I acakki piny Lubaŋa oketo polo ki lobo. Lobo onoŋo tye nono, onyobbe woko atata piny macol ocido wi kut matut, kun Cwiny pa Lubaŋa twago wi pii. Lubaŋa owacci, “Wek leŋo obed tye”; ci piny obedo leŋ. Lubaŋa oneno leŋo ni ber; Lubaŋa opoko kin leŋo ki colpiny. Lubaŋa olwoŋo leŋo ni Dyeceŋ, ki colpiny olwoŋo ni Dyewor. Piny oyuto dok piny oru, meno nino acel. Lubaŋa owacci, “Wek pete orine i kin pii, me poko kin pii ki pii wadi.” Ci Lubaŋa otiyo pete me poko pii ma tye piny i te pete ki pii ma tye malo i wi pete; ci otimme kit meno. Lubaŋa olwoŋo dan pete ni polo, Piny oyuto dok piny oru, meno nino me aryone. Lubaŋa owacci, “Wek pii ma tye i te polo ocokke, ogurre i kabedo acel, wek piny mutwo onen”; ci otimme kit meno. Lubaŋa olwoŋo piny mutwo ni Lobo, ki pii ma ocokke, ogurre kacel-li ni Nam; ci Lubaŋa oneno ni ber. Lubaŋa owacci, “Wek lum otwi i wi lobo, ki ginapita ma nyako nyiggi, ki yadi ma nyako nyiggi ma kodi tye i igi, macalo kit kwagi tye, i wi lobo”; ci otimme kit meno. Lum ocako twi i wi lobo, ki ginapita ma nyako nyiggi i kit kwagi acel acel, ki yadi ma nyako nyiggi ma kodi tye i igi, macalo kit kwagi tye. Ci Lubaŋa oneno ni ber. Piny oyuto dok piny oru, meno nino me adekke. Lubaŋa owacci, “Wek gin ma ryeny obed i kom pete me polo me poko dyeceŋ ki dyewor, ki me bedo ginanena ma nyuto kare ki nino ki mwaka, wek gubed gin ma ryeny i kom pete me polo ma menyo lobo”; ci otimme kit meno. Lubaŋa oketo gin madito aryo ma giryeny, wek ma ryeny madit-te aye olo dyeceŋ, ki ma ryeny matidine olo dyewor; dok oketo lwak lakalatwe bene. Lubaŋa oketogi i kom pete me polo me menyo lobo, me loyo dyeceŋ ki dyewor, ki me poko kin leŋo ki colpiny. Ci Lubaŋa oneno ni ber. Piny oyuto dok piny oru, meno nino me aŋwenne. Lubaŋa owacci, “Wek pii onywal gin makwo ma gicorre limuk, ki winyo bene gutuk lamalo i wi lobo i dan pete me polo.” Lubaŋa oketo nyaŋ madoŋo i nam, ki kwa gin makwo ducu ma gimol, ma gicorre limuk i pii, macalo kit kwagi tye, ki winyo ma gituk ki bwomgi, macalo kit kwagi tye. Ci Lubaŋa oneno ni ber. Lubaŋa omiyogi gum kun wacci, “Wunywal, wunya, wupoŋ pii ki nami, winyo bene gunya i wi lobo.” Piny oyuto dok piny oru, meno nino me abicce. Lubaŋa owacci, “Wek lobo onywal gin makwo i kit kwagi: lee ma paco, ki gin ma lak alaka, ki lee me tim macalo kit kwagi tye”; ci otimme kit meno. Lubaŋa oketo lee tim macalo kit kwagi tye, ki lee ma paco macalo kit kwagi tye, ki gin ma lak alaka piny i ŋom, macalo kit kwagi tye, Ci Lubaŋa oneno ni ber. Lubaŋa owacci, “Weku wacweyu dano ma gical ki wan; wek gin aye gulo rec ma i nam, ki winyo me polo, ki lee ma paco, ki wi lobo ducu, gulo bene gin ducu ma lak alaka wi lobo,” Lubaŋa ocweyo dano i Kit calle kikome; ocweyo laco ki dako. Lubaŋa omiyogi gum kun wacogi ni, “Wunywal, wunya, wupoŋ lobo, wulo bene; dok wulo wa rec ma i nam, ki winyo me polo, ki gin ducu makwo ma giwoto i wi lobo.” Lubaŋa owacci, “Nenu, amiyowu ginapita ducu ma nyako nyiggi ma tye i wi lobo ducu, ki yadi ducu ma nyako nyiggi fila kodi tye i igi; wubicamogi. Dok lee ducu me tim, ki winyo ducu me polo, ki gin ducu ma lak alaka wi lobo, ma gitye ki kwo, amiyo botgi ginapita ducu madyak me bedo camgi”; ci otimme kit meno. Lubaŋa oneno gin ma doŋ otiyo ducu, ci nen, tye mabeco twatwal. Piny oyuto dok piny oru, meno nino me abicelle. Polo ki lobo yam giketo otum kit meno, ki lwak mony ma tye iye ducu. I kom nino me abiro en aye Lubaŋa otyeko iye ticce ducu ma yam otiyo; en oywe i kom nino me abiro i kom ticce ducu ma yam otiyo. Ci Lubaŋa omiyo gum i kom nino me abiro, olonyo obedo maleŋ, pien i kom nino meno en aye Lubaŋa yam oywe iye i kom ticce ducu ma en obedo ka tiyo me keto lobo. Man aye acakki nya pa kwa gin ma i polo ki i lobo i kare ma giketogi kwede. I nino meno ma Rwot Lubaŋa otiyo iye polo ki lobo-ni, yat mo me tim onoŋo peya tye i wi lobo, onoŋo doo mo pud pe ma otwi wi lobo, onoŋo Rwot Lubaŋa peya omiyo kot ocwer i lobo, dok onoŋo peya tye dano mo ma puro lobo; ento lupu ocako duny malo, ci obido lobo ducu. Ci Rwot Lubaŋa ocweyo dano ki apwa me ŋom, okuto yamo me yweyo i ume, dano odoko gin makwo. Rwot Lubaŋa opito yadi i poto ma tye i Eden, tuŋ wokceŋ: en aye oketo iye dano ma en ocweyo-ni. Dok Rwot Lubaŋa omiyo yadi gutwi i ŋom, kwa yadi ducu mamwonya ma neno ber, ki mabeco me acama, dok oketo yat me kwo i dye poto bene, ki yat me ŋeyo gin maber ki marac. Kulu yam onoŋo mol a ki i Eden, ma kelo pii i poto, iye opokke ki kunnu, odoko kulu aŋwen. Nyiŋ kulu mukwoŋone Picon; en aye kulu ma mol rumo lobo Kavila ducu, ma a iye jabu. Jabu ma tye i lobo meno beco; odok yat ma gilwoŋo bedola ki got onik tye kunnu bene. Nyiŋ kulu me aryone Gikon, ma orumo lobo ducu me Kuc. Ki nyiŋ kulu me Taigric; mol dok tuŋ wokceŋ me Aciria. Ki kulu me aŋwenne Euprate. Rwot Lubaŋa otero dano, oketo i poto Eden wek opur, dok ogwok bene, ci Rwot Lubaŋa ociko dano ni, “Yadi ducu ma tye i poto, camgi macalo imito; ento yat me ŋeyo gin maber ki marac pe icam, pien i nino ma ibicamo iye, en aye ibito iye bene.” Ka doko Rwot Lubaŋa owaco ni, “Pe ber dano obed kene; abitimo lakony ma romme.” Ci Rwot Lubaŋa ocweyo lee tim ducu ki winyo ducu me polo, nia ki i ŋom, okelogi bot dano me neno kit ma ebicako ki nyiŋgi. Kit ma yam dano ocako ki nyiŋ gin makwo acel acel ducu, en aye obedo nyiŋgi. Dano ocako nyiŋ lee ma paco ducu, ki winyo me polo, ki lee tim ducu; ento lakony pa dano ma romme aye onoŋo pud pe onen. Rwot Lubaŋa omiyo nino madwoŋ omako waŋ dano; ka en tye ka nino, ci okwanyo cogo lakŋete acel, omwono waŋe woko ki riŋo, Ci cogo ma Rwot Lubaŋa okwanyoni ocweyo odoko dako, ka okelo bote. Dano owacci, “Man aye cogo mua i cogona kikome, ki riŋo bene mua i riŋona kikome; gibilwoŋo nyiŋe ni Dako, pien gikwanyo ki i kom Laco.” Mumiyo laco weko wonne ki minne, moko kom dakone likaŋ, gin aryo gidoko kom acel. I kare meno laco ki dakone onoŋo pud gibedo munero ma lewic pe makogi. Twol yam onoŋo ryek makato lee tim ducu ma Rwot Lubaŋa oketo. En owaco ki dako ni, “Lubaŋa mono owacci, ‘Pe wucam yat ducu ma tye i poto-ni’?” Dako otito ki twol ni, “Watwero camo nyig yadi ducu ma tye i poto-ni, ento Lubaŋa ociko ni, ‘Pe wubicamo nyig yat ma tye i dye poto, pe wugud kome bene, wek pe wuto.’ ” Ci twol owaco ki dako ni, “Pe wubito. Pien Lubaŋa ŋeyo ni, ka wucamo, ci wanwu biyabbe woko, ci wubidoko calo Lubaŋa, miyo wuŋeyo gin maber ki marac.” Ka dako oneno ni yat-te ber me acama, dok nen mwonya bene, dok yat meno ber, cwiny dano pyette i kome, pien miyo gidoko ryek, ci opwono nyige, ocamo; omiyo mogo bot cware, ci ocamo. Gin aryo ducu wangi oyabbe woko, gucako ŋeyo ni kara gitye munero, ka gukwoyo pot olam guruko i pyergi. Ka guwinyo Rwot Lubaŋa woto i poto i kare ma ceŋ okwe, ci dano ki dakone gukanne woko i nyim Rwot Lubaŋa i kin yadi ma tye i poto. Ci Rwot Lubaŋa olwoŋo dano kun wacce ni, “In mono it ye kwene, kaa?” En ogamo ni, “Awinyo ka iwoto i poto, ci lworo omaka, pien atye munero, akanne woko.” Dok openye aye ni, “Aŋa ma doŋ otitti ni it ye munero? Ityeko camo nyig yat ma onoŋo aciki ni pe icam-mi ce?” Dano ogamo ni, “Dako ma imiya ni obed kweda-ni aye omiya nyig yat meno, ci acamo.” Rwot Lubaŋa dok openyo dako ni, “Man kono itimo piŋo?” Dako ogamo ni, “Twol aye obwola, omiya acamo.” Rwot Lubaŋa owaco bot twol ni, “Pien in aye itimo man, giceno in makato lee ma paco ducu, ki makato lee tim ducu. Ibilak, iywane piny ki ii, dok ibicamo apwa i kare me kwoni ducu. Abiketo mone i kin in ki dako, ki i kin likwayi ki Likwaye; en bigoyo wii, in ibitoŋo opunye.” Ki bot dako owacce ni, “Abimeddi arem matek i kare me owacci, nyodo; ibinywalo litino ki arem, cwinyi bipyette i kom cwari dok en aye biloyi.” Ki bot Adam owacce ni, “Pien in aye iwinyo dog dakoni, ci icamo nyig yat ma aciki iye ni, ‘Pe icam’, giceno lo bo piri: ibicamone ki aroma i kare me kwoni ducu. Loboni biceko okuto ki ocok, ibicamo pot dek ma i tim. Ibicamo kwon ki kwok ma cwer ki i tur nyimi, nio ka ibidok i ŋom, kit ma con gikwanyi ki iye; in apwa, dok bene ibidok i apwa.” Dano ocako nyiŋ dakone ni Kawa, pien en aye megi jo ducu makwo. Rwot Lubaŋa oyubo laa aruka, ka omiyo Adam ki dakone guruko. Rwot Lubaŋa owacci, “Nen, dano doŋ odoko rom ki ŋat acel i kinwa, doŋ ŋeyo gin maber ki gin marac. Kombeddi pe dok wawek orye cine opwon nyig yat me kwo ocam doki, miyo doŋ bibedo makwo nakanaka.” Mumiyo Rwot Lubaŋa ocwale woko ki i poto Eden, wek odok opur gire ŋom ma yam gikwanye ki iye-ni. Oryemo dano woko, ci oketo lukerubi yo tuŋ wokceŋ me poto Eden, ki pala lucwan ma lyel mac, ma wirre tuŋŋi ki tuŋŋi, me gwoko yo ma cito i kom yat me kwo. Adam oŋeyo dakone Kawa, ci dakone ogamo ic, onywalo Kain, “Doŋ atyeko noŋo latin laco ma Rwot okonya kwede.” Ka dok onywalo ominne Abel. Abel obedo lakwat romi, Kain obedo lapur poto. Ka kare mo okato, Kain okelo cam ma oceko i potone, otyero bot Rwot. Abel okelo mere litino kayo romi ki dwologi. Ci Rwot ojolo Abel ki motte, ento pe ojolo Kain ki motte; omiyo Kain okeco, waŋe oballe. Rwot owaco bot Kain ni, “Ikeco piŋo? Waŋi oballe piŋo? Ka itimo maber pe giye? Ka pe itimo maber, ci bal buto i doggola macalo ŋuu ma cwinye pyette i komi; ento myero iloye.” Kain owaco bot ominne Abel ni, “Wacit i poto.” Ka gitye i poto, Kain ocako lweny kom ominne Abel, ci oneko woko. Ci Lubaŋa owaco bot Kain ni, “Omeru Abel tye kwene?” En ogamo ni, “Pe aŋeyo; an aye lagwok omera bo?” Rwot owacce ni, “Man doŋ itimo piŋo? Nen, remo pa omeru tye ka koko i nyima, winnye a ki i nom. Koni doŋ giceni woko ki i lobo, ma oŋamo doge me mato remo pa omeru ma ioyo-ni, Ka ipuro poto, pe bicekki cam ki tekke ducu; ibibedo lamal-gaŋ kun imal ata i lobo.” Kain owaco bot Rwot ni, “Twon can ma imiya-ni obwoyo koma woko do. Nen, doŋ iryema woko tin ki i poto, abikanne woko ki i waŋi; abibedo lamal-gaŋ kun amal ata i lobo, jo ducu ma binoŋa, bi neka woko.” Rwot owacce ni, “Pe kumeno! Ka ŋatti mo bineko Kain, gibiculo kwor i kome tyen abiro kulu.” Rwot oketo lanyut mo i kom Kain, wek jo ma binoŋe pe guneke. Kain ocako a woko ki i nyim Rwot, ocito obedo i lobo Nod, tuŋ wokceŋ me Eden. Kain onene ki dakone, ci dakone ogamo ic, onywalo Enoka. Ocako gero gaŋ madit, ocako nyiŋ gaŋ meno macalo nyiŋ wode, ni Enoka. Enoka onywalo Irad, Irad onywalo Mekujael, Mekujael onywalo Metucael, Metucael onywalo Lamek. Lamek onyomo mon aryo; nyiŋ dako acel Ada, ki nyiŋ mukene Jilla. Ada onywalo Jabal; en aye nene won jo ma gibedo i kema, ki wegi lim makwo. Nyiŋ ominne Jubal, en aye nene won jo ma gigoyo opuk ki lukut nyamulere. Jilla onywalo Tubalkain; en aye nene latet kit kwa jami tic ducu me mola ki nyonyo. Lamin Tubal-kain nyiŋe Naama. Lamek owaco bot monne ni, “Ada ki Jilla, wuwiny; wun mon pa Lamek, wuwiny lok ma awacciwu: Atyeko neko dano ma omiya ret, aneko awobi mo ma ogoya-ni. Ka Kain gibiculo kwor i kome tyen abiro, Lamek gibiculo kwor i kome tyen pyerabiro wiye abiro kulu.” Adam dok oŋene ki dakone, ci dakone onywalo latin laco, ocako nyiŋe Ceji, pien owacci, “Lubaŋa dok omiya latin mukene muleyo ka Abel, ma yam Kain oneko-ni.” Ceji bene onywalo latin awobi, ocako nyiŋe Enoci. I kare meno en aye dano gucako lwoŋo iye nyiŋ Rwot. Man aye buk me tekwaro pa Adam. I kare ma Lubaŋa oketo dano, ocweyo i kit calle kikome. Yam oketo laco ki dako, omiyogi gum, ocako nyiŋgi ni Dano i nino ma con oketogi iye-ni. Ka Adam doŋ otyeko ri mwaka miya acel ki pyeradek, en onywalo awobi ma calo en kikome, ci ocako nyiŋe Ceji. Mwaka pa Adam ma onoŋo doŋ otyeko nywalo Ceji romo miya aboro, dok omedde ki nywalo awobe ki anyira bene. Kit meno nino me kwo pa Adam ducu oromo mwaka miya aboŋwen ki pyeradek; ka doŋ oto. Ka Ceji doŋ otyeko ri mwaka miya acel ki abic, ci onywalo Enoci. Ceji ori i ŋe nywalo Enoci mwaka miya aboro ki abiro, dok omedde ki nywalo awobe ki anyira bene. Kit meno nino me kwo pa Ceji ducu oromo mwaka miya aboŋwen ki apar wiye aryo; ka doŋ oto. Ka Enoci doŋ otyeko ri mwaka pyeraboŋwen, ci onywalo Kenan. Enoci ori i ŋe nywalo Kenan mwaka miya aboro ki apar wiye abic, dok omedde ki nywalo awobe ki anyira bene. Kit meno nino me kwo pa Enoci ducu oromo mwaka miya aboŋwen ki abic; ka doŋ oto. Ka Kenan doŋ otyeko ri mwaka pyerabiro, ci onywalo Maalalel. Kenan ori i ŋe nywalo Maalalel mwaka miya aboro ki pyeraŋwen, dok omedde ki nywalo awobe ki anyira bene. Kit meno nino me kwo pa Kenan ducu oromo mwaka miya aboŋwen ki apar; ka doŋ oto. Ka Maalalel doŋ otyeko ri mwaka pyerabicel wiye abic, ci onywalo Jared. Maalalel ori i ŋe nywalo Jared mwaka miya aboro ki pyeradek, dok omedde ki nywalo awobe ki anyira bene. Kit meno nino me kwo pa Maalalel ducu oromo mwaka miya aboro ki pyeraboŋwen wiye abic; ka doŋ oto. Ka Jared doŋ otyeko ri mwaka miya acel ki pyerabicel wiye aryo, ci onywalo Enoka. Jared ori i ŋe nywalo Enoka mwaka miya aboro, dok omedde ki nywalo awobe ki anyira bene. Kit meno nino me kwo pa Jared ducu oromo mwaka miya aboŋwen ki pyerabicel wiye aryo; ka doŋ oto. Ka Enoka doŋ otyeko ri mwaka pyerabicel wiye abic, ci onywalo Metucela. Enoka obedo ka wot kacel ki Lubaŋa i ŋe nywalo Metucela mwaka miya adek, dok omedde ki nywalo awobe ki anyira bene. Kit meno nino me kwo pa Enoka ducu oromo mwaka miya adek ki pyerabicel wiye abic. Enoka obedo ka wot kacel ki Lubaŋa; ci orwenyo woko matwal, pien Lubaŋa otere woko. Ka Metucela doŋ otyeko ri mwaka miya acel ki pyeraboro wiye abiro, ci onywalo Lamek. Metucela ori i ŋe nywalo Lamek mwaka miya abiro ki pyeraboro wiye aryo, dok omedde ki nywalo awobe ki anyira bene. Kit meno nino me kwo pa Metucela ducu oromo mwaka miya aboŋwen ki pyerabicel wiye aboŋwen; ka doŋ oto. Ka Lamek doŋ ori mwaka miya acel ki pyeraboro wiye aryo, ci onywalo wode, ma ocako nyiŋe Nua, kun wacci, “I lobo ma yam Rwot oceno-ni, latin man aye bimiyo waywe ki aroma tic me ciŋwa.” Lamek ori i ŋe nywalo awobe mukene ki anyira bene. Kit meno nino me kwo pa Lamek ducu oromo mwaka miya abiro ki pyerabiro wiye abiro; ka doŋ oto. Nua ka otyeko mwaka me ditte, miya abic, ci onywalo Cem, Kam ki Yafeci. Ka dano gucako medde wi lobo, ci gunywalo anyira. Ka awobe pa Lubaŋa guneno anyira pa dano beco, gucako yero me anyoma ki i kingi. Ci Rwot owacci, “Cwinya pe doŋ bibedo i dano matwal, pien en kom mamwa, ento kare me kwone bibedo mwaka miya acel ki pyeraryo.” Jo Nepil onoŋo gitye i lobo i kare meno, ki lacen bene, i kare ma awobe pa Lubaŋa guyabo wi anyira pa dano, gunywalo kwedgi litino. Gin aye cog jo matego mukwoŋo i lobo, ma nyiŋgi ŋene matek. Rwot oneno ni bal pa dano odoko dit woko i wi lobo, dok tam ducu ma cwinygi lwodo kare ducu kemo bal keken. Rwot oŋut pi cweyo dano i lobo, ocwero cwinye matek. Rwot owacci, “Abijwero dano woko ma yam aketo-ni ki wi lobo, dano ki lee ki gin ma lak alaka ki winyo me polo, pien doŋ atyeko ŋut pi cweyogi.” Ento Nua aye onoŋo yomo cwiny Rwot. Man aye tekwaro pa Nua, Nua yam obedo dano ma kite atir, ma pe ki bal mo i kin yalwakke; Nua obedo ka wot kacel ki Lubaŋa, Nua onoŋo tye ki awobene adek, Cem, Kam ki Yafeci. Lobo oballe woko ki i nyim Lubaŋa, onoŋo doŋ opoŋ ki bwami. Ka Lubaŋa oneno lobo, oneno oballe woko, pien dano ducu gutyeko balle woko i kit bedogi i wi lobo. Ci Lubaŋa owaco ki Nua ni, “Agik pa dano ducu doŋ obino i nyima, pien gupoŋo lobo woko ki bwami; nen, abityekogi woko, kacel ki lobo bene. Pa yeya meri ki yat gofer; ci ipok kicika i yeya, ka imwon iye ki ŋeye ki odok.abic Ibitiyone kit man: yeya borre biromo yadi miya acel ki pyerabic,wiye abic, borre tuŋ malo yadi abic. Tuc waŋ dirica i yeya, kun iweko danne malo doŋ futi acel ki nucu; ka iket doggola i but yeya, ci ipok iye obed kabedo adek, ma pinnye, me aryone ki me adekke ma malone. Pien nen, abicoro nii aluka madwoŋ i wi lobo, wek otyek kom gin ducu ma tye ki kwo, i te polo, wek gin ducu ma gitye i wi lobo oto woko. Ento in aye abimoko gicikkena kwedi; ibidonyo i yeya, in kacel ki ‘litinoni, ki dakoni, ki mon pa awobeni ducu. Kwany gin makwo ducu ma gitye ki kom ki aryo aryo ki i kit kwagi acel acel, ci ipikgi i yeya, wek gubed kwo kacel ki in; gubed co ki mon. Winyo macalo kit kwagi tye, lee macalo kit kwagi tye, gin ma lak alaka i ŋom macalo kit kwagi tye, gin bibino boti ki aryo aryo ki i kit kwagi acel acel wek gubed kwo. Dok iter kit kwa cam ducu ma gicamo, ci ikangi; wek gubed me acamagi bene. Nua otimo kumeno; ocobo ducu macalo Lubaŋa ocike. Rwot owaco bot Nua ni, “Dony i yeya, in kacel ki jo ma i odi ducu, pien atyeko neno ni in aye kiti atir i nyima ki i kin yalwak me kare man. Ter lee ma gicamo abiro abiro, twonne ki minne, ki lee ma gikwero aryo aryo, twonne ki minne; ki winyo me polo bene abiro abiro, ma co ki ma mon, wek kit kwagi obed makwo wi lobo ducu. Pien odoŋ nino abiro, ka doŋ abimiyo kot cwer i lobo nino pyeraŋwen dyeceŋ ki dyewor benebene, ci gin ducu makwo ma yam aketo-ni, abijwerogi woko ki i wi lobo.” Nua ocobo kit ma Rwot ocike kwede ducu. Nua onoŋo doŋ tye ki mwaka me ditte miya abicel i kare ma pii aluka ocorre i wi lobo. Ci Nua ki dakone ki awo bene ki mongi gudonyo i yeya pi riŋo pii aluka. Lee ducu ma gicamo ki ma gikwero, ki winyo-gu, ki gin ma lak alaka i ŋom, gudonyo i yeya bot Nua aryo aryo, laco ki dako. I ŋe nino abiro pii aluka opoŋ, obyennye i wi lobo. I mwaka me miya abicel me dit pa Nua, i dwe me aryo, i nino dwe me apar wiye abirone, i nino meno aye waŋ it ducu me kut matut gumwoc woko ki pii, ki polo bene oyabbe. Ci kot ocorre i wi lobo nino pyeraŋwen dyeceŋ ki dyewor benebene. I kom nino meno kikome, Nua ki awobene Cem, Kam ki Yafeci, ki dakone en Nua, ki mon wote adek kacel kwedgi, gudonyo i yeya, gin ki lee tim ducu macalo kit kwagi tye, ki lee ma paco ducu macalo kit kwagi tye, ki gin ducu ma lak alaka wi lobo macalo kit kwagi tye, ki winyo ducu macalo kit kwagi tye, winyo ducu ki kitgi ducu mapatpat. Gin ducu ma gitye ki kwo gudonyo i yeya bot Nua ki aryo aryo. Gin ma gudonyo iye me kit kom ducu mapatpat, ma co ki ma mon, gudonyo iye kit ma con Lubaŋa ociko ki Nua; ci Rwot oloro wigi woko, Pii aluka ori wi lobo pi nino pyeraŋwen kulu; pii opoŋ, omedde ameda nio ka otiŋo yeya, otero yeya malo twatwal nia ki wi lobo. Pii opoŋ, omedde, ocegge woko wi lobo; yeya obedo ka kwaŋ i wi pii malo, Pii ocegge woko wi lobo ki tekke, nio ka oumo wi godi maboco ma tye i te polo ducu. Pii omedde, omwonyo wi godi woko futi pyeraryo kulu, Gin makwo ducu ma yam giwoto i wi lobo guto woko; winyo, lee ma paco, ki lee tim, gin ducu ma nya, ma gicorre limuk i wi lobo, kacel ki dano, ducu guto woko. Gin ducu ma yam gitye ki yweyo me kwo i umgi, ma i wi tura, guto woko. Lubaŋa ojwero gin ducu makwo ma yam gitye wi lobo, dano ki lee ki gin ma lak alaka, ki winyo me polo; ojwerogi woko nia ki i lobo. Nua keken aye odoŋ, ki jo ma yam gitye kwede i yeya-ni. Ci pii ocegge wi lobo nino miya acel ki pyerabic kulu. Lubaŋa opo kom Nua ki lee tim ducu, ki lee ma paco ducu ma yam tye kacel kwede i yeya. Lubaŋa omiyo yamo okodo wi lobo, ci pii ocako dwon. Waŋ it me kut matut oculle woko, ki polo bene ocegge woko, ki kot ma corre a ki i polo bene ocok woko, pii omedde ki dwon woko i wi lobo jwijwi. Ka nino okato miya acel ki pyerabic, pii onoŋo odwon woko. I dwe me abiro, i nino dwe apar wiye abirone, yeya ogem i wi got Ararat. Pii omedde ki dwon woko nio kwede i dwe me apar; i dwe me apar, i nino dwe acel, wi godi maboco gucako nen. Ka nino pyeraŋwen okato, Nua oyabo waŋ dirica ma yam otuco i yeya-ni, ocwalo agak woko; ci obedo ka tuk, kun wirre kwede tuŋŋi ki tuŋŋi, nio ka piny otwo woko. Dok ocwalo amam woko nia ki bote, wek enen ka pii doŋ otyeko dwon woko ki i lobo ada. Ento amam pe omedo ki noŋo ka ma opye iye ki tyene, ci odok bote cen i yeya, pien onoŋo pii pud omwonyo wi lobo woko ducu. Ci Nua oryeyo bade, omake, odwoke i yeya bote. Dok okuro pi nino abiro mukene, ka dok ocwalo amam woko nia ki i yeya. Amam dok odok bote i yeya ma onoŋo piny doŋ oyuto; nen, en otino pot yat jeituni ma opwono madyak i doge. Kit meno Nua oniaŋ ni pii doŋ otyeko dwon woko ki i wi lobo. Dok omedde ki kuro pi nino abiro mukene, dok ocwalo amam woko; ci doŋ pe odok bote matwal. I mwaka me miya abicel ki acel me dit pa Nua, i dwe mukwoŋo, i nino dwe acel, en aye pii otwo iye woko liweŋ wi lobo. Nua ocako puto wi yeya woko, ci oneno wi lobo otwo woko. I dwe me aryo, i nino dwe pyeraryo wiye abiro, onoŋo lobo doŋ otwo woko. Lubaŋa owaco bot Nua ni, “Doŋ ikat woko ki i yeya, in ki dakoni, ki awobeni ki mongi kacel kwedi. Kel woko gin makwo ducu ma gitye kwedi, wa kit kom ducu, winyo ki lee ki gin ducu ma lak alaka wi lobo, wek gucorre i wi lobo, kun ginywal, ginya i wi lobo.” Kit meno Nua okato woko, ki awobene ki dakone, ki mon pa awobene kacel kwede. Ki lee ducu ki gin ducu ma lak alaka, ki winyo ducu, gin ducu ma giwoto wi lobo, gucako mol, gukato woko ki i yeya, ma oporo kit kwagi ducu. Nua ocano keno tyer pi Rwot, ci oyero lee ma gicamo ki i kit kwagi acel acel, ki winyo ma gicamo ki i kit kwagi acel acel, otyero gitum awaŋa i wi keno tyer. Ka Rwot oŋweyo gin ma ŋwece kur ma yomo cwiny, Rwot oloko i cwinye kekene ni, “An pe dok abiceno lobo pi dano, kadi bed tam ducu ma i cwinye kemo bal keken nia wa i tinone; pe doŋ abineko gin makwo ducu kit ma yam atimo. Ka lobo pud tye, ci kare me coc ki kac, wa koyo ki lyeto, ki oro ki cwir, dyeceŋ ki dyewor, pe bigik matwal.” Lubaŋa omiyo gum i kom Nua ki litino awo bene kun waco ni, “Wunywal, wunya, wek wupoŋ lobo. Lee tim ducu bilworowu ki myelkom, wa winyo bene ducu me polo, ki gin ma lak alaka i ŋom, ki rec ducu ma i nam bene; gityeko miyogi ducu i ciŋwu, Gin ducu ma woto, ma kwo, gibibedo cam mewu; kit ma yam amiyowu pot dek-ki, doŋ amiyowu jami ducu. Ento pe wubicamo riŋo kacel ki kwone, ma en aye remone. Atikane abipido pi remo kwowu; abipido pire bot lee ducu, wa ki bot dano bene; ki tuŋ bot dano acel acel abipido pi kwo pa ominne. Ka ŋatti mo ooyo remo pa dano mo, ci dano meno gibioyo remone bene; pien Lubaŋa ocweyo dano i calle kikome. Wun wunywal, wunya wumedde madwoŋ i wi lobo, wunya iye.” Lubaŋa dok owaco bot Nua ki awobene ma onoŋo gitye kacel kwede ni, “Nen, amoko gicikkena kwedwu ki likwayowu ma bilubowu, ki gin makwo ducu ma gitye kwedwu, winyo ki lee ma paco ki lee tim ducu ma gitye kacel kwedwu, gin ducu ma gukato woko ki i yeya. Amoko gicikkena kwedwu ni, pii aluka pe dok bineko gin makwo, dok pe bibedo aluka ma bityeko lobo.” Lubaŋa dok owacci, “Man aye lanyut me gicikke ma aketo i kin an ki wun ki gin makwo ducu ma gitye kwedwu, ma bibedo matwal i yalwak ducu. Aketo danyu mera i pol, ma bibedo lanyut me gicikkena i kin an ki lobo. Ka amiyo pol oyuŋŋe i wi lobo, ci danyu binen i pol, abipo gicikke ma tye i kin an kwedwu ki gin makwo ducu ma gitye ki kom; dok pii bene pe dok bidoko aluka ma romo tyeko gin makwo ducu. Ka danyu tye i pol, ci abineno, ci abipo gicikkena ma bedo matwal i kin Lubaŋa ki gin makwo ducu ma gitye ki kom i wi lobo.” Lubaŋa owaco bot Nua ni, “Man doŋ lanyut me gicikkena ma doŋ amoko i kin an ki gin makwo ducu ma tye i wi lobo.” Awobe pa Nua ma yam gukatti woko ki i yeya-ni gin Cem, Kam ki Yafeci. Kam en aye won Kanaan. Litino awobe pa Nua adek-ki aye lwak ducu ma i wi lobo gua i komgi. Nua aye yam obedo lapur mukwo-ŋo. Ci opito olok i potone, omato koŋo vinone, ci omer woko, obuto i kemane ma pe oumo kome. Ci Kam, won Kanaan, ka oneno wonne pe oumo kome, otito ki omegine aryo ma gitye woko-ni. Ci Cem ki Yafeci gutiŋo boŋo i wi gwokgi gin aryo, ka gucako wot kun gijer ki yo ŋegi, ci guumo ki kom wongi ma onoŋo tye nono, kun wangi neno cen, ci pe guneno kom wongi ma tye nono-ni. Ka Nua oco ki i waŋ mero koŋo vinone, ci oŋeyo gin ma wode matidine otiyo i kome, ci owacci, “Gicen Kanaan; en bibedo opii i kin lwak opii pa omege.” Dok owaco bene ni. “Gipwo Rwot Lubaŋa pa Cem; wek Kanaan obed opiine. Lubaŋa oyab lobo pa Yafeci obed malac, wek en obed i kema pa Cem; ka dok Kanaan obed opiine bene.” Nua ori mwaka miya adek ki pyerabic nia i kare ma pii aluka ocorre i wi lobo. Kare me kwo pa Nua ducu oromo mwaka miya aboŋwen ki pyerabic; ka doŋ oto. Man aye tekwaro pa litino awobe pa Nua, Cem, Kam ki Yafeci. Gunywalo litino awobe i ŋe kare ma pii aluka ocorre i wi lobo. Litino awobe pa Yafeci aye Gomer, Magog, Madai, Javan, Tubal, Mecek ki Tirac. Litino awobe pa Gomer aye Acikenaj, Ripat ki Togarma. Litino awobe pa Javan aye Elica, Tarcic, Kitim ki Dodanim. Jo ma i dog nam guket ki i kom jo meno. Magi aye litino awobe pa Yafeci ki lobogi, kun ŋat acel acel loko leb tugi, macalo kakagi ki rokgi tye kwede. Magi aye litino awobe pa Kam: Kuc, Ejipt, Put ki Kanaan. Litino awobe pa Kuc aye Seba, Kavila, Cabta, Raama ki Cabteka. Litino awobe pa Raama aye Ceba ki Dedan. Kuc onywalo mere Nimulodi; en aye dano ma okwoŋo bedo oteka i wi lobo. En obedo ladwar oken i nyim ‘Rwot; mumiyo giwacci, “Calo Nimulodi ma ladwar oken i nyim Rwot-ti.” Acakki kerre onoŋo Babel, Erek, Akkad ki Kalne; gin ducu gibedo i lobo Cinar. Nia i lobo meno kerre omedde, ocito oo wa i Aciria, ci ogero iye Nineve, Rekobot-Ir, Kala, ki Recen ma i kin Nineve ki Kala; meno aye gaŋ madit. Ejipt onywalo jo Lud, jo Anam, jo Leab, jo Naptuk, jo Patruc ki jo Kaptor, ma en aye kaka ma jo Piliciti gua ki i komgi. Kanaan onywalo Cidon latin kayone, ki Ket, jo Jebuc, jo Amor, jo Girgac, jo Kiv, jo Arki, jo Cin, jo Arvad, jo Jemar ki jo Kamat. Lacen kaka pa jo Kanaan gucako ket woko ata. Waŋ lobo pa jo Kanaan ocakke ki i Cidon odok kwede i yo tuŋ Gerar, nio kwede wa Gaja; ka odok yo tuŋ Codom ki Gomora ki Adma ki Jeboim, nio kwede wa Laca. Magi aye litino awobe pa Kam, macalo kakagi, ki lebgi, ki lobogi, ki rokgi tye kwede. Cem, omin Yafeci maditte, en aye kwaro litino pa Eber ducu, en bene onywalo litino. Litino awobe pa Cem aye Elam, Acur, Arpakcad, Lud ki Aram, Litino awobe pa Aram gin aye Uj, Kul, Geter ki Mac. Arpakcad onywalo Cela, Cela onywalo Eber. Eber onywalo litino awobe aryo; nyiŋ ŋat acel onoŋo Peleg, pien i kare mere aye gipoko iye lobo, ki nyiŋ ominne onoŋo Yokotan. Yokotan onywalo Almodad, Celep, Kajarmavet, Jera, Adoram, Ujal, Dikla Obal, Abimael, Ceba, Opir, Kavila ki Jobab; magi gin ducu litino awobe pa Yokotan. Lobo ma gubedo iye wane ocakke ki i Meca, odok kwede yo tuŋ Cepar nio kwede wa lobo godi ma tuŋ wokceŋ. Magi aye litino awobe pa Cem, macalo kakagi, lebgi, lobogi, ki rokgi tye kwede. Man aye kaka pa litino awobe pa Nua, kit ma tekwarogi tye kwede, i rokgi; rok ocako ket nia ki i komgi oromo lobo, cakke i ŋe kare ma pii aluka ocorre i wi lobo. Lobo ducu yam onoŋo tye ki leb acel, ki lok bene onoŋo lam. Ka dano gucako dak nia ki tuŋ wokceŋ, gunoŋo lobo mubedo bar i lobo Cinar, ci gubedo iye kunnu. Ka gucako lok kekengi ni, “Wubin, wek watimu matafali, wawangi woko matek.” Ci gutiyo ki matafali ma ka got, ki odok macol lamwon kingi. Dok guwaco ni, “Wubin, wek wageru gaŋwa, ki ot ma wiye ocudo malo ogudo polo, wek wamiyu nyiŋwa oyweki, wek pe waket woko ata i wi lobo ducu.” Ka Rwot olor piny ka neno gaŋ ki ot ma wiye ocudo malo ma litino pa dano gugero, Rwot owacci, “Nen, guribbe rok acel, ki lebgi bene acel; man aye pud acakki gin ma gibitiyo, dok gin ma gibitamo pi tiyone pe doŋ biloyogi. Wubin waloru piny, warub legbi woko, wek ŋat acel acel pe oniaŋ leb pa wadi.” Kit meno Rwot okeyogi woko nia ki kunnu, guromo lobo ducu, ci guweko gero gaŋ meno. Mumiyo nyiŋe gucako ni Babel, pien kenyo aye Rwot orubo iye leb ducu ma i lobo, dok Rwot okeyogi woko nia ki kunnu, guromo lobo ducu. Man aye likwayo pa Cem. Ka Cem doŋ tye ki mwaka me ditte miya acel, ci onywalo Arpakcad munoŋo doŋ pii aluka okato mwaka aryo. Cem ori i ŋe nywalo Arpakcad mwaka miya abic, dok omedde ki nywalo awobe ki anyira bene. Ka Arpakcad doŋ otyeko ri mwaka pyeradek wiye abic, ci onywalo Cela. Arpakcad ori mwaka miya aŋwen ki adek ma doŋ otyeko nywalo Cela, dok omedde ki nywalo awobe ki anyira bene. Ka Cela doŋ otyeko ri mwaka pyeradek, ci onywalo Eber. Cela ori mwaka miya aŋwen ki adek ma doŋ otyeko nywalo Eber, dok omedde ki nywalo awobe ki anyira bene. Ka Eber doŋ otyeko ri mwaka pyeradek wiye aŋwen, ci onywalo Peleg. Eber ori mwaka miya aŋwen ki pyeradek ma doŋ otyeko nywalo Peleg, dok omedde ki nywalo awobe ki anyira bene. Ka Peleg doŋ otyeko ri mwaka pyeradek, ci onywalo Reu. Peleg ori mwaka miya aryo ki aboŋwen ma doŋ otyeko nywalo Reu, dok omedde ki nywalo awobe ki anyira bene. Ka Reu doŋ otyeko ri mwaka pyeradek wiye aryo, ci onywalo Cerug. Reu ori mwaka miya aryo ki abiro ma doŋ otyeko nywalo Cerug, dok omedde ki nywalo awobe ki anyira bene. Ka Cerug doŋ otyeko ri mwaka pyeradek, ci onywalo Nakor. Cerug ori mwaka miya aryo ma doŋ otyeko nywalo Nakor, dok omedde ki nywalo awobe ki anyira bene. Ka Nakor doŋ otyeko ri mwaka pyeraryo wiye aboŋwen, ci onywalo Tera. Nakor ori mwaka miya acel ki apar wiye aboŋwen ma doŋ otyeko nywalo Tera, dok omedde ki nywalo awobe ki anyira bene. Ka Tera doŋ otyeko ri mwaka pyerabiro, ci onywalo Abram, Nakor ki Karan. Man aye likwayo pa Tera. Tera onywalo Abram, Nakor ki Karan; Karan onywalo Lot. Karan okwoŋo to ki wonne Tera i lobo ma yam ginywale iye, i gaŋ me Ur pa jo Kaldaya. Ci Abram ki Nakor gunyomo mon; dako pa Abram nyiŋe Carai, dako pa Nakor nyiŋe Mirika, en aye nya pa Karan won Mirika ki Icika. Onoŋo Carai lalur, pe tye ki latin mo. Tera otero wode Abram, ki Lot wod pa Karan, ma lakware, ki Carai ci-wode, dako pa Abram, ci gudak woko ki i Ur, gaŋ pa jo Kaldaya, gucito kacel kun gikemo lobo Kanaan; ento ka guo i Karan, koŋ gudikke kenyo. Nino me kwo pa Tera oromo mwaka miya aryo ki abic; ka Tera oto i Karan. Rwot owaco bot Abram ni, “A woko ki i lobo tuwu, ki i kakawu, ki i paco pa woru, ci icit i lobo ma abinyutti. Abimiyi idoko rok madit, abimiyi gum bene, abimiyo nyiŋi bedo dit, pien ibibedo lakelgum. Abimiyo gum i kom jo ma leggi gum, abiceno ŋat mo ma biceni; dok piri en aye kaka ducu ma wi lobo bilimo iye gumgi.” Kit meno Abram ocako wot, macalo Rwot ocike; ki Lot bene owoto kacel kwede. Abram onoŋo doŋ tye ki mwaka me ditte pyerabiro wiye abic i kare ma en a kwede ki i Karan. Abram ocito ki dakone Carai, ki Lot latin pa ominne, ki lwak limgi ducu ma gucoko kacel, ki lwak jo ducu ma gucokke botgi ki i Karan; gutiŋo wot me cito i lobo Kanaan, Ka doŋ gutyeko o i lobo Kanaan, Abram obaro dye lobo obino i kabedo ma i Cekem, nio wa i te yat kworo me More. I kare meno onoŋo jo Kanaan aye gitye i lobo meno. Ci Rwot dok onen bot Abram kun wacce ni, “Abimiyo lobo man bot likwayi.” Ocano keno tyer kunnu pi Rwot ma onen bote-ni, Ka dok odak woko ki kunnu, okobo i te got ma tye yo tuŋ wokceŋ me Betel, oguro iye kemane, kun weko Betel yo tuŋ potoceŋ, ki Ai yo tuŋ wokceŋ; dok ocano keno tyer pi Rwot kunnu, ci olwoŋo iye nyiŋ Rwot. Abram dok okobo, omedde ki wotte yo tuŋ Negeb. Kec onoŋo opoto i lobo, omiyo Abram owoto piny i Ejipt, wek koŋ ebed kunnu, pien kec onoŋo doŋ lyet twatwal i lobo. I kare ma cok donyo i Ejipt, owaco bot dakone Carai ni, “Aŋeyo ni in i dako ma nen mwonya; ka Luejipt gibineni, ci gibiwacci, ‘Man dakone’; ci gibineka woko, ento gibiweki makwo. Wac ni, in lamera, ci gibibedo kweda maber piri, miyo abikwo piri.” Ka Abram otyeko donyo i Ejipt, ci Luejipt guneno dako meno mwonya matek twatwal, Ka ludito ma i kal pa Parao guneno, ci guboro pire bote, gutero dako wa i ot pa Parao. Ci omiyo Parao obedo maber ki Abram pi Carai: gikolle lim, romi, ki twoni; twoni kana, lwak opii ki aŋeca-gu, megi kana-gu, ki lwak kinaga-gu, Ento Rwot ocwalo cog two gemo mogo madoŋo i kom Parao ki jo ma i ode, pi Carai dako pa Abram. Omiyo Parao olwoŋo Abram bote, ci openye ni, “Itima kuman piŋo? Piŋo nene pe ititta atir ni en dakoni? Piŋo dok iwaco ni, ‘En lamera,’ omiya akwanyo, odoko dakona? Nen doŋ, dakoni ennu. Kwany icit kwede giri.” Parao ociko jone pire, ci gulwoke iyo, kacel ki dakone, ki lwak jami ducu ma yam tye bote. Kit meno Abram odwogo woko ki i Ejipt, en ki dakone, ki lwak jami ducu ma yam tye bote, kacel ki Lot, ci gutiro i Negeb. I kare meno onoŋo Abram odoko lalonyo dyaŋ mada, ki lim me ryal, ki jabu-gu. Okobo, omedde ki wotte nia ki i Negeb, odak wa Betel, ka ma yam koŋ okwono guro iye kemane, ma tye i kin Betel ki Ai, i kabedo ma yam okwoŋo caŋo iye keno tyer; ki kunnu aye dok Abram olwoŋo iye nyiŋ Rwot. Ki Lot ma yam onywako wot ki Abram, ceŋ tye ki romi ki dyani-gu ki kema bene. Lobo onoŋo doŋ pe romo ka kwat pi gin aryo ducu; pien onoŋo gin ducu ciŋgi ki lim madwoŋ, ma pe romogi bedo kacel. Onoŋo mone doŋ tye i kin lukwa lim pa Abram ki lukwa lim pa Lot. I kare meno onoŋo jo Kanaan ki jo Periji aye gibedo i lobo meno. Abram ocako waco ki Lot ni, “Pe wawek mone obed i kin in ki an, ki i kin lukwa limmi ki lukwa limma, pien wan ot acel. Lobo man ducu pe ineno i nyimi ene? Ber ipokke giri woko keni ki i koma. Ka ibidok tuŋ acam, ci an abidok gira tuŋ acuc: ce ka in idok tun acuc, ci an abidok gira tuŋ acam.” Ci Lot ocako tiŋo waŋe malo, ka oneno nota Jordan ducu ma iye ki pii macalo poto pa Rwot, rom ki lobo Ejipt mudok yo tuŋ Joar; man yam otimme i kare ma Rwot peya ojwero Codom ki Gomora. Pienno Lot oyero gire pire kene lobo ducu ma yam tye i nota Jordan, ci Lot ocako dak yo tuŋ wokceŋ: kit meno gupokke woko kekengi. Abram obedo mere i lobo Kanaan, kun Lot kono bedo mere i kin gaŋi ma gitye i nota, ocako dak ki kemane nio wa Codom. Jo ma i Codom onoŋo jo maraco, balgi dwoŋ twatwal i nyim Rwot. Rwot oloko ki Abram ma doŋ onoŋo gutyeko pokke woko ki Lot ni, “Tiŋ waŋi malo, nen piny nia ki i kabedo ma it ye iye-ni, nen tuŋ acam ki tuŋ acuc, ki tuŋ wokceŋ ki tuŋ potoceŋ; pien lobo meno ducu ma ineno-ni abimiyone boti ki bot likwayi matwal. Abimiyo likwayi bedo pol ma rom ki apwa me ŋom; mumiyo ka ŋatti mo twero kwano wel apwa me ŋom, ci likwayi welgi bikwanne. Doŋ ia malo, iwot i dye lobo-ni, wek inen borre ki lacce, pien abimiyo boti.” Kit meno Abram okobo kemane, odak, obedo i te kworo me Mamre, ma tye i Kebron; dok ocano keno tyer pi Rwot kunnu. I kare pa Amrapel kabaka me Cinar, ki Ariok kabaka me Ellacar, ki Kedor-laomer kabaka me Elam, ki Tidal kabaka me Goyim, luker meno guribbe ka lweny i kom Bera kabaka me Codom, ki Birca kabaka me Gomora, ki Cinab kabaka me Adma, ki Cemeber kabaka me Jeboim, ki kabaka me Bela, en aye Joar. Mony man ducu guribbe ka lweny i nota me Ciddim, en aye nam me Kado. Gubedo i te loc pa Kedor-laomer pi mwaka apar wiye aryo, ento gujemo woko i mwaka me apar wiye adekke. I mwaka me apar wiye aŋwenne, Kedor-laomer ki luker ma yam gitye kwede gubino dok guero lweny, ci guloyo jo Repaim i Aciterot-Kamaim, ki jo Jujim i Kam, ki jo Emim i Cave-Kiriataim, ki jo Kori i lobo godi megi me Ceir, nio wa i El-paran i waŋ apokki lobo ma tuŋ tim; ka dok gudwogo cen, gucito wa i En-micipat, en aye Kadec, guloyo lobo ducu pa jo Amalek, ki jo Amor bene ma gibedo i Kajajon-tamar. Ka dok kabaka me Codom, kabaka me Gomora, kabaka me Adma, kabaka me Jeboim, ki kabaka me Bela, ma co, aye Joar, gucito guero lweny i nota me Ciddim, i kom Kedor-laomer kabaka me Elam, ki Tidal kabaka me Goyim, ki Amrapel kabaka me Cinar, ki Ariok kabaka me Ellacar, luker aŋwen guribbe ka lweny i kom luker abic. Nota me Ciddim onoŋo tye iye bur odok macol; ka luker me Codom ki me Gomora guriŋo woko, jo mukene gupoto i bur meno, ki jo mukene mudoŋŋe guriŋo, gularo i got. Ci merok guyako jami pa jo Codom ki Gomora ducu, ki camgi ducu, gumol, gucito kwede, guyako bene Lot latin pa omin Abram, ma onoŋo obedo i Codom, ki jamine ducu, guwoto kwede woko. Ci dano acel mo ma obwot oriŋo, obino otito ki Abram ma Laibru, ma onoŋo bedo i te kworo pa Mamre, ma en Laamor, omin Ecikol ki Aner; gin yam gucikke pi ribbe ki Abram. Ka Abram owinyo ni watgi mony oyako woko, ci oywayo monnye, ka otelo wi jo mupwonyo lweny ma ginywalogi i pacone, jo ma giromo miya adek ki apar wiye aboro, ci olubo korgi nio wa i Dan. En opoko i monnye i dyewor; gucako poto i komgi, en ki luticce, ci guryemogi nio wa i Koba, i tuŋ acam me Damaciko. Ka oyako jami ducu, odwogo kwede, kacel ki watgi Lot, jamine ducu ki mongi ki lwakgi ducu. Ka doŋ odwogo ki ka ma en oloyo iye Kedor-laomer ki Luker ma gitye kwede-ni, ci kabaka me Codom ocito ka ŋolo wiye i waŋa yo wa i nota me Cave, ma en aye Nota pa Kabaka. Melkijedek kabaka me Calem okelo iye mugati ki koŋo vino; en aye onoŋo ajwaka pa Lubaŋa Mamalo Twal. Olamo gum i kome kun waco ni, “Lubaŋa Mamalo Twal ma laket polo ki lobo omi gum i kom Abram; gipwo Lubaŋa Mamalo Twal ma omiyo lumerokki i ciŋi!” Ci Abram omiye dul acel me apar me jami ducu ma en oyako. Kabaka me Codom dok owaco ki Abram ni, “Miya mera dano aye ater, ento in iter giri jami ducu obed meri.” Ento Abram odok iye bot kabaka me Codom ni, “Doŋ atyeko kwoŋo kwoŋ woko bot Rwot Lubaŋa Mamalo Twal, ma laket polo ki lobo-ni, ni, pe abigamo gin mo ki boti kadi latin uci, nyo del war mo, nyo gin mo i kin jami ma meri-ni, wek pe ibed ka wacci, ‘Amiyo Abram olony.’ Pe dok abigamo gin mo, doŋ agik ki gin ma awobe gucamo-ni, ki dul lim ma apoko ki jo ma gucito kweda-ni; wek doŋ Aner, ki Ecikol Mamre guter jamigi gigi.” I ŋe lok meno ducu, lok pa Rwot dok obino bot Abram i ginanyuta, ni, “Pe ilwor, Abram, an a kwotti, abimiyi mot madit twatwal.” Ento Abram ogamo ni, “Ai Rwot Lubaŋa, ibimiya mono gin aŋo? Pud abedo laboŋo latin mo en do, ki Lale oda bene Eliejer Ladamaciko-ni do.” Abram dok owacci, “Nen, in peya imiya nyodo mo; latin opii ma i oda bibedo Laleyo.” Ci dok nen, lok pa Rwot obino bote ni, “Dano man pe bibedo Lale ka tyeni; wodi kikome aye bileyo ka tyeni.” Ci okele woko, ka owacce ni “Nen malo i polo, kwan wel Lakalatwe, ka itwero kwano welgi.” Dok owacce ni. “Kit meno wel likwayi bene bibedo rom meno.” Ci en oye lok pa Rwot; ci gikwane ni en dano ma kite atir. Dok owacce ni, “An a Rwot ma akeli nia ki i Ur ma gaŋ pa jo Kaldaya, pi mini lobo-ni wek obed meri.” En ogamo ni, “Ai Rwot Lubaŋa, man abiŋeyo niŋŋiŋ ni lobo-ni bibedo mera?” Owacce ni, “Kella latin roya mo me mwaka adek, ki bwoŋ dyel me mwaka adek, ki nyok romo me mwaka adek, ki amam, ki latin akuri.” Ci okelo bote lwak gin meno ducu, ci onuno igi ari aryo aryo, ka opyelogi ma gukemme ki luwotgi; pe oŋuno i winyo aryo. Ka acut bino ka camo rinogi, ci Abram ryemogi woko. I kare ma ceŋ doŋ mito poto woko, ci nino madwoŋ omako waŋ Abram; nen, ka piny ocako yutte woko macol licuc. Rwot owaco ki Abram ni, “Ŋe atir ni, likwayi gibidoko lubedo i lobo ma pe megi, dok gibibedo opii kunnu, gibibwoyogi ki tek mwaka miya aŋwen; ento abiŋolo kop i kom rok ma biloyogi-ni, lacen gibiwiro, gidwogo kany ki lwak lim madwoŋ. Ki tuŋ boti in kikomi, ibicito bot kwarowu ki kuc; gibiyiki ma noŋo doŋ iti likoŋ, Dok gibidwogo kany i kare me likwayo ma i yalwak me aŋwen; pien bal pa jo Amor oromo.” Ka ceŋ doŋ opoto, ma piny doŋ odoko col, nen, agulu ma duny yito, ki mac raa ma lyel, owok i dye riŋo ma giŋuno-ni. I nino meno aye Rwot oketo iye gicikkene ki Abram, kun wacci, “Amiyo lobo man bot likwayi, nia wa i kulu me Ejipt nio wa i kulu madit, en ku lu Euprate, lobo pa jo Keni, jo Keniji, jo Kadmon jo Kit jo Periji, jo Repa, jo Amor, jo Kanaan jo Girgac ki jo Jebuc.” Carai dako pa Abram pe omedo ki nywalle latin mo, dok en onoŋo tye ki aŋecane ma anyira Ejipt ma nyiŋe Agar. Carai owaco ki Abram ni, “Nen, macalo Rwot ogeŋa nywalo latin mo-ni, cit idony i wi aŋecana, wek gwok nyo abinoŋo iye latin mo ma en binywalo.” Ci Abram owinyo dog Carai. Kit meno, i kare ma Abram otyeko bedo i lobo Kanaan mwaka apar, Carai dako pa Abram otero Agar anyira Ejipt ma aŋecane, omiye bot cware Abram wek obed dakone. Ocako bedo ki Agar, ci Agar ogamo ic. Ka Agar oneno ni doŋ egamo ic, ocako gayo Carai ki waŋ me cac. Carai owaco ki Abram ni, “Kipwola mupoto i koma odok meri! Amiyo aŋecana i kori; ka en oneno ni doŋ egamo ic, ci ocako gayo an ki waŋ me cac. Myero Rwot doŋ oŋol kop mapol i kin in ki an!” Ento Abram ogamo dog Carai ni, “Nen, aŋecani tye Dok i tweroni giri, in itim giri kit ma imito i kome.” Omiyo Carai ocako timme aromaroma, nio ka olwi, oriŋo woko ki bote. Lamalaika pa Rwot onoŋe i waŋ it mo ma i dye tim; it meno tye i yo ma cito Cur. Obino openye ni, “Agar, aŋeca pa Carai, in mono ia ki kwene kaa, dok icito wa kwene kaa?” En ogamo ni, “An alwi ariŋo Carai, min ot ma abedo i ode.” Lamalaika ogamo ni, “Dok cen bot min ot meno, ci iwore.” Lamalaika pa Rwot dok omedo lok ni, “An abimiyo likwayi nya mapol twatwal, ma ŋatti mo pe romo kwano welgi pi polgi.” Dok lamalaika pa Rwot omedde ka wacce ni, “Nen, igamo ic, ibinywalo latin laco, dok ibicako nyiŋe Icmael; pien Rwot obedo ka neno aromani, En bibedo dano ma cal ki kana me tim, en bitugge i kom dano ducu, ki dano ducu bene bitugge i kome; en bibedo i kabedone pat kun pyem ki utmegine ducu.” Ci Agar ocako nyiŋ Rwot ma oloko kwede ni, “In Lubaŋa ma neno.” Onoŋo en owacci, “An atyeko neno Lubaŋa ada, aneno en ci pud atye makwo gira?” Mumiyo nyiŋ waŋ it meno gicako ni, Beer-lakai-roi; ma tye i kin Kadec ki Bered. Agar onywalo ki Abram latin laco; Abram ocako nyiŋ latinne ma Agar onywalo ni Icmael. Abram onoŋo tye ki mwaka me ditte pyeraboro wiye abicel i kare ma Agar onywalo Icmael. Ka Abram onoŋo tye ki mwaka me ditte pyeraboŋwen wiye aboŋwen ci Rwot onen bot Abram kun wacce ni, “An Lubaŋa Matwero-ducu, bed i nyima laboŋo bal mo, ci abiketo gicikkena i kin an ki in, dok abimiyi inya mapol twatwal.” Abram oryebbe piny i nyime; Lubaŋa owacce ni, “Nen, gicikkena amini eno, in ibibedo kwaro rok mapol. Nia tin nyiŋi pe dok bibedo Abram, ento nyiŋi bibedo Abraim, pien aketo in wek ibed kwaro rok mapol. Abimiyi inya twatwal; abimiyi idoko rok mapol, ki luker bene gibia ki i komi. Dok abimoko gicikkena i kin an ki in ki likwayi ma bilubi, ki i yalwakgi ducu, me bedo gicikke ma bedo matwal, wek abed Lubaŋani, ki Lubaŋa pa likwayi ma bilubi bene. Dok abimiyo boti ki bot likwayi ma bilubi lobo ma ibedo iye-ni macalo welo, en aye lobo ducu me Kanaan, wek obed mewu matwal; dok an aye abibedo Lubaŋagi.” Ka Lubaŋa dok owaco bot Abraim ni, “Ki tuŋ boti, in ibigwoko gicikkena, in ki likwayi ducu ma bilubi, ki yalwakgi ducu. Man aye gicikkena, ma wubi gwoko, i kin an ki in ki likwayi ma bilubi: Gibiliro litino awobe ducu ma i kinwu. Wubiliro del kom nyimwu me co woko, wek obed gin ma nyuto gicikkena i kin an ki wun, Latin laco ma romo nino aboro gibiliro del kom nyime; co ducu gibilirogi i yalwak ki yalwakgi ducu, nia i kom litino ma ginywalogi i pacowu, nio kom litino ma wuwilo awila ki limwu ki bot lurok bene, ma pe wunywalogi anywala. Gin ducu ma ginywalogi i pacowu, ki ma giwilogi awila ki limwu, ducu gibilirogi, wek gicikkena obed i del kom nyimwu, wek obed gicikke ma bedo matwal. Ka laco mo onen ma pe giliro del kom nyime me co, waŋe birwenyo woko ki i kin lutugi, pien oturo gicikkena.” Ka Lubaŋa dok owaco ki Abraim ni, “Lok ma dok tuŋ bot Carai, dakoni, pe dok gibilwoŋo nyiŋe ni Carai, ento nyiŋe doŋ bibedo Cara.” Abimiye gum, dok makato ducu abimiyo en nywalli latin laco; abimiye gum, en bibedo min rok mapol, ki luker pa rok mapol gibia ki i kome.” Ci Abraim opoto piny aryeba ic ki nyero, kun tamo gire kekene ni, “Dano ma ditte doŋ romo mwaka miya kulu aye dok binywalo latin? Ki Cara bene ma ditte doŋ romo mwaka pyeraboŋwen ku lu dok binywalo latin?” Abraim ocako waco bot Lubaŋa ni, “Myero Icmael aye doŋ obed makwo i nyimi!” Lubaŋa owacce ni, “Pe gire, ento dakoni Cara aye binywalli latin laco, dok ibicako nyiŋe Icaka, dok abimoko gicikkena kwede wek obed gicikke ma bedo matwal bot Likwaye ducu ma bilube. Ki ma dok tuŋ bot Icmael bene, atyeko winyo in, ci nen, abimiye gum, abimiyo en binywal dok nya mapol twatwal; en bibedo kwaro luker apar wiye aryo, abimiye bedo rok madit. Ento abimoko gicikkena ki Icaka, latin ma Cara aye binywalli i kare macalo man i mwaka ma bino.” Ka Lubaŋa doŋ otyeko lok ki Abraim, ci oa woko ki bote, odok malo. Abraim otero Icmael ki lwak opii ducu ma ginywalogi i ode, nyo ma giwilogi ki lim, co ducu ma gitye i kin litino ma i ot pa Abraim, ci oliro del kom nyimgi me co woko i nino meno kikome, kit macalo Lubaŋa ocike kwede. Ka Abraim onoŋo tye ki mwaka me ditte pyeraboŋwen wiye aboŋwen en aye gicako Liro iye del kom nyime. Ki wode Icmael onoŋo doŋ tye ki mwaka me ditte apar wiye adek ka gicako Liro del kom nyime. I nino meno kikome en aye Abraim ki wode Icmael giliro iye del kom nyimgi, kacel ki jo ducu ma gitye i ode, litino ma ginywalo i ode, ki jo ma giwilogi ki lim ki bot lurok; gin bene gilirogi kacel kwede. Rwot dok onen bot Abraim i te kworo ma tye i Mamre, ma onoŋo obedo i dog kemane i kare ma piny Lyet. Otiŋo waŋe malo, ci oneno jo adek gucuŋ i nyime. Ka onenogi, oriŋo nia ki i dog kema, ocito ka ŋolo wigi, ci oryebbe piny i ŋom, kun wacci, “Laditta, ka gum okaya i nyimi, pe ikat an laticci akata. Wek koŋ gikel pii mo matitidi, wek wulwok ki tyenwu, ka doŋ wuywe i te yat-ti, dok acito ka omo kwon mo manok wek wubwol ki dogwu, ka doŋ wucak kato giwu, macalo doŋ wubino bota-ni.” Ci gin gugamo ni, “Citim kit ma iwaco-ni.” Abraim orune ocito bot Cara i kema, owacce ni, “Job moko mapwotte ma romo adita adek, inywan, ited capat matitino.” Abraim oriŋo i idwol, okwanyo wod twon ma riŋone pud yom mamit, omiyo bot awobine, ci oyubo oyotoyot. Ka okelo cak lukulu ki cak malibo, ki dek riŋo ma gitedo, oketo i nyimgi; en ocuŋ i ŋetgi ka konyogi, i te yat, kun gicamo. Gupenye ni, “Dakoni Cara kono tye kwene?” En ogamo ni, “En tye i kema.” Owacci, “Abidwogo boti i kare me cwir, ma noŋo dakoni Cara doŋ tye ki wode.” Cara onoŋo tye ki i ŋeye i dog kema, winyo lokgi. I kare meno onoŋo Abraim ki Cara mwaka me ditogi doŋ dwoŋ: dok Cara onoŋo doŋ pe neno dwe macalo mon wadigi. Mumiyo Cara onyerre kekene, kun wacci, “Ma doŋ ati, aloc woko, ki cwara bene doŋ oti, oloc woko, dok wabinoŋo yomcwiny odye?” Rwot owaco bot Abraim ni, “Cara onyero mono piŋo, ma wacci, ‘An mono dok abinywalo latin, ma kombeddi doŋ ati woko-ni?’ Tye gin mo matek ma loyo Rwot? Ka kare oromo ci abidwogo dok kany, i dye cwir, anoŋo Cara doŋ tye ki wode.” Ento Cara okwero woko kun waco ni, “An pe anyero gira.” Ogamo doge ni, “Pe, ento me nyero aye inyero.” Ka jo meno gucako a woko ki kunnu, ci guneno yo tuŋ Codom; ci Abraim olwokogi iyo. Rwot owacci, “Myero akan gin ma acito ka tiyone woko bot Abraim kulu, macalo Abraim obedoko rok madit ki matek, ma rok ducu ma i wi lobo gibilimo gum ki i kome? Pe; an doŋ atyeko yero en, wek ocik litinone ki jo ma i ode ma gibilube gumok ka lubo korayo pa Rwot ma gitiyo gin ma tye atir kun giŋolo bene kop atir; wek lacen Rwot omi ki Abraim gin ma yam otyeko cikke kwede-ni.” Ka doŋ Rwot owacce ni, “Pien koko i kom Codom ki Gomora doŋ okato kare, ki balgi doŋ dwoŋ twatwal, abicito botgi wek acinen ka ada gitye ka tiyo kit ma koko i komgi owinnye kwede bota-ni; ka pe, ci abiŋeyo.” Kit meno gulokke, gucako wot me kemo i Codom; ento Abraim pud ocuŋ i nyim Rwot aye. Lacen Abraim onyiko bote cok, owacci, “In ada ibityeko jo ma kitgi atir kacel ki jo maraco? Ka gwok nyo jo ma kitgi atir binoŋŋe pyerabic i gaŋ meno, ci ibityeko kabedo meno woko, pe ibijalo gaŋ meno pi jo pyerabic ma kitgi atir ma gitye iye-ni? Pe kumene! In pe myero inek jo ma kitgi atir kacel ki jo maraco, kun imiyo jo ma kitgi atir bene bedo rom ki jo maraco, Laŋolkop me lobo ducu pe bitimo gin ma nen, atir, bo?” Rwot ogamo ni, “Ka anoŋo i Codom jo ma kitgi atir pyerabic ma tye i gaŋ meno, abijalo kabedo meno ducu pigi.” Abraim ogamo dok ni, “Nen, an doŋ adyerre me lok kwedi, in Rwot, an mera apwa ki buru mamwa. Gwok nyo ka ce birem jo abic me romo jo pyerabic? Ci ibityeko gaŋ meno ducu woko pi jo abic murem-mi?” Ogamo ni, “An pe abityekone ka ce anoŋo kunnu jo pyeraŋwen wiye abic.” Dok onwoyo aye, owacci, “Ce ka ibinoŋo kunnu jo pyeraŋwen keken kono?” Ogamo ni, “Pi jo pyeranwen-ni pe abitimo iye gin mo.” Dok owacci, “Pe kiniga omaki, in Rwot, an abilok doki. Ka ce binoŋŋe kunnu jo pyeradek kono?” En ogamo ni, “Pe abitimo ce abinoŋo kunnu jo pyeradek.” En dok owacci, “Nen, an doŋ adyerre me lok kwedi, in Rwot. Gwok nyo jo pyeraryo binoŋŋe kunnu kono?” Ogamo ni, “Pi jo pyeraryo-nu pe abityeko gaŋ.” Dok onwoyo aye ni, “Pe kiniga omaki, in Rwot, an abilok doki tyen acel keken. Gwok ka ibinoŋo kunnu jo apar keken kono?” Ogamo ni; “Pi jo apar-ri pe abitye kone.” Ci doŋ Rwot ocako cito, ka doŋ otyeko lok ki Abraim; ci Abraim odok gire i kabedone. Lumalaika aryo gubino i Codom otyeno; gunoŋo Lot obedo piny i dog gaŋ me Codom. Ka Lot onenogi, ci oa malo, ocito ka jologi, oryebbe, okulo waŋe piny i ŋom, kun wacci, “Luditona, alegowu, wulokke, wudwog kany, wudony i oda an laticwu, wubed iye nino acel, wulwok iye tyenwu, ci doŋ wubia giwu odiko con, wucito i yo wotwu.” Gugamo ni, “Pe; piny biru ki wan i dye gaŋ, kany.” En odiyogi ki tek mada, ci gulokke, gudonyo i ode; otedogi karama, omyenogi kwon ma pe girubo iye tobi, ka gucamo. Ento ma pud peya gubuto piny, lwak co ma i gaŋ, jo me Codom, awobe wa ki ludito bene, guteŋŋe woko ducu, gubino, gurumo ot woko. Gulwoŋo Lot, gupenye ni, “Jo ma gubino boti otyeno-ni gitye kwene? Kelgi woko botwa kany, wekwaŋene kwedgi.” Lot okato, ocito botgi i doggola, ci oloro doggola woko cut ki i ŋeye, kun waco ni, “Alegowu, utmega, pe wutim tim aranyi. Wunen, an atye kany ki anyirana aryo ma pud peya guŋene ki co. Wek gin aye akelgi botwu, wutimgi giwu kit ma wumito; ento pe wutim gin mo i kom jo man, pien doŋ gudonyo i oda.” Ento guwacci, “Nyik cen!” Ka doŋ guwacci “Nye man obino kany macalo labedo, dok mito doko laŋolkop ce? Wan koni doŋ watimi marac makato gin.” Ka gucako dille matek i kom Lot, kun ginyiko pi turo kika. Ento lumalaika meno gurwako ciŋgi, ci guywayo Lot gukelo i ot botgi, ci guloro doggola woko, Gucoro waŋ dano ma gudille ka i doggola-ni, ludito ki awobe bene, wangi ocor woko, gubedo ka paŋŋe ka yenyo doggola, ci guol woko ata. Jo meno gucako waco ki Lot ni, “In dok it ye ki jo mukene ma watwu kany bene? Macalo cog anyirani, ki litino awobe ki anyiragi, nyo ki ŋatti mo ma tye i gaŋ kany. Wua kwedgi woko ki i kabedo man; pien wayubbe me tyeko gaŋ man woko. Koko ma i kom jo ma gitye iye odoko dit i nyim Rwot, Rwot ocwalowa ni doŋ wabin, watyek woko.” Mumiyo Lot okato ocito, olwoŋo cog anyirane, ma onoŋo nene gimito nyomo anyirane-ni, kun wacci, “Wua woko ki i kabedo man, pien Rwot obetyeko gaŋ man woko.” Ento ki bot cog anyirane nen calo lok oree. Ka piny doŋ oru, Lumalaika guruyo Lot, kun giwacci, “A woko, icit ki dakoni ki anyirani aryo ma gitye kanynyi, wek pe ginekgi i can ma gibemiyo i kom gaŋ man.” Ento en obedo ka galle, mumiyo jo meno gumako ciŋgi, gupeyogi woko, en ki dakone ki anyirane aryo; Rwot obedo ki kica i komgi, gikelogi wa i ŋe gaŋ woko. Ka doŋ gukelogi woko, ci gucikogi ni, “Wuriŋ wular kwowu; pe wulokke wunen ŋewu, pe wugik i yo ka mo i nota, wuriŋ wular godi, wek pe wuto.” Lot owaco ki gin ni, “Aa, luditona; nen, an doŋ gum okaya ki botwu, dok wunyuto i koma kica madwoŋ pi Laro kwona; ento pe atwero riŋo nio wa i godi, miyo gin marac dok poto i koma, ci neka woko. Nen, gaŋ macokke loka ca, ma aromo riŋo alaro iye, dok gaŋŋe tidi mo. Wek ariŋ alar kunnu; pe gaŋŋe nen tidi twatwal? Wek alar kwona do!” Owacce ni, “Nen, gum meno dok amiyi bene aye; pe doŋ abibalo gaŋ ma iloko pire-ni, Doŋ irune oyoto, ilar kunnu; peya atwero timo gin mo nio ka io wa kunnu.” Mumiyo nyiŋ gaŋ meno gucako ni Joar. Ceŋ otuc ma onoŋo Lot donyo i Joar. Ci Rwot ocwalo gweŋ calfa ma mac oliyo woko, ocwer piny nia ki i polo, ocorre i kom Codom ki Gomora, obalo gaŋ meno woko, ki notane ducu, ki lwak jo ducu ma gibedo i gaŋi meno, ki gin ducu ma gidoŋo i ŋom. Ento dako pa Lot mudoŋ cen aŋec-ci, olokke oneno ŋeye, ci olokke odoko wir kado cut. Abraim oa odiko con, ci ocito i kabedo ma yam koŋ ocuŋ iye i nyim Rwot-ti. Ci obolo waŋe oneno yo tuŋ Codom ki Gomora, ki tuŋ lobo ducu ma i nota-nu, ci oneno yito ma duny i lobo-nu, macalo ruk mac mukur. Kit meno Rwot otyeko gaŋi ducu ma i nota i nino meno, ka Lubaŋa opo pi Abraim, omiyo okwanyo Lot woko, wek can pe opot i kome, i kare ma obalo gaŋ ma yam Lot obedo iye woko. Lot oa woko ki i Joar, ocito obedo i godi, kacel ki anyirane aryo-nu, pien onoŋo lworo bedo i Joar; odonyo obedo i boro, kacel ki anyirane aryo-nu. Nyare me kayone ocako waco bot laminne matidi ni, “Wonwa doŋ oteggi, pe tye laco mo i wi lobo ma bibino botwa ka bedo kwedwa i kit pa dano ma wi lobo-ni. Bin, wek wami wonwa koŋo vino, omati, ci wabibuto kwede, wek wanoŋ nyodo, wonwa aye onywal kwedwa.” Ka gumiyo wongi omato koŋo ŋino i dyewor meno cut, latin kayone ocito, obuto ki wonne, ma kun pe ŋeyo ka nyare obuto kwede, ki kare ma nyare oa kwede malo. Orwone latin kayone dok owaco bot matidine ni, “Nen, tin dyewor doŋ atyeko buto ki wora; wek dok wamiye omat koŋo vino tin dyewor, wek in dok icit ibut kwede, wek wanon nyodo, wonwa aye onywal kwedwa.” Dok gumiyo wongi koŋo vino omato i dyewor meno bene; nyare matidi-ni dok oa, ocito obuto kwede; en pe oŋeyo ka nyare obuto kwede, ki kare ma nyare oa kwede malo. Kit meno anyira pa Lot aryonu ducu gunywal ki wongi. Kayone onywalo latin laco, ocako nyiŋe Moab; en aye odoko kwaro jo Moab nio wa kombeddi. Nyare matidine bene dok onywalo latin laco, ci ocako nyiŋe Ben-ammi; en aye odoko kwaro jo Ammon wa kombeddi. Abraim ocako wot me cito i lobo me Negeb ma tye i kin Kadec ki Cur, obedo i Gerar, ka ma otiro iye macalo labedo. Abraim ocako lok i kom dakone Cara ni, “En lamera.” Ci Abimelek kabaka me Gerar ocwalo jone guomo Cara. Ento’ Lubaŋa obino bote i waŋ lek dyewor, lok kom Cara, dako pa Abraim kun wacce ni, “Nen, in i dano ma lato, pien dako ma in iomo-ni dako ma cware tye.” Abimelek onoŋo peya obedo kwede; ci en ogamo ni, “Rwot, in mono ibineko rok mo ma pe obalo? Pe en aye gire otitta kun wacca ni, ‘Dako-ni lamera?’ Dako kikome bene owaco ni, ‘En omera.’ Atimo man ma cwinya leŋ, ki ciŋa bene pe obalo gin mo.” Lubaŋa dok owacce i waŋ lek ni, “Iyo, aŋeyo ni itimo kumeno ma cwinyi leŋ, ci onoŋo an aye abedo ka ŋeni, oweko pe itimo bal mo i nyima; mumiyo pe aye in igudo kome. Doŋ idwok dako-ni bot cware gire; pien en lanebi, en bilego piri, ci ibikwo. Ento ka ikwero dwoko dako-nu bot cware, ber iŋe ni ibito woko ada, in ki jo ma i paconi ducu.” Abimelek oa malo odiko con, olwoŋo luticce ducu, otito botgi lok meno ducu, ci gubedo ki lworo madwoŋ. Ka Abimelek olwoŋo Abraim bote, owacce ni, “Itimowa kuman piŋo? Aballi gin aŋo, mumiyo in ikelo bal madit i koma ki i kom kerra? In itimo gin ma pe myero atiya i kom dano.” Ka dok Abimelek owaco bot Abraim ni, “Onoŋo mono itamo niŋo, mumiyo itimo kit man?” Abraim ogamo ni, “Lok mumiyo atiyo, pien onoŋo atamo ni, Lubaŋa pe gilworo i kabedo man, gibineka woko pi dakona. Ada mere lamera kikome, nya pa wora, ento pe latin pa maa kikome, ci odoko dakona. I kare ma Lubaŋa okwanya okwanya woko ki i paco pa wora, ma abedo ka wirre, acako wacce ni, ‘Pi kicani myero itima kit man: i kabedo ducu ma wabio iye, ibinyuta ni, Man omera.’ ” Ci Abimelek okelo romi ki twoni ki lwak opii ki lwak aŋeca, omiyogi bot Abraim, ci odwoko dakone Cara bote. Abimelek owacce ni, “Nen, lobona tye i nyimi en; bed ka ma imito.” Ki tuŋ bot Cara owacci, “Nen, atyeko miyo bot cwari cekel me ryal ma romo alip acel, pi waro kop woko ki i komi i waŋ dano ducu ma ibedo kwedgi, wek ibed laboŋo bal mo i komi.” Ka Abraim olego Lubaŋa, ci Lubaŋa ocaŋo Abimelek ki dakone bene, ki lwak aŋecane, ci gucako nywalo litino; pien onoŋo Rwot ogeŋo nyodo woko i ot pa Abimelek pi lok kom Cara, dako pa Abraim. Rwot dok olimo Cara kit ma con owaco, ci otime kit ma yam ociko kwede. Cara ogamo ic, ci onywalo latin laco ki Abraim, ma kun en doŋ oti woko, i kare ma yam Lubaŋa otitte pire-ni, Abraim ocako nyiŋ latin ma ginywalle, ma Cara aye onywalo-ni, ni Icaka. Abraim oliro wode Icaka ka doŋ otyeko nino aboro me ditte, kit ma yam Lubaŋa ocike kwede. Abraim onoŋo doŋ mwaka me ditte romo miya acel, ka doŋ wode Icaka ginywalo. Cara owacci, “Lubaŋa doŋ omiya anyero; wa ŋat ma biwinyo bene binyera.’ Ci owacci, “Aŋa ma kono ceŋ owaco ki Abraim ni waŋ mo Cara bidoto latin? Nen ka doŋ anywalle awobi ma doŋ en oti, oloc woko.” Latin odoŋo, ci gijuke dot woko; Abraim otedo karama madit i nino ma gijuko iye Icaka dot-ti. Ento ka Cara oneno wod pa Agar ma anyira Ejipt, ma yam onywal ki Abraim, ka tuko ki latinne Icaka, en owaco bot Abraim ni, “Ryem aŋeca man ki wode, gucit woko, pien wod pa aneca-ni pe bibedo laleyo kacel ki woda Icaka.” Lok meno cwiny Abraim ocwer iye matek, en pi wode. Ento Lubaŋa owaco ki Abraim ni, “Pe cwinyi ocwer pi latin ki pi aŋecani; gin ducu ma Cara owacci, tim kit ma en otitti, pien litino pa icaka aye gibilwonogi ni likwayu. Dok abimiyo wod pa aŋeca bene doko rok, pien en latinni.” Abraim opuk odiko con, okwanyo kwon ki opiro pii, omiyo Agar, olwoke otere i yo, ci oŋabo jami ki latinne i wi gwoke, ocwale kwede woko. Dako meno ocito gire, obedo ka lak ata i tim me Beer-ceba. Ka pii ma i opiro otum woko, ci opyelo latinne piny i te yat buŋa mo. Ka oweko latinne, ocito cen ka ma borre rom ki ka ma ka gibayo atero gik iye; pien owacci, “Pe myero anen to pa latinna.’ En obedo i anyim kuca, ci latin odaŋŋe ki koko. Lubaŋa owinyo koko pa latin, lamalaika pa Rwot ocako lwoŋo Agar ki i polo, kun wacce ni, “Man lok aŋo Agar? Pe doŋ i lwor, pien Lubaŋa doŋ otyeko winyo dwan koko pa latin ki ka ma ipyele iye-ni. Doŋ ia malo, itiŋ latin, ci ikwake matek, pien abimiyo en doko rok madit.” Ka Lubaŋa oyabo waŋe, ocako neno waŋ pii; ci ocito otwomo, opiko i opirone poŋ, ka omiyo wode omato. Lubaŋa obedo ki latin meno; odoŋo, obedo i tim, odoko ladwar matek ki atero. Obedo i tim Paran; minne onyomme nya jo Ejipt. I kare meno Abimelek ki ladit wi monnye Pikol guwaco bot Abraim ni, “Lubaŋa tye kwedi i gin ducu ma itiyo; kombeddi doŋ ikwoŋ kwoŋ kweda i nyiŋ Lubaŋa ni, pe ibiumo waŋa, kadi wa litinona ki likwaya bene; macalo an bene atimi ber-ri, in bene ibitima ber, ki lobona ma koni in labedo iye-ni.” Abraim ogamo ni, “Abikwoŋo.” Abraim ocako kok bot Abimelek pi waŋ pii mo ma onoŋo luticce gucerre woko kome. Abimelek ogamo ni, “An pe amedo ki ŋeyo ŋatti mo mutimo lakit lok-ku; in bene pe imedo ki titta lokke. Pe amedo ki winyo lokke nio wa tin!” Lacen Abraim okwanyo romi ki twoni, omiyogi bot Abimelek, ci gin jo aryo guketo gicikke i kingi. Abraim oyero bwoŋi romi abiro, oketogi pat. Abimelek owaco ki Abraim ni, “Bwoŋi romi abiro ma iketo pat-ti kono piŋo?” Ogamo ni, “Bwoŋi romi magi abiro ma ibigamogi ki i ciŋa-ni, ibiketogi pi bedo cadenna ma nyuto ni, an aye yam akwinyo waŋ pii man.” Mumiyo kabedo meno gilwoŋo ni Beer-ceba, pien onoŋo gin aryo ducu gukwoŋŋe iye ki kwoŋ, Kit meno guketo gicikke i Beer-ceba. Ka doŋ Abimelek ki Pikol ladit lawi monnye gua, gudok i lobo pa jo Piliciti. Abraim opito yat anaŋa i Beer-ceba, ci olwoŋo iye nyiŋ Rwot, Lubaŋa Mabedo Nakanaka. Abraim ori i lobo pa jo Piliciti kare malac. I ŋe lok meno ducu, Lubaŋa otemo Abraim kun wacce ni, “Abraim!” En ogamo ni, “Ana ene.” Owacce ni, “Kwany wodi Icaka, iter, en wodi acel keken, ma imaro-ni, wot kwede i lobo Moria, wek icit ityere kunnu, obed gitum awaŋa i kom got mo ma abititti ki kunnu.” Kit meno Abraim opuk odiko con, otweyo kom me bedo i wi kanane, okwanyo awobene aryo, ocito kwedgi, kacel ki wode Icaka; otoŋo yen me waŋo gitum, oa, okemo i kabedo ma Rwot otitte-ni. I ninome adekke, Abraim otiŋo waŋe, ci oneno kabedo meno ka maborbor. Ka Abraim owaco bot awobe aryo ma tiyo bote-ni ni, “Wun wubed koŋ kany kacel ki kana; an ki latin-ni wabicito anyim loka ca ka woro Lubaŋa, ka dok wabidwogo botwu.” Abraim otiŋo yen me lawaŋ gitum, ocibo i wi wode Icaka; en omako mac ki pala i ciŋe, ka gucako wot kacel. Icaka owaco bot wonne Abraim ni, “Wora!” En ogamo ni, “Aŋa ene, woda.” Ci owacce ni, “Nen ba, watye ki mac ki yen, ento romo me gitum tye kwene?” Abraim ogamo, owacce ni, “Lubaŋa aye bimiyo romo me gitumme, latinna.” Kit meno, gumedde gigi kacel ki wotgi. Ka guo i kabedo ma Lubaŋa yam otitte, ci Abraim ocano keno tyer, ka ocano yen i wiye, otweyo wode icaka, ci opyelo i wi keno, obuto i wi yen. Abraim otiŋo ciŋe, okwanyo pala me neko wode. Lamalaika pa Rwot olwoŋe ki i polo, kun wacce ni, “Abraim! Abraim!” En ogamo ni, “An atye ene.” Owacce ni, “Pe iket ciŋi i kom latin-nu, pe itim gin mo i kome bene; doŋ tin atyeko niaŋ atir ni ilworo Lubaŋa, pien pe itwona wodi, wodi acel keken, nen imiya.” Abraim otiŋo waŋe malo, ci oneno nyok romo tye i ŋeye ma tuŋeomoko i agaba; Abraim ocito okelo nyok romo-nu, ci otyero me bedo gitum awaŋa ma ka wode. Abraim ocako nyiŋ kabedo meno ni, Rwot aye bimiyo; macalo giwaco nio wa onyo ni, “Gibimiyo wa i wi got pa Rwot.” Dok lamalaika pa Rwot olwoŋo Abraim nia ki i polo tyen me aryone kun waco ni, “Rwot owacci, Doŋ akwoŋŋe ki nyiŋa kekena ni, pi tim man, ma pe itwona wodi, ma kun en wodi acel keken-ni, abimiyi gum ada; abimiyo likwayi ginya mapol macalo lwak lakalatwe me polo, ma rom ki kweyo ma i dog nam Dok likwayi aye gibiloyo gaŋ pa merokgi; rok ducu ma i lobo gibilimo gumgi ki i kom likwayi, pien ityeko woro doga.” Lacen Abraim odok cen bot awobene, ka gua kunnu, gudok kacel kwedgi wa i Beer-ceba; Abraim obedo i Beer-ceba. I ŋe lok meno ducu, gitero lok bot Abraim ni, “Nen, Mirika otyeko nywalo litino ki omeru Nakor: latin kayone Uj, ki Buj ominne, Kemuel won Aram, Keced, Kajo, Pildac, Jidlap, ki Becweri.” Becweri onywalo Labeka. Mirika onywalo Litino aboro ki Nakor omin Abraim. Dakone ma aŋeca, ma nyiŋe Reuma, onywalo bene Teba, Gakam, Takac ki Maaka. Cara ori mwaka miya acel ki pyeraryo wiye abiro; meno aye wel mwaka me kwo pa Cara. Cara oto i Kiriat-arba, ma en aye Kebron, ma i lobo Kanaan; Abraim odonyo i ot okumo, okoko Cara ki pig waŋe, Lacen Abraim oa woko ki i nyim lato, ocito owaco bot jo Kit ni, “An a welo, ma doŋ atyeko bedo i kinwu; wumiya dullobo mo i kinwu ma bibedo kabedo me yiko dano, wek ayik iye dakona-ni, oa woko ki i waŋa.” Jo Kit gugamo dog Abraim ni, “Winy, laditwa; in laker madit i kinwa kany, Yik kom latoni i lyel maber ma iyero i kin lwak lyel mewa-ni: pe tye ŋatti mo ma i kinwa ma bitwonni lyelle, nyo ma bigeŋi ni pe iyik latoni iye.” Abraim oa malo, ci oryebbe i nyim jo Kit, ma wegi lobo-nu, kun wacogi ni, “Ka onoŋo wumito ayik latona wek oa woko ki i waŋa, wuwiny lokka, wulegga Epron ma wod pa Jokar, wek oye mina boro ma i Makpela, ma mere-ni, ma tye i wi agikki potone. Wek oŋolla welle kikome ma romo wilone, omi bota i nyimwu, obed mera me kabedo me yik.” I kare meno onoŋo Epron bene tye, obedo i kin jo Kit, ci Epron Lakit ogamo dog Abraim, ma jo Kit ducu giwinyo, kacel ki lwak ducu ma gibedo i gaŋ meno, kun waco ni, “Pe kumeno ladit, winy lokka; amini poto, dok amiyi wa ki boro ma tye iye-ni ki i nyim lutuwa ducu; yik iye kom latoni” Abraim dok oryebbe i nyim wegi lobo-nu, ka owaco ki Epron, ma wegi lobo ducu giwinyo ni, “Ento ka imito, ci winy lokka, Abimiyi wel lawil poto, in ibigamo lim ki i ciŋa, wek ayik iye kom latona.” Epron owaco bot Abraim ni, “Laditta, winy lokka ya; wel dul poto-nu romo cekel me ryal miya aŋwen, meno kono gin aŋo ki tuŋ boti ki an bene? Yik iye kom latoni.” Abraim owinyo dog Epron; ci opimo ki Epron wel ryal ma owaco i nyim jo Kit, ma romo cekel me ryal miya aŋwen kulu, kun pimo ki kidi mijan ma lucat-wil gipimo kwedeni. Kit meno poto pa Epron ma i Makpela-ni, ma yam tye tuŋe wokceg me Mamre, poto kacel ki boro ma yam tye i poto-nu, ki yadi ducu ma tye i pota-nu, ma gurumo dyere ducu, gimiyogi, gimokogi ducu me bedo pa Abraim, ki i nyim jo Kit ducu, kacel ki i nyim lwak ducu ma gibedo i gaŋ meno. Ka lok meno otum, Abraim oyiko dakone Cara i boro ma tye i poto Makpela yo tuŋ wokceŋ me Mamre, ma en aye Kebron, ma i lobo Kanaan. Lukit gumoko ni poto-nu, kacel ki boro ma tye iye, gubed pa Abraim me kabedo me yik. I kare ma Abraim doŋ oti, ma mwaka me ditte doŋ dwoŋ, dok onoŋo Lubaŋa doŋ otyeko miyo gum ki Abraim i gin ducu, ci Abraim owaco ki laticce ma tye i ode, ma onoŋo loyo jamine ducu, ma oteggi i kingi, ni, “Rwak ciŋi odony ki piny i te ema, wek ami ikwoŋ ki nyiŋ Rwot, Lubaŋa me polo ki lobo, ni, pe ibinyomo nyako mo bot woda ma i kin anyira Kanaan, ma abedo i kingi-ni, ento ibicito i lobo tuwa, i kakawa; en aye ibinyomo iye dako bot woda Icaka.” Laticce ogamo ni, “Gwok nyo dako aye pe biye bino kweda wa i lobo man; myero an aye adok ki wodi i lobo tuwu ma yam ibino, ia ki iye-ni?” Abraim owacce ni, “Nen maber ni, pe icito ki woda idwoko cen kunnu. Rwot Lubaŋa me polo ma yam okwanyo an ki i paco pa wora-ni, ki i lobo ma ginywala iye-ni, ma yam oloko kweda kun kwoŋŋa kwoŋ ni, ‘Abimiyo lobo man bot likwayi,’ en bicwalo lamalaikane i nyimi, ci ibinyomo dako bot woda nia ki kunnu. Ento ka dako aye pe oye bino kwedi, ci kwoŋŋa-ni pe bimaki; ento woda aye pe myero idok kwede cen kunnu.” Kit meno laticce orwako ciŋe, odonyo ki piny ki i te em laditte Abraim, ocako kwoŋo kwoŋ i kom lok meno. Laticce okwanyo kinaga pa rwode ma romo apar, ka ocako wot, kun otero bene jami mabeco mapatpat; ci oa me wot i Mecopotamia, i gaŋ pa Nakor. En omiyo kinaga orumo coŋgi piny i ŋe gaŋ ma cok ki waŋ pii i kin otyeno abwora, i kare ma mon gicito iye ka twomo pii. Ci olego ni, “Ai Rwot, Lubaŋa pa laditta Abraim, mi lok ducu owotta maber tin. Alegi inyut mar meri ma pe lokke i kom rwoda Abraim. Nen, acuŋ i ŋet waŋ pii en, ki anyira ma i gaŋ guebino bene ka twomo pii. Nyako mo ma abilege pii amata, ni, ‘Koŋ icib aguluni piny, wek imiya pii amati,’ ci nyako ma biwaco gire kene ni, ‘Koŋ imati, ka doŋ abimiyo kinagani bene gimato’, wek en aye obed nyako ma iyero pi laticci Icaka. Kit meno bimiyo aŋeyo ni; in doŋ inyuto ki laditta mar meri ma pe lokke-ni.” Ma pud peya otyeko lokke, ci nen, Labeka, nya pa Becweri, wod pa Mirika, dako pa Nakor, ma omin Abraim, otuc i waŋ pii ki agulu piine ma obolo i wi gwoke. Nyakone onoŋo neno mwonya twatwal, nyako ma ŋattt mo peya omako ciŋe, Ci nyako meno olor, odonyo i waŋ pii, otwomo pii opoŋo agulu piine, ka odwogo, okatti kwede woko. Latic meno oriŋo, oŋolle i kome, ci owacce ni, “Alegi ba, koŋ imiya pii ma i aguluni amati.” Nyako ogamo ni, “Koŋ imat, laditta”; en otugi tiŋo agulu piine i ciŋe, omiye omato. Ka otyeko, ci owaco gire kene ni. “Abitwomo pii, amiyo ki kinagani bene, nio ka gumato pii oromogi.” Oyotoyot oonyo pii i weer, ci oriŋo odok ka twomo pii i waŋ it, otwomo pii nio ka oromo kinaga ducu. Laco meno ociko waŋe i kome laliŋ, wek eniaŋ ka Rwot otyeko miyo luguma okaye i yo wotte-ni, nyo pe. Ka kinaga gutyeko mato pii, laco meno okwanyo atego um me jabu ma pekke romo nucu cekel, ki atego jabu aryo me ŋut ciŋ ma pekgi rom ki cekel apar me jabu, omiyo ki nyako meno kun penye ni, “In mono i nya pa ŋa? Kabuto mo twero noŋŋe piwa i gaŋ pa woru?” En ogamo ni, “An anya pa Becweri ma wod pa Mirika, ma onywalo ki Nakor.” Dok otitte ni, “Watye bene ki reŋ kal ki cam ma romo, wa kabuto bene noŋŋe.” Laco meno okula wiye piny, ci oworo Rwot, kun waco ni, “Gipwo Rwot, Lubaŋa pa laditta Abraim, ma pe oweko mar mere ma pe lokke, ki adane, i kom laditta. An bene, Rwot doŋ otyeko telo wiya, okela wa i ot ma i kaka pa laditta kikome.” Ci anyaka oriŋo otito lok mutimme ducu bot jo ma tye i ot pa minne. Labeka onoŋo tye ki ominne ma nyiŋe Laban. Ci Laban oriŋo ocito bot laco meno, wa i waŋ it. Ka oneno atego um, ki atego i ŋut ciŋ laminne, ki pi winyo lok pa laminne Labeka ni, “Laco-ni oloko bota kit man,” ci owoto bot laco-nu, nen, onoŋo ocuŋ cok ki kinagane i ŋet waŋ it. Owacce ni, “Bin wa i ot, pien Rwot otyeko miyi gum; piŋo dok icuŋ ki i ŋe gaŋ woko? Pien doŋ atyeko yubo ot ki kabuto pa kinaga bene.” Laco-ni obino, odonyo i ot; ka Laban ocako gonyo del woko ki i kom kinaga, omiyo reŋ kal ki cam bot kinaga, okelo pii lalwok tyene ki tyen jo ma owoto kwede. Ka gikelo cam gicibo i nyime wek ocam; ento en owacci, “An peya abicam, nio ka atito kit kwena ma giora kwede.” Ci ogamo ni, “Tit do.” Ci en otito ni, “An latic pa Abraim. Rwot otyeko miyo gum madit omako laditta, doŋ odoko dano madit, omiyo en olimo lim makwo, dyegi ki dyaŋi, ryal ki jabu, lwak opii ki lwak aŋeca, kinaga mapol, ki lwak kana. I kare ma laditta doŋ oteggi, ci Cara dako pa laditta ocako nywalo latin laco, en aye gimiye oleyo lim ducu ma en tye kwede. Laditta omiya akwoŋo kwoŋ, kun owacca ni, ‘Pe ibinyomo nyako mo bot woda ki i kin anyira Kanaan, i lobo ma abedo iye-ni; ento ibicito i ot pa wora, ki i kin lutuwa, en aye icinyom iye dako bot woda.’ Ci agamo dog laditta ni, ‘Gwok nyo dako pe biye bino kweda kono.’ Ento en odokka iye ni, ‘Rwot ma abedo alubo cikke-ni bicwalo lamalaikane nywako kwedi yo, ci luguma bikayi iyo wotti; in ibinyomo dako bot woda nia i ot pa wora kikome. Ci kwoŋŋa doŋ pe bimaki, ka doŋ icito bot lutuwa; ka ce gin aye pe gumiyi nyako, ci kwoŋŋa doŋ pe bimaki.’ “Tin ka ao i waŋ pii, ci alego ni, ‘Ai Rwot, Lubaŋa pa laditta Abraim, ka tin ibimiyo luguma kaya i wotta man ma awoto iye-ni, ci nen, acuŋ i ŋet waŋ pii en; nyako mo ma bibino ka twomo pii, an abiwacce ni, “Alegi ba, miya pii mo ki aguluni amati,” nyako ma bigamo ni, “Koŋ Imati, dok abitwomo mukene pi kinagani bene,” en aye obed dako ma Rwot oyero me bedo dako pa wod pa laditta.’ “I kare ma pud peya atyeko loko lok ma tye i cwinya, ci nen, Labeka otuc, mubolo agulu piine i wi gwoke, ci olor odonyo i waŋ pii, ka otwomo pii. Ci alege ni ‘Miya pii amat ba!’ En otugi tiŋo agulu piine ki i wi gwoke kun waco ni, ‘Koŋ imati, ci abimiyo kinagani bene gimato.’ Ci an amato, ka en omiyo kinagana bene gumato, Dok apenye ni, ‘In kono i nya pa aŋa kaa?’ En ogamo ni, ‘An anya pa Becweri ma wod pa Nakor, ma Mirika aye onywalo.’ Kit meno an acako keto agit i ume, ki atego jabu i ŋut ciŋe ryoryo. Ka akulo wiya piny, aworo Rwot ci apwoyo Rwot, Lubaŋa pa laditta Abraim, ma otela i yo maber, omiya anoŋo nya pa omin laditta me atera bot wode. Kombeddi ka wubitic ki laditta ki mar ki ada, wutitta; ka pe bene wutitta; wek alokke adok yo tuŋ ciŋ acuc nyo tuŋ acam.” Laban ki Becweri gugamo ni, “Lok man oa ki bot Rwot; pe watwero dokki iye marac nyo maber, Nen, en Labeka tye i nyimi enno; in ikwany en, wuwot kwede, wek en ocit obed ci-wod pa laditti, macalo Rwot doŋ otyeko wacone.” Ka latic pa Abraim owinyo lok meno, ocako ryebbe piny i ŋom i nyim Rwot. Latic okelo lwak atego ryal ki atego jabu, ki lwak ginaruka, otiŋo omiyogi bot Labeka; ka dok omiyo ki ominne ki bot minne jami me wel. En ki jo ma gitye kwede gucako camo cam ki mat, ci gubuto nino acel kunnu. Ka gua malo odiko, ci olego ni, “Doŋ wucwala adok bot laditta.” Laban ki minne gugamo ni, “Wek koŋ anyaka obed kwedwa kare manok, ma romo ka nino apar; lacen en doŋ bicito gire.” Ogamo kun waco botgi ni, “Pe wugal wiya; macalo Rwot doŋ omiyo luguma okaya i wot man, wuwek doŋ acak wot, adok bot laditta.” Gugamo ni, “Koŋ walwoŋ nyako, wapenye.” Ka gilwoŋo Labeka, gipenyo kun giwacce ni “Ibiye wot ki laco man?” En ogamo ni “Abiwot.” Kit meno gucako cwalo nyagi Labeka ki lapidine, kacel ki latic pa Abraim ki jone. Gulamo gum i kom Labeka, kun giwacce ni, “Laminwa, bed min jo alip apar; ki likwayi gulo gaŋ pa lumerokgi! Lacen Labeka ki lwak aŋecane gua, gucako wot, guito wi kinaga kun gilubo kor laco meno; kit meno latic meno ocako wot ki Labeka, kun gidok i yo tugi. Icaka onoŋo obino oa ki Beerlakai-roi; i kare meno onoŋo en bedo i Negeb. Ka Icaka ocito woko i bar ka lwodo lok otyeno; ci otiŋo waŋe malo, oneno kinaga ka bino. Ka Labeka otiŋo waŋe malo, oneno Icaka, ci olor woko ki i wi kinaga, opye piny. Owaco ki latic ni, “Meno laco mene ma loka ca, ma woto i bar kun bino ka romo kwedwa-ni?” Latic ogamo ni. “En aye laditta-ni.” Labeka okwanyo boŋo oumme kwede. Latic otito bot Icaka lok ducu ma otimme. Icaka okelo Labeka i kema, ci obedo kwede, odoko dakone, kun mare bene. Kit meno cwiny Icaka ocako kwe ki i ŋe to pa minne. Abraim dok onyomo dako mukene, ma nyiŋe Ketula, En onywalle Jimran, Yokocan, Medan, Midian, Icibak ki Cua. Yokocan onywalo Ceba ki Dedan; litino awobe pa Dedan gin ene: Accurim, Letucim ki Leummim. Litino awobe pa Midian gin aye Epa, Eper, Kanok, Abida ki Eldaa. Gin ducu likwayo pa Ketula, Abraim omiyo jamine ducu bot Icaka. Ento litino awobe pa monne ma aŋeca Abraim opoko botgi mot bene, i kare ma pud en kwo; ci ocwalogi woko cen nia ki ka ŋet wode Icaka. Gudok tuŋ wokceŋ i lobo mudok tuŋ nyaŋo, Man aye wel nino me kwo pa Abraim; oromo mwaka miya acel ki pyeraryo wiye abic. Abraim oomo cwinye me agikkine, ci oto woko, ma mwakane doŋ dit, dano muteggi, ma doŋ oti, ci odok bot lutugi. Awobene Icaka ki Icmael guyiko kome i boro lyel ma i Makpela, ma i poto pa Epron wod pa Jokar, ma Lakit, tuŋ wokceŋ me Mamre, i poto ma yam Abraim owilo ki bot jo Kit. Giyiko Abraim kenyo, kacel ki dakone Cara. Lubaŋa ocako miyo gum ki Icaka ki i ŋe to pa wonne Abraim, Icaka ocako bedo i Beer-lakai-roi, Man aye likwayo pa Icmael wod pa Abraim, ma Agar aŋeca pa Cara, anyira Ejipt, onywalo ki Abraim. Man nyiŋ litino awobe pa Icmael, kun lubo kit ma ginywalogi kwede: Nebayot, en latin kayo pa Icmael; ki Kooar, Adbeel, Mibcam, Micima, Duma, Maca, Adad, Tema, Jetur, Napic ki Kedema. Man, aye awobe pa Icmael, nyiŋgi ene, kun lubo gaŋgi, ki kabedogi; gin luker apar wiye aryo macalo rokgi tye. Icmael yam ori wi lobo mwaka miya acel ki pyeradek wiye abiro; ci oomo cwinye me agikkine, oto woko, odok bot lutugi. Kabedogi yam ocakke nia ki Kavila nio wa i Cur mukemo tuŋ Ejipt ma dok tuŋ Aciria; en obedo i kabedone pat kun pyem ki utmegine ducu. Man aye likwayo pa Icaka, wod pa Abraim: Abraim onywalo Icaka, Icaka onyomo dakone Labeka kun onoŋo tye ki mwaka pyeraŋwen; Labeka yam nya pa Becweri ma jo Aram, ma i lobo Paddan-aram, lamin Laban ma jo Aram. Icaka ocako lego Lubaŋa pi dakone, pien onoŋo lalur; ci Rwot ocwako kor legane, ka dakone Labeka ogamo ic I kare ma litino gubedo ka twomme ki i iye, en owacci, “Ka ce gitimme kit meno, man nyuto gin aŋo?” Ci ocito ka penyo dog Rwot. Ka Rwot otitte ni, “Rok aryo aye gitye i ii, jo meno aryo-nu kingi bipokke woko ki i ii; acel bibedo oteka makato lawote, latin matidi aye biloyo latin kayo.” Ka kare me gonnyene oromo, ci litino rudi gunen i iye. Onywalo latin kayo ma kome kwar, kome ducu obedo ki yer calo boŋo yer; omiyo gicako nyiŋe ni Ecau. Lacen dok ginywalo ominne, kun ciŋe omako opuny tyen Ecau, omiyo gicako nyiŋe ni Yakobo. I kare ma ginywalo litino-nu onoŋo Icaka ditte doŋ romo mwaka pyerabicel. Awobe meno ka gudoŋo, ci Ecau obedo oken makwiri, ladwar i tim, Yakobo obedo lamwolo, kun bedo mere i kema mot. Icaka yam maro mere Ecau, pien onoŋo bedo ka camo ciŋe; ento Labeka dok onoŋo maro mere Yakobo. I kare ma Yakobo tye ka tedo dek ŋor, ci Ecau oa ki i tim, odwogo ma kec obwoye woko, Ecau olego Yakobo ni, “Miya dek ŋor mubok-ki acam, kec obwoya woko.” Pi lok meno omiyo gilwoŋo nyiŋe ni Edom. Yakobo owacce ni, “Koŋ icatta dit me anywallini.” Ecau ogamo ni, “An acok to woko; dit me anywalli kono konnye tye kwene?” Yakobo ogamo ni; “Koŋ icak ki kwoŋŋa kwoŋ.” Mumiyo en okwoŋŋe kwoŋ, ci ocato dit me anywalline woko bot Yakobo. Ka Yakobo omine kwon ki dek ŋor, ka ocamo, omato pii i wiye, ci oa malo, ocako wot ocito woko. Ecau ocayo dit me anywalline kit meno. Kec dok opoto i lobo aye, ma pat ki kec ma yam koŋ opoto i kare pa Abraim ca. Ka Icaka ocitoi -Gerar, bot Abimelek kabaka Piliciti. Ci Rwot onen bote kun wacce ni, “Pe icit i lobo Ejipt; ber ibed i lobo ma abititti. Koŋ ibed i lobo man, an bene abibedo kwedi, abimiyi gum; pien lobo man ducu abimiyo boti ki bot likwayi, dok abicobo kwoŋ ma yam akwoŋo bot woru Abraim. Abimiyo likwayi nya mapol macalo lwak lakalatwe me polo, abimiyo likwayi lobo man ducu; dok rok ducu ma wi lobo gibilimo gumgi ki i komgi; pien yam Abraim oworo doga, kun cobo cikka ki gin ma aciko ducu.” Icaka obedo i Gerar. Ka jo kunnu gupenye lok kom dakone, en ogamo ni, “En lamera”; pien olworo waco ni, “Dakona”, kun tamo ni, “Wek wegi lobo pe guneka woko pi Labeka”; pien onoŋo nen mwonya mada. Ka doŋ odikke kunnu kare malac, ci Abimelek kabaka pa jo Piliciti oneno Icaka ki i waŋ dirica ka obedo ka tuko ki dakone Labeka. Abimelek ocako lwoŋo Icaka owacce ni, “Nen, man dakoni; piŋo in kono nene iwacci, ‘En lamera’?” Icaka odokke iye ni, “Pien onoŋo atamo ni, Wek pe guneka woko pire. Abimelek ogamo ni, “Itimowa kuman piŋo? Ka nene dano mo obuto ki dakoni, kono ikelo bal i komwa nono.” Abimelek ocako juko lwakke ducu, kun waco ni, “Dano mo ka ogudo kom laco man, nyo dakone, gibineke woko.” Icaka ocoyo poto i lobo meno; ci okayo cam ma dodo tyen miya i mwakanu. Rwot aye omiye gum, dano-nu odoko lalonyo, obedo ka medde ki limo jami, nio ka odoko twon lalonyo. Olimo lim madwoŋ makwo, dyaŋi ki dyegi, ci gaŋŋe opoŋ ki lwak dano, omiyo nyeko omako jo Piliciti i kome. Onoŋo jo Piliciti gujuko waŋ it guculo woko ducu ki lobo, ma con lutic pa wonne aye yam gukwinyo i kare pa wonne Abraim. Abimelek ocako waco ki Icaka ni, “Doŋ koŋ ia woko ki botwa, pien itek ikatowa woko.” Ci Icaka oa woko ki botgi, ocito, ogony otiro i nota me Gerar, ci obedo iye. Icaka dok ocako golo waŋ pii ma yam gikwinyo i kare pa wonne Abraim; pien yam koŋ jo Piliciti guju kogi woko i kare ma doŋ wonne Abraim oto woko-ni; ci dok ocako ‘lwoŋo nyiŋgi kit ma yam wonne, olwoŋogi’ kwede, Ento lutic pa Icaka gutyeko kwinyo waŋ it i nota-nu, ci gunoŋo iye waŋ it maloŋo, Lukwat pa jo Gerar gucako da ki lukwat pa Icaka, kun giwaco ni, “Pii man mewa.” Mumiyo en ocako nyiŋ waŋ pii meno ni. Ecek,” ni pien gubedo ka da iye kwede. Ka doŋ okwinyo waŋ it mukene, dok gucako da pi eno bene; mumiyo olwoŋo ni Citna. Dok oa woko ki kunnu, okwinyo dok waŋ it mukene aye. Pe doŋ daa obedo tye pi meno; mumiyo olwoŋo nyiŋe ni Rekobot, kun waco ni, “Pien tin doŋ Rwot oyabowa kabedo malac, doŋ wabinya i lobe-ni.” Ka oa woko ki kunnu odak i Beer-ceba. Rwot dok oen bote i dyewor meno, ma wacce ni “An Lubaŋa pa woru Abraim; pe ilwor, pien atye kwedi, abimiyi gum, dok abimiyo likwayi nya mapol pi laticca Abraim.’ Omiyo ocano keno tyer pi Rwot kunnu, ci olwoŋo iye nyiŋ Rwot; ci oguro kemane kunnu. Luticpa Icaka dok gukwinyo waŋ it kunnu. Abimelek ocito bote, oa ki i Gerar, kacel ki Akujat lamiye tam, ki Pikol ladit lawimony mere, Ci Icaka owaco botgi ni, “Wunwubino bota pi lok aŋo, ma wun kono wudaga, dok yam doŋ wuryema ki i lobowu?” Gin gugamo ni, “Wan waneno atir ni Lubaŋa tye kwedi, mumiyo wawacci, wek kwoŋ obed i kin in ki wan, wek waket gicikke ki in, wek pe ibitimwa marac, macalo wan bene yam pe wagudo komi, pe bene watimo gin mo marac i komi, ento tim maberre keken, dok bene waryemi woko ia ki i kinwa ki kuc. Kombeddi in aye ŋat ma Rwot omiyo gum.” Ci otedogi karama, ka gucamo, gumato. Gua malo odiko con, ci gukwoŋo kwoŋ ŋat man ki lawote; ka doŋ Icaka olwokogi i yo tugi, gua, gupokke kwede ki kuc. I nino meno bene kikome en aye lutic pa Icaka gubino bote, gutitte lok kom waŋ it ma gityeko kwinyone, kun giwacce ni, “Watyeko noŋo pii.” Ocako nyiŋe ni Ciba, mumiyo nyiŋ gaŋ meno gilwoŋo ni Beer-ceba nio wa onyoo. Ka Ecau doŋ ditte romo mwaka pyeraŋwen, onyomo monne, Judit nya pa Beeri, jo Kit, ki Bacemat nya pa Elon, jo Kit bene. Gumiyo cwercwiny madwoŋ bot Icaka ki Labeka. Ka Icaka doŋ oti, ki waŋe bene doŋ ocido woko ma doŋ pe neno piny, ci olwoŋo latin kayone Ecau, owacce ni, “Latinna.” En ogamo ni, “Ana ene.” Ci owacce ni, “Nen, an doŋ ati woko, pe aŋeyo nino ma abito iye. Doŋ ikwany jami dwarri, ki jurani ki atummi, kat doŋ i tim, wek icidwarra lee, wek icella riŋo makur, kit ma amaro-ni, ci ikella, wek doŋ acam ciŋi, ka doŋ alammi gum ma peya ato.” I kare ma Icaka tye ka lok ki wode Ecau-ni, onoŋo Labeka bene winyo. Ka Ecau okato ocito ka dwaro lee i tim, wek ekel riŋo, Labeka owaco ki wode Yakobo ni, “Abedo ka winyo woru ka loko ki omeru ni, ‘Cikella riŋo, wek icella riŋo makur, wek doŋ acam ciŋi, ka doŋ alammi gum i nyim Rwot ma peya ato.’ Mumiyo latinna, worra doga i lok ma aciki-ni, Wot icit i kin dyegi, icikella litino dyegi aryo ma komgi bulubulu. Wek an ayub riŋone makur ki woru, kit ma en maroni, wek iter ki woru ocam ciŋi, wek olammi gum ma peya oto.” Ento Yakobo ogamo dog minne kun wacce ni “Nen ba, omera Ecau kome ki yer, an: koma pe ki yer. Gwok nyo ka wora biboŋa, ci abinen macalo acito ka nyware, miyo bicena, pe bilamma gum.” Minne ogamo doge kun waco ni, “Wek cenni opot i koma, latinna; worra doga keken, Ber iwot, icikelgi bota.” En ocito, okelogi bot minne, ka minne ocelo riŋo makur, kit ma wonne maro-ni. Ka Labeka okwanyo ginaruka pa wode Ecau, ma en yam ruko maberre-ni, ma noŋo tye i ot bot minne, ci oruko ki Yakobo wode matidi-ni. Ocako boyo laa litino dyegi-nu ki bade ducu, ki ŋute bene ka ma yer pe iye; ka otiŋo riŋo me ocelo makur-ri, ki kwon ma omyeno, omiyo i ciŋ wode Yakobo. En odonyo kwede bot wonne, owacce ni, “Aba”; en oye ni, “An atye en do; in aŋa ce, latinna?” Yakobo ogamo dog wonne ni, “An Ecau, latin kayoni. Atyeko timo kit ma nakanen ititta-ni; doŋ i cukke, ia malo wek icam ciŋa, ka doŋ ilamma gum.” Icaka owaco ki wode ni, “In onoŋo riŋo oyotoyot ma rom man niŋniŋ, latinna?” En ogamo ni, “Pien Rwot Lubaŋani omiyo gum okaya oyot.” Dok Icaka owaco bot Yakobo ni, “Koŋ inyik cok bota kany, wek aboŋ komi, latinna, wek aŋe ka in latinna Ecau kikome ada nyo pe.” Ka Yakobo ocako nyiko cok bot wonne Icaka; oboŋo kome, ci owacci, “Dwani dwan Yakobo, ento badi en aye bad Ecau.” Ci doŋ pe omedo ki ŋene, pien onoŋo bade ki yer macalo bad ominne Ecau. Ka ocako lamme gum kun waco ni, “In ada latinna Ecau kikome?” En odok iye ni, “An kikoma.” Ka dok owacce ni, “Kel cam bota cok, wek doŋ acam ciŋ latinna, ka doŋ alammi gum.” Ci oketo cam i nyime, ka ocamo; dok okelle koŋo vino, omato bene. Ka dok wonne Icaka owacce ni, “Bin cok, wek inot lema, latinna.” Ci onyiko cok bote, ka onoto leme; ka ocako ŋweyo ŋwec ginarukane, ka olamme gum, kun wacce ni, “Nen, ŋwec kom woda kur macalo poto ma Rwot omiyo gum kome! Lubaŋa omiyi toyo ma luk a ki i polo, ki lobo ma ceko cam mapek. Lwak jo mapol obed luticci, ki rok mapol bene giryebbe piny i nyimi. In aye ibed ladit ma loyo omegi, litino pa meni ducu giryebbe piny i nyimi. Cen obed i kom dano ducu ma biceni, dok gum obed i kom jo ducu ma bilammi gum!” Ka doŋ Icaka otyeko lamo gum ki Yakobo okato woko manok nia ki i nyim wonne Icaka, ominne Ecau ocako dwogo nia ki ka dwarre. En bene ocelo riŋo makur, okelo bot wonne. Owaco ki wonne ni, “Wore, doŋ icukke, ia malo, wek icam ciŋ latinni, ka wek doŋ ilamma gum.” Wonne Icaka owacce ni, “In aŋa doki?” Ogamo ni, “An a wodi do, latin kayoni, Ecau do.” Kom Icaka ocako myel matek twatwal, kun waco ni, “Aŋa ma nakanen koŋ odwaro lee, okella-ni, ma doŋ atyeko camone woko ducu, ma onoŋo peya idwogo-ni, dok atyeko lamma gum woko do, gum doŋ bidebo gire i kome.” Ka Ecau owinyo lok pa wonne, ocako tokke ki cwar koko madit, magwa bene, kun waco bot wonne ni, “Lamme gum bene do, aya abana!” En dok owacce ni, “Omeru obino, obwola, ci doŋ otyeko buyo gummi woko.” Ecau owacce ni, “Pe gicako nyiŋe Yakobo atir? Nen, en doŋ oridde ka laro jamina kiryo kulu. Okwoŋo buyo dit anywillina, doki nen, in bene dok otyeko buyo gumma woko.” Dok omedde ki waco lok ni, “In nene pe igwoko gum pira ce?” Icaka ogamo dog Ecau ni, “Nen, doŋ atyeko keto en me bedo rwodi otum, ki omege ducu atyeko miyogi me bedo luticce; amiye wa kal ki koŋo vino ducu gubed me pito en. Gin aŋo ma dok abimiyi ba, latinna?” Ecau dok owaco bot wonne ni, “Onoŋo itye ki gum acel keken bo, wora? Lamma gum, lamma gom mo bene do, aya abana.” Ecau otiŋo wiye malo ka koko. Wonne Icaka ocako gamo lokke ni, “Nen, ibibedo bor ki lobo ma ceko cam mapek, dok ibibedo bor ki toyo ma luk a ki malo i polo. Ibikwo meri ki lak pala lucwanni, ibibedo latic pa omeru; ento i kare ma ibijemo i kome, ci ibituro rii okol ma oriyo i ŋutini.” Ecau ocako kwero ominne pi gum ma wonne olamo i kome-ni. Ecau opiro lok i cwinye ni, “Kare me to pa wora doŋ onyiko cok; en aye abineko iye omera Yakobo bene.” Ento ka gitito ki Labeka lok pa latin kayone Ecau, en ocwalo dano, olwoŋo Yakobo wode matidine, owacce ni, “Nen, omeru Ecau obedo ma cwinye yom kun oyubbe me neki. Mumiyo in iwor doga, latinna; a malo, ilwi, iriŋ woko bot omera Laban i Karan. Koŋ icibed kuunu, nio waŋ ma kiniga pa omeru opye; wek wiye koŋ owil i gin ma yam itimo i keme-ni; ka doŋ abicwalo dano ka omi ki kunnu. Piŋo wun aryo ducu myero wurweny woko ki i waŋa lawaŋacel?” Ka Labeka dok owaco bot Icaka ni, “An doŋ kwona ool woko ki kit kwo pa mon Kit. Ka dok Yakobo bene binyomo anyira Kit ma rom ki mon ma gitye i lobo-ni, ci doŋ kwona konyo aŋo?” Ka Icaka olwoŋo Yakobo, ci olamme gum, ka ocike ni, “In doŋ pe inyom dako mo ki i kin anyira me Kanaan. Ber ia, icit Paddan-aram i ot pa kwaru Becweri ma won meni; en aye inyom iye nya pa Laban ma omin meni kikome. Lubaŋa Matweroducu omiyi gum, omiyi inya mapol, wek ibed lwak rok mapol. Dok omi gum pa Abraim opot i komi, ki i kom likwayi, wek icam lobo ma ibedo iye-ni macalo welo, ma yam Lubaŋa omiyo ki Abraim!” Kit meno Icaka ocwalo Yakobo, ocito i Paddan-aram bot Laban, wod pa Becweri me Aram, ma omin Labeka ma min Yakobo ki Ecau. Ecau oneno ni Icaka doŋ otyeko lamo gum i kom Yakobo, ka dok ocwale wa i Paddan-aram wek onyom dako ki kunnu, dok i kare ma olamme gum ocike ni, “In pe inyom nyako mo ki i kin Lukanaan,” dok Yakobo bene oworo dog wonne ki minne, ci ocito i Paddan-aram. Ka Ecau oneno ni kit pa anyira Kanaan pe yomo cwiny wonne Icaka, ci ocito bot jo Icmael, onyomo iye dako, omedo i kom mere ma con ca. Onyomo Makalat ma nya pa Icmael wod pa Abraim, ma lamiŋ Nebayot. Yakobo oa ki, Beer-ceba, ci odok tuŋ Karan. Ka oo i kabedo mo, obuto kenyo i dyewor meno, pien onoŋo ceŋ doŋ opoto woko. Ka otiŋo got acel mo ki i kin wadi, opyelo piny, oteno ki wiye, ci onino woko i kabedo meno, Lek obino i wiye, oneno rwom ma gijeŋo tere ocuŋ piny i ŋom, kun wiye gijeŋo oo wa i polo; ka oneno lumalaika pa Lubaŋa kun gilor piny, ka dok giito gidok malo. Oneno Rwot ocuŋ tuŋ ka wiye malo, kun waco ni, “An a Rwot, Lubaŋa pa kwaru Abraim, ki Lubaŋa pa Icaka; abimiyi lobo ma ibuto iye-ni, abimiyo boti ki bot likwayi; dok likwayi gibibedo ma rom ki apwa ‘me lobo, dok wubimedde wuromo yo tuŋ potoceŋ ki tuŋ wokceŋ, ki yo tuŋ acam ki tuŋ acuc bene; dok i kom in ki i kom likwayi en aye kaka ducu ma wi lobo bilimo iye gumgi. Nen, an atye kwedi, abigwoki ka ma ibiwoto iye ducu, dok abidwoki cen wa i lobo man; pe abiweki ata nio waŋ ma acobo gin ma atyeko i okone boti-ni.” Ka Yakobo oco woko ki i waŋ nino, ci owacci, “Rwot tye i kabedo-ni ada; onoŋo an kara pe aŋeyo.” Ci lworo ocako make, kun wacci, “Kabedo man kara lik kuman! Man ot pa Lubaŋa kikome, man aye dog gaŋ me polo.” Yakobo oa malo odiko con, otino got ma oteŋo ki wiye-ni, ci ocibo wek obed wir, ka oonyo moo i wiye. Ocako nyiŋ kabedo meno ni Betel; ento nia wa con onoŋo nyiŋ kabedo meno gilwoŋo ni Luj. Yakobo ocako kwoŋo kwoŋ kun waco ni, “Ka Lubaŋa bibedo kweda, kun gwoka i yo man ma awoto iye-ni, ka dok bimiya kwon me acama, ki boŋŋi me aruka, ka ce abidwogo wa i ot pa wora ki kuc, ci Rwot doŋ bibedo Lubaŋana, ki got man bene, ma acibo me bedo wir, bidoko ot pa Lubaŋa: ki gin ducu ma ibimina, an bene abimini dul acel me aparre.” Yakobo dok omedde ki wotte, ka oo i lo bo pa jo ma tuŋ wokceŋ, Ka obedo ka neno piny, ci oneno waŋ pii i dye bar, lwak romi gubuto piny dul adek ma gicok i ŋet waŋ pii; pien romi gimato pii i waŋ it meno. Got ma giumo ki doge bene dwoŋ: ka romi ducu doŋ gugurre, gucokke kunnu, ka lukwat gitorre, giloro got woko cen ki i dog waŋ pii, ka gimiyo romi gimato, ka dok giloro got, gidwoko cen, giumo ki dog waŋ pii kakare. Yakobo openyogi ni, “Utmega, wun wua ki kwene?” Gugamo ni, “Wan waa ki i Karan.” Owaco botgi ni, “Wun mono wuŋeyo Laban wod pa Nakor?” Gugamo ni, “Waŋeyo en.” Owaco botgi ni, “En tye maber kono?” Gugamo ni, “En tye maber gire. Nen, nyare Lakeri ka bino ki romigi ca!” En ogamo ni, “Nen, tipo peya olokke do, man peya kare me guro lim kacel; ber wumi pii ki romi, ci dok wuciti, wukwagi aye,” Ento gin gutitte ni, “Wan pe watwero miyogi, waŋ ma lim ducu gucokke, gugurre kacel, ka doŋ gicwalo got woko cen ki i dog waŋ pii, ka doŋ wamiyoromi pii.” Ka onoŋo en tye ka lok kwedgi, ci Lakeri ocoro ki romi pa wonne, ma onoŋo kwayogi. Ka Yakobo oneno Lakeri nya pa Laban, nya pa omin minne, ki romi pa nerone Laban, Yakobo okato ci ocwalo got woko cen ki i dog waŋ pii, ka ocako mi yo romi pa nerone Laban gumato pii. Ci Yakobo onoto lem Lakeri, kun kok matek. Yakobo otito ki Lakeri ni, en e wat pa wonne kikome, en e wod pa Labeka; ci en oriŋo, ocito otito ki wonne. Ka Laban owinyo lok kom Yakobo wod pa laminne, ci oriŋo ocito ka ŋolo wiye; okwako kore, onoto leme bene, ka ocako tere wa i ode. Yakobo oyeko lok magi ducu kikore bot Laban, ka Laban owacce ni, “In ada i cogona dok i riŋo koma bene!” Ci obedo kwede dwe acel. Laban ocako waco bot Yakobo ni, “Pien in i watta, doŋ ibitina tic nono bo? Ber ititta, imito aculli gin aŋo?” Onoŋo Laban tye ki anyirane aryo; nyiŋ nyare maditte Lea, ki nyiŋ matidine Lakeri. Lea onoŋo wane kiŋiŋic, ento Lakeri nen mwonya muliŋŋe, Yakobo onoŋo maro Lakeri: ci owacci, “Abitini tic mwaka abiro pi Lakeri, nyari matidi-ni.” Laban ogamo ni, “Onoŋo bedo ber ka amiyo en boti, kato ma kono amiyo bot dano mukene; bed bota.” Yakobo otiyo pi Lakeri mwaka abiro; kare meno obedo macalo nino manok mo ki bot Yakobo, pien onoŋo iye omaro Lakeri mada. Yakobo openyo Laban ni, “Doŋ imiya dakona wek abed kwede, pien kare doŋ oromo.” Laban otedo karama ci olwoŋo iye dano ducu ma gitye i kabedo meno. Ci okelo nyare Lea bot Yakobo otyeno, ocako bedo kwede. Laban omiyo aŋecane Jilpa bot nyare Lea wek okonye. Ka odiko ma piny oru, Yakobo oneno kara gimiye Lea. Yakobo owaco ki Laban ni, “Itima kuman piŋo? Onoŋo pe abedo ka tic boti pi Lakeri? Ibwola kuman piŋo?” Laban ogamo ni, “Pe gitimo kuman i lobo tuwa kany, pe gimiyo nyako matidi aye kwoŋo ger ki maditte. Koŋ ityek’ cabit pi man acel-li, ci dok wabimiyi giri mukene bene, ka ibitina tic mwaka abiro mukene.” Yakobo otimo kit meno; ocobo cabit pa Lea, ka Laban omiye nyare Lakeri me bedo dakone. Laban dok omiyo aŋecane Bila bot nyare Lakeri wek okonye. Yakobo ocako bedo ki Lakeri bene; cwinye omaro Lakeri makato Lea, dok omedde otiyo tic bot Laban mwaka mukene abiro. Ka Rwot oneno ni gidag Lea, ci oyabo iye; ento Lakeri ocuŋ ma pe nywal. Lea ogamo ic, onywalo latin laco, ci ocako nyiŋe Reuben, kun waco ni, “Pien Rwot oneno aromana; koni olo doŋ cwara bimara.” Dok ogamo ic, ci onywalo latin laco, owacci, “Pien Rwot owinyo ni gidaga, omiyo dok omiya latin man bene”; ci ocako nyiŋe ni Cimeon. Lacen dok ogamo ic, onywalo latin laco, owacci, “Cwara doŋ bidwogo i koma, pien doŋ anywalle awobe adek kulu”; mumiyo gicako nyiŋ latin-nu Levi. Dok ogamo ic, onywalo latin laco, owacci, “Man aye kare ma abipako iye Rwot”; mumiyo ocako nyiŋ latin Juda; ci koŋ ocuŋ woko. Ka Lakeri oneno ni pe enywalo latin mo ki Yakobo, ci nyeko omake kom laminne. Ka owaco bot Yakobo ni, “Miya litino; ka pe, ci adene woko.” Kiniga omako Yakobo i kom Lakeri, kun wacce ni, “Iketa adoko Lubaŋa bo, ma en ogeni nywalli?” Lakeri ogamo ni, “Aŋecana Bila en do, doŋ ibed kwede, wek onywal latin mo ma kakara, wek an bene anoŋ litino mogo ki tuŋ bote.” Ci omiyo aŋecane obedo dakone, Yakobo ocako bedo kwede, Bila ogamo ic, onywalo latin laco ki Yakobo. Lakeri owaco ni, “Lubaŋa otyeko ŋolla kop, owinyo ki dwana bene, ci omiya gira latin laco”; omiyo ocako nyiŋe Dan. Bila aŋeca pa Lakeri dok ogamo ic, onywalo latin laco ki Yakobo me aryone. Lakeri dok owacci, “Ka me lweny doŋ alwenyo matek wan ki lamera, ci aloye”; mumiyo ocako nyiŋ latin Naputali. Ka Lea bene oneno ni doŋ ecun woko, ma pe enywalo litino, ci otiŋo aŋecane Jilpa, omiyo ki Yakobo wek obed dakone. Aŋeca pa Lea bene onywalo latin laco ki Yakobo. Lea owacci, “Gum maber!” Mumiyo ocako nyiŋe Gad. Jilpa aŋeca pa Lea dok onywalo latin laco ki Yakobo me aryone, Lea owacci, “An koma gum! Pien mon gibilwoŋa ni lagumkom”; mumiyo en ocako nyiŋ latin ni Acer. I kare me kayo ŋano, Reuben ocito i poto, ci onoŋo iye yat nyodo, ci okelogi wa bot minne Lea. Ka Lakeri olego Lea ni, “Alegi, imiya yat nyodo pa wodi mogo do.” Ento en ogamo ni, “In imayo cwara woko ki bota, itamo ni lokke tidi ce? Man dok imito ni ikwany yat nyodo pa woda woko bene?” Lakeri ogamo ni, “En tin obut kwedi dyewor ma ka yat nyodo pa wodi.” Ka Yakobo odwogo nia ki i tim otyeno, Lea okato ocito ka ŋolo wiye iyo, owacce ni, “Myero tin idony i oda; pien atyeko wilo in ki yat nyodo pa woda.” Ci ocito obuto ki Lea i dyewor meno. Lubaŋa owinyo lega pa Lea, ci ogamo ic, onywalo latin laco me abicce ki Yakobo. Lea owacci, “Lubaŋa doŋ oculo waŋ miyo aŋecana bot cwara”; mumiyo ocako nyiŋe Icakar. Lea dok ogamo, oyac, onywalo latin me abicelle ki Yakobo. Lea dok owacci, “Lubaŋa doŋ omiya mot me lim keny mabeco; cwara doŋ biketta deyo, pien doŋ atyeko nywalle litino co abicel kulu”; mumiyo ocako nyiŋe Jabulon. Lacen dok onywalo nyare, ci ocako nyiŋe Dina. Lubaŋa doŋ ocako po i kom Lakeri, dok owinyo legane bene, ka oyabo iye. Ci ogamo, onywalo latin laco, kun wacci, “Lubaŋa otyeko kwanyo lewic woko ki i’ koma”; ci ocako nyiŋe Yucepu, kun wacci, “Myero Rwot dok omedda latin laco mo acel!” Ka Lakeri otyeko nywalo Yucepu, ci Yakobo owaco bot Laban ni, “Doŋ icwala wek adok paco i lobo tuwa. Miya monna ki litinona ma yam atiyo pigi boti-ni, wek doŋ aciti; in bene iŋeyo gin ma atiyo boti do.” Laban ogamo ni, “Ka iye, ci koŋ alokki gin mo; pien atyeto ci aniaŋ ni Rwot omiya gum pi in. Ber ititta gin ma imito amini me mucarani, ci abimini.” Yakobo owacce ni, “In kikomi iŋeyo kit ma atiyo ki ticci, ki kit ma agwoko kwede limmi. Pien yam ma peya abino onoŋo limmi nok mo, nen doŋ gumedde madwoŋ mukato; Rwot obedo ka mini gum ka ma adok iye ducu. Ento an abinoŋo lim ma tuŋ bota awene?” En ogamo ni, “Gin aŋo ma abimini?” Yakobo ogamo ni, “In pe ibimiya gin mo wacel. Ka ibiye, tima gin macalo man, an abimedde ka kwayo limmi, ki gwokogi bene. Wek tin acit awot i kin limmi ducu, wek ayer ki i kingi romi ma gubedo aciri aciri ki ma abacabac, ki litino romi macol ducu, kacel ki dyegi ma gubedo abacabac ki ma aciri aciri; meno gin aye gibibedo mucarana. Kit meno leŋ cwinya binen lacen, ka ibibino ka ŋiyo kom mucarana. Ka ibinoŋ o dyegi ma komgi pe aciri aciri ki abacabac, ki litino romi ma pe gicol gitye i kin mega, meno gibikwano ni ma gikwalo.” Ci Laban ogamo ni, “Ber, wek obed kit ma iwaco-ni.” Ento i nino meno Laban okoyo nyogi dyegi ma gubedo kitana kitana, ki ma abacabac, ki megi dyegi ma gubedo aciri aciri ki abacabac, ma kitartar ducu, ki litino romi ducu macol, oketo i cin awobene. Opoko kingi woko ki Yakobo ma borre romo wot me nino adek kulu; Yakobo odoŋ ka kwayo lim pa Laban mudoŋŋe, Yakobo ocako jako jaŋ pobo madyak ki yaa ki ogali, ci oŋweko pokgi, wek kom kedi onen ŋwalaŋwala. Oketo kedi ma onweko komgi, opyelogi i nyim romi i weer pii, ka ma gionyo iye pii, ka ma lim cito iye ka mato pii, pien nyogine giyito megine ka gibino ka mato pii. Ka giyitogi i nyim kedi, omiyo ginywalo litino ma akolakol, ki ma aciri aciri ki ma abacabac. Yakobo dok opoko litino romi pat, oloko waŋ lim ka neno gin ma akolakol ki lwak lim pa Laban macolle ducu, ka opoko dul limme pat kun pe dok ribogi ki pa Laban. I kare ma nyogi yito megine matego, ci Yakobo pyelo kedi i weer pii i nyim romi, wek oyitte i nyim kedi, ento ka megine magorogoro aye giyitogi, en pe pyelo kedi i nyimgi; pienno lim magoro ducu pa Laban, mategone ducu pa Yakobo. Kit meno laco meno odoko lalonyo madwoŋ, ma tye ki lwak lim, ki lwak aŋeca ki lwak opiine, ki lwak kinaga ki kana. Yakobo obedo ka winyo kun awo be pa Laban giwaco ni, “Yakobo doŋ otero lim pa wonwa woko ducu, olimo lonyo nia ki i kom lim pa wonwa.” Yakobo oneno ni waŋ Laban oballe woko i kome, pe dok nene maber kit macon. Rwot owaco bot Yakobo ni, “Doŋ idok i lobo pa kwarowu bot lutuwu, an abibedo kwedi.” Yakobo olwoŋo Lakeri ki Lea i bar olet ka ma limme tye iye, ci owaco botgi ni, “An aneno waŋ wonwu ocido woko i koma, pe doŋ nena maber kit macon. Ento Lubaŋa pa wora yam tye kweda. Wun wuŋeyo ni atyeko tic bot wonwu ki tekka ducu; ci en obedo ka bwola, kun loko mucarana atata tyen apar kulu, ento Lubaŋa pe oye en otimo gin mo marac i koma, Ka owaco ni, ‘Lim ma abacabac bibedo meri me mucarani,’ ci lim ducu ginywal mubedo abacabac keken. Ka dok oloko doge ni, ‘Lim ma gibedo akolakol gin aye bibedo meri me mucarani,’ ci lim ducu dok ginywal akolakol. Meno aye kit ma Lubaŋa okwanyo kwede lim pa wonwu ci omiyogi bota. “I kare ma megine giyitogi, atiŋo waŋa malo ki i waŋ lek, ci aneno nyogi ma gitigo megine komgi obedo akolakol ki abacabac ki opukopuk. Lamalaika pa Lubaŋa owacca i waŋ lek ni,. ‘Yakobo’, an agamo ni, ‘An a ene!’ Ci owacca ni, ‘Tiŋ waŋi malo wek inen, nyogi ducu ma gitigo megine-ni gubedo akolakol ki abacabac ki opukopuk; pien atyeko neno kit ma Laban timi kwede. An Lubaŋa me Betel, ka ma yam iwiro iye wir ki moo, ka ikwoŋo iye kwoŋ bota-ni, Doŋ ia malo, icit woko cen ki i lobe-ni, idok i lobo ma ginywali iye ca.’ ” Lakeri ki Lea gugamo ni, “Tye dok dul lim mo nyo ginaleya mo ma dok odoŋ piwa i ot pa wonwa? Pe doŋ en nenowa macalo lurok ata? Doŋ otyeko catowa woko, tye ka camo bene lim ma gimiyo piwa woko. Lim ducu ma doŋ Lubaŋa otyeko kwanyo ki bot wonwa doŋ mewa ki pa litinowa; doŋ gin ducu ma Lubaŋa owacci aye itim.” Yakobo oa, oketo awobene ki monne i wi kinaga, oleko limme ducu, ma yam olimo i Paddan-aram; ci ocako wot me dok i lobo Kanaan bot Icaka. Laban onoŋo ocito ka ŋolo yer kom romine, ci Lakeri okwalo cal lubaŋa ki i ot pa, wonne. Yakobo obwolo Laban La-aram, pe otitte pi wotte. Olwi ki lwak lim ducu ma yam tye kwede, ka ocako wot, oŋolo kulu Euprate, ci okemo lobo godi me Gilead. Ka nino okato adek kulu, ci gitito bot Laban ni, “Yakobo doŋ otyeko lwi, ocito woko.” En ogwarre ki lutugi, gutwarre, gulubo kore; ka guwoto nino abiro, ci gudiŋo kore cokcok i kin godi me Gilead. Ento Lubaŋa obino bot Laban La-aram i waŋ lek, kun wacce ni, “Gwokke, pe icilok lok mo maber nyo marac bot Yakobo.” Laban omako Yakobo iyo. Onoŋo doŋ otyeko gony woko i lobo godi, ci Laban ki lutugi gugony i lobo godi meno me Gilead. Laban ocako lok ki Yakobo ni, “Itimo kuman piŋo, ma ibwola kit man, doŋ itiŋo anyirana, ilwi kwedgi, macalo iyakogi ayaka ki pala lucwan-ni? Piŋo ilwi woko alwiya i muŋ ali, kun iumo waŋa ma pe ititta gin mo, ma kono nene aciki ki yomcwiny ki wer ki ajaa ki opuk? Piŋo pe iweko aciko litinona kun anoto lem anyirana? Man itimo gin me caro a tika. Onoŋo atwero timi marac; ento Lubaŋa pa woru oloko kweda tin i dyewor, ocika ni ‘Gwokke pe icilok lok mo maber nyo’ marac bot Yakobo.’ Man doŋ ia icako wot woko, pien pi ot pa woru’ odoko mitti mada; ento dok ikwalo ki cal lubaŋana me ŋo kono?” Yakobo ogamo dog Laban ni, “Onoŋo abedo ki lworo, abedo ka tamo ni gwok nyo ibimayo anyirani woko ki bota. Ka ibinoŋo cal lubaŋani bot ŋatti mo kany, ŋat meno pe bikwo. Cim koni jamini ma inoŋo tye bota kany i nyim utmegiwa ci ikwany idok giri kwede, “Onoŋo Yakobo pe oŋeyo ni Lakeri aye ma okwalogi. Kit meno Laban ocako donyo i kemapa Yakobo, ki i kema pa Lea, ki i kema pa mon aŋeca aryo-nu ducu, ci pe omedo ki nonogi; ka okato woko ki i kema pa Lea, dok odonyo i kema pa Lakeri. I kare meno onoŋo Lakeri otiŋo lubaŋa-nu, ci orwakogi i kom me bedo i wi kinaga; ci obedo i wigi. Laban oŋiyo jami ma i kema ducu, pe omedo ki noŋogi. Lakeri owaco bot wonne ni, “Laditta, pe kiniga omaki i koma ka ineno ni pe atwero a malo i nyimi, pien atye ki kit pa wan mon.” Kit meno Laban oyenyo cal lubaŋane kwe, pe omedo ki noŋogi. Kiniga omako Yakobo, ocako da ki Laban, kun waco bot Laban ni, “Balla doŋ tye kwene kaa? Atimo bal aŋo, mumiyo ilubo kora twatwal-li? Kadi bed iyenyo i kin jamina ducu, kit gin aŋo ma inoŋo i kom jami ducu ma oa i odi? Kel iket kany i nyim utmegini ki utmegina, wek guŋol kop i kin wan aryo-ni. An abedo kwedi mwaka pyeraryo; pe i megi romini ki megi dyegini mo opoto, pe bene acamo nyok romoni mo. Lim ma ŋuu aye omwodo pe akelo riŋone boti, an aye aculo gira; lim ma gikwalo i dyeceŋ ki i dyewor ipenyo bota. Yam abedo kit meno, kun ceŋ waŋa dyeceŋ, koyo neka dyewor, pe aketo nino mo i waŋa, I lwak mwaka pyeraryo ma abedo kwedi i odi-ni, atiyo boti mwaka apar wiye aŋwen pi anyirani aryo-ni, ki mwaka abicel pi limmi, ibedo ka loko mucarana tyen apar kulu. Ka ce Lubaŋa pa wora, Lubaŋa pa Abraim ma Icaka bene lworo, pe obedo tuŋ bota, kono tin icwala adok tuwa ki ciŋa noŋo adada. Lubaŋa oneno twon aromana, ki tic ma atiyo ki ciŋa ci tin dyewor bene ojuki.’ ” Laban ogamo kun dok iye bot Yakobo ni, “Anyira man gin anyirana, ki litino bene gin litinona, lim bene gin limma, ki gin ma ineno-ni gin ducu limma. Ento abitimo gin aŋo tin i kom anyirana-ni, nyo i kom litinogi ma gunywalo? Doŋ ibin wek waket gicikke i kin in ki an, me bedo caden i kin in ki an.” Ci Yakobo otino got ocibo wek obed wir. Ka Yakobo owaco bot utmegine ni, “Wucok got”, ci gucoko got, guguro kacel, ka gucamo cam i ŋet odur got meno, Laban ocako nyiŋ kabedo meno ni Jegarcaduta; ento Yakobo ocako nyiŋe ni Galeed. Laban owacci, “Odur man en aye caden i kin in ki an tin.” Mumiyo ocako nyiŋe Galeed. Ocako nyiŋ wir meno ni Mijpa, pien owacci, “Rwot ogwok kin an ki in, ka kinwa doŋ bipokke woko. Ka ibiketo giŋi marac i kom anyirana, nyo ka dok ibinyomo mon mukene, idodogi i kom anyirana, kadi ŋatti mo pe tye kwedwa, ber ipo ni Lubaŋa en aye caden i kin in ki an,” Ci Laban dok owaco bot Yakobo ni, “Nen odur man, ki wir ma atyeko cibo i kin in ki an. Odur man aye caden, ki wir bene en caden, an pe abikato ka ŋet odur man pi cito boti, in bene pe ibikato ka ŋet odur man ki wir man pi cito bota, ni pi tim marac. Lubaŋa pa Abraim, Lubaŋa pa Nakor, Lubaŋa pa wongi, obed laŋolkop i kinwa.” Kit meno Yakobo okwoŋo kwoŋ ki nyiŋ Lubaŋa ma wonne Icaka lworo, Yakobo otyero gitum i wi got, kun olwoŋo iye utmegine ducu ka camo cam kwede, ci gucamo gubuto kunnu i wi got. Ka piny oru odiko con, Laban oa, onoto lem likwaye ki lem anyirane, olamo gum i komgi, ci opokke kwedgi odok i gaŋŋe.’ Yakobo omedde ki wotte ci lumalaika pa Rwot guromo kwede. Ka Yakobo onenogi, owacci, “Man mony pa Lubaŋa!” Mumiyo olwoŋo nyiŋ kabedo-nu ni Makanaim. Yakobo ocwalo lukwena bot ominne Ecau ma tye i lobo Ceir, i lobo pa jo Edom. Opwonyogi ni, “Wubiwaco bot laditta Ecau kit man: Laticci Yakobo owacci, ‘Doŋ atyeko bedo bot Laban abedo nio wa i kare-ni, Atye ki twoni ki lwak kana, ki lwak lim, ki lwak opii ki lwak aŋeca; acwalo kwena boti laditta wek anoŋ pwoc mo ki tuŋ boti.’ ” Ka lukwena gudwogo bot Yakobo, guwacce ni, “Wao bot omeru Ecau, en obebino ka jolo wii i yo, kacel ki jo miya aŋwen.” Lworo omako Yakobo matek kome bene oryaŋŋe woko; ci opoko kin jo ma onoŋo gitye kwede, ki dyegi ki dyaŋi, ki kinaga, dul aryo, kun tamo ni “Ka Ecau obino olwenyo i kom dul man acel-li otyeko woko, ci dul acel mudoŋ ca bibwot.” Yakobo olego ni, “Ai Lubaŋa pa kwara Abraim, Lubaŋa pa wora Icaka, ai Rwot in ma yam iwacca ni, ‘Doŋ idok tuwu bot kakawu, an abitimi maber,’ an pe amyero kadi matidi mo ki mar meri ducu ma pe lokke, ki ada meri ducu ma inyuto i kom an laticci; pien con aŋolo kulu Jordan ma kun atye ki odoona keken, ci kombeddi doŋ apokke dul aryo kulu. Alegi ni ilara ki i ciŋ omera, lara ki i ciŋ Ecau; pien alwore, gwok nyo obebino ka nekowa ducu mon ki litinogi. Ento yam onoŋo ‘iwaco ni, ‘Abitimi ber, abimiyo likwayi bedo macalo kweyo ma i dog nam, ma pe kwanne pi dwoŋŋe.’ ” En obuto kenyo i nino meno, okwanyo dul lim mogo ma yam tye kwede ocwalo bot ominne Ecau, megi dyegi miya aryo ki nyogi dyegi pyeraryo, megi romi miya aryo ki nyogi romi pyeraryo, megi kinaga ma ginyeto cakgi pyeradek ki litinogi, megi dyaŋi pyeraŋwen ki twoni apar, megi kana pyeraryo ki twoni kana apar. Otiŋo man ducu, omiyo i ciŋ luticce, kun gilekogi dul ki dul patpat. Ociko luticce ni, “Wun wukat i nyima, wek kinwu obed mabocoboco ka wutye ka lekogi.” Ociko latel yo ni, “Ka omera Ecau oromo kwedi, ce openyi ni, ‘Wun jo pa aŋa? Wucito kwene? Lim man ma i nyimwu-ni pa aŋa?’ Ibiwacce ni, ‘Lim pa laticci Yakobo; gin aye mot ma ocwalo bot laditte Ecau; en bene pud odoŋ ceŋ i newa.’ ” Omedde ki pwonyo dano me aryo ki me adekke, ki gin ducu ma gileko lim, ocikogi ni, “Wubiloko lok ma romrom bot Ecau ka wuromo kwede, ka wubiwacce ni, ‘Dok bene laticci Yakobo aye odoŋ cen i ŋewa.’ ” Onoŋo otamo ni, “Wek akwe cwinye ki mot ma ocito anyim-mi, ci lacen olo abineno waŋe twal, dok en bene gwok doŋ bijola.” Kit meno mot okwoŋo nyime, kun en kikome obuto i gony i dyewor meno. I dyewor meno en oa malo, ci okwanyo monne aryo, aŋecane aryo, kacel ki litinone apar wiye acel, owoto oŋolo kwedgi kulu Jabok i waŋ wat apara. Okwanyogi, omiyo guŋolo kulu, kacel ki lim ma ‘en tye kwede ducu. Yakobo ka odoŋ kene, laco mo obino, ocako rette kwede nio wa kwarpiny. Ka laco meno oneno ni pe doŋ etwero loyo Yakobo, ci otwomo awaŋ-macce; ci em Yakobo otuk owil woko lacuno ma en rette kwede. Owacce ni, “Weka doŋ aciti, pien piny doŋ mito ru woko.” Ento Yakobo ogamo ni, “Pe abiweki, nio waŋ ma koŋ ilamma gum.” En ogamo ni, “Nyiŋi kono aŋa?” En owacci, “Yakobo.” Ci dok owacce ni, “Nia tin nyiŋi doŋ pe gibilwoŋo ni Yakobo, ento ni Icrael, pien ibedo ka lweny ki Lubaŋa, dok ki dano bene, ci imedo ki loyo.” Yakobo dok openye ni, “Alegi ni itucca nyiŋi do.” En owacce ni, “Ipenyo nyiŋa kono piŋo?” Omiye gum ka kenyo. Ci Yakobo ocako nyiŋ kabedo meno ni, Peniel, kun wacci, “Pien atyeko neno Lubaŋa waŋ ki waŋ, ento pud akwo gira aye.” Ceŋ otucce i Peniel kun doŋ woto ma komo akoma pi eme ma otuk owil woko-ni. Omiyo wa i kare man Luicrael gikwero riŋo puc me bam ma tye i awaŋ-mac, pien Lubaŋa otwomo me Yakobo i ler awaŋ-mac, Ka Yakobo otiŋo waŋe malo, ci oneno ka Ecau bino, kacel ki jone miya aŋwen, Ocako poko litino i kin Lea ki Lakeri ki bot aŋecane aryo-ni. Ocwalo aŋeca ki litinogi anyim, ka dok Lea ki litinone, ka doŋ Lakeri ki Yucepu gucoko korgi ducu. En kikome obolle, ocito anyim, kun woto ryebbe piny tyen abiro nio ka oo kwede cok bot ominne. Ento Ecau otokke ki ŋwec, oriŋo ka mote, ci opoto okwako kore, ka omako ŋute, onoto leme, ci gucako koko. Ka dok Ecau otiŋo waŋe malo, ci oneno lwak mon ki litinogi, owacci, “Maca kono jo mene ma gibino-ni?” Yakobo ogamo ni, “Meno aye gin litino ma Lubaŋa omiyo ki laticci pi kicane.” Ka aŋeca gunyiko cok, kacel ki litinogi, ci guryebbe piny; Lea bene kit meno kacel ki litinone ka gunyiko cok ci guryebbe piny; me agikkine Yucepu ki Lakeri gunyiko cok, gin bene guryebbe piny. Ecau owacci, “Lwak man ma arwatte kwedgi ducu, te lokke aŋo?” Yakobo ogamo ni, “Wek anen maber-ber i nyim laditta.” Ento Ecau owacci, “An atye ki ma roma, omera; wek lim man ducu gubed meri.” Yakobo ogamo ni, “Aa, pe. Alegi ni, ka ineno an ayomo cwinyi, ci ber igam mot ma amiyi ki ciŋa-ni; pien ada, ka aneno waŋi, rom ki ma aneno waŋ Lubaŋa, pi kit cwiny maber ma ijola kwede-ni. Alegi igam mot ma amiyo gikelo boti-ni, pien Lubaŋa doŋ onyuto kicane i koma, dok bene atye ki mera ma roma.” Obedo ka ride ki lok meno, nio ka oye, ogamo motte. Lacen Ecau owacci, “Wek doŋ wanywaku yo kacel, kun atelo nyimi.” Ento Yakobo ogamo ni, “Laditta, iŋeyo ni litino pud peya guteggi, dok atye ka gwoko romi ki dyaŋi ma pud gidoto litinogi; ka wamiyogi wot malac, bibwoyogi woko, kadi bed pi nino acel, lim ducu gibito woko. Wek in laditta iwot, icit anyim i nyim laticci, kun an alubo kori motmot, muporo wot pa lim mutella yo, ki wot pa litino, nio ka abio boti i Ceir.” Ecau ogamo ni, “Wek awek boti jo mogo ma abino kwedgi-ni.” Ento en owacci, “Gimitte piŋo? Laditta, tima ber, wek doŋ obed kit meno.” Kumeno Ecau ocako wot i nino meno me dok i Ceir. Yakobo owoto odok mere tuŋ Cukot, ogero ode pire kene dok oguro dwol dyaŋine. Mumiyo nyiŋ kabedo meno gilwoŋo ni Cukot. Lacen Yakobo oo ki kuc i gaŋ me Cekem, ma tye i lobo Kanaan, kun oa ki i Paddan-aram; oguro kemane i nyim gaŋ, Dul-latin lobo ma oguro iye kema-ni, owilo ki bot litino pa Kamor, ma won Cekem, ki wellim ma romo miya acel. Ocano keno tyer kunnu, ci olwoŋo ni El-Eloe-Icrael. Dina nya pa Lea, ma onywalo ki Yakobo, ocito ka limo mon ma i lobo meno. Cekem wod pa Kamor ma Lakiv, laker me lobo meno, ka onene, ci omake tektek obuto kwede, omiye lewic. Cwinye omaro Dina nya pa Yakobo; omaro nyako, kun loko kwede mot mupye, Cekem oloko ki wonne Kamor ni, “Nyomma nyako man, obed dakona.” Yakobo owinyo ni otyeko ronyo nyare Dina; ento onoŋo awobene gitye ki limme i olet. Yakobo odiyo cwinye, oliŋ gire mot, nio ka gudwogo, Kamor won Cekem ocito bot Yakobo ka penyo keny. Ka awobe pa Yakobo guwinyo lok meno, gua ki i olet, gudwogo, ci gukeco, kiniga omakogi, pien otimo gin ma pe myero i Icrael, pi buta ki nya pa Yakobo, pien kit tim macalo meno pe myero otimme. Kamor oloko kwedgi kun waco ni, “Tipo kom woda doŋ omaro nyawu; alegowu, wuwek en onyom nyawu, obed dakone. Wek nyomme obed i kinwa kwedwu; wumi anyirawu botwa, wun bene wunyom anyirawa, wuter. Wun wubibedo kwedwa, wubibedo i lobo-ni macalo wumito; wubed iye wucat iye wilwu, wek wulim iye lim.” Cekem bene owaco kit meno bot won nyako ki omegine, ni, “Ber wujol kennya, abikelo botwu lim ducu ma wuŋolla. Wuŋolla wel lim kit ma wumito ducu ki me ayal, abikolo lim kit ma wubiwacca; ento wumiya anyom nyako-ni obed dakona.” Awobe pa Yakobo gugamo dog Cekem ki wonne Kamor kun gibwologi abwola, pien oronyo lamingi Dina. Guwaco botgi ni, “Pe watwero tiyo iye gin mo, ento miyo laminwa bot dano ma pe giliro, meno bikelo lewic i komwa. Tye yo acel keken; ka otimme, ci miyo waye, en ene: ka wudoko macalo wan, ka dano acel acel ma laco i kinwu olirre. Miyo wan doŋ wabimiyowu anyirawa, ki wan bene doŋ wabinyomo anyirawu; ci doŋ wabibedo i kinwu macalo wat acel. Ento ka pe wuwinyo lokwa, ka wukwero Lirre, ci wakwanyo nyawa, waa, wacito giwa.” Lokgi oyomo cwiny Kamor ki wode Cekem. Latin awobi orune ka timo woko cut, pien onoŋo cwinye yom i kom nya pa Yakobo, Onoŋo yam giwore makato jo ducu ma i ot pa wonne. Kit meno Kamor ki wode Cekem gucito i dog gaŋgi, ci guwaco bot jo me gaŋgi ni, “Jo man gimer kwedwa; waweku gin gubed i lobo, gucat wilgi iye; nen, lobo-ni tye malac ma romogi; wuwek wanyom anyiragi, wek wami gin bene gunyom anyirawa, Tye lok acel ma bimiyo giye bedo i kinwa, en aye bedo wat acel, ka laco acel acel i kinwa bilirre, kit macalo gin gilirre. Pe limgi, ki lonyogi ki lwak lee ma tye i ciŋgi ducu gibidoko limwa? Ber waye lokgi wek gubed kwedwa.” Ci jo ducu ma guwok ki i dog gaŋ guwinyo lok pa Kamor ki wode Cekem; co ducu ki acel acel gulirre, lwak ducu ma guwok ki i dog gaŋ meno. Ka nino okato adek, ma doŋ bur okwok, ci awobe pa Yakobo aryo, Cimeon ki Levi, omegi Dina, gukwanyo pala lucwan, gucito, guturo ki donyo i gaŋ ma pe wegine giŋeyo, ci guneko co woko ducu. Ka guneko Kamor ki wode Cekem ki pala lucwan, ci gukwanyo Dina woko ki i ot pa Cekem, gucito kwede. Awobe pa Yakobo gucorre i gaŋ pa luto, guyako iye jamigi pi ronyo lamingi. Guyako dyegigi ki dyaŋigi, ki lwak kana, ki jami ducu ma tye i gaŋ ki ma tye i potti bene. Guyako lwak lonyogi ducu, ki litinogi ducu ki mon megi, ki jami ma i odigi ducu, gutero matwal. Ci Yakobo owaco bot Cimeon ki Levi ni, “Wun wukelo ayela i koma, wumiyo nyiŋa odoko ŋwe lituny i kin wegi lobo-ni, Lukanaan ki Luperiji, An lwakka nok mo, ka ce gucokke kacel me lweny kweda, gibityeka woko liweŋ, an kacel ki oda ducu.” Ento gugamo ni, “Myero doŋ gubed ki laminwa macalo lakwele bo?” Lubaŋa owaco bot Yakobo ni, “A woko icit i Betel, wek ibed kunnu; dok ican keno tyer kunnu ka ma yam an anen iye boti i kare ma iriŋo ilwi woko ki bot omeru Ecau.” Omiyo Yakobo owaco bot jo ma i ode ki jo ducu ma gibedo bote ni, “Wubol lwak cal lubaŋa pa lurok ma wutye kwedgi i kinwu-ni, wulonnye kenwu, wulok ginarukawu; ka doŋ waayu, wacitu woko wa i Betel, wek acit acan keno tyer pi Lubaŋa ma yam ogamo doga i nino ma yam can odiŋani, ma obedo kweda i kabedo ducu ma awoto iye.” Gumiyo ki Yakobo cal ducu, ki agit ma noŋo tye i itgi bene; ci cal lubaŋa pa lurok ma gitye kwede Yakobo oyikogi piny i te yat kworo ma yam tye cok ki Cekem. Ka gitye ka wot, lworo ma oa ki bot Lubaŋa opoto i kom wegi gaŋi ma tye cok kwedgi, omiyo pe gulubo kor awobe pa Yakobo. Yakobo otiro i Luj ma en aye Betel, ma tye i lobo Kanaan, en kacel ki lwak dano ducu ma yam gitye kwede. Ocano keno tyer kunnu, olwoŋo nyiŋ kabedo meno ni El-betel pien onoŋo Lubaŋa yam onen iye bote i kare ma olwi oriŋo woko ki bot ominne. Debola lapidi pa Labeka oto woko, ci giyike i te yat kworo ma i ŋet Betel; mumiyo nyiŋ kabedo meno gilwoŋo ni Alon-bakut. Lubaŋa dok onyutte bot Yakobo i kare ma en oa ki i Paddan-aram, ci omiye gum. Lubaŋa owacce ni, “Nyiŋi Yakobo; pe dok gibilwoŋo nyiŋi ni Yakobo, ento nyiŋi doŋ bibedo Icrael.” Omiyo nyiŋe odoko Icrael. Lubaŋa dok owacce ni, “An Lubaŋa Matwero-ducu; nywal, inya; rok ki lwak rok mapol bia i komi, ki luker bene gibia ki i komi. Lobo ma yam amiyo ki Abraim ki Icaka abimiyo boti, ka dok abimiyo lobo bot likwayi ma gibilubi.” Lubaŋa ocako a ki i kabedo ka ma yam oloko iye kwede-ni odok malo. Ci Yakobo ocibo wii i kabedo ka ma oloko iye kwede-ni, ocibo iye wir got; oonyo gityer amata i keme, ka oliyo moo i kome. Yakobo ocako nyiŋ kabedo ma Lubaŋa oloko iye kwede-ni ni Betel. Gumedde ki wot nia ki i Betel: i kare ma pud Eprat kiborbor, mwoc Ogoyo Lakeri, ci nyodone obedo tek, Ka doŋ nyodone obedo tek, dako lacolo owacce ni, “Pe ilwor; tin doki ibinywalo latin laco mukene.” I kare ma en to ma cwinye cok ka tum, ocako nyiŋ latinne ni. Benoni; ento wonne ocako nyiŋe ni Benjamin. Lakeri oto woko kit meno, ci giyike i yo ma cito Eprat, ma en aye Beterekem. Yakobo ocibo wir got i wi lyel pa Lakeri; meno wir lyel pa Lakeri ma pud tye ocuŋ kunnu nio wa i kare man. Icrael omedde ki wotte, ogony i ŋe lubele me Eder ma wiye ocudo malo. I kare ma Icrael tye i lobo meno, ci wode Reuben otimo caro, obuto ki ci-wonne Bila ma aŋeca; ci wonne owinyo pire bene. Yakobo yam tye ki awobene apar wiye aryo, Litino awobe pa Lea gin aye Reuben, latin kayo pa Yakobo, Cimeon, Levi, Juda, Icakar ki Jabulon. Litino awobe pa Lakeri gin aye Yucepu ki Benjamin. Litino awobe pa Bila, aŋeca: pa Lakeri, gin aye Dan ki Naputali. Litino awobe pa Jilpa, aŋeca pa Lea, gin aye Gad ki Acer. Meno gin aye litino awobe pa Yakobo ma ginywalogi i Paddan-aram. Yakobo obino bot wonne Icaka i Mamre, i Kiriat-arba, en aye Kebron ka ma yam Abraim ki Icaka gubedo iye. Icaka yam ori wi lobo mwaka miya acel ki pyeraboro, Icaka oomo cwinye me agikkine, oto woko ci odok oto, lutugi, dano muteggi, ma doŋ oti; ci awobene Ecau ki Yakobo guyiko kome. Man-aye likwayo pa Ecau, en Edom. Ecau onyomo anyira Kanaan: Ada nya pa Elon Lakit, Okolibama nya pa Ana, wod pa Jibeon Lakiv, ki Bacemat nya pa Icmael, lamin Nebayot, Ada onywalo ki Ecau Erifaji; Bacemat onywalo Reuel; ki Okolibama onywalo Jeuc, Jalam ki Kora; meno aye litino awobe ma ginywalo ki Ecau i lobo Kanaan. Ecau otero monne ki litino awobene ki anyirane, ki lwak jo ducu ma en tye kwede, ki limme, lee mere ducu ki lonyone ducu ma olimogi ki i lobo Kanaan, odak kwedgi i lobo mukene kun opokke ki ominne Yakobo. Onoŋo gin ducu gitye ki lim madwoŋ, ma pe doŋ romogi bedo kacel: pien lobo ma onoŋo gibedo iye pe romo me kwayo limgi, Omiyo Ecau odak obedo i lobo godi me Ceir; Ecau en aye Edom. Likwayo pa Ecau won jo Edom ma i lobo godi me Ceir gin ene. Man aye nyiŋ litino awobe pa Ecau: Erifaji wod pa Ada ma, dako pa Ecau, ki Reuel wod pa Bacemat dako pa Ecau. Litino awobe pa Erifaji gin Teman Omar Jepo, Gatam ki Kenaj. Timna yam en dako pa Erifaji, wod pa Ecau, ma aŋeca; onywalo Amalek ki Erifaji. Man gin aye litino awobe pa Ada, dako pa Ecau. Man gin aye litino awobe pa Reuel: Nakat, Jera Cama ki Mija. Man aye litino awobe pa Bacemat dako pa Ecau, Man aye litino awobe pa Okolibama nya pa Ana wod pa Jibeon, dako pa Ecau; onywalo ki Ecau awobe magi: Jeuc, Jalam ki Kora. Magi aye litino awobe pa Ecau ma rwodi. Litino awobe pa Erifaji latin ka yo pa Ecau gin ene: rwot Teman rwot Omar, rwot Jepo, rwot Kenaj: rwot Kora, rwot Gatam rwot Amalek; magi aye rwodi pa’ Erifaji ma i lobo Edom; gin aye awobe pa Ada, Magi aye litino awobe pa Reuel wod pa Ecau: rwot Nakat, rwot Jera rwot Cama ki rwot Mija; meno aye ‘rwodi pa Reuel ma i lobo Edom; gin aye litino awobe pa Bacemat, dako pa Ecau, Magi aye litino awobe pa Okilibama dako pa Ecau: rwot Jeuc rwot Jalam ki rwot Kora: meno gin aye rwodi ma Okolibama nya pa Ana, dako pa Ecau, onywalo. Gin aye litino awobe pa Ecau, en aye Edom; meno aye gin rwodigi. Magi aye awobe pa Ceir Lakori, ma gin wegi lobo-nu: Lotan, Cobal, Jibeon, Ana, Dicon, Ejer ki Dican; magi aye rwodi pa jo Kori, litino awobe pa Ceir ma i lobo Edom. Litino awobe pa Lotan gin aye Kori ki Eman; ki lamin Lotan en Timna. Magi aye litino awobe pa Cobal: Alvan, Manakat, Ebal, Cepo ki Onamo Magi aye litino awobe pa Jibeon: Aiya, ki Ana; en aye Ana ma yam onoŋo waŋ pii amuro ma tye i tim, i kare ma en tye ka kwayo lwak kana pa wonne Jibeon. Magi aye Ilitno pa Ana: Dicon ki Okolibama, nya pa Ana. Magi aye litino awobe pa Dicon: Kemdan, Eciban, Itran ki Keran. Magi aye litino awobe pa Ejer: Bilan, Jaavan ki Akan. Magi aye litino awobe pa Dican: Uj ki Aran. Magi aye rwodi pa jo Kori: rwot Lotan, rwot Cobal, rwot Jibeon, rwot Ana, rwot Dicon, rwot Ejer ki rwot Dican; meno aye rwodi pa jo Koti, kit ma calo kakagi tye kwede i lobo Ceir. Magi aye luker ma guloyo lobo Edom, ma onoŋo pud peya kabaka mo oloyo jo Icrael. Bela wod pa Beor onoŋo loyo Edom, nyiŋ gaŋ kalle gilwoŋo ni Dinkaba. Ka Bela oto, ci Jobab wod pa Jera me Bojra oleyo ka tyene. Ka Jobab oto, ci Kucam mua ki i lobo pa jo Teman oleyo ka tyene. Ka Kucam oto, ci Adad wod pa Bedad oleyo ka tyene. En con olwenyo, oloyo jo Midian ma gitye i lobo Moab; nyiŋ gaŋ kalle gilwoŋo Avit. Ka Adad oto ci Camla me Macireka oleyo ka tyene. Ka Camla oto, ci Caul me Rekobot ma tye i dog kulu Euprate oleyo ka tyene. Ka Caul oto, ci Baal-kanan wod pa Akbor oleyo ka tyene. Ka Baal-kanan wod pa Akbor oto, ci Kadar oleyo ka tyene; nyiŋ gaŋ kalle gilwoŋo Pau. Nyiŋ dakone Meketabel, nya pa Matred, nya pa Mejakab. Magi aye nyiŋ rwodi ma tuŋ bot Ecau, macalo doggolagi tye kwede, ki kabedogi, ma lubo nyiŋgi: rwot Timna, rwot Alva, rwot Jetet, rwot Okolibama rwot. Ela rwot Pinon, rwot Kenaj, rwot Teman, rwot Mibjar, rwot Magdiel ki rwot Iram; magi aye rwodi pa jo Edom, en aye Ecau, ma kwaro pa jo Edom, kit ma yam gibedo kwede i kabedogi, i lobo ma odoko megi. Yakobo obedo i lobo ma yam koŋ wonne obedo iye-ni, lobo me Kanaan. Man aye lok me tekwaro pa Yakobo. Ka Yucepu doŋ ditte oromo mwaka apar wiye abiro, onoŋo doŋ kwayo lim kacel ki omege; en obedo ki litino awobe pa Bila ki Jilpa, mon pa wonne; Yucepu okelo lok maraco i komgi bot wongi. Yakobo onoŋo maro Yucepu makato litinone ducu pien onoŋo en latin ma ginywalo ka wi tiyone; okwone kanyi mabor ma bade boco. Ento ka omegine ‘guneno ni wongi maro en makato gin ducu, cwinygi ocako kwere woko, pe gitwero lok kwede maber. Ka Yucepu oleko lek, ci otito bot omegine, ci gumedde ameda ki kwere. En otito botgi ni, “Koŋ wuwiny kit lek ma aleko-ni: nen ba, i kare ma wabedo ka tweyo larita i poto, ci nen, laritana oa malo ocuŋ atir; ci laritawu gugurre, gurume dyere, ka giryebbe piny bot laritana.” Omegine gugamo ni, “In ada ibiloyowa? In aye doŋ ibiloyo wiwa?” Gumedde ki kwere doŋ marac pi lekke ki pi lokke. Dok oleko lek mukene, dok otito ki omegine aye, kun wacci, “Nenu ba, dok aleko lek mukene aye. Nen, ceŋ ki dwe ki lakalatwe apar wiye acel gubedo ka ryebbe piny i nyima.” Ka otito bot wonne ki bot omegine, wonne ocoke, ojuke matek, kun wacce ni, “Meno kit lek aŋo ma ileko kumene-ni? An ki meni ki omegini wabibino, ci wapoto waryebbe piny i nyimi ada?” Nyeko omako omegine i kome ento wonne okano lok meno i cwinye. Ka omegine gucito ka kwayo lim pa wongi ma cok ki Cekem, ci Icrael owaco bot Yucepu ni, “Omegini pe gitye ka kwat i ŋet Cekem? Bin wek aori icit botgi.” En ogamo doge ni, “An a ene”. Ci owacce ni, “Koŋ, icinen ka omegini gitye maber, kacel ki lim bene, ka idwokka lok doki.” Ka ocwale nia ki i nota me Kebron, ci ocito wa i Cekem. Laco mo onoŋe ka woto juŋŋe atata i olet; laco meno openye ni, “In ibeyenyo aŋo?” En ogamo ni, “Abeyenyo omegina. Alegi ititta ka ma gitye iye ka kwayo limgi.” Laco meno owacce ni, “Doŋ gutyeko a woko, pien awinyo ka giwaco ni, ‘Wacitu wa i Dotan’” Yucepu ocako lubo kor omegine, ka onoŋogi i Dotan. Ka gunene ki ka mabor, ma onoŋo peya oo botgi cok, ci guyubo lok i kome me neke, kun giloko kekengi ni, “Lalek eno bino-nu, Wubin tin wa neke woko, wek wabole i bur mo kany; ci wabitito ni, ‘ŋuu mo aye omake, omwode woko’, wek wanen kit ma lekke-nu bicobbe kwede.” Reuben owinyo yub meno, ci olare ki i ciŋgi, kun wacci, “Pe wan aye waneke.” Reuben owacogi dok ni, “Pe giony remone mo; wubole woko i bur man ma tye i tim kany, ento pe wuket ciŋwu i kome.” Onoŋo en oyubbe me kwanye woko ki i ciŋgi pi dwoke bot wonne. Ka Yucepu oo bot omegine, ci gupoto i kome, gulunyo boŋo kanyine woko, kanyi mabor ma bade boco ma onoŋo oruko-ni; ci gumake, gutere gubole woko i bur. Bur meno onoŋo pii pe iye. Lacen gubedo piny ka cam; ka gutiŋo wangi, ci guneno lwak jo Icmael ma gua i Gilead, ki lwak kinaga ma gutiŋo yec odok, moo yat too ki murra, ma giwoto gicito kwede i Ejipt, Juda dok owaco ki omegine ni, “Konyo aŋo ka waneko ominwa dok wamuno tone woko? Wubin wek wacatu en bot jo Icmael, pe wan aye waneke ki ciŋwa, pien en ominwa, remowa kikome.” Ci omegiŋe guworo doge. Jo Midian ma lucatwil gubino kenyo; ci guywayo Yucepu woko ki i bur, gucate woko bot jo Icmael, kun giwile ki cekel me ryal pyeraryo; ci gutero Yucepu wa i Ejipt. Ka Reuben odwogo i dog bur, ci oneno Yucepu doŋ pe i bur, ci cwinye ocwer ocako yeco boŋone woko. Ka odok cen bot omegine, owacogi ni “Awobi-ni doŋ pe do; man abidok kwene ba?” Ka gukwanyo kanyi pa Yucepu, ci guneko dyel, ka guluto kanyi i remo; ka gukelo kanyi mabor ma bade boco bot wongi, kun giwaco ni, “Wan wanoŋo man; koŋ iŋi, ka nyo kanyi pa wodi onyo pe.” Ka oŋiyo, ci owacci, “Man kanyi pa woda do; ŋuu doŋ omwode woko do; adada Yucepu doŋ ŋuu okido woko matitino do.” Yakobo bene cwinye ocwer, ocako yeco boŋone, ci otweyo boŋo cola i pyere, obedo ka koko wode pi kare malac, Awobene ducu ki anyirane gua malo gucito ka kweyo cwinye; okwero ni pe gikwe cwinye, kun wacci, “Aa pe, abilubo kor latinna i lyel ki koko.” Wonne obedo ka koke kit meno. Ci jo Midian gucato Yucepu woko i Ejipt bot Potipar, ladit tic pa Parao, ma loyo askari Lukur-piny, I kare meno Juda oa woko ki bot omegine, ocito odak bot laco mo ma i Adulam, ma nyiŋe Kira, Juda oneno nya pa Lakanaan mo ma nyiŋe Cua; ci onyomo, ka obedo kwede. Ci ogamo ic, onywalo latin laco, wonne ocako nyiŋe Er. Dako dok ogamo, onywalo latin laco, ocako nyiŋe Onan. Dok ogamo ic aye, onywalo latin laco, ocako nyiŋe Cela, Latin meno en onywalo i Kejib. Juda onyomo nyako ma nyiŋe Tamar ki wode Er ma latin kayone. Ento Er latin kayo pa Juda yam onoŋo dano marac i nyim Rwot, ci Rwot oneke woko. Ci Juda owaco bot Onan ni, “Dony i wi ci-omeru, ci ibed kwede macalo won ot, wek inywal kwede wi omeru.” Ento Onan oŋeyo ni litino pe bibedo mere; pi meno ka odonyo i wi ci-ominne, ci onyeto kodine piny, wek pe enywal kwede wi ominne. Gin ma otimo pe oyomo cwiny Rwot, ci oneke woko bene, Juda dok owaco bot ci-wode Tamar ni, “Koŋ doŋ ibed macalo daa-to i ot pa woru, nio waŋ ma woda Cela bidoŋo”, pien onoŋo lworo ni gwok bito woko, macalo omegine. Kit meno Tamar odok obedo i ot pa wonne. Ka kare okato, ci dako pa Juda ma nya pa Cua-ni oto woko. Ka cwiny Juda doŋ opye, ci ocito i Timna bor luŋol yer romine, onywako yo ki lareme Kira ma La-adulam. Ka gitito bot Tamar ni, “Kwaru okato obecito i Timna ka ŋolo yer rom ine”, ci olunyo boŋo cola me dalako woko, ka oumme ki kitambara, odwalo ki kome woko ducu, ka ocito obedo kwede i dogcel me Enaim, ma okemo yo me Timna; pien onoŋo oneno ni kadi bed Cela doŋ oteggi, ento peya gimiye ni olake. Ka Juda onene, ci otamo ni gwok dako lakwele mo, pien onoŋo en oumo waŋe woko ducu, Ka ocito bote ka ma obedo iye i ŋet yo, owacce ni, “Bin wek abed kwedi,” kun pe ŋeyo ni ci-wode. En ogamo ni, “Ibimiya gin aŋo kono, ka wek ibin ibed kweda?” En odok iye ni, “Abikwanyo latin dyel ki i kin dyegina, acwalli.” Dako-nu ogamo ni, “Ibijeno gin aŋo bota, ka doŋ ibicwalla?” Ogamo ni, “In imito ajeŋŋi gin aŋo?” En odok iye ni, “Agit meri, ki tolli, ki odooni ma tye i ciŋi-ni.” Ci otiŋo omiyogi ducu bote, ka odonyo obedo kwede, ci dako-nu oyac kwede. Dako oa okato ocito gire woko, olunyo boŋo kitambara ma oumme kwede-ni, ka doŋ oruko boŋo cola me dalako. Ka Juda ocwalo La-adulam ma lareme pi terre latin dyel, wek odwokke jami ma yam ojeŋo bot dako-nu, pe omedo ki noŋo kome. Obedo ka penyo jo ma i kabedo-nu ni, “Dako mo ma lakwele-ni tye kwene, ma onoŋo yam bedo i ŋet yo Enaim?” Guwacce ni, “Lakwele mo pe obedo kany.” Ka odok cen bot Juda, ci owacce ni, “Pe amedo ki noŋo dako-nu; ki jo ma i kabedo meno bene guwacci, ‘Lakwele mo pe yam obedo kunnu.’ ” Juda ogamo ni, “Wek doŋ oter jami-nu obed mere, giwek nyerowa; nen, acwalo latin dyel man, ci noŋo kome aye oloyi.” Ka dwe adek okato, ci gitito ki Juda ni, “Ci-wodi Tamar obedo ka timme kwele kwele, ci doŋ oyac woko ki tim kwelene-ni.” Juda owacci, “Wukele woko, wek giwaŋe woko.” Ka gitye ka kele woko, ci en ocwalo lok bot kwarone, ni “Won jami man en aye ayac kwede.” Dok onwoyo aye ni, “Alegi ŋi inigi, Agit, ki tol ki odoo-nu jami pa aŋa kaa?” Juda oŋiyogi, ci otuco kun waco ni, “Dako man kite atir makata woko, pien pe amedo ki miyo en bot woda Cela.” Pe bene omedo ki bedo kwede. Ka kare me gonnyene oromo, ci onen ni litino rudi tye i iye. Ka mwoc doŋ ogoye, latin ocwalo ciŋe woko, ci lacolo otweyo uci makwar i ciŋe, kun wacci, “Man aye okwoŋo katti woko.” Ka doŋ oŋunyo ciŋe, odwoko cen, nen, ominne aye dok okatti woko, ci dako-nu owacci, “In doŋ ituro ki baro dye ic, ikatti woko niŋniŋ?” Mumiyo gicako nyiŋe Perej. Ka lacen ominne dok ginywalo kun uci makwar-tye i ciŋe; ci gicako nyiŋe jera. Gitero Yucepu woko i Ejipt, ci Potipar ladit tic pa Parao, ma loyo askari lukur-piny, ma Laejipt, owilo en woko ki bot jo Icmael ma gutere kunnu-ni. Rwot yam tye ki Yucepu, ci odoko lakomegum; ocako bedo gire i ot pa laditte ma Laejipt; ci laditte bene oneno ni Rwot tye kwede, pien Rwot omiyo gin ducu ma en tiyo bedo maber. Cwiny Potipar obedo, yom i kom Yucepu, ci odoko laticce. Ocako kete obedo ladit ma loyo ode ki jamine ducu. Nia i kare meno ma okete obedo ladit ma loyo ode, ki lalo jamine ducu, Rwot ocako miyo gum obedo i ot pa Laejipt meno pi Yucepu; gum pa Rwot opoto i kom jami ma yam tyekwede ducu, ma i ot ki ma i poto-gu. Ci Potipar omiyo jami ducu i te loc pa Yucepu; pi bedo kwede omiyo doŋ pe paro gin mo, kono pi cam keken ma en camo-ni. Onoŋo Yucepu nen mabulobulo, dok mwonya matek. Lacen dako pa laditte cwinye ocako pyette i kom Yucepu, ci owacce ni, “Wabut kwedi.” Ento en okwero woko, ci owaco bot ci-laditte ni, “Nen ba, pi bedona kany omiyo laditta pe doŋ paro pi gin mo ma tye i ot-ti, dok otyeko keto gin ducu ma etye kwede i ciŋa. En pe doŋ tye ki dit makato an i ot man, pe tye gin mo ma dok okano ma peya omiyo i ciŋa, kono in keken, pien in i dakone. An dok acorre ka tiyo bal madit marac kuman niŋniŋ, kun atimo wa bal i kom Lubaŋa kulu?” Kadi bed dako meno obedo ka bito Yucepu jwijwi, pe omedo ki winyo lokke, pe oye buto kwede, kadi bedo kwede. Ento ka nino mo acel owec, ma, onoŋo laco mo pe i ot, ka Yucepu odonyo i ot ka tiyo ticce, ci dako-nu omake ki boŋone, kun wacci, “But kweda.” Ento Yucepu omwomme oweko boŋone i ciŋe, okato gire woko ki i ot. Ka dako-nu oneno en oweko boŋone i ciŋe, omwomme gire oka-to woko ki i ot, ci olwoŋo co ma gibedo i ode, ci otittigi ni, “Nenu, ladit-ti okelo Laibru-ni kany me nywarowa; obino bota i ot ni ebut kweda kulu, ci atokke adaŋŋe ki koko matek, Ka oneno ni atiŋo dwana malo kun agorre matek ki koko, ci otenyo ginarukane bota, ci omwomme oka-to woko ki i ot.” Ci opyelo boŋone ka ŋete nio ka won ot odwogo paco. Otitte kit lok acel-lu, kun waco ni, “Opii Laibru-ni ma ikelo i kinwa obino bota i ot ka nywara; ento ka atiŋo dwana oyotoyot kun adaŋŋe, ci oweko ginarukane bota, omwomme gire woko ki i ot.” Ka Potipar owinyo lok ma dakone olokke, ni, “Man en aye kit ma opiini otima kwede”, ci kiniga omake matek mada. Ocako mako Yucepu, oketo i mabuc, i kabedo ma gitweyo iye lumabuc pa kabaka, ci obedo i mabuc kunnu. Ento Rwot onoŋo tye ki Yucepu, ci onyutte mar mere ma pe lokke, ci omiyo en oyomo cwinylagwok ot mabuc. Lagwok mabuc omiyo twer ki Yucepu me gwoko lumabuc ducu ma gitye i mabuc; gin ducu ma gitiyo kunnu, en aye loyo. Lagwok ot mabuc pe doŋ tamo pi gin mo ma oketo i ciŋ Yucepu, pien oŋoŋo Rwot tye kwede; gin ducu ma en tiyo, Rwot omiyo iye gum. Ka kare okato, latyer koŋo vino pa kabaka me Ejipt ki lated mugatine gubalo i nyime. Kiniga’ omako Parao i kom ludito ticce aryo-nu, ladit latyer koŋo vino ki ladit me tedo mugati, ci oketogi i ot pa ladit ma loyo askari lukur-piny po gwokogi, i ot mabuc ma Yucepu bene gitweye iye-ni. Ladit ma loyo askari lukur-piny oketogi i ciŋ Yucepu, en okurogi; ka gitweyogi i ot kol kare mo. Ci guleko lek i nino acel, latyer koŋo vino ki lated mugati pa kabaka me Ejipt, ma gitweyogi i ot mabuc; ŋat acel acel oleko gire lekke, kun lek acel acel tye ki tyen lokke. Ka Yucepu obino botgi odiko, ci onenogi kun gitye ki cwercwiny. Ci openyo ludito tic aryo pa Parao ma gitye kwede i ot kol i ot pa laditte, ni, “Tin waŋwu oballe woko piŋo?” Gugamo ni, “Tin waleko lek, ci pe tye dano mo ma gonyowa te lekke.” Yucepu owacogi ni, “Pe Lubaŋa gire aye lagony tere? Koŋ wutitta lekke mono.” Ci latyer koŋo vino ocako tito lekke bot Yucepu, kun wacce ni, “I waŋ lekka onoŋo olok tye i nyima, olok onoŋo tye ki jaŋe adek; ka pud oluro me keto: ture, ci onyak, olugo ocek woko. Ka amako kikopo pa Parao i ciŋa, ci aŋolo nyige, abiyo i kikopo, ka amiyo kikopo i ciŋ Parao.” Yucepu ogamo, owacce ni, “Man aye te lekke: jaŋe adek-ki, meno nino adek; i nino me adekke Parao bitiŋi ci dwoki i dog ticci, ci dok’ ibimiyo kikopo pa Parao i ciŋe kit macon ca, kit macalo con i kare ma in latyer koŋo vinone, Ento ber ipo pira ka doŋ idok i dog ticci; alegi ni in bene itima ber do, itit pira bot Parao, wek gigonya woko ki i ot man, Pien yam gikwala akwala ki i lobo pa jo Ibru; man bene dok giketa kany i ot kol noŋo ma pe abalo gin mo.” Ka ladit me tedo mugati oneno ni gigonyo te lek maber, en owaco ki Yucepu ni, “An bene onoŋo aleko lekka: onoŋo adodo aduku adek i wiya. I aduku mamalone ca onoŋo tye iye lwak kit gin ma gitedo ducu pi Parao, ento winyo obedo ka camogi woko ki i aduku ma tye i wiya-ni.” Yucepu ogamo ni, “Man aye te lekke: aduku adek en aye nino adek; i nino me adekke Parao bitiŋi malo, ci biŋabi i kom yat, ka winyo gibicamo riŋo komi woko.” Ka nino adek oromo, en aye nino ma ginywalo iye Parao, ci otedo karama ki luticce ducu, ci Parao okelo ladit latyer kono yino kacel ki ladit lated mugati i nyim luticce. Odwoko ladit latyer koŋo vino i dog ticce me tyero koŋo vino, ci otiŋo kikopo pa Parao omiyo i ciŋe; ento oŋabo: ladit lated mugati malo i kom yat kit ma nene Yucepu ogonyo kwede te lekgi. Ento ladit latyer koŋo vino pe omedo ki po pi Yucepu, wiye owil woko i kome matwa!’ Ka mwaka okato aryo kulu, Parao oleko lek ni onoŋo ecuŋ i ŋet kulu Nail, ci nen, dyaŋi abiro ma komgi pilpii ma gucwe, gubedo ka camo lum tiro. Dyaŋi mukene abiro dok gukatti woko ki i kulu Nail ma komgi omok, gujony woko liŋok, ma gulubo korgi, ka gucuŋ ka ŋet dyaŋi meno, ma gitye i ŋet kulu Nail. Dyaŋi ma komgi omok, ma gujony woko linok-ki gucamo dyaŋi ma komgi pilpil mucwe-ni woko. Ci Parao oco woko ki i waŋ nino. Ka dok onino, ci dok oleko lek mukene me aryone, oneno wit kal abiro ma ocek oluŋŋe, mabeco, ma gujany i kom tyen kai acel. Dok i ŋegi oneno wit kal abiro ma gulot gujany ma walgi atati, ma gubwarre woko pi yamo malyet mua ki tuŋ wokceŋ. Ci wite abiro ma waŋgi atati-ni gumwonyo wit kal ma ocek oluŋŋe, ma waŋgi ŋaraŋara-nŋ woko. Ka Parao dok oco woko ki i waŋ nino, onoŋo ni dok eleko lek aye. Cwinye obedo ka cwer odiko con; ci ocwalo kwena olwoŋo lutyet ki luryeko ma i Ejipt ducu. Parao otitogi lekke, ento ŋat mo pe onen ma otwero gonyo ki Parao te lekke. Ladit latyer koŋo vino owaco ki Parao ni, “Apo rocca tin. I kare ma Parao okeco i kom luticce, ci otweya i ot kol kacel ki ladit lated mugati i ot pa ladit ma loyo askari lukur-piny, wan ducu waleko lek i dyewor acel-lu, en ki an, waleko lek ma tyen lokgi patpat, Latin Ibru mo onoŋo tye kwedwa, ma obedo latic pa ladit ma loyo askari lukur-piny, Ka yam watitte, ci ogonyowa te lekwa, kun gonyo te lek pa ŋat acel acel kit ma lekke tye kwede. Kit ma en ogonyo te Lekwa, ci otimme kumeno; an gidwoka i dog ticca, ento lated mugati giŋabo malo i kom yat.” Ci Parao ocwalo kwena gilwoŋo Yucepu, gikelo woko aruya ki i ot kol; olyelo wiye, ka oloko boŋone, ci ocito odonyo bot Parao. Parao owaco bot Yucepu ni, “An onoŋo aleko lek, ento ŋatti mo pe onoŋŋe ma twero gonnya te lekke; abedo ka winyo ka giloko i komi ni ka iwinyo lek mo, ci itwero gonyo tere.” Yucepu ogamo dog Parao ni, “Meno pe a ki iiya; Lubaŋa aye bidok iye ki Parao lok me kuc.” Ci Parao owaco bot Yucepu ni, “Nen, iwaŋ lekka onoŋo acuŋ i ŋet kulu Nail; ci dyaŋi abiro mucwe ma komgi pilpil gukatti woko ki i kulu Nail, gubedo ka camo lum tiro. Ka dok dyaŋi mukene abiro bene gukatti woko gulubo korgi ima gigoro, komgi omok ma gujony woko linok, kit ma yam peya aneno i lobo me Ejipt ducu. Ci dyaŋi ma komgi omok ma gujony woko linok-ki gucamo dyaŋi abiro mucwe-ni woko; ento kadi bed gucamogi woko, pe nene ni gucamogi, pien onoŋo pud gujony woko linok ma rom aroma ki kit ma nene gitye kwede. Ci aco woko ki iwaŋ nino. Dok aneno ki i waŋ Lekka wit kal abiro ma gujany i kom tyen kal acel, ma wangi ŋaraŋara mabeco; ka dok wite abiro muner ma wangi atati, ma gubwarre woko pi yamo malyet mua i tuŋ wokceŋ, gulot gudoŋo i ŋegi; ci wite ma waŋgi atati-ni gumwonyo wite abiro mabeco-ni. Ci atito bot lutyet, ento pe tye ŋatti mo ma twero gonnya tere.” Yucepu ogamo dog Parao owaco ni, “Lek pa Parao en lek acel; Lubaŋa doŋ onyuto ki Parao gin ma en bitiyo. Dyaŋi abiro mabeco-ni nyuto mwaka abiro, ki wit kal abiro mabeco bene nyuio mwaka abiro; lek aryo-nu te lokgi acel. Dyaŋi ma komgi otuk, ma gujony woko liŋok-ki ma dok gukatti woko gulubo korgi-ni, ki wit kal abiro mubwarre woko pi yamo malyet mua i tuŋ wokceŋ ca, meno nyuto mwaka abiro me kec. Tye kit macalo doŋ atito ki Parao, Lubaŋa onyuto ki Parao gin ma en bitiyo. Mwaka abiro bibedo ma cam bicek madwoŋ twatwal i lobo ducu me Ejipt, ento i ŋegi dok bibino mwaka abiro me kec, ma wi dano biwil woko i lwak camgi ma guceko i lobo Ejipt. Kec bineko lobo woko libok; ki lonyo cam madwoŋ-ŋi pe binene ni yam tye i lobo pi lok pa kec ma bilubone, pien kec meno bibedo gwa matek. Lek pa Parao mudodde aryo-ni nyuto ni lok man Lubaŋa aye omoko, dok bimiyo timme i kare ma cok-ki. “Mumiyo i kare man myero Parao oyer dano ma nen kwiri, maryek, ci oket en olo lobo Ejipt ducu. Dok ber Parao omedde ka keto ludito ma guloyo lobo, wek gubed ka jogo dul acel me abic me cam ma ocek i lobo Ejipt i kin mwaka abiro ma piny ocek-ki. Gin gubed ka guro cam ma ocek i mwaka mabeco ma cam bicek iye-ni, wek gigwok kal i te twero pa Parao, gikan me agwoka i gaŋi ducu. Cam meno obed dero kec me agwoka ma gigwoko i lobo Ejipt pi kec ma bipoto mwaka abiro, wek kec pe onek lobo.” Tam man Parao oneno ni ber, kacel ki luticce ducu. Parao owaco ki luticce ni, “Watwero noŋo dano mukene macalo man, ma Cwiny pa Lubaŋa tye kwede bene?” Ci Parao owaco bot Yucepu ni, “Macalo Lubaŋa doŋ otyeko nyutti man ducu-ni, pi meno pe doŋ tye dano mo ma nen kwiri, maryek macalo in. In aye doŋ ibiloyo oda, ki lwakka ducu gibitiyo kun gilubo gin ma iciko; kono nyo lok ma dok i kom komker keken, en aye bimiyo abedo dit makati.” Parao dok owaco bot Yucepu ni, “Nen, doŋ atyeko keti me loyo lobo Ejipt ducu.” Ci Parao okwanyo agitte ma olunyo ki i ciŋe, orwako i ciŋ Yucepu, dok oruke ki ginaruka me boŋo camanini maber, ka dok obolo nyor jabu i ŋute; ka omiyo en oriŋo ki gadigadine me aryone, kun dano gidaŋŋe i nyime ni, “Rumu coŋwu!” Ci oketo en me loyo lobo Ejipt ducu kit meno. Parao dok omedde lok ki Yucepu kun wacce ni, “An Parao; ka in pe iye, ci pe bibedo ŋatti mo ma bitiŋo ciŋe kadi tyene i lobo ducu me Ejipt.” Ci Parao ocako nyiŋ Yucepu ni Japeŋat-panea; ci omiye Acenaci nya pa Potipera ajwaka me On me bedo dakone. Ci Yucepu ocako wot orumo lobo Ejipt ducu. Yucepu onoŋo doŋ mwaka me ditte romo pyeradek i kare ma donyo i tic pa Parao kabaka me Ejipt. Yucepu okato woko ki i nyim Parao, ci owoto orumo lobo Ejipt ducu. Cam ocek i lobo madwoŋ twatwal otyeko mwaka abiro, ci ocoko cam ducu ma ocek i mwaka abiro-ni i kare ma lo bo Ejipt oceko cam madwoŋ, ci okano cam i dero kec i gaŋi ducu; i gaŋ acel acel en okano cam mua i potti murumo kenyo. Yucepu okano lwak cam madwoŋ i dero kec; cam obedo dwoŋ ma rom ki kweyo ma i dog nam, nio ka oweko pimone pien pe twero pimme. Ma mwaka kec peya oromo, onoŋo Yucepu doŋ tye ki litino awobe aryo, ma Acenaci nya pa Potipera ajwaka me On onywalo kwede. Yucepu ocako nyiŋ latin kayone ni Manace, kun wacci, “Pien Lubaŋa doŋ omiyo wiya owil woko ki i kom aromana ducu ki i kom jo ducu me ot pa wora.” Nyiŋ latin me aryone ocako ni Epraim, ni, “Pien Lubaŋa omiya anywal i lobo ma abedo iye ki aroma.” Ka mwaka abiro ma cam obedo ka cek iye madwoŋ twatwal i lobo Ejipt doŋ ogik, ci mwaka abiro me kec ocakke, kit ma yam Yucepu owaconi. Kec opoto i lobo ducu; ento i lobo Ejipt ducu onoŋo cam tye. Ka cam doŋ otum woko i lobo Ejipt ducu pi kec mupoto, dano gucako koko pi cam bot Parao; ci ‘Parao owaco bot jo Ejipt ducu ni, “Wucit bot Yucepu wutim gin ma owacciwu.” Ka kec opoto oromo lobo Ejipt ducu, ci Yucepu ocako yabo dog dero kec ducu, ocato cam bot jo Ejipt, pien onoŋo kec doŋ lyet twatwal i lobo Ejipt. Lobo ducu gucako mol i Ejipt bot Yucepu ka wilo kal, pien onoŋo kec doŋ lyet twatwal i wi lobo ducu. Ka Yakobo owinyo ni kal tye i Ejipt, owaco bot awobene ni, “Piŋo wubedo ka nenne anena?” Ka owaco botgi ni, “Nen, an awinyo ni kal tye i Ejipt; wucit wuwilliwa kai kunnu, wek wabedu kwo, pe wato kl kec.” Mumiyo omegi Yucepu apar gucito i Ejipt ka wilo kal. Ento Yakobo pe ocwalo Benjamin, omin Yucepu, kacel ki omegine ca, pien obedo ka lworo ni gwok dok gibitime rac bene. Kit meno awobe pa Icrael gucito ka wil i kin jo mukene ma gicito kunnu, pien onoŋo kec oromo lobo Kanaan ducu. I kare meno onoŋo Yucepu odoko laloyo maber i lobo Ejipt; en obedo ka cato kal bot lwak me lobo meno. Ci omegi Yucepu bene gubino, gupoto piny aryeba cwiny i nyime, kun gukulo wangi i ŋom. Ka Yucepu oneno omegine, ci oŋeyogi cut, ento obedo gwa i komgi, macalo gin Lurok ata, kun gerre agera ni, “Wun wua ki kwene?” Gugamo ni, “Waa ki i lobo Kanaan, wabino ka wilo cam.” Kit-meno Yucepu oŋeyo omegine, ento gin pe gumedo ki ŋeye, Yucepu ocako po lek ma yam oleko i komgi-ni; dok owaccigi ni, “Wun lurot piny do, wun wubino ka neno lobo-ni ka kabedo mo tye noŋo.” Gugamo ni, “Pe kumeno Laditwa, wan luticci wabino giwa ka wilo cam. Wan ducu awobe pa ŋat acel, wan jo ma iwa leŋ, wan pe lurot piny.” Owaccigi ni, “Pe ya, wun wubino mewu ka neno kabedo mo ma tye nono.” Gugamo dok ni, “Wan ducu wan omego apar wiye aryo, ma awobe pa laco acel ma tye i lobo Kanaan; ci ominwa matidine odoŋ bot wonwa, ki acel aye doŋ pe.” Yucepu owaco ki gin ni, “Doŋ kara tye kit ma awacowu, ni wun lurot piny. Pi lok meno, wun doŋ gibinenowu maber kit man: macalo Parao tye makwo-ni, wun pe doŋ wubia woko i kabedo-ni, ka ominwu matidi-ni pe obino kany. Wucwal ŋat acel i kinwu, wek en ocikel ominwu, kun noŋo wun pud wudoŋ kany i mabuc, wek lokwu koŋ ginen maber, ka wun wutye ki ada i iwu. Ka pe, macalo Parao tye makwo-ni, wun lurot piny i ada.” Ci oketogi ducu i mabuc pi nino adek. Ka nino adek oromo, ci Yucepu owaco botgi ni, “Wutim kit man ci wubikwo, pien alworo Lubaŋa: ka wun jo ma iwu leŋ, wuwek ŋat acel aye gitwe odoŋ i mabuc, wek jo mukene gucit paco guter kal ki jo ma paco pi larogi ki kec, ka wucikel ominwu matidi-ni bota; miyo binen ni lokwu doŋ tye ada, ci pe wubito.” Ci gutimo kit meno. Gucako lok gigi kekengi ni, “I adane, wan woroco i kom ominwa, pien waneno cwercwinye, ka yam bako doge botwa, ci pe wamedo ki winyone; mumiyo tin can man opoto i komwa bene.” Reuben owacogi ni, “Yam pe atittiwu ni pe wutim bal mo i kom latin ca? Ento wun pe wumedo ki winyo, en aye mumiyo gipido pi remone i komwa-ni.” Pe gumedo ki niaŋ ni Yucepu winyo lokgi-ni, pien onoŋo Iadum aye tye i kingi. Ka oa woko ki botgi ci ocako koko; ka odok botgi obedo ka lok kwedgi. Omako Cimeon ki i kingi ci otweyo ki i nyimgi. Yucepu ociko ni doŋ gipik kal opoŋ kicaa megi, ka dok gidwok lim pa dano acel acel gipik i kicaane, dok gumi botgi peke me wotgi. Man ducu gitimo botgi. Ka gutweyo kal i ŋe kanagi, ci gucako wot. Ka ŋat acel oyabo dog kicaane i kabedo ma gibuto iye-ni, wek emi cam ki kanane, ci oneno lim giketo i dog kicaane. Ocako waco ki omegine ni, “Limma gidwoko kakare. Nen, tye i kicaana ene.” Ka guwinyo, ci cwinygi opoto nirim, gubedo ka cabbe kekengi ki myelkom kun giwaco ni, “Lubaŋa timowa kuman piŋo?” Ka gudwogo bot wongi Yakobo i lobo Kanaan, gutitte gin ducu ma otimme i komgi, kun giwaco ni, “Dano ma ladit me lobo-nu obedo ka lok ki gero i komwa, olokowa wadoko lurot piny. Ento wan watitte ni, ‘Wan jo ma iwa leŋ, wan pe lurot piny. Wan omego apar wiye aryo ma wonwa acel. Ominwa acel aye doŋ pe, ki acel matidine tye odoŋ bot wonwa i lobo Kanaan.’ Ci dano meno, ladit me lobo-nu, owaco botwa ni, ‘Man aye miyo abinian ni wun jo ma iwu leŋ: wuwek ominwu acel odoŋ bota, wuter kal me laro kec i pacowu, wek wuciti. Wucikel ominwu matidini bota, ci doŋ abiŋeyo ni wun pe lurot piny, ento wun jo ma iwu leŋ, ci doŋ abimiyo ominwu i ciŋwu, dok wubicato wil i lobo-ni.’ ” Ka gitye ka onyo kal ma i kicaa megi, ci dano acel acel onoŋo lim ma nene oboyo tye i kicaane. Ka gin ki wongi guneno lim ma giboyo, ci lworo omakogi matek. Wongi Yakobo owaco ni, “Wutyeko litinona woko do. Yucepu doŋ pe, Cimeon bene doŋ pe, dok wumito tero Benjamin; man ducu canne poto i wiya.” Reuben ocako waco bot wonne ni, “Ibineko litino awobena aryo-ni ducu ka ineno pe adwoko en paco boti. Miya acit kwede, ci abikelo en paco boti.” Ento en ogamo, okwero woko ni, “Woda pe bicito kwedwu kunnu, pien ominne doŋ oto mere woko, en kene aye odoŋ, Ka gin marac dok otimme i kome i wotwu-ni, ci wubitero lwar wiya i lyel ki cwercwiny.” I kare ma kec doŋ lyet twatwal i lobo, dok kal ma gikelo ki i Ejipt doŋ gucamo otum woko, wongi owaco botgi ni, “Wudok kunnu, wuciwil ki wan cam mo manok.” Juda ogamo doge ni, “Dano ca ocikowa matek kun waco ni, ‘Pe wubineno waŋa ka ominwu pe i kinwu.’ Ka icwalo ominwa owoto kwedwa, ci wabicito kunnu ka willi cam; ento ka pe icwalo en, pe wabicito kunnu, pien dano ca owacowa ni, ‘Pe wubineno waŋa ka ominwu pe i kinwu.’ ” Icrael owacci, “Piŋo wutima marac kuman? Piŋo dok wutito ki dano ca ni wutye ki ominwu mukene?” Gudok iye ni, “Dano ca openyowa ki lwak peny mapol i komwa ki i kom kakawa, kun waco ni, ‘Wonwu pud tye makwo? Ominwu mukene tye?’ Wan wadok iye i kom gin ma openyo; wan onoŋo watwero ŋeyo niŋniŋ ni en biwacci, ‘Wukel ominwu kany”?” Juda owaco bot wonne Icrael ni, “Mi latin i ciŋa, cwale wawot kwede, ci wabia wacito, wek wabed kwo, pe wato, wan kacel ki in ki litinowa bene. An abicuŋ pire; ibipenya pire. Ka ce pe abikelo en boti i kare ma adwogo, akete i nyimi, ci wek an aye abed won alii matwal; pien ka nene pe wagalle, kono man doŋ wawirre kunnu kiryo.” Ci wongi Icrael dokowaco botgi ni, “Ka doŋ myero obed kumeno ba, doŋ wutim kit man: wuter nyig yadi mogo ma wuyero me lobo-ni i kicaawu, wuter mot ki dano-nu, moo makur manok ki moo kic, odok yat ki murra, nyig otitimo ki yaa. Dok wuter lim ma romo culo wil tyen aryo; wutiŋ lim ma nene gidwoko giketo i dog kicaawuni; gwok nyo yam wigi owil awila. Wuter ki ominwu, wek wua, wucit dok bot dano-nu; ber Lubaŋa Matwero-ducu aye omi kica omak dano-nu i komwu, wek ocwal ominwu mukene ca ki Benjamin. Ka gityeko litinona woko, doŋ gityeka arumo do!” Ci gutero mot, ki wel lim ma dodo tyen aryo, kacel ki Benjamin; gua gucito i Ejipt, gucuŋ i nyim Yucepu. Ka Yucepu oneno ni Benjamin tye i kingi, ci owaco bot lakan jamine me ot ni, “Kel jo-nu i ot, ka inek riŋo iyubi, pien gin koni gibicam kweda dyeceŋ.” Dano meno otiyo kit ma Yucepu ocike, okelo jo-nu i ot pa Yucepu. Lworo omako omegine ka giterogi i ot pa Yucepu, guwaco ni, “Man pi lok me lim, ma nene gidwoko giketo i dog kicaawa i kare mukwoŋo ca. Mumiyo gikelowa i ot-ti, wek enoŋ lok i komwa, emakwa, wek wadok opiine, ka dok ema lwak kanawa woko.” Pi meno gucito bot lakan jami me ot pa Yucepu, guloko kwede ki i doggola, guwacce ni, “Laditta, wan wabino kany ka wilo cam i kare mukwoŋo ca; ka wao i kabedo ma wabuto iye-ni, wagonyo dog kicaawa, ci wanoŋo lim tye i dog kicaa pa ŋat acel acel ma i kinwa, limwa ducu onoŋo tye ki berre; en watyeko dwogo kwedeni, ka dok wabino ki lim me wilo cam, Pe waŋeyo ŋat ma oketolimwa i kicaawa.” En ogamo ni, “Wuywe ma cwinywu opye mot, pe lworo omakwu. Lubaŋa ma Lubaŋa pa wonwu en aye gwok nyo okano ki wun lim i kicaawu; an mera agamo limwu.” Ci ocito okelo Cimeon botgi. Dano meno oterogi i ot pa Yucepu, omiyogi pii me lwoko tyengi, ka dok omiyo cam ki kanagi. Guyubo motgi me atyera bot Yucepu ka bidwogo i dyeceŋ, pien guwinyo ni gibicam kunnu. Ka Yucepu odwogo paco, gutero motgi bote i ot, guryebbe piny i nyime. Openyogi ka gitye maber, kun waco ni, “Wonwu tye maber, ladit mo muti ma nene wuloko pire-ni pud tye makwo?” Gugamo ni, “Laticci ma wonwa tye maber, pud tye makwo.” Gukulo wigi piny, guryebbe i nyime, Ka otiŋo waŋe malo ci oneno ominne Benjamin, latin pa minne, owacci, “Man aye ominwu matidi-ni bo, ma nene wutitta pire-ni? Lubaŋa omini gum, latinna!” Yucepu okato woko oyot, pien onoŋo cwinye pukke pi ominne, ocito oyenyo ka ma myero ekok iye. Ci odonyo ka koko i kicikane. Ka olwoko waŋe, ci okatti woko kun diyo cwinye, owacci, “Doŋ gitok cam.” Gitoko camme kene pat, ki megi bene pat, ki pa Luejipt ma yam gicamo kwedgi bene pat kakengi, pien Luejipt pe gicamo kacel ki jo Ibru, bedo me kwer ki bot Luejipt. Gubedo piny i nyime, latin kayo macalo dit me anywalline tye kwede ki latin matidine kit macalo por me tidine tye kwede; ci gucako bedo ka nenne kekengi kun giuro, Gipoko botgi cam kun gitoko a ki i meja pa Yucepu, ento pa Benjamin gipoko mere ododo pa omegine tyen abic kulu. Kit meno gimato, gibedo kwede ki yomcwiny. Yucepu ociko lakan jami me ot ni, “Pik cam opoŋ kicaa pa jo-nu, mabup, ma gitwero tino; dok iket lim pa ŋat acel acel i dog kicaane, ci iket kikopona, kikopo ryal-li, i dog kicaa pa latin matidi-ni, kacel ki limme me wilo kal.” En otimo kit macalo Yucepu owacce. Ka piny doŋ oru maleŋ, ci gicwalo jo-nu gukato woko kacel ki kanagi. Ka guwoto manok nia ki i gaŋ, Yucepu owaco ki lakan jamine ni, “Doŋ ilub kor jo-nu; ka imakogi, ci iwac botgi ni, ‘Piŋo wuculo gin maber ki gin marac? Piŋo wukwalo kikopo ryal mera woko? Pe rwoda mato ki kikopo meno? Dok pe en aye tyeto kwede bene? Wutimo rac mada.’ ” Ka omakogi i yo, ci owacogi lok meno. Gugamo doge ni, “Lok aŋo mumiyo in laditwa iloko lakit lok meno? Wan luticci pe myero watim lakit tim macalo meno! Nen ba, lim ma nene wanoŋo i dog kicaawa, wadwoko cen boti nia wa ki i lobo Kanaan; dok wan myero wakwal ryal nyo jabu ki i ot pa laditwa niŋniŋ? Ka ce gibinoŋo tye bot ŋat mo i kinwa, wek en aye oto, wan bene wabibedo opiini laditwa.” En ogamo ni, “Wuwek koŋ doŋ obed kit ma wuwaco-ni: ŋat ma gibinoŋo kikopo bote aye bibedo opiina, jo mukene bal bibedo pe i komgi.” Ŋat acel acel ocako cibo yecce piny oyotoyot, ŋat acel acel oyabo dog kicaane, Ka oyenyo dog kicaa nia ki kom pa ladit nio wa kom latin, ci ginoŋo kikopo i dog kicaa pa Benjamin, Gucako yeco boŋŋigi pi cwercwiny, gin ducu gutweyo yec i ŋe kanagi, gudok i gaŋ. Ka Juda ki omegine gudok i ot pa Yucepu, gunoŋo en pud tye kenyo; gupoto, guryebbe piny i nyime, Yucepu owacogi ni, “Wun wutimo kit tim macalo man piŋo ce? Wun pe wuŋeyo ni dano macalo an-ni ŋeyo tyet?” Juda ogamo kun waco ni, “Wan wabidok iye lok aŋo, ladit? Wabigamo lok aŋo kono? Wabikwanyo bal i komwa kekenwa niŋniŋ? Lubaŋa otyeko noŋo bal i komwa; nen, wan wadoko opiini, laditwa, wan ducu kacel ki ŋat ma ginoŋo kikopo bote-ni.’ Ento en ogamo ni, “An pe atwero timo kit eno! Ento ŋat ma ginoŋo kikopo bote-ni, aye bibedo opiina; ento ki tuŋ botwu wun wudok mewu bot wonwu ki kuc.” Juda ocako cito bote, owacce ni, “Alegi laditta, wek an alok lok mo kwedi, pe iwek kinigani obed Lyet i koma, pien in irom ki Parao kikome. Ladit, in yam ipenyowa ni, ‘Wun wutye ki wonwu, onyo omegiwu? Wan wagamo dogi ni, ‘Watye ki wonwa, dano muti doŋ, ki ominwa matidine latin me tiyone. Ominne aye oto woko, en aye odoŋ latin acel i kor minne; wonne bene maro en.’ Ka dok iwaco botwa ni, ‘Wukel en bota, wek aket waŋa i kome.’ Wan watito boti ni, ‘Latin awobi-nu pe twero weko ka ŋet wonne; ka ce opokke woko ki wonne, ci wonne to woko.’ Ento in onoŋo iwaco botwa ni, ‘Ka ominwu matidi-ni pe obino kany kacel kwedwu, pe dok wubineno waŋa.’ “Ka wadok paco bot wonwa ladit, ci watitte lokki ducu. Ka wonwa owaco ni, ‘Wuwot dok wuciwil ki wan cam mo manok’, wan wawacce ni, ‘Pe watwero dok Ka ominwa rmatidi-ni bicito kwedwa, ci wabidok kunnu, pien pe wabineno waŋ dano ca, ka ominwa matidi-ne pe i kinwa.’ Ci wora owacowa ni, ‘Wun wuŋeyo ni dakona onywalo litino awobe aryo; acel oweka woko, ci yam awacci, Ada ŋuu okide woko, pe dok amedo ki nene matwal. Ka dok wukwanyo man woko ki bota, ce gin marac bipoto i kome, ci wubitero lwar wiya i lyel ki: cwercwiny.’ “Mumiyo ka an adok bot wora;: ma latin awobi-ni pe i kinwa, macalo kwone ocuŋ i kom latin awobi-ni, ka oneno ni latin awobi-ni pe i kinwa, ci en bito woko. Miyo wabitero lwar wi wonwa i lyel ki cwercwiny. An nene acuŋ pi latin awobi man bot wora, kun awacce ni, ‘Ka pe abidwoko en boti, an abibedo won alii i nyim wora i kare me kwona ducu.’ Mumiyo kombeddi alegi ni ber iye an opiini, adoŋ ma ka latin awobi man, abed opiini, ladit; wek latin man odok paco kacel ki omegine. Pien atwero dok paco bot wora niŋniŋ, ka pe latin-ni tye kweda? Alworo neno gin marac ka poto i kom wora.” Yucepu diyo cwinye doŋ oloye woko ki i nyim lwak ducu ma gucuŋ ka ŋete, ci odaŋŋe ni, “Wumi dano ducu gua woko ki bota, guciti.” Kit meno ŋatti mo yam pe odoŋ bote i kare ma en nyutte kekene bot omegine. Ocako koko matek ma Luejipt bene giwinyo, ki jo ma i gaŋ kal pa Parao bene guwinyo. Yucepu owaco bot omegine ni, “An a Yucepu; wora mono pud tye makwo?” Ento omegine pe gitwero gamo doge, pien tipo komgi oto woko i nyime. Yucepu owaco bot omegine ni, “Alegowu, wubin bota cok.” Gucito cok bote. Owacogi ni, “An aye ominwu Yucepu, ma yam wucato i Ejipt. Pe doŋ wubed ki cwercwiny, pe cwinywu owaŋ i komwu kekenwu pi cato an kany; pien Lubaŋa aye yam ocwala kany i nyimwu, wek akony kwowu, Pien kec doŋ obedo i lobo pi mwaka aryo; pud dok odoŋ mwaka abic ma pur ki kac bibedo pe. Lubaŋa ocwalo an i nyimwu wek agwok ki wun jo ma bidoŋ wi lobo, ki pi gwoko ki wun jo mapol ma gibibwot makwo. Pien wun aye yam pe wucwala kany, ento Lubaŋa gire; omiyo an adoko won Parao, ki lalo ode ducu ki lalo lobo Ejipt ducu. Wutim oyot, wucit bot wora, wuciwacce ni, ‘Latinni Yucepu owaco kuman ni, Lubaŋa oketa abedo laloyo i Ejipt ducu; bin bota kany, pe dok iru. Ibibedo i lobo Gocen, ibibedo cok kweda, in ki litinoni ki litino pa litinoni ducu, ki dyegini ki dyani-gu ki gin ma itye kwedgi ducu. Abipito in kunnu pien pud dok odoŋ mwaka me kec mukene abic i anyim; wek in ki jo ma i paconi, ki gin ma it ye kwedgi ducu pe wubed lucan.’ Iyo, kombeddi waŋjwu oneno, ki waŋ omera Benjamin bene oneno ni an kikoma aye aloko kwedwu ki doga, Myero wun wucitit bot wora kit deyona ducu ma atye kwede i Ejipt, ki gin ducu ma doŋ wuneno. Wucit oyot, wek wukel wora kany.” Ocako poto i ŋut ominne Benjamin ki koko, ki Benjamin bene okok i ŋute, Ka onoto lem omegine ducu kun kok; ka doŋ lacen omegine gucako boko lok kwede. Ka lok owinnye wa ki i ot pa Parao ni, “Omegi Yucepu gubino”, pire oyomo cwiny Parao ki luticce matek. Parao owaco bot Yucepu ni, “Wac bot omegini ni, ‘Wutim kit man, wutwe yec i ŋe kanawu, wudok cen i lobo Kanaan; wutiŋ wonwu ki jowu, wek wubin bota; abimiyowu gin mabeco ma tye i lobo Ejipt, wucicamo moo ma i lobo-ni.’ “Dok icikgi ni, ‘Wutim kit man: Wuter gadigadi nia ki i lobo Ejipt kany pi litinowu matino ki pi mon mewu, wek wukel wonwu obin. Pe wupar pi jamiwu, pien gin mabeco ma tye i lobo Ejipt ducu mewu.’ ” Awobe pa Icrael gutiyo kit meno; Yucepu omiyogi gadigadi kit macalo Parao ociko, ka dok omiyogi peke me wotgi. Omiyo botgi ducu ŋat acel acel boŋŋi mabeco me aruka i nino madito, ento bot Benjamin omiyo cekel me ryal miya adek ki ruk mabeco abic me nino madito. Ocwalo bot wonne jami macalo man: Kana apar ma guyene ki jami mabeco ma oa ki i Ejipt, ki megi kana apar ma guyeyo kal, ki cam, ki peke me wot pa wongi. Ka doŋ ocako cwalo omegine gucito. Ka doŋ gia ocikogi ni, “Pe wubed ka da iyo.” Ka gua woko ki i Ejipt, ci gudwogo i lo bo Kanaan bot wongi Yakobo, Ka gutitte ni, “Yucepu pud tye makwo, en aye laloyo i lobo Ejipt ducu”; ci tipo kome oto woko lirut, pien onoŋo peya oye lokgi. Ento ka doŋ gutitte lok kom Yucepu ducu, kit ma ocikogi kwede, ka dok pi neno lwak gadigadi ma Yucepu ocwalo pi tiŋo en, ka tipo kom wongi ocako dwogo. Ka Icrael ocako lok ni, “Doŋ otum, woda Yucepu kara pud tye makwo; abiwot acito ka nene ma pud peya ato.” Icrael ocako wot ki jami ma yam en tye kwedgi ducu; ka obino i Beer-ceba, ci otyero gitum bot Lubaŋa pa wonne Icaka. Lubaŋa oloko ki Icrael i waŋ lek dyewor kun lwoŋe ni, “Yakobo, Yakobo.” En ogamo ni, “An a ene.” Owacce ni, “An Lubaŋa, Lubaŋa pa woru; pe ilwor cito i Ejipt, pien abimiyi idoko rok madit kunnu. Abicito kwedi wa i Ejipt, abidwoki cen bene; doki i kare ma ibito, ciŋ Yucepu biumo waŋi.” Yakobo ocako wot ki i Beer-ceba, kun awobene gutiŋe, kacel ki litinogi matino, ki mongi, i gadigadi ma Parao ocwalo me tinogi. Gutero limgi makwo ki jamigi ma yam gulimo ki i lobo Kanaan, gucito kwede i Ejipt; gutero Yakobo ki litinone ki likwaye ducu. En owoto i Ejipt ki awobene ki anyirane ducu, wa ki likwaye ma co ki ma anyira. Man aye nyiŋ likwayo pa Icrael ma gucito i Ejipt: Yakobo ki awobene. Reuben, latin kayo pa Yakobo, ki awobe pa Reuben, aye Kanok, Pallu, Kejeron ki Karmi. Awobe pa Cimeon aye Jemuel, Jamin, Okad, Jakin, Jokar ki Caul, ma awobi pa dako Lakanaan, Awobe pa Levi aye Gercon, Kokat ki Merari. Awobe pa Juda aye Er, Onan, Cela, Perej ki Jera, ento Er ki Onan guto woko i lobo Kanaan; awobe pa Perej aye Kejeron ki Kamul. Awobe pa Icakar aye Tola, Puwa, Iob, ki Cimron. Awobe pa Jabulon aye Cered, Elon ki Jaleel. Meno aye awobe pa Lea ma en onywalo ki Yakobo i Paddan-aram, kacel ki nyare Dina; wel litino awobene ki anyirane giromo pyeradek wiye adek. Awobe pa Gad aye Jipion, Kagi, Cuni, Ejibon, Eri, Arodi ki Areli. Awobe pa Acer aye Imna, Iciva, Icivi, Beria ki Cera ma lamingi. Awobe pa Beria aye Keber ki Malkiel. Meno aye litino awobe pa Jilpa, ma Laban omiyo bot Lea; en onywalo ki Yakobo litino apar wiye abicel. Awobe pa Lakeri dako pa Yakobo aye Yucepu ki Benjamin. Yucepu onywalo Manace ki Epraim ki i lobo Ejipt, ma Acenaci, nya, pa Potipera ajwaka me On aye onywalogi. Awobe pa Benjamin aye Bela, Beker, Acibel, Gera, Naaman, Eki, Roc, Mupim, Kupim ki Arud. Meno aye awobe pa Lakeri ma en onywalo ki Yakobo, litino ducu apar wiye aŋwen. Awobi pa Dan aye Kucim. Awobe pa Naputali aye Jajeel, Guni, Jejer ki Cilem. Meno aye likwayo pa Bila ma Laban yam omiyo ki nyare Lakeri; en onywalo ki Yakobo litino ducu abiro. Jo ducu ma tuŋ bot Yakobo ma yam ocito kwedgi i Ejipt, ma gin yam litinone ki likwaye kikome, ma pe gikwano iye mon pa litino awobene onoŋo giromo jo pyerabicel wiye abicel; ki litino awobe ma nene Yucepu onywalogi ki i Ejipt, nene gin awobe aryo; pienno jo ducu ma tuŋ bot Yakobo ma gucito i Ejipt giromo pyerabiro. Yakobo ocwalo Juda anyim bot Yucepu, wek onyuttigi yo ma cito i Gocen; ci guo i lobo Gocen, Yucepu oyubo gadigadine me cito ka rwatte ki wonne Icrael i Gocen; ka ocito, onyutte kekene bote, ka opoto i ŋute kun kok kwede pi kare mo malac. Icrael owaco bot Yucepu ni, “Tin to doŋ obin, pien doŋ aneno waŋi, aniaŋ ni pud ikwo ada.” Yucepu owaco ki omegine ki jo ma i ot pa wonne ni, “Abidok ka tito ki Parao, abiwacce ni, ‘Omega ki jo ma i ot pa wora, ma yam gitye i lobo Kanaan, doŋ gutyeko bino bota; gin lukwat, pien gin yam lukwat dyaŋi; dok gin gubino ki dyegigi ki dyani-gu, ki gin ducu ma gitye kwede.’ Ka ce Parao olwoŋowu, ka openyowu ni, ‘Wun wutiyo tic aŋo?’ wun wudok iye ni, ‘Wan luticci wan lukwat dyaŋi nia ka tinowa nio kwede wa onyoo, wan kacel ki kwarowa’, wek wubed i Gocen, pien bedo me kwer bot Luejipt me bedo ki lakwat mo.” Yucepu ocito ka tito bot Parao ni, “Wora ki omega, ki dyegigi ki dyaŋi-gu ki jamigi ducu gutyeko bino ki i lobo Kanaan; kombeddi doŋ gitye i lobo Gocen.” Okwanyo jo abic ki i kin omegine, oterogi, onyutogi bot Parao. Parao openyo omegine ni, “Wun wutiyo tic aŋo?” Gin guwaco bot Parao ni, “Wan luticci wan lukwat macalo kwariwa.” Ka guwaco bot Parao ni, “Wan doŋ wabino ka bedo i lobo-ni; pien ka kwayo limwa aye pe, pien onoŋo kec doŋ Lyet twatwal i lobo Kanaan; kombeddi walegi ni, wek wabed i lobo Gocen.” Parao owaco bot Yucepu ni, “Woru ki omegini doŋ gubino boti. Lobo Ejipt tye boti, ket woru ki omegini i lobo maberre, wek gubed i lobo Gocen; ka iŋeyo i kingi jo makwiri, ci iketgi gubed ludito ma gwoko limma.” Lacen Yucepu okelo wonne Yakobo, okete i nyim Parao, ci Yakobo olamo gum i kom Parao. Parao owaco bot Yakobo ni, “In mono doŋ iri wi lobo mwaka adi kaa?” Yakobo owaco bot Parao ni, “An doŋ ari wi lobo mwaka miya acel ki pyeradek macalo labedo. Ento mwaka ma ari kwede pud nok, dok opoŋ ki can, peya rom ki mwaka pa kwarina ma gubedo kwede macalo lubedo.” Yako bo olamo gum i kom Parao, ka doŋ okato woko ki i nyime. Yucepu omiyo ki wonne ki omegine kabedo i lobo Ejipt, i ŋom maberre, i Ramcec, kun miyogi lobo wek obed megi, kit macalo Parao ociko, Yucepu ocako poko cam ki wonne, ki omegine ki bot jo ducu me ot pa wonne, kun lubo wel jo ma tye botgi. I kare meno onoŋo cam doŋ pe i lobo ducu; pien onoŋo kec doŋ Lyet twatwal, omiyo jo ma i lobo Ejipt ki i lobo Kanaan kec obwoyogi woko, Yucepu ocoko cente ducu ma yam tye i lobo Ejipt ki i lobo Kanaan, ma yam dano guwilo ki cam; ci otero i ot pa Parao, Ka cente doŋ otum woko ki i lobo Ejipt ki i lobo Kanaan bene, ci jo Ejipt ducu gubino bot Yucepu, guwaco ni, “Miniwa cam; myero wato ki i komi ma ineno piŋo? Pien centewa doŋ otum woko.” Yucepu ogamo ni, “Wumiya lim makwo, ci an abimiyowu cam aloko ki dyaŋwu, ka limwu me cente doŋ otum woko.” Gucako kelo limgi makwo bot Yucepu, aguragura, romi, dyaŋi ki kana; ci Yucepu olokogi ki cam, I mwaka meno opoko botgi cam pi ‘lwak lim makwo ma gukelo. Ka mwaka meno doŋ otum, ci gubino bote i mwaka ma lubone, kun giwacce ni, “Wan pe doŋ wakano lok mo boti, laditwa, centewa doŋ watyeko woko ducu; ki lim makwo doŋ odoko pa laditwa; gin mo pe ma odoŋ i nyim laditwa, kono komwa ki lobowa keken. Myero wato ki i komi ma inenowa piŋo, wan kacel ki lobowa? In iwilwa ki cam kacel ki lobowa, wan kacel ki lobowa wabibedo opii pa Parao; dok imiwa kodi wek wabed makwo, pe wato, wek lobo pe odoŋ noŋo.” Kit meno Yucepu owilo lobo ducu me Ejipt obedo pa Parao; pien Luejipt ducu gucato pottigi woko, pi kec ma onoŋo doŋ Lyet twatwal. Lobo odoko pa Parao; oloko dano ducu gubedo opii, nia i agikki lobo Ejipt tuŋ cel, nio tuŋ cel. Lobo pa ajwagi keken aye pe giwilo, pien ajwagi onoŋo gitye ki camgi ma a ki i ciŋ Parao; onoŋo gubedo ka camo gin ma Parao miyogi, mumiyo pe gucato lobogi. Yucepu dok owaco bot lwak ni, “Nen, i kare man atyeko wilowu ki lobo mewu me bedo pa Parao. Kombeddi doŋ wugam kodi ma wubicoyo i lobo. I kare me kac wubimiyo acel me abic bot Parao, ki dul aŋwen me abic bibedo mewu, pi kodi me acoya i pottiwu, ki pi camwu, ki jo ma i pacowu, ki cam pa litinowu.” Gugamo ni, “Doŋ ityeko laro kwowa, wek berwa onen i nyimi, ladit, wan wabibedo opii pa Parao.” Pi lok man Yucepu oketo odoko cik i lobo Ejipt, pud tye nio wa onyoo, ni, Parao myero oter dul acel me abic; lobo pa ajwagi keken aye pe odoko pa Parao. Jo Icrael gubedo i lobo Ejipt, i lobo Gocen; gunoŋo iye lim, gumedde, gunya mapol. Yakobo obedo i lobo Ejipt mwaka apar wiye abiro; kit meno nino pa Yakobo, mwaka me kwone ducu, oromo miya acel ki pyeraŋwen wiye abiro. Ka kare me to pa Icrael doŋ onyiko cok, ci olwoŋo wode Yucepu, owacce ni, “Ka doŋ berra onen boti, ci irwak ciŋi, odony ki piny i te ema, icikke kweda ki gen ki ada ni, pe ibiyika i Ejipt, ento wek acibut kacel ki’ kwarina; tiŋa woko ki i Ejipt, ci iciyika i kabedo ma giyikogi iye.” En ogamo ni, “Abitiyo kit ma doŋ iwaco-ni.” Dok owaco ni, “Kwoŋŋa kwoŋ,” ci ocako kwoŋo kwoŋ, Lacen Icrael okulo wiye piny i wi kitandane. Lacen gitito bot Yucepu ni, “Nen, woru kome lit;” ci otero litino awobene aryo, Manace ki Epraim, Ka gitito ki Yakobo ni, “Wodi Yucepu obino boti,” ci Icrael ocukke oa malo, obedo i wi kitanda. Yakobo owaco bot Yucepu ni, “Lubaŋa Matwero-ducu yam onen bota i Luj i lobo Kanaan, omiya iye gum, owacca ni, ‘Nen, abimiyi inya imedde mapol, dok abimiyi idoko rok mapol, abimiyo lobo man bot likwayi ki jo ma bilubogi obed megi matwal.’ Awobeni aryo-ni ma inywalogi i lobo Ejipt ma onoŋo peya abino boti i Ejipt, meno mera gira; Epraim ki Manace gibibedo litinona, macalo Reuben ki Cimeon bene. Litino ma ginywalogi ki i ŋegi bibedo meri, ento gibikwanogi ki nyiŋ omegigi i kare ma gipoko lobo me bedo ginaleyagi. Pien ka yam aa ki i Paddan, me cwercwiny Lakeri otona woko i lobo Kanaan i waŋayo, munoŋo Eprat pud kiborbor; ci ayiko en i yo ma cito Eprat, en aye Beterekem.” Ka Icrael oneno awobe pa Yucepu, ci owacci, “Man kono jo mene?” Yucepu ogamo dog wonne ni, “Gin litino awobena, ma Lubaŋa omiya ki kany.” Ka owacci, “Kelgi bota kany, wek alam gum i komgi.” I kare meno onoŋo Yako bo doŋ oti, waŋe ocido woko, ma pe doŋ neno piny. Ka Yucepu okelogi cok bote, ci onoto lemgi ka okwakogi ki bade. Icrael owaco bot Yucepu ni, “Onoŋo yam atamo ni pe dok abineno waŋi; nen, ka Lubaŋa dok omiyo aneno wa litinoni bene.” Yucepu odirogi cen manok ki ka coŋe; oryebbe piny, okulo wiye-i ŋom. Yucepu otero gin aryo ducu, omako Epraim ki ciŋe tuŋ lacuc mukemo ciŋ Icrael ma lacam, ki Manace omako ki ciŋe tuŋ lacam ma okemo cin Icrael malacuc, odirogi cok bote. Icrael otino ciŋe malacuc oketo i wi Epraim, ma latin matidi, ki ciŋe malacam oketo i wi Manace, kun ogwenyo ciŋe, pien Manace aye onoŋo latin kayo. Olamo gum i kom Yucepu kun waco ni, “Lubaŋa ma yam kwarowa Abraim ki Icaka gubedo ka lubo cikke, Lubaŋa ma obedo ka kwayo an i kare me kwona ducu nio wa i nino man, lamalaika ma yam olara ki i gin marac, omi gum botawobe-ni; wek gilwoŋ nyiŋa pigi, ki nyiŋ kwarowa Abraim ki Icaka; gudoŋ, gudok lwak mapol i wi lobo.” Ka Yucepu oneno ni wonne ogwenyo ciŋe malacuc aye dok oketo i wi Epraim, pe opwoyo; ci ocako kwanyo ciŋ wonne ki i wi Epraim wek elok eket i wi Manace, Yucepu owaco bot wonne ni, “Pe kit meno, wora, pien man aye latin kayo, ket ciŋi malacuc i wiye.” Ento wonne okwero woko, kun wacci, “An aŋeyo ya latinna, aŋeyo; en bibedo rok, en bene bibedo madit, ento ominne matidi bibedo dit makato en, likwaye bidoko lwak rok mapol.” Olamo gum i komgi i nino meno, kun wacci, “Icrael bilamo gum ki nyiŋwu, ni, ‘Lubaŋa omiyi ibed macalo Epraim ki Manace’;” kit meno oketo Epraim i nyim Manace. Icrael owaco bot Yucepu ni, “Nen, an doŋ acok to, ento Lubaŋa bibedo kwedwu, dok bidwokowu i lobo pa kwarowu. Kor got ma yam ayako ki i ciŋ jo Amor ki pala lucwan ki atero, doŋ atyeko miyo boti makato pa omegini.” Yakobo olwoŋo awobene, ci owacogi ni, “Wucokke kacel, wek atittiwu gin ma bitimme i komwu i kare ma anyim. Wugurre wek wuwiny, wun litino awobe pa Yakobo, wuwiny wonwu Icrael. “Reuben, in aye latin kayona, in i kerona, ma akwoŋo nywalo ki tekona, in aye iloyo omegini ki wakke ki tek kom. Icorre macalo pii, pe ibiloyogi matwal, pien iito wa i wi kitanda pa woru; ipyedde iye, iito i wi kabutona! “Cimeon ki Levi gin omego; pala lucwangi aye gi-lwenygi magwa. Tipona, pe icit i kacokkegi; in, cwinya, pe iribbe kwedgi i gurregi; pien guneko lwak dano ki kiniga dok gitoŋo odon twoni dyaŋi akaka. Gicen kinigagi, pien ger; gicen akemogi, pien gwa! Abipoko kingi aketogi i kin jo pa Yakobo abikeyogi woko i dye Icrael. “Juda, omegini gibipaki; ciŋi bimako ŋut lukworri: litino pa woru gibiryebbe piny i nyimi. Juda en latin labwor: ia ki ka mwodo lee, latinna, ci iito malo. En onyono piny, obuto calo labwor, macalo min labwor; aŋa ma bituge? Odoo-ker pe bia ki bot Juda, tal-ker bene pe bia ki ka tyene, nio ka rwode kikome bibino: en aye rok ducu biworo doge. En tweyo latin kanane i kom yat olok, tweyo wod kana i kom olok maberre, en lwoko ginarukane ki koŋo vino ki boŋone i pig olok; koŋo vino bimiyo waŋe lokke doko makwar, cak biloko lake doko matar. “Jabulon bibedo i dog nam en bibedo waŋ wat me mel, waŋ lobone bibedo wa i Cidon. “Icakar en kana matek, buto i dye anok romi; oneno ka yweyone tye maber, ki lobone bene tye maber; onyoco gwoke piny ka tiŋo yec, odoko opii ma gidiyo i tic matek. “Dan biŋolo kop i kom jone macalo ŋat acel i kin kaka me Icrael. Dan bibedo twol ma i ŋet yo lacocodo ma iyo,’ ma bitoŋo opuny aguragura miyo labed i wiye poto ataro. Akuro lar meri, ai Rwot. “Gad mony bipoto i kome ento en binyono opuny tyengi. “Acer camme bibedo moo, en bikelo cam mamit muporo cam pa luker. “Naputali en labwo til ma gituko, ma iye olil ki lok “Yucepu en jaŋ yat ma nyak, jaŋe ginyak madwoŋ i ŋet waŋ it; jaŋe gilak i kom cel. Wegi atero gilwenyo i kome ki gero, gibaye, giruce matek; ento atumme cuŋ mot lilin, ciŋe odoko mit pi ciŋ Twon Oteka pa Yakobo, pi nyiŋ Lakwat, en Got pa Icrael, pi Lubaŋa pa woru ma bikonyi, pi Lubaŋa Matwero-ducu ma bi miyi gum; gum ma a malo i polo, gum ma a i kut matut muyarre i te lobo, gum ma a i tuno ki gum ma a i mego. Gum pa abani dwoŋ, loyo gum pa godi ma ri nakanaka, ki jami mabeco ma i wi cere ma bedo matwal; gubed i wi Yucepu, ki i tur nyime, en ma yam opokke woko ki i kin omegine. “Benjamin en orudi mager, camo lee ma oneko odiko, dok poko lim ma en oyako otyeno.” Magi aye kaka pa Icrael apar wiye aryo; man aye lok ma wongi oloko kwedgi i kare ma en lamo gum i komgi, kun lamo gum i kom ŋat acel acel kit macalo gumme tye kwede. Ci doŋ ocikogi kun waco botgi ni “An doŋ abito adok bot jona; be; wubiyika bot kwarina i boro ma tye i poto pa Epron Lakit, i boro meno ma tye i Makpela, tuŋ wokceŋ me Mamre, i lobo Kanaan, ma yam Abraim owilo kacel ki poto, ki bot Epron Lakit, odoko mere me kabedo me yik. Kunnu yam giyiko iye Abraim ki dakone Cara; kunnu bene giyiko iye Icaka ki dakone Labeka; an bene dok ayiko Lea kunnu; poto meno ki boro ma tye iye yam giwilo ki bot jo Kit.” Ka Yakobo otyeko ciko litino awobene, ci odolo tyene malo i wi kitanda, oomo cwinye me agikkine, oto odok bot lutugi. Yucepu ocako poto i nyim wonne, okok ki pig waŋe kun noto leme, lacen ociko luticce ma ludaktar pi wiro kom wonne ki yat ma talo kom, ci ludaktar guwiro kom Icrael; kun wirone otyeko nino pyeraŋwen, en aye nino ma mitte ka giwiro kom dano ki yat latal kom. Luejipt gukoko Yakobo nino pyerabiro. Ka nino me kwero cola doŋ otum, ci Yucepu oloko ki jo pa Parao, kun wacci, “Alegowu ni, ka wuneno kombeddi ni bedona botwu kany oyomo cwinywu, ci wuwac lokke bot Parao, kun wuwacce ni, wora omiya akwoŋo kwon kun waco ni, ‘An doŋ acok to: wubiyika i Lyel ma yam an ki koma aye akwinyo i lobo Kanaan.’ Mumiyo alegi ni, itima ber, wek aciyik wora, ka adwogi.” Parao ogamme ni, “Ber iwot giri, iciyik woru, kit macalo en omiyo ikwoŋo akwoŋa-ni.” Ci Yucepu ocito ka yiko wonne, ocito ki lwak lutic pa Parao ducu, ludoŋo me ode, ki ludoŋo ducu me lobo Ejipt, kacel ki jo ducu me ot pa Yucepu, ki omegine, ki jo me ot pa wonne. Litinogi keken ki lwak dyaŋigi ki dyegigi aye gudoŋ i lobo Gocen. Yucepu ocito ki lwak gadigadi ki wegi aguragura, owoto ki lwak jo mapol twatwal. Ka guo i laro moyo ma i Atad, ma tye loka Jordan ci gukok kunnu ki cwercwiny ki kumo madwoŋ; Yucepu okwero cola pa wonne nino abiro. Ka wegi lobo-nu ma gin Lukanaan, guneno kwero cola ma i laro moyo i Atad, ci guwaco ni, “Mankwero cola me cwercwiny madwoŋ bot Luejipt.” Pi meno nyiŋ kabedo meno gilwoŋo ni, Abel-micraim; tye loka Jordan. Awobene gutimo i kome kit ma nene en ocikogi kwede, pien awobene gutero kome i lobo Kanaan, ci guyiko kome i boro ma i poto ma tye i Makpela i tuŋ wokceŋ me Mamre, ma yam Abraim owilo, kacel ki poto, bot Epron Lakit, wek obed mere me kabedo me yik, Ka doŋ otyeko yiko wonne, ci Yucepu odok i Ejipt kacel ki omegine, ki jo ducu ma nene ocito kwedgi ka yiko wonne. Ka omegi Yucepu guneno ni wongi doŋ otyeko to woko, ci gutamo ni, “Gwok nyo Yucepu doŋ bicako kwerowa woko, biculo kwor ma yam watime kwede marac-ci i komwa.” Omiyo gucako cwalo kwena bot Yucepu kun giwaco ni, “Yam woru ocikowa ki cik man ma onoŋo peya oto, ni, ‘Wuwac bot Yucepu ni, alegi itim kica bot omegini pi tim aranyi ki pi bal ma gutimo i komi, pien gutimo tim aranyi i komi ada.’ Doŋ kombeddi walegi itimwa kica pi tim aranyiwa, pien wan waworo Lubaŋa pa woru.” Yucepu okok ka guloko kwede. Omegine bene gucito ci guryebbe i nyime kun giwaco ni, “Nen, wan doŋ luticci.” Ento Yucepu odok iye botgi ni, “Pe wulwor, an atye ma ka Lubaŋa bo? Ki tuŋ botwu yam wuyubbe pi timo gin marac i koma, ento Lubaŋa oyubo pi tiyo gin maber, ma omiyo jo mapol gubedo kwo, macalo gitye kwede wa kombeddi. Pi meno pe wubed ki lworo mo; abipitowu ki litinowu ducu.” Kit meno ojiŋo cwinygi kun kweyo igi. Kit meno Yucepu obedo i Ejipt, en ki jo me ot pa wonne, ori mwaka miya acel ki apar. Yucepu oneno litino pa Epraim, nio wa i kom likwaye me adekke; litino pa Makir wod pa Manace en omiyo gubedo mere bene. Yucepu owaco bot omegine ni, “An doŋ acok to; ento Lubaŋa bilimowu, dok en bikwanyowu woko ki i lobo man, bidwokowu ka ma yam okwoŋo iye bot Abraim ki Icaka ki bot Yakobo.” Yucepu omiyo litino pa Icrael gukwoŋo kwoŋ kun waco ni, “Lubaŋa bilimowu, ci wubiiino cogona woko ki kany.” Yucepu oto, ma mwaka me ditte romo miya acel ki apar; guwiro kome ki yat latal-kom, lacen gupyelo kome i canduk me yik i Ejipt. Man aye nyiŋ awobe pa Icrael ma yam gubino i Ejipt kacel ki Yakobo, kun ŋat acel acel bino ki jo nia i ode: Reuben, Cimeon, Levi, Juda, Icakar, Jabulon, ki Benjamin, Dan ki Naputali, Gad ki Acer. Litino pa Yakobo ducu giromo pyerabiro, kun onoŋo Yucepu doŋ tye i Ejipt. Ci Yucepu oto, ki omege ki yalwak ke ducu. Ento likwayo pa Icrael gunya gumedde mapol; gunya, gudoko matek twatwal, ci gupoŋo lobo woko. Ka kabaka manyen oloyo Ejipt, ma yam pe ŋeyo Yucepu, ci ocako waco ki lwak ke ni, “Nenu, jo Icrael doŋ gidwoŋ twatwal, dok gitek, giloyowa woko. Wubin wek watimugi ki ryeko, wek pe gunya twatwal; pien ka mony bipoto i komwa, ci giribbe ki lumerokwa ka lweny i komwa, ci giriŋo woko, giweko lobowa.” Pi meno guketo ludito ma loyo tic me romogi, ki tic madwoŋ; ci gugero ki Parao gaŋ kal ma nyiŋgi Pitom ki Ramcec, me kano cam. Ento ka gimedo can i komgi, gin bene ginya, gimedde, gipoŋo lobo malac, ci Luejipt gubedo ki lworo i kom jo Icrael. Pienno girido jo Icrael ki tic magwa, ma omiyo kwogi obedo ki peko pi tic matego me nyono lobo ki goyo matafali, ki kit tic ducu me poto; i dog ticgi ducu giridogi ki tic magwa. Ka dok kabaka me Ejipt oloko bot lucol-mon pa jo Ibru, ma ŋat acel nyiŋe Cipira ki mukene Pua, owaco ni, “Ka wutye ka colo mon jo Ibru, ka wunenogi ma pud gitye i wi kom me nywal, ka latin laco, ci wubineko woko; ka latin nyako, ci wuwek makwo.” Ento lucolo yam lworo Lubaŋa, ci pe, gutiyo kit ma kabaka me Ejipt ocikogi ento guweko litino co makwo, Mumiyo kabaka me Ejipt dok olwoŋo lucolmon, ci owaco botgi ni, “Wutimo kuman piŋo, ma wuweko litino co makwo-ni?” Lucol-mon guwaco bot Parao ni, “Pien mon jo Ibru pe girom ki mon Ejipt, pien komgi rom, miyo ginywal woko ma noŋo lacol-mon peya obino botgi,” Mumiyo Lubaŋa otimo lucol-mon ber; dano gunya gudoko matek twatwal. Pien lucolmon gulworo Lubaŋa, Lubaŋa omiyogi gudoko mego. Parao dok ociko lwakke ducu ni, “Latin laco acel acel ma jo Ibru gunywalo wubibolo woko i kulu Nail, ento wubiweko litino anyira ducu gibedo makwo.” Laco mo ma ladoggola pa Levi ocito onyomo nyako mo ma nya pa Levi. Dako-nu ogamo ic, ci onywalo latin laco. Ka dako oneno ni latinne ber twatwal, ci okane woko dwe adek. Ka doŋ pe twero kanne, ci otiŋo aduku ma gicweyo ki togo, ci opuyo ki odok yat; opyelo iye latin, otero oroyo i dye aluga ma i ŋet kulu. Laminne ocuŋ ki cen pi ŋeyo gin ma bitimme i kome. Ka nya pa Parao obino ka lwok i kulu, ci anyirane guwoto gurabo ŋet kulu; en oneno aduku ki i kin aluga, ocwalo aŋecane ka omone. Ka oelo wiye, ci oneno iye latin; ci nen, latin okok. Kica omake i kome, ci owacci, “Man latin pa jo Ibru.” Laminne owaco ki nya pa Parao ni, “Acit alwoŋ lapidi mo ki i kin mon Ibru, wek opitti’ latin bo?” Nya pa Parao ogamo ni, “Citi.” Kit meno nyako-nu ocito olwoŋo min latin. Ci’ nya pa Parao owacce ni, “Cit ki latin man, ci icipitta; an abiculli mucarani.” Kit meno min latin otero latin, opito. Ka doŋ latin odoŋo, ci otere bot nya pa Parao, odoko wode ocako nyiŋe Moses kun waco ni, “Pien aywayo ki i pii.” Ka Moses doŋ odoŋo, ci i niŋo mo acel en owoto bot lutugi, oneno pekogi. Ka oneno Laejipt mo ka goyo Laibru mo, ma ŋat acel i kin lutugi, ci oneno piny tuŋŋi ki tuŋŋi, pe oneno ŋatti mo, ci oneko Laejipt meno, okane woko i kweyo, Ka dok orwone, ka odok, nen jo Ibru aryo dok gubedo ka lweny, ci owaco bot latim bal ni, “Piŋo igoyo lawoti?” Ogamo ni, “Aŋa muketi me bedo laker ki laŋolkop i komwa? In imito neka macalo ineke Laejipt-ti?” Ci lworo omako Moses kun tamo ni, “Ada lok man oŋene woko.” Ka Parao owinyo lok man, ci omito neko Moses. Ento Moses oriŋo olwi woko ki bot Parao, obedo i lobo Midian; ci obedo piny i ŋet waŋ pii. Onoŋo yam ajwaka pa jo Midian tye ki anyirane abiro; gubino gutwomo pii, ci gupoŋo weer ki pii me amata pa lim pa wongi. Lukwat gubino guryemogi woko; ento Moses oa ci okonyogi, omiyo limgi gumato pii. Ka gudwogo wongi Reuel, en owacci, “Piŋo wudwogo con?” Gugamo ni, “laEjipt mo aye olarowa ki bot lukwat en, aye otwomowa pacoii, dok omiyo lim omato.” Reuel owaco ki anyirane ni“En tye kwene? Piŋo wuweko laco meno odoŋ woko? Wulwoŋe wek ocam kwon.” Moses oye bedo bot dano meno, en omiyo nyare Jipola Moses. Ci onywalo latin laco, ocako nyiŋe Gercom, kun waco ni, “An labedo i lobo pa lurok.” I lwak kare meno ducu, kabaka Ejipt oto iye woko, ci jo Icrael gubedo ka cur pi bedo opii, kun gikok gimito kony; ci kokogi pi bedo opii owinnye bot Lubaŋa. Ka Lubaŋa owinyo cur megi, ci opo pi gicikkene ki Abralm ki Icaka, ki Yakobo. Lubaŋa oneno jo Icrael, ci oŋeyo kit bedogi. Ka yam Moses tye ka kwayo lim pa won dakone, Yecero, ma ajwaka pa jo Midian, ci otero limme i tim ma yo tuŋ potoceŋ, owoto kwede wa i Koreb, ma got pa Lubaŋa, Lamalaika pa Rwot onen bote i leb mac ma i dye caka; oneno caka tye ka lyel mac pe gin mo waŋ, Moses owacci, “Abiŋak wek anen gin ma nen madit-ti ki piŋo caka-ni pe waŋ woko.” Ka Lubaŋa oneno ni en oŋak ka nenone Lubaŋa olwoŋe ki i caka, ni, “Moses! Moses!” En ogamo ni, “An a ene.” Ci Lubaŋa owacce ni, “Pe inyik cok kany. Luny war woko ki i tyeni, pien kabedo ma icuŋ iye-ni noŋ maleŋ.” Ka owacce ni, “An Lubaŋa pa woru Lubaŋa pa Abraim, Lubaŋa pa Icaka ki Lubaŋa pa Yakobo.” Moses okano waŋe woko, pien onoŋo lworo neno Lubaŋa. Rwot dok owacci, “Doŋ atyeko neno atwom pa jona i Ejipt, ka dok awinyo kokogi i kom ludito ma loyo ticgi. Ci doŋ alor piny ka larogi ki iciŋ jo Ejipt, ki kwanyogi woko ki i lobo meno, wek akelgi i lobo maber, malac, lobo ma mol cak ki moo kic, i kabedo pa jo Kanaan, jo Kit, jo Amor, jo Periji, jo Kiv ki jo Jebuc. Ci nen, koko pa jo Icrael doŋ owinnye wa bota, dok aneno kit uno ma jo Ejipt giunogi kwede. Bin, abicwali bot Parao wek ikwany jona, likwayo pa Icrael, ki i Ejipt.” Ento Moses owaco bot Lubaŋa ni, “An aŋa ma aromo cito bot Parao, ki kwanyo likwayo pa Icrael woko ki i Ejipt?” Lubaŋa ogamo ni, “Ento an aye abibedo kwedi; man aye bibedo lanyut boti, ma nyuto ni an aye acwali: ka doŋ ityeko kwanyo jona woko ki i Ejipt, ci wubiworo Lubaŋa i kom got man.” Moses owaco bot Lubaŋa ni, “Ka acito bot jo Icrael, awaco botgi ni, ‘Lubaŋa pa kwarowu ocwala botwu,’ ce ka gupenya ni, ‘Nyiŋe aŋa?’ ci abiwaco botgi nio?” Ci Lubaŋa owaco ki Moses ni, “ATYE MA ATYE.” Ka dok owacci, “Wac lok man bot jo Icrael ni, ‘ATYE aye ocwala botwu.’ ” Lubaŋa dok onwoyo waco bot Moses ni, “Wac man bot jo Icrael, ni, ‘Rwot, ma en Lubaŋa pa kwarowu, Lubaŋa pa Abraim, Lubaŋa pa Icaka, Lubaŋa pa Yakobo, ocwala botwu.’ Man aye nyiŋa matwal, wubipo i koma, wun ki likwayowu ducu, kit man. Cit icok ludoŋo pa jo Icrael kacel, ka iwac botgi ni, ‘Rwot, ma en Lubaŋa pa kwarowu, Lubaŋa pa Abraim, pa Icaka ki pa Yakobo, otyeko nen bota, kun waco ni, Aciko waŋa ka nenowu, ki kit ma gitimowu kwede i Ejipt; doŋ acikke ni abikwanyowu woko ki i atwom ma wutye kwede i Ejipt, adwokowu i lobo pa jo Kanaan, jo Kit, jo Amor, jo Periji, jo Kiv ki jo Jebuc, i lobo ma mol cak ki moo kic.’ Ci gin gibiworo dogi; in ki ludoŋo pa jo Icrael wubicito bot kabaka me Ejipt, ci wuwacce ni ‘Rwot, ma en Lubaŋa pa jo Ibru, oromo kwedwa, ci kombeddi walegi ni, wek wawot i tim, wot ma romo nino adek, wek watyer gitum bot Rwot Lubaŋawa.’ Aŋeyo ni kabaka me Ejipt pe biye wun wucito nio ka giruye ki bad matek. Mumiyo abiryeyo bada, ci abipwodo jo Ejipt ki taŋo ducu ma abitiyo kunnu; ci lacen en biye wucito. Dok abimiyo jo man ginoŋo gum i nyim jo Ejipt, wek ka wubicito, pe wucit ki ciŋwu nono, ento dako acel acel bikwayo dako wadi, ki dako ma labedo i ode, kun lego atego ryal ki atego jabu, ki boŋo bene ma wubiruko i kom awobewu ki anyirawu; kit meno miyo wubiyako jo Ejipt.” Moses ogamo ni, “Ento nen, pe gibiye lokka, pe gibiwinyo doga bene, pien gibiwacci, “Rwot gire pe onen boti.” Rwot owacce ni, “Meno gin aŋo ma i ciŋi-nu?” Ogamo ni, “Odoo.’ Ci owacce ni, “Bol piny i ŋom.” Ci ka obolo piny i ŋom, olokke odoko twol; Moses oriŋo woko cen. Ento Rwot owaco bot Moses ni, “Rye ciŋi imak ki tuŋ yibe.” Oryeyo ciŋe, omako; ci olokke odoko odoo ki i ciŋe, Rwot owaco ni, “Man bimiyo giye ni Rwot, Lubaŋa pa kwarogi, Lubaŋa pa Abraim, pa Icaka, ki pa Yakobo, otyeko nen boti.” Ci Rwot owacce ni, “Rwak ciŋi i kori.” Orwako ciŋe i kore; ka okwanyo woko, ci nen, ciŋe orugo matar macalo pee. Rwot dok owacce ni, “Rwak ciŋi i kori.” Ci dok orwako ciŋe i kore; ka okwanyo woko, nen, ciŋe odok kakare macalo kome mukene ducu. Lubaŋa dok owaco ni, “Ka pe gibiye lokki, nyo pe gibiparo bene pi lanyut mukwoŋo-ni, ci gibiye lanyut malacen. Ka bene pe gibiye lanyut man aryo-ni ducu, ki kwero winyo dogi, ci ibitwomo pii ki i kulu Nail, ionyo i lobo ka ma otwo; ci pii ma itwomo ki i Nail bidoko remo ki i lobo ma otwo-ni.” Ento Moses owaco bot Rwot ni, “Ai Rwoda, an ladwal nia wa con, kadi wa i kare ma ibedo ka lok kweda. Onoŋo atye ma aywayo lok mot, leba dwalle woko.” Rwot dok owacce ni, “Aŋa ma oketo dog dano? Aŋa ma miyo dano bedo Iato-dog, nyo ladiŋ-it, ma neno piny nyo lawaŋe-oto? Pe an aye atiyo, ma a Rwot-ti? Pi meno doŋ iciti, abibedo ki dogi, abipwonyi ki gin ma ibiloko.” Ento en dok ogamo ni, “Ai, Rwoda, alegi ni icwal ŋat mukene.” Ci kiniga: pa Rwot otugge i kom Moses kun wacci, “Aron pe tye kunnu, ma omeru-ni, ma Lalevi? An aŋeyo en lebe loko atir, ci nen, en obebino ka rwatte kwedi; ka en bineni, ci cwinye bibedo yom. In ibilok kwede, ki keto lok i doge, an abibedo ki dogi, ki doge bene, ci abipwonyowu ki gin ma wubitiyo. En aye bilok ki lwak maka in; en bibedo maka dogi, dok in ibibedo macalo Lubaŋa bote. Ibicito ki odoo man i ciŋi, ma ibitiyo ki lanyut magi.” Moses ka odok bot Yecero, ma won dakone, ci owacce ni, “Alegi wek koŋ adok bot omega ma i Ejipt, wek anen ka pud gitye makwo.” Ci Yecero ogamo dog Moses ni, “Cit ki kuc.” Rwot owaco bot Moses i Midian ni, “Dok cen wa i Ejipt; pien jo ma yam mito neki doŋ guto woko ducu.” Kit meno Moses okwanyo dakone ki awobene, oketogi i wi kana, ci owoto, odok cen i lobo Ejipt, kun omako odoo pa Lubaŋa i ciŋe. Rwot oloko bot Moses ni, “Ka doŋ ityeko dok cen i Ejipt, nen ni itiyo i nyim Parao taŋo ducu ma atyeko keto i ciŋi-ni; ento abijiŋo cwinye doko nwaŋ, ma pe biye dano woto. In ibiwaco bot Parao ni, ‘Rwot owaco kit man ni, Icrael aye latin kayona, ci awacci ni, Wek latinna ocit ka tic bota; ka ikwero kome ni pe ociti, nen, abineko latin kayoni woko.’ ” I kabutogi i yo en aye Rwot oromo ki Moses kun mito neke woko. Ci Jipola okwanyo got mabit, oliro ki kom latin awobine, ogudo ki tyen Moses kun wacce ni, “Ada, in i cwa remo!” Ci Rwot oweke gire. Oloko ni, “In i cwara pi remo,” me lirre-nu. Rwot owaco bot Aron ni, " cit i tim, wek icirom ki Moses.” Ci oromo kwede wa i te got pa lubaŋa ka onoto leme. Ci Moses otito bot Aron lok ducu ma Rwot owacce, ma ocwalle kwede, ki lanyut ducu ma ociko ni oti kwede. Ci Moses ki Aron gucito, gucoko ludoŋo pa jo Icrael ducu Ci Aron oloko lok ducu ma Rwot oloko bot Moses, ci onyuto lanyut ducu i nyim dano. Dano guye; ka guwinyo ni Rwot otyeko limo jo Icrael dok otyeko neno atwomgi ci gukulo wigi piny, guworo Lubaŋa Lacen Moses ki Aron gucito bot Parao, guwacce ni, “Rwot Lubaŋa pa Icrael owaco kit man ni, ‘Wek jona guciti, wek gukwer nino madit i tim.’ ” Ento Parao ogamoni “Rwot en aŋa, ma myero awiny doge ci awek Icrael owot-ti? An pe aŋeyo Rwot meno, dok bene pe abiweko jo Icrael woto!” Gin dok guwacce ni “Lubaŋa pa jo Ibru oromo kwedwai walegi ni iwek wan waciti, wawot wot me nino adek, ka tyero gitum bot Rwot Lubaŋawa, wek pe en opt i komwa ki two gemo marac nyo pala lucwan.” Ento Parao ma kabaka me Ejipt owaco botgi ni, “Moses wun ki Aron, piŋo wukwanyo dano woko ki i dog ticgi? Wun wudok i dog tic Ka dok owacci, “Nen, dano odoko dwoŋ woko i lobo, wun kono umiyo giywe i dog ticgi.” I nino meno ociko ludito ma loyo tic pa lwak, ki lunyampara, ni, “Pe dok wumedde kelogi lum ocwici me goyo matafali kit macon, wek gin aye gucit ka tweyone. Ento wel matafali ma yam gigoyo-ni wuwek gumedde kwede, pe wudwok welle piny; pien gin luwackom, mumiyo gikok ni, ‘Wek wacit i tim ka tyero gitum bot Lubaŋawa.’ Wumi tic mapek wek co gubed i dog tic pe guket cwinygi i lok goba.” Kit meno ludito ma loyo lunyampara pa lwak gucito guwaco bot dano ni, “Parao owaco kit man ni, ‘Wan pe dok wabikelliwu lum ocwici. Wun doŋ wucit kikomwu, wuyeny ka ma wutwero noŋo lum ocwici; ento ticwu pe gibidwoko welle piny.”’ Kit meno dano guket i lobo Ejipt ducu ka coko reŋ kal me ocwici. Ludito ma loyo tic giruyogi kun giwacci, “Wucob ticwu, kit me nino ducu, kit macalo yam lum ocwici tye-ni.’, Ki lunyampara pa jo Icrael, ma ludito ma loyo tic pa Parao oketogi me neno tic-ci, gubedo ka pwodogi kun gipenyogi ni, “Piŋo pe wucobo tic me goyo matafali tin, kit macon?” Ka lunyampara pa jo Icrael gucito gukok bot Parao ni, “Piŋo itimowa kit man, ladit? Pe doŋ gikelo lum ocwici botwa, ento giwacowa ni, ‘Wugo matafali!’ Nen, ka gipwodowa, ladit; ento bal tye i kom lwakki!” Ento en ogamo ni, “Wun luwackom, wun luwackom; en mumiyo wuwaco ni, ‘Wuwek wacit ka tyero gitum bot Rwot.’ Wucit kombeddi ka tic. Pe gibimiyowu lum ocwici mo, dok bene wubigoyo matafali ma rom ki wel macon.” Lunyampara pa jo Icrael guneno ni doŋ gitye marac, ka giwacogi ni, “Wun pe wubidwoko wel matafali piny kit me nino ducu.” Giromo ki Moses ki Aron ma onoŋo yam gitye ka kurogi, ka gia gidwogo ki bot Parao; guwaco botgi ni, “Rwot onenwu dok oŋolliwu kop, pien wun wumiyo nyiŋwa odoko ŋwe lituny i nyim Parao ki luticce, dok wumiyo pala lucwan i ciŋgi me nekowa.” Moses olokke bot Rwot, owacce ni, “Ai Rwot, itimo jo-ni marac kuman piŋo? Icwala ka ŋo kaa? Nia ma abino bot Parao, ma aloko kwede pi nyiŋi, en ocako timo jo-ni marac cut, in bene peya ilaro joni wacel.” Ento Rwot owaco bot Moses ni, “Tin doŋ ibineno gin ma abitimo i kom Parao; en bicwalogi woko ki bade matek, ci ryemogi woko ki i lobone ki tek.” Lubaŋa owaco bot Moses ni, “An a Rwot. Yam anen bot Abraim, bot Icaka ki bot Yakobo, kun giŋeyo ni an Lubaŋa Matwero-ducu, ento pe amiyo guŋeyo ni nyiŋa aye Rwot. An yam amoko gicikkena kwedgi bene, pi miyo botgi lobo Kanaan, en aye lobo ma yam gubedo iye lubedo-ni. Dok bene atyeko winyo cur pa jo Icrael ma jo Ejipt olokogi gudoko opii-ni, an bene doŋ atyeko po gicikkena. Wac bot jo Icrael ni, an a Rwot, abikwanyowu woko ki i peko ma jo Ejipt keto i komwu, abilarowu ki i opii megi, abikokowu woko ki ciŋa ma aryeyo, ki pi kop madito ma abiŋolo i wigi. Abiterowu me bedo jona, dok an abibedo Lubaŋawu; wun wubiŋeyo ni an a Rwot Lubaŋawu, ma akwanyowu ki i kom peko ma jo Ejipt giketo i komwu. Ci abikelowu i lobo ma yam akwoŋo pire ni abimiyo bot Abraim, ki Icaka ki Yakobo, abimiyo botwu obed lobowu; an a Rwot.” Moses oloko kit meno bot jo Icrael; ento pe guwinyo lok pa Moses, pien cwinygi oballe woko pi tic me opii mukato kare. Rwot owaco bot Moses ni, “Cit idony bot Parao, kabaka me Ejipt, ci ititte ni owek jo Icrael gua woko ki i lobone.” Ento Moses owaco bot Rwot ni, “Nen, jo Icrael pe guwinyo lokka, ci Parao biwinyo lokka niŋniŋ, ma an a dano ma dogga pe leŋ-ŋi?” Ento Rwot oloko ki Moses ki Aron, ocikogi bot jo Icrael, ki bot Parao, kabaka me Ejipt pi kwanyo jo Icrael woko ki i lobo Ejipt. Man aye ludito wi kaka i odi pa kwarogi: litino awobe pa Reuben, latin kayo pa Icrael gin ene: Kanok, Pallu, Kejeron ki Karmi; meno aye doggola pa Reuben. Litino awobe pa Cimeon gin ene: Jemuel, Jamin, ŋkad, Jakin, Jokar ki Caul, awobi pa dako Lakanaan; meno aye doggola pa Cimeon. Man aye nyiŋ litino awo be pa Levi, kun lubo yalwakgi: Gercon, Kokat ki Merari; wel mwaka me kwo pa Levi oromo miya acel ki pyeradek wiye abiro. Litino awobe pa Gercon gin ene: Libni ki Cimei, macalo doggolagi tye kwede. Litino awobe pa Kokat gin ene: Amram, Ijar, Kebron ki Ujiel; wei mwaka me kwo pa Kokat oromo miya acel ki pyeradek wiye adek. Litino awobe pa Merari gin ene: Makali ki Muci. Meno aye doggola pa Lulevi, kun lubo yalwakgi. Amram onyomo Yokobedi lamiŋ wonne, ci onywalo Aron ki Moses; wel mwaka me kwo pa Amram oromo miya acel ki pyeradek wiye abiro. Litino awobe pa Ijar gin ene: Kora, Nepeg ki Jikri. Litino awobe pa Ujiel gin ene: Micael, Elijapan ki Citri. Aron onyomo Eliceba nya pa Aminadab, lamin Nakucon, ci onywalo Nadab, Abiu, Eleajar ki Itamar. Litino awobe pa Kora gin ene: Elkana ki Abiacap; meno aye doggola pa jo pa Kora. Eleajar, wod pa Aron, onyomo dako ma i kin anyira pa Putiel, ci onywalo Finekaci. Meno aye ludito wi kaka ma i odi pa Lulevi, macalo doggolagi tye kwede. Man gin aye Aron ki Moses ma Lubaŋa owaco botgi ni, “Wukwany jo Icrael woko ki i lobo Ejipt ki bucagi.” Gin aye yam guloko ki Parao kabaka me Ejipt pi kwanyo jo Icrael woko ki ‘i lobo Ejipt; man aye Moses ki Aron meno. I kom nino ma Rwot oloko iye ki Moses i lobo Ejipt, Rwot owaco bot Moses ni, “An a Rwot; tit bot Parao kabaka me Ejipt lok ducu ma awaccini.” Ento Moses owaco bot Rwot ni, “Nen, doga pe leŋ; Parao biwinya niŋni,ŋ?” Rwot owaco bot Moses ni, “Nen aketi macalo Lubaŋa bot Parao, ki omeru Aron bibedo lanebini. In ibiloko lok ducu ma aciko boti; ci omeru Aron bitito bot Parao pi weko jo Icrael gua woko ki i lobone. Ento abijiŋo cwiny Parao doko nwaŋ, abimedo lwak lanyut ki taŋo i lobo Ejipt. Parao pe biwinyo lokki; abiketo ciŋa i kom Ejipt, ci abikwanyo monnya, jona, ma gin aye likwayo pa Icrael, ki i Ejipt, pi kop madito ma abiŋolo i wiye. Jo Ejipt gibiŋeyo ni an a Rwot, ka abiryeyo ciŋa i kom lobo Ejipt pi kwanyo jo Icrael woko ki i kingi.” Moses ki Aron gutimo kit ma Rwot ocikogi. Moses onoŋo mwaka me ditte romo pyeraboro, ki pa Aron pyeraboro wiye adek, i kare ma gubedo ka lok ki Parao-ni. Rwot dok oloko ki Moses ki Aron ni, “Ka Parao owaco botwu ni, ‘Wunyut ada mewu pi tiyo taŋo,’ ci ibiwaco ki Aron ni, ‘Kwany odooni, ibol piny i nyim Parao, wek olokke odok twol.’” Kit meno Moses ki Aron gucito bot Parao gutiyo kit ma Rwot ocikogi kwede; Aron obolo odoone piny i nyim Parao ki luticce, ci olokke odoko twol. Ci Parao olwoŋo jo ma luryeko ki lutal, ma gin lutyet ma i Ejipt, gin bene gutimo ma rom meno ki ryekogi. Pien ŋat acel acel obolo odoone piny, ci gulokke gudoko twol, ento odoo pa Aron omwonyogi woko ducu. Ento cwiny Parao pud obedo tek aye, pe omedo ki winyogi kit ma Rwot owaco-ni, Rwot dok owaco bot Moses ni, “Cwiny Parao odoko nwaŋ, okwero weko dano ocito. Cit odiko bot Parao macalo en cito i dog kulu-ni; cit ikur en i ŋet kulu, mak odoo i ciŋi, ma yam olokke odoko twol-li. Ci ibiwacce ni, ‘Rwot Lubaŋa pa jo Ibru ocwala boti, kun waco ni, Wek jona guciti, wek guti bota i tim, dok nen, in peya iworo doga. Ci Rwot doŋ owaco kuman ni, Pi lok man bimiyo iŋeyo ni an a Rwot: nen, abigoyo pii ma tye i kulu Nail ki odoo ma tye i ciŋa-ni, ci pii bilokke doko remo, ci rec ma i Nail gibikato woko, kulu Nail bilokke doko ma ŋwe coo, dok jo Ejipt cwinygi bikwero mato pii ma i kulu Nail woko.’’’ Rwot owaco bot Moses ni, “Wac ki Aron ni ‘Kwany odooni ci irye ciŋi i wi pii me Ejipt, i wi kulugi, i wi kulu akwinyagi, i wi kabedo ducu ka ma pii opoŋ iye, wek gulokke gudok remo; wek remo orom i lobo Ejipt ducu ki atabo weer ducu, ki i agulu godi ducu.’ ” Moses ki Aron gutimo macalo Rwot ocikogi. Aron otiŋo odoone malo ki i nyim Parao ki luticce; ci ogoyo ki pii ma i kulu Nail, ci pii ducu ma i kulu Nail olokke odoko remo. Rec ma i kulu Nail gucako to woko, ci kulu Nail odoko ŋwe coo; pienno jo Ejipt pe doŋ gitwero mato pii ma i kulu Nail; dok remo oromo i lobo Ejipt ducu. Ento lutyet me Ejipt bene gutimo ma rom meno ki ryekogi; omiyo cwiny Parao odoko nwaŋ aye, okwero winyogi woko, kit ma Rwot owaco-ni. Parao olokke odok i ode, kun pe cwinye paro kadi pi man. Jo Ejipt ducu gubedo ka kwinyo pii me amata i ŋet kulu Nail, pien pe doŋ gitwero mato pii ma i kulu Nail. Ka nino okato abiro nia ma Rwot ogoyo kulu Nail. Rwot dok owaco bot Moses ni, “Cit idony bot Parao, ci iwacce ni Rwot owaco kuman ni, ‘Wek jona guciti wek guti bota. Ento ka ikwero wekogi ni guciti, ci nen, abicoro gemo ogwal i loboni ducu. Ogwal bicorre limuk i kulu Nail ma gibibino wa i odi bene ki i kicikani, ki i wi kitandani ki i odi pa luticci, ki pa lwakki, ki i keno tedoni, ki otako lanywaŋ mokoni. Ogwal bipye wa i komi ki i kom lwakki ki i kom luticci ducu.’” Rwot dok owaco bot Moses ni, “Wac bot Aron ni, ‘Doŋ irye ciŋi ki odooni i wi kulu ducu, i wi kulu akwinya, ki i wi kut, wek ogwal ocorre i lobo Ejipt!’” Aron oryeyo cine i wi pii ducu ma i Ejipt. Ogwal obino ci oumo wi lobo Ejipt woko. Ento lutyet bene gutimo ma rom meno ki ryekogi, ci gukelo lwak ogwal bene i lobo Ejipt. Lacen Parao olwoŋo Moses ki Aron, owacci, “Leg Rwot wek okwany ogwal woko ki i koma ki i kom lwakka; ci abiweko dano gicito ka tyero gitum bot Rwot.” Moses owaco bot Parao ni, “Ber in aye icika kare ma aleg iye piri, pi luticci ki pi lwakki, wek ogwal oto otum woko i komi ki i odini, wek odon ma i kulu Nail keken.” Ci ogamo ni, “Diki adika-ni.” Moses owacci, “Obed kit macalo iwaco-ni, wek in iŋe ni pe tye ŋatti mo macalo Rwot Lubaŋawa-ni, Ogwal bia woko ki boti, ki i odini, ki i kom luticci ki lwakki; gibiweko ma i kulu Nail keken.” Ci Moses ki Aron gukato woko ki bot Parao. Moses okok pi ogwal bot Rwot, kit macalo onoŋo oye ki bot Parao. Rwot otiyo kit ma Moses owaco-ni; ogwal ocako to woko Ki i odi i dyekal ki i potti ducu. Gucoko gugurogi lipim, lobo okwok woko maŋwe. Ento ka Parao oneno yamo dok ‘okuto kore, ci cwinye odoko nwaŋ pe dok owinyogi, kit ma Rwot owacom. Rwot dok owaco bot Moses ni, “Wac bot Aron ni, “Tin odooni malo ci igo ki apwa ma i lobo wek odok nyoggi ma biromo i lobo Ejipt ducu.’ ” Ci gitimo kit meno; Aron otiŋo ciŋe malo ki odoone, ci ogoyo ki apwa ma i lobo, ci nyoggi obino i kom dano ki lee ducu. Lutyet gutemo ki ryekogi wek nyoggi obin, ento pe gutwero. Pienno nyoggi oromo kom dano ki lee ducu. Ci guwaco bot Parao ni, “Man lwet cin Lubaŋa.” Ento cwiny Parao obedo nwaŋ, pe omedo ki winyogi, kit ma Rwot owaco-ni. Rwot dok owaco bot Moses ni, “A malo odiko con, icikur Parao, macalo en cito i dog kulu-ni, ci iwacce ni, ‘Rwot owaco kuman ni, Wek jona guciti, wek guti bota. Ento ka pe iweko jona gucito, ci nen, abicoro lwaŋo limuk i komi ki i kom luticci ki i kom lwakki, ki i odini; i odi pa jo Ejipt ducu lwaŋo bicore iye limuk, wa i kom lobo ma gucuŋ iye. Ento i nino meno abipoko lobo Gocen pat, en aye kabedo pa jona, wek pe lwaŋo ocorre iye limuk; wek wune ni, an a Rwot ma atye i dye lobo. Kit meno abipoko kin jona ki joni. Lanyut man bitimme diki.’” Ci Rwot otiyo kit meno; omiyo lwak lwaŋo ocorre limuk i ot pa Parao ki i odi pa luticce; i lobo Ejipt ducu lwaŋo obalo lobo woko. Lacen Parao olwoŋo Moses ki Aron, owacci, “Wucit, wutyer gitum bot Lubaŋawu i lobowa-ni, Ento Moses ogamo ni, “Pe watwero timone kit meno; pien wabityero gitum bot Lubaŋawa ma bedo me kwer bot Luejipt. Ka watyero gitum ma obedo me kwer bot Luejipt ma kun gineno ki waŋgi, pe gibicelowa ki got-ti? Wan myero wawot i tim wot me nino adek pi tyero gitum bot Rwot Lubaŋawa kit macalo en aye bicikowa kwede.” Omiyo Parao ogamo ni, “Abiwekowu wucito ka tyero gitum bot Lubaŋawu i tim; ento pe wubiwot ka mabor. Wuleg pira aye.” Ka Moses owaco ni, “Nen, akato woko ki boti, ci abilego Rwot wek lwak lwaŋo oa woko ki i komi, Parao, ki i kom luticci, ki i kom lwakki diki; ento, ladit, pe dok ibwolwa pi kwero ye lwak cito ka tyero gitum bot Rwot.” Kit meno Moses okato woko ki bot Parao, ci olego Rwot. Rwot otiyo kit ma Moses olego-ni, ci okwanyo lwak lwaŋo woko kii kom Parao, ki i kom luticce, ki i kom lwakke, pe acel mo odoŋ, Ento cwiny Parao odoko nwaŋ tyen man bene, pe oweko lwak gucito. Ka Rwot dok owaco bot Moses ni, “Cit bot Parao, ci iwacce ni, ‘Rwot, Lubaŋa pa jo Ibru, owaco kuman ni, Wek jona guciti, wek guti bota. Ka ikwero ye gin gucito, ma pwod ijiŋ i komgi, nen, ciŋ Rwot bipoto ki two owaa malik i kom limwu makwo ma gitye i olet, i kom aguragura ki kana-gu, ki kinaga-gu, ki dyaŋi, ki dyegi-gu. Ento Rwot bipoko kin lim pa jo Icrael ki pa jo Ejipt, ci lim pa jo Icrael pe bito kadi ki acel mo,’ ” Rwot onyuto kare kun wacci, “Rwot bitiyo gin man i lo bo diki.” Orwone Rwot otiyo gin meno; lim pa jo Ejipt ducu guto woko, ento lim pa jo Icrael pe oto kadi ki acel mo. Ka Parao ocwalo dano, ci nen, lim pa jo Icrael pe oto kadi ki acel mo. Ento cwiny Parao odoko nwaŋ; pe oweko lwak gucito. Rwot owaco bot Moses ki Aron ni, “Wujob buru poŋ ciŋwu ki i ruk-keno mac, wumi Moses oony malo ki i nyim Parao, Ci bidoko apwa ma duny i lobo Ejipt ducu, ci bikwoto lwak odeke i kom dano wa i kom lee ducu ma burre bityer doko lwak bur ma oromo i lo bo Ejipt ducu.” Ci gujobo buru ki i keno, gucuŋ kwede i nyim Parao, ci Moses oonyo malo, ci okwoto odeke ma tyer doko lwak bur i kom dano ki i kom lee. Cuŋ i nyim Moses oloyo lutyet woko pi odeke, pien odeke okwoto wa kom lutyet bene ki kom jo Ejipt ducu. Ento Rwot ojino cwiny Parao odoko nwaŋ, okwero winyogi woko kit ma Rwot owaco bot Moses. Ka Rwot dok owaco bot Moses ni, “A malo odiko con, icicuŋ i nyim Parao, iwacce ni, ‘Rwot, Lubaŋa pa jo Ibru, owaco kuman ni, Wek jona guciti, we guti bota. Pien tyen man abicwah gemo mera ducu i cwinyi, ki i kor luticci ki i kom lwakki wek i ŋe ni p tye ŋatti mo ma rom ki an i wi lobe ducu, Kono aryeyo ciŋa apwodi k lwakki ducu ki two gemo magwa, kono tin atyekowu woko ki i lobo; enu aweko in makwo pi lok man, wek anyut tekka boti, wek nyiŋa oywek i lobo ducu. In pwod it ye ka nyatt i kom lwakka, pe iye wekogi citc Nen, diki i kare man abicoro lwal pee mapek poto i lobo, ma yam peyi otimme nia ma lobo Ejipt gibedo iye nio wa koni. Mumiyo cwal kwena kom beddi, wek icok limmi ki gin mer ducu ma tye woko i olet igwokgi i ot pien pee bipwodo dano ducu ki le ma gudoŋ woko i tim ma pe gikelog paco, ci gibito woko.’ ” Jo ma i ki: lutic pa Parao ma gulworo lok p/; Rwot, gumiyo lwak opiigi ki Iimgali guriŋo gularo odi; ento jo ma pe guwinyo lok pa Rwot guweko opiig ki limgi i olet. Rwot owaco bot Moses ni, “Rye ciŋi malo tuŋ polo, wek pee opot i Iobo Ejipt ducu, i kom dano ki lee ki ginapiti ducu ma i poto, oromo i lobo Ejipt ducu.’ Ka Moses otiŋo odoone mali tuŋ polo; ci Rwot omiyo polo omor, pee ocorre i lobo, ma kine orubbe ki mac, ci Rwot omiyo pee ocwer oromro lobo Ejipt ducu. Pee omedde ki ma i ma lyel wil i dye pee, pee mapek ma peya otimme i lobo ducu me Ejipt nia i kare ma rok ocakke iye. Pee opwodo gin ducu ma tye i poto, gin ma yam tye i lobo Ejipt ducu, dano ki lee; pee opwodo ginapita ducu ma tye i poto Lobo Gocen keken ka ma jo Icrae tye iye-ni, en aye pee obedo pe kunnu. Ci Parao ocwalo kwena olwoyo Moses ki Aron, ci owaco botgi ni “Atyeko poto i bal tyen man; Rwot lokke tye kakare, ento an ki lwakka watimo marac. Wuleg Rwot pier mor kot ki cwer pa pee doŋ oromo abiwekowu wucito, pe doŋ wubidikki kany.” Moses owacce ni. “Ka akato woko i ŋe gaŋ, ci abiryeyo ciŋa cut bot Rwot ci mor kot bigik, ki pee bene bibedo pe, wek wun wuŋe ni lobo-i pa Rwot gire. Ento in ki luticc aŋeyo ni peya wulworo Rwot Lubaŋa. (Obira ki cayiri pee obalogi woko pien onoŋo cayiri otyeko nok ki obira bene ocako turo. Ento,ŋano matar ki ŋano makwar pee pe obalogi, pien gicoyogi lacen i mwaka.) Moses okato woko ki i gaŋ nia ki bot Parao, oryeyo ciŋe bot Rwot; ci mor kot ki pee ogik woko, kot pe dok ocwer i lobo. Ento ka Parao oneno ni kot ki mor kot doŋ ogik, en dok opoto i bal aye, omiyo en kacel ki luticce cwinygi odoko nwaŋ. Kit meno cwiny Parao obedo nwaŋ, ci okwero weko jo Icrael gucito, macalo Lubaŋa yam oloko ki i dog Moses. Rwot dok owaco bot Moses ni, “Cit bot Parao; pien ajino cwinye odoko nwaŋ, ki cwiny luticce, wek anyut lwak lanyut mera man i kingi, wek in itit i it litinoni ki likwayi kit macalo abedo ka tuko ki jo Ejipt kit ma iya mito-ni ki kit lanyut ma atiyo i kingi; wek wun wuŋe ni an a Rwot.” Kit meno Moses ki Aron gucito gudonyo bot Parao, guwacce ni, “Rwot Lubaŋa pa jo Ibru owaco kuman ni, ‘In ibikwero bedo ki mwolo i nyima pi kare ma rom mene? Wek jona guciti, wek guti bota. Pien ka ikwero ni jona pe guciti, ci nen, diki abikelo lwak bonyo i loboni, giumo lobo woko lipuk, pe tye ŋatti mo ma bineno lobo; ci gibicamo gin ma pee oŋoyo botwu, ka dok gibicamo yadiwu ducu ma doŋo i poto. Gibipono i odini ki i odi pa luticci ducu ki i odi pa jo Ejipt ducu; bibedo gin ma yam wegiwu ki kwariwu pe guneno nia i nino na giketogi wi lobo nio wa i nino man.” Ka olokke ci okato woko ki bot Parao. Ci Lutic pa Parao guwacce ni, “Laco man bibedo owic botwa pi kare ma rom mene? Wek jo-nu guciti, wek guti bot Rwot Lubaŋagi: in peya iŋeyo ni Ejipt oballe woko ” Omiyo gidwoko Moses ki Aron bot Parao; ci owaco botgi ni, “Doŋ wucit, wuti bot Rwot Lubaŋawu; ento jo mene ma gibicito?” Ci Moses ogamo ni, “Wan wabicito ki litinowa, ki luditowa wabicito ki awobewa ki anyirawa; wabigwarre ki lwak limwa ducu matino ki madito, pien myero wakwer nino madit bot Rwot.” Ci owaco botgi ni, “Rwot obed kwedwu ka abiweko wun ki litinowu wucito! Nen wun iwu kirungula, wutye ki kop i iwu, Pe twerre, co ma i kinwu aye gucit ka miyo woro bot Rwot; pien meno aye gin ma cwinywu pyette iye.” Ci giryemogi woko ki i nyim Parao. Rwot dok owaco bot Moses ni, “Rye ciŋi i wi lobo Ejipt wek bonyo obin obed i lobo Ejipt, ocam gin mutwi i lo bo ducu ma yam pee onoyo.” Kit meno Moses’ otiŋo odoone i wi lobo Ejipt, ci Rwot ocwalo yamo oa tuŋ wokceŋ okodo i lobo dyeceŋ meno ducu ki i dyewor benebene; ka oo odiko ci yamo mua wokceŋ okelo bonyo. Ci bonyo ocorre i lobo Ejipt ducu, ci obuto, ori i lobo ducu me Ejipt, lwak bonyo mumukke madwoŋ ma yam pe tye, ma dok pe binen. Pien oumo lobo woko lipuk, ma lobo ocido woko licuc, ci gucamo gin mutwi ducu ma i lobo ki nyig yadi ducu ma yam pee onoyo; gin madyak mo pe odoŋ, kadi yat, kadi gin mutwi ma i poto ma i lobo Ejipt ducu. Ka Parao dok olwoŋo Moses ki Aron pi oyoto, owaco ni, “Atyeko timo bal i kom Rwot Lubaŋawu, ki i komwu. Mumiyo tin wutima kica, man doŋ alegowu kicel enni, dok wuleg Rwot Lubaŋawu wek okwany to man woko i koma.” Ci Moses okato woko ki bot Parao, olego Rwot. Rwot omiyo yamo okodo matek nia ki tuŋ potoceŋ, otiŋo bonyo ocorogi woko wa i Nam Makwar; bonyo mo acel pe odon i lobo Ejipt, Ento Rwot ojiŋo cwiny Parao odoko nwaŋ, pe oweko jo Icrael gucito. Rwot dok owaco bot Moses ni, “Rye ciŋi malo tuŋ polo, wek piny ocid woko Licuc i lo bo Ejipt, piny ma ocido woko ma dano winyo wa i kome.” Ci Moses oryeyo ciŋe malo tuŋ polo, ci piny ocido woko matek licuc ma oromo lobo Ejipt pi nino adek; pe ginenne kekengi, pe ŋatti mo a malo ki i kabedone pi nino adek; ento ka ma jo Icrael bedo iye onoŋo piny leŋ mere. Ka Parao olwoŋo Moses, ci owacce ni, “Cit wuti bot Rwot; litinowu bene myero gucit kwedwu; ento wuwek limwu matino ki madito gudoŋ i newu.” Ento Moses ogamo ni, “In bene myero imiwa gitum ki gityer me awaŋa, wek watyer bot Rwot Lubaŋawa. Limwa makwo myero gin bene gucit kwedwa; pe oboŋ tyen mo bidoŋ i ŋewa, pien myero wakwany mogo i kingi me miyo ki woro bot Rwot Lubaŋawa, dok pe waŋeyo gin ma myero wati kwede bot Rwot, nio ka wabio wa kunnu.” Ento Rwot ojiŋo cwiny Parao odoko nwaŋ, pe oweko gucito, Parao dok owacce ni, “A woko ki bota; gwokke keni aye, pe inen waŋa doki; pien i nino ma ibineno iye waŋa en aye ibito iye bene,” Moses ogamo ni, “Pe dok abineno waŋi kit macalo iwaco.” Rwot owaco bot Moses ni, “Pud odoŋ gemo acel ma abikelo i kom Parao ki i kom Ejipt; lacen biweko wun wua ki kany wucito; ka biwekowu ni wuciti, biryemowu woko magicel. Lok kombeddi i it lwak, laco acel acel oleg laco wadi ma ka ŋete, ki dako acel acel bene oleg dako wadi ma ka ŋete, wek omiye atego ryal ki atego jabu.” Ci Rwot omiyo dano gunoŋo gum i nyim jo Ejipt. Dok bene Moses yam obedo dano madit twatwal i lobo Ejipt, wa i nyim lutic pa Parao ki i nyim lwak ducu. Moses owaco ni, “Rwot owaco kuman ni, I cwiny dyewor abiwot i dye Ejipt; ci litino kayo ducu ma i lobo Ejipt gibito woko, nia i kom latin kayo pa Parao ma bedo i wi komkerre-ni, nio kwede i kom latin kayo pa aŋeca ma tye ka rego; wa litino kayo pa limgi makwo ducu. Koko bibedo malik mada ma oromo i lobo Ejipt ducu, kit ma yam peya otimme, dok pe bitimme matwal. Ento i kom jo Icrael ducu, dano onyo lee, kadi gwok pe bigweyo; wek wune ni Rwot opoko kin jo Ejipt ki jo Icrael. Luticci ducu gibibino bota, gibiryebbe piny i nyima, kun giwaco ni, ‘A woko, ki lwak ma gilubi ducu.’ Ci i ŋe meno, abicito woko gira.” Ci okato woko ki bot Parao ki kiniga madwoŋ. Ka dok Rwot owaco bot Moses ni, “Parao pe biwinyi; wek taŋona omedde orom i lobo Ejipt.” Moses ki Aron gutiyo taŋo meno ducu i nyim Parao; ento Rwot ojino cwiny Parao odoko nwaŋ, pe oweko jo Icrael gucito woko ki i lobone, Rwot owaco bot Moses Aron ki i lobo Ejipt ni, “Dwe man aye bibedo dwewu mukwo bibedo dwewu mukwoŋo i mwaka. Tit bot lwak jo Icrael ducu ni, i k nino dwe apar me dwe man, dano a acel bikwanyo latin romo, mac doggola pa kwarogi tye kwede, la romo acel pi ot acel acel. Ka ot mo tidi, ma pe romo tyeko riŋo latin ror ci won ot meno ki ladoggolane ma ode cok kwede gibikwanyo, ma romo wel dano ma gitye kwede. Wubikwanyo latin romo ma oporo kit ma dano acel camo kwede. Latin romowu obed ma kome pe ki mwonyo, nyok ma ditte romo mwaka acel ma wukwanyo ki kin romi nyo ki i kin dyegi, Wugwok nio wa i nino dwe apar wiye aŋwen me dwe-ni ka lacen, ka lwak jo Irael ducu gucokke kacel, gibineko romigo otyeno. Guter remo manok, gucwiny i kom okar me doggola ryoryo, ki i kom rii wiye malo i dog odi ma gicamo iye-ni. Gucam riŋo i dyewor meno, ma gibulo abula; gucam ki mugati ma tobi pe iye, ki pot dek mogo makec. Pe wumwod mo manumo, nyo ma gitedo ki pii, ento gibul abula, wiye kacel ki tyene ki jam iye. Pe wuwek gin mo odoŋ nio odiko; ka gin mo odoŋ nio odiko, ci wubiwaŋo woko. Wubicamo kit man: wubitweyo pyerwu, wuruko war i tyenwu, ki odoo i ciŋwu; wubicamo aruya. En aye Kato (Paska) Rwot. Pien abibaro dye lobo Ejipt i dyewor meno, abineko litino kayo ducu ma i lobo Ejipt, pa dano ki pa lee; ci abiŋolo kop i kom lubaŋa ducu pa jo Ejipt; an a Rwot. Remo bibedo lanyut mewu, i kom odi ma wutye iye; ka aneno remo, ci abikato lamalo ka wiwu. Pe gemo mo bipoto i komwu ma binekowu, i kare ma abipwodo iye lobo Ejipt.” “Nino man bibedo nino me poyo pe wiwu ma wubigwoko me bedo nino madit bot Rwot; wubikwero wun ki likwayowu obed cik matwal: Wubicamo mugati ma pe girubo rye tobi pi nino abiro; i kom nino mukwoŋo wukwany tobi ki i ot, wuony woko. Ka ŋatti mo bicamo mugati ma tobi tye iye, nia i nino mukwoŋo nio wa i nino me abiro, dano-nu waŋe birwenyo woko ki i kin jo Icrael. I kom nino mukwoŋo wubibedo iye ki gurre maleŋ; ki i nino me abirone bene wubibedo iye ki gurre maleŋ; pe gibitiyo tic mo i nino meno ducu; ento gin ma dano ducu camo, meno aye wuyubi, Wubikwero nino madito me Mugati ma Tobi Pe Iye, pien i kom nino meno kikome yam akwanyo iye bucawu ki i lobo Ejipt; mumiyo wubikwero nino meno, wun ki likwayowu ducu, obed cik matwal. I dwe mukwoŋo, i kom nino dwe apar wiye aŋwen otyeno, wubicamo mugati ma pe girubo iye tobi, nio wa i nino dwe pyeraryo wiye acel otyeno, Pe ginoŋ tobi mo i odiwu i kom nino abiro-ni; pien ka ŋatti mo bicamo gin ma girubo iye tobi, dano meno waŋe birwenyo woko ki i kin lwak pa jo Icrael, kadi bed en labedo nyo anywalli me lobo, Pe wubicamo gin mo ma girubo iye tobi; ka ma wubibedo iye ducu wubicamo mugati ma tobi pe iye.” Moses olwoŋo ludoŋo pa jo Icrael ducu, owaco botgi ni, “Wuyer litino romi muporo doggolawu, ci wunek latin romo me Kato (Paska), Wukwany dog anyero, wulut i remo ma tye i becen, wucwiny i kom rii doggola ki i kom okar me doggola ryoryo, kun wuluto i remo ma tye i becen-ni; dok ŋatti mo i kinwu pe okat woko ki i doggola ode nio wa odiko, pien Rwot bikato cito ka neko jo Ejipt. Ka en bineno remo i kom rii doggola, ki i kom okar me doggola, ci Rwot bikato donyo i odiwu ka nekowu. Wugwok lok man obed cik piwu ki pi likwayowu matwal. Ka wubio i lobo ma Rwot bimiyowu, macalo yam ociko, ci wubilubo kit tic man, Ka litinowu gibipenyowu ni, ‘Kit tic man te lokke aŋo?’ ci wubiwacogi ni, ‘Man gitum me Kato (Paska) pa Rwot, pien yam okato lamalo i wi odi pa jo Icrael i Ejipt, i kare ma oneko jo Ejipt, ci obwoto odiwa.’ ” Ci dano gukulo wigi piny, guworo Lubaŋa. Jo Icrael gucito gutimo kit meno; macalo Rwot ociko Moses ki Aron, gutimo kit meno. I cwiny dyewor, Rwot oneko litino kayo ducu ma i lobo Ejipt: okwoŋo ki i kom latin kayo pa Parao ma yam obedo i komkerre, oo kwede wa i kom latin kayo pa ŋat ma giyako ma tye i ot kol, ki litino kayo pa lim makwo ducu. Parao oa malo i dyewor, en ki luticce ducu ki jo Ejipt ducu; koko obedo malik mada i Ejipt, pien pe odoŋ ot mo ma dano pe oto iye. Parao olwoŋo Moses ki Aron ki i dyewor, ci owaco ni “Wua, wucit woko ki i kin lwakka, wun kacel ki jo Icrael ducu; wuciti, wuti bot Rwot, kit macalo wuwaco-ni. Wucit ki romiwu ki dyaŋiwu kit macalo wuwaco-ni, wucit giwu; wulamma gum bene!” Jo Ejipt gubedo ka ruyo dano pi cwalogi woko ki i lo bo pi oyotoyot; gubedo ka lok ni, “Wato doŋ, watum woko ducu.” Kit meno omiyo dano gutiŋo moko ma peya girubo iye tobi, gutweyo otako lanywaŋne ki boŋo umgi, gutiŋo kwede i wi gwokgi. Jo Icrael gutiyo kit macalo nene Moses ocikogi, gubedo ka lego atego ryal ki atego jabu, ki boŋo, ki bot jo Ejipt. Rwot omiyo gunoŋo gum i nyim jo Ejipt, ci gubedo ka miyogi gin ma gulego. Guyako jo Ejipt kit meno. Jo Icrael gucako wotgi nia ki i Ramcec nio i Cukot; co ma guwoto ki tyengi guromo alip miya abicel, ma pe iye mon ki litino. Ki lwak kwa rok murubbe bene gucito kwedgi, ki lwak lim makwo mapol twatwal, romi-gu ki i wi doggola lamalo, pe biye lanek dyani-gu. Ci gutedo capat ki moko ma gunyobo i otako laboŋo tobi ma gutero i kare ma gua ki i Ejipt, pien onoŋo pe girubo iye tobi; pien gibedo ka cwalogi wo ko ki tek nia ki i Ejipt, kun pe doŋ gitwero dikke, pe bene guyubo peke megi. Kare ma jo Icrael gubedo kwede i Ejipt oromo mwaka miya aŋwen ki pyeradek. I agikki me mwaka miya aŋwen ki pyeradekke, i kom nino meno kikome, en aye mony ducu pa Rwot omol iye oa woko ki i lobo Ejipt, En aye obedo dyewor ma Rwot okuro iye kare me kwanyogi woko ki i lobo Ejipt, dyewor meno en aye dyewor ma jo Icrael, gin ki likwayogi ducu, gikuro iye Rwot Ci Rwot owaco bot Moses ki Aron ni, “Man aye cik ma maka Kato (Paska): pe Larok mo bicamo; ento opii ducu ma yam giwilo ki lim bicamo ka onoŋo doŋ gityeko lirogi. Labedo mo nyo lapakaca mo pe bicamo. Wubicamo ki i ot acel; pe wubikato ki riŋo mo woko nia ki i ot, cogone bene pe gibituro iye. Lwak jo Icrael ducu gibikwero nino man, Ka larok mo bedo i kinwu ce mito kwero Kato (Paska) bot Rwot, wek koŋ gilir kom co ducu ma tye bote, ka doŋ onyik cok ka lubo kite; eh doŋ bedo macalo anywalli me lobo. Ento dano ma pe giliro pe camo, Cik bibedo acel pi anywalli ki pi lurok ma bedo i kinwu.” Ci jo Icrael ducu gutimo kit meno; macalo yam Rwot ociko Moses ki Aron, gutimo kit meno. I kom nino meno kikome aye yam Rwot okwanyo iye mony pa jo Icrael woko ki lobo Ejipt ki bucagi. Rwot owaco bot Moses ni, “Kwer litino kayo ducu gubed mega; gin ducu ma okwoŋo yabo ic i kin jo Icrael, pa dano ki pa lee bene, ducu mera.” Moses owaco ki lwak ni, “Wupo nino man, ma wua iye woko ki i Ejipt i ot me opii, pien Rwot okwanyowu woko ki i kabedo man pi bade matek; pe wubicamo mugati ma tobi tye iye. Tin wun doŋ wubecito woko, i dwe me Abib, Ka Rwot bikelowu i lobo pa jo Kanaan, jo Kit, jo Amor, jo Kiv ki jo Jebuc, ma yam okwoŋo pire bot kwarowu ni ebimiyowu, lobo ma mol cak ki moo k ic, wubilubo kit tic man i dwe-ni. Wubicamo mugati ma tobi pe iye pi nino abiro; i kom nino me abirone en aye wubikwero iye nino madit bot Rwot. Mugati ma pe girubo iye tobi wa tobi bene pe binen botwu i lobowu ducu. I nino meno ibitito bot latinni ni, ‘Man obedo tye pi gin ma yam Rwot otimo pira i kare ma aa wo ko ki i Ejipt.’ Man bibedo lanyut i ciŋi, dok bibedo i dye tur nyimi, me poyo wii, wek cik pa Rwot obed i dogwu; pien Rwot okwanyowu woko ki i Ejipt pi bade matek, Pi neno wugwok cik man i kare ma giciko-ni mwaka ki mwaka. “Ka Rwot bikelowu i lobo p Kanaan, macalo yam okwoŋo be ki bot kwarowu ni ebimiyowu, wubi yeko litino ducu mukwoŋo yabo ic gubed pa Rwot. Litino kayo pa limwu ducu ma twonne gibibedo pa Rwot. Latin kayo pa kana ibikoko ki i romo, nyo ka pe ikoko, ci ibituro woko. Latin dano acel acel ma i kin litinowu, ma latin kayo, wubikokone bene. I kare me anyim, ka latinni bipenyi ni, ‘Man kono te lokke aŋo?’ ci ibiwacce ni, ‘Rwot yam okwanyowa woko ki i Ejipt ki bade matek, i ot me opii. Pien con ka Parao okwero woko matek ni pe waciti, Rwot oneko litino kayo ducu ma i Ejipt, litino kayo pa dano ki litino kayo pa lim makwo. Mumiyo atyero bot Rwot twon ducu ma gukwoŋo yabo ic; ento akoko awobena ma litino kayo ducu.’ Bibedo macalo kedo i ŋut ciŋi, nyo gin me atweya i dye tur nyimi; pien Rwot yam okwanyowa woko ki i Ejipt ki matek.” Ka Parao oweko dano gucito, ci Lubaŋa pe otelo wigi i yo ma dok tuŋ lobo pa Lupiliciti, kadi bedi yam yone cok; pien Lubaŋa owacci, “Ka dano gurwatte ki mony, ci cwinygi biballe woko gidok woko cen i Ejipt.” Ento Rwot otelo wi dano kun rabo kwedgi piny i yo ma dok tun lim mukemo Nam Makwar. Ci jo Icrael gua woko ki i lobo Ejipt ma guyubbe ki jami lweny. Moses okwanyo cogo pa Yucepu ocito kwede; pien yam Yucepu omiyo jo Icrael gukwoŋo kwoŋ matek, kun waco ni, “Lubaŋa bilimowu; myero wutin cogona nia ki kany, kwede.” Gua Cukot, gugony i Etam i dog tim, Rwot otelo nyimgi i dyeceŋ ki pol mucuŋ macalo wir me nyutogi yo, ki i dyewor telo nyimgi ki mac mucuŋ macalo wir me menyo piny wek gubed ka wot dyeceŋ ki dyewor; wir me pol dyeceŋ ki wir me dyewor, kun pe a woko i nyim dano. Rwot dok owaco bot Moses ni, “Tit ki jo Icrael gudok cen ki ŋegi, wek gugony i nyim Pi-akirot i kin Migdol ki nam, i nyim Baal-jepon; wubigony mukemo en i ŋet nam. Pien Parao bilok pi jo Icrael ni, ‘Gin pud gitye ka dwalle atata i lobo; tim pud otweyogi woko.’ Abijiŋo cwiny Parao doko nwaŋ, ci en biryemo korgi, ci abinoŋo deyo i kom Parao ki monnye ducu; miyo jo Ejipt gibiŋeyo ni an a Rwot.” Ci gutimo kit meno. Ka gitito bot kabaka me Ejipt ni jo Icrael gutyeko riŋo gulwi woko, ci Parao kabaka me Ejipt ki luticce guloko cwinygi i komgi kun giwacci, “Man watimo gin aŋo ma waweko jo Icrael gua woko ki i dog ticwa, gucito woko-ni?” Kit meno ocako yubo gadigadine me lweny, oywayo wi monnye, ci otero gadigadi ma oyero miya abicel, ki gadigadi pa jo Ejipt mukene ducu kacel ki ludito luwigi ducu. Ci Lubaŋa ojiŋo cwiny Parao kabaka me Ejipt odoko nwaŋ, oryemo kor Jo Icrael macalo yam gutwarre magwa, gucito woko-ni. Jo Ejipt guryemo korgi, aguragura pa Parao ducu ki lwak gadigadi, ki wegi aguragura ki monnye ducu, ci gumakogi ka ma gugony iye i ŋet Pi-Kakirot, ma i nyim Baal-jepon, Ka Parao odiŋo korgi cok, jo Icrael gutiŋo waŋgi, ci nen, jo Ejipt gitye ka lubo korgi; ci gubedo ki lworo madwoŋ. Jo Icrael gukok matek bot Rwot, kun guwaco bot Moses ni, “Pien ineno ni Lyel pe i Ejipt mumiyo ikelowa kany wek wato woko i dye tim? Doŋ itimowa gin aŋo, pi kwanyowa woko ki i Ejipt? Pe yam walokki man i Ejipt ni, ‘Doŋ iwek yelowa, wek doŋ wat i ki jo Ejipt’? Twora kono yam watiyo ki jo Ejipt, makato ma wato woko i dye tim ata,” Ci Moses owaco bot lwak ni, “Pe wulwor wucuŋ matek, ci wubineno kit ma Rwot bilarowu kwede tin; pien jo Ejipt ma tin wunenogi-ni pe doŋ wubinenogi matwal. Rwot bilweny piwu, wun wubed mewu mot apira.” Rwot openyo Moses ni, “Ikok bota piŋo? Tit bot jo Icrael guwot anyim. Tin odooni malo, ci irye ciŋi i wi nam, ipok iye woko, wek jo Icrael guwok i dye nam i lo bo mutwo. Abijiŋo cwiny jo Ejipt doko nwaŋ, wek gin bene gulub korwu, ci abinoŋo deyo i kom Parao kacel ki monnye, ki gadigadine, ki wegi aguragurane, Jo Ejipt gibiŋeyo ni an a Rwot, ka doŋ atyeko limo deyo i kom Parao ki gadigadine, ki wegi aguragurane.” Ka lamalaika pa Lubaŋa ma yam woto i nyim mony pa jo Icrael oa odok ocego ŋegi; ki wir me pol bene oa ki inyimgi, odok ocun i ŋegi. I obino oridde i kin mony pa jo Ejipt ki mony pa jo Icrael, Pol ocego kunnu ki mutu macol; ci dyewor meno ducu mony tun cel pe orwayo cok ki lawote nio ka piny oru. Moses oryeyo cine i wi nam; Rwot odanyo dye nam woko, odiro pii woko wa ceŋ ki yamo matek mua wokceŋ mukodo i dyewor ducu, omiyo nam odoko lobo mutwo, ki i pii opokke woko. Jo Icrael guwot o i dye nam i lobo mutwe, pii otiŋŋe odoko kicika yo tuŋ ciŋgi acuc ki yo tuŋ acam. Jo Ejipt guryemo korgi, ci gudonyo i korgi i dye nam; aguragura pa Parao ducu, ki gadigadine, ki wegi aguragurane, I kare ma gikuro rupiny, Rwot onoŋo tye i wir me mac ki me pol kun neno mony pa jo Ejipt. Obano kom mony pa jo Ejipt woko, kun mako lawala me gadigadigi woko, mumiyo guywaŋe mot. Ci jo Ejipt guwacci, “Wek wariŋu walwiyu woko ki i nyim jo Icrael; pien Rwot tye ka lweny i kom jo Ejipt pigi.” Rwot dok owaco bot Moses ni “Rye ciŋ i i wi nam, wek pii odwog cel kom jo Ejipt, i kom gadigadigi, ki I kom wegt aguraguragi.” Kit meno Moses otiŋo ciŋe i wi nam, dwogo cen kun mol i kit m ma piny tye ka ru-ni. Jo Ejipt gucorre i iye, ci Rwot orido wi jo i dye nam. Ka pii odwogo gadigadi ki wegi aguragura Parao ducu ma yam gulul i nam-mi; pe tye ŋat mo a acel ma obwot i kingi. Ento jo Icrael gu mutwo ki i dye nam, kur kieikagi yo tun ciŋgi aew acam. Kit meno Rwot yam olaro jo Icrael ki i ciŋ jo Ejipt i nino meno, ci jo Icrael guneno kom jo Ejipt ma guto i dog nam. Ka jo Icrael matek ma Rwot otimo i ki ci dano gudworo Rwot; omiyo guye Rwot ki laticce Moses. Moses ki jo Icrael guwero wer man bot Rwot kun giwaci ni, “Abiwero wer bot Rwot, pien otuc ki loc me deyo; obolo aguragura ki lait i wiye woko i nam, Rwot aye tekka ma akoro ki wer, en odoko Lalarra. Man aye Lubaŋana, abipako en Lubaŋa pa wora, abikoro nyiŋe. Rwot en oteka lweny: nyiŋe Rwot, “En obolo gadigadi pa Parao ki monnye ducu i nam; twoni ma oyerogi gumwony piny i Nam Makwar. Pii matut oumo wigi woko; gulwiny woko i te kut macalo got. Ciŋi malacuc, ai Rwot, won deyo ki tek, ciŋi malacuc, ai Rwot, ŋido lumerok i woko. Pi deyoni madit ireto lukworri piny; icwalo akemoni, owaŋogi woko macalo ren kal. Yweyo me umi otiŋo pii malo, pii mamol otiŋŋe malo likuŋ; pii matut odille likiŋ i cwiny nam. Lumerok guwacci, ‘Abiryemo korgi, amakogi, abipoko gin ma ayako, cwinya biyen kwede, abiwoto pala lucwanna, ciŋa bityekogi woko.’ Ento in ikuto yamoni, ci nam omwonyogi woko; gumwony i te pii madwoŋ macalo odoo olek. Aŋa ma calo in, ai Rwot, ki i kin lwak lubaŋa-ni? Aŋa ma calo in, ma ladeyo ki maleŋ? Kom myel i gin me deyo ma itiyo, itimo ginaura, In yam iryeyo ciŋi malacuc, ci lobo omwonyogi woko. “Pi marri ma pe lokke itelo wi jo ma yam ikokogi, pi tekki igwokogi, ikelogi i kabedoni maleŋ, Lwak doŋ guwinyo pire ci komgi omyel; atiba opoto i kom Lupiliciti. I kare-nu cwiny rwodi me Edom oŋabbe aŋaba; lworo oonyo koyo i kom ludito me Moab; kom jo Kanaan ducu oto woko lirut. Lworo ki myelkom opoto i komgi, pi tek me badi omiyo gucuŋ, guliŋ macalo got, nio ka joni gukato ki ka netgi, ai Rwot, nio ka jo ma iwilogi gukato. Ibiterogi i lobo, ibipitogi i kom got meri, i kabedo ma iketo me bedo kabedoni, ai Rwot, i kabedo maleŋ, ai Rwot, ma yam ciŋi omoko. Rwot bibedo kabaka nakanaka.” Pien ka aguragura pa Parao ki gadigadine ki wegi aguragurane gucako donyo i nam, ci Rwot odwoko pii me nam cen i komgi; ento jo Icrael guwoto i lobo mutwo i dye namo Ci Miriam, lanebi ma dako, lamiŋ Aron, okwanyo ajaa i ciŋe; ci mon ducu gukwanyo ajaa gumol kwede i kore ki myel. Miriam ocakogi wer ni: “Wuwer bot Rwot, pien otuc ki loc me deyo; obolo aguragura ki lait i wiye woko i nam.” Moses dok otelo wi jo Icrael guwoto anyim nia ki i Nam Makwar gucito i tim me Cur; guwoto i tim wot me nino adek ci pe gunoŋo pii. Ka guo i Mara, ci mato piine oloyogi, pien piine onoŋo kec; mumiyo gilwoŋo ni Mara. Ci dano gubedo ka ŋur i kom Moses, kun giwacci, “Wabimato aŋo? En okok bot Rwot, Rwot onyutte yat mo; obolo i pii, ci pii odoko mamit. Rwot oketogi cik kunnu, ki lok ma en oŋolo, otemo cwinygi kunnu, kun waco ni, “Ka wubiworo dog Rwot Lubaŋawu ki cwinywu ducu, ma wuyito gin ma nen atir i waŋe, dok wugwoko lok ma en ociko kun wumako cikke ducu, ci pe abikelo two mo i komwu ma yam aketo i kom jo Ejipt; pien an a Rwot lacanwu.” Ka dok gubino i Elim, ka ma yam tye iye waŋ it apar wiye aryo, ki otit pyerabiro; ci gugony i ŋet pii-nu. Gua woko ki i Elim, ci lwak jo Icrael ducu gucorre i tim Cin, ma tye i kin Elim ki Cinai, i nino dwe apar wiye abic me dwe me aryone nia ma doŋ gua woko ki i Ejipt. Lwak jo Icrael ducu gunur i kom Moses ki Aron i tim, kun giwaco botgi ni, “Kono nene Rwot aye onekowa ki cine i lobo Ejipt, ka ma yam wabedo i ŋet agulu riŋo, ma wacamo kwon yeŋowa; ento in ikelowa wa i kany ka neko lwak man ducu ki kec.” Rwot dok owaco bot Moses ni, “Nen, abicwalo kwon cwer botwu nia ki i polo; ci dano gibikato woko cokone kun gicoko ma romo pi nino acel acel, wek koŋ anengi kwede, ka nyo gibilubo cikka nyo pe. I kom nino me abicelle ma noŋo gitye ka yubo ma gukelo-ni, dok bimedde madwoŋ ma rom ki ma gicoko nino acel acel-li kiryo.” Kit meno Moses ki Aron guwaco bot jo Icrael ni, “Tin otyeno wubineyo ni Rwot aye yam okwanyowu ki i lobo Ejipt, ki odiko bene wubineno deyo pa Rwot, pien otyeko winyo ka wuŋur i kom Rwot. Pien waŋ aŋagi ma wuŋur i komwa-ni? Ci Moses owacci, “Ka Rwot omiyo riŋo acamawu tin otyeno, ka dok omiyo kwon ma yenowu odiko, waŋ kono aŋagi? Pien Rwot otyeko winyo ŋuro ma wuŋur kwede i keme-ni. Ŋurowu pe tye i komwa, ento i kom Rwot gire.” Moses owaco bot Aron ni, “Wac ki lwak jo Icrael ducu ni, ‘Wubin cok i nyim Rwot, pien otyeko winyo nurowu.’ ” Ka yam tye ka lok ki lwak jo Icrael ducu guneno tuŋ tim, ci nen, deyo pa Rwot onen i pol. Rwot owaco bot Moses ni, “Doŋ atyeko winyo ŋuro pa jo Icrael; wac botgi ni, “Tin wi otyeno wubicamo riŋo, ki odiko wubicamo kwon ma yenowu: miyo wubineyo ni an a Rwot Lubaŋawu.’ ” I kare me otyeno aluru gubino gucorre, guumo gony woko; dok i odiko toyo oluk oumo ŋet gony woko. Ka toyo doŋ oo woko, ci gin mo odoŋ piny ma oŋidde matitino macalo pok rec, kun oŋidde matitino macalo bwoyo pee ma opune i lobo. Ka jo Icrael guneno, ci guloko kekengi ni, “Man gin aŋo?” Pien yam peya guniaŋ kite. Ci Moses owaco botgi ni, “Man aye kwon ma Rwot omiyo botwu me acama. Man aye gin ma Rwot ociko: ŋat acel acel ocok mere ma romo acamane. Wujob ma romo agwata moko kwon acel pi dano acel acel muporo wei dano ma ŋat acel acel tye kwede i kemane.” Jo Icrael gutimo kit meno; jo mogo gucoko madwoŋ, jo mogo gucoko manok. Ento ka guporo ki agwata moko kwon, ci ŋat ma ocoko madwoŋ pe mo odoŋ bote, ki ma ocoko manok pe mo orem, pien ŋat acel acel ocoko ma romo acamane. Moses owaco botgi ni, “Pe ŋatti owek mo odoŋ nio odiko.” Ento pe guwinyolok pa Moses; mukene guweko dulle mogo odoŋ nio wa odiko, ci ocako nywal kwidi, okwok maŋwe, ci kiniga omako Moses i komgi. Gubedo ka cokone odiko odiko, kun ŋat acel acel coko ma oromo acamane; ento ka cen odoko lyet ci mee woko. I kom nino me abicelle gucoko kwon madwoŋ ma dodo ma yam-mi tyen aryo, ma romo agwata moko kwon aryo aryo. Ka lutel wi lwak ducu gubino gutito lokke bot Moses, en owaco botgi ni, “Rwot yam ociko kit man ni, ‘Diki en aye nino me yweyo mot, en cabit maleŋ pa Rwot. Wubul gin ma wumito bulone, ci wuted gin ma wumito tedone, ki ma odonne wukan, wugwok nio wa odiko.’ ” Kit meno gukano, gugwoko nio wa odiko macalo Moses ocikogi pe omedo ki kwok maŋwe, kwidi pe iye bene; Moses owacci, “Wucam tin, tin aye cabit pa Rwot. Tin wubinono i bar. Wubicoko nino abicel; ento i kom nino me abirone, ma en aye cabit, pe bibedo tye.” I kom nino me abiro jo mukene gucito woko ka jobone, pe gunoŋo gin mo. Ci Rwot owaco bot Moses ni, “Wubikwero lubo lok ma aciko, ki cikka ducu, nio wa awene? Nen ba! Rwot otyeko miyowu cabit, mumiyo i nino me abicel en omiyowu kwon ma romo nino ariyo. Myero dano acel acel obed mot i kabedone, wek dano mo pe owek kabedone ocit woko i nino me abiro.” Kit meno dano ducu guywe mot i nino me abiro. I kare meno jo me ot pa Icrael gulwoŋo nyiŋe ni manna. Onoŋo nen macalo nyig koo matar, ma mit malim, macalo nyim kic. Moses owacci, “Rwot ociko kit man ni, ‘Wek gigwok ma romo agwata moko kwon acel wa i kare pa likwayowu, wek gunen kit kwon ma yam apitowu kwede i tim, i kare ma yam akwanyowu iye woko ki lobo Ejipt.’” Moses owaco Aron ni, “Kwany abino, ci iony manna ma romo agwata moko kwon kacel, iket i nyim Rwot, wek obed me agwoka wa i kare pa likwayowu.” Macalo Rwot ociko ki Moses, kit meno Aron oketo manna i nyim canduk lok me caden, wek obed me agwoka, Jo Icrael gucamo manna gutyeko kwede mwaka pyeraŋwen kulu, nio ka guo i lobo ma giromo bedo iye; gucamo manna nio ka guo i waŋ lobo Kanaan. Agwata moko kwon ma yam gipimo kwede i kar onoŋo romo acel me abic me debe. Lwak Jo Icrael ducu gua woko ki i tim Cin kun giwoto gikobo macalo Rwot ociko, ci gugony Repidim; ento pii amata pa dano obedo pe. Mumiyo dano gukeco i kom Moses, guwacci, “Miniwa pii me amata.” Moses ogamo doggi ni, “Piŋo wukeco i koma? Piŋo wuomo i Rwot?” Ento orwo pii oneko dano, ci dano gubedo ka ŋur i kom Moses kun giwacci, “Piŋo yam ikwanyowa woko ki i Ejipt ka nekowa ki Litinowa ki limwa ki orwo pii?” Omiyo Moses okok bot Rwot ni, “Abitimo jo man niŋniŋ? Gin doŋ gutyeko yubbe me cela woko ki got.” Rwot owaco bot Moses ni, “Kat wa i nyim lwak, kwany ludoŋo mogo pa jo Icrael, icit kwedgi; dok ikwany odoo ma yam igoyo ki Nail, mak i ciŋi, iwot kwede. Nen, abicuŋ i nyimi, i kom pata got ma i Koreb; ci ibigoyo pata got, ci pii bia ki iye, wek lwak gumati.” Moses otimo kit meno i nyim ludoŋo pa Icrael. Olwono nyiŋ kabedo meno ni, Maca ki Meriba, pien jo Icrael gukeco i kome, dok pien guomo i Rwot kun giwaco ni, “Rwot mono tye i kinwa nyo pe?” Jo Amalek gubino gulwenyo ki jo Icrael i Repidim. Moses owaco bot Yocwa ni, “Yer co ma i kinwa, ci icit icilweny ki jo Amalek; diki abicuŋ i wi got ki odoo pa Lubaŋa i ciŋa.” Ci Yocwa otimo kit ma Moses otitte, olwenyo i kom jo Amalek; ci Moses ki Aron ki Kur gucito malo i wi got. Ka Moses obedo ka tiŋo ciŋe malo, ci Icrael giloyo; ento ka obedo ka dwoko ciŋe piny, jo Amalek giloyo. Ento ka ciŋ Moses ojony woko, ci gikwanyo got gikette piny, ka en obedo i wiye, ci Aron ki Kur gitiŋo ciŋe malo, ŋat acel tuŋ cel kit ŋat acel tuŋ mukene; kit meno ciŋse obedo mutiŋŋe malo nio ka cen opoto. Ci Yocwa ojwero Amalek ki jone ki pala lucwan. Rwot owaco bot Moses ni, “Co lok man i buk obed me lapo wic, ci ikwan i it Yocwa matek, ni, An abijwayo Amalek woko ki i tam pa dano ducu ma gitye piny i te polo.” Ka Moses ocano keno tyer, olwoŋo ni, Rwot aye benderana, kun waco ni, “Cinwa omako bendera pa Rwot! Rwot bilweny ki Amalek kare ducu.” Yecero, ma ajwaka pa jo Midian, won dako pa Moses, yam owinyo gin ducu ma Lubaŋa obedo ka tiyo pi Moses ki pi jo Icrael, kit ma Rwot okwanyo jo Icrael ki i Ejipt, Onoŋo Yecero, won dako pa Moses, ogamo Jipola dako pa Moses, i kare ma Moses odwoko en bote, kacel ki awobene aryo. Nyiŋ awobi acel Gercom, pien yam owacci, “Abedo labedo i lobo pa lurok.” Nyiŋ mukene Eliejer, pien yam owacci, “Lubaŋa pa wora aye okonya, ci olara ki i pala lucwan pa Parao.” Ka Yecero, won dako pa Moses, obino ki awobene ki dakone bot Moses i tim, ka ma yam gugony iye i te got pa Lubaŋa, ŋat acel mo otito bot Moses ni, “Nen, won dakoni Yecero obebino boti ki dakoni kacel ki awobene.” Ci Moses okato ocito ka jolo won dakone, ci oryebbe i nyime, onoto leme; ka gucako motte kekengi kun gipenyo kit bedogi, ka gudonyo i kema, Ka Moses otito ki won dakone gin ducu ma yam Rwot otimo i kom Parao ki i kom jo Ejipt pi jo Icrael, ki peko ma gubedo kwede i korayo, ki kit ma yam Rwot olarogi kwede. Ci cwiny Yecero obedo yom pi gin ducu ma Rwot yam otiyo bot jo Icrael, pi kit ma olarogi kwede ki i ciŋ jo Ejipt. Ci Yecero owacci, “Gipwo Rwot ma olarowu ki i cin jo Ejipt ki i cin Parao. Kombeddi doŋ aŋeyo ni, Rwot dit makato lubaŋa mukene ducu, pien olaro dano ki i ciŋ jo Ejipt, ma yam gubedo ka ronyogi-ni.’ Ka Yecero won dako pa Moses otyero gitum awaŋa, ki gitum mukene, bot Lubaŋa; ci Aron obino ki ludoŋo ducu pa jo Icrael ka camo kwon kacel ki won dako pa Moses i nyim Lubaŋa. Orwone Moses obedo ka ŋolo kop pa dano, ci dano gucuŋ i nyim Moses nia odiko con nio wa otyeno. Ka won dako pa Moses oneno gin ducu ma en obedo ka timo pi dano, ci owacci, “Itiyo ki dano ku man piŋo? Piŋo ibedo keni, kun dano ducu gucuŋ gurumi woko nia odiko nio wa otyeno?” Moses owaco bot won dakone ni, “Pien dano gibino bota pi penyo dog Lubaŋa, Ka gitye ki lok alara, ci gibino bota, an aŋolo kop i kin dano ki lawote, kun amiyo giŋeyo cik pa Lubaŋa ki ŋolle.” Won dako pa Moses owacce ni, “Gin ma in itiyo pe kakare. In kacel ki lwak wubiol woko, pien ticce pek obwoyo komi woko, in pe itwero tyekone keni. Doŋ iwiny doga; abimini ryeko, dok Lubaŋa obed kwedi! In ibibedo lakwena pa dano i nyim Lubaŋa, ki pi tero kopgi bot Lubaŋa. Ibipwonyogi cik ki kit ŋolone, kun imiyo giŋeyo lubone ki kit ma myero giti kwede. Ento in iyer dano makwiri ki i kin lwak, jo ma nen ni gilworo Lubaŋa, jo ma gigenogi, ma gikwero lim me wilo loyo kop matan: ci iket jo meno gulo lwak, gubed lulo jo alip, ki jo miya, ki jo pyerabic, ki jo apar. Wek guŋol kop ki dano kare ducu; gukel boti lok maditone keken; ento lok ducu matitino guŋol ki kunnu; ci doŋ gibiyweyo kori, dok gibinywako tiŋo peko meno kwedi. Ka itiyo kit man ma Lubaŋa bene ociki kwede kit man, ci ibitwero cirone, ki lwak man ducu bene gibidok i kabedogi ki kuc.” Moses owinyo dog won dakone, otimo gin ducu ma owacce. Moses ocako yero jo makwiri ma i kin jo Icrael ducu, oketogi gudoko lutel wi lwak, lulo jo alip, ki jo miya, ki jo pyerabic, ki jo apar. Gubedo ka ŋolo kop i kare ducu; pido matego aye gikelo bot Moses, ento lok ducu matitino giŋolo ki kunnu. Ka Moses olwoko won dakone odok, ci en omedde anyim nio i lobo tugi. I kom por dwe me adekke nia guo i tim Cinai i kom nino meno. Ka gua woko ki i Repidim ci gubino i tim Cinai, gugony i tim; jo Icrael gugony kunnu i nyim got. Ka Moses oito malo bot Lubaŋa, ci Rwot olwone ki i got, kun waco ni, “Ibiwaco ki jo me ot pa Yakobo kit man kun itito ki jo Icrael ni, Rwot owaco ni, ‘Doŋ wutyeko neno gin ma atimo i kom jo Ejipt, kit macalo yam atiŋowu ki bwom ocur, akelowu bota, Pienno ka wubiworo doga, kun wumako gicikkena, ci wubibedo jona kikome i kin rok ducu; pien lobo ducu mera. Wubibedo ker ma lwakke ajwagi ma an aye aloyo, wubibedo rok maleŋ.’ Meno aye lok ma ibiloko bot jo Icrael.” Kit meno Moses obino olwoŋo ludoŋo pa lwak, ci oketo lok meno Rwot owaco-ni i nyimgi. Ci lwak ducu gugamo lawaŋ acel ni, “Gin ducu ma Rwot owaco, wabitiyo.” Ci Moses odwoko lok pa lwak bot Rwot. Rwot owaco ki Moses ni, “Nen, an abibino boti i pol mapek, wek lwak guwiny aloko kwedi, wek guye in matwal.” Ka Moses otito lok pa lwak bot Rwot, ci Rwot owaco bot Moses “Cit bot dano, ilonygi tin ki diki, gulwok boŋogi, wek i nino me adekke onoŋ guyubbe; pien i nino adekke, an Rwot abilor piny i wi got Cinai i nyim lwak ducu. In ibitoŋo waŋaco me poko ka ma lwak bicuŋ iye, kun itito ki lwak ni, ‘Wugwokke, pe wuit malo i wi got, pe gugud waŋacone bene; dok ka ŋat mo ogudo kom got, gibineko woko. Pe ciŋ mo bugudo kome, ento gibicelo ki got nyo ki atero; kadi bed lee nyo dano, pe bikwo. Ka dwan obute bikok nakanaka, ci gibiito malo i kor got.” Ci Moses olor piny nia ki wi got ocito bot lwak ka olonyo lwak; ci gulwoko boŋogi. Ka owaco bot lwak ni, “I nino adekke noŋo doŋ wuyubbe; pe wubed cok ki mon.” I kom nino me adekke odiko piny obedo ka mor ma noŋo lutkot wil awila, pol mapek oumo wi got, ci obute okok maloŋo twatwal, omiyo jo ducu ma gubedo i gony komgi omyel. Lacen Moses okelo lwak woko ki i gony ka rwatte ki Lubaŋa; gucuŋ piny ma jo Icrael gua ki i lobo Ejipt i te got. Yito oboyo kom got Cinai woko, pien onoŋo Lubaŋa olor Piny i kome ki mac; yitone oduny cito malo macalo yito mac lawaŋ agulu, got ducu oyeŋŋe matek. Ka dwan obute medde ki koko maloŋo, Moses bedo ka lok Lubaŋa gamo doge ki mor kot. Rwot olor piny i wi got Cinai, i wi lacol got Rwot olwoŋo Moses ki malo i wi locol got, ci Moses ocito malo kunnu. Rwot owaco bot Moses ni, “Lor piny, ijuk lwak, wek pe gucerre pi neno Rwot, miyo lwak jo mapol gibito. Dok imi ajwagi ma gibino cok bot Rwot, gulonnye kekengi, wek Rwot pe otugge i komgi.” Ci Moses ogamo ni, “Lwak pe gibiito malo i wi got Cinai; pien in kikomi aye icikowa, kun iwaco ni, ‘Toŋ waŋaco orum got ci iket obed kwer.’’’ Rwot owacce ni, “Lor piny, icibin malo wun ki Aron; ento pe iwek ajwagi ki lwak gucerre me bino bota, wek pe atugge i komgi.” Kit meno Moses olor piny bot lwak, otito botgi. Lubaŋa oloko lok man ducu kun waco ni, “An a Rwot Lubaŋani, ma yam akwanyi woko ki i lobo Ejipt, i ot me opii. “Pe ibed ki lubaŋa mukene kono an kena. “Pe iti cal apayani mo, nyo cal gin ma tye malo i polo, nyo ma tye piny i wi lobo, nyo gin ma tye i pii ma i te lobo. Pe iryebbe piny i nyimgi, pe iworgi; pien an aye a Rwot Lubaŋani, an Lubaŋa ma lanyeko. Aketo can i kom likwayo pi bal pa kwarogi nio wa i yalwak me adek ki me aŋwen pa jo ma gikwera, ento abinyuto mar ma pe lokke i kom jo alip ki alip ma gimara, ma gimako cikka. “Pe ilwoŋ nyiŋ Rwot Lubaŋani me noŋo; pien Rwot bimiyo kop loyo dano ma lwoŋo nyiŋe me noŋo. “Po pi nino me cabit, ikwer obed maleŋ. Ibitic matek nino abicel, kun itiyo iye ticci ducu; ento nino me abirone en aye cabit pa Rwot Lubaŋani. I nino meno pe igud iye tic mo, in kikomi, nyo wodi, nyo nyari, kadi opiini, kadi aŋecani, kadi dyaŋŋi, kadi labedo ma bedo i kinwu; pien i nino abicel aye Rwot yam otiyo iye polo ki nam ki jami ducu ma tye iye, ci oywe i kom nino me abiro; mumiyo Rwot omiyo gum i kom nino me abiro, olonyo obedo maleŋ. “Wor woru ki meni, wek iri pi kare malac i lobo ma Rwot Lubaŋani bimiyo boti. “Pe ineki. “Pe itim abor. “Pe ikwal gin mo. “Pe ibed caden me goba i kom lawoti. “Cwinyi pe opukke i kom ot pa lawoti; cwinyi pe opukke i kom dako pa lawoti, kadi opiine nyo aŋecane, nyo twonne, nyo kanane, nyo kadi gin mo ma lawoti tye kwede.” I kare meno ka dano guneno piny mor ki lutkot ma bedo ka wil awila, ki dwan obute ki yito muboyo kom got, ci lworo omakogi, komgi omyel. Gucuŋ ki cen ka mabor, ci guwaco bot Moses ni, “In aye ilok kwedwa, ci wabiwinyo; ento pe iwek Lubaŋa aye olok kwedwa; miyo wato.” Ci Moses owaco bot lwak ni, “Pe wulwor; pien Lubaŋa obino ka temo cwinywu, wek wubed ki lworo i kome, wek pe wubal.” Ci lwak gucuŋ ki cen ka mabor, kun Moses cito cok ki pol macol licuc ka ma Lubaŋa tye iye. Rwot owaco bot Moses ni, “Wac bot jo Icrael kit man ni, ‘Wun doŋ wuneno piwu kenwu ni Rwot otyeko lok kwedwu ki i polo. Pe wubitiyo cal lubaŋa me ryal me nywako bedo kacel kweda, pe wubitiyo cal lubaŋa me jabu bene piwu kenwu. Wutina keno tyer ki lobo, wutum iye gitum awaŋa ki gityer lakwecwiny, romiwu ki twoniwu; i kabedo ducu ma aketo iye nyina me po, abibino iye ka miyowu gum lobo ki Ka ibitiyo keno tyerra ki got, pe ican ki got ma gipayo; pien ka iketo iye giticci me payone, ci noŋo ipyedde i kome. Dok pe wuit ki rwom i keno tyerra, miyo komwu binen ka wuito.’ “Magi aye cik ma ibiketo i nyim lwak. Ka iwilo opii ma en Laibru, en bitic boti pi mwaka abicel i mwaka me abirone gibigonye woko laboŋo lim mo me kok, bicito gire, Ka yam obino en kene, ci en bicito en kene; ka obino ma onyomo, ci bicito ki dakone. Ka rwode aye onyomme dako ce onywalle awobe ki anyira, dako ki litinone gibidoŋ bot rwode, ci en bicito gire kene. Ento ka opii meno oloko atir ni, ‘An amaro rwoda, ki dakona ki litinona; pe abicito,’ ci rwode bitere bot Lubaŋa, ci bitere wa i ŋet kika, nyo i kom okar me doggola; ka rwode bituco ite ki atero; ci doŋ en bitic bote matwal. “Ka dano mo ocato nyare woko, macalo aŋeca, aŋeca meno pe gibigonyo macalo opii, Ka en pe oyomo cwiny rwode, ma yam oyere-ni, en myero oye ni gikoke ki lim; ento pe bibedo ki twero me cate bot dano mo ma larok, pien obwole noŋo. Ka yam oyere pi wode, ci en myero ogwoke macalo gwoko nyare. Ka ce binyomo dakone mukene gire, pe ojwik camme, kadi boŋone, pe oteny en woko ata. Ka pe ocobo gin magi adek ducu, dako gibigonyo laboŋo lim mo me kok, laboŋo culo lim mo. “Ka ŋatti mo ogoyo dano, ce oto, gibineke wako. Ento ka yam pe obuto okiye, ento Lubaŋa omiyo ciŋe orwatte i kome, ci abiyero kabedo mo ma en biriŋo laro iye. Ento ka dano mo ocako lweny i kom gat mo me akaka me nekone woko ki ryeko, ci wubikwanye woko ki i kom keno tyerra, gineko woko. “Ka ŋatti mo ogoyo wonne nyo minne gibineke woko. “Ka ŋatti mo ekwalo dano, kadi ka ocato bot ŋatti mo nyo ginoŋo bote, gibineke woko. “Ka ŋatti mo oceno wonne nyo minne gibineke woko. “Ka jo mogo gubedo ka da, ce ŋat acel ocelo lawote ki got nyo odoŋo ki ciŋe ci pe oto, ento obedo ka twor labuto, lacen ka dano meno ocukke oa malo kun woto komo ki odoo, kop pe biloyo ŋat ma ogoye-ni, ento bicul pi balo kare me ticce, dok bimiyo en caŋ maber. “Ka ŋatti mo ogoyo opiine nyo aŋecane ki odoo ce oto woko cut, I gibiketo can i kome. Ento ka opii meno obedo kwo pi nino acel nyo aryc pe gibiketo can mo i kome; pien op meno obedo gire limme. “Ka co gitye ka lweny, ci ŋat acel ciŋe ocer i kom dako ma iye odoŋo, ce iye opoto woko, ma can pe onen iye’ dano ma ogoyo dako-nu biculo kwor pi wei ma won dako biŋolone, kun culo ki kit ma laŋolkop oŋolo. Ka can onen iye, ci gibiculo kwo ki kwo waŋ ki waŋ, lak ki lak, ciŋ ki ciŋ tyen ki tyen, waŋo ki mac ki waŋo ki mac, ret ki ret, goco ki goco. “Ka ŋatti mo ogoyo waŋ opiine nyo waŋ aŋecane, ce oloyo oneko woko, ci bigonyo opii meno nyo aŋeca meno, weko cito gire pi waŋe-nu. Ka otwomo omuko lak opiine nyo aŋecane ci bigonyo opii meno nyo aŋeca meno weko cito gire pi lake-nu, “Ka twon mo ocobo dano ki tuŋe nyo dako, ce oneko woko, ci twon meno gibicelo woko ki got, dok riŋone bene pe gibicamo; ento kop pe biloye rwode. Ento ka kit twoŋ meno onene ni yam cobo dano ki tune con, dok yam doŋ giciko rwode pire ci ento pe omedo ki gwokone, ce oneko dano nyo dako mo, ci twon meno gibicelo woko ki got, ki rwode bene gibineke woko. Ka giŋolle cul, ci biculo lim ducu me koko kwone ma giŋolle. Ka ocobo awobi pa dano mo, nyo nyare, gibitic kwede i kit cik acel-lu. Ka twon ocobo opii mo, nyo aŋeca mo, ci rwode bimiyo cekel me ryal pyeradek ki ladit pa opii meno, ki twon bene gibicelo woko ki got. “Ka ŋatti mo oweko wi bur twolo nyo ka ŋatti mo okwinyo bur ci pe oumo wiye woko, ce twon nyo kana mo opoto iye, ci won bur biculone; en bimiyo lim bot rwode, ci riŋone bibedo mere. “Ka twon pa ŋatti mo otwomo mukene, ce oneko woko, ci gibicato makwo-ni woko, gipoko limme; ki twon ma gineko-ni riŋone bene gipoko woko. Nyo ka kite onene ni yam en twon ma lacob lim wadi atata, rwode bene pe ogwoko, en biculo twon ki twon wadi, ma gineko-ni bibedo mere. “Ka ŋatti mo akwalo twon mo nyo romo mo, ce oneko woko nyo ocato woko, ci biculo twoni abic pi twon acel, ki romi aŋwen pi romo acel, En biculo waŋe; ka gire mo pe, ci gibicate woko, wek gicul kwede lim ma ekwalo. “Ka ŋatti mo omiyo limme makwo gucamo poto cam nyo poto olok, nyo owekogi ocodo tol, ci gucamo poto pa dano mo, ci en biculone ki mere mabecone ma i potone ki i poto olokke. “Ka mac ocako waŋ ce ogamo okuto, ci owaŋo kal ma giduro nyo kal ma peya gikayo, nyo owaao poto ducu otyeko woko, ci lacwiny mac biculone ducu. “Ka ŋatti mo omiyo lim me akana bot lawote, nyo jami me agwoka, ka gikwalo woko ki i ot pa dano meno, ka dok lakwo meno ginoŋo, ci biculo ma dodo kiryo. Ka pe ginoŋo lakwo, ci won ot bicito cok bot Lubaŋa, pi nyuto ka en kikome aye oketo ciŋe i kom jami pa lawote, nyo pe. “Ka bal mo opoto, kadi bed pi twon, pi romo, pi boŋo, nyo pi kit gin mo murwenyo ka ŋat acel mo otuco ni, ‘Man aye en,’ ci kop ma i kin jo meno gibiketo i nyim Lubaŋa; ŋat ma Lubaŋa oŋolo kop oloye biculo lawote lim ma dodo kiryo. “Ka ŋatti mo omiyo kana nyo twon nyo romo nyo lee mo me akana bot lawote, ce oto woko nyo gigoyo nyo giryemo orwenyo woko, ma ŋatti mo pe oneno, ci en bikwon ki nyiŋ Rwot, wek ginen ka pe en kikome aye oketo ciŋe i kom jami pa lawote; rwode myero oye kwon meno, en pe biculone. Ento ka gikwalo ki bote, ci en biculo rwode. Ka ŋuu aye om wodo, ci en okel gin me moko lokke; ci en pe biculo gin ma ŋuu aye omwodo, “Ka ŋatti mo oomo lim makwo bot lawote, ce gigoyo nyo oto woko, ma rwode pe tye, ci myero ocul waŋe atir. Ka onoŋo rwode bene tye, ci pe biculo waŋe: ka yam obino pi awak, ci cul me awak biromo. Cik mapapat ma mako kit ki dini “Ka ŋatti mo obito nyako mo ma peya oneyo co, ma pe gitoŋo keny i kome, ce obedo kwede, ci myero okol lim me keny me nyome, ci oter obed dakone. Ka wonne okwero woko matek pi nyare, ci en biculo wei lim ma romo nyomo nyako ma peya oneyo co. “Pe iwek dako ma latal obed makwo. “Ŋat ma obuto ki lee ce ginek woko. “Ŋat ma otumo gitum bot Iubaŋa mo, ma pe bot Rwot, gibidyere woko me aneka. “Pe itim labedo ma bedo i kinwu marac, nyo pe iune bene, pien yam wun bene wubedo lubedo i lobo Ejipt. Pe wuket giŋi kom daa-to mo nyo latin kic mo. Ka iketo giŋi komgi, ce gukok bota, ci abiwinyo kokogi ada. Akemo bimaka matek, ci abinekowu ki pala lucwan, ci monwu bene gibidoko mon-to ki litinowu bene gibidoko litino kic, “Ka imiyo danona mo ma bedo i kinwu omako limmi ma en lacan, pe ibed kwede macalo labanyani, dok pe ipeny magoba mo ki bote. Ka lawoti ojeŋo boŋone boti, ci ber idwokke ma ceŋ peya opoto; pien giumme eno keken, boŋo ma umo kome; en dok bibuto ki gin aŋo? Ka en okok bota, ci abiwinyo, pien an lakica. “Pe iyet Lubaŋa, nyo pe icen ladit ma loyo wun lwak. “Pe igalle ki tyero jami ma ikayo opoŋo deroni kacel ki yino ki mooni bene, “Ibityero litino awobe kayo, imiyogi bota. Ibikelo twoni meri ki nyogi romi bene kit meno, Gubed ki megigi nino abiro, ka ibimiyogi bota i kom nino me aborone, “Wubibedo jo maleŋ ma gikwerogi pira: pienno pe wucam riŋo ma ŋuu omwodo i t im; wubol woko ki gwogi. “Pe irwe lok ma iwinyo awinya ata; pe iribbe ki dano marac ka kelo lok goba me keto can i kom dano. Pe ilub lwak ma gitiyo gin marac, Ka i lok me pido pe ilokke ilub kor lwak pi balo ŋolo kop atir, kadi dworo kor lacan i pidone. “Ka irwatte ki twon pa lamoneni, nyo kanane, ma orwenyo, dwok bote. Ka ineno kana pa ŋat ma dagi obuto piny ma yec obwoyo, pe iwek ata, konye akonya. “Pe ibal te pido pa danoni ma lacan wek lok oloye. Pe idony i lok goba: pe inek dano ma kite atir ma pe ki bal, pien pe abiye labalo loyo kop. Pe igam lim lawil loyo kop, pien lim lawil loyo kop miyo jo ma neno piny waŋgi umme woko, ci balo te pido pa dano ma lokke tye atir. “Pe iun larok ma bedo i kinwu, pien wun bene wuŋeyo cwiny lubedo, pien wun bene wubedo lubedo i Ejipt. “Ibicoyo potoni ci icoko cam ma ocek iye pi mwaka abicel. Ento i mwaka me abirone ibiweko ywe, okanne roc, wek arupinnye lucan ma i kinwu gunoŋ ginacama; ci ma obwotte lee tim bicamone. Ibitimo kit meno ki poto olokki ki poto jeitunini bene, “Ti ticci nino abicel, ento i kom nino me abirone ibiywe, wek twon ki kanani gunoŋ yweyo, dok wek latin pa aŋecani ki labedo boti guom ki kero komgi. Wumak gin ducu ma awaco botwu, dok pe wutuc nyiŋ lubaŋa, mukene; lok ma kit enno pe giwiny a ki i dogi. “Ibikwero nino madito bota tyen adek i mwaka acel acel. Ibikwero ni madito me Mugati ma Tobi Pe Iye, macalo yam aciko. Ibicamo mugati tobi pe iye pi nino abiro, i kare ma giciko, i dwe me Abib, pien meno aye dwe ma yam ia iye ki i Ejipt. Dano mope obin i nyima ki ciŋe noŋo, Ibikwc ronino madito me wi mwaka, pi c: mukwoŋo cek pi tic me ciŋi, i kom cam ma icoyo i poto; ki nino madito me nyonone i dero i agikki me mwaka, doŋ icoko gin ma ocek i poto pi ticci, Co ma boti ducu gibibino i nyim Rwot Lubaŋa tyen adek i mwaka, “Pe ityer remo me gitumma kacel ki mugat i ma tobi tye iye; pe iwek dwolo mo me kwero nino madito bota obed nio wa odiko. “Cam mukwoŋo cek i potoni me wi mwaka myero ikel i ot pa Rwot Lubaŋani, “Pe ited riŋo latin dyel ki cak pa minne. Gicwalo lamalaika pa Rwot pi telo nyim dano “Nen, acwalo lamalaika i nyim pi gwokowu i yo, ki me kelowu i kabe ma yam ayubo piwu, Wugwokke wek wuwiny doge, pe wujem i kor pien kica pe bimake i komwu ka wuba pien nyiŋa tye iye. “Ento ka wuwinyo doge ki cwinywu ducu, kun wutiyo k it ma awa botwu ducu, ci abibedo lamerok lumerokwu ki lamone pa lumonewu “Ka lamalaikana bitelo nyimwu terowu bot jo Amor, jo Kit, jo Per jo Kanaan, jo Kiv ki jo Jebuc, abijwa: gi woko. Pe wuryebbe i nyim lubaŋagi pe wuworgi, pe wulub kit tic Ento wubimuko calgi woko ducu, dok wubiŋido wir jogigi woko. Wubiwc Rwot Lubaŋawu, ci abimiyo gum i kom kwonwu ki i kom piiwu; abikwanyo two woko ki i kinwu. i-lobowu-nu lim pe bibwogo litinogi, dako ma lalur bibedo pe; abicobo nino me kwowu ducu kakare, Abicwalo lworo i koma i nyimwu, abibaŋo rok ducu ma wubiromo kwedgi; abimiyo lumerokwu giriŋo giloko ŋegi botwu. Abicoro pino jobi i nyimwu i kom jo Kiv, jo Kanaan ki jo Kit, wek oryemgi woko ki i nyimwu. Pe abiryemogi woko ki i nyimwu i mwaka acel, miyo lobo bidoŋ noŋo, ci gin tim bimedde mapol, yelowu. Abiryemogi woko ki i nyimwu motmot, nio ka wunya, wucamo lobo. Abiketo waŋ lobowu obed nia ki i Nam Makwar nio i nam pa Lupiliciti ki nia ki i tim nio i kulu Euprate. Dok abimiyo wegi lobo-nu i ciŋwu, wun bene wubiryemogi woko ki i nyimwu. Pe wuket gicikke mo kwedgi, kadi bot lubaŋagi. Pe gubed i lobowu, miyo wubitimo bal i koma; pien ka wubiworo lubaŋagi, ci bidoko owic botwu.” Dok Rwot owaco bot Moses ni, “Bin malo bota kany, in ki Aron, Nadab ki Abiu, ki ludoŋo pa jo Icrael pyerabiro, wuwora ki ka mabor. Moses keken aye binyiko cok bota. Jo mukene pe gibinyiko cok, dok lwak bene pe gibibino kwede malo.” Moses ocito otito ki lwak lok ducu ma Rwot owaco, ki cikke ducu. Lwak ducu gugamo ki dwan acel kun giwaco ni, “Lok ducu ma Rwot owaco wabiti yo.” Moses ocoyo lok ducu ma Rwot owaco. Oa malo odiko con, ocano keno tyer i te got, ki wir apar wiye aryo, muporo wel kaka pa jo Icrael apar wiye aryo. Ci ocwalo awobe pa jo Icrael, ma gutyero gitum awaŋa dok gutumo twoni bot Rwot me gityer lakwecwiny, Lacen Moses okwanyo nucu remo, oonyo i weer, ki nucu remo ocoro i kom keno tyer. Ka dok okwanyo buk me gicikke, ci okwano bot lwak, guwinyo. Ci gugamo ni, “Gin ducu ma Rwot owaco wabitiyo, dok wabiworo doge bene,” Ka Moses dok otiŋo remo, ocoro i kom lwak, kun wacci, “Nen remo me gicikke ma Rwot oketo kwedwu, ma lubo lok magi ducu.” Ka Moses ki Aron, Nadab ki Abiu, ki ludoŋo pa jo Icrael pyerabiro-ni gucito malo, ci guneno Lubaŋa pa Icrael. Gin mo obedo ka tyene macalo kidi capir ma bulu ma gipeto, ma ryeny macalo polo kikome. Ento Lubaŋa pe ogudo kom ludoŋo pa Icrael ki ciŋe; guneno Lubaŋa, ci gucamo dok gumato pii bene. Rwot owaco bot Moses ni, “Bin bota malo i wi got, ci ikura kunnu, Abimini kidi ma apada, kacel ki cik ki ginacika ma acoyo me pwonyo lwak.” Ci Moses oa malo, kacel ki Yocwa ma lakonye, ka ocito i wi got pa Lubaŋa. Owaco ki ludoŋo ni, “Wubed wukurwa kany, nio ka dok wadwogo botwu, Nen, Aron ki Kur gudoŋ botwu; ka ŋat mo tye ki lok mo, oter botgi.” Ka Moses cito malo i wi got, ci pol oumo got woko. Deyo pa Rwot obedo i kom got Cinai, ci pol oumo kema pi nino abicel. I kom nino me abirone, Rwot olwoŋo Moses ki i dye pol. I kare meno deyo pa Rwot onen bot jo Icrael macalo mac arum i wi got, Ka Moses odonyo i dye pol, ocito malo i wi got; ci Moses obedo i wi got nino pyeraŋwen, dyeceŋ ki dyewor. Rwot owaco bot Moses ni, “Wac bot jo Icrael ni gujogga gityer, ci gugam gityer pa dano ducu ma gukelo ma cwinygi opwoyo. Man aye kit gityer ma wubigamo ki botgi: jabu, ryal, mola; uci ma bulu, ki ma lamar lamar, ki makwar, ki boŋo camanini maberre; yer dyegi, laa nyogi romi ma ginyoŋo, laa dyegi; bao yat okuto lalwii: moo me mac tara, aŋwece me yubo moo wir ki pi odok eceta ma ŋwe kur; litino kidi onik litino kidi me wel me amwona i kom jabu pi epod ki kicaa kor. Ber gu yubba kabedo maleŋ wek abed i kingi Wuti gin ducu kun wulubo kit cal ma abinyutti, ma dok i kom timo kema ki jami ma giketo iye ducu. “Gibipayo canduk ki bao yat lalwii; borre obed futi aŋwen, ki lacce futi aryo, ki borre tuŋ malo futi aryo. Mwon kome woko ki jabu ma giliyo maber, mwon iye ki ŋeye bene. Lul doge ducu irum woko ki jabu. Ti agit me jabu aŋwen pire, iketgi i kom tyene aŋwen: ket agit aryo tuŋ cel ki aryo mukene tuŋ cel. Ti tal me yat lalwii, imwon komgi woko ki jabu. Rwak tal i agit ducu ma tye i but canduk, me tiŋo canduk. Tal gibibedo i agit ma i kom canduk-ki matwal, pe gibiwotogi woko. Kidi ma apada ma gicoyo iye lok me caden ma amiyi-ni ibiketogi i canduk. Dok ibitiyo kom mekica kijabu ma giliyo maber; borre obed futi aŋwen, ki lacce futi aryo. Ti cal lukerubi aryo ki jabu kun itetogi ki nyol, i kom agikki kom me kica aryo ducu. Ti cal lakerubi acel i agikkine tuŋ cel; ki acel i agikkine tuŋ cel; ti cal lukerubi kun gikubbe i kom me kica-ni i agikkine aryo ducu. Lukerubi gibiyaro bwomgi malo me umo kom me kica ki bwomgi, kun waŋgi kemo lawote; waŋ Lukerubi binen kun kemo kom me kica. Ibicibo kom me kica cuŋ i wi canduk, ci iket lok me caden ma abimiyo boti-ni i canduk. An abirwatte kwedi kunnu, ci abilok kwedi ki malo i wi kom me kica, ki i kin lukerubi ma gitye malo i wi canduk lok me caden-ni, kun aloko kwedi i kom cik ducu ma abimiyi pi jo Icrael. “Ti meja ki bao yat lalwii; borre obed futi adek, ki lacce futi acel ki nucu, ki borre tuŋ malo futi aryo. Mwon kome woko ki jabu ma giliyo maber, dok ilul doge ducu, irum woko ki jabu, Ket riine ma lacce rom ki dye ciŋ, ilul dog rii ki jabu orum woko. Dok itim agit me jabu aŋwen pire, ci imwon agit i twoke aŋwen ducu, i tyene aŋwen, Agit bibuto i kom rii, ci ibirwako iye tal me latin meja. Ti tal ki jabu; gibitiŋo meja ki tal meno. Dok iti caanine, ki ata bone me odok eceta, ki cupane ki werre me liyo gityer amate ibitimogi ki jabu ma giliyo mabe Ibicano mugati me aketa i nyima i wi meja jwijwi. “Dok ibitiyo okar-mac ki jabu m giliyo maber. Tedi okar-mac ki bolle gibiteto ki nyol; kikopone, en aye wen ki ature ducu, gibikubbe kwede kacel. Jaŋe bibedo abicel ma gujany guryey gukaco ŋete ryoryo, jaŋ okar-mac ade ma guryeyo i bute tuŋ cel, ki jaŋ okai mac cadek ma guryeyo i tuŋ mukene-ni. I kom jaŋe tuŋ cel bibedo iye kikop adek ma gitimo macalo tur yaa, ku; acel acel tye ki wene ki ature, ki i kor jaŋe tuŋ mukene bene bibedo iy kikopo adek ma gitimo macalo tu yaa, kun acel acel tye ki wene ki ature jaŋe abicel ducu ma guryeyo gukac okar-mac-ci gibibedo kit meno. Ka dok i kom okar-mac kikome-ni bibedi iye kikopo aŋwen ma gitimo macalo tu yaa, ki wengi ki aturegi, ki wene ma; okubbe i kom okar-mac-ci i te jaŋe abicel ma’ guryeyo ryoryo i kom okar mac. Wengi ki jaŋgi gubed ma gu kubbe kacel, kun kome ducu bedo jabi ma giliyo maber ma giteto ki nyol Ci doŋ ibitiyo pire mac laput abiro gicib mac laput malo i wiye wek omen: kabedo ma i nyime. Magacce ki caanine bibedo me jabu ma giliyo maber. Giyub okar-mac kacel ki jami tic magi ducu ki jabu ma giliyo maber ma pekke romo ratili miya acel. Dok ber inen ni itimogi i kit cal ma gibenyutti ki i wi got-ti. “Doki ibitiyo kema ki boŋo cuka apar me boŋo camanini ma giwiyo maberre, ki uci ma bulu ki ma lamar lamar ki makwar; ibicweyo iye cal lukerubi ma gitiyogi ki diro Bor boŋo cuka acel acel obed ms romo yadi apar wiye aŋwen, ki lac me boŋo cuka acel acel obed ma romo yat lalwii, ci imwon komgi woko ki yadi aryo; boŋo cuka ducu gibibedc marom, Boŋo cuka abic gibiribog kacel, ki boŋo cuka abic mukene bene gibiribogi kacel, Kwo waŋ jarara ma bulu i dog boŋo cuka me dul mukwoŋo me agikk i; ka dok ibikwoyo waŋ jarara i dog boŋo cuka me dul me aryone me agikk i, ma rom ki wadi. Kwo waŋ jarara pyerabic i dog boŋo cuka acel acel, ki waŋ jarara pyerabic i dog cuka me aryone kun waŋ jarara bikemme ki wadi. Ibitiyo jarara gol me jabu pyerabic me ribo dog boŋo cuka i kom lawote pi golo wad i wek kema obed mukubbe kacel likiŋ. “Ibit iyo cuka me yer dyegi me laum wi kema; ibitimo cuka apar wiye acel. Bor cuka acel acel obed ma romo yadi apar wiye abic, ki lac me cuka acel acel obed ma romo yadi aryo; cuka apar wiye acel-li ducu gubed marom. Ibiribo cuka abic kacel pat kengi, ki cuka abicel bene ibiribo pat kengi, dok cuka me abicelle ibibamo idolo iye aryo i nyim kema. Kwo waŋ jarara pyerabic i dog cuka me dul mukwoŋo me agikki, ka dok ikwo waŋ jarara pyerabic i dog cuka me dul me aryone me agikk i. “Dok ibitiyo lagol me mola me aroya i waŋ jarara, irib ki kema, wek obed mukubbe kacel likiŋ, Dul cuka me kema ma odon, en nucu cuka mudoŋŋe, bipyelle i ŋe kema. Futi acel ki nucu tuŋ cel ki futi acel ki nucu tuŋ cel bene, en bor me cuka mudoŋŋe, bipyelle i but kema tuŋŋi ki tuŋŋi me umone. Dok ikwo laa romo ma ginyoŋo, ki laa dyegi me umo wi kema. “Ibitiyo guti me bao yat lalwii, ma ocun atir, pi kema. Bor gut i obed futi apar wiye abic ki lacce futi aryo, i kom guti acel acel. Wek tyene aryo i kom guti acel acel, me kubogi kacel; ibitiyo guti me kema ducu kit meno, Ibitiyo guti me kema, guti pyeraryo i tuŋ acuc; dok ibitiyo tedi tergi me ryal ma romo pyeraŋwen pi guti pyeraryo-nu, tedi tere aryo pi guti acel pi tyene aryo, ki tedi tere aryo pi guti mu kene pi tyene aryo, Ki pi kema tuŋ me aryone, ma tuŋ acam, obed guti pyeraryo, ki tedi tergi me ryal ma romo pyeraŋwen, tedi tere aryo pi guti acel, ki tedi tere aryo pi guti mukene. Ki pi ne kema ma tuŋ potoceŋ bene iti guti abicel. Ti guti aryo me twok kema ma i ŋeye; gibipoko kingi ki tuŋ piny ento giribo doggi ki tuŋ wrgi malo i kom agut mukwoŋo; gin aryo ducu gibibedo kit meno, ci twoke bibedo aryo. Guti bibedo aboro, ki tedi tergi me ryal, tedi tergi apar wiye abicel, tedi tere aryo pi guti bao acel, ki tedi tere aryo pi gut i bao mukene. “Dok ibitiyo rii me bao yat lalwii abic pi guti me kema tuŋ cel, ki rii bao abic pi guti me kema tuŋ mukene, ki rii bao abic pi guti me kema me ŋeye tuŋ potoceŋ, Rii bao ma i dyere, ma ŋolo kor guti ari, bia ki i agikk i tuŋ cel nio i agikki tuŋ mukene, Ibimwono kom guti woko ki jabu, dok ibitiyo agit me rwako iye rii bao, ibimwono rii bao bene ki jabu, Gur kema i kit ma yam ginyutti i wi got. “Ibikwoyo boŋo kicika ki uci ma bulu ki ma lamar lamar ki makwar, ki boŋo camanini ma giwiyo maberre; gibicweyo iye cal lukerubi ki tic me diro. Ibiŋabo i kom wir aŋwen me bao yat lalwii ma gimwono komgi woko ki jabu, ma tye iye gol jabu, ma ocuŋ i kom tedi tergi me ryal aŋwen. Ŋab boŋo kicika ki jarara lagolle. Kel canduk lok me caden kunnu ki i boŋo kicika, ci boŋo kicika bipoko kin kabedo maleŋ ki kabedo maleŋ makato ducu. Ka doŋ iket kom me kica i wi canduk me cik i kabedo maleŋ makato ducu. Ket meja ki woko i ŋe boŋo k icika, ki okar-mac iket tuŋ acuc me kema, ma okemo meja; ibiketo meja tuŋ acam. “Dok ikwo boŋo cuka Laum doggola me kema ki uci ma bulu ki ma lamar lamar ki makwar, ki boŋo camanini ma giwiyo maberre, ma gidero maber. Ti wir abic me boŋo cuka laum doggola ki bao yat lalwii, ci imwon komgi woko ki jabu; golgi bibedo me jabu, dok ibiliyo tedi tergi me mola abic, “Ibitiyo keno tyer ki bao yat lalwii; borre obed futi abiro ki nucu ki lacce futi abiro ki nucu. Bor keno tyer ki lacce bibedo ma rom, ki borre tuŋ malo bibedo futi aŋwen ki nucu, Ibitimo ten keno i kom twoke aŋwen ducu; ten keno ducu gibikubbe kacel kwede, dok ibimwono kome woko ki mola. Ibiyubo lajob burune, ki akwaya latokke, ki becen, ki gin lacob riŋo, ki weer lawaŋ mac; jami tic meno ducu ibiyubogi ki mola. Yub keikeine bene me obwo mola, dok i twok obwo mola aŋwen-ni iket iye agit aŋwen me mola. Ibiketo i te rii me keno tyer wek obwo obut i kor keno tyer. Dok itim tal me keno tyer, tal me yat lalwii, ci ibimwono komgi woko ki mola. Ibirwako tal donyo i agit ducu, wek tal orine i keno tyer tuŋŋi ki tuŋŋi me latiŋŋe. Ibitiyo keno tyer ma iye twolo, ki bao; ti macalo yam ginyutti i wi got, “Ibitiyo dyekal me kema. I tuŋ acuc me dyekal gibiŋabo iye boŋo cuka camanini ma giwiyo maberre, ma borre tuŋ cel romo yadi pyerabic. Wir bibedo pyeraryo, ki tedi tergi bene pyeraryo, me mola, ento gol me wir ki otacgi ducu gubed me ryal, Ki tuŋ acam bene borre obed kit meno, kunnu bene gibiŋabo iye cuka ma borre romo yadi pyerabic; wir obed pyeraryo ki tedi tergi pyeraryo, me mola, ento gol me wir ki otacgi ducu gubed me ryal. Ki bute ma tuŋ potoceŋ dyekalle bene gibiŋabo iye boŋo cuka ma borre romo yadi pyeraryo wiye abic; wir obed apar ki tedi tergi bene obed apar, Lac dyekal ma tuŋ nyime ma tuŋ wokceŋ biromo yadi pyeraryo wiye abic. Gibiŋabo boŋo cuka i ŋet doggaŋ tuŋcel ma romo yadi abiro ki nucu; wir obed adek ki tedi tergi adek, Ki tuŋ mukene bene gibiŋabo iye boŋo cuka ma romo yadi abiro ki nucu; wirgi obed adek ki tedi tergi adek. Doggaŋ me dyekal gibiumo ki boŋo cuka ma lacce romo yadi apar ma gitiyo ki uci ma bulu ki ma lamar lamar ki makwar, ki boŋo camanini ma giwiyo maberre, ma gidero maber; bibedo ki wir aŋwen ki tedi tergi aŋwen, Wir murumo dyekal ducu bibedo iye otac me ryal; golgi bibedo me ryal, ki tedi tergi me mola. Bor me dyekal biromo yadi pyerabic, ki lacce yadi pyeraryo wiye abic, ki borre tuŋ malo futi abiro ki nucu; gibiŋabo iye boŋo cuka camanini ma giwiyo maberre; tedi te wir bibedo me mola. Jami tic ducu ma i kema ma konyo kwa tic ducu, kacel ki teke lagurre ducu, ki teke ma orumo dyekal ducu bibedo me mola. “Dok ibiciko jo Icrael ducu gukel moo me nyig jeituni ma giodo, giliyo maleŋ, me menyo piny, wek giket mac laput obed ka lyel nino ducu ma pe to. Aron ki awbene gucan mac olyel i nyim Rwot nia otyeno nio odiko, kun giketo i kema me rwatte, ki woko i ŋe boŋo kicika ma i nyim canduk lok me caden. Man bibedo cik ma jo Icrael bigwoko matwal, wa i kare pa likwayogi ducu. “Kel omeru Aron cok boti kacel ki awobene, gua woko ki i kin jo Icrael, wek guti bota tic me ajwagi; gin ene: Aron ki awobe pe Aron, Nadab ki Abiu, Eleajar ki Itamar. Ibikwoyo boŋŋi maleŋ pi omeru Aron, me deyo dok mamwonya. Dok ibiwaco bot jo makwiri ducu, ma apoŋo cwinygi ki kwiri, ni gukwo boŋo aruka pi Aron me kwero en pi tic me bedo, ajwakana. Man aye boŋŋi aruka ma gibikwoyo: kicaa kor, epod, jor, kanyi ma giŋweko kome, kitambara adwala me wic ki kitambara latwe pyer; myero gikwogi gubed boŋŋi aruka maleŋ pi omeru Aron ki awobene pi ticgi me bedo ajwagina. “Gibigamo jabu, uci ma bulu ki ma lamar lamar ki makwar, ki boŋo camanini ma giwiyo maberre. Gibikwoyo epod ki jabu ki uci ma bulu ki ma lamar lamar ki makwar, ki boŋo camanini ma giwiyo maberre, ma gikwoyo ki diro. Bibedo ki gin wi gwoke aryo ma gikubo i doge ryoryo, wek okubbe kacel. Ceme ma i kome ma latwene ma gicweyo ki diro bibedo kit tic acel-lu, me jami acel-lu, en aye me jabu, uci ma bulu ki ma lamar lamar ki makwar, ki boŋo camanini ma giwiyo maberre. Ibikwanyo litino kidi onik aryo, igor nyiŋ awobe pa Icrael i komgi, nyiŋ awobe abicel i kom kidi onik acel, ki nyiŋ awobe mudoŋŋe abicel i kom kidi onik mukene-ni, kun ilubo kit dito me anywalligi. Macalo ladiro goro kom kidi, in bene ibigoro nyiŋ awobe pa Icrael i kom kidi aryo-nu: ibimwonogi i kom jabu ma giŋweko kome ki diro ma okwa ko tere. Ci doŋ ibiketo litino kidi aryo meno i gin wi gwok epod, gubed kidi me po pi awobe pa Icrael; Aron bitiŋo nyiŋgi i wi gwoke aryo ducu me po pigi i nyim Rwot, Tim gin lakwak tere ki jabu ma giŋweko kome ki diro; dok itim nyor aryo me jabu ma giliyo maber ma giminogi macalo tol; ka imwon tol nyor meno i kom gin lakwak tere. “Dok ibikwoyo kicaa kor me ŋolo kop ki tic me diro; ibitiyo macalo tic i kom epod; ibitimo ki jabu, ki uci ma bulu ki ma lamar lamar ki makwar, ki boŋo camanini ma giwiyo maberre, Ibibano iye aryo ma borre ki lacce rom ki dye ciŋ acel. Ci ibimwono iye litino kidi me wel ma guryeyo tyen aŋwen.I tyeŋ mukwoŋo gibiketo iye cadiuc, topaj ki kabankel: tyen me aryone obed emeradi, capir ki dayaman; tyen me adekke obed jacint, agat ki ameticito; ki tyen me aŋwenne obed berul, onik ki jacipa; gibimwonogi i jabu ma giŋweko ki diro. Litino kidi ducu bibedo apar wiye aryo ma nyiŋ awobe pa jo Icrael gigoro i komgi; gibibedo macalo kidi ma gigoro me agit, kun acel acel tye ki nyiŋ ma gigoro i kome muporo kaka apar wiye aryo. Tim bene nyor aryo ki jabu ma giliyo maber ma giminogi macalo tol, me tweyo kicaa kor; ibitimo agit me jabu aryo, pi kicaa kor, ci iket agit aryo-nu i kom dog kicaa kor aryo. Dok irwak tol jabu aryo-nu odony i agit aryo ma gitye i kom kicaa kor-ri, ki dog tol aryo-nu ibimwonogi i kom gin lakwak tere aryo me jabu ma giŋweko ki diro-ni, me tweyo kicaa kor i gin wi gwok epod tuŋ nyime. Dok itim agit me jabu aryo, ci iketgi i twok kicaa kor aryo ducu i kom doge ma tuŋ iye ma cok ki epod. Tim agit jabu mukene doki, ci ikubgi i gin wi gwok epod aryo anyim tuŋ tere, ka ma okubbe tuŋ malo i wi ceme me epod ma gicweyo ki diro. Gibitweyo kicaa kor ki agitte i kom agit me epod ki tol ma bulu, wek gitwe obut opyelle i wi ceme me epod ma gicweyo ki diro, wek kicaa kor pe ogonnye woko ki i kom epod, Wek Aron otiŋ nyiŋ awobe pa Icrael i kicaa kor me ŋolo kop i pal cwinye i kare me donyo i kabedo maleŋ nino ducu, wek obed me po i komgi i nyim Rwot. I kicaa kor me ŋolo kop ibiketo iye Urim ki Tumim; gin bene gibibedo i pal cwiny Aron i kare ma en donyo i nyim Rwot; kit meno Aron bitiŋo ŋolo kop pa jo Icrael i pal cwinye nino ducu i nyim Rwot. “Dok ibitimo jor me epod ma kome ducu obedo bulu. Gituc doge obed twolo i dyere pi rwako wic; gibicweyo kun gidolo doge macalo dog boŋo aruka ma gidolo, orumo wo ko likiŋ, wek pe oyeci. I dog boŋo ibiluno iye gin muporo okwer pomegranat munyak ma gikwoyo ki uci ma bulu ki ma lamar lamar ki makwar, orum dog jor ducu, kun iŋobo kingi ki olan me jabu; olaŋ jabu ki okwer pomegranat orum dog jor ducu kun gigwennye agwenya. Aron biruko ka donyo ka tic, ci dwan olan bikok winnye i kare ma en donyo i kabedo maleŋ i nyim Rwot, ki i kare ma en kato woko, wek pe oto. “Ibitimo akwaya jabu ma giliyo maber, ci igor i ko me macalo agora i kom agit, ni, ‘Maleŋ pi Rwot.’ Ci ibitweyo irido i kom kitambara adwala me wic-ci ki tol ma bulu; ibiketo i nyim kitambara adwala me wic, Gibiketo cun i tur nyim Aron, ci Aron bitiŋo alii me bal pi jami maleŋ ma jo Icrael gityero me bedo motgi maleŋ; bicuŋ i tur nyime jwijwi, wek Rwot ogamgi. “Ibicweyo kanyi ki boŋo camanini maberre ma giŋweko kome, itim kitambara me adwala i wic ki boŋo camanini maberre, ci itim bene kitambara me latwe pyer ma gidero maber. “Pi awobe pa Aron ibikwoyo kanyi ki kitambara latwe pyer, ki gitok matino; ibitimogi obed me deyo ki mamwonya. Ibirukogi i kom omeru Aron kacel ki awobene, ibiwirogi ki moo me ketogi i dog tic, pi kwerogi pi tic maleŋ, wek guti bota tic me ajwagi. Dok ibikwoyo pali boŋo camanini pigi me umo komgi nia i pyergi nio i emgi. Aron ki awo bene birukogi i kare me donyo i kema me rwatte, nyo i kare ma gicito cok ki keno tyer pi tic i kabedo maleŋ; wek pe gutiŋ alii me bal, miyo gito woko, Man bibedo cik matwal bote ki bot likwaye ma bilube. “Man aye gin ma ibitimo i komgi ka ikwerogi, wek guti bota tic me ajwagi. Kwany wod twon acel ki nyogi romi aryo ma mwonyo pe i komgi, ki mugati ma tobi pe iye, ki capat ma tobi pe iye ma girubo ki moo, ki capat marep ma gireyo moo i komgi; ibitimogi ki moko ŋano ma pwotte. Ibiketogi i aduku acel, ci ikelogi ki aduku-nu, ka ikel, bene wod twon ki nyogi romi aryo. Ibikelo Aron ki awobene i nyim doggola kema me rwatte, ci ilwok komgi woko ki pii. Ibikwanyo boŋŋi aruka, ci iruko Aron ki kanyi, ki jor me epod, ki epod, ki kicaa kor, ci itwe pyere ki ceme me epod ma gicweyo ki diro; ibidwalo kitambara adwala i wiye, ka iketo lakukana maleŋ cuŋ i wi kitambara adwala, Ka ibikwanyo moo me wir, iwiro kwede, Ka dok ibikelo awobene, irukogi ki kanyi, ci ibitweyo pyergi ki kitambara, ka itwe gitok matino i wigi; ci tic me ajwagi bibedo megi pi cik ma bibedo matwal. Ibiketo Aron ki awobene i dog ticgi kitmeno. “Dok ibikelo twon i nyim kema me rwatte, ci Aron ki awobene gibiketo ciŋgi i wiye, ka doŋ ibineko wod twon-nu i nyim Rwot, ki i doggola kema me rwatte. Ibigwelo remo twon, ci ireyo remone i kom ten keno aŋwen me keno tyer ki lwet ciŋi; ki remo mudoŋŋe ibionyo i te tedi keno tyer. Ibikwanyo dwolo ducu ma oumo jam iye, ki okene ma i kom cwiny, ki olaŋ aryo ki dwolo ma tye i komgi, ci iwaŋgi woko i wi keno tyer, Ento riŋo wod twon-nu ki pyenne ki wee iye-gu, ibiwaŋo awaŋa ki mac wa i ŋe gony; en aye gitum me bal. “Ka man otum ci ibikwanyo nyok romo acel imiyo Aron ki awo bene giketo ciŋgi i wiye ci ibineko nyok romo, ibijolo remone, ci icoro remone i kom keno tyer irumo kwede kome ducu. Dok ibinido riŋo nyok romo matitino ci ilwoko jam iye, ki tyene ducu, ci iketogi i kom riŋo ma giŋido-ni, kacel ki wiye, ibiwaŋo riŋo nyok romo woko ducu ki berre i wi keno tyer; en aye gitum awaŋa bot Rwot; en aye gin ma ŋwece kur me layom cwiny, gityer ma giwaŋo ki mac bot Rwot. “Ka lacen dok ibikwanyo nyok romo mukene; ci Aron ki awobene gibiketo ciŋgi i wiye, ci ibineko nyok romo, igwelo remone ci ireyo i ogwilo it Aron malacuc, ki i ogwilo it awo bene malacuc, ki i kom twon nyig tyengi malacuc, ci ibicoro remo mudoŋŋe i kom keno tyer irumo kwede kome ducu, Ka ibikwanyo remo manok ma i wi keno tyer, ki moo wir, ci ikirogi i kom Aron ki i kom boŋŋi arukane, ki i kom awobene ki i kom boŋŋi aruka pa awobene, ci en ki boŋŋi arukane gibibedo maleŋ, kacel ki awobene ki boŋŋi arukagi bene. “Dok bene ibikwanyo dwolo nyok romo, ki moo yibe, ki dwolo ma oumo jam iye, ki okene ma i kom cwiny, ki olaŋ aryo kacel ki dwolo ma tye i komgi, ki em tun lacuc, (pien obedo nyok romo me keto dano i dog tic), ki mugati acel ki capat acel ma girubo iye moo, ki capat marep acel ma i aduku me mugati ma tobi pe iye ma tye i nyim Rwot; ci ibiketogi ducu i dye ciŋ Aron ki i dye ciŋ awo bene bene, wek gikwatgi me bedo gityer akwata i nyim Rwot. Ka dok ikwany woko ki i ciŋgi, iwaŋgi woko i wi keno tyer me ameda i kom gitum awaŋa, obed gin ma ŋwece kur ma yomo cwiny Rwot; en aye gityer ma giwaŋo ki mac bot Rwot. “Dok ibikwanyo gok nyok romo me keto Aron i dog ticce, ci ikwat me bedo gityer me akwata i nyim Rwot; en aye bibedo waŋ wat ma tuŋ boti, Dok ibikwero gok me gityer me akwata, ki em me waŋ wat pa ajwagi, ma gikwato, ma gityero nia ki i kom nyok romo me keto dano i dog tic, pien en aye pa Aron ki pa awobene, Bibedo waŋ wat pa Aron ki pa awobene ma myero jo Icrael gumi botgi dikdik, pien en aye waŋ wat pa ajwagi ma jo Icrael myero gutyer nia ki gitumgi me gityer lakwecwiny, en aye gityergi bot Rwot. “Boŋŋi aruka pa Aron maleŋ ducu bibedo pa likwaye ma bilube; gibiruko i komgi ka giwirogi ki moo, me ketogi i dog tic. Latin awobi ma bileyo kakare i t ic me bedo ajwaka birukogi tyeko kwede nino abiro, i kare ma en ci to i kema me rwatte ka tic i kabedo maleŋ. “Ibitero riŋo nyok romo me ketogi i dog tic, ci itedo i kabedo mo maleŋ; ci Aron ki awobene gibicamo riŋo nyok romo-nu ki mugati ma tye i aduku, i doggola kema me rwatte. Gibicamo jami meno ma gitiyo kwede me lakwany bal pi ketogi i dog tic ki kwerogi pi tic maleŋ, ento jo mukene pe gibicamone, pien gin jami maleŋ. Ka riŋo mo me ketogi i dog tic, nyo mugati mo, odoŋ nio odiko, ci ibiwaŋo mudoŋ-ŋi awaŋa ki mac; pe dok gibicamo, pien leŋ, “Ibitimo i kom Aron ki awobene kameno, kit macalo aciki kwede ducu; ibitiyo tic me ketogi i dog ticgi pi nino abiro; dok ibityero twon acel pi gitum me bal nino ducu me lakwany bal. Dok ibitumo gitum me bal pi keno tyer, ka itimo gin lakwany bal ki i kome, dok ibiwire ki moo pi kwerone. Ibitimo gin lakwany bal ki i kom keno tyer, ibikwere pi nino abiro, miyo keno tyer doko maleŋ maka to; gin ducu ma bigudo ke no tyer bidoko maleŋ, “Magi aye gin ma ibityero i wi keno tyer: nyogi romi aryo ma ditogi romo mwaka acel acel en aye ibityerogi nino ducu, Ibityero nyok romo acel odiko ki nyok romo acel ibityero otyeno. Kacel ki romo mukwoŋo-ni ibityero moko kwon mapwotte ma romo agwata acel ma girubo ki moo nyig jeituni ma giodo aoda ma romo cupa aryo ki nucu, ki vino ma romo cupa aryo ki nucu, me bedo gityer amata. Nyok romo mukene ibityero otyeno, kacel ki gityer me moko kwon ki gityer amatane, macalo me odiko, pi bedo gin ma ŋwece kur ma yomo cwiny, gityer ma giwaŋo ki mac bot Rwot. Bibedo gitum awaŋa me nino ducu ma wubityero wa i kare pa likwayowu ducu, i doggola kema me rwatte i nyim Rwot, ka ma abirwatte iye kwedwu, pi lok kwedwu kunnu. Abirwatte ki jo Icrael kunnu, ci deyona bilonyogi gibedo maleŋ; abikwero kema me rwatte ki keno tyer; ka dok abikwero Aron ki awobene pi t icgi bota me bedo ajwagi. Dok abibedo i kin jo Icrael, abibedo Lubaŋagi. Gin giŋeyo ni an a Rwot Lubaŋagi, ma yam akwanyogi woko ki i lobo Ejipt wek abed i kingi; an a Rwot Lubaŋagi. “Ibitiyo keno tyer me waŋo odok eceta; ibitiyo ki bao yat lalwii. Borre obed futi acel ki nucu, ki lacce bene futi acel ki nucu; borre ki Lacce bibedo marom, Borre tuŋ malo obed futi adek; ten keno aŋwen ducu bene gubed ma gukubbe kacel kwede. Ibimwono kome woko ki jabu ma giliyo maber, wiye ki bute ducu, ki ten keno aŋwen ducu; dok ibilulo doge ducu, irumo woko ki jabu. Ibitimo agit me jabu aryo pire; ibiketo agit ki piny i te doge ma ilulo-ni, kun agit acel acel okemme ki wadi tun cel, ci ibirwako iye tal me tinone, Ibitiyo tal ki bao yat lalwii, ibimwono komgi woko ki jabu. Ibiketo keno tyer man i nyim oono kicika ma umo canduk lok me caden, i nyim kom me kica ma i wi canduk lok me caden, ka ma abirwatte iye kwedi. Ci Aron biwaŋo iye odok eceta ma ŋwece kur. Nino ducu ka en yubo mac laput odiko, ci biwaŋone; dok ka Aron keto mac laput malo otyeno, ci biwaŋone, Kit meno gibiwaŋo odok eceta nino ducu i nyim Rwot, wa i kare pa likwayowu ducu. Pe wubityero iye odok eceta mo ata, kadi gitum awaŋa, kadi gityer me moko kwon; dok pe wuony iye gityer amata. Aron myero otim gin lakwany bal i kom ten keno aŋwen ducu ma i kome i mwaka acel kicel; en bitimo gin lakwany bal ki i kome ki remo me gitum me bal me lakwany bal i mwaka acel kicel wa i kare pa likwayowu ducu: en aye gin maleŋ makato bot Rwot.” Rwot owaco bot Moses ni “Ka icako kwaŋo wei jo Icrael, ci ŋat acel acel bimiyo gin lakok kwone kene bot Rwot ka ikwaŋogi, wek two gemo pe opot i komgi ka ikwaŋogi, Dano acel acel ka ikwano welle bimiyo gin man: nucu cekel me kabedo maleŋ (cekel acel rom ki gera pyeraryo); nucu cekel meno bibedo gityer bot Rwot. Dano ducu ki acel acel ma doŋ gikwano welle, cakke i kom jo ma ditogi romo mwaka pyeraryo ki makato, bimiyo gityer bot Rwot. Lalonyo pe bimiyo madwoŋ, dok lacan bene pe bimiyo matidi ma pe rom ki nucu cekel, i kare me miyo gityer bot Rwot me lakwany bal ki i komwu. Ibigamo lim me lakwany bal ki bot jo Icrael, i biketo pi tic me kema me rwatte, wek obed me po pi jo Icrael i nyim Rwot pi kwanyo bal ki i komwu.” Rwot owaco bot Moses ni “Dok ibitiyo otako mola, ki tedi tere bene me mola, obed me lwok. Ibicibo cuŋ i kin kema me rwatte ki keno tyer; ka doŋ ibionyo iye pii; en aye ka ma Aron ki awo bene gibilwoko iye ciŋgi ki tyengi. I kare ma gicito i kema me rwatte, nyo ka gicito cok ki keno tyer ka tic iye, me waŋo gityer ma giwaŋo ki mac bot Rwot, koŋ gibilwokke ki pii, wek pe guto. Gibilwoko ciŋgi ki tyengi wek pe guto; bibedo cik botgi matwal, bote ki bot likwaye, wa i kare pa likwayogi ducu.” Dok Rwot omedde owaco bot Moses ni, “Kwany aŋwece mabecone makato: murra maliyo ma romo cekel miya abic, cinamon ma ŋwece mit ma romo cekel miya aryo ki pyerabic, ma en aye nucune, lum ma ŋwece kur ma roma miya aryo ki pyerabic, kaciya cinamon miya abic, ma gipimo ki cekel me kabedo maleŋ, ki moo jeituni ma romo cupa apar. Man aye ibitimo ki moo maleŋ me wir ma girubo i kit macalo larub moo ma ŋwe kur rubo kwede; bibedo moo wir maleŋ, Ibiwiro ki kema me rwatte ki canduk lok me caden, ki meja ki jami ticce ducu, ki okar-mac tara ki jami ticce ducu, ki keno me odok eceta, ki keno tyer me gitum awaŋa ki jami ticce ducu, ki otako lwok ki tedi tere. Ibikwerogi wek gubed jami maleŋ makato; gin ducu ma bigudo komgi bidoko maleŋ. Dok ibiwiro Aron ki awobene, me kwerogi wek guti bota tic me ajwagi. Dok ibiwaco ki jo Icrael ni, ‘Man aye bibedo moona maleŋ me wir, wa i kare pa likwayowu ducu. Pe gibionyo i kom dano mo ata, pe wubitiyo mukene ma girubo macalo en; en moo maleŋ, bibedo maleŋ botwu bene. Dok ŋat ma birubo macalo meno, nyo ŋat ma biwiro i kom dano mo ata, waŋe birwenyo woko ki i kin lutugi.’ ” Rwot owaco bot Moses ni, “Kwany aŋwece makur, citakte ki onika ki galbanu, aŋwece makur, ki odok luban ma giliyo maber, (pekgi ducu obed marom) ci itim ki odok eceta maleŋ ma, giliyo maber, ma girubo i kit macalo larub gin ma ŋwe kur rubo kwede, ci ipwor iye kado. Mukene ibiluro iŋido matitino twatwal, ci iket mogo i nyim canduk lok me caden ma i kema me rwatte ka ma abirwatte iye kwedi; bibedo botwu gin maleŋ makato. Pe wubitimo piwu kenwu odok eceta ma irubo macalo meno; bibedo gin maleŋ bot Rwot ki tuŋ botwu. Ŋat ma birubo gin me aŋweya macalo meno, waŋe birwenyo woko ki i kin lutugi.” Rwot owaco bot Moses ni, “Nen, atyeko lwoŋo nyiŋ Bejalel wod pa Uri, ma wod pa Kur, ma i kaka pa Juda. Doŋ atyeko poŋo en ki Cwiny pa Lubaŋa, ki kwiri me tic, ki niaŋ matut, ki ŋec, ki kit tic ducu me diro, pi roto cal manyen me tic diro mapatpat, me tic ki jabu, ki ryal, ki mola, ki pi ŋolo litino kidi me wel me amwona i kom jabu, ki pi payo bao, ki pi tiyo kit tic ducu me diro. Dok nen, atyeko keto Okoliab bene kacel ki en, ma wod pa Akicamak, ma i kaka pa Dan; dok atyeko miyo kwiri me tic bot jo ducu makwiri, wek guti gin ducu ma aciko boti-ni: kema me rwatte, ki canduk lok me caden, ki kom me kica ma i wiye, ki jami ma i kema ducu, meja ki jami ticce, okar-mac me jabu ma giliyo maber ki jami ticce ducu, keno tyer me odok eceta, keno tyer me gitum awaŋa ki jami ticce ducu, otako lwok ki tedi tere, boŋŋi aruka ma gitiyo mabeco, boŋŋi aruka maleŋ pa ajwaka Aron, ki boŋŋi aruka pa awobene pi ticgi me bedo ajwagi, moo wir ki odok eceta ma ŋwece kur pi kabedo maleŋ. Gibitiyo kit macalo doŋ aciki kwede ducu.” Rwot owaco bot Moses ni, “Wac bot jo Icrael ni, ‘Wubigwoko cabitta, pien en aye lanyut ma tye i kin an ki wun wa i kare pa likwayowu ducu, wek wuŋe ni an a Rwot, ma alonyowu wubedo maleŋ. Wugwok cabit, pien nino-nu leŋ botwu; ka ŋatti mo opyedde i kome, myero gineke woko. Ka ŋat ma otiyo iye tic mo, dano meno waŋe birwenyo woko ki i kin lutugi, Wubitiyo tic nino abicel, ento nino me abiro en aye cabit me yweyo mot, nino maleŋ bot Rwot; ŋat ma otiyo tic mo i cabit gibineko woko. Pi meno myero jo Icrael gugwok cabit wa i kare pa likwayogi ducu, macalo gicikke ma bedo matwal. En aye lanyut matwal i kin an ki jo Icrael, ni, Rwot yam otiyo polo ki lobo nino abicel, oywe mot i nino me abiro, oomo iye kero kome.’ ” Ka Lubaŋa doŋ otyeko lok ki Moses i wi got Cinai, ci omiye kidi ma apada aryo me lok me caden, kidi ma apada aryo ma Lubaŋa ocoyo ki ciŋe. Ka lwak guneno ni Moses doŋ ori, pe dwogo piny ki i wi got, ci gucokke gugurre kengi bot Aron, kun giwacce ni, “A malo, itim ki wan lubaŋa, ma gibitelo wiwa; pien Moses man, ma en aye dano ma yam okwanyowa woko ki i lobo Ejipt, pe doŋ waŋeyo gin mutimme i kome.” Ci Aron owaco botgi ni, “Wukwany agit me jabu ma gitye i it monwu ki awobewu ki anyirawu, wukelgi bota.” Kit meno lwak ducu gukwanyo agit me jabu ki i itgi woko, gukelo bot Aron. En ogamo jabu ki i ciŋgi, ci oteto ki nyol me lino kome, ci otimo cal wod twon ma giliyo aliya, ci guwaco ni, “Man aye lubaŋawu, wun jo Icrael, ma yam okwanyowu woko ki i lobo Ejipt!” Ka Aron oneno kit man, ci ocako caŋo keno tyer i nyime; ka ocako tucone ka maleŋ kun waco ni, “Diki bibedo kwero nino madit bot Rwot.” Ci gua malo odiko con, gutyero gitum awaŋa mapol, ka gukelo tyergi me lakwecwiny; ci lwak gubedo piny gucamo ka gumato, ci gua malo ka tuko. Rwot owaco bot Moses ni, “Lor piny; pien joni ma yam ikwanyogi ki i lobo Ejipt guballe woko. Guweko kit ma yam acikogi kwede woko oyotoyot, gutimo pigi kengi cal wod twon ma giliyo aliya, gucako worone ki miye gitum, dok giwacci, ‘Man aye lubaŋawu, wun jo Icrael, ma yam okwanyowu woko ki i lobo Ejipt!’” Ci Rwot owaco bot Moses ni, “Atyeko neno jo man, ci nen, gin jo ma nutgi tek: mumiyo kombeddi doŋ iweka gira, wek akemo omaka matek i komgi, arid wigi woko; ento in abimiyi idoko rok madit.” Ento Moses obako doge bot Rwot Lubaŋane kun waco ni, “Ai Rwot, piŋo akemo omaki matek i kom lwakki, ma yam in ikwanyogi woko ki i lobo Ejipt ki tek madwoŋ ki badi matek. Piŋo iweko jo Ejipt giwacci, ‘Oterogi marac akaka me tyekogi i kin godi kuca, ki pi rido wigi woko ki i wi lobo.’ Lok akemoni mager-ri woko, dok inut i kom gin marac ma imito timo i kom lwakki. Po i kom Abraim, Icaka ki Icrael luticci, ma yam in kikomi aye, ikwonne ki nyiŋi kekeni botgi. Yam iwaco botgi ni, ‘Abimiyo wunya mapol macalo lakalatwe me polo; ki lobo man ducu, ma yam aciko pire, abimiyo bot likwayowu, ma gibileyone ma twal.’’’ Ci Rwot onut i kom gin marac ma yam en otamo ni ebitimo i kom lwakke. Moses olokke, olor piny ki i wi got kun tye ki kidi ma apada aryo me lok me caden i ciŋe; kidi magi gicoyo tuŋ igi ki ŋegi bene, gicoyo tuŋ cel ki tuŋ ŋegi ducu. Kidi meno ma apada Lubaŋa aye otiyo, ki coc bene Lubaŋa aye ocoyo, ma gigoro i kom kidi meno ma apada. Ka Yocwa owinyo dwan lwak ma giwo, ci owaco bot Moses ni, “Woo me lweny tye i gony.” Ento Moses ogamo ni, “Meno pe woo me loyo lweny, dok pe koko pa jo ma giloyogi, ento an awinyo dwan me wer aye.” Ka en obino cok ki gony, ma oneno twon ki myel, ci akemo omako Moses matek; obolo kidi aryo ma apada ma tye i ciŋe-ni piny, otyerogi woko i te got. Ci okwanyo cal wod twon ma gitimo-ni owaŋo woko i mac, orego woko mayom, oonyo i pii, omiyo jo Icrael gumato. Moses openyo Aron ni, “Lwak man gutimi niŋniŋ, mumiyo ikelo bal madit i komgi-ni?” Aron ogamo ni, “Pe iwek akemo omaki matek, laditta; in iŋeyo ni lwak man cwinygi okemo gin marac. Pien gin guwacca ni, “Tim ki waŋ lubaŋa, ma gibitelo wiwa; pien Moses man, ma en aye dano ma yam okwanyowa woko ki i lobo Ejipt, pe doŋ waŋeyo gin mutimme i kome.’ Ci awaco botgi ni, ‘Dano acel acel ma tye ki jabu ogony woko’; ci gimiya, aonyo i mac, ci cal wod twon man oa ki iye. Ka Moses oneno ni lwak wigi oteŋ woko, (pien Aron aye omiyo wigi oteŋ, kun oweko lewic omakogi i kin lukworgi), ci Moses ocuŋ i doggaŋ me gony, owaco ni, “Aŋa ma tye tuŋ bot Rwot? Obin bota.” Ci awobe pa Levi ducu gucokke kacel bote. Ci owaco botgi ni, “Rwot Lubaŋa pa jo Icrael owaco kuman ni ‘Dano acel acel oket pala lucwanne i lakŋete, wek ocit kwede i dye gony kun wirre kwede dok i doggaŋ tuŋ cel ki tuŋ cel, orum iye, kun ŋat man neko ominne, ŋat man neko latugi, ki ŋat man neko lawote.’ ” Awobe pa Levi gutiyo kit macalo Moses ocikogi; ci gineko lwak dano i nino meno ma guromo co alip adek. Moses owaco ni, “Tin wun wukette kenwu i dog tic pa Rwot, kun ŋat acel acel omiyo wode ki ominne me bedo gityer, wek omiwu gum tin.” Orwone Moses owaco bot lwak ni, “Wun wutimo bal madit; kombeddi abicito malo bot Rwot, gwok nyo abikwanyo bal woko ki i komwu.” Kit meno Moses odok bot Rwot, owaco ni, “Maa do, lwak man gutimo bal, madit; gutimo lubaŋa me jabu pigi kengi. Ento koni, ka ibitimogi kica i kom balgi, ci timgi; nyo ka pe, ci alegi ni, ijwa nyiŋa woko ki i bukki ma icoyo.” Ento Rwot owaco ki Moses ni, “Ŋat ma obalo i nyima en aye abijwayo nyiŋe woko ki i bukka, Ento doŋ icit kombeddi, icitel wi lwak, itergi i kabedo ma yam alokki pire-ni; nen, lamalaikana bitelo nyimi. Ento i kare ma abilimogi, an aye abiketo can i komgi pi bal man.” Ci Rwot ocwalo gemo opoto i kom lwak, pien gutimo cal wod twon ma Aron otiyo. Rwot owaco bot Moses ni, “Wua woko ki kany, in ki lwak ducu ma yam ikwanyogi woko ki i lobo Ejipt, pi terogi i lobo ma yam akwoŋo pire bot Abraim, Icaka, ki Yakobo, kun acikogi ni, abimiyo bot likwayogi. Dok abicwalo lamalaika i nyimgi, ci abiryemo jo Kanaan woko, ki jo Amor, jo Kit, jo Periji, jo Kiv ki jo Jebuc. Cit malo i lobo ma mol cak ki moo kic; ento an pe abicito kwedwu kunnu, wek pe arid wiwu woko iyo, pien wun jo ma nutwu tek.” Ka lwak giwinyo lok man marac-ci, ci gukumo; pe tye dano mo ma orukke me deyo. Pien onoŋo Rwot owaco bot Moses ni, “Wac bot jo Icrael ni, ‘Wun wu jo ma ŋutwu tek; kono ka acito kwedwu kunnu pi kare manok mo, kono arido wiwu woko cut. Kombeddi doŋ wuluny ruk me deyowu woko ki i komwu, wek aŋe gin ma abitimo i komwu.’ ” Mumiyo jo Icrael gulunyo ruk me deyogi woko, nia ki i te got Koreb ki cito kwede anyim. I kare meno Moses obedo ka tero kema, ci guro woko i ne gony, ka mabor ki gony; ci olwoŋo ni, kema me rwatte. Ci ŋat ma yenyo Rwot cito woko i kema me rwatte, ma tye woko i ŋe gony. I kare ducu ma Moses kato cito woko i kema me rwatte, lwak ducu gia malo, kun ŋat acel acel cuŋ i nyim dog kemane, ka neno kor Moses nio ka odonyo wa i kema. Ka Moses odonyo i kema, ci wir me pol dwogo piny cuŋ i doggola kema me rwatte, ci Rwot loko ki Moses. Ka lwak dano ducu guneno wir me pol ma ocuŋ i dog kema, ci dano ducu gia malo, giworo Lubaŋa, kun ŋat acel acel tye i dog kemane. Kit meno Rwot yam loko ki Moses waŋ ki waŋ, macalo dano loko ki lareme, Ka Moses odok i gony, Yocwa wod pa Nun, latin awobi ma lakony en, yam doŋ i kema. Moses owaco bot Rwot ni, “Nen, in onoŋo iwacca ni, ‘Kwany jo man woko;’ ento pe imiya aŋeyo ŋat ma ibicwalo acito kwede. Ento iwacci, ‘Aŋeyo in ki nyiŋi, ki in bene iyomo cwinya.’ Koni doŋ alegi, ka onoŋo ayomo cwinyi, nyutta kiti, wek aŋeyi, anoŋ gum ki boti. Dok itam bene ni, rok man gin aye lwakki.” Ci Rwot ogamo ni, “An kikoma abiwot kwedi, abimiyi iywe mot.” Dok owacce ni, “Ka in kikomi pe ibicito kweda, ci pe ikwanywa woko ki kany. Pien binene niŋniŋ ni anoŋo gum ki boti, an kacel ki lwakki? Pe pi in ma iwoto kwedwa-ni mumiyo waŋen pat? An, kacel ki lwakki, wapat ki jo mukene ducu ma gitye i wi lobo.” Rwot owaco bot Moses ni, “Abitiyo gin man ma iwaco-ni kikome; pien iyomo cwinya, dok aŋeyo in ki nyiŋi.” Moses ogamo ni, “Alegi inyutta deyoni.” Rwot ogamo ni, “Abimiyo berra ducu kato ki i nyimi, ka dok abituco nyina ni, ‘A Rwot’; abinyuto berra bot ŋat ma abinyuto berra bote, dok abitimo kica bot ŋat ma abitimo kica bote.” Rwot dok owaco ni, “Ento pe ibineno waŋa; pien dano pe neno waŋa ci bedo kwo.” Ci Rwot owacci, “Nen, kabedo mo tye ka ŋeta ka ma ibicuŋ iye i kom got. Ka deyona bikato ki kenyo, ci abiketi i kin got ma obar, ci abiumi woko ki ciŋa nio ka akato otum; ka doŋ abikwanyo ciŋa woko, ci ibineno neya; ento waŋa pe ibinenone.” Rwot owaco bot Moses ni, “Tyeŋ kidi ma apada aryo macalo mukwoŋo ca, ci abicoyo i komgi lok ma nene acoyo i kom kidi mukwoŋo-ni, ma yam ityero woko-ni, Bed ma iyubbe odiko, ci ibin malo odiko i wi got Cinai, icuŋ i nyima i wi got. Pe ŋatti mo bibino kwedi malo, pe ŋatti mo onen i wi got ducu; romi ki dyaŋi pe gucam nyim got.” Ci Moses otyeŋo kidi aryo ma apada macalo mukwoŋo ca; ci oa malo odiko con, oito i wi got Cinai, kit macalo Rwot ocike, otero kidi ma apada ma omako i-ciŋe. Ci Rwot olor piny i pol, ocuŋ kacel kwede kunnu, ci otuco nyiŋe. Rwot okato ki i nyime kun tucce ni, “Rwot, Rwot, Lubaŋa ma lakica dok maro dano, kiniga pe make oyot, marre ma pe lokke dwoŋ, en lagen mada. En gwoko mar ma pe lokke pi jo alip ki alip, kun weko rocgi, ki tim aranyigi ki balgi. En pe kwanyo kop i kom lubalo, ento keto can i kom likwayogi ki i kom likwayo pa likwayogi nio i yalwak me adek ki me aŋwen.” Moses orune oyot, okulo wiye piny i ŋom, oworo Lubaŋa. Owaco ni. “Koni doŋ ka ayomo cwinyi, ai Rwot, alegi in Rwot iwot kwedwa, kadi bed waŋ jo ma ŋutwa tek; itimwa kica pi rocwa ki balwa, imiwa wabed lwakki.” Rwot dok owaco ni, “Nen aketo gicikke. Abitiyo gin me aura’ mapol i nyim lwakki ducu, ma yam peya otine i lo bo ducu nyo i rok mo; ci jo ducu ma wubedo i kingi gibineno tic pa Rwot; abitiyo kwedwu gin ma kelo atiba i kom dano. “Gwok lok ma aciki iye tin. Nen, abiryemo jo Amor woko ki i nyimi, ki jo Kanaan, jo Kit, jo Periji, jo Kiv ki jo Jebuc. Gwokke pe iket gicikke mo ki jo ma bedo i lobo-nu, wek pe odok owic i kinwu. Ento wumuk keno jogigi woko, wuret wir jogigi piny, wutoŋ yadi ma gipito ka ma giworo iye jok ma dako ma gilwoŋo Acera. Pe myero wuwor lubaŋa mukene, pien Rwot, ma nyiŋe Lanyeko, en Lubaŋa ma lanyeko. Gwok iket gicikke mo ki jo ma bedo i lobo-nu: pien ka giworo lubaŋagi ki tim kwele kwele, nyo gityero gitum bot lubaŋagi, ce ŋatti mo olwoŋi, miyo ibicamo gin ma en otumo. Dok ka inyomo anyiragi ki awobeni, ce anyiragi gitimo abor pi woro lubaŋagi, ci miyo awobeni bene giworo lubaŋagi ki tim kwele kwele. “Pe iti cal lubaŋa mo me nyonyo aliya piri keni. “Ibikwero nino madito me Mugati ma Tobi Pe Iye, Ibicamo mugati ma tobi pe iye pi nino abiro macalo yam acikowu, i kare ma giciko, i dwe me Abib; pien yam ia woko ki i lobo Ejipt i dwe me Abib. “Litino kayo ducu mega, litino twonini, litino kayo me dyaŋi ki me romi. Latin kayo pa kana ibikoko ki latin nyok romo, nyo ka pe ikoko, ci itur ŋute woko. Litino kayo ducu ma gin litino awobeni ibikokogi. Dano mo pe obin i nyima ki ciŋe noŋo. “Ibitic nino abicel, ento i nino me abiro ibiywe iye; wa i kare me pur ki i kare me kac bene ibiywe. Ibibedo ki nino madit me kwero agikki cabit abiro, en aye wi mwaka me kayo naŋo mukwoŋo cek; ki nino madito me nyonone i dero i tum mwaka, Joni ma co ducu gibibino i nyim Rwot Lubaŋa, Lubaŋa pa Icrael, tyen adek i mwaka acel. Pien abiryemo lurok woko ki i nyimi, abimiyo waŋ loboni bedo malac; ŋatti mo bene pe bibedo ki miti i kom loboni i kare ma ibiwot ka nen i nyim Rwot Lubaŋawu tyen adek i mwaka acel acel. “Pe ityer remo me gitumma kacel ki tobi; pe giwek gitum me nino madit me Kato (Paska) obed nio wa odiko, “Cam mukwoŋo cek i potoni me wi mwaka myero ikel i ot pa Rwot Lubaŋani, “Pe ited riŋo latin dyel ki cak pa minne.” Rwot owaco bot Moses ni, “Co lok magi; pien doŋ acikke kwedwu, in ki jo Icrael, ki gicikke ma lubo lok magi ducu.” En obedo kunnu kacel ki Rwot nino pyeraŋwen, dyeceŋ ki dyewor, kun pe camo dok pe mato pii bene. Ci ocoyo lok me gicikke i kom kidi ma apada, gin aye cik apar-ri, Ka lacen Moses olor piny ki i wi got Cinai, ma omako kidi ma apada aryo me lok me caden i ciŋe. I kare ma en lor piny ki wi got, onoŋo Moses pe ŋeyo ni tur nyime tye ka ryeny, pien onoŋo obedo ka lok ki Lubaŋa. Ka Aron ki jo Icrael ducu guneno Moses, ci nen, tur nyime obedo ka ryeny; ci gulworo cito bote cok. Ento Moses olwoŋogi; ci Aron ki lutel wi lwak ducu gucako dok bote, Moses oloko kwedgi. Ka lacen jo Icrael ducu gucito bote cok, ocako miyogi cik ducu ma Rwot otitte i wi got Cinai, Ka doŋ Moses otyeko lok kwedgi, ci umo tur nyime ki boŋo; ento i kare ducu ma Moses cito i nyim Rwot ka lok kwede, kwanyo boŋo woko ki i tur nyime, nio wa ka dwogone; ka okatti woko ci tito ki jo Icrael lok ma gicike kwede, Ka jo Icrael gineno tur nyim Moses, gineno ni del tur nyim Moses ryeny; ci Moses dok umo tur nyime woko ki boŋo, nio ka dok cito ka lok kwede. Moses ocoko lwak jo Icrael ducu, owaco botgi ni, “Man aye gin ma Rwot ociko ni wutim. Wuti tic nino abicel, ento i nino me abirone wubed ki cabit maleŋ me yweyo mot bot Rwot; ŋat ma otiyo iye tic mo gibineke woko, Pe wubimoko mac i pacowu ducu i nino me cabit.” Dok Moses owaco bot lwak jo Icrael ducu ni, “Man aye gin ma Rwot ociko ni, wujog gityer pa Rwot ki i kinwu; ŋat ma cwinye aye opwoyo wek en okel gityer bot Rwot: jabu, ryal ki mola; uci ma bulu ki ma lamar lamar ki makwar, ki boŋo camanini ma giwiyo maberre; yer dyegi, laa nyogi romi ma ginyoŋo, laa dyegi; bao yat okuto lalwii; moo me mac, aŋwece me yubo moo wir ki pi odok eceta ma ŋwece kur; litino kidi onik ki litino kidi me wel me amwona i kom jabu pi epod ki pi kicaa kor. “Dok jo ducu ma i kinwu makwiri i tic gubin guti jami ducu ma Rwot ociko pigi: guti kema, kemane ki laum wiye, golle ki gutine, riine, wirre ki tedi tere; canduk me cik ki talle, kom me kica ki boŋo kicika me laumme; meja ki talle ki jami ticce ducu, ki mugati me aketa i nyim Lubaŋa; okar-mac ki jami ticce ki laputte, ki moo me macce; keno tyer me odok eceta ki talle, ki moo wir, ki odok eceta ma ŋwece kur, ki boŋo cuka laum doggola, me doggola me kema; keno tyer me gitum awaŋa, kacel ki keikeine me mola, ki talle ki jami ticce ducu, ki otako lwok ki tedi tere; boŋo cuka me anaba ma larum dyekal, ki wirre ki tedi tere, ki boŋo cuka laum doggaŋ me dyekal; teke me terro kema ki teke me dyekal ki tol lacikgi; boŋŋi aruka ma gitiyogi mabeco me tic kwedgi i kabedo maleŋ, ki boŋŋi aruka maleŋ pi ajwaka Aron, ki boŋŋi aruka pa awobene pi tic megi me bedo ajwagi.” Ci lwak jo Icrael ducu gua woko ki i nyim Moses. Ka gucako dwogo, kun ŋat acel acel oyubbe ki gin ma cwinye olyetto pire, ki ŋat acel acel ma iye pwoyo, okelo gityer bot Rwot me timo ki kema me rwatte, ki pi ticce ducu, ki pi boŋŋi aruka maleŋ, Ci gubino, co wa ki mon; jo ducu ma cwinygi aye opwoyo gukelo jarara, ki agit me it, ki agit ciŋ, ki mola ŋut ciŋ, ki kit jabu ducu, kun dano acel acel emo gityer me jabu bot Rwot, Dano ducu ma tye ki uci ma bulu, nyo ma lamar lamar, nyo makwar, nyo boŋo camanini maberre, nyo yer dyegi, nyo laa nyogi romi ma ginyoŋo, nyo laa dyegi, ducu gukelogi. Dano acel acel ma romo kela gityer me ryal, nyo mola, gukelo me gityer bot Rwot; ki dano ducu ma tye ki bao yat okuto lalwii ma romo kit tic ducu gukelo bene, Ki mon ducu makwiri i tic gubedo ka wiyo uci ki ciŋgi, gucako kela uci ma guwiyo ma bulu, ki ma lamar lamar ki makwar, ki boŋo camanini ma giwiyo maberre. Ci mon ducu ma cwinygi olyetto pi kwiri me tic guwiyo yer dyegi. Ki lutel wic bene gukelo litino kidi onik, ki litino kidi me wei me amwona i kom jabu, pi epod ki pi kicaa kor, ki aŋwece, ki moo me mac ki pi moo wir, ki pi odok eceta ma ŋwece kur, Jo Icrael ma co ki ma mon ducu ma yam cwinygi opwoyo pi kelo gin mo pi tic ma onoŋo Rwot ociko Moses ni oti, gukelo gityer ma igi opwoyo bot Rwot. Ci Moses owaco bot jo Icrael ni, “Nen, Rwot otyeko lwoŋo nyiŋ Bejalel wod pa Uri, ma wod pa Kur, ma i kaka pa Juda; dok otyeko poŋo en ki Cwiny pa Lubaŋa, ki kwiri me tic, ki niaŋ matut, ki ŋec, ki k it tic ducu me diro, pi roto cal manyen me tic diro mapatpat, me tic ki jabu, ki ryal ki mola, ki pi ŋolo litino kidi me wel me amwona i kom jabu, ki pi payo bao, pi tiyo kit tic ducu me diro. Dok omiye cwiny me pwony, en kacel ki Okoliab wod pa Akicamak, ma i kaka pa Dan, En otyeko poŋogi ki kwiri me tiyo kwa tic ducu me diro, ki me roto cal tic manyen me tic diro, ki me dero boŋo ki uci ma bulu, ki ma lamar lamar, ki makwar, ki boŋo camanini ma giwiyo maberre, ki me cweyo boŋo, ki me tiyo kwa t ic ducu, ki me roto cal manyen me tic diro mapatpat. “Bejalel ki Okoliab ki jo ducu ma kwiri i tic, ma Rwot oketo kwiri me tic i igi, ki niaŋ matut, me ŋeyo ki me tiyo tic ducu me tic i kabedo maleŋ, gibitiyo kun gilubo kit ducu ma yam Rwot ociko.” Moses olwoŋo Bejalel ki Okoliab ki jo ducu ma kwiri i tic, ma Rwot onoŋo oketo kwiri me tic i igi, dano ducu ma cwinygi olyetto pi bino ka tic; ci gugamo ki bot Moses mot ducu ma jo Icrael gutyero pi tic i kom kabedo maleŋ, Pud onoŋo gimedde ameda ki kelo gityer ma igi opwoyo odiko odiko. Pien lukwiri tic ducu ma gitiyo kwa tic mo ma i kom kabedo maleŋ gubino, kun ŋat acel acel oa ki i dog tic ma en tiyo, ci guwaco bot Moses ni, “Dano doŋ gukelo madwoŋ mukato ma yam mitte pi tic ma Rwot ocikowa ni wati.” Kit meno omiyo Moses ocwalo cik, lokke gitito oromo i gony ducu ni, “Pe dok laco mo kadi dako mo otim gin mo me gityer pi kabedo maleŋ.” Ci gijuko dano pe dok gukelo; pien jami ma gukelo onoŋo doŋ oromo tiyo tic ducu, ki makato bene. Jo ducu ma kwiri i tic ma yam gitye i kin lutic gutiyo kema ki boŋo cuka apar, ma gitiyogi ki boŋo camanini ma giwiyo maberre, ki uci ma bulu ki ma lamar lamar ki makwar, kun gicweyo iye cal lukerubi ma gitiyogi ki diro. Bor boŋo cuka acel acel onoŋo oromo yadi apar wiye aŋwen, ki lacce romo yadi aryo; boŋo cuka ducu gubedo marom. Oribo boŋo cuka abic kacel, ki abic mu kene bene oribo kacel kit meno. Ci okwoyo waŋ jarara ma bulu i dog boŋo cuka me dul mukwoŋo mugikoni, ka dok okwoyo waŋ jarara i dog boŋo cuka me dul me aryone mugiko-ni, ma rom ki wadi, Okwoyo waŋ jarara pyerabic i dog boŋo cuka acel, ki waŋ jarara pyerabic i dog boŋo cuka me aryone, kun waŋ jarara kemo wadi. Dok otiyo jarara gol me jabu pyerabic, ci oribo dog boŋo cuka ki jarara gol-li; ci kema obedo mukubbe kacel likiŋ. Dok otiyo boŋo cuka me yer dyegi bene me laum wi kema; otimo cuka apar wiye acel, Bor pa cuka acel acel romo yadi apar wiye abic, lac pa cuka acel acel romo yadi aryo; boŋo cuka apar wiye acel-li ducu girom. Oribo cuka abic kacel pat kengi, ki cuka abicel bene kacel pat kengi. Okwoyo waŋ jarara pyerabic i dog cuka me dul mukwoŋo mugiko-ni, dok okwoyo jarara pyerabic me dul mukene mugikoni. Otiyo jarara gol me mola pyerabic me ribo dog kema kacel, wek obed mukubbe kacel likiŋ, Dok okwoyo laa nyogi romi ma ginyoŋo, ki laa dyegi, me umo wi kema. Dok otiyo guti me bao ‘yat lalwii, ma ocuŋ atir pi kema. Bor pa guti obedo futi apar wiye abic, ki lacce futi aryo, i kom guti acel acel. Guti acel acel obedo ki tyene aryo me kubogi kacel; otiyo guti me kema ducu kit meno. Otiyo guti me kema kit man: guti pyeraryo i tuŋ acuc. Ka dok otiyo tedi tere me ryal ma romo pyeraŋwen me kubo iye guti pyeraryo-nu; tedi tere aryo aryo pi guti acel acel, pi tyene aryo. Ka dok pi kema tuŋ me aryone, ma tuŋ acam, otiyo guti pyeraryo ki tedi tere me ryal ma romo pyeraŋwen, tedi tere aryo aryo pi guti acel acel. Ki pi ne kema, ma tuŋ porocen, en otiyo guti abicel. Ka dok otiyo guti aryo me twok kema ma i ŋeye. Gipoko kingi ki tuŋ piny, ento giribo doggi ki tuŋ wigi malo i kom agit mukwoŋo; otiyo aryo ma kit meno pi twoke aryo. Yam tye guti aboro ki tedi tergi me ryal; tedi tergi obedo apar wiye abicel; i te guti acel acel bedo iye tedi tere aryo. Otiyo rii me bao yat lalwii abic pi guti me kema tuŋ cel, ki rii bao abic pi guti me kema tuŋ cel, ki rii bao abic pi guti me kema me ŋeye tuŋ potoceŋ. Ka dok otiyo rii bao ma i dyere ma oa ki i agikki tuŋ cel nio wa i agikki tuŋ cel ma oŋolo kor guti ari. Ci omwono kom guti woko ki jabu, ka otiyo agit me jabu me rwako bao iye; ki rii bao bene omwono komgi woko ki jabu. Ka dok otiyo boŋo kicika me uci ma bulu ki ma lamar lamar ki makwar, ki boŋo camanini ma giwiyo maberre; otiyo ma gicweyo iye lukerubi ki tic me diro. Otiyo pire wir aŋwen me bao yat lalwii, ci omwono komgi woko ki jabu; golgi obedo me jabu, ci oliyo tedi tergi me ryal aŋwen. Dok onyo boŋo cuka me laum doggola me kema ki uci ma bu lu ki lamar lamar ki makwar, ki boŋo camanini ma giwiyo maberre, ma gidero maber. Dok otiyo wirre abic, ki golgi, Omwono wigi woko, ki otacgi bedo me jabu, ento tedi tergi abic obedo me mola. Bejalel opayo canduk ki bao yat lalwii; borre obedo futi aŋwen, ki lacce futi aryo, ki borre tuŋ malo futi aryo. Omwono iye ki ŋeye woko ki jabu ma giliyo maber, ka olulo doge ducu, orumo woko ki jabu, Ci oliyo agit me jabu aŋwen pi twoke aŋwen ducu, agit aryo pi tuŋ cel ki agit aryo mukene pi tuŋ cel. Ka dok otiyo tal me yat lalwii, omwono komgi woko ki jabu, ka orwako tal i agit ma tye i but canduk-ki me tiŋo canduk. Dok otimo kom me kica ki jabu ma giliyo maber; borre obedo futi aŋwen, ki lacce futi aryo. Ka otiyo lukerubi aryo me jabu ma otetogi ki nyol. Otiyogi i agikki kom me kica ryoryo ducu, lakerubi acel i agikki tuŋ cel, ki lakerubi acel i agikkine tun cel; otiyo lukerubi kun gikubbe i kom kom me kica i agikkine aryo ducu. Lukerubi guyaro bwomgi malo i wiye, guumo wi kom me kica ki bwomgi, kun waŋgi kemme ki wadi; waŋ lukerubi nen ma okemo kom me kica. En dok otiyo meja ki bao yat lalwii; borre obedo futi adek ki lacce futi acel ki nucu, ki borre tuŋ malo futi aryo. Omwono kome woko ki jabu ma giliyo maber, ci olulo doge ducu orumo woko ki jabu. Oketo riine tuŋŋi ki tuŋŋi ducu, ma lacce rom ki dye ciŋ, ci olulo doge ducu orumo woko ki jabu. Oliyo agit aŋwen me jabu pire, ci omwono agit i twoke aŋwen ducu i kom tyene aŋwen. Agit giketo cok i kom rii, me rwako tal latin meja. Otiyo tal ki bao yat lalwii me tiŋo meja, omiwono komgi woko ki jabu. Otiyo jami me jabu ma giliyo maber me aketa i wi meja, caanine ki atabone me odok eceta, ki weerre, ki cupane me liyo gityer amata, En dok otiyo okar-mac ki jabu ma giliyo maber. Tedi okar-mac ki bolle oteto ki nyol; kikopone, en aye wene ki ature ducu, obedo ma gukubbe k acel kwede. Jaŋe onoŋo tye abicel ma gujany guryeyo gukaco i Jete ryoryo; jaŋ okar-mac adek ma guryeyo i bute tun cel, ki jaŋ okar-mac adek ma guryeyo i bute tuŋ cel, ki jaŋ okar-mac adek ma guryeyo i tuŋ mukene-ni. I kom jaŋe tuŋ cel obedo iye kikopo adek ma gitimo macalo tur yaa, kun acel acel tye ki wene ki ature, ki i kom jaŋe tuŋ mukene bene obedo iye kikopo adek ma gitimo macalo tur yaa, kun acel acel tye ki wene ki ature; jaŋe abicel ma guryeyo gukaco okar-mac-ci gubedo kit meno. Ka dok i kom okar-mac kikome-ni onoŋo tye iye kikopo aŋwen ma gitiyo macalo tur yaa, ki wengi ki aturegi, ki wene ma okubbe i kom okar-mac-ci i te jaŋe abicel ma guryeyo ryoryo i kom okar-mac. Wengi ki jaŋgi obedo ma gukubbe kacel, kun kome ducu obedo me jabu ma giliyo maber ma giteto ki nyol. Otiyo mac laputte abiro, ki magacce, ki caanine ki jabu ma giliyo maber, Oyubo okar-mac ki jami ticce ducu ki jabu ma giliyo maber ma pekke oromo ratili miya acel. Otiyo keno tyer me waŋo odok eceta ki yat lalwii; borre obedo futi acel ki nucu, ki lacce bene futi acel ki nucu; obedo ma twoke aŋwen ma rom, Borre tuŋ malo oromo futi adek; obedo ki ten keno aŋwen ma gukubbe i kome. Omwono kome woko ducu ki jabu ma giliyo maber, wiye ki bute ki ten keno ducu; olulo doge ducu orumo woko ki jabu. Otiyo agit me jabu aryo oketogi i te doge ma gilulo-ni, kun agit acel okemme ki wadi tuŋ cel, me rwako iye tal me tiŋone. Otiyo tal ki bao yat lalwii, omwono komgi woko ki jabu. Otiyo moo maleŋ me wir bene, ki odok eceta ma ŋwece kur ma giliyo maber, ma girubo kit macalo larub gin ma ŋwe kur timo-ni. Dok otiyo keno tyer me gitum awaŋa ki bao yat lalwii; borre obedo futi abiro ki nucu, lacce bene futi abiro ki nucu, obedo ki twoke aŋwen ma rom, borre tuŋ malo oromo futi aŋwen ki nucu, Otimo ten keno aŋwen ducu; ten keno aŋwen ducu gubedo ma gukubbe kacel kwede, dok omwono kome woko ki mola. Otiyo jami tic me keno tyer ducu, otako, ki akwaya latokke, ki becen, ki lacob riŋo, ki weer Iawau mac; otiyo jami tic meno ducu ki mola. Dok oyu bo keikei pi keno tyer, me obwo mola ma oketo i te riine, ki i kore. Oliyo agit aŋwen pi twoke aŋwen me keikeimola, me rwako iye tal me tinone, Otiyo tal ki bao yat lalwii, ci omwono komgi woko ki mola. Orwako tal odonyo i agit ma tye i but keno tyer-ri me latiŋŋe; otiyo ma iye twolo, ki bao. En dok otiyo otako mola ki tedi tere bene me mola; otiyo ki madara pa mon ma lutic ma gitiyo i doggola kema me rwatte, Otimo dyekal me kema; i tuŋ acuc me dyekal giŋabo iye boŋo cuka camanini ma giwiyo maberre ma borre tuŋ cel romo yadi pyerabic, Wirre onoŋo giromo pyeraryo, ki tedi tergi me mola gubedo pyeraryo, ento gol me wir ki otacgi ducu gubedo me ryal. Ki tuŋ acam bene borre oromo yadi pyerabic, ki wirre pyeraryo ki tedi tergi pyeraryo me mola; ento gol me wir ki otacgi ducu gubedo me ryal. Ki bute ma tuŋ potoceŋ bene giŋabo iye boŋo cuka ma borre romo yadi pyeraryo wiye abic; wirre gubedo apar, ki tedi tergi bene apar; gol me wir ki otacgi ducu gubedo me ryal. Nyime tuŋ wokceŋ onoŋo romo yadi pyeraryo wiye abic. Boŋo ma giŋabo i ŋet doggola tuŋ cel onoŋo romo yadi abiro ki nucu; wirre gubedo adek, ki tedi tergi adek. I ŋete tuŋ mukene bene kit meno; i ŋet doggaŋ tunŋi ki tuŋŋi giŋabo iye boŋo cuka ma romo yadi abiro ki nucu; wir gubedo adek ki tedi tergi adek. Boŋo cuka ducu ma giŋabo i doggaŋ me dyekal onoŋo gubedo boŋo camanini ma giwiyo maberre. Tedi te wir ducu onoŋo gibedo me mola, ento gol me wir ki otacgi gu bedo me ryal; gimwono wigi bene ki ryal, ki wir ducu ma i dyekal giketo iye otac ryal. Boŋo cuka laum doggaŋ me dyekal gidero kome maber ki uci ma bulu, ki ma lamar lamar ki makwar, ki boŋo camanini ma giwiyo maberre, kun borre romo yadi apar, ki borre tuŋ malo romo futi abiro ki nucu, ma rom ki boŋo cuka me aŋaba me dyekal. Wirre gubedo aŋwen, ki tedi tergi aŋwen me mola; golgi gubedo me ryal, ki wigi gumwono woko ki ryal, ki otacgi bene gubedo me ryal. Teke lagur kema ducu ki teke ma orumo dyekal ducu gubedo me mola. Man aye weI jami ma gitiyo ki kema, en aye kema lok me caden, macalo gikwanogi i kare ma Moses ociko, ma yam obedo pi tic pa jo Levi, kun ladit wi ticgi en aye Itamar wod pa Aron ma ajwaka-ni, Bejalel wod pa Uri ma wod pa Kur, ma i kaka pa Juda, otiyo jami ducu ma Rwot ociko ki Moses. Onoŋo tiyo kacel ki Okoliab wod pa Akicamak, ma i kaka pa Dan, dano ma ladiro, ma larot cal tic manyen, ki lader jami ki uci ma bulu, ki lamar lamar, ki makwar, ki boŋo camanini ma giwiyo maberre. Jabu ducu ma gitiyo kwede pi tic i kabedo maleŋ, ki jabu ducu ma oa i gityer, pekke onoŋo romo talanta pyeraryo wiye aboŋwen, ki cekel miya abiro ki pyeradek, kun giporo ki cekel me kabedo maleŋ, Ki ryal ma oa ki bot lwak ma gikwano onoŋo pekke romo talanta miya acel ki cekel alip acel, ki miya abiro ki pyerabiro wiye abic, kun giporo ki cekel me kabedo maleŋ, Onoŋo dano acel acel okelo beka acel, (en aye nucu cekel me kabedo maleŋ), pi dano acel acel ma yam gikwano welgi, cakke i kom jo ma ditogi romo mwaka pyeraryo ki dok kwede malo, jo alip miya abicel ki adek, ki miya abic ki pyerabic. Talanta miya acel me ryal onoŋo obedo me aliya pi tedi te wir me kabedo maleŋ, ki pi tedi te wir me boŋo kicika; tedi tere ma romo miya acel gua ki i kom talanta miya acel, en aye talanta acel pi tedi te wir acel acel. Ki cekel alip acel ki miya abiro ki pyerabiro wiye abic, otimo ki gol me wir ducu, omwono wigi ducu, dok otiyo ki otacgi. Mola ma gimiyo onoŋo talanta pyerabiro, ki cekel alip aryo ki miya aŋwen. Otiyo ki tedi te wir me doggola kema me rwatte, ki ke no tyer me mola, ki keikei me mola, ki jami tic ducu me keno tyer, ki tedi te wir ma orumo dyekal, ki tedi te wir me doggaŋ me dyekal, ki teke me guro kema, ki teke ma orumo dyekal. Gikwoyo boŋŋi aruka ma gitiyo mabeco ki uci ma bulu ki lamar lamar, ki makwar pi tic i kabedo maleŋ, gikwoyo boŋŋ i maleŋ pi Aron macalo Rwot ociko ki Moses. Otiyo epod ki jabu ki uci ma bulu ki lamar lamar ki makwar ki camanini ma giwiyo maberre. Gipado jabu woko marep ki nyol, giliro odoko macalo tol me dero boŋo, kacel ki uci ma bulu, ki ma lamar lamar, ki makwar ki me dero ki boŋo camanini ma’ giwiyo maberre, ki tic me diro. Gukwoyo gin wi gwok epod, gikubo i doge ryoryo. Ceme ma i kome ma gicweyo ki diro, me latwene, gikwoyo ki jami lakite acellu, ki kit tic acel-lu bene, ki jabu, ki uci ma bulu, ki ma lamar lamar ki makwar ki boŋo camanini ma giwiyo maberre: macalo Rwot ociko ki Moses.’ Giyubo litino kidi onik, gimwonogi i kom jabu ma giŋweko ki diro, ma doŋ gigoro komgi macalo ladiro goro kom kidi, muporo nyiŋ awobe pa lcrael. Omwonogi i kom gin wi gwok me epod, wek gubed kidi me po pi awobe pa lcrael, macalo Rwot ociko ki Moses. Otimo kicaa kor ki tic me diro, macalo tic i kom epod, ki jabu ki uci ma bulu, ki ma lamar lamar, ki makwar, ki boŋo camanini ma giwiyo maberre. Obedo ma twoke aŋwen marom; gibano i kicaa kor aryo; ka doŋ gibano iye aryo, ci borre bedo rom ki lac cin acel, ki lacce bene rom ki lac cin acel, Gumwono iye litino kidi me wel ma guryeyo i tyenŋ aŋwen. Tyen mukwoŋo obedo cadiuc, topaj ki kabankel: i tyen me aryone giketo iye emeradi’ capir ki dayaman; i tyeŋ me adekke giketo jacint, agat ki ameticito; ki i tyen me aŋwenne giketo berul, onik ki jacipa; gimwonogi i jabu ma giŋweko ki diro. Litino kidi gubedo apar wiye aryo, muporo nyiŋ awobe pa Icrael; gubedo macalo kidi ma gigoro me agit, kun kidi acel acel gigoro iye nyiŋ, muporo kaka apar wiye aryo. Dok gutimo nyor me jabu ma giliyo maber, ma giminogi macalo tol, Dok gutimo gin lakwak tere aryo me jabu giŋweko ki diro, ki agit me jabu aryo, ci gukwoyo agit aryo-nu i dog kicaa kor aryo bene; ka dok gurwako tol jabu aryo-nu odonyo i agit aryo ma gitye i dog kicaa kor-ri. Gumwono dog tol aryo-nu ducu i kom gin lakwak tere aryo ma giŋweko ki diro-ni, gutweyo kwede i kom gin wi gwok me epod. Dok gutimo agit aryo me jabu, ci gukwoyogi i twok kicaa kor aryo ducu, i doge ma tuŋ iye ma cok ki epod. Ci gutimo agit me jabu aryo gukubogi i gin wi gwok epod aryo anyim tuŋ tere, ka ma okubbe tuŋ malo i wi ceme me epod ma gicweyo ki diro-ni. Ci gutweyo kicaa kor ki agitte i kom agit ma i dog epod ki tol ma bulu, wek obut opyelle i kom ceme me epod ma gicweyo ki diro-ni, wek kicaa kor pe ogonnye woko ki i kom epod; macalo Rwot ociko ki Moses, Dok otimo jor me epod ma gicweyo kome ducu ki uci ma bulu. Otuco dog jor obedo twolo macalo dog boŋo aruka, ma gidolo doge orumo woko likiŋ wek pe oyeci. I dog jor guluno iye gin muporo okwer pomegranat munyak, ma gikwoyo ki uci ma bulu, ki ma lamar lamar, ki makwar, ki boŋo camanini ma giwiyo maberre, Dok gutimo olaŋ me jabu ma giliyo maber, ci gikwoyo olaŋ giŋobo kin okwer pomegranat orumo dog jor woko, onobo kin okwer pomegranat ducu; olaŋ ki okwer pomegranat orumo dog jor ducu kun gigwennye agwenya, i dog jor me aruka i dog tic; macalo Rwot ociko ki Moses, Dok gutimo kanyi ma gicweyo ki boŋo camanini maberre, ki pali me boŋo camanini ma giwiyo maberre, pi Aron ki awobene, ki kitambara me adwala i wic me boŋo camanini maberre ki gitok matino me boŋo camanini maberre, ki pali me boŋo camanini ma giwiyo maberre, ki k itambara me latwe pyer me boŋo camarum ma giwiyo maberre, ki uci ma bulu, ki ma lamar lamar, ki makwar, ma gidero maber; macalo Rwot ociko ki Moses, Dok gutimo akwaya jabu me lalukana maleŋ ki jabu ma giliyo maber, gigoro kome macalo agora i kom agit ni, “Maleŋ pi Rwot.” Gutweyo tol ma bulu i kome wek gitwe girid kwede i kom kitambara adwala me wic-ci; macalo Rwot ociko ki Moses. Yam gutyeko tic i kom kema, en kema me rwatte, kit meno; jo Icrael gutyeko tic ducu macalo Rwot ociko ki Moses; gutimo kit meno. Gukelo kema bot Moses, kema ki jami ticce ducu, lwak golle ki gutine ki riine wirre ki tedi tergi; laa nyogi romi ma ginyoŋo, kicika me laumme; canduk lok me caden, ki tal latiŋŋe, ki kom me kica; meja ki jami ticce ducu, ki mugati me aketa i nyim Lubaŋa; okar-mac me jabu ma giliyo maber, ki lwak laputte ma giketo malo i wiye, ki jami ticce ducu, ki moo me mac; ke no tyer me jabu, moo me wir, ki odok eceta ma ŋwece kur, ki boŋo laum doggola me kema; keno tyer me mola, ki tal latiŋŋe, ki jami ticce ducu; otako lwok ki tedi tere; boŋo cuka me aŋaba me rumo dyekal, wirre ki tedi tergi ki boŋo laum doggaŋ me d yekal, ki lwak tol lacikgi ki lwak teke lagurgi; jami me tic kwedgi i kema, pi kema me rwatte; ki boŋŋi aruka ma gitiyo mabeco me tic i kabedo maleŋ, bomji aruka maleŋ pi ajwaka Aron, ki boŋŋi aruka pi awobene pi ticgi me bedo ajwagi. Macalo Rwot ociko ki Moses, jo Icrael gutiyo gutyeko tic ducu kit meno, Moses oneno tic ducu, ci nen, gutiyo tic kikome; macalo Rwot onoŋo ociko, gutiyo tic ducu kakare. Ci Moses olamo gum i komgi. Rwot owaco bot Moses ni, “I nino dwe acel i dwe mukwoŋo, cak guro iye kema, en kema me rwatte. Ket iye canduk lok me caden, ci iŋab boŋo kicika me laum kom canduk. Ka doŋ iter iye meja, ican iye jami ducu kikore, ka dok ikel okar-mac ci icib laput malo i wiye, Dok iket keno tyer me jabu me waŋo odok eceta i nyim canduk lok me caden, ci iŋab boŋo cuka laum doggola me kema. Ket keno tyer me gitum awaŋa i nyim doggola me kema, en kema me rwatte; iket otako lwok ocuŋ i kin kema me rwatte ki keno tyer, ci iony iye pii. Dok iŋab boŋo cuka me dyekal irum woko ducu, ci iŋab boŋo cuka me laum doggaŋ me dyekal. K waŋy moo wir, iwir ki kema ki lwak jami ducu ma gitye iye, kun ikwero en ki jami ma giketo iye ducu gubed maleŋ. Dok bene wir keno tyer me gitum awaŋa ki moo, ki jami ticce ducu; kwer keno tyer, ci bidoko maleŋ makato. Wir moo bene i kom otako lwok ki tedi tere ikwergi. Ka doŋ ibikelo Aron ki awobene i doggola kema me rwatte, ci ilwok komgi ki pii. Ka doŋ iruk Aron ki boŋŋi aruka maleŋ, ci iwire ki moo, ikwere wek oti bo ta tic me ajwaka. Ka dok ikel awobene bene, irukgi ki kanyi, iwirgi ki moo macalo iwiro wongi-ni, wek guti bota tic meajwagi: wirogi ki moo bimiyo gibedo ajwagi matwal wa i kare pa likwayogi ducu.” Moses otimo kit meno kit ma yam Rwot ocike kwede ducu; otimo ducu kit meno, I dwe mukwoŋo, i mwaka me aryone, i nino dwe mukwoŋo aye giguro iye kema. Moses oguro kema: oryeyo tedi tere; ocibo iye guti, ka orwako iye rii bao, oilo wir malo, Ka dok oyaro boŋo opeto i wi kema, oketo laum kema, opeto i wiye, macalo yam Rwot ociko ki Moses. Ka dok otero lok me caden oketo i canduk, ka orwako tal i kor canduk, oketo kom me kica i wi canduk; ka otero canduk i kema, onabo boŋo kicika malo me laumme, ci oumo kom canduk lok me caden woko, macalo Rwot ociko ki Moses, Ka dok oketo meja i kema me rwatte, i kema tuŋ acam, ki woko i ŋe boŋo kicika ma oumo canduk-ki ka dok ocano mugati i nyim Ii wot macalo Rwot ociko ki Moses. Ka dok oketo okar-mac i kema me rwatte tuŋ acuc me kema kun okemme ki meja, ka ocibo laput malo i nyim Rwot; macalo Rwot ociko ki Moses. Ka dok oketo keno tyer me jabu i kema me rwatte i nyim boŋo kicika, ci owaŋo odok eceta ma ŋwece kur i wiye; macalo Rwot ociko ki Moses. Dok onabo boŋo cuka me laum doggola me kema. Ka dok oketo keno tyer me gitum awaŋa cok ki doggola kema me rwatte, ka ocako tyero iye gitum awaŋa, ki gityer me moko kwon; macalo Rwot ociko ki Moses. Ka dok oketo otako lwok i kin kema me rwatte ki keno tyer, oonyo iye pii me lwok; en aye ka ma Moses ki Aron ki awobene gilwoko iye tyengi. Ka gicito i kema me rwatte, dok ka ginyiko cok ki keno tyer, ci gilwokke, macalo Rwot ociko ki Moses: Oguro dyekal orumo kema ki keno tyer, ci onabo boŋo cuka laum doggaŋ me dyekal, Kit meno Moses otyeko tic kakare, Lacen pol obino, oumo wi kema me rwatte woko, ci deyo pa Rwot opoŋo i kema. Moses onoŋo pe twero donyo i kema me rwatte, pien pol oboyo kom kema me rwatte woko, dok deyo pa Rwot opoŋo i kema. I kare me wotgi ducu, ka pol owarre woko ki i wi kema, ci jo Icrael gicako wot anyim; ento ka pol pe owarre woko, ci pe gimedde ki wotgi anyim, gikuro nio i nino ma owarre woko, I kare me wotgi ducu pol pa Rwot umo wi kema dyeceŋ, ki mac bedo iye dyewor, ma kun jo ducu me ot pa Icrael gineno. Rwot olwoŋo Moses ci oloko kwede ki i kema me rwatte kun waco ni, “Lok bot jo Icrael kun iwaco botgi ni, Ka dano mo i kinwu kelo tyer mo bot Rwot, wubikelo gityerwu me lim makwo ma wukwanyo ki i kin dyaŋi nyo ki i kin romi ki dyegi. “Ka ce dano mo okwanyo gityerre me gitum awaŋa ki i kin dyaŋi, en bityero twon ma kome pe ki mwonyo; en bityero i doggola kema me rwatte, wek Rwot ogame, En biketo ciŋe i wi gitum awaŋa, ci Lubaŋa bigamone pire me lakwany bal ki i kome, En bineko twon meno i nyim Rwot ci awobe pa Aron ma gin aye ajwagi gibityero remo; gibicoro remo i kom keno tyer ma tye i doggola kema me rwatte kun rumo kome ducu, En biyaŋo gitum awaŋa, biŋido woko matitino, ka awobe pa ajwaka Aron gibimoko mac i wi keno tyer, kun gicano yen i mac kikore. Ci awobe pa Aron ma gin aye ajwagi gibicano riŋo ma giŋido-ni kikore, kacel ki wic ki dwolo, i wi yen ma tye i mac ma i wi keno tyer; ento jam iye ki tyene ducu gibilwokogi ki pii. Ajwaka biwaŋo woko ducu ki berre i keno tyer obed gitum awaŋa, gityer ma giwaŋo ki mac, en gin ma ŋwece kur me yomo cwiny Rwot. “Ka ce okwanyo gityerre me gitum awaŋa ki i kin romi nyo dyegi, en bityero nyok ma kome pe ki mwonyo. En bineko i nyim Rwot, yo tuŋ acam me keno tyer; awobe pa Aron ma gin aye ajwagi gibicoro remo i kom keno tyer rumo kome ducu, En biŋido woko matitino, kacel ki wic ki dwolone, ci ajwaka bicanogi kikore i wi keno tyer; ento jam iye ki tyene ducu gibilwokogi ki pii. Ajwaka bityero ducu ki berre kun waŋo i keno tyer; en aye gitum awaŋa, gityer ma giwaŋo ki mac, en gin ma ŋwece kur me yomo cwiny Rwot. “Ka ce gityerre bot Rwot obedo winyo me gitum awaŋa, ci en bikelo amam nyo litino akuri me gityerre. Ajwaka bikelone i keno tyer ci dwoyo ŋute, ka waŋo woko i wi keno tyer, En bikwanyo lacukone ki yece ci onyogi i ŋet keno tyer tuŋ wokceŋ ka ma gionyo iye buru; biyecone ki bwome, ento pe bipoko iye. Ajwaka biwaŋo i keno tyer, i wi yen ma tye i mac; en aye gitum awaŋa, gityer ma giwaŋo ki mac, gin ma ŋwece kur me yomo cwiny Rwot. “Ka ŋatti mo okelo gityer me moko kwon me atyera bot Rwot, gityer mere bibedo moko kwon mapwotte. En bionyo iye moo, ci keto iye odok luban, ka en bikelo bot awobe pa Aron ma gin aye ajwagi. Ajwaka bijobo moko kwon mapwot-ti poŋ ciŋ acel, kacel ki moo ki odok luban mere ducu; ci ajwaka biwaŋo man i wi keno tyer obed gin me po i kome; en gityer ma giwaŋo ki mac, gin ma ŋwece kur me yomo cwiny Rwot. Gin ma odoŋ ki i kom gityer me moko kwon bibedo pa Aron ki awobene; en aye gin maleŋ makato me gityer ma giwaŋo ki mac bot Rwot. “Ka ityero gityer me moko kwon ma gitedo i keno, bibedo capat ma tobi pe iye me moko kwon mapwotte ma girubo ki moo, nyo capat marep ma tobi pe iye ma gireyo moo i komgi. Ka ce gityer meri obedo gityer me moko kwon ma gitedo i otako nyonyo, bibedo moko kwon mapwotte ma tobi pe iye, ma girubo ki moo; ka ocek ibinido iye matitino ci ionyo iye moo; en aye gityer me moko kwon. Ka ce gityer meri obedo gityer me moko kwon ma gitedo i cupuriya, ibitedo ki moo ki moko kwon mapwotte. Gityer me moko kwon ma gitimo ki jami magi ibikelo bot Rwot; ka doŋ gityero bot ajwaka, ci en bikelo i wi keno tyer. Ki i kom gityer me moko kwon ajwaka bikwanyo iye gin me po, biwaŋo i wi keno tyer obed gityer ma giwaŋo ki mac, gin ma ŋwece kur me yomo cwiny Rwot. Gin ma odoŋ ki i kom gityer me moko kwon bibedo pa Aron ki awobene; en aye gin maleŋ makato me gityer ma giwaŋo ki mac bot Rwot. “Gityer me moko kwon ma gikelo bot Rwot pe wuted ki tobi; pien pe wubiwaŋo tobi nyo moo kic me bedo gityer ma giwaŋo ki mac bot Rwot. Wutwero kelogi bot Rwot pi gityer me wi mwaka, ento pe wubityerogi i wi keno tyer me bedo gin ma ŋwece kur me yomo cwiny Rwot. Ibiketo kado i gityer me moko kwon meri ducu; pe ibiweko kado me gicikke pa Lubaŋani bedo pe i gityer me moko kwon meri; myero ityer kado kacel ki gityer meri ducu. “Ka ityero gityer me moko kwon me wi mwaka bot Rwot, ibityero wit bel manyen ma gicoto, gicelo ki mac. Ibiketo moo ki odok luban i kome; en aye gityer me moko kwon. Ajwaka biwaŋo bel mogo ma gieoto, kacel ki moo ki odok luban mere ducu, obed gin me po i kome; en aye gityer ma giwaŋo ki mac bot Rwot. “Ka dano mo tyero gitum me gityer lakwecwiny, ka tyero lim ma okwanyo ki i kin dyaŋi, ma twon nyo ma roya, en bityero i nyim Rwot ma kome pe ki mwonyo. En biketo ciŋe i wi gityerre, ci bineko i doggola kema me rwatte; awobe pa Aron ma gin aye ajwagi gibicoro remo i kom keno tyer kun rumo kome ducu. En bityero gityer ma giwaŋo ki mac bot Rwot ma okwanyo ki i kom gitum meno me gityer lakwecwiny, en aye dwolo ma oumo jam iye, ki dwolo ducu ma tye i kom jam iye, ki olaŋ aryo ducu ki dwolo ma tye i komgi ma tye i pyere, ki okene ki i kom cwiny, ma en bi kwanyo woko kacel ki olaŋ aryo. Awobe pa Aron biwaŋo i wi keno tyer i wi gitum awaŋa ma tye i wi yen ma i mac; en aye gityer ma giwaŋo ki mac, gin ma ŋwece kur me yomo cwiny Rwot. “Ka gityerre bot Rwot me gityer lakwecwiny obedo lim ma okwanyo ki i kin romi, ma nyok nyo ma bwoŋ romo, en bityero ma kome pe ki mwonyo. Ka en tyero latin romo me gityerre, en bityero i nyim Rwot, biketo ciŋe i wi gityerre, ka doŋ neko woko i nyim kema me rwatte; ci awobe pa Aron gibicoro remone i kom keno tyer kun rumo kome ducu. Lacen en bityero gityer ma giwaŋo ki mac bot Rwot ma okwanyo ki i kom gitum meno me gityer lakwecwiny, en aye dwolone, ki moo yibe oluu, kun giŋolo cok ki i oguro cogo ŋeye, ki dwolo ma oumo jam iye, ki olan aryo ducu, ki dwolo ma tye i komgi ma tye i pyere, ki okene ma i kom cwiny ma en bikwanyo woko kacel ki olaŋ aryo. Ci ajwaka biwaŋo woko i wi keno tyer, obed cam ma gityero ki mac bot Rwot. “Ka ce gityerre obedo dyel, en bityero i nyim Rwot, biketo ciŋe i wiye, ka doŋ neko woko i nyim kema me rwatte; awobe pa Aron gibicoro remone i kom keno tyer rumo kome ducu. Lacen en bityero jami magi ma okwanyo ki i kome gubed gityer ma giwaŋo ki mac bot Rwot, en aye dwolo ma oumo jam iye, ki dwolo ducu ma i kom jam iye, ki olaŋ aryo ducu, ki dwolo ma i komgi ma tye i pyere, ki okene ma i kom cwiny ma en bikwanyo woko kacel ki olan aryo. Ajwaka biwaŋogi i wi keno tyer obed cam ma gityero ki mac, ma ŋwece kur. Dwolo ducu bedo pa Rwot. Bibedo cik matwal nio wa i kare pa likwayowu ducu, wa i kabedo ma wubedo iye ducu, ni, pe wucam dwolo nyo remo.” Rwot owaco bot Moses ni, “Wac bot jo Icrael ni, Ka dano mo obalo ma pe otimo akaka, i kom gin ma yam Rwot ociko ni pe gitim, ce otimo acel mo i kingi, ka ce ajwaka ma giwiro ki moo aye obalo, kun okelo bal i kom lwak, myero en otyer bot Rwot wod twon ma kome pe ki mwonyo pi bal ma en otimo, obed gitum me bal. En bikelo wod twon i doggola kema me rwatte i nyim Rwot, biketo ciŋe i wi twon ci neko woko i nyim Rwot. Ajwaka ma giwiro bikwanyo remo twon manok, tero i kema me rwatte; ajwaka biluto lwet ciŋe i remo ci kiro remo tyen abiro i nyim Rwot, i nyim boŋo kicika ma umo kabedo maleŋ. Ajwaka bireyo remo mukene i kom ten keno aŋwen me keno tyer me odok eceta ma ŋwece kur ma tye i kema me rwatte i nyim Rwot; remo twon mudonge en bionyo woko i te tedi keno tyer me gitum awaŋa ma tye i doggola kema me rwatte. En bikwanyo dwolo ducu ki i kom twon me gitum me bal, dwolo ma oumo jam iye, ki dwolo ducu ma tye i kom jam iye, ki olaŋ aryo ducu ki dwolo ma tye i komgi ma tye i pyere, ki okene ki i kom cwiny ma en bikwanyo woko kacel ki olaŋ aryo, kit macalo gikwanyo ki i kom twon me gityer lakwecwiny; ci ajwaka biwaŋogi woko i wi keno tyer me gitum awaŋa. Ento pyen twon ki riŋone ducu, kacel ki wiye ki tyene ki jam iye ki wee iye, en bitero woko ki berre wa i ŋe gony i kabedo ma olony ka ma gionyo iye buru, ci biwaŋo i wi yen ki mac; i kabedo ka ma gionyo iye buru en aye gibiwaŋo iye. “Ka lwak jo Icrael ducu gutimo bal ma pe gutimo akaka, ce lokke pe oŋene i nyim kacokke, kun gitiyo gin mo acel i kom gin ducu ma yam Rwot ociko ni pe gitim, ci gutiŋo alii; ka bal ma gutimo-ni doŋ onene, ci kacokke myero otyer wod twon me gitum me bal kun gikelo i nyim kema me rwatte. Ludoŋo pa lwak gibiketo ciŋgi i wi twon i nyim Rwot, ci gibineko twon i nyim Rwot. Ajwaka ma giwiro bitero remo twon manok i kema me rwatte: ajwaka biluto lwet ciŋe i remo ci kiro tyen abiro i nyim Rwot i nyim boŋo kicika. En bireyo remo mukene i kom ten keno aŋwen me keno tyer ma tye i kema me rwatte i nyim Rwot; remo mudoŋŋe en bionyo woko i te tedi keno tyer me gitum awaŋa ma tye i doggola kema me rwatte. En bikwanyo dwolone ducu ki i kome ci wano woko i wi keno tyer. En bitiyo ki twon man kit ma onoŋo otiyo ki twon me gitum me bal; ajwaka bitimo gin me lakwany bal ki i komgi ci Rwot biweko balgi. Ci ajwaka bitero twon woko Wa i ŋe gony, biwaŋo kit macalo owaŋo ki twon mukwoŋo-ni; en aye gitum me bal pa lwak mucokke. “Ka laloc mo aye obalo ma pe otimo akaka, kun otiyo gin mo acel i kom gin ducu ma yam Rwot Lubaŋane ociko ni pe gitim, ci otiŋo alii, ka gimiyo en oŋeyo bal ma en otimo-ni, ci en bikelo dyel pi gityerre, nyok ma kome pe ki mwonyo. Biketo ciŋe i wi dyel, ci neko i kabedo ma gineko iye gitum awaŋa i nyim Rwot; co aye gitum me bal. Ajwaka bigwelo remo me gitum me bal ki lwet ciŋe, ci reyo i kom ten keno aŋwen me keno tyer me gitum awaŋa; remo mudoŋŋe en bionyo woko i te tedi keno tyer me gitum awaŋa. En biwaŋo dwolone ducu i wi keno tyer, macalo dwolo me gityer lakwecwiny; kit meno ajwaka bitimo gin lakwany bal ki i kome pi balle, ci Rwot biweko balle. “Ka ŋat mo acel ma i kin lwak obalo ma pe otimo akaka, kun otiyo gin mo acel i kom gin ducu ma yam Rwot ociko ni pe gitim, ci otiŋo alii, ka gimiyo en oneyo bal ma en otimoni, ci en bikelo dyel pi gityerre, bwonne ma kome pe ki mwonyo, pi balle ma en otimo-ni. En biketo ciŋe i wi gitum me bal, ci neko gitum me bal i kabedo ma gineko iye gitum awaŋa, Ajwaka bigwelo temo ki lwet ciŋe, ci reyo ‘i kom ten keno aŋwen me keno tyer; remo mudoŋŋe en bionyo woko i te tedi keno tyer. En bikwanyo dwolone ducu macalo gikwanyo dwolo ki i gityer lakwecwiny, ajwaka biwaŋo i wi keno tyer obed gin ma ŋwece kur me yomo cwiny Rwot; kit meno ajwaka bitimo gin me i akwany bal ki i kome, ci Rwot biweko balle. “Nyo ka en mito kelo latin romo me gityerre pi gitum me bal, en bikelo bwonne ma kome pe ki mwonyo. Biketo ciŋe i wi gitum me bal, ci neko i kabedo ma gineko iye gitum awana-ni, Ajwaka bigwelo remo me gitum me bal ki lwet ciŋe, bireyo i ten keno aŋwen me keno tyer me gitum awaŋa; remo mudoŋŋe en bionyo woko i te tedi keno tyer. En bikwanyo dwolone ducu macalo gikwanyo dwolo latin romo ki i gityer lakwecwiny, ajwaka biwaŋo i wi keno tyer i kom gityer ma giwaŋo ki mac bot Rwot; kit meno ajwaka bitimo gin lakwany bal ki i kome pi bal ma en otimo-ni, ci Rwot biweko balle. “Ka dano mo obalo kun owinyo lam ma gilamo i kom lwak ni dano myero gutuc lok ma giŋeyo, ma kun en caden ma oneno nyo oniaŋ lokke, ce pe otuco, bal bidok i wiye. Nyo ka dano mo ogudo kom gin ma gikwero, kadi bed kom lee tim ma keni muto, ma gikwero; nyo kom lee ma paco ma keni muto, ma gikwero, nyo kom gin ma nya ma corre limuk ma keni muto, ma gikwero, kun pe oneyo, en bene odoko keni, noŋo otiŋo alii. Nyo ka ogudo gin me kwer ma i kom dano, kit gin mo-ni makwer ma twero miyo dano doko keni, kun pe oneyo, ka doŋ oniaŋ iye, noŋo otiŋo alii. Nyo ka dano mo okwono kwon laboŋo tamo tere pi timo gin mo marac nyo maber, kit kwon ma dano kwoŋo kun pe gitamo tere, kun pe oniaŋ iye, ka doŋ oniaŋ iye ci bitiŋo alii, ka otimo lok mo acel i kom magi. Ka ŋat mo otiŋo alii, ka otimo lok acel mo i kom magi, ci myero otuc bal ma en otimo, okel gitumme me tiŋo alii bot Rwot pi bal ma en otimo-ni, bwon romo nyo bwon dyel, obed gitum me bal; ci ajwaka bitimo gin lakwany bal ki i kome pi balle. “Ento ka noŋo latin romo oloye, ci en bikelo amam aryo nyo litino akuri aryo bot Rwot me gitumme me tiŋo alii pi bal ma otimo; acel obed pi gitum me bal, acel pi gitum awaŋa. Bikelogi bot ajwaka, ci ajwaka bikwoŋo tyero acel me gitum me bal. Bidwoyo ŋute turo woko, ento pe biputo wiye, ci bikiro remo manok me gitum me bal i but keno me tyer, remo mudoŋŋe en bibiyo cwer i te tedi keno tyer; en aye gitum me bal. Lacen bityero me aryone me gitum awaŋa macalo giciko; kit meno ajwaka bitimo gin lakwany bal ki i kome pi bal ma en otimo-ni, ci Rwot biweko balle. “Ento ka noŋo amam aryo nyo litino akuri aryo oloye, ci bikelo agwata moko kwon acel me moko mapwotte me gityer mere pi bal ma otimo, obed gitum me bal. Pe bionyo iye moo pe biketo rye odok luban, pren obedo gitum me bal. Bikelo bot ajwaka, ci ajwaka bijobo poŋ ciŋ acel obed gin me po i kome, biwaŋone i wi keno tyer, i wi gityer ma giwaŋo ki mac bot Rwot; en aye gitum me bal. Kit meno ajwaka bitimo gin lakwany bal ki i kome pi bal ma otimo pi lok mo acel i kom magi, ci Rwot biweko balle. Mudoŋŋe bibedo pa ajwaka, macalo gitimo i kom gityer me moko kwon.” Rwot owaco bot Moses ni, “Ka dano mo oturo cik pa Lubaŋa kun otimo bal ma pe otimo akaka i kom mot mo maleŋ ma myero en omi bot Rwot, en bikelo gitumme me tiŋo alii bot Rwot, nyok ma kome pe ki mwonyo ma okwanyo ki i kin romi i wel ma iŋolo i cekel me ryal kun ilubo cekel me kabedo maleŋ, obed gitum me tiŋo alii. Dok en biculo waŋ gin ma en obalo iye i kom mot maleŋ, kun medo iye acel me abic, ci miyo bot ajwaka. Ajwaka bitimo gin lakwany bal ki i kome ki nyok romo me gitum me tiŋo alii, ci Rwot biweko balle. “Ka dano mo obalo kun otiyo gin mo acel i kom gin ducu ma yam Rwot ociko ni pe gitim, kadi bed pe oneyo, noŋo otiŋo alii, ci bal bidok i wiye. En bikelo bot ajwaka nyok ma kome pe ki mwonyo ma okwanyo ki i kin romi, i wei ma iŋolo, obed gitum me tiŋo alii. Ajwaka bitimo gin lakwany bal ki i kome pi bal ma opoto iye ma pe me akaka, ci Rwot biweko balle. En aye gitum me tiŋo alii, noŋo en otiŋo alii i nyim Rwot.” Rwot owaco bot Moses ni, “Dano twero balo kun oturo cik pa Rwot, macalo ka obwolo lawote i kom gin ma con okano bote, nyo ojeŋo bote, nyo ka omayo jamine, nyo oburo lawote, nyo onoŋo gin ma orwenyo ci oloko iye lok goba, kun okwoŋo iye kwoŋ me goba; nyo otimo gin mo acel i kom gin ducu ma dano gitimo ci gibalo kwede. Ka ŋat mo obalo kumeno ce otiŋo alii, en bidwoko waŋ gin ma omayo-ni, nyo gin ma en otero me bura, nyo gin ma onoŋo gikano: bote, nyo gin ma orwenyo ma en onoŋo, nyo gin mo-ni ma en okwoŋo iye kwoŋ me goba. Bidwoko ducu ki berre, dok bimedo acel me abic i kome, ci miyo bot won jami i nino ma en tyero iye gitumme me tiŋo alii. En bikelo gitumme me tiŋo alii bot Rwot, nyok ma kome pe ki mwonyo ma okwanyo ki i kin romi, i wel ma iŋolo, wek obed gitum me tiŋo alii; bikelo bot ajwaka. Ajwaka bitimo gin lakwany bal ki i kome i nyim Rwot, ci Rwot biweko balle i kom gin mo-ni i kom gin ducu ma dano twero tiyo ma miyo etiŋo alii.” Rwot owaco bot Moses ni, “Cik Aron ki awobene ni, Man aye cik me gitum awaŋa, Gitum awaŋa bibedc i keno tyer dyewor benebene nio wa odiko, kun mac bedo ka lyel iye nakanaka. Ajwaka biruko boŋo arukane boŋo camanini, ci ruko pali camaninine i pyere, ka bijobo buru ma odon ka mac doŋ owano gitum awaŋa woko, ci keto i ŋet keno tyer. Ka doŋ en bilunyo boŋŋine woko ruko boŋŋi mukene, ci tero buru woko wa i ne gony i kabedo ma olony. Mac ma i wi keno tyer bibedo ka lyel nakanaka, pe myero oto. Ajwaka biwaŋo iye yen odiko ki piny ma ru, bicano gitum i wiye kikore, dok biwaŋo dwolo bene i wiye me gityer lakwecwiny. Mac bibedo ka Lyel i wi keno tyer nakanaka, pe myero oto. “Man aye cik me gityer me moko kwon. Awobe pa Aron gibityerone i nyim Rwot, i nyim keno me tyer, ŋat acel bijobo moko kwon mapwot-ti poŋ ciŋ acel ki i gityer me moko kwon, kacel ki moone ki odok luban ma i kom gityer me moko kwon, ci wano i wi keno tyer obed gin me po i kome, gin ma ŋwece kur me yomo cwiny Rwot. Ma odoŋŋe Aron ki awobene gibicamo; gibicamo ma tobi pe iye i kabedo mo maleŋ, i dyekal me kema me rwatte. Pe gibitedo capatte ki tobi. Atyeko miyo botgi me bedo dul megi me gityer mera ma giwaŋo ki mac; en gin maleŋ makato, macalo gitum me bal ki gitum me tiŋo alii. Co ducu ma i kin likwayo pa Aron gitwero camo dul man ma gikwanyo ki i kom gityer ma giwaŋo ki mac bot Rwot; en cik ma bibedo matwal wa i kare pa likwayowu ducu. Ŋat ma ogudo bidoko maleŋ.” Rwot owaco bot Moses ni, “Man aye gityer ma Aron ki awobene gibityero bot Rwot i nino ma giwire iye ki moo: agwata moko kwon acel me moko mapwotte, obed gityer me moko kwon me kare ducu; bityero nucune odiko ki nucune otyeno. Gibitedo ki moo i otako nyonyo; ibikelo ma doŋ girubo maber, ma noŋo inido matitino macalo gityer me moko kwon, ityer obed gin ma ŋwece kur me yomo cwiny Rwot. Ajwaka ma oa ki i kin awobe pa Aron ma gibiwiro ki moo me leyo kakare bityero bot Rwot pi cik ma bibedo matwal; gibiwaŋo ducu ki berre. Gityer me moko kwon pa ajwaka gibiwaŋo woko ducu ki bene; pe gibicamo.” Rwot owaco bot Moses ni “Wac bot Aron ki awo bene ni, Man aye cik me gitum me bal. I kabedo ma gineko iye gitum awana-ni, en aye gibineko iye gitum me bal i nyim Rwot; en gin maleŋ makato. Ajwaka ma otyero pi bal en aye bicamone; gibicamo i kabedo mo maleŋ, i dyekal me kema me rwatte. Gin ducu ma ogudo riŋone bidoko maleŋ; ka remone okir i kom ginaruka, ibilwoko gin ma remo okir i kome-ni i kabedo mo maleŋ. Agulu lobo ma gitedo iye gibineko woko; ento ka gitedo i weer mola, ci gibirudo kome, gilako ki pii. Co ducu ma i kin ajwagi gitwero camone; en gin maleŋ makato. Ento gitum me bal pe gibicamone tekke ka remone gitero i kema me rwatte pi timo gin lakwanybal i kabedo maleŋ; gibiwaŋo woko awaŋa ki mac. “Man aye cik me gitum me tiŋo alii. En gin maleŋ makato; i kabedo ma gineko iye gitum awana-ni en aye gibineko iye gitum me tino alii, ci gibicoro remone i kom keno tyer rumo kome ducu. Gibityero dwolone ducu, moo yibe, dwolo ma oumo jam iye, olan aryo ducu ki dwolo ma i komgi ma tye i pyere, ki okene ma tye i kom cwiny ma en bikwanyo woko kacel ki olan aryo, Ajwaka biwaŋogi i wi keno tyer obed gin ma giwaŋo ki mac bot Rwot; en aye gitum me tiŋo alii. Co ducu ma i kin ajwagi gitwero camone; gibicamo i kabedo mo maleŋ; en gin maleŋ makato. Gitum me tiŋo alii rom ki gitum me bal, cikgi tye acel; ajwaka ma otimo kwede gin lakwany bal, en aye biterone. Dok ajwaka ma otyero gitum awaŋa pa ŋat mo bitero pyen me gitum awaŋa ma en otyero-ni. Gityer me moko kwon ducu ma gitedo i keno, ki mukene ma gitedo i cupuriya nyo i otako nyonyo, bibedo pa ajwaka ma otyero-ni. Gityer me moko kwon ducu, ma girubo ki moo, nyo ma noŋone, bibedo pa awobe pa Aron ducu; ŋat man bitero ma rom ki lawote. “Man aye cik me gityer lakwecwiny ma ŋat mo bityero bot Rwot. Ka en tyero pi miyo pwoc, ci bityero, kacel ki gityer me pwoc, capat ma tobi pe iye ma girubo ki moo, capat marep ma tobi pe iye ma gireyo moo i komgi, ki capat ma tobi pe iye me moko kwon mapwotte ma girubo maber ki moo. En bityero bene capat me mugati ma girubo iye tobi kacel ki gitumme me gityer lakwecwiny. I kom magi en bityero capat acel ki i kom gityer acel acel obed gityer bot Rwot; meno bibedo pa ajwaka ma ocoro remo me gityer lakwecwiny. Riŋo me gitumme me gityer lakwecwiny pi miyo pwoc gibicamo i nino ma en otyero iye; en pe biweko mo doŋ nio odiko. Ento ka gityerre obedo gityer me cobo kwoŋ, nyo gityer mo ma iye opwoyo, gibicamo i nino ma en otyero iye, dok mudoŋŋe gitwero camo orwone, Ento riŋo mo me gitum mere ma odon i nino me adekke myero giwaŋ awaŋa ki mac, Ka gicamo riŋo mo me gitum mere me gityer lakwecwiny i nino me adekke, Lubaŋa pe bigamo ŋat ma otyero-ni, dok pe gibikwaŋo ni en otyero gin mo, Bibedo gin me kwer: ŋat ma ocamo, bal bidok i wiye. “Riŋo ma ogudo kom gin mo ma gikwero pe gibicamo; gibiwaŋone awaŋa ki mac. Jo ducu ma olonnye gitwero camo riŋo, ento ka ŋat mo ocamo riŋo me gityer lakwecwiny pa Rwot ma onoŋo en odoko keni, dano meno waŋe birwenyo woko ki i kin lutugi, Ka ŋat mo ogudo kom gin mo ma gikwero, kadi bed gin me kwer ma i kom dano, nyo lee ma gikwero, nyo kit gin mo-ni me kwer ma keni, ka dok camo kwede riŋo me gityer lakwecwiny pa Rwot, dano meno waŋe birwenyo woko ki i kin lutugi.” Rwot owaco bot Moses ni, “Wac bot jo Icrael ni, Pe myero wucam kit dwolo ducu, kadi me twon, kadi me romo nyo me dyel. Dwolo geŋ lee ma oto kene, ki dwolo lee ma ŋuu omwodo gitwero tic kwede i yo mukene ducu, ento pe gibicamo kadi ki acel. Dano ducu ma ocamo dwolo lee mo ma gityero kwede gityer ma giwaŋo ki mac bot Rwot, wane birwenyo woko ki i kin lutugi. Dok pe wubicamo remo gin mo ducu, kadi bed me winyo nyo me lee, ka ma wubedo iye ducu, Dano ma ocamo remo gin mo, waŋe birwenyo woko ki i kin lutugi.” Rwot owaco bot Moses ni, “Wac bot jo Icrael ni, ŋat ma otyero gitumme me gityer lakwecwiny myero okel gityer mere ma okwanyo iye me amiya bot Rwot. Ki i kom gityer mere me lakwecwiny, en bikelo gire ki ciŋe gityer ma giwaŋo ki mac bot Rwot; en bikelo dwolo ki gok, wek gikwat gok obed gityer me akwata i nyim Rwot. Ajwaka biwaŋo dwolo i wi keno tyer, ento gok bibedo pa Aron ki awobene, Em malacuc wubimiyo bot ajwaka obed gityer mere ma oa ki i kom gitum me gityer lakwecwiny; ŋat ma i kin awobe pa Aron ma otyero remo me gityer lakwecwiny, ki dwolone, bitero em malacuc obed waŋ watte. Pien gok ma gikwato, ki em ma gityero, atyeko kwanyogi woko ki bot jo Icrael ki i kom gityergi me lakwecwiny, amiyogi bot ajwaka Aron ki bot awobene, ma myero jo Icrael gumi botgi dikdik. Man aye waŋ wat pa Aron ki pa awo bene ma a ki i kom gityer ma giwaŋo ki mac bot Rwot, ma yam gikwero obed megi i nino ma yam gikelogi wek guti bot Rwot macalo ajwagi. Rwot yam ociko ni jo Icrael gubed ka miyo botgi i kare ma yam giwirogi ki moo; man bibedo waŋ watgi matwal nio wa i kare pa likwayogi ducu.” Man aye cik me gitum awaŋa, me gityer me moko kwon, me gitum me bal, me gitum me tiŋo alii, me keto ajwaka i dog tic, ki me gitum me gityer lakwecwiny, ma yam Rwot ociko ki Moses i wi got Cinai i nino ma yam ociko iye jo Icrael ni gukel gityer megi bot Rwot, i tim Cinai. Rwot owaco bot Moses ni, “Ter Aron kacel ki awobene, ki boŋŋi arukagi, ki moo wir, ki twon me gitum me bal, ki nyogi romi aryo, ki aduku me mugati ma to bi pe iye; ci icok lwak ducu kacel i doggola kema me rwatte.” Moses otiyo kit macalo Rwot ocike; ci lwak gucokke i doggola kema me rwatte. Moses owaco bot lwak ni, “Man aye gin ma Rwot ociko ni giti.” Ci Moses okelo Aron ki awobene olwokogi ki pii. Oruko Aron ki kanyi, otweyo pyere ki kitambara latwe pyer, ka dok oruke ki jor, oketo epod i kome, otweyo pyere ki ceme me epod ma gicweyo ki diro, otweyo, orido kwede i kome, Oketo kicaa kor i kore, ka dok oketo Urim ki Tumim i kicaa kor. Odwalo kitambara me adwala i wiye, ka otweyo akwaya jabu i kom kitambara me wic i nyime, me bedo lalukana maleŋ: macalo yam Rwot ociko ki Moses. Moses okwanyo moo wir ci owiro ki kema ki jami ducu ma, tye iye, okwerogi. Okiro moo i kom keno tyer tyen abiro, ci owiro keno tyer ki jami ticce ducu ki moo, kacel ki otako lwok ki tedi tere, pi kwerogi, Oonyo moo i wi Aron, owire kwede pi kwerone, Moses dok okelo awobe pa Aron, orukogi ki kanyi, otweyo pyergi ki kitambara latwe pyer, ka otweyo gitok matino i wigi, macalo yam Rwot ociko ki Moses, Lacen okelo twon me gitum me bal, ci Aron ki awobene guketo ciŋgi i wi twon me gitum me bal. Moses oneko, ogwelo remone ci oreyo i kom ten keno aŋwen me keno tyer ki lwet ciŋe orumo kome ducu, olonyo kwede keno tyer, okwero pi kwanyo bal ki i kome. Dok Moses okwanyo dwolo ducu ma i kom jam iye, ki okene ma i kom cwiny, ki olaŋ aryo ki dwologi ducu, owaŋogi i wi keno tyer. Ento riŋo twon-nu ki pyenne ki wee iye owaŋo awaŋa ki mac woko wa i ŋe gony, macalo yam Rwot ociko ki Moses, Ka man otum, okelo nyok romo me gitum awaŋa, ci Aron ki awobene guketo ciŋgi i wi nyok romo. Moses oneko, ocoro remone i kom keno kyer kuy rumo kome ducu. Ka doŋ giŋido ruŋo nyok romo woko, Moses owaŋo wiye ki riŋo ma giŋido-ni ki dwolone. Jam iye ki tyene ducu gilwoko ki pii lacen Moses owaŋo riŋo nyok romo woko ducu ki berre i wi keno tyer obed gitum awaŋa, gin ma ŋwece kur me yomo cwiny, gityer ma giwaŋo ki mac bot Rwot, macalo yam Rwot ociko ki Moses. Lacen okelo nyok romo mukene, en nyok romo me keto dano i dog tic, ci Aron ki awobene guketo ciŋgi i wi nyok romo. Moses oneko, ogwelo remone ci oreyo i ogwilo it Aron malacuc, ki i kom twon nyig ciŋe malacuc, ki i kom twon nyig tyene malacuc. Gikelo awobe pa Aron ci Moses oreyo remo i ogwilo itgi malacuc, ki i kom twon nyig ciŋgi malacuc, ki i kom twon nyig tyengi malacuc; ka Moses ocoro remo i kom keno tyer kun rumo kome ducu. Lacen okwanyo dwolo, ki moo yibe, ki dwolo ducu ma i kom jam iye, ki okene ma tye i kom cwiny, ki olaŋ aryo ducu kacel ki dwologi, ki em malacuc. Ka okwanyo capat acel ma tobi pe iye ki i aduku me mugati ma tobi pe iye ma tye i nyim Rwot, ki capat acel me mugati ma girubo ki moo, ki capat acel marep, oketogi i wi dwolo ki i wi em malacuc. Oketo magi ducu i dye cin Aron ki i dye cin awobene, okwatogi me bedo gityer me akwata i nyim Rwot. Lacen Moses okwanyogi ki i ciŋgi, owaŋogi woko i wi keno tyer kacel ki gitum awaŋa, obed gityer me keto dano i dog tic, gin ma ŋwece kur me yomo cwiny, gityer ma giwaŋo ki mac bot Rwot. Moses okwanyo gok, okwato me bedo gityer akwata i nyim Rwot; en aye obedo waŋ wat pa Moses ma oa ki i kom nyok romo me ketogi i dog tic, macalo yam Rwot ociko ki Moses. Moses okwanyo moo wir ki remo man ok ma i wi keno tyer, okiro i kom Aron ki i kom boŋŋi arukane, ki i kom awo bene ki boŋŋi arukagi; kit meno okwero Aron ki boŋŋi arukane, ki awobene ki boŋŋi arukagi, gudoko maleŋ. Moses owaco bot Aron ki awobene ni, “Wuted riŋo i doggola kema me rwatte, wucam ki kunnu, kacel ki mugati ma tye i aduku me gityer me ketowu i dog tic, macalo yam aciko kun awaco ni, ‘Aron ki awobene aye gibicamone.’ Riŋo ki mugati ma odoŋ myero wuwan awaŋa ki mac, Pe wubikato woko ki i doggola kema me rwatte pi nino abiro, nio ka kare me ketowu i dog tic ocobbe kakare, pien ketowu i dog tic bitero nino abiro. Gin ma gibedo ka tiyone tin, yam Rwot ociko ni gitim me lakwany bal ki i komwu. Wun wubibedo i doggola kema me rwatte pi nino abiro, kun wulubo gin ma Rwot ociko, wek pe wuto; pien gicika kit meno.” Aron ki awobene gutiyo gin ducu ma Rwot yam ociko ki i dog Moses. I nino me aborone Moses olwoŋo Aron ki awobene ki ludoŋo pa jo Icrael, ci owaco bot Aron ni, “Kwany wod twon, pi gitum me bal, ki nyok romo pi gitum awaŋa, ma pe komgi ki mwonyo ducu, wek ityergi i nyim Rwot. Dok iwac bot jo Icrael ni, ‘Wukwany nyok dyel pi gitum me bal, wod twon ki latin romo ma ditogi mwaka acel acel ma pe komgi ki mwonyo ducu, pi gitum awaŋa, ki twon ki nyok romo pi gityer lakwecwiny, me atuma i nyim Rwot, ki gityer me moko kwon ma girubo ki moo; pien Rwot binen botwu tin.’ ” Gukelo gin ma Moses ociko i nyim kema me rwatte; ci lwak ducu gunyiko cok, gucuŋ i nyim Rwot. Moses owaco ni, “Man aye gin ma Rwot ociko ni wuti, ci deyo pa’ Rwot binen botwu.” Moses dok owaco bot Aron ni, “Nyik cok ki keno tyer, wek ityer gitum me balli ki gitum awaŋani, ci itim gin lakwany bal ki i komi ki i kom lwak. Dok ikel gityer pa lwak itim gin lakwany bal ki i komgi macalo yam Rwot ociko.” Aron ocako nyiko cok kt keno tyer ci oneko wod twon me gitum me bal ma onoŋo tye pire kikome. Ka awobe pa Aron gumiyo remo bote, en oluto lwet cine i remo ci oreyo kom ten keno aŋwen me keno tyer, ka oonyo remo i te tedi keno tyer. Ento dwolo ki olan aryo ki okene ma tye i kom cwiny ma okwanyo ki i kom gitum me bal en owaŋo woko i wi keno me tyer, macalo yam Rwot ociko ki Moses. Riŋone ki pyenne en owano awaŋa ki mac woko i ne gony. Ka oneko gitum awaŋa, ci awobe pa Aron gumiyo remo bote, en ocoro i kom keno tyer kun rumo kome ducu. Ka dok gumiyo gitum awaŋa bote i kit ma giŋido kwede, kacel ki wic ci en owanogi i wi keno tyer. En olwoko jam iye ki tyene ducu, ci owanogi i wi keno tyer kacel ki gitum awaŋa. Ka man otum, otyero gityer pa lwak, Okwanyo dyel me gitum me bal ma onoŋo tye pi lwak, ci oneko, otyero pi bal, macalo gitum me bal mukwono. Ka dok omiyo gitum awaŋa, otyero kun lubo cik. Ka otyero gityer me moko kwon, ojobo poŋ ciŋe, owaŋo i wi keno tyer, omedo i kom gitum awaŋa me odiko. Oneko twon ki nyok romo bene en gitum me gityer lakwecwiny ma onoŋo tye pi lwak. Awobe pa Aron gumiyo remo bote, ci en ocoro i kom keno tyer kun rumo kome ducu. Ka dok gumiye dwolo me twon ki me nyok romo, ki moo yibe, dwolo ma oumo jam iye, olan aryo, ki okene ki i kom cwiny. Guketo dwolo i wi gok, ci owaŋo dwolo i wi keno tyer, ento gok ki em malacuc Aron okwato me bedo gityer akwata i nyim Rwot, macalo Moses ociko. Ka doŋ Aron otiŋo ciŋe malo tuŋ bot lwak, ci olamo gum i komgi, ci olor piny nia ki ka tyero gitum me bal ki gitum awaŋa ki gityer lakwecwiny ducu. Lacen Moses ki Aron gudonyo i kema me rwatte; ka gukatti woko, ci gulamo gum i kom lwak, ci deyo pa Rwot onen bot lwak ducu. Ka mac oa ki i nyim Rwot obino owaŋo gitum awaŋa ki dwolo ma i wi keno tyer, otyeko woko ducu. Ka lwak ducu oneno gudaŋŋe ki woo, gupoto piny aryeba ic. Nadab ki Abiu, awobe pa Aron, ŋat acel acel okwanyo atabo weerre me waŋo odok eceta, oketo iye mac, ka oketo iye odok eceta, ci gutyero mac mapat i nyim Rwot, kit mac ma yam pe ocikogi kwede. Ka mac oa ki i nyim Rwot, owaŋogi woko, ci guto woko ki i nyim Rwot. Ka Moses owaco bot Aron ni, “Man aye gin ma Rwot owaco, ni, ‘Abinyutte kekena i kin jo ma gitye cok kweda ni aleŋ, dok gibiketo deyo i koma i nyim lwak ducu.’ ” Ci Aron oliŋ gire mot. Ka Moses olwoŋo Micael ki Elijapan, awobe pa Ujiel omin won Aron, owaco botgi ni, “Wunyik cok, wutiŋ omegiwu ki i nyim kabedo maleŋ, wutergi woko i ne gony.” Ci gunyiko cok, gutiŋogi ki kanyigi, guterogi woko i ne gony, kit macalo Moses owaco. Moses owaco bot Aron ki bot Eleajar ki Itamar ma gin awobene ni, “Pe wugony yer wiwu oket ata lijayi, dok pe wuyec ginarukawu, wek pe wuto, dok wek kiniga pe opol i kom lwak ducu, Ento utmegiwu, jo ducu me ot pa Icrael, gitwero kok pi to ma mac pa Rwot okelo, Pe wukat woko ki i doggola ke ma me rwatte, wek pe wuto, pien moo wir pa Rwot tye i komwu.” Ci gutiyo kit ma Moses owaco botgi. Rwot oloko ki Aron kun waco ni, “Pe imat koŋo yiŋo nyo gin ma mero dano, in kacel ki awobeni, ka onoŋo wucito i kema me rwatte, wek pe wuto; meno bibedo cik matwal nio wa i kare pa likwayowu ducu. Myero wupok kin jami maleŋ ki jami ma pe leŋ, ki kin gin ma keni ki gin ma olony, Dok wubipwonyo jo Icrael ki cik ducu ma Rwot ocikogi kwede ki i dog Moses,” Ci Moses owaco bot Aron, ki bot Eleajar ki Itamar, awobene ma yam gudoŋ, ni, “Wukwany gityer me moko kwon ma odoŋ ki i kom gityer ma giwaŋo ki mac bot Rwot, ci wucam ma to bi pe iye, i ŋet keno tyer, pien en gin maleŋ makato. Myero wucam ki i kabedo mo maleŋ, pien en aye waŋ watti ki waŋ wat pa awobeni ma a ki i kom gityer ma giwaŋo ki mac bot Rwot; pien yam gicika kit meno. Ento gok ma gikwato ki em ma gityero wubicamo i kabedo mo ma olony, in ki awobeni ki anyirani kacel, pien gimiyogi gubed waŋ watti ki waŋ wat pa awobeni, ma a ki i kom gityer lakwecwiny pa jo Icrael. Em ma gityero ki gok ma gikwato-ni gibikek kacel ki gityer ma giwaŋo ki mac ma en aye dwolo, wek gikwat i nyim Rwot me gityer akwata. Bibedo meri ki pa awobeni kacel kwedi; en cik ma bibedo matwal, macalo yam Rwot ociko.” Ka Moses openyo mot pi dyel me gitum me bal, ci onoŋo ni doŋ giwaŋo woko. Akemo omake i kom Eleajar ki Itamar, awobe pa Aron ma con gudoŋŋi, owaco ni, “Piŋo pe wucamo gitum me bal ki i kabedo maleŋ? Pien en gin maleŋ makato ma gimiyowu wek wutin bal pa lwak, pi timo gin lakwany bal ki i komgi i nyim Rwot. Nenu, wa remone pe gukelo i tyelo i kabedo maleŋ. Yam myero wucam ki i kabedo maleŋ, macalo yam aciko.” Aron ogamo dog Moses ni, “Nen, tin gutyero gitum me bal ki gitum awanagi i nyim Rwot, ci gin macalo man doŋ opoto i koma, Ka kono abedo ka camo gitum me bal tin, kono obedo myero i waŋ Rwot?” Ka Moses owinyo lok meno, ci iye okwe. Rwot owaco bot Moses ki Aron ni, “Wuwac bot io Icrael ni, Man aye gin makwo ma wutwero camo ki i kin lee ducu ma tye i wi lobo. Lee ducu ma oboŋ tyengi akara, ma kin tyengi opokke, ma nyamo omen, ma i k in lee ducu wutwero camone. Ento lee ma nyamo omen nyo ma oboŋ tyengi akara ma pe wubicamo gin ene: Kinaga kadi en nyamo omen, ento obon tyene pe akara; pienno bedo keni botwu, wubikwerone. Ki oduka nyamo omen, ento oboŋ tyene pe akara; pienno bedo keni botwu, wubikwerone. Ki apwoyo bene kadi en nyamo omen, ento oboŋ tyene pe akara; pienno bedo keni botwu, wubikwero. Ki opego, kadi oboŋ tyene akara, kin tyene opokke, ento pe nyamo omen; pienno bedo keni botwu, wubikwero. Pe wucam rinogi, pe wugud wa komgi ma oto bene; gin bedo keni botwu, wubikwerogi. “Magi aye wutwero camogi ki i kin gin ducu ma bedo i pii. Gin ducu ma bedo i pii ma tye ki kiŋa ŋegi ki pok komgi, ma i nam ki ma i kulu ducu, wutwero camogi. Ento gin ducu ma tye i nam ki i kulu ducu ma pe ki kiŋa ŋegi ki pok komgi i kin gin ma corre limuk i pii ki i kin gin makwo ma bedo i pii, bedo gin me kwer botwu. Gibibedo me kwer botwu; pe wubicamo riŋogi, dok komgi mutone bene bedo me kwer botwu. Gin ducu ma i pii ma pe ki kiŋa ŋegi ki pok komgi bedo me kwer botwu, “Magi aye gin ma bibedo me kwer botwu ki i kin winyo; pe gibicamogi, gin gibedo me kwer: ocur, acut, koga, okwata, ocecu ki kit kwagi ducu; agak ki kit kwagi ducu; udu, tebu, wetwet, olwilwit ki kit kwagi ducu; tula, alwinya, adyeladyel, lagweno kulu, kikuŋ, ki ocur madito, acebe, ogoro ki kit kwagi ducu; ki putput, ki olik. “Kwidi ducu ma tye ki bwomgi, ma giwoto ki tyengi aŋwen, bedo me kwer botwu. Ento i kin kwidi ma tye ki bwomgi, ma giwoto ki tyengi aŋwen, wutwero camo gin ma tye ki tyengi mabocone ma gipye kwede i wi lobo. Wutwero ca mo magi i kingi: bonyo ki kit kwagi ducu; ocenne ki kit kwagi ducu, labari ki kit kwagi ducu; ki otwoŋo ki i kit kwagi ducu, Ento kwidi mukene ducu ma gitye ki bwomgi, ma gitye ki tyengi aŋwen, gibedo-me kwer botwu. “Magi gin ma bimiyo wudoko keni; ŋat ma ogudo kom mutone bibedo keni nie wa otyeno. Ŋat ma ot iŋo dul komgi mo muto-ni bilwoko boŋŋine ci bibedo keni nio wa otyeno. Lee ducu ma oboŋ tyene akara, ento kin tyene pe opokke, nyo ma pe nyamo omen, bedo keni botwu; ŋat ma ogudo komgi bibedo keni. Ki lee ducu ma woto ki opany tyengi, i kin lee ducu ma giwoto ki tyengi aŋwen, bedo keni botwu. Ŋat ma ogudo kom mutone bibedo keni nio wa otyeno. Dok ŋat ma ot iŋo kom mutone bilwoko boŋŋine ci bibedo keni nio wa otyeno; gin bedo keni botwu, wubikwerogi. “Man aye gin ma bedo keni botwu ki i kin gin ma nya ma corre limuk i wi lobo: oculi, oyoo adeŋ, lagwe lakaka ki kit kwagi ducu, laromo ot, ŋec, lagwe kweyo, ki laŋogo. Man aye gin makeni botwu ki i kin gin ducu ma gicorre limuk; ŋat ma ogudo komgi ka guto bibedo keni nio wa otyeno, Ka mo i kingi ma doŋ oto opoto i kom jami mo-ni, jami-nu bibedo keni, kadi weer, nyo boŋo aruka, nyo laa, nyo kicaa, jami mo keken ma gitiyo kwede pi kit tic mo-ni; myero giket i pii, ci bibedo keni nio wa otyeno, ka doŋ bibedo ma olony. Dok ka mo i kingi opoto i agulu, nyo atabo nyo kit gin mo macalo meno ma gicweyo ki lobo, gin ducu ma tye iye bibedo keni, agulu nyo atabo-gu wubineko woko. Ginacama mo ma gicamo ma tye iye, ma gionyo iye pii, bibedo keni; ki ginamata ma gimato ki i agulu-ni nyo atabo-gu bibedo keni, Jami ducu ma dul komgi mo muto-ni opoto i kome bibedo keni, kadi keno nyo tuk keno gibimuko woko; gin gudoko keni, ci gibibedo keni botwu. Kadi bed kumeno, waŋ it nyo bur taŋi me jolo pii bibedo ma olony; ento gin ducu ma ogudo kom mutone bibedo keni. Ka dul komgi muto-ni opoto i kom kodi mo me acoya, ma gibicoyo, kodi-nu bibedo ma olony; ento ka onoŋo gionyo pii i kom kodinu, ce dul komgi mo muto-ni opoto i kome, ci bedo keni botwu. “Ka lee mo ma gicamo oto woko, ŋat ma ogudo geŋŋe bibedo keni nio wa otyeno. Ŋat ma ocamo geŋ meno bilwoko boŋŋine ci bibedo keni nio wa otyeno. Dok ŋat ma otiŋo geŋ-ŋu bilwoko boŋŋine, ci bibedo keni nio wa otyeno. “Gin ducu ma nya ma corre limuk i wi lobo gin aye gin me kwer; pe gibicamone. Gin ducu ma woto kun ywane ki iye, ki gin ducu ma woto ki tyengi aŋwen, nyo ma tye ki lwak tyengi mapol, gin ducu ma nya ma corre limuk i wi lobo pe wubicamogi, pien gin aye gin me kwer. Pe wulokke wudok gin me kwer pi gin mo-ni ma nya ma corre limuk; dok pe wuballe wudok keni pigi. Pien an a Rwot Lubaŋawu; pi meno wulonnye kekenwu wubed maleŋ, pien an aleŋ. Pe wuballe wudok keni pi gin mo ma corre limuk ma lak i wi lobo. Pien an aye a Rwot ma akwanyowu woko ki i lobo Ejipt, wek abed Lubaŋawu; mumiyo wubed jo maleŋ, pien an aleŋ.” Man aye cik ma otiko lee ki winyo ki gin makwo ducu ma kwan i pii, ki gin ducu ma corre limuk i wi lobo, wek dano gupok kin gin ma keni ki gin ma olony, ki kin gin makwo ma gitwero camo ki gin makwo ma pe gitwero camo. Rwot owaco bot Moses ni, “Wac bot jo Icrael ni, Ka dako ogamo ic ce onywalo latin laco, en bibedo keni pi nino abiro; bibedo keni macalo i kare me two kwer. I nino me aborone en aye gibiliro iye del kom nyim latin me co. Dako dok bimedde pi nino pyeradek wiye adek wek olonnye pi remo me kwerre; pe bigudo gin mo maleŋ, pe bicito i ot pa Lubaŋa, nio ka kare me lonnyene otum. Ento ka onywalo latin nyako, en bibedo keni macalo i kare me two kwer pi cabit aryo; dok bimedde pi nino pyerabicel wiye abicel wek olonnye pi remo me kwer mere. “Ka kare me lonnyene otum, ka nyo pi awobi nyo pi nyako, dako bikelo latin romo ma ditte romo mwaka acel bot ajwaka i doggola kema me rwatte pi gitum awaŋa, ki latin akuri, nyo amam, pi gitum me bal. Ajwaka bityero i nyim Rwot, bitimo gin lakwany bal ki i kom dako, ci doŋ bilonnye ki i remone ma ocwer. Man aye cik ma mako dako ma onywalo latin laco nyo ma nyako. Ka noŋo latin romo oloye, en bitero amam aryo, nyo litino akuri aryo, acel pi gitum awaŋa, acel pi gitum me bal: ajwaka bitimo gin lakwany bal ki i kome, ci doŋ bedo ma olonnye.” Rwot owaco bot Moses ki Aron ni, “Ka dano mo del kome okwot, nyo orugo, nyo orobo, ci odoko two me dobo i del kome, ci myero gikele bot ajwaka Aron, nyo bot ŋat acel i kin awobene ma gin aye ajwagi. Ajwaka biŋiyo two ma orobo i del kome-ni; ci ka yer ma i del kome ma orobo-ni odoko lwar matar, dok ka twone onen ni ogolle matut ma okato del kome, ci meno two dobo, Ka ajwaka doŋ oniyo kome, ci bituco ni, kome ki keni, Ento ka del kome-ni orobo matar kun nen ni pe ogolle matut okato del, dok ka yer ma tye iye bene pe olokke odoko lwar, ci ajwaka bitweyo dano ma latwo-ni i ot pi nino abiro. I nino me abirone ajwaka dok biŋiyo kome, ci ka onen bote ni two doŋ ocuŋ, pe onya omedde i del kome, ci ajwaka bimedo tweyo dano-nu i ot pi nino abiro mukene. I nino me abirone ajwaka dok biŋiyo kome, ci ka two ma orobo kome-ni doŋ ojwik woko, dok two pe on ya omedde i del kome, ci ajwaka bituco ni kome pe ki keni; orugo aruga noŋo. Dano-nu myero olwok boŋŋine ci bibedo ma olony. Ento ka ce kome ma orugo-ni onya omedde i delkome, ma doŋ onoŋo onyutte kene bot ajwaka pi lonnyene, ci en myero dok obin i nyim ajwaka, Ajwaka biŋiyo, ci ka onoŋo ni kome ma orugo-ni doŋ onya omedde i del kome, ajwaka bituco ni kome ki keni, meno two dobo. “Ka dano mo two dobo omako gibikele bot ajwaka. Ajwaka biŋiyo, ci ka del kome mo tye ma okwot ma okwor matar, ma otyeko loko yer odoko lwar, dok bur odet manyen ka ma okwot-ti, meno noŋo two dobo ma yam ori i del kome. Ajwaka bituco ni kome ki keni; pe bitweyone i ot, pien kome ki keni. Ka dobo ocorre i del kome, ma two dobo oromo del kom dano ma latwo-ni, nia i wiye nio wa i tyene, ma ajwaka twero neno ducu, ci ajwaka biŋiyo. Ka dobo oromo kome ducu, ci ajwaka bituco ni olony i kom two meno; noŋo kome ducu okwor matar, kome pe ki keni. Ento ka bur odet ma nen i kome, ci kome bibedo ki keni, Ajwaka biŋiyo bur mudet manyen-ni, ci bituco ni kome ki keni; bur mudet manyen bedo keni, meno two dobo. Fnto ka ce bur mudet manyen-ni dok olokke odoko matar, ci bidwogo bot ajwaka. Ajwaka biŋiyo kome, ci ka two odoko matar, ajwaka bituco ni latwo kome pe ki keni; en doŋ olonnye. “Ka ŋatti i mo odeke okwot i del kome, ci ocaŋ obone woko, ka ce lacen dok ojer okwot i waŋ odeke-nu ma okwor matar, nyo orobo matar kun bedo makwarkwar, ci myero ginyut bot ajwaka. Ajwaka biŋiyo, ci ka onen ni ogolle matut okato del kom, ki yer bene odoko lwar, ajwaka bituco ni kome ki keni: meno two dobo ma otyer i waŋ odeke. Ento ka ajwaka oniyo, ci yer ma tye iye pe lwar, dok pe ogolle matut ma okato del kom, ento doŋ ojwik woko, ci ajwaka bitweyo dano-nu i ot pi nino abiro, Ka onya omedde i del kome, ci ajwaka bituco ni kome ki keni, pien meno two. Ento ka ce waŋe ma orobo-ni ogik i kabedo acel ma pe on ya omedde, meno po yo waŋ odeke keken, ci ajwaka bituco ni kome pe ki keni. “Nyo ka dano mo mac owaŋo, opwaco del kome, ce bur odet manyen i waŋ ka ma opwac-ci, ci orobo matar kun obedo makwarkwar, nyo okwor matar, ci ajwaka biŋiyo, Ka yer ma i waŋe odoko lwar, dok onen ni ogolle matut, okato del kom, meno two dobo otyer i waŋ ka ma opwac-ci. Ajwaka bituco ni kome ki keni; meno two dobo. Ento ka ajwaka oniyo, ci yer ma i wane ma orobo-ni pe lwar, dok pe ogolle matut ma okato del kom, ento ojwik woko, ci ajwaka bitweyo dano-nu i ot pi nino abiro. I nino me abirone ajwaka biŋiyo; ka tye ka nya medde i del kome, ci ajwaka bituco ni kome ki keni; meno two dobo, Ento ka ce waŋe ma orobo-ni ogik i kabedo acel ma pe onya omedde i del kome, ento ojwik woko, meno gin ma okwot i waŋ ka ma opwac keken; ajwaka bituco ni ko me pe ki keni, pien meno waŋ po yo ka ma mac owaŋo. “Ka laco mo nyo dako mo two tye i wiye nyo i yer tike, ajwaka biŋiyo twone. Ka onen ni ogolle matut okato del kom, dok yer ma tye iye odoko ocwakocwak, dok ojwer woko, ci ajwaka bituco ni kome ki keni; meno two akukuc, en dobo me wic nyo me yer tik. Ka ajwaka oniyo two akukuc, ka onen ni ogolle matut okato del kom, kun yer macol pe iye, ci ajwaka bitweyo dano meno ma tye ki two akukuc i ot pi nino abiro. I nino me abirone ajwaka bi niyo twone; ka akukuc pe on ya omedde, dok pe tye iye yer ma obedo ocwakocwak, dok akukuc pe onen ni ogolle matut okato del kom, ci dano-nu bilyelo wiye woko, ento pe bilyelo ka ma obedo akukuc-ci. Ajwaka bimedo tweyo dano meno i ot pi nino abiro mukene. I nino me abirone ajwaka biŋiyo akukuc; ka akukuc pe onya omedde i del kome, kun nen ni pe ogolle matut okato del kom, ci ajwaka bituco ni ko me pe ki keni. En bilwoko boŋŋine ci bibedo ma olony. Ento ka ce akukuc onya omedde i del kome i ŋe lonnyene, ci ajwaka biŋiyo kome, Ka akukuc omedde i del kome, ajwaka pe dok oyeny yer ma obedo ocwakocwak; kome ki keni. Ento ka onen bote ni akukuc doŋ ocuŋ, dok yer macol tye olot iye, akukuc doŋ ocaŋ woko, en doŋ olonnye; ajwaka bituco ni kome pe ki keni. “Ka laco mo nyo dako mo del kome orobo, kome oonyo ma okwor matar, ajwaka biŋiyo. Ka del kome orobo, kome oonyo ma pe okwor matar twatwal, noŋo del ko me oonyo odugo aduga keken; kome pe ki keni, “Ka yer wi laco mo otal oo woko, en bedo lawiye otal, ento kome pe ki keni. Dok ka laco mo yer olwer woko ki i tur nyime nyo i teŋ wiye, en bedo ma wiye otal i tur nyime, ento kome pe ki keni. Ento ka tye two mo i wiye nyo i tur nyime mutal-li ma orobo matar kun obedo makwarkwar, meno two dobo aye ma ocorre i wiye ma otal-li, nyo i tur nyime ma otal-li. Ajwaka biŋiyo kome: ci ka two ma okwoto wiye mutal-li nyo tur nyime mutal-li obedo matar makwarkwar, kun nen calo two dobo ma i del kom dano, en dano ma ladobo, ko me ki keni. Ajwaka myero otuc ni kome ki keni; twone tye i wiye. “Ladobo ma tye ki two dobo myero oruk boŋŋi ma oket, bigonyo yer wiye ket ata lijayi, ci umo del doge mamalo woko, ka daŋŋe ni, ‘Koma ki keni, koma ki keni.’ En bibedo keni pi kare ducu me twone; kome ki keni. En bibedo i kabedone kene, woko i ŋe gony. “Ka ce two dobo tye i kom ginaruka mo, kadi bed me boŋo yer romo nyo boŋo camanini, i kom uci ma atirre nyo i kom uci ma ariine, nyo i kom laa, nyo i kom gin mo ma gitiyo ki laa, ka two nen atworo-atworo nyo makwarkwar i kom boŋo, i kom uci ma atirre nyo i kom uci ma ariine, nyo i kom gin mo ma gitiyo ki laa, meno two dobo, myero ginyut bot ajwaka. Ajwaka biŋiyo two meno, ci bitweyo wi jami ma two tye iye-ni pi nino abiro. I nino me’ abirone en biŋiyo two-nu. Ka two onya omedde i ginaruka, i kom uci ma atirre nyo i kom uci ma ariine, nyo i kom laa, kadi bed laa ma giyubo pi kit tic mo, meno aye dobo ma ŋuno jami; jami-nu keni, Ajwaka biwaŋo ginaruka meno, kadi bed two tye i kom uci ma atirre nyo i kom uci ma ariine, i boŋo yer romo nyo i boŋo camanini, nyo i kom gin mo ma gitiyo ki laa, pien meno two dobo ma nuno jami; gibiwaŋo woko awaŋa ki mac. “Ka ajwaka oniyo, ce two pe onya omedde i ginaruka, i kom uci ma atirre nyo i kom uci ma ariine, nyo i kom gin mo ma gitiyo ki laa, ci ajwaka biciko ni gilwok jami ma two tye iye-ni, ci bimedo tweyo wiye pi nino abiro mukene. Dok ajwaka biŋiyo jami ma two tye iye-ni i ne lwokogi. Ka raŋi pe olokke ka ma two tye iye-ni, kadi bed two pe onya omedde, jami-nu keni; wubiwaŋo woko awaŋa ki mac, kadi bed two oŋuno tuŋ ŋeye nyo tuŋ iye. “Ento ka ce ajwaka oniyo, ci two pe nen twatwal i ne lwokone, en biyeco dul meno woko ki i kom ginaruka, nyo ki i kom laa, ki i kom ucine ma atirre nyo i kom uci ma ariine. Lacen ka two dok onen i kom ginaruka-nu, nyo i kom ucine ma atirre nyo i kom uci ma ariine, nyo i kom gin mo ma gitiyo ki laa, noŋo tye ka nya medde; gin ma two tye iye-ni wubiwano woko awaŋa ki mac. Ento ginaruka, kadi bed uci ma atirre nyo uci ma ariine, nyo gin mo ma gitiyo ki laa, ma two oa i kome ka ilwoko, myero gilwok tyen me aryo, ci bibedo ma olonnye.” Man aye cik ma mako two dobo ma i kom ginaruka me boŋo yer romo nyo boŋo camanini, i kom uci ma atirre nyo i kom uci ma ariine, nyo i kom gin mo ma gitiyo ki laa, pi ŋolo ka olony nyo keni. Rwot owaco bot Moses ni, “Man aye bibedo cik ma mako ladobo i nino me lonnyene. Gibikele bot ajwaka, ci ajwaka bikato woko i ŋe gony ka niyo kome. Ka two dobo doŋ ocaŋ woko ki i kome, ci ajwaka biciko ni gikel winyo makwo aryo ma olony, te lokke ni, winyo ma gitwero camogi, ki yat cedar, uci makwar, ki anyero, pi dano ma gimito lonyo-ni. Ajwaka biciko ni gitwom pii ma mol, giony i otako, ci ginek winyo acel ki malo i wi pii meno. En bimako winyo makwo kacel ki yat cedar ki uci makwar-ri ki anyero, ci lutogi kacel ki winyo makwo i remo winyo ma onoŋo gineko ki malo i wi pii mamol-li. Bikiro remo i kom dano ma gimito lonyo i kom dobo-ni tyen abiro; lacen bituco ni en doŋ olonnye, ci biweko winyo makwo-ni tuk dok woko i tim. Ci dano ma obino pi lonnye bilwoko boŋŋine, bilyelo yer kome ducu, ka lwoko kome ki pii, ci bibedo ma olonnye. I ŋe meno en doŋ cako bino i gony, ento bibuto woko i ne kemanepi nino abiro. I nino me abirone bilyelo yer wiye ducu, dok bilyelo yer tike ki yer pyen waŋe ki yer kome ducu. Ka dok bilwoko boŋŋine, bilwoko kome ki pii, ci doŋ bedo ma olonnye. “Dok i nino me aborone en bitero litino nyogi romi aryo ma komgi pe ki mwonyo, ki bwoŋ romo ma ditte romo mwaka acel, ki gityer me moko kwon ma romo agwata adek, moko mapwotte ma girubo ki moo, ki moo ma romo cupa acel. Ajwaka ma lonyo en-ni bitero dano ma gilonyo-ni, cibo kacel ki jamine i nyim Rwot i doggola kema me rwatte. Ajwaka bikwanyo nyok romo acel, bityero me gitum pi alii, kacel ki cupa moo acel-lu, ci kwatogi me bedo gityer akwata i nyim Rwot. Bineko latin romo-nu i kabedo ma gineko iye gitum pi bal ki gitum awaŋa, i kabedo maleŋ, pien gitum me alii rom ki gitum me bal, ducu bedo pa ajwaka; en gin maleŋ makato. Ajwaka bigwelo remo me gitum me alii, bireyo i ogwilo it dano ma gilonyo-ni, malacuc, ki i kom twon nyig ciŋe malacuc, ki i twon nyig tyene malacuc. Ka ajwaka bikwanyo moo ma romo cupa acel-li, bitono manok i dye ciŋe malacam, ka luto lwet ciŋe malacuc i moo ma i dye ciŋe malacam-mi, ci kiro moo ki nyig ciŋe tyen abiro i nyim Rwot. Moo ma odon i ciŋe ajwaka bireyo i ogwilo it daŋo ma gilonyo-ni malacuc, ki i twon nyig cine malacuc, ki i twon nyig tyene malacuc, i kom remo me gitum me alii. Moo ma odoŋ i ciŋ ajwaka en bidunyo i wi dano ma gilonyo-ni, ka ajwaka bitimo gin lakwany bal ki i kome i nyim Rwot. Ajwaka bityero gitum me bal me kwanyo bal ki; kom dano ma gimito lonyo keni ma i keme-ni. Lacen en bineko gitum awaŋa, ci ajwaka bityero gitum awaŋa kacel ki gitum me moko kwon i wi keno tyer, Kit meno ajwaka bitimo gin lakwany bal ki i kome, ci doŋ bilonnye. “Ento ka en lacan ma noŋo meno ducu oloye, en bikwanyo latin nyok romo acel obed gitum me alii me akwata, pi kwanyo bal ki i kome, ki agwata moko kwon acel me moko mapwotte ma girubo ki moo pi gityer me moko kwon, ki moo ma romo cupa acel; dok amam aryo nyo litino akuri aryo, macalo en romo noŋone; acel bibedo gitum me bal, acel bibedo gitum awaŋa, I nino me aborone en bikelo bot ajwaka pi lonnyene i doggola kema me rwatte i nyim Rwot. Ajwaka bikwanyo latin romo me gitum me alii, kacel ki moo ma romo cupa acel-li, bikwatogi me bedo gityer akwata i nyim Rwot. Ka dok bineko latin romo me gitum me alii; ci ajwaka bigwelo remo me gitum me alii, bireyo i ogwilo it dano ma gilonyo-ni malacuc, ki i twon nyig ciŋe malacuc, ki i twon nyig tyene malacuc. Ka ajwaka bitono moo manok i dye ciŋe malacam, ci bikiro moo ma i dye ciŋe malacam-mi tyen abiro i nyim Rwot ki nyig ciŋe malacuc. Ka ajwaka bireyo moo ma i ciŋe malacuc i ogwilo it dano ma gilonyo-ni, ki i twon nyig ciŋe malacuc, ki i twon nyig tyene malacuc, ka ma gireyo iye remo me gitum me alii. Moo ma odoŋ i ciŋe ajwaka bidunyo i wi dano ma gilonyo-ni, me lakwany bal ki i kome i nyim Rwot. I kom amam nyo litino akuri ma en romo noŋone, en bityero acel pi gitum me bal, acel pi gitum awaŋa, kacel ki gityer me moko kwon; ci ajwaka bitimo gin lakwany bal ki i kom dano ma gilonyoni, i nyim Rwot. Man aye cik ma mako dano ma tye ki two dobo, ma pe romo noŋo gityer ducu ma giciko pi lonnyene.” Rwot owaco bot Moses ki Aron ni, “Ka doŋ wuo i lobo Kanaan ma abimiyowu me bedo mewu, ka ce aketo two dobo i ot mo i lobo ma abimiyowuni, ci won ot bicito tito bot ajwaka kun waco ni, ‘I oda nen calo tye iye kit two mo.’ Ajwaka biciko ni gicok jami, gikel woko wek ot odoŋ ma iye nono ma noŋo peya en ajwaka odonyo iye ka ŋiyo two, wek pe gituc ni jami ducu ma tye i ot bedo keni; lacen ajwaka bidonyo ka ŋiyo ot. En biŋiyo two; ka ce twone tye i kor ot kun omido ma obedo atworo atworo, nyo omido makwarkwar, ka nen ni odonyo wa matut i kor ot, ci ajwaka bikato woko ki i ot meno, cito i doggolane, cego dog otte woko pi nino abiro. I nino me abirone ajwaka dok dwogo ci neno. Ka two onya omedde i kor ot, ci ajwaka biciko ni gimuk matafali got ma two omido iye-ni, gibolgi woko i ne gaŋ i kabedo ma pe olony. Dok bimiyo gicwero i ot rumo woko ducu, lobo ma gicwero i kor ot-ti gibionyo woko i ne gaŋ i kabedo ma pe olony. Ka dok gibikelo matafali got mukene, giketogi i kabedo ma gikwanyo iye godi-ni, ka dok gikelo lobo mukene, ci gipuyo ki ot meno. “Ka two dok otuc i ot meno, ma onoŋo doŋ gityeko muko godi woko, dok gicwero kor ot, gipuyo odoco, ci ajwaka dok bidok ka nenone. Ka two onya omedde i ot aye, meno two dobo ma ŋuno kor ot; ot-ti keni. Gibimuko ot meno gireto woko piny, godine ki baone ki lobo ma gipuyo kwede ducu, gibiterogi woko i ŋe gaŋ i kabedo ma pe olony. Dano ma odonyo i ot meno ma onoŋo gicego woko-ni bibedo keni nio wa otyeno Dano ma obuto piny i ot meno bilwoko boŋŋine; dok ŋat ma ocamo i at-tu bilwoko boŋŋine, “Ento ka ajwaka obino, oŋiyo ot ce onoŋo two pe onya omedde nia ma gipuyo-ni, ci ajwaka bituco ni otte pe keni, pien twone doŋ ocaŋ. Pi lonyo ot, en bikwanyo litino winyo aryo, kacel ki yat cedar ki uci makwar ki anyero. Gibitwomo pii ma mol i otako, ci en bineko winyo acel ki malo i wi pii meno. Bimako yat cedar ki anyero ki uci makwar, kacel ki winyo makwo, ci lutogi i remo winyo ma onoŋo gineko malo ki i wi pii mamol-li, ci kiro kom ot tyen abiro. Kit meno en bilonyo ot ki remo winyo, kacel ki pii mamol-li, ki winyo makwo, ki yat cedar, ki anyero ki uci makwar-ri, ci biweko winyo makwo tuk dok woko i tim i ne gaŋ. Kit meno en bitimo gin lakwany bal ki i kom ot, ci bibedo ma olony.” Man aye cik ma mako two dobo ducu: pi two akukuc, pi two dobo ma i kom ginaruka nyo i kom ot, nyo pi gin ma okwot, nyo orugo, nyo orobo del kom dano, pi nyuto ka obedo keni nyo ma olony. Man aye cik ma mako dobo, Rwot owaco bot Moses ki Aron ni, “Wuwac bot jo Icrael ni, Ka laco mo kome cwer tut, cwer tutte miyo kome bedo ki keni. Dok man aye cik ma mako dano ma kome ki keni pi cwer tut, ka nyo kome mol tut, nyo ka tut ma cwer i kome ocony, noŋo kome ki keni. Kitanda ducu ma dano ma kome cwer tut obuto iye bibedo keni, ki gin ducu ma en obedo iye bibedo keni. Ŋat ma ogudo kom kitandane myero olwok boŋŋine, olwok kome ki pii, ci bedo keni nio wa otyeno. Ŋat ma obedo i kom gin ma dano ma kome cwer tut obedo iye bilwoko boŋŋine, lwoko kome ki pii, ci bedo keni nio wa otyeno. Ŋat ma ogudo kom dano ma kome cwer tut-ti bilwoko bomji ne, lwoko kome ki pii, ci bedo kem nio wa otyeno. Ka ŋat ma kome cwer tut oŋulo laa i kom dano mo ma olony, dano-nu bilwoko boŋŋine, lwoko kome ki pii, ci bedo keni nio wa otyeno. Kom mo me bedo i wi kinaga ma dano ma kome cwer tut obedo i wiye bibedo keni. Ka ŋat ma ogudo gin mo ma en obedo nyo obuto iye, bibedo keni nio wa otyeno; ki ŋat ma otiŋo jami meno bilwoko boŋŋine, bilwoko kome ki pii, ci bedo keni nio wa otyeno, Ka dano ma kome cwer tut ogudo kom dano mo ma onoŋo pe olako ciŋe ki pii, dano-nu bilwoko boŋŋine, lwoko kome ki pii, ci bedo keni nio wa otyeno. Ka dano ma kome cwer tut ogudo kom agulu mo, ci agulune gibineko woko, ki jami macalo weer bao ducu gibilako komgi ki pii. “Ka dano mo ma kome cwer tut kome doŋ olony, ci bikwano nino abiro pi lonnyene, ka bilwoko boŋŋine, lwoko kome i pii mamol, ci bedo ma ko me pe ki keni. I nino me aborone en bitero amam aryo nyo litino akuri aryo, bibino i nyim Rwot i doggola kema me rwatte, bimiyogi bot ajwaka. Ajwaka bityerogi, acel me gitum me bal, acel me gitum awaŋa; kit meno ajwaka bitimo gin lakwany bal ki i kome i nyim Rwot pi kome ma obedo ka cwer tut-ti. “Ka laco mo kodi me co ne omol i kome, en bilwoko kome ducu ki pii, ci bedo keni nio wa otyeno. Ginaruka nyo pyen ducu ma kodine me co omol i kome myero gilwok ki pii, ci bedo keni nio wa otyeno. Ka laco obuto ki dako ci kodi me co odonyo i kome, gin aryo ducu gibilwoko komgi ki pii, ci gibibedo keni nio wa otyeno, “Dako ma remo mol ki i kome i kit me nino ducu bibedo ki kwerre pi nino abiro; dano ducu ma ogudo kome bibedo keni nio wa otyeno, Gin ducu ma en obuto iye i kare ma tye ki kwer bibedo keni, ki gin ducu ma en obedo iye bibedo keni. Ŋat ma ogudo kitandane myero olwok boŋŋine, olwok kome ki pii, ci bedo keni nio wa otyeno, Ŋat ma ogudo kom gin ma en obedo iye bilwoko boŋŋine, lwoko kome ki pii, ci bedo keni nio wa otyeno. Kadi bed kitanda nyo gin mo ma en obedo iye, dano ma ogudo bibedo keni nio wa otyeno. Ka laco mo obuto kwede, ce kwerre ogudo kome, en bibedo keni pi nino abiro, dok kitanda ducu ma danonu obutoiye bibedo keni. “Ka dako mo remo mol ki i kome pi nino mapol, ma pe i i kare me two kwerre keken, nyo ka remone mol ma okato kare me two kwerre, en bimedde bedo keni pi kare ducu ma remone mol; en bibedo keni macalo i kare me two kwer. Kitanda ducu ma en obuto iye, i kare ducu ma remone mol-li, bibedo bote macalo kitanda me two kwerre; dok gin ducu ma en obedo iye bibedo keni, macalo bedo keni i kare me two kwer. Ŋat ma ogudo jami magi bibedo keni; myero olwok boŋŋine olwok kome ki pii, ci bedo keni nio wa otyeno. Ento ka dako kome doŋ olony i kom kwerre, en bikwano nino abiro, lacen en bibedo ma kome pe ki keni. I nino me aborone en bitero am am aryo nyo litino akuri aryo, bikelogi bot ajwaka i doggola kema me rwatte. Ajwaka bityero acel me gitum me bal, acel me gitum awaŋa; kit meno ajwaka bitimo gin lakwany bal ki i kome i nyim Rwot pi remone ma omol ma omiyo en bedo keni. “Myero wumi jo Icrael gugwokke i kom gin ma miyogi bedo keni kit meno, wek pe guto ma gitye keni pi balo kemana ma tye i kingi,” Man aye cik ma mako laco ma kome cwer tut ki ma kodi me co omol i kome ma omiyo en odoko keni, ki dako bene ma two two kwer; man aye cik ma mako dano ducu, laco nyo dako, ma kome cwer tut nyo remo, ki laco bene ma obuto ki dako ma kome ki keni. Rwot oloko bot Moses i kare ma doŋ awobe pa Aron aryo gutyeko to, pien onoŋo gunyiko cok i nyim Rwot ci guto woko. Ci Rwot owaco bot Moses ni, “Tit ki omeru Aron ni pe obed ka donyo nino ducu i kabedo maleŋ ma boŋo kicika oumo i nyim kom me kica ma tye i wi canduk: wek pe oto; pien abinen i wi kom me kica i po!. Ento Aron bidonyo i kabedo maleŋ ki gin magi: bidonyo iye ki wod twon pi gitum me bal, ki nyok romo pi gitum awaŋa, En biruko kanyi maleŋ me boŋo camanini, biruko pali boŋo camanini i kome, bitweyo pyere ki kitambara boŋo camanini, ka tweyo kitambara adwala i wiye; man aye gin boŋŋi aruka maleŋ. En bilwoko kome ki pii, ka doŋ birukogi. Dok en bigamo ki bot lwak jo Icrael nyogi dyegi aryo pi gitum me bal, ki nyok romo acel me gitum awaŋa. “Aron bityero twon obed gitum me bal ma otiko en, kun timo gin lakwany bal ki i kome ki i kom jo ma i ode. Dok en bikelo dyegi aryo-nu, biketogi i nyim Rwot i doggola kema me rwatte. Ci Aron bibolo kwir i kom nyogi dyegi aryo-nu, kwir acel pi Rwot ki kwir mukene pi Ajajel, Aron bikelo dyel ma kwir pa Rwot opoto i kome-ni bityero me bedo gitum me bal. Ento dyel ma kwir pa Ajajel opoto i kome-ni gibikelo makwo i nyim Rwot pi timo gin lakwany bal i kome, wek gicwale woko ceŋ i tim bot Ajajel. “Aron bityero twon me bedo gitum me bal ma otiko en kun timo gin lakwany bal ki i kome ki i kom jo ma i ode; bineko twon obed gitum me bal ma otiko eno En bikwanyo atabo weer me waŋo odok eceta ma opoŋ ki lodi mac ma okwanyo ki i wi keno tyer ma i nyim Rwot, ki odok eceta ma ŋwece kur ma giluro matitino poŋ ciŋ aryo, ci bikelone i tyelo ka ma boŋo kicika oumo-ni. Bionyo odok eceta ma ŋwece kur-ri i mac ma i nyim Rwot, wek yito me odok eceta ma ŋwece kur-ri oduny macalo pol oum kom me kica ma bedo i wi canduk lok me caden, wek pe oto. Ka dok bikwanyo remo twon manok, ci kiro ki lwet ciŋe i kom kom me kica tuŋ nyime, dok bikiro remo ki lwet ciŋe tyen abiro piny i nyim kom me kica. “Ka man otum, bineko dyel me gitum me bal ma onoŋo tye pi lwak, ci kelo remone i tyelo ma boŋo kicika oumo-ni, ci timo remone kit ma otimo ki remo twon-ni; bikiro i wi kom me kica ki i nyim kom me kica. En bitimo gin lakwany bal ki i kom kabedo maleŋ kit meno, pi keni pa jo Icrael, ki pi tim aranyigi ki balgi ducu. Dok bitimo kit meno bene ki kema me rwatte ma bedo kwedgi i dye keni megi ducu. I kare ma en donyo i kabedo maleŋ ka timo gin lakwany bal, dano mo pe obed i kema me rwatte, nio ka doŋ okato woko ma otyeko timo gin lakwany bal ki i kome ki i kom jo ma i ode, ki i kom jo Icrael mucokke ducu. Lacen en bikato woko i nyim keno me tyer ma tye i nyim Rwot, ci timo gin lakwany bal ki i kome. Bikwanyo remo twon, ki remo dyel, ci reyo i kom ten keno aŋwen me keno tyer, rumo kome ducu. Ka dok bikiro remo iye ki lwet ciŋe tyen abiro kun lonyo, kwero doko maleŋ pi kwanyo keni pa jo Icrael ducu ki i kome, “Ka doŋ otyeko timo gin lakwany bal ki i kom kabedo maleŋ, ki kema me rwatte, ki keno tyer, en bikelo dyel makwo. Aron biketo cine aryo ducu i wi dyel, kun tuco i kome bal ducu ma jo Icrael gutimo, ki tim aranyigi ki kwa balgi ducu, Biketogi i wi dyel-lu, ci cwale woko kwede i tim, kun dano mo ma doŋ giyero aye tero. Dyel bitiŋo balgi ducu i kome, cito kwede wa i t im ata; ci dano-nu bigonyo dyel cito woko i tim. “Aron dok bidonyo i kema me rwatte, bilunyo boŋŋi camanini woko ma onoŋo oruko i kare ma en cito i kabedo maleŋ-ŋi, ci wekogi kunnu. Ka bilwoko kome ki pii i kabedo mo maleŋ, ka ruko boŋŋine i kome, ci katti woko, tyero gitum awaŋane, ki gitum awaŋa pi lwak, ci timo gin lakwany bal ki i kome ki i kom lwak. Dwolo me gitum awaŋa en biwaŋo woko i wi keno tyer. Ŋat ma otero dyel, ocwalo bot Ajajel, bilwoko boŋŋine, lwoko kome ki pii, ka lacen bibino i gony, Twon me gitum me bal ki dyel me gitum me bal, ma onoŋo gitero remogi i kabedo maleŋ ka timo gin lakwany bal, gibiterogi woko wa i ŋe gony; pyengi ki riŋogi ki wee igi gibiwaŋo woko ki mac. Ŋat ma owaŋo bilwoko boŋŋine, lwoko kome ki pii, ka lacen en bibino i gony. “Man bibedo cik matwal botwu, ni, i dwe me abiro, i nino dwe me aparre, wubikumo ki toncwiny. Pe wubitiyo tic mo, kadi anywalli me lobo, kadi labedo ma bedo i kinwu. Pien i nino meno aye gibitimo iye gin lakwany bal ki i komwu me lonyowu; myero wubed ma wulonnye i nyim Rwot ki i kom balwu ducu. En aye bedo botwu cabit me yweyo mot, ci wubikumo ki toncwiny; man aye cik ma bedo matwal. Ajwaka ma giwiro ki moo ka giketo en i dog ticce me bedo ajwaka, kun leyo kaka wonne, bitimo gin lakwany bal, kun ruko boŋŋi aruka maleŋ me boŋo camanini. En bitimo gin lakwany bal ki i kom kabedo maleŋ, dok bitimo gin lakwany bal ki i kom kema me wratte ki i kom keno tyer, Ka dok bitimo gin lakwany bal ki i kom ajwagi, ki i kom jo ducu mucokke. Man bibedo cik botwu matwal, ni, myero gitim gin lakwany bal ki i kom jo Icrael i mwaka acel kicel, pi balgi ducu.” Ci Moses otimo kit ma Rwot ocike kwede. Rwot owaco bot Moses ni, “Wac bot Aron ki awobene ki bot jo Icrael ducu ni, Man aye gin ma Rwot ociko. Ka dano mo me ot pa Icrael oneko twon nyo lat in romo nyo dyel ki i dye gony, nyo ka oneko woko ki i ne gony, kun pe okelo i doggola kema me rwatte me tyerone obed mot pa Rwot i nyim kema pa Rwot, ci gibikwano alii me remo i wi dano meno, Pi oyo remo, waŋ dano meno birwenyo woko ki i kin lutugi. Man giciko wek jo Icrael gukel gitumgi ma gibedo ka nekogi i dye bar; gikelgi bo! Rwot, bot ajwaka, i doggola kema me rwatte, ginekgi me bedo gityer lakwecwiny bot Rwot, Ajwaka bikiro remone i wi keno tyer pa Rwot i doggola kema me rwatte, biwaŋo dwolo obed gin ma ŋwece kur me yomo cwiny Rwot. Pe doŋ gibitumo gitumgi bot jogi ma calo nyogi oyima ma gitye ka worogi ki tim kwele kwele. Man bibedo cik botgi matwal wa i kare pa likwayogi ducu. “Ci ibiwaco ki gin ni, Dano mo me ot pa Icrael, nyo ki i kin lubedo ma bedo i kingi, ma otyero gitum awaŋa, nyo gitum mo ma pe okelo i doggola kema me rwatte pi tumo bot Rwot, dano meno waŋe birwenyo woko ki i kin lutugi. “Ka dano mo me ot pa Icrael, nyo ki i kin lubedo ma bedo i kingi, ocamo remo mo, abiketo waŋa i kom dano meno ma ocamo remo-ni, dok abimiyo waŋe rwenyo woko ki i kin lutugi, Pien kwo pa riŋo tye i Temo; an doŋ atyeko miyone botwu i wi keno tyer pi kwanyo bal ki i kom tipowu pien remo aye gin ma kwanyo bal, pi kwo ma tye iye-ni, En mumiyo awaco bot jo Icrael ni, Dano mo i kinwu pe ocam remo. Dano mo bene ki i kin jo Icrael, nyo ki i kin lubedo ma bedo i kingi, ma omako lee nyo winyo mo ma gicamo, ka en owoto ka dwar, bionyo remone woko piny i ŋom, ci umo woko ki lobo. “Pien kwo pa lee-gu ducu en aye remone; mumiyo awaco ki jo Icrael ni Pe wucam remo pa gin mo, pien kwo pa gin makwo ducu en remone; ŋat ma ocamo wane birwenyo woko. Dok ka dano mo ocamo geŋ ma oto kene, nyo lee ma ŋuu omwodo, kadi anywalli me lobo, kadi labedo, bilwoko boŋŋine, lwoko kome ki pii, ci bedo keni nio wa otyeno, ka doŋ bedo ma olony. Ento ka pe olwoko boŋŋine, nyo pe olwoko kome, ci bal bidok i wiye.” Rwot owaco bot Moses ni, “Wac bot jo Icrael ni, An a Rwot Lubaŋawu. Pe wubitimo macalo gitimo i lobo Ejipt ma yam wubedo iye-ni; pe bene wubitimo kit macalo gitimo i lobo Kanaan ka ma atye ka terowu iye-ni. Pe wulub cikgi. Myero wuti gin ma aciko, wumak cikka, wulubi. An a Rwot Lubaŋawu. Pi meno, wubimako cikka ki gin ma aŋolo ducu, Pi timo k it meno dano bikwo; an a Rwot. “Dano mo pe onyik cok ki dako ma watgi me bedo kwede, An a Rwot. Pe ibibedo ki meni, pien miyo iketo lewic i kom woru; en aye meni, pe ibiketo lewic i kome, Pe ibibedo ki ci-woru; pe, iket lewic i kom woru kumeno, Pe ibibedo ki lameru ma nya pa woru nyo nya pa meni, kadi ma ginywalo paco nyo ma ginywalo ka mukene. Pe ibibedo ki nya pa wodi nyo nya pa nyari, pien miyo ikelo lewic i komi keni. Pe ibibedo ki nya pa ci-woru ma woru aye onywalo, pien en lameru kikome. Pe ibibedo ki wayu, pien en wat ma i ot pa woru kikome. Pe ibibedo ki lamiŋ meni, pien en wat ma i ot pa meni kikome. Pe ibibedo ki ci-omin woru, pe ibinyiko cok ki dakone, pien en ci-omin woru, Pe ibibedo ki ci-wodi, pien en dako pa wodi, pe ibibedo kwede. Pe ibibedo ki ci-omeru, ma omeru aye bedo kwede. Pe ibibedo ki dako mo, ka idodo ki bedo ki nyare; pe ibitero nya pa wode, nyo nya pa nyare, me bedo kwede. Pe ibinyomo yweri obed nyek laminne, kun ibedo kwede ma lammne pud KWO. “Pe ibinyiko cok ki dako me bedo kwede i kare ma en tye ki kwer, ma peya olonnye. Pe ibibuto ki dako pa lawoti me bedo kwede, miyo ijerre kekeni, Pe ibityero latinni mo me awaŋa ki mac bot jok Molek, pe ibipyedo nyiŋ Lubaŋani kulu; an a Rwot. Pe ibibuto ki laco macalo ibuto ki dako; meno tim gwok. Pe ibibuto ki lee mo ma ipyedde kwede kekeni, kadi dako mo pe opyedde i kom lee mo me buta kwede; meno tim kipyeda, “Pe wupyedde kekenwu i kom gin ducu, pien rok ducu ma atye ka ryemogi woko ki i nyimwu-ni gubedo ka pyedde kekengi i komgi; mumiyo lobo opyedde woko, omiyo aketo can i kome pi balle, ci lobo oŋoko jo ma gibedo iye woko. Ento wun myero wumak cikka ki lok ducu ma aŋolo, kun pe wutimo gin mo i kom kipyeda magi ducu, kadi anywalli me lobo, kadi larok mo ma bedo i kinwu. Pien tim kipyeda meno ducu wegi lobo-ni gubedo ka timone, jo ma yam gukwoŋo nyimwu, mumiyo lobo gipyedo woko, Pe wutim tim kipyeda, wek lobo pe oŋokwu woko ka wutimo tim kipyeda i kome, macalo con oŋoko kwede rok ma okwoŋo nyimwu-ni. Pien jo ducu ma gutimo gin mo i kom kipyeda magi, jo ma gitimo-ni waŋgi birwenyo woko ki i kin lutugi. Wumak gin ma aciko, ni, pe wunyebbe i kit me timo kipyeda macalo yam ginyebbe ka timone i nyimwu, pe wubed ka pyedde kekenwu ki kit tim macalo meno; an a Rwot Lubaŋawu.” Rwot owaco bot Moses ni, “Wac bot lwak jo Icrael ducu ni, Myero wubedjo maleŋ, pien an Rwot Lubaŋawu aleŋ, ŋat acel acel ma i kinwu owor minne ki wonne, doki wugwok cabitta ducu; an a Rwot Lubaŋawu, Pe wulokke wudok bot cal lubaŋa-gu, pe wutim lubaŋawu me nyonyo aliya piwu kenwu; an a Rwot Lubaŋawu. “Ka wutyero gitum mewu me gityer Lakwecwiny bot Rwot, wubityero i kit ma miyo Lubaŋa ye gamowu. Myero wucam i nino ma wutumo iye, nyo orwone; ma odoŋ nio wa i nino me adekke gibiwaŋo awaŋa ki mac. Ka ce dok pud gicamo i nino me adekke, ci bedo gin me kwer; pe doŋ gibiye gamone, ŋat ma ocamo-ni bal bidok i wiye, pien opyedo gin maleŋ pa Rwot; dano meno waŋe birwenyo woko ki i kin lutugi. “Ka wukayo cam ma ocek i lobowu, pe wuka woko ducu nio wa i ŋet potowu, pe dok wubed ka beko obote ma odoŋ i kare me kac, Pe wupwon nyig olokwu wugwer ducu, pe bene wucok nyige ma opoto piny i poto olokwu; wubiwekogi pi konyo lucan ki lubedo; an a Rwot Lubaŋawu. “Pe wukwal kwo, pe wunyebbe ka bwolo dano, pe wulok lok goba i kinwu kekenwu. Pe wukwoŋ kwoŋ i nyina ki goba, ma miyo wupyedo nyiŋ Lubaŋawu; an a Rwot. “Pe ibur lawoti, pe ima jamine. Pe igalle ki mucara pa lapakaca mo dyewor kulu nio wa odiko. Pe iyet ladiŋit, pe iket gin mo i yo ma twomo tyen latowaŋ, ento lwor Lubaŋani; an a Rwot. “Pe wuŋol kop aleŋa; pe idwor kor lacan, pe idwor dano madit, ento ŋol kop atir i kom lawoti. Pe ibed ka wirre i kin lutuwu ka kwoto’ nyiŋgi, pe ikel lok mo ma kelo to i kom lawoti; an a Rwot. “Pe ikwer omeru ki i cwinyi, ento juk lawoti ajuka, wek balle pe odok i wii. Pe icul kwor, pe ibed ki akeca i kom lutuwu; ento mar lawoti macalo imarre keni; an a Rwot. “Wumak cikka. Pe iye limmi onywal ki kit lee mukene; pe ico kit kodi aryo mapatpat i poto acel; pe iruk boŋo ma gicweyo ki kit uci aryo mapatpat. “Ka laco mo obuto ki dako ma aŋeca ma ŋat mukene mito nyomo, ma peya gikoko gigonyo woko ki i opii, gibilaro koppe. Pe gibinekogi, pien dako onoŋo pe lone kene. Laco bikelo gitum me aliine bot Rwot i doggola kema me rwatte, nyok romo me gitum me tiŋo alii. Ajwaka bitimo gin lakwany bal ki i kome i nyim Rwot ki nyok romo me gitum me tiŋo alii, pi bal ma en otimo-ni, ci Lubaŋa biweko balle, “Ka doŋ wuo i lobo-nu, ce wupito iye kwa yadi ducu me acama, myero wuŋe ni gijuko ni nyige peya gicamo; gibijukowu camone pi mwaka adek. I mwaka me aŋwenne nyige ducu bibedo maleŋ, gibityero me lapak Rwot. Ento i mwaka me abicce wutwero camo nyige, wek yadiwu gunyak ki wun nyiggi madwoŋ; an a Rwot Lubaŋawu. “Pe wucam riŋo mo ma tye ki remo i kome. Pe wutyet tyet, pe wubed luyer war. Pe wuko yer te wiwu, pe wulyel teŋ yer tikwu. Pe wutoŋ komwu pi kwero cola, pe wuked kedo mo i komwu; an a Rwot. “Pe imi nyari odok lapyeda pi timo kwele, weko lobo balle woko ki tim kwele, bimiyo lobo poŋ ki tim kipyeda. Wugwok cabitta, wuwor kabedona maleŋ; an a Rwot. “Pe wulokke wudok bot lukor tipo ki megi jogi, pe wucit ka yenyogi, miyo wupyedde kekenwu pi gin; an a Rwot Lubaŋawu. “A malo i nyim dano ma wiye obuk lwar, wor dano ma doŋ guti, dok ilwor Lubaŋani: an a Rwot. “Ka labedo mo obedo: kwedi i lobowu, pe wutime marac. Labedo ma obedo kwedwu bibedo macalo latin anywalli i kinwu, ibimare macalo imarre keni; pien wun bene yam wubedo lubedo i lobo Ejipt; an a Rwot Lubaŋawu. “Pe wutim rac ‘i ŋolo kop, nyo i pimo bor me gin mo, nye pekke, nyo ditte, Wubed ki mijan ma pi mo kakare, kidi lapim pek muromo kakare, aduku lapim bel muromo kakare ki agulu lapim moo muromo kakare; an a Rwot Lubaŋawu ma con akwanyowu woko ki i lobo Ejipt. Wugwok cikka ki gin ma aciko ducu, wucobi; an a Rwot.” Rwot owaco bot Moses ni, “Wac bot Icrael ni, Dano mo ma i kin jo Icrael, nyo labedo ma bedo i kin jo Icrael, ma omiyo latinne mo bot jok Molek gibineko woko; lwak gibicele woko ki got. An kikoma abiketo waŋa i kom dano meno, abimiyo waŋe rwenyo woko ki i kin lutugi, pien omiyo latinne bot jok Molek, kun obalo kwede kabedona maleŋ, dok opyedo nyina maleŋ, Ka lwak pe guyabo wangi i kom dano meno kun en miyo latinne mo bot Molek, ce pe gumedo ki neko en, ci abiketo waŋa i kom dano meno ki i kom doggolane abimiyo waŋe rwenyo woko ki i kin lutugi, en kacel ki jo ducu ma gilube pi woro jok Molek ki tim kwele kwele. “Ka dano mo olokke odok bot lukor tipo ki megi jogi kun lubogi pi tim kwele kwele, abiketo waŋa i kom dano meno, abimiyo waŋe rwenyo woko ki i kin lutugi. Wulonnye kekenwu wubed maleŋ, pien an a Rwot Lubaŋawu, Wugwok cikka wucobgi, pien an a Rwot ma alonyowu wudoko maleŋ, Dano mo ma oceno wonne nyo minne gibineko woko; en otyeko ceno wonne nyo minne, remone dok i wiye. “Ka dano mo otimo abor ki dako pa lawote, laco ki dako ma gutimo abor-ri gibinekogi woko. Dano ma obuto ki ci-wonne, noŋo oketo lewic i kom wonne; gibineko gin aryo ducu, remogi dok i wigi. Ka dano mo obuto ki ci-wode, gibineko gin aryo ducu, pien gutimo k ir, remogi dok i wigi. Ka dano mo obuto ki laco macalo dako, gin aryo ducu gutimo gwok, gibinekogi woko, remogi dok i wigi. Ka dano mo onyomo dako ci ododo ki bedoki minne bene, meno kipyeda; gibiwaŋogi woko ki mac, en ki gin mon aryo ducu, wek kipyeda pe obed i kinwu. Ka dano mo obuto ki lee, gibineko woko, dok wubineko lee meno bene, Ka dako mo onyiko cok ki lee ce obedo kwede, wubineko dako-nu ki lee meno; gibinekogi woko, remogi dok i wigi. “Ka dano mo otero laminne, kun nya pa wonne nyo nya pa minne, ce en oneno nyime, ki nyako bene oneno kome, meno lok me lewic atika, wangi birwenyo woko ki i kin lutugi. En obedo ki laminne, bal bidok i wiye. Ka dano mo obuto ki dako ma tye ki kwer, ci obedo kwede, noŋo en pe oworo remo pa dako ma cwer, dako bene lewic pe omako pi remone ma cwer-ri; gin aryo ducu wangi birwenyo woko ki i kin lutugi. Pe ibed ki lamiŋ meni nyo lamiŋ woru, pien meno noŋo ibedo ki watti; balgi bidok i wigi. Ka dano mo obuto ki ci-omin wonne, obedo kwede, meno no no oketo lewic i kom omin wonne; balgi bidok i wigi, gibito laboŋo latin mo. Ka dano mo obedo ki ci-ominne, meno otimo kir; noŋo okelo lewic i kom ominne; gibito laboŋo latin mo, “Pi meno wumak cikka ducu, ki gin ma aŋolo ducu, wucobgi, wek lobo ma atye ka terowu iye-ni pe onokwu woko. Wun pe wulub kit pa lurok ma atye ka ryemogi woko i nyimwu-ni; pien gin gutimo gin magi ducu, mumiyo iya okwerogi woko. Ento atyeko waco botwu ni, ‘Wubileyo lobogi, abimiyo botwu me bedo mewu, lobo ma mol cak ki moo kic.’ An a Rwot Lubaŋawu ma apokowu woko ki i kom rok mukene. Mumiyo myero wupok kin lee ma gilony ki lee makeni, ki i kin winyo makeni ki winyo ma gilony. Pe wuballe wudok gin me kwer pi lee, nyo pi winyo, nyo pi gin mo ma corre i wi lobo, ma an doŋ atyeko pokone woko pat, ni obed keni botwu, Wubed jo maleŋ pira, pien an Rwot aleŋ, doŋ atyeko pokowu woko ki i kom rok mukene ducu, wek wubed jona. “Laco nyo dako mo ma lakor tipo nyo ma min jok gibineko woko; gibicelo woko ki got, remogi bidok i wigi.” Rwot owaco bot Moses ni, “Lok ki ajwagi, awobe pa Aron, iwac botgi ni, ŋatti mo i kingi pe oballe odok keni pi gudo kom dano muto ma i kin lutugi, kono nyo watgi keken ma cok kwede, macalo minne, wonne, wode, nyare, ominne, nyo laminne ma peya oneyo co, En pud cok kwede, pien peya tye ki cware; en twero balle pire doko keni. Kadi bed en won gaŋ i kin lutugi, myero pe oballe odok keni, miyo bedo kipyeda. Ajwagi pe gulyel wigi, pe gulyel teŋ yer t ikgi, pe guton komgi. Gubed jo maleŋ pi Lubaŋagi, pe gupyed nyiŋ Lubaŋagi, pien gin aye gityero gityer ma giwaŋo ki mac bot Rwot, en cam pa Lubaijagi; pienno myero gubed jo maleŋ. Pe gunyom dako ma lakwele, nyo ma doŋ tye ki meye, Gin pe gunyom dako ma cware oryemo pien ajwaka en dano maleŋ bot Lubaŋane. Wubigwoke obed maleŋ pi ticce, pien en tyero cam pa Lubaŋawu; en bibedo maleŋ botwu, pien an a Rwot ma alonyowu wubed maleŋ, an bene aleŋ, Ka nya pa ajwaka mo odoko lapyeda pi timo kwele, noŋo opyedo wonne; gibiwane woko ki mac. “Ajwaka madit i kin omege, ma en aye gionyo moo wir i wiye, ma onoŋo gikwere wek oruk boŋŋi aruka me ticce, myero pe ogony yer wiye oket ata lijayi, pe oyec ginarukane; pe odony i ot ka ma kom dano muto tye iye, pe oballe odok keni, kadi bed pi wonne nyo minne. Pe okat woko nia ki i kabedo maleŋ, wek pe opyed kabedo maleŋ pa Lubaŋane, pien moo wir ma yam gikwere kwede bot Lubaŋane tye i kome; an a Rwot. En myero onyom nyako ma peya oneyo co, Pe onyom daa-to, nyo dako ma cware oryemo, nyo dako ma doŋ tye ki meye, nyo dako ma lakwele; en onyom anyira tugi ma peya oneyo co, wek pe opyedde i kom litinone i kin lutugi; pien an a Rwot ma alonye obed maleŋ.” Rwot owaco bot Moses ni “Wac bot Aron ni, i kare pa likwayo wu ducu, lakwaru mo ma kome ki mwonyo pe onyik cok ka tyero cam pa Lubaŋane, Pien dano ma ko me ki mwonyo pe binyiko cok bota, macalo dano ma latowan, nyo laŋolo, nyo ŋat ma waŋe ki poyo, nyo ma tyene nyo bade tuŋcel laŋabu, nyo ŋat ma tyene otur, nyo ma bade otur, nyo dano ma kore oruŋŋe, nyo dano muran, nyo ma waŋe ocor, nyo ma twoyo gwenyo nyo nyac, nyo ma gidino mane. Dano mo i kin likwayo pa ajwaka Aron ma kome ki mwonyo pe onyik cok ka tyero gityer ma giwaŋo ki mac bot Rwot; tekke kome ki mwonyo, pe binyiko cok ka tyero cam pa Lubaŋane, En twero camo cam pa Lubaŋane, jami maleŋ makato, ki jami maleŋŋe; ento pe binyiko cok ki boŋo kicika, pe bibino cok ki keno tyer, pien kome ki mwonyo, wek pe opyed kabedona ducu maleŋ-ŋi, pien an a Rwot ma alonyogi gubed maleŋ.” Moses oloko kit meno bot Aron ki awo bene ki bot jo Icrael ducu. Rwot dok owaco bot Moses ni, “Tit ki Aron ki awobene ni gugwokke i kom gin maleŋ pa jo Icrael ma gudyero bota, wek pe gupyed nyina maleŋ-ŋi; an a Rwot. Wac botgi ni, ‘I kare pa likwayowu ducu, ka ŋatti mo ma i kin likwayowu onyiko cok ki gin maleŋ ma jo Icrael gudyero bot Rwot-ti ma kun kome ki keni, dano meno waŋe birwenyo woko ki i nyima; an a Rwot. Dano mo i kin likwayo pa Aron ma ladobo, nyo ma kome cwer tut, pe ocam gin maleŋ nio ka ko me olony. Ŋatti mo ma ogudo kom gin ma odoko keni pi gudo kom dano muto, nyo dano ma kodi me co mere omol i kome, nyo dano ma ogudo gin ma lak alaka ma twero miyo en doko keni, nyo ma ogudo dano ma kenine twero kobo i kome, nyo kwa gin mo ma twero miyo en doko keni; dano ma ogudo gin macalo meno bibedo keni nio wa otyeno, dok pe bicamo gin maleŋ ka peya olwoko kome ki pii, Ka ceŋ doŋ opoto, ci bibedo ma olony, lacen en twero camo gin maleŋ, pien en aye camme, En pe ocam geŋ lee ma oto kene, nyo lee ma ŋuu omwodo, wek pe oballe kwede odok keni; an a Rwot.’ Gumak gin ma aciko, wek bal pe odok i wigi, ma miyo gibito ka gipyedde i kom gin ma aciko; an a Rwot ma alonyogi gubed maleŋ. “Dano ata pe ocam gin maleŋ. Dano ma labedo bot ajwaka, nyo lapakaca, pe ocam gin mo maleŋ. Ento ka ajwaka owilo opii ki lim, ma odoko calo gipinnye, en twero camo, ki opii ma ginywalogi i ode bene gitwero camo camme. Ka dano mo mukene onyomo nya pa ajwaka, nyare-nu aye pe doŋ bicamo gin maleŋ ma gityero. Ento ka nya pa ajwaka odoko daa-to, nyo cware oryemo, kun pe tye ki latin mo, ci odwogo i ot pa wonne macalo yam obedo iye ma pud tidi, twero camo cam pa wonne; ento dano ata pe ocam. Ka dano mo ocamo gin mo maleŋ ma pe ocamo akaka, en bimedo acel me abic i kom welle, ci culo waŋ gin meno maleŋ bot ajwaka. Ajwagi pe gupyed jami maleŋ pa jo Icrael ma gityero bot Rwot, wek bal ki alii pe odok i wigi pi camo jamigi maleŋ; pien an a Rwot ma alonyogi gubed maleŋ.” Rwot owaco bot Moses ni “Wac bot Aron ki awo bene ki bot ‘jo Icrael ducu ni, Ka ŋat mo ma i ot pa Icrael, nyo labedo mo ma i Icrael, miyo gityer mere, kadi obed me cobo kwoŋ, nyo gityer ma iye opwoyo ma otyero bot Rwot me gitum awaŋa, ka wubikelo wod twon, nyo nyok romo, nyo nyok dyel ma kome pe ki mwonyo, Lubaŋa biye gamone. Ento pe wutyer gin mo ma kome ki mwonyo, pien pe gibiye gamone piwu. Ka dano mo okelo gityer lakwecwiny bot Rwot, pi cobo kwoŋ nyo pi gityer ma iye opwoyo, ma okwanyo ki i kin dyani nyo i kin romi nyo dyegi, gibigamo ma komgi becone; komgi pe obed ki mwonyo mo. Lee ma wane oto, nyo ma tyene otur, nyo ma oŋol, nyo ma kome cwer tut, nyo ma anoli omako, nyo kit two macalo meno, pe wutyer bot Rwot, pe wumigi me bedo gityer ma giwaŋo ki mac bot Rwot i wi keno tyer. Wutwero kelo twon nyo nyok romo ma kome obedo alwaya nyo ma aduno obed gityer ma iwu opwoyo, ento pe gibigamone pi cobo kwoŋ. Pe wutyer bot Rwot lee mo ma gidino mane, nyo ginyoto woko, nyo gikayo, nyo gikwanyo woko, pe wutum lee ma kit meno i lobowu. Dok pe wutyer lee mo macalo meno ma wuwilo ki bot larok obed cam pa Lubaŋawu, Pe gibigamogi piwu, pien komgi ki mwonyo pi bal ma tye i komgi-ni.” Rwot owaco bot Moses ni, “Ka ginywalo wod twon nyo romo nyo dyel, koŋ obed bot minne pi nino abiro; nia i nino me aborone gibiye gamone me bedo gityer ma giwaŋo ki mac bot Rwot. Kadi bed minne min dyaŋ nyo min romo, pe gibir omo neko minne ki latinne i nino acel. Ka ce wutumo gityer me pwoc bot Rwot wutum i kit ma miyo giye gamowu. Gicam i nino meno kikome; pe wuwek mo odoŋ nio wa odiko; an a Rwot. “Kit meno wugwok cikka ducu, wucobgi; an a Rwot. Pe wupyed nyiŋa maleŋ, ento jo Icrael myero guŋe ni an aleŋ; an a Rwot ma alonyowu wubed maleŋ,’ ma ceŋ akwanyowu woko ki i lobo Ejipt wek abed Lubaŋawu; an a Rwot.” Rwot owaco bot Moses ni, “Wac bot jo Icrael ni, Nino madito ma Rwot ocikogi, ma wubituco pigi ni gubed gurre maleŋ, nino madito ma an aciko, gin ene. Wubitiyo tic nino abicel, ento i nino me abirone en ceŋ cabit me yweyo mot, en aye gurre maleŋ, Pe wuti iye tic mo; en aye ceŋ cabit pa Rwot ka ma wubibedo iye ducu. “Magi aye nino madito ma Rwot ociko, gin gurre maleŋ ma wubituco pigi i kare ma Rwot ociko pigi. I dwe mukwono i nino dwe apar wiye aŋwen otyeno, en aye Kato (Paska) pa Rwot. I kom nino dwe apar wiye abic me dwe acel-lu en nino madit pa Rwot me Mugati ma Tobi Pe tye; wubicamo mugati ma tobi pe iye pi nino abiro.’ I kom nino mukwoŋone wubibedo iye ki gurre maleŋ; pe wuti iye tic mo matek. Ento wubityero gityer ma giwa-ŋo ki mac bot Rwot pi nino abiro; i Dino me abirone wubibedo ki gurre maleŋ, pe wuti iye tic mo matek.’” Rwot dok owaco bot Moses ni, “Wac bot jo Icrael ni, Ka doŋ wuo i lobo ma abimiyowu, ka wukayo iye kac, ci wubikelo wic larita cam me wi mwaka bot ajwaka. En bikwato wic larita cam i nyim Rwot, wek oye gamowu; ajwaka bikwato i nino ma lubo cabit. I nino ma wubikwato iye wic larita-ni, en aye wubityero iye latin nyok romo ma ditte romo mwaka acel, ma kome pe ki mwonyo, obed gitum awaŋa bot Rwot. Gityer me moko kwon ma wutyero kacel kwede bibedo moko kwon mapwotte ma romo agwata aryo, ma girubo ki moo, ma gibityero kun giwaŋo ki mac bot Rwot obed gin ma nweee kur me yomo cwiny. Gityer amatane bibedo vino ma romo cupa aryo kt nucu. Pe wucam mugati, pe wumwod nyig bel ma gicelo nyo manumo, nio wa i nino meno kikome, waŋ ma wukelo gityer pa Lubaŋawu; meno bibedo cik matwal wa i kare pa likwayowu ducu, ikabedo ducu ma wubibedo iye. “Ka doki wubikwano cabit abiro kulu kun wucako ki nino ma lubo cabit, en aye nino ma wutyero iye wic larita cam me gityer akwata. Wukwan nino pyerabic nio i nino ma lubo cabit me abirone, ka doŋ wucak kelo gityer me moko kwon kai manyen bot Rwot. Wubikelo ki i kabedowu mugati aryo me akwata ma gitedo ki moko ma romo agwata aryo; gibitedogi ki moko mapwotte ma onoŋo girubo iye tobi, gubed wi mwaka ma gityero bot Rwot. Dok wubikelo litino romi abiro kacel ki mugati meno ma ditogi mwaka acel acel, ma komgi pe ki mwonyo, ki wod twon acel ki nyogi romi aryo. Gibibedo gitum awaŋa bot Rwot, kacel ki gityer me moko kwon ki gityer amata mutikogi; gin gityer ma giwaŋo ki mac, gin ma ŋwece kur me yomo cwiny Rwot. Dok wubityero nyok dyel acel obed gitum me bal, ki litino nyogi romi aryo ma ditogi mwaka acel acel gubed gityer Lakwecwiny. Ajwaka bikwatogi kacel ki mugati me wi mwaka gubed gityer akwata i nyim Rwot, kacel ki litino nyogi romi aryo-nu; gibibedo maleŋ bot Rwot, pi ajwaka. I nino meno kikome wubibedo ki gurre maleŋ ma wutito pire ka maleŋ; pe wuti iye tic mo matek. Meno bibedo cik matwal wa i kare pa likwayowu ducu, i kabedo ducu ma wubibedo iye. “Ka wukayo cam ma ocek i lobowu, pe wuka woko ducu nio wa i ŋet potowu, pe dok wubed ka beko obote ma odoŋ i kare me kac. Wubiwekogi pi konyo lucan ki lubedo; an a Rwot Lubaŋawu.” Rwot owaco bot Moses ni “Wac bot jo Icrael ni, I dwe me abiro, i nino dwe acel, wubikwero iye nino me yweyo mot, nino me po ma gituco pire ki koko gwara, nino me gurre maleŋ. Pe wuti iye tic mo matek, dok wubityero iye gityer ma giwaŋo ki mac bot Rwot.” Rwot dok owaco bot Moses ni, “I nino dwe apar me dwe man me abiro-ui en aye bedo nino me Kwanyo Bal. Bibedo botwu nino me gurre maleŋ; wubikumo ki toncwiny, dok wubityero gityer ma giwaŋo ki mac bot Rwot. Pe wuti tic mo i nino meno, pien en aye nino me kwanyo bal, pi timo gin lakwany bal ki i komwu i nyim Rwot Lubaŋawu. Ŋat ma pe okumo ki toncwiny i nino meno wane birwenyo woko ki i kin lutugi. Ŋat ma otiyo tic mo i nino meno abineko woko wek pe obed i kin lutugi. Pe wuti iye tic mo; meno bibedo cik matwal wa i kare pa likwayowu ducu, i kabedo ducu ma wubibedo iye. En aye bibedo botwu cabit me yweyo mot, ci wubikumo iye ki toncwiny, i nino dwe aboŋwen cakke otyeno nio wa orwone otyeno en aye wubiywe mot.” Rwot dok owaco bot Moses ni, “Wac bot jo Icrael ni, I nino dwe apar wiye abic me dwe man me abiro-ni en aye bibedo acakki me nino madito pa Rwot, kare me Bolo, ci tyeko nino abiro. I kom nino mukwoŋo wubibedo iye ki gurre maleŋ; pe wuti iye tic mo matek. Wubityero gityer ma giwaŋo ki mac bot Rwot pi nino abiro. I nino me aborone wubibedo iye ki gurre maleŋ, ma wubityero iye gityer ma giwaŋo ki mac bot Rwot; meno cokke madit me woro Lubaŋa, pe wuti iye tic mo matek. “Magi aye nino madito ma Rwot ociko, ma wubitito ki lwak ni gin aye kare me gurre maleŋ, pi tyero bot Rwot gityer ma giwaŋo ki mac, gitum awaŋa, gityer me moko kwon, gitum mukene, ki gityer amata, kun acel acel bedo ki ninone ma otike, kun wumedogi i kom ceŋ cabit pa Rwot me kare ducu, ki i kom mot mewu, i kom gityer mewu ducu me cobo kwoŋ, ki i kom gityerwu ducu ma iwu opwoyo ma wumiyo bot Rwot. “I kom nino dwe apar wiye abic me dwe me abiro, ka doŋ wucoko cam ma ocek i lobo, wubikwero nino madito pa Rwot pi nino abiro; nino mukwoŋo bibedo nino me yweyo mot, ki nino me aborone bene bibedo nino me yweyo mot. I nino mukwoŋo wubicoko iye nyig yat mabecone, ki jaŋ otit, ki jaŋ yat muluk, ki yat oget ma i ŋet kulu; ci wubibedo ki yomcwiny i nyim Rwot Lubaŋawu pi nino abiro. Wubikwero nino madito man pa Rwot pi nino abiro mwaka ki mwaka; meno bibedo cik matwal wa i kare pa likwayowu ducu; wubikwerone i dwe me abiro. Wubibedo i bolo pi nino abiro; litino anywalli ducu ma i Icrael bibedo i bolc, wek likwayowu guŋe ni, yam amiyo jo Icrael gubedo i bolo i kare ma akwanyogi woko ki i lobo Ejipt; an a Rwot Lubaŋawu.” Kit meno Moses otito bot jo Icrael pi nino madito ducu ma Rwot ociko pigi. Rwot owaco bot Moses ni, “Cik jo Icrael gukel boti moo me nyig jeituni ma giodo aoda, giliyo maber, me mac tara, wek giket mac laput obed ka lyel nino ducu ma pe to. Aron myero ocaŋ mac olyel jwijwi i nyim Rwot nia otyeno nio odiko, ki woko i ŋe boŋo kicika ma umo canduk lok me caden, i kema me rwatte; meno bibedo cik matwal wa i kare pa likwayowu ducu. En bicano laput kakare i wi okar-mac me jabu ma giliyo maber i nyim Rwot jwijwi. “Dok ibikwanyo moko mapwotte, ibitedo kwede capat apar wiye aryo, kun i capat acel acel bedo iye agwata moko aryo. Ibicanogi latyeŋ aryo kun iryeyogi abicel abicel i wi meja me jabu ma giliyo maber-ri. I kom tyen acel aoel ibiketo iye odok luban ma giliyo maten, wek obed gin me po i kom mug ati-nu, gityer ma giwaŋo ki mac bot Rwot. I ceŋ cabit ducu Aron biryeyogi jwijwi i nyim Rwot kun gamo ki bot jo Icrael; en gicikke ma bedo matwal. Bibedo pi Aron ki awobene: gibicamo i kabedo mo maleŋ, pien en gin maleŋ makato ma gimiye ki i kin gityer ma giwaŋo ki mac bot Rwot ma myero gimi bote dikdik.’ ” Ceŋ mo wod pa nya jo Icrael mo ma wonne onoŋo Laejipt, okato woko i kin jo Icrael, ci ocako lwenyo ki dano mo ma Laicrael i gony. Wod pa nya jo Icrael meno ocako yeto nyiŋ Lubaŋa kun ceno bene, ci gitere bot Moses: Nyiŋ minne Celomit, nya pa Dibri, ma i kaka pa Dan. Ci gikete i ot kol, nio ka Rwot binyuto botgi gin ma en mito. Rwot owaco bot Moses ni, “Kel ŋat ma oceno cen woko i ŋe gony, jo ducu ma guwinyo lokke guket ciŋgi i wiye, ci wek lwak ducu gucele woko ki got. Ka dok iwac ki jo Icrael ni, ŋat ma oceno Lubaŋane, balle bidok i wiye. Ŋat ma oyeto nyiŋ Rwot gibineko woko; lwak ducu gibicele woko ki got; labedo kacel ki anywalli me lobo, ka oyeto Nyiŋ meno gibineke woko. Ŋat ma oneko dano gibineke bene. Ŋat ma oneko loo biculo acula; kwo giculo ki kwo. Ka ŋat mo oketo ŋolo i kom lawote, en bene gibitime kit meno; turo cogo giculo ki turo cogo, waŋ giculo ki waŋ, lak giculo ki lak; kit macalo oketo ŋolo i kom dano mo-ni, en bene gibiketo ŋolo i kome. Ŋat ma oneko loo biculo acula; ŋat ma oneko dano gibineke woko. Cik bibedo acel pi labedo ki pi anywalli me lobo; pien an a Rwot Lubaŋawu.” Moses ocako lok ki jo Icrael, ci gutero dano ma oceno cen woko i ŋe gony, gucele woko ki got. Kit meno jo Icrael gutiyo kit ma Rwot ociko ki Moses. Rwot owaco bot Moses i wi got Cinai ni, “Wac bot jo Icrael ni, Ka doŋ wuo i lobo ma abimiyowu-ni, lobo bigwoko cabit pa Rwot. Wubicoyo pottiwu mwaka abicel, wubiŋolo kin jaŋ olokwu mwaka abicel, wubicoko nyige; ento mwaka me abirone en aye bibedo cabit me yweyo mot pi lobo, en cabit pa Rwot; pe wubicoyo pottiwu, pe wubiŋolo kin jaŋ olokwu. Gin ma otwi kene i okaŋ pe wubikayo, pe wubicoko nyig olokwu ma pe wuŋolo kin jaŋe; bibedo mwaka me yweyo mot pi lobo. Cabit man me lobo bimiyowu cam, in ki opiini ki aŋecani ki lapakacani ki labedo ma bedo boti. Pi lim mewu makwo bene, ki pi lee ducu ma gitye i lobowu, gin ma cek iye ducu bedo me acamagi. “Dok ibikwano cabit abiro me mwaka bene, mwaka abiro tyen abiro; kare meno me cabit abiro me mwaka bibedo mwaka pyeraŋwen wiye aboŋwen. I mwaka meno ibimiyo gwara kok maloŋo i kom nino dwe apar me dwe me abiro; i nino me kwanyo bal en aye wubimiyo gwara kok romo lobowu ducu. Wubikwero mwaka me pyerabic obed maleŋ, kun wutito i lobowu ducu ni kuc tye pi jo ducu ma bedo iye, En aye bibedo kare me jubili mewu, ma noŋo ŋat acel acel i kinwu dok gire i dul lobone, dok ŋat acel acel i kinwu bidok i doggolagi. Mwaka me pyerabicce aye bibedo jubili mewu; pe wubicoyo iye kodi, pe wubikayo gin ma otwi kene, pe wubicoko nyig olok ma pe wuŋolo kin jaŋe. Pien obedo jubili, bibedo maleŋ botwu; wubicamo gin ma oa ki i poto. “I mwaka man me jubili-ni ŋat acel acel i kinwu bidok i dul lobone. Ka icato lobo mo bot lawoti, nyo iwilo lobo mo ki bote, pe wubed ka bune kekenwu. Ka iwilo ki bot lawoti, welle biporo wel mwaka mulubo jubili; en bicato boti kun poro wel mwaka ma ibinoŋo iye cam. Ka mwaka pud odoŋ mapol, ibimedo wel ma iculo, ka mwaka doŋ odoŋ manok, ci ibidwoko welle piny, pien gin ma en tye ka cato boti en aye mwaka me cam ma bia iye. Pe wubune kekenwu, ento wulwor Lubaŋawu; pien an a Rwot Lubaŋawu. “Pi meno wubilubo cikka, wubigwoko gin ma aŋolo, wubicobone, wek wubed ma lobo okwe mot. Pien lobo biceko cam, wubicamo, wubiyen kwede, ci wubibedo ma piny okwe mot. Ka ce wuwacci, ‘Wabicamo mono gin aŋo i mwaka me abiro-nu, ka ce pe wacoyo kodi, dok pe wacoko camwa ma a iye?’ An’ abiciko gumma poto i komwu i mwaka me abicelle, wek onyak nyige ma romo pi mwaka adek kulu, Ka wucoyo potowu i mwaka me aborone, noŋo pud wutye ka camo cam macon ca; nio wa i mwaka me aboŋwen i kare ma cam doŋ ocek, gikayo, noŋo pud wucamo en macon ca. Lobo pe gibicato me atera woko matwal, pien lobona gira; pien wun wuwelo, dok wun lubedona. I lobo ducu ma bibedo mewu wubiye ni giwar lobo. “Ka ce omeru odoko lacan, ce ocato lobone mo ci watgi macok aye bibino ka waro lobo meno ma ominne ocato woko-ni. Ka dano meno pe tye ki watgi mo ma twero warone, ce en kikome odoko lalonyo, ka onoŋo gin ma romo warone, wek en okwan wel mwaka nia i kare ma ocato, ocul bot dano ma owilo-nu wel ma pud odon, ci potone bidok i ciŋe, Ento ka pe tye ki lim ma romo dwokone i ciŋe, ci poto ma ocato-nu bidoŋ i cin lawilone nio ka mwaka me jubili oromo; gibidwoko potone i kare me jubili, bidok i ciŋe. “Ka dano mo ocato ode ma tye i gaŋ madit ma gicelo ki cel, en twero warone ma peya mwaka acel oromo; bibedo ki twer me warone kadi pi mwaka kulu. Ka pe giwaro ma peya mwaka acel oromo, ci ot meno ma tye i gaŋ madit ma gicelo-ni gibimoko ni doŋ bedo pa ŋat muwilo-ni matwal, wa i kare pa likwayone ducu; pe gibidwoko i kare me jubili. Ento odi ma i caro ata ma pe gicelo ki cel ma orumogi gibikwanogi kacel ki potti ma i caro; gitwero warogi, dok gibidwokogi ceŋ i kare me jubili. “I gaŋi pa Lulevi odi ma i gaŋi ma gimiyogi me bedo megi-ni Lulevi gitwero warogi i kare ducu. Ka ce ŋat mo i kin Lulevi pe owaro, ci ot ma gicato i gaŋ mo ma omiyogi obed megi bidok bot rwode i kare me jubili, pien odi ma i gaŋ pa Lulevi meno jami megi ma gimiyogi i kin jo Icrael. Ento olet ma orumo gaŋi megi pe gicato; meno lobogi matwal. “Ka ce omeru ma bedo ka ŋeti odoko lacan ma pe twero konnye kekene, in ibikonye; en bibedo boti macalo weloni nyo labedo. Pe igam lim mo me magoba ki bote nyo pe imed wiye, ento lwor Lubaŋani, wek omeru obed kwo ki ka ŋeti, Pe ibimiyo en mako banya boti wek inoŋ iye magoba, pe imiye cam wek odwok boti kun omedo wiye. An a Rwot Lubaŋawu ma yam akwanyowu ki i lobo Ejipt wek amiwu lobo Kanaan, abed Lubaŋawu. “Ka omeru ma bedo ka ŋeti odoko lacan, ci ocatte boti kekene, pe ibimiyo en tiyo boti macalo opii; en bibedo boti macalo lapakaca nyo labedo. En bitic boti nio wa i mwaka me jubili; ka lacen en bia woko ki boti, en kacel ki litinone bene. Bidok cen i doggolane, bidok i lobo pa kwarogi. Pien gin luticca ma yam akwanyogi woko ki i lobo Ejipt; pe gibicatogi me bedo opii. Pe ibiloyo en ki loc magwa, ento ibilworo Lubaŋani, “Lok i kom opiini ki aŋecani ma ibibedo kwedgi; itwero wilo opii ki aŋeca ki bot lurok ma orumo ka ŋetwuni. Wutwero wilo ki i kin lubedo ma bedo botwu, dok ki i kin doggolagi ma bedo botwu, ma ginywalogi i lobowu; gibidoko limwu. Wutwero miyogi bot litino awobewu ma bilubowu, gubed ginaleyagi matwal. Wutwero miyogi gibedo opiiwu, ento omegiwu ma jo Icrael pe wubiloyogi kit meno kun ŋat man loyo wadi ki loc magwa. “Ka welo mo nyo labedo mo ma tye boti odoko lalonyo, kun omeru ma tye ka ŋete odoko lacan, ci ocatte kekene bot welo nyo labedo ma tye boti-ni, nyo ocatte bot wat ma i doggola pa welo meno, ka doŋ otyeko catte, ci gitwero koko; ŋat mo ma i kin omege twero koke woko. Nyo omin wonne nyo latin pa omin wonne twero koke, nyo watgi mo ma i doggolagi twero koke; nyo ka en odoko lalonyo, ci kokke gire kene. En bikwano wel kacel ki ŋat ma con owile-nu, kun cako i mwaka ma yam owile iye nio wa i jubili, Wel me gonye bibedo ma poro wel mwaka; kare ma en obedo kwede bot rwode gibikwano macalo kare pa lapakaca. Ka ce mwaka pud odoŋ mapol, en biculo lim me koke ma oporo ki wel mwaka, kun kwanyo ki i kom wel lim ma yam giwile kwede. Ka pud odoŋ mwaka manok mo i mwaka me jubili, en bikwano wel ki dano ma owile-nu; ci biculo lim me koke ma oporo wel mwaka me ticce ma pud odon. En bibedo bot rwode macalo lapakaca ma giculo mwaka ki mwaka; pe gibiloye ki loc magwa kun in ineno. Ka ce pe gikoke i kit yo meno, ci gibigonye i mwaka me jubili, en kacel ki litinone bene. Pien jo Icrael gin aye lutic ma tuŋ ciŋa; gin aye luticca ma yam akwanyogi woko ki i lobo Ejipt; an a Rwot Lubaŋawu. “Pe wutim piwu kenwu cal lubaŋa mo, pe wucib cal apaya nyo wir jok mo, pe wucib got mo ma gigoro cal i kome ocuŋ i lobowu pi ryebbe i nyime, pien an a Rwot Lubaŋawu. Wubigwoko cabitta dok wubiworo ot mera maleŋ; an a Rwot. “Ka wubilubo cikka kun wugwoko gin ma aciko ducu, wucobo kakare, an abimiyowu kot ma cwer i karene, lobo biceko cam, yadi ma i poto binyako nyiggi. Kare me dino kalwu bidikke olo wa i kare me pwono otok, pwono olok bene bidikke nio wa i kare me coyo kodi. Wubicamo cam ma romowu, doŋ, ci wubibedo i lobowu ma piny okwe mot. Abimiyo kuc bedoi lobo, wubibuto piny, dano ma miyowu lworo bibedo pe. Abikwanyo ŋuu woko ki i lobo, pala lucwan pe biwok ki i lobowu, Wubiryemo lumerok mewu, gibito i nyimwu ki palawu. Jo abic ki i komwu gibiryemo jo miya kulu, jo miya ki i komwu biryemo jo alip apar; lumerokwu gibito i nyimwu ki’ palawu. Abiparo piwu, abimiyo wunywal, wunya, dok abimoko gicikkena kwedwu. Wubicamo cam macon i derowu pi kare malac, wubionyo maconne woko wek kabedo odoŋ pi manyenne. Abiyubo kabedona i kinwu, tipo koma pe bikwerowu, Abibedo ka wot i kinwu, abibedo Lubaŋawu, wun bene wubibedo jona, An a Rwot Lubaŋawu ma yam akwanyowu ki i lobo Ejipt wek pe wubed opiigi; aturo rii okol ma giriyo i ŋutwu, amiyowu wutirre, wuwot atir. “Ento ka pe wubiwinya, ka pe wubilubo cik magi ma aketo ducu, ka ce wucayo cikka, ka iwu okworo gin ma aŋolo, ma miyo pe wubicobo gin ma aciko ducu, enro wuturo gicikkena, ci abitimowu kit man: abimiyo lworo poto i komwu atura, ki aona opiyo, ki aburu ma coro wanwu kun balo komwu woko. Dok wubicoyo kodiwu noŋo, pien lumerok gibicamo. Abiketo waŋa i komwu, merok bigoyowu ki i nyimgi; jo ma gidagwu aye gibiloyowu; dok wubiriŋo ata ma kun ŋat mo pe ma ryemo korwu. Ka pe wuwinyo lokka kadi bed atimo kumeno, ci abimedde ki keto can i komwu tyen abiro pi balwu. Abituro tek me wakkewu woko, abimiyo polo bedo tek macalo nyonyo, ki lobowu bene bedo tek macalo mola, Wubityeko tek komwu nono pien lobowu pe biceko cam, ki yadi bene pe gibinyako nyiggi. “Ka wun wukemo an marac, ma pe wuwinyo lokka, ci abimedde ki kelo two mapek i komwu, ma romo lwak balwu tyen abiro. Dok abicwalo ŋuu me tim i kinwu, ma bimako litinowu, ma bityeko lim makwo ma i ciŋwu, ci bijwikowu wudoko jo manok, wa yowu birido woko. “Ka pe wujukke, wudwogo bota pi kit can meno, kun pud wukemo an marac aye, an bene abikemowu marac, ci an ki koma abipwodowu tyen abiro pi balwu. Abikelo pala lucwan i komwu me lacul kwor me balo gicikkena, Ka wugurre i gaŋwu, abicwalo two gemo magwa i kinwu, ci gibimiyowu i ciŋ lumerokwu. Ka abikwanyo cam ma wukwo kwede woko, ci mon apar gibitedo mugatiwu i keno acel, dok gibipokowu mugati kun gipimowu apima; ka wubicamo; pe biyeŋowu. “Ka pe wuwinyo lokka kadi bed atimo kumene, ento pud wukemo an marac, ci an bene abikemowu malyet, kun an kikoma aketo can i komwu tyen abiro pi balwu. Wubicamo riŋo kom litino awobewu ki riŋo kom anyirawu. Abituro waŋ jogiwu ma i wi godi, abitoŋo keno tyerwu me odok eceta, kun abolo komwu ma oto i kom kom muto me cal lubaŋawu, ci tipo koma bikwerowu woko. Abijwero gaŋwu woko ducu, abimiyo kabedowu ducu maleŋ doŋ noŋo, pe dok abiŋweyo ginwu ma ŋwece kur me yomo cwiny. Abineko lobowu woko, wek lumerokwu ma bibedo iye gubed ki ur pire. Abikeyowu i kin lurokbci abiwoto pala lucwan ki i akura me lubo nkorwu, miyo lobowu bidoŋ noŋo cut, ki gaŋiwu bene gibidoŋ obur. “I kare meno lobo bikwero cabitte pi kare ducu ma noŋo pud giweko ata-ni, kun wun pud wutye i lobo pa lumerokwu. I kare meno lobo biywe, kun noŋo tye ka kwero karene me yweyo mot macalo i ceŋ cabit. Pi kare ma pud giweko ata-ni koŋ biywe, ki yweyo ma naka yam en pe onoŋo i cabitwu i kare ma onoŋo wun wubedo iye. Jo ma i kinwu ma bidoŋ abicwalo lworo i cwinygi i lobo pa lumerokgi, miyo gibiriŋo dwan pot oboke keken ma yamo yeno. Gibiriŋo macalo ŋat ma riŋo pala lucwan, ci gibipoto piny kun ŋat mo pe ma ryemo korgi. Gibiyokke kekengi ŋat man i kom lawote, macalo giriŋo lak pala lucwan, kadi bed ŋat mo pe ma ryemo korgi: pe wubibedo ki twero me cun i nyim lumerokwu. Wubitum woko ki i kin lurok, lobo pa lumerokwu bicamo komwu woko ducu. Jo ma i kinwu ma bidoŋ, komgi bilwal woko i lobo pa lumerokwu pi bal megi; dok pi bal pa kwarogi bene komgi bilwal woko macalo gin. “Ento ka gibituco balgi ki bal pa kwarogi pi tim roro ma gutimo i koma, dok pi kemo an marac, ma omiyo an bene akemogi marac kun aterogi i lobo pa lumerokgi; ka gibedo jo ma gulirre i cwinygi, pe i komgi keken, ci gidoko mwol ma giculo ka waŋ balgi, ka doŋ abipo pi gicikkena ma acikke ki Yakobo, abipo pi gicikkena ki Icaka ki gicikkena ki Abraim, dok abipo pi lobogi. Ento lobo bidoŋ ma gin jona pe iye, bigwoko cabitte ducu ma kun noŋo pud giweko woko ata ma dano pe iye. Ci gibiculo ka waŋ balgi, pien gubedo ka cayo gin ma aciko, dok tipo komgi okwero cikka. Ento kadi bed kumeno, ka pud noŋo gitye i lobo pa lumerokgi, pe abieayogi, tipo koma pe bikwerogi ma romo miyo atyekogi woko liweŋ kun aturo gicikkena kwedgi, pien an a Rwot Lubaŋagi, Pi gin weko abipo pi gicikkena ma acikke ki kwarogi ma yam akwanyogi woko ki i lobo Ejipt ma rok ducu gineno, wek abed Lubaŋagi; an a Rwot.” Magi aye cik ki gin ma Rwot oŋolo, ki cik ma en oketo i kin en ki jo Icrael i wi got Cinai ki i dog Moses. Rwot owaco bot Moses ni, “Wac bot jo Icrael ni, Ka dano mo okwoŋo kwoŋ ma pire tek ma otiko kom dano bot Rwot, ma myero in iŋol welle, ci wel ma iŋolo pi laco ma mwaka me ditte romo pyeraryo o-wa i pyerabicel bibedo cekel me ryal pyerabic, ma giporo ki cekel me kabedo maleŋ, Ka ce dano meno ma kwon otiko obedo dako, ci ibiŋolo wel me cekel pyeradek. Ka mwaka me ditte romo abic o wa i pyeraryo, ibiŋolo pi laco cekel pyeraryo, pi dako cekel apar. Ka ce ditte romo dwe acel o wa i mwaka abic, ibiŋolo cekel me ryal abic pi laco, cekel me ryal adek pi nyako. Ka mwaka me ditte romo pyerabicel nyo makato, ibiŋolo cekel apar wiye abic pi laco, pi dako apar. Ka ce dano mo lacan twatwal, ma pe twero miyo wel ma iŋolle, ci en bitero dano ma gikwoŋo pire-ni i nyim ajwaka ci ajwaka aye biŋolle wel, kun lubo gin ma dano ma okwoŋo kwoŋ-ŋu twero noŋone. “Ka ce kwoŋ otiko lee mo ma gityero me bedo gityer bot Rwot, lee ducu ma kit meno ma dano miyo bot Rwot bedo maleŋ. En pe bilokone woko ki gin mukene, nyo gwenyo loko ki wadi mo, maberre ki maracce, nyo maracce ki maberre; nyo ka en oloko lee mo ki lee wadi, ci gin aryo ducu ma gilokogi-ni gibibedo maleŋ. Ka ce obedo lee mo ma keni, ma pe gityero me bedo gityer bot Rwot, ci dano meno bitero lee-nu i nyim ajwaka. Ajwaka biŋolo welle, kadi lee-nu ber kadi rac; macalo in ajwaka iŋolo welle, ci bicuŋ kit meno. Ento ka en mito kokone woko, en bimedo acel me abic i kom welle. “Ka dano mo onyero ode obed maleŋ bot Rwot, ci ajwaka biŋolo welle, ka ber ka rac; ka ajwaka oŋolo welle, ci bicuŋ kit meno. Ka ce ŋat ma odyero ode-ni mito warone woko, en bimedo acel me abic i kom welle ci bidok bote. “Ka dano mo odyero but lobone bot Rwot ki i kom lobo ma oleyo ki bot kwarone, ci ibiŋolo welle kun poro kodi ma gitwero coyo iye; ka romo coyo iye kodi cayiri guniya adek, Gibiŋolo iye cekel me ryal pyerabic. Ka en odyero potone i mwaka me jubili, ci bicuŋ i wel kikome ma iŋolo, Ento ka odyero potone lacen i ŋe jubili, ajwaka biŋolo wel-lim ma myero gicul iye kun poro wel mwaka ma pud odoŋ nio i mwaka me jubili, ci wel ma yam inolo-ni gibidwoko piny. Ka ce dano ma odyero peto-ni mito warone woko, en bimedo acel me abic i kom welle, ci bidoŋ i cine. Ento ka en pe mito waro po to-nu, nyo ka otyeko cato poto woko bot dano mukene, pe doŋ gibiwarone matwal, Poto meno ka gigonyo i jubili bibedo maleŋ pi Rwot, macalo poto ma gikwero matwal; ci ajwaka aye doŋ bibedo rwode. “Ka odyero bot Rwot poto mo ma owilo awila, ma pe dul lobo ma oleyo ki bot kwarone, ajwaka biŋolo wene nio i mwaka me jubili, ci dano-nu bimiyo wel ma giŋolo i nino meno wek obed maleŋ pi Rwot. Ci i mwaka me jubili poto bidok i ciŋ ŋat ma yam giwilo ki bote-ni, en ŋat ma poto-nu obedo mere kun oleyo ki bot kwarone. Wel ducu ma giŋolo bilubo cekel me kabedo maleŋ, kun cekel acel romo gera pyeraryo. “Ento litino kayo pa lee dano pe twero dyero, pien litino kayo ducu gibedo pa Rwot; kadi bed twon nyo romo, meno pa Rwot gire. Ka lee ma keni, en biwilone ki boti i wel ma iŋolo, kun medo acel me abic i wiye; nyo ka pe gikoko, gibicatone acata i wel ma iŋolo. “Ento gin ducu ma onoŋo gidyero i ciŋ Rwot matwal, ma dano mo odyero i ciŋ Rwot matwal ki i kin gin ma tye bote, kadi dano nyo lee nyo poto ma oleyo ki bot kwarone, pe gibicato kadi ki warone; gin ducu ma gidyero iciŋ Rwot matwal bedo gin maleŋ makato pi Rwot. Dano mo-ni ma gidyero iciŋ Rwot matwal, ma myero ginek woko ki i kin dano, pe gitwero kokone; gibineke woko aneka. “Acel me apar ducu mua i lobo, kadi bed kodi ma ocek i poto nyo nyig yat ma onyak, meno jami pa Rwot gire, gin maleŋ pa Rwot. Ka dano mo mito koko gin mo i kom gin me aparre, en bimedo dul acel me abic i wiye. Dul acel me apar pa dyaŋi ki romi nyo dyegi ducu, lee me aparre ducu i kin lim ducu ma kato i te odoo pa lakwat, meno bibedo maleŋ pi Rwot. Rwode pe bipenyo ka ber nyo rac, dok pe bi koko kun gwenyo ki wadi mo; ka giloko, ci gin aryo ducuma gilokogi-ni gibibedo maleŋ; pe gibikokogi akoka.” Magi aye cik ma yam Rwot ociko ki Moses pi jo Icrael ki i wi got Cinai. Rwot oloko ki Moses i tim Cinai; i kema me rwatte, i kom nino dwe mukwoŋo me dwe me aryo, i mwaka me aryone nia i kare ma doŋ gua woko ki i lobo Ejipt. Owacci, “Kwan wel lwakjo Icrael ducu, kun ilubo doggolagi ki dog odi pa kwarogi kit ma Wel nyiŋgi tye kwede, kun ikwano co ducu ki acel acel, cakke ki i kom jo ma ditogi romo mwaka pyeraryo dok kwede malo, jo Icrael ducu ma romo cito ka lweny; wubikwanogi wun ki Aron ki bucagi. Dok wubibedo ki dano acel ma oa ki i kaka acel acel, ma ŋat acel acel bibedo ladit wi kaka ki i ot pa kwarogi, Man gin aye nyiŋ jo ma gibicuŋ ka konyowu: Jo pa Reuben, Elijur wod pa Cedeur; jo pa Cimeon, Celumiel wod pa Juricadai; jo pa Juda, Nakucon wod pa Aminadab; jo pa Icakar, Netanel wod pa Juar; jo pa Jabulon, Eliab wod pa Kelon; i awobe pa Yucepu, jo pa Epraim, Elicama wod pa Amikud, jo pa Manace, Gamaliel wod pa Pedajur; jo pa Benjamin, Abidan wod pa Gideoni; jo pa Dan, Akiejer wod pa Amicadai; jo pa Acer, Pagiel wod pa Okoran; jo pa Gad, Eliacap wod pa Deuel; jo pa Naputali, Akira wod pa Enan,” Man gin aye dano ma giyero ki i lwak, ma gin aye lutel wi kaka pa kwarogi, gin ludito ma i kaka pa jo Icrael. Moses ki Aron gukwanyo jo meno ma doŋ gikwano nyiŋgi-ni, ci i kom nino mukwoŋo me dwe me aryo gucoko lwak ducu kacel. Gin gunyuto watgi kun gilubo doggolagi ki dog odi pa kwarogi, kit ma wel nyiŋgi tye kwede, cakke ki i kom jo ma ditogi romo mwaka pyeraryo dok kwede malo, ki acel acel, macalo Rwot ociko ki Moses. En okwanogi i tim Cinai kit meno, Welgi ene: Jo pa Reuben, latin kayo pa Icrael. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, wel jo ma i kaka pa Reuben oromo alip pyeraŋwen wiye abicel, ki miya abic. Jo pa Cimeon. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, wel-jo ma i kaka pa Cimeon oromo alip pyerabic wiye aboŋwen, ki miya adek. Jo pa Gad. Ka gikwano wel likwayo ne kun gicoyo nyiŋgi ki acel acel ma lubo doggolagi ki dog odi pa kwarogi co ducu cakke ki i kom jo ma mwaki me ditogi romo pyeraryo dok kwede malo, jo ducu ma giromo cito ka lweny, wel jo ma i kaka pa Gad oromo alip pyeraŋwen wiye abic, ki miya abicel ki pyerabic. Jo pa Juda. Ka gikwano wel likwayo ne kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, wel jo ma i kaka pa Juda oromo alip pyerabiro wiye aŋwen, ki miya abicel. Jo pa Icakar. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, Wel jo ma i kaka pa Icakar oromo alip pyerabic wiye aŋwen, ki miya aŋwen. Jo pa Jabulon. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, wel jo ma i kaka pa Jabulon oromo alip pyerabic wiye abiro, ki miya aŋwen. Jo pa Yucepu, jo pa Epraim. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, wel jo ma i kaka pa Epraim oromo alip pyeraŋwen, ki miya aŋwen. Jo pa Manace. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, wel jo ma i kaka pa Manace oromo alip pyeradek wiye aryo, ki miya aryo. Jo pa Benjamin. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki I kom jo ma mwaka me ditogi romo pyeraryo dok kwede malo, jo ducu ma giromo cito ka lweny, wel jo ma i kaka pa Benjamin oromo alip pyeradek wiye abic, ki miya aŋwen. Jo pa Dan. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, wel jo ma i kaka pa Dan oromo alip pyerabicel wiye aryo, ki miya abiro. Jo pa Acer. Ka gikwano Wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, wel jo ma i kaka pa Acer oromo alip pyeraŋwen wiye acel, ki miya abic. Jo pa Naputali. Ka gikwano Wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny, Wel jo ma i kaka pa Naputali oromo alip pyerabic wiye adek, ki miya aŋwen. Meno gin aye jo ma gikwano welgi, ma yam Moses ki Aron gukwano, kun lutel wi Icrael gukonyogi, jo apar wiye aryo, ma ŋat acel acel ocuŋ pi ot pa kwarogi, Kit meno wel jo Icrael ducu ma gikwano kun gilubo odi pa kwarogi, nia ki i kom jo ma ditogi romo mwaka pyeraryo dok kwede malo, jo Icrael ducu ma romo cito ka lweny, welgi ducu onoŋo oromo alip miya abicel ki adek, ki miya abic ki pyerabic noŋo. Ento jo pa Levi pe gikwano welgi kacel kwedgi kun gilubo kaka pa kwarogi, pien onoŋo Rwot owaco ki Moses ni, “Wel kaka pa Levi aye pe ikwan, pe ibikwano welgi i kin jo Icrael; ento ket jo pa Levi gubed ludito ma loyo tic i kema lok me caden, gulo jamine ducu, wa gin ducu ma tye iye. Gin aye bitiŋo kema ki jami ma tye iye ducu, gibitic iye, dok gibiguro kema me butogi rumo kema pa Lubaŋa, Ka kema bicako wot, ci gin Lulevi aye gibiputo woko; dok ka gibiguro kema, Lulevi aye gibigurone. Ka ce dano mo ata onyiko cok ki kema, gibineko woko. Jo Icrael gibiguro kemagi ki dog buca monygi, dano acel acel ki dog gonygi, ki dano acel acel i te benderane. Ento jo pa Levi gibiguro kemagi rumo kema lok me caden, wek akemo pe opot i kom lwak jo Icrael; jo pa Levi gibigwoko kema lok me caden.” Jo Icrael gutimo kit meno gutiyo gin ducu kit ma onoŋo Rwot ociko ki Moses. Rwot owaco bot Moses ki Aron ni, “Jo Icrael gibiguro kemagi ŋat acel acel i te benderane, kun gitye ki lanyut me odi pa kwarogi; gibiguro kemagi kun doggi tiko kema me rwatte tuŋŋi ki tuŋŋi ducu. Jo ma biguro kemagi yo tuŋ wokceŋ, ka ma ceŋ tuc ki iye-ni, gibibedo jo ma i te bendera pa Juda, kun gilubo buca monygi; latel wi jo pa Juda aye Nakucon ma wod pa Aminadab, ma gikwano wel dano ma i buca monnye oromo alip pyerabiro wiye aŋwen, ki miya abicel. Jo ma biguro kemagi ma cok kwede gibibedo kaka pa Icakar; latel wi jo pa Icakar aye Natanel ma wod pa Jura, ma gikwano wel dano ma i buca monnye oromo alip pyerabic wiye aŋwen ki miya aŋwen, Ka dok kaka pa Jabulon; latel wi jo pa Jabulon aye Eliab ma wod pa Kelon, ma gikwano wel dano ma i buca monnye oromo alip pyerabic wiye abiro, ki miya aŋwen. Wel jo ducu ma i gony pa Juda, i bucagi, oromo alip miya acel ki pyeraboro wiye aŋwen, ki miya aŋwen. Ka wot ocakke, gin aye gibitelo yo. “Ki yo tuŋ acuc en aye bendera me gony pa jo pa Reuben bicuŋ iye, kun gilubo buca monygi; latel wi jo pa Reuben aye Elijur ma wod pa Cedeur, ma gikwano Wel dano ma i buca monnye oromo alip pyeraŋwen wiye abicel, ki miya abic. Jo ma biguro kemagi ma cok kwede gibibedo kaka pa Cimeon; latel wi jo pa Cimeon aye Celumiel ma wod pa Juricadai, ma gikwano Wel dano ma i buca monnye oromo alip pyerabic wiye aboŋwen ki miya adek. Ka dok kaka pa Gad; latel wi jo pa Gad aye Eliacap wod pa Reuel, ma gikwano wel dano ma i buca monnye oromo alip pyeraŋwen wiye abic, ki miya abicel ki pyerabic. Wel jo ducu ma i gony pa Reuben, i bucagi, oromo alip miya acel ki pyerabic wiye acel, ki miya aŋwen ki pyerabic. Ka wot cakke, gin aye gibimol me aryone. “Lacen kema me rwatte bicako wot, kacel ki gony pa jo Levi, i dye gony ducu. Kit ma giguro ki kemagi gibicako wotgi kikore kit meno, kun dul acel acel tye ki kabedone, kun gilubbe aluba bendera ki bendera. “Ki yo tuŋ potoceŋ bendera pa jo Epraim bicuŋ iye, kun gilubo buca monygi; latel wi jo pa Epraim aye Elicama ma wod pa Amikud, ma gikwano wel dano ma i buca monnye oromo alip pyeraŋwen, ki miya aŋwen, Jo ma biguro kemagi ma cok kwede gibibedo kaka pa Manace; latel wi jo pa Manace aye Gamaliel ma wod pa Pedajur, ma gikwano wel dano ma i buca monnye oromo alip pyeradek wiye aryo, ki miya aryo. Ka dok kaka pa Benjamin; latel wi jo pa Benjamin aye Abidan ma wod pa Gideoni, ma gikwano wel dano ma i buca monnye oromo alip pyeradek wiye abic, ki miya aŋwen. Wel jo ducu ma i gony pa Epraim, i bucagi, oromo alip miya acel ki aboro, ki miya acel. Gin gibimol me adekke. “Ki yo tuŋ acam bendera pa jo pa Dan bicuŋ iye, kun gilubo buca monygi; latel wi jo pa Dan aye Akiejer ma wod pa Amicadai, ma gikwano wel dano ma i buca monnye oromo alip pyerabicel wiye aryo, ki miya abiro. Jo ma biguro kemagi ma cok kwede gibibedo kaka pa Acer; latel wi jo pa Acer en aye Pagiel ma wod pa Okoran, ma gikwano wel dano ma i buca monnye oromo alip pyeraŋwen wiye acel, ki miya abic. Ka dok kaka pa Naputali; latel wi jo pa Naputali aye Akira ma wod pa Enan, ma gikwano wel dano ma i buca monnye oromo alip pyerabic wiye adek, ki miya abicel. Wel jo ducu ma i gony pa Dan oromo alip miya acel ki pyerabic wiye abiro, ki miya abicel. Gin gibimol me agikkine, kun gilubbe aluba bendera ki bendera.” Meno aye jo Icrael kit ma gikwanogi kwede, kun lubo dog odi pa kwarogi; jo ducu ma i gonygi ducu ma gikwanogi i buca monygi onoŋo guromo alip miya abicel ki adek, ki miya abic ki pyerabic noŋo. Ento jo pa Levi pe gikwano i kom jo Icrael, macalo Rwot onoŋo ociko ki Moses. Jo Icrael yam gutiyo kit meno. Kit ma Rwot con ociko ki Moses ducu, guguro kemagi kit meno i te benderagi, gucako wot bene gumol kit meno, ŋat acel acel ki doggolane, macalo dog odi pa kwarogi tye kwede. Magi aye likwayo pa Aron ki Moses i kare ma Rwot obedo ka lok ki Moses i wi got me Cinai. Magi aye nyiŋ awobe pa Aron: Nadab latin kayone ki Abiu, Eleajar ki Itamar; meno aye nyiŋ awobe pa Aron, gin aye ajwagi ma giwirogi ki moo, ma Moses yam okwerogi pi tiyo tic me bedo ajwagi. Ento Nadab ki Abiu guto i nyim Rwot i kare ma gutyero mac mapat i nyim Rwot i tim Cinai, kit mac ma yam pe ocikogi kwede; gin pe gubedo ki litino. Mumiyo Eleajar ki Itamar gutiyo tic pa ajwagi i kare ma wongi pud kwo. Rwot owaco bot Moses ni, “Kel kaka pa Levi cok, ci iketgi i nyim ajwaka wek guti bote. Gibicobo tic mapatpat pire ki pi lwak ducu i nyim kema me rwatte, dok gibitiyo tic pi jo Icrael kun gitiyo ticgi i kema. Gin aye gibigwoko jami ducu ma i kema me rwatte, dok gibitiyo tic pi jo Icrael kun gitiyo ticgi i kema. Ibimiyo Lulevi bot Aron ki awobene; gityeko miyogi bote matwal kun gikwanyogi woko ki i kin jo Icrael. Ci ibiketo Aron ki awo bene, gibitiyo ticgi me bedo ajwagi; ento ka ŋat mo mukene onyiko cok, gibineke woko.” Rwot dok owaco bot Moses ni, “Nen, doŋ atyeko kwanyo jo pa Levi ki i kin jo Icrael ma ka litino kayo ducu mukwono yabo ic i kin jo Icrael. Jo pa Levi aye gibibedo jona, pien litino kayo ducu mera. I nino ma yam aneko iye litino kayo ducu ma i lobo Ejipt ca, en aye akwero iye litino kayo ducu ma i Icrael gubed mera, pa dano ki pa lee; gibibedo mera; an a Rwot.” Rwot owaco bot Moses ki i tim Cinai ni, “Kwan wel likwayo pa Levi, kun ilubo dog odi pa kwarogi, ki doggolagi; ibikwano co ducu cakke ki i kom jo ma ditogi romo dwe acel dok kwede malo.” Kit meno Moses okwano welgi kit ma Rwot owaco-ni, macalo yam ocike-ni. Magi aye awobe pa Levi ma giyeko nyiŋgi: Gercon, Kokat ki Merari. Magi aye nyiŋ awobe pa Gercon kun lubo doggolagi: Libni ki Cimei. Awobe pa Kokat kun lubo doggolagi gin aye Amram, Ijar, Kebron ki Ujiel. Awobe pa Merari kun lubo doggolagi gin aye Makali ki Muci. Meno aye doggola pa Lulevi, kun lubo dog odi pa kwarogi. Jo pa Gercon aye doggola pa jo pa Libni ki doggola pa jo pa Cimei; meno aye doggola pa jo pa Gercon. Welgi ka gikwano wel co ducu cakke ki i kom jo ma ditogi romo dwe acel dok kwede malo oromo alip abiro, ki miya abic. Doggola pa jo pa Gercon yam giguro kemagi i ŋe kema yo tuŋ potoceŋ, kun Eliacap wod pa Lael obedo ladit ki i ot pa kwaro pa jo Gercon. Tic pa likwayo pa Gercon i kema me rwatte obedo me gwoko kema; en aye kema kikome ki laum wiye, boŋo cuka laum doggola me doggola kema me rwatte, boŋo cuka me anaba me larum dyekal, boŋo cuka laum doggola me dyekal ma orumo kema ki keno tyer, ki lwak tol lacikgi; dog tic ducu ma mitte pi jami magi. Jo pa Kokat aye doggola pa jo pa Amram, ki doggola pa jo pa Ijar, ki doggola pa jo pa Kebron, ki doggola pa jo pa Ujiel; meno aye doggola pa jo pa Kokat. Welgi ka gikwano Wel co ducu cakke ki i kom jo ma ditogi romo dwe acel dok kwede malo oromo alip aboro, ki miya abicel ma gitiyo ticgi i kabedo maleŋ, Doggola pa jo pa Kokat yam giguro kemagi i ŋet kema yo tuŋ acuc, kun Elijapan wod pa Ujiel obedo ladit ki i ot pa kwaro me doggola pa jo. Kokat. Ticgi obedo me gwoko canduk, meja, okarmac, keno tyer, jami me kabedo maleŋ ma ajwagi gitiyo kwedgi ducu, ki boŋo kicika; dog tic ducu ma mitte pi jami magi, Ladit ma loyo ludito ducu pa Lulevi obedo Eleajar wod pa ajwaka Aron. En onoŋo loyo jo ma gitiyo ticgi i kabedo maleŋ, Jo pa Merari aye doggola pa jo pa Makali ki doggola pa jo pa Muci; meno aye doggola pa jo pa Merari. Welgi ka gikwano Wel co ducu cakke ki i kom jo ma ditogi romo dwe acel dok kwede malo oromo alip abicel, ki miya aryo. Ladit ki i ot pa kwarogi ma i doggola pa jo Merari obedo Juriel wod pa Abikail. Gin yam giguro kemagt i ŋet kema yo tun acam, Tic ma gimiyo bot likwayo pa Merari obedo me gwoko lwak guti me kema, lwak riine, lwak wirre lwak tedi tere ki gin ma okemo ticce ducu; dog tic ducu ma mitte pi jami magi ducu. Ka dok lwak wir ducu ma gurumo dyekal, ki tedi tergi ki lwak teke lagurgi, ki lwak tolle. Jo ma yam giguro kemagi i nyim kema yo tuŋ wokceŋ, i nyim kema me rwatte ka ma cen tuc iye-ni, gin aye Moses ki Aron ki awobene. Gin onoŋo gityeko ketogi i dog tic ma i kabedo maleŋ, pi tiyo tic ducu ma mitte pi jo Icrael; ka ŋat mo mukene onyiko cok, myero ginek woko. Wel jo Levi ducu ma yam gikwano, ma Moses ki Aron gukwano welgi pi lubo cik pa Rwot, kun lubo doggolagi, co ducu cakke ki i kom jo ma ditogi romo dwe acel dok kwede malo, oromo alip pyeraryo wiye aryo. Rwot owaco bot Moses ni, “Kwan wel litino kayo ducu ma co ki i kin jo Icrael, cakke ki i kom jo ma ditogi romo dwe acel dok kwede malo; kwan welgi kun ilubo nyiŋgi, An a Rwot; ibikwanyo jo pa Levi gubed mera ma ka litino kayo ducu ma i kin jo Icrael; dok iter lim makwo pa jo Levi ma ka litino kayo ducu ma i kin lim makwo pa jo Icrael.” Kit meno Moses okwano Wel litino kayo ma i kin jo Icrael ducu, macalo Rwot ocike. Litino kayo ducu ma co, macalo wel nyiŋgi tye, cakke ki i kom jo ma ditogi romo dwe acel dok kwede malo, ka gikwano welgi onoŋo guromo alip pyeraryo wiye aryo, ki miya aryo ki pyerabiro wiye adek. Rwot owaco bot Moses ni “Kwany jo pa Levi gubed ma ka litino kayo ducu ma i kin jo Icrael, dok iter lim makwo pa jo Levi ma ka limgi; jo pa Levi gibibedo jona; an a Rwot. Pi koko litino kayo miya aryo ki pyerabiro wiye adek ma i kin jo Icrael ma gudoŋ ma wel pa jo pa Levi orem woko pigi-ni, ibigamo cekel abic abic pi dano acel acel; ibigamo kun ilubo cekel me kabedo maleŋ, ma cekel acel romo gera pyeraryo-ni. Lim meno ma gikoko kwede wel jo ma gudoŋ-ŋi ibimiyo bot Aron ki awo bene.” Mumiyo Moses ogamo lim me kok ki bot jo mudoŋ, ma wel pa jo Levi orem me kokogi; ci ogamo lim ryal ki bot litino kayo pa jo Icrael ma romo cekel alip acel, ki miya adek pi pyerabicel wiye abic, kun lubo cekel me kabedo maleŋ. Moses omiyo lim meno me kok bot Aron ki awobene, kit ma Rwot owaco-ni, macalo Rwot yam ociko ki Moses. Rwot owaco bot Moses ki Aron ni, “Kwan wellikwayo pa Kokat ma i kin likwayo pa Levi, kun ilubo doggolagi ki dog odi pa kwarogi, cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic pi tiyo tic ma i kema me rwatte. Man aye tic ma likwayo pa Kokat gibitiyo i kema me rwatte: gibitic i kom jami maleŋ makato. Ka gony doŋ bicako wot, Aron ki awobene bidonyo i kema ka kwanyo boŋo kicika, ci giumo kwede canduk lok me caden, Ka dok gibiumo wiye ki laa dyel, lacen gibiyaro boŋo ma bulu i kom meno, ka doŋ gibirwako talle iye. Gibipeto boŋo ma bulu i kom meja me mugati me aketa i nyim Rwot, ka doŋ gibiketo caani i wiye, ki atabo me odok eceta, ki weer, ki cupa me onyo gityer amata; mugati ma gicano i nyim Rwot jwijwi bene obed i wiye. Lacen gibiyaro boŋo makwar i wiye, ci meno gibiumo ki laa dyel laumme, ka doŋ gibirwako talle iye. Ka dok gibikwanyo boŋo ma bulu, ci giumo ki okarmac, kacel ki laputte, ki magacce, ki caanine’ ki atabo moone ducu ma gitiyo kwede ticce; ci gibiboyo en ki jami ticce ducu ki laa dyel laumme, ka doŋ gibipyelo i wi tal latiŋŋe. Gibiyaro boŋo ma bulu i kom keno tyer me jabu, ka dok gibiumo kome ki gin ma gikwoyo ki laa dyel, ka doŋ gibirwako talle iye. Gibikwanyo jami tic ducu ma gitiyo kwedgi i kabedo maleŋ, gibiboyogi ducu ki boŋo ma bulu, ka doŋ gibiumogi ki gin ma gikwoyo ki laa dyel, ci gibipyelo i wi tal latingi. Gibijobo buru mac ma i keno me tyer woko, gibiyaro boŋo ma lamar lamar i wiye; ka dok gibiketo iye jami tic ducu me keno tyer, ma gitiyo kwede tic i kome, weer lawaŋ mac, gin lacob riŋo, akwaya latokke ki becen, jami tic ducu me keno tyer; ka dok gibiyaro i kome laa dyel laumme, lacen gibirwako talle. Ka Aron ki awobene doŋ gutyeko umo kabedo maleŋ ki jami ma i kabedo maleŋ ducu i kare ma giputo gony, lacen likwayo pa Kokat doŋ gibibino ka tinogi, ento pe gugud kom jami maleŋ ducu, wek pe guto. Magi aye jami me kema me rwatte ma likwayo pa Kokat gibitiŋo. “Eleajar wod pa Aron aye biloyo moo tara, ki odok eceta ma ŋwece kur, ki gityer me moko kwon me nino ducu, ki moo wir, kun dok loyo kom kema ducu ki lwak jami ducu ma bedo iye, en aye kabedo maleŋ kikome ki jami ticce.” Rwot owaco bot Moses ki Aron ni, “Pe iwek doggola ducu me kaka pa jo pa Kokat guto gutum woko ki i kin jo pa Levi, ento ber itimgi kit mau wek gubed makwo, ma pe guto i kare ma gibino cok ki jami maleŋ makato-ni: Aron ki awobene aye bidonyo ka nyutogi tic pa ŋat acel acel ki yec ma gibitiŋo, ento gin pe bidonyo iye ka neno kom jami maleŋ kadi matidi mo, wek pe guto.” Rwot owaco bot Moses ni, “Kwan wellikwayo pa Gercon bene, kun ilubo doggolagi ki dog odi pa kwarogi; ibikwano welgi cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic pi tiyo tic i kom kema me rwatte. Man en aye dog tic ma doggola pa Gercon ducu gibitiyo, me tiyo tic ki me tino yec: gibitiŋo boŋo cuka me kema, ki kema me rwatte ki laum wiye, kilaa dyel ma giumo kwede wiye malo, ki boŋo cuka me anaba me rumo dyekal, ki boŋo laum doggaŋ me dyekal ma orumo kema ki keno tyer, ki lwak tol lacikgi, ki jami tic ducu ma gitiyo kwedgi iye; gibitiyo tic ducu ma mitte i kom jami magi. Tic pa likwayo pa Gercon ducu gibitiyo kit ma Aron ki awo bene gicikogi i kom jami ducu ma gibitinone, ki i kom gin ducu ma gibitiyone; dok in aye ibipoko yecgi ducu botgi me agwoka, Man en aye tic pa doggola ducu pa likwayo pa Gercon ki i kema me rwatte; dog ticgi bibedo i te loc pa Itamar wod pa ajwaka Aron. “Likwayo pa Merari ibikwano welgi kun ilubo doggolagi ki dog odi pa kwarogi; ibikwano welgi cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic pi tiyo tic i kema me rwatte. Magi aye gin ma gimiyo botgi me atiŋa, ma en aye ticgi ducu ki i kema me rwatte: lwak guti me kema, ki riine, ki lwak wirre ki lwak tedi tere, ki wir ducu ma orumo dyekal, ki tedi tergi ducu, ki lwak teke lagurgi ki tol lacikgi, ki lwak jami ticgi ducu ki gin ma okemo tic ducu. Ibipoko botgijami ma gimito ni gutiŋ kun inyuto ki nyiŋgi, Man aye tic pa doggola ducu pa likwayo pa Merari, en aye dog ticgi ducu ki i kema me rwatte; bibedo i te loc pa Itamar wod pa ajwaka Aron.” Moses ki Aron ki lutel wi lwak gukwano wel likwayo pa Kokat, kun lubo doggolagi ki dog odi pa kwarogi, cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic, pi tiyo tic i kema me rwatte; welgi ma gikwano kun lubo doggolagi oromo alip aryo, ki miya abiro ki pyerabic. Meno aye wel doggola ducu pa jo pa Kokat, jo ducu ma gutiyo tic i kema me rwatte, ma Moses ki Aron gukwano welgi, macalo Rwot ociko ki i dog Moses. Man wel likwayo pa Gercon ma gikwano welgi kun lubo doggolagi ki dog odi pa kwarogi, cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic, pi tiyo tic i kema me rwatte; welgi ma gikwano kun lubo doggolagi oromo alip aryo, ki miya abicel ki pyeradek. Meno aye Wel doggola ducu pa likwayo pa Gercon, jo ducu ma gutiyo tic i kema me rwatte, ma Moses ki Aron gukwano welgi, macalo Rwot ociko ki i dog Moses, Man wel likwayo pa Merari ma gikwano welgi kun lubo doggolagi ki dog odi pa kwarogi, cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic, pi tiyo tic i kema me rwatte: welgi ma gikwano kun lubo doggolagi oromo alip adek, ki miya aryo. Meno aye jo me doggola pa likwayo pa Merari ma gikwanogi, ma Moses ki Aron gukwano welgi, macalo Rwot ociko ki i dog Moses. Jo ducu ki i kin jo pa Levi ma gikwano welgi, ma Moses ki Aron ki lutel wi Icrael gukwanogi kun lubo doggolagi ki dog odi pa kwarogi cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic pi tiyo tic mapatpat ki pi tiŋo yec i kema me rwatte jo ma i kingi ma gikwano welgi guromo alip aboro, ki miya abic ki pyeraboro. Macalo Rwot yam ociko kun wok ki i dog Moses ci gimiyogi ticgi kit meno, ŋat acel acel i dog ticce me tiyo tic nyo me tiŋo yec; gikwano welgi kit meno, macalo Rwot ociko ki Moses, Rwot owaco ki Moses ni, “Cik jo Icrael gucwal ludobo ducu gua woko ki i gony, ki dano acel acel ma kome cwer tut, ki dano acel acel ma odoko keni pi gudo kom dano muto. Wubicwalo co wa ki mon bene, kun wucwalogi woko ki i gony, wek pe gubal gonygi ma an abedo iye-ni odok keni.” Jo Icrael gutiyo kit meno, ci guryemogi woko i ŋe gony; macalo Rwot con owaco bot Moses, jo Icrael gutiyo kit meno. Rwot owaco bot Moses ni, “Wac ki jo Icrael ni, Ka ce laco mo nyo dako mo otimo bal mo ma dano timo kun ginayo waŋ Rwot, ce otiŋo alii, en bituco bal mere ma otimo-ni; ka dok en biculo waŋ gin marac ma otimo; bimedo iye acel me abic, ci miyo bot dano ma en otimo marac-ci. Ento ka dano meno watte mo pe ma myero giculle waŋ gin marac-ci, ci giculo Waŋ gin marac meno bot Rwot pi ajwaka, kun gibamo i kom nyok romo me kwanyo bal ma gitimo kwede gin lakwany bal ki i kome. Gityer ducu, nyo jami ducu maleŋ pa jo Icrael ma gikelo bot ajwaka bibedo mere. Jami maleŋ ma dano acel acel okelo bibedo mere; gin ducu ma dano mo omiyo bot ajwaka bibedo mere.” Rwot owaco bot Moses ni, “Wac ki jo Icrael ni, Ka dako pa laco mo waŋe olal, ci otimo kir i kom cware, ka laco-mo obuto kwede, ce cware pe oneyo, ma dako ojerre kekene kun lokke okanne woko, dok pe tye caden mo ma moko lok kom dako-nu, pien pe ginoŋe iye; ka cwiny me nyeko omako laco, kun nyeko omake i kom dakone ma ojerre kekene-ni, nyo ka cwiny me nyeko omako laco, kun nyeko omake i kom dakone, kadi bed dako pe ojerre kekene, ci laco bitero dakone bot ajwaka, kun tero gityer ma gimito pi dakone, agwata moko kwon acel me moko cayiri; pe bionyo moo i kome, pe biketo iye odok luban, pien meno gityer me moko kwon me nyeko, en gityer me moko kwon me lapo wic, ma bimiyo gipo pi bal meno. “Ajwaka bikelo dako cok, ci cibo i nyim Rwot. Ka dok ajwaka bitero pii maleŋ ki otako, ci jobo apwa ma i dye ot me kema, onyo i pii. Ka ajwaka bicibo dako i nyim Rwot, bigonyo yer wi dako wek oket ata lijayi, ci keto gityer me moko kwon me lapo wic i cinŋ, ma en aye gityer me moko kwon me nyeko. Ajwaka bimako pii makec me ceno dano i ciŋe. Ka ajwaka bimiyo dako-nu kwoŋo kwoŋ, kun waco ni, ‘Ka laco mo pe obuto kwedi, ka pe iŋak woko, kun ijerre kekeni ma it ye i te twero pa cwari, ci gin marac mo pe otimi pi pii man makec me ceno dano-ni, Ento ka ce waŋi olal woko, ma pud it ye i te twero pa cwari, ka ijerre kekeni, ci laco mo ma pe cwari obuto kwedi, ci (ajwaka bimiyo dako-nu kwoŋo kwoŋ ma kelo ceno dano kun waco ki dako-nu ni,) Rwot omi in idok ŋat ma giceno ki dano, kun dano gikwoŋo akwoŋa ki nyiŋi i kin lutuwu, i kare ma Rwot bitweyo nyodoŋi woko ci miyo ii bene deŋ woko; wek pii man me ceno dano ocit i cin ii, omi ii odeŋ, ci otwe nyodoŋi woko.’ Dako bigamo ni, ‘Amen, Amen.’ “Lacen ajwaka bicoyo lok me ceno dano-ni i karatac, ka dok lwoko vinone woko ki pii makee-ci, ci bimiyo dakonu mato pii makec ma giceno ki dano-ni, ci pii me ceno dano bidonyo i iye, miyo iye mwode matek. Ka dok ajwaka bikwanyo gityer me moko kwon me nyeko woko ki i cin dako-nu, ci kwato gityer me moko kwon i nyim Rwot, tero i keno tyer. Ka ajwaka bijobo moko me gityer poŋ ciŋ acel obed gin me po i kome, biwaŋo i wi keno tyer; ka dok lacen en bimiyo dako-nu mato pii. Ka doŋ omiyo omato pii, ka ce onoŋo en otyeko jerre kekene kun otimo kir i kom cware, ci pii me ceno dano bidonyo i iye, miyo iye mwode matek; iye biden woko, nyodoŋe bitwene woko, dako-ni bidoko ŋat ma giceno dano ki nyiŋe i kin lutugi. Ento ka dako-nu pe ojerre kekene, ma bal mo pe i kome, gin marac mo pe bitimo, ci en binywalo litino. “Man aye cik ma mako lok me nyeko, ka dako ma tye i te twero pa cware noŋo wage olal, ci ojerre kekene, nyo ka cwiny me nyeko omako laco mo, kun nyeko omake i kom dakone; en bicibo dako i nyim Rwot, ci ajwaka bitiyo i kom dako kun lubo cik man ducu. Laco pe bibedo ki bal mo, ento bal bidok i wi dako ka obalo.” Rwot owaco bot Moses ni, “Wac bot jo Icrael ni, Ka laco mo nyo dako mo okwoŋo kwoŋ ma pire tek, kwoŋ me bedo ajula pa Lubaŋa, ci okone gire kene pi bedo dano pa Rwot, en bikone gire kene kun pe mato koŋo vino nyo gin ma mero dano; pe bimato kono mawac ma oa i kom vino nyo i kom gin mo ma mero dano; pe bimato pig nyig olok, kadi camo nyige madyak nyo mutwone. I kare ducu ma en okone iye gire kene, pe bicamo gin mo ma oa i kom olok, kadi nyige matino ma i iye, wa odune. “I kare ducu ma noŋo en okwoŋo pire ni ebikone gire kene, lyedi pe bigudo wiye; bibedo dano maleŋ o wa i kare ma en okone iye pi bedo dano pa Rwot doŋ otum; biweko yer wiye lot maboco ma pe giŋolo. “I kare ma en okone iye gire kene pi bedo dano pa Rwot, pe binyiko cok i kom dano muto. Pe biballe doko keni kadi pi wonne nyo minne, nyo ominne, nyo laminne ka ce guto, pien gin ma nyuto konene kene pi bedo dano pa Lubaŋa pud tye i wiye. I kare ducu me konene kene en bibedo maleŋ pi Rwot. “Ka dano mo oto atura ka ŋete, ma miyo wiye ma okwero-ni odoko keni, en bilyelo wiye i nino me lonnyene; bilyelo i nino me abirone. I kom nino me aborone en bitero amam aryo nyo litino akuri aryo bot ajwaka i doggola kema me rwatte. Ajwaka bityero acel pi gitum me bal ki acel pi gitum awaŋa, kun timo gin lakwany bal ki i kom dano-nu, pien onoŋo obalo pi gudo kom dano muto. En bikwero wiye i nino meno kikome, ci kone gire pi bedo dano pa Rwot pi karene me kone kene, dok bikelo wod romo ma ditte mwaka acel obed gitum me tiŋo alii; ento kare mukwono ca noŋo oballe noŋo, pien yer wiye ma okwero-ni odoko keni. “Man aye cik ma mako dano ma ajula pa Lubaŋa ka karene me kone kene doŋ otum. Gibikele i doggola kema me rwatte, ci en bityero motte bot Rwot, wod romo acel me mwaka acel, ma kome pe ki mwonyo, pi gitum awaŋa, ki bwon romo acel ma ditte mwaka acel ma kome pe ki mwonyo pi gityer lakwecwiny, kacel ki aduku me mugati ma tobi pe iye, capat me moko kwon mapwotte ma girubo ki moo, ki capat marep ma tobi pe iye ma gireyo moo i komgi, ki gityer me moko kwon ki gityer amata mutikogi. “Ajwaka bikelogi i nyim Rwot, ci tyero gitum me balle ki gitum me tiŋo alii. Ka dok bityero nyok romo obed gityer Lakwecwiny bot Rwot, kacel ki aduku mugati ma tobi pe iye. Ka dok ajwaka bityero gityer me moko kwon ki gityer amatane. Dano ma ajula pa Lubaŋa bilyelo yer wiye me kone kene i doggola kema me rwatte, ci bikwanyo yer wiye me bedo ajula-ni, keto i mac ma tye i te gityer lakwecwinynyi. Ajwaka bikwanyo bat nyok romo ka doŋ gitedo, ki capat acel ma tobi pe iye, ki i aduku, ki capat marep acel ma tobi pe iye, biketogi i dye cin ajula, ka doŋ olyelo yer wiye me kone kene. Ajwaka bikwatogi me bedo gityer me akwata i nyim Rwot; gin aye waŋ wat maleŋ pa ajwaka, kacel ki gok ma gikwato-ni ki em ma gityero; lacen ajula doŋ twero mato koŋo vino, “Man aye cik ma mako ajula ma okwoŋo kwoŋ. Gityerre bot Rwot bibedo ma oporo kwoŋŋe ma okwoŋo me bedo ajula pa Lubaŋa, ma en miyo kacel ki gin ma en romo noŋone: wek en oti ma oporo kwoŋ ma yam okwoŋo, kun lubo cik ma mako konene kene me bedo ajula.” Rwot owaco bot Moses ni, “Wac bot Aron ki awobene ni, Wubilamo gum i kom jo Icrael kit man: ibiwaco botgi ni, Rwot omini gum, ogwoki; Rwot oneni ki waŋ me kica, otimi ber Rwot tiŋ waŋe i komi omini kuc. Gibiketo nyiŋa i kom jo Icrael kit meno, ci an abimiyogi gum.” Ka Moses otyeko guro kema, owiro ki moo dok okwero kacel ki jamine ducu. Ka dok owiro keno tyer ki moo bene, okwero kacel ki jami ticce ducu. I kare meno lutel wi Icrael, ma gin ludito kaka ki i odi pa kwarogi, lutel wi kaka ma giloyo wi jo ma yam gikwano welgi-ni, gutyero gityer megi, gukelo i nyim Rwot. Gumiyo gadigadi abicel ma gitye ki gin umo wigi, ki twoni apar wiye aryo; lutel wic aryo aryo gumiyo gadigadi acel acel, ci ŋat acel acel omiyo twon acel; gutyerogi ki i nyim kema. Rwot dok owaco ki Moses ni, “Gam jami-ni woko ducu ki botgi wek giti kwedgi tic ma i kema me rwatte, ci imigi bot Lulevi, macalo dog tic ma ŋat acel acel tye kwede.” Omiyo Moses ogamo gadigadi ducu ki twoni, ci omiyogi bot Lulevi, Gadigadi aryo ki twoni aŋwen omiyo bot likwayo pa Gercon, ma oporo dog ticgi; ka dok gadigadi aŋwen ki twoni aboro omiyo bot likwayo pa Merari, ma oporo dog ticgi, kun gitye i te loc pa Itamar wod pa ajwaka Aron. Ento pe omiyo gin mo bot likwayo pa Kokat, pien yam giketogi i dog tic me gwoko jami maleŋ ki me tinogi i wi gwokgi, Ci lutel wic gutyero gityer me kwero keno tyer i kom nino meno ma giwiro iye ki moo-ni; lutel wic gutyero gityergi i nyim keno tyer. Rwot owaco bot Moses ni, “Gibityero gityergi kun latel wic acel acel tyero mere i ninone, pi kwero keno me tyer.” Ŋat ma otyero gityerre i nino mukwoŋo en aye Nakucon wod pa Aminadab, ma i kaka pa Juda. En otyero caani me ryal acel ma pekke romo cekel miya acel ki pyeradek, ki becen me ryal acel ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka doki atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel. Man aye gityer ma Nakucon wod pa Aminadab otyero. I nino me aryone Netanel wod pa Juar, ma en aye latel wi jo pa Icakar otyero gityer. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal acel ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka doki atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa: nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel, Man aye gityer ma Netanel wod pa Juar otyero. I nino me adekke obedo kare pa Eliab wod pa Kelon, ma en aye latel wi jo pa Jabulon. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal acel ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka doki atabo me jabu acel ma pekke cekel apar ma opoŋ ki o dok eceta; wod twon acel, nyok romo acel, ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel. Man aye gityer ma Eliab wod pa Kelon otyero. I nino me aŋwenne obedo kare pa Elijur wod pa Cedeur, ma en aye latel wi jo pa Reuben. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal acel ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki mo ko kwon mapwotte ma girubo ki moo pi gityer me moko kwon. Ka doki atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel, Man aye gityer ma Elijur wod pa Cedeur otyero. I nino me abicce obedo kare pa Celumiel wod pa Juricadai, ma en aye latel wi jo pa Cimeon. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal acel ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka doki atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel, Man aye gityer ma Celumiel wod pa Juricadai otyero. I nino me abicelle obedo kare pa Eliacap wod pa Deuel, ma en aye latel wi jo pa Gad. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal acel ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka doki atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa: nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel, Man aye gityer ma Eliacap wod pa Deuel otyero. I nino me abirone obedo kare pa Elicama wod pa Amikud, ma en aye latel wi jo pa Epraim, Pi gityerre en otyero caani me ryal acel ma pekke romo cekel miya acel ki pyeradek, ki becen me ryal acel ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon, ka doki atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel. Man aye gityer ma Elicama wod pa Amikud otyero. I nino me aborone obedo kare pa Gamaliel wod pa Pedajur, ma en aye latel wi jo pa Manace. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal acel ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka doki atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel. Man aye gityer ma Gamaliel wod pa Pedajur otyero. I nino me aboŋwenne obedo kare pa Abidan wod pa Gideoni, ma en aye latel wi jo pa Benjamin. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal acel ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka doki atabo me jabu acel ma pekke cekel apar ma opoŋ ki odok eceta; wod twon acel, nyok romo acel ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel. Man aye gityer ma Abidan wod pa Gideoni otyero. I nino me aparre obedo kare pa Akiejer wod pa Amicadai, ma en aye latel wi jo pa Dan. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka doki atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel. Man aye gityer ma Akiejer wod pa Amicadai otyero. I nino me apar wiye acel obedo kare pa Pagiel wod pa Okoran, ma en aye latel wi jo pa Acer. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka dok atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel. Man aye gityer ma Pagiel wod pa Okoran otyero. I nino me apar wiye aryo obedo kare pa Akira wod pa Enan, ma en aye latel wi jo pa Naputali. Pi gityerre en otyero caani me ryal acel ma pekke romo cekel miya acel ki pyeradek, ki becen me ryal ma pekke cekel pyerabiro, ka giporo ki cekel me kabedo maleŋ; gin aryo ducu igi opoŋ ki moko kwon mapwotte ma girubo ki moo pi gityer me moko kwon. Ka dok atabo me jabu acel ma pekke cekel apar ma opoŋ ki odok eceta; wod twon acel, nyok romo acel, ki wod romo acel me mwaka acel pi gitum awaŋa; nyok dyel acel pi gitum me bal; ka doki pi gityer lakwecwiny otyero twoni aryo, nyogi romi abic, nyogi dyegi abic, ki litino nyogi romi abic ma ditogi mwaka acel acel. Man aye gityer ma Akira wod pa Enan otyero. Man aye obedo gityer me kwero keno tyer, ma gityero i kom nino ma giwiro iye ki moo, ma oa ki bot lutel wi Icrael: caani me ryal apar wiye aryo, becen me ryal apar wiye aryo, ki atabo me jabu apar wiye aiyo, kun caani me ryal acel acel pekke romo cekel miya acel ki pyeradek, ki becen acel acel pekke romo cekel pyerabiro, mumiyo ryal me jami-nu ducu pekke oromo cekel alip aryo, ki miya aŋwen ka giporo ki cekel me kabedo maleŋ, Atabo me jabu onoŋo tye apar wiye aryo, ma odok eceta opoŋo igi, kun atabo acel acel pekke romo cekel apar ka giporo ki cekel me kabedo maleŋ, mumiyo jabu me atabo ducu oromo cekel miya acel ki pyeraryo. Lim makwo ducu pi gitum awaŋa giromo twoni apar wiye aryo, nyogi romi apar wiye aryo, ki litino nyogi romi apar wiye aryo ma ditogi mwaka acel acel, kacel ki gityer me moko kwon mutikogi; ki nyogi dyegi apar wiye aryo pi gitum me bal. Lim makwo ducu pi gityer lakwecwiny giromo twoni pyeraryo wiye aŋwen, nyogi romi pyerabicel, nyogi dyegi pyerabicel, ki litino nyogi romi ma ditogi mwaka acel acel pyerabicel. Meno aye obedo gityer me kwero keno tyer, ma gityero ka doŋ gityeko wirone ki moo. I kare ma Moses ocito i kema me rwatte ka lok iye ki Rwot, owinyo dwan ma tye ka lok kwede-ni ka a ki malo i wi kom me kica ma i wi canduk lok me caden-ni, kun winnye ki i kin lukerubi aryo, ma kun loko kwede. Rwot owaco ki Moses ni, “Wac bot Aron ni, Ka icibo laput malo, laput abiro-ni bimenyo kabedo ma i nyim okar-mac.” Ci Aron otimo kit meno; ocibo mac laputte malo wek gumeny kabedo ma i nyim okarmac, macalo Rwot ociko ki Moses. Man aye kit tic ma gitiyo kwede okar-mac, gitiyo ki jabu ma giteto ki nyol. Nia ki i tedi tere o kwede wa i kom cal aturene onoŋo gitiyo kun giteto ki nyol; Moses otiyo okar-mac kun lubo kit cal ma Rwot onoŋo onyuto bote. Rwot owaco ki Moses ni, “Kwany Lulevi woko ki i kin jo Icrael, ci ilonygi. Ibitimogi kit man pi lonyogi: kir pii me lwoko bal i komgi, ci wek gin gulyel komgi woko ducu ki lyedi, gulwok boŋŋigi, gulonnye kekengi, Lacen wek gin gukwany wod twon kacel ki gityer me moko kwon mutike, me moko kwon mapwote ma girubo ki moo, ka doki in ibikwanyo wod twon mukene pi gitum me bal. Ka doŋ ibitero Lulevi i nyim kema me rwatte, kun icoko lwak jo Icrael ducu kacel. Ka itero Lulevi i nyim Rwot, jo Icrael gibiketo ciŋgi i wigi, ka Aron bityero Lulevi i nyim Rwot gubed gityer akwata ma oa ki bot jo Icrael, wek gubed ka tiyo tic pa Rwot. Ka dok Lulevi gibiketo ciŋgi i wi twoni, ci ibityero acel pi gitum me bal, ki acel pi gitum awaŋa bot Rwot, pi kwanyo bal ki i kom Lulevi. Ibitero Lulevi i nyim Aron ki awo bene, ci ibityerogi gubed gityer akwata bot Rwot. “Ibipoko Lulevi woko ki i kin jo Icrael kit meno, ci Lulevi doŋ bibedo jona. Ka doŋ lacen Lulevi gibidonyo ka tiyo tic ma i kema me rwatte, ka doŋ ityeko lonyogi kun ityerogi macalo gityer akwata. Pien gityeko miyogi bota matwal ki i kin jo Icrael; atyeko kwanyogi pira kena ma ka litino ducu mukwoŋo yabo ic, ma litino kayo pa jo Icrael ducu. Pien litino kayo ducu ma i kin jo Icrael gin mera, pa dano ki pa lee bene; yam akwerogi gubed mera i nino ma aneko iye litino kayo ducu ma i lobo Ejipt. Ci doŋ atyeko kwanyo jo pa Levi me leyo ka tyengi, gin litino kayo ducu ma i kin jo Icrael. Dok atyeko miyo Lulevi bot Aron ki awobene me mot, kun gia woko ki i kin jo Icrael pi tiyo tic i kema me rwatte pi jo Icrael, dok pi kwanyo bal ki i kom jo Icrael, wek gemo mo pe opot i kom jo Icrael pi nyiko cok ki kabedo maleŋ.” Moses ki Aron ki lwak jo Icrael ducu gutiyo kit meno i kom Lulevi; kit ducu ma yam Rwot ociko ki Moses i kom Lulevi-ni, jo Icrael bene gutimo i komgi kit meno. Lulevi gulonnye kekengi i kom balgi; gulwoko boŋŋigi; ka Aron otyerogi macalo gityer akwata i nyim Rwot, ci Aron otimo gin lakwany bal ki i komgi wek gubed ma gulony. Lacen Lulevi gudonyo ka tiyo ticgi i kema me rwatte me konyo Aron ki awobene; kit ma onoŋo Rwot ociko ki Moses i kom Lulevi, gitimogi kit meno. Rwot owaco ki Moses ni “Man aye lok ma mako Lulevi: jo ma ditogi romo mwaka pyeraryo wiye abic ki dok kwede malo gibidonyo ka cobo dog ticgi ma gitiyo pi kema me rwatte. Ka mwaka me ditogi oromo pyerabic, ci doŋ gibiweko ticgi ma gitiyo, pe doŋ gibitic matwal. Ento gibikonyo omegigi ma i kema me rwatte wek gugwok cik ma mako ticgi, ento pe gibitiyo tic kikome. Ibitimo Lulevi kit meno pi lok ma dok i kom ticgi.” Rwot oloko ki Moses i tim Cinai i dwe mukwoŋo me mwaka me aryone ma onoŋo doŋ gua woko ki i lobo Ejipt kun wacce ni, “Jo Icrael myero gukwer nino madit me Kato i kare ma giciko. I nino dwe apar wiye aŋwen me dwe man otyeno, i kare ma giciko, en aye wubikwero iye; wubikwero kun wulubo cikke ducu ki lok ducu ma giciko i kome.” Kit meno Moses ociko jo Icrael ni gukwer nino madit me Kato. Ci gukwero nino me Kato i dwe mukwono, i nino dwe apar wiye aŋwen, otyeno i tim Cinai; kit ducu ma yam Rwot ociko ki Moses, jo Icrael bene gutimo kit meno. Onoŋo tye jo mogo ma gudoko keni pi gudo kom dano muto, mumiyo pe gitwero kwero nino madit me Kato i nino meno. Gucito bot Moses ki Aron i nino meno; ci jo meno guwacce ni, “Wan doŋ wadoko keni pi gudo kom dano muto; piŋo gigenowa pe watyer gityer pa Rwot i kin jo Icrael i kare ma giciko?” Moses owaco botgi ni, “Koŋ wukur wek koŋ awiny gin ma Rwot biciko i komwu.” Rwot owaco bot Moses ni. “Wac bot jo Icrael ni, Kadi bed ŋatti mo i kinwu, nyo i kin likwayowu, odoko keni pi gudo kom dano muto, nyo otiŋo wot mabor, en pud twero kwero Kato pa Rwot. Gibikwero i dwe me aryo, i nino dwe apar wiye aŋwen, otyeno; gibicamo iye mugati ma tobi pe iye ki dek mogo makec. Pe gibiweko gin mo doŋ nio odiko, cogone mo pe gibituro; gibikwero kun gilubo cik ducu ma mako nino me Kato. Ento dano ma olony, ma pe ocito ka wot mo, ento dok oweko kwero nino madit me Kato, dano meno waŋe birwenyo woko ki i kin lutugi, pien onoŋo pe otyero gityer pa Rwot i kare ma giciko; dano meno balle bidok i wiye. Ka larok mo obedo i kinwu, ka en kwero Kato pa Rwot, en bitiyo kun lubo cik me nino me Kato ki gin ma giciko iye. Wubibedo ki cik acel pi labedo ki pi anywalli me lobo.” I kom nino ma giguro iye kema pa Lubaŋa, en aye pol obino, oboyo kom kema woko, en kema lok me caden; otyeno oumo wi kema ma nen macalo mac nio wa odiko. Ci obedo kwede kit meno jwijwi; pol umo wiye dyeceŋ, ki gin macalo mac umo dyewor. Ka ce pol owarre woko ki i kema, ci jo Icrael gicako wot anyim; i kabedo ka ma pol ocuŋ iye, jo Icrael giguro iye kemagi. Jo Icrael gicako wot pi cik pa Rwot, dok pi cik pa Rwot giguro kemagi; ka ce pol pud oumo wi kema pa Rwot, ci gin bene pud gibedo i gonygi. Ka pol omedde ki umo wi kema lwak nino mapol, jo Icrael bene gimedde ki gwoko cik ma mako tic pa Rwot kun pe gidak. I kare mukene pol umo wi kema pi nino mo manok, ci pi lubo cik pa Rwot gin bene gibedo i gony megi-nu kit meno; dok pi lubo cik pa Rwot miyo gidak. I kin mukene pol bedo cakke otyeno nio wa odiko; ka odiko pol owarre woko ki i wiye, ci gicako wot; nyo ka omedde ori pi nino acel ki dywor acel, kare ma pol owarre iye-ni, en aye gicako iye wot bene. Kadi bed ori i wiye pi nino aryo, nyo dwe acel, nyo pi kare mo malac, ka ce pol pud omedde ki umo wi kema, kun bedo kenyo, ci jo Icrael bene koŋ gibedo i gonygi kun pe gidak; ento ka owarre woko, ci gin bene gicako wot. Pi lubo cik pa Rwot miyo giguro kemagi, dok pi lubo cik pa Rwot miyo gidak, kun gigwokocik ma mako tic pa Rwot kit ma yam Rwot ociko ki i dog Moses. Rwot owaco bot Moses ni, “Yub tum aryo me ryal ma ibitetogi ki nyol, ci ibitic kwedgi me lwoŋo lwak ki pi cako wot. Ka gikuto tum aryo ducu, ci lwak ducu gibicokke kacel boti i doggola kema me rwatte, Ento ka gikuto tum acel keken, ci lutel wic, ma gin ludito ma i kaka ducu pa jo Icrael, gibicokke kacel boti. Ka wukuto okok maloŋo kicel, ci gony ma yo tun wokceŋ gibicako wot. Ka wukuto okok maloŋo tyen me aryone, ci gony ducu ma yo tun acuc gibicako wot. Gibikuto tum kok maloŋo me cako wot anyim. Ento ka wumito coko lwak kacel wubikuto, ento pe wukut okok maloŋo, Awobe pa Aron, ma gin aye ajwagi, gibikuto tumo Cik me kuto tum bibedo botwu cik matwal nio wa i kare pa likwayowu ducu. Ka wucito i mony ka lweny ki lukworwu ma gidiyowu i lobowu, ci wubimiyo oduru mony kok kun wukuto tum, wek Rwot Lubaŋawu opo piwu ci olarwu ki bot lukworwu. I nino ma cwinywu yom iye bene, ki i nino madito ma gicikowu pigi, ki i kare me por dwe ducu, wubikuto iye tum i wi gitum awaŋa mewu, ki i wi gitum mewu me gityer lakwecwiny; gibikutogi wek Lubaŋa opo piwu; an a Rwot Lubaŋawu.” I mwaka me aryone, i dwe me aryone, i kom nino dwe pyeraryo, pol ocako warre woko ki i wi kema lok me caden, omiyo jo Icrael gucako wot, gua woko ki i tim Cinai kun giwoto, gikobo; ci pol ocito ocuŋ wa i tim Paran. Gudak tyen man mukwoŋo kit ma Rwot yam ociko ki Moses. Bendera me gony pa jo pa Juda aye gutelo yo ki buca monygi ducu; lawimonygi aye Nakucon wod pa Aminadab. Lawimony me kaka pa Icakar obedo Natanel wod pa Juar, ki lawimony me kaka pa Jabulon obedo Eliab wod pa Kelon. Ka kema pa Rwot doŋ giputo, ci likwayo pa Gercon ki likwayo pa Merari ma gitiŋo kema, gucako wotgi. Ki bendera me gony pa jo pa Reuben ocako wot ki buca monygi ducu; lawimonygi obedo Elijur wod pa Cedeur Lawimony me kaka pa Cimeon obedo Celumiel wod pa Juricadai. Lawimony me kaka pa Gad obedo Eliacap wod pa Deuel. Dok jo pa Kokat gucako wot, kun gitiŋo jami maleŋ ducu; kema onoŋo doŋ giguro ocuŋ ma peya guo. Ka dok bendera me gony pa jo pa Epraim ocako wot ki buca monygi ducu; lawimonygi obedo Elicama wod pa Amikud. Lawimony me kaka pa Manace obedo Gamaliel wod pa Pedajur. Lawimony me kaka pa Benjamin obedo Abidan wod pa Gideoni. Lacen bendera me gony pa jo pa Dan ocako wot ki buca monygi ducu, kun gicoko ŋe gony ducu; lawimony megi obedo Akiejer wod pa Amicadai, Lawimony me kaka pa Acer obedo Pagiel wod pa Okoran, Lawimony me kaka pa Naputali obedo Akira wod pa Enan. Man aye onoŋo kit wot pa jo Icrael, ma lubo buca monygi, i kare ma gimol me cako wot. Moses owaco bot Kobab wod pa Reuel ma Lamidian, won dakone, ni, “Wan wacako wot wadak i kabedo ma Rwot cen owaco pire ni ebimiyowa-ni. Ber iwot kwedwa, ci wabitimi maber.” Ento Kobab owacce ni, “An pe abicito; abidok i lobo tuwa ki bot lutuwa.” Moses ogamo ni, “Alegi, pe iwekwa, pien in iŋeyo ni wabigony i tim, ci ibibedo botwa ma ka wanwa. Dok ka ibiwoto kwedwa, gin maber ducu ma Rwot bitimo i komwa, wan bene wabitimi kit meno.” Gucako a woko ki i nyim got pa Rwot, ci gutiŋo wot me nino adek; ci canduk me gicikke pa Rwot owoto otelo yo nyimgi wot me nino adek pi yenyo kabedo me yweyogi, kun pol pa Rwot woto lamalo ka wigi ki i dyeceŋ, i kare ducu ma gicako wot nia ki i gonygi. Kare ducu ka canduk cako wot, ci Moses waco ni, “Doŋ ia malo, ai Rwot imi lumerok meri guket woko ata; wek jo ma dagi gurin woko ki i nyimi.” Ka doŋ ocun ka yweyo, ci en dok waco ni, “Doŋ idwog cen, ai Rwot, bot lwak doggola mapol mada ma i Icrael.” Dano gubedo ka lok ki akeca pi can ducu ma gitye iye, ci Rwot owinyo; ka Rwot otyeko winyone, kiniga omake, ci mac pa Rwot opoto, olyel i kingi, owaŋo kabedo mogo ma i ŋet gony. Lwak gukok bot Moses, ci Moses olego Rwot, ka mac ocako pye. Mumiyo nyiŋ kabedo meno gilwoŋo ni, Tabera, pien mac pa Rwot olyel i kingi. I kare meno lwak jo a ta ma gitye i kingi cwinygi opukke matek, omiyo jo Icrael bene gucako koko doki, kun giwaco ni, “Lutuwa, aŋa ma bimiyowa riŋo me acamawa? Pud wapo pi rec ma yam wacamo nono i Ejipt, ki pi okwer ki okono ki kituŋgulu maboco ki kituŋgulu matino ki kituŋgulu matikki; ento i kare-ni kero komwa doŋ peke, dok gin mo bene doŋ peke, kono nyo manna man ma waneno keme-ni.” Onoŋo manna nen macalo nyig koo, dok bene nen macalo odok yat ma gilwoŋo bedola. Dano gicito ka jobone, ka girego ki kidi nyo giodo ki pany, ka gitedo ki agulu, nyo gitimo ki capatine; ka gicamo, mitte rom ki mit pa capat ma gitedo ki moo. Ka toyo oluk i dye gony ki i dyewor, ci manna bene poto piny. Moses owinyo ka dano gikok i doggolagi ducu, kun gat acel acel tye i dog kemane; ci kiniga omako Rwot matek, Moses bene cwinye pe obedo yom. Moses owaco bot Rwot ni, “Piŋo itima marac kuman? Piŋo an pe anoŋo gum mo i nyimi, mumiyo in doŋ iketo peko pa lwak man ducu i koma? Onoŋo an aye abedo min lwak man ducu bo? An aye yam anywalogi bo, mumiyo Iwaco bota ni atiggi i kora, macalo lapidi tiŋo latin ma pud dot, atergi i lobo ma yam ikwoŋo pire ni ibimiyo bot kwarogi? Ni kono abinoŋo riŋo kwene me amiya ki lwak dano man ducu? Pien gibedo ka kok i nyima kun giwaco ni, ‘Miniwa riŋo wek wacam.’ An pe atwero tigo lwak dano man pira kena; yecce pek mukato kare. Ka ibedo ka tima kit man, ci ber ineka woko magicel, ka anoŋo gum mo i nyimi, wek pe abed ka neno can kuman.” Rwot owaco bot Moses ni, “Cokka jo pyerabiro ki i kin ludoŋo pa jo Icrael, ma igeyo ni gin ludoŋo ki i kin lwak ki ludito ma loyogi; ci ikelgi i kema me rwatte, wek gucuŋ kunnu kacel kwedi. An abilor piny abino ka lok kwedi kunnu; ci abikwanyo cwinya mo ma tye i komi-ni, abiketo i komgi; miyo gibinywako tigo peko pa lwak kacel kwedi, wek in pe doŋ ibed ka tinone piri keni. Wac bot lwak ni, ‘Wulonnye kekenwu wubed maleŋ pi nino ma diki, ci wubicamo riŋo; pien wubedo ka kok i it Rwot kun wuwaco ni, “Aŋa ma bimiyowa riŋo me acamawa? Pien yam onoŋo watye maber giwa i Ejipt.” Pi meno Rwot bimiyowu riŋo ci wubicamo. Pe wubicamo pi nino acel keken, nyo nino aryo, nyo abic, nyo apar, nyo pyeraryo, ento wubicamo pi dwe acel kulu, nio ka bikatti woko ki i umwu, nio ka ocido cwinywu woko, pien wutyeko kwero Rwot ma bedo i kinwu-ni kun wukok i nyime ki pig waŋwu, wuwaco ni, “Piŋo yam waa woko ki i Ejipt?”’” Ento Moses ogamo ni, “Jo ma abedo i kingi welgi romo alip miya abicel, co ma giwoto ki tyengi, ci in iwaco ni, ‘Abimiyogi riŋo wek gucam pi dwe kulu!’ Myero ginek lwak lim makwo, romi ki dyani-gu, wek oromgi? Nyo lwak rec ducu ma, tye i nam gibicoko kacel pigi, wek oromgi?” Rwot ogamo dog Moses ni, “Cin Rwot aye doŋ odoko cek bo? Ibineno tin ka ce lokka bicobbe boti kakare nyo pe.” Moses okato woko ka tito ki dano lok ma Rwot owaco; ci ocoko jo pyerabiro ki i kin ludoŋo pa jo Icrael, oketogi gurumo kema me rwatte. Ka Rwot olor piny ki pol, ci oloko kwedgi, okwanyo cwinye mo ma tye i kom Moses, oketo i kom ludoŋo pyerabiro. Ka cwiny pa Lubaŋa opoto i komgi, ci gucako lok macalo lunebi. Ento pe dok gumedde ki timo kit meno. Onoŋo jo aryo gudoŋ cen i gony, acel nyiŋe Eldad ki mukene nyiŋe Medad, ci cwiny pa Lubaŋa opoto i komgi. Onoŋo gitye i kin jo ma yam gicoyo nyiŋgi-ni, ento pe gukato woko gucito i kema me rwatte, mumiyo gubedo ka lok macalo lunebi i dye gony. Latin awobi mo oriŋo otito bot Moses ni, “Eldad ki Medad gitye ka lok macalo lunebi i dye gony.” Ci Yocwa wod pa Nun, ma onoŋo obedo lakeny pa Moses cakke wa i tinone, owacci, “Moses, laditta, jukgi woko.” Ento Moses owaco bote ni, “In nyeko omaki pira ce? Kono jo pa Rwot ducu gubedo lunebi, kono ber mada, wek Rwot oony cwiny mere i komgi!” Ci Moses ki ludoŋo pa jo Icrael gudok i gony. Ka Rwot omiyo yamo okodo, ci okelo lwak aluru nia ki i nam, ci gupoto piny i ŋet gony. Lacce romo wot me nino acel ki tuŋcel, dok ki tuŋ mukene bene lacce romo wot me nino acel ma orumo gony ducu, opoŋo piny ma romo futi adek kulu. Dano gutwarre ka cokogi i nino meno dyeceŋ ki dyewor benebene, ki orwone bene. Jo ma gucoko manok keken gucoko muromo guniya pyeradek; ci gucako moyone murumo gony. I kare ma riŋone pud omoko i kin lakgi, ma peya gucamo otum, kiniga omako Rwot i kom dano, ci opwodo lwak ki two gemo mapek. Mumiyo nyiŋ kabedo meno gulwoŋo ni, Kibrot-atava, pien jo ma kecgi dwoŋ giyikogi kunnu. Nia ki i Kibrotatava lwak gutiŋo wot me cito Kajerot, ci gutiro gubedo kunnu. Onoŋo Moses onyomo dako mo ma nya jo Kuc, ci Miriam ki Aron gucako loko lok akeca i kom Moses pi dako-nu. Gubedo ka waco ni, “Rwot obedo ka lok ki dog Moses kene bo? Pe obedo ka lok ki dogwa bene?” Ci Rwot owinyo yo. Moses onoŋo yam mwol matek, mwol makato dano ducu ma onoŋo yam gitye i wi lobo-ni, Cutcut Rwot owaco bot Moses ki Aron ki Miriam ni, “Wukat woko, wun adek ducu, wubin i kema me rwatte.” Gin adek ducu gukato woko. Ci Rwot olor piny ki wir me pol, ocuŋ i dog kema me rwatte, ka olwoŋo Aron ki Miriam. Gin aryo ducu gukato anyim. Ci owacci, “Wuwiny lokka. Ka ce tye lanebi mo i kinwu, an Rwot aweko en neya ki i ginanyuta, aloko kwede ki i waŋ lek. Ento bot laticca Moses pe bedo kit meno; pien atyeko keto oda ducu i ciŋe, Abedo ka lok kwede waŋ ki waŋ, ka maleŋ atyer, pe agoŋo lok; en neno kit ma Rwot cal kwede, Piŋo pe wulworo loko lok akeca i kom laticca Moses?” Kiniga omako Rwot i komgi, ci ocito woko. Ka pol owarre woko ki i wi kema me rwatte, ci nen, kom Miriam orugo woko cut, okwor matar macalo pee. Ka Aron olokke yo tuŋ bot Miriam, oneno kome orugo woko matar ci owaco bot Moses ni, “Ai, laditta, pe iket can i komwa pien watimo lok me miŋo, doŋ wabalo. Pe iwek en obed macalo latin ma ginywalo ma doŋ oto, ma riŋo kome nucune doŋ oballe woko ma pud oa aaya ki i minne.” Moses okok bot Rwot ni, “Caŋe ba, ai Lubaŋa, abako doga boti do.” Ento Rwot owaco bot Moses ni, “Ka nene wonne aye onoŋo oŋulo laa i waŋe keken, kono pe en obedo ki lewic pi nino abiro? Wek koŋ gitweye woko i ŋe gony pi nino abiro, ka lacen gibikele doŋ i gony.” Kit meno gitweyo Miriam woko i ne gony pi nino abiro; ci lwak pe gumedo ki dak ka mo nio waŋ ma gimiyo Miriam odwogo woko i gony, Ka doŋ lacen dano gucako wot nia ki i Kajerot, ci gugony i tim Paran gubedo iye. Rwot owaco bot Moses ni, “Cwal dano gucit gurot lobo Kanaan ma abimiyo bot jo Icrael. Cwal dano acel ki i kaka acel acel pa kwarogi, kun dano acel acel bedo latel wic i kingi.” Moses ocwalogi ki i tim me Paran, kit macalo Rwot ociko; gin ducu onoŋo gin ludito i kin jo Icrael. Nyiŋi ene; i kaka pa Reuben Camua wod pa Jakur; i kaka pa Cimeon Capat wod pa Kori; i kaka pa Juda Kaleb wod pa Jepune; i kaka pa Icakar Igal wod pa Yucepu; i kaka pa Epraim Kocea wod pa Nun; i kaka pa Benjamin Palti wod pa Rapu; i kaka pa Jabulon Gadiel wod pa Codi; i kaka pa Yucepu, en aye kaka pa Manace, Gadi wod pa Cuci; i kaka pa Dan Amiel wod pa Gemali; i kaka pa Acer Cetur wod pa Mikael; i kaka pa Naputali Nabi wod pa Vopci; i kaka pa Gad Geuel wod pa Maki. Meno aye nyiŋ jo ma Moses ocwalogi ka roto lobo. Moses ocako nyiŋ Kocea wod pa Nun ni Yocwa. Moses ocwalogi ka roto lobo Kanaan kun waco botgi ni, “Wucit i Negeb kuca ca, wuit malo wa i lobo godi,” wek wunen kit ma lobo-nu tye kwede, ka ce jo ma bedo iye jo matego nyo jo magoro, ka ce ginok nyo gipol, ka ce lobo ma gibedo iye-ni ber nyo rac, ka ce gaŋi ma gibedo iye tye apero nyo girumo ki cel matego, ka ce lobone ceko cam nyo pe ceko, ka ce yadi tye i lo bone nyo pe. Wucam co ki i cwinywu, ci wudwog ki nyig yadi mogo mucek i lo bo kunnu.” Kare ma gin gucito onoŋo obedo kare ma nyig olok cako cek iye. Kit meno gucito ka roto piny nia ki i tim Jin o wa i Rekob, ma cok ki yo ma donyo i Kamat. Gucito nio wa i Negeb ka guo kwede i Kebron; ci Akiman, Cecai ki Talmai likwayo pa Anak onoŋo gitye kunnu, (Kebron onoŋo gigero ori mwaka abiro ma peya gigero Joan ma i Ejipt.) Lurot piny guo wa i nota me Ecikol, ci guŋolo jaŋ tuga nyig olok acel ma olugo, gutiŋo ki tal mabor kun jo aryo aye gulebo, dok gukelo ki nyig okwer pomegranat ki nyig oduru. Kabedo meno yam gilwoŋo ni nota me Ecikol, pien jo Icrael guŋolo iye jaŋ tuga nyig olok. I ŋe nino pyeraŋwen gudwogo ki ka roto piny ma i lobo-nu. Gudwogo bot Moses ki Aron ki lwak jo Icrael ducu ma i tim Paran, i Kadec; gukelo lok ki kunnu botgi ki bot lwak ducu, dok gunyuto botgi gin mucek i lo bo-nu. Gutito ki Moses ni, “Wacito i lobo ma icwalowa iye; lobone mol cak ki moo kic, man aye nyig yadine ma wakelo-ni. Kun kono jo ma gibedo i lobo-nu jo matego, gaŋgi bene gigoyo ki cel matego, dok gidito twatwal; medo ki meno, waneno iye likwayo pa Anak. Jo Amalek gibedo megi i lobo ma i Negeb; jo Kit, jo Jebuc ki jo Amor gibedo i lobo godi; jo Kanaan gibedo i lobo murabo dog nam, ki murabo dog Jordan.” Kaleb ojuko dano guliŋ woko i nyim Moses ci owacci, “Wan watugi cito kunnu magicel, wek wacamu woko; pien wan waromo loyogi.” Ento dano ma yam gunywako kwede wot kunnu guwacci, “Wan pe waromo ette me cito i kom jo meno, pien gitego, gikatowa woko.” Ci gukelo lok marac ma obalo cwiny jo Icrael woko i kom lobo ma guroto-ni, kun giwacci, “Lobo ma wawoto wabaro iye-ni, waroto ducu, lobone camo jo ma gibedo iye woko; dok jo ducu ma wanenogi iye kunnu jo ma komgi pek madito. Dok waneno twoni oluma kunnu, likwayo pa Anak ma kwarogi ducu twoni oluma. Wan giwa watino warom ki otwoŋo mamwa, dok myero wanen kumeno ki tun botgi.” Lwak ducu gucako daŋŋe matek, ci dano gukok ki pig wangi dyewor benebene. Jo Icrael ducu gubedo ka nur i kom Moses ki Aron, ci lwakgi ducu guwaco botgi ni, “Kono nene wato giwa ki i Ejipt, kono ber! Nyo kono nene wato ki i tim kany! Piŋo Rwot okelowa i lobo man wek ginekwa woko ki pala lucwan? Monwa ki litinowa gibiyakogi woko bene; kono nene pe obedo ber ka wadok giwa cen i Ejipt?” Ci gucako lok kekengi ni, “Wek wayeru laditwa mo, wek wadoku cen i Ejipt.” Moses ki Aron gupoto piny aryeba ic i nyim lwak jo Icrael ma gucokke ducu. Ci Yocwa wod pa Nun ki Kaleb wod pa Jepune ma yam gitye i kin jo ma guroto lobo-nu guyeco boŋŋigi kekengi pien cwinygi ocwer. Guwa, bot lwak jo Icrael ducu ni, “Lobo ma yam wawoto wabaro iye, waroto, wanono ni lobone ber makato ducu. Ka i Rwot obedo yom i komwa, en biterowa i lobo-nu, ci miyo i cinwa, en aye lobo ma mol cak ki moo kic. Ento pe wujem i kom Rwot; dok pe wulwor wegi lobo-nu, pien gin kwon me acamawa mere. Gin mo ma geŋo ŋegi doŋ pe, dok Rwot tye tuŋ botwa; pe wulworgi.” Ento lwak ducu guwacci, gicelgi acela ki got. Ka dok deyo pa Rwot onen i kema me rwatte i nyim jo Icrael ducu. Ci Rwot owaco bot Moses ni, “Jo man gibicaya pi kare ma rom mene? Gibikwero ye an pi kare ma rom mene, kadi bed atiyo lwak lanyut ducu ma rom man i kingi? Abipwodogi ki two gemo, abitwonogi lobo ma nene myero obed me aleyagi, dok abimiyo in idoko rok madit mada ki matek makatogi.” Ento Moses owaco bot Rwot ni, “Jo Ejipt dok gibiwinyo pire bene, pien in aye yam itiŋo jo man ki tekki ikwanyogi woko ki i kingi, dok gibitito bot jo ma gibedo i lobo man, Doŋ gityeko winyo ni in Rwot it ye i dye jo man, dok ni in Rwot aye gibedo ka neni waŋ ki waŋ, ki pol meri obedo ka cuŋ ka wigi, dok ibedo ka wot i nyimgi i wir pol dyeceŋ ki i wir mac dyewor. Ka ineko jo man woko lawaŋe acel, ci lurok ma giwinyo ywekani gibiwacci, ‘Onoŋo tero jo man i lobo ma yam okwoŋo pire ni ebimiyo botgi-ni doŋ oloyo Rwot woko, en mumiyo onekogi woko i dye tim-mi.’ Kombeddi alegi ni, wek tek pa Rwot obed madit kit macalo yam iciko kun iwacci, ‘Rwot kiniga pe mako oyot, mar mere ma pe lokke dwoŋ; en weko bal ki tim aranyi pa dano, ento pe kwanyo kop i kom lubalo. En keto can i kom likwayo ki i kom Likwayo pa likwayogi pi bal pa kwarogi nio i yalwak me adek ki me aŋwen.’ Alegi ni itim kica ki joni man pi rocgi, macalo in marri ma pe lokke dwoŋ twatwal-li, kit ma ibedo ka weko balgi cakke wa ki i Ejipt nio koni.” Rwot ogamo ni, “Doŋ atimo kica botgi kit macalo iwaco-ni. Ento ada, macalo atye kwo-ni, dok macalo deyo pa Rwot bipono lobo ducu-ni, akwoŋo ni, i kom jo ma guneno deyona ki lwak lanyut ma yam atiyo i Ejipt ki i tim, ento ma gubedo ka omo iya ma doŋ odoko tyen apar kulu, ma pe guwinyo doga bene, pe tye ŋat mo i kingi ma bineno lobo ma yam akwoŋo pire bot kwarogi ni abimiyogini; pe tye ŋat mo i kin jo ma gicaya ma bineno. Ento laticca Kaleb abitero i lobo ma yam ocito iye-ni, ci Likwaye bicamo, pien en tye ki cwiny mapat, dok en tye ka lubo gin ma amito ducu kakare atir. Jo Amalek ki jo Kanaan gibedo i nota ducu; pi meno wun diki wulokke wucak wot wudok tun tim i yo ma kemo Nam Makwar.” Rwot dok owaco bot Moses ki bot Aron ni, “Lwak man marac-ci gibiweko ŋuro i koma awene? Doŋ atyeko winyo lwak nuro ma jo Icrael gitye ka ŋuro kwede i koma. Wac botgi ni an Rwot awacci, ‘Macalo atye makwo-ni, gin ma doŋ wuwaco ma awinyo ki ita abitiyo botwu. Komwu muto biradde piny i dye tim man. I kin jo ma gikwanogi-ni, ma yam gikwano welgi cakke ki i kom jo ma ditogi romo mwaka pyeraryo dok kwede malo, ma gubedo ka nur i koma-ni, pe acel mo bio i lobo ma yam akwoŋo pire ni abimiyogi bedo iye; kono Kaleb wod pa Jepune ki Yocwa wod pa Nun keken aye gibio. Ento litinowu ma wuwacci gibiyakogi wokoni, gin aye abiterogi kunnu, gin aye gibiŋeyo lobo ma wun wucayo-ru. Wun aye komwu muto biradde piny i dye tim man. Litinowu gibibedo lukwat i tim mwaka pyeraŋwen kun gineno can pi tarwaŋwu atata, nio ka kom danowu ma oto me agikkine obuto i dye tim. Wubineno can pi balwu mwaka pyeraŋwen, muporo wel nino ma yam wuroto ki lobo-ni, nino pyeraŋwen, mwaka acel pi nino acel acel, ci wubineyo ni iya oarre woko i komwu.’ An a Rwot ma doŋ aloko; ada abitiyo man i kom lwak man marac-ci ducu ma guribbe me pyem kweda; gibitum woko i dye tim kany, gibito megi kunnu.” Jo ma yam Moses ocwalo ka roto lobo-ni, ma yam gudwogo ci gumiyo lwak ducu guŋur i kom Rwot pi lok marac ma gutito i kom lobo-nu, jo-nu guto woko ki two gemo i nyim Rwot. Ento Yocwa wod pa Nun ki Kaleb wod pa Jepune aye gudoŋ ma gikwo ki i kin lwak dano ma gucito ka roto lobo-ni. Moses otito lok meno ducu bot jo Icrael, ci dano gukok matek. Ci gua malo odiko con, gucito guito malo wa i lacol me lobo godi, kun giwaco ni, “Nen, wan doŋ watye kany co do, doŋ wabicito wa i kabedo ma Rwot ociko pire; pien doŋ wabalo.” Ento Moses owaco botgi ni, “Piŋo wun koni wuturo cik ma Rwot oketo? Pien meno pe bitwerre wacel. Pe wucit kunnu, wek pe lumerokwu guradwu woko piny, pien Rwot pe tye i kinwu. Jo Amalek ki jo Kanaan gitye i nyimwu kunnu, pala lucwangi bityekowu woko; pien wun wukwero lubo kor Rwot, miyo Rwot pe bibedo kwedwu.” Ento gin guette ni gimito ito malo wa i lacol lobo godi ca, kadi bed canduk me gicikke pa Rwot, ki Moses bene, pe gua woko ki i gony. Ci jo Amalek ki jo Kanaan ma gibedo i lobo godi kunnu gulor piny, guloyogi, ci guryemogi nio wa i Korma. Rwot owaco bot Moses ni, “Wac ki jo Icrael ni, Ka doŋ wuo i lobo ma wubibedo iye, ma abimiyowu-ni, ce wutyero dyaŋ nyo romo bot Rwot obed gityer ma giwaŋo ki mac, nyo gitum awaŋa, nyo kit gitum mukene, nyo gityer me cobo kwoŋ, nyo gityer ma ic opwoyo, nyo ka tyero i ninowu madito ma giciko wek obed gin ma ŋwece kur me yomo cwiny Rwot, ci ŋat ma okelo gityerre myero otyer bot Rwot bene moko kwon mapwotte ma romo agwata acel ma girubo ki moo ma romo cupa aryo ki nucu, obed gityer me moko kwon. Dok wubikelo yino me gityer amata pi gitum awaŋa nyo gitum mukene ducu ma romo cupa aryo ki nucu pi romo acel acel. Nyo ka pi nyok romo wubikelo moko kwon mapwotte ma romo agwata aryo ma girubo ki moo ma romo cupa adek pi gityer me moko kwon. Pi gityer: amata wubikelo yino ma romo cupa adek obed gin ma ŋwece kur me yomo cwiny Rwot. Ka wuyubo twon pi gitum awaŋa, nyo pi gitum mukene, nyo pi cobo kwon, nyo pi gityer lakwecwiny ma wutyero bot Rwot, ci myero wutyer kacel ki twon moko kwon mapwotte ma romo agwata adek ma girubo ki moo ma romo cupa abic obed gityer me moko kwon, Pi gityer amata wubityero koŋo vino ma’ romo cupa abic obed gityer ma giwaŋo ki’ mac, gin ma ŋwece kur meyomo cwiny Rwot. “Gibitiyo kit meno pi twon acel acel, nyo pi nyok romo acel acel, nyo pi wod romo nyo latin nyok dyel acel acel. Ducu bilubo Wel lim ma wukelo me atyera; wubitiyo kit meno i komgi acel acel macalo welgi, tye. Anywalli ducu me lobowu gibitiyo kit meno ka gityero gityer ma giwaŋo ki mac obed gin ma ŋwece kur me yomo cwiny Rwot. Ka larok mo odoko labedo i kinwu, nyo: ŋat mo ma bibedo i kinwu wa i kare pa likwayowu ducu, ka en mito tyero gityer ma giwaŋo ki mac obed gin ma ŋwece kurme ‘yomo cwiny Rwot, en bene bitime kit-mawun wutimo-ni. Pi lwak mucokke cik bibedo acel piwu ki pi larok ma odoko labedo i kinwu; meno bibedo cik matwal nio wa i kare pa likwayowu ducu; labedo bibedo ma rom ki wun i nyim Rwot. Cik bibedo acel ki ŋolo kop bene acel pi wun ki pi lurok ma gibedo i kinwu.” Rwot owaco bot Moses ni, “Wac bot jo Icrael ni, Ka doŋ wuo i lobo ma atye ka terowu iye-ni, ka wucamo cam ma ocek i lobe-nu, wubityero gityer bot Rwot. I kom moko kwon me kal manyen mukwoŋo cek’ wubityero capat lakoto obed gityer; wubityero macalo wutyero gityer ma wukwanyo ki i kom kal ma wudino. Wubimiyo gityer bot Rwot ki i kom moko kwoti me kal manyen mukwoŋo cek nio wa i kare pa likwayowu ducu. “Ento ka ce wuroco, kuli pe wumako cik magi ducu ma Rwot yam ociko ki Moses, ki gin ducu ma Rwot ocikowu kwede ki i dog Moses, nia wa i nino ma yam Rwot okwoŋo miyo iye cik, medde kwede wa i kare pa likwayowu ducu; ka ce dano guroco ma pe gubalo akaka, kun lwak pe ŋeyo gin mo iye, ci lwak ducu bityero wod twon acel me gitum awaŋa obed gin ma ŋwece kur me yomo cwiny Rwot, ki gityer me moko kwon ki gityer amata mutike macalo cik tye, kacel ki nyok dyel acel pi gitum me bal. Ajwaka bitimo gin lakwany bal ki i kom lwak jo Icrael ducu, ci Rwot biweko balgi; pien onoŋo pe gubalo akaka dok gukelo gityergi, gityer ma giwaŋo ki mac bot Rwot, ki gitumgi me bal, i nyim Rwot pi balgi ma pe gutimo akaka. Gibiweko bal pa lwak jo Icrael ducu, kacel ki pa lurok ma gibedo i kingi, pien onoŋo bal meno omako lwak ducu. “Ka ce dano acel mo aye obalo ma pe otimo akaka, ci en bityero bwoŋ dyel ma ditte romo mwaka acel pi gitum me bal. Ci ajwaka bitimo gin lakwany bal i nyim Rwot pi dano-nu ma opoto i bal ma pe otimo akaka, pi kwanyo bal ki i kome, ci Rwot biweko balle. Wubibedo ki cik acel pi dano ma obalo ma pe otimo akaka, kadi bed en anywalli pa jo Icrael nyo labedo ma bedo i kingi. Ento ka dano mo otimo bal mo me tekwic, kadi bed anywalli me lobo nyo labedo, noŋo doŋ ocayo Rwot; dano meno waŋe birwenyo woko ki i kin lutugi. Noŋo ocayo lok pa Rwot, oturo cikke, pi meno dano meno wane birwenyo woko magicel; balle bidok i wiye.” I kare ma jo Icrael gitye i tim, ci gunoŋo dano mo ma coko yen riddo i ceŋ cabit. Jo ma gunoŋe ka en coko yen riddo-ni gukele bot Moses ki Aron ki bot lwak ducu. Gukete i ot kol, pien peya ginyuto botgi gin ma myero gutim i kome. Ci Rwot owaco bot Moses ni, “Dano meno gibineke woko. Lwak ducu gibicele ki got woko i ŋe gony.” Lwak ducu gukele woko i ŋe gony, gucele ki got guneke woko, kit macalo Rwot onoŋo ociko ki Moses. Rwot owaco bot Moses ni, “Lok ki jo Icrael ci icikgi ni gukwo jira i twok dog boŋŋigi, wa i kare pa likwayogi ducu, dok i kom jira ma i twok dog boŋo acel acel guket iye tol ma bulu. Bibedo botwu jira dog boŋo ma wuneno kome wek wupo cik pa Rwot ducu, wulubgi, kun pe wulubo tamwu kenwu ki gin ma wuneno, ma wumaro lubo pi mitiwu kenwu. Kit meno miyo wubipo cikka ducu, wubicobo, miyo wubibedo jo maleŋ pi Lubaŋawu. An a Rwot Lubaŋawu ma yam akwanyowu ki i lobo Ejipt wek abed Lubaŋawu; an a Rwot Lubaŋawu.” Kora wod pa Ijar, ma wod pa Kokat, wod pa Levi, kacel ki Datan ki Abiram awobe pa Eliab ki On wod pa Pelet, ma gin adek ducu gubedo likwayo pa Reuben, gutero dano ci gucito kwedgi i kom Moses, kacel ki lwak dano ma i kin jo Icrael, lutel wi lwak miya aryo ki pyerabic ma giyero ki i kin lwak mucokke, jo ma ginene mada, Gucokke kacel i kom Moses ki Aron ci guwaco botgi ni, “Mewu doŋ okato kare! Pien jo magi ducu gin lwak maleŋ, gin ducu ki acel acel Rwot bene tye i kingi. Ci piŋo wun wukette kenwu malo twatwal makato lwak pa Rwot ducu?” Ka Moses owinyo, opoto aryeba ic, Ci owaco bot Kora ki lwakke ducu ni, “Diki odiko Rwot aye binyuto danone ki ŋat maleŋ i kinwa, ci bimiyo en nyiko cok bote; ŋat ma en oyero aye en bimiyo nyiko cok. Doŋ wutim kit man: wukwany weer me waŋo odok eceta, Kora ki lwakke ducu. Diki wuket mac iye, ci wuket iye odok eceta i nyim Rwot, ci dano ma Rwot oyero aye bibedo maleŋ, Wun mewu dok okato kare, wun likwayo pa Levi!” Moses dok owaco bot Kora ni, “Doŋ koŋ wuwiny ya, wun likwayo pa Levi. Wun wubwono man ni gin matidi mo, ma Lubaŋa pa Icrael aye opokowu woko ki i kom lwak jo Icrael ci okelowu cok bote pi tiyo tic i kema pa Rwot, kun wun aye wucun i nyim lwak ka tic pigi? En doŋ okelowu ka ma cok kwede wun kacel ki utmegiwu ducu ma gin likwayo pa Levi, ci dok pud wuyenyo yo me doko ajwagi aye? Wun wubedo ka jemo i kom Rwot, mumiyo wun ki lwakwu ducu wucokke kacel-li. Aron kono gin aŋo mumiyo wuŋur i kome-ni?” Moses dok ocwalo dano pi lwoŋo Datan ki Abiram ma awobe pa Eliab; ento gin guwacci, “Pe wabicito kunnu. Pud ibwono man ni gin matidi mo, ma ikwanyowa woko ki i lobo ma mol cak ki moo kic-ci, ma it ye ka nekowa kwede i tim-mi? Myero in dok ikette keni me bedo laker ma loyowa? Dok bene peya ikelowa i lobo mo ma mol cak ki moo kic, peya imiyowa potti mogo ma waleyo, nyo potti olok, ci kombeddi doŋ imito umo wanwa woko. Wan pe wabicito kunnu.” Kiniga omako Moses matek ci owaco bot Rwot ni, “Pe iye gityergi. An peya akwanyo kadi kanagi acel mo ki botgi, pe atimo gin marac i kom ŋat mo i kingi.” Lacen Moses owaco bot Kora ni, “In ki lwakki wubed tye i nyim Rwot diki, in ki gin ki Aron, kun noŋo ŋat acel acel i kinwu omako atabo weerre me waŋo odok eceta. Wuket iye odok eceta, ci ŋat acel acel okel atabo weerre i nyim Rwot, atabo weer miya aryo ki pyerabic; in bene ki Aron, ŋat man ki atabo weerre.” Ŋat acel acel ocako kwanyo atabo weerre, ci guketo mac i igi, ka guketo odok eceta iye, ci gucuŋ i dog kema me rwatte, kacel ki Moses ki Aron, Kora ocoko lwak jo ducu ci gucuŋ ma gukemme ki Moses ki Aron i doggola kema me rwatte. Ci deyo pa Rwot onen bot lwak ducu. Rwot owaco bot Moses ki Aron ni, “Wun wupokke kenwu ki i kin lwak man, wek anekgi atyekgi woko kombeddi.” Ento gin gupoto piny aryeba ic ci guwacci, “Ai Lubaŋa, Lubaŋa ma won tipo kom jo ducu, pi bal pa dano acel keken miyo kiniga maki i kom lwak ducu?” Rwot owaco bot Moses ni, “Cik lwak ni gua woko ki ka ma jo pa Kora, Datan ki Abiram gibedo iye.” Moses oa ocito bot Datan ki Abiram, ci ludoŋo pa jo Icrael gulubo kore. Owaco bot lwak ni, “Alegowu ni, wua wupokke ki i ŋet kema pa jo magi ma giraco-ni, pe wugud kom jamigi mo, wek pe gijwerwu woko kacel kwedgi pi bal megi ducu.” Omiyo dano gua woko ki i ŋet kema pa Kora, Datan ki Abiram; ci Datan ki Abiram gukatti woko gucuŋ i dog kemagi kacel ki mongi ki awobegi ki litinogi matino. Moses owacci, “Man aye gin ma bimiyo wuŋeyo ni Rwot onoŋo ocwala ka tiyo tic man ducu, pe abedo ka tiyone pira kena. Ka ce jo man gibito i kit ma dano gito kwede jwijwi-ni, nyo kit keckom ma poto i kotn dano ducu en aye bipoto i komgi, ci pe noŋo Rwot aye ma ocwala. Ento ka Rwot oketo gin mo manyen, ce lobo onamo doge omwonyogi woko ducu, lwakgi ki jamigi ducu, miyo gilor piny i bur Lyel ma pud gikwo, ci wubineyo ni, jo ma gubedo ka cayo Rwot.” Ka otyeko waco lok meno ducu, ci nom ma gucuŋ iye obar oyabbe woko, lobo oŋamo doge omwonyogi woko, kacel ki jo me odigi, ki lwakjo pa Kora ducu ki jamigi ducu liweŋ, Kit meno gin ki lwakgi ki jamigi ducu gulor piny i bur Lyel ma gikwo; ci lobo oumo wigi woko gurwenyo woko ki i kin lwak. Jo Icrael ducu ma gurumogi-ni guriŋo woko ka guwinyo kokogi kun giwacci, “Wek lobo pe dok omwonywa bene!” Ka dok mac bene oa ki bot Rwot, owaŋo jo meno miya aryo ki pyerabic ma gubedo ka tyero odok eceta-ni, otyekogi woko. Ka Rwot dok owaco bot Moses ni, “Cik Eleajar wod pa ajwaka Aron ni okwany atabo weer me waŋo odok eceta woko ducu ki i mac ma Lyel-li, oony mac ma i igi-ni ka mabor, pien gin jami maleŋ. Atabo weer pa jo meno ma balgi okelo can me to i komgi-ni myero gipadgi woko malac ki nyol gudok laum wi keno tyer; pien onoŋo yam doŋ gityerogi wo ko i nyim Rwot mumiyopudginjami maleŋ. Ci gibibedo lanyut bot jo Icrael.” Kit meno Eleajar okwanyo atabo weer me mola ma yam jo ma mac owanogi-ni gutyero, ci gipadogi gudoko laum wi keno tyer, wek obed gin me poyo wi jo Icrael, wek ŋat mo ma pe ajwaka, ma pe lakwar Aron, pe onyik cok ka wano odok eceta i nyim Rwot, wek pe odok macalo Kora ki lwakke, kit ma Rwot owaco bot Eleajar ki i dog Moses. Ento orwone lwak jo Icrael ducu dok gucako ŋur i kom Moses ki i kom Aron kun giwaco ni, “Wun aye wuneko jo pa Rwot woko.” Ka lwak gu tyeko cokke i kom Moses ki Aron, gulokke mŋ kema me rwatte; ci, nen, pol oumo ko me woko, deyo pa, Rwot ocako nen. Moses ki Aron gucito i nyim kema me rwatte, ci Rwot owaco bot Moses ni, “Wua woko ki i kin lwak man wek atyekgi woko kombeddi.” Gupoto piny aryeba cwiny, ci Moses owaco bot Aron ni, “Kwany atabo, weerri me waŋo odok eceta, iket iye mac ma itoko ki i keno tyer, ci iket iye odok eceta, itiŋ iter bot lwak oyotoyot, icit itim gin lakwany bal ki i komgi, pien kiniga doŋ ocako bino kun oa ki bot Rwot, two gemo doŋ bicakke.” Aron okwanyo atabo weer kit ma Moses owaco, cut, oriŋo kwede i dye lwak; ci, nen, two gemo onoŋo doŋ ocakke i kin dano. Oketo odok eceta i atabo weer, ocako timo gin lakwany bal ki i kom lwak. Ocuŋ i kin jo muto ki jo makwo, ci two gemo oaik woko. Jo ma two gemo onekogi guromo alip apar wiye aŋwen ki miya abiro, kun pe giribo iye jo ma guto i alii pa Kora. Aron odok cen bot Moses i dog kema me rwatte ka two gemo doŋ ogik woko. Rwot owaco bot Moses ni, “Lok ki jo Icrael ci igam odoo ki botgi, odoo acel pi dog ot pa kwarogi acel acel. Gam ki bot lutel wigi ducu, ma oporo dog odi pa kwarogi, odoo ducu apar wiye aryo. Co nyiŋ dano acel acel i kom odoone, ci ico nyiŋ Aron i kom odoo pa likwayo pa Levi; pien ludito wi kaka ki i dog odi pa kwarogi gibibedo ki odoogi acel acel. Ibicibogi i kema me rwatte i nyim canduk lok me caden ka ma arwatte iye kwedwu-ni. Ci odoo pa dano ma abiyero en aye bilot. Meno aye abinoŋo iye yo me juko jo Icrael ma gibedo ka nur i koma-ni.” Moses oloko ki jo Icrael, ci lutel wigi ducu gukelo odoo bote, odoo acel pi lutel wigi acel acel, ma oporo wel odi pa kwarogi, odoo apar wiye aryo; odoo pa Aron bene onoŋo tye i kin odoogi. Ci Moses ocibo odoo ducu i nyim Rwot i kema lok me caden. Orwone Moses odonyo i kema lok me caden; ci, nen, odoo pa Aron ma ocuŋ pi dog ot pa Levi-ni aye olot woko, ocako kico bolo olaŋ, ci oturo ture onyako nyig yaa mucek. Ka Moses okelo odoo ducu nia ki i nyim Rwot, otero bot jo Icrael ducu, guneno, ci dano acel acel okwanyo odoone. Rwot owaco bot Moses ni, “Dwok odoo pa Aron i nyim canduk lok me caden kakare, wek gigwok obed lanyut pi jo mujemo, wek ijuk ki nurgi atata i koma, ogik woko, wek pe to opot i komgi.” Moses otimo kit ma Rwot ocike kwede. Ci jo Icrael guwaco bot Moses ni, “Nen ba, watum woko do, keckom opoto i komwa omiyo wato, wato woko. Jo ducu ma gibino cok, ma gibino cok ki kema pa Rwot, gito woko. Wan ducu myero wato woko bo?” Ci Rwot owaco bot Aron ni, “In ki awobeni kacel ki jo me ot pa kwarowu wubitiŋo alii me bal pi kabedo maleŋ, dok in kacel ki awobeni wubitiŋo alii me bal pi ticwu me bedo ajwagi. In ibikelo utmegini ma i kaka, pa Levi cok kacel kwedi, ma en aye kaka pa woru, wek guribbe kwedi, gukonyi ma noŋo in ki awobeni wutye ka tic i nyim kema lok me caden. Gin gibibedo kwedwu i dog ticwu, dok gibitiyo tic ducu ma miite i kema; ento pe gibicito cok i kom jami ducu ma i kabedo maleŋ, pe gibinyiko cok ki keno tyer, wek pe to opot i kom gin ki wun. Gibinywako tic kwedwu i kema me rwatte pi tic ducu ma i kema; pe ŋat mukene mo bibino botwu cok. Wun wubitiyo tic ma i kabedo maleŋ, ki tic i kom keno tyer, wek kiniga pe dok opot i kom jo Icrael. Nen, doŋ akwanyo utmegiwu, gin Lulevi, ki i kin jo Icrael; gin gitye macalo mot ma gimiyowu, gin aye jo ma gimiyo bot Rwot pi tiyo tic i kema me rwatte, In ki awobeni keken wubitiyo ticwu me bedo ajwagi i lok ducu ma kemo kom keno tyer nyo ma tye i tyelo ma boŋo kicika oumo-ni. Amiyowu tic me bedo ajwagina macalo mot ma amiyo botwu; ka ŋat mo ata obino cok, gibineke woko.” Rwot dok owaco bot Aron ni, “Nen, doŋ atyeko miyo i ciŋi gityer ducu ma gimiyo bota, jami maleŋ ducu ma jo Icrael gikelo. Atyeko miyogi gubed waŋ wat ma tuŋ boti, ki bot awobeni me bedo waŋ wat ma myero gimi botgi dikdik. Magi aye gibibedo meri ki i kom jami maleŋ maka to ma pe giwaŋo ki mac: gityer ducu ma jo Icrael gimiyo bota, gityer me moko kwon ducu gitum me bal ducu, gitum me tino alii ducu; gibibedo maleŋ makato piri ki pi awobeni. Wubicamo i kabedo mo maleŋ makato; cowu ducu gitwero camo; tye maleŋ piwu. Man bene mewu: gin ducu ma gikwanyo ki i kom motgi me bedo gityer akwata; atyeko miyogi botwu ki bot awobewu ki anyirawu obed waŋ watwu me dikdik. Jo ducu ma i odi ma gulonnye gitwero camo. Moo mabecone ducu, yino mabecone ducu ki bel maberre ducu, mot ducu ma gimiyo bot Rwot me wi mwaka doŋ amiyo botwu. Cam ducu mukwoŋo cek i lobogi ma gikelo bot Rwot bibedo mewu; dano ducu ma i odi ma olonnye twero camo. “Gin ducu ma i Icrael ma gidyero i cin Rwot bibedo mewu. “Litino ducu ma, gikwoŋo nywalogi, kadi bed dano nyo lee, ma gityero bot Rwot bibedo mewu, Ento litino kayo ducu pa dano gibikokogi akoka ki lim, ki litino kaye pa lee ma keni ma pe gicamo bene gibikokogi akoka. Gibikokogi ka ditogi romo dwe acel. Wel me kokogi ibimoko ni obed cekel me ryal abic, kun lubo cekel me kabedo maleŋ ma romo gera pyeraryo. Ento latin kayo pa dyaŋ nyo pa romo nyo pa dyel pe gibikoko; gin gileŋ, Ibikiro remogi i kom keno tyer, dok ibiwaŋo dwologi obed gityer ma giwaŋo ki mac, gin ma ŋwece kur me yomo cwiny Rwot. Rinogi bibedo mewu, macalo gok ma gik Wato ki em malacuc bene mewu. Gityer maleŋ ducu ma jo Icrael gimiyo bot Rwot doŋ amiyo botwu ki bot awobewu ki anyirawu obed waŋ: watwu me dikdik. Man aye gicikke ma gimoko ki kado i nyim Rwot matwal piri ki pi likwayu.” Rwot dok owaco bot Aron ni, “Pe wubilimo ginaleya mo nyo dul lobo mo i kin jo Icrael; an ki koma aye abedo ginaleyawu. “Bot Lulevi atyeko miyogi dul acel me apar i kom jami pa jo Icrael me bedo megi pi culo ticgi ma gitiyo, ticgi ma i kema me rwatte. Dok nia tin jo Icrael pe gibinyiko cok ki kema me rwatte, wek pe gunoŋ bal ma kelogi to. Ento Lulevi keken aye gibitiyo tic ma i kema me rwatte, gin aye gibibedo lubalo ka gin mo orocce iye. Bibedo cik matwal nio wa i kare pa likwayowu ducu; dok pe gibileyo dul lobo mo i kin jo Icrael. Pien dul acel me apar ma a ki bot jo Icrael, ma gimiyo obed gityer bot Rwot, atyeko mi yo bot Lulevi me ginaleyagi; mumi yo aloko i komgi ni, pe gibibedo ki dul lobo mo me aleyagi i kin jo Icrael.” Rwot owaco bot Moses ni, “Dok iwac bot Lulevi ni, ‘Ka wugamo dul acel me apar ki bot jo Icrael, ma atyeko miyo botwu obed mewu, wun dok wubimiyo gityer ma a ki iye bot Rwot, dul acel me apar ki i kom dul acel me apar ma gikelo botwu. Gityerwu man gibikwano piwu macalo wumiyo ki i kom bel ma wudino ki i kom koŋo olokma oa ki i nyig olokwu ma wubiyo. Kit meno wun bene wubimiyo gityer bot Rwot ki i kom dul acel me apar ducu ma wubigamo ki bot jo Icrael; wubikwanyo gityer pa Rwot ki i kome, wumiyo bot ajwaka Aron. Mot ducu ma gimiyo botwu en aye wubikwanyo iye gityer ducu ma myero bot Rwot, ki i kom mabecone ducu, ci bedo gin ma gikwero wek obed maleŋ.’ Mumiyo ibiwaco bot Lulevi ni, ‘Ka doŋ wutyero mabecone woko, ci mudoŋŋe bibedo mewu macalo oa ki i laro dino belwu nyo i ka biyo nyig olokwu. Wutwero camo i kabedo ducu, wun ki jo ma i odiwu; pien en aye giculowu kwede pi ticwu i kema me rwatte. Pe wubinoŋo iye bal mo, tekke wutyeko kwanyo mabecone pi gityer. Ento pe wupyed jami maleŋ ma jo Icrael gimiyo, wek pe wuto.’ ” Rwot owaco bot Moses ki Aron ni, “Man en cik ma an Rwot aye aciko: Cik jo Icrael ni gukel boti roya makwar maberre ma kome pe ki mwonyo, ma peya gitiyo kwede me pur. Ibimiyo bot ajwaka Eleajar ci gibitero woko i ŋe gony, ka doŋ gibineko i nyim Eleajar. Ajwaka Eleajar bigwelo remone ki lwet cine, ci kiro remone tyen abiro mukemo nyim kema me rwatte. Gibiwaŋo kom roya woko ma kun en neno; pyene ki riŋone ki remone ki cete, gibiwaŋone ducu. Dok ajwaka bikwanyo yat cedar ki anyero ki uci makwar ci bibologi i dye mac ma waŋo riŋo roya-ni. Ka dok ajwaka bilwoko boŋŋine ki pii, lwoko kome ki pii, ka doŋ lacen bidok i gony; ci ajwaka bibedo keni nio wa otyeno. Ŋat ma onoŋo owano roya-ni bene bilwoko boŋŋine, lwoko kome ki pii, ci bibedo keni nio wa otyeno. Ci dano mo ma olony, ma pe kome ki keni aye bijobo buru roya-ni, ci biketo i kabedo mo ma olony, woko ki i ŋe gony, Gibikano pi lwak jo Icrael pi yubo pii me lwoko kwer; meno gitimo pi kwanyo bal. Ŋat ma ojobo buru bene bilwoko boŋŋine ci bedo keni nio wa otyeno. Man bibedo cik matwal bot jo Icrael ki bot Lurok ma bedo i kingi. “Ŋat ma ogudo kom dano mo ma oto bibedo keni pi nino abiro. Bilonynye kekene i ki pii me lwoko kwer i nino me adekke ki i nino me abiro miyo bibedo ma olony. Ento ka pe olonnye kekene i nino me adekke ki i nino me abiro, ci pe doŋ bibedo ma olony. Dano mo-ni ma ogudo kom dano muto, ce pe olonnye kekene, noŋo obalo kema pa Rwot, omiyo odoko keni. Dano meno waŋe birwenyo woko ki i kin jo Icrael. En bedo keni pien pii me lwoko kwer peya gionyo i kome, miyo keni mere pud tye i kome. “Ka dano oto i kemawu mo cik tye kit man: dano acel acel ma donyo i kema meno, ki dano ducu ma gubedo iye ka dano-nu oto, gibibedo keni pi nino abiro. Dok agulu nyo atabo-gu ducu ma i kema ma pe giumo wigi bedo keni. Dano mo ka tye i tim ce ogudo kom dano ma gineko ki pala Lucwan, nyo kom dano mo ma oto kene, nyo cogo dano mo, nyo lyel ma giyiko iye dano, bibedo keni pi nino abiro, Pi lonyo dano ma odoko keni kit meno gibikwanyo buru mo i kom buru roya ma yam gineko me kwanyo bal, gibiketo i otako, ci gimedo iye pii ma mol. Dano mo ma olony bikwanyo anyero ci luto i pii-nu, kiro i kom kema ki i kom jami ducu ma tye iye, ki i kom dano ducu ma onoŋo gitye kenyo. Gibitimo kumeno bene pi ŋat ma ogudo cogo-ni nyo ma ogudo kom dano ma gineko nyo ma oto kene, nyo ma ogudo lyel ma giyiko iye dano. Dano ma olony bikiro pii meno i kom dano ma keni i nino me adekke ki i nino me abiro, En bilonyo dano ma keni-ni i nino me abirone, dok dano-nu bilwoko boŋŋine, lwoko kome ki pii, ci otyeno noŋo en doŋ olony. “Ento ka dano mo onoŋo tye keni, ce pe olonnye kekene, dano meno waŋe birwenyo woko ki i dye lwak pa Lubaŋa, pien noŋo obalo kabedo maleŋ pa Rwot omiyo odoko keni, En bedo keni pien pii me lwoko kwer noŋo pe gionyo i kome, Meno bibedo cik botwu matwal. Ŋat ma okiro pii me lwoko kwer bilwoko boŋŋine; ki ŋat mo ma ogudo pii me lwoko kwer bibedo keni nie wa otyeno. Gin ducu ma dano ma keni-ni ogudo bibedo keni; ŋat ma ogudo jami-nu bene bibedo keni nie wa otyeno.” Jo Icrael ki lwakgi ducu guo i tim Jin i dwe mukwoŋo, ci gutiro i Kadec, gubedo iye. Miriam oto kenyo, giyike bene kenyo. Pii onoŋo pe tye me amata pa lwak, ci gucokke kacel i kom Moses ki Aron. Gukeco i kom Moses kun giwacci, “Kono yam wato woko i kare ma utmegiwa guto i nyim Rwot-ti, kono ber, Piŋo nene ikelo lwak pa Rwot i tim ata kany, wek wato woko, wan kacel ki limwa? Piŋo nene imiyo waa woko ki i Ejipt, ikelowa i kabedo man marac-ci? Pe kabedo ma ceko bel, kadi wa oduro nyo olok nyo okwer pomegranat; pii mo bene pe me amata.” Moses ki Aron gua woko ki i nyim lwak, gucito doggola kema me rwatte, gupoto piny iryeba cwiny. Ci deyo pa Rwot onen botgi, Rwot owaco ki Moses ni, “Kwany odoo ki i nyim canduk lok le caden, ci igur lwak kacel, wun ki meru Aron, ci iwac ki pata got ki i nyim lwak ni owek piine okatti woko. Kit meno ibikelo pii pigi nia ki i pata got wek lwak gumati, ki limgi bene.” Moses okwanyo odoo woko ki i nyim Rwot kit macalo ocike kwede. Moses ki Aron gucoko lwak kacel i nyim pata got, ci Moses owaco botgi ni, “Doŋ wuwiny ba, wun lujemo-ni. Wumito ni wan wakel pii nia ki i pata got man piwu?” Ci Moses oti;mo ciŋe malo, ogoyo pata got ki odoone tyen aryo kulu; ci pii ocorre limayi, lwak gumato, ki limgi makwo bene, Ento Rwot owaco bot Moses ki Aron ni, “Pien wun pe wuye an, kun pe wunyuto ki i nyim jo Icrael ni an aleŋ, pi meno wun pe doŋ wubitero lwak man i lobo ma abimiyogi-ni.” Man en aye pii me Meriba, ka ma jo Icrael gukeco iye i kom Rwot ci en onyutte kene ni eleŋ i kingi-ni. Moses ocwalo lukwena ma gicito bot kabaka me Edom nia ki i Kadec ci guwacci, “Omeru Icrael owaco kuman ni, In iŋeyo can madito ducu ma opoto i komwa: kit ma yam kwarowa guwoto kwede i Ejipt, ma wabedo i Ejipt pi kare malac, ci jo Ejipt gutimowa magwa, wan ki kwarowa ducu. Ka yam wakok bot Rwot, en owinyo dwanwa, ocwalo lamalaika, okwanyowa woko ki i Ejipt. Ci kombeddi watye doŋ i Kadec, i gaŋ ma doŋ cok ki waŋ lobowu. Ber wuwek wawok ki i lobowu. Pe wabiŋak wawok ki i poto mo, nyo i poto olok, pe wabimato pii ma i waŋ it, Wabimol ma walubo gudo madit-ti pa Kabaka, pe wabiŋak wadok yo tun acuc nyo tuŋ acam, nie ka wawok wakato waŋ lobowu.” Ento jo Edom guwaco ni, “Pe wubiwok ki i lobowa, mi yo wan aye wabino i komwu ki pala lucwan.” Jo Icrael gugamo ni, “Wabiwok i gudo madit keken. Ka wamato piiwu mo, wan nyo limwa makwo, wabiculo wane. Wek wawok wakat ki tyenwa keken, lok mo mukene pe.” Jo Edom dok guwacci, “Pe wubiwok ki i lobowa.” Ci jo Edom gubino ka lweny i komgi ki lwak co mapol ki mony matek. Kit meno jo Edom gukwero miyo jo Icrael kato kun giwok ki i lobogi; omiyo jo Icrael gua gulokke, guceyo yo mukene. Lwak jo Icrael ducu gua ki i Kadec, gubino i te got Kor. Rwot owaco bot Moses-ki Aron i te got Kor, i waŋ lobo Edom, ni, “Aron aye doŋ bito, bidok bot lutugi; en pe bidonyo i lobo ma amiyo bot jo Icrael, pien yam wujemo i kom cikka i dog pii me Meriba. Ter Aron ki wode Eleajar, icit kwedgi malo i wi got Kor, iluny boŋo tic pa Aron ducu ki i kome, ci iruk ki wode Eleajar, pien Aron doŋ bidok bot lutugi, en bito ki kunnu.” Moses otiyo kit ma Rwot ocike kwede, Guito malo i wi got Kor kun lwak ducu gineno. Moses olunyo bone tic pa Aron woko ducu, ci oruko kwede wode Eleajar, Aron oto woko ki kunnu i wi got. Lacen Moses ki Eleajar gulor woko piny ki i wi got, Ka lwak jo Icrael ducu guneno ni Aron doŋ oto, ci gukoke nino pyeradek. Ka kabaka me Arad, ma en Lakanaan ma bedo i Negeb, owinyo ni jo Icrael gibibino ki i yo Atarim, ci olwenyo komgi, oyako jo mogo woko ki i kingi. Ci jo Icrael gukwoŋo kwoŋ bot Rwot kun giwaco ni, “Ka ibimiyo jo man i cinwa ada, ci wan wabidyerogl i ciŋi, wabijwero gaŋigi woko liweŋ.” Rwot owinyo lega pa jo Icrael, omiyo guloyo Lukanaan, ci gin gudyerogi i cin Rwot kacel ki gaŋigi, gujwero woko; mumiyo nyiŋ kabedo meno gilwoŋo ni Korma. Jo Icrael gua ki i te got Kor, gucako lubo yo ma cito i Nam Makwar, kun girabo lobo Edom. Ci cwiny dano oballe woko ma gitye iyo, gucako loko lok akeca i kom Lubaŋa ki, i kom Moses kun giwaco ni, “Piŋo wukwanyowa woko ki i Ejipt wek wato i tim? Cam pe, pii bene pe, owinywa ocido woko ki cam ma konnye pe-ni.” Rwot ocwalo twol ma kwirgi kec i kom lwak, ci gucako toŋo dano; jo Icrael guto mapol. Dano gubino bot Moses, guwaco ni, “Doŋ watyeko balo, pien waloko lok akeca i kom Rwot ki i komi. Leg Rwot wek okwany twol woko ki i kinwa.” Ci Moses olego pi lwak. Rwot owaco ki Moses ni, “Tet cal twol ma kwirre kec-ci, iket iŋab malo i kom tal; ci dano ducu ma twol otoŋo, ka oneno kome, ci bedo kwo.” Kumeno Moses oteto twol mola, oŋabo malo i wi tal; ci ka twol otoŋo dano mo en neno kom twol mola, ci kwo. Jo Icrael gucako wot, ci gugony i Obot. Dok gua woko ki i Obot, gugony i Iye-abarim, i tim ma okemo Moab, yo tuŋ wokceŋ, Dok gua ki kunnu, gumedo wot, gugony i nota me Jered. Gua ki kunnu, gumedo wot, gugony loka kulu Amon, ma tye i dye tim, ma oa wa i waŋ lobo pa jo Amor, Amon en aye waŋ lobo pa jo Moab, ma i kin Moab ki jo Amor. En aye ka ma giwaco i Buk me Lweny pa Rwot ni, “Waeb ma i Cupa, ki nota me Amon ducu, ki luŋ me nota mapol ma oyarre nio wa i kabedo ma gilwoŋo ni Ar, ojeŋŋe wa i waŋ lobo me Moab.” Gua ki kunnu, gubino i Beer. En aye waŋ it ma yam Rwot owaco iye bot Moses ni, “Cok lwak kacel, wek ami pii botgi.” I kare meno jo Icrael guwero wer man ni, “Gunnye malo, in waŋ it! Wakoro ki wer! Man waŋ it ma luker gukwinyo, ma twoni ma i lwak gugolo matut ki tal ker ki odoogi.” Ka dok gua i dye tim, gucito i Matana Nia i Matana gucito Nakaliel, ki nia ki kunnu gucito Bamot. Nia ki kunnu gucito i nota ma otoŋŋe i lobo Moab, i te lacol got Piciga, ma neno piny tuŋ tim aroo. Jo Icrael gucwalo lukwena bot Cikon, kabaka pa jo Amor, ma giwaco ni, “Ber iwek wawok ki i lobowu, Pe wabiŋak wawok ki i poto mo, nyo i poto olok, pe wabimato pii ma i waŋ it. Wabimol ma walubo gudo pa Kabaka madit-ti nio ka wawok wakato waŋ lobowu.” Ento Cikon pe oye ni jo Icrael guwok ki i lobone. Ocoko jone ducu, ogurogi kacel, ci ocito ka lweny i kom jo Icrael i tim. Ka oo i Jakaj, ocako lweny i kom jo Icrael. Ento jo Icrael guneko jone mapol ki pala lucwan, ci gucamo lobogi cakke ki i kulu Amon o kwede wa i Jajer ma tye i waŋ lobo pa jo Ammon. Jo Icrael gumako gaŋi ducu pa jo Amor, gucako bedo iye, i Kecbon ki i gaŋi matino ducu ma i ŋete. Kecbon onoŋo obedo gaŋ kai pa Cikon kabaka pa jo Amor. Cikon yam con koŋ olwenyo i kom kabaka pa jo Moab ci okwanyo lobone woko ducu ki i oiŋe nio wa i Amon. Mumiyo lurot wer giwaco ni, “Wubin i Kecbon, gaŋ kai pa Cikon! Wek giger odoco, giyub ocuŋ matek. Pien mac yam oa ki i Kecbon, olyel matek kun oa ki i gaŋ kal pa Cikon. Owaŋo gaŋ Ar pa jo Moab, ma gin rwodi me wi godi me Amon. Can madwoŋ opoto i komi, in Moab! Wuto wutum woko do, wun lwak pa Kemoc! Jok Kemoc omiyo awobene guriŋo gularo komgi, oweko anyirane giyako gitero i ciŋ Cikon kabaka pa jo Amor. Kit meno likwayogi gityeko woko nia ki i Kecbon nio wa i Dibon. Wajwero piny woko nio ka mac oryeyo piny wa i Medeba.” Kit meno jo Icrael gubedo i lobo pa jo Amor. Ka dok Moses ocwalo dano ka roto Jajer. Gumako gaŋi matino ma i ŋete, ci guryemo jo Amor ma gibedo kunnu. Ka gulokke, gudok yo tuŋ Bacan. Ci Og kabaka me Bacan ocorre ka lweny i komgi, en ki lwakke ducu, ci lweny ogeto i Edrei. Ento Rwot owaco bot Moses ni, “Pe ilwore; pien atyeko miye i ciŋi, en ki lwakke ducu, ki lobogi bene. Ibitimo en kit ma itimo i kom Cikon kabaka pa jo Amor ma yam obedo Kecbon.” Kit meno jo Icrael guneko Og ki awobene ducu, gujwero lwakke ducu nid waŋ ma ŋat acel mo pe odoŋ mubwot makwo; ci gucamo lobogi woko. Jo Icrael dok gucako wot ci guguro kemagi i lobo aroo me Moab loka Jordan mukemo Jeriko. Balak wod pa Jipor oneno gin ducu ma jo Icrael gutimo i kom jo Amor. En kacel ki jo Moab gubedo ki lworo madwoŋ i kom jo Icrael, pien gipol mada, mumiyo lworo oloco kom jo Moab woko. Ci jo Moab guwaco ki ludoŋo pa jo Midian ni, “Lwak jo man gibijwerowa woko ki gin ma orumowa ducu, macalo twon dyaŋ ma camo lum ki i bar tyeko woko.” Pienno Balak wod pa Jipor ma onoŋo obedo kabaka me Moab i kare meno, ocwalo lukwena bot Balaam wod pa Beor i Petor ma cok ki kulu Euprate i lobo Amau ka Lwoŋe kun giwaco ni, “Nen, rok mo gubino ma gua ki i Ejipt, guumo lobo woko lipuk; kombeddi doŋ gubedo ma gukemo lobowa. Tim ber ibin wek icen jo-ni woko pira, pien gitek gikata woko. Gwok nyo miyo abitwero loyogi, aryemogi woko ki i lobo kany; pien aŋeyo ni ŋat ma ilego gum kome, kome bedo gum, ki ŋat ma iceno doŋ giceno.” Kit meno ludoŋo me Moab ki ludoŋo me Midian gucako wot ki lim me tyet i ciŋgi, Gucito bot Balaam, gutitte lok me kwena ma Balak ocwalo, En owaco ki gin ni, “Tin wubut kany, ci abidwoko lok botwu kit ma Rwot biloko bota.” Kit meno ludito pa jo Moab gubedo bot Balaam. Ci Lubaŋa obino bot Balaam, owaco ni, “Jo mene ma gitye boti-ni?” Balaam owaco ki Lubaŋa ni, “Balak wod pa Jipor, ma kabaka me Moab, en aye ocwalla kwena ma kun waco ni, ‘Nen, rok mo gubino ma gua ki i Ejipt, ci guumo lobo woko lipuk. Tim ber ibin wek icen jo-ni woko pira; miyo gwok nyo abitwero lweny kwedgi ci aryemogi woko.’ ” Lubaŋa owaco ki Balaam ni, “In pe ibiwot kwedgi; pe ibiceno jo meno, pien gin jo ma gimiyogi gum con.” Ka Balaam oa malo odiko, ci owaco ki ludito pa Balak ni, “Wudok giwu i lobowu; pien Rwot otyeko kwero ni pe acit kwedwu.’ Mumiyo ludito pa jo Moab gua gudok bot Balak, guwaco ni. “Balaam okwero bino kwedwa woko.” Balak dok omedde ki cwalo ludito jo mapol makato gin ca, ki dano ma giŋene makato jo ma gukwoŋo ca. Gin gucito bot Balaam, guwaco bote ni, “Balak wod pa Jipor owaco kuman ni, ‘Pe iwek gin mo ogeŋi bino bota; pien ada abiketti deyo madit, dok gin ducu ma ibiwacca abitiyo.’’’ Ento Balaam odok iye ki lutic pa Balak ni, “Kadi bed Balak onoŋo omiya ryal ki jabu ducu ma i ode, pe atwero kalo wi cik pa Rwot Lubaŋana pi tiyo gin mo matidi nyo madit. Doŋ alegowu ni wun bene tin wubed kany wek aŋe gin ma Rwot dok biwacca.” Ci Lubaŋa obino bot Balaam i dyewor meno owaco bote ni, “Ka jo meno gubino ka lwoni, ci ia malo icit kwedgii ento gin ma aciko boti aye ibitiyone.’ Kit meno Balaam oa malo odiko con, otweyo del kom kanane, ocito ki ludito pa jo Moab. Ento kiniga omako Lubaŋa pi citone; ci lamalaika pa Rwot ocuŋ woko i yo macalo lamerokke. Balaam onoŋo oito i wi kana, ki luticce aryo onoŋo gitye kwede. Ci kana oneno lamalaika pa Rwot kun ocuŋ i dye gudo, kun noŋo owoto pala lucwanne, omako i cine, Kana olokke, oa woko ki i gudo, ocito i poto. Balaam ogoyo kana omiyo odok woko i yo gudo. Ci lamalaika dok ocuŋ i yo ka mo madiŋ ma i kin poto olok ma gigeŋo ki cel got tuŋŋi ki tuŋŋi. Ka dok kana oneno lamalaika pa Rwot, ci oyokke ki cel got, odiyo tyen Balaam i kom cel, omiyo en dok ogoye aye. Ka dok lamalaika pa Rwot omedde ki wot anyim ci ocuŋ tuŋ lacuc nyo tuŋ acam Ka kana oneno lamalaika pa Rwot, obuto woko piny ka tyen Balaam, ci kiniga omako Balaam, ogoyo kana ki odoone. Ka doŋ Rwot oyabo dog kana ci owaco bot Balaam ni, “An atimo gin aŋo i komi mumiyo igoya tyen adek kulu-ni?” Ci Balaam owaco ki kana ni, “Pien ibedo ka nywara. Kono atye ki pala i ciŋa, kono aneki kwede woko.” Ci kana owaco ki Balaam ni, “An pe a kanani ma ibedo i koma kare me kwoni ducu nio wa onyoo? Onoŋo yam koŋ anyebbe ka timo kit man i komi?” En ogamo ni, “Pe.” Lacen Rwot oyabo waŋ Balaam, ci oneno lamalaika pa Rwot ka ocun i dye yo ma omako pala lucwan i ciŋe; ci Balaam okulo wiye piny, opoto piny aryeba cwiny, Lamalaika pa Rwot owaco bote ni, “Piŋo igoyo kanani tyen adek kulu? Nen, an abino anyim ka juki, pien wotti akaka-ni pe oyomo cwinya. Kana onena ci olokke aa woko ki i nyima tyen adek kulu. Kono en pe onoŋo olokke oa woko ki bota, kono onoŋo doŋ aneki woko tin ada, kun aweko en makwo.” Ci Balaam owaco bot lamalaika pa Rwot ni, “Doŋ abalo, pien onoŋo pe aŋeyo ni icuŋ i yo pi lweny i koma. Mumiyo ka ce otimme marac ma pe ipwoyo, ci abidok cen ki ŋeya.” Ento lamalaika pa Rwot ogamo dog Balaam ni, “In doŋ icit ki jo meno; ento gin ma aciki aye ibiloko.” Pienno Balaam omedde ki wot kacel ki ludito pa Balak. Ka Balak owinyo ni Balaam doŋ obino, ci ocito ka romo kwede i gaŋ me Moab ma i waŋ lobo ma kulu Amon opoko, wa i waŋ lobo kikome. Ka Balak owaco bot Balaam ni. “An yam pe acwalo kwena ka lwoŋi? Piŋo pe nene ibino bota? An pe atwero keto deyo i komi?” Balaam ogamo ni, “Nen doŋ abino boti. Kombeddi an atye ki twero me loko gin mo boti? Lok ma Rwot biketo i doga, en aye myero aloki.” Balaam ocito gin ki Balak, ci gucito i Kiriat-kujot. Ka Balak ocako tumo twoni ki romi opoko riŋo ocwalo bot Balaam ki ludito ma yam gitye kwede, Orwone Balak otero Balaam ocito kwede malo wa i Bamot-baal, ci Balaam oneno jo Icrael ma gitye cok ki kunnu. Balaam owaco bot Balak ni, “Ber icanna keno tyer abiro kany, ci ikella twoni abiro ki romi bene abiro.” Balak otiyo kit ma Balaam ociko-ni; ci Balak ki Balaam gubedo ka tyero twon acel ki nyok romo acel i wi keno tyer acel acel. Ci Balaam owaco bot Balak ni, “Cuŋ kany i ŋet gitum awanani-ni, ci an abicito kunnu. Gwok nyo Rwot bibino ka rwatte kweda, ci gin ducu ma en binyutta abititti.” Ci ocito malo i wi got ka ma yadi pe iye. Ci Lubaŋa orwatte ki Balaam. Balaam owaco bote ni, “Doŋ atyeko yubo keno tyer abiro, dok atyero twon acel ki nyok romo acel i wi keno tyer acel acel.” Ci Rwot oketo lokke i dog Balaam kun waco bote ni, “Dok cen bot Balak ci iwac kit man.” Odok cen ci onoŋo Balak pud ocuŋ ka ŋet gitum awaŋane kacel ki ludito pa jo Moab ducu. Balaam ocako lokke kun loko macalo lanebi. Owacci, “Balak okela ki i Aram, kabaka me Moab ooma ki i wi godi ma tye yo tuŋ wokceŋ: ‘Bin wek icenna jo pa Yakobo. Bin ikec i kom jo Icrael!’ Abiceno niŋniŋ ka Lubaŋa pe oceno? Akeco i kome niŋniŋ ka Rwot pe okeco i kome? Anenogi ki i wi pata got mabor, abedo ka nenogi ki i wi cere. Nen, gin lwak ma gibedo ka kengi, pe guribbe kacel ki rok mu kene ducu. Aŋa ma kwano jo pa Yakobo ma gipol macalo apwa-ni? Aŋa ma kwano jo Icrael ma gipol mada kuman? Wek an ato kit to pa jo-ni ma kitgi atir-ri! Agikki kwona obed macalo megi!” Ci Balak owaco ki Balaam ni, “Gin aŋo ma doŋ itimo tuŋ bota? Akeli kany ka ceno lumerokka, ci nen, in ilamo gum komgi keken.” Odok iye ni, “Myero agwokke ka loko gin ma Rwot oketo i doga.” Balak dok owaco bote ni, “Bin doŋ kweda i kabedo mukene ka ma iromo nenogi iye. Ibineno jo ma gitye cok keken, pe ibinenogi ducu; ci icengi pira ki kunnu.” Ci otere i poto pa Jopim wa i lacol got Piciga. Ocano keno tyer abiro kunnu, ci otyero twon acel ki nyok romo acel i wi keno tyer acel acel. Ci Balaam owaco bot Balak ni, “cuŋ kany ka ŋet gitum awaŋani, kun an arwatte ki Rwot kuca.” Ci Rwot orwatte ki Balaam, oketo lok i doge kun waco ni, “Dok cen bot Balak, ci iwac kit man.” Odok bote ci onoŋo Balak pud ocuŋ ka ŋet gitum awaŋane ki ludito pa jo Moab kacel kwede. Balak openye ni, “Rwot doŋ oloko niŋo?” Balaam ocako lokke kun loko macalo lanebi. Owacci, “A malo, Balak, ci iwiny; winy an ya, in wod pa Jipor. Lubaŋa pe dano, ma twero loko goba; en I pe wod pa dano, ma myero onen ki tamme. Ka doŋ owaco lok mo, ci pe bitiyone? Ka onoŋo oloko, ci pe cobo kakare? Nen ya, alimo cik me miyo gum; ka Lubaŋa omiyo gum, pe atwero dwokone cen, Pe aneno can mo ma bipoto i kom Yakobo; pe aneno aroma mo ma bibedo bol jo Icrael. Rwot Lubaŋagi tye kwedgi, awinyo ka gidaŋŋe gijolo kabakagi. Lubaŋa okwanyogi ki i Ejipt, kerone calo kero pa jubi, Lugaga mo pe ma loko can i kom Yakobo, gi-tyet mo pe ma mako kom Icrael Koni doŋ gibiwaco lok i kom Yakobo ki Icrael ni, ‘Lubaŋa otimo gin madit kuman!’ Nen lwak meno! Gia malo macalo min labwor, gitiŋŋe macalo labwor ma pe buto piny nio ka emwodo lee ma omako, ci mato remo pa dano ma onekogi.” Ci Balak owaco bot Balaam ni, “Ka pe iye cenogi, myero pe dok ilam gum komgi aye.” Ento Balaam odok iye ki Balak ni, “Yam pe awaco boti ni, ‘Gin ducu ma Rwot ocika kwede, meno aye myero ati’?”. Ci Balak owaco bot Balaam ni, “Koni doŋ ibin, abiteri i kabedo mukene; gwok Lubaŋa biye ni icengi ki kunnu.” Balak dok otero Balaam i wi lacol got Peor ma neno piny tuŋ tim aroo. Ci Balaam owaco bot Balak ni, “Canna bene keno tyer abiro kany, ikella twoni abiro ki nyogi romi abiro.” Balak otiyo kit ma Balaam owaco-ni, ci otyero twon acel ki nyok romo acel i wi keno tyer acel acel. Balaam, onoŋo doŋ oniaŋ ni Rwot mito miyo gum kom jo Icrael, mumiyo pe dok ocito ka yenyo tyet kit ma onoŋo ocito i kare mukeneni, ento oloko waŋe oneno yo tuŋ tim. Ka Balaam otiŋo waŋe malo, ci oneno jo Icrael ma guguro kemagi kaka man pat, kaka man pat. Cwiny pa Lubaŋa obino i kome, ci ocako lokke kun loko macalo lanebi. Owacci, “Man lok pa Balaam wod pa Beor, lok pa twon laco ma wane doŋ giyabo, lok pa ŋat ma winyo gin ma Lubaŋa owaco, ki ma neno gin ma Won Twer Ducu nyuto bote, kun opoto piny ento waŋe bedo twolo, Kemawu nen maber kuman, wun jo pa Yakobo, gonywu ber kuman, wuti jo Icrael! Nen calo nota ma oryene mabor, macalo pott i ma gipuro i ŋet kulu; cal ki yadi ma ŋwece kur ma Rwot opito,’ nyo yadi cedar maobakke i ŋet pii. Pii bipoŋ libic i agulugi kare ducu, likwayogi bibedo rom’ ki pii ma mol madwoŋ; kabakagi bibedo dit makato Agag, gibiketo deyo mamalo mada i kom kerre. Lubaŋa ma kerone calo kero pa jubi okwanyogi woko ki i Ejipt. Icrael bicamo lurok ma lukworre, bituro cogogi, biŋido matinotino; bicelogi pil ki aterone. Onyono piny, obuto calo labwor, macalo min labwor; aŋa ma bituge? Gum obed i kom jo-ducu ma bilamo gum i kom Icrael, cen opot i kom dano ducu ma bicene.” Kiniga omako Balak matek i kom Balaam, Odoŋo ciŋe ci owaco bot Balaam ni, “Alwoiji ka ceno lumerokka, ci nen, ni doŋ ilego gum komgi odoko tyen adek kulu. Pi meno in doŋ iriŋ woko oyot idok doŋ gaŋ, Yam awacci abiketo deyo i komi ada, ento Rwot doŋ ogeni woko ki i limo deyo mo ki bota.” Balaam ogamo dog Balak, owacci, “Yam atito ki lukwenani’ ma yam icwalogi bota ni, ‘Kadi bed Balak omiya-ryal ki jabu ducu ma i ode, pe atwero turo cik pa Rwot pi timo gin mo kadi ber kadi rac kit ma an aye amito; gin ma Rwot biwaco keken aye abiwaco.’ ” Lacen Balaam owaco bot Balak ni, “Kombeddi, nen, an doŋ abidok woko bot lutuwa. Bin wek koŋ ami iŋe gin ma jo me rok man bitimo i kom joni i kare ma tye anyim.” Ci ocako lokke kiin loko macalo lanebi, Owacci, “Man lok pa Balaam wod pa Beor, lok pa twon laco ma waŋe doŋ giyabo, lok pa ŋat ma winyo gin ma Lubaŋa owaco, ŋat ma tye ki ŋec mua ki but En Mamalo Twal, ma neno gin ma Won Twer Ducu nyuto bote, kun opoto piny ento waŋe bedo twolo: Anene, ento pe kombeddi, anene, ento pe tye cok. Lakalatwe bibino kun a ki bot Yakobo, odoo ker bia ki i Icrael; bityero tur nyim jo Moab, bituro wi jo ducu ma gimaro woo me lweny. En bimayo lobo pa jo Edom. Jo Ceir ma lukworre en bimayo lobo ki botgi, kun jo Icrael gitye ka lweny ki tek. Jo pa Yakobo gibiloyo loc; jo mubwot i gaŋ pa jo Moab gibinekogi woko liweŋ.’ Ka dok oneno tuŋ not jo Amalek, oloko macalo lanebi kun waco ni, “Jo Amalek yam gutelo wi rok mukene ducu, ento i agikki gibityekogi woko matwal.” Dok oneno tuŋ bot jo Keni, oloko macalo lanebi kun waco ni, “Kabedowu biri nakanaka, ka-larrewu gigero i pata got; ento wun jo Kain gibiyakowu, wubitum woko. Jo Aciria gibiterowu i opii pi kare ma rom mene?” Dok oloko macalo lanebi kun waco ni, “Magi dok jo mene do ma gucokke yo tuŋ acam? Lukwaŋ mel gibibino ma gua ki yo tuŋ Caiprac, gibiyelo jo Aciria ki jo Eber matek; gin bene gibinekogi gityekogi woko matwal.” Lacen Balaam oa malo odok cen ka ma en bedo iye; ki Balak bene ocito woko. I kare ma jo Icrael gubedo i Citim, gucako timo abor i kom anyira Moab. Anyira Moab gubedo ka lwoŋo jo Icrael ka ma gitumo iye gitum bot jogigi, ci jo Icrael gucamo riŋo ma gityero dok guryebbe i nyim jogigi. Kit meno jo Icrael guribbe kengi ki jok Baal me Peor, cikiniga omako Rwot i komgi, Rwot owaco bot Moses ni, “Kwany ludito ducu ma i kin lwak, idegi i wi yat malo i dyeceŋ i nyim Rwot, wek kiniga pa Rwot mager-ri oa woko i kom jo Icrael.” Mumiyo Moses owaco ki luŋolkop pa jo Icrael ni, “ŋat acel acel ma i kinwu onek jo me kakane ma guribbe kekengi ki jok Baal me Peor.” Dano mo i kin jo Icrael obino ki nya jo Midian otero i gaŋgi, kun Moses ki lwak jo Icrael ducu gineno, kun onoŋo gitye ka koko i nyim doggola kema me rwatte, Ka Finekaci wod pa Eleajar ma wod pa ajwaka Aron oneno, en oa malo, oweko lwak, omako toŋ, ocito olubo kor Laicrael wa i kicika ma i tyelo, ci ocobo gin aryo ducu, Laicrael ki dako-nu, ocobo igi pii. Kit meno omiyo two gemo oa woko ki i kom jo Icrael. Ento onoŋo jo ma two gemo onekogi guromo alip pyeraryo wiye aŋwen. Ci Rwot owaco bot Moses ni, “Finekaci wod pa Eleajar ma wod pa ajwakana Aron otyeko doŋ dwoko akecana cen ki i kom jo Icrael, pien nyeko ma omaka omako wa en bene ki i kingi, omiyo nene pe atyeko jo Icrael woko pi nyekona. Pi meno in iwac bote ni, atyeko miyo bote gicikkena me kuc. En kacel ki Likwaye ma bilube gibibedo i tic me bedo ajwakana matwal pi gicikke man ma aketo kwedgi, pien nene nyeko omake pi Lubaŋane, ci otimo gin lakwany bal ki i kom Jo Icrael.” Nyiŋ Laicrael ma gineko kacel ki nya jo Midian obedo Jimri wod pa Calu, ma ladit wi kaka i ot pa kwarogi i kin jo pa Cimeon. Nyiŋ dako ma nya jo Midian ma gineko-ni Kojibi nya pa Jur ma yam ladit wi kaka i ot pa kwarogi i kin jo Midian. Ci Rwot owaco bot Moses ni, “Cit doŋ magwa i kom jo Midian, ilweny i komgi; pien gin gupoto i komwu magwa pi bwolowu kun gimiyo wupoto i bal i lok pa jok me Peor, ki i lok pa Kojibi nya pa rwot ma i kin jo Midian ma lamingi i kare ma two gemo opoto pi lok pa jok me Peor.” I ŋe two gemo Rwot owaco bot Moses ki ajwaka Eleajar wod pa Aron ni, “Kwan Wel jo Icrael ducu, cakke ki i kom jo ma ditogi romo mwaka pyeraryo dok kwede malo, kun ilubo dog odi pa kwarogi, jo Icrael ducu ma romo cito ka lweny.” Jo me kaka pa Reuben ma obedo latin kayo pa Yakobo ma nyiŋe mukene Icrael-li gin ene: Likwayo pa Kanok, Pallu, Kejeron ki Karmi, Meno aye doggola pa jo pa Reuben; welgi ducu oromo alip pyeraŋwen wiye adek, ki miya abiro ki pyeradek. Likwayo pa Pallu gin aye Eliab, ki awobene Nemuel, Datan ki Abiram, Magi aye Datan ki Abiram ma lwak guyero ma gupyem ki Moses ki Aron kun gibedo i kin lwak pa Kora i kare ma gujem i kom Rwot. Lobo oŋamo doge omwonyogi woko ci guto kacel ki Kora i kare ma mac owaŋo dano miya aryo ki pyerabic, otyekogi woko, ci nyiŋgi odoko lok aboka me juko dano. Ento awobe pa Kora pe guto. Jo me kaka pa Cimeon gin ene: likwayo pa Nemuel, Jamin, Jakin, Jera ki Caul. Meno aye doggola pa jo pa Cimeon; welgi ducu oromo alip pyeraryo wiye aryo, ki miya aryo. Jo me kaka pa Gad gin ene: likwayo pa Jepon, Kagi, Cuni, Ojini, Eri, Arod ki Areli, Meno aye doggola pa jo pa Gad; welgi ducu oromo alip pyeraŋwen, ki miya abic, Kaka pa Juda, Er ki On an ma awobe pa Juda yam guto con i lobo Kanaan. Doŋ jo me kaka pa Juda gin ene: Likwayo pa Cela, Perej ki Jera, ki pa Kejeron ki Kamul ma awobe pa Perej. Meno aye doggola pa jo pa Juda; welgi ducu oromo alip pyerabiro wiye abicel ki miya abic. Jo me kaka pa Icakar gin ene: likwayo pa Tola, Puwa, Jacub ki Cimron. Meno aye doggola pa jo pa Icakar; welgi ducu oromo alip pyerabicel wiye aŋwen, ki miya adek. Jo me kaka pa Jabulon gin ene: likwayo pa Cered, Elon ki Jaleel. Meno aye doggola pa jo pa Jabulon; welgi ducu oromo alip pyerabicel, ki miya abic. Jo me kaka pa Yucepu gin aye likwayo pa Manace ki Epraim, Kaka pa Manace. Makir wod pa Manace onywalo Gilead. Jo pa Gilead gin ene; likwayo pa Iejer, Kelek Aciriel, Cekem, Cemida ki Keper. Jelopekad wod pa Keper onywalo anyira keken, awo bene pe, Nyiŋ anyirane Makala, Noa, Kogla, Mirika ki Tiŋa. Meno aye doggola pa jo pa Manace; welgi ducu oromo alip pyerabic wiye aryo, ki miya abiro. Jo me kaka pa Epraim gin ene: likwayo pa Cutela, Beker, Takan, ki pa Eran ma wod pa Cutela. Meno aye doggola pa jo pa Epraim; welgi oromo alip pyeradek wiye aryo, ki miya abic. Meno ducu gubedo Likwayo pa Yucepu. Jo me kaka pa Benjamin gin ene: likwayo pa Bela, Acibel, Akiram, Cepupam, Kupam, ki pa Arud ki Naaman ma awobe pa Bela. Meno aye doggola pa jo pa Benjamin; welgi ducu oromo alip pyeraŋwen wiye abic, ki miya abicel. Jo me kaka pa Dan gin ene: likwayo pa Cukam, Doggola ducu pa likwayo pa Cukam Wel danogi oromo alip pyerabicel wiye aŋwen, ki miya aŋwen, Jo me kaka pa Acer gin ene: likwayo pa Imna, Icivi ki Beria, ki pa Keber ki Malkiel ma awobe pa Beria. Nya pa Acer nyiŋe obedo Cera. Meno aye doggola pa jo pa Acer; welgi ducu oromo alip pyerabic wiye adek, ki miya aŋwen. Jo me kaka pa Naputali gin ene: likwayo pa Jajeel, Guni, Jejer ki Cilem. Meno aye doggola pa jo pa Naputali; welgi ducu oromo alip pyeraŋwen wiye abic, ki miya aŋwen. Wel jo Icrael ducu oromo alip miya abicel ki acel, ki miya abiro ki pyeradek. Ci Rwot owaco bot Moses ni, “Ibipoko lobo i kin kaka magi obed me aleyagi kun ilubo wel nyiŋgi ma gicoyo. Ibimiyo dul lobo malac bot kaka maditone ki dul lobo manok bot kaka matino; dul lo bo me aleyagi gibipoko ma oporo wel dano ma i kaka mo-ni. Lobo gibipoko ki bolo kwir kun lubo kaka pa kwarogi. Gibilimo lobo me aleyagi muporo dit pa kaka acel acel kun lubo kit ma kwir opoto kwede.” Jo me kaka pa Levi gin aye doggola pa Gercon, Kokat ki Merari, kacel ki likwayo pa Libni, Kebron, Makali, Muci ki Kora, Kokat onywalo Amram, ma dakone obedo Yokobedi nya pa Levi ma onywalo i Ejipt. Yokobedi onywalo Aron ki Moses ki lam ingi Miriam ki Amram, Aron onywalo Nadab, Abiu, Eleajar ki Itamar, ento Nadab ki Abiu guto woko i kare ma gutyero mac mapat i nyim Rwot, kit mac ma yam pe ocikogi kwede. Gikwano wel jo Levi ducu ma co, cakke i kom jo ma ditogi romo dwe acel dok kwede malo, Welgi oromo alip pyeraryo wiye adek: ento welgi yam pe gikwano i kin jo Icrael, pien pe gipoko botgi dul lobo mo me aleyagi i kin jo Icrael. Meno gin aye jo ma Moses ki ajwaka Eleajar gukwanogi i lobo aroo me Moab i ŋet Jordan, ma cok ki Jeriko. Ento pe tye ŋat mo acel i kingi ki i kin jo ma yam Moses ki ajwaka Aron gukwanogi i kare ma gukwano wel jo Icrael i tim me Cinai ca. Onoŋo yam Rwot owaco pigi bot Moses ni, “Gibito woko i tim,” ci dano mo pe odoŋ ki i kingi, kono nyo Kaleb wod pa Jepune ki Yocwa wod pa Nun keken aye gudoŋ. I kare meno anyira pa Jelopekad gubino bot Moses. Jelope kad obedo wod pa Keper, wod pa Gilead, ma wod pa Makir, wod pa Manace; gin aye jo me doggola pa Manace wod pa Yucepu. Nyiŋ anyiranu Makala, Noa, Kogla, Mirika ki Tiŋa. Gin gubino gucuŋ i nyim’ Moses ki ajwaka Eleajar, ki i nyim lutel wic ki lwak jo Icrael ducu i doggola kema me rwatte, ci guwacci, “Wonwa yam oto woko i tim, En yam pe tye i kin lwak jo ca ma gujemo i kom Rwot, i lwak pa Kora, ento oto mere pi balle kene gire; yam pe onywalo awobe, Pi lok aŋo miyo gikwanyo nyiŋ wonwa woko ki i kin doggolane? Ni pi litino co ma pe onywalo-ni bo? Wuminiwa walim dul lobo mo i kin omegi wonwa.” Moses otero lok me kokogi i nyim Rwot. Ci Rwot owaco ki Moses ni. “Lok pa anyira pa Jelopekad tye atir. Ibipoko lobo botgi i kin omego pa wongi obed me aleyagi, wek gule dul lobo ma myero obed pa wongi. Dok iwac bot jo Icrael ni, ‘Ka laco mo oto ma pe onywalo wode mo, ci wubimiyo ginaleyane bot nyare. Ka nyare mo pe, ci wubimiyo bot omegine. Ka ominne mo pe, ci wubimiyo bot omegi wonne, Ka omin wonne mo pe ci wubimiyo ginaleyane bot watgi macok ma i doggolagi, ci bidoko mere. Man aye bibedo cik bot jo Icrael, ki lok ma doŋ giŋolo, macalo Rwot ociko ki Moses.’ ” Rwot owaco bot Moses ni, “Cit malo i wi got man me Abarim, icinen lobo ma abimiyo bot jo Icrael. Ka doŋ ineno, ci in bene doŋ ibito, idok bot lutuwu, macalo yam omeru Aron odok botgi-ni; pien yam wujemo i kom lokka i tim Jin i kare ma lwak okeco i koma ca, kun pe wunyuto ni an aleŋ i nyimgi, i waŋ pii kunnu.” (Man aye pii me Meriba ma cok ki Kadec i tim Jin.) Moses olego Rwot kun wacci, “Ai Rwot Lubaŋa ma loyo tipo kom jo ducu, tim ber iket dano mo me loyo lwak, wek owirre i kingi macalo laditgi, dok otel nyimgi ka ma gibicito iye ducu, wek lwakki pe gubed macalo romi ma lakwatgi pe.” Ci Rwot owaco bot Moses ni, “Kwany Yocwa wod pa Nun, dano ma tye ki cwiny, en aye iket ciŋi i kome. I mi en ocuŋ i nyim ajwaka Eleajar ki i nyim lwak ducu, ci ibicike pi ticce i nyimgi ducu. Dok imine twerri mogo, wek lwak jo Icrael ducu gubed ka woro doge. En bicuŋ i nyim ajwaka Eleajar ma en aye bipenyo lok ma Rwot oŋolo kun tiyo ki Urim i nyim Rwot; kit meno en kacel ki lwak Jo Icrael ducu gibitiyo gin ducu kun gilubo lok pa Eleajar.”. Moses otiyo kit ma Rwot ocike kwede; okwanyo Yocwa, omiyo ocuŋ i nyim ajwaka Eleajar i nyim lwak ducu, ci oketo ciŋe i wiye, ocike pi ticce, macalo Rwot ocike kwede. Rwot owaco not Moses ni, “Cik jo Icrael kun iwaco botgi ni, ‘Myero wunen ni wukelo bota gityerra i kare ma giciko, en aye camma me gityer ma giwaŋo ki mac me bedo gin ma ŋwece kur ma yomo cwinya.’ “Dok iwac botgi ni, Man aye gityer ma giwaŋo ki mac ma wubityero bot Rwot: litino nyogi romi aryo ma ditogi mwaka acel acel ma komgi pe ki mwonyo, i nino acel acel, obed gitum awaŋa me nino ducu. Wubityero latin romo acel odiko, ki latin romo mukene wubityero otyeno, kacel ki moko kwon mapwotte ma romo agwata acel ma girubo ki moo nyig jeituni ma giodo aoda ma romo cupa aryo ki nucu pi gityer me moko kwon. Meno aye gitum me nino ducu ma yam giciko pire i wi got Cinai obed gin ma ŋwece kur, gityer ma giwaŋo ki mac bot Rwot. Gityer amata mutike bibedo koŋo vino ma romo cupa aryo ki nucu pi latin romo acel acel; wubiliyo koŋo vino makec me gityer amata i kabedo maleŋ i nyim Rwot. Latin romo mukene wubityero otyeno kacel ki gityer me moko kwon ki gityer amata kit macalo wutimo ki gityer me odiko; bibedo gityer ma giwaŋo ki mac, gin ma ŋwece kur me yo mo cwiny Rwot. “I kom nino me cabit wubityero nyogi romi aryo ma ditogi mwaka acel acel, ma komgi pe ki mwonyo, ki moko kwon mapwotte ma romo agwata aryo, ma girubo ki moo pi gityer me moko kwon, ki gityer amata mutike. Man aye gitum awaŋa me nino me cabit acel acel ma wubimedo i kom gitum awaŋa me nino ducu ki gityer amata mutike. “I acakki dwe ducu en aye wubityero iye gitum awaŋa bot Rwot: litino twoni aryo, nyok romo acel ki litino nyogi romi abiro ma ditogi mwaka acel acel, ma komgi pe ki mwonyo; kacel ki moko kwon mapwotte ma girubo ki moo ma romo agwata adek pi twon acel acel, agwata aryo pi nyok romo acel-li ki agwata acel pi latin romo acel acel; bibedo gitum awaŋa ma ŋwece kur me yo mo cwiny, gityer ma giwaŋo ki mac bot Rwot. Gityer amata mutikogi bibedo koŋo vino ma romo cupa abic pi twon, cupa adek pi nyok romo, ki cupa aryo ki nucu pi latin romo. Man aye gitum awaŋa me dwe acel acel tyeko kwede dwe ducu ma i mwaka, Dok bene wubityero nyok dyel acel bot Rwot pi gitum me bal; wubimedo i kom gitum awaŋa me nino ducu ki gityer amatane, “I nino dwe apar wiye aŋwen me dwe mukwoŋo en aye nino madit me Kato (Paska) pa Rwot. Dok i kom nino dwe apar wiye abic me dwe acel-lu en aye nino madit; wubicamo mugati ma tobi pe iye pi nino abiro. I kom nino mukwoŋone wubibedo iye ki gurre maleŋ; pe wuti iye tic mo matek. Ento wubityero iye gityer ma giwaŋo ki mac, gitum awaŋa bot Rwot: litino twoni aryo, nyok romo acel, ki litino nyogi romi abiro ma ditogi mwaka acel acel; wunen ni komgi pe ki mwonyo, Wubityero bene gityer me moko kwon mapwotte ma girubo ki moo. Wumi ma romo agwata adek pi twon acel acel, agwata aryo pi nyok romo, ki agwata acel pi latin romo acel acel. Wubityero bene nyok dyel acel bot Rwot pi gitum me bal me kwanyo bal ki i komwu. Wubityero gitum magi kun wumedo ki gitum awaŋa me odiko, ma en gitum awaŋa me nino ducu. Wubityero cam me gityer ma giwaŋo ki mac, gin ma ŋwece kur me yo mo cwiny Rwot, kit meno pi nino abiro ki piny maru; wubityero kun wumedo ki gitum awaŋa me nino ducu ki gityer amata mutike. I nino me abirone wubibedo ki gurre maleŋ: pe wuti iye tic mo matek. “I kom nino me tyero cam me wi mwaka, ma wukelo iye gityer me moko kwon kai manyen bot Rwot i ninowu madit me’ kwero agikki cabit abiro, wubibedo iye ki gurre maleŋ. Pe wuti iye tic mo matek, ento wutyer iye gitum awaŋa, gin ma ŋwece kur me yo mo cwiny Rwot: litino twoni aryo, nyok romo acel, ki litino nyogi romi abiro ma ditogi mwaka acel acel; kacel ki gityer me moko kwon mapwotte ma’ girubo ki moo, Wumi ma romo agwata adek pi twon acel acel, agwata aryo pi nyok romo, ki agwata acel pi latin romo acel acel. Wubityero bene nyok dyel acel pi kwanyo bal ki i komwu. Wubityerogi kacel ki gityer amata mutikogi kun wumedo ki gitum awaŋa me nino ducu. Wunen ni komgi pe ki mwonyo. “I nino dwe acel me dwe me abiro wubibedo iye ki gurre maleŋ; pe wuti iye tic mo matek. En aye nino ma wubimiyo gwara kok iye, dok wubityero iye gitum awaŋa, gin ma ŋwece kur me yomo cwiny Rwot: wod twon acel, nyok romo acel ki litino nyogi romi abiro ma ditogi mwaka acel acel, ma komgi pe ki mwonyo; kacel ki gityer me moko mapwotte ma girubo ki moo mutikogi, agwata adek pi wod twon, agwata aryo pi nyok romo ki agwata acel pi latin romo acel acel. Wubityero bene nyok dyel acel pi gitum me bal me kwanyo bal ki i komwu. Meno ducu wubityero kun wumedo ki gitum awaŋa me por dwe ki gityer me moko kwon mutike, ki gitum awaŋa me nino ducu ki gityerre me moko kwon, ki gityer amatagi kit ma cikgi tye. Gibibedo gin ma ŋwece kur ma yomo cwiny, gityer ma giwaŋo ki mac bot Rwot. “I nino dwe apar me dwe me abiro wubibedo ki gurre maleŋ, kun wukumo iye ki toncwiny; pe wuti iye tic mo, ento wutyer gitum awaŋa bot Rwot, gin ma ŋwece kur me yomo cwinye: wod twon acel, nyok romo acel ki litino nyogi romi abiro ma ditogi mwaka acel acel; wunen ni komgi pe ki mwonyo. Wumi bene gityer me moko kwon mapwotte ma girubo ki moo, agwata adek pi wod twon, agwata aryo pi nyok romo, ki agwata acel pi latin romo acel acel. Wubityero bene nyok dyel acel pi gitum me bal ma gimedo ki gitum me bal me lakwany bal, ki gitum awaŋa me nino ducu, ki gityer mere me moko kwon, ki gityer amata mutikogi ducu, “I nino dwe apar wiye abic me dwe me abiro wubibedo ki gurre maleŋ; pe wuti iye tic mo matek. Wubikwero nino madito me woro Rwot pi nino abiro. Wubityero gitum awaŋa i nino man mukwoŋo-ni, gityer ma giwaŋo ki mac wek obed gin ma ŋwece kur me yomo cwiny Rwot: litino twoni apar wiye adek, nyogi romi aryo ki litino nyogi romi apar wiye aŋwen ma ditogi mwaka acel acel; gubed ma komgi pe ki mwonyo. Wubimiyo gityer me moko kwon mutikogi, moko mapwotte ma girubo ki moo ma romo agwata adek pi twoni apar wiye adek ki acel acel, agwata aryo pi nyogi romi aryo pi acel acel, ki agwata acel pi litino romi apar wiye aŋwen pi acel acel. Wubityero bene nyok dyel acel pi gitum me bal ma gimedo ki gitum awaŋa me nino ducu, ki “gityer me moko kwon ki gityer amata mutike. “I nino me aryone wubimiyo litino twoni apar wiye aryo, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo, kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye. Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon mere ki gityer amata mutikogi ducu. “I nino me adekke wubimiyo litino twoni apar wiye acel, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo, kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye. Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike. “I nino me aŋwenne wubimiyo litino twoni apar, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo, kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye. Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike. “I nino me abicce wubimiyo litino twoni aboŋwen, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo, kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye. Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike. “I nino me abicel wubimiyo litino twoni aboro, nyogi romi aryo ki litino nyogi romi apar wi ye aŋwen ma ditogi mwaka acel acel ma komgi pe ki mwonyo, kacel pi gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye, Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike. “I nino me abiro wubimiyo litino twoni abiro, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo, kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye. Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike. “I nino me aborone wubibedo iye ki cokke madit me woro Lubaŋa; pe wuti iye tic mo matek, ento wutyer iye gitum awaŋa, gityer ma giwaŋo ki mac wek obed gin ma ŋwece kur me yomo cwiny Rwot: twon acel, nyok romo acel ki litino nyogi romi abiro ma ditogi mwaka acel acel, ma komgi pe ki mwonyo, kacel ki gityer me moko kwon ki gityer amata pi twon ki nyok romo ki litino romi ma lubo welgi, macalo cik tye, Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike. “Meno aye gin ma wubityero bot Rwot i ninowu madito ma giciko, kun wumedo iye gityerwu me cobo kwon ki gityer mu kene ma iwu opwoyo, pi gitumwu me awaŋa, gityer me moko kwon ki me amata, dok pi gityerwu me lakwecwiny.” Moses otito ki jo Icrael lok ducu ma Rwot ocike kwede, Moses owaco bot ludito wi kaka pa jo Icrael ni, “Man gin ma Rwot ociko, ni, Ka laco mo okwoŋo kwoŋ mo bot Rwot, nyoocikke pi lok mo kun olamme kekene otwene kene ki cikke me timo gin mo-ni, myero pe otur cikkene, ento myero ocob kakare kit ma owaco kwede. “Nyo ka nyako mo okwoŋo kwoŋ mo bot Rwot, otwene kwede ki cikke me timo gin mo-ni ma kun tye i paco pa wonne i kare ma pud tidi. Ce wonne owinyo pi kwoijne ki cikke ma otwene kwede kekene, ci pe omedo ki waco iye lok mo bote, ci kwon ducu ma en okwono ki cikke ducu ma otwene kwede kekene bimoko i kome matwal. Ento ka ce wonne ojuke woko i nino ma owinyo iye lokke-ni, ci kwoŋ pa nyako-nu ki lok ma otwene kwede ke kene pe bimoko i kome; Rwot bene bitimme kica, pien onoŋo wonne ogeŋo woko. “Ka ce ginyomo nyako mo ma noŋo okwoŋo kwon nyo otwene kekene ki cikke kun oloko laboŋo tamo tere, ce cware owinyo pire, ci pe omedo ki waco iye lok mo bote i nino ma owinyo iye-ni, ci kwoŋŋe ki cikke ma otwene kwede kekene bimoko i kome matwal. Ento ka ce cware ojuke woko i nino ma owinyo iye lokke-ni, ci cware bikwanyo kwoŋ meno woko ki i kome, nyo lok mo ma onoŋo otwene kwede kekene kun oloko laboŋo tamo tere; Rwot bene bitimme kica. “Ka ce daa-to nyo dako ma cware oryemo okwoŋo kwoŋ, ci lok ducu ma en otwene kwede kekene bimoko i kome, “Ka dako mo okwoŋo kwoŋ nyo otwene kekene ki cikke ma doŋ ginyomo woko, ce cware owinyo pire ci pe omedo ki waco iye lok mo bote, dok pe ojuke, ci kwoŋ ducu ma en okwoŋo, ki cikke ducu ma otwene kwede, bimoko i kome. Ento ka ce cware ogeno woko i nino ma owinyo pire-ni, ci lok ducu ma dako-nu oloko ma mako kwoŋ ma okwoŋo nyo cikke ma otwene kwede pe bimoko, pien cware doŋ ogeŋo woko: Rwot bene bitimme kica iye. Kwoŋ ducu ma dako okwoŋo nyo ma otwene kwede me keto aroma i kome kekene, cware twero moko, dok cware twero geŋo woko. Ento ka cware pe owaco lok mo bote, obedo ka liŋ aliŋa nino ducu, miyo en moko kwede kwoŋ pa dakone ducu ki cikke ducu ma otwene kwede kekene, pien pe owaco lok mo bote i nino ma owinyo iye pire-ni. Ento ka ori ma pe ogeno woko oyotoyot, ci bal pa dakone bidok i wiye ka pe ocobo.” Meno aye cik ma Rwot ociko ki Moses ma mako Laco ki dakone ka okwono kwon, ki won nyako ki nyare ka okwoŋo kwoŋ i kare ma en pud tidi, ma noŋo pud tye i paco pa wonne. Rwot owaco bot Moses ni, “Doŋ icul kwor pa jo Icrael i kom jo Midian; lacen doŋ ibito, idok bot lutuwu.” Ci Moses owaco ki lwak ni, “Wumi lumony ma gitye i kinwu gurukke ki jami lwenygi, wek gucit ka lweny i kom jo Midian, gucul kwor pa Rwot i komgi. Wucwal dano alip acel mua ki i kaka acel acel ma i Icrael gucit i lweny.” Kit meno ginoŋo dano alip apar wiye aryo ma gurukke pi lweny mua ki i lwak doggola mapol mada ma i Icrael, dano alip acel mua ki i kaka acel acel. Moses ocwalogi woko ka lweny, kacel ki Finekaci wod pa ajwaka Eleajar ma omako jami maleŋ pa Lubaŋa ki tum me goyo oduru. Gulwenyo i kom jo Midian macalo Rwot ociko ki Moses, ci guneko co megi ducu. Luker abic pa jo Midian onoŋo tye i kin dano ma ginekogi; nyiŋgi Evi, Rekem, Jur, Kur ki Reba. Dok guneko Balaam wod pa Beor bene ki pala lucwan. Jo Icrael guyako mon ki litino pa jo Midian, gutero woko; dok gumayo limgi makwo madito ki matino ducu, ki jamigi ducu. Gaŋigi ducu i kabedo mapatpat ma gin gibedo iye, ki gonygi ducu, guwaŋo woko ki mac, ci gutero jami ducu ma guyako nyo gumayo, dano wa ki lee-gu, gucito kwede, gukelo bot Moses ki ajwaka Eleajar ki bot lwak jo Icrael, i gonygi ma i lobo aroo me Moab i ŋet Jordan, ma cok ki Jeriko. Moses ki ajwaka Eleajar ki lutel wi lwak ducu gucito woko ka rwatte kwedgi i ue gony. Ci kiniga omako Moses i kom ludito me mony, i kom lulo dano alip ki lulo dano miya ma gudwogo ki ka tero dano i mony. Moses owaco botgi ni, “Man wuweko mon ducu gudoŋ makwo piŋo? Nen, mon-ni aye yam gulubo tam pa Balaam ci gumiyo jo Icrael guŋayo waŋ Rwot i lok i kom jok Peor ca, mumiyo two gemo opoto i kom lwak pa Rwot. Kombeddi doŋ wunek litino co woko ducu ma i kin litinogi, dok wunek mon ducu ma doŋ otyeko ŋene ki co. Ento litino anyira ducu ma peya gubuto ki co wugwokgi makwo gubed mewu. Koŋ wubut woko i ne gony pi nino abiro. Jo ducu ma i kinwu ma guneko dano, ki jo ducu ma gugudo kom dano muto myero wulonnye kekenwu, kacel ki dano ma wuyakogi, i nino me adekke ki i nino me abirone. Wulony boŋŋi aruka ducu, gin ducu ma gitiyo ki laa, nyo ma gicweyo ki yer dyegi, ki jami ducu ma gitiyo ki bao nyo ki yat.” Ajwaka Eleajar owaco bot lulweny ma onoŋo gucito i mony ni, “Man aye cik ma giketo, ma yam Rwot ociko ki Moses: Jami ma obedo jabu, nyo ryal, nyo mola, nyo nyonyo, nyo koc, nyo racac keken, gin ducu ma mac pe balo, wubimiyo wok kato ki i mac ci bilony woko. Ento kadi bed kumeno, pud dok gibilonyo ki pii me lwoko kwer; ci gin ducu ma mac balo woko wubimiyo wok kato ki i pii. Myero wulwok bonniwu i nino me abirone, ci doŋ wubibedo ma wulony; ka lacen wubibino i gony.” Rwot owaco ki Moses ni, “Doŋ ikwan wel jami ma giyako ki i mony, dano ki lee bene; wukwan ki ajwaka Eleajar ki ludito kaka ma i ot pa kwarogi ma i kin lwak. Ci ipok jami ma giyako i mony i dul aryo, tuŋ cel pi lulweny ma gucito i mony, tuŋ cel pi lwak ducu. Dok ijog ajog pa Rwot ki bot lulweny ma gucito i mony kun ikwanyo acel i kom miya abic ki i kom dano, ki twoni, ki kana, ki romi ki dyegi. Kwany ki i kom nucu ma megi, ci imi bot ajwaka Eleajar obed gityer bot Rwot. I kom nucu ma tuŋ bot jo Icrael ibikwanyo iye acel i kom pyerabic ki kom dano, ki twoni, ki kana, ki romi nyo dyegi, ki i kom lim makwo ducu, ci imi bot Lulevi ma gigwoko kema pa Rwot.” Ci Moses ki Eleajar gutiyo kit ma Rwot ociko ki Moses. Jami ma lulweny guyako, ma odoŋ, onoŋo obedo romi alip miya abicel ki pyerabiro wiye abic, dyaŋi alip pyerabiro wiye aryo, kana alip pyerabicel wiye acel, ki dano alip pyeradek wiye aryo ma gin ducu aye anyira ma peya gubuto ki co. Nucune ma gipoko bot jo ma gucito i mony obedo romi alip miya adek ki pyeradek wiye abiro, ki miya abic; romi ma gijogo pi Rwot guromo miya abicel ki pyerabiro wiye abic. Dyaŋi guromo alip pyeradek wiye abicel; dyaŋi ma gijogo pi Rwot guromo pyerabiro wiye aryo. Kana gubedo alip pyeradek, ki miya abic; gin ma gijogo pi Rwot guromo pyerabicel wiye acel. Dano guromo alip apar wiye abicel; dano ma gijogo pi Rwot guromo pyeradek wiye aryo, Moses omiyo dul ma gijogo me gityer pa Rwot bot ajwaka Eleajar, macalo Rwot ocike. Nucu ma gipoko ki jo Icrael, ma Moses opoko pat ki maca pa jo ma yam gucito i mony, wek obed pi lwak, obedo romi alip miya adek ki pyeradek wiye abiro, ki miya abic, dyaŋi alip pyeradek wiye abicel, kana alip pyeradek, ki miya abic, ki dano alip apar wiye abice!’ I kom nucu man ma obedo pi lwak Moses okwanyo iye acel ki i kom pyerabic, i kom dano ki i kom lee, ci omiyogi bot Lulevi ma gigwoko kema pa Rwot, macalo Rwot ocike kwede. Ka doŋ ludito ma giloyo lumony ducu, lulo dano alip ki lulo dano miya, gubino bot Moses. Guwacci, “Wan luticci watyeko kwano Wel lumony ma gitye i te locwa, ci onen ni pe tye dano acel mo ma orwenyo ki i kingi. Ci doŋ wakelo gityerwa bot Rwot, gin ma dano acel acel onoŋo i lweny, jami me jabu, mola bad, atego ŋut ciŋ, agit ciŋ ki tiko nut, pi kwanyo bal ki i komwa i nyim Rwot.” Moses ki ajwaka Eleajar gugamo jabu meno ki botgi; gin ducu obedo jami me deyo kom ma gitiyo ki diro Jabu ducu ma lulo dano alip ki lulo dano miya gutyero bot Rwot pekke oromo makato ratili miya aŋwen, Onoŋo lulweny ducu guyako jami, ŋat acel acel pire kene. Moses ki ajwaka gugamo jabu ki bot ludito wi mony, gutero i kema me rwatte obed gin me poyo wi Rwot i kom jo Icrael. Jo me kaka pa Reuben ki pa Gad gubedo ki lwak lim makwo mapol twatwal. Ka guneno lobo Jajer ki lobo Gilead obedo lobo maber twatwal me kwat, ci gucito bot Moses ki ajwaka Eleajar ki bot lutel wi lwak, guwaco ni, “Gaŋi magi, Atarot, Dibon, Jajer, Nimra, Kecbon, Eleale, Cebam, Nebo ki Beon ma i lobo ma yam Rwot oloyo i nyim lwak jo Icrael, lobogi ber twatwal me kwat; ci wan luticwu-ni watye ki lim madwoŋ. Ka in bene ipwoyo tamwa-ni, ci iye lobo man gimi botwa obed mewa, pe doŋ iterwa waŋol loka Jordan.” Ento Moses owaco bot jo pa Gad ki pa Reuben ni, “Omegiwu gibicito ka lweny kun wun wubedo kany bo? Piŋo wumito balo cwiny jo Icrael, ni pe gucit loka ca i lobo ma yam Rwot omiyo botgi? Kwarowu bene yam koŋ gutimo kit meno i kare ma acwalogi ki i Kadec-bamea pi neno lobo. Pien ka gucito malo wa i nota me Ecikol, ka guneno lobo, ci gubalo cwiny jo Icrael woko, ni pe gucit i lobo ma Rwot doŋ otyeko miyo botgi. Ci kiniga omako Rwot i komgi i nino maca. Okwono kwon kun waco ni, ‘Ada, pe tye ŋat mo ki i kin jo ma yam gua ki i Ejipt, cakke ki i kom jo ma ditogi romo mwaka pyeraryo dok kwede malo ma bineno lobo ma yam akwoŋo pire ni abimiyo bot Abraim ki Icaka ki Yakobo, pien pe gubedo ka lubo gin ma amito ducu kakare, Pe tye ŋat mo ma bineno, kono nyo Kaleb wod pa Jepune ma jo Keniji, ki Yocwa wod pa Nun, pien gin aye gubedo ka lubo gin ma amito ducu kakare.’ Kiniga omako Rwot i kom jo Icrael i kare ca, ci omiyo gubedo ka wirre i tim atata gutyeko mwaka pyeraŋwen kulu, nio ka yalwak ma yam gutimo rac i nyim Rwot gutum woko. Ci nen, wun bene dok wua malo kun wuleyo ka wegiwu, wun litino pa lubalo, miyo wubimedo dok kiniga pa Rwot doko mager t kom jo Icrael! Pien ka wuweko luba gin ma en mito kombeddi, ci en dok bitenyo lwak man woko i tim ata; kit meno wubimiyo lwak man ducu to tum woko.’ ” Ka gin dok gubino bote kun giwaco ni, “Wabigero dwol ma wagero ki gweŋ pi romiwa, ki gaŋi pi mon ki litinowa. Ento wan wabiruko jami Iwenywa, kun wayubbe pi telo wi jo Icrael anyim, nio ka wabiterogi i kabedogi, kun noŋo monwa ki litinowa gibedo i gaŋi gogo ma wacelo matek pi dano ma gibedo i lobo-ni. Pe wabidwogo i pacowa nio waŋ ma jo Icrael gutyeko noŋo ginaleyagi ki acel acel ducu. Wan pe wabinywako leyo lobo kacel kwedgi i ne kulu Jordan ki tuŋ kunnu ducu, pien ginaleya ma me wa doŋ watyeko noŋone i loka Jordan kany ma tuŋ wokceŋ.” Omiyo Moses dok owaco botgi ni, “Ka ce wubitimo kit meno, ka ce wubiruko jami Lwenywu wucito anyim ka lweny i nyim Rwot, kun dano acel acel i kinwu ma romo lweny kato loka Jordan i nyim Rwot, nio ka Rwot otyeko ryemo lumerokke woko ki i nyime, ci ber. Ka Rwot doŋ otyeko loyo lobo-nu, ci lacen wubidwogo giwu kun banya mo pe i komwu bot Rwot nyo bot jo Icrael, ci lobo man wubicamo bedo mewu i nyim Rwot. Ento ka pe wutimo kit meno, ci nen, noŋo wutimo bal i kom Rwot. Myero wune ni, balwu bimiyo wutiŋo alii ma bidwarowu. Wuger gaŋi pi mon ki Litinowu, ki dwol pi romiwu; ento wucob gin ma wuwaco-ni.” Jo Gad ki jo Reuben gudok iye bot Moses ni, “Wan aye luticci; wabitiyo kit macalo in laditwa iciko ducu. Litinowa ki monwa ki romiwa ki limwa makwo ducu gibidoŋ kany i gaŋi ma i Gilead. Ento wan ducu ma waruko jami lweny wabikato waŋolo loka ca ka lweny i nyim Rwot kit macalo in laditwa iciko-ni.” Kit meno Moses omiyo cik ma makogi bot ajwaka Eleajar ki bot Yocwa wod pa Nun, ki bot ludito ki i odi pa kwarogi ma i kaka ducu pa jo Icrael. Owaco botgi ni, “Ka jo Gad ki jo Reuben ma doŋ gurukke pi lweny i nyim Rwot gibikato giŋolo kwedwu loka Jordan, dok ka wun wuloyo lobonu woko, ci wubimiyo botgi lobo Gilead obed megi. Ento ka pe bigikato loka ca kacel kwedwu kun gurukke me lweny, ci gibinywako camo lobo Kanaan kacel kwedwu.” Jo pa Gad ki pa Reuben gudok iye ni, “Wabitimo kit ma Rwot doŋ oloko botwa, ladit. Wabikato Loka ca i nyim Rwot, wacito i lobo Kanaan kun warukke me lweny, miyo lobo ma loka Jordan kany bidoŋ i ciŋwa ci bedo me aleyawa.” Mumiyo Moses omiyo bot jo Gad ki jo Reuben ki bot nucu kaka pa Manace wod pa Yucepu lobo ma yam obedo pa Cikon kabaka pa jo Amor ki Og abaka me Bacan, lobo ducu ma gin yam guloyo, kacel ki gaŋi ducu ma i lobo-nu ki lobo ma i ŋetgi ducu. Jo Gad gugero Dibon, Atarot, Aroer, Atarot-copan, Jajer, Jogbea, Bet-nimra ki Bet-aran, gin ducu gaŋi ma gicelo ki cel gogo, ki dwol pi romigi. Jo Reuben gugero Kecbon, Eleala, Kiriataim, Nebo ki Baal-meon (magi giloko nyiŋgi woko) ki Cibma; ci gucako nyiŋ mukene pi gaŋi ma gugero-ni, Jo pa Makir wod pa Manace gucito i lobo Gilead, gumako gumayo woko ki bot jo Amor ma onoŋo gitye kunnu. Ci Moses omiyo Gilead bot jo pa Makir wod pa Manace, gucako bedo iye. Jair me kaka pa Manace ocito omako gaŋi matino mapol, ocako nyiŋgi ni, Kavot-jair. Dok Noba ocito omako Kenat ki gaŋi matino ma i ŋete, ci ocako nyiŋe Noba, macalo nyiŋe kikome. Jo Icrael yam guwoto kun gikobo ki wotgi kit man, i kare ma gua woko ki i lobo Ejipt ki bucagi kun Moses ki Aron gitelo wigi. Yam Moses obedo ka coyo nyiŋ kabedo acel acel i kare ma gua ki iye, macalo Rwot ociko, Nyiŋ kabedo ki kit ma gukobo ki wotgi en ene: Jo Icrael gua woko ki i Ramcec i nino dwe apar wiye abic me dwe mukwoŋo, i nino ma lubo nino madit me Kato (Paska), Gua gucito woko ki wayu kun jo Ejipt ducu gineno. Noŋo jo Ejipt gitye ka yiko litino kayogi ma onoŋo Rwot ogoyo oneko woko, ocobo kwede kop ma oŋolo i kom lubaŋa ducu pa jo Ejipt. Kit meno jo Icrael gua ki i Ramcec, gugony i Cukot. Gua ki i Cukot, gugony i Etam ma tye i dog tim. Gua ki i Etam, ci gulokke gudok cen i Piakirot ma yo tuŋ wokceŋ me Baaljepon; ci gugony i nyim Migdol. Gua ki i Pi-akirot guwok gukato i dye nam, guo i tim. Guwoto wot me nino adek i dye tim me Etam, ci gugony i Mara. Gua ki i Mara, gubino i Elim. I Elim yam tye iye waŋ it apar wiye aryo, ki otit pyerabiro; ci gugony kunnu. Gua ki i Elim, gugony i ŋet Nam Makwar, Gua ki i ŋet Nam Makwar, gugony i tim Cin. Gua ki i tim Cin, gugony i Dopka, Gua ki i Dopka, gugony i Aluc, Gua ki i Aluc, gugony i Repidim ka ma pii amata pa dano obedo pe, Gua ki i Repidim gucito wa i te got Kor. Ka pud gitye i yo me cito kunnu gugony i kabedo magi: tim Cinai, Kibrot-atava, Kajerot, Ri tma, Rimmon-perej, Libna, Rica, Keelata, got Ceper, Karada, Makelot Takat Tera Mitka Kacimona, Mocerot, Bene-jaa-kan, Kor-agidgad. Jotibata, Abrona, Ejion-geber, tim me Jin, en aye Kadec lacen gugony i te got Kor, i dog waŋ lobo me Edom. Ajwaka Aron oito malo i wi got Kor kit ma Rwot ociko, ci oto woko kunnu, i mwaka me pyeraŋwenne nia ma jo Icrael gua ki i lobo Ejipt, i nino mukwoŋo me dwe me abic, onoŋo Aron doŋ tye ki mwaka me ditte miya acel ki pyeraryo wiye adek i kare ma en oto ki i wi got. Ci kabaka me Arad, ma en Lakanaan ma bedo i Negeb i lobo owinyo pi bino pa jo Icrael. Ka gua ki i te got Kor gugony i kabedo magi: Jalmona, Punon, Obot, Iye-abarim ma i lobo Moab, Dibon-gad, Almon-Diblataim. Gua ki i Almon-diblataim gugony i dye godi Abarim, i nyim got Nebo. Gua ki kunnu, gugony i lobo aroo me Moab i ŋet Jordan ma cok ki Jeriko. Guguro kemagi i ŋet Jordan cakke i Bet-jecimot o kwede wa Abelcitim i bar aroo me Moab, I lobo aroo me Moab i ŋet Jordan ma cok ki Jeriko Rwot owaco bot Moses ni, “Cik jo Icrael ni, Ka wuŋolo kulu Jordan wukato i lobo Kanaan, ci wubiryemo jo ma gibedo i lobo meno woko ducu ki i nyimwu; wubibalo got megi ducu ma gigoro cal i komgi, ki cal jogigi me nyonyo ma giliyo aliya, dok wubimuko waŋ jogigi ma i wi godi, Wubicamo lobo-nu, wubibedo iye, pien atyeko miyo botwu ni obed mewu. Wubilimo lobo me aleyawu kun gipoko ki bolo kwir ma lubo kit ma doggolawu tye kwede, Wubimiyo dul lobo malac bot kaka maditone ki dul lobo manok bot kaka matino. Ka ma kwir opoto iye i kom dano mo, en aye bedo mere; wubilimo lobo me aleyawu kun lubo kaka pa kwarowu. Ento ka pe wuryemo jo ma gibedo i lobo-nu woko ki i nyimwu, ci gin jo meno ma wuwekogi gudoŋŋi gibibedo macalo atero mabit me cobo waŋwu ki okuto me cobo lakŋetwu, ci gibiyelowu i lobo ka ma wubibedo iye-ni, Ci abitimo i komwu kit ma onoŋo atamo ni abitimo i komgi.” Rwot owaco bot Moses ni, “Cik jo Icrael kun iwaco botgi ni, Ka wudonyo i lobo Kanaan, ma en aye lobo ma gibimiyowu obed mewu me aleyawu, waŋ apokki me lobowu bibedo k it man: Wan lobowu yo tuŋ acuc bicakke i tim me Jin ci rabo ŋet lobo Edom. Bia ki tuŋ agikki nam me Kado ma tuŋ wokceŋ, ka doŋ bilokke dok tuŋ acuc ka ma giito iye malo i Akrabim, ka dok kato kwede wa i Jin, ki agikkine bibedo i ŋet Kadec-bamea yo tuŋ acuc, Ka dok bicito medde kwede nio wa i Kajar-adar, ka kato cito kwede i Ajimon, Ka waŋ lobo cako lokke ki i Ajimon cito wa i nota ora me Ejipt; ci wane bigik i dog nam, “Waŋ lobo ma yo tuŋ potoceŋ bibedo Nam Madit; dog namme bibedo waŋ lobowu ma yo tuŋ potoceij. “Man aye bibedo waŋ lobowu ma yo tuŋ acam: bia ki i Nam Madit ci bicito atir o wa i kom got Kor. Nia ki i kom got Kor bicito atir wa i yo ma donyo i Kamat, ci cito wa i Jedad; ka dok bimedde cito wa i Jipron, ka bigik i Kajar-enan, Man aye bibedo waŋ lobowu ma yo tuŋ acam. “Waŋ lobowu ma yo tuŋ wokceŋ bicakke ki i Kajar-enan cito atir o wa i Cepam. Ka waŋ lobo bilor dok tuŋ piny nia ki i Cepam o kwede wa i Ribla ma i ŋet Ain yo tuŋ wokceŋ. Ka dok bilor piny cito o kwede i kor got me nam me Kineret yo tuŋ wokceŋ, Ka dok bilor piny wa i Jordan, ka bigik i nam me Kado, Meno aye bibedo lobowu, ki waŋ apokkine ma orumo ducu.” Moses dok ociko jo Icrael kun waco ni, “Man aye lobo ma wubileyo kun gipoko ki bolo kwir, ma yam Rwot ociko ni gimi bot kakawu aboŋwen ki nucu; pien kaka pa Reuben ki kaka pa Gad gutyeko gamo ginaleyagi kun lubo dog odi pa kwarogi, kacel ki nucu kaka pa Manace bene, Gutyeko gamo lobogi loka Jordan mukemo Jeriko, yo tuŋ wokceŋ, ka ma ceŋ tuc ki iye-ni.” Rwot owaco bot Moses ni, “Man aye nyiŋ dano ma gibipoko botwu lobo me ginaleyawu: ajwaka Eleajar ki Yocwa wod pa Nun. Dok wubikwanyo latel wic acel ki i kaka acel acel wek gupok lobo me aleyawu. Magi aye nyiŋ lutel; pi kaka pa Juda, Kaleb wod pa Jepune. Pi kaka pa Cimeon, Cemuel wod pa Amikud. Pi kaka pa Benjamin, Elidad wod pa Kicion, Pi kaka pa Dan, Buki wod pa Jogli. Pi likwayo pa Yucepu, pi kaka pa Manace, Kaniel wod pa Epod; ki i kaka pa Epraim, Kemuel wod pa Ciptan, Pi kaka pa Jabulon, Elijapan wod pa Pamak. Pi kaka pa Icakar, Paltiel wod pa Ajan. Pi kaka pa Acer, Akiud wod pa Celomi. Pi kaka pa Naputali, Pedael wod pa Amikud. Magi aye dano ma Rwot ociko ni gupok lobo me aleya pa jo Icrael ki i lobo Kanaan.’ I lobo aroo me Moab ma i ŋet Jordan mukemo Jeriko Rwot owaco bot Moses ni, “Cik jo Icrael ni gumi ki Lulevi gaŋi me bedogi ki i koni lobo ma gibilimo me aleyagi; dok myero wumi botgi lobo ma orumo gani-nu obed me oletgi. Gani-nu bibedo pa Lulevi me bedogi, ki olet ma i ŋetgi bibedo pi kwayo dyaŋigi ki limgi makwo ducu. Lobo ma wubimiyo bot jo Levi pi oletgi lacce biromo yadi miya abic cakke ki i cel me gaŋ tuŋŋi ki tuŋŋi kun rumo gaŋ ducu. Wubipimo dul lobo ma latwoke aŋwen ma romrom; bor me twoke acel acel bibedo yadi alip acel, kun gaŋ bedo i dyere. Wubimiyo bot Lulevi gaŋi abicel me laro lunek dano ka ma wubiweko lunek riŋo iye, dok wubimiyo botgi gaŋi mukene pyera ŋwen wiye aryo wumedo i kom meno, Kit meno gaŋi ducu ma wubimiyo bot Lulevi biromo pyeraŋwen wiye aboro, kacel ki oletgi. Gaŋigi wubimiyo botgi kuti wukwanyo ki i kom lobo ma jo Icrael gibigamo; wubikwanyo mabup ki bot kaka madito, dok ki bot kaka matinone wubikwanyo manok, kun kaka acel acel miyo gaŋine mogo bot Lulevi muporo lobo ma ogamo me ginaleyane.” Rwot owaco bot Moses ni, “Wac bot jo Icrael ni, Ka doŋ wuŋolo kulu Jordan, wukato i lobo Kanaan, ci wubiyero gaŋi mogo wek gubed gaŋi me laro lunek dano, wek dano ma pe guneko dano akaka gurhj gular iye komgi. Gaŋi magi bibedo me laro lanek dano ki bot lacul kwor, wek lanek dano mo pe oto nio ka ocuŋ i nyim lwak wek giŋol koppe, Wubiyero gaŋiwu abicel, adek loka Jordan tuŋ wokceŋ ki adek i lobo Kanaan, gubed gaŋi me laro lunek dano. Gaŋi magi abicel-li gibibedo me laro kom pi jo Icrael ki pi welowu ki pi lubedo ma gibedo i kinwu, wek ka ŋat mo oneko dano kun pe oneko akaka oriŋ olar iye kome. “Ento ka ogoyo dano ki nyonyo mo oreto piny ci oto woko, meno en lanek; gibineke woko. Ka ce ocelo dano ki kidi ma omako i ciŋe, ma romo neko dano, ci ocelo oto woko, meno aye lanek; gibineke woko. Nyo ka ogoyo ki yat ma omako i ciŋe, ma romo neko dano, ci oto woko, meno en lanek; gibineke woko. Wat macok pa lato kikome aye bineko lanek dano woko; ka oromo kwede, ci neke woko. Ka ŋat mo obako dano ocobo pil pi mone, nyo otokke i kome ci obayo ocobo woko, kun noŋo okiye ak iya, ci oto woko, nyo ka odoŋe ki ciŋe pi mone ma tye i kingi ci oto woko, ŋat ma ocobe nyo ma odoŋe-ni gibineko woko; meno en lanek. Wat macok ki Lato kikome aye bineko lanek dano woko, ka oromo kwede, “Ento ka ce obako ci ocobe oyotoyot ma tyen mone mo pe, nyo otokke i kome ci obayo ocobo ma pe okiye akiya, nyo ocele ki kidi ma romo neko dano ma noŋo pe onene, ci oto woko kadi yam pe en lamerokke, dok onoŋo pe opiro timo en marac, ci lwak myero oŋol kop i kin lanek ki wat pa lato ma lacul kwor remo kun lubo cik magi. Lwak myero olar lanek dano ki i cin wat pa lato ma lacul kwor remo-ni, ci dwoko lanek i gaŋ me laro lunek dano ka ma yam oriŋo olaro-ni. En bibedo kunnu matwal, nio ka ajwaka madit ma giwiro ki moo maleŋ i kare-nu otyeko to woko. Ento ka i kare mo lanek dano ocito okato woko i ŋe waŋ apokki me gaŋ me laro kome ka ma yam oriŋo iye-ni, ci lacul kwor remo pa lato onoŋo kome owee, kun tye woko i ŋe waŋ apokki me gaŋ me laro kome, ce lacul kwor remo pa lato oneko lanek-ki, pe gibikwano alii me remo i wiye. Pien dano meno myero obed i gaŋ me laro kom nio i kare ma ajwaka madit bito iye; ento i ŋe to pa ajwaka madit lanek dano twero dok cen i pacone. Meno ducu bibedo cik botwu wa i kare pa likwayowu ducu, i kabedo ducu ma wubibedo iye. Cik ma mako lucaden ki lim me kok “Ka ce dano mo oneko dano, ci gibineko lanek woko pi lok pa lucaden; ento pe gibineko dano mo pi lok ma lacaden acel keken otito. Dok pe wubigamo lim me koko kwo pa lanek dano mo ma balle romo to; gibineke aneka. Dok pe wugam lim me kok mo pi dano ma oriŋo olaro gaŋ me laro lunek dano, wek giyene odwog obed i lobone ma noŋo ajwaka madit peya oto. Pe wubinyobo lobo ma wubibedo iye-ni; pien remo nyobo lobo woko, dok pe tye gin mo ma twero kwanyo bal ki i lobo pi remo ma oo iye-ni, kono remo pa lanek dano meno kek en aye kwanyo. Pe wubimiyo lo bo ma wubedo iye, ma an bene abedo iye i dyewuni, odok keni; pienan a Rwot ma abedo i kin jo Icrael.” Ludito kaka pa kwarogi ma i doggola pa Gilead wod pa Makir ma wod pa Manace ma i doggola pa Yucepu gubino cok, ci guloko i nyim Moses ki ludito kaka mukene. Guwaco ni, “Laditwa, Rwot yam ociki ni imi lobo me aleya bot jo Icrael kun gibolo kwir; ci yam ociki ni imi ginaleya pa ominwa Lyel Jelopekad bot anyirane, Ento ka ce awobe ma i kaka mukene gunyomogi ki i kin jo Icrael ata, ci miyo lobogi gi bi kwanyo woko ki i kom ginaleya pa kwarogi, gimedo i kom lobo pa kaka ma anyirane doŋ tye iyeni; meno miyo gibijwiko lobowa woko ma yam gipoko botwa ki kwir. Dok ka kare me jubili pa jo Icrael oromo, ci lobogi gibimedo i kom lobo pa kaka ma anyira gitye iye-ni matwal, ci miyo lobowa me aleya bijwik woko.” Moses ociko jo Icrael kit man, kun cikke oa ki bot Rwot, ni, “Lok me kaka pa likwayo pa Yucepu tye atir. Doŋ man aye cik ma Rwot omiyo ma okemo kom anyira pa Lyel Jelopekad, ni, ‘Wek gin gunyomme ki dano ma gitamo ni ber, tekke ka ginyomogi i doggola mo ma i kaka pa kwarogi. Lobo ma gimiyo bot jo Icrael me aleyagi pe gibilokone nia i kaka man dok i kaka mukene; pien dano acel acel ma i kin jo Icrael bimoko matwal i kom ginaleya ma i kaka pa kwarogi. Dok ka nyako mo oleyo dul lobo mo ma i kaka mo ma i kin jo Icrael, ci en binyomme ki dano mo ma i doggola mo ma i kaka pa kwarogi, wek dano acel acel ma i kin jo Icrael obed ki lobone ma oleyo ki bot kwarone. Kumeno, pe gibiloko ginaleya mo nia ki i kaka mo-ni dok i kaka mukene, ento kaka acel acel pa jo Icrael bimoko gire i lobo me ginaleyane kikome.’ ” Anyira pa Jelopekad gutimo kit ma Moses ocikogi kwede. Makala, Tiŋa, Kogla, Mirika ki Noa, ma gin aye anyira pa Jelopekad, gunyomme ki awobe pa omegi wongi. Ginyomogi i doggola pa jo pa Manace wod pa Yucepu, omiyo lobo me aleyagi obedo i kaka me doggola pa wongi, pe gikobo woko. Meno ducu aye gin lok ma Rwot ociko ki ma oŋolo ki i dog Moses bot jo Icrael i lobo aroo me Moab i ŋet kutu Jordan ma okemo Jeriko. Man aye lok ma yam Moses ŋroko bot jo Icrael ducu ki i loka Jordan i dye tim, i Araba mukemo Cup, i kin Paran ki Topel, Laban, Kajerot ki Di-jabu, Nia ki i Koreb nio wa i Kadec-bamea onoŋo romo wot me nino apar wiye acel ki i yo ma wok i lobo godi me Ceir. I mwaka me pyeraŋwenne, i nino dwe mukwoŋo me dwe me apar wiye acel, en aye Moses oloko iye ki jo Icrael i kom cik ducu ma Rwot yam omiye ma mako komgi. Oloko kwedgi i kare ma doŋ otyeko loyo Cikon kabaka pa jo Amor ma yam bedo i Kecbon, ki Og kabaka me Bacan ma yam bedo i Acitarot ki i Edrei. Moses omine pi gonyo te cik man ki i loka Jordan, i lobo Moab, kun waco ni, “Rwot Lubaŋawa owaco botwa ki i Koreb ni, ‘Doŋ wubedo kare malac twatwal i te got man. Wulokke, wucak wot, wucit i lobo godi pa jo Amor, ki bot jo ma gicok kwedgi ducu ma i Araba, bot jo ma i lobo godi ki i pwor got, ki i Negeb ki i lobo murabo dog nam. Wucit i lobo Kanaan, ki i Lebanon nio wa i kulu madit, en kulu Euprate. Nen, atyeko keto lobo-nu i nyimwu; wucit iye, wucam obed mewu, kit ma yam Rwot okwoŋo bot kwarowu, bot Abraim, bot Icaka ki bot Yakobo, ni ebimiyo botgi ki bot likwayogi ma bilubogi.’ “I kare meno yam amedde ki wacciwu ni, ‘An pe atwero tiŋowu kena; Rwot Lubaŋawu doŋ omiyo wunya mapol, mumiyo tin, nen, wun wupol macalo lwak lakalatwe me polo. Myero Rwot Lubaŋa pa kwarowu doŋ omedwu wudok mapol tyen alip makato ma koni wutye-ni, dok ominiwu gum, macalo yam ocikowu kwede-ni! An kena atwero tiŋo yec mapek ma wuketo i koma-ni niŋniŋ, ki ciro kecowu? Wuyer dano ma luryeko, jo makwiri muteggi, muporo wel kakawu ducu, ci abiketogi gubed ludito ma loyowu.’ Ci wun yam wudokka iye ni, ‘Lok ma ilokkiwa-ni ber, myero wati.’ Pienno akwanyo ludito wi kakawu, jo maryek, muteggi, ci aketogi gubedo lulo jo alip, lulo jo miya, lulo jo pyerabic ki lulo jo apar, ki ludito mukene muporo kakawu ducu, I kare meno aciko luŋolkopwu ni, ‘Wuwiny pido ma i kin omegiwu, ci wuŋol kop atir i kin dano mo ki ominne, nyo ki larok mo ma bedo bote. Ka wuŋolo kop, pe wudwor kor dano mo; wuwiny lok pa dano matidi ma rom ki pa dano madit, Pe wulwor waŋ dano mo, pien ŋolo kop tye bot Lubaŋa. Ka lok mo tek, loyowu, wukel bota, abiwiniyo.’ I kare ca yam acikowu i kom gin ducu ma myero wutim. “Yam wacako wot, waa woko ki i Koreb, wacito wabaro dye tim meno ducu malac ki malik ma yam wuneno, i yo ma kemo lobo godi pa jo Amor, kit ma yam Rwot Lubaŋawa ocikowani; ci wabino wa i Kadec-bamea. Ci awacciwu ni, ‘Wun doŋ wuo i lobo godi pa jo Amor en, ma Rwot Lubaŋawa bimiyowa, Nen, Rwot Lubaŋawu oketo lobo-nu i nyimwu; wucit wucam obed mewu, macalo Rwot Lubaŋa pa kwarowu yam ocikowu; pe wulwor, cwinywu pe ocid woko.’ Ci wun ducu wubino bota cok, wuwaco ni, ‘Wek wacwal dano i nyimwa wek gurot lobo, ka gudwok lok botwa i kom yo ma myero wacitu iye, ki i kom gaŋi ma wabio iye.’ Yam aneno ni lokke ber, ci akwanyo jo apar wiye aryo ki i kinwu, dano acel ki i kaka acel acel. Gin gulokke, guito i lobo godi, guo i nota me Ecikol, guroto ducu. Ci gukwanyo nyig yadi mogo mucek i lobo-nu, gumako ki ciŋgi, guo kwede botwa, dok gudwoko lok botwa bene kun giwaco ni, ‘Lobo ma Rwot Lubaŋawa tye ka miyowa-ni ber.’ “Ento yam wun wukwero cito kunnu, ci wujemo woko i kom cik pa Rwot Lubaŋawu. Wubedo ka ŋuro i kemawu, kun wuwaco ni, ‘Pien Rwot yam dag wanwa en aye gin mumiyo okwanyowa woko ki i lobo Ejipt, wek omiwa i cin jo Amor, gutyekwa woko liweŋ. Wan wabecito kwene kaa? Utmegiwa gumiyo cwinywa oŋabbe aŋaba pi waco ni, “jo maca gidoŋo dok giboco gikatowa woko; gaŋi megi bene gidito, dok gugoyo cel matek ma o wa i polo; dok bene waneno kunnu likwayo pa jo Anak.” Ci an dok awacciwu ni, ‘Pe atiba opot i komwu, pe wulworgi. Rwot Lubaŋawu ma tye ka telo nyimwu-ni, en aye bilweny piwu ma rom ki gin ducu ma yam otimo piwu i Ejipt ma wuneno ki waŋwu, wa ki i dye tim bene, ka ma wuneno iye kit ma Rwot Lubaŋawu otiŋowu kwede, macalo dano ma otiŋo wode, kun timo kumeno i yo ducu ma wuwoto iye nio ka wuo kwede i kabedo man.’ Ento kadi bed aloko kumeno, wun wukwero geno Rwot Lubaŋawu, ma yam obedo ka telliwu yo wek eyeny kabedo ma wubiguro iye kemawu. Dyewor en woto i mac ki dyeceŋ woto i pol pi nyutowu yo ma wucito iye. “Ka yam Rwot owinyo lok ma wuloko ducu, ci kiniga omake, okwoŋo kwoŋ ni, ‘Pe tye ŋat mo ma i kin yalwak man marac-ci ma bineno lobo maber ma yam akwoŋo pire ni abimiyo bot kwarowu, kono Kaleb wod pa Jepune keken. En aye binenone, dok abimiyo bote ki bot litinone lobo ma yam en onyono ki tyene, pien en obedo ka lubo gin ma Rwot mito ducu kakare.’ Kiniga yam omako Rwot wa i koma bene piwu, owacci, ‘In bene pe ibio kunnu. Yocwa wod pa Nun ma tiyo boti-ni, en aye bicito iye. Cuk cwinye, pien en aye doŋ bimiyo jo Icrael gileyo lobo ca. Dok litinowu ma wun wuwacci gibiyakogi woko-ni, litinowu ma kombeddi peya giŋeyo gin maber ki marac-ci, gin aye gibicito iye; abimiyone botgi, gibicamo, bibedo megi. Ento wun giwu wulokke, wucak wot i dye tim yo tuŋ Nam Makwar.’ “Wun dok wugamo doga kun wuwaco ni, ‘Wan doŋ wabalo i nyim Rwot; wabicito ka lweny kit macalo Rwot Lubaŋawa ocikowa.’ Dano acel acel i kinwu otwene ki jami lwennye, kun wutamo ni bedo yot me cito i lobo godi, Ci Rwot owacca ni, ‘Wac botgi ni, Pe wucit kunnu, pe wulweny, pien an pe atye i dyewu, weko lumerokwu biloyowu.’ Yam aloko botwu, ci wukwero, pe wuwinyo; ento wujemo woko i kom cik pa Rwot, wuette, wuito malo wa i lobo godi. Ci jo Amor ma gibedo i lobo godi kunnu gubino i komwu, guryemo korwu macalo kic, gudatowu piny i Ceir nio wa i Korma. Wudwogo, wukok i nyim Rwot; ento Rwot pe owinyo kokowu, pe ociko ite i lokwu. Mumiyo wubedo i Kadec pi kare malac, pi kare ma wubedo kwede kunnu. “Yam walokke, wawoto i tim, i yo ma dok tuŋ Nam Makwar, kit macalo Rwot ocika; ci wabedo ka rabo ŋet lobo godi me Ceir pi mwaka mapol. Ka dok Rwot owacca ni, ‘Wubedo ka rabo ŋet lobo godi man kare malac, doŋ oromowu; wulokke wudok yo tuŋ acam. Ci icik lwak ni, Wun doŋ wucok ka wok ki i lobo pa utmegiwu likwayo pa Ecau ma gibedo i Ceir, ci gibibedo ki lworo i komwu. Myero wugwokke mada, pe wucak lweny i komgi, pien pe abimiyowu dul lobogi mo, pe kadi ma tyenwu romo cuŋ iye, pien atyeko miyo lobo godi me Ceir bot Ecau obed mere. Wubiwilo cam botgi ki lim wek wucam; dok pii amatawu bene wubiwilo botgi ki limo Pien Rwot Lubaŋawu obedo ka miyowu gum i kom tic ducu ma ciŋwu otiyo; en ŋeyo kit ma wuwok wukato kwede i dye tim man malac-ci. Rwot Lubaŋawu obedo kwedwu i lwak mwaka man ducu pyeranwen-ni, ma can gin mo pe omakowu.’ Mumiyo wacito waa ki ka ŋet utmegiwa likwayo pa Ecau ma gibedo i Ceir, kun walubo yo me Araba mua ki i Elat ki Ejiongeber. “Ci walokke, wacito i yo ma kemo tuŋ tim me Moab. Ka Rwot dok owacca ni, ‘Pe icit magwa i kom jo Moab, pe icak lweny i komgi, pien pe abimiyi dul lobogi mo obed mewu, pien atyeko miyo Ar bot likwayo pa Lot obed megi.’ (Yam jo Emim aye gukwoŋo bedo kunnu; gin rok madit, gipol bene, jo maboco macalo jo Anak. Jo man gikwanogi i kin jo Repaim bene macalo jo Anak, ento jo Moab lwonogi ni jo Emim. Ki jo Kori bene yam gukwoŋo bedo i Ceir, ento likwayo pa Ecau aye gucamo lobogi, gutyekogi woko liweŋ ki i nyimgi, guleyo kabedogi, macalo jo Icrael gutimo ki lobo ma odoko megi, ma Rwot omiyogi-ni.) ‘Doŋ wua malo kombeddi, wuŋol nota ora me Jered.’ Kit meno yam wacito, waŋolo nota ora me Jered. Nia i kare ma waa ki i Kadec-bamea nio ka waŋolo nota ora me Jered onoŋo oromo mwaka pyeradek wiye aboro, nio kwede i kare ma yalwak meno ducu, ma en aye jo ma lulweny, doŋ guto gutum woko ki i gony, kit ma yam Rwot okwoŋo kwede kwoŋ i komgi-ni. Pien onoŋo yam ciŋ Rwot tye i komgi likiŋ pi tyekogi woko ki i gony, nio ka gutum woko ducu. “Kit meno ka yam jo ducu ma lulweny guto gutum woko ki i kin lwak, ci Rwot owacca ni, ‘Tin doŋ ibikato ki i waŋ lobo Moab kun iwok ki i Ar. Ka doŋ inyiko cok i nyim likwayo pa Ammon, pe icit magwa i komgi, pe icak lweny i komgi, pien pe abimiyi dul lobo mo pa jo Ammon obed mewu, pien atyeko miyone woko bot likwayo pa Lot obed megi.’ (Meno bene gilwoŋo ni lobo pa jo Repaim. Jo Repaim aye yam gukwoŋo bedo kenyo, ento jo Ammon lwoŋogi ni jo Jamjummim, Gin yam gubedo rok madit, ma gipol bene, giboco macalo jo Anak; ento Rwot otyekogi woko liweŋ ki i nyimgi, ci jo Ammon gucamo lobogi, guleyo kabedogi, kit ma yam Rwot otimo pi likwayo pa Ecau ma gibedo i Ceir, i kare ma otyeko jo Kori woko ki i nyimgi, ci likwayo pa Ecau gucamo lobogi, guleyo kabedogi, pud gibedo iye wa tin. Dok jo Avi bene ma yam gubedo i gaŋgi matino nio wa i Gaja, jo Kaptor aye, ma yam gubino gua ki i Kaptor, gucamo lobogi, guleyo kabedogi.) ‘Wua malo, wucak wot, wucit wuŋol nota me Amon. Nen, atyeko miyo Cikon i ciŋwu, ma en aye dano me Amor, kabaka me Kecbon, kacel ki lobone; wucak camone, ma wucako doŋ lweny i kome. Tin abicako keto atiba ki lworo piwu i kom rok ma tye piny i te polo ducu. Ka giwinyo lok i komwu, komgi bimyel, gibinyonne woko piwu matek.’ “Mumiyo acwalo lukwena nia ki i tim me Kedemot bot Cikon kabaka me Kecbon ki lok me kuc, kun awacce ni, ‘Ber iwek awok akat ki i loboni; abicito alubo gudo keken, pe Abiŋak adok yo tuŋ acuc nyo tuŋ acam, Ibicatta cam me acama ma awilo ki lim, dok ibimiya pii bene me amata ma awilo ki lim. Wek awok akat ki tyena keken, kit macalo likwayo pa Ecau ma gibedo i Ceir, ki jo Moab ma gibedo i Ar yam gutimo, nio ka aŋolo Jordan akato wa i lobo ma Rwot Lubaŋawa bimiyowa.’ Ento Cikon kabaka me Kecbon pe oye ni wawok ki i lobonie; pien Rwot Lubaŋawu omiyo cwinye obedo tek ki adunone obedo nwaŋ, wek emi en i ciŋwu, macalo otimme-ni. Ci Rwot owacca ni, ‘Nen, doŋ acako miyo Cikon ki lobone i ciŋi: cak doŋ camone wek wule lobone obed mewu.’ Ka dok Cikon ocorre obino i komwa, en ki lwakke ducu ka lweny i Jakaj. Ci Rwot Lubaŋawa omiyo en i cidwa, waloyo en ki awobene ki lwakke ducu. I kare meno wamayo gaŋine madito ducu, wajwerogi woko liweŋ, co wa ki mon ki litino, pe waweko ŋat mo odoŋ. Watero lim makwo keken wayako odoko mewa, kacel ki jami ma wayako ki i gaŋi ma wamayogi-ni. Nia ki i Aroer ma tye i dog nota me Amon, ki nia ki i gaŋ ma tye i nota nio wa i Gilead, pe onen gaŋ mo ma gigero ma malo twatwal ma mayone oloyowa; Rwot Lubaŋawa omiyogi ducu i ciŋwa. Lobo pa likwayo pa Ammon keken yam pe wunyiko cok kwede, en aye lobo ducu ma i dog kulu Jabok, ki gaŋi ma i lobo godi, ki ka ma Rwot Lubaŋawa ojukowa pire-ni ducu. “Ka dok walokke, wacito malo i yo ma dok i Bacan; ci Og kabaka me Bacan ocorre obino i komwa, en ki lwakke ducu, ka lweny i Edrei. Ento Rwot owacca ni, ‘Pe ilwore; pien atyeko miyo en ki lwakke ducu kacel ki lobone i ciŋi; ibitimo en macalo yam itimo i kom Cikon kabaka pa jo Amor, ma yam bedo i Kecbon.’ Kit meno Rwot Lubaŋawa omiyo Og kabaka me Bacan i ciŋwa bene, ki lwakke ducu; ci waloye, wanekogi nio ka danone mo pe odoŋ, I kare meno wamako gaŋine madito ducu; pe tye gaŋ mo ma pe wamayo ki botgi, gaŋi pyerabicel kulu, i lobo me Argob ducu ma i te ker pa Og i Bacan. Lwak gaŋi man ducu onoŋo gigoyogi ki cel matek mutiŋŋe malo likuŋ, ma gitye ki doggaŋgi ma gicego ki rii, ma pe gikwano iye lwak gaŋi matitino mapol ma pe gicelogi ki cel. Wajwerogi woko liweŋ, macalo yam watimo i kom Cikon kabaka me Kecbon; wajwero gaŋi ducu, co wa ki mon ki litino. Ento lim makwo ducu ki jami ma wayako ki i gaŋi watero odoko mewa. Kit meno i kare ca wakwanyo lobo meno ki i cin luker aryo pa jo Amor ma yam gitye loka Jordan, nia ki i nota me Amon nio wa i kom got Kermon. (Jo me Cidon gilwoo Kermon ni, Cirion, ento jo Amor gilwoŋo ni Cenir.) Yam wamako gaŋi ducu ma i wi cere, kacel ki lobo Gilead ducu ki Bacan, nio kwede wa i Caleka ki Edrei, ma gin aye gaŋi ma i te ker pa Og i lobo Bacan. (Pien Og kabaka me Bacan en aye yam odoŋ kene ki i kin jo Repaim ma yam odoŋ, Nen, kitandane yam obedo ki tanda nyonyo; pud tye i Raba pa jo Ammon, Borre romo yadi aŋwen ki nucu ki lacce yadi aryo, ka gipimo ki yadi me nino ducu-ni.) “I kare meno, i kare ma wacamo lobo ma kenyo, amiyo lobo bot jo pa Reuben ki jo pa Gad, kun waŋe cakke ki i Aroer, ma i dog nota me Amon, kacel ki nucu lobo godi me Gilead ki gaŋi madito ducu ma tye iye. Lobo Gilead mudoŋŋe, ki lobo Bacan ducu, en aye lobo Argob ducu, ma yam obedo i te ker pa Og, yam amiyo bot nucu kaka pa jo Manace. (Lobo Bacan meno ducu gilwoŋo ni lobo pa jo Repaim. Jair, ma jo Manace, yam otero lobo ducu me Argob, en aye Bacan, nio wa i waŋ apokki me lobo pa jo Gecur ki pa jo Maaka, ci ocako nyiŋ gaŋine ki nyiŋe kene ni Kavot-jair, macalo pud tye wa onyoo.) Ci amiyo lobo Gilead bot Makir; ‘ki bot jo pa Reuben ki jo pa Gad amiyo lobo ma a ki i Gilead cito kwede wa i nota me Amon, kun waŋ lobone obedo cwiny kulu, nio kwede wa i kulu Jabok, ma en aye waŋ lobo pa jo Ammon. Amiyogi Araba bene, ma Jordan aye waŋ apokkine, nia wa i nam me Kineret nio kwede i nam me Araba, en aye nam me Kado ma tye i pwor got me Piciga, ma tuŋ wokceŋ. “Dok yam acikowu i kare meno kun awacci, ‘Rwot Lubaŋawu doŋ otyeko miyowu lobo man wucam obed mewu, Oteka lwenywu ducu myero gukat loka ca i nyim omegiwu jo Icrael kun noŋo guruko jami lwenygi; ento monwu ki litinowu matino ki limwu makwo, (pien aŋeyo ni wutye ki lim madwoŋ), gin gibidoŋ i gaŋi madito ma doŋ amiyo botwu-ni, nio ka Rwot doŋ omiyo omegiwu ka yweyo, kit ma omiyowu ka yweyo-ni, ma doŋ gin bene gucamo lobogi ma Rwot Lubaŋawu bimiyogi loka Jordan. Lacen wubidwogo, kun ŋat acel acel dwogo i dul lobone ma doŋ amiyowu-ni.’ I kare meno bene yam aciko Yocwa ni, ‘In doŋ ityeko neno ki waŋi gin ducu ma Rwot Lubaŋawu otiyo i kom luker meno aryo-nu; Rwot dok bitimo kit meno i kom ker ducu ma wubio iye ka wukato loka ca, Pe wulworgi, pien Rwot Lubaŋawu aye tye ka lwenyo piwu.’ “Yam abako doga bot Rwot i kare meno kun awaco ni, ‘Ai Rwot Lubaŋawa, in pud icako acaka me nyuto bota, an laticci, kit dit meri ki twero me badi, Lubaŋa mo pe i polo nyo i wi lobo ma twero tiyo kit tic matek twatwal macalo in itimo! Wek koŋ acit anen lobo maber ca ma loka Jordan, lobo godi maber-ri, ki Lebanon bene.’ Ento yam kiniga omako Rwot i koma piwu, pe omedo ki winya. Rwot owacca ni, ‘Wek meno doŋ rommi; pe dok inwo loko lok meno bota. Cit iit malo i wi got Piciga, ci itiŋ waŋi malo inen yo tuŋ potoceŋ, ki tuŋ acam ki tuŋ acuc ki tuŋ wokceŋ, inen ducu ki waŋi, pien pe ibiŋolo Jordan man. Ento in icik Yocwa, icuk cwinye, imiye tek; pien en aye bikato loka ca kun telo wi lwak man, ci bimiyogi camo lobo ma ibineno-ni.’ Mumiyo wamedde ka bedo i nota mukemo Bet-peor. “Kombeddi wun jo Icrael wuwiny cik ki kop ma giŋolo ma atye ka pwonyowu kwede, wucobgi, wek wubed makwo, wucit wuo i lobo ma Rwot Lubaŋa pa kwarowu tye ka miyowu, wucam obed mewu. Pe wumed lok mo i kom cik ma acikowu kwede-ni, pe wukwany lok mo woko ki i kome, wek wugwok cik pa Rwot Lubaŋawu ma acikowu kwede ducu. Yam wuŋeno ki wanwu gin ma Rwot otimo i Baalpeor; pien yam Rwot Lubaŋawu okwanyo i kinwu jo ducu ma gulubo jok Baal me Peor, onekogi woko; ento wun jo ma yam wumoko i kom Rwot Lubaŋawu matek-ki pud wutye makwo ducu wa tin. Nenu, doŋ atyeko pwonyowu ki cik mapatpat ki gin ma Rwot oŋolo, macalo Rwot Lubaŋana ocika kwede, wek wulubgi i lobo ma wucok donyo iye me camone-ni. Wugwokgi, wucobgi, pien meno aye bibedo ryekowu ki ŋeyo pinywu i nyim rok mukene, Gin ka giwinyo lwak cik man ducu gibiwacci, ‘Adada, rok man madit-ti tye ki ryeko, dok gin lwak ma giŋeyo piny.’ Pien pe tye rok mukene madit ma lubaŋagi bedo cok kwedgi macalo Rwot Lubaŋawa bedo cok kwedwa i kare ducu ma wakok bote. Dok tye rok madit mo ma tye ki lwak cik ki kop ma giŋolo atir ma rom ki cik man ma tin aketo i nyimwuni ce? “Ento myero wunen maber ni wugwokke kenwu ki cwinywu ducu, wiwu pe owil i kom gin ma wuneno ki waŋwu, wek pire pe oa woko ki i cwinywu i kare me kwowu ducu. Wutit bot litinowu ki likwayowu wek guŋe kit ma yam wucuŋ kwede i nyim Rwot Lubaŋawu i Koreb, ci i nino meno Rwot owacca ni, ‘Cok lwak kacel bota, wek ami guwiny lokka, gupwony lworo an pi kare ducu ma gibedo kwede i wi lobo-ni, dok gin bene gupwony ki litinogi.’ Ci yam wubino cok, wucuŋ i te got ma onoŋo got tye ka waŋ ki mac ma oo wa i polo, i dye colpiny ki pol ma ocido licuc. Ci Rwot yam oloko kwedwu ki i dye mac. Yam wuwinyo dwan ŋat ma loko, ento pe wuneno kom gin mo; wuwinyo dwan keken. En yam otitowu pi gicikkene ma en ocikowu ni wucobi, en aye cik apar ma en ocoyogi i kidi aryo ma apada. I kare meno Rwot ocika ni apwonywu ki cik ducu ki gin ma en oŋolo ducu, wek wulubgi i lobo ma wubicito loka ca ka camoneni. “Myero doŋ wugwokke kenwu matek. Yam pe wuneno kom mo i kare ma Rwot oloko iye botwu i Koreb ki i dye mac ca; pi meno wugwokke wek pe wuballe pi payo cal mo piwu kenwu, kadi cal kom gin mo-ni muporo laco nyo dako, nyo muporo lee mo ma tye i wi lobo, nyo winyo mo ma tuk ki bwome i dye yamo, nyo gin mo ma lak alaka i nom, nyo rec mo ma bedo i pii ma i te lobo. Dok wugwokke wuwek tiŋo waŋwu malo i polo; miyo ka wuneno iye cen ki dwe ki lwak lakalatwe, ma gin ducu mony ma i polo, ci cwinywu biterowu ka ryebbe piny i nyimgi ka worogi, kun noŋo Rwot Lubaŋawu omiyogi bot rok ducu ma gitye piny i te polo. Ento yam Rwot okwanyowu ci okelowu woko ki i lobo Ejipt, en lobo ma obedo calo buk mac me teto nyonyo ma otwak me waŋowu, wek wubed jone kikome macalo i kare man. Dok bene yam kiniga omako Rwot i koma piwu, ci okwono kwon ni an pe abiŋolo Jordan, pe abidonyo i lobo maber ma Rwot Lubaŋawu tye ka miyowu me aleyawu, An myero ato woko ki i lobo man, pe myero aŋol loka Jordan; ento wun aye wubiŋolo wukato loka ca pi camo lobo ca maber-ri. Wugwokke wek wiwu pe owil i kom gicikke pa Rwot Lubaŋawu ma yam en oketo kwedwu ci miyo wutiyo cal apaya muporo kom gin mo ma yam Rwot Lubaŋawu ociko ni pe wutim. Pien Rwot Lubaŋawu en mac ma waŋo piny woko, en Lubaŋa ma lanyeko. “Ka doŋ wunywalo litino ki likwayo, ma doŋ wudikke i lobo ca, ka ce wuballe kekenwu pi tiyo cal apaya muporo kom gin mo-ni, kun wutimo gin ma nen marac i waŋ Rwot Lubaŋawu, ma miyo kiniga omake, alwoŋo polo ki lobo gubed caden botwu tin i kom lok man ni, wubito wutum woko oyotoyot ki i lobo ma doŋ wucok ŋolo Jordan ka camone; pe wubiri iye kare malac, ento gibityekowu woko liweŋ. Dok Rwot biketowu woko ata i kin rok mapatpat, ci wubidoŋ ma welwu nok twatwal i dye lurok ka ma Rwot biryemowu wucito iye. Ki kunnu wubiworo iye lwak lubaŋa mapol ma gipayo calgi ki bao nyo ki got, gin ma gitiyo ki ciŋ dano, ma pe gineno piny, pe giwinyo lok bene, kadi cam, kadi ŋweyo piny. Ento ki kunnu en aye wubicako yenyo Rwot Lubaŋawu ci wubinoŋe, ka wuyenyo kore ki cwinywu ducu ki tipowu ducu. Ka piny oloyowu, ma doŋ gin meno ducu opoto i komwu i kare me lacen, wubilokke wudwogo cen bot Rwot Lubaŋawu, ci wubiworo doge. Pien Rwot Lubaŋawu en Lubaŋa ma lakica: pe bitenyowu ata, pe bityekowu woko, wiye pe biwil i kom gicikke ma yam oketo ki kwarowu, ma yam okwoŋo pire botgi. “Koŋ wupeny nino ma yam con ca, ma yam okwoŋo nyimwu cakke i kom nino ma yam Lubaŋa oketo iye dano i wi lobo-ni, ci wupeny kite nia i agikki polo tuŋ cel o kwede i agikkine tuŋ cel, ka yam nyo gin madit macalo man koŋ otine, nyo yam koŋ giwinyo pire ka mo. Yam koŋ tye rok mo ma guwinyo dwan lubaŋa mo ma loko kun lokke a ki i dye mac, kit ma yam wun wuwinyo, ci pud gubedo makwo? Nyo yam koŋ lubaŋa mo otemo cito ka kwanyo rok mo pire kene ki i kin rok mukene, kun otemo cwinygi i yo mapol, ki lanyut ki taŋo ki lweny, pi bade matek ki ciŋe ma oryeyo ki pi gin ma kelo lworo madwoŋ, ma rom ki gin ducu ma yam Rwot Lubaŋawu otimo i lobo Ejipt kun wuneno ki waŋwu? Yam ginyuto botwu wek wuŋe ni Rwot aye Lubaŋa; pe tye mo mukene doki. Oweko wuwinyo dwane ma a ki i polo pi tiro kitwu; dok onyutowu macce madit i wi lobo, ka dok wuwinyo lokke ki i dye mac. En yam omaro kwarowu, oyero likwayogi ma gunywalo, ci okwanyowu woko ki i Ejipt pi tekke madwoŋ, ma en kikome tye kwedwu, kun ryemo rok madito ki matego makatowu ki i nyimwu pi kelowu i lobogi, wek omiwu lobogi wucam obed mewu macalo i kare man. Myero doŋ wuŋe tin, dok wuket i cwinywu, ni Rwot aye Lubaŋa ma tye malo i polo ki piny i wi lobo; pe tye mo mukene. Pi meno wumak cikke ki gin ma ociko ducu ma tin acikowu kwede, wek nyimwu obed leŋ, ki nyim litinowu ma bilubowu bene obed leŋ, wek wuri pi kare malac i lobo ma Rwot Lubaŋawu tye ka miyowu-ni matwal.” I kare meno Moses opoko gaŋi adek pat yo tuŋ wokceŋ loka Jordan, wek lunek dano guriŋ iye gular komgi; wek ŋat ma noŋo pe oneko lawote me akaka, kun noŋo mone mo pe i kingi i kare mukato, onoŋ ka laro kwone pi riŋo laro gaŋ mo i kin gaŋi meno. Gin ene: Bejer ma i tim ma bedo cerecere pi jo pa Reuben, Ramot i Gilead pi jo pa Gad ki Golan i Bacan pi jo pa Manace. Man aye cik ma yam Moses oketo i nyim jo Icrael; man aye gin lok me caden ducu, ki cik ki gin ma giŋolo ducu-ma yam Moses oloko bot jo Icrael i kare ma doŋ gua woko ki i Ejipt. Oloko botgi ki i loka Jordan, i nota ma okemo Bet-peor, i lobo pa Cikon kabaka pa jo Amor ma yam bedo i Kecbon, ma yam Moses ki jo Icrael guloyo ka doŋ gua woko ki i Ejipt. Gucamo lobone ki lobo pa Og kabaka me Becan, gin luker aryo pa jo Amor ma yam gubedo loka Jordan tuŋ wokceŋ. Waŋ lobone ocakke ki i Aroer ma i dog nota me Amon ocito kwede wa i got Cirion, ma en aye Kermon, kacel ki Araba ducu ma i tuŋ wokceŋ me Jordan o kwede wa i nam me Araba ma i pwor got me Piciga. Moses olwoŋo jo Icrael ducu ci owaco botgi ni, “Wun jo Icrael, wuwiny cik ducu ki gin ma giŋolo ma aloko tin ma wuwinyo ki itwu; myero wupwonygi dok wugwokke wek wulubgi. Yam Rwot Lubaŋawa oketo gicikke kwedwa i Koreb. Rwot yam pe oketo gicikke man ki kwarowa, ento ocikke kwedwa wan jo ducu ma watye kany tin makwo-ni, Rwot yam oloko kwedwu waŋ ki waŋ i te got ki i dye mac, ma kun an acuŋ i kin Rwot ki wun i kare meno kun atito botwu lok pa Rwot; pien yam wubedo ka lworo mac, ci pe wumedo ki ito malo wa i wi got. En yam owaco ni, “‘An a Rwot Lubaŋani ma yam akwanyi woko ki i lobo Ejipt, i ot me opii. “‘Pe ibed ki lubaŋa mukene, kono an kena. “‘Pe iti cal apayani mo, nyo cal gin mo ma tye malo i polo, nyo gin ma tye piny i wi lobo, nyo gin ma tye i pii ma i te lobo. Pe iryebbe piny i nyimgi, pe iworgi; pien an aye a Rwot Lubaŋani, an Lubaŋa ma lanyeko, Aketo can i kom likwayo pi bal pa kwarogi nio i yalwak me adek ki me aŋwen pa jo ma kwera, ento anyuto mar ma pe lokke i kom jo alip ki alip ma gimara, ma gimako cikka. “‘Pe ilwoŋ nyiŋ Rwot Lubaŋani me nono; pien Rwot bimiyo kop loyo dano ma lwoŋo nyiŋe me noŋo. “‘Gwok nino me cabit, ikwer obed maleŋ, kit ma yam Rwot Lubaŋani ociki. Ibitic matek pi nino abicel, kun itiyo iye ticci ducu; ento nino me abirone en aye cabit pa Rwot Lubaŋani. I nino meno pe igud iye tic mo, in kikomi, nyo wodi, nyo nyari, kadi opiini nyo aŋecani, kadi twonni nyo kanani nyo dyaŋŋi mo ducu, kadi labedo ma bedo i gaŋwu, wek opiini ki aŋecani guywe macalo in. Myero ipo ni, yam in ibedo opii i lobo Ejipt, ci Rwot Lubaani okwanyi woko ki kunnu ki twero me bade ki ciŋe ma oryeyo; mumiyo Rwot Lubaŋani ociki ni igwok nino me cabit. “‘Wor woru ki meni, macalo Rwot Lubaŋani ociki, wek iri i lobo, dok wek ibed ma nyimi leŋ, i lobo ma Rwot Lubaŋani bimiyo boti. “‘Pe ineki. “‘Pe itim abor. “‘Pe ikwal gin mo, “‘Pe ibed caden me goba i kom lawoti. “‘Cwinyi pe opukke i kom dako pa lawoti, pe ipar ot pa lawoti, kadi potone, nyo opiine, nyo aŋecane, nyo twonne, nyo kanane nyo kadi gin mo ma lawoti tye kwede.’ “Rwot yam oloko lok man bot jowu mucokke ducu kun loko ki dwan maloŋo ki i dye mac ki pol ki colpiny ma ocido licuc; pe dok omedo iye lok mukene. Yam en ocoyo lok man ducu i kom kidi aryo ma apada, omiyogi bota. “Ka yam wuwinyo dwan man ma a ki i dye colpiny, kun got tye ka waŋ ki mac, wubino bota cok, ludito wi kakawu ducu, ki ludoŋo mewu. Ci wuwacci, ‘Nen, Rwot Lubaŋawa doŋ onyutowa deyone ki ditte, dok watyeko winyo dwane bene ka katti ki i dye mac; doŋ tin waneno ka Lubaŋa loko ki dano ci dano pud kwo. Doŋ piŋo myero wato kombeddi? Pien mac man madit bityekowa woko; ka pud wamedde dok ka winyo dwan Rwot Lubaŋawa ma loko kwedwa-ni, ci wabito woko. Aŋa ma i kin jo ducu ma gitye ki kom ma yam koŋ owinyo dwan Lubaŋa makwo ma loko ki i dye mac, kit ma wan wawinyo-ni, ci pud gubedo makwo? In inyik cok, iwiny lok ducu ma Rwot Lubaŋawa biloko, ci itit botwa lok ducu ma Rwot Lubaŋawa biloko boti; wan wabiwinyo ci walubo.’ “Rwot yam owinyo lokwu ma wuloko bota-ni; ci Rwot owacca ni, ‘Atyeko winyo lok pa jo man ma guloko bota; lok ma guwaco ducu guloko maber. Kono yam gibedo jwijwi ki cwiny macalo meno, me lwora ki me gwoko cikka ducu, wek nyimgi obed leŋ kacel ki pa litinogi matwal, kono ber! Cit iwac botgi ni, “Doŋ wudok i kemawu.” Ento in icuŋ cok ka ŋeta kany, ci abititti lok ducu ma aciko, ki lwak cik ki gin ma aŋolo ducu ma ibipwonyogi kwede, wek gulubgi i lobo ma atye ka miyogi me bedo megi.’ Doŋ wun wugwokke wek wulub gin ma Rwot Lubaŋawu ocikowu kwede; pe wuŋak wudok-yo tuŋ acuc nyo tuŋ acam. Wuwot kun wulubo yo ducu ma yam Rwot Lubaŋawu ocikowu kwede, wek wubed makwo, wek yo nyimwu obed leŋ, wek wuri pi kare malac i lobo ma wubicamo doko mewu. “Man aye lok ma giciko, ki lwak cik ki gin ma Rwot oŋolo ma Rwot Lubaŋawu ocika ni apwonywu kwede, wek wulubgi i lobo ma wubicito loka ca ka camone, wek wulwor Rwot Lubaŋawu, wun kikomwu ki likwayowu, kun wugwoko cikke ducu ki lok ducu ma en ociko ma atye ka cikowu kwede, nino ducu me kwo mewu, wek wuri i wi lobo pi kare malac. Pi meno, wun jo Icrael wuwiny, wugwokke wek wulubgi, wek nyimwu obed leŋ, wek wunya bene mapol, kit ma Rwot Lubaŋa pa kwarowu yam owaco botwu i lobo ma mol cak ki moo kic-ci. “Wuwiny, wun jo Icrael: Rwot Lubaŋawa en Rwot acel. Mar Rwot Lubaŋani ki cwinyi ducu, ki tiponi ducu ki tekki ducu. Lok magi ducu ma acikowu kwede tin-ni wubiketo i cwinywu; dok wubipwonyo litinowu kwedgi matek. Wulok lok i komgi ma wubedo i odiwu, ki ka wutye ka wot i yo, ka wubuto piny ki ka wua malo. Wutwe i ŋut ciŋwu obed lanyut; wutwe bene i dye tur nyimwu. Dok wubicoyo i kom okar doggola me odiwu, ki i dog gaŋwu. “I kare ma Rwot Lubaŋawu doŋ otyeko kelowu i lobo ma yam okwoŋo pire bot kwarowu Abraim ki Icaka ki Yakobo, ni ebimiyowu, ma tye iye gaŋi madito ma gibeco, ma yam pe wun aye wugerogi, ki odi ma gupoŋ ki jami ducu ma gibeco ma yam pe wun aye wupoŋo igi, ki bur pii ma gikwinyogi ma pe wun aye wukwinyo, ki poto olok ki poto jeituni ma pe wun aye wupito; ka doŋ wucamo wuyeŋ, ci ber wugwokke wek wiwu pe owil woko i kom Rwot ma yam okwanyowu woko ki i lobo Ejipt, i ot me opii. Wulwor Rwot Lubaŋawu, wuti pi en, wukwoŋ kwoŋwu ki nyiŋe, Pe wulub kor lubaŋa mukene ducu, macalo lwak lubaŋa pa rok mapatpat ma birumowu dyere, pien Rwot Lubaŋawu ma tye i kinwu-ni en Lubaŋa ma lanyeko; wek kiniga pe omak Rwot Lubaŋawu i komwu, miyo en bityekowu woko liweŋ ki i wi lobo. “Pe wuom i Rwot Lubaŋawu, macalo yam wuomo kwede iye i Maca. Wuket cwinywu ka gwoko lok ducu ma Rwot Lubaŋawu ociko, ki lokke me caden, ki cikke ducu ma en ocikowu kwede. Dok wubitiyo gin ma nen atir dok maber i waŋ Rwot, wek nyimwu obed leŋ, wek wucit wucam lobo maberri ma yam Rwot okwoŋo pire ni ebimiyo bot kwarowu, kun wuryemo lukworwu woko ducu ki i nyimwu, macalo Rwot yam owaco. “I kare me anyim, ka latinni bipenyi ni, ‘Lok man me caden kono te lokke aŋo, ki lwak cik ducu ki gin ma giŋolo ma Rwot Lubaŋawa ocikowa kwede-ni?’ ci ibiwaco ki latinni ni, ‘Wan yam onoŋo wabedo opii pa Parao i Ejipt, ci Rwot okwanyowa ki i Ejipt pi twero me bade. Yam Rwot onyuto lwak lanyut ki taŋo madito dok malit twatwal i kom lobo Ejipt ki i kom Parao ki i kom jo ma i ode ducu ma waneno ki waŋwa, Okwanyowa woko ki kunnu wek ekelwa wa kany, eminiwa lobo ma yam okwoŋo pire ni ebimiyo bot kwarowa. Rwot yam ocikowa ni walub cik magi ducu, dok ni walwor Rwot Lubaŋawa wek wabed maber nakanaka, wek en ogwokwa wabed makwo, macalo koni watye-ni. Ka wagwokke wek wacob lok man ducu ma gicikowa kwede ki i nyim Rwot Lubaŋawa, macalo en yam ocikowa kwede, miyo wabedo jo ma kitwa atir.’ “Rwot Lubaŋawu tye ka terowu i lobo ma wubidonyo iye ka camone me bedo mewu, dok en biryemo rok mapol woko ki i nyimwu, jo Kit, jo Girgac, jo Amor, jo Kanaan, jo Periji, jo Kiv ki jo Jebuc, gin rok ducu abiro ma gidito dok gitego makatowu. Ka Rwot Lubaŋawu omiyogi i ciŋwu ci wuloyogi, ci myero wudyergi i ciŋ Rwot, wujwergi woko liweŋ, Pe wuket gicikke mo kwedgi, pe wutimgi kica. Pe wunyomme kwedgi kun wumiyo anyirawu bot awobegi nyo wunyomo anyiragi ki awobewu. Pien gibiloko cwinyawobewu woko, pe dok gibilubo kora, ento gibiworo lubaŋa mogo mukene; ci miyo kiniga mako Rwot i komwu, en bityekowu woko oyot. Ento wubitimogi kit man: wubimuko keno jogigi woko, wubinido wir jogi woko, wubitoŋo yadi ma gipito ka ma giworo iye jok ma dako ma gilwoŋo Acera, ki waŋo cal apayagi ki mac. “Pien wun aye wudoko jo maleŋ pi Rwot Lubaŋawu, Rwot Lubaŋawu otyeko yerowu ki i kin rok ducu ma tye i wi lobo wubed jone kikome. Gin mumiyo mar pa Rwot Lubaŋawu omoko i komwu ci oyerowu, pe ni wun aye welwu dwoŋ makato rok mukene, pien onoŋo wun yam wunok i kin rok ducu. Rwot yam okwanyowu woko ki twero me bade, okokowu ki i ot me opii ki i ciŋ Parao kabaka me Ejipt pien en marowu, dok tye ka cobo kwoŋ ma yam en okwoŋo bot kwarowu. Myero doŋ wuŋe ni, Rwot Lubaŋawu en Lubaŋa kikome, Lubaŋa ma genne, ma gwoko gicik kene, dok gwoko mar mere ma pe lokke bot jo ma gimare ki ma gimako lok ma en ociko ducu, nio wa i yalwak alip kulu. Dok eo culo kwor i kom jo ma gikwere kikomgi, kun nekogi woko. En pe bijalo dano ma okwere; biculo kwor i kom dano meno kikome. Pi meno wugwokke wek wulub lok ma en ociko ki cik ducu ki gin ma en oŋolo ducu ma acikowu kwedetin. “Pien wun wuwinyo cik magi ma giŋolo, kun wugwokogi dok wucobogi, miyo Rwot Lubaŋawu bene bigwoko gicikkene kwedwu, ki mar mere ma pe lokke ma yam en okwoŋo pire bot kwarowu. En bimarowu, bimiyowu gum, dok bimiyo wunya mapol; bimiyo gum i kom litino ma wubinywalo ki i kom gin ma bicek i potowu, kalwu ki koŋo vinowu ki moo mewu, kacel ki litino ma dyaŋiwu ki romiwu binywalo, i lobo ma yam en okwoŋo pire bot kwarowu ni ebimiyowu. Gibimiyowu gum makato rok ducu; pe binen laco mo nyo dako mo ma bibedo lalur i kinwu nyo i kin limwu makwo. Rwot bikwanyo kit two ducu woko ki i kinwu; pe biketo i komwu two mo i kin two maraco me Ejipt ma wun wuŋeyo-ni, ento biketogi i kom jo ducu ma kwerowu. Wun bene wubityeko rok ducu ma Rwot Lubaŋawu biketogi i ciŋwu; kica pe omakwu i komgi. Pe wubiworo lubaŋagi, pien bidoko owic botwu. “Ka ilwodo lok ki i cwinyi ni, ‘Rok magi ducu gin gidito makato an, abicamogi niŋniŋ?’ pe ibibedo ki lworo mo i komgi, ento ibipo gin ma yam Rwot Lubaŋawu otiyo i kom Parao ki i kom jo Ejipt ducu. Ibipo kit ma yam otemo kwede cwinygi ki tic madito kun ineno ki waŋi, kacel ki lanyut ki taŋo mapol, ki twero me bade ki ciŋe ma oryeyo, ma Rwot Lubaŋawu yam okwanyi kwede woko ki kunnu; Rwot Lubaŋawu bitiyo kit meno i kom rok ducu ma ibedo ka lworogi-ni. Dok bene Rwot Lubaŋawu bicoro pino jobi i kingi, nio waŋ ma jo ma yam gudoŋ, ki jo ma gikanne woko ki boti doŋ ginekogi woko, Pe atiba omaki i komgi, pien Rwot Lubaŋawu tye i kinwu, ma en Lubaŋa madit ma ryaŋo kom dano. Rwot Lubaŋawu bijero rok magi woko ki i nyimwu motmot; pe wutwero tyekogi ducu oyotoyot, miyo gi-tim bimedde mapol, ma okato komwu woko. Ento Rwot Lubaŋawu bimiyogi i ciŋwu, ci bibaŋogi woko matek twatwal, nio ka wutyekogi woko. Dok en bimiyo lukergi i ciŋwu, ci wubimiyo nyiŋgi rwenyo woko piny i te polo. Pe binen dano mo ma bicuŋ ka lweny i komwu, nio ka wutyekogi woko. Cal lubaŋagi ma gipayo apaya wubiwaŋogi woko ki mac. Pe wubiparo ryal ki jabu ma gimwono i komgi pe wubikwanyo me bedo mewu, wek pe odok owic me makowu; pien meno aye gin me kwer mada ki bot Rwot Lubaŋawu, Pienno pe ibikelo gin me kwer i odi, miyo odi doko gin ma gilamo kome, macalo eno Myero ikwer woko adada, ica pire woko matwal; pien gin ma doŋ gilamo kome me aneka. “Cik ducu ma atye ka cikowu kwede tin-ni ber, wunen ni wulubo gi, wek wubed makwo, wunya mapol, wucit wucam lobo ca ma yam Rwot okwoŋo pire ni ebimiyo bot kwarowu. Dok myero wupo kom yo ducu ma yam Rwot Lubaŋawu otelowu iye i tim pi mwaka pyeraŋwen, wek emi wudok mamwol, kun temo iwu wek eŋe gin ma tye i cwinywu, ka nyo wubimako cikke, nyo pe. Kit meno en omiyo wudoko mamwol, dok omiyo kec onekowu, ci opitowu ki manna ma onoŋo yam pe wuŋeyo, kadi wa kwarowu bene yam pe guŋeyo; wek oniaŋwu ni, dano pe kwo ki kwon keken, ento dano kwo ki lok ducu ma a ki i dog Rwot. Boŋŋi arukawu yam pe guti gutum woko ki i komwu, tyenwu bene yam pe okwot, i kin mwaka pyeraŋwen kulu. Doŋ myero wuŋe ki i cwinywu ni, Rwot Lubaŋawu tye ka tiro kitwu macalo dano tiro kwede kit latinne. Pi meno, wugwok cik ducu pa Rwot Lubaŋawu, kun wuwoto ma wulubo yone dok kun wulwore. Pien Rwot Lubaŋawu tye ka terowu i lobo maber, ma opoŋ ki lwak nota ora ma igi ki pii, ki waŋ it ki waŋ pii maloŋo, ma gimol ki i nota ki i wi godi. En lobo ma ceko ŋano ki cayiri, ki ma ceko olok ki oduro ki okwer pomegranat, lobo ma moo jeituni ki moo kic dwoŋ iye. En lobo ma wubicamo iye cam mabup laboŋo can gin mo, ka ma gin mo pe birem iye botwu; en lobo ma gweŋŋe bedo nyonyo, ka ma wubikwinyo iye mola ki i cere. Wubicam wubiyen, ci wubipwoyo Rwot Lubaŋawu pi lobo maber ma omiyowu-ni. “Wugwokke kekenwu wek pe wiwu owil woko i kom Rwot Lubaŋawu, kun pe doŋ wugwoko lok ma en ociko; ki gin ma oŋolo, ki lwak cikke ducu ma atye ka cikowu kwede tin; wek wiwu pe ocak doko dito ka doŋ wucamo, wuyeŋ, ma doŋ wugero odi mabeco ma wubedo iye, dok ka dyaŋiwu ki romiwu doŋ onya mapol, ki ryalwu ki jabuwu omedde madwoŋ, ki jami ducu ma wutye kwedgi doŋ onya omedde madwoŋ, Pe wiwu owil woko i kom Rwot Lubaŋawu, ma yam okwanyowu woko ki i lobo Ejipt, ki i ot me opii ca, ma yam otelo wiwu wuwok kwede i tim malac ki malik bene, ma tye iye lwak twol ma kwirgi kec, ki oton, ki lobo ma orwo pii mako iye dano, ma pii pe iye-ni, ci en okelowu pii mua ki i pata got. En bene opitowu i tim ki manna ma yam kwarowu pe giŋeyo, wek elokwu wudok mwol, kun temo ki cwinywu, wek otimwu ber lacen. Wugwokke wuwek Lwodo lok ki i cwinywu ni, “Tek koma ki twero me bada gira aye omiyo alimo lonyo man.’ Wun wubipo i kom Rwot Lubaŋawu, pien en aye ma miyowu tek me limo lonyo; wek en omok gicikkene ma yam okwoŋo pire bot kwarowu, macalo pud tye wa kombeddi. Ka ce wiwu owil woko i kom Rwot Lubaŋawu, ci wucako lubo kor lwak lubaŋa mukene, ki tiyo botgi ki ryebbe piny i nyimgi, atitowu atyer tin ni, wubito wutum woko liweŋ. Wubito wutum woko macalo lurok ma Rwot tye ka miyogi to gitum woko ki i nyimwu-ni, pien pe wumedo ki woro dog Rwot Lubaŋawu, “Wuwiny, wun jo Icrael; wubikato loka Jordan tin, wek wucit ka camo lobo pa rok madito ki matego makatowu, ki gaŋi bene madito, ma gigoyo iye cel matek ma o wa i polo, rok madit ma giboco, likwayo pa jo Anak, ma wuŋeyogi, ma yam doŋ wuwinyo nyiŋgi kun giwaco ni, ‘Aŋa ma twero cuŋ i nyim likwayo pa Anak?’ Pi meno myero wuŋe lok man tin ni, Ŋat ma tye ka wot i nyimwu macalo mac ma waŋo piny en aye Rwot Lubaŋawu; en aye bityekogi, en aye bitayogi woko ki i nyimwu, miyo wubiryemogi woko, wumiyo gito gitum woko oyot, macalo Rwot owaco botwu-ni. “Ka doŋ Rwot Lubaŋawu otyeko ryemogi woko ki i nyimwu, pe wulwod lok ki i cwinywu ni, ‘Pi an ma abedo ma kita atir en aye omiyo Rwot okela ka camo lobo-ni”; kun kono pi bal maraco ma rok meno ducu gitimo aye omiyo Rwot biryemogi woko ki i nyimwu. Pe wubicito ka camo lobogi pi kitwu ma atir, nyo pi leŋ iwu, ento pi bal maraco ma rok meno ducu gitimo en aye omiyo Rwot Lubaŋawu biryemogi woko ki i nyimwu, dok wek ecob lok ma yam okwoŋo bot kwarowu Abraim ki Icaka ki Yakobo. “Myero doŋ wune ni, pe pi kitwu ma atir en aye omiyo Rwot Lubaŋawu bimiyowu lobo man maber-ri wek wucam; pien wun jo ma ŋutwu tek. Ber wupo, dok bene wiwu pe owil kit ma yam Rwot Lubaŋawu obedo ki akemo i ‘tim. Nia wa i nino ma yam wua iye ki i lobo Ejipt, o kwede wa i kare ma wuo i kabedo-ni, wubedo lujemo i kom Rwot. Kadi wa i Koreb wumiyo Rwot obedo ki akemo, ci yam Rwot kiniga omake i komwu twatwal, omiyo onoŋo cok ka tyekowu woko. I kare ma yam aito malo i wi got ka gamo kidi aryo ma apada-ni, kidi me gicikke ma yam Rwot oketo kwed wu, ci abedo i wi got, ari nino pyeraŋwen dyeceŋ ki dyewor kun pe acamo dok pe amato pii bene. Ci Rwot omiya kidi aryo ma apada ma Lubaŋa onoŋo ocoyo ki ciŋe, kun ocoyo i komgi lwak lok ducu ma yam Rwot obedo ka loko i wi got ki i dye mac, i nino ma yam lwak ocokke iye ca, Ka nino pyeraŋwen ki dyewor pyeraŋwen doŋ okato, Rwot omiya kidi meno aryo ma apada, gin kidi me gicikke. Ka dok Rwot owacca ni, ‘A malo, icit ilor piny ki kany oyot, pien joni ma yam ikelogi ki i Ejipt gutyeko balle woko, Gulokke, gubarre woko oyot nia ki i yo ma yam acikogi kwede, gutimo gigi cal jabu ma giliyo aliya.’ “Rwot dok omedde ki lok kun wacca ni, ‘Atyeko neno jo man, ci nen, gin jo ma ŋutgi tek. Weka gira, weka doŋ atyekgi woko liweŋ; abijwayo nyiŋgi woko ki i te polo, ci abimiyo in idoko rok matek twatwal ki madit makatogi.’ Ci alokke, alor piny ki i wi got, kun got tye ka waŋ ki mac. Onoŋo amako kidi apada aryo me gicikke ki ciŋa aryo ducu. Ka aneno, ci nen, wutyeko timo bal i nyim Rwot Lubaŋawu, Onoŋo wutimo giwu cal wod twon ma giliyo aliya, kun wulokke, wubarre woko oyot ki i yo ma yam Rwot ocikowu kwede-ni. Ci ame ko kidi aryo ma apada ca, abologi woko piny ki i ciŋa aryo ducu, atyerogi woko ki i wanwu, Lacen abuto aryeba cwiny i nyim Rwot nino pyeraŋwen dyeceŋ ki dyewor kit ma con ca; pe acamo, pe amato pii bene, pi lwak bal ducu ma wubedo ka timone, kun wutimo gin ma nen marac i waŋ Rwot ma omiyo kiniga omake. Pien onoŋo lworo omaka pi kiniga pa Rwot ki akecane malyet i komwu ma onoŋo cok ka tyekowu woko. Ento Rwot owinya wa i kare meno bene. Kiniga yam omako Rwot i kom Aron bene matek, omiyo onoŋo doŋ cok ka neke wo ko; ento i kare ca alego pi Aron bene, Dok akwanyo balwu, en aye wod twon ma wutimo-ni, ci awaŋo woko ki mac, aodo, arego woko mapwot, nio ka odoko apwa; ci aonyo apwane i kulu ma mol piny a ki i wi got. “Dok bene yam i Tabera, ki i Maca ki i Kibrot-atava wubedo ka mi yo Rwot bedo ki akemo. Ka yam Rwot ocwalowu nia ki i Kadec-bamea kun waco ni, ‘Wucit, wucam lobo ma doŋ amiyowu-ni’, ci wujemo woko i kom cik pa Rwot Lubaŋawu; yam pe wugene, pe wuworo doge. Wun wubedo lujemo i kom Rwot nia wa i nino ma yam acako ŋeyowu iye-ni. “Kit meno abuto aryeba cwiny i nyim Rwot nino pyeraŋwen dyeceŋ ki dyewor, pien onoŋo Rwot owaco ni emito tyekowu woko. Ci yam alego bot Rwot ni, ‘Ai Rwot Lubaŋa, pe ityek lwakki woko, ma gin aye gipinnyi ma yam ikokogi pi ditti, ma ikwanyogi woko ki i Ejipt pi twero me badi, Ber ipo i kom luticci Abraim, Icaka ki Yakobo. Pe ibed ka paro pi tek ŋut pa rok man, nyo pi timgi maraco, nyo pi balgi, wek jo me lobo ma yam ikwanyowa ki iye-ni pe gubed ka waco ni,. Pien onoŋo terogi i lobo ma yam ocikke pire botgi doŋ oloyo Rwot woko, dok pien onoŋo yam kara dag wangi, en aye omiyo okwanyogi woko, wek enekgi woko i dye tim, Pien gin aye lwakki, gin gipinnyi, ma doŋ ikelogi woko ki tekki madwoŋ ki pi ciŋi ma iryeyo.’ I kare meno Rwot owacca ni, ‘Muk kidi ma apada aryo, ipagi macalo mukwoŋo ca; ci ibin bota i wi got malo, dok ipa canduk me bao. Abicoyo i kom kidi ma apada-nu lok ma yam tye i kom kidi ma apada mukwoŋo ma yam ityero woko ca, ci ibiketogi i canduk.’ Kit meno atimo canduk ki bao yat lalwii, ci amuko kidi ma apada aryo, apayo ma rom ki macon ca, aito malo i wi got kun amako kidi ma apada aryo-nu i ciŋa. Rwot ocoyo i kom kidi-nu macalo yam okwoŋo coyo, gin cik apar ma yam oloko ki wun i wi got ki i dye mac i nino ma yam wucokke iye ca; ci Rwot omiyogi bota, Lacen alokke, alor piny ki i wi got, ci aketo kidi ma apada aryo-nu i canduk ma yam apayo-ni; gin pud gitye ene, kit ma yam Rwot ocika kwede. (Jo Icrael gua ki i Beerot Benejaakan, guo Mocera. Aron oto ki kunnu, giyike bene kunnu; ci wode Eleajar oleyo ka tyene i tic me bedo ajwaka pa Lubaŋa. Gua ki kunnu, guwoto guo i Gudugoda, ki nia ki i Gudugoda guo Jotibata, en aye lobo ma tye iye lwak nota ora ma igi ki pii. I kare meno en aye Rwot ocako poko kaka pa Lulevi pat, gubed lutiŋ canduk me gicikke pa Rwot, gucuŋ i nyim Rwot kun gitiyo bote, dok gulam gum i nyiŋe, nio wa i nino man. En gin mumiyo jo pa Levi pe gitye ki dul lobo mo nyo ginaleya mo i kin omegigi; Rwot aye ginaleyagi, kit macalo Rwot Lubaŋawu yam owaco botgi.) “Yam abedo i wi got macalo i kare mukwoŋo ca, abedo nino pyeraŋwen dyeceŋ ki dyewor; ci Rwot dok owinya i kare meno bene, omiyo Rwot pe dok mito tyekowa woko. Lacen Rwot owacca ni, ‘A malo, imed wotti kun itelo wi lwak, wek gudony, gucam lobo ma yam akwoŋo pire bot kwarogi ni abimiyogi.’ “Doŋ kombeddi, wun jo Icrael, gin ma Rwot Lubaŋawu mito ki botwu en ene keken ni, wulwor Rwot Lubaŋawu ki cwinywu ducu ki tipowu ducu, dok wugwok gin ducu ma en ociko ki cik mapatpat ma acikowu kwede tin wek wubed doŋ maber. Nen, Rwot Lubaŋawu aye rwot me polo, ki polo ma malo makato ducu, ki lobo ki jami ma tye ducu liweŋ. Ento kadi bed kumeno, Rwot oketo cwinye i kom kwarowu, omarogi, oyero likwayogi ma gulubogi, ma gin aye wun, ki i kin rok ducu macalo wa i kare man, Pienno, wubed jo ma gulirre wa i cwinygi, pe wubed jo ma ŋutgi tek, Pien Rwot Lubaŋawu aye Lubaŋa pa lubaŋa ducu ki Rwot pa rwodi. En Lubaŋa madit, ma tye ki tek, ma ryaŋo kom dano; pe dworo kor dano mo, pe giwilo ki lim. En ŋolo kop pa litino kic atir, ki pa mon to, dok maro lubedo bene, miyogi cam ki boŋŋi, Wun bene myero wumar lubedo, pien yam wubedo lubedo i lobo Ejipt. Wulwor Rwot Lubaŋawu; wuti bote kun wumoko i kome matek, dok wukwoŋ kwoŋwu ki nyiŋe keken. En aye ma myero wupake; en Lubaŋawu ma yam otimo botwu tim man ducu madito ki ma ryano kom dano, ma waŋwu doŋ oneno-ni. Kwarowu yam gucito i Ejipt kun gin jo pyerabiro keken; ci tin Rwot Lubaŋawu doŋ omiyo wunya mapol macalo lwak lakalatwe me polo. “Mar Rwot Lubaŋani, lub cikke i kare ducu, cik mapatpat ma oketo ki oŋon me cikke ki lok ma en oŋolo ducu, Tin doŋ wutam, (pien pe atye ka lok ki litinowu ma yam pe giŋeyo dok ma pe guneno), wutam kit ma Rwot Lubaŋawu opwonyowu kwede pi tiro kitwu, wutam pi ditte ki bade matek ki ciŋe ma oryeyo-ni, ki lwak lanyut ki ticce ma otiyo i Ejipt i kom Parao kabaka me Ejipt ki i kom lobone ducu; ki gin ma otimo i kom mony pa jo Ejipt ki i kom aguraguragi ducu ki gadigadigi, ki kit ma yam omiyo pii me Nam Makwar omwonyogi woko i kare ma giryemo korwu-ni, ki kit ma Rwot otyekogi woko kwede nio wa i kare man, Dok wutam gin ma yam otimo i komwu i tim nio ka wubino wuo i kabedo man; wupo bene gin ma en otiyo i kom Datan ki Abiram ma awobe pa Eliab wod pa Reuben; ki kit ma yam lobo oŋamo kwede doge ci omwonyogi woko ki jo ma i otgi ducu ki kemagi ducu; pien wutyeko neno ki wanwu tic madito ma Rwot yam otiyo ducu. “Wumak cikka ducu ma acikowu kwede tin-ni, wek wubed ki tek me cito i lobo ma wubicito loka ca ka camone obed mewu, wucam, dok wek wuri pi kare malac i lobo ma yam Rwot okwoŋo pire bot kwarowu, ni ebimiyogi wa ki likwayogi bene, en lobo ma mol cak ki moo kic. Pien lobo ma wubidonyo iye ka camone-ni pe rom ki lobo Ejipt ka ma yam wua iye-ni, ka ma yam wucoyo iye kodiwu ka dok wubaro waŋ piine ki tyenwu, macalo poto dek ma gicamo pote-ni. Ento lobo ma wucito loka ca ka camone obed mewu obedo lobo godi ki nota-gu, ma mato pii kot ma cwer a ki i polo; en aye lobo ma Rwot Lubaŋawu gwoko; waŋ Rwot Lubaŋawu bedo i kome nino ducu, nia i acakki mwaka o wa i agikki mwaka ducu. “Ka wubilubo cikka ducu ma acikowu kwede tin-ni, ni wumar Rwot Lubaŋawu, wuti bote ki cwinywu ducu ki tipowu ducu, ci en bimiyo kot cwer i lobowu i karene, i poto kot ki kot oro-gu, wek wucek kalwu ki koŋo vinowu ki moowu. Dok en bimiyowu lum i oletwu me cam pa lim makwo, miyo wubinoŋo, cam ma yeŋowu. Wugwokke wek pe gibwolwu, miyo wulokke: wubarre woko, wutiyo bot lwak lubaŋa mukene, wuworogi bene, miyo kiniga mako Rwot i komwu, ci geŋo polo, juko kot pe cwer, miyo lobo pe ceko cam, ci wuto wutum woko oyotoyot ki i lobo maber ma Rwot bimiyowu-ni. “Wubiketo lok magi ducu i cwinywu ki i tamwu; wubitweyogi i ŋut ciŋwu obed me lanyut, dok gubed me atweya i dye tur nyimwu, Wupwony litinowu ki lok magi, wubed ka lok komgi ka wubedo i odiwu, ka wutye ka wot i yo, ka wubuto piny ki ka wua malo. Dok wuco lok magi i yat doggola odiwu, ki i dog gaŋwu, wek wun ki likwayowu wuri pi mwaka mapol i lobo ma yam Rwot okwoŋo pire bot kwarowu ni ebimiyogi pi kare ducu ma polo pud bibedo malo ka wi lobo. Ka ce wubigwokke wek wulub cik man ducu ma atye ka cikowu kwede ni wulubi, kun wumaro Rwot Lubaŋawu, ma wulubo yone ducu, ma wucuŋ i kome matek, ci Rwot biryemo rok mukene woko ducu ki i nyimwu, miyo wucamo lobo pa rok madito ki matego makatowu. Kabedo ducu ma tyenwu binyono bibedo mewu; ci lobo ma wubiloyo bibedo nia wa i tim nio wa i Lebanon, ki nia wa i Kulu, ma en aye kulu Euprate, nio wa i nam ma yo tuŋ potoceŋ. Pe tye dano mo ma bicuŋ i nyimwu; Rwot Lubaŋawu biketo lworo ki atiba piwu i kom lobo ducu ma tyenwu binyonone, kit ma yam ocikowu kwede-ni, “Nen, tin aketo i nyimwu gum ki ceno dano: gum bibino ka ce wulubo cik pa Rwot Lubaŋawu ma atye ka cikowu kwede tin-ni, ci ceno dano bi bino ka ce pe wulubo cik pa Rwot Lubaŋawu, ento noŋo wulokke, wubarre woko nia ki i yo ma acikowu kwede tinni ci dok wulubo kor lubaŋa mukene ma yam pe wuŋeyo, Ka Rwot Lubaŋawu doŋ okelowu i lobo ma wubicito iye ka camone-ni, ci wubiketo gum obed i kom got Gerijim, ki ceno dano bibedo i kom got Eba!. Gin godi-nu gitye loka Jordan, ma but piny yo tuŋ potoceŋ, tuŋ ka ma ceŋ poto iye-ni, i lobo pa jo Kanaan ma gibedo i Araba, ma okemo Gilgal, ma ka ŋet yadi kworo me More; Wubiŋolo Jordan, wukato loka ca ka camo lobo ma Rwot Lubaŋawu bimiyowu. Ka doŋ wucamo, ma wubedo iye, ci wugwokke wek wulub cik ki oŋon me cikke ducu ma doŋ aketo i nyimwu tin-ni. “Magi gin aye cik ki oŋon me cik ma wubimako matek kun wulubogi i lobo ma Rwot Lubaŋa pa kwarowu bimiyowu obed mewu, pi kare ducu ma wubibedo iye i wi lobo-ni. Wubibalo kabedo ducu liweŋ ka ma yam rok ducu ma ubigamo lobogi giworo iye lubaŋagi, ma gitye malo i wi godi mabocone ducu ki i wi cere ki i waŋ ayweya ma i te yadi ma potgi oluk. Wumuk keno jogigi woko ducu, wuŋid wir jogi megi woko matitino, wuwaŋ yadi ma gicomo i ŋom pi woro jok ma dako ma gilwoŋo Acera, wutoŋ cal lubaŋa apaya-gi woko ducu, wunek nyingi woko ki i kabedo meno. Pe wubitimo kit meno i kom Rwot Lubaŋawu, ento wubipenyo dog Rwot Lubaŋawu i kabedo ma en biyero ki i kin kakawu ducu pi keto iye nyiŋe wek obed pacone. Kenyo aye wubicito iye, kenyo en aye wubitero iye gitum awaŋa ki gitum mewu ducu, ki dul acel me apar, ki gityer mapatpat ma wubimiyo, gityer me cobo kwoŋ, ki gityer ma iwu opwoyo, ki litino kayo pa dyaŋiwu ki pa romi ki dyegiwu. Wubicamone ki kunnu i nyim Rwot Lubaŋawu, ci cwinywu bibedo yom, wun ki jo ma i odiwu ducu, i kom gin ducu ma wubiketo iye ciŋwu, ma onoŋo Rwot Lubaŋawu omiyowu iye gum. “Pe wubitimo kunnu kit ma watye ka timo kany i kare-ni, ma dano acel acel tye ka tiyo gin ducu ma en tamo ni tye atir; pien peya wuo i kabedo me yweyowu, i lobo ma wubileyo, ma Rwot Lubaŋawu bimiyowu. Ento ka doŋ wukato loka Jordan, ma wubedo i lobo ma Rwot Lubaŋa bimiyo me aleyawu, ka doŋ omiyo wuywe ki i lweny i kom lumerokwu ma gurumowu dyere-ni, ci doŋ wubibedo ma piny okwe mot. Rwot Lubaŋawu biyero kabedo ka ma en biketo iye nyiŋe bedo iye; kenyo en aye wubikelo iye gin ducu ma acikowu-ni: gitum awaŋawu ki gitum mukene ducu, ki dul acel me apar, ki gityer mapatpat ma wubimiyo, ki gityer me cobo kwon ducu ma wukwono me miyogi bot Rwot. Ci cwinywu bibedo yom i nyim Rwot, wun ki awobewu ki anyirawu, opiiwu ki aŋecawu ducu, ki Lulevi ma tye i gaŋiwu, pien gin Lulevi pe gibipokogi dul lobo mo nyo kabedo mo i kinwu me aleyagi. Gwokke wek pe ityer gitum awaŋani i kabedo mo ma ineno; ento ibityerone ki i kabedo ma Rwot biyero ki i kakawu mo acel. Ibityero gitum awaŋani ducu kunnu, dok ibitiyo gin ducu ma aciki-ni ki kunnu. “Ento wutwero neko lee me acamawu ki i gaŋiwu ducu kit ma cwinywu mito, muporo gum ma Rwot Lubaŋawu omiyowu. Dano ma kome ki keni twero camo, ki dano ma olony, macalo gicamo riŋo abur nyo til. Remone keken aye pe wubicamo; wubionyo woko piny i ŋom, macalo pii. Pe myero wucam dul acel me apar me kalwu, nyo me koŋo vinowu nyo me moo jeituniwu ki i gaŋiwu, kadi litino kayo pa dyaŋiwu nyo pa romi ki dyegiwu, nyo gityer me cobo kwoŋwu ma wukwoŋo, nyo gityer mewu ma cwinywu opwoyo, nyo gityer mo ma wumiyo. Ento wubicamo ki i nyim Rwot Lubaŋawu i kabedo ma en biyero, in ki wodi ki nyari, ki opiini, ki aŋecani, ki Lulevi ma i gaŋwu; dok cwinyi bibedo yom i nyim Rwot Lubaŋani pi gin ducu ma ibiketo iye ciŋi. Gwokke pe ibwot Lulevi ata i kare ducu ma ibedo i lobowu-ni. “Ka Rwot Lubaŋawu doŋ oyabo waŋ lobowu obedo malac, kit ma yam ocikke kwede botwu, ce iwacci, ‘Abicamo riŋo,’ pien onoŋo itye ki miti iye, ci itwero camo riŋo kit ma cwinyi mito. Ka ce kabedo ma Rwot Lubaŋawu biyero me keto iye nyiŋe tye ka mabor ki ka ma itye-ni, ci itwero neko dyaŋŋi nyo romoni ma Rwot omiyo boti, macalo doŋ aciki; itwero camo ki i gaŋŋi kit ma cwinyi mito. Itwero camone kit ma gicamo riŋo abur ki til; kadi wa dano ma kome ki keni twero camone kacel ki dano ma olony. Cuŋ matek i man keken ni, pe icam remone, pien remo en aye kwo; pienno pe ibicamo kwo kacel ki riŋone. Pe ibicamone, ibionyo woko i ŋom macalo pii. Pe ibicamone, wek nyimi obed leŋ, in kacel ki litinoni ma bilubi, ka ce ibedo ka tiyo gin ma nen atir i waŋ Rwot. Ento jamini maleŋ ducu ma myero imi, ki gityer me cobo kwoŋ, ibikwanyo icito kwede i kabedo ma Rwot biyero. Ibityero gitum awaŋani ducu, riŋone ki remone, i wi keno tyer pa Rwot Lubaŋani; remo me gitummi ducu gibionyo woko i kom keno tyer pa Rwot Lubaŋani, ento riŋone ibicamo. Gwokke wek ilub lok magi ducu ma aciki kwede-ni, wek nyimi obed leŋ nakanaka, in ki likwayi ma bilubi, ka ce itiyo gin ma nen maber ki ma atir i waŋ Rwot Lubaŋani. “Ka Rwot Lubaŋawu doŋ otyeko lurok woko ki i nyimwu ma wucito ka camo lobogi-ni, ma doŋ wucamo lobogi, wubedo iye, myero wugwokke wek pe wumok i owic pi lubo kitgi, i kare ma doŋ gityekogi woko ki i nyimwu. Dok pe wubed ka penyo lok i kom lubaŋagi, kun wuwacci, ‘Rok man yam giworo lubaŋagi niŋniŋ? wek an bene aworgi kit meno.’ Pe ibitimo kumeno i kom Rwot Lubaŋawu, pien gibedo ka timo gin me kwer ducu ma Rwot dagi pi woro lwak lubaŋagi; giwaŋo wa awobegi ki anyiragi ki mac macalo gitum me woro lubaŋagi. “Gin ducu ma acikowu kwede myero wugwokke ka lubone; pe wubimedo wiye nyo wukwanyo mogo woko. “Ka ce lanebi mo onen i kinwu, nyo lalek lek mo, miyo wu lanyut nyo taŋo mo, ka ce lanyut nyo taŋo ma otitti pire-ni otimme kakare, ce en owacci, ‘Wek doŋ walub kor lubaŋa mukene,’ ma yam pe iŋeyo, ‘wacak worogi,’ pe iwiny dog lanebi meno, lalek meno; pien noŋo Rwot Lubaŋawu tye ka temo cwinywu wek eŋe ka wumaro Rwot Lubaŋawu ki cwinywu ducu ki tipowu ducu. Wulub kor Rwot Lubaŋawu kun wulworo en dok wugwoko cikke ducu; wuwor doge, wuti bote kun wucuŋ i kome matek. Ento nyo lalek meno wubineko woko, pien opwonyo dano ki jemo i kom Rwot Lubaŋawu, ma yam okwanyowu woko ki i lobo Ejipt, okokowu ki i ot me opii, ci en bimiyo wuweko yo ma yam Rwot Lubaŋawu ociko ni wulubi. Kit meno miyo wubijwero gin marac woko ki i kinwu. “Ka ce omeru mo ma wod pa meni, nyo wodi, nyo nyari, nyo damaroni kikome, nyo laremi ma imaro ki kwoni ducu, obiti i muŋ kun wacci, ‘Wek wacit ka woro lubaŋa mogo mukene,’ ma noŋo in kikomi nyo kwarowu yam pe guŋeyo, lubaŋa pa rok ma gurumowu dyere-ni, kadi ma gitye ka ma cok kwedwu nyo gitye ka mabor, nia i agikki lobo tuŋ cel cito kwede i agikkine tuŋ cel, pe iye doge, pe iwiny lokke, pe kica omaki i kome, pe imuŋ lokke; ento ibineke woko. Ciŋi aye bikwoŋo poto i kome me neke, lacen ciŋ lwak ducu bipoto i kome. Ibicele ki got ineko woko, pien obedo ka yenyo yo me kwanyi woko ki bot Rwot Lubaŋawu ma yam okwanyowu woko ki i lobo Ejipt, ki i ot me opii. Ci jo Icrael ducu gibiwinyo pire, ci gibilworo, miyo pe gibinwoyo timo bal marac macalo meno i kinwu. “Gwok nyo i gaŋ mo ma Rwot Lubaŋawu bimiyowu me bedo iye wubiwinyo ni jo mogo ma kitgi raco, ma gin jowu kikome, guywayo tam pa jo ma bedo i gaŋ meno kun giwacci, ‘Wubin wacitu ka woro lubaŋa mukene,’ ma yam pe wuŋeyo, Myero wupeny lokke kun wuyenyo tere motmot; ka ce onen ni lokke otimme ada, ma gimoko ni lok me kwer macalo meno otimme i kinwu, ci wubineko jo ma gibedo i gaŋ meno woko ki pala lucwan, wujwerogi woko ducu liweŋ, Jo ducu ma tye iye, ki lim makwo bene ma tye iye, myero gutum woko ki pala lucwan. Wubicoko jami ma wuyako-ni ducu, wugurogi i dyekal ka maleŋ, ci wubiwaŋo gaŋ meno ki jami ducu ma tye iye woko ki mac, obed gitum ma giwaŋo ducu ki berre bot Rwot Lubaŋawu. Bibedo wi odur matwal; pe dok gibigero iye gaŋ mo. Gin mo ma gidyero bot Rwot pe wubiweko doŋ i ciŋwu, wek Rwot okwany kinigane mager twatwal-li woko. Bitimowu kica kun nyuto cwiny me kica i komwu, ci miyo wunya mapol kit ma yam okwoŋo kwede bot kwarowu-ni, ka ce wuworo dog Rwot Lubaŋawu, wumako cikke ducu ma acikowu kwede tin-ni dok wutiyo gin ma nen atir i waŋe. “Wun aye litino pa Rwot Lubaŋawu: pe wubiŋolo komwu kenwu nyo Lyelo tur nyimwu pi kwero cola. Pien wun aye jo maleŋ pa Rwot Lubaŋawu; en Rwot aye yam oyerowu ki i kin rok ducu ma tye i wi lobo wek wubed jone kikome. “Pe wubicamo gin mo me kwer. Magi aye gin lee ma wutwero camogi: dyaŋ, romo, dyel, til, abur, ruda, dyel me tim, jubi, pura, ki romo ma i godi. Lee ducu ma oboŋ tyengi akara, ma kin tyengi opokke aryo, ma nyamo omen ki i kin lee ducu wutwero camogi. Ento lee ma ginyamo omen nyo ma oboŋ tyengi akara ma pe wubicamo gin ene; kinaga, apwoyo ki oduka, Gin ginyamo omen ento kin tyengi pe akara; pienno gibedo keni botwu. Ki opego bene, pien kadi oboŋ tyene akara ento pe nyamo omen, en bene bedo keni botwu. Pe wucam riŋogi, pe wugud wa komgi ma oto bene. “Magi aye wutwero camogi ki i kin gin ducu ma bedo i pii: gin ducu ma tye ki kiŋa ŋegi ki pok komgi wutwero camogi; ento gin ma pe ki kiŋa ŋegi ki pok komgi pe wubicamogi, pien gibedo keni botwu. Wutwero camo winyo ma gilony ducu, ento magi aye pe wubicamogi: ocur, acut, koga, agoga, okwata ki kit kwagi ducu; agak ki kit kwagi ducu; udu, tebu, awewet, olwilwit ki kit kwagi ducu; tula matino ki tula madoŋo, lagweno kulu, kikuŋ ki ocur madito ki alwinya, acebe ki ogoro ki kit kwagi ducu; ki putput ki olik. Ki kwidi ducu ma bwomgi tye gibedo keni botwu; pe wubicamogi. Gin ducu ma bwomgi tye ma gilony wutwero camogi. “Pe wubicamo geŋ lee mo muto kene; wutwero miyo bot labedo mo ma bedo i gaŋiwu, wek en aye ocam, nyo wutwero cato bot larok mo owil; pien wun aye rok maleŋ pa Rwot Lubaŋawu, “Pe wuted riŋo latin dyel ki cak pa minne. “Wubimiyo dul acel me apar me jami ma wuceko i poto, ma a i poto mwaka ki mwaka. Dok wubicamo dul acel me apar me kalwu ki i nyim Rwot Lubaŋawu i kabedo ka ma en biyero ci keto nyiŋe bedo iye, ki dul acel me apar me koŋo vinowu ki moowu, ki litino kayo pa dyaŋiwu ki pa romi ki dyegiwu; wek wupwony lworo Rwot Lubaŋawu jwijwi. Ka ce wutye ka mabor twatwal ma miyo pe wutwero kelo dul acel me apar i kare ma Rwot omiyowu iye gum-mi, pien kabedo ma Rwot oyero me keto iye nyiŋe odoko bor kwedwu, ci wubicato woko wek wunoŋ cente, ci wutweyo lim meno wucito kwede i kabedo ma Rwot Lubaŋawu oyero-ni, Wubitic ki lim meno pi kit gin ducu ma cwinywu mito, macalo me wilo twoni, nyo romo nyo koŋo vino nyo koŋo makecce, ki gin ducu ma cwinywu mito, ci wubicamo ki kunnu ki yomcwiny i nyim Rwot Lubaŋawu, in ki jo ma i odi ducu. Dok pe wubitenyo Lulevi ma gitye i gaŋwu ata, pien pe gipokogi dul lobo mo nyo gin mo me aleyagi kacel kwed wu. “I agikki mwaka adek adek wubikelo iye dul acel me apar me gin ducu ma wuceko i mwaka-nu, wukano i gaŋiwu madito. Ci Lulevi ma pe ki dul lobo nyo ka mo ma guleyo i kinwu, ki lubedo, ki litino kic, ki mon to ma i gaŋiwu ducu, gin ducu gibibino ka cam kwedwu giyeŋ; wek Rwot Lubaŋawu omiwu gum i kom gin ducu ma ciŋwu otiyo. “I agikki mwaka abiro abiro wubiweko banya bot dano ma twal. Man aye kit me weko banya: lami banya biweko banya me lim matwal ki bot dano ma yam omako banyane-ni; pe bipido banyane bot lawote matwal ma ominne, pien doŋ gityeko tito ki dano pi weko banya matwal kit ma Rwot ociko-ni. Itwero pido larok ocul banyani; ento kwany cwinyi woko i kom banya ma omeru ma Laicrael omako boti. Ento lacan mo pe doŋ bibedo i kinwu, pien Rwot bimiyowu gum i lobo ma Rwot Lubaŋawu bimiyowu wucam me aleyawu matwal, ka ce wubiworo dog Rwot Lubaŋawu kun wugwokke wek wulub cikke ducu ma acikowu kwede tin. Rwot Lubaŋawu bimiyowu gum kit ma yam ocikke kwede botwu-ni. Wubimiyo rok mapol mako banya botwu, ento wun pe wubimako banya mo; dok wubiloyo rok mapol, ento gin pe gibiloyowu. “Ka tye dano mo ma lacan i kinwu, i kin omegiwu ma gitye i gaŋ mo ma Rwot Lubaŋawu bimiyowu, pe cwinyi obed tek, pe ijuk ciŋi woko i kom ominwu-nu ma lacan-ni. Ento ikonye, imiye mako banya ma romo cobo gin ma en mito ducu, kadi bed gin aŋo. Ber igwokke wek tam marac mo pe obed i cwinyi ma miyo iwacci, ‘Mwaka me abiro, ma en aye mwaka me weko banya matwal, doŋ cok,’ ci waŋi cido woko i kom omeru ma lacan-ni miyo pe doŋ imiye gin mo. Meno miyo en cako kok i komi i nyim Rwot, ci doko bal i komi. Ka imiye gin mo, ber imiye ma cwinyi leŋ matwal, cwinyi pe waŋ pi gin ma imiye-ni: pien Rwot Lubaŋani bimiyi gum i kom tic ducu ma itiyo, ki i kom gin ducu ma ciŋi ogudo. Lucan pe gibitum woko i lobowu, mumiyo aciki ni, ibiyabo ciŋi malac bot omeru ki jo ma piny oloyogi, ki bot lucan ma i lobowu. “Ka ce gicato boti omeru mo, laco ma Laibru nyo dako ma Laibru, ci iwilo obed opiini nyo aŋecani, en bitiyo tic boti pi mwaka abicel. I mwaka me abirone ibiweke a woko ki boti cito gire ki kuc, Ka igonye wek ociti, pe, ibiweko en cito ki ciŋe nono. Ibimiye cito ki jami mapolpol, romi ki dyegi, bel ki koŋo vino, ma lubo kit ma Rwot Lubaŋani omiyi kwede gum. Ibipo ni yam ibedo opii i lobo Ejipt, ka ma Rwot Lubaŋani okoki ki iye; en gin mumiyo tin aciki kumeno. Ento ka en owacci, ‘An pe abia woko ki boti,’ pien en mari ki jo ma i odi ducu, pien obedo kwedwu maber, ci ibikwanyo atero, ituco ki ite i doggola, ci doŋ bibedo opiini matwal. Ki aŋecani bene ibitimo kit meno. Pe ibitamo ni tek twatwal me weke a woko ki boti, pien obedo ka tic boti pi mwaka abicel kulu kun ticce dodo tic pa ‘Lapakaca kiryo pi wel manok mo. Ka itimo kit meno, Rwot Lubaŋani bimiyi gum i tic ducu ma itiyo. “Litino kayo ducu ma ginywalogi i kin dyaŋini nyo romi ki dyegini ibikwero komgi i nyim Rwot Lubaŋani, Pe ibitiyo tic mo ki litino kayo pa dyaŋini, pe ibiŋolo yer kom litino, kayo pa romini. Ibicamo riŋone kacel ki jo ma i Odi, i nyim Rwot Lubaŋani mwaka ki mwaka ki i kabedo ma Rwot biyero. Ento ka kome ki mwonyo, ka tyene oŋol, nyo waŋe oto, nyo tye ki kit mwonyo mo marac i kome, pe ibitumo bot Rwot Lubaŋani. Wubicamo ki i gaŋwu ki kunnu; dano ma kome ki keni twero camo kacel ki dano ma olony, macalo riŋo abur ki til. Remone keken aye pe wubicamo; wubionyo woko piny i ŋom macalo pii. “Wugwok dwe me Abib, wukwer iye nino madit me Kato pi woro Rwot Lubaŋawu, pien i dwe me Abib yam Rwot Lubaŋawu okwanyowu iye woko ki i Ejipt dyewor. Wubikwanyo gitum me Kato ki i kin romiwu nyo i kin dyaŋiwu, wutumo bot Rwot i kabedo ma en biyero, ka ma en biketo nyiŋe bedo iye. Pe wubicamo mugati ma girubo iye tobi; ento wubicamo mugati ma tobi pe iye pi nino abiro pi po pi atwom ma yam wubedo kwede; pien yam wua ki i lobo Ejipt rucurucu; mumiyo ibipo pi nino ma yam wua kwede ki i lobo Ejipt pi kare me kwowu ducu. Tobi mo pe myero onen botwu i lobowu ducu pi nino abiro; kadi wa riŋo mo ma ityero me gitum wi otyeno i nino mukwoŋone pe bidoŋ nio wa odiko. Pe wubityero gitum me Kato ki i gaŋ mo ma i kin gaŋiwu ma Rwot Lubaŋawu bimiyowu; ento wubityero ki i kabedo ma Rwot Lubaŋawu biyero, ka ma en biketo nyiŋe bedo iye, Wubityero gitum me Kato kunnu wi otyeno ma ceŋ cito ka poto-ni, i ca wa ma yam wua kwede ki i Ejipt. Wubitedo wucamo i kabedo ma Rwot Lubaŋawu biyero; ci odiko wubia wudok i kemawu. Wubicamo mugati ma tobi pe iye pi nino abicel; i kom nino me abirone wubibedo iye ki cokke madit pi woro Rwot Lubaŋawu; pe wubitiyo iye tic mo. “Wubikwano cabit abiro cakke ki i kare ma wukwoŋo keto iye pala kac i ŋut kal mucuŋ i poto. Ka dok wubibedo ki nino madit me kwero agikki cabit abiro i nyim Rwot Lubaŋawu kun wumiyo gityer ma iwu opwoyo; wubimiyo muporo gum ma Rwot Lubaŋawu omiyowu. Ibibedo ki yomcwiny i nyim Rwot Lubaŋawu, in ki wodi ki nyari ki opiini ki aŋecani, ki Lulevi ma gibedo i gaŋwu, ki lubedo ki litino kic ki mon-to ma tye i kinwu, ki i kabedo ma Rwot Lubaŋawu biyero, ka ma en biketo iye nyiŋe bedo iye, Wubipo ni yam wubedo opii i Ejipt, ci wubigwoko cik magi ducu matek. “Wubikwero nino madito me Bolo pi nino abiro, i kare ma doŋ wukayo cam ducu wudino woko wutero paco, kacel ki pig olok ma doŋ wukayo wubiyo woko. Wubibedo ki yomcwiny ka wukwero nino madito-ni, in ki wodi ki nyari, opiini ki aŋecani, kacel ki Lulevi ki lubedo, litino kic ki monto ma gibedo i gaŋiwu. Wubikwero kare man pi nino abiro i nyim Rwot Lubaŋawu ki i kabedo ma en biyero; pien Rwot Lubaŋawu bimiyowu gum i cam ducu ma wuceko ki i kom tic me ciŋwu ducu, ma miyo wubibedo ki yomcwiny keken: “Co ducu ma i kinwu myero gubin i nyim Rwot Lubaŋawu tyen adek i mwaka acel acel ki i kabedo ma en biyero: i nino madito me Mugati ma Tobi Pe Iye, i nino madit me kwero cabit abiro, ki i nino madito me Bolo. Pe gubin i nyim Rwot ki ciŋgi noŋo; dano acel acel bimiyo mot macalo en twero muporo kit gum ma Rwot Lubaŋawu omiye. “Wubiketo luŋolkop ki ludito i gaŋiwu ducu ma Rwot Lubaŋawu bimiyowu, ma oporo kakawu; gin myero guŋol ki lwak kop ma atir. Pe wubal te pido pa dano ma lokke tye atir; pe wuket apokapoka mo i kin dano; pe giwilwu ki limo Ka giwilo dano ki lim miyo laryeko doko lawaŋeoto ci balo te pido pa jo ma lokgi tye atir. Wuŋol kop atir keken, wuŋol kop atir, wek wubed makwo, wule lobo ma Rwot Lubaŋawu bimiyowu. “I kare ma wubicano keno tyer pi Rwot Lubaŋawu, pe wubipito yat mo i ŋete pi woro jok ma dako ma gilwoŋo Acera. Dok pe wubicibo wir got mo cuŋ me awora; en aye gin ma Rwot Lubaŋawu okwero matek. “Pe wubitumo bot Rwot Lubaŋawu twon nyo romo nyo dyel mo ma kome ki mwonyo, nyo ma tye ki kit ŋolo mo, pien meno aye bedo me kwer bot Rwot Lubaŋawu. “Gwok nyo gibinoŋo dano mo i gaŋ mo ma Rwot Lubaŋawu bimiyowu, laco nyo dako, ma otimo gin ma nen marac i waŋ Rwot Lubaŋawu pi taro gicikkene, ce ocito ka woro lwak lubaŋa mukene, nyo ceŋ nyo dwe nyo gin mo ma i kin mony me polo ci oryebbe piny i nyimgi, ma en aye gin ma Rwot ociko ni pe myero gitim. Ka doŋ gitito lokke botwu ci wuwinyo, wubipenyo lokke motmot, Ka ce lokke tye ada ma ŋene atir ni gin me kwer macalo meno otimme i Icrael, wubikelo laco meno nyo dako meno ma otimo bal marac-ci i dog gaŋ, ci wubicelo ki got wuneko woko. Dano meno gineko pi lok pa lucaden aryo nyo adek; dano mo pe gibineko pi lok pa lacaden acel keken. Dok ciŋ lucaden aye bikwoŋo poto i kom dano meno me neke, ka lacen ciŋ lwak bipoto i kome. Kit meno miyo wubijwero gin marac woko ki i kinwu, “Ka ce pido mo onen i kinwu ma ŋolone oloyowu, macalo poko kin kit nek mapatpat, nyo lok kom twer ma dano mo-ni tye kwede i nyim cik, nyo lok kom ret ma dano mo oketo i kom lawote, kit pido mo ma twero nen i gaŋiwu ma ŋolone tek loyowu, ci wubia wucito i kabedo ma Rwot Lubaŋawu oyero-ni. Wubicito bot ajwagi ma Lulevi, ki bot laŋolkop ma tye ka tic i kare meno, wubipenyogi ci gibititowu kit ŋolle. Wubilubo kit ma gitito botwu i kabedo ma Rwot biyero; wubigwokke wek wuti kit gin ducu ma gicikowu kwede, Wubitiyo kun wulubo kit pwony ducu ma gipwonyowu kwede, muporo kit ŋol ma gin guŋolo. Pe wubikwero lubo lok ma gin guŋolo, ento wubilubo kun pe wuŋak woko yo tuŋ acuc nyo tuŋ acam. Dano ma lanywar ma okwero woro dog ajwaka ma ocuŋ ka tic i nyim Rwot Lubaŋawu, nyo dog laŋolkop, dano meno bito; kit meno miyo wubijwero gin marac woko ki i kinwu. Lwak ducu gibiwinyo pire, ci miyogi lworo, miyo ŋat mo pe dok bitimo tim anywar macalo meno. “I kare ma doŋ wuo i lobo ma Rwot Lubaŋawu bimiyowu, ma doŋ wucamo wubedo iye, gwok nyo wubiwacci, ‘Waket kabaka me loyowa, kit ma rok ducu ma gurumowa tye kwedeni.’ Doŋ ka wuketo kabaka ma loyowu myero wunen ni obedo dano ma Rwot Lubaŋawu oyero. Myero obed ŋat mo i kin utmegiwu; pe wuket larok olowu ma pe rokwu kikome. En pe obed ka coko lwak aguragura pire kene, pe omi lwak odok cen i Ejipt pi wilo aguragura, pien Rwot yam owaco botwu ni, ‘Pe wubidok cen kunnu matwal.’ Pe onyom mon mapol, miyo ŋako cwinye woko; pe bene ocok lonyo madwoŋ pire kene. “Ka doŋ obedo i wi komkerre, ci bicoyo lok me cik man ducu i buk kun kwanyo lokke ki i buk ma ajwagi ma Lulevi gwoko-ni. En bibedo kwede ci bedo ka kwanone pi kare me kwone ducu, wek opwony lworo Rwot Lubaŋane pi gwoko lok ducu ma tye i cik man ki lubo gin ducu ma Rwot ociko, wek pe obed ka wakke i cwinye ni edit ekato omegine, dok pe oŋak owek cik woko, pe odok yo tuŋ acuc nyo yo tuŋ acam, wek omedde bedo i kerre nakanaka, en ki likwaye i Icrael. “Ajwagi ma Lulevi, wa kaka pa jo Levi ducu, pe gibilimo dul lobo mo nyo ginaleya mo i kin jo Icrael. Gibicamo gityer ma giwaŋo ki mac bot Rwot ki gin ducu ma myero dano gumi bot Rwot. Pe gibileyo dul lobo mo i kin utmegigi, pien Rwot aye ginaleyagi kit ma yam ocikogi kwede. Man aye bibedo waŋ wat pa ajwagi ma lwak gibimiyo botgi: Jo ma gityero gitum, kadi bibedo twon nyo romo, gibimiyo riŋo bat bot ajwaka, ki cwake aryo ki apika. Kal ki koŋo vino ki moo mewu me wi mwaka, ki yer romo ma gikwoŋo nyarone, wubimiyo bot ajwaka; pien Rwot Lubaŋawu yam oyero jo Levi ki i kin kakawu ducu wek gucuŋ ka tic i nyim Rwot, gin ki likwayogi matwal. “Ka ce Lalevi mo oa ki i gaŋwu mo ma i lobo Icrael ducu, ka ma yam en bedo iye, ci bino i kabedo ma Rwot biyero, en twero bino kit ma cwinye mito, ci bitic i nyiŋ Rwot Lubaŋane macalo Lulevi luwote ducu ma gicuŋ ka tic kunnu i nyim Rwot. Gibilimo waŋ wat me acamagi ducu marom, medo ki lim ma Lalevi mo-ni olimo ki i jami pa kwarone ma ocato. “Ka doŋ wuo i lobo ma Rwot Lubaŋawu bimiyowu, pe wubipwonyo lubo kit tim me kwer pa lurok ma kunnu, Pe ginoŋ ŋat mo i kinwu ma owaŋo wode nyo nyare me gityer, nyo dano mo ma odoko latyet, nyo latyet ki ajaa, laŋi i dyel, latal, lakot piny, lakor tipo, min jok nyo lapeny dog tipo pa lato. Ka dano mo timo gin ma kit me-no ci en bedo me kwer bot Rwot; pien pi timo gin me kwer ma kit meno miyo Rwot Lubaŋawu biryemo rok meno ducu woko ki i nyimwu. Wun myero wubed laboŋo bal mo i komwu i nyim Rwot Lubaŋawu; rok magi ducu ma wubicamo lobogi-ni giwinyo dog lutyet ki ajaa ki lutyet mukene ducu, ento wun aye Rwot Lubaŋawu pe ye ni wutim kumeno. “Rwot Lubaŋawu bicwalo lanebi mo macalo an, ma a ki i kin utmegiwu; wubiwinyo en I nino ma yam wucokke iye i Koreb wubako dogwu bot Rwot Lubaŋawu kun wuwacci, ‘Pe dok awiny dwan Rwot Lubaŋawa, nyo anen kom mac madit-ti, wek pe ato.’ Ci Rwot owaco bota ni, ‘Gutimo ber pi waco lok meno ducu ma guwaco-ni. Abicwalo botgi lanebi mo macalo in ma oa ki i kin utmegigi. Abiketo lokka i doge, ci en biwaco bot lwak lok ducu ma abicike kwede. Ka ce dano mo okwero winyo lokka ma en biwacone i nyiŋa, ci an aye abipenyo dog dano-nu wek aket can i kome. Ento ka lanebi mo ocorre ki wiye ka waco lok mo i nyiŋa ma onoŋo pe an aye acike ni oloki, nyo ma loko i nyiŋ lubaŋa mukene, lanebi meno bito.’ Ka ce iloko ki i cwinyi ni, ‘Wabiŋeyo lok ma Rwot pe owaco niŋniŋ mo no?’ ci agamo kit man ni, ‘Ka ce lanebi mo oloko i nyiŋ Rwot ce lokke-nu pe otimme nyo pe obedo me ada, meno nyuto ni lokke pe Rwot aye owaco.’ Lanebi meno ocorre ki wiye kene ki lokke gire, pienno pe myero wubed ka lwore. “I kare ma Rwot Lubaŋawu doŋ otyeko lurok woko ma en bimiyo lobogi botwu-ni, ma doŋ wucamo lobogi ci wubedo i gaŋigi ki i odigi ducu, ci wubipoko gaŋi adek woko pat i lobo ma Rwot Lubaŋa doŋ omiyowu me bedo mewu. Wubiyubo yo gudo dok wubipoko dye lobo ma Rwot Lubaŋawu bimiyowu i dul adek wek okony ŋat ma oneko dano me riŋo iye wek olar iye kome. “Man aye lok me konyo kom lanek dano. Ka dano mo pe oneko lawote akaka, ma yam mone mo pe i kingi, myero en oriŋ kunnu wek olar kome, Labolle ka dano mo ocito i buŋa ki lawote mo ka toŋo yen, ce otiŋo latoŋ me toŋo ki yen me areta piny ci latoŋ oput woko ki i purre, ogoyo lawote oneko woko, en myero oriŋ olar kome i gaŋ mo acel ma i kin gaŋi meno. Ka pe kumeno, miyo lacul kwor remo ka kinigane olyetti biryemo kor lanek, mako woko iyo, pien noŋo piny bor, ci cobo neko woko. Ento dano macalo meno pe romo aneka, pien pe onoŋo mone mo tye i kingi i kare macon, en gin mumiyo acikowu pi poko gaŋi adek pat. I kare ma Rwot Lubaŋawu oyabo waŋ lobowu omedo malac kit ma yam okwoŋo kwede bot kwarowu, ma doŋ ominiwu lobo ducu ma yam ociko ni ebimiyo bot kwarowu, dok ka ce wubigwoko cik man ducu ma acikowu kwede tin-ni, ni wumar Rwot Lubaŋawu, wulub yone ducu i kare ducu, ci dok wubimedo gaŋi mukene adek i kom maca, Kit meno pe gibionyo remo pa dano mo ma pe ki bal i lobo ma Rwot Lubaŋawu bimiyowu me aleyawu, ci miyo alii me to pe bedo i wiwu. “Ento ka dano mo iye dag lawote, ce obuto okure i yo, ci olwenyo i kome, ocobo omedo ki neko woko, ka laco meno oriŋo olaro i gaŋ mo i kin gaŋ adek-ki, ci ludoŋo me tuŋ pa lanek-ki gibicwalo dano giome ki kunnu, gimiye i ciŋ lacul kwor remo, wek gineke woko. Kica pe bimakowu i kome, ento myero wulwok alii me to pa dano ma pe ki bal woko ki i Icrael kit meno, wek ariya mo obed pe i nyimwu. “Pe ibikobo got ma poko waŋ lobo pa lawoti ma yam ludoŋo gutyeko pokone ki i lobo ma ibileyo bot kwarowu i lobo ma Rwot Lubaŋawu bimiyowu me bedo mewu. “Lacaden acel pe miyo pido loyo dano mo pi kit bal mo nyo kit tim marac mo ma onoŋo otimo; ento kop biloyo dano pi lok pa lucaden aryo nyo adek. Ka ce lacaden ma lagoba odoto dano mo ni otimo bal, ci gin lupido aryo ducu gibicito i nyim Rwot, ki i nyim ajwagi pa Lubaŋa ki luŋolkop ma gitye i dog tic i kare meno. Luŋolkop gibipenyo lokke mot. Ka ce lacaden ma lagoba odoto ominne ki adot me atoŋa ci gibiketo can i kome ma rom ki can ma nene en mito ni giket i kom ominne-ni: kit meno miyo wubijwero tim marac woko ki i kinwu. Jo mukene gibiwinyone, miyo gilworo, miyo ŋat mo pe dok bitimo tim marac macalo meno, Kica pe bimakowu i kome; kwo gibiculo ki kwo, waŋ ki waŋ, lak ki lak, bad ki bad, tyen ki tyen. “I kare ma wubicito ka monyo lumerokwu, ka ce wuneno gin tye ki lwak aguragura ki gadigadi lweny, dok monygi bene dit makato mewu, pe wubed ki lworo i komgi,’ pien Rwot Lubaŋawu bibedo kwedwu, en ma yam okwanyowu woko ki i lobo Ejipt. Ka doŋ wurwayo cok ka lweny, ci ajwaka pa Lubaŋa bikato anyim ka lok ki lwak. Biwaco botgi ni, ‘Wun jo Icrael wuwiny, tin doŋ wurwayo cok ka lweny i kom lumerokwu: cwinywu pe oryaŋŋe, pe wulwor, komwu pe omyel, atiba pe omakwu i komgi; pien Rwot Lubaŋawu aye bicito kwedwu ka lweny piwu i kom lumerokwu ci bimiyo wuloyogi.’ “Lacen ludito mony gibilok ki dano kun giwacci, “Tye laco mo kany ma ogero ode ci peya okwero me donyo iye? Wek en odok cen paco, wek pe oto i lweny ci miyo dano mu kene aye dok bikwero ode, Tye laco mo kany ma opito poto olokke ci peya ocamo nyige? Wek en odok paco, wek pe oto i lweny ci miyo ŋat mukene aye camo nyig olokke. Tye laco mo kany ma otoŋo keny i kom dako ci peya obedo kwede? Wek en odok paco, wek pe oto i lweny ci miyo laco mukene aye bedo kwede.’ ‘Ludito mony dok gibimedde ki lokgi bot lwak kun giwacci, ‘Tye laco mo kany ma lalworo ma kome obaŋŋe woko? Wek en odok woko paco, pien bimiyo jo mukene cwinygi ryaŋŋe woko: macalo en-ni.’ Ka doŋ ludito gutyeko lokgi bot lwak, ci doŋ gibiyero lutel wi mony. “I kare ma wurwayo cok ka lweny i kom gaŋ mo, koŋ wumi dwan me kuc i kome. Ka jo me gaŋ meno gidok iye botwu ki dwan me kuc ce giyabo dog gaŋgi botwu, ci jo ducu ma binoŋŋe iye wubiketo tic muroni i wigi miyo gibedo macalo opiiwu. Ento ka gukwero jolo lokwu me kuc, ce gucako lweny i komwu, ci monywu birumo gaŋ meno, Ka Rwot Lubaŋawu omiyogi i ciŋwu, ci wubineko co ducu ki pala lucwan, ento mon ki litino matino ducu ki limgi makwo, ki jami ma i gaŋ-gu ducu gibibedo me ayakawu, wubiyako wuterogi bedo mewu, ci wutwero tic ki jami ma wuyako ki bot lumerokwu, ma Rwot Lubaŋawu omiyo botwu. Wubitimo gaŋi ducu ma tye ka mabor kwedwu kit meno, ma pe gaŋi pa lurok ma gibedo kanynyi. “Ento gaŋi pa rok magi ma Rwot Lubaŋawu bimiyo lobogi botwu obed mewu-ni pe wubiweko gin mo doŋ iye makwo; wubijwerogi woko ducu liweŋ, gin aye jo Kit, jo Amor, jo Kanaan, jo Periji, jo Kiv ki jo Jebuc, macalo Rwot Lubaŋawu yam ocikowu kwede; wek gin pe gubed ka pwonyowu ki timo gin me kwer ma gubedo ka timo me woro lwak lubaŋagi, ma bimiyowupoto i bal i nyim Rwot Lubaŋawu. “Ka ce wurumo gaŋ mo pi kare malac, kun wulwenyo i kome me makone, pe wubitoŋo yadi ma i ŋete woko ducu ki latoŋwu, Wutwero camo nyiggi ento pe wutoŋ yadi wuret woko piny, Yadi bene ma gitye i lum gudoko dano bo wek monywu orumgi olweny i komgi? Ento yadi ma wuŋeyo ni pe gicamo nyiggi aye wubityekogi woko kun wutoŋogi wureto woko piny wek wuger ki cel matek me lweny i kom gaŋ ma tye ka lweny i komwu-ni, nio ka opoto i ciŋwu, “Ka ce ginoŋo dano mo gineko i lobo ma Rwot Lubaŋawu bimiyowu me bedo mewu, kun kome obuto i tim ata, ci pe giŋeyo ŋat ma oneke, ci ludoŋowu ki luŋolkopwu gibibino kunnu, gibiporo bor piny nio wa i gaŋi ma orumo kom dano ma gineko-ni. Ludoŋo ma i gaŋi ma cok ki kom dano ma gineko-ni gibikelo roya ma peya otiyo tic mo, ma peya oywayo kweri dyaŋ. Gibitero roya wa i nota kulu mo ma piine mol kare ducu, i kabedo mo ka ma yam peya gipuro, ma pe gicoyo iye kodi. Gibituro ŋut roya woko ki i nota kunnu; ci ajwagi ma gin likwayo pa Levi gibinyiko cok, pien yam Rwot Lubaŋawu oyerogi pi tic bote ki me lamo gum i nyiŋ Rwot, gin bene myero gutyek lok ducu me pido ki me bwami. Ludoŋo me gaŋ meno ma cok ki ka ma ginoŋo iye kom dano ma gineko-ni gibilwoko ciŋgi malo i wi kom roya ma gituro nute i ŋota-ni, ci gilamo doggi kun giwacci, ‘Ciŋwa pe ooyo remo pa dano man, waŋwa bene pe oneno ka gineke. Ai Rwot, tim kica ki jo Icrael ma gin aye joni ma yam ikokogi-ni, pe iket alii me remo pa dano man ma pe ki bal-li i dye lwakki Icrael, ento itimgi kica pi bal me to man.’ Wubilwoko alii me remo ma pe ki bal woko ki i kinwu kit meno, ka ce wutiyo gin ma nen atir i waŋ Rwot. “Ka wucito ka lweny i kom lumerokwu, ce Rwot Lubaŋawu omiyogi i ciŋwu ci wuyakogi wutero obedo dano alimawu, gwok nyo ibineno dako mo mamwonya i kin jo ma iyakoni ci cwinyi mare matek kun imito ni ikwany odok dakoni. Ka tye kumeno ci ibitere paco wa i odi. En koŋ bilyelo wiye ki ŋolo Lwete, ci lunyo boŋone woko ma imake kwede me bedo opii, ruko mukene; ci bibedo i odi kun koko wonne ki minnne dwe acel kulu, ka lacen itwero bedo kwede macalo cware, ci en doŋ bibedo dakoni. Ka inen cwinyi pe mare twatwal ci ibiweko en cito gire mot ka ma en bimito; ento pe ibicato woko giwilo ki lim, pe ibitime macalo aŋeca, pien noŋo ityeko lanye woko. “Ka laco mo tye ki mon aryo, acel dako ma gimaro ki acel ma pe gimaro, ci gin mon aryo ducu ginywalo litino ka latin kayo obedo wod pa dako ma en pe maro-ni, i kare ma laco-ni poko lim me aleya ki awobene, pe omi bot latin kayo pa dako ma gimaroni dullim muporo dit pa latin kayo ma ka miyo bot latin kayone kikome ma wod pa dako ma en pe maro-ni, Ento en bituco ni latin kayo en aye pa dako ma pe gimaro-ni, ci bimiye lim ma dodo dul aryo ma i kom jamine ducu ma en tye kwede; en acakki kero kome, dit me bedo latin kayo aye mere gire. “Ka dano mo tye ki wode ma ŋute nwaŋ dok lajemo, ma pe winyo dog wonne ki minne, kadi bed gijuye matek, pe winyogi, ci wonne ki minne gibimake gitere wa i dog gaŋ bot Ludoŋo me gaŋ meno ma en bedo iye-ni, Ci gibiwaco bot ludoŋo ma i gaŋgi-nu ni, ‘Latin awobiwa man ŋute nwaŋ dok lajemo, pe winyo dogwa, en lacarcar dok lamero koŋo matek.’ Ci dano ducu me gaŋ meno gibicele woko ki got nio ka oto. Kit meno miyo wubijwero gin marac woko ki i kinwu; jo Icrael ducu gibiwinyo ci miyo gilworo. “Ka dano mo otimo bal ma romme noŋo can me to ci gineke woko, ma giŋabe malo i wi yat, ci pe gibiweko kome bedo i wi yat dyewor. Wubiyiko kome i nino meno kikome, pien dano ma giŋabo i wi yat bedo dano ma Lubaŋa ceno; pe wubinyobo lobo ma Rwot Lubaŋawu bimiyowu me aleyawu. “Ka ineno dyaŋ nyo romo pa omeru ma orwenyo woko ata, ci pe ikwer miyo kony; dwokgi cen bot omeru. Ka ce en pe bedo cok kwedi, nyo ka pe iŋeye, ibitero lee-nu paco ci bibedo boti nio ka wonne oyenyo, ka doŋ ibidwokone bote. Kanane bene ibitimo kit meno, ki boŋone nyo kit jami mo keken pa omeru ma orwenyo ki bote ma in inoŋo; pe ikwer miyo kony. “Ka inoŋo kana pa omeru nyo dyaŋŋe ma opoto piny i ŋet yo, pe inen anena; kony omeru ki tiŋone malo. “Dako pe oruk ginaruka pa co, dok laco bene pe oruk ruk pa mon, pien dano ma otimo kumeno bedo me kwer bot Rwot Lubaŋawu. “Ka ce icob i kom ot winyo mo ma tye i wi yat nyo piny i nom, ma litino tye iye, nyo toŋe, ki minne bene oumo wi litinone nyo obuto i wi toŋe, pe ibimako minne kacel ki litinone, Ibiweko minne tuk cito, ento ibicoko litino icito kwede, wek ariya mo pe onen i nyimi ento ibed kwo pi kare malac. “Ka ce igero ot manyen, ibigoyo wi ot meri irumo woko, wek pe ikel bal me oyo remo lodi, ma noŋo ŋat mo obut opoto piny ki i wiye. “Pe ibicoyo poto olokki ki kit kodi mapatpat aryo, miyo gin ducu ma ocek iye myero giter i ot pa Lubaŋa, gin ma icoyo iye wa ki nyig olok bene. Pe ibitweyo dyaŋ ki kana kacel me ywayo kweri dyaŋ. Pe ibiruko boŋo ma gicweyo ki uci yer romo kacel ki uci camanini. “Ibikwoyo jira aŋwen i twok boŋo ma iume kwede-ni. “Ka laco mo onyomo nyako ce obedo kwede, ka iye okwere woko, ci otoŋo doge ki lok me lewic ma obalo nyiŋ nyako woko marac kun waco ni, ‘Anyomo nyako man ci ka anyiko bote cok pe anoŋo gin ma nyuto atir ni peya ocodo co,’ won latin dako-nu ki minne gibikelo boŋo ma nyuto atir ni latin dako-nu peya ocodo co bot ludoŋo ma i gaŋ meno ka ma gicokke iye i dog gaŋ, Ci won latin dako-nu biwaco bot ludoŋo ni, ‘Amiyo nyara o ot laco man ci onyomo ka dok okwero en woko. Ci, nen, okelo lok me lewic i kome kun waco ni pe enoŋo gin ma nyuto atir ni nyara peya ocodo co, Koŋ wunen, man en aye gin ma nyuto atir ni nyara peya ocodo co.’ Ci biyaro bone-nu i nyim ludoŋo ma i gaŋ meno. Ludoŋo gibitero laco-nu gigoyo, giŋolle cul me cekel me ryal miya acel. Gibimiyo limme bot won nyako, pien laco-nu obalo nyiŋ nya jo Icrael ma peya ocodo co. Ci bibedo dakone, pe biryeme woko matwal pi kare me kwone ducu. Ento ka lokke ada ni, gin mo pe ginoŋo ma nyuto atir ni latin dako-nu peya ocodo co, ci jo ma i gaŋ meno gibicele ki got gineko woko, pien otimo gin ma pe myero i Icrael pi codo co ki i ot pa wonne. Wubijwero tim marac woko ki i kinwu kit meno. “Ka ginoŋo laco mo obuto ki dako pa laco mukene, gin aryo ducu gibito, laco ma obuto ki dako, ki dako bene. Kit meno miyo wubijwero gin marac woko ki i kinwu. “Ka tye nyako mo ma peya oŋeyo laco, ma gitoŋo keny i kome ce laco mo oromo kwede i dye gaŋ ka obuto kwede, ci wubitero gin aryo ducu woko i dog gaŋ, wucelogi ki got wunekogi woko, latin dako-nu pien pe ogoyo oduru kadi onoŋo tye i dye gaŋ, dok laco bene pi mako dako pa lawote ki tek. Kit meno miyo wubijwero tim marac woko ki i kinwu. “Ento ka laco mo orwatte ki nyako mo ma gitoŋo keny i kome i dye tim ce omake tektek obuto kwede, ci laco ma obuto kwede-ni aye bito. Pe wubitimo gin mo i kom nyako, pien en pe ki bal mo ma romo keto can me to i kome. Lok man rom ki pa laco mo ma olwenyo i kom lawote ci oneke woko. Laco-nu obino i kom nyako-nu i dye tim ci kadi bed en ogoyo oduru noŋo ŋat mo pe kunnu ma lare. “Ka laco mo orwatte ki nyako mo ma peya gitoŋo keny i kome ce omake tektek obuto kwede, ka gimakogi, ci laco ma obuto kwede-ni bimiyo lim me luk bot won nyako ma romo cekel pyerabic, ci nyako-nu bidoko dakone, pien omake ki tek; pe biryeme woko matwal pi kare me kwone ducu. “Laco mo pe obed ki ci-wonne, pe oket lewic i kom wonne kumeno. “Dano ma gidino mane nyo ma giŋolo kome me co woko pe bidonyo i cokke pa Rwot. “Latin luk pe bidonyo i cokke pa Rwot; kadi wa likwaye me aparre acel mo pe bidonyo i cokke pa Rwot. “Dano mo pa jo Ammon nyo pa jo Moab pe bidonyo i cokke pa Rwot; kadi wa likwayogi me aparre ŋat acel mo ki i komgi pe bidonyo i cokke pa Rwot matwal, pien gin yam gukwero jolowu ki kwon ki pii i kare ma wua woko ki i Ejipt, dok bene yam gukelo Balaam wod pa Beor ki i Petor ma i Mecopotamia ci guwilo ki lim wek ocenwu. Ento Rwot Lubaŋawu pe owinyo dog Balaam; oloko lok me cenowu odoko me kelo gum i komwu, pien Rwot Labanawu onoŋo marowu. Pe wutim gin mo ma kelligi kuc ki berbedo matwal, pi kare me kwo mewu ducu. “Pe ii okwer Laedom mo, pien en omeru. Pe ii okwer Laejipt mo, pien yam in labedo i lobone. Litinogi ma giliywalo ma likwayogi me adekke gitwero donyo i cokke pa Rwot. “Ka wucito ka lweny ki lumerokwu, ma pud wutye i gony, myero wugwokke i kom gin maraco ducu. “Ka tye laco mo i kinwu ma odoko keni pi gin ma otimme bote dyewor, ci en bicito woko i ne gony, bedo kunnu. Ento ka piny oyuto bilwoko kome ki pii, ci ka ceŋ opoto en twero dwogo i gony, “Wubiyubo kabedo mo woko i ŋe gony ka ma wubicito ka konnye iye. Wubed ki tir i kin jami lwenywu; ci ka inyoŋo ka konnye ibikwinyo bur ki tir-ru, ka ilokke iumo wi coronni woko. Pien Rwot Lubaŋawu woto limo dye gonywu pi larowu ki pi ryemo lumerokwu woko ki i nyimwu, mumiyo dye gonywu myero obed maleŋ wek en pe onen gin mo ma keni ci miyo en lokke wekowu woko. “Pe ibidwoko opii mo bot rwode ka ce en oriŋo rwode olaro boti. En bibedo i kinwu i kabedo mo ma en oyero ki i kin gaŋiwu, ka ma iye mito; pe wubiune. “Kit me timo kwele me woro jogi obed peke i kin anyira Icrael, dok kit me timo kwele ki awobe mukene pi woro jogi obed peke ki i kin awobe Icrael. Pe wubikelo lim ma ginoŋo pi tim kwele nyo pi tim caro macalo gwok i ot pa Rwot Lubaŋawu macalo cul me cobo kwoŋwu mo; pien gin ducu jami me kipyeda i nyim Rwot Lubaŋawu. “Pe ibimiyo omeru ma dano me Icrael mako banya boti me ciliŋ nyo me cam pi limo magoba, kadi banya me gin mo ma kelo magoba. Itwero mako magoba i kom banya ma imiyo bot dano me rok mukene, ento pe i kom banya ma imiyo bot omeru ma Laicrael. Ka ilubo cik man ci miyo Rwot Lubaŋawu bimiyi gum i kom gin ducu ma ibitiyo i lobo ma doŋ wucok donyo iye me camone-ni. “Ka ikwoŋo kwoŋ mo bot Rwot Lubaŋani, pe ibed ka galle ki cobone; pien Rwot Lubaŋawu bipenyi pire ada, ci bibedo bal boti ka pe iculo. Ka pe ikwoŋo kwoŋ, bal mo pe boti. Ento tekke imine ka kwoŋo kwoŋ mo bot Rwot Lubaŋawu, myero igwokke mada ka cobo lok ma okatti ki i dogi. “Ka iwok ki i dye poto olok pa lawoti, itwero camo nyige mabup macalo imito, ento pe ibipiko mogo i kicaani. Dok ka iwok ki i poto pa lawoti ma kal Ocuŋ iye, itwero jako wite ki ciŋi, ento pe ibiketo pala kac i ŋut kal mucuŋ i poto pa lawoti. “Ka laco mo onoŋo dako ce onyomo, ka dakone pe yomo cwinye pien onoŋo roc mo i kome, laco twero coyo waraga me keto nyom, miyo i ciŋe, ryeme kwede woko ki i ode, ci dako-ni a woko ki i ode. Ento ka laco mukene onyome, ce cware ma lacen-ni bene pe mite ci coyo waraga me keto nyom, miyo i ciŋe ci ryeme kwede woko ki i ode, nyo ka cware me aryone oto woko, ci cware mukwoŋo ma yam oryeme woko pe dok owar en me bedo dakone ma onoŋo en doŋ oballe pi doko dako pa ŋat mukene, pien kit tim macalo meno bedo me kwer i nyim Rwot, wun pe wubikelo bal i kom lobo ma Rwot Lubaŋawu bimiyo botwu me aleyawu. “Ka laco mo pud onyomo nyen, pe bicito woko kacel ki mony, dok pe gibicwale i dog tic mo; en bibedo paco mot pi mwaka acel, wek obed ki yomcwiny gin ki dakone ma onyomo-ni, “Dano mo pe omi gijeŋ bote min kidi rego nyo nya kidi rego; meno rom ki kwanyo kwo pa dano me ajeŋa. “Ka ŋatti mo ginoŋo okwalo dano mo ki i kin omege jo Icrael, ce otimo en kit ma gitimo ki opii, nyo ocate woko, ci lakwo meno gibinekone woko; kit meno miyo wubijwero tim marac woko ki i kinwu. “I kom two dobo wubed ka gwokke matek kun wutimo gin ducu kit ma ajwaka ma Lalevi bititowu; kit ma yam acikogi kwede, wubigwokke ka tiyo kit meno. Wupo gin ma yam Rwot Lubaŋawu otiyo i kom Miriam ki i yo ma onoŋo wua ki i Ejipt. “Ka lawoti mo omako banya mo boti, pe ibicito i ode ka omo gin ma en jeŋo boti. In ibicuŋ ki woko, ci dano ma omako banya boti-ni bikelo gin ma ojeŋo boti ki woko. Ka en dano ma lacan, pe ibibuto ki gin ma en ojeŋo boti. Ka ceŋ mito poto, in ibidwoko bote gin ma ojeŋo-ni wek en obut ki boŋone kun lammi gum; ci bimiyo Rwot Lubaŋawu bineni macalo dano ma kite atir. “Pe ibiburo lapakacani mo ma lacan ma piny oloyo, kadi en bed omeru ma Laicrael nyo dano mo ma i kin lubedo ma gibedo i lobowu, i gaŋiwu, Ibimiye mucarane i nino ma otiyo iye-ni ma onoŋo ceŋ peya opoto, pien en lacan, en bedo ka paro pire; wek en pe okok i komi bot Rwot ci bedo bal i komi. “Won latin pe gibineko pi bal pa wode, nyo latin bene pe gibineko pi bal pa wonne; dano acel acel gibineko pi balle kikome. “Pe ibal te pido pa labedo mo nyo pa latin kic wek lok oloye, pe iter boŋo pa daa-to me ajeŋa boti. Ento ibipo ni yam ibedo opii i lobo Ejipt ci Rwot Lubaŋawu okoki woko ‘ki i kunnu, en gin mumiyo aciko ni itim kit meno. “Ka ikayo cam i potoni, ce wii owil ki larita bel mo iweko odoŋ i poto, pe idok cen ka omone; doŋ bibedo pi labedo ki latin kic ki daa-to; wek Rwot Lubaŋawu omii gum i kom tic ducu ma ibitiyo. Ka ce igoyo yat jeitunini pi coko nyige, pe idok ibek obote; doŋ bibedo pa labedo ki latin kic ki daa-to. Ka icoko nyig olok ki i potoni, pe idok cen ka beko obote; doŋ bibedo pa labedo ki latin kic ki daa-to. Ibipo ni yam ibedo opii i lobo Ejipt, engin mumiyo aciko ni itim kumeno. “Ka laro kop mo tye ikin dano, ka gubino ka ma gipido iye, ce luŋolkop guŋolo kop i kingi kun gituco dano ma pe ki bal, ka giŋolo kop loyo latim bal, ka dano ma labalo romo agoya, ci laŋolkop miyo en buto piny ci gigoye ki i nyime ki wel odoo muporo kit balle. Wel odoo twero bedo pyeraŋwen, ento pe okat kenyo, wek pe gigoye ki lwak goco makato meno miyo wucayo ominwu. “Pe itwe dog twon ka tye ka nyono bel me dinone. “Ka ce omego aryo gibedo kacel ce ŋat acel i kingi oto woko ma pe ki wode mo, pe wubiye dano ma welo ma pe ladoggolagi oter dako pa lato. Omin cware aye bilako dako-nu, ci bedo kwede doko dakone wek onywal kwede litino ka wi ominne, wek nyiŋ ominne pe orweny woko ki i Icrael. Ento ka laco pe mito lako ci-ominne, ci ci-ominne bicito ka ma ludoŋo me, gaŋ gucokke iye ci wacci, ‘Ywera okwero nywalo wi ominne wek nyiŋe pe orweny woko ki i kin jo Icrael; en pe oye cobo tic pa ywero i koma.’ Ka ludoŋo ma i gaŋgi gibilwoŋo laco-nu ci giloko kwede. Ka ce en pud medde ki lokke kun wacci, ‘An pe amito lake,’ ci-ominne bicito cok bote i nyim ludoŋo ci lunyo war woko ki i tyene, ka ŋulo laa i wane kun wacci, ‘Laco ma okwero nywalo litino ka wi ominne gibitimo kit meno.’ Ki nyiŋ dogggolane gibilwoŋo i Icrael ni, ‘Doggola pa dano ma gilunyo war woko ki i tyene.’ “Ka ce co gitye ka lweny kekengi, ka dako pa ŋat acel onyiko cok ka laro cware ki i ciŋ dano ma tye ka goye-ni, ce ocwalo ciŋe omako kom me co pa laco-ni, ci ibitoŋo ciŋ dako iŋolo woko, ma kica pe maki i kome. “Pe ibed ki kidi aryo me pimo jami i kicaani, mapekke ki mayotte. Pe ibed ki lapor jami aryo i odi, maditte ki matidine. Ibibedo ki kidi lapim pek pa jami maberre ma romo kakare, ki agwata lapor jami maberre ma romo kakare, wek iri pi kare malac i lobo ma Rwot Lubaŋawu bimiyowu. Jo ducu ma gitimo gin macalo meno, ki jo ducu ma pe gitiyo gin ma tye atir, gibedo me kwer bot Rwot Lubaŋawu. “Wupo gin ma yam jo Amalek gutimo i komwu i yo i kare ma wua woko ki i Ejipt, kit ma yam gulwenyo kwede i komwu i yo ca, i kare ma onoŋo wuder, ma komwu ducu oloc woko, kit ma gin guŋolo kwede wi jo ma gudoŋ i ŋewu ma gi goro; gin yam pe gulworo Lubaŋa wacel. Ka ce Rwot Lubaŋawu doŋ omiyo wuywe ki lweny ki merokwu ducu ma orumowu dyere-ni, ki i lobo ma Rwot Lubaŋawu bimiyo wucamo me aleyawu, ci wubijwayo jo Amalek woko ki i tam pa dano ducu ma gitye piny i te polo. Wukan lok man i cwinywu. “I kare ma doŋ wuo i lobo ma Rwot Lubaŋawu bimiyowu me aleyawu, ma doŋ wucamo lobo wubedo iye, ibikwanyo dul mo i kom gin mukwoŋo cek i kom kit cam ducu ma ikayo ki i lobo ma Rwot Lubaŋawu omii, ibiketo i aduku icito kwede i kabedo ma Rwot Lubaŋawu biyero ka ma biketo nyiŋe bedo iye. Ibicito bot ajwaka pa Lubaŋa ma tye ka tic i kare meno, iwacce ni, ‘Tin atuco bot Rwot Lubaŋana ni atyeko o i lobo ma yam Rwot okwoŋo pire bot kwarowa ni ebimiyo botwa.’ Ci ajwaka bigamo aduku ki i ciŋ, ci keto piny i nyim keno tyer pa Rwot Lubaŋawu, “Ci ibidok iye ki i nyim Rwot Lubaŋawu ni, ‘Kwarowa yam dano me lobo Aram, ma lamal gaŋ ata. Yam olak ocito wa i Ejipt obedo kunnu ma welgi nok mo; ki kunnu en odoko rok madit ki matek munya mapol. Jo Ejipt gubedo ka timowa magwa marac twatwal, ma giunowa, giketowa i tic matego me opii. Ka yam wakok bot Rwot Lubaŋa pa kwarowa, ci Rwot owinyo dogwa, oneno kit ma giunowa kwede, ki aroma ticwa, ki atwomwa. Rwot okwanyowa woko ki i Ejipt pi twero me bade, ki ciŋe ma oryeyo, ki tim ma okelo lworo madwoŋ, ki lwak lanyut ki taŋo. Okelowa wa i kabedo man, omiyowa lobo-ni, en lobo ma mol cak ki moo kic. Ci doŋ inen ka tin akelo wi mwaka mua i poto ma imiyo bota; ai Rwot.’ Ka doŋ iketo aduku piny i nyim Rwot Lubaŋani, ci iryebbe piny iwore. Cwinyi bibedo yom pi jami mabeco ducu ma Rwot Lubaŋani omiyo boti ki bot jo me odi; ci ibimiyo Lulevi ki lubedo ma gibedo i kinwu bene cwinygi obed yom kacel kwedwu. “I mwaka me adekke, ma en aye mwakame miyo dul acel i kom apar, ibimiyo dul acel me apar me kit cam ducu ma ocek i potoni bot Lulevi, lubedo, litino kic ki mon-to wek gin bene gubed ki cam ma romogi i gaŋiwu ducu. Ka doŋ ityeko miyone botgi, ci ibiwaco bot Rwot Lubaŋani ni meno, ‘Doŋ atyeko kobo jami maleŋ woko ki i oda, amiyo woko bot Lulevi, lubedo, litino kic ki mon-to kun alubo cikki ducu ma imiyo bota. Pe aturo cikki mo, pe bene wiya owil i komgi. Pe acamo gin mo i kom dul acel me apar i kare ma atye ka kwero cola, pe akobo gin mo ki i oda ma onoŋo koma ki keni, pe atyero mogo bot tipo pa lato mo; doŋ aworo dogi, in Rwot Lubaŋana, atyeko tiyo gin ducu kit ma yam icika kwede, Nen piny ki i kabedoni maleŋ-ŋi, nia ki i polo, ci imi gum i kom joni Icrael ki i kom lobo ma imiyowa kit ma yam ikwoŋo kwede bot kwarowa, en lobo ma mol cak ki moo kic.’ “Tin Rwot Lubaŋawu ociko ni wulub cik magi ki gin ma en oŋolo ducu, mumiyo wubigwokke mada ka lubogi ki cwinywu ducu ki tipowu ducu. Tin doŋ wutuco lok i kom Rwot ni en aye Lubaŋawu, dok ni wubilubo yone ducu kun wugwoko cikke ki gin ma en ociko ducu, dok wubiworo doge. Dok tin Rwot otuco lok i komwu ni wun aye wu jone kikome, dok en bipilo wiwu makato rok ducu ma yam en oketo; gibipake piwu, nyiŋe biywek piwu, en bilimo deyo i komwu, dok otuco ni wun wubibedo rok maleŋ pi Rwot Lubaŋawu,” kit ma yam owaco ni.” Moses ki ludoŋo pa jo Icrael guciko lwak kun giwacci, “Wu mak cik ducu ma wacikowu kwede tin, Dok i kom nino ma wuŋolo iye kulu Jordan pi donyo i lobo ma Rwot Lubaŋawu bimiyowu, wubicibo iye kidi madito ci wupuyo komgi ki opuyu. Wubicoyo lok me cik magi ducu i kare ma wukato wudonyo i lobo ma Rwot Lubaŋawu bimiyowu, en aye lobo ma mol cak ki moo kic, kit ma Rwot, Lubaŋa pa kwarowu, yam ocikowu kwede-ni. Ka wuŋolo loka Jordan, wubicibo kidi-nu gicuŋ i kom got Ebal, kit ma tin acikowu kwede, dok wubipuyo komgi woko ki opuyu. Wubicano keno tyer kunnu pi Rwot Lubaŋawu, keno tyer ma gicano ki got; pe gitiŋ nyonyo mo me payo komgi. Wubitumo gitum awaŋa i wi keno-nu bot Rwot Lubaŋawu, ka dok wubityero iye gityer lakwecwiny ma wubicamone ki kunnu, ci cwinywu bibedo yom i nyim Rwot Lubaŋawu, Wubicoyo lok me cik man ducu i kom kidi ma wubicibogi kunnu maber ma kwanone yot.” Moses ki ajwagi ma Lulevi guwaco ki jo Icrael ducu ni, “Wuliŋ mot, wuwiny, wun jo Icrael. I nino ma tin aye wudoko iye lwak pa Rwot Lubaŋawu. Mumiyo doŋ wuwor dog Rwot Lubaŋawu kun wumako cik mere ki gin ma en ociko ducu ma acikowu kwede tin-ni.” Moses ociko lwak i nino meno kikome kun wacci, “Ka doŋ wutyeko kato loka Jordan, jo magi gibicuŋ i wi got Gerijim ka gilamo gum i kom lwak: jo Cimeon, Levi, Juda, Icakar, Yucepu ki Benjamin; ki jo magi gibicuŋ i wi got Ebal i kare ma giceno dano: jo Reuben, Gad, Acer, Jabulon, Dan ki Naputali, Ci Lulevi gibiwaco lok man bot jo Icrael ducu ki dwan maloŋo ni. “‘Cen opot i kom dano ma otiyo cal Jok apaya mo nyo cal jok nyonyo ma giliyo aliya ma gin me kwer bot Rwot, ma ladiro otiyo ki ciŋe ci ocibo me awora i muŋ.’ Lwak ducu gibigamo ni, ‘Amen.’ “‘Cen opot i kom dano ma pe woro wonne ki minne.’ Lwak ducu gibigamo ni, ‘Amen.’ “ ‘Cen opot i kom dano ma okobo got ma poko waŋ lobo pa lawote woko.’ Lwak ducu gibigamo ni, ‘Amen.’ “ ‘Cen opot i kom ‘dano ma opaŋo wi lawaŋeoto oweko yo.’ Lwak ducu gibigamo ni, ‘Amen.’ “ ‘Cen opot i kom dano ma obalo te pido pa labedo, nyo pa latin kic, nyo pa daa-to oweko lok oloye.’ Lwak ducu gibigamo ni, ‘Amen.’ “ ‘Cen opot i kom dano ma obuto ki ci-wonne, pien oketo lewic i kom wonne.’ Lwak ducu gibigamo ni, ‘Amen.’ “ ‘Cen opot i kom dano ma obuto ki lee mo.’ Lwak ducu gibigamo ni, ‘Amen.’ “Cen opot i kom dano ma obuto Ki laminne, kadi nya pa wonne, kadi nya pa minne.’ Lwak ducu gibigamo ni, ‘Amen.’ “ ‘Cen opot i kom dano ma obuto ki marone.’ Lwak ducu gibigamo ni, ‘Amen.’ “ ‘Cen opot i kom dano ma oneko lawote i muŋ ali.’ Lwak ducu gibigamo ni, ‘Amen.’ “ ‘Cen opot i kom dano ma giwilo ki lim me Labal te pido pa dano ma pe obalo, miyo gineke nono.’ Lwak ducu gibigamo ni, ‘Amen.’ “ ‘Cen opot i kom dano ma pe moko lok ducu me cik man kun lubogi.’ Lwak ducu gibigamo ni, ‘Amen.’ “Ka wubiworo dog Rwot Lubaŋawu, ma wugwokke ka lubo cikke ducu ma acikowu kwede tin-ni, ci Rwot Lubaŋawu bipilo wiwu makato rok ducu ma wi lobo-ni, ci miyo gum man ducu bipoto i komwu ci moko i komwu ka ce wuworo dog Rwot Lubaŋawu. Wubibedo ki gum i gaŋiwu dok wubibedo ki gum ipottiwu. Gum bibedo i kom litino ma wubinywalogi, ki i kom cam ma bicek i pottiwu; i kom litino dyaŋiwu ki i kom litino romiwu ki dyegiwu. Gum bibedo i kom adukuwu ma wuyeyo ki cam i kare me kac, gum bibedo i kom otakowu me myeno kwon. Gum bipoto i komwu ka wudonyo i ot, ci gum bipoto i komwu ka wukato woko. “Rwot biloyo lumerokwu ducu ma bibino ka lweny i komwu, miyo wubinekogi woko ki i nyimwu. Gibimol ka lweny i komwu ki i yo acel, giriŋo giket woko i yo abiro. “Rwot Lubaŋawu biciko gum poto i kom derowu ducu, ki i kom gin ducu ma wubitiyo; bimiyowu gum i lobo ma en bimiyo botwu-ni. “Rwot bimokowu me bedo lwakke maleŋ kit ma yam okwoŋo kwede botwu’, ka ce wumako cik pa Rwot Lubaŋawu, kun wulubo yone ducu. “Jo ma i wi lobo ducu gibineno ka gilwoŋowu ki nyiŋ Rwot, ci gibilworowu. Rwot bimiyo wulony ki lwak jami mapol; bimiyo wunywalo litino mapol bimiyo limwu makwo nya madwoŋ ma pottiwu bene ceko cam mabup. Rwot biyabo polo piwu, ma en ot kano limme maber, ci miyo kot cwer i lobowu i karene, ci miyo gum i kom tic ducu ma wutiyo. Jo me rok mapol gibimako banya botwu ento wun pe wubimako banya mo.” Rwot bimiyo wubedo jo ma telo nyim, pe jo ma coko ter; wubibedo ka cito anyim ma pe doŋ wudok cen, tekke wubedo ka lubo cik pa Rwot Lubaŋawu ma acikowu kwede tin-ni kun wugwokke ka cobogi maber, ma pe wulokke wukwero lubo lok ducu ma acikowu kwede tin ci wuŋak wudok yo tuŋ acuc nyo tuŋ acam pi lubo kor lubaŋa mukene ki pi worogi. “Ka ce pe wuworo dog Rwot Lubaŋawu nyo pe wugwokke ka lubo lok ma en ociko ducu ki cikke ma acikowu kwede tin-ni, ci lwak cen magi ducu bipoto i komwu ci moko i komwu. Cen bibedo i komwu i gaŋiwu dok cen bibedo i komwu i pottiwu. Cen bibedo i kom adukuwu ma wuyeyo ki cam i kare me kac, cen bibedo i kom otakowu me myeno kwon. Cen bibedo i kom litino ma wubinywalogi, ki i kom cam ma bicek i pottiwu, i kom litino dyaŋiwu ki i kom litino romiwu ki dyegiwu. Cen bibedo i komwu ka wudonyo i ot, ci cen bibedo i komwu ka wukato woko. “Ka ce wubwoto Rwot, ma wubedo ka tiyo gin marac, ci Rwot bicwalo cen i komwu bibaŋowu woko ci bijukowu i gin ducu ma wutemo tiyone nio ka wuto wutum woko oyotoyot. Rwot bimiyo two gemo marac poto i komwu nio ka bityekowu woko ki i lobo ma wubicito iye ka camone. Rwot bipwodowu ki two aona opiyo, ki aburu ki two akwota, ki lyeto madwoŋ; bicwalo oro malyet mada, ci miyowu kal mubwarre ki mupur woko. Polo ma tye ka wiwu bibedo macalo mola, ki piny ma ka tyenwu bibedo tek macalo nyonyo. Rwot bimiyo apulu ki apwa aye cwer ma ka kot i lobowu kun a ki malo duny i komwu nio ka otyekowu woko. “Rwot bimiyo lumerokwu giloyowu woko. Wubilubo yo acel ka wucito ka lweny i komgi, ka wuriŋo wuket i yo abiro ki i nyimgi. Lworo bimako ker ducu ma wi lobo pi gin ma bitimme i komwu. Komwu muto-ni bibedo cam pa winyo ducu me polo, ki pa lee timgu; pe bibedo dano mo ma ryemogi. Rwot bipwodowu ki odeke kit ma yam otimo i kom jo Ejipt, ki bur adola ki nyac ki gwenyo, ma caŋone biloyowu: Rwot bipwodowu ki two apoya ki to-waŋ-gu, dok bibaŋo tamwu woko. Wubipanne apana i dyeceŋ macalo lawaŋoto paŋŋe i colpiny, pe wubilimo gum mo i wot mewu ducu; gibibedo ka unowu ki yako jamiwu jwijwi, dano ma bikonyowu bibedo pe, “Ibitoŋo keny i kom nyako, ci ŋat mukene aye bibuto kwede; ibigero ot ci pe ibibedo iye; ibipito poto olok ci pe ibicamo nyige. Gibineko twonni i nyimi ma ineno ci pe ibibilo riŋone; gibimayo kanani ki i nyimi gitero woko ki tek, pe gibidwokone boti, gibimiyo romini bot lumerokki, ŋat mo ma konyi bibedo pe, Awobeni ki anyirani gibimiyogi bot jo me rok mukene ma kun waŋi nenogi ci piny loyi i komgi matal, pe ibibedo ki twero me geŋogi wot. Rok mo ma yam pe iŋeyo aye bicamo gin ma ocek i potoni pi tic matek ducu ma iyelle iye. Gibiuni auna keken, gibidiyi piny jwijwi, miyo ibibaŋŋe woko pi gin ma ineno ki waŋi. Rwot bipwodi ki odeke mudet i coŋi ki i tyeni ma caŋone biloyo dano; odeke bimwono komi woko liweŋ cakke i tyeni o kwede wa i wii. “Rwot biterowu kacel ki kabakawu ma wuketo me loyowu i rok mukene ma yam peya wuŋeyo kadi wa kwarowu bene pe guŋeyo; wubiworo lwak lubaŋa mukene kunnu ma gipayo calgi ki bao nyo ki got. Wubidoko gin ma kelo lworo i kin rok ducu ka ma Rwot biterowu iye, ci gibitiyo ki nyiŋwu macalo carolok ki lok aboka: “Ibitiŋo lwak kodi madwoŋ itero i poto, ento ibicoko iye cam matidi mo, pien bonyo bicamo, tyeko woko. Ibipito potti olok, iyubo maber, ento pe ibimato kono vinone, dok pe ibicoko nyige, pien kwidi bicamogi woko ducu. Ibibedo ki yadi jeituni i dye loboni ducu, ento pe ibiwirre ki moone, pien nyige bio woko piny. Ibinywalo awobe ki anyira, ento pe gibibedo joni, pien gibiterogi woko i opii. Yadini ducu ki gin ma ocek i potoni bonyo aye bicamone woko. Lubedo ma gibedo i kinwu gibidoko dito giloyowu, dok wigi bibedo doŋo i komwu, ento wun wubimedde ki doko jo matitino mogo. Gin aye dok bimiyo wumako banya botgi, wun pe wubimiyo gimako banya ki botwu. Gin aye gibibedo jo ma telo nyim, wun wubicoko ter. “Lwak cen man ducu bipoto i komwu kun lubo korwu, makowu, nio ka bityekowu woko, pien onoŋo wukwero winyo dog Rwot Lubaŋawu, pe wulubo cikke ki gin ma yam ocikowu kwede ducu, Can magi gibibedo lanyut ki taŋo botwu ki bot likwayowu matwal, pien yam pe wutiyo bot Rwot Lubaŋawu ki yomcwiny pi lwak jami ma en omiyowu-ni. Pienno wubitic ki lumerokwu ma Rwot bicwalo ka lweny i komwu. Kec ki orwo pii binekowu, wubibedo munero ma can jami ducu omakowu, ci Rwot biriyo okol nyonyo i ŋutwu nio ka otyekowu woko ducu. Rwot bikelo rok mo i komwu mua ki ka mabor, nia wa ki i agikki lobo, ma gidwir macalo ocur ma tuk, en aye rok mo ma pe wuŋeyo lebgi. Gin rok ma waŋgi tek ma pe biparo pi woro jo, muti, kadi wa timo kica i kom jo matino. Gibicamo litino dyaŋiwu woko, ki cam mucek i potowu nio ka gityekowu woko; pe kalwu mo doŋ, nyo koŋo vino nyo moo, gibiweko kadi wa litino dyaŋiwu ki litino romi ki dyegiwu, miyo wubito woko liweŋ, Gibirumowu woko i gaŋiwu ducu nio ka cel maboco ki gogo ma wugenoni gupoto woko piny ki i lobowu ducu; monygi birumowu woko i gaŋiwu ducu ma oromo dye lobowu ducu ma yam Rwot Lubaŋawu omiyowu. “Wubicamo riŋo kom litinowu, en aye riŋo kom awobewu ki anyirawu ma Rwot Lubaŋawu omiyo botwu, i kare ma girumo gaŋwu woko, i kare me can madwoŋ ma lumerokwu gibiketo i komwu. Laco ma yam kome okwe mot ki kuc waŋe bicido woko i kom camme miyo twono ominne woko, ki dakone ma en maro, ki litinone mogo ma pud gudoŋ; pe biye ni ŋat mo i kingi onywak camo kwede riŋo kom litinone ma en tye ka camone, pien pe tye ‘gin mo mudoŋ bote, i kare me rumo gaŋ ki i kare me can madwoŋ ma lumerokwu gibiketo i komwu i gaŋiwu ‘ducu. Dako bene ma yam kome okwe mot ki kuc, ma yam lworo keto tyene piny i ŋom pien yam gigwoke mada, waŋe bicido woko i kom cware ma en maro, ki i kom wode ki nyare, bitwonogi byero ma okatti ki i kin tyene ki riŋo kom litino ma en onywalo, pien bicamogi ki i muŋ pi can jami ducu, i kare me rumo gaŋ ki i kare me can madwoŋ ma lumerokwu gibiketo i komwu i gaŋ mewu ducu. “Ka pe wugwokke ka lubo lok ducu ma i cik man ma gicoyo i buk man wek wubed ka lworo nyiŋ me deyo ki mapek pa Rwot, Lubaŋawu, ci Rwot dok bikelo atwom madit i komwu ki i kom likwayowu, en atwom malik ma bedo nakanaka, ki two magwa ma ri nakanaka. En bikelo i komwu kit two ducu pa jo Ejipt ma yam wubedo ka lworogi; twone biniaŋ i komwu matek, Dok kit two ducu ki kit atwom ducu ma pe gicoyogi i buk man me cik Rwot aye bikelogi i komwu, nio ka otyekowu woko liweŋ. Kadi onoŋo yam wunya mapol macalo lwak lakalatwe me polo, gibiweko welwu doŋ manok mo, pien pe wubedo ka woro dog Rwot Lubaŋawu. Kit ma yam cwiny Rwot obedo yom i komwu omiyo otimowu maber-ri dok omiyo wunya mapol, kit meno bene cwiny Rwot dok bibedo yom pi kelowu topiny ma bityekowu woko liweŋ; ci bikwanyowu woko ki i lobo ma doŋ wucok donyo iye ka camone. “Rwot bikeyowu woko ata i kin rok ducu, cakke i agikki lobo tuŋ cel o kwede i agikkine mukene tuŋ cel. Wubiworo lwak lubaŋa mukene kunnu ma gipayo calgi ki bao nyo ki got, ma yam pe wuŋeyo kadi wa kwarowu bene pe guŋeyo. I kin lurok magi pe wubinoŋo iye kuc mo, dok pe wubinoŋo iye ka yweyo tyenwu, ento Rwot bimiyo cwinywu myel kunnu, wanwu bimyeno, tipo komwu bito woko lirut. Cwinywu biŋabbe aŋaba pi kwowu me anyim; wubibedo ki lworo madwoŋ dyewor ki dyeceŋ, ma pe wutye ki gen mo i kwowu. Odiko wubiwacci, ‘Kono nene obedo otyeno!’ dok otyeno wubiwacci, ‘Kono nene obedo odiko!’ pi lworo madwoŋ i cwinywu pi gin ma tye anyim ma waŋwu bineno. Dok Rwot bidwokowu cen i Ejipt kun giterowu i mel, wubidok i wot ma yam aciko ni pe dok wubinwoyone-ni. Wubimine kekenwu kunnu bot lumerokwu kun wucatte ni giwilwu wubed opiigi ki anecagi, ento dano mo pe ma biwilowu.” Man aye lok me gicikke ma yam Rwot ociko ki Moses ma oketo i kingi ki jo Icrael i lobo Moab, ma omedo i kom gicikke ma yam oketo i kingi i wi got Koreb. Moses olwoŋo jo Icrael ducu ci owaco botgi ni, “Doŋ wutyeko neno gin ducu ma yam Rwot otiyo i lobo Ejipt ma wuneno ki waŋwu, gin ma en otimo i kom Parao ki i kom luticce ki i kom lobone ducu. Wun yam wuneno ki waŋwu kit ma Rwot otemo kwede cwinye ki lwak, lanyut ki taŋo madito. Ento Rwot peya omiyowu cwiny me niaŋ, nyo waŋ me neno, nyo it me winyo nio wa onyoo. Doŋ atelo wiwu i dye tim mwaka pyeraŋwen ma boŋowu pe guti ki i komwu, ki war tyenwu bene pe guti woko ki i tyenwu. I kare meno onoŋo pe wutye ki kwon me acama, pe wumato koŋo vino nyo kono makecce; meno aye oweko wuŋeyo ni an aye a Rwot Lubaŋawu, Ka doŋ wuo i kabedo-ni, ci Cikon kabaka me Kecbon ki Og kabaka me Bacan gubino ka romo kwedwa i lweny, ento waloyogi woko, ci wamayo lobogi woko wamiyo obedo ginaleya pa jo pa Reuben, ki pa jo pa Gad, ki pa nucu kaka pa Manace. Pi meno myero wugwokke ka lubo lok ducu me gicikke man, wek gumkom omakwu i kom gin ducu ma wutiyo. “Tin wun ducu wucuŋ i nyim Rwot Lubaŋawu: ludito wi kakawu, ludoŋowu, ludito ticwu ki co ducu pa jo Icrael, litinowu ki mon mewu ki lubedo ma gibedo i gonywu ma gin aye lubar yenwu ki lutwom piiwu. Wucuŋ kany wek wun ducu wukwoŋŋe pi donyo i gicikke man ma Rwot Lubaŋawu oketo i kinwu ki en tin, wek en omi wubed jone tin, wek en obed Lubaŋawu, kit ma yam ocikke kwede botwu-ni, ki kit ma yam olwoŋo kwede bot kwarowu Abraim, Icaka ki Yakobo. Pe aketo kwoŋ man ki gicikke man kwedwu keken, ento okwako wa dano ma pe gitye kany kwedwa tin ma rom ki wan ducu ma wacuŋ kany i nyim Rwot Lubaŋawa tin. “Wun wuŋeyo kit ma yam wabedo kwede i lobo Ejipt, kit ma wawoto wabino kwede kun wawok ki i dye rok mapol; dok wuneno gin me kwer ma gitye kwede ducu, cal lubaŋagi me bao ki me got, me ryal ki me jabu; Wugwokke wek laco mo nyo dako mo, nyo doggolawu mo, nyo kakawu mo pe onen i kinwu ma cwinye olokke oa woko i kom Rwot Lubaŋawa, ci okobo ocito ka woro lubaŋa mogo pa rok meno ducu, wek i kinwu pe onen iye dano mo ma rom ki lwit yat ma nyako kwir ki nyige makec. Gwok nyo dano macalo meno ka owinyo kwoŋ man ki gicikke man ci lamo gum i kome kene i cwinye kun wacci, ‘An gira abibedo ki kuc, kadi bed cwinya nwaŋ ma alubo yona kena.’ Kit meno miyo gijwero gin maber ki gin maracce woko kacel. Rwot pe bitimo dano macalo meno kica, ento kiniga pa Rwot ki nyekone aye bidunyo yito i kome, ki lok me ceno dano ma gicoyo i buk man bimoko i kome matwal, Rwot bijwayo nyiŋe woko ki i te polo. Rwot bipoko en woko kene ki i kin kaka pa jo Icrael ducu, ci bolo can mapek i kome ma rwatte ki lok ducu me ceno dano ma i gicikke ma gicoyo i buk man me cik. “Dok likwayowu ma gibilubowu, litinowu ma gibileyo ka tyenwu, ki lurok ma gua ki i lobo mabor, ka gibineno lwak aroma ducu ma opoto i lobowu ki lwak two ma Rwot omiyo omako dano, dok ka gibineno lobowu ducu mac obalo, kun odoŋ gweŋ calfa ma mac olenyo, ki kado keken, ma pe gicoyo iye kodi mo, ma gin mo pe doŋo iye, ma lum pe lot iye, lobo muballe woko ma rom ki Codom ki Gomora ki Adma ki Jeboim, ma yam Rwot obalo woko ki kiniga ki akecane, ada, ka guneno man ducu gibiwacci, ‘Piŋo Rwot otimo lobo-ni kit man? Lyeto me kiniga madwoŋ ma rom manni te lokke aŋo?’ Ci dano gibigamo ni, ‘Gin mumiyo otimo kit meno pien guweko lubo gicikke pa Rwot Lubaŋa pa kwarogi woko, ma ocikke iye kwedgi i kare ma okwanyogi woko ki i Ejipt, ci guyeŋ gucito ka woro lwak lubaŋa mukene ki ryebbe piny i nyimgi, lwak lubaŋa ma onoŋo yam pe giŋeyo, ma yam pe gimiyo botgi me awora; mumiyo kiniga omako Rwot i kom lobo man, ma okelo iye lwak lok ducu me ceno dano ma gicoyo i buk man. Rwot oputo lwitgi woko ki i lobogi pi kinigane ki akecane ki akemone madwoŋ, ka obayogi woko wa i lobo mukene, macalo tye kwede wa onyooni.’ “Rwot Lubaŋawu tye ki muŋŋe; ento gin ma doŋ oyabo omiyo botwa doŋ bedo mewa ki pa likwayowa matwal, wek walub lok ducu ma i cik man. “Ka gin man ducu doŋ opoto i komwu, gum ki lok me ceno dano ma atyeko ketone i nyimwu-ni, ka wupo pire ki i kin rok ducu ka ma Rwot Lubaŋawu yam ocwalowu iye-ni ce wudwogo cen bot Rwot Lubaŋawu, wun ki likwayowu, ci wucako woro doge i lok ducu ma acikowu kwede tin-ni ki cwinywu ducu ki tipowu ducu, ci Rwot Lubaŋawu bidwoko gum mewu botwu; en dok bicokowu woko ki i kin rok ducu ka ma yam okeyowu iye-ni. Kadi wa jowu ma obayogi ka mabor wa i agikki te polo, Rwot Lubaŋawu bicokogi woko ki kunnu; en biomowu woko ki kunnu. Rwot Lubaŋawu bikelowu i lobo ma yam kwarowu gucamo-ni wek wun bene wucam obed mewu. Lubaŋa-bimiyo wubedo ki lwak lonyo mabeco, kun wunya mapol makato kwarowu. Rwot Lubaŋawu bimiyo wubedo jo mulirre i cwinywu, wun ki likwayowu bene, wek wumar Rwot Lubaŋawu ki cwinywu ducu ki tipowu ducu wek wubed makwo. Rwot Lubaŋawu biketo lok magi me ceno dano I kom lumonewu ki lumerokwu ma guunowu, ci wun dok wubiworo dog Rwot kun wugwoko cikke ducu ma acikowu kwede tin-ni. Rwot Lubaŋawu bimiyo wubedo ki jami mabeco madwoŋ mada ma wubinoŋo pi ticwu; wubibedo ki litino mapol, limwu makwo binya mapol bene, potowu biceko cam mabup, pien cwiny Rwot dok bibedo yom pi miyowu lonyo ki jami mabeco, kit ma yam cwinye obedo yom i kom kwarowu-ni, Ka ce wubiworo dog Rwot Lubaŋawu, ma wugwoko cikke ki gin ma ociko ducu ma gicoyo i buk man me cik, ka ce wudwogo cen bot Rwot Lubaŋawu ki cwinywu ducu ki tipowu ducu, ci Lubaŋa bimiyowu gum man. “Pien cik ma acikowu kwede tin-ni pe tek twatwal ma cobone loyowu, dok pe tye ka mabor kwedwu. Pe tye wa i polo, ma kono omiyo wuwacci, ‘Aŋa ma bicito ka omone botwa ki malo i polo kuca, wek okel botwa ka wek wawiny lokke’ walubi?’ Dok pe tye wa loka nam, ma kono omiyo wuwacci, ‘Aŋa ma bicito piwa wa loka nam kuca, wek okel botwa ka wek wawiny lokke walubi?’ Ento lokke tye cok kwedwu; wumako doŋ i cwinywu, ci wubedo ka tucone ki dogwu, miyo wutwero lubone. “Nen maber ni, tin atyeko keto i nyimwu kwo ki lonyo ki to ki keckom. Ka ce wuworo cik pa Rwot Lubaŋawu ma ocikowu kwede tin-ni, wek wumar Rwot Lubaŋawu, ma wulubo yone kun wugwoko cikke ki gin ma en ociko nyo oŋolo ducu, ci wubikwo dok wubinya mapol, dok Rwot Lubaŋawu bimiyowu gum i lobo ma wubidonyo iye ka camone-ni. Ento ka ce cwinywu odok cen ka ryebbe i nyim lubaŋa mukene ki tiyo botgi ma wukwero winyo dog Rwot, atuco atir botwu tin ni wubito wutum woko; pe wubiri pi kare malac i lobo ma wubecito iye loka Jordan ka camone-ni. Alwoŋo polo ki lobo me bedo lucaden i komwu tin, ni, atyeko keto i nyimwu kwo ki to, gum ki lok me ceno dano; mumiyo wuyer kwo wek wun ki likwayowu wubed makwo, ma kun wumaro Rwot Lubaŋawu, wuworo doge ci wumoko i kome matek; en aye kelo kwo botwu, ci miyo wuri pi kare malac, wek wubed i lobo ma yam Rwot okwoŋo pire bot kwarowu Abraim, Icaka ki Yakobo ni ebimiyogi.” Moses dok omedde ki waco lok magi bot jo Icrael ducu. Owaco botgi ni, “An mwaka me ditta doŋ romo miya ki pyeraboro tin, ci pe doŋ aromo wot ki dwogo kit ma iya mito. Rwot otyeko waco bota ni pe abikato loka Jordan. Rwot Lubaŋawu kikome aye doŋ bitelo nyimwu wa loka ca. En bityeko rok magi woko ducu ki i nyimwu, ci wubicamo lobogi; ki Yocwa aye doŋ bikato loka ca ka telo wiwu kit ma doŋ Rwot owaco-ni. Rwot bitimogi kit ma yam otimo i kom Cikon ki Og ma luker pa jo Amor ki i kom lobogi i kare ma otyekogi kwede woko-ni. Rwot bimiyo gipoto i ciŋwu, wun wubitimogi ma lubo cik ducu ma atyeko cikowu kwede-ni. Wubed oteka ma cwinywu nwaŋ; pe wulwor, pe atiba opot i komwu pigi, pien Rwot Lubaŋawu aye biwot kwedwu, pe bibwotowu ata, pe biwekowu wudoŋ kenwu.” Lacen Moses olwoŋo Yocwa ci owaco bote ki i nyim jo Icrael ducu ni, “Bed oteka ma cwinyi nwaŋ, pien ibicito ki lwak man wa ilobo ma yam Rwot okwoŋo pire bot kwarogi ni ebimiyogi-ni; in aye ibimiyo gicamo doko megi. Rwot aye bi telo nyimi, en bibedo kwedi, pe bibwoti ata, pe biweki keni. Pe ilwor, cwinyi pe opoti.” Moses ocoyo cik man ducu ci omiyo bot ajwagi ma gin likwayo pa Levi, ma yam gitiŋo canduk me gicikke pa Rwot, ki bot ludoŋo ducu pa jo Icrael, Ocikogi ni, “I ŋe mwaka abiro abiro, i kare ma giciko pire ni obed mwaka me weko banya, i nino me Bolo, ma noŋo jo Icrael ducu gubino i nyim Rwot Lubaŋagi i kabedo ma en biyerone, wubikwano iye cik man i nyim jo Icrael ducu wek guwiny. Wugur lwak kacel, co wa ki mon ki litino, ki lubedo ma gibedo i gaŋiwu, wek guwiny ci gupwony lworo Rwot Lubaŋawu, gugwokke ka lubo lok ducu me cik man, ka wek litinogi ma peya guŋeyo lokke guwiny ci gupwony lworo Rwot Lubaŋawu, i kare ducu ma wubedo i lobo ma wucito iye loka Jordan ka camone-ni.” Dok Rwot owaco ki Moses ni, “Nen, nino ma ibito iye doŋ onyiko cok. Lwoŋ Yocwa ci wucuŋ kwede i kema me rwatte wek acike.” Ci Moses ki Yocwa gucito gucuŋ i kema me rwatte, Rwot ocako nen i kema ki wir me pol; ci wir me pol ocuŋ okemo doggola me kema. Rwot owaco bot Moses ni, “Nen, in doŋ icok cito ka yweyo bot kwarowu; ci lwak man gibitwaro gicito ka woro lubaŋa mogo ma welo ki tim kwele kwele, i lobo ma gicto ka bedo iye i kingi-ni. Gibibwota woko dok gibituro gicikkena ma atyeko ketone i kinwa wan kwedgi. Dok kiniga bi maka i komgi i kare meno, ci abitenyogi woko ma akano waŋa woko pe anenogi, miyo gibityekogi woko liweŋ, Gin maraco-gu ki lwak ayela mapol bipoto i komgi, mumiyo i kare meno gibiwacci, ‘Gin mumiyo can man opoto i komwa, pien Lubaŋawa doŋ pe tye i kinwa.’ Abikano waŋa woko i kare meno adada pi lwak balgi ducu ma gubedo ka timo, pien gudok woko cen bot lwak lubaŋa mukene. Kombeddi doŋ ico wer man wek ipwony ki jo Icrael. Ket wer man i doggi, wek obed cadenna i kom jo Icrael. Pien ka akelogi i lobo ma mol cak ki moo kic ma yam akwoŋo pire ni abimiyo bot kwarogi, ka gucamo ci guyeŋ gucwe kwede, ci gibidok cen bot lubaŋa mogo mukene. Gibiworogi ma kun gicaya woko, gituro gicikkena, Dok ka gin maraco mapol ki lwak ayela mapol opoto i komgi, ci wer man bicuŋ i nyimgi me bedo caden botgi, pien likwayogi pud gibiwero, wigi pe biwil iye. Pien aŋeyo tam ma gutyeko yubone ma onoŋo peya aterogi i lobo ma yam akwoŋo pire ni abimiyogi.” Moses ocoyo wer meno i nino meno kikome, ocako pwonyo ki jo Icrael. Ka Rwot ociko Yocwa wod pa Nun kun waco bote ni, “Bed oteka ma cwinyi nwaŋ, pien in aye ibitero likwayo pa Icrael i lobo ma yam akwoŋo pire ni abimiyogi-ni, ci an abibedo kwedi.” Ka yam Moses otyeko coyo lok me cik man ducu i buk nio ka otum woko ducu, ci ociko Lulevi ma gitiŋo canduk me gicikke pa Rwot, owacci, “Wugam buk man me cik, wuket i ŋet canduk me gicikke pa Rwot Lubaŋawu, wek obed kunnu me bedo caden i komwu. Pien aŋeyo kit jemowu ki kit ma ŋutwu nwaŋ kwede ducu, Nen, ka tin dok wujemo i kom Rwot ma an pud atye kwedwu ma akwo, ci jemowu bibedo dwoŋ ma rom mene ka doŋ ato woko? Wumi ludoŋo ma i kakawu ducu ki ludito ticwu gugurre kacel ka doŋ awac lok magi guwiny. ka doŋ alwoŋ polo ki lobo wek obed caden i komgi. Pien aŋeyo adada ni, Ka doŋ ato, wubitimo tim aranyi; ci wubilokke, wubibarre woko ki i yo ma acikowu kwede. Gum marac bipoto i komwu i kare me anyim, pien wubitimo gin ma nen marac i waŋ Rwot kun wumiyo kiniga make ki gin ma wutiyo.” Moses okwano lok ma i wer man nio ka otyeko ducu, kun lwak jo Icrael ducu ma gugurre kacel gubedo ka winyone: “Wucik itwu, wun polo ducu, an doŋ abiloko; wek lobo bene owiny lok ducu ma i doga, Lubaŋa omi pwonnya ocwer macalo kot, omi lokka oton macalo toyo, macalo kot ma ŋido i kom lum alita macalo kot ma wo i kom doo. Pien abituco nyiŋ Rwot. Wutit dit pa Lubaŋawa! “En aye Got, ma ticce ducu cobbe kakare; gin ducu ma en tiyo tye atir. En Lubaŋa ma lagen, ma pe ki bal mo; kite atir, gin ma en timo ducu tye maber. Gutimo tim aranyi i kome; pe doŋ gin litinone, pien komgi ki mwonyo; gin aye yalwak muŋak mugom woko. Wun mono dok wuculo Rwot kit meno, wun jo mamiŋ ki rok ma pe ki ryeko? Pe en aye wonwu ma oketowu? Pe en aye lacwec ma omiyo wutye makwo? Po i kom kare ma yam con ca, tam pi lwak mwaka pa yalwak macon. Peny woru, ci binyutti maber, ki ludoŋowu bene gibititti. I kare ma En Mamalo Twal yam omiyo ki rok ducu ginaleyagi, i kare ma opoko kin litino pa dano, yam opoko waŋ lobo pa rok acel acel kun lubo wei awobe pa Lubaŋa. Pien lwak pa Rwot gin aye dulle, jo pa Yakobo aye gipiny ma gipoko bote. “Yam onoŋo Yakobo i dye tim aroo, i lobo kweyo marac ma dano pe iye; okwake ki bade kun gwoke maber ogwoke macalo toŋ waŋe kikome. Macalo ocur ma pwonyo litinone ki tuk kun teŋo bwome ma oyaro ka wigi, yaro bwome, jologi kwede, ci tiŋogi ki kono lacar madito, Rwot kene aye yam telo wi jone, kun onoŋo lubaŋa pa lurok mo pe ka ŋete. “Omiyo guriŋo i wi cere mutiŋŋe malo i lobo, opitogi ki cam mucek i poto; omiyogi doto moo kic ma noŋŋe i wi got, ki noto moo yaa mucek i dye pata got matek. Omiyogi boto cak lukulu pa dyaŋi, ki mato cak ma libo bene pa dyegigi; gucamo moo litino romi ki nyogi romi, ki riŋo dyaŋi me Bacan ki riŋo dyegi, kacel ki moko ŋano mabecone twatwal, gumato kono vino makwar me pig olok. “Ento Jecurun ocwe matek, ma loyone tek; jo pa Rwot gucwe ma komgi pek, muliŋŋe. Gubwoto Lubaŋa ma Lacwecgi woko, gucayo Got mularogi-ni. Guworo lubaŋa ‘ma welo-gu mumiyo nyeko omake, guŋeto cwinye ki tim marac me kwer omiyo kiniga omake. Gutumo tum bot jogi ma pe gin lubaŋa, bot lubaŋa mogo ma yam pe giŋeyo, bot lubaŋa mogo manyen ma obino lacen ma yam kwarogi pe gulworo, Gin pe guparo Got ma onywalogi-ni, wigi owil woko i kom Lubaŋa ma Wongi-ni, “Rwot oneno ci ocayogi woko, pien awobene ki anyirane guŋeto cwinye. Owacci, ‘Abikano waŋa woko ki botgi, wek dok anen kit ma gibitum kwede; pien gin yalwak muŋak woko ata, gin litino ma pe lugen. Gumiyo nyeko omaka i kom gin ata ma pe lubaŋa; guŋeto cwinya ki cal jogi acweyagu. An bene abimiyo nyeko makogi i komji ata; abimiyo rok mo mamiŋ ŋeto cwinygi, Pien kinigana doŋ omoko mac woko, doŋ tye ka waŋ wa i te bur matut melyel, kun waŋo lobo ki gin ma ocek iye ducu, ka dok cwinyo mac waŋ wa te guti me godi. “‘Abicoko can aguro i wigi; abityeko aterona woko i komgi. Kec aye bimiyo gijony liŋok, dok awaŋogi ki lyeto ki two gemo maraco atyekogi woko liweŋ; abicwalo lak ŋuu i komgi ki kwir pa gin ma lak alaka i ŋom. Pala lucwan bityekogi woko i tim, lworo bibedo wa i kicika ot; pala bityeko litino co ki anyira, litino ma dot wa ki jo ma wigi ki lwar. Kono awacci, “Abikeyowu woko ka ma boco, abimiyo nyiŋgi pe doŋ gipo iye i kin dano,” ento alworo lumerok wek pe guŋet cwinya, wek lumonegi pe guter marac, pe guwacci, “Waloyogi giwa, ciŋ Rwot pe otimo gin mo.” “Pien gin aye rok ma gikwiya yubo lok, niaŋ lok bene loyogi woko, Ka nene giryek, kono giniaŋ lok man, kono giŋeyo agikki me kwogi. Dano acel ryemo jo alip kulu, jo aryo twaro jo alip apar, ka Gotgi aye pe omiyogi woko bot lukworgi, ka Rwot pe otenyogi woko? Pien gotgi pe rom ki Gotwa, lubaŋagi pe tek ma rom ki mewa; wa merokwa bene giye lok man. Lukworwa girom ki jo Codom ki Gomora, gical ki olok marac ma nyige kec; girom ki koŋo vino ma girubo ki kwirtwol, ki kwir twol golla mager-ri. “Man aye gin ma akano, ma agwoko i ot kano limma. An aye abiculo kwor, abiculo waŋe lacen. Akuro kare ma tyengi bicer; pien nino me to-pinygi doŋ cok, bipoto i komgi atura. Pien Rwot bimiyo jone loyo kop, kica bimake i kom luticce ka oneno tekgi doŋ otum woko, ma dano mo pe odoŋ kadi opii nyo ŋat ma lone kene. Ci bipenyogi ni, ‘Lwak lubaŋawu doŋ gitye kwene kaa, ki got ma yam wuriŋo wularo iyeni? Jogi ma yam camo moo me gitumwu doŋ tye kwene, ki lumat koŋo vino me gityer amatawu? Wek doŋ gua malo ka konyowu, wek gin aye gubed jo ma gwokowu! “‘Tin doŋ wunen ni, an aye a ene, an kena, lubaŋa mukene pe ka ŋeta, An aye aneko dok an aye amiyo kwo; an aye aketo ret dok acaŋo burre, dok pe tye ŋat mo ma laro dano ki i ciŋa. Atiŋo ciŋa malo acimo polo ci akwoŋo kwon man ni, Macalo an Lubaŋa ma abedo kwo matwal-li, ka ce apako pala lucwanna ma mil amila, ce aryeyo ciŋa pi ŋolo kop ci abiculo kwor i kom lumonena, abiketo can i kom jo ma gidaga. Abimiyo aterona mer ki remo, pala lucwanna bicamo riŋo mabup, biyeŋ ki remo jo ma ginekogi ki ma gimakogi, bitoŋo wi lutel pa lumerok.’ “Wupake wun rok ducu kacel ki lwakke, pien en culokwor remo pa luticce; en culo kwor i kom lumonene pi kwanyo bal woko ki i lobopa jone.” Moses okwano wer man ducu wek lwak guwiny, en kacel ki Yocwa wod pa Nun. Ka Moses otyeko waco lok magi ducu bot jo Icrael ducu ci owaco botgi ni, “Wuket i cwinywu lok ducu ma awaco botwu tin-ni, wek wuketgi gubed cik ma mako litinowu bene, wek gugwokke ka lubo lok ducu me cik man. Lok magi pe lok ma tere pe; gin aye kwowu kikome. Pi gwoko cik magi miyo wubiri pi kare malac i lobo ma wucito iye loka Jordan ka camone-ni.” I nino meno kikome Rwot owaco bot Moses ni, “It malo i wi got man me Abarim, got Nebo, ma tye i lobo Moab mukemo Jeriko, wek inen lobo Kanaan ma abimiyo bot jo Icrael obed megi. Ibito i wi got ka ma iito iye-ni wek idok bot lutuwu, macalo omeru Aron yam oto i wi got Kor ci odok bot lutugi; pien yam wuŋayo waŋa woko ki i dye jo Icrael, i dog pii me Meribakadec i tim me Jin; yam pe wuwora i nyim jo Icrael macalo an Lubaŋa maleŋ. Pienno ibineno lobo-nu ki cen i nyimi kuca, ento pe ibicito kunnu, i lobo ma abimiyo ki jo Icrael.” Man aye lamo gum pa Moses ma dano pa Lubaŋa-ni, ma yam olamo i kom likwayo pa Icrael ma onoŋo peya oto, Moses olamo ni, “Rwot yam obino oa ki i wi got Cinai, ci otuc ki i Ceir wa i komwa cut, kun ryeny ki i wi got Paran. Obino ma oa ki i kin jo maleŋ alip ki alip, ki leb mac ma lyel tuŋ cine malacuc. Ada, en maro jone, gwoko jone maleŋ ducu i cine, Pi meno waryebbe ka tyene kun en bedo ka pwonyowa, ki cik ma yam Moses oketo i komwa me bedo me aleya pa lwak pa Yakobo. Kit meno Rwot odoko kabaka i Jecurun i kare ma ludito ma gitelo wi lwak gucokke, ma kaka pa jo Icrael ducu gugurre kacel. I kom kaka pa Reuben Moses olamo gumkit man, “Wek Reuben obed makwo, pe oto, kadi bed jone nok.” Olamo gum i kom kaka pa Juda kit man, “Ai Rwot, winy dwan Juda, kele wa paco bot jone. In aye ilweny pire ki ciŋi, ikonye ka lwenyo i kom lumonene.” I kom kaka pa Levi olamo ni, “Mi ki Levi Tumim meri, miye Urim meri pien en lwori. En aye dano ma yam iomo iye i Maca, en aye ŋat ma yam itemo i ŋet pii me Meriba. Yam owaco i kom wonne ki minne ni, ‘Pe aparo pigi’; opokke woko ki omegine, dok pe oneyo wa litinone. Pien jo pa Levi gumako lokki, gulubo gicikkeni bene. Gibipwonyo jo pa Yako bo ki lok ma iŋolo, gibipwonyo cikki bot jo Icrael; gibiwaŋo odok eceta i nyimi, gibityero gitum ma giwaŋo woko ducu ki berre i wi keno tyerri. Ai Rwot, mi gum i kom gipinygi, dok igam tic ma gitiyo ki ciŋgi, Nyon pyer lumonegi piny, ma gin aye jo ma daggi, wek pe dok gutub i komgi.” I kom kaka pa Benjamin olamo ni, “Dano ma Rwot maro-ni bedo ki kuc, Rwot Mamalo Twal gwoke kare ducu, tino en malo i wi gwoke.” I kom kaka pa Yucepu olamo ni, “Rwot omi gum opot i kom lobone, ki mot mabeco ma a malo ki i polo, ki mua ki i kut matut ma oyarre i te lobo. Omine nyig yadi mabeco ma nyak ki cen, ki lonyo me cam ma cek ki dwene; Omine cam ma cek mabeco i kom godi muri mada, ki mubakke i wi cere ma bedo matwal; omine mot mabeco me nom ki lonyone, ki gum pa Labedo i caka mulyel mac. Wek gum magi ducu gupot i kom Yucepu, i wi dano mubedo laker i kin omegine. Ditte ki deyone bibedo rom ki pa wod twon me kayo, tune aryo ducu tye macalo tuŋ twon ma i tim. I kom kaka pa Jabulon olamo ni, “Cwinyi obed yom, in Jabulon, ka ikato woko; ki in Icakar ka ibedo i kemani. Gibilwoŋo rok ducu wek gucit i wi gotgi, gibityero gitum muporre kunnu, pien lim ma tye i nam obedo megi, kacel ki lonyo ma gikano i kweyo.” En aye bitwomo kwede rok mapol, bicobogi ducu nio wa i agikki lobo; tune aye jo Epraim ma gikato alip apar, ki jo Manace ma giromo alip mapol-li.” I kom kaka pa Gad olamo ni, “Gum opot i kom dano ma oyabo i lobo pa Gadmalac! Gad obuto piny macalo min labwor, en yeco bat lee, dano wiye. Oyero lobo maberre ni obed mere, pien onoŋo gikano lobo pa lawimony kunnu, Obino bot ludito wi lwak, otimo gin ma tye atir i nyiŋ Rwot, ocobo gin ma Rwot ociko kacel ki jo Icrael.” I kom kaka pa Dan olamo ni, “Dan aye latin labwor ma kirre nia ki i Bacan.” I kom kaka pa Naputali olamo ni, “Bed ki lonyo ma rommi, in Naputali, gum pa Rwot obed kwedi madwoŋ, nam ki lobo ma tun acuc obed meri.” I kom kaka pa Acer olamo ni, “Acer olim gum madit makato litino ducu; wek cwiny omegine ducu omare; wek olwa tyene ki moo. Laceg dog gaŋŋi obed nyonyo ki mola; bed ki tekkomi nio wa ka toni. “Pe tye ‘ŋat mo’ macalo Lubaŋawu, wun jo Jecurun, ma ito pol bino kwede ka konyowu, kun baro dye polo ki doyone. Lubaŋa ma bedo nakanaka-ni en aye kabedowu, ciŋe tye ki tuŋ piny ma tiŋowu kwede malo. Oryemo lumerok woko ki i nyimwu kun wacci, “Tyekgi woko liweŋ.” Icrael yam obedo ki kuc kit meno, waŋ it pa Yakobo obedo kene i lobo me kai ki koŋo vino; iyo, polo miyo toyo ton piny kunnu. Cwinyi yom kuman, Icrael! Aŋa mono ma calo in kaa? In i rok ma yam Rwot olaro, Rwot aye kwot ma gwokowu, ki pala lucwan ma kelowu wayu! Lumerokwu gibibino botwu kun gimwolle amwola; ento wun wubinyonogi woko piny.” Moses oa ki i lobo aroo me Moab, ocito i wi got Nebo, oito wa i wi lacol me got Piciga ma okemo Jeriko, ci Rwot onyutte lobo ducu. Onyutte lobo Gilead ducu nio kwede wa i Dan, ki lobo Naputali ducu, ki lobo pa jo Epraim ki Manace, ki lobo Juda ducu nio kwede wa yo tuŋ potoceŋ, ki Negeb kacel ki lobo bar-gu, ma en ayenota me Jeriko, ma gaŋ me yadi otit, ‘ki nio kwede wa i Joar. Rwot owaco bot Moses ni, “Man aye lobo ma yam akwoŋo pire bot Abraim ki Icaka ki Yakobo, ni abimiyone bot likwayogi. Doŋ aweki ineno lobone ki waŋi, ento pe ibikato loka ca.” Moses latic pa Rwot oto kit meno ki i lobo Moab, kit ma yam Rwot owaco-ni, ci Rwot oyike ki kunnu i nota ma i lobo Moab ma okemo Bet-peor; ento pe tye dano, mo ma oneyo kabedo ma oyike iye nio wa onyoo. Moses onoŋo mwaka me ditte romo miya acel ki pyeraryo ka oto. Onoŋo waŋe peya ocor, ki kome bene onoŋo pud tek. Jo Icrael gukoko Moses ki i lobo aroo me Moab pi nino pyeradek, ci doŋ kare me koko ki kumo pi Moses otum woko. Yocwawod pa Nun yam opoŋ ki cwiny me ryeko, pien onoŋo yam Moses oketo ciŋe i kome; mumiyo jo Icrael gubedo ka woro doge, kun gilubo kit ma yam Rwot ociko ki Moses. Lanebi mo mukene pe dok onen macalo Moses, ma yam Rwot nene kwede waŋ ki waŋ. Pe tye ŋat mo ma rom kwede ma obedo ka tiyo lwak lanyut ki taŋo ducu ma Rwot ocwale kwede i lobo Ejipt, ma otiyo i kom Parao ki luticce ducu ki lobone ducu. Pe tye lanebi mo mukene ma obedo ki twer madwoŋ ma rom ki mere pi tiyo kit tic madito ki ma kelo lworo madwoŋ kit ma yam Moses obedo ka tiyone ki i nyim jo Icrael ducu-ni. Ka Moses latic pa Rwot doŋ oto woko, Rwot owaco bot Yocwa wod pa Nun ma lakony pa Moses ni, “Laticca Moses doŋ oto woko; pienno in aye doŋ ia malo, iciŋol loka Jordan man, in ki lwak jo-ni ducu, wucit wa i lobo ma abemiyo botgi-ni, ma abimiyo bot gin jo Icrael. Kabedo ducu ma tyenwu binyono abimiyo botwu, kit ma yam aciko ki Moses. Cakke wa i tim ki i Lebanon kany o kwede wa i kulu madit, en aye kulu Euprate, lobo ducu pa jo Kit nio wa i Nam Madit ma yo tuŋ potoceŋ, ducu bibedo lobowu, Pe tye dano mo ma bicuŋ i nyimi i kare me kwoni ducu. Kit ma yam abedo ki Moses, abibedo kwedi kit meno; pe abibwoti, pe abitenyi ata. Bed oteka ma cwinyi nwaŋ, pien ibimiyo rok man leyo lobo ma yam akwoŋo pire bot kwarowu ni abimiyo botgi. Ento bed oteka ma lacwinye nwaŋ, bed ma igwokke ka lubo cik ma yam laticca Moses ociki kwede i gin ma itiyo ducu; pe iŋak idok yo tuŋ acuc nyo yo tuŋ acam, wek ibed ki gum maber i kabedo ducu ma ibicito iye. Buk man me cik pe bia ki i dogi, ento ibibedo ka Iwodone i cwinyi dyeceŋ ki dyewor, wek igwokke ka lubo gin ducu ma gicoyo iye-ni, Kit meno bimiyo nyimi bedo maleŋ, ka dok ticci ducu bicobbe kakare. An doŋ atyeko ciki ba. Bed oteka ma cwinyi nwaŋ; pe komi omyel, pe cwinyi oryaŋŋe, pien Rwot Lubaŋani tye kwedi ka ma iwoto iye ducu.” Yocwa ociko ludito ma giloyo lwak ni, “Wuwot i dye gony ka ciko lwak ni, ‘Wuyub camwu; pien odoŋ nino adek ci wucito ka ŋolo loka kulu Jordan, wucito iye ka camo lobo ma Rwot Lubaŋawu omiyo botwu me bedo mewu.’ ” Yocwa dok owaco bot jo Reuben, jo Gad ki nucu kaka pa Manace ni, “Wupo lok ma yam Moses latic pa Rwot ocikowu kwede kun wacci, ‘Rwot Lubaŋawu doŋ otyeko miyowu kabedo me yweyowu, en doŋ omiyowu lobo man.’ Monwu ki litinowu ki dyaŋiwu gibidoŋ i lobo ma yam Moses omiyo botwu i ŋe Jordan kany; ento oteka lweny ma gitye i kinwu ducu gibikato loka ca ki jami lwenygi ducu i nyim omegigi pi konyogi, nio ka Rwot omiyo yweyo bot omegiwu macalo omiyo botwu-ni, ci gin bene gicamo lobo ma Rwot Lubaŋawu omiyogi. Ka doŋ wubidok i lobo ma mewu-ni, ci doŋ wubibedo iye matwal, en aye lobo ma yam Moses latic pa Rwot omiyo botwu i ŋe Jordan kany ma tuŋ wokceŋ.” Ci gugamo dog Yocwa ni, “Gin ma doŋ iciko ducu wabitiyo, dok ka ma icwalowa iye ducu wabicito. Kit macalo yam waworo dog Moses i lok ducu-ni, wabiworo dogi bene kit meno. Rwot Lubaŋa keken aye obed kwedi, kit ma yam obedo ki Moses! Dano mo ka okwero lokki ce ojemo i kom cikki ki gin ducu ma iciko, gibineke woko. In aye ibed oteka ma cwinyi nwaŋ.” Yocwa wod pa Nun ocwalo jo aryo nia ki i Citim i muŋ ka roto piny kun waco botgi ni, “Wucit ka neno lobo, makatone aye Jeriko.” Ka gucito, ci gutiro i ot pa dako ma lakwele ma nyiŋe Rakab, gubuto kunnu. Gitito pigi bot kabaka me Jeriko ni, “Nen, jo Icrael mogo gubino kany ka roto piny.” Ci kabaka me Jeriko ocwalo kwena bot Rakab ma kun wacce ni, “Kel dano ma gubino boti kany, dano ma gudonyo i odi-ni, pien gubino ka roto lobowa ducu.” Ento dako-nu onoŋo otero jo aryo-nu okanogi woko, ci en ogamo ni, “Ada, jo-nu gubino bota, ento onoŋo pe aŋeyo ka ma gua iye. I kare ma dog gaŋ gicok lorone woko, ma piny col-li, jo-nu gukato woko, ci ka ma gucito iye aye pe aŋeyo. Wuryem korgi oyotoyot, ci wubimakogi iyo,” kun onoŋo oterogi i wi ot malo, ci okanogi i kin tol tworo ma ocano kikore i wi ot kunnu. Kit meno dano gucako ryemo korgi i yo ma kemo kulu Jordan nio kwede wa i waŋ wat. Ka luryem korgi gukato woko, ci dog gaŋ giloro woko cut. I kare ma jo-nu peya gubuto piny, en ocito botgi i wi ot, ci owaco botgi ni, “Aŋeyo ni Rwot otyeko miyowu lobo man, lworo bene otyeko makowa piwu, ki jo ma gibedo i lobo-ni komgi oonyo koyo woko piwu, pien wawinyo kit ma Rwot otwoyo ki pii me Nam Makwar woko i nyimwu i kare ma wua woko ki i Ejipt, ki gin ma wutiyo i kom luker aryo pa jo Amor ma yam gibedo loka Jordan tuŋ kany, gin aye Cikon ki Og, ma wujwerogi woko liweŋ-ŋi. I kare ma wawinyo pire-ni cwinywa ocako ŋabbe aŋaba cut, tipo kom dano oto woko lirut piwu, pien Rwot Lubaŋawu aye Lubaŋa ma tye malo i polo ki piny i wi lobo bene. Kombeddi doŋ wukwoŋŋa kwoŋ ki nyiŋ Rwot ni, kit macalo atyeko timowu maber-ri, wun bene wubitimo jo me ot pa wora maber, ci wumiya lanyut ma moko adane, wek wular kwo pa wora ki pa maa, ki pa omegina ki lumegina, ki jo ducu ma gitye botgi, wek wular kwowa wawek to.” Jo meno gugamo ni, “Wan aye wabito ma ka wun. Ka pe wubitito gin ma watimo kany-nyi, ci wan wabitimowu maber ki gen madwoŋ ka Rwot bimiyowa lobo-ni.” Lacen dako-nu omiyo gukato woko ki i waŋ dirica ma noŋo en cwalogi piny ki tol, pien onoŋo ode gigero okubbe i kom cel murumo gaŋ-ŋi, omiyo en yam bedo i kom cel. Ci en ocikogi ni, “Koŋ wucit wa i kin godi, wek luryem korwu pe gurwatte kwedwu iyo. Koŋ wukanne kunnu pi nino adek, nio ka luryem korwu gudwogo; ka lacen wun doŋ wucit giwu.” Jo-nu guwaco bote ni, “Pe wabibedo ki bal mo i kom kwoŋ man ma imiyo wakwoŋo boti-ni. Nen ba, ka monywa obino i lobo-ni, ci ibitweyo tol man makwar-ri i waŋ dirica ma imiyo wakato woko kun wawok ki iye-ni. Ci ibilwono woru ki meni ki omegini ki jo ma i ot pa woru ducu, icokogi i ot boti kany. Ka ŋat acel mo okato gire woko ki i doggola odi ocito i gudo, bal me remone bidok i wiye, wan pe wabibedo ki bal mo iye, Ento ka ce itito gin ma watimo kany-nyi, ci pe wabibedo ki bal mo pi kwoŋ ma imiyo wakwoŋo-ni.” Dako ogamo ni, “Doŋ obed kumeno kit macalo wuloko-ni.” Ka ocwalogi gucito, ci en otweyo tol makwar-ri i waŋ dirica ode. Ka gucito ci guwoto atir wa i godi, gubedo kunnu pi nino adek, nio ka luryem korgi gudok woko; lulub korgi gubedo ka yenyogi kwe i waŋayo, ci pe gumedo ki noŋogi, Jo aryo-nu gulor piny ki i wi godi, gukato loka ca ci gucito bot Yocwa wod pa Nun, gutito bote lok ducu ma otimme i komgi. Ka dok guwaco bot Yocwa ni, “Adada Rwot doŋ otyeko miyo lobo meno ducu i ciŋ wa; dok nen ni jo ducu ma gibedo i lobo-nu piwa oneko komgi woko lirut.” Yocwa oa malo odiko con ci otiŋo wot kun a ki i Citim, kacel ki jo Icrael ducu, guo kwede wa i dog kulu Jordan, gubuto kenyo ma peya gukato loka tuŋ ca. Ka gutyeko kunnu nino adek, ci ludito guwoto i dye gaŋ kun giciko lwak ni, “Ka doŋ wuneno ajwagi ma Lulevi doŋ gutiŋo canduk me gicikke pa Rwot Lubaŋawu, ci wun bene doŋ wubicako wot, wua ki i kabedowu wulubo kore, wek wuŋe yo ma wubilubo-ni, pien yam peya wulubo yo meno. Ento kinwu ki canduk pa Rwot aye obed ma oŋadde; ber kinwu opokke ma romo yadi alip acel kulu, pe wunyik cok bote.” Ci Yocwa ociko lwak ni, “Wulonnye kekenwu wek wubed maleŋ, pien diki Rwot bitiyo jami taŋo i kinwu.” Yocwa owaco bot ajwagi ni, “Doŋ wutiŋ canduk me gicikke, wukat kwede i nyim lwak.” Gutiŋo canduk me gicikke, gucito kwede wa i nyim lwak. Rwot owaco bot Yocwa ni, “Tin doŋ acako miyo ibedo dano madit ki i nyim ‘jo Icrael ducu, wek guŋe ni, kit ma yam abedo ki Moses, abibedo kwedi bene kit meno, Ibiciko ajwagi ma gitiŋo canduk me gicikke ni, ‘Ka doŋ wuo i dog pii me Jordan, ci wubicuŋ mot i kulu Jordan.’” Ci Yocwa owaco bot lwak ni, “Wubin kany ka winyo lok pa Rwot Lubaŋawu.” Ka dok owaco ni, “Kombeddi doŋ wubiŋeyo ni Lubaŋa makwo tye i kinwu, dok ni en biryemo jo magi woko ki i nyimwu ada, jo Kanaan, jo Kit, jo Kiv, jo Periji, jo Girgac, jo Amor ki jo Jebuc. Canduk me gicikke pa Rwot me lobo ducu doŋ biŋolo kulu Jordan ki i nyimwu. Koni doŋ wukwany dano apar wiye aryo ki i kin kaka pa jo Icrael, dano acel pi kaka acel acel. I kare ma tyen ajwagi ma gutiŋo canduk me gicikke pa Rwot, ma Rwot me lobo ducu-ni, bicuŋ i pii me Jordan, ci pii me Jordan biŋol woko ma pe doŋ mol; pii ma mol a ki malo yo tuŋ cel-li bigut gurre kacel.” Kit meno lwak gua ki i kemagi gucako wot pi ŋolo loka Jordan kacel ki ajwagi ma gutiŋo canduk me gicikke ma gutelo kwede nyim lwak. Noŋo pii me kulu Jordan poŋ woko libyeny o wa i wi tura mwaka ki mwaka pi kare malac i kare me kac. Ka doŋ ajwagi ma gutiŋo canduk me gicikke-ni guo i Jordan, guluto tyengi i pii ma i doge-ni, ci pii ma mol piny ma a ki tuŋ malo-ni ogut ocuŋ woko ma opoŋ otiŋŋe malo likuŋ ma ojer wa i Adam, en gaŋ ma cok ki Jaretan. Pii mogo ma mol kemo nam me Araba, ma Nam me Kado-ni, kingi ducu oŋol woko, ci lwak gukato loka tuŋcel, mukemo Jeriko. I kare ma jo Icrael ducu gimol gikato ki i lobo mutwo-ni, onoŋo ajwagi ma gutiŋo canduk me gicikke pa Rwot-ti gucuŋ i dye Jordan, nio ka rok ducu otyeko kato loka Jordan. Ka lwak ducu gutyeko kato loka Jordan, ci Rwot owaco bot Yocwa ni, “Kwany dano apar wiye aryo ki i kin lwak, dano acel pi kaka acel acel, ci icikgi ni, ‘Wukwany godi apar wiye aryo ki kany ki i dye Jordan, ki i kabedo ma tyen ajwagi ocuŋ iye-ni, wutiŋ wukat kwedgi wa loka ca, ci wuketgi piny i kabedo ma wucibuto iye tin-ni.’ ” Yocwa olwoŋo dano apar wiye aryo ki i kin jo Icrael ma nene en oyerogi, ma laco acel oa ki i kaka acel acel. Owaco botgi ni, “Wukat wucit wa i nyim canduk me gicikke pa Rwot Lubaŋawu ma i dye Jordan-ni, dano acel acel otiŋ iye got oket i wi gwoke, muporo wel kaka pa jo Icrael ducu, wek gubed me lanyut i kinwu, I kare me anyim ka waŋ mo litinowu gibipenyowu ni, ‘Godi magi kono nyuto gin aŋo?’ Wun wubitito botgi ni, pii me Jordan yam iye opokke oŋol wo ko ki i nyim canduk me gicikke pa Rwot, i kare ma en ŋolo Jordan kato kwede loka ca-ni. Kit meno godi magi bibedo gin me po bot jo Icrael.” Jo Icrael gutiyo kit ma Yocwa ocikogi kwede. Gutiŋo godi apar wiye aryo ki i dye Jordan, muporo wel kaka pa jo Icrael, kit ma nene Rwot otito bot Yocwa-nii gutiŋo gucito kwedgi loka ca, wa i kabedo ma gicibuto iye-ni, ci guketogi piny kunnu. Yocwa ocibo godi apar wiye aryo-nu i dye Jordan, i kabedo ka ma tyen ajwagi ma gutiŋo canduk me gicikke ocuŋ iye; pud gitye kunnu wa onyoo, Pien onoŋo ajwagi ma gutiŋo canduk-ki gucuŋ kenyo i dye Jordan nio ka gin ducu ma nene Rwot ociko Yocwa ni otit bot lwak otum, ma rom ki cik ma yam Moses ocikoki Yocwa-ni. Lwak ducu gumol oyotoyot wa loka ca, Ka lwak ducu gumol gukato loka ca, ci canduk ki’ ajwagi bene gukato loka i nyim lwak. Jo pa Reuben ki pa Gad ki nucu kaka pa Manace onoŋo guruko jami lwenygi gutelo kwede nyim lwak jo Icrael kit ma yam Moses ocikogi kwede-ni. Jogi ma gurukke me lweny guromo alip pyeraŋwen, ci gukato loka ca I nyim Rwot ka lweny i lobo bar me Jeriko. Rwot omiyo Yocwa obedo dano madit i nyim jo Icrael ducu; ci lwak guwore Wa i kare me kwone ducu kit ma yam giworo ki Moses, Rwot owaco bot Yocwa ni, “Cik ajwagi ma gitiŋo canduk me caden doŋ gua woko ki i Jordan.” Yocwa ociko ajwagi ni, “Doŋ wua woko ki i Jordan.” Ka ajwagi ma gutiŋo canduk me gicikke pa Rwot gua woko ki i dye Jordan gukato wi tura;” ma tyengi ocako nyono lobo ma wi tura mutwo-ni, ci pii me Jordan ocorre odwogo cen i kabedone, opoŋo piny obyennye wa i wi tura kit ma yam ca, Lwak gua woko ki i Jordan gukato wi tura i nino dwe apar me dwe mukwono, ci gutoŋo gonygi i Gilgal i waŋ lobo Jeriko ma tuŋ wokceŋ, Ki godi apar wiye aryo ma gutiŋo ki i Jordan, Yocwa ocibogi i Gilgal. Ci owaco bot jo Icrael ni, “I kare me anyim, ka ‘likwayowu gupenyo wegigi ni, ‘Godi magi kono nyuto gin aŋo?’ ci wubitito bot litinowu ni, ‘Jo Icrael yam gumol gukato ki i Jordan kany ma lobone otwo woko.’ Pien Rwot Lubaŋawu omiyo pii me Jordan otwo odwon woko piwu nio ka wumol wukato loka kany, kit ma yam Rwot Lubaŋawu otiyo ki Nam Makwar-ri, ma yam omiyo piine otwo odwon woko piwa nio ka wamol wakato loka tuŋcel, wek rok ducu ma wi lobo-ni guŋe atir ni ciŋ Rwot tye ki tek; wek wubed ka lworo Rwot Lubaŋawu matwal.” Ka luker pa jo Amor ducu ma gibedo loka Jordan ma tuŋ potoceŋ, ki luker pa jo Kanaan ducu ma gitye i dog nam, guwinyo ni Rwot otyeko dwono pii me Jordan otwo woko pi jo Icrael nio ka gumol gukato loka tuŋcel, ci cwinygi ocako ŋabbe aŋaba, ki tipo komgi oto woko, pi lworo jo Icrael. I kare meno Rwot owaco bot Yocwa ni, “Tim pala kidi lela mabitte ci ilir ki jo Icrael tyen me aryone.” Ci Yocwa otimo pala kidi lela mabitte, oliro ki jo Icrael i Gibea-aralot, Man aye tyen lok mumiyo Yocwa olirogi: lwak co ducu ma gua ki i Ejipt, lulwenygi ducu, onoŋo gutyeko to woko ki i tim i kare ma doŋ gutyeko a woko ki i Ejipt. Jo ma gua ki kunnu onoŋo yam gilirogi, ento jo ducu ma ginywalogi ki i wanayo ma onoŋo doŋ gua woko ki i Ejipt, gubedo ma pe gilirogi, Pien JO Icrael gubedo ka wot i tim mwaka pyeraŋwen, nio ka jo me rokgi ducu, co ducu ma lumony ma yam gua ki i Ejipt, guto gutum woko, pien onoŋo pe gubedo ka woro dog Rwot. Rwot yam okwoŋo ni pe ebiye ni gin gunen lobo ma yam okwono bot kwarogi ni ebimiyo botgi, en aye lobo ma mol cak ki moo kic. Kit meno jo ma Yocwa oliro gubedo litinogi ma Rwot omiyo gudoŋo guleyo ka tyengi; pien onoŋo gubedo ma pe gilirogi, pe gilirogi ki i waŋayo. Ka liro jo Icrael doŋ otum, ci gubedo i gony nio ka gucan. Rwot owaco bot Yocwa ni, “Tin doŋ akwanyo lewic me lobo Ejipt woko ki i komwu,” mumi yo nyiŋ kabedo-nu pud gilwoŋo ni Gilgal wa onyoo. I kare ma jo Icrael gitye i gony me Gilgal gukwero nino madit me Kato i nino dwe apar wiye aŋwen otyeno i bar me Jeriko. Orwone ki i ŋe kwero Kato, i nino meno kikome, gucako camo cam ma ocek i lobo-nu, capat ma tobi pe iye ki bel ma gicelo, I nino meno ma gucamo iye cam ma ocek ki i lobo-nu en aye nino ma manna bene, ogik iye; jo Icrael pe dok gumedde ki camo manna matwal, ento doŋ gubedo ka camo cam ma ocek i lobo Kanaan i mwaka meno. Ka Yocwa onyiko cok ki Jeriko, otiŋo wane malo oneno piny, ci oneno dano mo ocuŋ i nyime ma onoŋo owoto pala lucwan omako i ciŋe. Yocwa ocito bote, openye ni, “In itye tuŋ botwa nyo tuŋ bot lumerokwa?” En ogamo ni, “Pe; ento an aye lawimony pa Rwot ma tin doŋ abino.” Yocwa oryebbe piny i ŋom, owore, ci owaco bote ni, “Ladit, an laticci, icika ki lok aŋo?” Lawimony pa Rwot owaco bot Yocwa ni, “Luny war woko ki i tyeni, pien kabedo ma icuŋ iye-ni kabedo maleŋ.” Ci Yocwa otimo kit meno. I kare meno onoŋo Jeriko gicego woko matek twatwal pi lworo jo Icrael; dano mo pe kato woko, ki dano mo pe donyo i iye. Rwot owaco bot Yocwa ni, “Nen, doŋ atyeko miyo Jeriko i ciŋi kacel ki kabakane ki twoni oteka lwennye. Wubiwot wurumo gaŋ; lulweny ducu gibiwot kun girumo gaŋ tyen acel. Wubitiyo kit meno tyeko nino abicel, kun ajwagi abiro bimako obute me tuŋ romi gitelo kwede nyim canduk me gicikke, I nino me abirone wubiwot wurumo gaŋ tyen abiro kun ajwagi gikuto obute. Ka doŋ gikuto tuŋ nyogi romi, ka doŋ wuwinyo dwan obute maloŋo-ni, ci lwak ducu gibidaŋŋe ki dwangi maloŋo mapek; cel gogo me gaŋ bimuk, poto woko piny ducu, ci lwak gibicorre gicito iye kun dano acel acel kemo nyime atir.” Ci Yocwa wod pa Nun olwoŋo ajwagi, owaco botgi ni, “Wutiŋ canduk me gicikke. Ajwagi abiro gumak obute tuŋ nyogi romi gutel kwede nyim canduk pa Rwot.” Ka dok owaco ki lwak ni, “Wuwot anyim, wuwot wurum gaŋ, wumi jo ma guruko jami lwenygi gukat wa i nyim canduk pa Rwot.” Kit ma Yocwa ociko ki lwak-ki, ajwagi abiro gumako obute tuŋ nyogi romi abiro ci gutelo kwede nyim Rwot kun gicito anyim kacel ki canduk me gicikke pa Rwot ma lubo korgi. Lumony gutelo nyim ajwagi ma gikuto obute-ni, ci lugwok ŋec gulubo kor canduk, kun obute gikuto gimedde kwede ameda. Ento Yocwa ociko lumony ni, “Pe wubidaŋŋe ki woo, kadi wa dwanwu pe biwinnye, wa lok mo pe bia ki i dogwu, o kwede wa i nino ma abicikowu ni doŋ wudaŋŋe ki woo; ka doŋ wubidaŋŋe.” Kit meno Yocwa omiyo canduk pa Rwot ocako wot me rumo gaŋ, kun rumo tyen acel keken. Lacen gudok i gony, gubuto kunnu. Yocwa dok oa malo odiko con, ki ajwagi bene gucako tiŋo canduk pa Rwot. Ajwagi abiro gumako obute tuŋ nyogi romi abiro gukato kwede i nyim canduk pa Rwot, kun gimedde ki kuto obute nakanaka. Lumony gutelo nyimgi, ki lugwok ŋec gulubo kor canduk, kun ajwagi gikuto obute nakanaka. I nino me aryone guwoto gurumo gaŋ tyen acel ci gudok i gony, Gubedo ka rumo gaŋi kit meno otyeko nino abicel. I kom nino me abirone gua malo kwarpiny, guwoto gurumo gaŋ kit ma yam ca tyen abiro; i nino meno keken aye gurumo iye gaŋ tyen abiro. I kom tyen me abirone en aye ajwagi gucako kuto iye obute, ka Yocwa owaco bot lumony ni, “Wudaŋŋe, wuwo, pien Rwot doŋ omiyo gaŋ man botwu. Ento gaŋ man ki gin ducu ma tye iye gibidyerogi bot Rwot ci gibijwero woko ducu. Rakab ma lakwele-ni keken, ki jo ducu ma gitye i ode, aye gibidoŋ makwo, pien en yam okano lurot-piny ma wacwalo kunnu. Ento wun aye wugwokke kekenwu i kom gin ducu ma gidyero me ajwera woko, pe dok wukwany gin mo ki i kom gin ma wudyero-ni, miyo gony pa jo Icrael doko me ajwera woko ducu, ci kelo ayela i kome, Ento ryal ki jabu ducu ki jami me mola-gu ki me nyonyo gu, gin ducu jami maleŋ pa Rwot; gibiterogi i ot kano lim pa Rwot.” Kit meno lumony gudaŋŋe ki woo ki ajwagi gukuto tum obute, Tekki lumony guwinyo dwan obute ci gutugi daŋŋe ki woo matek, ci cel me gaŋ omuk opoto woko piny ducu, ka doŋ lumony gudonyo i gaŋ kun dano acel acel woto tiko nyime atir, gumako gaŋ woko. Gujwero co wa ki mon, litino ki ludoŋo ducu, ki dyaŋi ki romi ki kana-gu; gin ducu gutum woko kun gineko ki pala lucwan. Ci Yocwa owaco bot jo aryo ma yam guroto lobo ni, “Wucit i ot pa dako ma lakwele-ni, wukele woko ki jone ducu, kit ma yam wukwoŋo boteni,” Kit meno awobe ma yam guroto lobo gudonyo i ot, gukelo Rakab woko kacel ki wonne ki minne ki omegine ki jone ducu. Gutero ludoggolane ducu, guketogi woko i ŋe gony pa jo Icrael. Lacen lumony guwaŋo gaŋ woko ki mac, ki gin ducu ma tye iye; ento guweko ryal ki jabu ki jami me mola ki me nyonyo-gu, guketogi i ot ma gikano iye lim pa Rwot. Ento Rakab ma lakwele-ni ki jo me ot pa wonne kacel ki jone ducu, Yocwa owekogi makwo. Gibedo i kin jo Icrael nio wa onyoo, pien Rakab yam okano lukwena ma Yocwa onoŋo ocwalogi ka roto Jeriko. I kare meno Yocwa omiyo dano gukwoŋo kwoŋ i nyim Rwot kun wacci, “Cen opot i kom dano ma bitiŋŋe pi gero gaŋ man me Jeriko doki. Latin kayone bito, ci gibiketo gutine i wiye; wode ma cogone bito, ci gibicibo dog gaŋ i wiye.” Kit meno Rwot obedo ki Yocwa, omiyo nyiŋe oywek oromo lobo ducu. Ento jo Icrael guŋayo waŋ Rwot i lok ma mako jami ma onoŋo gidyero bote. Akan wod pa Karmi, wod pa Jabdi, wod pa Jera ma i kaka pa Juda okwanyo jami mogo ma gidyerogi bot Rwot, omiyo kiniga omako Rwot i kom jo Icrael. Yocwa ocwalo dano ki i Jeriko me cito wa i Ai ma cok ki Bet-awen, i ŋet Betel yo tuŋ wokceŋ, owaco botgi ni, “Wucit ka roto lobo kuca:’ Jo-nu gucito guroto Ai. Ka gudwogo bot Yocwa ci gutito bote ni, “Pe iwek mony ducu gucit kunnu, ento wek dano alip aryo nyo adek gucit ka lweny i kom Ai; pe imi mony ducu guyelle gucit kunnu, pien jo ma tye kunnu ginok mo.” Mumiyo dano alip adek ki i kin lumony aye gucito kunnu; ci guriŋo woko ki i nyim jo Ai. Jo Ai guneko jo pyeradek wiye abicel ki i kingi’; guryemo korgi cakke ki i dog gaŋ o kwede wa i Cebarim, ci gunekogi i kor got kunnu. Ci cwiny jo Icrael oballe woko, tekgi okwe woko macalo pii. Yocwa oyeco boŋone woko, opoto piny aryeba cwiny i nyim canduk pa Rwot nio wa otyeno, en ki Ludoŋo pa jo Icrael, kun gionyo apwa i wigi. Ci Yocwa owacci, “Maa do, ai Rwot Lubaŋa, piŋo ikelo lwak man loka Jordan kany pi miyowa i cin jo Amor wek gutyekwa woko? Twora yam waye giwa bedo loka Jordan kuca! Ai Rwot, ka man dok awaco lok aŋo, ma jo Icrael doŋ gutyeko loko ŋegi woko i nyim lumerokgi-ni? Pien jo Kanaan ki jo ducu ma gibedo i lobo-ni ka gibiwinyo pire, gibicorre girumowa woko dyere, gijwayo nyiŋwa woko ki i wi lobo. Ci gin aŋo mono ma dok ibitiyo pi nyiŋi madit-ti?” Rwot owaco bot Yocwa ni, “A malo, piŋo ipoto aryeba cwiny kit man? Jo Icrael gutimo bal. Gutyeko turo gicikkena ma yam acikogi kwede. Gukwanyo jami mogo ma yam gidyerogi-ni, gukwalo woko, guŋinnye kwede, guketo i kin jamigi, En aye lok mumiyo jo Icrael pe gitwero cuŋ i nyim lumerokgi; gin mumiyo guloko ŋegi ki i nyim lumerokgi noŋo gin kikomgi gudoko gin me ajwera woko, Pe doŋ abimedde ki bedo kwedwu, nio waŋ ma wukwanyo jami ma gidyerogi woko ki i kinwu. A malo wek ilony lwak gubed maleŋ kun iwaco ni, ‘Diki myero wulonnye kekenwu wubed maleŋ, pien Rwot Lubaŋa pa Icrael owaco kuman ni, “Jami ma gidyero tye i kinwu, wun jo Icrael. Pienno pe wutwero cun i nyim lumerokwu nio waŋ ma wukwanyo jami ma gidyerogi woko ki i kinwu.” Diki odiko gibikelowu i nyim Rwot kaka ki kaka, ci kaka ma Rwot okwanyo gibibino cok doggola ki doggola; doggola ma Rwot okwanyo bibino ot ki ot; ki ot ma Rwot okwanyo dano ma tye iye gibibino ki acel acel. Ŋat ma gikwanyo ma tye ki jami ma gidyero-ni gibiwaŋo woko ki mac, en kacel ki jone ki jamigi ducu, pien oturo gicikke pa Rwot, dok otimo gin me lewic i Icrael.’ ” Kit meno Yocwa oa malo odiko con, okelo jo Icrael cok i nyim Rwot kaka ki kaka, ci gukwanyo kaka pa Juda aye. Okelo jo pa Juda, ‘ci gikwanyo doggola jo pa Jera. Okelo doggola pa Jera kun kelo dano ma iye ki acel acel, ka dok gikwanyo Jabdi. Ka dok okelo dano ma i ode ki acel acel, ci gikwanyo Akan wod pa Karmi, likwayo pa Jera ma i kaka pa Juda. Yocwa owaco bot Akan ni, “Woda, mi deyo bot Rwot Lubaŋa pa Icrael kun ituco balli. Titta kombeddi gin ma itimo; pe imuŋŋa.” Akan ocako dok iye ki Yocwa ni, “Ada, abalo i nyim Rwot Lubaŋa pa Icrael, man aye gin ma atiyo: ka aneno boŋo maber mua ki i Cinar ki i kin jami ma giyakoni, ki cekel me ryal miya aryo, ki dul jabu ma pekke romo cekel pyerabic, pigi obedo mitta, ci akwanyogi. Nen, akanogi i ŋom i kemana, ryal tye piny i tergi.” Yocwa ocwalo lukwena ci guriŋo i kema pa Akan, gunoŋo jami-nu gikano i kema, kun ryal tye i tere piny. Gukwanyogi woko ki i kema, gukelogi bot Yocwa ki jo Icrael ducu, ci guketogi piny i nyim Rwot. Ci Yocwa ki jo Icrael ducu gukwanyo Akan lakwar Jera kacel ki ryal ki boŋo ca ki dul jabu, ki awo bene ki anyirare, ki twoni dyaŋine, ki kanane ki romine, ki kemane ki jami ma en tye kwede ducu, gutero wa i nota me Akor. Yocwa owacci, “Piŋo ikelo ayela i komwa? Tin doŋ Rwot bikelo ayela i komi.” Ci jo Icrael ducu gucelogi ki got. Guwaŋo jamigi ki mac, ci gucelogi ki got. Lacen gucano got i kome madwoŋ likuŋ ma pud tye wa onyoo, ci kiniga pa Rwot malyet-ti okwe woko. Pienno nyiŋ kabedo-nu pud gilwoŋo ni nota me Akor nio wa onyoo. Rwot owaco bot Yocwa ni, “Pe ilwor, cwinyi pe opoti. Ter jo ma lulweny ducu kacel kwedi, doŋ wutugi a, wucit wa i Ai. Nen, doŋ atyeko miyo kabaka me Ai i ciŋi, ki lwakke ducu ki gaŋŋe ki lobone. Ibitimo Ai ki kabakane kit macalo itimo i kom Jeriko ki kabakane-ni; ento jamine ma giyako, ki limme makwo, wubitero bedo mewu, Mi dano gubut gukanne i ŋet gaŋ yo tuŋ ŋeye.” Yocwa oa malo ki jo ma lulweny ducu pi cito ka lweny i kom Ai. Oyero twoni matego ma oteka lweny alip pyeradek ci ocwalogi ki i dyewor. Ocikogi ni, “Wubibuto wukanne i ŋet gaŋ yo tuŋ ŋeye, Pe wucit ka mabor ki gaŋ, ento wun ducu wubed ma wuterre, ci an ki jo ducu ma gitye kweda wabinyiko cok ki gaŋ, Ka ce jo kunnu gubino woko ka lweny i komwa, ci wan wabiriŋo woko ki i nyimgi, miyo gin gibibino woko ka ryemo korwa nio ka gin ducu gukato woko ki i gaŋ, pien gibitamo ni wariŋo woko ki i nyimgi kit ma yam watimo-ni, Ka wan watye ka riŋo woko ki i nyimgi, wun doŋ wubia malo ki ka ma wubuto wukanne iye-ni, ci wutugi mako gaŋ woko cut, pien Rwot Lubaŋawu bimiyo i ciŋwu, Ka doŋ wutyeko mako, wubiwaŋo woko ki mac; kit meno wubicobo gin ma Rwot ociko. Nen, doŋ acikowu en.” Yocwa ocwalogi woko kit meno, ci guwoto ka ma gicikanne iye-ni, Gubuto i kin Betel ki Ai, i ŋet Ai yo tuŋ potoceŋ; ento Yocwa obuto kacel ki lwak i dyewor meno. Odiko con Yocwa oa malo ocoko mony, ocako cito i nyim jo Ai kacel ki ludoŋo pa Icrael. Jo ma lulweny ducu ma gitye kwede gucito gunyiko cok ki gaŋ, gutoŋo gony i ŋet Ai yo tuŋ acam, kun nota tye i kingi ki Ai. Yocwa otero dano ma romo alip abic oketogi gubuto gukanne i kin Betel ki Ai i ŋet Ai yo tuŋ potoceŋ. Guketo mony i kabedogi kit meno kun gony madit tye i nyim gaŋ yo tuŋ acam ki dul mukanne tye i ŋe gaŋ yo tun potoceŋ. Yocwa obuto i nota i dyewor meno. Ka kabaka me Ai oneno man, ci en ki lwakke ducu, dano me gaŋ meno, gurune gucito gulor piny odiko con i luŋ mukemo Araba ka lweny i kom jo Icrael; ento kabaka pe ŋeyo ni jo mogo gubuto gukanne woko i ŋe gaŋ, Yocwa ki jo Icrael guporo ŋwec ki i nyimgi ni doŋ giryemogi woko, kun giriŋo gidok yo tuŋ tim, Gilwoŋo dano ducu ma i gaŋ gucokke kacel ka lubo korgi, ka guryemo kor Yocwa gucito ka mabor ki gaŋ. Dano acel mo pe odoŋ i Ai nyo i Betel ma pe okato woko i kor jo Icrael. Gubwoto dog gaŋ odoŋ ma twolo pi ryemo kor jo Icrael. Ka doŋ Rwot ociko Yocwa ni, “Tir toŋ alwiro ma tye i ciŋi-ni malo, ikem ki Ai, pien abimiyo woko i ciŋi.” Yocwa otiro toŋ alwiro ma tye i ciŋe-ni malo, okemo ki gaŋ. Oyotoyot jo ma gukanne-ni gua malo ki i kabedogi tekke Yocwa oryeyo cine malo, ci gutwarre guriŋo gudonyo i gaŋ, gumako woko, ka gurune gucwinyo mac me wano gaŋ woko. Ka jo Ai guneno yo ŋegi, ci nen, yito mac ma waŋo gaŋ tye ka duny mutiŋŋe wa malo i polo; ci ŋwec me riŋo yo tuŋŋi nyo tuŋŋi oloyogi woko, pien onoŋo jo ma guriŋo gudok yo tuŋ tim-mi gulokke gudwogo cen i kom luryem korgi. Ka doŋ Yocwa ki jo Icrael ducu guneno ni jo ma gubuto aŋec-ci doŋ gumako gaŋ woko, ki yito mac ma waŋo gaŋ bene doŋ duny cito malo, ci gudwogo cen ka neko jo Ai. Jo mukene gua ki i gaŋ gulwenyo bene i kom jo Ai; kit meno onoŋo jo Icrael gurumogi dyere, jo mukene ki yo tuŋcel ki jo mukene yo tuŋ mukene. Jo Icrael gunekogi nio ka pe gubwoto dano acel mo mudoŋ makwo nyo muriŋo obwot. Ento gumako kabaka me Ai makwo, gutero bot Yocwa. Ka jo Icrael doŋ gutyeko neko jo Ai ducu ma ginoŋogi i bar nyo i tim ka ma guryemo iye korgi-ni, nio ka gunekogi ducu ki pala lucwan, mo pe odoŋ, ci jo Icrael ducu gulokke gudok i gaŋ, guneko dano mudoŋ iye ki pala lucwan. Jo ducu ma guto i nino meno, co ki mon, guromo alip apar wiye aryo, jo Ai ducu. Yocwa pe odwoko ciŋe piny ma noŋo oryeyo otiro ki toŋ alwiro-ni, nio waŋ ma gijwero jo ma gibedo i Ai woko Liweŋ. Kono nyo lim makwo ki jami mogo ma giyako ki i gaŋ meno aye jo Icrael gutero obedo megi, macalo lok ma yam Rwot ociko ki Yocwa. Kit meno Yocwa owaoŋ Ai woko, oweko odoŋ odur ma odurre lipim matwal, kit ma tye kwede wa onyoo-ni. Odeyo kabaka me Ai, oŋabo malo i wi yat o wa otyeno. Ka ceŋ doŋ cito ka poto, Yocwa ociko dano ci gukwanyo kome woko ki i kom yat, gubolo piny i dog gaŋ ka ma gidonyo kwede i gaŋ-ŋi, ka gucano got i kome madwoŋ Likun, ma pud tye kenyo o kwede wa i kare man. Yocwa ocano keno tyer i wi got Ebal pi Rwot Lubaŋa pa Icrael, kit ma yam Moses Latic pa Rwot ociko ki jo Icrael. Olubo lok ma gicoyo i buk me cik pa Moses ni, “Wucan keno tyer ki got ma pe gipayo komgi, ma danomo pe otiŋo nyonyo i kome.” En aye gutyero iye gitum awaŋa bot Rwot, ci gutumo gityer lakwecwiny, Ci Yocwa ocoyo kopi me cik pa Moses i kom godi kunnu ki i nyim jo Icrael kun lubo kit ma yam Moses ocoyo. Ci jo Icrael ducu, lubedo ki anywalli, kacel ki ludoŋo ki ludito tic ki luŋolkopgi, gin ducu gucuŋ i get canduk pa Rwot tuŋŋi ki tuŋŋi ki i nyim ajwagi ma Lulevi ma gutiŋo canduk me gicikke pa Rwot. Nucu dano gucuŋ i nyim got Gerijim ki nucu dano gucuŋ i nyim got Ebal, kit ma Moses latic pa. Rwot okwono cikogi kwede kit ma myero gilam kwede gum i kom jo Icrael. Ka lacen Yocwa okwano lok ducu ma i cik, wa lok me lamo gum ki lok me ceno dano ducu kikore macalo yam gicoyo ducu i buk me cik, Lok acel mo pe odoŋ i kom lok ducu ma Moses yam ociko ma Yocwa pe okwano i nyim kacokke pa jo Icrael ducu, kacel ki mon ki litino ki lubedo ma gibedo i kingi. Ka luker ducu ma nene gitye loka Jordan i lobo godi ki i lobo ma i pwor ma orabo ŋet Nam Madit mukemo Lebanon, ki jo Kit, jo Amor, jo Kanaan, jo Periji, jo Kiv ki jo Jebuc guwinyo lok man, gucokke kacel pi lweny i kom Yocwa ki jo Icrael. Ento ka jo ma gibedo i Gibeon guwinyo gin ma Yocwa otimo i kom Jeriko ki i kom Ai, ci gin ki tuŋ botgi gutiyo ki ryeko mamalo mada. Guyubo peke me wot ki kicaa muti me atweya i wi kanagi, ki opiru kono ma guti woko, ma oyec atata ma gidabogi bene, ki war tyengi muti ma gidabogi, ki boŋŋi arukagi muti woko; ki pekegi ducu obedo mutwo woko, opuro woko bene, Gucito kwede bot Yocwa i gony ma i Gilgal, ci guwaco bot Yocwa ki bot jo Icrael ni, “Wan wabino ma waa ki i lobo mabor; pienno walegi ni icikke kwedwa kombeddi.” Ento jo Icrael guwaco bot jo Kiv ni, “Gwok nyo wubedo i kinwa, ci dok watwero cikke kwedwu niŋniŋ?” Guwaco bot Yocwa ni, “Wan doŋ luticci.” Ci Yocwa openyogi ni, “Wun kono wu jo kwene kaa? Dok bene wua ki kwene mono?” Gugamo doge ni, “Wan waa ki i lobo mabor mada, ladit, pi nyiŋ Rwot Lubaŋawu ma wawinyo gitito pire, ki pi gin ducu ma yam otimo i lobo Ejipt, ki pi gin ducu ma en otimo i kom luker aryo pa jo Amor ma yam gitye loka Jordan ca, Cikon kabaka me Kecbon ki Og kabaka me Bacan ma yam bedo i Acitarot. Ci ludoŋowa ki jo ducu ma gibedo i lobowa guwaco botwa ni, ‘Wumak peke me wot i ciŋwu wek wucirwatte kwedgi, ci wuwac botgi ni, Wan luticwu, wek doŋ wacikke kwedwu.’ Kwonwa ene; wakwanyo ma onoŋo pud lyet i kare ma wa-a ki pacowa me acama i yo i nino ma wacako bino botwu-ni, ento kombeddi, nen, tye ma doŋ otwo dok opuro woko bene. Wa opiru koŋo vino ducu onoŋo pud ginyen i kare ma wapiko koŋo vino i igi-ni; doŋ wunen ba ka guyec woko. Ki ginarukawa ki war mewa doŋ guti woko pi wot man mabor-ri.’ Ludito gugamo pekegi gucamo, ma pe koŋ gupenyo dog Rwot. Ci Yocwa oturo ki yubo lok me kuc i kingi, ocikke kwedgi pi wekogi makwo; lutel wi lwak bene gukwoŋo kwoŋ botgi. Ka nino okato adek nia ki i kom nino ma gucikke kwedgi, lacen guwinyo ni jo-nu gitye kacel kwedgi kun gibedo i dyegi. Jo Icrael gucako wot ci guo i gaŋgi i nino me adekke. Gunoŋo gaŋ magi, Gibeon, Kepira, Beeroth ki Kiriat-jearim, Ento jo Icrael pe doŋ gunekogi, pien lutel wi lwak onoŋo doŋ gutyeko kwoŋe botgi i nyiŋ Rwot, Lubaŋa pa Icrael. Ci lwak ducu gucako ŋur i kom lutel wi lwak-ki. Ento lutel wi lwak ducu guwaco bot lwak ducu ni, “Watyeko doŋ kwoŋo kwoŋ botgi i nyiŋ Rwot, Lubaŋa pa Icrael, pienno kombeddi pe doŋ watwero gudo komgi. Doŋ wabitimogi kit man; wabiwekogi gubed makwo wek pe wakel kiniga pa Lubaŋa i komwa pi kwoŋ ma doŋ wakwoŋo botgi-ni.” Ci guwaco bot lwak ni, “Wuwek gubed makwo, ento gibibedo lubar yen ki lutwom pii pi lwak ducu.’ Yocwa olwoŋogi ci owaco botgi ni, “Piŋo wubwola kun wuwaco ni, ‘Wan watye ka mabor kwedwu,’ kun kono wutye i dyewa? Pienno kombeddi doŋ gicenowu woko; pi kare ducu wubibedo opii, lubar yen ki lutwom pii i ot pa Lubaŋana.” Gugamo dog Yocwa ni, “Pien onoŋo doŋ gitito botwa lok me ada, ladit, ni Rwot Lubaŋa yam ociko laticce Moses pi miyowu lobo man ducu, dok ociko ni myero wujwer jo ma gibedo i lobo man woko ki i nyimwu; omiyo walworowu matek twatwal, en aye omiyo watimo man pi laro kwowa. Ci doŋ kombeddi in aye doŋ inen giri. Doŋ watye i ciŋi, in doŋ itim gin ma ineno ni ber dok oporre me atima i komwa.’ Otimogi kit man, olarogi ki i ciŋ jo Icrael, pe ginekogi. Ento cakke i nino meno Yocwa oketogi me bedo lubar yen ki lutwom pii pi lwak ki pi keno tyer pa Rwot, medde kwede o wa i kare man, i kabedo ma Rwot biyero. Adoni-jedek kabaka me Jerucalem owinyo kit ma Yocwa otyeko mako kwede Ai, ki kit ma ojwero woko liweŋ kun tiyo i kom Ai ki kabakane kit ma otyeko tiyo i kom Jeriko ki kabakane, owinyo bene kit ma jo Gibeon guyubo kwede lok me bedo ki jo Icrael ki kuc, doŋ gitye bene i kingi. Ci lworo omake matek twatwal, pien onoŋo Gibeon gaŋ madit ma rom ki gaŋ kaL kulu, dok onoŋo dit makato Ai, ki jo ma gibedo iye gubedo twoni matego. Mumiyo Adoni-jedek kabaka me Jerucalem ocwalo kwena bot Kokam kabaka me Kebron, Piram kabaka me Jarmut, Japia kabaka me Lakic ki Debir kabaka me Eglon kun wacci, “Wubin bota, wukonya, wubin walwenyu i kom jo Gibeon, pien doŋ guyubo lok me bedo ki kuc i kingi ki Yocwa: ki jo Icrael.” Ci luker pa jo Amor abic-ci gucoko monygi, gucito kacel ki lulwenygi ducu, gutoŋo gony cok ki Gibeon, gucako lweny i kome. Ci jo Gibeon gucwalo kwena bot Yocwa wa i gony ma i Gilgal kun giwaco ni, “Pe ikwany ciŋi woko ki i komwa, wan luticci; bin botwa oyotoyot wek ilarwa. Konywa pien luker ducu pa jo Amor ma gibedo i lobo godi-ni gucokke ka monyowa.” Mumiyo Yocwa oa ki i Gilgal ocito kunnu kacel ki lumony ducu ki twoni oteka lweny ducu. Ci Rwot owaco bot Yocwa ni, “Pe ilwor, pien atyeko miyogi i ciŋi. Pe tye dano mo ma bicuŋ i nyimi.” Yocwa orune obino i komgi oyotoyot, kun oa ki i Gilgal owoto kwede dyewor benebene. Ci Rwot oonyo atiba lworo i kom jo-nu i nyim jo Icrael, omiyo gunekogi ki cwar nek madit twatwal i Gibeon; guryemo korgi i yo ma dok yo tuŋ malo ma kemo Bet-koron, kun ginekogi o kwede wa i Ajeka ki i Makeda. I kare ma giriŋo i nyim jo Icrael ma gilor kwede i luŋ me Bet-koron, Rwot ocako coro lwak gweŋi madito i komgi mua ki i polo o kwede wa i Ajeka, ci merok guto mapol; pee meno oneko lwak merok mapol makato dano ma jo Icrael gunekogi ki pala lucwan. I nino ma Rwot omiyo iye jo Amor i ciŋ jo Icrael, Yocwa oloko bot Rwot i nyim jo Icrael kun wacci, “In cen, cuŋ mot i wi Gibeon, ki in dwe, cuŋ i nota me Aijalon.” Ci ceŋ ocuŋ mot atir, ki dwe bene obedo mot, nio ka jo Icrael guculo kwor i kom lumerokgi. Lok man gicoyo i buk pa Jacar. Ceŋ ocuŋ mot i dye polo, pe orune me poto woko oyot ma cok romo nino acel kulu. Nino mo yam peya obedo kit man nia wa i kare macon o kwede wa i kare man, ma Rwot owinyo iye dog dano; pien onoŋo Rwot aye obedo ka lweny pi Icrael. Lacen Yocwa ki jo Icrael ducu gudok cen i gony me Gilgal. Luker meno abic guriŋo, gukanne woko i boro ma i ŋet Makeda. Ci gitito bot Yocwa ni, “Luker abic-ci ginoŋogi gukanne i boro ma i ŋet Makeda.” Yocwa owacci, “Wulor dog boro woko ki kidi madoŋo, ci wuket dano gubed cok ka kurogi. Ento wun pe wubed kunnu abeda, wuciryem kor lumerokwu, wulweny i kom jo mudoŋ cen i ŋegi, pe dok wuwek gudony i gaŋigi; pien Rwot Lubaŋa doŋ otyeko miyogi i ciŋwu.” Ka Yocwa ki jo Icrael gutyeko neko lukworgi madwoŋ twatwal, nio ka guyweyogi woko ducu, ki jo ma gubwotte noŋo gudonyo i gaŋgi ma gicelo ki cel gogo, ci lwak ducu gudok cen bot Yocwa ma onoŋo tye i gony i Makeda; pe doŋ tye dano mo ma loko lok mo me lweny i kom jo Icrael. Yocwa dok owacci, “Doŋ wuyab dog boro woko, ci wukwany luker abic-ci ki i boro, wukelgi bota kany.” Gutimo kit meno; gukwanyo luker abic-ci ki i boro gukelogi bote, kabaka me Jerucalem, kabaka me Kebron, kabaka me Jarmut, kabaka me Lakic ki kabaka me Eglon. Ka doŋ gikwanyo luker-ru woko, gikelogi bot Yocwa, Yocwa olwoŋo jo Icrael ducu, ci owaco bot ludito mony ma yam gucito kwede ni, “Wubin cok, wuket tyenwu i ŋut luker abic-ci.” Gubino cok, guketo tyengi i ŋutgi. Yocwa dok owaco botgi ni, “Pe wulwor, pe cwinywu opoti; wubed oteka ma cwinywu nwaŋ, pien Rwot bitimo lumerokwu ducu ma wubilwenyo kwedgi kit meno.” Ka doŋ Yocwa ocobogi onekogi woko, ka oŋabo komgi malo i wi yadi abic, gulyerre i wi yadi nio wa otyeno. Ento i kare ma ceŋ doŋ mito poto, Yocwa ociko, ci gikwanyogi woko ki i wi yadi, gibologi i boro ma nene gukanne iye-ni, ci giloro dog boro woko ki godi madito ma pud gitye kunnu nio wa onyoo. Yocwa omako Makeda i nino meno, oneko jo Makeda ki kabakagi ki pala lucwan, ojwerogi woko liweŋ, pe oweko iye dano mo ma obwot; otimo kabaka me Makeda kit ma yam otimo kwede kabaka me Jeriko-ni. Yocwa oa woko ki i Makeda, okato ocito i Libna kacel ki jo Icrael ducu, olwenyo i kome, Rwot dok omiyo gaŋ, meno kacel ki kabakane i cin jo Icrael. Guneko jo Libna ducu ki pala lucwan, i kom dano ducu ma tye iye pe guweko acel mo mubwot; gutimo kabaka me kunnu kit ma nene gutimo kwede kabaka me Jeriko. Yocwa oa woko ki i Libna, okato ocito wa i Lakic kacel ki jo Icrael ducu, ci obuto orumo woko likiŋ ka olwenyo i kome. Rwot omiyo Lakic i ciŋ jo Icrael ci Yocwa omako woko i nino me aryone, oneko jo Lakic woko ki pala lucwan, dano ma tye iye ducu, kit ma nene otimo i kom Libna-ni. Koram kabaka me Gejar obino ka konyo jo Lakic, ci Yocwa olwenyo i kome, oneke kacel ki jone ducu, pe oweko dano mo obwot. Yocwa dok oa woko ki i Lakic okato ocito i Eglon kacel ki jo Icrael ducu; obuto orumo woko likiŋ ci olwenyo i kome. Gumako woko i nino meno, guneko jo Eglon ki pala lucwan, gujwero dano ducu ma gitye iye woko liweŋ, kit ma nene gutimo i kom Lakic. Yocwa dok oa woko ki i Eglon, ocito wa i Kebron kacel ki jo Icrael, olwenyo i kome, omako woko oneko jo Kebron woko ki pala lucwan kacel ki kabakane ki gaŋi ducu ma i ŋete. Guneko dano ducu ma tye iye, pe guweko mo acel obwot. Yocwa ojwero woko liweŋ kacel ki dano ‘ma gitye iye ducu, kit ma nene otimo i kom Eglon. Yocwa ki jo Icrael ducu gulokke gudwogo cen i kom Debir, gulwenyo i kome, gumako woko kacel ki kabakane ki gaŋi ma i ŋete ducu, gunekogi woko ki pala lucwan. Yocwa ojwero dano ducu ma gitye iye woko liweŋ, pe oweko iye dano acel mo mubwot. Otimo Debir ki kabakane kit ma nene otimo i kom Kebron ki i kom Libna ki kabakane. Yocwa oloyo lobo-nu ducu kit meno, lobo godi ki Negeb ki pwor got ki luŋ ki lukergi ducu, pe oweko gin mo makwo obwot. Ojwero gin makwo woko ducu liweŋ kit ma yam Rwot Lubaŋa pa Icrael ociko-ni. Yocwa oloyogi cakke i Kadec-bamea o kwede wa i Gaja, kacel ki lobo Gocen ducu o wa i Gibeon. Omako luker-ru ducu ki lobogi ducu lawaŋacel, pien Rwot Lubaŋa pa Icrael aye noŋo obedo ka lweny pi Icrael. Lacen Yocwa odok cen kacel ki jo Icrael i gony ma i Gilgal. Ka Jabin kabaka me Kajor owinyo pire, ci ocwalo kwena bot Jobab kabaka me Madon, ki bot kabaka me Cimron ki kabaka me Akicap, ki bot luker ma gitye yo tuŋ acam i lobo godi, ki i Araba i ŋet nam me Kinerot yo tun acuc, ki i lobo ma i pwor, ki i Napot-dor ma yo tun potoceŋ, bot jo Kanaan ma yo tun wokceŋ ki tun potoceŋ, ki bot jo Amor, jo Kit, jo Perej, jo Jebuc ma i lobo godi, ki jo Kiv ma i te got Kermon i lobo Mijpa. Luker meno ducu gubino ki buca monygi ducu, mony madwoŋ ma welgi rom ki kweyo me dog nam, ki lwak aguragura ki gadigadi lweny mapol. Gutoro monygi ducu kacel, ci gubino” gugony kacel i ŋet pii me Merom pi lweny i kom jo Icrael. Rwot owaco bot Yocwa ni, “Pe lworo omaki i komgi, pien diki ca onyoo noŋo doŋ amiyogi i ciŋ-jo Icrael, noŋo doŋ gunekogi woko ducu. Wubitoŋo odoŋ aguraguragi ducu, wuwaŋo gadigadi lwenygi woko ki mac.” Yocwa ocito opoto i komgi atura ki lwak monnye ducu ki i ŋet pii me Merom, olwenyo kwedgi. Ci Rwot omiyogi i ciŋjo Icrael, gulwenyo i komgi matek, guryemo korgi o kwede wa i Cidon Maditte ki i Micrepot-maim, yo tun potoceŋ ki wa i nota me Mijpe yo tuŋ wokceŋ kun ginekogi weŋ ma acel mo pe guweko obwot. Yocwa otimogi kit ma nene Rwot ocike kwede; otoŋo odoŋ aguraguragi ducu, owaŋo gadigadi lwenygi woko awaŋa. Ka man otum, Yocwa odok cen ka mako Kajor, oneko kabakane ki pala lucwan. I kare ca onoŋo Kajor aye gaŋ madit ma loyo lwak ker meno ducu. Jo Icrael guneko jo ma onoŋo gitye iye ducu ki pala lucwan, gujwerogi woko liweŋ, pe guweko gin mo makwo obwot; ci guwaŋo Kajor woko. Kit meno Yocwa omako luker meno ducu, ki gaŋigi, onekogi woko ki pala lucwan, omedo ki jwerogi woko liweŋ macalo gin ma gidyero bot Rwot, kit ma Moses latic pa Rwot onoŋo ocike kwede-ni, Ento jo Icrael pe guwaŋo gaŋi ma gigero i wi lobo ma gitoro malo macalo got-ti, kono Kajor keken aye Yocwa owaŋo woko. Jo Icrael guyako gaŋi meno ducu, gutero lim makwo ki jami ma guyako obedo megi; ento guneko dano woko ducu ki pala lucwan nio ka gutyekogi woko ducu, pe guweko gin mo makwo obwot. Kit macalo Rwot yam ociko ki laticce Moses, Moses bene ociko ki Yocwa kit meno, ci Yocwa oketo i tic; otiyo gin ducu ma yam Rwot ociko ki Moses, pe oweko cik mo odoŋ ma pe ocobo kakare. Yocwa omako lobo meno ducu kit meno, lobo godigodi, ki Negeb ducu, lobo Gocen, pwor got. Araba ki lobo godi me Icrael ki lobo pwor-gu ma i ŋete, cakke wa i kom got Kalak ka ma lobo otiŋŋe odok kwede tuŋ Ceir, o wa i Baal-gad ma i nota Lebanon ma i te got Kermon. Omako lukergi ducu, onekogi woko. Yocwa obedo ka lweny ki luker meno pi kare malac. Pe tye gaŋ mo ma oyubo lok me kuc ki jo Icrael, kono nyo jo Kiv ma gibedo i Gibeon keken; gaŋi ducu gumakogi ki lweny, pien Rwot aye obedo ka miyo cwinygi obedo tek wek gubin ka lweny i kom jo Icrael ka wek gujwergi woko liweŋ ma pe kica mako dano mo i komgi, ento ginekgi woko, mo pe odoŋ, kit ma yam Rwot ociko ki Moses. I kare meno bene Yocwa ocito ka jwero jo Anak woko ki i lobo godi; ojwerogi ki i Kebron, Debir ki Anab, i lobo godi me Juda ki me Icrael; ojwerogi woko liweŋ kacel ki gaŋigi ducu. Pe guweko jo Anak mo obwot, ki i lobo pa jo Icrael; kono nyo i Gaja keken ki i Gat ki i Acidod, kunnu aye jo Anak mogo gudoŋ iye. Yocwa omako lobo ducu kit meno, kit macalo yam Rwot oloko bot Moses; lacen omiyo bot jo Icrael me bedo ginaleyagi i kakagi, ma lubo kit ma kwir omakogi kwede, ci lobo doŋ ocako ywe, lweny doŋ obedo pe. Magi aye nyiŋ luker ma i lobo-nu ma jo Icrael guloyogi ci gumako lobogi ma i loka Jordan yo tuŋ wokceŋ, gucamo odoko megi, cakke wa i kulu Amon o kwede wa i got Kermon, kacel ki Araba ducu ma yo tuŋ potoceŋ: en aye Cikon kabaka pa jo Amor ma yam bedo i Kecbon kun loyo kwede lobo cakke wa i Aroer ma tye i dog nota me kulu Amon, dok cakke ki i dye nota-nu o kwede i kulu Jabok ma waŋ lobo pa jo Ammon, en aye nucu lobo Gilead; kacel ki Araba o wa i nam me Kinerot tuŋ wokceŋ ki tuŋ yo mukemo Bet-jecimot o wa i nam me Araba, ma en aye nam me Kado, cito kwede wa i pwor got Piciga. Ka doki Og kabaka me Bacan, en aye ŋat acel ma yam odoŋ ki i kom jo Repaim, ma yam bedo i Acitarot ki i Edrei. En yam loyo got Kermon ki Caleka ki Bacan o kwede wa i waŋ lobo pa jo Gecur ki jo Maaka, ki nucu lobo Gilead o wa i waŋ lobo pa Cikon kabaka me Kecbon. Moses ma latic pa Rwot yam oloyogi kacel ki jo Icrael; ci Moses latic pa Rwot omiyo lobogi bot jo pa Reuben ki jo pa Gad ki nucu kaka pa Manace obed megi. Magi aye luker ma i lobo-nu ma yam Yocwa ki jo Icrael guloyogi loka Jordan yo tuŋ potoceŋ, cakke ki i Baal-gad i nota me Lebanon o wa i got Kalak ka ma lobo otiŋŋe odok kwede yo tuŋ Ceir, Yocwa omiyo lobogi bot jo Icrael me bedo megi kun gipoko ma lubo kwir ma gibolo, i lobo godi, ki i lobo ma i nota, i Araba, i lobo ma i pwor got, i tim, i Negeb ki i lobo pa jo Kit, jo Amor, jo Kanaan, jo Periji, jo Kiv ki jo Jebuc; nyiŋgi ene: kabaka me Jeriko, kabaka me Ai ma tye i ŋet Betel; kabaka me Jerucalem, kabaka me Kebron; kabaka me Jarmut, kabaka me Lakic; kabaka me Eglon, kabaka me Gejer; kabaka me Debir, kabaka me Geder; kabaka me Korma, kabaka me Arad; kabaka me Libna, kabaka me Adulam; kabaka me Makeda, kabaka me Betel; kabaka me Tapua, kabaka me Keper; kabaka me Apek, kabaka me Apek ma i Caron; kabaka me Madon, kabaka me Kajor; kabaka me Cimronmeron, kabaka me Akicap; kabaka, me Taanak, kabaka me Megido; kabaka me Kedec, kabaka me Jokneam ma i Karmel; kabaka me Dor ma i Napat-dor, kabaka me Goyim ma i Galilaya; ki kabaka me Tirija; gin ducu guromo pyeradek wiye acel. I kare ma Yocwa doŋ oti woko, ma mwaka me ditte doŋ dwoŋ, Rwot owaco bote ni, “In doŋ iti woko ma mwaka me ditti doŋ dwoŋ, ento pud lobo odoŋ mabup ma myero obed mewu. Magi aye nyiŋ lobo ma pud gudoŋ: lobo pa jo Pilciti ducu ki berre, ki lobo pa jo Gecur ducu. (Lobo meno ducu gikwano ni pa jo Kanaan, cakke wa i Cikor ma i ŋet Ejipt yo tuŋ wokceŋ dok kwede i yo tuŋ acam o wa i waŋ lobo me Ekron; tye i te loc pa rwodi abic pa jo Piliciti, rwodi me Gaja, Acidod, Acikelon, Gat ki Ekron.) Pud odoŋ lobo ducu pa jo Ayi bene yo tuŋ acuc; ka doki lobo ducu pa jo Kanaan cakke ki i Me-ara pa jo Cidon cito kwede wa i Apek ma i waŋ lobo pa jo Amor; ki lobo pa jo Gebal, ki Lebanon ducu ma tuŋ kunyaŋo, cakke ki i Baal-gad ma i te got Kermon o kwede i yo ma donyo i Kamat. An ki koma abiryemo woko ki i nyim jo Icrael jo ducu ma gibedo i lobo godi, cakke ki i Lebanon o kwede i Micrepot-maim, en aye jo Cidon ducu. In aye ipok lobo-ni bot jo Icrael ki bolo kwir wek obed ginaleyagi, kit ma yam aciki kwede-ni, Kombeddi doŋ ipok lobo man obed me aleya pa kaka aboŋwen mudoŋ ki pa nucu kaka pa Manace.” Nucu kaka mukene pa jo Manace, kacel ki jo pa Reuben ki jo pa Gad onoŋo doŋ gutyeko gamo ginaleyagi ki i loka Jordan tuŋ wokceŋ, kit macalo Moses latic pa Rwot omiyo botgi, cakke ki i Aroer ma tye i dog nota me kulu Amon ki gaŋ ma tye i dye nota-nu, kacel ki abami me Medema o wa i Dibon; ki gaŋi ducu pa Cikon kabaka pa jo Amor ma yam obedo ka loc i Kecbon o kwede i waŋ apokki lobo pa jo Ammon; ki lobo Gilead bene, ki lobo pa jo Gecur ki jo Maaka, got Kermon ducu, ki lobo Bacan ducu o wa i Caleka; ki ker ducu pa Og ma gaŋ kalle yam gubedo Acitarot ki Edrei i lobo Bacan. En kene aye yam odoŋ ki i kin jo Repaim; kabaka aryonu Moses oloyogi, oryemogi woko. Ento jo Icrael pe guryemo jo Gecur ki jo Maaka; jo Gecur ki jo Maaka pud gibedo i dye jo Icrael o wa onyoo. Kaka pa Levi keken aye Moses pe omiyo botgi lobo mo me aleya; gityer ma giwaŋo ki mac bot Rwot Lubaŋa pa Icrael aye gubedo ma ka ginaleyagi, kit ma Rwot yam owaco bote-ni. Moses yam omiyo ginaleya bot kaka pa jo pa Reuben muporo dogolagi ducu. Pienno waŋ lobogi ocakke ki i Aroer ma tye i dog nota kulu Amon, ki gaŋ ma tye i dye nota-nu, okwako lobo abami ducu ma orabo ŋet Medeba; kacel ki Kecbon ki gaŋine ducu ma guryeyo wi abami kunnu, Dibon, Bamot-baal, Bet-baalmeon, Jakaj, Kedemot, Mepat, Kiriataim, Cibma, Jeret-cakar ma gigero i wi got ma i dye nota, Betpeor, pwor got Piciga, ki Bet-jecimot, meno aye gaŋi ducu ma gitye i wi abami, ki ker ducu pa Cikon kabaka pa jo Amor ma gaŋ kalle yam tye i Kecbon, ma yam Moses olwenyo kwede oloyo woko, kacel ki ludito pa jo Midian ma gubedo i lobo-nu i te loc pa Cikon; nyiŋgi aye Eyi, Rekem, Jur, Kur ki Reba, Balaam wod pa Beor bene, ma Latyet, obedo i kin jo ma jo Icrael gunekogi ki pala lucwan. Kulu Jordan obedo waŋ lobo pa jo Reuben. Meno aye obedo ginaleya pa jo pa Reuben ma oporo wel doggolagi, meno aye gaŋigi ki gaŋi matino ma i ŋetgi. Moses omiyo ginaleya bot jo pa Gad bene muporo wel doggolagi. Lobogi obedo Jajer ki gaŋi me lobo Gilead ducu, ki nucu lobo pa jo Ammon o wa i Aroer ma tye i ŋet Raba, yo tuŋ wokceŋ, cakke ki i Kecbon cito kwede wa i Ramat-mijpe ki Betonim, dok cakke ki i Makanaim cito kwede i waŋ lobo me Lo-debar, kacel ki Bet-aram, Bet-nimra, Cukot ki Japon, gaŋi ma i nota, en aye lobo mudoŋ ki i kom ker pa Cikon kabaka me Kecbon. Waŋ lobogi obedo kulu Jordan cito kwede wa i but nam me Kineret tuŋ acuc, loka Jordan tuŋ wokceŋ, Meno aye obedo ginaleya pa jo pa Gad muporo wel doggolagi, meno aye gaŋigi ki gaŋi matino ma i ŋetgi. Moses omiyo ginaleya bot nucu kaka pa. Manace bene; opoko bot nucu kaka pa Manace muporo wel doggolagi. Lobogi ocakke ki i Makanaim, okwako lobo Bacan ducu, en aye ker pa Og kabaka me Bacan ducu liweŋ, ki gaŋi me Jair ducu ma gitye i Bacan, gaŋi pyerabicel, ki nucu lobo Gilead, kacel ki Acitarot ki Edrei ma gin aye gaŋ kal pa Og i lobo Bacan. Meno ducu gipoko bot jo pa Makir wod pa Manace, pi nucu kaka pa jo Makir muporo wel doggolagi, Meno aye ginaleya ma yam Moses opoko i lobo aroo me Moab ma loka Jordan tuŋ wokceŋ mukemo Jeriko. Ento ki tun bot jo Levi Moses pe omiyogi ginaleya mo; onoŋo Rwot Lubaŋagi aye obedo ginaleyagi, kit ma yam owaco botgi-ni. Magi aye ginaleya ma jo Icrael gulimo ki i lobo Kanaan, ma jo magi aye gupoko botgi: ajwaka Eleajar, Yocwa wod pa Nun ki ludito kaka ma i odi pa kwarogi. Ginaleyagi gipoko ki bolo kwir kit ma yam Rwot ociko bot Moses ni myero gipok kwede bot kaka aboŋwen ki nucu mudoŋ-ŋi, Moses onoŋo yam opoko lobo aleya bot kaka aryo ki nucu ki i loka Jordan. Jo Levi keken aye pe gimiyo botgi lobo mo me aleyagi. Likwayo pa Yucepu onoŋo gupokke i kaka aryo, jo Manace ki jo Epraim; ento pe gimiyo dul lobo mo bot jo Levi me aleyagi; gimiyogi gaŋi me bedogi keken ki olet me kwayo dyaŋigi ki Limgi mukene makwo. Jo Icrael gupoko lobo i kingi kun gitiyo kit ma onoŋo Rwot ociko ki Moses. I kare meno jo pa Juda gubino bot Yocwa i Gilgal, ci Kaleb wod pe Jepune ma jo Keniji owaco bote ni, “In iŋeyo gin ma yam Rwot ociko bot Moses ma dano pa Lubaŋa-ni, ma ociko ki i Kadec-bamea, lok ma dok i komi ki i koma. Onoŋo doŋ mwaka me ditta romo pyeraŋwen i kare ma Moses latic pa Lubaŋa ocwala ki i Kadec-bamea pi roto lobo, ci adwogo ki lok kit ma yam tye kwede i cwinya. Utmegiwa ma yam gucito kweda-ni gumiyo cwiny lwak oŋabbe aŋaba, ento an yam alubo gin ma Rwot Lubaŋana mito ducu kikore. Moses okwoŋo kwoŋ i nino meno kun wacci, ‘Adada, lobo ma yam inyono ki tyeni bibedo ginaleyani ki pa likwayi matwal, pien ibedo ka lubo gin ma Rwot Lubaŋana omito ki cwinyi ducu.’ Kombeddi nen ka Rwot pud ogwoka atye makwo wa onyoo kit ma yam owaco-ni, odoko doŋ mwaka pyeraŋwen wiye abic a kwede wa i kare ca ma Rwot owaco iye lok man bot Moses, ma onoŋo jo Icrael pud gitye ka wirre i tim kuca; kombeddi doŋ inen, mwaka me ditta doŋ oromo pyeraboro wiye abic. Ento koma pud tek wa i kare man ma rom ki i kare ma yam Moses ocwala kwede ca; i kare-ni tek koma pud rom ki tek koma macon ca, pud aromo lweny, aromo cito ka mo-ni ci adwogo bene. Pienno miya lobo-ni ma bedo lobo godi, ma yam Rwot owaco pire i kare ca. Yam iwinyo i kare meno ni jo Anak gitye kunnu kun gitye ki cog gaŋigi madito ma girumogi woko ki cel matego; ka gwok nyo Rwot bibedo kweda ci abiryemogi woko kit macalo Rwot yam owaco.” Yocwa olamo gum i kome, ci omiyo Kebron bot Kaleb wod pa Jepune wek obed ginaleyane. Kit meno Kebron odoko ginaleya pa likwayo pa Kaleb wod pa Jepune ma jo Keniji o wa onyoo, pien obedo ka lubo gin ma Rwot Lubaŋa pa Icrael mito ducu kikore. Nyiŋ Kebron okwoŋo bedo Kiriat-arba, dok Arba meno yam obedo dano madit makato ducu ki i kin jo Anak. Ci lobo doŋ oywe, lweny obedo pe. Dul lobo ma gipoko bot kaka pa jo Juda ki bolo kwir muporo doggolagi obedo yo tuŋ acuc cok ki waŋ lobo pa jo Edom, i tim Jin ci ogik i Negeb tuŋ acuc. Waŋ lobogi yo tuŋ acuc ocakke i agikki nam me Kado ki i wen nam ma okemo tuŋ acuc; ka dok ocito kwede yo tuŋ acuc ka ma giito iye malo i Akrabim, ka okato wa i Jin, ocito kwede malo i ŋet Kadec-bamea yo tuŋ acuc, orabo ŋet Kejeron o wa i Adar, ka dok olokke odok kwede Karka. Ka dok okato ocito i Ajimon, oo i nota ora me Ejipt, ka ogik i dog nam Meno aye waŋ lobogi yo tuŋ acuc. Waŋ lobogi yo tuŋ wokceŋ aye nam me Kado o ka ma kulu Jordan gik iye. Waŋ lobo yo tuŋ acuc ocakke i wen nam ka ma Jordan ogik iye, ka dok cito Bet-kogla, kato kwede i ŋet Bet-araba yo tuŋ acam, o wa i got ma Boan wod pa Reuben ocibo. Ka dok cito malo Debir kun oa ki i nota me Akor, kemo kwede yo tuŋ acam, ka doŋ lokke ka kemo Gilgal ma i nyim kor got ka ma giito iye malo i Adumim ma i ŋet nota ora yo tuŋ acuc, Ka doŋ kato cito wa i pii me En-cemec ci gik kwede i En-rogel. Ki kunnu waŋ lobo lubo nota pa wod pa Kinom i kor got pa jo Jebuc yo tuŋ acuc (en aye Jerucalem). Ka dok waŋ lobo cito malo i wi got ma okemo nota pa Kinom yo tuŋ potoceŋ, i agikki luŋ me Repaim yo tuŋ acuc, ci medde kun a ki i wi got cito i waŋ pii me Neputoa, kato kwede wa i gaŋi ma i got Epron, ci lokke mano yo tuŋ Baala (en aye Kiriat-jearim); ka oa ki i Baala ci gono cito kun kemo tuŋ potoceŋ o kwede i got Ceir, kato kwede i kor got Jearim yo tuŋ acam (en aye Kecalon). Ka dok cito piny i Bet-cemec, kato kwede i ŋet Timna. Waŋ lobo a ki kunnu cito i kor got ma i ŋet Ekron tuŋ acam, ka dok lokke cito Cikeron, kato kwede wa i got Baala, cito i Jabneel; ka dok gik woko i dog nam Waŋ lobo yo tuŋ potoceŋ lubo dog Nam Madit ki Waŋ watte. Meno aye waŋ lobo ducu mukwako lobo pa jo Juda ma oporo doggolagi. Kaleb wod pa Jepune yam gimiyo dul lobo i kin jo pa Juda, kit ma onoŋo Rwot ociko ki Yocwa. Yocwa omiye Kiriat-arba, en aye Kebron. Arba obedo kwaro pa jo Anak. Ci Kaleb oryemo likwayo adek pa Anak ma yam tye kunnu, gin Cecai, Akiman ki Talmai. Oa ki kunnu ocito olwenyo i kom jo ma gibedo Debir. Nyiŋ Debir yam obedo Kiriat-ceper, Ci Kaleb owacci, “Ka ŋatti mo olwenyo i kom Kiriat-ceper ce oloyo, ci abimiye nyara Akaca obed dakone.” ‘Otiniel wod pa Kenaj omin Kaleb aye oloyo, ci Kaleb omiye nyare Akaca obedo dakone. Ka nyako ocito bot cware, ci odiye ni openy poto mo bot wonne. Opye piny ki i wi kanane ci Kaleb openye ni, “Imito gin aŋo?” Nyare ogamo ni, “Miya mot mo. Macalo doŋ iketa wa i lobo Negeb, dok imiya waŋ it mo bene.” Kaleb omiye Waŋ it ma tuŋ malo ki waŋ it ma tuŋ piny bene; Man aye ginaleya pa jo me kaka pa Juda ma oporo doggolagi. Gaŋigi ma obedo ka ma lobogi ogik iye yo tuŋ acuc i Negeb, ma dok yo tuŋ waŋ lobo pa jo Edom gin ene: Kabeel, Eder, Jagur, Kina, Dimona, Adada, Kedec, Kajor, Itnan, Jip, Telem, Bealot, Kajor-kadata, Keriot-kejeron, ma en aye Kajor, Amam, Cema, Molada, Kajar-gada, Kecmon, Betpelet, Kajar-cual, Beer-ceba, Bijiotia, Baala, Iyim, Ejem, Eltolad, Kecil, Korma, Jiklag, Madmana, Cancana, Lebaot, Cilim, Ain ki Rimmon; gin ducu gaŋi pyeraryo ki gaŋi matino ma i ŋetgi. Gaŋigi ma obedo i pwor gin ene: Ectaol, Jora, Acna, Janoa, Enganim, Tapua, Enam, Jarmut, Adulam, Coko, Ajeka, Caaraim, Aditaim, Gedera, ki Gederotaim; gaŋi apar wiye aŋwen ki gaŋi matino ma i ŋetgi. Jenan, Kadaca, Migdal-gad, Dilean, Mijpe, Jokteel, Lakic, Bojkat, Eglon, Kabon,” Lamam. Kitlic, Gederot, Bet-dagon, Naama ki Makeda; gaŋi apar wiye abicel ki gaŋi matino ma i ŋetgi. Libna, Eter, Acan, Ipta, Acna, Nejib, Keila, Akijib ki Mareca; gaŋi aboŋwen ki gaŋi matino ma i ŋetgi. Ekron ki gaŋi madito ki matinone ma i ŋete; dok cakke ki i Ekton cito kwede i dog nam gaŋi ducu ma gibedo yo tuŋ Acidod ki gaŋi matino ma i ŋetgi. Acidod kacel ki gaŋi madito ki matino ma i ŋete; Gaja ki gaŋi madito ki matino ma i ŋete cito wa i nota ora me Ejipt ki Nam Madit ki waŋ watte. I lobo godi, Camir, Jatir, Coko, Dana, Kiriat-cana, en aye Debir, Anab, Ectemo, Anim, Gooen, Kolon ki Gilo; gaŋi apar wiye acel ki gaŋi matino ma i netgi, Arab, Duma, Eean, Janim, Bettapua, Apeka, Kumta, Kiriat-arba, en aye Kebron, ki Jior; gaŋi aboŋwen ki gaŋi matino ma i ŋetgi. Maon, Karmel, Jip, Juta, Jejreel, Jokdeam, Janoa, Kain, Gibea ki Timna; gaŋi apar ki gaŋi matino ma i ŋetgi. Kalkul, Bet-jur, Gedor, Maarat, Bet-anot ki Eltekon; gaŋi abicel ki gaŋi matino ma i ŋetgi. Kiriat-baal, en aye Kiriat-jearim, ki Raba; gaŋi aryo ki gaŋi matino ma i ŋetgi. Ka dok i tim, Bet-araba, Midin, Cekaka, Nibcan ma gilwoŋo ni gaŋ me Kado, ki En-gedi; gaŋi abicel ki gaŋi matino ma i ŋetgi. Ento jo Jebuc, ma gin aye jo ma gibedo i Jerucalem, jo Juda pe guryemogi woko ki i lobogi, mumiyo jo Jebuc gunywako bedo kacel ki jo Juda i Jerucalem o kwede wa onyoo. Waŋ lobo pa likwayo pa Yucepu ma gipoko ki bolo kwir ocakke ki i kulu Jordan i ŋet Jeriko, oweko pii me Jeriko odoŋ tuŋ wokceŋ, ocito tuŋ tim, kun oa ki i Jeriko ocito wa i lobo godi me Betel; oa ki i Betel ocito Luj, ka okato ocito Atarot ma i lobo pa jo Arki; dok okato kwede yo tuŋ piny ma yo tuŋ potoceŋ, i lobo pa jo Japuleti, oo i lobo ma i ŋet Bet-koron Mapiny, ocito Gejer, ka ogik kwede i nam Meno-aye obedo ginaleya pa likwayo pa Yucepu, jo Manace ki jo Epraim. Lobo pa jo Epraim muporo doggolagi obedo kit man: waŋ lobogi yo tuŋ wokceŋ ocakke i Atarot-adar ocito kwede i Bet-koron Mamalo; Oa ki kunnu okemo yo tuŋ nam, oo i Mikmetat yo tuŋ acam; ka dok olokke okemo Taanat-eilo yo tuŋ wokceŋ, orabo ŋete okato kun weko ‘Janea bene yo tuŋ wokceŋ. Oa ki i ŋet Janoa ocito Atarot ki Naara, ogudo Jeriko, ocito ogik kwede i kulu Jordan Waŋ lobo dok ocakke Tapua okemo yo tuŋ potoceŋ o kwede i nota ora ma nyiŋe Kana ka ogik kwede i nam Meno aye ginaleya pa jo Epraim muporo wel doggolagi, kacel ki gaŋi mogo ma gikoyo pi jo Epraim’ i dye lobo pa jo Manace, gaŋi meno ducu ki gaŋi matino ma i ŋetgi. Ento jo Epraim pe guryemo jo Kanaan woko ma gibedo i Gejer, mumiyo jo Kanaan gibedo i dye jo Epraim o wa onyoo, ento gudoko opiigi me tiyo tic matek. Dok gibolo kwir me poko dul lobo pa jo Manace, pien en aye latin kayo pa Yucepu. Yam onoŋo gimiyo Gilead ki Bacan bot Makir won Gilead, latin kayo pa Manace, pien onoŋo en lalweny. Ka dok gibolo kwir pi poko lobo bot jo me kaka pa Manace ma pud Odoŋ muporo doggolagi ducu, doggola pa Abiejer, Kelek, Aciriel, Cekem, Keper ki Cemida; gin aye likwayo ma co pa Manace wodpa Yucepu. Jelopekad wod pa Keper onywalo anyira keken, awobene pe. Nyiŋ anyirane Makala, Noa, Kogla, Mirika ki Tirja. Gin gubino i nyim ajwaka Eleajar ki Yocwa wod pa Nun, ci guwacci, “Rwot yam ociko Moses ni myero gimi ginaleya botwa kacel ki utmegiwa.” Mumiyo Yocwa omiyogi ginaleya kacel ki omegi wongi, kit ma Rwot onoŋo ociko-ni. Kit meno jo pa Manace gugamo dul lobo apar medo i kom Gilead ki Bacan ma loka Jordan tuŋ wokceŋ, pien anyira pa Manace bene dok gulimo ginaleya kacel ki awobene. Lobo Gilead onoŋo doŋ gimiyo bot likwayo mukene pa Manace. Waŋ lobo pa jo Manace ocakke ki i Acer ocito kwede Mikmetat ma tye i ŋet Cekem yo tuŋ wokceŋ. Ka dok ocito, yo tuŋ acuc o kwede En-tapua. Lobo Tapua obedo bot jo Manace, ento gaŋ Tapua kikome ma i waŋ lobo pa jo Manace onoŋo gimiyo bot jo Epraim. Waŋ lobo dok ocito wa i nota ora Kana. Gaŋi ma tye kunnu i ŋet kulu-nu yo tuŋ acuc gimiyogi bot jo Epraim, kadi bed gitye i dye gaŋi pa jo Manace. Waŋ lobo pa jo Manace orabo ŋet kulu-nu yo tuŋ acam ocito kwede i nam Lobo ma yo tuŋ acuc obedo pa jo Epraim ki lobo ma tuŋ acam obedo pa jo Manace, kun nam aye obedo waŋ lobogi yo tuŋ potoceŋ. Lobo pa jo Manace orwatte ki lobo pa jo Acer yo tuŋ acam, ki yo tuŋ wokceŋ orwatte ki lobo pa jo Icakar. Ento i lobo pa jo Icakar ki jo Acer jo Manace gubedo ki gaŋi magi: Bet-cean ki gaŋi matino ma i ŋete, ki Ibleam ki gaŋi matino ma i ŋete; gimiyogi bene dano ma gibedo i Dor ki En-dor ki i gaŋi matino ma i netgi, ki dano ma gibedo i Taanak ki Megiddo ki i gaŋi matino ma i ŋetgi. (Me adekke obedo Napat.) Ento gamo gaŋi meno loko doko megi oloyo jo Manace woko; jo Kanaan gucerre gumedo ki bedo i lobo kunnu. Ento lacen ka jo Icrael gudoko tek, guketogi i tic muroni, pe guryemogi woko ducu liweŋ. Kaka pa Yucepu guloko bot Yocwa kun giwaco ni, “Piŋo imiyo gibolo kwir piwa tyen acel keken, mumiyo walimo dul lobo acel keken me bedo ginaleyawa? Wan watye ki lwak dano madwoŋ mada, macalo Rwot doŋ obedo ka miyowa gum o wa onyoo.” Yocwa ogamo ni, “Ka wutye ki lwak dano mapol, ci wucit i buŋa wucijwer dul lobo mo ma i lobo pa jo Perej ki jo Repaim, kit macalo lobo godi pa jo Epraim pe romowu-ni.” Ento jo me kaka pa Yucepu gugamo ni, “Lobo godi pe biromowa; dok bene jo Kanaan ma gibedo i bar gitye ki gadigadi nyonyo me lweny, Jo Kanaan ma gibedo Bet-cean ki i gaŋi matino ma i ŋete ki gin ma gibedo i nota me Jejreel bene.” Yocwa dok owaco bot likwayo pa Yucepu, jo Epraim ki jo Manace, ni, “Wun wutye ki lwak dano madwoŋ mada, dok wutye ki tek madwoŋ bene; pienno pe wubibedo ki dul lobo acel keken. Lobo godi aye bibedo mewu, kadi obedo buŋa; wubijwero woko wucamo doko mewu o kwede wa i agikki waŋ lobo; pien wubiryemo jo Kanaan woko, kadi bed gitye ki gadigadi nyonyo me lweny, dok kadi bed gin jo matego.” Lacen jo Icrael gucokke i Cilo, ci guguro kema me rwatte kunnu, Onoŋo gityeko loyo lobo woko ducu, ento pud odoŋ kaka abiro ma peya gipoko dul lobo mo botgi me aleyagi. Mumiyo Yocwa owaco bot jo Icrael ni, “Wubibedo ka juŋŋe o kwede wa awene ma pe wucito ka camo lobo ma Rwot Lubaŋa pa kwarowu doŋ omiyo botwu-ni? Wukwany dano adek ki i kaka acel acel wek gucit guwirre i lobo-ni ducu, guco lok i kome kun gipo ni bibedo ginaleya pa kakagi, ka dok gudwog bota. Myero gipok i dul abiro, kun noŋo jo Juda pud bimedde ki bedo i lobogi ma yo tuŋ acuc, jo pa Yucepu bene bibedo i megi ma yo tuŋ acam. Wubicoyo lok i kom lobo kun wunyuto kit ma lobo tye kwede i dul acel acel i kom dul abiro-nu, wukel gin ma wucoyo-ni bota, ci abibolo kwir piwu kany i nyim Rwot Lubaŋawa, Jo pa Levi pe gibilimo dul lobo mo i kinwu, pien ginaleyagi aye ticgi me bedo ajwagi pa Rwot; dok jo Gad, jo Reuben ki nucu kaka pa Manace gutyeko limo ginaleyagi loka Jordan yo tuŋ wokceŋ, ma Moses latic pa Rwot omiyo botgi.” Jo meno ma gucito ka coyo lok i kom lobo gucako wotgi, ci Yocwa ocikogi kun waco ni, “Wucit wuciwirre ka coyo kit ma lobo-ni tye kwede, ka wudwog bota; ci abibolo kwir piwu kany i Cilo ki i nyim Rwot.” Jo-nu gucito ka wirre i lobo-nu, kun gicoyo lok i kom gaŋ acel acel i buk ma lubo dul lobo abiro ma gupoko iye. Lacen gudwogo cen bot Yocwa i gony ma i Cilo, ci Yocwa obolo kwir pigi i Cilo ki i nyim Rwot. Opoko lobo bot jo Icrael ki kunnu, kun kaka acel acel limo dullobone. Dul lobo ma kwir okwanyo pi kaka pa Benjamin muporo doggolagi obedo kit man. Lobo ma gimiyo botgi obedo i kin lobo me kaka pa Juda ki me kaka pa Yucepu, Ki yo tuŋ acam waŋ lobogi ocakke i kom kulu Jordan, ka ocito malo wa i kor got ma i get Jeriko yo tug acam, ka ocito kwede obaro kin lobo godi ma yo tuŋ potoceŋ, ka ogik kwede i tim me Bet-awen. Ki kunnu waŋ lobogi ocito yo tuŋ acuc kun kemo Luj nio wa i kor got ima i jet Luj, en aye Betel, ka jog ocito Atarot-adar, kun wok ki i wi got ma tye i get Bet-koron Mapiny yo tuŋ acuc. Ka dok waŋ lobo olokke omano ŋe got ma okemo Bet-koron yo tuŋ acuc kun kato i ŋet got cito kemo yo tuŋ acuc o kwede i Kiriat-baal, ma en aye Kiriat-jearim, ma gaŋ pa kaka pa Juda, ci ogik kunnu. Meno waŋ lobo ma tun potoceŋ. Ki yo tuŋ acuc waŋ lobo ocakke ki i agikki gag Kiriat-jearim ocito kwede yo tun piny nio i waŋ pii me Neputoa; ka dok ocito i waŋ agikki got ma okemo nota pa wod pa Kinom ma tye i agikki nota me Repaim yo tuŋ acam. Ka dok ocito piny kun lubo nota pa Kinom ma i ŋet kor got pa jo Jebuc yo tuŋ acuc o kwede En-rogel. Ka dok olokke odok yo tuŋ acam wa i En-cemec, Ki kunnu dok ocito Gelilot ma i nyim kor got ka ma giito iye malo i Adumim; ka, dok cito i got ma Boan wod pa Reuben ocibo, ka okato kwede ocito yo tuŋ acam ma orabo kwede kor got me Bet-araba, ocito wa i Araba. Ka dok orabo ŋet kor got me Bet-kogla kun wok yo tuŋ acam, ocito ogik i wen nam me Kado ma i but nam yo tuŋ acam ka ma kulu Jordan gik iye-ni, Meno aye waŋ lobo yo tuŋ acuc; kulu Jordan aye obedo waŋ lobogi yo tuŋ wokceŋ, Meno aye ginaleya pa jo Benjamin ma oporo doggolagi, ki waŋ lobo ducu mukwako lobogi. Gaŋi pa jo Benjamin muporo doggolagi gin ene; Jeriko, Bet-kogla, Emek-kejij, Bet-araba. Jemaraim, Betel, Avim, Para, Opra, Keparammoni, Opni, Geba, gaŋi apar wiye aryo ki gaŋi matino ma i ŋetgi; Gibeon, Rama, Beerot, Mijpe, Kepira, Moja, Rekem, Irpeel, Tarala, Jela, Elep, Jebuc, ma en aye Jerucalem, Gibea ki Kiriat-jearim, gaŋi apar wiye aŋwen ki gaŋi matino ma i ŋetgi. Meno aye ginaleya pa jo Benjamin muporo doggolagi ducu. Kwir ma gibolo me aryone opoto i kom Cimeon, pi kaka pa jo Cimeon muporo doggolagi; ginaleyagi obedo i dye lobo ma gimiyo bot jo me kaka pa Juda. Ginaleya pa jo Cimeon obedo gaŋ magi: Beer-ceba, Ceba, Molada, Kajar-cual, Bala, Ejem, Eltolad, Betul, Korma, Jiklag, Betmarkabot, Kajar-cuca, Bet-lebaot ki Caruken, gagi apar wiye adek ki gaŋi matino ma i ŋetgi; En-rimmon, Eter, ki Acan, gaŋi aŋwen ki gaŋi matino ma i ŋetgi, kacel ki lwak pacci ducu ma orumo ŋet gaŋi-nu o kwede wa Baalat-beer, ma gilwogo bene ni Rama me Negeb. Meno aye obedo ginaleya pa jo Cimeon ma oporo doggolagi. Ginaleya pa jo Cimeon obedo dul ma gipoko ki i kom ginaleya pa jo Juda; onoŋo dullobo ma gipoko bot jo Juda obedo lac mada ma obwono komgi woko, mumiyo jo Cimeon gulimo ginaleyagi i dyegi. Kwir ma gibolo me adekke opoto i kom kaka pa jo Jabulon muporo doggolagi ducu, ci lobo me ginaleyagi oo wa i Carid. Wag lobogi owoto yo tun potoceg oo wa i Mareal, ka ogudo kwede Dabecet ki nota ora ma i ŋet Jokneam yo tun wokceŋ. Cakke ki i Carid bene waŋ lobone mukene mukemo wokceŋ ma yo tuŋ kunyaŋo ocito oo wa i waŋ lobo me Kiclot-tabor, ka ocito kwede Dabera, ka oo i Japia. Ka oa ki kunnu okato yo tuŋ wokceŋ oo kwede Gat-keper ki Etkajin, ka ocito Rimmon ci olokke odok Nea. Waŋ lobo yo tun acam ogom woko ocito Kanaton ci ogik i nota Iptakel. Medde i kom meno gubedo ki Katat, Nakalal, Cimron, Iddat ki Beterekem; gubedo ki gaŋi apar wiye aryo ki gaŋi matino ma i ŋetgi. Meno aye ginaleya pa jo Jabulon ma oporo doggolagi, gaŋi magi ki gaŋi matino ma i ŋetgi. Kwir ma gibolo me aŋwenne opoto i kom Icakar pi kaka pa jo Icakar muporo doggolagi. I lobogi onoŋo tye iye gaŋi magi: Jejreel, Kecuiot, Cunem, Kaparaim, Sion, Anakarat, Rabit, Kicion, Ebej, Remet, Enganim, En-kada, Bet-pajej. Waŋ lobogi ogudo Tabor bene, Cakajuma ki Bet-cemec, ci ogik i kulu Jordan. Gaŋigi ducu obedo apar wiye abicel, ki gaŋi matino ma i ŋetgi. Meno aye ginaleya pa jo Icakar muporo doggolagi, gaŋi magi ki gaŋi matino ma i ŋetgi. Kwir ma gibolo me abicce opoto i kom kaka pa jo Acer muporo doggolagi, Lobogi onoŋo tye iye gaŋi magi: Kelkat, Kali, Beten, Akicap, Alam melek, Amad ki Mical. Waŋ lobogi ogudo Karmel yo tuŋ potoceŋ, ki Cikor-libnat; lacen olokke odok tuŋ wokceŋ ocito Bet-dagon, ci ogudo lobo pa jo Jabulon ki nota Iptakel yo tuŋ acam i Bet-emek ki Neiel. Waŋ lobo ma yo tuŋ acam ocito Kabul, Ebron, Rekob, Kamon ki Kana ci oo wa i Cidon Maditte; lacen olokke ocito Rama oo kwede Turo ma gicelo ki cel gogo-ni, ci olokke ocito Koca ka ogik i dog nam. Gaŋigi mukene obedo Makalab, Umma, Apek ki Rekob, ducu pyeraryo ki gaŋi matino ma i ŋetgi. Meno aye ginaleya pa jo Acer muporo doggolagi, gaŋi magi ki gaŋi matino ma i ŋetgi. Kwir ma gibolo me abicel opoto i kom kaka pa jo Naputali muporo doggolagi. Waŋ lobogi ocakke i Kelep i te yat kworo ma i Jaananim owok ki i Adami-nekeb ki Jabneel, ocito wa i Lakun ka ogik kwede i kulu Jordan. Ki kunnu waŋ lobo olokke okemo yo tuŋ potoceŋ ocito Ajinot-tabor, oa ki kunnu ocito Kukok; kumeno ogudo lobo pa jo Jabulon yo tuŋ acuc, lobo pa jo Acer yo tuŋ potoceŋ ki kulu Jordan yo tuŋ wokceŋ. Gaŋigi ma gicelo ki cel gogo obedo Jidim, Jer, Kammat, Rakat, Kineret, Adama, Rama, Kajor, Kedec, Edrei, En-Kajor, Yiron, Migdalel, Korem, Bet-anat ki Bet-cemec: Gaŋigi ducu obedo apar wiye aboŋwen ki gaŋi matino ma i ŋetgi. Meno aye ginaleya pa jo Naputali ma oporo doggolagi, gaŋi magi ki gaŋi matino ma i ŋetgi. Kwir, ma gibolo me abiro opoto i kom kaka pa jo Dan muporo doggolagi. I lobo me ginaleyagi onoŋo tye iye gaŋi magi Jora, Ectaol, Ir-cemec, Caalahin, Aijalon, Itla, Elon, Timna, Ekron, Elteke, Gibeton, Baalat, Jekud, Bene-barak, Gat-rimmon, Mejarkon ki Rakon ki lobo ma i nyim Jopa. Ento ka lobo pa jo Dan orwenyo woko ki i ciŋgi, gucito gulwenyo i kom gaŋ mo ma nyiŋe Lecem, gumayo, guneko dano ma gubedo iye ducu ki pala lucwan, guloko gaŋ meno odoko megi, gucako bedo iye. Guloko nyiŋ Lecem gucako ni, Dan macalo nyiŋ kwarogi Dan. Meno aye ginaleya pa jo Dan ma oporo doggolagi, gaŋi magi ki gaŋi matino ma i ŋetgi. Ka doŋ gutyeko poko lobo i dul mapatpat me bedo ginaleyagi, jo Icrael gumiyo dul lobo bot Yocwa wod pa Nun obed ginaleyane i kingi. Gumiyo bote gaŋ ma en olego ki botgi kit ma Rwot ocikogi kwede, en aye Timnatcera ma i lobo godi pa jo Epraim. En dok ogero gaŋŋ eodoco ci obedo iye. Meno aye ginaleya ma ajwaka Eleajar ki Yocwa ki ludito kaka ma i odi pa kwarogi gupoko bot jo Icrael i Cilo i nyim Rwot i doggola kema me rwatte kun gibolo iye kwir; gutyeko poko lobo kit meno. Rwot dok owaco bot Yocwa ni, “Wac bot jo Icrael ni, ‘Wu yer gaŋi me laro lunek dano ma yam aloko pigi botwu ki i dog Moses, wek lunek ma pe guneko dano akaka, nyo ma pe gupiro pi nekone apira, guriŋ gular iye komgi. Gaŋi magi bibedo me laro lanek dano ki bot lacul kwor remo. Lanek biriŋo laro gaŋ mo i kingi, ci bicuŋ i nyim dog gaŋ ma gidonyo kwede-ni wek otit lokke bot ludoŋo me gaŋ meno. Ka gin gibi tere wa i gaŋ, gimine kabedo mo, ci en bibedo kwedgi kunnu. Ka ce wat macok pa lato ma lacul kwor remo-ni olubo kore, pe gibimiyo lanek meno i ciŋgi, pien pe oneko lawote ma onoŋo opiro pi nekone apira, dok onoŋo en yam pe tye ki kit mone mo i kome i ‘kare macon ca. En bibedo i gaŋ meno nio ka bicuŋ i nyim kacokke wek giŋol koppe, ci bikuro nio wa i kare ma ajwaka madit ma onoŋo tye ka tic i kare meno otyeko to. Lacen en twero dok i gaŋŋe wa tugi kikome, i gaŋ ma yam en oa ki iye i kare ma oriŋo olaro kome-ni.’ ” Ci jo Icrael guyero gaŋi magi, gukwerogi pi tic man: Kedec ma i Galilaya i lobo godi pa jo Naputali, Cekem i lobo godi pa jo Epraim, ki Kiriat-arba, en aye Kebron, i lobo godi pa jo Juda. Ki loka Jordan ma i ŋe Jeriko yo tuŋ wokceŋ guyero Bejer ma i tim ma bedo cerecere i lobo pa jo Reuben, Ramot ma i Gilead i lobo pa jo Gad, ki Golan ma i Bacan i lobo pa jo Manace. Meno aye gaŋi ma giyerogi pi kaka pa jo Icrael ducu kacel ki welo ma lubedo i kingi, wek lanek dano ma pe oneko akaka oriŋ olar iye kome, wek pe oto i ciŋ lacul kwor remo nio waŋ ma ocuŋ i nyim kacokke. Ludito wi kaka pa kwaro pa Lulevi gubino bot ajwaka Eleajai ki Yocwa wod pa Nun ki ludito wi kaka pa jo Icrael mukene ducu. Gubino botgi i Cilo i lobo Kanaan, guwaco botgi ni, “Rwot yam ociko ki i dog Moses ni myero gimi botwa gaŋi me bedowa kacel ki lobo ma i ŋetgi me olet-gu pi kwayo limwa makwo.” Ci jo Icrael gulubo cik pa Rwot, gumiyo gaŋi magi bot Lulevi kacel ki lobo me oletgi kun gikwanyo ki i kom ginaleyagi: Kwir okwoŋo poto i kom jo Kokat ci Lulevi ma likwayo pa ajwaka Aron gulimo gaŋi apar wiye adek ki bot jo Juda, jo Cimeon ki jo Benjamin kun onoŋo giyerogi ki bolo kwir. Jo Kokat mudoŋŋe gulimo gaŋi apar ki bot jo Epraim, jo Dan ki nucu kaka pa jo Manace muporo doggolagi. Jo Gercon gulimo gaŋi apar wiye adek ki bot jo Icakar, jo Acer, jo Naputali ki nucu kaka pa Manace ma i Bacan muporo doggolagi. Jo Merari gulimo gaŋi apar wiye aryo ki bot jo Reuben, jo Gad ki jo Jabulon muporo doggolagi. Gaŋi magi ki lobo olet ma i ŋetgi jo Icrael gumiyo bot jo Levi kun gibolo kwir, kit macalo Rwot yam ociko ki i dog Moses. Gaŋi ma gulimo ki bot kaka pa Juda ki Cimeon, gaŋi ma gimiyo bot likwayo pa Aron, ma gin aye doggola acel i kin jo Kokat ma Lulevi-ni nyiŋgi ene. Kwir okwoŋo poto i komgi ci gimiyo botgi Kiriat-arba, en aye Kebron, ma i lobo godi me Juda, kacel ki lobo olet ma orume dyere. Arba obedo kwaro pa jo Anak. Ento potti ducu ma i ŋet gaŋ meno, ki gaŋi matino ma i ŋete yam onoŋo gimiyogi woko bot Kaleb wod pa Jepune me bedo mere. Gimiyo Kebron ki lobo olet ma i ŋete bot likwayo pa ajwaka Aron, en aye gagŋ me laro lunek dano, Libna ki lobo olette, Jatir ki olette, Ectemoa ki olette, Kolon ki olette, Debir ki olette, Ain ki olette, Juta ki olette, Bet-cemec ki olette, gaŋi aboŋwen mua ki bot kaka aryo-nu. Ka doki gimiyo botgi gaŋi magi mua ki bot jo Benjamin: Gibeon, Geba, Anatot ki Almon, gaŋi aŋwen ki olet ma i ŋetgi. Gaŋi ducu ma gimiyo bot likwayo pa ajwaka Aron gubedo apar wiye adek, kun gaŋ acel acel tye ki lobo me olet i ŋete. Lulevi me doggola mogo pa jo Kokat mudoŋ gulimo gaŋi magi ma i lobo pa jo Epraim: Cekem, gaŋ me laro lunek dano ma i lobo godi me Epraim, ki olette, Gejer ki olette, Kibjaim ki olette, Bet-koron ki olette, gaŋi aŋwen, Ki bot kaka pa Dan gulimo Elteke, Gibeton, Aijalon ki Gat-rimmon, gagi aŋwen ki olet ma i ŋetgi. Ki bot nucu kaka pa Manace gulimo Taanak ki Gat-rimmon ki olet ma i ŋetgi. Kumeno gaŋi ducu ma gimiyo bot doggola mukene pa jo Kokat gubedo apar, kun gaŋ acel acel tye ki lobo olet i ŋete, Jo Gercon ma doggola mukene pa Lulevi gulimo gaŋi aryo ki bot nucu kaka pa Manace, gin aye Golan ma i Bacan ma gaŋ me laro lunek dano ki olet ma i ŋete, ki Be-eciterot ki olette. Ki bot jo Icakar gulimo Kicion, Oaberat, Jarmut ki En-ganim, gaŋi aŋwen ki olet ma i netgi. Ki bot jo Acer gulimo Mical, Abdon, Kelkat ki Rekob, gaŋi aŋwen ki olet ma i ŋeti, Ki bot jo Naputali gulimo Kedec i Galilaya, gaŋ me laro lunek dano, Kamot-dor ki Kartan, gaŋi adek ki olet ma i ŋetgi. Kumeno gaŋi ducu ma gimiyo bot doggola mapatpat pa jo Gercon obedo apar wiye adek, kun gaŋ acel acel tye ki lobo olet i ŋete. Lulevi mukene, ma gin aye doggola pa jo Merari, gulimo ki bot jo Jabulon Jokneam, Karta, Dimna ki Nakalal, gaŋi aŋwen ki olet ma i ŋetgi, Ki bot jo Reuben gulimo Bejer, Jakaj, Kedemot ki Mepat, gaŋi aŋwen ki olet ma i netgi. Ki bot jo Gad gulimo Ramot ma i Gilead ma gaŋ me laro lunek dano, Makanaim, Kecbon ki Jajer, gaŋi aŋwen ki olet ma i ŋetgi. Gaŋi ducu ma gimiyo bot doggola mapatpat pa jo Merari, en aye bot doggola pa Lulevi mudoŋŋe, obedo apar wiye aryo. Gaŋi ducu pa Lulevi ma gitye i dye lobo pa jo Icrael gubedo pyeraŋwen wiye aboro, ki oletgi. Gaŋ acel acel onoŋo tye ki lobo olet ma orume dyere; gaŋigi ducu gubedo kit meno. Kit meno Rwot omiyo bot jo Icrael lobo ducu ma yam okwoŋo pire ni ebimiyo bot kwarogi-ni; gucamo lobone kit meno, ci gubedo iye, Rwot omiyogi yweyo i kabedogi ducu kit ma yam okwoŋo bot kwarogi; pe lamerokgi acel mo ocun i nyimgi, pien Rwot onoŋo omiyo lumerokgi ducu i ciŋgi. Lok mabeco ducu ma yam onoŋo Rwot ociko ki jo Icrael ocobbe kakare, pe onen lok mo ma pe otimme. Lacen Yocwa olwoŋo jo Reuben, jo Gad ki nucu kaka pa Manace, ci owaco botgi ni, “Wutyeko cobo gin ducu ma yam Moses latic pa Rwot ocikowu kwede, dok wubedo ka woro doga bene i lok ducu ma acikowu kwede. Pe wubwoto utmegiwu i lwak kare man ducu o kwede wa onyoo, ento wuketo cwinywu ka lubo lok ma Rwot Lubaŋawu ocikowu kwede. Kombeddi Rwot Lubaŋawu doŋ otyeko miyo yweyo bot utmegiwu kit ma yam ocikogi kwede-ni; pienno wun doŋ wulokke wudok cen i pacowu ka ma lobo ma yam wucamo odoko mewu tye iye, i lobo ma yam Moses latic pa Rwot omiyo botwu loka Jordan. Ber wugwokke ka lubo cik ki lok ducu ma yam Moses latic pa Rwot ocikowu kwede, ni, wumar Rwot Lubaŋawu, kun wulubo yone ducu ki lok ma en ociko, wumok i kome Iikiŋ kun wutiyo bote ki cwinywu ducu ki tipo komwu ducu.” Kit meno Yocwa ocikogi kun lamo gum i komgi, ka ocwalogi kwede tugi, ci gudok i pacogi. Onoŋo Moses yam omiyo dul lobo bot nucu kaka pa Manace i Bacan, ento nucu kakane mukene Yocwa aye omiyo ‘lobo botgi ma ka ŋet utmegigi ma i lobo ma loka Jordan yo tuŋ potoceŋ, I kare ma Yocwa ocwalogi i pacogi, olamo gum i komgi, kun waco botgi ni, “Doŋ wudok cen i pacowu ki lonyo madwoŋ, ki lwak lim makwo mapol, ki ryal, jabu, mola, nyonyo ki boŋŋi-gu, wucit wupok jami ma wuyako ki bot lukworwu i kinwu ki utmegiwu.” Kit meno jo Reuben, jo Gad ki nucu kaka pa Manace gucako dok i pacogi; gupokke woko ki jo Icrael i Cilo ma tye i lobo Kanaan, gucito i lobo Gilead, en aye lobogi kikome ma yam gulimo, kit ma Rwot onoŋo ociko ki Moses. Ka guo i Gelilot i ŋet kulu Jordan, ma tye i lobo Kanaan, ci jo Reuben, jo Gad ki nucu kaka pa Manace gucano keno tyer i ŋet Jordan, keno tyer madit mada. Ci jo Icrael guwinyo lok ni, “Jo Reuben, jo Gad ki nucu kaka pa Manace gucano keno tyer i waŋ lobo me Kanaan, i Gelilot ma i ŋet Jordan mukemo lobo pa jo Icrael.” Ka jo Icrael guwinyo pire, ci lwak jo Icrael ducu gucokke i Cilo ka yubo lweny i komgi. Jo Icrael gucwalo Finekaci wod pa ajwaka Eleajar bot jo Reuben, jo Gad ki nucu kaka pa Manace i lobo Gilead, kacel ki rwodi apar. Gucwalo rwot acel ki i kaka acel acel pa jo Icrael, kun rwot acel acel obedo ladit ma loyo doggola mo i kin kaka pa jo Icrael. Ka doŋ guo bot jo Reuben, jo Gad ki nucu kaka pa Manace ma i lobo Gilead, ci guwaco botgi ni, “Lwak pa Rwot ducu guwaco botwu kit man ni, ‘Man kit robo dog aŋo ma wutimo i kom Lubaŋa pa Icrael-li, mumiyo wulokke woko wuweko lubo kor Rwot, wucano keno tyer piwu kenwu, wucako jemo woko i kom Rwot? Bal ma otimme i Peor pud pe oromowu ce, ma yam two gemo opoto pire i kom lwak pa Rwot? Pud peya walonnye i kom bal meno wa onyoo, ci dok pud wumedde ki weko lubo kor Rwot i kare man? Ka ce dok wujemo woko i kom Rwot tin, ci diki kiniga bimake i kom lwak jo Icrael ducu. Ento koni ka lobowu obedo keni, ci wudok cen i lobo pa Rwot ka ma kema pa Rwot ocuŋ iye-ni, wuyer dul lobo mo i kinwa kunnu wek wubed iye; ento pe dok wujem i kom Rwot aye, nyo pe wulokwa wadok lujemo pi cano keno tyer mukene ma dok pat ki keno tyer pa Rwot Lubaŋawa kikome. Akan wod pa Jera yam pe oŋayo waŋ Rwot ce pi lok ma dok i kom jami ma onoŋo gidyerogi woko bot Rwot, ci omiyo akemo opoto i kom lwak jo Icrael ducu? Dok en pe oto kene pi ballenu.’ ” Jo Reuben jo Gad ki nucu kaka ka Manace gudok iye bot ludito wi doggola pa jo Icrael ni, “Rwot aye Lubaŋa ma loyo lubaŋa ducu! Rwot aye Lubaŋa ma loyo lubaŋa ducu! En ŋeyo, dok en weko Icrael bene ŋeyo! Ka ce man otimme pi jemo nyo pi ŋayo waŋ Rwot, ci tin pe wubwotwa makwo. Ka ce wacano keno tyer pi weko lubo kor Rwot, nyo ka ce wacano pi tyero iye gitum awaŋa, nyo gityer me moko kwon, nyo gityer lakwecwiny, ci wek Rwot kikome aye ocul kwor i komwa. Pe kumeno gire, ento wan onoŋo watimo pi lworo pi kare ma bibino anyim, pien likwayowu gibiwaco bot likwayowa ni, ‘Wun wuwaco ni Rwot Lubaŋa pa Icrael obedo Lubaŋawu niŋniŋ? Rwot doŋ otyeko keto kulu Jordan obedo waŋ lobo i kin wan ki wun; pienno wun jo Reuben ki jo Gad pe wutye ki waŋ pok mo i kom Rwot.’ Lok macalo meno bimiyo likwayowu gijuko likwayowa, ci miyo giweko woro Rwot woko. En “aye lok mumiyo wawaco ni, ‘Wek wacanu keno tyer, pe pi gitum awaŋa nyo pi tumo iye gitum mo, ento watim me bedo caden i kin wan ki wun, ki i kin yalwak ma bilubowa i anyim, ma nyuto ni wan bene waworo Rwot ki gitum awaŋa ki gitum mukene ki gityer lakwecwiny ina watyero i nyime; wek likwayowu pe guwac bot likwayowa i kare ma bibino anyim ni, “Wun pe wutye ki waŋ pok mo i kom Rwot.?” Onoŋo watamo ni, ka giloko botwa kit meno, nyo bot likwayowa i kare me anyim, ci wabidok iye ni, ‘Nen kit keno tyer ma yam kwarowa gucano muporo keno tyer pa Rwot kikome. Pe gucano pi gitum awaŋa nyo pi tyero kit gitum mo, ento me bedo caden i kin wan ki wun.’ Wanonoŋo pe wayubbe pi jemo i kom Rwot wacel, nyo me weko lubo kor Rwot i kare man pi cano keno tyer me tumo gitum awaŋa, nyo me tyero gityer me moko kwon nyo kadi kit gitum mo me ameda i kom keno tyer pa Rwot Lubaŋawa ma i nyim kemane-ni!” Ka ajwaka Finekaci ki rwodi ma luwi lwak, ki ludito kaka ma i Icrael ma onoŋo gitye kacel kwede guwinyo lok pa jo Reuben, jo Gad ki jo Manace ma gudbk iye-ni, ci cwinygi obedo yom mada. Finekaci wod pa ajwaka Eleajar owaco bot jo Reuben, jo Gad ki jo Manace ni, “Tin doŋ waniaŋ atir ni, Rwot tye i dyewa, pien wun pe wutimo man pi robo dog Rwot; kombeddi doŋ wutyeko laro jo Icrael woko ki i cin Rwot.” Lacen Finekaci wod pa ajwaka Eleajar ki rwodi ducu gua ki bot jo Reuben ki jo Gad ma i lobo Gilead, gudok i Kanaan bot jo Icrael ma tye kunnu, ci gudwoko lok botgi. Lok ma gudwoko botgi oyomo cwiny jo Icrael mada, ci gupwoyo Lubaŋa, pe dok gumedde ki loko me cito ka lweny i komgi nyo pi balo lobo ma jo Reuben ki jo Gad gibedo iye-ni woko. Jo Reuben ki jo Gad gucako nyiŋ keno tyer ma gucano ni, Caden, pien guwaco ni, “Man aye bedo me caden i kin wan ki wun ma moko ni, Rwot en aye Lubaŋa.” Ka kare okato malac ma Rwot doŋ otyeko miyo yweyo bot jo Icrael i kom lumerokgi ducu ma yam orumogi dyere-ni, onoŋo Yocwa doŋ oti woko, mwaka me ditte doŋ dwoŋ. Olwoŋo jo Icrael ducu, ki ludoŋogi, ludito wigi, luŋolkopgi ki ludito ticgi ducu, ci owaco botgi ni, “Ao kombeddi doŋ ati woko, mwaka me ditta doŋ dwoŋ. Wun doŋ wutyeko neno gin ducu ma Rwot Lubaŋawu otiyo piwu i kom rok magi ducu, pien Rwot Lubaŋawu aye obedo ka lweny i komgi piwu, Nen ka doŋ atyeko poko rok mapatpat ma, pud gudoŋ i kinwu me bedo ginaleya pa kakawu, kacel ki rok ducu ma yam doŋ aloyogi woko, cakke ki i Jordan o kwede wa i Nam Madit ma yo tuŋ potoceŋ. Rwot Lubaŋawu bidirogi woko cen kun ryemogi woko ki i nyimwu, ci wubicamo lobogi kit ma yam Rwot Lubaŋawu ocikke kwede botwu-ni, Pienno wucuŋ matek kun, wulubo gin ducu ma gicoyo i buk me cik pa Moses, pe wuŋak wudok yo tuŋ acuc nyo yo tuŋ acam. Pe wunyebbe ki bedo kacel ki lurok ma pud gudoŋ i kinwu-ni, pe wutuc nyiŋ Iubanagi, pe wukwoŋ kwoŋ mo ki nyiŋ lubaŋagi, pe wuworgi, pe wuryebbe i nyimgi, Ento wumok likiŋ i kom Rwot Lubaŋawu kit ma wubedo ka timone o kwede wa onyoo-ni. Rwot doŋ otyeko ryemo rok madito ki matego woko ki i nyimwu; ŋat mo peya onen ma obedo ki twero me cuŋ i nyimwu. Dano acel mo ki i kinwu romo ryemo jo alip kulu, pien Rwot Lubaŋawu aye tye ka lweny piwu kit ma yam owaco botwu-ni. Doŋ ba, myero wugwokke matek, wunen ni wumaro Rwot Lubaŋawu; pien ka wudok cen kun wuribbe ki lurok ma gudoŋ i kinwu, ka ce wucako nyomme kwedgi kun wunyomo anyiragi ka dok gin bene ginyomo anyirawu, ci wuŋe atir ni, Rwot Lubaŋawu pe dok bimedde ki ryemo lumerokwu woko ki i nyimwu; ento gin aye gibidoko macalo owic ki layutta me cikowu, ki odoo gayi me jwato pyerwu ki okuto me cobo waŋwu, nio ka wubito wutum woko ki i lobo man maber ma Rwot Lubaŋawu doŋ omiyo botwu-ni, “Kombeddi an doŋ atye cok ka lubo yo ma gin me wi lobo ducu mol ci to iye-ni, wun bene wuŋeyo ki i cwinywu wa ki tipo komwu ducu ni, gin mabeco ducu ma yam Rwot Lubaŋawu ociko piwu gin ducu gucobbe kakare, pe tye acel mo ma pe otimme, Ento kit ma yam Rwot Lubaŋawu ocobo lok ducu mabeco ma yam ociko piwu-ni, kit meno bene Rwot dok bikelo gin ducu maraco i komwu, nio ka, bityekowu woko ki i lobo man maber ma en omiyo botwu-ni, ka ce wuturo gicikke pa Rwot Lubaŋawu ma yam ocikowu kwede kun wucito ka woro lubaŋa mogo mukene, wuryebbe i nyimgi. Kiniga bimako Rwot i komwu, ci wubito wutum woko oyotoyot ki i lobo man maber ma en omiyo botwu.” Lacen Yocwa dok ocoko kaka pa jo Icrael ducu kacel i Cekem; olwoŋo ludoŋo ki luwi lwak, luŋolkop ki ludito tic ma i Icrael ducu, ci gubino guryeyo i nyim Lubaŋa. Yocwa owaco bot lwak ducu ni, “Rwot Lubaŋa pa Icrael owaco kuman ni, ‘Kwarowu yam con gubedo i lobo ma loka kulu Euprate, ci gubedo ka woro lubaŋa mogo mukene. Ŋat acel i kingi obedo Tera ma won Abraim ki Nakor. An yam akwanyo kwarowu Abraim woko ki i lobo ma loka kulu Euprate, ci atelo wiye awok kwede i lobo Kanaan ducu, dok amiyo likwaye gunya mapol. Amiyo bote Icaka, dok amiyo bot Icaka litinone Yakobo ki Ecau. Amiyo lobo godi me Ceir bot Ecau me bedo mere, ento Yakobo ki litinone gucito megi wa i Ejipt, Ka dok acwalo Moses ki Aron, ci ayelo jo Ejipt ki gemo mapol ki kit gin ducu ma atimo i kingi; ka lacen akwanyowu woko ki kunnu. Akwanyo kwarowu woko ki i Ejipt ci wuo wa i dog nam: io Ejipt guryemo kor kwarowu ki gadigadi lweny ki aguragura o kwede wa i dog Nam Makwar. Ka kwarowu gukok bot Rwot, en oketo piny macol i kin wun ki jo Ejipt, ka dok odwoko nam cen i komgi ci omwonyogi woko ducu. Yam wuneno ki waŋwu gin ma atimo i kom jo Ejipt, dok wubedo i tim pi lwak kare malac, “‘Ka dok akelowu i lobo pa jo Amor ma gubedo loka Jordan tuŋcel. Gulwenyo kwedwu ento amiyogi i ciŋwu; wumako lobogi wucamo odoko mewu, ci atyekogi woko ki i nyimwu. I ŋe meno Balak wod pa Jipor, kabaka me Moab, otiŋŋe olwenyo i kom jo Icrael; ka dok ocwalo kwena olwoŋo Balaam wod pa Beor ni obin wek ocenwu woko, ento an pe awinyo dog Balaam, mumiyo en dok olamo gum i komwu; kit meno alarowu woko ki i ciŋ Balak. Wukato loka Jordan, wubino i Jeriko, ci jo Jeriko gulwenyo i komwu, kacel ki jo Amor, jo Periji, jo Kanaan, jo Kit, jo Girgac, jo Kiv ki jo Jebuc, ento amiyogi ducu i ciŋwu. I kare meno acoro pino jobi i nyimwu pi ryemo luker pa jo Amor aryo ducu woko ki i nyimwu; pe wun aye wuloyogi ki pala lucwanwu nyo atumwu, Amiyo botwu lobo ma yam pe wutiyo iye gin mo, ki gaŋi ma yam pe wun aye wugerogi, ci wubedo iye; wutye ka camo nyig olok ki nyig jeituni ma yam pe wupitogi.’ “Pi meno doŋ wulwor Rwot, wuti bote ki lencwiny ki gen madwoŋ, Wubol woko lwak lubaŋa ma yam kwarowu gubedo ka worogi i lobo ma loka kulu Euprate ki i lobo Ejipt wek doŋ wuwor Rwot. Ka pe wumito woro Rwot, ci tin doŋ wuyer ŋat ma wubitiyo bote, ka nyo wubiyero lubaŋa ma yam kwarowu gutiyo botgi i lobo ma loka kulu Euprate, nyo lubaŋa pa jo Amor ma wubedo i lobogi-ni; ento an gira ki jo ma i oda ducu wabitiyo bot Rwot.” Lwak gudok iye ni, “Wan pe wabedo ki tam mo me bwoto Rwot pi tiyo bot lubaŋa mukene, pien Rwot Lubaŋawa aye yam okwanyowa kacel ki kwarowa ki i lobo Ejipt, ki i ot kol me bedo opii. Otiyo lwak lanyut madito kun wan waneno, ogwokowa i yo ducu ma wawoto iye ki i kom rok ducu ma wakato wawok i kingi-ni, Rwot oryemo rok meno ducu woko ki i nyimwa, gin jo Amor ma yam gubedo i lobo-ni, mumiyo wan wabitiyo bot Rwot, pien en aye Lubaŋawa.” Ento Yocwa dok owaco bot lwak ni, “Pe wutwero tiyo bot Rwot, pien en Lubaŋa maleŋ, en Lubaŋa ma lanyeko. Pe bitimowu kica i kom tim aranyiwu ki balwu, Ka ce wubwoto Rwot kun wutiyo bot lubaŋa mogo pa lurok, ci en bilokke ka timowu marac ci tyekowu woko, kadi bed yam koŋ onoŋo otimowu maber.” Lwak gugamo dog Yocwa ni, “Pe kumeno; wan giwa wabitiyo bot Rwot.” Yocwa dok owaco bot lwak ni, “Wun aye wudoko caden i komwu kekenwu, pien doŋ wutyeko yero Rwot kun wuwacci wubitiyo bote keken.” Lwak gugamo ni, “Wan aye caden giwa.” Yocwa owaco botgi ni, “Wubol lubaŋa pa lurok ducu ma gitye i kinwu woko, wek wulok cwinywu odwog i kom Rwot Lubaŋa pa Icrael.” Lwak guwaco bot Yocwa ni, “Wabitiyo bot Rwot Lubaŋawa, dok wabiworo doge.” Kit meno Yocwa oketo gicikke ki lwak i nino meno, ci omiyo botgi cik mapol i Cekem i nino meno kun nyuto kit ma myero gulub ki cik mapatpat ducu. Yocwa ocoyo lok magi ducu i buk me cik pa Lubaŋa; ci okwanyo got madit, ocibo ocuŋ kunnu i te yat kworo ma i kabedo maleŋ pa Rwot. Yocwa dok owaco bot lwak ducu ni, “Nenu, got man aye bibedo caden i komwa, pien otyeko winyo lok pa Rwot ducu ma en owaco botwa; mumiyo en bedo lacaden i komwu wek pe dok wukwer Lubaŋawu.” Ka meno otum Yocwa ociko lwak ci guket woko kun ŋat acel acel odok i lobo ma oleyo-ni, Ki i ŋe lok meno ducu Yocwa wod pa Nun ma latic pa Rwot oto woko ma onoŋo mwaka me ditte oromo miya acel ki apar. Guyiko kome i lobone kikome, i ginaleya ma yam gimiyo bote, i Timnat-cera i lobo godi pa jo Epraim i ŋet got Gaac, yo tuŋ acam. Jo Icrael gutiyo bot Rwot i kare pa Yocwa ducu ki i kare pa ludoŋo ducu ma yam gudoŋ ka Yocwa doŋ oto, gin jo ma guŋeyo tic ducu ma yam Rwot otiyo pi jo Icrael. Cogo kom Yucepu ma onoŋo jo Icrael yam gukelo ki i Ejipt giyiko i Cekem i dullobo ma yam Yakobo owilo ki bot awobe pa Kamor ma won Cekem; owilo ki dullim miya acel. Dul lobo-nu odoko ginaleya pa likwayo pa Yucepu matwal’ Ka Eleajar wod pa Aron bene oto, ci giyiko kome i Gibea, i gaŋ pa wode Finekaci ma yam onoŋo gimiyo bote i lobo godi pa jo Epraim. Ka Yocwa doŋ oto, jo Icrael gucako penyo dog Rwot ni, “Aŋa ma bikwoŋo cito piwa ka lweny i kom jo Kanaan?” Ci Rwot ogamo ni, “Jo Juda aye gibicito; nen, atyeko miyo lobo-ni i ciŋgi.” Jo Juda guwaco bot utmegigi jo Cimeon ni, “Wubin wunywak kwedwa wot i lobo ma gipoko botwa ki kwir-ri, wek walweny i kom jo Kanaan, Wan bene wabinywako kwedwu wot kit meno i lobo ma gipoko botwu,” Mumiyo jo Cimeon gudto kwedgi. Ka jo Juda gucito kunnu, Rwot omiyo jo Kanaan ki jo Periji i ciŋgi, ci guloyo dano alip apar i Bejek, Gurwatte ki Adoni-bejek kabaka me Bejek i gaŋŋe kunnu, gulwenyo i kome, ci guloyo jo Kanaan ki jo Periji. Adoni bejek oriŋo woko, ento gulubo kore, gumake, guŋolo twoni ciŋe woko, ki twoni tyene, Adoni-bejek owacci, “Yam luker pyerabiro ma giŋolo twoni ciŋgi ki twoni tyengi gubedo ka coko ŋide cam i te mejana; kit ma yam atimo i komgi-ni, Lubaŋa oculla kit meno.” Gitere i Jerucalem, ci oto kunnu. Ka dok jo Juda gulwenyo i kom Jerucalem, gumako woko, guneko jo ma tye iye ki pala lucwan, ka guwaŋo woko ki mac. Ka lacen jo Juda dok gucito ka lweny i kom jo Kanaan ma gibedo i lobo godi, ki i Negeb, ki i pwor got. Jo Juda gucito bene ka lweny i kom jo Kanaan ma gibedo i Kebron, ci guloyo Cecai, Akiman ki Talmai. Gaŋ ma koni gilwoŋo ni Kebron, yam nyiŋe obedo Kiriat-arba. Ka gua ki kunnu, gucito ka lweny i kom jo ma gibedo i Debir. Nyiŋ Debir yam obedo Kiriat-ceper. Ci Kaleb owacci, “Ka ŋatti mo olwenyo i kom Kiriat-ceper ce omako, ci abimiye nyara Akaca obed dakone.” Otiniel wod pa Kenaj, ma omin Kaleb matidine, aye omako, ci Kaleb omiye nyare Akaca obedo dakone. Ka nyako ocito bot cware, ci odiye ni openy poto mo bot wonne. Opye piny ki i wi kanane ci Kaleb openye ni, “Imito gin aŋo?” Nyare ogamo ni, “Miya mot mo; macalo doŋ iketa wa i lobo Negeb, dok imiya waŋ it mo bene.” Kaleb omiye waŋ it ma tuŋ malo ki waŋ it ma tuŋ piny bene, Likwayo pa jo Keni, ma jo pa oc Moses, gucito kacel ki jo Juda kun gia ki i gaŋ Otit, gucito wa i tim me lobo Juda ma tye i Negeb ma cok ki Arad; gucito, gubedo kacel ki jo Amalek. Jo Juda gucito kacel ki utmegigi jo Cimeon, ci guloyo jo Kanaan ma gibedo i Jepat, Gudyero gaŋ meno i ciŋ Rwot, gujwero woko; mumiyo nyiŋ gaŋ meno gilwoŋo ni Korma. Juda dok omako Gaja ki lobo ma i ŋete, Acikelon ki lobo ma i ŋete ki Ekron ki lobo ma i ŋete, Rwot obedo ki Juda, mumiyo ocamo lo bo godi odoko mere; ento ryemo jo ma gibedo i bar oloye, pien onoŋo gitye ki gadigadi lweny me nyonyo. Kebron gimiyo bot Kaleb, kit ma yam Moses ociko-ni; en oryemo likwayo pa Anak adek woko ki kunnu. Ento jo Benjamin pe guryemo jo Jebuc ma gibedo i Jerucalem, mumiyo jo Jebuc gunywako bedo i Jerucalem kacel ki jo Benjamin o kwede wa onyoo. Jo me ot pa Yucepu bene gucito ka lweny i kom Betel, ci Rwot obedo kwedgi. Gucwalo lurot-piny i Betel, meno aye gaŋ ma yam gilwoŋo ni Luj. Ka lurot-piny guneno dano mo ka bino kun oa ki i gaŋ, guwacce ni, “Nyut botwa yo me donyo i gaŋ ba, ci wabitimi maber.” En onyuto botgi yo me donyo i gaŋ, ci guneko dano ina gitye iye ki pala lucwan; ento guweko laco meno ki ludoggolane gucito. Dano meno ocito i lobo pa jo Kit, ogero iye gaŋ, ocako nyiŋe ni Luj; meno aye obedo nyiŋe o kwede wa onyoo. Jo Manace pe guryemo jo ma gibedo i Bet-cean ki i gaŋi matino ma i ŋete, kadi jo ma gibedo i Taanak, Dor, Ibleam ki Megido ki i gaŋi matino ma i netgi; ento jo Kanaan gucerre ci gubedo i lobo-nu. Ka jo Icrael gudoko tek, ci gudiyo gin jo Kanaan ki tic muroni, ento pe guryemogi woko ducu. Jo Epraim pe guryemo jo Kanaan ma gubedo i Gejer, ento jo Kanaan gubedo i kingi i Gejer. Jo Jabulon pe guryemo jo ma gibedo i Kitron, kadi jo ma gibedo i Nakalol; ento jo Kanaan gubedo i kingi, ci guketogi i tic muroni. Jo Acer pe guryemo jo ma gibedo i Akko, kadi jo ma gubedo i Cidon, Aklab, Akijib, Kelba, Apik ki Rekob. Ento jo Acer gubedo i kin jo Kanaan ma gin wegi lobo-nu, pien pe guryemogi woko. Jo Naputali pe guryemo jo ma gibedo i Bet-cemec ki Bet-anat, ento gubedo i kin jo Kanaan ma gin wegi lobo-nu. Kadi bed kumeno, guketo jo Bet-cemec ki Bet-anat i tic muroni. Jo Amor gudiyo jo Dan, gudwokogi wa i lobo godi, pe guye ni gucit i bar. Jo Amor gucerre gubedo i got Kerec, i Aijalon ki i Calabim. Ento jo me ot pa Yucepu gubedo ka diyogi matek, ci guketogi i tic muroni. Waŋ lobo pa jo Amor ocakke ka ma giito iye malo i Akrabim, oa ki i Cela ocito malo. Lamaika pa Rwot oa ki i Gilgal ocito i Bokim, ci owacci, “Yam akwanyowu ki i Ejipt, ci akelowu wa i lobo ma yam akwoŋo pire ni abimiyo bot kwarowu. Yam awacci, ‘Pe abituro gicikkena kwedwu matwal, wun bene pe wuket gicikke mo i kinwu ki jo ma gibedo i lobo man. Wubimuko keno jogigi woko.’ Ento wun pe wulubo cikka Man doŋ wutimo aŋo? Kombeddi doŋ awaco ni, pe doŋ abiryemogi woko ki i nyimwu; gibidoko lumonewu, ki lubaŋagi bibedo owic me makowu.” Ka lamalaika pa Rwot oloko lok meno bot jo Icrael ducu, jo Icrael guwo ki koko. Gucako nyig kabedonu ni Bokim ci gutumo gitum bot Rwot kunnu. Ka Yocwa ociko lwak ci guket woko kun gat acel acel ocito i lobo ma ginaleyane ka camone. Jo Icrael gutiyo bot Rwot i kare pa Yocwa ducu ki i kare pa ludoŋo ducu ma yam gudoŋ ka Yocwa doŋ oto, gin jo ma guneno tic madito ducu ma yam Rwot otiyo pi jo Icrael. Yocwa wod pa Nun ma latic pa Rwot oto woko ma noŋo mwaka me ditte oromo miya acel ki apar, Guyiko kome i lobone kikome, i ginaleya ma yam gimiyo bote i Timnat-kerec i lobo godi pa jo Epraim i ŋet got Gaac, yo tuŋ acam. Ci yalwak meno ducu guto, gudok bot kwarogi, ka dok yalwak mukene olubogi ma pe gigeyo Rwot, kadi tic ma yam en otiyo pi jo Icrael. Jo Icrael gucako timo gin ma nen marac i wag Rwot pi woro jogi ma nyiŋgi Baal. Gubwoto Rwot Lubaŋa pa kwarogi woko, ma yam okwanyogi ki i lobo Ejipt, ci gucako lubo kor lubaŋa mukene ki i kin lwak lubaŋa pa rok mapatpat ma orumogi dyere-ni; guryebbe i nyimgi, gumiyo kiniga omako Rwot.; Gubwoto Rwot woko, guworo jogi Baal mapatpat ki jogi ma mon-gu. Pienno kiniga omako Rwot i kom jo Icrael ci omiyogi i ciŋ Iuyak-jamigi, ma gubedo ka yako jamigi, Dok omiyogi woko i te twero pa lumerokgi ma orumogi dyere, omiyo pe doŋ gitwero cuŋ i nyim lumerokgi, Ka ma gicito iye ducu i kare-nu, ciŋ Rwot onoŋo tye i komgi likiŋ pi timogi rac, kit ma yam Rwot owaco-ni, kun lubo kit ma Rwot onoŋo okwoŋo botgi; ci piny orem kwedgi woko. Rwot ocako keto luŋolkop ma gularo jo Icrael ki i twero pa jo ma yam giyako jamigi-ni. Ento pe guworo dog luŋolkopgi; gubedo ka woro lubaŋa mogo mukene ki tim kwele kwele ki ryebbe i nyimgi, Gulokke gubarre woko oyot ki i yo ma yam kwarogi gulubo. Kwarogi onoŋo yam gulubo cik pa Rwot, ento gin pe gulubo cikke. I kare ducu ma Rwot omiyo botgi Laŋolkop mo, ci Rwot obedo ki laŋolkop meno; obedo ka larogi ki i ciŋ lumerokgi pi kare pa Laŋolkop meno ducu. Kica yam mako Rwot i komgi kare ki kare ka gicur i kom jo ma unogi kun gidiyogi ki tek. Ento ka laŋolkop mo oto woko, ci gitarre, gidok cen ka timo tim maraco makato kwarogi ducu, kun gilubo kor lubaŋa mogo mukene, giworogi kun giryebbe piny i nyimgi; pe gibwoto timgi mo, kadi wa kit ducu ma gibedo ka lubo pi nwaŋ ŋutgi-ni. Mumiyo kiniga omako Rwot i kom jo Icrael, ci owacci, “Jo man guturo gicikkena ma yam acikke kwede ki kwarogi, dok gukwero woro doga. Pi meno cakke tin an pe doŋ abiryemo rok mo woko ki i nyimgi ma i kin lwak rok mapatpat ma yam Yocwa oto oweko-ni, wek atem ki cwiny jo Icrael, anen ka gibigwokke kun gilubo yo pa Rwot macalo kwarogi yam gugwokke iye, nyo pe.” Kit meno Rwot oweko rok meno ducu gubedo, pe oryemogi woko ducu lawaŋacel, dok pe omiyogi i te twero pa Yocwa. Magi aye rok ma Rwot oweko gudoŋ i lobo me temo kwede cwiny jo Icrael, makato ducu dano ma i Icrael ducu ma peya gulwenyo lweny mo i Kanaan. Owekogi pi lok man keken wek yalwak ma i Icrael ducu gunyebbe ki lweny, wek en opwonygi ki lweny, makato ducu jo ma yam pe guŋiyo kwede. Magi aye rok ma Rwot oweko gudoŋ: rwodi pa jo Piliciti abic, jo Kanaan ducu, jo Cidon ki jo Kiv ma yam gibedo i godi me Lebanon, cakke ki i got Baal-kermon o kwede wa i yo ma donyo i Kamat, Gin aye gubedo me temo cwiny Luicrael pi ŋeyo ka gibilubo cik pa Rwot ducu ma yam en ociko bot kwarogi ki i dog Moses. Kit meno jo Icrael gubedo i dye jo Kanaan, jo Kit, jo Amor, jo Periji, jo Kiv ki jo Jebuc. Gucako nyomo anyiragi, gin bene gumiyo anyiragi bot awobegi, gunyomo; ci gucako woro lwak lubaŋagi. Jo Icrael gutimo gin ma nen marac i waŋ Rwot, kun wigi owil woko i kom Rwot Lubaŋagi, guworo jogi Baal mapatpat ki Aciterot-gu. Pienno omiyo kiniga omako Rwot i kom jo Icrael, ci omiyogi woko i cin Kucan-ricataim kabaka me Mecopotamia. Jo Icrael gutiyo bot Kucan-ricataim mwaka aboro. Ento ka jo Icrael gukok bot Rwot, en omiyogi dano ma olarogi, en Otiniel wod pa Kenaj, ma omin Kaleb matidine. Cwiny pa Rwot obino i kome, ci obedo ka ŋolo kop i Icrael. Ka ocito ka lweny, Rwot omiyo Kucan-ricataim kabaka me Mecopotamia i ciŋe, obwoyo Kucan-ricataim woko, Kit meno omiyo lobo oywe pi mwaka pyeraŋwen, ci lacen Otiniel wod pa Kenaj oto. Jo Icrael dok gutimo gin ma nen marac i waŋ Rwot, ci Rwot omiyo tek bot Eglon kabaka me Moab me lweny i kom jo Icrael, pien onoŋo gutimo gin ma nen marac i waŋ Rwot. Eglon ocoko jo Ammon ki jo Amalek, ocito kwedgi, oloyo jo Icrael, omayo gaŋ Otit woko, Jo Icrael gutiyo bot Eglon kabaka me Moab pi mwaka apar wiye aboro kulu. Ento ka jo Icrael gukok bot Rwot, en omiyogi dano ma olarogi, en Ekud wod pa Gera ma jo Benjamin, dano ma lacam. Jo Icrael gumiyo en aye otero mucorogi bot Eglon kabaka me Moab. Ekud oteto pala lucwanne ma lake bit ryoryo ma borre oromo futi acel ki nucu, ci orwako i te boŋone, otweyo i kom eme tuŋ lacuc, ocito otero mucoro bot Eglon. Eglon onoŋo obedo dano ma ocwe mada. Ka Ekud otyeko miyo mot me mucoro bot kabaka, ocwalo dano ma gutiŋo mot meno gucito woko. Ento en kikome, ka oo i godi ma gipayo apaya ma cok ki Gilgal, olokke odok cen, owacci, “At ye ki lok mo me muŋ ma gicwala kwede boti, kabaka.” Kabaka ociko ni, “‘Wuliŋ koŋ!” Ci lwak luticce ducu ma gucuŋ i nyime gukato woko, Ka Ekud obino bote, onoŋo en obedo kene i kicikane manic ma malo i wi ot. Ekud owacci, “Atye ki kwena ma oa ki bot Lubaŋa ma akelo boti,” ci kabaka oa malo ki i wi komme. Ekud oroyo ciŋe ma lacam, omako pala lucwan, owoto ki i eme ma tuŋ lacuc, ocobo ki i kabaka. Lak pala odonyo wa ki lokke, ci moo iye opuyo lak pala woko. Pe owoto pala lucwan woko ki i i kabaka, dok wee iye okatti woko. Ekud okato woko ki ka ma gidonyo kwede i ot-ti, ci oloro doggola me kicika me wi ot ka ma kabaka tye iye-ni, otweyo woko. Ka en doŋ ocito woko, ci lutic gubino. Ka guneno ni doggola me kicika ‘ma i wi ot doŋ gitweyo woko, ci gubedo ka tamo ni, “Laditwa tye ka konnye i ot matidi ma i kicika manic-ci.” Gubedo ka kurone nio ka doggi otwo woko; ento ka en pud ori kun pe oyabo doggola me kicika me wi ot, gukwanyo layab, guyabo kwede, ci nen, rwotgi obuto i dye ot ma doŋ oto, Ma pud gigalle, Ekud olwi oriŋo woko, okato wa i ŋe godi ma gipayo apaya ca, oriŋo olaro Ceira, Ka doŋ oo kunnu, okuto tum i lobo godi me Epraim; ci jo Icrael gucito kwede gua ki i lobo godi, kun en telo wigi, Owaco botgi ni, “Wulub kora, pien Rwot doŋ omiyo lumerokwu, jo Moab, i ciŋwu.” Gucito kwede, gumako waŋ wat me Jordan me geŋo jo Moab: pe guye dano acel mo oŋolo kulu. I kare meno guneko jo Moab ma mito romo alip apar, ma gin ducu twoni co matego; acel mo pe obwot. Kit meno gutayo jo Moab woko i nino meno, Gubedo i te loc pa jo Icrael ci lobo oywe pi mwaka pyeraboro, Ŋat mulubo kore en Camgar wod pa Anat ma oneko jo Piliciti miya abicel ki dim lalek dyaŋ; en bene olaro jo Icrael. Jo Icrael dok gutimo gin ma nen marac i waŋ Rwot ma Ekud doŋ oto woko, ci Rwot omiyogi i ciŋ Jabin kabaka mo pa jo Kanaan ma yam obedo ka loc i Kajor. Lawimonnye nyiŋe Cicera, ma bedo i Karocet pa Lurok. Jo Icrael dok gukok bot Rwot ni okonygi, pien onoŋo Jabin tye ki gadigadi lweny me nyonyo miya aboŋwen, ci obedo ka uno jo Icrael matek pi mwaka pyeraryo, I kare meno Debora, lanebi ma dako ma cware Lapidot, aye obedo laŋolkop pa jo Icrael. En bedo i te otit pa Debora, ma tye i kin Rama ki Betel ma i lobo godi me Epraim, ci jo Icrael gibino bote wek en oŋol kopgi, Debora ocwalo kwena, olwoŋo Barak wod pa Abinoam ki i Kedec i lobo pa jo Naputali, owacce ni” “Rwot Lubaŋa pa Icrael ociko in ni, ‘Cit icok joni i wi got Tabor kun ikwanyo jo alip apar ki i kaka pa Naputali ki kaka pa Jabulon. Abiywayo Cicera, lawimony pa Jabin, akelo ka romo kwedi i dog kulu Kicon kacel ki gadigadi lwennye ki buca monynye ducu, ci abimive i ciŋi.’’’ Barak owaco bot Debora ni, “Ka in aye ibicito kweda, ci abicito; ento ka in pe ibicito kweda, an pe abicito.” Debora ogamo ni, “An abicito kwedi ada; ento wot ma icito iye-ni deyone pe bibedo meri, pien Rwot bimiyo Cicera i cin dako.” Ci Debora oa, owoto ki Barak wa i Kedec. Barak olwoŋo jo Jabulon ki jo Naputali ki i Kedec, ci jo alip apar gucito bote gulubo kore; ki Debora bene ocito kacel kwedgi. I kare meno onoŋo Keber ma jo Keni opokke woko ki bot jo Keni mukene-ni ma gin likwayo pa Kobab ma jo pa oc Moses, ci onoŋo oguro kemane ka mabor i ŋet yat kworo ma i Jaananim, ma cok ‘ki Kedec. Ka gitito bot Cicera ni Barak wod pa Abinoam ocito i got Tabor, ci Cicera olwoŋo wegi gadigadi nyonyone ducu ma giromo miya aboŋwen, ki jo ducu ma gitye bote, ni gua ki i Karocet pa Lurok gubin i kulu Kicon. Debora owaco bot Barak ni, “A malo, pien tin aye nino ma Rwot omiyo iye Cicera i ciŋi. Rwot aye bitelo nyimi.” Kit meno Barak ocako lor piny ki i wi got Tabor kacel ki dano alip apar ma gilubo kore. Ci Rwot obwaŋo kom Cicera ki wegi gadigadine ducu, kacel ki monnye ducu i nyim Barak, ci guto ki pala lucwan. Ento Cicera opye woko piny ki i gadigadine, oriŋo woko ki tyene, Barak olubo kor gadigadi ki monygi o wa i Karocet pa Lurok; mony pa Cicera ginekogi woko ducu ki pala lucwan, pe dano acel mo odoŋ. Cicera oriŋo ki tyene nio wa i kema pa Yayeri, dako pa Keber ma jo Keni; pien yam onoŋo kuc tye i kin Jabin kabaka me Kajor ki jo me ot pa Keber ma Lakeni. Yayeri okatti woko ka jolo wiye ci owaco bote ni, “Lokke idwog-kany, laditta, pe ilwor.” Kit meno omiyo Cicera odok bote wa i kemane, ci dako oume woko ki boŋo. Cicera owaco bote ni, “Koŋ imiya pii mo manok me amata, pien orwo pii tye ka neka.” Dako oyabo dog opiru cak, omiyo en omato, ka dok oume woko, Ka Cicera dok owaco bote ni, “Cun i doggola kema. Ka ŋat mo obino ce openyi ni, ‘Ŋatti mo tye kany?’ wacci, ‘Pe.’ ” Ento Yayeri dako pa Keber okwanyo loc lagur kema, ka dok omako nyol i cine, ocito bote mot, oguro loc i tur nyime tuŋcel, nio ka otuc pil wa i nom, pien onoŋo onino matek pi olo. Kit meno omiyo oto. Ci nen, ka Barak obedo ka lubo kor Cicera. Yayeri ocito woko ka jolo wiye ci owacci, “Bin, wek anyutt i dano ma it ye ka yenyone-ni.” Odonyo i kemane, ci onoŋo Cicera oto woko, obuto piny kenyo kun loc ocuŋ i tur nyime. Kit meno Lubaŋa otayo Jabin kabaka me Kanaan ki i nyim jo Icrael i nino meno, ci jo Icrael gumedde ki diyo Jabin kabaka me Kanaan matek nio ka gutyeke woko. Debora ki Barak wod pa Abinoam guwayo wer akero i nino meno ni, “Luwimony gutelo wi Icrael, dano gubino ma gudyero komgi kekengi; wupwo Rwot! “Wuwiny, wun luker! Wuter itwu, wun luloc! Abiywayo akero bot Rwot abiwero ki dwan mamit bot Rwot Lubaŋa pa Icrael. “Rwot, i kare ma ikato woko ki i Ceir, i kare ma icoro la ki i dye lobo Edom, lobo ocako yeŋŋe, polo bene ocwero pii; ada do, pol ocako cwer, Godi guyemje ki i nyim Rwot, Cinai oyeŋŋe kuca ki i nyim Rwot Lubaŋa pa Icrael. “I kare pa Camgar wod pa Anat, ki i kare pa Yayeri, luwot gubedo pe i yo gudo, jo ma giwoto ka mo giwirre i yo matino. Dano gutum woko ki i Icrael i kin paco, gutum, gutum woko do, nio ka in Debora ibino, ituc ma in i mego i Icrael. I kare ma guyero lubaŋa mogo manyen, ci mony oo wa i dog gaŋ, Kwot mo, nyo toŋ, yam onen mono i kin io Icrael alip pyeraŋwen? Cwinya olwodo lok i kom luwimony pa Icrael ma gudyero komgi i kin lwak. Wupwo Rwot! “Wun lubed i wi kana makwar-ri ma wuumo komgi ki boŋŋi me bedowu, ki wun luwot ki tyenwu iyo, wutit lokke ba. Wuwiny dwan luwer ka ma gitwomo iye pii; kunnu gipako kit ma Rwot oloyo ki mony, kit ma danone ma ikin gaŋ guloyo ki lukworgi i Icrael. “I kare-nu jo pa Rwot gucito piny wa i dog gaŋ. “Deborawe, co woko, co woko! Co woko, co woko, icak wer! A malo, Barak, itel wi opiini ma iyako, in wod pa Abinoam! Ludito mudoŋ gucako wot, jo pa Rwot gucito ka lwenypire i kom oteka. Jo Epraim gucito gubino i nota, i korwu wunjo Benjamin ki lutuwu; luwimonypajo Makir gubino piny, lumak odoo ker gua i Jabulon. Rwodi pa jo Icakar gubino ki Debora. Jo Icakar gucuŋ matek i kom Barak; gutwarre i nota i kore. Ento jo me kaka pa Reuben gubedo ki guŋ-ic. Piŋo ibedo i dye dwol romi ka winyo nyamulere ma gikuto i kor lim? Jo me kaka pa Reuben gubedo ki guŋ-ic. Gilead odoŋ loka Jordan; gin aŋo mumiyo Dan obedo mere i mel? Acer obedo mere mot i dog nam, obedo otoyo toke i Waŋ watte. Jo Jabulon aye lwak ma gudyero komgi i to; ki jo Naputali bene i wi cere ma i dye bar. Luker gubino, gulwenyo, luker me Kanaan gulwenyo matek i kare-nu i Taanak, i ŋet pii me Megido, ento pe gunoŋo lonyo me ayaka. Lakalatwe gulwenyo ki i polo, gulwenyo i kom Cicera kun gilubo gergi, Kulu Kicon oterogi woko, wi biamwonyi mager-ri, Kicon mager-ri. Abimedo ki woto anyim ki tekka ducu! “Aguragura gimoro piny ki oboŋ tyengi, kun gipye, gikirre kwede; aguragurane gipye, gikirre, “Lamalaika pa Rwot owacci, gicen Meroj, gicen lubedo iye matek, pien pe guriŋo i oduru pa Rwot, pi konyo Rwot ki lweny i kom oteka. “Yayeri gimiye gum makato mon ducu, dako pa Keber Lakeni; i kin mon ducu ma bedo i kema kome gum. Olego pii, dok omiye cak, okelle cak lukulu i awal maber ma ma oporre pi rwot. Omako loc kema i ciŋe, ciŋe malacuc otiŋo nyol pa lutic; Ogoyo wi Cicera, otyero, ocanyo, otuco tur nyime pil, Okulle piny, opoto, obuto lilwe ka tyene; okulle ka tyene, opoto; opoto oto ka ma okulle iye-ni. “Dako opiro wane ki i waŋ dirica min Cicera okiyo ki i waŋ ot, owacci, ‘Piŋo gadigadine pe odwogo oyot? Piŋo tyen gadigadine pe mor, bino oyot?’ Mon ma luryeko gudok iye, en bene ogamo doge kene, ni, ‘Gunoŋo lim, gitye ka pokone, anyaka acel pi twon acel acel, nyo dodo aryo; boŋo manwala nwala pi Cicera, ma giyako, boŋo manwala nwala ma gidero, boŋŋi aryo ma gidero me abola i ŋuta.’ “Lumerokki ducu myero gutum woko kit meno, ai Rwot! Ento luremi gubed macalo cen ma tuc ki kerone.” I ŋe meno lobo oywe pi mwaka pyeraŋwen. Jo Icrael gutimo gin ma nen marac i nyim Rwot; ci Rwot omiyogi i ciŋ jo Midian pi mwaka abiro. Jo Midian gubwoyo jo Icrael woko, mumiyo jo Icrael guyubo ka-kannegi i kin godi, dok guyubo borogi ki kabedo ma gicelo matek, pi lworo jo Midian. I kare ducu ma jo Icrael gicoyo kodi, ci jo Midian ki jo Amalek ki jo ma tun wokceŋ gicorre gibino ka monyogi. Gitoŋo gonygi cok kwedgi, gibalo cam ma i potogi o kwede ka ma cok ki Gaja, kun pe giweko cam mo doŋ ma konyo jo Icrael, kadi wa romo nyo twon nyo kana. Gibino ki limgi makwo, ki kemagi; kun gibino macalo bonyo, ma kwanogi ki kwaŋo wei kinagagi loyo dano; ka gibino gibalo lobo woko liweŋ. Kit meno jo Midian gumiyo piny orem ki jo Icrael woko, oweko jo Icrael gukok bot Rwot ni okonygi. I kare ma jo Icrael gukok bot Rwot pi aroma pa jo Midian, ci Rwot ocwalo lanebi botgi. Owaco botgi ni, “Rwot Lubaŋa pa Icrael owaco kit man ni, Yam atelo wiwu akwanyowu ki i Ejipt ki i ot kol me bedo opii. Yam alarowu ki i ciŋ jo Ejipt ki i ciŋ jo ma gubedo ka unowu ducu; aryemogi woko ki i nyimgi kun amiyo lobog botwu, I kare ca awaco botwu ni, ‘An aye a Rwot Lubaŋawu: pe wubilworo lwak lubaŋa pa jo Amor ma wubedo i lobogi-ni.’ Ento pe wumedde ka woro doga.” I kare meno lamalaika pa Rwot obino obedo i te kworo ma tye i Opra, gaŋ pa Yoaci ma jo Abiejer. Onoŋo wode Gideon tye ka dino ŋano i bur biyo olok wek jo Midian pe gunen. Lamalaika pa Rwot onen bote, owaco bote ni, “Rwot tye kwedi, in twon oteka lweny.” Ci Gideon owaco bote ni, “Tima kica ba, ladit. Ka Rwot tye kwedwa, piŋo lok magi ducu opoto i komwa? Lwak tic ducu me aura ma yam Rwot otiyo, ma kwarowa gutitowa pire-ni, doŋ tye kwene? Giwacci yam Rwot aye okwanyowa ki i lobo Ejipt, ento kombeddi Rwot doŋ obolowa woko, omiyowa i ciŋ jo Midian.” Ci Rwot olokke tuŋ bote, owacce ni, “Cit ki tek komi-ni, icilar jo Icrael ki i ciŋ jo Midian. An kikoma aye acwali.” Gideon ogamo doge ni, “Tima kica ba, Rwot. An atwero laro jo Icrael niŋniŋ? Nen, kakawa tye matidi mo i kin jo Manace, dok an aye latin matidine ki i doggolawa.” Ci Rwot owaco bote ni, “Ento an aye abibedo kwedi; dok ibineko jo Midian ducu macalo obedo dano acel keken.” Gideon owaco ni, “Ka doŋ anoŋo gum ki boti, doŋ imiya ‘anyut mo ma moko ni in aye iloko kweda. Tim ber, pe ia woko ki kany nio ka abino boti kun akelo ki motta me aketa i nyimi.” Ogamo ni, “Abibedo nio ka idwogo.” Gideon ocito i ode, otedo latin dyel mo, ki capat ma tobi pe iye ma otedo ki moko kwoŋ ma oromo debe aryo. Oketo riŋo i aduku, oonyo pige i agulu, ka okelo bot lamalaika pa Rwot i te kworo, oketo i nyime. Lamalaika pa Rwot owaco bote ni, “Kwany riŋo ki capat ma to bi pe iye-ni, iketgi i kom pata got man, ka ionyo pige i wiye.” Gideon otimo kit meno. Ka doŋ lamalaika pa Rwot ocwalo odoo ma tye i ciŋe, omiyo wiye ogudo riŋo ki capat ma tobi pe iye-ni. Ci mac olyel, oa ki i pata got, owaŋo riŋo ki capat ma tobi pe iye-ni woko. Lacen lamalaika pa Rwot orwenyo woko ki i waŋe. Mumiyo Gideon oniaŋ ni lamalaika pa Rwot; ci owacci, “Maa do, ai Rwot Lubaŋa! Pien doŋ aneno lamalaika pa Rwot waŋ ki waŋ.” Ento Rwot owaco bote ni, “Kuc obed boti. Pe ilwor; pe ibito.” Ci Gideon ocaŋo keno tyer kunnu pi Rwot, ocako nyiŋe ni, Rwot aye kuc. Pud tye, ocun i Opra, gaŋ pa jo Abiejer, wa onyoo. I dyewor meno Rwot owaco bote ni, “Kwany twon pa woru, twon me aryone ma mwaka me ditone oromo abiro, ci imuk keno tyer pa jok Baal ma tye bot woru woko, itoŋ yat ma gicomo i ŋete pi woro jok ma dako ma gilwoŋo ni Acera. Ci icuŋ keno tyer pi Rwot Lubaŋani i wi lobo ma gitoro ma otinne malo, kun icaŋo got kikore. Ka doŋ ikwany twon me aryone, ityer me gitum awaŋa; yat me awora ma ibitoŋo ireto woko piny-nyi bidoko yen me waŋo gitum.” Kit meno Gideon otero jo apar ki i kin luticce, otimo kit ma Rwot ocike kwede; ento pi lworo lutugi ki jo ma i gaŋ kunnu pe otiyo dyeceŋ, otiyo dyewor, Ka dano ma i gaŋ gua malo odiko con, ci nen, keno tyer pa jok Baal gimuko woko, ki yat me awora ma ka ŋete bene gitoŋo woko, ki twon me aryone gityero woko i wi keno tyer ma gicaŋo-ni. Gucako lok kekengi ni, “Aŋa mono ma otimo kuman-ni?” Lacen ka doŋ gutyeko yenyo kore kun gipenyo dano, ci guwacci, “Gideon wod pa Yoaci aye otimo kuman-ni.” Ci jo ma i gaŋ meno guwaco bot Yoaci ni, “Kel wodi wo ko wek gineke, pien omuko keno tyer pa Baal woko, dok otoŋo yat me awora ma ka nete-ni.” Ento Yoaci owaco bot jo ducu ma guryeyo cok i kome ni, “Wun wubilweny pi Baal bo? Wun wubicun i kome? Ŋat ma bilweny pire gibineko woko ki odiko-ni. Ka en aye lubaŋa, wek en olweny gire kene, pien keno tyerre doŋ gimuko woko.” Pi meno gicako nyiŋ Gideon ni Jerubaal i nino meno, ma te lokke ni, “Wek Baal olweny kwede,” pien omuko keno tyerre woko. Ka doŋ jo Midian ducu ki jo Amalek ki jo ma tuŋ wokceŋ gucokke, guŋolo kulu Jordan ci gugony i nota me Jejreel. Ento Cwiny pa Rwot obino i kom Gideon; okuto tum ci jo Abiejer gucokke i kore. Ci ocwalo kwena oromo kin jo Manace ducu, gin bene gucokke i kore, Ka dok ocwalo kwena bot jo Acer, jo Jabulon ki jo Naputali; ci gucito ka rwatte kwedgi. Ci Gideon owaco bot Lubaŋa ni, “Ka ce ibilaro jo Icrael ki ciŋa kit ma iwaco-ni ba, nen, aketo yer romo piny i laro moyo eno Ka ce toyo opoŋ i yer romo keken, kun i nom ducu otwo woko, ci abiŋeyo ni ibilaro jo Icrael ki ciŋa, kit macalo iwaco-ni.” Ci obedo kit meno, Ka oa malo odiko con, obiyo yer romo, oliyo toyo ki i yer romo ma opoŋo awal kwoŋ woko. Ka dok Gideon owaco bot Lubaŋa ni, “Pe kiniga omaki i koma, Wek dok alok tyen man acel-li. Wek dok atem ki yer romo kicel. Alegi ni, wek yer romo keken aye obed ma otwo, ento toyo oluk i kom nom ducu ma kenyo.” Ci Lubaŋa otimo kit ennu i dyewor meno; onoŋo yer romo keken aye otwo, ento ŋom ducu toyo oluk iye. Jerubaal, ma en aye Gideon, ki jo ducu ma onoŋo gitye bote gua malo odiko con, ci gugony i ŋet waŋ pii me Karod. Gony pa jo Midian onoŋo tye i nyimgi yo tuŋ acam, i ŋet got More ki i nota. Rwot owaco bot Gideon ni “Jo ma gitye kwedi-ni gipol mada ki tuŋ bota. Ka abimiyo jo Midian i ciŋgi gibiwakke ginwette i koma ni meno’ ‘Ciŋa kikoma gire aye olara.’ Pi meno kombeddi doŋ itit bot lwak ni, ‘Ŋatti mo ma lworo omako, ma kome myel ber odok i gaŋŋe.’ ” Kit meno Gideon oomo cwinygi, ci dano alip pyeraryo wiye aryo gudok woko, ki dano alip apar gudoŋ. Rwot dok owaco bot Gideon ni “Lwak pud pol mada; tergi i dog pii ci abitemo cwinygi ki kunnu. Ŋat ma abiwacci, ni, ‘Dano man bicito kwedi’ en aye bicito kwedi; ki ŋat ma abiwacel ni, ‘Dano man pe bicito kwedi,’ en pe bicito kwedi.” Kit meno Gideon otero dano i dog pii; ci Rwot owaco bote ni, “Dano acel acel ma gamo pii ki lebe macalo gwok gamo kwede ibiketo en cuŋ kene; ki ŋat ma orumo coŋe piny ka mato pii bene kit meno.” Ci wei dano ma gugamo pii kun giketo ciŋgi i doggi oromo miya adek; ento lwak jo mudoŋ ducu gurumo coŋgi ka mato pii. Rwot owaco bot Gideon ni, “An abilarowu ki jo miya adek ma gugamo pii ki i ciŋgi-ni, pi miyo jo Midian i ciŋwu. Doŋ iwek jo mukene-ni ŋat acel acel odok gire i pacone.” Gideon ogamo abino pa lwak wo ko ki i ciŋgi wa ki tumgi; ci ocwalo jo Icrael mudoŋ, kun dano acel acel cito i kemane. En odoŋ ki jo miya adek-ki, kun gony pa jo Midian tye piny i nota, I dyewor meno Rwot owaco bote ni, “A malo, icit ilweny i kom gony pa jo Midian, pien doŋ atyeko miyone i ciŋi, Ento ka ilworo cito piny kunnu, ci icit i gonygi kacel ki laticci Pura. Ibiwinyo gin ma jo-nu giloko, ci lacen cwinyi bilimo tek me cito ka monyo gonygi.” Ocito piny ki laticce Pura, ci guo i agikki gony ka ma lumony gubuto iye. Jo Midian, jo Amalek ki jo ducu ma gua wokceŋ onoŋo guryeyo gonygi i nota ma gumoo calo lwak bonyo; ki kinagagi bene welgi pe kwanne, gipol macalo kweyo me dog namo Ka Gideon oo, dano mo ocako tito lek mo bot lawote, kun waco ni, “Nen, aleko lek mo; mugati me cayiri ma oluŋŋe opoto i gony kun lor alora, obino kwede wa i kom kema, ci oreto kema woko piny, oloko ataro, kema opyelle woko piny,” Lawote ogamo ni, “Man pala lucwan pa Gideon wod pa Yoaci, Laicrael; en ennu kikome. Lubaŋa otyeko miyo jo Midian ki lwak monygi ducu i ciŋe.” Ka Gideon owinyo kit ma gitito kwede lek ki kit ma gigonyo kwede tere, ci omiyo woro bot Lubaŋa. Lacen odwogo kwede i gony pa jo Icrael, ci owacci, “Wua malo, pien Rwot doŋ omiyo mony pa jo Midian woko i ciŋwu.” Opoko kin jo miya adek-ki lwak buca mony adek, ka omiyo tum i ciŋgi ducu, ki abino ma igi noŋo, ki mac raa i abino ducu. Ka doŋ ocikogi ni, “Wunena, ci wun bene wutim kit ma an atimo ka doŋ ao iŋet gony cok. Ka akuto tum, an kacel ki jo ma atye kwedgi ducu, ci wun bene wukut tum murumo gony ducu kun wudaŋŋe ni, ‘Pi Rwot ki pi Gideon!’ ” Gideon ki jo miya acel ma gitye bote guo i ŋet gony cok ki cwiny dyewor ma onoŋo pud giketo Lukur-piny aketa; ci gucako kuto tum ki tyero abino ma tye i ciŋgi ducu. Buca mony adek ducu gukuto tumgi, gutyero abinogi woko ci gumako mac raa i ciŋgi malacam ki tum me akuta i ciŋgi malacuc, kun gidaŋŋe kwede ni, “Pala lucwan pi Rwot ki pi Gideon!” Dano acel acel ocuŋ mot i kabedone ma gurumo gony ducu, ci mony pa jo Midian guriŋo woko ducu; gucako daŋŋe gurigo kwede woko. Ka dano miya adek ca gitye ka kuto tumgi, Rwot oloko pala lucwan pa jo. Midian i kom lutugi kekengi ki i kom monygi ducu. Monygi oriŋo o wa i Bet-cita, ma yo tuŋ Jerera, ki o kwede wa i waŋ lobo me Abel-mekola i ŋet Tabat. Gilwoŋo jo Icrael ki i Naputali, ki i Acer wa ki i Manace ducu, ci guryemo kor jo Midian. Gideon ocwalo kwena i lobo godi ducu me Epraim kun waco ni, “Wubin, wulweny i kom jo Midian, wukurgi i waŋ wat ducu o wa i Bet-bara ki i Jordan bene.” Kit meno gilwoŋo jo Epraim ducu ci gumako waŋ wat ducu o wa i Bet-bara ki Jordan bene. Gumako luker pa jo Midian aryo, Oreb ki Jeeb; ci guneko Oreb i pata got pa Oreb, ki Jeeb guneko i bur biyo olok pa Jeeb. Lacen gukelo wi Oreb ki Jeeb loka Jordan bot Gideon. Jo Epraim guwaco bot Gideon ni, “Itimowa kuman piŋo? Nen pe ilwoŋowa ka onoŋo icito ka lweny i kom jo Midian.” Ci gugerre i kome matek. Ento en owaco botgi ni. “Gin aŋo ma tin atimo ma giporo ki wun kulu? Pe gwero kor olok pa Epraim ber makato olok ducu ma Abiejer opwono? Lubaŋa omiyo luker pa jo Midian i ciŋwu, Oreb ki Jeeb, ci gin aŋo ma abedo ka timo ma porre ki wun?” Ka oloko kit meno, ci kinigagi ocako dok cen i kome. Ka Gideon obino i Jordan, okato loka ca, en kacel ki dano miya adek ma gitye bote-ni. Komgi oloc woko, ento pud giryemo kor jo Midian. Omiyo owaco bot jo me Cukot ni. “Alegowu wumi mugati bot dano ma gilubo kora-ni, pien komgi doŋ oloc woko, dok atye ka ryemo kor Jeba ki Jalmuna ma luker pa jo Midian.” Ento rwodi ma i Cukot gugamo ni, “Jeba ki Jalmuna doŋ gitye i ciŋi bo, ma weko wamiyo mugati bot joni?” Gideon ogamo ni, “Ber yo, ka Rwot omiyo Jeba ki Jalmuna i ciŋa, ci abipwodo komwu ki okuto me tim ki okuto laŋo.” Ka oa woko ki kunnu, ci ocito i Penuel, ci dok oloko kwedgi laki te acel-lu. Jo me Penuel bene guwacce lok ma rom ki kit ma jo Cukot gudok iye bote. Ci owaco bot jo ma i Penuel ni, “Ka adwogo kany ki kuc, abimuko ot man ma ocudo malo-ni woko.” I kare meno onoŋo Jeba ki Jalmuna gitye i Karkor, kacel ki monygi ma romo jo alip apar wiye abic, gin jo ducu ma yam gubwot ki i kom mony ducu pa jo me tuŋ wokceŋ. Onoŋo doŋ gineko jogi ma romo alip miya acel ki pyeraryo ma gin wegi lweny ki pala lucwan. Gideon olubo yo ma jo ma gibedo i kema gimaro wok ki iye ma wok ki i ŋet Noba ki Jogbea yo tuŋ wokceŋ, ci olwenyo ki monygi ma gutoyo tokgi ata. Jeba ki Jalmuna guriŋo woko ci oryemo korgi, omako gin luker pa jo Midian aryo ducu, oonyo kwede atiba i kom monygi ducu. Lacen Gideon wod pa Yoaci odwogo ki i lweny kun lubo yo ma giito iye i Kerec. Omako awobi mo ma Lacukot, openye, ci awobi-ni ocone nyiŋ rwodi ki ludoŋo me Cukot ducu, ma giromo dano pyerabiro wiye abiro. Gideon obino boŋo me Cukot, owaco botgi ni, “Doŋ wunen Jeba ki Jalmuna ma yam wunala pigi kun wuwaco ni, ‘Jeba ki Jalmuna doŋ gitye i ciŋi bo, ma weko wamiyo mugati bot joni ma komgi oloc woko-ni?’ ” Ci omako ludoŋo ma i gaŋ meno, ka okwanyo okuto me tim ki okuto laŋo, opwodo kwede jo Cukot. Ka dok omuko ot ma ocudo malo ma i Penuel, ka oneko ki jo ma i gaŋ meno woko. Ka dok owaco bot Jeba ki Jalmuna ni, “Jo ma yam wunekogi i Tabor onoŋo gubedo kit dano aŋo?” Gudokke iye ni. “Kit ma it ye kwede-ni, gin bene onoŋo gitye kit meno; ŋat acel acel i kingi onoŋo nen calo awobi pa kabaka.” Gideon ogamo ni, “Gin omegina kikome, awobe pa maa. Macalo Rwot tye makwo-ni, kono yam pe wunekogi, kono pe anekowu bene.” Ka dok owaco bot wode Jeter ma latin kayone ni, “A malo, inekgi woko.” Ento latin awobi pe owoto pala lucwanne, pien lworo omake; onoŋo pud tidi mo. Ci Jeba ki Jalmuna guwaco ni, “In aye ia malo kikomi, ipot i komwa; pien kit ma laco tye kwede, tek kome bene tye kit meno.” Mumiyo Gideon oa malo oneko Jeba ki Jalmuna woko, ci okwanyo mola cal dwe ma yam giruko i nut kinagagi. I ŋe meno jo Icrael guwaco bot Gideon ni, “Doŋ ibed lalocwa, in kikomi, ki wodi ki likwayi bene, pien ityeko larowa ki i ciŋ jo Midian.” Ento Gideon owaco botgi ni, “An pe abiloyowu, ki woda bene pe biloyowu; Rwot aye biloyowu gire.” Ka dok Gideon owaco botgi ni, “Wek alegwu gin mo acel. Ber ŋat acel acel omiya mola it me jabu ma oyako. (Onoŋo lumerokgi gitye ki jabu me aruka i it, pien onoŋo gin Io Icmael.) Gugamo ni, “Wabimiyo ki yomcwiny.” Gupeto ginaruka piny, ci dano acel acel obolo iyemolaiŋabu ma oyako. Pek me jabu me aruka i it ma en olego-ni oromo cekel alip acel ki miya abiro, ma pe giribo iye mola cal dwe, ki mola aruka ma ryeny aryenya, ki boŋŋi aruka ma lamar lamar ma luker me Midian aye giruko, dok ma pe giribo iye mola ma gitweyo i nut kinagagi. Gideon otimo ki epod, ocibo i gaŋŋe Opra, ci jo Icrael ducu guworo ki tim kwele kwele, mumiyo odoko owic me ciko Gideon ki jo me ode. Kit meno jo Icrael guloyo jo Midian, pe doŋ guilo wigi malo matwal. I kare pa Gideon lobo oywe woko pi mwaka pyeraŋwen, Jerubaal, ma en aye Gideon wod pa Yoaci, ocito, obedo i ode. Onoŋo Gideon tye ki awobene pyerabiro ma gin nyodone kikome, pien onoŋo tye ki moo mapol. Obedo ki dakone ma aŋeca bene ma bedo i Cekem. Dako-nu onywalo kwede latin ma laco ci Gideon ocako nyiŋe Abimelek. Gideon wod pa Yoaci oto ma doŋ oti woko maber, ci giyike i lyel pa wonne Yoaci i Opra ma gaŋ pa jo Abiejer. Ka Gideon doŋ oto, cutcut jo Icrael gulokke doki, gucako woro jogi Baal mapatpat ki tim kwete kwele, ci guketo Baal-berit me bedo lubaŋagi, Jo Icrael pe doŋ gupo i kom Rwot Lubaŋagi, ma yam olarogi ki i ciŋ lumerokgi yo tuŋŋi ki tuŋŋi; dok pe gubedo ki cwiny maber bot litino pa Jerubaal, ma en aye Gideon, pi gin ducu maber ma yam otimo pi jo Icrael. I kare meno Abimelek wod pa Jerubaal ocito i Cekem bot jo pa neyone ci otito botgi, ki bot jo ma i doggola pa minne ducu ni, “Wuwac lok wek jo ma i gaŋ me Cekem ducu guwiny ni, ‘Mene maber ki botwu? Myero awobe pa Jerubaal ma giromo pyerabiro ducu gubed lulowu, nyo myero ŋat acel aye olowu?’ Ento wupo ni, an a cogowu, dok a riŋo komwu.” Jo paneyone guloko lok meno ducu pire, kun gimiyo jo Cekem ducu guwinyo; ci cwinygi olokke ka lubo kor Abimelek, pien guwacci, “En aye ominwa.” Gimiyo bote lim ryal pyerabiro ma gikwanyo ki i ot pa Baalberit. En aye Abimelek obedo ka culo kwede jo ma kitgi atata ma lubwami ma guribbe i kome. Ocito i gaŋ pa wonne i Opra, oneko omegine awobe pa Jerubaal, jo pyerabiro, ki i kom pata got mo acel. Ento Yocam wode matidine aye odoŋ, pien onoŋo okanne woko. Lacen jo Cekem ducu gubino gucokke kacel, kacel ki jo Bet-millo ducu, ci gucito guketo Abimelek me bedo kabaka i ŋet kworo ma i Cekem ma wir jok ocuŋ i ŋete-ni. Ka gitito lokke bot Yocam, en ocito ocuŋ malo i wi got Gerijim, odaŋŋe matek kun waco botgi ni. “Koŋ wuwiny lokka, wun jo Cekem, wek Lubaŋa bene owiny dogwu. I nino mo acel lwak yadi gucito ka wiro moo ker i kom kabakagi. Guwaco bot yat jeituni ni, ‘In aye ilowa.’ Ento yat jeituni ogamo doggi ni, ‘Abiweko moona mabup-pi ma gimiyo kwede deyo bot lubaŋa ki bot dano, acit alyerre i wi yadi bo?’ Yadi dok guwaco bot oduro ni, ‘In aye ibin ilowa.’ Ento oduro ogamo doggi ni, ‘Abiweko nyiga mamit-ti ki mabeco-ni, acit alyerre i wi yadi bo?’ Ka yadi guwaco bot olok ni, ‘In aye ibin ilowa.’ Ento olok ogamo doggi ni, ‘Abiweko kono vinona ma yomo cwiny lubaŋa ki dano-ni, acit alyerre i wi yadi bo’? Ka dok yadi ducu guwaco bot abelwinyo ni, ‘In aye ibin ilowa.’ Ci abelwinyo owaco bot yadi ni, ‘Ka wutye ka wira ki moo me bedo kabakawu ki cwiny me ada, ci doŋ wubin, wunon ka-larre i te tipona; ento ka pe kumeno, ci wek mac oa ki bot abelwinyo owan yadi cedar me Lebanon woko.’ “Doŋ apenyowu ba. I kare ma wuketo Abimelek me bedo kabaka, yam wutiyo ki cwiny me ada, kun iwu leŋ? Yam wutimo Jerubaal maber mono, kacel ki jo me ode, ma rwatte ki ticce macon ca? Pien ada, wora olwenyo piwu kun odyero kome, olarowu ki iciŋ jo Midian, ci tin wutwarre ka lweny i kom ot pa wora, wuneko awobene woko ma giromo pyerabiro ki i kom, pata got acel-lu, dok wuketo Abimelek ma wod pa aŋecane me bedo kabaka ma loyo Cekem pi bedo watwu. Pi meno, ka wutiyo ki Jerubaal ki jo me ode ki cwiny me ada tin kun iwu leŋ, ci wubed ki yomcwiny i kom Abimelek, en bene cwinye obed yom i komwu. Ento ka pe kumeno, wek mac obin oa ki bot jo Cekem ki Bet-millo, owan Abimelek woko.” Ka Yocam oriŋo gire woko, olaro kome, ci ocito wa i Beer, pi lworo ominne Abimelek. Abimelek oloyo jo Icrael pi mwaka adek. Lacen Lubaŋa ocwalo cwiny marac i kin Abimelek ki jo Cekem, ci jo Cekem gucako tim me robo dog i kom Abimelek. Kit meno tim bwami ma yam gitimo i kom awobe pa Jerubaal ma romo pyerabiro ca opoto i kom Abimelek ma omingi-ni ma yam onekogi, wek alii me remogi obed i kome ki i kom jo Cekem ma yam gumiye tekcwiny me neko omegine. Jo Cekem guketo dano gubuto ka kure i yo i wi godi. Jo-nu gubedo ka yako jo ducu ma guwokgukato ki i ŋetgi i yo kunnu; ci Abimelek owinyo Jokke. I kare meno Gaal wod pa Ebed odako kacel ki lutugi, gubino i Cekem, ci jo Cekem gugene, Gucito i poto, gupwono nyig olokgi, gunyono, gubiyo pige, guyubo nino madit, gudonyo kwede i ot pa lubaŋagi, gucamo, gumato kun giyeto Abimelek. Gaal wod pa Ebed owacci, “Abimelek kono aŋa? Wan jo Cekem wan ana-gi? Lok aŋo kono ma miyo waworo en? Wod pa Jerubaal ki Jebul laticce yam pe guworo jo pa Kamor ma won Cekem? Piŋo myero wabed ka woro en? Kono jo kany tye i te locca, kono akwanyo Abimelek woko. Kono awaco bot Abimelek ni, ‘Med monnyi ci ikatti woko!’ ” Ka Jebul ma lalo gaŋ meno owinyo lok pa Gaal wod pa Ebed, ci kiniga omake cut. Ocwalo kwena bot Abimelek i Aruma kun waco bote ni, “Nen, Gaal wod pa Ebed ki lutugi gubino i Cekem, gitye ka rubo gaŋ woko pi lweny i komi. Pi meno wua woko, in kacel ki jo ma tye boti, ibut ikurgi i poto. Odiko ka ceŋ pud tuc atuca-ni, a woko con, ipot i kom gaŋ, Ka en ki jo ma tye bote gubino ka lweny i komi, ci in doŋ itimgi ka komgi owee.” Abimelek ki jo ma gitye kwede ducu gua i dyewor, gucito gubuto pi lweny i kom Cekem kun noŋo opoko buca monnye i dul aŋwen, Gaal wod pa Ebed okato woko, ocuŋ ka ma gidonyo kwede i dog gaŋ; ci Abimelek ki dano ma gitye bote gua ki ka ma gubuto iye ka kurogi-ni. Ka Gaal oneno jo-nu, owaco bot Jebul ni, “Nen dano ca ma gibino gilor piny ki i wi godi!” Ento Jebul owaco ni, “In ibeneno meri tipo godi macalo dano-ni.” Gaal dok owacci, “Nen, dano gitye ka lor piny ki i dye lobo malo ca, kun buca acel bino a ki i yo tuŋ te Kworo Waŋ Ayweya ca.” Jebul dok owaco bote ni, “Dogi dok tye kwene tin, in ma yam iwacci, ‘Abimelek kono aŋa, wek wawore?’ Meno pe gin jo ma in icayogini? Koŋ ikat woko kombeddi, icilweny kwedgi.” Ci Gaal ocito kun telo wi, mony pa jo Cekem, ocako lweny i kom Abimelek. Abimelek ocako ryeme, ci oriŋo olaro kome. Jo mapol gupoto ma ret omakogi, o wa i dog gaŋ, Abimelek odok obedo Aruma; ci Jebul oryemo Gaal ki lutugi woko, pe dok gubedo i Cekem. Orwone dano dok gucito i potogi, ci gitito pire bot Abimelek. Ocito ki jone, opokogi i buca adek, ci gubuto gukuro yo poto. Oneno dano gibino gia ki i gaŋ, ci oa opoto i komgi, onekogi woko. Abimelek ki dul dano ma gitye bote gucorre anyim, gucuŋ i dog gaŋ ka ma gidonyo ki iye-ni, kun buca aryo mukene-ni gicorre i kom jo ducu ma grtye I poto, ginekogi woko. Abimelek olwenyo i kom gaŋ meno dyeceŋ benebene, omako woko, oneko jo ma gitye iye, omuko odi woko liweŋ, opworo kado i ŋom. Ka jo ducu ma gibedo Migdalcekem guwinyo lokke, ci gudonyo i kicika ma gigolo piny ma i ot pa jokgi El-berit. Ci gitito bot Abimelek ni, jo ducu me Migdal-cekem gucokke kacel. Abimelek ocito i wi got Jalmon, en kacel ki jo ducu ma gitye bote, ci Abimelek omako laton i cine, ocito otoŋo kwede riddo yen, otino i wi gwoke ci owaco bot jo ma gitye kwede ni, “Kit ma wuneno atimo-ni, wun bene wutim oyot kumene.” Kit meno dano acel acel otono riddo yen, olubo ki kor Abimelek, Guketo i wi kabedo matek ma gigolo piny-nyi, gucwinyo mac i kom jo-nu, mumiyo dano ducu ma gubedo i Migdal-cekem guto woko, ma mito romo ka alip acel, co wa ki mon. Abimelek dok ocito Tebej, oguro woko, omako. Yam tye ot matek ma ocudo malo i dye gaŋ meno, ci lwak dano ma i gaŋ ducu guriŋo gularo iye, co ducu wa ki mon, ci gucego wigi woko iye, gucito malo wa i dan ot ma ocudo malo-ni. Ento Abimelek ocito i ot ma ocudo malo-ni, ocako lweny i kome, ci onyiko cok ki doggolane wek eciwan woko ki mac. Ci dako mo obayo lakidi rego madit, ocelo wi Abimelek, otyero, obaro cogo wiye woko. Oyotoyot olwoŋo awobi ma tiŋo jami lwennye, owaco bote ni, “Wot pala lucwanni, ineka woko, wek dano pe guwacci, ‘Dako mamwa-ni aye oneke.’’’ Awobi-nu ocobo kome pil, oneke woko. Ka jo Icrael guneno ni Abimelek oto woko, ci guket, kun dano acel acel dok i gaŋŋe, Kit meno Lubaŋa oculo waŋ bal ma Abimelek otimo i kom wonne pi neko omegine pyerabiro. Dok Lubaŋa odwoko tim pa jo Cekem maracce ducu i wigi, omiyo lok pa Yocam wod pa Jerubaal ma ocenogi kwede ocobbe i komgi kakare. Ki i ŋe Abimelek dano ma dok olaro jo Icrael en aye Tola wod pa Puwa, wod pa Dodo, ma jo Icakar. En yam bedo i Camir ma i lobo godi me Epraim. Obedo ka ŋolo kop i Icrael pi mwaka pyeraryo wiye adek. Ka oto, giyike i Camir. Dano ma olubo kore en aye Jair ma Lagilead. En obedo laŋolkop i Icrael pi mwaka pyeraryo wiye aryo. En yam tye ki awobene pyeradek ma giwoto ki kanagi pyeradek. Dok gibedo ki gaŋigi pyeradek bene ma pud gilwoŋo ni Kavot-jair o wa onyoo, ma grtye i lobo Gilead. Ka Jair oto, ci giyike i Kamon. Jo Icrael dok gutimo gin ma nen marac i waŋ Rwot kun giworo jogi Baal mapatpat ki jogi ma mon-gu, ma gin lubaŋa pa jo Ciria, jo Cidon, jo Moab, jo Ammon ki jo Piliciti; gubwoto Rwot woko, pe dok giwore. Pienno kiniga omako Rwot i kom jo Icrael, ci omiyogi i ciŋ jo Piliciti ki jo Ammon. Jo-nu guninyo jo Icrael guunogi matek i mwaka meno. Gubedo ka uno jo Icrael ducu ma gibedo loka Jordan i lobo pa jo Amor ma tye i lobo Gilead pi mwaka apar wiye aboro kulu. Jo Ammon guŋolo kulu Jordan ka lweny i kom jo Juda bene, ki jo Benjamin ki jo me doggola pa Epraim, mumiyo piny orem ki jo Icrael woko atika. Lacen jo Icrael gukok bot Rwot kun giwaco ni, “Doŋ wabalo i komi, pien wabwoto Lubaŋawa woko, waworo jogi Baal mapatpat.” Ci Rwot owaco bot jo Icrael ni, “Yam pe an aye alarowu ki bot jo Ejipt, jo Amor, jo Ammon ki jo Piliciti? Jo Cidon bene ki jo Amalek ki jo Maon yam giunowu, ento i kare ma yam wukok bota, alarowu ki i ciŋgi. Kadi bed kumeno, pud wubwota woko aye, wuworo lwak lubaŋa mukene. Pienno an pe dok abimedde ki larowu. Wucit wukok bot lwak lubaŋa ma yam wuyero-ni, Wek gin aye gularwu ki i kare ma piny orem kwedwu.” Ento jo Icrael guwaco bot Rwot ni, “Wapoto i bal: in itim i komwa kit ma imito, ento walegi ilarwa tin.” Ci gubolo lwak Iubana pa lurok ma i kingi-ni woko, gucako woro Rwot; ci Rwot cwinye oton matek pi atwom ma jo Icrael gubedo kwede. I kare meno jo Ammon guywayo mony, gugony i Gilead, ci jo Icrael gucokke kacel, gugony i Mijpa. Ludito pa jo Gilead gucako lok kekengi ni, “Dano mene ma bicako lweny i kom jo Ammon? En bibedo lalo wi jo ma gibedo i Gilead ducu.” I kare meno Jeputa ma Lagilead obedo twon oteka lweny. Wonne nyiŋe Gilead, ento minne obedo dako ma lakwele. Dako pa Gilead ma dakone kikome onywalo awobe bene. Ka awobe pa dako-nu gudoŋo, ci guryemo Jeputa woko, kun giwaco bote ni, “In pe ibileyo gin mo ma i ot pa wonwa, pien in i wod pa dako mukene.” Ci Jeputa oriŋo omegine woko, obedo gire i lobo Tob. Lwak jo mogo ma kitgi obedo atata aye gucokke bote ci en cito ka mony kwedgi. Ka kare doŋ okato, jo Ammon gucako lweny i kom jo Icrael. Ka meno otimme, ci ludoŋo pa jo Gilead gucito i lobo Tob ka omo Jeputa. Guwaco bote ni, “Bin ibed latel wi monywa, wek walweny ki jo Ammon.” Ento Jeputa owaco botgi ni, “Yam wukwera woko, wuryema woko ki i ot pa wora. Ka dok tin wubino bota piŋo ma doŋ wutye ki can-ni?” Ci ludoŋo pa jo Gilead guwaco bot Jeputa ni, “Meno aye gin mumiyo tin wadwogo boti, ni, wek icit kwedwa ka lweny i kom jo Ammon, ibed ladit ma loyo jo ducu ma gibedo i Gilead.” Ci Jeputa owaco botgi ni, “Ka wudwoka paco pi lweny ki jo Ammon, ka ce Rwot omiyogi i ciŋa, ci abibedo ladit ma loyo wiwu.” Ludoŋo me Gilead guwaco bot Jeputa ni, “Rwot aye bibedo lacaden i kinwa; dok wabitiyo kit ma iwaco-ni i ada.” Kit meno Jeputa odok cen ki ludoŋo me Gilead, ci lwak gukete me bedo lalo wigi ki latel wi monygi. Jeputa onwoyo lok ma yam owaco ducu i nyim Rwot ki i Mijpa. Ci Jeputa ocwalo lukwena bot kabaka pa jo Ammon kun waco ni, “An abalo gin aŋo boti, mumiyo ibino ka lweny ki lobona-ni?” Kabaka pa jo Ammon ogamo dog lukwena pa Jeputa ni, “Pien i kare ma jo Icrael gua ki i Ejipt gumayo lobona woko, cakke wa i kulu Amon o kwede wa i kulu Jabok ki i Jordan; ber tin wudwok lobona bota mot ki kuc.” Jeputa dok ocwalo lukwena bot kabaka pa jo Ammon, kun waco bote ni, “Jeputa owaco kit man ni, Jo Icrael yam pe gumayo lobo pa jo Moab kadi lobo pa jo Ammon, ento i kare ma gua ki i Ejipt, jo Icrael guwok gubaro gigi i dye tim o wa i Nam Makwar, ka gucito i Kadec. Lacen jo Icrael gucwalo lukwena bot kabaka me Edom ma guwaco ni, ‘Ber iwek wawok wakat ki i loboni.’ Ento kabaka me Edom okwero winyo. Dok gucwalo kwena bot kabaka me Moab bene, en pe oye. Kit meno omiyo jo Icrael gubedo gigi i Kadec. Ka dok guwoto gubaro dye tim, gurabo lobo Edom ki lobo Moab araba, ka guo kwede i ŋet lobo Moab yo tuŋ wokceŋ, ci gugony loka kulu Amon tuŋcel, Ento pe gudonyo i lobo Moab, pien Amon aye waŋ lobo pa jo Moab. Jo Icrael dok gucwalo kwena bot Cikon, kabaka pa jo Amor, ma gaŋ kalle Kecbon. Jo Icrael guwaco bote ni, ‘Ber iwek wawok wakat ki i loboni, wacit i lobowa.’ Ento Cikon iye ogun i kom jo Icrael, omiyo pe oye ni guwok gukat ki i loboner-omiyo Cikon ocoko jone ducu, ogurogi kacel, gugony i Jakaj, ci olwenyo i kom jo Icrael, Rwot Lubaŋa pa Icrael omiyo Cikon ki lwakke ducu i cin jo Icrael, ci guloyogi. Kit meno jo Icrael gucamo lobo pa jo Amor ducu ma yam gibedo i lobo-ni, odoko megi. Gucamo lobo pa jo Amor ducu cakke ki i kulu Amon o kwede wa i Jabok, ki dok cakke ki i tim o wa i Jordan. Kit meno Rwot Lubaŋa pa Icrael oryemo jo Amor woko ki i lobogi ki i nyim jone Icrael, ci in dok imito ile kaka-gi bo? Wun myero wucam lobo ma lubaŋawu Kemoc omiyowu me acama, ento wan wabicamo lobo ducu ma Rwot Lubaŋawa otyeko ryemo jo iye ki i nyimwa. In aye iber makato Balak wod pa Jipor, kabaka me Moab? En yam otubbe i kom jo Icrael? Nyo en yam ocako lweny i komgi? I kare ma jo Icrael gubedo i Kecbon ki i gaŋi matino ma i ŋete, ki i Aroer ki i gaŋi matino ma i ŋete, ki i gaŋi ducu ma i dog kulu Amon pi mwaka miya adek kulu, piŋo yam pe imayogi woko i kare ca? Kit meno an gira pe atimo bal mo i komi; in giri aye itima rac pi cako lweny i koma. Rwot ma Laŋolkop aye ber oŋol kop i kin jo Icrael ki jo Ammon tin.” Ento kabaka pa jo Ammon pe oketo cwinye i kom kwena ma Jeputa ocwalo bote. Ci Cwiny pa Rwot obino i kom Jeputa, omiyo obaro dye Gilead ki Manace, okato kwede wa i Mijpa ma i lobo Gilead. Ki kunnu en dok okato kwede i kom jo Ammon, Jeputa onoŋo okwoŋo kwoŋ bot Rwot kun waco ni, “Ka ibimiyo jo Ammon i ciŋa, ci ŋat ma okatti woko ki i doggola oda ma bino ka rwatte kweda ma doŋ adwogo ma aloyo jo Ammon, en aye bibedo pa Rwot ci abimiye me bedo gitum awaŋa.” Kit meno Jeputa oŋolo loka kulu i kom jo Ammon ka lweny kwedgi, ci Rwot omiyogi i ciŋe. Onekogi cakke ki i Aroer o kwede wa i lobo ma cok ki Minit, gaŋi pyeraryo madito, ki o wa i Abel-keramim, kun ginekogi matek twatwal. Kit meno Lubaŋa omiyo jo Icrael guloyo jo Ammon. Ka Jeputa odwogo cen i pacone i Mijpa, nen, nyare okato woko ka rwatte kwede ki ajaa ki myel. Nyare en acel keken, pe tye ki wode nyo nyare mo mukene. Ka oneno nyare, oyeco boŋone woko pi cwercwiny kun wacci, “Maa do, nyara! Ituro tekka woko do, iketa i cwar can madwoŋ kuman, pien onoŋo doŋ atiŋo doga bot Rwot ma doŋ pe atwero loko kwonna.” Ci nyare owaco bote ni, “Wora, ka onoŋo itiŋo dogi bot Rwot ba, ci doŋ itima kit ma itiŋo ki dogi-ni, pien Rwot doŋ oculo kwor i kom jo Ammon ma lumerokki-ni.” Dok oloko ki wonne, owacci, “Koŋ itima man; weka abedi pi dwe aryo, wek koŋ acit awirre i kor godi, wek acikok akum pi tidina, an kacel ki luwota, pien abito ma peya ginyoma.” Ogamo ni, “Citi”, ocwalo nyare pi dwe aryo. Nyako ocito, en ki luwote, ci gukok i wi godi kun gikumo pi tidine. Ka dwe aryo-nu otum, odwogo cen bot wonne, ci otime kit ma yam okwoŋo-ni. Nyare yam pe obedo ki meye mo, Ci lok-ki odoko kit ki bot jo Icrael. Anyira Icrael yam gicito ka kumo pi nya pa Jeputa ma Lagilead nino aŋwen i mwaka acel acel. Jo Epraim guywayo mony, guŋolo loka, guo i Japon, guwaco bot Jeputa ni, “Piŋo icito ka lweny i kom jo Ammon, ci pe ilwoŋowa wacito kwedi? Wabiwaŋo wii woko i odi.” Jeputa ogamo doggi ni, “An ki lwakka yam wabedo ki mone madit ki jo Ammon, ento ka alwonowu, wun pe wulara ki i ciŋgi, Ka aneno ni pe wutwero lara, ci adyero koma aŋolo loka ca i kom jo Ammon, ci Rwot omiyogi i ciŋa, Piŋo tin dok wubino bota ka lweny i koma?” Ci Jeputa ocoko jo Gilead ducu, olwenyo ki jo Epraim, ci jo Gilead guloyo jo Epraim. Onoŋo jo Epraim guwacci, “Wun jo Gilead ma wubedo i kin jo Epraim ki Manace, wun giwu jo Epraim aye ma yam wuriŋo wularo komwu.” Mumiyo jo Gilead gumako waŋ wat ducu me kulu Jordan pi geŋo jo Epraim. Ka dano mo i kin jo Epraim ma oriŋo olaro kome owacci, “Wek aŋol akat loka ca,” ci jo Gilead giwaco bote ni, “In i jo Epraim?” Ka ogamo ni, “Pe,” ci giwaco bote ni, “Koŋ iwac Cibolet,” ci en wacci, “Sibolet,” pien pe twero lwonone maber matir; ci gimake, gineke woko i waŋ wat kunnu. Jo Epraim guto ma romo alip pyeraŋwen wiye aryo i nino meno. Jeputa obedo laŋolkop i Icrael pi mwaka abicel, Ka Jeputa ma Lagilead oto, ci giyike i gaŋŋe ma i Gilead. Dano ma olube me bedo laŋolkop i Icrael obedo Ibijan, dano me Beterekem. En yam tye ki awobene pyeradek, ki anyira pyeradek. Omiyo anyirane ginyomogi i kaka mukene, dok okelo anyira ma i kaka mukene pyeradek pi awo bene. Obedo ka ŋolo kop i Icrael pi mwaka abiro. Ka Ibijan oto, ci giyike i Beterekem. Ci Elon Lajabulon dok olubo kore, obedo laŋolkop i Icrael. Obedo ka ŋolo kop i Icrael pi mwaka apar. Ka Elon Lajabulon oto, ci giyike i Aijalon i lobo pa jo Jabulon. Ki I ŋeye dok Abudon wod pa Ilel ma Lapiraton aye obedo laŋolkop i Icrael. Yam tye ki awobene pyeraŋwen ki likwaye pyeradek ma giwoto ki kanagi pyerabiro. Obedo ka ŋolo kop i Icrael pi mwaka aboro. Ka dok Abudon wod pa Ilel ma Lapiraton oto, ci giyike i Piraton ma i lobo Epraim, i lobo godi pa jo Amalek. Jo Icrael dok gutimo gin ma nen marac i Waŋ Rwot, ci Rwot omiyogi i ciŋ jo Piliciti pi mwaka pyeraŋwen. Yam tye laco mo i Jora ma i kaka pa jo Dan, nyiŋe Maŋoa. Dakone onoŋo lalur, pe tye ki latin mo. Lamalaika pa Rwot onen bot dako, ci owaco bote ni, “Nen, in lalur ma pe it ye ki latinni mo. Ento ibiyac, ibinywalo latin laco. Pi meno myero igwokke, pe imat koŋo vino nyo gin ma mero dano, dok pe icam gin mo ma keni; pien, nen, ibiyac, ci ibinywalo latin ma laco. Pe lyedi bigudo wiye, pien bibedo ajula pa Lubaŋa cakke ki i kare ma ginywale, dok en bicako laro jo Icrael ki i ciŋ jo Piliciti.” Dako ocito otito bot cware ni, “Dano pa Lubaŋa obino bota kun waŋe nen calo waŋ lamalaika pa Lubaŋa; neno lik twatwal. Pe apenye ka ma oa iye, en pe otitta nyiŋe. Ento owaco bota ni, ‘Nen, ibiyac inywalo latin laco; pi meno pe imat koŋo vino nyo gin ma mero dano, pien latin-nu bibedo ajula pa Lubaŋa cakke ki i kare ma ginywale o kwede wa i nino me tone.’ ” Maŋoa olego Rwot kun waco ni, “Ai Rwot, alegi ba, wek dano pa Lubaŋa ma ne ne icwalo-ni odwog botwa, wek opwonywa ki gin ma myero wati i kom awobi ma gibinywalo-ni.” Lubaŋa owinyo koko pa Maŋoa, ci lamalaika pa Lubaŋa obino bot dako doki ma en obedo i poto; ento cware Maŋoa onoŋo pe tye kacel kwede. Dako oriŋo oyotoyot, otito bot cware ni, “Dano ma nene onen bota i kare ca dok onen bota kombeddi.” Maŋoa oa ocito kun lubo kor dakone. Ka obino bot dano-nu, ci owacce ni, “In aye i dano ma yam oloko ki dakoni’?” Ogamo ni, “An.” Ci Maŋoa owacci, “Ka lokki doŋ ocobbe kakare, kit kwo pa awobi-ni bibedo niŋniŋ, dok en bitiyo kit gin aŋo?’ ” Lamalaika pa Rwot owaco bot Maŋoa ni, “Gin ducu ma doŋ awaco bot dako en ogwoki. Pe ocam gin mo ma oa i kom olok, pe omat koŋo vino nyo gin ma mero dano, pe ocam gin mo ma keni; ento olub gin ducu ma yam acike iye.” Maŋoa owaco bot lamalaika pa Rwot ni, “Wek koŋ wagali man ok ba, pi yubo latin dyel mo piri.” Ento lamalaika pa Rwot owaco bot Maŋoa ni, “Kadi bed igala, pe abicamo camwu. Ento ka ibiyubo gitum awaŋa, ci doŋ itum bot Rwot.” Onoŋo Maŋoa pe ŋeyo ni en lamalaika pa Rwot. Ci Maŋoa openyo Lamalaika pa Rwot ni, “Nyiŋi aŋa, wek ka lokki ocobbe kakare wamiyi deyo?’ ” Lamalaika pa Rwot owacce ni, “Piŋo ipenyo nyiŋa, kun nyiŋa obedo me aura twatwal?” Manoa otero latin dyel kacel ki gityer me moko kwon, ci otyero i kom pata got bot Rwot ma ticce me aura-ni. Ka leb mac olyel ocito malo tuŋ polo ki i wi keno tyer, ci lamalaika pa Rwot oito malo i leb mac me keno tyer-ri kun Manoa ki dakone gineno; ci gupoto piny aryeba ic. Lamalaika pa Rwot pe dok onen bot Manoa ki dakone tyen mukene, mumi yo Manoa oniaŋ ni en lamalaika pa Rwot. Ci Manoa owaco bot dakone ni, “Wan wabito ada, pien waneno Lubaŋa.” Ento dakone ogamo doge ni, “Ka onoŋo Rwot oyubbe me nekowa, kono pe ogamo gitum awaŋa ki gityer me moko kwoŋ ki i ciŋwa, dok kono pe onyuto botwa lok magi ducu, kadi tuco lok macalo magi.” Ka dako onywalo wode, ci ocako nyiŋe Samson. Ci awobi-nu odoŋo kun Rwot miye gum. Cwiny pa Rwot ocako tic i kome i Gony pa Dan ma i kin Jora ki Ecitaol.’ Samson ocito Timna, ci oneno nyako mo kunnu ma anyira jo Piliciti. Ka odwogo cen, ci otito bot wonne ki minne ni, “Aneno nyako mo i kin anyirajo Piliciti i Timna; ber wunyomma obed dakona.” Ento wonne ki minne guwaco bote ni, “Nyako mo pe i kin lwak anyira ma tuwu ce, nyo i kin rokwa ducu, en aye omiyo icito ka kelo dako ki i kin jo Piliciti ma pe gulirre-ni?” Ento Samson ogamo dog wonne ni, “Ber wunyomma nya-nu, pien mwonya twatwal.” Wonne ki minne onoŋo pe guŋeyo ni lokke oa bot Rwot; pien onoŋo obeyenyo tyen alii mo i kom jo Piliciti. I kare meno jo Piliciti giloyo jo Icrael. Samson ocito Timna ki wonne ki minne. Ka oo i potti olok ma i Timna, ci latin labwor omor i kome. Cwiny Rwot obino opoto i kome ki tek, ci oyeco kom labwor, obaro iye woko macalo yeco latin dyel, kun pe tye ki gin mo i ciŋe. Ento pe otito gin ma en otimo-ni bot wonne nyo minne. Ka ocito kunnu, oloko ki nyako ca, ci oyomo cwinye matek. Ka kare okato manok, odok kunnu ka omo dakone, ci oŋak ocito ka neno kom labwor ma oneko-ni, Ci nen, lwak kic odonyo i kom labwor, moo kic bene tye. Ototo ki ciŋe, ka opyelo i dye ciŋe kun camo woto kwede. Ka oo kwede bot wonne ki minne, omiyogi mogo, gin bene gucamo. Ento pe otito botgi ni etoto ki i kom labwor ma oneko-ni. Lacen wonne ocito bot dako-nu, ci Samson otedo karama kunnu, pien latin awobi yam timo kit ennu. Ka jo kunnu gunene, gukelo bote jo pyeradek wek gubed kwede. Samson owaco botgi ni, “Wek koŋ awacciwu koc lit: ka wubigonyo tere i kin nino abiro-ni me karama, ma wunoŋo tyen lokke, ci an abiminiwu boŋŋi camanini pyeradek, ki boŋŋi mabeco pyeradek bene e aruka i nino madito. Ento ka Wo tyen lokke oloyowu, ci wun aye wubimina boŋŋi camanini pyeradek, ki boŋŋi mabeco pyeradek bene me aruka i nino madito.” Guwacce ni, “Wac koc litti, wek koŋ wawiny mono.” Owaco botgi ni, “Lacam dano oa iye cam, latekkom oa iye gin ma lim.” Gutyeko nino adek ma pe gitwero gonyo tyen koc lit meno. I nino me aŋwenne guwaco bot dako pa Samson ni, “Bit cwari, wek otit botwa tyen koc litte. Ka pe, ci wawaŋi woko ki mac wa ki jo me ot pa woru bene. Wun wulwoŋowa; kany pi yako jamiwa woko bo?” CI dako pa Samson ocako kok i nyime kun waco bote ni, “In idaga giri, pe imara. Iwaco koc lit bot lutuwa kun pe ititta te lokke.” Ogamo doge ni, “Nen, yam pe atito bot wora wa maa bene, ci in aye doŋ abititti bo?” Dako obedo ka kok bote pi nino abiro, kit ma karama obedo kwede; ci i kom nino me abirone otito bot dakone, pien onoŋo doŋ odiye matek. Dako ocito otito koc lit bot lutugi, mumiyo jo me gaŋ meno guwacce tyen koc litte ma peya cen opoto i kom nino me abirone, kun giwacci, “Gin aŋo ma lim makato moo kic? Gin aŋo ma tek makato labwor?” En owaco botgi ni, “Kono yam pe wubedo ka pur ki royana, kono pe wugonyo tyen koc litta.” Ci Cwiny pa Rwot obino opoto i kome ki tek. Ocito i Acikelon, oneko dano pyeradek ma i gaŋ meno, oyako jamigi, omiyo boŋŋigi mabeco me aruka i nino madito bot jo ma gugonyo koc lit-ti, ci odok i paco pa wonne ki akemo madwoŋ. Ci gimiyo dako pa Samson bot lawote ma onoŋo obedo ka ŋete i kare me nyom, Ka kare okato manok, i kare ma gikayo iye naŋo, Samson ocito ka limo dakone ki latin dyel mo, ci owacci, “Abidonyo bot dakona i kicikane.” Ento won dako pe oye en odonyo. Owacci, “Onoŋo atamo mera ada ni ityeko kwere woko, mumiyo doŋ amiye woko bot lawoti. Laminne matidi dok ber kato en. Ber ibed kwede ma kakare.” Ento Samson owaco botgi ni, “Tin pe abibedo labal ka atimo gin marac i kom jo Piliciti.” Samson ocito omako lwak too miya adek, ci oriyo raa. Oloko too omiyo yibgi okemme ki wadi, otweyo raa i kin yibgi aryo aryo. Ka oewinyo mac i kom raa, ci oweko too gucito kwede i poto naŋo pa Lupiliciti ma peya gikayo-ni. Mac owaŋo wic larita ma gigurogi woko, ki naŋo ma peya gikayo, wa ki potti jeituni bene, Ka Lupiliciti gupenyo ni, “Man aŋa ma otimo?” ci giwacci, “Samson ma cwar dako pa Latimna aye otimo, pien gikwanyo dakone, gimiyo bot lawote.” Mumiyo jo Piliciti gubino, guwaŋo anyaka ki wonne woko ki mac. Ci Samson owaco botgi ni, “Ka ce wutimo kit meno, ci akwoŋo akwoŋa botwu ni abiculo kwor i komwu, ka doŋ abiweko lobo bedo.” Ocako datogi ki ton, onekogi matek; lacen ocito obedo i boro got ma i Etam. Jo Piliciti gubino, gugony i Juda, ci gumonyo Leki. Jo Juda guwacci, “Piŋo wun wubino ka monyowa?” Ci gugamo ni, “Wabino ka tweyo Samson, wek watim en kit ma en otimowa-ni.” Jo Juda alip adek gucito i boro got ma i Etam, guwaco ni, “In pe iŋeyo ni jo Piliciti aye gitye ka loyowa? Ci itimowa kuman mono piŋo?” Ogamo doggi ni, “Kit ma gutimo i koma-ni, an bene atimogi kumene.” Guwacce ni, “Wan wabino ka tweyi, wek wamiyi i ciŋ jo Piliciti.” Samson owaco botgi ni, “Koŋ wukwoŋna kwoŋ ni pe wun aye wubineka wun kikomwu.” Gugamo ni, “Pe; wan wabitweyi atweya keken, ci wabimiyi i ciŋgi.” Ci gutweye ki tol aryo manyen, gukele woko ki i boro got, Ka oo i Leki, Lupiliciti gubino ka romo kwede kun gidaŋŋe, ci Cwiny pa Rwot obino opoto i kome ki tek, tol ma gitweyo ki ciŋe odoko calo tol obira ma mac owaŋo, opoto ome woko ki i ciŋe, Ocop i kom cogo cwak kana manyen, owoto ciŋe, okwanyo, ci oneko kwede dano alip kulu. Ci Samson owaco ni, “Pi cogo cwak kana odurre kom wadi lipimpim; ki cogo cwak kana aneko kwede co alip.” Ka otyeko loko lokke, obolo cogo cwak kana ma i ciŋe-ni piny, ci gicako nyiŋ kabedo-nu ni, Ramat-leki. Lacen orwo pii oneke matek, ci okok bot Rwot kun waco ni, “ityeko larowa matek kit man ki ciŋa, Rwot ci dok ata kombeddi ki orwo pii? Doŋ apot i ciŋ jo ma pe gilirogi bo?” Ci Lubaŋa obaro waŋ got matwolo ma yam tye i Leki, pii onyette ki iye. Ka omato, ci cwinye odwogo, olimo tek doki. Pienno nyiŋ kabedo-nu gilwoŋo ni, En-akore; pud tye i Leki waonyoo. Samson obedo laŋolkop i Icrael i kare pa jo Piliciti pi mwaka pyeraryo. I nino mo Samson ocito Gaja, ci oneno lakwele mo, ocito odonyo bote. Gitito bot jo Gaja ni, “Samson obino kany,” ci gurumo kabedo-nu woko, gubuto gukure i dog cel me gaŋ meno dyewor benebene. Guliŋ woko litik i dyewor meno, kun gikwilo lok ni, “Weku wakure nio wa kwar piny, ka doŋ wabineke.” Ento Samson obuto kunnu o wa i cwiny dyewor, ci ba malo i cwiny dyewor, omako dog cel me gaŋ-ŋu, ki pagi wirre aryo ducu, oputogi woko ki pal gwoke, ki rii me cegone ki jamine ducu, otiŋogi woko, oterogi wa i wi got ma i nyim Kebron. Lacen dok omaro dako mo ma i nota me Corek, ma nyiŋe Delila. Ci rwodi pa jo Piliciti gubino bot dako, guwaco bote ni, “Bit en mot, wek inoŋ ka ma tek kome madwoŋ-ŋi ocuŊ iye, ka dok wabiloye ki yo aŋo, wek watweye, wabwoye; ci wan ki acel acel wabimini lim ryal alip acel ki miya acel.” Ci Delila ocako waco bot Samson ni, “Opwoyo ititta ka ma tek komi madwoŋ-ŋi ocuŋ iye do, ki kit ma myero gitweyi kwede, wek gibwoyi.” Samson owaco bote ni, “Ka ce gitweya ki tol atum abiro, manyenne, ma pe otwo, ci abidoko goro macalo dano mukene ducu.” Rwodi pa Lupiliciti gukelo tol atum manyen abiro ma peya otwone, ci Delila otweyo ki Samson woko. Onoŋo dako-nu tye ki jo mukanne i kicika ma i tyelo me kiye. Owaco bot Samson ni, “Samson, Lupiliciti gubino i komi!” Ento en ocodo tol atum woko ducu, macalo tol tworo ma ogudo mac. Kit meno ka ma tek kome ocuŋ iye pe omedo ki nene, Ci Delila owaco bot Samson ni, “Nen ka ibwola ba, ilokka giri lok goba. Opwoyo ititta kit ma myero gitweyi kwede do.” Ci dok owaco bote ni, “Ka ce gitweya ki tol ma peya gitiyo kwedgi, ci abidoko goro macalo dano mukene ducu.” Delila okwanyo tol manyen, otweye kwede, ci owacce ni “Samson, Lupiliciti gubino i komi!” Koŋ onoŋo dano gukanne i kicika ma i tyelo ka kiye, Ento Samson ocodo tol woko ki i ciŋe macalo uci me kwoyo boŋo, Ka Delila dok owaco bot Samson ni “Pud ibwola aye o wa onyoo, kun ilokka goba. Titta kit ma myero gitweyi kwede mono.” Ci owacceni, “Ka ce imako dog yer wiya abiro, icweyo irwako i boŋo ma it ye ka cweyoni, igoyo ki yat ma lacwe-boŋo goyo ki uci ma orwako wek omok matek, ci abidoko goro macalo dano mukene ducu.” Kit meno ka doŋ onino, Delila omako dog yer wiye abiro, ocweyo kun orwako i boŋo ma etye ka cweyo, ogoyo ki yat wek omok iye matek. Ci owaco ni, “Samson, Lupiliciti gubino i komi!” Ento en oco ki i waŋ nino owoto yat, oputo kwede yat cweyo boŋo, ki boŋo ma i kome ma gitye ka cweyone. Lacen dako owaco bote ni, “Itwero waco niŋniŋ ni imara kun noŋo pe igena ki cwinyi ducu? Man doŋ ibwola tyen me adekke, kun pe ititta ka ma tek komi madwoŋ-ŋi ocuŋ iye.” Ka dako obedo ka dide matek ki lokke nino ki nino, kun lokke ki tek, omiyo cwinye obelle me to woko. Ci otito bot dakone gin ducu ma tye i cwinye, kun wacce ni, “Lyedi peya ogudo wiya, pien abedo ajula pa Rwot cakke ki i kare ma ginywala iye. Ka ce gilyelo yer wiya, ci tek koma biweka woko, abidoko goro, abedo macalo dano mukene ducu.” Ka Delila oneno ni doŋ otyeko titte lok ma i cwinye ducu, ocwalo kwena olwoŋo rwodi pa jo Piliciti kun wacci, “Wubin koŋ doŋ k icel-li, pien doŋ otitta lok ma i cwinye ducu.” Rwodi pa jo Piliciti gubino kun gikelo ki lim bene i ciŋgi. Delila omiyo Samson onino i coŋe, ci gilwoŋo laco mo omiye olyelo dog yer wiye abiro-ni woko, Ci dako ocako time malitlit, ci tek kome oa woko ki i kome. Ka dako owaco ni, “Samson, Lupiliciti gubino i komi!” ci oco woko ki i waŋ nino kun tamo ni, “Abikato woko i kit macon ca, ateŋogi woko ki i koma.” Onoŋo pe ŋeyo ni Rwot otyek o a woko ki i kome, Lupiliciti gumake, gukolo waŋe woko, gutere Gaja. Gutweye ki atego mola, obedo ka rego bel i mabuc. Ento yer wiye ocako lot doki i ŋe lyelone. I kare mo rwodi pa Lupiliciti gucokke ka tyero gitum madwoŋ bot Dagon ma lubaŋagi ma cwinygi yom, pien gubedo ka waco ni, “Lubaŋawa doŋ omiyo lamerokwa Samson i ciŋwa.” Ka lwak gunene, gupako lubaŋagi-ni kun giwacci, “Lubaŋawa doŋ omiyo lamerokwa i cinwa ma lanek pinywa, ma otyeko lwak jowa mapol.” Ka cwinygi doŋ yom, ci guwacci, “Gilwon Samson wek otuk tuko mo ogal ki wanwa.” Kit meno gilwoŋo Samson ki i ot mabuc, ci obedo ka tuko i nyimgi, Ci giweko en ocuŋ i kin wir ot aryo. Samson owaco bot awobi ma peye ni, “Wek koŋ aboŋ kom wir ma ot ocuŋ iye-ni, wek ajeŋŋe i komgi.” Onoŋo ot opoŋ ki co ki mon, ki rwodi ducu pa Lu piliciti onoŋo gitye kunnu. Malo i wi ot bene onoŋo tye co ki mon alip adek ma gubedo ka neno ka Samson tye ka tuko. Ka doŋ Samson okok bot Rwot kun waco ni. “Ai Rwot Lubaŋa, po pira, alegi ba do, ci imiya tekkom doki tyen man acel-li. Ai Lubaŋa alegi iwek acul kwor i kom jo Piliciti pi waŋa aryo-ni lawaŋacel.” Ci Samson omako wil ot aryo ma i dyere ma ot ocuŋ i komgi-ni, otyelle ki tekke ducu, ojenne i komgi, kun ciŋe malacuc omako wir acel, ki ciŋe malacam omako mukene. Ka doŋ Samson owacci, “Wek doŋ ato kacel ki jo Piliciti.” Ci okulle ki tekke ducu, omiyo ot opoto i kom rwodi ki i kom lwak ma gitye iye-ni. Kit meno, jo ma onekogi i kare me tone obedo pol makato jo ma yam onekogi ma pud en kwo. Omegine ki kakagi ducu gubino, gutiŋo kome, gukelo lyel ci guyiko i kin Jora ki Ectaol, i lyel pa wonne Manoa. Obedo laŋolkop i Icrael pi mwaka pyeraryo, Yam tye dano mo i lobo godi me Epraim ma nyiŋe Mika. Owaco bot minne ni, “Lim ryal alip apar wiye acel ma yam gikwalo ki boti-ni, ma yam iloko iceno iye dano-ni, kun an bene awinyo, nen, ryal-lu tye bota, an aye yam akwanyo.” Minne ogamo ni. “Rwot omiyi gum, latinna.” Odwoko lim ryal alip apar wiye acel bot minne, ci minne owaco ni, “An kikoma adyero ryal man bot Rwot pi woda me timo cal apaya ki cal ryal ma giliyo aliya; ci kombeddi doŋ omiyo adwoko boti.” Mika dok odwoko lim bot minne, ci minne okwanyo lim ryal miya aryo, omiyo bot latet ryal, en otiyo ki cal apaya ma gimwono kome ki ryal, ki cal ryal ma giliyo aliya, ci giketo i ot pa Mika. Laco man, Mika, onoŋo tye ki ot woro Lubaŋa i gaŋŋe, ci otiyo epod ki cal lubaŋa, oketo wode acel me bedo ajwakane. I kare meno onoŋo kabaka pe i Icrael; dano acel acel tiyo gin ma en tamo ni tye atir. I kare meno onoŋo tye latin laco mo ma bedo i Beterekem, i lobo Juda. En onoŋo Lalevi ci bedo kunnu macalo welo. En odak oa woko ki i Beterekem ma i Juda wek ecibed i kabedo mo ma ebinoŋo, Ka owoto, ci oo i lobo godi me Epraim, i gaŋ pa Mika. Mika openye ni, “In ia ki kwene?” Ogamo ni” “An Lalevi me Beterekem ma i Juda, abibedo i kabedo mo ma abinoŋone.” Ci Mika owaco bote ni, “Bed doŋ bota, wek ibed wora ki ajwakana, ci abimini litn ryal apar mwaka ki mwaka, ki boŋŋi me aruka, dok abigwoki.” Lalevi oye bedo bote; ci latin laco meno ocako bedo kwede macalo ŋat acel i kom litinone. Mika oketo Lalevi me bedo ajwakane, ci obedo i gaŋ pa Mika. I kare-nu Mika owacci, “Kombeddi doŋ aŋeyo ni Rwot bibedo kweda maber, pien doŋ atye ki Lalevi me bedo ajwakana.” I kare meno onoŋo kabaka mo pe i Icrael. Dok i kare meno jo ma i kaka pa Dan gubedo ka yenyo kabedo me bedo ginaleyagi, wek gubed iye, pien onoŋo peya gunoŋo dul lobo mo me aleya i kin kaka me Icrael. Kit meno jo Dan gucwalo dano abic makwiri ki i kin doggolagi ducu, gua ki i Jora ki Ectaol pi roto lobo ki tatone maber, kun giwaco botgi ni, “Wuciti ka tato lobo maber.” Ci gubino i lobo godi me Epraim, i gaŋ pa Mika, gubuto kunnu. Ka onoŋo gitye i gaŋ pa Mika, ci guŋeyo dwan Lalevi matidi-ni, guŋak gucito bote, gupenye ni, “Aŋa mono ma okeli wa kany? Itimo aŋo i kabedo-ni? Ibedo kany piŋo mono?” Owaco botgi ni, “Mika aye obedo ka tima kuman, kuman; dok en aye cula gire, ci adoko ajwakane.” Ci gulege ni, “Koŋ ipeny dog Lubaŋa, wek wane ka wotwa ma wacito iye-ni bibedo maber.” Ajwaka owaco botgi ni, “Wucit ki kuc. Rwot bigwokowu i wot ma wucito iye-ni.” Ci jo abic-cu gucito guo i Laic, ci guneno jo ma gitye kenyo, kit ma gibedo kwede mot i kit bedo pa jo Cidon, ma gibedo mot gutoyo ki tokgi ata, dok ni pe gin mo orem botgi i wi lobo, ento gitye gigi ki lonyo madwoŋ. Dok onoŋo gitye ka mabor ki bot Jo Cidon, pe gimer ki ŋatti mo. Ka gudwogo bot omegigi i Jora ki Ectaol, omegigi gupenyogi ni, “Wukelo kit lok aŋo?” Gugamc ni, “Wua, wek wacitu i komgi, pien waneno lobo ca, lobone ber twatwal. Pe wumito timo iye gin mo? Pe wugalle ka cito kunnu ka donyo iye, ki camo lobone woko, Ka wubicito, ci wubituc i kom jo ma gutoyo tokgi ata. Lobone lac; ada Lubaŋa otyeko miyone woko i ciŋwu, kabedone tye iye gin ducu ma mitte i wi lobo.” Ci jo miya abicel ma i kaka pa Dan gukwanyo jami lwenygi, gua ki i Jora ki Ectaol, gukato, gugony i Kiriat-jearim i Juda, Pi lok meno omiyo kabedo-nu gilwoŋo Gony pa Dan o wa onyoo. Nen, tye i ŋet Kiriaŋearim, yo tuŋ potoceŋ. Lacen gukato gucito i lobo godi me Epraim, ci gubino i gaŋ pa Mika. Ka doŋ jo abic-cu ma yam onoŋo gucito ka roto lobo Laic guwaco bot omegigi ni, “Wuneyo mono ni i odi kany tye iye epod, cal lubaŋa, cal apaya ki cal me ryal ma giliyo aliya? Kombeddi doŋ wutam gin ma wubitimo.” Ci guŋak gucito kunnu, guwoto i ot pa latin Lalevi ma i paco pa Mika, ci gupenye ka en tye maber. Jo Dan miya abicel gumako jami lwenygi, gucuŋ kwede i dog gaŋ ka ma gidonyo iye-ni, ci jo abic ca ma yam gucito ka roto lobo-ni gucito gudonyo i ot, gukwanyo cal apaya ki epod, ki cal lubaŋa, ki cal me ryal ma giliyo aliya, kun ajwaka ocuŋ i dog gaŋ kacel ki jo miya abicel ma gumako jami lwenygi, Ka jo-nu gudonyo i ot pa Mika, gukwanyo cal apaya, ki epod, ki cal lubaŋa ki cal me ryal ma giliyo aliya, ci ajwaka openyogi ni, “Wutimo gin aŋo mono?” Gugamo doge ni, “Liŋ mot, um dogi woko ki ciŋi, ci ibin kacel kwedwa, ibed wonwa ki ajwakawa. Hamo ni bedo ber ka ibedo ajwaka i ot pa dano acel, nyo ibedo ajwaka i doggola nyo i kaka kulu ma i Icrael?” Cwiny ajwaka obedo yom; otero epod ki cal lubaŋa ki cal apaya, owoto kwedgi i dye lwak. Kit meno gulokke gucako wot, kun gicwalo litino ki lim makwo ki jamigi ducu i nyimgi. Ka doŋ gucito ma oŋado ki paco pa Mika, jo ma gibedo i gaŋ ma cok ki gaŋ pa Mika onoŋo guriŋo i oduru, gumako jo Dan iyo, Gudaŋŋe bot jo Dan, ci gin gulokke, guwaco bot Mika ni, “Aŋo mutimi mumiyo ibino ki lwak macalo man?” Ogamo ni, “Wukwanyo lubaŋana ma apayo, ki ajwakana, wucito kwede woko, doŋ adoŋ ki gin aŋo? Ka dok wupenya akaka ni, ‘Aŋo mutimi?’” Emo jo Dan gugamo ni, “Pe iwek dwani owinnye i kinwa, miyo kiniga mako jowa ci gipoto i komwu, gineki ki jo paconi ducu.” Ci jo Dan gucito gigi woko. Ka Mika oneno ni gitek pe eromo loyogi, en bene odok paco. Jo Dan gutero jami ma yam Mika opayo; ki ajwakane ma yam tye bote, guo kwede wa i Laic, bot jo ma gubedo mol ma gutoyo tokgi ata, gunekogi ki pala lucwan, guwaŋo gaŋgi woko ki mac. Dano mo pe ma oriŋo oduru ka larogi, pien onoŋo gitye bor ki Cidon, dok yam pe gumer ki ŋatti mo, Onoŋo gitye i nota ma cok ki Bet-Rekob. Jo Dan gugero gaŋ meno odoco, gubedo iye. Ci gucako nyiŋ gaŋ ni, Dan, macalo nyiŋ Dan ma kwarogi, ma yam Icrael onywalo. Ento yam con nyiŋ gaŋ-ŋu gilwoŋo ni Laic. Jo Dan gucibo cal ma gutero-ni me aworagi. Ci Yonacan lakwar Gercom ma wod pa Moses, ki likwaye, gubedo ajwagi i kaka pa Dan o wa i kare ma gitero jo Icrael i opii. Cal ma yam Mika opayo obedo kunnu pi kare ducu ma ot pa Lubaŋa obedo i Cilo. I kare meno ma onoŋo-kabaka pud pe i Icrael, yam tye Lalevi mo ma bedo i lobo godi me Epraim macalo welo, i kabedo mo ma tye teŋe i lum ka mabor. Okwanyo nya jo Beterekem ma i Juda me bedo dakone ma aŋeca, Ka dakone okeco i kome, ci oa woko ki bote, odok i ot pa wonne i Beterekem ma i Juda, obedo kunnu pi dwe aŋwen, Lacen cware oa ocito ka lubo kore kunnu, wek elok kwede mot, edwog kwede gaŋ, Owoto ki laticce ki kana aryo, ci obino i ot pa won nyako. Ka won nyako onene, obino ka jole ki yomcwiny, Ci won dakone odiye, omiyo obedo kunnu pi nino adek; gubedo ka camo cam ki mat, kun en buta kunnu. I nino me aŋwenne gua malo con, ci en oyubbe pi wot. Ento won nyako owaco bot cwar nyare ni, “Koŋ igal dogi ki latin kwoŋ mo, ka lacen doŋ wuwoti.” Jo aryo-nu gubedo gucamo ki mat kacel, ci won nyako owaco bot laco-nu ni, “Ber ibut kany tin, wek koŋ cwinyi opye mot.” Ka laco-nu oa malo me wot, won nyako dok ojuke, omiyo dok obuto kunnu. I nino me abicce doŋ oa malo odiko con me cako wot; ci won nyako owacci, “Koŋ igal dogi ki gin mo; ibed nio ka piny okwe.” Kit meno gin aryo ducu gucamo cam. Lacen laco-nu ki dakone ki laticce gua malo me cako wot. Won dakone owaco bo te ni, “Nen, piny doŋ mito yuto woko, ber wubut kany do, Nen ka piny doŋ oyuto woko ayuta, but kany wek koŋ cwinyi opye mot, ci diki wubia odiko con, wucako wot me cito paco.” Ento laco-nu pe dok oye buto kunnu. Oa, ocako wot, ci oo i nyim Jebuc, ma en aye Jerucalem. Onoŋo en tye ki kana aryo ma doŋ gitweyo kom me bedo i wigi, kun dakone tye kwede kacel. Ka doŋ gitye cok ki Jebuc, onoŋo piny doŋ oyuto woko, ci laticce owaco bote ni, “Wek wanak i gaŋ man pa jo Jebuc, wabut kunnu tin.” Ento rwode ogamo ni, “Pe wabidok bot lurok ma pe gin jo Icrael; ento wabikato wacito Gibea.” Ci owaco bot laticce ni, “Bin wek wacit i kabedo mo mukene, wabut i Gibea nyo i Rama.” Gukato gucito gigi, ci cen opoto woko ma gitye cok ki Gibea, ma gaŋ pa jo Benjamin, Guŋak kunnu pi wot buto i Gibea. Ka gudonyo iye, Lalevi ocito obedo piny i dye gaŋ ka maleŋ: ento dano mo pe oterogi i ode wek gubut bote, Ka lacen dano mo ma oti obino kun oa ki ka tic i potone. Dano-nu tugi tye i lo bo godi me Epraim; onoŋo en labedo i Gibea, wegi gaŋ kikomgi gin jo Benjamin, Otiŋo waŋe oneno dano ca ma lawot ma obedo i dye gaŋ ka maleŋ, openye ni, “Icito kwene? la ki kwene?” Lalevi ogamo ni, “Waa ki i Beterekem ma i Juda, wadok i lobo godi me Epraim ka mo tene i lum ka mabor ka ma an abedo iye. Onoŋo acito i Beterekem ma i Juda-ni, kombeddi abedok gaŋ; ento ŋatti mo pe otera i ode. Watye ki reŋ kal ki cam pa kanawa, wa ki kwoŋ ki koŋo vino ma romowa, an ki aŋecana ki awobi-ni ma konya; gin mo murem peke.” Ci dano muti-ni ogamo ni, “Kuc obed i komi; abicobo gin ma wumito ducu; ento pe wubut wo ko i dye gaŋ aye,” Kit meno ocako tere i ot, ci omiyo cam ki kana. Gin gulwoko tyengi, ka gucamo, gumato, Ka gitye ka yomo cwinygi, ci nen, jo ma i gaŋ meno ma lutim aranyi gurumo ot woko, gugoyo doggola kun giwaco bot ladit ma won ot ni, “Kel dano ma obino i odi-ni woko, wek wanene kwede.” Won ot okato woko, ocito botgi, owaco botgi ni, “Pe kumeno, utmega, pe wutim tim marac kit meno; pien dano man doŋ odonyo i oda, pe wutim tim man me aranyi. Nen, nyara tye ene ma peya oneyo co, ki aŋeca pa laco-ni bene. Wek akelgi woko kombeddi, wuronygi kun wutimogi kit ma wumito; ento i kom dano man pe wutim aranyi i kome.” Ento jo-nu pe gumedo ki winyone, mumiyo Lalevi omako dakone ci ocwalo woko i ciŋgi, Guronye, gutiyo kwede kit ma igi mito i dyewor benebene nio wa odiko, guweke ka piny doŋ mito ru. Ka te piny oyabbe, dako-nu obino opoto piny i doggola ot pa laco ma rwode tye bote-ni, nio ka piny odoko leŋ. Rwode oa malo odiko, oyabo doggola, okato woko pi medo wotte. Ci nen, dako tye obuto i doggola me ot, kun ciŋe tye i doggola. Owaco bot dako ni, “A malo wek waciti,” ento pe ogamo doge. Ci otiŋo kom dakone muto oketo i wi kana; lacen oa ocito kwede i gaŋŋe, Ka doŋ odonyo i ode, okwanyo pala, omako kom dakone muto-ni, oŋido woko i dul ma romo apar wiye aryo, ocwalo i lobo pa jo Icrael ducu. Jo ducu ma guneno guwacci, “Gin macalo man yam peya otimme, peya yam onen, cakke i kare ma yam jo Icrael gua ki i Ejipt, o wa onyoo; wutam, wupor lokke, ci wuloki.” Jo Icrael ducu gukatti woko, cakke wa i Dan o kwede i Beer ceba, medo ki lobo Gilead bene, ci lwak ocokke bot Rwot i Mijpa ki cwiny acel. Rwodi pa lwak ducu ma i kaka ducu pa jo Icrael gucuŋ i dye jo pa Lubaŋa ma gucokke, co alip miya aŋwen ma gilwenyo ki pala lucwan, ma giwoto ki tyengi. Jo Benjamin bene guwinyo ni jo Icrael mukene gucito i Mijpa. Jo Icrael guwacci, “Tit botwa kit ma tim aranyi man otimme kwede.” Ci Lalevi ma cwar dako ma gineko-ni owacci, “Nino mo acito i Gibea pa jo Benjamin, an ki dakona, wek abut iye. Ci jo Benjamin gubino i koma, gurumo ot ma atye iye i dyewor kun gimito neka; ci guronyo dakona, omedo ki to woko. Atero dakona muto-ni aŋido kome woko, acwalo dul kome oromo lobo ducu ma jo Icrael guleyo odoko megi; pien gitimo kipyeda ki tim me aranyi i Icrael. Nen ba, wun jo Icrael, wun ducu, wupor lokke ki kany, wumi tamwu.” Lwak ducu gutwarre malo lawaŋacel kun giwaco ni, “Wan ducu pe ŋat acel mo bidok i kemane, dano acel mo pe bidok i ode. Ento kombeddi wabitimo jo Gibea kit man: wabicito i komgi kun gikwanyo dano ki kwir. Dok wabikwanyo dano apar i kom jo miya ki i kom kaka ducu ma i Icrael, ki dano miya acel i kom jo alip, ki dano alip i kom jo alip apar, wek gukel cam pi lwak, wek gubin gucul kwor i kom Gibea pa jo Benjamin pi bal aranyi ma gutimo i Icrael.” Kit meno jo Icrael ducu gucokke ka lweny i kom gaŋ meno, ma guribbe ki cwiny acel. Ci kaka ducu ma i Icrael gucwalo jo i dye kaka pa Benjamin ducu kun giwaco ni, “Kit tim aranyi aŋo ma otimme i kinwu-ni? Kombeddi doŋ wumi jo meno ciŋwa, lutim aranyi ma i Gibea, wek wanekgi woko, wajwer kwede gin marac woko ki Icrael.” Ento jo Benjamin pe gumedo ki winyo dog utmegigi jo Icrael. Ci jo Benjamin gua ki i gaŋgi, gucokke i Gibea me cito ka lweny i kom jo Icrael. I nino meno ka jo Benjamin gukwano jo mua ki i gaŋgi, guromo jo alip pyeraryo wiye abicel ma gilwenyo ki pala lucwan, ma pe gikwano iye jo me Gibea kikome ma gucoko co miya abiro ma giyerogi ayera. I kin jo meno ducu onoŋo tye co miya abiro ma giyerogi ma gin ciŋgi Lacam; ŋat acel acel i kingi bayo lagwen celo yer wic cut, pe bayo piny. Jo Icrael ducu ma pe gikwano iye jo Benjamin guromo co alip miyaaŋwen ma gilwenyo ki pala lucwan; gin jo meno ducu onoŋo gin jo ma guŋiyo ki lweny. Jo Icrael gua gucito Betel, gupenyo dog Lubaŋa ni, “Aŋa i kinwa ma bikwoŋo cito ka lweny i kom jo Benjamin?” Ci Rwot owacci, “Jo Juda aye gibikwoŋo cito.” Ci jo Icrael gua odiko con, gugony ma gikemo Gibea. Gucito ka lweny i kom jo Benjamin, guryeyo ki tyen i nyim Gibea me lweny i komgi. Jo Benjamin gukatti woko ki i Gibea, guneko jo Icrael ma romo jo alip pyeraryo wiye aryo i nino meno. Kit meno jo Icrael gurwayo cok i kom jo Benjamin i nino me aryone. Jo Benjamin gukatti woko ki i Gibea i nino me aryone, guneko jo alip apar wiye aboro ki i kin jo Icrael; gin ducu gubedo jo ma lulweny ki pala lucwan. Ci dok jo Icrael gucito Betel ki monygi ducu, gukok; ci gubedo piny kunnu i nyim Rwot, guri kec i nino meno owa otyeno. Gutumo gitum awaŋa bene ki gityer lakwecwiny i nyim Rwot. Jo Icrael dok gupenyo dog Rwot,’ pien canduk me gicikke pa Lubaŋa onoŋo tye kunnu i kare meno, kun Finekaci wod pa Eleajar ma wod pa Aron aye tiyo i nyime i kare meno, Gupenyo ni, “Pud dok wacito ka lweny i kom utmegiwa jo Benjamin aye, nyo wawek lweny doŋ ogik woko?” Rwot owacci, “Wuciti, pien diki abimiyogi i ciŋwu.” Kit meno jo Icrael guketo dano gubuto gurumo Gibea woko. Ci jo Icrael gucito ka lweny i kom jo Benjamin i nino me adekke, gutiŋo mony i kom Gibea kit ma yam ca. Jo Benjamin gukatti woko i kom jo Icrael, ci gumol woko wa i ne gaŋ. Gucako neko jo Icrael kit ma yam ca ki i yo gudo, i yo me cito Betel ki i yo mukene bene ma cito Gibea, wa ki i bar bene, dano ma mito romo ka pyeradek. Mumiyo jo Benjamin guwacci, “Gutwarre, guriŋo woko i nyimwa kit ma yam ca.” Ento jo Icrael guwacci, “Wek koŋ warin woko, wek waywagi woko ki i gaŋ o wa i yo gudo.” Ci jo Icrael ducu gutwarre woko ki i kabedogi, guryeyo i Baaltamar; ki jo Icrael ma yam gubuto gukanne ka kurogi i ŋet Gibea tuŋ potoceŋ gutwarre wo ko ki i kabedogi. Jo alip apar ma giyerogi ki i kin jo Icrael ducu gubino i kom Gibea, ci lweny odoko tek; ento jo Benjamin pe guŋeyo ni to pacogi doŋ onyiko cok, Rwot omiyo jo Icrael guloyo jo Benjamin; ci jo Icrael gujwero jo Benjamin ma romo alip pyeraryo wiye abic ki mi ya acel i nino meno, gin ducu jo ma lulweny ki pala lucwan. Pienno jo Benjamin guneno ni doŋ guloyogi. Jo Icrael gujer, guweko kabedo ki jo Benjamin, pien gigeno jo ma giketo gubuto i ŋet Gibea-ni. Ci jo ma gubuto ka kurogi-ni gurune ci gucorre i kom Gibea, guneko jo ducu ma i gaŋ woko ki pala lucwan. Onoŋo jo Icrael ki jo mubuto gurumo gaŋ guyubo lanyut ni, ka doŋ gumiyo yito mac oduny ocito malo ki i gaŋ, ci jo Icrael gibidwogo cen ka lweny, Jo Benjamin gucako lweny ki neko jo Icrael pyeradek kun giwacci, “Ada ya, watye ka loyogi macalo i lweny mukwoŋo ca,” Ento ka lanyut ocako duny ki i gaij, yito mac ma ocuŋ macalo wir, jo Benjamin guneno yo ŋegi: ci nen, gaŋgi ducu tye ka waŋ duny malo o wa i polo, Ci jo Icrael gulokke, gudwogo, omiyo kom jo Benjamin obaŋne woko, pien guneno ni to pacogi doŋ onyiko cok. Pi meno guloko ŋegi bot jo Icrael gidok i yo tuŋ tim ata. Ento lweny onukogi woko, ka dok jo Icrael ma gumol gukatti woko ki i gaŋ bene gutyekogi woko ki i dyere kunnu. Gujwero jo Benjamin woko, guryemo korgi guradogi woko piny laboŋo ywe o kwede tuŋ ka ma okemo Gibea yo tuŋ wokceŋ. Jo Benjamin ma romo alip apar wiye aboro guto woko, gin ducu oteka lweny. Jo mukene gulokke guriŋo yo tuŋ tim ata o wa i got Rimmon; dok gineko jo alip abic ki i komgi ma gitoŋogi gireto woko piny i yo gudo. Ci guryemo korgi matek nio wa Gidom, guneko jo alip aryo. Jo Benjamin ducu ma gineko ma oradde piny i nino meno guromo alip pyeraryo wiye abic ma lulweny ki pala lucwan; gin ducu oteka lweny. Ento jo miya abicel gulokke guriŋo gularo yo tuŋ tim wa i got Rimmon, gubedo i got Rimmon pi dwe aŋwen. Jo Icrael dok gudwogo cen ka lweny i kom jo Benjamin, gunekogi ki pala lucwan, dano ki lee ki gin ducu ma ginoŋo; gaŋi ducu ma ginoŋo giwaŋo woko ki mac. Onoŋo jo Icrael yam gukwoŋo kwoŋ i Mijpa ni, “Pe dano mo ki i kinwa bimiyo nyare me anyoma bot jo Benjamin.” Ci lwak gubino i Betel, gubedo kunnu i nyim Lubaŋa o wa otyeno, gutiŋo dwangi malo ki koko matek, kun giwaco ni, “Ai Rwot Lubaŋa pa Icrael, piŋo lok man otimme i Icrael, ma tin wi kaka acel doŋ pe i Icrael?” Ka dok orwone lwak gua odiko con ka caŋo keno tyer kunnu, ki tyero gitum awaŋa ki gityer lakwecwiny. Ci jo Icrael guwacci, “I kin kaka me Icrael ducu jo mene ma yam pe gubino i kare ma wacokke bot Rwot?” Pien onoŋo gukwoŋo kwoŋ madit ni, “Ka dano mo pe obino bot Rwot i Mijpa gibineke woko.” Kica omako jo Icrael i kom utmegigi jo Benjamin kun giwaco ni, “Kaka acel doŋ waŋe orwenyo woko tin ki i kin jo Icrael. Wabitimo niŋniŋ pi noŋo mon pi jogi ma gudoŋ, ma doŋ watyeko kwoŋo kwoŋ i nyiŋ Rwot ni, pe wabimiyo nyarwa mo botgi me anyoma-ni?” Mumiyo guwacci, “Jo mene ma i kin kaka ma i Icrael ma yam pe gubino bot Rwot i Mijpa?” Ci gunoŋo ni i kare ma gucokke dano acel mo pe obino i gony ma oa ki i Jabec-Gilead, Pien i kare ma gikwano dano, dano acel mo pe onen ma oa ki bot jo ma bedo i Jabec-gilead. Pienno lwak gucwalo twoni co ma lulweny alip apar wiye aryo kun gicikogi ni, “Wucit wunek jo ma bedo i Jabec-gilead ki pala lucwan, wa mon ki litino. Wubitimo kit man: co ducu ki mon ducu ma yam gubuto ki laco wubijwero woko liweŋ.” I kin jo me Jabec-Gilead gunoŋo anyira miya aŋwen ma peya gubuto ki co, gukelogi i gony ma i Cilo, ma tye i lobo Kanaan. Ka doŋ lwak ducu gucwalo lok bot jo Benjamin ma gitye i got Rimmon kun giloko botgi lok me kuc. Jo Benjamin gudwogo i kare meno ci gumiyo botgi anyira me Jabec-Gilead ma guwekogi makwo-ni; ento pe guromogi ducu. Kica omako lwak i kom jo Benjamin, pien onoŋo Rwot oketo ariya i kom kaka me Icrael ducu. Ka dok ludoŋo me lwak guwacci, “Wabitimo niŋniŋ pi noŋo mon pi dano mudoŋ, ma doŋ gityeko mon ma i kin jo Benjamin woko ducu-ni?” Ci guwacci, “Luleyo myero nonne pi jo Benjamin ma gubwot, wek kaka mo pe gijwa woko ki Icrael. Ento pe watwero miyo anyirawa botgi me bedo mongi.” Pien yam jo Icrael gukwoŋo kwoŋ ni, “Gicen ŋat ma omiyo dako mo bot jo Benjamin.” Pi meno guwacci, “Nen, tye nino madit me woro Rwot ma bedo mwaka ki mwaka i Cilo.” Cilo onoŋo tye i ŋet Betel yo tuŋ acam, cok ki yo gudo ma a ki Betel cito Cekem; ka it ye Lebona, Ci lo tye yo tuŋ acuc. Guciko jo Benjamin ni, “Wucit wubut i potti olok, wukur dano, ci wuki. Ka ce anyira Cilo gibino ka myel, ci wubin, wumakgi woko, kun dano acel acel mako dakone ki i kin anyira Cilo, ci wucit kwedgi wa i lobo Benjamin. Ka ce wegigi nyo omegigi gibino ka laro lokke botwa, ci wabiwaco botgi ni, ‘Wutim ber wumigi botwa; pien yam pe wakelo anyira ki i mony ma romogi ducu, wun bene pe wumiyo mogo botgi; kono wumiyogi botgi, kono wuroco.’ ” Jo Benjamin gutimo kit meno; gutero mongi ma oporo welgi, ma gumako ki i kin lumyel, gutiŋo yo, gucito, gudok i lobo ma yam guleyo-ni, ka gugero gaŋgi odoco, gubedo iye. Jo Icrael guket woko ki kunnu i kare meno; ŋat acel acel odok i kakane ki i doggolane. Guket, gucito woko ki kenyo, kun dano acel acel ci to i lobo ma yam oleyo. I kare meno onoŋo kabaka pe Icrael; dano acel acel tiyo gin ma co tamo ni tye atir. I kare ma luŋolkop giloyo lobo-ni onoŋo kec tye i lobo, ci laco mo me Beterekem ma i Juda ocito i lobo Moab, obedo kunnu, en ki dakone ki awobegi aryo. Nyiŋ laco meno Elimelek, ki nyiŋ dakone Naomi; nyiŋ awobegi aryo-ni Malon ki Kilion. Yam gin jo Eprata; gaŋgi Beterekem ma i Juda. Gucito i lobo Moab, gubedo kunnu. Ento Elimelek ma cwar Naomi oto woko, ci dako odoŋ ki awobene aryo-ni. Gin gunyomo anyira Moab; nyiŋ acel gilwoŋo ni Orupa ki nyiŋ mukene Ruth. Gubedo kunnu kine ka mwaka apar; lacen Malon ki Kilion guto woko, gin aryo ducu, mumiyo dako odoŋ kene laboŋo awobene aryo-nu ki laboŋo cware bene. En ocako a woko ki i lobo Moab wek edok cen ki mon pa awo bene aryo ducu, pien onoŋo owinyo ki i lobo Moab ni Rwot doŋ otyeko limo jone, omiyogi cam. Kit meno en oa woko ki i kabedo ma onoŋo gitye iye-ni ki mon pa awobene, gucako lubo yo ma dok i lobo Juda, Ento Naomi owaco bot mon wote ni, “Wudok cen, ŋat acel icel odok gire i ot pa minne. Rwot otimwu maber, kit ma wun wutimo jona ma waŋgi orwenyo woko ki bota, kacel ki an bene, Rwot omiwu wunoŋ ot, wek ŋat acel acel i kinwu obed gire i ot pa cware.” Onoto lemgi me cikogi, ci gucako kok matek. Guwacce ni, “Pe kumeno; wan wabidok kwedi wa bot jowu.” Ento Naomi owacci, “Wudok cen, anyirana, wubicito kweda piŋo? Pud dok atye ki litino co i iya ma myero gudok cogwu? Wudok cen, lnyirana, citu giwu, pien an doŋ ati, pe aromo bedo ki cwara mo, Dok kono awacci, pud ageno ni atwero nywalo litino, kadi abed ki cwara mo i dyewor man, kadi anywalo awo be, kono wun wuye kurogi nio ka gudoŋo mono? Wun kono wubikwero gero co? Pe kumeno, anyirana, pien toncwiny dwoŋ i cwinya mada piwu, pi kipwola ma Rwot omiyo opoto i koma-ni.” Dok gucako kok matek ki dwangi maloŋo; lacen Orupa onoto lem daane ocike kwede, ento Ruth ocerre i kore matwal. Naomi owacce ni, “Nen, nyeki otyeko dok cen bot lutugi ki bot lubaŋane; dok Cen i kor nyeki.” Ento Ruth owacci, “Pe ibed ka lega ni aweki, nyo ni adok cen awek lubo kori; pien ka ma in icito iye, an bene abicito iye; ka ma ibuto iye, an bene abibuto iye; jo tuwu gibibedo jo tuwa bene, dok Lubaŋani bibedo Lubaŋana, Ka ma ibito iye, an bene abito iye, gibiyika kunnu. Myero Rwot oket can i koma kit meno ki makato bene, ka to kikome aye bipoko an kwedi.” Ka Naomi oneno ni en atyeko moko tamme me cito kwede, pe doŋ oloko gin mo. Kit meno mon aryo-nu gucako wot nio ka guo wa i Beterekem, Ka guo i Beterekem, ci gaŋ ducu orubbe woko pigi. Ci mon gucako wacci, “Man en aye Naomi?” En owaco botgi ni. “Pe dok wulwoŋa ni, Naomi. Wulwoŋa ni Kipwola, pien Won Twer Ducu okelo kipwola i koma. Yam acito ma abup, Rwot omiyo adwogo cen ma alam. Piŋo wulwoŋa ni Naomi ma Rwot ouna-ni, Woti Twer Ducu bketa i can mapek?” Kit meno odwogo cen, ki Ruth ma ci-wode kacel kwede, ma con odwogo nia ki i lobo Moab. Guo i Beterekem i kare ma gicako kayo bel cayiri. Naomi con tye ki wat ma ladoggola pa cware, dano ma lalonyo ma i doggola pa Elimelek, ma nyiŋe Boaj. Ruth ma anyira Moab owaco ki Naomi ni, “Wek acit i poto acibek wit cayiri ki i kor dano mo ma biparo pira.” Ci en owaco ni, “Cit, nyara.” Ocito i poto ka beko kor lukac, ci ocob i kom poto pa Boaj ma ladoggola pa Elimelek, Ci nen, Boaj oa ki i Beterekem, obino owaco ki lukac ni, “Rwot obed kwedwu.” Gudok iye ni, “Rwot omiyi gum.” Boaj dok openyo latic ma loyo lukac ni, “Man nya pa aŋa?” Ci latic ma loyo lukac ogamo ni, “Man nya jo Moab, ma yam odwogo ki Naomi ki i lobo Moab, Ci en openya ni, ‘Alegi, wek abek korgi, kun abeko ki i kin larita ma i kor lukac.’ Kit meno en obino kun tiyo medde kwede nia wa odiko con nio wa onyoo, kun pe ywe kadi matidi mo,” Ci Boaj owaco ki Ruth ni, “Koŋ iwiny, nyara, pe doŋ icit ibed i poto mukene, nyo pe iwek poto man, ento bed cocok ki anyirana. Ket waŋi i kom poto ma gitye ka kayo-ni, bed ka lu bo korgi. Doŋ atyeko ciko awobe ni pe gugud komi. Dok ka orwo pii neki, ci cit ka ma agulu pii tye iye, icimat pii ma awobe gutwomo-ni.” Ruth oguŋo oryebbe piny, owacce ni, “Piŋo luguma okaya i nyimi, omiyo iparo pira ma an larok ata-ni?” Ento Boaj ogamo ni, “Gin ducu ma ibedo ka tiyone pi daani nia ma cwari oto ca gibedo ka titta ducu kikore, ki kit ma iweko kwede woru ki meni ki lobo tinoni pi bino i rok ma yam pe iŋeyo. Rwot myero oculli gin ma doŋ itiyo maber-ri! Rwot ma en Lubaŋa pa Icrael ka ma iriŋo ilaro i te bwome-ni, omiyi mot muromo maber!” Ruth ogamo ni, “Rwoda, in kica omaki i koma, pien doŋ ityeko kweyo cwinya woko pi lok ki aŋecani lok me kica, kadi bed an pe a ŋat acel i kom lwak aŋecani.” I kare me cam Boaj dok owacce ni, “Bin kany, wek icam kwon mo, igwe ki koŋo vino,” Kit meno Ruth ocako nywako bedo ki lukac, ci Boaj omiye cayiri ma gicelo acela. En ocamo nio ka oyen, ci oweko mogo odoŋ. Ka en oa malo ka beko cam, Boaj ociko awobe kun waco ni, “Wuwek en obeki wa i kin larita, pe wule wiye. Dok bene wuwot wi te mogo wo ko ki i kom larita, ci wuwek en obeki, kun pe wucoko wiye.” Kit meno en obeko cam i poto nio wa otyeno, ci odino bel cayiri ma obeko-ni woko; omito romo debe aryo, Ci otiŋo ocito kwede i gaŋ, onyuto bot daane gin ma ebeko; dok ocako kelo cam ma odoŋ ma onoŋo en doŋ oyen, omiyo ki daane. Ci daane openye ni. “Tin ibeko kwene? Itiyo kwene? Gum obed i kom ŋat ma oparo piri-ni.” En otito ki daane ŋat ma etiyo bote-ni kun wacci, “Nyiŋ dano ma tin atiyo bote-ni aye Boaj.” Ci Naomi owaco ki ci-wode ni, “Myero Rwot omiye gum, Rwot ma kicane peya otenyo jo makwo ki jo muto-ni.” Dok Naomi owacce ni, “Dano meno aye omegiwa macok ma romo laki,” Ci Ruth ma anyira Moab owacci, “Medo ki meno, dok owacca bene ni, ‘In ibinywako bedo ki luticca nio ka gutyeko kayo kacca ducu.’ ” Ci Naomi owaco ki ci-wode Ruth ni, “Man ber, nyara, ka ibecito kacel ki anyirane, wek pe jo gubed ka gudo komi i poto mukene.” Kit meno en obedo ki anyira pa Boaj kun beko cam nio ka kayo bel cayiri ki ŋano otum, kun obedo kacel ki daane. Daane Naomi dok owacce ni, “Nyara, pe myero ayennyi ot, wek ibed maber? Boaj ma onoŋo ibedo ki anyirane-ni en aye ladoggolawa. Nen ba, en bipyeto cayirine tin otyeno i laro moyo, Ber in ilwokke, iwirre ki moo, irukke ki boŋŋini mabeco-ni, ci icit kunnu wa i laro. Ento pe inyutte kekeni bo te nio ka otyeko cam ki mat-gu. Lacen ka doŋ obuto piny, in inen ka ma obuto iye-ni, ci icit iye, iel tuŋ ka tyene, ibut iye; ci en bititti gin ma ibitiyo.” Ruth ogamo ni, “Abitiyo gin ma iwaco ducu.” Kit meno Ruth ocako cito wa i laro moyo, ci otiyo kit ma daane otitte-ni kikome. Ka Boaj otyeko camo cam ki mat-gu, ma kun cwinye yom, ocito obuto Ka ŋet cayiri ma giguro kacel. Ci Ruth okwalle ocito mot, oelo tuŋ tyene, obuto piny, Ki i cwiny dyewor laco ocako po; ka olokke, ci nen, dako mo obuto ka tyene! Owacci, “In aŋa?” Ogamo ni, “An a Ruth, aŋecani. Yar dog boŋoni, iuma kwede, pien in aye imyero ka lako an.” En owacce ni, “Rwot omiyo gum, nyara; man inyutta berri madit makato macon, pien pe icito i kor awobe matino, ma lucan nyo ma lulonyo. Ci tin, nyara, pe doŋ ilwor, pien abitimo piri gin ducu ma ilego-ni, pien lutuwa ma i gaŋ-ŋi giŋeyo kit berri. Me adane an aye a watwu macok, ento tye omegiwa ma dok cok makato an ma romo lako in. Koŋ ibut i dyewor man, ci diki odiko ka ce omegiwa mukene aye bilaki, wek en olaki; ento ka omegiwa mukene-ni pe mito laki, macalo Rwot tye makwo-ni, ci an abilaki ma ka en. Doŋ ibut piny nio wa odiko.” Obuto piny ka tyene nio wa odiko, ento oa woko con ma piny pud ribiribi; ci Boaj ociko ni, “Pe ŋatti mo one ni dako man obino wa i laro moyo.” Ci owacci, “Kel boŋo ma iruko-ni, iyar iye.” Oyaro iye, ci Boaj opimo cayiri agwata moko abicel, ocibo i wiye, ci en ocito kwede gaŋ, Ka en obino bot daane,’ daane openye ni, “Wotti obedo niŋniŋ, nyara?” Ci otitte gin ducu ma laco meno otimo i kome, kun waco ni, “En omiya cayiri agwata moko abicel kun wacci, ‘Pe myero idok bot daani ki ciŋi noŋo.’ ” Ci daane odok iye ni, “Nyara, koŋ ikur nio ka iniaŋ Boaj ocito i dog gaŋ, obedo piny kunnu. Ci nen, lalako ma Boaj oloko pire-ni okato akata. Boaj owacci, “Bin, omera, ibed piny kany,” ci obino obedo piny, Ci Boaj okwanyo ludoŋo me gaŋ meno apar, owaco botgi ni, “Wubed piny kany,” ci gubedo piny. Lacen owaco ki dano ma en lalako-ni ni, “Naomi, ma doŋ odwogo cen nia ki i lobo Moab, tye ka cato but dul lobo mo yam pa ominwa Elimelek. Pienno omiyo atamo ni koŋ atitti, kun awacci, In iwil ki i nyim jo man ma gibedo kany-nyi, ki i nyim ludoŋowa-ni. Ka ce ibikokone, ci koki; ento ka pe, ci titta wek aŋe, pien pe tye ŋat mo ma myero okoki, kono in, ci an aye alubi.” Ogamo ni, “An abikokone.” Boaj dok owacci, “I nino ma iwilo iye dul lobo meno ki bot Naomi, noŋo in iwilo wa ki Ruth ma anyira Moab bene, ma dako pa lato-ni, pi dwoko nyiŋ lato i kom ginaleyane.” Mumiyo lalako owacci, “An pe atwero koko ne pira, miyo abalo ginaleyana woko. In ikoki; doŋ ajalo twerona me kokone boti, pien an pe atwero kokone.” Man aye kit macon ma yam gitimo i Icrael i kare me koko dul lobo, nyo loko ki dul mukene: pi moko lok mo-ni, con ‘dano acel lunyo warre woko, ci miyo ki ŋat mukene; meno aye yam obedo lok me caden i Icrael. Ka lalako dok owaco ki Boaj ni, “In aye iwil,” ci olunyo warre woko, Boaj owaco ki ludoŋo ki bot lwak ducu ni, “Wun aye wucaden ma moko ni, atyeko wilo jami ducu ma yam pa Elimelek, ki jami ducu ma yam pa Kilion, ki jami ducu ma yam pa Malon nia ki i ciŋ Naomi. Ki Ruth anyira Moab bene ma yam dako pa Malon doŋ atyeko warone woko wek obed dakona, pi dwoko nyiŋ lato i kom ginaleyane, wek nyiŋ lato pe gijwa woko ki i kin utmege, nyo ki i dog gaŋ ka ma ginywalo iye-ni. Tin wun aye wucaden.” Ci jo ducu ma yam gitye i dog gaŋ kacel ki ludoŋo guwacci, “Wan aye lucaden. Rwot omi dako meno ma bino i odi-ni obed macalo Lakeri ki Lea, ma gin aryo ducu gutiŋo wi ot pa Icrael malo. Myero ibed matek i Eprata, nyiŋi bene oywek i Beterekem, odi bene obed rom ki ot pa Perej ma yam Tamar onywalo ki Juda, pi litino ma Rwot bimiyi ma a ki i latin dako-ni.” Kit meno Boaj otero Ruth, odoko dakone. Odonyo obedo kwede, ci Rwot omiyo ogamo ic, onywalo latin laco. Mon guwaco ki Naomi ni, “Doŋ gipwo Rwot ma pe oweki ibedo laboŋo wat macok kwedi tin. Wek nyiŋe oywek i Icrael! En biroco kwoni odoco, dok bikuri ka iti; pien ci-wodi ma mari, ma pire tekki makato awobe abiro-ni, en aye onywale.” Naomi otiŋo latin, opyelo i kore, ci odoko lapidine. Mon wadi gucako nyiŋe, kun giwacci, “Ginywalo ki Naomi latin laco.” Ci gucako nyiŋe ni Obed; en aye obedo won Yece, ma won Daudi. Man aye likwayo pa Perej: Perej onywalo Kejeron, Kejeron onywalo Ram, Ram onywalo Aminadab, Aminadab onywalo Nakucon, Nakucon onywalo Calmon, Calmon onywalo Boaj, Boaj onywalo Obed, Obed onywalo Yece, Yece onywalo Daudi. Yam tye dano mo i Ramataimjopim ma i lobo godi me Epraim nyiŋe Elkana wod pa Jerokam, ma wod pa Eliu wod pa Toku, ma en aye wod pa Jupi ma jo Epraim. Onoŋo tye ki mon aryo; nyiŋ ŋat acel Anna, ki nyiŋ dako mukene Penina. Penina onoŋo tye ki litino, ento Anna onoŋo litinone peke. Dano man yam a ki i gaŋŋe mwaka ki mwaka ci cito ka woro Rwot me mony ki ka tyero gitum i Cilo, ka ma onoŋo tye iye awobe pa Eli aryo, Kopuni ki Finekaci, ma gin ajwagi pa Rwot. I nino ma Elkana tyero iye gitumme-ni, en miyo dul riŋo bot dakone Penina ki bot awo bene ki anyirane ducu. Ento kadi bed en maro Anna mada en bedo ka miyo bote dul acel keken’, pien Rwot onoŋo otweyo iye woko, pe nywal. Nyeke bedo ka ŋeto iye marac ki cwero cwinye, pien Rwot otweyo iye woko, pe nywal. Kit tim meno obedo ka timme mwaka ki mwaka; i kare ducu ma Anna cito kunnu i ot pa Rwot, nyeke bedo ka ŋeto iye. Yam miyo Anna bedo ka koko, ci pe camo. I nino mo acel cware Elkana openye ni, “Anna, ikok piŋo? Piŋo pe icamo? Cwinyi cwer piŋo? An pe ayomo cwinyi makato awobe apar?” Ka doŋ gutyeko camo cam ki mat i Cilo, ci Anna oa malo. I kare-nu onoŋo ajwaka Eli obedo i wi komme i ŋel okar doggola me ot pa Rwot. Anna onoŋo cwinye cwer matek, ci ocako lego Rwot kun kok matek twatwal. Okwoŋo kwoŋ kun waco ni, “Ai Rwot me mony, ka ce ibineno aroma ma aŋecani tye kwede, kun ipo pira, ma wii pe wil i koma, ce imiya latin laco ci abitiŋo am iyo bot Rwot pi kare me kwone ducu, dok lyedi mo bene pe bigudo wiye.” Ka en pud omedde ki lega i nyim Rwot, Eli obedo ka neno doge, Anna obedo ka lega ki i cwinye, kun del doge aye yeŋŋe, ento dwane pe winnye; mumiyo Eli otamo ni en dako ma lamero. Ci Eli owaco bote ni, “Ibimer pi kare ma rom mene? Juk mero ki koŋo yinoni-ni woko,” Ento Anna odok iye ni, “Pe kumeno, rwoda, An a dako ma cwercwiny aye oneka woko, Pe amato koŋo yino nyo gin ma mero dano, ento abe do ka yako lok ma iiya woko i nyim Rwot. Pe iloka abed dako ma kile rac, pien gin ma abedo’ ka loko-ni ducu dwoŋŋe parra ki cwercwinya,” Ci Eli odok iye ni, “Wot ki kuc. Lubaŋa pa Icrael myero oye legani ma ikelo bote-ni.” Anna ogamo ni, “Wek gum okaya i nyimi, ladit,” Ka okato ocito woko, ocako cam, ci waŋe odoko leŋ, Gupuk woko odiko con, gucito ka woro Rwot; ka lacen gudok paco tugi i Rama. Elkana obedo ki dakone Anna, ci Rwot ogamo lega pa Anna, Anna ogamo iye, Ka kare oromo, onywalo latin laco, ci ocako nyiŋe Camuel, pien Dwacci, “Alego alega ki bot Rwot.” Elkana ki jo ma i ode ducu dok gucito ka tyero gitum me mwaka bot Rwot, ki pi cobo kwoŋŋe. Ento Anna pe ocito, Owaco bot cware ni, “Ka latin doŋ obwoto deto cak, abitere, wek ocinen i nyim Rwot, obed kunnu doŋ matwal.” Cware Elkana ogamo ni, “Tim gin ma ineno ni ber; koŋ doŋ ikur waŋ ma obwoto dot. Ento Rwot aye ocob lokke kakare.” Ci Anna odoŋ ka doto latinne, nio ka oweko doto cak, Ka doŋ wode obwoto dot ci otere, kacel ki twon ma ditte romo mwaka adek, ki moko kwon ma romo debe aryo, ki opiro koŋo vino, ci okele i ot oa Rwot ma i Cilo, kun onoŋo latin pud tidi. Guneko twon, ka gutero latin bot Eli, Ci Anna owaco bote ni, “A rwoda, tika ipo i koma? An aye a dako ma yam ocuŋ i nyimi kany kun alego Rwot-ti. Yam alego pi latin man, ci Rwot oye legana ma akok kwede bote. Mumiyo an adyero en woko i ciŋ Rwot pi kare me kwone ducu; doŋ adyere woko i cin Rwot en.” Ci guworo Rwot kunnu. Anna olego bene kun wacci, “Aum ki yomcwiny pi Rwot; tekka omedde woko pi Rwot. Doga nyedo lok i kom lumerokka, cwinya yom pien in Rwot ilara. “Pe tye ŋatti mo maleŋ macalo Rwot, ŋatti mo pe, kono in keken; got mo pe ma rom ki Lubaŋawa. Pe wumedde ka lok ki wakke twatwal, pe lok me nyatte okatti ki i dogwu; pien Rwot aye Lubaŋa won ŋec, en pimo gin ducu ma dano timo. Atum pa twoni doŋ gituro, jo magoro gudoko lutekkom. Jo ma yam giyeŋ gudoko lutic me noŋo cam, ento kec doŋ pe bot jo ma yam kec nekogi, Lalur onywalo litino abiro, ento megi awobe mapol doŋ odoko goro. Rwot neko dano dok cero woko bene, tero i lyel dok dwoko makwo. Rwot miyo can, dok miyo lonyo; en lanyo dano dok pilo wiye. En ilo lucan woko ki i apwa, dok tiŋo jo ma piny obwoyogi kwanyogi woko ki i wi odur, wek gubed kacel ki rwodi, gunoŋ kabedo me deyo. Rwot aye won wir ma teno lobo, ocibo lo bo ocuŋ i wigi. “Rwot bigwoko tyen jone ma gene; ento lutim aranyi gibirido wigi woko i piny macol; pien dano pe loyo lweny pi tek kome. Lulweny i kom Rwot gibininyogi woko; en bimor i komgi ki i polo macalo mor kot. Rwot biŋolo kop wa i agikki lobo ducu; en bimiyo tek bot kabakane, bipilo wi lakerre ma giwiro ki moo,” Ka Elkana odok i gaŋŋe i Rama, latin odon ka tic bot Rwot i te loc pa ajwaka Eli. Onoŋo awobe pa Eli kitgi raco; pe giparo pi Rwot wacel. Kit ma yam ajwagi gitiyo kwede i kom lwak i kare-nu onoŋo tye kit man: ka dano mo otyero gitum, ci latic pa ajwaka bino ma pud gitye ka tedo riŋo, ma omako lacob riŋo ma lake okarre adek. Ci rwako i otako, nyo i atabo, nyo i cupuriya, nyo i agulu. Rino ducu ma lacob riŋo ocobo okelo woko bedo pa ajwaka. Yam gubedo ka timo kit meno i Cilo i kom jo Icrael ducu ma gibino iye. Dok bene latic pa ajwaka yam bino ma moo dwolo peya giwaŋo, ci waco bot dano ma tyero gitumme ni, “Mi riŋo bot ajwaka me abula, pien en pe ye gamo riŋo ma doŋ gitedo, kono manumone keken.” Ka ce dano-nu owacce ni, “Koŋ iwek giwan dwolo, ka doŋ ikwany madit kit ma imito-ni,” ci latic gamo ni, “Pe kumeno; myero imi kombeddi. Ka pe, ci abikwanyo ki tek.” Kit meno bal pa awo be-nu obedo dit twatwal i nyim Rwot, pien jo-nu gubedo ka cayo gityer pa Rwot acaya, Camuel obedo ka tic i nyim Rwot ma onoŋo pud tidi, kun tweyo epod boŋo camanini i pyere. Minne kwoyo kanyi matidi mwaka ki mwaka ci tero bote ka en cito kacel ki cware ka tyero gitum me mwaka. Ci. Eli lego gum i kom Elkana ki dakone kun wacci, “Lubaŋa omi inoŋ litino ki i kom dako man ma ka latin ma en odyero bot Rwot-ti;” ka lacen gidok paco tugi. Rwot dok olimo Anna ci Anna ogamo ic, onywalo litino awobe adek ki anyira aryo. Ci latin man Camuel odoŋo i nyim Rwot. I kare-nu onoŋo Eli doŋ oti mada. Obedo ka winyo kit ma awobene tiyo kwede i kom jo Icrael ducu, ki kit ma gibuto ki mon ma gitiyo i doggola kema me rwatte. Owaco botgi ni, “Piŋo wutimo gin macalo meno? Pien abedo ka winyo ki bot lwak ducu pi gin maraco ma wutimo. Pe kumeno, litinona; lok ma awinyo i komwu ma lwak pa Rwot gunyayo oromo piny-nyi pe ber. Ka dano mo obalo i kom dano wadi, ci Lubaŋa biteko kingi. Ento ka dano obalo i kom Rwot, aŋa ma twero bako doge pire?” Ento gin yam pe giworo dog wongi, pien onoŋo Rwot mito ni enekgi woko. Ci latin man Camuel omedde ki doŋo, kun yo mo cwiny Rwot kacel ki dano. Dano pa Lubaŋa mo obino bot Eli, owaco bote ni, “Rwot owaco kit man ni, ‘Yam anyutte kekena boŋo me ot pa kwaru i kare ma gitye i Ejipt, ma gubedo opii i ot pa Parao. Yam ayere ki i kin kakawu ducu ma i Icrael wek obed ajwakana, ocit cok ki keno tyerra, obed ka waŋo odok eceta, ki ruko epod i nyima. Ci yam amiyo bot jo me ot pa kwaru gityer ducu pa jo Icrael ma giwaŋo ki mac. Piŋo dok wucayo gitumma ki gityerra ma yam aciko? Dok piŋo iworo litinoni makato an, pi weko gicwe ki dul mabeco twatwal ki i kom gityer ducu ma jona Icrael gityero.’ Pi meno Rwot Lubaŋa pa Icrael otuco atyer ni, ‘Yam aciko ni, jo me odi ki jo me ot pa kwaru gibimedde ta tiyo ticgi i nyima matwal’; ento kombeddi Rwot otuco atyer ni, ‘Lok me cikke meno pire obotti woko ki bota, pien jo ma giketo deyo i koma an bene abiketo deyo i komgi, ento jo ma gicaya pe abiketo cwinya i komgi. Nen, kare bibino ma abituro iye tekki woko ki tek me ot pa kwaru, wek dano mo muti pe obed i odi. Ka can doŋ opoto i komi, nyeko bimaki i kom jo Icrael pi lonyo ducu ma gibinoŋo, kun dano mo muti pe bibedo i odi matwal. Danoni mo ma abiweko doŋ i ŋet keno tyerra, wane bicor woko ki koko, kun cwinye ton; likwayowu ducu dano binekogi woko ki pala lucwan. Gin ma bipoto i kom awobeni aryo. Kopuni ki Finekaci, en aye bibedo lanyut boti; gin aryo ducu gibito i nino acel. Dok abiketo ajwaka ma lagen pira kena ma ticce birwatte ki lok ma tye i cwmya ki i tamma, Abigerre ot matek atika, ci en biri i dog ticce nakanaka i nyim danona ma giwiro ki moo. Dok ka dano mo odoŋ ki i odi, bibino ka bako doge bote pi nucu lim mo, nyo kwon mo kun wacci, Tim ber, iketa i kabedo mo pa ajwaka, wek acam latin kwon mo.’ I kare meno onoŋo Camuel tye ka tic pi Rwot i te loc pa Eli. Onoŋo lok pa Rwot bino kicel kicel keken, ginanyuta ma Rwot cwalo macalo lek pe nen ata. I kare meno onoŋo waŋ Eli ocido woko, pe doŋ neno piny, I nino mo onoŋo obuto piny ka ma en buto iye, kun mac tara pa Lubaŋa pud lyel, dok kun Camuel obuto piny i ot pa Rwot ka ma canduk pa Lubaŋa bedo iye-ni, Ci Rwot olwoŋo ni, “Camuel! Camuel!” Camuel ogamo ni, “An atye ene!” Ci oriŋo bot Eli owaco ni, “An atye ene, ibedo ka lwoŋa.” Ento Eli ogamo ni, “An pe alwoŋi, cibut piny doki.” Camuel odok obuto piny. Ci Rwot dok olwoŋo ni, “Camuel! Camuel!” Ci Camuel oa ocito bot Eli, owaco ni, “An atye ene, ibedo ka lwoŋa.” Eli ogamo ni, “An pe alwoŋi, latinna, cibut piny doki.” I kare-nu onoŋo Camuel peya ŋeyo Rwot, onoŋo Rwot peya oyabo lokke bote. Ci Rwot dok olwoŋo Camuel tyen me adekke, ci Camuel dok oa ocito bot Eli kun waco ni, “An atye ene, ibedo ka lwoŋa.” Ci Eli oniaŋ ni Rwot aye obedo ka lwoŋo awobi-nu, mumiyo Eli owaco bot Camuel ni, “Cibut piny. Ka ce dok olwoŋi, ci ibiwaco ni, ‘Rwot, wac lokki. An laticci, atye ka winyone.’’’ Kit meno Camuel odok obuto piny i kabutone. Rwot obino ci ocuŋ cok kun lwoŋo kit ma olwoŋo i kare ca ni, “Camuel! Camuel!” Ci Camuel ogamo ni, “Rwot, wac lokki. An laticci, atye ka winyone.” Dok Rwot owaco bot Camuel ni, “Nen ba, an doŋ atye cok ka tiyo gin mo i Icrael ma bimiyo dano ducu ma winyo komgi bito lirut. I nino meno abicobo gin ducu ma yam aloko i kom ot pa Eli, cakke i acakkine o wa i agikki, An doŋ atito bote ni abiketo can i kom jo me ode matwal pi gin ma guroco ma en ŋeyo wa con, pien litinone gubedo ka yeto Lubaŋa kun en pe jukogi. Mumiyo akwoŋo kwoŋ bot jo me ot pa Eli ni, pe tye gitum mo nyo gityer mo ma bikwanyo bal ki i kom jo me ot pa Eli matwal.” Camuel obuto nio wa odiko, ci ocako yabo doggola me ot pa Rwot. Onoŋo en lworo tito bot Eli lok ma Lubaŋa onyuto bote. Ento Eli olwoŋe kun waco ni “Camuel, latinna.” Camuel ogamo ni, “An atye ene.” Ci Eli openye ni, “Rwot otitti lok aŋo? Pe imuŋŋa lokke. Lubaŋa myero oket can i komi kit meno ki makato bene, ka ce imunna lok mo i kom lok ducu ma en otito boti.” Kit meno Camuel otitte lok ducu, kun pe omuŋo lok mo bote. Eli ogamo ni, “En aye Rwot; wek otim gin ma oneno ni ber.” Camuel omedde ki doŋo kun onoŋo Rwot tye kwede, Rwot pe oweko lok mo ma Camuel owaco obut opoto piny i nom ma pe ocobbe kakare. Ci jo Icrael ducu cakke ki i Dan o wa i Beer-ceba guŋeyo ni, Camuel doŋ gimoko me bedo lanebi pa Rwot. Rwot omedde ki nen doki i Cilo, ka ma yam onoŋo onyutte iye bot Camuel kun tito lokke bote. Ci lok ma Camuel bedo ka loko cito romo lobo Icrael ducu. I kare meno jo Icrael gucito ka lweny ki jo Piliciti, ci gutoŋo gony i Ebenejer, ki jo Piliciti gutoŋo gonygi i Apek. Jo Piliciti gurye ki tyen ka lweny i kom jo Icrael. Ka mony ogeto matek, ci jo Piliciti guloyo jo Icrael, guneko jo ma mito romo alip aŋwen i bar lweny. Ka lumony gudwogo i gony, ludoŋo pa jo Icrael guwacci, “Piŋo Rwot aye jo Piliciti guloyowa tin? Wek wacikel canduk me gicikke pa Rwot ki i Cilo, wek en Rwot obin obed i dyewa, olarwa ki i ciŋ lumerokwa-ni.” Ci lwak gucwalo dano Cilo, gukelo canduk me gicikke pa Rwot me mony ki kunnu, ma Rwot bedo-i wi komkerre malo ka wi lukerubi-ni, kun awobe pa Eli, Kopuni ki Finekaci, bene onoŋo gubino kacel ki canduk me gicikke pa Lubaŋa, Ka canduk me gicikke pa Rwot obino i gony, jo Icrael ducu guwo ki daŋŋe matek, omiyo lobo bene omor. Ka jo Piliciti guwinyo woo ki daŋŋe, ci guwacci, “Woo man madit ma a ki i gony pa jo Ibru-ni te lokke aŋo?” Ka guŋeyo ni canduk pa Rwot otyeko bino i gony pa jo Icrael, ci jo Piliciti gubedo ki lworo, pien gubedo ka waco ni, “Lubaŋagi doŋ oo i gonygi.” Ci guwacci, “Oii, watum woko ba! Gin macalo man yam peya otimme. Oii, watum woko ba! Aŋa ma bilarowa ki i ciŋ lubaŋa magi matek-ki? Meno gin aye lubaŋa ma yam gupwodo jo Ejipt ki lwak can mapol i tim. Wucam co, wuka lakwu matek macalo co, wun jo Piliciti, wek pe wudok opii pa jo Ibru kit ma gin gubedo kwede opiiwu-ni. Wuka lakwu matek macalo co, ci wulweny.” Kit meno jo Piliciti gucako lweny, ci guloyo jo Icrael. Jo Icrael guriŋo woko, kun dano acel acel riŋo laro pacone. Nek obedo dwoŋ twatwal, pien Luicrael guto kunnu ma romo jo alip pyeradek ma woto ki tyengi. Ki canduk pa Lubaŋa bene giyako woko; ki awobe pa Eli aryo, Kopuni ki Finekaci, ginekogi woko bene. Dano mo ma Labenjamin oriŋo oa ki i waŋ mony, obino i Ci lo i nino meno kikome, ma boŋŋine oyec woko, wiye bene ojuko ki ŋom, Ka en oo, onoŋo Eli obedo i wi komme i ŋet yo ka kuro lok, pien onoŋo cwinye oŋabbe aŋaba pi canduk pa Lubaŋa, Ka dano-nu obino odonyo i gaŋ, otito lokke, ci gaŋ ducu omor ki koko. Ka Eli owinyo dwan ma mor ki koko-ni, owacci, “Man woo me ŋo?” Ka dano-nu orune, obino otito bot Eli. Onoŋo Eli ditte romo mwaka pyeraboŋwen wiye aboro, ki wane bene ocor woko, omiyo doŋ pe neno piny. Dano-nu owaco bot Eli ni, “An aye aa ki i waŋ mony, ariŋo aa ki i mony tin.” En ogamo ni, “Ci doŋ obedo niŋniŋ, latinna?” Lakellok-ki ogamo owacci, “Jo Icrael guriŋo woko ki i nyim jo Piliciti, dok bene gineko jo tuwa madwoŋ twatwal, ki canduk pa Lubaŋa bene giyako woko.” Ka otuco lok i kom canduk pa Lubaŋa, ci Eli opoto ataro ki i wi komme ma obedo kwede i ŋet dog gaŋ; ci ŋute otur, oto woko, pien onoŋo doŋ oti mada, dok kome dit. Obedo laŋolkop i Icrael pi mwaka pyeraŋwen. I kare-nu ci-wode ma dako pa Finekaci onoŋo iye odoŋo, cok nywal. Ka owinyo lok ni canduk pa Lubaŋa doŋ giyako woko, dok ni kwarone ki cware guto woko, oturre piny, onywal, pien onoŋo mwoc ogoyo. I kare ma en mito to woko, mon ma gucuŋ ka ŋete guwaco bote ni, “Pe ilwor, pien inywalo latin awobi.” Ento en pe ogamo doggi, pe oketo iye cwinye bene. Ci ocako nyiŋ latin ni, Ikabod, kun wacci, “Deyo otyeko a woko ki i Icrael!” pien canduk pa Lubaŋa doŋ giyako woko, ki pi kwarone bene ki pi cware. Dok owacci, “Deyo oa woko ki i Icrael, pien canduk pa Lubaŋa doŋ giyako woko.” Ka jo Piliciti guyako canduk pa Lubaŋa, gutiŋo ki i Ebenejer, gutero Acidod. Ka dok jo Piliciti gukobo canduk pa Lubaŋa, gutero i ot pa jokgi Dagon, ci gucibo ka ŋet cal Dagon, Orwone ka jo Acidod gua malo odiko con, ci nen, cal Dagon tye opoto aryeba cwiny i nyim canduk pa Rwot. Ci gutiŋo cal Dagon, gudwoko kakare, Ento orwone doki ka gua odiko con, ci nen, cal Dagon tye opoto aryeba i nyim canduk pa Rwot. Wi cal Dagon ki bade ryoryo oŋun woko, opoto i kom larii doggola; cal Dagon odoŋ ma kome odul. Man aye mumiyo ajwagi pa Dagon ki jo ducu ma gidonyo i ot pa Dagon pe dok ginyono larii doggola me ot pa Dagon ma i Acidod wa onyoo. Ciŋ Rwot opoto mapek i kom jo Acidod ma omiyogi lworo madwoŋ; dok Rwot omiyogi akwota bur lebba, ki i lobo ma i ŋete ducu, Ka jo Acidod guneno kit ma piny tye kwede, guwacci, “Canduk pa Lubaŋa pa jo Icrael pe obed i kinwa, pien ciŋe opoto mapek i komwa, ki i kom Dagon ma lubaŋawani.” Mumiyo gucwalo kwena, ci gucoko rwodi pa jo Piliciti ducu kacel kun giwacci, “Wabitimo canduk pa Lubaŋa pa jo Icrael niŋniŋ?” Ci gudok iye ni, “Wek canduk pa Lubaŋa pa jo Icrael giter wa i Gat.” Ci gutero canduk pa Lubaŋa pa jo Icrael kunnu. Ento ka doŋ gitero kunnu, ci ciŋ Rwot opoto i kom gaŋ meno, obano komgi woko. Ci otimo jo Gat malit, omiyo akwota bur Lebba ocorre i kom litino wa ki ludito. Dok gucwalo canduk pa Lubaŋa i Ekron. Ka canduk pa Lubaŋa oo i Ekron, ci jo Ekron gukok matek ni, “Gukelo canduk pa Lubaŋa pa jo Icrael kany me nekowa woko wa ki rokwa ducu.” Ci dok gicwalo lok, gucoko rwodi pa jo Piliciti ducu kacel kun giwacci, “Wucwal canduk pa Lubaŋa pa jo Icrael woko, wek odok gire i kabedone, wek pe obed ka nekowa kacel ki rokwa ducu.” Pien onoŋo to me nino ducu doŋ obano kom dano ma i gaŋ-ŋu ducu. Cin Rwot opoto kunnu mapek, kun jo ma pe guto gubedo ki akwota bur lebba maraco i komgi. Ci koko me gaŋ meno oo wa malo i polo. Canduk pa Rwot obedo i lobo pa jo Piliciti pi dwe abiro. Lacen jo Piliciti gulwoŋo ajwagi ki lutyet ci guwacci, “Wabitimo canduk pa Rwot niŋniŋ? Wutit botwa kit gin ma myero wami ma wabidwoko kwede canduk i kabedone.” Ci guwacci, “Ka wucwalo canduk pa Lubaŋa pa jo Icrael;: pe wucwal nono, ento atikane wudwok ki gitum me tiŋo alii. Ci doŋ wubican ci wubinian gin mumiyo Rwot pe okwanyo ciŋe woko ki i komwu.” Gugamo ni, “Kit gin aŋo ma wabidwokke me gitum me tiŋo alii?” Gudok iye ni, “Cal jabu abic ma oporo kit akwota bur lebba, ki cal oyoo adeŋ abic muporo wel rwodi pa Lupiliciti; pien kit two gemo acel-lu onoŋo omakowu ducu, ki rwodiwu bene. Pienno myero wutet cal akwota bur lebba ki cal oyoo adeŋ ma gitye ka tyeko lobowa woko-ni ki kela deyo i kom Lubaŋa pa jo Icrael; ci gwok nyo en bikwanyo cine woko ki i komwu, ki i kom lubaŋawu ki lobowu, Pe wumi cwinywu obed tek kit macalo yam jo Ejipt ki Parao cwinygi obedo tek kwede. Kombeddi doŋ wucikwany gadigadi manyen, ki megi dyaŋi aryo ma ginyeto ma yam peya gitiyo kwedgi me pur, ci wutwe dyaŋi i nyim gadigadi me ywayone, ento wuter litino dyaŋi paco, pe gubed kacel ki megigi. Ci wukel canduk pa Rwot wuket i wi gadigadi, ci wuket cal jabu ma wuteto-ni i canduk mukene ka ŋete, ma wubidwoko bo te macalo tyer me tiŋo alii. Ka doŋ wucwal, ociti. Ci doŋ wunen kore; ka ce ocito okemo yo tugi, wa i Bet-cemec, ci Lubaŋa pa jo Icrael aye okelo can man madit i komwa; ento ka pe kit meno ci miyo waneyo ni pe ciŋe aye ma obedo ka pwodowa; meno otimme i komwa pi keckom.” Jo-nu gutimo kit meno; gukwanyo megi dyaŋi aryo ma ginyeto, gutweyogi i nyim gadagadi, ci guloro wi litinogi woko paco. Ci gucibo canduk pa Rwot i wi gadigadi, kacel ki canduk mukene ki cal oyoo adeŋ ma giteto ki jabu, ki cal akwota bur lebbagi. Dyaŋi gucito gukemo yo atir ma dok yo tuŋ Bet-cemec, kun lubo yo ger madit. Giwoto kun gikok, pe gumedo ki dok yo tuŋ acuc nyo yo tuŋ acam, kun rwodi pa jo Piliciti gilubo korgi, nio ka guo kwede wa i waŋ lobo me Betcemec. Onoŋo jo Bet-cemec gitye ka kayo nanogi i nota. Ka gutiŋo wangi ci guneno canduk pa Rwot, cwinygi obedo yom pi nenone. Gadigadi obino wa i poto pa Yocwa ma Labet-cemec, ci ocuŋ kenyo, Onoŋo kidi madit tye kenyo; ci gubaro gadigadi woko me yen, gutyero dyaŋi me gitum awaŋa bot Rwot. Ka dok Lulevi gutero canduk pa Rwot ki canduk mukene ma onoŋo tye ka ŋete-ni, ka ma onoŋo tye iye cal jabu, ci guketogi i wi kidi madit-ti. Ci jo Bet-cemec gutyero gitum awaŋa ki gitum mukene mogo bot Rwot i nino meno. Ka rwodi pa jo Piliciti abic-ci guneno kite, ci gudok Ekron i nino meno. Cal akwota bur lebba me jabu ma jo Piliciti gudwoko bot Rwot me gityer me tino alii obedo kit man; acel pa jo Acidod, acel pa jo Gaja, acel pa jo Acikelon, acel pa jo Gat, acel pa jo Ekron. Gucwalo cal oyoo adeŋ me jabu bene muporo wei gaŋ ducu pa jo Piliciti ma rwodigi abic ‘loyo-ni, gaŋi ma gicelogi ki cel matego, wa ki gaŋi matitino ma pe girumogi ki cel, Kidi madit ma yam giketo canduk pa Rwot ka ŋete-ni en aye caden o wa i nino man; pud tye i poto pa Yocwa Labetcemec. Rwot oneko jo Bet-cemec mogo, pien guŋiyo i canduk pa Rwot. Oneko jo pyerabiro i kingi, ci dano gukumo, pien Rwot onekojo mapol i kingi. Ka dok jo Bet-cemec guwacci, “Aŋa ma twero cuŋ i nyim Rwot ma Lubaŋa maleŋ-ŋi? Dok ka bia ki botwa, ci bicito bot jo mene?” Pi meno gucwalo lukwena bot jo ma gibedo i Kiriat-jearim, kun giwaco ni, “Jo Piliciti doŋ gudwoko canduk pa Rwot. Wubin, wuter botwu kunnu.” Ci jo Kiriat-jearim gucito guomo can duk pa Rwot, gutero i ot pa Abinadab ma i wi got. Ci gukwero wode Eleajar pi gwokone. Canduk pa Rwot obedo i Kiriajearim pi kare malac ma mito romo mwaka pyeraryo, ci jo me otpa Icrael ducu gucako dwogo bot Rwot ki kumo. Ci Camuel owaco bot jo Icrael ni, “Ka doŋ wudwogo bot Rwot ki cwinywu ducu, ci doŋ wubol lwak lubaŋa pa lurok ki cal jogi ma mon-gu woko ki i kinwu, wek cwinywu okem bot Rwot atir kun wuworo en keken, cien bilarowu ki i ciŋ jo Piliciti.” Kit meno jo Icrael gubolo lwak cal jok Baal ki cal jogi ma mon-gu ma tye botgi-ni woko, ci gucako woro Rwot keken. Camuel dok owacci, “Wucok jo Icrael ducu i Mijpa ci abilego piwu bot Rwot.” Mumiyo dano gucokke i Mijpa ka dok gutwomo pii ci guonyo piny i nyim Rwot macalo gityer, ci guri kec i nino meno kun giwacci, “Watimo bal i nyim Rwot.” Dok Camuel oŋolo kop pa jo Icrael pigi i Mijpa, I kare meno ka jo Piliciti guwinyo ni jo Icrael gucokke i Mijpa, ci rwodi pa jo Piliciti gucito ka lweny i kom jo Icrael. Ka jo Icrael guwinyo, ci gubedo ki lworo i kom jo Piliciti. Ci jo Icrael guwaco bot Camuel ni, “Pe iwek koko piwa bot Rwot Lubaŋawa wek olarwa ki i ciŋ jo Piliciti.” Camuel okwanyo latin romo ma pud dot, otyero bot Rwot obed gitum ma giwaŋo ki berre. Ka Camuel okok kwede bot Rwot pi jo Icrael, ci Rwot owinyo kokone. I kare ma Camuel tye ka tyero gitum awaŋa, jo Piliciti gucako bino cok ka lweny i kom jo Icrael; ento Rwot omor macalo mor kot ki dwan madit i nino meno i kom jo Piliciti, obano komgi woko; ci jo Icrael guryemogi woko ki i nyimgi. Jo Icrael gumol woko ki i Mijpa, guryemo kor jo Piliciti, gurwadogi woko nio wa i te Bet-kar. Lacen Camuel okwanyo got, ocibo ocuŋ i kin Mijpa ki Jecana, ci ocako nyiŋe Ebenejer, kun owacci, “Rwot obedo ka konyowa o wa kany.” Guloyo jo Piliciti kit meno; pe dok gudonyo i lobo pa jo Icrael. Rwot obedo ka lweny i kom jo Piliciti i kare pa Camuel ducu, Gaŋi ducu ma yam jo Piliciti gumayo woko ki bot jo Icrael gidwokogi bot jo Icrael, cakke wa i Ekron o kwede i Gat. Jo Icrael gularo lobogi ki i ciŋ jo Piliciti i kare-nu. Kuc onoŋo tye i kinjo Icraelkijo Amor bene, Camuel oŋolo kop pa jo Icrael i kare me kwone ducu, Yam woto kun wirre i kin Betel ki Gilgal ki Mijpa mwaka ki mwaka kun ŋolo kop pa jo Icrael i kabedo meno ducu, Ka doŋ lokke dok Rama, pien gaŋŋe onoŋo tye kunnu. En ŋolo kop pa jo Icrael kunnu bene, dok ocano keno tyer pi Rwot kunnu. I kare ma Camuel doŋ oti woko, oketo awobene gubedo luŋolkop pa jo Icrael. Nyiŋ wode me kayone Joel, ki nyiŋ wode me aryone Abija; vam gubedo luŋolkop ki i Beer-ceba,’ Ento awobene pe gulubo kite; gubwoto woko, gudok ka yenyo lim. Gubedo ka gamo lim me wilo loyo kop, kun gibalo te pido pa dano woko. Ci ludoŋo pa jo Icrael ducu gucokke kacel bot Camuel i Rama, guwaco bote ni, “Nen ba, in doŋ iti woko, dok awobeni pe gilubo kiti. In iket kabaka piwa wek en aye olowa, macalo tye i rok mukene ducu.” Ento lok meno pe oyomo i Camuel ka guwacci, “Miniwa kabaka wek en aye olowa.” Ka Camuel ocako lego Rwot. Ci Rwot owaco bot Camuel ni, “Winy dog lwak i gin ducu ma guwaco boti; pien gin pe gukwero in, ento gukwero an, ni pe abed kabaka ma loyogi. Kit tim ducu ma gubedo ka timone i koma cakke i nina ma yam akwanyogi iye ki i Ejipt o kwede wa tin, ma gibwoto an gidok ka woro lubaŋa mukene, gitye ka timone i komi bene kit meno, Koni doŋ koŋ iwiny doggi; lok acel keken, ber ilok kwedgi kun inyuto botgi atyer kit ma kabaka ma biloyogi bibedo kwede.” Kit meno Camuel otito lok pa Rwot ducu bot lwak ma gulego kaba ka ki bote, Owacci, “Man aye bibedo kit ma kabaka biloyowu kwede; en bitero awobewu ci ketogi i gadigadine me lweny, ki me bedo wegi aguragurane, ki jo ma riŋo i nyim gadigadine. Dok en biketo ludito wi monnye ma loyo dano alip, ki ma loyo dano pyerabic, ki jo mukene pi puro potone ki pi kayo kacce, ki pi teto jami lwennye ki jami kom gadigadine. En bitero anyirawu ka rubo moo ma ŋwece kur, ki pi tedo cam ki pi tedo mugati. En bi mayo pottiwu mabecone woko, ki poto olokwu ki poto jeituni, bitiŋo mi yo bot luticce. Bikwanyo dul acel me apar me kalwu ki me olokwu, ci tiŋo miyo bot ludito ticce ki bot luticce mukene. Bitero opiiwu ki aŋecawu, ki dyaŋiwu ki kanawu mabecone, ci biketogi ka tiyo ticce. En bitero dul acel me apar me romiwu ki dyegiwu, ci doŋ wubibedo opiine. I kare meno wubikok giwu i kom kabakawu, ma wun aye wuyero piwu kenwu; ento Rwot pe bidok iye botwu i nino meno.” Ento dano gukwero winyo dog Camuel, guwaco bote ni, “Pe; wan wabibedo ki kabaka ma loyowa, wek wan bene wabed macalo rok mukene ducu, wek kabakawa aye olowa, ci okat anyim pi telo wiwa ki ka lweny piwa i mony.” Ka Camuel otyeko winyo lok pa lwak ducu, ci odwoko lokke bot Rwot. Ka Rwot dok owaco bot Camuel ni, “Winy doggi, imigi kabaka,” Camuel dok owaco bot jo Icrael ni; “Doŋ wuciti, ŋat acel acel odok i gaŋŋe.” Yam tye dano mo ma Labenjamin ma nyiŋe Kic, wod pa Abiel, ma wod pa Jeror, wod pa Bekorat, wod pa Apia, ma Labenjamin, dano ma lalonyo. Onoŋo tye ki wode ma nyiŋe Caulo, awobi ma oputte ma mwonya, ma pe tye dano mo ma i kin jo Icrael ducu ma mwonya makato en; odono mabor makato dano ducu cakke ki i wi gwoke dok kwede malo, I kare mo megi kana pa Kic won Caulo gurwenyo, ci Kic owaco bot wode Caulo ni, “Ter latic mo acel, ci wua wucit ka yenyo kana.” Ka gukato guwok i lobo godi me Epraim, ci gubaro dye lobo Calica, pe gunoŋo komgi. Ka dok gukato guwok i lobo Caalim, ento pe onoŋo gitye kenyo, Ka dok gukato gubaro dye lobo Benjamin, ento pe gunonogi. Ka guo i lobo Jup, Caulo owaco bot latic ma onoŋo gitye kwede-ni ni, “Bin wadok cen, wek wora pe ocak paro piwa, kun weko paro pi kana.” Ento en odok iye ni, “Nen, dano pa Lubaŋa tye i gaŋ man, en dano ma giworo; gin ducu ma en waco bedo me ada, Wek koŋ wacit kunnu; gwok en bitito botwa lok mo i kom wot ma watye iye-ni.” Ento Caulo owaco bot laticce ni, “Ka wacito bote, wabiterre gin aŋo? Pien kwon doŋ otum woko ki i kicaawa, dok mot mo pe ma wabitero bot dano pa Lubaŋa ca,” Laticce dok ogamo doge ni, “Nen kany, atye ki dul acel me aŋwen me cekel me ryal; abimiyo bot dano pa Lubaŋa wek onyut botwa yo,” (I kare pa jo Icrael macon, ka dano mo yam ci to ka penyo dog Lubaŋa ci wacci, “Bin, wek wacit bot lanen-piny;” pien dano ma gilwoŋo ni lanebi i kare man, yam con gilwoŋo ni dano ma neno piny.) Ci Caulo owaco bot laticce ni, “Iwaco maber, Bin wek waciti.” Kit meno gucako ci to i gaŋ ka ma yam dano pa Lubaŋa tye iye-ni. I kare ma giito kor got pi donyo i gaŋ ci gurwatte ki anyira ma gicito ka twomo pii, ci gupenyogi ni, “Lanenpiny tye kany?” Gugamo ni, “En tye. Nen, tye i nyimwa ca, Wurune oyot; pud obino i gaŋ kombeddi, pien tin dano tye ka tyero gityer i kabedo me woro Lubaŋa ma tye i wi got. Ka wucito, wudonyo i gaŋ, ci wunono kome cut, ma noŋo peya ocito ka cam i wi got. Pien dano peya gibicam ka en peya obino, nio ka en olego gum i kom gitum; ka doŋ jo ma gilwonogi gicako cam. Wun doŋ wuciti, ci wubirwatte kwede oyotoyot.” Kit meno gumedde ki ito malo wa i gaŋ, Ka gitye ka donyo i gaŋ, ci guneno Camuel; tye ka bino tun botgi kun onoŋo obecito i kabedo ma i wi got-ti. Onoŋo Rwot onyuto lok bot Camuel ma pud onoŋo Caulo odon ki nino acel me bino bote kun wacci, “Diki ka onyoo abicwalo boti dano mo ma oa ki i lobo pa jo Benjamin, ci ibiwiro en ki moo wek obed laker ma loyo jona Icrael. En bilaro jona ki i ciŋ jo Piliciti; pien atyeko neno aroma pa jona, kokogi doŋ oo bota.” Ka Camuel oneno Caulo, Rwot otito bote ni, “Man aye dano ma onoŋo atitti pire-ni. En aye biloyo lwakka.” Ka Caulo doŋ oo cok bot Camuel i dog gaŋ, openye ni, “Titta ba, ot pa lanenpiny tye kwene?” Camuel ogamo ni, “An aye lanen-piny. Cit itel nyima nio i kabedo me woro Lubaŋa ma i wi got, pien ibicam kweda kacel tin, ka odiko abiweki icito, dok abititti lok ducu ma tye i cwinyi, Lok i kom kana ma gurwenyo okato nino adek-ki, pe cwinyi obed ka paro pigi, pien gityeko nonogi. Gin ma pire mit i Icrael-li ducu pa aŋa? Pe gin ducu meri? Gin ducu pe me ot pa woru?” Caulo ogamo ni, “An gira Labenjamin, ma kakawa tidi twatwal i kin jo Icrael. Doggolawa onyono anyona ki i kin doggola ducu pa jo Benjamin. Ci piŋo ilokka lok ma rom meno?” Camuel otero Caulo ki laticce, okelogi i kicika, ka omiyogi kabedo me dito makato jo ma gilwonogi ducu, ma giromo jo pyeradek. Ci Camuel owacobot latedo ni, “Kel wan pok ma nanen amini, kun aciki ni iket pat-ti.” Latedo okwanyo em ki bam, aciba i nyim Caulo, ci Camuel owaco bot Caulo ni, “Nen, gin ma gikano piri gityeko cibone i nyimi. Cam; pien onoŋo gikano piri nio wa i kare ma giciko, wek icam kacel ki welo.” Kit meno Caulo ocamo kacel ki Camuel i nina-nu, Ka doŋ gulor gudwogo piny ki i kabedo ma i wi got, ci gucito i gaŋ. Gipeto kabuto pa Caulo malo i wi at, ci obuto piny, onino wako. Kate piny oyabbe, Cainuel olwoŋo Caulo ma onoŋo pud tye malo i wi at kun wacci, “A malo, wek doŋ alwoki, iciti.” Caulo aa malo, ci en ki Camuel gucito i yo gin aryo, Camuel owiro Caulo me bedo kabaka Ka onoŋo gitye ka lor piny, ma doŋ guo i agikki gaŋ, Camuel owaco bot Caulo ni, “Wac ki laticci ni okat ocit i nyimwa, Ka doŋ okato anyim, ci icuŋ kany manok, wek amiyi iŋe lok pa Lubaŋa.” Ci Camuel okwanyo kicere me moo, oonyo i wi Caulo, amate kun noto leme ci owacci, “Rwot doŋ oonyo moo i komi wek ibed laker ma loyo lwakke jo Icrael. In ibiloyo lwak pa Rwot, ci ibilarogi ki i ciŋ lumerokgi ma gurumogi-ni. Man aye bibedo gin ma nyuto bati ni Rwot doŋ owiri me bedo laker ma loyo gipinnye: Ka ibia wako ki bata tin, ci ibirwatte ki co aryo i ŋet lyel pa Lakeri ma i Jelja, i lobo Benjamin, Gibiwaco bati ni, ni, ‘Kana ma ibedo ka yenyogi-ni doŋ ginoŋogi, dok kombeddi cwiny woru doŋ aa wako ki i kom kana, doŋ tye ka paro piwu kun baka doge ni, “Atim gin aŋo pi woda-ni?”, Dok ibimedde ka wot anyim ka laki kenya, ci ibio i te kworo me. Tabor; ci co adek ma gicito i Betel bot Lubaŋa gibirwatte kwedi kunnu, kun ŋat acel otiŋo litino dyegi adek, ŋat acel otiŋo mugati adek, ŋat acel otiŋo opiru koŋo vino. Gin gibimoti, ci gibimini mugati aryo, in ibigamo, ki i ciŋgi. Ka lacen ibio i Gibea-eloim, ka ma cel gogo mony pa jo Piliciti tye iye-ni, Ka ibidonyo i gaŋ kunnu, ibirwatte ki lwak lunebi ma gibino gilor piny kun gia ki i kabedo me woro Lubaŋa ma i wi got, ma gitye ki dano ma gigoyo naŋa ki ajaa ki nyamulere ki opuk ma gitelo kwede nyimgi, kun lunebi giwoto ki tito lok pa Lubaŋa, Ci Cwiny pa Rwot bibino i komi ki tek, ci ibicako tito lok pa Lubaŋa kacel kwedgi, ci ibilokke idoko dano mapat. Ka lanyut meno ducu doŋ otimme i komi ci doŋ icak timo gin ma ciŋi orwatte kwede, pien noŋo Lubaŋa tye kwedi. In icit ikwon nyima i Gilgal; nen, abibino bati ka tyero gitum awaŋa ki gityer lakwecwiny lbikuro nino abiro nio ka abio bati ka nyu to bati gin ma myero iti.” Ka Caulo oloko ŋeye pi weka Camuel, Lubaŋa omine kit cwiny mapat; ci lanyut meno gutimme ducu i nino meno, Ka guo i Gibea, ci nen, lwak lunebi gurwatte kwede; ci Cwiny pa Lubaŋa obino i kome ki tek, ci ocako tito lok pa Lubaŋa i kingi, Ka jo ma yam gineye guneno kit ma en tito kwede lok pa Lubaŋa kacel ki lunebi, ci dano gucako lok kekengi ni, “Gin aŋo ma opoto i kom wod pa Kic? Caulo bene doŋ tye i kin lunebi?” Ci dano mo me kunnu ogamo ni, “Onoŋo wongi kono aŋa?” Mumiyo odoko carolok abola ni, “Caulo bene doŋ tye i kin lunebi?” Ka doŋ otyeko tito lok pa Lubaŋa ci ocito i kabedo me woro Lubaŋa ma i wi got, Omin won Caulo openyo en ki laticce ni, “Onoŋo wucito wa kwene?” Ci ogamo ni, “Wacito ka yenyo kana; ka waneno ni pe gibinoŋŋe, ci wacito wa bot Camuel.” Ci omin won Caulo dok owacci, “Koŋ itit bota gin ma Camuel owaco boti mono.” Ci Caulo owaco bot omin wonne-ni ni, “Otito botwa atir ni kana doŋ ginoŋo.” Ento pe otito lok me camo ker ma onoŋo Camuel oloko bote-ni, I kare-nu Camuel olwoŋo lwak ocokke kacel bot Rwot i Mijpa. Ka owaco bot ŋo Icrael ni, “Rwot Lubaŋa pa Icrael owaco kit man ni, ‘Yam akwanyo jo Icrael ki i Ejipt, alarowu ki i ciŋ jo Ejipt ki i ciŋ Luker ducu ma gubedo ka unowu.’ Ento tin wutyeko kwero Lubaŋawu wo ko ma bedo ka larowu ki i can ki ayelawu ducu, ci doŋ wuwacci, ‘Pe kumeno; ento imiwa kabaka ma biloyowa.’ Doŋ wubin wucun i nyim Rwot kun wurye kaka ki kaka ki doggola ki doggola.” Camuel okelo kaka ma i Icrael ducu cok, ci kwir okwanyo kaka pa Benjamin. Okelo kaka pa Benjamin cok doggola ki doggola, ci kwir okwanyo doggola pa jo Matri. Ka lacen doŋ okelo doggola pa jo Matri cok ki acel acel, ci kwir okwanyo Caulo wod pa Kic, Ento ka gibedo ka yenye, pe ginoŋo kome, Mumiyo gucito, gupenyo dog Rwot doki ni, “Dano-nu tika obino kany?” Ci Rwot ogamo ni, “Nen, tye okanne i kin jami.” Guriŋo gucito, guomo en ki kunnu, Ka ocuŋ i dye lwak, nen, odono mabor makato dano ducu, cakke ki i wi gwoke dok kwede malo, Ci Camuel owaco bot lwak ducu ni, “Doŋ wuneno ŋat ma Rwot oyero-ni? Pe tye ŋatti mo i kin wun lwak ducu ma cal kwede.” Ci lwak ducu gudaŋŋe ki woo ni, “Kabaka obed kwo nakanaka!” Camuel dok otito bot lwak kit cik ma myero me aluba ka kaba ka biloyogi; ci ocoyogi i buk, ka opyelo i nyim Rwot, Lacen Camuel ocwalo lwak woko ducu, wek ŋat acel acel odok i pacone, Caulo bene odok i pacone i Gibea. Jo mo go ma twoni oteka bene gucito kwede, gin jo ma Lubaŋa ogudo cwinygi, Ento jo mogo ma kitgi obedo atata guwacci, “Dano-ni bilarowa niŋniŋ?” Gubedo ka caye, pe gumedo ki tero mot mo bote. Ka dwe acel doŋ okato, Nakac ma jo Ammon ocito orumo gaŋ me Jabec-gilead ki monnye; ci jo ducu ma i Jabec guwaco bot Nakac ni, “Ber icikke kwedwa, ci wabidoko luticci.” Ento Nakac ogamo doggi ni, “Abicikke kwedwu kit man: abikolo wanwu tuŋ acuc woko ducu, wek aket ki lewic i kom jo Icrael ducu.” Ludoŋo ma i Jabec gugamo kun giwacci, “Koŋ imiwa nino abiro wek wacwal lukwena i lobo Icrael ducu, Ka pe onen ŋatti mo ma larowa, ci wabimine kenwa boti.” Ka lukwena gubino i Gibea i gaŋ pa Caulo, gutito lokke bot lwak; ci lwak ducu guwo ki koko matek. I kare meno onoŋo Caulo oa ki i poto, obedo ka lubo ŋe twoni pur, ci owacci, “Aŋo mutimme? Piŋo dano tye ka koko?” Ci gititte lok kom jo Jabec, Ka Caulo owinyo lokke, ci Cwiny pa Lubaŋa obino ki tek i kome, kun kiniga omake madwoŋ, Okwanyo twoni pur aryo, otoŋogi, matitino, ci ocwalo ‘I cin lukwena oromo kwede i lobo Icrael ducu kun giwaco ni, “Dano mo ma pe obino olubo kor Caulo ki Camuel, gibitimo twon purre kit menol” Lworo omako dano matek pi Rwot, mumiyo gumol gubino ki cwiny acel. Ka Caulo oryeyo lwak i Bejek, okwanogi, ci jo Icrael guromo alip miya adek, ki jo Juda guromo alip pyeradek. Ci guwaco bot lukwena ma gubino botgi ni, “Wuwac bot jo Jabec-gilead ni, ‘Dikki ka cen odoko lyet gibilarowu.’ ” Ka lukwena ‘gucito gutito bot jo Jabec, cwinygi obedo yom matek, En aye omiyo jo Jabec guwaco bot jo Ammon ni, “Wabimine kenwa di ki i ciŋwu, ci wubitimowa kit ma wumito ducu.” Orwone Caulo opo ko mony i buca adek; ci gucoro i dye gony pa jo Ammon kwarpiny, gucako nekogi o wa i dyeceŋ, Jo ma gubwotte guket woko, pe inoŋo jo aryo ma gudoŋ kacel. Ka otum, lwak owaco bot Camuel ni, “Aŋagi ma yam owacci, ‘Caulo aye biloyowa bo?’ Gikel jo-nu wek wanekgi woko.” Ento Caulo ogamo ni, “Pe tin gineko iye dano mo, pien tin aye Rwot olaro jo Icrael.” Ka Camuel dok owaco bot lwak ni, “Wubin, wacitu i Gilgal, wek wacikweru ker odoco kunnu.” Mumiyo lwak ducu gucito i Gilgal, ci guketo Caulo me bedo kabaka i nyim Rwot kunnu. Gutyero gityer lakwecwiny kunnu i nyim Rwot, ci Caulo ki jo Icrael ducu cwinygi obedo yom mada. Camuel owaco bot jo Icrael ducu ni, “Nen, doŋ atyeko winyo dogwu i lok ducu ma wuwaco bota; doŋ amiyowu kabaka me loyowu. Koni doŋ wunen, kabaka tye ka telo wiwu. An doŋ ati woko ma wiya ki lwar; dok, wunen, awobena bene gitye kwedwu. Abedo ka tic i nyimwu cakke wa ka tinona o kwede wa onyoo. An atye ene, wutit lok ma mako koma i nyim Rwot ki i nyim lakerre ma giwiro ki moo, Aŋa ma akwanyo twonne? Aŋa ma akwanyo kanane? Nyo aŋa ma abumo jamine? Aŋa ma yam aburo? Nyo aŋa ma yam agamo lim me wilo loyo kop ki i ciŋe me laum waŋa? Wutit lok ma mako koma, ci abidwoko waŋe botwu.” Gugamo ni, “In yam pe ibumo jamiwa mo, kadi burowa, nyo gamo jami mo ki i ciŋ dano mo.” Ci owaco botgi ni, “Rwot aye lacaden i komwu, ki lakerre ma giwiro ki moo bene aye lacaden tin ma moko ni, pe wunono gin mo i ciŋa.” Gugamo ni, “En aye caden.” Camuel dok owaco bot lwak ni, “Rwot aye caden ma yam oyero Moses ki Aron ci okwanyo kwarowa woko ki i Ejipt. Mumiyo kombeddi doŋ wucuŋ mot, wek apid kop i komwu i nyim Rwot i kom tim ducu ma Rwot olarowu kwede, ma yam otimo piwu ki pi kwarowu. Ka yam Yakobo ki jone gucito i Ejipt, ci jo Ejipt gubwoyogi ki tek, mumi yo kwarowu gukok bot Rwot. Ka doŋ Rwot ocwalo Moses ki Aron ma gukwanyo kwarowu ki i Ejipt ci gumiyogi gubedo i kabedo man. Ento wigi ocako wil i kom Rwot Lubaŋagi woko; ci omiyogi i ciŋ Cicera ma lawimony pa Jabin, kabaka me Kajor, ki i ciŋ jo Piliciti, ki i ciŋ kabaka me Moab, ci gucako lweny i komgi. Ci gukok bot Rwot kun giwacci, ‘Wan doŋ wabalo, pien wabwoto Rwot woko, waworo jogi Baal ki jogi ma mon-gu, Ento doŋ ilarwa ki i cin lukworwa, ci wabiworo in keken.’ Ka dok Rwot ocwalo Jerubaal ki Barak, ki Jeputa ki Camuel, olarowu ki i ciŋ lumerokwu tuŋŋi ki tuŋŋi, ci wubedo mot ki kuc. Lacen ka wuneno ni Nakac kabaka pa jo Ammon obino ka lweny i komwu, ci wuwaco bota ni, ‘Pe kumeno; ento kabaka aye biloyowa,’ ma onoŋo Rwot Lubaŋawu aye kabakawu. Kombeddi doŋ wunen kabakawu ma wuyero-ni, ma yam wupenya pireni. Nen, Rwot doŋ oketo kabaka ma loyowu. Ka ce wubilworo Rwot ci wutiyo bote kun wuwinyo doge, ma kun pe wujemo nyo wukwero cik pa Rwot woko, dok ka wun ki kabakawu ma loyowu-ni ce wubilubo kor Rwot Lubaŋawu, ci bibedo ber. Ento ka’ ce pe wubiwinyo dog Rwot, nyo wujemo ma wukwero cik pa Rwot woko, ci ciŋ Rwot bipoto i komwu ki i kom kabakawu, Kombeddi wun doŋ wucuŋ mot wek wunen kit gin madit ma Rwot bitiyo i nyimwu, Kare-ni kare me kayo ŋano; pe kumeno? Doŋ an abilego Rwot wek ocwal kot ma mor kun cwer kwede, ci wubineyo dok wubineno kit ma balwu dit kwede ma wutimo i nyim Rwot pi penyo pi kabaka piwu kenwu.” Kit meno Camuel olego Rwot, ci Rwot ocwalo kot ma mor kun cwer kwede i nino meno; mumiyo lwak ducu gubedo ki lworo madwoŋ mada i kom Rwot ki i kom Camuel. Ci lwak ducu guwaco bot Camuel ni, “Ladit, leg piwa bot Rwot Lubaŋani wek pe wato, pien wapoŋo wi bal wa ki tim marac man me penyo pi kabaka piwa kenwa.” Ci Camuel owaco bot lwak ni, “Pe wulwor, Wutyeko timo gin maraco magi ducu, ento pe dok wulokke wubarre woko ki ka lubo kor Rwot, ento doŋ wuti bot Rwot ki cwinywu ducu. Pe wulokke wubarre woko wudok ka lubo kor gin atata ma pe konyo, ma pe laro dano mo, pien gin atata. Pien Rwot pe bibolo lwakke woko ata, pi nyiŋe madit-ti keken, pien yomcwiny oa ki i i Rwot ma oketowu me bedo jone kikome, Dok bene ki tuŋ bota pe myero atim bal bot Rwot me weko lego piwu; dok abipwonyowu kit me lubo yo atir ki maber. Wulwor Rwot keken, dok wuti bote ki gen madwoŋ ki cwinywu ducu; pienno wubedo ka tamo kit gin madito ma yam Rwot obedo ka tiyone piwu. Ento ka pud wumedde ka timo tim maraco, ci gibijwerowu woko, wun kacel ki kabakawu.” Caulo onoŋo tye ki mwaka kare ma ocamo ker ci oloyo jo Icrael pi mwakaiye aryo. Caulo oyero jo Icrael alip adek; jo alip aryo gubedo bote i Mikmac ki i lobo godi me Betel, ki alip acel gubedo bot Yonacan i Gibea i lobo Benjamin. Jo mudoŋ ocwalogi paco, ni ŋat acel acel odok i kemane, Yonacan oloyo jo Piliciti i cel gogo monygi mo ma tye i Geba, ci jo Piliciti guwinyo pire. Caulo okuto tum okwanne oromo lobo ducu kun wacci, “Wek jo Ibru ducu guwiny.” Ci jo Icrael ducu guwinyo ka giwaco ni, Caulo oloyo jo Piliciti i cel gogo monygi, dok bene ni, nyiŋ jo Icrael odoko nwe lituny bot jo Piliciti. Ci gilwoŋo lwak gucokke bot Caulo i Gilgal. Jo Piliciti gurwayo ka lweny ki jo Icrael ki gadigadi lweny alip pyeradek, ki wegi aguragura alip abicel, ki lwak mony madwoŋ macalo kweyo me dog nam, Gubino guguro gonygi i Mikmac ma tye i ŋet Bet-awen yo tun wokceŋ. Ka jo Icrael guneno ni doŋ gidinogi matek ma doŋ gitye marac twatwal, ci dano gukanne i boro ki i bur, ki i kin godi ki i lyel ki i bur pii-gu. Jo mogo guŋolo kulu Jordan, gucito wa i lobo Gad ki Gilead, Onoŋo Caulo pud tye i Gilgal, ci lwak ducu gilubo kore ki myelkom. Okuro pi nino abiro ma onoŋo Camuel ociko-ni; ento Camuel pe obino i Gilgal, ci lwak ocako ket woko ki bot Caulo. Mumiyo Caulo owacci, “Wukella gitum awaŋa kany, ki gityer lakwecwiny.” Ci otyero gitum awaŋa. Ka onoŋo pud otyeko tyero gitum awaŋa, ci nen, Camuel oturo kibi no cut. Ka Caulo okato woko ka rwatte kwede ki mote, Camuel owaco bo te ni, “Ibedo ka timo gin aŋo?” Caulo ogamo ni, “Ka aneno ni dano gucako ket woko ki bota, dok bene pe ibino i nino ma onoŋo iciko-ni, kun jo Piliciti doŋ gurwayo woko cok ki Mi kmac, ci atamo ni, ‘Jo Piliciti doŋ gibipoto i koma ki i Gilgal kany, ma peya ataŋo ciŋa akwayo Rwot;’ ci doŋ aturre pira kena ka tyero gitum awaŋa.” Ci Camuel owaco bot Caulo ni, “Itimo gin me miŋo keken. In pe igwoko cik pa Rwot Lubaŋani ma yam ociki kwede; kono onoŋo igwoko, kono Lubaŋa omoko kerri me loyo Icrael matwal. Ento kombeddi kerri doŋ pe bicuŋ; Rwot doŋ otyeko yero dano ma bitimo gin ma cwinye mito. Dok Rwot oketo en me bedo laker ma loyo lwakke, pien in pe igwoko gin ma Rwot yam ociki kwede.” Ci Camuel oa malo, oa ki i Gigal ocito i Gibea i lobo pa jo Benjamin. Caulo okwano wel dano ma gitye bote, ci guromo miya abicel. Caulo ki wode Yonacan ki jo ma gitye bote gubedo i Geba i lobo pa jo Benjamin, ento jo Piliciti gugony i Mikmac. Luyak gua ki i gony pa jo Piliciti buca mony adek; buca acel odok yo tuŋ Opra ma i lobo Cual, buca mukene odok yo tuŋ Bet-koron, ki buca mukene odok yo tuŋ waŋ lobo ma neno piny i nota Jeboim ma yo tuŋ tim ata. I kare-nu latet mo pe inoŋo i lobo Icrael ducu, pien yam jo Piliciti guwacci, “Pe wawek jo Ibru gutet pala lucwangi nyo tonigi pigi kengi.” Ento ŋat acel acel ki i kin jo Icrael obedo ka cito bot jo Piliciti ka twero lak kweri dyanne, nyo kweri kidima, nyo laton nyo pala kacce. Ci giŋolo gikok bedo dul aryo me adek me cekel pi lak kweri dyaŋ ki pi kidima, ka dok acel me adek me cekel pi twero lak latoŋ ki pi como dim. Kit meno omiyo i kare me lweny pala lucwan nyo toŋ pe ginoŋo i Ciŋ dano mo ki i kin jo ma gitye bot Caulo ki Yonacan. Ento Caulo ki wode Yonacan onoŋo gitye ki megi. Ci jo ma gitye i cel gogo mony pa jo Piliciti gumol gukato woko, gucito i waŋ apidin me Mikmac me gwokone. I nino mo acel Yonacan wod pa Caulo owaco bot awobi ma tino jami lwennye ni, “Bin wek wakat bot mony ma i cel gogo pa jo Piliciti ma tye loka ca-ni.” Ento pe otito bot wonne. Onoŋo Caulo bedo i agikki gaŋ me Gibea i te yat okwer pomegranat ma yam tye i Migron. Onoŋo jo ma gitye kwede giromo miya abicel, kacel ki Akija wod pa Akitub, omin Ikabod wod pa Finekaci ma wod pa Eli. En aye obedo ajwaka pa Rwot i Cilo ma ruko epod. Lwak pe guneye ni Yonacan ocito. I waŋ apidin ma Yonacan obedo ka yenyo yo me kato kwede i kom mony ma i cel gogo pa jo Piliciti-ni, onoŋo tye iye got ma oculle tuŋcel ki got ma oculle tuŋ mukene bene, Nyiŋ got acel Bojej ki nyiŋ mukene Cene. Got acel ocuŋ oculle yo tuŋ acam i nyim Mikmac, ki mukene yo tuŋ acuc i nyim Geba. Yonacan owaco bot awobi ma tiŋo jami lwennye ni, “Bin wek wakat bot mony ma i cel gogo pa jo-ni ma pe giŋeyo Lubaŋa; gwok Rwot bitiyo gin mo piwa kunnu, pien pe tye gin mo ma geŋo Rwot laro dano kadi gipol kadi ginok.” Latin jami lwennye owaco bote ni, “Tim gin ducu ma cwinyi oteri iye. Nen, an atye kacel kwedi; kit macalo cwinyi otamo kwede, mera bene kit meno,” Yonacan dok owaco ni, “Wabiwok wakato bot jo ca, ci wabinyutte kenwa botgi. Ka ce guwacci, ‘Wukur nio ka wao botwu,’ ci wabicun giwa mot i kabedowa, pe wabiito malo botgi, Ento ka guwacci, ‘Wubin malo botwa kany,’ ci wabiito malo kunnu, pien noŋo Rwot doŋ otyeko miyogi i ciŋwa. Meno aye bibedo lanyut botwa.” Kit meno gin aryo ducu gunyutte kekengi bot mony pa jo Piliciti ma tye i cel gogo; ci jo Piliciti guwacci, “Nen, jo Ibru gubebino ca, tye ka kato woko ki i bur ma gukanne iye.” Ci co me mony ma i cel gogo gulwoŋo Yonacan ki latin jami lwennye kun giwacci, “Wubin malo botwa, ci wabinyuto gin mo botwu.” Yonacan owaco bot latin jami lwennye ni, “Bin ilub kora, pien Rwot otyeko miyogi i ciŋ jo Icrael.” Ka doŋ Yonacan ocako ito malo kun ci to kobo ‘ki ciŋe ki tyene, ki latin jami lwennye lubo kore. Yonacan otoŋo Lupiliciti ci gupoto woko piny i nyime, kun latin jami lwennye obedo ka nekogi ki i kore. I nek meno mukwoŋo-ni ma Yonacan ki latin jami lwennye gutimo, guneko dano pyeraryo macalo kweri dyaŋ ma ŋolo dye poto ma romo nucu eka. Dano gutwarre ki lworo madwoŋ i gony pa jo Piliciti, ki jogi ma gitye woko i bar, ki mony ma i gogo, kadi wa luyak bene komgi omyel. Lobo oyeŋŋe, ci lworo mutwaro dano odoko madwoŋ twatwal. Ka lukur-piny pa Caulo ma i Gibea i lobo Benjamin guneno lwak jo Piliciti guket gigwennye atata, gidok tuŋŋi ki tuŋŋi, ci Caulo owaco bot lwak ma gitye bote ni, “Koŋ wukwan dano wek wanen aŋa ma okato woko ki botwa.” Gukwano dano, ci nen, Yonacan ki latin jami lwennye onoŋo gipe kunnu. Ci Caulo owaco bot Akija ni, “Kel canduk pa Lubaŋa kany.” Pien onoŋo canduk pa Lubaŋa woto kacel ki jo Icrael i kare meno, I kare ma Caulo obedo ka lok ki ajwaka-ni, woo obedo ka medde ameda i gony pa jo Piliciti, mumiyo Caulo owaco bot ajwaka ni, “Wek doŋ obedi.” Caulo ki jo ducu ma gitye kwede gucako wayo, ci gucito gudonyo ka lweny. Ci nen, dano acel acel i kin jo Piliciti co bo lawote ki pala lucwanne; kom dano obaŋŋe woko twatwal. Jo Ibru ma yam con gubedo bot jo Piliciti, ma yam gumol gucito kwedgi i gonygini, gin bene gulokke gudwogo i kom jo Icrael ma gitye kacel ki Caulo ki Yonacan. Kit meno wa jo Icrael ma yam onoŋo gukanne i kin godi me lobo Epraim, ka guwinyo ni jo Piliciti gitye ka riŋo woko, gin bene guryemo korgi matek ka lweny i komgi. Rwot olaro jo Icrael i nino meno; ci lweny omedde wa i ne Bet-awen. Can dok opoto i kom jo Icrael i nino meno; pien Caulo okwoŋo kwoŋ ki dano kun wacci, “Cen opot i kom dano mo ma ocamo cam ma peya piny oyuto, ma noŋo pud atye ka culo kwor i kom lukworra.” Kit meno pe onen ŋatti mo ma obilo cam. Ci dano ducu gucorre gudonyo i buŋa, gunoŋo moo kic opoto i ŋom. Ka dano gudonyo i buŋa, ci nen, moo kic tye ka ton piny. Ento dano mo pe oketo cine i doge, pien lwak obedo ka lworo kwon ma gikwono-ni. Ento Yonacan onoŋo pe owinyo ka wonne kwoŋo kwoŋ kun ciko ki dano. Kit meno en oluto iye wi odoo ma onoŋo tye i ciŋe, ci orwako i peda kic, orwako ciŋe i doge; ci waŋe ocako gony woko. Ŋat acel ma i lwak owacci, “Woru ociko dano kun kwoŋo kwoŋ matek ni, ‘Cen obed i kom dano ma ocamo cam i nino man.’” Onoŋo kec obwoyo dano woko. Yonacan ogamo ni, “Wora okelo can i lobo. Nen kit ma waŋa ogony kwede pien atyeko bilo moo kic man manok. Kono pe obedo ber twatwal kono dano gucamo tin ki kuc gin ma guyako ki bot lumerokgi? Pien kombeddi pud peya gineko jo Piliciti mapol.” Gineko jo Piliciti i nino meno cakke ki i Mikmac o wa i Aijalon. Onoŋo kec obwoyo dano mada; ci dano gucako mwomme i kom I im ma giyako, ci gumako romi ki twoni ki roci-gu guradogi woko piny, ci lwak gucako mwodo riŋone kacel ki remo. Ka gitito bot Caulo ni, “Nen, dano gubalo i nyim Rwot pi mwodo riŋo ki remo,” ci en ogamo ni, “Wutimo me dwalo dog! Wulor kidi madit tuŋ bota kany.” Caulo dok owacci, “Wuket wurom kin dano kun wuwaco botgi ni, ‘Dano acel acel okel twonne nyo romone, wunekgi kany wek wucam, Pe dok wubal i nyim Rwot pi mwodo riŋo ki remo.’ ” Pi meno dano acel acel okelo twonne i wor meno ci gunekogi kunnu. Caulo ocano keno tyer pi Rwot; en aye keno tyer mukwoŋo ma en ocano pi Rwot. Caulo dok owacci, “Wek walubu kor jo Piliciti i dyewor, waciyakugi nio ka piny oru. Pe waciweku dano mo odoŋ i komgi.” Dano gugamo ni, “Tim gin ma ineno ni berri.” Ento ajwaka owacci, “Weku koŋ wanyiku cok bot Lubaŋa kany.” Caulo openyo dog Lubaŋa ni, “Myero acilub kor jo Piliciti? Ibimiyogi i ciŋ jo Icrael?” Ento Lubaŋa pe odokke iye i nino-nu. Caulo owacci, “Wubin kany, wun lutel wi lwak ducu, wek wuiŋi wuniaŋ kit ma bal obino kwede tin. Pien macalo Rwot ma lalar jo Icrael tye makwo-ni, kadi ka bal tye i kom woda Yonacan, ci en bito ada.” Ento pe natu mo odokke iye ki i kin lwak. Dok owaco bot jo Icrael ducu ni, “Wun wubiwalle wubedo tuŋcel, ki an ki Yonacan wabiwalle wabedo tuŋcel.” Ci lwak guwaco bot Caulo ni, “Tim gin ma ineno ni berri.” Mumiyo Caulo owacci, “Ai Rwot Lubaŋa pa Icrael, piŋo tin pe idok iye bota, laditta? Ka ce bal man tye i koma nyo i kom Yonacan ma woda-ni, ai Rwot Lubaŋa pa Icrael, mi Urim, Ento ka bal man tye i kom joni Icrael, ci imi Tumim.” Ci kwir omako Yonacan ki Caulo, kun lwak obwot. Caulo dok owacci, “Bolu kwir i kin an ki woda Yonacan,” ci kwir opoto omako Yonacan, Caulo dok owaco bot Yonacan ni, “Titta gin ma itimo,” ci Yonacan otito bote ni, “Abilo moo kic manok ki i wi odoo ma onoŋo amako i ciŋa-ni, An doŋ atye ene, abito doŋ.” Caulo owacci, “Lubaŋa myero oket can i koma kit meno ki makato bene ka pe gineki woko, Yonacan.” Ento lwak gugamo dog Caulo ni, “Yonacan bi to doŋ ada, ma otiyo matek me kelo ki Icrael loc man madit-ti? Pe twero timme! Macalo Rwot tye makwo-ni, yer wi ye mo acel pe bipoto i ŋom, pien obedo ka tic kacel ki Lubaŋa i nino man,” Kit meno lwak gularo Yonacan, pe omedo ki to. Caulo oweko ryemo kor jo Piliciti, ci odok cen; ki jo Piliciti bene gudok woko i kabedogi. Ka Caulo doŋ otyeko camo ker pa jo Icrael me bedo kabaka, obedo ka lweny i kom lumerokke ducu ma gurume. Olwenyo i kom jo Moab, jo Ammon, jo Edom, i ‘kom luker me Joba ki i kom jo Piliciti. Ka ma olokke odokiye ducu, onekogi marac. Obedo ka lweny matek, oloyo wa jo Amalek, ci olaro Jo Icrael ki i ciŋ jo ma yam gibedo ka yakogi. Caulo yam tye ki awobene Yonacan, Icivi, Malkicua. Niŋ anyirane ene: latin nyako mukwoŋo nyiŋe Merab, nyiŋ matidine Mikal. Nyiŋ dako pa Caulo onoŋo’ Akinoam, nya pa Akimaj. Nyiŋ ladit wi monnye onoŋo Abneri wod pa Ner, ma omin won Caulo. Kic en aye won Caulo, ki Ner ma won Abneri-ni onoŋo en aye wod pa Abiel. Lweny obedo magwa i kom jo Piliciti i kare pa Caulo ducu. Ka Caulo oneno dano mo ma oteka lweny, ci kelo, bedo kwede cok. Camuel owaco bot Caulo ni, “Rwot yam ocwala ka wiri ki moo ker me bedo kabaka ma loyo jo Icrael, mumiyo tin ber iwiny lok pa Rwot. Rwot me mony owaco kuman ni, ‘Abiketo can i kom jo Amalek pi gin ma yam gutimo i kom jo Icrael, pien yam gulwenyo kwedgi ma gitye iyo, i kare ma gua ki i Ejipt. Cit ilweny ki jo Amalek, idyergi i ciŋ Rwot, ijwergi woko liweŋ ki gin ducu ma gitye kwede. Pe kica omaki i komgi, ento inen co wa ki mon, litino wa ki gin ma pud dot, twoni ki romi, kinaga wa ki kana-gu.’ ” Caulo olwoŋo dano ka lweny, ci okwanogi i Telaim. Jo ma giwoto ki tyengi onoŋo giromo alip miya aryo, ki jo pa Juda alip apar. Ka Caulo obino i nyim gaŋ pa jo Amalek, ci obuto i nota, okurogi iye. Dok Caulo owaco bot jo Keni ni, “Wua, wucit woko ki i kin jo Amalek, wek pe atyekwu woko kacel kwedgi; pien yam kica omakowu i kom jo Icrael ducu i kare ma gua woko ki i Ejipt.” Mumiyo jo Keni gua woko ki i kin jo Amalek. Caulo oloyo jo Amalek cakke ki i Kavila o kwede wa i Cur ma cok ki lobo Ejipt yo tuŋ wokceŋ. Omako Agag kabaka pa jo Amalek otere makwo, ci odyero jo-nu, ojwerogi woko ki pala lucwan. Ento Caulo ki lwak kica omakogi i kom Agag, ci guweko en kacel ki romi mogo ma gibeco, ki twoni, ki roci mucwe, ki litino romi-gu, ki jami mukene ma gibeco ducu, pe guye ni myero gijwergi woko liweŋ, Gin ducu ma gicayo, ki gin maracone, gin aye gujwerogi woko. Ka doŋ lok pa Rwot obino bot Camuel ni, “Atyeko ŋut pi miyo Caulo bedo kabaka, pien obarre woko ki ka lubo kora odok woko cen, pe ocobo cikka.” Ci kiniga omako Camuel, obedo ka kok bot Rwot dyewor benebene. Camuel oa odiko con pi rwatte ki Caulo. Ka gitito bot Camuel ni, “Caulo doŋ owoto i Karmel, ocibo gin me po pire kene, ci olokke okato anyim, ocito wa i Gilgal, Ka Camuel oo bot Caulo, ci Caulo owaco bote ni, “Gum pa Rwot obed i komi. Atyeko cobo cik pa Rwot.” Camuel owacci, “Man dok kit koko romi aŋo ma awinyo ki ita-ni, ki koko dyaŋi ma awinyoni?” Caulo owacci, “Gikelogi ki bot jo Amalek, pien dano gunoyo romi ki dyaŋi mabecone me gitum bot Rwot Lubaŋani; ki mudoŋŋe wajwerogi woko ducu liweŋ.” Ento Camuel owaco bot Caulo ni, “Liŋ! Abititti gin ma Rwot otito bota tin dyewor.” Caulo ogamo ni, “Doŋ itit bota do.” Camuel owacci, “Kadi inen i waŋi kekeni ni itidi, pe in aye iloyo kaka ducu ma i Icrael? Rwot yam owiri ki moo me bedo kabaka pa jo Icrael. Rwot ocwali kun waco boti ni, ‘Cit icidyerra jo Amalek ma lubalo, ijwergi woko ducu liweŋ.’ Piŋo yam pe iworo dog Rwot? Piŋo icorre i kom gin ma giyako, ki timo gin ma nen marac i waŋ Rwot?” Caulo owaco bot Camuel ni, “Atyeko woro dog Rwot. Acito ka ma gicwala iye, akelo Agag kabaka me Amalek, dok ajwero jo Amalek woko ducu liweŋ. Ento dano gukwanyo romi ki twoni ki i kin gin ma giyako, gukwanyo gin mabecone ki i kin jami ma onoŋo gidyero me ajwera woko liweŋ, gutero wek gubed gitum bot Rwot Lubaŋani i Gilgal.” Camuel ogamo ni, “Cwiny Rwot bedo yom i gitum awaŋa ki gityer-gu ma rom ki kit ma cwinye bedo yom kwede ka giworo doge? Nen, woro dog Rwot ber kato gitum, winyo cik ber kato dwolo nyogi romi ma giwaŋo me gityer, Pien jemo rom ki bal me tyet, tekwic rom ki bal me woro cal jogi. Macalo in ikwero winyo lok pa Rwot, en doŋ okwero in me bedo kabaka.” Caulo owaco bot Camuel ni, “Apoto i bal, pien akalo wi cik pa Rwot ki wi lokki, pien onoŋo alworo lwak, aworo doggi. Doŋ kombeddi alegi ni itima kica i kom balla, ci wadok kwedi wek aciwor Rwot.” Camuel ogamo dog Caulo ni, “Pe abidok kacel kwedi, pien ityeko kwero lok pa Rwot woko, ki Rwot bene otyeko kwero in me bedo kabaka pa jo Icrael.” Ka Camuel olokke me cito woko, Caulo omako dog kanyine, ci oyec woko. Camuel owaco bote ni, “Rwot doŋ oyeco ker pa Icrael woko ki boti tin, doŋ otyeko miyone bot lawoti ma en ber makato in. Lubaŋa ma en Deyo pa Icrael pe bi loko goba, kadi ŋut bene; en pe dano ma kono oŋut-ti.” Caulo owacci, “Apoto i bal; ento tin koŋ iket deyo i koma i nyim ludoŋo pa lwakka ki i nyim jo Icrael, wek wadok kwedi, aciwor Rwot Lubaŋani.” Mumiyo Camuel odok cen olubo kor Caulo, ci Caulo oworo Rwot. Camuel dok owacci, “Kella Agag, kabaka pa jo Amalek, bota kany.” Agag ocako bi no bote ma tipo kome pe kun wacci, “Lit me to doŋ peke.” Camuel owacci, “Kit ma yam pala lucwanni omiyo mon gudoŋ laboŋo litinogi-ni, kit meno meni bene bibedo laboŋo latin i kin mon wadi.” Ka doŋ Camuel oŋido Agag woko matitino i nyim Rwot i Gilgal. Lacen Camuel odok i Rama; Caulo ocito mere i ode i Gibea pa Caulo. Camuel pe omedo ki neno Caulo o wa i nino me tone, ento Camuel obedo ka kumo pi Caulo. Ci Rwot oŋut pi keto Caulo me bedo kabaka pa jo Icrael. Rwot owaco bot Camuel ni, “Cwinyi bikumo pi Caulo pi kare ma rom mene, kun an doŋ atyeko kwero en me bedo kabaka pa jo Icrael? Pik moo i tuŋ dyaŋ, ci iciti. Abiori bot Yece ma jo Beterekem, pien anoŋo kabaka pira kena i kin awobene.” Camuel ogamo ni, “Abiwot kunnu niŋniŋ? Ka Caulo biwinyone, bineka woko.” Rwot owaco bote ni, “Cit ki roya kun iwacci, ‘Abino ka tyero gitum bot Rwot.’ Ci ilwoŋ Yece obin i ka tumo gitum. An abinyutti gin ma myero iti. Ibiwiro pira dano ma abituco nyiŋe boti.” Camuel otimo kit ma Rwot ocike-ni, ocito i Beterekem. Ludoŋo ma i gaŋ meno gucito ka jolo wiye kun komgi myel. Guwacci, “Ibino ki kuc bo?” Ogamo ni, “Abino ki kuc. Abino ka tyero gitum bot Rwot. Wulonnye kekenwu wubed maleŋ, ka wubin kacel kweda ka tyero gitum.” Olonyo Yece ki awobene gubedo maleŋ ci olwoŋogi i ka tyero gitum. Ka gubino, Camuel oneno kom Eliab ci otamo ni, “Ada, ŋat ma Rwot biwiro ki moo tye i nyime.” Ento Rwot owaco bot Camuel ni, “Pe ibed ka neno ber me kome nyo kit borre, pien atyeko kwere woko; pien Rwot pe neno piny kit ma dano neno-ni, Dano neno kome ki woko, ento Rwot neno cwinye.” Yece dok olwoŋo Abinadab, oweko en okato ki i nyim Camuel; ci Camuel owacci, “Kadi man bene Rwot pe oyero.” Yece dok oweko Cama okato ki ka ŋete; Camuel dok owacci, “Kadi man bene pe Rwot oyero.” Yece omiyo awobene abiro ducu gukato i nyim Camuel. Ci Camuel owaco bot Yece ni, “Rwot pe oyero jo-ni.” Dok openyo Yece ni, “Awobeni ducu gitye kany?” Ogamo ni, “Matidine aye pud odoŋ; ento en tye ka kwayo romi,” ci Camuel owaco bot Yece ni, “Cwal kwena giome; pien pe wabibedo piny nio ka en oo kany.” Ocwalo kwena, ci gikele. Otuc ma kome kwar, waŋe mwonya ma neno ber. Rwot owacci, “Doŋ ia malo, iwire ki moo, pien man aye en.” Camuel okwanyo tuŋ dyaŋ ma moo tye iye, owiro Daudi ki moo ki i dye omegine. Ci Cwiny pa Rwot obino i kom Daudi ki tek cakke i nino meno. Lacen Camuel oa odok i Rama. I kare meno Cwiny pa Rwot oa woko ki i kom Caulo, ci cen marac ma oa ki bot Rwot opoto i kome, obedo ka lanye. Lutic pa Caulo guwaco bote ni, “Nen ba, cen marac ma oa ki bot Lubaŋa opoto i komi, obedo ka lanyi, Laditwa, ber icikwa wan luticci ma watye kany-nyi wek waciyeny dano mo ma ladiro goyo opuk; ci ka cen marac ma a ki bot Lubaŋa opoto i komi, en bigoyo opuk, mi yo ibedo maber.” Mumiyo Caulo ociko luticce ni, “Wun wuciyennya dano mo ma ŋeyo goyo opuk maberre, ci wukel en bota.” Ŋat acel i kin awobene ogamo ni, “Nen ba, aneno wod pa Yece ma Labeterekem ma ladiro goco. En laco ma oteka ma oniyo ki lweny, ma iye olil i lok, ma nen mwonya, dok Rwot tye kwede.” Mumiyo Caulo ocwalo lukwena bot Yece kun waco bote ni, “Cwalla wodi Daudi ma lakwat romi-ni.” Yece okwanyo kana me yeyo mugati, ki opiro koŋo vino, ki latin dyel, ci ocwalogi bot Caulo kacel ki wode Daudi. Ka Daudi ocito bot Caulo ci ocako ticce, Caulo ocako mare matek twatwal, ka odoko lamak jami lwennye. Caulo ocwalo kwena bot Yece kun waco bote ni, “Wek Daudi obed doŋ ka tiyo tic bota, pien aneno ticce, oyomo cwinya.” I kare ducu ma cen marac ma a ki bot Lubaŋa opoto i kom Caulo, ci Daudi kwanyo opuk, cako goyone, miyo Caulo bedo maber, doko dano, ci cen marac a woko ki i kome. I kare meno jo Piliciti gucoko monygi kacel pi lweny. Gucokke i Coko i lobo pa Juda, ci gugony i kin Coko ki Ajeka, i Epec-damim. Caulo ki jo Icrael gucokke kacel, gugony i nota Ela, ci gurye ki tyen me lweny i kom jo Piliciti. Lupiliciti gucuŋ i wi got tuŋcel, ki Luicrael gucuŋ i wi got tuŋ mukene, kun nota tye i kingi. Ci twon oita lweny mo obino oa ki i gony pa Lupiliciti ma nyiŋe Goliac, dano me Gat. Borre kato ka futi aboŋwen, Oruko otaŋ mola i wiye, dok oruko koti mola lagen kore; pek pa koti molane onoŋo romo ratili miya acel ki pyerabic. Oruko mola mukwako tyene, kun okacce ki toŋ alwiro mola wi gwoke. Bol tonne mito rom ki rii yat me cweyo boŋo; lak toŋŋe pekke romo ratili apar wiye aboŋwen, kun lamak kwotte otelo nyime. En ocuŋ ci odanne matek i wi mony pa jo Icrael ma gurye i tyen ni, “Kaa wubino ma wurye i tyen pi lweny piŋo? Pe an Lapiliciti? Pe wun lutic pa Caulo bo? Wuyer danowu mo acel, wek en olor piny obin bota. Ka en twero lweny kweda ce oneka, ci wan wabibedo luticwu; ento ka an aye aloye, ce aneke, ci wun wubibedo luticwa pi tiyo tic botwa.” Lapiliciti meno dok owacci, “Ataro mony pa jo Icrael ma tin gurye i tyengi! Wumiya dano mo wek walweny kwede kacel.” Ka Caulo ki jo Icrael ducu guwinyo lwak lok pa Lapiliciti-nu, ci cwinygi oballe woko, gubedo ki lworo madwoŋ twatwal. Daudi obedo wod pa dano mo me Eprata ma gaŋŋe Beterekem i lobo Juda; nyiŋe Yece, yam tye ki awobene aboro. I kare pa Caulo, onoŋo en doŋ oti woko, mwaka me ditte doŋ dwoŋ. Onoŋo awobe pa Yece adek muteggine gulubo kor Caulo i mony, Nyiŋ awobene adek ma gucito i mony-nyi gin ene: Eliab ma latin kayo, ki ma olube Abinadab, ki me adekke Cama, Daudi aye matidine; jo muteggi adek-ki gulubo kor Caulo, ento Daudi obedo ka wirre bot Caulo, ka dok paco ka kwayo romi pa wonne i Beterekem. Lapiliciti obedo ka bino anyim ci cuŋ kunnu odiko ki otyeno pi nino pyeraŋwen. Yece owaco bot wode Daudi ni, “Ber iter nyig bel ma gicelo acela-ni bot omegini, ma romo agwata adek, kacel ki mugati man apar, itiŋ itergi oyot bot omegini ma i gony ca. Dok iter cak mutwo muluŋŋe-ni apar bot laditgi me mony ma loyo dano alip, Nen kit ma omegini tye kwede, ci imak gin mo idwog kwede ki botgi.” I kare-nu onoŋo Caulo ki omegi Daudi wa ki jo Icrael ducu gubedo i nota Ela, kun gilwenyo ki jo Piliciti. Daudi oa odiko con oweko rorru bot lagwokone, ci ocako wot otero cam ma giyubo kit macalo Yece ocike kwede oo i gony ma onoŋo mony doŋ cito ka rye i tyen, kun giwayo me lweny. Ci jo Icrael ki jo Piliciti gurwayo cok ka romo; mony okemme ki mony wadi. Daudi oweko jami i ciŋ lagwok jami, ocito i ka ryeyo i mony, ci omoto omegine ducu. Ka pud tye ka lok kwedgi, ci twon oita mony Lapiliciti me Gat ma nyiŋe Goliac otuc ka maleŋ i nyim mony pa jo Piliciti ma guryeyo, kun loko lok ma’ rom ki macon ca, ci Daudi owinyo lokke. Jo Icrael ducu guriŋo laco meno woko ka gunene, ci gubedo ki lworo matek. Lwak jo Icrael guwacci, “Wuneno dano man ma obino-ni? Ada, en obino ka taro jo Icrael. Ka ŋat mo oneko, kabaka bimiye doko lalonyo madit, dok bimine nyare bene obed dakone, dok bimiyo jo me ot pa wonne pe doŋ giculo mucoro.” Daudi owaco bot jo ma gucuŋ ka ŋete ni, “Gin aŋo ma gibitimo ka dano mo oneko Lapiliciti-ni, okwanyo kwede cac woko ki i Icrael? Lapiliciti ma pe ŋeyo Lubaŋa-ni aŋa mono, ma myero obed ka taro Lubaŋa makwo-ni?” Lwak dok gudokke iye lakite acel-lu ni, “Gibitimo dano ma oneko-ni kit meno,” Ka Eliab omin Daudi maditte owinyo ka loko ki dano, kiniga omake i kome ci owacci, “Piŋo ibino? Iweko romiwa manok-ki i tim bot aŋa? Aŋeyo etteni ki keccwinyi; ibino kany ka neno lweny.” Daudi ogamo ni, “Atimo gin aŋo kombeddi? Pud aloko aloka keken.” Oloko ŋeye oneno ka mukene dok oloko lakite acel-lu, Dano ducu dok gudokke iye kit mukwoŋo-ni. Ka lok ma Daudi obedo ka lokoneni owinnye, gutito bot Caulo; ci Caulo ocwalo kwena olwoŋe. Daudi owaco bot Caulo ni “Pe iwek cwiny dano mo opoti pi Lapiliciti-nu, ladit; an abicito ka lweny kwede.” Caulo owaco bot Daudi ni, “In pe itwero cito ka lweny ki Lapiliciti man, pien in pud latin awobi.” Ento Daudi ogamo dog Caulo ni, “Ladit, abedo ka kwayo romi pa wora. Ka yam labwor mo obino, nyo ŋuu mukene, ce omako latm romo mo ki i kin romiwa, aryemo kore ci agoyo, alaro latin romo, akwanyo woko ki i doge. Ka ce otokke otiŋŋe i koma, apoto amako yer tike, agoyo aneko woko. Ladit, aneko labwor ki ŋuu mukene mapol. Lapilicitini ma pe ŋeyo Lubaŋa bibedo ma rom ki ŋat acel i kingi. Nen, en doŋ otaro nmony pa Lubaŋa makwo woko.” Daudi dok owacci, “Rwot yam olara ki i lwet ciŋ labwor ki ŋuu mukene: bilara bene ki i ciŋ Lapiliciti man.” Caulo owaco bot Daudi ni, “Citi. Rwot aye obed kwedi!” Caulo oruko Daudi ki jami lwennye, oruko otan mola i wiye, ka oruke ki koti mola. Daudi otweyo pala lucwan pa Cauloi wi jami lwennye, otemo wot kwede me noŋo, pien pe oniyo wot kwede. Ci owaco bot Caulo ni “An pe atwero wot ki man ducu pien pe aŋiyo kwede.” Olunyogi woko, ka okwanyo odoone omako i ciŋe, ci oyero litino gweni abic muluŋŋe mapwot ki i laora kulu, opikogi i opiro kwatte, ma en kicaane; omako latandiyone i ciŋe, ka onyiko cok bot Lapiliciti. Lapiliciti obino onyiko cok ki Daudi ki latin kwotte i nyime. Ka Lapiliciti oneno kom Daudi, ci otuki cayone woko, pien onoŋo pud latin awobi, kome kwar, dano ma neno mwonya. Owaco bot Daudi ni, “An adoko gwok bo, mumiyo ilima ki odoo-ni?” Ka ocako ceno Daudi ki nyiŋ lwak lubaŋane, Lapiliciti dok owaco bot Daudi ni, “Bin bota ci abimiyo riŋo komi bot winyo me polo ki bot ŋuu ma i tim.” Daudi bene owaco bot Lapiliciti ni, “In ibino bota ki pala lucwan ki toŋ ki toŋ alwiro, ento an abino boti i nyiŋ Rwot me mony, i nyiŋ Lubaŋa me mony pa jo Icrael ma ibedo ka tarone-ni. Tin Rwot bimiyo in i ciŋa, abireti woko piny, ci aŋolo wii woko; dok abimiyo kom lumony pa Lupiliciti ma guto tin bot winyo me polo ki bot ŋuu ma wi lobo, wek lobo ducu oneni, Lubaŋa tye i Icrael, dok wek lwak man guŋe ni, Rwot pe laro dano ki pala lucwan kadi ki toŋ, pien lweny Rwot aye ma loyo gire, ci en bimiyowu i ciŋwa.” Lapiliciti oa obino ka romo ki Daudi, ci Daudi oriŋo oyotoyot i nyim mony ma orye i tyen pi romo ki Lapiliciti. Orwako ciŋe i opirone, okwanyo lagwen, obayo, ocelo tur nyim Goliac. Lagwen odonyo woko i tur nyime ci opoto piny aryeba cwiny. Kit meno Daudi oloyo Goliac ki latandiyo ki lagwen, ocelo, oneko woko. Pala lucwan onoŋo pe i ciŋ Daudi. Oriŋo, ocuŋ i wi Goliac, owoto pala lucwan pa Goliac ki i akurane, oneke kwede, ka oŋolo kwede wiye woko. Ka jo Piliciti guneno ni twon oita monygi oto, ci guriŋo woko. Lwak jo Icrael ki Juda gutwarre ‘ki oduru gulubo kor jo Piliciti nio wa i Gat, ki i dog gaŋ me Ekron. Omiyo Lupiliciti ma ret omakogi gupoto woko i dog yo cakke ki i Caaraim o wa i Gat ki Ekron. Lacen jo Icrael gucako dwogo cen ki ka ryemo Lupiliciti, ci guyako gonygi. Daudi okwanyo wi Goliac okelo i Jerucalem, ento oketo jami lwennye I kemane. Ka Caulo oneno ka Daudi cito ka lweny ki Goliac, ci openyo Abneri ma ladit wi monnye ni, “Abneri, latin awobi-ni wod pa aŋa?” Abneri ogamo doge ni, “Macalo in ikwo-ni, kabaka, pe aŋeyo.” Kabaka dok owacci, “Peny pi awobi-ni, ni en wod pa aŋa?” Ka Daudi odwogo ki ka neko Lapiliciti, ci Abneri okwanye otere i nyim Caulo, ki wi Goliac i ciŋe. Caulo openye ni, “In wod pa aŋa, latin awobi?” Daudi odok iye ni, “An a wod pa laticci Yece ma Labeterekem.” Ka doŋ Daudi otyeko lok ki Caulo, ci tipo kom Yonacan omoko i kom Daudi matek, omare macalo tipo kome kene. Caulo otero Daudi i nino meno, pe dok oweke odok i gaŋ pa wonne. Yonacan dok oketp gicikke ki Daudi, pien onoŋo mare macalo tipo kome kene, Olunyo jorre woko ki i kome, omiyo bot Daudi kacel ki jami lwennye, wa pala lucwanne bene ki atum aterone ki del pyere. Ka ma Caulo ooro Daudi iye ducu co cito, tiyo maber, mumiyo Caulo okete oloyo jo me mony. Ket man oyomo cwiny lwak ducu, dok oyomo cwiny lutic pa Caulo bene. Ka onoŋo gidwogo i gaŋ paco, i kare ma Daudi dwogo ki ka ma oneko iye Lapiliciti-ni, ci mon gumol woko ki i gaŋi ducu ma i Icrael ma kun giwero, gimyelo pi jolo kabaka Caulo ki ajaa, ki wer me waya pi yomcwiny, ki jami agoya me wer. I tukogi mon giwero kun gileyo aleya ni, “Caulo oneko mere dano alip, ento Daudi oneko alip apar.” Lok man ocwero cwiny Caulo, kiniga omake matek twatwal. Owacci, “Ma gubedo ka waco ni Daudi oneko alip apar, ki tuŋ bota giwaco ni alip keken, gin aŋo mukene ma en dok twero limo? Man odon camo ker.” Cakke i kare meno, Caulo neno Daudi agaya. Orwone cen marac oturo ki poto i kom Caulo, ci obedo ka po ki lok i ode, kun onoŋo Daudi goyo opuk i kit me nino ducu. Caulo onoŋo tye ki toŋŋe i ciŋe, ci obaye ki toŋ, pien obedo ka tamo ni, “Wek acob Daudi, adi woko i kor ot.” Ento Daudi oloye tyen aryo, Caulo obedo ka lworo Daudi, pien Rwot tye kwede, ento Rwot onoŋo oa woko ki bot Caulo. Caulo okwanyo Daudi woko ki i nyime, okete me bedo ladit lalo dano alip; ci obedo ka telo nyim lwak ka gicito i mony. Gin ducu ma Daudi tiyo en cobo maber, pien Rwot tye kwede, Ka Caulo oneno ni gin ducu ma Daudi tiyo cobo maber twatwal, ci obedo ka lwore. Ento Jo Icrael ki jo Juda ducu gumaro Daudi pien obedo ka telo rryimgi ka ma giwoto iye ducu. Caulo dok owaco bot Daudi ni, “Atye ki nyara madit Merab ene; abimiye boti obed dakoni. Bed oteka lwennya keken, kun ilwenyo matek pi Rwot.” Caulo onoŋo tamo ni, “Wek ciŋa pe opot i kome, wek ciŋ jo Piliciti aye opot i kome.” Daudi owaco ni, “An aŋa, ki kwarina jo mene, ki doggola pa kwaragi gin aŋa-gi i kin jo Icrael, ma miyo abedo cwar nya pa kabaka-ni?” Ento i kare ma kono gimi Merab nya pa Caulo bot Daudi, dok gimiyo bot Adriel ma jo Mekola pi bedo dakone. Mikal nya pa Caulo dok omaro Daudi, Ka gitito bot Caulo, lokke oyomo iye. Caulo onoŋo otamo ni, “Wek amiye bot Daudi, wek obed owic me make, wek ciŋ jo Piliciti aye opot i kome.” Mumiyo Caulo dok owaco bot Daudi tyen me aryo ni, “In doŋ ibibedo cwar nyara.” Caulo oloko ki luticce bene, ocikogi ni, “Wulok ki Daudi i muŋ ni, ‘Nen, cwiny kabaka yom i komi, ki luticce ducu gimari; doŋ ibed cwar nya pa kabaka.’ ” Lutic pa kabaka guwacce lok meno ducu. Daudi ogamo ni, “Lok me doko cwar nya pa kabaka nen botwu ni tidi mono, kun an lacan, peya aywek?” Lutic pa Caulo gutito bote lok ma Daudi odwoko. Dok Caulo owaco lok ni, “Wubiwaco bot Daudi ni, ‘Kabaka pe mito lim me nyom. En mito del kom nyim jo Piliciti me co miya acel, wek icul kwor i kom lumerok pa kabaka.’’’ Onoŋo Caulo otamo ni, jo Piliciti aye myero gunek Daudi. Ka luticce gutito lok man bot Daudi, bedo cwar nya pa kabaka oyomo cwinye. Ma peya kare ma gimoko okato, ocito ki lwakke, oneko jo Piliciti miya aryo, odwogo ki del kom nyimgi me co, omiyogi bot kabaka kun mo pe orem, wek odok cwar nya pa kabaka. Caulo omiye nyare Mikal me bedo dakone. Ento ka Caulo oneno dok oniaŋ maber ni Rwot tye ki Daudi, dok ni jo Icrael ducu gimare, lworo omako Caulo i kom Daudi makato yam con, mumiyo Caulo obedo lamerok pa Daudi i kare ducu. Rwodi pa jo Piliciti dok gubino ka lweny, ci i kare ducu ma gibino, noŋo Daudi loyogi maber makato lutic pa Caulo mukene ducu, ma omiyo nyiŋe oywek matek. Caulo ocako loko ki wode Yonacan ki luticce ducu ni myero gunek Daudi woko. Ento cwiny Yonacan wod pa Caulo onoŋo maro Daudi matek. Yonacan otito bot Daudi ni, “Wora tye ka yenyo yo me neki woko; pienno myero igwok komi diki odiko, bed ma ikanne keni i muŋ. An abicito i bar, acuŋ i ŋet wora ka ma ikanne iye-ni, ci abiloko piri bot wora; ka aniaŋ lok mo, ci abitito boti.” Yonacan oloko pi Daudi mamit bot wonne Caulo kun waco ni, “Kabaka, pe itim bal i kom laticci Daudi, pien pe otimo bal mo i komi, obedo ka timmi tic ducu mabeco. Yam odyero kwone, oneko Goliac ma Lapiliciti, ci Rwot omiyo jo Icrael oloyo loc madit. Yam ineno, cwinyi obedo yom iye. Piŋo imito timo bal kun ioyo remo pa dano ma pe ki bal, pi neko Daudi noŋo laboŋo tere?” Caulo owinyo dog wode Yonacan, ci okwoŋo kwoŋ ni, “Macalo Rwot tye makwo-ni, pe doŋ gibineko.” Yonacan olwoŋo Daudi, otito bote lok meno ducu, ci okelo Daudi bot Caulo, obedo i nyime kit macon. Lweny dok ocakke. Daudi ocito olwenyo ki jo Piliciti, onekogi mapol, omiyo guriŋo woko. I kare meno cen marac dok oa ki bot Rwot opoto i kom Caulo, i kare ma en obedo i ode ki toŋŋe i ciŋe, kun Daudi tye ka goyo opuk. Caulo oyubbe woko me guro Daudi i kor ot ki toŋ; ento Daudi oneyo waŋ Caulo woko, omiyo Caulo ocobo kor ot ki toŋŋe. Daudi onno, obwot gire. I dyewor meno Caulo ocwalo lukwena ka kuro Daudi i ode, wek enek woko odiko, Ento Mikal dako pa Daudi owaco bote ni, “Ka tin dyewor pe igwoko komi, ci gibineki woko diki.’ Kit meno Mikal ocwalo Daudi owok ki i waŋ dirica oriŋo woko obwot gire. Mikal okwanyo cal apaya opyelo i wi kitanda pa Daudi, ka oketo laten wic me yer dyegi opyelo ka wiye, ka oumo woko ki boŋo. Ka’ Caulo ocwalo lukwena me omo Daudi, Mikal owacci, “Kome lit,’ Caulo dok ocwalo lukwena ka neno Daudi kun waco ni, “Wutine ki kitanda wukel bota, wek aneke woko.” Ka lukwena gudonyo i kicika, ci nen, cal apaya aye tye i wi kitanda, ki laten wic me yer dyegi ka wiye. Caulo openyo Mikal ni “Piŋo ibwola kit man iweko lamerokka ocito?” Mikal odok iye bot Caulo ni, “Owacca ni, ‘Wek aciti;” ka pe, ci aneki woko.’ ” I kare-nu Daudi oriŋo ci obwot gire, ocito bot Camuel i Rama, otitte gin ducu ma Caulo otimo i kome. Ci en kacel ki Camuel gucito gubedo i Nayot. Dok gitito bot taulo ni, “Daudi tye i Nayot i Rama.’ Caulo dok ocwalo lukwena ka omo Daudi. Ka lukwena pa Caulo guneno lwak lunebi ma gitito lok pa Lubaŋa, kun Camuel ocuŋ ka telo wigi, ci Cwiny pa Lubaŋa opoto i kom lukwena pa Caulo, gin bene gucako tito lok pa Lubaŋa macalo lunebi.” Ka gitito lokke bot Caulo, ci dok ocwalo lukwena mukene. Gin bene gucako tito lok pa Lubaŋa kit macalo lunebi gitito-ni. Caulo dok ocwalo lukwena tyen me adekke, gin bene gutito lok pa Lubaŋa aye. Ka lacen Caulo kikome ocito i Rama, obino ka ma waŋ pii madit tye iye ma tye i Ceku-ni, ci openyo ni, “Camuel ki Daudi gitye kwene?” Ŋat acel owacci, “Gitye i Nayot, i Rama.” Caulo oa ki kunnu, ocito i Nayot ma i Rama. Cwiny pa Lubaŋa obino opoto i kome bene, obedo ka wot kun tito lok pa Lubaŋa macalo lanebi, kun woto oo kwede wa i Nayot ma ‘i Rama. En bene ocako lunyo boŋone woko, otito lok pa Lubaŋa macalo lanebi i nyim Camuel. Obuto munero i nino meno dyeceŋ ki dyewor benebene. Mumiyo giwacci, “Caulo bene tye i kin lunebi?” Daudi olwi oriŋo woko ki i Nayot ma i Rama, ocito bot Yonacan owacci, “An atimo gin aŋo? Aroco gin aŋo? Abalo gin aŋo i nyim woru mumiyo en mito neka-ni?” Yonacan ogamo ni, “Meno pe twero timme! Pe myero ito. Nen; wora pe tiyo gin mo madit nyo matidi ma pe otito bota; ci lok aŋo ma miyo wora munna lok man? Pe tye kit meno.” Ento Daudi odok iye ni, “Woru ŋeyo maber ni doŋ ayomo cwinyi; dok’ en tamo ni, ‘Pe giwek Yonacan one lok man, wek pe obed ki kumo.’ Ento me adane, macalo Rwot tye makwo, dok macalo tiponi bene tye makwo-ni, an ki to kinwa doŋ cok.” Yonacan dok owaco bot Daudi ni, “Gin ducu ma iwaco abitiyo piri.” Daudi ogamo dog Yonacan ni, “Nen, dwe diki por; pe myero bedo ki kabaka i dog cam oloya. Ento wek koŋ aciti, acikanne woko i bar nio Wa i nino me adekke wi otyeno. Ka woru openyo pira, ci iwac ni, ‘Daudi openya matek ni giyene me cito wa i gaŋgi Beterekem oyoto, pien timo gitum tye ma bedo kunnu i doggolagi mwaka ki mwaka.’ Ka ce ogamo ni, ‘Ber!’ ci abibedo maber; ento ka obedo ki kiniga, ci ber iŋe ni tim marac doŋ otyeko mo ko i cwinye. Mumiyo in itima ber, pien doŋ iketo gicikke maleŋ i kin in ki an. Ento ka roc mo tye i koma, ci in kikomi aye ineka. Piŋo iweko apoto i ciŋ woru?” Yonacan ogamo ni, “Pe twero timme i komi! Ka ce aŋeyo ni tim marac doŋ otyeko moko i cwiny wora, ci pe atito boti?” Daudi dok owaco bot Yonacan ni, “Aŋa mono ma doŋ bititta ka woru ogammi lok taro?” Yonacan owaco bot Daudi ni, “Bin wek wacit i bar.” Ci gin aryo ducu gucito i bar. Yonacan owaco bot Daudi ni, “Rwot Lubaŋa pa Icrael obed caden i kinwa! Ka doŋ atyeko ŋeyo tam pa wora, diki ka onyoo, nyo i nino me adekke, nen, ka tamme ber i komi in Daudi, ci abicwalo lok atito boti, Ento ka wora mito timi marac, Rwot myero oket can i koma kit meno ki makato bene ka pe atito lokke boti ci acwali woko cen wek icit giri maber. Rwot aye obed kwedi kit ma yam obedo ki wora-ni. Ka ce pud atye makwo, ci ibed kweda ki mar pa Rwot ma pe lokke-ni, wek pe ato. Dok pe ikwany marri woko ki i kom jo me oda matwal. Ka ce Rwot bikwanyo lumerokki ducu ki i lobo, pe iwek gicikkewa wan kwedi gitur. Ka ce gituro, Rwot biculo kwor i komi.” Ci Yonacan dok omiyo Daudi okwoŋo kwoŋ kun ocikke kwede pi mare, pien Yonacan onoŋo maro Daudi kit ma maro kwede tipo kome kekene. Yonacan dok owaco bot Daudi ni, “Dwe por diki. In doŋ ibibedo pe, kom bedoni bidoŋ noŋo, I nino me adekke gibipenyi matek; in doŋ icit, i kabedo ma yam ikanne iye i kare ma lok gilaro ci ibed i ŋet got ma giguro-ni, An abibayo atero adek ka ŋete ma nen calo abecelo gin mo, Nen, abicwalo latin awobi kun awacci, ‘Cit ka yenyo atero.’ Ka ce awaco bot latin awobi-nu ni, ‘Nen, atero tye tuŋ boti kany, putgi woko,’ ci in ibidwogo, pien macalo Rwot tye makwo-ni, noŋo gin mo pe ma timi marac, Ento ka awaco bot awobi ni, ‘Nen atero tye wa i nyimi kuca,’ ci pe idwogi, pien noŋo Rwot aye ocwali woko cen. Dok lok ma in ki an watyeko lokone, nen, Rwot tye i kin in ki an matwal.” Kumeno Daudi okanne woko i bar, Ka dwe opor, ci kabaka obedo piny ka cam. Obedo i komme me nino ducu ma cok ki kor ot, ka Yonacan bedo kemo kabaka, ki Abneri dok bedo ka ŋet Caulo, ento kabedo pa Daud i tye noŋo. Caulo pe oloko iye gin mo i nino meno, pien otamo ni, “Gin mo opoto i kome, omiyo pe etye ma elonnye, pe tye ma elonnye ada.” Ento i nino me aryone, orwone i nino mulubo por dwe, kom bedo pa Daudi obedo noŋo, ci Caulo ocako penyo wode Yonacan ni, “Piŋo wod pa Yece pe obino ka cam, cakke wa laworo ki tin bene?” Yonacan ogamo dog Caulo ni, “Daudi openya matek ni giyene me cito Beterekem. Olego ni, ‘Wek aciti, pien jo me doggolawa gitye ka tumo gitum i gaŋ, omera ociko ni abed kunnu. Kombeddi, ka gum omaka i nyimi, ci wek aciti, acinen omegina.’ Pi lok meno omiyo en pe obino i dog cam boti, kabaka.” Kiniga otugi mako Caulo i kom Yonacan cut. Owaco bote ni, “In i wod pa dako ma ŋute oteŋ, ma lajemo; pe Onoŋo an doŋ aŋeyo ni cwinyi otyeko maro wod pa Yece, ma lewicce bimaki giri, ma lewicce bimako wa meni bene? Pien Kitma wod pa Yece bedo kwede i wi lobo-ni, kadi in nyo kerri pe bimoko matwal. Pienno cwal dano wek okele bota, pien en bi to ada.” Yonacan ogamo dog wonne Caulo ni, “Gibineke woko pi gin aŋo? Otimo gin aŋo?” Ento Caulo obaye ki toŋ, mumiyo Yonacan oŋeyo ni cwiny wonne otyeko moko pi neko Daudi, Yonacan oa woko ki i dog cam ki kiniga madwoŋ, ci pe dok ocamo cam mo i nino dwe me aryone, pien cwinye obedo ka kumo pi Daudi, pien wonne onoŋo oyeto Daudi. Orwone Yonacan ocito i bar ka ma ocikke iye ki Daudi, kacel ki latin awobi mo. Owaco bot awobine ni, “Rin iciput atero, ma abibayo-ni.” Ka awobi-nu oberiŋo, ci obayo atero ocuŋ wa i nyime. Ka latin awobi-nu oo ka ma Yonacan obayo iye atero-ni, Yonacan olwoŋo awobi-nu kun wacci, “Atero tye wa i nyimi kuca.” Dok olwoŋo awobi-nu kun wacci, “Rune itim oyoto, pe iru!” Awobi pa Yonacan ocoko atero ducu, odwogo kwedgi bot laditte. Ento awobi pe oneyo iye gin mo; kono Yonacan ki Daudi aye giŋeyo lokke. Yonacan omiyo jamine ducu bot awobine, ocike ni, “Doŋ icit, idwokgi wa gaŋ.” Ka awobi ocito, ci Daudi otugi a malo ki i ŋet got ma giguro-ni, opoto i ŋom aryeba cwiny, okulo wiye piny k idek, Gucako noto lemgi kekengi ki mot me mar, ka gukok ki pig waŋgi kekengi ento Daudi aye obedo ki kumo madwoŋ. Yonacan dok owaco bot Daudi ni, “Cit giri ki kuc, macalo doŋ watyeko kwoŋo kwoŋ kekenwa i nyiŋ Rwot, kun wawacci, ‘Rwot bibedo i kin an ki in, ki i kin likwaya ki likwayi matwal.’ ” Ka lacen Daudi oa opokke kwede, ci Yonacan odok i gaŋ. Daudi ocito i Nob bot Akimelek ma ajwaka pa Lubaŋa, Akimelek obino ka jolo wi Daudi ki myelkom kun penye ni, “Piŋo it ye keni ma ŋat acel mo pe kacel kwedi?” Daudi ogamo dog ajwaka Akimelek ni, “Kabaka ocika ki lok mo kun waco bota ni, ‘Pe iwek ŋatti mo one lok ma acwali pire-ni, ki lok ma aciki kwede.’ Pienno doŋ acikke ki jona pi kabedo ma abirwatte iye kwedgi. Kombeddi it ye ki gin aŋo i ciŋi? Miya mugati abic, nyo gin mo keken ma tye boti.” Ajwaka odok iye bot Daudi ni, “Pe tye mugati mo me nino ducu-ni i ciŋa, ento atye ki mugati maleŋ, Ka ce gin awobeni gupokke woko ki mon i kin kare-ni, atwero mini.” Daudi ogamo dog ajwaka ni, “Me adane, mon gipokke woko kwedwa kare ducu ka wacito ka mo, ki kom awobe gibedo leŋ kadi bed wot me nino ducu. Pe myero komgi obed leŋ makato tin ma wacito i lok ma pire tek-k i?” Kit meno ajwaka omine mugati maleŋ; pien onoŋo mugati mo pe bote, kono mugati me aketa i nyim Lubaŋa keken, en aye gikwanyo ki i nyim Rwot, ma gidwoko waŋe ki mugati manyen ma pud lyet i nino meno kikome ma gikwanyo-ni. Laco mo ma i kin lutic pa Caulo onoŋo tye kunnu i nino meno, obedo ka dikke i nyim Rwot, Nyiŋe Doeg, Laedom, ma ladit pa lukwat pa Caulo. Daudi dok owaco bot Akimelek ni, “Itye ki pala lucwan nyo toŋ mo kany? Pe akelo kadi pala lucwan kadi wa jami lweny mo, pien or pa kabaka obedo rucurucu.” Ajwaka ogamo kun wacci, “Pala lucwan pa Goliac ma Lapiliciti ma yam ineko i nota Ela tye kany, Nen, tye ma giboyo kome woko ki boŋo giketo i ŋe epod. En ene; ka imito terone, ter do, pien mukene pe, ennu keken tye kany.” Daudi owacci, “Pe tye mo ma rom ki meno; mina do.” Daudi oa woko ki kunnu i nino meno kun riŋo ki bot Caulo, ocito bot Akic, kabaka me Gat. Lutic pa Akic guwaco bote ni, “Man aye Daudi ma kabaka me lobo-ni. Yam giwere kun mon gimyelo kwede ma giwero ni, Taulo oneko mere dano alip, ento Daudi oneko alip apar.’ ” Daudi okano lok meno i cwinye, ci obedo ki lworo madwoŋ i kom Akic, kabaka me Gat, Oloko kit bedone i nyimgi pi lworo, ocako banne woko i ciŋgi macalo lapoya, obedo ka goro kom kika me doggola ma i dog gaŋ, kun oweko laa doge mol i tike. Akic owaco bot luticce ni, “Nenu, laco-ni lapoya; piŋo dok wukelo bota kany? An can lupoya omaka bo, mumiyo wukelo laco man ka nyuto apoyane i nyima? Wumito laco man odony wa i oda?” Daudi oa woko ki kunnu, ocito i boro got ma tye Adulam. Ka omegine guwinyo pire, ki jo mukene me doggola pa kwarogi, gucito bote. Wa ki dano ducu ma can odiŋogi ki dano ma gucamo banya, ki dano ma piny oloyogi, gucokke botgi, en odoko ladit ma loyogi, obedo ki dano ma cok romo miya aŋwen. Daudi oa ki kunnu, ocito i Mijpe ma i lobo Moab. Owaco bot kabaka me Moab ni, “Alegi iwek wora ki maa gubed boti, nio ka abiŋeyo gin ma Lubaŋa bitiyo i koma.” Owekogi bot kabaka me Moab, ci gubedo kwede i kare ducu ma Daudi tye ka kanne i godi. Lanebi Gad dok owaco bot Daudi ni, “Pe ibed ka kanne i godi, A woko, icit i lobo Juda.” Mumiyo Daudi oa woko ki kunnu, ocito i buŋa Keret. Caulo onoŋo bedo i Gibea, i te yat anaŋa ma i kabedo mutiŋŋe malo. Cen mo ka obedo kunnu ki toŋŋe i ciŋe, kun luticce ducu gucuŋ cok kwede, owinyo ni ginoŋo kom Daudi ki jo ma gitye kwede. Owaco bot luticce ma gucuŋ i ŋete ni, “Tin wuwiny, wun jo pa Benjamin, Wutamo ni wod pa Yece bimiyo poto me apura bot ŋat acel acel i kinwu, ki poto olok? En biketowu ducu wubedo lulo dano alip nyo lulo dano miya, mumiyo wun ducu wupiro lok i koma? Pe tye ŋat mo mutito bota ni woda ocikke ki wod pa Yece. Pe tye ŋat mo ma cwinye cwer pira. Ŋat mo pe mutitta ni woda orubo cwiny dano ma yam laticca wek oliba, macalo i nino man.” Doeg ma Laedom ogamo doge ki ka ma ocuŋ iye ka ŋet lutic pa Caulo, owacci, “An aye aneno wod pa Yece ka ocito Nob bot Akimelek wod pa Akitub, ci Akimelek openyo dog Rwot pire, dok omiye cam, ki pala lucwan pa Goliac ma Lapiliciti.” Kabaka ocwalo kwena pi lwoŋo ajwaka Akimelek wod pa Akitub ki ludoggola pa kwarone ducu, gin ajwagi pa Lubaŋa ducu ma gitye i Nob; ci gin ducu gubino bot kabaka, Caulo owaco ni, “Doŋ iwiny, in wod pa Akitub.” En ogamo ni, “An atye ene, rwoda.” Caulo openye ni, “Piŋo wupiro lok i koma, in ki wod pa Yece, dok imine cam ki pala lucwan, ka ipenyo dog Rwot pire, omiyo obino ka lweny i koma ki ka liba, macalo en tye ka timo i kare-ni?” Akimelek ogamo dog ka baka ni, “Kabaka, aŋa ma i kin luticci ma lagen macalo Daudi, ma obedo oru bene, dok ladit pa lugwok kwoni, dano ma giworo mada i odi!’ Tin aye tyen mukwono ma apenyo kwede dog Lubaŋa pire? Pe kumeno, ladit kabaka, Pe itam lok mo marac i koma nyo i kom jo me doggola pa kwarona, Pe aŋeyo lok mo wacel i kom lok ma iwaco-ni.” Kabaka owacce ni, “Ibito ada, Akimelek, in kacel ki jo me doggolawu ducu.” Ci kabaka owaco bot dano ma gigwoke ma gucuŋ cok kwede ni, “Wunek ajwagi pa Rwot woko, pien guribo ciŋgi ki Daudi. Giŋeyo ni olwi woko, ci pe gutito bota.” Ento lutic pa ka baka gukwero gudo kom ajwagi pa Rwot. Kabaka dok owaco bot Doeg ma Laedom ni, “In aye inek ajwagi-ni.” Ci Doeg ma Laedom oneko ajwagi ducu. I nino meno oneko dano pyeraboro wiye abic ma giromo ruko epod me boŋo camanini ma ajwagi pa Lubaŋa giruko-ni. Caulo dok omiyo gineko dano ducu ma i Nob ma gaŋ pa ajwagi; gityekogi woko ducu ki pala lucwan, co wa ki mon, litino ki litino lukere ma pud dot, kacel ki twoni dyaŋi ki kana ki romi-gu, Ento ŋat acel ki i kin awobe pa Akimelek wod pa Akitub obwot, nyiŋe Abiatar. Oriŋo olubo kor Daudi, ci otito bote ni, Caulo otyeko neko ajwagi pa Rwot woko. Daudi owaco bot Abiatar ni, “Onoŋo yam aŋeyo lokke wa i nino ma aneno Doeg ma Laedom kunnu. I nino-nu yam aniaŋ ni bitito bot Caulo ada. An aye akelo to man i kom doggola pa kwarowu. Doŋ ibed kweda, pe ilwor, pien ŋat ma mito neka noŋo mito neki bene. Ka ibedo kweda abigwoki maber.” I kare ca gitito bot Daudi ni “lo Piliciti gitye ka lweny i kom jo Keila, gitye ka yako kalgi woko ki i laro moyo,” Pienno Daudi openyo dog Rwot ni, “Acit ilweny i kom jo Piliciti meno?” Rwot ogamo dog Daudi ni, “Cit icilweny i kom jo Piliciti wek ilar jo Keila.” Ento jo pa Daudi guwaco bote ni, “Nen, kany i Juda wabedo ki lworo madwoŋ, Pe bedo rac mada ka dok wacito i Keila ka lweny ki mony pa jo Piliciti?” Ci Daudi dok openyo dog Rwot. Rwot owaco bote ni, “A malo, icit i Keila pien abimiyo jo Piliciti i ciŋi.” Daudi kijone gucito i Keila, gulwenyo i kom jo Piliciti, gudwogo cen ki dyaŋigi, ma onoŋo guneko lwak jo mapol i komgi. Daudi olaro jo Keila kit meno. Ka Abiatar wod pa Akimelek oriŋo bot Daudi i Keila, ocito ki epod i ciŋe. Dok gitito bot Caulo ni Daudi doŋ ocito i Keila. Caulo ogamo ni, “Lubaŋa doŋ otyeko miye woko i ciŋa, pien odonyo i gaŋ ma tye ki doggola ma gicego ki rii, ci oloro iye wiye kekene.” Caulo olwoŋo lwak ducu ka lweny wek gucit i Keila ka rumo wi Daudi ki jone kunnu. Daudi oniaŋ ni Caulo tye ka piro lok marac i kome, ci owaco bot ajwaka Abiatar ni, “Kel epod kany.” Ci Daudi olego ni, “Ai Rwot Lubaŋa pa Icrael, awinyo ni Caulo tye ka yenyo yo me bi no Keila wek etyek gaŋ man woko pira. Ci doŋ apenyo ni, jo Keila gibimiya i ciŋ Caulo? Caulo bibino, kit ma awinyoni? Ai Rwot Lubaŋa pa Icrael, abako doga boti, titta ba,” Rwot owaco bote ni, ‘En bibino.’’’ Daudi dok openyo ni, “Jo Keila gibimiya ki jona i cin Caulo?” Rwot ogamo ni, “Gibimiyi bote.” Ci Daudi ki jo ma gitye bote ma giromo miya abicel gua woko ki i Keila, guket, gucito ka ma giromo wot iye. Ka dok gitito bot Caulo ni, Daudi doŋ oriŋo woko ki i Keila, ci pe doŋ ocito kunnu. Daudi obedo i kakannene i dye tim, i lobo godi ma i tim Jip. Caulo obedo ka yenye jwijwi, ento Lubaŋa pe omiye i ciŋe. Daudi obedo ki lworo pien onoŋo Caulo tye ka yenye me aneka. I kare ca onoŋo. Daudi obedo i Korec ma tye i tim Jip, ci Yonacan wod pa Caulo obino bote, ojiŋo cwinye i nyiŋ Lubaŋa kun waco bote ni, “Pe ilwor, pien ciŋ wora pe bipoto i komi. Ibibedo kabaka ma loyo Icrael, an abibedo lalub kori. Wora Caulo bene ŋeyo kumeno.” Ci gin aryo ducu geketo gicikkegi i nyim Rwot. Lacen Daudi odoŋ i Korec, ci Yonacan odok paco. Jo Jip gucito bot Caulo i Gibea, guwaco bote ni, “Daudi tye i kakannene i kinwa, i Kortec, i kom got Kakila ma i Jecimon yo tuŋ acuc. In kabaka bin doŋ, kit macalo cwinyi mito bino-ni, ci wan aye wabimiye i ciŋi.” Caulo ogamo ni, “Rwot aye omiwu gun pien kica omakowu i koma. Wun wucit ka penyo kakare maber wek wuŋe kabedo ma en bedo iye, ki ŋat munene kunne; pien gitta ni en kwiri mada. Koŋ wucinen, wuŋi kabedo ducu ma en maro kanne iye, wek wudwog ma donŋ wuniaŋ atir. Ka doŋ abicito kunnu kacel kwedwu. Tekke en tye i lobo man ka mo, ci abiyenye ki i kin kaka ducu ma gitye i Juda.” Ci gua gukwoŋo nyim Caulo gucito i Jip. I kare-nu onoŋo Daudi ki jone gitye i Maon, i Araba cok ki Jecimon, yo tuŋ acuc. Caulo ocito kacel ki jone ka yenye, ento gitito bot Daudi, omiyo ocito obedo i luŋ matut i kin godi ma i tim Maon. Ka Caulo owinyo pire, ci olubo kor Daudi wa kunnu. Caulo woto rabo ŋet luŋ tuŋcel kun Daudi ki jone onoŋo girabo ŋet luŋ tuŋcel. Daudi orune me a woko ki ka ŋet Caulo, pien onoŋo jo pa Caulo ginyiko cok ki Daudi ki jone wek gimakgi woko. Ci lakwena mo dok obino bot Caulo ma wacci, “Rune ibin oyoto, pien jo Piliciti gubino ka monyo lobo.” Caulo oa woko ki ka lubo kor Daudi, ociko ka lweny ki jo Piliciti; mumiyo gicato nyiŋ kabedo-nu ni, Got me Pokke. Daudi oa ki kunnu, ocito obedo i En-gedi i kakannene. Ka Caulo odwogo ki ka lubo kor jo Piliciti, ci gitito bote ni, “Daudi tye i tim En-gedi.” Caulo ocoko dano alip adek ma giyerogi ki i kin jo Icraelducu, ci ocito kwedgi ka yenyo Daudi i nyim godi Ladyel-tim. Ocito ka ma dwol romi tye tye i ŋet yo, ka ma boro bene tye iye; ci Caulo oŋak woko i boro ka konnye. Onoŋo Daudi ki jone bene gitye i boro meno, wa i tyelone. Jo pa Daudi guwacce ni, “Tin aye nino ma yam Rwot owacci pire ni, ‘Nen abimiyo lamerokki i ciŋi, in doŋ ibitime kit ma imito.’ ” Daudi oa malo okwalle, ci oŋolo dog boŋo jor pa Caulo. Lacen cwiny Daudi opoto, pien oniaŋ ni etimo bal. Ci owaco bot jone ni, “Lubaŋa okwero ni pe atim kit gin macalo man i kom rwoda ma en dano ma Rwot owiro; pe myero aket ciŋa i kome, pien Rwot doŋ owire woko.” Daudi ojuko jone ki lok meno, ci pe oye ni gulweny i kom Caulo. Caulo oa molo, oa woko ki i boro got, omedde ki wotte. Lacen Daudi bene oa malo, ocito i dog boro, olwoŋo Caulo kun wacci, “Rwoda ki kabakana!” Ka Caulo oneno ŋeye, ci Daudi okulo wiye piny i ŋom, omiye woro. Daudi owaco bot Caulo ni, “Laditta, piŋo ibedo ka winyo lok pa jo ma ŋiwaco ni atye ka yenyi wek atimi rac? Nen, ka tin Rwot omiyi i ciŋa i boro man, kun onoŋo jo mukene guwaco bota ni aneki woko. Ento an aye aweki omiyo ibwot. Awacci pe atwero keto ciŋa i komi, rwoda, pien in dano ma Rwot owiro. Doŋ inen, wora, nen dog jorri i ciŋa en. Nen, aŋolo dog jorri ci pe aneki. Myero doŋ iŋe dok inen atir ni, pe atye ki gin mo marac nyo roro mo i cwinya. Pe atimo bal mo i komi, kadi ka itye ka yenya ma imito neka woko. Ber Rwot aye oŋol kop i kin an ki in, ber Rwot aye ocul kworra i komi; ento ciŋa pe bigudo komi. Kit ma carolok pa ludoŋo wacci, ‘Bal nywalo bal wadi;’ ento pe abiketo can i komi. In kabaka pa Icrael kulu ibino ka lubo kor aŋa? Ilubo kor gwok muto, kor ladep mamwa-ni! Peinno Rwot aye doŋ obed laŋolkop en oŋol i kin an ki in, onen kite, dok opid ma kakara, wek olara ki i ciŋi.” Ka Daudi otyeko waco lok meno ducu bot Caulo. Caulo openyo ni, “Meno dwani bo, Daudi, latinna?” Ci ocako koko kun waco bot Daudi ni, “In cwinyi leŋ kato cwinya woko, pien itima maber kun an atimi marac. Tin doŋ inyuto woko ka maleŋ kit ma itima kwede maber, en aye omiyo pe ineka i kare ma Rwot omiya woko i ciŋi. Ada, ka dano mo onoŋo kom lamerokke owee, ci biweko bwot ma pe opoto i kome? Myero Rwot omini mot maber, kit macalo tin itimo kwede i koma-ni. Tin doŋ aŋeyo ada ni, in ibibedo kabaka, dok ker me Icrael bimoko matek i ciŋi. Doŋ ikwonna kwoŋ ki nyiŋ Rwot ni, pe ibijwero likwayo ma gilubo ŋeya woko, dok pe ibijwayo nyiŋa woko ki i doggola pa kwara.” Daudi okwoŋo kwoŋ kit ma Caulo omito-ni, Lacen Caulo odok paco, ento Daudi ki jone gudok i kakannegi. Ka Camuel oto, ci jo Icrael ducu gucokke, gukumo pire, ci giyike i gaŋŋe ma i Rama. Lacen Daudi dok oa ocito i tim Paran. Laco mo onoŋo tye kunnu i Maon, ma tiyo ticce i Karmel. Lacone lalonyo mada; tye ki romi alip adek ki dyegi alip acel. I kare ca en obedo ka ŋolo yer romine i Karmel. Nyiŋ laconu Nabal, ki nyiŋ dakone Abigail. En dako ma ŋeyo piny mada, dok mwonya bene, ento cware aye lakolo dok ger. Doggolane jo Kaleb. Ka Daudi owinyo ki i tim ni Nabal tye ka ŋolo yer romine, ci ocwalo awobe apar bote. Ocikogi ni, “Wucit i Karmel bot Nabal, wucwal motta bote, wuwac bote ni, ‘Daudi omoti, owacci, kuc obed i komi, omera, ki i kom jo me odi, ki jo ducu ma gitye boti. Awinyo ni it ye ka ŋolo yer romini. I kare ducu ma lukwatti gubedo i Karmel wabedo kacel kwedgi. Pe watimogi marac, dok bene gin mo pe oloyogi. Peny awobeni, ci gibititti. Pienno wek awobena gunoŋ gum boti tin, pien gubino i nino me camo karama, Alegi imi botgi gin ma itwero noŋo pigi ki pira, an wodi Daudi.’ ” Ka awobe pa Daudi guo kunnu, guwaco lok meno ducu bot Nabal ma ka-ka Daudi; ci gubedo ka kurone. Nabal odok iye bot lutic pa Daudi ni, “Daudi en aŋa? Aŋa ma wod pa Yece-ni? I kare man tye lwak lutic mapol ma gutenyo luditogi. Ci an dok akwany mugatina ki piina, ki riŋo ma aneko pi luŋol yer romina, ami bot dano mo ata ma gua ka ma pe aneyoni?” Pi lok meno awobe pa Daudi gulokke gudok woko cen ci gutito lok man ducu bote, Daudi owaco bot jone ni, “Dano acel acel otwe pala lucwanne!” Ci dano acel acel otweyo pala lucwanne ki Daudi bene otweyo mere. Jo miya aŋwen gucito i kor Daudi, kun jo miya aryo gudoŋ ka kuro jami. Ento awobi mo acel otito bot Abigail dako pa Nabal ni, “Nen, Daudi ocwalo lukweria ki i tim gubino ka moto laditwa; ci en otugge i komgi magwa, kun kono jo-nu giber i komwa, pe wabedo ki can mo, ki gin mo pe orem botwa i kare ma watye i bar kwat, i kare ducu ma wawoto kacel kwedgi, Gin aye gubedo celwa dyewor ki dyeceŋ bene i kare ducu ma wabedo ka kwayo romi. Ber in aye iŋe lok-ki, wek inen gin ma myero itim, pien can bipoto i kom laditwa ki i kom jo me ode ducu; en tye ki gero keken, ma dano mo pe twero lok kwede.” Abigail oa malo liwic, okwanyo mugati miya aryo, opiru kono vino aryo, riŋo romi abic ma gitedo, nyig bel ma gicelo aduku abic, tuga olok mutwone miya acel ki poki otini miya aryo, ci oketogi i wi kana wek gutiŋ. Owaco bot awobene ni, “Wucit wutel nyima, abibino alubo korwu.” Ento pe otito lokke bot cware Nabal, Oito i wi kana, ocako wot, ci olor piny ka ma got ocego iye piny. Ci nen, Daudi ki lwakke bene gitye ka lor piny gikemo en, ci en oromo kwedgi. Onoŋo Daudi owacci, “Kara ada abedo ka gwoko lim pa laco-ni i tim noŋo, ma kun jamine mo pe orwenyo i kom wadigi. En otima marac kun an atime maber. Lubaŋa myero oket can i koma kit meno ki makato bene, ka ce diki odiko aweko laco acel mo obwot ki i kom jo ma en tye kwedgi-ni.” Ka Abigail oneno Daudi, ci orune, olor woko piny ki i wi kanane, opoto i ŋom aryeba ic i nyim Daudi, okulo wiye piny. Oryebbe piny ka tyene kun wacci, “Wek bal obed i koma keken Laditta. Alegi ni wek koŋ alok kwedi mot, laditta, iwiny lokka, Pe ibed ka tamo lok pa Nabal ma lagikome-ni, pien kit ma nyiŋe tye kwede, kite bene tye kit meno, Nabal aye nyiŋe, miŋo bene oniaŋ woko i kome. An onoŋo pe aŋeyo, ladit, pe aneno kom awobe ma icwalogi. Kombeddi, laditta, macalo Rwot tye makwo-ni, ki tipo komi bene tye makwo-ni, doŋ inen ba, Rwot otyeko juki woko ni pe icitiŋ alii me remo kun iculo kwor ki ciŋi kikome. Wek lumerokki ki jo ma gimito timi marac gubed macalo laditta Nabal. Doŋ igam mot ma luticca gukelo boti, rwoda, wek gimi bot awobe ma gilubo kori. Tima kica pi balla, ladit; pien Rwot bimiyo odi cuŋ matek, pien it ye ka lwenyo pi Rwot, bal mo pe gibinoŋo i komi i kare me kwoni ducu. Kadi jo mapol gubin ka lubo kori kun gimito neki woko, gibinoŋo kwoni giboyo kome woko i kin boc pa jo makwo ma Rwot Lubaŋani aye gwokogi. En bibayo kwo pa lumerokki wo ko macalo labaa latandiyo. I kare ma Rwot doŋ otiyo i komi gin ducu maber ma oloko i komi-ni, laditta, ma doŋ oket i me bedo laker ma loyo jo Icrael, ci doŋ pe ibibedo ki gin mo ma miyo ikumo, kadi tam marac mo ma obino pien yam ioyo remo noŋo, nyo iculo kworri in kikomi. I kare ma Rwot bitimi ber, ci ipo pira, ladit.” Daudi owaco bot Abigail ni, “Gipwo Rwot Lubaŋa pa Icrael, ma tin ocwali ka rwatte kweda-ni! Gipwoyi mulii, gum obed i komi, pi ryekoni maber, mumiyo ijuka tin, omiyo pe atiŋo alii me oyo remo, ki pi culo kworra kekena ki ciŋa kikome! Ada, kit ma Rwot Lubaŋa pa Icrael tye makwo-ni, en doŋ ojuka, pe atimi marac. Kono in pe irune ibino irwatte kweda, me adane kono tin laco mo acel pe obwot ki bot Nabal.” Daudi ogamo gin ma Abigail okelo, ci owaco bote ni, “Cit giri ki kuc idok i odi. Atyeko winyo dogi, dok ajolo legani.” Abigail ka odwogo bot Nabal, onoŋo tye ka camo karamane i ode, ma rom ki karama pa kabaka kulu. Cwinye obedo yom matek pien onoŋo omer woko twatwal, omiyo Abigail pe otito lok mo bote nio ka piny oru. Odiko ka koŋo vino doŋ owarre woko ki i waŋe, en otito lok ducu bote. Kom Nabal oto woko lirut, kome ojiŋ woko matek calo got. Ka nino okato apar, ci Rwot ogoyo Nabal oto woko. Ka Daudi owinyo ni Nabal doŋ oto woko, ci owacci, “Gipwo Rwot ma oculo kworra pi anywar ma yam alimo ki bot Nabal, dok ojuka pe atimo bal mo. Rwot odwoko bal pa Nabal i wiye gire!” Ci Daudi ocwalo kwena me cako cunane i kom Abigail wek obed dakone, Ka lutic pa Daudi guo bot Abigail i Karmel, ci guwaco bote ni, “Daudi ocwalowa boti ni wacit kwedi wek icibed dakone.” Abigail oa malo ci oryebbe piny i ŋom, owacci, “Nen, an aŋecane me Lwoko tyen luticce.” Orune oito i wi kanane, ocako wot i kor lukwena pa Daudi kacel ki anyirane abic ma konye, ci odoko dakone. Onoŋo Daudi onyomo Akinoam me Jejreel bene, ci gin aryo ducu gubedo monne. Ento onoŋo Caulo otyeko kwanyo nyare Mikal ma dako pa Daudi, omiyo bot Palti wod pa Laic ma bedo i Gallim. Jo Jip dok gubino bot Caulo i Gibea, guwaco bo te ni, “Daudi tye okanne i wi got Kakila i Jecimon yo tuŋ wokceŋ.” Caulo oa ocito i tim Jip ki jo Icrael ma giyerogi ma romo alip adek; gucito ka yenyo Daudi i tim Jip. Caulo ogony i wi got Kakila ma tye i ŋet gudo i Jecimon yo tuŋ wokceŋ; ento onoŋo Daudi tye mere i tim. Ka oneno Caulo olubo kore wa i tim, ocwalo lurot-piny kunnu, ci gumoko atir ni Caulo obino ada. Daudi oa obino i kabedo ka ma Caulo ogony iye, oneno kabedo ma Caulo obuto iye kacel ki Abneri wod pa Ner ma ladit ma loyo monnye. Caulo onoŋo obuto i kabedo ma gigeŋo ŋete, kun mony ogure dyere. Ci Daudi owaco bot Akimelek ma Lakit, ki Abicai ma omin Joab wod pa Jeruya ni, “Aŋa ma bicito kacel kweda i gony bot Caulo?” Abicai ogamo ni; “An aye abicito kacel kwedi.” Daudi ki Abicai gucito i gony pa Caulo i nino meno, Caulo onoŋo obuto i kabedo ma gigeŋo ŋete, ki toŋŋe ocuŋ ka ŋete ma giguro i nom. Abneri ki lumony gubuto gugu re dyere. Abicai owaco bot Daudi ni, “Tin Lubaŋa omiyo lamerokki i ciŋi, Wek doŋ aneke woko kombeddi kun aguro woko ki toŋ pil wa i nom kicel keken; pe abicobo kiryo.” Ento Daudi owaco bot Abicai ni, “Wek nekone obedi. Aŋa ma twero keto ciŋe i kom dano ma Rwot owiro ci pe bitiŋo alii?” Dok owacci, “Kit macalo Rwot tye makwo-ni, Rwot aye bipwode gire; nyo ka nino me tone biromo, nyo bicito i mony ka mo, ci to ki kunnu. Rwot pe ye ni aket ciŋa i kom dano ma en owiro. Ento ber waput toŋŋe ma tye ka wiye-ni, ki opoko piine, wek wacit woko.” Kit meno Daudi ocako puto toŋ pa Caulo, ka otino opoko piine ma onoŋo tye ka wiye, ci gucito woko. Dano mo pe onenogi nyo oneyo gin mutimme, ŋatti mo bene pe oco ki i waŋ nino; pien gin ducu gunino woko ki nino mapek mua ki bot Rwot, opoto i komgi ducu. Daudi obaro dye nota, okato tuŋcel, ci ocuŋ ki ka mabor i wi got, ma kingi lac. Ci Daudi ocako lwoŋo mony pa Caulo ki Abneri wod pa Ner kun waco ni, “Abneri, pe igamo doga ce?” Abneri ogamo ni, “In aŋa ma ilwoŋo kabaka-ni?” Daudi owaco bot Abner ni, “Pe in laco ce? Aŋa ma rom kwedi i Icrael? Ci piŋo pe ibedo ka gwoko laditti ma kabaka-ni? Pien dano mo obino wa botwu ka neko rwodi woko ki i kinwu, Gin ma itimoni pe ber wacel. Macalo Rwot tye makwo-ni, myero gineki woko, pien pe ibedo ka gwoko laditti, ma en aye dano ma Rwot owiro. Kombeddi doŋ inen ka ma toŋ pa kabaka tye iye, ki opoko piine ma onoŋo tye ka wiye-ni!” Caulo oneyo dwan Daudi woko ci owacci, “Man aye dwani, Daudi, latinna?” Daudi ogamo ni, “En aye dwana, laditta, kabaka.” Daudi dok owacci; “Piŋo ibedo ka lubo kora, laditta? An mono atimo gin aŋo? Atiŋo kit alii aŋo? Kombeddi doŋ iwiny lokka, laditta kabaka. Ka ce Rwot aye opiyo in i koma, ci wek en ogam gityer, ento ka dano aye gupiyo in, ci wek gicengi woko ki i nyim Rwot, pien gutyeko ryema woko wek pe anywak bedo kwedgi i lobo ma Rwot omiyo botwa me aleya-ni, kun giwacci, ‘Cit woko icitii ki lubaŋa mukene-gu.’ Kombeddi pe iwek remona ocwer i ŋom i lobo pa lurok ka mabor ki i nyim Rwot; pien kabaka me Icrael obino ka lubo kora kun mito neka woko, macalo dano ma dwaro anyeri i kin godi.” Caulo dok ogamo ni, “Atimo rac, Doŋ idwog cen, Daudi, latinna, pe doŋ abitimi rac matwal, pien kwona tin obedo me wel i nyimi. Nen, abedo ka nyuto minona, omiyo aŋak ka mabor twatwal.” Daudi ogamo ni, “Tonni doŋ ennu, kabaka! Wek ŋat acel ki i kin awobe obin kany ka omone. Rwot culo dano ki acel acel kit ma cwinye atir kwede ki ma lubo kit genne; pien tin doŋ Rwot omiyi i ciŋa, ci an pe atiŋo ciŋa aketo i komi pien in dano ma Rwot owiro, Kit macalo tin kwoni obedo me wel i nyima-ni, kit meno kwona bene myero obed me wel i nyim Rwot, dok myero en aye olara i aromana ducu.” Caulo dok ogamo dog Daudi ni, “Gum obed i komi, Daudi, latinna! Ibitiyo gin mapol, dok ibiloyogi ducu maber.” Ci Daudi ocito gire, ki Caulo bene odok i kabedone, Daudi olwodo lok ki i cwinye ni, “An ba, olo Caulo biketo ciŋe i koma i nino mo keken ci neka woko cut, Pienno yo mu kene pe, myero alwi ariŋ acit woko wa i lobo pa jo Piliciti; ci cwiny Caulo bia woko i koma, pe doŋ biyenya ki i waŋ lobo pa jo Icrael, miyo abilaro kwona ki i cine.” Daudi ocako a woko ki kunnu, en ki jone miya abicel ma onoŋo gitye bote, ci gucito bot Akic wod pa Maok, kabaka me Gat. Daudi obedo ki Akic i Gat, en ki lwakke ducu, kun dano acel acel ocito ki jo me ode. Daudi onoŋo otero monne aryo, Akinoam me Jejreel ki Abigail me Karmel, ma yam obedo dako pa Lyel Nabal. Ka gitito bot Caulo ni Daudi doŋ oriŋo woko wa i Gat, ci pe dok obedo ka yenyo kore matwal. Daudi dok owaco bot Akic ni, “Ka bedona boti oyomo cwinyi, ci gimiya kabedo mo ma i kin gaŋi ma i lobo-ni wek abed iye kunnu, Piŋo an laticci abedo kwedi kacel i gaŋ kaili?” Akic omiye Jiklag, mumiyo Jiklag odoko gaŋ pa luker me Juda nio wa onyoo. Kare ma Daudi obedo kwede i lobo pa jo Piliciti oromo mwaka acel ki dwe aŋwen, I kare-nu Daudi ki, jone gubedo ka monyo mony i kom jo Gecur, jo Girij ki jo Amalek ma gin aye wegi lobo kunnu cakke wa con, guo kwede i Cur wa ki i Ejipt, Ka Daudi omonyo lobo-nu, pe oweko laco mo kadi dako mo odoŋ makwo; oyako romi, dyaŋi, kana, kinaga wa ki boŋŋi ka odwogo kwede bot Akic. Ka Akic openye ni, “Tin icito ka monyo jo mene?” Daudi ogamo ni, “Amonyo lobo Negeb ma tye i lobo Juda,” nyo ni, “Alwenyo i kom Negeb pa jo Jeramel,” nyo ni, “Amonyo Negeb pa jo Keni.” Daudi pe oweko laco mo nyo dako mo obwot makwo, pien onoŋo olworo ni, “Miyo gibitito lok ma i komwa, ni, ‘Daudi otimo gin munyo.’’’ Meno aye obedo kite i kare ma obedo kwede i lobo pa jo Piliciti. Akic obedo ka geno Daudi kun tamo ni, “Jo tugi doŋ gidage matek twatwal, pienno en doŋ bibedo laticca matwal.” I kare meno jo Piliciti guoto monygi pi lweny i kom jo Icrael. Akic owaco bot Daudi ni, “Ber iŋe ni in ki joni wubicito ka mony kacel kwedwa.” Daudi ogamo dog Akic ni, “Ber matek, laditta, doŋ ibiŋeyo gin ma atwero tiyone.” Akic dok owaco bot Daudi ni, “Abiketi ibedo lagwok kwona matwal.” I kare meno onoŋo Camuel doŋ oto woko. Jo Icrael ducu gukumo pire ci guyike i Rama i gaŋŋe kikome. Caulo yam koŋ onoŋo oryemo lukor tipo ki megi jogi woko ki i lobone. Jo Piliciti gucokke ci gutoŋo gonygi i Cunem, Caulo bene ocoko jo Icrael ducu ci gin gutoŋo gonygi i Gilboa. Ka Caulo oneno mony pa jo Piliciti, ci obedo ki lworo, cwinye ocako myel matek. Ka Caulo openyo dog Rwot, Rwot pe odokke iye lok mo, kadi wa, ki lek-gu, nyo ki Urim, nyo ki lok pa lunebi. Ci Caulo owaco bot luricce ni, “Koŋ wuyennnya dako mo ma lakor tipo, wek acit bote, acipeny doge.” Luticce guwacce ni, “Lakor tipo tye wa i En-dor.” Caulo oloko kite woko mapat, pien oruko ginaruka mapat, ci ocako wot ki jone aryo, Gucito guo bot dakonu dyewor. Caulo owaco bote ni, “Ber ikorra tipo, Mi jokki okella dano mo ma abituco nyiŋe boti.’ Dako-nu ogamo doge ni, “Iŋeyo gin ma Caulo otiyo, kit ma oryemo kwede lukor tipo ki megi jogi-gu woko ki i lobone, Ci piŋo in dok ibino ka cika ki owic lamak kwona wek ineka woko?” Ento Caulo okwoŋo kwoŋ bo te ki nyir; Rwot kun wacci, “Macalo Rwot tye makwo-ni, pe can mo bipoto i komi pi lok man,” Ci dako-nu ogamo ni, “Abikelo aŋa boti?” Caulo ogamo ni, “Kella Camuel.” Ka dako-nu oneno: kom Camuel, ci odaŋŋe ki dwan matek, owaco bot Caulo ni, “Ibwola piŋo? In i Caulo kikome.” Kabaka owaco bot dako ni, “Pe ibed ki lworo, Ineno kom aŋo kaa?” Dako ogamo ni, “Aneno tipo mo obebino kun katti a ki piny i ŋom.” Caulo dok openyo ni, “Kite nen niŋniŋ mono?” Ogamo ni, “Dano ma oti aye obebino-ni; oumo kome woko ki jor.” Ci Caulo oniaŋ ni en aye Camuel kikome, okulo wiye piny oryebbe i nyime. Camuel ocako lok ki Caulo ni, “Piŋo iyela kit man, idwoka dok woko?” Caulo ogamo ni, “Can aye tye odiŋa matek; pien jo Piliciti gitye ka lweny i koma, Lubaŋa bene otenya woko ata, Pe doŋ dokka iye kit lok mo, kadi wa lok pa lunebi, kadi wa lek-gu doŋ pe. En aye omiyo alwoŋi wek ititta gin ma myero atim.” Camuel ogamo ni, “Piŋo dok ipenyo an ma Rwot doŋ oweki woko-ni, odoko lamerokki? Rwot doŋ otimo i komi kit ma yam ocika kwede ci an bene atito lokke boti wa con ca, Rwot doŋ oyeco kerri woko okwanyo ki i ciŋi, ci doŋ otyeko miyone woko bot lawoti, en aye Daudi. In yam pe iworo dog Rwot, pe icobo kiniga magwa pa Rwot i kom jo Amalek; en gin mumivo Rwot tye ka timi kit man i kare-ni. Rwot bimiyo jo Icrael ki-in bene i ciŋ jo Piliciti; di ki in ki awobeni wubibedo kacel kweda. Rwot bimiyo mony pa jo Icrael i ciŋ jo Piliciti.” Caulo otugi poto woko piny i ŋom, ci obuto piny Iibat pi lworo ma omake matek pi lok pa Camuel. Tipo kome oto woko lirut, pien onoŋo pe ocamo cam mo i dyeceŋ ki dyewor meno ducu. Dako-nu ocito bot Caulo cok, oneno kome doŋ obaŋŋe woko, ci owaco bote ni, “Nen ba ladit, an doŋ awinyo dogi, adyero pi kwona woko pi timo gin ma iwacca. In bene, ladit, doŋ iwiny doga. Wek koŋ aket latin cam mo i nyimi icam, ka wek dok ilim kero pi wotwu.” En okwero woko kun wacci, “Pe abicam.” Ento luticce gubako doggi bote kacel ki dako-nu, ci owinyo lokgi, ocako a malo ki i ŋom obedo i wi kitanda, Dako-nu onoŋo tye ki latin roya mo ma ocwe i ode. Ocako nekone woko oyotoyot, ka ojobo moko kwon, onywaŋo, otedo mugati ma tobi pe iye. Oketo i nyim Caulo ki luticce ci gucamo, ka gua woko i dyewor meno gucito. Jo Piliciti gucoko monygi ducu i Apek; ki jo Icrael gutoŋo gonygi i ŋet waŋ it ma tye i Jejreel. Rwodi pa jo Piliciti gumol gukato ki jogi miya miya ki alip alip, ki Daudi ki jone bene gumol gukato lacen kacel ki Akic. Ludito mony pa jo Piliciti gupenyo ni, “Jo Ibru gitimo gin aŋo kany?” Akic ogamo doggi kun wacci, “Man aye Daudi ma yam latic pa Caulo kabaka me Icrael. Otyeko doŋ bedo kweda pi kare malac mada. Cakke ki i nino ma olaro bota o kwede wa onyoo peya anoŋo roc mo i kome.” Ento ludito mony pa jo Piliciti gubedo ki kiniga i kom Akic; guwacce ni, “Cwal laco meno odok paco. Myero odok cen i kabedo ma yam imiyo bote, En pe bicito kwedwa i mony, miyo en bilokke doko lamerokwa ki kunnu, Ka nyer-ri mito dok ribbe ki laditte bitimo aŋo? Pe neko jowa, coko wigi tero bo te? Man aye Daudi kikome, ma yam giwere kun mon gimyelo kwede ma giwero ni, ‘Caulo oneko mere dano alip, ento Daudi oneko alip apar.’ ” Akic olwoŋo Daudi, owaco bote ni, “Macalo Rwot tye makwo-ni in ibedo dano ma ageno. An aneno ni ber iwot kacel kwedwa i mony, pien pe anoŋo gin mo marac i komi cakke ki i nino ma ibino iye bota o wa onyoo. Ento pe cwiny rwodi oniaŋ i komi. Pienno ber itugi dok cen cut. Dok cen ki kuc keken, wek pe imi cwiny rwodi pa Lupiliciti obed ka cwer.” Daudi owaco bot Akic ni, “Ento an atimo gin aŋo? Gin aŋo ma inoŋo i koma laditta, cakke wa i nino ma adonyo kwede i dog ticci nio koni, ma miyo pe acito ka lweny ki lumerokki, rwoda kabaka?” Akic dok omedo dok iye ki Daudi ni, “Aŋeyo maber ni bal mo pe i komi; ki i nyima in icalo lamalaika pa Lubaŋa, Ento ludito monywa gutyeko waco ni, in pe ibicito kwedwa i mony, Kombeddi doŋ itugi a ki odiko-ni, kacel ki joni ma iloyogi ma gubino kwedi. Cak wot ki odiko-ni, a woko ki kany oyotoyot tekke piny leŋ ma romo wot.” Daudi ocako a woko odiko con ki jone, ci odok i lobo pa jo Piliciti. Ento jo Piliciti gucito i Jejreel. Daudi ki jone guo i Jiklag i nino me adekke, ci gunoŋo jo Amalek gumonyo Negeb ki Jiklag. Guloyo Jiklag woko, guwaŋo woko ki mac, dok guyako mon ducu ki jami ducu ma tye kunnu, wa dano ducu matino ki madito. Pe guneko dano mo, ento guterogi makwo, gucito kwedgi woko. Ka Daudi ki jone guo i gaŋ ci gunoŋo tye ka waŋ awaŋa, dok mongi ki awobegi ki anyiragi ducu giterogi woko, gucako wo ki koko, nio ka tek me koko otum woko. Mon pa Daudi aryo-nu bene giterogi woko, Akinoam me Jejreel ki Abigail me Karmel, dako pa Lyel Nabal. Piny oloyo Daudi woko matek, pien jone bene gubedo ka lok pi cele woko ki got, pien cwinygi ducu obedo kec matek kun dano acel acel tamo pi awo bene ki anyirane. Ento Daudi olimo tekcwiny ki bot Rwot Lubaŋane. Daudi owaco bot ajwaka Abiatar wod pa Akimelek ni, “Kella epod.” Ci okelo bot Daudi. Daudi openyo dog Rwot ni, “Aryem kor mony man? Abimakogi woko iyo?” Rwot odokke iye ni, “Ryem korgi, pien ibimakogi woko i yo ada, dok ibilaro jowu.” Daudi ocako wot ki jone miya abicel-li kacel kwede. Ka guo i kulu Becor, ci jo ma doŋ guol ma pe gitwero ŋolo kulu gudoŋ kenyo, gubedo iye. Ento Daudi omedde ka ryemo kor jo Amalek ki jone miya aŋwen kacel kwede, kun jo miya aryo ma komgi oloc, ma ŋolo kulu oloyogi gudoŋ cen. Gunoŋo Laejipt mo i dye bar ci gukele bot Daudi, Gucako mine mugati ocamo, ka gimiye pii amata omato, dok gimiye nucu poki oduro mutwone ki tuga olok aryo mutwone. Ka doŋ otyeko cam ci cwinye odwogo; pien onoŋo pe ocamo cam mo kadi wa pii bene pe omato pi nino adek dyeceŋ ki dyewor, Lacen Daudi ocako penye ni, “In kono i dano pa aŋa? la ki kwene?” En ogamo ni, “An wod jo Ejipt, latic pa La-amalek mo. Laditta otenya woko ata, pien onoŋo two aye omaka, ma ari kwede nino adek mukato-ni. Wan wamonyo Negeb pa jo Keret, ki pa jo Juda, ki Negeb pa jo Kaleb, ka dok wawaŋo Jiklag woko.” Daudi openye ni, “In ibitera bot mony meno?” Awobi-nu ogamo ni, “Kwoŋŋa kwoŋ ki nyiŋ Lubaŋa kun iwaco ni pe ibineka, dok pe ibidwoka i ciŋ laditta, ci abiteri bot monygi.” Otero Daudi kunnu, ci ononogi guket woko ata i kabedo meno ducu kun gicamo, gimatte ki myel-gu, ma cwinygi yom pi lwak jami ma giyako madwoŋ ki i lobo pa jo Pilciti ki i lobo Juda. Daudi opoto i komgi kwarpiny, olwenyo kwedgi nio wa otyeno. Dano mo i komgi pe obwot makwo, kono nyo awobe miya aŋwen ma guito wi kinagani, guriŋo kwede woko. Daudi oyako gin ducu ma jo Amalek onoŋo guyako, olaro bene monne aryo ducu. Gin mo pe orwenyo kadi wa gin matidi nyo maditte; awobe ducu wa anyira ducu ki jami ma giyako ducu, ki gin mo keken ma jo-nu gutero, Daudi odwokogi ducu cen. Omayo wa dyegi ki romi ki dyaŋi ducu, ci jone guleko lim meno ducu i nyimgi kun giwacci, “Man aye lim ma Daudi oyako.” Ka Daudi odwogo bot jo miya aryo-ni ma yam komgi oloc woko ma pe doŋ gitwero lubo kore, ma onoŋo giwekogi i dog kulu Becor-ni, ci jo-nu gukato ka jolo Daudi ki lwak ma gucito kwede-ni. Ka Daudi onyiko cok, en bene omotogi, Ci jo maraco ducu ki lutim aranyi ma i kin lwak ma gucito ki Daudi guwacci, “Jo-ni pe gucito kwedwa, pienno wan pe wabimiyogi gin mo i kom jami ma wayako wadwogo kwede-ni. Wek dano acel acel oter dakone ki litinone ci guciti.” Ento Daudi ogamo ni, “Pe wubitimo kit meno, utmegina, ki gin ma Rwot omiyo botwa. En aye obedo ka gwokowa, ci otiŋo mony ma gubino ka monyowa, omiyogi i ciŋwa. Aŋa ma twero ye lokwu i kom lok man? Kit ma gipoko ki jami bot dano ma ocito i mony-nyi, gibipoko bot dano mudoŋ ka gwoko jami bene kit meno, Gibipoko bot dano ducu ma rom.” Meno odoko cik matwal cakke i kare meno, ma jo Icrael gibedo ka lubo nio wa onyoo. Ka Daudi odwogo i Jiklag, ci ocwalo dul jami ma giyako-ni bot lureme ma gin ludoŋo pa jo Juda kun wacci, “Motwu ene ma wayako ki bot lumerok pa Rwot.” Ocwalo jami pi jo ma i Betel, ki i Ramot ma i Negeb, i Jatir, i Aroer, i Cipmot, i Ectemoa, ki i Rakal, bot jo ma bedo i gaŋi pa jo Jeramel ki pa jo Keni, bot jo ma i Korma, Boracan, Atak, Kebron ki i lwak kabedo ducu ma yam Daudi ki jone guwok ki iye. I kare meno jo Piliciti gulwenyo i kom Icrael. Jo Icrael guriŋo woko ki i nyim jo Piliciti, ci ginekogi i wi got Gilboa. Jo Piliciti guriŋo gudiŋo kor Caulo ki awobene, ci guneko Yonacan, Abinadab ki Malkicua, gin ducu awobe pa Caulo. Lweny ogeto matek i kor Caulo, ‘ci wegi atero gucele woko, guketo ret i kome marac mada. Caulo owaco bot latin jami lwennye ni, “Wot pala lucwanni woko, icoba kwede pil, wek jo ma pe giliro-ni, ma pe giŋeyo Lubaŋa, pe gubin i koma gucoba, mi yo giyarre i koma,” Ento latin jami lwennye pe oye, pien lworo omake matek, omiyo Caulo okwanyo pala lucwanne kikome opoto ogurre kwede kekene. Ka latin jami lweny oneno ni Caulo doŋ oto, en bene opoto ogurre kene ki pala lucwanne, onywako to kwede kacel. Kit meno Caulo ki awobene adek-ki, ki latin jami lwennye, ki lwakke ducu guto woko lawaŋacel i nino acel. Ka jo Icrael ma onoŋo gitye loka nota tuŋcel, ki jo mukene ma onoŋo gitye loka Jordan, guneno ni mony pa jo Icrael guriŋo woko, dok ni Caulo ki awobene ginekogi woko, ci guriŋo guweko gaŋigi woko; ci jo Piliciti gubino gucako bedo i gani-nu. Orwone jo Piliciti gupuk odiko ka lunyo boŋŋi ki i kom jo ma ginekogi, ci gunoŋo kom Caulo ki kom awobene adek-ki i kom got Gilboa. Guŋolo wi Caulo woko, ka gulunyo jami lwennye ki i kome, ci gucwalo kwena oromo i lobo pa jo Piliciti ducu, pi tero lok me yomcwiny bot jogigi ki bot lwakgi ducu. Guketo jami lweny pa Caulo i ot pa jokgi ma dako ma gilwoŋo ni Acitarot, ka dok guguro kome i kom cel murumo gaŋ me Bet-can. Ento ka jo ma gibedo i Jabec-gilead guwinyo gin ma jo Piliciti gutimo i kom Caulo, ci oteka lwenygi ducu gua, gucito guwoto dyewor benebene, gukwanyo kom Caulo ki kom awo bene woko, gugonyo woko ki i kom cel me Bet-can, guo kwedgi wa i Jabec, ci guwaŋo komgi woko kunnu, Lacen gukwanyo cogogi, guyiko i te yat anana ma tye i Jabec, ci guri kec pi nino abiro. ``Ka Caulo doŋ oto, ma Daudi bene odwogo ki ka neko jo Amalek, Daudi odikke nino aryo i Jiklag, I nino me adekke laco mo obino kun oa ki i gony pa Caulo, ma boŋone oyec woko, wi ye bene ojuko ki ŋom, Ka obino bot Daudi, ci oryebbe piny, owore. Daudi openye ni, “la ki kwene?” Ogamo ni, “An abwot ki i gony pa jo Icrael.” Daudi dok openye ni, “Ci doŋ kunnu tye niŋniŋ? Titta,” Ogamo ni, “Dano guriŋo woko ki i waŋ mony, ci gineko lwak jo mapol, giradogi woko piny; Caulo ki wode Y onacan bene guto,” Daudi dok openyo awobi ma otitte lok-ki ni, “In kono iŋeyo niŋniŋ ni Caulo ki wode Yonacan bene guto woko?” Awobi-nu ogamo ni, “Onoŋo atye kunnu i wi got Gilboa ci acob i kom Caulo ma ojeŋŋe ki toŋŋe, kun gadigadi lweny ki wegi aguragura bene gudiŋo kore, Ka obolo waŋe i ŋeye, onena, ci olwoŋa, An agamo ni, ‘An atye ene.’ Openya ni, ‘In aŋa?’ Agamo ni, ‘Anjo Amalek.’ Dok owacca ni, ‘cuŋ ka ŋeta, icuda woko, pien to doŋ waŋo koma, ento pud akwo.’ Ci acuŋ ka ŋete, acude woko, pien onoŋo doŋ aniaŋ ni pe doŋ twero bedo kwo ma doŋ opoto woko piny-nyi, Ci akwanyo lalukana ma onoŋo tye i wiye, ki ogul ma tye i ŋut ciŋe, doŋ akelogi boti, laditta, gin ene,” Daudi ocako mako boŋŋine kene, oyecogi woko pi cwercwiny ma omake, Jo ma gitye kwede bene gutimo kit meno. Gubedo ka kumo ki koko ki ri kec pi Caulo ki pi Yonacan, ki pi lwak pa Rwot ki pi jo me ot pa Icrael, gukok nio wa otyeno, pien gityekogi woko ki pala lucwan, Daudi dok owaco bot awobi ma otito lokke ni, “In mono ia ki kwene?” Ogamo ni, “An latin pa labedo mo ma jo Amalek,” Daudi owacce ni, “Piŋo pe koŋ ilworo tiŋo ciŋi pi neko dano ma Rwot owiro?” Daudi olwoŋo ŋat acel i kin awobe orobone, owacce ni, “Cit ipot i keme.” Ci oneko woko, Daudi owaco bot La-amalek ni, “Remoni aliine bedo i wii, pien dogi aye okelo lok i komi kun iwacci, ‘Aneko dano ma Rwot owiro-ni.’ ” Daudi okoko Caulo ki wode Yonacan ki wer man me koko, ci owacci, myero gipwony ki jo Juda. Lokke gicoyo i buk pa Jacar. Okoko ni, “Icrael do, deyoni gibalo woko i wi cere mutiŋŋe! Twoni oteka gupoto wokokuman! Pe itit pire i Gat, pe ituc pire i yo me Acikelon; miyo anyira pa jo Piliciti gium kwede, miyo anyira pa jo ma pe giŋeyo Lubaŋa giwakke, “Wun godi me Gilboa, toyo pe obed i komwu, kot pe doŋ myero ocwer i cerewu! Pien kwot pa otekawa olannye kunnu, kwot pa Caulo pe doŋ gijwayo ki moo, “Atum pa Yonacan pe yam dwogo paco ma pe ooyo remo pa dano; pala lucwan pa Caulo yam pe dwogo nono ma pe onywanne ki moo kom oteka. “Caulo ki Yonacan luyomewiny dano, jo ma gimaro! I kare me kwo ki i kare me to gin pe gupokke, Gin ludwiro makato ocur, gubedo lutekkom makato labwor, “Wun anyira me Icrael, wukok Caulo, ma yam rukowu ki boŋo makwar, ma dero ginarukawu ki jabu. “Twoni oteka gupoto woko kuman ki i dye mony! “Yonacan gineko opoto piny i WI cere mutiŋŋe, Omera Yonacan, piny orem kweda woko i komi do! Mar meri i koma yam obedo me aura, kato mar pa dako woko. “Twoni oteka guto woko kuman! Jami lwenygi gitenyo woko ata.” Lacen Daudi openyo dog Rwot ni, “An doŋ acit abed i gaŋ mo ma i Juda?” Ci Rwot ogamo ni, “Citi,” Daudi dok openyo ni, “Abicito i gaŋ mene?” Rwot owacce ni, “I Kebron.” Ci Daudi ocito i Kebron, ki monne aryo bene, Akinoam me Jejreel ki Abigail ma yam dako pa lyel Nabal me Karmel. Otero benejone ma yam gitye kwede, kun tero dano acel acel ki jo ma i ode ducu; ci gubedo i gaŋ me Kebron. Ci jo Juda gucito kunnu, guwiro Daudi me bedo kabakagi ma loyo jo me ot pa Juda. Ka gitito bot Daudi ni, “Jo me Jabec-gilead aye guyiko kom Caulo,” ci Daudi ocwalo lukwena bot jo me Jabec-gilead, owaco botgi ni, “Rwot omi gumme opot i komwu, pien wunyuto mar madwoŋ i kom laditwu Caulo, pi yiko kome. Kombeddi Rwot doŋ onyut botwu mar mere ma pe lokke, ma genne! An bene abitimowu maber pi kit tim man, Doŋ wuliŋ komwu, wubed oteka lweny, pien laditwu Caulo doŋ oto woko, ki jo Juda gutyeko wira me bedo kabakagi.” I kare meno Abneri wod pa Ner, ma lawimony pa Caulo, okwanyo Icbocet wod pa Caulo otero i Makanaim, ci okete me bedo kabaka ma loyo lobo Gilead, Acer, Jejreel, Epraim ki Benjamin wa lobo Icrael ducu, Icbocet wod pa Caulo onoŋo mwaka me ditte oromo pyeraŋwen ma en cako loyo jo Icrael, ci oloyogi pi mwaka aryo. Ento jo me ot pa Juda gubedo i te ker pa Daudi. Kare ma Daudi obedo kwede kabaka kun loyo ot pa Juda i Kebron oromo mwaka abiro ki dwe abice!. Abneri wod pa Ner ki lutic pa Icbocet wod pa Caulo gua ki i Makanaim gucito i Gibeon. Ki Joab wod pa Jeruya ki lutic pa Daudi gucito gurwatte kwedgi i kut me Gibeon, ci gubedo piny, kun ŋat acel bedo loka kut tuŋcel ki ŋat acel bene bedo loka kut tuŋcel. Abneri owaco bot Joab ni, “Wek koŋ litino orobo gua malo, gutuk i nyimwa.” Joab ogamo ni, “Wek gua malo do,” Ci gua gukato loka tuŋcel kun gikwano welgi, jo apar wiye aryo ma tuŋ bot Benjamin ki Icbocet wod pa Caulo, ki lutic pa Daudi bene apar wiye aryo. Ci ŋat acel acel ocako mako wi lakworre, ka cobo bute pil ki pala lucwan, ka gin ducu girwomo poto piny lawaŋacel; omiyo kabedo meno gilwoŋo ni Kelkatajurim, ma tye i Gibeon, Ci lweny obedo gwa matek i nino meno; lutic pa Daudi guloyo lwak pa Abneri ki jo Icrael woko. Awobe pa Jeruya adek ducu onoŋo gitye kunnu, Joab ki Abicai ki Acael. Onoŋo Acael dwir calo til ma i tim. En oryemo kor Abneri, kun riŋo ke mo en atir, pe lokke yo tuŋ acuc nyo yo tuŋ acam. Ka Abneri olokke oneno yo ŋeye, owacce ni, “Meno in Acael?” Ogamo ni, “Meno an yo,” Abneri ocike ni, “Lokke idok yo tuŋ acuc nyo yo tuŋ acam, wek imak latin orobo mo ci iyak jamine.” Ento Acael pe oye weko kore, Abneri dok onwoyo ci ko Acael ni, “Lokke idok ka mukene, pe ibed ka lubo kora, Lok aŋo ma mi yo acobo in areti woko piny-nyi? Ka aneki ci abitiŋo waŋa me neno waŋ omeru Joab niŋniŋ?” Ento Acael pe oye weko kore, omiyo Abneri ocobo iye ki dim toŋŋe, ci dim otuc wa i ŋeye pi!. Otugi poto kenyo, ci oto ki kenyo bene, Dano ducu ma guo i kabedo ka ma Acael oto iye-ni, gibino ci gicuŋ mot laliŋ. Ento Joab ki Abicai gubedo ka ryemo kor Abneri; guo wa i got Amma i kare ma ceŋ doŋ mito poto, Got meno onoŋo orine yo tuŋ Gia, i yo ma cito i tim me lobo Gibeon. Jo pa Benjamin gucokke kacel i kor Abneri, gudoko buca acel, ci gucuŋ i wi got kunnu. Abneri ocako lwoŋo Joab kun wacci, “Pala lucwan bibedo ka camo dano nakanaka ce? Pe iŋeyo ni agikkine bibedo rac mukato kare? Ibiryemo korwa pi kare ma rom mene ka wek doŋ ijuk lwak guwek ryemo kor omegigi?” Joab ogamo ni, “Macalo Lubaŋa tye makwo-ni, kono pe iwaco dogi, kono lwak guryemo kor omegigi nio kwede wa diki ada.” Ci Joab okuto tumme, ci lwak gucuŋ woko, pe dok gumedde ki lubo kor jo’ Icrael, kadi wa lweny bene doŋ ogik woko kumeno, Abneri ki jone gucako wot i dyewor meno guwoto dyewor benebene, kun giwok ki i Araba, ka guŋolo kwede kulu Jordan, guwoto nakanaka cakke odiko nio wa dyeceŋ guo kwede i Makanaim. Joab oweko lubo kor Abneri, odok woko cen. Ka ocoko lwak ogurogi kacel, ci ginoŋo lutic pa Daudi ma doŋ wangi orwenyo woko giromo apar wiye aŋwen, kacel ki Acael bene. Ento lutic pa Daudi onoŋo guneko jo Benjamin ma gin aye lwak pa Abneri ma romo dano miya adek ki pyerabicel. Joab ki jone gutiŋo kom Acael, guyiko i lyel pa wonne ma onoŋo tye i Beterekem, Ka gudwogo ki kunnu, guwoto dyewor benebene, nio ka piny oru botgi wa i Kebron. Lweny obedo i kin jo me ot pa Caulo ki lwak pa Daudi pi kare malac, kun ker pa Daudi doŋo medde ameda ki tek, ento ot pa Caulo jwik ajwika dok kwede piny kun goro bene,. Litino awobe pa Daudi ma onywalogi i Kebron gin ene: latin kayone aye Ammon, minne Akinoam me Jejreel; me aryone Kileab, minne Abigail dako pa lyel Nabal me Karmel; me adekke Abcalom, minne Maaka ma nya pa Talmai kabaka me Gecur; me aŋwenne Adoniya, minne Kagit; me abicce Cepatia, minne Abital; ki me abicelle Itream, minne Egla, ma dako pa Daudi. Gin ducu Daudi onywalogi i Kebron. I kare ma lweny tye i kin ot pa Caulo ki lwak pa Daudi, Abneri omedde odoko dano matek i kin jo me ot pa Caulo. Onoŋo Caulo yam obedo ki dako ma aŋecane ma nyiŋe Rijpa, nya pa Aiya, ci Icbocet ma wod pa Caulo-ni ocako kelo lok i kom Abneri ni obedo ki ci-wonne. Kiniga omako Abneri matek pi lok pa Icbocet, omiyo owacci, “An aye a gwok pa jo Juda bo? I kare man abedo ka nyuto mar madwoŋ i kom ot pa woru Caulo, ki i kom omegine ducu ki lureme ducu, pe ya am iyi i ciŋ Daudi bene ci tin doŋ icika pi balo wi dako man! Lubaŋa myero oket can i koma kit meno ki makato bene, ka ce pe acobo kwoŋ ma yam Rwot okwoŋo i kom Daudi, pi kwanyo ker woko ki i ot pa Caulo, ki pi moko ker pa Daudi wek olo Icrael ki Juda ducu, cakke wa ki i Dan nio kwede i Beer-ceba.” Icbocet pe dok ogamo dog Abneri ki lok mukene, pien obedo ka lwore, Abneri ocwalo lukwena bot Daudi i Kebron kun waco bote ni, “Lobo mono tye i ciŋ aŋa doki? Ket gicikke kweda, ci nen, ciŋa bidok yo tuŋ boti pi kelo lobo Icrael ducu boti.” Daudi ogamo ni, “Meno ber, abiketo gicikke kwedi; ento gin mukwoŋo ma amito ki tuŋ boti tye kit man; peya ibineno waŋa, nio waŋ ma ikelo Mikal nya pa Caulo, bota, ibino kwede ka ibino ka nena.” Daudi dok ocwalo lukwena bot Icbocet wod pa Caulo kun waco ni, “Miya dakona Mikal ma yam anyomo ki del kom nyim jo Piliciti me co miya acel.” Icbocet ocwalo dano okwanyo dako wo ko ki bot cware Paltiel wod pa Laic, Paltiel olubo kor dakone kun kok pire nio kwede wa i Bakurim. Ka lacen Abneri ojuke ni odok cen, ci laco-nu odok cen. Abneri ocako yubo lok ki ludoŋo pa jo Icrael kun wacci, “Nen, cakke wa i kare ma okato ca wubedo ki miti me keto Daudi obed kabaka ma loyowu. Doŋ wutim ba, pien Rwot yam ociko pi Daudi kun wacci, ‘Abimiyo laticca Daudi aye bilaro jo Icrael ki i ciŋ jo Piliciti ki i ciŋ lumerokgi ducu.’ ” Abneri owaco bot jo pa Benjamin bene kit meno, ci lacen ocito i Kebron ka tito bot Daudi kit lok ducu ma jo Icrael kacel ki jo ducu me ot pa Benjamin gutamo ni ber doŋ gitim. Ka Abneri oo bot Daudi i Kebron ki jo pyeraryo, ci Daudi otedo karama pi Abneri ki jo ma en tye kwedgi ducu. Ci Abneri otito bot Daudi ni, “Koni doŋ amito dok cen, ci abicoko jo Icrael ducu aketogi i ciŋi, rwoda kaba ka, wek guket gicikke kwedi, ka doŋ icak loyo lwak ducu kit ma cwinyi mito.” Kit meno Daudi ocwalo Abneri ocito, kun dok gire ki kuc, Ki iŋe wot pa Abneri, Joab ki lutic pa Daudi gudwogo ki i mony, gukelo lwak jami mapol ma guyako. Ento onoŋo Abneri doŋ pe bot Daudi i Kebron, pien Daudi onoŋo otyeko cwale ocito woko, ocito ki kuc, Ka Joab odwogo kacel ki lumony ducu ma onoŋo ocito kwede, gitito bo te ni, “Abiner wod pa Ner obino kany bot kabaka, ci kabaka oweko en ocito woko, ocito ki kuc.” Joab ocito bot kabaka owacce ni, “In ibedo ka timo gin aŋo? Nen ba, Abneri obino boti, ci piŋo icwale odok woko cen, omiyo en doŋ ocito woko? In mono pe iŋeyo ni Abneri wod pa Ner obino ka bwoli, wek ene ka ma icito iye ducu ki gin ducu ma itiyo?” Ka Joab oa woko ki i nyim Daudi, ci ocwalo lukwena i kor Abneri, gudwogo kwede cen nia ki i waŋ pii me Cira, ento Daudi pe oneyo iye lok mo. Ka Abneri odwogo cen, oo i Kebron, Joab otere woko cen i dog gaŋ macalo mito lok kwede i muŋ, ci otugi cobo iye ki kunnu, oto woko. Oneke pi culo kwor remo pa ominne Acael. Ka Daudi owinyo pire, owacci, “An ki kerra ducu pe watye ki alii mo wacel i nyim Rwot pi to pa Abneri wod pa Ner. Aliine opot gire i kom Joab, ki i kom jo me ot pa wonne, Ot pa Joab kare ducu pe myero obed laboŋo dano mo iye ma kome cwer tut, nyo ladobo, nyo dano ma bwoc, nyo dano ma gineko ki pala lucwan, nyo dano ma lakec cam!” Joab ki ominne Abicai guneko Abneri kit meno, pien yam oneko omingi Acael i mony ma obedo i Gibeon. Daudi dok owaco bot Joab ki lwak ducu ma gitye kwede ni, “Wuyec ginarukawu, wutwe boŋo cola i pyerwu, wek wukum i nyim Abneri.” I kare ma giyiko kom Abneri Daudi ma kabaka-ni olubo kor kitarane. Giyiko i Kebron, ci kabaka odaŋŋe ki koko matek i wi lyelle, ki lwak ducu bene gukok. Kabaka okoko Abneri kun wacci, “Abneri myero oto kit ma lamiŋ to-ni mono? Badi yam pe gitweyo woko do; kit ma dano kome wee i nyim latim bwami, in bene komi owee kit meno do.” Ci lwak ducu dok gunwoyo koke. Lwak ducu gubino ka bito Daudi wek ocam kwon ma piny pud dyeceŋ, ento Daudi okwono kwon kun wacci, “Lubaŋa myero oket can i koma kit meno ki makato bene, ka ce abilo kwon mo ma ceŋ peya opoto!” Ci lwak guniaŋ lok ma i cwinye, omiyo cwinygi okwe; pien kit gin ducu ma kabaka tiyo yomo cwiny lwak ducu. Kit meno omiyo lwak ducu guniaŋ i nino meno ni pe kabaka aye ma omiyo ni ginek Abneri wod pa Ner. Kabaka owaco, bot luticce ni, “Wun pe wuŋeyo ni oteka madit ma lawimony doŋ oto woko tin ki i Icrael? An adoko nyap woko i kare man, kadi an kabaka ma giwiro. Awobe pa Jeruya gin aye guketa i peko, Rwot myero ocul kwor i kom latim marac muporo kit bwamine!” @ Ka Icbocet wod pa Caulo owinyo ni Abneri doŋ gineko woko i Kebron, ci kome oto woko lirut, ki cwiny jo Icrael bene oballe woko, I kare meno onoŋo Icbocet tye ki lutel wi buca monnye aryo; nyiŋ ŋat acel Baana ki nyiŋ mukene: Rekab. Gin ducu awobe pa Rimmon ma jo Benjamin, gaŋ tugi Beerot. Beerot gikwano bot jo Benjamin. Jo Beerot kikome guriŋo gularo i Gitaim, ci gudoko lubedo kunnu nio wa i kare man. Yonacan wod pa Caulo yam tye ki wode mo ma tyene okwe woko. I kare ma gikelo lok ki i Jejreel i kom gin mutimme i kom Caulo ki Y onacan, onoŋo en doŋ ditte romo mwaka abic. Ci lapidine otiŋe, oriŋo kwede woko, ci latin opoto woko piny i kare ma co tye ka ŋwec matek-ki, omiyo odoko Laŋolo; nyiŋe Mepibocet. Awobe pa Rimmon ma jo Beerot, Rekab ki Baana, gua ci gucito ki i cwiny dyeceŋ malyet-ti, gucito wa i ot pa Icbocet i kare ma en tye ka yweyo i dyeceŋ. Onoŋo lagwok doggola obedo ka pyeto nano, ci nino omako waŋe, onino woko; omiyo Rekab ki ominne Baana gulwitte gudonyo. Ka gudonyo i ot, gunoŋo Icbocet obuto i ot butone i wi kitandane, ci gucobo, guneko woko, ka guŋolo wiye. Gutiŋo wiye, gulubo kwede yo Araba dyeworwor, ci gukelo wi Icbocet bot Daudi i Kebron, guwaco bot kabaka ni, “Wi Icbocet wod pa Caulo doŋ wakelo ene, wod pa Caulo ma lamerokki ma yam mito neki, Rwot doŋ oculo kworri tin, rwotwa, i kom Caulo ki i kom litinone.” Ento Daudi ogamo dog Rekab ki ominne Baana, awobe pa Rimmon ma jo Beerot ni, “Macalo Rwot tye makwo-ni, ma yam olaro kwona ki i ciŋ lumerokka ducu, i kare ma yam dano mo obino otitta lok ni, ‘Nen ba, Caulo doŋ oto woko,’ ma onoŋo en tamo ni ekella lok maber, ci an amake aneke woko i Jiklag; meno aye obedo mot ma amiyo bote pi lok ma okelo-ni. Ento lok man doŋ dit makato ducu, ka ce lutim aranyi doŋ guneko dano ma cwinye leŋ ki i ode i wi kitandane, ci wutamo ni an pe abiculo kworre i komwu, atyekowu wo ko ki i wi lobo?” Ci Daudi ociko litino orobone, guneko jo-nu woko, guŋolo cing: ki tyengi woko, ka gunabo komgi i ŋet kulu me Kebron. Ento gukwanyo wi Icbocet, guyiko Lyel pa Abneri i Kebron. Kaka ducu ma i Icrael gucokke gubino bot Daudi i Kebron, ci guwacci, “Nen ba, wan aye wacogo komi ki riŋo komi. I kare macon ca, ma onoŋo Caulo aye kabaka ma loyowa, in aye yam itelo wi jo Icrael ka gicito ka lweny, idwokowa pa co bene, Rwot bene ne ne owaco boti ni, ‘In aye ibibedo lakwa lwak ka jo Icrael, dok ibibedo laker ma loyogi.’ ” Kit meno ludoŋo pa jo Icrael ducu gubino bot kabaka i Kebron, Kabaka Daudi oketo gicikke kwedgi i Kebron i nyim Rwot, ci guwiro Daudi obedo kabaka ma loyo jo Icrael. Daudi ocako locce ma onoŋo mwaka me ditte romo pyeradek, ci obedo ka loc pi mwaka pyeraŋwen, oloyo jo Juda i. Kebron pi mwaka abiro ki dwe abicel, dok oloyo jo Icrael ki jo Juda ducu ki i Jerucalem pi mwaka pyeradek wiye adek, Kabaka ki lwakke gucito i Jerucalem ka lweny i kom jo Jebuc ma gibedo i lobo kunnu, Gin onoŋo guwaco bot Daudi ni, “In pe ibidonyo kany. Ka ibino, ci luŋolo ki lutowan aye gibiryemi woko ki cen.” Onoŋo gitamo ni Daudi pe twero donyo kunnu, Ento Daudi ocito omayo gogo me Cion woko, ci odoko gaŋ kalle, I nino meno Daudi owacci, “Dano ducu ma gimito neko jo Jebuc gudony ki i waŋ otul pii, gucak lweny i kom luŋolo ki lutowaŋ-ŋu ma tipo koma okwerogi-ni.” En gin mumiyo giwacci, “Lutowaŋ ki luŋolo pe gibidonyo i ot pa Lubaŋa.’ Daudi ocako bedo i cel go go kunnu, ci olwoŋo ni, Gaŋ kai pa Daudi. Daudi ogero gaŋ madit orumo wo ko likiŋ cakke ki i Millo, Daudi omedde odoko dit twatwal, pien onoŋo Rwot ma Lubaŋa me mony tye kwede. Kiram kabaka me Turo ocwalo kwena bot Daudi kun miyo bao yat cedar, ki lupac bene ki lupa-godi me gero ode en Daudi. Omiyo Daudi oniaŋ ni, Rwot otyeko moko en me bedo kabaka ma loyo Icrael, dok ni Rwot omiyo kerre obedo ki deyo madwoŋ pi pilo wi jone Icrael. Daudi dok omedde ki kwanyo mon aŋeca ki mon anyoma ki i Jerucalem ki i kare ma doŋ oa woko ki i Kebron, ci onywalo awobe ki anyira mukene. Magi aye nyiŋ awobe pa Daudi ma onywalogi i Jerucalem: Cobab, Natan, Solomon, Ibar, Elicua, Nepeg, Japia, Elicama, Eliada ki Elipelet. I kare ma jo Piliciti guwinyo ni Daudi doŋ gityeko wiro ki moo, odoko kabaka ma loyo jo Icrael, ci gucokke ducu gucito ka yenye; ento Daudi owinyo pigi ci odonyo woko i cel gogo. Jo Piliciti gumol gubino ci guket guromo i nota Repaim woko. Daudi openyo dog Rwot ni, “Ber acit ka lweny i kom jo Piliciti? Ibimiyogi i ciŋa?” Rwot ogamo dog Daudi ni, “Citi, pien abimiyo jo Piliciti i ciŋi ada.” Daudi ocito wa i Baal-perajim, oloyogi kunnu, ci owacci, “Rwot obaro dye lumerok woko ki i nyima, macalo lalele mucorre.” Mumiyo nyiŋ kabedo meno gilwoŋo ni, Baal-perajim. Jo Piliciti gutenyo cal jogigi kenyo, Daudi ki lwak ke gutiŋo gutero woko. Jo Piliciti dok gudwogo, gumol guket i nota Repaim ducu. Ka Daudi dok openyo dog Rwot, ci ogamo ni, “Pe ibicito atir. Ber icit iman ne monygi ma odoŋ cen ca, wek ipot i komgi ki ka ma okemo yadi owak. Ka ce iwinyo woo macalo lwak dano ma gitye ka dorre i wi yadi owak, ci rune anyim oyot, noŋo Rwot doŋ bitelo nyimwu pi neko mony pa jo Piliciti woko ducu.” Daudi otiyo kit meno kit macalo Rwot ocike kwede, ci oneko jo Piliciti cakke ki i Geba o kwede wa i Gejer. Daudi dok ocoko lulweny mabeco ma giyerogi ki i kin jo Icrael ma giromo alip pyeraŋwen, Ci Daudi ocako a ki jone ducu ma gitye kwede, gucito i Baale-juda ka omo canduk pa Lubaŋa, ma gilwoŋo ki nyiŋ Rwot me mony ma bedo wi komkerre malo ka wi lukerubi, Gutiŋo canduk i wi gadigadi manyen, ci gukelo woko ki i ot pa Abinadab, ma gaŋŋe onoŋo tye i wi got-ti, Uja ki Akio, ma gin awobe pa Abinadab, aye gubedo ka leko twoni ma ywayo gadigadi manyen-ni ma gitiŋo ki canduk pa Lubaŋa, kun Akio aye telo nyime. Daudi ki jo me ot pa Icrael ducu gubedo ka yarre ki myel ki yomcwiny i nyim Lubaŋa ki kero komgi ducu, ki wero wer, ki go yo opuk ki nana ki ajaa ki bul ki atego agoya-gu. Ka guo i laro moyo pa Nakon, ci Uja ocwalo ciŋe, ogudo kom canduk pa Lubaŋa, omako kome, pien onoŋo twoni gucato, ci kiniga omako Lubaŋa i kom Uja, oneke woko ki kunnu, pien onoŋo oketo ciŋe i kom canduk; ci oto woko ki kunnu i ŋet canduk pa Lubaŋa, Kiniga omako Daudi pien Rwot otugge i kom Uja; mumi yo kabedo-nu gilwoŋo ni Perej-uja nio wa onyoo. Daudi obedo ki lworo i kom Rwot i nino meno; owacci, “Canduk pa Rwot doŋ gibitero bota niŋniŋ?” Kit meno omiyo Daudi okwero tero canduk pa Rwot i gaŋ kalle; ento oŋak kwede woko, otero i ot pa Obededom ma jo Gat. Canduk pa Rwot obedo i ot pa Obed-edom pi dwe adek; ci Rwot omiyo gum bot Obed-edom ki jo ma i ode ducu. Ka gitito bot Daudi ni, “Rwot omiyo gum i kom jo ma i ot pa Obededom ki gin ducu ma tye bote, pi canduk pa Lubaŋa, omiyo Daudi ocito ka omo canduk ki i ot pa Obed-edom ci okelo i gaŋ kalle ma cwinye yom matek. Ka jo ma gutiŋo canduk pa Rwot gudako tyengi ki wot tyen abicel, ci Daud i otumo twon ki romo mucwe bot Rwot: Lacen ocako myel i nyim Rwot ki tipo kome ducu, kun noŋo otweyo pyere ki epod me boŋo camanini, Kit meno Daudi ki jo me ot pa Tcrael ducu gukelo canduk pa Rwot i Jerucalem ki waya ki kuto bila. Ka canduk pa Rwot obino i gaŋ kal pa Daudi, ci Mikal ma nya pa Caulo obolo wane ki i waŋ dirica, ci oneno ka Daudi pye kirre ki myel i nyim Rwot; ci obedo ka caye ki i cwinye. Gukelo canduk pa Rwot wa paco, ci gucibo i kabedone, ma en kema ma Daudi onoŋo oguro pire. Daudi ocako tyero gitum awaŋa mapol ki gityer lakwecwiny i nyim Rwot. Ka Daudi otyeko tyero gitum awana-gu ki gityer lakwecwiny, ci olamo gum i kom lwak i nyim Rwot me mony. Lacen opoko cam bot lwak ducu, bot jo Icrael ma gucokke ducu, co wa ki mon. Dano acel acel gimiye mugati acel, riŋo mucekke, ki poki olok mutwo. Ka lwak gucako ket, kun ŋat acel acel dok i gaŋŋe. Ka Daudi odok cen ka lamo gum i kom jo ma i ode, Mikal nya pa Caulo okato woko ka jole, ci owaco bote ni, “Kabaka me Icrael tin oketo deyo i kome kene ba! Pe tin obumo kome i waŋ aŋeca magi ducu! Kabaka obedo macalo ŋatti mo ma lamalgaŋ ata ma lewic pe mako, ma pe obumo wa kome bene.” Daudi ogamo dog Mikal ni, “An abedo ka myel i nyim Rwot, ma oketo an abedo kabaka ma ka woru, kun aloyo ode ducu. En oketa abedo laker ma loyo jo Icrael, ma lwak pa Rwot. Abimyelo myel ki yomcwiny i nyim Rwot. An amito abed yot makato man, wek abed ginanyerani; ento aŋeca ma iloko i komgi-ni aye dok gibiketo deyo i koma makato.” Mikal nya pa Caulo pe onywalo latin mo, nio ka oto. I kare ma doŋ kabaka Daudi obedo i ode, ma onoŋo Rwot omiye yweyo i kom lumerokke ma gurume dyere-ni, owaco bot lanebi Natan ni, “Nen ba, an doŋ abedo i ot bao cedar, ento canduk pa Lubaŋa pud bedo i kema.” Natan odok iye bot kabaka ni. “Cit iciti gin ducu ma tye i cwinyi, pien Rwot tye kwedi.” Ento i dyewor acel-lu en aye lok pa Rwot obino kwede bot Natan ni, “Cit icitit bot laticca Daudi ni Rwot owaco kuman ni, ‘In imito gerra ot me bedona? An peya abedo i ot mo cakke ki i kare ma yam akwanyo jo Icrael ki i Ejipt o kwede wa onyoo-ni, ento gibedo ka wirre kweda kun abedo i kema. I lwak kabedo ducu ma abedo ka wirre iye ki jo Icrael ducu, onoŋo yam koŋ aloko lok mo bot luŋolkop pa jo Icrael, ma acikogi pi kwayo lwak ka jo Icrael, kun awacci, “Piŋo pe koŋ wugerra ot mo me bao cedar?”, Mumiyo ibiwaco bot laticca Daudi ni, ‘Rwot me mony owaco k it man ni, An yam akwanyo in ki ka kwat i olet, ka ma ibedo iye ka leko romi, wek ibed laker ma loyo jona jo Icrael. Dok abedo ka Ionne kwedi i kabedo ma icito iye ducu, abedo ka jwero lumerokki woko ki i nyimi. An dok abimiyo nyiŋi ywek ma rom ki nyiŋ jo madito ma i wi lobo-ni. Dok abimiyo kabedo ki jona jo Icrael, ci abiketogi iye, wek doŋ gubed i kabedogi kikome, ma pe doŋ giyelogi matwal, wa lulweny magwa bene pe dok bipoto i komgi i kare mo, kit ma con ca, cakke ki i kare ma yam aketo iye luŋolkop ma guloyo jona jo Icrael; doŋ abimiyo iywe ki lweny i kom lumerokki ducu. Dok Rwot otyeko tuco boti ni en ebimiyo jo ma i odi gibedo mapol,. Ka kareni oromo ma doŋ ibuto kacel ki kwariwu-ni, ci abimiyo wodi mo ma in kikumi inywalo bedo madit, ci abimoko kerre bedo matek. En aye bigero ot pi nyiŋa, an abimoko komkerre bedo matwal. An abibedo wonne, ki en bibedo woda. Ka ce otimo bal, ci abipwode ki odoo pa dano, ki kit goco pa awobe pa dano. Ento pe abikwanyo mar mera ma pe lokke woko ki i kome, kit ma yam akwanyo ki i kom Caulo, ma yam aryemo woko ki i nyima-ni, Odi ki kerri bimoko i nyima nakanaka; ki komkerri bene bimoko matwal.’” Natan otito lok magi ducu bot Daudi, ki kit ginanyuta ma onen bote ducu. Lacen Daudi ocito obedo piny i nyim Rwot i kema ma Rwot bedo iyeni, ci owacci, “Ai Rwot Lubaŋa, an aŋa, oda bene kono gin aŋo, mumiyo ikonya nio wa onyoo-ni? Ento in pud ibwono kony man ni tidi ki tuŋ boti, ai Rwot Lubaŋa ibedo ka lok i kom dano ma i oda kit ma gibibedo kwede pi kare malac ma tye anyim, inyuto bota kit ma likwaya gibibedo kwede i anyim, ai Rwot Lubaŋal An Daudi dok abiwacci kit lok aŋo? In iŋeyo an, ai Rwot Lubaŋa ma an laticci-ni. Itiyo gin madit magu ducu pi lubo lok ma yam iloko pi mitti keni, wek an laticci anen ki waŋa. In idit mada, ai Rwot Lubaŋa; pe tye ŋatti mo macalo in, pe tye Lubaŋa mo, kono in keken, kit ma yam wawinyo ki itwani. Rok mene ma i wi lobo ma rom ki joni jo Icrael, ma yam in Lubaŋa icito ka kokogi ki i opii wek gubed joni wek nyiŋi oywek pigi, pi tim madito ma itimo ma miyo lworo, ki pi ryemo rok mukene mapol woko ki i nyimgi, kacel ki lubaŋagi? In ityeko moko lwakki jo Icrael wek gubed joni nakanaka; dok in, ai Rwot, idoko Lubaŋagi, “Ai Rwot Lubaŋa, kombeddi doŋ imok lok ma yam iwaco i koma ki i kom jo ma i oda matwal, ci doŋ itim kit ma iwaco-ni. Kumeno dano gibidworo nyiŋi nakanaka kun giwacci, ‘Rwot Lubaŋa me mony aye Lubaŋa ma loyo jo Icrael,’ ki ot pa laticci Daudi bimoko i nyimi matwal. Ai Rwot me mony, Lubaŋa pa Icrael, in aye inyuto tammi bota, an laticci, kun iwacci ibimiyo oda bedo madit; en gin mumiyo an laticci alirrio tekcwiny me kelo lega man i nyimi. Ai Rwot Lubaŋa, in aye Lubaŋa, lokki bedo me ada, ci in doŋ ityeke cikke me timo gin man maber pira. Pi meno, alegi ni imi gum i kom jo ma i oda, wek gumedde ameda ki bedo i nyimi nakanaka; pien in, ai Rwot Lubaŋa, doŋ iwaco, dok pi lokki me gum miyo likwaya gibibedo ki gum nakanaka.” Lacen Daudi dok otayo jo Piliciti, ocako loyogi, dok omayo Meteg ama ki i ciŋgi. Daudi dok otayo jo Moab, ka opimogi ki tol, kun omiyo gubuto piny i nom. Opimo tol aryo me aneka ki tol acel me aweka makwo. Ci jo Moab gubedo i te loc pa Daudi, kun giculo mucoro bote. Daudi dok otayo Adadejer wod pa Rekob kabaka me Joba, ma onoŋo ocito ka roco kerre odoko tek i dog kulu Euprate. Daudi omako wegi aguragurane alip acel ki miya abiro, ki askari ma giwoto ki tyengi alip pyeraryo. Oŋolo odoŋ tyen aguragura ma yam ywayo gadigadi lwenygi, ento oweko mogo manok odoŋ ma romo ywayo gadigadi miya acel. Ka jo Ciria me Damaciko gubino ka konyo kor Adadejer me Joba, Daudi oneko jo Ciria alip pyeraryo wiye aryo. Daudi oketo lumony i cel gogo i lobo Ciria ma i ŋet Damaciko; ci jo Ciria ma gitye kunnu gubedo i te loc pa Daudi kun giculo mucoro bote. Rwot obedo ka miyo tek me bwoyo lobo bot Daudi ka ma en cito iye ducu. Daudi oyako lwak kwodi me jabu ma yam lutic pa Adedejer tinogi, ci oterogi i Jerucalem. Dok kabaka Daudi oyako lwak jami mapol me mola ki i Beta ki Berotai, ma yam obedo gaŋi pa Adadejer. I kare ma Toi kabaka me Kamat owinyo ni Daudi otyeko tayo mony pa Adadejer woko ducu liweŋ, ci Toi ocwalo wode Joram bot Daudi ka mote, ki pi pwoye pi lweny i kom Adadejer ki pi loyo en woko; pien yam Adadejer obedo ‘ka lweny ki Toi tyen mapol. Joram onoŋo obino ki jami me ryal ki jabu ki mola-gu; jami meno bene kabaka Daudi odyerogi bot Rwot, kacel ki ryal ki jabu mukene ma en odyero ma oyakogi ki bot rok ducu ma en otayogi, bot jo Edom, jo Moab, jo Ammon, jo Piliciti ki jo Amalek, kacel ki jami ma oyako ki bot Adadejer wod pa Rekob, kabaka me Joba.’ Daudi olimo yweka pi tekke kekene. I kare ma doŋ en tye ka dwogo, oneko jo Edom alip apar wiye aboro i nota me Kado. Oketo lumony i cel gogo i Edom, oromo i lobo Edom ducu, ci jo Edom gubedo i te loc pa Daudi. Rwot omiyo Daudi obwoyo lobo ka ma ocito iye ducu. Daudi oloyo jo Icrael ducu kit meno; dok obedo ka ŋolo kop atir dok kakare i kom lwakke ducu: Joab wod pa Jeruya obedo ladit me mony; ki Yekocapat wod pa i Akilud obedo laco lok ma timme. Jadok wod pa Akitub ki Akimelek wod pa Abiatar gubedo ajwagi; Ceraya obedo karan; Benaya wod pa ekoyada obedo ladit ‘ma loyo jo Keret ki jo Pelet; ki awobe pa Daudi gubedo ajwagi. Daudi openyo ni. “Tye ŋati mo ma odoŋ ki i ot pa Caulo, wek anyut cwinyme mar i kome pi Yonacan?” I kare meno latic pa Caulo mo ma nyiŋe’ Jiba onoŋo tye kenyo. Gilwoŋo en gikelo bot Daudi, ci kabaka openye ni, “In aye liba bo?” Ogamo ni, “An do, ladit.” Kabaka openyo ni, “Pe tye ŋatti mo ma odoa ki i ot pa Caulo, wek anyut cwiny me mar pa Lubaŋa i kome?” Jiba owaco bot kabaka ni, “Wod pa Yonacan pud tye, ento tyene aye okwe woko.” Kabaka openyo ni, “En kono tye kwene?” Jiba ogamo ni, “En bedo i ot pa Makir wod pa Amiel, i Lo-debar.” Ci kabaka ocwalo dano giome ki i Lodebar. Ka Mepibocet wod pa Yonacan ma wod pa Caulo obino bot Daudi, ci opoto oryebbe piny omiye woro. Daudi owacce ni, “Mepibocet!” En ogamo ni, “An laticci en do.” Daudi owaco bote ni, “Pe ibed ki lworo mo. An abinyutti cwiny me mar pi woru Yonacan, abidwoko boti lobo ducu ma yam pa kwaru Caulo, dok ibicam i wi mejana jwijwi.” Ci Mepibocet dok omiye woro kun wacci, “An kono aŋa, ma miyo itamo pi gwok muto macalo an-ni?” Daudi dok olwoŋo Jiba latic pa Caulo, ci owacce ni, “Jami pa Caulo ki jo ma i ode ducu atiŋo amiyo bot Mepibocet. In ki awobeni ki luticci wubipuro potone ducu, wek cam ocek iye, wek wod pa laditti onon iye ginacama. Ento en Mepibocet wod pa laditti bicam i wi mejana jwijwi.’ Onoŋo Jiba tye ki awobene apar wiye abic, ki luticce pyeraryo; Jiba owaco bot kabaka ni, “An abitiyo kit ma icika ducu, ladit kabaka.” Kit meno Mepibocet ocako cam i wi meja pa Daudi ma rom ki ŋat acel mo i kin awobe pa kabaka. Mepibocet onoŋo tye ki wode mo matidi ma nyiŋe Mika. Ci jo ducu ma gibedo i ot pa Jiba gudoko lutic pa Mepibocet. Mepibocet ocako bedo i Jerucalem, pien obedo ka cam jwijwi i wi meja pa kabaka. Onoŋo tyene aryo ducu okwe woko. Ka man otum, kabaka me Ammon oto, ci wode Kanun oleyo ka tyene. Daudi owacci, “Abinyuto cwiny me mar bot Kanun wod pa Nakac, kit ma yam wonne onyuto kwede cwiny me mar beta-ni,” Mumiyo Daudi ocwalo luticce ka kweyo cwiny Kanun pi to pa wonne, ci lutic pa Daudi guo i lobo pa jo Ammon. Ento rwodi pa jo Ammon guwaco bot laditgi Kanun ni, “In itamo ni Daudi ocwalo lukwe cwinyi pi keto deyo i kom woru? Daudi mono pe ocwalo luticce ka niyo gaŋ ki ka roto kite ducu, wek etur woko?” Kit meno omiyo Kanun omako lutic pa Daudi, ci olyelo yer tik ŋat acel acel woko tuŋ cel, ka dok Oŋolo dye boŋogi i kom pyergi, ka ocwalogi kwede woko. Ka gitito pire bot Daudi, ocwalo dano ka jologi, pien onoŋo gitye ki lewic madwoŋ twatwal. Ci kaba ka owacpi, “Koŋ wubed i Jeriko, nio ka yer tikwu otwi olot, ka doŋ wudwog kany.” Ka jo Ammon guneno ni pigi odoko ŋwe marac bot Daudi, ci gucwalo dano ka wilo jo Ciria ma i Betrekob, ki jo Ciria ma i Joba, gukelo askari alip pyeraryo ma giwoto ki tyengi, ki kabaka me Maaka ma obino ki dano alip acel, ki jo Tob ma giromo alip apar wiye aryo. Ka Daudi owinyo pigi, ci ocwalo Joab kacel ki buca mony pa twoni oteka lweny ducu. Ci jo Ammon gubino gurwayo cok ka gurye i dogcel; ci jo Ciria me Joba ki me Rekob, ki jo Tob ki jo Maaka gupokke kengi, gurye i dye bar. Ka Joab oneno mony okacce woko ryoryo, tuŋ nyime ki yo tuŋ ŋeye bene, ci oyero ŋo Icrael ma oyita lweny, ocako ryeyogi gukemo jo Ciria. Oketo jo mudoŋŋe bot ominne Abicai, gin bene guryeyo gukemo jo Ammon. Joab owacci, “Ka ce jo Ciria gubedo tek i koma, ci ibikonya; ento ka jo Ammon aye gubedo tek i komi, ci an abibino ka konyi. Bed oteka ma cwinyi nwaŋ, wek walweny lweny me co pi lutuwa, ki gaŋi pa Lubaŋawa, Rwot bene otim gin ma oneno ni ber.” Kit meno Joab ki jo ma gitye kwede ducu gurwayo cok ka lweny i kom jo Ciria; ci jo Ciria guriŋo woko ki i nyime. Ka jo Ammon guneno jo Ciria guriŋo woko, ci gin bene gucako riŋo woko ki i nyim Abicai, gudonyo i gaŋ. Ci Joab oa woko ki i ka lweny i kom jo Ammon, odok i Jerucalem. Ka jo Ciria guneno jo Icrael guloyogi, gucako cokke kacel. Ka Adadejer ocwalo kwena, ci gukelo jo Ciria ma gitye loka kulu Euprate; gucako bino i Kelam, kacel ki Cobak ma lawimony pa Adadejer ma obedo latel wigi. Ka gitito pigi bot Daudi, ci en bene ocoko jo Icrael ducu, Oŋolo kwedgi kulu Jordan, ka ocito wa i Kelam. Jo Ciria gurwayo i kom Daudi, gulwenyo i kome. Ento jo Ciria gucako riŋo woko ki i nyim jo Icrael; Daudi oneko jo Ciria ma romo riŋo ki gadigadi lweny miya abiro, ki wegi aguragura alip pyeraŋwen, Gucobo bene Cobak lawimony pa jo-nu, ci oto woko ki kunnu. Ka luker ma gubedo i te loc pa Adadejer guneno ni jo Icrael gutyeko loyogi woko, ci guketo kuc i kingi ki jo Icrael, gubedo i te locgi. Kit meno jo Ciria gucako bedo ki lworo, pe dok gumedde ki konyo jo Ammon. I dog oro ma en aye kare ma luker gicito kwede ka mony, Daudi ocwalo Joab ki luticce ki jo Icrael ducu, ci guneko jo Ammon, guyako pacogi woko, ka gurumo gaŋ me Raba, kun Daudi odon mere paco i Jerucalem. I kare me dyeceŋ abwora, ka Daudi oa malo ki i kabutone, ci ocako wot malo i wi ot pa kabaka, Ka obolo wane oneno dako mo ma tye ka lwok, kun kome nen ma mwonya twatwal. Daudi ocwalo dano wek enian i kom dako-nu, Ci ŋat acel owacci, “Meno aye Batceba nya pa Eliam, ma dako pa Uria ma Lakit.” Daudi ocwalo lukwena ci gukwanyo dako, gutero bot Daudi, Daudi obedo kwede, I kare-nu en pud olwoko kwer monne alwoka. Lacen dako odok i ode, Dako-nu ogamo ic: ocwalo kwena otito lokke bot Daudi ni, “Doŋ atye ki remo.” Kit meno Daudi ocwalo lok bot Joab, kun wacci, “Cwalla Uria ma jo Kit.” Joab ocwalo Uria bot Daudi. Ka Uria oo bote, Daudi openyo gin ma Joab tye ka tiyone, ki kit ma dano gubedo kwede, ki kit ma mony tye ka wot kwede. Lacen Daudi owaco bot Uria ni, “Koŋ doŋ icit i odi, icilwok tyeni.” Ka Uria okato woko ki i ot pa kabaka, kabaka ocwalo mot i kore. Ento Uria obuto i ŋet doggola pa kabaka kacel ki lutic pa laditte, en pe ocito i ode. Ka gitito pire bot Daudi, ni, “Uria pe ocito gire in ode,” Daudi owaco bot Uria ni, “In pe ia ki ka wot ce? Ci piŋo pe koŋ icito wa i od i?” Uria ogamo dog Daudi ni, “Canduk pa Lubaŋa ki jo Icrael ki Juda gibedo i bolo kunnu, ki laditta Joab ki luticce ducu gibuto woko i tim, ka an aye dok acii i oda kuca ka cam ki ka mat ki ka bedo ki dakona? Macalo it ye makwo-ni, ki tipo komi tye makwo-ni, pe atwero tiyo lok macalo meno.” Daudi owaco bot Uria ni, “Tin dok koŋ ibed kany, ci diki doŋ aweki icito.” Omiyo Uria dok obedo i Jerucalem i nino meno, ki orwone bene. Daudi olwoŋe, ci ocamo ka omato i nyime, ci Daudi omiyo en omer woko. I dyewor meno eh dok ocito obuto i kabutone kacel ki lutic pa laditte; pe ocito i ode. Daudi ocoyo waraga bot Joab odiko, ci omiyo bot Uria me atera. I waraga meno ocoyo ni, “Ket Uria anyim ka ma lweny gwa iye, ci wujer, wudwog cen ki ŋeye, wuweke kunnu, wek gicobe, oto woko.” I kare ma Joab orumo gaŋ, otugi keto Uria ka ma en ŋeyo ni oteka lweny gitye iye. Jo ma i gaŋ meno gubino gulwenyo i kom Joab, ci lutic pa Daudi mogo ginekogi woko. Uria ma Lakit bene gineko woko. Joab ocwalo kwena otito bot Daudi gin ducu ma otimme i waŋ lweny. Joab ociko lakwena ma ocwalo kunnu kit man ni, “Ka doŋ ityeko tito bot kabaka lok ducu mutimme i waŋ lweny, ka ce kiniga omako kabaka ce openyi ni, ‘Piŋo wunyiko cok wa i kom gaŋ ka lweny iye kunnu? Pe onoŋo wuŋeyo ni gibicelowu ki malo i wi cel? Aŋa ma yam oneko Abimelek wod pa Jerubecet? Pe dako mo aye obayo lakidi rego madit ocele kwede ki malo i wi cel, omiyo en oto woko i Tebej? Piŋo wunyiko cok i kom cel?’ Ka owaco kit man, ci in dok ibiwacce ni, ‘Laticci Uria ma Lakit bene oto woko.’ ” Lakwena ocito, obino otito bot Daudi gin ducu ma Joab ocwale kwede, Lakwena otito bot Daudi ni, “Merok olwenyo i komwa magwa, gucorre i komwa i dye bar, ento wajerogi, wadwokogi cen wa i dog gaŋ. Ci wegi atero gucako celowa ki malo i wi cel, guneko luticci mogo woko; wa laticci Uria bene gineko woko.” Daudi ogamo dog lakwena ni, “Ibiwaco bot Joab kit man ni, ‘Pe ibed ka paro lok meno, pien pala lucwan neko dano tuŋŋi ki tuŋŋi. Wek mony olweny matek i kom gaŋ meno, ci imak woko, iret woko piny.’ Ci ititte ni myero oka lake matek.” Ka dako pa Uria owinyo ni gineko cware woko, ci ocako koko cware. Ka kwero cola otum, Daudi ocwalo kwena ci okelo Batceba i ode, odoko dakone, onywalo kwede latin laco. Ento gin ma Daudi otimo pe oyomo cwiny Rwot. I kare meno Rwot ocwalo lanebi Natan bot Daudi, ci ocito otito bote ni, “Jo aryo yam gubedo i gaŋ mo, acel lalonyo, acel lacan. Lalonyo onoŋo tye ki lwak romi ki dyaŋi mapol; ento lacan onoŋo obedo ki bwoŋ romone acel loko ma onoŋo owilo. Ci odoŋo ki i ciŋe kacel ki litinone; romone obedo ka camo ŋide camme, kun mato pii i kikopone, dok buta bene wa i kore, obedo macalo nyare, I kare mo lawot obino bot dano ma lalonyo-ni, ci en pe oye kwanyo limme mo ma i kin romone kikome me tedo welone ma obino boteni, ento dok okwanyo romo pa dano ma lacan-ni, en aye otedo pi welo ma obino bote-ni.” Kiniga omako Daudi i kom lalonyo meno matek; ci owaco bot Natan ni, “Macalo Rwot tye makwo-ni, dano ma otimo kit meno ber ginek woko. Dok en biculo waŋ romo meno tyen aŋwen, pien otimo kumeno, ma pe otimo kica.” Natan owaco bot Daudi ni, “In aye i dano meno kikome. Ci Rwot, Lubaŋa pa Icrael, owaco ni, ‘Yam awiro in ki moo me bedo kabaka ma loyo Icrael. Alaro in ki i ciŋ Caulo, ci amiyo ot pa laditti i ciŋi, ki monne ducu amiyogi i kori, dok amiyo boti ot pa Icrael ki pa Juda. Ka ce meno ducu pud ibwonogi, kono nene ameddi makato meno, In icayo lok pa Rwot piŋo, ki tiyo gin marac i nyime? Nen, ityeko neko Uria ma Lakit-ti woko ki pala lucwan, ka dok ikwanyo dakone woko odoko dakoni. In aye ineko en woko ki pala lucwan pa jo Ammon. Pala lucwan doŋ pe biweko odi, pien ityeko cayo an pi kwanyo dako pa Uria Lakit me bedo dakoni.’ Rwot dok owaco kit man ni, ‘Nen, abimiyo gin marac poto i komi ma bia ki i odi kikome; dok abikwanyo monni ki i nyimi, ci amiyogi bot lawoti, ci en bibuto ki monni i dyeceŋ ka maleŋ, In itiyo i muŋ, ento an abitiyo man atyer i nyim jo Icrael ducu, ki i dyeceŋ bene.’ ” Daudi ogamo dog Natan ni, “An atiyo bal i kom Rwot.” Ci Natan owaco bot Daudi ni, “Rwot doŋ otyeko jwayo balli woko, pe doŋ ibito. Ento pi kit tim man nyuto atir ni ityeko cayo Rwot ibito. Ento pi kit tim man nyuto atir ni ityeko cayo Rwot marac adada; pi lok meno latin ma ginywalo-ni bito woko.” Lacen Natan odok i ode. Ci Rwot omiyo two ocelo latin ma dako pa Uria onywalo ki Daudi, ci two ori i kome. Daudi obedo ka bako doge pi latin bot Lubaŋa, kun ri kec bene; odonyo i ot obuto piny i ŋom dyewor benebene, Ludoŋo ma i ode gucuŋ ka ŋete pi tiŋe woko malo ki i ŋom, ento en okwero woko, pe ocamo cam mo kwedgi. I nino me abirone latin oto woko. Lutic pa Daudi gulworo tito pi to pa latin, pien gutamo ni, “I kare ma latin pud kwo waloko kwede, pe owinyo dogwa. Ci watwero wacce niŋniŋ ni latin otyeko to woko? Gwok nyo bitimme marac kekene.” Ento Daudi ka oneno luticce gitye ka kwilo lok kacel, ci oniaŋ ni latin doŋ oto woko. Owaco bot luticce ni, “Latin doŋ oto woko ce?” Gugamo ni, “En doŋ oto.” Ci Daudi ocako a woko ki i ŋom, olwokke, owiro kome ki moo, ka oloko boŋŋine bene. Okato woko ocito i ot pa Rwot, oworo Lubaŋa; ka dok okato woko ocito i ode kikome. Ka openyo pi cam, guketo cam i nyime ci ocamo. Luticce guwaco bote ni, “Man kit gin aŋo ma itiyo, ladit? In ibedo ka ri kec ki ka koko pi latin ma onoŋo pud kwo; ento ka latin doŋ oto woko, ci doŋ ia malo icako camo cam.” Daudi ogamo ni, “I kare ma latin pud tye makwo-ni, abedo ka ri kec ki ka koko pi latin kun atamo ni, ‘Aŋa mono ma ŋeyo ka nyo kica bimako Rwot i koma, wek latin pe oto?’ Ento kombeddi doŋ latin otyeko to woko; pud dok ari kec piŋo kono? An dok atwero dwoko en cen bo? Wayi an aye doŋ abicito bote yo, ento en pe dok bidwogo bota.” Daudi okweyo cwiny dakone Batceba, ci obedo kwede. Onywalo kwede latin laco, ocako nyiŋe Solomon. Rwot bene omaro latin-nu. Ocwalo lanebi Natan, ci ocako nyiŋ latin ni Jedidia, pi Rwot. I kare meno Joab obedo ka lweny i kom Raba, ma en gaŋ pa jo Ammon, ci omako gaŋ piine. Ocwalo lukwena bot Daudi ka wacce ni, “Abedo ka lweny i kom Raba, atyeko mako gaŋ piine bene. In doŋ icok lwak mudoŋŋi kacel, ci ibin irum gaŋ man wek imak woko, wek pe an aye amaki, miyo gilwoŋo ki nyiŋa.” Kit meno Daudi ocoko lwak kacel ci ocito kunnu kwedgi i Raba, olwenyo i kome ci omako woko. Daudi okwanyo lalukana me jabu ki i wi Milkom ma jokpa jo Ammon. Pekke romo ratili miyaacel, got me wel bene onoŋo tye iye, ci gicibo i wi Daudi. Daudi Odwogo ki jami ma giyako i gaŋ-ŋu madwoŋ twatwal. Dok okelo dano ma giyakogi ki i gaŋ meno, oketogi ka tic ki mucumeno ki cururu nyonyo ki latoŋ-gu, ka dok oketigi ka tic matek me waŋo matafali; en obedo ka timo dano ma i gaŋi pa jo Ammon kit meno. Lacen Daudi ki lwak ducu gudok cen i Jerucalem. Abcalom onoŋo tye ki laminne mamwonya twatwal ma nyiŋe Tamar. Ci Amnon wod pa Daudi ocako maro nyako-nu. Amnon obedo ki miti madwoŋ i kome; pi paro lamininne Tamar ocako kelle two. Onoŋo Tamar pud latin nyako ma peya oŋeyo laco dok Amnon oneno ni pe etwero noŋo kare me bedo kwede. Ento Amnon onoŋo tye ki lareme mo ma nyiŋe Jonadab, wod pa Cimea ma omin Daudi. Jonadab aye dano mo maryek twatwal. Openyo Amnon ni, “Wod pa kabaka, gin aŋo mono ma jonyo in jwijwi-ni? Pe ititta lokke ce?” Amnon ogamo ni, “An amaro Tamar ma lamiŋ omera Abcalom.” Jonadab owaco bote ni, “But piny i wi kitandani, ipor two. Ka woru Daudi obino ka limo twoni, ci iwacce ni, ‘Wek lamera Tamar aye obin omiya cam ka wek acam, kun en yubo ki i nyima, ma aneno, ka dok acamo ki i ciŋe.’ ” Kit meno Amnon ovako buto piny kun poro two. Ka kabaka obino ka limo two, ci Amnon olego kabaka kun wacci, “Alegi iwek lamera Tamar aye obin oted capat mogo aryo ki i nyima, ka wek acam ki i ciŋe.” Daudi ocwalo lok paco bot Tamar kun wacci, “Cit i ot pa omeru Amnon, wek iciyubbe cam kunnu.” Mumiyo Tamar ocito wa i ot ca ominne Amnon, ci otedo capat ki i nyime. Ka capat ocek, ci otiŋo otako woko, oloko capat ocibo i nyim Amnon wek ocam. Ento Amnon okwero camo. O wacci, “Gicwal dano ducu woko weŋ ki i nyima.” Kit meno dano ducu gucito gua woko ki i nyime. Ka Amnon dok owaco bot Tamar ni, “Kel cam wa i tyelo bota kany, wek acak camone ki i ciŋi.” Tamar otero capat ma otedo-nii tyelo bot ominne Amnon. Ento ka Tamar okelo cam ka ma cok kwede wekocam, ci oa malo opoto i kome kun wacce ni, “Bin wek ibut kwede, lamera.” Tamar oagmo ni, “Pe kumeno, omera, pe imaka tektek, pien kit tim macalo ma peya onen i Icrael kulu. Pe itim tim me miŋo kit man. Ci an mono, abitero lakit lewic-ci wa kwene? In bene ibibedo ŋat mutimo tim me kipyeda i Icrael kulu. Alegi ni, ipeny kabaka; en pe bikwero i koma.” Ento Amnon pe owinyo lokke; dok obedo ki tek makato nyako-nu, ci omake ki tek, obedo kwede. Lacen Amnon ocako kwero Tamar ki kwer madit twatwal; dok kweroen obedo madit makato mar ma yam omare kwede. Amnon owacce ni, “Doŋ ikat woko iciti.” Ento Tamar owacce ni, “Pe kumeno, omera. Cwala woko tektek aye dok rac makato tim kipyeda ma doŋ itimo i koma-ni.” Amnon pe omedo ki winyo lokke. Olwoŋo awobi ma tiyo bote, owacce ni, “Cwal dako-ni woko ki i nyima, ci irwak lalor doggola iceg woko ki i yo ŋeye.” Onoŋo Tamar oruko boŋo gomci mabor ki bade bene boco, pien meno aye kit ruk pa anyira pa kabaka ma peya giŋeyo co. Latic pa Amnon ocwalo Tamar woko, oloro doggola ocego woko ki i yo ŋeye. Tamar ocako onyo buru i wiye, la oyeco gomci ma oruko-ni, okwako wiye ki ciŋe, ocito kwede kun kok matek. Abcalom openya laminne ni, “Omeru Amnon obedo kwedi co? Kombeddii doŋ iliŋ mot, lamera. En obedo Abcalom ki cwercwiny madwoŋ kun bedo kene. Ka kabaka Daudi owinyo lok meno ducu, obedo ki kiniga madwoŋ. Abcalom pe omedo ki loko lok mo bot Amnon maber nyo marac, ento cwinye okwero Amnon matek pi mako laminne ki tek. Ka doŋ mwaka okato aryo, Abcalom obedo ki lunyar yer romine i Baalkajor ma cok ki Epraim, ci olwoŋo awobe pa kabaka ducu me bino iye. Ocito wa bot kabaka owacce ni, “Nen, atye ki lunyar yer romina, Alego in kabaka ki Tuticci wubin wucit iye kacel kweda.”. Ento kabaka owaco bot Abcalom ni, “Pe ku meno, latinna, pe iwek wan ducu wacit kunnu, miyo wacikelli peko.” Abcalom odiye ki tek, ento pe oye cito kunnu, olamme gum keken. Abcalom dok owacci, “Ka doŋ pe icito, alegi iwek Amnon ma omera aye ocit kwedwa.” Kabaka ogamo ni, “Piŋo imito ni en bene ocit kwedwu?” Ento Abcalom odiye ki tek, mumiyo lacen oweko Amnon ocito kwede, ki awobe pa kabaka ducu, Abcalom ociko luticce ni. “Wunen maber ka doŋ cwiny., Amnon edoko yom ki koŋo vino. Ka ce doŋ awacciwu ni ‘Wucob Amnon,’ ci doŋ wuneke woko. Pe wulwor iye gin mo, pien an aye acikowu. Wubed ma cwinywu nwaŋ, Wubed twoni lweny matego.” Lutic pa Abcalom guneko Amnon kit ma ocikogi kwede, Awobe pa kabaka mukene ducu gutwarre malo ki ŋwec, ci ŋat acel acel opye i wi kanane oriŋo kwede woko. Lok okwoŋo o bot Daudi ma pud peya guo paco ni, “Abcalom oneko awobe pa kabaka woko ducu liweŋ, ma cel mo pe obwot.” Kabaka oa malo, ocako yeco boŋŋine woko pi cwercwiny, obuto piny i nom. Lutticce ma gucuŋ ka ŋete bene guyeco boŋŋigi woko, Ento Jonadab wod pa Cimea omin Daudi, owacci, “Laditta, pe ibed ka tamo ni gineko litino awobeni woko ducu. Amnon kene aye gineko. Gineko pi cik pa Abcalom, pien omoko lok man i cwinye cakke ki i kare ma Amnon omako iye laminne Tamar tektek-ki, Kombeddi, rwoda kabaka, pe ibed ka tamo ni awobeni ducu doŋ guto woko; Amnon kene aye oto,” Abcalom oriŋo woko. Ci awobi ma kuro piny otiŋo waŋe oneno piny, ci nen, lwak dano gibino ki i yo ma a ki i Koronaim kun girabo ŋet got. Jonadab dok owaco bot kabaka ni, “Doŋ inen ba, litino awobeni doŋ gitye ka bino kit macalo awacci-ni. Lokka doŋ ocobo kakare.” Ka doŋ otyeko waco lokke, ki i ŋeye cut, awobe pa kabaka gutuc paco. Gucako daŋŋe ki koko, ci kabaka bene wa ki luticce ducu gukok matek twatwal. Ento Abcalom oriŋo woko, ocito bot Talmai wod pa Amikud, kabaka me Gecur. Daudi obedo ka koko pi wode pi nino mapo!. Kit meno Abcalom oriŋo ocito i Gecur, obedo kunnu mwaka adek. Lacen ka cwiny kabaka doŋ okwe pi to pa Amnon, cwinye ocako pido pi Abcalom. I kare meno. Joab wod pa Jeruya onoŋo doŋ otyeko niaŋ maber ni cwiny kabaka tye ka pido pi Abcalom. Ci Joab ocwalo kwena i Tekoa ka omo dako mo ma laryeko ma tye kunnu. Ka obino ci owacce ni, “Ber ipor koko, dok iruk ginaruka me cola. Pe iwir komi ki moo, ento bed macalo dako ma obedo ka koko lato pi kare malac, ka icit kwede bot kabaka, icilok kwede kit man.” Kumeno Joab opiko dako-nu ki lok. Ka dako me Tekoa obino bot kabaka, ci oryebbe piny i ŋom, omiye woro, kun wacci, “Konya, ai kabaka.” Kabaka owacce ni, “Gin aŋo ma tye ka yeli?” Dako-nu ogamo ni, “Ada, an a dalako; cwara doŋ oto woko. Onoŋo atye ki awobe aryo, ci ceŋ mo gubedo ka da kekengi i poto, ma latek kingi peke; ci ŋat acel ogoyo wadi oneko woko. Ci kaka ducu gutwarre gubino i koma, gucako lok ni, ‘Kel dano ma ogoyo ominne oneko woko-ni, wek wanek woko.’. Nen, gimito neko laleyo woko, pi culo kwor pa ominne. Kit meno gimito neko dog macca mudoŋŋi, ci doŋ pe giweko gin mo pi nyiŋ cwara, en doŋ pe bibedo ki danone mo ma doŋ i wi lobo.” Kabaka owaco bot dako-nu ni, “Dok wa i odi, ci abicwalo cik ma mako lok komi.” Dako me Tekoa dok owaco bot kabaka ni, “Aliine opot i koma, laditta kabaka, ki i kom ot pa wora. Wek alii mo pe opot i kom kabaka ki i kom kom kerre.” Kabaka ogamo ni, “Ka ce ŋatti mo owacci lok mo, ci ikel en bota, ci doŋ en pe bigudo komi matwal.” Dako-nu ogamo ni, “Ladit kabaka, tim ber ikwon i nyiŋ Rwot Lubaŋani, kun iwacci, Lacul kwor remo pa lato owek neko woda obedi, wek latinna pe oto doki.” Kabaka ogamo ni, “Macalo Rwot tye makwo-ni, yer wi wodi mo pe bipoto i ŋom.” Dako-nu dok owaco ni, “Alegi ni iwek dok alok lok mo acel boti, laditta kabaka.” Kabaka ogamo ni, “Waci.” Dakonu owacci, “Piŋo cwinyi oteri ka tiyo gin marac i kom lwak pa Lubaŋa? Pi kit ŋol ma iŋolo-ni omiyo in kabaka iŋolo kop i komi keni ni oloyi, pien pe idwoko latin ma giryemo woko-ni paco. Wan ducu wabito woko, wan wacalo pii ma okir piny i ŋom, ma pe dok gitwero gurone kacel. Ento Lubaŋa pe twero kwanyo kwa pa ŋat mo ma yenyo yo wek danone ma giryemo pe giryem woko matwal. An abino kany ka lok kwedi, laditta kabaka pien dano gumiya lworo, omiyo atamo ni, ‘Abilok ki kabaka; gwok kabaka bitiyo iye gin mo i kom lok ma alego dok bicobone. Pien kabaka biwinyo, ci bilaro laticce ki i ciŋ dano ma gimito jwayo an kacel ki woda woko ki i lobo pa Lubaŋa.’ Dok onoŋo atamo ni, ‘Lok pa laditta kabaka bimiyo cwinya kwe.’ Pien in, laditta kabaka, irom ki lamalaika pa Lubaŋa ma poko kin lok maber ki maracce. Rwot Lubaŋani obed kwedi.” Kabaka dok ogamo dog dako-nu ni, “Pe imuŋŋa lok ducu ma apenyi kwede.’ Dako-nu ogamo ni, “Lok ba, laditta kabaka.” Kabaka openye ni, “Wun wuribo dogwu ki Joab i kom lok man ducu?” Dako-nu ogamo kun wacci, “Lok me adane, kit ma it ye makwo-ni, laditta kabaka, dano pe twero lokke yo tuŋ acuc nyo yo tuŋ acam i kom lok ma in kabaka ipenyoni, Laticci Joab aye ociko an; en kikome aye oketo lok magi ducu i doga, Laticci Joab otimo man wek tam manyen obin. Ento in, laditta kabaka, ryekoni rom ki ryeko pa lamalaika pa Lubaŋa, pien iŋeyo gin ducu ma timme i wi lobe-ni.’ Lacen kabaka owaco bot Joab ni, “Nen ba, tin ajolo lokki. Ber icit iciom latin man Abcalom, idwok en paco.” Ci Joab opoto oryebbe piny i ŋom omiyo woro, olamo gum i kom kabaka: Joab owacci, “Tin an laticci doŋ aŋeyo ni ayomo cwinyi, laditta kabaka, pien ityeko jolo gin ma alego boti.” Joab ocito i Gecur, oomo Abcalom okele paco i Jerucalem. Ento kabaka ociko ni, “Wek en koŋ obed ki cen i ode, pe obin i nyima kany.” Ci Abcalom obedo gire ki cen i ode, pe omedo ki bino i nyim kabaka. I kare-nu pe tye ŋatti mo ma giboro mwonyane makato Abcalom ki i lobo Icrael ducu; kome mwonya cakke ki i tyene nio wa i cwiny dye wiye, kome ducu nen mwonya matek. En yam ŋolo yer wiye i tum mwaka ducu; ka oneno ni yer wiye doŋ odoko pek, ci doŋ ŋolo woko. Ka ce olyelo yer wiye, en pimo ki mijan pa kabaka, ci pekke kato ratili adek ki nucu. Abcalom onoŋo tye ki litino awobe adek ki nyako acel ma nyiŋe Tamar; nyako-nu bene mwonya matek. Abcalom obedo i Jerucalem pi mwaka aryo ma pe cito i nyim kabaka. Lacen ocwalo kwena bot Joab wek otere bot kabaka, ento Joab pe omedo ki cito bote. Dok ocwalo kwena tyen me aryone, Joab dok pe ocito bote. Ci Abcalom owaco bot luticce ni, “Nen, poto pa Joab tye cok ki mera, ocoyo bel cayiri iye. Wucit wuwaŋ woko.’ Joab oa ocito bot Abcalom, odonyo i ode, ci openye ni, “Piŋo luticci guwaŋo potona woko?” Abcalom ogamo dog Joab ni, “Abedo ka cwalo lok boti ni ibin kany wek acwali bot kabaka, wek ipenye ni, ‘Piŋo aa woko ki i Gecur. Kono nene abedo gira kunnu.’ Kombeddi amito cito i nyim kabaka. Ka roc mo tye i koma, wek en oneka woko.’ Joab ocito bot kabaka, owacce lokke, ci kabaka olwoŋo Abcalom. Abcalom ocito bot kabaka, oryebbe piny i nyime, ci kabaka ojole onoto leme. I ŋe meno Abcalom ocako noŋo gadigadine ki aguragura me ywayone, ki dano pyerabic ma’ giriŋo i nyime. Obedo ka a malo odiko con jwijwi, ci cuŋ i ŋet yo i dogcel me Jerucalem. Ka oneno dano mo ma okelo lok me alara bot kabaka, en lwoŋo dano-nu ci waco bote ni, “In ia ki gaŋ mene?” Ka ce dano meno owaco ni, “An aa ki i Icrael i kaka munyo,” ci Abcalom waco bote ni, “Nen ba, lokki nen mit dok tye atir, ento ŋatti mo pe tye ma kabaka oketo ma biwinyo lokki.” Abcalom dok waco ni, “Kono yam giketo an aye abedo laŋolkop i lobo-ni, kono ber twatwal! Kono ŋat ma tye ki lokke nyo pidone tugi bino bota, ci aŋolle kop matir cut.” I kare ducu ka dano bino ryebbe piny ka miye woro, ci en cwalo ciŋe kwako ki dano-nu, ci mote ki mot me mar. Abcalom obedo ka timo jo Icrael ducu kit meno ka gibino ka pidogi bot kabaka; ci oywayo cwiny jo lerael ducu odwoko i kome. I agikki me mwaka me aŋwenne, Abcalom openyo kabaka ni, “Alegi wek acit Kebron ka cobo kwoŋŋa ma yam akwoŋo bot Rwot, Pien yam akwoŋo kwoŋ, ladit, i kare ma abedo i Gecur i lobo Ciria kun awacci, ‘Ka Rwot odwoka tuwa i Jerucalem ada, ci abicito ka miye woro.’’’ Kabaka ogamo ni, “Ber icit ki kuc.” Ci Abcalom ocito i Kebron. Ento Abcalom ocwalo lukwena i muŋ ci guwoto gurumo i kaka pa jo Icrael ducu, kun en ciko ni, “Ka tekke wuwinyo dwan tum okok, ci wuwacci, ‘Abcalom doŋ odoko kabaka i Kebron!’” Abcalom ocito ki dano ma gua ki i Jerucalem ma giromo miya aryo ma olwonogi macalo welo. Gin gucito ata ma pe giŋeyo tere. I kare ma Abcalom tye ka tyero gitum, ocwalo kwena olwoŋo Akitopel ma jo Gilo, ma lami-tam pa Daudi, ci en oa ki i gaŋgi Gilo, obino. Ci piro lokgi omedde matek, lwak gubedo ka medde bot Abcalom ameda. Kwena obino bot Daudi ma wacce ni, “Cwiny jo Icrael odak woko ka lubo kor Abcalom.” Daudi owaco bot jo ducu ma gitye kwede i Jerucalem ni, “Wutugi a wek warinu woko. Ka pe wurune wacito woko oyoto, ci dano mo pe bibwot ki i ciŋ Abcalom, miyo bipoto i komwa, ci bikelo can madwoŋ i komwa. En bineko dano ma i gaŋ tyeko woko ki pala lucwan.” Ci lutic pa kabaka guwaco bote ni, “Nen ba, wan luticci watye ka kuro gin ducu ma in imoko.” Kabaka ocito woko ki jo ma i ode ducu i kore, ento oweko mon aŋeca ma giromo apar ka gwoko ot. Kabaka ocito woko ki lwak ducu i kore; ci ocuŋ cok ki ot me agikkine. Luticce ducu gumol gukato ki i nyime; ki jo Keret ducu, ki jo Pelet ducu ki jo Gat miya abicel ma yam gulubo kore nia ki i Gat; gin ducu gumol gukato ki i nyim kabaka. Kabaka owaco bot Itayi, dano me Gat, ni, “Piŋo in bene icito kweda? Dok cen icibed ki kabaka manyen; pien in larok ma ia woko ki i lobowu. Pud ibino abina laworo maca, ka an tin dok amiyi ibed ka wirre ka mal ata kwedwa? Nen, an abiwoto ka ma pe aŋeyo. Dok cen, ikwany omegiwu gudok kwedi. Myero Rwot omi marre ma pe lokke, ma genne, obed i komwu.” Ento Itayi odok iye bot kabaka ni, “Macalo Rwot tye makwo-ni, dok macalo in kabaka it ye makwo-ni, kabedo ducu ma ibibedo iye, laditta, kadi bed to kadi bed kwo, an bene abibedo kunnu.” Daudi owaco bot Itayi ni, “Doŋ ikat wacit kacel,” ci Itayi me Gat okato kacel ki jone ducu ki litinone matino ma gitye bote ducu. Dano ducu gubedo ka koko matek i kare ma jo pa Daudi gikato ka netgi, Kabaka Oŋolo laora kulu Kidron, ci lwak ducu gukato gukemo yo tim. Ka Abiatar obino, ci Jadok bene otugi bi no ki jo Levi ducu, ma gutiŋo canduk me gicikke pa Lubaŋa. Guketo canduk pa Lubaŋa piny, nio ka lwak ducu gumol ki i gaŋ, gukato woko. Kabaka owaco bot Jadok ni, “Tiŋ canduk pa Lubaŋa, idwok cen i gaŋ, Ka ce alimo gum bot Rwot, ci abidwogo paco ci dok aneno kome ki ka ma en bedo iye. Ento ka Rwot owacci pe etye ki yomcwiny mo i koma, ci nen, an doŋ atye ene, wek en doŋ otim i koma gin ducu ma en neno ni ber ki tuŋ bote.” Kabaka dok owaco bot ajwaka Jadok ni, “Nen ba, wudok i gaŋ, wun ki Abiatar ki awobewu aryo, Akimaj ma wedi-ni ki Yonacan wod pa Abiatar. Abikurogi ki i waŋ wat ma i tim, nio ka lok bia ki botwu ma miya ŋec mogo.” Kit meno Jadok ki Abiatar gutiŋo canduk pa Lubaŋa, gudok kwede cen i Jerucalem, ci gubedo kunnu. Ento Daudi ocako ito malo i wi got Jeituni. En ito malo ki koko, ki tyene noŋo, ma oumo wiye; ki jo ma gitye kwede ducu guumo wigi, ma giwoto kun gikok. Ka dok gitito bot Daudi ni, “Akitopel bene tye i kin lupir lok ki Abcalom,” Daudi olego Rwot ni, “Ai Rwot, alegi imi tam ma Akitopel miyo obed lok me minmin.’ Daudi oito malo, oo i wi got ka ma giworo iye Lubaŋa, Ci nen, Kucai ma La-arki otuc, obino ka rwatte kwede ma kanyine oyec woko, ki ma ojuko wiye ki ŋom. Daudi owacce ni, “In ka iwoto kweda ibimiya peko, Ento ber idok i gaŋ ci iwac bot Abcalom ni, ibibedo laticce, kit ma yam ibedo laticca i kare ma an abedo kabaka. Ci’ in aye ibibalo tam ma Akitopel miyo bote. Jadok ki Abiatar ajwagi pa Lubaŋa gibibedo kwedi kunnu. Awobegi aryo bene gitye kunnu, Akimaj wod pa Jadok ki Yonacan wod pa Abiatar. Ibicwalla lok ducu ma iwinyo, wok ki botgi.” Kit meno Kucai ma larem Daudi obino i Jerucalem ki i kare ma Abcalom donyo kwede i gaŋ, Ka Daudi okato cwiny wi got manok, ci Jiba laticpa Mepibocet orwatte kwede kun tye ki kana aryo ma gitweyo kom me bedo i wigi, dok guyeyo mugati miya aryo, tuga olok mutwo miya acel, nyig yat mucek i oro miya acel ki opiro koŋo vino acel. Kabaka openyo Jiba ni, “Ikele jami-ni me ŋo?” Jiba ogamo ni, “Akelo kana pi konyo jo ma i odi, kabaka, wek gubed i wigi me wotgi, ki mugati me acama pa awobeni, ki koŋo vino me amata pa jo ma komgi oloc i tim.” Kabaka dok openye ni, “Latin pa Laditti Caulo tye kwene?” Jiba ogamo dog kabaka ni, “Aweko en tye odoŋ i Jerucalem; pien en tye ka tamo ni, tin doŋ jo me ot pa Icrael gibidwoko ker pa wonne i ciŋe.’ Kabaka owaco bot Jiba ni, “Nen ba, jami ma yam pa Mepibocet ducu tin doŋ gudoko meri.” Jiba ogamo ni. “An doŋ apoto aryebbe piny i nyimi, wek amedde ki noŋo gum i nyimi, laditta kabaka.” Ka kabaka oo i Bakurim, ci laco mo obino bote, dano me ot pa Caulo, Nyiŋe Cimei wod pa Gera, En woto bino kun ceno dano’ medde kwede ameda, kun celo Daudi ki got-gu, wa lutic pa kabaka ducu, ki lwak ducu, ki twoni lweny ducu ma gitye i ŋet Daudi yo tuŋ lacuc ki yo tuŋ lacam. Cimei obedo ka ceno dano kunwacci, “Wot iciti, wot iciti, in lao remo, in dano ma kite peke! Rwot doŋ oculo kwor i komi pi oyo remo i ot pa Caulo ma koni it ye ka loc makakare. Rwot doŋ otiŋo ker omiyo woko i ciŋ wodi Abcalom. Neri ka to-piny doŋ opoto i komi, pien in i dano ma lao Remo.” Abicai wod pa Jeruya owaco bot kabaka ni, “Piŋo gwok muto-ni’ bedo ka ceni, laditta kabaka? Wek akat i kome aciŋol wiye woko.” Ento kabaka ogamo ni, “An alaro aŋo kwedwu, wun awobe pa Jeruya? Ka ce en tye ka ceno an ma onoŋo Rwot aye ocike ni, ‘Cit icen Daudi,’ ci aŋa ma dok biwacci, ‘Piŋo itimo kit meno?’ ” Daudi dok owaco bot Abicai ki luticce ducu ni, “Nen ba, woda aye mito neka, ci Labenjamin man pe doŋ bimito neka makato? Wuwek en obedi, wek obed ka cena gire, pien Rwot aye ocike. Gwok nyo Rwot aye bineno kit atwom ma tye i koma, ci Rwot aye biculla ki gin maber ma ka cen ma gicena kwede tin.” Kit meno Daudi ki lwak ke gulubo yo gucito gigi; kun kono Cimei woto rabo ŋet got ma woto porre ki Daudi, kun woto cene kwede, ka bayo got celo ki kome, ka onyo apwa bene i kome. Kabaka ki jo ducu ma gitye kwede guwoto guo i dog kulu Jordan ma guol matek, ci kabaka ocako jiŋ maber ki kenyo. Abcalom ki lwak ke ducu, ma gin jo Icrael, gubino gucorre i Jerucalem kacel ki Akitopel. Ka Kucai ma La-arki, ma larem Daudi, obino bot Abcalom, Kucai owaco bot Abcalom ni, “Kabaka obed kwo nakanaka. Kabaka obed kwo nakanaka!” Abcalom owaco bot Kucai ni, “Meno aye yo me nyuto mar bot laremi bo? Piŋo pe icito kacel kilaremi?” Kucai owaco bot Abcalom ni, “Pe kumeno, pien ka ŋat ma Rwot ki lwak man kacel ki jo Icrael ducu gutyeko yerone, an abibedo danone dok abibedo kwede bene, An dok abitiyo bot aŋa? Pe myero abed bot wode kikome? Kit ma yam abedo ka tic bot woru-ni, abitic boti bene kit meno,” Abcalom dok owaco bot Akitopel ni, “Ŋolla ryeko ba; doŋ wabitimo gin aŋo?” Akitopel owaco bot Abcalom ni, “Doŋ itugi cito bot mon aŋeca pa woru, ma owekogi ka gwoko ot-ti. Ci jo Icrael ducu gibiwinyo ni, in piri doŋ odoko uwe bot woru, miyo jo ducu ma gitye tuŋ boti komgi biyarre woko ki tek.” Kit meno giguro kema pi Abcalom malo i wi ot, ci Abcalom ocako donyo i, wi moo aŋeca pa wonne ma Jo Icrael ducu gineno. I kare meno tam ducu ma Akitopel miyo nen calo lok pa Lubaŋa kikome. Tam me ryeko ma Akitopel miyo nen ber kit meno bot Daudi wa bot Abcalom bene. Akitopel dok owaco bot Abcalom ni, “Wek ayer dano alip apar wiye aryo, wek an kikoma acak wot me lubo kor Daudi tin, i dyewor. Abio bote ma noŋo pud ooI woko, ma tamme bene goro; wek atugi bano kome woko, ci jo ma gitye bote ducu gibiriŋo woko. Abineko en kabaka keken, ci abidwoko lwak ducu boti, macalo nyako ger ma bino paco bot cware, Tye dano acel keken ma imito neko, ci lwak ducu gibibedo ki kuc.” Tam meno me ryeko oyomo cwiny Abcalom ki ludoŋo pa jo Icrael ducu. Abcalom dok owacci, “Wulwomja Kucai La-arki bene, wek wawinyu bene gin ma en biwaco.” Ka gilwoŋo Kucai, obino bot Abcalom, ci Abcalom owacce ni, “Akitopel owaco kuman kuman, wabitic ki kit tamme-ni? Ka pe, ci in iwaci.” Kucai owaco bot Abcalom ni, “Tam ma Akitopel okeloni pe ber.” Kucai dok omedde ki lokke ni, “In iŋeyo maber ni, woru ki jone ducu gin lulweny matego, gin gitwoni ma lugero magwa, macalo ŋuu ma ger pi litinone ka gimako i tim. Dok pud amedo ni, woru oyita lweny, en pe twero buto ki lwak kacel i dyewor, Nen ba, kadi wa kombeddi en tye mukanne woko i bur kaikene, nyo i kabedo mo kunnu. Ka ce owinnye ni jo mogo ginekogi woko ki i lweny mukwoŋo-ni, ka dano mo owinyo biwacci, gibedo ka neko dano ma gubedo ka lubo kor Abcalom. Ci kadi bed dano mo yam oteka lweny, ma cwinye nwaŋ macalo cwiny labwor, cwiny me lworo bimiyo kome to woko lirut; pien jo Icrael ducu giŋeyo ni woru oyi ta lweny, ki jone ma gitye bote ducu gin oteka lweny. Ento an amiyo tamma kit man ni, wek jo Icrael ducu gucokke boti, cakke ki i Dan nio wa i Beer-ceba, wek gubed mapol ma rom ki kweyo ma i dog nam, in kikomi bene icit kwedgi ka lweny. Kit meno miyo wabipoto i kome ki i kabedo mo ma kome binoŋŋe iye, ci wabicorre i kome macalo toyo ma poto luk i ŋom: ci en kikome ki jo ducu ma gitye kwede ŋatti mo acel i kingi pe bibwot. Ka ce oriŋo woko odonyo i gaŋ mo, ci jo Icrael ducu gibikelo tol girumo ki gaŋ meno, gicako ywayo gicoro woko wa i nota; kadi wa kidi laliŋliŋ mo pe gibinoŋo mudoŋ kunnu.” Ci Abcalom ki lwak ducu ma i Icrael gugamo ni, “Tam ma Kucai La-arki omiyo-ni aye ber makato pa Akitopel.” Pien onoŋo Rwot yam doŋ oketo ni, gibibalo te tam pa Akitopel woko kadi bed ber twatwal, ka wek Rwot oket can mapek i kom Abcalom. Gimiyo ŋec bot Daudi ci obwot woko Lacen Kucai dok otito lok bot ajwaka Jadok ki Abiatar ni, “Akitopel onoŋo omiyo tam me ryeko bot Abcalom ki Ludoŋo pa jo Icrael kuman; ki an bene dok amiyo tamma knman. Kombeddi doŋ wucwal kwena oyotoyot bot Daudi wutitte ni, tin pe dok obut i waŋ wat ma i tim, ento oa woko oyoto okat wa loka ca, wek pe mony omak kabaka ki jo ma en tye kwedgi onekgi woko ducu.” I kare meno onoŋo Yonacan ki Akimaj gubedo ka kuro lok i En-rogel. Kunnu aŋeca mo wirre iye jwijwi ka tero lok botgi, ka gikwano lokke gitero gitito bot Daudi; ento gigwokke ma komgi pe nen ka gidonyo i gaŋ. Ento latin awobi mo waŋe ocob i komgi ci onenogi, ocito otito pigi bot Abcalom. Gin aryo ducu gurune gucito i paco pa dano mo ma i Bakurim ma onoŋo tye ki waŋ itte i dyekalle, ci gudonyo gulutte iye. Dakone otiŋo laum dog waŋ it opeto oumo ki wiye, ka okelo kai omoyo i wiye; pe tye dano mo ma ŋeyo, Ka lutic pa Abcalom gubino ci gudonyo i gaŋ meno bot dako, ci gupenye ni, “Akimaj ki Yonacan gitye kwene?” Dako-nu owaco botgi ni, “Doŋ gityeko kato nota ora ma pii tye iye-ni woko.” Ka gubedo ka yenyo korgi ci pe gumedo ki nonogi, lacen gudok woko cen i Jerucalem. Ka jo-nu doŋ gucito, ci Akimaj ki Yonacan gukato woko ki i waŋ it, gucito gutito lok ducu bot kabaka Daudi, Guwaco bote ni, “A woko ki kany oyot wek iŋol kulu ikat loka ca; pien Akitopel aye omiyo tamme kit man kun mi yo tamme i komi.” Daudi otugi a malo cut, kacel ki lwak ducu ma gitye kwede, ci guŋolo loka kulu Jordan, Kwarpiny pe tye dano acel mo ma odoŋ ma pe oŋolo loka kulu Jordan. Ka Akitopel oneno ni tamme me ryeko-ni pe giye lubone, otweyo kom bedo i wi kanane, oito i wiye oriŋo kwede i gaŋŋe. Ka oyubo ode ducu maber, ci ocito odene woko, ci oto woko cut, giyiko i lyel pa wonne. Daudi ocito i Makanaim. Ci Abcalom oŋolo loka kulu Jordan kacel ki jo Icrael ducu, I kare meno onoŋo Abcalom oketo Amaca aye dok obedo ladit ma lawimony ma ka Joab. Amaca aye wod pa laco mo ma nyiŋe Itra ma La-icmael, ma onyomo Abigal nya pa Nakac, ma lamin Jeruya ma min Joab. Jo Icrael kacel ki Abcalom gugony i lobo Gilead. Ka Daudi obino i Makanaim, ci Cobi wod pa Nakac ma gaŋgi Raba, gaŋ pa jo Ammon, ki Makir wod pa Amiel ma gaŋgi Lo-debar, ki Baŋilai ma jo Gilead ma gaŋgi Rogelim, gukelo ki tanda buto mapol, ki becengu, agulu-gu, nano bel cayiri, moko kwon, bel ma gicelo, muraŋa ki nor-gu, moo kic, cak lukulu, romi, cak mutwo ma giyubo ki cak dyaŋ, ci gumiyo bot Daudi ki lwak ke wek gucam, pien gutamo ni kec obedo ka neko lwak, omiyo komgi oloc woko, orwo ii bene onekogi i tim. Daudi oniyo lwak ma tye bote, oketo ludito ma giloyo wi mony pi dano alip ki dano miya. Ci ocwalo mony okato woko, dul acel me adek obedo i te twero pa Joab, dul acel me adek i te twero pa Abicai wod pa Jeruya ma omin Joab, ki dul acel me adek i te twero pa Itayi dano nie Gat. Kabaka owaco bot jone ni, “An kikoma bene abicito kacel kwedwu.” Ento dano gugamo ni, “Pe ibikato icito kwedwa. Pien ka wariŋo woko, ci gin pe gibiparo piwa; kadi bed nucu dano oto, pe giparo piwa. Ento in kikomi aye piri tek ma rom ki pi jo alip apar; pienno myero ibed ka cwalowa kony ma a ki i gaŋ man.” Kabaka owaco botgi ni, “Gin ducu ma wuneno maberre en aye abitiyo.” Kit meno kabaka ocuŋ i ŋet doggaŋ kun lumony ducu gimol gikato ki i dulgi, jo miya miya ki jo alip alip. Kabaka ociko Joab ki Abicai ki Itayi ni, “Macalo an a wonne, awacci, wutim ber ki latin awobi-nu, en Abcalom.” Ci lwak ducu guwinyo ka kabaka ociko ludito wi mony pi Abcalom. Kit meno mony okato woko i tim ka lweny ki jo Icrael; ci gucako lweny i buŋa me Epraim. Lumony pa Daudi guloyo jo Icrael, ci neko dano obedo madit i nino meno; guneko dano ma romo alip pyeraryo kulu. Lweny oromo i lobo ducu, dok kadi wa buŋa bene oneko dano otyeko woko, makato pala lucwan. Ka Abcalom otugi rwatte ki lumony pa Daudi, kun en tye ka ŋwec ki kanane, ci kana oriŋo ocorre kwede i te kworo madit ma jaŋe oluk oculle woko. Wi Abcalom orwakke omoko woko ‘i kin jaŋ kworo, ci kana oweke kun Lyerre i kin polo ki lobo, kana ma en oito i wiye-ni obedo ka medde ki ŋwec. Ka dano mo onene ci otito bot Joab ni, “Nen, aneno Abcalom tye ka lyerre malo i wi yat kworo.” Joab owaco bot dano mutitte lok-ki ni, “Iwacci ŋo? Ineno kome? Ci piŋo pe icobo ireto woko piny i nom? Kono itimo kumeno, kono cwinya obedo yom i komi, amiyo mot boti ma romo dul ryal apar, ki del pyer bene.” Ento laco-nu ogamo dog Joab ni, “Kadi ciŋa tiŋ dul ryal ma pekke alip acel kulu, pe atwero tiŋo ciŋa aketo i kom wod pa kabaka. Wan bene wawinyo ka kabaka ciko in ki Abicai ki Itayi ni, ‘Macalo an a wonne, awacci wugwok latin awobi-nu en Abcalom.’ Dok bene ka nene atimo bwami ce aneke woko, (kun kono pe tye gin mo ma kabaka pe ŋeyo), kadi in kikomi bene iwene iye woko.’ Joab ogamo ni, “Pe abibalo kare ma rom man ka lok kwedi.’ Ci okwanyo toni adek i ciŋe, ocobo kor Abcalom i adunone ki gin adek ducu, ma onoŋo tye olyerre i wi kworo makwo. Lacen awobe apar ma gin lutin jami lweny pa Joab gubino gurumo Abcalom gucobo guneko woko. Joab okuto tum, mony ducu odwogo woko cen ki ka ryemo kor jo lerael; pien Joab doŋ ojukogi woko. Gutiŋo kom Abcalom gubolo i te bur matut ma i buŋa, guyweko lwak godi madwoŋ gutoro i wiye, Ci jo Icrael guket woko, kun dano acel acel dok i gaŋŋe. Onoŋo Abcalom yam ocibo wir got ocuŋ i nota pa Kabaka, pien obedo ka wacci, “An pe atye ki woda mo me po nyiŋa.’ Ocako nyiŋ” wir meno ki nyiŋe kene, ci pud gilwoŋo ni got me po Abcalom nio wa onyoo. Akimaj wod pa Jadok owacci, “Wek ariŋ ater lok bot kabaka, aciwacce ni, ‘Rwot doŋ otyeko lari ki i ciŋ lumerokki.’ Joab ogamo ni, “Pe ibitero lok tin. Ibitero i nino mukene, ento tin pe ibitero lok mo, pien wod pa kabaka aye doŋ oto woko.’ Joab owaco bot dano mo me lobo Kuc ni, “Rin icitit bot kabaka gin ma doŋ ineno.’ Lakuc okulo wiye i nyim Joab, ka ocako ŋwec. Akimaj wod pa Jadok dok openyo Joab ni, “Gin ma mito timme myero otimme i koma, ento wek an bene ariŋ i kor Lakuc.” Joab ogamo ni, “Imito riŋo kunnu piŋo ce, latinna? Nen, pe ibinoŋo iye mot mo pi tero lok man,” Akimaj dok owacci, “Gin ma mito timme onen. An abirino.” Joab owacce ni, “Rin do.” Akimaj ocako riŋo i kora yo ma i yo bar, ci okato Lakuc woko ki ŋwec. I kare meno onoŋo Daudi obedo piny i kin doggaŋ me iye ki en me wokoni, kun lakur-piny onoŋo oito malo i wi ot ma i wi doggaŋ, ma cok ki cel ma orumo gaŋ-ŋi. Ka lakur-piny otiŋo waŋe ka neno piny, ci oneno dano mo ka riŋo bino en kene. Lakur-piny odanne owaco bot kabaka. Kabaka ogamo ni, “Ka ce en tye kene, ci tye ki lok ma okelo.’ Dano ca omedde ki ŋwec bino kwede cok. Lakur-piny dok oneno dano mukene ka riŋo bino. Ci odaŋŋe bot dano ma i doggaŋ ni, “Dano mukene dok tye ka bino ki ŋwec, en kene!” Kabaka owacci, “En bene obekelo lok mo.” Lakur-piny owacci, “Atamo ni, laŋwec mutelo yo-ni nen calo Akimaj wod pa Jadok.” Kabaka owacci, “En dano maber, en obebino ki lok mabeco.” Akimaj odaŋŋe matek ni, “Kabaka, piny tye maber.” Ci okulo wiye piny i nyim kabaka oryebbe kwede piny i ŋom kun waco ni, “Pwoc obed bot Rwot Lubaŋani, ma doŋ olari ki i ciŋ dano ma gutiŋo ciŋgi ka lweny i komi, laditta kabaka.” Kabaka openyo ni, “Lok mo marac pe i kom awobina Abcalom?” Akimaj ogamo ni, “I kare ma Joab cwala ki lok, awinyo woo madwoŋ ki yo neya, ento pe doŋ aniaŋ i gin mutimme-ni.’ Kabaka owacci, “Koŋ ilokke icuŋ ki kenyo.” Ci olokke ocun mot. Nen, Lakuc bene obino, ci otugi wacci, “Akelo lok maber bot laditta kabaka! Pien Rwot otyeko lari ki i tek pa jo ducu ma onoŋo gutiŋo lweny i komi.” Kabaka openyo Lakuc ni, “Lok mo pe marac i kom latinna Abcalom?” Lakuc ogamo ni, “Lumerokki ki jo ducu ma gutiŋŋe ka lweny i komi marac-ci gubed macalo latin awobi-ni, laditta kabaka.’ Cwiny kabaka opoto lirim, ci oa malo oito malo i kicika ma tye i ot ma i wi doggaŋ, ocako koko kun woto kwede, ma koko wode ni, “A woda Abcalom, woda Abcalom! Kono nene an aye ato ma kakari do! Oii Abcalom, woda, woda do!” Gitito bot Joab ni kabaka tye ka koko ki ka kun o pi Abcalom. Kit meno loyo mony me nino-nu olokke odoko me kumo’ palwak ducu, pien lwak ducu guwinyo i nino meno ni, “Cwiny kabaka tye ka ton pi wode.” Ci dano gubedo macalo jo ma mony aye oryemogi, pien gikwalle akwala ka gidonyo kwede i gaŋ ki lewic i nino meno. Kabaka oumo wane woko, obedo ka koko ki dwan maloŋo ni, “Ai woda Abcalom, ai Abcalom, woda, woda do!” Joab odonyo i ot bot kabaka Daudi, owaco bote ni, “In tin i mako luticci ducu ki lewic, ma gin aye tin gularo kwoni, ki kwo pa awobeni ki anyirani, ki kwo pa monni ki mon aŋecani ducu, In kara imaro jo ma dag waŋi, idag jo ma gimari. Tin doŋ inyuto woko ka maleŋ ni, ludito wi monnyi ki luticci ducu pe gitye ki kony mo boti. Tin doŋ aniaŋ atir ni, kono nene Abcalom aye obwot makwo, kun wan wato woko ducu, kono tin cwinyi obedo yom maka to. Ber ia malo kombeddi, ikat woko wek icilok ki luticci lok mabeco, pien akwoŋo ki nyiŋ Rwot ni, ka pe iye kato woko, ci pe dano mo tin bidoŋ boti i dyewor man; dok man aye bibedo rac boti makato can madoŋo ma ilimo ducu cakke ki ka tinoni nio kwede wa onyoo.” Kabaka otugi a malo cut, ocito obedo i kabedone i doggaŋ, Ci gitito bot lwak ducu ni, “Nen, kabaka tye obedo i doggaŋ.” Ci dano ducu gucako bino i nyim kabaka, Onoŋo jo Icrael guriŋo woko ducu, kun dano acel acel odok i gaŋŋe: Dano ducu gubedo’ ka pyein ki i kaka ma i Icrael ducu, kun gipyem ni, “Kabaka aye yam olarowa ki i cin lumerokwa, dok en aye olarowa ki i cin jo Piliciti. I kare-ni en doŋ oriŋo oweko lobowa pi lworo Abcalom. Ento Abcalom ma yam wawiro ki moo wek olowa-ni doŋ oto woko i mony. Ci piŋo pe doŋ giloko iye lok mo kombeddi pi dwoko kabaka paco?” Ka lok ma jo Icrael ducu gubedo ka waco oo bot kabaka Daudi, ocwalo kwena bot Jadok ki ajwaka Abiatar kun wacci, “Wuwac bot ludoŋo pa jo Juda ni, ‘Piŋo wun aye wudoŋ cen ka gidwoko kabaka paco i ode? Nen, wun aye utmega, wun aye wucogo na ki riŋo koma; ci piŋo wun aye dok wudoŋ cen ka gidwoko kabaka paco?’ Dok wuwac bot Amaca ni, ‘In giri ibedo watta. Lubaŋa myero oket can i koma kumeno ki maka to, ka pe in aye idoko ladit ma loyo monnya ma ka Joab, cakke tin cito kwede anyim.’ ” Kumeno omiyo dano ducu ma i Juda gumoko i kom Daudi ki cwiny acel, ci gucwalo lok bote ni, “Doŋ idwog cen, in kacel’ ki luticci ducu.” Mumiyo kabaka ocako dwogo cen oo i kulu Jordan. Ci jo Judagubino i Gilgal ka jolo wiye ki ka dwoko kabaka cen loka kulu Jordan. Cimei wod pa Gera, ma jo ‘Benjamin, dano me Bakurim, en bene orune obino kacel ki jo Juda ka jolo kabaka Daudi, kun bino ki jo” Benjamin ma romo alip acel. Ki Jiba “ma, latic ma loyo ot pa Caulo, ki awo bene apar wiye abic, ki luticce pyeraryo, gin bene gucorre i kulu Jordan ci gutuc i nyim kabaka. Gukato ki i waŋ wat pi kelo dano pa kabaka loka kulu, ki pi tiyo gin ducu ma kabaka mito, Ka Cimei wod pa Gera obino, ci opoto piny i nyim kabaka i kare ma kabaka doŋ mito ŋolo Jordan, Owaco bot kabakani, “Kabaka, pe imak balla i cwinyi, pe ibed ka po i kom gin ma yam atimo i komi marac, laditta kabaka, i kare ma ia kwede i Jerucalem. Pe iket lokke i cwinyi. An laticci aŋeyo maber ni atimo bak Pienno, nen an doŋ tin abino, dok an aye akwoŋo bino ki i kin dano me ot pa Yucepu ka joli.” Abicai wod pa Jefuya ogamo ni, “Pe gibineko Cimei woko pi lok mari, pien yam obedo ka ceno dano ma Rwot owiro?” Ento Daudi ogamo ni, “Gin aŋo ma alaro kwedwu, wun awobe pa Jeruya, ma wun bene tin wulokke wudoko lumerokka? Tin dok gibineko dano i kin jo Icrael? Tin aye doŋ aniaŋ atir ni, an kabaka ma loyo jo Icrael.’ Kabaka dok owacci, “In Cimei pe ibito.” Ci okwoŋŋe kwoŋ lamok lokke. Mepibocet wod pa Caulo bene obino ka jolo kabaka. Obino ma pe oŋolo Lwet tyene-gu, dok pe okido yer tike, pe ojwero bene wek obed maleŋ, pe olwoko wa boŋŋine cakke ki i kare ma kabaka oriŋo kwede nio i kare me dwogone ki kuc. Ka oa ki i Jerucalem obino ka jolo kabaka, kabaka openye ni, “Mepibocet, piŋo yam pe icito kweda?” Mepibocet ogamo ni, “Laditta, laticca aye obwola. Onoŋo awaco hote ni, ‘Twenakom bedo i wi kanana, wek abed iye,’ acit kacel ki kabaka.’ Pien tyena okwe woko. En ocoko lok me goba i koma owaco boti, laditta kabaka. Ento in icalo lamalaika pa Lubaŋa, mumiyo in itim gin ma ineno ni ber. Onoŋo yam jo ma i ot pa wora ducu kwogi okemo to keken ki i nyimi, ento in iketa i kin dano ma gicamo i wi mejani. Doŋ kit gin aŋo ma myero dok akok iye boti?” Kabaka ogamo ni, “Piŋo ibedo ka titta lok i komi twatwal? An doŋ atyeko ŋolo atir ni, wun ki Jiba wubipoko lobo.” Mepibocet owacci, “Kabaka, ka kumeno keken, ci wek en oter ducu, macalo in laditta kabaka doŋ idwogo paco ki kuc-ci.” I kare-nu Barjilai ma Lagilead bene obino ma oa ki i Rogelim; ci olwoko kabaka oo kwede i dog kulu Jordan, wek enol kwede loka tuŋcel. Baŋilai onoŋo doŋ oti woko, mwaka me ditte doŋ romo pyeraboro. En aye yam obedo ka miyo cam bot kaba ka i kare ma kabaka tye i Makanaim, pien onoŋo en lalonyo mada. Kabaka owaco bot Baŋilai ni, “Bin wakat kwedi loka ca, abigwoki i Jerucalem.” Baŋilai owaco bot kabaka ni, “An pud adoŋ ki mwaka adi me bed ona wi lobo, ma miyo dok acito wa i Jerucalemmi? I kare man an ditta doŋ romo mwaka pyeraboro. An pud dok atwero poko kin gin ma yomo cwinya nyo ma pe yomo cwinya? Pud dok abilo mit pa cam ma acamo, nyo gin ma amato? An pud dok atwero winyo wer ma co nyo mon giwero? Ci lok aŋo ma miyo amedo peko i komi, laditta kabaka? Abinywako yo kwedi manok me lwoki nio ka iŋolo loka kulu Jordan. Dok piŋo icula ki mot macalo meno? Doŋ alego ni, wek adok cen i gaŋŋa, acit ato ki kunnu, i ŋet lyel pa wora ki maa. Ento atye kany ki laticci Kimkam; wek en aye ocit oŋol kwedi kulu, ci icitim en kit ma ineno ni ber.” Kabaka ogamo ni, “Kimkam biwot kweda loka ca, ci abitimo en kit ma ineno ni ber yo tuŋ boti; ki gin ducu ma imito ki tuŋ bota abitiyone piri.” Ka lwak ducu guŋolo Jordan, ci k ibaka bene oŋolo. Lacen kabaka ocik Baŋilai ki mot me mar, ka olamme gum; ci Baŋilai odok i pacone. Jo Juda ki jo Icrael gupyem pi kabaka Kabaka ocito i Gilgal, ki Kimkam bene onywako wot kwede. Ki lwak ma i Juda ducu ki nucu jo Icrael bene gunywako wot kacel ki kabaka. Jo Icrael ducu gubino bot kabaka, guwaco bote ni,’ “Piŋo utmegiwa ma i Juda gukwalo in kabaka woko akwala, kacel ki jo ma i odi ducu, ci gukelowu loka kulu Jordan in Daudi ki lwakki ducu?” Lwak ma i Juda gugamo dog jo Icrael ni, “Pien kabaka aye watwa macok, ci piŋo kiniga makowu i kom lok macalo man, Onoŋo doŋ wacamo ciŋ kabaka bo? Nyo en doŋ otyeko miyowa mot mo bo?” Jo Icrael dok gudok iye bot jo Juda ni, “Wan watye ki dul apar i te ker man, ki i te loc pa Daudi wan wadwoŋ wakatowu. Ci piŋo wun aye dok wucayowa? Pe myero nene wan aye wakwoŋ waco pi dwoko kabaka paco?” Ento jo pa Juda lokgi obedo gwa makato lok pa jo Icrael. I kare meno onoŋo tye dano mo marac mada ma nyiŋe Ceba wod pa Bikri ma Labenjamin. Ocako kuto kum kun wacci, “Wan pe watye ki waŋ pokwa mo i kom Daudi, pe watye ki dul mo i kom latin pa Yece; Wun jo Icrael, dano acel acel odok i kemane!” Kit meno jo Icrael gutwarre wo ko guweko Daudi, gucako lu bo kor Ceba wod pa Bikri. Ento jo Juda gubedo ka lubo kor kabakagi ma cwinygi omoko i kome, cakke ki i Jordan o kwede i Jerucalem. Ka Daudi oo i ode ma i Jerucalem, okwanyo mon aŋeca apar ma onoŋo owekogi ka gwoko ode-ni, ci oketogi i ot ma gigwokogi iye kun en miyo cam botgi, ento pe omedo ki bedo kwedgi. Kit meno giloro wigi woko i ot nio wa i ka togi, kun gibedo macalo mon-to. Kabaka dok owaco bot Amaca ni, “Cilwoŋ jo ma i Juda ducu gubin bota i kin nino adek-ki, in kikomi bene ibed tye kany.” Amaca ocito ka lwoŋo jo ma i Juda, ento odikke okato nino ma giciko-ni woko. Daudi owaco bot Abicai ni, “Ceba wod pa Bikri bitimowa marac twatwal makato Abcalom. Cit ki danona wutugi ryemo kore, wek pe oma gaŋi mogo ma gicelo ki gogo, miyo bikelowa ayela.” Jo ma gulubo kor Abicai obedo Joab ki jo Keret ki jo Pelet, ki twoni oteka lweny ducu. Gucito gua ki i Jerucalem pi ryemo kor Ceba wod pa Bikri. Ka doŋ guo i got mo madit ma i Gibeon, ci Amaca otuc i komgi. Onoŋo Joab orukke ki boŋo me askari, kun otweyo del pala lucwan i pyere, ma orwako pala lucwan i akurane. Ka en ocito anyim, ci pala opoto piny. Joab openyo Amaca ni, “It ye maber bo, omera?” Ka Joab omako yer tik Amaca ki ciŋe malacuc ka omoto kun noto leme. Ento Amaca pe oneno kom pala ma tye i ciŋ Joab. Joab ocobo iye, cin iye ocako wukke piny; pe dok onwoyo cobone tyen me aryo, ci oto woko. Ci Joab ki ominne Abicai guryemo kor Ceba wod pa Bikri. Dano pa Joab mo ocuŋ ka ŋet Amaca ci owacci, “Ŋat ma cwinye omaro Joab, ki ma cwinye tye i kom Daudi, olub kor Joab.” Amaca obuto kun pwodde nenne kwede piny i remone i ŋet gudo. Tek dano mo oo kenyo, ka oneno, ci koŋ cuŋ. Ka dano pa Joab oneno lwak ducu koŋ gicuŋ, ci obino otŋo Amaca woko ki i gudo otero i lum, ci obolo boŋo mo i kome. Ka doŋ gikwanyo kome woko ki i gudo lwak gucako mol gilubo kor Joab pi ryemo kor Ceba wod pa Bikri. Ceba ocito kun baro kin kaka ducu ma i Icrael nio wa i Abel ma i ŋet Betmaaka; ci jo Bikri ducu gucokke, gulubo tamme. Ci jo ducu ma gulubo kor Joab gucito gurumo gaŋ ma Ceba tye iye, en Abel ma i ŋet Bet-maaka. Gucako toro cel lobo orumo gaŋ woko, cel meno gitoro otenne wa i kom cel gogo me gaŋ, Dok gubedo ka twomo cel me gaŋ me amuka woko. Dako mo ma laryeko odaŋŋe ki i gaŋ ni “Wuwiny ya! Wuwiny ya! Wuwac bot Joab koŋ obin kany, wek koŋ alok kwede mono.” Joab ocito cok bote ki dako-nu openyo ni, “In aye Joab bo?” Ogamo ni, “An do.” Dako-nu owacce ni, “Koŋ iwiny lokka, ladit.” Ogamo ni, “At ye ka winyone.” Dako-nu dok owacci, “Carolok macon wacci, ‘Wek gupeny dog jo Abel”; miyo giyubo lok tum mupye. An gat acel i kom jo ma gimito kuc, ki jo ma lugen i Icrael. In imito balo gaŋ man woko ma en aye mego i Icrael kulu; piŋo ityeko lwak pa Rwot woko?” Joab ogamo ni, “Pe kumeno gire, pe kumeno; pe abino ka tyeko gaŋ nyo ka balone woko. Lok meno pe ada. Ento dano mo ma i lobo godi me Epraim ma gilwoŋo Ceba wod pa Bikri aye otiŋo ciŋe i kom kabaka Daudi. Wumiwa en keken, ci abia aweko gaŋwu woko.” Dako-nu odok iyi bot Joab ni, “Nen ba, gibibolli wiye wok ki i wi cel.” Dako-nu ocito bot jo-nu ducu ki ryekone. Ci guŋolo wi Ceba wod pa Bikri woko, gubolo woko bot Joab. Joab okuto tum, ci mony oket woko oweko gaŋ, kun dano acel acel dok i pacone. Ki Joab bene odok i Jerucalem bot kabaka. I kare-nu onoŋo Joab aye ladit ma loyo mony pa jo Icrael ducu; ki Benaya wod pa Yekoyada aye loyo jo Keret ki jo Pelet. Adoram aye onoŋo ladit ma loyo tic muroni; ki Yekocapat wod pa Akilud onoŋo laco lok ma timme. Ceva obedo karan, ki Jadok ki Abiatar gubedo ajwagi pa Lubaŋa; ki Ira ma jo Jair obedo ajwaka pa Daudi. Kec opo to i kare pa Daudi mwaka ki mwaka pi mwaka adek. Mumiyo Daudi openyo dog Rwot, ci Rwot owacce ni, “Tye alii me remo i kom Caulo ki i kom jo me ode, pien oneko jo Gibeon.” Kabaka olwoŋo jo Gibeon ni gubin bote. Jo Gibeon pe gin jo Icrael kikome, ento gin jo Amor ma yam odon, Onoŋo yam JO Icrael gukwoŋo kwoŋ ni pe gibinekogi, ento kadi bed kumene, Caulo otemo nekogi woko, pien nyeko omake pi jo Icrael ki jo Juda. Daudi openyo jo Gibeon ni, “Gin aŋo ma myero atim piwu? Dok abiculo kwor meno i kit yo aŋo, ka wek doŋ wulam gum i kom lwak pa Rwot?” Jo Gibeon guwacce ni, “Lok ma i kinwa ki Caulo ki jo me ode pe lok ma gitwero tyekone ki culo limo Kadi wa wan bene pe myero wanek dano mo ma i Icrael.” Daudi ogamo ni, “Wun doŋ wuwacci, atimmiwu kit gin aŋo?” Guwaco bot kabaka ni, “Dano ma obedo ka nekowa, ma en aye oyubo pi tyekowa woko wek pe wabed ki kabedo mo i lobo ma Icrael loyo-ni, wek gimi botwa awobene abiro, wek wagurgi woko guŋabbe malo i nyim Rwot ki i Gibeon i kom got pa Rwot.” Ci kabaka ogamo ni, “Abimiyogi.” Ento kabaka oŋoyo Mepibocet wod pa Yonacan wod pa Caulo oweko odon, pien yam gukwoŋo kwoŋ i nyim Rwot ma tye i kingi, en Daudi ki Yonacan wod pa Caulo. Kabaka okwanyo awobe aryo ma mingi nyiŋe Rijpa nya pa Aiya, ma onywalogi ki Caulo, nyiŋgi Armoni ki Mepibocet; ki awobe abic pa Merab ma nya pa Caulo, ma en onywalo ki Adriel wod pa Baŋilai ma jo Mekola. Omiyogi ducu i cin jo Gibeon, ci gugurogi guŋabogi malo i wi got i nyim Rwot. Gin abiro ducu guto woko lawaŋacel. Ginekogi i nino ina gikwoŋo kayo iye kac, i nino ma gicako kayo iye bel cayiri. Ka Rijpa nya pa Aiya okwanyo boŋo cola, oyaro i wi got me butone, ci ori kunnu cakke i acakki kayo kac nio ka kot ocako cwer i komgi ki i polo. Pe oweko winyo mo opye i komgi dyeceŋ, kadi wa ŋuu mo pe oo i komgi dyewor. Ka gitito bot Daudi kit gin ma dako aŋeca pa Caulo, Rijpa nya pa Aiya, obedo ka timone, Daudi ocito okwanyo cogo pa Caulo ki pa Yonacan ki bot jo Jabec-gilead, ma yam onoŋo gukwalo komgi ki i dye gaŋ me Bet-can ka ma yam Lupiliciti guŋabogi malo i kare ma Lupiliciti guneko iye Caulo i wi got Gilboa. Okwanyo cogo pa Caulo ki pa wode Yonacan otero, ka gucoko cogo pa jo abiro ma gigurogi bene. Guyiko cogo pa Caulo ki pa wode Yonacan i lobo Benjamin i Jela, i lyel pa wonne Kic; ci gutiyo gucobo kit ma kabaka ociko ducu. Ka lacen Lubaŋa ocako winyo lega pa dano ma gilego pi lobo. Jo Piliciti dok gubedo ka lweny ki jo Icrael, ci Daudi ocito kunnu kacel ki jone, gucako lweny ki jo Piliciti. I kare mo Daudi ocako ol woko, ka Icbibenob ma ŋat’ acel i kin likwayo pa twoni oluma-ni obino ma tye ki tonne ma pekke romo cokcok ratili apar kulu, dok otweyo del pyere ma tye iye pala Lucwan manyen. Oa otirre, i kom Daudi wek enek woko. Ento Abicai wod pa Jeruya omwomme oriŋo ka lare ci ocobo Lapiliciti oneko woko. I ŋe meno jo pa Daudi gucike i nyiŋ Rwot ni, “In pe dok ibibino kacel kwedwa i mony mo, miyo ibineko mac tara pa Icrael woko.” Lacen “lweny ‘dok ocakke i kom jo Piliciti ma i Gob; ci Cibekai Ina Lakucat oneko Cap woko ma ŋat acel i kin likwayo pa twoni oluma-ni. Ka lweny dok ocakke i kom Lupiliciti ma i Gob, ci Elkanan wod pa Jair, ma jo Beterekem, oneko Goliac ma jo Gat, ma bol toŋŋe rom ki rii yat me cweyo boŋo, Lweny dok obedo i Gat ka ma tye iye dano mo ma oputte mabor liwawo, ma tye ki nyig ciŋe abicel, ki nyig tyene bene abicel, tuŋ ryoryo ducu, omiyo nyig Iwe te ducu romo pyeraryo wiye aŋwen, En bene obedo lakwar twoni oluma-nu. Ka okatti ka nywaro jo Icrael ki ŋalane, ci Yonacan wod pa Cimei ma omin Daudi oneke woko. Gin jo aŋwen-nu ducu gubedo likwayo pa twoni oluma ma yam bedo i Gat. Gin ducu Daudi ki jone guryekogi woko Daudi owero lok ma i wer man bot Rwot i kare ma Rwot olare iye ki i ciŋ lumerokke ducu, ki i ciŋ Caulo bene. Owero kit man ni, “Rwot aye gotta, en cel gogona matek, en lalarra. En Lubaŋana, ki gotta, ariŋo alaro bote; en gwoka macalo kwot, en kalarrena matek; en gaŋ gogona ka ma ariŋo alaro iye, en lalarra; in aye ilara ki i lweny magwa. Akok bot Rwot, ci en lara ki ciŋ lukworra. Pi meno myero gipak Rwot, “Biamwonyi me to otwagge oruma woko dyere, kulu ma piine ger ma neko dano ocorre woko i wiya limuk. Tol lyel odwala woko, owic me to bene orine woko i nyima. “I kare ma atye ki can akok bot Rwot; akok gira bot Lubaŋana. Owinyo dwana ki i ot mere maleŋ, kokona pi kony odonyo i ite. “Cutcut lobo oyeŋe ma morre pe twerre, te godi bene ducu guyegge woko ma giyeŋŋe matek, pien kiniga onoŋo omako Lubaŋa. Yito oduny okatti ki i ume, mac ma waŋ malyet okatti ki i doge ma lodine bene olyel, olyelmatek mada. Oywayo polo odwoko cen, ci olor obino piny,’ kun piny macol mapek oryene i te tyene. Oito i wi lakerubi ci otuk kwede, kome onen i dye yamo, Oketo piny macol orume dyere, kemane obedo pol mapek mupoŋ ki pii. Lodi mac ma lyel okatti, onen i piny ma ryeny maleŋ ki i nyime. Rwot omiyo polo omor, dwan ŋat Mamalo Twal owinnye. Obayo aterone, okeyo lumerok woko; omiyo lutkot owil, ci orwadogi woko piny, Dye nam opokke, tere onen, guti me te lobo bene odoŋ twolo, i kare ma Rwot ojukogi, i kare ma okutogi ki yweyo ma okatti ki i ume. “Rwot ocwalo cine piny ki i polo, ci omaka, oywaya okela woko ki i pii matut. Olara ki i cin lakworra matek, olara ki i ciŋ jo ma gidaga, pien onoŋo gitek mada giloya woko. Gupoto i koma i kare ma can obwoya matek, ento Rwot aye obedo ka konya. Okwanya woko okela i kabedo malac; olara pien onoŋo ayomo cwinye. “Rwot omiya bakacic pien oneno ni kita atir, oculla muporo leŋcwinya; pien abedo ka lubo cik pa Rwot, pe apokke woko ki bot Lubaŋa pi bal mo. Alubo cikke ducu, pe aŋak aweko gin ma en ociko. Pe atimo bal mo i nyime, dok agwokke mada pe atim obal alii mo. Mumiyo Rwot omiya bakacic pien oneno ni kita atir, oculla muporo leŋcwinya ma abedo kwede i nyime. “Rwot, in lagen bot jo ma lugen; bot ŋat maber ma pe ki bal inyutte bote bene calo ŋat maber ma pe ki bal. Cwinyi leŋ i kom jo ma cwinygi leŋ, ento iger i kom dano ma tamme ogom. Ilaro jo mamwol, ento jo ma luwakke idwokogi woko piny. Iyo, in aye ibedo mac tarana, ai Rwot; Lubaŋana aye menya ki i colpiny, Iyo, atwero tyeko buca mony kulu ka ikonya; pi teko pa Lubaŋana miyo apye akalo wi cel. Lubaŋa man, gin ducu ma co tiyo tye atir, lok pa Rwot ma en cikke me tiyo bedo ada; en tye macalo kwot pa jo ducu ma giriŋo gilaro bote. “Aŋa ma Lubaŋa, kono Rwot kene? Aŋa ma got, pe Lubaŋawa aye keken gire? Lubaŋa man aye ka-larrena matek, en aye ma omiyo awoto ki kuc. Oketo tyena obedo macalo tyen til, ociba malo ka ma acuŋ iye matek. En pwonyo ciŋa pi lweny, mumiyo atwero gomo wa atum mola. Doŋ ityeko miya kwot me larri, kony ma in imiya omiyo adoko dit. Imiya kabedo malac ka ma awoto iye ducu, omiyo tyena pe ocer. Aryemo kor lukworra ci anekogi woko; pe alokke adok cen nio ka atyekogi ducu. Atyekogi woko, acobogi woko pil, ci gupoto piny ka tyena; pe doŋ gitwero a malo. In aye iruka ki tek pi lweny; imiyo lulweny i koma guto gutum woko ka tyena. Imiyo lumerokka guloko ŋeg bota, imiyo atyeko jo ma gidaga woko. Guciko wangi, ento ŋat mo pe ma olarogi, gukok bot Rwot, ento en pe ogamo doggi. Adinogi woko gudoko macalo apwa me ŋom; abologi woko macalo coto ma tye i yo gudo-gu, “Yam ilara ki i kom rok mapol ma gilwenyo kweda; iketa abedo ladit ma loyo rok ducu; jo ma yam pe aŋeyogi gudoko jona ma an aye aloyogi, Lurok gubino bota ma gimwolle amwola; cutcut ka giwinyo pira ci gilubo cikka. Tekcwiny orwenyo woko ki botgi, gua ki ka ma gukanne iye gubino ma komgi myel amyela. “Rwot tye kwo; gipwo gotta, gipil wi Lubaŋa ma en lalarra. En Lubaŋa ma omiya aculo kwor i kom lukworra, dok ma obwoyo rok mapol, omiyo gubedo i te locca; ci olara ki i cin lumerokka. In ipilo wiya makato lukworra, ilara ki i ciŋ lulweny ma lubwami. “Pi meno abikori i kin lurok, ai Rwot, dok abiwero wer me pako nyiŋi, Lubaŋa miyo deyo me loc bot kabakane, dok nyuto mar mere ma pe lokke i kom danone ma en oyero ka giwiro, bot Daudi ki likwaye ducu matwal.” Man aye lok ma Daudi oloko me agikkine: Lok pa Daudi wod pa Yece, lok pa dano ma gipilo wiye twatwal, dano ma Lubaŋa pa Yakobo owiro, lawer jabuli mamit i Icrael. “Cwiny pa Rwot aye miyo aloko, lokke winnye ki ileba. Lubaŋa pa Icrael oloko, Lubaŋa ma obedo got matek pa Icrael owacca ni, Ka dano mo loyo lwak maber, kun loyo ma lworo Lubaŋa, deyone nen i komgi macalo ceŋ ma ryeny odiko, macalo ceŋ ma ryeny odiko ma pol pe, dok bedo calo kot ma twiyo lum i wi lobo. Iyo, oda pe ocuŋ kit meno kacel ki Lubaŋa? Pien otyeko keto gicikke kweda ma bedo nakanaka, ma oyubo kikore, dok bigwoko maber. En bimiyo gin ma konya ki gin ma amito medde ameda. Ento jo ma pe gilworo Lubaŋa ducu gicalo okuto ma gibolo woko, ma dano pe twero mako ki cine noŋo. Dano ma gudo komgi makogi ki nyonyo nyo bol toŋ ci mac aye wanogi tyeko woko.” Magi aye nyiŋ twoni oteka lweny ma yam gibedo bot Daudi: Jocebbacebet ma jo Takemon, en aye ladit pa jo adek-ki. En yam okato ki tonŋe i kom dano miya aboro ci onekogi woko ducu lawaŋacel, Ŋat ma lubo en ki i kin twoni lweny adek-ki aye Eleajar wod pa Dodo ma jo Akoki. En obedo kacel ki Daudi i kare ma gicayo jo Piliciti ma gucokke ka lweny kunnu, ci jo Icrael guriŋo gujer ki ŋegi. Ci en Eleajar ocako neko jo Piliciti nio waŋ ma ciŋe ojony omoko i kom pala lucwanne. Rwot omiyo loc obedo dit twatwal i nino meno, Lacen jo Icrael gudwogo cen ka lubo kore, ento gubino pi lunyo jami ki ginaruka-gu i kom dano ma ginekogi keken. Twon oteka lweny ma olube aye Cama wod pa Agee ma jo Karar. I kare ca jo Piliciti dok gucokke kacel i Leki ka ma poto ŋor tye iye, ci mony dok oriŋo jo Piliciti woko. Ento Cama ocamo co, ocuŋ i dye poto nor pi laro, ocako ‘neko jo Piliciti, ci Rwot dok omiyo loc obedo dit twatwal. I kare ma gikayo kac jo adek ki i kin jo pyeradek-ki gucako wot, ci gucito bot Daudi i boro got ma tye Adulam; onoŋo buca mony pa jo Piliciti ogony i nota Repaim. I kare nu onoŋo Daudi tye i kakannene, dok cel gogo pa lumony pa jo Piliciti onoŋo tye i Beterekem. Daudi oloko ki miti madwoŋ ni, “Kono ŋatti mo ocito ka twomo pii amata ki i waŋ it me Beterekem ma tye cok ki dog gaŋ ca, omiya amati, kono ber mada!” Ci twoni lweny adek-ku gucito gubaro dye gony pa jo Piliciti, gutwomo pii ki i waŋ it me Beterekem ma tye cok ki dog gaŋ ci gukelo bot Daudi. Ento Daudi pe omato; otino oliyo i nyim Rwot pi gityer amata, kun wacci, “Pe kumeno, ai Rwot. An pe myero atim kit man, An dok am at remo pa dano ma gudyero komgi-ni?” En aye lok mumiyo pe omato pii-nu. Twoni lweny adek-ku yam autimo kit meno, Abicai omin Joab, wod pa Jeruya, onoŋo en ladit i kin jo pyeradek-ki. Otiŋo toŋŋe olwenyo i kom jo miya adek ci onekogi woko ducu, mumiyo nyiŋe oywek ma mito romo jo adek ca, Pienno olimo yweka madit makato ki i kom jo pyeradek-ki, ci odoko ladit me WI monygi; ento pe olimo rwom pa jo adek ca, Benaya wod pa Yekoyada obedo twon oteka ma i Kabjeel, latim tim madito. En oneko awobe aryo ma gin twoni labwor me Moab. En bene olor odonyo i bur ci oneko iye labwor i kare ma pee ocwer mapek. Ka dok oneko Laejipt mo, dano mamwonya, Laejipt meno onoŋo tye ki toŋŋe i ciŋe, ento en Benaya ocito bote ki odoone, oyuto toŋ woko ki i ciŋ Laejipt, ka oneke kwede woko ki toŋŋe-nu, Benaya wod pa Yekoyada otimo gin madito kit meno, omiyo nyiŋe olimo yweka madit ma mito rom ki twoni lweny adek-ki. Nyine oywek i kin jo pyeradek-ki, ento pe olimo rwom pa jo adek ca, Daudi oketo en obedo ladit pa jo ma gwoko en kabaka. Acael ma omin Joab bene yam tye i kin jo pyeradek-ki; ki Elkanan wod pa Dodo me Beterekem, Cama me Karcd, Elika me Karod, Kelej ma jo Palti, Ira wod pa Ikec me Tekoa, Abiejer me Anatot, Mebunai ma Lakucat, Jalmon ma jo Akoki, Makarai me Netopa, Keleb wod pa Baana me Netopa, Itayi wod pa Ribai me Gibea pa jo Benjamin, Benaya me Piraton, Kidai ma bedo i nota ora me Gaac, Abialbon me Arba, Ajimavet me Bakurim, Eliaba me Caalbon ma wod pa Jacen, Yonacan, Cama ma jo Karar, Akiam wod pa Carar ma jo Karar, Elipelet wod pa Akacbai me Maaka, Eliam wod pa Akitopel me Gilo, Kejero me Karmel, Parai ma jo Arbi, Igal wod pa Natan me Joba, Bani ma jo Gad, Jelek ma jo Ammon, Nakarai me Beerot, ma latin jami lweny pa Joab wod pa Jeruya, Ira ma jo Itri, Gareb ma jo Itri. Uria ma jo Kit: gin ducu pyeradek wiye abiro. Kiniga dok omako Rwot i kom jo Icrael, ci opiyo Daudi i komgi kun owaco ni; “Cit ikwan wei jo Icrael ki Juda.” Kit meno kabaka owaco bot Joab ki ludito wi mony ducu ma gitye bo te ni, “Wucit ka kwano dano i kin kaka ducu ma i Icrael, cakke i Dan nio kwede wa i Beer-ceba, kun wukwano dano ducu.” Ento Joab ojuko kaba ka kun owacce ni, “Myero Rwot Lubaŋani aye omed wel lwak tyen miya kulu, kun in kabaka ineno ki waŋi, ento piŋo cwinyi mito kwano dano kit man, laditta kaba ka?” Ento lok pa kabaka obedo tek makato pa Joab ki pa ludito wi mony ducu, omiyo Joab ki ludito wi mony gukato woko ki i nyim kabaka, gucito ka kwano wel jo Icrael. Guŋolo loka kulu Jordan, ci gucako kwano dano cakke ki i Aroer ki i gaŋ ma tye i dye nota, ci gukemo Gad, guo kwede wa i Jajer. Ka gumedde wa i Gilead ki i Kadec ma i lobo pa jo Kit; ka guo kwede i Dan, gulokke gudok yo tuŋ Cidon, ka, gumedde kwede wa i gaŋ gogo me Turo ki i gaŋi ducu pa jo Kiv ki jo Kanaan; ka dok gucito kwede i Negeb me Juda kun giwok ki i Beer-ceba, Ka gurumo ki lobo ducu, ci guo kwede i Jerucalem ma onoŋo otero dwe aboŋwen ki nino pyeraryo. Ka Joab omiyo wel dano ma okwano-ni bot kabaka, i Icrael onoŋo tye iye oteka lweny ma wegi pala lucwan alip miya aboro, ki i Juda alip miya abic. Ka Daudi okwano wel dano otum, ci cwinye ocako poto, Obako doge bot Rwot kun wacci, “Abalo twon bal mo madit pi gin ma doŋ atimo. Ento, ai Rwot, kombeddi doŋ alegi ni ikwany roc man woko ki i koma, pien atimo lok me miŋo twatwal.” Ka doŋ Daudi oa malo odiko con, ci lok pa Rwot obino bot lanebi Gad, ma lanenpiny ma konyo Daudi. Rwot owacci, “Cit iciwac bot Daudi ni, ‘Rwot owaco kuman ni, Amiyi lok adek; in ikwany acel i kingi wek ami opot i korrii.’’’ Kit meno Gad obino bot Daudi, otitte lok meno kun wacce ni, “Imito kec aye opot i lobowu otyek mwaka adek? Nyo imito lumerok guryemwu wek wuriŋ i nyimgi pi dwe adek kulu? Nyo two gemo aye opot i lobowu otyek nino adek? In koŋ itam wek inoŋ kit ma abidok iye bot Rwot ma ocwala boti-ni, ka wek adwokke lok.” Daudi owaco bot Gad ni, “An doŋ adonyo i twon can madit ma pe wacce. Wek wapot i ciŋ Rwot, pien kicane dwoŋ; ento pe apot i cin dano.” Rwot ocwalo two gemo opoto i kom jo Icrael cakke odiko nio kwede i nino ma ociko-ni. Dano guto cakke ki i Dan o kwede wa i Beer-ceba ma romo alip pyerabiro kulu. I kare ma lamalaika pa Rwot ma tye ka neko dano oryeyo ciŋe okemo Jerucalem wek etyek woko, ci Rwot oŋut i kom gin man marac, Ojuko lamalaika kun waco ni, “Man doŋ oromo; doŋ ikul ciŋi piny.” Onoŋo lamalaika pa Rwot tye i ŋet laro moyo pa Arauna ma jo Jebuc, Ka Daudi oneno kom lamalaika ma tye ka neko lwak ki, ci owaco bot Rwot ni, “Nen, atyeko tiyo bal, atimo roc madit; ento lwak romi man gutimo kit roc aŋo? Alegi ni, wek ciŋi opot i koma ki i kom jo me ot pa wora keken.” Gad dok obino bot Daudi i ŋino meno, owacce ni, “Doŋ icit ka ca no keno tyer pi Rwot i laro moyo pa Arauna ma jo Jebuc.” Daudi ocito kunnu kit ma Rwot ocike kwede pi lok pa Gad. Arauna obolo wane piny ci oneno kabaka ki luticce ka gibino gikemo en atir, ci ocito omiyo woro bot kabaka kun oryebbe piny i nyime. Arauna openyo ni, “Piŋo ibino bota tin, laditta kabaka?” Daudi ogamo ni, “Abino ka wilo laro moyoni wek acan iye keno tyer pi Rwot wek two gemo oke woko ki i kom lwak.” Arauna owaco bot Daudi ni, “Laditta kabaka in iter larona, ityer iye gin ma ineno ni ber. Twon me gitum awaŋa bene ene, ki opam me dino bel ki rii nut twoni gubed me yen, Magi ducu an Arauna amiyo boti, kabaka.” Arauna dok owaco bot kabaka ni, “Rwot Lubaŋani aye ogam motti.” Ento kabaka ogamo dog Arauna ni, “Pe kumeno, Abiwilogi ki boti awila, aculo ki lim; pien pe atwero tyero gitum awaŋa mo bot Rwot Lubaŋana ma, pe awilo ki, limma.” Kit meno Daudi owilo laro moyo ki twoni bene, oculo cekel me ryal pyerabic, Daudi ocano iye keno tyer pi Rwot, ka otyero gitum awaŋa, ki gityer lakwecwiny, Pienno Rwot owinyo bako-dog pa lwak pi lobogi, ci two gemo oke woko ki i lobo Icrael. I kare ma kabaka Daudi doŋ oti twatwal, ki mwaka me ditte bene dwoŋ, kadi bed gium kome ki lwak boŋŋi mapol, pe winyo lyeto mo i kome. Luticce guwaco hote ni, “Ladit kabaka, giyeny nyako mo matidi gikel boti, wok omur kori, ogwoki bene, Wek en obut i kori, ladit kabaka, omiyi lyeto.” Guyenyo nyako mo mamwonya ki i lobo Icrael ducu, ci gunoŋo Abicagi anyira Cunam, gukele bot kabaka. Nyako meno onoŋo mwonya mada. Otugi doko lagwok kabaka cut, kun tiyo tic ducu; ento kabaka pe oloko odoko dakone. I kare meno Adoniya wod pa Kagit oŋwette ki dwoŋ wiye kene kun wacci, “Abibedo kabaka.” Ocako yubo gadigadi lweny ki wegi aguragura, ki co pyerabic, oketogi me riŋo i nyime. Yam wonne pe ocwero cwinye i kare mo ducu pi penye ni, “Piŋo itimo gin munyo-ni!” En odoŋo nia kome mwonya mada ma neno mit; yam minne onywalo olubo ŋe Abcalom. En oyubo lok ki Joab wod pa Jeruya ki ajwaka Abiatar, ci gulubo kor Adoniya gukonye. Ento ajwaka Jadok, Benaya wod pa Yekoyada, lanebi Natan, ki Cimei ki Rei ki oteka lweny pa Daudi yam pe gitye bot Adoniya. Adoniya otyero romi ki twoni ki lim ma gucwe bot Lubaŋa i nyim got Twol ma tye i ŋet En-rogel, ka olwoŋo iye omege ducu ma awobe pa kabaka ki ludito ducu ma i Juda ma gitiyo bot kabaka. Ento pe olwoŋo lanebi Natan, kadi Benaya, kadi twoni oteka lweny pa Daudi, kadi wa ominne Solomon. Natan owaco bot Batceba min Solomon ni, “In peya iwinyo ni Adoniya wod pa Kagit otyeko doko kabaka ma rwotwa Daudi bene pe ŋeyo lok mo iye? Iyo, koŋ doŋ ibin wek amiyi ryeko, ka wek alar kwoni ki kwo pa wodi Solomon. Cit oyot bot kabaka Daudi, iwacce ni, ‘Yam ikwoŋo kwoŋ bota, ladit, kun iwacci, woda Solomon aye bicamo kerri, en aye bibedo i wi komkerri, Piŋo Adoniya aye odoko kabaka?’ I kare ma noŋo pud it ye ka lok ki kabaka-ni, an bene abibino i kori ka moko lokki.” Batceba ocito bot kabaka wa i kicikane. Onoŋo kabaka doŋ oti twatwal, kun Abicagi anyira Cunam obedo ka tic i kome. Batceba okulo wiye oryebbe piny me woro kabaka. Kabaka openye ni, “Gin aŋo ma cwinyi mitoni?” Batceba ogamo ni, “Rwoda, yam ikwoŋo kwoŋ bota ki nyiŋ Rwot Lubaŋani kun iwacci, Solomon ma woda aye bicamo kerri, en aye bibedo i wi komkerri. Kombeddi nen ba, Adoniya aye odoko kabaka, kadi bed in rwoda pe iŋeyo iye gin mo, Otyeko tyero twoni ki lim ma oewe-gu ki lwak romi mapol twatwal, olwoŋo awobe pa kabaka ducu, ki ajwaka Abiatar, ki Joab ladit me mony bene; ento pe olwoŋo laticci Solomon. Rwoda kabaka, kombeddi waŋ jo lerael ducu gineno boti pi tito botgi ŋat ma bibedo i wi komkerri ka in doŋ ipe. Gwok nyo kare biromo ma noŋo in rwoda kabaka ito woko, iywe kacel ki kwariwu, ci an ki woda Solomon aye gibinenowa macalo wan luba!.” I kare ma Batceba tye ka lok ki kabaka-ni, lanebi Natan bene obino i ot. Giwaco bot kabaka ni, “Lanebi Natan bene tye kany.” Ka Natan odonyo i ot, oryebbe i nyim kabaka kun okulo wiye piny i ŋom. Owacci, “Rwoda kabaka, onoŋo in iwacci, ‘Adoniya aye bileyo ka tyena, en aye bibedo i wi komkerra’? Gin mumiyo apenyo, pien en doŋ ocito woko, otyero twoni ki lim ma ocwe, ki romi mapol twatwal, olwoŋo awobe pa kabaka ducu, ki Joab ladit me mony, ki ajwaka Abiatar. Nen, gin gitye ka cam ki mat i nyime kun giwacci, ‘Kabaka Adoniya obed kwo nakanaka!’ Ento an ma laticci, ki ajwaka Jadok, ki Benaya wod pa Yekoyada, ki laticci Solomon, en pe olwoŋowa. Lok man in rwoda kabaka aye imiyo otine kece, kun pe itito botwa wan luticci aŋa ma bibedo i wi komkerri ka in doŋ ipe?” Kabaka Daudi ogamo ni, “Lwoŋ Batceba obin bota.” Ci Batceba obino bot kabaka, ocuŋ i nyime. Kabaka okwono kwon kun wacci, “Macalo Rwot tye makwo-ni, ma yam okoko kwona ki iciŋ lukworra, macalo yam akwoŋo kwoŋ boti ki nyiŋ Rwot Lubaŋa pa Icrael kun awacci, ‘Wodi Solomon aye bileyo ka tyena, en aye bibedo i wi komkerra me leyo kakara,’ tin doŋ abiketo i tic.” Batceba okulo wujc oryebbe piny oworo kaba ka kun wacci, “Myero rwoda kabaka Daudi obed kwo matwal!” Kabaka Daudi dok owacci, “Wulwon ajwaka Jadok obin bota, ki Benaya wod pa Yekoyada ci gubino bot kabaka. I Kabaka owaco botgi ni, “Wucit ki askarina, wuket woda Solomon i wi kanana kikome, ci wutere i Gikon. Wumi ajwaka Jadok ki lanebi Natan guwire kunnu ki moo me bedo kabaka me Icrael, lacen wukut tum kun wuwacci, ‘Kabaka Solomon obed kwo nakanaka!’ Ka wun doŋ wubilubo kore, ka en bino ci bedo i wi komkerra; pien en aye bibedo kabaka kakara, an doŋ atyeko kete me bedo laloc i wi Icrael ki i wi Juda bene,” Benaya wod pa Yekoyada ogamo dog kabaka ni, “Amen, Myero Rwot Lubujani rwoda kabaka omok lok ma iwaco-nu, Kit ma Rwot yam obedo kwedi, rwoda kabaka, en dok obed ki Solomon bene kit meno, omi komkerre obed dit makato meri.” Ajwaka Jadok ki lanebi Natan, ki Benaya wod pa Yekoyada, ki jo Keret ki jo Pelet, gucito guketo Solomon obedo i wi kana pa kabaka Daudi, ka gukelo kwede i Gikon. Ajwaka Jadok okwanyo moo ma i tun romo ma onoŋo okwanyo ki i kema pa Rwot, owiro ki Solomon ki kunnu, Lacen gikuto tum, ci lwak ducu gugamo ni, “Kabaka Solomon obed kwo nakanaka!” Dano gucako mol i kore kun gikuto nyamulere-gu ma cwinygi yom adada, omiyo lobo mito bar woko likwak pi dwangi. Adoniya ki welone ducu guwinyo i ŋe tyeko karamagi. Ka Joab owinyo dwan tum ci openyo ni, “Woo madit ma i gaŋ kai-Ii nyuto aŋo?” I kare ma en pud tye ka lok, Yonacan wod pa ajwaka Abiatar otuc, ci Adoniya owacce ni, “Dony, pien in dano ma gigeno, myero ikel lok maber.” Yonacan ogamo dog Adoniya ni, “Pe kumeno, ladit, pien rwotwa kabaka Daudi doŋ otyeko keto Solomon me’ bedo kabaka. Ocwalo ajwaka Jadok, ki lanebi Natan, ki Benaya wod pa Yekoyada, ki jo Keret ki jo Pelet, guketo Solomon obedo i wi kana pa kabaka. Ajwaka Jadok ki lanebi Natan gutyeko wire ki moo i Gikon me bedo kabaka; gucito nia ki kunnu ma cwinygi yom, en aye omiyo woo tye i gaŋ kal, Man aye dwan ma wuwinyo-ni. Solomon doŋ obedo i wi komker, dok bene lutic pa kabaka gucito ka pwoyo rwotwa, kabaka Daudi, kun giwacci, ‘Lubaŋani omi nyiŋ Solomon oywek mada makato meri, dok omi komkerre obed dit makato komkerri!’ Ci kabaka okulle piny i wi kitandane, owaco bene ni, ‘Gipwo Rwot Lubaŋa pa Icrael, ma otyeko keto ŋat acel ki i kin litinona obedo i wi komkerra tin, ma kun aneno ki waŋa.’ ” Lwak welo pa Adoniya ducu komgi ocako myel, ci gutwarre, ŋat acel acel okemo yone kene, Adoniya ocako lworo Solomon, ci oa ocito, omako ten keno me keno tyer. Gitito pire bot Solomon kun giwacci, “Nen, Adoniya doŋ lwori, kabaka Solomon, pien ocito omako ten keno me keno tyer kun wacci, ‘Waŋ ma kabaka Solomon okwoŋo kwoŋ bota ni pe ebineka, an laticce, ki pala lucwan, ci abia.’’’ Solomon owacci, “Ka ebibedo dano ma genne, pe yer wiye mo bipoto piny; ento ka rac mo onen i kome, ci bito.” Kit meno kabaka ocwalo dano ci gukwanyo Adoniya woko ki i kom keno tyer, ci ocito oworo kabaka Solomon, Solomon owaco bote ni, “Cit wa i odi.” Ka kare me to pa Daudi onyiko cok ci ociko Solomon kun wacci, “An doŋ acok cito ka lubo yo ma jo me lobo ducu lubo-ni. Bed matek, nyutte ni in laco. Mak cik pa Rwot Lubaŋani kun iwoto i yone, ma ilubo lok ma en ociko ducu, dok omiyo botwa obed lok me caden, kit ma gicoyo kwede i buk pa Moses, wek ibed ki gum i kom gin ducu ma itiyo, ki ka ma idok iye ducu. Rwot omok lokke ma yam oloko i komi, ma owacci, ‘Ka ce awobeni gibigwoko kitgi maber, kun gibedo dano ma gin lugen i nyima ki cwinygi ducu ki tipo komgi ducu, ci pe ibibedo laboŋo daponi mo ma bibedo i wi komker me Icrael!’ “Ento in iŋeyo gin ma yam Joab wod pa Jeruya otiyo i koma, kit ma otimo ki ludito mony pa jo Icrael aryo-ni. Abneri wod pa Ner ki Amaca wod pa Jeter, ma en onekogi wo ko pi culo kwor i kare me kuc pi remo ma yam oo i mony macon ca. En omiyo remo pa jo ma gipe ki bal onyobo del pyera ki war tyena bene. In itim muporo ryekoni; ento pe iwek lwar wiye ocit i lyel ki kuc. Ento bed maber ki awobe pa Baŋilai ma jo Gilead, wek gubed i kin dano ma gicamo i wi mejani; gin bene yam gubedo maber kweda kumeno i kare ma gunona ka ariŋo omeru Abcalom. Dok bene pud it ye ki Cimei wod pa Gera ma Labenjamin ma gaŋgi Bakurim. En yam obedo ka lamo an ki cen marac twatwal i kare ma onoŋo acito i Makanaim; ento ka obino ka rwatte kweda i dog kulu Jordan, ci akwoŋo kwon bote ki nyiŋ Rwot kun awacci, pe abineke ki pala lucwan. Iyo, pe ibed kwede macalo en pe tye ki bal mo, In laryeko, ibiŋeyo kit ma ibitime kwede, ibitero lwar wiye i lyel ki remo.” Lacen Daudi oto, oywe kacel ki kwarine, ci giyike i gaŋ kalle. Kare ma Daudi oloyo kwede jo Icrael oromo mwaka pyeraŋwen; obedo ka loc i Kebron pi mwaka abiro, ka dok i Jerucalem pi mwaka pyeradek wiye adek. Kit meno Solomon obedo i wi komker pa wonne Daudi, ci kerre omoko matek. Adoniya wod pa Kagit obino bot Batceba ma min Solomon. Batceba openye ni, “Ibino ki kuc?” Ogamo ni, “Abino ki kuc.” Dok owacci, “At ye ki gin mo ma amito wacci.” Batceba ogamo ni, ‘“‘Wac do,” Adoniya owacci, “Iŋeyo ni ker yam mera, dok jo Icrael oye ni alogi; ento ker dok olokke odoko pa, omera, pien onoŋo Rwot aye omiye. An atye ki peny mo acel me penyi kwede; pe ikwer doga.” Batceba ogamo ni, “Wac do.” Ci owacci, “Alegi ipennya kabaka Solomon, pien en pe bikwero dogi, en omiya Abicagi ma Laeunam wek obed dakona.” Batceba ogamo ni, “Ber matek; abitito lokki bot kabaka.” Batceba ocito bot kabaka Solomon pi lok kwede pi Adoniya. Kabaka oa malo pi jole, okulle piny bot minne; ka obedo i wi komkerre, ka dok gikelo kom pi min kabaka bene, ci obedo i ŋete tuŋ acuc, Batceba owacci, “At ye ki peny mo acel ma apenyi kwede; pe ikwer.” Kabaka ogamo doge ni, “Peny pennyinu, maa; pien pe abikwero dogi.” Minne owacci, “Wek Abicagi ma Laeunam gimi bot Adoniya obed dakone.” Kabaka Solomon ogamo dog minne ni, “Piŋo ipenyo ni gimi Abicagi ma Laeunam bot Adoniya? Peny wa pi kerra bene ducu; pien en omera maditte, en onoŋo tye ki ajwaka Abiatar ki Joab wod pa Jeruya ka ŋete.” Ci kabaka Solomon okwoŋo kwoŋ ki nyiŋ Rwot kun wacci, “Lubaŋa oket can i koma kit meno ki makato ka ce lok man pe amiyo Adoniya oculo ki kwone! Kombeddi, macalo Rwot tye makwo-ni, ma doŋ omoko kerra, ma oketa i wi komker pa wora Daudi, ma oketa adoko kabaka, dok omiyo jo me oda gicuŋ matek kit ma yam ociko-ni, Adoniya tin gibinekone woko.” Kabaka Solomon ocwalo Benaya wod pa Yekoyada, ci Benaya ocobo Adoniya oreto woko piny, oneko woko. Kabaka dok owaco bot ajwaka Abiatar ni, “Cit i Anatot, i paconi, pien imyero ki to. Ento peya abineki i kare-ni, pien yam ibedo ka tiŋo canduk pa Rwot Lubaŋa i nyim wora Daudi, dok pien yam iribbe ki wora ka neno can madwoŋ.” Ci Solomon okwanyo Abiatar woko ki i tic me bedo ajwaka pa Rwot. Lok pa Rwot ma yam oloko i Cilo ma mako jo me ot pa Eli ocobbe kit meno. Ka Joab owinyo gin mutimme, oriŋo olaro i kema pa Rwot, omako ten keno me keno tyer; pien Joab onoŋo obedo ka konyo Adoniya, kadi bed yam pe okonyo Abcalom, Ka gitito pire bot kabaka Solomon ni, “Joab oriŋo olaro i kema pa Rwot, tye wa i ka ŋet keno tyer,” Solomon ocwalo Benaya wod pa Yekoyada kun wacci, “Cit icobe iret woko piny.” Ci Benaya ocito i kema pa Rwot, owacce ni, “Kabaka ociko ni ikat woko.” Joab ogamo ni, “Pe, abito ki kany.” Benaya dok otero lok bot kabaka kun wacci, “Joab dok owaco kuman-ni, ka dok odokka iye kit man.” Kabaka odok iye bote ni, “Tim kit ma en owaco-ni, cob iret woko piny. Ci ibiyike woko, wek gikwany alii woko ki i koma ki i kom ot pa wora pi remo pa dano ma yam Joab onekogi laboŋo bal mo ma gin gutimo. Rwot bidwoko tim me oyo remo meno i wiye kikome, pien en yam opoto i kom twoni aryo ma cwinygi atir ma gibeco gikato en, ci onekogi woko ma wora Daudi pe ŋeyo en aye Abneri wod pa Ner ma lawimony ma loyo mony pa jo Icrael, ki Amaca wod pa Jeter ma lawiwmony ma loyo mony pa jo Juda. Alii me togi bidok i wi Joab ki i wi likwaye matwal; ento ki bot Daudi ki bot likwaye ki jo me ode ducu, ki bot komkerre, kuc ma a ki bot Rwot bibedo iye nakanaka.” Benaya wod pa Yekoyada ocito kunnu, ocobo Joab oreto woko piny oneko woko; ci giyike i pacone kikome ma tye i dye tim. Kabaka oketo Benaya wod pa Yekoyada me bedo ladit ma loyo mony ma ka Joab, dok oketo Jadok me bedo ajwaka pa Lubaŋa ma ka Abiatar. Lacen kabaka ocwalo kwena ka lwoŋo Cimei, owaco bote ni, “Ger odi piri keni i Jerucalem, ibed iye kunnu, pe ia ki kunnu icit i kabedo mukene. Ento i nino mo keken ma icito iye woko, ma iŋolo iye nota ora Kidron, ci myero iŋe atir ni ibito iye; alii me toni bidok gire i wii.” Cimei ogamo dog kabaka ni, “Lok ma iwaco-ni ber, rwoda kabaka; abitimo kit ma iwaconi.” Ci Cimei obedo i Jerucalem pi kare malac. Ka mwaka adek okato, opii aryo pa Cimei guriŋo woko bot Akic wod pa Maaka, ma kabaka me Gat. Ka gitito bot Cimei ni, “Opiini gitye i Gat bot Akic.” Cimei oa, otweyo kom me bedo i ŋe kana, ci ocito i Gat bot Akic ka yenyo kor opiine. Ka ononogi, odwokogi cen ki i Gat. Ka gitito bot Solomon ni Cimei otyeko a woko ki i Jerucalem, ocito wa i Gat ka olokke odwogo, kabaka ocwalo dano ka lwoŋo Cimei, ci, owaco bote ni, “Yam pe amiyo ikwoŋo kwon i nyiŋ Rwot, kun ajuki matek ma awacci, ‘ŋe atir ni, i nino ma ibicito iye woko i kabedo mo mukene, ibito’? Ci in igamo doga ni, ‘Lok ma iwaco-ni ber; abilubo.’ Ci piŋo nene pe doŋ igwoko kwoŋŋi ma ikwoŋo i nyim Rwot, ki cik ma yam aciki kwede?” Kabaka dok owaco bot Cimei ni, “In iŋeyo ki i cwinyi kit tim maraco ducu ma yam itimo i kom wora Daudi; Rwot bene bidwoko tim maraco meno poto i wii kikome. Ento an abibedo ki gum, ci komker pa Daudi bimoko matwal i nyim Rwot.” Kabaka dok ociko Benaya wod pa Yekoyada; ci okato woko ocobo Cimei oreto woko piny oneko woko. Kumeno ker omoko matek i ciŋ Solomon. Solomon oribbe ki Parao kabaka me Ejipt kun onyomo nyare; ci otero nya pa Parao i gaŋ kai pa Daudi nio ka doŋ otyeko gero ode kikome ki ot pa Rwot, ki cel ma orumo Jerucalem. Ento lwak gubedo ka tyero gitum i kabedo me woro Lubaŋa ma i wi godi, pien onoŋo peya gigero ot mo pi nyiŋ Rwot. Solomon yam omaro Rwot, kun lubo cik pa wonne Daudi, ento onoŋo pud tumo gitum dok Waŋo odok eceta i kabedo me woro Lubaŋa ma i wi godi. I nino mo acel kabaka ocito i Gibeon ka tumo gitum kunnu, pien meno aye kabedo me woro Lubaŋa maditte. Solomon yam obedo ka tyero gitum awaŋa alip acel kulu i wikeno tyer kunnu. Rwot onyutte bot Solomon i Gibeon i wag let dyewor, ci owacci “Peny gin ma abimiyo boti.” Solomon ogamo ni, “In yam inyuto mar meri madwoŋ ma pe lokke bot wora Daudi ma laticci, pien obedo ka kwo i nyimi ki gen madwoŋ ki tim ma atir, ma cwinye leŋ; in bene igwoko mar meri madit ma pe lokke pire, dok ityeko miyo wode obedo i wi komkerre i kareni. Ai Rwot Lubaŋa, kombeddi doŋ iketa, an laticci, adoko kabaka ma ka wora Daudi, kadi bed pud an latin, ma peya aŋeyo loyo dano. An doŋ atye i kin joni ma yam iyero, rok madit ma pe kwanne, ma welgi pe ŋene pi polgi. Ber in Rwot imiya cwiny me ryeko me loyo lwakki, wek aŋe poko kin gin maber ki gin marac; aŋa ma twero loyo rok man madit-ti?” Rwot cwinye obedo yom i kom Solomon pi peny man. Lubaŋa owaco bote ni, “Pien ipenyo kit man, ma pe ilega ni ami iri i wi lo bo nakanaka, pe ilego lonyo, kadi pi kwo pa lumerokki, ento ilego ni gimiyi cwiny me ryeko me poko gin ma tye atir, abitiyo kit ma iloko-ni. Nen, doŋ amiyi ryeko ki cwiny me poko kin lok mapatpat kit ma peya onen i kom dano mo nia wa con, dok bene ŋat macalo in pe binen ki i ŋeyi. Dok abimiyi gin ma pe ilego bene, abimiyi lonyo ki deyo, wek kabaka mo pe obinen ma gibiporo ki in pi kwoni ducu. Ka ce ibilubo yona kun imako cikka ki lok ma aciko ducu, kit ma yam woru Daudi olubo-ni, abimedo kwoni ri i wi lobo kare malac.” Ka Solomon oco, ci onoŋo ni kara ebedo ka leko lek. Ka obino i Jerucalem, ocuŋ i nyim canduk me gicikke pa, Rwot, otyero gitum awaŋa ki gityer lakwecwiny, ci otedo karama pi luticce ducu. I kare meno mon aryo ma lukwele gubino bot kabaka, gucuŋ i nyime. Dako acel owacci, “Ai rwoda, dako man ki an wabedo i ot acel, ci an anywalo latinna ma onoŋo en tye i ot kweda. Dok i ne nino adek cakke i kare ma agonnye kwede, en bene onywal; dano mo onoŋo pe tye kwedwa i ot, onoŋo watye wan aryo keken. Ci dako man obuto i kom latinne i dyewor, omiyo latin oto. En oa malo ki i dyewor, ci otiŋo woda woko ki ka neta; ma onoŋo an anino woko, ka opyelo i kore, ka dok opyelo kom wode muto-ni i kora. Ka oo odiko, ci aa malo ka doto latinna; ci nen, anoŋo doŋ oto woko, Ka abedo ka niyo kome, nen, pe en aye latinna ma anywalo-ni.” Ento dako mukene-ni owacci, “Pe kumeno; latin makwo-ni: aye mera, latin muto-ni meri.” Dako mukwoŋo-ni owacci, “Pe, latin muto-ni aye meri, latin makwo-ni aye mera.” Gubedo ka lok kumeno i nyim kabaka. Kabaka dok owacci, “Man wacci, ‘Man makwo-ni aye latinna, latinni en oto-ni”; mu kene gamo ni, ‘Pe; ento muto-ni aye latinni, makwo-ni aye mera.’ ” Kabaka dok owacci, “Kella pala lucwan.” Ci gikelo pala lucwan i nyim kabaka. Kabaka ociko ni, “Gipok i latin makwo-ni aryo, wek gimi dul acel bot dako acel, ki dulle tuŋcel bot lawote.” Ci dako ma wode tye makwo-ni owaco bot kabaka ni, “A, rwoda, mi latin makwo-ni hote, pe inek aneka,” pien cwinye tye ka cwer pi latinne. Ento mukene-ni ogamo ni, “Gipok iye wek pe doŋ obed mera nyo meri.” Kabaka ogamo lokgi owacci, “Mi latin makwo bot dako mukwoŋo-ni. Pe ginek woko, en aye min latin-nu.” Ka jo Icrael guwinyo k it kop ma kabaka onolo-ni, ci gubedo ki lworo i kom kabaka; pien guniaŋ ni ryeko pa Lubaŋa tye i iye, omiyo oŋolo kop atir. Kabaka Solomon obedo kabaka ma loyo jo Icrael ducu. Dano magi aye gubedo ludito wi ticce: Ajaria wod pa Jadok obedo ajwaka pa Lubaŋa; Elikorep ki Akija ma awobe pa Cica gubedo lukarani, Yekocapat wod pa Akilud obedo laco lok ma timme; Benaya wod pa Yekoyada obedo ladit me mony; Jadok ki Abiatar gubedo ajwagi pa Lubaŋa; Ajaria wod pa Natan obedo ladit ma loyo lulo dul lobo; Jabud wod pa Natan obedo ajwaka ki larem kabaka; Akica obedo ladit ma gwoko gaŋ kai; ki Adoniram wod pa Abda obedo ladit ma loyo tic muroni, Solomon obedo ki lulo dul lobo apar wiye aryo ma giloyo wi Icrael ducu, ma ticgi obedo me coko cam pi kabaka ki jone ducu; dano acel acel miyo cam tyeko dwe acel i mwaka. Nyiŋgi ene: Ben-kur onoŋo loyo lobo godi me Epraim; Ben-deker onoŋo loyo Makaj, Caalbim, Bet-cemec ki Elon-bet-kanan; Ben-keced oloyo Arubot ki Coko ki lobo Keper ducu; Ben-abinadab oloyo Napat-dor ducu. (Onoŋo dakone obedo Tapat ma nya pa Solomon.) Baana wod pa Akilud oloyo Taanak, Megido ki Bet-cean ducu ma tye ka ŋet Jaretan ma i luŋ me Jejreel, ki cakke i Bet-cean nio i Abel-mekola ki nio kwede wa ka ŋet Jokmeam tuŋcel; Ben-geber oloyo Ramot-gilead, ki gaŋi matino pa Jair wod pa Manace ma gitye i lobo Gilead, kacel ki lobo Argob ma i Bacan ma tye iye gaŋi madito pyerabicel ma gicelo ki cel, ma dogcelgi gicego ki rii mola; Akinadab wod pa Iddo oloyo Makanaim; Akimaj oloyo lobo Naputali. En onoŋo onyomo Bacemat ma nya pa Solomon. Baana wod pa Kucai oloyo Acer ki Bealot; Yekocapat wod pa Parua oloyo lobo Icakar; Cimei wod pa Ela oloyo lobo Benjamin; Geber wod pa Uri oloyo dul lobo Gilead ma yam obedo lobo pa Cikon kabaka pa jo Amor ki pa Og kabaka me Bacan. Dok onoŋo tye lalo lobo acel ma loyo lobo Juda. Jo Juda ki jo Icrael yam gidwoŋ ma rom ki kweyo ma i dog nam; gubedo ka cam ki ka mat ki yomcwiny. Solomon obedo ka loyo ker mapatpat ducu cakke ki i kulu Euprate nio wa i lobo pa jo Piliciti, ki nio wa i lobo Ejipt. Jo me ker meno gubedo ka tyero mot bot Solomon kun gitiyo bote i kare me kwone ducu. Cam ma gimiyo bot Solomon pi nino acel acel onoŋo romo moko kwon mapwotte guniya miya acel, moko kwon mukene guniya miya aryo, twoni mucwe apar, dyaŋi pyeraryo ma gikwayogi i-olet, romi miya acel, ma pe iribo iye til ki bure ki abur, ki gweni mucwe. En onoŋo bwoyo lobo ducu cakke ki i kulu Euprate dok kwede yo tuŋ potoceŋ, en aye cakke ki i Tipica nio wa i Gaja, kun loyo ki luker ducu cakke ki i kulu Euprate dok kwede yo tuŋ potoceŋ; obedo ki kuc i kabedo ducu murumo lobone. Juda ki Icrael bene gubedo mot ki kuc cakke ki i Dan nio kwede wa i Beer-ceba, kun dano acel acel bedo gire i te olokke ki i te odurone i kare pa Solomon ducu. Solomon obedo ki kabedo me gwoko aguragurane ma giromo gwoko iye aguragura alip pyeraŋwen pi ywayo gadigadine me lweny, ki lulweny alip apar wiye aryo ma giriŋo ki aguragura. Lulo dul lobo mapatpat gubedo ka miyo cam bot kabaka Solomon ki pi jo ducu ma gicito ka cam bote, kun dano acel acel miyo i dwene; pe gimiyo gin mo rem. Ki bel cayiri bene ki Teŋ kal pi cam pa aguragura ki pi aguragura madwirre gitero ducu i kabedo ma gimitogi iye, kun ŋat acel acel kelo kit ma giciko. Lubaŋa omiyo Solomon obedo ki ryeko ki niaŋ matut mada; tamme lac ma rom ki kweyo ma oyarre i dog namo Kit meno ryeko pa Solomon okato ryeko pa jo ducu ma yo’ tuŋ wokceŋ, wa ki ryeko pa jo Ejipt ducu. En onoŋo ryek makato jo mu kene ducu, en laryeko makato Etan ma jo Jera, ki Eman, ki Kalkol ki Darda ma gin awobe pa Makol; ci nyiŋ Solomon oywek oromo i rok ducu ma orumogi. En bene obolo carolok ma romo alip adek; ki wer ma en ocako oromo alip acel ki abic. Oloko i komi yadi ocako ki i kom yat cedar ma tye i Lebanon nio kwede wa i kom anyero ma twi doŋo i kom cel got; oloko i kom lee tim bene, ki i kom winyo-gu, ki i kom gin ma lakalaka piny-gu, ki i kom rec-gu: Ci dano ma i rok ducu gubino ka winyo ryeko pa Solomon, dok gua ki bot luker ducu ma i wi lobo, ma guwinyo pi ryekone. Kiram kabaka me Turo ocwalo luticce bot Solomon ka owinyo ni giwire ki moo me bedo kabaka me leyo ka tyen wonne, pien Kiram obedo ka maro Daudi nia wa con. Ci Solomon ocwalo lok bot Kiram ni, “Iŋeyo ni wora Daudi pe yam ogero ot pi nyiŋ Rwot Lubaŋane, pien lweny ki mony pa lumerok ma gurume omiyo gerone oloye, nio ka Rwot omiyo en oloyogi ducu, Ento i kare-ni Rwot Lubaŋa doŋ omiya yweyo i kabedo ducu; i kare-ni lamonewa mo doŋ pe, kadi wa peko mo. Pienno omiya atamo pi gero ot pi nyiŋ Rwot Lubaŋana, kit ma yam Rwot owaco bot wora Daudi ni, ‘Wodi ma abiketo i komkerri aye bigero ot pi nyiŋa.’ Iyo, doŋ icik pi toŋŋa lwak yadi cedar me Lebanon. Luticca bene gibiribbe ki luticci, an abiculli lim me mucara pa luticci kit ma iyubo; pien iŋeyo ni pe tye dano mo ma i kinwa ma ŋeyo tono yadi macalo jo Cidon.” Ka Kiram owinyo lok pa Solomon lokke okweyo cwinye matek twatwal, ci owacci, “Gipwo Rwot Lubaŋa i kare man, ma doŋ omiyo bot Daudi wode ma laryeko me bedo Lalo rok man madit twatwal-li.” Kiram ocwalo lok bol Solomon kun wacci, “Atyeko winyo kwena ma icwalo bota; an atye ma aterre atera pi tiyo gin ducu ma imito 325 i kom lok ma dok kom bao yat cedar ki bao yat ciprec. Luticca aye gibikelone i dog nam nia ki i Lebanon; ka doŋ wabitweyo bao kacel ci gibikwan i wi pii macalo bwoda nio kwede i kabedo ma ibinyutta, ka doŋ wabigonyo kingi wo ko ka in doŋ ibigamogi ki kunnu; ci ibimiya cam pi jo ma i oda kit ma abimito kwede.” Kiram ocwalo lwak bao cedar ki ciprec bot Solomon kit ma en mito-ni, ci Solomon ocako miyo bot Kiram naŋo ma nyige ma romo guniya alippyerabicel me acama pa jone ma i ode, ki moo nyig jeituni ma giodo ma romo debe ahp pyeraŋwen. Solomon obedo ka miyo jami magi ducu bot Kiram mwaka ki mwaka, Rwot obedo ka miyo ryeko bot Solomon kit ma yam ocikke kwede; ci kuc obedo i kin Kiram ki Solomon; gin aryo guketo gicikke i kingi. Kabaka Solomon ocako muroni pi tiyo tic matek i lobo Icrael ducu; girono dano alip pyeradek pi tic muroni. Ocwalogi i Lebanon, kun cwalogi ki alip apar apar dwe ki dwe pi leyo dog tic pa luwotgi. Gibedo i Lebanon dwe acel, dok gibedo paco tugi dwe aryo; Adoniram en aye ladit ma loyo lutic muroni ducu. Solomon onoŋo tye ki lutin yec alip pyerabiro, ki jo ma gipayo godi ma i lobo godi ma giromo alip pyeraboro, ka dok imed iye ludito ma giloyo dog tic alip adek ki miya adek ma Solomon oketo, ma gin lulo lwak ma gitiyo tic. Gimuko godi madoŋo me wei, kit ma kabaka ociko, me keto guti me te ot ki godi ma gipayo mabeco. Kit meno lugedo pa Solomon ki pa Kiram, kacel ki jo Gebal, gubedo ka payo godi ki yu bo bao ki godi me gero ot. Lacen ka mwaka okato miya aŋwen ki pyeraboro cakke ki i kare ma jo Icrael gua iye ki i lobo Ejipt, i mwaka me aŋwenne me ker pa Solomon me loyo jo Icrael, i dwe Jib, ma en aye dwe me aryone, en aye Solomon ocako gero iye ot pa Rwot. Ot ma kabaka Solomon ogero pi Rwot onoŋo borre romo futi pyerabo ŋwen, ki lacce futi pyeradek ki borre tuŋ malo romo futi pyeraŋwen wiye abic. Kicika ot ma i doggola me donyo, ma i nyim kicika me dye ot, borre romo futi pyeradek, ma rom ki lac me ot kikome, ki lac me kicika ma i nyim ot romo futi apar wiye abic. Oketo lwak dirica ot ki frem ma giketo odonyo i iye. Ogero gedo mukene ki woko ma orumo kicika ot ducu, en aye orumo dye ot, ki kabedo maleŋ ma i tyelo; ci oketo iye kicika odi matino ma orumo ot ducu. Kicika odi matino ma piny lacgi romo futi abiro ki nucu, kicika odi ma i dyere lacgi romo futi aboŋwen, ki me adekke lacgi romo futi apar ki nucu; pien noŋo ojwiko kicika ot ki woko kun bwoto ka ma rii me kicika odi matino buto iye, wek rii pe odony i kicika kor ot kikome. I kare ma gigero ot, gibedo ka gero ki godi ma giyubo woko cut ki i bur gweŋ ka ma gipayogi iye; mumi yo i kare ma gitye ka gero ot pa Lubaŋa-ni, nyol ki laton ki jami tic ducu me nyonyo pe giwinnye i ye wacel. Doggola me donyo i kicika odi matino ma tye piny onoŋo tye yo acuc ka idonyo i ot, ci gidonyo i grofa ma i dyere kun giito ki rwom, ka dok gia ki i grofa ma i dyere giito i me adekke. Kit meno Solomon ogero or ci otyeko. Ogoyo dan ot ki rii yat cedar ma gipeto ki bao cedar bene. Ogero gedo mukene ki woko ma orumo ot ducu. Grofane acel acel borre ki malo romo futi abiro ki nucu; gikubo i kom ot kikome ki rii bao cedar. I kare-nu lok pa Rwot obino bot Solomon ma waco ni, “Pi ot ma it ye ka gerone, ka ce ibilubo cikka, kun ilubo kit ma aciko ducu, kun itiyo kwede, ci abimiyo lokka moko i kin an ki in, kit ma yam aloko kwede bot woru Daudi. Dok abibedo i kin jo Icrael, pe abibwoto jona jo Icrael.” Solomon ogero ot kit meno ci otyeko. Ki i i ot oguro kor kicika ot ki bao yat cedar, cakke ki i dye ot piny nio kwede wa i kwori dan ot; opeto kicika ot me i ot ki bao kumeno, dok opeto dye ot piny ki bao ciprec. Dok ogero kicika ot ma i tyelo ki bao yat cedar, cakke kii dye ot piny nio kwede wa i kwori dan ot, kun bor me ot romo futi pyeradek. Ogero man ki i i ot wek obed kabedo maleŋ ma i tyelo, en aye kabedo maleŋ makato ducu. Ci kicika maditte, ma en aye dye ot ma i nyim kabedo maleŋ ma i tyelo-ni, borre romo futi pyerabicel. Bao cedar ma i i ot gigoro iye cal, cal keno munyak ki cal ature. I ot ducu obedo bao cedar keken, ma kom got pe nen. Oyubo kabedo maleŋ i i ot, i tyelo ot kikome, me keto canduk me gicikke pa Rwot. Kabedo maleŋ ma i tyelo-ni borre romo futi pyeradek, ki lacce futi pyeradek, ki borre tuŋ malo bene romo futi pyeradek; omwono kome woko ducu ki jabu ma giliyo maber. Otiyo bene keno tyer me bao cedar. Solomon omwono i ot woko ki jabu ma giliyo maber, dok oketo nyor jabu ma oŋolo dye ot arii i nyim kabedo maleŋ ma i tyelo, ka omwono kome woko ki jabu. Omwono kom ot woko ducu ki jabu, nio ka kom ot ducu otum maber. Ki keno tyer ma i kabedo maleŋ ma i tyelo bene en omwono kome woko ducu ki jabu. Ka dok opayo cal lukerubi aryo ki yat jeituni, oketogi i kabedo maleŋ ma i tyelo; lakerubi acel acel borre romo futi apar wiye abic. Ki bwom lakerubi muyarre, bwome acel romo futi abiro ki nucu, ki bwome mukene bene romo futi abiro ki nucu; cakke i kom lano wi bwome tuŋcel nio wa i lano wi bwome tuŋ mukene lacgi romo futi apar wiye abic. Lukerubi aryo ducu bocogi rorom, ki komgi bene rom. Bor kom lakerubi acel acel romo futi apar wiye abic. Oketo Lukerubi aryo ducu i kicika ma i tyelo ot-ti, kun bwom lukerubi aryo ducu guyaro woko wek bwom ŋat acel ogud kom kicika ot tuŋcel, ki bwom lakerubi me aryone bene ogud kom kicika ot tuŋ mukene-ni; ki bwomgi mukene lano wigi rwatte ki i dye ot. Ci omwono kom lukerubi woko ki jabu. Ogoro cal i kor kicika ot orumo woko ducu, cal lukerubi, ki cal yadi otit, ki cal ature; ogoro cal i kor kicika ot ma i tyelo ki kicika maditte bene. Dok omwono dye ot ki jabu, i kicika ma i tyelo ki i kicika maditte bene. Doggola me donyo i kabedo maleŋ ma i tyelo otiyo kikane aryo ki bao yat jeituni; rii me doggola ki okar doggola ryoryo gubedo latwoke abic. Oumo kom kika aryo me bao jeituni-ni ki cal lukerubi ma gigoro, ki cal yadi otit, ki cal ature. Omwono komgi woko ki jabu, ka olilo jabu i kom cal lukerubi ki i kom cal yadi otit ducu. Otiyo bene okar doggola me bao yat jeituni pi doggola me donyo i kicika maditte; otiyo latwoke aŋwen. Ka dok otiyo kika aryo ki bao yat ciprec; bao kika aryo-nu ducu gibanne abana. Ogoro cal lukerubi i komgi, ki cal yadi otit, ki cal ature. Omwono kom kika woko ki jabu ma oreyo, ka olilo mapwot i kom cal ma gigoro i komgi. Ogero dyekal ma i dyere ki godi apa ya latyeŋ adek, ki bao yat cedar tyeŋ acel. Onoŋo giketo guti me te ot pa Rwot i mwaka me aŋwen, i dwe Jib, ka dok i mwaka apar wiye acelle, i dwe Bul, ma en aye dwe me aboro-ni, en aye gityeko iye tic i kom ot ducu, kun onoŋo gityeko tic ducu iye kit ma onoŋo yam giporo kwede, Gerone otero mwaka abiro. Solomon dok ogero ode kikome pi mwaka apar wiye adek, ka otyeko ode ducu kakare. Ogero ot ma gicako nyiŋe Buŋa me Lebanon. Borre romo futi miya acel ki pyerabic, lacce romo futi pyerabiro wiye abic, ki borre tuŋ malo romo futi pyeraŋwen wiye abic; gigero ot-te ocuŋ i wi lwak wir yat cedar muryeyo latyeŋ adek, ki rii bao cedar ma giriyo i wigi. Dok giguro bao cedar me umo wi rii ma giriyo i wi wir pyeraŋwen wiye abic, ma guryeyo apar wiye abic i tyeŋ acel acel. Dok giketo frem me wan dirica ma guryeyo latyeŋ adek, kun dirica gikemme ki luwotgi ma guryeyo latyeŋ adek-ki. Doggola ducu ki dirica ducu gitiyogi latwoke aŋwen, kun dirica kemo dirica wadgi i tyeŋ adek. Dok otiyo ot mukene ma oketo iye wir mapol. Borre romo futi pyerabiro wiye abic, ki lacce romo futi pyeraŋwen wiye abic; dok tye ki latin of ma i doggola me donyo, ma oryeyo iye wir bene, ki bolo ma tye i nyime. Ka dok ogero ot mukene pi komker ka ma en biŋolo iye kop, en kicika me ŋolo kop kikome. Giguro bao cedar giumo kwede kom kicika ot, i i ot, cakke ki i dye ot piny nio kwede wa i kwori dan ot. Dok ode kikome ma en bedo iye, ma tye i dyekal mukene ma i ne ot ŋolo kop, gigero lakite acel-lu. Solomon dok ogero ot macalo odi mukene-nu pi nya pa Parao ma en onyomo-ni. Odi magi ducu gigerogi ki godi me wel ma gipayogi muporo kit por ma gimito, kun gibaro ki mucumeno, kun gipayo ŋegi ki igi gubed mapwot, cakke ki i kom guti te ot nio kwede wa i kom godi ma giriyo i wiye, doko cakke ki i dyekal me ot pa Rwot nio kwede wa i dyekal madit. Guti te ot obedo godi mabeco me wel, godi madoŋo mada ma ditogi romo futi apar wiye aryo ki apar wiye abic. I wi guti te ot bene giketo iye godi me wel ma gipayogi muporo kit por ma gimito, kacel ki bao cedar. Cel me dyekal madit bene giryeyo iye godi apaya latyeŋ adek ma gurumo dyekal woko, ki bao yat cedar tyeŋ acel. Cel me dyekal ma i iye ma tye i nyim ot pa Rwot bene onoŋo tye kit meno, ki kicika ot ma i doggola me donyo i ot pa Rwot bene. Kabaka Solomon ocwalo kwena ci gikelo Kiram ki i Turo. En onoŋo wod pa daa-to mo ma i kaka pa Naputali, wonne aye dano me Turo ma ladiro tic me teto jami mola. Kiram dano ma laryeko mada, ma ladiro tic bene, ma opit pi tiyo gin ducu ma dok i kom tic ki mola. Obino bot: kabaka Solomon, ci otiyo ticce ducu. Oliyo wir mola aryo. Wir acel acel borre romo futi pyeraryo wiye abiro. Gipimo kore ki tol ci ditte oromo futi apar wiye aboro, kun iye twolo, kome ducu kinoŋ ma romo nyig cin aŋwen, En dok otiyo lalukana wigi ki mola ma giliyo me aketa i wi wir aryo ducu. Lalukana acel acel borre romo futi abiro ki nucu. Dok otiyo obwo aryo ma gikedogi ki nyor pi lalukana aryo ducu ma gitye i wi wir; otiyo obwo acel pi lalukana acel, ki acel pi lalukana mukene bene.’ Otiyo cal okwer pomegranat bene kit meno, Ka otiyo, ci odwalogi i kom nyor latyeŋ aryo i kom obwo me laum kom lalukana ma gicibo i wi wir; otimo lalukana mukene bene kit meno. Lalukana ma gitye i wi wir ma i kicika ot ma i doggola-ni bocogi romo futi abicel, ma gitiyo calo ature lena. Giketo lalukana aryo ducu i wi wir aryo, i wi doge ma gilulo ma ka ŋet obwo ma giumo kwede-ni; onoŋo tye iye cal okwer pomegranat miya aryo, ma gidwalo latyeŋ aryo; ki lalukana mukene bene tye ki mere ma rom meno. Ocibo wir i nyim kicika ot ma i doggola me donyo i ot pa Lubaŋa. Oketo wir acel yo tuŋ acuc, ci ocako nyiŋe Jakin, ka dok oketo wir mukene yo tuŋ acam, ci ocako nyiŋe Boaj. Giketo cal ature lena i wi wir aryo ducu. Tic i kom wir otum kumeno. Kiram dok otiyo nam ki mola ma giliyo. Otwodde aduno ma lacce romo futi apar wiye abic cakke i doge tuŋcel nio i doge tuŋ mukene; borre tuŋ malo romo futi abiro ki nucu. Gipimo doge ki tol ci oromo futi pyeraŋwen wiye abic. Ki i te doge ki piny tye iye cal keno munyak ma orumo kom nam ducu, ma romo futi pyeraŋwen wiye abic; cal keno giryeyo latyeŋ aryo. I kare ma giliyo nam, giliyo ki cal keno i kome lawaŋacel. Gicibo nam ocuŋ i wi cal twoni dyaŋi apar wiye aryo. Giketo twoni adek gineno yo tuŋ acam, ki adek gineno yo tuŋ potoceŋ, adek gineno yo tuŋ acuc, ki adek gineno yo tuŋ wokceŋ. Gicibo nam ocuŋ i kom cal twoni-nu kun ŋegi ducu odok tuŋ iye. Kome kinoŋ ma romo incic adek; doge gitiyo macalo dog kikopo, ma rom ki ature lena; dok piine romo debe alip aŋwen. Dok otiyo litino gadigadi apar me mola, Acel acel borre futi abicel, lacce bene futi abicel, ki borre tuŋ malo futi aŋwen ki nucu. Man aye kit ma gitiyo kwede gadigadi matino-ni: gipeto mola ma apada i bute ducu, ma okubbe ki rii mola. I kom mola ma apada ma okubbe ki rii mola-ni gigoro iye cal labwor, ki cal twoni dyaŋi, ki cal lukerubi, Rii mola bene gidero doggi ki cal nyor mudwalle ka wi labwor ki dyaŋi, ki ka tyengi bene. Latin gadigadi acel acel obedo ki lawala mola aŋwen ki bolti me mola. Ka dok i twoke aŋwen ducu tye iye laten otako. Laten-ni giliyo aliya kun gidwalo cal nyor i butgi. Doge onamme ki i i gin muluŋŋe ma ocuŋ malo, kun borre romo futi acel ki nucu. Doge-ni otwodde atwoda macalo gitiyo tedi te gin mo-ni, tutte romo futi aryo ki incic mogo. Doge-ni gidero kun gigoro iye cal, dok mola apada ma gipeto i kom litino gadigadi-ni obedo latwoke aŋwen, pe otwodde atwoda. Lawala aŋwen tye i te mola apada-ni; bolti pa lawala gukubbe ki gadigadi; bor pa lawala romo futi aryo ki incic mogo. Gitiyo lawalane macalo lawala me gadigadi lweny; boltigi, ki doggi, ki cilligi, ki abbugi giliyogi aliya. Giketo latyelle aŋwen i twoke aŋwen ma i kom gadigadi acel acel; latyelle ducu okubbe kacel ki gadigadi. Ki i wi gadigadi giketo iye gin muluŋŋe ma borre tuŋ malo romo incic aboŋwen; dok tuŋ wi gadigadi latyelle ki mola ma apadane gukubbe kacel kwede. I kom latyelle ki i kom mola ma apada gigoro iye cal lukerubi, ki cal labwor-gu, ki cal yadi otit, ka ma romo gorone, ki cal nyor mudwalle i ŋetgi. Kiram otiyo kit gadigadi macalo meno apar; gin ducu giliyogi marom, kun ditogi rom, calgi bene rom. Ka dok otiyo otako mola apar, kun otako acel acel gitwero onyo iye pii ma romo debe pyeraboro. Otako mola acel acel lacce romo futi abicel. Otiyo otako mola acel acel me aluta i gadigadi mola apar ducu. Oryeyo gadigadi abic i ŋet ot pa Lubaŋa yo tuŋ acuc, ki abic yo tuŋ acam ka oketo nam i twok ot ka ma bute yo tuŋ acuc ki bute yo tuŋ wokceŋ gurwatte iye. Kiram dok otiyo lwak agulu ki akwaya Latokke ki becen-gu. Kit meno otyeko tic ducu ma i kom ot pa Rwot pi kabaka Solomon. Otiyo wir aryo, ki lalukana aryo ma oluŋŋe macalo agulu ma giketo i wi wir, ki obwo aryo me umo kom lalukana aryo ma oluŋŋe ma obedo i wi wir-ri. Dok otiyo cal okwer pomegranat miya aŋwen pi obwo aryo-nu, kun cal okwer pomegranat giryeyo latyeŋ aryo i kom obwo acel acel me umo kom lalukana aryo ma oluŋŋe ma obedo i wi wir, Dok otiyo litino gadigadi apar ki otako mola apar ma giluto i gadigadi; ki nam acel, ki cal twoni dyaŋi apar wiye aryo ma giketo nam ocuŋ i komgi. Lwak agulu ducu, ki akwaya latokke-gu, ki becen-gu, jami magi ducu ma i ot pa Rwot, ma Kiram otiyogi pi kabaka Solomon, obedo me mola ma gijwane maleŋ. Kabaka omiyo giliyo mola meno i pwor kulu Jordan, ka ma lobo agulu tye iye, i kin Cukot ki Jaretan, Solomon oweko jami-ni ducu ma pe gipimo pekgi, pien onoŋo jami dwoŋ twatwal, omiyo pek me mola ma gitiyo kwede pe giŋeyo. Kit meno bene Solomon omiyo gitiyo jami ducu ma mitte i ot pa Rwot, gin ene: keno tyer me jabu, meja me jabu pi mugati me aketa i nyim Rwot. Okar-mac me jabu ma giliyo maber ma guryeyogi i nyim kabedo maleŋ ma i tyelo, abic yo tuŋ acuc ki abic yo tuŋ acam; ki lwak cal ature ki laput-gu, ki boyi lakar mac, ducu me jabu; ki kikopo-gu, magac-gu, becengu, atabo me odok aceta ki weer me waŋo mac, ducu me jabu ma giliyo maber; ki pata jabu ma giketo i kom kika me donyo i kicika ma i tyelo, en aye kabedo maleŋ makato ducu, ki i kom kika me kicika maditte ma i ot pa Lubaŋa. Tic ducu ma kabaka Solomon otiyo i kom ot pa Rwot otum kit meno, Solomon dok okelo iye jami ducu ma yam wonne Daudi odyerogi bot Rwot; okelo ryal ki jabu ki jami mukene-gu ducu, okanogi i ot kano lim ma i ot pa Rwot. Solomon ocoko ludoŋo pa jo Icrael ki ludito wi kaka ducu, ma gin aye rwodi kaka ma i doggola pa kwarogi ma i kin jo Icrael, ci gubino i nyim kabaka Solomon i Jerucalem pi kwanyo canduk me gicikke pa Rwot ki i gaŋ kal pa Daudi ma gilwoŋo ni Cion. Lwak jo Icrael ducu gucokke bot kabaka Solomon i kare me kwero nino madito me dwe Etanim, ma en aye dwe me abiro. Ci ludoŋo ducu pa jo Icrael gubino, ka ajwagi pa Lubaŋa gucako tino canduk. Gutero canduk pa Rwot, ki kema me rwatte, kacel ki jami maleŋ ducu ma yam tye i kema; ajwagi ki Lulevi guterogi. Kabaka Solomon ki lwak jo Icrael ducu ma gucokke bote-ni gin ducu gitye kacel kwede i nyim canduk, kun gitumo lwak romi ki twoni-gu mapol ma welgi pe kwanne dok pe nene bene. Kit meno ajwagi gukelo canduk me gicikke pa Rwot wa i kabedone, i kabedo maleŋ me ot pa Lubaŋa, ma en aye kabedo maten makato ducu-m, CI guketo piny i te bwom Lukerubi. Pien Lukerubi guyaro bwomgi ka wi kabedo me canduk wek Lukerubi guum wi canduk woko, kacel ki tal latiŋŋe ducu, Tal latiŋŋe onoŋo giboco, omiyo wigi nen ki i kabedo maleŋ ma i tyelo-ni, ento onoŋo pe gitwero nenogi ki woko; dok pud gitye kunnu wa onyoo. Gin mo onoŋo pe i canduk, kono kidi aryo ma apada keken ma yam Moses oketo iye i Koreb, ka ma yam Rwot oketo iye gicikke ki jo Icrael, i kare ma gia ki-i lo bo Ejipt. Ka ajwagi gukato woko ki i kabedo maleŋ, ci pol obino opoŋo i ot pa Rwot woko; pienno omiyo ajwagi pe gitwero cuŋ ka tiyo ticgi, pi pol meno pien deyo pa Rwot noŋo opoŋo i ot pa Rwot woko. Ci Solomon owacci, “Rwot yam oketo cen i polo, ento en owacci ebedo i pol macol licuc. Agerri doŋ ot ma ocudo malo, wek obed kabedoni ma ibedo iye matwal.” Ka dok kabaka olokke, ci olamo gum i kom lwak jo Icrael ma gucokke ducu, kun jo Icrael ma gucokke-ni gucuŋ mot. Kabaka owacci, “Gipwo Rwot, Lubaŋa pa Icrael, ma doŋ ciŋe otyeko cobo gin ma yam oloko ki doge bot wora Daudi-ni, kun owacci, ‘Nia wa i kare ma akwanyo jona jo Icrael ki i Ejipt, peya ayero gaŋ mo ma i kaka ma i Icrael ducu pi gero iye ot mo, wek nyiŋa obed iye; ento ayero mera Daudi wek olo lwakka jo Icrael.’ I kare-nu onoŋo wora Daudi obedo ki tam i cwinye me gero ot pi nyiŋ Rwot, Lubaŋa pa Icrael. Ento Rwot aye owaco bot wora Daudi ni, ‘Kit macalo onoŋo doŋ tam tye i cwinyi me gero ot pi nyiŋa, itimo ber pi keto lok meno i cwinyi, Ento pe in aye dok ibigerra ot; wodi ma ibinywalo aye bigero ot pi nyina.’ Ci Rwot doŋ otyeko cobo gin ma en ociko; pien an doŋ atyeko leyo ka tyen wora Daudi, an doŋ abedo i wi komker pa Icrael, kit ma yam Rwot ociko-ni, dok atyeko gero ot pi nyiŋ Rwot, Lubaŋa pa Icrael. Doŋ atyeko keto iye kabedo pa canduk pa Rwot ma tye iye gicikke ma Rwot con oketo ki kwariwa, i kare ma kwanyogi woko ki i lobo Ejipt.” Solomon dok ocuŋ i nyim keno tyer pa Rwot ki i nyim lwak jo Icrael ma gucokke ducu, otaŋo ciŋe malo okemo polo. Ci owacci, “Ai Rwot, Lubaŋa pa Icrael, pe tye Lubaŋa mo macalo in, kadi malo i polo nyo piny i wi lobo, ma tye ka gwoko gicikkene macalo in, ma inyuto mar meri ma pe lokke bot luticci ma gibedo ka lubi ki cwinygi ducu. Ibedo ka lubo gin ma yam itito bot wora Daudi; iyo gin ma yam iloko ki dogi, icako doŋ tiyo i kare man ki ciŋi, ci icobo ducu maber. Ai Rwot, Lubaŋa pa Icrael, doŋ ilub gin ma yam iciko bot laticci Daudi ma wora, kun iwacci, ‘Pe ibibedo laboŋo danoni mo ma bibedo i wi komker me Icrael, tekke awobeni gugwoko kitgi maber, kun gibedo ki kit kwo i nyima kit ma in ibedo kwede i nyima-ni.’ Ai Lubaŋa pa Icrael, kombeddi mi lokki doŋ omok matek, kit ma yam iloko bot wora Daudi ma laticci. “Ento Lubaŋa bibedo i wi lobo-ni ada? Nen, kadi polo bene kulu ma malone twatwal-li pe romo in me bedo iye, ci ot ma agero-ni tidine rom mene kono! Kadi bed kit meno, an alegi iwiny legana, an Laticci, ki kit ma abako kwede doga, ai Rwot Lubaŋana; winy koko ki lega ma atye ka lego i nyimi tin. Waŋi aye iwek obed twolo dyewor ki dyeceŋ benebene me neno yo tuŋ bot ot man, en aye kabedo ma yam iwaco pire ni, ‘Nyiŋa bibedo kunnu,’ wek ibed ka winyo legana ma akelo boti kun alokke akemo kabedo man, Dok iwiny legana ki lega pa joni jo Icrael i kare ma wabako dogwa, ma walego wakemo kabedo man atir; iyo in doŋ ibed ka winyo bako doga ki i polo ka ma ibedo iye-ni; ci ka doŋ ityeko winyone, doŋ iwek balwa. “Ka ce dano mo otimo bal i kom wadi mo, ci gimiye okwoŋo kwoŋo pire, ka obino ce okwoŋo kwoŋo ki i nyim keno tyerri ma i ot man, ci in Lubaŋa iwiny ki i polo, ci iti gin ma mitte. Ŋol kop pa laticci-ni, imi kop olo dano mutino alii, kun iketo gin ma en otimo i’ wiye kene, dok imi dano ma pe obalo olo kop kun itime ber ma oporo leŋcwinye. “Ka ce mony pa lumerok guloyo joni jo Iorael pi balgi ma gutimo i komi, ka ce guŋut, gudwogo boti, ci gucako tuco nyiŋi, ma gilego in ka gibako doggi boti i ot man, ci in iwinygi ki i polo, iwek bal pa joni jo Icrael, ka dok idwokgi cen wa i lobo ma yam imiyo bot kwarogi. “Ka ce polo ocegge woko, ma kot mo pe ocwer pi lakit balgi mo i komi, ka ce lwakki gucako lega kun gikemo in i kabedo man, kun gituco nyiŋi, ka guŋut ci gubwoto balgi woko i kare ma iketo can i komgi-ni, ci in Lubaŋa iwinygi ki i polo, iwek balgi, gin joni jo Icrael, dok ipwonygi ki kit yo maber ma myero gulubi; ci doŋ imi kot ocwer i loboni-ni ma yam imiyo bot lwakki obed megi. “Ka ce kec opoto i lobo, ka kono two gemo opoto, nyo ka bel obwarre nyo odoko ocone, nyo ka bonyo opoto nyo okwil obino, ka ce merok pa joni orumogi woko i gaŋgi mo, nyo kadi bed kit gemo aŋo, nyo kit two mo-ni, ka ce lwakki gucako lego nyo bako doggi boti, kadi bed dano acel kok boti, nyo joni jo Icrael ducu, kun dano acel acel ŋeyo kit atwom ma i cwinye, ka ce otano cine okemo ot man; ci in Lubaŋa iwinygi ki i polo ka ma ibedo iye-ni, iwek balgi, ci iti gin ma mitte. Tim dano acel acel kit ma iŋeyo kwede cwinye, ma rwatte ki kit kwone ducu, pien in aye, in keni, iŋeyo kit cwiny pa dano ducu. Meno bimiyo gibedo ka lwori nino ducu ma gibedo iye i lobo ma yam imiyo bot kwarowa. “Obed kit meno bene ka ce larok mo, ma pe joni jo Icrael, obino kany ma oa ki i lobo mo mabor, kun obino pi yweka me nyiŋi; pien gibiwinyo pi nyiŋi madit-ti, ki pi twero me badi ki kit ma iryeyo ki ciŋi pi konyo joni, Ka ce larok mo obino ce ocako lega ma okemo ot man, ci in Lubaŋa iwiny ki i polo ka ma ibedo iye-ni, itim kit gin ducu ma larok-ki okok kwede i nyimi, wek rok ma wi lobo ducu guŋe nyiŋi, galwori, kit ma lwakki jo Icrael gilwori-ni, dok wek guŋe maber ni, ot man ma agero-ni gilwoŋo ki nyiŋi keken. “Ka ce lwakki gucito ka lwenyo ki lumerokgi i kabedo mo ducu ma icwalogi iye, ka ce gukelo legagi boti in Rwot ma gukemo gaŋ man ma in iyero, ki ot man ma agero pi nyini-ni, ci in iwiny legagi ki bako doggi ki i polo, ikony korgi ka ineno lokgi tye atir. “Ka ce gutimo bal i komi, pien pe tye dano mo ma pe balo, ka ce kiniga omaki i komgi, ci imiyogi i ciŋ lamerok mo ma oyakogi ci oterogi i opii wa i lobo pa lumerokgi, ka mabor nyo ka macok, iwiny legagi, Ka cwinygi otamo lok ki i lobo ma giterogi iye i opii-ni, ce guŋut ci gubako doggi boti ki i lobo ma gitye iye i ciŋ luyakgi, kun gikok ni, ‘Wabalo, wanak woko ata, wati yo lwak bal-gu mapol’, ka ce guŋut ki tamgi ducu ki cwinygi ducu i lobo pa lumerokgi ma yam oterogi i opii-ni, kun doŋ gilego i nyimi ma gukemo lobogi ma yam imiyo bot kwarogi, ki gaŋ ma nene iyero, ki ot man ma agero pi nyiŋi; ci in Lubaŋa iwiny legagi ki bako doggi ki i polo ka ma ibedo iye-ni, ci iye konyo korgi ka ineno lokgi tye atir, Dok iwek bal pa joni ma gubalo i komi pi tim aranyigi ducu ma gibalo kwede i nyimi, imi kica omak jo ma yam guterogi i opii-ni, kica ocak makogi i komgi. Pien gin aye lwakki kikome, gin joni kikome ma yam ikwanyogi ki i Ejipt, ma obedo calo buk mac me teto nyonyo ma otwak me wanogi. Wek waŋi onen kit bako dog pa laticci, ki bako dog pa lwakkijo Icrael, cik iti i komgi i kare ducu ma gikok boti. Pien yam dok ikoyogi pat ki i kin rok ma wi lobo ducu wek gubed joni kikome, kit ma yam ituco lokke ki i dog laticci Moses i kare ma yam ikwanyo kwarowa ki i Ejipt, ai Rwot Lubaŋa.” Ka doŋ Solomon otyeko lego lega meno ducu kacel ki bako doge-gu i nyim Rwot, ci oa malo ki i nyim keno tyer pa Rwot ka ma onoŋo orumo iye coŋe, kun otaŋo ciŋe malo okemo polo. Ka doŋ ocuŋ, ci olamo gum i kom jo Icrael ma gucokke ducu kun daŋŋe ki dwane maloŋo ma waco ni. “Gipwo Rwot ma doŋ omiyo jone jo Icrael guywe, kit ma yam ociko ducu! I kom lok ducu mabeco ma yam ociko ki i dog laticce Moses, pe tye lok mo acel ma pe ocobo kakare. Rwot Lubaŋawa obed kwedwa kit ma yam obedo ki kwarowa-ni; pe obwotwa, pe otenywa ata, wek olok cwinywa odwok i kome. Kit meno wabilubo yone ducu, kun wagwoko lok ma en ociko, ki cikke ducu ma yam ociko ki kwarowa. Wek lok ma doŋ aloko ducu, ma abako ki doga i nyim Rwot-ti, obed cok i nyim Rwot Lubaŋawa dyeceŋ ki dyewor, wek en otim pira ma an laticee-ni, ki pi lwakke jo Icrael, gin ma tye atir i nino acel acel. Meno bimiyo rok ma wi lobo ducu ŋeyo ni, Rwot aye Lubaŋa kene; mukene peke. Wun wubed ki leŋic i kom Rwot Lubaŋawa, wulub cik ma en oketo, kun wugwoko lok ma en ociko ducu macalo wutiyo tin-ni.” Ka dok kabaka ki jo Icrael ducu gucako tyero gitum i nyim Rwot. Solomon otyero gityer lakwecwiny bot Rwot ma romo twoni dyaŋi alip pyeraryo wiye aryo, ki romi alip miya acel ki pyeraryo. Kabaka kacel ki jo Icrael ducu gukwero ot pa Rwot kit meno. I nino meno bene kaba ka okwero kabedo ma i cwiny dyekal ma tye i nyim ot pa Rwot-ti, Otyero kunnu gitum awaŋa ki gityer me moko kwon ki moo dwolo me gityer lakwecwiny, pien keno tyer mola ma i nyim Rwot-ti onoŋo tidi twatwal, pe romo keto iye gitum awaŋa kacel ki gityer me moko kwon ki dwolo me gityer lakwecwiny-gu. Kit meno Solomon okwero nino madito i kare meno, kacel ki jo Icrael ducu. Onoŋo lwak gucokke mapol kun gua wa i yo ma donyo i Kamat nio wa i laora kulu me Ejipt, ci gubedo i nyim Rwot Lubaŋawa pi nino abiro. I kom nino me aborone Solomon ocwalo lwak gudok woko tugi. Lwak gupwoyo kabaka, ci gudok i pacogi ki yomcwiny madwoŋ, ma igi okwe pi gin ducu mabeco ma Rwot otimo pi laticce Daudi ki pi lwakke jo Icrael. Ka Solomon otyeko gero ot pa Rwot, ki ode en kabaka, ki odi mukene ducu ma onoŋo en mitogi, ci Rwot dok onen bote tyen me aryone, kit ma yam onen bote i Gibeon ca. Rwot owacce ni, “Atyeko winyo legani, ki bako dogi ma iketo i nyima; atyeko lonyo ot man ma igero-ni obed maleŋ, aketo iye nyina wek obed iye matwal; dok waŋa ki cwinya bikemo kunnu nino ducu. Ki ma tuŋ boti, ka ce ibibedo ki kit kwo i nyima ma yam woru Daudi obedo kwede-ni, kun ii Ien dok cwinyi atir, ce ka itiyo gin ma aciko ducu kun igwoko cik ma aketo, ci an Lubaŋani abimoko komkerri me loyo jo Icrael matwal, kit ma yam aciko bot woru Daudi-ni kun awaco bote ni, ‘Pe ibibedo laboŋo danoni mo ma bibedo i wi komker me Icrael.’ Ento ka ce in nyo likwayi wunak wuweko lubo kora, ma wukwero mako lok ma aciko ki cik ma aketo i nyimwu, ce wukobo woko ka tiyo bot lubaŋa mogo mukene kun wuworogi, ci miyo abityekojo Icrael woko ki i lobo ma yam amiyo botgi-ni; dok abikwanyo waŋa woko, pe doŋ aneno ot man, ma doŋ alonyo bedo maleŋ pi nyina-ni; miyo nyiŋ jo Icrael bi doko carolok ki lok aboka i kin rok ducu. Ot man bi doko obur ma odurre lipim; miyo dano ducu ma gibikato ka ŋete gibiuro ki jwat kun giwacci, ‘Kit lok aŋo ma omiyo Rwot otimo lobo-ni ki ot man ki tim macalo man?’ Ka dok gibiwacci, ‘Pien gubwoto Rwot Lubaŋagi ma yam okwanyo kwarogi ki i lobo Ejipt, ci gukobo i te loc pa lubaŋa mogo mukene, dok gubedo ka worogi ma kun gitiyo botgi bene; en aye lok mumiyo Rwot omiyo can opoto i komgi magwa-ni.’ ” Gero odi aryo-ni ma Solomon ogero, gin aye ot pa Rwot ki ot pa kabaka, otero mwaka pyeraryo kulu, kun Kiram kabaka me Turo obedo ka miyo bot Solomon bao yat cedar ki bao yat ciprec, ki jabu bene kit ma en mito ducu. Lacen ka doŋ otum Solomon omiyo bot Kiram gaŋi pyeraryo ma i lobo Galilaya. Ento i kare ma Kiram oa ki i Turo ocito ka neno gaŋi ma Solomon omiyo bote-ni, oneno gaŋine pe guyomo cwinye. Kiram owaco bot Solomon ni, “Omera, man kono kit gaŋi aŋo ma imiya-ni?” Kit meno omiyo lobone gilwoŋo ni Kabul nio wa onyoo. Kiram onoŋo yam ocwalo bot Solomon jabu ma romo talanta miya acel ki pyeraryo. Man aye lok i kom tic muroni ma kabaka Solomon omiyo girono pi gero ot pa Rwot, ki ode kikome, ki Millo, ki cel me Jerucalem, kacel ki gaŋi magi, Kajor, Megido ki Gejer. Onoŋo Parao kabaka me Ejipt yam ocito omako Gejer ka owaŋo woko ki mac, ka dok oneko Lukaanan ma gibedo’ i gaŋ meno ci omiyo bot nyare ma Solomon onyomo, wek obed mot me nyommegi; ci Solomon ogero Gejer odoco, Girono bene dano pi gero Betkoron Mapiny, kacel ki Baalat, Tamar ma tye i tim me lobo Juda, ki gaŋi ducu me kano cam ma yam Solomon tye kwedgi, ki gaŋi me gadigadine me mony, gaŋi pa lulweny ma giriŋo ki aguragurane, ki kit gedo ducu ma Solomon omito gerogi i Jerucalem ki i Lebanon ki i lobo ma en loyo ducu. Likwayo pa jo ma pe gin jo Icrael ma yam gubwot ci gudoŋ i lobo ki i kom jo Amor, jo Kit, jo Perej, jo Kiv ki jo Jebuc, ma jwerogi woko liweŋ yam oloyo jo Icrael, gin aye Solomon oketo tic muroni i wigi macalo gin opii, kit macalo tye-ni nio wa onyoo. Ento Solomon pe omiyo jo Icrael tiyo tic macalo opii: gin gubedo askarine, ki ludito ticce, ludito wi mony, lukapten, ludito ma loyo gadigadi lweny, ki lulweny ma riŋo ki aguragura. Ludito pa Solomon ma giloyo dog tic ducu onoŋo giromo miya abic ki pyerabic; gin aye giloyo lwak ducu ma gitiyo tic ducu. Nya pa Parao odak woko ki i gaŋ kai pa Daudi, okobo i ode kikome ma Solomon ogero pire; ka dok lacen Solomon ogero Millo. Solomon obedo ka tyero gitum awaŋa ki gityer lakwecwiny tyen adek i mwaka acel acel, kun tyerogi i wi keno tyer ma otiyo pi Rwot-ti, ka dok wano odok eceta i nyim Rwot. Solomon otyeko tic me gero ot pa Rwot kit meno. Kabaka omiyo gipayo lwak mel i Ejion-geber, ma tye cok ki Elot i dog Nam Makwar i lobo Edom. Kiram ocwalo luticce ma gin lunam ma guŋiyo ki tic i nam wek guwot ki mel meno kacel ki jo pa Solomon. Gucito i Opir ka omo jabu ki kunnu; gukelo ma romo talanta miya aŋwen ki pyeraryo ci gudwogo kwede gumiyo bot kabaka Solomon. I kare meno kabaka ma dako me Ceba owinyo pi yweka pa Solomon, ci obino bote ka temo iye ki peny matego. Obino i Jerucalem ki lwak jo madito ma gicom i kore, kacel ki kinaga-gu ma giyeyo aŋwece, ki jabu madwoŋ twatwal, ki litino godi me wel, Ka obino bot Solomon, ci otitte lok ducu ma onoŋo tye i cwinye. Solomon odok iye i pennye ducu; pe onoŋo tye lok mo wacel ma okanne ki bot kabaka, ma tucone oloye. Ka kabaka ma dako me Ceba oneno ryeko pa Solomon ducu, ki ot ma en ogero, ki cam ma i wi mejane, ki kit kabedo pa luditone, ki tic pa luticce ducu, ki boŋŋigi, ki lutin kikopo-gu, ki gitum awaŋa ma en tyero i ot pa Rwot, ci tam otum woko ki i cwinye. ‘Owaco bot kabaka ni, “Lok ducu ma i komi ma yam gitero bota ki i lobona, ki lok i kom ryekoni bene, onoŋo lokke tye kakare; ento yam pe aye lok ma gitero bota, nio ka abino aneno ki waŋa. Nen, pe gititta kadi wa nucune kulu, pien ryekoni ki lonyoni kato lok dog ma gitero bota. Monni gitye ki yomcwiny kuman! Luticci ducu gitye ki yomcwiny ma rom mene, ma gibedo ka cuŋ i nyimi jwijwi ka winyo lok me ryekoni! Gipwo Rwot Lubaŋani ma cwinye opwoyo in ci oketi i wi komker me Icrael! Pien Rwot omaro Icrael matwal, en aye mumiyo oketi ibedo kabaka, wek ibed ka ŋolo kop atir dok kakare.” En omiyo bot Solomon jabu madwoŋ ma romo talanta miya acel ki pyeraryo, ki lwak aŋwece mapatpat madwoŋ twatwal, ki lwak litino godi me wel, Aŋwece pe dok obino madwoŋ ma rom meno ma kabaka ma dako me Ceba omiyo bot Solomon. Dok bene mel ma Kiram kelo ki jabu ma i Opir okelo bao me yat almug madwoŋ twatwal, ki lwak godi matino me wel, Kabaka otiyo ki bao yat almug pi jeijo kor ot pa Rwot ki kor ot pa kabaka. Otiyo kwede opuk bene ki nana pa luwer. Kit bao me almug macalo meno pe dok obino i lobo, pe dok onen, nio wa onyoo. Kabaka Solomon omiyo bot kabaka ma dako me lobo Ceba jami ducu ma cwinye omito, omiye gin ducu ma openyo, omedo ki gin ma en Solomon oyubo pi miyo bote muporo lonyone. Kit meno kaba ka me Ceba ocako wot me dok i lobone kacel ki luticce ducu. Lwak jabu ma obino bot Solomon i mwaka acel acel pekke onoŋo cok romo ratili alip pyerabiro, ma pe giribo iye ma obino ki tuŋ bot lucat-wil me paco ki me lobo ma woko, ki ma oa ki bot luker me lobo Arabia ki bot lulo dul lobo mapatpat me lo bo Icrael. Kabaka Solomon otiyo kwodi madoŋo miya aryo me jabu, ma gitetogi ki nyol; i kom kwot acel acel odonyo iye jabu ma pekke cok romo ratili pyeraryo. Dok otiyo kwodi matinone miya adek ma gitetogi ki nyol, kun kwot acel acel giteto ki jabu ma pekke cok romo ratili abicel. Kabaka oketogi i ot ma gilwoŋo ni Buŋa me Lebanon. En dok otiyo komker madit me lak lyec, ci omwono kome woko ki jabu ma giliyo maber, Komker meno onoŋo tye ki rwomme abicel, ki i ŋe komker giketo iye cal wi wod twon. Ka ŋete tuŋŋi ki tuŋŋi giketo iye ka teno cin dano, ki cal labwor aryo gucuŋ ka ŋet bad kom me teno ciŋ tuŋŋi ki tuŋŋi. Onoŋo tye bene cal labwor apar wiye aryo ma gucuŋ i agikki rwom abicel-li, tuŋŋi ki tuŋŋi tye komker mo ma yam gitiyo ma cal ki meno i te ker ducu. Jami ducu ma yam kabaka Solomon mato kwede onoŋo me jabu keken, wa jami ducu ma gitiyo kwedgi i ot Buŋa me Lebanon obedo me jabu ma giliyo maber. Pe tye iye jami me ryal mo acel, pien i kare pa Solomon pe tye ŋatti mo ma otamo pi ryal ni obedo gin mo. Onoŋo co tye ki lwak mel madonone ma giwoto i nam kacel ki mel pa Kiram. Mel man madoŋo-ni ma gilwoŋo ni mel me Tarcic yam dwogo cen ka mwaka okato adek adek kun gikelo jabu ki ryal ki lak lyec-gu, ki ayom-gu ki gunya-gu, Kabaka Solomon obedo dit makato luker ma wi lobo ducu pi lonyone ki pi ryekone. Dano me lobo ducu gubedo ka yenyo kit yo me neno wan Solomon, ki pi winyo kit ryekone ma Lubaŋa oketo i cwinye-ni. Dano acel acel tero motte bote, kun gitero jami me ryal ki me jabu-gu, ki ginaruka-gu, ki odok murra, ki aŋwece, ki aguragura ki kanagu mwaka ki mwaka. Solomon ocoko gadigadi lweny ki lulweny ma giriŋo ki aguragura. Obedo ki gadigadi lweny alip acel ki miya aŋwen, ki wegi aguragura alip apar wiye aryo, Oketo mogo i kingi i gaŋi me gadigadi lweny, ki mukene gubedo bote i Jerucalem. Kabaka Solomon Omiyo ryal odoko gin malam ma rom ki gweŋ-gu i Jerucalem, dok okelo yadi cedar mapol ata ma rom ki olam ma i bar Cepela. En yam limo aguragura ma a ki i Ejipt ki Kuc; lucat-wil pa kabaka gamogi ki i Kuc i wel lim ma onoŋo giyubo. Gadigadi lweny ma gia ki i Ejipt welgi onoŋo romo cekel me ryal miya abicel, ki aguragura acel welle cekel miya acel ki pyerabic; ka dok lucat-wil pa kabaka catogi’ bot luker ducu pa jo Kit ki bot luker me Ciria. Kabaka Solomon obedo ka maro mon mapol: ma anyira rok mapatpat, Onyomo nya pa Parao, ki anyira Moab, ki anyira Ammon, ki me Edom ki me Cidon ki pa jo Kit-gu. Onyomogi ki i rok ma yam Rwot ojuko jo Icrael i komgi kun waco ni, “Pe wubinyomo anyiragi, kadi wa gin bene pe gibinyomo anyirawu, pien ada miyo giloko cwinywu dok cen ka lubo lubaŋagi.” Ento Solomon cwinye omaro anyira-nu matek, En obedo ki mon miya abiro ma gin ducu anyira pa luker, ki mon mukene ma aŋeca miya adek; ci monne guloko cwinye woko ada. Ka Solomon doŋ oti woko, ci monne guloko cwinye odok i kom lubaŋa mogo mukene, omiyo pe obedo ki leŋic i kom Rwot Lubaŋane, kit ma yam wonne Daudi obedo kwede. Solomon ocako lubo kit pa jok ma dako pa jo Cidon ma nyiŋe Acitoret, ki jok kipyeda pa jo Ammon ma gilwoŋo Milkom. Kit meno Solomon otiyo gin ma nen marac i wan Rwot, pe doŋ tiyo gin ma Rwot mito ki cwinye ducu, kit ma yam wonne Daudi otiyo-ni. Solomon dok ogero wan jok me woro Kemoc ma jok kipyeda pa jo Moab, ki me woro Molek ma jok kipyeda pa jo Ammon; oketo wan jogigi i wi got ma i ŋet Jerucalem yo tuŋ wokeen. Obedo ka timo kit meno pi monne ducu me rok mukene ma giwaŋo odok eceta dok gityero gitum bot lubaŋagi. Rwot okeco i kom Solomon, pien onoŋo cwinye doŋ oweko Rwot Lubaŋane woko, ma yam onen bote tyen aryo-ni, ma yam bene ociko Solomon i kom lok man kun waco bote ni pe olub kor lubaŋa mukene; ento en pe omako cik ma Rwot omiye-ni. Omiyo Rwot owaco bot Solomon ni, “Kit macalo cwinyi tye kit man, ma ikwero mako gicikkena ki cik ma aketo ma aciki kwede, an doŋ abimayo kerri woko, amiyo bot laticci, Ento pi woru Daudi miyo pe abitimo i kare-ni, ento abimayo woko ki i ciŋ wodi. Kadi bed kumeno, pe abikwanyo kerri woko ducu, ento abimiyo kaka acel bot wodi, pi nyiŋ laticca Daudi, ki pi Jerucalem ma yam ayero.” Rwot okelo merok i kom Solomon, Adad ma jo Edom ma obedo wat pa Luker me Edom. Onoŋo yam i kare ma Daudi obedo i Edom, Joab ma ladit me mony ocito kunnu pi yiko kom dano ma gineko, ci oneko co woko ducu ma i Edom. I kare ca Joab ki jo Icrael gubedo kunnu dwe abicel kulu, nio ka gutyeko co ma i Edom woko ducu. Ento Adad oriŋowoko kacel ki jo Edom mogo ma gin Lutic pa wonne. I kare meno onoŋo Adad pud tidi. Gua woko ki i Midian gucito i Paran, ci gukwanyo co mogo ki i Paran gucito kwedgi i Ejipt bot Parao kabaka me Ejipt. Parao omiyo ot bot Adad ki cam, wa ki lobo bene. Adad olimo gum madwoŋ ki bot Parao, Parao dok omiye onyomo ywere ma Lamiŋ dakone kikome ma daker-ri, ma nyiŋe Tapanec. Lamiŋ Tapanec onywalo latin laco ki Adad, nyiŋe Genubat, ci Tapanec omiyo Genubat odono i ot pa Parao kun bedo kacel ki awobe pa Parao. Ento ka Adad owinyo ki i Ejipt ni Daudi doŋ oto, ma giyike kacel ki kwarine, ki Joab ma ladit me mony bene otyeko to woko, ci Adad openyo Parao ni, “Wek doŋ aa woko ki boti, adok doŋ i lobowa.” Parao openye ni, “Gin aŋo ma pe inoŋo kany ma, ormyo imito dak woko i lobo tuwu-ni?” Adad ogamo ni, “Koŋ iwek acit mono.” Lubaŋa dok okelo merok mukene bot Solomon. Okelo Rejor ma wod pa Eliada, ma onoŋo yam oriŋo woko ki bot rwode Adadejer kabili ma Joba. En ocoko dano mapol ma gibedo bote, ci odoko ladit me buca mony pa luyak ki i ŋe nek ma Daudi onekogi kwede, Gucito i Damaciko, gubedo kunnu, ci guketo en obedo kabaka i Damaciko. En obedo Lamerok pa jo Icrael i kare pa Solomon ducu, obedo ka timo tim aranyi kit ma yam Adad timo-ni. Obedo ka loyo lobo Ciria, kun cwinye dagjo Icrael. Dano mukene ma otiŋo ciŋe i kom kabaka Solomon obedo Jeroboam wod pa Nebat, ma jo Epraim me Jereda. En yam obedo latic pa Solomon; minne nyiŋe Jerua ma nene cware oto. Jeroboam otiŋo ciŋe i kom kabaka pi tyen lok man. I kare ca onoŋo Solomon obedo ka gero Millo dok ocego wan cel me gaŋ kal pa wonne Daudi ka ma yam gimuko woko-ni. Jeroboam onoŋo tye ki kero kome ki kwiri bene. Ka Solomon oneno ni en latin awobi ma kome mit i tic, ci omiye dit me loyo tic muroni ducu pa jo me ot pa Yucepu. I kare mo ma Jeroboam oweko Jerucalem okato woko, ci lanebi Akija ma Lacilo orwatte kwede iyo, kun onoŋo Akija oruko boŋo manyen. Gin aryo onoŋo girye kengi i dye tim. Ci Akija olunyo boŋo manyen ma oruko i kome-ni, oyeco iye dul apar wiye aryo. Ka ocako lok ki Jeroboam, owacci, “Gam dul boŋo apar-ri iter obed meri, pien Rwot Lubaŋa me Icrael owaco kuman ni. ‘Nen, an acok mayo ker woko ki i ciŋ Solomon, ci abimiyo kaka apar i ciŋi. Ento en bidoŋ ki kaka acel pi nyiŋ laticca Daudi, ki pi Jerucalem ma yam ayero-ni, en aye gaŋ ma yam ayero ki i kin kaka ma i Icrael ducu. Pien Solomon doŋ otyeko bwota woko, ocako woro gire Acitoret ma jok ma dako ma jo Cidon giworo-ni, ki Kemoc ma jok pa jo Moab, ki Milkom majok pa jo Ammon. En pe doŋ tye ka lubo kora, pe dok tiyo gin ma nen atir i waŋa, pe dok mako cik ma aketo, pe doŋ lubo cikka kit ma yam wonne Daudi olubo-ni. Ento pe abikwanyo ker woko ducu ki i cine kikome; abimiyo en bedo laloc i kare me kwone ducu, pi laticca Daudi ma yam ayero, ma yam gwoko cikka ki cik ma aketo ducu. Ento abikwanyo ker woko ki iciŋ wode, abimiyo boti, gin kaka apar-ri ducu. Ci abimiyo kaka mo acel bot wode, wek laticca Daudi obed ki mac tara i nyima jwijwi i Jerucalem, i gaŋ ma yam ayero me keto iye nyiŋa. Abiketo in Jeroboam ibedo kabaka me Icrael, ci ibiloyo gin ma cwinyi mito ducu. Ka ce ibiwinyo cikka ma aciki kwede, ce ilubo yona, kun itiyo gin ma nen atir i waŋa, pi gwoko cikka ki gin ma aciko ducu kit ma yam laticca Daudi ogwoko-ni, ci abibedo kwedi; an aye abimiyo odi cuŋ matek atika, kit ma yam atimo pi Daudi-ni, dok abimiyo jo Icrael i ciŋi. Abiketo can i kom likwayo pa Daudi, ento canne pe bibedo matwal.’ ” Solomon otemo neko Jeroboam ento Jeroboam oa woko, oriŋo i Ejipt bot Cicak kabaka me Ejipt, ci obedo gire i Ejipt nio ka Solomon oto. Lok kom Solomon mudoŋŋe ducu, ki gin ducu ma yam otiyo, ki ryekone, gityeko coyone ducu i buk me kwo pa Solomon. Kare ma Solomon oloyo kwede jo Icrael ducu kun bedo i Jerucalem oromo mwaka pyeraŋwen. Solomon oto ci oywe kacel ki kwarine, ka giyiko i gaŋ kal pa wonne Daudi. Rekoboam ma wode aye oleyo ka tyene. Rekoboam ocito i Cekem, pien onoŋo jo Icrael ducu gumol gucito i Cekem ka keto en me bedo kabaka. Ka Jeroboam wod pa Nebat owinyo pire, ci oa ki i Ejipt odok cen; pien onoŋo Jeroboam pud tye i Ejipt ka ma yam oriŋo iye kabaka Solomon. Gicwalo lukwena ka lwone, ci Jerobaom ki lwak jo Icrael ma gucokke ducu guwaco bol Rekoboam ni, “Woru oketo yec mapek i komwa. In doŋ ilok tic matego ma woru omiyowa, ki yec mapek ma en oketo i komwani obed mayot, ci wan wabibedo luticci.” Rekoboam ogamo ni, “Koŋ wudok cen wubed kunnu nino adek, ka dok wudwog bota kany.” Ci lwak gudok cen. Kabaka Rekoboam ocako poro lok ki ludoŋo muteggi, ma yam gicuŋ i nyim wonne ka miye tam i kare ma en pud kwo, ci openyogi ni, “Wun wumiya kit tam aŋo wek adok iye bot lwak man?” Gin guwacce ni, “Ka ce tin imito bedo latic pa lwak man kun itiyo pi konyogi, iloko botgi lok mabeco i kare ma ibidok iye i penygi, ci gin bene gibibedo luticci matwal.” Ento en obwoto lam pa ludoŋo muteggi woko, ocako dok poro lok ki awobe ma yalwakke, ma gicuŋ i nyime, Openyogi ni, “Wun wumiya kit tam aŋo wek adok iye ki lwak man ma gupenyo ni, ‘Wek yec ma woru oketo i komwa mapek-ki obed yot.”?” Ci awobe ma yalwakke guwacce ni, “Ibidok iye bot lwak ma gupenyi kit man ni, ‘Woru yam omiyo yecwa odoko pek, ento in imi obed yot botwa’; in ibidok iye ki gin kit man ni, ‘Nyig ciŋa kinoŋ makato pyer wora. Doŋ abitiyo kit man: wora yam oketo yec mapek i komwu, an doŋ abimedo bedo mapek; wora yam pwodowu ki del anino, an abipwodowu ki yib otoŋ.’ ” Jeroboam ki lwak ducu gubino bot Rekoboam i kom nino me adekke, kit ma onoŋo kabaka ocikogi, Kabaka odok i peny pa lwak ki gero, pien oweko tam ma ludoŋo muteggi gumiye. Oloko kwedgi kit ma awobe guyubo kun wacci, “Wora yam omiyo yecwu odoko pek, ento an abimedo bedo mapek. Wora yam pwodowu ki del anino an abipwodowu ki yib otoŋ.” Gin mumiyo kabaka pe owinyo lok pa lwak, pien Rwot aye omiyo okwero, wek lokke ocobbe kakare ma yam en oloko bot Jeroboam wod pa Nebat kun ocwalo Akija ma jo Cilo ocito otito bote-ni, Ka jo Icrael guneno ni kabaka pe owinyogi, ci lwak gudok iye bote ni, “Wan watye ki ‘wan po kwa aŋo i kom Daudi? Pe watye ki dul mo i kom latin pa Yece. Wun jo Icrael wudok i kemawu! In Daudi, doŋ inen odi keni.” Ci jo Icrael gupokke woko gudok i pacogi. Ento Rekoboam pud loyo jo Icrael ma gibedo i gaŋi ma i Juda, Kabaka Rekoboam ocwalo Adoram botgi, ladit ma loyo t ic muroni, ci jo Icrael ducu gucele ki got, guneke woko, Kabaka Rekoboam orune oito i gadigadi lwennye oriŋo kwede woko i Jerucalem. Kit meno-jo Icrael gujemo woko i kom luker me ot pa Daudi cakke ki i kare-nu nio kwede wa onyoo. Ka jo Icrael guwinyo ni Jeroboam odwogo, ci gucwalo kwena gulwoŋe, ci obino bot lwak ma gucokke, lwak gukete me bedo kabaka ma loyo jo Icrael ducu, Pe tye ŋatti mo ma dok olubo kor ot pa Daudi, kono kaka pa Juda keken. Ka Rekoboam odwogo cen Jerucalem, ocoko jo ma giyero ki i kaka pa Juda ducu ki i kaka pa Benjamin, twoni lweny alip miya acel ki pyeraboro, pi lweny ki jo me ot pa Icrael wek gudwok ker bot Rekoboam wod pa Solomon, Ento lok pa Rwot obino bot dano pa Lubaŋa ma nyiŋe Cemaya kun wacci, “Wac bot Rekoboam wod pa Solomon ma kabaka me Juda, ki bot jo ducu me ot pa Juda, ki jo pa Benjamin, ki bot jo mukene ducu ni, ‘Rwot owaco ku man ni, Wun pe wubicito ka lweny i kom lutuwu ma gin jo Icrael. Wek dano acel acel odok cen i pacone, pien lok man oa ki bota.’’’ Gin ducu guwinyo lok pa Rwot, ci gudok cen i pacogi, kit ma Rwot owaco-ni. Jeroboam ogero gaŋ Cekem i lobo godi me Epraim, ci obedo kunnu; ka dok oa ki kunnu ocito ogero gaŋ Penuel. Ka dok ocako lwodo lok ki i cwinye ni, “Kit ma tye-ni, ker bidok woko cen i ot pa Daudi. Pien ka ce lwak gibedo ka wirre ka tyero gitum wa i Jerucalem ka ma ot pa Rwot tye iye-ni, ci miyo cwiny lwak man bidok woko i kom rwotgi Rekoboam ma kabaka me Juda, ci miyo gibineka woko ka gidok bot Rekoboam kabaka me Juda.” Kit meno kabaka ocako yubo lok ci otiyo cal litino twoni aryo me jabu, ka owaco bot lwak ni, “Wun doŋ wubedo ka wirre wa i Jerucalem twatwal, meno doŋ oromowu, Doŋ wunen lubaŋawu, wun jo Icrael, ma yam gukwanyowu woko ki i lo bo Ejipt.” Jeroboam oketo cal wod twon acel i Betel, ka dok oketo acel i Dan. Lok man odoko bal, pien jo Icrael gucako mol gicito bot wod twon acel ma tye i Betel, ki bot mukene ma tye i Dan, Jeroboam dok ogero odi me woro Lubaŋa i wi godi, kun keto iye ajwagi ma okwanyogi ki i kin lwak ata, ma pe gin jo Levi. Dok oketo nino madit obedo i dwe me aboro, i kom nino dwe apar wiye abic, ma rom ki nino madit ma bedo i Juda-ni, ci ocako tyero gitum i kom ke no tyer. Obedo ka tiyo kit meno i Betel, kun tyero gitum bot cal litino twoni ma en otiyo-ni. Dok oketo i Betel ajwagi ma okwanyo ki i kabedo me woro Lubaŋa i wi godi ma en oyubo-ni, Oito i keno tyer ma en otiyo i Betel i dwe me aboro, i nino dwe apar wiye abic, i nino ma cwinye otamo-ni; oketo nino madit pi jo Icrael, dok oito bene i keno tyer ka wano odok eceta, Dano pa Lubaŋa mo oa ki i Juda ma Rwot ocwalo ki lokke wa i Betel, ka ma Jeroboam onoŋo ocuŋ iye ka ŋet keno tyer ka waŋo odok eceta. Dano meno ocako lok ki gero kun tito lok pa Lubaŋa i kom ke no tyer. Owacci, “Ai keno tyer, keno tyer, Rwot owaco kuman ni, ‘Nen ba, gibinywalo latin laco i ot pa Daudi ma nyiŋe Yocia. Ajwagi me kabedo me woro Lubaŋa ma i wi godi ma gibedo ka waŋo odok eceta i komi en binekogi woko i komi macalo gitum, ki cogo pa dano bene gibiwaŋogi i komi.’ ” Omiyo lanyut i nino meno kun wacci, “Man aye bibedo gin ma nyuto ni Rwot aye oloko lok man: Gibimuko keno tyer-ri woko, ki buru ma i wiye-ni gibionyo woko piny.” Ka kabaka Jeroboam owinyo lok ma dano pa Lubaŋa owaco kun loko ki gero i kom 338 keno tyer ma i Betel, oryeyo cine ki i ner keno tyer kun wacci, “Wumak dano-nu woko.” Ci bade ma oryeyo pi cimo dano-nu otugi tal woko cut, ma dolone wek odwog cen oloye woko. Ki keno tyer bene otugi muk woko, ki buru bene otugi ukke woko piny nia ki i wi keno tyer. Kumeno lanyut me lok pa Rwot ma dano pa Lubaŋa otito-ni ocobo kakare, Jeroboam owaco bot dano pa Lubaŋa ni, “Leg Rwot Lubaŋani kombeddi, wek odwok cwinye, ka doŋ ileg pira, wek bada odolle odwog i koma kakare.” Dano pa Lubaŋa olego Rwot, ci bad kabaka odolle odwogo cen kakare, obedo kit ma con ca, Kabaka owaco bot dano pa Lubaŋa ni, “Bin doŋ wacit paco, wek iciywe kunnu, ci abimiyi mot mo me pwoc.” Ento dano pa Lubaŋa ogamo dog kabaka ni, “Kadi bed imiya nucu jami ma i odi kulu, pe abiye donyo i odi wan kwedi. Dok pe abicamo kwon kadi wa mato pii-gu i kabedo man; pien Rwot ocika kit meno kun wacci, ‘In pe ibicamo kwon kadi wa mato pii-gu kunnu, dok pe ibidwogo ki yo ma icito kwede kunnu.’ ” Kit meno en okwanyo yo mukene; pe odok cen ki yo ma ocito kwede i Betel-li. Onoŋo tye lanebi mo ma oti woko ma bedo i Betel. Awobene gucito gutitte gin ducu ma dano pa Lubaŋa otiyo i Betel i nino meno; ki lok ma oloko bot kabaka bene gutito bot wongi. Ci wongi openyogi ni, “En kono okwanyo yo mene?” Awobene gunyutte yo ma dano pa Lubaŋa ma oa i Juda-ni odok kwede cen. Ci owaco bot awobene ni; “Wutwena kom me bedo i wi kana,” Gutwene kom me bedo i wi kanane, ci en obedo i wiye. Ocita i kor dano pa Lubaŋa-nu, onoŋe obedo i te yat kworo. Owaco bote ni, “In aye i dano pa Lubaŋa ma oa i Juda-ni?” Ogamo ni, “An do!” Dok owacce ni, “Bin wacit paco kacel kweda ka camo kwon.” Dano pa Lubaŋa ogamo ni, “Pe myero adok kwedi cen, nyo donyo kwedi i ot, dok pe abicamo kwon kwedi kadi wa mato pii-gu i kabedo man; pien lok pa Rwot obino bota ma ocika ni. ‘In pe ibicamo kwon kadi wa mato pii-gu kunnu, dok pe ibidwogo ki yo ma icito kwede kunnu.’ ” Lanebi muti ca ogamo doge ni, “An bene lanebi macalo in, dok lamalaika owacca lok pa Rwot kun wacci, ‘Cit icidwog ki lanebi ca paco, en obin kacel kwedi wa i odi wek ocam kwon ka omat pii-gu.’’’ Ento noŋo en obedo ka bwolo dano ca abwola, Dano ca odok cen kacel kwede, ci ocamo kwon i ode, ka omato pii-gu, kare ma gubedo ka cam wi meja, lok pa Rwot obino bot lanebi muti ca ma omiyo lawote odwogo cen i ode, Ocako lok ki gero bot dano pa Lubaŋa ma oa ki i Juda kun wacci, “Rwot owaco kuman ni, ‘In pe iworo dog Rwot, pe imako cik ma Rwot Lubaŋani ociki kwede, ento iye dwogo wako cen, dok ibedo ka camo kwon bene ki mato pii-gu i kabedo ma awacct m pe myero icam iye kwon kadi wa mato pii-gu. Pi meno pe gibiyiko komi i Lyel pa kwariwu.’ ” Ka doŋ gityeko cam ki mat, won ot otweyo kom me bedo i wi kanane pi lanebi ma en omiyo odwogo cen. Ka dano meno ocito, labwor mo orwatte kwede i yo, ci omake oneke woko. Kome obuto i yo kun kana ocun ka ŋete, ki labwor bene ocun ka ŋet kom dano-nu. Dano ma gukato ka ŋete guneno kom dano ma obuto i yo, ki labwor ma ocuŋ ka ŋet kom dano-ni. Gubino gutito pire i gaŋ ma lanebi muti bedo iye-ni. I kare ma lanebi ma omiyo dano ca odwogo cen-ni owinyo pire, ci owacci, “Meno aye dano pa Lubaŋa ma pe oworo lok pa Rwot-ti; omiyo Rwot omiye i ciŋ labwor ma okaye oneke woko-ni, kit macalo Rwot oloko kwede bote.” Ci owaco bot awobene ni, “Doŋ wutwe kom i wi kana,” ci gutweyo kom i wi kana. Ocito onoŋo kom dano-nu gibolo iyo, kun kana ki labwor gucuŋ ka ŋet kome. Labwor bene pe omwodo kome, pe okayo kana bene, Lanebi muti-ni otino kom dano pa Lubaŋa-ni, oketo i wi kanane, ci okelo kome i gaŋŋe, wek gukum pire ka guyiko kome. Lanebi meno oyiko kom dano pa Lubaŋa i lyeŋe kikome; ci gukumo pire kun giwacci, “Can madit opoto i komi do, omera!” Ka doŋ gityeko yiko kome, ci lanebi-nu ociko awo bene ni, “Ka an doŋ ato, ci wuyika i lyel ma giyiko iye kom dano pa Lubaŋa-ni, wuket cogona ka ŋet cogone. Pien lok ma en ogerre kwede matek-ki onoŋo lok pa Rwot ma oloko i kom keno tyer ma i Betel, ki i kom odi ducu ma i kabedo me woro Lubaŋa ma gitye i gaŋi ma i Camaria. Lokke ducu bicobbe kakare ada.” I ne lok man mutimme-ni Jeroboam pe omedo ki weko kite maraco-ni. En dok omedde ki keto ajwagi me tic i kabedo me woro Lubaŋa ma i wi godi ma okwanyogi ki i kin lwak ata, Tekke onoŋo ŋat ma mito keken, ci kwere me bedo ajwaka cut, ci keto i ka woro Lubaŋa ma i wi godi-ni. Kit tim man aye odoko bal i kom jo me ot pa Jeroboam, mumiyo ode gikwanyo woko nio ka gityeko woko liweŋ ki i wi lobo man, I kare meno two omako Abija wod pa Jeroboam. Jeroboam owaco bot dakone ni, “Cit iruk boŋŋi mapat wek pe ŋatti mo one ni in i dako pa Jeroboam, ci icit i Cilo. Akija ma lanebi-ni tye kunnu, en aye yam owaco bo ta ni abibedo kabaka ma loyo lwak man, Ber iter mugati apar, ki capat bene, ki agulu moo kic, wek icit kwede bote, ci en birirti gin ma bitimme i kom latin.” Dako pa Jeroboam otimo kit meno, Ocito i Cilo ci ka doŋ oo kunnu ocito i ot pa Akija. Onoŋo Akija pe doŋ twero neno piny, pien wane doŋ ocor woko pi tiyone. Rwot owaco bot Akija ni, “Nen ba, dako pa Jeroboam tye ka bino boti. Obebino ka penyo dogi pi two pa wode, pien two omako malit.” Ci Rwot otito bote lok ducu ma myero owac bot dako-nu, Ka dako meno obino, onoŋo olokke odoko macalo dako mua ki ka mukene. Ento ka Akija owinyo kor tyene i kare ma en obino kwede i doggola-ni, ci otugi jole ni, “Dony ba, in dako pa Jeroboam. Piŋo ilokke idoko macalo dako mua ki ka mukene? Rwot ocika ki lok mapek i komi. In idok icitit bot Jeroboam ni, Rwot Lubaŋa pa Icrael owaco kuman ni, ‘An yam apilo wii aketi kwede i dit, ma kun akwanyi ki i kin lwak, ci aketi ibedo lalo lwakka ma gin jo Icrael. Yam amayo ker woko ki i ot pa Daudi, amiyo boti; ento in pe ibedo macalo laticca Daudi ma yam omako cikka ducu, kun lubo kora ki cwinye ducu, dok tiyo gin ma nen atir i waŋa keken. In aye doŋ itiyo bal ma okato jo ducu ma gukwoŋo nyimi, kun itiyo lwak lubaŋa piri keni, ki cal lubaŋa aliya-gu ma omiyo kiniga emaka, dok ityeko bola woko yo ŋeyi. Pienno abiketo can i kom jo me odi, in Jeroboam, abineko co ducu ma i odi ma ‘i lobo Icrael, opii wa ki anywalli, Abijwero jo ma i odi ducu atyeko woko liweŋ, kit macalo dano wano cet dyaŋ nio ka owano okur woko liweŋ-ŋi. Danoni ducu ma gibito i gaŋ, gwogi aye bimwodo komgi; ento dano ma gibito i dye tim ata, winyo aye bicamogi, an Rwot aye doŋ atyeko loko kit meno.’ “In dako doŋ ia, icit i odi, Ka ce tyeni odonyo i gaŋ, ci latin bito woko. Jo Icrael ducu gibikumo pire, ka giyiko kome, En kene aye gibiyiko kome i Lyel ki i kin jo pa Jeroboam pien en kene aye i kin jo me ot pa Jeroboam ma Rwot Lubaŋa me Icrael onoŋo k it gin mo i kome ma oyomo cwinye. Rwot bikwanyo dano mo mukene ma bibedo kabaka ma loyo jo Icrael, en aye dano ma bityeko ot pa Jeroboam woko i kare man. Lacen aŋo doki? Rwot bipwodo Icrael nio wan ma kome myel calo lagada ma kwan i wi pii. En biputo jo Icrael woko ki i lobo man maber-ri ma yam omiyo bot kwarigi, ci bikeyogi woko ata loka kulu Euprate, pien gumiyo kiniga omako Rwot pi payo cal jok ma dako ma gilwoŋo Acera. Rwot bibwoto Icrael woko pi bal pa Jeroboam ma en obalo, ka dok omiyo jo Icrael bene gubalo-ni.” Dako pa Jeroboam oa ocako wot me cito i Tiŋa. Ka en oo i doggola ot ci latin otugi to woko cut. Jo Icrael ducu guyiko kome, ka dok gukumo pire kit ma yam Rwot owaco, ma laticce lanebi Akija oloko lokke. Lok kom Jeroboam mudoŋŋe ducu, ki kit ma olwenyo kwede i mony-gu, ki kit locce ducu, gityeko coyone i buk me Tekwaro pa Luker me Icrael. Kare ma Jeroboam obedo kwede ka loc oromo mwaka pyeraryo wiye aryo; ci oto, oywe kacel ki kwarine. Wode Nadab aye oleyo ka tyene. I kare meno Rekoboam wod pa Solomon obedo ka loyo lobo Juda. Rekoboam ocamo ker ma noŋo mwaka me ditte romo pyeraŋwen wiye acel, obedo ka loc i Jerucalem pi mwaka apar wiye abiro, Jerucalem aye gaŋ ma yam Rwot oyero ki i kin kaka ma i Icrael ducu pi keto iye nyiŋe. Nyiŋ min Rekoboam Naama, ma anyira Ammon. Jo Juda gutiyo gin ma nen marac i wan Rwot, ci gumiyo nyeko omake pi balgi ma gutiyo, ma okato bal ma yam kwarigi gutiyo ducu, Gugero wan jogigi i wi godi, gucibo wir jogi-gu ki cal jok ma dako ma gilwoŋo Acera i wi godi mabocone ducu, ki i wan ayweya ma pote oluk-gu. I lobogi onoŋo tye bene awobe ma lutim kwele i kom awo be wadgr i wan jogi. Lwak gutiyo kit tim kipyeda ducu ma rom ki bal pa rok ma yam Rwot oryemogi wo ko ki i nyim jo Icrael-li. I mwaka me loc pa Rekoboam me abicce en aye Cicak kabaka me Ejipt obino iye ka lweny i kom Jerucalem. Oyako jami ma gikano i ot lim pa Rwot, ki jami ma gikano i ot lim pa kabaka, Oyako jami woko ducu, oyako ki kwodi jabu ma yam Solomon otiyogi. Kabaka Rekoboam dok otiyo kwodi mukene ma kakagi; otiyo kwodi mola ci omiyogi i ciŋ ludito pa Lugwok kabaka, ma gigwoko doggola ot pa kabaka. I kare ducu ma noŋo kabaka cito i ot pa Rwot, lugwok en gimako kwodi, ka dok gidwokogi kakagi i ot kicika pa lugwok kabaka. Lok kom Rekoboam mudoŋŋe, ki gin ma en otiyo ducu gityeko coyone i buk me Tekwaro pa Luker me Juda. Lweny obedo i kin Rekoboam ki Jeroboam kare mapol. Rekoboam oto oywe kacel ki kwarine ci giyike kacel ki kwarine i gaŋ kal pa Daudi. Nyiŋ minne Naama ma anyira Ammon, Wode Abijam aye oleyo ka tyene. I mwaka me apar wiye aboro me loc pa Jeroboam wod pa Nebat en aye Abijam ocako loyo iye jo Juda. Obedo ka loc i Jerucalem pi mwaka adek. Nyiŋ minne Maaka ma nya pa Abicalom. En otimo kit bal ducu ma wonne ma otelo nyime yam obedo ka timogi; pe obedo ki leŋic i kom Rwot Lubaŋane kit ma yam kwarone Daudi obedo kwede. Kadi bed kumeno, Rwot Lubaŋane omiye obedo ki mac tara i Jerucalem pi Daudi, kun omiyo wode oleyo ka tyene, dok omiyo Jerucalem ocuŋ matek. Rwot otiyo man pien Daudi yam otiyo gin ma nen atir i wan Rwot, pe oweko lubo gin ma yam Rwot ociko i kare me kwone ducu, ento oroco i lok kom Uria ma Lakit keken. Onoŋo lweny tye i kin Rekoboam ki Jeroboam i kare me kwone ducu. Lok kom Abijam mudoŋŋe ducu, ki gin ma en otiyo ducu, gityeko coyone i buk me Tekwaro pa Luker me Juda, Lweny obedo i kin Abijam ki Jeroboam, Abijam oto, oywe kacel ki kwarine, ci giyike i gaŋ kal pa Daudi. Wode Aca aye oleyo ka tyene. I mwaka me pyeraryo me loc pa Jeroboam kaba ka me Icrael en aye Aca ocako loyo iye jo Juda. Obedo ka loc i Jerucalem pi mwaka pyeraŋwen wiye acel. Nyiŋ minne Maaka ma nya pa Abicalom. Aca otiyo gin ma nen atir i wan Rwot kit ma kwarone Daudi yam otiyo-ni, Oryemo woko ki i lobone awobe ma lutim kwele i kom awobe wadgi i wanjogi kadok okwanyo cal jogi ducu ma yam kwarine gutiyo. Oryemo wa minne Maaka woko, pe oye ni omed bedo daker, pien onoŋo Maaka omiyo gitine cal me kipyeda pi Acera ma jok ma dako; ci Aca otoŋo cal jokke onido woko, ci owaŋo woko i laora kulu Kidron. Ento waŋ jogi ma i wi godi pe gimuko woko. Kadi bed kumeno, Aca obedo ki leŋic i kom Rwot pi kare me kwone ducu. Okelo i ot pa Rwot mot ma yam wonne odyero bot Lubaŋa, kacel ki mere kikome bene ma odyero, ryal ki jabu ki weer-gu. Lweny obedo i kin Aca ki Baaca kabaka me Icrael pi kare me kwogi ducu, Baaca kabaka me Icrael otiŋo lweny i kom Juda, ci ogero gaŋ Rama, wek ogeŋ dano mo pe okat woko ki i lobo Juda nyo donyo iye bot Aca kabaka me Juda. Aca okwanyo jami ducu me ryal ki me jabu ma onoŋo odoŋ i ot kano lim pa Rwot, ki jami ma i ot kano lim pa kabaka, omiyogi i cin luticce. Ocwalogi bot Ben-adad wod pa Tabrimmon, wod pa Kejion kabaka me Ciria ma bedo i Damaciko, kun waco bote ni, “Wek waket gicikke i kinwa an ki in, kit ma yam bedo i kin kwara ki kwaru. Nen ba, an doŋ acwalli ryal ki jabu me mot; ber icit itur gicikkewu ki Baaca kabaka me Icrael, wek en oa woko ki i lobona.” Ben-adad owinyo dog kabaka Aca, ocwalo ludito wi monnye ka lweny i kom gaŋi pa jo Icrael, ci omayo ŋon, Dan, Abel-bet-maaka ki lobo Kinerot ducu, ki lobo pa jo Naputali ducu, Ka Baaca owinyo pire, ci obwoto gero Rama woko, odok obedo i Tiŋa. Kabaka Aca olwoŋo jo Juda ducu kun ociko ni ŋatti mo pe odoŋ, ci guyweko godi ki bao ma i Rama ducu, ma onoŋo Baaca obedo ka gero ki Rama-ni; ci kabaka Aca ocako gero kwede gaŋ Geba ma i lobo pa jo Benjamin, ki Mijpa. Lok kom Aca mudoŋŋe ducu, tekke ducu ki gin ducu ma en otiyo, ki gaŋi ma ogerogi, giryeko coyone i buk me Tekwaro pa Luker me Juda. Ento two aye omako tyene i kare ma en doŋ oti, Aca oto, oywe kacel ki kwarine, ci giyike kacel ki kwarine i gaŋ kai pa kwarone Daudi, Yekocapat ma wode aye oleyo ka tyene. Nadab wod pa Jeroboam ocako loyo Icrael i mwaka me aryo me loc pa Aca kabaka me Juda, oloyogi pi mwaka aryo. Otiyo gin ma nen marac i wan Rwot, pien obedo ka lubo kit pa wonne, ki balle ma en omiyo jo Icrael bene gubalo-ni. Baaca wod pa Akija ma i dog ot pa Icakar opiro lok kofi Nadab, ci ocobe oneke weoko i Gibeton ma gaŋ pa jo Piliciti. Onoŋo Nadab ki jo Icrael ducu gurumo gaŋ Gibeton woko. Baaca oneko Nadab i mwaka me adek me loc pa Aca kabaka me Juda, ci oleyo ka 341 tyene. Ka otyeko doko kabaka, oneko jo me dog ot pa Jeroboam woko ducu, pe oweko dano mo obwot i kingi, nio ka orido wi Jeroboam woko ducu, kit ma yam Rwot owaco ki i dog laticce Akija me Cilo, Can meno opoto pi bal pa Jeroboam ma yam obalo-ni, ma en omiyo jo Icrael bene gubalo, dok pien omiyo kiniga omako Rwot Lubaŋa pa Icrael. Lok kom Nadab mudoŋŋe ducu, ki gin ducu ma en otiyo, gityeko coyone i buk me Tekwaro pa Luker me Icrael. Lweny obedo i kin Aca ki Baaca kabaka me Icrael pi kare me kwogi ducu. I mwaka me adek me loc pa Aca kabaka me Juda en aye Baaca wod pa Akija ocako loyo iye jo Icrael ducu ki i Tiŋa, ci obedo ka loc pi mwaka pyeraryo wiye aŋwen, Otiyo gin ma nen marac i wan Rwot, pien obedo ka lubo kit pa Jeroboam, ki balle ma en omiyo jo Icrael bene gubalo-ni. Lok pa Rwot obino bot Yeko wod pa Kanani ma lokke okemo kom Baaca, kun wacci, “I kare ma apilo wii aketi kwede i dit, ma kun akwanyi ki i apwa ci aketi ibedo latel wi jona jo Icrael, icako lubo kit pa Jeroboam, imiyo jona jo Icrael bene gudoko lubalo, mumiyo kiniga omaka pi balgi ducu, Nen ba, abiyweyo in Baaca woko liweŋ ki jo me odi ducu, dok abimiyo odi bedo calo ot pa Jeroboam wod pa Nebat. Danoni ducu ma gibito i gaŋ, gwogi aye bimwodo komgi, ento dano ma gibito i dye tim ata, winyo aye bicamogi.” Lok kom Baaca mudoŋŋe ducu, ki gin ma en otiyo, ki tekke, gityeko coyone i buk me Tekwaro pa Luker me Icrael. Baaca oto, oywe kacel ki kwarine, ci giyike i Tiŋa. Ela ma wode aye oleyo ka tyene. Lok pa Rwot obino bot lanebi Yeko wod pa Kanani ma okemo Baaca ki jo ma i ode pi lok aryo, pi gin ma otimo ma nen marac i wan Rwot, kun orruyo kmiga omako Rwot i kome pi gin ma otiyo ma rom ki tim pa jo me ot pa Jeroboam, ento doki pien oneko jo me ot pa Jeroboam woko ducu. I mwaka ma pyeraryo wiye abicel me loc pa Aca kabaka me Juda en aye Ela wod pa Baaca ocako loyo iye jo Icrael ki i Tiŋa, ci obedo ka loc pi mwaka aryo. Ento laticce Jimri, ma ladit ma loyo nucu gadigadi lwennye, opiro lok i kome. I kare ma Ela tye i Tiŋa en obedo ka mat ci omer woko i ot pa Aŋa ma lalo jami ma i ode ma i Tiŋa. Jimri odonyo i ot, ocobo Ela otugi neko woko cut, i mwaka me pyeraryo wi ye abiro me loc pa Aca kabaka me Juda, ci Jimri oleyo ka tyene, Ka Jimri ocako loyo lobo, tekke obedo i wi komkerre, ci otugi neko jo me ot pa Baaca woko liweŋ; pe oweko latin laco mo makwo ma i doggolagi, kadi wa i kin lureme. Jimri oneko jo me ot pa Baaca otyeko woko ducu kit meno, kit ma lok pa Rwot owaco-ni ma yam obino i dog lanebi Yeko ma okemo kom Baaca, pi bal pa Baaca ducu ki pi bal pa Ela ma wode, ma gin gubalo ka dok omiyo jo Icrael bene gubalo-ni, kun gimiyo kiniga omako Rwot Lubaŋa me Icrael pi cal jogi ma giworogi. Lok kom Ela mudoŋŋe ducu, ki gin ducu ma en otiyo, gityeko coyone i buk me Tekwaro pa Luker me Icrael. I mwaka me pyeraryo wiye abiro me loc pa Aca kaba ka me Juda en aye Jimri obedo ka loc i Tiŋa pi nino abiro, Onoŋo mony pa jo Icrael gutoŋo gonygi ma gikemo Gibeton ma gaŋ pa jo Piliciti, ci lumony guwinyo ki i gonygi ni Jimri opiro lok, oneko kabaka woko. En aye lok mumiyo jo Icrael ducu guketo Omri ma ladit me mony aye odoko kaba ka ma loyo Icrael i nino meno i kare ma gitye i gony kunnu. Omri oa woko ki i Gibeton ki jo Icrael ducu kacel kwede, ci guwoto gurumo gaŋ Tiŋa. Ka Jimri oneno ni mony doŋ omako gaŋ woko, ci owoto i gogo me ot pa kabaka, owano ot i wiye kene, oto iye. Oto pi balle ma otiyo dok pi tiyo gin ma nen marac i wan Rwot kun lubo kit pa Jeroboam ki balle ma co omiyo jo Icrael gubalo-ni. Lok kom Jimri mudoŋŋe ducu, ki lok ma en opiro, gityeko co yo ne i buk me Tekwaro pa Luker me Icrael. I kare meno onoŋo jo lerael gupokke woko dul aryo; nucu lwak tuŋcel aye gudok i kom Tibni wod pa Ginat pi keto en me bedo kabakagi, ki nucu tuŋcel gupokke gudok i kom Omri. Ento lwak ma gudok i kom Omri guloyo lwak ma gudok i kom Tibni wod pa Ginat; kit meno Tibni oto woko, ci Omri odoko kabaka. I mwaka pyeradek wiye acel me loc pa Aca kabaka me Juda en aye Omri ocako loyo iye jo Icrael, ci obedo ka loc pi mwaka apar wiye aryo, kun oloyo mwaka abicel i Tiŋa. Owilo got me Camaria ki bot Cemer ki lim ryal ma romo talanta aryo, ka ogero iye gaŋ gogo matek, ocako nyiŋe Camaria, macalo nyiŋ Cemer ma yam obedo won got meno. Omri otiyo gin ma nen marac i wan Rwot, otiyo gin marac makato jo ma gutelo nyime ducu. Obedo ka lubo kit pa Jeroboam wod pa Nebat ducu, ki bal ducu ma en omiyo jo Icrael gubalo, kun gimiyo kiniga omako Rwot Lubaŋa pa Icrael pi cal jogigi. Lok kom Omri mudoŋŋe ducu, ki gin ma en otiyo, ki tekke ducu, gityeko coyone i buk me Tekwaro pa Luker me Icrael. Omri oto, oywe kacel ki kwarine, ci giyike i Camaria; Akab ma wode aye oleyo ka tyene. I mwaka me pyeradek wiye aboro me loc pa Aca kabaka me Juda en aye Akab wod pa Omri ocako loyo iye jo Icrael, ci obedo ka loc i Camaria pi mwaka pyeraryo wiye aryo. Akab wod pa Omri otiyo gin ma nen marac i wan Rwot makato jo ma gutelo nyime ducu. Dok macalo en otamo ni lubo kit bal pa Jeroboam wod pa Nebat obedo gin manok mo, omiyo en onyomo Jejebel ma nya pa Etibaal kabaka pa jo Cidon, dok en bene ocito kunnu oworo jok Baal kun oryebbe i nyime. Ogero ot pi jok Baal i Camaria, ocano keno tyer iye. Akab ocibo cal jok ma dako ma gilwoŋo Acera, dok otiyo gin ma omiyo kiniga omako Rwot Lubaŋa pa Icrael makato luker me Icrael ducu ma gutelo nyime, I karene aye Kiel, dano me Betel, ogero iye Jeriko odoco. Abiram ma latin kayone okwoŋo to ci oketo gutine i wiye, ci wode matidine oto, ma nyiŋe Cegub, ka giketo dog gaŋ i wiye, macalo lok ma Rwot yam oloko ki i dog Yocwa wod pa Nun. I kare meno Elia Laticbe, ma gaŋgi Ticbe ma i Gilead, owaco bot Akab ni, “Macalo Rwot Lubaŋa pa Icrael tye makwo-ni, ma an acuŋ i nyime, i mwaka ma bino-ni toyo bibedo peke kadi wa kot bene, nio ka doga aye dok biloko.” Lok pa Rwot obino bot Elia ni, “A woko ki kany, idok yo tun wokceŋ, icikanne i ŋet laora kulu Ketit ma i ne kulu Jordan tun wokceŋ, Ibimato pii ma i kulu-nu, dok atyeko ci ko winyo agak ma gibipiti kunnu.” Elia ocito kit ma Rwot owacce-ni, ocito obedo i ŋet laora kulu Kerit ma i ne kulu Jordan yo tuŋ wokceŋ. Agak gutero kwon ki riŋo-gu bote i odiko, ka dok otyeno bene guterre kwon ki riŋo. En obedo ka mato pii i kulu Kerit. Lacen pii ma i kulu otwo woko, pien kot doŋ pe cwer i lobo. Lok pa Rwot dok obino bot Elia ni, “A malo, icil wa i Jarepat, ma cok ki Cidon, ici bed kunnu, Atyeko ciko dako mo kunnu ma cware oto ma bimiyi cam.” Elia oa malo ocito i Jarepat. Ka oo cok ki dog gaŋ, nen, daa-to mo tye ka coko yen riddo. Elia olwone kun waco bote ni, “Cikella pii mo i agwata wek amati.” Ka dako ocako wot me kela pii, ci dok olwone, owacce ni, “Cikella kwon mo man ok i ciŋi.” Dako ogamo ni, “Macalo Rwot Lubaŋani tye makwo-ni, pe atye ki kwon mo ma amyeno, ento atye ki moko kwon poŋ ciŋ acel keken ma odon i abino, ki moo tedo manok mo i atabo moo; man atye ka coko yen riddo mogo wek adok kwede ka acited pira ki pi woda, ka wek doŋ wacam ci wato kwede.” Elia ogamo ni, “Pe ilwor, cit icitim kit ma iwaco-ni; ento koŋ idolla kwon manok ikella, ka dok lacen icidol piri ki pi wodi. Pien Rwot Lubaŋa pa Icrael ocika kuman ni, ‘Moko kwon pe bitum woko i abino, moo pe birem woko i atabo, nio ka Rwot ocwalo kot ocwer i lobo.’ ” Dako-nu ocito otedo kit ma Elia owacce-ni, ci dako-nu ki Elia ki jo ma i ode ducu gubedo ka camone pi nino mapol, kun moko kwon pe tum ki i abino, moo bene pe rem i atabo, kit ma Rwot owaco ki dog Elia-ni, Lacen ki i ŋe man, latin pa dako ma min ot meno two omako, ci twone omedde malit mada, nio ka pe doŋ ywe-gu, Dako-nu owaco bot Elia ni, “Itima rac kuman piŋo, in dano pa Lubaŋa? Ibino bota ka poyo wi balla macon, omiyo balla oneko woda woko do!” Elia owaco bot dako-nu ni, “Miya wodi kany.” Ci otino latin woko ki i kore, ocito kwedei kicika ma malo ka ma en buto iye, opyelo latin i wi kabutone kikome. Ocako kok bot Rwot ni, “Ai Rwot Lubaŋana, in aye dok ikelo can i kom daa-to ma abedo bote-ni pi neko wode?” Ci Elia oryene i kom latin kidek, kun kok kwede bot Rwot ni, “Ai Rwot Lubaŋana, wek tipo kom latin man odwog cen i kome ba,” Rwot owinyo koko pa Elia, omiyo tipo kom latin odwogo cen i kome, ka cwinye odwogo, Elia otiŋo latin ki i kicika ma malo, okele piny i ot, omiyo bot minne, owacci, “Nen, wodi tye makwo ene.” Dakonu owaco bot Elia ni, “Ai rwoda, kombeddi doŋ aŋeyo atir ni in i dano pa Lubaŋa, dok Jok pa Rwot ma iwaco ki dogi bene me ada.” Ka kare okato malac, ci lok pa Rwot dok obino bot Elia, i mwaka me adekke, ma wacci, “Cit icinyutte kekeni bot Akab; an doŋ abicwalo kot i lobo.” Elia ocito ka nyutte bot Akab. I kare-nu onoŋo kec doŋ dwoŋ i Camaria. Akab olwoŋo Obadia ma ladit ma loyo jami ma i ode-ni. Onoŋo Obadia woro Rwot matek twatwal. I kare ma yam Jejebel tye ka neko lunebi pa Rwot, Obadia otero lunebi miya acel kulu, okanogi i boro, opo ko kingi pyerabic pyerabic, opitogi ki kwon ki pii-gu. Akab owaco bot Obadia ni, “Wot icit i dye lobo ducu ka ma waŋ pii tye iye, wa ki i nota ducu; gwok nyo wabinono iye lum wek walar aguragura ki kana madonone gubed makwo, wek leewa mogo pe guto woko.” Gucako poko lobo ma ŋat acel acel i kingi biwot iye; ci Akab ocito mere tuŋcel en kene, ki Obadia bene odok yo tuŋcel en kene, I kare ma Obadia tye ka wot iyo, nen, Elia otuc, orwatte kwede, Obadia otugi ŋeye woko cut, opoto piny aryeba cwiny kun wacci, “Man aye in kikomi Elia, rwoda?” Elia ogamo ni, “Iyo an kikoma. Ento cit icitit bot rwodi ni Elia tye kany.” Obadia ogamo ni, “An abalo kit bal aŋo boti, rwoda? Piŋo imito miya i ciŋ Akab wek oneka? Macalo Rwot Lubaŋani tye makwoni, pe tye rok mo nyo ker mo ma rwoda Akab pe ocwalo iye dano ka yenyi, Ka gudwoko lok ni, ‘Elia pe tye kany,’ en koŋ miyo ladit me rok meno nyo me ker meno kwoŋo kwoŋ ma nyuto ni pe gunoni kunnu, Ci in dok iwacci, ‘Wot icit bot rwodi icititte ni Elia tye kany.’ Ki i neya ma noŋo doŋ acito woko, Cwiny pa Rwot bitini woko ci teri ka ma pe aŋeyo. Pienno, ka acito atito bot Akab, ka ce pe ginoŋo komi, en bi neka woko, kadi bed abedo ka woro Rwot cakke ka tinona. Peya gititti ce, rwoda, kit gin ma abedo ka tiyone i kare ma Jejebel tye ka neko lunebi pa Rwot? Yam akano lunebi pa Rwot miya acel kulu i boro, kun apoko kingi pyerabic pyerabic, ci abedo ka miyogi kwon ki pii-gu. Ka in dok iwacci, ‘Wot itit bot rwodi ni Elia tye kany,’ man miyo en neka woko.” Elia ogamo ni, “Macalo Rwot me mony tye makwo-ni, ma an acuŋ i, nyime, abinyuto koma bo te tin i nyime.” Obadia ocito ka rwatte ki Akab, otitte, ci Akab ocito ka rwatte ki Elia. Ka Akab oneno kom Elia, owaco bote ni, “Man en in kikomi, in ma layel Icrael-li?” Elia ogamo ni, “An pe ayelo Icrael; in aye it ye ka yelone, in ki jo me doggola pa woru, pien ibwoto lubo cik pa Rwot woko, icako lubo kor Baal-gu. Kombeddi icwal kwena wek icok jo Icrael ducu i nyima i wi got Karmel. Cok ki lunebi pa jok Baal bene mi ya aŋwen ki pyerabic-ci, ki lunebi pa Acera ma jok ma dako-ni ma gitye ka cam i wi meja pa Jejebel,” Akab ocwalo kwena bot jo Icrael ducu, ci ocoko lunebi pa Baal ducu i wi got Karmel. Elia ociro cok bot lwak ci owaco bot dano ni, “Wun mono wubicabbe atara i cwinywu nio kwede wa awene? Ka ce Rwot aye Lubaŋa, ci wulub en keken; ento ka Baal, ci wutugi lubo en cur.” Emo lwak pe gudokke iye lok mo, Elia dok owaco bot lwak ni, “An kena aye pud adoŋ ki i kom lunebi pa Rwot, kun lunebi pa Baal gitye miya aŋwen kulu ki pyerabic, Wek gikel twoni aryo botwa kany, Wek lunebi pa Baal guyer twon acel obed megi, gunek ci guŋid woko, gucan riŋone i wi yen i wi keno tyer, ento pe gumok iye mac mo, Ki an bene abiyubo twon acel, abicano riŋone i wi yen, pe amoko iye mac mo, Wun wubed ka lwoŋo nyiŋ; lubaŋawu, ki an bene abilwono nyiŋ Rwot; ci lubaŋa ma bidok iye ki cwalo mac, en aye Lubaŋa ada.” Lwak ducu gugamo ni, “Iloko mamit.” Elia dok owaco bot lunebi pa Baal ni, “Wun wuyer twonwu acel wek wucak yubone; wun aye wukwoŋ, pien wupol, ento pe wumok iye mac mo,” Lunebi pa Baal gukwanyo twon ma gimiyogi-ni, guyubo, gulwoŋo iye nyiŋ Baal, cakke odiko nio kwede wa i cwiny dyeceŋ, kun giwacci, “Ai Baal, dokkiwa iye do ya!” Ento dwan mo pe ma winnye, ki ŋatti mo ma dokkigi iye bene peke, Gubedo ka myel ma girumo kwede keno tyer ma gucano-ni. Elia ocako cayogi i dyeceŋ kun wacci, “Wudaŋŋe matek, pien en aye lubaŋa. Gwok nyo pud iye tye ka Lwodo lok, nyo pud ocito woko, nyo tye i wotte ka mo, nyo pud onino, ci myero koŋ wucoye woko ki i waŋ ninone.” Ka dok gudaŋŋe matek, kun giŋolo komgi kekengi ki pala lucwan ki atero-gu macalo kitgi tye kwede; guŋolle nio ka remo komgi ocako cwer kun mol i komgi. Gubedo ka daŋŋe matek ka cwiny dyeceŋ okato kun gidaŋŋe adaŋa, nio wa i cawa me tyero gityer me otyeno, ento piny oliŋ litik; ŋat ma dok iye botgi peke, ki ŋat ma paro pigi bene peke. Lacen Elia owaco bot lwak ducu ni, “Wubin doŋ bota cok kany,” ci lwak ducu gucito bote cok, En ocako yubo keno tyer pa Rwot ma yam gimuko gireto woko piny-nyi, Okwanyo godi apar wiye aryo muporo wel kaka pa awobe pa Yakobo ima yam lok pa Rwot obino bote kun wacci, “Nyiŋi bibedo Icrael.” Ocano keno tyer ki godi meno pi nyiŋ Rwot. Okwinyo bur orumo ŋet keno tyer, ma ditte romo awal kodi aryo. Ka otyeko caŋo yen kikore, ci oŋido riŋo twon, ocano i wi yen. Owacci, “Doŋ wutwom pii ma romo abino aŋwen, ka wuony piine i wi gitum awaŋa, ki i kom yen-gu.” Ka dok owacci, “Dok wumed onyo iye pii”; ci gunwoyo onyo pii tyen me aryone, Dok owacci, ‘“‘Wumed tyen me adekke”; ci gumedo tyen me adekke. Pii obedo ka mol kun rumo keno tyer, opoŋ i bur woko ducu. Ka cawa me tyero gityer me otyeno doŋ oromo, lanebi Elia onyiko cok i kom keno tyer, owacci, “Ai Rwot, Lubaŋa pa Abraim, pa kaka ki pa Icrael, wek tin doŋ oneŋe atir ni in aye Lubaŋa i Icrael, dok ni an abedo laticci, ci atiyo man ducu pi lok ma iwaco bota. Dokka iye, ai Rwot, dokka iye, wek lwak man one atir ni, in Rwot aye in Lubaŋa keni, dok ni ityeko dwoko cwinygi i komi.” Ci mac oa ki bot Rwot opoto piny, owaŋo gitum awaŋa woko ducu liweŋ, ki yen-gu, ki godi-gu, ki apwa, ka dok onaŋo pii woko ma onoŋo opoŋo bur-ri. Ka lwak ducu guneno, gupoto woko piny aryeba cwiny, kun giwacci, “Rwot aye Lubaŋa; Rwot aye Lubaŋa.” Elia owaco bot lwak ni, “Wumak lunebi pa Baal ducu, pe wuwek mo obwoti.” Gimakogi woko ducu, ci Elia oterogi piny i laora kulu Kicon, onekogi woko kunnu. Elia owaco bot Akab ni, “Cit doŋ ka cam ki ka mat, pien dwan kot ma mito cwer doŋ mor winnye.” Akab ocito woko ka cam ki ka mat, Elia ocito malo i wi got Karmel, okulo wiye piny i ŋom, orwako wiye i kin coŋe. Owaco bot laticce ni, “Cit koŋ icinen yo tuŋ nam.” Ka ocito woko oneno, ci owacci, “Gin mo pud peke.” Elia dok owacce ni, “Cit doki tyen abiro.” I kom tyen me abirone laticce owacci, “Aneno latin pol mo otinne ki i nam, tidi rom ki cin dano keken.” Elia dok owacci, “Cit bot Akab, iciwacce ni, ‘Yub gadigadini idok gaŋ wek kot pe ogeni wot.’ ” Polo ocako cido woko ki pol oyotoyot twatwal, kun yamo kodo, ci kot ocako cwer madwoŋ. Akab oito wi gadigadine odok i Jejreel. Ento Rwot onoŋo odiyo Elia ki ciŋe, omiyo otweyo pyere oriŋo kwede i nyim Akab nio kwede wa i dog gaŋ me Jejreel. Akab otito bot dakerre Jejebel gin ducu ma Elia otiyo, ki kit ma oneko kwede lunebi pa jok Baal ducu ki pala lucwan. Jejebel ocwalo lakwena bot Elia kun wacce ni, “Ka pe di ki ka onyoo atyeko kwoni woko, kit ma ityeko kwede kwo pa lunebina woko-ni, ci lubaŋana myero guket can i koma kit meno ki makato bene.” Lworo omako Elia, omiyo oriŋo woko olaro kwone, ocito i Beer-ceba ma i lobo Juda, oweko laticce kunnu. Ento en aye ocito kene i tim, kun owoto wot me nino acel kulu, Ocito obedo i te yat laywe mo, olego Rwot ni, “Doŋ otum, ai Rwot, tin doŋ ikwany kwona woko; pien an pe aber akato kwarina ducu.” Obuto woko piny otugi nino woko i te yat laywe meno, Ci nen, lamalaika ogudo kome, owaco bote in, “Elia, a malo wek icam.” Ka oa oneno piny, oneno capat ma gitedo i kom got malyet, ki pii i abino tye ka wiye. Ocako camone ka dok omato pii, ka dok obuto piny. Lamalaika pa Rwot dok odwogo bote tyen me aryone; ogudo kome kun dok owacce ni, “Elia, a malo wek icam, ka dok imat pii, pien wotti pud dit mada.” Elia oa malo, ocamo dok omato pii, ci olimo tek mua i cam meno omiyo omedde ki wot ci oo kwede wa i Koreb ma got pa Lubaŋa-ni. Owoto pi nino pyeraŋwen dyeceŋ ki dyewor. Ka oo kunnu, odonyo i boro mo, obedo iye. Lok pa Rwot obino bote kun waco bote nii “Itimo gin aŋo kany, Elia?” Ogamo ni, “Nyeko obedo ka maka mada pi Rwot, ma Lubaŋa me mony; pien jo Icrael gubwoto gicikkeni woko, dok gumuko keno tyerri woko ducu, guneko lunebini woko ki pala Lucwan-gu, An aye doŋ adoŋ kena, dok bene gimito neka woko.” Dok Rwot owaco bote ni, “Wot icit anyim, icuŋ i wi got i nyim Rwot.” Ci nen, Rwot oka to ka ŋete kun yamo madwoŋ mager tye ka baro godi, dok ŋido lela matitino i nyim Rwot; ento Rwot onoŋo pe i yamo-nu. Ki i ŋe yamo oyenyen obino, ento onoŋo Rwot pe tye i oyenyen meno. Ki i ŋe oyenyen mac obino, ento Rwot pe tye i mac. Ki i ŋe mac dwan matidi mo obino, Ka Elia owinyo, oumo waŋe ki boŋone, ci ocito kwede ocuŋ i dog boro. Nen, dwan obino bote ma waco bote ni, “Itimo gin aŋo kany, Elia?” Elia ogamo ni, “Nyeko aye obedo ka maka mada pi Rwot, Lubaŋa me mony; pien jo Icrael gubwoto gicikkeni woko, dok gumuko keno tyerri woko ducu, guneko lunebini ki pala Iucwan-gu, ci an aye doŋ adoŋ kena, dok bene gimito neka woko.” Rwot owacce ni, “Wot idok cen kun ilubo yo ma cito i tim Damaciko. Ka io kunnu, ibiwiro Kajael wek obed kabaka me Ciria. Ka dok ibiwiro Yeko wod pa Nimci obed kabaka me Icrael; ka dok Elica wod pa Capat me Abel-mekola ibiwiro me bedo lanebi ma bileyo kakari. Dano ma bibwot ki pala lucwan pa Kajael, Yeko binekone; dok dano ma bibwot ki pala lucwan pa Yeko, Elica binekone. Ento abibwoto dano alip abiro i Icrael, jo ducu ma peya gurumo coŋgi i nyim jok Baal, ma doggi bene pe gunoto lem cal Baal pi nyuto woro bote.” Elia oa woko ki kunnu, ocito onoŋo Elica wod pa Capat. Elica tye ka pur kun tye ki kweri dyaŋ apar wiye aryo ma guryeyo i nyime, ma twoni pur giywayogi aryo aryo; en kikome aye tye ki me apar wiye aryone. Elia okato ki ka ŋete, obolo boŋone i kome. Elica otugi weko twonine woko, ocako ŋwec i kor Elia kun wacci, “Wek koŋ acicik wora ki maa, ka doŋ adwogo alubo kori.” Elia ogamo ni, “Dok giri cen do, an kono atimo kit gin aŋo i komi?” Elica oweko lubo kor Elia, odok cen, ogonyo twonine aryo onekogi woko, ka otedo riŋogi ki rii ŋutgi ma ka yen, opoko bot dano ma gitye kunnu, ci gucamo. Ka doŋ oa ocito ka lubo kor Elia, ocako konye macalo laticce. Ben-adad ma kabaka pa jo Ciria ocoko monn-ye ducu, ogu rogi kacel, kun luker pyeradek wiye aryo bene gitye kwede, ki lwak aguragura ki gadigadi lweny-gu, Otero monynye orumo Camaria woko ocako I weny i kome. Ocwalo lukwena i gaŋ bot Akab kabaka me Icrael ka wacce ni, “Ben-adad owaco kumanni, ‘Ryalli ki jabuni ducu mera; ki monni ma gibeco-ni ki litinoni bene ducu mera.’ Kabaka me Icrael ogamo ni “Ai kabaka, in i rwoda, an a danoni, kacel ki jami ma atye kwedgi ducu.’ Lukwena dok gudok kunnu tyen me aryone, guwacci, “Ben-adad owaco kuman ni, ‘Yam acwalo lok kun awacci imiya ryal ki jabuni, ki monni ki litinoni. Doŋ di ki i kin cawa man abicwalo luticca boti, gibiyenyo i odi ki i odi pa luticci, ci gibimako gin ducu ma yomo cwinygi, giyako, gitero woko.’ ” Kabaka me Icrael olwoŋo ludoŋo me lobone ducu, owaco botgi ni, “Koŋ wunen kit ma dano man tye ka yenyo kwede kolo. Ocwalo lok bota ni amiye monna ki litinona, ki ryal ki jabu-gu, ci peya akwerre lok mo,” Ludoŋo ducu ki lwak ducu gugamo ni, “Pe itam kom lokke-nu, pe iye bene.” Mumiyo kabaka owaco bot lukwena pa Ben-adad ni, “Wun wuwac bot rwoda kabaka ni, ‘Gin ma ikwoŋo mitone ki bota abimiyone ducu, ento man aye pe atwero ye.’” Lukwena gudok ka tero lokke. Ben-adad ocwalo lok owaco bote ni, “Abiloko Camaria doko apwa, ento apwane pe biromo lwak dano ma abibino kwede, wek ŋat acel acel ojob poŋ ciŋe, Ka pe kumeno, lubaŋawa myero guket can i koma kit meno ki makato bene.” Kabaka me Icrael ogamo ni, “Dano ma pud tye ka tweyo jami lweny i pyere peya wakke ma rom ki dano ma doŋ obelunyo jamine woko.” Ben-adad owinyo lok man kun tye ka mato konone ki luker ma gitye ka gony i bolo. Owaco bot lwakke ni, “Doŋ wucak ryeyo ki tyeŋ i kabedowu,” ci guryeyo ki tyeŋ i kabedogi pi lweny i kom gaŋ Camaria. Lanebi mo obino cok bot Akab kabaka me Icrael ci owaco bote ni, “Rwot owaco kuman ni, Ityeko neno lwak man madwoŋ? Tin abimiyogi i ciŋi, miyo ibiŋeyo atir ni an a Rwot.” Akab ogamo ni. “En bitiyo ki jo mene?” Ogamo ni, “Rwot owaco kuman ni, en bitiyo ki awobe ma gikonyo tulo dul lobo acel acel.” Akab dok omedde ki peny ni, “Aŋa ma bicako lweny?” Lanebi ogamo ni, “In.” Akab olwoŋo awobe ma gikonyo lulo dul lobo mapatpat; onoŋo giromo miya aryo ki pyeradek wiye aryo. Ka dok oryeyo jo Icrael ducu i ŋegi, ma giromo dano alip abiro. Lwak gumol gukato woko ki i dyeceŋ, kun Ben-adad tye mere ka mato koŋo ma omer ki kono i bolo bedone, en kacel ki luker pyeradek wiye aryo-nu ma gucokke ka konye-ni, Lukony pa ludito ma giloyo dullobo ducu gin aye gukwoŋo kato woko. Ben-adad ocwalo lurot-piny ci gudwoko lok ni, “Lwak dano gitye ka mol gikato woko ki i Camaria.” Kabaka ogamo ni, “Ka ce gubino pi yubo lok me kuc, wumakgi amaka makwo; kadi bed gubino ka lweny bene wumakgi makwo.” Lukony pa ludito ma giloyo dul lobo gumol woko ducu ki i gaŋ, ci lwak mony gulubo korgi. Dano acel acel oneko dano mukemo nyime. Jo Ciria gucako riŋo woko, kun jo Icrael giryemo korgi; ento Ben-adad kabaka me Ciria obwot, pien oriŋo woko ki aguragura kacel ki wegi aguragura mogo. Ci kabaka me Icrael okato woko, omako lwak aguragura ki gadigadi lweny mapol, kun neko jo Ciria ki nek madit twatwal. Lanebi dok obino bot kabaka me Icrael ci owaco bote ni, “Ber imed monnyi obed matek, kun itamo maber pi gin ma myero itim, pien jo Ciria dok gibidwogo i dog oro ka cako lweny i komi.” Lutic pa kabaka me Ciria guwaco bote ni, “Jo man lubaŋagi lubaŋa me wi godi, omiyo gin yam tek, guloyowa; ento wek dok walweny kwedgi ki i dye bar, ci wan aye wabibedo tekmakatogi. Wamiyiryeko kit man: Kwany luker ducu woko ki i ka ticgi, wek iket ludito ma loyo mony ma kakagi. Dok iywa mony mukene ma rom ki mony ma doŋ gityekogi woke-ni, Cok aguragura ki gadigadi lweny ma welgi rom ki gin macon ca, ci wek walweny ki jo Icrael i dye bar, ci wabibedo matek makatogi.” En owinyo doggi, otiyo kit ma guwaconi. Ben-adad ocoko mony pa jo Ciria i dog oro, ci gutiro i Apek pi lweny ki jo Icrael. Jo Icrael bene guryeyo monygi, ci gutiŋo mony i kom jo Ciria, ma guyubbe ki camgi bene. Jo Icrael guyubo gonygi i nyim lumerokgi macalo lwak dyegi manok ma gipokogi i dul aryo ‘keken, ento jo Ciria gupoŋo lobo woko. Dano pa Lubaŋa dok obino cok ci owaco bot kabaka me Icrael ni, “Rwot owaco kuman ni, Pien jo Ciria gubedo ka waco ni, ‘Rwot en Iubana me godi, pe lubaŋa me nota-gu,’ en aye lok mumiyo abimiyo monygi madit-ti i ciŋi, ci ibiŋeyo atir ni an aye a Rwot.” Mony aryo ducu gugony gukemme ki mony pa lumerokgi pi nino abiro kulu, ci lweny ocakke i nino me abirone. Jo Icrael guneko askari pa jo Ciria ma giwoto ki tyengi ma romo alip miya acel kulu i kom nino meno acel-lu. Jo mudoŋŋe guriŋo gularo gaŋ Apek, ci cel murumo gaŋ dok opoto i kom jo mapol ma gudoŋŋe ma giromo alip pyeraryo wiye abiro. Ben-adad bene oriŋo kunnu, odonyo i kicika ma i tyelo ot mo ma i gaŋ kunnu. Luticce guwacce ni, “Nen ba, watyeko winyo ni luker ma i ot ker me Icrael gin lukica. Wek koŋ waruk boŋo cola i pyerwa ki tol-gu ma watweyo i wiwa wacit kwede bote en kabaka me Icrael, ci gwok nyo en pe bineki.” Gutweyo pyergi ki boŋo cola, ki tol i wigi ducu, gucito kwede bot kabaka me Icrael. Guwaco bote ni, “Laticci Ben-adad owacci, ebako doge boti ber iweke, pe doŋ ineke.” Kabaka ogamo ni, “En pud tye makwo bo? En omera.” Onoŋo jo-nu gitye ka yenyo Lanyut mo wek guniaŋ kit ma piny tye kwede. Ka guwinyo nyiŋ man, “omera”, ci gugamo oyotoyot ni, “Iyo, omeru Ben-adad.” En dok owacci, “Wucit wukele.” Ben-adad obino bote, ci kabaka Akab otine i gadigadine. Ben-adad owacce ni, “Gaŋi ma yam wora oyako ki, bot woru abidwokogi ducu i ciŋi: ka dok in bene itwero bedo ki dukani me cato wil i Damaciko kit ma yam wora obedo kwede i Camaria.” Akab ogamo ni, “Abibwoti icito pi lok ma iciko-ni.” Kit meno oketo gicikke kwede, ci obwote ocito. Laco mo ma i kin lwak pa lunebi owaco bot lawote ni, “Amito igoya malit,” kun Rwot aye onoŋo ocike kumeno. Ento lawote okwero goye. Ka dok owacce ni, “In pe iworo lok pa Rwot. Pi meno, nen ba, ka ce ibia ki bota kombeddi, labwor mo bineki woko cut.” Ka dano meno oa woko ki bote, ci labwor orwatte kwede, oneke woko cut, Lanebi dok onoŋo dano mukene, owaco bote ni, “Amito igoya malit,” ci laco meno otugi goye cut, ogoye oketo ret i kome bene. Lanebi-nu ocito, obedo ka kuro kabaka Akab i ŋet yo, kun oloko kit kome woko pi umo waŋe woko ki kitambara ma otweyo iye. Ka kabaka obekato, odaŋŋe bote kun wacci, “An laticci acito i mony, ci adonyo wa i dyere ka ma lweny tye malyet. Ci nen, askari mo odwogo ki dano mo ma okelo bota ci ocika ni, ‘Gwokka dano man. Ka ce iweko orwenyo woko pi tyen lok mo, ci in aye ibito ma kakare, nyo ibiculo ki talanta acel me ryal.’ Kit meno, kit ma abedo ka yelle kany ki kuca-ni, ladit, omiyo en ocito gire woko.” Kabaka me Icrael owacce ni, “Gibiŋolo koppi kit meno; in kikomi aye ityeko ŋolone.” Dano-nu okwanyo kitambara woko oyotoyot ki i waŋe, ci kabaka otugi ŋeyo cut ni en ŋat acel i kin lunebi. Dano-nu owaco bot kabaka ni, “Rwot owaco kuman ni, Pien in ityeko bwoto dano ma onoŋo an aciko ni myero ginek woko, pienno gibineko in ma kakare, gibineko lwakki bene ma ka lwakke.” Kabaka me Icrael odok gaŋ, oo i Camaria ki toncwiny ma wane oballe woko. Onoŋo Nabot me Jejreel tye ki poto olokke i Jejreel i ŋet cel pa Akab kabaka me Camaria. Lacen i ŋe lok mutimme-ni, Akab openyo Nabot ni, “Ber imiya poto olokki obed mera, wek apit iye dekka, pien tye cok ki oda; ci abimiyi poto olok mukene ma kakare, maber makato en-nu, nyo ka ce imito abiculo welle ki lim.” Ento Nabot ogamo dog Akab ni, “Pe twerre; Rwot pe twero ye ni ami lobo pa kwariwa boti.” Akab odok i ode ki kiniga ma waŋe oballe woko pi lok ma Nabot me Jejreel owaco bote-ni; pien onoŋo odok iye bo te ni pe ebimiyo lobo ma eleyo ki bot kwarine. Kabaka ocito obuto piny wi kitandane kun oloko waŋe neno woko, pe ocamo cam mo bene. Ento ka dakone Jejebel obino bote, openye ni, “Cwinyi ton pi lok aŋo ma ogeŋi wa cam-mi?” Akab otitte ni, “Pien nane aloko ki Nabot me Jejreel kun apenye ni omiya poto olokke wek awil ki lim, nyo kono ka en mito ci abimiye poto olok mukene ma kakare. Ci en okwero woko, owacci pe ebimiya poto olokke.” Dakone Jejebel ogamo ni, “Pe in aye i loyo Icrael kombeddi bo? A malo icam, wek cwinyi obed mayom. An aye abimiyi poto olok pa Nabot me Jejreel.” Ci Jejebel ocoyo waraga ki nyiŋ Akab, omwono kun odiyo agit pa Akab i kom odok; ci ocwalo waraga bot ludoŋo ki ludito mukene ma gibedo bot Nabot i gaŋŋe. Waragane onoŋo ocoyo kit man ni, “Wucik pi kare me ri kec, ci wucib Nabot obed wi kom me dito i kin lwak. Ka doŋ wukel lutim aranyi aryo gucuŋ kun gikemo nyime atir, wek gukel kop i kome kun giwacci, ‘In iceno Lubaŋa ki kabaka.’ Ka doŋ wutere woko, wucele ki got wuneke woko.” Jo ma i gaŋŋe, ludoŋo ki ludito mukene ma gibedo i gaŋŋe, gutimo kit ma Jejebel ocwalo kwede lok botgi. Guciko kare me ri kec, ka guketo Nabot i wi kom me dito i kin lwak. Lubwami aryo gubino gucuŋ gukemo nyime. Gukelo kop i kom Nabot ki i nyim lwak ducu kun giwacci, “Nabot oceno Lubaŋa ki kabaka bene.” Ka gutere woko i ŋe gaŋ, gucele ki got guneke woko. Ka gucwalo kwena bot Jejebel pi titte ni, “Nabot doŋ gityeko celone woko ki got; doŋ oto.” Ka Jejebel owinyo ni Nabot doŋ gicelo woko ki got gineko woko, owaco not Akab ni, HA malo, icam poto olok pa Nabot me Jejreel, ma yam okwero miyone boti wek iwil ki lim-mi; kombeddi Nabot doŋ pe, doŋ oto.” Ka Akab owinyo ni Nabot doŋ oto woko, oa malo ocito i poto olok pa Nabot i Jejreel ka camone woko cut. Lok pa Lubaŋa dok obino bot Elia ma Laticbe ma waco bote ni, “A malo, icit irwatte ki Akab kabaka me Icrael ma tye i Camaria. Nen, en tye i poto olok pa Nabot. Ibiwaco bote ni Rwot owaco kuman ni, ‘Ineko dano woko ka dok icamo wa potone bene?’ Dok ibiwacce ni, ‘I kabedo ka ma gwogi gunano iye remo pa Nabot, en aye in bene gwogi binano iye remoni.’ ” Akab owaco bot Elia ni, “In doŋ inoŋa bo, in lamerokka-ni?” Elia ogamo ni, “An doŋ anoŋi, pien in aye imiyo komi kekeni pi tiyo gin ma nen marac i wan Rwot. Nen, abikelo can i komi; abiyweyo in woko liweŋ, abineko co woko ducu ma tye boti in Akab, ma i lobo Icrael, opii wa ki anywalli. Abimiyo odi bedo calo ot pa Jeroboam wod pa Nebat, ma rom bene ki ot pa Baaca wod pa Akija, pi kiniga ma imiyo omaka, dok pien imiyo jo Icrael gubalo. Dok Rwot owaco lok i kom Jejebel bene kit man ni, ‘Gwogi aye bimwodo kom Jejebel woko i lobo ma i ŋet Jejreel.’ Dano ma wat pa Akab ma oto i gaŋ, gwogi aye bimwodo komgi, ento dano ma gibito i dye tim ata, winyo aye bicamogi.” Pe tye dano mo ma yam omiyo kome kekene pi tiyo gin ma nen marac i waŋ Rwot macalo Akab, ma dakone Jejebel odiye iye ki tek. Otimo bal me kipyeda marac twatwal pi lubo kor jogi-gu, macalo jo Amor yam gutimo, ma Rwot oryemogi woko ki i nyim jo Icrael-li. Ka Akab owinyo lok meno, ci oyeco boŋŋine woko, oruko boŋo cola cut i kome, obedo ka wot ma kome odem woko. Lok pa Rwot dok obino bot Elia ma Laticbe ma waco bo te ni, “In mono ineno kit ma Akab obedo kwede ka mwolle i nyima? Pien en doŋ omwolle kene i nyima, pe abikelo can i karene kikome; ento i kare pa wode aye abikelo can i kom jo me ode.” Jo Ciria ki jo Icrael gubedo mot laboŋo lweny mo i kingi pi mwakaadek. Ento i mwaka me adekke Yekocapat kaba ka me Juda ocito ka limo kabaka me Icrael. Kabaka me Icrael owaco bot luticce ni, “Wun mono atika pe wuŋeyo ni Ramot-gilead mewa? Wan waliŋ woko ata, ma pe koŋ wacikwanyo woko ki i ciŋ kabaka me Ciria?” Ka dok olokke openyo Yekocapat ni, “In bene ibicito kwedwa ka lweny i kom gaŋ Ramot-gilead?” Yekocapat ogamo dog Akab, kabaka me Icrael, kun wacce ni, “An ki in wan acel. Lwakka aye lwakki, ki aguragurana gin aguragurani bene,” Yekocapat owaco bot kabaka me Icrael ni, “Koŋ ikwon penyo lok ki bot Rwot wek wawiny doge.” Kabaka Akab ocoko lwak lunebi ducu kacel, ci gucokke miya aŋwen, Owaco botgi ni, “Acit ka lweny i kom Ramot-gilead, nyo pe aciti?” Lunebi gugamo ni, “Tugi cito cut, kabaka, pien Rwot bimiyo i ciŋi.” Ento Yekocapat dok owaco ni, “Lanebi mo mukene pa Rwot pe kany, wek koŋ dok wapeny doge?” Kabaka me Icrael ogamo dog Yekocapat ni, “Pud tye dano mo ma omyero wapenye wek wawiny dog Rwot ki bote, en Mikaya wod pa Imla; ento cwinya dage matek, pien peya otitta kit lok mo maber, en titta lok maracce keken.” Yekocapat ogamo ni, “Pe kumeno, kabaka, wek lok kit meno obedi.” Kabaka me Icrael olwoŋo ladit mo ci owacce ni, “Cit icikel Mikaya wod pa Imla oyotoyot.” Onoŋo Akab kabaka me Icrael ki Yekocapat kabaka me Juda gubedo wi komkergi ma guruko jor kergi mabeco; gubedo kwede i laro moyo me dino bel ma i ŋet dogcel ma gidonyo kwede i Camaria, kun lunebi ducu gitye ka tito lok i nyimgi, Jedekia wod pa Kenaana oyubo cal tuŋ lee ki nyonyo ci owacci, “Rwot owaco kuman ni, ibitwomo jo Ciria kit man macalo dyaŋ twomo wadi ki rune, nio ka ityekogi woko ducu.” Lunebi ducu gutito lok ma kit meno kun giwacci, “Tugi cito i Ramot-gilead, kabaka ci ibiloyo; Rwot bimiyo i ciŋi.” Lakwena ma ocito ka lwoŋo Mikaya-ni obino owacci, “Nen ba, Mikaya, lok pa lunebi ducu obedo me cuko cwiny kabaka; pienno wek lokki bene obed ma romki megi, lokki bene obed lok me cuko cwiny.” Mikaya ogamo doge ni, “Macalo Rwot tye makwo-ni, gin ducu ma Rwot owacca, en aye abilokone.” Ka Mikaya oo bot kabaka, kabaka openye ni, “Wacit ka lweny i kom Ramot-gilead, nyo pe waciti?” Ogamo ni, “Tugi cito cut, ci ibiloyo; Rwot bimiyo i ciŋi, kabaka.” Ento kabaka dok owaco ni, “An mono abiciki i nyiŋ Lubaŋa tyen adi ni ilokka lok me ada keken i nyiŋ Rwot?” Ci Mikaya owacci, “Aneno jo Icrael ducu guket woko lijayi i wi godi, macalo romi ma gipe ki lakwat. Dok Rwot bene owacci, ‘Jo-ni laditgi peke; wek ŋat acel acel odok gire i pacone ki kuc.’ ” Kabaka me Icrael owaco bot Yekocapat ni, “An pe onoŋo awacci ni, Mikaya pe bitito lok mo maber ma otika, ento bitito maracce?” Mikaya ogamo ni, “Pi meno koŋ dok iwiny lok pa Rwot mono. Abedo ka neno Rwot ma obedo i wi komkerre, kun lwak mony me polo ducu gucuŋ ka ŋete yo tuŋ bade malacuc ki yo tuŋ bade malacam. Rwot owacci. ‘Aŋa mono ma bibito Akab, wek ocit oto i Ramot-gilead?’ Ci giwaco lok mapatpat. Lacen kit cwiny mo obino, okato anyim ocuŋ i nyim Rwot kun wacci, ‘An aye abibito.’ Rwot openye ni, ‘Ibibite niŋniŋ?’ Ogamo ni, ‘Abicito ci abibedo cwiny ma lagoba kun aloko ki i dog lunebine ducu.’ Rwot ogamo ni ‘In ibibite, ci biye lokki. Doŋ icitim kumeno.’ Kombeddi doŋ inen ka Rwot doŋ otyeko keto cwiny ma lagoba i dog lunebini magi ducu; Rwot doŋ otyeko ciko pi kelo lok marac i komi.” Jedekia wod pa Kenaana ocito bot Mikaya cok, odoŋo leme ki cine, ci owacci, “Cwiny Rwot dok oa ki i koma niŋniŋ ka okobo oloko boti?” Mikaya owaco ni, “Meno ibiniaŋ iye i nino ma ibidonyo i kicika ma i tyelo wek ikanne iye.” Kabaka me Icrael owacci, “Wumak Mikaya woko, wudwoke cen bot Amon ma laloyo me gaŋ, ki bot Yoaci wod pa kabaka. Iciwaco botgi ni, ‘Kabaka owaco kuman ni, Wuket dano man i mabuc, dok wumiye ocam cam me mabuc, mugati ki pii keken, nio ka abidwogo paco ki kuc.’” Mikaya ogamo ni, “Ka ce idwogo paco ki kuc, ci pe Rwot aye oloko ki i doga.” Dok owacci, “Wun rok ducu doŋ wuwiny!” Kit meno kabaka me Icrael ki Yekocapat kabaka me Juda gucito i Ramot-gilead. Kabaka me Icrael owaco bot Yekocapat ni, “An abirukke macalo dano mo ata ka doŋ acito ka lweny, ento in iruk jorri me ker.” Kabaka me Icrael orukke macalo dano mo ata, ka ocito kwede i mony. Onoŋo kabaka me Ciria otyeko ciko ludito mony pyeradek wiye aryo ma giloyo gadigadine me lweny ni, “Pe wulweny ki dano mo matidi nyo madit, kono kabaka me Icrael keken.” Ka ludito mony guneno Yekocapat, guwacci, “Meno aye kabaka me Icrael kikome.” Gulokke ka lweny i kome, ci Yekocapat ocako daŋŋe ki mwoc. Ka ludito mony me gadigadi lweny guniaŋ ni pe en kabaka me Icrael, gulokke gudok woko cen gubwoto lubo kore. Ento dano mo otelo atumme ocelo ata, ci ocelo kwede kabaka me Icrael atura. Atero obaro kin nyonyo me geŋo kore ki nyonyc mukene me geŋo kome ma obedo macalo pok rec. Kabaka owaco bot laryem gadigadine ni, “Lokke idok cen wek ikwanya woko ki i wan lweny, pien ret otyeko maka woko.” Lweny odoko malyet i nino meno, dok lutic pa Akab gubedo ka jeŋo kome i gadigadine kun wane okemo jo Ciria nio wa otyeno, ka oto. Remo me wan rette omol piny i te gadigadi, I kare ma cen doŋ cok poto, dano gucako daŋŋe kun dwangi oromo dye mony ducu ni, “Dano acel acel odok i gaŋŋe. Dano acel acel odok wa i lobone!” Kabaka Akab oto kit meno, ci gitero kome i Camaria, giyiko kunnu. Gulwoko kom gadigadine i kut me Camaria, ci gwogi gunaŋo remone, ki lukwele bene gulwokke iye, kit ma Rwot owaco-ni. Lok kom Akab mudoŋŋe ducu, ki gin ducu ma en otiyo, ki ot ma en ogero ma odeyo ki lak lyec, ki lwak gaŋi ducu ma en ogero, gityeko coyone i buk me Tekwaro pa Luker me Icrael. Kit meno Akab oto, oywe kacel ki kwarine. Wode Akajia aye oleyo ka tyene. Yekocapat wod pa Aca ocako loyo jo Juda i mwaka me aŋwen me loc pa Akab kabaka me Icrael. Yekocapat ocamo ker ma onoŋo mwaka me ditte romo pyeradek wiye abic, ci obedo ka loc i Jerucalem pi mwaka pyeraryo wiye abic. Nyiŋ minne Ajuba ma nya pa Cilki, Yekocapat obedo ka lubo kit pa wonne Aca ducu; pe olokke oweko lubo kore, Obedo ka tiyo gin ma nen atir i wan Rwot. Ento wan jogi ma i wi godi pe gimuko woko; dano pud gityero gitumgi i wan jogi, dok giwaŋo iye odok eceta. Yekocapat oketo kuc bene i kin en ki kabaka me Icrael. Lok kom Yekocapat mudoŋŋe ducu, ki tekke, ki kit ma olwenyo kwede gityeko coyone i buk me Tekwaro pa Luker me Juda. Ki awobe ma lutim kwele i kom awobe wadgi i wan jogi ma yam pud odoŋ i kare pa wonne Aca, en oryemogi woko ki i lobone. I kare ca onoŋo kabaka pe i Edom. Lawaŋ kabaka me Juda aye obedo macalo kabakagi. Yekocapat omiyo gipayo lwak mel madoŋo me cito i Opir pi omo jabu-gu; ento pe gucito, pien mel gutur woko ducu i Ejion-geber. Lacen Akajia wod pa Akab owaco bot Yekocapat ni, “Wek luticca gucit kacel ki luticci i melli,” ento Yekocapat okwero gire woko, Yekocapat oto, oywe kacel ki kwarine, ci giyike kacel ki kwarine i gaŋ kai pa Daudi. Wode Jekoram aye oleyo ka tyene. Akajia wod pa Akab ocako loyo jo Icrael ki i Camaria i mwaka me apar wiye abiro me loc pa Yekocapat kabaka me Juda, ci obedo ka loyo jo Icrael pi mwaka aryo, Obedo ka tiyo gin ma nen marac i wan Rwot, kun bedo ka lubo kit pa wonne ki kit pa minne, ki kit pa Jeroboam wod ‘Pa Nebat, ma yam omiyo jo Icrael gubalo. Oworo jok Baal, otiyo bote, dok omiyo kiniga omako Rwot Lubaŋa me Icrael kun lubo kit ducu ma yam wonne otiyo kwede. I kare ma Akab oto, jo Moab gucako jemo woko i kom Icrael. I kare-nu Akajia opoto piny ki i waŋ dirica ki i kicikane mamalo ma i Camaria, odoko two ma obuto kwede piny; omiyo ocwalo lukwena, kun waco botgi ni, “Wucit wucipeny dog Baaljebub, lubaŋa pa jo Ekron, ni nyo abicaŋ ki two man.” Ento lamalaika pa Rwot owaco ki Elia ma Laticbe ni, “A malo, wek icit icirom ki lukwena pa kabaka me Camaria” ci iwac botgi ni, ‘Wutimo kuman ni Lubaŋa mo pe i Icrael, mumiyo wucito ka penyo dog Baal-jebub, ma lubaŋa pa jo Ekron-ni?’ Pi kit tim man, Rwot owacci, ‘In pe ibia malo ki i wi kitanda ma ibuto iye-ni, ento ibito woko adada.’ ” Elia ocako cito woko. Lukwena gudok bot kabaka, ci openyogi ni, “Piŋo wudwogo cen?” Gugamo ni, “Dano mo obino oromo kwedwa i yo, ci owacowa ni, ‘Wudok cen bot kabaka ma oorowu-ni, wuciwacce ni, Rwot owaco kuman ni, Itimo kuman ni Lubaŋa mo pe i Icrael, mumiyo icwalo ni gipeny dog Baaljebub, ma lubaŋa pa jo Ekron-ni? Pi kit tim man, omiyo in pe ibia malo ki i wi kitanda ma ibuto iye-ni, ento ibito woko adada.’’’ En openyogi ni, “Dano ma orwatte kwedwu-ni obedo niŋniŋ ma olokowu lok magi-ni?” Gugamo ni, “En oruko ginaruka ma obedo yeryer, kun otweyo pyere ki del.” Ci ogamo ni, “Meno en Elia Laticbe.” Kabaka dok ocwalo ladit me mony ma loyo jo pyerabic kacel, ki jone pyerabic. En ocito bot Elia, ma onoŋo obedo malo i wi got, ci owacce ni, “Ai dano pa Lubaŋa, kabaka owacci, ‘Ilor piny.’ ” Ento Elia ogamo dog ladit me mony ma loyo jo pyerabic-ci ni, “Ka an aye a dano pa Lubaŋa, wek mac oa ki malo i polo owaŋ in woko kacel ki joni pyerabic-ci ducu.” Ci mac oa malo ki i polo owaŋo en ki jone pyerabic-ci ducu. Kabaka dok ocwalo ladit me mony ma loyo jo pyerabic kacel ki jone pyerabic. Ocito bot Elia owacce ni, “Ai dano pa Lubaŋa, man aye cik pa kabaka ni, ‘Ilor piny oyotoyot.’’’ Ento Elia odok iye ki gin ni, “Ka ce an a dano pa Lubaŋa, wek mac aa ki malo i polo opot i komwu owaŋwu woko ducu, in kacel ki joni pyerabicci.” Ci mac pa Lubaŋa oa ki malo i polo owaŋo en ki jone pyerabic-ci ducu. Kabaka dok ocwalo ladit me mony me adekke ma loyo dano pyerabic, kacel ki jone. Ci ladit me adekke ma loyo jo pyerabic ocito. Ka oo, ci opoto orumo coŋe piny i nyim Elia, obako doge bote ni, “Ai dano pa Lubaŋa, alegi ni, pe ineka kacel ki joni pyerabicci, piwa obed tek ki in, Pien, nen, mac oa ki i polo ci obino piny, owaŋo ludito mony aryo mukwoŋo-ni ducu kacel ki jogi ma giloyo pyerabic-ci; ento in iwek, pi kwena obed tekki.” Lamalaika pa Rwot owaco bot Elia ni, “Lworo pe omaki i kome, Lor piny icit kwede.” Omiyo en ocito owoto kacel kwede bot kabaka, ci owacce ni, “Rwot owaco kuman ni, ‘Pien icwalo lukwena ka penyo dog Baal-jebub, lubaŋa pa jo Ekron, itimo kumeno ni Lubaŋa pe i Icrael bo, mumiyo ipenyo doge-ni? En aye lok mumi yo pe ibia ki i wi kitandani ma it ye iye-ni, ento in ibito woko adada.’ ” Akajia oto woko kit macalo Rwot oloko ki i dog Elia-ni, Jekoram ma ominne aye odoko kabaka ma oleyo ka tyene, i mwaka me aryo me loc pa Tekoram wod pa Yekocapat, kabaka me Juda, pien onoŋo Akajia pe tye ki wode mo. Lok kom Akajia mudoŋŋe ducu, ma en otiyo, gityeko coyone i buk me Tekwaro pa Luker me Icrael. I kare ma Rwot doŋ mito tero Elia woko i polo ki lapiru, onoŋo Elia ki Elica gitye i wotgi nia ki i Gilgal. Elia owaco bot Elica ni, “Alegi ni koŋ ibed kany; pien Rwot otyeko cwala woko wa i Betel.” Ento Elica ogamo ni, “Macalo Rwot tye makwo-ni, macalo in kikomi bene itye makwo-ni, an pe abibwoti.” Kit meno gucako wot wa i Betel. Lwak lunebi ma yam gitye i Betel gucito bot Elica guwacce ni, “In mono iŋeyo ni tin Rwot bikwanyo rwodi ki boti ci tero woko?” En ogamo ni, “Iyo, aŋeyo lokke; doŋ Wuliŋ mot.” Elia owacce ni, “Elica, alegi ni koŋ ibed kany, pien Rwot otyeko cwala woko wa i Jeriko.” Elica ogamo ni, “Macalo Rwot tye makwo-ni, dok macalo in bene kikomi it ye makwoni, an pe abibwoti.” Kit meno gubino wa i Jeriko, Lwak lunebi ma gitye i Jeriko gubino bot Elica cok, guwacce ni, “In mono iŋeyo ni tin Rwot bi kwanyo rwodi ki boti ci tero woko?” En ogamo ni. “Iyo, aŋeyo lokke; doŋ Wuliŋ mot.” Elia dok owacce ni, “Alegi ni koŋ ibed kany; pien Rwot ocwala wa i Jordan.” En ogamo ni, “Macalo Rwot tye makwo-ni, dok macalo in bene kikomi it ye makwo-ni, pe abibwoti.” Kit meno gin aryo ducu gumedde ki wot kacel. Lwak lunebi pyerabic bene guwoto kacel kwedgi, ci gucuŋ ki cen ka mabor ki gin, ka pud gin aryo ducu gucuŋ i dog Jordan, Elia okwanyo boŋone kikome, odolo woko, ogoyo ki pii, ci pii iye opokke woko aryo tuŋŋi ki tuŋŋi nio ka gin aryo ducu gukato ki i nom mutwo, Ka gutyeko ŋolo loka tuŋcel, Elia owaco bot Elica ni, “Leg gin ma abitimo piri, ma peya gikwanya woko ki boti.” Elica owacci, “Alegi, imiya ale kit cwinyi-ni adod tyen aryo.” Elia ogamo ni, “Ilego gin matek; ento ka ce ibedo ka neno an i kare ma gitiŋa nia ki boti-ni, ci bibedo boti kit meno; ento ka ce pe inena, ci pe bibedo kit meno,” Ka onoŋo pud giwoto kun giloko, ci nen, gadigadi me mac ki aguragura opoko kingi gin aryo-ni woko, Elia ocako ci to woko malo i polo ki lapiru madit-ti, Elica oneno ci okok ni, “Wora, wora do! gadigadi pa Icrael ki wegi aguragurane!” Pe dok omedo ki neno kome. En omako boŋone kikome oyeco woko i dul aryo. Ka okwanyo boŋo pa Elia ma opoto piny mua ki i kome-ni, odok kwede cen ci ocuŋ i dog Jordan. Okwanyo boŋo pa Elia ma opoto ki i kome-ni, ocako goyo ki pii, kun wacci, “Rwot Lubaŋa pa Elia tye kwene?” Ka otyeko goyo pii, ci pii iye opokke yo tuŋŋi ki tuŋŋi; Elica owoto i dyere, oŋolo loka kulu. Ka lwak lunebi ma onoŋo gitye i Jeriko guneno en okato loka tuŋ botgi, ci guwacci, “Cwiny ma yam tye i kom Elia otyeko gamo Elica.” Gubino ka romo kwede, ci guguŋo piny i nyime. Giwacce ni, “Nen, wan luticci watye ki jo matego pyerabic. Walego icwalgi gucit ka yenyo rwodi; gwok nyo Cwiny pa Rwot otiŋe ci obole woko wa i got nyo i nota-gu.” En ogamo ni, “Pe wubicwalogi.” Ento ka gubedo ka dido en nio ka lewic omake, owacci, “Wucwalgi.” Ci gucwalo jo pyerabic; gubedo ka yenyo Elia pi nino adek ci pe gunoŋo kome, Gudwogo bot Elica i kare ma en pud tye i Jeriko, ci owaco botgi ni, “An pe nene awacciwu ni, Pe wuciti?” Jo ma i gaŋ meno guwaco bot Elica ni, “Nen ba, gaŋ man tye-i kabedo maber ma yomo cwiny, kit ma in laditwa ineno-ni, Ento piine aye rac, ki lobone bene mi yo i mon poto woko.’ En owacci, “Wukella awal kwon manyen, ci wuony iye kado.” Ci gucako kelone bote. En ocito wa i wan pii ci oonyo iye kado-nu, kun wacci, “Rwot owaco kuman ni, An doŋ atyeko yubo wan pii man odoko maleŋ; pe doŋ bikelo to, pe miyo i mon poto.” Kit meno pii ocako doko maleŋ nio wa onyoo, kit macalo yam Elica olokoni. En ocito wa i Betel; i kare ma en tye ka wot i wanayo, litino awobe gua ki i gaŋ gubino gucako nyware, kun giwacci, “Cit malo, lawiye otal: Cit malo, lawiye otal.” Ka olokke onenogi, ocenogi i nyiŋ Rwot. Ci ŋuu ma mon aryo gukatti ki i buŋa ci gukilo kom awobe pyeraŋwen wiye aryo. Ka oa ki kunnu ci ocito wa i got Karmel, ka oa ki kunnu odok i Camaria. I mwaka me apar wiye aboro me ker pa Yekocapat kabaka me Juda, en aye Jekoram wod pa Akab ocamo iye ker me loyo Icrael i Camaria, ci obedo ka loc pi mwaka apar wiye aryo. Otiyo gin ma nen marac i wan Rwot, kadi pe obedo marom ki pa wonne ki pa minne, pien koŋ omuko wir me woro Baal ma yam wonne otiyo-ni. Ento en bene pe oweko kit bal pa Jeroboam wod pa Nebat, ma omiyo jo Icrael gubalo-ni; en pe oweko lubone. I kare meno onoŋo Meca kabaka me Moab tye ki romi ma gunya mapol; en yam bedo ka miyo romi alip miya acel bot kabaka me Icrael, ki yer nyogi romi alip miya acel, mwaka ki mwaka. Ento ka Akab oto, ci kabaka me Moab ojemo woko i kom kabaka me Icrael. Omiyo kabaka Jekoram otiŋŋe oa ki i Camaria i kare meno, ci ocoko jo Icrael ducu pi lweny. Ka ocito ci ocwalo lok bot Yekocapat kabaka me Juda ni, “Kabaka me Moab ojemo woko i koma; ibicito ka lweny kweda i kom jo Moab?” En ogamo ni, “Abicito, an ki in wan acel, lwakka gin aye lwakki, ki aguragurana gin aye aguragurani bene.” Dok owacci, “Wabiwot walubo yo mene?” Jekoram ogamo ni, “Wabilubo yo makemo i tim me Edom.” Kit meno kaba ka me Icrael ocako cito kacel ki kabaka me Juda ki kabaka me Edom. Ka gubedo ka gono piny pi wot me nino abiro, pii mo pe ononne pi mony kadi pi lee ma gimol i korgi ki yec. Kabaka me Icrael owacci, “Maa do! Rwot doŋ okelo luker magi adek-ki pi miyogi i ciŋ jo Moab.” Yekocapat owacci, “Lanebi pa Lubaŋa mo pe kany, wek wapeny dog Rwot ki bote?” Ci ŋat acel i kom lutic pa kabaka me Icrael ogamo ni, “El ica wod pa Capat aye tye kany, ma yam liyo pii i ciŋ Elia-nu. Yekocapat owacci, “En tye ki lok pa Rwot.” Ci kabaka me Icrael ki Yekocapat ki kabaka me Edom gucito wa bote. Elica owaco bot kabaka me Icrael ni, “An atimmi gin aŋo? In icit bot lunebi pa woru ki lunebi pa meni.” Ento kabaka me Icrael owacce ni, “Pe kumeno; pien Rwot aye olwoŋo luker magi adek-ki pi miyogi woko i ciŋ jo Moab.” Elica ogamo ni, “Macalo Rwot me mony tye makwo-ni, ma atiyo pire-ni, kono nene pe aparo pi Yekocapat kabaka me Juda, kono pe abolo waŋa i komi, kadi wa neno in, Ento wukella lago-opuk.” Ka lagoopuk ocako goyone, ci tek pa Rwot oyido i kome. Owacci, “Rwot owaco kuman ni, ‘Abimiyo laora kulu man mutwe-ni pii poŋ iye.’ Pien Rwot owaco kuman ni, ‘Wun pe wubineno yamo ki kot-gu, ento laora kulu aye pii bipoŋ iye, ci wubimato, wun, ki dyaŋiwu ki leewu.’ Man gin mayot ki bot Rwot; en bimiyo jo Moab bene i ciŋwu, ci wubiloyo gaŋi ma girumo ki cel gogo, ki gaŋi ducu ma ŋene, wubireto yadi mabeco ducu, wubiculo wan pii woko ducu, wubalo lobo maber-ri kun wucoro iye godi.” Orwone i kare me odiko, i kom cawa me tyero gitum, nen, pii obino oa ki yo tuŋ Edom, nio ka pii opoŋo lobo woko ducu. Ka jo Moab ducu guwinyo ni luker gubino ka lweny i komgi, ci gulwoŋo jo ducu ma gitwero ruko jami lweny i komgi, cakke i kom jo matino nio kwede wa i kom ludito, ci guryeyo i wan lobo. Ka gua malo odiko con, ci cen oryeny i kom pii, jo Moab guneno pii ma okemogi nen calo remo. Guwacci, “Man remo; luker gubedo ka lweny kacel, ci gunekke woko kekengi. Iyo, jo Moab, wucak yako jami?” Ento ka gubino i gony pa jo Icrael, ci jo Icrael ducu gutwarre malo ka lweny i kom jo Moab, ci guriŋo woko ki i nyimgi; gumedde anyim ki neko jo Moab ma giriŋo-ni. Gumako gaŋi woko, ki potti mabeco ducu bene dano acel acel obolo iye got, nio ka godi opoŋo pmy woko; guculo wan pii woko ducu gureto yadi mabeco ducu; nio ka godi keken aye odoŋ i Kir-karecet, ci lucel latandiyo gurumo gaŋ meno nio ka guloyo. Ka kabaka me Moab oneno ni mony doŋ ogeto marac i kome ci ocito ki wegi pala lucwan miya abiro pi baro dye mony, ma okemo kabaka me Edom; ci pe gutwero. En omako wode maditte ma onoŋo bileyo ka tyene-ni, ci otyero en me bedo gitum awaŋa i kom cel murumo gaŋ. Omiyo akemo madwoŋ opoto i kom io Icrael; ci gua gudok cen i lobogi. I kare meno dako mo acel ma i kin mon pa lunebi ocito okok bot Elica ni, “Cwara ma laticci oto woko; in bene iŋeyo ni laticci yam lworo Rwot, ento won banya obino ka mako litino awobena aryo wek gubed opiine.” Elica owacce ni, “Abitimmi kit gin aŋo? Titta; gin aŋo ma it ye kwede i odi?” En ogamo ni, “Pe atye ki gin mo i ot, ladit, kono nyo ablrtomoo aye tye.” Dok owacce ni, “Cit woko ka lego agulu pa luwoti ducu, ikel ma igi noŋo, kel mapolpol. Ka idony i ot, ci ilor doggola iceg wii ki wi litino awobeni woko i ot, ka iony moo i lwak agulu meno ducu; ka ce acel acel opoŋ, ci iket ocuŋ cen.” Dako-nu ocito ci oloro doggola, ocego wiye ki wi litino awobene aryo; ka en tye ka onyo moo i igi ci gin gikelo agulu mukene bote. Ka agulu ducu opoŋ woko, ci owaco bot wode ni, “Kella agulu mukene.” Ogamo ni, “Mukene doŋ peke.” Moo ocako gik woko ma pe dok mol. En obino otito bot dano pa Lubaŋa, en ogamo ni, “Cit icicat moo wek icul banyani woko, ci wek in ki litino awobeni wukonnye ki mudoŋŋe.” I nino mo acel Elica ocito wa i Cunem ka ma dako mo ma lalonyo bedo iye; ci dako-nu olege ni ocam bote. Lacen i kare ducu ma en wok ki kenyo, en ŋak koŋ ca mo kunnu. Dako-nu owaco bot cware ni, “Nen ba, aniaŋ atika ni dano man en dano maleŋ pa Lubaŋa, ma en bedo ka wirre i yowa jwijwi. Wek wagerre latin kicika mo i wi ot, ci waket iye kitanda mo pire ki meja, ki kom, ki mac tara, ce ka en bino botwa, wek ocit obed iye.” I nino mo acel, en ocito kunnu ci odonyo i kicika ocako ywe iye. Owaco bot laticce Gikaji ni, “Cilwonna Lacunem man.” Ka olwone, ci ocuŋ i nyime. Owacce ni, “Wacce ni, Nen, ibedo ki ayela man ducu piwa; gin aŋo ma myero atimmi? In it ye ki lok mo ma imito atit bot kabaka nyo ladit ma loyo mony?” En ogamo ni, “An abedo gira i kin lutuwa.” Elica openyo ni, “Dok gin aŋo ma gitim pire?” Gikaji ogamo ni, “En pe tye ki wode mo, ki cware bene doŋ oti woko.” Owacce ni, “Lwoŋe.” Ka olwoŋe, en ocuŋ i doggola. Ci owacce ni, “I mwaka ca ka onyoo, ka kare oromo, ci ibitiŋo wodi i kori.” En ogamo ni, “Pe kumeno, rwoda, ai dano pa Lubaŋa; pe ibwol aŋecani ba.” Ento dako-nu ogamo ic, ci onywalo wode i kare meno kikome, i mwaka ma olubo-ni, kit macalo yam Elica owaco bote. Ka latin odoŋo, ci i nino mo acel ocito bot wonne i kin lukac, ci owaco bot wonne rii, “Ai, wiya do, wiya do!” Wonne owaco bot laticce ni, “Tiŋ itere bot minne.” Ka otine ci otere bot minne. Latin obedo i em minne nie i dyeceŋ abwora, ci oto woko. Ci dako oa ocito opyelo i wi kitanda pa dano pa Lubaŋa-ni, ka oloro wiye woko i ot, ci ocito woko. Olwoŋo cware, owacci, “Cwalla laticci mo acel ki kana mo acel, wek acit bot dano pa Lubaŋa oyot, ka adwogi.” Ogamo ni, “Piŋo icito wa bote tin? Pien dwe peya opor, kadi cabit bene pudi.” En ogamo ni, “Bibedo ber.” Gitweyo kom i ŋe kana, ci dako owaco bot laticce ni, “Wek kana oriŋ, pe icuŋ nio ka awacci.” En ocako a ocito bot dano pa Lubaŋa wa i got Karmel. Ka dano pa Lubaŋa oneno en bino, owaco bot laticce Gikaji ni, “Nen, Lacunem loka ca; riŋ oyot icirom kwede, ci ipenye ni, Itye maber? Cwari tye maber? Latin tye maber?” Dako-nu ogamo ni, “Tye maber.” Ka obino i wi got bot dano pa Lubaŋa, ci opoto omako tyene. Gikaji obino ka cwale woko cen. Ento dano pa Lubaŋa ojuke ni, “Wek en obedi, pien tye ki can madwoŋ i cwinye; ento Rwot okano lokke woko bota, pe otitta.” Dako owacci, “An yam alegi pi latin laco mo, rwoda? Yam pe awacci, pe ibwola?” Elica owaco bot Gikaji ni, “A malo, itwe pyeri, ci ikwany odoona imak i ciŋi, wek iciti. Ka iromo ki dano mo, pe imote; ka dano mo omoti, pe igam doge; cit iciket odoona ipyel i wan latin.” Min latin dok owacci, “Kit macalo Rwot tye makwo-ni, macalo in bene it ye makwo-ni, pe abibwoto in,” En bene oa ocako lubo kor dako-nu. Gikaji ocito mere anyim, ci oketo odoo i wan latin, ento gin mo pe otimme kadi wa kit gin ma nyuto ni kwo. Omiyo odok cen ka romo kwede iyo, ci otitte ni, “Latin peya oco.” Ka Elica obino i ot, oneno latin obuto i wi kitandane ma oto woko. En odonyo oloro doggola woko i wigi gin aryo, ocako lego Rwot. Dok oa malo ocito obuto i kom latin, kun keto doge i dog latin, ki waŋe bene oketo i waŋ latin, ki bade bene opyelo i bad latin, kun ryene i kome, ci kom latin odoko lyet, Dok oa malo, ocako woto kun wirre i dye ot tuŋŋi ki tuŋŋi, ka oryene i kome; latin ocako jiro tyen abiro, ci oyabo waŋe, Ka olwoŋo Gikaji owacce ni, “Lwoŋ Lacunem man,” Ocito olwoŋe. Ka obino bote, ci owacci, “Gam wodi eno,” Dako-nu obino opoto ka tyene, orumo coŋe piny i nom; ci otiŋo latinne ocito woko. Elica dok ocito i Gilgal i kare ma kec tye i lobo. Ka yam lwak lunebi gubedo i nyime, owaco bot laticce ni, “Cib agulu madit i keno, wek ited dek ki lwak lunebi-ni.” Ŋat acel ocito i poto ka ŋwedo dek, ci onoŋo agaba me tim, opwono nyige poŋ kanyi ma odolo, ci obino onwero oketo i agulu dek kun pe ŋeyo kitgi. Ka gitoko wek jo-nu gucam, ka gitye ka camo dek-ku, ci gudamje matek ni, “Ai dano pa Lubaŋa, yat to aye tye i agulu-ni!” Ci camone oloyogi woko. Elica ogamo ni, “Wukel moko kwon.” Ci oonyo i agulu, kun wacci, “Tok dek ki jo-nu gucam.” Ci gin marac mo pe dok onen i agulu. Laco mo onoŋo oa ki i Baal-calica, okelo kwon me wi mwaka bot dano pa Lubaŋa, mugati cayiri pyeraryo, ki wit kal manyen i kicaane. Elica owacci, “Mi ki jo-nu wek gucam.” Ento laticce ogamo ni, “Man abiketo i nyim jo miya acel-li niŋniŋ?” En onwoyo waco ni, “Migi bot jo-nu, wek gucam, pien Rwot aye owaco kuman ni, ‘Gibicamo ci giweko mogo doŋ.’ ” Ci oketo i nyimgi, Gucamo, guweko mogo odoŋ, kit macalo Rwot owaco-ni. Naaman, ladit me mony me Ciria, en yam dano madit i nyim rwode dok ma giworo, pien Rwot omiyo Ciria obedo ka loyo lweny pi Naaman. En yam twon oteka lweny madit, ento onoŋo en ladobo. I kare-nu onoŋo mony pa jo Ciria oyako latin nyako mo ki i lobo Icrael, ci odoko aŋeca pa dako Naaman. En owaco bot min ot ni, “Kono nene rwoda tye cok ki lanebi ma tye i Camaria ca, kono ocaŋo two dobone woko.” Kit meno omiyo Naaman ocito otito bot kabaka ni, “Aŋeca ma oa ki i lobo Icrael owaco kuman.” Kabaka me Ciria ogamo ni, “Cit doŋ, an abicwalo waraga bot kabaka me Icrael.” En ocako cito, otero ryal ma romo talanta apar, ki jabu ma romo cekel alip abicel, ki boŋŋi me nino madito apar. Okelo waraga bot kabaka me Icrael, ma kwanne calo man ni, “Ka waraga man oo boti, ber iŋe ni acwalo laticca Naaman boti, wek in ican two dobone.” Ka kabaka me Icrael okwano waraga-nu, ci oyeco boŋone kun wacci, “An aye Lubaŋa bo, ma neko dano ka dok cero woko-ni, en aye omiyo dano man ocwalo lok bota pi caŋo two dobo pa laco man? Koŋ wutam, ka dok wunen ni en tye ka yenyo kolo i koma.” Ento ka Elica ma dano pa Lubaŋa lwoŋo nyiŋ Rwot Lubaŋane, ka kwato owinyo ni kabaka me Icrael oyeco boŋone woko, ci ocwalo lok bot kabaka kun wacci, “Piŋo iyeco boŋoni woko? Wek en obin bota kombeddi, wek oneni lanebi tye i Icrael.” Kit meno Naaman ocito bote ki aguragurane ducu ki gadigadi monnye, ci ocuŋ i doggola ot pa Elica. Elica ocwalo kwena bote kun wacci, “Cit icilwokke i kulu Jordan tyen abiro, ci komi biroc dok kakare, dok komi bilony.” Ento kiniga omako Naaman, ocako cito woko kun wacci, “Nen, onoŋo atamo ni en bikato woko wa bota, ka cun, lwoŋo nyiŋ Rwot Lubuŋane, ka kwato ciŋe i koma ka ma lit-ti, ka caŋo two dobo woko. Kulu Abana ki Parpar ma gitye i Damaciko pe gibeco makato lwak pii ma tye i Icrael ducu? Kono nene pe alwokke i piigi ci koma bedo leŋ?” Ocako lokke ci ocito woko ki akeca madwoŋ. Ento luticce gucito bote cok, guwacce ni, “Wora, ka nene lanebi owacci pi tiyo gin mo madit, kono pe itiyo? Man do twara ka owacci ni, ‘Lwokke, wek komi olony.’ ” En ocako cito ci olutte i kulu Jordan tyen abiro, kit ma dano pa Lubaŋa owaco-ni; ci kome ocako roc odok kakare macalo kom latin lakere, ci olonnye. En odok bot dano pa Lubaŋa, en ki lwakke ducu, obino ci ocuŋ i nyime, owacci, “Nen, an doŋ aŋeyo ni Lubaŋa mo pe i lobo ducu, kono i Icrael keken; ci ber doŋ igam mot pa laticci.” Elica owacci, “Macalo Rwot tye makwo-ni, ma atiyo pire-ni, pe abigamo gin mo.” Naaman obedok a diyo en ni ogam, ento Elica okwero woko. Naaman dok owacci, “Ka ikwero, ci alegi ni, wek gimi bota lobo ma kana aryo gitwero yeyo, pien nia tin, rwoda, pe abityero gitum awaŋa nyo gitum mukene bot lubaŋa mo, kono bot Rwot keken. Pi lok man Rwot myero otima kica: ka ce laditta bicito jwijwi i ot pa Rimmon ka worone kunnu, ma kun noŋo ojeŋo cine i bada, ki an bene noŋo akulle piny kekena i ot pa Rimmon, ka ce onoŋo akulle kekena i ot pa Rimmon, ci Rwot myero otima kica i kom lok man.” En owacce ni, “Doŋ icit ki kuc.” Ento ka Naaman owoto ocito ka ma borbor, manok mo, ci Gikaji latic pa Elica ma dano pa Lubaŋa-ni owacci, “Nen, ka rwoda oweko Naaman Laciria-ni, pe omedo ki gamo gin ma okelo-ni ki i cine, Macalo Rwot tye makwo-ni, abiriŋo i kore, wek anoŋ gin mo ki bote.” Kit meno Gikaji ocako lubo kor Naaman. Ka Naaman oneno ŋatti mo ma riŋo i kore, ci opye piny ki i wi gadigadine pi rwatte kwede kun penyo ni, “Lok mo tye?” En ogamo ni, “Lok mo peke. Rwoda ocwala ka wacci ni, ‘Kombeddi awobe aryo mogo ma gin lunebi gubino bota ma gua wa i lobo godi me Epraim; alego ni, imi botgi talanta me ryal ki boŋo aryo me nino madito.’’’ Naaman ogamo ni, “Ber igam talanta aryo.” Dok orido en matek, omiyo otweyo talanta aryo me ryal i kicaa aryo, ki boŋo aryo me mno madito, ci omiyo luticce aryo guyeyo, gutiŋo gutelo nyim Gikaji. Ka oo i wi got, ci okwanyo woko ki i ciŋgi, ocako ketogi i ot; ka ocwalo jo meno woko, ci gucito. Ka odonyo i ot, ocuŋ nyim rwode, Elica openye ni, Gikaji In ibedo kwene?” En ogamo doge ni, “Laticci pe ocito ka mo.” Ento Elica owacce ni, “Tipo koma ocito kwedi wa i kare ma laco meno odwogo boti nia ki i wi aguragura pi rwatte kwedi. Meno pe en aye kare ma myero giga miye lim ki ginaruka-gu, ki poto jeitum ki poto olok, ki romi ki twoni-guiki opii ki aneca-gu. Pienno dobo pa Naaman bikobo i komi ki i kom likwayi matwal.’ Kit meno en okato woko ki i nyime ma ladobo, ma kome oruko woko matar macalo pee. I kare-nu lwak pa lunebi gukok bot Elica ni, “Nen, kabedo ma wabedo iye i te locci-ni tidi mo, pe romowa. Wek waciti wa i Jordan wek dano acel acel onoŋ yat ki kunnu, wek wayub kabedowa kunnu.” Elica ogamo ni. “Citu.” Dano mo acel ma kingi owacci, “Kono obedo ber ka in icito kwedwa wan luticci.” Ogamo ni, “Abicito.” En ocako cito kwedgi. Ka guo I Jordan, gutoŋo lwak yadi woko. Ento ka dano mo acel tye ka togo yat, latoŋŋe oput woko opoto i pii, ci odaŋŋe’ matek ni, “Maa do, rwoda! Pien alego bot dano mo.” Dano pa Lubaŋa owacci, “Opoto ki kakwene?” Ka onyutte kakare,’ ci otoŋo yat mo, obolo i pii kunnu, omiyo latoŋ ocako kwan wi pii. Owacce ni, “Kwany woko.’ Ocwalo bade okwanyo woko. I kare mo ka kabaka me Ciria tye ka lweny i kom Icrael, Obedo ka yubo lok ki luticce kun wacci, “Ka gonnya bibedo ka munyo.’ Ento dano pa Lubaŋa ocwalo lok bot kabaka me Icrael ni, “Ber igwokke pe iwok ki ka munyo, pien jo Ciria gubecito wa kunnu.’ Kabaka me Icrael ocako cwalo dano i kabedo ma dano pa Lubaŋa otitte-ni. En obedo ka konye kit meno, omiyo olaro kome tyen mapolpol. Cwiny kabaka me Ciria obedo ka cwer mada pi lok meno; omiyo olwoŋo luticce openyogi ni, “Wunyutta dano ma tye i kinwa ma dotowa bot kabaka me Icrael.’ Laticce mo acel owacce ni. “Dano mo pe, rwoda kabaka; ento Elica ma lanebi ma tye i Icrael-li, en aye tito lok ma iloko wa i kicika butoni bot kabaka me Icrael.’ En ogamo ni, “Cit iciyeny ka ma en tye iye, wek acwal dano ka make.” Gititte ni, “Nen, en tye wa i Dotan.’ Kabaka ocako cwalo lwak aguragura ki gadigadi lweny ki mony madit; ci gucito wa kunnu i dyewor, gurumo gaŋ woko. Ka latic pa dano pa Lubaŋa oa malo odiko con ci okato woko nen, mony ki aguragura ki gadigadi lweny orumo gaŋ woko ducu. Laticce owacci, “Maa do, rwoda! Man watimo aŋo?” En ogamo ni, “Pe ilwor, pien jo ma tye tuŋ botwa dwoŋ, makato jo ma tye tuŋ botgi.’ Elica ocako lega, kun lego ni, “Ai Rwot, alegi, yab waŋe wek onen.’ Rwot ocako yabo waŋ latin awobi meno, ci oneno; nen aguragura opoŋo wi got woko ki gadigadi lweny me mac ma orumo Elica woko dyere. Ka Luciria gucito ka lweny i kome, Elica olego Rwot, kun wacci, “Alegi ni doŋ imi wan jo magi ocor woko.’ Rwot ocako miyo wangi ocor woko kit macalo Elica olego-ni. Elica owaco botgi ni, “Man pe yo, man bene pe gaŋ; wulub kora, abiterowu bot dano ma wuyenyo-ni.” Ci oterogi wa i Camaria. Ka gudonyo i Camaria, Elica olego Rwot ni, “Ai Rwot, doŋ iyab wan jo magi, wek gunen piny.” Rwot ocako yabo wangi, ci guneno piny; ci nen, onoŋo gitye wa i dye Camaria. Ka kabaka me Icrael onenogi ci openyo Elica ni, “Wora, abinekogi woko? Abinekogi woko?” En ogamo ni, “In pe ibinekogi. In itwero neko jo ma doŋ iyakogi ki pala lucwanni ki atummi? Ket cam ki pii i nyimgi, wek gucam, gumat, ka gucak cito wa bot rwotgi.” En oyubogi cam madwoŋ; ka doŋ gucamo, gumatol ci ocwaloai gudok bot rwotgi. Jo Ciria pe dok gudwogo ka monyo lobo Icrael matwal. Lacen Ben-adad kabaka me Ciria ocoko monnye ducu, ocito, orumo Camaria. Onoŋo kec bene dwoŋ i Camaria ci gurumo woko likiŋ, nio ka wi kana gicato giwilo ki cekel me ryal pyeraboro, ki kello bakuli acel giwilo ki cekel me ryal abic. I kare ma kabaka me Icrael woto kato ki i wi cel, dako mo odaŋŋe ki lok bote, kun wacci, “Konya, rwoda, kabaka!” En ogamo ni, “Ka Rwot pe okonyi, ci an abinoŋo gin ma akonyi kwede kwene? Binonne ki i laro moyo nyo ka ma gidino iye koŋo vino bo?” Kabaka ocako penyo en ni, “Gin aŋo ma yeli?” Dako-nu ogamo ni. “Dako man owacca ni, ‘Miwa wodi wek tin wacam, ka diki doŋ wacam woda.’ Pienno omiyo watedo woda, wacamo, ci orwone awaco ki dako-nu, ‘Miwa wodi, wek wacam’; ento en okano wode woko.” Ka kabaka owinyo lok pa dako-nu, ci oyeco boŋŋine woko ducu, ki i kare ma en kato ki i wi cel-li, kun dano gineno, ci nen, en oruko boŋo cola ki i te boŋone ma i kome-ni. En owacci, “Myero Lubaŋa oket can i koma kumeno, ki makato bene, ka ce wi Elica tin pe gitoŋo woko.” Onoŋo Elica tye obedo i ode, ki ludoŋo bene onoŋo gubedo kwede. I kare meno onoŋo kabaka oa ocwalo lakwena mua ki i nyime; ento ma pud peya lakwena oo bot Elica, en otugi waco bot ludoŋo ni, “Wun wuneno kit ma lanek man ocwalo kwede dano me toŋo wiya woko? Wunen ka lakwe-na-nu obino, ci wulor doggola woko, wumak doggola matek. Meno pe obot tyen rwode ma winnye bino ki i ŋeyeni?” I kare ma en pud loko kwedgi, kabaka obino bote owacce ni, “Ayela man oa ki bot Rwot! Piŋo amedde ka kuro Rwot ‘kuman?” Elica owacce ni, “Winy lok pa Rwot: Rwot owaco kuman ni, ‘Diki ka onyoo moko kwon mapwotte adita acel gibicato ki cekel acel, ki cayiri adita aryo gibicato pi cekel acel ki i dog gaŋ me Camaria.”” Ladit me askari ma kabaka jeŋo ciŋe i kome, ogamo dog dano pa Lubaŋa ni, “Ka ce Rwot kikome aye biyabo wan dirica ki i polo, ci meno bitimme?” Elica ogamo ni, “In ibineno ki waŋi, ento pe ibicamone.” I kare-nu onoŋo tye jo aŋwen ma ludobo ma gibedo i dog gaŋ; gubedo ka pennye kekengi ni, “Piŋo wabedo kany nio ka wato? Kadi wawac ni, ‘Wek wadonyu i gaŋ,’ kec bene tye i gaŋ, wabito ki kunnu; ka wabedo kany, wato woko bene. Doŋ wubin, wacitu kombeddi wa i gony pa jo Ciria. Ka pe gunekowa ci wabikwo, ka gunekowa ci wabito.” Gucako a ma piny pud ribiribi, gucito wa i gony pa jo Ciria; ento ka guo i dog gony pa jo Ciria nen, dano mo pe kunnu. Pien Rwot omiyo jo Ciria guwinyo dwan lwak gadigadi lweny, ki pa aguragura, ki dwan mony madwoŋ, omiyo gubedo ka lok kekengi ni, “Nen, kabaka me Icrael owilo mony pa kabaka pa jo Kit ki luker me Ejipt, gubino i komwa.” Omiyo gutwarre woko ki ŋwec ma piny pud ribiribi gularo kwogi, ci guweko kemagi, ki aguraguragi, ki kanagi, i gony ki berre, guriŋo gularo kwogi. Ka ludobo meno guo i dog gony, gudonyo i kema mo, gucamo, gumato, ci gutiŋo ryal mogo ki jabu ki bonni-gu, gucito gukanogi woko; ka dok gudwogo cen, gudonyo i kema mukene bene, gutiŋo jami ma tye iye, gucito gukano. Ka dok guloko kekengi ni, “Gin ma watimo-ni pe ber. Tin aye nino me lok maber; ka waliŋ nio ka piny odoko leŋ, ci can bipoto i komwa; doŋ wubin, wacitu wacitit bot jo ma i ot pa kabaka.” Ci gucito gulwoŋo lugwok dog gaŋ, gutito botgi ni, “Wan wacito wa i gony pa jo Ciria, nen, dano mo pe onen nyo owinnye kunnu, gin mo pe, kono lwak aguragura ki lwak kana keken ma gitweyogi, ki kema bene tye ma giwekogi ki berre.” Lugwok dogcel gudaŋŋe matek, ci gitito pire bot jo pa kabaka. Kabaka ocako a malo i dyewor, owaco bot luticce ni, “Abitittiwu kit ma jo Ciria guyubbe kwede ‘ka lweny i komwa. Gin giŋeyo ni watye ki kec; omiyo guweko gony gucito woko ka kanne wa i bar kun gitamo ni, ‘Ka ce gukatti woko ki i gaŋ ci wabimakogi makwo ka wadonyo i gaŋ.’ ” Laticce mo acel owacci, “Koŋ giwcal jo mogo ki aguragura abic ki i kin mewa mudoŋ, pien jo ma gidoŋ kany gibito macalo lwak jo Icrael ducu ma doŋ guto gutum woko-ni; wek koŋ wacwalgi ci wanen kite.” Gucako kwanyo jo aryo ma luriŋ ki aguragura, kabaka ocwalogi i kor mony pa jo Ciria kun wacci, “Wucit wunen.” Gucito gulubo korgi wa i Jordan; nen guweko jami i korgi ki ginaruka-gu ki lwak jami ma jo Ciria gubolo pi laro komgi. Lukwena gudwogo gutito bot kabaka. Lwak gumol woko, guyako gony pa jo Ciria, ci adita acel me moko kwon mapwotte gicato pi cekel acel, ki adita aryo me cayiri pi cekel acel, kit ma yam Rwot owaco-ni. I kare meno onoŋo kabaka oketo ladit me askari ma en jeŋo ciŋe i kome me bedo lagwok dog gaŋ; dano gunyono en ki tyengi i dog gaŋ, ci oto woko, kit ma dano pa Lubaŋa owaco i kare ma kabaka ocito bote-ni. Pien ka dano pa Lubaŋa nene owaco bot kabaka ni, “Adita aryo me cayiri gibiwilo ki cekel acel, ki adita me moko kwon mapwotte pi cekel acel, di ki ka onyoo ki i dog gaŋ me Camaria,” ladit me askari ogamo dog dano pa Lubaŋa ni, “Ka ce Rwot kikome aye biyabo wan dirica ki i polo, ci jami ma kit meno bitimme?” En ogamo ni, “In kikomi ibineno ki waŋi, ento pe ibicamone.” Ci otimme i kome kit meno, pien dano gunyone ki tyengi ki i dog gaŋ ci oto woko. I kare meno Elica owaco ki dako ma yam ocero latinne ni, “A woko wek icit ki jo ma i odi icibed ka mo ma itwero ducu; pien Rwot ociko pi kec, ci bipoto i lobo pi mwaka abiro.” Dako-nu ocako a woko ci otiyo kit macalo dano pa Lubaŋa owaco-ni; ocito ki jo ma i ode ci obedo i lobo pa jo Piliciti mwaka abiro. Ka mwaka abiro otum, dako-nu ocako dwogo nia ki i lobo pa Jo Piliciti, okato ocito bot kabaka ka koko pi ode ki pi lobone. I kare-nu onoŋo kabaka tye ka lok ki Gikaji ma latic pa dano pa Lubaŋa, kun wacce ni, “Titta gin madito ducu ma doŋ Elica otyeko tiyo.” Ka onoŋo obetito bot kabaka kit ma Elica ocero ki dano muto-ni, nen, dako ma en ocero wode-ni okok bot kabaka pi ode ki pilobone. Ci Gikaji owacci, “Rwoda, kabaka, man en aye dako, ki wode bene ene, ma Elica ocero-ni.” Ka kabaka openyo dako-nu, ci en otitte, omiyo kabaka okwanyo dano mo madit pire, kun wacci, “Dwok jami ma yam pa dako-nu ducu bote, kacel ki jami ma ocek i pottine nia wa i kare ma en obwoto ki lobone nio kwede wa onyoo.” I kare meno El ica ocito i Damaciko. Ben-adad kabaka me Ciria onoŋo two; ka onoŋo gititte pire ni, “Dano pa Lubaŋa obino kany,” kabaka owaco bot Kajael ni, “Kwany mot icit kwede ka jolo wi dano pa Lubaŋa, ci ipeny dog Rwot ki bote, kun ipenye ka abicar, ki i two man.” Kit meno Kajael ocako cito ka jolo wiye, otero ki mot bene, kit kwa jami ducu mabeco ma tye i Damaciko, ma kinaga pyeraŋwen guyeyo. Ka ocito ocuŋ i nyime, owacci, “Wodi Ben-adad ma kabaka me Ciria ocwala boti, kun wacci, ‘Abicaŋ i two man?’ Elica owacce ni, “Cit iciwacce ni, ‘In ibican adada’; ento Rwot otyeko nyuto bota ni en bito woko adada.” En ociko waŋe i kom Kajael kun gaye kwede, nio ka lewic omako, ci dano pa Lubaŋa ocako koko. Kajael openyo ni, “Rwoda, dok ikok piŋo kaa?” En ogamo ni, “Pien aŋeyo tim marac ma ibitime ki jo Icrael; ibiwaŋo gaŋi gogogi woko ki mac, ibineko co matino woko ki pala lucwan, kun inyoto litino lukere woko, dok mongi ma giyac gibiryeko igi woko.” Kajael ogamo ni, “Laticci odoko gin aŋo, ma en gwok ma mwa-ni, ci twero tiyo gin madit ma rom meno kulu?” Elica odok iye ni, “Rwot otyeko nyutta ni, in aye ibibedo kabaka me Ciria.” En ocako a woko ki bot Elica, ci ocito wa bot rwode. Rwode openye ni, “El ica owaco boti lok aŋo?” En owacci, “En otitta ni in ibicaŋ adada.” Orwone en okwanyo taulo, oluto i pii ci oyaro i waŋe, nio ka oto kwede. Kajael oleyo ka tyene. I mwaka me abic me ker pa Joram wod pa Akab kabaka me Icrael, en aye Jekoram wod pa Yekocapat kabaka me Juda ocako iye loc. Ocamo ker ma onoŋo mwaka me ditte pyeradek wiye aryo, ci obedo ka loc i Jerucalem pi mwaka aboro. Obedo ka lubo kit pa luker me Icrael, kun tiyo kit macalo jo me ot pa Akab gutiyo, pien dakone nya pa Akab. Obedo ka tiyo gin ma nen marac i waŋ Rwot. Ento Rwot pe omito tyeko Juda woko ducu, pi laticce Daudi, kit ma con ocikke bote ni ebimiye bedo ki mac tara, en ki likwaye matwal. I karene en aye jo Edom gujemo iye woko i kom loc pa Juda, ci guketo kabakagi pigi kengi. Joram okato loka Jair kacel: ki gadigadi lwennye ducu, ci oa woko i dyewor, ci en ki ludito ma giloyo gadigadi lwennye gulwenyo i kom jo Edom ma gurume dyere-ni; ento monnye oriŋo odwogo woko paco. Omiyo Edom ojemo woko i kom loc pa Juda nio wa onyoo. Ka dok Libna bene ocako jemo woko i kare-nu. Lok kom Joram mudoŋŋe ducu, ki gin ma yam otiyo ducu, gityeko coyone i buk me Tekwaro pa Luker me Juda. Joram oto, oywe kacel ki kwarine, dok giyike kacel ki kwarine i gaŋ pa Daudi; Akajia ma wode aye oleyo ka tyene. I mwaka me apar wiye aryo me loc pa Joram wod pa Akab, kabaka me Icrael, Akajia wod pa Jekoram, kabaka me Juda, ocako camo iye ker. Akajia onoŋo ditte romo mwaka pyeraryo wiye aryo ka ocamo ker, ci obedo ka loc i Jerucalem pi mwaka acel. Minne nyiŋe Atalia; en yam lakwar Omri kabaka me Icrael. Akajia bene obedo ka lubo kit pa jo me ot pa Akab, obedo ka tiyo gin ma nen marac i waŋ Rwot, kit macalo jo me ot pa Akab obedo ka tiyone, pien onoŋo jo paoce ot pa Akab. En ocako cito gin ki Joram wod pa Akab ka lweny ki Kajael kabaka me Ciria wa i Ramot-gilead, ci jo Ciria guketo ret i kom Joram. Kabaka Joram odwogo ka mado rette i Jejreel, en aye waŋ ret ma jo Ciria guketo i kome ki i Rama, i kare ma en olwenyo i kom Kajael kabaka me Ciria. Akajia wod pa Jekoram kabaka me Juda ocito ka limo Joram wod pa Akab i Jejreel, pien onoŋo kome lit. Elica olwoŋo ŋat acel i kin lwak pa lunebi ci owacce ni, “Twe pyeri, ci ikwany cupa moo man imak i ciŋi, icit kwede wa i Ramot-gilead. Ka io kunnu, ci iciyeny Yeko wod pa Yekocapat, wod pa Nimci; cit iciwacce oa woko ki i kin luwote, ci itel wiye itere i kicika ma i tyelo. Ka ikwany cupa moo, iony i wiye, kun iwacci, ‘Rwot owaco kuman ni, Awiro in me bedo kabaka ma loyo Icrael.’ Ka doŋ iyab doggola ci ilwi woko; pe ibed kunnu.” Latin awobi meno ma lanebi-ni ocako wot i Ramot-gilead. Ka ocito oo, nen, onoŋo ludito me mony gubedo i kacokke ka laro lok, ci owaco ni, “At ye ki kwena mo boti, ai ladit me mony.” Yeko ogamo ni, “Ibino bot aŋa ki i kinwa kany?” En ogamo ni, “Abino boti, ai ladit me mony.” Yeko oa ocito kwede i ot; ci latin awobi-nu oonyo moo i wiye, kun wacce ni, “Rwot Lubaŋa pa Icrael owaco kuman ni, Awiro in me bedo kabaka ma loyo lwak pa Rwot, wek ilo jo Icrael. In aye ibimuko ot pa laditti Akab woko, wek an acul kwor i kom Jejebel pi remo pa luticca ma lunebi, ki pi remo pa lutic pa Rwot ducu. Pien ot pa Akab bitum woko ducu; abineko co woko ducu ki bot Akab, ma opii ki ma anywalli-gu, ma gitye i Icrael. Abimiyo ot pa Akab bedo calo ot pa Jeroboam wod pa Nebat, dok bibedo macalo ot pa Baaca wod pa Akija. Gwogi aye bimwodo kom Jejebel woko ki i lobo Jejreel, ŋatti mo pe biyiko en.” Ka oyabo doggola, ci olwi woko. Ka Yeko okato woko bot lutic pa laditte, gupenye ni, “Lok aŋo doŋ? Piŋo lapoya-nu obino boti?” En owaco botgi ni, “Wun wuŋeyo laco-nu ki lokke.” Dok gupenye ni, “Meno goba; tucciwa lok kikome.” En otito botgi kikore ni, “En olokka kuman kun wacca ni, ‘Rwot owaco kuman ni, Awiro in me bedo kabaka ma loyo Icrael.’ ” Ŋat acel acel okwanyo boŋone oyotoyot opeto piny i rwom ma obedo gotgot wek en obed iye, gucako kuto tumgi kun gidaŋŋe matek ni, “Yeko aye kabaka.” Kit meno Yeko wod pa Yekocapat wod pa Nimci ocako piro lok i kom Joram. (I kare-nu onoŋo Joram ki jo Icrael ducu gubedo ka gwoko Ramotgilead pi geŋo Kajael kabaka me Ciria wek pe olweny i kome; ento onoŋo kabaka Joram otyeko dwogo i Jejreel wek gimad rette ma yam jo Ciria guketo i kome, i kare ma onoŋo en olwenyo ki Kajael kabaka me Ciria.) Yeko owacci, “Ka ce tamwu tye kit man, pe wuwek dano mo obucce ki i gaŋ ka tero lokke i Jejreel.” Yeko ocako ito i wi gadigadi lwennye, ocito wa i Jejreel, pien onoŋo Joram buto kunnu. Ka dok Akajia kabaka me Juda bene ocito kunnu ka limo Joram. I kare meno onoŋo lakur-piny Ocuŋ malo i lubele ma i Jejreel, ci oneno buca mony pa Yeko ka bino, ci owacci, “Aneno buca mony.” Joram owacci, “Kwany won aguragura mo, icwal ocirwatte kwede wek openye ni, ‘Ibino ki kuc bo?’” Dano mo oito i wi aguragura ocako cito ka rwatte kwede, ci openye ni, “Kabaka owacci, ‘Ibino ki kuc bo?’’’ Yeko ogamo ni, “In iyelle ka penyo pi kuc piŋo kaa? Lokke, ilub kora.” Lakur-piny odwoko lok kun wacci, “Lakwena oo kunnu, ento pe doŋ obedwogo.” Dok ocwalo won aguragura me aryone. Ka oo botgi owacci, “Kabaka owacci, ‘Ibino ki kuc bo?’” Yeko ogamo ni, “In iyelle ka penyo pi kuc piŋo? ‘Lokke, ilub kora.” Lakur-piny dok odwoko lok ni, “En oo botgi, ci pe doŋ obedwogo. Dok laryem gadigadi lweny ryemo macalo Yeko wod pa Nimci; pien ryemo ki tek twatwal calo lapoya.” Joram owacci, “Wuyub gadigadina!” Ci giyubo gadigadine, ka Joram kabaka me Icrael ki Akajia kabaka me Juda gucako wot, kun ŋat acel acel oito i gadigadine, gucito ka rwatte ki Yeko. Gurwatte kwede i poto pa Nabot ma jo Jejreel. Ka Joram oneno Yeko, ci openyo ni, “Ibino ki kuc bo?” En ogamo ni, “Kit kuc aŋo ma dok bedo tye-ni, ma kun kono tim kwele kwele pa meni Jejebel, ki tim jokjokke doŋ dwoŋ twatwal?” Joram owiro gadigadine, oriŋo woko kun waco bot Akajia ni, “Roro doŋ ocakke, Akajia.” Yeko otelo atumme ki tekke ducu, ci obayo ocelo Jorami kin kwaya bade, ci atero ocun wa i kom adunone, omiyo en opoto piny i gadigadine. Yeko owaco bot Bidkar ma lakony en ni, “Kwanye woko, ibol piny i poto pa Nabot ma jo Jejreel. Po pi lok ma Rwot’ yam otito i kome i kare ma an ki in warino ki aguragurawa kacel i kor: Akab ma wonne kun waco ni, ‘Macalo laworo aneno remo pa Nabot, ki remo pa awobene-ni, abiculo kwor i komi i poto man! Man lok pa Rwot kikome.’ Doŋ itine ibole i po to kany, kun ilubo lok ma yam Rwot owaco-ni.” Ka Akajia kabaka me Juda oneno, ci oriŋo woko odok yo tuŋ Bet-kagan Yeko olubo kore ci owacci, “Cel en woko bene”; ci gicelo en woko ki i gadigadine kun obeito wi cere ma wo to i Gur, ma cok ki i get Ibleam, Oriŋo olaro Megido, ci oto kunnu. Luticce gutiŋo en ki gadigadi gutere i Jerucalem, ci guyike i lyelle kacel ki kwarine i gaŋ kal pa Daudi. Onoŋo Akajia ocako loyo jo Juda i mwaka me apar wiye acel me loc pa Joram ma wod pa Akab. Ka Yeko oo i Jejreel, ci Jejebel owinyo pire. Owiro yat macol i ŋet waŋe ryoryo, okedo wiye, ocako neno woko ki i waŋ dirica. Ka Yeko donyo ki i dog gaŋ, ci Jejebel openyo ni, “Ibino ki kuc bo, in Jimri, lanek rwodi-ni?” Yeko otiŋo waŋe malo ka oneno dirica, ci owacci, “Aŋa ma tye tuŋ bota? Aŋa?” Co aryo nyo adek ma lugwok daker, ma gikologi, guneno yo tuŋ bote. Yeko owaco botgi ni, “Wubole woko piny.” Gubolo Jejebel woko piny, ci remone okir i kor ot ki i kom aguragura, aguragura bene gunyono kome. Yeko odonyo i gaŋ, ci ocamo ka omato. Lacen owacci, “Wunen dako man ma giceno-ni, wuyike woko: pien en nya pa kabaka.” Ka gucito ka yiko kome, pe ginoŋo gin mo mudoŋ i kome, kono nyo olar wiye ki tyene aryo ki opany cine aryo. Ka gudwogo bote, gutitte, ci ogamo ni, “Meno en aye lok pa Rwot, ma yam owaco ki i dog Elia Laticbe-ni, ni meno, ‘Gwogi aye bimwodo kom Jejebel ki i lobo me Jejreel; dok kom Jejebel bibedo macalo cet dyaŋ ma giketo ata i nom i poto ma i lobo Jejreel, ma bimiyo dano mo pe twero waco ni, Man aye Jejebel.’ ” Onoŋo Akab tye ki awobene pyerabiro ma gibedo i Camaria. Yeko ocako coyo waraga mogo, ci ocwalogi i Camaria bot ludito ma giloyo gaŋ meno, ki bot ludoŋo, ki bot lugwok litino awobe pa Akab, kun waco ni, “Litino pa rwotwu tye botwu, dok bene wutye ki gadigadi lweny ki aguragura-gu, ki gaŋi ma girumo ki cel gogo, ki jami lweny-gu. Doŋ ka ce waraga man oo botwu, wuyer latin ker mo maber ki ma romo loc ki i kin litino awobe pa rwotwu, ci wuket i wi komker pa wonne, ka doŋ wulweny pi ot pa rwotwu.” Ento gubedo ki lworo matek, ci guwacci, “Nen ba, ka luker aryo ca pe gucuŋ i nyime, ci wan kono watwero cuŋ i nyime niŋniŋ?” Pienno dano ma onoŋo loyo kal ki ŋat ma loyo gaŋ ducu, kacel ki ludoŋo ki lugwok litino, gucwalo lok bot Yeko kun giwacci, “Wan luticci; wabitiyo gin ducu ma ibicikowa kwede. Wan pe wabiketo kabaka mo; in iti gin ma ineno ni ber.” Dok onwoyo coyo botgi waraga me aryo, kun waco ni, “Ka ce wun wutye tuŋ bota, ka ce wuyubbe me woro doga, ci wukwany wi litino awobe pa rwotwu, ci wubin bota i Jejreel diki ka onyoo.” Onoŋo litino awobe pa kabaka ma romo jo pyerabiro gitye bot jo madito ma i gaŋ meno ma gibedo ka pitogi. Ka waraga oo botgi, ci gumako litino awobe pa kabaka, gunekogi woko, jo pyerabiro-nu, gucoko wigi i aduku mogo, gutero wa i Jejreel. Ka lakwena ocito otitte ni, “Doŋ gityeko kelo wi litino awobe pa kabaka ducu,” ci en ogamo ni, “Wucan wigi obed odu aryo ki i ŋet dogcel me gaŋ, ka ma gidonyo iye, obed nio wa odiko.” Ka okato odiko, ocuŋ iye ci owaco bot lwak ducu ni, “Wun pe wutye ki bal mo. An gira apiro lok me neko rwoda, ci atyeko neko en woko; ento aŋa ma oneko jo magi woko ducu? Ber wune atir ni lok pa Rwot pe poto piny noŋo. Lok ma yam Rwot oloko ma dok i kom ot pa Akab bicobbe ducu; pien Rwot otyeko tiyo gin ma yam owaco ki i dog Laticce Elia.” Yeko dok oneko jo ducu ma i ot pa Akab mudoŋŋe i Jejreel, oneko wa jone madito-gu ducu, ki lureme ma cok kwede, ki ajwagine, nio ka otyekogi woko ducu ma acel mo pe odoŋ. Ka otiŋo wot ocito wa i Camaria. Ki i yo ma onoŋo en tye i Bet-eked ka ma lukwat gigurre iye. Yeko oromo ki jo ma gin ludoggola pa Akajia kabaka me Juda, openyo ni, “Wun aŋa-gi?” Gugamo ni, “Wan ludoggola pa Akajia, wan wabino ka moto litino kal ki litino awobe pa daker yo.” En owacci, “Wumakgi makwo.” Ci gumakogi makwo, gunekogi woko ka ŋet bur me Bet-eked, jo ma giromo pyeraŋwen wiye aryo, ne oweko acel mo obwot. Ka oa woko ki kunnu, ci orwatte ki Yekonadab wod pa Rekab ma bino ka jolo wiye; ci omoto en, owacce ni, “Cwinyi leŋ i koma macalo an cwinya leŋ kwede i komi-ni?” Yekonadab odok iye ni, “At ye kit meno.” Yeko owacci, “Ka it ye kit meno, ci cwal ciŋi bota.” En ocako cwalo ciŋe. Yeko otiŋe i gadigadine, kun wacce ni, “Bin wacit kacel, wek inen kit ma akemo maka kwede pi Rwot.” Kit meno Yeko ocako tere i gadigadine. Ka oo i Camaria, ci oneko jo pa Akab ducu ma onoŋo gudoŋ kunnu, nio ka oyweyogi woko ducu liweŋ, kit ma yam Rwot oloko ki Elia-ni. Yeko dok ocoko lwak ducu, owaco botgi ni, “Akab yam otiyo ki Baal manok mo, ento abitiyo bote makato. Pienno wulwonna lunebi pa Baal ducu, ki jo ma giworo en ducu, ki ajwagine ducu; pe ŋatti mo obed peke, pien atye ki gitum madwoŋ me atyera bot Baal; dano mo ma obedo pe, pe bibedo makwo.” Ento Yeko otiyo ki ryeko laum wan: pien onoŋo oyubbe me tyeko luwor Baal woko. Yeko dok ociko ni, “Wulwon cokke madit pi Baa!.” Ci gucako lwoŋone. Yeko ocwalo kwena oromo i Icrael ducu, ci luwor Baal ducu gubino; pe dano mo odoŋ ma pe obino. Gucako donyo i ot pa Baal, ci ot pa Baal opoŋ tuŋŋi ki tuŋŋi ducu. Yeko owaco bot ladit me ot boŋŋi ni, “Kel ginaruka pi luwor Baal ducu.” En ocako kelo ginaruka pigi. Yeko ocako cito i ot pa Baal kacel ki Yekonadab wod pa Rekab; ci owaco bot luwor Baal ni, “Wuyeny, wek wunen ni lutic pa Rwot mo pe odoŋ i kinwu, kono luwor Baal keken.” En dok odonyo iye ka tyero gityer ki gitum awaŋa-gu. Yeko onoŋo doŋ okano jo pyeraboro woko i ŋe ot, kun wacci, “Dano mo ma oye ŋat mo acel ki i kom jo ma amiyo i ciŋwu-ni obwot, ci kwone aye bidyero ka waŋe.” Ka otyeko tyero gitum awaŋa, Yeko owaco bot lukur-piny ki ludito pa askari ducu ni, “Wudony i ot, wunekgi woko; pe wuwek dano mo obwoti.” Kit meno gunekogi woko ki pala lucwan, ci lukur-piny ki ludito pe askari ducu gucako bologi woko, ka gudonyo kwede wa i kicika ma i tyelo ot pa Baal, ci gukelo wir ma nene tye i ot pa Baal woko, guwaŋo woko. Dok gumuko wir pa Baal woko, ka dok gumuko ot pa Baal bene, guloko odoko ot coron nio wa onyoo, Yeko ojwayo tim me woro Baal woko ki i Icrael kit meno. Ento Yeko pe obwoto lubo bal pa Jeroboam wod pa Nebat ma omiyo jo Icrael bene gubalo-ni, en aye bal me woro litino twoni me jabu ma i Betel ki Dan. Rwot owaco bot Yeko ni, “Pien in itimo ber pi tiyo gin ma nen atir i waŋa, dok ityeko timo ot pa Akab kit ducu ma tye i cwinya-ni, pienno likwayi gibibedo i wi komker me Icrael nio i yalwak me aŋwenne.” Ento Yeko yam pe ogwokke ka lubo cik pa Rwot Lubaŋa pa Icrael ki cwinye ducu; pe obwoto lubo bal pa Jeroboam, ma en omiyo jo Icrael bene gubalo-ni. I kare meno Rwot ocako ŋwido i lobo Icrael woko. Kajael olwenyo i komgi, oloyogi ki i lobo Icrael ducu. Tuŋ wokceŋ me kulu Jordan omayo iye lobo Gilead ducu, ki jo pa Gad, jo pa Reuben ki jo pa Manace, cakke ki i Aroer ma i ŋet nota kulu Amon, en aye lobo Gilead ki Bacan. Lok kom Yeko mudoŋŋe ducu, ki gin ducu ma yam otiyo, ki tekke ducu, gityeko coyone i buk me Tekwaro pa Luker me Icrael. Kit meno Yeko oywe kacel ki kwarine, ci giyiko i Camaria. Wode Yekoakaj aye oleyo ka, tyene. Kare ma Yeko oloyo jo Icrael ki i Camaria oromo mwaka pyeraryo wiye aboro. Ka Atalia min Akajia oneno wode oto woko, ci en ocako jwero ot ker woko ducu. Ento Yekoceba, nya pa kabaka Joram, ma lamiŋ Akajia, otino Yoaci wod pa Akajia okwalo woko ki i kin awobe pa kabaka ma gibenekogi-ni, ci okano en ki lapidine i kicika mo me buto. En okane woko kit meno, omiyo Atalia pe onoŋo kome ci latin obwot, pe gineko. Ci en obedo ki Yoaci mwaka abicel, kun kano i ot pa Rwot, i kare ma Atalia tye ka loyo lobo. Ento i mwaka me abirone Yekoyada ocwalo kwena ci gikelo ludito ma lulo buca mony pa jo mi ya ma pa jo Kari ki pa lukur-piny, ci en oterogi i ot pa Rwot, oketo gicikke kwedgi, omiyogi gukwoŋo kwoŋ ki i ot pa Rwot, ka onyuto botgi wod pa kabaka. En ocikogi ni, “Man aye gin ma wubitiyo: dul acel me adekke ma i komwu, jo ma gia i dog ticgi i nino me cabit, ma gikuro ot pa kabaka, gibikuro gaŋ kai, kun dul acel me adekke mukene gikuro doggola me Cur, ki acel me adek gikuro doggola ma i ŋe lukur-piny. Dulwu aryo ma gibino i dog ticgi i nino me cabit pi kuro ot pa Rwot, gibirumo kabaka dyere, kun dano acel acel tye ki jami lwennye i ciŋe. Ka dano mo obino ka temo baro kin tyenwu, gibineko woko. Wubibedo ki kabaka ka ma en bicito iye ducu.” Ludito mony gutiyo gin ducu kit ma ajwaka Yekoyada ocikogi kwede; ladit mony acel acel okelo jone ma onoŋo gubea woko ki i dog ticgi i nino me cabit, ki jo ma nene gibino i dog tic i nino me cabit. Gin ducu gucito bot ajwaka Yekoyada. Ajwaka ocako miyo bot ludito me mony lwak toni ki kwodi ma onoŋo yam pa kabaka Daudi, ma onoŋo tye i ot pa Rwot. Lukur-piny gucuŋ kun dano acel acel omako jami lwennye i ciŋe, cakke wa i agikki ot yo tuŋ acuc ki nio kwede wa i agikki ot yo tuŋ acam, kun girumo keno tyer ki ot bene, Ka doŋ ocako kelo wod pa kabaka, oketo lalukana i wiye, ka orwako ogul makwar i ŋut ciŋe, ka gituco atir ni en doŋ kabaka, ci giwire ki moo; ci dano gudaŋŋe kun gidoŋo ciŋgi kun giwacci, “Kabaka obed kwo nakanaka!” Ka Atalia owinyo woo pa lukurpiny ki pa lwak, ci ocito bot lwak wa i ot pa Rwot. Ka oniyo piny, ci oneno kabaka ocun ka ŋet wir, kit ma kabaka cun kwede, kun ludito me mony ki lukut-tum gurumo kabaka, ki lwak ducu gubedo ka wo ki tum kun cwinygi yom. Atalia ocako yeco boŋone, kun kok ni, “Roro yai! Roro!” Ajwaka Yekoyada ociko ludito ma giloyo wi mony ni, “Wukel dako-nu woko ki i kin tyen; wunek wa jo ma gilubo kore ducu.” Pien ajwaka onoŋo tamo ni, “Pe myero gineke ki i ot pa Rwot.” Gucako keto ciŋgi i kom Atalia, ci guwok kwede ki i doggola ma aguragura donyo kwede, guo wa i ot pa kabaka, ci guneke kenyo. Yekoyada ocako keto gicikke i kin Rwot ki kabaka ki lwak, wek gubed lwak pa Rwot; ka dok oketo gicikke i kin kabaka ki lwak. Lwak ducu gucako mol gucito i ot pa Baal ci gumuko gureto woko piny; guturo keno tyerre ducu ki calle guŋido woko matitino, Ci guneko Matan ma ajwaka pa Baal ki i nyim keno tyer. Lacen ajwaka ocako keto jo ma gigwoko ot pa Rwot. Ci otero ludito ma lulo buca mony pa jo miya, ki jo Kari, ki lukur-piny ki lwak ma i lobo ducu, gucako kelo kabaka woko nia ki i ot pa Rwot kun gidorre giwok ki i doggola pa lukurpiny nio kwede wa i ot pa kabaka. Kabaka ocako bedo piny i wi komker pa luker. Kit meno lwak ma i lobo ducu cwinygi obedo yom; gaŋ ocako kwe mot ki i ŋe to pa Atalia ma gineko ki pala lucwan i ot pa kabaka. Yekoac ocamo ker ma mwaka me ditte abiro. I mwaka me abiro me loc pa Yeko, en aye Yekoac ocako iye loc i Jerucalem pi mwaka pyeraŋwen. Nyiŋ minne Jibia me Beer-ceba. Yekoac obedo tiyo gin ma nen atir i wan Rwot i kare me kwone ducu, pien ajwaka Yekoyada obedo ka pwonyo en. Kadi bed kumeno, wan jogi ma i wi godi pe omukogi woko; lwak pud gumedde ka tumo gitum ki waŋo odok eceta i waŋ jogi ma i wi godi. Yekoac owaco bot ajwagi ni, “Lim ducu me jami maleŋ ma gikelogi i ot pa Rwot, en aye lim ma gijogo ma noŋo giŋolo i wi dano acel acel, lim me ajog ma jo gukelo kit ma giŋolo, ki lim ma dano kela i ot pa Rwot kit ma cwinye opwoyo, wek ajwagi guter, kun dano acel acel gamo ki bot jo ma en neyogi, wek guyub ki ot ka ma ginoŋo ni mito ayuba.” Ento oo i mwaka me pyeraryo wiye adekke me loc pa kabaka Yekoac, onoŋo ajwagi peya guyubo ot ka mo, Mumiyo kabaka Yekoac olwoŋo ajwaka Yekoyada ki ajwagi mukene, openyogi ni, “Piŋo pe wubedo ka yubo ot Kombeddi pe doŋ wugam lim mo ki bot jo ma wuneyogi, ento wucwal lim ma tye-ni me layub ot.” Kit meno ajwagi gucako ye ni pe doŋ gibigamo lim ki hot lwak, dok pe gibiyubo ot bene. Ajwaka Yekoyada ocako kwanyo canduk mo, otuco wiye, ci oguro i ŋet keno tyer ki i yo tuŋ acuc, ka idonyo i ot; ci ajwagi ma gikuro doggola giketo iye lim ducu ma dano gikelo i ot pa Rwot. Ka ce guneno ni lim tye i canduk madwoŋ, ci karan pa kabaka, ki ajwaka madit, gibino gikwano lim ma ginoŋo i ot pa Rwot ci gitweyo i kicaa. Ka dok gimiyo limma gipimoni i ciŋ lutic ma giloyo dog tic me ot pa Rwot; ci gin gicako miyone bot lupac ki lugedo ma gitiyo i kom ot pa Rwot, ki bot lugedo ki godi ki lupa-godi, kacel ki pi wilo bao ki godi ma gimuko pi yubo ot ka ma oballe, ki pi lim ducu ma mitte pi yubo ot. Ento lim ma gikelo i ot pa Rwot pe gitiyo kwede becen me ryal, nyo magac, nyo atabo, nyo tum nyo jami me jabu nyo me ryal mo me tic kwede i ot pa Rwot, pien lim meno onoŋo gimiyo bot lutic ma gitye ka yubo kwede ot pa Rwot. Pe gubedoka penyo lok kom lim ki bot jo ma gimiyo lim i ciŋgi pi culo lutic, pien gubedo ka tic kwede ki gen. Lim mua ki i kom gitum me tino alii, ki lim mua ki i kom gitum pi bal, pe gitero i ot pa Rwot; meno bedo lim pa ajwagi, I kare meno Kajael kabaka me Ciria ocito olwenyo i kom Gat, ci oloyo, Ento ka Kajael ociko waŋe me ci to ka lweny i kom Jerucalem, ci Yekoac kabaka me Juda ocako kwanyo mot ma yam gidyero ducu, ma kwarine Yekocapat ki Jekoram ki Akajia ma luker pa Juda yam gudyero, ki mot ma en kikome odyero, kacel ki lwak jabu ducu ma ginoŋo i ot kano lim ma i ot pa Rwot ki i ot pa kabaka, ci ocwalo wa bot Kajael kabaka me Ciria. Ka Kajael oa woko ki i Jerucalem ocito woko. Lok kom Yoaci mudoŋŋe ducu, ki gin ducu ma otiyo, gityeko coyone i buk me Tekwaro pa Luker me Juda. Luticce gujemo, gupiro lok, ci guneko Yoaci i ot ma i Millo, ki i korayo ma dok i Cilla. Luticce ma guneke gin aye Jojakar wod pa Cimeat ki Yekojabad wod pa Comer. Giyiko en kacel ki kwarine i gaŋ kai pa Daudi, ci wode Amajia oleyo ka tyene. I mwaka me pyeraryo wiye adek me loc pa Yoaci wod pa Akajia kabaka me Juda, en aye Yekoakaj wod pa Yeko ocako iye loyo jo Icrael ki i Camaria, ci obedo ka loc pi mwaka apar wiye abiro. Obedo ka tiyo gin ma nen marac i waŋ Rwot, kun lubo bal pa Jeroboam wod pa Nebat ma en omiyo jo Icrael bene gubalo-ni; en pe obwoto lubogi, Ci kiniga pa Rwot otugge woko i kom Icrael, obedo ka miyogi jwijwi i ciŋ Kajael kabaka me Ciria, ki i ciŋ Ben-adad wod pa Kajael. Lacen Yekoakaj obako doge bot Rwot, ci Rwot owinyo kokone; pien oneno uno pa jo Icrael, kit ma kabaka me Ciria unogi kwede. Mumiyo Rwot omiyo lalar bot jo Icrael, ci gubwot ki i cin jo Ciria, ci jo Icrael gubedo i pacogi kit ma con ca. Ento pe gubwoto lubo kit bal me ot pa Jeroboam, ma en omiyo jo Icrael bene gubalo-ni, ento gubedo ka lubogi; ki yadi ma gicomo pi woro jok ma dako ma gilwoŋo Acera bene onoŋo pud tye i Camaria. Rwot oweko Yekoakaj pe odoŋ ki monnye mo, kono wegi aguragura pyerabic keken, ki gadigadi lweny apar, ki askari alip apar ma giwoto ki tyengi; pien kabaka me Ciria onekogi otyeko woko, omiyo guradde piny macalo apwa ma ginyono. Lok kom Yekoakaj mudoŋŋe ducu, ki gin ma yam otiyo gityeko coyone i buk me Tekwaro pa Luker me Icrael. Kit meno Yekoakaj oto, oywe kacel ki kwarine, ci giyiko i Camaria, Yoaci ma wode aye oleyo ka tyene. I mwaka me pyeradek wiye abiro me loc pa Yoaci kabaka me Juda, en aye Yekoac wod pa Yekoakaj ocako iye loyo jo Icrael ki i Camaria, ci obedo ka loc pi mwaka apar wiye abicel. En bene obedo ka tiyo gin ma nen marac i waŋ Rwot. Pe obwoto lubo lwak bal pa Jeroboam wod pa Nebat, ma en omiyo jo Icrael bene gubalo-ni; ento obedo ka lubogi. Lok kom Yoaci mudoŋŋe ducu, ki gin ducu ma otiyo, ki tek mere ma yam olwenyo kwede i kom Amajia kabaka me Juda, gityeko coyone i buk me Tekwaro pa Luker me Icrael. Yoaci oto, oywe kacel ki kwarine, ka Jeroboam ocako bedo i wi komker mere, Yoaci giyiko i Camaria kacel ki luker me Icrael. I kare ma two omako Elica, ma en aye two ma oneke, Yoaci kabaka me Icrael ocito bote ci ok ok i nyime kun wacci, “Wora, wora! Gadigadi lweny me Icrael ki wegi aguragura do ya!” Elica owacce ni, “Mak atum ki atero-gu”; ci en omako atum ki aterogu, Ci dok owaco bot kabaka me Icrael ni, “Tel atum”; ci otelo, Elica ocako keto ciŋe i wi ciŋ kabaka, kun wacci, “Yab dirica ma yo tuŋ wokceŋ”; ci oyabo. Elica dok owacce ni, “Baa atero”; ci obayo. Dok owaco ni, “Atero pa Rwot me loc! Atero me loyo jo Ciria! Pien ibilweny ki jo Ciria i Apek nio ka ityekogi ducu.” Dok owacci, “Mak atero”; ci omakogi. Ci dok owaco bot kabaka me Icrael ni, “Pwodgi ki ŋom”; ci opwodo tyen adek, ci ogik. Dano pa Lubaŋa okeco i kome kun wacci, “Kono nene ipwodo ŋom tyen abic nyo abicel, kono nene ipwodo jo Ciria nio ka ityekogi. Ento in doŋ ibipwodo iloyogi tyen adek keken.” Elica oto woko, ci giyiko. I kare-nu buca mony pa jo Moab bi no ka monyo lobo i dog oro, mwaka ki mwaka. Ci i kare ma gitye ka yiko laco mo, nen, buca mony pa luyak otuc, ci kom dano muto-ni gibolo i lyel pa Elica. Ka kom dano-nu ogudo cogo pa Elica, ci ocer woko, ocuŋ ki tyene. Kabaka Kajael me Ciria obedo ka uno jo Icrael i kare ducu me loc pa Yekoakaj. Ento Rwot onyuto berre botgi kun kica omake i komgi, ci olokke odwogo tuŋ botgi pi gicikkene ma yam oketo ki Abraim, ki Icaka ki Yakobo, pe omito tyekogi woko; pe obayogi woko ki i nyime nio wa onyoo. Ka yam Kajael kabaka me Ciria oto, ci wode Ben-adad odoko kabaka kun oleyo ka tyene. Ka Yekoac wod pa Yekoakaj omayo gaŋi ki i cin Ben-adad wod pa Kajael, gin gaŋi ma Kajael yam oyako ki bot wonne Yekoakaj ki mony-nyi. Yoaci obedo ka lweny i kome ci oloyo en tyen adek, ci odwoko gaŋi pa Icrael woko cen. I mwaka me aryo me loc pa Yoaci wod pa Yoakaj kabaka me Icrael, en aye Amajia wod pa Yoaci kabaka me Icrael ocako iye loc. Ocamo ker ma mwaka me ditte oromo pyeraryo wiye abic, ci obedo ka loc pi mwaka pyeraryo wiye aboŋwen ki i Jerucalem. Minne nyiŋe Yekoadin me Jerucalem. En obedo ka tiyo gin ma nen atir i wan Rwot, ento pe obedo rom ki kwarone Daudi; en obedo ka tiyo gin ducu kit ma wonne Yoaci yam obedo ka tiyone. Ento wan jogi ma i wi godi pe omukogi woko; lwak pud gumedde ka tumo gitum ki waŋo odok eceta i wan jogi ma i wi godi. Ka kerre doŋ omoko, ci oneko luticce woko ma yam guneko wonne-ni, Ento pe oneko litino pa lunek-ki, kit macalo gicoyo i buk me cik pa Moses, ka ma yam Rwot ociko ni, “Won latin pe gibineko pi bal pa wode, nyo latin pi bal pa wonne; ento dano acel acel bito pi balle kikome.” En yam onekojo Edom ma giromo alip apar ki Lnota me kado, ka oloyo Cela ki mony, ocako lwoŋo ni Jokteel, ci obedo nyiŋe nio wa onyoo. Dok Amajia ocwalo lukwena bot Yekoac ma wod pa Yekoakaj, wod pa Yeko, kabaka me Icrael, kun wacce ni, “Bin wek wacam co wanenne waŋ ki waŋ.’ Yekoakaj odwoko lok bot Amajia kabaka me Juda ni, “Yam okuto mo ma i wi Lebanon ocwalo kwena bot yat cedar me Lebanon kun wacci, ‘Miya nyari wek anyom ki woda.’ Ci lee tim mo me Lebanon ma owok ki kunnu onyono okuto piny. In iloyo Edom ada, ci omiyo wii opii mada. Bed ki deyo meno rommi, ci ibed kwede wa i paconi. Piŋo irobo dog dano me kelo ayela i komi, miyo ipoto wa ki Juda kacel kwedi?” Ento Amajia pe owinyo. Omiyo Yekoakaj kabaka me Icrael ocito, ci en ki Amajia gucamo co gunenne kekengi i lweny i Bet-cemec, ma gaŋ me Juda. Icrael ocako loyo Juda, ci dano acel acel oriŋo woko i pacone. Yekoac kabaka me Icrael omako Amajia kabaka me Juda wod pa Yekoac ma wod pa Akajia ki i Bet-cemec, ka ocito wa i Jerucalem ci omuko cel me Jerucalem ma romo yadi miya aryo kulu, nia ki i dogcel pa Epraim nio kwede wa i dogcel ma i twok gaŋ. Oyako jabu ki ryal ducu ki atabo-gu ducu ma onoŋo i ot pa Rwot, ki i ot kano lim ma i ot pa kabaka, kacel ki jo ma gimako me akoka, ci odok kwede wa i Camaria. Lok kom Yekoac mudoŋŋe ducu ma en otiyo, ki tekke ducu, ki kit ma yam olwenyo kwede ki Amajia kabaka me Juda, gityeko coyone i buk me Tekwaro pa Luker me Icrael. Yekoac oto, oywe kacel ki kwarine, ci giyiko i Camaria kacel ki luker me Icrael. Wode Jeroboam aye oleyo ka tyene. Ka Yekoac kaba ka me Icrael oto, ci Amajia kabaka me Juda koŋ dok obedo kwo mwaka apar wiye abic. Lok kom Amajia mudoŋŋe ducu gityeko coyone i buk me Tekwaro pa Luker me Juda. Jo mogo gucako piro lok i kom Amajia ki i Jerucalem, ci olwi oriŋo woko i Lakic. Ento gucwalo dano i kore wa i Lakic, ci gineke woko ki kunnu. Gukelo kome ki aguragura, ci giyiko i Jerucalem kacel ki kwarine i gaŋ kal pa Daudi. Ci lwak ducu ma i Juda gutiŋo Ajaria ma mwaka me ditte romo apar wiye abicel, ci guketo en kabaka ka leyo ka tyen wonne Amajia. En aye ogero Elat ka odwoko cen bot Juda ki i ŋe to pa kabaka, ma doŋ oywe kacel ki kwarine. I mwaka me apar wiye abic me loc pa Amajia wod pa Yoaci kabaka me Juda, en aye Jeroboam wod pa Yoaci kabaka me Icrael ocako iye loc ki i Camaria, ci obedo ka loc pi mwaka pyeraŋwen wiye acel. Obedo ka tiyo gin ma nen marac i waŋ Rwot; pe obwoto lubo lwak bal pa Jeroboam wod pa Nebat, ma en omiyo jo Icrael bene gubalo-ni. En odwoko waŋ lobo Icrael kit ma yam tye-ni cakke ki i yo ma donyo i Kamat nio kwede wa i nam ma i Araba, kit macalo Rwot Lubaŋa pa Icrael yam owaco, ma oloko ki i dog laticce lanebi Yona wod pa Amittai, ma gaŋŋe Gat-keper. Pien Rwot onoŋo oneno atwom pa jo Icrael odoko kec twatwal, pien ŋatti mo pe odon kunnu, kadi opii nyo anywalli, dok lakony Icrael mo bene peke. Ento Rwot pe yam owacci ebijwayo nyiŋ Icrael woko ki piny i te polo, omiyo olarogi ki ciŋ Jeroboam wod pa Yoaci. Lok kom Jeroboam mudoŋŋe ducu, ki gin ma otiyo ducu, ki tek mere ducu, ki kit ma yam olwenyo kwede, ki kit ma yam odwoko kwede Damaciko ki Kamat i lobo Icrael, ma onoŋo yam koŋ gubedo i ciŋ Juda, gityeko coyone i buk me Tekwaro pa Luker me Icrael. Ci Jeroboam oto, oywe kacel ki kwarine; wode Jekaria aye oleyo ka tyene. I mwaka me pyeraryo wiye abiro me loc pa Jeroboam kabaka me Icrael en aye Ajaria wod pa Amajia, kabaka me Juda, ocako iye loc. Ocamo ker ma mwaka me ditte romo apar wiye abicel, ci obedo ka loc ki i Jerucalem pi mwaka pyerabic wiye aryo. Minne nyiŋe Yekolia me Jerucalem. Obedo ka tiyo gin ma nen atir i waŋ Rwot, kun lubo gin ducu ma yam wonne Amajia otiyo. Kadi bed kumeno, wan jogi ma i wi godi pe omukogi woko; lwak pud gumedde ki tumo gitum ki waŋo odok eceta i waŋ jogi ma i wi godi. Rwot ocako pwodo kabaka, ci odoko la dobo nio wa i nino me tone, kun bedo i ot ka ikene. Yocam ma wod pa kabaka aye obedo ladit ma loyo ode, kun loyo kwede lwak ma i lo bo meno. Lok kom Ajaria mudoŋŋe ducu, ki gin ducu ma yam otiyo, gityeko coyone i buk me Tekwaro pa Luker me Juda. Ajaria oto, oywe kacel ki kwarine, ci giyiko kacel ki kwarine i gaŋ kal pa Daudi. Yocam ma wode aye oleyo ka tyene. I mwaka me pyeradek wiye aboro me loc pa Ajaria kabaka me Juda en aye Jekaria wod pa Jeroboam ocako loyo iye jo Icrael ki i Camaria pi dwe abicel. En obedo ka tiyo gin ma nen marac i waŋ Rwot, kit ma yam kwarine gutiyo. Pe obwoto lubo kit bal pa Jeroboam wod pa Nebat, ma en omiyo jo Icrael bene gubalo-ni. Calum wod pa Jabec ocako piro lok i kome, ci ocobo oreto woko piny ki i Ibleam, oneke woko, ci odoko kabaka ma kakare. Lok kom Jekaria mudoŋŋe ducu, nen, gityeko coyone i buk me Tekwaro pa Luker me Icrael. Man aye lok ma Rwot yam owaco ki Yeko ni, “Likwayi gibibedo i wi komker me Icrael nio wa i yalwak me aŋwenne”, ci otimme kit meno. Calum wod pa Jabec ocako loc i mwaka me pyeradek wiye aboŋwen me loc pa Ujia kabaka me Juda, ci obedo ka loc pi dwe acel ki i Camaria. Lacen Menakem wod pa Gad oa ki i Tiŋa, obino i Camaria, ci ocobo Calum wod pa Jabec ki i Camaria oreto woko piny, oneko woko, ci odoko kabaka ma kakare. Lok kom Calum mudoŋŋe ducu, ki lok ma en opiro, nen, gityeko coyone i buk me Tekwaro pa Luker me Icrael. I kare meno Menakem ojwero gaŋ me Tapua woko, ki jo ma gibedo iye ducu, ki lo bo ma i ŋete, nia wa i Tiŋa; pien pe guye yabo doge wek en odony, mumiyo en ojwero woko, kun ryeko i mon ducu ma kunnu ma gitye ki ico I mwaka me pyeradek wiye aboŋwen me loc pa Ajaria kabaka me Juda, en aye Menakem wod pa Gad ocako iye loyo jo Icrael, ci obedo ka loc pi mwaka apar ki i Camaria. En obedo ka tiyo gin ma nen marac i wan Rwot; i kare me kwone ducu pe obwoto lubo kit bal pa Jeroboam wod pa Nebat, ma en omiyo jo Icrael bene gubalo-ni. Ci Pul kabaka me Aciria obino ka monyo lobo; ci Menakem omiyo bot Pul ryal ma romo talanta alip acel, wek okonye pi miye tek me moko kerre maber. Lim meno Menakem ojogo ki bot jo Icrael ma lulonyo ducu, kun ŋat acel acel oculo cekel me ryal pyerabic me amiya bot kabaka me Aciria, omiyo kabaka me Aciria odok cen, pe obedo i lobo. Lok kom Menakem mudoŋŋe ducu, ki gin ducu ma yam otiyo, gityeko coyone i buk me Tekwaro ptl Luker me Icrael. Menakem oto, oywe kacel ki kwarine, ci wode Pekakia aye oleyo ka tyene. I mwaka me pyerabic me loc pa Ajaria kabaka me Juda en aye Pekakia wod pa Menakem ocako iye lo yo jo. Icrael, ci obedo ka loc pi mwaka aryo. En obedo ka tiyo gin ma nen marac i wan Rwot, pe obwoto lubo kit bal pa Jeroboam wod pa Nebat, ma en omiyo jo Icrael bene gubalo-ni, Ci Peka wod pa Remalia ma ladit, pa askarine ocako piro lok i kome, kacel ki jo pyerabic me Gilead, ci oneko en woko i Camaria, ki i gogo me ot pa kabaka, ci odoko kabaka ma kakare. Lok kom Pekakia mudoŋŋe ducu, ki gin ma yam otiyo ducu, nen, gityeko coyone i buk me Tekwaro pa Luker me Icrael. I mwaka me pyerabic wiye aryo me loc pa Ajaria kabaka me Juda, en aye Peka wod pa Remalia ocako iye loyo jo Icrael, ci obedo ka loc pi mwaka pyeraryo. Obedo ka tiyo gin ma nen marac i wan Rwot; pe obwoto lubo kit bal pa Jeroboam wod pa Nebat, ma en omiyo jo Icrael bene gubalo-ni. I kare pa Peka kabaka me Icrael, en aye Tiglat-Pilecer kabaka me Aciria obino ci omako gaŋi magi, Ijon, Abel-bet-Maaka, Janoa, Kedec ki Kajor kacel ki Gilead, Galilaya ki lo bo Naputali ducu; ci oyako dano oterogi i opii wa i Aciria. Kocea wod pa Ela opiro lok i kom Peka wod pa Remalia, ci ocobo oreto woko piny, oneko woko, odoko kabaka ma kakare, i mwaka me pyeraryo me loc pa Y ocam wod pa Ujia. Lok kom Peka mudoŋŋe ducu, ki gin ducu ma yam otiyo, nen, gityeko coyone i buk me Tekwaro pa Luker me Icrael. I mwaka me aryo me loc pa Peka wod pa Remalia, en aye Yocam wod pa Ujia kabaka me Juda ocako iye loc. Ocamo ker ma mwaka me ditte pyeraryo wiye abic, ci obedo ka loc i Jerucalem pi mwaka apar wiye abicel. Nyiŋ minne Yeruca ma nya pa Jadok. En obedo ka tiyo gin ma nen atir i wan Rwot, kun lubo gin ducu ma yam wonne Ujia otiyo. Kadi bed kumeno, wan jogi ma i wi godi pe omukogi woko; lwak pud gumedde ka tumo gitum ki wano odok eceta i wan jogi ma i wi godi. En ogero doggola ma malo me ot pa Rwot. Lok kom Yocam ducu, ki gin ducu ma yam otiyo, gityeko coyone i buk me Tekwaro pa Luker me Juda. I kare meno Rwot ocako cwalo Rejin kabaka me Ciria kacel ki Peka wod pa Remalia ka monyo Juda. Yocam oto, oywe kacel ki kwarine, ci giyiko kacel ki kwarine i gaŋ kal pa kwarone Daudi. Wode Akaj aye oleyo ka tyene. I mwaka me apar wiye abiro me loc pa Peka wod pa Remalia, en aye Akaj wod pa Yocam kabaka me Juda ocako iye loc. Akaj ocamo ker ma mwaka me ditte pyeraryo, ci obedo ka loc i Jerucalem pi mwaka apar wiye abicel. Pe obedo ka tiyo gin ma nen atir i wan Rwot Lubaŋane, kit ma kwarone Daudi yam otiyo-ni, ento obedo ka lubo kit pa luker me Icrael. En bene omedo ki waŋo wode me gityer, kun lubo kwede tim me kwer pa rok mukene ma Rwot yam oryemogi woko ki i nyim jo Icrael. En obedo ka tumo gitum ki waŋo odok eceta i waŋ jogi ma i wi godi, ki i wi cere, ki i waŋ ayweya ducu ma pote oluk-gu. Rejin kabaka me Ciria, ki Peka wod pa Remalia, kabaka me Icrael, gutiŋo mony gutero i kom Jerucalem, ci gurumo Akaj dyere, ento pe guloye. I kare meno kabaka me Edom odwoko Elat i te loc me Edom, ka oryemo Lujuda woko ki i Elat; ci jo Edom gucako bino i Elat, gubedo iye nio wa onyoo. Akaj ocako cwalo lukwena bot Tiglat-pilecer ma kabaka me Aciria kun wacci, “An laticci, dok an a wodi, Bin wek ilara ki i ciŋ kabaka me Ciria ki kabaka me Icrael ma gitye ka lweny i koma.” Akaj dok okwanyo ryal ki jabu ma onoŋo tye i ot pa Rwot, ki i ot kano lim ma i ot pa kabaka, ci ocwalo me mot bot kabaka me Aciria. Kabaka me Aciria owinyo kokone, ci otiŋo mony ocito kwede i Damaciko, ocako yako jo ma kunnu oterogi i opii wa i Kir, ci oneko Rejin woko. Ka kabaka Akaj ocito i Damaciko ka jolo wi Tiglat-Pilecer kabaka me Aciria, ci oneno keno tyer ma tye i Damaciko, ci ocwalo cal me keno tyer meno bot ajwaka Vria, ki kit tiyorie, kun nyuto kite ducu kikore. Ajwaka Uria ocako cano keno tyer kun cweyo kit ma kabaka Akaj onoŋo ocwalo bote ki i Damaciko. Otimo kumeno ma onoŋo kabaka Akaj peya odwogo ki i Damaciko. Ka kabaka odwogo ki i Damaciko, ocito oŋiyo keno tyer, ci oito iye malo, owaŋo gitumme me awaŋa, ki gityer mere me moko kwon, ka oonyo gityer amata, ocoro remo me gityer mere me lakwecwiny i kom keno tyer. Ci okwanyo keno tyer me mola ma yam tye i nyim Rwot, ma onoŋo bedo i nyim ot, i kabedo ma i kin keno tyerre ki ot pa Rwot, ci oketo yo tuŋ acam me keno tyer mere. Kabaka Akaj ociko ajwaka Uria kun wacci, “Waŋ gitum awaŋa me odiko i wi keno tyer madit-ti, ki gityer me moko kwon me otyeno, ki gitum awaŋa ma kabaka omiyo, ki gityerre me moko kwon, kacel ki gitum awaŋa pa lwak ducu ma i lobo, ki gityergi me moko kwon, ki gityergi me amata. Ibicoro remo me gitum awaŋa ducu i kome bene, ki remo me gitum mukene ducu. Ento keno tyer me mola-ni bibedo mera, me penyo iye dog Rwot.” Ajwaka Uria otiyo ducu kit meno, kit ma kabaka Akaj ociko-ni. Kabaka Akaj oŋolo mola ma apada ki i kom litino gadigadi, ci okwanyo otako ki i komgi, ka okwanyo nam woko ki i kom twoni mola ma onoŋo gitye i tere-ni, ci oketo i kom godi ma gipetogi piny. Ki yo ma giumo wiye ma giwok ki iye i ceŋ cabit, ki doggola pa kabaka ma tye woko, en okwanyogi woko ki i kom ot pa Rwot, pi kabaka me Aciria. Lok kom Akaj mudoŋŋe ducu, ki gin ma yam otiyo, gityeko coyone i buk me Tekwaro pa Luker, me Juda. Akaj oto, oywe kacel ki kwarine, ci giyiko kacel ki kwarine, i gaŋ kai pa Daudi; wode Kejekia aye oleyo ka tyene. I mwaka me apar wiye aryo me loc pa Akaj kabaka me Juda, en aye Kocea wod pa Ela ocako loyo iye jo Icrael ki i Camaria ci obedo ka loc pi mwaka aboŋwen, Obedo ka tiyo gin ma nen marac i wan Rwot, ento pe obedo marom ki luker me Icrael ma gukwono nyime. Cal maneeer kabaka me Aciria obino ka monyo en; ka Kocea odoko laticce, ci ocako miyo mucoro bote. Ento lacen kabaka me Aciria oniaŋ ni Kocea laruba; pien ocwalo lukwena bot Co, kabaka me Ejipt, ci okwero miyo mucoro bot kabaka me Aciria kit ma yam obedo ka miyo kwede mwaka ki mwaka, omiyo kabaka me Aciria omake, otweye woko i buc. Kabaka me Aciria ocako monyo lobo Icrael ducu, ka obino kwede wa i Camaria, ci orumo gaŋ meno mwaka adek. I mwaka me loc pa Kocea me aboŋwenne en aye kabaka me Aciria omayo kwede gaŋ Camaria, ci otero jo Icrael i opii wa i Aciria ci oketogi i Kalak ki i ŋet Kabor, ma en aye kulu ma i Gojan, ki i gagi pa jo Medi. Lok man otimme kumeno pien jo Icrael onoŋo gubalo i nyim Rwot Lubaŋagi, ma yam okwanyogi woko ki i lobo Ejipt, ki i ciŋ Parao kabaka me Ejipt. Gubedo ka woro lubaŋa mogo mukene, kun gilubo kit pa lurok ma yam Rwot oryemo woko ki i nyim jo Icrael, ki kit ma luker me Icrael gukelo. Jo Icrael gubedo ka timo gin ma pe kakare i kom Rwot Lubaŋagi i muŋ, Gugero lwak odi i waŋ jogi megi kengi i wi godi i ŋet gaŋigi ducu, cakke ki i kom lubele pa lukurpiny nio kwede wa i kom gaŋi ma girumo ki cel gogo. Gucibo wir jogi dok gucomo yadi me woro jok ma dako ma gilwoŋo Acera i wi godi mabocone ducu, ki i wan ayweya ducu ma pote oluk-gu, Gubedo ka wano odok aceta i wan jogi i wi godi ducu, macalo lurok ma yam Rwot oryemo woko ki i nyimgi. Gubedo ka tiyo gin maraco bene, ma omiyo kiniga omako Rwot. Gubedo ka woro cal lubaŋa-gu ma yam Rwot ojukogi pire kun wacci, “Pe wubitiyo man.” Rwot obedo ka poyo wi jo Icrael ki jo Juda, kun lanebi acel acel ki lanen acel acel cikogi ni, “Wulokke, wuwek kitwu maraco, wucak mako lok ma aciko ducu, ki cik mera ducu, kun wulubo cik ducu ma yam aciko ki kwariwu, ki ma abedo ka cwalo botwu ki luticca ma gin lunebi.” Ento yam pe guworo doge; gubedo jo ma iŋutgi nwaŋ, macalo kwarigi con tye kwede, ma yam pe guye Rwot Lubaŋagi, Gubedo ka cayo cikke mapol, ki gicikke ma yam oketo ki kwarigi, ki lok ma obedo ka poyo ki wigi. Gubedo ka luko kor cal jogi ma konygi pe, mumiyo gin bene gudoko jo ma konygi pe. Gubedo ka lubo kit pa lurok ma yam orumogi dyere-ni, jo ma yam Rwot ojukogi i komgi, ni pe gutim kit ma gin gitiyo-ni. Gubwoto cik ma Rwot Lubaŋa ociko woko ducu, gutimo pigi kengi cal litino twoni aryo me jabu ma giliyo aliya; ka dok gucomo yadi me woro jok ma dako ma gilwoŋo Acera; gucako woro mony ma i polo ducu, kun gitiyo bot Baal bene. Gubedo ka waŋo awobegi ki anyiragi me gityergi, kun gityeto bene bot lutyet ki luŋi i dyel; gumine kekengi pi tiyo gin ma nen marac i wan Rwot, kun gimiyo kiniga make. Kiniga omako Rwot matek i kom jo Icrael, ci oryemogi woko ki i nyime; iŋatti mo pe odoŋ, kono kaka pa Juda keken aye odoŋ. Jo Juda bene yam pe gumako lok ma Rwot Lubaŋagi ociko, ento gubedo ka lubo kit ma jo Icrael gukelo. Rwot ocako kwero likwayo pa Icrael woko ducu, ci oketogi i atwom mapek, omiyogi i ciŋ luyakgi, nio ka oryemogi woko ki i nyime. Ka yam Rwot omayo ker me Icrael woko ki bot likwayo pa Daudi, gin guketo Jeroboam wod pa Nebat odoko kabakagi. Jeroboam oryemo jo Icrael woko ki ka lubo kor Rwot, ci omiyo gupoto i bal madito. Jo Icrael gubedo ka lubo bal ducu ma yam Jeroboam otiyo; pe gubwoto tiyogi, nio ka Rwot oryemo jo Icrael woko, macalo yam oloko i dog luticce ducu ma lunebi. Kit meno gikwanyo jo Icrael ki i lobogi, giterogi wa i Aciria me bedo opii nio wa onyoo. Gikelo rok mukene me bedo i camaria Kabaka me Aciria yam okelo dano ki i Babilon, i Kuta, i Aya, i Kamat ki i Ceparvaim, ci oketogi gubedo i gaŋi me Camaria, guleyo kabedo pa jo Icrael. Gucamo lobo me Camaria odoko megi, gubedo i gagine ducu. I kare ma gucako bedo i loba-nu, pe gulworo Rwot; omiyo Rwot ocwalo lwak labwor, ma oneko jo mogo i kingi. Gitito lokke bot kabaka me Aciria ni, “Rok ducu ma iterogi ci iketogi i gagi me Camaria-ni gin pe gigeyo cik pa lubaŋa me lobo-nu, omiyo ocwalo lwak labwor i kingi, ci nen, gitye ka nekogi woko, pien gin pe gigeyo cik pa lubaŋa me lobo-nu.” Kabaka me Aciria ocako ciko ni, “Wucwal ajwaka mo acel ki i kin jo ma yam wukelogi ki kunnu, wek en ocit obed kunnu, ocipwonygi ki cik pa lubaŋa me lobo-nu.” Ci ajwaka mo acel ki i kin ajwagi ma yam giterogi kunnu mua ki i Camaria ocako dwogo, obedo i Betel, ci opwonyogi ki kit ma myero gilwor kwede Rwot. Ento rok acel acel pud obedo ka tiyo cal lubaŋane kene, kun giketogi i waŋ jogi ma i wi godi ma yam Lucamaria gutiyo, kun rok acel acel tye ki megi i gagi ma gibedo iye-ni. Jo Babilon gutiyo Cal jok Cukot-benot, jo Kut gutiyo cal jok Nergal, jo Kamat gutiyo cal jok Acima; jo Aya gutiyo cal jok Nibaj ki jok Tartak. Jo Ceparvaim gubedo ka wago litinogi ki mac bot Adramelek ki Anamelek ma gin jogi pa jo Ceparvaim, Gilworo Rwot bene, kun gikwanyo kwa dano ducu ki i kingi me bedo ajwagi me waŋ jogi ma i wi godi, ma gitiyo pigi i nyim waŋ jogi ma i wi godi. Kit meno gin yam gilworo Rwot kun gitiyo bene bot lubaŋagi kikome, kun gilubo kit pa rok mapatpat ma yam gikwanyogi ki i kingi-ni. Kadi wa i kare man gin pud gilubo kitgi macon. Gin pe gilworo Rwot, pe gilubo cikke ducu, nyo lok ma en oŋolo, nyo cik ma en oketo, kadi wa cik mo ma yam Rwot ociko ki likwayo pa Yakobo ma ocako nyige ni Icrael-li. Rwot yam oketo gicikke kwedgi, kun cikogi ni, “Pe wubilworo lubaŋa mukene ducu; pe wuryebbe i nyimgi, pe wuti botgi, pe wutum gitum botgi. Ento wubilworo Rwot ma yam okwanyowu woko ki i lobo Ejipt ki tek madwoŋ ki cine ma oryeyo; en aye wubiryebbe i nyime, en aye wubitumo gitum bote. Cik matino ducu ki lok ma Rwot oŋolo, ki cik ma en oketo, ki ginacika ma con ocoyo piwu, wubigwokke ka lubogi kare ducu pe wubilworo lubaŋa mukene ducu. Pe wiwu biwil i kom gicikke ma doŋ atyeko ketone kwedwu. Pe wubilworo lubaŋa mukene ducu, ento wubilworo Rwot Lubaŋawu, en bene aye bilarowu ki i ciŋ lumerokwu ducu.” Ento yam gukwero woro doge woko, pud gubedo ka lubo kitgi macon ca aye. Kit meno rok meno ducu gubedo ka lworo Rwot kun giworo bene Cal lubaŋagi ma gipayo; litinogi ki likwayogi bene kit meno gubedo ka fiyo kit ma yam kwarigi gutiyo-ni, pud gitiyo kit meno nio wa onyoo. I mwaka me adek me loc pa Kocea wod pa Ela kabaka me Icrael, en aye Kejekia wod pa Akaj kabaka me Juda ocako iye loc. Ocamo ker ma mwaka me ditte pyeraryo wiye abic, ci obedo ka loc pi mwaka pyeraryo wiye aboŋwen ki i Jerucalem. Nyiŋ minne Abi, ma nya pa Jekaria. Kejekia obedo ka tiyo gin ma nen atir i wag Rwot kun lubo gin ducu ma yam kwarone Daudi otiyo. Omuko lwak waŋ jogi ma i wi godi, oturo wir jogi-gu ducu, ka otoŋo yadi ma gicomo pi woro jok ma dako ma gilwogo Acera woko, ka dok oŋido twol mola ma yam Moses otiyo-ni, pien nio wa i kare meno onoŋo jo Icrael gubedo ka wago odok eceta pi worone. Yam gilwogo ni Nekucitan. En obedo ka geno Rwot, Lubaŋa me Icrael, mumiyo pe gatti mo onen ma rom ki en ki i kin luker me Juda ducu ma gulubo geye, kadi wa i kin luker ma gukwogo nyime bene. Omoko i kom Rwot matek; pe obwoto lubo kor Rwot, ento obedo ka lubo cik ducu ma yam Rwot ociko ki Moses. Rwot bene yam tye kwede; wa ka ma cito iye ducu, en noŋo iye gum. En ocako jemo woko i kom kabaka me Aciria, okwero bedo i te locce. Olwenyo ki jo Piliciti nto wa i Gaja ki lobo ma i ŋete; oloyogi i kabedogi ducu, cakke ki i kom lubele pa lukur-piny nio kwede wa i gaŋi ma girumo ki cel gogo. I mwaka me aŋwen me loc pa Kejekia, ma en aye mwaka me abirone me loc pa Kocea wod pa Ela kabaka me Icrael, Calmanecer kabaka me Aciria obino ka lweny i kom Camaria ci orumo woko ki monnye. Oloyo ma onoŋo mwaka adek okato. I mwaka me abicel me loc pa Kejekia, ma en aye mwaka me aboŋwenne me loc pa Kocea kabaka me Icrael, en aye giloyo kwede gaŋ Camaria. Kabaka me Aciria otero jo Icrael i opii wa i Aciria, ci oketogi i Kala, ki i ŋet Kabor, ma en aye kulu ma i Gojan, ki i gaŋi pa jo Medi, pien gukwero woro dog Rwot Lubaŋagi, ento gukalo wi gicikkene, kacel ki lok ducu ma yam Moses ma latic pa Rwot ocikogi kwede; pe guwinyo kadi ki woro doge. I mwaka me apar wiye aŋwen me loc pa kabaka Kejekia en aye Cenakerib kabaka me Aciria obino kwede ka lweny i kom gaŋi ducu me Juda ma girumogi ki cel gogo, ci omayogi ducu. Kejekia kabaka me Juda ocwalo kwena bot kabaka me Aciria wa i Lakic kun wacci, “An atimo bal; dok cen, wek lweny i koma obedi, gin ducu ma ibiŋolo i wi ya abiculone.” Kabaka me Aciria oŋolo i wi Kejekia kabaka me Juda wel me ryal ma romo talanta miya adek, ki jabu ma romo talanta pyeradek. Kejekia ocako miye ryal ducu ma onoŋo i ot pa Rwot, ki i ot kano lim ma i ot pa kabaka. I kare meno Kejekia omuko jabu woko ducu ma yam gimwono i kom kika me ot pa Rwot, ki jabu ma yam en Kejekia kabaka me Juda omwono kwede okar me doggola, ci otino omiyo bot kabaka me Aciria. Kabaka me Aciria ocwalo ludito wi monnye ma gilwoŋo Tartan, Larabcaric ki Larabcake ki mony madit ma gua ki Lakic gucito Jerucalem. Gucako mol gucito wa i Jerucalem. Ka guo kunnu, gucito gucuŋ i ŋet yo pii ma mol a ki i joro ma malo, i yo gudo ma woto i poto pa Lalwok-bono. Ka gulwoŋo kabaka, ci Eliakim wod pa Ilkia aye obino botgi, ma en aye ladit ma loyo jami ma i ot pa kabaka, kacel ki Cebna ma karan, ki Joa wod pa Acap, laco lok matimme. Larabcake owaco botgi ni. “Wuwac bot Kejekia ni, ‘Kabaka madit, kabaka me Aciria, owaco kuman ni, In ijeno genni i kom gin aŋo? In itamo ni lok dog noŋo bedo rom ki ryeko me lweny ki mony madit me loyo lweny? In kombeddi ijeŋŋe i kom aŋa, mumiyo ijemo woko i koma-ni? Nen, kombeddi iloko Ejipt obedo odoo ma ijeŋŋe i kome, kun en lagada ma otur otyer woko, ma bituco cin dano mo ma ojeŋŋe i kome. Meno kit ma Parao kabaka me Ejipt bedo ka timo kwede jo ducu ma gijeŋŋe i kome. Ento ka wuwacca ni, “Wan wajeŋŋe giwa i kom Rwot ma Lubaŋawa,” pe en aye waŋ jogine ma i wi godi, ki keno tyerre ma Kejekia doŋ omukogi woko, kun waco bot jo Jerucalem ki Juda ni, “Wubiworo Lubaŋa i nyim keno tyer man ma i Jerucalem”? Koŋ ijeŋ gin me camme ki laditta kabaka me Aciria! An abimiyi aguragura alip aryo, ka ce in ki tuŋ boti bene itwero noŋo lubed i wigi. In itwero dwoko ladit me lweny acel mo cen ki i kin lutic pa laditta matinone niŋniŋ ka ce ijeŋŋe i kom Ejipt pi noŋo gadigadi lweny ki wegi aguragura? Dok bene itamo ni an abino ka lweny i kom kabedo man wek atyek woko, laboŋo twero pa Rwot? Wai Rwot aye ma owacca ni, Cit icilweny i kom lobo man ityek woko yo!’ ” Cutcut Eliakim wod pa Ilkia, ki Cebna ki Joa guwaco bot Larabcake ni, “Walegi ilok ki wan luticci i leb Aram, pien wawinyo. Pe ibed ka lok kwedwa i leb Juda ma lwak ma gitye i wi cel bene giwinyo.” Ento Larabcake ogamo doggi ni, “Itamo ni rwoda ocwala ka loko lok magi bot laditwu ki botwu keken bo, pe bot lwak ma gubedo i wi cel-li bene, ma gin kacel ki wun gukemo can me camo cetgi kengi ki mato lacgi kengi?” Larabcake ocun ocako daŋŋe ki dwan maloŋo i leb Juda ni, “Wuwiny lok pa kabaka madit, kabaka me Aciria! Kabaka owaco kuman ni, ‘Pe wuwek Kejekia obed ka bwolowu, pien en pe bitwero larowu ki i ciŋa. Pe wuwek Kejekia omi wujeŋŋe i kom Rwot kun wuwacci, Rwot aye bilarowa, gaŋ man pe gibimiyo i ciŋ kabaka me Aciria.’ Pe wubed ka winyo lok pa Kejekia; pien man aye lok ma kabaka me Aciria owaco, ni meno, ‘Wuyub lok me kuc kweda, ci wukatti woko bota; kit meno ŋat acel acel bicamo nyig olok ma i potone, ŋat acel acel bicamo nyig odurone, ki ŋat acel acel bimato pii ma i taŋine kikome; nio ka abiterowu wa i lobo ma rom ki mewu-ni, lobo ma ceko kai ki koŋo vino, lobo ma miyowu kwon ma tye iye poto olok-gu, lobo ma moo jeituni ki moo kic dwoŋ iye, wek wubed ma komwu yot, wek pe wubed ka to atoya, Pe wubed ka winyo lok pa Kejekia ma tye ka bwolowu kwede marac kun wacci, Rwot bilarowa. Tye Iubaŋa pa lurok mo ma yam olaro lobone ki i ciŋ kabaka me Aciria? Lubaŋa pa jo Kamat ki Arpad gitye kwene kaa? Lubaŋa pa jo Ceparvaim, nyo Kena ki iya gitye kwene? Gin gularo Camaria ki i ciŋa bo? Lubaŋa me lobo mene ki i kin lubaŋa ducu ma gitye ki lobogi, ma yam koŋ olaro lobone ki i ciŋa mono, mumiyo wutamo ni Rwot bilaro Jerucalem ki i ciŋa-ni?’ ” Ento lwak ducu guliŋ aliŋa, pe gudokke iye lok mo kadi ki acel, pien onoŋo kabaka ociko ni, “Pe wubigamo doge.” Eliakim wod pa Ilkia ma en aye ladit ma loyo jami ma i ot pa kabaka, kacel ki Cebna ma karan, ki Joa wod pa Acap ma laco lok matimme guyeco boŋŋigi, gucito kwede wa bot Kejekia gutitte lok ducu ma Rabcake owaco. Ka Kejekia owinyo, ci oyeco boŋŋine woko, ocako umme ki boŋo cola, ocito kwede wa i ot pa Rwot Ci ooro Eliakim ma lalo jami ma i ode, kacel ki Cebna ma karan, ki ajwagi pa Lubaŋa ma guteggi ma guumo komgi woko ki boŋo cola, ocwalogi guwoto bot Icaya wod pa Amoj, ma lanebi. Guwaco bote ni, “Kejekia owaco kuman ni, Tin piny loŋ oloyowa woko, giburowa, lewic omakowa mada. Latin doŋ obino i yo nyodo, ci tek me nywalone aye peke. Gwok nyo Rwot Lubaŋani doŋ otyeko winyo lok pa Lara bcake ducu, ma laditte kabaka me. Aciria ocwale kwede ka nywaro Lubaŋa makwo-ni, ci bimiyo lokke, ma Rwot Lubaŋani owinyo-ni, bedo me ajuya. Pienno, tin legani malo pi jo ma gubwot, ma gudoŋ-ŋi.” Kalutic pa kabaka Kejekia guo bot Icaya, Icaya owaco botgi ni, “Wuwac bot laditwu ni, ‘Rwot owaco kuman ni, pe ibed ki’ lworo mo pi lok ma iwinyo-ni, ma lutic pa kabaka me Aciria gubedo ka yeta kwede. Nen, abikete cwiny mo i iye, ci biwinyo lok mo ma oywek, ci dok woko wa i lobo tugi; ci abimiyo gineko en woko ki pala lucwan ki i lobo tugi kunnu.’ ” Ka Larabcake odok, ci onoŋo kabaka me Aciria tye ka lweny i kom Libna; pien onoŋo owinyo ni kabaka otyeko a woko ki i Lakic. Ka ce kabaka owinyo lok i kom Tiraka kabaka me Etiopia, ni otiŋo yo me bino ka lwenyi kome, en dok ocwalo lukwena bot Kejekia kun wacci, “Wubiwaco bot Kejekia kabaka me Juda kit man ni, ‘Pe iwek Lubaŋani ma ijeŋŋe i kome-ni obed ka bwoli, kun ciko ni Jerucalem pe gibimiyo i cin kabaka me Aciria. Nen, ityeko winyo gin ma yam luker me Aciria gutiyo i kom lobo ducu, ma gutyekogi woko ducu liweŋ, ci in aye gibilari? Lubaŋa pa lurok yam gularogi, lurok ma yam kwarina gutyekogi woko ducu, ma gin aye jo Gojan, jo Karan, jo Recep ki jo Eden ma yam gitye i Telacar? Kabaka me Kamat tye kwene, nyo kabaka me Arpad, kabaka me gaŋ Ceparvaim, kabaka me Kena, nyo kabaka me Iva?’ ” Kejekia ogamo waraga ki i ciŋ lukwena-nu, ci okwano. Ka oa ocito i ot pa Rwot, ci oyaro waraga woko i nyim Rwot. Ocako lego i nyim Rwot kun wacci, “Ai Rwot, Lubaŋa pa Icrael, ma ibedo i wi komkerri ka wi lukerubi, in aye Lubaŋa, in keni ma iloyo lwak ker ducu ma i lobo; in aye iketo polo ki lobo. Cik iti tuŋ botwa, ai Rwot, rwmywa; yab waŋi, ai Rwot, inenwa; koŋ iwiny lok pa Cenakerib ma ocwalo me cayo Lubaŋa makwo-ni, Adada, ai Rwot, luker me Aciria gujwero rok ducu wa ki lobogi ducu, dok gutyeko bolo lubaŋagi woko i mac; pien onoŋo gin pe Lubaŋa kikome, gin tic me ciŋ dano, yen ki got-gu, mumiyo gityekogi woko. Kit meno, ai Rwot, abako doga boti, ilarwa ki i cine, wek ker ma wi lobo ducu Oŋe ni in, ai Rwot, in Lubaŋa in keni.” Icaya wod pa Amoj odwoko lok bot Kejekia kun waco ni, “Rwot, Lubaŋa pa Icrael, owaco kuman ‘ni, Atyeko winyo legani ma ilego i kom Cenakerib kabaka me Aciria. Man aye lok ma Rwot owaco i kome, ni, ‘Jo Cion gicayi’ calo nyako ma obedo ka cayi kun jeri; jo Jerucalem bene gicayi, calo nyako ma tye ka yeŋo wiye ki i ŋeyi. ‘In icayo aŋa, aŋa mono ma iyetoni? Imoro dwani i kom aŋa, ma itiŋo waŋi ki wakke-ni? I kom ŋat Maleŋ me Icrael kulu! In aye ma imiyo lukwenani giŋalo Rwot, dok iwaco ni, in iito malo i wi godi kun it ye ki lwak gadigadi lwennyi, nio wa malo i wi got Lebanon. Iwakke bene ni itoŋo yadi cedar maboco ki kunnu woko, ki yadi ciprec mabecone mada-ni; dok iwacci, Adonyo bene i bunane ka mabor, ka ma yadi oculle iye likiŋ. Akwinyo waŋ pii, amato pii pa lurok; anyono lobo Ejipt, atwoyo pii ma i jaŋ kulu Nail ducu. ‘In peya iwinyo bo? ni atyeko yubo wa con kuca’? Gin ma atye ka timo kombeddi yam ayubo tamma wa i kare macon ca, ni in myero itur gaŋi ma gicelo ki cel gogo, ilokgi odok obur ma odurre lipim, kun jo ma gibedo iye gidoko goro, cwinygi oballe, lewic omakogi, gudoko macalo ginapita ma i poto, gicalo lum alita macalo lum ma otwi i wi ot, ma bwarre woko ma pud otwi atwiya. ‘Ento aŋeyo bedoni piny, ki citoni woko ki donyoni i ot, ki jennyeni i koma. Pien ibedo ka jennye i koma, lok anywarri otyeko donyo i ita, mumiyo abirwako golina i umi, abiketo tolla i dogi abidwoki cen i yo ka ma yam iwok ki iye.’ ” Lacen Icaya owaco bot kabaka Kejekia ni, “Man aye bibedo gin lanyut boti: i mwaka man ibicamo gin ma otwi kene, i mwaka me aryone ibicamo gin ma dok otwi i okaŋ, ento i mwaka me adekke ibicoyo kodi ci ikayo, ibipito olok ci icamo nyige. Ki jo ma gubwot ma gudoŋ ki i ot pa Juda gibibedo calo yat ma cwalo lwite piny, dok ma nyako nyige lamalo. Pien jo ma gudoŋ gibikato woko ki i Jerucalem, lwak jo mubwot gibikato woko ki i wi got Cion. Man bitimme pi nyeko ma Rwot me mony tye kwede piwu. “Pienno Rwot owaco kuman i kom kabaka me Aciria, ni, En pe bidonyo i gaŋ man, pe bibayo atero mo iye, pe binyiko cok kwede ki kwot, pe bitoro cel lobo me rumone. Yo ma yam obino kwede-ni, en yo acel-lu en bidok kwede bene, pe dok bidwogo i gaŋ man. Man lok pa Rwot kikome. An abilwenyo pi gaŋ man me larone, pira kena ki pi laticca Daudi.” I dyewor meno lamalaika pa Rwot ocito, oneko jo Aciria alip miya acel ki pyeraboro wiye abic ki i gonygi. Ka dano gua malo odiko con, nen, gunoŋo kom jo Aciria muto oradde lirat. Cenakerib kabaka me Aciria ocako a ocito, odok wa i gaŋŋe, ci obedo i Nineve. Ka yam en tye ka woro i ot pa lubaŋane Nicirok ci awobene magi, Adramalek ki Carejer, guneke woko ki pala lucwan, ci guriŋo gularo komgi wa i Ararat. Wode Ecarkadon aye oleyo ka tyene. I kare meno two omako Kejekia ma onoŋo cok to woko. Icaya wod pa Amoj ocito bote, owacce ni, “Rwot owaco kuman ni. ‘Yub odi obed maber, pien ibito woko, pe twoni bicaiŋ.’ ” Kejekia ocako loko wane i kom kicika ot kun wacci, “Ai Rwot abako doga boti, koŋ ipo, inen kit kwo ma abedo kwede i nyimi, kun abedo ŋat ma geni, alubo in ki cwinya ducu, kun abedo ka tiyo gin ma nen maber i waŋi.” Ci Kejekia ocako koko matek twatwal kun cwinye cwer. I kare ma Icaya peya okato woko ki i dyekal ma i dyere, lok pa Rwot obino bote ni, “Dok cen, ici wac bot Kejekia ma laker ma loyo lwakka ni, ‘Rwot, ma Lubaŋa pa woru Daudi owaco kuman ni, Atyeko winyo kokoni, aneno pig waŋi; nen, abicano twoni woko; i kom nino me adekke en aye ibicito kwede wa i ot pa Rwot. Dok abimedo mwaka apar wiye abic i kom wel mwaka me kwo meri. Abilaro in ki gaŋ man ki i cin kabaka me Aciria; abilweny pi gaŋ man pira kena ki pi laticca Daudi.’ ” Icaya ocako wacci, “Kella poki oduro ma ginino, wek giter giket i wan odeke, wek ocan woko.” Kejekia owaco ki Icaya ni, “Gin aŋo ma binyuto ni Rwot bicano twona, ci abicito wa i ot pa Rwot i nino me adekke?” Icaya ogamo ni, “Man en aye gin ma nyuto ma oa wa ki bot Rwot, ma nyuto ni Rwot bitiyo gin ma otyeko ciko pire: tipo ocit anyim ma rom ki rwom apar, nyo odok ki ŋeye rwom apar?” Kejekia odok iye ni, “Bedo yot ka tipo woto medde anyim rwom apar; pe kumeno gire, ber odok ki ŋeye rwom apar.” Lanebi Icaya okok bot Rwot, ci Rwot odwoko tipo cen rwom apar ka ma nene oryene omedde i kom gin me poro cen pa Akaj. I kare meno Merodak-baladan wod pa Baladan kabaka me Babilon, ocwalo lukwena ma gukelo waraga kacel ki mot bot Kejekia; pien onoŋo owinyo ni Kejekia kome lit. Kejekia ojologi maber, ci onyuto botgi ot Limme ducu, ki ryal ki jabu ki aŋwece, moo me wel, ki jami lwennye. Kejekia onyuto gin ducu ma onoŋo tye i ot kano jamine; gin mo pe odoŋ ma pe onyutogi, ma i ode nyo ma i te kerre ducu. Lacen lanebi Icaya obino bot kabaka Kejekia, openye ni, “Jo meno guwacci lok aŋo? Dok gua ki kwene?” Kejekia ogamo ni, “Gua ki i lobo mabor, gua wa i Babilon.” Ci owacci, “Guneno gin aŋo ki i odi?” Kejekia ogamo ni, “Gutyeko neno jami ducu ma tye i oda; gin mo pe odon ki i ot kano jamina ma pe anyuto botgi.” Icaya dok owaco bot Kejekia ni, “Doŋ iwiny lok pa Rwot. Nen ba, kare doŋ romo ma jami ducu ma i odi, ki ma yam kwarini gukano nio wa onyoo gibiterogi woko wa i Babilon; gin mo pe bidoŋ, man Rwot ma owaco. Ki awobeni mogo bene, ma in inywalo, gibiterogi woko; gibikolo mangi woko, ci gibidoko lutic i gaŋ kal pa kabaka me Babilon.” Kejekia owaco bot Icaya ni, “Lok pa Rwot ma iwaco-ni ber mere.” Pien obedo ka tamo ni, “Racce tye kwene, tekke ka wabedo ki kuc ma lobo okwe mot i kare ma pud akwo?” Lok kom Kejekia mudoŋŋe ducu, kt tekke ducu, ki kit ma yam okwinyo kwede joro ki yo pii ma kelo pii wa i dye Jerucalem gityeko coyone i buk me Tekwaro pa Luker me Juda. Kejekia oto, oywe kacel ki kwarine, ci wode Manace aye oleyo ka tyene. Manace ocamo ker ma mwaka me ditte romo apar wiye aryo, ci obedo ka loc ki i Jerucalem pi mwaka pyerabic wiye abic. Nyiŋ minne Kepjiba. Manace obedo ka tiyo gin ma nen marac i wan Rwot, kun lubo kwede tim me kwer pa rok ducu ma Rwot yam oryemogi woko ki i nyim jo Icrael. En dok oroco waŋ jogi ma i wi godi, ogero odoco ka ma yam wonne Kejekia ojwerogi woko-ni. Ogero keno tyer pa Baal, ka dok ocomo yat pi woro jok ma dako ma gilwoŋo Acera, kit ma yam Akab kabaka me Icrael otiyo-ni, ocako woro mony ma i polo ducu, kun tiyo botgi. Dok ocano lwak keno tyer i ot pa Rwot, ka ma yam Rwot owacci, “Abiketo nyina bedo i Jerucalem.” Ka dok ocano lwak keno tyer pa mony ma i polo ducu i dyekal aryo me ot pa Rwot. Ocako wano wode ki mac me gityer, obedo ka tyet ki ajaa ki ŋiyo i dyel-gu, kun tiyo ki lukor tipo-gu ki megi jogi. Obedo ka tiyo kit tim mapol ma nen marac i wan Rwot, kun miyo kiniga mako Rwot. Ka dok omiyo gipayo cal Acera ma jok ma dako-ni, ocibo i ot ma yam Rwot owaco i kome bot Daudi ki wode Solomon ni.” I ot man, ki i Jerucalem, ma yam ayero ki i kin kaka ma i Icrael ducu, abiketo nyiŋa bedo iye matwal. Pe doŋ abimiyo tyen jo Icrael bedo ka wirre woko i ŋe lobo ma yam amiyo bot kwarigi-ni, tekke gibigwokke gilubo kit lok ducu ma atyeko cikogi kwede, kun gilubo cik ducu ma yam laticca Moses ocikogi kwede.” Ento pe yam guwinyo, dok Manace obitogi omiyo gubedo ka timo gin marac, makato lurok ma Rwot yam ojwerogi woko ki i nyim jo Icrael. Rwot ocako lok ki i dog lunebi ma luticce kun waco ni, “Pien Manace kabaka me Juda obedo ka timo tim magi me kwer, kun timo tim maraco makato ma yam jo Amor ma gukwono nyime gubedo ka tiyone, dok omiyo jo Juda bene gubalo pi woro lwak cal lubaŋane; pienno Rwot Lubaŋa pa Icrael owaco kuman ni, Nen, abikelo gin marac i kom Jerucalem ki i kom Juda ma bimwoco it ŋat acel acel ma biwinyo rwone. Dok abiryeyo tol i kom Jerucalem ma rom ki tol ma yam apimo kwede Camaria, abiporo ki birigi ma yam aporo kwede ot pa Akab; dok abijwayo Jerucalem kit ma dano jwayo ki caani-ni, kun jwayo kome ka dok ryebo iye umo woko piny, Abibolo jona mudon-ni woko ma gin aye lwakka, ci amiyogi woko i i ciŋ lumerokgi. Gibidoko ginayaka ma lumerokgi giyako, pien gubedo ka tiyo gin ma nen marac i waŋa, kun gimiyo kiniga bedo ka maka nia wa i kare ma kwarigi oa kwede i Ejipt nio kwede wa onyoo.” Ento Manace obedo ka oyo remo pa jo mapol ma pe gitye ki bal mo, nio ka oromo i Jerucalem woko tuŋŋi ki tuŋŋi, ka dok gimedo iye bal ma omiyo jo Juda gubalo, mumi yo gin bene gubedo ka tiyo gin ma nen marac waŋ Rwot. Lok kom Manace mudoŋŋe ducu, ki gin ducu ma yam otiyo, ki bal ma otiyo, gityeko coyone i buk me Tekwaro pa Luker me Juda. Manace oto, oywe kacel ki kwarine, ci giyiko i poto ma i ŋet ode, i poto pa Uja; wode Amon aye oleyo ka tyene. Amon ocamo ker ma mwaka me ditte pyeraryo wiye aryo, ci obedo ka loc ki i Jerucalem pi mwaka aryo. Nyiŋ minne Meculemet ma nya pa Karuj, dano me Jotba. Amon obedo ka tiyo gin ma nen marac i waŋ Rwot, kit macalo wonne Manace obedo ka tiyo. Obedo ka lubo kit pa wonne ducu, kun tiyo bot cal lubaŋa-gu ma yam wonne otiyo botgi, kun worogi bene. En obwoto Rwot, Lubaŋa pa kwarine woko, pe obedo ka lubo kit pa Rwot. Lutic pa Amon gupiro lok i kome, ci guneko en woko i ode, Ento lwak ma i lobo guneko jo ducu ma gupiro lok i kom kabaka Amon ci gin lwak me lobo-nu guketo wode Yocia me bedo kabaka ma kakare. Lok kom Amon mudoŋŋe ducu ki gin ma yam otiyo ducu gityeko coyone i buk me Tekwaro pa Luker me Juda. Giyike i lyel ma i poto pa Uja; wode Yocia oleyo ka tyene. Yocia ocamo ker ma mwaka me ditte aboro, ci obedo ka loc ki i Jerucalem pi mwaka pyeradek wiye acel. Nyiŋ minne Yedida, ma nya pa Adaya me Bojkat. Yocia obedo ka tiyo gin ma nen atir i waŋ Rwot; obedo ka lubo kit pa kwarone Daudi ducu, pe obedo ka cabbe yo tuŋ acuc nyo yo tuŋ acam. I mwaka me apar wiye aboro me loc pa kabaka Yocia, en ocwalo Capan wod pa Ajalia, wod pa Meculam ma karan, wa i ot pa Rwot, kun wacci, “Cit wa bot Ilkia, ajwaka madit, en okwan wei lim ma gikelo i ot pa Rwot, ma lukur-doggola gugamo ki bot lwak, wek gimi i ciŋ lutic ma giloyo dog tic me ot pa Rwot. Ci gin gumi i ciŋ lutic ma gitye kunnu ka tic i kom ot pa Rwot, pi yubo ka ma oballe, gin aye lupac ki lugedo, ki lugedo ki godi wek guti kwede me wilo bao bene, ki godi ma gimuko pi yu bo ot ka ma oballe. Ento pe gupeny lok kom lim mo ma gimiyo i ciŋgi, pien gin gitiyo kwede ki gen.” Ilkia, ajwaka madit, owaco bot Capan ma karan ni, “Atyeko noŋo buk me cik i ot pa Rwot.” Ilkia omiyo buk bot Capan, ci okwano. Capan ma karan ocito kwede bot kabaka, ci odwoko lok bot kaba ka ni, “Ladit, watyeko kwanyo lim ma ginoŋo i ot pa Rwot, ci wamiyo i cin lutic ma giloyo dog tic me ot pa Rwot.” Capan ma karan dok otito ki kabaka ni, “Ilkia ajwaka madit otyeko miya buk mo.” Ka Capan ocako kwanone i nyim kabaka. Ka kabaka owinyo lok ma i buk me cik, ci oyeco boŋŋine woko. Kabaka ocako ciko Ilkia, ajwaka madit, ki Akikam wod pa Capan, ki Akbor wod pa Mikaya, ki Capan ma karan, ki Acaya ma latic pa kabaka kun waco ni, “Wucit ka penyo dog Rwot pira, ki pi lwak, ki pi ker me Juda ducu, pi lok ma i buk man ma gityeko noŋone-ni. Akemo pa Rwot kara doŋ olyetto i komwa matek, pien kwariwa pe gubedo ka woro lok ducu ma i buk man, pi tic kwede i kit ducu ma yam gicoyo kwede ma mako komwa.” Ilkia, ajwaka madit, ki Akikam, ki Akbor, ki Capan ki Acaya gucito bot Kulda ma lanebi ma dako, ma cware Calum wod pa Tikva, ma wod pa Karkac ma lagwok boŋŋi pa kabaka, ci guloko kwede. Dako-nu onoŋo bedo i Jerucalem, i dul gaŋ ma gilwoŋo Dul gaŋ me Aryone. En owaco botgi ni, “Rwot, Lubaŋa pa Icrael, owaco kuman ni, ‘Wutit bot dano ma ocwalowu bota ni, Rwot owaco kuman ni, Nen ba, abikelo gin marac poto i kom kabedo man, ki i kom jo ma gibedo iye, pi cobo lok ducu ma gicoyo i buk ma kabaka me Juda okwano; pien gutyeko bwota woko kun giwaŋo odok eceta bot lwak lubaŋa mukene, wek gimi kiniga obed ka maka pi jogi ducu ma gitiyo ki cingi-ni. Pienno akemona bilyetto matek i kom kabedo man, ma pe doŋ bikwe. Ento lok ma dok i kom kabaka me Juda ma ocwalowu ka penyo dog Rwot, wun wubiwacce kit man ni, Rwot Lubaŋa me Icrael owaco kit man ni, i kom lok ma iwinyoni, doŋ ityeko ŋut ki i cwinyi, ci imwolle keni i nyim Rwot i kare ma iwinyo kit lok ma yam aloko i kom kabedo man, ki i kom jo ma gibedo iye, ni bidoko obur, miyo gibitic ki nyiŋe macalo lok lacen dano, ci icako yeco boŋŋini woko kun ikok kwede i nyima; pienno an bene atyeko winyo kokoni, man lok pa Rwot kikome. Nen ba, an abidwoki i kin kwarini, ci gibiyiki i lyelli ki kuc, dok waŋi pe bineno gin marac ducu ma abikelo i kom kabedo man.’ ” Ci gin gudwoko lok bot kabaka. Kabaka ocwalo kwena, ci ludoŋo me Juda ducu ki me Jerucalem gucokke bote. Kabaka ocito malo wa i ot pa Rwot, kacel ki jo Juda ducu, ki jo ducu ma gibedo i Jerucalem, ki ajwagi, ki lunebi, ki lwak ducu, jo matino ki jo madito. Ci ocako kwano lok ducu ma i buk me gicikke ma ginoŋo i ot pa Rwot, kun gin ducu giwinyo. Lacen kabaka ocun i ŋet wir ci oketo gicikke, omoko i nyim Rwot ni, ebilubo kor Rwot, kun emako lok ma Rwot ociko ducu, ki lok me caden, ki cik matinone ducu. Ocikke ni ebimako ki cwinye ducu ki tipone ducu, kun ecobo kwede lok me gicikke meno, ma yam gicoyo i buk meno. Ci lwak ducu guribbe ka moko gicikke. Kabaka ociko Ilkia, ajwaka madit, ki ajwagi ma i dul me aryo, ki lukurdoggola ni gukel jami ducu ma tye i ot pa Rwot ma yam gitiyogi pi Baal, ki pi jok ma dako ma gilwoŋo Acera, ki pi mony ma i polo ducu, Gucako wanogi woko i ŋe Jerucalem, i potti ma i ora kulu Kidron, gutero burugi wa i Betel. Orido wi ajwagi me waŋ jogi ma yam luker me Juda guketogi me waŋo odok eceta i waŋ jogi ma i wi godi ma i ŋet gaŋi madito ma i Juda, ki ma gurumo Jerucalem, kacel ki jo ma giwaŋo odok eceta bot jok Baal, ki bot ceŋ ki dwe, ki lakalatwe ki mony ducu ma i polo. Ka dok okwanyo cal Acera ma jok ma dako-ni woko ki i ot pa Rwot, otero woko wa i ŋe Jerucalem, i kulu Kidron, ci owano woko i ora me Kidron, oluro matitino twatwal, ci oonyo ka ma giyiko iye dano ata. Omuko odi pa lutim kwele ma luwor jogi, ma onoŋo gukubbe i kom ot pa Rwot, ka ma yam mon gicweyo iye boŋo pi Acera, Ka dok okwanyo lwak ajwagi woko ki i gaŋi madito ma i Juda, ka obalo lwak waŋ jogi ma i wi godi ka ma yam ajwagi gubedo ka waŋo iye odok eceta; obalo cakke wa i Geba nio kwede wa i Beerceba. Omuko bene waŋ jogi pa jogi ma calo nyogi oyima, ma yam gitye i dog gaŋ ma gidonyo kwede i gaŋ pa Yocwa ma laloyo me gaŋ Jerucalem, yo tuŋ acam ka idonyo i dogcel. Ajwagi ducu ma i waŋ jogi ma i wi godi yam pe gibino i nyim keno tyer pa Rwot i Jerucalem, ento gubedo ka camo mugati ma tobi pe iye ki i kin utmegigi. Kabaka dok obalo Topet, ma onoŋo tye i nota pa wod pa Kinom, wek dano mo pe dok owaŋ iye wode nyo nyare ki mac me gityer bot jok Molek. Ka dok omuko lwak cal aguragura ma yam luker me Juda gudyero bot cen, ka ma gidonyo kwede i ot pa Rwot, i ŋet kicika pa Natan-melek, dano ma gikolo ma tiyo i ot pa kabaka, ma i dyekal me ot pa Rwot; ka owaŋo gadigadi pa cen ki mac. Lwak keno tyer ma yam obedo i wi kicika ma malo me ot pa Akaj, ma yam luker me Juda gutiyo, kacel ki Reno tyer ma yam Manace ocano i dyekal aryo ducu me ot pa Rwot, magi ducu omuko oreto woko piny, oŋido woko matitino, oonyo lurugi i nota me kulu Kidron. Kabaka dok obalo waŋ jogi ma i wi godi ma yam gitye i ŋet Jerucalem yo tun wokceŋ, yo tuŋ acuc me got me bal, ma en aye got Jeituni, ma yam Solomon kabaka me Icrael ogero pi Acitoret ma jok kipyeda pa jo Cidon, ki pi Kemoc ma jok kipyeda pa jo Moab, ki pi Milkom ma jok kipyeda pa jo Ammon. Ka dok oturo wir jogi ducu oŋido woko, ka otoŋo yadi ma gicomo pi woro Acera ma jok ma dako-ni, ka opoŋo kabedogi ki cogo kom dano. Keno tyer ma i Betel bene, ki wan jok ma yam Jeroboam wod pa Nebat ocano, ma yam omiyo jo Icrael gupoto i bal-li, keno tyer meno bene en omuko oreto woko piny, kacel ki waŋ jokke; godi ma gicano kwede en oŋido woko matino, ci orego woko odoko luru; ka dok owaŋo cal jok Acera bene. Ka Yocia oloko waŋe malo, oneno lwak Lyel i wi got; ci ocwalo dano okwanyo lwak cogo ma giyiko i lyel kunnu, ocako waŋogi i wi keno tyer, obalo kenone woko, ocobo ki lok pa Rwot ma yam dano pa Lubaŋa otito kun nyuto kwede gin ma bitimme anyim. Dok openyo ni, “Got ma gitiyo me po ma ocuŋ loka ca-ni pa aŋa?” Jo me gaŋ meno gutitte ni, “Meno Lyel pa dano pa Lubaŋa ma yam oa ki i Juda, ma okwoŋo tito lok magi ducu ma doŋ ityeko cobogi i kom keno tyer ma i Betel-li.” Ci ogamo ni, “Wek obedi; pe dano mo okwany cogone.” Ci guweko cogone, pe gugudo, kacel ki cogo pa lanebi ma yam oa ki i Camaria-ni. Wa ki odi jogi ducu ma i waŋ jogi ma i wi godi ma i gaŋi ducu ma i Camaria, ma yam luker me Icrael gugero, kun gimiyo kiniga mako Rwot, Yocia omukogi woko; otiyo i komgi kit ma yam otimo i Betel ducu. Dok oneko ajwagi ducu ma i wan jogi ma i wi godi, onekogi i wi keno tyergi, ka owano cogo kom dano i komgi; ka odok woko i Jerucalem. Kabaka dok ociko lwak ducu ni, “Wukwer nino madit me Kato pa Rwot Lubaŋawu, kit ma yam gicoyo i buk man me gicikke.” Pe tye nino mo madit me Kato (Paska) ma gikwero kit man i Icrael, cakke ki i kare pa luŋolkop ma yam giŋolo kop ki jo Icrael, kadi wa i kare pa luker me Icrael nyo wa i kare pa luker me Juda; ento i mwaka me apar wiye aboro me loc pa Yocia en aye gikwero iye nino madit me Kato pa Rwot i Jerucalem. Ka dok medo i kom ennu, Yocia dok otyeko jwero lukor tipo woko, ki megi jogi-gu, kacel ki cal jogi matinone ma dano gubedo kwede i pacogi, ki cal jogi-gu mukene, ki gin me kipyeda ducu ma gunen i lobo Juda ki i Jerucalem, wek emok lok me cik ducu ma yam gicoyo i buk ma ajwaka Ilkia nene onoŋo i ot pa Rwot, Pe tye kabaka mo ma rom kwede ki i kin luker ducu ma gutelo nyime, ma yam koŋ olokke bot Rwot ki cwinye ducu ki tipo kome ducu, ki tekke ducu kun lubo cik pa Moses ducu; dok pe tye dano mo ma olubo ŋeye ma obedo ma rom kwede. Kadi bed ku meno, cwiny Rwot ma opoŋ ki akemo mager-ri peya owarre woko, kit ma yam kinigane olyetti kwede matek i kom Juda pi kit ŋeto-ic ma yam kabaka Manace obedo ka ŋeto ki iye-ni, Rwot ocako waco ni, “Abikwanyo Juda bene woko ki i nyima, kit macalo atyeko kwanyo Icrael woko ki i nyima-ni, dok abibayo gaŋ man ma ayero-ni woko, en aye Jerucalem, kacel ki ot ma yam aloko i kome ni, Nyiŋa bibedo kunnu.” Lok kom Yocia mudoŋŋe ducu, ki gin ma yam otiyo ducu, gityeko coyone i buk me Tekwaro pa Luker me Juda. I karene en aye Parao Neko kabaka me Ejipt ocito kwede bot kabaka me Aciria wa i dog kulu Euprate. Kabaka Yocia owoto ka rwatte kwede; ci Parao Neko, ka onene, otugi neke woko cut i Megido. Luticce gutiŋo kome ki gadigadi nia wa i Megido, gutero Jerucalem, ci guyiko i lyelle kikome. Lwak ma wegi lobo gukwanyo Yekoakaj wod pa Yocia guwiro ki moo, ci guketo en me bedo kabaka, oleyo ka tyen wonne. Yekoakaj ocamo ker ma mwaka me ditte pyeraryo wiye adek, ci obedo ka loc i Jerucalem pi dwe adek. Nyiŋ minne Kamutal, nya pa Jeremia me Libna. En obedo ka tiyo gin ma nen marac i wan Rwot, kun lubo kit ducu ma yam kwarine gutiyo, Parao Neko otweyo en woko ki nyor ki i Ribla i lobo Kamat, wek pe obed ka loc i Jerucalem oketo wel ajog i kom lobo Juda ma romo talanta me ryal miya acel ki talanta me jabu acel. Parao Neko oketo Eliakim wod pa Yocia obedo kabaka me leyo ka tyen wonne Yocia ocako loko nyiŋe Yekoyakim, Ento otero Yekoakaj wa i Ejipt, ci oto woko ki kunnu. Yekoyakim yam omiyo ryal ki jabu meno bot Parao, ento koŋ ojogo ajog i lobone pi noŋo wellim ma Parao ociko. En ojogo ryal ki jabu ki bot wegi lobo, kun gamo ki bot dano acel acel muporo wel ma giŋolo i kome me amiya bot Parao Neko. Yekoyakim ocamo ker ma mwaka me ditte pyeraryo wiye abic, ci obedo ka loc ki i Jerucalem pi mwaka apar wiye acel. Nyiŋ minne Jebida, nya pa Pedaya me Ruma, Obedo ka tiyo gin ma nen marac i wan Rwot kun lubo gin ducu ma yam kwarine gutiyo. I kare pa Yekoyakim en aye Nebukadnejar, kabaka me Babilon, obino kwede, ci Yekoyakim odoko laticce pi mwaka adek; lacen olokke ojemo woko i kome. Rwot ocwalo buca mony pa jo Kaldaya i kome, ki buca mony pa jo Ciria ki buca mony pa jo Moab, ki buca mony pa jo Ammon; ocwalogi ka lweny i kom jo Juda pi jwerogi woko ducu, kit ma yam Rwot oloko ki i dog luticce ma lunebi, Meno ducu opoto i kom jo Juda pi cik pa Rwot, wek okwanygi woko ki i nyime, pi bal pa Manace, ki pi gin ducu ma yam otiyo. Ka dok pi remo pa io ma pe ki bal ma en ooyo noŋo; pien opoŋo Jerucalem ki remo pa jo ma pe ki bal, ma Rwot pe twero timo iye kica. Lok kom Yekoyakim mudoŋŋe ducu, ki gin ma yam otiyo, gityeko coyone i buk me Tekwaro pa Luker me Juda. Yekoyakim oto, oywe, kacel ki kwarine ci wode Yekoyakm aye oleyo ka tyene. Kabaka me Ejipt pe dok onwoyo a ki i lobone, pien onoŋo kabaka me Babilon otyeko mayo lobo woko ki i cin kabaka me Ejipt, cakke ki i nota ora me Ejipt mo kwede wa i kulu Euprate ducu. Yekoyakin ocamo ker ma mwaka me ditte apar wiye aboro, ci obedo ka loc ki i Jerucalem pi dwe adek. Nyiŋ minne Nekocita, nya pa Elnatan me Jerucalem. Obedo ka tiyo gin ma nen marac i waŋ Rwot, kun lubo gin ducu ma yam wonne otiyo. I kare meno en aye lutic pa Nebukadnejar, kabaka me Babilon, obino kwede i Jerucalem, ci monnye orumo gaŋ woko. Kabaka Nebukadnejar ocito i Jerucalem I kare ma luticce gurumo woko-ni. Ci Yekoyakin kabaka me Juda oye mine kekene i ciŋ kabaka me Babilon, en kikome, ki minne ki luticce, ki rwodine, ki ludito ma i kalle. Kabaka me Babilon otweyo en macalo lamabuc i mwaka me locce me aborone. Otero bene jami ducu ma gikano i ot lim ma i ot pa Rwot, ki jami ma gikano i ot lim pa kabaka, ka otoŋo jami me jabu ma i ot, pa Rwot onidogi woko ducu, gin jarm ma yam Solomon kabaka me Icrael otiyo, kit ma yam Rwot oloko. Otero jo me Jerucalem ducu i opii, rwodi ducu, tworu oteka lweny ducu. Jo ma giyakogi guromo alip apar, kacel ki ludiro tic mapatpat ducu ki lutet nyonyo. Pe dano acel mo odoŋ, kono jo ma lucan atika aye gudoŋ i lobo. Ka doŋ otero Yekoyakin woko i opii wa i Babilon; min kabaka ki mon pa kabaka, luditone ki rwodi ma giloyo lwak ma i lobo-nu, oterogi i rok me bedo opii nia ki i Jerucalem nio wa i Babilon. Kabaka me Babilon otero lwak opii ma gin ducu oteka lweny ma giromo alip abiro, ludiro tic mapatpat ki lutet ma giromo alip acel, gin ducu jo matego ma giromo mony. Kabaka me Babilon dok oketo Matania ma omin won Yekoyakin obedo kabaka ma oleyo ka tyene, ci oloko nyiŋe odoko Jedekia. Jedekia ocamo ker ma mwaka me ditte pyeraryo wiye acel, ci obedo ka loc ki i Jerucalem pi mwaka apar wiye acel. Nyiŋ minne Kamutal, nya pa Jeremia me Libna. En obedo ka tiyo gin ma nen marac i wan Rwot, kun Lubo gin ducu ma yam Yekoyakm otiyo. Pi kiniga ma omako Rwot, ka kare oromo, omiyo Rwot obayo Jerucalem ki Juda woko ki i nyime. Lacen Jedekia ocako jemo woko i kom kabaka me Babilon. I mwaka me aboŋwen me locce, i dwe me apar, i nino dwe apar, en aye Nebukadnejar kabaka me Babilon obino kwede ki monnye ducu i kom Jerucalem, ci orumo gaŋ woko, ka dok gutoro cel lobo orumo woko dyere. Gaŋ girumo kit meno nio wa i mwaka me apar wiye acel me loc pa kabaka Jedekia. I kom nino dwe aboŋwen me dwe me aŋwen onoŋo kec odoko marac i Jerucalem, ma omiyo cam pe dok nen pi lwak. Ka gumuko cel me gaŋ woko, ci kabaka ki lwak lulweny ducu gumol gurmo woko ki i dyewor, kun giwok ki i dog gaŋ ma i kin cel aryo me Jerucalem, ma i ŋet poto pa kabaka, kadi onoŋo jo Kaldaya gurumo gaŋ woko. Gucito gulubo yo ma dok tuŋ Araba. Ento mony pa jo kaldaya guryemo kor kabaka, ci gumake wa i bar me Jeriko; ci monnye guket woko ducu ki i kome. Ka gumako kabaka, ci gukelo en bot kabaka me Babilon i Ribla, ka ma onolle iye kop. Ka gucako neko awobe pa Jedekia woko ki i nyime ma wane neno, ka gikolo wane giloyo woko, ka gitweye ki nyor, gitere kwede wa i Babilon. I dwe me abic, i kom nino dwe me abirone, ma en aye mwaka me aboŋwenne me loc pa kabaka Nebukadnejar kabaka me Babilon, en aye Nebujaradan ma ladit pa lugwok kabaka, ma latic pa kabaka me Babilon, obino i Jerucalem. Ocako wano ot pa Rwot woko, ki ot pa kabaka, ki odi ducu ma tye i Jerucalem; owaŋo odi madito woko ducu ki mac. Ki mony pa jo Kaldaya ducu, ma yam gitye kacel ki ladit pa lugwok kabaka, gumuko kicika cel murumo Jerucalem woko. Ki lwak ma yam gudoŋ i gaŋ, ki jo ma yam gukobo gigi kengi bot kabaka me Babilon, kacel ki lwak ma gudoŋŋe ducu, Nebujaradan ma ladit pa lugwok kabaka oterogi woko i opii, Ento owe ko lucan mogo gudoŋ i lobo wek gubed lugwok poto olok ki lupur ki kweri dyaŋ. Ki wir mola aryo ma yam gitye i ot pa Rwot, ki litino gadigadi ki nam me mola ma yam gitye i ot pa Rwot, jo Kaldaya guturo, guŋido woko ka gutero molane wa i Babilon. Gutero lwak agulu ducu, ki akwaya latokke-gu, ki magac-gu ki atabo me odok eceta, ki jami mola ducu ma yam gitiyo kwedgi i ot pa Rwot, ki weer me waŋo mac bene, ki becen-gu. Gin ma yam gitiyo ki jabu, ladit pa lugwok kabaka otero macalo jabu, gin ma yam gitiyo ki ryal, otero macalo ryal. Lok ma dok i kom wir aryo-ni, ki nam acel, ki litino gadigadi ducu, ma yam Solomon otiyo pi ot pa Rwot, pek me mola ma oa ki i kom jami magi ducu dwoŋ, pe pimme. Bor pa wir acel romo futi pyeraryo wiye abiro. I wiye yam giketo iye lalukana me mola, kun lalukana borre romo futi aŋwen ki nucu. I kom lalukana onoŋo giketo iye obwo ki cal nyig okwer pomegranat, ma gin ducu gitiyogi ki mola, ma girumo lalukana dyere. Wir me aryo bene rom ki lawote, kun tye ki obwone me mola. Ladit pa lugwok kabaka otero Ceraya bene ma ajwaka madit, ki Jepania, ajwaka me aryone, ki lukurdoggola me ot pa Rwot gin adek. Ka dok okwanyo ladit ma loyo lumony ki i dye gaŋ, ki lumemba abic me lukiko pa kabaka ma onoŋogi i dye gaŋ; ki karan pa ladit me mony ma yam coko jo me lobo pi lweny, ki jo pyerabic i kin wegi lobo ma ginonogi i dye gaŋ. Nebujaradan ladit pa lugwok kabaka omakogi, oterogi wa i Ribla bot kabaka me Babilon. Kabaka me Babilon ocako nekogi woko ducu; onekogi i Ribla ma i lobo Kamat. Jo Juda yam gikwanyogi woko ki i lobogi giterogi i opii kit meno. Nebukadnejar kabaka me Babilon oketo Gedalia wod pa Akikam ma wod pa Capan me loyo jo mudoŋ i lobo Juda, ma yam owekogi gubwot. Ka ludito me mony ducu ma i kin gaŋi guwinyo ni kabaka me Babilon otyeko keto Gedalia me bedo laloyo, ci gubino ki lwakgi bot Gedalia wa i Mijpa. Nyiŋgi ene: Icmael wod pa Netania, Yokanan wod pa Karea, Ceraya wod pa Tankumet ma jo Netopa, ki Jajania wod pa jo Maaka. Gedalia ocako kwoŋo kwoŋ botgi ki bot lwakgi ducu kun wacci, “Pe wulwor ludito tic pa jo Kaldaya. Wubed i lobo, wuti bot kabaka me Babilon, ci wubibedo maber laboŋo ayela mo,” Ento i dwe me abiro, Icmael wod pa Netania, wod pa Elicama, ma tye i kaka pa luker, obino kacel ki jo apar, ci gulwenyo ki Gedalia, guneko woko, kacel ki Lujudaya ki jo Kaldaya ma gitye kwede i Mijpa. Lacen lwak ducu, jo matino ki jo madito, ki ludito me mony gua gucito wa i Ejipt, pien gulworo jo Kaldaya. I kare me mwaka pyeradek wiye abirone nia ma gitero kwede Yekoyakin kabaka me Juda i opii, i dwe me apar wiye aryo, i kom nino dwe pyeraryo wiye abiro, en aye Evil-merodak, kabaka me Babilon, otimo kica ki Yekoyakin kabaka me Juda, ogonye woko ki i mabuc, i mwaka ma en ocamo iye ker. Obedo ka lok kwede mot maber, oketo en obedo i kom madit makato ducu ma i kin kom pa luker ma onoŋo gibedo kwede i Babilon. Kit meno omiyo Yekoyakin olunyo boŋo mabuc mere woko, obedo ka cam i wi meja pa kabaka jwijwi, pi kare me kwone ducu. Pi miye gin me konye kwede, kabaka dok obedo ka miye lim me tic kwede jwijwi, nino ducu me kwo mere. Adam onywalo Ceji, Ceji onywalo Enoci, Enoci onywalo Kenan; Kenan onywalo Maalalel, Maalalel onywalo Jared; Jared onywalo Enoka, Enoka onywalo Metucela, Metucela onywalo Lamek; Lamek onywalo Nua, Nua onywalo Cem, Kam ki Yafeci, Litino awobe pa Yafeci aye Gomer, Magog, Madai, Javan, Tubal, Mecek ki Tirac, Litino awobe pa Gomer aye Acikenaj, Dipat ki Togarma, Litino awobe pa Javan gin Elica, Tarcic, Kitim ki Rodanim, Litino awobe pa Kam gin aye Kuc, Ejipt, Put ki Kanaan, Litino awobe pa Kuc aye Seba, Kavila, Cabta, Raama ki Cabteka, Litino awo be pa Raama gin aye Ceba ki Dedan, Kuc onywalo mere Nimulodi; en aye okwoŋo’ bedo oteka i wi lobo. Likwayo pa Ejipt gin aye jo Lud, jo Anam, jo Leab, jo Naptuk, jo Patruc, jo Kacluk ki jo Kaptor, ma gin aye kaka ma jo Piliciti gua ki i komgi. Kanaan onywalo Cidon, latin kayone, ki Ket ma likwaye gilwoŋo ni jo Kit. Likwayo mu kene pa Kanaan gin aye jo Jebuc, jo Amor, jo Girgac, jo Kiv, jo Arki, jo Cin, jo Arvad, jo Jemar ki jo Kamat, Litino awo be pa Cem gin aye Elam, Acur, Arpakcad, Lud, Aram, Uj, Kul, Geter ki Mecek. Arpakcad onywalo Cela, Cela onywalo Eber, Eber onywalo litino awobe aryo; acel nyiŋe Peleg, pien i karene aye gipoko iye lobo, ki nyiŋ ominne onoŋo Yokotan, Yokotan onywalo Almodad, Celep, Kajarmavet, Jera, Adoram, Ujal, Dikla, Obal, Abimael, Ceba, Opir, Kavila ki Jobab; magi ducu gin litino awobe pa Yokotan. Cem onywalo Arkpacad, Arpakcad onywalo Cela, Cela onywalo Eber; Eber onywalo Peleg, Peleg onywalo Reu, Reu onywalo Cerug; Cerug onywalo Nakor, Nakor onywalo Tera; Tera onywalo Abram, meno aye Abraim, Litino awobe pa Abraim gin aye Icaka ki Icmael. Litino pa Icmael gin ene: Nebayof ma latin kayone, ki Kedar, Adbeel, Mibcam, Micima, Duma, Maca, Adad, Tema, Jetur, Napic ki Kedema. Jo magi ducu aye ‘litino awobe pa Icmael. Litino awobe pa Ketula ma obedo dako pa Abraim ma aŋeca gin ene: en onywalo Jimran, Yokocan, Medan, Midian, Icibak ki’ Cua, Litino awobe pa Yokocan gin aye Ceba ki Dedan, Litino awobe pa Midian gin aye Epa, Eper, Kanok, Abida ki Eldaa, Magi ducu aye likwayo pa Ketula. Abraim onywalo Icaka, Litino awobe pa Icaka gin aye Ecau ki Icrael. Litino awobe pa Ecau aye Erifaji, Reuel, Jeuc, Jalam ki Kora. Litino awobe pa Erifaji aye Teman, Omar, Jepi, Gatam, Kenaj, Timna ki Amalek. Litino awobe pa Reuel gin Nakat, Jera, Ca ma ki Mija. Litino awobe pa Ceir aye Lotan, Cobal, Jibeon, Aŋa, Dicon, Ejer ki Dican, Litino awobe pa Lotan aye Kori ki Komam; lamiŋ Lotan aye Timna, Litino awobe pa Co bal gin aye Alian, Manakat, Ebal, Cepi ki Onam, Litino awobe pa Jibeon aye Aiya ki Aŋa, Latin awobi pa Aŋa aye Dicon, Litino awobe pa Dicon aye Kamram, Eciban, Itran ki Keran, Litino awobe pa Ejer aye Bilan, Jaavan ki Jaakan, Litino awobe pa Dican aye Uj ki Aran. Magi aye luker ma guloyo lobo Edom ma onoŋo pud peya kabaka mo oloyo jo Icrael: Bela wod pa Beor ma nyiŋ gaŋ kalle Dinkaba. Ka Bela oto, ci Jobab wod pa Jera me Bojra oleyo ka tyene. Ka Jobab oto, ci Kucam mua ki i lobo pa jo Teman oleyo ka tyene. Ka Kucam oto, ci Adad wod pa Bedad oleyo ka tyene. En aye yam olwenyo ki jo Midian, ci oloyogi i lobo Moab; nyiŋ gaŋ kalle aye Avit. Ka Adad oto, ci Camla me Macireka oleyo ka tyene. Ka Camla oto, Caul me Rekobot ma tye i dog kulu Euprate oleyo ka tyene. Ka Caul oto, ci Baal-kanan wod pa Akbor oleyo ka tyene. Ka Baal-kanan oto, ci Adad oleyo ka tyene; nyiŋ gaŋ kalle Pai. Nyiŋ dakone Meketabel nya pa Matred, ma nya pa Mejakab. Ci Adad oto woko. Rwodi ma i Edom gin ene: Timna, Alia, Jetet, Okolibama, Ela, Pinon, Kenaj, Teman, Mibjar, Magdiel ki Iram; magi aye rwodi ma i Edom. Magi aye litino awobe pa Icrael: Reuben, Cimeon, Levi, Juda, Icakar, Jabulon, Dan, Yucepu, Benjamin, Naputali, Gad ki Acer. Litino awobe pa Juda gin aye Er, Onan ki Cela. Jomagi adek-ki Bat-Cua ma nya jo Kanaan aye onywalogi. Er ma en aye latin kayo pa Juda obedo dano marac i wan Rwot, omiyo Rwot oneke woko. Juda dok onywalo Perej ki Jera ki Tamar ma ci-wode; litino awobe pa Juda gin ducu abic. Litino awobe pa Perej gin aye Kejeron ki Kamul. Litino awobe pa Jera aye Jimri, Etan, Eman, Kalkol ki Dara, gin ducu abic. Latin awobi pa Karmi en aye Akar, layel Icrael, ma yam obalo i kom jami ma gidyero bot Rwot. Wod pa Etan obedo Ajaria. Litino awobe pa Kejeron ma en onywalo gin aye Jeramel, Ram ki Kelubai. Ram onywalo Aminadab, Aminadab onywalo Calma, Calma onywalo Boaj, Boaj onywalo Obed, Obed onywalo Yece, Yece onywalo Eliab ma latin kayone, me aryone Abinadab, me adekke Cimea, me 385 aŋwenne Netanel, me abicce Radai, me abicelle Ojem, me abirone Daudi. Lumegigi gin aye Jeruya ki Abigail. Litmo awobe pa Jeruya gin Abicai, Joab ki Acael, gin adek. Abigail onywalo Amaca; won Amaca obedo Jeter ma jo Icmael. Kaleb wod pa Kejeron onywalo Jeriot ki dakone Ajuba. Litino awobe pa Ajuba gin aye Jecer, Cobab ki Ardon. Ka Ajuba oto, Kaleb onyomo Eprat ma onywalo Kur. Kur onywalo Uri, Uri onywalo Bejalel. Lacen Kejeron obedo ki nya pa Makir ma won Gilead. Onyomo ma onoŋo mwaka me ditte romo pyerabicel; dako meno onywalo Cegub. Cegub onywalo Jair ma yam obedo ki gaŋine pyeraryo wiye adek i lobo Gilead. Ento jo Gecur ki jo Aram gumayo gaŋi pa Jair ki bot wegine, kacel ki Kenat ki gaŋi matino ma i ŋete, gaŋi ducu pyerabicel. Jo magi ducu gin likwayo pa Makir ma won Gilead. Ka Kejeron doŋ oto, ci Kaleb obedo ki Eprata ma ci-wonne dako pa Kejeron, ci onywalo kwede Acikur ma ocako gaŋ Tekoa. Litino awobe pa Jeramel ma latin pa Kejeron gin aye Ram ma latin kayone, ki Buŋa, Oren, Ojem ki Akija. Jeramel onoŋo tye ki dakone mukene bene ma nyiŋe Atara; en aye min Onamo Litino awobe pa Ram ma latin kayo pa Jeramel gin aye Naaj, Jamin ki Eker. Litino awobe pa Onam gin aye Camai ki Jada. Litino awobe pa Camai aye Nadab ki Abicur. Nyiŋ dako pa Abicur obedo Abikail; en aye onywalo Aban ki Molid. Litino awobe pa Nadab gin aye Celed ki Apaim. Celed oto ma pe ki latin mo. Latin awobi pa Apaim aye Ici. Latin awobi pa Ici aye Cecan. Latin awobi pa Cecan en aye Aklai. Litino awobe pa Jada ma omin Camai gin aye Jeter ki Yonacan; Jeter oto ma pe ki latin mo. Litino awobe pa Yonacan gin aye Pelet ki Jaja. Jo magi ducu gin likwayo pa Jeramel. Cecan yam pe ki litino awobe; onywalo anyira keken. Ento Cecan onoŋo tye ki opiine ma Laejipt ma nyiŋe Jara. Cecan omiyo nyare mo bot opiine Jara, ci onywalo kwede Atai. Atai onywalo Natan, Natan onywalo Jabad. Jabad onywalo Eplal, Eplal onywalo Obed, Obed onywalo Yeko, Yeko onywalo Ajaria. Ajaria onywalo Kelej, ki Kelej onywalo Eleaca, Eleaca onywalo Cicimai, ki Cicimai onywalo Calum. Calum onywalo Jekamia, Jekamia onywalo Elicama. Litino awobe pa Kaleb ma omm Jeramel gin ene: Meca ma latin kayone obedo won Jip. Latin awobi pa Jip aye Mareca ma won Kebron. Litino awobe pa Kebron aye Kora, Tapua, Rekem ki Cema. Cema onywalo Rakam ma won Jorkeam, Rekem onywalo Camai. Latin awobi pa Camai en aye Maon; Maon onywalo Beŋur. Kaleb obedo ki dako ma aŋeca bene ma nyiŋe Epa; en aye onywalo Karan, Moja ki Gajej; Karan bene obedo ki wode ma nyiŋe Gajej. Litino awobe pa Jadai gin aye Regem, Yocam, Gecan, Pelet, Epa ki Caap. Maaka ma dako pa Kaleb ma aŋeca onywalo Ceber ki Tirkana. Dako meno bene dok onywalo Caap ma ocako gaŋ Madmana, ki Ceva ma ocako gaŋi Makbena ki Gibea, Akaca obedo nya pa Kaleb. Jo man ducu gin likwayo pa Kaleb. Litino awobe pa Kur ma latin kayo pa Eprata gin aye Cobal ma ocako gaŋ ma gilwoŋo Kiriat-jearim, Calma ma ocako Beterekem, ki Karep ma ocako Bet-gader. Likwayo pa Cobal ma ocako Kiriat-jearim gin aye jo Karoe ki nucu pa jo Menukot. Doggola pa jo Kiriat-jearim ducu gin aye jo Itri, jo Put, jo Cumat ki jo Micra; jo Jora ki jo Ectaol bene gua ki i kom jo meno. Likwayo pa Calma ma ocako gaŋ Beterekem gin aye jo Netopa, jo Atrotbet-joab, nucu pa jo Manakat, ki jo Jora. Doggola pa lukaran bene ducu ma gibedo i Jabej gin aye jo Tira, io Cimea ki jo Cuka. Magi aye jo Keni ma gunyomme ki jo ma i dog ot pa Rekab. Magi aye litino awobe pa Daudi ma en onywalo i Kebron: latin kayone aye Amnon, ma minne obedo Akinoam me Jejreel; me aryone Daniel, ma minne obedo Abigail me Karmel; me adekke obedo Abcalom, ma minne Maaka ma nya pa Talmai kabaka me Gecur; me aŋwenne Adoniya, ma minne Kagit; me abicce Cepatia, ma minne Abital; me abicelle Itream, ma minne Egla. Daudi onywalo jo abicelli i Kebron, ka ma yam obedo ka loc iye pi mwaka abiro ki dwe abicel. Ka dok obedo ka loc i Jerucalem pi mwaka pyeradek wiye adek. Dano magi en onywalogi i Jerucalem: Cimea, Cobab, Natan ki Solomon; gin aŋwen-ni ducu mingi Bat-cua ma nya Amiel. Ka dok onywalo Ibar, Elicama, Elipelet, Noga, Nepeg, Japia, Elicama, Eliada ki Elipelet, gin aboŋwen. Magi ducu gin litino awobe pa Daudi, ma pe gikwano iye litino pa mon aŋecane; ki lamingi en aye Tamar. Likwayo pa Solomon gin ene: en onywalo wode Rekoboam, ma wode Abija, ma wode Aca, ma wode Yekocapat, ma wode Joram, ma wode Akajia, ma wode Yoaci, ma wode Amajia, ma wode Ajaria, ma wode Yocam, ma wode Akaj, ma wode Kejekia, ma wode Manace, ma wode Amon, ma wode Yocia, Litino awobe pa Yocia gin aye Yokanan ma latin kayone, me aryone Yekoyakim, me adekke Jedekia me aŋwenne Calum. Likwayo pa Yekoyakim gin ene: en onywalo wode Yekonia, ma wode Jedekia. Ka dok litino awobe pa Yekonia ma yam gitere i opii-ni gin ene: Cealtiel, Malkiram Pedaya, Cenajar, Jekamia, Kocama ki Nedabia. Litino awobe pa Pedaya gin aye Jerubabel ki Cimei. Litino awobe pa Jerubabel aye Meculam ki Anania, ma lamingi aye Celomit; ki Kacuba, Okel, Berekia, Kacadia ki Jucab-keced, gin abic. Likwayo pa Anania gin ene: en onywalo Pelatia ki Jecaya, ma wode Repaya, ma wode Aman, ma wode Obadia, ma wode Cekania. Latin awobi pa Cekania aye Cemaya, Ki litino awobe pa Cemaya gin aye Katuc, Igal, Baria, Nearia ki Capat, gin abicel. Litino awobe pa Nearia gin aye Elioenai, Kijikia ki Ajrikam, gin adek. Litino awo be pa Elioenai gin aye Kodavia, Eliacib, Pelaya, Akub, Yokanan, Delaya ki Anani, gin abiro. Litino awobe pa Juda aye Perej, Kejeron, Karmi, Kur ki Cobal. Reaya ma wod ‘pa Cobal onywalo Jakat, Jakat onywalo Akumai ki Lakad. Meno aye doggola pa jo Jora. Magi aye litino awobe pa Etam: Jejreel, Icima ki Idibac; nyiŋ lamingi obedo Kajelelponi. Penuel ocako gaŋ Gedor, ki Ejer ocako gaŋ Kuca. Magi aye litino awobe pa Kur ma obedo latin kayo pa minne Eprata; en aye ocako Beterekem. Acikur ma ocako gaŋ Tekoa, yam tye ki mon aryo, Kela ki Naara. Naara onywalo Akujam, Keper, Temeni ki Akactari. Meno aye litino awobe pa Naara. Litino awobe pa Kela gin aye Jeret, Ijar ki Etanan. Koj onywalo Anub ki Jobeba; jo me doggola pa Akarkel ma wod pa Karum ducu gubedo likwaye. Jabej onoŋo giworo maka to omegine ducu. Minne ocako nyiŋe Jabej kun wacci, “Pien anywale ki arem madwoŋ.” Jabej okok bot Lubaŋa me Icrael kun wacci, “Tim ber, imiya gum ci imi wan lobona obed malac. Bed kweda, igwoka i kom gin marac ducu wek pe otima malit.” Ci Lubaŋa oye gin ma en olego. Kelub ma omin Cuka onywalo Mekir, Mekir onywalo Eciton. Eciton onywalo Bet-rapa, Pacea ki Tekina ma ocako gaŋ ma gilwoŋo Ir-Nakac, Magi aye jo Reka. Litino awobe pa Kenaj gin aye Otiniel gin ki Ceraya. Litino awobe pa Otiniel aye Katat ki Meonatai. Meonatai onywalo Opra, ki Ceraya onywalo Joab ma ocako nota pa lutic diro. Gin mumiyo gilwoŋo kit meno, pien gin ducu lutic diro. Litino awobe pa Kaleb ma wod pa Jepune gin aye Iru, Ela ki Naam. Latin awobi pa Ela aye Kenaj. Litino awobe pa Jekalelel gin aye Jip, Jipa, Tiria ki Acarel. Litino awobe pa Ejra gin aye Jeter, Mered, Eper ki Jalon. Mered onyomo Bitia ma nya pa Parao; en ogamo ci onywalo nyare Miriam ki litino awobe aryo, Camai ki Iciba ma ocako gaŋ Ectemoa. Ki dakone ma Lajuda Mered dok onywalo Jered ma ocako gaŋ Gedor, Keber ma ocako gaŋ Coko, ki Jekutiel ma ocako gaŋ Janoa. Litino awobe pa dako pa Kodia ma lamiŋ Nakam gunywalo jo magi, Keila ma obedo kwaro pa jo Garmi, ki Ectemoa ma obedo kwaro pa jo Maaka. Litino awobe pa Cimon gin aye Amnon, Rina, Ben-kanan ki Tilon. Litino awobe pa Ici gin aye Joket ki Ben-joket. Likwayo pa Cela ma wod pa Juda aye Er ma ocako gaŋ Leka, Laada ma ocako gaŋ Mareca, ki doggola pa lucwe boŋo camanini ducu ma gibedo i Bet-acibea; ki Jokim, ki jo Koceba, ki Yoaci, ki Carap ma yam obedo laloc i Moab ka dok odwogo obedo i Beterekem. (Meno lok macon twatwal.) Jo-nu aye lucwe agulu, ki jo ma gubedo i Netaim ki i Gedera. Onoŋo gibedo kunnu kacel ki kabaka pi tiyo ticce. Litino awobe pa Cimeon gin aye Nemuel, Jamin, Jarib, Jera ki Caul. Caul onywalo wode Calum, ma wode Mibcam, ma wode Micima. Litino awobe pa Micima gin aye wode Kamuel, ma wode Jakur, ma wode Cimei. Cimei onoŋo tye ki awobene apar wiye abicel ki anyirane abicel; ento omegine pe gubedo ki litino mapol, kadi wa ludoggolagi ducu pe gunya mapol ma rom ki jo Juda. Gin yam gibedo i Beer-ceba, Molada, Kajar-cual, Bila, Ejem, Tolad, Becweri, Korma, Jiklag, Bet-markabot, Kajar-cucim, Bet-biri ki Caaraim. Magi aye obedo gaŋigi nio wa i kare me loc pa Daudi. Kabedo mukene ma gin gubedo iye gin aye Etam, Ain, Rimmon, Token ki Acan, gagi ducu abic, kacel ki gagi matino ma orumo gagi man ducu nio kwede wa i Baalat, Magi aye kabedogi, dok gin aye gubedo ki buk me tekwarogi. Mecobab, Jamlek, Joca ma wod pa Amajia, Joel, Yeko ma wod pa Jocibia, wod pa Ceraya, ma wod pa Aciel, Elionia, Jaakona, Jecokaya, Acaya, Adiel, Jecimiel, Benaya, Jija wod pa Cipi ma wod pa Alon, wod pa Jedaya, wod pa Cimri, ma wod pa Cemaya, jo magi ducu ma gicoyo nyiŋgi malo-ni gin aye lutel me doggolagi. Dog odi pa kwarogi onya madwoŋ, ci gucako wot nio wa i yo ma donyo i Gerar, kun girabo dog nota yo tuŋ wokceŋ pi yenyo ka kwayo romigi ki dyegigi. Gunoŋo kakwat maber kunnu ma lum olot iye madwoŋ, lobone bene lac ma obedo mot ki kuc. Jo ma gukwoŋo bedo kunnu aye jo Kam. Jo meno ma gicoyo nyingi-ni guo kunnu i kare pa Kejekia kabaka me Juda, ci guneko jo Kam woko, kacel ki jo Meuni ma gunoŋo kunnu, gutyekogi woko liweŋ nio wa i kare-ni, Kit meno guleyo kabedogi woko, pien onoŋo ka kwayo romigi ki dyegigi tye kunnu maber. Jo mogo ma i kingi, jo Cimeon ma giromo miya abic, gucito wa i got Ceir kun gitye ki jo magi ma lutel wigi: Pelatia, Nearia, Repaya ki Ujiel ma gin litino awobe pa Ici. Guneko jo Amalek ma yam guriŋo ci gubwot ma gudoŋ kunnu, ci gucako bedo kunnu nio wa onyoo. Man lok kom likwayo pa Reuben ma latin kayo pa Icrael. En aye latin kayo, ento otimo kir pi bedo ki ci-wonne. Pi meno ditte me ‘anywalli gimiyo bot litino awobe pa Yucepu wod pa Icrael, pe doŋ gicoyo nyiŋe i buk me tekwaro ma lubo kit ma ginywale kwede. Dok kadi bed Juda yam obedo oteka i kin omegine, dok laker bene ononne ki i kin likwaye, ento dit me anywalli onoŋo tye bot Yucepu. Litino awobe pa Reuben ma latin kayo pa Icrael gin aye Kanok, Pallu, Kejeron ki Karmi. Litino awobe pa Joel gin ene: wode obedo Cemaya, ma wode Gog, ma wode Cimei, ma wode Mika, ma wode Reaya, ma wode Baal, ma wode Beera ma yam Tiglat-pilecer kabaka me Aciria otero woko i opii; en yam obedo ladit pa jo Reuben. Lukakagi yam gicoyo tekwarogi kun lubo yalwakgi ki doggolagi, gin ene: laditgi Jeyel, ki Jekaria, ki Bela wod pa Ajaj ma wod pa Joel; en yam bedo i Aroer, ma lobone oo wa i Nebo ki Baal-meon. En yam obedo bene yo tuŋ wokceŋ ma lobone o wa i dog tim ma i ŋet kutu Euprate tuŋ kany, pien onoŋo doŋ limgi onya madwoŋ i lobo Gilead. I kare pa Caulo gubedp ka lweny ki jo Agri ci gunekogi, ka gucako bedo i kemagi i lobo ducu ma i ŋet lobo Gilead yo tuŋ wokceŋ, Likwayo pa Gad gubedo i lobo Bacan nio kwede wa i Caleka, kun gukemme ki jo Reuben. Joel obedo laditgi, me aryone Capamo Janai ki Capat bene gubedo i Bacan. Lukakagi gupokke i doggola mapatpat ma kwarogi obedo Mikael, Meculam, Ceba, Jorai, Jakan, Jia ki Eber, gin abiro. Magi aye gubedo likwayo pa Abikail wod pa Kuri, ma wod pa Jaroa, wod pa Gilead, wod pa Mikael, wod pa Jecicai, wod pa Jado, wod pa Buj. Aki wod pa Abdiel ma wod pa Guni, en aye obedo ladit ma loyo dog odi pa kwarogi. Gin gubedo i Gilead, i Bacan ki i gaŋi ma i lobo meno, ki i kakwat ducu ma i lobo Caron, nio wa i waŋ lobo kikome, Jo magi ducu gicoyo nyiŋgi i buk me tekwaro i kare pa Yocam kabaka me Juda, ki i kare pa Jeroboam kabaka me Icrael. Jo pa Reuben, jo pa Gad, ki nucu kaka pa Manace yam gitye ki twoni oteka lweny ma gitye ki kwotgi ki pala lucwangi, ma gutelo atumgi bene, ma gin oyita lweny, dano alip pyeraŋwen wiye aŋwen, ki miya abiro ki pyerabicel ma guyubbe pi lweny. Gulwenyo ki Jekur, Napic ki Nodab, ma gin jo Agri, Lubaŋa okonyogi ka lweny kwedgi, pien gukok bote i kare ma gilwenyo, ci en oye legagi pien onoŋo gigene, ci omiyo jo Agri ki lwakgi ducu i ciŋgi, Guyako limgi makwo ma romo kinaga alip pyerabic kulu, romi alip miya aryo ki pyerabic, ki kana alip aryo, kacel ki dano alip miya acel ma guyakogi makwo. Guneko jo mapol, pien mony meno obedo mony pa Lubaŋa. Ci gubedo i lobo pa jo-nu nio wa i kare ma giterogi i opii. Jo me nucu kaka pa Manace gubedo i lobo meno. Gubedo mapol mada cakke ki i lobo Bacan nio kwede wa i Baal-kermon, Cenir ki got Kermon Magi aye ludito wi kaka ma i odi pa kwarogi: Eper, Ici, Eliel, Ajriel, Jeremia, Kodavia ki Jadiel, twoni oteka lweny ma nyiggi oywek, ma gin aye ludito i odi pa kwarogi. Ento gu,nayo waŋ Lubaŋa pa kwarogi, gubedo ka woro lubaŋa pa jo me lobo meno ki tim kwele kwele-gu, gin jo ma onoŋo Lubaŋa otyekogi woko ki i nyimgi, Pi meno Lubaŋa opiyo Pul kabaka me Aciria, ma en aye Tiglat-Pilecer kabaka me Aciria, ci oterogi i opii, gin jo Reuben, jo Gad ki nucu kaka pa jo Manace. Oterogi wa i Kalak, Kabor, Kara ki i kulu Gojan, pud gitye kunnu nio wa onyoo. Litino awobe pa Levi gin aye Gercom, Kokat ki Merari. Litino awobe pa Kokat aye Amram, Ijur, Kebron ki Ujiel. Litino pa Amram aye Aron, Moses ki Miriam. Litino awobe pa Aron gin aye Nadab, Abiu, Eleajar ki Itamar. Eleajar onywalo Finekaci, Finekaci onywalo Abicua, Abicua onywalo Buki, Buki onywalo Uji, Uji onywalo Jerakia, Jerakia onywalo Merayot, Merayot onywalo Amaria, Amaria onywalo Akitub, Akitub onywalo Jadok, Jadok onywalo Akimaj, Akimaj onywalo Ajaria, Ajaria onywalo Yokanan, Yokanan onywalo Ajaria, ma en aye obedo ajwaka ma tiyo i ot pa Lubaŋa ma yam Solomon ogero i Jerucalem. Ajaria onywalo Amaria, Amaria onywalo Akitub, Akitub onywalo Jadok, Jadok onywalo Calum, Calum onywalo Ilkia, Ilkia onywalo Ajaria, Ajaria onywalo Ceraya, Ceraya onywalo Yekojadak. Yekojadak gitero woko i opii i kare ma Rwot omiyo Nebukadnejar otero jo Juda ki jo Jerucalem i opii. Litino awobe pa Levi aye Gercom, Kokat ki Merari. Magi aye nyig litino awobe pa Gercom: Libni ki Cimei. Litino awobe pa Kokat gin aye Amram, Ijar, Kebron ki Ujiel. Litino awobe pa Merari aye Makali ki Muci. Magi aye doggola pa jo Levi, ma lubo kwarogi. Likwayo pa Gercom gin ene: en onywalo wode Libni, ma wode Jakat, ma wode Jima, ma wode Joa, ma wode Iddo, ma wode Jera, ma wode Jeaterai. Likwayo pa Kokat gin ene: en onywalo wode Aminadab, ma wode Kera, ma wode Acir, ma wode Elkana, ma wode Ebiacap, ma wode Acir, ma wode Takat, ma wode Uriel, ma wode Ujia, ma wode Caul. Likwayo pa Elkana gin aye Amacai ki Akimot, ma wode Elkana, ma wode Jopai, ma wode Nakat, ma wode Eliab, ma wode Jerokam, ma wode Elkana. Litino awobe pa Camuel gin aye Joel ma latin kayone, ki me rayone Abija. Likwayo pa Merari gin ene: en onywalo Makali ma wode Libni, ma wode Cimei, ma wode Uja, ma wode Cimea, ma wode Kagia, ma wode Acaya. Magi aye jo ma Daudi oketogi me loyo tic me wer i ot pa Lubaŋa, i ge kare ma gitero canduk pa Rwot giketo obedo iye. Ticgi obedo me wer i nyim kema, ma en aye kema me rwatte, nio wa i kare ma Solomon doŋ ogero ot pa Rwot i Jerucalem; gubedo ka tiyo ticgi kun gilubo cik ma gimiyogi. Magi aye nyig dano ma gitiyo tic meno, ki nyig likwayogi. Likwayo pa Kokat gin ene: Eman ma lawer, ma wod pa Joel, wod pa Camuel, wod pa Elkana, wod pa Jerokam, wod pa Eliel, wod pa Toa, wod pa Jup, wod pa Elkana, wod pa Makat, wod pa Amacai, wod pa Elkana, wod pa Joel, wod pa Ajaria, wod pa Jepania, wod pa Takat, wod pa Acir, wod pa Ebiacap, wod pa Kora, wod pa Ijar, wod pa Kokat, wod pa Levi, wod pa Icrael; ki ominne Acap ma yam Cuŋ ka gete tuŋ bade malacuc, en aye Acap ma wod pa Berekia, wod pa Cimea, wod pa Mikael, wod pa Baaceya, wod pa Malkija, wod pa Etini, wod pa Jera, wod pa Adaya, wod pa Etan, wod pa Jima, wod pa Cimei, wod pa Jakat, wod pa Gercom, wod pa Levi. Omegigi ma likwayo pa Merari yam gicuŋ tuŋ lacam; gin ene: Etan wod pa Kici, wod pa Abdi, wod pa Maluk, wod pa Kacabia, wod pa Amajia, wod pa Ilkia, wod pa Amji, wod pa Bani, wod pa Cemer, wod pa Makali, wod pa Muci, wod pa Merari, wod pa Levi. Yam giketo omegigi mukene ma gin Lulevi me tiyo tic ducu ma i kema, ma en aye ot pa Lubaŋa. Ento Aron ki awobene aye gityero gityer i wi keno tyer me gitum awaŋa, ki i keno tyer me waŋo odok eceta. Gin aye onoŋo gitiyo tic ducu ma i kabedo maleŋ makato ducu, ki tic me kwanyo bal ki i kom jo Icrael, kit ma Moses latic pa Lubaŋa yam ociko kwede ducu. Magi aye likwayo pa Aron: en onywalo wode Eleajar, ma wode Finekaci, ma wode Abicua, ma wode Buki, ma wode Uji, ma wode Jerakia, ma wode Merayot, ma wode Amaria, ma wode Akitub, ma wode Jadok, ma wode Akimaj. Magi aye kabedo ma likwayo pa Aron ma i doggola pa jo Kokat yam gubedo iye, ma oporo kit bedogi ki wan lobogi, kit ma kwir opoto kwede: yam gimiyo botgi Kebron ma i lobo Juda, kacel ki olet ma orumo ducu; ento potti ducu ma tye pi gaŋ meno, ki gaŋi matino ma i ŋete, onoŋo gimiyogi woko bot Kaleb wod pa Jepune. Ka dok likwayo pa Aron gimiyo botgi Kebron ma en aye gaŋ me laro lunek dano, Libna ki olette bene, Jatir, Ectemoa ki olette, Kilen ki olette, Debir ki olette, Acan ki olette, ki Bet-cemec ki olette. Ka dok gimiyo botgi gaŋi magi ma gikwanyo ki i lobo me kaka pa Benjamin: Geba ki olette, Alemet ki olette, Anatot ki olette. Kumeno gaŋi ma i doggolagi ducu onoŋo giromo apar wiye adek. Jo Kokat mudoŋ gimiyo botgi gaŋi apar ma gipokogi ki kwir, ma gikwanyogi ki bot nucu kaka pa Manace. Jo Gercom gimiyo botgi gaŋi apar wiye adek macalo doggolagi tye, ma gikwanyo ki i kaka pa Icakar, Acer, Naputali ki Manace i lobo Bacan. Jo Merari gimiyo botgi gaŋi apar wiye aryo macalo doggolagi tye, ma gikwanyo ki i kaka pa Reuben, Gad ki Jabulon. Kit meno jo Icrael gumiyo gaŋi bot jo Levi kacel ki oletgi ducu, wek gubed iye. Gumiyo botgi gllŋi ma gicoyo nyiŋgi malo-ni ma gikwanyogi ki bot kaka pa Juda, Cimeon ki Benjamin kun gibolo kwir. Ka dok doggola mogo pa likwayo pa Kokat gimiyo botgi gaŋi ma gikwanyo ki bot kaka pa Epraim. Gimiyo botgi Cekem ma en aye gaŋ me laro lunek dano ma i lobo godi me Epraim, ki olette, Gejer ki olette, Jokmeam ki olette, Bet-koron ki olette, Aijalon ki olette, Gat-Rimmon ki olette, Ka dok doggola pa jo Kokat mudoŋŋe ducu gimiyo botgi gaŋi magi ma gikwanyo ki bot nucu kaka pa Manace: Aner ki olette, Bileam ki olette. Jo pa Gercom gimiyo botgi gaŋi magi ma gikwanyo ki bot nucu kaka pa Manace: Golan ma i Bacan ki olette, Acitarot ki olette; ka dok gaŋi magi ma gikwanyo ki bot kaka pa Icakar: Kedec ki olette, Daberat ki olette, Ramot ki olette, Anem ki olette; ka dok gaŋi magi ma gikwanyo ki bot kaka pa Acer: Macal ki olette, Abudon ki olette, Kukok ki olette, Rekob ki olette; ka dok gaŋi magi ma gikwanyo ki bot kaka pa Naputali: Kedec ma i Galilaya ki olette, Kamon ki olette, Kiriataim ki olette. Jo pa Merari mudoŋ gimiyo botgi gaŋi magi ma gikwanyo ki bot kaka pa Jabulon kun gibolo kwir: Rimmono ki olette, Tabor ki olette; ka dok i loka kulu Jordan yo tuŋ wokceŋ ma cok ki Jeriko gimiyo botgi gaŋi magi ma gikwanyo ki bot kaka pa Reuben: Bejer ma i tim aroo kacel ki olette, Jaja ki olette, Kedemot ki olette, Mepaat ki olette; ka dok gaŋi magi ma gikwanyo ki bot kaka pa Gad: Ramot ma i Gilead ki olette, Makanaim ki olette, Kecbon ki olette, Jajer ki olette. Litino awobe pa Icakar aye Tola, Puwa, Jacub ki Cimron, gin aŋwen. Litino awobe pa Tola aye Uji, Repaya, Jeriel, Jamai, Ibcam ki Cemuel, Gin aye ludito kaka pa jo Tola ki i odi pa kwarogi ma gubedo twoni oteka lweny i yalwakgi. I kare pa Daudi welgi oromo alip pyeraryo wiye aryo ki miya abicel. Latin awobi pa Uji aye Ijrakia. Litino awobe pa Ijrakia aye Mikael, Obadia, Joel ki Icia, gin abic, ma gin ducu jo madito. Ka dok onoŋo tye lwak buca mony pa lulweny ma gicoyo nyiŋgi ma lubo yalwakgi ma i dog odi pa kwarogi; welgi obedo alip pyeradek wiye abicel, pien onoŋo gitye ki mon mapol ki litino awobe mapol. Lukakagi ma i doggola pa Icakar ducu onoŋo giromo twoni oteka lweny alip pyeraboro wiye abiro ma gicoyo nyiŋgi i buk me tekwarogi. Litino awobe pa Benjamin gin aye Bela, Beker ki Jediael, gin adek. Litino awobe pa Bela aye Ejibon, Uji, Ujiel, Jerimot ki Iri, gin abic, ma gin ducu ludito wi kaka ma i odi pa kwarogi, twoni oteka lweny, I kare ma yam gicoyo nyiŋgi i buk me tekwaro, welgi oromo alip pyeraryo wiye aryo ki pyeradek wiye aŋwen. Litino awobe pa Beker gin aye Jemira, Yoaci, Eliejer, Elioenai, Omri, Jeremot, Abija, Anatot ki Alemet; jo magi ducu gin awobe pa Beker. Yam gicoyo nyiŋgi i buk me tekwaro ma lubo yalwakgi, kun gin ludito wi kaka i odi pa kwarogi, twoni oteka lweny; welgi onoŋo romo alip pyeraryo ki miya aryo. Latin awobi pa Jediael aye Bilan. Litino awobe pa Bilan aye Jeuc, Benjamin, Ekud, Kenaana, Jetan, Tarcic ki Akicakar. Magi ducu likwayo pa Jediael ma gin ludito kaka i odi pa kwarogi, twoni oteka lweny; welgi oromo alip apar wiye abiro ki miya aryo ma guyubbe pi lweny. Cupim ki Kupim gin aye litino awobe pa Ir, Kucim obedo latin awobi pa Aker. Litino awobe pa Naputali gin aye Jajiel, Guni, Jejer ki Calum, gin aye likwayo pa Bila, Litino awo be pa Manace aye Aciriel ki Makir ma obedo won Gilead. Gin aryo ducu dako aŋecane ma anyira jo Aram aye onywalogi. Makir onyomo dako ki Kupim ki Cupim bene. Nyiŋ laminne aye Maaka. Nyiŋ wode me aryone Jelopekad. Jelopekad onywalo anyira keken. Maaka ma dako pa Makir onywalo wode ma ocako nyiŋe Perec; nyiŋ ominne Cerec. Litino awobe pa Perec aye Ulam ki Rakem. Latin awobi pa Ulam aye Bedan. Magi gin likwayo pa Gilead wod pa Makir, ma wod pa Manace. Kamoleket ma lamiŋ Gilead onywalo Icikod, Abiejer ki Makala. Litino awobe pa Cemida gin aye Akian, Cekem, Liki ki Aniam. Likwayo pa Epraim gin aye Cutela ma wode Bered, ma wode Takat, ma wode Eleada, ma wode Takat, ma wode Jabad, ma wode Cutela. Litino awobe mukene pa Epraim aye Ejer ki Elead ma jo Gat ma gin wegi lobo-nu guneko woko i kare ma awo be-nu gucito ka yako dyaŋigi, Wongi Epraim obedo ka kokogi pi kare malac, dok omegine bene gubino ka kweyo cwinye. Lacen Epraim obedo ki dakone ci dako ogamo, onywalo wode. Wonne ocako nyiŋe Beria, pien onoŋo can opoto i ode, Nyare obedo Ceera; en aye ogero gaŋ Bet-koron mapiny ki mamalone bene, ki Ujen-Ceera. Wod pa Beria aye Repa ma wode Recep, ma wode Tela, ma wode Takan, ma wode Ladan ma wode Amikud, ma wode Elicama, ma wode Nun, ma wode Yocwa. Lobogi ki kabedogi gin aye Betel ki gaŋi ma i ŋete, ka dok yo tuŋ wokceŋ Naaran, ki yo tuŋ potoceŋ Gejer ki gaŋi ma i ŋete, Cekem ki gaŋi ma i ŋete, Aya ki gaŋi ma i ŋete: ka dok i wan lobo pa jo Manace, Bet-cean ki gaŋi ma i ŋete, Taanak ki gaŋi ma i ŋete, Megido ki gaŋi ma i ŋete, Dor ki gaŋi ma i ŋete, Likwayo pa Yucepu wod pa Icrael yam gubedo i kabedo magi. Litino awobe pa Acer gin aye Imna, Iciva, Icivi, Beria ki Cera ma lamingi. Litino awobe pa Beria gin aye Keber ki Malkiel ma ocako gaŋ Bir-jait. Keber onywalo Japulet, Gomer, Kotam ki Cua ma lamingi. Litino awobe pa Japulet aye Racak, Bimal ki Acivat. Magi gin Iiiino pa Japulet. Litino awobe pa ominne Cemer aye Roga, Jekuba ki Aram, Litino awobe pa ominne Keler gin aye Jopa, Imna. Celec ki Ama!. Litino awobe pa Jopa aye Cua, Kameper, Cual, Beri, Imra, Bejer, Kod, Cama, Ciloa, Itran ki Beera. Litino awobe pa Jeter aye Jepune, Picpa ki Ara, Litino awobe pa Ula aye Ara, Kaniel ki Rijia, Magi ducu jo pa Acer, ludito kaka i odi pa kwarogi, jo ma giyerogi, twoni oteka lweny, jo madito i kin lutel wi kaka. I kare ma gicoyo nyiŋgi i buk me tekwaro pi tic i lweny, welgi onoŋo romo alip pyeraryo wiye abicel. Benjamin onywalo Bela ma latin kayone, me aryone Acibel, me adekke Akara, me aŋwenne Noka, me abicce Rapia, Bela onywalo litino awobe bene ma gin aye Adar, Gera, Abikud, Abicua, Naaman, Akoa, Gera, Cepupan ki Kuram. Magi aye likwayo pa Ekud; gin gubedo ludito kaka i odi pa kwarogi i kin jo ma yam gibedo i Geba, ma giterogi i opii wa i Manakat. Gin ene: Naaman, Akija ki Gera, ma en aye Keglam, ma obedo won Uja ki Akikud. Cakaraim onywalo litino awobe i lobo Moab, ma doŋ otyeko ryemo monne Kucim ki Baara woko. Onywalo litino awobe ki dakone Kedec, gin aye Jobab, Jibia, Meca, Malkam, Jeuj, Cakia ki Mirma. Magi aye litino awobene ma gubedo ludito kaka i odi pa kwarogi. Cakaraim onywalo litino awobe bene ki dakone Kucim, gin aye Abitub ki Elpaal. Litino awobe pa Elpaal aye Eber, Micam ki Cemed. Cemed ogero gaŋ Ono, ki Lod, ki gaŋi ma i ŋete. Beria ki Cema aye gubedo ludito kaka i odi pa kwarogi i kin jo ma gibedo i Aijalon, ma guryemo jo ma yam gubedo i Gat woko. Akio, Cacak, Jeremot, Jebedia, Arad, Eder, Mikael, Icipa ki Joka gin aye likwayo pa Beria. Jebadia, Meculam, Kijiki, Keber, Icimerai, Ijilia ki Jobab gin aye likwayo pa Elpaal. Jakim, Jikri, Jabdi, Elienai, Jiletai, Eliel, Adaya, Beraya ki Cimrat aye likwayo pa Cimei. Icipan, Eber, Eliel, Abudon, Jikri, Kanan, Anania, Elam, Antotija, Ipedaya ki Penuel gin aye likwayo pa Cacak, Camcerai, Cekaria, Atalia, Jarecia, Elia ki Jikri gin aye likwayo pa Jerokam. Jo magi gubedo ludito kaka i odi pa kwarogi i yalwakgi; gin jo madito. Jo magi ducu gubedo i Jerucalem. Jeyel ma ocako gaŋ Gibeon yam bedo i Gibeon. Nyiŋ dakone Maaka. Latin awobine me kayo aye Abudon, ka dok Jur. Kic, Baal, Nadab, Gedor, Akio, Jeker, ki Miklot, ma en aye won Cimea. Jo magi bene kacel ki lukakagi yam gubedo ma gukemme ki lukakagi ma gibedo i Jerucalem. Ner onywalo Kic. Kic onywalo Caulo, Caulo onywalo Yonacan, Malkicua, Abinadab, ki Ecibaal. Yonacan onywalo Meribaal, Meribaal onywalo Mika. Litino awobe pa Mika aye Piton, Melek, Tarea ki Akaj: Akaj onywalo Yekoada, Yekoada onywalo Alemet, Ajimavet ki Jimri. Jimri onywalo Moja, Moja onywalo Binea ma wode Rapa, ma wode Eleaca, ma wode Ajel. Ajel yam tye ki litino awobe abicel ma nyiŋgi ene: Ajrikam, Bokeru, Icmael, Cearia, Obadia ki Kanan. Jo magi ducu aye litino awobe pa Ajel, Litino awobe pa ominne Ecek gin ene: Ulam ma latin kayone, me aryone Jeuc, me adekke Elipelet. Litino awobe pa Ulam yam gin twoni oteka lweny, wegi atum, ma litino awobegi ki likwayogi pol mada, gin ducu miya acel ki pyerabic. Jo magi ducu gin jo pa Benjamin. Yam gicoyo nyiŋ jo Icrael ducu i buk me tekwarogi, ma gicoyogi i buk pa Luker me Icrael. Jo Juda yam giterogi i opii i Babilon pien onoŋo guŋayo waŋ Lubaŋa. Jo ma gukwono dwogo cen ka bedo i dul lobo ma yam gimiyo botgi i gaŋigi gin aye jo Icrael kacel ki ajwagi pa Lubaŋa, Lulevi, ki lutic i ot pa Lubaŋa, Jo mogo me kaka pa Juda, Benjamin, Epraim ki Manace gucako bedo i Jerucalem. Gin aye Utai wod pa Amikud, ma wod pa Omri, wod pa Imri, wod pa Bani ki i kin likwayo pa Perej ma wod pa Juda. Dok i kin likwayo pa Cela, Acaya ma latin kayo ki litino awobene. Ki i kin likwayo pa Jera, Jeuel ki lukakagi, gin miya abicel ki pyeraboŋwen noŋo. Ki i kin jo Benjamin Calu ma wod pa Meculam, wod pa Kodavia, wod pa Kacenua, Ibneya wod pa Jerokam, Ela wod pa Uji ma wod pa Mikri, ki Meculam wod pa Cepatia ma wod pa Reuel, wod pa Ibinija, kacel ki lukakagi ma lubo yalwakgi, dano miya aboŋwen ki pyerabic wiye abicel. Gin ducu ludito kaka i odi pa kwarogi. Ajwagi pa Lubaŋa ma gudwogo cen ma gubedo i Jerucalem gin aye Jedaya, Jekoyarib, Jakin ki Ajaria wod pa Ilkia ma wod pa Meculam, wod pa Jadok, wod pa Merayot, wod pa Akitub, ma en aye ladit ma loyo ot pa Lubaŋa; ki Adaya wod pa Jerokam ma wod pa Packur, wod pa Malkija; ki Maacai wod pa Adiel ma wod pa Jakajera, wod pa Meculam, wod pa Mecilemit, wod pa Imer; kacel ki lukakagi bene ma gin tudito kaka i odi pa kwarogi, gin dano alip acel ki miya abiro ki pyerabicel, jo makwiri twatwal i kom tic i ot pa Lubaŋa. Lulevi ma gudwogo cen ma gubedo i Jerucalem gin aye Cemaya wod pa Kacub, ma wod pa Ajrikam, wod pa Kacabia, wod pa Merari; ki Bakbakar, Kerec, Galal, ki Matania wod pa Mika ma wod pa Jikri, wod pa Acap; ki Obadia wod pa Cemaya ma wod pa Galal, wod pa Jedutun; kacel ki Berekia wod pa Aca wod pa Elkana ma obedo i kin gaŋi pa jo Netopa. Lugwok-doggola ot pa Lubaŋa ma gubedo i Jerucalem gin aye Calum, Akub, Talmon, Akiman ki lukakagi, ma Calum aye laditgi. Nio wa i kare meno onoŋo gubedo lugwok-doggola ot pa Lubaŋa ma kabaka wok ki iye, yo tuŋ wokceŋ. Magi aye lugwokdoggola gaŋ pa Lulevi. Calum wod pa Kore, ma wod pa Ebiacap, wod pa Kora, kacel ki lukakagi ma i dog ot pa kwarogi, likwayo pa Kora, gin aye lugwok dog kema, kit macalo kwarogi yam gubedo ludito ma giloyo gony pa Rwot kun gigwoko doggola me donyo. I kare macon onoŋo Finekaci wod pa Eleajar en aye obedo ladit ma loyogi; onoŋo Rwot tye kwede. Jekaria wod pa Mecelemia en aye onoŋo lagwok-doggola ma donyo i kema me rwatte, Jo magi ducu ma yam giyerogi me bedo lugwok-doggola onoŋo giromo dano miya aryo ki apar wiye aryo, Gicoyo nyiŋgi i buk me tekwarogi ki i gaŋgi. Onoŋo kabaka Daudi ki Camuel ma lanen-piny yam gumoko kwarogi i dog tic man, pien gubedo dano ma gigenogi twatwal. Kit meno gin ki likwayogi gubedo ludito tic ma loyo doggola ot pa Rwot, en aye ot me kema pa Rwot, macalo lukur-piny. Lugwok-doggola giketogi i kabedo aŋwen, yo tuŋ wokceŋ, yo tuŋ potoceŋ, yo tuŋ acam ki yo tuŋ acuc. Lukakagi ma i gaŋigi myero gubin pi nino abiro kare ki kare me bedo kwedgi; pien lugwok-doggola madito gibedo kunnu kare ducu, gin aye Lulevi ma giloyo kicika odi matinone ki odi kano lim ma i ot pa Lubaŋa, Odi butogi girumo ot pa Lubaŋa, pien tic me kuro piny obedo megi, gin bene gigwoko layab me yabo ot odiko odiko, Jo mogo i kingi onoŋo gigwoko jami ma gitiyo kwedgi i ot pa Lubaŋa; i kare ducu ma gidwokogi ki ma gikwanyogi woko, gikwanogi. Jo mukene i kingi giketogi me loyo jami ma bedo i ot pa Lubaŋa, ki jami tic maleŋ ducu, dok giloyo bene moko mapwotte, ki koŋo Yiŋo, ki moo, ki odok eceta, ki an wece. Jo mukene ma gin litino pa ajwagi giyubo jami me aruba pi aŋwece. Matitia, dano acel ma i kin Lulevi, ma en latin kayo pa Calum ma jo Kora, en aye obedo lalo tic me tedo mugati ma apada-ni, pien en dano ma genne. Lukakagi mogo ma gin jo Kokat giloyo mugati ma giketo i nyim Rwot; ticgi obedo me yu bone cabit ki cabit. Magi aye luwer, ma gin ludito kaka i odi pa kwarogi; yam gibuto i kicika odi matinone ma i ot pa Lubaŋa, ma pe gitiyo tic mukene, pien yam gibedo i dog tic dyeceŋ ki dyewor. Magi aye ludito kaka i odi pa kwarogi ma i kaka pa Lulevi, ma lubo yalwakgi, gin aye ludito ma yam gibedo i Jerucalem. Jeyel ma won Gibeon yam bedo i Gibeon; nyiŋ dakone Maaka, latin awobine me kayo en Abudon, ka dok Jur, Kic, Baal, Ner, Nadab, Gedor, Akio, Jeker, ki Miklot; Miklot aye won Cimeam, Jo magi bene yam gubedo ma gukemme ki lukakagi ma gibedo i Jerucalem, kacel ki lukakagi. Ner onywalo Kic, Kic onywalo Caulo, Caulo onywalo Yonacan, Malkicua, Abinadab ki Ecibaal; Yonacan onywalo Meribaal, Meribaal onywalo Mika. Litino awobe pa Mika gin aye Piton, Melek, Takrea ki Akaj. Akaj onywalo Jara, Jara onywalo Alemet, Ajimavet ki Jimri. Jimri onywalo Moja, Moja onywalo Binea; ma wode Repaya, ma wode Eleaca, ma wode Ajel. Ajel yam tye ki litino awobe abicel, ma nyiŋgi ene: Ajrikam, Bokeru, Icmael, Cearia, Obadia ki Kanan. Jo magi aye litino awobe pa Ajel. I kare meno jo Piliciti gulwenyo i kom Icrael. Jo Icrael guriŋo woko ki i nyim jo Piliciti, ci ginekogi i wi got Gilboa. Jo Piliciti guriŋo gudiŋo kor Caulo ki awo bene, ci guneko Yonacan ki Abinadab ki Malkicua, gin ducu awobe pa Caulo. Lweny ogeto matek i kor Caulo, ci wegi atero gucele woko, guketo ret i kome, Caulo owaco bot latin jami lwennye ni, “Wot pala lucwanni woko, icoba kwede pil, wek jo ma pe gilirogini, ma pe giŋeyo Lubaŋa pe gubin i koma, miyo giyarre i koma.” Ento latin jami lwennye pe oye, pien lworo omake matek, omiyo Caulo okwanyo pala lucwanne kikome ci opoto ogurre kwede kekene. Ka latin jami lwennye oneno ni Caulo doŋ oto woko, ci en bene opoto ogurre kene ki pala lucwanne, oto woko. Kit meno Caulo ki awobene adek-ki kacel ki jo me ode ducu, guto woko lawaŋacel, Ka jo Icrael ducu ma onoŋo gitye i nota guneno ni mony pa jo Icrael guriŋo woko, ki Caulo ki awobene ginekogi woko, ci guriŋo guweko gaŋigi woko; ci jo Piliciti gubino gucako bedo i gani-nu. Orwone jo Piliciti gubino ka lunyo boŋŋi ki i kom jo ma ginekogi, ci gunoŋo kom Caulo ki kom awobene adek-ki i kom got Gilboa, Gulunyo jami lweny pa Caulo ki i kome, gucito kwede, wa ki wiye bene ma gutoŋo, ka gucwalo kwena oromo i lobo pa jo Piliciti ducu pi tero lok me yomcwiny bot jogigi ki bot lwakgi ducu. Guketo jami lweny pa Caulo i oŋogigi; ka dok guguro wiye i ot jok Dagon. Ento ka jo Jabec-gilead ducu guwinyo gin ma jo Piliciti gutimo i kom Caulo, ci oteka lwenygi ducu gua, gukwanyo kom Caulo woko ki kom awobene, guterogi wa i Jabec, Ka guyiko cogogi i te yat kworo ma tye i Jabec, ci guri kec pi nino abiro. Caulo oto pien pe obedo lagen; oŋayo waŋ Rwot woko, pe otiyo gin ma Rwot ociko, dok owoto ka tyet bot lakor tipo pi yero nyime, ma pe openyo dog Rwot. Pienno omiyo Rwot oneke woko, ci okwanyo ker omiyo bot Daudi ma wod pa Yece. Lacen jo Icrael ducu gucokke bot Daudi i Kebron, ci guwacci, “Nen ba, wan aye wa cogo komi ki riŋo komi. I kare macon ca, wa i kare ma onoŋo Caulo aye kabaka ma loyowa, in yam itelo wi jo Icrael ka gicito ka lweny, idwokowa paco bene, Rwot Lubaŋani bene nene owaco boti ni, ‘In aye ibibedo lakwa lwakka jo Icrael, dok ibibedo laker ma loyogi.’ ” Kit meno ludoŋo pa jo Icrael ducu gubino bot kabaka i Kebron. Kabaka Daudi oketo gicikke kwedgi i Kebron i nyim Rwot, ci guwiro Daudi obedo kabaka ma lo yo jo Icrael, kit ma yam Rwot oloko ki i dog Camuel. Daudi ki jo Icrael ducu gucito i Jerucalem, ma en aye Jebuc, ka lweny i kom jo Jebuc ma gibedo i lobo kunnu, Jo ma gibedo i Jebuc onoŋo guwaco bot Daudi ni, “In pe ibidonyo kany.” Ento Daudi ocito omayo gogo me Cion woko, ci odoko gaŋ kalle. Daudi owacci, “Dano ma bikwoŋo neko jo Jebuc, en aye bibedo ladit ma lawimony.” Ci Joab wod pa Ceruya okwono ito kunnu ci en odoko laditgi. Daudi ocako bedo i cel gogo, mumiyo gilwoŋo ni, Gaŋ kai pa Daudi. Daudi ogero gaŋ madit orumo woko likiŋ, cakke ki i Millo; Joab ogero odi mukene ma i gaŋ ma yam oballe. Daudi omedde odoko dit twatwal, pien onoŋo Rwot me mony aye tye kwede. Magi gin aye ludito ki i kin twoni oteka lweny pa Daudi, jo ma yam gumiyo kony matek i kerre, kacel ki jo Icrael ducu, ci guketo en me bedo kabaka, kit ma onoŋo Rwot yam oloko i kom Icrael. Man aye lok kom twoni oteka lweny pa Daudi: Jacobeam ma jo Kakmon en aye ladit pa jo adek-ki; en yam okato ki toŋŋe i kom jo miya adek, ci onekogi woko ducu lawaŋacel. Ŋat ma lubo en ki i kin twoni oteka rweny acel-ki en aye Eleajar wod pa Dodo ma jo Akoki. En obedo kacel ki Daudi i Pac-dammim i kare ma jo Piliciti gucokke ka lweny kunnu. Poto onoŋo tye kunnu ma cayiri ocek iye mabup, ci lwak ocako riŋo woko ki i nyimjo Piliciti. Ento en ocamo co ci ocuŋ i dye poto pi laro, ocako neko jo Piliciti, ci Rwot olarogi ki loc madit twatwal. Jo adek ki i kin ludito pyeradek-ki gulor piny wa i got ka ma Daudi bedo iye i boro Adullam; onoŋo mony pa jo Piliciti ogony i nota Repaim. I karenu onoŋo Daudi tye i kakannene, ki cel gogo pa Lupiliciti onoŋo tye i Beterekem, Daudi oloko ki miti madwoŋ ni, “Kono ŋatti mo ocito ka twomo pii ki i wan it Beterekem ma tye cok ki dog gaŋ ca, omiya amati, kono ber mada!” Ci twoni lweny adek-ku gucito gubaro dye gony pa jo Piliciti, gutwomo pii ki i wan it Beterekem ma tye cok ki dog gaŋ ca, ci gukelo bot Daudi. Ento Daudi pe omato; otiŋo oliyo piny i nyim Rwot pi gityer amata, kun wacci, “Pe obed kumeno ki i nyim Lubaŋana, an pe myero atim kit man. An aye dok amato remo pa jo-ni? Pien gukelo pi dyero komgi.” En aye lok mumiyo pe omato pii meno. Twoni lweny adek-ku yam gutimo kit meno. Abicai omin Joab onoŋo ladit i kin jo pyeradek-ki. Otiŋo toŋŋe olwenyo i kom jo miya adek ci onekogi woko ducu, ma omiyo nyiŋe oywek ma mito rom ki jo adek ca. Pienno olimo yweka madit ki i kom jo pyeradek-ki, ci odoko ladit wi monygi; ento pe olimo rwom pa jo adek ca. Ki Benaya wod pa Yekoyada obedo twon oteka ma i Kabjeel, latim gin madito; en oneko awobe aryo ma gin twoni labwor me Moab. En bene olor odonyo i bur ci oneko iye labwor i kare ma pee ocwer mapek, Ka dok oneko Laejipt mo, dano ma kome pek ma borre romo futi abiro ki nucu. Laejipt meno onoŋo tye ki toŋŋe i ciŋe ma rom ki rii yat lacwe boŋo; ento en Benaya ocito bote ki odoone, ci oyuto toŋ woko ki i cin Laejipt, ka oneke kwede woko ki toŋŋe-nu. Benaya wod pa Yekoyada otimo gin madito kit meno, omiyo nyiŋe olimo yweka madit ma mito rom ki twoni lweny adek-ki. Nyiŋe oywek i kin jo pyeradek-ki, ento pe olimo rwom pa jo adek ca. Daudi oketo en obedo ladit pa jo ma gwoko en kabaka. Twoni oteka lweny ma i kin lumony gin aye Acael ma omin Joab, Elkanan wod pa Dodo me Beterekem, Camot me Karod, Kelej ma jo Palti, Ira wod pa Ikec me Tekoa, Abiejer me Anatot, Cibekai ma Lakucat, Ilai ma jo Akoki, Makarai me Netopa, Keled wod pa Baana me Netopa, Itai wod pa Ribai me Gibea pa jo Benjamin, Benaya me Ptraton, Kurai ma bedo i nota ora me Gaac, Abiel me Arba, Ajimavet me Bakarum, Eliaba me Caalbon, Kacem ma jo Gijon, Yonacan wod pa Cage ma jo Karar, Akiam wod pa Cakar ma jo Karar, Elipal wod pa Ur, Keper ma jo Mekerat, Akija ma jo Pelon, Kejero me Karmel, Naarai wod pa Eiibai, Joel omin Natan, Mibkar wod pa Agri, Jelek ma jo Ammon, Nakarai me Beerot ma latin jami lweny pa Joab wod pa Jeruya, Ira ma jo Itri, Gareb ma jo Itri, Uria ma jo Kit, Jabad wod pa Aklai, Adina wod pa Cija ma jo pa Reuben, ma ladit i kin jo pa Reuben, en aye obedo ki jone pyeradek bene; Kanan wod pa Maaka ki Yocapat ma Lamitini, Ujia ma jo Acitera, Cama ki Jeyel ma awobe pa Ketam me Aroer, Jediael wod pa Cimri ki ominne Joka, ma Latiji, Eliel ma jo Makavi, ki Jeribai ki Jocavia ma awobe pa Elnaam, ki Itima ma jo Moab, Eliel ki Obed, ki Jaciel ma jo Mejoba. Jo magi yam gubino bot Daudi i Jiklag, i kare ma piny odiyo ma doŋ pe twero wot ka mo pi Caulo wod pa Kic; gin aye onoŋo gitye i kin twoni oteka ma gubedo ka konye i lweny. Gin wegi atum; gin yam gicelo atero nyo gibayo kidi kadi ki ciŋgi ma lacuc ki lacam bene. Gin onoŋo jo pa Benjamin, ma i kaka pa Caulo-gi. Laditgi obedo Akiejer, ka dok Yoaci gin aryo ducu litino pa Cema me Gibea; ka dok Jejiel ki Pelet ma awobe pa Ajimavet; ki Beraka, Yeko me Anatot. Icmaya me Gibeon, twon oteka ma i kin jo pyeradek ca, en ladit ma loyo jo pyeradek-ku; Jeremia, Jakajiel, Yokanan, Jojabed me Gedera, Elujai, Jerimot, Bealia, Cemaria, Cepatia ma jo Karup; Elkana, Icia, Ajarel, Joejer ki Jacobeam, ma gin jo pa Kora, ki Joela ki Jebadia, gin awobe pa Jerokam me Gedor. Oteka ma guŋiyo ki lweny ma i kin jo pa Gad gugwarre gucito bot Daudi i kakannene ma i tim, oyi ta ma giŋeyo lweny ki kwot ki toŋ, ma wangi nen calo wan labwor, ma gidwir calo til ma i godi. Gin ene: Ejer ma laditgi, me aryone Obadia, me adekke Eliab, me aŋwenne Micimana, me abicce Jeremia, me abicelle Atai, me abirone Eliel, me aborone Yokanan, me aboŋwenne Elijabad, me aparre Jeremia, me apar wiye acelle Makibanai. Jo Gad magi ducu gin ludito ma loyo mony; ludito matinone giloyo jo miya, ki maditone loyo jo alip. Magi gin aye jo ma yam guŋolo Jordan i dwe mukwono, i kare ma onoŋo piine opoŋ woko Libyeny nio wa i tura ci guryemo jo ma gitye i nota ducu, ma yo tuŋ wokceŋ ki yo tuŋ potoceŋ. Ka dok jo pa Benjamin mogo, ki pa Juda, gubino bot Daudi i kakannene. Daudi okato woko ka jolo wigi, kun waco botgi ni, “Ka ce wubino bota ki cwiny me wat pi konya, ci abibedo kwedwu ki yomcwiny. Ento ka ce wubino ka umo waŋa wek wumiya bot lumerokka, kadi bed an cwinya leŋ, ci Lubaŋa pa kwarowa myero onen ci oŋol gire.” Ci Cwiny pa Lubaŋa obino i kom Amacai, ma en aye ladit pa jo pyeradek ca, ci owacci, “Wan wa lwakki, in Daudi, wabibedo kwedi, in wod pa Yece. Kuc, kuc obed kwedi, kuc bene obed i kom lukony in! Pien Lubaŋani aye tye ka konyi.” Daudi ojologi, ci oketogi gubedo ludito me buca monnye. Jo pa Manace mogo gulokke bot Daudi i kare ma obino ki jo Piliciti ka lweny i kom Caulo. Kadi bed kumeno en pe omedo ki konyogi pien ludito pa jo Piliciti guyubo lok i kome, ci guryeme woko, kun giwacci, “Ka ce bidok bot laditte Caulo, ci doŋ wato oke.” Jo pa Manace ma gudonyo bote i kare ma en cito i Jiklag gin ene: Adina, Jojabad, Jediael, Mikael, Jojabad, Eliu ki Jiletai, ma gin aye ludito ma loyo jo alip ma i Manace. Gukonyo Daudi ki lweny i kom buca mony pa luyak; pien onoŋo gin ducu twoni oteka lweny ma ludito me mony, Dano gibino ka konyo Daudi nino ki nino, nio ka gudoko cwar mony madit, ma rom ki mony pa Lubaŋa. Magi gin aye wel dul buca mony ma guruko lweny ma yam gubino bot Daudi i Kebron pi dwoko ker pa Caulo i ciŋe, kit ma yam Rwot owaconi. Jo pa Juda ma wegi kwot ki toŋ onoŋo giromo alip abicel ki miya aboro ma guruko lweny. Ki jo pa Cimon ma twoni oteka lweny alip abiro ki miya acel. Jo pa Levi alip aŋwen ki miya abicel. Ka dok Yekoyada ma loyo jo me ot pa Aron obino ki jo alip adek ki miya abiro. Jadok latin awobi ma twon oteka obino ki ludito wi mony pyeraryo wiye aryo ma i dog ot pa wonne kikome. Jo pa Benjamin ma lukaka pa Caulo gubino ma romo alip adek; jo mapol ki i komgi yam gubedo ka cwako kor ot pa Caulo nio wa i kare meno. Jo pa Epraim gubino ma romo alip pyeraryo ki miya aboro, ma gin oteka lweny ma nyiŋgi oywek i dog odi pa kwarogi. Jo ma i nucu kaka pa Manace gubino ma romo jo alip aboro ma giyerogi ki nyiŋgi wek gubin ka keto Daudi kabaka. Jo pa Icakar, jo ma onoŋo giŋeyo kare dok giŋeyo gin ma myero Icrael oti, gubino ki ludito miya aryo ki lukakagi ducu ma i te locgi. Jo pa Jabulon gubino ki jo ma gunyebbe ki lweny ma romo alip pyerabic, ma gurukke pi lweny ki jami lwenygi ducu pi konyo Daudi ki cwinygi acel. Jo pa Naputali gubino ki ludito wi mony ma romo alip acel ma gitye ki danogi alip pyeradek wiye abiro ma gutiŋo kwot ki toŋ. Jo pa Dan gubino ki jo alip pyeraryo wiye aboro ki miya abicel ma guyubbe pi lweny. Jo pa Acer gubino ki jo ma gunyebbe ki lweny ma romo alip pyeraŋwen, ma doŋ guyubbe pi lweny. Jo pa Reuben, jo pa Gad ki nucu kaka pa Manace ma gua loka Jordan gubino ma romo alip miya acel ki pyeraryo ma gurukke ki jami lwenygi ducu. Lulweny magi ducu gurwayo ma guryeyo kikore, gubino kwede wa i Kebron ki cwiny mukemo keto Daudi kabaka ma loyo Icrael ducu; kit meno jo Icrael ducu mudoŋŋe gubedo ki cwiny acel me keto Daudi kabaka. Ci gubedo ki Daudi kunnu pi nino adek kun gicamo, gimato bene, pien onoŋo utmegigi gutyeko yubbe pigi. Dok jo ma gicok kwedgi bene, ma gua wa ki i lobo Icakar ki Jabulon ki Naputali gucom ki cam ma giketo i wi kana, ki kinaga, ki kana madito ki twoni-gu; gukelo lwak moko kwon madwoŋ, ki poki otini, ki dog tuga olok mutwo-gu, ki koŋo vino, ki moo-gu, ki twoni ki romi, pien onoŋo yomcwiny tye i Icrael. Daudi yam oyubo lok ki ludito ma loyo buca mony me jo alip ki buca mony me jo miya, ki ludito ma i dul acel acel. Ci Daudi oloko ki kacokke pa jo Icrael ducu kun wacci, “Ka ce bedo ber botwu, ma Rwot Lubaŋawa bene mito, ci wacwalu kwena orom kin utmegiwa ma gudoŋ i lobo Icrael ducu, kacel ki ajwagi ki Lulevi ma i gaŋi ma gitye ki lobo me kakwatgi, wek gubin gucokke kacel botwa. Ka wek doŋ wakelu canduk pa Lubaŋawa botwa, pien i kare pa Caulo yam watenyo woko ata.” Ci kacokke ducu oye ni gitim kit meno, pien lokke onen atir bot lwak ducu. Daudi ocoko jo Icrael ducu cakke ki i Cikor ma i Ejipt nio wa i yo ma donyo i Kamat, pi kelo canduk pa Lubaŋa ki i Kiriat-jearim. Daudi ki jo Icrael ducu gucito i Baala, ma en aye Kiriat-jearim ma tye i Juda, ka omo canduk pa Lubaŋa woko ki kunnu, en aye canduk ma gilwoŋo ki nyiŋ Rwot ma bedo i wi komker malo ka wi lukerubi. Ci gutiŋo canduk pa Lubaŋa i wi gadigadi manyen, gukelo woko nia ki i ot pa Abinadab, ci Uja ki Akio gubedo ka Leko twoni ma ywayo gadigadi. Daudi ki jo Icrael ducu gubedo ka yarre ki myel ki yomcwiny i nyim Lubaŋa ki kero komgi ducu, ki wero wer-gu, ki goyo opuk-gu ki nana-gu ki ajaa-gu, ki atego agoya-gu ki tum-gu. Ka guo i laro moyo pa Kidon, Uja ocwalo cine pi mako kom canduk, pien onoŋo twoni gucato. Ci kiniga omako Rwot i kom Uja, ci oneke woko pien onoŋo oketo ciŋe i kom canduk; oto woko kunnu i nyim Lubaŋa, Ci kiniga omako Daudi, pien Rwot otugge i kom Uja; mumiyo kabedo-nu gilwoŋo ni Perej-uja nio wa onyoo. Daudi obedo ki lworo i kom Lubaŋa i nino meno; owacci, “Abikelo canduk pa Lubaŋa wa paco bota niŋniŋ?” Kit meno omiyo Daudi pe otero canduk wa i gaŋ kal pa Daudi, ento onak kwede woko i ot pa Obed-edom ma jo Gat. Canduk pa Lubaŋa obedo i ot pa Obed-edom pi dwe adek; ci Rwot omiyo gum ‘bot Obed-edom ki jone ducu. Kiram kabaka me Turo yam ocwalo kwena bot Daudi, kun miyo bao yat cedar ki lupa-godi bene ki lupa-bao me gero ot pa Daudi. Omiyo Daudi oniaŋ ni Rwot otyeko moko en me bedo kabaka ma loyo Icrael, dok ni otyeko miyo kerre obedo ki deyo madwoŋ pi pilo wi jone jo Icrael. Daudi dok omedde ki nyomo mon i Jerucalem, ci onywalo awobe ki anyira mukene. Magi aye nyiŋ litino ma onywalogi i Jerucalem. Camua, Cobab, Natan, Solomon, Ibar, Elicua, Elpelet, Noga, Nepeg, Japia, Elicama. Beeliada ki Elipelet. Ka jo Piliciti guwinyo ni Daudi doŋ gityeko wire odoko kabaka ma loyo jo Icrael ducu, ci jo Piliciti ducu gucito ka yenyo Daudi; ento Daudi owinyo pigi, okato woko ka lweny i komgi. Onoŋo jo Piliciti gubino gumonyo nota Repaim. Daudi ocako penyo dog Lubaŋa ni, “Ber acit ka lweny i kom jo Piliciti? Ibimiyogi i ciŋa?” Rwot ogamo doge ni, “Citi, abimiyogi i ciŋi.” Daudi ocito wa i Baal-perajim, ci oloyogi kunnu, ci owacci, “Lubaŋa otyeko baro dye lumerok woko ki ciŋa, macalo lalele mucorre.” Mumiyo nyiŋ kabedo meno gilwoŋo ni, Baal-perajim. Jo Piliciti gutenyo cal jogigi kenyo, ci Daudi ociko pi wanogi woko. Jo Piliciti dok gudwogo gumonyo nota meno. Ka Daudi dok openyo dog Lubaŋa, ci Lubaŋa ogamo ni, “Pe ibicito i komgi atir. Wot iman ŋegi ci ipot i komgi ki ka ma okemo yadi owak. Ka ce iwinyo kor tyen dano ma gitye ka wot lirukruk ma winnye wa i wi yadi owak, ci doij icit ka lweny, pien Lubaŋa doŋ obetelo nyimwu pi neko mony pa jo Piliciti woko.” Daudi otiyo kit ma Lubaŋa ocike kwede, ci guneko mony pa jo Piliciti nia ki i Gibeon nio wa i Gejer. Nyiŋ Daudi oywekoromo lobo ducu, ci Rwot omiyo lworo omako rok ducu i kom Daudi. Daudi ogero odine i gaŋ kai pa Daudi, ci oyubo kabedo pi canduk pa Lubaŋa, ocako guro kema pire. Daudi dok owacci, “Dano mukene pe bitiŋo canduk pa Lubaŋa, ento Lulevi keken, pien Rwot yam oyerogi pi tino canduk pa Rwot ki pi tiyo bote matwal.” Daudi ocoko jo Icrael ducu otorogi i Jerucalem, pi kelo canduk pa Rwot i kabedone ma yam oyubo pire. Ci Daudi ocoko litino awobe pa Aron ki Lulevi kacel, gin ene: i kin likwayo pa Kokat, Uriel ma laditgi, kacel ki utmegine miya acel ki pyeraryo; i kin likwayo pa Merari, Acaya ma laditgi, kacel ki utmegine miya aryo ki pyeraryo; i kin likwayo pa Gercon, Joel ma laditgi, kacel ki utmegine miya acel ki pyeradek; i kin likwayo pa Elicapan, Cemaya ma laditgi, kacel ki utmegine miya aryo; i kin likwayo pa Kebron, Eliel ma laditgi, kacel ki utmegine pyeraboro; i kin likwayo pa Ujiel, Aminadab ma laditgi, ki utmegine miya acel ki apar wiye aryo. Daudi dok olwoŋo ajwagi Jadok ki Abiatar, ki Lulevi magi, Uriel, Acaya, Joel, Cemaya, Eliel ki Aminadab, ci owaco botgi ni, “Wun aye ludito kaka ma i dog odi pa kwarowu ma jo pa Levi; wulonnye kekenwu wubed maleŋ, wun kacel ki utmegiwu, wek wukel canduk pa Rwot, Lubaŋa pa Icrael, i kabedo ma atyeko yubone pire. I kare mukwono ca onoŋo Rwot Lubaŋa otugge i komwa, pien pe wun aye onoŋo wutino i kare-nu, pien pe yam wapenyo doge i kit ma cik mito.” Kit meno ajwagi ki Lulevi gulonnye kekengi pi kelo canduk pa Rwot, Lubaŋa pa Icrael. Lulevi gucako tiŋo canduk pa Lubaŋa, gulebo ki talle i wi gwokgi, kit ma yam Moses ocikogi kwede, macalo Rwot owaco. Daudi dok ociko ludito pa Lulevi pi yero utmegigi wek gubed luwer ma gibigoyo jami wer maloŋo, naŋa ki opuk ki atego agoya-gu, me tino dwan malo ki yomcwiny. Kit meno Lulevi gucako yero Eman wod pa Joel, ka dok Acap wod pa Berekia ki i kin utmegine. I kin likwayo pa Merari guyero utmegigi magi, Etan wod pa Kucaya; ka dok guyero utmegigi ma i dul me aryo, gin aye Jekaria, Jajiel, Cemiramot, Jekiel, Uni, Eliab, Benaya, Maaceya, Matitia, Elipeleku ki Mikneya, ki lugwok-doggola Obed-edom ki Jeyel. Luwer magi Eman, Acap ki Etan ticgi obedo me goyo atego mola; Jekaria, Ajiel, Cemiramot, Jekiel, Uni, Eliab, Maaceya ki Benaya ticgi obedo me goyo nana i kit me Alamot; ento Matitia, Elipeleku, Mikneya, Obed-edom, Jeyel ki Ajajia gin ticgi obedo me telo wer ki opuk i kit me Ceminit. Kenania, ma en aye latelwer pa Lulevi, ticce me nyuto kit me wer pien en aye niaŋ maber. Berekia ki Elkana yam gin lugwok-doggola me canduk pa Lubaŋa, Cebania, Jocapat, Netanel, Amacai, Jekaria, Benaya ki Eleajar, ma gin ducu ajwagi, ticgi me kuto tum i nyim canduk pa Lubaŋa, Obed-edom ki Jekia gin bene gubedo lugwok-doggola me canduk pa Lubaŋa. Kit meno Daudi ki ludoŋo pa jo Icrael, ki ludito ma loyo jo alip, gucako wot me omo canduk me gicikke pa Rwot nia ki i ot pa Obed-edom ma cwinygi yom matek. Gucako tumo twoni abiro ki nyogi romi abiro, pien Lubaŋa okonyo Lulevi ma gutiŋo canduk me gicikke pa Rwot. Daudi onoŋo orukke ki jor me camanini maberre, macalo Lulevi ducu ma gutiŋo canduk pa Lubaŋa, kacel ki luwer, ki Kenana ma latel-wer pa luwer ducu; Daudi onoŋo otweyo pyere ki epod me camanini. Yam jo Icrael ducu gukelo canduk me gicikke pa Rwot kit meno, ma giwayo ma rwatte ki koko bila, ki tum, ki atego agoya-gu, kun giwero ki nana ki opuk-gu maloŋo. Ka canduk me gicikke pa Rwot obino wa i gaŋ kai pa Daudi, ci Mikal ma nya pa Caulo obolo wane woko ki i wan dirica oneno kabaka Daudi ka myelo ma cwinye yom, ci obedo ka cayo en ki i cwinye. Gukelo canduk pa Lubaŋa wa paco, gucibo i kema ma yam Daudi oguro pire; gucako tyero gitum awaŋa ki gityer lakwecwiny i nyim Lubaŋa. Ka Daudi otyeko tyero gitum awaŋa-gu ki gityer lakwecwiny, ci ocako lamo gum i kom lwak i nyiŋ Rwot. Lacen ocako poko jami ki jo Icrael ducu, co wa ki mon; dano acel acel gimiye mugati acel, ki riŋo anida, ki poki olok mutwone. Dok oketo Lulevi mogo pi bedo lutic i nyim canduk pa Rwot, pi lwoŋo nyiŋ Lubaŋa, pi pwoyo en ki pi pako Rwot, Lubaŋa pa Icrael. Acap aye laditgi, ki me aryone ma lube obedo Jekaria, Jeyel, Cemiramot, Jekiel, Matitia, Eliab, Benaya, Obed-edom ki Jeyel, gin aye lugo nana ki opuk. Acap onoŋo goyo atego agoya, ki Benaya ki Jakajiel ma ajwagi gin aye lukut tum teretere i nyim canduk me gicikke pa Rwot. I kare meno en aye nino ma Daudi okwono ciko ni Acap ki utmegine gubed ka wero wer me pwoyo Rwot, kit man: Wumi pwoc bot Rwot, wulwon nyiŋe, wumi ticce oneŋe i rok ducu! Wuwer bote wer me pako en, wutit ticce me aura ducu! Wuket deyo i kom nyiŋe maleŋ; jo ma yenyo Rwot cwinygi obed yom! Wubin bot Rwot wek wunon tek ki bote, wubed i nyime nakanaka. Wupo kom tic me aura ma en otiyo ducu, ginaura ma yam otiyo ki kop ma oŋolo, wun likwayo pa Abraim ma yam laiicce, wun litino pa Yakobo ma en oyerowu. En aye Rwot Lubaŋawa; kop ma en oŋolo romo i lobo ducu. En cwinye omoko i kom gicikkene ma bedo nakanaka, i kom lok ma yam ociko, pi yatwak alip ki alip, en gicikke ma oketo ki Abraim, ki lok ma yam okwoŋo ki Icaka, ma omoko odoko cik bot Yakobo, wek obed gicikke ki Icrael matwal, kun wacci, “Abimiyo lobo Kanaan botwu, obed lobo me aleyawu.” I kare ma pud gin nok, ma welgi tidi, ma pud gin lubedo i lobo-nu, ma giwirre i kin rok mapatpat, ma gia i te ker acel, gikobo i rok mukene, Lubaŋa pe oye ŋat mo odiyogi; ojuko luker mapol pigi kun wacci, “Pe wugud kom jo ma an awirogi, pe wutim lunebina marac!” Wuwer bot Rwot, wun lobo ducu! wutit pi larre nino ducu. Wutuc deyone bot lurok, wutit ticce me aura bot rok ducu! Rwot aye dit, myero gipake twatwal, myero gilwore makato lubaŋa mukene-gu ducu. Pien lubaŋa pa lurok ducu gin cal jogi apaya, ento Rwot aye oketo polo. Deyo ki dit tye bote, tek ki yomcwiny tye ka ma en bedo iye. Wun kaka me rok ducu, wumi deyo bot Rwot, wumi deyo ki tek bot Rwot! Wumi deyo bot Rwot muporo nyiŋe; wukel gityer, wubin wa i nyime! Wuwor Rwot ki boŋo maleŋ; komwu omyel i nyime, wun lobo ducu; ada, lobo ocuŋ matek ma pe yeŋŋe. Polo iye obed yom lobo bene obed ma cwinye yom, dano guwac i kin lurok ni, “Rwot tye ka loc!” Wek nam omor, ki gin mupoŋ iye, poto bene oum, ki jami ducu ma tye iye! Yadi ma i buŋa ducu gibiwer ki yomcwiny i nyim Rwot, pien obebino ka ŋolo kop i kom lobo. Wumi pwoc bot Rwot, pien en ber; mar mere ma pe lokke bedo nakanaka! Wuwac bene ni, “Larwa, ai Lubaŋa lalarwa, icokwa ci ilarwa ki i kin lurok, wek wapwo nyiŋi maleŋ, waum ka wapaki. Gipwo Rwot, Lubaŋa pa Icrael, nia con ki con nio nino ma pe tum!” Lwak ducu gugamo ni, “Amen!” ci gupako Rwot. Daudi oweko Acap ki utmegine i nyim canduk me gicikke pa Rwot wek gubed ka tic kunnu i nyim canduk pa Rwot kit ma mitte kwede i nino acel acel, ka dok Obed-edom ki utmegine pyerabicel wiye aboro, kun Obed-edom wod pa Jedutun ki Koca gubedo lugwok-doggola. Dok oweko ajwaka Jadok ki utmegine ma gin ajwagi wa i nyim kema pa Rwot i ka woro Lubaŋa i wi got ma tye i Gibeon, pi tumo gitum awaŋa bot Rwot i wi keno tyer me gitum awaŋa, kun lubo lok ducu ma gicoyo i cik pa Rwot ma yam ociko ki io Icrael. Ki Eman ki Jedutun gunywako tic kwedgi, kacel ki jo mukene ma yam giyerogi ki nyiŋgi pi miyo pwoc bot Rwot pi mar mere ma bedo nakanaka. Eman ki Jedutun onoŋo gitye ki tura ki atego agoya pi wer agoya, ki jami agoya mukene ma gigoyo i kare me wero wer maleŋ, Litino awobe pa Jedutun yam giketogi pi gwoko doggola ot pa Rwot. Ci lwak ducu guket, dano acel acel odok i ode, ki Daudi bene odok i pacone ka lamo gum i kom jone. I kare ma doŋ Daudi obedo i ode, ocako waco bot lanebi Natan ni, “Nen ba, an doŋ abedo i ot baorcedar, ento canduk me gicikke pa Rwot pud bedo i kema.” Ci Natan odok Iye bot Daudi ni, “Tigin ducu ma tye i cwinyi, pien Lubaŋa tye kwedi.” Ento i dyewor acel-lu lok pa Rwot dok obino bot Natan ni, “Cit icitit bot laticca Daudi ni Rwot owaco kuman ni, ‘In pe ibigerra ot me bedo. Pien peya abedo i ot mo nia wa i kine ma atelo iye wi Icrael nio kwede wa onyoo-ni, ento abedo ka kobo nia ki i kema man nio wa i kema mukene, ki nia ki i kabedo man nio wa i kabedo mukene. Kabedo ducu ma abedo ka wirre iye ki jo Icrael ducu, an yam koŋ aloko lok mo bot luŋolkop me Icrael ma yam acikogi pi kwayo lwakka kun awacci, “Piŋo pe koŋ wugerra ot mo me bao cedar?’ ” Koni doŋ ibiwaco ki laticca Daudi ni, ‘Rwot me mony owaco kuman ni, an yam akwanyi ki kakwat i olet, ka ma ibedo ka leko iye romi, wek ibed laker ma loyo jona jo Icrael; dok abedo ka loŋŋe kwedi i kabedo ma icito iye ducu, abedo ka jwero lumerokki woko ki i nyimi. Dok abimiyo nyiŋi ywek, ma rom ki nyiŋ jo madito ma i wi lobo-ni. Dok abimiyo kabedo ki jona jo Icrael; ci abiketogi iye, wek doŋ gubed i kabedogi kikome, ma pe doŋ giyelogi matwal, wa lulweny magwa bene pe dok bipoto i komgi i kare mo, kit ma con ca, ma nia wa i kare ma con aketo luŋolkop ma guloyo jona jo Icrael; ci abitayo lumerok meri ducu. Ento atucci ni. Rwot bimiyo odi bedo madit. Ka kareni oromo me yweyo kacel ki kwarini, ci abiketo lakwaru mo ma bilubi bedo dit, ma ŋat acel i kom likwayi kikomi, ci abimoko kerre bedo matek. En aye bigerra ot, an abimoko komkerre bedo matwal. Abibedo wonne, ki en bibedo woda; pe abikwanyo mar mera ma pe lokke ki i kome, kit ma yam akwanyo ki i kom ŋat mutelo nyimi-ni. Ento abimoko en i oda ki i kerra matwal; ki komker mere bene bimoko matwal.’ ” Natan otito bot Daudi kit lok magi ducu, ki kit ginanyuta ma onen bote ducu. Lacen Kabaka Daudi ocito obedo piny i nyim Rwot, ci owacci, “Ai Rwot Lubaŋa, an aŋa, oda kono gin aŋo, mumiyo ikonya nio wa onyoo-ni? Pud ibwono kony man ni tidi ki tuŋ boti, ai Lubaŋa; ibedo ka lok i kom oda kit ma bibedo kwede pi kare malac ma tye anyim, dok inyutta bene likwaya ma anyim, ai Rwot Lubaŋa. An Daudi dok abiwacci kit lok aŋo i kom deyo ma imiyo bota? Pien in ineya, an ma abedo laticci-ni. Pira keken, ai Rwot, dok pi cwinyi giri keni, omiyo itiyo gin madito magu ducu, pi miyo gin madito ducu ma kit man onene. Pe tye ŋatti mo macalo in, ai Rwot, dok pe tye Lubaŋa mo, kono in keken, kit ma yam wawinyo ki itwa-ni. Rok mene ma wi lobo ma rom ki joni jo Icrael, ma yam Lubaŋa ocito ka kokogi wek gubed jone, wek nyiŋi oywek pigi, pi tiyo gin madito ma miyo dano lworo, ki pi ryemo rok mapol kacel ki lubaŋagi i nyim lwakki, ma yam in ikokogi ki i Ejipt? In ityeko miyo lwakki jo Icrael gudoko joni nakanaka; dok in, ai Rwot, yam idoko Lubaŋagi, Ai Rwot Lubaŋa, kombeddi doŋ imok lok meri ma yam iwaco i koma ki i kom jo ma i oda matwal, ci doŋ itim kit ma ityeko waco-ni, Mok lok ma iwaco-ni, wek nyiŋi obed me adwora nakanaka kun giwacci, ‘Rwot Lubaŋa me mony, Lubaŋa pa Icrael, en aye Lubaŋa ma loyo Icrael,’ ki ot pa laticci Daudi bimoko i nyimi matwal. Pien in, Lubaŋa, ityeko nyuto bota ni ibimiyo oda bedo madit; mumiyo an laticci alimo tekcwiny me kela lega man i nyimi. Ai Rwot, in aye Lubaŋa, ci in doŋ ityeko cikke me timo gin man maber pira. Pi meno, mi gum i kom dano ma i oda ki yomcwiny, wek likwaya gumedde ameda ki bedo i nyimi nakanaka; pien gin ma in imiyo gum, gumme bedo nakanaka, ai Rwot.” Lacen Daudi dok otayo jo Piliciti, ocako loyogi, ci omayo Gat ki gaŋi matino ma i ŋete ki i ciŋ jo Piliciti. Daudi dok otayo jo Moab, ci jo Moab gudoko luticce, kun giculo mucoro bote. Daudi dok otayo Adadejer kabaka me Joba, ma yo tun Kamat, ma yam ocito ka cibo got me po en i dog kulu Euprate. Daudi omako gadigadi lwennye alip acel, ki wegi aguragura alip abiro, ki askari ma giwoto ki tyengi alip pyeraryo oŋolo odoŋ tyen aguraguragi ducu ma yam giywayo gadigadi Lwenygi, ento oweko mogo manok odoŋ ma romo ywayo gadigadi miya acel. Ka jo Ciria me Damaciko gubino ka konyo kor Adadejer kabaka me Joba, Daudi oneko jo Ciria alip pyeraryo wiye aryo. Daudi oketo lumony i cel gogo i lobo Ciria ma i te loc me Damaciko; ci jo Ciria gudoko lutic pa Daudi, kun giculo mucoro bote. Rwot obedo ka miyo tek me bwoyo lobo bot Daudi ka ma yam ocito iye ducu. Daudi oyako lwak kwodi me jabu ma yam lwak pa Adadejer tinogi, ci oterogi i Jerucalem. Daudi oyako lwak mola mapol ki i gaŋi magi, Tibat ki Kun, ma onoŋo yam gaŋi pa Adadejer. Man aye mola ma yam Solomon otiyo kwede nam me mola, ki wir, ki agulu mola-gu. Ka cen Tou kabaka me Kamat owinyo ni Daudi otyeko tayo mony pa Adadejer woko ducu liweŋ, ci ocwalo wode Adoram bot kabaka Daudi ka mote, ki pi pwoyo en pi lweny i kom Adadejer ki pi loyo en woko; pien yam Adadejer obedo ka lweny ki Tou tyen mapol. Dok ocwalo lwak jami mapol me jabu, ki me ryal ki me mola-gu; jami meno bene kabaka Daudi yam odyerogi bot Rwot, kacel ki ryal ki jabu ma yam oyakogi nia ki i rok ducu, nia wa i lobo Edom, Moab, ki bot jo Ammon ki jo Piliciti ki jo Amalek. Dok Abicai wod pa Jeruya oneko jo Edom alip apar wiye aboro i nota me Kado. Ci oketo lumony i cel gogo i Edom; ci jo Edom ducu gudoko lutic pa Daudi. Rwot omiyo Daudi obwoyo lobo ka ma yam ocito iye ducu. Daudi oloyo jo Icrael ducu kit meno; obedo ka ŋolo kop atir dok kakare i kom lwakke ducu. Joab wod pa Jeruya obedo ladit me mony; ki Yekocapat wod pa Akilud obedo laco lok ma timme; Jadok wod pa Akitub ki Akimelek wod pa Abiatar gubedo ajwagi; Cavica obedo karan, ki Benaya wod pa Yekoyada obedo ladit ma loyo jo Keret ki jo Pelet; ki awobe pa Daudi gubedo ludito ma loyo tic pa kabaka. Ka man otum, Nakac kabaka pa jo Ammon oto woko, ci wode oleyo ka tyene, Daudi owacci, “Abinyuto cwiny me mar bot Kanun wod pa Nakac, kit ma yam wonne onyuto cwiny me mar bota-ni.” Mumiyo Daudi ocwalo lukwena bote ka kweyo cwinye pi to pa wonne, Lutic pa Daudi guo bot Kanun i lobo pa jo Ammon ka kweyo cwinye, Ento rwodi pa jo Ammon guwaco bot Kanun ni, “In itamo ni Daudi ocwalo lukwe cwinyi pi keto deyo i kom woru? Daudi mono pe ocwalo luticce ka ŋiyo piny, ki ka turo gaŋ, ki pi roto lobo ducu?” Kit meno omiyo Kanun omako lutic pa Daudi, ci olyelo yer tikgi, ka dok oŋolo dye boŋogi i kom pyergi, ka ocwalogi kwede woko; ci gucito. Ka gitito bot Daudi pi jo meno, ci ocwalo dano ka jologi, pien onoŋo gitye ki lewic madwoŋ twatwal. Ci kabaka owacci, “Koŋ wubed i Jeriko, nio ka yer tikwu otwi olot, ka doŋ wudwog kany.” Ka jo Ammon guneno ni pigi odoko ŋwe marac bot Daudi, ci Kanun ki jo Ammon gucwalo ryal ma romo talanta alip acel ka wilo gadigadi lweny ki wegi aguragura ki bot jo Mecopotamia, wa ki i lobo Arammaaka, ki i Joba. Ci guwilo gadigadi lweny alip pyeradek wiye aryo, ki kabaka me Maaka bene, ma onoŋo obino ki monnye, ogony i nyim Medeba. Jo Ammon bene gucokke ki i gaŋigi, gubino ka lweny. Ka Daudi owinyo pigi, ci ocwalo Joab kacel ki mony pa twoni oteka lweny ducu. Ci jo Ammon gubino gurwayo cok ka guryeyo i dog gaŋ; luker ma gubino guryeyo kengi, i dye bar. 403 Ka Joab oneno mony okace woko ryoryo, tuŋ nyime ki yo tuŋ ŋeye bene, ci oyero jo Icrael ma oyita lweny, ocako ryeyogi gukemo jo Ciria; oketo jo mudoŋŋe bot ominne Abicai, gin bene guryeyo gukemo jo Ammon. Joab owacci, “Ka ce jo Ciria gubedo tek i koma, ci ibikonya, ento ka jo Ammon aye gubedo tek i komi, an abikonyi. Bed oteka ma cwinye nwaŋ, wek walweny pi lutuwa, ki pi gaŋi pa Lubaŋawa, Rwot bene otim gin ma oneno ni ber.” Kit meno Joab ki jo ma gitye kwede ducu gurwayo cok ka lweny i kom jo Ciria; ci jo Ciria guriŋo woko ki i nyime. Ka jo Ammon guneno jo Ciria guriŋo woko, ci gin bene gucako riŋo woko ki i nyim Abicai omin Joab, gudonyo wa i gaŋ, Ci Joab obino i Jerucalem. Ento ka jo Ciria guneno jo Icrael guloyogi, gucwalo lukwena ci gukelo jo Ciria ma gitye loka Euprate, kacel ki Copak ma lawimony pa Adadejer ma latel wigi. Ka gitito pigi bot Daudi, ci en bene ocoko jo Icrael ducu oŋolo kwedgi kulu Jordan, ci obino i komgi, oryeyo monnye orwayo i komgi. Ka Daudi doŋ oryeyo monnye, orwayo kom jo Ciria, gucako lweny kwede. Jo Ciria gucako riŋo woko ki i nyim Icrael; Daudi oneko jo Ciria ma romo riŋo ki gadigadi lweny alip abiro, ki askari ma woto ki tyengi alip pyeraŋwen, ka dok oneko Copak ladit me monygi bene, Ka lutic pa Adadejer guneno jo Icrael gutyeko loyogi woko, ci guketo kuc i kingi ki Daudi, ci gudoko luticce. Kit meno jo Ciria pe dok gubedo ki miti me konyo jo Ammon i kare mo, I dog oro ma en aye kare ma luker gicito kwede ka mony, Joab ocako telo wi mony, guneko lobo pa jo Ammon woko, ka dok gubino gurumo gaŋ Raba. Ento Daudi yam odon i Jerucalem. Joab olwenyo i kom Raba, ci oloyo. Ci Daudi okwanyo lalukana me jabu ki i wi kabakagi; pekke romo ratili miya acel, got me wei bene onoŋo tye iye. Ci gicibo i wi Daudi. Dok okelo jami ma giyako i gaŋ meno madwoŋ twatwal. Dok okelo jo ma giyakogi ki i gaŋ meno, ci oketogi ka tic ki mucumeno ki cururu nyonyo ki latoŋ-gu, Daudi obedo ka timo jo ma i gaŋi pa jo Ammon ducu kit meno. Ci Daudi ki lwak ducu gucako dok cen wa i Jerucalem. Lacen lweny dok ocakke i kom jo Piliciti ma i Gejer; ci Cibekai ma Lakucat oneko Cipai woko, ma onoŋo en ŋat acel ma i kin likwayo pa twon oluma-ni; yam giloyo jo, Piliciti kit meno. Ka lweny dok ocakke i kom jo Piliciti; ci Elkanan wod pa Jair oneko Lami ma omin Goliac ma jo Gat, ma bol toŋŋe rom ki rii yat lacwe boŋo. Lweny dok obedo i Gat ka ma tye iye dano mo ma oputte mabor liwawo, ma tye ki nyig ciŋe abicel, ki nyig tyene bene abicel, tuŋ ryoryo ducu, ci nyig Lwete ducu romo pyeraryo wiye aŋwen; en bene yam lakwar twoni oluma-nu, Ka okatti ka nywaro jo Icrael ‘ki ŋala, ci Yonacan wod pa Cimea ma omin Daudi oneko en woko. Jo man gin likwayo pa twoni oluma ma i Gat; gin ducu Daudi kacel ki luticce gutyekogi woko, Catan ocuŋ ka lweny i kom Icrael, ocako piyo Daudi pi kwano wel jo Icrael. Kit meno Daudi owaco bot Joab ki ludito me mony ducu ni, “Wucit ka kwano wei jo Icrael, cakke ki i Beer-ceba nio kwede wa i Dan, ci wudwok lokke bota, wek aŋe welgi.” Ento Joab ojuko Daudi kun owaco ni, “Myero Rwot Lubaŋa aye omed wei lwak tyen miya kulu, kit ma doŋ gidwoŋ-ŋi! Pe gin ducu lwakki, rwoda kabaka, gin ducu luticci, rwoda. Ci piŋo imito lakit tim macalo man i Piŋo imito kela bal i kom Icrael?” Ento lok pa kabaka obedo tek makato pa Joab. Omiyo Joab oa ocito orumo lobo Icrael ducu, ka odwogo kwede cen i Jerucalem. Ka Joab ocako miyo wel lwak ma okwano-ni bot Daudi. Jo Icrael ducu ono ŋo giromo milion acel ki alip miya acel ma gin wegi pala lucwan, ki i Juda giromo alip miya aŋwen ki pyerabiro ma gin wegi pala lucwan. Ento Joab pe okwano wel jo pa Levi ki pa Benjamin, pien onoŋo cwiny Joab dag cik pa kabaka. Ento cwiny Lubaŋa pe obedo yom i kom lok meno; ocako neko jo Icrael. Ci Daudi ocako bako doge bot Lubaŋa kun waco ni, “Abalo twon bal mo madit pi gin ma doŋ atyeko tiyone. Kombeddi doŋ alegi, ikwany roc pa laticci woko; pien atimo lok man me miŋo twatwal.” Rwot ocako lok ki Gad, ma lanen pa Daudi, kun wacci, “Cit iciwac bot Daudi ni, ‘Rwot owaco kuman ni, Amiyi lok adek; in ikwany acel ki i kingi, wek ami opot i komi.’ ” Kit meno Gad obino bot Daudi ci otitte lok meno ni, “Rwot owaco kuman ni ‘Kwany acel ma imitone! Imito kec opot pi mwaka adek; nyo lumerokwu oryemwu pi dwe adek, kun ginekowu ki pala lucwan; nyo pala pa Rwot aye opot i loboni ki two gemo pi nino adek kulu, kun lamalaika pa Rwot neko jo ma i lobo Icrael tyeko woko ducu?’ In doŋ itam kit lok ma abidok kwede bot ŋat ma ocwala boti-ni.” Daudi owaco bot Gad ni, “An doŋ adonyo i twon can madit ma pe wacce; wek apot i cin Rwot, pien kicane dwoŋ; ento pe apot i cin dano.” Kit meno Rwot ocako cwalo two gemo opoto i kom Icrael; ci jo Icrael guto ma romo co alip pyerabiro. Ci Lubaŋa ocwalo lamalaika i kom Jerucalem pi tyekone woko; ento ka doŋ mito tyekone, ci Rwot oneno, ci onut i kom gin marac man, ci ojuko lamalaika ma lanek piny-nyi woko, kun wacci, “Man doŋ oromo, doŋ ikul ciŋi piny.” Lamalaika pa Rwot onoŋo ocuŋ i ŋet laro moyo pa Oman ma jo Jebuc. Ka Daudi otiŋo waŋe malo ci oneno lamalaika pa Rwot ocuŋ i kin lobo ki polo, kun ciŋe owoto pala lucwan otiŋo i kom Jerucalem. Ci Daudi ki ludoŋo ducu, gucako ruko boŋo cola, gupoto kwede piny aryeba cwiny. Daudi owaco bot Lubaŋa ni, “Pe an aye yam aciko pi kwano wel lwak? An aye yam abalo atyeko tiyo roc madit twatwal, ento lwak romi man, gutimo kit roc aŋo? Alegi ni, wek ciŋi opot i koma ki i kom ot pa kwara keken; pe iwek two gemo opot wa i kom lwakki.” Lamalaika pa Rwot dok ociko Gad ni owac ki Daudi wek ocit ka caŋo keno tyer pi Rwot i laro moyo pa Oman ma jo Jebuc. Daudi ocito kunnu pi lok pa Gad, ma onoŋo oloko kit ma Rwot ocike kwede. I kare-nu onoŋo Oman tye ka dino ŋano; ka olokke ci oneno lamalaika, awobene aŋwen ma yam gitye kwede gukanne woko. Ka Daudi woto cito bot Oman, ci Oman oneno; ka oneno Daudi ci oa ki i laro ocito bot Daudi, omiye woro kun oryebbe piny i nyime, Daudi owaco bot Oman ni, “Miya kabedo man me laro moyo wek acan iye keno tyer pi Rwot, miya awil pi welle kikome, wek two gemo oke woko i kom lwak.” Omao owaco bot Daudi ni, “Ber iter; wek in, rwoda kabaka, ityer iye gin ma ineno ni ber; nen amiyo twon me gitum awaŋa, ki opam ladin bel me yen, ki nyig ŋano me gityer me moko kwon; amiyogi ducu.” Ento kabaka Daudi ogamo dog Oman ni, “Pe kumeno, ento abiwilo i welle kikome; pe abityero jamini ma pe mera bot Rwot, pe abimiyo gitum awaŋa ma pe awilo ki Limma.” Kit meno Daudi ocako miyo bot Oman cekel me jabu miya abicel ma gipimo pekgi pi wilo kabedo-nu, Ci Daudi ocako caŋo keno tyer pi Rwot kunnu, ka otyero gitum awaŋa ki gitum lakwecwiny-gu, ocako lwoŋo iye nyiŋ Rwot, ci Rwot odok iye ki mac ma oa i polo ma obino i kom keno tyer me gitum awaŋa. Rwot ociko lamalaika, ci orwako pala lucwanne i akurane. Daudi oyero kabedo pi ot pa Lubaŋa I kare meno, ka Daudi oneno ni Rwot otyeko dokke iye ki i laro moyo pa Oman ma jo Jebuc, ci obedo ka tyero gitumme ducu kunnu. Pien kema pa Rwot ma Moses yam oti yo i tim, ki keno tyer me gitum awaŋa bene onoŋo pud gitye wa i kabedo me woro Lubaŋa i wi got ma tye Gibeon; ento Daudi yam pe cito kunnu ka penyo dog Rwot Lubaŋa, pien obedo ka lworo pala lucwan pa lamalaika pa Rwot. Daudi dok owacci, “Ot pa Rwot Lubaŋa bibedo kany, ki keno tyer me gitum awaŋa pi jo Icrael bene bibedo kany.” Daudi ociko pi coko lurok ma onoŋo gibedo i lobo Icrael, ci oketo lupa-godi ka yubo godi ma gipayogi mabeco pi gero ot pa Lubaŋa, Daudi dok okano lwak nyonyo madwoŋ me yubo mucumar pi guro kika me dog gaŋ, ki okol latwe bao, ki lwak mola madwoŋ ma pekke pe pimme, ki lwak bao cedar ma welle pe kwanne, pien jo Cidon ki jo Turo gukelo bot Daudi bao cedar madwoŋ twatwal. Pien Daudi yam owacci, “Latinna Solomon pud tidi, peya tye ki ŋec mo, dok ot ma gibigero pi Rwot myero obed me deyo makato ducu, wek ywekane ki deyone orom lobo ducu; mumiyo an aye ayubo kit gerone.” Pienne Daudi ocako yubo lwak jami madwoŋ twatwal ma pud kwo. Ka dok olwoŋo wode Solomon, ociko en pi gero ot pa Rwot Lubaŋa pa Icrael. Daudi owaco ki Solomon ni, “Woda, onoŋo abedo ki tam i cwinya pi gero ot mo pi nyiŋ Rwot Lubaŋa. Ento lok pa Rwot yam obino bota kun wacci, ‘In doŋ ityeko oyo lwak remo mapol, dok ibedo ka Lwenyo lweny madito-gu; pe ibigero ot mo pi nyina, pien ityeko oyo lwak remo madwoŋ i nyima ki i wi lobo. Nen ba, ibinywalo latin laco; en bibedo ki kuc, abimiye kuc ma lumerokke ducu pe gibiyele; pienno nyiŋe bibedo Solomon, dok abimiyo kuc ki yweyo bot Icrael i karene, En aye bigero ot pi nyiŋa, En bibedo woda, ki an abibedo wonne, dok abimoko komkerre bedo i Icrael matwal.’ Iyo latinna, Rwot obed kwedi, wek ityek gero ot pa Rwot Lubaŋani, kit ma yam oloko kwede i komi-ni. Atikane, Rwot aye myero omiyi ryeko ki niaŋ matut, wek ibed ka lubo cik pa Rwot Lubaŋani ka en doŋ omiyi dit me loyo Icrael. Dok ibilimo gum ka ce ibedo ka gwoko kit cik ducu ki ŋol ducu ma cen Rwot ociko ki Moses pi jo Icrael. Bed oteka ma cwinyi nwaŋ. Pe ilwor; cwinyi pe opoti. Nen an doŋ ayelle mada’ ci doŋ atyeko yubo jami magi pi ot pa Rwot: jabu ma romo talanta alip miya acel, ryal ma romo talanta milion acel, ki mola ki nyonyo ma pekke pe pimme, pien gidwoŋ twatwal; ka dok ayubo bao ki got-gu, In dok imed mu kene i komgi. Dok it ye ki lwak lutic mapol: I upa-godi, lugedo ki godi, lupac ki ludiro tic ducu ma welgi pe kwanne, ki jo ma gikwiri i ticgi, ma gitiyo ki jabu, ki ryal-gu, ki mola ki nyonyo-gu, Doŋ ia malo icak tic cut! Rwot “obed kwedi.” Daudi dok ociko ludito ma i Icrael ducu pi konyo wode Solomon kun wacci, “Rwot Lubaŋa tye kwedwu? Dok pe en aye omiyowu kuc i kabedo ducu? En aye otyeko miyo wegi lobo-ni i ciŋa; dok lobo doŋ gitayo ki i nyim Rwot ki i nyim lwakke. Iyo, kombeddi doŋ wuket tamwu ki cwinywu ka yenyo Rwot Lubaŋawu. Doŋ wutwarre malo wuciger kabedo maleŋ pa Rwot Lubaŋa, ka wek canduk me gicikke pa Rwot ki jami pa Lubaŋa maleŋ-gu ducu gikelgi wa i ot ma doŋ gigero pi nyiŋ Rwot.” Ka Daudi doŋ oti ma mwakane doŋ dwoŋ, ci ocako keto wode Solomon obedo kabaka ma loyo Icrael. Lwak dul pa Lulevi ki ajwagi ki dog ticgi Daudi ocoko ludito ma i Icrael ducu, kacel ki ajwagi ki Lulevi. Gikwano Lulevi ducu ma ditogi romo mwaka pyeradek dok kwede malo, ci wel co ducu oromo alip pyeradek wiye aboro. Daudi owacci, “Jo alip pyeraryo wiye aŋwen ki i komgi gibiketogi ka tic i ot pa Rwot; jo alip abicel gibibedo jagi ki luŋolkop; jo alip aŋwen gibibedo lugwok-doggola, ki jo alip aŋwen gibipako Rwot ki jami wer ma yam atiyo pi pake kwede.” Ci Daudi opokogi i dul muporo awobe pa Levi, Gercom, Kokat ki Merari. Litino awobe pa Gercom gin aye Ladan ki Cimei. Litino awobe pa Ladan gin aye Jekiel ma laditgi, ki Jetam ki Joel, gin adek. Litino awobe pa Cimei gin aye Celomot, Kajiel ki Karan, gin adek. Magi gin aye ludito kaka pa Ladan ma i odi pa kwarogr, Litino awobe pa Cimei gin aye Jakat, Jina, Jeuc ki Beria. Jo aŋwen-nu gin aye litino awobe pa Cimei. Jakat aye onoŋo ladrtgi, ki me aryone Jija; ento Jeuc ki Beria pe gunywalo awobe mapol, mumiyo gikwanogi macalo dog ot ma kwarogi acel. Litino awobe pa Kokat gin aye Amram, Ijar, Kebron ki Ujiel, gin aŋwen. Litino awobe pa Amram gin aye Aron ki Moses. Aron gibolle tic me kwero jami maleŋ makato, wek en ki litino awobene guwan odok eceta i nyim Rwot matwal, dok guti bote, gulam gum i nyiŋe matwal. Ento litino awobe pa Moses ma dano pa Lubaŋa yam gikwanogi i kin kaka pa Levi. Litino awobe pa Moses gin aye Gercom ki Eliejer. Litirro awobe pa Gercom: Cebuel aye laditgi. Litino awobe pa Eliejer: Rekabia aye laditgi. Eliejer pe onywalo litino awobe mukene, ento Rekabia onywalo litino awobe mapol mada. Litino awobe pa Ijar, Celomit aye laditgi. Litino awobe pa Kebron gin aye Jeria ma laditgi, ki me aryone Amaria, me adekke Jakajiel, ki me aŋwenne Jekameam. Litino awobe pa Ujiel gin aye Mika ma laditgi, ki me aryone Icia. Litino awobe pa Merari gin aye Makali ki Muci. Litino awobe pa Makali gin aye Eleajar ki Kic, Eleajar oto ma pe onywalo awobe, onywalo anyira keken; ento ludoggolagi ma awobe pa Kic aye gunyomogi. Litino awobe pa Muci gin aye Makali, Eder ki Jeremot, gin adek. Magi aye litino awobe pa Levi ma i odi pa kwarogi, ma gin ludito kaka ma i odi pa kwarogi kit ma yam gicoyogi kwede, ma lubo wei ki nyiŋ dano ki acel acel ma ditogi romo mwaka pyeraryo dok kwede malo, ma gibedo ka tiyo tic i ot pa Lubaŋa. Pien Daudi onoŋo owacci, “Rwot Lubaŋa pa Icrael doŋ omiyo kuc ki jone; en doŋ bedo: i Jerucalem matwal. Pi meno Lulevi pe doŋ gimitogi pi tiŋo kema pa Rwot, kadi jami mo ma gitiyo kwede.” Pi lok ma Daudi oloko me agikkine omiyo gicoyo wel Lulevi ma ditogi romo mwaka pyeraryo ki dok kwede malo, En dok owacci, “Ticgi bibedo me konyo awobe pa Aron ka tic i ot pa Rwot, kun gigwoko dyekal ki kicika odi matinone, gilonyo jami maleŋ ducu, dok gitiyo kit tic mu kene ducu ma i ot pa Lubaŋa. Dok ikonyo bene ki kela mugati ma giketo i nyim Rwot, ki moko kwon me gityer me moko kwon, ki capat mareppe ma tobi pe iye, ki gityer me moko kwon ma gitedo i otako nyonyo, ki gityer me moko kwon ma girubo ki moo, ki gin pimo pek ki dwoŋ pa jami mapatpat, Gin gibicuŋ ka miyo pwoc ki pak bot Rwot odiko odiko, ki otyeno otyeno bene kumeno, ki i kare ducu ma gityero gitum awaŋa bot Rwot i cen cabit, ki i por dwe, ki i nino maditogu, gibicuŋ i nyim Rwot kare ducu, kun gilubo wel jo ma giciko. Gibigwoko kema me rwatte ki kabedo maleŋ kit meno, dok gibikonyo utmegigi, awobe pa Aron, i ticgi ma i ot pa Rwot.” Dul pa likwayo pa Aron gin ene. Litino awobe pa Aron gin aye Nadab, Abiu, Eleajar ki Itamar. Ento Nadab ki Abiu guto i kare ma wongi pud kwo, litinogi bene pe, mumi yo ‘Eleajar ki Itamar gudoko ajwagi pa Lubaŋa. Ci Daudi opokogi muporo dog ticgi ma giyerogi iye, kun jo ma gukonye gin aye Jadok ma i kin likwayo pa Eleajar, ki Akimelek ma i kin likwayo pa Itamar. Doŋ macalo ginoŋo jo madito mapolle i kin likwayo pa Eleajar makato ma i kin likwayo pa Itamar, gupoko ludito kaka ma i dog odi pa kwarogi apar wiye abicel pi likwayo pa Eleajar, ki ludito kaka ma i odi pa kwarogi aboro pi likwayo pa Itamar. Gipokogi ki bolo kwir, marom, pien ludito me kabedo maleŋ ki ludito pa Lubaŋa yam gubedo i kin likwayo pa Eleajar ki i kin likwayo pa Itamar bene, Cemaya wod pa Netanel ma Lalevi, ma obedo karan, yam ocoyo nyiŋgi ki i nyim kabaka, ki’ i nyim rwodi, ki ajwaka Jadok, ki Akimelek wod pa Abiatar, ki ludito kaka ma i odi pa kwaro pa ajwagi ki pa Lulevi; yam guyero dog ot pa kwarogi acel pi Eleajar ki acel giyero pi Itamar. Kwir mukwoŋo opoto i kom Yekoyarib, ki me aryo i kom Jedaya, me adek i kom Karim, me aŋwen i kom Ceorim, me abic i kom Malkija, me abicel i kom Mijamin, me abiro i kom Kakoj, me aboro i kom Abija, me aboŋwen i kom Yecwa, me apar i kom Cekania, me apar wiye acel i kom Eliacab, me apar wiye aryo i kom Jakim, me apar wiye adek i kom Kupa, me apar wiye aŋwen i kom Jecebeab, me apar wiye abic i kom Bilga, me apar wiye abicel i kom Imer, me apar wiye abiro i kom Kejir, me apar wiye aboro i kom Kapijej, me apar wiye aboŋwen i kom Petakia, me pyeraryo i kom Jekejikel, me pyeraryo wiye acel i kom Jakin, me pyeraryo wiye aryo i kom Gamul, me pyeraryo wiye adek i kom Delaya, me pyeraryo wiye aŋwen i kom Maajia. Dog tic ma giyero jo magi iye obedo me donyo i ot pa Rwot, kun gilubo cik ma yam kwarogi Aron oketo pigi, ‘macalo Rwot Lubaŋa pa Icrael yam ociko en kwede. Lok kom likwayo pa Levi mudoŋŋe: i kin likwayo pa Amram giyero Cubael; ki i kin likwayo pa Cubael giyero Jedeya. Likwayo pa Rekabia: i kin likwayo pa Rekabia giyero Icia ma laditgi. I kin likwayo pa Ijar giyero Celamot; i kin likwayo pa Celamotgiyero Jakat. I kin likwayo pa Kebron giyero Jeria ma laditgi, me aryone Amajia, me adek Jakajiel, me aŋwen Jekameam. I kin likwayo pa Ujiel giyero Mika; i kin likwayo pa Mika giyero Camir, Umin Mika en aye Icia; i kin likwayo pa Icia giyero Jekaria. I kin likwayo pa Merari giyero Makali ki Muci. I kin likwayo pa Jajia giyero Beno. Likwayo pa Merari gin aye Jajia, Beno, Cokam, Jakur ki Ibri. I kin likwayo pa Makali giyero Eleajar ma pe onywalo awobe. I kin likwayo pa Kic giyero Jeramel. I kin likwayo pa Muci giyero Makali, Eder ki Jerimot. Magi gin aye likwayo pa jo Levi, kun lubo dog odi pa kwarogi. Jo magi bene, ludito kaka ma i dog odi pa kwarogi acel acel gubolo kwir, kun ladit bolo kacel ki utmegine matino, macalo utmegigi ma likwayo pa Aron gubolo ki i nyim kabaka Daudi, Jadok, Akimelek ki ludito kaka ma i dog odi pa kwaro pa ajwagi ki pa Lulevi, Daudi ki ludito ma loyo tic gubolo tic ki jo mogo ma i kin likwayo pa Acap, pa Eman ki pa Jedutun, wek gutit lok pa Lubaŋa macalo lunebi ki opuk ki naŋa ki atego agoya-gu, Nyiŋ jo ma yam gitiyo tic man, ki dog ticgi gin ene: i kin litino pa Acap, Jakur, Yucepu, Netania ki Acarela, ma litino pa Acap, Acap aye telogi i wer, kun tito lok ma a ki bot Lubaŋa, i te cik pa kabaka. Litino pa Jedutun gin Gedalia, Jeri, Jecaya, Cimei, Kacabia ki Matitia, gin abicel, ma wongi Jedutun aye telogi i wer, kun tito lok a ma ki bot Lubaŋa ki opuk pi miyo pwoc bot Rwot. Litino pa Eman gin Bukia, Matania, Ujiel, Cebuel, ki Jerimot, Anania, Kanani, Eliata, Gidalti, ki Romamtiejer, Jocebekaca, Maloti, Kotir ki Makajiot. Magi ducu aye litino pa Eman ma lanen pa kabaka, macalo Lubaŋa yam ociko bote ni ebipilo wiye; pien Lubaŋa omiyo ki Eman litino awobe apar wiye aŋwen ki anyira adek. Gin ducu yam wongi aye telogi i wer i ot pa Rwot, kun giwero ki atego agoya, naga ki opuk pi konyo lega ma i ot pa Lubaŋa, Acap, Jedutun ki Eman yam gitiyo i te loc pa kabaka. Wei jo man giribo ki utmegigi ma yam gipwonyogi ki wer bot Rwot, jo ducu ma yam luryeko, giromo miya aryo ki pyeraboro wiye aboro. Gin ducu gipokogi i dog tic kun gibolo kwir, kun jo matino ki jo madito, lupwony ki jo ma gipwonyogi, gitimogi ducu marom. Kwir mukwoŋo opoto i kom Yucepu, ma jo pa Acap; me aryone opoto i kom Gedalia, ci okwako en ki omegine, ki litino awobene, gin ducu apar wiye aryo; me adekke opoto i kom Jakur kacel ki litino awobene ki omegine, gin ducu apar wiye aryo; me aŋwenne opoto i kom Ijri kacel ki litino awobene ki omegine, gin ducu apar wiye aryo; me abicce opoto i kom Netania kacel ki litino awo bene ki omegine, gin ducu apar wiye aryo; me abicelle opoto i kom Bukia kacel ki litino awobene ki omegine, gin ducu apar wiye aryo; me abirone opoto i kom Jecarela kacel ki litino awobene ki omegine, gin ducu apar wiye aryo; me aborone opoto i kom Jecaya kacel ki litino awo bene ki omegine, gin ducu apar wiye aryo; me aboŋwenne opoto i kom Matania kacel ki litino awobene ki omegine, gin ducu apar wiye aryo; me aparre opoto i kom Cimei kacel ki litino awobene ki omegine, gin ducu apar wiye aryo; me apar wiye acelle opoto i kom Ajarel kacel ki litino awo bene ki omegine, gin ducu apar wiye aryo; me apar wiye aryone opoto i kom Kacabia kacel ki litino awo bene ki omegine, gin ducu apar wiye aryo; me apar wiye adekke opoto i kom Cubael kacel ki litino awobene ki omegine, gin ducu apar wiye aryo; me apar wiye aŋwenne opoto i kom Matitia kacel ki litino awobene ki omegine, gin ducu apar wiye aryo; me apar wiye abicce opoto i kom Jeremot kacel ki litino awo bene ki omegine, gin ducu apar wiye aryo; me apar wiye abicelle opoto i kom Anania kacel ki litino awobene ki omegine, gin ducu apar wiye aryo; me apar wiye abirone opoto i kom Jocebekaca kacel ki litino awobene ki omegine, gin ducu apar wiye aryo; me apar wiye aborone opoto i kom Kanani kacel ki litino awo bene ki omegine, gin ducu apar wiye aryo; me apar wiye aboŋwenne opoto i kom Maloti kacel ki litino awobene ki omegine, gin ducu apar wiye aryo; me pyeraryone opoto i kom Eliata kacel ki litino awo bene ki omegine, gin ducu apar wiye aryo; me pyeraryo wiye acelle opoto i kom Kotir kacel ki litino awobene ki omegine, gin ducu apar wiye aryo; me pyeraryo wiye aryone opoto i kom Gidalti kacel ki litino awobene ki omegine, gin ducu apar wiye aryo; me pyeraryo wiye adekke opoto i kom Makajiot kacel ki litino awobene ki omegine, gin ducu apar wiye aryo; me pyeraryo wiye aŋwenne opoto i kom Romamtiejer kacel ki litino awobene ki omegine, gin ducu apar wiye aryo, Lok kom dul pa lugwokdoggola. I kin jo pa Kora guyero Mecelemia ma wod pa Kore ma i kin likwayo pa Acap. Mecelemia onywalo awobe magi: Jekaria ma latin kayone, ka dok me aryone Jediael, me adekke Jebadia, me aŋwenne Jatiniel, me abicce Elam, me abicelle Yekokanan, me abirone Eliekoenai. Obed-edom onywalo awobe magi: Cemaya ma latin kayo, ka dok me aryone Yekojabad, me adekke Joa, me aŋwenne Cakar, me abicce Netanel, me abicelle Amiel, me abirone Icakar, me aborone Peuletai; pien Lubaŋa omiye gum. Ki wode Cemaya bene onywalo awobe ma gubedo rwodi i dog odi pa kwarogi, pien gubedo jo makwiri atika. Litino awobe pa Cemaya gin aye Otini, Repael, Obed ki Eljabad, ma omegigi gubedo jo makwiri, nyiŋgi Eliu ki Cemakia. Jo magi ducu gin aye likwayo pa Obed-edom kacel ki awobegi ki omegigi, jo makwiri ma giromo tic; jo pa Obed-edom giromo pyerabicel wiye aryo, Mecelemia bene obedo ki awo bene ki omegine ma gikwiri, gin apar wiye aboro. Ki Koca ma i kin likwayo pa Merari onywalo awobe magi: Cimri aye laditgi; kadi pe en aye latin kayo, ento wonne okero en odoko ladit; ka dok me aryone Ilkia, me adekke Tebalia, me aŋwenne Jekaria; awobe pa Koca kacel ki omegine, ducu giromo apar wiye adek. Dul magi pa lugwok-doggola, ma dul acel acel tye ki laditte, gipokogi tic, kit ma yam gipoko ki utmegigi bene ma gubedo ka tic i ot pa Rwot; dok gibolo kwir ma lubo dog odi pa kwarogi, pi noŋo doggola ma gibigwoko, kun dog odi matino ki maditone gitimogi marom. Kwir ma gibolo pi doggola ma tuŋ wokceŋ opoto i kom Celemia. Gibolo kwir bene pi wode Jekaria, ma en lami-tam ma ŋeyo piny mada, ci mere opoto pi doggola ma tuŋ acam. Pa Obed-edom opoto pi doggola ma tuŋ acuc, ci pa awobene obedo ot kano jami. Pa Cupim ki Koca opoto pi doggola ma tuŋ potoceŋ, kacel ki doggola ma gilwoŋo Caleket ma i yo ma dok tuŋ malo. Lugwok-doggola gukemme ki luwotgi. Ki tuŋ wokceŋ gubedo jo abicel i nino acel acel, ki tuŋ acam jo aŋwen i nino acel acel, ki tuŋ acuc bene jo aŋwen i nino acel acel, kacel ki jo aryo aryo i ot kano jami. I ot ma tere aperu ma yo tuŋ potoceŋ onoŋo giketo jo aŋwen i ŋet yo, ki aryo i ŋet ot ma tere aperu. Magi aye dul pa lugwok-doggola ma i kin jo pa Kora ki likwayo pa Merari. I kin Lulevi giketo Akija obedo ladit ma gwoko odi me kano lim ma i ot pa Lubaŋa, ki odi me kano lim me mot ma gidyero bot Rwot. I kin likwayo pa Gercon likwayo pa Ladan aye gubedo ludito kaka i dog odi pa kwarogi. Laditgi aye Jekieli. Litino awobe pa Jekieli, ma gin aye Jetam ki ominne Joel, gubedo ludito ma gwoko odi me kano lim ma i ot pa Rwot. I kin jo pa Amram, pa Ijar, pa Kebron ki pa Ujiel, Cebuel, ma lakwar Gercom ma wod pa Moses, en aye rwot madit ma giketo pi gwoko odi me kano limo Omegine gin ene: i kin likwayo pa Eliejer obedo wode Rekabia, ma wode Jecaya, ma wode Joram, ma wode Jikri, ma wode Celomot. Celomot man ki omegine gubedo ludito ma gwoko odi me kano mot ducu ma yam kabaka Daudi odyero bot Rwot, ki mot ma ludito kaka ma i odi pa kwarogi ki ludito ma giloyo buca mony me jo alip, ki buca mony me jo miya, ki lutel wi mony yam gudyero bene. Gin yam gudyero mot mua i lim ma giyako i lweny me yubo ot pa Rwot. Dok bene lim ducu ma yam Camuel ma lanen-piny, ki Caulo wod pa Kic, ki Abneri wod pa Ner, ki Joab, wod pa Jeruya yam gudyero bot Rwot; mot ducu ma gidyero Celomot ki omegine gubedo ka gwokone. I kom jo pa Ijar, giketo Kanania ki awobene pi tic ma woko ma i Icrael me bedo jagi ki luŋolkop. I kom jo pa Kebron giketo Kacabia ki omegine ma gikwiri ma romo alip acel ki miya abiro me ne no tic ma i Icrael ma loka Jordan yo tuŋ potoceŋ, pi tic pa Rwot ducu ki pi tic pa kabaka bene. I kom jo pa Kebron laditgi obedo Jerija ma loyo jo pa Kebron ducu ma ocoko dog odi pa kwarogi ducu. I mwaka me pyeraŋwen me loc pa Daudi yam gibedo ka yenyo, ci ginoŋo jo makwiri atika ma i kingi i Jajer ma i Gilead. Kabaka Daudi oketo en ki omegine, jo makwiri ma romo alip aryo ki miya abiro, ma gin ludito kaka ma i odi pa kwarogi, me neno tic pa jo pa Reuben, jo pa Gad ki nucu kaka pa Manace pi lok ducu ma mako tic pa Lubaŋa ki pi lok pa kabaka. Man aye nyiŋ jo Icrael ma ludito kaka ma i odi pa kwarogi, ludito ma giloyo buca mony pa jo alip ki buca mony pa jo miya, ki luditogi ma yam gitiyo bot kabaka i kom lok ducu ma mako dul pa jo ma gibino ki ma gicito dwe ki dwe pi mwaka ducu, kun dul acel acel welle romo jo alip pyeraryo wiye aŋwen: Jacobeam ma wod pa Jabdiel en aye ladit ma loyo dul mukwono ma tiyo i dwe mukwono; i dulle tye iye jo alip pyeraryo wiye aŋwen, En yam lakwar Perej, en yam ladit ma loyo luwi mony ducu pa mony ma gitiyo i dwe mukwoŋo. Dodai ma jo Akoki aye ladit ma loyo jo ma tiyo i dwe me aryo; i dulle tye iye jo alip pyeraryo wiye aŋwen, Ladit me adekke, ma loyo jo ma tiyo i dwe me adek, en aye Benaya wod pa ajwaka Yekoyada, en aye laditgi; i dulle tye iye jo alip pyeraryo wiye aŋwen. Benaya man en aye twon oteka ma i kin jo pyeradek ca, dok en aye ma loyo jo pyeradek-ku; wode Amijabad aye ladit ma loyo lwak ma i dulle. Me aŋwenne obedo Acael ma omin Joab, pi dwe me aŋwen; ŋat ma olube obedo Jebadia ma wode. I dulle tye iye jo alip pyeraryo wiye aŋwen. Ladit me abicce, pi dwe me abic, en aye Camkut ma jo pa Ijra; i dulle tye iye jo alip pyeraryo wiye aŋwen. Me abicelle pi dwe me abicel en aye Ira ma wod pa Ikec ma jo Tekoa; i dulle tye iye jo alip pyeraryo wiye aŋwen, Me abirone, pi dwe me abiro, en aye Kelej ma jo Pelon, ma i kin likwayo pa Epraim; i dulle tye iye jo alip pyeraryo wiye aŋwen, Me aborone, pi dwe me aboro, en aye Cibekai ma jo Kueat, pa jo pa Jera; i dulle tye jo alip pyeraryo wiye aŋwen, Me aboŋwenne, pi dwe me aboŋwen, en aye Abiejer ma jo Anatot, ma Labenjamin; i dulle tye iye jo alip pyeraryo wiye aŋwen, Me aparre, pi dwe me apar, en aye Makarai ma jo Netopa, ma jo Jera; i dulle tye iye jo alip pyeraryo wiye aŋwen, Me apar wiye acelle, pi dwe me apar wiye acel, en aye Benaya ma jo Piraton, ma i kin likwayo pa Epraim; i dulle tye i iye jo alip pyeraryo wiye aŋwen. Me apar wiye aryone, pi dwe me apar wiye aryo, en aye Keldai ma jo Netopa, likwayo pa Otiniel; i dulle tye iye jo alip pyeraryo wiye aŋwen. Jo ma loyo kaka pa Icrael gin ene: ladit ma loyo jo pa Reuben en aye Eliejer ma wod, pa Jikri; pi jo pa Cimeon, Cepatia ma wod pa Maaka; pi jo pa Levi, en Kacabia ma wod pa Kamuel; pi jo pa Aron, Jadok; pi jo pa Juda, Eliu, ma ŋat acel ma i kin omegi Daudi; pi jo pa Icakar, Omri ma wod pa Mikael; pi jo pa Jabulon, Icmaya ma wod pa Obadia; pi jo pa Naputali, Jeremot ma wod pa Ajriel; pi jo pa Epraim, Kocea ma wod pa Ajajia; pi nucu kaka pa Manace, Joel ma wod pa Pedaya; pi nucu kaka pa Manace ma i Gilead, Iddo ma wod pa Jekaria; pi jo pa Benjamin, Jaciel ma wod pa Abneri; pi jo pa Dan, Ajarel ma wod pa Jerokam. Magi aye ludito ma loyo kaka ducu ma i Icrael. Daudi yam pe okwano wel jo ma mwaka me ditogi pe romo pyeraryo, pien Rwot yam ociko ni ebimiyo jo Icrael gibedo mapol macalo lwak lakalatwe me polo. Joab ma wod pa Jeruya yam ocako kwano welgi ento pe ocobo; kadi bed kumeno akemo opoto i kom Icrael pi roc man, welgi bene pe gicoyo i buk me tekwaro pa kabaka Daudi. Ŋat ma loyo odi me kano lim pa kabaka en aye Ajimavet ma wod pa Adiel; ki ma loyo odi lim ma i lobo, ma i gaŋi madito ki matinone, ki i odi matego ma ocudo malo liŋ aye Yonacan ma wod pa Ujia; ki ma loyo jo ma gitiyo tic me pur i poto en aye Ejiri ma wod pa Kelub; ki ma loyo poto olok en aye Cimei ma jo Rama; ki ma loyo gin ma ocek i poto olok ma gikano i odi me kano kono yino en aye Jabdi ma jo Cipmi. Ŋat ma loyo yadi jeituni ki olam ma i bar Cepela en aye Baal-kanan ma jo Geder, dok ŋat ma loyo ot kano moo jeituni en aye Yoaci. Ŋat ma loyo lwak dyaŋi ma gikwayogi i Caron aye Citrai ma jo Caron; ki ma loyo lwak dyaŋi ma i nota ducu aye Capat ma wod pa Adlai. Ŋat ma loyo kinaga aye Obil ma jo Icmael; ki, ma loyo megi kana aye Jedeya ma jo Meronot. Ŋat ma loyo romi ki dyegi aye Jajij ma jo Agri. Jo magi ducu gin lugwok-lim pa kabaka Daudi. Yonacan ma okeyo Daudi aye lami-tam, pien obedo dano ma niaŋ matut, dok karan bene; en ki Jekiel ma wod pa Kakmoni gubedo lugwok litino awobe pa kabaka. Akitopel obedo lami-tam pa kabaka, ki Kucai ma jo Arki obedo larem kabaka. Jo ma guleyo ka tyen Akitopel aye Yekoyada ma wod pa Benaya, ki Abiatar. Joab aye ladit me mony pa kabaka. Daudi ocoko ludito pa jo Icrael ducu i Jerucalem, ludito ma loyo kaka ducu, ludito ma loyo dul tic ducu ma gitiyo i te loc pa kabaka, ludito ma loyo buca mony me jo alip, ki buca mony me jo miya, ludito ma gwoko jami ducu ki lim makwo ducu pa kabaka ki pa awo bene, kacel ki ludito ma loyo gaŋ kai, ki jo ma twoni oteka, ki jo ducu ma gunyebbe ki lweny. Ci kabaka Daudi oa malo, ocuŋ, ocako waco ni, “Wuwiny an, wun utmega ki wun lwakka. Yam abedo ki tam i cwinya me gero ot ka ma canduk me gicikke pa Rwot biywe iye, ki ka ma gibiketo iye kom pa Lubaŋa me teno tyene; ci abedo ka yubo kit me gerone ducu. Ento Lubaŋa ojuka kun wacca ni. ‘In pe ibigero ot mo pi nyina, pien in lalweny, dok ityeko oyo lwak remo madwoŋ.’ Kadi bed kumeno, ci Rwot Lubaŋa pa Icrael yam oyero an ki i kin doggola pa kwarina ducu me bedo kabaka ma loyo jo Icrael matwal; pien yam oyero Juda wek obed ladit, ki i ot pa Juda oyero ot pa wora, ki i kin litino awobe pa wora cwinye okwanyo an me bedo kabaka ma loyo Icrael ducu. I kom litino awobena ducu, macalo Lubaŋa omiya litino awobe mapol, en oyero iye woda Solomon me bedo i wi komker ma i te ker pa Rwot ma loyo Icrael. En rwacca ni, ‘Wodi Solomon aye bigerra ot ki dye kalle ducu, pien ayero en wek obed woda, ki an bene abibedo wonne. Abimoko kerre bedo matwal, ka ce cwinye omoko matek me lubo cikka ki lok ma aŋolo ducu kit ma en tye kwede i kare-ni.’ Doŋ acikowu i nyim jo Icrael ducu, ki i nyim lwak pa Rwot ducu, ma kun Lubaŋa bene winyo, wun wubed ka gwoko ki ka yenyo cik pa Rwot Lubaŋawu ducu, wek wubed wegi lobo man maber-ri, ci wuwek obed ginaleya matwal bot likwayowu ma gibilubo newu. “In woda Solomon bene, ber iŋe Lubaŋa pa wora, iti ki en ki cwinyi ducu ki kero komi ducu; pien Rwot niyo cwiny dano ducu, dok ŋeyo gin ma cwiny dano yubo ducu ki tamme ducu. Ka ce iyenyo en, ci in ibinoŋo kome; ento ka ce ibwoto en woko, en bitenyi woko matwal. Ber igwokke matek, pien Rwot doŋ otyeko yero in pi gero ot me kabedo maleŋ; bed laco, wek itim woko.” Ci Daudi omiyo bot wode Solomon cal kicika ot me donyo i ot pa Lubaŋa ma yam gicoyo, ki cal odine ducu, ki cal odi kano lim, ki me kicika ma malo ducu, ki me kicika odi matino ducu ma i iye, ki me kicika ma kom me kica bedo iye. Dok omiye cal ma nyuto dyekal me ot pa Rwot ducu kit ma yam cwinye otamo, ki kicika odi matino ma orumo ot ducu, ki odi me kano lim ducu ma i ot pa Lubaŋa, ki odi me kano lim me mot ma gidyero bot Rwot. Onyutte bene dul tic pa ajwagi ki Lulevi, ki kit kwa tic ducu ma gitiyo i ot pa Rwot; ki kit kwa jami ducu ma gitiyo kwedgi i ot pa Rwot, ki pek pa jabu ma mitte pi jami me jabu ma i dog tic acel acel, ki pek pa jami me ryal pi dog tic acel acel, ki pek pa okar-mac me jabu, ki mac laputgi, pek me jabu ma mitte pi okar-mac acel acel ki lwak laputte ducu, ki pek pa ryal ma mitte pi okar-mac acel acel ki lwak laputte ducu, muporo kit tic pa okarmac acel acel ma gitiyo kwede, ki pek me jabu ma mitte pi meja acel acel me mugati me aketa i nyim Rwot, ki pek me ryal ma mitte pi tiyo meja me ryal ducu, ki jabu ma giliyo maberre pi gin lacob riŋo, ki becen ducu, ki kikopo ducu; dok pi atabo jabu ducu, ki pekgi acel acel; pi atabo ryal ducu ki pekgi acel acel; ki pi keno tyer me wano odok eceta ma gitiyo ki jabu ma giliyo maleŋŋe, ki pekke. Ka doki onyutte cal gadigadi mejabu pa lukerubi ma giyaro bwomgi me umo canduk me gicikke pa Rwot. Man ducu en onyuto ka maleŋ pi gin ma yam Rwot ocoyo pire ki cine: tic ducu myero giti ma lubo kit cal meno. Daudi dok owaco bot wode Solomon ni, “Bed laco ma cwinyi nwaŋ, wek itim woko. Pe ilwor, pe cwinyi oryanne: pien Rwot Lubaŋa, ma en aye Lubaŋana, tye kwedi. En pe bibwoti ata, dok pe bitenyi, nie-ka tic ducu ma gitiyo i ot pa Rwot bitum. Nen, it ye ki lwak dul pa ajwagi ki pa Lulevi pi tiyo tic ducu me ot pa Lubaŋa; jo ducu ma ludiro i kwa tic ducu, ma gitye ki miti, gibinywako tic kwedi; ki ludito ki lwak ducu gibiwinyo dogi i lok ducu.” Kabaka Daudi dok owaco bot lwak ducu ma gucokke ni, “Latinna Solomon ma Lubaŋa gire aye oyero en, pud tidi, peya tye ki ŋec mo, dok tic bene dit; pien gaŋ kai man pe bibedo pa dano ento pa Rwot Lubaŋa, Pienno doŋ atyeko yubo jami ducu pi ot pa Lubaŋana kit munoŋo atwero, jabu pi jami me jabu, ryal pi jami me ryal, mola pi jami me mola, nyonyo pi jami me nyonyo, bao pi jami me bao, kun amedo iye lwak kidi onik mapol mada, ki litino kidi me amwona i kom jabu, ki akuku-gu, ki godi ma ranigi patpat, godi me wei ma kitgi patpat, ki kidi matarre bene. Dok pien cwinya obedo yom i kom ot pa Lubaŋana, omiyo amiyo jami magi me jabu ki me ryal mua i ciŋa pi ot pa Lubaŋana, kun amedo i kom lwak jami ducu ma atyeko yubo pi ot maleŋ, gin ene: jabu ma pekke romo talanta adek, en aye jabu me Opir, ki ryal ma giliyo maleŋŋe ma pekke romo talanta alip abiro pi mwono kom ot pa Rwot, ki pi tic ducu ma ludiro gibitiyo, jabu pi jami me jabu, ki ryal pi jami me ryal. Aŋa ma bikelo jami ma cwinye opwoyo-ni, ma tin kwerre kene i nyim Rwot?” Ci ludito kaka ma i odi pa kwarigi gucako tyero mot ma igi opwoyo, ki ludito ma loyo kaka bene gumiyo kit meno, ki ludito ma loyo buca mony me jo alip ki buca mony jo miya, ki ludito ma loyo tic pa kabaka. Gumiyo jami magi pi tic me ot pa Lubaŋa: jabu ma romo talanta alip abic ki darik alip apar, ki ryal ma romo talanta alip apar, ki mola ma romo talanta alip aboro, ki nyonyo ma romo talanta alip miya acel. Ki ŋat ma tye ki godi me wei omiyogi i ot kano lim ma i ot pa Rwot, ma Jekiel ma jo pa Gercon aye gwoko. Cwiny lwak obedo yom pien jo magi gumiyo mot ma cwinygi opwoyo, pien gutyero mot bot Rwot ki cwinygi ducu. Kabaka Daudi bene cwinye obedo yom matek. Mumiyo Daudi opwoyo Rwot i nyim lwak mucokke ducu, kun wacci, “Gipwo in Rwot, Lubaŋa pa kwarowa Icrael, nino ma pe tum, Ai Rwot, dit ki tek ki deyo ki loc ki woro ducu meri, pien jami ducu ma tye i polo ki ma tye i ‘lobo ducu meri. Ker bene meri, ai Rwot, in gipilo wii pien iloyo jami ducu. Lonyo ki deyo ducu a ki boti, dok in aye iloyogi ducu. Twero ki tek ducu tye i ciŋi, dok ciŋi aye miyo dano dit dok miyo tek ki jo ducu. Wan doŋ wapwoyi, in Lubaŋawa, kun wapako nyiŋi me deyo matek. “Ento an aŋa, ki lwakka kono gin aŋo, niumiyo wabedo ki twero kit man me miyo jamiwa kit ma iwa opwoyo-ni? Pien jami ducu a ki boti, dok wadwokki giri. Pien wan wawelo i nyimi, ki lubedo, kit ma yam kwarowa tye kwede; ninowa me bedo i lobo Lokke calo tipo, kabedowa pe iye. Ai Rwot Lubaŋawa, lwak jami man ducu ma wamiyo pi gerri ot pi nyiŋi maleŋ gua ki i ciŋi, ducu jamini giri. An aŋeyo, ai Lubaŋana, in itemo cwiny dano, ipwoyo dano ma cwinye atir; pi cwinya ma tye atir omiya atyero boti mot me jami magi ducu; doŋ atyeko neno lwakki ki waŋa, gin ma gitye kany-nyi, ka gityero jamigi boti kit ma cwinygi omito ki yomcwiny madwoŋ. Ai Rwot, Lubaŋa pa kwarowa Abraim ki Icaka ki Icrael, mi cwiny lwakki okem tam ma kit ennu nakanaka, dok imi cwinygi okem boti keken. Dok mi bot woda Solomon gum me mako cikki ki cwinye ducu, ki lok ma ibolo, ki lok ma iciko-gu, kun cobogi ducu; kun imiye gum me gero gaŋ kal ma doŋ atyeko yubo jami pire-ni.” Lacen Daudi owaco bot lwak ducu mucokke ni, “Wupwo Rwot Lubaŋawu.” Lwak mucokke ducu gucako pwoyo Rwot, Lubaŋa pa kwarigi, ci gukulo wigi piny, guworo Rwot, dok gumiyo woro bot kabaka bene, Gutumo gitum bot Rwot, dok orwone bene gutyero gitum awaŋa bot Rwot, twoni alip acel, nyogi romi alip acel ki litino romi alip acel, kacel ki gityer amata ma otiko kit gityer acel acel, ki lwak gitum mukene mapol pi jo Icrael ducu. Gucamo dok gumato i nyim Rwot i nino meno ki yomcwiny madwoŋ twatwal. Guketo Solomon wod pa Daudi me bedo kabaka tyen me aryone, kun giwire ki moo me bedo laker pi Rwot, dok giwiro Jadok bene me bedo ajwaka pa Lubaŋa, Lacen Solomon obedo kabaka i wi komker pa Rwot ma ka wonne Daudi; ci obedo ki gumkom, kun jo Icrael giworo doge. Ci ludito ducu ki twoni oteka lweny ducu, kacel ki litino awobe pa kabaka Daudi ducu, gucikke pi woro kabaka Solomon. Ci Lubaŋa omiyo Solomon yweka madit i nyim jo Icrael ducu, ci ocako onyo deyo me loc i kome madwoŋ ma yam pe onen i kom kabaka me Icrael mo nia wa con. Daudi wod pa Yece yam oloyo Icrael ducu kit meno. Obedo ka loyo jo Icrael pi mwaka pyeraŋwen kulu; obedo ka loc i Kebron pi mwaka abiro, ka dok i Jerucalem pi mwaka pyeradek wiye adek. Daudi oto ma doŋ oti woko likon, i kare maber mupoŋ ki lonyo ki deyo; ci wode Solomon oleyo ka tyene. Lok kom kabaka Daudi ducu nia i acakkine nio i agikkine gicoyogi i buk me Tekwaro pa Camuel ma lanen ki i buk me Tekwaro pa lanebi Natan, ki i buk me Tekwaro pa Gad ma lanen, kacel ki lok kom locce ducu, ki tekke ducu, ki lok ducu ma otimme i kome, ki i kom Icrael ki i kom ker ducu ma i lobo. Solomon wod pa Daudi omoko kerre matek, kun Rwot Lubaŋane bene onoŋo tye ‘kwede, ma omiyo en obedo madit twatwal. Solomon oloko ki jo Icrael ducu, bot ludito ma loyo buca mony me jo alip ki buca mony me jo miya, ki bot luŋokop ki ludito ducu ma i Icrael ducu, ma gin aye ludito wi kaka ki i odi pa kwarogi ducu. Solomon kacel ki lwak mucokke ducu gucito I kabedo me woro Lubaŋa i wi got ma i Gibeon; pien kema me rwatte pa Lubaŋa, ma yam Moses latic pa Rwot otiyo ki i tim, onoŋo pud bedo kunnu. (Ento Daudi yam okwanyo canduk pa Lubaŋa ki i Kiriat-jearim, okelo i kabedo ma ceŋ en oyubo pire, pien onoŋo oguro kema pire i Jerucalem,) Onoŋo keno mola ma yam Bejalel wod pa Un, ma wod pa Kur otiyo-ni, pud tye wa kunnu bene i nyim kema pa Rwot. Solomon ocito cok ki keno mola ma i nyim kema me rwatte, wa i nyim Rwot, ci otyero iye gitum awaŋa alip acel kulu. I dyewor meno Lubaŋa onen Iye bot Solomon, owacce ni, “Peny gin ma abimiyo boti,” Solomon ogamo doŋ Lubaŋa ni, “In yam myuto mar meri madwoŋ ma pe lokke bot wora Daudi, dok iketo an adoko kabaka pi leyo ka Tyene. Ai Rwot Lubaŋa, wek lok ma yam iciko bot wora Daudi tin doŋ ocobbe kakare, pien iketo an adoko kabaka me loyo rok madit ma gipol ma rom ki apwa me ŋom. Ber tin imiya ryeko ki ŋeyo piny, wek aŋe kit me loyo rok man, pien aŋa ma twero loyo lwakki man, madwoŋ ma rom manni?” Lubaŋa ogamo dog Solomon ni, “Ka meno aye gin ma tye i cwinyi, macalo in pe ilego lim nyo lonyo nyo deyo, kadi pi jo ma gidagi ni myero ginekgi woko, pe bene ilega, ni ami iri wi lobo nakanaka, ento ilego ryeko ki ŋeyo piny piri keni, wek ilo lwakka ma aketo in ibedo kabakagi, ryeko ki ŋeyo piny doŋ amiyogi boti. Dok abimiyi lwak lonyo ki lim ki deyo, ma acana i nyim Rwot jwijwi, ki pi tyero pe tye ŋat acel mo i kin luker ma gukwoŋo nyimi ma yam olimo gin ma rom meno, kadi wa kabaka mo ma bilubo kori pe bilimo kumeno.” Solomon ocako a woko ki i kabedo me woro Lubaŋa ma i wi got ma tye i Gibeon, kun oa woko ki i nyim kema me rwatte, odok i Jerucalem, ci obedo ka loyo jo Icrael. Solomon yam ocoko gadigadi lweny ki lulweny ma riŋo ki aguragura, Obedo ki gadigadi lweny alip acel ki miya aŋwen, ki wegi aguragura alip apar wiye aryo, Oketo mogo i kingi i gaŋi me gadigadi lweny, ki mukene gubedo bote i Jerucalem, Kabaka Solomon yam omiyo ryal odoko gin ma lam ma rom ki gweŋ-gu i Jerucalem, dok okelo yadi cedar mapol ata ma rom ki olam ma i bar Cepela. En yam limo aguragura ma a ki i Ejipt ki Kuc; lucat-wil pa kabaka gamogi ki i Kuc i wel lim ma onoŋo giyubo. Gadigadi ma gia ki i Ejipt welgi onoŋo romo cekel me ryal miya abicel, ki aguragura acel welle cekel miya acel ki pyerabic; ka dok lucat-wil pa kabaka catogi bot luker ducu pa jo Kit, ki bot luker me Ciria. Solomon otamo pi gero ot pa Lubaŋa pi nyiŋ Rwot, kacel ki gaŋ kalle kikome. Solomon oyero jo alip pyerabiro me yweko yec, ki jo alip pyeraboro me muko godi i lobo ma obedo gotgot, ki jo alip adek ki miya abicel me bedo ludito ma loyo lutic. Solomon dok ocwalo lok bot Kuram kabaka me Turo ni, “Kit ma yam ibedo ki wora Daudi kun icwalle bao cedar me gero ode me bedone, ber ibed kweda bene kit meno. Nen, ayubbe pi gero ot pi nyiŋ Rwot Lubaŋana, ci abidyero bote pi waŋo iye odok eceta ma ŋwece kur i nyime, ki pi tyero iye mugati me gitum awaŋa odiko ki otyeno, ki i ceŋ cabit ducu, ki i por dwe, ki i nino madito ma Rwot Lubaŋawa oketo, ma yam en ociko pi jo Icrael matwal. Ot ma abigero-ni bibedo dit mada, pien Lubaŋawa du makato lubaŋa’ mukenegu ducu. Ento aŋa ma twero gero ot pi Lubaŋa? Kadi polo kulu ma tye malo twal-li, pe twero romo en bedo iye. An kono an aŋa ma atwero gero ot pire? Ento kono atwero tiyo ot mo macalo kabedo me waŋo odok eceta i nyime keken. Pienno amito icwalla dano mo makwiri ma twero tic i kom jabu, ki ryal, ki mola, ki nyonyo, ki boŋo ma lamar lamar, ki makwar ki ma bulu, ki dano ma gipwonyo ki goro kom jami, wek oti ki lutic makwiri ma gitye kweda i Juda ki i Jerucalem, ma yam wora Daudi oyubogi. Dok icwalla bao cedar, ki ciprec, ki bao algum ma gia i Lebanon, pien aŋeyo ni luticci giŋeyo toŋo yadi ma i Lebanon. Dok luticca gibibedo ki luticci, wek guyubba bao madwoŋ, pien ot ma abigero-ni bibedo dit dok me aura. Abimiyo bot joni ma gitiŋo bao ŋano ma nyige ma romo guniya alip pyerabicel, ki cayiri ma romo guniya alip pyerabicel, ki koŋo ŋino ma romo debe alip pyeraŋwen, ki moo jeituni bene debe alip pyeraŋwen, obed pi luticci me acamagi.” Kuram kabaka me Turo odok iye ki waraga ma ocwalo bot Solomon ni, “Pien Rwot maro jone omiyo oketo in ibedo kabaka ma loyogi.” Kuram dok owacci, “Gipwo Rwot Lubaŋa pa Icrael, ma con otiyo polo ki lobo, ma omiyo ki Daudi wode maryek, ma tye ki niaŋ matut, ma bigero ot pi Rwot, kacel ki gaŋ kalle kikome. “An doŋ acwalli dano ma ladiro ma tye ki ŋec matut, en Kuram-abi, ma wod pa dako ma anyira Dan, ma wonne dano me Turo, Gipwonyo en ki tic i kom jabu, ki ryal, ki mola, ki nyonyo ki godi, ki bao, ki boŋo ma lamar lamar, ki ma bulu ki makwar ki camanini maberre, En ŋeyo bene tic ducu me goro coc i kom jami, ŋeyo lubo kit cal mo me tic ma gimiye, kun tiyo kacel ki ludironi, ki ludiro pa rwoda Daudi ma woru. Pienno gin ma rwoda owaco-ni, doŋ ocwal ki luticce, ŋano ki cayiri, ki moo ki koŋo yiŋo; Ci wan wabitoŋo kit bao ducu ma imito ki i Lebanon, wabitweyogi ci gibikwan i wi pii macalo bwoda nio wa i Jopa, wek in doŋ iom iter i Jerucalem.” Solomon dok ocako kwano wel jo ducu me rok mukene ma gibedo i lobo Icrael, kit ma yam wonne Daudi koŋ okwanogi-ni. Ginoŋo ni welgi romo jo alip miya acel ki pyerabic wiye adek ki miya abicel. En oyero jo alip pyerabiro ki i kingi me yweko yec ducu, ki jo alip pyeraboro me muko godi i lobo ma obedo gotgot, ki jo alip adek ki miya abicel me bedo ludito ma loyo lutic, pi cuko cwiny dano wek guti tic. Solomon ocako gero ot pa Rwot i Jerucalem i wi got me Moria, ka ma yam Rwot onyutte iye bot wonne Daudi, i kabedo ma yam Daudi oyero, i kom laro moyo pa Oman ma jo Jebuc. En ocako gerone i dwe me aryo i mwaka me aŋwen me locce. Solomon opimo ot pa Lubaŋa ma en omito gerone-ni kit man: borre romo futi pyeraboŋwen, ki lacce futi pyeradek. Ki kicika ma i doggola me donyo ma i nyim kicika me ot lacce romo futi pyeradek, ma roni ki lac me ot maditte; borre tuŋ malo roma futi miya acel ki pyeraboro. Omwono iye woko ki jabu ma giliyo maber. Solomon oguro kor ot me kicika maditte ki bao ciprec, ci omwono kom bao woko ki jabu maberre, ma gigoro iye cal yadi otit ki nyor. Odeyo i ot mamwonya mada ki godi matino me wel ma gimwono i kom jabu. Jabune obedo jabu ma gikelo ki i Parvaim. Kit meno en omwono i ot ducu ki jabu, riine, rii doggolane, kor kicika ot ducu, ki doggolane; ka dok ogoro cal lukerubi i kor kicika ot. En dok otiyo kabedo maleŋ makato ducu; borre futi pyeradek, ma rom ki lac me kicika ot maditte, ki lacce bene futi pyeradek. Omwono kome woko ki jabu maberre ma romo talanta miya abicel. Pek me mucumar me jabu ma giguro kwede obedo cekel pyerabic. En dok omwono kicika ma malo ducu ki jabu. I kabedo maleŋ makato ducu en oketo iye cal lukerubi aryo me bao ma gipayo, ci omwono komgi woko ki jabu. Bwom lukerubi ducu borre muyarre romo futi pyeradek. Bwomgi acel acel borre romo futi abiro ki nucu. Wi bwom lakerubi acel ogudo kor ot, kun bwome tuŋcel ma borre futi abiro ki nucu, wiye ogudo wi bwom lakerubi wadi; ki bwom lakerubi man bwome acel ma borre futi abiro ki nucu-ni, wiye bene ogudo kicika ot, ki bwome mukene, ma romo futi abiro ki nucu-ni, wiye orwatte ki bwom lakerubi mukwoŋo-ni. Bwom cal lukerubi magi borgi muyarre oromo futi pyeradek. Gucuŋ ki tyengi ma gineno tuŋ kicika ot maditte. Okwoyo boŋo kicika ki boŋo ma bulu ki ma lamar lamar ki makwarre, ki boŋo camanini maberre, ma odero ki callukerubi. En dok otiyo wir aryo ma bocogi romo futi pyerabic wiye aryo, ki lalukana i wigi ma bocogi romo futi abiro ki nucu, ci oketogi i nyim ot. Ka dok otiyo nyor macalo tiko nut, ci oketogi i wi wir aryo ducu, ka dok otimo cal nyig okwer pomegranat miya acel, ci oketogi i kom nyor. Ocibo wir magi i nyim ot pa Lubaŋa, acel yo tuŋ acuc, ki mukene yo tuŋ acam. Ocako nyiŋ ma yo tuŋ acuc-ci ni, Jakin, ki ma yo tuŋ acam-mi olwoŋo ni Boaj, Otiyo keno tyer me mola ma borre romo futi pyeradek, ki lacce bene futi pyeradek; borre ma dok malo romo futi apar wiye abic, Ka dok otiyo nam me mola ma giliyo ma otwodde aduno, ma lacce romo futi apar wiye abic, nia i doge tuŋcel nio i doge tuŋcel; borre tuŋ malo romo futi abiro ki nucu. Gipimo doge ki tol ci oromo futi pyeraŋwen wiye abic. Ki i tere piny tye iye cal keno munyak ma orumo kom nam ducu, ma borre futi pyeraŋwen wiye abic; cal keno magi giryeyogi latyeŋ aryo, I kare ma gitiyo nam, gitiyo ki cal keno i kome lawanace!. Gicibo nam ocuŋ i wi cal twoni dyaŋi apar wiye aryo; giketo adek gineno yo tuŋ acam, adek gineno yo tuŋ potoceŋ, adek gineno yo tuŋ acuc, ki adek gineno yo tuŋ wokceŋ. Gicibo nam ocun i ŋe twoni-nu, kun ŋegi ducu odok tuŋ iye. Kome kinoŋ maromo incic adek; ki doge bene calo dog kikopo, ma, rom ki cal ature lena, Piine romo debe makato alip abicel. Ka dok otiyo otako apar me lwok, oketo abic yo tuŋ acuc, ki abic yo tuŋ acam. Magi obedo me lako jami ducu ma gitiyo kwedgi pi gitum awaŋa: nam giketo me lwok pa ajwagi. Dok otiyo okar-mac me jabu apar kit ma giciko-ni, oketogi i ot pa Lubaŋa; oketo abic yo tuŋ acuc ki abic yo tuŋ acam. En dok otiyo meja apar, oketogi i ot pa Lubaŋa, abic yo tuŋ acuc ki abic yo tuŋ acam. Dok otiyo becen me jabu miya acel. Ka dok oyubo dyekal pa ajwagi, ki dyekal maditte, ki kika me dyekal, omwono kom ki ka ducu ki mola; ka oketo nam i twok ot i kin tuŋ acuc ki tuŋ wokceŋ, Kuram ocweyo agulu mapol bene, ki akwaya, ki becen-gu, Kit meno Kuram otyeko tic i kom ot pa Lubaŋa pi kabaka Solomon. Otiyo wir aryo, ki lalukana aryo ma oluŋŋe macalo agulu ma giketo i wi wir, ki obwo aryo me umo kom lalukana aryo ma oluŋŋe ma obedo i wi wir-ri. Dok otiyo cal okwer pomegranat miya aŋwen pi obwo aryo-nu, kun cal pomegranat giryeyo latyeŋ aryo i kom obwo acel acel me umo kom lalukana aryo ma oluŋŋe ma obedo i wi wir. Otiyo bene litino gadigadi apar, ki otakomola apar ma giluto i litino gadigadi, ki nam acel, ki cal twoni dyaŋi apar wiye aryo ma i te namo Lwak agulu ki akwaya latokke-gu, ki gin lacob riŋo, ki jami ducu ma mitte pi tic ki jami magi ma Kuram-abi otiyogi pi ot pa Rwot ki pi kabaka Solomon obedo me mola ma gijwane maleŋ. Kabaka omiyo giliyo mola meno i pwor kulu Jordan, ka ma lobo agulu tye iye, i kin Cukot ki Jereda. Solomon otimo gin lwak jami-nu madwoŋ twatwal, ma pek pa molane pe gikwano. Solomon otiyo jami ducu ma tye i ot pa Lubaŋa kit man: keno tyer me jabu, ki lwak meja me caŋo mugati ma giketo i nyim Rwot, okar-mac ki lwak laputgi me jabu ma giliyo maber, ma myero gubed ka lyel i kabedo maleŋ ma i tyelo, kit ma giciko-ni; ki lwak cal ature, ki laput-gu, ki boyi lakar mac, ducu me jabu ma giliyo maber makato. Magac-gu, becen-gu, atabo me odok eceta, ki weer me waŋo mac otiyogi ki jabu ma giliyo maber; ki pata me ot pa Lubaŋa ma giketo i kom kika me kabedo maleŋ ma i tyelo, ki i kika me kicika maditte bene, gubedo me jabu, Tic ma Solomon otiyo i kom ot pa Rwot otum kit meno. Solomon okelo jami ma yam wonne Daudi odyero ki Rwot-ti, ci okano ryal, ki jabu, ki jami tic-gu ducu i ot kano lim ma i ot pa Lubaŋa. Solomon ocoko ludoŋo pa jo Icrael ki ludito wi kaka ducu, ma gin aye lutel wi doggola pa kwarogi ma i kin jo Icrael, ci gubino i Jerucalem pi kwanyo canduk me gicikke pa Rwot ki i gaŋ kal pa Daudi, ma gilwoŋo ni Cion. Ci lwak jo Icrael ducu gucokke i nyim kabaka pi nino madito ma tye i dwe me abiro-ni. Ludoŋo pa jo Icrael ducu gubino, ci Lulevi gucako tino canduk me gicikke. Gutero canduk ki kema me rwatte, kacel ki jami maleŋ ducu ma yam tye i kema; ajwagi ki Lulevi gukelogi. Kabaka Solomon ki lwak jo Icrael ducu ma gucokke bote-ni, gubedo i nyim canduk kun gitumo romi ki twoni-gu mapol ma welgi pe kwanne dok pe nene bene. Kit meno ajwagi gucako kelo canduk me gicikke pa Rwot wa i kabedone ma i tyelo me ot, en aye kabedo maleŋ makato ducu-ni, ci guketo piny i te bwom lukerubi. Lukerubi guyaro bwomgi ka wi kabedo me canduk wek lukerubi guum wi canduk woko kacel ki tal latiŋŋe ducu. Dok tal latiŋŋe yam wigi nen ki i kabedo maleŋ ma i nyim kabedo maleŋ ma i tyelo-ni; ento pe gitwero nenogi ki woko; pud gitye kunnu nio wa onyoo. Gin mo onoŋo pe tye i canduk, kono kidi aryo ma apada keken ma yam Moses oketo i iye ki i Koreb, ka ma yam Rwot oketo iye gicikke ki jo Icrael, i kare ma gia ki i lobo Ejipt. Ajwagi gukato woko ki i kabedo maleŋ, pien ajwagi ducu ma onoŋo gitye-ni doŋ gutyeko lonnye kekengi, ma pe giparo pi dul ticgi; ci Lulevi ducu ma gin luwer, Acap ki Eman, ki Jedutun, ki awobegi, ki utmegigi, onoŋo gurukke ki boŋŋi camanini mabecone, ci gimako atego agoya, ki nana ki opuk. Kacel kwedgi obedo ajwagi ma giromo miya acel ki pyeraryo ma gin lukut tumo Tic pa lukut tum ki luwer en aye me ribo dwangi kacel ka pako ki ka pwoyo Rwot, ki dwangi ma winnye maloŋo. I kare ma gucako wer, kacel ki tum ki atego agoya ki jami mukene ducu me wer, pi pako Rwot kun giwero ni, “Pien en ber, mar mere ma pe lokke bedo nakanaka,” ci deyo pa Rwot opoŋo i ot woko, en ot pa Rwot. Pienno omiyo ajwagi pe gitwero cuŋ ka tiyo ticgi, pi pol meno, pien deyo pa Rwot noŋo opoŋo i ot pa Lubaŋa woko. I nino meno Solomon owacci, “Rwot otyeko wacci en ebibedo i pol macollicuc. Agerri doŋ ot ma ocudo malo, wek obed kabedoni ma ibedo iye matwal.” Ka dok kabaka olokke, ci olamo gum i kom lwak jo Icrael ma gucokke ducu, kun jo Icrael ma gucokke-ni gucuŋ mot. En ocako lamo gum ni, “Gipwo Rwot, Lubaŋa pa Icrael, ma doŋ cine otyeko cobo gin ma “am oloko ki doge bot wora Daudi-ni, kun wacci, ‘Nia wa i kare ma akwanyo ki jona jo Icrael ki i Ejipt, peya ayero gaŋ mo ma i kaka ma i Icrael pi gero iye ot mo, wek nyina obed iye. Dok pe ayero laker mo me loyo jona jo Icrael; ento doŋ atyeko yero Jerucalem wek nyina obed kenyo, ka dok ayero Daudi me bedo lalo lwakka jo Icrael.’ I kare-nu onoŋo wora Daudi obedo ki tam i cwinye me gero ot pi nyiŋ Rwot, Lubaŋa pa Icrael. Ento Rwot aye owaco bot wora Daudi ni, ‘Kit macalo onoŋo doŋ tam tye i cwinyi me gero ot pi nyina, itimo ber pi keto lok meno i cwinyi. Ento pe in aye dok ibigerra ot, ento wodi ma ibinywalo aye bigero ot pi nyiŋa.’ I kare-ni Rwot doŋ otyeko cobo gin ma en ociko i cikkene; pien an doŋ atyeko leyo ka tyen wora Daudi, doŋ atyeko bedo i wi komker pa Icrael, kit ma yam Rwot ociko-ni, dok atyeko gero ot pi nyiŋ Rwot Lubaŋa pa Icrael. Doŋ atyeko keto iye kabedo pa canduk pa Rwot, ma tye iye gicikke ma Rwot con oketo ki jo Icrael.” Solomon dok ocuŋ i nyim keno tyer pa Rwot ki i nyim lwak jo Icrael ma gucokke ducu, ocako taŋo ciŋe aryo ducu malo, Solomon onoŋo otiyo abam mola ma borre futi abiro ki nucu, ki acee futi abiro ki nucu, ki borre nia piny dok malo futi aŋwen ki nucu, ocibo i dyekal; en ocuŋ i wiye. Ka dok orumo coŋe piny i nyim lwak jo Icrael ducu ma gucokke, ka ocako taŋo ciŋe aryo ducu malo okemo polo, kun wacci, “Ai Rwot, Lubaŋa pa Icrael, pe tye Lubaŋa mo macalo in, kadi malo i polo nyo piny i wi lobo, ma tye ka gwoko gicikkene macalo in, ma inyuto mar meri ma pe lokke bot luticci ma bedo ka lubi ki cwinygi ducu. Ibedo ka lubo kit gin ma yam itito bot wora Daudi, iyo, gin ma yam iloko ki dogi, icako doŋ tiyo i kare man ki ciŋi, ci ico bo ducu maber. Kombeddi ai Rwot, Lubaŋa pa Icrael, doŋ ilub gin ma yam iciko ki laticci wora Daudi, kun iwacci, ‘Pe ibibedo laboŋo danoni mo i nyima ma bibedo i wi komker pa Icrael, tekke awobeni gugwoko kitgi maber, kun gilubo cikka kit macalo ibedo kwede i nyimani.’ Ai Rwot, Lubaŋa pa Icrael, kombeddi mi lokki doŋ omok matek, kit ma cen iloko ki wora Daudi ma laticci. “Ento Lubaŋa bibedo i wi lobo-ni kacel ki dano ada? Nen, kadi oolo bene kutu ma malone twatwal-li pe romo in me bedo iye, ci ot ma agero-ni tidine rom mene kono! Dok in pud iciko iti ka winyo legana, an laticci, ki kit ma abako kwede doga, ai Rwot Lubaŋana, doŋ iwiny koko ki lega ma atye ka lego i nyimi tin; wek waŋi obed twolo onen ot man dyeceŋ ki dyewor, en aye kabedo ma yam iwaco pire ni ibiketo iye nyiŋi, wek ibed ka winyo legana ma akelo boti kun alokke akemo kabedo man atir. Dok iwiny bako dog laticci ki pa joni jo Icrael, i kare ma walego wakemo kabedo man atir; iyo, in doŋ ibed ka winyone ki i polo ka ma ibedo iye-ni; ci ka doŋ ityeko winyone, doŋ iwek balwa. “Ka ce dano mo otimo bal i kom wadi mo, ci gimiye okwono kwon mo pire, ka obino ce okwoŋo kwoŋŋe ki i nyim keno tyerri ma i ot man, ci in Lubaŋa iwiny ki i polo, iket i tic; ŋol kop pa laticci-ni, imi kop olo dano mutino alii, kun iketo gin ma en otimo i wiye kene, dok imi dano ma pe obalo olo kop, kun itime ber muporo leŋcwinye. “Ka ce mony pa lumerok guloyo jonijo Icrael pi balgi ma gutimo i komi, ka ce guŋut gudwogo boti, ci gucako tuco nyiŋi, ma gilego in ka gibako doggi boti ki i ot man, ci iwinygi ki polo, iwek bal pa joni jo Icrael, ka dok idwokgi cen wa i lo bo ma yam i miyo bot kwarogi. “Ka ce polo ocegge woko, ma kot mo pe ocwer pi lakit balgi mo i komi, ka ce lwakki gucako lega kun gukemo kabedo man, kun gituco nyiŋi, ka guŋut ci gubwoto balgi, ki i kare ma iketo can i komgi-ni, ci in Lubaŋa iwinygi ki i polo, iwek bal pa luticci, gin joni jo Icrael, dok ipwonygi ki yo maber ma myero gulubi; ci doŋ imi kot ocwer i loboni-ni ma yam imiyo bot lwakki obed megi. “Ka ce kec opoto i lobo, ka two gemo opoto, nyo ka bel obwarre nyo odoko ocone, nyo ka bonyo opoto nyo okwil obino, ka ce merokgi orumogi i gaŋigi mogo nyo kadi bed kit gemo aŋo, nyo kit two mo-ni, ka ce lwakki gucako lega nyo bako doggi, kadi bed dano acel kok boti, nyo joni jo Icrael ducu, kun dano acel acel ŋeyo kit atwomme kene, ki cwercwinye bene, ka ce otaŋo ciŋe okemo ki ot man; ci in Lubaŋa iwinygi ki i polo ka ma ibedo iye-ni, iwek balgi. Tim dano acel acel kit ma iŋeyo kwede cwinye, ma rwatte ki kit kwone ducu, pien in aye, in keni, iŋeyo kit cwiny pa dano ducu; meno bimiyo gibedo ka lworo in kun gilubo yo meri nino ducu ma gibedo, iye i lobo ma yam imiyo bot kwarowa. “Obed kit meno bene ka ce larok mo, ma pe joni jo Icrael, obino kany ma oa ki i lobo mo mabor, ma obino pi nyiŋi madit-ti, ki badi matek-ki, ki ciŋi ma iryeyo, ka ce larok obino ce ocako lega ma okemo ot man, ci in Lubaŋa iwiny ki i polo ka ma ibedo iye-ni, itim kit gin ducu ma larok-ki okok kwede i nyimi, wek rok ma wi lobo ducu guŋe nyiŋi, gucak lwori, kit ma I wakki jo Icrael gilwori-ni, dok wek guŋe maber ni, ot man ma agero-ni, gilwoŋo ki nyiŋi keken. “Ka ce lwakki gucito ka lwenyo i kom lumerokgi i kabedo mo ducu ma icwalogi iye, ka ce gukelo legagi boti ma gukemo gaŋ man ma in iyero, ki ot man ma agero pi nyini-ni, ci in iwiny legagi ki bako doggi ki i polo, ci ikony korgi macalo ineno ni lokgi tye atir. “Ka ce gutimo bal i komi, pien pe tye dano mo ma pe balo, ka ce kiniga omaki i komgi, ci imiyogi i ciŋ lamerok mo, ma oyakogi ci oterogi i opii wa i lobo mo ka mabor nyo ka ma cok; ento ka cwinygi otamo lok ki i lobo ma giterogi iye i opii-ni, ce guŋut ci gubako doggi boti ki i lobo ma gitye iye i opii, kun gikok ni, ‘Wabalo, watyeko ŋak woko ata, watiyo lwak bal-gu mapol’, ka ce gutyeko nut Ici tamgi ducu ki cwinygi ducu, ki i lobo ka ma giterogi iye i opii-ni, kun doŋ gilego i nyimi ma gukemo lobogi, ma yam imiyo bot kwarogi-ni, ki gaŋ ma nene iyero, ki ot ma atyeko gerone pi nyiŋi, in Lubaŋa iwiny legagi ki bako doggi ki i polo ka ma ibedo iye-ni, ci iye konyo korgi ka ce ineno ni lokgi tye atir, dok iwek bal pa joni ma gubalo i komi. Ai Lubaŋa, kombeddi doŋ wek waŋi obed twolo ci icik iti iwiny lega ma gilego i kabedo man. “A malo, ai Rwot Lubaŋa, ci idony i kabedo me yweyoni, in ki canduk me tekki. Ai Rwot Lubaŋa, wek ajwagini gurukke ki larre, wek joni maleŋ cwinygi obed yom pi berri. Ai Rwot Lubaŋa, pe ikwer lega pa lakerri ma giwiro! Po pi mar meri ma pe lokke i kom laticci Daudi.” Ka Solomon doŋ otyeko legane, ci mac obino piny ma a ki i polo, owaŋo gitum awaŋa ki gitum mu kene ducu, ci deyo pa Rwot opoŋo i ot pa Lubaŋa woko. Ajwagi doŋ pe gitwero donyo i ot pa Rwot, pien deyo pa Rwot opoŋo i ot pa Rwot woko. Ka jo Icrael ducu guneno mac obino piny, ki deyo pa Rwot oboyo kom ot pa Lubaŋa woko, gukulo wigi piny aryeba ic i dyekal ma gipeto iye godi, gumiyo woro ki pwoc bo! Rwot, kun giwacci, “Pien en ber, mar mere ma pe lokke bedo nakanaka.” Ka dok kabaka ki jo Icrael ducu gucako tyero gitum i nyim Rwot. Kabaka Solomon otyero gityer ma romo twoni dyaŋi alip pyeraryo wiye aryo, ki romi alip miya acel ki pyeraryo. Kabaka ki jo Icrael ducu gukwero ot pa Lubaŋa kit meno. Ajwagi gucuŋ i kabedogi, kacel ki Lulevi ma gumako jami me wer megi me pako Rwot, kit ma yam kabaka Daudi oyubo pi miyo pwoc bot Rwot, ni, pien mar mere ma pe lokke bedo nakanaka. Meno timme i kare ducu ma yam Daudi pako iye Lubaŋa, kun gin gikonye ki jami wergi. Ki jo ma gucuŋ ma’ gukemogi gin ajwagi ma gikuto tum, kun noŋo jo Icrael ducu gucuŋ mot. Solomon dok ocako kwero kabedo ma i cwiny dyekal ma tye i nyim ot pa Rwot-ti. En otyero kunnu gitum awaŋa, ki moo dwolo-gu me gityer lakwecwiny, pien keno tyer me mola ma Solomon otiyo-ni onoŋo tidi twatwal, pe romo keto iye gitum awaŋa kacel ki gityer me moko kwon ki dwolo-gu. I kare meno Solomon okwero nino madito pi nino abiro kulu, kacel ki jo Icrael ducu. Onoŋo lwak gucokke madwoŋ, kun gua wa i yo ma donyo i Kamat nio wa i nota ora me Ejipt, I nino me aborone gubedo ki cokke madit; pien gubedo ki lega me kwero keno tyer nino abiro kulu, ki nino madito mukene bene nino abiro. I kom nino dwe pyeraryo wiye adek i dwe me abiro en aye Solomon ocwalo lwak gudok woko tugi. Lwak gudok i pacogi ki yomcwiny madwoŋ, ma igi okwe pi gin ducu mabeco ma Rwot otimo pi Daudi ki pi Solomon ki pi lwakke jo Icrael. Kit meno Solomon otyeko gero ot pa Rwot ki ode en kabaka bene; tic ducu ma yam en oyubo me atiya i ot pa Rwot ki i ode en ocobo maber twatwal. Ci Rwot onen bot Solomon i dyewor kun wacce ni, “Atyeko winyo legani, doŋ atyeko yero kabedo man obed mera me bedo ot ka ma gibityero iye gitum bota. Ka ce acego polo ma kot doŋ pe cwer, nyo ka ce aciko ni bonyo ocam cam ma i lobo otyek woko, nyo ka ce acwalo two gemo opoto i kom lwakka, ka ce lwakka ma gilwoŋogi ki nyina-ni gumwolle woko, ce gulego ma gimito an kikoma, ka guweko kit timgi maraco, ci dok abiwinyogi ki i polo, ci abikwanyo gin ma tye ka balo lo bogi, ka dok abiweko balgi. Cakke tin waŋa bibedo twolo, dok abiciko ita ka winyo lega ma gibilego i kabedo man. Pien tin an doŋ atyeko yero ot man, dok atyeko lonyone odoko maleŋ, wek nyiŋa obed iye matwal; dok waŋa ki cwinya bikemo kunnu matwa!’ Ki ma tuŋ boti, ka ce ibibedo ki kit kwo i nyima ma yam woru Daudi obedo kwede-ni, ce ka itiyo gin ma aciko ducu, kun igwoko cik ma aketo, ki gin ma doŋ aŋolo, ci an Lubaŋani abimoko komkerri me loyo Icrael matwal, kit ma yam aciko bot woru Daudi kun awacce ni, ‘Pe ibibedo laboŋo danoni mo ma biloyo jo Icrael.’ “Ento ka ce wunak woko, ma wubwoto lubo cikka ki mako lok ma aciko ma aketogi i nyimwu, ce wukobo woko ka tiyo bot lubaŋa mogo mukene kun wuworogi, ci miyo abiputowu woko ki i lobo ma yam amiyowu-ni; dok abikwanyo waŋa woko, pe dok neno kom ot man ma atyeko lonyo odoko maleŋ pi nyiŋa-ni; miyo nyiŋ Icrael bi doko carolok ki lok aboka i kin rok ducu, Jo ducu ma bikato ki ka ŋet ot man madit twatwal-li gibiuro ki jwat kun giwacci; ‘Kit lok aŋo mumiyo Rwot otimo lobo-ni ki ot man ki tim macalo man?’ Ka dok gibiwacci, ‘Pien gubwoto Rwot Lubaŋa pa kwarogi ma yam okwanyogi ki, i lobo Ejipt, ci gukobo bot lubaŋa mogo mukene, dok gubedo ka worogi ma kun gitiyo botgi bene; en aye lok mumiyo Rwot omiyo can opoto i komgi magwa-ni.’ ” Gero odi aryo-ni ma Solomon ogero, gin aye ot pa Rwot ki ot pa kabaka, otero mwaka pyeraryo kulu, Solomon dok ogero gaŋi odoco ma yam Kuram omiyogi bote, ci omiyo jo Icrael gubedo i igi. Solomon dok ocito i Kamat-joba, ci omako woko. En ogero Tadmor ma i tim, ki gaŋi ducu me kano cam ma ogerogi i Kamat. Dok en ogero Bet-koron Mamalo ki Bet-koron Mapiny orumo gaŋi magi ki cel gogo, oketo iye doggola ma gicego ki rii. Ogero Baalat bene, ki gaŋi ducu me kano cam ma yam Solomon tye kwedgi, ki gaŋi me keto gadigadi mony, ki gaŋi pa lulweny ma giriŋo ki aguragura, ki kit gedo ducu ma yam Solomon omito gerogi i Jerucalem, ki i Lebanon, ki i lobo ma en loyo ducu. Jo ducu ma yam gubwot ci gudoŋ ki i kom jo Kit, jo Amor, jo Periji, jo Kiv ki jo Jebuc, ma pe gin jo Icrael, gin aye Solomon oketo tic muroni i wigi, kit macalo tye-ni nio wa onyoo, Ento Solomon pe odiyo jo Icrael i tic me opii; gin gubedo askari, ki luditone, ki ludito me gadigadi monnye, ki lulweny ma giriŋo ki aguragurane. Jo magi gin aye ludito tic pa Kabaka: Solomon ma giloyo dog tic ducu; giromo miya aryo ki pyerabic, gin aye giloyo lwak. Solomon okelo nya pa Parao nia ki i gaŋ kal pa Daudi otero i ot ma en ogero pire, pien owacci, “Dakona pe bibedo i ot pa Daudi kabaka me Icrael, pien kabedo ducu ma doŋ canduk pa Rwot obino iye-ni odoko kabedo maleŋ.” Dok Solomon obedo ka tyero gitum awaŋa i wi keno tyer pa Rwot ma yam en ocano i nyim kicika ot ma i doggola me ot pa Rwot. En obedo ka miyo gityer kit ma tic me nino acel acel mito kwede, kun lubo cik pa Moses i cen cabit ducu, ki i por dwe, ki i nino madito adek me mwaka ki mwaka-ni, ma gin aye nino madito me Mugati ma Tobi Pe Iye, nino madit me kwero Agikki Cabit Abiro, ki nino madito me Bolo. Kit macalo yam wonne Daudi ociko, en oketo lwak dul pa ajwagi ki dog ticgi, ki Lulevi gi dog ticgi me pako Lubaŋa ki me tic i nyim ajwagi, muporo tic me nino acel acel. Opoko bene tic pi lugwok doggola ducu ki dulgi i doggola acel acel, kit ma Daudi ma dano pa Lubaŋa yam ociko. Gin gubedo ka lubo cik ma kabaka ociko ki ajwagi ki Lulevi, pe guweko gin mo ma mako lok ducu, ki ma mako kano limo Solomon otyeko ticce ducu kit meno, cakke i nino ma giketo iye guti me te ot pa Rwot nio ka otum, Ot pa Rwot otum kit meno. Solomon dok ocito wa i Ejiongeber ki i Elot ma i dog nam, ma i lobo Edom. Kuram yam ocwalo luticce ki mel bot Solomon; en ocwalo luticce ma guŋiyo ki nam, ci gucito wa i Opir kacel ki lutic pa Solomon, guomo jabu ma romo talanta miya aŋwen ki pyerabic ki kunnu, gukelo bot kabaka Solomon. I kare ma kabaka ma dako me lobo Ceba owinyo pi yweka pa Solomon, en obino bote i Jerucalem ka temo iye ki peny matego, Obino ki lwak jo madito mapol ma gicom i kore, kacel ki lwak kinaga-gu ma giyweyo aŋwece, ki jabu madwoŋ twatwal, ki litino godi me wel-gu. Ka obino bot Solomon, ci ocako titte lok ducu ma onoŋo tye i cwinye. Solomon odok iye i pennye ducu; pe onoŋo tye lok mo wacel ma okanne ki bot Solomon ma pe romo tucone bot dako-nu, Ka kabaka ma dako me Ceba oneno ryeko pa Solomon ducu, ki ot ma en ogero, ki cam ma i wi mejane, ki kit kabedo pa luditone, ki tic pa luticce, ki boŋŋime arukagi, ki lutin kikopo-gu, ci tam otum woko ki i cwinye. Owaco bot kabaka ni, “Lok ducu ma i komi ma yam gitero bota ki i lobona, ki lok i kom ryekoni bene, onoŋo lokke tye kakare, ento yam pe aye lok ma gitero bota ducu, nio ka abino aneno ki waŋa. Ci nen, kadi wa nucu ryekoni maditte onoŋo pe gititta kulu, pien ryekoni ki lonyoni kato lok dog ma giterra awinyo-ni. Monni gitye ki yomcwiny kuman! Luticci magi ducu gitye ki yomcwiny ma rom mene, ma gibedo ka cuŋ i nyimi jwijwi ka winyo lok me ryekoni! Gipwo Rwot Lubaŋani ma cwinye opwoyo in ci oketi i wi komker me bedo kabaka pi Rwot Lubaŋani! Pien Lubaŋani omaro jo Icrael matwal, dok omito mokogi gubed matek, en aye omiyo en oketi ibedo kabaka ma loyogi, wek ibed ka ŋolo kop atir dok kakare.” En omiyo bot Solomon jabu madwoŋ ma romo talanta miya acel ki pyeraryo, ki lwak aŋwece mapatpat madwoŋ twatwal, ki lwak litino godi me wel, I kare ca onoŋo pe tye aŋwece mukene macalo meno ma kabaka me Ceba omiyo bot Solomon-ni. Ka dok lutic pa Kuram ki lutic pa Solomon ma onoŋo gukelo jabu nia ki i Opir, gukelo wa ki bao yat algum ki lwak godi matino me wel. Kabaka otiyo ki bao yat algum pi jeŋo kor ot pa Rwot ki kor ot pa kabaka. Otiyo kwede opuk bene ki nana pa luwer. Kit jami macalo meno onoŋo peya yam onen kulu i lobo Juda. Kabaka Solomon omiyo bot kabaka ma dako me Ceba jami ducu ma cwinye omito, omiye gin ducu ma openyo, ma pe giribo iye jami ma onoŋo en okelo bot kabaka. Kit meno kabaka me Ceba ocako wot me dok wa i lobone kikome, kacel ki luticce ducu. Lwak jabu ma obino bot Solomon i mwaka acel acel pekke oromo talanta miya abicel ki pyerabicel wiye abicel ma pe giribo iye ma lucat-wil gukelo; luker pa jo Arabia, ki ludito ma loyo lobo bene gukelo jabu ki ryal bot Solomon. Kabaka Solomon otiyo lwak kwodi madoŋo miya aryo me jabu, ma gitetogi ki nyol; i kom kwot acel acel odonyo iye jabu ma pekke romo cekel miya abicel. Dok otiyo kwodi matinone miya adek me jabu ma gitetogi ki nyol, kun kwot acel acel giteto ki jabu ma pekke cok romo ratili apar, Kabaka oketogi i ot ma gilwoŋo ni, Buŋa me Lebanon. Kabaka dok otiyo komker madit me lak lyec, ci omwono kome woko ki jabu ma giliyo maber. Komker meno onoŋo tye ki rwomme abicel ki kom me jabu me teno tyen, ma gikubogi i kom komker. Ka ŋete tuŋŋi ki tuŋŋi giketo iye ka teno ciŋ dano, ki labwor aryo gucuŋ ka ŋet bad kom me teno ciŋ, kun tye bene lwak labwor apar wiye aryo ma gucuŋ i agikki rwom abicel-li, tuŋŋi ki tuŋŋi. Pe tye kom mo ma gitiyo ma cal ki meno i te ker ducu. Jami ducu ma yam kabaka Solomon mato kwede onoŋo me jabu keken, wa jami ducu ma gitiyo kwedgi i ot Buŋa me Lebanon yam gitiyogi ki jabu ma giliyo maber; i kare pa Solomon pe tye ŋatti mo ma tamo pi ryal. Onoŋo kabaka tye ki lwak mel ma giwoto Tarcic kacel ki mel pa Kuram, Mel me Tarcic yam dwogo cen ka mwaka okato adek adek kun gikelo lwak jabu ki ryal ki lak lyec-gu, ki ayom-gu ki gunya-gu. Kabaka Solomon obedo dit makato lwak luker ma wi lobo ducu pi lonyone ki pi ryekone. Lwak luker ducu me wi lobo gubedo ka yenyo kit yo me neno waŋ Solomon ki pi winyo kit ryekone-gu ma Lubaŋa oketo i cwinyeni, Dano acel acel yam tero motte bote, kun gitero jami me ryal ki me jabu-gu, ki ginaruka-gu, ki odok murra, ki aŋwece, ki aguragura-gu, ki kana-gu, mwaka ki mwaka, Solomon tye ki loc aguragura alip aŋwen pi aguragura ki gadigadi lwennye, ki lulweny ma giriŋo ki aguragura alip apar wiye aryo, En yam oketo mogo i gaŋi me gadigadi lweny ki mukene gubedo bot kabaka i Jerucalem. En oloyo luker ducu cakke wa i kulu Euprate nio kwede i lobo pa jo Piliciti, ki i wan lobo me Ejipt. Kabaka yam omiyo ryal odoko gin ma lam ma rom ki gweŋ-gu i Jerucalem, dok okelo yadi cedar mapol ata ma rom ki olam ma i bar Cepela. Solomon yam limo aguragura ma a ki i Ejipt ki i lobo ducu. Lok kom Solomon mudoŋŋe ducu, nia i acakki nio i agikkine, gityeko coyone i buk me Tekwaro ma lanebi Natan ocoyo, ki i kin lok pa Lubaŋa ma Akija ma jo Cilo otito, ka dok i buk me lok kom gin ma Iddo ma lanen oneno ma okemo kom Jeroboam wod pa Nebat. Kare ma Solomon oloyo kwede jo Icrael kun bedo i Jerucalem oromo mwaka pyeraŋwen, Solomon oto ci oywe kacel ki kwarine, ka giyike i gaŋ kai pa wonne Daudi. Rekoboam ma wode aye oleyo ka tyene. Rekoboam ocito i Cekem, pien onoŋo jo Icrael gumol gucito i Cekem ka keto en me bedo kabaka, Ka Jeroboam wod pa Nebat owinyo pire, ci oa ki i Ejipt odok cen; pien onoŋo Jeroboam yam pud tye i Ejipt ka ma yam oriŋo iye kabaka Solomon, Gicwalo lukwena ka lwoŋe, ci Jeroboam ki lwak jo Icrael ma gucokke ducu guwaco bot Rekoboam ni, “Woru oketo yec mapek i komwa. In doŋ ilok tic matego ma woru omiyowa, ki yec mapek ma en oketo i komwa-ni, obed mayot, ci wan wabibedo luticci.” En ogamo ni, “Wudwog bota kany i ŋe nino adek.” Ci lwak gudok cen. Kabaka Rekoboam ocako yubo lok ki ludoŋo muteggi, ma yam gicuŋ i nyim wonne Solomon i kare ma en pud kwo, ci openyogi ni, “Wun wumiya kit tam aŋo wek adok iye ki lwak man?” Gin guwacce ni, “Ka ce kica bimaki i kom lwak man, ma ikweyo cwinygi, kun iloko botgi lok ducu mabeco, ci gin bene gibibedo Luticci matwal.” Ento en obwoto tam pa ludoŋo muteggi woko, ocako dok yubo lok ki awobe ma yalwakke, ma gicuŋ i nyime. Openyogi ni, “Wun wumiya kit tam aŋo wek adok iye ki lwak man ma gupenya ni, ‘Wek yec ma woru oketo i komwa mapek-ki obed yot’?” Ci awobe ma yalwakke guwacce ni, “Ibidok iye ki lwak ma gupenyi kit man ni, ‘Woru yam omiyo yecwa odoko pek, ento in imi obed yot botwa’; in ibidok iye ki gin kit man ni, ‘Nyig ciŋa kinoŋ makato pyer wora. Doŋ abitiyo kit man: wora yam oketo yec mapek i komwu, an dok abimedone bedo mapek. Wora yam opwodowu ki del anino, an abipwodowu ki yib otoŋ.’ ” Jeroboam ki lwak ducu gubino bot Rekoboam i kom nino me adekke, kit ma yam kabaka ociko ni, “Wudwog cen bota i nino me adekke.” Kabaka ocako dok i peny pa lwak ki gero, pien oweko tam ma ludoŋo muteggi gumiye. Kabaka Rekoboam oloko ki lwak kit ma awobe guyubo kun wacci, “Wora yam omiyo yecwu odoko pek, ento an abimedone bedo mapek; wora yam pwodowu ki del anino, an abipwodowu ki yib oton.’ Kabaka pe owinyo lok pa lwak; pien Rwot aye omiyo okwero, wek lokke ocobbe kakare ma, yam en oloko bot Jeroboam wod pa Nebat kun ocwalo Akija ma jo Cilo ocito otitte-ni, Ka jo Icrael ducu guneno ni kabaka pe owinyogi, ci lwak gudok iye ki kaba ka ni, “Wan watye ki waŋ pokwa aŋo i kom Daudi? Pe watye ki dul mo i kom latin pa Yece. Wun jo Icrael wudok i kemawu! In Daudi, doŋ inen odi keni.’ Ci jo Icrael gucako pokke woko, gudok i pacogi. Ento Rekoboam pud loyo jo Icrael ma gibedo i gaŋi ma i Juda. Kabaka Rekoboam ocwalo Adoram, ladit ma loyo tic muroni, ci jo Icrael ducu gucako cele ki got, guneke woko, Kabaka Rekoboam orune oito i wi gadigadi lwennye, ci oriŋo kwede woko wa i Jerucalem. Kit meno jo Icrael gucako jemo woko i kom ot pa Daudi nio kwede wa onyoo. Ka Rekoboam odwogo cen i Jerucalem, ci ocoko jo ma giyero ki i ot pa Juda ki i kin jo Benjamin, twoni lweny alip miya acel ki pyeraboro, pi lweny i kom jo Icrael wek gidwok ker bot Rekoboam. Ento lok pa Rwot obino bot dano pa Lubaŋa ma nyiŋe Cemaya, kun wacci, “Wac ki Rekoboam wod pa Solomon ma kabaka me Juda, ki bot jo ducu me ot pa Juda ki jo Benjamin ni, ‘Rwot owaco kuman ni, Wun pe wubicito ka lweny i kom lutuwu ma gin jo Icrael. Wek dano acel acel odok cen i pacone, pien lok man oa ki bota.’’’ Gin ducu guwinyo lok pa Rwot, ci gudok cen i pacogi, pe dok gucito ka lweny i kom Jeroboam. Rekoboam obedo i Jerucalem, ogero gaŋi gogo me mony i Juda. Ogero Beterekem, Etam, Tekoa, Bet-jur, Coko, Adulam, Gat, Mareca, Jip, Adoraim, Lakic, Ajeka, Jora, Aijalon, ki Kebron, gin ducu gaŋi ma girumo ki cel gogo ma gitye i Juda ki i Benjamin. En oyubo cel gogo ducu obedo matek, oketo ludito mony i igi, okano iye cam, ki moo ki koŋo vino. Ka dok oketo kwodi ki toni i gaŋi ducu, ci omiyogi gubedo matek mada. Kit meno Juda ki Benjamin gudoŋ i te locce. Ajwagi ducu pa Lubaŋa ki Lulevi ma yam gitye i lobo Icrael gua ki i kabedogi ducu, gubino ka bedo i ŋete. Lulevi gubwoto lobo ma gibedo iye gudok wa i Juda ki i Jerucalem, pien Jeroboam ki likwayone gukwero woko ni pe doŋ guti tic macalo ajwagi pa Rwot, Jeroboam oketo ajwagine ma en oyero me tic i wan jogi ma i wi godi, ki bot jogi ma calo nyogi dyegi, ki bot cal litino twoni ma en otiyo. Jo ma yam guketo cwinygi ka cito bot Rwot Lubaŋa pa Icrael gulubo kor ajwagi pa Rwot ki Lulevi, nia ki i kaka pa jo Icrael ducu, guwoto Jerucalem ka tyero gitum bot Rwot, Lubaŋa pa kwarogi. Gujiŋo ker pa Juda matek, gumiyo Rekoboam wod pa Solomon obedo matek pi mwaka adek, pien gubedo ka lubo kit pa Daudi ki Solomon pi mwaka adek. Rekoboam onyomo Makalat nya pa Jerimot wod pa Daudi, Min Makalat obedo Abikail nya pa Eliab ma wod pa Yece. Makalat onywalo ki Rekoboam litino awobe magi, Jeuc, Cemaria ki Jakam, Ka dok ki i ŋeye en onyomo Maaka nya pa Abcalom ci onywalo kwede Abija, Atai, Jija, ki Celomit. Rekoboam omaro Maaka nya pa Abcalom makato monne ducu ki mon aŋecane-gu. En yam onyomo mon apar wiye aboro ci obedo ki mon aŋecane pyerabicel kulu; onywalo awobe pyeraryo wiye aboro ki anyira pyerabicel. Rekoboam oketo wode Abija latin pa Maaka me bedo ladit ma loyo wi omegine, pien yam onoŋo omito keto en me bedo kabaka. Rehoboain obedo ka tic ki ryeko, opoko awobene mogo i dul lobo ducu ma i Juda ki Benjamin, oketogi i gaŋi me cel gogo ducu, opoko botgi cam madwoŋ, dok bene onyomo botgi mon. Ka ker pa Rekoboam doŋ omoko maber, kun medde ki cuŋ matek, en kacel ki jo Icrael ducu gucako bwoto cik pa Rwot. I mwaka me loc pa Rekoboam me abicce, en aye Cicak kabaka me Ejipt obino kwede ka lweny i kom jo Jerucalem, pien gubwoto Rwot woko. Gubino ki gadigadi lweny alip acel ki miya aryo, ki lulweny ma giriŋo ki aguragura alip pyerabicel. Lwakjo ma welgi pe kwanne gubino kwede ma gua ki i Ejipt, jo Libya, jo Cukiim, ki jo Etiopia, Ci omako gaŋi ma girumo ki cel gogo ma i Juda ducu nio kwede wa i Jerucalem. Cemaya ma lanebi ocito bot Rekoboam ki bot rwodi me Juda, ma onoŋo gucokke i Jerucalem pi Cicak owaco botgi ni, “Rwot owaco kuman ni, ‘Wun wuryeko bwoto an woko, pi meno an bene atyeko miyowu i ciŋ Cicak.’’’ Rwodi me Icrael kacel ki kabaka gumwolle woko, omiyo guwacci, “Rwot lokke tye kakare.” Ka Rwot oneno ni gumwolle kengi, lok pa Rwot obino bot Cemaya ma wacci, “Gin gumwolle kengi; pe doŋ abityekogi woko, ento doŋ abilarogi, pe doŋ abitoyo akemona i kom Jerucalem ki cin Cicak. Ento gibibedo luticce, ka wek guŋe tic kweda ki dok me tic ki luloc me lobo mukene bene,” Kit meno Cicak kabaka me Ejipt ocako bino ka lweny i kom Jerucalem, ci oyako jami ma gikano i ot lim pa Rwot, ki jami ma gikano i ot lim pa kabaka. En oyako woko ducu, dok oyako lwak kwodi me jabu ma yam Solomon otiyogi. Kabaka Rekoboam dok otiyo lwak kwodi mukene; otiyo kwodi mola, ci omiyogi i ciŋ ludito pa lugwok kabaka ma gigwoko doggola ot pa kabaka. I kare ducu ma noŋo kabaka cito i ot pa Rwot, lugwok en yam gimako kwodi, ka dok gidwoko kakagi i ot kicika pa lugwok kabaka, Ka doŋ en omwolle kene ci akemo pa Rwot oa woko i kome, ci pe miyo gityekogi woko liweŋ, dok piny onoŋo ber i Juda. Kit meno Rekoboam omoko ker mere matek i Jerucalem dok obedo ka loc bene, Rekoboam ocamo ker ma mwaka me ditte romo pyeraŋwen wiye acel, obedo ka loc i Jerucalem pi mwaka apar wiye abiro, Jerucalem ma en aye gaŋ ma yam Rwot oyero ki i kin kaka ducu me lerael pi keto iye nyiŋe. Nyiŋ minne Naama ma anyira Ammon. En con obedo ka tiyo gin marac, pien pe oketo cwinye ka yenyo Rwot. Lok kom Rekoboam mudoŋŋe ducu, nia i acakki nio i agikkine, gityeko coyone i buk me Tekwaro ma lanebi Cemaya ocoyo, ki i buk pa Iddo ma lanen, Lweny yam obedo tye i kin Rekobo am ki Jeroboam pi kare ducu ma pe gik. Rekoboam oto, oywe kacel ki kwarine, ci giyiko kacel ki kwarine i gaŋ kai pa Daudi; wode Abija aye oleyo ka tyene. I mwaka me apar wiye aboro me loc pa kabaka Jeroboam, en aye Abija ocako loyo iye jo Juda. Obedo ka loc i Jerucalem pi mwaka adek, Nyiŋ minne Mikaya ma nya pa Uriel me Gibea. Lweny obedo tye i kin Abija ki Jeroboam. Abija yam ocito ka lweny kun woto ki monnye ma gin oteka lweny, ma giromo alip miya aŋwen ma giyerogi ayera, Ci Jeroboam orwayo monnye cok ka lweny i ko me ki jo ma giyerogi matego alip miya aboro, ma gin twoni lweny, Abija ocuŋ i wi got Jemaraim ma tye i lobo gotgot ma i lobo Epraim, kun wacci, “Winy lokka, in Jeroboam ki wun jo Icrael ducu!” Pe wuŋeyo mono ni Rwot Lubaŋa pa Icrael omiyo ker bot Daudi ki likwaye i gicikke ma gimoko ki kado, me loyo Icrael matwal? Jeroboam wod pa Nebat, ma latic pa Solomon wod pa Daudi, pud dok ojemo woko i kom rwode, Jo mogo ma konygi pe ma kitgi obedo atata gucokke bote, ci gubalo Rekoboam wod pa Solomon woko. Pien onoŋo Rekoboam pud t idi ma timme bene pud woto atata, dok pe otwero kwero tamgi. “Nen kombeddi wumito kwanyo ker pa Rwot woko ki i cin likwayo pa Daudi, pien wun wutye lwak madwoŋ, dok wutye bene ki cal litino twoni me jabu ma Jeroboam otiyo me bedo lubaŋawu. Wun pe doŋ wuryemo ajwagi pa Rwot woko, ma gin likwayo pa Aron, ki Lulevi, ka dok wuketo ajwagi piwu kenwu macalo jo ma i lobo mukene-ni? Ka ŋat mo obino, tekke okwero ko me kekene ki wod twon nyo nyogi romi abiro, ci tugi doko ajwaka cut pi jogiwu ma pe gin Lubaŋa kikome, Ento ki tun botwa, Rwot en aye Lubaŋawa, peya wabwoto en, Wan watye ki ajwagi ma gitiyo ki Rwot ma gin aye likwayo pa Aron, ki Lulevi ma gikonyogi ki tic. Odiko odiko ki otyeno otyeno, giwaŋo gitum awaŋa ki odok eceta ma ŋwece kur, gicano mugati i nyim Rwot i wi meja me jabu ma giliyo maber, dok gigwoko okar mac me jabu wek macce obed ka lyel otyeno otyeno; wan watye ka gwoko cik ma mako tic pa Rwot Lubaŋawa, ento wun wutyeko bwoto en woko. Nen, Lubaŋa tye kwedwa, tye ka telo wiwa, ki ajwagine gitye ki tum ma gikuto me ywayo mony me lweny i komwu, Aa wun awobe pa Icrael, pe wulweny i kom Rwot, Lubaŋa pa kwariwu: pien pe wutwero loyo mony.” Jeroboam onoŋo ocwalo dul mony gukanne woko me bino i komgi ki yo ŋegi; kit meno onoŋo monnye tye i nyim jo Juda, ki jo mubuto gurumo piny woko tye yo tuŋ ŋegi. Ka jo Juda guneno, gunoŋo ni mony tye i nyimgi ki i ŋegi bene; ci gucako kok bot Rwot, kun ajwagi gikuto tum. Jo Juda gucako wayo me lweny. I kare ma jo Juda gudaŋŋe, Lubaŋa oloyo Jeroboam woko, omiyo jo Icrael ducu guriŋo woko i nyim Abija ki jo Juda, Jo Icrael guriŋo woko, ci Lubaŋa omiyogi i ciŋ Abija. Abija ki jone gunekogi ki nek malit twatwal; jo ma guto giromo alip miya abic ki i kom jo ma giyerogi ayera ki i kin jo Icrael. Giloyo jo Icrael kit meno, pien jo Juda ma oloyogi onoŋo gujeŋŋe i kom Rwot Lubaŋa pa kwarigi. Abija olubo kor Jeroboam ci omayo gaŋi mogo pa jo Icrael woko ki bote, Betel ki gaŋi matino ma i ŋete, Jecana ki gaŋi matino ma i ŋete, ki Epron ki gaŋi matino ma i ŋete, Jeroboam pe dok olimo tek mo wacel i kare pa Abija; dok Rwot opwode, ci oto woko. Ento Abija omedde odoko tek, Onyomo mon apar wiye aŋwen, onywalo kwedgi litino awobe pyeraryo wiye aryo ki anyira apar wiye abicel. Lok kom Abija mudoŋŋe ducu, ma nyuto kite ma yam oloko, gityeko coyone i lok pa lanebi Iddo. Abija oywe kacel ki kwarine, ci giyike i gaŋ kal pa Daudi; wode Aca aye oleyo ka tyene. I karene lobo oywe mot ki kuc pi mwaka apar. Aca yam obedo ka tiyo gin maber dok ma nen atir i wan Rwot Lubaŋane. En okwanyo keno tyer ki waŋ jogi ma i wi godi pa lurok woko, omuko wir jogigi bene, ka dok otono yadi ma gicomo pi woro lok ma dako ma gilwoŋo Acera ducu oreto woko piny, ka dok ociko jo Juda ni gubin bot Rwot, ma Lubaŋa pa kwarigi, dok gugwok cikke ki gin ma en ociko. En bene yam omuko waŋ jogi ma i gaŋi ducu ma i Juda, okwanyo keno tyer me waŋo odok eceta ducu, Ker okwe mot i karene. Ogero gaŋi ma girumo ki cel gogo i Juda, pien lobo onoŋo okwe mot. Pe obedo ki lweny i lwak mwaka-nu ducu, pien Rwot omiyo kuc. En owaco bot jo Juda ni, “Wageru gaŋi magi, warumogi woko ki cel ma wagero i kome odi matego ma ocudo malo, waket bene doggola iye ma gicego ki rii; lobo doŋ pud mewa, pien wabedo ka bino bot Rwot Lubaŋawa, wabedo ka bino bote ci en omiyowa kuc i kabedo ducu.” Gugedo dok gubedo ki lonyo madwoŋ. Aca obedo ki lumony ma gua ki i Juda ma giromo alip miya adek, ma gitye ki kwodi ki toni, ki lumony ma gua ki i Benjamin ma giromo alip miya aryo ki pyeraboro ma gutiŋo kwodi, ma gin bene lucel atum; gin ducu twoni oteka lweny ma gitego. Jera ma Laetiopia obino ka lweny i komgi ki mony ma romo jo milion acel ki gadigadi miya adek; gubino guo cok ki Mareca. Ci Aca ocito ka rwatte kwede, kun monygi oryeyo i nota Jepata i Mareca. Aca okok bot Rwot Lubaŋane ni, “Ai Rwot, pe tye lakony mo macalo’ in, ma ‘koriyo jo magoro ka lweny i kom jo matego, Konywa, ai Rwot Lubaŋawa, pien wageno in, wabino ka lweny i kom lwak man madwoŋ-ŋi pi nyiŋi. Ai Rwot, in aye Lubaŋawa; pe iye dano mo oloyi.” Kit meno omiyo Rwot oryemo jo Etiopia woko ki i nyim Aca ki i nyim jo Juda, omiyo jo Etiopia guriŋo woko, Aca ki monnye guryemo korgi nio wa i Gerar, ci guneko jo Etiopia matek ma dano mo acel pe obwot makwo; pien guket woko ata ki i nyim Rwot ki monnye. Jo Juda gutiŋo lwak jami madwoŋ ma guyako gucito kwede. Guturo gaŋi ducu ma gurumo Gerar, pien Rwot omiyo lworo opoto i komgi. Guyako gaŋi ducu, pien onoŋo jami me ayaka dwoŋ i igi twatwal. Guputo kema pa jo ma yam wegi dyaŋi, guyako romi madwoŋ twatwal ki kinaga-gu, Gudok kwede cen i Jerucalem. Cwiny pa Lubaŋa obino i kom Ajaria wod pa Oded, omiyo en ocito orwatte ki Aca, ci otitte ni, “Winy an, Aca, ki jo Juda ki Benjamin ducu. Rwot tye kwedwu, ka ce wun wutye kwede. Ka wuyenyo en, ci wubinoŋo en, ento ka wubwoto en, en bene bibwotowu. Jo Icrael onoŋo gubedo laboŋo Lubaŋa me ada pi kare malac, wa ajwaka ma pwonyogi bene onoŋo pe, dok gubedo laboŋo cik; ento i kare ma arubaruba madwoŋ odiyogi gulokke bot Rwot, Lubaŋa pa Icrael, kun giyenyo en, omiyo gunoŋo en, I kare meno ducu onoŋo nar mo pe tye ki kuc me kato woko nyo kadi me dwogo gaŋ, pien cwiny dano orubbe woko pi can mapatpat ma obedo ka poto i kom jo ma gibedo i lobo ducu, Kingi opokke woko atata, rok lwenyo ki rok wadi ki gaŋ i kom gaŋ wadi, pien Lubaŋa odiyogi ki can i kit yo mapatpat. Ento wun, cwinywu obed nwaŋ! Pe wuwek badwu okwe woko, pien Lubaŋa biculo waŋ ticwu.” Ka Aca owinyo lok meno ducu, ma lanebi Ajaria wod pa Oded otito-ni, ci cwinye odoko nwaŋ, ocako jwero cal jogi me kipyeda woko ducu ki i lobo Juda ki Benjamin ki i gaŋi ducu ma en omayogi i lobo godi ma i Epraim, ci oyubo keno tyer pa Rwot ma yam tye i nyim kicika ma gidonyo kwede i ot pa Rwot. En ocoko jo Juda ducu ki jo pa Benjamin, ki jo ma gua i Epraim ki Manace ki Cimeon, ma onoŋo gibedo i kingi, pien onoŋo jo mapol gudak gua ki i Icrael gukobo bote pien guneno ni Rwot Lubaŋa tye kwede. Gucokke i Jerucalem i dwe me adek i mwaka me apar wiye abic me loc pa Aca, Gutyero gitum bot Rwot i nino meno, kun gikwanyo ki i kom jami ma gukelo, ma yam guyako, twoni ma romo miya abiro ki romi alip abiro. Ci gucako keto gicikke me cito bot Rwot, Lubaŋa pa kwarigi, ki cwinygi ducu ki tipogi ducu; dok guciko matek ni ŋat ma pe bicito bot Rwot, Lubaŋa pa Icrael, myero ginek woko, kadi bed dano matidi nyo dano muteggi, laco nyo dako. Gucako kwoŋo kwoŋ bot Rwot ki dwan maloŋo, kun gidaŋŋe, ma gikuto tum-gu ki tuŋ romi-gu. Ci jo Juda ducu cwinygi obedo yom pi kwoŋo kwoŋ; pien gukwoŋo kwoŋ ki cwinygi ducu, gubedo ka yenyo Rwot ki mitgi ducu, ci gunoŋo en, ka Rwot ocako miyogi yweyo i kabedo ducu. Kabaka Aca oryemo wa minne Maaka woko, pe oye ni omed bedo daker pien en otiyo cal me kipyeda pi Acera ma jok ma dako. Aca otoŋo cal jokke oŋido woko, ci owaŋo woko i nota kulu Kidron, Ento waŋ jogi ma i wi godi pe gimukogi woko ki i Icrael’ Kadi bed kumeno, Aca obedo ki leŋic i kom Rwot pi kare me kwone ducu, En okelo i ot pa Rwot mot ma wonne odyero, kacel ki mere kikome bene ma odyero, ryal ki jabu ki weer-gu, Lweny koŋ dok obedo pe nio kwede wa i mwaka me pyeradek wiye abic me loc pa Aca. I mwaka me pyeradek wiye abicel me loc pa Aca, Baaca kabaka pa jo Icrael ocito ka monyo jo Juda, ci orumo gaŋ me Rama ki cel matek, wek ogeŋ dano cito woko nyo bino bot Aca kabaka me Juda, Ci Aca okwanyo ryal ki jabu ma i ot kano lim pa Rwot ki ma i ot pa kabaka, ci ocwalo bot Ben-adad kabaka me Ciria, ma yam bedo i Damaciko, kun wacci, “Wek an ki in waribbe kacel, kit macalo ribbe obedo tye i kin wora ki woru-ni, Nen, acwalli ryal ki jabu; cit wek icitur ribbe ma tye i kin in ki Baaca kabaka me Icrael-li woko, wek en oa woko ki bota.” Ben-adad owinyo lok pa kabaka Aca, ci ocwalo ludito monnye ka monyo gaŋi pa jo Icrael, ci guloyo Ijon, Dan, Abelmaim, ki gaŋi ducu me kano cam ma i lobo pa jo Naputali. Ka Baaca owinyo lokke ci oweko gero cel Rama woko, ogiko ticce iye, Kabaka Aca owoto ki jo Juda ducu, guyweko litino godi ducu ma i Rama kacel ki lwak baone, ma yam Baaca obedo ka gedo kwede, ci ogero kwede cel i Geba ki Mijpa, I kare meno Kanani ma lanen obino bot kaba ka Aca, owacce ni, “Pien in doŋ igeno kabaka me Ciria, pe igeno Rwot Lubaŋani, omiyo mony pa kaba ka me Ciria guriŋo woko ki boti. Onoŋo mony pa jo Etiopia ki pa jo Libya yam dit twatwal ma gitye ki lwak gadigadi lweny ki wegi aguragura-gu? Ento in ibedo ka geno Rwot, oweko omiyogi i ciŋi. Pien wan Rwot neno lobo ducu, me nyuto tekke bot jo ma gibedo ki leŋic i kome. In itimo lok me miŋo mada i lok man; pienno cakke tin in ibibedo ki lweny.” Cut kiniga omako Aca i kom lanen, ci okete i mabuc, otweye ki okol, pien ojul i kome pi lok meno, Ka dok oketo can i kom jo mogo ma i kin lwak bene i kare meno. Lok kom Aca nia i acakkine nio i agikkine gityeko coyone i buk pa Luker me Juda ki me Icrael. I mwaka pyeradek wiye aboŋwen me loc pa Aca, en aye two omako iye tyene, ci twone omedde marac mada; ento i twone-ni en pe oyenyo kony bot Rwot, obedo mere ka yenyo kony ki bot ludaktar. Aca oto i mwaka me pyeraŋwen wiye acel me locce, oywe kacel ki kwarine. Giyike i lyel ma onoŋo en okwinyo pire kene i gaŋ kal pa Daudi, Gupyelo kome i wi kitara ma giketo iye lwak aŋwece mapatpat ma giyubo ki diro pa luyub aŋwece; ka dok gumoko mac madit mada pi miye deyo. Yekocapat ma wode aye oleyo ka tyen Aca, ci odoko tek mada i kom Icrael. Oketo mony i gaŋi ma girumo ki cel gogo ma i Juda ducu, ka dok oketo ludito wi mony oromo i lobo Juda ducu ki gaŋi ma i Epraim ma yam wonne Aca omayogi-ni. Rwot ogwoko Yekocapat, pien en obedo ka lubo kit pa wonne ma con-ni; pe obedo ka yenyo kony ki bot lwak Baal-gu, En obedo ka yenyo kony ki bot Lubaŋa pa wonne ki lubo cikke ducu, pe obedo ka lubo kit pa jo Icrael, Pienno omiyo Rwot omoko ker matek i cine; ki jo Juda ducu gubedo ka kelo lim ajog bot Yekocapat; onoŋo en tye ki lonyo madwoŋ wa ki deyo bene. Obedo ki tekcwiny pi lubo yo pa Rwot; dok omuko waŋ jogi ma i wi godi woko ki i Juda, kacel ki yadi ma gicomo pi woro Acera ma jok ma dako-ni. I mwaka me adek me locce ocwalo rwodine Ben-kail, Obadia, Jekaria, Netanel ki Mikaya ka pwony i gaŋi ma i Juda, Medo i komgi dok ocwalo Lulevi magi, Cemaya, Netania, Jebadia, Acael, Cemiramot. Yekonatan, Adoniya, Tobiya ki Tobadoniya; ki ajwagi ma onoŋo guwoto kwedgi obedo Elicama ki Jekoram, Gucako pwony i Juda, ma gitye ki buk me cik pa Rwot; gubedo bene ka wot i gaŋi ducu me Juda kun gipwonyo dano. Lworo ocako mako ker ducu me lobo ma gurumo Juda, ci pe guero lweny i kom Yekocapat. Lupiliciti mogo gukelo mot bot Yekocapat, guculo bote ryal, Jo Arab bene gutero bote nyogi romi alip abiro ki miya abiro, ki nyogi dyegi alip abiro ki mi ya abiro, Yekocapat ocako doŋo medde doko madit mada. En ogero cel gogo ki gaŋi me kano jami i Juda. En obedo ki odi madito me kano jami i Juda, Obedo ki lwak askari i Jerucalem ma gin twoni oteka lweny. Man aye onoŋo welgi ma giryeyo ma lubo dog odi pa kwarogi. I ot pa Juda ludito mony ma loyo jo alip gin ene: Adna ladit me mony, kacel ki twoni oteka lweny alip miya adek; ki ma lubo en obedo Yekokanan ladit me mony, ma loyo jo alip miya aryo ki pyeraboro; ki ma olube obedo Amacia wod pa Jikri, ma odyero kome pi tic pa Rwot, kacel ki jo alip miya aryo ma gin twoni oteka lweny. I ot pa Benjamin onoŋo tye Eliada, ma en twon oteka lweny, kacel ki jo alip miya aryo ma gitye ki atum ki kwodi; ki ŋat ma olubo en obedo Yekojabad, kacel ki jo alip miya acel ki pyeraboro ma gurukke pi lweny, Magi aye jo magubedo lutic pa kabaka, medo i kom jo ma yam kabaka oketogi i gaŋi ma girumo ki cel gogo ma i Juda. Yekocapat onoŋo tye ki lwak lonyo madwoij wa ki deyo bene; ocako ribbe ki Akab, ci omiyo wode onyomo nya pa Akab, Lacen i ne mwaka mogo manok ocito bot Akab i Camaria. Akab oneko lwak romi ki twoni dyaŋi mapol ata pire ki pi lwak ducu ma onoŋo gitye kwede, Man oti mo pi bito en wek ocit kwede ka lweny i kom Ramot-gilead. Akab kabaka me Icrael open yo Yekocapat kabaka me Juda ni, “Ibicito kweda ka lweny i kom gaŋ Ramot-gilead?” Yekocapat ogamo dog kabaka me Icrael kun wacce ni, “An ki in wan acel, lwakka gin aye lwakki. Wabibedo kwedi i mony.” Yekocapat owaco bot kaba ka me Icrael ni, “Koŋ ikwon penyo lok ki bot Rwot.” Kabaka me Icrael ocoko lwak lunebi ducu kacel, gucokke miya aŋwen, En owaco botgi ni, “Wacit ka lweny i kom Ramot-gilead, nyo pa aciti?” Gin lu ne bi gugamo ni, “Tugi cito cut, kabaka, pien Lubaŋa bimiyo i ciŋi.” Ento Yekocapat dok owaco ni, “Lanebi mo mukene pa Rwot pe tye ka ny, wek koŋ dok wapeny doge?” Kabaka me Icrael ogamo dog Yekocapat ni, “Pud tye dano mo ma myero wapenye wek wawiny dog Rwot ki bote, en Mikaya wod pa Imla; ento cwinya dage matek, pien peya otitta kit lok mo maber, en titta lok maracce keken.” Yekocapat ogamo ni, “Pe kumene, kabaka, wek lok kit meno obedi.” Kabaka me Icrael ocak o lwoŋo ladit mo ci owacce ni, “Cit icikel Mikaya wod pa Imla oyotoyot.” Onoŋo kabaka me Icrael ki Yekocapat kabaka me Juda gubedo wi komkergi, ma guruko jor kergi mabeco; gubedo kwede i laro moyo me dino bel ma i ŋet dogcel ma gidonyo kwede i Camaria, kun lunebi ducu gitye ka tito lok i nyimgi. Jedekia wod pa Kenaana otiyo cal tuŋ lee me nyonyo pire kene, ci owacci, “Rwot owaco kuman ni, ‘Ibitwomo jo Ciria ki magi nio ka ityekogi woko ducu.’ ” Ci lunebi ducu gutito lok ma kit meno, kun giwacci, “Tugi cito i Ramot-gilead, ci ibiloyo; Rwot bimiyo i ciŋi, kabaka.” Lakwena ma ocito ka lwoŋo Mikaya-ni obino owacci, “Nen ba, lok pa lunebi ducu obedo me cuko cwiny kabaka; pienno wek lokki bene obed ma rom ki megi, lokki bene obed lok me cuko cwmy.” Mikaya ogamo doge ni, “Macalo Rwot tye makwo-ni, gin ducu ma Lubaŋana owacca, en aye abilokone.” Ka Mikaya oo bot kabaka, kabaka openye ni, “Mikaya, wacit ka lweny i kom Ramot-gilead, nyo pe aciti?” En ogamo ni, “Tugi cito cut, ci ibiloyo; Rwot bimiyogi i ciŋi.” Ento kabaka dok owacce ni, “An mono abiciki i nyiŋ Lubaŋa tyen adi ni ilokka lok ada keken i nyiŋ Rwot?” Ci Mikaya owacci, “Anene jo Icrael ducu guket woko lijayi i wi godi, macalo romi ma gipe ki lakwat; dok Rwot bene owacci, ‘Jo-ni laditgi peke; wek ŋat acel acel odok gire i pacone ki kuc.’ ” Kabaka me Icrael owaco ki Yekocapat ni, “An pe onoŋo awacci ni, Mikaya pe bitito lok mo maber ma otika, ento bitito maracce?” Mikaya ogamo ni, “Pi meno koŋ dok iwiny lok pa Rwot mono. Abedo ka neno Rwot ma obedo i wi komkerre, kun lwak mony me polo ducu gucuŋ ka ŋete ki yo tuŋ bade malacuc ki yo tuŋ bade malacam. Rwot owacci, ‘Aŋa mono ma bibito Akab kabaka me Icrael, wek ocit oto i Ramot-gilead?’ Ci giwaco lok mapatpat. Lacen kit cwiny mo obino ci okato anyim ocuŋ wa i nyim Rwot, kun wacci, ‘An aye abibito en.’ Rwot openye ni, ‘Ibibito en niŋniŋ?’ En ogamo ni, ‘An abicito, ci abibedo cwiny ma lagoba kun aloko ki i dog lunebine ducu.’ Rwot ogamo ni, ‘In ibibite, ci biye lokk i; doŋ icitim kumeno.’ Kombeddi in doŋ inen ka Rwot ‘otyeko keto cwiny ma lagoba i dog lunebini magi ducu; Rwot doŋ otyeko ciko pi kelo lok marac i komi.” Ci Jedekia wod pa Kenaana ocito bot Mikaya cok ci odoŋo leme ki ciŋe, kun wacci, “Cwiny Rwot dok oa ki i koma niŋniŋ ka okobo oloko boti?” Mikaya owaco ni. “Meno ibiniaŋ iye i nino ma ibidonyo i kicika ma i tyelo wek ikanne iye.” Kabaka me Icrael owacci, “Wumak Mikaya woko, wudwoke cen wa bot Amon ma laloyo me gaŋ, ki bot Yoaci ma wod pa kabaka. Iciwacogi ni, ‘Kabaka owaco kuman ni, Wuket dano man i mabuc, dok wumiye ocam cam me mabuc, mugati ki pii keken, nio ka abidwogo paco ki kuc.’’’ Mikaya ogamo ni, “Ka ce idwogo paco ki kuc, ci pe Rwot aye oloko ki i doga.” Dok owacci, “Wun rok ducu doŋ wuwiny!” Kit meno kabaka me Icrael ki Yekocapat kabaka me Juda gucako cito i Ramot-gilead. Kabaka me Icrael owaco bot Yekocapat ni, “An abirukke macalo dano mo ata ka doŋ acako cito ka lweny, ento in iruk jorri me ker.” Kabaka ocako rukke macalo dano mo ata, ka ocito kwede i mony. Onoŋo kabaka me Ciria otyeko ciko ludito mony ma giloyo gadigadine me lweny ni, “Pe wucilweny i kom dano mo matidi nyo madit, ento wucilweny i kom kabaka me Icrael keken.” Ka ludito mony ma giloyo gadigadi lweny guneno Yekocapat, ci guwacci, “Meno aye kabaka me Icrael kikome.” Ci gulokke ka lweny i kome. Yekocapat ocako daŋŋe ki mwoc, ci Rwot okonye. Ci Lubaŋa okwanyogi woko ki bote. Ka ludito mony guneno ni pe en kabaka me Icrael, ci gulokke gudok woko cen gubwoto lubo kore. Ento dano mo otelo atumme ocelo ata, ci ocelo kwede kabaka me Icrael atura; atero obaro kin nyonyo me geŋo kore ki nyonyo mukene me geŋo kome ma obedo macalo pok rec. Kabaka owaco ki laryem gadigadine ni, “Lokke idok cen wek icikwanya woko ki i waŋ lweny, pien ret otyeko maka woko.” Ci lweny odoko malyet i nino meno, kabaka me Icrael obedo ojeŋŋe i gadigadine kun waŋe okemo jo Ciria nio wa otyeno, ka ocako to ma ceŋ cito ka poto, Yekocapat kabaka me Juda odok cen maber wa i ode i Jerucalem, Ento Yeko wod pa Kanani ma lanen-piny aye ocito ka rwatte kwede, ci owaco bot kabaka Yekocapat ni, “In imyero ka konyo jo maraco, ki maro jo ma gidag Rwot? Akemo pa Rwot doŋ otyeko bino ka lweny i komi. Ento gin maber tye i kin jami ma itiyogi, pien ityeko jwero yadi ma gicomo pi woro jok Acera woko ducu ki i lobo, ma iketo cwinyi ka yenyo Lubaŋa.” Yekocapat obedo i leruealem; dok owoto i kin dano cakke ki i Beer-ceba nio kwede wa i lobo godi me Epraim, odwoko cwiny dano i kom Lubaŋa pa kwarigi. Dok oyero lunoklop ki i gaŋi ducu ma girumo ki cel gogo ma tye i Juda, gaŋ ki gaŋ, ka ociko luŋolkop ni, “Wubed ki tam i kom gin ‘ma wutiyo, pien pe wubinolo kop pi dano ento pi Rwot; en tye kwedwu ka wuŋolo kop, Pi meno wulwor Rwot kun wugwokke bene i kom gin ducu ma wutiyo, pien Rwot Lubaŋawa pe mito giŋol kop ki go ba ma noŋo lok pe tye atir, nyo kadi dworo kor dano, ki dok pe mito gigam lim me wilo loyo kop.” Ki i Jerucalem Yekocapat dok oyero Lulevi mogo, ajwagi, ki ludito wi kaka ma i Icrael ducu, me bedo luŋolkop pi Rwot ki me winyo pido ma pyem tye iye ma ŋolo koppe tek. Gubedo ka tic i Jerucalem. Ocikogi ni. “Wubitiyo kun wulworo Rwot, ki gen, dok ki cwinywu ducu. Ka ce utmegiwu ma gibedo i gaŋigi gukelo lok me pido mo ma mako lok me oyo remo, ki ma mako cik pa Lubaŋa, nyo lok mo ma Lubaŋa ociko nyo oŋolo, wun aye wubipwonyogi, wek pe gutiŋ alii mo i nyim Rwot, wek akemo pa Lubaŋa pe obin i komwu ki i kom utmegiwu. Wubitiyone kit meno, wek pe wutin bal alii mo. Dok wunen, Amaria ajwaka madit en aye ma loyowu i kom lok pa Rwot ducu; Jebadia wod pa Icmael, ma laloyo ma i ot pa Juda, en aye ma loyo lok ma bot kabaka ducu; ki Lulevi gibitic botwumacalo lukaraniwu, Wuti ki tekcwinywu ducu, Rwot myero okony jo ma cwinygi atir!” Lacen jo Moab ki jo Ammon ki jo mogo me Meun gubino ka lweny i kom Yekocapat, Jo mogo gucito gutito bot Yekocapat ni, “Mony madwoŋ tye ka bino ka lweny i komi ma gia ki i Edom, gua ki loka nam; nen, doŋ gitye wa i Kajajon-tamar” (en aye En-gedi). Lworo ocako mako Yekocapat, en kikome ocako yenyo kony ki bot Rwot cut, ka dok ociko pi ri kec oromo i lo bo Juda ducu, Ci jo Juda gucokke kacel pi yenyo kony ki bot Rwot; dano ma gua ki i gaŋi ducu me Juda gucito ka yenyo kony ki bot Rwot. Yekocapat oa malo ocuŋ i nyim jo Juda ki jo Jerucalem ma gucokke, ocuŋ i ot pa Rwot, ki i nyim dyekal manyen, olego ni, “Ai Rwot, Lubaŋa pa kwariwa, in aye pe Lubaŋa ma i polo-ni? Pe in aye iloyo lwak ker ducu ma i lwak rok-ki ducu? Tek ki twero tye i ciŋi, pienno pe tye ŋatti mo ma twero cuŋ i nyimi. Pe in aye Lubaŋawa, ma oryemo jo ma i lobo-ni ki i nyim joni jo Icrael, ci omiyo bot likwayo pa Abraim laremi matwal-li? Ka gubedo iye, ci gugero piri kabedo maleŋ pi nyiŋi, kun giwacci, ‘Ka gin mo marac opoto i komwa, macalo lweny nyo lok ma iŋolo i komwa, nyo two gemo, nyo kec, ci wan wabicuŋ i nyim ot man, pien nyiŋi tye i ot man, ci wabikok boti pi aroma can wa i nyimi; in ibiwinyo ci ilarowa.’ Doŋ inen jo Ammon, jo Moab, ki jo Lugot Ceir, ma yam in pe iye Icrael omonyogi i kare ma gua ki i lobo Ejipt, ma yam gubwoto odoŋ ma pe gijwerogi woko-ni. Nen ka doŋ giculowa waŋe ki bino ka ryemowa woko ki i loboni ma wacamo ma yam imiyowa me bedo ginaleyawa. Ai Lubaŋawa in pe ibinologi kop? Pien wan pe watye ki tek me lweny i kom mony man madwoŋ ma gubino ka lweny i komwa-ni. Pe waneyo gin ma watiyo, ento waketo waŋwa i komi.” I kare-nu onoŋo jo Juda gucuŋ i nyim Rwot, ki jo ma gikwo i komgi, mongi ki litinogi. Cwiny Rwot obino opoto i kom Jakajiel wod pa Jekaria, wod pa Benaya, wod pa Jeyel, wod pa Matania, ma Lalevi ma jo pa Acap; onoŋo en tye i dye cokke. En owaco ni, “Wuwiny, wun jo Juda ki jo Jerucalem, ki in kabaka Yekocapat: Rwot owaco botwu kuman ni, ‘Pe wulwor, dok bene cwinywu pe opoti pi kom lwak man madwoŋ-ŋi; pien lweny man pe mewu ento pa Lubaŋa gire. Diki wucit ka lweny i komgi; nen, gibibino kun giwok ki i wi cere me Jij; wubinonogi wa ka ma nota ogik iye, yo tuŋ wokceŋ me tim Jeruel. Lweny man pe wun aye wubilwenyo, wun wubed i kabedowu, wucuŋ iye mot, wek wunen kit ma Rwot bilarowu kwede tin, wun jo Juda ki Jerucalem.’ Pe wulwor, pe cwinywu opoti, diki wucit ka lweny i komgi, Rwot bibedo kwedwu.” Yekocapat okulo wiye oluŋo waŋe piny i ŋom, ci jo Juda ducu ki jo Jerucalem guryebbe piny i nyim Rwot, kun giworo Rwot. Lacen Lulevi ma jo pa Kokat ki jo pa Kora, gucuŋ ka pako Rwot. Lubaŋa pa Icrael, ki dwangi maloŋo, Gua malo odiko con ci gucito i tim Tekoa. I kare ma gicito, Yekocapat ocuŋ ci owacci, “Wuwiny an, wun jo Juda kacel ki wun jo ducu ma wubedo i Jerucalem! Wuye Rwot Lubaŋawu, ci wubicuŋ matek; wuyelok pa lunebine, ci wubiloyo.” Ka otyeko noŋo tam ki bot lwak, ocako yero jo ma myero gubed ka wer bot Rwot kun gipake ma guruko bone maleŋ kun gitelo kwede nyim mony, ma giwero kuman ni, “Wumi pwoc bot Rwot, pien mar mere ma pe lokke bedo nakanaka.” Ka gucako wer ki pwoc, Rwot oketo mony ma gubuto pi kuro lweny ki jo Ammon, ki jo Moab, ki jo got Ceir, ma gubino i kom Juda-ni, ci giloyogi woko. Pien jo Ammon ki jo Moab gubino ka lweny i kom jo ma gibedo i lobo godi me Ceir, gujwerogi woko liweŋ. I kare ma lweny tum i kom jo ma gibedo i Ceir, gin bene gucako nekke kekengi. Ka jo Juda gua malo guito wa i wi lubele ma yo tuŋ tim, ka guneno tuŋ bot lwak mony-nyi, guneno lwak kom dano muto ka guradde piny; acel mo pe obwot. Ka Yekocapat ki lwakke gucito ka yako jamigi, ci gunoŋo dyaŋ i mapol, ki jami ki boŋŋi ki jami me wel-gu, ma gubedo ka yako ne me bedo megi nio ka tiŋone oloyogi. Gubedo ka yako jami pi nino adek, ento jami obedo dwoŋ mukato kare, I nino me aŋwenne gucokke i nota Beraka, pien gubedo ka pwoyo Rwot ki kenyo; mumiyo nyiŋ kabedo meno gilwoŋo ni nota Beraka nio wa onyoo. Dano gudok cen, jo Juda ducu ki jo Jerucalem kun Yekocapat telo wigi; gudok cen i Jerucalem ki nyatte, pien Rwot omiyo gubedo ki nyatte pi loyo lumerokgi. Gubino i Jerucalem ki nanagi ki opuk ki obute wa i ot pa Rwot. Lubaŋa omiyo lworo omako ker ducu ma i lobo mapatpat i kare ma guwinyo ni Rwot obedo ka lweny ki lumerok pa jo Icrael. Kit meno ker pa Yekocapat obedo mupye mot, pien Lubaŋa omiye yweyo i kabedo ma orumo ŋete ducu, Kit meno Yekocapat oloyo lobo Juda. Yekocapat ocamo ker ma mwaka me ditte pyeradek wiye abic, ci obedo, ka loc i Jerucalem pi mwaka pyeraryo wiye abic. Nyiŋ minne Ajuba ma nya pa Cilki. En obedo ka lubo k it pa wonne Aca ducu; pe olokke oweko lubo kore; en obedo ka tiyo gin ma nen atir i wan Rwot. Ento wan jogi ma i wi godi pe gimuko woko; lwak ducu onoŋo pud peya guketo cwinygi i kom Lubaŋa pa kwarigi. Lok kom Yekocapat mudoŋŋe ducu, nia i acakkine nio i agikkine, gityeko coyo i lok me tekwaro pa Ye ko wod pa Kanani, ma gicoyo i buk pa Luker me Icrael. Lacen Yekocapat kabaka me Juda oribbe gin ki Akajia kabaka me Icrael, ma yam obedo ka tiyo bal maraco. Oribbe kwede pi payo mel mapol me cito i Tarcic; gubedo ka payo mel i Ejion-geber, Eliejer wod pa. Dodayaku me Mareca otito lok ma kemo Yekocapat, kun wacci, “Rwot bijwero gin ma wutiyo-ni woko, pien ityeko ribbe ki Akajia.” Ci mel ducu gutur woko, pe gucito i Tarcic, Yekocapat ote, oywe kacel ki kwarine, ci giyiko kacel ki kwarine i gaŋ kal pa Daudi; wode Jekoram aye oleyo ka tyene. En yam tye ki omegine, ma gin awobe pa Yekocapat: Ajaria, Jekiel, Jekaria, Ajaria, Mikael, ki Cepatia; gin ducu onoŋo awobe pa Yekocapat kabaka me Juda. Wongi omiyogi mot madito, me ryal, me jabu, ki me jami mabeco me wel, ki gaŋi mogo ma i Juda ma girumogi ki cel gogo; ento-en omiyo ker bot Jekoram, pien Jekoram obedo latin kayone. Ka Jekoram obedo wi komker pa wonne ma doŋ kerre omoko matek, ci oneko omegine woko ducu ki pala lucwan, kacel ki rwodi mogo ma i Icrael, Jekoram ocamo ker ma mwaka me ditte pyeradek wiye aryo, ci obedo ka loc i Jerucalem pi mwaka aboro. Obedo ka lubo kit pa luker me Icrael, kun tiyo kit macalo jo me ot pa Akab gutiyo; pien dakone nya pa Akab. Obedo ka tiyo gin ma nen marac i waŋ Rwot. Ento Rwot pe omito tyeko Juda woko ducu, pi laticce Daudi, kit ma con ocikke bote ni ebimiye bedo ki mac tara, en ki likwaye matwal. I karene en aye jo Edom gujemo iye woko i kom loc pa Juda, ci guketo kabakagi pigi kengi. Jekoram okato loka kacel ki ludito monnye ki ludito ma giloyo gadigadi lwennye ducu; en oa woko i dyewor olwenyo i kom jo Edom. Jo Edom onoŋo gurumo en woko kacel ki ludito ma giloyo gadigadi lwennye. Kit meno Edom ojemo woko i kom loc pa Juda nio wa onyoo. Ka dok Libna bene ocako jemo woko i kom locce i kare-nu, pien en otyeko bwoto Rwot, Lubaŋa pa kwarine. Dok bene en ogero waŋ jogi i wi godi i lobo godi me Juda; en omiyo jo ma gibedo i Jerucalem gucako woro jogi, ma pe doŋ gitye ki gen i kom Rwot, omiyo Juda oŋak, Cut olimo waraga ma oa ki bot lanebi Elia, ma wacce ni, “Rwot Lubaŋa pa kwaru Daudi owaco kuman ni, ‘In pe ilubo kit pa woru Yekocapat, nyo kit pa Aca kabaka me Juda, ento ibedo ka lubo kit pa luker me Icrael, ityeko miyo jo Juda ki jo ma gibedo i Jerucalem guworo jogi, macalo jo me ot pa Akab gumiyo jo Icrael guworo jogi; dok bene ityeko neko omegini woko ducu, jo me ot pa woru, ma onoŋo gibeco gikato in. Nen, Rwot bikelo can madwoŋ i kom lwakki, i kom litinoni, i kom monni, ki i kom jamini ducu; in kikomi ibibedo ki two matek two ma i cin ii-gu ducu, nio ka min ii bikatti woko jwijwi pi two meno.’ ” Rwot omiyo kiniga omako jo Piliciti ki jo Arab ma gibedo cok ki jo Etiopia; ci gubino gulwenyo i kom Jekoram. Ka gubinoka lweny i kom Juda gumonyo lobogi, ci guyako jami ducu ma gunoŋo, Gutero jami ma i of pa kabaka, ki awo bene ki monne, guweko wode acel keken mudoŋ, en aye Yekoakaj, ma wode matidine. I ŋe magi ducu Rwot opwode omiye two i cin iye ma pe twero can. Ka omedde i ŋe mwaka aryo, ci min iye obino woko pi two meno, ci oto ki arem kom madwoŋ. Lwakke pe gumoko mac wacel pi miye deyo kit ma gimoko kwede mac pi kwarine. En ooamo ker ma mwaka me ditte pyeradek wiye aryo, ci obedo ka loc i Jerucalem pi mwaka aboro; cwiny dano mo pe ocwer pi tone. Giyike i gaŋ kai pa Daudi, ento pe giyiko kome i Lyel pa luker. Jo ma gibedo i Jerucalem guketo Akajia ma wode matidine odoko kabaka ma oleyo ka tyene; pien mony pa jo ma yam gubino i gony kacel ki jo Arab gutyeko neko awobe madito woko ducu. En gin mumiyo Akajia wod pa kabaka Jekoram me Juda ocamo ker. Akajia onoŋo ditte romo mwaka pyeraŋwen wiye aryo ka ocamo ker, ci obedo ka loci Jerucalem pi mwaka acel. Minne nyiŋe Atalia; en yam lakwar Omri. Akajia bene obedo ka lubo kit pa jo me ot pa Akab, pien minne aye obedo ka miye tam me tiyo gin maraco, Obedo ka tiyo gin ma nen marac i wan Rwot, kit macalo jo me ot pa Akab gubedo ka tiyone; pien gin aye gubedo ka miye tam me tiyo gin marac i kare ma wonne doŋ oto, ci gutere i to. En bene oye tamgi, ocito gin ki Jekoram wod pa Akab kabaka me Icrael ka lweny ki Kajael kabaka me Ciria i Ramot-gilead. Jo Ciria guketo ret i kom Joram, ci en odwogo ka mado rette i Jejreel, en aye waŋ ret ma jo Ciria guketo i kome ki i Rama i kare ma en olwenyo i kom Kajael kabaka me Ciria. Akajia wod pa Jekoram kabaka me Juda ocito ka limo Joram wod pa Akab i Jejreel, pien onoŋo kome lit. Lubaŋa onoŋo doŋ otyeko yubo ni Akajia bito i kare ma en bicito ka limo Joram. Pien ka ocito kunnu ci onywako wot gin ki Jekoram pi rwatte ki Yeko wod pa Nimci, ma Rwot onoŋo owiro wek omuk jo me ot pa Akab woko. I kare ma Yeko tye ka cobo lok ma Rwot oŋolo i kom jo me ot pa Akab, en orwatte ki ludito me Juda bene ki awobe pa omegi Akajia, ma gitiyo bot Akajia, ci onekogi woko. En obedo ka yenyo Akajia, ci gimako en ki i Camaria ka ma okanne iye, gikelo en bot Yeko ci Yeko oneke woko, Guyike, pien guwacci, “En lakwar Yekocapat, ma yam obedo ka yenyo Rwot ki cwinye ducu.” Dano mo pe odoŋ i ot pa Akajia ma romo camo ker, Ka Atalia min Akajia oneno ni wode oto woko, ci en ocako jwero jo me dog ot ker pa Juda woko ducu. Ento Yekocabeat nya pa kabaka, otiŋo Yoaci wod pa Akajia, ci okwalo woko ki i kin awobe pa kabaka ma gibenekogi-ni, ci okano en ki lapidine i kicika mo me buto. Yekocabeat, ma nya pa kabaka Jekoram obedo dako pa ajwaka Yekoyada, en lamiŋ Akajia; okano Yoaci woko ki bot Atalia kit meno, omiyo Atalia pe oneke. En obedo kwedgi mwaka abicel, kun gikano en i ot pa Lubaŋa i kare ma Atalia tye ka loyo lobo. Ento i mwaka me abirone Yekoyada obedo ki tekcwiny, oketo gicikke ki ludito ma lulo buca mony pa jo miya, Ajaria wod pa Jerokam, Icmael wod pa Yekokanan, Ajaria wod pa Obed, Maceya wod pa Adaya, ki Elicapat wod pa Jikri. Ci guket i lobo Juda, gubedo ka coko Lulevi ki i gaŋi me Juda woko ducu, ki ludito wi kaka ma i dog odi me Icrael ducu, ci gubino wa i Jerucalem. Lwak mucokke ducu guketo gicikke ki kabaka ki i ot pa Lubaŋa, Ci Yekoyada owaco botgi ni, “Nen, wod pa kabaka ene! Wuwek en aye obed laloc, kit ma yam Rwot oloko i kom likwayo pa Daudi. Man aye gin ma wubitiyo: ki tuŋ botwu wun ajwagi ki Lulevi ma wua woko ki i dog tic i nino me cabit, dul acel me adek gubed lugwok doggola, ki dul acel me adekke mukene gibikuro ot pa kabaka, ki dul acel me adek gubed i doggola ma gilwoŋo ni Guti ot; ki lwak ducu gubed i dyekalme ot pa Rwot. Pe wuwek dano mo-odony i ot pa Rwot, kono ajwagi ki Lulevi ma lutic keken aye wuwek gudony, pien gin jo maleŋ; ento lwak ducu gibigwoko cik pa Rwot. Lulevi gibirumo kabaka dyere, kun dano acel acel omako jami lwennye i ciŋe; ento dano mo ma odonyo i ot gibineko woko. Wubibedo ki kabaka ka ma en bicito iye ducu.” Lulevi ki jo Juda ducu gutiyo gin ducu kit macalo ajwaka Yekoyada ociko botgi. Dano acel acel okelo lwakke, ma onoŋo giweko dog ticgi i nino me cabit, gubino kacel ki jo ma gibino ka tic i nino me cabit; pien ajwaka Yekoyada pe oye ni guwek dog ticgi ducu. Ajwaka Yekoyada ocako miyo ki ludito me mony lwak toni ki kwodi madito ki matino ma onoŋo yam pa kabaka Daudi, ma onoŋo tye i ot pa Lubaŋa, En oketo lwak ka gwoko kabaka, kun dano acel acel omako jami lwennye i ciŋe, cakke wa yo tuŋ acuc me ot ki nio kwede wa yo tuŋ acam me ot, kun girumo keno tyer ki ot bene. Ka doŋ ocako kelo wod pa kabaka, oketo lalukana i wiye, ka omiye lok me caden pa Lubaŋa i ciŋe, ka gituco atir ni en doŋ kabaka. Yekoyada ki awo bene guwiro en ki moo, ci dano gudaŋŋe ni, “Kabaka obed kwo nakanaka!” Ka Atalia owinyo woo pa lwak ma giriŋo kun gipako kabaka, ci en ocito bot lwak wa i ot pa Rwot. Ka oniyo piny, ci oneno kabaka Ocuŋ ka ŋet wir ki i dog ot, kun ludito me mony ki lukut-tum gurumo kabaka, ki lwak jo ducu ma gua ki i kin gaŋ gubedo ka wo ki tum kun cwinygi yom, ki luwer ma gumako jami wergi gutelo wer me kwero eno Atalia ocako yeco boŋone kun kok ni, “Roro yai! Roro!” Ajwaka Yekoyada okelo ludito mony ma gubedo kacel ki mony, ocikogi ni, “Wukel dako-nu woko ki i kin tyenwu. Ka ŋatti mo o lubo kore, ci wuneke woko ki pala lucwan.” Pien ajwaka onoŋo tamo ni, “Pe myero gineke ki i ot pa Rwot.” Gucako keto ciŋgi i kom Atalia, ci guwok kwede ki i doggola ma aguragura donyo kwede, guo wa i ot pa kabaka ci guneke kenyo. Yekoyada ocako keto gicikke i kin en ki lwak ducu ki kabaka wek gubed lwak pa Rwot. Lwak ducu gucako mol gucito i ot pa jok Baal, ci gumuko gureto woko piny; guturo keno tyerre ducu, dok guŋido cal jogine woko ducu matitino, ci guneko Matan ajwaka pa Baal ki i nyim kena tyer. Lacen Yekoyada oketo lukurpiny me gwoko ot pa Rwot i te twero pa ajwagi ma Lulevi, ki Lulevi ma yam Daudi opoko tic botgi pi bedo lugwok ot pa Rwot, kun gityero gitum awaŋa bot Rwot, macalo gicoyo i cik pa Moses, ki yomcwiny kacel ki wer, kit ma yam Daudi oyubo-ni, Oketo lugwok doggola i doggola ot pa Rwot, wek dano mo ma ko me ki keni pe odony iye. En dok okwanyo ludito mony, ki rwodi, ki lulo wi lwak, kacel ki lwak ducu, ci gucako kela ka baka woko ki i ot pa Rwot kun gidorre giwok ki i doggola ma malo nio kwede wa i ot pa kabaka, Ci guketo kabaka obedo piny i wi komker pa luker. Kit meno lwak ma i lobo-nu ducu cwinygi obedo yom; gaŋ ocako kwe mot ki i ŋe to pa Atalia ma gineko ki pala lucwan. Yoaci ocamo ker ma mwaka me ditte abiro, ci obedo ka loc i Jerucalem pi mwaka pyeraŋwen, Nyiŋ minne Jibia me Beer-ceba, Yoaci obedo ka tiyo gin ma nen atir i waŋ Rwot pi kare me kwo pa ajwaka Yekoyada ducu. Yekoyada onyomo bote mon aryo, onywalo kwedgi litino co ki anyira. Lacen Yoaci obedo ki tam pi yubo ot pa Rwot. Ocoko ajwagi ki Lulevi, ocako waco botgi ni, “Wucit wa i gaŋi pa jo Juda, wek wucok lim ki bot jo Icrael ducu pi yu bo ot pa Lubaŋawu mwaka ki mwaka; ber wunen ni wutiyo tic man oyotoyot.” Ento Lulevi pe guruyo tiyone oyotoyot, Mumiyo kabaka olwoŋo Yekoyada ajwaka madit, openye ni, “Piŋo pe iweko Lulevi gujogo lim ki bot jo ma bedo i Juda ki Jerucalem kit ma yam Moses latic pa Rwot ociko ni myero gigam ki bot lwak jo Icrael pi tic me kema lok me caden?” Pien jo pa Atalia, ma en dako ma latim marac-ci, onoŋo yam guturo ki donyo i ot pa Lubaŋa, ci gutero jami ducu ma yam gidyero pi ot pa Rwot, gutiyo kwedgi pi woro Baal-gu. Pi meno kabaka ociko ni myero gipaa canduk, ci giguro ki woko i nyim doggola me ot pa Rwot. Gitito lok oromo i Juda ki Jerucalem ducu, ni myero dano gukellim ajog pa Rwot kit ma Moses latic pa Lubaŋa ociko ki jo Icrael i kare ma gitye i tim. Pienno rwodi kacel ki lwak ducu cwinygi obedo yom, ci gukelo lim ajog megi, gubolo i canduk nio ka gin ducu gumiyo. I kare ducu ma Lulevi gikelo canduk bot ludito ma kabaka ocimo, ka ce guneno ni lim tye i canduk madwoŋ, ci karan pa kabaka, kacel ki ajwaka madit, gibino gikwanyo lim woko ki i canduk gicito kwede, ka gidwoko canduk kakare i kabedone. Gubedo ka timo kit meno nino ki nino, ci gucoko lim madwoŋ. Kabaka ki Yekoyada gumiyo lim i ciŋ lutic ma giloyo dog tic me ot pa Rwot, giculo ki lupa-godi ki lupa bao pi yu bo ot pa Rwot, giculo kwede bene lutic ki nyonyo ki mola pi yu bo ot pa Rwot. Jo ma gimiyogi tic gutiyo ticgi matek ci yubone owoto oyot i ciŋgi maber, ci guyubo ot pa Rwot odoko maber kit ma yam con, odoko tek kakare. Ka doŋ gutyeko ticgi, ci gukelo lim mudoŋŋe bot kabaka ki Yekoyada, ka gutiyo ki jami ot pa Rwot, pi tic mapatpat ki pi gitum awaŋa, ki atabo me waŋo odok eceta, ki jami me jabu ki me ryal. Gutyero gitum awaŋa i ot pa Rwot jwijwi i kare me kwo pa Yekoyada ducu. Ento ka Yekoyada doŋ oteggi, oti woko, ci oto; i kare ma en to onoŋo mwakane romo miya acel ki pyeradek. Giyike i gaŋ kal pa Daudi i kin luker, pien en obedo ka tiyo tic maber i Icrael, kun tiyo pi Lubaŋa ki pi ot legane. Lacen i ŋe to pa Yekoyada, rwodi me Juda gubino guryebbe i nyim kabaka, ci kabaka owinyo lokgi. Gucako bwoto ot pa Rwot, ma Lubaŋa pa kwarigi, gudok ka woro Acera ma jok ma dako-ni, ki cal jogi apaya-gu. Cut akeca pa Rwot obino i kom jo Juda ki Jerucalem pi bal meno. Ento pud omedde ki cwalo lunebi mogo botgi, wek gudwokgi cen bot Rwot, ci gutito lokke botgi, ento dano gukwero winyo. Cwiny pa Lubaŋa obino i kom Jekaria wod pa ajwaka Yekoyada ocuŋ i nyim lwak ci owaco botgi ni, “Lubaŋa owaco kuman ni, ‘Piŋo wun wukalo wi cik pa Rwot, miyo pe wulimo gum? Pierr wutyeko bwoto Rwot woko, en bene doŋ otyeko bwotowu.’ ” Ento gubedo ka libo en, ci gucele ki got pi cik pa kabaka, guneke i dyekal me ot pa Rwot. Kabaka Yoaci pe opo pi kica ki pi ber ma Yekoyada won Jekaria yam onyuto i kome, ento dok oneko wode woko. I kare ma en to, Jekaria owacci, “Ber Rwot onen gin mutimme, ci ocul kworra!” I kare me tum mwaka mony pa jo Ciria obino ka lweny i kom Yoaci. Gubino i kom Juda ki Jerucalem, gujwero rwodi pa lwak woko ducu ki i kin dano, ka dok gucwalo jamigi ma guyako ducu bot kabaka me Damaciko. Kadi bed mony pa jo Ciria obino ki jo manok, ento Rwot omiyo mony madit pa jo Juda i ciŋgi, pien onoŋo gubwoto Rwot, Lubaŋa pa kwarogi. Kit meno gucobo kop ma Rwot oŋolo i kom Yoaci. Ka jo Ciria gua woko ki bote, gubwoto en ma doŋ guketo ret marac twatwal i kome, Luticce gupiro lok i kome pi culo kwor pi remo pa wod pa ajwaka Yekoyada, ci guneke woko i ot i wi kitandane. En oto kit meno, ci giyike i gaŋ kal pa Daudi, ento pe giyiko en i Lyel pa luker, Jo ma gujemo i kome gin ene: Jabad wod pa Cimeat ma nya jo Ammon, ki Yekojabad wod pa Cimrit ma nya jo Moab. Lok kom litino awobe pa Yoaci, ki lok mapol ma lunebi guloko i kome, ki lok kom gero ot pa Lubaŋa odoco gityeko coyone i Buk Lagony-lok ma i buk pa Luker. Wode Amajia aye oleyo ka tyene. Amajia ocamo ker ma mwaka me ditte pyeraryo wiye abic, ci obedo ka loc i Jerucalem pi mwaka pyeraryo wiye aboŋwen, Nyiŋ minne Yekoadan me Jerucalem. En obedo ka tiyo gin ma nen atir i waŋ Rwot, ento pe ki cwinye ducu. Ka ker omoko matek i cine, ci ocako neko luticce ma yam guneko wonne ma kabaka-ni. Ento pe oneko litino pa lunek-ki, kit macalo gicoyo i buk me cik pa Moses ka ma yam Rwot ociko ni, “Won latin pe gibineko pi bal pa wode, nyo latin pi bal pa wonne; ento dano acel acel bito pi balle kikome, Amajia dok ocoko lwak me Juda, ci oketogi muporo dog odi pa kwarogi i te ludito ma giloyo buca mony pa jo alip ki pa jo miya, pi jo Juda ki jo Benjamin ducu, Okwanojo ma mwaka me ditogi romo pyeraryo dok kwede malo, ci onoŋo ni jo ma giyero ma gin twoni oteka lweny giromo alip miya adek, ma giyerogi ayera ma giromo lweny, ma giŋeyo mako toŋ ki kwot. Dok onoŋo twoni oteka lweny alip miya acel mu kene ki bot jo Icrael kun owilogi ki talanta me ryal miya acel. Ento dano pa Lubaŋa obino bote owacce ni, “Rwoda kabaka, pe iye mony pa Icrael ocit kwedwu, pien Rwot pe tye ki jo Icrael, pe tye ki jo Epraim magi ducu, Ento ka in itamo ni ibilimo tek me lweny pi lok meno, ci Lubaŋa bireti woko piny ki i nyim lumerokki; pien Lubaŋa tye ki tek me miyo kony ki me reto piny.’ Amajia ogamo dog dano pa Lubaŋa ni, “Wabitimo aŋo pi talanta mi ya acel ma doŋ atyeko miyone bot mony pa Icrael-li?” Dano pa Lubaŋa odok iye ni, “Rwot twero miyi lim madwoŋ makato man,” Amajia ocako cwalo mony ma oa ki i Epraim gubino bote-ni, me dok woko cen i pacogi doki. Ci kiniga omakogi matek i kom jo Juda, gucako dok i gaŋgi ki kiniga mager. Ento Amajia odiyo cwinye, ci otero lwakke, ocito kwedgi wa i nota me Kado, ci oneko jo Ceir ma giromo alip apar. Jo Juda gumako jo mukene makwo ma giromo alip apar bene, ci guterogi i wi got ka gucorogi woko piny ki i wi got kunnu; gin ducu gupoto gunyot woko. Ento jo mony ma Amajia okwerogi ni pe gucit i lweny kwedgi-ni, ma ocwalogi gudok cen-ni, gumonyo gaŋi me Juda, cakke ki i Camaria, nio kwede i Bet-koron, ci guneko jo alip adek ki kunnu, dok guyako jami mapol. Ka Amajia odwogo ki ka neko jo Edom, okelo ki lwak lubaŋa pa jo Ceir, ci ocibogi gucuŋ macalo lubaŋane cut, ocako worogi, kun tyero gitum botgi. Pi meno kiniga omako Rwot i kom Amajia ci ocwalo lanebi mo bote, ma owacce ni, “Piŋo icako lubo kor lubaŋa me rok mukene, ma pe gutwero laro lwakgi kikome ki i ciŋi-ni?” Ka pud tye ka lok kwede kabaka openye ni, “Wan waketo in me bedo lami-tam pa kabaka bo? Tugi liŋ! Piŋo imito ni gineki woko?” Lanebi ocako liŋ, ento owacci, “Aŋeyo ni Lubaŋa otyeko yubo me neki woko, pien in itiyo lok man ma pe iwinyo tamma.” Amajia kabaka me Juda dok openyo tam ki bot jo mukene ci ocwalo lukwena bot Yoaci wod pa Yekoakaj, wod pa Yeko, kabaka me Icrael, kun wacce ni, “Bin wacam co wanenne waŋ ki waŋ.” Yoaci kabaka me Icrael odwoko lok bot Amajia kabaka me Juda kun waco ni, “Yam okuto mo ma i wi Lebanon ocwalo kwena bot yat cedar me Lebanon, kun wacci, ‘Miya nyari wek anyom ki woda.’ Ci lee tim mo me Lebanon ma owok ki kunnu onyono okuto woko piny. In iwacci, ‘Doŋ atyeko neko Edom woko,’ ci cwinyi otiŋimalo ki wakke madwoŋ. Bed ki deyo meno rommi, ci ibed kwede i paconi: piŋo irobo dog dano me kelo ayela i komi, miyo ipoto wa ki Juda kacel kwedi.” Ento Amajia pe owinyo; pien onoŋo Lubaŋa oyubo ni, wek emigi i ciŋ lumerokgi, pien gulokke bot lwak lubaŋa pa jo Edom. Yoaci kabaka me Icrael ocito; ci en ki Amajia kabaka me Juda gucamo co gunenne kekengi i lweny i Bet-cemec, ma gaŋ me Juda. Icrael ocako loyo Juda, ci dano acel acel oriŋo woko i pacone. Yoaci kabaka me Icrael omako Amajia kabaka me Juda wod pa Yekoac, ma wod pa Akajia, ki i Bet-cemec, ka otere wa i Jerucalem, ci omuko cel me Jerucalem ma romo yadi miya aryo kulu, nia ki i dogcel ma gilwoŋo ni pa Epraim nio kwede wa i dogcel ma i twok gaŋ. En oyako jabu ki ryal ducu ki atabo-gu ducu ma onoŋo i ot pa Lubaŋa, kacel ki Obed-edom; oyako lim ki i ot kano lim pa kabaka, kacel ki jo ma gimako me akoka, ci odok kwede wa i Camaria. Amajia wod pa Yoaci kabaka me Juda koŋ dok obedo kwo ki i ŋe to pa Yoaci wod pa Yekoakaj, kabaka me Icrael pi mwaka apar wiye abic. Lok kom Amajia mudoŋŋe ducu, nia i acakkine nio i agikkine, gityeko coyone i buk pa Luker me Juda ki Icrael. Cakke i kare ma en obwoto Rwot woko jo mogo ‘gucako piro lok i kome ki i Jerucalem, ci olwi oriŋo woko i Lakic. Ento gucwalo dano i kore wa i Lakic ci guneke woko ki kunnu, Gukelo kome ki aguragura, ci giyiko kacel ki kwarine i gaŋ kal pa Daudi. Lwak ducu gutiŋo Ujia, ma mwaka me ditte romo apar wiye abicel, ci guketo en kabaka me leyo ka tyen wonne Amajia. En aye ogero Elot ci odwoko cen bot Juda, ki I ne to pa kabaka ma oywe kacel ki kwari ŋe. Ujia ocamo ker ma mwaka me ditte romo apar wiye abicel, ci obedo ka loc i Jerucalem pi mwaka pyerabic wiye aryo. Nyiŋ minne Yekolia me Jerucalem. Obedo ka tiyo gin ma nen atir i waŋ Rwot, kun lubo gin ducu ma yam wonne Amajia otiyo. I kare pa Jekaria, en oketo cwinye ka yenyo Lubaŋa, pien Jekaria opwonyo en ki kit me lworo Lubaŋa. Pi kare ducu ma en obedo ka keto cwinye i kom Rwot, Lubaŋa omiye gum. En ocito ka lweny ki jo Piliciti, ci oturo cel me Gat woko, ki cel me Jabne ki me Acidod; ka ogero gaŋi mukene i lobo ma i ŋet Acidod, ki i kabedo mukene ma i kin jo Piliciti, Lubaŋa obedo ka konye ki lweny i kom jo Piliciti, ki i kom jo Arab ma gibedo i Gurbaal, ki i kom jo Meun. Jo Ammon gubedo ka culo mucoro bot Ujia; nyiŋe oywek oo wa i waŋ lobo Ejipt, pien onoŋo odoko tek mada. Ujia dok ogero odi matego ma ocudo malo i Jerucalem. Ogero acel i dogcel ma i twok gaŋ, acel i dogcel ma cito i no ta ki acel i twoke mukene; ogerogi matek twatwal. Ka dok ogero odi matego ma ocudo malo i tim, dok okwinyo lwak waŋ pii mapol, pien onoŋo tye ki lim makwo madwoŋ; obedo ki lim i Cepela ki i bar bene, dok obedo ki lupur ki lupur olok i lobo godi ki i lobo ducu ma ceko cam, pien en maro pur. Ujia dok obedo ki mony pa askari ma giromo lweny, i lwak buca mapatpat, kit macalo Jeyel ma karan-ni oryeyo kwede welgi gin ki ladit mony Maaceya, i te loc pa Anania, ma en ŋat acel i kin ludito ma giloyo mony pa kabaka. Wel twoni oteka lweny ducu ma gin ludito kaka i odi pa kwarogi yam oromo alip aryo ki miya abicel. I te loc pa ludito mony magi onoŋo tye iye mony ma romo jo alip miya adek ki abiro, ki miya abic magitwero lweny, ma komgi tek ka lweny pi konyo kabaka ki lweny i kom lumerokke, Ujia oyubo kwodi pi lumony ducu, ki toŋi, ki otaŋwic, ki koti nyonyo, ki lwak atum, ki laliŋliŋ me latandiyo. Dok oketo bao me lacel atero i Jerucalem ma luryeko guroto, wek guket i wi odi matego ma ocudo malo i twok cel ducu, pi celo atero ki pi bayo lakidi madito-gu, Nyiŋe oywek oromo lobo ducu, pien Lubaŋa obedo ka konye i yo me aura, nio ka odoko tek. Ento kadi bed en obedo tek, obedo ki cwiny me wakke i iye, ma okelo can i kome kene. Pien en oŋayo waŋ Rwot Lubaŋane; oette odonyo i ot pa Rwot ka waŋo odok eceta i keno tyer me wano odok eceta. Ento ajwaka Ajaria olubo kore odonyo bote, kacel ki ajwagi pyeraboro ma gin twoni matego, Ci gucuŋ gupyem ki kabaka Ujia kun giwaco bote ni, “Man pe ticci, me waŋo odok eceta bot Rwot, man tic pa ajwagi ma gin likwayo pa Aron, ma yam gikwerogi me waŋo odok eceta. Kat woko ki i kabedo maleŋ; pien ityeko timo bal, pe ibinoŋo iye deyo mo ma a ki bot Rwot Lubaŋa.” Cutcut kiniga omako Ujia woko, ma onoŋo pud tye ki atabo weer me waŋo odok eceta i ciŋe. I kare ma kiniga omake i kom ajwagi, cut dobo opoto i kome ma ajwagi bene gineno ma onoŋo gitye i ot pa Rwot, i ŋet keno tyer me odok eceta. Ajaria ajwaka madit, ki ajwagi ducu, gubedo ka neno en, ci guneno dobo tye i tur nyime! Gucwale woko cen oyotoyot, en bene orune me cito woko, pien Rwot otyeko pwode. Kabaka Ujia obedo ladobo nio wa i nino me tone; pi bedo ladobo omiyo opokke obedo i ot ka ikene, pien pe giye ni en odony i ot pa Rwot. Yocam ma wode aye obedo ladit ma loyo jo me ot pa kabaka, kun loyo kwede lwak me lobo meno, Lok kom Ujia mudoŋŋe ducu, nia i acakkine nio i agikkine, lanebi Icaya ma wod pa Amoj aye ocoyo. Ujia oto, oywe kacel ki kwarine, ci giyike kacel ki kwarine i kabedogi me yik ka ma yam giyiko iye luker, kun guwacci, “En ladobo.” Wode Yocam aye oleyo ka tyene. Yocam ocamo ker ma mwaka me ditte pyeraryo wiye abic, ci obedo ka loc i Jerucalem pi mwaka apar wiye abicel. Nyiŋ minne Yeruca ma nya pa Jadok, En obedo ka tiyo gin ma nen atir i waŋ Rwot, kun lubo gin ducu ma yam wonne Ujia otiyo, ento pe obedo calo en pien pe omedo ki donyo i ot pa Rwot. Ento onoŋo lwak pud gimedde ki timgi maraco. En ogero doggola ma malo me ot pa Rwot, ka dok obedo ka gedo i kom cel me Opel matek twatwal. Omedde ki gero gaŋi i lobo gotgot me Juda, ki cel gogo-gu ki odi matego ma ocudo malo i wi cere ma yadi dwoŋ iye. En olwenyo i kom kabaka pa jo Ammon ci oloyogi, jo Ammon gumiye ryal ma romo talanta miya acel i mwaka meno, ki naŋo guniya alip apar, ki ‘cayiri guniya alip apar. Jo Ammon gubedo ka culo bote wel marom i mwaka me aryo ki me adekke. Yocam omedde odoko tek pien obedo ka lubo yo ma atir i nyim Rwot Lubaŋane, Lok kom Yocam mudoŋŋe ducu, ki mony ducu ma en olwenyo, ki kite ducu, nen, gityeko coyone i buk pa Luker me Icrael ki me Juda. En ocamo ker ma mwaka me ditte pyeraryo wiye abic, ci obedo ka loc i Jerucalem pi mwaka apar wiye abicel. Yocam oto, oywe kacel ki kwarine, ci giyike i gaŋ kal pa Daudi, Wode Akaj aye oleyo ka tyene. Akaj ocamo ker ma mwaka me ditte pyeraryo, ci obedo ka loc i Jerucalem pi mwaka apar wiye abicel. Pe obedo ka tiyo gia ma nen atir i wan Rwot, kit ma kwarone Daudi yam otiyo-ni, ento obedo ka lubo kit pa luker me Icrael. En otiyo cal jok aliya pi lwak Baal-gu; obedo ka waŋo odok eceta i nota pa wod pa Kinom, dok owaŋo wode me gityer, kun lubo kwede tim me kwer pa rok ducu ma Rwot yam oryemogi woko ki i nyim jo Icrael. En obedo ka tyero gitum ki waŋo odok eceta i waŋ jogi ma i wi godi, ki i wi cere, ki i waŋ ayweya ducu ma po te oluk-gu. Pienno Rwot Lubaŋane omiyo en i ciŋ kabaka me Ciria, ma oloyo en ci oyako jo mapol ki i kin lwakke oterogi woko wa i Damaciko. Dok gimiyo en i ciŋ kabaka me Icrael, ma oloyo en kun oneko lwak jone madwoŋ. Pien Peka wod pa Remalia oneko jo alip miya ki pyeraryo i Juda i nino acel, gin ducu gubedo twoni lweny matego, pien onoŋo doŋ gutyeko bwoto Rwot woko, ma Lubaŋa pa kwarogi. Ka Jikri twon oteka me Epraim, oneko Maaceya wod pa kabaka, ki Ajrikam ma ladit ma loyo i gaŋ kal, ki Elkana ma en aye lawaŋ kabaka. Jo Icrael guyako jo alip mi ya aryo ki i kin utmegigi, mon, awobe, ki anyira; dok guyako jamigi mapol ci gutero i Camaria. Ento lanebi pa Rwot onoŋo tye kunnu, ma nyiŋe Oded; en ocito ka rwatte ki mony ma onoŋo ocito i Camaria, ci owaco botgi ni, “Nenu, kiniga omako Rwot Lubaŋa pa kwariwu i kom jo Juda ci omiyogi i ciŋwu, ento wun wunekogi ki akemo madwoŋ mada ma pire owinnye wa i polo. Kombeddi tamwu tye ka rido lwak ma i Juda ki Jerucalem, co ki mon, wek gubed opiiwu. Pe wutye ki bal ma okemowu i kom Rwot Lubaŋawu? Doŋ wuwiny lokka, ci wucwal jo ma wukwanyogi-ni gudok cen; gin utmegiwu, wudwokgi ka ma wukwanyogi ki iye-ni, pien akemo pa Rwot tye i komwu madwoŋ.” Ludito mukene me Epraim, gin aye Ajaria wod pa Yokanan, Berekia wod pa Mecilemot, lekijikia wod pa Calum, ki Amaca wod pa Kadlai, gucuŋ gujuko jo ma gua i mony, kun giwacci, “Pe wubikelo jo ma giyakogi wa kany, pien tamwu tye me tiŋo alii bot Rwot kun wamedo i kom balwa ki alii ma doŋ watyeko tiŋone-ni. Aliiwa doŋ tye dwoŋ, dok bene akemo pa Rwot magwar tye i kom Icrael.” Kit meno jo ma gin lumony-nyi guweko dano ki jami ducu ma guyakogi i nyim rwodi ki i nyim lwak mucokke ducu. Jo ma gicoyo nyiŋgi malo-nu gua gutero dano ma giyakogi-ni, kacel ki jami, ci guruko jo ducu ma i kingi ma gitye no no munero ki boŋŋi ma lumony onoŋo guyako. Gurukogi ki boŋŋi, ka gimiyogi war tyen wa ki cam bene ki ginamata-gu, dok guwiro komgi ki moo. Lacen gutiŋo jo magoro i kingi ki kana, guterogi wa bot jo tugi ma i Jeriko, gaŋ me otit, ka gudok cen i Camaria. I kare meno kabaka Akaj ocwalo kwena bot kabaka me Aciria kun lego kony ki bote; pien onoŋo jo Edom gumonyo jo Juda ci guloyogi bene, guyako jo mogo i kingi, guterogi i opii. Jo Piliciti bene gumonyo gaŋi ma i Cepela ki Negeb me Juda, Betcemec, Aijalon, Gederot, Coko ki gaŋi matino ma i ŋete ducu, Timna ki gaŋi matino ma i ŋete ducu, Gimjo ki gaŋi matino ma i ŋete ducu; ci gubedo iye. Rwot odwoko Juda woko piny pi Akaj kabaka me Icrael, pien obedo ka timo tim mogo me carocaro i Juda, pien onayo wan Rwot woko. Pi meno omiyo Tiglat-pilecer kabaka me Aciria obino ka lweny i kome, ci otime malit ma kaka miye kony ma twero miye tek. Akaj okwanyo jami ma i ot pa Rwot ki ma i ot pa kabaka ki ma i ot pa rwodi, ci oculo mucoro bot kabaka me Aciria; ento pe omedo ki noŋo iye kit kony mo. I kare ma doŋ can odiye en kabaka Akaj acel-li omedde ameda ki ŋayo waŋ Rwot. En otyero gitum bot lwak lubaŋa pa jo Damaciko ma onoŋo guloye, kun wacci, “Pien lwak lubaŋa pa luker me Ciria okonyogi, an abityero gitum botgi wek gukonya bene,” Ento gukelo can ma otyeko en ki jo Icrael ducu. Ci Akaj ocoko jami ducu ma gitiyo kwede i ot pa Lubaŋa ocako ŋido woko matitino gin jami magi ma onoŋo gitiyo kwedgi i ot pa Lubaŋa, ka dok oloro doggola me ot pa Rwot woko; cut otiyo keno tyer mapol pire kene ma romo i Jerucalem ducu, I gaŋ acel acel ma i Juda oketo iye waŋ jogi ka ma giwaŋo iye odok eceta bot lwak lubaŋa mukene-gu, ma omiyo kiniga omako Rwot Lubaŋa pa kwarine. Lok kom Akaj mudoŋŋe ducu, ki kite ducu, nia i acakkine nio i agikkine, gityeko coyone i buk pa Luker me Juda ki me Icrael. Akaj oto, oywe kacel ki kwarine, ci giyiko en i gaŋ, i Jerucalem, pien pe gutere i lyel pa luker me Icrael. Ci wode Kejekia aye oleyo ka tyene. Kejekia ocamo ker ma mwaka me ditte pyeraryo wiye abic, ci obedo ka loc i Jerucalem pi mwaka pyeraryo wiye aboŋwen, Nyiŋ minne Abija ma nya pa Jekaria, Kejekia obedo ka tiyo gin ma nen atir i waŋ Rwot, kun lubo gin ducu ma yam kwarone Daudi otiyo, I mwaka mukwoŋo me locce, i dwe me acel, en aye en oyabo iye doggola me ot pa Rwot, dok oyubogi. En okelo ajwagi ki Lulevi, omiyo gucokke kacel i dyekal yo tuŋ wokceŋ, ocako waco botgi ni, “Wuwiny lokka, wun Lulevil Kombeddi wulonnye kenwu, dok wulony ot pa Rwot. Lubaŋa pa kwariwu, obed maleŋ, wukwany cilo woko ki i kabedo man maleŋ, Kwariwu guŋayo waŋ Rwot woko. Gubedo ka timo gin ma nen marac i waŋ Rwot Lubaŋawa: gutyeko bwoto en woko, ma guloko wangi ka mukene ma cwinygi pe i kom Rwot. Gin bene gucego doggola me kicika ma gidonyo kwede i ot, ka guneko mac tara woko, pe guwaŋo odok eceta nyo kadi ki tyero gitum awaŋa i kabedo maleŋ bot Lubaŋa pa Icrael. Pi meno akemo omako Rwot i kom Juda ki Jerucalem, ci omiyogi gudoko jo ma kela lworo, ur ki jwat bot dano, macalo wun wutye ka nenone ki wanwu-ni, Nen ba, kwariwa ginekogi woko liweŋ ki pala lucwan dok awobewa, anyirawa ki monwa ducu gitye i opii pi lok man. Tam ma tye i cwinya kombeddi en aye me keto cikke i kinwa ki Rwot, Lubaŋa pa Icrael, wek kinigane magwar-ri oa woko ki i komwa. Pe wubed ata litinona, Rwot otyeko yerowu me cuŋ i nyime, ka tic bote, ki me bedo lutic ma mere ma wuwaŋo odoko eceta bote.” Cutcut Lulevi magi gua, gin aye Makat wod pa Amacai, ki Joel wod pa Ajaria, ma gin likwayo pa Kokat; ki likwayo pa Merari, ma gin aye Kic wod pa Abdi, ki Ajaria wod pa Jekalelel; ki likwayo pa Gercon, ma gin aye Joa wod pa Jimma, ki Eden wod pa Joa; ki i kom likwayo pa Elijapan ma gin aye Cimri ki Jeuel; ki likwayo pa Acap, ma gin aye Jekaria ki Matania; ki likwayo pa Keman, ma gin aye Jekuel ki Cimel; ki likwayo pa Jedutun, gin aye Cemaya ki Ujiel. Gucoko utmegigi kacel ci gulonnye kengi, ka doŋ gucako donyo i ot kit macalo onoŋo kabaka ociko ma lubo lok pa Rwot, wek gulony ot pa Rwot. Ajwagi gudonyo gucito wa i kicika ma i tyelo ma i ot pa Rwot ka lonyone, ci gukatti woko ki jami maraco me kwer ma gunoŋo i ot pa Rwot, gukelo guketo i dyekal ma i ot pa Rwot; ka doŋ Lulevi gutiŋo gutero guonyo woko wa i laora kulu Kidron. Gucako lonyo ot i nino dwe acel me dwe me acel, ka dok i nino dwe aboro me dwe me acel gubino i kicika ma gidonyo kwede i ot pa Rwot, ka lacen gibedo ka lonyo ot pa Rwot pi nino aboro, ci gutyeko ticgi i nino dwe apar wiye abicel me dwe meno. Lacen gucito gudonyo bot Kejekia ci guwacce ni, “Doŋ watyeko lonyo ot pa Rwot woko ducu, keno tyer me gitum awaŋa ki jami me tic ducu, ki meja ma giketo iye mugati ma giketo i nyim Rwot, wa jami tic ducu. Dok jami tic ducu ma yam kabaka Akaj obolo woko i kare me locce ma onoŋo pe ogwoko cik pa Rwot, wayubogi dok walonyo; nen, gitye i nyim keno tyer pa Rwot.” Lacen kabaka Kejekia opuk woko con ci ocoko ludito ma giloyo gaŋ kacel, ocito kwedgi i ot pa Rwot, Gucako kelo twoni abiro, nyogi romi abiro, litino romi abiro ki nyogi dyegi abiro pi itum me bal pi ker, pi kabedo maleŋ ki pi Juda. Ci ociko ajwagi ma gin likwayo pa Aron me tyerogi i wi keno tyer pa Rwot. Kit meno gucako neko twoni, ci ajwagi gukwanyo remone gucoro i kom keno tyer, Ka dok guneko nyogi romi ci remone bene gucoro i kom keno tyer; i ŋeye guneko litino romi ci remone gucoro i kom keno tye bene. Lacen gikelo nyogi dyegi bot kabaka ki jo ma gucokke ducu, pi gitum pi bal, ci guketo ciŋgi i komgi; ajwagi guneko nyogi dyegi ka gutyero gitum pi bal ki remogi i wi keno tyer, me lakwany bal ki i kom jo Icrael ducu. Kabaka onoŋo ociko ni myero gityer gitum awaŋa ki gitum pi bal pi jo Icrael ducu. Kejekia omiyo Lulevi gucuŋ i ot pa Rwot gumako atego agoya-gu, ki naŋa-gu, ki opuk-gu, kun olubo cik pa Daudi, ki Gad ma lanen-piny pa kabaka, ki cik pa lanebi Natan. Cik man oa ki bot Rwot ma en omiyo owok ki bot lunebine. Lulevi gucuŋ gumako jami wer pa Daudi, kun ajwagi gumako tumgi. Cutcut Kejekia ociko ni myero gityer gitum awaŋa i wi keno tyer. I kare ma gicako tyero gitum awaŋa, gicako wer me pako Rowt cut, kun gikuto tum-gu, ma gigoyo bene jami Icrael. Lwak ma gucokke ducu gumiyo woro bot Lubaŋa, luwer guwero wer, ki lukut tum gukuto tumgi; gumedde kwede nio waŋ ma tyero gitum awaŋa otum. Ka doŋ tyero gitum otum, ci kabaka kacel ki jo ma onoŋo gitye kwede ducu guryebbe piny gumiyo woro bot Lubaŋa. Kabako Kejekia ki rwodine gucako ciko Lulevi me wero wer me pak bot kun gilubo lok pa Daudi ki pa Acap ma lanen-liny. Ci guwero wer pak ki yomcwiny, ka dok guryebbe piny gumiyo woro bot Rwot. Kejekia dok owacci, “Doŋ wutyeko kwerre kenwu bot Rwot; wunyik cok, wukel gitum ki gityer me pwoc i ot pa Rwot.” Ci jo ma gucokke ducu gukelp gitum mapol ki gityer me pwoc; ki jo ducu ma cwinygi aye opwoyo gukelo gitum awaŋa. Wel jami me gitum awaŋa ma lwak ma gucokke gukelo onoŋo tye twoni pyerabiro, nyogi romi miya acel, ki litino romi miya aryo; magi ducu gikelogi me gitum awaŋa bot Rwot. Doŋ gityer ma gikwero onoŋo obedo twoni miya abicel ki romi alip adek. Ento ajwagi onoŋo ginok twatwal ma pe gitwero yaŋo gitum awaŋa magi ducu, omiyo utmegigi ma Lulevi gucako konyogi nio waŋ ma ajwagi mukene gulonnye kengi nio ka gutyeko tic ducu pien Lulevi onoŋo cwinygi leŋ ma kato ajwagi i lonnye kengi. Medo i kom wel gitum awaŋa madit twatwal-li, moo dwolo bene onoŋo tye me gityer lakwecwiny, ki dok gubedo ka liyo koŋo vino pi gitum awaŋa. Gidwoko kit me tic i ot pa Rwot kit meno. Omiyo Kejekia kacel ki lwak gubedo ki yomcwiny pi gin ma Lubaŋa otyeko tiyo pi lwak; pien lokke obino atura. Kejekia ocwalo kwena bot jo Icrael ducu ki jo Juda, ka dok ocoyo waraga ocwalo bot jo Epraim ki Manace, ma tito botgi ni myero gubin i ot pa Rwot ma tye i Jerucalem, ka kwero nino madito me Kato (Paska) bot Lubaŋa pa Icrael. Onoŋo kabaka ki rwodine kacel ki jo ducu ma obedo i cokke i Jerucalem gutyeko moko tam me kwero nino madito me Kato (Paska) i dwe me aryo; pien pe onoŋo gitwero kwero nino man i karene kikome pien ajwagi mapol onŋo pud peya gulonnye kekngi, ki lwak bene pe gucokke i Jerucalem. Yub meno onen atir twatwal i waŋ kabaka kacel ki lwak ducu me gubedo i cokke. Ci giciko kwede pi yweko lok man wek orom i lobo Icrael ducu cakke ki i Beer-ceba nio kwede i Dan, kun gitito ni lwak myero gubin ka kwero nino madito me Kato (Paska) bot Rwot Lubaŋa pa Icrael, i Jerucalem; pien lwak mapol onoŋo pe gubedo ka kwero nino man kit macalo giciko kwede. Kit meno lukwena gutero waraga pa kabaka ki rwodine guwoto i lobo Icrael ki Juda ducu macalo kabaka ociko, kun giwaco ni, “Wun lwak me Icrael, wudwog cen bot Rwot, Lubaŋa pa Abraim, pa Icaka ki pa Icrael, wek en odwog bot jo mudoŋ i kinwu ma gubwot ki i cin luker me Aciria. Pe wubed macalo kwariwu ki utmegiwu, ma guŋayo waŋ Rwot Lubaŋa pa kwarigi-ni, pi meno Lubaŋa omiyo lobogi odoko obur kit macalo wutye ka nenone. Pe wubed ma ŋutwu nwaŋ kombeddi macalo yam kwariwu gubedo kwede, ento wun wumi kwowu bot Rwot, wubin i kabedo man maleŋ ma en otyeko lonyo matwal, kun wutiyo bot Rwot Lubaŋawu, wek kinigane mager-ri oa woko ki i komwu, Ka ce wulokke wudwogo cen bot Rwot, ci kica bimako jo ma guyako utmegiwu ki litinowu, ci gibiye gidwogo i lobo man. Myero wuŋe Rwot Lubaŋa en ber dok lakica, ma pe bi loko waŋe ki i komwu, ka wulokke wudwogo cen bote.” Kit meno lukwena gucako wot i gaŋ ki gaŋ ma i lobo Epraim ki Manace, dok gumedde ki wotgi nio wa i lobo Jebulun, ento dano gibedo ka nyerogi kun gicayogi dok ginalogi, Jo manok keken ma i lobo pa Acer, pa Manace ki Jebulun aye gumwolle kengi gubino i Jerucalem, Lubaŋa oketo ciŋe i kom jo Juda omiyo gubedo ki cwiny acel kun gitiyo gin ma kabaka ki rwodine onoŋo guciko pire ma gulubo lok pa Rwot. Lwak jo mapol gucokke kacel gubino i Jerucalem i cokke madit twatwal ka kwero nino madito me Mugati ma Tobi Pe Iye i dwe me aryo. Ka gucako tic ci gumuko keno tyer ducu ma yam tye i Jerucalem, ka dok gumuko keno tyer ducu ka ma giwaŋo iye odok eceta gutero gubolo woko i laora kulu Kidron. Ci guneko latin romo me Kato (Paska) i nino dwe apar wiye aŋwen me dwe me aryo. Man omiyo lewic omako ajwagi ki Lulevi, oweko gucako lonnye kengi, ka doŋ gukelo gitum awaŋa i ot pa Rwot. Gucako mako dog ticgi kit me kare ducu kun gilubo cik pa Moses ma en dano pa Lubaŋa, Ajwagi ticgi obedo me coro remo ma gigamo ki i ciŋ Lulevi. Onoŋo tye jo mapol i cokke ma pe gulonnye kengi; pi meno omiyo Lulevi guneko latin romo me Kato (Paska) pi ŋat acel acel ma pe olonnye, wek obed leŋ pi Rwot. Jo mapol i kom lwak onoŋo gua ki i lobo Epraim, Manace, Icakar ki Jebulun, ma pud peya gulonnye kengi, ento gubedo ka camo karama me Kato (Paska) i yo mu kene mapat ki ma giciko con. Kadi bed kumeno, Kejekia olego pigi, kun wacci, “In Rwot maber tim kica ki dano acel acel ma oketo cwinye ka bino bot Lubaŋa, Rwot Lubaŋa pa kwarine, kadi bed pe ogwoko cik me kabedo maleŋ ma mako lok kom lonnye.” Rwot owinyo dog Kejekia, ci ocaŋo lwak. Ci jo Icrael ducu ma onoŋo gitye i Jerucalem i kare meno gucako kwero nino madito me Mugati ma Tobi Pe Iye ki yomcwiny madwoŋ pi nino abiro; kun Lulevi ki ajwagi gubedo ka pako Rwot nino ki nino, ma giwero wer bot Rwot ki tekgi ducu. Kejekia oloko lok me cuko cwiny bot Lulevi ducu ma gunyuto diro maber i tic pa Rwot. Kit meno lwak gubedo ka cam me kwero nino madito pi nino abiro, kun gityero gityer lakwecwiny-gu, ma gimiyo pwoc bot Lubaŋa pa kwarigi. Lacen lwak ducu ma gucokke guye lawaŋacel me medde ki kwero nino madito pi nino abiro mukene; ci gumedde kwede kit meno ki yomcwiny madwoŋ pi nino abiro mukene. Onono Kejekia kabaka me Juda omiyo twoni alip acel ki romi alip abiro bot lwak ma gucokke pi gityer. Ka dok rwodine bene gumiyo twoni alip acel ki romi alip apar bot lwak ma gucokke. Omiyo ajwagi mapol gulonnye kengi. Lwak jo Juda ducu ma i cokke, kacel ki ajwagi ki Lulevi, medo ki jo ma i cokke ma gua ki i lobo Icrael, kadi wa lubedo ma gua ki i lo bo Icrael, kacel ki jo ma gin lubedo ma gibedo i Juda, ducu gubedo ki yomcwiny madit. Kit meno lwak gubedo ki yomcwiny madit i Jerucalem, pien nia wa i kare pa Solomon ma wod pa Daudi kabaka me Icrael onoŋo gin macalo man kulu pe onen i Jerucalem, Lacen ajwagi ki Lulevi gua malo gucuŋ ci gumiyo gum ki lwak, Lubaŋa owinyo dwangi, dok legagi bene oo bote i kabedone maleŋ ma i polo. Ka man otum, jo Icrael ducu ma onoŋo gitye gucito i gaŋi ducu ma i Juda gucako ŋido wir jogi woko i dul matitino, gutoŋo yadi ducu ma yam gicomo pi woro jok ma dako ma gilwoŋo Acera, ki waŋ jogi ma i wi godi kacel ki keno tyer ducu ma gunoŋo i Juda, Benjamin, Epraim ki Manace, nio ka gubologi woko ducu. Lacen lwak jo Icrael ducu gucako dok i gaŋigi, kun dano acel acel odok i pacone kikome. Kejekia ocako keto ajwagi ki Lulevi i dul ticgi, oketogi i dul ki dul, ŋat acel acel macalo ticce tye, ma gin ajwagi ki Lulevi ticgi obedo me tyero gitum awaŋa ki gityer lakwecwiny, kun gitiyo bene i dog gaŋ mapatpat me ot pa Rwot pi miyo pwoc ki pak. Jami ma kabaka okwanyo me amiya ki i kom jamine kikome obedo pi gitum awaŋa-gu: gitum awaŋa me odiko ki me otyeno, ki gitum awaŋa pi cabit-gu, por dwe, ki pi nino madito ma giciko, ma gilubo kit macalo gicoyo i cik pa Rwot. En bene ociko lwak ducu ma gibedo i Jerucalem ni gumi dul ma giciko me amiya bot ajwagi ki Lulevi, wek gumi kwogi me tiyo ticgi kun gilubo cik pa Rwot. Cutcut ma cik man oket oromo i lobo ducu, ci jo Icrael gucako miyo jami mapol ata, bel me wi mwaka, kono yino, moo, moo kic ki kit jami mukene ducu ma guceko i pottigi; dok gukelo acel me apar me jami acel acel madwoŋ makato. Lwak jo Icrael ki jo Juda ma gibedo i gaŋi me Juda bene gukelo acel me apar me dyaŋi ki romi, ki jami mukene ma gityeko dyerogi bot Rwot Lubaŋagi, ci gubakogi lipim i odur mapol. Gucako pano jami magi i odur ki odur i dwe me adek, ci gutyeko paijogi i dwe me abiro. Ka Kejekia ki rwodi gubino guneno odur me jami ma gipaŋo, ci gupwoyo Rwot kacel ki lwakke jo Icrael. Kejekia openyo ajwagi ki Lulevi pi odur magi. Ci Ajaria ajwaka madit, ma en dano me ot pa Jadok, odokke iye ni, “Nia ma lwak gucako kelo jami me motgi i ot pa Rwot pe tye gin mo ma orem; wabedo ka camo cam muromo dok mudoŋŋe obedo pol ata; pien Rwot omiyo gum ki jone, en aye meno mumiyo watye ki lwak cam man ducu mudoŋ.” Kejekia dok ocikogi ni guyub kicika mogo i ot-pa Rwot; ci cut giyubo. Lwak gukelo gityer me motgi, acel me apar ki jami ma gidyero, ducu gukelo ki cwinygi ducu. Rwot madit ma loyo wigi obedo Konania ma en Lalevi, ki ominne Cimei obedo ŋat ma lube, kun giketo Jekiel, Ajajia, Nakat, Acael, Jerimot, Jojabad, Eliel, Icmakia, Makat, ki Benaya me bedo lunen-tic pi konyo Konania ki ominne Cimei. Jo magi kabaka Kejekia ki Ajaria ma en ladit ma loyo tic i ot pa Lubaŋa en aye guyerogi. Kore ma wod pa Imla ma Lalevi giketo en lagwok dog gaŋ ma yo tuŋ wokceŋ; en ticce obedo me loyo gityer ma ic pwoyo bot Lubaŋa, me poko tyer ma gimiyo bot Rwot ki gityer maleŋ makato. Eden, Miniamin, Yecwa, Cemaya, Amaria ki Cekania aye gubedo ka konyo en ki gen madit i gaŋi pa ajwagi, pi poko dul jami bot utmegigi, jo muteggi ki-jo matino ducu ma romrom kun lubo dul ticgi, pe lu bo kit ma gicoyogi i buk me tekwaro. Gipoko bot co ma ditogi romo pyeradek dok kwede malo, jo ducu ma gidonyo i ot pa Rwot kit macalo tic me nino acel acel tye kwede, ma gitiyo tic ma lubo dog ticgi ki dul ticgi. Gicoyo ajwagi kun lubo dog odi pa kwarogi; ento Lulevi cakke i kom dano ma ditte mwaka pyeraryo dok kwede malo olu bo dog tic megi ki dul ticgi. Gicoyo ajwagi kacel ki jo ducu ma tye botgi, mongi, awobe, ki anyiragi, ki lwakgi ducu; pien onoŋo gubedo lugen kun gigwokke kengi pi bedo maleŋ. Doŋ pi likwayo pa Aron, ajwagi ma onoŋo gibedo i lobo ma orumo gaŋigi, giyero nyiŋ co mogo ki i gaŋigi acel acel bene me poko dul jami mogo bot laco acel acel ma i kin ajwagi, ki bot dano acel acel ma i kin Lulevi ma gityeko coyo eno Kejekia otiyo ticce kit meno oromo i lobo Juda ducu; en obedo ka tiyo gin maber, ma nen atir ki ma nyuto gen i nyim Rwot Lubaŋane, Kit tic acel acel ma en obedo ka tiyone ma mako tic i ot pa Lubaŋa ma lubo cik ki gin ma giciko ducu, otiyo ki cwinye ducu, dok obedo ka yenyo Lubaŋane; ticce owoto maber twatwal. I ŋe lok magi ki tic magi ducu me gen-gu, Cenakerib kabaka me Aciria obino ka lweny i gaŋi ducu me Juda ma girumogi ki cel gogo, kun otamo me loyogi woko wek gubed mere. Ka Kejekia oneno ni Cenakerib otyeko bino ma mito lweny i kom Jerucalem, ocako bedo ki yub gin ki rwodine kacel ki oteka lweny ducu me juko wan pii ma i ŋe gaŋ; ci gin gukonye. Ci lwak mapol gucokke, gucako juko wan it kacel ki ora kulu ma yam piine mol wok ki i lobo meno, kun giwacci, “Piŋo waweko luker me Aciria gibino kany gilimo pii madwoŋ?” En ocako tic matek cut ci ogero cel matek ma yam orette woko piny-nyi, ka dok oketo lubele i wiye, ki yo tuŋ wokone ogero cel mukene; ci omiyo Millo ma en kabedo ma i gaŋ kal pa Daudi ocuŋ matek, En bene otiyo jami lweny ki kwodi mapol ata, Ka dok ocako keto ludito luwi mony me loyo lwak, ocokogi ducu kacel i kabedo mo malac ma i nyim dog gaŋ, ci oloko botgi lok me cuko cwiny, kun wacci, “Wubed tek dok jo macir. Pe wubed lwor, cwinywu bene pe myero oballe i nyim kabaka me Aciria ki lwak ducu ma tye kacel kwede; pien ŋat madit makato en tye kwedwa, En tye ki dul mony pa dano ma gigeno tekogi; ento wan watye ki Rwot Lubaŋawa ma konyowa dok lwenyo piwa.” Lwak gucako bedo ki gen pi lok pa Kejekia kabaka me Juda. Lacen Cenakerib kabaka me Aciria kacel ki dul monnye ducu ma onoŋo gumonyo Lakic, ocwalo lukwenane gucito i Jerucalem bot Kejekia kabaka me Juda ki lwak ducu me Juda ma onoŋo gitye i Jerucalem, kun giwacci, “Cenakerib, kabaka me Aciria, owaco kuman ni, ‘In ijeŋo genni i kom gin aŋo, ma miyo pud icuŋ matek i Jerucalemmi? Kejekia mono pe tye ka umo waŋwu wek wuto woko ki kec kacel ki orwo pii, ma noŋo en tito botwu ni, “Rwot Lubaŋawa tika bilarowa ki i cin kabaka me Aciria”? En Kejekia acel-li aye pe ojwero waŋ jogine ma i wi godi kacel ki keno tyerre woko ducu, kun ociko jo Juda ki jo Jerucalem ni, “Myero wubed ka woro Lubaŋa i nyim keno tyer acel keken, dok wuwaŋ gitum mewu iye”? Tika wun wuŋeyo gin ma an kacel ki kwarina watyeko tiyone i kom lwak ducu me lo bo mukene? Wuneno lwak lubaŋa pa rok me lobo magi gutwero laro lwak me lobo meno ki i ciŋa? Tye lubaŋa mo acel ki i kin lwak lubaŋa mukene-ni ma yam kwarina gujwero wo ko liweŋ-ŋi ‘ma twero laro lwakke ki i ciŋa, mumiyo wutamo ni Lubaŋawu bene twero larowu ki i ciŋa? Pi meno, kombeddi pe wuwek Kejekia obwolwu nyo oum waŋwu kit man, dok pe wuye lokke, pien pe tye lubaŋa me rok nyo ker mo ma yam olaro lwakke ki i ciŋa nyo ki i ciŋ kwarina. Ci Lubaŋawu bitwero larowu ki i ciŋa niŋniŋ?’ ” Lukwena pa Cenakerib dok gumed de ki loko lok mapol i kom Rwot Lubaŋa ki i kom laticce Kejekia. Ci Cenakerib kikome ocoyo waraga ma nyuto cac madwoŋ i kom Rwot Lubaŋa pa Icrael ki loko 1ok marac i kome, kun wacci, “Kit macalo lwak lubaŋa me rok mukene pe gutwero laro lwakgi ki i ciŋa, ci Lubaŋa pa Kejekia bene pe bitwero laro lwakke ki i ciŋa.” Gucako daŋŋe i kom jo Jerucalem ma onoŋo gitye wi cel ki dwan maloŋo i leb pa Lujudaya, kun giburogi ma gimiyogi lworo, ka wek gima gaŋ pa jo Jerucalem woko. Gubedo ka loko lok i kom Lubaŋa pa jo Jerucalem kit macalo koŋ gubedo ka loko i kom lwak lubaŋa pa lurok me wi lobo-ni, ma dano aye gutiyogi ki ciŋgi. Lacen kabaka Kejekia kacel ki lanebi Icaya, wod pa Amoj, gulego pi lok man kun gicwalo kokogi i polo. Ci Rwot ocwalo lamalaika cut, ma otyeko twoni oteka lweny ki ludito wi mony ki ludito mukene woko ducu ki i gony pa kabaka me Aciria, Kit meno en odok i lobone ki lewic ma waŋe olwal woko. I kare ma en obino odonyo i ot pa lubaŋane, litinone ma en onywalogi gutone ki pala lucwan guneke woko kenyo. Meno en aye kit ma Rwot olaro kwede Kejekia ki jo ma gibedo i Jerucalem ki i ciŋ Cenakerib kabaka me Aciria, ka dok ki i ciŋ lumerokgi ducu. Rwot omiyogi yweyo i kabedo ducu. Jo mapol gucako kelo mot mapol bot Rwot i Jerucalem kun gikelo bene jami mabeco me wel bot Kejekia kabaka me Juda; cakke i kare meno wot kwede anyim gimiye woro madit twatwal i nyim rok me lobo ducu. I kare meno two omako Kejekia ma onoŋo cok to woko, ci olego Rwot; Rwot odokke iye kun omiye lanyut. Ento Kejekia pe otimo gin mo macalo adwoggi me gin maber ma gitiyo bote, pien obedo ki wakke i cwinye. Pi meno akemo omako Rwot i kome kacel ki jo Juda ki jo Jerucalem. Ento Kejekia omwolle kene oweko wakke ma i cwinye, en kacel ki jo ma gibedo i Jerucalem, omiyo akemo pa Rwot pe obino i komgi i kare pa Kejekia. Kejekia onoŋo tye ki lonyo kacel ki yweka madwoŋ mada. En ogero ot kano lim pi keto ryal, jabu, litino godi me wel, aŋwece, kwodi ki pi jami me wel-gu ducu. Ogoyo bene dero me kano cam, ka ma en keto iye bel, koŋo vino, ki moo, ogoyo bene dwol pi kit kwa dyaŋ i ducu, ki dwol romi bene. En ogero gaŋi mapol pire kene, ocoko romi ki dyaŋi mapol ata; pien Lubaŋa onoŋo omiye jami madwoŋ twatwal. En Kejekia acel-li aye oloro wan pii ma tye yo tuŋ malo ka ma pii ma a i Gikon mol kato kwede woko, en dok oyubo omiyo pii omol okemo yo tuŋ potoceŋ i ŋet gaŋ kal pa Daudi. Kejekia obedo ki gum maber kacel ki lonyo i kom ticce ducu ma en otiyo. Doŋ i lok ma dok i kom lukwena pa luker me Babilon, ma gicwalogi bote me penyo en pi lanyut ma onoŋo Lubaŋa otiyo i lobone, Lubaŋa oweko gire pire kene, pi temo en ki pi ŋeyo lok ducu ma tye i cwinve. Lok kom Kejekia mudoŋŋe ducu, ki tic mabeco ma en otiyo, nen, gityeko coyone i lok kom ginanyuta ma lanebi Icaya wod pa Amoj oneno, i buk pa Luker me luca ki Icrael. Kejekia oto, oywe kacel ki kwarine ci giyike i lyel ma malo ma i kin lyel pa likwayo pa Daudi. Jo Juda ki jo ma gibedo i Jerucalem ducu gumiye deyo i kare me tone. Ci wode Manace aye oleyo ka tyene. Manace ocamo ker ma mwaka me ditte romo apar wiye aryo, ci obedo ka loc i Jerucalem pi mwaka pyerabic wiye abic. Manace obedo ka tiyo gin ma nen marac i wan Rwot, kun lubo kwede tim mer kwer pa rok ducu ma yam Rwot oryemogi woko ki i nyim jo Icrael. En dok oroco waŋ jogi ma i wi godi, ogero odoco ka ma yam wonne Kejekia ojwerogi woko-ni. Ocano keno tyer pi lwak Baal-gu, ka dok ocomo yadi pi woro Acera ma jok ma dako-ni, ocako woro mony ma i polo ducu, kun tiyo botgi. Dok ocano keno tyer pa jogi-gu i ot pa Rwot, ka ma yam Rwot owacci, “Abiketo nyiŋa bedo i Jerucalem matwal.” Ka dok ocano lwak keno tyer pa mony ma i polo ducu i dyekal aryo me ot pa Rwot. Ocako wano awobene ki mac me gityer i nota pa wod pa Kinom, dok obedo ka tyet ki ajaa ki ŋiyo i dyel-gu kun uyo ki lutal ki lukor tipo-gu ki megi jogi. Obedo ka tiya gin ma nen marac i waŋ Rwot, kun miyo kiniga mako Rwot. Ka dok omiyo gipayo cal jok, ocibo i ot pa Lubaŋa, ma yam Lubaŋa owaco i kome bot Daudi ki bot wode Solomon ni, “I ot man, ki i Jerucalem, ma yam ayero ki i kin kaka ma i Icrael ducu, abiketo nyiŋa bedo iye matwal. Pe doŋ abimiyo tyen jo Icrael bedo ka wirre woko i ŋe lobo ma yam amiyo bot kwariwu-ni, tekke gibigwokke gilubo kit lok ducu ma atyeko cikogi kwede, kun gilubo cik ducu ma yam laticca Moses ocikogi kwede.” Manace obito jo Juda ki jo ma gibedo i Jerucalem, omiyo gubedo ka timo gin marac, makato lurok ma Rwot yam ojwerogi woko ki i nyim jo Icrael. Rwot oloko ki Manace kacel ki lwakke, ento gin pe guwinyo lokke. Pi meno Rwot ocwalo ludito ma loyo mony pa kabaka me Aciria, gumako Manace ki goli, gutweye ki nyor mola ci gutere kwede i Babilon. I kare ma en tye i can obako doge, olego kica ki bot Rwot Lubaŋane ci omwolle kene mada i nyim Lubaŋa pa kwarine. En olego, ci Lubaŋa owinyo legane dok owinyo lega me bako doge, ka ocako dwoko en doki i Jerucalem i kerre kikome. Ci Manace oneyo atir ni Rwot aye Lubaŋa. Lacen en ogero cel ma woko me gaŋ kal pa Daudi ki yo tuŋ potoceŋ me Gikon, i nota, ogero oo wa i yo ma wok ki i dog gaŋ ma gilwoŋo ni dog gaŋ me Rec, orumo ki Opel, ogero ma ocudo malo likuŋ; dok bene oketo ludito ma loyo mony i gaŋi ducu ma girumo ki cel gogo ma i Juda. En ojwero lwak lubaŋa me rok-gu kacel ki cal jok-gu woko ki i ot pa Rwot, ka dok omuko keno tyer ducu ma yam en ocano ka ma gigero iye ot pa Rwot, ki ma onoŋo gitye i Jerucalem, ocokogi ducu obologi woko i ŋe gaŋ, En dok ocano keno tyer pa Rwot odoco, ka otyero iye gitum me gityer lakwecwiny ki gityer me miyo pwoc; ci ociko jo Juda me woro Rwot Lubaŋa pa Icrael. Lwak pud gumedde ki tyero gitum i wi godi, ento gityerogi bot Rwot Lubaŋagi keken. Lok kom Manace mudoŋŋe ducu, legane bot Lubaŋane, ki lok pa lunene ma guloko bote i nyiŋ Rwot Lubaŋa pa Icrael, ki lagam me legane ma Lubaŋa odwoko bote, balle ki kit ma en onayo kwede waŋ Rwot, ki kabedo ma en ogero iye waŋ jogi i wi godi, ka doŋ ocibo lwak yadi me woro Acera ma jok ma dako-ni, ki cal jogine ma ocibo ma onoŋo pud peya omwolle kene, nen, gityeko coyone i buk Lok pa Lunen. Kit meno Manace oto, oywe kacel ki kwarine, ci giyike i ode; wode Amon aye oleyo ka tyene. Amon ocamo ker ma mwaka me ditte pyeraryo wiye aryo, ci obedo ka loc i Jerucalem pi mwaka aryo. Amon obedo ka tiyo gin ma nen marac i waŋ Rwot, kit macalo wonne Manace obedo ka tiyo. Amon obedo ka tyero gitum bot cal lubaŋa-gu ma yam wonne Manace otiyo, kun worogi bene. En pe omwolle kene i nyim Rwot, kit macalo wonne Manace yam omwolle kwede, ento Amon obedo ka tiŋo alii makato teretere. Luticce gupiro lok i kome, ci guneko en woko i ode. Ento lwak me lo bo-nu guneko jo ducu ma onoŋo gupiro lok i kom kabaka Amon; ci gin lwak me lobo-nu guketo wode Yocia me bedo kabaka ma kakare. Yocia ocamo ker ma mwaka me ditte aboro, ci obedo ka loc i Jerucalem pi mwaka pyeradek wiye acel. Y ocia obedo ka tiyo gin ma nen atir i waŋ Rwot, obedo ka lubo kit pa kwarone Daudi ducu, pe obedo ka cabbe yo tuŋ acuc nyo yo tuŋ acam. I mwaka me aboro me locce, ma onoŋo en pud awobi matidi, Yocia ocako keto cwinye ka yenyo Lubaŋa pa kwarone Daudi; ki i mwaka me apar wiye aryone ocako lonyo Juda ki Jerucalem kun omuko waŋ jogi ma i wi godi woko ducu, ojwero yadi ma gicomo pi woro jok Acera ducu, ki cal ma gipayo, ki cal jogi ma gicweyo-gu ducu. Omiyo gimuko keno tyer pa lwak Baal-gu ducu ma en neno; ka dok omuko keno tyer ma gucudo malo i wigi ka ma giwaŋo iye odok eceta, Ci dok ojwero yadi me woro jok Acera ducu, ki cal apaya, ki cal jogi ma giliyo aliya, onidogi woko matitino, ka orego odoko apwa, ka ocako onyone i wi lyel pa jo ma yam gubedo ka tyero gityer bot cal jogi magi. En bene owaŋo cogo pa ajwagi i wi keno tyergi, pi lonyo Juda ki Jerucalem. Ki i gaŋi pa jo Manace, Epraim ki Cimeon, nio kwede wa i gaŋi pa jo Naputali, ki i wi oburgi murumo kenyo, en omuko keno tyer pa jogi, ki cal jok Acera-gu ducu, ki cal jogi mukene, oluro matitino twatwal, ka dok omuko bene lwak keno tyer ka ma giwaŋo iye odok eceta ki i lobo Icrael ducu. Ka lacen odok cen i Jerucalem. I mwaka me apar wiye aboro me locce, ma doŋ onoŋo en otyeko kwanyo gin marac woko ki i lo bo kacel ki i ot pa Lubaŋa Yocia ocwalo Capan wod pa Ajalia, ki Maaceya laloc me gaŋ, ki Joa wod pa Joakaj, ma en laco lok ma timme, ka yubo ot pa Rwot Lubaŋane. Gubino bot Ilkia ajwaka madit ci gumiyo bote lim ma yam gikelo i ot pa Lubaŋa, ma Lulevi ki lukur doggola yam gujogo ki bot jo Manace ki Epraim dok ki bot jo Icrael ducu mudoŋ, ki bot jo Juda ki Benjamin ducu, ki bot jo ma gibedo i Jerucalem. Gumiyo lim man bot ludito tic i ot pa Rwot; ci gin lutic magi ma gitiyo i ot pa Rwot gumiyo lim man pi yubo ot pa Rwot ka ma oballe, ki rocone odoco. Gumiyo lim man bot lu pa-bao ki bot lugedo wek guwil ki godi ma gipayo, ki me wilo yadi pi gin latwe bao, ki pi rii pi odi ducu ma yam luker me Juda guweko oballe odoko wi obur-ni. Ci co magi gutiyo tic ki gen. Jo ma loyogi onoŋo giketo Jakat ki Obadia ma gin Lulevi, ma jo me ot pa Merari, ki Jekaria ki Meculam, ma jo me ot pa Kokat, giketogi me bedo lulo dog tic i ot pa Rwot. Lulevi ducu ma yam guŋiyo ki jami me wer giketogi me bedo lulo jo ma tiŋo yec, ma dok bene ticgi me cuŋu dano i dog tic mapatpat; Lulevi mukene gubedo lucoc, lunyampara ki lugwok doggola ot pa Lubaŋa. I kare ma gitye ka kwanyo lim ma onoŋo gikelo i ot pa Rwot, ci Ilkia ajwaka madit otugi noŋo buk me cik pa Rwot ma yam omiyo ki Moses, Cutcut Ilkia owaco bot Capan ma karan ni, “Atyeko noŋo buk me cik i ot pa Rwot.” Ilkia ocako miyo buk man bot Capan. Capan okelo buk man bot kabaka, ka omedde ki tito lok bot kabaka ni, “Tic ducu ma iciko ni luticci guti, gin gitye ka tiyone. Gukwanyo lim ma gunoŋo i ot pa Rwot gumiyo i ciŋ lulo dog tic ki lutic.” Ka dok Capan karan otito bot kabaka ni, “Ajwaka Ilkia otyeko miya buk mo.” Ci Capan ocako kwanone i nyim kabaka. Ka kabaka owinyo lok me cik, ci oyeco boŋŋine woko. Omiyo kabaka ociko Ilkia, Akikam wod pa Capan, Abudon wod pa Mika, Capan ma karan, ki Acaya ma latic pa kabaka, kun waco ni, “Wucit, wupeny dog Rwot pira ki pi jo ma gudoŋ i Icrael ki i Juda, pi lok ma i buk man ma gityeko nono-ni, Akemo pa Rwot kara olyetto i komwa matek, pien kwariwa pe gubedo ka woro lok ducu ma i buk man, pi tic kwede i kit ducu ma yam gicoyo kwede ma mako komwa.” Kit meno Ilkia kacel ki jo ma kabaka ocwalogi gucito bot Kulda ma lanebi ma dako ma cware Calum wod pa Tokat, ma wod pa Kacra, ma lagwok boŋŋi pa kabaka. Dako-nu onoŋo bedo i Jerucalem i dul gaŋ ma gilwoŋo Dul gaŋ me Aryone; ci guloko kwede lok i kom gin mutimme. En owaco botgi ni, “Rwot Lubaŋa owaco ku man ni, ‘Wutit ki dano ma ocwalowu bota ni, Rwot owaco kuman ni, Nen ba, abikelo gin marac poto i kom kabedo man, ki i kom jo ma gibedo iye, pi co bo lok ducu ma giceno ki dano ina gicoyoi buk ma gikwano i nyim kabaka me Juda. Gin gutyeko bwota woko kun giwaŋo odok eceta bot lwak lubaŋa mukene, wek gimi kiniga obed ka maka pi jogi ducu ma gitiyo ki ciŋgi-ni. Pienno akemona bilyetto matek i kom kabedo man ma pe doŋ bikwe. Ento lok ma dok i kom kabaka me Juda ma ocwalowu ka penyo dog Rwot, wun wubiwacce kit man ni, Rwot Lubaŋa pa Icrael owaco kit man ni, i kom lok ma iwinyo-ni, doŋ ityeko ŋut ki i cwinyi ci imwolle keni i nyim Rwot i kare ma iwinyo lok ma yam aloko i kom kabedo man ki i kom jo ma gibedo iye, imwolle woko keni i nyima, ci icako yeco boŋŋini woko kun ikok kwede i nyima; pienno an bene atyeko winyo kokoni, man lok pa Rwot kikome. Nen ba, an abidwoki i kin kwarini, ci gibiyiki i lyelli ki kuc, dok waŋi pe bineno gin marac ducu ma abikelo i kom kabedo man ki i kom jo ma gibedo iye.’ ” Ci gin gudwoko lok bot kabaka. I ŋe meno kabaka ocwalo kwena bot ludoŋo me Juda ki me Jerucalem ci gucokke kacel. Kabaka ocako cito i ot pa Rwot kacel ki jo Juda ducu, jo ma gibedo i Jerucalem ajwagi kacel ki Lulevi ki lwak ducu, jo madito ki jo matino; ci okwano botgi buk me gicikke ma ginoŋo i ot pa Rwot. Kabaka ocuŋ i kabedone ocako keto gicikke i nyim Rwot ni, ebilubo gin ma Rwot mito dok ebigwoko cikke ki gin ma en ociko ducu, ki cwinye ducu, ki tipone ducu, kun etiyo lok me gicikke ma gicoyo i buk meno. En ociko dano ducu ma onoŋo gitye i Jerucalem ki i Benjamin i kare meno ni gulub gicikke meno. Jo ma gibedo i Jerucalem gubedo ka lubo gicikke pa Lubaŋa, ma Lubaŋa pa kwarigi. Ka dok Yocia ojwero jami me kipyeda woko ducu ma i dul lobo ducu pa jo Icrael, omiyo jo ducu ma i Icrael guworo Rwot Lubaŋagi, I karene ducu pe gulokke guweko lubo kor Rwot Lubaŋa pa kwarigi. Yocia okwero nino madit me Kato (Paska) pa Rwot i Jerucalem. Ci guneko litino romi me Kato (Paska) i nino dwe apar wiye aŋwen me dwe mukwoŋo. En oyero ajwagi ci oketogi i dog ticgi, dok ocuko cwinygi i kom tic ma i ot pa Rwot. Dok owaco bot Lulevi ma gin aye gupwonyo jo Icrael ducu-ni, ma gin jo maleŋ i nyim Rwot, ni, “Wuket canduk maleŋ i ot ma Solomon wod pa Daudi, kabaka me Icrael, yam ogero; pe myero dok wubed ka tinone i wi gwokwu. Wun doŋ wuti bot Rwot Lubaŋawu ki lwakke jo Icrael. Wuyubbe kun wulubo dog odi pa kwariwu ki dulwu, kun wulubo bene gin ma yam Daudi kabaka me ‘Icrael ociko ki gin ma wode Solomon ociko. Dok wucuŋ i kabedo maleŋ, wucuŋ kun wulubo dog odi pa kwari utmegiwu ma gin jo me lobo-ni, kun dul acel acel pa Lulevi ocuŋ pi dog ot acel acel pa lwak. Kit meno doŋ wunek litino romi me Kato (Paska), wulonnye kenwu, wuyub gin ma mitte pi utmegiwu, wek gulub lok pa Rwot ma Moses ociko.” Yocia omiyo litino romi ki litino dyegi alip pyeradek, ki twoni alip adek, bot lwak pi gityer me Kato (Paska) pi lwak jo ducu ma onoŋo gitye kenyo. Jami magi ducu jami ma oa i kom jami pa kabaka. Ki rwodi bene gumiyo gin ma cwinygi opwoyo bot lwak, bot ajwagi ki bot Lulevi. Ilkia, Jekaria ki Jekiel, ma gin ludito ma giloyo tic ma i ot pa Lubaŋa, gumiyo bot ajwagi litino romi ki dyegi alip aryo ki miya abicel ki twoni miya adek me gityer me Kato (Paska). Konania ki omegine, ki Cemaya ki Netanel, ki Kacabia, Jeyel ki. Jojabad, ma gin ludito pa Lulevi, gumiyo litino romi ki dyegi alip abic, ki twoni miya abic, bot Lulevi me gityer me Kato (Paska). I kare ma doŋ giyubo jami ducu kakare, ajwagi gucako cuŋ i kabedogi, ki Lulevi bene gucuŋ i dul ki dul i dog ticgi kun gin ducu gilubo gin ma kabaka ociko. Guneko litino romi me Kato (Paska), ci ajwagi ticgi obedo me coro remo ma gigamo ki bot Lulevi ina gitye ka yaŋo riŋo. I kare ma gitimo man giketo dul mukene me gitum awaŋa cen, ma gibipoko i kin lwak kun gilubo dog odi pa kwarigi, wek gutyer bot Rwot, macalo gicoyo i buk pa Moses. Ci gutiyo ki twoni bene kit meno. Gubulo litino romi me Kato (Paska) ki mac kun gilubo cik ma yam giciko; ento jami me gityer maleŋ gutedo ateda ki otako ki agulu, ki cupuriya, ka gucako tinone gutyero bot lwak oyotoyot. I ne meno gubedo ka yubo jami pigi kengi ki pi ajwagi, pien ajwagi ma gin likwayo pa Aron onoŋo gitye ki tic madwoŋ twatwal me waŋo gitum awaŋa-gu ki moo dwolo-gu nio wa i wor, Kit meno Lulevi guyubo jami pigi kengi ki pi ajwagi bene ma gin likwayo pa Aron. Likwayo pa Acap ma gin luwer, gubedo i kabedogi macalo Daudi, Acap, Keman, ki Jedutun ma lanen pa kabaka onoŋo guciko; ki lugwok doggola ot pa Rwot ducu gubedo i doggola acel acel. Pe gumito weko ticgi pien guniaŋ ni utmegigi ma Lulevi gubedo ka yubbe pigi bene. Meno aye kit ma giyubo ki tic pa Rwot i nino-nu, pi kwero nino madit me Kato (Paska) ki pi tyero gitum awaŋa i kom keno tyer pa Rwot, kun gilubo lok ma kabaka Yocia ociko, Jo Icrael ducu ma onoŋo gitye kunnu gukwero nino madit me Kato (Paska) i kare meno, ki dok gukwero bene nino madito me Mugati ma Tobi Pe Iye pi nino abiro. Pe tye nino mo madit me Kato (Paska) ma gikwero kit man i Icrael nia i kare pa lanebi Camuel. Dok pe tye laker mo i kin luker me Icrael ma yam okwero nino me Kato (Paska) macalo Yocia okwero, kacel ki ajwagi ki Lulevi, jo Juda ki jo Jerucalem ducu ma onoŋo gubedo tye, ki jo ducu ma gibedo i Jerucalem, I mwaka me apar wiye aboro me loc pa Yocia en aye gikwero iye nino man madit me Kato (Paska). I ŋe man ducu, ma doŋ Yocia otyeko yubo ot pa Lubaŋa, Neko kabaka me Ejipt ocito ka lweny i Karkemic ma cok ki kulu Euprate, ki Yociaa bene ocrto ka lweny i kome cut. Ento Neko ocwalo kwena bot Yocia ma guwacci, “Imito, watimme niŋniŋ: kaba ka me Juda? Tin an pe abino ka lweny i komi, ento abino ka lwenyo i kom jo ma atye ka lweny i komgi; dok Lubaŋa ociko me tiyo man oyotoyot. Wek pyem ki Lubaŋa ma tye kweda-ni miyo neki woko,” Ento Yocia pe oloko ŋeye ki kabaka Neko, ci orukke macalo dano mo ata wek elweny kwede. Yocia pe owinyo lok pa Neko ma oa ki i dog Lubaŋa kadi ki acel ento ocerre ocito ka lweny kwede iba; Megido, Cutcut gutugi celo kabaka Yocia woko; ci kabaka owaco bot luticce ni, “Wukwanya woko ki i wan lweny, pien doŋ gutyeko keto ret marac twatwal, i, koma,” Ci luticce gukwanye woko ki I gadigadine gukete i gadigadine me aryone ka gutere i Jerucalem. Yocia oto, ci giyike i lyel pa kwarine. Jo Juda ki jo Jerucalem ducu gukumo matek pi Yocia. Jeremia bene okok matek pi Yocia; co kacel ki mon ma gubedo ka wer guloko pi Yocia i kokogi cakke i kare ca nio wa onyoo. Guketo man odoko cik i Icrael ducu: nen gityeko coyone i buk me Koko. Lok kom Yocia mudoŋŋe ducu, ki tic mabeco ma en otiyo ducu kit ma gicoyo kwede i buk me cik pa Rwot, gin ma yam en otiyo ducu, nia i acakkine nio i agikkine, nen, gityeko coyone I buk pa Luker me Icrael ki me Juda. Lwak ma gin wegi lobo gukwa nyo Yekoakaj wod pa Yocia, ci guketo en kabaka me leyo ka tyen wonne i Jerucalem. Yekoakaj ocamo ker ma mwaka me ditte pyeraryo wiye adek, ci obedo ka loc i Jerucalem pi dwe adek. Lacen Kabaka me Ejipt oryemo Yekoakaj woko ki i ker ka oketo wel ajog mapek i kom jo Juda i wel me kilo alip abic me ryal ki kile pyerabic me jabu. Kabaka me Ejipt oketo Eliakim omin Yekoakaj obedo kabaka me Juda ki me Jerucalem ci ocako loko nyiŋe Yekoyakim; ento Neko okwanyo Yekoakaj otero woko i Ejipt. Yekoyakim ocamo ker ma mwaka me ditte pyeraryo wiye abic, ci obedo ka loc i Jerucalem pi mwaka apar wiye acel. Obedo ka tiyo gin ma nen marac i waŋ Rwot Lubaŋane, Nebukadnejar kabaka me Babilon obino ka lweny i kome, CI omake otweye ki nyor ka otere kwede woko i Babilon. Nebukadnejar bene okwanyo jami mogo ki i kin jami ma gitiyo kwedgi i ot pa Rwot oterogi i Babilon, ci oketogi i gaŋ kalle i Babilon. Lok kom Yekoyakim mudoŋŋe ducu, ki tim me kipyeda ducu ma yam otiyo, kacel ici lok ma ginoŋo i kome, nen, gityeko coyone i buk pa Luker me Icrael ki me Juda, Wode Yekoyakin aye oleyo ka tyene, Yekoyakin ocamo ker ma mwaka me ditte aboro, ci obedo ka loc i Jerucalem pi dwe adek ki nino apar. Obedo ka tiyo gin ma nen marac i wan Rwot. I dog oro en aye Nebukadnejar ocwalo luticce ka ome ci gutere wa i Babilon. Otero wa jami mabeco ma gitiyo kwedgi i ot pa Rwot. Ci oketo ominne Jedekia obedo kabaka me loyo jo Juda ki Jerucalem, Jedekia ocamo ker ma mwaka me ditte pyeraryo wiye acel, ci obedo ka loc i Jerucalem pi mwaka apar wiye acel. Obedo ka tiyo gin ma nen marac i waŋ Rwot Lubaŋane. En pe omwolle i nyim lanebi Jeremia, ma oloko kwede lok ma oa ki bot Rwot. Jedekia bene ojemo i kom kabaka Nebukadnejar ma yam omiyo en ekwono kwon ki nyiŋ Lubaŋa; omiyo cwinye obedo nwaŋ ma pe mito lokke bot Rwot, Lubaŋa pa Icrael. Ajwagi ma gin lutel kacel ki lwak mukene-gu ducu pe gugeno Rwot matwal, gubedo ka lubo gin me kwer pa rok mukene, omiyo gubalo kwede ot pa Rwot wo ko ma yam Rwot otyeko lonyo obedo leŋ i Jerucalem. Rwot, Lubaŋa pa kwarigi, obedo ka cwalo lok botgi teretere kun oro lukwenane me tito botgi, pien kica omako en i kom lwakke ki pi kabedo mere; ento gin gubedo ka ŋalo lukwena pa Lubaŋa, ma gicayo lokke-gu, dok gijwiyo lunebine bene, nio ka akemo omako Rwot i kom lwakke, ma gin mo ma romo jukone doŋ pe, Rwot ocako kela kabaka pa jo Kaldaya ka lweny i komgi, ci oneko awobe ki pala lucwan ki i kabedo maleŋ ma i ot pa Lubaŋa, pe obedo ki kica i kom awobi nyo nyako, jo muteggi nyo jo muti; magi ducu Lubaŋa omiyogi woko i ciŋe. Ki jami ducu ma yam gitiyo kwedgi i ot pa Lubaŋa, jami madito ki matinone, ki lonyo ma gikano i ot pa Rwot, ki lonyo ma kabaka okano ki pa rwodine ducu, kabaka pa jo Kaldaya otero woko ducu i Babilon. Giwaŋo ot pa Lubaŋa woko, ka dok gimuko cel murumo Jerucalem, ci giwaŋo odi ma gibedo iye woko ducu ki mac, kun gibalo bene wa jami ma pigi tego, En otero jo ma guloyo ki i lak to i Babilon, ci gudoko opiine ki pa litinone nio ka ker me Percia ocuŋ matek. Man obedo pi cobo lok pa Rwot ma yam oloko ki i dog Jeremia, nio wan ma lobo otyeko kwero cabitte ducu. Pi kare ducu ma lobo giweko ata noŋo tye ka kwero karene me yweyo mot macalo i ceŋ cabit, nio ka wel mwaka ocobo kakare ma oromo pyerabiro. I mwaka mukwoŋo me loc pa Ciro kabaka me Percia, wek lok pa Rwot ma yam oloko ki i dog Jeremia ocobbe kakare, cutcut Rwot otugo cwiny Ciro kabaka me Percia omiyo en otito lok oromo i lobo ma i te kerre ducu. En ocoyo lok man bene ki waraga ni, “Ciro kabaka me Percia owaco kuman ni, ‘Rwot, ma en Lubaŋa me polo, otyeko miyo ker ducu ma i wi lobo i ciŋa, dok ocika ni ager ot pire i Jerucalem, ma tye i Juda. Bot ŋat mo keken ma i kinwu ma i kom lwakke ducu awaco ni, Rwot Lubaŋane myero obed kwede. Wek en oa ociti.’ ” I mwaka mukwoŋo me loc pa Ciro kabaka me Percia, wek lok pa Rwot ma yam oloko ki i dog Jeremia ocobbe kakare, cutcut Rwot otugo cwiny Ciro kabaka me Percia omiyo en otito lok oromo i lobo ma i te kerre ducu. En ocoyo lok man bene ki waraga ni, “Ciro kabaka me Percia owaco kuman ni, Rwot, ma en Lubaŋa me polo, otyeko miyo ker ducu ma i wi lobo i ciŋa, dok ocika ni ager ot pire i Jerucalem ma tye i Juda. Bot ŋat mo keken ma i kinwu ma i kom lwakke ducu awaco ni, Lubaŋane myero obed kwede. Wek en oa ocit i Jerucalem, ma tye i Juda, ka gero ot pa Rwot, Lubaŋa pa Icrael, en Lubaŋa ma gaŋ kalle Jerucalem. Pienno dano acel acel ma pud odoŋ i kabedo mo ma en bedo iye, wek jo ma i kabedo meno gumiye kony me ryal ki jabu, kacel ki jami-gu ki lim makwo, kun gimedo i kom gityer ma igi opwoyo ma gimiyo pi ot pa Lubaŋa ma tye i Jerucalem.” Ludito ma giloyo dog odi pa kwarogi ma tye i kaka pa Juda ki Benjamin, kacel ki ajwagi ki Lulevi ma Lubaŋa otugo cwinygi, gucako yubbe me cito ka gero ot pa Rwot ma tye Jerucalem odoco. Jo ducu murumogi gumiyogi kony me jami me ryal, jabu, ki lwak jami mapatpat, kacel ki lim makwo-gu, ki mot ma welgi doŋo, medo i kom lim ducu ma dano gutyero ma cwinygi opwoyo me miyone. Kabaka Ciro bene okwanyo jami ma yam gitiyo kwedgi i ot pa Rwot woko ma yam Nebukadnejar oyako ki i Jerucalem ci otero oketo i ot jok pa lwak lubaŋane, Ciro kaba ka me Percia okelogi ci omiyogi i cin Mitredat ma lakan lim, en ma okwano lwak jami meno ducu i nyim Cecbajar ma en rwot me Juda. Wel jami onoŋo yam tye kit man: Becen me jabu alip acel, becen me ryal alip acel, ata bo weer me waŋo odok eceta pyeraryo wiye aboŋwen, atabo me jabu pyeradek, atabo me ryal alip aryo ki miya aŋwen ki apar, ki jami mukene alip acel; jami me jabu ki me ryal ducu oromo alip abic ki miya aŋwen ki pyerabicel wiye aboŋwen, Jami magi ducu Cecbajar odwokogi i Jerucalem i kare ma jo ma yam giterogi i opii i Babilon gidwokogi kwede cen i Jerucalem. Magi gin aye jo me dul lobo Juda ma yam giyakogi ci giterogi i opii i lobo Babilon ma Nebukadnejar kabaka me Babilon con otweyogi kunnu: ci gudwogo i Jerucalem ki i Juda, kun dano acel acel dok i gaŋŋe kikome. Gin gudwogo kacel ki Jerubabel, ki Yecwa, ki Nekemia, ki Ceraya, ki Rcelaya, ki Mordekai, ki Bilcan, ki Micpar, ki Bigvai, ki Rekum, ki Baana. Man aye wel co ma i kin jo Icrael: Likwayo pa Paroc, alip aryo ki miya acel ki pyerabiro wiye aryo. Likwayo pa Cepatia, miya adek ki pyerabiro wiye aryo, Likwayo pa Ara, miya abiro ki pyerabiro wiye abic, Likwayo pa Pakat-moab, ma gin aye likwayo pa Yecwa ki Joab, alip aryo ki miya aboro ki apar wiye aryo. Ki likwayo pa Elam, alip acel ki miya aryo ki pyerabic wiye aŋwen. Likwayo pa Jatu, miya aboŋwen ki pyeraŋwen wiye abic, Likwayo pa Jakai, miya abiro ki pyerabicel. Likwayo pa Bani, miya abicel ki pyeraŋwen wiye aryo. Likwayo pa Bebai, miya abicel ki pyeraryo wiye adek, Likwayo pa Ajgad, alip acel ki miya aryo ki pyeraryo wiye aryo. Likwayo pa Adonikam, miya abicel ki pyerabicel wiye abicel. Likwayo pa Bigvai, alip aryo ki pyerabic wiye abicel. Likwayo pa Adin, miya aŋwen ki pyerabic wiye aŋwen. Likwayo pa Ater, ma en aye likwayo pa Kejekia, pyeraboŋwen wiye aboro. Likwayo pa Bejai, miya adek ki pyeraryo wiye adek, Likwayo pa Jora, miya acel ki apar wiye aryo. Likwayo pa Kacum, miya aryo ki pyeraryo wiye adek. Likwayo pa Gibar, pyeraboŋwen wiye abic, Jo Beterekem, miya acel ki pyeraryo wiye adek. Jo Netopa, pyerabic wiye abicel. Jo Anatot, miya acel ki pyeraryo wiye aboro. Jo Ajimavet, pyeraŋwen wiye aryo, Jo Kiriatarim, jo Kepira, ki jo Beerot, miya abiro ki pyeraŋwen wiye adek. Jo Rama ki jo Geba, miya abicel ki pyeraryo wiye acel. Jo Mikmac, miya acel ki pyeraryo wiye aryo. Jo Betel ki Ai, miya aryo ki pyeraryo wiye adek. Jo Nebo, pyerabic wiye aryo, Jo Magbie, miya acel ki pyerabicel wiye abicel. Jo Elam mukene-ne, alip acel ki miya aryo ki pyerabic wiye aŋwen, Jo Karim, miya adek ki pyeraryo. Jo Lod, jo Kadid, ki jo Ono, miya abiro ki pyeraryo wiye abic. Jo Jeriko, miya adek ki pyeraŋwen wiye abic. Jo Cenaa alip adek ki miya abicel ki pyeradek. Man aye wel ajwagi: likwayo pa Jedaya, ma i dog ot pa Yecwa, miya aboŋwen ki pyerabiro wiye adek. Likwayo pa Imer, alip acel ki pyerabic wiye aryo. Likwayo pa Packur, alip acel ki miya aryo ki pyeraŋwen wiye abiro. Likwayo pa Karim, alip acel ki apar wiye abiro. Man aye wel Lulevi: Likwayo pa Yecwa ki Kadmiel, ma i kin likwayo pa Kodavia, pyerabiro wiye aŋwen, Luwer ma likwayo pa Acap, miya acel ki pyeraryo wiye aboro. Likwayo pa lugwok-doggola ma gin likwayo pa Calum, likwayo pa Ater, likwayo pa Talmon, likwayo pa Akub, likwayo pa Katita, ki likwayo pa Cobai, gin ducu onoŋo giromo miya acel ki pyeradek wiye aboŋwen. Magi aye lutic i ot pa Lubaŋa: likwayo pa Jika, likwayo pa Kacupa, likwayo pa Tabaot, likwayo pa Keroc, likwayo pa Ciaka, likwayo pa Padon, likwayo pa Lebana, likwayo pa Agaba, likwayo pa Akub, likwayo pa Kagab, likwayo pa Camlai, likwayo pa Kanan, likwayo pa Gidel, likwayo pa Gakar, likwayo pa Re-aya, likwayo pa Rejin, likwayo pa Nekoda, likwayo pa Gajam, likwayo pa Uja, likwayo pa Pacea, likwayo pa Becai, likwayo pa Acna, likwayo pa Meunim, likwayo pa Nepicim, likwayo pa Bakbuk, likwayo pa Akupa, likwayo pa Arur, likwayo pa Bajlut, likwayo pa Mekida, likwayo pa Arca, likwayo pa Barkoc, likwayo pa Cicera, likwayo pa Tema, likwayo pa Nejia, ki likwayo pa Atipa. Likwayo pa lutic pa Solomon gin ene: likwayo pa Cotai, likwayo pa Kaeoperet, likwayo pa Peruda, likwayo pa Jaala, likwayo pa Darkon, likwayo pa Gidel, likwayo pa Cepatia, likwayo pa Katil, likwayo pa Poceret-kajebaim, ki likwayo pa Ami. Jo ma gitiyo i ot pa Lubaŋa ki likwayo pa lutic pa Solomon onoŋo welgi romo miya adek ki pyeraboŋwen wiye aryo. Magi aye jo ma gubino ma gua ki i Tel-mela, Tel-karca, Kerub, Adan ki Imer, kadi bed pe gitwero nyuto dog odi pa kwarogi, ka onoŋo yam gin jo Icrael: gin likwayo pa Delaya, likwayo pa Tobia, ki likwayo pa Nekoda, gin ducu miya abicel ki pyerabic wiye aryo. Dok jo magi gitye i kin likwayo pa ajwagi: likwayo pa Kabaya likwayo pa Kakoj, ki likwayo pa Barjilai. En yam onyomo dakone ki kin anyira pa Barjilai ma jo Gilead; yam gilwoŋo en ki nyiŋgi. Gin gubedo ka yenyo nyiŋgi i kin lwak nyiŋ ma gicoyogi i buk me tekwaro, ento pe gunoŋo iye nyiŋgi, omiyo gikwanyogi woko ki i kin ajwagi calo jo ma komgi ki keni. Laloyo otito botgi ni gin pe gunywak camo cam maleŋ maka to, nio wan ma ajwaka binen ma bipenyo dog Rwot ki Urim ki Tumim. Lwak ma gucokke ducu welgi romo alip pyeraŋwen wiye aryo ki miya adek ki pyerabicel, ma pe gikwano iye lwak luticgi ki anecagi ma welgi romo alip abiro ki miya adek ki pyeradek wiye abiro. Onoŋo gitye bene ki luwer ma co ki ma mon miya aryo. Aguraguragi yam tye miya abiro ki pyeradek wiye abicel, ki kanagi maditone mi ya aryo ki pyeraŋwen wiye abic, kinagagi romo miya aŋwen ki pyeradek wiye abic, ki kanagi romo alip abicel ki miya abiro ki pyeraryo. I kare ma jo mogo ma i kin ludito wi kaka, gubino i ot pa Rwot ma tye i Jerucalem, gutyero gityer ma cwinygi opwoyo pi gero ot pa Lubaŋa, i kabedone macon kikome. Gumiyo lim i ot kano lim me tic kit macalo gitwero, darik me jabu alip pyerabicel wiye acel, mina me ryal alip abic, ki boŋŋi aruka pa ajwagi miya acel. Ajwagi ki Lulevi ki jo mogo mukene gubedo i Jerucalem ki i kabedo ma cok kwede; luwer, lugwok-doggola, ki lutic i ot pa Lubaŋa i gaŋigi, ki jo Icrael ducu bene gubedo i gaŋigi. Ka dwe me abiro oromo, onoŋo doŋ jo Icrael gubedo mot i gaŋigi, ci lwak gucokke i Jerucalem ki cwiny acel. Cutcut Yecwa wod pa Jojadak kacel ki ajwagi luwote, ki Jerubabel wod pa Cealtiel ki lutugi, gucako caŋo keno tyer pa Lubaŋa pa Icrael, pi tyero iye gitum awaŋa, kit macalo yam gicoyo i cik pa Moses ma dano pa Lubaŋa-ni. Gucano keno tyer i kabedone kikome, kadi bed lworo omakogi pi lwak jo mukene ma gitye i lobo-nu, ci gutyero iye gitum awaŋa bot Rwot, kun giwaŋo gitum odiko ki otyeno. Ka gukwero nino madito me Bolo, kit ma con gicoyo, kun gityero gitum awaŋa nino ducu kun welle lubo cik ma mitte pi nino acel acel. Ka doŋ i ne meno gimedde ki tyero gitum awaŋa nino ducu, gityer me por dwe ki me nino madito ma Rwot ociko ducu, ki gityer ma dano acel acel miyo bot Rwot kit ma iye opwoyo. Cakke i kom nino dwe mukwoŋo me dwe me abiro en aye gucako tyero iye gitum awaŋa bot Rwot, Ento guti me te ot pa Rwot onoŋo pud peya giketo. Pienno gumiyo lim bot lupa-godi ki bot lupac. Dok gumiyo cam ki ginamata-gu, ki moo bot jo Cidon ki jo Turo wek gukel yadi cedar ki i Lebanon wa i dog nam, i Jopa, pi twero ma Ciro kabaka me Percia omiyo botgi. I mwaka me aryone ma lubo dwogogi i Jerucalem i ot pa Lubaŋa, i dwe me aryo, en aye Jerubabel wod pa Cealtiel ki Yecwa wod pa Jojadak gucako kwede tic, kacel ki utmegigi mukene, kacel ki ajwagi ki Lulevi ki jo ducu ma yam gudok i Jerucalem ma gua ki i lobo ka ma giterogi iye i opii. Guyero Lulevi, ma mwaka me ditogi romo pyeraryo ki makato pi ketogi me bedo ludito ma giloyo tic i kom ot pa Rwot. Yecwa ki awobene ki lutugi, ki Kadmiel ki awo bene ma likwayo pa Juda, gin ducu guloyo lutic ma i ot pa Lubaŋa, kacel ki awobe pa Kenadad ki Lulevi, ki litinogi kacel ki lutugi. Ka doŋ lugedo guketo guti me te ot pa Rwot, ajwagi guruko ginaruka me tic megi gukato kwede anyim ma gumako tumgi; ki Lulevi ma likwayo pa Acap onoŋo gitye ki atego agoya-gu me pako Rwot, kit ma yam Daudi kabaka me Icrael ociko. Guwero wer kun gileyo aleya, ma gipako Rwot dok gimiyo pwoc bote, kun giwero ni, “Pien en ber, mar mere ma pe lokke bedo nakanaka bot jo Icrael.” Lwak ducu gudaŋŋe ki woo madwoŋ, ka gipako Rwot, pien doŋ giketo guti me te ot pa Rwot. Ento lwak jo mapol ki i kin ajwagi ki Lulevi ki ludito ma giloyo dog odi pa kwarogi, jo muteggi ma yam guneno ot pa Rwot mukwono ca, gukok matek ki dwan maloŋo i kare ma guneno ka gitye ka keto guti me te ot man, kadi ka jo mapol onoŋo gubedo ka daŋŋe ki yomcwiny; mumiyo dano pe gutwero poko kin dwan ma jo gidaŋŋe kwede pi yomcwiny ki dwan me daŋŋe ma jo gikok kwede akoka-ni, pien onoŋo lwak gubedo ka daŋŋe matek twatwal, dok dwangi bene owinnye wa ka mabor. Ka lumerok pa jo Juda ki jo pa Benjamin guwinyo ni jo ma gudwo go ki i opii i rok gitye ka gero ot pa Rwot, Lubaŋa pa Icrael, ci cut gubino bot Jerubabel ki ludito ma giloyo dog odi pa kwarogi kun giwaco botgi ni, “Wuwek waribbe kwedwu i gedo man, pien wan bene waworo Lubaŋawu-ni macalo wun, dok wan bene wabedo ka tyero gitum bote cakke wa i kare pa Ecar-kadon kabaka me Aciria ma yam okelowa kany-nyi.” Ento Jerubabel, ki Yecwa, ki ludito mukene ma giloyo dog odi pa kwarogi ma i Icrael gugamo doggi ni, “Wun pe wutwero ribbe kwedwa me gero ot mo pi Lubaŋawa; wan kenwa watwero gero ot pi Rwot, Lubaŋa pa Icrael, macalo kabaka Ciro kabaka me Percia yam ociko ki wan.” Ka dok lwak jo mukene ma gitye i lobo-nu gucako balo cwiny jo Juda woko, omiyo gubedo ki lworo me gedo. Jo meno guwilo lumi-tam pa kabaka mogo me balo ticgi woko, i kare pa Ciro kabaka me Percia, nio kwede wa i kare me loc pa Dario kabaka me Percia. I kare me loc pa Akacwero, i acakki me locce, gucoyo lok me adot i kom jo ma gibedo i Juda ki i Jerucalem. I kare me loc pa Aritakcec, jo magi Biclam ki Mitredat ki Tabcel ki ludito wadgi ducu, gucoyo waraga bot Aritakcec kabaka me Percia; yam gicoyo ki leb Aram ka giloko. Rekum ma en ladit me mony ki Cimcai ma karan gucoyo waraga bot kabaka Aritakcec ma tito lok i kom Jerucalem kit man ni. Rekum ma ladit me mony, ki Cimcai ma karan gucoyo waraga man kacel ki ludito wadgi ducu, luŋolkop, ki luloc me lobo, ki ludito, pa jo Percia ki jo Erek, ki jo Babilon, ki jo Cuca, ma gin aye jo Elam, kacel ki lwak rok mukene ducu ma yam laker madit me awora Ocnapar okobogi woko omiyo gubedo i gaŋi ma i lobo Camaria ki i kabedo mukene mapatpat ma i dul lobo ma gilwoŋo Loka Kulu Euprate, Man aye kopi me waraga ma gucwalo bote-ni, lokke kwanne kit man, “Bot kabaka Aritakcec: Wan luticci ma wabedo i lobo me Loka Kulu, wacwalo motwa boti. Wek kabaka one ni Lujudaya ma gua ki boti gudwogo botwa, koni gutyeko cito woko i Jerucalem, Gitye ka gero gaŋ pa jo ma lujemo ma gin jo maraco-ni odoco; gicok doŋ ka tyeko tic i kom cel murumo gaŋ dok gitye ka yubo te gutine. Myero kabaka one lok man ni, ka ce gaŋ man gigero odoco, ka gigero cel otum, ci pe doŋ gibimiyo ajog dok pe gibiculo kit mucoro mo. Dok lim ma gibicwalo bot kabaka bene bijwik woko. Kit macalo wan lutic i gaŋ kal pa kabaka, pe bedo ber ka waweko gituro twero pa kabaka woko ma kun wan waneno anena, mumiyo wacwalo lok man pi titone boti in kabaka, wek koŋ ginen dok giyeny lok i buk ma gicoyo iye lok mutimme i kom kwarowu. Ibinoŋo i lok ma gicoyo i buk me lok mutimme ma bimiyo iniaŋ atir ni gaŋ man kara gaŋ me jemo ada, ma miyo can ki arem i kom luker ki luloc me lobo, pi atubegi ma ocakke magwa i gaŋ meno nia wa con. Meno aye gin mumiyo yam gimuko gaŋ man woko. Wamito kabaka one ni, ka ce gaŋ man gigero odoco, ki cel bene otum, in doŋ pe ibibedo ki twero mo i lobo ma i Loka Kulu.” Kabaka ocwalo botgi lagam me waraga kit man, “Bot Rekum ladit me mony ki Cimcai karan, ki lwak ducu ma gin ludito wadiwu ma gibedo i Camaria ki i lobo ducu me Loka Kulu, amotowu. Doŋ amito wune ni waraga ma wucwalo botwa kany gikwano ducu maber i nyima. Ci doŋ amiyo twero, kun bene giniyo ma giyenyo i buk, ci ginoŋo ada ni gaij man nia wa i kare macon obedo ka jemo woko i kom luker ducu, dok ni jemo kacel ki atube obedo ka timme iye. Ki luker matego yam gubedo ka loyo Jerucalem, ma guloyo bene wa ki lobo ducu me Loka Kulu, ma lwak gubedo ka culo ajog ki mucoro ducu botgi. Pienno myero wuket cik wek gijuk jo meno woko, wek gaŋ man pe dok giger odoco, nio wan ma an kikoma aketo cik. Wuket cwinywu i kom lok meno, pe wubed ata ma pe wuŋeyo ticwu, Piŋo wumito weko lim pa kabaka ki twer mere balle woko ata?” I kare ma doŋ gikwano waraga pa kabaka Aritakcec i nyim Rekum ki Cimcai ma karan ki bot ludito wadgi ducu, gucako cito oyotoyot bot Lujudaya ma onoŋo gitye i Jerucalem ci gujukogi woko ki tek. Tic i kom ot pa Lubaŋa ma tye i Jerucalem ocun woko; ticce ocun nio wa i mwaka me aryo me loc pa Dario kabaka me Perci I kare meno, lunebi magi, Aggai ki Jekaria wod pa Iddo, gutito lok bot Lujudaya ma gitye i Juda ki i Jerucalem, i nyiŋ Lubaŋa pa Icrael ma en aye loyogi-ni, Ka dok Jerubabel wod pa Cealtiel ki Yecwa wod pa Jojadak gucako gero ot pa Lubaŋa ma tye i Jerucalem odoco; onoŋo lunebi pa Lubaŋa bene tye kacel kwedgi ma konyogi ki tic. I kare meno kikome en aye Tatenai ma laloc me dul lobo me Loka Kulu ki Cetar-bojenai ki ludito wadgi gubino botgi ci guloko kwedgi kit man ni, “Aŋa mumiyowu twero me gero ot man ki me tyeko gedo man?” Gin bene gupenyogi kit man ni, “Lugedo ma gitye ka gedo-ni nyiŋgi aŋagi?” Ento wan Lubaŋa yam tye ka neno ludoŋo pa Lujudaya, omiyo pe gijuko ticgi nio wan ma lok ma gicwalo-ni oo bot Dario, ma kun gikuro lagam me waraga ma gibidwoko pi lok meno. Man aye lok ma i waraga ma Tatenai ma en laloc me dul lobo ma tye Loka Kulu ki Cetar-bojenai ki ludito wadgi ducu gucoyo ci gucwalo bot Dario; gucwalle lok ma gicoyo kit man ni, “Bot kabaka Dario, kuc obed boti. Myero kabaka one ni wan wacito i lobo Juda, wao wa i ot pa Lubaŋa madit. Gitye ka gerone ki godi apaya madoŋo, ki dok giguro bao bene me umo kom ot nia ki i dye ot piny nio kwede wa i kwori me dan ot ducu; tic man tye ka wot mot maber twatwal dok ticce ye ciŋgi maber. Wan wapenyo ludoŋo ma kunnu ka waloko botgi kit man ni, ‘Aŋa mumiyowu twero me gero ot man ki me tyeko cel murumo ducu?’ Ka dok wapenyo wa nyiŋgi bene, wek watit boti, ka wacoyo nyiŋ ludito ma gitelo wigi. Gin gugamo dogwa kit man ni, ‘Wan lutic pa Lubaŋa me polo ki lobo, wan watye ka gero ot man odoco, en ot ma yam gigero i lwak mwaka mapol mukato anec, ma con kabaka madit pa jo Icrael ogero nio ka otyeko, Ento ka kwarowa yam gumiyo kiniga omako Lubaŋa me polo i komgi, ci omiyogi i ciŋ Nebukadnejar ma Lakaldaya, kabaka me Babilon, ma obalo ot man woko ka oterogi wa I lobo Babilon. Ento i mwaka mukwono me loc pa Ciro kabaka me Babilon, Ciro oketo cik ma miyo twero ni ot pa Lubaŋa man myero giger odoco. Dok bene jami me jabu ki me ryal ma yam gitiyo kwedgi i ot pa Lubaŋa, ma yam Nebukadnejar oyako ki i ot pa Lubaŋa ma yam tye i Jerucalem ci oterogi oketogi i ot pa lubaŋa ma i Babilon, jami magi ducu kabaka Ciro acel-lu aye yam okwanyogi woko ki i ot pa lubaŋa ma tye i Babilon, ka omiyogi bot dano ma nyiŋe Cecbajar, ma yam Ciro oketo obedo laloc; ka dok ocike ni, “Kwany jami magi itergi iciketgi i ot pa Lubaŋa ma tye i Jerucalem, ka dok iwek giger ot pa Lubaŋa odoco i kabedone kikome.” Cecbajar man yam obino ci oketo te guti me ot pa Rwot Lubaŋa ma i Jerucalem; cakke wa i kare ca nio wa koni gubedo ka gerone, ma pud bene peya otum.’ Ka ce kabaka oneno ni tye atir, wek koŋ giyeny lokke i ot kano lok ma gicoyo ma tye i Babilon, wek ginen atir ka yam kabaka Ciro oketo cik ma omiyo twero me gero ot pa Lubaŋa man ma i Jerucalem-mi odoco. Koŋ kabaka onen kit ma en ŋolo kwede lokke ci ocwal botwa.” Kabaka Dario omiyo twero, ci giyenyo lokke i Babilon ki i ot me kano lok ka ma gigwoko iye buk me lok ma yam gicoyo. Ginoŋo buk ma yam gicoyo iye lok i Ekbatana gaŋ kai me loko Media, ma gicoyo iye ni, “Lok mutimme: I mwaka mukwoŋo me loc pa kabaka Ciro, kabaka Ciro omiyo twero ni, lok ma mako gedo ot pa Lubaŋa ma i Jerucalem, wuwek ot meno giger odoco, en aye kabedo ka ma gityero iye gitum ki ka ma gityero iye gitum awaŋa-ni, borre obed futi pyeraboŋwen ki lacce futi pyeraboŋwen bene, ki godi apaya madoŋo, latyeŋ adek ma gurumo ot woko ducu ki bao tyen acel. Lim ma gibiculo pi tic bia ki i kom lim pa kabaka. Dok bene wuwek jami me jabu ki me ryal me ot pa Lubaŋa, ma yam Nebukadnejar oyakogi ki i ot pa Lubaŋa ma tye i Jerucalem ci okelogi i Babiloni-ni, gidwokgi cen wek giketgi i ot pa Lubaŋa ma tye i Jerucalem, kun jami acel acel giketo i kabedone kikome; ibiketogi i ot pa Lubaŋa.” “Pi meno in Tatenai, laloc me lobo me Loka Kulu, ki Cetar-bojenai, ki ludito wadwu luloc mukene ma gitye i lobo me Loka Kulu, wunyik woko cen ki i ot pa Lubaŋa: wuwek tic me ot pa Lubaŋa owot anyim kit ma mitte. Wuwek laloc pa Lujudaya ki ludoŋo pa Lujudaya guger ot pa Lubaŋa odoco i kom kabedone macon kikome. Dok acikowu me konyo ludoŋo magi pa Lujudaya pi gero ot pa Lubaŋa odoco; myero gicul lim ma mitte bot jo magi laboŋo galle, kun gikwanyo Iimme ki i kom lim me ker ma gijogo, mua ki i lobo me Loka Kulu. Ka ce gimito litino twoni, ki nyogi romi, nyo romi me gitum awaŋa me atyera bot Lubaŋa me polo, nyo ŋano, kado, ki koŋo vino, nyo moo, macalo ajwagi pa Lubaŋa ma gitye i Jerucalem gimito, myero wumi gin meno botgi nino ducu ma pe wuken, Wubitimo kir man wek gutyer gityer ma Lubaŋa me polo bipwoyo, ki lego pi kwo pa kabaka ki litinone. Dok amiyo twero ni ka ce dano mo oturo cik man, ci rii wi ot mere gibiwoto woko, gipayo girobe kwede, ode bi doko odur yugi. Ka kabaka mo nyo rok mo oette otemo loko cik man, nyo obalo ot pa Lubaŋa man ma tye i Jerucalem, Lubaŋa ma yam oyero kabedo meno wek eket iye nyiŋe myero otur twerogi woko. An Dario amiyo twero; giwek tic otine kakare ki mitkom kun gilubo cik man maber.” Ka kabaka Dario ocwalo kop, ci Tatenai, ma laloc me dul lobo me Loka Kulu, ki Cetar-bojenai, ki ludito wadgi, gutiyo tic ki mitkom kit ma kabaka Dario ociko. Ludoŋo pa Lujudaya gugedo gedo ma tic bene omedde owoto anyim maber, pi lok me cuko cwiny ma lanebi Aggai ki Jekaria wod pa Iddo gutito. Gutyeko tic me gedo kit macalo ceŋ Lubaŋa pa Icrael ocikogi kwede ki pi cik pa Ciro, Dario ki pa Aritakcec kabaka me Percia. Gutyeko tic me gedo me ot pa Lubaŋa man i nino dwe adek me dwe me Adar, i mwaka me abicel me loc pa kabaka Dario. Lacen jo Icrael, ajwagi ki Lulevi, kacel ki jo mu kene ma yam gudwogo cen ki i opii i rok, gukwero ot pa Lubaŋa ki yomcwiny, I nino me kwero ot pa Lubaŋa kikome gutyero twoni miya acel, ki nyogi romi miya aryo, litino romi miya aŋwen, ki nyogi dyegi apar wiye aryo, ma oporo wel kaka pa jo Icrael pi gitum me bal pi jo Icrael ducu. Gipoko ajwagi ki Lulevi i dul, pi ‘tic pa Lubaŋa i Jerucalem, kun gilubo gin ma gicoyo i buk pa Moses, Jo ma gudwogo cen ki i opii gukwero nino madit me Kato (Paska) i nino dwe apar wiye aŋwen me dwe mukwoŋo, Onoŋo ajwagi ducu kacel ki Lulevi doŋ gutyeko lonnye kekengi; gin ducu gudoko leŋ. Omiyo guneko litino romi me gitum pi jo ducu ma yam gudwogo gua ki i opii, ki pi ajwagi luwotgi, ki pigi kengi. Jo Icrael ma gudwogo ma gua ki i opii i rok aye gubedo ka camone, kacel ki jo ducu ma doŋ guweko kwo me kafiri ma gupokke woko ki i kin lwak ma gin wegi lobo, gubino ka woro Rwot, Lubaŋa pa Icrael. Ka dok gukwero nino madito me Mugati ma Tobi Pe Iye ki yomcwiny pi nino abiro; pien Rwot omiyogi yomcwiny, dok oloko cwiny kabaka me Aciria i komgi, wek okonygi ki tic me gero ot pa Lubaŋa, Lubaŋa pa Icrael. Lacen ki i ne lok man, ma onoŋo Aritakcec kabaka me Percia aye loyo lobo, Ejira yam oa ki i lo bo Babilon ocito i Jerucalem. En yam obedo wod pa Ceraya, wod pa Ajaria, wod pa Ilkia, wod pa Calum, wod pa Jadok, wod pa. Akitub, wod pa Amaria, wod pa Ajaria, wod pa Merayot, wod pa Jerakia, wod pa Uji, wod pa Buki, wod pa Abicua, wod pa Finekaci, wod pa Eleajar, wod pa Aron ajwaka madit. En aye Ejira ma yam obedo karan dok laryeko i cik pa Moses ma con Rwot Lubaŋa pa Icrael omiyo ki Moses; kabaka omiye jami ducu ma yam en olego, pien Rwot Lubaŋane onoŋo tye ka konye, Jo ma gucito kwede i Jerucalem bene i mwaka me abiro me loc pa Aritakcec, obedo ajwagi ki Lulevi, luwer, lugwok-doggola, ki lutic i ot pa Lubaŋa. En oo i Jerucalem i dwe me abic, me mwaka me abiro me loc pa kabaka. Gua woko ki i lobo Babilon i nino dwe acel me dwe me acel bene, ci guo i Jerucalem i dwe me abic ninone acel, pien Rwot Lubaŋane onoŋo tye ka konye. Ejira yam oketo cwinye ka kwano ki niaŋ cik pa Rwot, kun tiyo, lubo, dok pwonyo cikke ki gin ma en ociko ducu bot jo Icrael. Man aye kopi me waraga ma kabaka Aritakcec yam omiyo bot ajwaka Ejira, ma lapwony-cik pa Lubaŋa, dano ma opwonnye i tyen lok me cik pa Rwot ki cik ma en ociko pi jo Icrael: ni, “An Aritakcec kabaka ma loyo luker ducu, amiyo waraga man bot ajwaka Ejira, ma lapwony-cik pa Lubaŋa me polo. An kombeddi amiyo twero ni dano mo keken ki i kom jo Icrael nyo ajwagigi nyo Lulevigi ma gitye i te locca ma oye mine kene me cito i Jerucalem, myero ocit kacel kwedi. An kabaka kacel ki lumi-tam ma mera abiro aye wacwalli wek icipeny lok ma tye i Juda ki i Jerucalem, me neno kit macalo cik pa Lubaŋawu, ma yam omiyo i ciŋini, gitye ka lubone kwede. Myero iter ryal ki jabu ma an kacel ki lumitamma wamiyo ki yomcwiny me atyera bot Lubaŋa pa Icrael, ma ode tye i Jerucalem. Dok bene myero iter ryal ki jabu ma in icoko ki i lobo Babilon ducu, ki gityer ma ic opwoyo ma jo Icrael kacel ki ajwagi gumiyo, ma gukwoŋo kwoŋ me miyo gin mo kit macalo cwiny dano acel acel omito pi ot pa Lubaŋagi ma tye i Jerucalem, Doŋ myero igwokke iti ki lim man maber me wilo twoni dyaŋi, nyogi romi, ki gityer me moko kwon ki koŋo vino, ka icak tyerogi i kom keno tyer ma i ot pa Lubaŋawu ma tye i Jerucalem. Dok in ki utmegi wutwero tic ki ryal ki jabu mogo ma odon kit macalo wuneno ni ber, kun wulubo cik pa Lubaŋawu, Dok myero iter lwak jami tic ma gimiyo boti me tic kwedgi i ot pa Lubaŋa-ni, ibiterogi ducu i nyim Lubaŋa me Jerucalem. Ka tye gin mo mukene ma mitte pi ot pa Lubaŋawu, ma myero in inoŋ, ci itwero wilone ki lim ma gikwanyo ki i ot kano lim pa kabaka. “An kabaka Aritakcec, amiyo twero bot lukan lim ducu ma gitye i lobo me Loka Kulu ni, Gin ducu ma ajwaka Ejira, ma lapwony-cik pa Lubaŋa me polo, bimito ki botwu, myero wumi bote oyotoyot ki mitkom, ma welle pe kato talanta me ryal miya acel, guniya nano miya adek, ki koŋo vino debe miya aryo, ki debe me moo miya aryo, ki kado ma welle pe ginyuto, Gin ducu ma Lubaŋa me polo ociko, wuti kakare kikore i tic i kom ot pa Lubaŋa me poto, wek akemo pe omake i koma ki i kom jo ma bibedo i loc i anyim ki i neya. Dok bene wagenowu ni pe myero wujog lim me mucoro mo ki bot ajwagi, Lulevi, luwer, lugwok-doggola, ki lutic ma gitiyo i ot pa Lubaŋa, nyo lutic mukene ma gitiyo i ot pa Lubaŋa. “In, Ejira, ti ki ryeko ma Lubaŋani omiyi, ket luŋolkop madito ki luŋolkop matino wek gubed ka ŋolo kop pa lwak ducu ma gibedo i lobo me Loka Kulu; myero gubed jo ma ŋeyo cik pa Lubaŋawu. Jo ma pe giŋeyo cik pa Lubaŋawu, in ipwonygi wek guŋe. Ka ce ŋat mo pe bilubo cik pa Lubaŋawu kacel ki cik me lobona, myero gimiye pwod magwar, macalo kop me to, nyo kop me ryeme woko ki i lobo-ni, nyo me yako jamine woko, nyo pi tweyo en i mabuc.” Gipwo Rwot, Lubaŋa pa kwarowa! En aye muketo gin maca lo man i cwiny kabaka, pi deyo ot pa Rwot ma i Jerucalem maber. Dok onyuto bota mar mere ma pe lokke i nyim kabaka kacel ki lumi-tamme ducu, ki i nyim ludito ma gin twoni oteka pa kabaka. Abedo ki tekcwiny pien Rwot Lubaŋana onoŋo tye ka konya dok abito ludito wi kaka pa jo Icrael adwogo kacel kwedgi. Magi aye nyiŋ ludito ma giloyo dog odi pa kwarogi, ma gudwogo kacel kweda ki i lobo Babilon, i kare me loc pa kabaka Aritakcec: ma gicoyo nyiŋgi i buk me tekwarogi: Gercom, ki i kin likwayo pa Finekaci. Daniel, ki i kin likwayo pa Itamar. Katuc, ki i kin likwayo pa Daudi, ma i kin likwayo pa Cekania. Jekaria, ki i kin likwayo pa Paroc, kacel jo megi ma gicoyo nyiŋgi giromo miya acel ki pyerabic. Eliekoenai wod pa Jerakia, ki i kin likwayo pa Pakat-moab, kacel ki jone ma welgi oromo miya aryo. Cekania wod pa Jakajiel, ki i kin likwayo pa Jatu, kacel ki jone miya adek, Ebed wod pa Yonacan, ki i kin likwayo pa Adin, kacel ki jone pyerabic. Jecaya wod pa Atalia, ki i kin likwayo pa Elam, kacel ki jone pyerabiro. Jebadia wod pa Mikael, ki i kin likwayo pa Cepatia, kacel ki jone pyeraboro. Obadia wod pa Jekiel, ki i kin likwayo pa Joab, kacel ki jone miya aryo ki apar wiye aboro. Celomit wod pa Jocipia, ki i kin likwayo pa Bani, kacel ki jone miya acel ki pyerabicel. Jekaria, wod pa Bebai, ki i kin likwayo pa Bebai, kacel ki jone pyeraryo wiye aboro. Yokanan wod pa Kakatan, ki i kin likwayo pa Ajgad, kacel kijone miya acel ki apar, Elipelet, Jeuel, ki Cemaya, ki i kin likwayo pa Adonikam, jo ma gucito lacen, kacel ki jo megi pyerabicel. Utai ki Jakur, ki i kin likwayo pa Bigvai, kacel ki jo megi pyerabiro. An yam acokogi kacel i dog kulu ma mol dok yo tuŋ Akava, wagony iye wabedo kunnu pi nino adek. Ka abedo ka ŋiyo dano anoŋo ni ajwagi gitye, ento Lulevi pe gitye kadi ki acel mo. Ka dok acwalo kwena me lwoŋo jo magi, Eliejer, Ariel, Cemaya, Elnatan, Jarib, Elnatan, Natan, Jekaria, ki Meculam, gin aye ludito wi lwakgi dok alwoŋo Joyarib ki Elnatan ma yam gin jo ma fye ki niaŋ matut, ka acwalogi bot Iddo, ma en ladit ma loyo kabedo me Kacipia, kun atito botgi lok ducu ma myero gin gucilok bot Iddo ki utmegine ma gin lutic i ot pa Lubaŋa ma i kabedo me Kacipia, me cwalo botwa dano ma gibitic i ot pa Lubaŋawa. Pi Rwot Lubaŋawa ma onoŋo tye ka konyowa omiyo gucwalo botwa Cerebia dano ma ŋeyo piny, ma en tye i kin likwayo pa Makali ma en lakwar pa Levi dok lakwar Icrael bene; en obino ki litinone kacel ki utmegine, gin ducu apar wiye aboro; ka dok gucwalo Kacabia ki Jecaya ma gitye i kin likwayo pa Merari, kacel ki utmegigi, ki litinogi gin ducu pyeraryo. Doŋ medo i kom lutic i ot pa Lubaŋa miya aryo ki pyeraryo, ma con Daudi ki luditone guketo pi tic bot Lulevi, gin ducu gicoyo nyiŋgi woko piny kikore. An dok aciko pi ri kec kunnu, ki i dog kulu Akava, wek wamwolle kenwa i nyim Lubaŋawa, wek waleg en omiwa wawot maber, wan kikomwa, litinowa, kacel ki jamiwa ducu. Kono nene apenyo kabaka ni omiya lwak askari ki wegi aguragura me gwokowa i kom lumerokwa ma iyo, lewic onoŋo twero maka; pien onoŋo doŋ watito bot kabaka woko ni, “Lubaŋawa bibedo ki jo ma giyenye pi konyogi, ki tek me akemone bedo i kom jo ducu ma gibwoto en woko.” Wari kec kun walego Lubaŋawa ni ogwokwa, ci en owinyo legawa bene. Ka dok aketo ludito magi apar wiye aryo ma giloyo ajwagi: Cerebia, Kacabia, ki jo apar mukene ma gin utmegigi kacel kwedgi. Ci apimo botgi ryal ki jabu ki jami me tic, amiyogi gityer me ot pa Lubaŋawa ma con kabaka ki lumi-tamme ki luditone ki jo Icrael ducu ma gitye i kare-nu gumiyo. Apimo ryal ma romo talanta miya abicel ki pyerabic, ki jami mukene ma romo talanta miya acel, ki jabu ma romo talanta miya acel, ki atabo jabu pyeraryo ma acel acel peke romo darik alip acel, ki atabo mola aryo ma giliyo maber ma rom ki jami me jabu. Awaco botgi ni, “Wun dano maleŋ i nyim Rwot, ki jami ducu bene leŋ; ryal ki jabu ducu gin aye mot me gityer ma cwiny dano opwoyo me miyone bot Rwot, Lubaŋa pa kwarowu. Wugwokgi, wunengi maber nio ka wupimogi i nyim ajwagi madito ki Lulevi kacel ki ludito ma giloyo dog odi pa kwarogi ma i Jerucalem, kun wupimo ki i kicika ma i ot pa Rwot.” Ajwagi ki Lulevi gutiŋo ryal ki jabu ma gupimo kacel ki jami mukene ducu, guterogi guketo i ot pa Lubaŋawa i Jerucalem. Lacen wacako wot ki i dog kulu Akaya i nino me apar wiye aryo me dwe me acel, me cito i Jerucalem; Lubaŋawa aye obedo ka konyowa, dok ogwokowa ki i ciŋ lumerok ki i ciŋ luli bo ma gubuto ka kiyowa iyo. Ka wao i Jerucalem, ci wabedo kunnu pi nino adek. I nino me aŋwenne, wacito i ot pa Lubaŋawa, wacako pimo iye ryal ki jabu ki jami tic ducu wamiyogi i ciŋ ajwaka Meremot, ma wod pa Uria. Onoŋo en tye kacel ki Eleajar wod pa Finekaci, kacel ki Lulevi ma gitye kwedgi, ma gin aye Jojabad wod pa Yecwa ki Noadia wod pa Binui. Gikwano jami woko liweŋ, dok gipimogi bene ka gicoyo pekgi i buk i cawa meno. I kare meno jo ma yam gudwogo ki i opii i rok, gucako tyero gitum awaŋa bot Lubaŋa pa Icrael. Gutyero twoni dyaŋi apar wiye aryo pi jo Icrael ducu, ki nyogi romi pyeraboŋwen wiye abicel, ki litino nyogi romi pyerabiro wiye abiro, ki nyogi dyegi apar wiye aryo pi gitum me bal; meno ducu obedo gitum awaŋa bot Rwot. Gin gumiyo cik pa kabaka bot rwodi ki bot luloc ma gitye i lobo me Loka Kulu; gin bene gukonyo dano kacel ki ot pa Lubaŋa. I kare ma gin meno gityeko timone, ludito gubino bota gutitta ni, “Jo Icrael, ajwagi, kacel ki Lulevi, pud peya gupokke woko ki i kom jo mukene ma gibedo i lobo-nu me bedo kengi ki pi tim me kipyedagi jo Kanaan, jo Kit, jo Periji, jo Jebuc, jo Ammon, jo Moab, jo Ejipt, ki jo Amor. Co ma gin Lujudaya gubedo ka nyomo anyiragi mogo gubedo mongi kikomgi ki mon pa litinogi; omiyo kwa jo maleŋ pa Lubaŋa guribbe woko kacel ki jo mukene ma gibedo i lobo-nu ma gin jo maraco. Ludito ma giloyo lwak kacel ki rwodi aye gubedo lubal madoŋo i lok man.” Ka awinyo lok meno, ci ayeco ginarukana woko, ka aputo yer wiya ki i wiya ki dok aputo yer tika ki i tika bene, acako bedo ma piny orem kweda woko. Lacen jo ducu ma komgi omyel ka guwinyo lok pa Lubaŋa pa Icrael, pi ŋayo waŋ Lubaŋa ma jo ma gudwogo ki i opii gubedo kwede, ci gucako gurre guruma woko dyere ma abedo ma piny orem kweda woko nio wa i kare ma gityero gitum me otyeno. I kare meno ma gityero gitum me otyeno en aye aa woko kwede ki ka ma onoŋo abedo ka ri kec iye-ni, ma ginarukana ducu guyec woko, ka arumo coŋa piny ma atano ciŋa bot Rwot Lubaŋana, kun awacce ni, “Ai Lubaŋa, lewic maka mada me ilo wiya ka atye i nyimi, ai Lubaŋana, pien bal ma wan watimo odurre madit lipim ma kato wiwa woko, ki alii mewa otorre madit lipim malo oo wa i polo. Cakke i kare pa kwarowa nio wa kombeddi wan ki lwakki wabedo ka timo lwak bal mapol, Doŋ pi balwa, omiyo wan ki lukerwa, ki ajwagiwa yam gimiyowa i Ciŋ luker ma i lobo pa lurok, ginekowa ki pala lucwan, ki i rok kunnu giyakowa, dok gitimowa ki tim me lewic, macalo watye i kare man. Ento pi kare manok keken Rwot Lubaŋawa, kica omaki i komwa, ci imiyo jo mukene ki i kinwa gubwot dok gubedo i kabedo maleŋ-ŋi mot maber. Lubaŋawa iweko wabwot ki i opii dok imiyowa kwo manyen. Onoŋo wan opii, ento in Lubaŋawa pe yam iwekowa ata i kare ma watye i opii, Dok inyuto mar meri ma pe lokke i nyim luker me Percia, omiyo guwekowa makwo dok guye ni wager ot pa Lubaŋawa odoco, ki yubo jami muballe i oburre, gumiyo gigwokowa bene maber i Judaya ki i Jerucalem. “Kombeddi ai Lubaŋawa, wan dok wawaco aao ki i ŋe lok man mutyeko timme-ni? Doŋ wabwoto lubo cikki woko ducu, gin cik ma yam iciko dok imiyo owok ki i dog luticci ma lunebi, kun iwacci, ‘Lobo ma wubidonyo iye ka camone me bedo mewu matwal-li, en aye lobo pa jo ma komgi ki keni, pien jo ma gibedo iye gupoŋo lobo meno woko ki tim me kipyeda nia tuŋcel nio kwede i agik lobo tuŋcel dok gubedo jo ma komgi ki keni. Mumiyo wun pe wumi litinogi gunyom anyirawu, ki litinowu bene pe gunyom anyiragi, wun pe myero wuyeny kuc ki lonyogi ma gitye kwede; wek wubed jo matego, ki dok wucam gin maber ma i lobo, ma wubiweko bene bot litinowu me bedo ginaleyagi matwal.’ Lacen i ŋe lok magi ducu ma opoto i komwa pi balwa ma watimogi ki pi alii madit ma watiŋo, kadi bed in, ai Lubaŋawa ineno maber, ci doŋ iketo can i komwa manok ma pe oporo lwak bal ma watimo, dok ikonyowa omiyo wabwot watye makwo-ni. Wan dok pud wabituro cikki aye kun wamedde ki nyom i kinwa ki jo ma gitiyo bal kipyeda-ni? Ka watimo meno, kiniga pe bimaki i komwa matek nio ka Ityekowa ducu, ma dano mo acel i kinwa pe bibwot? Ai Rwot Lubaŋa pa Icrael, in iporre, pien imiyo wabwot ki i lak to. Nen, watuco bal aliiwa boti, pe watye ki kit twero mo me cuŋ i nyimi pi bal man.” I kare ma Ejira tye i ot ka lega kun tuco bal, kun kok, poto kwede piny, dok Lwak jo Icrael mapol, co, mon ki litinogi gucokke gukok matek twatwal. Cutcut Cekania wod pa Jekiel, ma i kin likwayo pa Elam, owaco bot Ejira ni, “Waŋayo waŋ Lubaŋawa woko pi nyomo mon ma gin lurok ma gitye i lobo-ni, ento kadi bed kumeno jo Icrael pud gitye ki gen i kom Lubaŋa kadi lok meno otimme. Wan koŋ doŋ waketu gicikke ki Lubaŋawa me ryemo mon magi woko ducu kacel ki litinogi. Wabitiyo gin ma in kacel ki jo mukene ma giworo cik pa Lubaŋawa wutito botwa ni wati; wabitiyo gin ducu ma cik pa Lubaŋa mito. In ia malo, pien man ticci, wan bene wacuŋ i ŋeyi; myero ibed tek dok itim kumeno.” Ka Ejira oa malo ci omiyo lutel pa ajwagi ki pa Lulevi ki pa jo Icrael ducu gukwoŋo kwoŋ ni gibitiyo gin ma Cekania doŋ oyubo ni giti. Kit meno gucako kwoŋo kwoŋ. Ejira oa woko ki i nyim ot pa Lubaŋa, odonyo i kicika pa Yekokanan wod pa Eliacib, obuto kunnu nino acel, kun pe camo gin mo kadi wa mato pii bene. Dok obedo ka kumo pi jo ma gua ki i opii ma guŋayo waŋ Lubaŋa woko. Ka doŋ gitito lok oromo i lobo Juda ki Jerucalem ki bot jo ducu ma cen gudwogo ki i opii ni gin ducu myero gucokke i Jerucalem. Giciko ni ka dano mo pe obino i kin nino adek-ki, ludito ma giloyo lwak ki ludoŋo guwacci jamine ducu myero giyak gidyer ki Lubaŋa, ki en kikome bene myero giryeme oa woko ki i kin lwak ma gudwogo ki i opii. Cutcut jo Juda ki jo Benjamin ducu gucokke i Jerucalem i kin nino adek-ki, i nino dwe pyeraryo me dwe me aboŋwen, Lwak ducu gubedo i dyekal ma i nyim ot pa Lubaŋa. Onoŋo kot obedo ka cwer matek; pi lok man ma pire tek ki pi ŋico, omiyo kom dano acel acel obedo ka myel amyela, Ajwaka Ejira oa Ocuŋ owaco bot lwak ni, “Wun wuturo cik pa Lubaŋa omiyo wukelo alit wumedo i kom bal alii pa jo Icrael pi nyomo mon ma gin lurok. Wutuc balwu kombeddi i nyim Rwot Lubaŋa pa kwarowu, kun wutiyo gin ma en mito; dok myero wupokke woko pat ki i kom jo ma gibedo i lobo-ni, wuryem monwu ma gin lurok-ki bene woko.” Lwak ducu gugamo ki dwan maloŋo ni, “Obed kit meno, wabitiyo gin ducu ma doŋ iwaco-ni.” Gin gumedde guwacce ni, “Lwak tye dwoŋ mada dok bene obedo kare ma kot cwer iye madwoŋ; pe watwero cuŋ i dyekal ata kit man. Man pe gin ma gitwero tiyo nino acel nyo aryo keken, pien wan watyeko timo bal madit twatwal i lok man. Wek ludito ma giloyowa aye gucuŋ pi nyiŋ lwak ducu ma gucokke; wek gicik jo ducu ma gibedo i gaŋiwa ma gunyomo mon ma gin lurok gubin i nino mo ma giciko, kacel ki ludoŋo ma loyogi ki luŋolkop ma i gaŋi ducu, nio waŋ ma gikwanyo kiniga pa Lubaŋa mager ki i komwa pi lok man.” Ŋat mo onoŋo pe okwero yub man, ento kono Yonacan wod pa Acakel ki Jakijeya wod pa Tikva keken aye gukwero, dok Meculam ki Cabetai ma gin Lulevi bene gukonyo korgi iye. Jo ma gudwogo ki i opii gutimo kit meno. Ajwaka Ejira oyero dano, ludito ma loyo dog odi pa kwarogi, dano acel acel ma giyero en ocoyo nyiŋe woko piny, kun lubo dog odi pa kwarogi. I kom nino dwe acel me dwe me apar en aye gubedo iye piny ka neno lok meno; i nino dwe acel me dwe me acel onoŋo doŋ gutyeko yenyo lok i kom co ducu ma yam gunyomo mon ma gin lurok. Magi aye nyiŋ co ma yam gunyomo mon ma gin lurok ma gitye i kin likwayo pa ajwagi, gin aye Maceya, Eliejer, Jarib, ki Gedalia, ma gitye i kin likwayo pa Yecwa wod pa Jojadak kacel ki utmegine. Gin gucikke pigi kengi me ryemo mongi woko, ki dok gutyero gitum pi tiŋo aliigi ma obedo nyok romo ma gukwanyo ki i kom romigi pi tino aliigi. Ki i kin likwayo pa Imer gin aye Kanani ki Jebadia. Ki i kin likwayo pa Karim: gin aye Maceya, Elija, Cemaya, Jekiel, ki Ujia. Ki i kin likwayo pa Packur gin aye Elioenai, Maceya, Icmael, Natanel, ki Elaca. Jo ma i kin likwayo pa Lulevi: gin aye Jojabad, Cimei, Kelaya ma gilwoŋo bene ni, Kelita, ki Petakia, Juda, ki Eliejer. Ki i dul pa luwer gin aye Eliacib. Ki i dul pa lugwokdoggola gin aye Calum, Telem, ki Uri. Ki i kom likwayo pa jo Icrael: Ki i kin likwayo pa Paroc gin aye Ramia, Ijia, Malkija, Mijamin, Eleajar, Kacabia, ki Benaya. Ki i kin likwayo pa Elam gin aye Matania, Jekaria, Jekiel, Abdi, Jeremot, ki Elija. Ki i kin likwayo pa Jatu gin aye Elioenai, Eliacib, Matania, Jeremot, Jabad, ki Ajija, Ki i kin likwayo pa. Bebai gin aye Yekokanan, Anania, Jabai, ki Atlai. Ki i kin likwayo pa Bani gin aye Meculam, Maluk, Adaya, Jacub, Ceal, ki Jeremot. Ki i kin likwayo pa Pakatmoab: gin aye Adna, Celal, Benaya, Maceya, Matania, Bejalel, Binui, ki Manace. Ki i kin likwayo pa Karim gin aye Eliejer, Icija, Malkija, Cemaya, Cimeon, Benjamin, Maluk, ki Cemaria. Ki i kin likwayo pa Kacum gin aye Matenai, Matata, Jabad, Elipelet, Jeremai, Manace, ki Cimei. Ki i kin likwayo pa Bani gin aye Madai, Amram, Uel, Benaya, Bedeya, Keluki, Vania, Meremot, Eliacib, Matania, Matenai, ki Jacu. Ki i kin likwayo pa Binui gin aye Cimei, Celemia, Natan, Adaya, Maknadebai, Cacai, Carai, Ajarel, Celemia, Cemaria, Calum, Amaria, ki Yucepu, Ki i kin likwayo pa Nebo gin aye Jeyel, Matitia, Jabad, Jebina, Jadai, Joel, ki Benaya. Jo magi ducu onoŋo yam gunyomo mon ma gin lurok, ci guryemogi woko kacel ki litinogi ducu. Man lok pa Nekemia wod pa Kakalia. I dwe me Kiclev, i mwaka me pyeraryo me loc pa kabaka Aritakcec, an Nekemia onoŋo atye i gaŋ madit me Cuca, ci Kanani, ma ŋat acel ma i kom utmegina, obino bota kacel ki jo mogo ma gua ki i Juda. An apenyogi lok i kom Jerucalem ki i kom jo ma gubwot, ma yam giterogi i opii ci gudok cen kunnu. Gm guwacca ni, “Jo ma gitye i lobowa kunnu ma gubwot ma yam giterogi i opii gitye ki peko madit ma jo mukene cayogi bene; ki dogcel me Jerucalem gimuko opoto woko piny, dok dog gaŋŋe ducu giwaŋo woko ki mac.” Ka awinyo lok meno ducu, ci abedo piny akok matek. Abedo ka kumo pi nino mapol; kun ari kec ma pe acamo cam ento abedo ka lego Lubaŋa me polo. Alego kun awacci, “Ai Rwot Lubaŋa me polo, in idit, dok wabedo ki lworo i nyimi. In Lubaŋa me ada dok igwoko gicikkeni ki mar meri ma pe lokke pi jo ma gimari dok ma gilubo cik meri. Rwot, nen an, dok iwiny legana, ma atye ka legone dyeceŋ ki dyewor pi luticci, lwak me Icrael. Atuco balwa i nyimi ni, wan jo Icrael, watyeko timo bal i nyimi. Iyo, an ki jo me doggola pa kwara watimo bal. Wan watimo gin marac mada nyimi, pe wabedo ka tiyo gin ma iciko, pe walubo cik meri ma yam imiyo botwa kun wok ki bot laticci Moses. Po i kom lok ma yam iciko ki laticci Moses, kun iwacci, ‘Ka pe wulubo cikka; ci abikeyowu woko ata i kin lurok; ento ka wulokke wudwogo bota kun wulubo cikka, kadi bed gikeyowu giketowu woko ata nio wa i agikki piny, an abicokowu adwokowu cen wa i kabedo ma doŋ atyeko yerone pi nyiŋa wek wuwora iye. Rwot, jo man gin luticci, dok gin lwakki ma yam ilarogi ki tweroni madwoŋ dok ki tekki. Ai Rwot, kombeddi winy legana ki lega pa luticci mukene-gu ma gitye ki cwiny me woro in, Mina gum tin, imi kica omak kabaka i koma.” I kare meno onoŋo an abedo ladit ma loyo lok i kom kono yino ma kabaka mato. I dwe me Nican, i mwaka me pyeraryo meloc pa kabaka Aritak cec, ma onoŋo kabaka tye ka cam, akwanyo koŋo vino atero bote. Onoŋo yam peya abedo ki cwercwiny mo i nyime. Kabaka ocako penya ni, “Piŋo waŋi nen ki can, inen calo komi yot do? Man can mo aye tye i cwinyi.” Cutcut lworo ocako maka woko marac, Ci agamo dog kabaka ni, “Kabaka obed kwo nakanaka! Waŋa pe twero nen ki can piŋo, ma kun kono gaŋ kal ka ma giyiko iye kwarowa ducu doŋ odoko obur, ma dog gaŋŋe giwaŋo woko liweŋ ki mac?” Kabaka dok openya ni, “Doŋ imito gin aŋo kono?” Cutcut alego Lubaŋa me polo, Ka doŋ agamo dog kabaka ni, “Ka ce ineno ni ber, laditta kabaka, ka itwero ye legana, wek acit i lobo me Juda i gaŋ kal ka ma kwarowa giyikogi iye, wek aciyub gaŋ meno odoco.” Kabaka odokka iye ma onoŋo daker mere obedo ka ŋete, owacci, “Wot meno biteri kare ma rom mene, dok ibidwogo awene?” Ci atitte bene nino ma abia iye kikome; kabaka oye pi citona kunnu. Ka dok awaco bot kabaka ni, “Ka ce ineno ni ber, myero gico waraga ci imiya ater bot luloc ma i lobo ma tye Loka Kulu, ma tito botgi ni myero guye akat acit i Juda. Dok apenyo kabaka bene ni myero oco waraga omiya ater bot Acap, ma lagwok buŋa pa kabaka, wek omiya yadi wek giti ki bao pi dogcel me gogo ma gwoko ot pa Lubaŋa, ki pi cel ma orumo gaŋ, ki pi ot ma an abibedo iye.” Kabaka oye ci omiya gin ducu ma alege pire, pien Lubaŋa onoŋo tye ka konya. Kabaka ocwalo an kacel ki ludito me mony ki dul pa wegi aguragura, ci acito i lobo ma tye Loka Kulu tuŋ potoceŋ, ci amiyo waraga pa kabaka bot luloc me lobo. Ento Canbalat ma jo Bet-koron, ki Tobia ma en jo Ammon, ka guwinyo lok man, ci gubedo ki keco i cwinygi matek pien guŋeyo ni dano mo obino pi konyo kor jo Icrael. Acito i Jerucalem ci ari kunnu pi nino adek, ma pe atito bot ŋat mo tam ma Lubaŋa otyeko keto i cwinya ma myero ati kwede pi Jerucalem. Cutcut i cwiny dyewor aa malo wacako wot kacel ki lurema mogo. Pe onoŋo watye ki lee mo mukene kono kana ma abedo i wiye-ni keken. Akato acito woko i dyewor kun awok i dogcel me cito i nota nio kwede i waŋ It pa Too ki i dogcel ma cito wi odur, ci acako niyo cel me Jerucalem ducu ma yam gimuko opoto woko piny, kacel ki dogcel ducu ma yam giwaŋo woko liweŋ ki mac-ci. Ka dok alokke acito i Dogcel me Wan It ki i Kut pa Kabaka. Kana ma abedo i wiye-ni onoŋo pe twero noŋo yo mo ma myero ekat ki iye. Kit meno aa i dyewor acito ka ŋiyo cel kun awok ki i nota; ka adok cen i gaŋ ki i dogcel ma ci to i nota, ki yo ma acito kwede. Pe tye ŋat mo i kin ludito ma giloyo lwak ma oneyo ka ma acito iye ki gin ma abedo ka tiyone. Onoŋo peya atito gin mo bot Lujudaya, ajwagi, ludito ma giloyo lwak ducu, kadi ki bot jo mukene ma onoŋo myero guti tic meno. Ka doŋ awaco botgi ni, “Wunen kit ayela ma watye kwede kombeddi, wunen Jerucalem doŋ odoko obur, wa dog celle ducu giwaŋo woko. Wubin wacaku gero cel me Jerucalem odoco, wek lewic pe obed ka makowa.” Ka dok atitogi kit macalo Lubaŋa obedo kweda dok okonya maber,’ kacel ki lok ducu ma cen kabaka owacca. Gin gugamo ni, “Wacaku gerone odoco.” Ci guyubbe me cako tic cut, gujiŋo badgi me tiyo tic maber. Ento ka Canbalat ma jo Bet-koron, Tobia ma latic, ma jo Ammon, ki Gecem ma Laarab guwinyo pi gin ma watye ka tiyone, gucako nywarowa kun gicayowa bene ma giwacci, “Man gin aŋo ma wutye ka tiyone-rii? Wun wumito jemo i kom kabaka?” An adok iye botgi ni, “Lubaŋa me polo aye bikonyowa, wan luticce, wabicako gedo. Ento pe tye dul mo ma gipoko ki wun i Jerucalem, kadi wa twero mo, nyinwu bene pe gipo pire.” Eliacib ma ajwaka madit, ki ajwagi ma gin utmegine, gugero Dogcel me Romo, Gukwero wek obed maleŋ dok guketo kikane. Gugero nio wa i lubele me Miya ki Lubele ma gilwoŋo Kananel. Jo Jeriko gugero dul mukene ma cok kwede ki Jakur wod pa Imri ogero bene dul ma lubo enno. Likwayo pa Acena gugero dogcel me Rec; guriyo baone ka guketo kikane, bolti, ki rii me doggola me lorone. Dano ma olubogi obedo Meremot wod pa Uria, ma wod pa Kakoj, ma oyubo dul ma i ŋete. Dano ma oyubo dul ma i ŋete obedo Meculam wod pa Berekia ma wod pa Mecejabel. Dano mukene ma oyu bo dul ma i ŋete obedo Jadok wod pa Baana. Jo ma guyubo dul mukene ma i ŋete malubo gin aye jo Tekoa, ento luditogi me awora pe guye tiyo tic mapek ma jo ma loyogi gumiyogi. Ka dok Joyada wod pa Pacea, ki Meculam wod pa Beeodeya guyubo Dogcel Macon: guriyo baone ka guketo kikane, ki bolti ki rii me doggola me lorone. Jo ma guyubo dul mukene ma i ŋete obedo Melatia jo Gibeon, ki Jadon jo Meronot kacel ki jo ma i gaŋi me Gibeon ki Mijpa, ma gitye i te loc pa laloc me lobo ma Loka Kulu. Ujiel wod pa Karaya ma en latet jabu bene oyubo dul mukene ma i ŋete. Ŋat mukene ma olube obedo Anarua ma layub moo ma ŋwece kur, oyubo dul mukene; ci guroco Jerucalem odwogo kakare nio kwede wa i kom cel malaece. Ŋat mukene ma olubogi en aye Repaya wod pa Kur, ma en loyo nucu lobo ma orumo Jerucalem, en bene oyu bo dul nukene. Ŋat mukene ma olubo obedo Jedaya wod pa Karumap, en oyubo mere dul ma okemo ode; ki ŋat ma olube obedo Katuc wod pa Kacabneya, en oyubo dul mukene. Ki Malkija wod pa Karim ki Kacub wod pa Pakat-moab guyubo dul mukene ki cel Gogo me Keno me tedo mugati ducu. Ŋat mukene ma olubo obedo Calum wod pa Kalokeci, ma loyo nucu lobo ma orumo Jerucalem, en oyu bo dul mukene ki anyirane bene gukonye. Kanun ki jo ma gibedo i Janoa guyubo dogcel ma cito i nota. Guroco cel odok kakare ka guketo kikane, ki bolti ki rii me doggola me lorone, ka guyubo cel gogo ma borre romo yadi miya abic, nio kwede wa i dogcel ma cito wi odur. Malkija wod pa Recab, ma laloc me lobo ma orumo Bet-akerem, oyubo dogcel ma cito wi odur; ogero odoco ka oketo kikane, ki bolti ki rii me doggola me lorone ducu. Calum wod pa Kolkoje, laloc me lobo Mijpa, oyubo Dogcel me Waŋ It; ogero odoco dok oumo wiye ka oketo kikane, ki bolti ki rii me doggola me lorone ducu; ka dok en ogero cel orumo Kut Cela ma cok ki po to pa kabaka, nio kwede wa i rwom ma lor piny nia ki i gaŋ kal pa Daudi. Ŋat ma olubo en obedo Nekemia wod pa Ajbuk, ma laloc me nucu lobo Bet-jur; en oyubo ka ma okemme ki Lyel pa Daudi, ma cok ki kut ma gikwinyo akwinya ki ciŋ, yo tuŋ odi pa twoni oteka lweny, Jo ma olubo en obedo Lulevi magi: Rekum wod pa Bani, ki ŋat ma olube obedo Kacabia, ma laloc me nucu lobo ma orumo Keila; guyubo pi nyiŋ lobone. Lacen utmegigi bene guyubo, gin ene: Bavai wod pa Kenadad, ma laloc me nucu lobo ma orumo Keila. Ŋat ma lubo en obedo Ejer wod pa Yecwa, ma laloc me Mijpa; en oyubo dulle me aryone mukene mukemme ki ot kano jami lweny me mony ma i twok cel. Dano ma olubo en obedo Baruk wod pa Jabai; en oyubo dulle mukene nia ki i twokke ma yo tuŋ doggola me ot pa Eliacib ajwaka madit. Dano ma olubo en obedo Meremot wod pa Uria, ma wod pa Kakoj; oyubo dul ot mukene nia ki i doggola me ot pa Eliacib nio wa i agikki ot. Jo ma gulube obedo ajwagi, jo ma gibedo i lobo bar; guyubo dul mukene. Jo ma olubogi obedo Benjamin ki Kacub; guyubo dul mukemo ot megi. Ŋat ma olubogi obedo Ajaria wod pa Maceya, ma wod pa Anania ma oyubo mere ki yo tuŋ ode kikome. Dano ma olubo en obedo Binui wod pa Kenadad; en oyubo dul mukene, nia ki i kom ot pa Ajaria nio kwede i twok cel nio kwede ka ma ogonne. Ka Palal wod pa Ujai oyu bo gulle ma i iye, kacel ki cel ma ocudo malo mukemo ot pa kabaka ma i dyekal pa: lukur-piny, Dano ma olubo en obedo Pedaya wod pa Paroc. Lutic i ot pa Lubaŋa ma gibedo i kom Opel, guyubo dulle mu kene mukemo Dogcel me Pii tuŋ wokceŋ, mukemo dul cel ma ocudo malo, Jo ma gulubo en obedo jo Tekoa; guyubo dul mukene mukemo cel gogo madit ma wiye ocudo malo likuŋ nio kwede wa i kom cel ma cok ki Opel. Ajwagi guyubo ka wi Dogcel me Aguragura, kun ŋat acel acel yu bo mukemo tuŋ ode kikome. Ŋat ma olubogi obedo Jadok wod pa Imer ma oyubo mere ka ma okemo ode kikome. Ŋat ma olubo en obedo Cemaya wod pa Cekania, ma lagwok dogcel ma tuŋ wokceŋ: en oyubo bene dul mu kene. Jo ma gulube obedo Anania wod pa Celemia, ki Kanun wod pa Jalap me abicelle; guyubo dul mukene, ŋat ma olubo en obedo Meculam wod pa Berekia ma oyubo ka ma okemo kicikane. Ŋat mulubo en obedo Malkija, ŋat acel i kom lutet jabu; en oyubo dul mu kene nia ki i ot pa lutic i ot pa Lubaŋa ki pa lucat-wil, ma okemo dogcel me coyo nyiŋ jo nio kwede wa i kicika ma malo ma i twoke. I kin kicika ma malo ma i twoke ki Dogcel me Romo, jo ma giliyo jabu, ki lucatwil aye guyubo dul mukene, I kare-nu ka Canbalat owinyo ni wan Lujudaya watye ka gero cel me Jerucalem odoco, ci kiniga ki akemo madwoŋ omake, ocako cayowa. Ki kinigane-ni en ocako nywarowa ki i nyim luwote ki i nyim mony me Camaria kun waco ni, “Man Lujudaya ma gigoro-ni gitye ka tiyo aŋo kaa? Gitamo ni gitwero gero gaŋ man odoco? Gibityero gitum mo? Gitwero tyeko tic man i nino acel keken? Gitwero payo godi me gedo ducu ki i kom godi ma gudurre i wi odur yugi ma giwaŋo-ni?” Tobia ma Laammon onoŋo ocun ka ŋete, owacci, “Kit cel aŋo ma gin twero gerone? Kadi too mamwa-ni ka owoto ki i wiye, ci muko cel gotgi-ni reto woko piny!” Ai Lubaŋawa, winy ka gicayowa ba; lok cac ma gicayo ki wan odok i wigi, imi giyak jamigi woko ducu dok gimakgi gitergi i opii i lobo pa lurok. Pe iwek bal megi, dok wii pe myero owil i kom balgi, pien guyetowa wan ma watye ka gedo-ni. Kit meno wan wamedde ki gero cel; ci watyeko gero cel woko oyotoyot oo wa malo i nucu me borre ma yam con ca, Man otimme pien lwak onoŋo gitye ki cwiny me tic kikome. Ento i kare ma Canbalat ki Tobia ki jo Arab, jo Ammon ki jo Acidod guwinyo ni watye ka wot anyim ki tic me yubo cel me Jerucalem ki dok ni wacako culo ka ma twolone woko ducu, ci kiniga omakogi matek. Ci gucokke kacel ka piro lok me cito ka lweny i kom Jerucalem, ki kelo anyobanyoba bot dano ma gitye kunnu. Ento wan wamedde ki lego Lubaŋawa, dok waketo co me kuro piny me gwokowa dyeceŋ ki dyewor ki i komgi. Ento jo Juda gubedo ka wacci, “Kero kom luywek godi doŋ otum woko; dok yugi bene odurre iye lipim; pe doŋ watwero gero cel.” Lukworwa gutamo ni wan pe wabitwero nenogi dok pe wabitwero ŋeyo gin ma tye ka timme, nio ka gibio wa botwa kany, ci ginekowa dok gigiko ticwa woko, Lujudaya ma gibedo i kin lumerokwa gubedo ka bino botwa kare ki kare kun gitito botwa tyen ma romo apar kulu yub ma lumerokwa gitye kwede i komwa; kun gibino ma gia ki i kabedo ducu ka ma gibedo iye. Oyotoyot acako poko jami lweny magi bot lwak, pala lucwan, toŋi ki atum, ci aketogi gubedo i kabedo mo ma i ŋe cel kun lubo doggolagi, ka ma pud odoŋ twolo, Aneno gin ma tye ka timme, ci aa malo awaco bot ludito ma gin lutel wic, ki ludito ma giloyo lwak, ki bot lwak ducu ni, “Pe wubed ki lworo mo i kom lukworwa. Wupo ni Rwot dit dok gilworo; pienno wun wulweny matek pi jo me lobowu, pi litinowu, pi monwu, ki pi pacowu.” Ka lumerokwa guwinyo ni lok me yubgi otyeko winnye botwa ci guniaŋ ni Lubaŋa oturo yubgi woko, ci wan ducu wacako dok cen ka tic i kom cel, dano acel acel odok i dog ticce. Cakke i kare meno nucu pa lwakka gubedo ka’ gedo, ki nucugi mukene gumako toni, kwodi, ki atum-gu, ka guruko koti me nyonyo pi lweny, kun ludoŋo pa lwak gucwako jo me ot pa Juda ducu, ma onoŋo gitye ka gero cel odoco. Jo ma gin lutin yec bene gabedo ka tic kit man, dano acel acel tiŋo jami ma mitte pi gedo ki cine acel, ki jami lwennye noŋo omako i cine tuŋ cel. Ka dok dano acel acel i kinjo ma gin lugedo bedo ki pala lucwanne ma otweyo woko i pyere kun noŋo tye kwede ka gedo. Dano ma en lakut tum onoŋo bedo mere cok ka ŋeta. Atito ki rwodi kacel ki ludito ma giloyb lwak i dog tic ni, “Tic doŋ onya odoko dwoŋ twatwal, omiyo kinwa odon malac ki kinwa opokke woko ki i kom cel, kin dano odoko bor ki lawote. I kabedo ma wuwinyo tum okok iye, myero wucokke botwa kunnu. Lubaŋawa bilweny piwa.” Kit meno nino ducu cakke okogweno nio i dyewor ka lakalatwe otuc wabedo ka tic i kom cel, ma noŋo nucu pa lwakwa mukene gucuŋ ki toŋi i ciŋgi gikuro piny. An dok awaco ki lwak i kare-nu ni, “Wek dano acel acel ki laticce gudoŋ gubut i Jerucalem, ci gubed ka kuro piny piwa i dyewor ka dok guti tic i dyeceŋ.” Pe tye dano mo i kinwa, kadi an kikoma nyo utmegina nyo lukur-piny ma gulubo kora ma olunyo boŋŋine. Dano acel acel obedo ki jami lwennye i ciŋe. Lacen jo mapol, co kacel ki mongi, gucako ŋur i kom Lujudaya wadigi. Jo mogo guwacci, “Wan kacel ki litino awobewa ki anyirawa doŋ wadoko dwoŋ; wamito kal me acama wek wabed kwo.” Jo mukene bene guwacci, “Wan wajeŋo pottiwa, potti olokwa, kacel ki odiwa ducu, wek wanoŋ kal wacam, pien kec tye marac.” Dok jo mukene bene guwacci, “Wan doŋ watyeko deno lim me culo mucoro pa kabaka kun wajeno pottiwa ki potti olokwa pire. Wan mono pe wamito jami ma rom aroma ki jami ma Lujudaya wadiwa gimito? Litinowa kono pe giber ma rom ki litinogi? Ento watye ka miyo litinowa gibedo opii. Doŋ watyeko cato anyirawa mukene woko macalo opii. Wan pe watye ki twer mo, pien doŋ gityeko kwanyo pottiwa ki potti olokwa woko ducu ki botwa.” I kare ma an Nekemia awinyo koko megi kacel ki lok pa lwak, kiniga omaka matek, abedo ka lwodo lok ki i cwinya kekena, acako laro lok ki rwodi kacel ki ludito ma giloyo lobo, kun awaccigi ni, “Wun wutye ka noŋo magoba i kom omegiwu.” Alwoŋo cokke madit me neno lok i komgi, kun awaco botgi ni, “Wabedo ka koko omegiwa ma gin Lujudaya ki lim kit macalo watwero, ma yam gicatogi woko bot lurok. Ento wun wutye ka cato omegiwu kikome ni wan Lujudaya wadigi aye dok wawilgi!” Ludito guliŋ aliŋa litik, ma pe gitwero noŋo lok mo ma myero guwaci. Ka dok awaccigi ni, “Gin ma wutye ka tiyone-ni pe ber. Wun pe myero wulwor Lubaŋawa i timwu ducu? Ka pe wulworo Lubaŋawa, ci miyo lumerokwa gicayowa, Ento an kacel ki utmegina ki luticca ducu wamiyo gideno lim ki kai ki botwa. Wan waweku tam ducu me limo magoba-ni obedi. Tin wudwok pottigi odok i ciŋgi, potti olokgi, potti jeitunigi kacel ki odigi ducu, Dok wuŋol banya ma gitye kwede botwu macalo me lim ryalgi, kai, kono vino, nyo moogu ma wubedo ka jogone ki botgi-ni.” Ludito gugamo ni. “Wan wabitiyo kit ma iwaco-ni, wabidwoko jami magi ducu botgi, dok pe wabipenyogi ni gucul banyawa.” Alwoŋo ajwagi, ci amiyo ludito gukwoŋo kwoŋ ma moko ni gibigwoko cikkegi. Acako yeno kitambara ki i pyera kun adoŋo taca ma awacci, “Man aye kit ma Lubaŋa biyeŋo kwede dano mo ma i kinwu ma pe bicobo kwoŋ kun gwoko cikke. Ci Lubaŋa biyeŋo odiwu ki jami ducu ma wutye kwede, biweko wudoŋ noŋo laboŋo gin mo.” Jo ducu ma onoŋo gitye i cokke gugamo ni, “Amen” dok gupako Rwot. Lwak gutiyo kit macalo gucikke kwede. Pi mwaka apar wiye aryo ma onoŋo an laloc me lobo Juda, cakke i mwaka me pyeraryo nio kwede i mwaka pyeradek wiye aryo me loc pa kabaka Aritakcec, pe tye utmegina mo kadi ki an mucamo kit cam ma giyubo ni gimi bota macalo laloc me lobo. Luloc ma yam gubedo i loc ma gutelo nyima guketo peko madwoŋ i kom lwak pi jogo lim me ryal pyeraŋwen, ki koŋo vino, ki cam. Luticgi guloko lwak gudoko opiigi, guketo peko madwoŋ bene i kom lwak. Ento an pe atimo kumeno, pien an abedo ka lworo Lubaŋa. An aketo tekona ducu ka tero cel meno odoco, pe alimo dullobo mo me bedona. Dok luticca ducu gucokke kunnu gubedo megi ka tiyo tic me gedo. Dok onoŋo atye ki jo ma romo miya acel ki pyerabic, ma gin Lujudaya ki ludito ma loyo lwak, ma wabedo kwedgi dok ma wacamo kwedgi cam kacel i wi me jana, medo i kom jo ma gubino bota ma gua ki i kin lurok ma gurumowa. Nino acel acel onoŋo aneko twon acel, ki romi mabeco abicel, ki dok gineko gweni mapol pira kit meno dok pi nino apar apar aonyo koŋo vino manyen. Ento i kom jami magi ducu ma atiyo pe abedo ki miti mo ni gim iya dul cam mo ma giciko ni laloc myero onon, pien onoŋo lwak doŋ gitye ki peko madwoŋ atika ma obwoyo komgi woko. Alegi, ai Lubaŋana, po pi gin ducu ma atiyo pi lwak man, wek anon pwoc pire. Ka Canbalat, Tobia, Gecem, kacel ki jo ducu ma gin lukworwa guwinyo ni atyeko gero cel woko, dok ni ka mo ma omuk ma twolone doŋ pe, i kare meno onoŋo pud peya aketo rii me doggola me loro dog gaŋ ducu, ci Canbalat ki Gecem gucwalo lok bota, kun giwacci, “Bin wek wabed kacel i gaŋ mo ma i bar me Ono.” Ento gin onoŋo gimito timma marac. An acwalo kwena botgi kun awaccigi ni, “An atye ka tiyo tic mo ma pire dit mada, pe atwero bino kunnu ka rwatte kwedwu. Pe atwero weko tic man Ccuŋ pi bino me nenowu keken.” Gubedo ka cwalo kwena bota ma rom kit meno tyen aŋwen kulu, an bene adwoko botgi lagam lakite acel. Dok Canbalat ocwalo laticce bota ki waraga i ciŋe ma pe gimwono doge lakite acel-lu pi tyen me abicce. Lok ma gicoyo iye tye kit man ni, “Gecem otitta ni cwinyo lok tye ka wot i kin lwak ma gicok kwedwa ni meno, in kacel ki lwak pa Lujudaya wumito jemo; meno aye gin mumiyo wutye ka gero cel odoco-ni, Lok man tito bene ni in ikette keni me bedo kabakagi. Dok bene lok man otittiwa ni in doŋ ityeko keto lunebi me tuco lok atyer i Jerucalem i komi ni, ‘Kabaka doŋ tye i Juda.’ Lok meno doŋ gibitito bot kabaka, Pienno ber ibin warib tam wayub lokke kacel kwedi.” An dok adwoko lok bote, kun awacce ni, “Pe tye gin mo macalo meno ma otimme, lok meno wun wunwaro ki wiwu.” Onoŋogutemme me burowa wek wagik tic, kun gitamo ni, “Komgi bidoko nyap i tic, ci bimiyo tic doŋ pe bitine.” Ento kombeddi, ai Lubaŋa, doŋ imiya abed matek. Ka acito wa i ot pa Cemaya wod pa Delaya, ma wod pa Meketabel, ma pe twero weko ode, ci cut an acito ka Lime. En owacca ni, “Wek wacit kwedi kacel i kabedo maleŋ ma i ot pa Lubaŋa, ci walor doggola me ot pa Lubaŋa woko; pien gin bibino ka neki woko. I dyewor mo keken gibibino gineki woko.” Ento an agamo doge ni, “An pe acal ki dano ma riŋo lawote ci kanne woko. In itamo ni abitemo laro kwana ki kanne i ot pa Lubaŋa? Pe atwero cito.” Ka abedo ka tamo lok man, lacen, ci aniaŋ atir ni Lubaŋa onoŋo pe oloko kwede, ento onoŋo Tobia ki Canbalat aye kara guwile ki lim wek otit lok macalo meno me bito an. Guwile ki lim wek obur an abed ki lworo apot i bal, wek gicak balo nyiŋa kun gicaya kwede-gu. Ai Lubaŋana, po i kom Tobia ki Canbalat, pi gin ma gubedo ka timone i koma, ci iket can i komgi. Dok ipo i kom lanebi ma dako ma nyiŋe Noadia kacel ki lwak lunebi mukene ducu ma yam gutemo buro an ki miya lworo. I ŋe tic pi nino pyerabic wiye aryo tic me gero cel otum woko, i nino dwe pyeraryo wiye abic me dwe me Elul.” I kare ma lumerokwa ma gibedo i rok murumowa guwinyo lok man, ci lworo omakogi ma komgi oto woko lirut; pien dano acel acel onoŋo oneyo atir ni tic man otine pi kony pa Lubaŋa, Ento i kare-nu ducu ludito pa Lujudaya gubedo ka coyo waraga mapol gucwalo bot Tobia, ki Tobia bene coyo waraga cwalo botgi. Lwak mapol ma i Juda onoŋo gitye tuŋ bote ma gucikke bote ki kwoŋo kwoŋ, dok en onoŋo obedo oro Cekania ma wod pa Ara. Dok wode Yekokanan bene onoŋo yam onyomo nya pa Meculam wod pa Berekia. Jo mogo bene guloko i nyima lok kom tic maber ma Tobia yam otiyo, ka gidwoko bote lok ducu ma an awaco botgi, Tobia yam omedde ki cwalo waraga bota pi miyo lworo bota. Ka tic me gero cel doŋ otum, ma aketo doggola lalor dogcel ducu, aketo lugwok-doggola, ki luwer, ka dok ayero Lulevi aketogi i dog ticgi, ci aketo jo aryo me loyo gaŋ me Jerucalem, omera Kanani, ki Anania, ma ladit wi mony ma loyo gaŋ me cel gogo. Anania obedo dano ma genne, dok ŋat ma lworo Lubaŋa makato lwak mukene-gu ducu. Ci awaco botgi ni, “Pe wuwek giyab dogcel me Jerucalem nie ka ceŋ doŋ odoko lyet, ka dok gilor dogcel woko giceggi ki rii ma noŋo pud peya lukur-piny guweko dog ticgi ma ceŋ cito ka poto. Ka dok bene atito botgi ni guyer lukur-piny ki i kin lwak ma gibedo i Jerucalem, ci guketgi i dog tic ma mitte, dano acel acel myero obed i kabedone, kun kuro piny ka ma okemme ki ode kikome.” Gaŋ meno onoŋo lac dok dit mada, ento jo ma gibedo iye onoŋo pe gidwoŋ, dok onoŋo pud peya gigero odi mapol iye. Lubaŋa dok oketo tam i cwinya me guro lwak, rwodi ki ludito ma giloyo wi lwak kacel, wek gico nyiŋgi i buk me tekwarogi. Ci anoŋo i buk me tekwaro nyiŋ jo ma gilubo jo mukwoŋo dwogo cen ki i opii, anoŋo gicoyo nyiŋgi kit man: Magi gin aye lwak ma gibedo i lobo Juda ma ceŋ gudwogo cen ki i opii ka ma yam Nebukadnejar kabaka me Babilon oterogi iye macalo lumabuc, Gin gudwogo kacel ki Jerubabel, ki Yecwa, Nekemia, Ajaria, Raamia, Nakamani, Mordekai, Bilcan, Micperet, Bigvai, Nekum, ki Baana. Man aye wel co ma i kin jo Icrael. Likwayo pa Paroc, alip aryo ki miya acel ki pyerabiro wiye aryo. Likwayo pa Cepatia, miya adek ki pyerabiro wiye aryo. Likwayo pa Ara, miya abicel ki pyerabic wiye aryo. Likwayo pa Pakat-moab, ma gin aye likwayo pa Yecwa ki Joab, alip aryo ki miya aboro ki apar wiye aboro. Likwayo pa Elam, alip acel ki miya aryo ki pyerabic wiye aŋwen, Likwayo pa Jatu, miya aboro ki pyeraŋwen wiye abic. Likwayo pa Jakai, miya abiro ki pyerabicel. Likwayo pa Binui, miya abicel ki pyeraŋwen wiye aboro. Likwayo pa Bebai, miya abicel ki pyeraryo wiye aboro. Likwayo pa Ajgad, alip aryo ki miya adek ki pyeraryo wiye aryo. Likwayo pa Adonikam, miya abicel ki pyerabicel wiye abiro. Likwayo pa Bigvai, alip aryo ki pyerabicel wiye abiro. Likwayo pa Adin, miya abicel ki pyerabic wiye abic. Likwayo pa Ater, ma en aye likwayo pa Kejekia, pyeraboŋwen wiye aboro. Likwayo pa Kacum, miya adek ki pyeraryo wiye aboro. Likwayo pa Bejai, miya adek ki pyeraryo wiye aŋwen. Likwayo pa Karip miya acel ki apar wive aryo. Likwayo pa Gibeon, pyeraboŋwen wiye abic. Jo Beterekem kacel ki jo Netopa, miya acel ki pyeraboro wiye aboro. Jo Anatot, miya acel ki pyeraryo wiye aboro. Jo Betajimavet, pyeraŋwen wiye aryo. Jo Kiriatarim, jo Kepira, ki jo Beerot, miya abiro ki pyeraŋwen wiye adek. Jo Rama ki jo Geba, miya abicel ki pyeraryo wiye acel. Jo Mikmac, miya acel ki pyeraryo wiye aryo. Jo Betel ki jo Ai, miya acel ki pyeraryo wiye adek. Jo Nebo mukene-ne, pyerabic wiye aryo. Jo Elam mukene-ne, alip acel ki miya aryo ki pyerabic wiye aŋwen, Likwayo pa Karim, miya adek ki pyeraryo. Jo Jeriko, miya adek ki pyeraŋwen wiye abic. Jo Lod, jo Kadid, ki jo Ono, miya abiro ki pyeraryo wiye acel. Jo Cenaa, alip adek ki miya aboŋwen ki pyeradek. Man aye wel ajwagi: likwayo pa Jedaya, ma i dog ot pa Yecwa, miya aboŋwen ki pyerabiro wiye adek. Likwayo pa Imer, alip acel ki pyerabic wrye aiyo. Likwayo pa Packur, alip acel ki miya aryo ki pyeraŋwen wiye abiro. Likwayo pa Karim, alip acel ki apar wiye abiro. Man aye wel Lulevi: likwayo pa Yecwa ki Kadmiel, ma i kin likwayo pa Kodeva, pyerabiro wiye aŋwen. 468 Luwer ma gin likwayo pa Acap, miya acel ki pyeraŋwen wiye aboro. Likwayo pa lugwok-doggola ma gin aye likwayo pa Calum, likwayo pa Ater, likwayo pa Talmon, likwayo pa Akub, likwayo pa Katita, likwayo pa Cobai, gin ducu onoŋo giromo miya acel ki pyeradek wiye aboro. Magi gin aye lutic i ot pa Lubaŋa: likwayo pa Jika, likwayo pa Kacupa, likwayo pa Tabaot, likwayo pa Keroc, likwayo pa Cia, likwayo pa Padon, likwayo pa Lebana, likwayo pa Agaba, likwayo pa Camlai, likwayo pa Kanan, likwayo pa Gidel, likwayo pa Gakar, likwayo pa Reaya, likwayo pa Rejin, likwayo pa Nekoda, likwayo pa Gajam, likwayo pa Uja, likwayo pa Pacea, likwayo pa Becai, likwayo pa Meunim, likwayo pa Nepucecim, likwayo pa Bakbuk, likwayo pa Akupa, likwayo pa Arur, likwayo pa Bajlit, likwayo pa Mekida, likwayo pa Arca, likwayo pa Barkoc, likwayo pa Cicera, likwayo pa Tema, likwayo pa Nejia, ki likwayo pa Katipa. Likwayo pa lutic pa Solomon gin ene: likwayo pa Cotai, likwayo pa Coperet, likwayo pa Perida, likwayo pa Jaala, likwayo pa Darkon, likwayo pa Gidel, likwayo pa Cepatia, likwayo pa Katil, likwayo pa Poceret-kajebaim, ki likwayo pa Amon. Jo ma gitiyo i ot pa Lubaŋa ki likwayo pa lutic pa Solomon, onoŋo welgi romo miya adek ki pyeraboŋwen wiye aryo. Magi aye gin jo ma gubino ma gua ki i Tel-mela, Tel-karca, Kerub, Adon ki Imer, ento onoŋo pe gitwero nyuto dog odi pa kwarogi, ka ce onoŋo yam gin jo Icrael: likwayo pa Delaya, likwayo pa Tobia, ki likwayo pa Nekoda, gin ducu miya abicel ki pyeraŋwen wiye aryo. Dok jo magi gitye i kin likwayo pa ajwagi: likwayo pa Kobaya, likwayo pa Kakoj, likwayo pa Baŋilai ma yam onyomo dakone ki i kin anyira pa Baŋilai ma jo Gilead; yam gilwoŋo en ki nyiŋgi, Gin gubedo ka yenyo nyiŋgi i kin lwak nyiŋ ma gicoyogi i buk me tekwaro, ento pe gunoŋo iye nyiŋgi, omiyo gikwanyogi woko ki i kin ajwagi calo jo ma komgi ki keni. Laloyo otito botgi ni gin pe gunywak camo cam maleŋ makato, nio waŋ ma ajwaka binen ma bipenyo dog Rwot ki Urim ki Tumim. Lwak ma gucokke ducu welgi romo alip pyeraŋwen wiye aryo ki miya adek ki pyerabicel, ma pe gikwano iye lwak luticgi ki anecagi ma welgi romo alip abiro ki miya adek ki pyeradek wiye abiro. Onoŋo gitye bene ki luwer ma co ki ma mon miya aryo ki pyeraŋwen wiye abic. Aguraguragi yam tye miya abiro ki pyeradek wiye abicel, ki kanagi maditone miya aryo ki pyeraŋwen wiye abic kinagagi romo miya aŋwen ki pyeradek wiye abic, ki kanagi romo alip abicel ki miya abiro ki pyeraryo. I kare meno jo mogo ma i kin ludito wi kaka ma giloyo dog odi pa kwarogi gumiyo ‘kony me lim pi gero ot pa Lubaŋa. Laloyo omiyo lim i ot kano lim ma romo darik me jabu alip acel, becen pyerabic, ki boŋŋi aruka pa ajwagi ma romo miya abic ki pyeradek. Jo mogo ma i kin ludito wi kaka ma giloyo dog odi pa kwarogi bene gumiyo lim i ot kano lim pi tic, lim ma roino darik me jabu alip pyeraryo ki mina me ryal alip aryo ki miya aryo. Jo mukene mudoŋŋe gumiyo lim ma romo darik me jabu alip pyeraryo, ki mina me ryal alip aryo, ki boŋŋi aruka pa ajwagi ma romo pyerabicel wiye abiro. Ajwagi, Lulevi, ki lugwok-doggola, luwer, ki jo mogo mukene, lutic i ot pa I kare ma dwe me abiro oromo, onoŋo jo Icrael doŋ gitye i gaŋigi. Ci lwak gucokke ki cwiny acel i dyekal ma i nyim Dogcel me Pii; ci gutito bot Ejira ma lapwony-cik pa Lubaŋa ni okel buk me cik pa Moses ma yam Lubaŋa omiyo bot jo Icrael. Ci Ejira okelo buk me cik i nyim cokke, ma tye iye co ki mon ki jo ducu ma yam giromo winyone ki niaŋ iye maber, i nino dwe mukwoŋo me dwe me abiro. Ejira ocako kwanone i nyimgi, kun ocuŋ okemo dyekal ma i nyim Dogcel me Pii-ni, ocako kwanone odiko nio wa dyeceŋ, kun kwano i nyim co ki mon ducu ki jo ma gitwero niaŋ lokke maber, kun dano ducu guciko itgi ka winyo lok ma i buk me cik, Ejira ma lapwony-cik pa Lubaŋa ocuŋ i wi abam bao ma gitiyo pi kwano lok meno, Jo magi yam gucuŋ ka ŋete tuŋ lacuc, Matitia, Cema, Anaya, Uria, Ilkia, ki Maceya; ka dok jo magi gucuŋ ka ŋete tuŋ lacam, Pedaya, Micael, Malkija, Kacum, Kacbadana, Jekaria, ki Meculam. I kare ma Ejira ocuŋ malo ka maleŋ i kabedo me kwano buk, lwak ducu guciko waŋgi i kome, Oyabo buk ci dano ducu gua malo gucuŋ, Ejira okwoŋo ki pwoyo Rwot, Lubaŋa madit; ci lwak ducu gugamo ni, “Amen, Amen,” kun giriŋo ciŋgi malo; ka dok guryebbe piny, ci guworo Rwot ma gukulo wigi piny i ŋom, Ka dok lwak gucuŋ i kabedogi, ci Lulevi magi: Yecwa, Bani, Cerebia, Jamin, Akub, Cebetai, Kodia, Maceya, Kelita, Ajaria, Jojabad, Kanan, ki Pelaya, gukonyo lwak me niaŋ te cik maber, kun onoŋo lwak gubedo i kabedogi mot. Gukwano lok me cik nia ki i buk me cik, en aye buk me cik pa Lubaŋa, dok gugonyo te lokke matir bot lwak, wek guniaŋ lok ma gikwano. Ka lwak doŋ guwinyo lok ma gikwano ki i buk me cik, gucako koko cut. Ci Nekemia ma onoŋo en laloc, ki Ejira ma onoŋo ajwaka dok bene lapwony-cik pa Lubaŋa, kacel ki Lulevi ma gupwonyo lwak guwaco bot lwak ni, “Man aye nino maleŋ bot Rwot Lubaŋawa; pe wukum dok bene pe wukoki.” Dok owaco botgi ni, “Doŋ wuwot, wucit wucam moo ki wumat koŋo vino maliŋo, wucwal cam mogo bot dano mo ma pe ki cam; pien tin aye nino maleŋ bot Rwotwa; pien yomcwiny pa Rwot en aye tek mewu.” Lulevi gujuko dano guliŋ mot, kun giwacci “Wubed mot laliŋ, pien man aye nino maleŋ; pe wubed ki cwercwiny.” Lwak guket gucito i gaŋigi ka cam ki ka mat, dok gucwalo cam mogo ma gitye kwede bot luwotgi mukene, pi bedo ki yomcwiny madwoŋ, pien guwinyo lok ma gikwano gitito botgi ci guniaŋ maber. I kom nino me aryone ludito ma giloyo dog odi pa kwarogi ma i kin lwak ducu, kacel ki ajwagi ki Lulevi, gucito bot Ejira ma lapwony-cik pa Lubaŋa pi niyo lok ducu ma tye i buk me cik. Ci gunoŋo ka ma gicoyo i buk me cik ni Rwot yam ociko Moses ni jo Icrael myero gubed i bolo pi kwero nino madito me dwe me abirone, dok myero guywek lokke wek gutit i gaŋigi ducu ki i Jerucalem, kun giwacci, “Wucit i wi godi ka kela jaŋ jeituni, ki jeituni ma i tim, ki yadi ma ŋwecgi kur, yat otit ki yadi ma potgi oluk wek wayub bolo mapol, kit ma gicoyo i buk me cik.” Lwak ducu gucito ka kelo jami ma gitito pire-ni ci gutiyo bolo mapol me bedogi, kun dano acel acel timo mere, i wi odigi, i dyekalgi, ki i dyekal me ot pa Lubaŋa, ki i dyekal ma i Dogcel me Pii, ki i dyekal ma i dogcel ma gilwoŋo ni pa Epraim. Ki cokke pa lwak ma con gudwogo ki i opii i rok mukene gutiyo bologi ci gubedo iye; cakke i kare pa Yocwa wod pa Nun nio kwede wa i nino meno jo Icrael pe gutiyo kit meno. Ci gubedo ki yomcwiny madit twatwal. Dok nino ki nino gikwano lok ma tye i buk me cik pa Lubaŋa i kom nino mukwoŋo nio kwede wa i nino me agikkine. Gukwero nino me cokke maleŋ pi nino abiro; i kom nino me aborone ci gubedo ki cokke maleŋ, ma lubo cik kikome. I dwe man ninone pyeraryo wiye aŋwen jo Icrael gucokke, kun giri kec ma guruko boŋo cola, ma gunywano wigi ki lobo ma nyuto cwercwinygi. Jo Icrael gupokke woko kengi ki i kom lurok ducu, ka gucuŋ ka tuco balgi kacel ki bal pa kwarogi ma yam gutimo, Gucuŋ i kabedogi, kun gikwano botgi lok ma tye i buk me cik pa Rwot Lubaŋagi pi cawa adek; ka i ŋeye gutuco balgi ci guworo Rwot Lubaŋagi pi cawa adek mukene. Lulevi magi gucuŋ i wi abam, Yecwa, Bani! Kadmiel, Cebania, Buni. Cerebia, Bani ki Kenani; gin ducu gudaijŋe ki dwan maloŋo bot Rwot Lubaŋagi, Dok gin Lulevi magi, Yecwa, Kadmiel, Bani, Kacabneya, Cerebia, Kodia, Cebania ki Petakia guwacci, “Wua malo wupak Rwot Lubaŋawu; wupake nakanaka. Wek dano acel acel opak nyiŋi me deyo makato ducu, ai Rwot, kadi bed pwoc ki pak pa dano pe rom ki ditti.” Ka doŋ gulego lega man ni, “In aye i Rwot, in keni; in ma iketo polo ma malo makato ducu, ki lwak lakalatwe ma tye i polo-gu ducu, dok iketo lobo ki nam ki jami ducu ma tye i igi; in aye imiyo kwo botgi ducu; ki mony me polo ducu giryebbe piny ka woro in. In aye i Rwot, Lubaŋa ma yam iyero Abram ci ikwanyo en woko ki Or lobo pa Lukaldaya, ka icako miyo bote nyiŋ man Abraim. Dok con inoŋo ni en ŋat ma lagen, ka doŋ iketo gicikke kwede pi miyo lo bo pa jo Kanaan, lobo pa jo Kit, lobo pa jo Amor, lobo pa jo Periji, lobo pa jo Jebuc ki lobo pa jo Girgac, me bedo lobo ma likwaye gibibedo iye, In ico bo lok ma iciko, pien in Lubaŋa muporre. “In yam ineno atwom ma kwarowa gubedo kwede i Ejipt, dok bene iwinyo kokogi ki i dog Nam Makwar, in itiyo bene lanyut ki taŋo me aura i kom Parao ki luticce ducu, ki i kom jo ducu ma i lobone, pien in onoŋo iŋeyo kit ma gubedo kwede ka uno kwarowa; ma omiyo in ilimo iye yweka, macalo tye kwede nio wa onyoo. In yam ipoko i dye nam pi lwakki, ka itelogi imiyo gukato ki iye i wi ŋom mutwo. Dok ibolo merok ma gulubo korgi woko i pii, imiyo gumwony ci gulwiny woko i kut matut, macalo gweŋ ma lwiny piny i i pii mager. In yam itelo nyimgi i dyeceŋ ki pol mucuŋ macalo wir, ka dok itelo wigi i dyewor ki mac mucuŋ macalo wir me menyo botgi yo ka ma myero guwot gucit iye. In ilor ibino piny i kom got Cinai, ci iloko ki lwakki ki kunnu ki i polo; ka imiyo botgi cik maber ki pwony ma myero gin gulubi kacel ki gin ma iciko ducu. In ipwonyogi ni gugwok cabitti obed maleŋ, ka dok imiyogi cik kacel ki gin ma in iciko ni gugwoki, kun wok ki bot laticci Moses. I kare ma kec onekogi in ipitogi ki kwon mua ki i polo, ka dok imiyo gumato pii mua ki i kom pata got i kare ma orwo pii onekogi. Itito botgi bene ni gudony gucam lobo ma yam ikwoŋo pire ni ibimiyo botgi. “Ento gin kacel ki kwarowa wigi obedo tek ci gubedo ki wakke, omiyo gukwero lubo cikki. Gukwero lubone; dok wigi owil woko i kom tano mapol me aura ma ibedo ka tiyo i kingi; wigi obedo tek ci guyero dano mo acel me bedo laditgi wek otel wigi odwokgi cen i opii i Ejipt. Ento in Lubaŋa ma weko bal pa danoi in iber dok lakica, kiniga pe maki oyot, mar meri dwoŋ ma pe lokke, yam pe ibwotogi ata. Kadi bed yam gucweyo cal wod twon dyaŋ ma giliyo aliya, kun giwacci, ‘Man aye Lubaŋawa mukwanyowa woko ki i Ejipt,’ gin ma gutiyo gutiyo me yeto in, ento in pe ibwotogi ata Him pi kicani; ki pol mucuŋ macalo wir ma obedo ka telo wigi iyo-ni, onoŋo pe orwenyo woko ki botgi i dyeceŋ, kadi mac mucuŋ macalo wir ma obedo ka menyo botgi yo ma giwoto iye i dyewor bene pe orwenyo woko ki botgi. In imiyo Cwiny meri maber me pwonyogi, dok pe iweko pitogi ki manna, imiyogi bene gumato pii me kweyo orwo. In yam igwokogi maber i tim pi mwaka pyeraŋwen, kun imiyo botgi gin ducu ma gin mito, dok boŋŋigi yam pe guti guyec woko ducu, ki tyengi bene yam pe okwot. In imiyo gulwenyo ci guloyo lwak rok mapol, ipoko botgi lobo ma cok ki wan apokki lobogi, kun gumayo lobo pa Cikon kabaka me Kecibon kacel ki lobo pa Og kabaka me Bacan. In imiyo likwayogi gunya mapol gudoko macalo lwak lakalatwe ma i polo, in yam imiyogi lobo ma myero gubed iye, en lobo ma yam ikwoŋo pire ni ibimiyo bot kwarogi wek gucam obed megi. Likwayogi gudonyo ci gumayo lobo pa jo Kanaan woko; dok in iloyo wegi lobo ma gibedo kunnu, ci i niyogi i ciŋgi gin kacel ki lukergi ki lwakgi ducu wek guti kwedgi gin ma gimito. Lwakki yam gumako gaŋi cel gogo kacel ki lobo ma ceko cam, ka gukwanyo odi ki lonyo ducu ma tye iye, ki bur pii ma gituco odonyo i nom piny, ki potti me yadijeituni ki lwak yadi ducu ma nyako nyiggi, kacel ki potti olok ma ginyako nyiggi madwoŋ; ma yam gucamo guyeŋ kwede ka gucako cwe ma cwinygi obedo yom twatwal pi jami mapol mabeco ma imiyogi-ni. “Ento lwakki gujemo dok gukwero lubo cikki; gubolo cikki odok yo tuŋ i ŋegi, kun gineko lunebini, ma gujukogi ni gulokke gudwog boti, ci pe guwinyo, gubedo ka yeti kare ducu. Pi meno omiyo iweko lukworgi oloyogi i lweny, dok gudiyogi matek; gukok boti i kare ma gitye i can ni ikonygi bene, ci in iwinyo kokogi ki i polo. Doŋ pi kicani madwoŋ omiyo icwalo botgi jo ma myero otel wigi, gin jo ma yam olarogi ki i ciŋ lumerokgi-ni. Ento i kare ma kuc dok odwogo botgi, gin gucako timo bal dok aye i nyimi, oweko in dok imiyogi i ciŋ lumerokgi, guloyogi. Kadi bed kumeno i kare ma guŋut gulokke gudwogo gukok boti, ci iwinyo kokogi ki i polo pi tyen mapol ci ilarogi pi kicani madwoŋ. In itito botgi ni gulokke gudwog cen boti dok gulub cikki. Ento gin gubedo ki wakke ci gukwero lubo cikki ducu, kadi bed nene atir ni mako cikki aye miyo dano bedo ki kwo, ento gin gutimo bal i kom gin ma in iciko. Gubedo ki tekwic gukwero lubo cikki. Ibedo ka jukogi pi mwaka mapol, kun ijukogi ki Cwiny meri ma con otiyo i i lunebini; ento gin pe guwinyo. Omiyo iwekogi gubedo i te loc pa lwak me lobo me rok mukene. Ento pi kicani madwoŋ omiyo pe ityekogi woko, dok bene pe ibwotogi ata; pien onoŋo in Lubaŋa ma i won kica madwoŋ, ma kica maki twatwal. “Kombeddi, ai Lubaŋawa madit, ma won twero, dok in Lubaŋa ma gilworo, pien igwoko gicikkeni ki mar meri ma pe lokke, can mapek twatwal-li pe iwek obed gin matidi mo ki tuŋ boti, can meno opoto i komwa, ki i kom lukerwa, ki i kom rwodiwa, ki i kom ajwagiwa, ki i kom lunebiwa, ki i kom kwarowa, ki i kom lwakki ducu, nia wa i kare pa luker me Aciria nio kwede wa onyoo. Ento in itimo gin ma tye atir pi pwodowa kit meno; in ibedo ka tic kwedwa ki ada, ento wan aye ma watyeko timo bal. Lukerwa, rwodiwa, kacel ki ajwagiwa, ki kwarowa ducu yam pe gugwoko cikki, dok, pe gulubo gin ma iciko kadi wa jukki ducu ma onoŋo ijukogi kwede. Luker guloyo lwakki pi gum madit ma imiyo botgi, i kare ma gubedo ka malac i ŋom maber ma ceko cam ma imiyo botgi, ento gin pe gulokke, pe guweko timgi marac wek guti gin ma imito. Nen, kombeddi wan doŋ wadoko opii i lobo ma yam imiyowa ni wacam gin ma ocek i potone ki yomcwiny, kacel ki jami ducu mabeco ma nonne iye. Lonyo me lobo ducu wamiyo bot luker ma in iketogi me loyowa pi balwa; gin gitye ki tek me loyo komwa ki Umwa makwo ducu, kit ma gimito, omiyo wan kombeddi watye ki atwom madwoŋ.” Pi gin ducu ma doŋ otyeko timme, wan Lujudaya kombeddi waketo ciŋwa i cikke ma wacoyo acoya i buk, dok rwodiwa, Lulevi ki ajwagiwa ducu guketo ciŋgi i cikke man me mokone matwal. Ŋat mukwoŋo keto ciŋe obedo Nekemia wod pa Kakalia, ma en laloc me lobo, ka i ŋeye Jedekia bene oketo ciŋe, Jo ma guketo ciŋgi bene obedo ajwagi magi: Ceraya, Ajaria, Jeremia, Packur, Amaria, Malkija, Katuc, Cebania, Maluk, Karim, Meremot, Obadia, Daniel, Gineton, Baruk, Meculam, Abija, Mijamin, Maajia, Bilgai, Cemaya. Lulevi ma guketo ciŋgi obedo Yecwa wod pa Ajania, Binui ma i kin likwayo pa Kenadad, Kadmiel; ki utmegigi, Cebania, Kodia, Kelita, Pelaya, Kanan, Mika, Rekob, Kacabia, Jakur, Cerebia, Cebania, Kodia, Bani, Beninu. Jo magi aye gubedo ludito ma loyo lwak: Paroc, Pakat-moab, Elam, Jatu, Bani, Buni, Ajgad, Bebai, Adoniya, Bigvai, Adin, Ater, Kejekia, Ajur, Kodia, Kacum, Bejai, Karip, Anatot, Nebai, Magpiac, Meculam, Kejir, Mecejabel, Jadok, Jadua, Pelatia, Kanan, Anaya, Kocea, Anania, Kacub, Kalokeci, Pilka, Cobek, Rekum, Kacabna, Maaceya, Akia, K anan, Anan, Maluk, Karim, Baana. Wan jo Icrael, ajwagi, Lulevi, lugwok-doggola me ot pa Lubaŋa, luwer, ki lutic i ot pa Lubaŋa ki jo mukene ducu ma wapokke woko kenwa ki i kom jo ma gibedo i lobo meno, wek walub cik pa Lubaŋa, wan kacel ki monwa ki litinowa awobe ki anyira ducu ‘ma doŋ gin dito ma giromo niaŋ lok, kombeddi waribbe ki utmegiwa, ki luditowa kun wakwoŋo kwoŋ ma walamme kekenwa ni wek can opot i komwa ka ce pe wabilubo cik man, kun pe walubo cik pa Lubaŋa ma yam Moses latic pa Lubaŋa omiyo botwa. Wakwoŋo ni wabibedo kun watiyo gin ma Rwot ma en R wotwa yam ociko, ki dok ni wabigwoko cikke ducu ki gin ma en mito. Wan pe wabimiyo lurok ma gibedo i lobowa ginyomo anyirawa, ki wan bene pe wabinyomo anyiragi bot awobewa. Ka ce lurok ma gitye i lobo man gukelo jamigi mo nyo kai, nyo kit nyig cam mo me catone botwa i nino me cabit, nyo i nino mo maleŋ, ci wan pe wabiwilo jamigi. Dok pe wabipuro pur i mwaka me abirone, i kare meno bene wabiŋolo banya ducu ma myero gicul. Wan waye me miyo dul me adek i cekel acel mwaka ki mwaka me konyo tic i ot pa Lubaŋawa. Wabimiyo jami magi pi woro Lubaŋa; mugati me aketa i nyim Rwot, gityer me moko kwon pi nino ducu, ki gityer me gitum awaŋa me nino ducu, gityer maleŋ pi nino me cabit ducu, nino madito me por dwe, nino madito ma giciko ducu, jami maleŋ-gu ducu, ki gitum me bal pi kwanyo bal pa jo Icrael, ki jami ma mitte pi tic ducu ma gitiyo i ot pa Lubaŋa, Wan lwak, kacel ki ajwagi, ki Lulevi, wabibolo kwir mwaka ki mwaka me moko kaka mene ma myero gukel yen i ot pa Lubaŋa me wano gitum awaŋa ma gityero bot Rwot Lubaŋawa, kit macalo cik mito, kun gilubo dog odi pa kwarogi, i kare ma giciko. Wan waye me tero kai manyen ma wakayo, kacel ki nyig yadi ducu mukwoŋo cek, macalo gityer i ot pa Lubaŋa mwaka ki mwaka. Dok bene ŋat acel acel i kinwa bitero latin laco ma en latin me kayone, miyo bot ajwagi gin lutic i ot pa Lubaŋa, me dyerone bot Lubaŋa, ki dok bene wabimiyo litino dyaniwa me kayo ma dyaŋiwa gunywalo ki litino kayo romi nyo dyegi ma romiwa nyo dyegiwa gunywalo, kit macalo cik mito. Wabitero mo ko kwon me kai manyen mukwoŋo cek wamiyo bot ajwagi, kacel kijami me kony mewa ma wamiyo, ki gityer mukene ducu macalo me koŋo vino, moo nyig yat jeituni ki kit kwa nyig yadi ducu mapatpat, mwaka ki ki mwaka, kun waketo i kicika odi matino me ot pa Lubaŋa, Wabimiyo dul acel me apar me kwa cam mapatpat ma wapuro bot Lulevi ma gin lujog dul acel me apar ki bot lupur ma tye i gaŋiwa, Ajwagi ma gin likwayo pa Aron gubed kacel ki Lulevi i kare ma noŋo gigamo dul acel me apar. Lulevi myero gutyer dul acel me apar me jami ma gijogo i ot pa Lubaŋa, i kicika me odi matino, ki i odi me kano jami. Jo Icrael kacel ki Lulevi myero gumi kai, koŋo vino, ki moo me nyig jeituni gukel i odi me kano jami, ka ma gigwoko iye jami ma gitiyo kwedgi i kabedo maleŋ, ka ma ajwagi gitye iye i dog tic, lugwok-doggola, ki dul pa luwer. Wan pe wabibwoto ot pa Lubaŋawa ata. Lutel wi lwak onoŋo gibedo i Jerucalem, ki lwak mukene-gu gubolo kwir me yero ŋat acel i kom jo apar me cito ka bedo i gaŋ maleŋ me Jerucalem, ma kun noŋo jo mukene mudoŋŋe gibedo i gaŋi mukene. Lwak gupwoyo jo ma gumine pigi kengi me bedo i Jerucalem. Magi aye ludito me lobo Juda ma gubedo i Jerucalem. Ento i gaŋi mukene ducu ma i Juda dano acel acel con obedo i lobone ma i gaŋigi, jo Icrael, ajwagi, Lulevi, lutic i ot pa Lubaŋa, ki likwayo pa lutic pa Solomon. Likwayo pa Juda ki likwayo pa Benjamin bene gubedo i Jerucalem. Magi aye likwayo pa Juda ma gubedo i Jerucalem: Ataya ma wod pa Ujia, ma wod pa Jekaria, ma wod pa Amaria, ma wod pa Cepatia, ma wod pa Makalalel, ma i kin likwayo pa Perej; ki Maaceya wod pa Baruk, ma wod pa Kolkoje, ma wod pa Kajaya, ma wod pa Adaya, ma wod pa Joyarib, ma wod pa Jekaria, ma i kin likwayo pa Cela, Likwayo pa Perej ducu ma gubedo i Jerucalem onoŋo giromo miya aŋwen ki pyerabicel wiye aboro ma gin twoni oteka. Magi aye likwayo pa Benjamin: Calu wod pa Meculam, ma wod pa Joed, wod pa Pedaya, ma wod pa Kolaya, ma wod pa Maaceya, ma wod pa Itiel, ma wod pa Jecaya. Jo ma gulubo en obedo Gabai, Calai, ki jo miya aboŋwen ki pyeraryo wiye aboro. Joel wod pa Jikri obedo laditgi: ki Juda wod pa Kacenua obedo ladit me aryo ma loyo gaŋ. Magi aye likwayo pa ajwagi: Jedaya wod pa Joyarib, Jakin, Ceraya wod pa Ilkia ma wod pa Meculam ma wod pa Jadok, ma wod pa Merayot, ma wod pa Akitub, laloc me ot pa Lubaŋa, ki utmegigi ma gutiyo tic i kom ot, gin ducu miya aboro ki pyeraryo wiye aryo; ki Adaya wod pa Jerokam, ma wod pa Pelalia, ma wod pa Amji, ma wod pa Jekaria, ma wod pa Packur, ma wod pa Malkija, ki utmegine, ma giloyo dog odi pa kwarogi, gin ducu giromo miya aryo ki pyeraŋwen wiye aryo; ki Amacai, ma wod pa Ajarel, ma wod pa Imer, ki utmegigi, ma gin twoni oteka ma nene, gin ducu grromo miya acel ki pyeraryo wiye aboro. Jabdiel wod pa Kagedolim aye obedo laditgi. Magi aye likwayo pa Lulevi: Cemaya wod pa Kacub, ma wod pa Ajrikam, ma wod pa Kacabia, ma wod pa Buni; ki Cabetai, ki Jojabad, ma gin ludito i kin ludito pa Lulevi, ma gubedo ka loyo dano i dog tic ma yo tuŋ woko ma gitiyo i kom ot pa Lubaŋa; ki Matania wod pa Mika, ma wod pa Jabdi, ma wod pa Acap, ma obedo latel ma cako lega me pwoc, ki Bakbukia, ma en dano me aryone i kin utmegine; ki Abda wod pa Camua, ma wod pa Galal, ma wod pa Jedutun, Lulevi ducu ma gubedo i gaŋ maleŋ giromo miya aryo ki pyeraboro wiye aŋwen. Lugwok-doggola me ot pa Lubaŋa obedo Akub, Talmon ki utmegigi ma yam gigwoko doggola; onoŋo giromo miya acel ki pyerabiro wiye aryo. Jo Icrael mukene ma gudoŋ kacel ki Lulevi ki ajwagi gubedo i dul lobo ma yam gimiyo me bedo megi matwal i gaŋi mukene ma tye i Juda. Ento lutic i ot pa Lubaŋa gubedo i kabedo ma tye i Jerucalem ma gilwoŋo ni Opel; kun ludito ma loyogi i dog tic gin aye Jika ki Gicpa. Ladit ma obedo lanen ma onoŋo loyo Lulevi i dog tic i Jerucalem obedo Uji wod pa Bani, ma wod pa Kacabia, ma wod pa Matania, ma wod pa Mika, ma i kin likwayo pa Acap, ma gin yam luwer pi tic ma i ot pa Lubaŋa. Kabaka onoŋo oketo cik ma t iko gin luwer kun tito botgi kit macalo kaka mapatpat myero guwer kwede wer i ot pa Lubaŋa, kun gileyo aleya nino ki nino. Petakia wod pa Mecejabel, ma en ŋat acel i kin likwayo pa Jera ma i kaka pa Juda, yam obedo lami-tam pa kabaka i kom lok ducu ma mako lwak. Jo mapol ma i kom lwak gubedo i gaŋi matino ma cok kipottigi. Jo Juda gubedo i gaŋ ma gilwoŋo ni Kiriat-arba ki i gaŋi matino ma i ŋete, ki i Dibon ki i gaŋi matino ma i ŋete, ki i Jekabjeel ki i gaŋi matino ma i ŋete. Gin bene gubedo i gaŋi magi: Yecwa, Molada ki Bet-pelet, Kajacual ma i Beer-ceba ki i gaŋi matino ma i ŋete, Jiklag Mekona ki gaŋi matino ma i ŋete, En-rimmon, Jora, Jarmut, Janoa, Adulam ki gaŋi matinoma i ŋetgi ducu, Lakic ki poto ma i ŋete, ki Ajeka ki gaŋi matino ma i ŋete. Gin gugony gubedo nia Beer-ceba nio kwede wa i no ta pa Kinom. Jo Benjamin bene gubedo i Geba nio kwede yo tuŋ anyim, i Mikmac, Aija, Betel ki gaŋi matino ma i ŋete, Anatot, Nob, Anania, Kajor Rama, Gitaim, Kadid, Jeboim, Nebalat, Lod, ki Ono, nota pa lutic diro. Dok dul jo pa Lulevi mukene ma i Juda giribogi woko i kom jo Benjamin. Magi aye ajwagi pa Lubaŋa ki Lulevi ma yam gua ki i opii ma gudwogo kacel ki Jerubabel wod pa Cealtiel ki Yecwa: Ceraya, Jeremia; Ejira, Amaria, Maluk, Katuc, Cekania, Rekum, Meremot, Iddo, Ginetoi, Abija, Mijamin, Maadia, Bilga, Cemaya, Joyarib, Jedaya, Calu, Amok, Ilkia, Jedaya. Jo magi aye gubedo ludito pa ajwagi ki pa utmegigi i kare pa Yecwa. Jo magi aye Lulevi: Yecwa, Binui, Kadmiel, Cerebia, Juda, ki Matania, ma en ki utmegine obedo ŋat acel ma loyo lok i kom wer me lega me pwoc ma giwero bot Lubaŋa. Bakbukia, ki Uno ma utmegigi bene gicuŋ tuŋcel ma gikemme kwedgi i kare me ‘Lega, Yecwa onywalo Joyakim, Joyakim onywalo Eliacib, Eliacib onywalo Joyada, Joyada onywalo Yonacan; ki Yonacan onywalo Jadua. I kare ma Joyakim obedo ajwaka madit, ajwagi magi aye onoŋo gin ludito ma loyo doggola pa kwarogi: i kaka pa Ceraya, Meraya, i kaka pa Jeremia, Anania; i kaka pa Ejira, Meculam, i kaka pa Amaria, Yekokanan; i kaka pa Maluki, Yonacan; i kaka pa Cebania, Yucepu; i kaka pa Karim, Adna; i kaka pa Merayot, Kelkai; i kaka pa Iddo, Jekaria; i kaka pa Gineton, Meculam; i kaka pa Abija, Jikri; i kaka pa Miniamin, i kaka pa Moadia, Peletai; i kaka pa Bilga, Camua; i kaka pa Cemaya, Yekonatan; i kaka pa Joyarib, Matenai; i kaka pa Jedaya, Uji; i kaka pa Calai, Kalai; i kaka pa Amok, Eber; i kaka pa Ilkia, Kacabia; i kaka pa Jedaya, Netanel. Gicoyo nyiŋ ludito ma giloyo jo me doggola pa kwaro pa Lulevi woko ducu kikore, i kare me kwo pa Eliacib, Joyada, Yokanari, ki Jadua. Dok bene gicoyo nyiŋ ajwagi ducu nio wa i kare me loc pa kabaka Dario me Percia. Likwayo pa Levi ma giloyo doggola pa, kwarogi gicoyo nyiijgi woko i buk me Tekwaro nio wa i kare pa Yokanan wod pa Eliacib. Lulevi onoŋo giribogi woko gubedo i dul mapatpat ma lulocgi i dog tic obedo Kacabia, Cerebia, ki Yecwa wod pa Kadmiel. Dul aryo gipako Lubaŋa ki wer lawaŋacel kun giloco wer aloca, ma gimiyo pwoc bot Lubaŋa, kun gilubo cik ma kabaka Daudi ma en dano pa Lubaŋa yam ociko, Jo magi aye gubedo lugwok-doggola me ot: pa Lubaŋa, dok bene onoŋo gikuro ot kano jami ki i doggola me ot pa Lubaŋa: Matania, Bakbukia, Obadia, Meculam, Talmon, ki Akub. Jo magi gubedo i kare pa Joyakim, wod pa Yecwa ma en wod pa Yekojadak, ki i kare pa Nekemia ma obedo laloc, ki i kare pa Ejira ma en obedo ajwaka dok bene obedo lapwony-cik pa Lubaŋa, I kare me kwero cel me Jerucalem, gikelo Lulevi ducu ki i kabedo ducu ma yam gibedo iye, wek dano acel acel okwer nino man ki yomcwiny, ki wer me miyo pwoc, kacel ki wer ma gigoyo ki atego agoya-gu, ki naŋa ki opuk-gu, Jo me doggola pa luwer gua ki i kabedo ducu murumo Jerucalem, ki i gaŋi ducu pa jo Netopa; ki jo mukene gua ki i Bet-gilgal ki i lobo murumo Geba ki Ajimavet, ka ma onoŋo yam doŋ gugero iye pacogi murumo Jerucalem. Ajwagi kacel ki Lulevi gulonnye kekengi; ka dok gulonyo lwak ki dogcel ducu ki cel me gaŋ bene, An akelo rwodi me Juda aketo gucuŋ malo i wi cel me gaŋ, ka acako ketogi i dul madito aryo guwoto gurumo gaŋ, kun giwero wer me miyo pwoc bot Lubaŋa. Jo ma i buca acel guwoto ki i wi cel me gaŋ nio kwede wa i dogcel ma cito wi odur; ki Kocaya owoto kun lubo ŋegi, ka dok nucu pa rwodi me Juda gulube. Ajwagi magi ma gubedo ka kuto tum aye dok gulubo: Ajaria, Ejira, Meculam, Juda, Benjamin, Cemaya, ki Jeremia, Ka dok ajwagi ma gubino gulubogi ma gubedo ka kuto tum obedo Jekaria wod pa Yonacan, ma wod pa Cemaya, ma wod pa Matania, ma wod pa Mikaya, ma wod pa Jakur, ma wod pa Acap, kacel ki jo magi ma gin jo me kaka ne ma gulube: Cemaya, Ajarel, Milalai, Gilalai, Maai, Netanel, Juda ki Kanani; gubino ma gumako jami me wer pa Daudi ma en dano pa Lubaŋa. Ejira ma en lapwony-cik pa Lubaŋa owoto mere anyim obedo ka telo wigi, Ka guo i Dogcel me Waŋ It guwoto atir guito i kom rwom ma cito i gaŋ kai pa Daudi, ci gukato ot kai pa Daudi woko guwok ki malo, ka gudok cen i kom cel ma cok ki Dogcel me Pii ma tye yo tuŋ wokceŋ me Jerucalem. Jo ma i dul mu kene ma gubedo ka miyo pwoc bot Lubaŋa guwoto gudok yo tuŋ lacam, ka doŋ an, kacel ki nucu pa lwak wacako lubogi. Wawoto ki i wi cel ma malo i nyim Lubele me Keno, wao kwede i kom cel malac, ki kunnu wawoto wakato ki i wi dogcel pa Epraim wawok ki i dog gaŋ macon, ka wao kwede i Dogcel me Rec, ka wawok ki i ŋet Lubele ma gilwoŋo Kananel ki i ŋet Lubele ma gilwoŋo Miya, ka wacito wao kwede wa i Dogcel me Romo; ka doŋ wabino wagiko wotwa cok ki dogcel pa lukurpiny, Kit meno lwak ducu ma gitye i dul aryo-ni ma gubedo ka miyo pwoc bot Lubaŋa guo i kabedo ka ma ot pa Lubaŋa tye iye, an kacel ki nucu ludito pa lwak onoŋo watye kacel. Ajwagi magi onoŋo gitye i dul ma mera: Eliakim, Maaceya, Miniamin, Mikaya, Elioenai, Jekaria ki Anania, ma gumako tum; ki Maaceya, Cemaya, Eleajar, Uji, Yekokanan, Malkija, Elam ki Ejer, Luwer guwero wer ki dwangi maloŋo adada ma Jejrakia aye obedo ka telogi ki wer. I nino meno gityero gitum mapol, dok lwak bene gubedo ki yomcwiny madwoŋ, pien Lubaŋa omiyo cwinygi obedo yom twatwal. Mon kacel ki litino bene cwinygi obedo yom matek i kare meno me kwero cel me gaŋ. Mumiyo woo me yomcwiny ma jo gubedo ka daŋŋe kwede i Jerucalem owinnye wa i kabedo ma tye ka mabor. I kom nino meno giyero jo ma giloyo kicika odi me kano jami, ka ma gigwoko iye jami ma gimiyo me kony pi ot pa Lubaŋa, kal manyen ki nyig yat mukwoŋo cek i mwaka acel acel, kacel ki dul acel me apar, me keto i igi jami ducu kit macalo cik mito pi konyo ajwagi ki Lulevi, kun lubo kit wei potti ma i gaŋi matino. Jo Juda cwinygi obedo yom twatwal i kom ajwagi ki Lulevi ma gubedo ka tic. Gin gutiyo gin ma Lubaŋagi ocikogi, dok bene gutiyo tic me lonyo dano, kit macalo yam luwer ki lugwok-doggola gutimo, kit macalo con Daudi ki wode Solomon guciko, I kare pa Daudi ki Acap ma onoŋo ladit me wer, luwer onoŋo giwero wer me pak ki me miyo pwoc bot Lubaŋa. I kare pa Jerubabel ki i kare pa Nekemia jo Icrael ducu gubedo ka miyo jami macalo mot nino ducu pi konyo luwer me ot pa Lubaŋa, ki pi lugwok ot pa Lubaŋa. Lwak gumiyo gityer maleŋ bot Lulevi, ki Lulevi Pene gumiyo dul ma mitte bot ajwagi ma gin likwayo pa Aron. I kare meno gikwano cik pa Moses bot lwak wek guwiny; ci gunoŋo i dul mo ka ma gicoyo ni pe giye dano mo ma en jo Ammon kadi ki jo Moab mo me donyo i cokke pa lwak ma gin jo pa Lubaŋa. Lok man gicoyo pien onoŋo jo Ammon ki jo Moab yam gukwero miyo cam ki pii bot jo Icrael i kare ma gia woko ki i Ejipt. Gin guwilo Balaam me ceno jo Icrael, ento Lubaŋawa oloko cenowaŋi odoko gum botwa. I kare ma jo Icrael doŋ guwinyo gikwano cik, ci gucako poko jo ma gin likwayo pa lurok woko ducu ki i kom jo Icrael. I kare ma lok man peya otimme, onoŋo ajwaka Eliacib ma yam giketo en me loyo kicika ma i ot pa Lubaŋa, omako larem gin ki Tobia. En oyu bo kicika acel malac pi Tobia, ma yam onoŋo obedo me gwoko jami macalo gityer me moko kwon ki odok luban ma gityero, jami ma gitiyo kwedgi i ot pa Lubaŋa, ki dul acel me apar me kal, koŋo vino ki moo ma yam gimiyo bot Lulevi ki luwer ki lugwok-doggola pi lubo cik, kacel ki jami me mot pi konyo ajwagi, I kare ma lokke timme onoŋo an ape i Jerucalem, pien i mwaka me pyeradek wiye aryo me loc pa Aritakcec kabaka me Babilon onoŋo acito ka tito lok man bot kabaka. I kare mo alego kabaka ni adok cen, ci en oye omiyo adok cen i Jerucalem, ci cut anoŋo ni Eliacib otimo bal me ye ni Tobia obed i kicika acel i dyekal ma i ot pa Lubaŋa, Kiniga omaka matek, ci abolo jami pa Tobia me ot woko ducu ki i kicika meno, Dok amiyo cik cut me lonyo kicika ducu; ka doŋ acako dwoko iye jami ma gitiyo kwedgi i ot pa Lubaŋa, kacel ki gityer me moko kwon ki odok luban. Dok bene anoŋo ni Lulevi kacel ki luwer ma gubedo ka tic gua woko ki i Jerucalem gudok cen i pottigi, pien lwak pe gumiyo dul ma giciko me amiya ki Lulevi. Ci an acako da i kom ludito ma giloyo lwak kun awacci, “Piŋo wuweko gibwoto ot pa Lubaŋa?” Acako coko Lulevi kacel ki luwer adwokogi cen i ot pa Lubaŋa ci aketogi i dog ticgi i kabedogi. Jo Juda ducu gukelo dul acel me apar me kai, kono yino ki moo i kicika odi me kano jami. Aketo jo magi me loyo tic i kom kicika odi me kano jami: Celemia ma en ajwaka, Jadok ma lapwony-cik ki Pedaya ma en Lalevi. Dok aketo Kanan wod pa Jakur, ma wod pa Matania, me bedo lakonygi, pien onoŋo dano ducu giŋeyo ni gin jo ma lugen; ticgi obedo me poko jami bot utmegigi. Ai Lubaŋana, po pira i kom lok man, pe ijwa ticca mabeco ma doŋ atyeko tiyone me yubo ot pa Rwot Lubaŋana ki pi ticce woko. I kare meno abedo ka neno jo mapol ma i Juda gubedo ka biyo kono yino i bur ka ma gibiyo iye i nino me cabit, kun jo mukene guyweko nyig kai, kono yino, nyig olok, nyig oduro ki kit kwa yec ducu mapatpat gutweyo i wi kana gutero i Jerucalem, i nino me cabit. Ci an ajukogi bene ni pe gucat cam i nino meno. Jo mogo ma gua ki i lobo ma orumo lobo Turo onoŋo bene yam gibedo i Jerucalem, ci gukelo rec ki kwa jami ducu me acata, ci gucato bot jo Juda ki i Jerucalem i nino me cabit. Omiyo akeco matek i kom ludito me Juda kun awaco botgi ni, “Man kit gin marac aŋo ma wutye ka tiyone-ni, ma wupvedo kwede cen cabit-ti? Lubaŋawa mo no pe okelo can man i komwa ki i kom gaŋ man ni pien kwarowa bene yam gutiyo kit meno? Wun dok wutye ka medo akemo pa Lubaŋa ni obin i kom jo Icrael pi pyedo cen cabit.” Amiyo cik ni i acakki cabit ducu, tekke piny doŋ mito yuto, dogcel ducu myero gilor woko, ma pe dok myero giyabgi nio wan ma nino me cabit oka to, Aketo jona mogo ka kuro dog gaŋi me neno ni yec mo pe gikelogi i gaŋ i cen cabit. Lucat-wil ki lucat jami ducu ma kitgi patpat ma gukelo jamigi gubuto i ne gaŋ me Jerucalem, kicel nyo kiryo. Ento ajukogi kun apenyogi ni, “Piŋo wun wubuto woko i ne gaŋ i nyim cel? Ka dok wumedde ka timo kit meno ci abilweny kwedwu ki tek.” Nia i kare meno pe dok gudwogo cen i cen cabit. Amiyo cik bot Lulevi ni myero gulonnye kekengi ci gucit ka kuro dogcel ducu, me neno ni gigwoko nino me cabit obedo maleŋ, Ai Lubaŋana, po pira, ki pi lok man bene, dok ilar kwena pi dit me mar meri ma pe lokke. I kare-nu bene aneno co mapol ma gin Lujudaya gunyomo anyira Acidod, Ammon ki Moab, gudoko mongi. Omiyo nucu pa litinogi gubedo ka loko leb pa jo Acidod, ki leb oa jo mukene ma doŋ pe gitwero loko, Leb Ibru ma en leb pa jo Juda. Akeco i komgi omiyo acenogi woko kun apwodo jo mogo ki i kingi, dok aputo yer wigi woko; amiyo gukwoŋo kwoŋ i nyiŋ Lubaŋa, kun awacci, “Wun pe wubimiyo anyirawu bot awobegi ni gunyom, dok gin bene pe gukwany anyirawu me anyoma pi awobegi kadi wun pe myero wunyomme kwedgi. Solomon yam pe otimo bal pi lok pa mon ma gin anyira rok? I kin rok mapol onoŋo pe tye kabaka mo macalo Solomon pien Lubaŋa omaro Solomon makato omiyo Lubaŋa oketo en obedo kabaka ma loyo Icrael; ento kadi bed kumeno mon ma gin anyira rok mukene gumiyo en opoŋo i bal. Wun bene wumito wan walub lanen me gin marac ma wun wutimo, wek pe walub cik pa Lubaŋawa, pi nyomo anyira pa lurok me bedo monwa?” Dok dano mo acel i kom likwayo pa Yekoyada, wod pa Eliacib ajwaka madit, onoŋo onyomo nya pa Canbalat ma jo Bet-koron, ci aryemo en woko ki bota. Ai Lubaŋana, in ipo pigi, pien doŋ gubalo nyiŋgi woko me bedo ajwagi, dok bene gubalo gicikke ma iketo i kin in ki ajwagi kacel ki Lulevi. An doŋ alonyo jo Icrael woko kit meno i kom gin ducu ma obedo pa lurok, ka acako moko tic pa ajwagi ki Lulevi, kun dano acel acel ŋeyo dog ticce ma myero eti. Ka dok ayubo kit ma myero gikel iye yen me gityer i kare ma mitte kikome, kacel ki gityer me cam me wi mwaka ma okwoŋo cek. Ai Lubaŋana, doŋ ipo pira, itima maber. Man lok mutimme i kare pa Akacwero ma yam loyo piny nia ki i India nio kwede wa i lobo Etiopia, kun loyo dul lobo mapat-pat ma romo miya acel ki pyeraryo wiye abiro kulu, I kare meno kabaka Akacwero obedo i wi kom kerre i gaŋ kalle i Cuca. I mwaka me adek me locce en ocako tedo karama pi rwodine ki ludito wi ticce ducu; ludito wi mony me Percia ki me Media gubino iye, kacel ki ludito me awora ki lulo dullobo mapatpat ducu. En obedo ka nyuto botgi lonyo ki deyo ma tye i te kerre ki dit me locce, ki woro ma lwak omiye, pi lwak nino mapol, nino miya acel ki pyeraboro kulu. Ka kare meno ducu doŋ otum, kabaka ocako tedo karama pi jo ducu ma gibedo i gaŋ madit me Cuca, jo madoŋo ki matino. Obedo kwedgi pi nino abiro i dyekal ki i poto me ka namo ma tye i ŋet ot mere. Dyekalle gidero ki cuka boŋo pamba matarre ki boŋo ma bulu ma gitweyo ki tol uci camanini ki tol ma lamar lamar ma girwako i agit me ryal ma i kom wir ma gitiyo ki got mapwot me wel. Gi-bedo onoŋo tye ma gitiyo ki jabu ki ryal. Ka ma gicibogi iye onoŋo gipeto iye godi ma gidero ki kidi matino makwar ki matar, ki gin mukene ma ryeny ki ki di matino me wel. Gikelo ginamata i kikopo mejabu ma kitgi patpat; kabaka onoŋo omiyo gionyo koŋo vino mabup twatwal muporo lonyone. Koŋo vino bene gimato ma lubo cik, kun pe gidiyo dano mo tektek; pien onoŋo kabaka omiyo cik bot ludito tic ducu ma i gaŋ kalle ni dano acel acel omat kit ma cwinye mito. Vasti ma en aye daker otedo karama bene pi mon, obedo kwedgi i gaŋ kal pa kabaka Akacwero. I nino me abiro me karama meno, ma cwiny kabaka doŋ odpko yom ki mat, en ociko Meuman, Bijita, Karbona Bigita, Abagita, Jetar ki Karkac, ma gin aye ludito kal abiro ma gikologi ma gitiyo bot kabaka Akacwero, ni myero gukel Vasti ma daker mere i nyime, kun girwako lalukanane me ker i wiye, wek onyute bot lwak jo ma rokgi patpat ki bot rwodi wek gunen kit ma dakone ber kwede, pien mwonya mada me anena. Ento Vasti okwero lubo cik pa kabaka ma onoŋo ooro ludito kalle bote-ni, ci pe obino. Pienno omiyo kiniga omako kabaka mada, cwinye owaŋ matek. Ci kabaka ocako lok ki luryeko ma giŋeyo lok me kare mapatpat, pien meno obedo kit pa kabaka; kare ducu en penyo lok bot jo ma giŋeyo cik ki kit me ŋolo kop, Jo ma cok kwede gin aye Karcena, Cetar, Adimata, Tarcic, Merec, Marcena ki Memukan, ma gin rwodi pa jo Percia ki Media ma gitye ki twero me bino bot kabaka i kare mo keken, ludito ma gikwoŋo nyim jo mukene ducu ma i kerre pi ditogi. Openyogi ni, “I te cik myero gitim gin aŋo i kom daker Vasti, pien pe olubo cik pa kabaka Akacwero ma onoŋo ooro ludito kalle bote pi lwone?” Ci Memukan odok iye i nyim kabaka ki rwodi ni, “Daker Vasti pe otimo bal bot kabaka keken, ento bot rwodi ducu me rok ducu ma i dul lobo ducu ma kabaka Akacwero loyo-ni; pien tim man ma daker otimo-ni lokke binene bot mon ducu, miyo gibicayo coggi ki i waŋgi atyer kun giwacci, ‘Kabaka Akacwero owacci gikel daker bote, ento dako okwero bino woko.’ Wa tin kikome mon madito pa jo Percia ki Media ma gutyeko winyo tim pa daker gibitito pire bot rwodi ma i te locpa kabaka, ci meno binyayo cac ki kiniga madwoŋ mada. Ka ce ineno ni ber, wek gicwal cik ma iketo pi ditti in kabaka, dok wek gico i kin cik pa jo Percia ki jo Media ma pe doŋ gitwero lokoneni, daker Vasti doŋ pe myero oo i nyim kabaka Akacwero. Dok wek kabaka omi ditte me bedo daker bot dako mukene ma dok ber kato en woko. Ka cik ma kabaka biketo-ni gibitito pire romo lobo ducu ma i te kerre, kit macalo ditte tye kwedeni, ci bimiyo mon ducu woro coggi, jo me rwom ma malo ki me rwom ma piny.” Lok meno oyomo cwiny kabaka ki rwodi, ci kabaka otiyo kit macalo Memukan owaco. Ocwalo waraga i kabedo ducu ma en loyo, kun onoŋo gicoyo bot jo me dul lobo acel acel ki kit nukuta ma jo kunnu giŋeyo, ki i leb mapatpat ma oporo rok mapatpat ducu. Ocoyo ni laco acel acel myero obed rwot i ode, dok ni olok lok kun lubo leb pa lutugi. Lacen ki i ŋe lok man, i kare ma kiniga pa kabaka Akacwero doŋ opye, en ocako po pi Vasti ki gin ma ceŋ otimo, ki gin ma giciko i kome. Ci lutic pa kabaka ma gitiyo bote guwacci, “Myero giyeny anyira pi kabaka, anyira ma mwonya ma pud gudoŋo adoŋa, Wek kabaka oyer ludito oketgi i dul lobo acel acel ma en loyo, gucok anyira magi ducu i ot pa mon i gaŋ kalle Cuca, gibed i te Loc pa Egai ladit kai ma gwoko mon pa kabaka. Myero gipok botgi moo ma ŋwece kur me wirregi, ci wek nyako mo ma oye waŋ kabaka odok daker ma ka Vasti.” Lok man oyomo cwiny kabaka, ci otimo kumeno. Onoŋo tye Lajudaya mo ma bedo i gaŋ madit me Cuca ma nyiŋe Mordekai. Wonne obedo Jair, wod pa Cimei ma wod pa Kic me kaka pa jo Benjamin. I kare ma Nebukadnejar kabaka me Babilon otero Yekonia kabaka me Juda i opii, kun otere i kin lwak jo mukene ma okwanyogi ki i Jerucalem onoŋo Mordekai obedo i kin jo ma gitero, En onoŋo opito Adaca, ma en aye Esta, nya omin wonne, pien onoŋo pe tye ki wonne kadi minne. Nyako-ni onoŋo ber dok mwonya mada; i kare ma wonne ki minne guto woko Mordekai oloko en odoko macalo nyare. Doŋ i kare ma kabaka oketo cikke lokke oywek, ma doŋ gicoko anyira mapol i gaŋ madit me Cuca, giketogi i cin Egai ma lagwok mon pi kabaka, Esta bene gitero i gaŋ kai kunnu, gikete i cin Egai, Ci nyako-ni oyomo cwinye twatwal, cwinye opwoye mada, omiyo en omine moo wirre mapatpat oyotoyot, kacel ki cam muromo pi en, dok oyero aŋeca abiro ki i gaŋ kal pa kabaka pi konyo en, ci omiyo en ki aŋecane kabedo maber makato i gaŋ pa mon pa kabaka. Esta pe onyuto rokke, kadi ki wat mere, pien Mordekai ociko en ni pe onyuti. Doŋ nino ducu Mordekai woto i ŋe cel me gaŋ pa mon wek ene kit ma Esta tye kwede ki gin ma timme ikome. Kare ma giciko pi gwoko mon pi yubo bergi oromo mwaka acel kulu; pi dwe abicel giwirre ki moo murra, dok pi dwe abicel mukene gitiyo ki moo mapatpat ma ŋwecgi kur ki moo ma mon wirre kwede. Ka lacen gitero nyako acel acel bot kabaka Akacwero ka karene oromo. Ka kare pa nyako mo oromo me cito ka nenne ki kabaka, giye en tero kit jami ducu ma iye mito ma en a kwede ki ka ma gigwoko iye mon cito kwede i gaŋ kai pa kabaka. En ci to otyeno ci dwogo cen odiko cito i kabedo me aryo ma gigwoko iye mon, ma lagwok mon ma kakany nyiŋe Ca-acgaj. En dano ma gikolo ma gwoko mon aŋeca pa kabaka. Ka nyako doŋ odwogo pe dok dok cen bot kabaka, kono nyo ka kabaka doŋ mito en ce olwoŋo en ki nyiŋe. Ka nino pa Esta nya pa Abikail omin won Mordekai, ma Mordekai oloko en odoko nyare, oromo me cito ka neno kabaka en pe ocokke ki gin mo openyo mere ladit Egai ma gikolo ma en aye lagwok mon pa kabaka, ci olubo tamme. Dano ducu ma guneno Esta gupwoye mada. I kare ma gitero Esta bot kabaka Akacwero i gaŋ kai kerre i dwe me apar, ma en aye dwe me Tebet, i mwaka me abiro me loc pa kabaka, kabaka ocako maro Esta makato mon mukene-gu ducu. Esta onoŋo kica ki gum madit mada ki bote, makato anyira mukene ducu. Ci doŋ kabaka otugi kwanyo lalukana oruko i wiye, oketo en me bedo daker ka-ka Vasti. Ci kabaka otedo karama madit mada ki rwodine ki ludito wi ticce ducu; man obedo karama me woro Esta, Omiyo bene yweyo i dul lobo ducu ma en loyo, dok opoko mot kit macalo lonyo me kerre tye kwede. I kare ma gicoko anyira kacel tyen me aryone, gimiyo bot Mordekai dit i te loc pa kabaka. Esta onoŋo pe otito kit watte nyo rokke, kit ma Mordekai onoŋo ocike kwede; pien Esta onoŋo winyo Mordekai kit ma yam opite kwede. I nino mo onoŋo Mordekai obedo i dog tic pa kabaka, Bigitan ki Terec, jo aryo ma gikologi ma gigwoko doggola pa kabaka gubedo ki kiniga, ci guyenyo yo me neko kabaka Akacwero woko. Lok man Mordekai oneyo woko ci otito woko ki Esta daker, ci Esta otito ki kabaka kun waco ni Mordekai aye otitte. Ka giyenyo tyen lok man ginoŋo ni ada, ci jo aryonu ducu giyutogi woko i yat me deyo dano. Lok man gicoyo i buk me Lok Mutimme i nyim kabaka. Lacen ki i ŋe meno kabaka Akacwero omiyo dit ki Aman ma jo Agag, wod pa Amedata, omedo rwomme omiye tic me loyo rwodi ducu ma i te locce. Doŋ lutic pa kabaka ma gitiyo tic i te locce gikulle piny giworo Aman, pien kabaka onoŋo ociko kumeno. Ento Mordekai pe okulle piny pi wore, Ci lutic ma gitiyo i te loc pa kabaka gupenyo Mordekai ni, “Piŋo ituro cik pa kabaka?” Gubedo ka lok bote nino ki nino ento en pe owinyo, mumiyo gucako tito bot Aman me neno ka en twero ye ni Mordekai otim kumeno, pien Mordekai onoŋo otito botgi ni en Lajudaya, Ka Aman oneno ni Mordekai pe kulle piny pi wore, kiniga ocako make mada. Ento pe omito ni enek Mordekai kene; macalo doŋ oniaŋ ni Mordekai Lajudaya, omito ni enoŋ yo me neko Lujudaya ducu ma i te loc pa kabaka Akacwero. I dwe mukwoŋo, ma en aye dwe me Nican, i mwaka me apar wiye aryo me loc pa kabaka Akacwero, gicako bolo kwir ma gilwoŋo ni Pur i nyim Aman nino ki nino, Gibedo ka bolone dwe ki dwe, nio ka ogik i kom dwe me apar wiye aryo, ma en aye dwe me Adar. Ci Aman ocako tito bot kabaka Akacwero ni, “Tye rok mo ma guket woko ata i kin rok mu kene mapatpat ma i dul lobo ducu ma i te kerri. Cikgi pat ki cik pa rok mukene ducu, dok pe gigwoko cikki, in kabaka; doŋ kony mo pe boti me weko ni jo meno gubedi. Ka kabaka oye, myero oket cik me tyekogi woko, ci abiculo talanta alip apar me ryal bot jo ma giloyo tic pa kabaka, wek guket i ot kano lim pa kabaka.” Ci kabaka owoto agit ki i ciŋe, omiyo bot Aman ma jo Agag, wod pa Amedata, lamerok pa Lujudaya. Ci kabaka owaco bot Aman ni, “Lim ducu gibimini, ki rok meno bene, wek iti kwedgi kit ma ii mito.” Gicako lwoŋo lukaran pa kabaka i nino dwe apar wiye adek me dwe mukwoŋo, ci gucako coyo cik kitmacalo Aman ociko ducu bot luloyo madoŋo pa kabaka, ki bot lulo dul lobo mapatpat ducu, ki bot rwodi ma loyo rok mapatpat ducu, kun onoŋo gicoyo bot jo me dul lobo acel acel ki kit nukuta ma jo kunnu giŋeyo, ki i leb mapatpat ma oporo rok mapatpat ducu. Gicoyo i nyiŋ kabaka Akacwero, ci gimwono kun gidiyo agit pa kabaka i kom odok. Gimiyo luter-waraga guriŋo ki waraga i dul lobo ducu ma i te loc pa kabaka ni myero ginek, gityek dok gijwer Lujudaya wo ko ducu, jo matino ki madoŋo, mon wa litino, i nino acel keken, i nino dwe apar wiye adek me dwe me apar wiye aryo, ma en aye dwe me Adar, ci giyak jamigi woko bene, Gipoko kopi me waraga meno i dul lobo acel acel me yeko lok man doŋ obed macalo cik, wek rok ducu gubed ma guterre pi nino meno, Luterwaraga guriŋo oyotoyot mada pi cik pa kabaka, dok cik meno gimiyo oneŋe i gaŋ madit me Cuca bene, Aman ki kabaka gubedo megi piny ka mat, ento jo ma tye i gaŋ me Cuca gubedo ka cabbe megi acaba. Ka Mordekai oŋeyo gin mutimme ducu, oyeco boŋŋine woko ci ocako ruko boŋo cola ki onyo buru i wiye, ocito kwede i dye gaŋ madit, kun daŋŋe ki koko ki cwercwiny. Ocito kwede wa i dogcel pa kabaka; noŋo cik okwero ni dano ma oruko boŋo cola pe odony i cel pa kabaka. I dul lobo acel acel, ma lok pa kabaka oo botgi ki cik man, obedo kumo madit mada i kin Lujudaya, Guri kec, gukok, gukumo, ci polgi guruko boŋo cola kun gubuko wigi ki buru. I kare ma aŋeca pa Esta ki luticce ma gikolo gubino gutitte, daker oniŋnye mada ki cwercwiny, ci en ocwalo boŋŋi ni Mordekai oruki wek oluny boŋo cola woko, ento Mordekai pe ogamogi. Lacen Esta olwoŋo Atak, ŋat acel i kom lutic pa kabaka ma gikolo, ma onoŋo gimiyo bote me bedo laor, ci ocwale ka penyo Mordekai gin aŋo mutimme, pi ŋo en timo kumeno, Atak ocito bot Mordekai i dye bar malac me gaŋ madit, i nyim dogcel pa kabaka. Mordekai otitte gin ducu mutimme i kome, ki wel lim kikome ma Aman ocikke me culone i ot kano lim pa kabaka pi neko Lujudaya. Mordekai bene omine kopi me waraga me cik ma gipoko i Cuca pi nekogi, wek en onyut ki Esta, oniaŋ lok meno, wek ocik Esta ni ocit bot kabaka obak doge, wek kabaka otim kica ki jo me rokke. Ci Atak ocito otito lok man ki Esta kit ma Mordekai owacce-ni. Cutcut Esta oloko ki Atak kun cwalo kwena bot Mordekai ni, “Lutic pa kabaka ducu ki dano ma i dul lobo ducu ma i te locce giŋeyo ni kit dano mo, laco nyo dako, ma ocito bot kabaka, ka odonyo wa i dyekal ma i iye ma pe gilwoŋe alwona, tye mere cik acel keken ma omako dano ducu, ni, dano-nu myero ginek woko, kono nyo ka kabaka oilo odoo kerre me jabu tuŋ bote, en aye twero kwo, Ento an pud peya gilwoŋa i nyim kabaka pi nino pyeradek kulu.” Ci gitito ki Mordekai lok ma Esta owaco, Mordekai odwoko lok ni gitit bot Esta ni, en pe otam ni etye i gaŋ kal pa kabaka nyo miyo ebiloyo makato Lujudaya mukene ducu. Pien ka eliŋ i kare ma kit man kony ki lar bibino bot Lujudaya ki i kabedo mukene, ento en ki ot pa wonne gibito woko. Aŋa kono ma ŋeyo ka nyo gimiyo en odoko daker pi kare macalo man? Esta owacci, “Titu ki Mordekai ni, ocit ogur Lujudaya ducu ma gitye i Cuca kacel, gucak ri kec pira, pe gucam gin mo dok pe gumat gin mo pi nino adek dyewor ki dyeceŋ. An bene ki aŋecana wabiri kit macalo gin giri-ni. Ci doŋ abicito bot kabaka kadi bed cik okwero. Ka doŋ ato, ci wek ato.” Mordekai ocito otiyo ducu kit ma Esta ocike kwede, kwede, I nino me adekke Esta oruko jor me kerre ocuŋ kwede i dyekal ma iye ma i gaŋ kal pa kabaka, ma opimme ki ot malac me cokke, En kabaka kono obedo i wi komkerre i gaŋ kalle ma opimme ki dog cel me gaŋ kal. I kare ma kabaka oneno daker Esta ocuŋ i dyekal, obedo ki yomcwiny madit twatwal, oilo odoo kerre me jabu ma onoŋo tye i ciŋe tuŋ bot Esta. Ci Esta onyiko oboŋo wi odoo ker. Kabaka ocako penye ni, “Kop aŋo, daker Esta? Imito atimmi gin aŋo? Gitwero mini kadi bed nucu kerra.” Ci Esta owaco ni, “Ka onoŋo ber piri, kabaka, amito ni wubin wun ki Aman i cam ma ayubo piri tin.” Ci kabaka owacci, “Wukel Aman oyot, wek, wati gin ma Esta mito-ni.” Ka kabaka gin ki Aman gucako bino ka cam ma Esta oyubo, I ka re ma gucako mato koŋo vino, kabaka openyo Esta ni, “Gin aŋo ma myero piri? Gitwero mini. Gin aŋo ma ilego? Kadi wa nucu kerra, jami ducu gitwero cobo kakare.” Ento Esta owacci, “Legana ki gin ma apenyo en aye ni, ka in kabaka itwero tima ber me ye lokka ki cobo gin ma alego, myero in kabaka idwog kany wun ki Aman diki ka cam ma abiyubo piwu, ci diki abitimo macalo in kabaka iwaco.” Ci Aman ocito ma cwinye yom mada i nino meno, Ento Aman ka oneno Mordekai i dogcel pa kabaka pe oa malo, pe kome bene oryaŋŋe pire, kiniga omake matek twatwal ri kom Mordekai. Kadi bed kit ennu, Aman ociro dok odiyo cwinye, ci ocito paco. Ooro dano ka lwoŋo lureme ki dakone Jerec, Aman ocako boko pi lonyone kit ma dwoŋ kwede, ki kwano wel awobene, rwom mapatpat ma, kabaka omiye me wore, ki kit ma omiye kwede twero mamalo ma kato rwodi ki lutic pa kabaka mukene ducu. Aman omedo doki ni, “Wa cam ma daker Esta oyubo pe oye ŋatti mo me bi no iye, kono wan ki kabaka keken. Dikini doki olwoŋa ka cam aye wan ki kabaka, Ento magi ducu pud peya berra kit macalo aneno Mordekai Lajudaya pud bedo i dogcel pa kabakani,” Ci dakone Jerec ki lureme ducu guwacci, “Yub yat me deyo dano mabor twatwal ma romo futi pyerabiro wiye abic, wek di ki odiko itit ki kabaka ni myero gide Mordekai iye; ka wek icit ki yomcwiny ka cam ma giyubo piwu wun ki kabaka.” Tam man oyomo i Aman twatwal; otugi yubo yat me deyo dano wok I dyewor meno kabaka pe onino; ci en omiyo cik ni myero gikel buk me po gin mabeco ma jo mogo gutiyo, buk me tekwaro, ci gikwano i nyim kabaka. Ci gucako noŋo ka ma yam Mordekai otito iye lok i kom Bigitana ki Terec, jo aryo ma gikologi ma gigwoko doggola pa kabaka ma guyenyo yo me neko kabaka Akacwero. Ci kabaka openyo ni, “Woro aŋo nyo dit aŋo ma gimiyo ki Mordekai pi gin ma en otiyo-ni?” Lutic pa kabaka gugamo ni, “Pe gimiye gin mo,” Ci kabaka openyo ni, “Aŋa ma tye i dyekal?” Aman aye pud odonyo i dyekal ma woko i gaŋ kal kun mito tito ki kabaka pi deyo Mordekai, i yat ma en oyubo pi deyone. Lutic pa kabaka gugamo ni, “Aman ocuŋ i dyekal ca.” Kabaka owacci, “Wulwoŋe obin kany.” Ci Aman obino, kabaka openye ni, “Myero gitim aŋo ki dano ma kabaka maro keto deyo i kome?” Aman otamo ni, “Man aŋa ma kabaka twero maro miye deyo makato an-ni?” Aman odok iye ki kabaka ni, “Dano ma kabaka maro kelo deyo i kome, myero gikel jor me ker ma kabaka oruko ki aguragura me ker ma kabaka riŋo kwede, ma giruko lalukana i wiye giruke kwede. Jor ki aguragura myero giket i ciŋ dano madit me awora pa kabaka, wek en oruk dano ma kabaka maro keto deyo i kome-ni, ci ocit kwede i dye bar malac me gaŋ madit, kun noŋo obedo i wi aguragura, ka tito i nyim dano ducu ni, ‘Man aye kit ma gibitimo ki dano ma kabaka maro keto deyo i kume:” Kabaka owacci, “Rune oyot, Aman, iom jor ki aguragura kit macalo iwaco, tugi tiyo kit meno i kom Mordekai Lajudaya ma bedo i dog ticca-ni, Pe iwek gin mo odoŋ i kom jami ducu ma ikwanogini.” Ci Aman okwanyo jor ki aguragura, ocako ruko Mordekai, ocito kwede i aye bar malac me gaŋ madit, kun Mordekai obedo wi aguragura, ci obedo ka tito ki dwan maloŋo ni, “Man kit ma gibitimo ki dano ma kabaka maro keto deyo i kome!” Lacen Mordekai odok i dogcel pa kabaka. Ento Aman orune me dok i gaŋe kun kumo, ma oumo wiye woko. Ci Aman ocako tito ki dakone Jerec ki bot lureme ducu gin ducu mutimme i kome. Lacen jo ma miye ryeko, kacel ki ki dakone, guwacce ni, “Ka Mordekai ma koni doŋ ocako loyi ki dit obedo Lajudaya, pe itwero pyem kwede, ento ibipoto i rwom ma piny twatwal i nyime.” Ma pud giloko kwede, cutcut luor pa kabaka ma gikologi gutuc guwacci, “Gimiti oyot twatwal pi karama ma Esta oyubo piri.” Kabaka gin ki Aman gucito i karama bot daker Esta. Doŋ i nino man me aryone doki, ka gitye ka mato koŋo vino, kabaka dok openyo Esta ni, “Gin aŋo ma myero piri, daker Esta? Gin aŋo ma ilego? Kadi wa nucu kerra, jami ducu gitwero cobo kakare.” Ci daker Esta owacci, “Ka in kabaka itwero tima ber me ye lokka, abako doga ni pe ineka, dok pe inek jo me rokka, Man aye gin ma alego ki boti. Pien wan doŋ gicatowa woko, an ki jo me rokka, ni myero ginekwa woko, gityekwa, gijwerwa woko. Kono nene gicatowa woko, co ki mon, macalo opii, kono pe awaco lok mo, pien can wa pe myero gipor ki rwenyo lim pa kabaka.” Ci kabaka Akacwero openyo daker Esta ni, “Aŋa ma owaco lok meno? En kono tye kwene ma ette ka timo lok ma kit meno-ni?” Ci Esta owacci, “A wayi latim aranyi, lamerok! Aman ma kite rac-ci yo!” I kare meno Aman obedo ki lworo madit mada i nyim kabaka ki daker. Kabaka oa woko ki i karama ki kiniga madit mada, okato wa i dyekal ma i ŋet ot ker; ento Aman odoŋ ka lego pi kwone bot daker Esta, pien oneno ni kabaka doŋ oyubbe me keto can i kome. Ka kabaka odwogo ki i dyekal i ŋet ot ker, ka odonyo i ot ka ma onoŋo gubedo iye ka mato koŋo vino, onoŋo Aman orumo coŋe i ŋet ki tanda ka ma Esta obedo iye. Ci kabaka owacci, “Imito timo anywar i kom daker ki i waŋa, wa i oda kikoma?” Ma pud kabaka loko aloka, gitweyo wan Aman woko cut. Ci Karbona ma en aye ŋat acel i kin dano ma gikologi ma lugwok kabaka owacci, “Tye yat me deyo dano ma Aman oyubo pi deyo Mordekai, dano ma lokke olaro kwo pa kabaka-ni, tye ocuŋ i gaŋ pa Aman, borre romo futi pyerabiro wiye abic kulu.” Kabaka owacci, “Wude en iye.” Ci gucako deyo Aman i wi yat meno ma en oyubo pi deyo Mordekai. Ci kiniga pa kabaka doŋ ocako kee. I nino-nu kabaka Akacwero omiyo ot pa Aman ma en lamerok pa Lujudaya bot daker Esta. Ci Mordekai obino i nyim kabaka, pien Esta doŋ onoŋo otyeko tito pi wat ma tye i kingi ki Mordekai. Kabaka owoto agit ma yam omiyo ki Aman woko ki i ciŋe, ci omiyo ki Mordekai. Ci Esta oketo ot pa Aman i ciŋ Mordekai. Lacen Esta dok ocako lok ki kabaka; opoto piny i tyen kabaka, ka ocako bako doge kun kok ki pig waŋe, ni myero ojuk yub marac woko ma Aman ma jo Agag oyubo pi neko Lujudaya. Kabaka oilo odoo kerre me jabu tuŋ bot Esta, ci Esta oa ocuŋ i nyim kabaka. Ci owaco ni, “Ka onoŋo ber piri, kabaka, dok ka itwero tima ber, ka in kabaka ineno ni ber, ka an ayomo cwinyi, kono gicoyo cik mejuko ‘waraga ma Aman ma jo Agag, wod pa Amedata ocoyo-ni, kun onoŋo oyubo lok ni myero ginek Lujudaya ma i dul lobo ducu ma i te loc pa kabaka, Atwero ciro niŋniŋ ma aneno can madwoŋ tye ka bino i kom rokka-ni? Atwero ciro niŋniŋ ma aneno giemito tyeko wadina woko?” Ci kabaka owaco ki daker Esta ki Mordekai ma Lajudaya ni, “Nen, doŋ atyeko miyo ot pa Aman woko bot Esta, dok bene gityeko deyo Aman woko kun gilyere i wi yat me deyo dano, pien onoŋo mito neko Lujudaya. 484 Doŋ wutwero coyo kit ma iwu mito i kom Lujudaya i nyiŋ kabaka, kun wudiyo agit pa kabaka i kom odok ma gimwono kwede waraga; pien cik ma gicoyo i nyiŋ kabaka, ki ma gidiyo iye agit pa kabaka, pe gitwero lokone.” Gicako lwoŋo lukaran pa kabaka cut i kare-nu i dwe me adek ma en aye dwe me Civan, i nino dwe pyeraryo wiye adek, ci gucako coyo cik kit ma Mordekai ociko ducu i lok kom Lujudaya bot luloyo madoŋo, bot lulo dano, ki bot rwodi ma loyo dul lobo mapatpat ducu, nia ki i India nio kwede wa i lobo Etiopia, dul lobo mapatpat ma romo miya acel ki pyeraryo wiye abiro kulu. Gicoyo bot jo me dul lobo acel acel ki kit nukuta ma jo kunnu giŋeyo, ki i leb mapatpat ma oporo rok mapatpat ducu, ki bot Lujudaya ducu i kit cocgi ki lebgi. Gicoyo i nyiŋ kabaka Akacwero kun gidiyo agit pa kabaka i kom odok ma gimwono kwede, Gicwalo ki luter-waraga ma giriŋo ki aguragura, aguragura madwir twatwal ma gitiyo kwede pi tic pa kabaka, ma ginywalogi i ot pito aguragura me ker, Pi waraga man kabaka omiyo twero bot Lujudaya i gaŋ ducu ma gubedo iye me ribbe kacel ka gwoko komgi i kom I ukworgi kun gineko, gityeko dok gijwero kit mony mo keken woko, nyo dul lobo mo keken, ma mito poto i komgi ki litinogi ki mongi, ka doki ma gimito yako jamigi, i nino acel mo, i dul lobo ducu liweŋ ma i te loc pa kaba ka Akacwero, i nino dwe apar wiye adek me dwe me apar wiye aryo, ma en aye dwe me Adar. Gipoko kopi me waraga meno i dul lobo acel acel me yweko lok man obed macalo cik bot rok ducu, wek Lujudaya gubed ma guterre mada i nino meno pi culo kwor i kom lumerokgi, Kit meno luter-waraga ma giriŋo ki aguragura madwirre ma gitiyo kwede pi tic pa kabaka, gucako riŋo oyotoyot mada pi cobo cik pa kabaka; dok cik meno gimiyo onene i gaŋ madit me Cuca bene. Mordekai okato woko ki i nyim kabaka kun oruko ruk me ker ma obedo bulu ki matar, ki twon lalukana me jabu, ki jor ma gikwoyo ki boŋo camanini maber ki boŋo ma lamar lamar, ma inoŋo mere gaŋ madit me Cuca opoŋ ki woo me yomcwiny. Lujudaya gubedo ki leŋo ki yomcwiny ki pwoc ki woro. I dul lobo acel acel ki i gaŋ madito ducu ka ma lok pa kabaka oo botgi ki cik man, Lujudaya gubedo ki yomcwiny madit mada, gutedo karama dok gubedo ki yweyo. Jo mapol i kin rok mapatpat ma i lobo guwacci gin Lujudaya, pien gubedo ki lworo Ci nino dwe apar wiye adek me dwe me apar wiye aryo oromo, ma en aye dwe me Adar. Meno aye nino kikome ma lumerok pa Lujudaya gimito ni gilogi iye pi lok me cik ma kabaka oketo, ento onoŋo olokke odoko nino ma Lujudaya aye myero gulo iye lumerokgi. I nino meno Lujudaya gucokke kacel i gaŋgi i dul lobo ducu liweŋ ma i te loc pa kabaka Akacwero, me neko jo-nu ma onoŋo mito timo aranyi i komgi. Pe tye ŋatti mo ma romo cuŋ i nyimgi, pien lworo omako rok ducu i komgi. Rwodi ducu me dul lobo mapatpat, ki luloyo madoŋo, ki lulo dano, ki lutic pa kabaka, gukonyo Lujudaya, pien lworo madit mada omakogi i kom Mordekai. Pien onoŋo Mordekai odoko dano me awora mada i ot pa kabaka, doŋ ywekane oromo dul lobo ducu, Twero pa Mordekai owoto ki medde mada. Ci Lujudaya gucako lweny i kom lumerokgi ducu; gunekogi ki pala lucwan, gutyekogi woko, gutimo gin ma igi mito i kom jo ma onoŋo gidag wangi-ni. I gaŋ kal madit me Cuca kikome, Lujudaya guneko dano ma romo miya abic, gutyekogi woko. Guneko bene Parcandata, Dalpon ki Acapata, Porata, Adalia ki Aridata, Parmacata, Aricai, Aridai ki Vaijata, ma gin aye awobe apar pa Aman wod pa Amedata, lamerok pa Lujudaya; ento pe guyako jami mo. I nino-nu kikome jo ma ginekogi i gaŋ kai me Cuca ginyuto welgi ki kabaka. Kabaka otito ki daker Esta ni, “Lujudaya guneko lumerokgi miya abic i gaŋ kai me Cuca ki awohe apar pa Aman bene, Gin doŋ gutimo gin aŋo i dul lobo mukene ma i te kerra-ni? Gin aŋo ma myero piri? Gitwero mini, Gin aŋo ma pud ipenyo? Gitwero cobone.” Ci Esta ogamo ni, “Ka kabaka oye, myero giket cik ni diki doki Lujudaya ma tye i Cuca gutim macalo tin-ni. Ki awobe apar pa Aman doki myero gilyer komgi i wi yat me deyo dano.” Kabaka oye ni myero gitim kumeno; girriiyo cik meno onene i Cuca ci gulyero kom awobe apar pa Aman i wi yat me deyo dano. Lujudaya ma onoŋo gitye i Cuca gucokke kacel doki i nino dwe apar wiye aŋwen me dwe me Adar, ci guneko dano miya adek i Cuca, ento pe guyako jami mo. Lujudaya mukene ma gibedo i dul lobo mapatpat ma i te Loc pa kabaka guŋbbe kacel bene pi gwoko komgi. Guneko dano alip pyerabiro wiye abic i kom jo ma daggi-ni, mumiyo gunoŋo yweyo i kom lumerokgi; ento pe guyako jami mo. Meno otimme i nino dwe apar wiye adek me dwe me Adar. I nino dwe apar wiye aŋwen en aye guywe iye, ci giloko odoko nino me tedo karama ki me yomcwiny, Ento Lujudaya ma onoŋo gitye i Cuca gukkeco i nino dwe apar wiye adek ki apar wiye aŋwen, mumiyo gin guywe i nino dwe apar wiye abic, ci guloko nino meno odoko nino me tedo karama ki me yomcwiny. Pi meno Lujudaya ma gibedo i caro, i kin gaŋ, gikwero nino dwe apar wiye aŋwen me dwe me Adar macalo nino me yomcwiny ki me tedo karama ki me yweyo, ki nino ma dano poko iye mot me jami mabeco bot luwotgi. Mordekai ocoyo lok magi ducu, ocwalo waraga bot Lujudaya ducu ma gibedo i dul lobo ducu ma i te loc pa kabaka Akacwero, ma gitye cok ki ma gitye ka mabor. Ocikogi ni myero gikwer nino dwe apar wiye aŋwen me dwe me Adar, ki nino dwe apar wiye abic bene me dwe meno, mwaka ki mwaka, ni gin aye nino ma Lujudaya gunoŋo iye yweyo i kom lumerokgi, dwe ma gua kwede ki i cwercwiny medwogo kwede i yomcwiny, ma gua kwede ki i kumo me dwogo kwede i kuc; wek gulok nino magi gubed nino me tedo karama ki me yomcwiny, nino me cwalo jami mabeco bot luwotgi, ki me cwalo mot bot lucan. Lujudaya guye me timo kit ma onoŋo doŋ gucako kwede ki kit ma Mordekai ocoyo botgi-ni. Pien Aman ma jo Agag wod pa Amedata, lamerok pa Lujudaya ducu, opiro lok i kom Lujudaya me nekogi woko, ci obolo kwir ma gilwoŋo ni Pur me loyo tekogi wek etyekgi woko. Ento ka Esta obino i nyim kabaka omiyo twer i coc ni lok marac ma en opiro i kom Lujudaya myero gidwok i wiye, dok ni awobe pa Aman myero gidegi woko i wi yat me deyo dano, Pienno nino-ni gilwoŋo ni Purim, pi lubo nyiŋ kwir ma gilwoŋo ni Pur. Pienno, pi lok ducu ma gicoyo i waraga-nu dok pi can ma gineno pi lok meno ki gin ma otimme i komgi, Lujudaya guye lok man ni myero obed i wigi, ki i wi likwayogi, ki i wi jo ducu ma gibiribbe kwedgi; myero gikwer nino magi aryoni, kun gilubo lok ma gicoyo i kare ma giciko mwaka ki mwaka ma pe gikeŋ. Nino magi myero gipo pigi dok gikwergi wa i kare pa likwayogi ducu i doggola acel acel, i dul lobo ducu ki i gaŋ madito ducu. Lujudaya pe myero guwek gwoko nino magi me Purim, po iye pe myero ogiki i kin likwayogi. Ci daker Esta nya pa Abikail, ocoyo waraga gin ki Mordekai ma Lajudaya, kun moko waraga man me aryo-ni i kom Purim ki twerone ducu. Gicwalo waraga bot Lujudaya ducu ma i dul lobo miya acel ki pyeraryo wiye abiro ma i te loc pa kabaka Akacwero ki lok me kuc ki ada, ni meno nino magi me Purim myero gikwer i kare ma giciko, kit ma Mordekai Lajudaya ki daker Esta guciko bot Lujudaya, ki kit ma Lujudaya onoŋo guciko pigi kengi ki pi likwayogi i kom lok ma mako kare me ri kecgi ki kokogi. Cik pa daker Esta omoko lok man me Purim, ci gicoyo gigwoko i buk. Kabaka Akacwero oketo tic muroni i lobo ki i dog namo. Gin ducu ma Akacwero otiyo pi twerone ki tekone, ki lok ducu i kom deyo madit ma kabaka omiyo ki Mordekai pi medo rwomme gityeko coyone i buk me Tekwaro pa luker me Percia ki Media. Pien Mordekai Lajudaya obedo dano me aryo ma lubo kabaka Akacwero. Obedo dano madit mada i kin Lujudaya, pol lutugi gimare, pien obedo ka yenyo yo me medo berbedo pa jo me rokke, doki loko pi kuc keken i kin lutugi ducu. Yam tye dano mo ma i lobo Uj ma nyiŋe Yubu. Dano man onoŋo pe ki bal mo, dok dano ma cwinye leŋ; en lalwor Lubaŋa, ma dag tim marac. En onywalo awobe abiro ki anyira adek. Lim ma yam tye bote obedo romi ki dyegi alip abiro, kinaga alip adek, twoni pur alip acel, megi kana miya abic, kacel ki lwak luticce mapol mada; en obedo dano madit makato jo ducu ma yo tuŋ wokceŋ. A wobene yam gimaro cito ka camo karama i ot pa ŋat acel acel i ninone; ci gicwalo kwena gilwoŋo nyimegigi adek-ki ka cam ki ka mat kwedgi, Ka kare me karamagi otum, ci Yubu yam cwalo kwena, Iwoŋogi ci lonyogi. En a malo odiko con, tyero gitum awaŋa muporo welgi ducu, pien Yubu noŋo tamo ni, gwok nyo awobene gubalo, pi yeto Lubaŋa la i cwinygi. Yubu yam timo kit meno jwijwi. I nino mo acel awobe pa Lubaŋa gubino gucuŋ i nyim Rwot, ci Catan bene obino i kingi. Rwot owaco bot Catan ni, “In ia ki kwene?” Catan ogamo dog Rwot kun wacci, “An aa ka wirre wi lobo, ki ka wot i kin piny i lobo.” Ci Rwot dok owaco bot Catan ni. “Itamo pi maticca Yubu ni meno pe tye ŋat mo macalo en i wi lobo, dano ma pe ki bal mo, dano ma cwinye atir, ma lworo Lubaŋa, dok dag tim marac?” Catan ogamo dog Rwot kun wacci, “tamo ni Yubu lworo Lubaŋa noŋo? Pe in aye irumo kome ki cel, ki ode, ki gin ducu ma en tye kwede, tuŋŋi ki tuŋŋi? In imiyo gum i kom tic me ciŋe, limme bene omedde i lobo. Ento tugi keto ciŋi cut koni, igud gin ducu ma en tye kwede, ci en yeti ki i nyimi,” Ci Rwot owaco bot Catan ni, “Nen, gin ducu ma en tye kwede tye i tweroni; kono nyo i kom en keken aye pe iket ciŋi.” Kumeno Catan oa ocito woko ki i nyim Rwot. Onoŋo tye nino mo ma awobe ki anyira pa Yubu gubedo ka cam ki ka mato koŋo vino i ot pa omingi maditte; ci fakwena mo obino bot Yubu ma wacci, “I kare ma twoni gitye ka pur, ki kana bene gicamo ka ŋetgi, ci jo Ceba gupoto i komgi, guyakogi, guneko lukwat woko ki pala lucwan: ci an kena aye abwot me bino ka titti.” Ka onoŋo pud tye ka lok, ŋat mukene dok obino ma wacci, “Mac pa Lubaŋa oa ki i polo, ci owaŋo romi ki lukwat, otyekogi woko ducu; ci an kena aye abwot me bino ka titti.” Ka onoŋo en pud tye ka lok, ŋat mukene dok obino ma wacci, “Jo Kaldaya gupokke i buca adek, ci guturre i kom kinaga, guyakogi, ci guneko lukwat ki pala lucwan; ci an kena aye abwot me bino ka titti.” Ka en pud tye ka lok, ŋat mukene dok obino ma wacci, “Awobeni ki anyirani onoŋo gitye ka cam ki ka mato koŋo yino i ot pa omingi maditte, ci nen, yamo madit obino, oŋolle ki tuŋ tim, oyoko twok ot aŋwen, ot opoto i kom litino omiyo guto; ci an kena aye abwot me bino ka titti.” Yubu oa malo, oyeco jorre, olyelo wiye, opoto piny i ŋom, oworo Lubaua. Ci owaco ni, “Yam abino noŋo nia ki i i maa, dok abidok bene noŋo. Rwot ceŋ omiyo, ci Rwot otyeko kwanyo gire; gipwo nyiŋ Rwot.” I kom lok man ducu, Yubu pe obalo, pe owaco ni Lubaŋa otimo rac. I nino mo mukene awobe pa Lubaŋa dok gubino gucuŋ i nyim Rwot, ci Catan bene obino i kingi ka cuŋ i nyim Rwot. Rwot owaco bot Catan ni, “In ia ki kwene?” Catan ogamo dog Rwot kun wacci, “Aa ka wirre wi lobo, ki ka wot i kin piny i lobo.” Ci Rwot dok owaco bot Catan ni, “Itye ka tamo pi laticca Yubu, ni meno, pe tye ŋat mo macalo en i wi lobo, dano ma pe ki bal mo, dano ma cwinye leŋ, ma lworo Lubaŋa, dok dag tim marac? En pud ocuŋ matek laboŋo bal mo, kadi bed ipiya i kome wek it yeke woko laboŋo tyen lok mo.” Catan ogamo dog Rwot kun wacci, “Del pi del! Gin ducu ma dano tye kwede en bimiyo pi kwone. Ento tugi keto ciŋi koni, igud cogone ki riŋo kome, ci en yeti ki i nyimi.” Ci Rwot owaco bot Catan ni, “Nen, en doŋ tye i tweroni; ento myero igwok kwone keken.” Kumeno Catan oa ocito woko ki i nyim Rwot, ocako yelo Yubu ki bur maraco muonyo cakke ki i dye tyene nio kwede wa i cwiny wiye. Ci en okwanyo labaltak me cwero kome, ocito obedo i buru. Mumiyo dakone owacce ni, “Pud ibicuŋ matek ma pe ibalo bal mo? Yet Lubaŋa, ci ito.” Ento Yubu ogamo dog dakone ni, “In aye iloko lok macalo mon mamiŋ ma pe giŋeyo Lubaŋa. Wabigamo gin maber ki i cin Lubaŋa, ci pe wagamo gin marac?” I can man ducu Yubu pe obalo ki doge. Ka lurem Yubu adek guwinyo pi gin marac man ducu mubino i kome gubino kun ŋat man a ki i kabedone, Erifaji Lateman, Bildad Lacua ki Jopar Lanaamat. Kumeno gurwatte kacel wek gucinyut cwercwinygi bot Yubu ki kweyo cwinye. Ci guilo waŋgi ka pud gitye ka mabor, pe guniaŋ maber ka dano ma gineno-nu aye Yubu; ci gucako koko ki dwan maloŋo, guyeco jorgi, gujuko wigi ki ŋom. Ci gubedo piny i ŋom guri bote nino abiro dyeceŋ ki dyewor, ŋat mo ma loko kwede pe, pien guneno ni aremme onoŋo dit mada. Ka man otum Yubu oŋamo doge, olamo nino ma yam ginywale iye Yubu owacci, “Wek nino ma yam ginywala iye orweny woko matwal, ki wor ma yam giloko iye ni, ‘Doŋ gigamo latin laco.’ Wek en nino ca obed macol! Lubaŋa ma tye malo pe oyeny, lenpiny mo pe omeny nino-nu. Wek mutu ki piny ma ocido licuc aye ogam. Wek pol obed i wiye, cido piny me dyeceŋ bene omiye lworo. Wor meno, wek piny ma ocido licuc omake, wek pe olim yomcwiny i kin nino me mwaka, pe obin i kin weI dwe. Eyo, wek wor meno obed lalur, dwan daŋŋe me yomcwiny pe owinnye iye, Wek jo ma gilamo nino gulam en, gin jo ma gitwero lwoŋo Min Kulu. Wek lakalatwe me kwarpiny gudok col, okur lenpiny ento pe onoŋ, pe onen waŋ cen me odiko; pien yam pe oloro doggola ma i i maa woko, kadi kano ayelayela ki i waŋa. “Piŋo pe ato i kare me nywala? Piŋo kwona pe otum cut ka aa ki i ic? Piŋŋ yam apoto i wi coŋ maa?’ Piŋo tunone ogama, wek adote? Pienno do kono ceŋ abuto piny mot lilwe, kono anino, dok kono noŋo atye ka yweyo, kacel ki luker ki luryeko me lobo, ma yam gugero odigi mabeco, nyo ki rwodi ma yam gitye ki lonyo, ma gupoŋo odigi ki limo Piŋo yam pe abedo macalo latin abwoga ma gikano, macalo latin ma pe oneno der cen?” Ki kunnu jo maraco pe doŋ gikelo ayela, ki kunnu jo muol gitye ka yweyo. Kunnu lumabuc gibedo mot kacel, ma pe doŋ giwinyo dwan ladit tic. Jo matino ki ludito gitye kunnu, opii noŋo gigonyo woko ki i twer pa rwotgi. “Piŋo gimiyo lenpiny bot ŋat ma tye ki can, piŋo gimiyo kwo bot jo ma cwinygi kec? Giparo pi to, ento to pe bino, gikwinyo ŋom pire makato pi lim mukanne. Jo-nu cwinygi kwe atika, ci cwinygi bedo yom ka giyikogi i lyel. Piŋo gimiyo lenpiny bot dano ma yo orwenye, ma Lubaŋa orume ki cel? Pien aomo cwinya macalo acamo kwon, curra mol woko macalo pii. Pien gin maca ma alworo-ni bino i koma, kit giri ma poto cwinya oetimme i koma. Kwecwiny pe bota, kadi bedo mot; pe atye ki yweyo, ento aye Eritaji Lateman ogamo doge ni, “Ka ŋat mo otemo lok kwedi, ibijul? Ento aŋa ma twero jukke owek lok? Nen, in ibedo ka pwonyo jo mapol, ci ibedo ka jiŋo ciŋ jo manyap. Dano ma oyokke mito poto in yam ijolo ki lokki, ci ibedo ka yubo dano muloc obed matek. Ento koni can doŋ obino i komi, ci pe idiyo cwinyi; ogudi, ci doŋ ibaŋŋe woko. Lworoni i kom Lubaŋa pe kwanyo par woko ki i cwinyi mono? Leŋcwinyi pe miyo ibedo ki gen? “Koŋ itam, aŋa ma pe ki bal ma yam oto? Jo ma cwinygi teŋ ginekogi woko ki ka kwene? Macalo atyeko neno-ni, jo gipuro bal ci gicoyo ayelayela macalo kodi, gikayo bene marom. Gito ki yamo yweyo pa Lubaŋa, alur doge me kinigane tyekogi. Mor pa labwor, ki dwan labwor mager doŋ oliŋ; lak litino labwor doŋ otur. Labwor matek to, pien gin ma edwar pe, litino pa min labwor guket woko ata. “Yam gikelo lok bota i muŋ, ita owinyo ka gikwilo akwila, i kin tam mua ki i lek me dyewor, i cawa ma dano nino matek. Lworo madwoŋ obino i koma, ki myelkom, omiyo cogona ducu oyeŋŋe. Tipo okato i waŋa, ci yer koma ducu oa. Lacen ocuŋ mot, ento pe apoko kit ma nen kwede. Cal gin mo onoŋo tye i nyima, piny oliŋ woko litik; lacen awinyo dwan ma wacci, ‘Tika dano ma to-ni bedo ma kite atir i nyim Lubaŋa? Dano twero bedo ma olony i nyim Lacwecee? Lubaŋa pe geno kadi wa luticce, ki lumalaikane bene en ŋolo bal. Jo ma komgi calo odi me lobo, ma gutigi gicibo i kweyo, ma ginyotogi macalo nyenye, gibedo niŋniŋ kono? I kin odiko ki otyeno gityekogi woko, girwenyo matwal kun ŋat ma paro pe. Gito woko oyot, kun peya ginoŋo ryeko, macalo kema poto ka gigonyo tolle.’ “Lwoŋ ba; tye ŋat mo ma bidokki iye? Ibilokke bot aŋa ki i kin jo maleŋ? Atika cwercwiny miyo lamiŋ to, nyeko neko dano ma tamme nok. Atyeko neno lamiŋ ma ocuŋ matek, ento oyotoyot aceno kabedone. Kuc doŋ bor ki litinone; ginyotogi woko i dog gaŋ, kun ŋat ma larogi pe. Cam ma en okayo, dano ma kec nekogi gicamo, kun gikwanyo wa i kin okuto; pi mitgi madwoŋ gilaro lonyone alara. Pien can pe a i apwa, ayelayela pe twi ki i ŋom; dano ginywalo kun kemo can macalo mac kir malo, “Ki tuŋ bota kono do ayenyo kony ki bot Lubaŋa, kono aketo lokka i ciŋe. En tiyo tic madito ma tere pe tatte, ticce me aura ma welgi pe kwanne. En miyo kot i wi lobo, cwalo pii i bar kwat. En keto jo ma tye piny i kabedo ma malo, tiŋo jo ma kumo, cibogi malo ka maber. En balo tam pa luryeko me goba, kumeno pe gicobo ticgi kakare. En mako luryeko i ryekogi kengi, macalo i owic, yub pa jo ma tamgi ogom balle woko oyot. Gin donyo i colpiny dyeceŋ, gipaŋŋe apaŋa i cwiny dyeceŋ macalo dyewor. Ento en laro litino kic ki i twergi, mayo jo ma piny obwoyo ki i cin jo magwa. Kumeno lucan gibedo ki gen, jo maraco gimiyo doggi woko. “Tye ki yomcwiny, dano ma Lubaŋajuko; pi meno pe ikwer pwony pa Won Twer Ducu. Pien en miyo ret, dok tweyo; goyo dano, ci caŋo, En bilari i kom ayela abicel, wa i me abirone bene gin marac mo pe bigudi. I kare me kec en bikoki i kom to, ki i mony en bilari ki i lak pala lucwan. En bikani ki bot anino leb, pe ibilworo layak ka obino. Kec cam ki yako jamini bimiyo inyero anyera, dok pe ibilworo lee tim. Pien in ibicikke ki gweŋ ma i poto, lee tim bibedo kwedi ki kuc. Ibiŋeyo ni kemani tye maber, ibiŋiyo dwolli ci gin mo pe ma orem. Ibiŋeyo bene ni likwayu gibibedo mapol, litino anywallini bibedo calo lum ma i tim. Ibito ma doŋ iti maber, ma komi pud tek, macalo bel ma gitero i laro ka dinone ka karene oromo, Nen, watyeko yenyo te lok man, tye ada. Winy, wek in bene iŋe piri keni.” Yubu odok iye kun wacci, “Kono ceŋ gipimo cwercwinya, kono giporo i mijan ki can ma opoto i koma! Pien kono obedo pek ma kato kweyo dog nam; en gin mumiyo cen aloko lok ata ta. Atero pa Won-Twer Ducu doŋ otuco koma, cwinya tye ka mato kwirgi; Lubaŋa doŋ o kelo i koma kit ticce ducu ma kelo lworo. Kana me tim kok ka en tye ki lum i doge? Twon dok kok ka doŋ giketo camme i nyime? Gin mabot twero camme laboŋo kado? Pig otigo lweka bille mamit? Iya pe mito wa bilone; gin calo cam ma lemo cwinya. “Ka nene Lubaŋa omiya gin ma alego bote! Kono omiya gin ma cwinya mito! Do kono Lubaŋa oye nyota woko matwal; kono oweko ciŋe otiyo ticce otyeka woko. Kono otimo kumeno, kono cwinya okwe; kono apye ki yomcwiny, kadi bed remkoma pe tima kica; pien onoŋo yam pe akwero lok ma ŋat Maleŋ owaco. Atye ki teko aŋo ma miya pud akuro? Agikki me kwona bibedo niŋniŋ, ni kono abedo ka ciro? Tekona rom ki teko me got mono? Riŋo koma rom ki mola ce? I ada pe atye ki kony mo iiya, kit gin me konya doŋ oa woko ki bota. “Ŋat ma kwero timo lawote kica noŋo oweko doŋ lworo Won Twer Ducu, Omega gubwola macalo laora kulu ma ka opoŋ, piine mol woko, two oyot; piine col pien orubbe ki pee, pee mua ki i wi got okanne iye. I kare me oro piine rwenyo woko, ka piny doko lyet pe doŋ nen. Luwot giweko yogi, giwirre ata pi yenyo pii, gicoro dye tim, girwenyo wo ko matwal. Luwot mua ki i Tema guciko waŋgi me neno lakit kulu-nu, jo mua ki i Ceba gumoko gengi i kome, Gubedo ki gen madwoŋ ento gengi oballe noŋo, ka guo kunnu, ci lewic omakogi. Wun ki tuŋ bota wurom ki laora kulu meno; wuneno can mupoto i koma, ci lworo omakowu cut. Onoŋo yam alego gin mo ki tuŋ botwu? Yam awacci wumi limwu pira me lawil loyo kop? Nyo awaco ni wulara ki i ceŋ lakworra? Nyo ni wukoka ki i ciŋ jo ma gitye ka una? “Ber wupwonya, ci abiliŋ woko litik; wunyuta bal ma apoto iye. Lok ma tye atir mit twatwal! Ento wun ka wujuka nyuto aŋo? Wumito juko lok ma giwaco awaca, kun lokka calo yamo noŋo pien piny doŋ oloya. Kono do wubol kwir i kom litino kic, nyo wulok luremwu gudok gin me acata pi lim. “Ento koni wutim ber, wunen waŋa, pien pe abiloko lok goba ki i nyimwu. Wuwek doŋ meno obedi ba, wuwek ŋolo kop i koma ma pe atir. Wulok tamwu, pien kop pe twero loya. Pud wutamo ni aloko lok goba? Can mapek poto i koma ci pe aromo poko kine? “Kwo me lobo man tek calo tic matek pa lumony; dano tyeko karene macalo lapakaca, En cal ki opii ma paro bedo i tipo, rom ki lapakaca ma tamme okemo mucara, Kumeno an gimiya abedo abeda noŋo pi lwak dwe mapol, nino ki nino aciro ayela dyewor, Ka abuto piny apenyo ni, ‘Abia malo awene?’ Ento dyewor ri nakanaka, kun abedo ka pwodde apwoda nio wa okogweno. Kwidi ki cilo ma odille kacel oboyo koma woko, del koma tal woko ci dok cwer tut Nino acel acel kato madwir makato yat cweyo boŋo, ci tum woko kun weka laboŋo gen mo. “Lubaŋa, po ni kwona rom ki yamo; waŋa pe dok bineno gin maber wacel. Ŋat ma waŋe onena pe binena doki; ibiciko waŋi pi nena, ci inoŋo an ape, Macalo pol ket ci pe dok nen, kumeno ŋat mucito piny i lyel pe kato woko. En pe dok aye i ode, kadi kabedone pe ŋeyo en doki. “Kumeno pe dok abijuko doga. Awinyo arem i cwinya, myero aloki; myero akok, pien iya kec. An abedo nam bo, nyo min kulu, mumiyo imito tweya woko? Ka awaco ni, ‘Kabutona bikweyo cwinya,’ nyo ni, ‘Arem koma bikwe ka abuto piny,’ ci in iryaŋo koma ki lwak lek ma bino i wiya, imiyo lworo maka matek pi gin ma anene dyewor. Kono do gideya woko! Twora ata awek bedo ki arem man, Adag bedo kit man; pe amito kwo nakanaka. Wek abedi, pien nino me kwona calo yamo noŋo, “Dano obedo gin aŋo, mumiyo pire bedo tek boti-ni? Piŋo iketo cwinyi i kome kuman? Ibedo ka lime odiko odiko, kun iteme teretere. “Ibibedo ka nena pi kare ma rom mene, ma pe iloko waŋi ineno cen ka mukene? Pe koŋ iweka kare manok ma rom, ma mwonyo laa keken? Ka abalo, ci atimo gin aŋo i komi, in lagwok dano? Piŋo ibaya ki toŋŋi kare ducu, macalo dano ma pwonyo lweny? Piŋo adoko calo yec mapek boti? Piŋo pe itima kica pi rocca? Dok pe ijwayo balla woko pi ŋo? Pien koni doŋ gibiyika woko; ibiyenya ento pe ibinoŋa.” Bildad Lacua ogamo doge kun waco ru, “Lok magi ibiloko nio wa awene, kun lokki winnye calo yamo madit ma kodo matek? Lubaŋa pe twero ŋolo kop atir? Won Twer Ducu timo gin ma pe kakare? Nen, litinoni gubedo ka timo bal i kome, oweko en omiyo can opoto i komgi ma oporo balgi. Ka ibiyenyo Lubaŋa, kun ibako dogi bot Won Twer Ducu, ka ii leŋ ma cwinyi atir, adada en bia ci konyi, bidwoko odi kakare pi kiti ma atir. Kadi bed yam i acakki ibedo ki jami manok, ento i agikki me kwoni ibibedo ki lim mabup. “Pienno alegi, peny kwarowa macon, ci it am ni gin aŋo ma yam kwarogi gubedo ka yenyo; pien waŋ wabedo jo ma laworo keken, pe waŋeyo gin mo, ninowa me bedo i lobo lokke calo tipo. Kono iwinyo pwony pa ludoŋo, ki lok ma giwaco pi ŋecgi matut. “Togo twero doŋo ka ma daba pe iye? Lagada doŋo ka ma pii pe iye? Ka pud gilot alota, ma peya gitoŋogi, giner woko oyot makato ginapita ducu ka pii pe. Meno aye yo pa jo ducu ma wigi wil i kom Lubaŋa; gen pa dano ma pe lworo Lubaŋa bitum. Gin ma en geno rom ki uci ma cot woko oyotoyot, nyo rom ki obwo oboropyen. En jeŋŋe i kom ode, ento ode pe cuŋ; en keto cine me makone, ento pe cun matek. Nyo en rom ki doo ma lot matek ka cen oryeny, ma jaŋe lak, rumo po to woko, Lwite odwalle i kom odur gweŋ, en bedo i kin pata, Ka gipuro woko ki kakare, kabedone bikwere woko, kun waco ni, ‘An yam peya aneni,’ ci doo mukene twi i ŋom leyo kakare cut. Meno aye yomcwiny pa dano ma pe lworo Lubaŋa, “Nen, Lubaŋa pe kwero dano ma pe ki bal; en pe mako cin jo maraco. En pud bimiyo dogi poŋ ki nyero, miyo ibidoŋo oduru me yomcwmy. Lewic bimako jo ma dagi, ki kema pa lutim maraco pe dok binen.” Yubu ogamo ni meno, “Adada aŋeyo ni tye kit meno; ento dano twero loyo kop niŋniŋ i nyim Lubaŋa? Ka ce dano mo mito pyem kwede, ci twero penyo peny alip acel kulu ma pe dano mo twero dokke iye kicel keken. Lubaŋa ryek i cwinye, dok tekone dwoŋ; aŋa ma tye ki tekcwiny ma romo loye? En kobo godi woko ma pe giŋeyo, ci lokogi woko ki kiniga. En cwalo oyeŋyeŋ yeŋo ŋom, ci puto woko ki i kabedone, dok miyo wir me te lobo ducu yeŋŋe. En ciko ceŋ, miyo pe tuc; en umo lakalatwe woko i dyewor wek pe guryeny. En oyaro polo kene, ka onyono biamwonyi me nam woko, En aye ma otiyo Oluma ki Lyeronyim, Yoggo ki lakalatwe ma ginen yo tuŋ acuc, En tiyo tic madito ma niaŋ iye tek bot dano, ki tic me aura ma welgi pe kwanne. Nen, en kato ki i ŋeta, kun pe aneno; en medde ki wot anyim, ento an pe aŋeyo. En kwanyo jami ma iye mito cito kwede woko aŋa ma twero juke? Aŋa ma twero penye ni, ‘Itimo aŋo?’ “Lubaŋa pe biloko kinigane; wa lukony pa Rakab, ma min kulu, gukulle piny i nyime, Kara man atwero gamo doge niŋniŋ, nyo yero lok ma abipido kwede i nyime? Kadi bed balla pe, pe atwero gamo doge; myero aleŋ ŋat ma odota otima kica keken. Ka ce nene ogamo doga i kare ma alwone, kono pe aye ni obedo ka winyo lokka. En bedo ka nyona ki yamo matek, ci medo ret i koma laboŋo tyen lok mo. En pe ye miya kare me yweyo, ento miyo abedo ki keccwiny keken. Ka ce obedo lweny me pyem me nyuto teko, ci nen en! Aŋa ma twero lwoŋe ka amito pido kwede? Kadi bed balla pe, ento lok ma aloko miyo kop loya; kadi bed balla pe, en twero miyo anen calo dano muŋak woko. An balla pe, omiyo pe doŋ aparo; doŋ pe amito ni abed kwo. Lokke tye acel keken; pienno omiyo awaco ni, Lubaŋa tyeko jo ducu, jo mubalo ki jo ma pe gubalo. Ka can mo opoto i kom jo ma pe ki bal, ci en nyero mere anyera, kun neno ni man keckom mukelo to atura kit meno, Gimiyo lobo i cin jo maraco; en umo waŋ luŋolkop woko; ka ce pe en, ci aŋa kono? “Nino me kwona riŋo oyotoyot kato laŋwec woko, gilwi girwenyo woko, pe gineno gin mo maber. Gicito oyot calo yeya ma gitiyo ki togo, calo ocur ma lyanne i kom lee ma en dwaro. Ka atamo ni, ‘Wiya biwil woko i kom pekona, abibedo ki yomcwiny kun abunyo abunya,’ pud dok abedo ki lworo pi arem ducu ma atye kwede, pien aŋeyo ni ibitera macalo dano ma laba!. Macalo doŋ iŋolo ni kop oloya, ayelle kono dok piŋo? Kadi bed alwokke ki pee, kadi bed alwok ciŋa ki cabun magwa, pud ibibola i bur aye, ci boŋŋina bikwero koma woko. “Lubaŋa gire pe dano calo an, ma myero agam doge, kono obedo dano, kono wapido dwede, Ŋat mo pe ma twero ŋolo lok i kinwa, ma myero oket ciŋe i komwa waŋ aryo ducu, Wek Lubaŋa pe opwoda ki odoone wek pe koma oryaŋŋe me lworo en. Miyo atwero lok laboŋo lworo mo i nyime, kun aŋeyo ni pe atye kit ma jo mogo gitamo kwede, “Adag doŋ kwona, pe abijuko kokona; abiloko lok ducu, pien cwinya doŋ odoko kec, Abiwaco bot Lubaŋa ni, pe iŋol ni kop oloya; titta gin mumi yo it ye ka pyem kweda, Tika nen ber ki boti me una, ki me ca yo tic ma in doŋ itiyo, kun tammi rwatte ki tam pa jo maraco? Waŋi rom ki waŋ dano? Ineno piny kit ma dano neno kwede? WeI nino me kwoni rom ki pa dano? Ibiri pi mwaka manok calo dano, mumi yo it ye ka roto bal i koma-ni, wek inen ka ma apoto iye? Kono iŋeyo ni an pe abalo, dok ni pe tye dano mo ma twero lara ki i ciŋi. In yam icweya ki ciŋi, ci koni doŋ ilokke, imito neka? Po ni yam icweya ki lobo; dok ibidwoka i apwa aye? Cen pe ionya woko macalo cak, ci imiyo adoko calo cak lukulu? In ceŋ iumo koma ki del ki ler riŋo, ci ikubo an kacel ki cogo ki Jer Imiyo bota kwo ki mar meri ma pe lokke ci iyelle pira, igwoko cwinya. Ento onoŋo ikano lok macalo man i cwinyi; doŋ aniaŋ ni gin mutimme-ni onoŋo ityeko yubo con. Ka apoto i bal, in ibedo ka kiya, ci pe iye weko balla mo wacel. Ka at imo gin marac can obed i koma! Ento kadi balla pe, pe atwero tino waŋa malo, pien lewic omaka, canna obwoya woko, Ka ce atiŋo wiya in itugi dwara cut, macalo labwor, ci itiyo tic me aura i koma, In ibedo ka kelo cadenni manyen pi nyutc balla, kinigani medde ameda i koma, kun ikelo buca mony manyen ka lweny i koma, “Piŋo iweko aa ki i i maa? Kono ceŋ aŋuko to ma peya waŋ dano onena, kono ber. Kono ceŋ gitiŋa nia ki i ic gitera wa i lyel, wek abed macalo ŋat ma pe yam obedo kwo, Nino me kwona pe odoŋ manok keken? Wek abedi, wek abed ki yomcwiny manok, ma peya acito ka ma pe doŋ abidwogo ki iye, i lobo me mutu ki piny macollicuc, i lobo me colpiny munyobbe ata, ka ma dero ceŋ rom ki piny macol.” Jopar ma Lanaamat ogamo ni meno, “Lwak lok mapol ma rom meno pe gigamo ce? Lalok mada aye ma lokke tye atir? Dog dano myero otwo woko pi lokki ma tere pe-ni? Iloko lok me ŋala, ci dano mo pe bimaki ki lewic? Pien iwaco ni, ‘Pwonnya tye maleŋ, i waŋ Lubaŋa balla pe.’ Ento kono Lubaŋa oloko lok mo, kono oŋamo doge boti! En kono oyabo boti muŋ mapol me ryekone, pien tim mua ki i ryekone bedo me aura, Koŋ iŋe ni can ma Lubaŋa oketo i komi pe oporo balli ducu. “In itwero niaŋ ryeko ki dit pa Lubaŋa? Itwero noŋo ka ma twer pa Won Twer Ducu gik iye? Tye malo kato polo, in itwero timo gin aŋo? Tut makato lyel, in iŋeyo iye gin aŋo? Bor makato lobo ducu, lac makato nam. Ka en obino ci omako dano, ce olwoŋe i nyim kop, aŋa ma twero juke? En ŋeyo jo ma pe gigenne; ka oneno bal, pe keto iye cwinye? Ento dano ma lamiŋ binono ryeko, ka kana me tim onywalo dano, “Kono ibedo ki cwiny maber, kono itaŋo ciŋi bote! Ka yam itimo tim marac, pe doŋ igudi; pe iwek jo ma i odi gutim gin mo marac. Atika doŋ ibitiŋo waŋi malo kun bal mo pe i komi; ibicuŋ matek, pe ibilworo. Wii biwil i kom canni; bibedo boti mucalo pii ma doŋ omol orwenyo woko. Kwoni bibedo ka maleŋ makato cwiny dyeceŋ; kadi bed itye i piny macol bibedo macalo rupiny, In doŋ ibibedo ma cwinyi opye, kun iŋeyo ni nyimi leŋ; ibiywe mot ki kuc kun Lubaŋa tye ka gwoki, Ibibuto piny, ci ŋat mo pe bimiyi lworo; jo mapol gibibino boti wek ginoŋ gum ki boti. Ento piny biloyo jo maraco matwal; pe gibinoŋo ka kanne, gibiparo pi to keken.” Yubu ogamo ni meno, “Adada wun jo ma tye ki ŋec, ka wuto, ryeko bene birwenyo woko, Ento an aniaŋ lok bene macalo wun, wun pe wuloya wacel. Aŋa ma pe ŋeyo lok macalo magi? Adoko gin anyera bot lurema; an ma ceŋ alwoŋo Lubaŋa ci en gamo doga, an ma kita atir, ma bal mo pe i koma, adoko gin anyera. Lagumkom cayo ŋat ma kome kec, en mito goyo jo ma tyengi ocer, Kema pa luyak tye ki kuc; jo ma miyo kiniga mako Lubaŋa gibedo mot mupye, gin jo ma guloko tekgi odoko lubaŋagi. “Peny wa bot lee, ci gibipwonyi; peny winyo me polo, ci gibitittr, Gin ma lak alaka i nom gibipwonyi; rec me nam bene gibitucone boti. Aŋa i kin magi ducu ma kwiya ni ciŋ Rwot aye otiyo man? Tipo pa gin makwo ducu tye i ciŋe, dano acel acel mato yamo pi twerone, It dano pe ye lok ducu, ento bilo abila, macalo dano bilo cam ki lebe. Ryeko bedo bot jo muti, ri i wi lobo miyo dano niaŋ i te lok mapol. Lubaŋa tye ki ryeko dok ki twer; en tye ki tam matut ki twer me cobone. Ka en omuko ot, ŋat mo pe dok gero odoco; ka en oloro wi dano, ŋat mo pe dok yabo, Ka en ojuko kot pe cwer, ci lobo two woko; ka en cwalo pii, ci corre i wi lobo. En tye ki teko ki ryeko me cobo ticce; laŋak dano ki ŋat ma giŋako gin ducu mere, En tero lumi-tam woko munero, en loko luŋolkop doko lumino, En gonyo jo ma luker gutweyo ki i buc, ci tweyo dura i pyer luker macalo opii. En tero ajwagine woko munero, ci miyo wegi twer poto. En twoyo dog jo ma yam gigenogi, ci miyo gikwiya poko gin maber ki gin marac, En miyodano gicayo rwodi, dok geŋo wegi twer i tiyo ticgi, En yabo muŋ ma gikanne i piny macol, ci kela piny macol licuc i der ceŋ. En miyo rok mo-ni doko madit, ka dok tyeko woko; miyo rok mukene nyayo locce, ka dok tenyo woko ata. En kwanyo ryeko woko ki bot lutel wi lwak, miyo gimal ata i tim ka ma yo pe iye. Gin leyo piny i colpiny laboŋo der ceŋ; miyo gicatte macalo lamero. “Nen, atyeko neno man ducu, atyeko winyo, ci aniaŋ iye. Gin ma wun wuŋeyo, an bene aŋeyo wun pe wuloya wacel. Ento kono do aloko bot Won Twer Ducu; amito laro lokka ki Lubaŋa, Wun wuumo lok ada woko ki goba; wun ducu ludaktar ma konywu pe. Kono Wuliŋ aliŋa do, ci mi yo wunen jo maryek. Koŋ wuwiny kit ma atamo kwede, wuter itwu i pidona. Wubiloko lok goba pi Lubaŋa? Wubilok ŋire kun wubwolo dano abwola? Wun wudworo kor Lubaŋa? Wudoko lupido pire ce? Wubibedo maber mono ka en oŋiyo tamwu? Wutwero bwolo en macalo wubwolo dano? Atikane en bijukowu, ka wucwako kore i muŋ. Ditte pe biryaŋo komwu, ci miyo lworo makowu i nyime? Oŋon ma wubolo rom ki buru mamwa, lok ma wupido rom ki lobo ma nidde woko oyot. “Koŋ Wuliŋ mot, ci abilok, ci gin ma mito bino i koma obin. Wek acam tona, ajalo kwona woko, Wek en oneka gire, pe atye ki gin mo’ kadi bed kumeno pud abilaro lok kom kita i nyime. Man aye bimiyo aloyo kop, ni meno, dano ma pe lworo Lubaŋa pe o i nyime. Wuwiny lokka mot mupye, wek lok ma atiro odony i itwu. Atyeko yu bo lok ma abipido; aŋeyo ni abiloyo kop. Aŋa ma bipyem kweda? Wek obin, an mera abiliŋ woko ci ato. “Alegi lok aryo keken, Lubaŋa, ci ka iye, pe abikanne gira ki nyimi; pe iwek ciŋi oguda, pe iwek lworona i komi oryan koma. Eno, lwoŋa, ci abigamo dogi; nyo weka aloki, ci ibidwoko lok bota, Balla ki rocca tve adi? Nyutta tim aranyina, Piŋo doŋ ilokke woko i koma? Piŋo itera macalo lakworri? Imito imi lworo omaka ce, kun arom ki oboke ma yamo tero? Iryemo kor cuŋ kai mutwo? Pien icoyo lok makec marac i koma, pud imito ni anen can pi bal me tinona. In irwako tyena i okol, iniyo ka ma acito iye ducu; iketo waŋ co ka ma tyena myero ogik iye, Ci miyo adoko rom ki gin mutop woko, nyo boŋo ma nyenye ocamo, “Dano ma dako onywalo nino me kwone nok, opoŋ ki ayelayela. En bi no calo ature ci ner woko oyot; en rwenyo calo tipo, pe ri nakanaka, Ci in dok iciko waŋi i kom ŋat macalo meno, ikela i nyimi wek inolla kop? Aŋa ma twero kelo gin maleŋ ki kom gin ma pe leŋ? Pe tye ŋat mo wacel. Gityeko ŋolo wei nino me kwone, in iŋeyo wel dwe ma imiye; ityeko nyuto ka ma kwone bigik iye pe dok kato, Lok waŋi inen ceŋ, wek en obedi, wek otyek ninone ki kuc macalo latic pi mucara. “Dano twero bedo ki gen pi yat, ni meno ka gireto piny ci dok binyuro, pud dok bilot aye. Kadi Lwite ori oteggi i lobo, kadi ajutte yam oto la i nom, ento tekke pii tye bicwico woko, bolo jaŋe calo yat ma pud gipito apita. Ento dano to mere ci pe doŋ a malo; kwone gik woko, ci en doŋ tye kwene? Macalo pii tum wo ko ki i nam, ki kulu dwoŋ two woko, kumeno dano bene buto piny ci pe dok a; en pe dok bico nio waŋ ma polo doŋ pe, pe bico ki i waŋ ninone. Kono do ikana i lyel, kono ikana waŋ ma kinigani doŋ okato! Kono icikka kare wek ipo pira doki! Ka dano doŋ oto, pud dok bibedo kwo? Kono icikka kare, kono atyeko kare me waŋ ticca ducu, kun akuro nino ma myero gigonya iye. Ka lacen ibilwona, ci abigamo dogi; pira bibedo mitti mada, pien in aye iketo an, Lacen ibineno ka ma acito iye ducu, ento pe ibikiya pi neno balla; ibitweyo balla woko i kicaa, ibiumo wi rocca ducu. “Ento got madit poto ci nidde woko, pata gikobo woko ki i kakare. Pii mudo gweŋ woko, kot ma cwer matek molo lobo woko; in bene ityeko gen pa dano woko kit meno. In ibwoye woko matwal, ci en cito gire; imiyo waŋe lokke, ci iryeme woko. Litinone ginoŋo deyo, ci en pe ŋeyo; gidwokogi piny, ci en pe niaŋ gin mo iye. En bedo ka winyo mere arem me kome keken, en koko cwercwiny ma mere kene,” ne,” Erifaji Lateman ogamo owaco ni meno, “Dano ma Laryeko gamo lok ki yamo noŋo, kun noŋo iye opoŋ ki yamo wokceŋ laboŋo ŋec mo? En myero opyem ki lok ma pe konyo, nyo ki lok ma pe kelo gin mo maber? Ento in igeno dano ni pe gulwor Lubaŋa, igenogi ni pe gubed ka lwodo lok i nyime. Pien balli aye pwonyo dogi, iloko lok pa jo ma bwolo dano ki ryeko, Dogi keni miyo kop loyi, pe an, dogi aye ma okelo lok i komi. “In aye dano ma gicako nywalone ce? Meni onywali ma peya giketo godi? Yam iwinyo yub me muŋ i cokke pa Lubaŋa? Imito ryeko ducu obed meri keni ce? Gin aŋo ma in iŋeyo ma waŋ wakwiya? Iniaŋ i gin aŋo ma waŋ pe waŋeyo ducu-ni? Dano muti ki dano ma wiye ki lwar gitye i kinwa, gin aye guri i wi lobo makato woru, Lok ma Lubaŋa okweyo ki cwinyi ki lok ma giloko kwede mot mupye, obedo gin mo manok ki tuŋ boti ce? Piŋo cwinyi oarre woko? Piŋo waŋi tur ki kiniga? Piŋo iloko kinigani i kom Lubaŋa kun iweko lok macalo meno a ki i dogi? Dano gin aŋo, ma miyo en twero bedo ma iye leŋ? ŋat ma dako onywalo en gin aŋo, ma miyo twero bedo laboŋo bal mo? Nen, Lubaŋa pe geno wa jone maleŋ-gu, polo kulu pe leŋ ki i waŋe, Ci dano kono, ma en keni mukwokki bibedo niŋniŋ i nyime, ma oloko bal odoko macalo pii me amatane-ni? “Winy lokka, wek atitti, ci abinyutti gin ma doŋ aneno, en aye lok ma yam luryeko gubedo ka titone, ki kwarogi bene yam pe gumuno lokke. Lobowa ceŋ gimiyo botgi gin kengi, ci larok mo pe mubedo i kingi, Dano marac pwodde ki arem nino ducu me kwone, pi mwaka ducu ma gimiyo bot dano ma pe lakica. En bedo ka winyo dwan ma kelo lworo; i kare me kuc layak bibino i kome, En pe tye ki gen me dwogo woko ki i ka macol, pien gitye ka kiye ki pala lucwan me neke, En bedo ka mal ata pi yenyo kwon, kun waco ni, ‘Tye kwene?’ En ŋeyo ni i nyime tye iye to. Peko ki can gibedo ka ryaŋo kome; gibwoye woko macalo kabaka ma oyubbe pi mony. “Dano-nu oryeyo ciŋe kom Lubaŋa, obutte ni etwero lweny ki Won Twer Ducu, kun riŋo i kome macalo twon ki kwot molane ma kinoŋ. Waŋe obedo mununy, pyere oyarre malac. En obedo i gaij i mogo ma yam odoŋ noŋo, i odi ma dano pe myero gubed iye, ma giciko ni odoŋ obur. Pi meno en pe bibedo lalonyo, lonyone pe biri, pe bicuŋ matek macalo yat ma Lwite odonyo piny i ŋom; pe bibwot ki i colpiny. En bibedo rom ki yat ma mac oroyo pote woko ma pud olot alota, ki ma yamo otero ture woko. Wek en pe ogen piny nono, kun bwolle kene, pien piny nono aye bibedo bakacic ma en bilimo. En bibedo rom ki yat ma gilwero jaŋe ma karene peya oromo, ma pote pe doŋ lot. Bibedo rom ki olok ma nyige oo ma peya ocek, nyo yai jeituni ma ture oo woto. Lwak “jo ma pe gilworo Lubaŋa girom ki lulur; mac waŋo kema pa lugam lim me wil i muŋ; Giyaco aranyi ci ginywalo tim marac, gipiro lok goba ki i Yubu ogamo ni meno, “Atyeko winyo lok mapol ma rom ki meno; wun ducu wun lukwecwiny ma kela ayela keken, Lok ma obedo yamo noŋo ka gikke pe? Aŋo ma oŋeto ii, omiyo igamo doga? An bene ceŋ atwero loko macalo wun, kono ceŋ wubedo ki kit ma rom ki mera-ni; an onoŋo ceŋ atwero rwado lok pi jukowu, kun ayeŋo wiya botwu, Cen atwero jiŋo cwinywu ki lokka, ki kweyo aremwu ki mit doga, “Ka an aloko-ni arem koma pe okwe; ci ka aliŋ woko, pe dok cen. Adada, Lubaŋa koni doŋ oolo koma woko, oruto jona woko ducu, En doŋ otyeko maka woko, ci odoko caden me nyuto balla; jony me koma odoko macalo lakworra, ma loko lok me caden i nyima. Iye okwera, otima malit macalo labwor ma kido kom lee, okayo lake woko i koma ki kiniga, lamonena gaya ki waŋe macalo ŋat ma pako toŋŋe me neko dano, Jo guŋamo doggi i koma, gudoŋo lema me anywar, gudille i koma likiŋ. Lubaŋa doŋ omiya i ciŋ jo ma kitgi pe atir, obola i ciŋ jo maraco. Onoŋo abedo mot mupye, ci onyono koma woko, omaka ki ŋuta, oŋinya matitino. Obedo ka baya ki toŋŋe wegi atumme guruma dyere. Otuco olaŋa pil, laboŋo kica, ooyo pig kedana i ŋom, Oketo can i koma teretere macalo lamony ma bedo ka riŋo i kom ot pi mu kone woko. Akwoyo boŋo gunia me arukana, tekona ducu doŋ obuto i apwa. Waŋa doŋ obok ki koko, del waŋa ocido macol licuc, kadi bed pe atimo gin mo me bwami, dok kadi legana bal mo pe iye, “In lobo, pe ium remona, ci wek kokona pe onoŋ kabedo me yweyo. Kadi koni, nen, cadenna tye i wi polo, cadenna tye malo. Lurema gicaya, ento pig waŋa cwer kun akok kwede bot Lubaŋa, ni kono en olar lok pa dano i nyim Lubaŋa, macalo dano laro lok kun cuŋ pi lawote. Pien ka mwaka man ok doŋ okato, abicito ka ma pe doŋ abidwogo ki iye. Cwinya doŋ otum, kwona doŋ mito gik woko, lyel doŋ tye ka kura. Adada lunywar guruma dyere, abedo ka neno kit ma gikeco kwede i koma. “In kikomi myero icuŋ pira i nyimi keni, ai Lubaŋa; pien aŋa ma dok twero mine me cuŋ pira? Macalo doŋ imiyo gukwero yabo tamgi wo ko wek guniaŋ lok, pienno pe ibiye ni guloya. Ŋat ma tero lok roro i kom lawote wek enoŋ dul me limgi, piny biloyo litinone. “En omiyo nyiŋa odoko lok aboka pa lwak; adoko ŋat ma jo giŋule ki laa. Waŋa doŋ ocido woko pi kumo, dul koma ducu ojony woko likaŋ. Pi meno jo ma cwinygi atir giuro ki jwat, ci dano ma pe ki bal cako mwomme i kom ŋat ma pe lworo Lubaŋa. Ŋat ma kite atir pud medde ki kite macon, ŋat ma cwinye leŋ tekke medde ameda. Ento wun dok wubin, wun ducu, ci pe abinoŋo dano mo maryek i kinwu. Karena doŋ okatu, lok ma yam ayubo doŋ otur woko, en aye lok ma yam cwinya tye iye twatwal. Guloko wor odoko dyeceŋ, kun giwacci, ‘Der ceŋ cok ki piny macol.’ Akuro doŋ lyel wek obed oda, wek apet kabutona i piny macol. Bur lyel doŋ alwoŋo ni wora, kwidi ma bicamo koma alwoŋo ni maa, nyo lamera. Gen mera kono dok tye kwene kaa? Aŋa ma dok neno gin maber ma myero akur? En bicito kweda wa i lyel? Wan wabilor kwede kacel i apwa?” Bildad ma Lacua ogamo ni meno, “Ibibedo Ka lok pi kare ma rom mene? Koŋ itam mot ci dok wabilok. Piŋo itimowa macalo lee? Piŋo inenowa macalo jo mamiŋ? In ikilo komi keni i kinigani macalo labwor. Lobo myero giwek odoŋ noŋo piri? Got myero okobbe woko ki i kabedone piri? “Iyo, tara pa dano marac bito woko, leb macce pe biryeny. Mac ma menyo i kemane bidoko ribiribi, tara ma giŋabo ka wiye bito woko, Kalo wotte ki tek bijwik, lok ma en kikome oyubo birete piny. En moko i obwo ki tyene kene, nyo woto i wi bur ma gikunyo pi mako lee. Layuta mako opunye, owic ma giciko dwalo tyene. Giciko uno i noŋ pire, giciko kinu i yo pi make, Lworo nyono kome tuŋŋi ki tuŋŋi, lubo kore ka ma en cito iye ducu, Kec bibwoyo tekke woko, can kuro me poto i kome tek oyoko tyene. Two bibalo del kome ducu, two marac mada biŋuno dul kome woko. Gibiywaŋe woko ki i kemane ma yam egeno, gitere bot rwot ma loyo kit gin ducu ma dano lworo. Ŋat ma pe mere aye bibedo i kemane; gibipworo buru calfa i pacone, En bibedo rom ki yat ma lwite otwo woko ki piny, ki ma jaŋe oner woko ki malo, Dano pe doŋ bipo pire i lobone, nyiŋe pe doŋ biwinnye i waŋa yo, Gibicwale wo ko ki i piny maleŋ, obed i colpiny, gibiryeme woko ki i wi lobo. En pe bibedo ki latin nyo likwayo i kin jone, ŋat mo pe bidoŋ makwo ka ma yam en bedo iye. Jo me tuŋ potoceŋ bibaŋŋe woko pi gin mutimme i kome, atiba bipoto i kom jo ma tye tuŋ wokceŋ bene, Adada, gaŋ pa lubalo bibedo kumeno, meno gin ma bitimme i kom dano ma kwiya Lubaŋa.” Yubu ogamo ni, “Wubiyela nio wa awene, kun wukeko ita ki lok? Man doŋ tyen me aparre ma wunala; lewic pe makowu me tima marac kuman? Kadi bed doŋ aŋak woko ada, balla pe gik doŋ i koma kena? Ka ada wun wunyatte i koma, kun wuwaco ni lewic ma giketo i koma onyuto ni an labal, doŋ myero wune ni Lubaŋa aye omiyo lok oloya, ci otweya woko ki obwone, Nen, akok ni, ‘Gineka woko do!’ ento pe gigamo doga; adaŋŋe matek, ento ŋat mo pe ma ŋolo koppa atir. En ocego yo woko bota, pe atwero kato, oketo colpiny woko i nyima ka ma acito iye ducu. Otyeko kwanyo deyo woko ki ikoma, oweka adoŋ noŋo laboŋo dit mo. Adoko macalo ot ma en omuko woko ma otwomo tunŋi ki tuŋŋi ci arwenyo woko; genna bene en oputo woko macalo oputo yar. Kiniga omake i koma, en tera macalo lakworre. Monnye gubino i koma kacel, gutoro cel lobo guruma wo ko dyere, gugony gurumo kemana. “Opoko omegina woko ka mabor kweda, jo ma cen giŋeya ducu adoko welo ki botgi. Wadina ki lurema gurwenyo woko; welo ma i oda doŋ wigi owil woko i koma; aŋecana gibedo kweda calo an a welo ki tun botgi, adoko larok ki i waŋgi. Ka alwoŋo laticca, en pe gamo doga, an myero abak doga bote. Yweyo doga odoko rac wa bot dakona, omegina ma litino pa maa gidag ŋwec koma, Kadi wa litino matino gicaya; ka aa, gin loko lok marac i koma, Lurema ma giŋeya ducu igi doŋ okwera woko, jo ma yam amarogi doŋ gulokke i koma. Cogona doŋ omakke woko ki del koma ki riŋo koma, anen ki laka keken. Kica omakwu i koma ba, wun lurema, pien ciŋ Lubaŋa doŋ otyeko gudo koma, Piŋo wubedo ka una macalo Lubaŋa? Can ma aneno, ki arem koma peya oromowu? “Lokka ducu kono gicoyo woko cut! Kono cen gicoyo i buk! Kono cen gigoro lokka ki kalam nyonyo i kom pata, gimwono ki nyonyo macol, wek ori matwal. Pien aŋeyo ni Lacunudwarra tye, ci lacen en bicuŋ pira i wi lobo; lacen ka doŋ del koma oballe woko kuman, abineno Lubaŋa laboŋo koma-ni, Abinene kun ocuŋ pira, abinene ki waŋa, pe bibedo welo ki tuŋ bota, Cwinya opoto ni liŋ! Ka wuwaco ni, ‘Wabiryemo kore niŋniŋ?’ dok ni, ‘Te lok kikome onen ki bote” myero wulwor pala lucwan, pien kiniga aye kelo can me to, wek wuŋe ni ŋolo kop tye.” Jopar Lanaamat ogamo kit man ni, “Pi lok meno tamma odiya, omiya adok iye, pi rucurucu ma atye kwede i cwinya. Awinyo juk ma miya lewic, ento cwiny ma omiya abedo ki niaŋ matut miyo agamo. “In pe iŋeyo lok man nia wa con, i kare ma giketo dano i wi lobo, ni, kijira pa dano marac winnye pi kare manok, yomcwiny pa dano ma pe lworo Lubaŋa ri pi dakika acel keken? Kadi en bor, o wa i polo, kadi wiye gudo pol, birwenyo woko matwal macalo cette; jo ma yam gunene gibiwaco ni, ‘En tye kwene?’ En bilal wo ko macalo lek; gibiryeme woko macalo ginanyuta me dyewor. Jo ma yam ginene pe dok gibinene aye, kadi kabedone pe dok binen matwal. Litinone gibiyenyo kony ki bot lucan, en bidwoko lonyone cen ki ciŋe. Cogo kome tye mupoŋ ki teko me awobine, ento gibiyike kwede i apwa. “Kadi doge lim pi tim marac, kadi bed en kano i te lebe, kadi pe ye ŋulone, kun kano pud bedo kwede i doge, ento lokke ki i cin iye, doko kec macalo kwir twol. En mwonyo lim ci noko woko odoco; Lubaŋa cwalo woko ki i iye, En bidoto kwir twol gola, leb ororo bineke. En pe bineno kulu mo, laora ma mol kic ki cak lukulu. En bidwoko gin ma en onoŋo pi ticce matek, pe bimwonyo; magoba ma en olimo pi cato wille, pe bilimo iye yomcwiny mo. Pien odiyo lucan ci otenyogi woko ata omayo odi ma ceŋ en pe ogerogi. “Pe bigwoko gin mo wacel ma pire mitte, pien iye pe okwe. Berbedo pe biri, pien ceŋ pe weko gin mo doŋ ka en camo. I kare ma jamine doŋ nya mapol, piny biloye woko, ciŋ jo ducu ma tye ki can bikemo en, Lubaŋa bicwalo kinigane malyet i kome, miyo cwer i kome macalo kot ma ka camme, wek oyen kwede likiŋ. En biriŋo gi-lweny me nyonyo, ento atero mola bicele woko pil. Giputo ki tuŋ ŋeye, lebe ma ryeny kato woko ki pig kedane; kome nyonne ki lworo. Lim ma en okano, colpiny malik bibalo woko; mac ma pe dano okuto bityeke woko; biwaŋo wa jami ducu mudoŋ i ode, Polo binyuto balle, lobo bikelo lok me caden i kome. Pii lalele bitero ode woko, bimolo woko i nino me kiniga pa Lubaŋa, Man en aye pok pa dano marac ma a ki bot Lubaŋa, man ginaleya ma Lubaŋa ociko pire.” Yubu dok ogamo ni meno, “Wuwiny lokka maber, meno aye kit ma wubikweyo ki cwinya. Wudi cwinywu, ci abilok, lacen ma doŋ aloko otum, ci wumedde giwu ki nyara. Atye ka koko i kom dano bo? Myero adi cwinya piŋo? Wunena ci dogwu bitwo woko, wuket ciŋwu i dogwu. Ka atamo pire cwinya poto, ci koma onyo koyo woko. Piŋo jo maraco gibedo kwo, giri dok tekogi woto ki medde? Litinogi doko dito ma lunyodogi pud kwo, likwayogi doŋo kun gineno ki waŋgi. Odigi tye ki kuc laboŋo lworo, odoo pa Lubaŋa pe o i komgi. Twonigi nywal ma pa gikeŋ, dyaŋigi bene pe gibwogo litino abwoga. Litinogi mol calo lwak romi, ka gicito ka tuko. Giwero ki ajaa ki opuk, ginyuto yomcwinygi ki dwan nyamulere. Gityeko kare ki berbedo keken, gimedo ki to ki kuc. Giwaco ki Lubaŋa ni, A woko ki botwa! Pe wamito ŋeyo yoni. Won Twer Ducu en aŋa ma myero wati bote? Ka walego en wabinoŋo koni aŋo?’ Nen ya, berbedogi gigi ginoŋo ki ciŋgi kengi. Ento pe atwero ye tam pa jo maraco. “Tara pa jo maraco gineko woko tyen adi? Can poto i komgi tyen adi? Lubaŋa poko arem botgi pi kini gane tyen adi? Gibedo macalo reŋ ka ma yamo tero ada? Nyo macalo cuŋ kal ma yamo kot kuto? Wuwaco ni, ‘Lubaŋa kano can me balgi pi litinogi? Wek ocul botgi gin kikomgi guniaŋ. Wek gunen ki waŋgi ka can poto i komgi, gubil kiniga pa Won Twer Ducu. Gin kono giparo aŋo pi likwayogi, ka doŋ gityeko ŋolo wel dwegi woko? Ŋat mo bipwonyo Lubaŋa ki ryeko, kun kono en ŋolo kop pa jo ma gitye malo? Ŋat man to ma pud kome tek, ma tye maber ki kuc madwoŋ; agulune opoŋ ki cak, i cogone opoŋ ki moo mapwot. Ŋat mukene to ki cwercwiny madwoŋ, ma naka yam pe obilo gin maber. Gibuto kacel i apwa, kwidi poŋ i komgi woko. “Nen, aŋeyo tamwa, ki yubwu me timo gin marac i koma. Pien wuwacci, ‘Ot pa kadit tye kwene? Kema ma yam jo maraco bedo iye tye kwene? Wun pe wubedo ka penyo jo ma giwoto i yo? Pe wuye oŋon ma gobolo botwu, ma nyuto ni dano marac giweke i nino me can, gilare woko i kare me kiniga? Aŋa ma twero nyutte kite ka maleŋ? Doki aŋa ma twero cule pi timme marac? Ka gitero kome i bur, dano gikuro lyelle. Ŋom ma i nota obedo mit bote; jo ducu gilubo kore, lwak jo ma gitelo nyime pa kwanne. Wun dok wubikweyo cwinya niŋniŋ ki lok ma tere pe? Gin mo pe odoŋ i kom lagamwu kono goba keken.” Erifaji Lateman dok ogamo ni, “Dano twero bedo ki kony bot Lubaŋa? Atikane ŋat ma tye ki ryeko konnye pire kene. Won Twer Ducu cwinye bedo yon ka kiti atir? En noŋo kony mo ka bal mo pe i komi? Nyo itamo ni pien ilwore ma miyo en juki, ci donyo kwedi i ŋolo kop? Pe tim marac ma itimo aye pol? Balli ka gikke pe. Pien imiyo omegeni gijeŋo jamigi nononono, ci ilunyo boŋo woko ki i kom dano iweko gudoŋ munero. In ceŋ pe imiyo pii amata bot ŋat mo muol, itwono ŋat ma kec neko woko ki kwon. Oteka aye ceŋ obedo won lobo, dano ma gipwoyo aye bedo iye. In ceŋ iryemo mon to woko ke ciŋgi noŋo, ceŋ ituro bad litino kic. Pienne girumi ki owic, lworo onyoŋo komi woko oyotoyot. Dero ceŋ odoko col, pe itwero neno piny, lalele pii omwonyi woko. “Lubaŋa pe tye wa malo i polo? Nen lakalatwe ma gitye malo kit ma gibor kwede! Pi meno iwaco ni, ‘Lubaŋa ŋeyo gin aŋo? Waŋe romo tuco pol mapek pi ŋolo kop? Pol mucido oboyo kome woko, pi meno en pe twero neno bal. En woto mere wa i dan polo.’ Pud imoko i yo macon ma jo maraco yam gubedo ka lubone-ni? Ceŋ giceyogi woko ma peya karegi oromo, gutigi pii omolo woko. Ceŋ guwaco bot Lubaŋa ni, ‘A woko ki botwa,’ doki ni, ‘Gin aŋo ma Won Twer Ducu twero timo i komwa? Kun en aye ma yam opoŋo odigi ki jami mabeco. Pe atwero ye tam pa jo maraco! Jo ma kitgi atir gineno ki yomcwiny, jo ma pe ki bal nyero anyera, kun giwaco ni, ‘Lukworwa doŋ gityekogi, jamgi mudoŋ mac owaŋo woko.’ “Ribbe ki Lubaŋa, ci ibibedo ki kuc; en aye bimiyo gin maber bino boti. Gam pwony ma a i doge, ci iket lokke i cwinyi. Dwog bot Won Twer Ducu, ci ibed mwol, bol tim ma pe atir woko ka mabor ki i paconi. Bol jabu apwa, Ki jabu me Opir i kin gweŋ laora kulu, wek Won Twer Ducu aye obed jabuni, ki ryal ma pire tek boti. Kumeno cwinyi bibedo yom pi Won Twer Ducu, ibitiŋo waŋi malo bot Lubaŋa. Ibilego en, ci biwinyo legani, ci ibicobo kwoŋŋi bote. Gin ducu ma itamo bicobbe maber, nyimi bibedo leŋ. Pien Lubaŋa dwoko lukwakke piny, ento en laro jo mamwol. En laro dano ma pe tiyo gin marac, ci bilare pi leŋ ciŋi.” Yubu ogamo kun waco ni meno “Tin bene aloko ma iya kec; kadi bed atye ka cur, ciŋe pud nura. Kono ceŋ aŋeyo ka ma atwero noŋe iye, wek ao wa i kabedone! Kono ayeko lokka i nyime wek oŋol, anyuto kore kikore ki lok mapol mada, miyo aŋeyo gin ma en bigamma, kono aniaŋ gin ma en owaco bota. En kono opyem kweda ki twerone madit? Pe kumeno; en kono oketo cwinye ka winya. Dano ma kite atir twero pyem kwede ki kunnu, ci laŋolkoppa kono miyo aloyo kop naka. “Nen mono, acito anyim, ento pe tye kunnu; adok cen, ento pe anoŋe. Ayenye tuŋ acam, ento pe amedo ki nene, alokke tuŋ acuc, pe anene bene. Ento en noŋo ŋeyo yo ma acito iye; ka en otema, abikatti macalo jabu maleŋ. Abedo ka lubo kore kikome, pe aŋak ka mukene. Pe adok cen aweko cik ma en ociko; lok ma en owaco akano i cwinya macalo lonyona. Ento en pe lokke, aŋa ma twero wiro en? En t iyo gire gin ma iye mito. Pien en bicobo gin ma en oyubo pira, ki lwak lok macalo meno ma en tye kwede i cwinye. Pienno koma onyo koyo i nyime, ka atamo, atye ka lworo eno Lubaŋa omiyo koma obaŋŋe woko, Won Twer Ducu otyeko miyo koma onyo koyo. Pe colpiny aye orida woko, kadi piny macol licuc ma oumo waŋa. “Piŋo Won Twer Ducu pe kano kare me ŋolo kop? Piŋo jo ma giŋeyo en pe gineno ninone? Dano gidiro waŋ co lobo pi medo nomgi, gimayo lim pa jo mukene, ci gikwayogi. Giryemo kana pa litino kic, gikwanyo twon pa daa-to pi den. Gicoro lucan gidirogi cen ki iyo; lucan ma i lobo gikanne woko liweŋ. Nen, giwoto macalo kana me tim gicito ka canne ki tic matek; giyenyo camgi i tim ata, obed kwon pa litinogi. Gigwero obot cam ma i poto, gibeko nyig olok ki i pot ti pa jo maraco. Dyewor gibuto nono ma pe giumme, pe giumme, kadi piny nie twatwal. Kot ma a ki wi got pwodogi, gipadde i kom pata pien kagwokgi pe, Jo maraco gimayo litino kic ki i kor mon, gigamo litino pa lucan me den. Ento lucan giwirre noŋo, laboŋo ginaruka; giyeyo bel ma gikayo, kun gitye ki kec, Gibiyo moo jeituni i potti pa jo maraco, ginyobo nyig olok vino ki laa doggi. Jo ma tye ka to gicur ki i gaŋ, dano ma olimo retgi kok ki cwinygi ducu, ento Lubaŋa pe ciko ite i legagi. “Tye jo mogo ma igi dag ceŋ; pe guŋiyo tic kwede, pe gimaro lubo yone. Lanek a kwarpiny wek enek lacan ki dano ma piny oloyo; dyewor en doko lakwo. Lakwele bene kuro piny ma ribiribi, kun wacci, ‘ŋatti mo pe ma nena’; ci kano waŋe woko. Ka piny col gituro odi; ka dyeceŋ ci gicego wigi i ot; pe gimaro lenpiny, Pien ka piny col, meno aye rupiny ki tuŋ botgi; piny macol ma dano lworo-ni en aye laremgi. “Iwaco ni, ‘Pii mologi woko oyotoyot; dullobogi giceno woko; lapakaca mo pe yenyo tic i poto olokgi. Macalo pee mee woko pi cen ki lyeto, kit meno lubalo bene rwenyo woko i lyel. Wic biwil i komgi i dye gaŋ; ŋat mo ma bipo i nyiŋgi doŋ pe; kumeno lutim maraco gibitur calo yat.’ “Giuno mon ma lulur ma litinogi pe, pe gikonyo mon to. Ento Lubaŋa weko jo matego giri i wi lobo pi twerone; gia malo, kadi bed onoŋo pe gitye ki gen me bedo kwo. En weko gicuŋ kun gitamo ni gitye maber, ento en bedo ka ŋiyo gin ducu ma gitimo. Giille malo pi kare manok, lacen girwenyo woko, macalo doo ma ner ci two woko, nyo macalo wit bel ma gimworo woko. Ka pe kumeno, aŋa ma twero nyuto ni an lagoba? Aŋa ma waco ni lok ma awaco-ni mwa? Bildad Lacua ogamo ni meno, “Loc tye bot Lubaŋa, myero gilwor en; en miyo kucce nya malo i polo. Mony pa Lubaŋa twero kwanne? Jo mene ma ceŋŋe pe menyogi? Dano twero bedo ma kite atir niŋniŋ i nyim Lubaŋa? Ŋat ma dako onywalo twero bedo leŋ i ki te aŋo? Nen, i waŋe dwe pe ryeny, lakalatwe bene pe gileŋ; dano kono bedo niŋniŋ i nyime ma en kwidi mamwa-ni?” Yubu dok ogamo ni, “Kit ma ikonyo kwede dano ma pe tye ki twero! Kit ma ilaro kwede bad dano ma pe tye ki tek! Kit ma ikonyo kwede ŋat ma pe ki ryeko ki tam, kun itito bote lok me ŋec maber mapol! Aŋa ma okonyi ki waco lok meno? Cwiny ma it ye ka lok kwede-ni ilimo ki bot aŋa? “Tipo pa jo muto ma gitye piny komgi myel, pii ki gin ma bedo iye bene gitye ki lworo. Lyel tye nono i nyim Lubaŋa, lobo pa jo muto pe tye ki gi-umo wiye. Lubaŋa oyaro but piny tuŋ acam i dye yamo noŋo, pe oŋabo lobo i kom gin mo. En tweyo pii malo i pol mere mucido licuc, pol pe tyer woko pi pek pa pii, En umo waŋ dwe, yaro polle i wiye, En oluŋo lawala i wi pii i waŋ co ma poko leŋo ki mutu. Wir ma otiŋo pol giyeŋŋe, gibedo ka uro ka en ojukogi. Nam oliŋ pi twerone, ogoyo min kulu Rakab pi ryekone. Yamone omiyo polo owarre onen maleŋ; en aye ocobo twol ma tye ka mol riŋo woko. Nen, man pud doge, pe kom ticce kikome, wawinyo macalo lok ma gikwilo akwila ma winyone tek, ento aŋa ma niaŋ i kom twerone ka mor calo mor kot Yubu dok omedde ki lokke kun waco ni, “Akwoŋo ki nyiŋ Lubaŋa makwo, ma Won Twer Ducu, ma omiyo cwinya odoko kec pi kwero ŋolo koppa atir, ni, pi kare ducu ma pud atye ki yweyo, ma cwiny pa Lubaŋa pud tye i uma, doga pe biloko goba, ki leba bene pe biloko lok me bwolo dano. Pe abiye lokwu matwal ni gin ma wuloko tye kakare; nio waŋ ma ato, ento pud abiwacci cwinya leŋ. Pud abicuŋ matek kun awacci kita tye atir, pe abilokke; aŋeyo ki i cwinya kena ni pe tye nino mo i kwona ducu ma lewic myero omaka iye. “Wek lukworra gunen can macalo jo maraco! Wek jo ma gimito lweny kweda gitimgi macalo lubalo! Dano ma pe lworo Lubaŋa tye ki gen aŋo ka kwone otum woko, ka Lubaŋa okwanyo kwone woko? Lubaŋa biwinyo kokone ka ayela mo obino i kome? Cwinye bibedo yom i kom Won Twer Ducu? Bilego Lubaŋa kare ducu? Atye ka pwonyowu ki lok ma dok i kom twer pa Lubaŋa, pe aumo kit tam ma Won Twer Ducu tye kwede, Nen, wun ducu doŋ wutyeko nenone piwu kenwu; piŋo dok wuloko lok ma konnye pe? “Man can ma Lubaŋa poko bot dano marac, man gin ma jo ma giuno jo mukene ginoŋo ki bot Won Twer Ducu. Ka litino pa dano marac ginya, ginekogi woko ki pala lucwan; litino ma en onywalo pe gibedo ki cam ma romogi. Litinone ma pud gikwo two gemo aye nekogi, ci mongi pe kokogi. Kadi bed oguro lim odurre calo kweyo, kadi ocoko boŋŋi obako lipim, en twero cokone mere, ento dano ma kite atir aye ma birukogi, dano ma pe ki bal aye ma bipoko limme. Ot ma en ogero bibedo calo obwo oboropyen, nyo ot aduc ma giyubo pi kuro cam ma tye i poto, Cen mo bibuto piny ma noŋo pud olony, ento ka oyabo waŋe odiko ci noŋo gin mo doŋ pe. Gin ma kelo lworo bimwonye woko macalo pii lalele; yamo lapiru bitine woko cwiny dyewor. Yamo ma a wokceŋ bitine wo ko tere matwal; kun kwanye woko ki i kabedone, bicorre i kome laboŋo kica, miyo en riŋo woko ki tekke ducu wek ebwot ki i twerone. Yamo kok macalo ŋat ma doŋo ciŋe pi nyware, ŋur calo ŋat ma tye ka jwiye ki i kabedone.” “Bur tye ka ma gikwinyo iye ryal, kabedo tye ka ma giliyo iye jabu. Nyonyo gikwinyo ki i ŋom, mola ginoŋo ki i gweŋ ka gilenyo. Dano giroto i nom i colpiny, kun giyenyo gweŋ nyonyo nio wa i agikkine i mutu ki piny macollicuc. Gikwinyo bur i nota ka ma dano pe bedo iye; luwot i yo wigi wil woko i komgi, Gilutogi i bur ki tol ci gilyerre iye ka ma dano mukene pe, Cam cek ki i lobo, ento i tere piny gibedo ka mukone woko calo gimuko ki mac. I kin gweŋ tye iye godi matino ma bulu me wel, ma tye iye luru jabu. “Yo ma cito kunnu acut mo pe ma ŋeyo, ocecu peya oneno, Lee tim ma, ginyatte yam peya gunyono; labwor bene peya owok ki iye. “Dano cwalo ŋine wa i kom pata matek, muko wa got madit ki i tere piny. En baro yo pii ki i gweŋ,’ ci neno gin me wei ducu. Culo kor pii woko wek kulu pe gumol; gin mukanne en kela woko ka maleŋ, “Ento ryeko gibinoŋo ki kwene? Niaŋ matut kabedone tye kwene? Dano pe ŋeyo yo ma cito iye, pe noŋŋe i lobo pa jo makwo. Kut wacci, ‘Pe tye iiya,’ nam bene waco ni, ‘Pe bota.’ Lonyo madwoŋ pe twero wilone, pe tye wellim mo ma giromo culo pire. Pe gitwero kwaŋo welle i jabu me Opir, pe giporo ki kidi me wel macalo onik nyo capir. Jabu ki madara pe twero rom kwede, pe gibilokone kadi wa ki atego me jabu maber. Pe gibipo pi tiko me wel makwarre nyo matarre: wel ryeko tye malo kato jami mukene me wel woko ducu. Kidi ma obedo atworo me Etiopia pe gitwero porone kwede, wa jabu ma giliyo maber bene pe romo wilone. “Ci doŋ ryeko a ki kwene ce? Niaŋ matut bedo kwene? Okanne woko ki i waŋ gin makwo ducu, oumme woko ki bot winyo me polo. Lyel ki to giwaco ni, ‘Lok i kome wawinyo awinya keken.’ “Lubaŋa aye ŋeyo yone, en ŋeyo kabedone, pien en neno wa i agikki me lobo, neno wa jami ducu ma tye i te polo. I kare ma yam en omoko kit ma teko me yamo myero obed kwede, kun nyuto bene ka ma pii me nam myero ogik iye; i kare ma cen en oketo cik pi kot, dok ocimo yo ma wil pa kot ma mor myero olubi; i kare meno Lubaŋa oneno ryeko, oniyo maber, omiyo ocuŋ ci otato tere, Ci owaco bot dano ni meno, ‘Nen, lworo Rwot en aye ryeko; bwoto timo gin maracaye ke lo niaŋ matut.’ ” Yubu dok omedde ki lokke kun waco ni, “Ayaa, kono ceŋ atye kit ma abedo kwede i kare macon ca, i kare ma Lubaŋa obedo ka gwoka! I kare meno tarane obedo ka lyel malo ka wiya, ceŋ pa Lubaŋa obedo ka menya ka awoto i piny macol. I kare meno onoŋo atye maber ki lim mabup, mar pa Lubaŋa gwoko kemana; Won Twer Ducu onoŋo tye kweda, onoŋo litinona bene gurumo ka ŋeta woko, Ka ma acito iye ducu anoŋo cak mabup, anoŋo moo madwoŋ wa i kom yadi ma apito i kin gweŋ, I kare ma acito i dog gaŋ ka ma ludoŋo gicokke iye, ka ayubo kabedona i dye gaŋ ka ma giporo iye lok, ka awobe gunena ci gudirre woko cen, ludoŋo gua gucuŋ; rwodi bene gujuko lokgi woko, guketo ciŋgi i doggi; dwan ludito olin, lebgi bene omoko woko i dangi. Dano ma winyo lok i koma yam lwona ni lagumkom, ŋat ma onena ki waŋe obedo caden me pwoya: pien onoŋo yam alaro lucan ka gukok, dok akonyo litino kic ma lukonygi pe. Jo ma onoŋo doŋ gicok to giiegga gum, dok amiyo mon ma coggi oto giwero wer pi yomcwiny. Onoŋo arukke woko ki kit ma atir macalo rukka me kare ducu, anyebbe ki ŋolo kop kakare macalo jor ki tok ma pe rwenyo ki bota. Yam abedo ma ka waŋ jo ma waŋgi oto, akonyo luŋolo amiyo guwoto ki tyengi. Yam akonyo lucan macalo gin litinona kikome; kadi dano ma onoŋo pe aŋeyo, ayelle pi cwako pidone. Alwenyo matek ki lubwami macalo alwenyo ki ŋuu, alaro dano ki botgi macalo alaro ki i dog labwor. Yam onoŋo atamo ni abito mot i pacona, ma nino me kwona pol ma rom ki kweyo, ma noŋo arom ki yat ma oyaro Lwite i ŋet pii, ma toyo luk i jaŋe dyewor, kun deyo pe rweny ki bota, dok tekona obedo ka roc odoko nyen. “Dano yam winyo lokka, ci gilir; mot, kun gikuro tam ma an aye amiyo botgi. Ka doŋ aloko, pe giloko lok mo, lokka obedo macalo kot ma cwer, Gibedo ka kuro lokka macalo gikuro poto kot, gigamo tamma macalo gimato kot me cwir. Ka yam abwonyo, pe gitwero ye; ento pe gitwero balo yomcwinya. Yam anyuttigi gin ma myero gutim, kun abedo macalo rwotgi, nyo macalo kabaka ma bedo i dye monnye, dok macalo ŋat ma kweyo cwiny jo ma koko lyel. “Ento koni doŋ gitye ka nyera, gin jo ma pud gin litino ki tuŋ bota, ma wegigi yam acayogi, pe atwero ketogi wa i kin gwogi ma gikuro romina. Kit kony aŋo ma atwero noŋo i kom teko me badgi, gin jo ma kero komgi doŋ otum woko-ni? Gujony pi can ki kec ma nekogi, gigweno gin mutwo i tim ka ma dano pe; giŋwedo pot yat me tim ki oboke me buŋa, giboko lwit lyonno me acamagi. Giryemogi woko ki i kin dano; gidaŋŋe i korg i macalo gidaŋŋe i kor lakwo. Yam gibedo i laora kulu ka ma rac, ki i bur ma i ŋom nyo i boro got, Gikok ki i buŋa macalo lee-gu, gigurre kacel i te ok uto. Gin jo ma k itgi raco ma pe gmeyo ka ma gua iye; ceŋ giryemogi woko ki i lobowa. “Ento koni jo-nu gucako wer i koma, nyiŋa odoko lok aboka ki tuŋ botgi, Gidaga, pe gimaro bino cok kweda, giŋulo laa wa i waŋa, Lubaŋa obalo tekona woko, omiyo pe doŋ atwero timo gin mo i komgi; en meno gin mumi yo pe gijukke kengi i nyima. Lwakgi otwarre i koma tunacuc, gucako ryema woko cut, gitye ka yubo yo me kelo can i koma macalo mony ma oguro gaŋ. Gituro yo ma kono ariŋo alarre iye, gimedo can i koma ameda; ŋat ma jukogi pe, Gimuko waŋ cel malac, gikatti i koma, gibedo ni kelkel i wi obur. Lworo obaŋo koma woko; deyona otum woko macalo gin ma yamo okolo, berbedona bene orwenyo woko macalo po!. “Koni doŋ cwinya tye ka cwer matek; kare me ayelayela doŋ obino i koma. Koma mwoda amwoda dyewor, awinyo arem ma pe aywe, Lubaŋa omako ginarukana ki tek, otweya woko macalo nut kanyina. Obola woko piny i daba, adoko calo apwa ki buru. Lubaŋa, abedo ka kok boti, ci pe igamo doga; acuŋ ka lega ento pe iketo cwinyi, Doŋ ilokke idoko ger woko i koma, itye ka una ki tekki ducu. Imiyo yamo tiŋa malo wek ariŋ kwede macalo ariŋo ki gadigadi, kun yamo kot tye ka bola ata ki mor madwoŋ. Iyo, aŋeyo ni ibitera i to, i kabedo ka ma jo makwo ducu gigurre iye, “Ŋat ma ocuŋ i wi obur mono pe taŋo cine? Ka tye ki keckom pe kok pi kony? Ceŋ pe akok pi jo ma tye ki peko? Cwinya bene pe ocwer pi jo ma piny obwoyogi? Ento ka yam ageno ni abibedo maber, ci gin marac ocako bino; i kare ma ageno ni piny bibedo leŋ, col piny aye obino. Cwinya obedo ka poto, ci pe omedo ki kwe; kare me aroma keken aye doŋ tye i nyima. Awirre ma aruko boŋo cola, ento ŋat mo ma kweyo cwinya pe; aa malo i kacokke akok pi kony. Too gudoko omegina, ki udu-gu gudoko luwota. Del koma ocido woko, ci waŋye woko awaŋya ki i koma, cogona tye ka waŋ ki lyeto. Dwan opukka doŋ odoko wer me koko lyel, ki dwan nyamulerena winnye calo dwan dano ma kok. “Atyeko cikke con, waŋ ki waŋa; dok atwero neno nyako mo niŋniŋ iyo marac? Lubaŋa ma tye malo poko ki dano kit gin aŋo? Gin aŋo ma dano noŋo ki bot Won Twer Ducu ma tye i polo? En pe kelo can i kom lubalo? Pe miyo keckom ma ko lutim maraco? En pe neno kit kwona ducu? Pe kwaŋo gin ducu ma atimo? “Ka yam abedo ka loko lok goba, ka yam koma obedo mit ka bumo dano: wek gipima ki mijan ma pimo kakare, wek Lubaŋa oŋe ni cwinya leŋ. Ka yam tyena oŋak woko ki iyo, ka yam cwinya oparo gin ma aneno, ka yam ton me bal mo onen i ciŋa; myero jo mukene aye gucam bel ma an acoyo, gin ma ocek i potona myero giput woko. “Ka cwinya yam otera i kom dako mo, ka yam akanne i ŋet doggola pa lawota, wek dakona oreg bel pi laco mukene, wek ŋat mukene aye obed kwede, Meno onoŋo kono obedo bal marac atika; ma luŋolkop myero gunol can iye. Rom ki mac ma waŋ nakanaka nio wa i bur lyel, ma kono owaŋo wa Lwit cam ki i potona wo ko ducu, “Ka cen akwero pi do pa opiina nyo aŋecana, ka ce gukelo lok i koma, abitimo aŋo ka Lubaŋa ocuŋ pi ŋolo kop i koma? Ka en obino pi penyo lokke ci abigamo doge niŋniŋ? Dat ma oketa i i maa en aye ma oketo opiina bene, Pe ŋat acel aye ma ocweyowa ki i ic? “Yam atwono lucan ki gin mo ma gimito, kun amiyo mon to kuro kony ki bota kwe? Cen acamo camma kena, ci latin kic oken? Nia i waŋ tinona Lubaŋa obedo ka gwoka macalo wora, obedo ka tela nia ki i i maa. Cen abedo ka neno anena ka ŋat mo mito to pi can boŋo, nyo dano ma lacan obedo laboŋo gi-um, ma pe akonye? Ceŋ pe olegga gum ki cwinye ducu, kun noŋo amiye boŋo me yer romo mapek pi miyelyeto? Ka yam atiŋo ciŋa pi goyo ŋat ma pe ki bal, pien aneno ni gitwero konya wek alo kop; ka yam atimo kumeno myero kwaya bada opot woko ki i wi gwoka, myero giput bada ki i waŋ mwotte woko, Pien yam alworo can ma a ki bot Lubaŋa; pe atwero timo meno ducu, pi woro ditte ki deyone, “Yam pe amoko genna i kom lim, pe onoŋo ajeŋŋe i kom lonyo me jabu; ceŋ cwinya pe obedo yom pi lonyona mabup, nyo pien acoko gipiny mapol. Yam pe aneno ceŋ ka ryeny, nyo dwe kun woto ki deyo madit, ma dok aweko gibita me worogi i muŋ, kun aryeyo ciŋa pi motogi, Meno bene kono onoŋo obedo bal ma luŋolkop myero gunol can iye, pien onoŋo adoko lagoba bot Lubaŋa ma tye malo, “Yam pe abedo ki yomcwiny ka keckom omako lakworra, pe anyatte ka gin marac opoto kome. Yam pe aweko doga obalo bal, kun alamo pi kwone ki kwon, Jo ma i oda yam guwacci, ‘Aŋa ma pe oyen ki riŋo lee ma laditwa oneko?’ Larok mo pe yam obuto i dye gaŋ ata, pien ajolo luwot ducu i oda, Yam pe amuŋo gin marac ma atimo ki bot dano, kun akano balla i cwinya kena, pi lworo lok pa lwak. Yam pe aliŋ mot kun pe akato woko ki i oda pi lworo cac pa jo me doggola mukene. Kono nene ŋat ma winyo lokka tye! Nen, doŋ aketo ciŋa en! Wek Won Twer Ducu ogam lokka. Kono lakworra ocoyo lok ma odota kwede acoya, kono anyatte kwede ma noŋo atiŋo i wi gwoka, nyo adwalo i wiya macalo tok me dito. Kono atitte gin ducu kikore, kun anyiko cok kwede calo abedo laker. “Ka yam lobo ma apuro okok i koma, ma kokone winnye i kor kweri pa lapur; ka yam acamo cam mucek laboŋo culo waŋe, kun aweko wegine guto woko; wek okuto odoŋ iye ma ka gaya, ki doo labika ma ŋwece coo ma ka kal.” Jo meno adek guweko gamo dog Yu bu pien en ŋeyo ki i cwinye kene ni lokke tye atir. Lacen Eliu wod pa Barakel ma jo Buj, me doggola pa Ram, ocako jul. En onoŋo okeco i kom Yubu pien otamo ni en aye lokke tye atir, pe Lubaŋa. Okeco bene i kom lurem Yubu adek-ki, pien pe gunoŋo lagam mo, kadi bed ceŋ gutito ni Yubu aye oroco, Eliu okuro ka jo-nu gitye ka lok ki Yubu, pien onoŋo gin doŋ guteggi makato en, Ento ka en oneno ni gamo dog Yubu oloyo jo-nu adek-ki kiniga ocako make, Eliu wod pa Barakel ma jo Buj ocako waco ni meno, “An pud latin, wun doŋ wuteggi; pi meno nanen abedo ki lworo, pe atwero diyo cwinya wek atit botwu gin ma aŋeyo, Ceŋ atamo ni, ‘Wek dito aye oloki, wek lwak mwaka onyut ryeko.’ Ento cwiny ma tye i i dano, yweyo pa Won Twer Ducu, aye gin ma miyo dano niaŋ i lok mo, Enno pe ni ludito aye giryek, nyo ni jo muteggi giŋeyo gin ma tye atir. Pi meno awacci, ‘Wuwiny lokka; wek an bene anyut tamma.’ “Nen, ceŋ abedo ka kuro lok ma wubiwaco, aciko ita wek awiny ryeko ma wubedo ka lokone, kun wuyenyo kit lok ma myero wuwaci. Onoŋo aketo cwinya ka winyo lokwu, ci nen, onoŋo pe tye ŋat mo i kinwu muloyo Yubu, nyo ma ogamo lokke. Wugwokke, wuwek waco ni, ‘Wan doŋ walimo ryeko.’ Lubaŋa aye twero loye, pe dano. Lokke ceŋ pe okemo an, ci pe abigamo doge ki kit lok macalo mewu-ni: Doggi otwo woko, pe doŋ gugamo doge, pien pe gitye ki lok mo ma myero guwaci. An myero akur pierr gin pe giloko, pien gin ducu gucuŋ acuŋa, ma pe doŋ gigamo lok mo? An ki tuŋ bota abigamo; dok abinyuto tamma bene, Pien atye ki lwak lok mapol, cwinya tye ka ruya ki iiya, Nen, cwinya tye macalo kono ma giumo wiye woko, calo kicaa kono yino manyen ma mito yec. Myero aloki, wek aywe maber; myero olo aŋam doga, agam lokke. Pe abidworo kor dano mo, pe abikoro dano mo bene. Pe aŋeyo ki r me koro, dano; kono atemo, kono Lacwec otugi neka woko cut. “Ento koni doŋ in Yubu, winy lokka, cik iti i kom lok ducu ma abiwaco. Nen, doŋ anamo doga, leba ma i doga doŋ ocako lok. Lokka nyuto ni cwinya tye atir, aloko gin ma aŋeyo ni tye atir. Cwiny pa Lubaŋa aye ma oketa, yweyo pa Won Twer Ducu omiyo abedo makwo. Gam doga, ka ce itwero, can lokki ducu kikore i nyima; noŋ kom lok ma icuŋo iye. Nen, arom kwedi i nyim Lubaŋa; an bene gicweya ki lobo. Nen, lworo i koma pe myero oryaŋ komi, lokka pe binuri mukato kare. “Adada, ityeko loko lok kun awinyo, doŋ awinyo lok ma iwaco. Cen iwaco ni meno, ‘An aleŋ, bal mo pe i koma; cwinya olony, pe atimo gin mo marac. Nen, Lubaŋa bedo ka yenyo lok i koma, en tima macalo lakworre; orwako tyena i okol, en ŋiyo ka ma acito iye ducu.’ “Nen, ka iloko kumeno noŋo ipoto i bal, an agamo kumeno, Lubaŋa aye dit makato dano. Piŋo imito pyem kwede kun iwacci, ‘Pe ogamo lwak lokka-ni wacel’? Lubaŋa loko i yo mapatpat, ento dano pe niaŋ i lokke, waŋ lek, i ginanyuta me dyewor, ka dano onino matek, kun nino oyuto waŋgi i kabutogi, meno aye kare ma en lokokwede i it dano, ci ryaŋo komgi ki lok me jukogi, wek emi dano olokke, owek timo tim marac, dok wek okwany wakke woko ki i cwiny dano. Kumeno en gwoko dano wek pe opot i bur lyel, en gwoko kwone, giwek neko en ki pala lucwan. “Lubaŋa pwodo dano bene ki arem i kabutone, kun miyo kome rem kare ducu, ma miyo cwinye dag cam, iye kwero wa cam mamit. Kome mok ma riŋo kome pe doŋ nen, cogone ma yam pe nen woko ka maleŋ nen woko ligaŋ. Nono en doŋ cok ci to piny i bur, kwone doŋ cok poto i ciŋ Lunek dano. “Ento ka ce onoŋo lamalaika tye ma cun pire, ŋat acel i kin lumalaika alip ki alip, ma giribo Lubaŋa ki dano, pi nyuto bot dano gin ma myero otim, ci lamalaika twero time kica kun wacci, ‘Weke, owek cito piny i bur, pien doŋ anoŋo gin lakok kwone.’ Ci riŋo kome biroc, bi doko nyen macalo pa latin, tekone bidwogo macalo i kare me awobine. Lacen ka dano lego bot Lubaŋa, Lubaŋa gamo legane, ci dano bi no i nyim Lubaŋa ki yom cwiny, kun tito pi larrene bot dano. En wero i nyim lwak kun wacci, ‘Ceŋ abalo, aŋak woko aweko timo gin ma tye atir, ento Lubaŋa pe oculla ma rom ki tim ma atimo. Okoka, pe doŋ abicito piny i bur, pud abibedo kwo kun aneno der ceŋ.’ “Nen, Lubaŋa tiyo meno ducu kare ki kare bot dano, pi miyo en odwog cen, wek pe olor i bur, ento onen ceŋ me kwo. Cik iti, Yubu, iwiny lokka, liŋ mot, wek an aloki. Ka it ye ki lok mo me awaca, gam doga; loki, pien cwinya bibedo yom ce onen ni lokki tye atir. Ento ka pe, winy lokka; liŋ mot, ci abipwonyi ki ryeko.” Eliu dok oloko ni meno, “Wuwiny lokka, wun luryeko, wucik itwu ka aloko, wun jo ma wuŋeyo lok; pien dano temo lok ki ite macalo en bilo cam ki doge, Wek wayer gin ma tye atir, waniaŋ waŋ kwedwu lok mene ma tye kakare. Pien Yubu owaco ni iye leŋ, dok ni Lubaŋa okwero ŋolo koppe atir. Owacci, ‘Kadi bed lokka tye atir, pud giwaco ni an lagoba; ret ma giketo i koma pe twero caŋ, kadi bed pe abalo bal mo.’ Dano mukene twero nen ma cal ki laco man Yubu? En ŋalo Lubaŋa macalo emato pii-gu, Omako lurem ki lutim aranyi, dok woto kacel ki jo maraco. Pien en owacci, ‘Kony mo pe bot dano me tiyo gin ma yomo cwiny Lubaŋa.’ “Pi meno wuwiny lokka, wun jo ma tye ki niaŋ matut, Lubaŋa pe twero timo gin marac kadi ki acel. Won Twer Ducu pe timo gin mo ma pe tye atir. En culo ki dano ma rom ki kit gin ma en otimo, en timo dano acel acel muporo kit kwone, Ada, Lubaŋa pe timo gin mo marac, Won Twer Ducu pe ŋolo kop ma pe atir. Aŋa ma yam oketo lobo i te locce? Aŋa ma ceŋ oketo lobo ducu i ciŋe? Kono ceŋ mo en dwoko cwinye cen, kun guro yweyone ducu bote kene, ci miyo gin makwo ducu to woko lawaŋacel, ci dano dok gire i apwa. “Ka it ye ki niaŋ matut, ci winy lok-ki mono, cik iti i lok ma awaco-ni, Ŋat ma dag ŋolo kop atir dok bedo laloc ce? Ŋat ma kite atir, ma won twero bene, dok iwaco ni kite rac? En mere waco bot kabaka kulu ni, ‘In konnyi pe,’ dok waco bot ladit ni, ‘In i dano marac.’ En pe dworo kor luker, pe paro pi lulonyo maka to pi lucan, pien gin ducu en mucweyogi ki ciŋe. I dakika acel keken gin gito woko cwiny dyewor, en goyo rok mo-ni ci rwenyo woko, dok kobo wa dano matek twatwal woko i kabedone kun ciŋ dano mo pe ogudo. “En ciko waŋe pi neno gin ma dano tiyo, ci neno ka ma en cito iye ducu, Pe tye mutu mo nyo piny ma ocido Licuc ka ma Lutim maraco gitwero kanne iye. Lubaŋa pe ociko kare ki dano mo me cito i nyime wek enol kop i kome, En turo dit pa wegi twer laboŋo niyo lokgi, ci keto jo mukene i wi komgi. Kit meno, macalo en ŋeyo ticgi con, en retogi piny dyewor ci twerogi kec woko, En pwodogi i nyim lwak pi timgi maraco, pien onoŋo gubarre woko ki ka lubo kore, pe doŋ guketo cwinygi ka timo kit ma en mito, Kit meno gumiyo koko pa lucan oo wa bot Lubaŋa, en owinyo koko pa jo ma giunogi, “Ka Lubaŋa obedo mot, aŋa ma waco ni en otimo bal? Ka okano waŋe woko, aŋa ma twero nene, kadi rok mo kadi dano mo? Pe gitwero geŋo dano ma pe lworo Lubaŋa ki i loc, nyo me bedo macalo owic ki bot lwak, “Tye dano mo ma owaco bot Lubaŋa ni, ‘Apoto i bal, ento pe dok abitimo gin marac. Gin ma pe aneno, in giri ipwonya; ka yam abalo, pe dok abitimo aye’? Ki tuŋ boti myero Lubaŋa ocul lakit dano-nu pi balle, in ma idag gin ma Lubaŋa otimo? In myero iyer, ma pe an, Pi meno tit gin ma iŋeyo, Jo maryek ma giniaŋ lok ka guwinyo lokka gibiwaco bota ni, ‘Yubu tye ka lok laboŋo ŋec mo, lokke pe oa ki i ryeko ma odonyo matut.’ Kono gibedo ka temo Yubu nakanaka, kono ber, pien en gamo lok macalo jo maraco. En lacerre, pud medde ameda i bal, doŋo ciŋe i kinwu pi nywaro Lubaŋa, dok nyayo lokke me yete.” Eliu dok owaco ni meno, “Onoŋo itamo ni lok ma kit enno tye atir, nyo ni ibedo laboŋo bal mo i nyim Lubaŋa, mumiyo iwacci, ‘Kony aŋo ma doŋ anoŋo? At ye doŋ maber niŋniŋ koni makato ma kono abedo ka timo bal?’ Abigamo lokki kit man, in kacel ki luremi, Nen polo, ci iŋi, nen pol ma gitye lamal makato in, Ka ibalo, noŋo itimo gin aŋo i kom Lubaŋa? Kadi bed inyayo bal anyaya, meno noŋo itimo en niŋniŋ? Ka timmi tye atir, noŋo imiyo gin aŋo bote? Gin aŋo ma en gamo ki i ciŋi? Timmi marac gudo dano ma rom ki in, timmi ma atir bene itimo bot dano. “Dano gikok pi aroma mapol ma giunogi kwede, wek gilargi ki i twer pa jo matek ma tye ka unogi. Ento pe tye ŋat mo ma wacci, ‘Lubaŋa ma ocweya tye kwene? En miyo wawero wer me pake wa dyewor. En pwonyowa makato lee ma i wi lobo, ci miyo wabedo ryek makato winyo me polo.’ Gikok bote ki kunnu, ento en pe gamo doggi, pi wakke pa jo maraco, Adada, Lubaŋa pe winyo koko nonoŋo, Won Twer Ducu pe keto iye cwinye. “In Yubu doŋ ibibedo niŋniŋ, kun iwaco ni, pe inene, dok ni koppi doŋ tye i nyime me aŋola, ento ibedo ka kure nakanaka. Itamo ni koni ka kiniga omake pe keto can i kom dano, dok ni pe paro twatwal pi tim aranyi. Meno gin mumi yo Yubu onamo doge pi loko lok ma tere pe; en onyato lwak lok mapol pi kwiya piny.” Eliu omedde ki lokke kun waco ni, “Kura koŋ manok, wek anyutti, pien pud atye ki lok me aloka pi Lubaŋa, At ye ki ŋec malac mada, ci abitiyo kwede, pi nyuto ni tim pa Dat ma ocweyowa tye atir. Pien adada lokka goba pe iye; ŋat ma tye ka lok kwedi tye ki ŋec ma oromo maber. “Nen, Lubaŋa tye ki twero, ci pe cayo ŋat mo; tekone ocuŋ i kom ryekone matut. En pe weko jo maraco bedo kwo nakanaka, ento ŋolo kop kakare pi jo ma giunogi. En pe kwanyo waŋe woko ki i kom jo ma kitgi atir, ento ketogi ka loc macalo luker, ci gibedo ki dit nakanaka. Ento ka gitweyogi ki pinno, ma ayela otweyogi macalo ogwil, ci en nyuto botgi gin ma gutimo, tim aranyigi ki kit ma guwakke kwede. En miyo gituco itgi me winyo pwony, en cikogi wek gulokke, guwek timo gin marac. Ka giwinyo doge ci gicako tiyo gin ma en mito, gityeko kare me kwogi ducu ki yomcwiny kun gitye maber. Ento ka gikwero winyo, ginekogi woko, gito ma peya giŋeyo gin mo, “Jo ma pe gilworo Lubaŋa ki i cwinygi gibedo ki kiniga, pe gikok bote pi kony ka en otweyogi. Gito ma pud gitiŋo, kwogi tum woko i tim me lewic. En laro jo ma giunogi kun tiyo ki aromagi, pwonyo dano ki can ma poto i komgi. “In Yubu bene obiti, omiyo la woko ki i atwom, oteri i kabedo malac ka ma gin mo pe odiyi, cam ma icamo jwijwi obedo ma mi yu twa twal, En can ma giketo i kom jo maraco opoŋ boti, can ma giketo pi ŋolo kop i komi doŋ omaki matek. Gwokke wek kiniga pe oteri i anywar; pe iwek gi-kok mapek ma giŋolo i komi omiyi iŋak woko, Kokoni pe twero geŋo aroma ma bi no i komgi, kadi bed iyelle ki tekoni ducu, Pe imit ni dyewor obin; meno aye kare ma rok mapol gibirwenyo wo ko ki i kabedogi. Gwokke, pe ilokke ka timo bal, pien meno aye gin ma okelo ayela i komi. “Nen, twer pa Lubaŋa dit twatwal; aŋa ma obedo lapwony ma rom kwede? Aŋa ma ocimme yo ma myero olubi? Aŋa ma twero waco bot Lubaŋa ni, ‘In itimo rac’ ’! Po pi pako ticce ma dano cen gikoro ki wer. Jo ducu guneno gin ma en otimo, ento dano neno ki ka mabor, Lubaŋa dit, waŋ pe waŋeye; wel mwaka ma en ori kwede pe rotte, “Pien en miyo pii duny dok malo, ci tono lupune calo kot; kot corre piny ki i pol, ci cwer i kom dano madwoŋ atika. Ŋat mo twero niaŋ kit ma pol giyarre kwede, nyo kit ma kot mor kwede i kema pa Lubaŋa? En miyo lutkot wil tuŋŋi ki tuŋŋi, ci umo wi godi woko. Kit meno en pito jo me rok ducu, kun miyogi cam madwoŋ twatwal. En wiro cine ki mac me lutkot, ci ciko ni myero ocel ka ma gibayo iye, Mor me kot tito pi Lubaŋa ma nyeko omake ki kiniga pi bal. “Meno aye gin ma miyo cwinya poto, ma adunona mito tiŋŋe woko ki i kabedone. Wuwiny mor me dwane ki lok ŋuruŋuru ma katti ki i doge. En cwalo mor kot i te polo ducu, lut-kotte wil wa i twok lobo ducu. Lacen dwane cako mor; mor winnye maloŋo macalo dwan laker; pe juko wil kot i kare ma dwane pud winnye. Lubaŋa miyo dwane mor i kit me aura; en tiyo jami madoŋo ma waŋ pe waromo niaŋ iye. En ciko pee ni opot i ŋom, dok ciko kot wek ocorre madwoŋ twatwal’ En tweyo ciŋ dano acel acel gene tic, wek jo ducu guŋe ticce, Lee-gu ducu gudok i ka-kannegi, gibedo mot i borogi. Lapiru a ki i ode, yamo ma kodo ki tuŋ malo kelo koyo manic. Yweyo pa Lubaŋa miyo pii makke, doko pee; pii malac makke ci doko tek calo nyonyo. En poŋo pol mapek ki pii; ci lutkot wil meny ki i pol, Gibedo ka wirre tuŋŋi ki tuŋŋi kun Lubaŋa aye telogi, pi cobo gin ducu ma en ocikogi kwede, i wi lobo ducu ka ma dano twero bedo iye. En aye ma miyo timme, kadi pi pwodo dano, nyo pi konyo lobone, nyo pi nyuto mar mere ma pe lokke, “Winy lok man, Yubu, cuŋ mot, itam pi tic me aura ma Lubaŋa timo, Iŋeyo kit ma Lubaŋa miyogi kwede cik, ci mi yo lutkot meny ki i pol? Iŋeyo kit ma pol lyerre kwede? Meno aye tic me aura mada, pa ŋat ma dirone dwoŋ mukato kare. In meri iwinyo lyeto me boŋŋini keken, ka yamo a ki tuŋ piny ci miyo kom dano ducu bedo wac, In iromo yaro polo kit ma en otimo-ni, ma omiyo obedo matek macalo mola? Pwonywa ki lok ma myero wawac bote; pe waromo ca no timwa maber pi kwiya piny ma watye kwede, Myero gitit bote ni amito lok? Dano yam owaco pire kene’, ni gineke woko? “Kombeddi doŋ cen caro waŋwa, tye ka ryeny maleŋ twatwal i polo; yamo doŋ okodo, pol doŋ owarre woko. Der ceŋ tuc woko ki tuŋ malo ma ryeny calo jabu; Lubaŋa doŋ orukke ki deyone ma kelo lworo. En Won Twer Ducu, pe watwero roto tamme; tekone dwoŋ, ŋolo kop atir, timme ducu tye atir mada, pe uno dano mo, Pi meno dano gilwore; en pe paro pi jo ma gin luryeko i tamgi kengi.” Rwot ogamo dog Yubu kun lok ki i yamo lapiru, owaco ni. “Meno aŋa ma mito umo tamma woko keto i colpiny kun loko lokke laboŋo ŋec mo? Bed ma iyubbe macalo laco, abipenyi ci in aye igam doga. “I kare ma acibo guti me te lobo onoŋo in mono it ye kwene? Titta, ka iniaŋ matut kuman. Aŋa ma omoko kit ma borre ki lacce bibedo kwede? Aŋa ma oryeyo tol me pimone? Tedi te gutine gigurogi i kom gin aŋo? Aŋa ma ocibo got me twokke kakare, ma onoŋo lakalatwe ducu me odiko giwero kacel, dok awobe pa Lubaŋa ducu gidaŋŋe ki yomcwiny? “Aŋa ma oketo kika me geŋo nam, ikare ma okatti woko ki i ot nyodo? I kare ca amiyo pol odoko boŋo me arukane, aboye woko ki pol ma ocido woko licuc. Ceŋ atoŋo waŋ co ka ma myero ogik iye, aketo doggola ma gicego ki rii me geŋone, maawacci, ‘Ibio wa kany, ento pe ibikato,’ biamwonyini ma iwakke kwede-nu bigik kany.’ “I kare me kwoni ducu yam imiyo cik bot odiko, nyo inyuto ki rupiny kabedone? Ipwonyo rupiny ki mako but lobo macalo ŋat ma teno boŋo, wek jo maraco guyekke woko ci gitengi woko ata? Ka piny oru lobo lokke woko, jami ducu cako nen ka maleŋ, macalo lobo agulu ma lacwec diyo ajiŋa i kome; ki ranine bene cako nen calo boŋo aruka ma ŋwalaŋwa la. Lenpiny pa jo maraco rwenyo woko ki botgi; pe doŋ gitwero tiŋo badgi pi goyo dano. “Yam io wa i waŋ it me nam ce? Yam iwoto ki tyeni i te kut nam wek iroti? Yam ginyuto boti doggola me to, nyo ineno doggola me kabedo-nu ma ocido I icuc? Doŋ iniaŋ kit ma piny lac kwede? Ka iŋeyo meno ducu doŋ iwaci. “Yone tye kwene ma o i kabedo me lenpiny? Ki mutu bene kabedone tye kwene? Itwero Iwoke itere wa i dul lobone, nyo Iniaŋ i kom yo ma cito gaŋŋe? In myero iŋe, pien i kare ca onoŋo doŋ gityeko nywali! Wel mwaka me kwoni pol twatwal! “Yam idonyo i odi me kano pee mayom? Ineno odi me kano pee matek calo gweŋ, ma an pud agwoko pi kare me ayela, pi kare me lweny ki me mony? Yo mene ma cito dok tuŋ ka ma gipoko iye leŋo? Yamo wokceŋ ket i wi lobo kun a ki kwene? “Aŋa ma yam obaro waŋ lalele pi kot ma corre matek twa twa!? Aŋa ma oyubo yo pi lutkot wek olubi, omi kot ocwer i lobo ka ma ŋat mo pe iye, i tim ka ma dano pe bedo iye? Aŋa ma cwalo kot muromo i lobo ma odoŋ obur, ci miyo lum twi doŋo iye? “Ŋat munywalo kot tye mono? Aŋa munywalo toyo ma ton-ni? Pii ma omakke calo pee oa ki kwene? Aŋa ma min bwoyo pee ma opune i lobo, kun a ki i polo? Pii doko matek macalo got, wa pii ma i kut nam makke woko likiŋ. “Itwero tweyo Yoggo ki nyor, nyo tuko ogwil ma gitweyo ki Lyeronyim? Iromo kela lakalatwe mukene woko wek ginen i karegi, nyo telo Oluma ki litinone i wotgi? Iŋeyo cik ma giciko ki polo? Itwero moko cikgi i wi lobo kany? “Itwero miyo dwani winnye wa i polo, wek imi pii kot ocorre, oumi woko? Itwero cwalo lutkot wek owil, tuŋŋi ki tuŋŋi, ci waco boti ni, ‘An ene, ora’? Aŋa ma oketo ryeko i pol mapek? Aŋa ma omiyo niaŋ matut okanne i lupu? Aŋa ma twero kwano wel pol ki ryekone? Aŋa ma twero leŋo dog opoko pii me polo wek kot ocwer, ci miyo apwa doko daba, ŋom makke kacel doko matek. “Itwero dwaro lee pi labwor, ci imiyo litinone giyeŋ ki cam, ma girikke i borogi, nyo ma gibuto mot kun gikanne pi mako lee? Aŋa ma miyo cam bot agak, i kare ma litinone gikok bot Lubaŋa, ma gimal ata pi nok pa cam? “Iŋeyo kare me nywal pa dyegi ma gibedo i wi got? Yam ineno ka til nywalo litinogi? Iŋeyo kwano wel dwe me durugi, wek iŋe kare ma gibinywal iye, kare ma giturre piny pi nywal kun gicolle, ci ginywalo litinogi? Litinogi doŋo i bar ma komgi yot, ci gicito gigi matwal ma pe dok gidwogo cen botgi, “Aŋa ma oweko kana me tim olone kene? Aŋa ma omiyo twero bot lagwar me cito ka ma iye mito? Atyeko miyogi bar mutwo wek obed pacogi, ki lobo ma obedo punu wek gubed iye. Gin cayo woo me gaŋ madito, pe tye ŋat mo ma burogi nyo ma miyogi gitiyo tic mo. Wi godi odoko oletgi ma gin wirre iye ata, kun giyenyo gin mutwi ducu me acama. “Jobi biye tic mo piri? Nyo bibuto i dwolli dyewor? Itwero tweyo jobi i kom kweri dyaŋ wek opur potoni? En bilubi kun loko potoni ma i luŋ? Ibigene ni pien tye ki teko madwoŋ? Ibiweko en tiyo ticci ducu? Igeno ni en bidwogo paco, ci kela belli i laro me adina? “Udu goyo bwome ki yomcwiny: ento kono lacarre rom ki pa winyo acebe ma lakica-ni? Pien en weko toŋe i ŋom, wek lyeto me kweyo omur komgi. Wiye wil woko, pe niaŋ ni lee tim mo twero nyonogi. En tiyo ki litinone ki gero, calo pe gubedo mere kikome, kadi bed ticce balle noŋo, en pe lworo; pien Lubaŋa otwonne ryeko, pe omiye ryeko mo me niaŋ i lok. Ka inen ocako ŋwec, ci en nyero aguragura ki rwode ma obedo i wiye-ni anyera. “In aye ma imiyo tekkom ki aguragura? In aye ce ma iruko ŋute ki yer maboco? In aye ma imiyo calo bonyo? Daŋŋe mere macalo won twer ci gilworo. En nyono piny i luŋ ma wakke awaka pi tekkome, ci riŋo anyim pi rwatte ki toŋi pa lulweny. En cayo lworo acaya, cwinye pe poto; pala lucwan bene pe miyo en lokke dok cen. Juru atero pa rwode yeŋŋe kok ni tak tak tak, toŋine wil calo mac. En riŋo anyim oyot mada ki gero ki kiniga; pe twero cuŋ mot ka buriji okok. Tekke buriji kok, en bene kok ki yomcwiny; Ŋweyo ŋwec lweny ki ka mabor, winyo daŋŋe pa lutel ki lulweny ma gimwoc. “Pi ryekoni aye omiyo olwilwit tuk malo, ka yaro bwone kemo piny i ŋom? In aye ma iciko ocur ni otuk malo wek oger ode lamal i wi got? En bedo i pata got, buto kunnu bene, i kakannene matye i kor got ma oculle. En yenyo camme ki kunnu, waŋe neno piny ki ka mabor, wek litinone gunoŋ remo me amata; ka ma kom dano muto noŋŋe iye, en pe rwenyo ki kunnu.” Rwot openyo Yubu ni meno, “Lajuk bal bipido lok ki Won Twer Ducu? In ma ipyem ki Lubaŋa-ni, gam lok-ki.” Ci Yubu ogamo dog Lubaŋa kun wacci, “Nen ba, an pe a gin mo ada, ci abigamo lokki niŋniŋ? Pe doŋ abiŋamo doga ka lok. Doŋ aloko tyen acel keken, pe doŋ abidok iye; iyo, aloko doŋ tyen aryo, ci pe dok abimedde.” Rwot dok ogamo dog Yubu kun loko ki i yamo lapiru ni, “Koŋ iyubbe, icuŋ matek calo laco; abipenyi ki lok, ci in ititta. Itamo ni ibinyuto ni bal tye koma ce? Ibimiyo kop loya pi nyuto ni lokki tye atir? Badi tek rom ki pa Lubaŋa? Dwani mor winnye maloŋo calo mere? “Ber doŋ irukke ki ditti ki deyone, wek tweroni ki woro ma gimiyi onen. Wek kinigani madwoŋ-ŋi okatti woko; nen jo ducu ma wakke, ci imi wakkegi okwe woko. Nen lyerregi ci idwokgi woko piny, dok inyon jo maraco woko piny ka ma gucuŋo iye. Yikgi woko ducu piny i ŋom, twe waŋgi woko i lyel. Ka itimo kumeno an bene abiye ni iromo cobo pekoni ducu ki tekki. “Nen Raa mono, lee madit ca, ma an aye akete macalo aketo in; en camo lum twon. Nen kit ma pyere tek kwede. Nen kit ma ler iye nwaŋ kwede. Yobe cuŋ matek likiŋ macalo yat kijiŋ, ler eme okubbe kacel. Cogone tek rom ki oceke mola kulu, tyene rom ki rii nyonyo. “En tye ginaura madit i kin jami ma Lubaŋa oketo; ŋat mucweye-ni keken aye romo tiŋo pala lucwan i kome. Gikelo cam bote wa ki i wi godi ka ma lee tim ducu gituko iye. En buto i te okuto ma i dog kulu, ci kanne i lagada ki i daba. Okuto ma i dog kulu giume ki tipogi, yat oget ma i ŋet kulu gurume woko dyere. Nen, kadi bed kulu mol matek ki biamwonyi, en pe lworo; kadi bed pii ma i kulu Jordan corre i doge, en pud bedo ma cwinye opye. Ŋatti mo twero golo waŋe ki goli wek omake? Gitwero tuco ume ki toŋ twok? “Itwero ywayo Min Kulu ki goli? Itwero diyo lebe kun itweyo ki tol? Itwero rwako tol ogwil i ume, nyo tuco cwake ki goli? En bibako doge boti? Bilok kwedi ki mwolo? En bicikke kwedi wek ebed opiini matwal? Ibituko kwede calo winyo? Ibitweyo tyene ki tol wek obed me galo waŋ anyirani? Lumak rec wadiwu gibilaro wei me wilone? Lucat-wil bipoko woko i kingi me acata? Ibicobo ki dim mabit ma romo kome ducu? Nyo ibicobo wiye ki atero mabit lacob rec? Ka onoŋo yam igudo ki ciŋi, pe ibinwoyo; wii pe biwil i kit ma en olwenyo kwede kwedi. “Ŋat ma tamo ni etwero timo gin mo noŋo bwolle abwola kene; tekke onene keken, ci bipoto woko piny. Ka gituge, ger mukato kare; aŋa ma romo cun i nyime? Aŋa ma twero poto i kome, ci bwot? Pe tye ŋat mo i wi lo bo-ni ducu, “Wek koŋ atitti lok i kom tyen min kulu, ki tekone madwoŋ, ki kit ma dul kome ducu gikubogi kacel maber mada. Aŋa ma twero woto ginarukane woko? Aŋa ma twero tuco kotine me mola? Aŋa ma twero yabo doggola doge? Lake ma gurumo doge kelo lworo mada. Dye ŋeye giumo ki kwodi ma giryeyogi i tyeŋ, oculle cokcok calo gimwono amwona. Gukubbe cokcok kacel, yamo pe twero kate ki i kingi. Guribbe kacel ŋat man omoko i kom lawote, ma gumoko woko likiŋ, gin pe twero poko kingi. Ka ojiro, piine mil ma ryeny aryenya calo ceŋ waŋe kwar calo ceŋ ma tye ka tuc. Leb mac macalo mac raa a ki i doge, mac kir katti woko ki i doge, Yito duny ki i ume calo pii ma tye ka walo i i agulu, nyo macalo togo ma tye ka waŋ. Yamo doge miyo mac lyel, dok miyo bilo twako lodi mac mucek adada. Ŋute tek twatwal, ŋat mo ka orwatte kwede ci bedo ki lworo madwoŋ, Dul kome ojuŋŋe kacel, ojiŋ woko matek, tek calo nyonyo ma pe wotte. Adunone tek calo got, tek calo min kidi rego. Ka otiŋŋe malo, oteka ducu gilworo; cwinygi doko nyap, tipo komgi to woko. Kadi dano toŋ ki pala lucwan, pe donyo, kadi toŋ, nyo atero kadi dim mabit, En waco ni-nyonyo obedo reŋ kai, mola kono mere rom ki yat mutop. Atero pe twero miyo en riŋo; ki tuŋ bote lagwen ma gibaye kwede lokke doko lum mutwo. Odoo kor en lwoŋo ni tyen gaya; ka gibaye ki toŋ nyero mere anyera. Tuŋ iye piny cal ki labaltako ma lake bit; ka woto goro daba madyak agora. En miyo kut yenyo calo pii ma tye ka walo awala; nam yenyo bwoyo ma obedo calo bwoyo ma i i agulu pa lated moo wir. Ka tye kia kwaŋ, kore ryeny woko matar, miyo kut kwor woko matar calo lwar wic, Pe tye gin mo ma rom kwede i wi lobo, en aye gin ma gicweyo ma pe tye ki lworo wacel. En cayo lee ducu, wa maditone, enrwot’ ‘pa lee ducu kadi bed giwakke.” Yubu ogamo dog Rwot kun waco ni, “Aŋeyo ni itwero tiyo gin ducu; pe tye lok mo ma iyubo ma pe bicobbe kakare. Ceŋ iwacci, ‘Meno aŋa ma mito umo tamma woko, kun loko laboŋo ŋeyo gin mo?’ Ada, doŋ awaco lok ma pe aniaŋ tere, aloko i kom gin me aura ma ŋeyogi loya woko. Ceŋ iwacci, ‘Winy, ci abilok; abipenyi ci myero igam doga.’ Yam onoŋo awinyo piri awinya keken, ento kombeddi doŋ aneni ki waŋa, Pi meno acane kekena, aŋut ma abuku koma woko ki apwa ki buru.” Lacen ma Rwor doŋ oloko lok magi ducu bot Yubu, ‘ocako waco bot Erifaji Lateman ni meno, “Kiniga omaka i komi ki i kom luremi aryo-nu, pien pe wuloko lok me ada i koma, kit ma ceŋ laticca Yubu oloko-ni. Kombeddi doŋ wukwany twoni abiro ki nyogi abiro, wucit kwede bot laticca Yubu, wutyer me gitum awaŋa piwu kenwu. Laticca Yubu bilego piwu, ci an abigamo legane, pe abiketo lewic i komwu muporo lokwu; pien pe wuloko lok me ada i koma kit macalo laticca Yubu oloko-ni.” Kumeno Erifaji Lateman, Bildad Lacua ki Jopar Lanaamat gucito, gutiyo kit ma onoŋo Rwot ocikogi kwede; ci Rwot ogamo Lega pa Yubu. Rwot odwoko gum pa Yubu, i kare ma en doŋ olego pi lureme; omiyo bote lim ma dodo maca ma yam en tye kwede ryen aryo. Kumeno omegine ki Iumegine ki jo ma guŋeyo wacon, gucamo cam bo te i ode. Gunyuto cwercwinygi bote, gukweyo cwinye pi gin marac ducu ma yam Rwot okelo i kome. Dano acel acel i kingi omiye dul lim ki agit jabu. Rwot omiyo gum ki Yubu i agikki me kwone makato i acakkine. En obedo ki romi alip apar wiye aŋwen, kinaga alip abicel, twoni pur alip aryo, ki megi kana alip acel. Obedo bene ki awobe abiro ki anyira adek. Ocako nyiŋ nyako mukwoŋone ni Yemima, nyiŋ me aryone Kejia, ki nyiŋ me adekke Kerenapuk. I lobo meno ducu pe onoŋo tye iye mon ma yam gibeco calo anyira pa Yubu; wongi opoko botgi ginaleya i kin omegigi. Lacen i ŋe lok meno ducu Yubu ori i lobo dok mwaka miya acel ki pyeraŋwen, ci oneno awobene ki litino pa awobene, yalwak me aŋwen kulu. Ci Yubu oto muti adada, ma onoŋo karene bene doŋ oromo maber. Dano ma kwero lubo tam pa jo maraco, ma pe lubo kit pa lubalo, ki ma pe bedo kacel ki luŋala, bedo ki yomcwiny. En maro kwano cik pa Rwot, en bedo ka lwodo lok i kom cikke dyeceŋ ki dywor. En bedo macalo yat ma odoŋo i ŋet kulu, ma nyako nyige i karene kikome, ma pote bene pe two woko. Gin ma en tiyo ducu, en limo iye gum, Ento jo maraco pe gitye kit meno; gin calo cun kal ma yamo kolo tero woko. Pi meno jo maraco Gibiŋolo kop loyogi; ki jo ma lubalo pe gibiribogi ki jo ma kitgi atir. Rwot paro pi dano ma kite atir, ento dano marac birwenyo mere woko matwal. Piŋo lurok gitye ka wo kacel? Piŋo rok mapol gipiro lok ma konnye pe? Lukergi ducu gijemo woko, ki lulocgi bene gipiro lok kacel, i kom Rwot ki i kom ŋat ma en doŋ otyeko wiro, kun giwacci, “Wek wacodu nyorgi ma gutweyowa kwede-ni woko, dok wabolu twerogi me loc woko ki i komwa.” Rwot ma obedo i wi komkerre i polo tye ka nyero; en ŋalogi aŋala. En loko kwedgi ki kiniga, dok miyogi lworo ki akemone mager, kun wacci, “An doŋ atyeko keto kabakana i wi Cion, ma en got mera maleŋ.” Abitito cik pa Rwot, ma en owaco bota ni, “In latinna, tin doŋ atyeko nywali. Legga, ci abimiyi lurok me bedo ginaleyani, ki lobo ducu bene bibedo meri. Ibiloyogi ki odoo nyonyo, ibiŋidogi woko matitino macalo agulu pii pa lacwe agulu.” Kombeddi doŋ wuwiny lokka, wun luker, wubed ryek; myero wuwiny pwony man, wun luloc me lobo. Wuti bot Rwot ki lworo ki myel kom, wurum coŋwu i nyime; wek kinigape omake i komwu miyo wuto woko i yo: pien akemo make oyotoyot mada. Gitye ki gum jo ducu ma giriŋo gilaro bote. Ai Rwot, lukworra gitye mapol, gipol mada ma giero lweny i koma. Giloko lok i koma ma giwacci, “Lubaŋa pe twero laro en!” Ento in, ai Rwot, in kwot ma gwoka ki i gin marac; in imiya abedo ki deyo, dok imiya tekcwiny bene, Akok bot Rwot matek, ci en gamo ki i wi got mere maleŋ. Abuto piny anino woko, dok aco aa malo ma koma yot, pien Rwot gwoka. Pe alworo jo alip apar ma guruma woko dyere pi lweny i koma. Bin, ai Rwot! Lara do, ai Lubaŋana! In aye ma idono lem lukworra woko ducu, ituro lak jo maraco woko liweŋ. Lar a ki bot Rwot; mi gummi obed i kom joni! Ai Lubaŋa, gam doga ka akok boti, in aye ma igwoka! I kare ma atye i can, in ceŋ ibino ikonya. Kombeddi doŋ ibed ki kica i koma, dok iwiny legana, Wun co mono, wubibedo ka yeta pi kare ma rom mene? Wun mono wubimaro lok ma konnye pe pi kare ma rom mene, ma wulubo lok me goba-ni? Wuŋe ni Rwot doŋ otyeko yera me bedo dano mere kikome; ka akok bo te en winyo kokona, Kadi bed kiniga omakwu, ento pe wutim bal; wutam tam matut mada ki i cwinywu, wubed kenwu dok laliŋ i wi kitandawu. Wutyer gitum ma myero bot Rwot, dok wuket gen mewu i kome, Tye jo mapol ma giwacci, “Wamito walim gum!” Nenwa ki kica, ai Rwot! Yomcwiny ma in imiya dwoŋ, kato yomcwiny pa jo ma gitye ki kal ki koŋo madwoŋ ata. Cutcut ka abuto piny, acako nino woko mot liyoo ki kuc; ai Rwot, in keni aye ma igwoka miyo abedo maber. Cik iti iwiny lokka, ai Rwot; dok iwiny curra, Kabakana ki Lugaŋana, winy kokona ilara. Abilego kun abako doga boti, ai ai Rwot. I odiko iwinyo dwana; ka ceŋ doŋ tuc akelo gitumma boti, ci doŋ akuro lagam ma a boti. In pe Lubaŋa ma cwinye bedo yom pi tim maraco; in pe iye nywako kabedo ki gin marac. Pe iye ni jo ma gin luwakke gucuŋ i nyimi; idag lutim maraco ducu. Ityeko lugoba woko liweŋ, in Rwot icayo jo ma gin lutim, bwami ma gineko dano kun gin lubwola kwede. Atwero donyo i ot meri, pi mar meri madwoŋ ma pe lokke; abiworo in i ot meri maleŋ, kun aryebbe piny i nyimi ki lworo madwoŋ. Ai Rwot, lukworra gitye pol; tela wek ati gin ma tye atir i nyimi, dok imi yoni ma alubo obed atir. Lok ma lukworra giwaco pe me ada’ cwinygi opoŋ ki tam me nek keken, guŋamo doggi calo lyel ma twolo, kun giloko lok mamit me bwolo dano. Pwod gidok idwok balgi i wigi, ai Lubaŋa; mi yubgi maraco ma giyubo-gu pe ocobbe. Ryemgi woko ki i nyimi gucit cen, pien gutimo lwak bal mapol, dok gujemo wo ko i komi. Ento mi jo ma giriŋo ‘gilaro boti gubed ki yomcwiny, gibiwero wer kare ducu pi yomcwiny. Dok igwokgi gin jo ma gimari; pi in omiyo cwinygi yom adada. Imiyo gum ki jo ma kitgi atir, ai Rwot; kicani geŋo komgi woko calo kwot. Ai Rwot, kiniga pe omaki, pe ijuka, dok pe ipwoda ma itye ki akemo. Kica omaki i koma do, ai Rwot, pien tipo koma doŋ oto woko lirut; ai Rwot, caŋa, pien koma ducu doŋ mwodde amwoda wa i cogo, Kwona ducu opoŋ ki can. Ai Rwot, i bigalle pi kare ma rom mene? Bin ilara, ai Rwot; lara ki i to, pien imara ki mar meri ma pe lokke. Pe gipo piri i lobo pa jo muto; ŋat mo ma paki ki i lyel kunnu pe! Doŋ aol woko ki kumo; i dyewor ducu noŋo pig waŋa oluk i kabutona woko, koko ma omiyo kabutona odyak woko. Waŋa okwot woko pi koko me cwercwiny, waŋa ocido woko, pe doŋ aneno piny maber; man ducu otimme pien lukworra giliba. Wua wucit woko cen, wun lutim maraco; pien Rwot otyeko winyo dwana ka akok. Rwot otyeko winyo ka abako doga; dok Rwot ogamo Legana. Lewic bimako lukworra ducu dok gibibedo ki cwercwiny madit’ twatwal; gibilokke gidok cen cut ki lewic. Ai Rwot Lubaŋana, ariŋo alaro boti; lara ki i ciŋ lukworra ducu ma giryemo kora, ci ikonya; ka pe, ci gibikila woko calo labwor ma kilo lee, gibiywaya woko ka ma ŋal o doŋ pe ma twero lara. Ai Rwot Lubaŋana, ka ce onoŋo atiyo gin mo i kin jami magi, ka ce atimo bal i kom ŋat mo, nyo ka atimo bal bot larema pi dwoko bote gin marac kom gin marac, nyo ka atimo bwami ayako jami pa lakworra woko laboŋo tyen lok mo, ci mi lukworra guryem kora gumaka woko iyo, wek gureta piny i nom ci guneka woko, ka gibwota i ŋom kenyo ma doŋ ato woko. Ai Rwot, a malo ki akemoni, ci ilweny i kom lukworra ma gubino magwa i koma-ni; ai Lubaŋana, co woko, pien in aye iciko pi nino me ŋolo kop. Wek lwak me rok ducu gucokke gurumi woko dyere; ci ibed malo i kabedoni ka icak loyogi ki kunnu. Rwot, in laŋolkop pa jo me rok ducu; ai Rwot, ŋol koppa muporo kit ma atir ma atye kwede, dok ma lubo kit ma cwinya leŋ kwede. Gik tim marac ma jo maraco gitiyo woko, ento mok jo ma kitgi atir. In Lubaŋa ma kiti tye atir, in itemo tam pa dano kacel ki mitigi. Lubaŋa aye kwot mera, en laro jo ma cwinygi atir, Lubaŋa laŋolkop ma ŋolo kop atir, en Lubaŋa ma tye ki kiniga nino ducu i kom lubalo. Ka ce dano mo pe oŋut, ci Lubaŋa bipako pala lucwanne. En doŋ otyeko ciko atumme dok otero; en doŋ oyubo jami lewny maraco me nek, oroyo lak aterone-gu ducu i mac gucek woko makwar. Nen, latim marac tamo tam marac ki i cwinye opoŋ ki yub me kelo ayela keken, kun loko lok gobagoba me bwolo dano. En kwinyo bur matut i ŋom, ka dok lokke poto i bur ma en okwinyo-ni kekene. Doŋ tamme marac-ci miyo en poto i can, ki tim bwamine dwogo gire i kome kene, Abipwoyo Rwot pien kite atir mada, dok abiwero wer me pako nyiŋ Rwot, ma en ŋat Mamalo Twal. Ai Rwot, in i Rwotwa, dit me nyiŋi nen i wi lobo ducu! Pak ma gikori kwede o malo i polo, wer ma litino lukere ki litino ma pud dot giwero me paki. Ityeko gero cel gogo me gwokkeni pi geŋo lukworri, wek ilo lukworri ki jo ma lewnyo i komi. Ka aneno polo, ma in itiyo ki ciŋi, ki dwe ki lakalatwe ma iketogi i kabedogi likiŋ; dano kono gin aŋo ma miyo itamo pire, dano adana ma mwa-ni gin aŋo ma miyo iparo pire? Ento imiye dit ma in Lubaŋa keken aye iloye, ka doŋ iketo lalukana me dit ki deyo i wiye, Iketo en obedo Laloc ma loyo gin ducu ma iketogi; iketo en obedo lalo jami ducu, romi ki dyaŋi, ki lee tim-gu, winyi kacel ki rec me nam, ki kit gin ducu ma wok i dye nam. Ai Rwot, in i Rwotwa, dit me nyiŋi nen i wi lobo ducu! Abipaki, ai Rwot, kun amiyi pwoc ki cwinya ducu, abitito pi jami me aura-gu ducu ma itiyo. Abiwero wer ki yomcwiny kun anyatte piri. Abiwero wer me pako nyiŋi, in ŋat Mamalo Twal. Lukworra gilokke gidok cen ka guneno in ituc; gigatte gipoto piny gito woko. In laŋolkop ma oolo kop atir, ibedo i wi komkerri, ci iŋolo koppa kakare. In ijuko lurok, dok ityeko jo maraco woko liweŋ; ityeko jwayo nyiŋgi woko ducu, pe doŋ gibipo i komgi matwal. Lukworra doŋ gutum woko matwal; ijwero gaŋigi woko ducu, wi dano doŋ otyeko wil woko i komgi adada, Ento Rwot en kabaka ma bedo i wi komkerre nakanaka; en ocibo komkerre pi oolo kop. En loyo lobo ki kit ma atir, ci oolo kop pa lwak me rok ducu kun tiyo ki dano maromrom. Rwot en ka larre pa jo ma piny obwoyogi, en cel matek ma gwokogi maber i kare me ayela. Rwot, jo ma neyi gibiketo gengi i komi; pien in pe ibwoto jo ma gibino boti. Wuwer wer me pak bot Rwot, ma tye ka loc i Cion! Wutuc gin ma en otiyo bot lwak me rok ducu! Lubaŋa ma lacul kwor me remo po pi jo ma can omakogi; wiye pe wil i kom kokogi, dok pwodo jo ma gitimogi rac. Kica omaki i koma do, ai Rwot! Nen kit atwom ma jo ma gidaga gutyeko keto i koma! In aye ma ilara iila malo ki i to, wek imiya acuŋ i nyim jo Jerucalem, wek atit botgi gin ducu mumiyo apako nyiŋi. Abibedo ki yomcwiny pien doŋ ilara. Lurok gukwinyo bur ka dok gupoto iye kekengi; guciko obwo ci tyengi kekengi aye omoko iye. Rwot doŋ otyeko miyo nyiŋe oŋene pi ŋolo kop atir, jo maraco gimoko i owic pi tim ma gin aye gutimo. Jo maraco ducu gibito giyikogi i lyel, gin lurok ducu ma gikwero Lubaŋa, Jo ma piny obwoyogi pe gibiwekogi ata kare ducu; ki gen pa lucan bene pe birwenyo woko matwal. Bin, ai Rwot! Wek dano pe oloyi! Lwoŋ lurok gucokke i nyimi wek iŋol kop i komgi. Ai Rwot, mi lworo omakgi; wek guŋe ni gin dano adana mamwa. Piŋo icuŋ cen ka mabor, ai Rwot? Piŋo ikanne woko i kare me can? Jo maraco giwakke ma gidwaro lucan me aneka; mi yub ducu maraco ma guyuboni aye otyekgi. Dano marac nyatte pi mitine maraco ma tye i cwinye; dano ma wor ma mito enoŋ magoba yeto Rwot dok kwere woko bene. Dano marac tamo ki cwiny me wakke kun wacci, “Lubaŋa peke.” En pe paro, dok pe bino bot Lubaŋa. Gin marac ma en tamo ducu tiyo co bo kakare. En pe niaŋ i ŋolo kop pa Lubaŋa pien malo twatwal; en neno lukworre ci jwiyogi woko ajwiya. En ta mo ki i cwinye kun wacci, “Gin mo pe ma biloya; i kare me kwona ducu pe abineno can,” Lokke ducu ma en loko opoŋ ki ceno dano acena, bwola ki bura me diyo dano ki tek; en pe galle me loko lok marac ki lok ma kelo adagadaga. En kanne woko i dye gaŋi ka kiyo piny; en libo dano kunnu ci neko jo ma gipe ki bal. En neno piny kun roto dano ma can omako adada ma piny oloyo; en kanne woko i muŋ ka kiyogi calo labwor. En kanne woko pi kiyo lacan wek emak woko, en mako lacan noŋo doŋ oleko wiye okelo omoko i obwone. Dano ma can omako adada gininyo woko, ci donyo woko piny i ŋom, pien teko pa lakworre noŋo oloyo mere woko. Dano marac tamo ki i cwinye ni, “Wi Lubaŋa doŋ otyeko wil woko, omiyo waŋe woko, pe bitwero nena.” Bin ilara do, ai Rwot! wii pe myero owil i kom ŋat ma tye ki can, ai Lubaŋa! Piŋo dano marac kwero Lubaŋa, kun tamo ki i cwinye ni, “In pe ibipwoda?” Ento in iŋeno, dok iŋeyo can ki cwercwiny ma dano tye kwede, kare ducu it ye ka yubbe me miyo kony, Dano ma tye ki can-ni miyo kwone boti, pien yam ibedo ka konyo litino kic. Myero itur twero pa jo maraco ki lutim maraco woko; yeny balgi ducu nio waŋ ma pe doŋ ibinoŋo bal mo kadi ki acel. Rwot aye’ kabaka ma bedo nakanaka; lurok ducu gibito gitum woko ki i lobone, Ai Rwot, iwinyo lega pa jo mamwol: ibimiyo gibedo ki tekcwiny, ibiciko iti. Iŋolo kop pa litino kic ki jo ma giunogi, wek dano mo me lobo man pe dok okel lworo. Ariŋo alaro bot Rwot. Piŋo wuwaco bota ni. “Lwi woko calo winyo ici bed i wi godi; pienjo maraco gitero atum, dok guketo te aterogi i kom tol atum, wek gicel jo ma cwinygi atir woko i colpiny, Pe tye gin mo ma dano ma kite atir twero timo, ka te guti ducu doŋ gibalo wako”? Rwot tye i ot mere maleŋ; komkerre tye i polo. En neno dano ducu ma i lobo, dok ŋiyo gin ma gin tiyo. Rwot temo jo ma kitgi atir ki jo maraco, en dag ŋat ma maro timo tim bwami. En bionyo lodi mac ki gweŋ calfa i kom jo maraco; en bipwodogi ki yamo oro malyet. Rwot kite tye atir, dok maro tim ma atir; jo ma cwinygi atir gibineno waŋe. Konya, ai Rwot, pien ŋat mo maber ma geni doŋ pe; pien jo ma lugen doŋ guto gurwenyo woko ki i kin dano. Dano acel acel loko lok goba bot lawote, ma noŋo lok ma a ki i doggi mit ata ento cwinygi opokke woko dul aryo. Rwot, myero ijuk lok me bitagi-ni woko, en lok ma a ki i doggi me nyatte-ni! Gin giwacci, “Wabiloyo lok ki lebwa, wabiloko gin ducu kit macalo wamito, pien pe tye ŋat mo ma en ladit ma loyowa.” “Ento kombeddi abibino,” Rwot ma owaco, “pien doŋ giyako jami pa lucan woko, dok jo ma piny obwoyogi gitye ka cur acura ki arem. Abigwokogikit ma gimito-ni.” Lok pa Rwot ma en ciko ber, gitwero genone, obedo calo ryal ma giliyo maber ki mac piny i ŋom, ma giliyo tyen abiro kulu. Gwoka maber kare ducu, ai Rwot, gwokwa ki i kom yalwak me kare man. Jo maraco gitye ka wirre i kabedo ducu giyenyo dano, kit macalo dano ducu pako kwede tim marac ma gitiyo i kin dano ma i lobo. Ai Rwot, wii mono biwil woko i koma pi kare, ma rom mene? Wii biwil woko matwal bo? Ibikanne woko ki bota pi kare ma rom mene? Myero abed ki arem i cwinya pi kare ma rom mene, dok bene myero abed ki cwercwiny dyeceŋ ki dyewor benebene? Lukworra kono gibiloya, wigi pil i koma pi kare ma Tom mene? Nen tuŋ bota ci igam doga, ai Rwot Lubaŋana. Meny waŋa, wek pe anin nino me to, miyo lukworra giwacci, “Watyeko loyo en woko!” Dok pe iwek lukworra gubed ki yomcwiny ni pien doŋ apoto i can, Ento an doŋ atyeko geno mar meri ma pe lokke; abibedo ki yomcwiny pi lar meri, Abiwero wer bot Rwot, pien otima maber atika. Dano ma lamiŋ waco ki, i cwinye ni, “Lubaŋa gire pe,” Gin jo ma kitgi raco ma gitimo gin me kwer; pe tye ŋat mo ma tiyo gin maber. Rwot neno dano ducu kun neno piny ki i polo, me neno ka ce tye jo mogo i kingi ma gitiyo ki ryeko, ma gimito Lubaŋa. Gin ducu doŋ guŋak woko, gudoko jo ma kitgi raco; pe tye ŋat mo ma tiyo gin maber, pe tye, kadi ki acel. Gin lutim maraco-ni, pe gitye ki ŋec? Giyako lim pa jona calo gicamo kwon, ma pe bene gilwoŋo nyiŋ Rwot. Gibibedo kunnu ki lworo madwoŋ, pien Lubaŋa tye ki jo ma kitgi atir. Wun wumito balo yub pa lacan, ento Rwot aye ka Larrene. Iyo, kono bedo ber ka larre pa jo Icrael bi no ki i Cion! Ka Rwot bidwoko gum bot jone, Yakobo bibedo ki yomcwiny madwoŋ, ki Icrael bene cwinye bibedo yom. Ai Rwot, aŋa ma bibedo i kemani? Aŋa ma bibedo i wi got meri maleŋ? Dano ma cwinye leŋ; dok ma tiyo ginma atir, ma loko bene lok me ada ki cwinye ducu; ma pe coko lok me kwot i lok ma en loko, dok en pe timo gin marac mo i kom lareme, dok pe balo nyiŋ lawote. En cayo jo ma pe giworo Lubaŋa, ento en woro jo ma gilworo Rwot. Pe loko kwoŋ ma yam okwoŋo kadi bed kwoŋŋe-ni kelle can, En pe mito enoŋ magoba i kom lim ma en konyo ki dano, dok pe gamo lim ma giwile kwede i muŋ wek giwe lok odok i kom dano ma pe ki bal, ŋat ma tiyo kumeno pe gidiro woko cen. Gwoka, ai Lubaŋa, pien ariŋo alaro boti. Awaco bot Rwot ni. “In i rwoda; gin maber mo ma atye kwede pe, laboŋo in.” Jo maleŋ ma i lobo gin jo me awora, ma giyomo cwinya mada. Jo ma giyero lubaŋa mukene ginyayo cwercwinygi gimedo ameda; pe abionyo gityergi me remo, dok bene pe abilwoŋo nyiŋ jogigi ki doga. Rwot aye dulla ma gipokka, en kikopo ma abimato; kwona ducu tye i ciŋi. Waŋ apokki me potona opoto i kabedo ma yo mo cwinya; iyo, doŋ anoŋo ginaleya maber ma romma, Apwoyo Rwot ma omiya ryeko; cwinya bene pwonya kadi ki i dyewor, Kare ducu aŋeyo ni Rwot tye kweda: pe gibidira woko cen, pien en tye yo tuŋ ciŋa ma lacuc. Pi meno omiyo abedo ki yomcwiny madwoŋ, nino ducu abedo maber ki kuc; pien in pe ibitenya ata i lobo pa jo muto, pe ibiweko danoni ma geni donyo i bur lyel. In doŋ ibinyutta yo ma tera i kwo; bedoni kweda miyo abedo ki yomcwiny madwoŋ mada, i tuŋ ciŋi lacuc tye iye gin ma yomo cwiny dano nakanaka. Ai Rwot, winy kokona pien lokka tye atir; cik iti iwiny kokona! Winy legana, pien pe tye lok me bwola mo ma a ki i doga. Ibimiyo aloyo kop, pien iŋeyo kop ma tye atir. Ka iŋiyo cwinya, dok ka ilima i dyewor, kadi itema, pe ibinoŋo gin marac mo tye iiya; dok pe abalo i lok ducu ma aloko, Dok ka iniyo tic pa dano, ibinoŋo ni alubo cikki, pe alubo kit pa jo ma gin lubwami. Kare ducu abedo ka lubo yoni, ma pe aŋak woko ki iye, Alegi kun akok boti, ai Lubaŋa, pien ibigamo doga; cik iti bota, iwiny lok ma aloko. Nyut mar meri ma pe lokke i yo me aura, in Lalar pa jo ma giyenyo ka larre i ciŋi yo tuŋ lacuc, pien igwokogi woko maber ki i kom lukworgi. Gwoka macalo igwoko nyig waŋi kikome; kana i te tipo me bwomi, ki i kom jo maraco ma giyako limma, gin lukworra ma giraco twatwal ma giruma woko dyere. Cwinygi odoko tek ma kica pe makogi; lok ma giloko bene giloko ki nyatte, Gilubo kora; kombeddi guruma woko; guciko waŋgi me noŋo kare ma myero gireta kwede woko piny i ŋom, Lukworra calo labwor ma owor, gimito kido koma woko, ma giliba kun gikura i kabedo ka ma gukanne iye calo latin labwor. A malo, ai Rwot, ci icirwatte ki lukworra, lweny kwedgi ci ilogi woko! Lara ki i ciŋ jo maraco ki pala lucwanni; lara ki i ciŋgi ki tweroni, ai Rwot, ki i ciŋ jo ducu ma doŋ gitye ki jami ducu ma igi mito i kwo man. Wek guyeŋ ki gin ma yam ikano pigi; mi litinogi gunoŋ can muromo makato; dok myero guwek mogo odoŋ pi litinogi ma pud lukere. Kit macalo an kita tye atir-ri, abineni, bedoni kweda miyo aco ki i waŋ nino ma noŋo apoŋ ki yomcwiny. Amari, ai Rwot, pien in i tekka. Rwot aye gotta en cel gogona matek, en lalarra; en Lubaŋana, ki gotta, ariŋo alaro bote, en gwoka macalo kwot, en kalarrena matek; en geŋo ŋeya woko ci gwoka miyo abedo maber laboŋo ayela, Akok bot Rwot, ci en lara ki i ciŋ lukworra, Pi meno myero gipak Rwot. To otelo tolle ci otweya woko aduno, biamwonyi me to otwagge oruma woko dyere, kulu ma piine, ger ma neko dano ocorre woko i wiya limuk. Tol Lyel odwala woko, owic me to bene orine woko i nyima. I kare ma atye i can akok bot Rwot; akok gira bot Lubaŋa pi kony, Owinyo dwana ki i ot mere maleŋ, kokona pi kony odonyo i ite, Cutcut lobo oyeŋŋe ma morre pe twerre, te godi bene ducu guyegge woko ma giyeŋŋe matek, pien kiniga onoŋo omako Lubaŋa. Yito oduny okatti ki i ume, mac ma waŋ malyet okatti ki i doge, ma lodine bene olyel, olyel matek mada. Oywayo polo odwoko cen, ci olor obino piny, kun piny macol mapek oryene i te tyene. Oito i wi lakerubi ci otuk kwede, oriŋo madwir i dye yamo. Oketo piny macol orume dyere, kemane obedo pol mapek mupoŋ ki pii. Pee ki lodi mac ma lyel gunen i piny ma ryeny maleŋ ki i nyime, otuco dye pol macol licuc-ci woko. Rwot omiyo polo omor, dwan ŋat Mamalo Twal owinnye, ocwalo pee ki lodi mac. Obayo aterone, okeyo lumerok woko; omiyo lutkot owil, ci orwadogi woko piny. Dye nam opokke, tere onen, guti me te lobo bene odoŋ twolo, i kare ma ijukogi, ai Rwot, i kare ma ikutogi ki yweyo ma okatti ki i umi. Rwot ocwalo ciŋe piny ki i polo, ci omaka, oywaya okela woko ki i pii matut. Olara ki i ciŋ lakworra matek, olara ki i ciŋ jo ma gidaga, pien onoŋo gitek mada giloya woko. Gupoto i koma i kare ma can obwoya matek, ento Rwot aye obedo ka kenya. Okwanya woko okela i kabedo malac; olara pien onoŋo ayomo cwinye. Rwot omiya bakacic pien oneno ni kita atir, oculla muporo leŋcwinya; pien abedo ka lubo cik pa Rwot, pe apokke woko ki bot Lubaŋa pi bal mo. Alubo cikke ducu, pe aŋak aweko gin ma en ociko. Pe atimo bal mo i nyime, dok agwokke mada pe atimo bal alii mo, Mumiyo Rwot omiya bakacic pien oneno ni kita atir, oculla muporo leŋcwinya ma abedo kwede i nyime. Rwot, in lagen bot jo ma lugen; bot ŋat maber ma pe ki bal inyutte bote bene calo ŋat maber ma pe ki bal. Cwinyi leŋ i kom jo ma cwinygi leŋ, ento iger i kom dano ma tamme ogom, Ilaro jo mamwol, ento jo ma luwakke idwokogi woko piny. Iyo, in aye ma icwinyo mac tarana; Rwot Lubaŋana aye menya ki colpiny. Iyo, atwero tyeko buca mony kulu kaikonya; pi teko pa Lubaŋana miyo apye akalo wi cel. Lubaŋa man, gin ducu ma en tiyo tye atir, lok pa Rwot ma en cikke me tiyo bedo ada; en tye macalo kwot pa jo ducu ma giriŋo gilaro bote. Aŋa ma Lubaŋa, kono Rwot kene? Aŋa ma got, pe Lubaŋawa aye keken gire? En aye Lubaŋa ma oruka ki tek, en aye ma omiyo awoto ki kuc. Oketo tyena obedo macalo tyen til, ociba malo ka ma acuŋ iye matek. En pwonyo ciŋa pi lweny, mumiyo atwero gomo wa atum mola, Doŋ ityeko miya kwot me larri, kun ijola ki ciŋa lacuc; kony ma in imiya omiya adoko dit. Imiya kabedo malac ka ma awoto iye ducu, omiyo tyena pe ocer, Aryemo kor lukworra ci amakogi wako iyo; pe alokke adok cen nio, ka atyekogi ducu, Acobogi woko pil ci gupoto piny ka tyena; ma pe doŋ gitwero a malo. In aye iruka ki tek pi lewny; imiyo lulweny i koma guto gutum woko ka tyena. Imiyo lumerokka guloko ŋegi bota, imiyo atyeko jo ma gidaga woko. Gukok pi kony, ento ŋat mo pe ma olarogi, gukok bot Rwot, ento en pe ogamo doggi. Adinogi woko gudoko macalo apwa me yom ma yamo kolo; anyonogi macalo coto ma tye i yo gudo-gu. Yam ilara ki i kom rok mapol ma gilwenyo kweda; iketa abedo ladit ma loyo rok ducu; jo ma yam pe aŋeyogi gudoko jona ma an aye aloyogi. Cutcut ka lurok giwinyo pira ci gubino bota ma gimwolle amwola, ci gilubo cikka. Tekcwiny orwenyo woko ki botgi, gua ki ka ma gukanne iye gubino ma komgi myel amyela. Rwot tye kwo; gipwo gotta, gipil wi Lubaŋa ma en lalarra. En Lubaŋa ma omiya aculo kwor i kom lukworra, dok ma obwoyo rok mapol, omiyo gubedo i te Locca; ci olara ki i ciŋ lumerokka; iyo, ipilo wiya makato lukworra, ilara ki i cin lulweny ma lubwami, Pi meno abikori i kin lurok, ai Rwot, dok abiwero wer me pako nyiŋi. Lubaŋa miyo deyo me loc madit bot kabakane, dok nyuto mar mere ma pe lokke i kom danone ma en oyero ka giwiro, bot Daudi ki likwaye ducu matwal. Polo ki jami ducu ma tye iye ginyuto deyo pa Lubaŋa; dan polo bene nyuto tic me cine. Nino acel acel tuco pire bot nino ma lube, dyewor acel acel nwoyo tucone bot dyewor mukene wek oŋe. Leb ma giloko pe, ki lokgi bene pe; dwangi won pe winnye. Ento dwangi winnye teretere i wi lobo ducu, ki lok ma giloko owa i agikki piny. Lubaŋa oguro kema i polo pi cen, ma bino macalo lanyom ma a woko ki i kicikane, macalo laco ma kome tek ma riŋo i ŋwec ki yomcwiny. Tuc ki i acakki polo yo tuŋcel, woto rumo woko ducuo wa iagikkine; gin mo pe liweŋ ma twero kanne pi Iyetone. Cik pa Rwot ber, dok tye atir; miyo kwo manyen bot dano; gin ma Rwot ociko tye me ada, miyo ryeko bot lumiŋ. Pwony pa Rwot tye atir, yomo cwiny dano; cik pa Rwot tye maleŋ, miyo dano niaŋ maber. Lworo Rwot ber, ci pe bigik matwal, ŋolo kop pa Rwot tye kakare, dok bedo atir ma romrom kare ducu. Pigi tek ma myero gimak makato jabu, kato bene jabu ma giliyo maberre, Gilim gikato moo kic woko, kato bene kadi ki moo ma cwer ki i peda kic, Gimiyo ŋec bot laticci; ŋat ma ogwoko cikki limo mot madit. Aya ma twero neno balle kene? Lara ki i kom balla ducu mukanne. Juka bene pe apot i bal mo ma obino pi cwiny me wakke; pe iwek oloya! Ci abibedo laboŋo bal mo i koma, abibedo ma pe atimo bal mo madit: Mi lok ma a ki i doga ki tam ducu ma tye i cwinya obed ma in ipwoyo, ai Rwot, in gotta dok lakokka. Rwot ogam dogi i nino ma it ye ki can! En ocwal kony boti ki i kabedone maleŋ, okony kori ki i Cion! En ogam mot ducu ma ityero bote, dok opwo gitum awaŋani ducu ma itumo bote. En omiyi gin ma cwinyi mito, dok omi yub meri ducu ocobbe kakare. Wek wawer wer me pak ki yomcwiny pi Locci; wek waŋab benderawa malo i nyiŋ Lubaŋawa! Rwot omiyi gin ducu ma-ilege pire! Kombeddi aŋeyo ni Rwot bikonyo kabakane ma giwiro; bigamo doge ki i polone maleŋ, bimiye loyo lweny. Jo mogo ginyatte pi gadigadi lewny, ki pi aguragura; ento wan wanyatte pi nyiŋ Rwot Lubaŋawa, Gibiyokke ci gipoto woko piny; ento wan wabia malo wacuŋ atir. Mi loc bot kabaka, ai Rwot; gam dogwa ka wakok boti. Kabaka tye ki yomcwiny, ai Rwot, pien in aye imiye tek; dok opoŋ ki yomcwiny madwoŋ pi loc ma imiye. Ityeko miye gin ma cwinye mito, dok igamo doge imiye gin ma en olegi pire. Iŋolo wiye ki mot mabeco me gum; iketo bene lalukana me jabu ma giliyo maber i wiye, En olegi ni imiye kwo, ci imiye; imiye kwo ma ri nakanaka pi kare malac. Deyone dit pi konnyi; imiye deyo ki dit me Loc, Iyo, imiyo gum bedo i kome matwal; bedoni kwede miye yomcwiny. Kabaka geno Rwot; pi meno pe gibidire cen, pi mar ma pe lokke pa ŋat Mamalo Twal. Ibicwalo ciŋi imako lukworri woko ducu; ibimako jo ducu ma gidagi ki ciŋi lacuc. Ka ibinen botgi, ci ibilokogi gidoko calo keno ma mac tye ka lyel iye. Rwot bimwonyogi woko ki kinigane; ci mac biwaŋogi woko. Ibineko litino ityeko woko liweŋ ki i lobo, ibineko likwayogi woko ducu, Gipiro lok i komi kun giyubo me timi marac, ento kadi gibed ki yub me timo gin marac, yubgi pe bicobbe kakare. Ibitelo atummi ibayo atero kun imito icel waŋgi woko; ci ibimiyo gin ducu giriŋo woko, Gidwori pi tekki, ai Rwot! Wabiwero wer kun wapako tweroni. Lubaŋana, Lubaŋana, itenya woko piŋo? Piŋo ibedo ka mabor ma pe iromo lara, dok bene pe iwinyo ka acur acura? Akok boti dyeceŋ, ai Lubaŋana, ento pe igamo doga; akok boti dyewor bene, ento pe anoŋo kit yweyo mo. Ento giketi i wi komker macalo ŋat, Maleŋ, in aye Lubaŋa ma jo Icrael gipako. Kwarowa yam gigeni; gugeni, ci omiyo ilarogi. Gukok boti, ci ilarogi; gugeni, omiyo pe gubedo ki cwercwiny dok lewic pe omakogi. Ento an mera a kwidi, pe adano; jo ducu giŋala dok gicaya. Jo ducu ma ginena giŋala aŋala, gicima ki lebgi, kun giyeno wigi. Gin giwacci, “En omiyo kwone bot Rwot; wek Rwot olare, wek Rwot olare, pien cwinye yom i kome!” In aye yam ikonya omiyo ginywala; i kare ma an pud latin lakere igwoka maber, Cakke ma ginywala abedo ka jeŋŋe i komi, cakke i kare ma maa onywala iye in ibedo Lubaŋana. Pe ibed bor kweda, pien can tye cok; pe tye ŋat mo ma myero okonya. Lukwor mapol guruma woko macalo twoni, gin ducu guruma woko dyere, calo twoni ma komgi tek ma gua ki i lobo Bacan. Giŋamo doggi malac i koma, calo labwor mager ma tye ka koko. Tekka otum woko macalo pii ma gionyo i ŋom, cogona ducu guwotte woko ki i waŋ mwot; cwinya leny calo odok kic ma tye ka leny, tye ka leny ki iiya, Tekka otwo woko calo tako mutwo, ki leba bene omoko woko i cwaka; imiya apoto piny i apwa macalo ŋat muto. Iyo, dul pa jo ma gin lutim maraco gugura woko dyere, gicalo lwak gwogi ma gugura woko doŋ gucobo ciŋa ki tyena wo ko ducu, Atwero kwano wel cogona ducu, ginena ma guciko waŋgi i koma; gipoko ginarukana woko i kingi, gibolo kwir pi boŋona. Ento in, ai Rwot, pe ibed ka mabor kweda! In Lalarra, rune ibin oyot ikonya! Lara ki i lak pala lucwan, lar kwona ki i teko pa gwogi! Lara ki i dog labwor, kwany kwona wo ko ki i tuŋ twoni mager-gu! Abitito pi gin ma itiyo bot utmegina; abipaki i dye lwak ma gucokke kacel: Wun jo ma wulworo Rwot, wupake! Wun likwaye pa Yakobo ducu wumiye deyo, wuwore, wun jo Icrael ducu! En pe ocayo can pa jo ma can opoto i komgi; iye pe dag neno cangi, ento owinyo kokogi, i kare ma gukok bote. Abipaki i dye lwak madwoŋ ma gucokke kacel; abicobo kwonna i nyim jo ducu ma gilwori. Jo ma can opoto i komgi gibicamo cam giyeŋ; ki jo ma giyenyo Rwot gibipake! Myero gibed ki kwo maber nakanaka! Rok ducu ma i lobo gibipo i kom Rwot; gibia ki i kabedo ducu gidwogo bote; kaka ducu me rok mapatpat gibibino ka wore. Rwot aye kabaka, en loyo jo me rok ducu. Iyo, jo ducu ma gin luwakke lobo-ni gibiguno piny bote; ki jo muto ma gibidok i ŋom gibiguŋo piny i nyime, jo ducu ma giŋeyo ni gibito. Yalwak me kare me anyim ducu gibitiyo bote; dano gibitito lok i kom Rwot bot yalwak ma lubogi, kun gituco larre bot jo ma pud peya ginywalogi, ni Rwot aye ma olaro jone. Rwot aye lakwat ma kwayo an; pe tye gin mo ma birem bota. En miyo abuto i olet maber, en tera i waŋ pii manic. En roco kwona doko nyen. En tela miyo abedo ki kit kwo ma atir pi nyiŋe kene keken. Kadi bed awoto i nota me tipo to, pe abilworo gin marac mo; pien in it ye kweda; toŋŋi ki odooni me kwat gimiyo cwinya bedo tek. Iketo meja me cam i nyima ma onoŋo lukwor mera bene gineno; ijola maber kun iwiro wiya ki moo, ki kopona bene opoŋ woko libyeny. Adada, berri ki kicani bibedo i koma pi kare me kwona ducu; dok an abibedo i ot pa Rwot matwal. Lobo kacel ki jami ducu ma tye iye gin jami pa Rwot; lobo kacel ki jo ducu ma gibedo iye bene mere. En con oketo lobo i wi nam, dok oketo te gutine ocuŋ matek i dye pii me nam matut. Aŋa ma tye ki twero me ito malo i wi got pa Rwot? Aŋa ma twero cuŋ i kabedone maleŋ? Ŋat ma tiyo gin ma atir, dok ma cwinye leŋ, ŋat ma pe miyo kwone me woro cal lubaŋa-gu, dok ma pe kwoŋo kwoŋ ki goba. Rwot bimiye gum, Lubaŋa lalarre bimiyo en loyo kop. Meno gin aye jo ma giyenyo en, gin jo ma gibino i nyim Lubaŋa pa Yakobo, Wutiŋŋe, wuyabbe malac, wun dog cel! Wuyabbe, wun doggola macon, wek kabaka me deyo odony. Aŋa ma kabaka me deyo? En Rwot matek ma tye ki twer, en Rwot matek ma loyo lewny! Wutiŋŋe, wuyabbe malac, wun dog cel! Wuyabbe, wun doggola macon, wek kabaka me deyo odony. Kabaka me deyo man en aŋa? Rwot me mony aye kabaka me deyo! Atiŋo kwona amiyo boti, ai Rwot. Ageno in, ai Lubaŋana, pe iwek lewic omaka; pe iwek lukworra guŋala, Iyo, pe iwek lewic omak jo ma gikuri; ento wek lewic omak jo ma gijemo woko i komi nonono. Pwonya wek aŋe yoni ducu, ai Rwot; mi anegi maber. Tela i ada meri, dok ipwonya, pien in Lubaŋa Lalarra, Abedo ka kuri dyeceŋ jwi. Po pi kicani, ai Rwot, ki pi mar meri ma pe lokke, ma yam inyuto nia wa con, Pe ipo pi roc ki bal ma yam atimo i kare me tinona. Ento po pira pi mar meri ma pe lokke, ki pi berri, ai Rwot. Rwot ber, dok cwinye atir; pi meno en pwonyo lubalo yo ma myero gulubi. En telo jo mamwol me tiyo gin ma atir, dok pwonyogi wek guŋe gin ma en mito. Yo pa Rwot ducu opoŋ ki mar ma pe lokke, ki gen, pi jo ma gigwoko gicikkene ki lok me cadenne. Pi ber me nyiŋi, ai Rwot, wek balla, pien dwoŋ. Dano mene mono ma lworo Rwot? Rwot bipwonye yo ma myero en olubi, En kikome bibedo ki lonyo ma ri nakanaka, dok litinone bene gibicamo lobo. Rwot bedo larem jo ma gilwore, dok bene en mi yo giŋeyo gicikkene. Aneno bot Rwot kare ducu, pien en bigonyo tyena woko ki i obwo. Lokke idwog bota, dok inyutta berri; pien doŋ adoŋ kena, dok can odiya woko. Kwany cwercwiny woko ducu ki i cwinya, dok ilara ikwanya woko ki i lwak can ma atye iye. Tam pi canna ki ayela ma atye kwede, ci iwek balla ducu. Tam lukworra gitye adi, ma gidaga kun giger matek! Gwok kwona, dok ilara; pe iwek giket lewic i wiya, pien ariŋo alaro boti. Mi berra ki cwiny ma atir ma atye kwede gugwoka, pien akuro in. Ai Lubaŋa, lar jo Icrael ki i can megi ducu. ŋol koppa, ai Rwot, pien abedo ka tiyo gin ma atir, kun ageno in ki cwinya ducu ma pe akalo akala wacel. Nena maber, ai Rwot, dok itema; nen cwinya ki tamma ducu. Pien aneno mar meri ma pe lokke, dok abedo i adani. Pe abedo kacel ki jo ma lugoba, dok pe aribbe ki jo ma lubwola. Adag ribbe ki lutim maraco, pe bene abibedo kacel ki jo maraco. Ai Rwot, alwoko ciŋa pi nyuto ni ape ki bal mo, awoto arumo kwede ke no tyerri, dok awero wer me pwoc ki dwana maloŋo, kun atito bene pi tic me aura ma itiyo. Ai Rwot, amaro odi ka ma ibedo iye, ma en kabedo ka ma deyoni tye iye. Pe it yeka woko kacel ki lubalo, dok pe ineka woko kacel ki jo ma gioyo remo pa dano. Gin jo ma cwinygi tye pi timo gin marac, ma jabagi opoŋ woko ki lim mewil i muŋ. Ento an atiyo gin ma atir; lara, dok iyutta berri. Abedo ki kuc ma gin marac mo pe ma gudo koma; abipako Rwot i dye lwakke ma gucokke. Rwot aye ceŋ mera ki lalarra; abilworo aŋa? Rwot gwoka-ki igin marac ducu: pi meno abibedo ki lworo it, kom aŋa Ka lutim maraco gipote i koma ma gitemo neka woko, ma giloko lok maraco me kwot i koma, gin lukworra ki lumonena, gibicato ci gipoto woko piny. Kadi dul mony mo ruma woko dyere, pe abibedo ki lworo i cwinya; kadi gier Iweny i koma, pud abibedo ki gen aye i kom Rwot. Onoŋo alego Rwot pi jami acel, abiyenyo en jami acel-li keken, ni, myero abed i ot pa Rwot pi kare me kwona ducu wek abed ka neno ber pa Rwot, dok apeny doge ki i ode. En bikana i ode, dok gwoka, i kare me can; biuma woko i kemane, dok biketa acuŋ malo i kom got. Pi meno abiloyo lukworra woko ducu ma giruma woko dyere-ni; dok abi tyero gitum i kema pa Rwot kun adaŋŋe ki yomcwiny madwoŋ; abiwero wer kun apako Rwot ki dwan mamit. Winya, ai Rwot, ka akok boti matek nyut berri bota dok igam doga! Iwaco ni, “Bin bota.” Agamo ki i cwinya kun awacci ni, “Abibino boti, ai Rwot.’ ” Pe ikanne WOKO ki bota, Pe iryem laticci woko ki kiniga; in aye ibedo lakonya. Pe ibola woko, dok pe ibwota, ai Lubaŋa lalarra! Wora ki maa dok gubwota woko, ento Rwot gire bigwoka. Pwonya wek aŋe yoni, ai Rwot, tela awot i yo ma opirre maber, wek lukworra pe guliba. Pe imiya bot lumonena; pien lucaden ma lugoba gucuŋ ka loko lok gobagoba i koma, ma giloko lokke ducu ki gero. Aye ni abineno ber pa Rwot ma pud abedo i kin jo makwo i lobo. Kur Rwot; bed matek, dok ibed ki tekcwiny; iyo, kur Rwot! Akok boti do ai Rwot; pe idiŋ iti woko ka winyo kokona do, in gotta, pien ka iliŋ woko ma pe igamo doga, miyo adoko ŋat acel i kin jo ma gidonyo piny i bur. Winy dwan me lega me bako doga boti, ka akok boti pi kony, kun ataŋo ciŋa malo boti ma akemo kwede kabedoni maleŋ twarwal-Ii. Pe imaka itera woko kacel ki jo maraco, ki jo ma timo gin marac, gin jo ma giloko ki luwotgi lok ma kelo kuc kun gitamo ki i cwinygi me timo tim aranyi, Culgi muporo kit timgi, mi gunoŋ can pi gin marac ma gutimo. Pe giparo pi gin ma Rwot otimo, kadi pi jami ma en oketo; pi meno en biiyekogi woko ma calo ot magimuko ma pe dok gigero matwal. Gipak Rwot pien doŋ otyeko winyo kokona me bako dog, Rwot aye tekka dok kwotta; agene ki cwinya ducu, En okonya omiyo cwinya opoŋ ki yomcwiny madwoŋ, awero wer me pak kun amiyo pwoc bote. Rwot aye tek pa lwakke, en aye ŋat ma danone ma giwiro riŋo laro bote, Lar lwakki, dok imi gum i kom jo ma gin meri. Bed lakwatgi, dok igwokgi nakanaka. Wupak Rwot, wun gin makwo ducu ma wubedo i polo, wupak Rwot pi deyone ki pi tekke, Wupak nyiŋ Rwot ma tye ki deyo; wuwor Rwot kun wuruko ginaruka maleŋ. Dwan Rwot mor winnye wa i wi pi i: dwan Lubaŋa me deyo tye ka mor, Rwot dwane tye ka winnye i wi nam madoŋo, Dwan Rwot winnye ma opoŋ ki tek dok ki dit me loc. Dwan Rwot baro wa yadi cedar woko, kadi wa yadi cedar madoŋo me Lebanon. En miyo godi me Lebanon pye calo laroya dyaŋ, ki Cirion bene en miyo pye calo wod jubi ma i tim. Dwan Rwot meny ci miyo leb mac puk woko lipil. Dwan Rwot miyo tim yeŋŋe, Rwot yeŋo tim Kadec, Dwan Rwot miyo til nywal, dok jwero yadi me buŋa wo ko ducu; dano ducu ma gicokke i ode gidane ni, “Deyo obed bot Lubaŋa!” Rwot aye ma loyo pii matut ducu ma tye i nam; en bedo i wi komkerre matwal macalo kabaka, Rwot myero omi teko bot lwakke! En myero omi gum me kuc i kom jone! Amito paki, ai Rwot, pien doŋ ilara, dok pe imiyo lukworra gubedo ki yomcwiny pira. Ai Rwot Lubaŋana, onoŋo akok boti ni ikonya, ci in doŋ ityeko caŋa woko. Ai Rwot, in aye ma ilara ikwanya woko ki i lobo pa jo muto, iroco kwona odoko nyen ki i kin jo ma gudonyo piny i bur. Wuwer wer me pako Rwot wun jone ma gene, dok wumiye pwoc pi nyiŋe maleŋ. Kinigane pe ri, bedo pi kare manok keken, ento berre bedo pi kare me kwowa kulu. Gwok koko twero bedo i dyewor, ento yomcwiny bino i odiko. Doŋ an i kare ma atye ki lonyo awacci, “Pe gibidira cen.” Pi berri bota, ai Rwot, omiyo iciba acuŋ likiŋ macalo got matek. Ento i kare ma ikanne woko ki bota, abedo ki lworo madwoŋ, Akok boti, ai Rwot, dok alego lega me bako dog bot Rwot kun awaco ni, “Kit kony aŋo ma tona twero miyo boti ka adonyo piny i bur? Apwa me ŋom mono bipaki? Dok binyuto berri ki adani? Ai Rwot, winy kokona, wek kica omaki i koma! Ai Rwot, bed lakonya!” Ityeko loko kumo ma atye kwede odoko myel me yomcwiny madwoŋ: igonyo bene boŋo colana woko ka doŋ iruka ki yomcwiny. Pi meno pe abibedo liŋ; abiwero wer me pak boti. Ai Rwot Lubaŋana, abimiyi pwoc nakanaka. Ai Rwot, ariŋo alaro boti wek igwoka; pe iwek giket lewic i wiya. In Lubaŋa ma kiti atir, alegi, lara do! Cik iti, iwiny legana, lara oyotoyot! Bed got ma ariŋo alaro iye, dok ibed cel gogona matek ma laro an! Iyo, in aye i gotta ki cel gogona; tela dok igwoka pi nyiŋi, Gonya woko ki i obwo ma giciko gikano pira, in aye ka larrena. Amiyo kwona doŋ i ciŋi; ai Rwot, in doŋ ityeko koka, in Lubaŋa me ada. In idag jo ma giworo cal lubaŋa mamwa-ni; ento an ageno mera Rwot. Abibedo ki yomcwiny madwoŋ pi mar meri ma pe lokke, pien doŋ ityeko neno can ma omaka, dok ityeko winyo koko me can ma odiya. Pe imiyo lukworra gumaka; imiya abedo i kabedo malac. Ai Rwot, kica omaki i koma do, pien atye i can; waŋa doŋ olwal woko pi koko madwoŋ, koma ducu doŋ oloc woko marac, I kwona ducu abedo ki cwercwiny, dok mwaka me bedona opoŋ ki cur keken. Tekona otum woko pi ayelayela ma atye kwede, cogona ducu guballe woko. Lumonena ducu giŋala aŋala, ki luwota bene gicaya; jo ma giŋeya doŋ gilwora alwora, ka ginena i gudo ci giriŋo woko ki bota. Luwota doŋ wigi owil woko i koma calo doŋ onoŋo ato woko atoya; alokke adoko calo otako agulu ma oto. Iyo, awinyo jo mapol gikwoto nyiŋa; omiyo lworo bene ogura woko dyere! Guribbe gitye ka yubo lok i koma, ma gipiro lok me neka woko. Ento genna pud tye i komi, ai Rwot, kun awaco ni, “In Lubaŋana.” Kare me kwona tye i ciŋi; lara ki bot lukworra, ki i cin jo ma giketo ayela, i koma. An laticci, nena ki waŋ me kica; lara pi mar meri ma pe lokke! Akok boti, ai Rwot, pe iwek lewic omaka; wek lewic omak jo maraco, wek guto gucit i lobo pa jo mu to gubed mot laliŋ. Juk gin jo ma loko lok goba-ni woko, ma giloko lok marac i kom jo ma kitgi atir ki wakke kacel ki cac. Berri dit rom kwene, ma igwoko pi jo ma gilwori! Gin ma itiyo bedo me aura rom kwene i waŋ ŋat acel acel, ma itiyo pi jo ma giriŋo gilaro boti! Igwokogi woko maber i kabedo ma it ye iye, igwokogi bene ki i piro lok ma dano gipiro; ikanogi woko gibedo mol ki kuc i odi ki i yet pa lukworgi. Gipwo Rwot, pien doŋ otyeko nyuto marre bota i yo me aura, ka onoŋo gigura woko dyere macalo gaŋ ma girumo. I kare ma adoŋo oduru awaco ni, “Doŋ giryema woko ki i nyimi ka mabor.” Ento in iwinyo lega me bako dogga, i kare ma akok boti pi kony. Wumar Rwot, wun lwakke ducu ma gene! Rwot gwoko jo ma lugen, ento pwodo jo ma gilyerre ma giwakke awaka. Wubed tek, dok wubed ma cwinywu nwaŋ, wun jo ma wukuro Rwot! Dano ma doŋ giweko balle tye kigum, ma balle doŋ gikwanyo woko, Dano ma Rwot pe doŋ kwano bal mo i wiye tye ki yomcwiny, ma pe tye ki bwola i cwinye. I kare ma akwero tuco balla, anoŋo ni koma oballe woko pi cur ma abedo ka cur dyeceŋ jwi. Imiya pwod malit i dyeceŋ ki i dyewor; tekona ducu otwo woko macalo toyo two woko ki Lyeto me oro. Cut atuco balla boti, pe amuŋo gin marac ducu ma onoŋo atimo; awaco ni, “Abituco balla ducu bot Rwot”; ci in bene iweko balla ducu. Pi meno wek jo ducu ma gigeni gukel legagi boti; i kare me can ma noŋo lalele me pii madwoŋ mito mwonyogi woko, pii meno pe bio i komgi. In aye kakannena, igwoka ki i ayela; igura woko dyere ki larri. Abipwonyi dok abicimmi yo ma myero ilubi; abimiyi ryeko dok abineni. Pe ibed calo aguragura nyo kana ma pe niaŋ, ma myero gitwe doge ki wiye, wek olub gin ma iwaco. Jo maraco gibilimo arem madwoŋ; ento jo ma gigeno Rwot en gwokogi ki mar mere ma pe lokke. Wubed ki yomcwiny madwoŋ i Rwot, wun jo ma kitwu atir, wudaŋŋe pi yomcwiny, wun jo ducu ma cwinywu atir! Wuwer matek ki yomcwiny i Rwot, wun jo ma kitwu atir! Myero wupake, wun jo ducu ma cwinywu leŋ. Wumi pwoc bot Rwot kun wupake ki opuk, wupake ki wer naŋa ma tolle tye apar. Wuwer wer manyen bote, wugo naŋa ki kit kwiriwu ducu kun wuwero ki dwanwu maloŋo. Lok pa Rwot tye ada, dok ticce ma en tiyo ducu tiyo ki gen, Rwot maro kit ma atir ki ŋolo kop atir; lobo opoŋ ki mar mere ma pe lokke. Rwot oketo polo pi lokke, ka oketo cen, dwe ki lakalatwe ki lok ma en oloko ki doge. Ocoko pii me nam woko ducu oguro kacel i kabedo acel calo opiko i opoko; ka okano nam madoŋo bene i kicika odine me kano jami. Wek lobo ducu omi woro bot Rwot, wek jo ducu ma Jibedo i lobo gulwore. I kare ma en olok, ci lobo okette; gin ma en ociko otiŋe, dok ocuŋ matek likiŋ. Rwot geŋo yub pa lurok pe cobbe, dok geŋo lwak me rok mapol me keto yubgi i tic, Yub pa Rwot bedo matwal; yub ducu ma en tamo ki i cwinye bedo matwal i kare pa yalwak ducu. Lwak me rok ma Rwot aye Lubaŋagi tye ki gum, gin aye jo ma en oyero me bedo jone kikome! Rwot neno piny ki i polo; en neno dano ducu. En lworo waŋe ki i wi komker ka ma obedo iye, neno jo ducu ma gibedo i lobo. En aye ma oketo cwinygi ducu, dok en neno gin ducu ma gitiyo. Kabaka pe twero loyo lweny pi dul mony matek ma en tye kwede; lalweny pe twero loyo Lweny pi tekkom madit ma en tye kwede. Pe gitwero geno aguragura ‘me lweny ni romo miyo loc; tekke-ni ducu pe twero laro dano. Nen, Rwot nenojo ma giwore, gin jo ma gigeno mar mere ma pe lokke, wek olargi ki i to, dok ogwokgi gubed makwo i kare me kec. Genwa ducu tye i kom Rwot en lakonywa, dok en kwot ma gwokowa. Iro, wabedo ki yomcwiny pi en, pien wageno nyiŋe maleŋ. Ai Rwot, wek mar meri ma pe lokke obed i komwa, kit macalo wageno in-ni. Abipwoyo Rwot kare ducu; dok abibedo ka pake nakanaka. Abipako en pi gin ma doŋ otyeko tiyo; wek jo ma gitye ki can guwiny dok gubed ki yomcwiny. Wuribbe kweda me pako dit pa Rwot, wek wapaku nyiŋe kacel! Ayenyo Rwot, ci en ogamo legana dok olara ki i kit lworo ducu ma onoŋo atye kwede. Wuŋen bote, wek wanwu oryeny ma noŋo cwinywu yom, wek lewic pe omakwu. An lacan akok bot Rwot, ci en ogamo doga, dok olara ki i canna ducu, Lamalaika pa Rwot cuŋ kun gwoko jo ma gilworo Rwot, dok larogi bene woko ki i can. Tem koŋ inen ni Rwot oor. Dano mariŋo laro bote bedo ki yomcwiny! Wulwor Rwot, wun jo maleŋ mere ducu, gin mo pe ma rem bot jo ma gilwore. Litino labwor kare mogo camgi pe, dok kec nekogi; ento jo ma giyenyo Rwot gin mabeco mo pe birem botgi. Wubin litinona, wuwiny lokka, abipwonyowu kit me woro Rwot. Aŋa ma maro kwo, ma paro ni eri pi kare malac wek enoŋ yomcwiny i kom jami mabeco? Gwok lebi pe ilok gin marac, dok dogi bene pe olok lok me bwola. A woko ki i gin marac, ci iti gin maber; yeny kuc, dok iti matek macalo itwero wek inoŋ. Rwot neno jo ma kitgi atir, dok ciko ite winyo koko ma gikok bote pi kony. Rwot dag neno jo ma lutim maraco; en miyo wi dano wil woko i komgi matwal i lobo-ni. Ka jo ma kitgi atir okok bote pi kony, en winyo kokogi, dok larogi bene woko ki i cangi ducu. Rwot tye cok ki jo ma cwinygi goro, eci laro jo ma gitye ki arem madwoŋ i cwinygi. Dano ma kite atir limo can madwoŋ; ento Rwot lare ki i canne ducu. En gwoko cogo ma i kome ma ber wek kadi acel mo pe otur woko. Gin marac bineko jo maraco; dok jo ma gidag jo ma kitgi atir gibipwodogi. Rwot koko kwo pa luticce; en pe miyo pwod bot ŋat mo i kom jo ma giriŋo gilaro bote. Ai Rwot, pid ki jo ma gidota; dok ilweny ki jo ma gilwenyo i koma, Mak kwot ki gin me geŋo kori, ci ibin ikonya. Bed ma iyubbe ki toŋ ki latoŋ me lweny me rwatte ki jo ma giryemo kora. Titta ni, “An lalarri.” Wek lewic omak jo ma gimito neka woko dok alee myero otwodgi. Wek ‘gin jo ‘ma gipiro lok marac i koma gulokke gudok cen ki lewic madwoŋ! Wek gubed calo cuŋ kal ma yamo tiŋo woko, ma kun lamalaika pa Rwot tye ka ryemogi. Mi yogi ocid woko dok obed pwot ma cerogi acera, dok iwek lamalaika pa Rwot oryem korgi. Guciko obwo gukano woko pira laboŋo balla mo; dok bene gukwinyo bur wek apot iye ate woko. Wek can opot i komgi atura otyekgi woko; ki obwo ma gukano-ni bene omakgi, gupot i bur gutum woko! Abibedo ki yomcwiny i Rwot, abibedo ki yomcwiny pien Rwot olara. Abiwaco lok man ki cwinya ducu ni, “Ai Rwot, aŋa mono ma calo in, in ma ilaro dano magoro ki i cin jo ma gitek giloye woko? Ilaro ŋat magoro ki ma piny obwoyo ki i ciŋ jo ma yako jamine woko.” Caden ma cwinygi rac gikatti ka maleŋ pitito lok i koma, kun gipenya pi gin ma pe aŋeyo. Giculla gin marac pi gin maber; piny doŋ orem kweda woko. Ento an aruko boŋo cola i kare ma onoŋo komgi lit, dok amine kena i can me ri kec. Alego ma agoyo kora akulo wiya piny, macalo onoŋo akumo pi larema nyo pi omera. Abedo ka wot atata macalo dano ma koko minne, kun akulle piny ka kumo, I kare ma ayokke gin ducu gubedo ki yomcwiny, gucokke kacel i koma; luput ma yam pe aŋeyogi gucokke i koma ka yeta ma pe gitwero liŋ. Gumedde ka ŋala ma noŋo doggi bit i koma, ma gukayo lakgi wo ko likiŋ. Ai Rwot, ibibedo ka nena anena pi kare ma rom mene? Lara woko ki i gerogi, lar kwona ki i dog labwor. Abimiyi pwoc madit mada i cokke madit; abipaki ka ma lwak jo mapol gugurre iye, Pe iwek lukworra ma gin lutim marac gubed ki yomcwiny ikoma, pe iwek jo ma gimiyo wangi lirwitrwit guloya, gin jo ma daga laboŋo bal mo-ni. Pe giloko lok ma kelo kuc, ento gipiro megi lok maraco i kom jo ma gibedo mot i lobo, gupoŋ ki lok me bwola keken, Giŋamo doggi malac me lok i koma, kun giwacci, “Aa! Aa! Watyeko neno gin ma itimo!” Ai Rwot, doŋ iŋeno, pe myero iliŋ aliŋa do! Pe ibed bor kweda, ai Rwot! Co woko, cukke me ŋolo koppa; pid pita, in Rwoda ki Lubaŋana! In iporre, ai Rwot, pi meno kwany kop woko ki i wiya; pe iwek lukworra gunoŋ yomcwiny i koma do, Lubaŋanal Pe iwek gulok kekengi kun giwacci, “Aa! Doŋ wanoŋo gin ma cwinywa mito.” Dok pe iwek guwacci, “Doŋ watyeko mwonye woko.” Wek lewic omakgi dok gubed ki anyobanyoba lawaŋacel, gin jo ma gibedo ki yomcwiny pi can ma omaka! Wek gupoŋ ki lewic ma alee bene otwodgi, gin jo ma giwakke i koma-ni! Wek jo ma cwinygi mito ni alo kop gudaŋŋe pi yomcwiny kun giwaco nakanaka ni, “Rwot dit, cwinye yom ka neno ni laticce bedo ki kuc!” Abitito pi porreni, dok abipako nyiŋi dyeceŋ jwi. Bal me turo cik tye loko ka matut i cwiny dano marac; en pe neno gin ma miyo elworo Lubaŋa. Bal miyo en bwolle kekene dok umo waŋe woko kun tamo ni pe gibinoŋo gin marac ma en otimo, miyo dano kwere woko. Lok ma en loko obedo lok me tim aranyi ki me bwola keken; pe doŋ tye ki ryeko mo ma: romme tiyo gin maber. En piro lok me timo gin marac ma obuto i wi kitandane; oloko kite wo ko i yo mapat ma pe doŋ ber; dok pe kwero kit gin mo marac. Ai Rwot, mar meri ma pe lokke o wa i polo, dok adani bene o i pol. Porreni ocuŋ matek likiŋ macalo godi madoŋo, ki ŋolo koppi tye calo tut-piny madit. Ai Rwot, igwoko dano kacel ki lee ducu. Ai Rwot, ber me mar meri ma pe lokke dit rom mene! Jo ducu riŋo gilaro ka kanne i te bwomi. Giyeŋ ki lwak cam madwoŋ ma tye i odi, mnyo gimato pii mua i kulu me yomcwiny ma tye boti. In aye i waŋ it me kwo ducu, i ceŋŋi wan bene waneno iye ceŋ, Med mar meri ma pe lokke bot jo ma giŋeyi, dok imed lar meri bot jo ma cwinygi atir, Pe iwek dano ma lawakke onyona ki tyene, pe iwek dano marac oryema woko ki ciŋe. Lutim maraco gibuto kunnu aryeba ic, gidiyogi woko piny ma pe dok gitwero a malo. Pe myero ibed ka paro pi jo maraco; pe ibed ki mone i kom jo ma gitiyo gin marac; pien gibitwo woko calo lum, dok gibiner woko calo pot dek madyak. Gen Rwot, dok iti gin maber; bed i lobo ki kuc. Bed ki yomcwiny i Rwot, ci en bimiyi gin ducu ma cwinyi mito. Mi kwoni bot Rwot; gen en, ci en bikonyi. En bikwanyo kop woko ki i wii miyo berri ryeny calo ceŋ, doŋ loyo koppi bibedo calo ceŋ ma ryeny i cwiny dyeceŋ, Bed mot i nyim Rwot, dok idi cwinyi ikure. Pe ipar pi ŋat ma tye ka lony oyotoyot, kadi pi ŋat ma cobo yubbe me timo gin maraco. Pe iwek kiniga omaki, dok ibwot akemo obedi; pe ibed ki par iye, pien tim ma kit meno kelo gin marac keken. Lutim maraco gibityekogi woko; ento jo ma gigeno Rwot gibicamo lobo. Odoŋ kare manok, ci dano marac doŋ bibedo pe matwal; kadi iŋi i kabedone maber, ibinoŋo ni en doŋ pe kunnu. Ento jo mamwol aye gibicamo lobo; gibibedo ki yomcwiny pi lonyo madwoŋ ma gibilimo. Dano marac piro lok i kom dano ma kite atir, dok kayo lake i kome matek. Ento Rwot nyero dano marac anyera, pien neno ni nino me ŋolo kop i kom dano marac doŋ tye ka bino. Jo maraco giwoto pala lucwangi dok gitelo atumgi, me neko lucan kacel ki jo ma piny obwoyogi, ki pi neko jo ma cwinygi atir. Pala lucwangi bicobo komgi kekengi, ki atumgi bene gibituro woko. Gin mo manok ma dano ma kite atir tye kwede ber kato lonyo madwoŋ ma jo maraco mapol gitye kwede. Twero ma jo maraco gitye kwede gibituro woko; ento Rwot bigwokojo ma kitgi atir. Rwot gwoko jo ma lubo cikke; dok gipinygi biri nakanaka. Lewic pe bimakogi i kare me can, dok gibibedo ki cam madwoŋ i kare me kec. Ento jo maraco, ma gin lukwor pa Rwot, gibito gitum woko macalo lum i olet dyaŋ, gibiduny woko calo yito ma duny. Dano marac mako banya, ento pe twero culo waŋe, ento dano ma kite atir lakica, miyo mere jami amiya noŋo. Jo ma Rwot omiyo gum botgi aye gibicamo lobo, ento jo ma doŋ en ocenogi gibityekogi woko. Ka Rwot telo dano i kit kwo ma myero en obed kwede, ci en moko dano ma kwone yomo cwinye, Kadi oyokke, ci pe bipoto piny aryeba ic, pien Rwot tye jole woko ki ciŋe. Yam abedo latin, ento man doŋ adit; pud peya aneno gibwoto dano ma kite atir, kadi ki litinone bene pe aneno ka gilego kwon alega. En nino ducu ber, miyo jami amiya, dok dano gimako banya bote, ki litinone bene gidoko joma kelo gum bot dano, A woko ki i gin marac, iti gin maber, ci ibibedo iri nakanaka. Rwot maro ŋolo kop atir; pe bibwoto jo ma gigeno eno En bigwoko jo ma kitgi atir matwal, ento gibityeko litino pa jo maraco woko ducu. Jo ma kitgi atir gibicamo lobo, dok gibibedo iye matwa!’ Dano ma kite atir loko lok me ryeko, dok loko gin ma tye atir. En gwoko cik pa Lubaŋane i cwinye; pe ŋak woko ento bedo ki kit maber kare ducu. Dano marac neno ŋat ma kite atir, ci yenyo yo me neke woko. Ento Rwot pe bibwoto en ata i ciŋ lakworre, nyo ni giŋol kop oloye ka gikelo en ka pido. Kur Rwot, dok ilub cikke, en bimiyi twero me camo lobo; ibineno bene ka gityeko jo marac woko. Aneno dano marac tye ka keto gero mukatŋ kare, kun tye ka doŋo medde ameda calo yat cedar me Lebanon. Lacen ka akato ki kenyo, anoŋo ni en doŋ pe matwal; kadi bed ayenye, ento pe doŋ twero noŋŋe, Nen dano ma pe ki bal mo, dok inen dano ma cwinye atir; dano ma kelo kuc Likwaye bedo tye. Ento jo ma lubalo gibityekogi woko liweŋ; ki likwayo pa jo maraco bene gibijwerogi woko. Rwot aye ma laro jo ma kitgi atir; en bene ma gwokogi i kare me can. Rwot konyogi, dok larogi ki bot jo maraco, pien giriŋo gilaro bote. Ai Rwot, pe ijuka ki kiniga, dok pe ipwoda ki akemo! Ateroni doŋ gucela, gumwony woko iiya, kun in bene icwalo ciŋi piny idiya kwede woko. Pi kinigani omiyo atwo matek, pe atye ki yotkom i cogona ducu; man obino pi balla. Balla doŋ oketo koma woko; gipek calo yec ma pe aromo tiŋone, Waŋ burra kwok maŋwe pi minona, atyeko kulle woko piny adada ma abuto i ŋom aryeba cwiny; dyeceŋ jwi awoto kun akumo akuma. Pyera bene waŋŋe awaŋa calo mac, koma pe tye ki kit yotkom mo wacel. Koma oloc dok onyonne woko adada; acur pien atye ki remcwiny madwoŋ twatwal. Ai Rwot, iŋeyo gin ma amito ducu, gin ma abedo ka cur pire-ni pe obedo me muŋ ki boti. Adunona tye ka gone matek lituktuk, miyo tekone bene tum woko waŋa bene ocor woko, pe neno piny doŋ maber. Lurema ki luwota ma wabedo kwedgi gicuŋ cen ka mabor pi bur ma oonyo: i koma, ki lutuwa bene gicuŋ cen ka mabor adada. Jo ma giyenyo yo meneka guciko owicgi pira, jo ma gimito keto ret i koma giloko lok me tyeko kwona woko, gibedo ka piro lok marac i koma dyeceŋ jwi. Ento an abedo macalo ladinit, pe awinyo lokgi, dok abedo calo ladoge-oto ma pe ŋamo doge ka lok. Iyo, adoko calo dano ma pe winyo, ma pe loko kit lok mo me juk. Ento genna ducu tye i komi, ai Rwot; ai Rwot Lubaŋana, in aye ma ibigamo doga. Alegi alega keken ni, “Pe iwek jo ma ginyatte i koma ka tyena ocer, gunoŋ yomcwiny i koma!” Doŋ acok poto, atye ka winyo arem i koma kare ducu. Atuco balla, kun cwinya cwer mada pire. Lukworra ma gidaga noŋo laboŋo gin mo ma abalo botgi gitek, jo ma gidaga laboŋo te lok mo gipol. Jo ma giculo gin maber pi gin marac gudoko lukworra, pien amito ni ati gin maber. Ai Rwot, pe ibwota: ai Lubaŋana, pe ibed bor kweda! Bin oyot ikonya, ai Rwot, lalarra! Awaco ni, “Abigwokke i kit gin ducu ma anyo, wek pe atim bal ki lok ma aloko; abiliŋ ma pe aŋamo doga ka waco lok mo, ka ce atye kacel ki jo maraco.” Aliŋ aliŋa ma pe awaco lok mo, dok bene ajukke kekena kadi me waco gin mo maber; ento cwercwinnya dok omedde ameda marac, cwinya olyetti woko dok owaŋ matek. I kare ma pud alwodo lok, ci mac olyel; ci acako lok maber laboŋo lworo. “Rwot, mi aŋe agikkina, dok imiya aŋe wel ninona; wek aŋe bene kit macalo kwona rwenyo kwede oyot. Nen, Iŋolo ninona obedo manok, dok kare me kwona pe gin mo ki boti. Adada dano acel acel cuŋ mere macalo yweyo nono! Adada dano woto wirre calo tipo! Adada gicanne nono pi gin ma pe konyo; dano kano lonyo madwoŋ, kun pe ŋeyo aŋa ma bileyo, “Doŋ kombeddi mono, Rwot, akuro gin aŋo? Genna tye i komi. Lara ki i balla ducu. Pe imi adok gin aŋala pa lumiŋ. Aliŋ woko litik, pe aromo ŋamo doga ka lok; pien in aye ma imiya peko ma kit man. Pe dok imedde ka pwoda ki odooni; adoŋ me ciŋi ma idoŋa kwede doŋ mito neka woko. Ka ipwodo dano kun ijuke pi bal, ityeko berre woko macalo nyenye ma camo gin mo ma pire tek bot dano meno; adada dano obedo mere rom ki yweyo mamwa. “Ai Rwot, winy legana, icik iti iwiny kokona; pe iliŋ woko aliŋa ka akok boti! An a weloni pi kare manok, dok an labedo macalo kwarowa ducu. Pe inena, nen ka mukene, wek koŋ abed ki yomcwiny mo, ma pud peya aa aweko lobo man woko matwal.” Akuro Rwot kun adiyo cwinya; ci en okulle piny owinyo kokona. En owota woko ki i bur marac, ki i coto manwaŋ, ci oketa acuŋ i wi got, omiyo abedo ka wot atir. Opwonya ki wer manyen, en wer me pak bot Lubaŋawa. Jo mapol gibineno ci lworo makogi woko, ci gibigeno Rwot. Tye ki gum dano ma geno Rwot, ma pe lokke ribbe ki jo ma luwakke, dok ma pe ribbe ki jo ma ŋak woko kun giworo cal lubaŋa-gu! Ai Rwot Lubaŋana, itiyo tic madito me aura mapol, dok iyubo lwak tam mapol pi konyowa; pe tye ŋat mo macalo in! Ka onoŋo ne ne atuc dok atit pigi, onoŋo gibedo pol makato ma pe gitwero kwano welgi. Pe imito gitum kadi gityer; ento ityeko yabo ita wek awiny. In pe ipenyo pi gitum awaŋa nyo pi gitum me bal, Ka doŋ agamo ni, “Nen, an a en; gicoyo lok ma mako koma i buk adolani. Cwinya bedo yom me tiyo gin ducu ma imito, ai Lubaŋa; amako cikki dok agwoko tye cwinya. Doŋ atyeko tito lok maber me yomcwiny me larri i dye lwak i cokke madit; nen, pe am iyo doga woko aliŋ aliŋa, kit macalo in bene ineyo-ni, ai Rwot. Pe akano lok me larri pira kena, e nto aloko pi ada ki pi larri; dok pe amuŋo mar meri ma pe lokke kacel ki adani bot lwak ma i cokke madit. Ai Rwot, pe itwonna kicani, wek mar meri ma pe lokke, ki adani, gugwoka nakanaka. Gin marac ma welgi pe kwanne guruma woko dyere; balla doŋ obwoyo koma woko, miyo pe doŋ aneno piny; gipol gikato yer wi ya woko; tekcwiny doŋ orwenyo woko ki bota. Ai Rwot, mi cwinyi obed yom me lara! Ai Rwot, bin oyotoyot ikonya! Wek lewic omak jo ma gimito neka, dok gubed ki anyobanyoba bene; wek gidwokgi cen, wek alee otwodgi, gin jo ma mito tima marac-ci! Wek gubed ma piny orem kwedgi woko pi lewic ma doŋ omakogini, gin jo ma giwacca ni, “Aa, Aa!” Ento mi jo ducu ma giyenyo in gubed ki yomcwiny madwoŋ komi; dok imi jo ma gimaro larri gumedde ki waco nakanaka ni, “Rwot dit!” An gira lacan, dok piny obwoya woko; ento Rwot tamo pira. In aye lakony ki lalarra; ai Lubaŋana, pe igalle! Tye ki gum dano ma paro pi lucan! Rwot lare woko i kare me can, Rwot bigwoko en dok miyo bedo kwo; gilwoŋe ni ŋat ma kome gum i lobo; pe ibimiyo en bot lukworre wek gutime rac macalo gitwero. Rwot gwoke ka two ma tye i wi kitanda; en caŋo twone woko liweŋ maber. Ento an, awaco ni, “Ai Rwot, kica omaki i koma; cana, pien atimo bal i komi!” Lukworra giwaco lok marac i koma, ni, “En bi to awene, wek nyiŋe orweny woko?” Ka ŋat mo obino ka lima, ci loko lwak lok ma tere pe, kun noŋo cwinye opoŋ ki lok me tim aranyi; ka doŋ okato ocito woko, ci tito lokke woko ka maleŋ. Jo ma daga ducu gigurre kacel ka kwoto nyiŋa; dok gipiro lok marac i koma, Giwaco ni, “Two marac adada doŋ omake, pe doŋ bitwero a ki i kabuto kadi ki acel.” Kadi larema maber atika ma yam ageno, ma ocamo kwonna bene, en aye dok olokke ka timo gin marac i koma. Ento in, ai Rwot, kica omaki i koma, cana i kom twona-ni wek aa malo, ci abiculo kwor i komgi. Ka ce lakworra pe loya dok bedo ki wakke i koma, ci miyo aŋeyo ni in kara cwinyi yom i koma. Ento doŋ ityeko konya pi leŋcwinya, ka doŋ iketa me bedo i nyimi matwal. Gipak Rwot Lubaŋa pa Icrael, gipake nakanaka! Amen, dok Amen. Kit macalo til yenyo kwede kulu ma piine tye ka mol, an bene atye ka yenyo ki i cwinya kit meno, ayenyo in, ai Lubaŋa, Cwinya mito anen Lubaŋa, en Lubaŋa makwo-ni Abicito ka neno waŋ Lubaŋa awene wek awore? Pig waŋa doŋ odoko camma i dyeceŋ naka wa i dyewor ducu, ma noŋo dano gipenya teretere ni, “Lubaŋani tye kwene?” Cwinya dem woko, ka apo i kom lok magi: kit macalo acito kacel ki lwak kun atelo wigi, ma wawoto i rek ma gurye aryeya me cito i ot pa Lubaŋa, kun lwak gidaŋŋe ki yomcwiny ma giwero wer me pwoc, i kare me kwero nino madito, Piŋo cwinya poto, dok abedo ki cwercwiny? Dok piŋo awinyo lwak par madwoŋ i cwinya? Pud abigeno Lubaŋa aye, dok abipake bene, Lalar mera ki Lubaŋana, Cwinya poto, miyo apo piri ki i lobo me Jordan ki Kermon, ki i got Mijar. Nam madoŋo matut lwoŋo nam wadigi ki i mor pii ki i waŋ acurcurri; biamwonyini ducu me pii ma twagge doŋ otyeko mwonya woko licwic. Rwot miyo mar mere ma pe lokke ryeny i koma i dyeceŋ; ci i dyewor awero wer me pake, kun alego Lubaŋa ma miyona kwo. Abiwaco bot Lubaŋa ni, “In gotta; piŋo wii owil woko i koma? Piŋo awoto ma akumo akuma kun lakworra bene una twatwal?” Nen calo atye ki bur marac twatwal mudet i koma pien lukworra gibedo ka yeta, kun gipenya teretere ni, “Lubaŋani-ni tye kwene?” Piŋo cwinya poto, dok abedo ki cwercwiny? Piŋo awinyo lwak par madwoŋ i cwinya? Pud abigeno Lubaŋa aye, dok abipake bene. Lalar mera ki Lubaŋana. Ai Lubaŋa, pid pira dok imi alo kop i kom lwak me rok ma pe giŋeyi; lara ki i cin jo maraco ma lubwola. In aye Lubaŋa ma ariŋo alaro boti; piŋo ibola woko cen ka mabor? Piŋo awoto ma akumo akuma kun lakworra una twatwal? Doŋ icwal ceŋŋi ki adani; wek gutela, wek gukela i kom got meri maleŋ, wa i odi ka ma ibedo iye! Ci abicito wa i kom keno tyer pa Lubaŋa, bot Lubaŋa ma yomo cwinya mada; ka doŋ abipaki ki opul agoya, ai Lubaŋa, Lubaŋana. Piŋo cwinya poto, dok abedo ki cwercwiny? Piŋo awinyo lwak par madwoŋ i cwinya? Pud abigeno Lubaŋa aye, dok abipake bene, Latar mera ki Lubaŋana. Ai Lubaŋa, doŋ watyeko winyone ki itwa, dok kwarowa bene gutito botwa, tic ducu ma yam itiyo i karegi, i kare macon muka to: iryemo lurok woko ki twero ii kikomi, imiyo joni gubedo i lobogi macalo yadi ma ipito; iuno lwak me rok mapol ento imiyo kwarowa gubedo ki kuc. Lwakki pe guloyo lobo meno ki pala lucwangi, pe gulimo Loc pi twerogi; ento meno obedo pi tweroni ki pi tekki, dok pi ceŋŋi ma oryeny i komgi; pien onoŋo in cwinyi yom i komgi. In keken aye Kabakana ki Lubaŋana, ma yam iciko pi loc bot Yakobo. Pi konnyi miyo wabiryemo lukworwa gidok piny, dok wabinyono jo ma gibino ka monyowa pi nyiŋi. Pe ageno atumma, dok pala lucwanna bene pe twero Lara. Ento in aye ma ilarowa ki i cin lukworwa, ci imiyo lewic omako jo ma gidagwa. Wabedo ka nyatte i Lubaŋa teretere, dok wabimedde ka pwoyo nyiŋi matwal. Ento in doŋ ityeko bolowa woko dok imiyo wadoko mayot, pe inywako yo me ci to ka lweny kacel ki monywa. Imiyo walokke ki bot lumerokwa wadwogo woko cen; ci imiyo lukworwa guyako jami mapol ata.’ Imiyo wadoko calo romi meaneka, dok ikeyowa woko i kin lurok. Icato lwakki i wel manok mo, pe imito ni gicul wel madwoŋ pigi. Imiyo luwotwa ma gibedo cok kwedwa giloko lok aŋec i komwa, imiyo jo ma gibedo i kabedo murumowa gicayowa dok giŋalowa. Imiyo wadoko lok aboka i kin lurok, wadoko ginanyera i kin rok ducu. Abedo ki cwercwiny dyeceŋ jwi, ma noŋo waŋa olwal woko ki lewic, pi winyo lok cac pa jo ma giloko lok aŋec i komwa, ki lok pa jo ma ginywarowa, dok pi neno lukworwa ma gin lucul kwor ma gubino ka lewny i komwa, Man ducu doŋ otimme i komwa, kadi bed wiwa pe owil i komi, dok bene kadi pe watero gicikkeni. Cwinywa pe oa ki i komi wacel, dok bene pe waŋak wabwoto lubo cikki. Itenyowa woko liyak i kabedo pa too, iumowa woko lipuk ki colpiny mapek. Ka ce nene wiwa owil woko i kom nyiŋ Lubaŋawa,’ nyo ka onoŋo wacako woro lubaŋa mukene ma yam pe waŋeyo, kono Lubaŋa mono pe oroto man oŋeyo woko? En ŋeyo muŋ ducu ma tye i cwiny dano. En to gibedo ka nekowa dyeceŋ jwi piri, gikwanowa macalo romi me aneka. Co woko, ai Rwot! Piŋo inino anina? Co woko! Pe ibolwa woko matwal! Piŋo ikanne woko ki botwa? Piŋo wii wil woko i kom can ma watyekwede kun iŋeno anena ka giunowa? Wapoto woko ducu piny i ŋom; waryebbe piny i apwa pien tipowa doŋ ool. A malo, bin ilarwa! Larwa pi mar meri ma pe lokke! Cwinya opoŋ ki lok mabeco adada; lok magi ducu atye ka lokone bot kabaka; leba bit calo leb kal am pa karan ma ladiro. In keken aye iber ikato co mukenegu woko, pien lok ma iloko ducu obedo me kica keken; pi meno Lubaŋa doŋ otyeko miyi gum woko matwal. Twe pala lucwanni i emi, in twon oteka, i deyoni ki dit meri! Rin ŋwec me loc kikome ki deyo ka lweny pi ada dok pi gwoko kit ma atir; wek ciŋi malacuc otim tim ma kelo lworo. Ateroni bit, icelo ateroni tllco aduno pa lukworri woko pil; lwak me rok ducu gipoto i te locci, Komkerri cal ki komker pa Lubaŋa ci bedo nakanaka, Odoo kerri aye odoo me kit ma atir imaro kit ma atir, idag tim maraco. Pi meno Lubaŋa, ma Lubaŋani, doŋ, otyeko wiri ki moo, owiri ki moo me yomcwiny ma kato luwoti mukene ducu. Ginarukani ducu gikiro iye murra ma ŋwece kur, ki kit moo makur ducu, ki kacia mamit. I gaŋ kaili ma gideyo ki lak Lyec wer pa lugo naŋa-gu miyo cwinyi bedo yom. Anyira pa kabaka bene gitye i kin monni me awora; daker ocuŋ yo tuŋ ciŋi malacuc ma oruko ruk ma gidero ki jabu me Opir. Nyara, koŋ iwiny, ci itam mot, dok icik iti; wii myero owil woko i kom lutuwu ki i kom jo me doggola pa kwaru. Berri bimiyo kabaka miti; en obedo rwodi, gun i nyime iwore. Jo Turo gibikelo mot mapol boti pi ber ma itimo bot dano, jo ma lulonyo gibilego kony ki boti kun gikelli lwak lonyo mapatpat. Nyako ker orukke woko maber ki i kicikane ki boŋo ma gideyo maber ki jabu. Oruko boŋŋi ma raŋigi patpat ma gitere kwede bot kabaka, kun anyira luwote ma gilwoke gilubo kore. Gitelo wigi kun gitye ki yomcwiny madwoŋ i kare ma gicito ka donyo i gaŋ kal pa kabaka. Ma ka kwaru ibibedo ki litino awobe; ibiketogi gibedo rwodi i lobo ducu, Abimiyo gipo pi ywekani i yalwak ducu; dok lwak me rok ducu gibipaki nakanaka. Lubaŋa aye ka-larrewa dok tekwa bene, en oyubbe me konyowa i kare me can, Pi meno pe wabibedo ki lworo mo kadi bed lobo lokke, kadi bed godi gupot woko i dye nam kadi bed pii me nam mor dok twagge, kadi bed godi giyeŋŋe pi twagge mere matek. Tye kulu mo ma litino orane kelo yomcwiny i gaŋ pa Lubaŋa, i kabedo maleŋ pa ŋat Mamalo Twa! Lubaŋa bedo i dye gaŋŋe, pi meno pe gibitwero balone wacel; Lubaŋa konye woko oyotoyot okogweno. Rok ducu komgi oonyo koyo, ki ker-gu ducu oyeŋŋe woko; Lubaŋa daŋŋe ki dwan maloŋo, ci lobo leny woko. Rwot me mony tye kwedwa; Lubaŋa pa Yakobo aye ka-larrewa. Bin inen gin ma Rwot otiyo, kit macalo omiyo lobo odoŋ obur. En juko lweny woko i wi lobo ducu; turo atum-gu dok ninyo wa ton woko, waŋo lwak kwot woko liweŋ ki mac. “Wubed mot, dok wuŋe ni an Lubaŋa, At ye malo i wi rok ducu, dok gidwora i wi lobo ducu!” Rwot me mony tye kwedwa; Lubaŋa pa Yakobo aye ka-larrewa. Wudoŋ ciŋwu, wun lwak ducu me wi lobo ducu! Wudaŋŋe kun wuwero wer me yomcwiny bot Lubaŋa ki dwan maloŋo! Rwot, ma en ŋat Mamalo Twal, aye myero gilwor, en kabaka madit ma loyo wi lobo ducu. En aye omiyo waloyo lwak me rok ducu, oketowa me bedo luloc pa lurok. En aye ma oyero lobo man ma wabedo iye-ni piwa, man aye gipiny me wakke pa Yakobo ma en maro. Lubaŋa doŋ oito malo kun lwak gidaŋŋe matek, Rwot oito malo ma lwak gikuto tum-gu. Wuwer wer me pako Lubaŋa, wuwer wer me pake! Wuwer wer me pako Kabakawa, wuwer wer me pake! Lubaŋa aye kabaka ma loyo wi lobo ducu; wuwer wer me pak ki jabuli! Lubaŋa loyo rok ducu; Lubaŋa bedo i wi komkerre maleŋ, Rwodi ma giloyo lwak me rok ducu gucokke ma guribbe kacel ki jo pa Lubaŋa pa Abraim. Kwot me wi lobo ducu obedo jami pa Lubaŋa; gidwore matek twatwal! Rwot dit, pi meno myero gipake matek i gaŋ pa Lubaŋawa! Got mere maleŋ ber, dok wiye bor, ma yomo cwiny lwak me wi lobo ducu, en got Cion ma tye ka mabor tun acam, en aye gaŋ pa Kabaka madit. Ki i gogone Lubaŋa onyutte ni en aye cel matek ma gwoko dano maber. Nen, luker gucokke, gubino gugurre kacel. I kare ma guneno, cutcut gubedo ki ur madit mada, lworo omakogi marac, ci guriŋo woko ata. Komgi omyel matek ki kunnu, arem madwoŋ macalo pa dako ma rem ka nywal omakogi. Ituro mel me Tarcic ki yamo ma oa tuŋ wokceŋ. Kit ma watyeko winyone, doŋ bene waneno i gaŋ pa Rwot me mony, i gaŋ pa Lubaŋawa, ma Lubaŋa miyo cuŋ likiŋ nakanaka. Wabedo ki tam i kom mar meri ma pe lokke, ai Lubaŋa, i dye odi. Kit macalo nyiŋi oywek kwede-ni, ai Lubaŋa, omiyo pak ma gipaki kwede oromo wi lobo ducu. Ciŋi malacuc opoŋ ki twero meloc; wek got Cion obed ki yomcwiny! Wek gaŋi ma i Juda gubed ki yomcwiny pi kit ma iŋolo kwede kop! Wucit i Cion, wuwot wurum celle woko, wukwan wel lubelene, ka dok wutam maber i kom celle, wucit wuwot wa i gogone bene; wek wutit bot yalwak ma bilubowu ni, man aye Lubaŋa, en Lubaŋawa ma bedo nakanaka. En bibedo latelwa matwal. Wuwiny lok man, wun lwak me rok ducu! Wuwiny, wun jo ducu ma wubedo i wi lobo, jo ma tye ki rwom ma malo ki jo me rwom ma piny, lulonyo kacel ki lucan. Abibedo ka tamo tam wek aniaŋ maber ki i cwinya, dok abiloko lok me ryeko keken. Abiciko ita me winyo carolok; abigonyo te lok me koc-lit ki wer ma agoyo agoya ki opuk. Omyero abed ki lworo piŋo i kare me can, ma kun noŋo lumonena ma gitima marac guruma woko dyere, gin jo ma geno lonyogi, ma ginyatte pi lwak lonyo madwoŋ ma gitye kwede? Adada, pe tye dano mo ma twero kokke kekene, nyo ma twero miyo wel mo bot Lubaŋa me wilo kwone, pien gin kok me kwo pa dano welle dit mada, dok pe twero romo me miyo en medde ki bedo nakanaka, wek pe ocit i bur. Iyo, en bineno ki waŋe ni kadi wa jo maryek bene gito, lamiŋ kacel ki ŋat ma wiye odiŋ bene gito kit meno, ci giweko lonyogi doŋ bot jo mukene. Lyelgi bedo pacogi matwal, bibedo kabedogi pi kare pa yalwak ducu, kadi bed gucak nyiŋ lobo ma gibedo iye ni megi kikomgi. Dano pe bedo ki deyone matwal; en obedo macalo lee tim ma gito gitum woko. Man aye can ma poto i kom jo ma tye ki gen me miŋo; man agikki pa jo ma cwinygi yom pi dul jami ma gitye kwede. Giyerogi giterogi i lyel macalo romi; to aye ma bibedo ka kwayogi. Gibicito atir gidonyo wa i lyel, ci komgi bitop woko; lyel bibedo pacogi. Ento Lubaŋa bikoko tipona ki i twero pa lyel, pien en gire bigama, Pe myero lworo omaki ka ce iŋeno ŋat mo doko lalonyo, kadi bed deyo me jami ma i ode tye ka medde ameda. Pe bitiŋo gin mo cito kwede i kare ma en to; deyo ma en obedo kwede pe bicito lube i bur kunnu. Kadi bed en tamo ni etye ki yomcwiny i kare ma pud ekwo, ci kadi bed dano gipake pi ticce ma konyo en keken, en bicito ka bedo kacel ki yalwak pa kwarine i lyel ma pe doŋ gibimedo ki neno cen matwal. Dano pe bedo ki deyone matwal; en obedo macalo lee tim ma gito gitum woko. Lubaŋa Matwero-ducu, ma en Rwot, doŋ oloko; en lwoŋo jo me wi lobo ducu cakke ki tuŋ wokceŋ nio kwede tuŋ potoceŋ. Lubaŋa tye ka ryeny ki i Cion, en gaŋ maber twatwal-li. Lubaŋawa tye ka bino, en pe biliŋ, mac mager tye ka waŋ i nyime, yamo magwa ma kodo matek orume woko dyere. En Lwoŋo polo ki malo, ka dok lwoŋo lobo, wek doŋ ecak ŋolo kop i kom lwakke. En wacci, “Wucok jona ma lugen, wukelgi bota, jo ma guketo gicikke kweda ki gitum!” Polo otuco ni Lubaŋa oporre, pien Lubaŋa aye laŋolkop. “Wuwiny, wun jona, an doŋ abilok, wun jo Icrael, abimiyo lok me caden i komwu. An Lubaŋa, Lubaŋawu, Pe ajukowu pi lwak gitumwu mapol, ki gitum awaŋa ma wutyero bota kare ki kare. Pe abigamo twon mo ma wukelo ki i gaŋwu, kadi nyok dyel ma wukwanyo ki i dwolwu. Lee me buŋa ducu mera, wa lwak dyaŋi ma gitye i wi cere alip kulu-ni bene mera. Aŋeyo winyo ducu ma gitpk i dye yamo, ki gin mak wo ma gibedo i tim ducu mera. “Ka ce nene kec neka” pe onoŋo atwero tito botwu; pien lobo ki jami ducu ma tye iye mera. An mono acamo riŋo twoni, nyo wuneno amato remo nyogi romi? Wutyer gityer me miyo pwoc bot Lubaŋa, wucob kwoŋwu bot En Mamalo Twal. Wukok bota i kare me can; abilarowu, ci wubipaka.” Ento bot dano marac Lubaŋa owacci, “Kit twer aŋo ma it ye kwede me kwano cikka, ki me bedo ka loko lok i kom gicikkena? In ikwero ni pe myero gijuki, dok ibolo lok ma aciko odok yo tuŋ ŋeyi. Ka ce iŋeno lak wo, ci imak o doko laremi; dok ibedo kacel ki lutim abor. “Kare ducu iyubbe me loko gin marac; lok ma a ki i dogi obedo lok goba. Ka ma ibedo iye icako loko lok marac i kom omeru; ikwoto omeru kikome ma latin pa meru. Meno ducu itiyo ento an aliŋ aliŋa: itamo ni gwok abedo ŋat mo ma kite rom ki meri-ni. Ento kombeddi ajuki, dok anyutti balli kore kikore. “Koŋ wutam man, wunjo ma wiwu wil woko i kom Lubaŋa-ni, wek pe atyekwu woko, ci doŋ ŋat mo ma bilarowu bibedo pe. Ŋat ma miya pwoc macalo gitumme noŋo keto deyo i koma; ki ŋat ma bedo ki kit atir kun lubo cikka abinyuto larra bote.” Ai Lubaŋa, tima kica pi mar meri ma pe lokke; dok pi kicani madwoŋ jwa balla woko ducu, Lwok gin marac woko ki i koma, dok ilonya i kom balla. Aŋeyo balla ducu maber, dok kare ducu wiya po i kom bal ma atimo. Doŋ atyeko timo bal i komi, i komi keken, kun atimo gin ma nen marac i waŋi; pi meno lok ma iwaco tye atir, dok kop ma iŋolo i kuma tye kakare. Nen, abedo labalo cakke i kare ma ginywala, i kare ma maa ogamo ic onoŋo an doŋ atye ki bal. Nen, in imito ni dano obed ki ada i iye; pi meno pwonya ki lok me ryeko wek odony matuti cwinya. Lonya ki anyero, ci abidoko leŋ; lwoka ci abidoko tar makato pee. Miya abed ki yomcwiny madwoŋ; mi cogo koma ducu ma yam ituro woko gubed ki yomcwiny bene. Mi waŋi woko, pe inen rocca, dok ijwa balla woko ducu, Ai Lubaŋa ma Lacwec, miya abed ki cwiny mulony, ket cwiny manyen ma pe lokke obed iiya. Pe iryema woko ki i nyimi, dok pe ikwany Cwiny meri maleŋ woko ki bota. Lara, ci imi dok abed ki yomcwiny; miya cwiny me lubo cikki wek acuŋ matek. Ci abipwonyo lujemo me lubo yoni, lubalo gibilokke gidwogo boti. Ai Lubaŋa, lara ki i kom bal alii me oyo remo, in Lubaŋa lalarra, dok abiwero wer me paki ki dwan maloŋo pi kiti ma atir. Ai Rwot, yab doga, ci abiwero wer me paki. Gitum ma dano kelo pe mini yomcwiny mo; kadi bed atyer boti gitum awaŋa, pe ibipwoyo. Gitum ma Lubaŋa pwoyo aye cwiny ma oŋut; ai Lubaŋa, in pe ibicayo ŋat ma cwinye cwer ki ma oŋut. Tim ber ki Cion muporo bercwinyi, dok icwe cel me Jerucalem odoco. Ci doŋ cwinyi bibedo yom pi gitum ma atir, pi gitum awaŋa ki gitum ma giwaŋo woko ducu ki berre; ka doŋ gibityero twoni i wi keno tyerri. In twon oteka, piŋo inyatte pi gin marac ma itimo i kom jo ma ŋeyo Lubaŋa? Ipiro lok me tyeko jo mukene woko dyeceŋ jwi. Lebi bit calo lyedi, imaro loko lok goba. Imaro timo gin marac makato timo gin maber, dok imaro loko lok goba makato loko lok ada. Imaro miyo arem i kom dano ki lok maraco ma iloko, in dano ma lagoba. Ento Lubaŋa biŋinyi woko piny matwal; en bimaki ci ywayi woko ki i kemani; biputi woko ki i lobo pa jo makwo. Jo ma kitgi atir bineno ci gibedo ki lworo, gibinyere kun giwacci, “Nen, man aye dano ma onoŋo pe mito riŋo ka larre bot Lubaŋa, ento obedo ka geno lwak lonyone madwoŋ-ŋi, dok ogeno ni limme aye kalarrene!” Ento an abedo macalo yat jeituni mujany ma tye i ot pa Lubaŋa, Abedo ma ageno mar pa Lubaŋa ma pe lokke nakanaka. Abipwoyi nakanaka, pien doŋ ityeko tiyo man. Nyiŋi ber, abibedo ka tucone i nyim joni ma giŋeyi, Dano ma lamiŋ waco ki i cwinye ni, “Lubaŋa gire pe,” Gin jo ma kitgi raco ma gitimo gin me kwer; pe tye ŋat mo ma tiyo gin maber. Lubaŋa neno dano ducu kun neno piny ki i polo, me neno ka ce tye jo mogo i kingi ma giryek, ma gimito Lubaŋa. Gin ducu doŋ guŋak woko, gudoko jo ma kitgi raco; pe tye ŋat mo ma tiyo gin maber, pe, kadi ki acel, Gin lutim maraco-ni, pe gitye ki ŋec? Giyako lim pa jona calo gicamo kwon, ma pe bene gilwoŋo nyiŋ Lubaŋa. Gitye kunnu ki lworo madwoŋ kit lworo ma yam peya onen! Lubaŋa biketo cogo pa jo ma pe giŋeyo en woko ata; lewic bimakogi, pien Lubaŋa doŋ okwerogi woko. Iyo, kono bedo ber ka larre pa jo Icrael bino ki i Cion! Ka Lubaŋa bidwoko gum bot jone. Yakobo bibedo ki yomcwiny madwoŋ, ki Icrael bene cwinye bibedo yom. Ai Lubaŋa, lara pi nyiŋi, dok imi alo kop pi tweroni. Winy legana, ai Lubaŋa; cik iti iwiny lok ma awaco. Jo ma luwakke gubino ka lweny i koma, jo mager gimito neka woko; gin jo ma pe tamo pi Lubaŋa. Aŋeyo ni Lubaŋa aye lakony mera; Rwot aye ma gwoko kwona. En biculo kwor i kom lukworra ki gin marac; tyekgi woko liweŋ pien in Lubaŋa ma genne. Abityero gityer boti pi yomcwiny; abimiyi pwoc, ai Rwot, pien in iber. Nen doŋ ityeko lara ki i kit can ducu, mumiyo aneno lukworra macalo jo ma doŋ aloyogi woko. Cik iti iwiny legana, ai Lubaŋa; pe ikanne woko ka abako doga boti! Winya, dok igam doga; can doŋ obwoya woko. Cwinya oballe woko pi winyo woo pa lukworra, ki pi aroma ma jo maraco giuna kwede. Gin aye ma gikelo can i koma kiniga omakogr i koma, guloka adoko lamonegi. Atye ki arem madwoŋ i cwinya, lworo me to doŋ opoto woko ikoma. Lworo omaka dok koma bene myel amyela, doŋ tipo koma oto woko lirut, Omiyo awacci, “Kono nene atye ki bwoma calo akuri! Kono atuk acito woko wek aywe. Ada, kono atuk acito wa ka mabor, onoŋo atwero buto i dye tim ata, Onoŋo kono arune oyotoyot pi noŋo kalarre, wek agwokke ki yamo laprru mager ki yamo ma kodo matek.” Ai Rwot, bal yubgi ducu, dok irub lebgi woko; pien atye ka neno tim bwami ki lweny ma tye i gaŋ, Dyeceŋ ki dyewor giwoto ki i wi cel girumo gaŋ woko; dok tim aranyi ki can madwoŋ tye ka nen iye. Nek tye ka nen i kabedo ducu; wa i cuk-gu gitye ka uno dano ki tim aranyi ki bwola. Pe lamonena aye ma loko lok aŋec ikoma, ka kumeno kono atwero cirone; pe lakworra aye ma tye ka nywara, ka kumeno kono aa ki bote akanne woko. Ento man in, ma warom kwedi-ni, ŋat ma wabedo kwede kacel, larema kikome ma doŋ waŋiyo kwede. Yam wabedo ka boko lok mamit kwedi kacel; i ot pa Lubaŋa bene wawoto ma waribbe kacel. Wek to obin onekgi woko; wek gulor piny i lyel ma pud gikwo, pien tim maraco tye i dye pacogi, Ento akok bot Lubaŋa, ci Rwot bilara. Akok bote kun acur bene, odiko, dyeceŋ ki otyeno; pi meno en biwinyo dwana. En bilara dok miyo abedo ki kuc ki i lweny ma abedo ka lwenyone, pien jo mapol guero lweny i koma. Lubaŋa ma obedo i wi komker nia wa con biwinyo kokona, dok bimiyo lewic makogi; pien pe gigwoko cik, dok bene pe gilworo Lubaŋa. Lawota ma yam ca olwenyo i kom lureme, oturo cikkene ma yam ocikke kwede woko. Lokke onoŋo pwot makato moo dyaŋ, ento cwinye onoŋo opoŋ mere ki mony; lokke ducu onoŋo kweyo cwinydano macalo moo, ento giŋolo dano macalo pala lucwan. Kel pekoni ducu bot Rwot, ci en bikonyi; en pe biye ni myero gidir dano ma kite atir woko wacel. Ento in, ai Lubaŋa, ibiretogi woko piny i bur matut adada; gin jo ma oyo remo pa jo mukene ma gin luroro bene, pe gibibedo ma gicobo nucu kare me kwogi. Ento an abigeno mera in. Kica omaki i koma, ai Lubaŋa, pien dano doŋ ginyona gidiya woko piny; lumonena giuna dyeceŋ jwi. Lukworra ginyona woko dyeceŋ jwi, pien jo mapol gilwenyo i koma ma giwakke awaka. Ka lworo omaka, ai Lubaŋa, agano mera in. Ageno Lubaŋa, dok apake pi lokke, ageno Lubaŋa laboŋo lworo mo. Dano mamwa-ni kono timo gin aŋo bota? Lukworra giketo ayela dyeceŋ jwi i gin ducu ma atiyo; tamgi ducu tye marac pi keto arem i Koma. Gigurre woko kacel kun giliba, dok guketo cwinygi me neno kit gin ducu ma atimo. Kit macalo gubedo ka kiya kun gimito neka woko, kumeno myero ipwodgi, iculgi pi balgi; ret lwak man woko piny ki akemoni, ai Lubaŋa, In doŋ iŋeyo lwak ayelayela ma abedo kwede; dok ibedo ka neno kit ma pig waŋa cwerkwede! Meno ducu pe gicoyo i bukki? I nino ma abikok iye boti, lukworra gibilokogi gidok cen. Man gin ma aŋeyo, ni, Lubaŋa tye ka lewny pira. Ageno Lubaŋa, dok apake pi lokke; ageno Rwot, dok apake pi lok ma en oloko; ageno Lubaŋa laboŋo lworo mo. Dano mamwa-ni kono twero timo gin aŋo bota? Abicobo kwonna boti, ai Lubaŋa; abityero gityer me miyo pwoc boti. In aye ma ilara ki i to, pe iweko tyena ocer apoto piny, Pi meno abedo ka wot i nyim Lubaŋa i ceŋ ma ryeny i kom gin makwo ducu. Tima kica, ai Lubaŋa, tima kica do, pien ariŋo ka larre boti. Abirino ka larre i te tipo bwomi, nio ka yamo kot ma tyeko dano okato. Akok bot Lubaŋa Mamalo Twal, bot Lubaŋa ma cobo gin ma en oyubo pira. Lubaŋa bicwalo mar mere ma pe lokke, kacel ki adane, en bicwalo ki i polo ci lara; en biloyo lukworra ma ginyona woko piny-nyi, dok miyo lewic makogi bene. Abuto piny i kin labwor ma guwor atika ka mwodo dano. Lakgi bit calo toŋ ki atero, lebgi bene bit calo pala lucwan. Ai Lubaŋa, nyut ditti malo i polo, dok imi deyoni oryeny i wi lobo ducu! Lukworra guciko obwo, gimito maka; cwinya doŋ ool woko ki can. Gukwinyo bur i yo ka ma awoto ki ive, emo gin dok gupoto iye kekengi. Cwinya omoko i komi, ai Lubaŋa, cwinya omoko i komi ma pe lokke! Abiwero wer kun apaki ki dwan maloŋo! In tipona, co woko! Wun naŋa ki opuk bene wuco woko! An bene abicoyo rupiny miyo ceŋ tuc! Abimiyo pwoc boti i kin lwak me rok ducu, ai Rwot; abiwero wer me paki i kin lurok. Mar meri ma pe lokke dit, o wa i polo, dok ada meri bene dit, o wa i pol. Ai Lubaŋa, nyut ditti malo i polo, dok imi deyoni oryeny i wi lobo ducu! Wun tika wumoko lok ma atir, wun luloc? Wun tika wuŋolo kop pa dano ducu ki cwiny ma atir? Pe wacel, wupiro lok maraco ki cwinywu; dok wutimo bal ki tim aranyi lobo. Jo maraco giŋak woko i kare me kwogi ducu, gibalo nia i kare ma ginywalogi iye kun giloko lok goba keken. Gitye ki kwir marac macalo kwir pa twol, gidiŋo itgi woko akaka calo twol uwu ma diŋo ite, ni wek pe cwiny dwan lutim yatyat i kom twol, wek pe cwiny dwan latim jokjok maryek. Ai Lubaŋa, tur lakgi woko; dok iput lak litino labwor mager-ri woko, ai Rwot! Wek gutum woko macalo pii ma mol cito woko; wek ginyongi piny calo lum ci gutwo woko. Wek gubed macalo okoro ma obab woko, nyo macalo latin ma gibwogo abwoga ma pe oneno cen, Ma pud peya guŋeyo myero gitoŋgi woko macalo yadi okuto; Lubaŋa omi yamo okolgi otergi woko ki kiniga madwoŋ! Jo ma kitgi atir gibibedo ki yomcwiny ka guneno culo kwor man; dok gibilwoko tyengi ki remo pa jo maraco. Dano gibiwacci, “Adada jo ma kitgi atir gilimo bakacic; adada Lubaŋa ma ŋolo kop i lobo bene tye.” Lara ki i ciŋ lukworra, ai Lubaŋa, gwoka ki i kom jo ma bino ka lweny i koma; lara ki bot jo ma lutim maraco, ki i kom jo ma gioyo remo pa dano, Nen, gubuto gikiya gimito neka woko; gin jo mager-ri guribbe woko ka lweny i koma. Pe pi gin marac mo nyo bal ma an atimo, ai Rwot, pe atimo kit roc mo, ma omiyo giriŋo oyotoyot i kakannegi, A ibin, in Rwot Lubaŋa me mony ci ilara; dok inengi piri keni, Lubaŋa pa Icrael! Co woko ipwod lwak me rok ducu; pe myero itrm kica ki ŋat mo kadi ki acel ki i kom lutim roro ma gipiro lok me timo tim maraco, Otyeno otyeno gidwogo cen kun gikok calo gwogi, ka giwoto girumo kwede gaŋ. Koŋ iwiny gin ma giwaco! Lok ma i doggi bit calo pala lucwan. Gttamo tam ki i cwinygi ma giwacci, “Aŋa kono ma biwinyo lok ma wawaco?” Ento in inyerogi anyera, ai Rwot; dok inalo rok ducu aŋala. In i tekka, abiwero wer me paki; pien in i cel gogona, ai Lubaŋa, Lubaŋana ma mara ki mar mere ma pe lokke bibino bota; en bimiyo aneno lukworra macalo jo ma doŋ aloyogi woko. Pe inekgi woko, miyo lutuwa wigi wil; ketgi woko ata ki tweroni ci ityekgi woko, ai Rwot, in kwotwa! Doggi opoŋ ki bal, giloko lok me bal keken; mi gumok woko i owic pi wakkegi! Pi lok me ceno dano ki goba ma giloko, myero ityekgi woko ki akemoni; tyekgi waŋ ma gutum woko liweŋ. Man bimiyo lwak ducu ŋeyo ni, Lubaŋa aye ma loyo jo pa Yakobo nio i agikki lobo. Otyeno otyeno gidwogo cen, kun gikok calo gwogi, ka giwoto girumo kwede gaŋ. Giwoto atata giyenyo cam, gibedo ka ŋur aŋura ka peya guyeŋ, Ento an abiwero wer ma apaki kwede pi tekki, abiwero wer matek odiko con pi mar meri ma pe lokke. In aye ibedo cel gogona, dok in kalarrena i nino ma atye ki can. In i tekka, abiwero wer me paki, pien in i cel gogona, ai Lubaŋa, in Lubaŋa ma imara ki mar ma pe lokke. Ai Lubaŋa, ikwerowa dok iloyowa woko do; kiniga ceŋ omaki i komwa; aya, ye wadwog boti do! Imiyo lobo oyeŋŋe, ibaro dyere woko; yub ka ma obarre-ni, pien yeŋŋe, mito poto woko. Imiyo lwakki gulimo arem me can matego; imiyowa koŋo vino wama to, wamer, wabaŋŋe woko. Iŋabo bendera malo pi jo ma gilwori, wek guriŋ iye gularre ki i lak atum. Larwa ki tekki imi walo lukworwa, dok igam legawa, wek lwak ma imaro gubwot. Lubaŋa oloko ki i kabedone maleŋ ni,’ “Abipoko Cekem woko ki deyo madit me loc, dok abipoko nota me Cukot woko i dul i dul bot jona. Gilead mera, ki Manace bene mera; Epraim aye tok nyonyo me wiya, ki Juda mere odoo kerra. Ento Moab aye becen me lwokka; ki Edom mera, obedo ka bolo warra; dok abidaŋŋe matek me loc i kom jo Pilciti.” Aŋa ma bikela i gaŋ man ma girumo ki cel gogo? Aŋa ma bitelo wiya tera i Edom? In pe doŋ ikwerowa woko, ai Lubaŋa? In pe doŋ inywako yo ki dul monywa me cito ka lewny, ai Lubaŋa. Konywa me lewny i kom lukworwa, pien kony ma dano miyo pe gin mo! Ka Lubaŋa tye ka lewny kacel kwedwa ci wabiloyo; en aye ma binyono lukworwa diyogi woko piny. Winy kokona, ai Lubaŋa, dok iwiny legana. Akok boti ki ka mabor, ki i agikki lobo, ka cwinya doŋ odem woko. Tela itera i kom got mabor ma kata; pien in aye ka larrena, in cel matek ma igwoka i kom lukworra. Wek abed i kemani nakanaka! Wek akanne i te bwomi abed ki kuc! In doŋ ityeko winyo lokka, ai Lubaŋa, dok ityeko miya gipiny pa jo ma gilworo nyiŋi, Med mwaka mapol i kom nino me kwo pa kabaka; wek obed nakanaka i kare pa yalwak ducu! Mi en obed i wi komker nakanaka i nyimi, ai Lubaŋa; dok igwoke ki mar meri ma pe lokke, ki adani. Pi meno abiwero wer kun apa ko nyiŋi, kun acobo bene kwonna ma akwoŋo i nyimi nino ki nino. Ageno mera Lubaŋa keken kun abedo aliŋ gira mot; pien larra a ki bote. En kene aye got ki Lalarra, en cel gogo ma gwoka, pe gibidira cen wacel. Wun ducu mono wubiero lweny i kom dano pi kare ma rom mene, wek wuloye wo ko calo cel ma doŋ cok poto? Giyubo lok me kwanye woko ki i rwom me dit wek gidwoke piny. Ginoŋo yomcwiny i loko lokgoba, Gulamo gum i kom dano ki lok doggi nono, ento ki i cwinygi giceno dano acena. Ageno mera Lubaŋa keken kun abedo aliŋ gira mot, pien genna ducu a ki bote. En aye got ki Lalarra, en cel gogo ma gwoka, pe gibiyena wacel. Lar kacel ki deyona ducu tye bot Lubaŋa; en aye gotta matek, dok en aye kalarrena. Wun dano, wugen Lubaŋa kare ducu, wuyab cwinywu woko ducu bote; Lubaŋa aye kalarrewa, Dano ma rwomgi piny gubedo calo yamo me yweyo mamwa, dok jo ma tye ki rwom ma malo bene obedo gin ma pe genne. Ka gipimogi i mijan gitiŋŋe malo, ma gin ducu kacel noŋo giyot makato yamo me yweyo nono. Pe wuket genwu i kom tim me bumo dano, pe wugen tim me yak, pien konnye pe; kadi bed lonyowu tye ka medde, pe wuket cwinywu iye. Lubaŋa oloko lok makato tyen acel woko ni, en a ye e won twero; dok ni in Rwot aye i won mar ma pe lokke. In, giri iculo dano acel acel muporo kit ticce. Ai Lubaŋa, in Lubaŋana, atye ka yenyi, kwona ducu ocuŋ piri; koma doŋ ool woko pi miti, calo abedo i lobo mutwo, muti, ma pii pe iye. Pi meno abedo ka yenyi i kabedoni maleŋ, pi neno tweroni kacel ki deyoni. Mar meri ma pe lokke ber kato kwo, pi meno abipaki gira kare ducu. Abipwoyi pi kare me kwona ducu; abikok boti kun ataŋo ciŋa, Ayeŋ calo acamo moo ma ii cogo ki moo dwolo, abiwero wer kun apaki ki yomcwiny madwoŋ. Kadi ka atye i wi kitandana wiya po i komi, dok abedo ka lwodo lok i komi dyewor benebene; pien ibedo lakonya kare ducu, dok akanne i tipo te bwomi kun awero wer pi yomcwiny. Amoko i komi woko Iikiŋ, ci ikwaka woko maber ki ciŋi malacuc. Ento jo ma giyenya ma gimito neka gibidonyo gicito piny i te ŋom matut. Gibinekogi woko i lweny ki pala lucwan, gibidoko cam pa too me tim. Ento kabaka bibedo mere ki yomcwiny pi Lubaŋa; jo ducu ma gikwoŋo kwoŋ ki nyiŋe gibipake; ento jo ma lugoba gibiumo doggi woko lipuk. Winy dwana ma akok kwede boti, ai Lubaŋa; atye ki lworo, lara do ki i cin lukworra! Gwoka ki i kom lok pa jo maraco ma gipiro i koma i muŋ, konya i kom lwak lutim maraco. Gipako lebgi calo gipako pala lucwan, ma giketo cwinygi i loko lok makec calo atero ma gimito celone. Gikanne, gibayo aterogi kun gicelo ki dano ma pe ki bal mo, gibayo aterogi gicelo woko oyotoyot laboŋo lworo mo, Tamgi omoko likiŋ i kom gin marac ma giparo me timone; gitye ka lok kekengi pi ciko owicgi i muŋ, kun gitamo ni, “Aŋa ma twero nenowa? Aŋa kono ma ‘twero yenyo balwa wek enoŋ? Wabedo ki tam, omiyo wapiro lok me ryeko ma pe wacce.” Gin ma tye i tam ki i cwiny dano niaŋ Iye tek, pien tye ka matut! Ento Lubaŋa bicelo aterone cito i komgi; ci gibilimo ret woko oyotoyot. En bityekogi woko matwal pi lokgi ma giloko; dano ducu ma binekogi gibiyeŋo wigi. Bimiyo jo ducu gibedo ki lworo; ci gibitito pi gin ma Lubaŋa otimo, kun gitamo bene mot pi gin ma en otyeko tiyone. Wek jo ma kitgi atir gubed ki yomcwiny i Rwot, dok guriŋ gular bote, wek jo ducu ma cwinygi atir gupake! Dano myero gupaki i Cion, ai Lubaŋa; dok myero gumini gin ducu ma yam gukwoŋo pire, pien in aye ma igamo Iega-gu ducu. Dano ducu gibibino boti pi balgi ma gutimo. I kare ma timwa marac doŋ obwoyowa, in itimowa kica iweko bal wa. Dano ma iyero ka ikelo cok boti tye ki gum, me bedo i dyekal me kabedoni maleŋl Wabiyen ki jami ducu mabeco ma tye i odi, ma en aye kabedoni maleŋl Igamo legawa, ai Lubaŋa Lalarwa, ilarowa kun itiyo jamimadito me aura ma kelo lworo. Jo ducu ma gibedo ilobo gigeno in, kadi wa jo ma gibedo ka ma lobo ogik iye, ki jo ma gibedo ka mabor wa i agikki nam Iciba godi ocuŋ i kabedogi ki tekki, ma irukke woko ki tweroni madwoŋ. In aye ma ijuko mor pa nam ki twagge pa biamwonyi bene; dok ijuko woo pa lwak me rok ducu, Mumiyo dano ducu ma gibedo ka mabor i wan apokki me agikki lobo gitye ki lworo pi lanyut ma itiyo; dok Imiyo lwak gigoyo kijira pi yomcwiny cakke tuŋ wokceŋ o kwede wa i tuŋ potoceŋ. Ibino i lobo ci imiyo kot cwer iye, imiyo lobo cekocam mabup; kuluni ducu ma iketo Poŋ woko ki pii; in bene ma imiyo bel cek, pien in yam iyubo kumeno. Imiyo kot cwer bino i potti ma gipuro ki kweri dyaŋ, dok ipiro ŋom mutiŋŋe ma i dyere woko maber, imiyo kot cwer iye madwoŋ obido woko, dok imiyo gum i kom kodi ducu ma i poto gitwi gidoŋo maber. Mwaka ki mwaka imiyo cam cek bot dano madwoŋ pi gum ma imiyo; yo ma gadigadini wok ki iye mol moo keken. Olet ma i tim ducu opoŋ ki dyaŋi keken, jo ma gibedo i ŋet godi ducu gitye ki yomcwiny madwoŋ, Bar kwat ducu opoŋ ki lwak romi ma pe wacce, nota-gu ducu opoŋ ki kal ma tye ka doŋo iye, gigoyo kijira ma giwero wer kacel ki yomcwiny. Wun jo ducu ma wubedo i wi lobo, wugo kijira bot Lubaŋa ki yomcwiny; wuwer wer pi pako deyo me nyiŋe, wupake ki pak me deyo adada! Wuwac bot Lubaŋa ni, “Gin me aura ducu ma itiyo ma kelo lworo ditte rom mene! Tweroni giri dit mada, miyo lumoneni ducu gimwolle amwola i nyimi. Dano ducu ma i lobo giworo in; giwero wer me paki, kun giwero wer gipako nyiŋi.” Wubin, wunen gin ma Lubaŋa otiyo; otiyo gin ma kela lworo mada i kin dano. Oloko nam odoko ŋom mutwo; omiyo dano guwoto ki tyengi ki i dye kulu gukato loka tuŋcel, mumiyo wabedo ki yomcwiny pi gin ma en otiyo kunnu. En loyo loc nakanaka ki tek me twerone, dok ciko waŋe me neno rok ducu. Jo ma gin lujemo myero pe gukette malo pigi kengi. Wupwo Lubaŋa, wun lwak me rok ducu, wuwek dwan me pak ma wupake kwede owinnye. En mugwokowa omiyo pud wakwo, dok pe oweko tyenwa ocer kadi ki acel. In doŋ ityeko temowa, ai Lubaŋa; doŋ itemowa macalo ryal ma giliyo i mac. Ikelowa imiyo wamoko i obwo; dok bene icibo yec mapek me can I ŋewa ni watiŋ, Iweko lukworwa giŋweco ginyono wiwa woko piny; wawotoki i dye mac wa i dye pii, ento in doŋ ikelowa wao i kabedo malac me kuc. Abibino i odi kun akelo boti gityer me gitum awaŋa; abicobo kwonna i nyimi kun amiyi gin ma yam acikke pire. Abimiyo gin ma doŋ awaco ki doga ni abimini, gin ma acikke pire i kare ma onoŋo atye i can. Abityero boti gitum awaŋa me lim makwo ma gucwe, dok abidunyo boti yito mac ma giwaŋo ki gitum me nyogi romi; abityero boti twoni dyaŋi kacel ki dyegi. Wubin wuwiny, wun jo ducu ma wulworo Lubaŋa, ci abitito botwu gin ma Lubaŋa otiyo pira. Cen akok bote matek, dok bene apake ki wer pi dworo nyiŋe. Ka nene aumo balla i cwinya, kono Rwot pe owinyo kokona wacel. Adada Lubaŋa doŋ owinyo kokona; doŋ owinyo legana ducu, Gipwo Lubaŋa, pien pe okwero winyo legana, dok bene pe okwanyo mar mere ma pe lokke woko ki i koma. Lubaŋa onyutwa kicane dok omiwa gum, ci onenwa bene ki waŋ me kica, wek dano ma i lobo ducu guŋe kiti; nyut bene twero me larri bot rok ducu. Mi rok ducu me wi lobo gupaki, ai Lubaŋa: wek lwak me rok ducu gupaki! Wek lurok ducu cwinygi obed yom kun giwero wer me pwoc, pien in aye iŋolo kop pa rok ducu maromrom, dok in aye ma it ye ka telo rok ducu me wi lobo, Mi rok ducu me wi lobo gupaki, ai Lubaŋa; wek lwak me rok ducu gupaki! Lobo doŋ oceko cam mabup: Lubaŋa ma Lubaŋawa doŋ omiyowa gum. Lubaŋa doŋ omiyowa gum; pi meno dano ma i lobo ducu myero guwore. Wek Lubaŋa oa malo, ci oket lukworre woko atata; wek jo ma kwere ducu gurin woko ki i nyime! Macalo yito duny cito woko, gin bene gibirwenyo woko kit meno; macalo odok kic leny woko ka giketo i ŋet mac, wek jo maraco bene guto woko i nyim Lubaŋa kit meno! Ento wek jo ma kitgi atir gubed ki yomcwiny; wek gunyatte ki yomcwiny madwoŋ i nyim Lubaŋa; wek gudaŋŋe ma yomcwiny mito nekogi woko! Wuwer bot Lubaŋa, wuwer wer wupak nyiŋe; wuil dwanwu malo ki wer bot en ma tye ka ŋwec ki gadigadine i wi pol; nyiŋe Rwot, wudwore, dok wubed ki yomcwiny i nyime. En won jo ma wongi pe, dok en bene magwoko mon to; en Lubaŋa ma bedo i ot mere maleŋ. Lubaŋa miyo paco bot jo mudoŋ kengi ma piny oloyo, wek gubed iye; en aye ma kwanyo lumabuc woko ki i ot kol mot maber miyo gibedo ki kuc; ento jo ma gin lujemo gibedo i lobo mutwo. Ai Lubaŋa, i kare ma itelo wi lwakki, i kare ma iwoto kwedgi ki i dye tim, ŋom oyeŋŋe, kot bene oa ki i polo ocorre i lobo, got Cinai bene oyeŋŋe i nyim Lubaŋa; oyeŋŋe i nyim Lubaŋa ma en Lubaŋa pa jo Icrael. Imiyo kot madwoŋ ocwer i lobo, ai Lubaŋa; iroco loboni muol-li woko odoco. Lwakki gubedo iye macalo pacogi; dok bene pi berri, ai Lubaŋa, ipito jo ma piny obwoyogi ki cam. Rwot omiyo cik, doŋ mon mapol gutiŋo lok maber miyo nya kun giwacci, “Luker kacel ki monygi gitye ka riŋo woko ariŋa!” Mon ma gudoŋ paco gupoko jami ma giyako woko i kingi. Kadi gibuto i dwol romi, ginen calo akuri ma gidero bwome ki ryal, dok yece gidero ki jabu ma obedo alumalum. Ka Lubaŋa Matwero-ducu oketo luker woko i wi got Jalmon, ci omiyo pee bene ocwer kunnu. Got Bacan kara tek kuman, got ma lacol wiye pol, en got me Bacan! In got ma lacol wii dwon-ni, piŋo iŋeno piny ki nyeko, wa i wi got ma Lubaŋa oyero me bedo iye-ni? Iyo, Rwot bibedo kunnu matwal! Rwot oa ki i got Cinai bino i kabedone maleŋ ki lwak gadigadi matego ma romo alip ki alip. Iito wa i wi got malo, kun icoko lwak opii cito kwedi, dok ibedo ka gamo mot ki bot dano, kadi wa ki bot jo ma yam gujemo woko. Rwot Lubaŋa doŋ bibedo kunnu. Gipwo Rwot, pien nino ki nino en tinowa wa ki pekowa ducu i kore; Lubaŋa aye Lalarwa. Lubaŋawa en Lubaŋa me lar; en Rwot Lubaŋawa, ma larowa ki i to, Ento Lubaŋa bigoyo wi lukworre turo woko, bigoyo wi dano ma yer wigi boco-gu ma gilubo timgi me bal. Rwot owacci, “Abidwokogi cen ki i Bacan, abiwotogi ka maleŋ ki i te nam matut, wek wubin wulwok tyenwu ki remogi, wek gwogiwu bene gunaŋ remo pa lukwor madwoŋ macalo gimito.” Ai Lubaŋa, jo ducu gitye ka neno wotti, wot pa Lubaŋa ma Lakerra, ma cito kwede i kabedone maleŋ, Luwer gutelo nyim, lugo wer gudoŋ i ŋec, ka doŋ anyira ma gigoyo ajaa gubedo i dyere. “Gipwo Lubaŋa i cokke madit pa lwakke, wupak Rwot, wun likwayo pa Icrael ducu!” Mutelo yo bino ca-ni aye Benjamin, ma en kaka matidi, ka rwodi me Juda ki lwakgi madwoŋ gulubo, ka doŋ rwodi me Jabulon ki rwodi me Naputali i korgi. Nyut tweroni, ai Lubaŋa; nyut tekki, ai Lubaŋa, en tek ma itiyo kwede piwa-ni. Pi odi ma tye i Jerucalem, omiyo luker gikelo mot gityero boti Juk lee tim mager ma gibedo i kin lagada, gin lwak twoni ki litino dyaŋi pa lurok. Nyon jo ma yenyo lim ajog woko piny ki tyeni; ket lwak me rok ma cwinygi yom pi lweny-gu woko ata. Wek gikel mola ki i Ejipt; dok wek jo Etiopia gubin oyotoyot ka ryeyo ciŋgi bot Lubaŋa. Wuwer wer bot Lubaŋa, wun ker ducu ma i wi lobo; wuwer wer me pak bot Rwot; Wuwer wer bot en ma tye ka wot i wi polo, en wi polo macon; winy, en tye ka daŋŋe ki dwan matek adada. Wutit pi twero pa Lubaŋa, ma dit me locce tye i Icrael, ma twerone bene tye malo i polo. Lubaŋa me aura ma kelo lworo tye i kabedone maleŋ, en Lubaŋa pa Icrael, ma miyo twero ki tek bot jone. Gipwo Lubaŋal Lara, ai Lubaŋa! Nen pii doŋ omwonya woko oo wa i ŋuta. Alwiny woko i coto ka matut, ka ma gin mo pe ma atwero cuŋ i kome; amwony woko i pii matut, ki biamwonyi me pii ma tagge bene kato ki i wiya. Doŋ aol woko ki koko pi kony; dwana doŋ okak woko. Waŋa-gu bene doŋ ocido woko pi kuro kony ma a ki bot Lubaŋana Jo ma daga nonono laboŋo tyen lok mo gipol ma gikato yer wiya woko; jo ma gin lukworra ma giloko lok goba pi lweny i koma gitek dok gimito neka woko. Gimito adwok jami ma pe akwalo akwala cen, kun pe akwalo gin mo. Ai Lubaŋa, iŋeyo minona; dok balla ducu ma atiyo pe okanne ki boti wacel. Pe iwek aket lewic i kom jo ma geno in, ai Rwot Lubaŋa me mony. Dok pe iwek akel can i kom dano ma giworo in, ai Lubaŋa pa Icrael. Aciro yet madwoŋ mada pi nyiŋi, omiyo lewic oumo waŋa woko lipuk. Adoko calolarok not utmegina, dok macalo ŋat ma labedo ki bot litino awobe pa maa. Arima pi odi mito neka woko, dok yet pa dano ma giyeti kwede bene doŋ otyeko poto i koma, Ikare ma amwolle kena i cwinya kun ari kec, meno odoko lok anywar i koma. Ikare ma abedo ka rukke ki boŋo cola, alokke adoko lok aboka i kin dano. Jo ma bedo i dog cel gibedo ka loko lok i koma ma pe wacce, lumero bene giwera awera ki wer. Ento ki tuŋ bota, ai Rwot, akelo legana mere boti. Gam Legana i kare ma iyero, ai Lubaŋa, pi mar meri madwoŋ ma pe lokke, pien igwoko cikkeni pi Laro joni. Lara wek pe alwiny woko i coto: lara ki i ciŋ lukworra, lara bene ki i pii matut. Pe iwek biamwonyi otagge omwony wiya woko, pe iwek amwony woko i pii matut, kadi ki donyo piny i bur lyel. Gam doga, ai Rwot, pien mar meri ma pe lokke ber; lokke bota pi kicani madwoŋ. Pe ikanne woko ki bot laticci; gam doga oyotoyot kombeddi, pien atye i can, Nyik cok bota ikoka, lara ki i ciŋ lukworra. Iŋeyo kit anywar ducu ma ginywara kwede, ki kit ma gimiya kwede lewic marac mada; doŋ in iŋeyo lumonena ducu. Cwinya oballe woko pi yet ma giyeta kwede, omiyo doŋ pe atye ki kit gen mo. Ayenyo ŋat ma twero nyuto kicane i koma, ento pe anoŋo; ayenyo jo ma myero gukwe cwinya, ento ŋat mo pe. Gumiya kwir marac ma kaka cam, dok i kare ma orwo pii oneka gumiya koŋo vino mawac ni amati. Wek karamagi ma gicamo-ni otyekgi woko macalo owic; karama me gityer ma gicamo-ni myero olokke odok owic ma makogi. Mi waŋgi ocor woko, wek pe gunen piny; mi pyergi onyonne obed ka myel amyela nakanaka. To akemoni woko ducu i komgi, mi kinigani malyet-ti otyekgi woko. Mi gonygi odok obur, pe iwek ŋat mo odoŋ obed i kemagi. Giyelo dano ma in doŋ ityeko pwodo, dok giketo can gimedo ameda i kom jo ma yam doŋ ityeko keto ret i komgi. Medde ki keto can i komgi muporo balgi, pe ikwany kop woko ki i wigi kadi ki acel, Jwa nyiŋgi woko ki i buk ma nyiŋ jo makwo ducu gicoyo iye-ni; pe iwek gico nyiŋgi i kin nyiŋ jo ma kitgi atir. An doŋ atye i can ki arem madwoŋ: wek larri oketa malo, ai Lubaŋal Abipako nyiŋ Lubaŋa ki wer; abidworo nyiŋe kun amiye pwoc. Pwoc man biyomo cwiny Rwot makato twon dyaŋ, nyo twon ma tuŋe olot, ma oboŋe dito, Wek jo ma giunogi gunen, gubed ki yomcwiny; wun jo ma wutye ka yenyo Lubaŋa, wubed ki kwo manyen i cwinywu. Rwot winyo koko pa dano ma piny obwoyogi, dok pe cayo jone kikome ma gitweyogi i mabuc. Wek polo ki lobo ducu gupake, nam ki jami makwo ducu ma tye ka wot iye. Lubaŋa bilaro jo Cion dok bigero gaŋi me Juda odoco; luticce gibibedo kunnu, gibicamo doko megi; litino pa luticce gibileyo doko megi, dok jo ma mare gibibedo iye. Ai Lubaŋa, mi cwinyi obed yom me lara’ Ai Rwot, bin oyotoyot ikonya! Wek Lewic omak jo ma gimito neka dok gubed ki anyobanyoba bene; wek gidwokgi cen, wek alee otwodgi, gin jo ma mito tima marac-ci! Wek gubed ma piny orem kwedgi woko pi lewic ma doŋ omakogini, gin jo ma giwacca ni, “Aa, Aa!” Ento mi dano ducu ma giyenyo in gubed ki yomcwiny madwoŋ i komi; dok imi jo ma gimaro larri gumedde ki waco nakanaka ni, “Lubaŋa dit!” An gira lacan, dok piny obwoya woko; bin bota oyotoyot, ai Lubaŋal In aye lakony ki lalarra; ai Rwot, pe igalle! Ariŋo alaro boti, ai Rwot; pe imi lewic omaka! Kit macalo in kiti at ir-ri, lara dok ikonya; cik iti iwiny legana, ci ilara! Bed got me kalarrena, dok ibed cel gogo matek ma gwoka; pien in i got ki cel gogona. Lara ki i ciŋ jo maraco do, ai Lubaŋana, lara ki i twero pa jo mager ma lubwami. Genna ducu tye i komi, ai Rwot; abedo ka geno in cakke wa ka tinona. Cakke ma ginywala abedo ka jeŋŋe i komi; in aye ma yam ikwanya ki i ot nyodo pa maa. Abibedo ka pako in nino ducu, Abedo ginaura bot jo mapol, ento in aye kalarrena matek. Abedo ka paki dyeceŋ jwi, dok amiyi deyo bene. Pe ibola woko i kare ma doŋ ati woko kuman; pe ibwota bene i kare ma tekka doŋ otum woko. Lukworra gipiro lok mapol i koma, gin jo ma mito neka woko-ni gicokke kacel ka yubo lok i koma. Giwacci, “Lubaŋa doŋ otyeko bwote woko; wuriŋ i kore wumake woko, pien pe tye ŋat mo ma myero olar en.” Ai Lubaŋa, pe ibed bor kweda; ai Lubaŋana, bin oyotoyot ilara! Mi lewic omak jo ma gidota-gu, dok gityekgi woko liweŋ; wek gicagi dok can omakgi malit, gin jo ma mito keto can i koma-ni. Ento pud abimedde ki bedo ki gen i komi, abimedde ki paki nakanaka. Abituco pi tic ma atir ducu ma itiyo, abituco bene pi tic me larri dyeceŋ jwi, pien welgi doŋ pe kwanne, okato ŋecca woko. Abibino pi tito pi tic madit me aura pa Rwot Lubaŋa, abipaki pi porreni keken. Ai Lubaŋa, ibedo Ka pwonya cakke ka tinona, pi meno pud atuco pi ticci me aura ducu ma itiyo. Pe ibwota ata, ai Lubaŋa, kadi bed i kare ma doŋ ati ma: wiya otwi lwar; ento bed kweda nio Ka atuco pi tekki bot yalwak ducu me kare me anyim, Ai Lubaŋa, twerri ki timmi ma atir doŋ otyeko o wa malo i polo. In aye ma itivo jami madito ducu, pe tye ŋat mo macalo in, ai Lubaŋa! In aye ma icwalo ayelayela ki arem madwoŋ i koma, in giri ma ibidwoko tek i koma; dok ibiwota woko ki i te ŋom ka matut, ibikela woko ka maleŋ doki. Ibimiya abedo ki dit makato, dok bene ibikweyo cwinya. Dok bene abipaki ki naŋa pi genni, ai Lubaŋana; abiwero wer me paki kun agoyo agoya ki opuk, in ŋat Maleŋ pa jo Icrael. Abidanne matek pi yomcwiny, i kare ma noŋo atye ka wero wer me paki; abipaki ki tipo koma ducu, pien doŋ ilara. Dok abitito pi timmi ma atir ma ik onya kwede dyeceŋ jwi, pien lewic ki can doŋ otyeko makogi woko, gin jo ma onoŋo giyenya wek giket can i koma. Pwony kabaka wek Oŋol kop atir macalo in, ai Lubaŋa, dok inyut porreni bot latin ker, wek oŋol kop pa lwakki atir, dok olo lucan ki kit ma atir, Wek godi ki cere-gu gukel kuc bot dano, ma en tye ka loyo lwak ki kit ma atir. Myero kabaka owiny pido pa lucan dok oŋol kopgi kakare, olar bene jo ma piny obwoyogi; ento oŋiny jo ma uno dano mukenegu woko! Lwakki myero guwori nakanaka i kare pa yalwakgi ducu pi kare ducu ma cen ki dwe pud tye! Kabaka obed macalo kot ma cwer i kom lum ma doŋ gilwero, calo ŋido kot ma cwer bido ŋom. Wek kit ma atir omedde ameda i kare me locce, dok kuc bene obed i lobone nakanaka nio wa i kare ma ‘dwe doŋ bibedo pe! En biloyo lo bo cakke i dog nam tuŋŋi nio kwede wa i nam tuŋ cel, dokbiloyo cakke ki i kulu Euprate o kwede wa i agikkipiny. Lumonene ducu gibiguno i nyime ka wore, lukworre gibibuto aryeba ic ci gibimoko apwa. Luker me Tarcic ki pa jo ma bedo i cula nam, myero gucul mucoro bote, dok luker me Ceba ki me Seba gukel mot bote. Luker ducu myero guryebbe piny i nyime, dok rok ducu myero guti bote! En laro dano ma piny obwoyo ka okok bote, konyo Lucan ki jo ma pe gitye ki ŋat ma konyogi. Kica make i kom jo magoro ki ma piny obwoyogi, ci laro kwo pa jo ma piny oloyo. En kokogi ki i tim bwami ki i un ma gibedo ka unogi kwede; kwogi pire tek bote ma pe wacce. Kabaka obed kwo nakanaka! Myero gimi jabu ma gikelo ki i Ceba bot kabaka; dok gibed ka lega pire kare ducu ma pe gikeŋ, gileg Lubaŋa wek oony gum i kome kareducu! Cam bene myero ocek mabup i lobone, opoŋ wa wi godi-gu woko ducu; wek onyak nyig mabeco calo godi me Lebanon; wek gaŋi ducu opoŋ ki lwak dano madwoŋ ala, ma gipol calo lum ma i tim! Wek nyiŋ kabakaori nakanaka, ki ywekane onya omedde ameda kit macalo cen ri kwede, Jo me rok ducu myero gulwoŋi ni lagumkom, dok myero guleg Lubaŋa ni omi gum i komgi ma rom ki gum ma omiyo i kom kabaka! Gipwo Rwot, Lubaŋa pa Icrael, ma en keken aye ma tiyo gin me aura. Gipak nyiŋe me deyo-ni nakanaka, wek deyone bene opoŋ lobo woko ducu! Amen ka dok Amen! Lega pa Daudi wod pa Yece gugik kany. Adada Lubaŋa ber bot dano ma cwmygi anr, en ber bot jo ma cwinygi leŋ, Ento an, tyena ogwaŋŋe onoŋo doŋ acok poto tyena onoŋo doŋ cok cer mada. Nyeko onoŋo omaka woko i kom jo ma luwakke, dok aneno jo maraco gilony alonya. Pe gitye ka winyo kit arem mo liweŋ; komgi yot dok pwot apwota, Pe gibedo ka neno can kit ma jo mukene gineno kwede; pe gitye ka keto ayela i komgi macalo giketo i kom jo mukene. Pi meno wakke odoko calo gin deyo me ŋutgi; tim bwami bene oboyogi woko calo gubone ki boŋo, Waggi nen mupoŋ ki yub me tim maraco, ki cwinygi bene opoŋ ki tam me miŋo keken. Giŋalo jo mukene kun giloko lok maraco; giburo dano dok giunogi bene. Giloko lok marac i kom Lubaŋa ma tye i polo-ni, lok ma a i doggi romo i lobo woko ducu, Pi meno omiyo lwak pa Lubaŋa gibedo ka pakogi; pe gineno bal mo i iwmgi kadi ki acel. Giwacci, “Lubaŋa kono twero ŋeyone niŋniŋ? En ŋat Mamalo Twal tye ki kit ŋec mo?” Nen, meno aye kit pa jo maraco; kare ducu gilimo lwak jami mapol, dok pud gimedde ameda ki noŋo lonyo makato. Abedo ma cwinya leŋ mere noŋo, dok alwoko ciŋa ma pe abalo. Gibedo ka keto ayela i koma dyeceŋ jwi, kun gipwoda nino ducu odiko odiko. Kono nen aloko lok macalo meno, kono pe abedo ki ada bot yalwak pa litino pa Lubaŋa. Ento atemo ki tekka ducu me niaŋ lok man, kadi bed oolo koma twatwal, nio ka acito i ot maleŋ pa Lubaŋa; ka doŋ acako niaŋ gin ma bitimme i kom jo maraco. Ada yam ik etogi i kabedo mapwot ma gicer acera ki iye; imiyo gipoto gitum woko ducu. Ityekogi woko oyotoyot laboŋo galle, irwenyogi woko oyotoyot ki gin maraco ma kelo lworo. Jo-nu gibedo macalo lek ma ka ŋat mo oco ki i waŋ nino ci tamo pire; ka doŋ ico, ci calgi rwenyo woko i waŋi ki i tammi. I kare ma abedo ki keccwiny, ma cwinya oton adada, onoŋo amiŋ dok akwiya piny, alokke adoko macalo lee i komi. Ento kare ducu abedo kwedi; in ibedo ka mako ciŋa lacuc bene. Itela ki tam ma ibedo ka miya, i agikkibene ibijola ki deyo. Gin aŋo mukene ma dok atye kwede i polo, kono in keken? Pe tye gin mo i lobo kany ma amito twatwal makato in. Koma ki cwinya twero doko goro, ento Lubaŋa aye miya tekcwiny, dok en aye lonyona ma abigwoko matwal. Adada jo ma tye ka mabor kwedi gibito gitum woko; dok ibijwero jo ducu ma pe gigeno in. Ento ki tun bota, bedo cok ki Lubaŋa aye ber; in Rwot Lubaŋa aye doŋ idoko kalarrena, wek atit pi tic ducu ma in itiyo. Ai Lubaŋa, piŋo ibolowa woko matwal? Piŋo imiyo akemoni duny i kom romini ma in aye ikwayogi? Po pi lwakk i ma yam iyerogi cakke wa con, gin jo ma yam ikokogi ki i can wek gubed joni kikome. Po pi got Cion, kabedo ma yam ibedo iye. Bin iwot i kabedo man ma doŋ odoko obur matwal-li; lukwor gujwero jami woko ducu ki i kabedoni maleŋi Lukworri gudaŋŋe matek ka ma yam jo gucokke iye ka wori; guketo benderagi malo me nyuto ni doŋ odoko megi. Gicalo luton-yat ma i buŋa ma gitye ka toŋo yadi ki latongi. Gutoŋo bao iye ducu ma yam gipayo maber, gubaro gubalo woko ki laton ki nyol. Gucwinyo ot pa Lubaŋa woko ki mac’ gupyedo ot meno maleŋ ka ma yam dano giworo iye nyiŋe, gumuko gureto woko piny. Guwacci, “Wabiŋinyo jo-ni watyekogi woko matwal”; guwaŋo kabedo ducu woko liweŋ ki i lobowa ka ma yam lwak cokke iye ka woro Lubaŋa, Pe doŋ waneno kit lanyut ma yam gimiyowa-ni; pe doŋ tye lanebi mo, pe tye ŋat mo i kinwa ma nevo kare ma can man bitero. Ai Lubaŋa, lukworwa mono gibibedo ka ŋalowa pi kare ma rom mene? Lukworwa myero gubed ka yeto nyiŋi nakanaka, Lubaŋa? ‘Piŋo idolo ciŋi woko pe ikonyowa? Idolo ciŋi idwoko yo tuŋ ŋeyi piŋo? Ento in Lubaŋa, ibedo kabakawa cakke wa con, ibedo ka tiyo ticci me laro dano i wilobo. Ipoko dye nam woko ki tekki; inyoto wi megi kulu-gu woko ducu i pii. Ininyo wi Leviatan ma min kulu-ni woko ducu, ka imiyo odoko cant pa Lee ma gibedo i tim. Iyabo waŋ it, imiyo piine obedo ka gunnye odoko ora, ci imiyo pii otwo woko liweŋ ki i kuln mukene ma yam gimol. Dyeceŋ meri ki wor bene meri; in aye iketo ceŋ ki dwe i kabedogi. Iketo waŋ apokki ducu me lobo; in bene ma iketo oro ki cwir gubedo tye. Ai Rwot, po i kit ma lukworwa giŋali kwede, gin jo ma pe gilwori giyeti noŋo. Pe imi joni ma rom ki akuri-ni bot lukwor magi mager-ri ma rom ki lee tim; wii pe myero owil matwal i kom lwakki ma gin lucan-ni, Po i kom gicikkeni ma yam icikke kwede ki wan; pien tim bwami tye i kabedo macol ducu ma tye i lobowa-ni. Pe iwek lewic omak jo ma doŋ ginyonogi woko piny-nyi; wek lucan ki jo ma’ piny obwoyogi gupak nyiŋi. A malo, ai Lubaŋa, ipid pidoni; po bene kit ma jo ma pe gilwori giŋali kwede dyeceŋ jwi! Wii pe owil i kom daŋŋe me kiniga ma lumoneni gidaŋŋe kwede matek-ki, en woo pa gin lukworri ma gimedde kwede ameda ma pe giliŋ-ŋi. Wapwoyi, ai Lubaŋa, wapwoyi! Watito pi dit me nyiŋi ki pi tic me aura ducu ma doŋ ityeko tiyogi. “Atyeko yero kare me ŋolo kop”, Lubaŋa ma owaco, “abiŋolo kop atir dok kakare. Kadi bed lobo oyeŋŋe, kacel ki jo ma bedo iye ducu, ento an abegwoko wir ma lobo ocuŋ iye ducu cuŋ matek kakargi. Awaco bot luwakke ni, ‘Pe wuwakke’, bot jo maraco bene awacci, ‘Pe wulyerre ma wuwakke awaka.’ Dok atito botgi ni pe myero gukette kengi malo twatwal, dok bene gugik loko lok anywar woko.” Medo rwom pa dano pe bino kun a ki yo tuŋ wokceŋ nyo potoceŋ, kadi ki yo tuŋ tim nyo yo tuŋ godi; ento Lubaŋa kene aye ma ŋolo kop pa dano, dwoko ŋat man piny dok tino dano mukene malo. Rwot omako kikopo i ciŋe ma opoŋ ki koŋo vino, ma yenyo ayenya ki bwoyo, ma girubo maber; en miyo jo maraco ducu ma tye i lobo gimato, gimato nio waŋ ma gityeko WOKO ducu. Ento an abibedo ki yomcwiny nakanaka, abiwero wer kun apako Lubaŋa pa Yakobo. En bityeko twero pa jo maraco woko liweŋ, ento bimedo twero bot jo ma kitgi atir. Dano giŋey Lubaŋa maber twatwal i Juda, nyiŋe bene dit i Icrael. Giketo kabedone tye i Calem, ki kabedo ma en bedo iye tye i Cion, En oturo atero ma lakke wil awila woko ki kunnu, oturo wa kwodigi, pala lucwan ki jami lweny-gu ducu. It ye ki deyo makato, ai Lubaŋa, ki dit me loc tye i ciŋi, makato godi ducu ma ri nakanaka, Askarigi macir ducu giyako jamigi woko; gitye ka nino nino matut adada; pe tye ŋat mo mudoŋ ki i kin gin lumony ma twero tic ki jami lweny. I kare ma ijukogi, ai Lubaŋa pa Yakobo, aguragura ki jo ma ŋweco kwedgi gupoto guwille woko; ducu, Ento in, dano lwori matek! Aŋa ma twero cun i nyimi ka onoŋo kiniga doŋ omaki woko? In doŋ iŋolo kop woko ki i polo; jo ducu ma bedo i lo bo gulworo, omiyo guliŋ mot, i kare ma ia malo ka ŋolo kop, pi laro jo ducu ma giunogi i lobo-ni, Adada akemo pa dano miyo jo gilokke gidok ka paki; jo mudoŋ ma gubwot ki i lweny ibikelo bedo cok kwedi. Wukwoŋ kwon bot Rwot Lubaŋawu, dok wucob gin ma wukwoŋo; wek dano ducu ma gibedo cok, i ŋete gukel bote mot; Lubaŋa myero gilwor, pien en dwoko rwodi ma luwakke woko piny, dok miyo luker me lobo gibedo ki lworo madwoŋ. Akok matek bot Lubaŋa, akok bote, matek, ci en winyo kokona. Ayenyo Rwot i kare ma atye ki can; i dyewor ataŋo ciŋa bote kun alego ma pe aol; ento meno ducu mwa, cwinya pe romokwe. Aparo pi Lubaŋa kun acur; alwodo lok, dok cwinya oballe woko, Pe imiyo nino mako waŋa: atye ki par mapol twatwal omiyo pe atwero loko Abedo ka tamo pi kare macon, dok apo i kom lwak mwaka ducu ma okato. Abedo ka tamo lam matut ki i cwinya i dyewor; alwodo lok dok apennye kekena ki i cwinya ni, “Rwot mono bikwerowa woko matwal? Cwinye doki pe bibedo yom ikomwa? En doŋ pe marowa ki mar mere ma pe lokke-ni? Cikkene ducu mono doŋ ogik woko pi kare ducu? Lubaŋa mono doŋ wiye owil woko pi nyuto kicane i kom dano? En doŋ mono pe romo timo kica, pi kiniga ma omake?” Dok awacci, “Gin ma cwero cwinya makato ducu en ene ni, twero pa en ŋat Mamalo Twal-li doŋ olokke woko.” Abipo, Rwot, abipo i kom ticci madit ma itiyo; ada, abipo i kom ticci ducu me aura ma yam itiyo i kare macon. Abibedo ka tamo pi gin ducu ma doŋ itimo, dok abilwodo lok i kom ticci madito ducu ma yam itiyo. Kit gin ducu ma itiyo leŋ, ai Lubaŋa! Pe tye kit lubaŋa mo madit calo in! In keken aye Lubaŋa ma tiyo taŋo me aura; dok inyuto tekki i kin lwak me rok ducu. Yam ikoko lwakki ki i can pi tweroni, gin likwayo pa Yakobo ki Yucepu. Ka pii me nam oneni, ci obedo ki lworo, ai Lubaŋa, ka oneni obedo ki lworo adada, dok nam matut ducu oyeŋŋe. Kot oa ki i pol ocwer i lobo; piny omor ki i pol matek, ci lutkot owil i kabedo ducu. Dwani omor owinnye wa i yamo lapiru mager; lutkotti bene omeny ocaro lobo woko ducu; lobo oyeŋŋe ki jo ma bedo iye ducu komgi omyel, Iwoto ikato ki i dye nam, iŋolo ki i dye nam madoŋo matut; ento ojwe tyeni pe omedo ki nen. Itelo wi lwakki macalo lakwat romi, kun imiyo Moses ki Aron me gwokogi. Wucik itwu, wuwiny lok ma apwonyowu kwede, wun lwakka; wucik itwu, wuwiny lok ma abecito ka lokone-ni. Abiwaco botwu lok i carolok; abitito botwu lok macon me koc lit, lok ma wan kikomwa wawinyo dok waŋeyo, ma kwarowa yam gutito botwa, Pe wakano lok man bedo me muŋ bot likwayogi, ento wabitito bot yalwak ma lubowa; wabitito “bi twero pa Rwot, ki pi tic matego ma en otiyo ducu, ki pi taŋo mapol me aura ma en doŋ otiyo. En omiyo lok me caden bot jo Icrael, dok omiyo cik bot likwayo pa Yakobo. En yam omiyo cik bot kwarowa me pwonyo ki litinogi; wek yalwak ma lubo i anyim bene guŋe cik magi, gin litino ma yam pud peya ginywalogi, wek gin bene gua gutit lok man bot litinogi. Ka guwinyo lok man gugen Lubaŋa, wek wigi pe owil i kom tic ducu pa Lubaŋa, dok bene gugwok cikke ducu. Gin pe myero gubed macalo kwarogi, gin yalwak ma cwinygi opoŋ ki jemo, ma pe wuwinyo cik pa Lubaŋa, yalwak ma tamgi pe omoko matek ma pe gigeno Lubaŋa ki cwinygi ducu. Jo Epraim ma gulwenyo ki atum ki atero gulokke gudok woko cen i nino me lweny. Pe gugwoko gicikkegi ki Lubaŋa, gukwero lubo cikke woko. Wigi bene owil woko i kom tic ma yam en otiyo, kadi ki lwak taŋo mapol ma yam onyuto botgi. Lubaŋa yam otiyo lwak taŋo me aura ma kwarogi gineno i bar me Joan, i lobo Ejipt, Opoko dye nam woko aryo, omiyo gukato ki iye wa loka tuŋ cel, en omiyo pii otiŋŋe malo likuŋ. Obedo ka telo wigi ki i dyeceŋ ki pol, ento i dyewor obedo ka telo wigi ki mac ma lyel. Obaro got i dye tim, omiyo gumato pii madit adada macalo pii ma tye i kut matut. Omiyo ora kulu mapol gumol ki i got mubar-ri, omiyo pii ocako mol ki iye cito piny macalo kulu madit. Ento pud gumedde ki timo bal i kom Lubaŋa, gujemo woko i kom ŋat Mamalo Twal-li i dye tim. Gutemo Lubaŋa i cwinygi kun gilege ni ominigi cam ma igi opukke iye. Guloko lok marac i kom Lubaŋa kun giwacci, “Lubaŋa twero yubo meja i dye tim kany? Kono ada en obaro got ci pii okatti ki iye, kulu ducu gupoŋ woko libyeny wa i wi tura. En dok twero miyowa cam, nyo twero miyo bene Rino bot lwakke wek gucam!” Pi meno akemo omako Rwot matek i kare ma owinyo lok meno; omiyo olwenyo i kom jo pa Yakobo ki mac, kinigane onya omedde ameda i kom jo Icrael, pien pe gubedo ki niye i kome, dok pe gugeno ni en twero larogi. En ociko pol ma tye malo, dok oyabo doggola me polo; ka doŋ ocako cwalo botgi manna me acama, omiyo botgi kal mua ki i polo. Dano gucamo kwon ma lumalaika gicamo; ocwalo botgi cam madwoŋ ata. Omiyo yamo ma a tuŋ wokceŋ okodo ki i polo, dok bene otelo yamo ma kodo yo tuŋ acuc ki twerone. Ocwalo lwak winyo opye i komgi calo apwa, gipol ma girom ki kweyo ma i dog nam; omiyo gupoto woko i dye gonygi, i kabedo ducu ma orumo kemagi. Lwak gucamo ci guyeŋ bene matek, pien Lubaŋa doŋ omiyo botgi gin ma igi opukke iye. Ento ma pud kee riŋogi tye, ma peya guyeŋ maber, ma onoŋo cam bene pud tye i doggi, kiniga omako Lubaŋa matek i komgi, ci oneko jo matego woko ki i kingi, ojwero twoni oteka ma giyerogi ki i kin jo Icrael-li woko. Kadi bed kumeno, jo Icrael pud gimedde ameda ki timo bal; kadi bed Lubaŋa otiyo jami tano mapol, gin pe guye. Pi meno ogiko nino me kwogi woko calo yweyo, ka orwenyo kwogi woko bene ki can madwoŋ ma opoto atura. Ka oneko jo mogo, jo mudoŋ gilokke giyenye gidwogo bote; giŋut ci giyenyo Lubaŋa ki cwinygi ducu. Gucako po ni Lubaŋa aye kalarregi, Lubaŋa Mamalo Twal yam okokogi ki i can. Ento gubedo ka bwole abwola ki lok doggi noŋo, lok ducu ma gubedo ka loko bote obedo goba keken. Pe gimare ma gimoko i kome ki cwinygi ducu; pe bene gubedo ki ada me gwoko gicikke ma tye i kingi ki Lubaŋa. Ento kica omako Lubaŋa i kom lwakke. En oweko balgi, omiyo pe otyekogi woko. Obedo ka juko kinigane pi tyen mapol, pe obedo ka tugo akemone ducu. En opo oŋeyo ni gin dano mamwa, gubedo calo yamo ma kodo cito mere matwal ma pe dok dwogo cen. Gujemo i kome i tim pi kare mapol; gucwero cwinye i aroo. Gubedo ka temo Lubaŋa teretere, gumiyo kiniga omako ŋat Maleŋ pa Icrael. Wigi owil woko i kom twerone, kadi i kom nino ma en okokogi kwede ki i ciŋ lukworgi-ni, i kare ma en otiyo lanyut me jami taŋo mapol, i bar Joan, i lobo Ejipt. Oloko pii ma i kulu pa jo Ejipt ducu odoko remo, wek pe gumat piine ma i ora kulu. Ocwalo Iwaŋi i kingi ocamogi matek, ocwalo ogwal bene ma obalo lobogi. Omiyo okwil ocamo ginapitagi woko, ki camgi ma doŋ guyelle kwede i poto omiyo bonyo ocamo woko ducu. Omiyo pee ogoyo olokgi obalo woko, ki yadi olamgi obalo woko ki ŋico. Omiyo pee oneko dyaŋigi woko, ki lutkot bene ocelo romigi, Obaŋogi woko ki akemone magerri, ki kiniga, mone ki can, kun ocwalo lumalaika me jwerogi woko. En pe ojuko kinigane; pe oye laro kwogi ki i to, ento omiyo two gemo onekogi woko. Oneko litino kayo ducu ki i Ejipt, ma gin jo ma gukwoŋo nywalo ki tekogi ki i kema pa Kam. Ka doŋ otelo wi lwakke okelogi woko macalo lakwat romi, obedo ka telogi kun gwokogi i tim macalo lwak lim Otelogi Ki kuc, omiyo pe gubedo ki lworo; ento nam aye omwonyo lukworgi woko. Okelogi i lobone maleŋ, i got ma en omayo ki twerone i lweny ma en oloyo. Oryemo lurok woko ki i nyimgi; opoko dul lobo i kingi ma myero gucam obed megi, ci omiyo jo me kaka pa Icrael ducu gubedo doŋ mot i kemagi. Ento gutemo Lubaŋa Mamalo Twal dok gujemo woko i kome, kun pe gilubo lokke me caden, gulokke guŋayo waŋe woko macalo yam kwarogi gutimo; guminne woko, gubwole macalo atum ma pe celo atir. Gumiyo kiniga omake pi waŋ jogigi ma giketo i wi godi-gu; gumiyo nyeko omake pi callubaŋa ma gupayo. Akemo omako Lubaŋa matek i kare ma owinyo lok meno, ci okwero jo Icrael woko marac twatwal. En obwoto kemane ma en bedo iye i eilo-ni woko, ma en aye gaŋ ma en yam bedo iye i kin dano. Omiyo canduk me twerone woko wek giter i opii, lanen me deyone omiyo woko bot lumerok, Akemo noŋo omake twatwal i kom lwakke, omiyo lukworgi gunekogi woko ki pala lucwan. Mac owaŋo awobegi otyekogi woko liweŋ, ki anyiragi bene pe doŋ giwero wer nyommo. Gineko ajwagigi woko ki pala lucwan, ci mongi pe gukokogi. Lacen Rwot opo litaku calo oco ki i waŋ nino, calo oteka mumer ki koŋo yino ka doŋ daŋŋe. Oryemo lukworre gudok cen, dok lewic ma bedo nakanaka opoto i komgi. En okwero kema pa Yucepu woko, pe oyero kaka pa Epraim, Ento oyero kaka pa Juda, ki got Cion ma en maro-ni. Ogero kabedone maleŋ kunnu, calo gaŋŋe ma tye i polo; ocibo ocuŋ matek liliŋ calo lobo, ma en doŋ oketo bedo matwal-li. Oyero laticce Daudi, ci okwanye woko ki ka kwayo romi; Okwanye okele woko ki ka gwoko megi romi ki litinogi, okete obedo lakwat pa jone Icrael, odoko kabaka pa likwayo pa Yakobo ma lwak pa Lubaŋa. Daudi ogwokogi ki leŋcwinye, dok otelogi ki diro mada. Ai Lubaŋa, lurok gubino gumayo lobo pa lwakki woko; gubalo ot meri maleŋ-ŋi woko; gujwero Jerucalem woko odoŋ obur. Gubwoto kom luticci muto me acama pa winyo me polo, dok gubwoto kom joni ma geni bot lee tim wek gucam. Guonyo remogi woko macalo gionyo pii, orumo Jerucalem woko, dok dano mo pe odoŋ ma onoŋo myero oyikgi. Rok ma gibedo i ŋetwa giloko lok aŋec i komwa, ma giŋalowa dok gijwiyowa. Ai Rwot, kiniga bimaki nakanaka? Nyo pi kare ma rom mene? Akemoni ma nyek-ki bimedde kun waŋ macalo mac? Kiniga myero omaki i kom rok ma pe giŋeyi, ki i kom ker ducu ma pe gilwoŋo nyiŋi! Gutyeko jo pa Yakobo woko, gumiyo lobowa doŋ odoko obur. Pe icul kwor i komwa pi bal pa kwarowa; wek kica omaki i komwa oyotoyot, pien piny doŋ obwoyowa woko. Konywa, ai Lubaŋa lalarwa, pi deyo me nyiŋi; larwa, dok iwek balwa, wek dano gupak nyiŋi. Piŋo lurok myero gupeny ni, “Lubaŋagi tye kwene?” Cul kwor i kom lurok i nyimwa ma waneno pi oyo remo pa luticci! Winy cur pa lumabuc; gwok jo ma doŋ giŋolo kop me to i wigi ki tweroni madit-ti! Ai Rwot, cul kwor ma romo tyen abiro i kom jo, ma gibedo i ŋetwa pi lok aŋec ma giyeŋ kwede. Ci wan lwakki, ma wan romini ma ikwayowa-ni, wabimiyo pwoc boti nakanaka; wabipako nyiŋi nakanaka, wan ki likwayowa ducu. Winywa, in lakwat pa jo Icrael, in ma itelo wi jo pa Yucepu macalo itelo wi lwak romi! In ma ibedo i wi komkerri i kom lukerubi, ryeny menypiny I nyim kaka pa Epraim, pa Benjamin ki pa Manace! Nyut tekki, ci ibin ilarwa! Dwokwa cen boti, ai Lubaŋa; nenwa ki waŋ me kica ci wabilarre! Ai Rwot Lubaŋa me mony, ibibedo ki kiniga i kom lega pa lwakki pi kare ma rom mene? Imiyo wacamo pig wanwa macalo wacamo kwon, imiyowa pig waŋ poŋ kikopo madit niwamati. Imiyo jo ma bedo i ŋetwa doŋ gicayowa marac; ki lukworwa bene ginyerowa anyera i kingi kengi, Dwokwa cen boti, ai Lubaŋa; nenwa ki wan me kica ci wabilarre! In aye ma yam ikelo tyen olok ki i Ejipt; ka iryemo lurok woko ki, i lobogi ci ipito iye olokki, Ipurokakare woko maber, ci oroyo Lwite odonyo matut i ŋom, omiyo odoŋo oumo lobo woko ducu. Tipone oumo godi woko ducu, oumo bene wa yadi cedar madito ki jaŋe-gu, Jaŋe ojany oo wa i nam, ki pote ma pud lot alota oo wa i kulu Euprate. Piŋo imuko cel marumo-gu woko, iweko jo ducu ma kato ki kenyo gupwono nyige? Opego ma gibedo i buŋa ginyono woko piny, ki lee tim ducu gicamo. Lokke idwog botwa, ai Lubaŋa me mony! Nen piny ki i polo ci inenwa; bed ki tam i kom olok man, bin ilar tyen olok man ma in aye ipiro-ni, Gutyeko wanone woko ki, mac, dok bene gutoŋo gureto woko piny; nengi ki kiniga ityekgi woko! Ket ciŋi i kom dano ma tye i ŋeti tuŋ lacuc, en dano ma imiyo odoŋo odoko matek-ki! Pe doki wabilokke-wabwoto in; gwokwa wabed kwo, ci wabipako nyiŋi. Dwokwa cen boti, ai Rwot Lubaŋa memony, nenwa ki waŋ me kica ci wabilarre! Wuwer wer ki dwan maloŋo bot Lubaŋa ma en tekwa; wuwer wer me pak ki yomcwiny bot Lubaŋa pa Yakobo! Wuwer ci wugo ajaa-gu bene, wugo ki opuk ki naŋa-gu. Wukut tum i kare ma dwe pud opor apora, dok ka doŋ ogudo got, ki i ninowa madit. Pien man obedo cik i Icrael, gin ma Lubaŋa pa Yakobo yam ociko. En oketo cik man i kaka pa Yucepu, i kare ma en owoto ocito ka lewny i kom lobo Ejipt. Awinyo dwan ma yam oc aneyo, ma wacci “Atiŋo yec mapek woko ki i gwoki; amiyo iketo aduku woko piny. Ikok bota i’ kare ma it ye i can, ci alarl; agamo dogi ki mor piny ki i kabedo me muŋ ma akanne iye, atemi bene i ŋet pii me Meriba. Wuwiny, wun jona, ka ajukowu; wun jo Icrael, amito ni wuwinv gin ma awacowu-nil Pe myero ginoŋ i kinwu kit lubaŋa mo ma pe ŋene, pe wuryebbe piny ka woro lubaŋa pa lurok. An a Rwot Lubaŋawu, ma akwanyowu, akelowu woko ki i lobo Ejipt. Wuŋam dogwu malac, ci abipitowu ki cam. “Ento jona pe guwinyo lok ma yam aloko botgi; ro Icrael onoŋo doŋ pe gitwero lubo cikka kadi ki acel. Pi meno omiyo awekogi woko pi tek wigi, wek guti gin ma cwinygi mito. Kono nene jona guwinyo lokka, kono jo Icrael gulubo cikka! Onoŋo kono aloyo lukworgi woko oyotoyot, kono aryeyo ‘ciŋa atayo lumerokgi woko ducu, Onoŋo kono jo ma daga gimwolle amwola i nyima, dok can ma bipoto i komgi kono obedo matwal. Onoŋo atwero pitowu ki ŋano maber twatwal, dok onoŋo atwero miyo wuyeŋ ki moo kic ma tye im got.” Lubaŋa doŋ obedo i wi komme i kacokke i wi polo, ci ŋolo kop i dye lwak lubaŋa ma gugurre, kun wacci, “Pe wubinolo kop kakare pi kare ma rom mene, kun wudworo kor jo maraco? Wuŋol kop pa lugoro ki pa jo ma wongi pe; wutim jo ma tre ki can ki jo ma doŋ piny obwoyogi adada muporo kwogi. Wular lugoro ki jo ma piny obwoyogi; wulargi ki i ciŋ jo maraco.” Pe gitye ki ŋec, dok niaŋ mo bene pe, giwoto megi ata i colpiny; te guti me lobo ducu tye ka yeŋŋe. Awacci, “Wun wubedo lubaŋa, wun ducu litino pa ŋat Mamalo Twa! Kadi bed kumeno, wubito macalo dano, dok bene wubipoto macalo rwot mo keken.” A malo, ai Lubaŋa, iŋol kop i kom lobo; rok ducu ma i wi lobo-ni meri. Ai Lubaŋa, pe iliŋ; pe ibed mot ki kuc ma iliŋ woko, ai Lubaŋa! Nen lukworri gitye ka timo gin marac; jo ma gidagi-ni doŋ gujemo woko. Gitye ka yubo yub mogo i muŋ i kom lwakki; gicokke kacel giporo lok i kom joni ma doŋ igwokogi woko-ni. Giwacci, “Wubin, wek watyek rokgi woko; wek pe doŋ gipo pi nyiŋ Icrael matwal!” Iyo, gin ducu gipiro lok ki cwiny acel; dok bene giketo gicikke i kingi me lweny i komi. Gin jo Edom, ki jo Icmael, jo Moab ki jo Agri, jo Gebal, jo Ammon ki jo Amalek, jo Piliciti ki jo ma gibedo i Turo. Jo Aciria bene onoŋo guribbe kwedgi; gin aye dul mony matek pa likwayo pa Lot. Tim gin ma itimo i kom jo Midian-ni i komgi, macalo itimo i kom Cicera ki Jabin i dog kulu Kicon, ma gityekogi woko i En-dor, ma gudoko macalo cet dyaŋ ma gionyo i poto. Mi luditogi me awora gubed calo Oreb ki Jeeb, dok ilo rwodigi woko macalo iloyo Jeba ki Jalmuna; ma guwacci “Wek wakwanyu obed piwa kenwa, en olet pa Lubaŋa-ni.” Ai Lubaŋana, mi gubed macalo apwa ma yamo lapiru kolo, calo cuŋ kaŋ ma yamo tero. Kit macalo mac waŋo kwede buŋa, dok macalo leb mac ma tye ka lyel i wi godi, in bene ibiryemogi ki yamo matek gicito woko kit meno, ci ibimiyo yamo lapiru mager kodo miyogi lworo ki myelkom. Mi lewic omakgi, ai Rwot; wek gulokke guyenyi ci guti boti. Wek giket lewic i komgi dok omi cwinygi oballe woko, wek guto i can ki lewic madwoŋ, Wek guŋe ni, in keni aye ma nyiŋi Rwot, in aye ŋat Mamalo Twal ma loyo wi lobo-ni ducu. Odi ber twatwal ar Rwot me mony! Cwinya mito mada ni abed kunnu, dok olwoko pi donyo ka bedo i dyekal pa Rwot. Awero wer mepako Lubaŋa makwo ki yomcwiny madwoŋ kun amiyo iye kwona ducu. Kadi ki lakalagwec bene tye ki ode, ki aliboro bene tye ki ode ka ma en buto iye, en ka ma etwero bolo iye toŋe, ma cok ki keno tyerri, ai Rwot me mony, kabakana ma Lubaŋana, Jo ma bedo i odi gitye ki gum, ma gibedo ka wero wer kun gipaki, kare ducu! Jo ma gigeno tek ma tve boti gitye ki gum, gin jo ma tye ki cwiny me cito wa i Cion. I kare ma giwok i nota me Baka mutwo-ni, gimiyo doko waŋ it; kot me poto kot bene cwer iye miyo pii poŋ i kabedo ducu. Gimedde gidoko tek i kare ma giwoto; Lubaŋa ma loyo lwak lubaŋa ducu binen i Cion. Winy legana, ai Rwot Lubaŋa me mony; cik iti iwiny, ai Lubaŋa pa Yakobo! In aye i kwotwa, ai Lubaŋa; nen danoni ma giwiro ma in aye iyero! Bedo i dyekalli pi nino acel keken ber kato bedo ka mukene pi nino alip. Twora abedo lagwok doggola ot pa Rwot, kato ma abedo i kema ka ma tim maraco tye iye. Rwot Lubaŋa aye cen mewa dok kwotwa; en onyo kicane i komwa dok miyo wabedo ki deyo. Rwot pe, twono dano ma gilube ma cwinygi Ien, ki gin mo maber, Ai Rwot me mony, dano ma geno in tye ki gum madwoŋ! Rwot, yam ibedo ki kica i kom loboni, idwoko gum i kom jo pa Yakobo. Yam iweko bal pa lwakki, dok itimogi kica i kom roc ducu ma gutiyo, Yam idwoko akemoni woko cwinyi, ilokke ibwoto kinigani malyet-ti, Dwokwa cen boti, ai Lubaŋa lalarwa, cwinyi pe myero doŋ obed ka waŋ i komwa! Kiniga mono bimaki i komwa matwal? Ibimedo kinigani bedo i kom yalwak ducu? Pe ibidwoko cwinywa i komi doki aye, wek wan lwakki wabed ki yomcwiny piri? Ai Rwot, nyut botwa mar meri ma pe lokke, dok imiwa larri. Wek awiny gin ma Rwot Lubaŋa biloko. Biloko lok me kuc bot lwakke, bot jone ma gene, ma gilokke ki i cwinygi gidwogo bote. Adada, en tye oyubbe pi laro jo ma lwore, wek deyo obed i lobowa. Mar ma pe lokke ki gen gibiribbe kacel, kit ma atir ki kuc bene gibirwatte. Gen bia ki i lobo doŋo malo, kit ma atir bene bineno piny ki i polo. Iyo, Rwot bimiyo botwa gin maber, ki lobowa ‘bene biceko cam madwoŋ. Kh ma atir bitelo nyim Rwot, dok biyubo yo ma en biwoto iye. ‘Yiny legana, ai Rwot, dok igam doga, pien an lacan, piny bene obwoya woko. Lar kwona ki i to, pien atye ki mar me ada i komi, lara, pien an laticci dok ageno in. In Lubaŋana, pi meno bed ki kica i koma, ai Rwot, akok boti dyeceŋ jwi. Mi cwiny laticci obed yom, ai Rwot, pien legana cito malo boti kun amiyi tipona ducu. Ai Rwot, in iber dok iweko bal pa dano, dok mar meri ma pe lokke dwoŋ pi jo ducu ma kok boti. Cik iti iwiny legana, ai Rwot; winy kokona ma abako kwede doga boti. I kare ma atye i can akok boti, pien igamo doga. Pe tye lubaŋa mo i kin lubaŋa mukene-gu macalo in, dok pe tye kit tic mo ma rom ki ticci. Rok ducu ma iketogi gibibino gibiryebbe piny i nyimi, ai Rwot, ci gibipako nyiŋi. In i dit dok itiyo jami tano me aura mapol, in Lubaŋa keni. Pwonya ki cikki ai Rwot, wek alub adani; mi abed ki cwiny acel me lworo in. Amiyo pwoc boti ki cwinya ducu, ai Rwot Lubaŋana, abibedo ka miyo deyo boti kun atuco nyiŋi nakanaka. Mar meri ma pe lokke dit twatwal i koma, in aye ma ilara ma onoŋo atye ka matut i te bur lyel. Ai Lubaŋa, jo ma lunywar guero lweny i koma; dul pa jo ma lubwami gimito neka woko, kun bene pe giketi anyim me telogi i gin ducu. Ento in, ai Rwot, in Lubaŋa ma lakica dok imaro dano, kiniga pe maki oyot, dok mar meri ma pe lokke, ki genni, dwoŋ, Lokke inena ci kica omaki i koma; miya tek dok ilara, pien atiyo boti, kit macalo yam maa otiyo kwede boti, Nyutta lanyut ma tito berri bota, ai Rwot, wek lewic omak jo ma gidaga ka gibineno ni in doŋ ityeko kweyo cwinya dok ikonya. Rwot ogero gaŋŋe i wi got maleŋ; en maro dog gaŋ me Cion makato kabedo mukene ducu ma jo pa Yakobo gibedo iye. Winy, in gaŋ pa Lubaŋa, lok me aura me deyo-gu ma gitye ka lokone i komi. I kin jo ma ŋeya abituco nyiŋ Rakab ki Babilon; dok abiloko i kom Piliciti, Turo ki Etiopia. Giwacci, “Ŋadi ginywalo ki kunnu.” I kom Cion gibiwaco ni;: “Dano man ki maca ducu ginywalogi iye”; pien ŋat Mamalo Twal aye bimiyo Cron cuŋ likiŋ. Rwot bicoyo nyiŋ rok woko ducu ki kore, kun coyo ni, “Man, ginywalo kunnu. Man ginywale-kunnu.” Luwer ki lumyel ducu giwaco ni, “Waŋ it mera ducu tye i in.” Ai Rwot Lubaŋa, akok: dyeceŋ jwi pi kony; kadi i dyewer bene akok boti. Winy’ legana, cik iti iwiny kokona! Lwak can mapol opoto i koma,’ omiyo kwena doŋ onyiko cok ki to, An doŋ gikwana i kin jo ma gicok to, ma gibidonyo piny-i bur; tekona ducu otum woko. Acalo ŋat mo ma gibwoto i’ kin jo muto; adoko calo jo ina ginekogi ma doŋ gibuto ilyelgi, calo jo ma wii doŋ pe PO i komgi matwal, ma doŋ gitye ka mabor ma pe iromo konyogi, In doŋ ityeko bola woko i te bur ka matut, ka macol dok matut adada. Akemoni tye mapek i koma, imiyo amwony woko i biamwonyi me akemoni boti Imiyo lurema gutenya woko liyak; imiyo adoko gin malik botgi. Giloro wiya woko i ot ma pe atwero lwi akato ka mo; waŋa doŋ ocido woko pi cwercwiny. Ai Rwot, akok boti nino ducu; alegi kun ataŋo ciŋa boti. In mono itiyo taŋo pi jo muto? Tipogi mono gra malo ka paki? Tika gitito pi mar meri ma pe lokke wa i lyel, kadi ki pi genni bene gibitito i lobo pa jo muto? Taŋo me aura ma itiyo-gu ducu nen kunnu i kabedo macol-li, nyo kony me larri binen i lobo me wil-wic? Ai Rwot akok boti pi kony, odiko odiko ducu akelo legana i nyimi, Ai Rwpt, piŋo ibola woko? Piŋo ikanne woko ki bota? Cakke ma pud atidi abedo ki arem madwoŋ ma, onoŋo doŋ acok to; abedo ka ciro tim maitimo i koma ma kelo lworo, koma doŋ oloc woko, Akemoni ouma woko lipuk; lwennyi i koma ma miyo lworo otyelca woko, Akemoni ki Lwennyi giruma woko dyere dyeceŋ jwi calo lalele me pii, ma giuma woko lipuk tuŋŋi ki tuŋŋi. Imiyo lurema ma cok kweda ma amaro ducu gutenya woko liyak; luwota doŋ gin jo ma tye i colpiny. Ai Rwot, abiwero wer nakanaka pi mar meri ma pe lokke; abituco pi genni ki doga bot jo me yalwak ducu. Aŋeyo ni mar meri ma pe lokke bedo matwal, genni bene tye ocuŋ woko likiŋ calo polo, Iwacci, “Doŋ aketo gicikke ki dano ma ayero, akwoŋo kwoŋ bot laticca Daudi ni, ‘Abimoko likwayi gibedo matwal, dok abiketo komkerri cuŋ pi kare pa yalwak ducu.’ Ai Rwot, wek lwak ma i polo gupaki pi taŋo me aura ma doŋ ityeko tiyogi-ni, wek guwer bene pi genni i cokke pa joni maleŋ! Pe tye ŋat mo i polo ma gitwero poro ki Rwot; pe tye mo kadi acel i kin lwak me polo ma rom kwedi, Rwot. In aye Lubaŋa ma gilworo i cokke pa jo maleŋ, in idit dok iger iloyo jo ducu ma gurumi woko-ni.’ Ai Rwot Lubaŋa me mony, aŋa ma tek calo in? In lagen ijami ducu, ai Rwot. Iloyo wa biamwonyi me nam ma twagge; ka biamwonyine otwagge, ikweyogi woko cut, Inyono Rakab piny ineko woko calo inyono geŋ lee muto, ikeyo lukworri woko ducu pi tek me badi. Polo ki lobo ducu meri; lobo ki jami ducu ma tye iye in aye ma iketogi. In aye ma iketo lobo ma tuŋ acam ki ma tuŋ acuc; got Tabor ki got Kermon gipako nyiŋi ki yomcwiny madwoŋ. It ye ki twero madit mada; tekki dwoŋ, ciŋa ma lacuc oille malo. Icibo komkerri i kom kit ma atir ki ŋolo kop kakare; mar ma pe lokke, ki gen, tye i gin ducu ma itiyo. Gitye ki gum jo ma giwori kun giwero boti wer ki dwan maloŋo, ma giwoto i ceŋ me kicani, ai Rwot. Gibedo ki yomcwiny piri dyeceŋ jwi, ma gidwori pi kiti muporre. In aye ma imiyogi tek miyo gibedo ki deyo; pi berri botwa miyo tekwa bene tiŋŋe malo. In aye i kwot ma gwokowa, ai Rwot; in ŋat Maleŋ pa Icrael imiyo botwa kabaka. Yam con iloko ki laticci ma lagen i lek, kun iwacci, “Aketo lalukana i kom dano ma tye ki tek, amiyo ŋat ma ayero ki i kin lwak obe do i wi komker. Ayero laticca Daudi, awire kimoona maleŋ, aketo obedo kabakawu. Tekka bibedo bote kare oucu, twerona bimiyo en bedo tek. Lukworre pe gibibwole, dok jo maraco pe gibiloye bene. Abinyono lukworre woko piny ki i nyime, dok aneko jo ma dage woko liweŋ, Abibedo kwede ki gen kun amare ki mar mera ma pe lokke, dok abimiye tek me loyo lukworre pi nyiŋa, Abimedo kerre nia ki i nam madit nio wa i kulu Euprate. En bilwoŋa ni, ‘In i Wora, ki Lubaŋana; in aye Got me kalarrena.’ Abiloko en bedo latin kayo, kabaka madit makato luker ducu ma i wi lobo-ni. Abigwoko mar mera ma pe lokke nakanaka pire, dok gicikkena pire bicuŋ likiŋ. Abimiyo lakwarre bedo kabaka kare ducu; dok abimoko komkerre bedo matwal macalo pol. “Ka ce likwaye gibibwoto cikka, ma gibedo kun pe gilubo gin ma aciko; ka ce guturo cikka ma pe gilubo cik ma amiyogi, ci abipwodogi ki odoo pi balgi; can madwoŋ adada bipoto i komgi pi balgi. Ento pe abikwanyo mar mera ma pe lokke woko ki i kome, pe abibwoto adana me kwanyo genna woko ki i kome. Pe abituro gicikkena, nyo kadi loko kit lok ma yam doŋ atyeko lokone. “Doŋ akwoŋo kwon kicel ma bedo matwal ki nyina maleŋ; pe abiloko lok goba bot Daudi. Kare ducu Likwaye bibedo tye, dok abigwoko kerre bedo nakanaka calo ceŋ ma ryeny i nyima. Bibedo nakanaka ma omoko woko likiŋ calo dwe ma tye i kabedone, bicuŋ woko matek likiŋ calo polo ma oyarre malo.” Ento kombeddi kiniga omaki i kom kabaka ma in aye iwiro ki moo; doŋ itenye woko liyak dok ikwere woko adada. Ityeko weko gicikkeni woko ki laticci, ibolo lalukanane i apwa ibalo woko. Ityeko muko cel me gaŋŋe woko ducu; cel gogone-gu ducu doŋ ireto woko piny odoko obur. Jo ma giwok ki i ŋete giyako jamine; doŋ odoko gin me aŋala bot luwote ma gibedo cok kwede. In doŋ imiyo loc woko bot lumonene; imiyo gin ducu gubedo ki yomcwiny. Iyo, iloko lak pala lucwanne odoko gin ma konnye pe, imiyo giloye woko i lewny. Ikwanyo odoo kerre woko ki i ciŋe, ka ikwanyo komkerre ituro ibolo woko piny i nom. Imiyo oteggi oti woko ma pud en tidi, ci ileyo wiye woko. Ai Rwot, ibikanne woko matwal? Nyo pi kare ma rom mene? Dok akemoni bibedo ka waŋ calo mac pi kare ma rom mene? Ai Rwot, po i kom kit ma kare me kwo pa dano nok kwede, dok ipo ni dano ma iketo-gu ducu mwa! Aŋa ma twero bedo kun pe to? Dok aŋa ma twero larre kene ki i twer me Lyel? Rwot, tic ducu ma yam itiyo, ki mar meri ma pe lokke-ni, doŋ gitye kwene? Genni ma ikwoŋo kwede kwon bot Daudi-ni kono tye kwene? Ai Rwot, po i koma an laticci, nen kit maginala kwede. Nen kit ma atye ka ciro kwede yet pa lwak me rok ducu. Ai Rwot, nen kit ma lukworri giloko kwede lok aŋec, kun bene giŋalo dano ma in aye iwiro ki moo i kabedo ducu ma en woto iye. Gipwo Rwot nakanaka! Amen dok Amen! Rwot, in aye ibedo kalarrewa ma con ki con. In Lubaŋa ma bedo nakanaka; ma pud peya iketo godi ki lobo, onoŋo in doŋ it ye. Iloko dano doko apwa, kun iwacci, “Wudok cen, wun litino pa dano!” Mwaka alip kulu ki boti rom ki nino ma okato laworo; nyo rom ki cawa acel ma i dyewor. Ijwero dano woko, gikato calo lek, gicalo lum ma lot odiko. Odiko lot, doŋo; otyeno ner, ci two woko. Akemoni otyekowa woko; kinigani omiyowa lworo madwoŋ. Ityeko keto gin marac ma watimo ducu i nyimi, wa balwa ma watimo i muŋ ducu onen i waŋi ka maleŋ. Kare me kwowa kato akata i te akemoni, mwakawa tum woko i kare manok twatwal. Kare me kwowa romo mwaka pyerabiro, nyo pyeraboro ka komwa yot; ento gin ducu kelo can ki ayelayela keken, pien gikato oyot, waŋ bene warwenyo woko. Aŋa ma paro pi tek me akemoni, ki pi lworo ma kinigani kelo? Pwonywa me kwano nino me kwowa, wek wabed ki cwiny me ryeko. Lok cwinyi, ai Rwot! Imito wanen can pi kare ma rom mene? Wek kica omaki i kom luticci! Kwe cwinywa odiko ki mar meri ma pe lokke, wek wawer wer wabed ki yomcwiny pi kare me kwo mewa ducu. Miwa yomcwiny pi kare ma rom ki nino ma imiyowa iye can; ma rom bene ki mwaka ma walimo iye ayelayela. Wek wan luticci wanen tic meri, wek deyo me tek meri onen bot litinowa. Rwot Lubaŋawa, wek gum meri obed i komwa; mok ticwa ducu ma watiyo wek obed maber! Iyo mok tic mewa ducu ma watiyo wek obed maber! Dano ma bedo i kakanne pa En Mamalo Twal, ki ma bedo i te gwok pa Won Twer Ducu, biwaco bot Rwot ni, “In kalarrena ki cella, in Lubaŋana ma ageno.” En aye ma bilari ki i owic pa ladwar, ki i two gemo marac ma neko dano. En biumi ki bwome, ibiriŋo ka larre i te bwome, adane en kwot ki gin ma geŋo kori. Pe ibilworo gin marac i dyewor, nyo kadi atero ma gicelo dyeceŋ, kadi two gemo ma neko dano atura i colpiny, nyo can ma poto nekogi i dyeceŋ. Jo alip apar gitwero to ka ŋeti, ki jo alip i tuŋ ciŋi ma lacuc; ento gin mo pe bigudo komi. Ibibedo caden keken, ibineno kwor ma giculo i kom lutim maraco ki waŋi. Inoŋo Rwot doŋ odoko kalarreni, En Mamalo Twal doŋ odoko kabedoni. Can mo pe bipoto i komi, kit gemo mo bene pe bibino cok ki kemani. Lubaŋa biciko lumalaikane piri me gwoki ka ma iwoto iye ducu. Gibijoli ki ciŋgi, wek pe iyok tyeni i kom got. Ibinyono labwor ki ororo, ibitoro latin labwor ki twol piny i nom ki tyeni. Kit macalo en onyuto marre i koma, abilare; abigwoke, pien en ŋeya. Ka okok bota, abigamo doge; abibedo kwede i kare me ayelayela, abilare dok abiketo deyo i kome. Abikweyo cwinye kun amiye eri i lobo pi mwaka mapol, abimiyo en ŋeyo ni an lalar dano. Miyo pwoc bot Rwot en gin maber, wero wer me pako nyini bene en gin maber, ai In Mamalo Twal. Tuco mar meri ma pe-lokke odiko, ki nyuto adani otyeno bene ber, kun gigoyo naŋa ki gitta, ma gilubo dwan opuk bene. Pien in, ai Rwot, pi ticci me aura ma itiyo omiya yomcwiny, pi tic ma itiyo miyo awero wer ki yomcwiny, Ticci dit tom mene, ai Rwot! Dok tammi tut rom mene! Dano ma lamiŋ pe twero ŋeyo lok man, dano ma wiye odiŋ pe twero niaŋ i kom lok man, ni, kadi lubal gidoŋo macalo lum, dok kadi lutim maraco gibedo ki kwo maber, ento gibityekogi woko matwal. Ento in, ai Rwot, ibedo dit nakanaka, Lumerokki, ai Rwot, ada gibinekogi woko liweŋ, jo ducu ma gin lutim maraco gibiketogi woko ata. Imiyo adoko tek macalo jubi ma i tim, ityeko wira woko ki moo manyen. Atyeko neno can ma poto i kom lukworra ki waŋa, dok atyeko winyo ki ita kit ma giloyo kwede jo maraco ma onoŋo gutinne i koma. Jo ma kitgi atir gidoŋo calo yadi otit, gidoŋo maboco calo yadi cedar me Lebanon. Gipitogi i ot pa Rwot, gituru i dyekal me ot pa Lubaŋawa. Kadi guti ento pud gibinyak, piggi bibedo dwoŋ miyo pe gibiner. Man binyuto ni Rwot cwinye atir en gotta ma pe tiyo gin mo marac. Rwot tye ka loc, orukke ki deyo me twer; Rwot orukke, ma otweyo pyere ki tek. Iyo, lobo doŋ ocuŋ matek, pe giromo dirone; komkerri omoko matek; nia wa con onoŋo in doŋ it ye. Lalele doŋ otyeko mor, ai Rwot, lalele otyeko mor; lalele medde ki mol liwolwol, Rwot dit kato mor me pii madwoij, tye ki twer me: deyo ma kato biamwonyi me namo. Rwot ma bedo i polo tye ki deyo. Cikki obedo me ada, ai Rwot: odi myero obed maleŋ nakanaka. Ai Rwot, in Lubaŋa ma lacul kwor, in Lubaŋa ma lacul kwor, ryeny imeny piny, A malo, in laŋolkop me lobo; cul kwor i kom jo ma wakke muporo timgi. Jo maraco gibilyerre pi kare ma rom mene, pi kare ma rom mene, ai Rwot? Giloko lok me cac ki wakke, lutim maraco ducu gin jo ma luwakke. Giŋinyo joni woko, ai Rwot, gibalo joni kikomi. Gineko mon to ki jo ma gin lubedo, gineko wa litinokic-gu. Giwaco ni, “Rwot pe neno; Lubaŋa pa Yakobo pe keto cwinye iye.” Wuniaŋ, wun jo ma wiwu pe tiyo! Wun lumiŋ mono wubidoko ryek awene? En ŋat muketo it mono pe winyo? En Ŋat mucweyo waŋ kono pe neno? En ma pwodo lurok, pe bipwodowu? En ma pwonyo dano ki ryeko, pe ŋeyo gin mo? Rwot ŋeyo tam pa dano, ni gicalo alur dog me yweyo keken. Dano ma in itiro tye ki gum, ai Rwot, dano ma ipwonyo ki lok me cikki, wek oywe i kare me can, nio waŋ ma gikwinyo bur pi jo maraco. Rwot pe bibwoto jone, pe biweko jo ma gin mere kikome. Gibiŋolo kop atir pi jo ma kitgi atir, jo ma cwinygi atir gibilubo. Aŋa ma twero tiŋŋe i kom jo maraco? Aŋa ma bicuŋ ma kakara i kom lutim maraco? Ka kono Rwot pe okonya, tipona kono oliŋ woko licwic i lobo me liŋo. I kare ma atamo ni, “Tyena ocer,” mar meri ma pe lokke otiŋa malo, ai Rwot. Ka atamo pi jami mapol, in ikweyo cwinya ki kicani, Jo maraco ma gin luloc gitwero ribbe kwedi niŋniŋ, ma giloko lok marac doko cik? Gicokke kacel ka neko dano ma kite atir, gujolo kop me to i kom dano ma pe ki bal. Ento Rwot aye doŋ cella, en got me kalarrena. En bidwoko balgi i wigi kengi, ci bityekogi woko pi timgi maraco; Rwot Lubaŋawa bityekogi woko. Wubin wawer bot Rwot; wek cwinywa yom kom got ma larowa! Wabin i nyime ka miyo pwocwa; Wawer bote wer me pak ki yomcwiny! Rwot aye en Lubaŋa madit, en kabaka madit makato lubaŋa-gu ducu. Nota me lobo tye i twerone; lacol wi godi gin mere bene. Nam mere pien en muti yo, lobo bene en ma ocweyo ki ciŋe. Wubin, waryebbe piny wawore, warumu conwa i nyim Rwot ma oketowa. Pien en aye Lubaŋawa, wan wa jone ma en aye ma kwayowa, dok wan romi ma en aye gwokowa. Ka kono tin wun wuwinyo dwane! Pe myero wumi cwinywu obed nwaŋ macalo yam wutimo i Meriba, macalo wutimo i kare ma wutye i Maca i tim. I kare meno kwarowu yam gutema, guporo kit ma kwona tye kwede, kadi bed guneno tic ma atiyo pigi ki waŋgi, Cwinya okwero lwak meno woko pi mwaka pyeraŋwen; omiyo awacci, “Gin lwak ma guŋak woko ki i cwinygi, pe gilubo cikka.” Mumiyo akwoŋo kwoŋ ki kiniga, ni pe myero gudony i lobo ka ma an abimiyogi iye yweyo. Wuwer bot Rwot wer manyen; wuwer bot Rwot, wun lobo ducu! Wuwer bot Rwot, wupwo nyiŋe; wutit pi larre nino ducu. Wutuc deyone bot lurok wutit ticce me aura bot rok ducu! Rwot aye dit, myero gipake twatwal myero gilwore makato lubaŋa mukene-gu ducu, Pien lubaŋa pa lurok ducu gin cal jogi apaya, ento Rwot aye oketo polo. Deyo ki dit tye bote tek ki ber tye i kabedo mere maleŋ, Wun kaka me rok ducu, wumi deyo bot Rwot, wumi deyo ki tek bot Rwot! Wumi deyo bot Rwot muporo nyiŋe; wukel gityer, wubin wa i dyekalle! Wuwor Rwot ki, boŋo maleŋ; komwu omyel i nyime, wun lobo ducu! Dano guwac i kin lurok ni, “Rwot tye ka loc! Ada, lobo ocuŋ matek ma pe yeŋŋe; en biŋolo kop i kom dano maromrom.” Polo iye obed yom, lobo bene obed ma cwinye-yom, wek nam omor, ki jami ducu ma tye iye; wek poto obed ki yomcwiny, ki jami ducu ma tye iye! Man bimiyo yadi ma i buŋa ducu, giwero wer pi yomcwiny i nyim Rwot, pien obebino ka ŋolo kop ki lobo. En ‘biŋolo kop ma tye atir i kom lobo; biŋolo kop i kom rok ducu ki adane. Rwot tye ka loc; wek lobo obed ki yomcwiny; wek lobo ma i dog nam ducu cwinygi obed yom! Pol ki mutu mucido licuc ogure woko dyere; kit ma atir ki ŋolo kop ma tye atir aye miyo komkerre cuŋ matek. Mac telo nyime, waŋo lumerokke ma gugure dyereni woko. Lutkotte mil menyo lobo; lobo neno ci yeŋŋe. Godi leny i nyim Rwot calo odok kic, i nyim Rwot me lobo ducu. Polo tito porrene; lwak me rok ducu gineno deyone. Jo ducu ma woro cal jogi ma gipayo lewic omakogi, jo ma wakke pi cal jogi ma gupayo; lwak lubaŋa-gu ducu giryebbe piny i nyime. Jo Cion giwinyo ci gibedo ki yomcwiny, anyira Juda ducu cwinygi yom ma pe twerre, pi kop ma iŋolo, ai Lubaŋa. In ŋat mamalo twal i wi lobo ducu, ai Rwot; in i dit ikato lubaŋa-gu ducu. Rwot maro jo ma dag gin marac; en gwoko tipo pa jone ma gene; en larogi woko ki i ciŋ jo maraco. Ceŋ ryeny pi jo ma kitgi atir, yomcwiny bene tye pi jo ma cwinygi atir. Wubed ki yomcwiny i Rwot, wun jo ma kitwu atir, wupwo nyiŋe maleŋ! Wuwer bot Rwot wer manyen, pien doŋ otyeko tiyo jami me aura! Ciŋe ma lacuc ki bade maleŋ okelo bote loc. Rwot doŋ omiyo locce oneŋe, doŋ otyeko nyuto porrene ka maleŋ i nyim lurok ducu. En opo i kom mar mere ma pe lokke kacel ki genne bot jo me ot pa Icrael, Agikki piny me wi lobo ducu doŋ oneno loc pa Lubaŋawa, Wudaŋŋe ki yomcwiny nyim Rwot, wun lobo ducu; wupake ki wer kun wudaŋŋe ki yomcwiny. Wuwer wer me pak bot Rwot ki opuk; wuwer kun wugoyo ki opuk ki dwan mamit! Wukut tum ki obute, wudaŋŋe ki yomcwiny i nyim kabaka, ma en aye Rwot! Wek nam omor, ki gin mupoŋ iye, lobo kacel ki jo ducu ma bedo iye! Wek lalele omol otagge, wek godi ducu guwer kacel ki yomcwiny i nyim Rwot, pien obebino ka ŋolo kop i kom lobo. En biŋolo kop ma atir i kom lobo, biŋolo kop pa lwak me rok ducu maromrom. Rwot tye ka loc, wek rok ducu komgi omyel! En obedo i WI komker mere ma gicibo i wi lukerubi; wek lobo oyeŋŋe! Rwot dit i Cion; en loyo lwak me rok ducu. Wek gin ducu gipak nyiŋi madit me deyo ma kelo lworo! En ŋat Maleŋ! Kabaka matek, ma maro ŋolo kop kakare, in aye ma ikelo ŋolo kop maromrom: ikelo ŋolo kop kakare ki kit ma atir, imiyo omoko matek i kin jo pa Yakobo. Wudwor Rwot Lubaŋawa, wuwore i nyim kom me teno tyene. En ŋat maleŋl Moses ki Aron bene onoŋo gubedo tye i kin ajwagine, Camuel bene onoŋo tye i kin jo ma gilwoŋo nyiŋe, Gukok bot Rwot, ci Rwot ogamo doggi. Oloko kwedgi ki i wir pol; gugwoko lok me cadenne, ki cik ma en omiyo botgi. Ai Rwot Lubaŋawa, in ceŋ igamo doggi, ibedo botgi Lubaŋa ma lawek bal, ento ibedo laculkwor me gin marac ma gutiyo. Wudwor Rwot Lubaŋawa, dok wuwore i wi got mere maleŋ; pien Rwot Lubaŋawa leŋ. Wuwer ki dwan me yomcwiny bot Rwot, wun lobo ducu! Wuti bot Rwot ki yomcwiny, wubin i nyime ki wer! Wuŋe ni Rwot en Lubaŋa! En aye oketowa, wan wa danone, wan jone dok romi ma en kwayogi. Wudony i dog gaŋ mere ki pwoc, ki i dyekal mere kun wupake, wupwoye, wupwo nyiŋe! Pien Rwot ber; mar mere ma pe lokke bedo nakanaka, ki ada mere bedo nakanaka bot yalwak ducu. Abiwero wer pi ada ki pi ŋolo kop atir; abiwero wer boti, ai Rwot. Abiketo cwinya me lubo yo ma atir ma pe tera i bal. Ibibino bota awene? I oda abibedo ma cwinya leŋ; pe abiketo kit mo marac i nyima me aluba. Adag cic pa jo ma gilokke gibwoto Lubaŋa woko; pe abiye ni aribbe kwedgi wek kitgi oguda. Pe abibedo ki cwiny me ŋak woko ki i yo ma atir wacel, pe abitamo tam mo me timo gin marac. Abineko dano ma loko lok marac kun kwoto ki lawote woko; dok pe abiciro tim pa dano ma Lyerre kun nyatte i cwinye. Abineno jo ma bedo i lobo ma gigeno Lubaŋa ki kica, wek gubibed kacel kweda i gaŋ kaila; ŋat ma lubo yo ma atir ma pe tere i bal bitiyo tic bota. Dano ma lagoba pe bibedo i oda; dok ŋat ma loko lok goba atata pe bimedde ki tiyo ticce i nyima. Nino ki nino abityeko jo maraco woko ducu ki i lobo, kun ajwero lutim maraco woko liweŋ ki i gaŋ pa Rwot. Ai Rwot, winy legana; wek kokona owinnye boti! Pe ikanne woko bota do i kare ma atye ki can! Cik iti iwiny lokka, gam doga oyotoyot i nino ma akok iye boti-ni! Karena tye ka rwenyo woko calo yito, ma cogona ducu waŋ awaŋa calo ruk mac. Gipwoda woko calo lum mutwo, miyo wiya wil woko ka camo kwon. Acur matek kit man; riŋo koma omoko woko i kom cogona likiŋ, Abedo calo acut ma bedo i tim, calo tula ma bedo i wi obur. Abuto ma nino pe mako waŋa, atye calo winyo ma bedo kene i wi ot malo. Lukworra giloko lok aŋec i koma dyeceŋ jwi, jo ma nywara gilwoŋo nyiŋa kun giceno ki jo mukene, Buru doŋ olokke odoko camma, arubo pig waŋa ki ginamatana, pi lyeto me akemoni ki kinigani; in doŋ ityeko kwanya ibola woko. Kwona obedo calo tipo me otyeno ma cok rwenyo; alokke doŋ adoko calo lum mutwo. Ento in ibedo i wi komkerri matwal, ai Rwot; yalwak me kare ducu gibipo pi nyiŋi, Ibia ci kica maki i kom Cion; kare doŋ oromo me nyuto berri bote; kare ma iciko pire doŋ oromo. Luticci gimare, kadi bed onoŋo doŋ gedo ducu iye odoko odur godi, kica makogi i kome pien doŋ en odokoapwa. Rok ducu bilworo Rwot, luker ducu ma i wi lobo gibilwore pi deyone. Rwot bigero Cion odoco; en bituc kun nyuto deyone. En biwinyo lega pa jo ma piny doŋ obwoyogi woko adada, pe bicayo lega me bako dog ma gikelo i nyime. Wek gico lok man gigwok maber pi yalwak me kare ma bibino anyim, wek omi jo ma pud peya ginywalogi gupak Rwot, ni, Rwot oneno piny ki i kabedone maleŋ ma tye malo, en oneno piny i lobo ki i polo, wek cwiny koko pa lumabuc, dok wek egony jo ma doŋ gityeko ŋolo kop me to i wigi, Kumeno dano gibipako nyiŋ Rwot i Cion, gibipake i Jerucalem i kare ma lwak me rok ducu cokke kacel, wa ker ducu, pi woro Rwot. Rwot oturo tekka woko ma pud atidi; ojwiko nino me kwona obedo manok. Awacci, “Ai Lubaŋana, pe ikwany kwona woko ma pud peya ati!” Rwot, in ibedo nakanaka i kare pa yalwak ducu. I kare macon mukato aŋec iketo guti me te lobo, dok in aye ma itiyo polo ki ciŋi, Gibito woko, ento in ibedo meri matwal; gibiti woko macalo boŋo. In ilokogi macalo ginaruka, ci gitum woko liweŋ; ento in kiti acel, mwaka me kwoni bene pe gik. Ibitniyo litinowa, wan luticci, gibibedo ki kuc laboŋo peko mo; dok in aye ma ibigwoko likwayogi. Pwo Rwot, in tipona; kwona ducu myero opak nyiŋ Rwot maleŋ! Pwo Rwot, in tipona; wii pe myero owil i kom mot ducu mabeco ma en omiyi. En ma weko balla ducu, en bene ma caŋo two ducu ki i koma. En olaro kwona omiyo pe adonyo i bur, oketo mar mere ma pe lokke kacel ki kicane i koma; en miya jami mabeco pi kare me kwona ducu, kun roco tekona kare ki kare macalo pa ocur. Rwot ŋolo kop kakare dok maromrom, ŋolo bene kop pa jo ma giunogi atir. En otuco yubbe woko ducu bot Moses, omiyo jo Icrael guneno tic me aura ma en otiyo. Rwot lakica dok maro dano, kiniga pe make oyot, mar mere ma pe lokke dwoŋ, En pe bibedo ka jukowa kun juyowa kare ducu, kinigane bene pe ri nakanaka. En pe timowa kun poro bal ma watimo, dok pe culo kwor i komwa kun poro kit roc ducu ma watimo. Kit macalo polo tye malo i wi lobo, mar mere ma pe lokke bene dit kit meno bot jo ma lwore. Kit macalo tuŋ wokceŋ tye bor kwede ki tuŋ potocen-ni, en kwanyo balwa woko ducu ki i komwa cwalo ka mabor kit meno. Macalo wegi litino bedo ki kica i kom litinogi, Rwot bene kica mako kit meno i kom jo ma lwore. En ŋeyo kit gin ma ecweyowa kwede; en po ni wan apwa mamwa. Nino me kwo pa dano obedo calo lum; en lot, turu macalo ature ma tye i okan, Yamo kodo ŋeno, ci rwenyo woko liweŋ, kabedo ma en ocuŋ iye-ni doŋ pe bineye matwal. Ento mar pa Rwot ma pe lokke bedo nakanaka pi jo ma wore, dok berre bedo nakanaka bot jo me yalwak ducu, bot jo ma gwoko gicikkene, ma gipo pi tiyo gin ma en ociko. Rwot ocibo komkerre i polo; en kabaka ma loyo ducu. Wupak Rwot, wun lumalaika matek, ma wulubo cikke, kun wuwinyo lok ducu ma en waco botwu! Wupak Rwot, wun lwak me monnye ducu ma wutye i polo, wun luticce ma wutiyo gin ma en mito! Wupak Rwot, wun ginaketane ducu, i kabedo ducu ma en loyo! Pwo Rwot, in tipona! Pak Rwot, in tiponal Ai Rwot Lubaŋana, in idit twatwal! Irukke ki dit ki deyo; iumo komi woko ki ceŋ calo iruko boŋo, Iyaro polo woko macalo kema ma giyaro, dok igero kicika me otti malo i wi pii. Iloko pol odoko gadigadini, ituk iŋweco woko ki gadigadini i dye yamo. Iloko yamo odoko laorri, kun leb mac ma lyel gubedo luticci. Iketo lobo ocuŋ matek i kom gutine, ma pe biyeŋŋe wacel. Iumo woko ki nam matut calo giumo ki ginaruka, ki pii bene omwonyo godi woko ducu. Ento i kare ma ijuko pii, ci oriŋo woko; i kare ma owinyo dwani omor kun idaŋŋe natek, ci orwenyo woko liweŋ, Omol ki i wi godi okato ocito piny i luŋ, i kabedo ma yam iyero pire. Iketo ki pii waŋ lobo ma pe myero oŋol okat i ŋeye, wek pe dok oum lobo woko odoco. Imiyo pii nyette mol i luŋ, kun mol ki i kin godi. Lee tim ducu gimato pii meno, kana me tim bene gimato gineko ki orwo, Lwak winyi gigero odigi i wi yadi ki i ŋet kulu, ci gibedo ka koko i jaŋ yat. Icwalo kot ki i polo cwer piny i wi godi, lobo opoŋ ki jami ducu ma in itiyo. Imiyo lum lot doŋo me cam pa dyaŋ, ki ginapita ma myero dano oti kwedgi, wek dano opur lobo ci onoŋ cam, ki koŋo vino ma yo mo cwiny dano, ki moo me wir wek waŋe obed ma ryeny aryenya, ki dok ocam kwon ma miye teko. Yadi pa Rwot limo pii mabup, gin aye yadi cedar me Lebanon ma yam en opitogi-ni. Lwak winyi mapol gigero odigi i wi yadi-kunnu; winyi aramatala bene gibedo i wi yadi maboco, Dyegi me tim gibedo i wi godi ma malo twatwal, ki okile giriŋo gikanne i got. Iketo dwe me poko kare; ceŋ ŋeyo kare me potone. In aye ma iketo colpiny omiyo dyewor tye; i kare meno aye lee ma gibedo i buŋa gicako kwede wotgi. Litino labwor gidwaro lee ki koko, kun giyenyo cam ma Lubaŋa miyo botgi. Ka ceŋ otuc gidok woko cen, ci gibuto i gorogi, Dano kato woko cito ka tic ci tiyo ticce nio wa otyeno, Ai Rwot, in doŋ itiyo lwak jami mapol! Itiyogi ducu ki ryeko, omiyo lobo opoŋ ki ginaketani. Nam madit malac bene tye kuca, lwak ginaketa ma welgi pe kwanne bedo iye, gin makwo matino ki madito. Mel bene woto ki iye, dok twol ma min kulu ma iketo-ni bene tuko iye. Gin ducu gineno boti, gimito imigi cam i kare ma mitte kikome. Ka imiyogi cam, ci gigamo gicamo woko; ka iyabo ciŋi imiyogi cam, ci giyeŋ ki jami mabeco mada. Ka ikanne woko ki botgi, ci gineno can; ka ikwanyo yamo me yweyoni woko ki botgi ci gito woko, gidok i apwa ka ma’ yam gua ki iye. Ka iketo yamo me yweyoni i igi ci gibedo kwo; dok bene imiyo lobo doko nyen. Deyo pa Rwot myero ori nakanaka! Rwot myero obed ki yomcwiny pi gin ma en otiyo. Rwot neno lobo ci miyo yeŋŋe, en gudo godi ci giduny yito, Abiwero wer bot Rwot pi kare me kwona ducu; abiwero wer me pako Lubaŋana ka pud akwo. Wek lok ma alwodo ki i cwinya oyom cwiny Rwot, pien en aye ma miyo abedo ki yomcwiny. Wek gityek lubalo woko liweŋ ki i lobo, dok wek jo maraco bene gurweny woko matwal! Pwo Rwot, in tipona! Wupwo Rwot! Wumi pwoc bot Rwot, wulwon nyiŋe, wumi ticce oneŋe i kin rok ducu! Wuwer bote wer me pako en, wutit ticce me aura ducu! Wuket deyo i kom nyiŋe maleŋ: jo ma yenyo Rwot cwinygi obed yom! Wubin bot Rwot wek wunoŋ tek ki bote, wubed i nyime nakanaka. Wupo i kom tic me aura ma en otiyo ducu, taŋo ma yam otiyo ki kop ma en oŋolo, wun likwayo pa Abraim ma yam laticce, wun litino pa Yakobo ma en oyerowu. En aye Rwot Lubaŋawa; kop ma en oŋolo romo i lobo ducu. En cwinye omoko I kom gicikkene ma bedo nakanaka, i kom lok ma yam ociko, pi yalwak alip ki alip, en gicikke ma oketo ki Abraim, ki lok ma yam okwoŋo ki Icaka, ma omoko odoko cik bot Yakobo, wek obed gicikke ki Icrael matwal, kun wacci, “Abimiyo lobo Kanaan botwu, obed lobo me aleyawu.” I kare ma pud gin nok, ma welgi tidi, ma pud gin lubedo i lobo-nu, ma giwirre i kin rok mapatpat, ma gia ki i te ker acel gikobo i rok mukene, Lubaŋa pe oye ŋat mo odiyogi. Ojuko luker mapol pigi kun wacci, “Pe wugud kom jo ma an awirogi, pe wutim lunebina marac!” I kare ma Rwot ocwalo kec opoto i lobogi, ci okwanyo camgi ma gikwo kwede woko ducu, noŋo en ocwalo Yucepu okwoŋo nyimgi, en dano ma yam gicato woko macalo opii-ni. Gitweyo tyene woko ki nyor matek, girwako atego nyonyo i ŋute, nio waŋ ma lok ma en oloko-ni ocobbe kakare; lok pa Rwot oteme onoŋo ni en tye atir. Kabaka ocwalo dano ci gigonye woko, laloc me lobo ogonyo nyor woko oweko en ocito gire. Kabaka oketo en obedo rwot ma loyo ode, ki ŋat ma loyo jamine ducu; omiye bene twero me pwonyo rwodi kit ma cwinye mito, dok me pwonyo ludito ma gimiye tam ki ryeko. Omiyo Icrael obino i Ejipt, en Yakobo odoko labedo i lobo pa Kam. Rwot omiyo lwakke gunywalo litino mapol, dok omiyo gudoko tek ma kato lukworgi. Oloko cwiny jo Ejipt omiyo gukwero jone, ci gutiyo ki luticce i kit me bwolo. En ocwalo laticce Moses, ki Aron ma en aye oyero. Gutiyo lanyut pa Lubaŋa madito, gutiyo taŋo mapol i lobo pa Kam. Ocwalo colpiny, ci lobo ocido woko odoko collicuc; ento gujemo woko pe guwinyo lokke. Oloko pii ma i kulu megi odoko remo, omiyo rec ma tye iye ducu guto woko. Lobogi opoŋ ki lwak ogwal mapol ata, kadi wa gaŋ kal pa kabaka noŋo opoŋ ki ogwal keken. Lubaŋa oloko, ci omiyo lwak lwaŋi madwoŋ obino, ki nyoggi bene gucorre i lobogi ducu. Omiyo pee ocwer ma ka kot, ki lutkot bene owil mutyeko lobogi woko ducu. Ojwero olok ki yat odurogi ducu, ci oturo yadi ducu ma i lobogi. Dok oloko ci bonyo ocorre, lwak litino bonyo ma welgi pe kwanne; gucamo ginapita woko liweŋ ki i lobo, gucamo kit kwa ginapita me cam ducu ma gupuro i lobogi. Oneko litino kayogi wa co woko ducu, ma gin aye jo ma gukwoŋo nywalo ki tekogi. Okwanyo jo Icrael okelogi woko ma gutiŋo ryal ki jabu; dano mo ma ogatte i kin kakane ducu obedo pe, I kare ma gua woko ki kunnu jo Ejipt cwinygi obedo yom, pien onoŋo gilworogi mada, En oyaro pol malo ka wi jone, dok omiyogi mac me menyo piny dyewor, Gulege ci ocwalo aluru, ocwalo kwon mabup ki i polo wek gucam guyeŋ. Obaro got ci pii onyette okatti ki iye, omol ki i dye tim aroo calo kulu, En opo i kom cikkene maleŋ, ki i kom Abraim ma laticce. En okwanyo jone otelogi ki yomcwiny, ma lwakke ma en oyero gidaŋŋe ki wer matek. Omiyogi lobo pa lurok, omiyo gukwanyo cam ki i poto ma jo me rok mukene guyelle iye, wek lwakke gulub cikke, dok gugwok gin ma en ociko ducu. Wupak Rwot! Wupak Rwot! Wumi pwoc bot Rwot, pien en ber; Mar mere ma pe lokke bedo nakanaka! Aŋa ma twero tito pi tic madito matek ma Rwot otiyo, dok aŋa ma twero pako en muromo maber? Jo ma ŋolo kop atir tye ki yomcwiny, jo ma tiyo gin ma tye atir kare ducu! Ai Rwot, po pira ka inyuto kicani bot lwakki; konya, bene, ka ibilarogi; wek anen kit ma joni ma iyero gibibedo kwede maber, ci anywak bedo ki yomcwiny kacel ki rokki, wek awakke kacel ki joni ma gin aye gipinnyi, Wan kacel ki kwarowa ducu watyeko timo bal; wan watyeko timo roc, watimo gin maraco adada. Kwarowa pe gutamo pi tic meri me aura ma yam itiyo botgi, i kare ma gitye i Ejipt: pe gupo i kom bup me mar meri ma pe lokke, ento gujemo woko i kom En Mamalo Twal i dog Nam Makwar. Ento en pud olarogi aye pi nyiŋe, wek emi twerone madit onene. Ojuko Nam Makwar, ci nam otwo wokot otelo wigi i dye nam matut calo gitye ka wot i dye tim mutwo. Olarogi ki i ciŋ lukworgi, olarogi ki i twero pa lumerokgi. Pii omwonyo’ lumerokgi woko liweŋ; ŋat mo acel i kingi pe odoŋ. Lacen lwak guye lokke; guwero wer bene me pake. Ento wigi owil woko oyotoyot i kom tic ma en otiyo, gubedo ka tic ma pe doŋ gukuro ryeko ma a ki bote. Cwinygi opukke pi camo riŋo i dye tim, gutemo i Lubaŋa i tim aroo. En omiyogi gin ma gupenye pire, ento ocwalo kit two marac ma balo kom dano i komgi. I kare ma nyeko omakogi i kom Moses, ki i kom Aron ma en ŋat maleŋ ma Rwot oyero, ci lobo obar omwonyo Datan woko, ka oumo lwak pa Abiram woko bene. Mac oturo ki lyel i wi lwakgi; ci leb mac ma lyel-l i owano jo maraco woko ducu. Gucweyo cal-latin twon i Koreb, ci gubedo ka woro cal jabu ma guliyo-ni. Guloko deyo pa Lubaŋa woko, guwilo ki deyo pa cal twon dyaŋ ma camo lum. Wigi owil woko i kom Lubaŋa Lalargi, ma yam otiyo gin me aura madito i lobo Ejipt; pe gupo pi gin me aura ma en otiyo i lobo pa Kam, ki gin maraco ma kelo lworo ma en otiyo i dog Nam Makwar. Mumiyo en owacci onoŋo ebetyekogi woko, ka nene pe Moses, ma en aye dano ma eyero, ocuŋ i nyime, i kin en ki lwakke, ci oloko akemone woko omiyo pe otyekogi. Gucayo lobo maber ma yomo cwiny dano-ni woko, ma pe gubedo ki niye wacel i kom gin ma Lubaŋa ociko, Gubedo i kemagi kun giŋur aŋura, dok pe guwinyo lok ma Rwot owaco botgi. Omiyo en otiŋo ciŋe malo okwoŋo kwoŋ botgi ni, ebimiyo gito i dye tim, dok ebikeyogi woko i kin rok mapatpat, kun eketogi woko atata i lobo mapol. Cutcut guribbe ki rok mukene ka, woro jok Baal i Peor, dok gucamo gitum ma gityero pi jo muto; gumiyo kiniga omako Rwot pi gin ma gutimo, ki two gemo marac bene opoto i komgi. Finekaci oa malo, omine pi tyeko lokke, ci two gemo otuggi gik woko cut. Gibedo ka po pi lok man ni en dano ma kite atir, gibipo iye bene matwal pi kare pa yalwak ducu. Gumiyo kiniga omako Rwot i ŋet pii me Meriba pi meno omiyo Moses oneno can malit pigi. Gumiyo cwiny Moses odoko kec, omiyo oloko lok ma onoŋo myero pe en oloki, Pe guneko jo me rok mukene, kit macalo onoŋo Rwot ocikogi kwede, ento gurubbe woko ki lurok, gubedo ka lubo yo me woro cal jogi macalo lurok giworo. Lwak pa Lubaŋa gubedo ka woro cal jogi, ma olokke odoko owic botgi. Gubedo ka tyero litino awobegi ki anyiragi macalo gitum bot jogi. Guneko jo mapol ma gipe ki bal, ma gin aye litino awobegi ki anyiragi, ma yam gutyero bot cal jogi me Kanaan macalo gitum; ci pi remo pa dano ma guoyo omiyo lobo odoko gin me kwer. Gudoko jo ma keni pi gin: ma gutiyo; i gin ma gutiyo gubedo ka timo tim me kwele kwele. Mumiyo kiniga omako Rwot i kom jone, omiyo okwero jone woko, ma gin aye gipinnye-ni. Pi meno oweko omiyogi i ciŋ lurok, oweko lukworgi ma yam gidaggi aye gubedo ka loyogi. Lukworgi ounogi mada, gudiyogi piny i te locgi. Rwot olaro jone tyen mapol, ento gin gubedo ka jemo woko kome i gin ducu ma gutimo; gupoto piny twatwal pi balgi. Ento Rwot pud owinyo kokogi aye i kare ma gukok, oniaŋ ada ni gitye ki can, Omiyo opo pi gicikkene pigi; pi mar mere ma pe lokke omiyo Rwot oŋut oloko tamme. Omiyo jo ducu ma giloyogi macalo opii me bedo ki kica i komgi. Larwa, ai Rwot Lubaŋawa, cokwa woko ki i kin lurok, wek wapwo nyiŋi maleŋ, waum ka wapaki. Gipwo Rwot, Lubaŋa pa Icrael, gipake nakanaka! lo ducu myero guwac ni, “Amen!” Wupak Rwot! Wumi pwoc bot Rwot, pien en ber; mar mere ma pe lokke bedo nakanaka! Wek jo ma Rwot okokogi guwac kumeno, gin jo ma en okokogi ki i can, kun okwanyogi ki i lobo pa lurok odwokogi cen i lobogi, ma ocokogi ki yo tuŋ wokceŋ ki yo tuŋ potoceŋ, ki yo tuŋ acam ki yo tuŋ acuc. Jo mogo gubedo ka lak ata i tim aroo, pe gumedo ki noŋo yo ma cito i gaŋ ka ma myero gubed iye; kec ki orwo pii onekogi matek, omiyo gen ducu orwenyo woko ki i cwinygi. I kare ma gitye ki can gukok bot Rwot, ci en olarogi ki i can megi. Otelogi guwoto ki yo matir, nio ka guo wa i gaŋ ka ma myero gubed iye, Myero gupwo Rwot pi mar mere ma pe lokke, ki pi tic me aura ma en otiyo pi dano! En miyo jo ma orwo pii nekogi giyeŋ, ki jo ma kec nekogi bene en miyo giyeŋ ki jami mabeco. Jo mogo gubedo i mutu ki colpiny, lumabuc ma gitweyo ki nyor ma gitye ka winyo arem madwoŋ, pien gujemo woko pe gulubo lok ma Lubaŋa ocikogi kwede, dok gukwero pwony pa En Mamalo Twal. Cwinygi ool woko pi tic matek ma gubedo ka tiyone; gupoto piny, ci onoŋo ŋat mo pe ma myero okonygi, I kare ma gitye ki can gukok bot Rwot, ci en olarogi ki i cangi. Okwanyogi okelogi woko ki i mutu ki colpiny, ka ocodo nyor ma gitweyogi kwede woko lirwatrwat. Myero gupwo Rwot pi mar mere ma pe lokke, ki pi tic me aura ma en otiyo pi dano. Oturo kika mola woko ducu, oŋolo rii nyonyo me cego doggola opoko iye woko i dul aryo. Jo mogo komgi obedo lit pi balgi, gubedo ki can madwoŋ pi gin maraco ma gutimo. Gubedo ka kwero kit cam ducu; onoŋo doŋ gicok to. I kare ma gitye ki can gukok bot Rwot, ci en olarogi ki i cangi. Ocaŋogi ki lok ma en oloko aloka keken, ci olarogi ki i to. Myero gupwo Rwot pi mar mere ma pe lokke, ki pi tic me aura ma en otiyo pi dano. Myero gupwoye kun gityero gityer me pwoc, dok gutit pi tic ma en otiyo kun giwero wer me yomcwiny! jo mogo guwoto ki mel i dye nam, ginjo ma ticgi terogi i nam madoŋo. Guneno gin ma Rwot twero tiyone, ticce me aura ma en tiyo i nam madoŋo-gu. En oloko, ci yamo matek okodo, omiyo pii me nam otwagge. Omiyo mel gutiŋŋe malo ma gicok gudo polo, ka dok gudwogo piny gumwony woko ka matut i te nam; tekcwinygi orwenyo woko i can marom-meno. Gucatte kun gipaŋŋe apaŋa macalo lumero koŋo, ma ryeko otum woko liweŋ ki i wigi. I kare ma gitye ki can gukok bot Rwot, ci en olarogi ki i cangi. Ojuko yamo matek ci nam opye mot, ki biamwonyi me nam ducu oliŋ woko mot. Cwinygi obedo yom pi piny ma oliŋ woko mot litik; en okelogi bene wa i waŋ wat ka ma gimito bino iye, ki lobo ma tar atara ligwek doko waŋ it ma gunnye. Myero gupwo Rwot pi mar mere ma pe lokke, ki pi tic me aura ma en otiyo pi dano. Myero gudwore i cokke pa lwak, kun gipake bene i gurre pa ludito. En loko kulu-gu ducu doko tim aroo mutwo, dok en juko waŋ it-gu woko ducu, pii doŋ pe mol ki iye, loko lobo mulony doko lobo mubedo kado ma konnye doŋ pe; man timme pi bal pa jo ma bedo i lobo meno, En loko tim aroo mutwo doko ka ma pii poŋ iye, En miyo jo ma kec nekogi gibedo kunnu, ci gigero gaŋ ma myero gibed iye; gicoyo kodi i potti, gipito olok bene, camgi cek mabup. Ginya gidoko mapol pi gum ma Rwot omiyo botgi; en pe weko wel dyaŋigi dok piny. I kare ma giloyogi, ma gileyo wigi kun giunogi, giyelogi, ma gimiyo cwinygi bene cwer, en cayo rwodi ma unogi, miyo giwoto i dye tim ata ka ma yo pe iye. Ento en laro jo ma piny obwoyogi ki i cangi, ci medo wel pa jo me odigi macalo lwak romi, Jo ma cwinygi atir gineno ci gibedo ki yomcwiny; jo maraco ducu gijuko lok woko ki i doggi giliŋ litik. Jo maryek myero gubed ka tamo pi jami magi matut ki i cwinygi, wek dano opar pi mar pa Rwot ma pe lokke. Cwinya omoko i komi, ai Lubaŋa, cwinya omoko i komi ma pe lokke! Abiwero wer kun apaki ki dwan maloŋo! In tipona, co woko! Wun naŋa ki opuk bene wuco woko! An bene abicoyo rupiny miyo ceŋ tuc! Abimiyo pwoc boti i kin lwak me rok ducu, ai Rwot; abiwero wer me paki i kin Lurok, Mar meri ma pe lokke dit, o wa i polo, dok adani bene dit, o wa i poI Ai Lubaŋa, nyut ditti malo i polo, dok imi deyoni oryeny i wi lobo ducu! Larwa ki tekki imi walo lukworwa, dok igam legawa, wek lwak ma imaro gubwot. Lubaŋa oloko ki i kabedone maleŋ ni, “Abipoko Cekem woko ki deyo madit me loc, dok abipoko nota me Cukot woko i dul i dul bot jona. Gilead mera, ki Manace bene mera; Epraim aye tok nyonyo me wiya, ki Juda mere odoo kerra. Ento Moab aye becen me lwokka; ki Edom mera, obedo ka bolo warra; dok abidaŋŋe matek me loc i kom jo Pilciti.” Aŋa ma bikela i gaŋ man ma girumo ki cel gogo? Aŋa ma bitelo wiya tera i Edom? In pe doŋ ikwerowa woko, ai Lubaŋa? In pe doŋ inywako yo ki dul monywa me cito ka lweny, ai Lubaŋa, Konywa me lewny i kom lukworwa, pien kony ma dano miyo pe gin mo! Ka Lubaŋa tye ka lweny kacel kwedwa ci wabiloyo; en aye ma binyono lukworwa diyo woko piny. Apaki, ai Lubaŋa, pe iliŋ mot! Jo maraco ki lugoba gubino ka lweny i koma, kun giloko lok goba keken i koma. Gimiya cwercwiny pi lok maraco me adagadaga ma giloko i koma, gilwenyo i koma noŋo ma pe abalo gin mo. Gidota adota kadi bed amarogi, kadi wa i kare ma noŋo atye ka lego pigi. Gitimo gin marac i koma pi gin maber ma atiyo botgi, dok gidaga kadi bed amarogi. Yer dano marac wek opidkwede; wek ŋat mo i kin lukworre odote koŋ giteme. Myero giteme ci ginoŋ bal i kome; dok legane bene gikwan macalo bal ma en otimo! Gijwik nino me kwone woko obed manok, wek dano mukene aye obile jamine! Litinone gudok litino kic, ki dakone bene odok daa-to Wek litinone gubed lumalgan ma gilak ata kun gibedo ka lego jami alega; myero giryemgi woko bene ki i wi obur ka ma onoŋo gibedo iye! Won banya ma en yam odeno banya bote myero okwany jamine woko ducu ma etye kwede, dok dano ata-gu myero guyak jamine ma en olimogi ki tic matek-ki. Ŋat mo myero pe otim kica bote wacel, dok dano bene pe myero kica omake i kom litino kicce. Wek likwaye ducu guto woko, wek nyiŋe bene dano pe gupo pire i kare pa yalwak ma bilubo. Rwot opo i kom bal pa kwarone, dok pe ojwa bal pa minne woko wacel. Wek Rwot opo i kom balgi teretere, ento dano myero pe opo i komgi matwal i lobo kany. Pien dano meno pe otamo me bedo lakica, ento obedo ka ryemo kor lucan ki jo ma piny obwoyogi, ki jo ma cwinygi cwer ducu nio ka onekogi woko. Onoŋo en maro loko lok me ceno dano; wek lok me ceno danone-ni odok i wiye! En onoŋo dag lamo gum; pi meno ŋat mo pe myero olam gumi kome. Onoŋo lok me ceno dano odoko calo koti ma en ruko; wek doŋ obid kome woko macalo pii, dok macalo moo ma mido i cogone! Wek obed calo boŋo ma en odwalo ikome; obed calo del pyer ma nino ducu en tweyo i pyere! Man aye myero obed kit pwod ma Rwot pwodo ki jo ma dota, gin jo ma loko lok maraco ma gimito rwenyo kwona woko! Ento in, ai Rwot Lubaŋana, konya pi deyo me nyiŋi, dok ilara-pi mar meri ma pe lokke maber-ri! An lacan, piny obwoya woko, cwinya bedo ka ton atona keken. Arwenyo woko calo tipo me otyeno; yamo kola woko macalo tero bonyo. Pi ri kec pi kare malac omiyo coŋa doŋ odoko nyap; omiyo bene amok woko adoko goro. Adoko doŋ ginaŋala pa jo ma gidota; ka gunena, ci giyeŋo wigi ayeŋa. Konya, ai Rwot Lubaŋana; lara pi mar meri ma pe lokke! Wek lukworra guŋe ni, in aye ma ilare an, ai Rwot! Wek gin gucen dano, ento in imiya meri gum. Wek alee otwod jo ma lewnyc i koma-ni woko, ci an laticci abed ma cwinya yom. Wek jo ma dota gulim can; wek lewic oumgi woko calo guruko boŋo. Abimiyo pwoc bot Rwot ki dwan maloŋo; abipake i dye lwakke ka ma gucokke iye. En cuŋ yo tuŋ lacuc i ŋet jo ma piny obwoyogi, pi Larogi ki i cin jo ma ŋolo kop me to i wigi. Rwot owaco bot rwoda ni, “Bed I ŋeta yo tuŋ acuc i kabedo me deyo, nio ka abimiyo lukworri gidoko kom, laten tyeni.” Rwot bicwalo odoo ker me twerri ki i Cion. En bimiyo ibedo ka loc i dye lukworri. I nino ma ibilweny i kom lukworri lwakki gibimine kengi boti. Calo toyo ma luk odiko con, awobeni bene gibibino boti kit meno i wi godi maleŋ, Rwot doŋ okwoŋo kwoŋ, pe dokbiloko tamme, “In ibibedo ajwaka nakanaka i kit pa Melkijadek.” Rwot tye yo tuŋ Iacucci; i nino ma kiniga omake en biloyo luker woko ducu. En biŋolo kop i kom jo me rok ducu dok bipoŋo bar me lewny ki kom jo muto; en biloyo luker ducu ma i wi loboni. Kabaka bimato pii ki i laora kulu ma tye i ŋet yo, meno bimiyo en ilo wiye malo. Wupak Rwot. Abimiyo pwoc bot Rwot ki cwinya ducu, i dul pa jo ma cwinygi atir, i dye lwak ma gucokke. Tic ma Rwot tiyo dito dok me aura mada; jo ducu ma ticce yomo cwinygi giketo cwinygi twatwal me niaŋ iye. Gin ducu ma en tiyo opoŋ ki deyo dok ki tek; dok porre mere bedo nakanaka, En pe weko wiwa wil i kom ticce me aura ma en otiyo; Rwot ber dok lakica. En miyo cam bot jo ma lwore; wiye bene po twatwal i kom gicikkene. En onyuto twero me ticce bot lwakke, omiyogi lobo pa lurok wek gucam obed megi. Tic ma en tiyo ducu obedo me ada dok tye atir, cikke ducu tye iye gen madwoŋ, Gimoko matwal dok giri nakanaka, ma myero gilubgi ki ada dok ki cwiny ma atir. En okelo lar bot jone, dok oketo gicikkene kwedgi me bedo matwal. En leŋ dok myero gilwore! Lworo Rwot aye acakki me ryeko, doŋ jo ma lubo gin ma en ociko gibedo ki niaŋ maber. Dano gibipake nakanaka! Wupak Rwot. Tye ki gum dano ma lworo Rwot, ma bedo ki yomcwiny mada ka lubo cikke. Likwayone gibibedo twoni oteka i lobo ma gibedo iye; likwayo pa ŋat ma cwinye atir gibimiyogi gum. Jone gibilony dok gibedo ki lwak jami mapul, dok kite ma atir-ri bene bibedo nakanaka, Ceŋ tuc, ryeny i colpiny pi jo ma cwinygi atir; Rwot ber, lakica, dok oporre. Dano ma cwinye yom, ma miyo banya bot luwote, bibedo maber, dano ma tiyo ki jo ducu ki gen, Dano ma kite atir pe gibidiro cen; gibipo pire nakanaka, En pe bedo ki lworo kadi ka owinyo lok marac me cwercwiny: bedo ma cwinye tek kun geno Rwot. En bedo ma cwinye opye mot, pe bilworo gin mo, nio waŋ ma oneno ka giloyo lukworre. En poko jami noŋo bot lucan; dok kite ma atir-ri bibedo nakanaka; en bibedo ki twer dok gibiwore. Dano marac ka oneno, ci kiniga mako woko; bibedo ka mwodo lake ma cwinye poto; gen pa dano marac rwenyo woko matwal. Wupak Rwot! Wun lutic pa Rwot wupake, wupak nyiŋ Rwot! Gipak nyiŋ Rwot nakanaka nia tin nio nino ma pe tum! Cakke wokceŋ nio kwede yo tuŋ potoceŋ myero gipak nyiŋ Rwot! Rwot tye malo i wi rok ducu, ki deyone bene tye malo okato polo woko. Aŋa ma calo Rwot Lubaŋawa, ma bedo i kabedone ma tye malo, ma kulle neno piny ka mabor ki kunnu, ma neno polo ki lobo? En ilo lucan malo nia ki i apwa, dok tiŋo jo ma piny obwoyogi kwanyogi woko ki i wi odur, ci miyo gibedo kacel ki rwodi, ma gin aye rwodi pa lwakke. En miyo paco bot dako ma lalur, dok miyo noŋo litino ci doŋ bedo ki yomcwiny madwoŋ. Wupak Rwot! I kare ma jo Icrael gua woko ki I Ejipt, i kare ma likwayo pa Yakobo guweko lobo pa lurok ma jone loko leb mapat atika, Juda odoko kabedo maleŋ pa Rwot, ci Icrael odoko lobone ma en loyo. Nam oneno ci oriŋo woko, kulu Jordan ocuŋ woko ma pe mol. Godi gupye calo nyogi romi, ki cere-gu gupye calo litino romi. In nam, aŋo mutimme mumiyo iriŋo woko-ni? Dok in Jordan, icuŋ woko ma pe imol piŋo? Wun godi kono, piŋo wubedo ka pye calo nyogi romi? Wun cere, piŋo wubedo ka pye calo litino romi? In lobo, myero iyeŋŋe, pien Rwot doŋ cok bino; yeŋŋe i nyim Rwot, Lubaŋa pa Yakobo, ma loko pata got doko ka ma pii poŋ iye, ki got mabit-gu loko doko waŋ it ma gunnye agunya. Deyo obed boti keken, ai Rwot, ento pe obed botwa, pi mar meri ma pe lokke kacel ki adani. Piŋo lurok myero gupenywa ni, “Lubaŋawu tye kwene?” Lubaŋawa tye i polo, en tiyo gin ma cwinye mito. Cal lubaŋagi gitiyo ki ryal dok ki jabu; meno gin ma dano gutiyo ki ciŋgi, Doggi tye, ento pe gitwero lok, waŋgi bene tye, ento pe gitwero neno piny. Itgi tye, ento pe gitwero winyo lok, umgi tye, ento pe gitwero ŋweyo piny. Ciŋgi tye, ento pe gitwero mulo piny, tyengi bene tye ento pe gitwero wot; dok pe tye gin mo ma twero winnye ki i dwangi. Jo ma gitiyo cal lubaŋa magi girom aroma kwedgi, ki jo ducu ma geno cal lubaŋa magi bene gitye kit meno. Wun jo Icrael, wugen Rwot! En aye ma konyowu dok gwokowu. Wun jo me ot pa Aron bene wugen Rwot! En aye ma konyowu dok gwokowu. Wun jo ma wulworo Rwot, wugen Rwot! En aye ma konyowu dok gwokowu. Rwot pud po i komwa dok bimiyowa gum; en bimiyo gum bot jo Icrael, ki bot jo me ot pa Aron ducu. Rwot bimiyo gum bot jo ducu ma gilwore, bot jo matino ki bot jo madito ducu maromrom. Rwot omed litino botwu, wun kacel ki likwayowu, Rwot myero omiwu gum, en muketo polo ki lobo! Polo obedo jami pa Rwot kene, ento omiyo lobo bot dano, ni gubed iye. Jo muto pe gipako Rwot, kadi bed wa ŋat ma donyo piny ka ma piny oliŋ mot bene pe pako Rwot. Ento wan jo makwo wabimiyo pwocwa bot Rwot nia tin nio nino ma pe tum. Wupak Rwot! Amaro Rwot, pien en owinyo kokona; en owinyo dwana kacel ki legana me bako dog ma alege kwede. Kit macalo en ociko ite me winyo legana-ni, pi meno abibedo ka kok bote nino ki nino pi kare me kwona ducu. To ociko owicce oruma kwede woko dyere, arem me lyel bene otwene woko i koma likiŋ; abedo ki can dok ki remcwiny madwoŋ. Cutcut akok bot Rwot ni, “Ai Rwot, alegi, Lara do!” Rwot lakica dok oporre; Lubaŋawa latim kica. Rwot gwoko jo ma kwiya piny; kare ma gidiya woko piny, en olara. In tipona, bed ki gen, pien Rwot doŋ otyeko nyuto bene bota. Rwot olara ki i to; ojuko pig waŋa woko, dok ogwoka omiyo tyena pe ogwaŋŋe atata. Atye ka wot i nyim Rwot i lobo pa jo makwo. Amedde ki ye en, kadi onoŋo awacci, “Can doŋ oketo koma woko”, ki i kare ma onoŋo abedo ki lworo ma awacci, “Dano ducu pe genne.” Abimiyo gin aŋo bot Rwot pi gin maber ducu ma en otiyo pira? Abitiŋo gityer amata i kikopo akelo bot Rwot, abipwoye kun alwoŋo nyiŋe, pien olara. Abicobo kwoŋ ma yam akwoŋo bot Rwot, i nyim lwakke ducu ka ma gucokke iye. Ka ŋat acel ki i kin jo ma geno Rwot oto cwero cwiny Rwot mada. Ai Rwot, an laticci; an laticci, ma latin pa aŋecani, In doŋ ityeko gonyo nyor ma gitweya kwede woko. Abityero boti gitum me pwoc dok abikok boti kare ducu. Abicobo kwoŋ ma yam akwoŋo bot Rwot, i nyim lwakke ducu ka ma gucokke ‘iye, i dyakal me ot pa Rwot, i Jerucalem. Wupak Rwot. Wupak Rwot, wun rok ducu! Wudwore, wun lwak me rok ducu! Mar mere ma pe lokke dit piwa, ki adane bene bedo matwal. Wupak Rwot! Wumi pwoc bot Rwot, pien en ber, mar mere ma pe lokke bedo nakanaka! Jo Icrael myero guwacci, “Mar mere ma pe lokke bedo nakanaka.” Jo me ot pa Aron myero guwacci, “Mar mere ma pe lokke bedo nakanaka.” Jo ma lworo Rwot bene myero guwacci, “Mar mere ma pe lokke bedo nakanaka.” Akok bot Rwot ki i can; Rwot ogamo legana ci ogonya woko. Rwot tye kweda, pe abilworo gin mo. Dano kono twero timo gin aŋo bota? Rwot tye kweda, en aye ma konya. Abineno jo ma daga ki wan me loc. Riŋo ka larre bot Rwot ber kato geno dano. Rino ka larre bot Rwot ber kato geno rwodi. Rok ducu onoŋo oruina woko dyere, ento atyekogi woko ducu i nyiŋ Rwot! Guruma woko dyere, guruma woko dyere i kabedo ducu; ento atyekogi woko ducu i nyiŋ Rwot! Guruma woko dyere calo nyig kic, gubino i koma oyotoyot macalo mac ma waŋo tim, ento atyekogi woko ducu i nyiŋ Rwot! Gucora ‘matek ma onoŋo doŋ acok poto, ento Rwot okonya. Rwot aye tekka ma apako ki wer, en doŋ odoko lalarra. Wuwiny wer ma giwero me loc i kema pa jo ma kitgi atir: “Ciŋ Rwot ma lacuc lwenyo lweny matek! Twerone omiyo waloyo, twerone matek i lweny-nyi!” Pe abito, ento abibedo kwo, kun atito pi gin ma Rwot doŋ otiyo, Rwot doŋ opwoda marac twatwal, e nto pe oneka woko gire. Yabba doggaŋ me kit ma atir, wek adony ki iye, ci ami pwoc bot Rwot. Man aye doggaŋ pa Rwot, jo ma kitgi atir gibidonyo ki iye. Apwoyi pien doŋ igamo legana, doŋ idoko lalarra. Got ma lugedo gukwero, en aye odoko got madit me twok ot. Man Rwot aye mutimo, obedo botwa lok me aura. Man aye nino ma Rwot omiyo botwa; wakweru nino man ki yomcwiny madwoŋ. Ai Rwot, walegi, ilarwa! Rwot walegi, mi ticwa ducu ocobbe kakare! Lubaŋa omi gum i kom ŋat ma bino i nyiŋ Rwot! Walamo gum i komwu ki i ot pa Rwot. Rwot aye Lubaŋa en doŋ omiyo piny odoko leŋ botwa. Wumak jaŋ yat wuwot kwede ma wurye i tyeŋ, wuwot wurum kwede keno tyer, Abimiyo pwoc boti, pien in Lubaŋana; dok abidwori bene. Wumi pwoc bot Rwot, pien en ber, mar mere ma pe lokke bedo nakanaka! Gitye ki gum jo ma pe tye ki bal mo, ma gibedo kun gilubo cik pa Rwot! Gitye ki gum jo ma gwoko lok me cadenne, ma giyenyo en ki cwinygi ducu, jo ma pe timo gin marac, ento gibedo kun gilubo yo’ pa Rwot. Doŋ ityeko ciko pi pwonnyi ni gigwok maber ki leŋcwiny. Wek abed ma acuŋ matek i yona kun agwoko cikki! Bimiyo lewic pe maka, abiketo cwinya me lubo gin ducu ma ceŋ doŋ iciko. Abipaki ki cwiny ma tye atir, ka doŋ apwonyo cikki ma tye atir-ri. Abigwoko gin ma iciko; pi meno pe ibwota woko! Latin awobi bigwokke niŋniŋ yone ma pe balo? Gwokke i yone kun lubo lok ma in iciko. Ayenyo in ki cwinya ducu; gwoka wek pe aŋak woko ma abwoto lubo cikki. Doŋ akano lokki i cwinya, wek pe atim bal mo i nyimi, Apwoyi, ai Rwot; pwonya ki cikki! Abituco ki doga ka maleŋ lok ducu ma yam iciko mua ki idogi. Cwinya okwe woko liyoo pi lok me caden meri ma inyuto, calo pi lonyo madwoŋ ma alimo ducu. Abilwodo lok me pwonnyi ki i cwinya, dok abiketo waŋa me ŋiyo kit yo me pwonnyi ducu. Abibedo ki yomcwiny pi cikki; wiya pe biwil i kom lokki wacel. Nyut berri bota an laticci, wek abed kun alubo lokki. Yab waŋa wek anen piny, anen jami me aura ma tye i cikki. An atye macalo labedo i wi lobo man; pe ikan cikki woko bota! Cwinya pukke i kare ducu kun amito niaŋ lok me cikki. Ijuko jo ma lunywar, ma gin aye jo ma doŋ gityeko ceno, jo ma ŋak ma gibwoto cikki. Kwany ŋala ki cacgi woko ki i koma, pien abedo ka gwoko lok me cadenni. Kadi bed rwodi gicokke kacel gibedo ka piro lok i koma, ento an laticci pud abimedde: ki lwodo lok i kom cikki ki i cwinya. Lok me cadenni yomo cwinya mada; tam ducu mabeco me ryeko anoŋo ki iye. Abuto piny i apwa ma doŋ giloya woko; roc kwona odoco kit macalo yam iciko! I kare ma atuco boti gin ducu ma ceŋ atiyo, in igamo doga; pwonya ki lok me cikki. Pwonya wek aŋe kit yo ma myero alub kwede cikki, ci abibedo ka lwodo lok i kom ticci me aura ma doŋ itiyo. Cwercwiny doŋ obwoya woko; miya teko, kit macalo yam iciko. Gwoka wek pe alub yo marac, ento pwonya ki cikki pi kicani. Ayero doŋ me bedo ki gen, kun aketo cwinya i kom cikki twatwal. Ai Rwot, atyeko mako lok me cadenni woko likiŋ; pe iwek lewic omaka. Abibedo ka lubo cikki ki mitkom, ka imedo niaŋ matut bota. Ai Rwot, pwonya wek aŋe kit yo ma myero alub kwede cikki, ci abigwoko nio wa i agiki. Miya aniaŋ i cikki, wek agwoki, ci abed ka lubone ki cwinya ducu. Tela i yo me cikki, pien yomo cwinya mada. Wek abed ki miti me lubo lok me cadenni, kato ma abedo ki cwiny me noŋo lonyo. Pe iwek abed ka neno jami atata ma konygi pe; ento miya kwo me lubo yoni. Mok cikkeni bota an laticci, ma icikke kwede bot jo ma gilworini. Kwany tim cac ma miya lworo woko ki i koma; pien cikki ducu beco. Nen, cwinya pukke pi noŋo cikki; in iporre, pi meno miya kwo! Nyutta kit macalo mar meri ma pe lokke tye kwede i koma, ai Rwot, dok ilara, kit macalo yam iciko. Man bimiyo agamo dogjo ma loko lok agec i koma, pien ageno lokki. Pe ikwany lok me ada woko ki i doga, pien genna tye i cik me ŋolo koppi. Abigwoko cikki teretere ma pe akeŋ, abigwoko nakanaka! Abibedo ka ma cwinya mito ki kuc, pien doŋ atemo lubo cikki. Abitito lok me cadenni bene i nyim luker, ma lewic pe bimaka wacel. Anoŋo yomcwiny i lubo cikki ducu, pien amarogi mada. Aworo cikki ducu, ma amarogi-ni, ci abilwodo lok me cikki ki i cwinya. Po i lok ma yam icikke kwede bota, an laticci, ma imiya doŋ aketo genna iye-ni. Kadi ka atye i can, lokki kweyo cwinya; pien cikkeni doŋ omiya kwo. Jo ma kwiya Lubaŋa ginywara anywara, ento pe alokke aweko cikki. Ka apo i kom cik ma yam ipwonya kwede i kare mukato aŋec, kweyo cwinya, ai Rwot. Akemo malyet omaka woko pi jo maraco, pien gibwoto cikki pe gilubo. I ot ma abedo iye ma bor ki pacona kikome, ayubo wer ma awero pi cikki. Apo piri i dyewor, ai Rwot, dok alubo cikki. Man aye gum ma alimo omiyo agwoko pwonnyi macon ducu. In aye gin ducu ma amito, ai Rwot acikke me lubo lokki ducu. Alegi ki cwinya ducu, tima kica, kit macalo yam icikke kwede. Ka atamo pi lubo yoni ci alokke acikke me lubo lok me cadenni. Arune woko oyotoyot ma pe agalle ka lubo cikki. Kadi bed jo maraco gitelo tolgi giciko giruma kwede dyere macalo owic, ento wiya pe biwil i kom cikki. Aa malo ka paki i dyewor pi cikki me ŋolo kop ma tye atir. An larem dano ducu ma lwori ki jo ma gilubo cikki. Ai Rwot, lobo opoŋ ki mar meri ma pe lokke; pwonya ki cikki! Ai Rwot, igwoko cikkeni giri, dok itiyo kweda maber, an laticci. Pwonya ki ŋolo kop maber ki ŋec, pien ageno gin ma iciko. I kare ma pud peya imiya can, onoŋo aŋak woko ata; ento kombeddi doŋ agwoko lokki. In iber, dok itimo gin maber bene; pwonya ki cikki. Jo ma lunywar gimedo lok goba i koma, ento an alubo cikki ki cwinya ducu. Jo-nu cwinygi opune woko calo moo dwolo, ento an anoŋo yomcwiny i cikki. Can ma alimo-ni obedo ber bota matek, wek apwony lok me cikki. Lok me cik ma imiya ber bota makato lwak lim me jabu ki ryal alip ki alip. In aye ma iketa dok igwoka bene maber; miya niaŋ matut wek apwony lok me cikki. Jo ma lwori gibinena ci gibedo ki yomcwiny, pien doŋ ageno lokki. Ai Rwot, aŋeyo ni ŋolo koppi tye atir, imiyo aneno can pi ada ma itye kwede. Wek mar meri ma pe lokke obed pi kweyo cwinya, kit macalo yam icikke kwede bota an laticci. Tima kica wek abed kwo, pien anoŋo yomcwiny i cikki. Wek lewic omak jo ma lunywar pien gubita ki lok goba; ento an abibedo ka lwodo lok i kom pwonnyi. Wek jo ma gilwori gubin bota, ci guŋe lok me caden meri. Wek abed ma cwinya leŋ kun alubo cikki, wek lewic pe omaka. Tipona ool woko pi kuro lar meri: ageno lokki.’ Waŋa doŋ oballe woko pi neno gin ma icikke pire; apenyi ni, “Ibikweyo cwinya awene?” Doŋ adoko calo opoko koŋo vino ma yito obalo woko, ento wiya pud peya owil i kom cikki. Imito an laticci akur pi kare ma rom mene? Ibiŋolo kop i kom jo ma gilwenyo i koma-ni awene? Jo ma lunywar ma pe gilubo cikkini gukwinyo bur ma myero apot iye. Cikki ducu tye ada; ento dano gilwenyo i koma ki loko lok goba; konya do! Onoŋo doŋ gicok tyeko kwona woko ki i lobo, ento an pe abwoto cikki. Miya abed kwo pi mar meri ma pe lokke, wek agwok lok me cadenni ma yam iloko ki dogi-ni. Ai Rwot, lokki bedo nakanaka; tye ma icibo ocuŋ woko likiŋ i polo. Gen ma itye kwede bedo bot yalwak me kare ducu; icibo lobo ocuŋ matek i kabedone, Jami ducu ocuŋ nio wa onyoo pi cikki; pien gin ducu luticci. Ka nene pe anoŋo yomcwiny i cikki, kono ato i canna. Wiya pe biwil i kom pwonnyi, pien igwoka pi cikki omiyo pud akwo. An a danoni, lara do! Atemo lubo cikki mada. Jo maraco gikanne gikiya wek gineka woko, ento an atamo pi lok me cadenni. Doŋ aneno ni jami ducu ma i wi lobo agikkigi tye, ento cikki pe tye ki agikkine. Amaro cikki twatwal! Abedo ka lwodo lok i kom cikki dyeceŋ jwi. Cikki miyo abedo ryek akato lukworra woko, pien atye kwede nino ducu. Doŋ atye ki niaŋ maber muromo, akato lupwonnya woko ducu, pien abedo ka lwodo lok i kom lok me cadenni kare ki kare. Aniaŋ bene aloyo jo muteggi, pien alubo gin ma iciko. Ajukke kena wek pe atim gin marac, pi gwokolokki. Pe aweko pwonnyi, pien in doŋ ityeko pwonya. Lokki bille mamit adada ki bota lim i doga makato moo kic woko! Alimo ryeko madwoŋ ki i cikki pi meno omiyo akwero yo ma bwola-gu ducu. Lokki calo tara ma menyo ka tyena, dok tye calo ceŋ ma menyo yo ma awoto iye. Doŋ atyeko kwoŋo kwoŋ dok amoko bene, me lubo pwonnyi ma tye atir. Arem me can ma atye kwede doŋ oketo koma woko; ai Rwot, gwoka abed makwo kit macalo yam icikke kwede. Gam pwocca me pak ma akelo boti, ai Rwot, dok ipwonya ki cikki. Kare ducu-ayubbe me miyo kweŋa i peko, ento wiya pe wil i kom cikki. Jo maraco guciko owic me maka, ento an pe aŋak aweko lubo cikki. Lok me cadenni gin aye gipinnya ma ri nakanaka; ada, gin aye gimiyo abedo ki yomcwiny. Aketo cwinya ada me tiyo gin ma iciko nakanaka, nio wa i kare me agik. Adag jo ma tamgi tye aryo, ento amaro cikki. In aye kalarrena ki kwotta, ageno lok ma iciko. Ayu woko ki ka ŋeta, wun lutim maraco, wek abed kun alubo cik pa Lubaŋana. Konya macalo yam, doŋ iciko, wek abed kwo, pe ibal cwinya woko pi gen ma doŋ atyeko geni kwede. Tiŋa malo ijola woko, ci abibedo maber ki kuc, miyo abiketo cwinya ka lubo cikki teretere. Ikwero jo ma ŋak woko ma giweko lubo cikki; ada, ryekogi-ni pe konyo gin mo. Itiyo ki jo maraco ducu ma tye i wi lobo-ni macalo yugi; pi meno an amaro lubo lok me cadenni. Koma ducu myel amyela pi lworo in, locci me ŋolo kop omiyo apoŋ ki lworo. Atiyo gin ma tye atir dok kakare; pe iweka i ciŋ lukworra ma giuna-ni. Cuŋ pira, an laticci, pi kelo kuc, wek jo ma lunywar pe guuna. Waŋa doŋ ool woko pi kuro larri, dok pi kit ma ibicobo kwede cikkeni ma tye atir-ri, Ti ki laticci ki mar meri ma pe lokke, dok ipwonya ki lok me cikki. An laticci, miya aniaŋ maber, ci wek aŋe lok me cadenni. Rwot, kare doŋ oromo myero iti ticci, pien lwak guturo cikki woko pe doŋ gilubo. Pi meno amaro cikki makato jabu, kadi ki jabu ma giliyo maberre. Aloyo kwona kun abedo ka lubo cikki; adag yo me bwola-gu ducu. Pwonnyi ducu tye me aura; pi meno alubogi ki cwinya ducu. Tito lokki miyo ceŋ bot dano, dok miyo niaŋ bot jo ma pe ki ŋec. Aŋamo doga, abedo ka omo cwinya ki yweyo, pien amito alub cikki. Bin bota, ci itima kica, kit macalo itimo kwede kica bot jo ma maro nyiŋi. Gwoka wek pe apoti, kit macalo yam doŋ iciko, pe iwek bal mo olo kwona. Lara woko ki i ciŋ jo ma giuna, wek abed kun agwoko cikki. Nen laticci ki waŋ me kica, dok ipwonya ki lok me cikki. Pig waŋa cwer dok mol matek, pien dano pe gigwoko cikki. In iporre, ai Rwot, dok kop ma iŋolo tye atir. Iyero lok me cadenni kun ilubo kiti ma atir, ki gen madwoŋ bene. Nyeko ki kiniga waŋo koma calo mac, pien lukworra wigi owil woko i kom lokki. Gitemo cikkeni adada, miyo an laticci amaro. An atidi mo, dok gicaya bene, ento wiya pe wil i kom lok me cikki. Porreni tye atir dok bedo nakanaka, ki cikki bene cik me ada. Can ki cwercwiny doŋ opoto woko i koma, ento cikki aye miya yomcwiny, Lok me cadenni tye atir dok bedo nakanaka; miya niaŋ maber ci abibedo kwo. Akok boti ki cwinya ducu, gam doga, ai Rwot! Abigwoko cikki, Akok boti; lara, ci abilubo lok me cikki. Aa malo ma pud peya piny oru akok boti pi kony; pud ageno lokki. Abuto i dyewor ci aco woko, waŋa bedo twolo, kun abedo ka lwodo pi cikki ki i cwinya. Ai Rwot, winy dwana pi mar meri ma pe lokke; roc kwona odoco i locci ma tye atir, Jo ma lwenyo i koma ginyiko cok kun gitamo me timo gin marac; gitye ka mabor adada ki cikki. Ento in icok kweda, ai Rwot, cikki ducu cik me ada, Apwonnye ki lok me caden meri ducu nia wa con, ni iketogi me bedo nakanaka. Nen canna dok i lara, pien wiya pe wil i cikki. Pid pira ci ikoka: miya kwo kit macalo yam iciko. Jo maraco pe gibiromo larre wacel, pien pe gitemo me lubo cikki. Ento kicani dit makato, ai Rwot; miya kwo kit macalo locci tye atir-ri. Jo ma lwenyo i koma ki lumerokka gipol, ento pe aleŋŋe aweko lubo pwonnyi. Ka aneno lutim roro, ci cwinya lemo alema i komgi, pien pe gigwoko cikki. Koŋ itam kit macalo amaro kwede lok me cikki! Gwok kwona pi mar meri ma pe lokke. Lokki ducu ocuŋ i kom ada, cikki ducu tye atir gibedo nakanaka. Rwodi gilwenyo i koma laboŋo tyen lok mo, ento abedo kun atye ki lworo i cwinya pi lokki, Abedo ki yomcwiny pi lokki calo dano ma onoŋo jami mapol ma giyako, Adag dok akwero lok goba, ento amaro cikki. Apaki nino ki nino tyen abiro pi cikki ma tye atir. Jo ma maro cikk i limo kuc madit; pe tye gin mo ma bimiyo giyokke atata, Ai Rwot, ageno larri, dok bene atiyo gin ma cikki mito. Agwoko lok me cikki ducu i cwinya, dok amarogi ma pe twerre. Agwoko cikki ki lok ma ipwonya kwede ducu; in bene ineno gin ducu ma atiyo. Wek kokona oo boti do, ai Rwot; miya abed ki niaŋ maber ma lubo kit ma lokki tye kwede. Wek lega me bako doga bene oo boti; lara kit macalo yam icikke kwede. Abiŋamo doga kun apaki, wek ipwonya ki cikki. Abiwero lokki awera ki doga, pien cikki ducu tye atir. Yubbe kun iketo ciŋi me konya, pien doŋ ayero me lubo cikki. Atye ka yenyo larri, ai Rwot, dok cikki aye miya yomcwiny. Miya abed kwo, wek abed ka paki, wek pwony me cikki bene okonya. Aŋak woko ata calo romo murwenyo; myero iyenya, an laticci, pien wiya pe wil i kom cikki. I kare ma atye i can akok bot Rwot, wek ogam doga, kun akok ni. “Lara do, ai Rwot, ki bot jo ma loko lok goba, ki bot jo ma bwolo dano ki lok doggi.” Gibiminiwu gin aŋo kono? Dok gin aŋo makato ma gibitiyo i komwu, wun jo ma bwolo dano ki dogwuni? Gibicwalo i komwu atero mabit pa lulweny, ki lodi mac yen opok ma otwak! Aneno can adada, pien abedo Mecek macalo labedo, dok pacona tye i dye kema pa jo Kedar! Abedo doŋ ari pi kare malac twatwal i kin jo ma dag kuc. Amito wabed ki kuc; ento tek aloko lok mo, gin gilokke gicuŋ pi lweny! Atiŋo waŋa malo aneno yo tuŋ kom godi; kony ma amito-ni a ki kwene? Kony ma amito-ni a ki bot Rwot, muketo polo ki lobo. En pe biweko tyeni cer, ŋat ma gwoki pe bibuto nino woko ata, Nen, en aye ma gwoko jo Icrael, pe bibuto nino woko licwic ma kwiya kome, Rwot aye ŋat ma gwoki; dok tye calo tipo me ka yweyoni, tye yo tuŋ ciŋi ma lacuc. Ceŋ pe biwaŋi i dyeceŋ, kadi dwe bene pe biwaŋi i dyewor. Rwot bigwoki ki i gin maraco woko ducu, en bigwoko kwoni. Rwot bigwoki ka icito woko nyo kadi ka idwogo cen, nia i kare-ni cito kwede anyim nakanaka. Abedo ki yomcwiny i kare ma guwaco bota ni, “Wacitu i ot pa Rwot!” Wabedo ka cuŋ acuŋa ki ‘tyenwa i dog gaŋ me Jerucalem! Jerucalem doŋ gigero odoco matek, ma ocuŋ nen maber atika! Man aye ka ma kaka ma Rwot oyero gibino iye, gin aye jo Icrael; gibino ka miyo pwoc bot Rwot, kit macalo yam giciko kwede pigi. Komker me ŋolo kop giketo tye kunnu, gin komker me ot pa Daudi. Wuleg pi kuc me Jerucalem! “Wek gin jo ma mari gubed ki lonyo dok ki kwo maber! Kuc obed i i cel murumo gaŋŋi, dok kuc madwoŋ myero obed i odi ma wigi ocudo malo!” Pi utmega ki pi luwota abiwacci, “Kuc obed botwu!” Kit macalo Rwot Lubaŋawa bedo i ode kany-nyi, abilego ni ibed maber. Ai Rwot, ailo waŋa aneno boti, in ma ibedo i wi komkerri i polo! Nen, macalo lutic gineno bot rwodigi, dok macalo aŋeca neno bot min ot ma en bedo bote, waŋ bene waneno bot Rwot Lubaŋawa, nio wan ma kica omake i komwa, Kica omaki i komwa, ai Rwot, kica omaki i komwa do, pien doŋ gicayowa twatwal! Tipowa doŋ ool woko pi kare malac ki ŋala pa jo ma gitye ki kwo mayot, ki cac pa jo ma luwakke. Jo Icrael myero guwacci, “Ka kono Rwot pe obedo tuŋ botwa, ka kono Rwot pe obedo tuŋ botwa, i kare ma lukworwa gubino ka lweny i komwa, kono gumwonyowa woko makwo oyotoyot, i kare ma kinigagi olyetti woko marac twatwal i komwa; kono nene lalele omolowa oterowa woko, kono biamwonyi me pii oumowa woko lipuk, kono omiyo pii otwagge i wiwa. Gipwo Rwot, ma pe omiyowa botgi macalo riŋo ma myero gukil woko ki lakgi! Wabwot woko calo winyo ma obwot ki i owic pa ladwar; tol owic ocot, ci wan wabwot! Kony ducu ma wamito a ki bot Rwot, muketo polo ki lobo. Jo ma geno, Rwot gitye macalo got Cion, ma pe gitwero dirone gikobo ka mukene, ento cuŋ mere kacel matwal. Kit macalo godi gurumo Jerucalem woko dyere-ni, Rwot bene orumo jone woko kumeno, nia i kare-ni cito kwede anyim nakanaka, Jo ma kitgi raco kadi gumak odoo ker me loc ci pe gibiloyo lobo ma gimiyo bot jo ma kitgi atir, wek jo ma kitgi atir pe gurye ciŋgi me timo gin marac. Tim ber bot jo ma kitgi beco, ki bot jo ma cwinygi tye atir. Ento jo ma lokke gilubo yogi mugom Rwot biterogi ribogi ki lutim maraco! Kuc obed i Icrael! I kare ma Rwot odwokowa cen i Cion, onoŋo wabedo calo jo ma leko lek, Onoŋo wanyero nyero, ma wadaŋŋe bene ki yomcwiny; ci lurok guwaco lok i komwa ni, “Rwot doŋ otyeko tiyo jami me aura pigi.” Rwot doŋ otiyo jami me aura piwa, omiyo cwinywa yom. Ai Rwot, dwok gum botwa do, calo kulu ma tye i Negeb! Wek jo ma coyo kodigi ma gikok akoka ki pig waŋgi guka camgi kun gidaŋŋe ki yomcwiny madwoŋ! ŋat ma woto kun kok, ma noŋo omako kodi cito ka coyone, bidwogo i pacone ma daŋŋe adaŋa ki yomcwiny, kun kelo kal ma okayo ki i poto. Ka pe Rwot aye ma ogero ot, jo ma gero gicanne nono. Ka pe Rwot aye ma okuro gaŋ, lakurpiny bedo dyewor ma waŋe twolo noŋo. Kadi ka wupuk con ka tic, ma wudok paco ka yweyo wa mot, kun wucamo kwon wuparo kwede pi tic ma wutiyo, meno ducu noŋo, pe konyowu; pien Rwot miyo jo ma en maro ginino. Nen, litino aye gin gipiny mua bot Rwot, gin aye mot ma ginywalogi anywala, Litino ma dano mo onywalo ma pud en awobi, gitye calo atero ma tye i ciŋ ŋat ma lalweny. Ŋat ma ajurune opoŋ ki lwak atero ma kit meno bedo ki yomcwiny! Pe giloye wacel i kare ma en bilok ki lukworre ki i dog gaŋ. Tye ki gum dano ma lworo Rwot, ma bedo kun lubo yone! Ibicamo cam mua ki i tic ma itiyo ki ciŋi; ibibedo ki yomcwiny dok ilimo lwak lonyo madwoŋ. Dakoni bibedo calo olok ma nyak nyig madwoŋ i odi; ki litinoni gibibedo calo yat ma pote lot kun gibedo girumo mejani woko. Nen, meno aye kit gum ma poto i kom dano ma lworo Rwot, Rwot myero omini gum ki i Cion pi kare me kwoni ducu, wek inen lonyo ma tye i Jerucalem! Wek bene ibinen likwayu! Kuc obed i kom Icrael! Jo Icrael myero guwacci, “Guketo can i koma marac twatwal nia wa ka tinona, guketo can i koma marac twatwal nia wa ka tinona, ento pe guloya kadi ki acel. Wegi kweri dyaŋ gipuro ŋeya; guryeyo pottigi obedo maboco.” Rwot oporre, en doŋ oŋolo tol pa jo maraco woko. Wek dano ducu ma kwero Cion giket lewic i wigi dok gidwokgi bene cen! Wek gubed macalo lum ma tye i wi ot malo, ma two woko ma noŋo peya odoŋo ocito malo, ma dano ma nyaro bene pe mako poŋo ciŋe, kadi ŋat ma tweyo kacel bene pe gwaro poŋ kore, ci miyo jo ma kato ki kenyo pe giwacci, “Gum pa Rwot obed i komwu! Walamo gum i komwu i nyiŋ Rwot!” Ai Rwot, akok boti ki i te bur matut! Rwot, winy kokona do! Cik iti iwiny legana me bako dog do! Ai Rwot, ka nene onoŋo iparo balwa, aŋa munoŋo twero cuŋ i nyimi, in Rwot? Ento in iweko balwa, wek giwori. Akuro Rwot ki cwinya ducu, ageno lokke bene. Kwona ducu ocuŋ i kom Rwot; akure makato lukur-piny ma gikuro nio wa odiko, makato lukur-piny ma gimito ni piny oru. Wun jo Icrael, myero wugen Rwot! Rwot tye ki mar ma pe lokke, dok lar madwoŋ bene tye bote, En bi koko jo Icrael ki i balgi ducu. Ai Rwot, pe atye ki miti ma malo twatwal i cwinya, dok bene waŋa pe neno malo twatwal. An pe atikke i kom lok madito ata ma gidito dok me aura makato ŋecca woko. Ento doŋ cwinya okwe, aywe doŋ gira mot, calo latin ma tye i kor minne ma oliŋ mot; cwinya doŋ okwe calo latin ma doŋ oliŋ. Wun jo Icrael, wugen Rwot! nia i kare man cito kwede anyim nakanaka! Ai Rwot, po pi Daudi, ki pi can ducu bene ma yam en ociro; ki kit macalo yam en okwoŋo kwede kwoŋ bot Rwot, ma okwono bot en ŋat Matek pa Yakobo ni, “Pe abidonyo i oda, nyo kadi me ito i wi kitandana; nino bene pe bimako waŋa, dok pe abimiyo waŋa, nio ka anoŋo kabedo pi Rwot, kabedo ma en ŋat Matek pa Yakobo twero bedo iye.” Nen, wawinyo pire ki i Eprata, wanoŋo tye i potti me Jaar. “Wucitu ka ma en bedo iye, wek wawore i nyim komkerre!” Ai Rwot, a icit i kabedoni me yweyo, kacel ki canduk me tweroni. Wek ajwagini gurukke ki kit ma atir, wek joni ma gigeni gudaŋŋe ki yomcwiny. Pe myero ikwer kabaka ma in aye yam iyero ka giwiro, ento par pi laticci Daudi. Rwot okwoŋo kwoŋ me ada bot Daudi, ma en pe dok biloko, ni. “Abiketo latin awobi acel ki i kin awobeni bedo kabaka, en bibedo ka loc ki i neyi, Ka likwayu ducu gibigwoko gicikkena ki ada ki lok me caden ma apwonyogi kwede, ci a biketo litiilogi bene bedo i wi komkerri, gibibedo ka loc nakanaka.” Pien Rwot doŋ oyero Cion; en mito ni obed pacone ka ma ebibedo iye. “Man aye kabedo me-yweyona ma abibedo iye matwal; abibedo kany, pien doŋ amito. Abimiyo gum i kom Cion ci noŋo cam mabup; dok abimiyo lucan ducu ma bedo iye giyeŋ ki kwon. Abimiyo ajwagine giruko lar, ki jone ma geno Rwot gibidaŋŋbe ki yomcwiny. Abiyero ŋat mo acel ki i kom likwayo pa Daudi me bedo kabaka; doŋ atyeko yubo mac tara pi danona ma giwiro. Abimiyo lewic umo lukworre woko limuk, ento en keken aye kerre bibedo maber dok bikelo, kuc bot lwakke.” Nen kit macalo bedo ber ki me yomcwiny ka omego gibedo kacel ki mer i kingi! Rom ki moo ma ŋwece kur ma gionyo i wic, ma mol bino piny wa i tik dano, moo ma con omol ki i wi Aron obino piny Wa i tike, ma omol bene odyako wa ŋut boŋŋone woko liweŋ! Dok rom ki toyo me got Kermon, ma luk i wi godi me Cion! Kunnu en aye ka ma Rwot ociko iye pi miyo gum, ki kwo ma bedo matwal. Wubin, wupwo Rwot, wun lutic pa Rwot ducu, ma wucuŋ i ot pa Rwot dyewor! Wutiŋ ciŋwu malo wutaŋ i kabedo man maleŋ, ci wupwo Rwot! Rwot omiwu gum ki i Cion, en muketo polo ki lobo! Wupak Rwot! Wupak nyiŋ Rwot, wun luticce ducu, wun ma wucuŋ i ot pa Rwot, i dyekal me ot pa Lubaŋawa! Wupak Rwot, pien en ber; wuwer wer me pako nyiŋe, pien en lakica. Rwot oyero Yakobo me bedo mere, ki jo Icrael me bedo lwakke kikome. Aŋeyo pira kena ni Rwot dit, dok aŋeyo ni Rwotwa loyo lwak cal lubaŋa ducu. Gin mo keken ma Rwot mito en tiyo, i polo ki i wi lobo, i nam kadi i pii matut ma tye piny i te lobo. En aye ma miyo pol tiŋŋe malo ki i agikki me lobo, en ma miyo lutkot wil, en bene ma cwalo yamo ki i odine me kano jami, ci kodo. En aye ma yam oneko litino kayo pa jo Ejipt woko, litino kayo pa dano ki pa lee. En otiyo lwak taŋo ki gin-aura mapol i Ejipt, kun pwodo Parao ki luticce ducu. Dok oneko lwak me rok mapol, ci oneko luker matego woko liweŋ, Cikon, kabaka pa jo Amor, ki Og, kabaka me Bacan, ki luker ducu ma tye i Kanaan. Omiyo lobogi woko me bedo gipiny, gipiny pa lwakke jo Icrael. Ai Rwot, nyiŋi bedo nakanaka, dok bene gibipo piri i kare pa yalwak ducu. Rwot bimiyo jone loyo kop, kica bimake i kom luticce. Cal lubaŋa pa lurok gitiyogi ki ryal ki jabu; man obedo tic ma dano gutiyo ki ciŋgi, Doggi tye, ento pe giloko, waŋgi bene tye, ento pe gitwero neno piny. Itgi tye, ento pe gitwero winyo lok, yamo me yweyo bene pe i doggi. Jo mutiyo cal lubaŋa magi bene girom aroma kwedgi, ki jo ducu ma geno cal lubaŋa magi bene gitye kit meno. Wun jo Icrael, wupak Rwot! Wun jo me ot pa Aron bene wupak Rwot! Wun jo me ot pa Levi, wupak Rwot! Wun bene ma wulworo Rwot, wupake! Gipwo Rwot ki i Cion, en ma bedo i Jerucalem! Wupak Rwot! Wumi pwoc bot Rwot, pien en ber; mar mere ma pe lokke bedo nakanaka. Wumi pwoc bot Lubaŋa ma loyo lwak lubaŋa-gu ducu, pien mar mere ma pe lokke bedo nakanaka. Wumi pwoc bot Rwot ma loyo rwodi ducu, pien mar mere ma pe lokke bedo nakanaka. En keken aye ma tiyo ginaura madito, pien mar mere ma pe lokke bedo nakanaka. En oketo polo ‘ki ryekone, pien mar mere ma pe lokke bedo nakanaka. En bene ma opeto lobo i wi pii matut, pien mar mere ma pe lokke bedo nakanaka. En muketo gin madito ma ryeny ma menyo piny, pien mar mere ma pe lokke bedo nakanaka. Oketo ceŋ me loyo dyeceŋ, pien mar mere ma pe lokke bedonakanaka. Oketo dwe ki lakalatwe me loyo dyewor, pien mar mere ma pe lokke bedo nakanaka. Oneko litino kayo pa jo Ejipt ma co woko ducu, pien mar mere ma pe lokke bedo nakanaka. Ci okwanyo jo Icrael okelogi woko ki i kin jo Ejipt, pien mar mere ma pe lokke bedo nakanaka. Okelogi woko pi twero me bade ki ciŋe ma oryeyo, pien mar mere ma pe lokke bedo nakanaka. Opoko i Nam Makwar woko aryo i dyere, pien mar mere ma pe lokke bedo nakanaka; ci omiyo jo Icrael gukato ki i dyere wa loka tuŋcel, pien mar mere ma pe lokke bedo nakanaka. Ento omiyo Parao kacel ki dul monnye gumwony guto wok i Nam Makwar, pien mar mere ma pe lokke bedo nakanaka. En mutelo lwakke i dye tim, pien mar mere ma pe lokke bedo nakanaka. Oneko luker madito woko ducu, pien mar mere ma pe lokke bedo nakanaka; oneko wa luker ma guywek-gu woko mapol; pien mar mere ma pe lokke bedo nakanaka. Oneko Cikon, ma kabaka pa jo Amor, pien mar mere ma pe lokke bedo nakanaka; oneko bene Og, kabaka me Bacan, pien mar mere ma pe lokke bedo nakanaka. Omiyo lobogi woko bot lwakke me bedo gipinygi, pien mar mere ma pe lokke bedo nakanaka; omiyo bot luticce jo Icrael obed ginaleyagi, pien mar mere ma pe lokke bedo nakanaka. En opo piwa i kare ma doŋ giloyowa woko marac, pien mar mere ma pe lokke bedo nakanaka; ci olarowa ki i ciŋ lumerokwa, pien mar mere ma pe lokke bedo nakanaka. En miyo cam bot gin makwo ducu, pien mar mere ma pe lokke bedo nakanaka. Wumi pwoc bot Lubaŋa me polo, pien mar mere ma pe lokke bedo nakanaka. Wabedo piny i ŋet kulu me Babilon, ci wakok matek i kare ma wapo pi Cion. Waŋabo opukwa malo i kor yadi ma i dog kulu kunnu. Jo ma gumakowa guterowa i opii gupenyowa ni myero wawer botgi; lulibowa gumito ni wawer wer me yomo cwiny, kun giwacci, “Wuwerwa wer mo ma loko lok i kom Cion!” Watwero wero wer pa Rwot i lobo pa lurok niŋniŋ? Wek ciŋa ma lacuc otwo woko, ka ce wiya wil i komi, in Jerucalem! Wek leba omok woko i dana, ka onoŋo pe apo piri, ka pe atamo piri, in Jerucalem, macalo gin ma miya yomcwiny makato! Ai Rwot, po pi nino ma Jerucalem oneno can iye, ci icul waŋe i kom jo Edom. Po kit ma gubedo ka wacci, “Ret woko, ret woko piny wa i ŋom te gutine!” In Babilon, inlayak! Ŋat ma biculo kworwa i komi ki gin ma itimo i komwa, bibedo ki yomcwiny.’ Dano-ma mako litinoni, ci jwatogi woko i kom got, bibedo ki yomcwiny! Apwoyi ki cwinya ducu, ai Rwot; awero wer me paki i nyim cal lubaŋa-gu. Aryebbe piny akemo ot meri maleŋ, apako nyigi pi mar meri ma pe, lokke ki pi genni; pien itiŋo nyiŋi ki lokki ducu malo makato jami mukene-gu ducu. I nino ma akok bati, in igamo doga, ci imedo tekcwiny bota. Luker ducu ma wi lobo gibipaki, ai Rwot, pien dog guwinyo lokki ma icikke kwede. Gibiwero wer pi gin ma Rwot otiyo, ki pi deyo madit pa Rwot. Kadi bed Rwot bedo malo ka mabor twatwal, pud neno jo mamwol ma lucan i cwinygi; ento jo ma lyerre en ŋeyogi woko ki ka mabor. Kadi bed awoto ma can oruma woko dyere, in pud igwoko kwona; iryeyo ciŋi me juko akemo pa lukworra, ci ilara ki ciŋ i ma lacuc. Rwot bicoba yub ma mere ducu pira; ai Rwot, mar meri ma pe lokke bedo nakanaka. Pe ibwot gin ma itiyo ki ciŋi woko. Ai Rwot, in doŋ iŋiyo kwona CI Iŋeya woko! Kadi abedo piny nyo kadi aa malo, in iŋeyo; iniaŋ tamma woko ki ka mabor, Iŋiyo yona ki ka butona piny, dok iŋeyo kit yo me kwona ducu. Kadi ma peya aloko lok mo, nen, ai Rwot, in doŋ iŋeyo lok ma abiloko ducu. In iruma woko tuŋŋi ki tuŋŋi, kun igwoka ma iketo ciŋi i koma. Kit ŋec ma itye kwede tye me aura mada ki tuŋ bota; tye wa malo twatwal ma pe atwero o iye. Abicito kwene wek aa woko ki boti? Abia ki i nyimi ariŋo acito kwene? Kadi ka ait malo i polo, in bene itye kunnul Kadi ka abuto piny i lyel, in pud itye kunnu aye! Kaatuk acito malo ma awoto macalo rupiny, nyo abed i kabedo mo i dog nam ma tye ka mabor adada, in pud ibibedo kunnu ka peya, dok bene ibimaka ki ciŋi malacuc. Ka awacci, “Wek colpiny ouma woko, ki Leŋo me ceŋ ma atye iye odok dyewor,” colpiny bene pe col ki boti, ki dyewor bene leŋ aleŋa calo dyeceŋ; pien ki tuŋ boti colpiny rom ki leŋo. In aye ma iketo dul me koma ducu, dok icweyo woko kacel ki i i maa. Abipaki, pien in aye ma myero gilwori dok itye me aura. Ticci ducu ma itiyo obedo tic aura! Iŋeya maber twatwal. Yam ineno ka giribo cogo koma i kare ma gicweya i i maa, ma gicweyo koma piny i te lobo ka matut ki diro madwoŋ, Ineno koma ki waŋi ma pud peya gicweyo otum, wel ninona ma iciko pira ducu gicoyogi woko i bukki ma peya nino mo acel i kingi oo. Ai Lubaŋa, tammi beco bota kuman! Gin ducu mono gitye adi! Ka awacci akwangi akwana, gipol gikato kweyo woko. Ka aco ki i waŋ nino, noŋo pud atye boti. Ai Lubaŋa, onoŋo amito inek jo maraco woko, wek jo ma oyo remo pa dano gurweny woko ki bota, gin jo ma gibedo ka loko lok marac i komi-ni, ma guille malo kun giloko lok marac me balo nyiŋi, Ai Rwot, an adagjo ma gidagi, dok bene iya okwerojo ma gijemo woko i komi. Adaggi adada ki adagadaga mutum, anenogi macalo lukworra. Ŋi kwona, ai Lubaŋa, wek iŋe gin ma tye i cwinya; koŋ itema, wek iŋe ka ma tamma tye iye. Inen ka kit mo marac tye iiya, ci doŋ itela i yo ma bedo nakanaka. Ai Rwot; lara ki bot jo maraco, gwoka bene ki i kom jo ma gin lutim bwami, ma giyubo lok maraco ki i cwinygi, ci gitugo lweny teretere-ni. Doggi bit calo lak twol-madoŋo, lok ma giloko obedo calo kwir pa twolororo. Ai Rwot, gwoka ki i ciŋ jo maraco; gwoka ki i kom jo ma gin lutim bwami, ma doŋ gupiro lok me dwalo tyena wek apoti. Jo ma nyatte guciko owicgi gukano woko pira, guciko obwo ki tol kun gimito maka kwede; i ŋet yo ducu noŋo guciko obwo tye ka kura akura. Awaco bot Rwot ni, “In Lubaŋana.” Winy legana me bako dog, ai Rwot! Ai Rwot Lubaŋana, lalarra matek, igwoka maber i kare me lweny. Ai Rwot, pe myero imi bot jo maraco gin ma gimito; pe iwek tim maraco ma gupiro-ni ocobbe. Pe iwek lukworra guloya woko, wek tim aranyi ma gimito timone odok i komgi. Wek lodi mac ocorre i komgi owaŋgi woko; wek gi bolgi i bur matut, pe dok gunoŋ yo me katti woko! Wek jo ma giloko lok gobagoba me balo nyiŋ luwotgi pe gubed i lobo; wek gin marac omak gin lutim bwami ci ityekgi woko. Aŋeyo ni Rwot pido pilucan, dok ŋolo kop kakare pi jo ma piny obwoyogi. Adada jo ma kitgi atir bimiyo pwoc boti; ki jo ma cwinygi atir gibibedo i nyimi. Ai Rwot, akok boti, bin bota oyotoyot do! Winy dwana ka akok boti! Wek legana obed i nyimi macalo odok eceta ma giwaŋo ma duny makur; ki ciŋa ma ataŋo boti-ni myero obed calo gitum ma gityero boti otyeno. Ai Rwot, gwok doga, dok inen kit ma aŋamo kwede doga ka lok. Gwoka mi pe abed ki cwiny me timo gin marac, wek pe aribbe ki jo maraco pi timo bal, wek bene pe aribbe kwedgi me camo cam mamit ma gin guyubo! Wek dano ma kite ber aye opwoda, dok ojuka ma kica omake i koma, ento pe iwek dano mo marac owir wiya ki moo; pien legana ma atye ka legi kwede teretere-ni tye pi dag gin marac ma gin gitimo. Ka inen gimiyogi i ciŋ dano ma myero guŋol kop i komgi, gibipwonyo atir ni lok pa Rwot kara tye ada. Gibiketo cogogi woko ata i dog lyel, macalo got ma dano tyero iye ci tyer poto woko acacacac i lobo. Ento an, ai Rwot, waŋa kemo boti; ayenyo kalarre boti, pe iweka ata ma pe igwoka! Gwoka wek pe amok i owic ma guciko pira-ni, gwoka pe amok i obwo pa lutim maraco. Wek jo maraco gumok i obwogi kekengi, ento mi an abwot ma pe gin mo oguda. Akok bot Rwot pi kony, kun abako doga bene bote. Akelo lok me kokona ducu i nyime, dok atitte bene kit can ducu ma atye ka noŋone. Ka cwinya doŋ ool woko, in iŋeyo gin ma myero atim. Lukworra guciko o wic woko pira i yo ma awoto ki tye kare ducu-ni. Aloko waŋa tuŋ acuc aneno, ci anoŋo ni pe tye dano mo ma myero okonya: kalarre mo mudoŋ pira bene pe, pe tye ŋat mo ma paro pira. Ai Rwot, akok boti pi kony; Rwot, in aye kalarrena, in aye dul ma gipokka i lobo pa jo makwo. Winy kokona do, pien piny doŋ obwoya woko! Lara ki i ciŋ jo ma gitye ka liba, pien gitek giloya woko. Kwanya ikela woko ki i mabuc, wek ami pwoc boti. Jo ma kitgi atir gibiruma dyere, pien ibitiyo kweda i yo maber mada. Ai Rwot, winy legana; winy legana me bako dog ma akelo i nyimi! Gam doga pi genni, pien in iporre! Pe iŋol kop i kom laticci, pien pe tye dano mo makwo ma kite atir i nyimi. Lakworra doŋ oryemo kora, oloya woko adada, omiyo abedo i colpiny calo jo ma yam doŋ guto wa con. Pi meno cwinya doŋ ool woko, gen bene doŋ orwenyo woko ki i cwinya. Apo i kom kare macon ma doŋ okato, ci abedo ka lwodo lok i kom gin ducu ma doŋ itiyo; gin ducu ma itiyo bino i tamma. Aryeyo ciŋa ataŋo boti ka alego, tipona tye ki orwo me neni calo lobo mutwo woko ma pii pe iye, Ai Rwot, gam doga oyotoyot! Cwinya mito tum woko! Pe ikanne woko ki bota, miyo abedo rom ki jo ma gicito gidonyo piny i bur. Ageni mada; wek awiny i odiko kun ipoyo wiya i kom mar meri ma pe lokke. Pwonya ki yo ma imito ni myero alubi, pien legana ducu acwalo malo boti kunnu. Ai Rwot, lara ki i ciŋ lukworra! An doŋ ariŋo ka larre boti, Pwonya wek ati gin ma imito, pien in Lubaŋanal Wek cwiny meri maber-ri otela iyo mupirre marom! Lara, ai Rwot, pi deyo me nyiŋi; dok ikela woko ki i can pi porreni! I mar meri ma pe lokke pira, nek lukworra ityekgi woko, pien an abedo laticci. Gipwo Rwot ma en aye gotta, ma opwonyo ciŋa pi lweny, dok oŋiyo lwet ciŋa woko ki lweny. En gotta ki cel gogona matek, en kakannena ki lalarra, en gwoka macalo kwot, ariŋo alaro bote, en ma obwoyo rok mapol, omiyo gubedo i te locca, Ai Rwot, dano gin aŋo ma miyo ipo pire? Dano adana ma mwa-ni piŋo ibedo ka tamo pire? Dano obedo calo yamo me yweyo keken, nino me kwone bene obedo calo tipo ma kato woko oyotoyot, Ai Rwot, ywa polo idwok cen, ci ilor ibin piny! Gud kom godi ci wek guduny yito! Mi lutkot owil omeny piny oket woko ata, celgi ki ateroni ci iradgi woko piny. Rye ciŋi piny ki i polo, ywaya ci ikwanya woko ki i pii matut, lara ki i ciŋ lurok, ma gibedo ka loko lok goba keken. Kadi bed gutiŋo ciŋgi me kwoŋo kwoŋ, ento pud inoŋo ni giloko lok goba. Abiwero wer manyen boti, ai Rwot; abigoyo naŋa ma giciko ki tol puc apar kun apaki kwede. In aye ma imiyo loc bot luker, dok ilaro laticci Daudi, Lara ki i lak pala lucwan mager, dok ilara ki i ciŋ lurok ma giloko megi lok goba keken-ni; kadi bed gutiŋo ciŋgi me kwoŋo kwoŋ, ento pud inoŋo ni giloko lok goba. Mi litino awobewa kakagi-ni gubed calo ginapita ma doŋ otyeko doŋo woko; ki anyirawa bene gubed macalo wir me twoke ma gitoŋo me gero gaŋkal madit. Mi derowa ducu gupoŋ woko libic ki kit wit cam mapatpat. Mi romiwa bene gunywal litinogi alip ki dok alip apar i oletwa. Mi dyaniwa bene guduru gunywal litinogi ma pe igi myero opot woko nyo gubwog litinogi abwoga. Pe imi koko me can mo owinnye i dye ganwal Gitye ki yomcwiny jo ma kit gum man bipoto i komgi! Gitye ki gum jo ma Rwot aye Lubaŋagi! Abidwori ki wer, in Lubaŋana ki kabakana, dok abipako nyiŋi nakanaka. Abipwoyi nino ducu, dok abipako nyiŋi nakanaka, Rwot dit, myero gipake twatwal, ditte pe romo titte, tere pe tatte. Lwak me kare ducu gibipako ticci bot litinogi; gibituco tic matego ma yam itiyogi. Abilwodo lok i kom deyo me dit me kerri, ki i kom tic me aura ma ceŋ itiyo. Jo gibilok i kom tek me ticci ma kelo lworo bot dano-ni, ki an bene abitito pi ditti. Gibimiyo pi berri madwoŋ ywek ŋene mada i kin dano, dok gibiwero wer ki dwan maloŋo pi porreni. Rwot lakica dok maro dano, kiniga pe mako oyot, mar mere ma pe lokke dwoŋ, Rwot ber bot dano ducu, dok kica make i kom gin ducu ma en oketo. Ai Rwot, jami ducu ma in icweyo gibimiyi pwoc, ki joni ma geni ducu gibipaki. Gibiloko i kom deyo me kerri, dok gibitito pi tweroni bene, wek dano ducu guŋe pi tic matego ma in doŋ itiyo, ki deyo me dit me kerri. Kerri en ker ma ri nakanaka, dok locci biri nakanaka i kare pa yalwak ducu. Rwot lagen i lokke ducu ma en ociko, dok bene lakica i ticce ducu ma en tiyo, Rwot kwako dano ma mito poto, dok ilo joma piny obwoyogi woko ada malo. Waŋ dano ducu neno boti, in aye ma iminigi cam i kare ma mitte kikome, In iyabo ciŋi, ci imiyo gin makwo ducu giyeŋ. Gin ducu ma Rwot tiyo tye atir, gin ma en timo ducu tiyo ki mar. Rwot tye cok bot jo ducu ma kok bote, ma gikok bote ki ada. En miyo jami ducu ma mitte bot jo ma lwore, dok winyo kokogi, ci larogi bene, Rwot, gwoko jo ducu ma mare; ento jo maraco ducu en binekogi tyekogi woko. Abipako Rwot kare ducu; wek gin makwo ducu ma tye ki kom gupak nyiŋ Rwot nakanaka. Wupak Rwot! Pak Rwot, in tipona! Abipako Rwot pi kare ducu me kwona; abiwero wer me pako Lubaŋana ka pud akwo. Pe ibed ka geno rwodi, pe igen dano adana mamwa ma pe romo konyi-ni. Ka oto dok i nom ka ma yam oa ki iye; yubbe ducu mayam oyubo rwenyo woko liweŋ i nine-meno kikome, Tye ki gum dano ma geno Lubaŋa pa Yakobo me konye; ma genne ducu tye i kom Rwot Lubaŋane, ma oketo polo ki lobo, ki nam, ki jami ducu ma tye i igi, En gwoko cikkene nakanaka; en ŋolo kop pa jo ma giunogi kakare, dok miyo cam bot jo ma kec nekogi. Rwot gonyo lumabuc woko; Rwot yabo waŋ jo ma waŋgi oto. Rwot ilo jo ma piny obwoyogi woko ada malo, Rwot maro jo ma kitgi atir. Rwot gwoko jo ma gin lubedo i lobo mo-ni, en konyo mon to ki litino-kic: ento balo yub pa jo maraco woko, miyo pe cobbe matwal. Rwot bibedo ka loc nakanaka; Lubaŋani, in Cion, bibedo pi kare pa yalwak ducu. Wupak Rwot! Wupak Rwot! Pien wero wer me pako Lubaŋawa ber, pien en lakica, mumiyo wer me pak myero kwede, Rwot tye ka gero Jerucalem odoco; en coko jo Icrael ma yam giterogi i opii kelogi paco. En caŋo jo ma cwinygi cwer, dok tweyo waŋ retgi woko, En omoko wel lakalatwe woko ducu, ocako nyiŋgi woko ducu liweŋ. Rwotwa dit, dok tek twatwal; tye ki niaŋ matut ma pe pimme. Rwot tiŋo jo ma ginyonogi piny, ilogi malo, ci reto jo maraco gipoto woko ducu i ŋom. Wuwer wer bot Rwot kun wumiye pwoc; wupak Lubaŋawa ki opuk agoya. En umo polo woko ki pol, dok miyo kot cwer i lobo; en miyo lum doŋo wa i wi godi-gu. En miyo cam bot lee tim, dok pito litino agak ma tye ka koko. Tek pa aguragura pe miye yomcwiny, ki tyen dano ma laŋwec bene pe yomo cwinye; ento Rwot cwinye yom i kom jo ma gilwore, ki i kom jo ma geno mar mere ma pe lokke, Pak Rwot, in Jerucalem! Pak Lubaŋani, in Cion! En aye ma gwoko dog gaŋŋi miyo cuŋ matek; en bene ma miyo gum i kom joni. En miyo waŋ apokki loboni bedo ki kuc, dok miyowu kal maber mabup adada weko wuyeŋ. En cwalo cikke bot lobo; lokke riŋo bino oyotoyot, En cwalo pee mayom calo yer romo; dok keto bwoyo pee woko atata calo buru. En bolo pee piny calo ŋinyoŋinyo cam ma poto i ŋom; aŋa ma twero cuŋ i ŋico ma en miyo? En dok cwalo lokke, ci lenyo pee woko; en miyo yamone kodo, ci pii bene mol. En tito lokke bot Yakobo; cikke ki gin ducu ma en ociko en tito bot jo Icrael. En pe obedo ka tic ki rok mo mukene kit meno; pe giŋeyo cikke ki gin ma en ociko ducu, Wupak Rwot! Wupak Rwot! Wupak Rwot ki i polo, ki wun jo ma wubedo malo ka mabor bene wupake! Wun lumalaikane ducu, wupake, ki wun dul monnye bene wupake! Wun ceŋ ki dwe wupake, wun lakalatwe ma ryeny, wupake! Wupake, wun polo ma tye malo twatwal, ki wun pii ma wutye malo i wi polo bene wupake! Wek gin ducu gupak nyiŋ Rwot! En ociko acika keken ci gukette. En oketogi i kabedogi doŋ me bedo iye matwal, oketo Waŋ apokkigi bene ma pe gitwero kato ki iye. Wupak Rwot ki i lobo, wun nyaŋ madoŋo me nam, kacel ki nam madoŋo matut-gu, wun mac ki pee, toyo ki ŋico, ki yamo lapiru ma kodo matek pi cobo gin ma en ociko! Wupake, wun godi ki cere-gu, wun yadi ma nyak ki yadi cedar ducu! Lee tim-gu ki dyaŋi ducu, gin makwo ma lak alaka i ŋom ki winyo ducu ma tuk! Wupake, wun luker me lobo kacel ki lwak me rok ducu, rwodi ki luloc ducu me lobo! Awobe ki anyira kacel, jo muti ki litino! Wek gupak nyiŋ Rwot, pien nyiŋe keken aye dit makato ducu; deyone bene kato polo ki lobo woko. En doŋ omiyo lwakke odoko tek, en mumiyo jone ducu gipake, gin jo Icrael ma pigi tek mada bote. Wupak Rwot! Wupak Rwot! Wuwer wer manyen bot Rwot; wupake i cokke pa lwak ma gigene! Wun jo Icrael, cwinywu myero obed yom i kom Lubaŋa muketowu: wun jo Cion, wubed ki yomcwiny pi kabakawu! Wupak nyiŋe ki myel; wugo bul ki naŋa-gu kun wupake kwede. Pien Rwot cwinye yom i kom lwakke; en miyo deyo bot jo mamwol, miyo giloyo. Wek jone ma gigene gugo kijira ki deyo; wek guwer wer me yomcwiny i karamagi, Wek gudaŋŋe matek ki dwan malogo ka gipako Rwot, dok gumak pala lucwan ma lebe bit ryoryo i ciggl, me culo kwor i kom lurok, ki dok me pwodo lwak me rok mapol, me tweyo lukergi woko ducu ki nyor, ki me tweyo luditogi me awora woko ducu ki nyor me nyonyo, ki me ŋolo kop i komgi kit ma yam gicoyo! Man aye deyo pi lwakke ducu ma gigene. Wupak Rwot! Wupak Rwot. Wupak Rwot i kabedone maleŋ; wupake bene i dan polone matek! Wupake pi tic matego ma en otiyo; wupake pi ditte madwoŋ makato ducu-ni. Wupake kun wukuto tum; wupake ki nyamulere ki ŋaŋa! Wupake ki myel ki ajaa agoya-gu; wupake ki naŋa-gu ki lukemme! Wupake ki bul ma kok maloŋo; wupake bene ki atego agoya-gu ma kok maloŋo! Wek gin makwo ducu ma ywe gupak Rwot! Wupak Rwot! Carolok pa Solomon, wod pa Daudi, kabaka me Icrael. Carolok magi konyo dano me ŋeyo ryeko ki pwony maber, ki me niaŋ lok ma miyo niaŋ matut, dok gipwonyo dano me bedo ki ryeko i gin ducu ma en tiyo, bedo ki kit ma tye atir, ŋolo kop atir, kun tiyo ki dano ducu maromrom. Gipwonyo dano ma pe tye ki kit ŋec mo, ci doko ryek; dok miyo ŋec bot jo matino me moko lok maber pigi kengi. Carolok magi bene medo ŋec bot ŋat maryek, telo dano ma tye ki niaŋ matut i ticce, miyo giniaŋ tyen lok me carolok ki cal gin ma giloko i kome, ki lok pa luryeko, ki ododo ma giboko. Ka dano lworo Rwot, ci en cako noŋo ŋec; jo mamiŋ gicayo ryeko dok gikwero pwonnye woko. Latin, winy lok ma woru pwonyi kwede, pe ikwer winyo pwony pa meni bene’ pien pwonygi twero yubo kiti maber, tye calo tok maber me aketa i wii, dok calo gi-ŋut ma iketo i ŋuti miyo inen mwonya. Latinna, ka lubalo giomo cwinyi ki lok mo, pe myero iye. Gwok nyo gibiwacci, “Bin kacel kwedwa, wek waki dano mo wanek woko, wakur dano ma pe tye ki bal wanek woko; wek wamwonygi woko ducu makwo macalo lyel, gubed macalo jo ma donyo piny i bur. Lonyo mapatpat ducu bidoko mewa, odiwa bipoŋ ki jami ma wayako; bin iribbe kwedwa, wan ducu wabitic ki kicaa, lim acel.” Latinna, pe iribbe ka wot ki jo macalo meno, gwokke pe ilub korgi; tyengi lyet me ŋwec ka timo bal, gin nino ducu gitye ma guyubbe me oyo remo pa dano. Ciko obwo konyo aŋo ka winyo tye ka neni? Ento jo macalo meno giciko owic pigi kengi, gin gibito i owicgi kengi. Meno aye can ma mako jo ma gin lubwami, meno aye gin ma neko lakwo. Wuwiny, ryeko tye ka lwoŋo i yo gudo-gu; en kok ma lwoŋo lwoŋo i cuk ki dwane maloŋo; en tye ka lwoŋo matek ki i wi cel; wa i dog gan-gu en bedo ka lok aloka ni, “Wun jo ma lumiŋ, wumito wubed miŋ pi kare ma rom mene? Luŋala mono gibibedo ki yomcwiny pi kare ma rom mene ki ŋalagi-ni? Lumiŋ, wun wudag pwonnye ma miyowu ŋec? Wuwiny lok ma an awaco botwu; nen, abinyuto tamma ducu botwu; abimiyo wuŋeyo lokka. Abedo ka lwoŋowu ni wubin, ento wun wukwero winyo lwoŋona; aryeyo ciŋa, ento pe tye ŋat mo ma oketo iye cwinye. Wucayo tamma ducu ma amiyo botwu, wun pe wuye ni ayubwu. Pi meno ka can opoto i komwu an abinyerowu anyera; abiŋalowu bene aŋala ka gin ma kelo lworo opoto i komwu ma obaŋowu woko. I kare ma can man bibaŋowu woko macalo yamo me nam, can ma poto i komwu bene bino macalo yamo lapiru, en aye i kare meno wubibedo ki arem ki cwercwiny madwoŋ. I kare meno aye gibicako lwona kwede, ento an pe abigamo doggi; gibiyenya ki cwinygi ducu ento pe gibinona. Gukwero ŋec ma miyo gipwormye dok bene pe guye lworo Rwot, pien gukwero winyo tamma, dok gucayo yub ma mera pi gin; pi meno gibikoko aŋee pi gin marac ma gutimo dok gibikumo pi timgi maraco, Jo ma pe gitye ki ŋec gito pien gukwero yenyo ryeko, ki yomcwiny ma lumiŋ gitye kwede en aye tyekogi, Ento ŋat ma biwinyo lokka bibedo ma ocuŋ matek; en bibedo ma pe lworo gin marac, laboŋo par mo.” Latinna, ka ce iketo lokka i cwinyi, ma igwoko bene cikka i tammi, kun itero iti ka winyo lok me ryeko, iketo cwinyi bene me niaŋ, iyo, kok pi gin ma ineno ki i cwinyi, dok ikok ki dwan maloŋo pi niaŋ. Ka ce iyenyo macalo iyenyo lim, kun iyenyo bene macalo it ye ka yenyo lonyo ma gikano; ka itimo meno, ci ibiniaŋ i kit me lworo Rwot dok ibibedo ki ŋec i kom Lubaŋa, Rwot aye ma miyo ryeko; ŋec ki niaŋ bene gia hote. En kano ryeko maber twatwal pi jo ma cwinygi atir; en kwot ma gwoko jo ma cwinygi leŋ, dok gwoko jo ma giŋolo kop atir, gwoko bene jo ma gumiyo kwogi bote. Ibiniaŋ gin ma tye atir ki ŋolo kop ma atir, ci ibilubo yo ma tye atir keken; pi meno cwinyi bipoŋ ki ryeko, ki ŋec ma ibilimo bimiyo ibedo ki yomcwiny. Tut cwinyi bigwoki, niaŋ maberri bikuri; bilari ki i yo me gin marac, dok bilari ki i ciŋ dano ma gikelo ayelayela, pi lok ma giwaco. Gin jo ma gibwoto bedo ki kwo ma tye atir, ma gimito wot i piny macol, kun cwinygi yom i timo gin marac dok ginoŋo yomcwinygi i gin marac ma kelo ayelayela: gin jo ma yogi ogom, dok kitgi pe atir, gimaro timo gin maraco, Bimiyo iloyo tam pa dako ma lakwele, ma noŋo biti ki lok mapwot me ywayo tammi. En dako ma bwoto cware ma onyome ka tinone, kun pe gwoko gicikke ma Lubaŋane oketo; ma ka idonyo i ode ilwiny piny i to, yo pa dako-nu teri mere i lobo pa jo muto; pe tye ŋat mo ma donyo bote ma twero noŋo yone me dwogo cen, pe bene gitwero noŋo yo ma tero dano i kwo. Myero ilub yo pa jo ma kitgi beco, kun ilubo yo pa jo ma kitgi atir. Jo ma cwinygi atir gibibedo i lobo ki jo ma gin lugen ma pe gitye ki bal mo gibibedo iye matwal; ento jo maraco gibityekogi woko ki i lobo meno, ki jo ma guŋayo waŋ Rwot pi bal me nek bene gibipujogi macalo giputo doo. Latinna, pe myero wii owil i kom pwony ma apwonyi kwede, ento gwok cikka i cwinyi; pwonnya ducu bimiyi iri i lobo pi kare malac, pi mwaka mapol, ki dok bimiyo ibedo ki kuc ki lonyo madwoŋ. Pe ibwot ada ki gen ma itye kwede; twegi gubed i ŋuti, dok icogi i cwinyi macalo icoyo i kom got. Kit meno ibinoŋo gum ki kit maber i waŋ Lubaŋa kacel ki i waŋ dano. Gen Rwot ki cwinyi ducu, pe ibed ka jeŋŋe i kom niaŋ ma itye kwede. I kit kwoni ducu wii myero opo i kom Rwot, ci en bitiro yo ma iwoto iye bedo atir. Pe myero ibed ka tamo kekeni ni iryek; lwor Rwot, ci ilokke iwek timo gin marac. Meno aye yat ma bicano two ki i komi, dok bimiyo cogoni gibedo matek, Wor Rwot ki lonyoni ma itye kwede ducu, dok ityer cam mukwono cek i potoni me wi mwaka; ci deroni bipoŋ ki cam madwoŋ, ki koŋo vino ma ipiko i opoko bityero opoko ci mol woko liweŋ. Latinna, pe myero ica juk pa Rwot, myero imak lok ma en yubi kwede macalo lok me poyo wii, pien Rwot pwonyo dok yubo ŋat ma en maro, en tye macalo wego ma pwodo latin ma cwinye maro adada. Dano ma doŋ onoŋo ryeko tye ki yomcwiny, ki dano ma doŋ olimo niaŋ matut bedo kit meno, pien kelo gin maber makato lonyo me ryal, ki magoba me lonyone bene kato me jabu, Ryeko ber kato jami me wel-gu, pe tye gin mo ma imito ma gitwero poro kwede. Ryeko tye ki kwo ma ri nakanaka i ciŋe tuŋ acuc; lonyo kacel ki deyo gitye i ciŋe tuŋ acam, Yone yo ma miyo yomcwiny madwoŋ,’ ka iwoto i yone ducu inoŋo kuc keken, Ryeko tye macalo yat me kwo bot, jo ma gumako matek likiŋ; Jo ma gumake matek likiŋ gilwonogi jo ma cwinygi yom. Rwot oketo lobo ki ryekone; dok pi ŋecce omiyo en oketo polo i kabedone; pii ma tye i te lobo ogunnye pi ŋecce, ki toyo bene oa ki i pol ocwer obino piny i lobo. Latinna, gwok ryekoni kacel ki niaŋ matut ma it ye kwede; pe iwek gurweny woko ki i waŋi; gibimiyo ibedo ki kwo i cwinyi, dok gibibedo macalo gin mo ma iruko i nuti me deyo. Doŋ ibiwoto i yoni ma cwinyi tek ma pe iparo gin mo, tyeni bene pe bigwamje atata. Ka ce ibedo piny, pe ibilworo gin mo liweŋ; ka doŋ ibuto piny, ci ibinino nino mamit atika. Pe myero ilwor ka ineno can opoto i kom jo maraco macalo yamo kot, kadi bed ka can opoto i kom jo maraco otyekogi woko liweŋ: pien Rwot aye bibedo ŋat ma igeno; dok en bigwoki, miyo owic pe mako tyeni. Pe ikwer tiyo gin maber bot dano ma mito ni ikonye, ma noŋo it ye ki twero me tiyone, Pe iwac ki lawoti ni, “Koŋ iciti, ka dok idwog kany aye, abimiyi diki,” ma kun noŋo tye boti en gin ma en mito-ni. Pe myero ipir lok me timo gin marac i kom lawoti, ma kun noŋo en bedo ki gen i komi nino ducu, Pe myero ipyem ki dano mo laboŋo tyen lok mo, ma kun noŋo en pe otimo gin mo marac i komi. Pe iwek nyeko omaki i kom jo ma gin lubwami, dok pe ilub kitgi mo kadi ki acel; pien Rwot dag jo ma gitimo gin marac akaka, ento en tye ki gen i kom jo ma kitgi atir, Rwot ceno gaŋi pa jo maraco, ento en miyo gum i kom gaŋi pa jo ma kitgr atir. Rwot cayo jo ma luŋala, en nyuto kicane bot jo mawmol. Jo ma gin luryeko giketo deyo madit i komgi, ento lumiŋ ginoŋo megi can keken, Litino, wuwiny pwony ma wonwu pwonyowu kwede, wuket cwinywu ka winyone, miyo wubibedo ki niaŋ matut. Gin ma atye ka pwonyowu kwede en gin maber mada; pe myero wubwoti, ento wiwu opo iye. I kare ma onoŋo an pud latin matidi, ma pud abedo latin acel keken bot maa, wora obedo ka pwonya, kun wacca ni, “Ket lok ma apwonyi kwede-gu ducu i cwinyi; lub cikka wek ibed kwo. Wii pe owil, dok bene pe myero ibwot lok ma apwonyi kwede. Noŋ ryeko kacel ki niaŋ matut. Myero imar ryeko, pe ikwer; pien en bigwoki miyo ibedo maber laboŋo ayela mo, Kit ma itwero doko ryek kwede ene: Noŋ ryeko, ket cwinyi wek ibed ki cwiny me niaŋ makato jami mukene ducu. Mar ryeko, ci en bimiyo idoko dit; ka ce imako maber, ci bimiyi deyo. Ryeko bikelo deyo boti, bimiyo dano giwori.” Latin, koŋ iwiny lokka dok iket bene i cwinyi, ci ibiri i lobo pi mwaka mapol. Doŋ atyeko pwonyi ki yo me ryeko, atyeko nyuto boti bene kit yo me bedo ki kwo ma tye atir. Gin mo pe ma birine i nyimi ka ce it ye ka wot ki ryeko; ka ibinwec, ci pe ibitwomme atata. Mak pwony ma gimiyoni-ni matek, pe iwek obwoti; gwok maber, pien meno aye kwoni. Pe ilub yo pa jo maraco, pe ilub kit kwo pa jo ma gin lutim maraco. Gwokke, pe iwot ki i yogi; lokke iwek timo gin marac, ci iwot meri anyim. Jo maraco pe gitwero nino ka peya gutimo tim marac; dok pe gitwero nino ka ce peya gumiyo dano mo opoto i can. Timo tim maraco odoko calo cam ki botgi ki timo bwami bene odoko calo koŋo vino ma gimato-ni. Ento yo pa jo ma kitgi atir calo dero me rupiny, ma ryeny nio waŋ ma piny doŋ leŋ. Yo pa jo maraco col calo dyewor; ka gupoto bene ci pe giniaŋ gin ma noŋo oyokogi. Latinna, ket cwinyi i lokka; winy gin ma an awaco, Pe myero iwek orweny woko ki boti; myero igwok i cwinyi. Lok magi gimiyo kwo bot ŋat ma owinyogi, dok caŋo two ma i kome woko ducu. Gwokke i kom tam ma itamo ki i cwinyi ducu; pien kwoni ducu a ki i lok ma icwinyi. Pe myero ibed ka loko lok mugom, wek loko lok goba bene obedi. Myero inen anyim atir, dok icik waŋi me neno jami ducu ma tye anyim. Myero iŋi gin ma ilubo, ci bimiyo gin ma itiyo ducu bedo atir. Pe iŋak idok tuŋ acuc nyo tuŋ acam; lokke, pe imar timo gin marac. Latinna, ket cwinyi ka winyo lok me ryekona, cik iti bene ka winyo kit ma niaŋŋa tye kwede; miyo ibiŋeyo kit kwo ma mitte, dok lok ducu ma ibiloko binyuto ada ni, kara it ye ki ŋec, Dako ma lakwele mere kite enu, lok doge lim calo kic, noŋo lokke bene pwot kato moo woko; ento i agikkine inoŋo doko kec macalo yat roka, ma noŋo bit ryoryo calo pala lucwan. Dako-nu biteri wa i lyel; yo ma en woto ki iye cito i to keken. En pe tye ka lubo yo ma tero dano ikwo; tye ka cabbe atata kwone kun en bene pe ŋeyo. Litino, kombeddi doŋ wuwiny lokka; pe myero wuweki, dok wiwu pe owil i lok ma awaco, Pe icit bot dako ma lakwele-ni, pe icit cok ki doggolane. Ka itimo kumeno, ci woro ma yam gimiyo boti bidoko pa jo mukene, dok jo ma pe gin lukica gibineki woko ma noŋo mwaka me toni peya oromo. Ji ata gibiyako lonyoni woko ducu, gin ma ibedo ka tic pire matek larok bitero woko ducu; meno bimiyo icur i kare ma noŋo doŋ icok to, ma noŋo riŋo komi kacel ki cogoni gibijuŋŋe woko. Doŋ ibiwacci, “Piŋo akwero winyo lok me pwony, dok abedo ka cayo lok me juk ki i cwinya? Pe abedo ka winyo lok ma lupwonnya gubedo ka pwonya kwede, ada pe awinyo lokgi. Cutcut anoŋo ni nyiŋa doŋ oballe woko, dok lwak ma gucokke ducu gicayo an acaya.” Mat pii ma a ki i taŋi meri kikomi, ki pii ma mol bene ma a ki i waŋ it meri kikome. Pe myero iwek pii ma tye i waŋ it meri ducu omol oket woko ata, ma piine mol poŋ wa i yo-gu ducu. Wek piine obed meri keken me konyi, ento pe obed me konyo ji ata. Gum obed i kom dakoni ma inyomo ka tinoni ma en waŋ it meri, dok cwinyi myero obed yom i kome, en dako ma nen mwonya mada, ma yomo cwinyi atika, Nen berre wek oyomcwinyi i kare ducu, kare ducu wek mar mere olo kwoni. Latinna, piŋo imiyo gibwoli kun imaro dako ma malaya? Piŋo ikwako kor dako ma lakwele? Rwot ŋeyo kit kwo pa dano acel acel, dok neno ka ma en cito iye ducu. Bal pa ŋat marac tye macalo owic ma mako tyene, bal ma en timo-ni aye mako en, En to pien pe twero jukke kene, doŋ en rwenyo woko ki miŋo madit ma en tye kwede. Latinna, ka in iye me cuŋ pi lawoti, dok ijeno jamini pi dano mo ata, lokki ma iloko odoko owic piri, pien noŋo gimako lok ki i dogi. Pi meno, latinna, tim kuman, ci ibilaro kwoni, pien kombeddi doŋ ipoto i ciŋ lawoti; cit oyotoyot ibak dogi bote. Pe myero iniŋ, pe myero waŋi omak nino ma miyi yweyo matek; lar komi macalo til ma riŋo laro kome ki bot ladwar, macalo winyo ma tuk woko ki i owic pa ladwar, In lawackom, nen kit ma ŋiniŋini tiyo kwede; mito koŋ ibed ki ryeko me neno kite. Pe gitye ki rwot mo, kadi ladit nyo laloc mo; giyubo cam me akana i kare me oro, dok gicoko wit cam mapatpat i kare me kac. In lawackom mono, ibibedo ka buto abuta pi kare ma Tom mene? Ibico awene ki i waŋ nino? Ka ibuto inino manok, dok idolo ciŋi woko omiyi yweyo, man bimiyo can maki kit macalo layak mako kwede dano, ma noŋo orukke woko ki jami lweny. Dano marac, ma konnye pe, woto mere atata ki lok me bwola keken, kun gayo dano ki waŋe, dok gwelo ki tyene, ka doŋ cimo piny atata ki lwete, ma noŋo en tye ki cwiny muŋak mupoŋ ki tam maraco keken, dok miyo en tubo dano teretere. Pi meno can bipoto i kome atura; pi kare manok keken ret bimake ma pe doŋ bicaŋ. Rwot dag jami ma romo abicel, tye jami abiro kulu ma gin ducu gin me kwer ki tuŋ bote: en dag dano ma tamo ni eryek pire kene, ma loko lok goba, en bene dag jo ma gioyo remo pa jo ma pe ki bal. Rwot dag dano ma cwinye opoŋ ki yub me timo gin marac, ki jo ma giriŋo oyotoyot ka tiyo gin marac, en dag bene caden ma loko lok goba, ki ŋat ma tubo omegine. Latinna, myero ilub gin ma woru otito boti, dok pe ibwot pwony pa menni. Ket lok magi ducu i cwinyi kare ducu; gwok lok magi macalo igwoko gin mo ma itweyo i ŋuti. Lok magi gibiteli i wotti; kadi ka ibuto piny bene gibikuri i kom gin marac; dok ka ico ki i waŋ nino gibipwonyi kit ma myero ibed kwede. Cik tye macalo tara, ki pwony bene tye macalo ceŋ ma ryeny, doŋ pwony me yubo kit pa dano en aye yo me kwo, Lok magi gibimiyo igwokke ma pe ibedo ki dako ma kite rac, man bimiyo iloyo tam pa dako ma lakwele. Pe myero cwinyi opar pi berre-ni, dok pe iwek waŋe ma en neni kwede oywa tammi. Laco mo keken twero wilo dako ma lakwele ki mugati acel ci bedo kwede, ento tim me abor twero balo kwo pa laco ma bedo ki dako pa ŋat mukene. Dano twero kwanyo mac keto i kore, ci mac pe waŋo boŋone woko? Aŋa ma twero wot i lodi mac ma tyene pe biwaŋ woko? ŋat ma cito bedo ki dako pa lawote bene limo-can kit meno; pe tye ŋat mo ma bwot ma pe giketo can i kome, ka obedo ki dako pa lawote. Dano pe gicayo lakwo ka okwalo cam ma noŋo kec neke kun mito eyeŋ? ka ce gimako en lakwo-nu, en biculo cul ma romo wan abiro kulu; dok bimiyo jami ma i ode woko ducu pi cul. Dano ma timo abor noŋo pe ryek; ŋat ma tiyo gin macalo meno kelo can i kome kene, Dano gibiketo ret i kome dok gibicaye, dok cwercwiny me can ma en bilimo pe biwany ki i cwinye. Dano ma tye ki nyeko bedo ki kiniga madwoŋ, ma ka oero lweny ci neko dano cut, noŋo pe ye juk. En pe biye kit cul mo kadi ki acel, dok kadi gimiye lwak mot mapol, magi ducu pe twero juko kinigane. Latinna, mak lokka, dok ikan gin ma an aciki kwede ducu macalo lonyo madit. Lub cikka wek ibed kwo, gwok lok ma apwonyi kwede kit macalo igwoko kwede waŋi, Gwokgi maber kare ducu, cogi woko ducu i cwinyi. Myero iwac ki ryeko ni, “In lamera”, ki niaŋ matut bene myero ilwoŋ ni laremi ma imaro adada. Man bigwoki me bedo ki tam i kom dako ma lakwele, man bimiyo iloyo tam pa dako ma lalak ata, kadi bed noŋ loko lok mamit calo gin aŋo. I kare ma ayabo waŋ dirica me oda, ci aneno piny wa ki i waŋ dirica me kicikana. Aneno lwak jo matino ma pe gitye ki ŋec mo wacel; aneno i kin jo magi matino, awobi mo ma lamiŋ atika. En obedo ka wot ki i yo kun kato ki i twok ot pa dako ma lakwele, kun lubo yo ma cito i ot pa dako meno, wi otyeno, ma piny aŋa kato-ni, i dyewor ma onoŋo piny doŋ col. Nen, dako mo orwatte kwede, ma orukke calo lakwele kikome ma cwinye opoŋ ki lok me bwola. En dano ma lewic pe make, lawot ata, kome pe ye bedo gaŋ kacel; ka pud ineno tye ka wot i gudo koni dok ineno noŋo opille wa i cuk, i twok yo ducu buto kuro piny. Ka oneno laco ci mwomme mako woko likiŋ, noto leme, kun nenowaŋe atir laboŋo lewic mo, ka wacce ni, “Atyeko tyero gitum tin, dok tin acobo kwoŋŋa; kombeddi an abino ka rwatte kwedi, ayenyi ki cwinya ducu, ci doŋ anoŋi. Atyeko peto cuka i wi kitandana, boŋo cuka ma raŋigi patpat ma gikelogi ki i Ejipt; dok atyeko kiro moo murra I kom kitandana, akiro bene moo ma ŋwece kur ki cinamon mamit. Bin, wek wabed kacel nio odiko ki mar keken; wek wabed ki yomcwiny pi mar ma watye kwede. Cwara tin pe paco; ocito woko welo i wot mabor. Omako lim ki kicaane ducu ocito kwede; en bidwogo paco kany ka dwe ogudo got.” Dako-nu obedo ka bito nyer-ri ki lwak lok gobagoba mapol ata; olo twal odiyo laco meno ki lokke mapwot-ti. Cutcut nyer-ri otuggi lubo kor dako-nu, calo twon ma gipeyo gitero ka nekone, nyo macalo til ma omoko i owic, nio ka atero ocelo cin iye otuco woko pil. Bedo calo winyo ma riŋo laro i owic; en pe ŋeyo ni tim macalo meno bimiyo erwenyo kwone kulu. Kombeddi wun litino, wuwiny lokka, wucik itwu maber ka winyo lok ducu ma katti ki i doga. Pe myero iwek cwinyi obiti me lubo kit kwo pa dako-nu, pe iŋak ilub kore Dako-nu oneko lwak co mapol ata; ada, jo ma en onekogi welgi pe kwanne. Ode ma en bedo iye-ni meno mere lyel, meno aye yo ma tero dano i to. Pe wutye ka winyo ka ryeko daŋŋe matek, ki niaŋ matut bene mito ni giwiny dwane? I wi cere ducu ma i ŋet yo noŋo en ocuŋ i aŋakaŋaka yo-gu ducu. I dogcel ma gidonyo kwede i gaŋ, en tye ka daŋŋe ki i dog gaŋ matek twatwal ni, “Wuwiny, atye ka lwoŋo wun co, lwoŋona-ni tye pi dano ducu. Wun jo ma pe ryek, wudok calo jo ma doŋ guteggi; wun lumiŋ bene wuket cwinywu me winyo lok man. Wuwiny, pien gin ma abetito-ni obedo lok mabeco, dok lok ducu ma abiloko bibedo lok atir; pien abiloko ada keken; gin marac pe bikatti ki i doga, pien bedo me kwer ki tuŋ bota. Lok ducu ma awaco tye atir; pe tye gin mo ma gidwalo tere nyo mugom i lokka. Lokka ducu tye atir bot ŋat ma twero niaŋ, dok winnye maber bot jo ma gitye ki ŋec muromo. Wumak pwony ma apwonyowu kwede ma ka kwanyo lim, dok wugam ŋec ma ka kwanyo lonyo. Ryeko ber makato jami me wel-gu, kadi ki jami mukene ducu ma cwinywu malo pe giromo poro kwede, An ryeko, atye ki tam matut, dok alimo ŋec ki tam maber me moko loko Gat ma lworo Lubaŋa pe tiyo gin marac. Wakke ki nyatte ki yo me tiyo gin marac ki lok ducu ma gidwalo tere ma pe tye atir ducu cwinya dagi. Atye ki twero me miyo tam ki me keto yub ducu i tic, atye ki niaŋ matut dok atek. Luker ducu giloyo loc pi twerona, dok pira miyo luloc giketo cik ma tye atir. Rwodi ma giloyo lobo giloyo pi kony mera, ki ludito ducu ma giloyo lobo bene kit meno. An amaro jo ma gimara, jo ma gibedo ka yenyo an ki cwinygi ducu bene gibinoŋa. At ye ki lonyo kacel ki deyo, ki lonyo ma ri, ki kwo maber, ma abimiyo botgi. Gin ma amiyo botwu ber kato jabu, kato kadi wa jabu maberre, dok gin ma wulimo ki bota kato ryal ma giliyo maber. Alubo kit ma tye atir, eh aye yo me ŋolo kop kakare; abimiyo lonyo bot jo ma gimara, dok abipoŋo odi me kano limgi ki lim madwoŋ. “Rwot oketo an ryeko macalo acakki ticce, man aye obedo ticce ma en otiyo i kare macon twatwal. I kare meno macon giketo an kena, i acakki piny kikome ma peya giketo lobo. Ginywala ma onoŋo nam maditogu bene pud gipe, dok waŋ it-gu bene onoŋo piine pud pe gunnye ma katti woko. Ginywala ma onoŋo godi ducu pud pe ginen, ki cere-gu bene onoŋo pud gipe; ma pud peya Lubaŋa oketo lobo ki, potti ducu ma tye iye, kadi ki apwa me ŋom ma okwoŋo nen, I kare ma en oketo polo onoŋo an doŋ atye, i kare ma Rwot oketo agikki obedo tye i dye nam madoŋo-gu, i kare ma en omiyo polo ocuŋ i kabedone malo, ka dok omiyo waŋ pii me nam madono-gu gucako gunnye. I kare ma en oketo kama nam myero ogik iye, wek pii pe omol oket woko ata miyo balo gin ma en eloko, i kare ma en oketo guti me te lobo ducu, an onoŋo atye, abedo ka ŋete macalo ladiro tic. Dok cwinye obedo yom kare ducu pi an, an abedo ki yomcwiny madwoŋ mada i nyime; ma cwinya okwe pi bedo i lobo ma en oketo-ni, dok cwinya obedo yom i kom litino pa dano. Litinona, kombeddi wuwiny lokka: jo ma gitiyo gin ma awaco botgi aye gibedo ki yomcwiny, Wuwiny pwonnya dok wubed maryek, pe myero wubwot pwonnye ata. Dano ma winyo lokka bedo ki yomcwiny, en dano ma bedo i dog gaŋŋa nino ducu, ma kura i doggolana. Ŋat munoŋo an meno onoŋo kwo, ci Rwot bibedo ki yomcwiny i kome; ento ŋat ma pe onoŋo an biketo ret i kome kekene; ki jo ducu ma gidaga noŋo gimaro to.” Ryeko otyeko gero ode, ocibo iye wir ma romo abiro. En oneko lee pi karama me donyo iye, oonyo koŋo vinone, dok oyubo jami ducu oketo i wi meja. Doŋ ocwalo aŋecane ma gucito ka lwoŋo dano ki i kabedo ma tye malo twatwal ma i gaŋ madit, kun giwacci, “Wubin kany, wun lumiŋ!” Bot ŋat ma wiye odiŋ en wacci, “Bin icam kwonna, dok imat koŋo vino ma aonyo-ni. Wek miŋ obedi, ci ibibedo kwo, dok bene ibibedo ki niaŋ matut.” Dano ma mito ni ejuk laŋala, laŋala nywaro woko anywara, ki ŋat ma mito ni ejuk latim marac, ci latim marac dok keto ret i kome. Pe myero ijuk ŋat ma laŋala, pien miyo bikweri woko; juk dano maryek, ci bimari. Pwony dano maryek, ci ryekone bimedde ameda; pwony dano ma kite tye atir ci en bimedde ameda ki pwony meno. Ka dano lworo Rwot, ci cako noŋo ryeko; dano ma ŋeyo Ŋat Maleŋ bibedo ki niaŋ matut. Ryeko bimiyo nino me kwoni nya doko mapol; dok bimedo mwaka me kwoni, miyo iri i lobo. Ka ce iryek, ci in kikomi aye ma ibinoŋo berre; ento ka ibedo laŋala, ci meno bene biketo peko i komi keni. Dako ma lamiŋ nino ducu wo twatwal; dok en ŋat ma waŋe tar ma pe lewic mako. En bedo i doggolane, nyo i kabedo ma malo ma tye i gaŋ madit, ci cako lwoŋo jo ducu ma gikato ki kenyo, ma noŋo gitye ka wot me cito anyim i yo wotgi, ni, “Ŋat ma lamiŋ myero olokke obin kany!” Bot ŋat ma wiye odiŋ en waco ni, “Pii akwala lim matek, ki kwon ma icamo i muŋ bene yomo cwinyi mada.” Ento laco meno pe ŋeyo ni jo ducu ma gicito bot dako-nu gito woko, jo ma gucito bot dako-nu ducu guto giyikogi i lyel. Carolok pa Solomon. Latin laco ma ryek yomo cwiny wonne, ento latin laco ma miŋ cwero cwiny minne matek. Lonyo ma inoŋo ki tim maraco pe konyi, ento bedo ki kit atir twero lari ki i to. Rwot pe weko kec neko dano ma kite atir, en kwero dano marac, pe noŋo gin ma iye mito. Ka in lawackom ci ibedo meri lacan, ento ka itiyo tic matek ci itwero lony. Latin ma ryek coko cam woko ki i poto ka ocek, ento latin ma nino mere-anina i kare me kac kelo lewic i wiye kene. Rwot miyo gum i kom dano ma kite atir, dano marac muŋo tim bwamine woko., Dano ma kite atir gipo pire pien en lakel gum, ento dano marac nyiŋe biballe woko, wi dano biwil woko i kome matwal. Ŋat ma laryeko i cwinye twero lubo cik, ento dano ma lamiŋ ma loko lok me miŋmiŋ agikkine en aye can keken. Dano ma cwinye leŋ bedo laboŋo lworo mo, ento dano ma loko kite atata biŋene woko. Dano ma bedo ka miyo waŋe kun umo bal kelo ayela, ento ŋat ma juko dano atir kelo kuc. Lok ma jo ma kitgi atir giloko en aye waŋ it me kwo, ento dano marac loko lok kun noŋo omuŋo tim bwamine woko. Adagadaga nyayo lweny ki mone, ento bedo ki mar umo bal ducu. Ŋat ma nino ducu tye ki niaŋ matut loko lok ki ryeko; ento dano ma wiye odiŋ mere ka oloko lok mo, gigoyo ogoya. Jo ma luryeko gilimo ŋec ducu macalo gitwero, ento lamiŋ mere ka loko lokke lwoŋo can me nyiko cok bote. Lonyo bedo calo gaŋ matek bot lulonyo, ento lucan can nekogi aneka. Bakacic pa dano ma kite atir en aye kwo, ento magoba ma dano marac noŋo en aye medde ameda ki timo bal. Dano ma winyo pwony tye ka lubo yo ma tere i kwo, ento dano ma dag juk ŋak mere ki yone pat. Dano ma tye ki adagadaga nino ducu loko lok goba keken, ŋat ma loko lok me kwoto luwote noŋo en lamiŋ. Ka dano mo bedo ka loko lok madwoŋ, ci twero timo bal i lok madwoŋ ma en loko-ni; dano ma ryek gire liŋ aliŋa. Ŋat ma kite atir lokke bene leŋ calo ryal ma giliyo maber: ento tam pa dano marac konnye nok twatwal,. Dano ma ki te atir pwonyo jo mapol ki lokke ma en loko, ento lumiŋ gito atoya pi diŋ wigi. Ka Rwot omiyo gum, dano doko lalonyo; Rwot pe medo cwercwiny i kom gin ma en omiyo. Tiyo gin marac obedo calo tuko ki bot lamiŋ, ento dano ma, tye ki niaŋ matut noŋo yomcwiny i ryeko ma en tye kwede. Gin ma dano marac lworo mada bipoto i kome, ento dano ma kite atir gibicobo mitine. Ka ce yamo mager okodo okato, ci tero wa ki dano marac-ci woko, ento ŋat ma kite atir moko bedo mere matwal. Pe myero icwal dano ma lawackom ni oti tic mo piri; pien tye calo koŋo vino mawac, dok calo yito ma duny donyo i waŋi, Lwor Rwot ci ibiri wi lobo pi mwaka mapol, ento dano marac mwakane me bedo i lobo bibedo manok. Gen pa dano ma kite atir kelo bote yomcwiny, ento gen pa dano marac lal woko ata, Rwot tye macalo cel gogo matek pa ŋat ma yo me kwone tye atir, ento jo ma gin lutim maraco en bityekogi woko liweŋ, Pe tye ŋat mo ma bireto dano ma kite atir; dano marac aye pe bibedo i lobo. Ŋat ma kite atir loko lok ki ryeko, ento ŋat ma loko lok munak me gobagoba Gibiŋolo lebe woko. Ŋat ma kite atir loko lok mabeco ma dano pwoyo bene, kun dano marac noŋo loko mere lok munak ma rwenyo dano arwenya. Rwot dag jo ma gipimo jami ki mijan ma pe pimo kakare, cwinye yom i kom jo ma gitye ki mijan ma pimo jami kakare. Jo ma wakke gibibedo ki cwerwiny; ento jo mamwol gibibedo ki rveko. Jo ma cwinygi atir leŋcwanygi telogi, ento jo ma gin lubal ma kitgi raco gito gitum woko. I kare me akemo pa Rwot, lonyo doko gin ma konnye pe, bedo ki kit atir aye twero laro dano ki i to. Dano ma pe ki bal mo, ma kite atir, woto i yo mapwot, ento ŋat marac poto pi racce. Kit ma atir pa jo ma cwinygi tye atir twero larogi, ento lubal gilokke gidoko opii me bal ma gitimo pi tamgi maraco. Ka dano marac oto, ci genne bene tum woko cut, ki gen pa dano ma pe ŋeyo Lubaŋa bene gik woko. Dano ma kite atir gilaro ki i ayelayela, ma noŋo dano marac poto i can ma ka eno Jo ma pe gilworo Lubaŋa gibalo luwotgi ki lok doggi, ento jo ma kitgi atir gibwot pi ŋecgi, Jo ma i gaŋ ducu gibedo ki yomcwiny, ka dano ma kite atir olimo gum odoko lalonyo; ka inen jo maraco aye guto, jo ma i gaŋ ducu giwo ki twon yomcwiny mo ma pe twerre. Gum ma jo ma kitgi atir gilimo miyo gaŋ doko dit, kun jo maraco gibalo megi gaŋ abala ki lok ma giloko, Dano ma wiye odiŋ cayo lawote acaya, ento dano ma tye ki, niaŋ matut liŋ mere aliŋa mot. Ŋat ma woto ki lok me kwot i kin gaŋ tuco muŋ woko, ŋat ma lagen i cwinye kene aye kano lok me muŋ. Ka ce ineno rok mo pe tye ki dano mo ma telogi maber, ci rok meno poto woko; bedo ki jo mapol ma gin lumi-tam kelo kuc ki bedo maber. Ŋat ma cikke me culo banya pa dano mo ata bikoko aŋee, ŋat ma kwero cuŋ pi cul macalo meno bedo mere mot ki kuc laboŋo lworo mo. Dako maber ma lakica dano giworo, jo ma kitgi pe atir ginoŋo lim ci gidoko lulonyo oyotoyot. Dano ma lakica limo kony pire kene, ento dano mager keto ret i kome kene. Dano marac noŋo mucara me bwolo, ma noŋo dano ma kite atir limo mere bakacic me ada. Ŋat ma omoko likiŋ i bedo ki kit atir bibedo kwo, ento ŋat ma medde ki tiyo gin marac bito. Rwot dag jo ma tamgi oŋak, cwinye yom i kom jo ma gipe ki bal mo. Myero wuniaŋ ni, dano ma latim marac gibimiye can, kono jo ma kitgi atir keken aye gibilarogi. Dako ma nen mwonya maber, ka ce pe romo poko kin gin maber ki marac, noŋo rom ki agit jabu ma girwako i um opego. Jo ma kitgi atir gimito megi jami maber keken; tam pa ŋat marac tum mere i akemo. Jo mogo ma gimiyo limgi kit ma cwinygi opwoyo, gilony gimedde ameda; jo mukene gikano limgi akana ma pe gimito miyone, ci gidoko lucan marac. Dano ma cwinye yom i miyo mot gimedo lonyo madwoŋ bote, Ŋat ma konyo jo mukene en bene gibikonye. Dano giceno ŋat ma kano kai woko ma kun noŋo gimito, ento gilamo gum i kom ŋat ma cato bel botgi. Ŋat ma tamme tye me noŋo gin maber, dano gipwoye; ento ŋat ma yenyo gin marac, noŋo bene gin marac cut, Ŋat ma geno lonyone, bipoto; dano ma kite atir bedo mere ki kwo maber macalo yat ma pote dyak. Ŋat ma kelo ayela i kom jo ma i ode pe binoŋo gin mo matwal, ki ŋat ma lamiŋ bibedo latic pa dano maryek, Ŋat ma kite atir limo kwo macalo adwoggi me bedone atir, doŋ bedo laboŋo lubo cik rwenyo kwo pa dano arwenya. Ka ce dano ma kite atir gitwero miye bakacic i kare ma noŋo en pud tye i lobo kany, doŋ jo maraco kacel ki jo ma gin lubalo kono gibinoŋo can ma rom mene? Dano ma ye pwony noŋo maro ni ebed ki ŋec mo, ŋat ma kwero pwony noŋo miŋ. Rwot bedo ki yomcwiny i kom dano ma kite ber, en ŋolo kop loyo latim marac. Dano pe cuŋ matek pi timo gin marac, ento dano ma tiyo gin ma atir bedo calo lwit yat mudonyo matut i ŋom ma ŋat mo pe roma putone. Dako makwiri ma kite ber miyo dano keto deyo i kom cware, dako ma kela lewic bedo calo bur adola mudet i tyen cware ma ogudo cogo. Tam pa ŋat ma kite atir tye kakare ma rwatte ki cik; lok ma jo maraco giyubo bwolo dano abwola. Lok ma dano marac loko nyayo to, ento lok pa ŋat ma cwinye atir laro dano. Jo maraco gityekogi woko ducu pe mo doŋ, kun jo me doggola pa dano ma kite atir biri nakanaka. Dano maryek ma tye ki ŋec jo gipwoyo, ento gicayo ŋat ma tamme oŋak, Dano ma bedo ki mwolo ma tiyo tic wek enoŋ jami me gwoko kwone, ber kato ŋat ma poro bedo dano madit ma noŋo pe tye ki cam. Dano ma kite atir gwoko lee ma tye i pacone maber, ma noŋo jo maraco gigerre agera i kom leegi laboŋo kica mo, Ŋat ma lapur matek twero limo cam mabup; ŋat ma balo karene i timo tim ma konnye pe, noŋo en ŋat ma ryekone pe. Cel gogo pa jo maraco bipoto woko piny, ento jo ma kitgi atir gicuŋ gigi matek likiŋ. Dano ma latim marac gimake ki lok me bal ma en loko, ŋat ma kite atir bwot ki i ayela ducu ma opoto i kome. Dano twero yeŋ ki jami mabeco ma en limo pi lok ma en loko, dok tic ma dano tiyo kelle bakacic bene. Dano ma lamiŋ tamo ni gin ma en etiyo ducu tye atir, kun dano ma ryek winyo mere tam ma gimiye. Ka kiniga omako lamiŋ giŋeyo woko cut, ento dano maryek pe paro yet ma giyete kwede. Ŋat ma lagen tito lok me caden ma tye ada, caden ma lagoba tito mere lok goba me bwola keken. Lok pa ŋat ma pe ki tam winnye malit macalo pala lucwan ka ocobo dano, ento lok ma a ki i leb ŋat maryek twero caŋo dano. Lok goba ri pi kare manok keken, ento lok ada bedo matwal. Jo ma giyubo lok me tiyo gin marac aye gikano lok me bwola i cwinygi, kun noŋo jo ma gitamo me tiyo gin maber gibedo ki yomcwiny. Pe tye gin mo marac ma twero poto i kom ŋat ma kite atir; dano marac nino ducu noŋo mere ayelayela keken. Rwot dag jo ma giloko lok goba, ento cwinye bedo yom i kom jo ma gitiyo ki gen. Dano ma tye ki niaŋ matut liŋ gire mot kadi en ŋeyo gin mo-ni, jo ma gin lumiŋ ginyuto kwiya pinygi ka maleŋ bot dano. Dano ma omiyo kwone me tiyo tic matek bedo ki twero me loyo luwote, ento ŋat ma lawackom gibikete ka tiyo tic muroni mapek, Par mapol geŋo dano me bedo ki yomcwiny, lok maber me kica aye romo kweyo cwinye, Dano ma kite atir ŋiyo kwone, miyo pe tiyo gin marac, kun jo maraco noŋo kitgi-nu ŋakogi girweny arwenya. Dano ma kome wac pe mako lee mo, ento dano ma tiyo tic matek twero bedo ki lonyo mabup, Bedo ki kit ma atir tero dano i kwo, ento lubo yo me bal tero mere dano i to. Latin maryek winyo pwony ki juk pa wonne, ento latin ma Laŋala pe winyo lok ma gijuke kwede. Jo ma kitgi beco gibilimo bakacic pi lok mabeco ma noŋo giwaco; miti pa jo ma lubal tye mere me timo tim bwami keken. Ŋat ma gwekke i lok ma en loko gigwoko kwone; ento ŋat ma loko lok ata, can poto i kome cut. Ŋat ma lawackom kadi bed cwinye omito jami mo-ni ma rom mene pe twero noŋone, kun dano ma omiyo kwone me tiyo tic matek gimedo bote lonyo ameda. Dano ma kite atir dag goba, ento dano marac timo tim me lewic ki cac me bwola keken. Kit ma atir gwoko ŋat ma pe ki bal mo, ento bal tyeko jo maraco woko at yeka ducu. Jo mogo giporo bedo ki lonyo, ma noŋo pe gitye ki gin mo kadi ki acel; ki jo mukene giporo bedo lucan ma kun noŋo gitye ki lwak lonyo madit ata. Dano ma lalonyo twero koko kwone ki lonyone; ŋat ma lacan, ma gire mo pe, pe tye ki yo mo me laro kwone, Jo ma kitgi atir gimeny calo mac tara ma lyel maleŋ, jo maraco gibedo calo mac tara ma gineko woko. Wakke kelo ayelayela keken, ento jo ma giwinyo lok me tam ma gimiyo botgi gibedo maryek. Lonyo ma ginoŋo oyotoyot rwenyo woko, ŋat ma noŋo lonyo manoknok lonyone bimedde. Gen ma pe gicobo miyo two i cwiny dano, doŋ mit ka ocobbe kakare tye macalo yat me kwo. Ŋat ma cayo lok ma giwacce lwoŋo to i kome kene, ŋat ma lubo gin ma giciko bilimo bakacic. Pwony ma jo maryek gipwonyo ki dano miyo kwo, miyo dano bene gibwot ki i owic pa to. Ŋec ma dano tye kwede miyo jo mapol gipwonye, ento jo ma pe genne gilimo megi can keken. Dano ma wiye tiyo cobo ticce ki ŋec muromo, ŋat ma lamiŋ bedo ka nyuto miŋone ka maleŋ, Lakwena marac miyo dano gilimo peko, ento lakwena ma genne kelo kuc. Dano ma kwero juk noŋo can ki cwercwiny; ento ŋat ma ye juk dano giworo. Ka dano onoŋo gin ma en mito yomo cwinye mada; ento jo ma lumiŋ gidag bwoto tiyo gin marac. Ŋat ma bedo kacel ki jo maryek pwonnye doko ryek bene, ento ŋat ma mako lurem ki lumiŋ kite biballe woko. Gin marac lubo lubalo i kabedo ducu ma giwoto iye, jo ma kitgi atir gibimiyogi jami mabeco macalo bakacicgi, Dano ma kite ber weko lonyone bot likwaye macalo ginaleyagi, kun noŋo ŋat ma labal kano mere lonyone pi ŋat ma kite at ir. Poto okaŋ pa lacan ceko cam mabup, ento dano balo camme woko ki tim ma pe atir. Dano ma pe pwodo latinne ki odoo noŋo pe mare, ŋat ma maro latinne keto cwinye me pwode ka noŋo abalo. Ŋat ma kite atir bedo ki cam muromo, ento dano marac kec neko kare ducu. Mon maryek miyo pacogi bedo maber ki kuc, mon ma lumiŋ aye giketo gaŋ woko aketa ki ciŋgi kengi. Dano ma kwone tye atir aye lworo Rwot, ŋat ma yone ogom ma maro timo gin marac cayo Rwot acaya. Lok pa lamiŋ calo odoo ma gigoye kwede, ento jo maryek lok ma giloko twero gwokogi. Ka ma pe gipuro iye ki twoni dyaŋ, inoŋo bel pe, ento ka ma gipuro iye ki twoni dyaŋ inoŋo cam cek madwoŋ ata. Ŋat ma lagen tito lok me caden ma tye ada, caden ma lagoba tito mere lok goba me bwola keken, Laŋala pe twero doko ryek wacel, ŋat ma tye ki niaŋ matut twero noŋo ŋec oyotoyot. A woko ki bot lamiŋ, pien pe tye lok mo me ŋec ma en romo pwonyi kwede, Dano maryek tye ki niaŋ matut me noŋo kit ma myero ebed kwede, ento lumiŋ minogi telogi i yo marac miyo gibwolle abwola kengi. Lubaŋa cayo jo maraco, ento timo kica ki jo ma cwinygi atir, Yomcwiny ma itye kwede bedo meri keni; ki keccwiny bene meri; pe tye dano mo ma twero nywako gin-gu ducu kwedi, Gibibalo ot pa dano marac woko, ento ot pa ŋat ma cwinye atir bicuŋ mere kakare. Tye gin ma dano tamo ni en aye yo ma atir, kun noŋo yo ma kit ennu tero en i to. Kadi bed ineno dano nyero nyero, noŋo cwinye bene tye ka cwer; ka yomcwiny doŋ otum, ci i ŋeye bino cwercwiny madit. Dano ma cwinye odoko nyap poto i can pi gin marac ma en timo, ento dano maber limo mere bakacic maber pi gin maber ma en otiyo. Dano ma lamiŋ ye jami ducu ayeya, ento ŋat maryek koŋ ŋiyo ka kwene ma en ecito iye. Dano maryek wiye po lokke, kwero timo gin marac, ento dano ma lamiŋ ma lawackom, tiyo oyotoyot laboŋo par ma romo juke. Dano ma kinigane lyetti oyotoyot timo gin me miŋo, ento dano ma tye ki ryeko diyo cwinye. Lukwiya piny gilubo yo me miŋo, ento jo maryek ŋecgi miyo gibedo ki deyo madit. Jo ma lutim maraco giryebbe piny i nyim jo ma kitgi beco, ki jo maraco giryebbe piny i dog gaŋ pa jo ma kitgi atir. Pe tye ŋat mo ma mito dano ma lacan, kadi lawote kikome, ento jo ma lulonyo gitye ki lurem mapol. Ŋat ma cayo lawote en labal; ŋat ma kica mako i kom lacan bedo ki yomcwiny. Pe jo ma gibedo ki tam me timo gin marac aye giŋak woko adada? Ento jo ma gitye ki tam me tiyo gin maber gibedo ki mar me ada ki gen, Kit tic ducu ma dano tiyo magoba tye iye, lok aloka keken ki dog kelo can. Deyo pa jo maryek aye ryeko ma gitye kwede, ento jo ma lumiŋ gicayogi pi tim miŋogi. Caden me ada laro kwo pa jo mapol, ento caden ma loko lok goba noŋo laroro. Dano ma lworo Rwot bedo ma cwinye opye, dok litinone bene ginoŋo ka ma gilarre iye. Lworo Rwot miyo kwo bot dano, miyo dano bwot ki i owic pa to. Kabaka bedo ki deyo pi lwak dano mapol ma en loyogi; laboŋo dano rwot pe gin mo. Ŋat ma kiniga pe mako oyot tye ki niaŋ matut, ento ŋat ma kiniga mako oyot nyuto miŋone keken. Ka dano bedo ma cwinye opye, miyo kome bene bedo yot; ento nyeko tye macalo bur adola mudet ma ogudo cogo. Ŋat ma uno dano ma lacan meno yeto Lubaŋama ocweyo dano-nu; ŋat ma bedo ki kica i kom jo ma piny obwoyogi noŋo woro Lubaŋa. Dano marac can poto i kome pi timme marac, kun dano ma kite atir noŋo ka larre pien bal mo pe i kome. Ryeko bedo i tam pa dano ma tye ki niaŋ, ento pe tye i cwiny lumiŋ. Bedo ki kit ma atir miyo rok mo-ni nyiŋe ywek matek, ento bal kelo lewic bot lwak mo keken ma gibedo i wi lobo. Kabaka bedo ki yomcwiny i kom latic ma tiyo ticce ki ryeko: kiniga make i kom latic ma tiyo tic ma miyo lewic bote. Gam me mwolo kweyo kiniga woko, ento lok magwagwa tugo kiniga medo ameda. Ka ce dano maryek tye ka lok, loko lokke mot maber ki ŋec, ento jo ma gin lumiŋ gicoro lok me miŋmiŋ keken. Rwot neno kabedo ducu, en neno jo ma lutim maraco kacel ki jo ma kitgi beco. Lok ma giloko mot ki kica tye macalo yat me kwo, ento lok mogo muŋak balo cwiny dano woko. Dano ma lamiŋ cayo pwony ma wonne pwonye kwede, ŋat maryek ye lok mejuk. Jo ma kitgi atir gikano lonyo madit iodigi, doŋ lonyo ma jo maraco gilimo kelo botgi can keken. Lok pa jo maryek nyayo ŋec bot jo mukene, kun tam pa lumiŋ noŋo pe timo kit meno. Rwot dag gitum ma jo maraco gityero bote, ento cwinye bedo yom i kom lega pa jo ma kitgi atir. Rwot dag kit pa jo maraco, en maro ŋatma bedo ki kit kwo ma tye atir. Ŋat ma bwoto lubo yo pa Rwot gibimiye pwod maracmada; dok ŋat ma dag winyo lok me juk bito woko. Rwot ŋeyo gin ducu ma tye piny i lyel ki i lobo pa jo muto, doŋ dano ma mwa-ni gitwero kano muŋ mo ma Rwot pe ŋeyo? Dano ma laŋala pe mito gitire; en pe cito bot jo maryek. Dano ma tye ki yomcwiny gineno ki i waŋe, ento dano ma cwinye cwer bedo ma cwinye ryaŋŋe aryaŋa, Tam pa ŋat ma tye ki niaŋ matut tye me yenyo ŋec, lumiŋ mito giyeŋ megi ki lok me miŋo. Jo ma giunogi gibedo marac nino me kwogi ducu; ento dano ma cwinye yom camo karama kare ki kare. Bedo ber me bedo ki jami manok kun ilworo Rwot, kato ma ibedo ki lonyo madit kun noŋo it ye ki ayela keken. Camo pot dek i paco pa jo ma gimari ber kato camo riŋo twon ma moo i paco pa jo ma gidagi. Dano ma kinigane lyet tugo mere daa, ento ŋat ma diyo cwinye romo juko pyem. Ŋat ma lawackom rwatte ki peko i kabedo ducu ma en cito iye, kun noŋo yo pa dano ma cwinye atir bedo yo gudo ma gigero maber, Latin maryek yomo cwiny wonne, latin mamiŋ cayo minne acaya. Ŋat ma wiye odiŋ cwinye bedo yom i kom lok me miŋo, ŋat ma tye ki niaŋ aye bedo ki kwo ma atir, Yub mo ma giyubo laboŋo noŋo tam muromo pe twero cobbe maber, doŋ yub ma giyubo ma koŋ gipenyo tam bot jo mapol cobbe kakare. Dano ma miyo lagam ma rwatte ki lok mo-ni bedo ki yomcwiny, ki lok ma en loko i kare ma mitte kikome, ber mada! Jo maryek gilubo yo ma dok tuŋ malo ma terogi i kwo, wek pe gidony i lyel, Rwot keto ot pa ŋat ma lawakke woko, ento gwoko waŋ lobo pa daa-to. Rwot dag tam pa jo maraco, cwinye yom i kom lok pa jo ma cwinygi leŋ. Ŋat ma wor ma noŋo magoba i yo ma pe atir kelo can i kom jo ma i ode, ŋat ma kwero gamo lim me wil i muŋ bibedo kwo. Dano ma kite atir koŋ bedo ki tam matut i kom lagam ma myero edok iye, dano marac coro mere lok marac keken. Rwot tye cen ka mabor ki bot jo maraco, ento winyo lega pa dano ma kite atir. Waŋ ma nen ma opoŋ ki bunyo miyo yomcwiny bot dano, doŋ winyo lok maber miyo ibedo maber. Ŋat ma winyo lok maber ma gijuke kwede, bibedo i kin luryeko. Ŋat ma weko lok me pwony, meno noŋo canne kekene; ento ŋat ma ye lok me juk me yubo kite twero niaŋ i lok matut. Ka dano lworo Rwot, ci limo pwony me ryeko, dok bedo ki mwolo aye yo me limo woro. Yub ma tye i tam, meno yub pa dano; ento Rwot aye ma loyo lok ma dano loko. Dano neno ni gin ducu ma etimo tye atir ki tun bote, ento Rwot aye neno cwinye ka leŋ. Leg Rwot okonyi i ticci ducu ma itiyo, ci yub ducu ma it ye kwede bicobbe maber dok kakare. Kit jami acel acel ma “Rwot oketo tye ki tyen lokke, doŋ agikki pa jo maraco aye to. Rwot dag jo ma luwakke; en pe biweko gibwot ma pe koŋ noŋo opwodogi. Bed ki mar me ada dok ki gen ci Lubaŋa biweko balli; lwor Rwot ci gin mo marac pe bitimme i komi. Ka inen kit pa dano yomo cwiny Rwot, ci Rwot bene cako miyo kuc bedo i kin dano meno ki lumonene. Gin matidi ma inoŋo ki yo ma atir ber kato lim madwoŋ ma ilimo i yo me bwami. Dano yubo yubbe ki i cwinye, Rwot aye ma telo en miyo cobo maber. Kabaka loko lok kit ma noŋo Rwot omiye ni oloki; miyo doge bene pe cer ka ŋolo kop pa dano. Rwot cwinye yom i kom jo ma gitye ki mijan ma pimo jami kakare; kidi lapim jami-me acata ducu en mutiyogi. Luker pe gitwero ciro jo ma gitiyo gin marac, pien bedo ki kit ma atir aye miyo komker cuŋ matek. Kabaka bedo ki yomcwiny i kom dano ma loko lok ki gen, dok en maro ŋat ma loko lok ada. Dano maryek twero kweyo akemo pa kabaka; ka kiniga omako rwot, ci dano mo to woko. Yomcwiny ma kabaka tye kwede nen wa i tur waŋe dok miyo kwo, ki kicane bene tye macalo pol ma miyo kot cwer i cwir. Bedo ki ryeko ber kato lonyo ma dano tye kwede; dok bedo ki niaŋ matut ber kato noŋo lim, Jo ma cwinygi atir giwoto i yo ma pe terogi ka timo gin marac; ŋat ma gwoko kite bilaro kwone bene. Wakke tero dano i can, ki cwiny me nyatte miyo dano poto i can. Bedo kacel ki lucan ki cwiny me mwolo ber kato poko jami ayaka ki jo ma luwakke. Ŋat ma winyo lok me pwony ma gipwonye kwede bibedo ki kwo maber, dok ŋat ma geno Rwot bedo ki yomcwiny. Dano maryek ki i cwinye giŋeyo ni tye bene ki niaŋ matut; en loko lok mamit ma bito ki tam pa dano. Ryeko miyo kwo bot ŋat ma tye kwede, ento miŋo kelo can keken i kom lumiŋ. Tam pa dano maryek miyo en loko lok maber ma nyuto niaŋ matut, dok gin ma en waco ducu bedo lok me pwony ma bito jo mukene. Lok ma giloko ki kica lim calo moo kic, lim mada ma yomo cwiny dok miyo yotkom. Tye gin ma dano tamo ni en aye yo ma atir, kun noŋo yo ma kit enu tero en i to. Miti ma latic tye kwede miyo en tiyo matek; pien mito ni ecam eyeŋ kare ducu wek kec pe obed ka neke. Dano ma latim bwami piro lok me neko jo mukene woko, dok lok ma en loko noŋo lyet calo mac, Dano ma cwinye rac bedo kun keto lok ma nyayo mone i kin dano, ki ŋat ma maro kwoto dano, keyo larem pa jo mapol. Dano ma labwami bwolo lawote, miyo lawote lubo yo ma pe ber ci poto woko i can. Ŋat ma gayo lawote ki waŋe noŋo tye ki yub me limo gin marac ikome; dano ma miyo doge likiŋ bikelo gin marac. Lwar wic aye lalukana me deyo pa ludoŋo, ka ce obino pi kwo ma tye atir. Ŋat ma kiniga pe mako oyot ber loyo twon oteka, ŋat ma loyo tam ma i cwinye kene loyo ŋat ma omayo gaŋ kulu. Kadi bed gibol kwir, ento Rwot aye ma ŋolo kop. Kwon maŋic mo ma icamo ki kuc ber kato karama ma icamo i ot ma opoŋ ki daa. Opii ma tiyo ticce ki ryeko twero bedo ki loc i kom latin ma tiyo gin me lewic, dok twero nywako ginaleyagi kwedgi macalo ŋat ace ma i kom omegigi. Jabu ki ryal gitemo kun giliyo i ruk mac, ento Rwot temo cwiny dano. Lutim maraco giwinyo lok pa jo maraco; ki lugoba bene giwinyo lok ma balo nyiŋ dano. Ŋat ma ŋalo lacan meno yeto Lubaŋa ma ocweyo dano-nu; ki ŋat ma bedo ki yomcwiny pi can ma opoto i kom lawote pe bibwot ma noŋo pe koŋ gimiye pwod. Ludito muti ginoŋo deyo pi likwayogi, ki litino bene ginoŋo deyo pi wongi. Pe porre ki lamiŋ me loko lok maber, bene pe ber ki ladit me loko lok goba. Lim me wil i muŋ nen bot lamiyone calo lwit ma dano otweyo i bade; en geno ni ebinoŋo gum i kabedo ducu ma ewoto iye. Dano ma timo kica bot jo ma gitime marac noŋo mito gimare, ento ŋat ma wiye bedo ka po i kom bal ma lawote obalo bote, keto larem woko ki i kingi. Dano ma niaŋ matut twero ye lok me juk ki cwinye ducu, kato lamiŋ ma kadi gidon tyen miya pe winyo lok mo-ni. Dano ma latim marac tamo lok me jemo keken; pi meno gibicwalo lakwena mager wek olweny i kome. Bedo ber ka dano orwatte ki ŋuu mager ma litinone gineko woko, kato ma orwatte ki lamiŋ ma tiyo gin me miŋomiŋo. Ka ce dano timo gin marac bot ŋat ma otime ber, gin marac pe bia ki i ode wacel. Lweny cakke matitidi ki lok me pyem macalo pii ma ka iyabo doge koŋ kwoŋo mol manoknok; pi meno myero ijukke woko ma pud peya daa ocakke. Laŋolkop ma miyo dano marac loyo kop, ki laŋolkop ma ŋolo lok loyo dano ma lokke tye atir, gin aryo ducu Rwot daggi, Kadi lamiŋ tye ki lim muromo ma romo wilo ryeko, meno kone konyo aŋo, ma kun noŋo wiye odiŋ woko? Ŋat ma larem bedo ki mar i kare ducu, ki dano ginywalo me nywako peko ki omegine. Dano ma wiye odiŋ aye jeŋo jamine, kun mine me cuŋ ma ka lawote Dano ma maro bal noŋo maro kelo ayela bene; ki ŋat ma keto dog ode malac meno lwoŋo can keken. Dano ma tamo lok marac pe twero limo gin maber, ki ŋat ma loko lok me rwenyo dano arwenya bipoto i can. Latin ma lamiŋ cwero cwiny wonne; ŋat ma latinne miŋ pe bedo ki yomcwiny. Yomcwiny kelo yotkom, cwercwiny miyo dano mok woko. Laŋolkop marac ye gamo lim me wilo loyo kop i muŋ, ma balo ŋolo kop atir woko. Dano ma tye ki niaŋ matut ŋeyo gin ma myero etim, ento dano ma lamiŋ bedo mere ma pe romo moko lok mo pire kene. Latin mamiŋ miyo wonne bedo ki cwercwiny dok minne bene bedo ma cwinye kec adada. Pe ber me ŋolo cul ki dano ma kite atir; dok pwodo jo ma kitgi beco bene rac mada. Ŋat ma tye ki ŋec loko lok manok, ki ŋat ma cwinye opye mot en aye dano ma tye ki niaŋ matut. Kadi bed ŋat ma lamiŋ, ka ce liŋ aliŋa gitwero tamo ni ryek; ma noŋo pe namo doge gitamo ni niaŋ te lok. Ŋat ma pe ribbe ki jo mukene yenyo tyen lok mogo, kun kwero lubo tam pa jo ma ticgi nyuto ryekogi, Lamiŋ pe paro pi niaŋ jami mo-ni; gin ma en mito aye me nyuto ka tamme kene. Bal ki lewic giwoto kacel; ka woro orwenyo, ci yet bene cakke. Lok ma dano loko cal ki pii matut; ryeko cal ki wan it ma gunnye doko kulu. Dworo kor dano marac pe ber; ŋolo kop me loyo dano ma pe ki bal bene rac. Lamiŋ loko gin ma nyayo daa ki pyem; pi lok maraco ma en loko aye miyo gigoye. Lamiŋ kelo can i kome kene ki lok ma en loko, dok gin ma en loko ducu tye macalo owic ma twero mako en kekene. Lok pa ŋat ma lakwot dano mit calo kwon ma gitedo makur atika, ma gimwonyo cito i ic kikome. Dano ma kome wac ka tiyo ticce rom ki dano ma balo jami abala. Nyiŋ Rwot obedo calo cel matek ka ma dano ma kite atir rio iye ci laro kwone, Lonyo bedo calo gaŋ matek bot lalonyo, dok macalo cel ma gigero ocudo malo likuŋ me gwoko en: Ka can pud pe, dano bedo ki cwiny me lyerre; bedo ki mwolo aye yo me limo woro, Myero koŋ iwiny lok ma noŋo peya igamo lok mo; ka pe, ci inyuto miŋŋi dok myayo yet i komi. Dano twero ciro arem matek i kare ma noŋo en two, ento aŋa ma twero ciro ka cwinye odoko nyap? Tam pa ŋat ma tye ki niaŋ matut tye me yenyo ŋec, jo maryek bene gimito giwiny lok ma medo ŋecgi. Mol ma dano miyo twero yabo yobote, dok miyo en o wa i nyim jo madito. Dano ma kwoŋo tito lok i lukiko nen calo lokke tye atir, nio ka lawote ma gipido kwede openye ki peny madwoŋ. Ka jo aryo ma gitego gitye ka pyem i lukiko, ci ka gibolo kwir tyeko daa ma i kingi. Kony omeru ci en bigwoki macalo ibedo i cel me gaŋ matek, ento ka ibedo ka da kwede ci en lorri doggola woko. Dano noŋo gin maber nyo marac pi lok ma en oloko; lok ma oa ki i doge tye ki adwoggine. Lok ma iloko twero gwoko kwoni, nyo twero neki woko aneka; jo ma gimaro loko lok maraco gibineno can. Ŋat munoŋo dako, meno onoŋo gin maber; en biniaŋ atir ni Rwot kara pwoye. Dano ma lacan ka loko, bako doge ki mwolo; ento ŋat ma lalonyo gamo mere lok ki gero cut. Tye jo mogo ma giporo bedo lurem apora, ento tye dano ma moko mere i kom lareme likiŋ ma loyo ominne kikome. Dano ma lacan ma loko ada dok lagen ber kato ŋat ma loko lok gobagoba ma noŋo en lamiŋ kwede. Miti ma dano tye kwede laboŋo ŋec rac, dano ma laro wot oyotoyot yone rwenyo woko. Miŋ ma dano tye kwede kela can bote, ci cako cayo Rwot ki i cwinye marac. Ŋat ma lalonyo noŋo lurem manyen mapol kare ki kare, ento dano ma lacan kadi lareme kikome bene noŋo otenyo woko liyak. Caden ma lagoba pe gibiweko ma pe koŋ gipwodo, ki ŋat ma loko lok goba bene pe bibwot. Jo mapol giyenyo gum ki bot dano ma cwinye yom; ŋat acel acel mito ebed larem dano mo ma maro miyo mot. Dano ma lacan kadi ki omegine ducu gidage, ki lureme bene ducu giket gicito woko cen ka mabor kwede. Pe doŋ gitwero dwogo cen bote, kadi en obitgi ki lok mamit ma rom kwene. Ŋat ma marre kekene noŋo ryeko; ki ŋat ma wiye tiyo i kom gin ma en opwonyo bibedo ki kwo maber. Caden ma lagoba pe gibiweko ma pe koŋ gipwodo, ki ŋat ma loko lok goba bene bito. Pe porre pi lamiŋ me bedo i kwo me lonyo, ci rac pa opii ma bedo ki twero me loyo rwodi bibedo rom kwene? Dano ma tye ki ryeko maber kiniga pe mako oyot, en bedo ma cwinye tye atir pi cayo bal ma ŋat mo otimo i kome. Kiniga pa kabaka bedo calo koko pa labwor, ento berre calo toyo ma ton i kom lum. Latin mamiŋ kelo can kom wonne, ki daa pa dako obedo calo ŋido kot ma pe cok. Ot kacel ki lonyo gi Jeyogi ki bot kwaro, ento dako maryek Rwot aye miyo. Wackom miyo dano nino nino matut; dano ma lawackom kec bineko matek. Ŋat ma lubo gin ma Rwot ociko, meno noŋo tye ka gwoko kwone; ento ŋat ma cayo lokke bito. Ŋat ma kica mako i kom lucan omiyo banya bot Rwot; pi meno Rwot bicule pi gin ma en otiyo. Pwony litinoni me bedo ki kit kwo maber ma noŋo pud gin tino; pe iket cwinyi pi nekogi. Dano ma kinigane Lyet bilimo pwod muporo kinigane; ka ikwanyo en woko ki i can kicel, en pud dok bimito ikonye aye i kare mukene. Winy tam ma gimini dok imak pwony ma gipwonyi kwede, ci ibibedo dano ma laryeko i kare me anyim. Dano twero bedo ki yub pi jami mapol i tamme, ento Rwot aye ma bicobo yubbe ki twerone. Gin ma myero dano obed kwede aye mar me ada; dano ma lacan ber kato ŋat ma lagoba. Lwor Rwot, ci ibibedo kwo; ŋat ma lworo Rwot bedo ki yweyo muromo i cwinye; gin marac bene pe twero gudo kome. Lawackom luto ciŋe i atabo, ento kwanyo ciŋe me tero cam i doge loye, Pwod jo ma gin luŋala, ci jo ma kwiya piny gibipwonnye; juk dano ma niaŋ, ci bilimo ŋec muromo. Ŋat ma timo bwami i kem wonne, ma ryemo minne woko bene ki i gaŋ, meno latin ma kelo lewic ki cwercwiny bot lunyodone. Latinna, ka iweko pwony ibiŋak ibwoto lok me ŋec ma doŋ it ye kwede con. Caden ma konnye pe kelo ŋala i kom ŋolo kop atir, jo maraco bene guloko bal odoko camgi, Pwod doŋ tye ma gitero woko pi jo ma gin luŋala, ki lumiŋ bene gibigoyo ŋegi ki odoo. Mato koŋo vino makec madwoŋ mukato kare loki idoko lakolo dok miyo gicayi bene; ŋat ma mato koŋo vino mer kwede noŋo pe ryek. Kiniga pa kabaka kelo lworo calo koko pa labwor; ŋat ma miyo kiniga mako kabaka gineko woko. Dano ma bedo cen ki ka ma daa tye iye bedo ki deyo; ento lamiŋ mo keken bibedo mere ka da adaya. Lapur ma lawackom pe puro potone i poto kot kikome; pi meno en pe binono cam mo ma myero eka i kare me kac. Tam ma dano tye kwede i cwinye calo pii matut, ento dano ma tye ki niaŋ matut twero golo woko ka maleŋ. Dano acel acel loko pi mar me ada ma etye kwede, ento aŋa ma twero noŋo dano ma genne? Likwayo pa dano ma cwinye leŋ dok ma tiyo gin ma tye atir, gitye ki gum! Kabaka ma bedo i wi komker me ŋolo kop waŋe yeko gin marac ducu. Aŋa ma twero waco ni, “Doŋ atyeko lwoko cwinya odoko leŋ kombeddi atye maleŋ, balla ducu doŋ gijwayo woko”? Rwot dag jo ma gitiyo ki agwata ki mijan ma pe pimo jami kakare, ma gitiyo ki agwata lapor bel mapatpat me bwolo dano. Kadi wa latin nyuto kit ma etye kwede i gin ma en tiyo, ka gin ma en tiyo-ni ber nyo tye atir. Rwot aye mumiyowa it me winyo lok ki waŋ me neno piny, en muketo gin aryo-nu ducu. Pe ibed ka nino anina, miyo idoko lacan; yab waŋi iti tic, ci ibibedo ki cam madwoŋ. Lawil ŋur bot lacat-wil kun wacci, “Man rac, man rac” ento ka doŋ okato ocito woko ci nyatte matek. Ka ce iŋeyo gin ma it ye ka lok ikome, ci it ye giri ki gin me wei makato jabu ki godi me wel-gu. Gam ginaruka pa dano ma ojeŋo jamine pi banya pa dano mo ata, dok ber imak en kikome ka onoŋo ocibo jami mo pi jo ma gin lurok. Kwon ma dano noŋo i yo me bwola lim alima bote, ento lacen bibedo kweyo mupoŋ i doge. Yub ducu cobbe maber ka koŋ ityeko noŋo tam mabeco muromo’ bed ki ryeko ma teli ka icito i lweny. Ŋat ma bedo ka wirre ki lok me kwot i kin dano tuco muŋ woko; pi meno pe myero iribbe ki ŋat ma loko lok i yo me miŋomiŋo. Ka ce ŋat mo oceno wonne nyo minne, ci kwone bitum woko macalo mac tara ma to woko i colpiny. Ginaleya ma ilimo oyotoyot i acakki pe ibilimo iye gum i agikkine. Pe myero iwacci, “Abiculo waŋ gin marac ma gitimo i koma”; ber ikur Rwot, ci en bikonyi. Rwot dag jo ma gitiyo ki lapim jami ma pe pimo kakare; ki mijan ma pe pimo jami kakare me bwolo dano per ber, Rwot aye ma telo dano i yo me kwone; dano twero niaŋ kit kwo ma etye kwede niŋniŋ? Dano ma waco oyotoyot ni, “Man adyero bot Rwot”, ka dok tamo lacen ma noŋo doŋ otyeko kwoŋo kwoŋ, rom ki winyo ma omoko i owic, Kabaka maryek yeko jo maraco, macalo dano ma dino bel, ci yeko yugi pat. Cwiny dano aye tara pa Rwot, ma menyo wa gin ducu mukanne ka madiŋ i iye. Kabaka twero ri i loc ka ce tye ki mar me ada ki gen; dok bedo ki kit ma atir aye miyo komker cuŋ matek. Deyo ma co matino gitye kwede aye tekkomgi, ento co muteggi giworogi pi yer lwar ma otwi i wigi. Adoŋ ma keto ret i kom dano kwanyo gin marac woko; dok odoo ma gigoyo ki dano malit aye loko kwone. Rwot aye ma loyo cwiny kabaka, macalo kulu ma mol, enloko piine mol cito ka ma en mito. Dano neno ni gin ducu ma etimo tye atir ki tuŋ bote, ento Rwot aye neno cwinye ka leŋ. Tiyo gin ma atir, ki ŋolo kop atir, yomo cwiny Rwot makato gitum. Waŋ me lyerre, ki cwiny me wakke, magi ducu bal; ento gin tye macalo tara ki bot jo maraco. Ŋat ma yubo yubbe ma noŋo koŋ oketo i tam, bilimo jami madwoŋ ata; ento ŋat ma tiyo jami oyotoyot bibedo lacan. Lonyo ma inoŋo ki loko lok goba duny woko macalo lupu, dok tye calo owic ma tero dano i to. Jo maraco bito pi tim bwamigi, pien gukwero tiyo gin ma atir. Jo ma lubalo giwoto i yo mugom, gitiyo gin ma pe atir; ento jo mabeco ma gipe ki bal mo gitiyo gin ma atir. Bedo i ot mukene tene ber kato bedo i ot kacel ki dako ma lapyem. Dano marac bedo ki miti i cwinye pi timo gin marac, ma noŋo pe tye ki kica i kom lawote wacel. Ka ce gimiyo pwod ki ŋat ma laŋala, ci ŋat ma kwiya piny bene cako doko ryek; dano ma laryeko mako pwony ma gipwonye kwede, ci medo ŋecce doko dwoŋ. Dano ma kite atir neno odi pa jo maraco ki gin ma gitimo; jo maraco gityekogi woko matwal. Ŋat ma diŋo ite woko ka winyo koko pa lucan, en bene ka bikok pi kony, ŋat mo pe biwinyo kokone wacel. Mot ma gimiyo liŋ i muŋ kweyo cwiny dano ma tye ki kiniga; ki lim ma gimiyo i muŋ me wilo dano kwanyo akemo madit woko. Ka ŋolo kop woto kakare, jo ma kitgi atir bedo ki yomcwiny madwoŋ, ento lutim maraco aye gibedo ki kumo. Dano ma ŋak woko weko yo me niaŋ maber bito, giyiko woko nywako kabedo ki jo muto. Ŋat ma maro yomcwiny madwoŋ bibedo lacan; ki ŋat ma maro mato koŋo vino ki camo cam ma obedo moo moo pe bilony. Ŋat marac bedo gin kok pi ŋat ma cwinye leŋ, ki dano ma oŋayo waŋ Rwot bedo gin kok pi dano ma cwinye atir. Bedo i tim aroo ber, kato bedo kacel ki dako ma lapyem ma lakel ayela. Dano maryek bedo ki jami mabeco ki lonyo i pacone, ento dano mamiŋ tyeko limme woko ducu oyotoyot. Ŋat ma bedo ki Lencwiny dok ki kica, bibedo ki kwo pi kare malac; ci jo mapol bene gibiwore. Dano maryek twero mayo gaŋ pa jo ma gin oteka woko, dok muko cel gogogi ma gigeno-ni reto woko piny lirum. Ŋat ma gwokke i kom lok ducu ma en loko, pe twero bedo ki ayela mo. “Laŋala” meno aye nyiŋ dano ma lawakke dok ma lyerre, ma gin ma en tiyo ducu bedo tim me anywaranywar ki wakke marac. Miti ma lawackom tye kwede twero neke bene, pien en dag tiyo tic pi noŋo gin ma emito. Dano marac bedo ka paro jami pa jo mukene dyeceŋ ki dyewor benebene, ento dano ma kite atir miyo jamine me konyo jo mukene ma pe kano mo doŋ bote. Gitum ma dano marac otyero en gin me kwer bot Rwot; racce bedo rom mene ka ce en tyerogitum bot Rwot ma noŋo tye ki tam marac i cwinye? Caden ma lagoba bito; ento dano ma winyo lok ma giwacce, lokke bedo nakanaka. Dano marac poro bedo ŋat macir, ento dano ma cwinye atir bedo ka tamo motmot gin ma myero etim i lobo. Ryeko, niaŋ ki tam ma gimiyo me konyo dano, magi ducu pe konyo dano ma pyem ki Rwot. Gitwero coko aguragura kacel ma doŋ giyubogi pi kuro nino me lweny, ento loyo lweny twerone tye bot Rwot. Yer bedo ki nyiŋ maber, pien en aye ber kato lonyo madwoŋ, dok pwoc ma dano gipwoyi kwede ber loyo ryal nyo jabu. Pe tye apokapoka i kin lalonyo ki lacan, pien Rwot aye muketo gin aryo-nu ducu. Dano ma wiye tiyo ka oneno gin marac bino i kome, kanne woko; ento lakwiya piny medde mere ameda, ci neno can ada. Bakacic ma dano limo pi bedo ki mwolo ki pi lworo Rwot, en aye lwak lonyo mapol, woro kacel ki kwo. Okuto ki owic tye i yo pa jo muŋak: ento ŋat ma gwoko kome pe biwok i yo meno. Pwony latin con ma noŋo en pud tidi kit yo ma myero en obed kwede, ci ka en odoŋo pe biweko lubone. Ŋat ma lacan bedo i te loc pa dano mulony, ki ŋat ma deno lim bedo opii pa won limo Ŋat ma timo tim bwami limo can keken, agikki me ticce bibedo odoo ma konnye pe. Ŋat ma waŋe leŋ i kom dano bilimo gum ma a bot Rwot, pien en poko camme mogo ki lucan. Ryem ŋat ma lacac woko, ci lweny bene bibedo pe boti, dok daa kacel ki anywar bene bigik. Ŋat ma bedo ki leŋcwiny, ma loko lok maber me kica, bimako kabaka bedo lareme. Rwot tye ka neno ni lok me ŋec gigwoko maber, ento en bolo lok pa jo ma guŋayo waŋe woko. Ŋat ma lawackom wacci, “Labwor tye woko! Ka akato woko miyo bineka woko i dye gudo!” Lok pa dako ma lakwele obedo calo bur matut; ŋat ma kiniga omako Rwot i kome bipoto woko i bur meno. Miŋo aye gin ma tye i cwiny latin matidi, ento ka ipwonye ki odoo, ci miŋo a woko ki bote. Ŋat ma diyo lucan ni wek lonyone omedde, nyo ma miyo jamine bot lulonyo keken, bidoko lacan. Gwoko cik ki gin ma luryeko yam guwaco Cik iti iwiny lok ma luryeko guwaco, dok myero iket cwinyi i kom ŋec ma apwonyi kwede. Ka igwoku lok magi i cwinyi, ci bedo ber matek; ka ce ibipo i komgi ci ibibolo lok i komgi i kare ma mitte. Doŋ amito igen Rwot, en aye gin mumiyo atito lok magi boti tin-ni. Atyeko coyo lok ma romo pyeradek kun amiyi tam mabeco kacel ki ŋec muromo, pi nyuto boti gin ma atir dok ada, wek in bene idwok lok ada bot jo mucwali. Pe myero iyak jami pa lacan ni pien en lacan mamwa, nyo kadi me nyono jo ma gitye ki can woko i kabedo me ŋolo kop; pien Rwot bi pi do pigi, bineko jo ma guyakogi woko. Pe myero imak larem ki dano ma kiniga mako oyotoyot; dok pe myero iwot kacel ki dano ma cwinye opoŋ ki akemo twatwal, weko ibilubo kite ducu ci imoko i owic. Pe myero ibed ŋat acel i kom jo ma gijeŋo jamigi, ma gicuŋ pi jo ma lubanya. Ka ce pe it ye ki gin mo ma myero icul kwede banya, ci gimayo kitandani ma ibuto iye-ni woko, Pe myero ikob got macon ma poko waŋ lobo ma yam kwarowu doŋ gutyeko ketone. It ye ka neno dano makwiri i ticce? En bibedo ka tic wa i nyim luker: pe bitic i nyim dano ata-gu, Ka ibedo ka cam kacel ki rwot, myero itemme twatwal me keto woro i kome; ka ce ineno ni in lacam madwoŋ, ci kwany pala iŋol ŋuti woko. Pe myero imwony laa pi camme makur, meno cam ma bwolo dano noŋo. Pe myero ibed ka tiyo tic matek ni wek inoŋ lonyo; bed ki ryeko muromo ci iwek kit tam macalo meno obedi. I kare ma iloko waŋi ineno en lonyoni-ni, inoŋo ni otyeko cito con; pien bwome twi woko oyotoyot, ci tuk malo calo ocur ma kemo polo. Pe myero icam kwon pa dano ma ladur; pe iket cwinyi i kom camme makur-ri. En obedo calo ŋat ma lwodo lok ki i cwinye. En wacci, “Cam dok imat ba!” kun noŋo cwinye pe i komi. Ibiŋoko kwon ma icamo-ni woko liweŋ, dok bibalo lokki mamit ma iloko bote-gu ducu. Pe myero ilok lok me ryeko bot ŋat ma lamiŋ, pien en pe twero niaŋ ber pa lok ma iloko bote, cayo mere acaya keken. Pe ikob got macon ma poko waŋ lobo nyo kadi donyo i potti pa jo ma wongi pe; pien Lacunudwargi tek; en bipido pigi kwedi, ci miyo lok loyi, Ket cwinyi me winyo pwony ma gipwonyi kwede, cik, iti bene me winyo lok me ŋec. Pe ikal akala me pwonyo latin wek obed ki kit maber; ka igoye ki odeo pe bito. Ka ce ipwonye kun igoye ki odoo kit meno, ci ibilaro kwone wek pe odony ilye!. Latinna, ka ce ibedo ki ryeko icwinyi, an bene cwinya bibedo yom. Abibedo ki yomcwiny ki tipo koma ducu, ka onoŋo iloko gin ma atir. Pe myero ibed ki mone i cwinyi ‘i kom lubalo, ento medde ki lworo Rwot nino ki niŋo. Adada kwoni ma tye anyim bibedo maber, dok genni bene pe gibibalo woko. Latinna winy lokka, wek ibed ryek,’ dok iket tammi pi lubo yo ma mitte. Pe ibed i kin jo ma gin lumero ki koŋo vino, kadi bedo i kin jo ma luworo ma gin lucam riŋo; pien lumero kacel ki luworo gibidoko lucan, nino bimako waŋgi woko miyo giruko boŋo muketoket. Winy lok pa woru munywali, dok pe myero ica meni ka doŋ oti. Wil ada, ento pe icat woko aye; dok iwil ryeko, pwony, ki niaŋ maber. Latin ma kite atir miyo wonne hedo ki yomcwiny madwoŋ; ŋat ma nywalo tatin maryek bedo ki yomcwiny pire. Wek woru kacel ki meni gubed ma cwinygi yom, wek meni munywali obed ki yomcwiny. Latinna, ket cwinyi ka mako lok ma awacci, dok inen kit kwona ducu wek obed lanyut ma biteli. Dako ma lakwele obedo calo bur matut; en tye calo waŋ it madiŋ, Dako-nu kanne woko pi libo dano calo layak, dok en medo wel jo ma guŋayo waŋ Rwot doko dwoŋ i kin dano. Aŋa ma tye ki can? Aŋa ma tye ki cwercwiny? Aŋa ma tye ka da? Aŋa ma tye ka ŋur? Aŋa mulimo ret laboŋo gin mo mutimme? Aŋa ma waŋe ocek makwar? Jo ma giri ka mato koŋo vino pi kare malac, jo ma cito ka mato koŋo vino ma girubo mamit. Pe imat koŋo vino ka doŋ odoko kwar, ma noŋo tye ka ryeny aryenya i kikopo, dok donyo mapwot i i ŋat ma tye ka matone, I agikkine kayo i dano calo twol, kayo calo twol ororo ma tye ki kwir marac. Ibineno jami mapat ma yam peya inenogi, dok pe ibitwero tamo kadi ki loko gin mo ma atir. Ibibedo calo ŋat ma obuto piny idye nam, calo ŋat ma oito malo i wi wir me mel. Ibiwaco ni, “Gigoya, ento pe alimo ret mo; gigoya, ento pe awinyo arem mo wacel. Abico awene? Abicito ka mato kono yino mukene doki.’ Pe myero nyeko omaki i kom jo ma gin lutim maraco, dok pe imar ribbe kwedgi; pien tamgi ducu opoŋ ki lok me tim bwami, ma noŋo giloko lok ma keto can keken i kom dano. Gitwero gero ot pi ryeko, dok pi niaŋ matut miyo cuŋ matek likiŋ; pi ŋec ma dano tye kwede miyo poŋo ode ki kit jami mabeco me wel ki lwak jami ma yomo cwiny, Dano maryek tek kato dano ma latekkom, dano ma tye ki ŋec bene kato ŋat ma tye ki teko. Ka giteli ki ryeko ci itwero lweny maber, dok winyo tam mabeco ma dano gimiyo boti miyo iloyo lweny. Ryeko nen calo gin mo ma tye malo twatwal bot ŋat mamiŋ; pe twero waco lok kadi ki acel ka gitye ka laro lok ma pire tek. Ŋat ma bedo ki tam me timo gin marac gilwoŋe ni lakel-ayela. Tam ma lamiŋ tamo bedo bal keken, dano ducu gidag ŋat ma laŋala. Ka ce ibedo nyap i kare ma ayelayela tye, tekoni noŋo nok adada. Myero ilar kwo pa jo ma gimakogi giterogi woko me aneka; gwok jo ma giywayogi giterogi i kabedo me nek. Ka ce iwacci, “Nen, wan onoŋo pe waŋeyo lokke,” ento Lubaŋa ma neno cwiny dano-ni pe biromo niaŋ? En ŋat ma neno kwowu-ni pe ŋeyo? En pe biketo can i kom dano acel acel ma poro kit gin ma en otimo? Latinna, cam moo kic, pien ber, dok moo kic ma cwer ki i peda kic lim matek ka ibilo. Myero iŋe ni ryeko bene tye kit meno pi kwoni; ka ce inoŋo ryeko, ci ibedo ki gen ni kwoni me anyim bibedo maber, dok genni pe bigik. Pe ikanne i ŋet ot pa dano ma kite atir pi time rac; pe myero itim bwami i kom gaŋŋe; pien dano ma kite atir kadi opot piny tyen abiro, dok pud twero a malo aye; ento jo maraco can retogi gipoto woko piny matwal. Pe ibed ki yomcwiny ka ineno lakworri opoto i can, dok cwinyi pe obed yom ka ineno en yokke atata; gwok Rwot bineno gin ma itimo, ci pe biyomo cwinye, ci miyo kwanyo kinigane woko ki i kom dano-nu. Pe myero cwinyi ocwer pi jo ma gin lutim maraco, dok pe ibed ki mone i kom jo maraco; pien dano ma latim marac pe tye ki gen pi kwone pi kare me anyim; mac tara pa jo maraco gibineko woko, Latinna, lwor Rwot dok ilwor kabaka bene, pe myero ijem i komgi. Ka ijemo ci gibiketo can i komi oyotoyot; dok aŋa ma ŋeyo kit can ma bia bot Lubaŋa ki kabaka? Magi ducu obedo lok ma luryeko guwaco. Dworo kor dano i ŋolo kop rac. Ŋat ma waco bot dano marac, “Pe it ye ki bal mo” jo me rok ducu gibicene, dok gibikwere woko; ento jo ma gijuko lutim maraco gibibedo ki yomcwiny, dok gibilimo gum maber makato ducu. Ŋat ma miyo lagam ma atir meno aye larem me ada. Mukwoŋo koŋ ikwoŋ tiyo ticci ma tye woko, pur poto dok ipit iye ginapita ducu ma mitte; ka lacen doŋ icak gero odi. Pe ibed caden ma lagoba i kom lawoti ma pe ki bal; pe myero ibwol dano ki lok gobagoba. Pe myero iwac ni, ‘Abitimo gin ma en otimo i koma-ni bene ikome; abiculo waŋ gin ma dano meno otimo.” Awoto akato ki i ŋet poto pa dano ma lawackom, ki i ŋet poto olok pa dano ma wiye odiŋ; nen, potone ducu obakke ki okuto keken; doo ayila oumo ŋom woko, celle ma gigero ki got bene omuk orette woko piny, Ka aneno ci abedo ki tam matut pire; aneno dok omiya pwony madit. Ka ibuto inino manok, dok idolo ciŋi woko omini yweyo, ci can bimaki macalo layak ma mako dano, ma orukke woko ki jami lwennye ducu. Lok magi bene gin carolok pa Solomon ma jo ‘pa Kejekia kabaka me Juda guloko gucoyo i buk. Deyo pa Lubaŋa aye me kano jami woko i muŋ ma pe nen, ento deyo pa luker tye me tito lok woko bot lwak ka maleŋ. Pe iŋeyo gin ma kabaka tye ka tamone, pien tamme bor calo polo, tut calo lobo. Ka giliyo ryal maber laboŋo cette, ci latet ryal twero yubo kwede gin mo maber. Ryem jo maraco woko ki i nyim kabaka, pien bedo ki kit ma atir miyo komkerre cuŋ matek. Pe ikette keni me bedo dano madit i nyim kabaka, dok pe myero ibed i kabedo pa jo madito. Bedo ber makato ka giwacci ni, “Nyik malo kany,” ber kato ma gidwoki i kabedo ma piny ma noŋo kun itye i nyim rwot. pe myero ikel oyotoyot i nyim lukiko; i agikkine ibitimo gin aŋo ka lawoti mo oketo lewic i wii? Ka lok mo tye i kinwu ki lawoti, myero wutyek lokke wun aryo; pe ituc muŋ pa jo mukene, wek ŋat ma winyo lokki pe omi lewic omaki, miyo nyiŋi biballe woko matwal. Lok ma giloko kakare obedo calo jabu ma gimwono i kom ryal. Ŋat maryek ma juko dano ki pwony maber bot ŋat ma winyo lokke, obedo calo gin mo me jabu me deyo kom dano. Lakwena ma genne kweyo cwiny jo ma guore calo ŋico pee i kare me kac; en kweyo cwiny ludito ma loye kumeno. Dano ma nyatte ki mot ma en pe twero miyone obedo calo pol ki yamo ma bino laboŋo kot mo. Itwero loko tam pa laloc ka idiyo cwinyi, dok lok ma iloko mot ki mwolo twero loko tam pa dano kadi bed onoŋo tek calo cogo, Ka ce inoŋo moo kic, cam ma romo ii keken, pien ka icamo mukato kare miyo iŋoko woko. Pe ibed ka wot me limo lawoti i ode kare ki kare, miyo en biol woko kwedi ci cako kweri woko. Lacaden ma tito lok goba i kom lawote obedo macalo odoo me lweny, nyo pala lucwan, nyo atero mabit. Bedo ki gen i kom dano ma pe genne i kare me ayela rom ki lak ma miyo arem ki dano, nyo tyen ma oŋol. Ŋat ma wero wer bot dano ma tye ki kumo mapek i cwinye rom ki ŋat ma okwanyo ginaruka woko ki i kome i nino ma piny ŋie, dok tye macalo kado ma giketo i waŋ bur. Ka kec neko lakworri, miye kwon ocam; dok ka orwo pii neke, miye pii omati. Ka itimo kumeno, ci ibicoko lodi mac ibako i wiye, Rwot bene bimiyi bakacic. Yamo ma kodo a ki tuŋ malo kelo kot; lok me kwoto dano kelo kiniga. Bedo i ot mukene tene ber kato bedo i ot kacel ki dako ma lapyem. Lok maber me yomcwiny ma dano owinyo ma oa ki i lobo mabor, calo pii manic ma kweyo cwiny dano ma orwo omako. Dano ma kite atir ma oye tam pa jo maraco, cal ki wan it ma piine opoŋ coto, ki waŋ it ma oballe woko. Pe bedo ber me camo moo kic madwoŋ, dok bene bito dano ki lok mapol ni wek gipwoyi pe ber. Ka ce onoŋo pe itwero loyo kinigani, ci irom ki gaŋ ma gimonyo ma gimuko celle gireto woko. Woro dano ma lamiŋ, cal ki pee i kare me oro nyo kot ma cwer i kare me kac. Lok ma giceni kwede pe twero timo gin mo i komi ka ce pe ibalo, obedo calo winyo lakalagwec ma tuk yeŋŋe atata, dok calo aliboro ma tuk twarre cito woko. Gigoyo aguragura ki del, gitweyo dog kana ki ogwil, odoo aye gigoyo ki ŋe dano ma Lamiŋ. Pe idok i peny pa dano ma miŋ ma rom ki miŋone, miyo in bene ilokke idoko lamiŋ calo eno Dok i peny pa dano ma miŋ ma rom ki miŋone, wek pe otam pire kene ni eryek. Ŋat ma oro lamiŋ me cwalo lok ka mo meno rom ma oŋuno tyene kekene dok tye ka yenyo ayela ni obin ikome. Carolok ma lumiŋ giloko, cal ki tyen dano ma lanol ma lyero alyera ma konnye doŋ pe. Ŋat ma woro lamiŋ rom ki dano ma otweyo gweŋ i latandiyo. Carolok ma lumiŋ giloko, rom ki okuto ma cobo ciŋ dano ma lamero. Won tic ma coyo lamiŋ nyo lamero me tic bote rom ki won atero ma bayo aterone ci celo dano ducu. Ŋat ma lamiŋ ma nwoyo tim miŋone rom ki gwok ma lokke dok ka nano nokke kekene. Ineno dano ma tamo ki i cwinye ni eryek pire kene? Itwero bedo ki gen i kom ŋat ma lamiŋ makato eno Dano ma lawackom wacci, “Labwor tye i waŋa yo! Labwor tye i dye gudo!” Dano ma lawackom bedo ka lokke aloka i wi kitandane, macalo kika ma wirre i kom pete. Lawackom luto ciŋe i atabo; ento kwanyo ciŋe me tero cam i doge loye. Dano ma lawackom nenne kekene ni eryek ekato kadi wa dano abiro ma gitwero dok i peny ki ryeko. Ŋat ma donyo i lok daa ma pe okemo en rom ki ŋat ma mako gwok ma tye ka kato akata ki ite, Calo dano ma lapoya ma cwinyo mac i wi ot, nyo ma bayo atero ci neko dano, en aye ŋat ma bwolo lawote kun waco ni, “An atye ka loko lok oree keken!” Pi nok pa yen miyo mac pe lyel maber, to woko; ka ma ŋat ma maro kwoto dano pe iye, daa bene gik woko cut. Macalo bilo kano lodi mac, yen bene miyo mac lyel, dano ma maro daa bene tye kit meno, miyo daa medde ‘ameda. Lok pa ŋat ma lakwot dano mit calo kwon ma gitedo makur atika, ma gimwonyo cito i ic kikome. Dano ma loko lok mamit ki doge ma kun noŋo tve ki tam marac i cwinye rom ki atabo lobo ma gidero ki libi ma ryeny aryenya. Ŋat ma lakworri twero loko boti lok mamit ki doge noŋo kun noŋo tye ki adagadaga i cwinye; kadi ka loko lok mamit niŋo, pe iye lokke, pien cwinye opoŋ ki jami abiro ma gin ducu gin me kwer. En twero umo adagadaga ma etye kwede i cwinye ki bwola, ento lwak ka ocokke gibineno gin marac ma en otiyo. Ŋat ma kwinyo bur bipoto iye; ki ŋat ma cako loro got, got bipoto i kome. Ŋat ma lagoba kwero jo ma en tye ka unogi, dok dano ma bwolo dano ki lok mamit kelo can keken. Pe myero inyatte kekeni pi nino ma diki, pien pe iŋeyo gin ma bitimme tin. Pe ipakke keni ki lok ma iloko; wek ŋat mukene aye opaki, kadi en larok. Got pek, kweyo bene pek, ento ayela ma lamiŋ kelo pek makato ducu. Akemo ger, dok kiniga nyayo nek; ento pe gitwero porogi ki nyeko. Juko dano atyer ka maleŋ ber kato mar ma gikano woko. Kadi bed laremi ogoyi pud itwero geno en, ento ka lakworri obino me kwako kori, myero igwokke. Ŋat ma oyeŋ kwero camo moo kic, ento ŋat ma kec neko kadi gin makec noŋo lim alima i doge. Dano ma weko gaŋŋe a cito woko ka mukene, rom ki winyo ma obwoto ode otuk ocito woko ka mabor. Moo wir ki gin ma ŋwece kur miyo dano bedo ma cwinye yom, ento ayela balo cwiny dano woko marac. Pe ibwot ŋat ma laremi, ki ŋat ma larem woru; dok i kare ma itye ki can pe myero icit i ot pa omeru. Lawoti ma tye cok twero konyi makato omeru ma tye ka mabor. Latinna, bed ryek, wek iyom cwinya, wek anoŋ lagam ma myero adok iye i lok ki ŋat ma yeta. Dano ma wiye tiyo ka oneno gin marac bino i kome, kanne woko; ento lakwiya piny medde mere ameda, ci neno can ada. Gam ginaruka pa dano ma ojeŋo jamine pi banya pa dano mo ata, dok ber imak en kikome ka onoŋo ocibo jami mo pi jo ma gin lurok. Ŋat ma a malo odiko con, ci cako lamo gum i kom lawote ki dwan maloŋo, gibiwaco ni en tye ka ceno lawoteni acena. Dako ma lapyem ma nyayo ayela rom ki ŋido kot ma pe cok i kare me cwir. Dako-nu jukone tek macalo juko yamo, dok tek macalo mako moo poŋcin. Dano acel acel twero pwonyo lawote, macalo nyonyo twero pako nyonyo lawote doko bit. Ŋat ma pito yat oduro ka ogwoko maber bicamo nyige, ki ŋat ma kuro piny kun gwoko laditte maber dano biwore. Kit macalo dano ka okulo wiye i pii neno tur nyime, cwiny dano bene nyuto kit ma dano meno tye kwede. Dano ma pe twero yeŋ ki gin ma iye mito, obedo calo lyel pa jo muto ma pe yeŋ. Ryal ki jabu gitemo kun giliyo i ruk mac, doŋ ber pa dano nen i kit ma jo mukene gipake kwede. Kadi bed igo lamiŋ ikwany iod woko ki lalek i pany, kun iketo kacel ki bel me aoda, ci pud miŋ ma tye i kome-ni pe bia wacel. Myero igwok romini dok iŋegi maber, ket cwinyi bene ka gwoko dyaŋini: pien lonyo pe bedo matwal. Ineno ker ri nakanaka pi yalwak ducu? Ka lum otum woko, ka ginapita cako lot manyen, ci gicako nyaro lum ma olot i wi godi. Itwero yubo boŋo nia ki i kom yer romini, dok itwero wilo lobo ki cilir; ma inoŋo ki i kom dyegini; ibinoŋo cak muromo ma a ki i kom dyegini ma bibedo cammi, ibipito ki jo ma i odi ducu, dok biromo gwoko anyira ma gin aŋecani ducu. Jo maraco giriŋo woko ariŋa kadi bed pe ŋat mo tye ka ryemogi, ento dano ma kite atir cwinye tek calo labwor. Ka lobo obedo ka timo bal lulocce bedo mapol. Lobo twero cuŋ matek dok bedo ki kuc ma ri nakanaka ka ce onoŋo tye ki luloc maryek ma giniaŋ dok ma gitye ki ŋec maber. Laloc ma uno lucan obedo calo kot ma cwer ki pee ci balo cam woko liweŋ, Jo ma gibwoto cik pa Lubaŋa gipako jo maraco, ento jo ma gigwoko cik mere gilwenyo alwenya i kom jo maraco. Jo ma Lutim gin marac pe giniaŋ i lok me ŋolo kop atir, ento jo ma giworo Rwot giniaŋ iye ducu maber. Dano ma lacan ma loko lok ada dok lagen ber kato lalonyo ma kite pe atir. Latin ma gwoko cik noŋo ŋat maryek, ento ŋat ma mako larem ki dano ma laworo kelo lewic i kom wonne. Ŋat ma medo lonyone ki gamo magoba ki bot jo ma gitye ki peko noŋo tye ka cokone pi ŋat ma lakica ma konyo Lucan. Ŋat ma pe tero ite ka winyo lok me cik ki lubone, Rwot bene bikwero winyo legane woko. Dano ma telo ŋat ma cwinye atir me timo gin marac bipoto i burre kekene; ento ŋat ma pe ki bal gibimiye lobo maber me bedo ginaleyane. Dano mulony tamo ki i cwinye ni en eryek, ento dano ma lacan ma tye ki niaŋ matut neno kit ma en tye kwede. Ka jo ma kitgi atir aye guloyo, ci dano gibedo ki deyo madit; ka jo maraco guille malo, dano gikanne woko akana. Ŋat ma kano balle ma pe tuco, pe bimedde ki bedo ki kwo maber; ento ŋat ma tuco balle ka bwoto timogi matwal aye kica bimako Lubaŋa i kome. Dano ma lworo Rwot kare ducu tye ki gum; ento can bipoto i kom dano ma pe lubo cik pa Rwot. Laloc ma en dano marac ma loyo lwak jo ma gin lucan obedo calo labwor ma kok nyo ŋuu ma tye ka Iibo lee. Laloc ma pe ki niaŋ matut en ŋat mager ma uno dano; ento ŋat ma kwero lim ma ginoŋo i yo ma pe atir biri i lobo pi mwaka mapol. Dano ma oneko lawote, myero ginek woko bene; pe myero ŋat mo okonye. Ŋat ma loko lok ada dok lagen, Lubaŋa bilaro ki i gin marac ducu; ento ŋat ma ŋak woko ma pe Lubo cik bipoto i bur. Ŋat ma lapur matek twero limo cam mabup, ento ŋat ma balo karene i timo tim ma konnye pe can bimako malit. Dano ma lagen bilimo gum madwoŋ, ento ŋat ma laro ni elony woko oyotoyot pe bibwot ki pwod. Poko kin dano pe ber; nen, dano twero timo roc kadi pi latin kwon mo matidi. Dano ma lagem laro ni en aye ebed ki lonyo, ma pe ŋeyo ni can cok bimake. Ŋat ma juko dano gibibedo kwede maber lacen, en loyo ŋat ma pwoyo dano ki doge noŋo. Ŋat ma yako jami pa wonne nyo pa minne kun wacci, “Gin ma atimo-ni pe bal” en aye larem ŋat ma lanek dano. Dano ma laworo tugo mere daa ento ŋat ma geno Rwot bilimo lonyo madwoŋ. Ŋat ma genne kene ki i tamme, meno lamiŋ; ento ŋat ma lubo ryeko bilarre. Ŋat ma konyo lucan Rwot bimedo bote jami mapol, ento ŋat ma pe ye ni can tye jo mapol bicene woko. Ka jo maraco guille malo, dano gikanne woko akana, ento ka doŋ guto woko, jo ma kitgi atir ginya gimedde ameda, Ŋat ma gipwonyo jwijwi, ka dok pud jiŋo ŋute, bitur atura ma pe dok biromo a malo, Lwak gibedo ki yomcwiny, ka jo ma kitgi atir aye tye ka loc; ento ka jo maraco aye loyo, lwak cur marac, Ŋat ma maro ryeko kweyo cwiny wonne, ento ŋat ma mako larem ki dako ma lakwele balo limme ducu i tim me carocaro. Kabaka ma ŋolo kop kakare miyo kuc bedo tye i lobo, ento ŋat ma gamo lim ma dano gimiye balo lobo abala. Ŋat ma bwolo lawote ki lok doge meno noŋo tye ka ciko obwo ma bimako en kekene. Dano ma latim marac gire moko i owic me bal ma en timo, ento ŋat ma kite atir wero mere wer dok bedo ki yomcwiny, Dano ma kite atir ŋeyo gin ma myero pi ŋat ma lacan; ento dano marac pe niaŋ kit gin macalo meno wacel. Jo ma luŋala gitwero tugo ayela ma miyo gaŋ Lyetti woko, ma noŋo jo maryek gikweyo megi kiniga woko akweya. Ka ce dano maryek tye ka pido gin ki lamiŋ, lamiŋ meno cako tim anywar anywar ma nyero gire anyera, dok pe twero liŋ. Jo ma cwinygi kuto akuta pi oyo remo pa luwotgi, gidag neno ŋat ma pe ki bal; gin jo maraco-ni giyenyo yo me rwenyo kwone woko. Lamiŋ loko ki teko me dwane ducu ka kiniga omako, ento dano maryek juko kinigane motmot. Ka ce dano ma laloc bedo ka winyo lok gobagoba, ci luditone ducu gilibokke gidoko jo maraco. Rwot aye ma omiyo waŋ bot gin aryo-ni me neno piny, bot dano ma lacan ki bot ŋat ma uno eno Ka ce kabaka ŋolo kop atir kun paro pi lucan, ci biri ka loc matwal. Ka ce ipwonyo latin ki odoo ci bimiyo en doko ryek, ento ka itenyo latin liyak ma pe ipwonyo ci bikelo lewic i wi minne. Ka jo maraco aye gitye ka loc ci dano gimedde ameda ki timo bal; ento jo ma kitgi atir gibineno can ma poto i komgi. Pwony latinni me bedo ki kit maber, ci ibibedo ma pe iparo gin mo; dok en bikweyo cwinyi bene. Ka dano pa Lubaŋa pe ma romo pwonyo lwak, gin lwak kikomgi ginuny woko ki ŋegi, ento ŋat ma gwoko cik pa Lubaŋa tye ki gum. Ka ibedo ka lok aloka keken bot laticci miyo en pe pwonnye, kadi bed en niaŋ gin ma iloko bote, pe bilubo wacel. Ineno dano ma laro lok oyotoyot ma kun pe tamo gin ma etye ka wacone? Itwero bedo ki gen i kom ŋat ma lamiŋ makato eno Ŋat ma miyo jamine ducu bot laticce kit macalo laticce mito nia ka tino, i agikkine binono ni latic-cu doŋ odoko lale jamine. Dano ma opoŋ ki akemo kare ducu tugo mere daa nyo lweny, ki ŋat ma kinigane Lyet kelo ayela dok timo bal mapol ata. Wakke miyo dano poto i can, ento dano ma bedo mwol i cwinye jo mapol gibiworo. Ŋat ma lawot lakwor meno lamonene kekene pien dag kwone; kadi bed en winyo lok ma giceno ki dano, pe twero tuco lok mo Lworo ma dano tye kwede i kom jo mukene tye macalo owic, ento ŋat ma geno Rwot bedo maber laboŋo ayela. Jo mapol gimito ni laloc opwogi, ento Rwot aye timo gin ma myero ki dano acel acel. Dano ma ki te atir dag ŋat ma labal, dok jo maraco gidag ŋat ma bedo ki kit kwo ma atir. Magi aye gin lok ma Agur wod pa Jake me Maca oloko, Dano meno waco kit man bot Itiel, bot Itiel ki Ukal: Adada an doŋ amin makato ducu, pe aromo bedo dano. Pe atye ki kit niaŋ mo wacel macalo dano. Pe apwonyo lok me ryeko, dok pe aŋeyo Lubaŋa ma en ŋat Maleŋ-ŋi, Aŋa ma oito i wi polo ka dok odwogo piny i lobo kany? Aŋa ma otyeko mako yamo i ciŋe-ni? Aŋa ma oboyo pii ki boŋo? Aŋa ma oketo agikki lo bo ducu ma tye-ni? Nyiŋe aŋa, ki nyiŋ latinne kono aŋa, ka iŋeyo? Lubaŋa cobo lok ma en ociko ada; en tye macalo kwot pa jo ma giriŋo gilaro bote. Pe imed lok mukene ma pe en owaco i kom lokke ma en owaco, miyo en bijuki dok nyuto ka maleŋ ni in lagoba. Lubaŋa, alegi imiya jami a ryo ma pud peya ato: Kwany lok me bwola ki goba woko ki i doga; pe amito imiya abed lacan nyo lalonyo; ento amito imiya cam ma romo pita. Ka abibedo ki cam madwoŋ mukato kare, miyo abikweri woko, kun awacci, “Rwot en aŋa?” dok pe myero abed lacan, miyo akwalo kwo, miyo abipyedo nyiŋ Lubaŋana. Pe myero inoŋ latic bot rwode, miyo biceni, d ok miyo gibinoŋo bal i komi. Tye jo mukene ma giloko lok me ceno wongi dok giloko lok marac i kom megigi. Tye jo mukene ma ginenne kekengi ni gitye laboŋo bal mo i komgi, ento noŋo pe gilonyogi ki i kom cilo me bal ma gitye kwede. Tye jo mukene ma gilyerre kun gitamo ni gin aye giber makato, dok gikette malo i rwom me dito pigi kengi! Tye jo mukene ma Lakgi bit calo pala lucwan, lakgi calo pala, ma gineko ki Lucan gityeko woko ducu ki i lobo, gijwero bene jo ma piny obwoyogi woko ducu ki i kin dano. Kwidi karadini tye ki anyirane aryo, ma gikok ni, “Miwa, miwa.” Tye jami adek ma pe twero yeŋ; tye jami aŋwen kiilu ma pe giwacci, “Oromo”: lyel, dako ma lalur, ŋom ma cwiyo pii madwoŋ, ki mac ma lyel ma pe twero waco bene ni, “Oromo.” Dano ma ŋalo wonne ki ŋat ma cayo minne, agak ma i laora kulu gibitiŋe woko dok acut bicamo kome woko. Tye jami aŋwen ma abedo ki ur madit i komgi; dok pe aniaŋ kitgi, gin ene: Kit ma ocur tuk kwede ki i polo, kit ma twol mol kwede ki i kom got, kit ma mel woto kwede i dye nam madit, ki kit ma laco gin ki nyako gibedo kwede. Man aye kit pa dako ma lakwele: en timo abor, lwoko kome woko, ci wacci, “An pe atimo bal mo,” Tye jami adek ma miyo lobo yenne; tye jami aŋwen kulu ma lobo kikome pe twero ciro: opii ka odoko kabaka, lamiŋ ka oyen ki cam, nyako ma gidagi, ka ginyomo woko, ki nyako aŋeca ka oleyo ka tyen min ot. Tye jami aŋwen i wi lobo-ni ma gitiŋo, ento gitye ki ryeko madwoŋ: Ŋiniŋini pe gitek, ento gicoko cam me acamagi kare me oro; okile pe gitwoni oteka, ento kabedogi tye i kom got; bonyo pe tye ki kabaka mo ento pud gitwarre kun gilubbe aluba i dul ki dul. Itwero mako lagwe i ciŋi, ento pud ibinoŋo ni lagwe tye i gaŋ pa luker, Tye jami adek ma nen me deyo ka gitye ka wot; tye jami aŋwen ma gurye aryeya i rek ka giwoto: labwor keken aye ma tye twon oteka makato lee mu kene ducu dok pe loko ŋeye ki lee mo wacel; twon gweno ma lanywar, nyok dyel, ki kabaka ma tye ka wot ma ŋatte aŋata i nyim lwakke. Ka ce onoŋo miŋ omaki, ma ibedo ka kette malo piri keni, nyo ka ibedo ka tamo gin marac, myero ijuk lebi cut. Ka ipwayo cak dyaŋ ci inoŋo moo, ka imako umi idiyo matek ci remo katti cut, dok ka itugo kiniga ki i cwiny dano mo, nyayo lweny cut. Magi aye lok pa Lemuel, kabaka me Maca, ma minne onwonye kwede. Latinna, gin aŋo, abiwacci lok aŋo? In latinna, an aye ma anywali, dok in lagam me kwonna bot Lubaŋa, Pe myero ityek tekki woko i kom mon, pe iribbe kwedgi pien gin jo ma gineko luker gityeko woko. Lemuel, mat pe oporre pi luker, luker myero pe gumat koŋo vino, kadi luloc pe myero gubed ki miti me mato mat makec; ka gumato miyo wigi wil woko i kom cik ma giketo, dok bimiyo ginako pido pa jo ma gitye ki can ki gin ma myero botgi. Mi koŋo vino makec bot ŋat ma doŋ cok to, ki koŋo vino bot jo ma tye ki kumo pi can malit; wek gumat ci wigi owil woko i kom cangi, wek wigi pe opo i kom cwercwiny ma gubedo kwede. Lok pi jo ma doggi oto, ki pi gin ma myero bot jo ma gudoŋ woko liyak ata. Lok pigi, dok iŋol kopgi atir, myero igwok lucan ki jo ma piny obwoyogi. Dako makwiri ma kite ber Aŋa ma twero noŋo dako makwiri ma kite ber? En ber kato jami me wel-gu ducu. Cware keto genne ducu i kome, pi meno cware pe bibedo lacan. Dako-nu timo cware maber, pe miye peko mo, pi kare me kwone ducu. En tiyo tic matek ki ciŋe, kun cweyo boŋŋi me yer romo, ki mukene ma a i kom pamba. En tye macalo lwak mel pa lacat, kelo camme nia ki ka mabor. En a malo wa con ma piny pud wor ci miyo cam ki jo ma i ode ducu, ka dok poko tic ki aŋecane. En neno lobo ci wilo woko wek epur iye olokke; man en wilo ki lim ma en onoŋo mua i kom tic matek ma en otiyo. En dako ma tye ki kero ma kome mit bene i ticce, en tye ki teko ma romme tic. En bene tye ka neno ni ticce me cat kelo bote magoba maber. Dok mac tarane bedo ka lyel alyela wa i dyewor-gu ducu ma pe to. En wiyo ucine pire kene, dok en kikome aye cweyo boŋone. En gire konyo jo ma lucan, dok bene konyo jo ma piny obwoyogi. En pe tye ki lworo mo pi jo ma i ode i kare me koyo, pien jo ma i ode ducu guruko boŋo mapek me uci makwar. En cweyo boŋŋi me giumme; boŋŋine ducu obedo boŋŋi camanini maberre ki ma lamar lamar. Cware doŋ nene mada bot jo ma i dog gaŋ, ka obedo i kin ludoŋo me lobo. Dakone cweyo boŋo nia ki kom pamba ci catogi woko; en bene poko del me tweyo pyer bot lucat. En rukke ki tek kacel ki deyo, ma noŋo nyero nino ma pud tye anyim-gu ducu anyera. En loko lokke ducu ki ryeko, pwony ma en pwonyo ki dano bene obedo pwony me kica. En tye ka gwoko jo ma i ode i kit yo ducu ma mitte, en pe lawackom. Ka litinone gua malo gilwoŋe ni lagumkom; cware bene lwoŋe ni lagumkom, dok pake matek kun wacci, “Mon mapol gutyeko tiyo tic mabeco makato, ento in itiyo doŋ ma ikatogi ducu.” Pe igen dako ma labuta, ki ber kom dano konnye pe; ento myero gipak dako ma lworo Rwot aye. Myero gipwoye pi tic matek ducu ma en tiyo, dok myero jo ducu guwore pi ticce magi ducu. Man aye lok pa latit-lok, wod pa Daudi, ma obedo kabaka i Jerucalem. Latit-lok owacci, konygi pe, konygi pe! Gin ducu konygi pe, Dano twero noŋo kit magoba aŋo ki i kom tic matek ma en tiyo dyeceŋ jwi-ni? Yalwak me kare man kato, dok yalwak mukene teyo kakare, ento lobo bedo mere matwal. Ceŋ tuc ci cito poto, ka dok lokke oyotoyot, dok ka ma en tuc ki iye, Yamo kodo dok tuŋ acuc, ka dok wirre kodo dok tuŋ acam; bedo ka kodo tuŋŋi ki tuŋŋi, ka dok lokke rumo piny aruma. Pii ma opoŋ i kulu ducu mol cito i nam, ento nam pe poŋ; pii dok cen ka ma kulu ocakke ki iye, ka cako mol ki kunnu dwogo i ŋamo Kom dano doŋ ool woko ki jami ducu; dano liŋ aliŋa pe twero waco lok mo’ waŋ dano pe twero yeŋ ki gin ma dano neno, kadi ki it bene pe twero yeŋ ki gin ma dano winyo. Gin ma doŋ otyeko timme en aye gin ma bitimme bene, ki gin ma gityeko tiyo en bene gin ma gibitiyo; pi meno pe tye gin mo manyen i wi lobo-ni kulu. Tye gin mo ma giloko pire ni, “Nen, man gin manyen”? Man otyeko timme wa con, i kare ma onoŋo pud peya ginywalowa. Pe tye ŋat mo ma po i kom gin mutimme yam wa con, dok pe tye ŋat mo ki i kin jo ma bilubogi ma bipo i kom gin ma bitimme i kare ma pud tye anyim. An latit-lok onoŋo abedo kabaka ma loyo jo Icrael i Jerucalem. Amoko tamma me yenyo dok me niyo ki ryeko gin ducu ma dano gitye ka tiyone i te polo i lobo kany. Lubaŋa omiyo tic ma kelo cwercwiny keken bot dano ma myero gubed ka tiyone. Atyeko neno gin ducu ma gitye ka tiyone i lobo kany: aneno gin ducu konygi pe, dok gibedo calo ryemo kor yamo ma kodo. Gin mugom pe doŋ gitwero twenyone bedo atir, dok jami ma komgi pe nen, pe gitwero kwanogi. Aloko kekena ni, “An doŋ alimo ryeko madit makato ryeko pa luker ducu ma gukwoŋo nyima ma gubedo ka loc i Jerucalem; dok kit ryeko ki ŋec ducu doŋ atyeko ŋiyo kwede.” Aketo cwinya me ŋeyo ryeko, ki me ŋeyo apoya ki miŋo. Anoŋo ni magi ducu bene obedo calo ryemo kor yamo ma kodo. Bedo ki ryeko madwoŋ miyo dano bedo ki cwercwiny madwoŋ bene, ŋat ma ŋecce tye ka medde meno tye ka medo cwercwiny. Aloko kekena ni, “Bin ba, amito koŋ atem yomo cwinya wek aniaŋ kit ma yomcwiny tye kwede.” Ento anoŋo ni man bene gin ma konnye pe. Ka aloko kekena ni nyero obedo gin me apoya, ki yomcwiny obedo gin ma pe konyo. Atamo ni my ero koŋ atem mato koŋo vino wek olyet koma, kun noŋo tamma tye ka tela ki ryeko, dok ni koŋ atem niyo ki tim me miŋo, nio wan ma aneno gin maber atika ma myero dano guti i kare manok me kwogi ma gibedo kwede i lobo. Atiyo tic matego; agero odi, ka dok apito olok., Ayubo potti mabeco me yomcwiny ma gicelogi woko ki cel, ci apito iye kwa yadi ducu ma nyak ma gicamo nyiggi, Dok akwinyo kut ka ma pii ogurre iye me aonya i te yadi ma gitye ka doŋo i kabedo ma giyubo me buŋa. Awilo opii ki aŋeca; ka dok abedo ki opii ma ginywalogi ki i kin jo ma i oda. Abedo ki lwak dyaŋi kacel ki romi mapol, kun akato jo ducu ma gukwoŋo nyima ma gubedo ka loc i Jerucalem. Acoko lwak ryal ki jabu ki lonyo pa luker kacel ki dul lobo ma yam giloyo odoko mera. Abedo bene ki luwer ma co ki ma mon, kacel ki mon mapol mapatpat ki gin ducu ma yomo cwiny dano. Kit meno adoko twon dano mo madit ma pe wacce, kun aloyo bene wa jo ducu ma gukwoŋo nyima ma gubedo ka loc i Jerucalem; ryekona aye obedo ka konya. Dok gin mo keken ma amito ka waŋa oneno anoŋo; dok pe akwero gin ma yomo cwiny dano, pien anoŋo yomcwiny madwoŋ i tic ducu ma abedo ka tiyone, doŋ meno aye obedo bakacicca pi tic ma atiyo. Lacen alokke acako niyo jami ducu ma atiyo ki ciŋa ki kit ma ayelle kwede ka tiyone, ci nen, anoŋo ni man gin ma konnye pe, rom ki ryemo kor yamo ma kodo, dok ni pe tye kit magoba mo ma dano twero noŋo i lobo. Kit meno alokke abedo ka tamo tam matut i kom ryeko, apoya ki miŋo, Ci anoŋo ni gin mo ma ŋat ma oleyo ka tyen kabaka twero timo pe. Myero en olub gin ma kabaka ma okwono nyime otiyo. Ci cutcut aniaŋ ni ryeko ber kato miŋo macalo cen kato colpiny, Dano maryek neno yo ka ma ecito iye, ma noŋo ŋat ma lamiŋ woto mere i colpiny; ento kadi bed kumeno kit gin acel bipoto i ko m gin aryo-nu ducu. Ka dok aloko kekena ni, “Gin ma bipoto i kom ŋat ma lamiŋ bipoto i koma bene; ka kumeno piŋo abedo maryek twatwal?” Ci adok iye kekena ni, man bene gin ma konnye pe. Pe tye ŋat mo ma twero po pi dano ma laryeko kadi pi lamiŋ, pien i kare ma tye anyim noŋo wi dano doŋ otyeko wil woko wa con i kom gin aryo-nu ducu. Dano maryek ki dano ma lamiŋ ducu gito i yo ma rom aroma! Kit meno acako kwero bedo kwo, pien gin ma gitye ka tiyone i lobo-ni obedo gin ma kelo can i koma keken; pien gin ducu ma gitiyo konnye pe, rom ki ryemo kor yamo ma kodo. Cwinya ocako kwero ticca ducu ma atiyo i lobo man, kun aneno ni jami ducu ma anoŋo myero abwot ki ŋat ma bileyo ka tyena; doŋ aŋa ma ŋeyo ka ce en bibedo dano ma laryeko nyo lamiŋ? Ento en bibedo ladit ma loyo jami ducu ma yam alimo kun atiyo pigi matek, ma ayelle kwede ka tiyone kun atiyo ki ryekona i lobo man. Man bene gin ma konnye pe. Ci alokke abedo ki cwercwiny ma iya oarre woko i kom ticca ma atiyo i lobo-ni, pien kare mogo dano ma otiyo tic matek ki ryekone, ki ŋec ma en tye kwede dok ki kwirine ducu myero owek jamine bot dano mo ma pe otiyo tic mo liweŋ pire wek ole olony kwede labedo. Man bene gin ma konnye pe, dok gin marac twatwal. Kit gin aŋo ma dano noŋo ki i kom ticce ducu, ki kero ma en otiyo kwede tic i lobo-ni? Mwaka me kwone ducu opoŋ ki arem, ki ticce bene kelo bote cwercwiny keken; kadi wa i dyewor wiye pe twero ywe ki tam. Man bene gin ma konnye pe. Doŋ gin maber makato ma dano myero otim en aye ni en myero ocam cam dok omat mat, wek onoŋ yomcwiny i tic ma en tiyo. Ento aneno ni man bene Lubaŋa aye ma omiyo; pien ka Lubaŋa pe, ŋat mo pe twero camo cam dok ŋat mo pe twero noŋo yomcwiny. Lubaŋa miyo ryeko, ŋec ki yomcwiny bot dano ma en pwoyo; ento bot dano ma labalo en miye tic me guro jami ki durogi kacel, me amiya bot ŋat ma onoŋo pwoc ki bote. Man bene gin ma konnye pe, rom ki ryemo kor yamo ma kodo. Kit tim acel acel tye ki karene, dok kit lok mo keken tye ki karene i lobo man: Kare ma ginywalo iye dano, ki kare ma en bito iye; kare me pito ginapita, ki kare me puto gin ma gipito-ni woko; kare me neko dano, ki kare me caŋo dano acaŋa: kare me muko ot ki reto woko piny, ki kare me gerone odoco; kare me koko, ki kare me nyero; kare me kumo, ki kare me myel; kare me bolo got atata, ki kare me gurone kacel; kare me kwako lawoti, ki kare ma pe ikwako iye lawoti; kare me yenyo gin mo-ni, ki kare ma jami rwenyo iye arwenya; kare me gwoko gin mo-ni, ki kare me bolone woko; kare me yeco boŋo ki kare me kwoyone woko doki; kare me liŋ aliŋa, ki kare me lok; kare me maro dano, ki kare me kwero dano akwera; kare me lweny, ki kare me bedo ki kuc. Dano ma latic-ci mono noŋo kit magoba aŋo i kom tic ducu ma en otiyo? Doŋ atyeko neno kit tic ma Lubaŋa omiyo bot dano ma myero gubed ka tiyone. En oketo jami ducu maber i karegi kikome; dok oketo dano me ŋeyo kare mukato anec ki kare ma pud tye anyim, ento kadi kumeno dano pe twero ŋeyo gin ma Lubaŋa otiyo nia i acakki nio i agikki. Aniaŋ atir ni pe tye gin mo maber pi dano makato kono bedo ki yomcwiny pi kare me kwone ducu i lobo man. Dok aniaŋ bene ni man obedo mot ma Lubaŋa omiyo bot dano, kun mito ni dano acel acel myero ocam cam, dok omat mat-gu, dok onoŋ yomcwiny ma a i kom ticce ducu ma en tiyo, Aŋeyo ni gin mo keken ma Lubaŋa tiyo bedo matwal; pe gitwero medo gin mo iye, dok pe gitwero kwanyo gin mo woko ki i kome. Lubaŋa oketo obedo kit meno, wek omi dano gubed ki lworo i nyime, Gin ma tye ka timme-ni doŋ yam otyeko timme con; ki gin ma bitimme i anyim bene doŋ otyeko timme woko; Lubaŋa yenyo kit gin acel-lu ma yam otimme, miyo dok timme aye. Pe meno keken, anoŋo ni i lobo man ka ma myero tim ma atir obed tye iye inoŋo tim maraco, dok bene ka ma myero dano gubed ki kit ma atir inoŋo tim maraco iye. Abedo ka lok kekena ki i cwinya ni, Lubaŋa biŋolo kop i kom jo ma kitgi atir kacel ki lutim maraco, pien doŋ otyeko yero kare pi kit lok acel acel, ki pi kit tic ducu. Abedo ka tamo ki i cwinya ni, Lubaŋa tye ka temo dano atema wek enyut botgi ni kadi bed gin dano ento gin rom aroma ki lee tim, Can ma poto i kom dano ki gin ma timme i kom lee tim ducu rom aroma; gin ducu gito woko. Gin ducu gimiyogi yweyo me kwo maromrom, dano pe bedo maber makato lee; pien gin ducu konygi pe. Gin aryo ducu gicito i kabedo acel; pien gin ducu gua ki i apwa, dok gibidok iye aye. Aŋa ma ŋeyo ka ce tipo pa dano cito malo i polo, nyo ka tipo pa lee donyo piny i nom? Kit meno aniaŋ ni gin maber makato ducu ma dano twero timo en aye me yomo cwinye ki gin ma en olimo ki i ticce ma en otiyo, pien meno aye dul ma gipoko bote. Aŋa ma twero nyutte gin ma bitimme lacen i anyim ma noŋo en doŋ eto woko? Dok aneno kit macalo jo mukene tye ka uno ki luwotgi i lobo man. Nen, jo ma giunogi gikok akoka ki pig waŋgi, pien pe gitye ki ŋat mo ma myero okwe cwinygi! Pe gitye ki ŋat mo ma konyogi, pien jo ma unogi onoŋo gitye ki twero. Omiyo atamo ni jo ma doŋ guto woko komgi gum kato jo makwo ma pud gudoŋ gibedo i lobo-ni, Ento ŋat ma kato gin-nu ducu en aye dano ma pud peya ginywalo, ma peya oneno tim maraco ma gitye ka timone i lobo-ni, Atyeko neno bene ni tic ducu ma dano tiyo ki dirone ducu, tiyo pi nyeko ma en tye kwede i kom lawote, ni myero en aye ebed ki jami makato lawote. Man bene gin ma konnye pe, dok rom ki ryemo kor yamo ma kodo. Dano ma lamiŋ bedo abeda ma odolo ciŋe, pi meno kec bineko nio wan ma oto. Ka it ye ki jami manok ma romo poŋciŋ keken, kun itiyo kwede inoŋo ni it ye ki kuc i cwinyi, ber kato jami ma tye poncin aryo ma kuc pe iye mupoŋ ki tic matek, dok ma rom ki ryemo kor yamo ma kodo. Dok aniaŋ bene ni tye gin mo mukene ma konnye pe i lobo-ni: tye dano ma bedo kene ma pe tye ki lareme mo, latinne mo bene pe, kadi ominne mo-gu bene pe, ento pud inoŋo ni tye ka tiyo tic matek ma pe ywe, ento ki tuŋ bote nen ni lonyo ma etye kwede-ni pud pe romme, En bene pe twero pennye kekene ni, “Tic matek ma atye ka tiyone-ni mono atiyo pi aŋa, ma geŋa woko ki noŋo yomcwiny-nyi?” Man bene gin ma konnye pe, dok gin ma pe miyo yomcwiny bot dano. Bedo jo aryo ber kato ma dano acel obedo kene, pien gin jo aryo-nu gitwero noŋo bakacic maber ma a i kom tic ma gitiyo. I kin jo aryo-ni ka ŋat acel opoto piny, ci lawote ilo woko malo; ento ŋat ma bedo kene tye ki can, pien ka opoto piny pe tye ŋat mo mukene ma twero ile woko malo. Dok ka jo aryo gubuto i kabuto acel kacel, gin ducu komgi bedo lyet, ento ka dano acel obuto i kabuto kene, ci kome twero bedo Lyet niŋniŋ? Kadi bed dano mo twero bwoyo ŋat ma tye kene-ni, ento jo aryo kulu bwoyo en woko marac twatwal. Pe tye ŋat mo ma twero codo tol adek ma giwiyogi kacel oyotoyot. Awobi ma lacan dok maryek ber kato kabaka muti ma lamiŋ, ma pe doŋ winyo tam ducu ma gimiye, kadi bed giketo en me bedo kabaka kun oa ki i mabuc nyo kadi bed ginywalo en dano ma lacan i lobo ma lacen en oloyo. Abedo ka tamo bene pi jo ducu ma gibedo kwo i lobo man, kadi wa awobi meno matidi-ni bene, ma oleyo kakare. Aneno ni lwak jo ducu pe kwanne; awobi matidi ca obedo ka loyogi ducu. Ento io ma gibinywalogi lacen pe gibibedo ki yomcwiny mo i kome. Adada man bene gin ma konnye pe, dok rom ki ryemo kor yamo ma kodo. Myero igwok kiti ka icito ka donyo i ot pa Lubaŋa; pien nyiko cok ka winyo lok pa Lubaŋa ber kato gitum ma lumiŋ gimiyo bote, pien gin pe giŋeyo ni gitye ka timo bal. Myero koŋ ikwoŋ tamo pi gin ma imito loko ma peya iloko gin mo, pe myero ilok lok oyotoyot i nyim Lubaŋa; myero ilok manok mo keken i nyime, pien en tye wi polo, ki in it ye i lobo. Ka ibedo ka paro par mapol ci lek bino i wiyi, ci ibedo ka lok calo lamiŋ. Pi meno ka ikwoŋo bot Lubaŋa pe igalle, dok myero igwok kwoŋŋi; pien Lubaŋa cwinye pe yom i kom lumiŋ. Myero icob gin ma in doŋ ikwoŋo, Onoŋo bedo ber ka in pe ikwoŋo kwoŋ mo, kato ma ikwoŋo kun pe icobo gin ma ikwoŋo, Pe iwek lok ma iloko oteri ka timo bal, dok pe myero iwac bot lukwena pa Lubaŋa ni meno dogi onoŋo ocer acera. Piŋo iweko kiniga mako Lubaŋa i komi pi lok ma iloko, ma miyo en balo ticci ducu ma yam itiyo ki ciŋi-ni? Myero ilwor Lubaŋa, kadi bed lek mapol bimedde ki bino i wiyi, ma miyo iloko lok madwoŋ ata ma konygi pe. Pe myero ibed ki ur mo ka ce ineno ni lucan ma gitye i dul lobo mo gitye ka unogi, ma kopgi pe giŋolo atir kun gitimogi ki tim me bwami; pien tye ŋat ma tye malo makato ladit ma loyo wi lwak, dok pud tye ŋat mo ma tye malo makato gin aryo-nu ducu. Doŋ gin maber makato ducu, en aye kabaka mo ma omiyo lobo ma en loyo gipuro dok gipito iye cam madwoŋ, Ŋat ma maro lim, lim pe twero romone wacel; ki ŋat ma maro lonyo bene kadi bed noŋ magoba madwoŋ, pud dok wacci peya oromme. Man bene gin ma konnye pe. Ka lonyo pa dano woto ki medde, ci jo ma gicamo ciŋe bene nya gimedde ameda. Doŋ kit kony aŋo ma lalonyo-ni tye kwede? En neno lonyone anena ki waŋe keken. Ŋat ma latic matek nino mot liywi, kadi bed camo cam man ok nyo madwoŋ ento ŋat mulony mukato kare pe nino pien bedo ka paro lonyone. Gin marac twatwal ma aneno i lobo en aye ni dano kano lwak lonyo madwoŋ, ci lacen dok lonyo meno kelo can i komgi, dok lwak lonyogi meno rwenyo woko liweŋ pi gum marac. Man miyo dano doŋ ki cine noŋo laboŋo gin mo ma etwero pito ki litinone, Pi meno kit macalo dano yam minne onywale i lobo man ma tye munero, en bene biweko lobo-ni dok ki ciŋe noŋo laboŋo gin mo, pe bikwanyo jami mo mua i kom ticce kadi ki acel ma bimako i cine kun cito kwede. Man bene gin marac atika: kit macalo en obino i lobo noŋo laboŋo gin mo-ni, en bene bidok noŋo kit meno. Ci doŋ dano-nu noŋo kit magoba aŋo i kom ticce ma en otiyo? Otiyo tic me mako yamo keken, Pi kare me kwone ducu en obedo i colpiny ki can ki cwercwiny madwoŋ mukato kare, dok ki two wa ki keccwiny. Doŋ gin maber ma aneno ma myero dano otim en ene, en myero ocam cam dok omat mat-gu wek onoŋ yomcwiny i kom ticce ducu ma en otiyo pi kare manok me kwone ma Lubaŋa omiye i lobo-ni, pien man aye dul ma gipoko bote. Dano acel acel ma Lubaŋa omiye lonyo, kacel ki jami madwoŋ wa ki twero me yomo cwinye ki jami magi, mito ogam dul ma gipoko ni obed mere, wek onoŋ yomcwiny i kom ticce, pien man aye mot ma Lubaŋa omiyo. Man miyo dano pe po pi kare me kwone mukato aŋec, pien Lubaŋa tye ka miyo cwinye bedo yom kare ducu. Atyeko neno gin marac mapek ma obwoyo kom dano ducu ma bedo i lobo-ni woko. Lubaŋa twero miyo bot dano mo lonyo, lwak jami mapol ata, dok miyo dano giwore, wek dano-nu obed ma gin mo ducu ma en mito pe orem bote, ento ka Lubaŋa pe omiye twero me noŋo yomcwiny i kom lwak lonyone-ni, ci dano mo ata aye binoŋo yomcwiny i kom jamine ducu; man gin ma konnye pe. Man aye can marac mukato kare. Kadi bed dano mo onywal litino ma romo miya acel kulu, kadi en obedo i lobo pi lwak mwaka mapol, ma mwakane bene doŋ dwoŋ, ento ka pe noŋo yomcwiny mo i kom jami mabeco me lobo man, ka pe bene giketo deyo me yiko en ka oto, awaco ni latin ma ginywalo ma doŋ otyeko to woko ki i ic ber kato eno Kony me nywalo latin meno pe, en cito i colpiny, ka doŋ tye i colpiny ci wi dano wil woko pi nyiŋe, Dok latin meno pe one no cen, pe oneyo gin mo; ento en noŋo yweyo maber makato dano meno madit-ti. Kadi bed dano-nu ori i lobo pi mwaka alip aryo kulu, ka pe bedo ki jami mabeco i lobo man, ci gin aryo-ni ducu pe gicito i kabedo acel? Dano tiyo ticce ducu wek enoŋ gin ma myero ecam, ento pe romo yen ki cam ma en noŋo. Dano maryek kato ŋat ma lamiŋ niŋniŋ? Ci dano ma lacan ma ŋeyo gwoko kwone i kin’ jo makwo bedo ki gin aŋo? Bedo ber me tic ki jami ma it ye kwede, kato ma ibedo ki par madwoŋ pi jami mukene; man bene gin ma konnye pe, rom ki ryemo kor yamo ma kodo. Gin ma tye ka timme onoŋo doŋ gityeko cako nyiŋe con, dok waŋeyo kit pa dano ni, en pe twero pyem ki ŋat matek makato eno Ka dano pyem kun loko lok madwoŋ, ci lokke ducu doko gin ma konnye pe, noŋo oyelle nono. Aŋa ma ŋeyo gin maber pi dano ma kun noŋo en obedo pi kare manok ki kit kwo ma konnye pe, pien kwone rwenyo woko macalo tipo? Aŋa ma twero tito bot dano gin ma bitimme ki i ŋeye lacen i lobo man ma noŋo en doŋ oto woko? Bedo ki nyiŋ maber ber kato moo me wel ma ŋwece kur; ki nino me to pa dano, ber kato nino ma ginywale iye. Bedo ber me cito i ot ka ma dano tye iye ka kumo pi to, kato ma icito i ot ma giyubo iye karama; pien to aye agikki pa dano ducu, jo makwo gibipo i lok man dok gibiketo cwinygi iye. Cwercwiny ber kato nyero, cwercwiny miyo waŋi nen ki can ento miyo niaŋ matut bot dano. Tam pa dano ma ryek rwatte ki tam pa jo ma gitye ka kumo i ot; ento lumiŋ tamgi rwatte ki tam pa jo ma gitye i ot ka ma ginoŋo iye yomcwiny. Ka dano owinyo juk pa ŋat maryek ber, kato ma en obedo ka winyo wer pa lumiŋ, Nyero pa lumiŋ obedo gin ma konynye pe; cal ki yen okuto ma girwako i mac i te agulu dek, ma waŋ mwoc lirwatrwat. Dano maryek ka uno dano, lokke doko ŋat ma lamiŋ, dok gamo lim me wilo dano i muŋ balo tam pa dano woko. Agikki me jami ber kato acakkine; dok dano ma diyo cwinye ber kato ŋat ma lawakke. Pe myero iwek kiniga omaki oyotoyot; jo ma lumiŋ aye kano kiniga i cwinygi. Pe myero iwac ni, “Piŋo jami me kare macon mukato ‘aŋec ber makato me kare man!” Peny macalo man nyuto ni ipe ki ryeko. Dano acel acel ma bedo i lobo mito obed ryek, pien ryeko ber macalo ŋom ma dano oleyo ki bot kwarone. Ryeko twero gwoko dano kit macalo lim gwoko ki ŋat ma tye kwede; ryeko gwoko kwo pa ŋat maryek, man aye ber me bedo ki ŋec. Koŋ itam pi tic pa Lubaŋa; aŋa ma twero twenyo gin ma en oketo mugom wek obed atir? Bed ki yomcwiny i kare ma itye maber, dok i kare ma piny rac ber ipo ni, Lubaŋa aye ma omiyo dano gibedo maber nyo marac, wek dano pe oŋe gin ma bitimme lacen ma noŋo doŋ guto woko. Anoŋo ni kwona kara konnye pe, ento kono omiyo aneno jami ducu. Dok aneno ni dano ma kite atir to pi leŋcwinye, kun dano marac ma en latim marac bedo ri nakanaka i kom timme marac-ci. Pe myero ibed dano ma kite atir twatwal, pe bene ikette keni me bedo ryek makato. Piŋo imito nekke woko kekeni? Dok pe myero ibed dano marac mukato kare, pe ‘ibed lamiŋ bene. Imito ni ito woko piŋo, ma pud peya kareni oromo? Bedo ber ka imako man, ento mukene-ni, bene pe ikwany ciŋi woko ki iye; pien ŋat ma lworo Lubaŋa kwone bibedo maber i yo aryo-ni ducu. Ryeko miyo teko bot dano maryek, kato gin ma luloc apar kulu twero tiyo i gaŋ ma gitye iye. Adada pe tye dano mo ma kite atir i lobo man, ma timo gin maber keken ma pe balo. Pe icik iti me winyo lok ducu ma dano giwaco, miyo iwinyo lok mogo maraco ma laticci loko me yeto in: in bene iŋeyo ki i cwinyi kekeni ni yam ibedo ka loko lok maraco kun iyeto ki jo mukene pi tyen mapol. Atiyo ki ryekona me temo man ducu, kun awacci, “Abibedo ryek”; ento pe atwero, pien ryeko noŋo tye ka mabor kweda. Gin ma doŋ tye, tye ka mabor, dok tye ka matut, ka matut adada; pe tye ŋat mo ma twero niaŋ iye. Aloko tamroa me ŋeyo ki me yenyo ryeko, kun amito aniaŋ ka ma ryeko twero noŋŋe iye, dok me niaŋ tyen lok me jami ducu, ci aniaŋ atir ni tim maraco aye miŋo, ki tim miŋo aye apoya kikome. Dok anoŋo ni tye kit dako mo ma cwinye tye calo owic nyo obwo ma kelo can makato to ma cine obedo calo nyor me tweyo dano. Ŋat ma tiyo gin ma Lubaŋa mito twero bwot woko ki bote, ento ŋat ma labalo aye dako-nu twero makone. Nen, Latit-lok owaco ni, abedo ka noŋo man motmot i kare ma atye ka yenyo tyen lok ducu, ma obedo ka bino i tamma teretere, ento pe amedo ki noŋo gin mo. I kin jo alip acel anoŋo iye laco acel keken aye kite yomo cwinya, ento pe anoŋo dako mo kadi ki acel i kin jo magi ducu. Nen man gin acel keken ma anoŋo ni, Lubaŋa gire onoŋo oketo dano ma cwinygi tye atir, ento dano guyenyo tam mapol mapatpat. Aŋa ma calo dano maryek? Dok aŋa ma ŋeyo gonyo tyen lok mo? Ryeko miyo waŋ dano ryeny aryenya, dok miyo colwaŋ me adagadaga ma: en tye kwede lokke. Myero ilub gin ma kabaka ociko, dok pi kwoŋŋi maleŋ ma ikwoŋo pe iwek cwinyi oballe woko; pe igalle a woko ki i nyime oyotoyot ka lok doŋ odoko rac, pien kabaka twero timo gin mo keken ma en mito. Lok ma kabaka lok loko ki twero, dok aŋa ma twero waco bote ni, “In itimo aŋo?” ŋat ma lubo cik pe birwatte ki kit peko mo, dok dano maryek ŋeyo kare, kacel wa ki yo ma myero elubi. Kit lok acel acel tye ki karene dok ki yone, kadi bed ayela tye mapek ma obwoyo kom dano woko. Dano pe ŋeyo gin ma bitimme i anyim, pi meno aŋa ma twero tito bote kit ma bitimme kwede. Pe tye dano mo ma tye ki twero me gwoko tipone, kadi ki twero me geŋo ni en pe eto ka nino me tone oromo; pe watwero nuny ki newa pi lweny man, dok tim maraco bene pe bilaro jo ma gin lutim maraco. Man ducu an aneno kun aporo ki jami ducu ma tye ka timme i lobo, kun dano ma tye ki twero loyo jo mukene ki tek. Lacen aneno ka giyiko lutim maraco; yam gicito gidonyo i kabedo maleŋ ka gidok woko-gu, ma noŋo dano gipakogi mada i gaŋ ka ma yam gutimo iye tim maraco ma kit meno. Man bene gin ma konnye pe. Lubaŋa pe keto can oyotoyot i kom dano ka otimo gin marac, omiyo dano ducu guketo cwinygi atika pi timo gin marac. Kadi bed labalo otim gin marac ma romo tyen miya acel kun medo mwaka ma myero eri kwede i lobo, ento an aŋeyo atir ni jo ma gilworo Lubaŋa aye gibibedo maber, pien gibedo ki lworo i nyime; ŋat ma latim marac pe bibedo maber wacel, dok bene en calo tipo, pe biri i lobo pi kare malac, pien en pe tye ki lworo i nyim Lubaŋa. Tye gin ma konnye pe ma tye ka timme i lobo; tye jo mogo ma kitgi atir ma can poto i komgi ma myero opot i kom lutim maraco, dok tye lutim maraco mogo ma ginoŋo gum maber ma oporre pi jo ma kitgi atir. Doŋ awaco ni man bene gin ma konnye pe. Doŋ aniaŋ maber ni gin ma mitte ma myero dano otim en aye me bedo ki yomcwiny, pien pe tye gin mo maber i lobo kany pi dano, kono camo ki mato mat-gu, ki yomo cwinye macalo etwero, pien man aye gin ma ebiwot kwede i ticce ducu ma etiyo, i kare me kwone ducu ma Lubaŋa omiye i lobo-ni, Ka aketo cwinya me niaŋ matut i kit yo ma ryeko tiyo kwede, ki dok me neno tic ma dano gitiyo i lobo, kun aneno dano pe miyo wane pi nino i dyeceŋ kadi i dyewor, ci aneno tic ducu ma Lubaŋa otiyo, aniaŋ ni dano kara pe twero ŋeyo gin ma tye ka timme i lobo. Kadi bed dano mo oyelle ma rom mene me yenyone, pud pe binono; dok kadi bed dano ma laryeko tamo ni eneyo, pe twero noŋone bene. Ento lok man ducu aketo i cwinya, kun aŋiyo ducu maber, kit macalo jo ma kitgi atir ki jo ma luryeko kacel ki gin ma gutiyo ducu gitye i ciŋ Lubaŋa; kono obedo mar nyo adagadaga, pe tye dano mo ma ŋeyo. Dok gin ducu ma pud tye obedo gin ma konnye pe, pien kit can acel bipoto i komgi ducu, bipoto i kom jo ma kitgi atir kacel ki i kom jo ma gin lutim maraco, i kom jo mabeco ki i kom jo maraco, i kom jo maleŋ ki i kom jo ma komgi ki keni, i kom ŋat ma tyero gitum ki i kom ŋat ma pe tyero gitum. Can man poto i kom dano maber ma rom aroma ma opoto i kom ŋat ma labalo; ki ŋat ma kwoŋo kwoŋ rom ki ŋat ma lworo kwoŋo kwoŋ, Man aye gin marac ma nen i gin ducu ma tye ka timme i lobo-ni; kit can acel bino pi jo ducu. Dok cwiny dano ducu opoŋ ki gin marac, dok apoya bene tye i cwinygi i kare me kwogi ducu, ka lacen gin bene gito woko. Ento ŋat ma oribbe ki jo makwo ducu bedo ki gen, pien gwok makwo ber kato labwor muto. Jo makwo giŋeyo ni gibito, ento jo ma doŋ guto woko pe giŋeyo gin mo, dok bene pe doŋ gitye ki bakacic ma gibilimo, dok wi dano wil i komgi woko matwal. Pe doŋ gitye ki dul mo ma gibinywako ki jo mukene matwal i tic ducu ma gitye ka tiyone i lobo-ni, pien mar megi ki adagadagagi kacel ki miti ma onoŋo gitye kwede ducu otyeko gik woko licwic. Doŋ icit icam kwonni ki yomcwiny, dok imat koŋo vinoni ma noŋo cwinyi yom ata; pien Lubaŋa otyeko pwoyo gin ma itiyo. Ruk ginaruka matar kare ducu, ma pe iken wiro wii ki moo bene. Bed ki yomcwiny kacel ki dako ma imaro, i mwaka me kwoni ducu ka pud ikwo, ki i ticci ma gimiyi ma iri kwede i lobo-ni, pien meno aye dul ma gipoko boti i kwoni ma konnye pe-ni i ticci ma it ye ka tiyone i lobo. Kit gin mo keken ma inoŋo oye ciŋi me atiya, ti ki tekki: pien tic nyo tam nyo ŋec nyo ryeko mo doŋ pe i lyel, ka ma ibecito iye-ni, Dok aneno ni ŋat madwir pe loyo ŋwec, ŋat matek bene pe en aye ma loyo lweny, pe ŋat maryek aye ma noŋo kwon ma myero ecam, kadi jo ma tye ki ŋec matut pe gin aye ma ginoŋo lonyo madwoŋ, nyo jo makwiri i tic pe gin aye jo ma gipwoyogi; ento kare kacel ki gumkom poto i komgi ducu. Dano acel acel pe ŋeyo bino pa nino ma mere. Dano obedo macalo rec ma gimakogi ki obwo pi gum marac, dok calo winyo ma gimoko i owic; dano bene gimakogi ki owic i kare marac, ma tuggi poto i komgi woko oyotoyot. Dok bene aneno kit labol man kit macalo ryeko tye kwede i lobo, ci onen madit mada ki tuŋ bota. Yam tye gaŋ mo matidi ki jo manok keken ma gibedo iye; ci kabaka mo madit obino omonyo gaŋ meno kun mito mayone woko, ci ocako toro cel lobo matek orumo gaŋ meno woko dyere. Ento dano ma lacan maryek i gaŋ meno aye ma olaro gaŋ meno ki ryekone. Ento pe tye ŋat mo kadi ki acel ma wiye opo i kom dano meno ma lacan. Ento awaco ni ryeko loyo tekkom, kadi bed gicayo ryeko pa dano ma lacan ca, dok bene ŋat ma owinyo lokke peke. Ka iwinyo lok pa ŋat maryek mot laliŋ, ber kato ma ibedo ka winyo lok pa laloc ma daŋŋe kwede adaŋa i kin lumiŋ. Ryeko ber loyo jami lweny, ento labalo acel keken twero balo lwak jami mabeco mapol at Lwaŋo muto miyo moo wir makur kwok doko maŋwe; miŋo matidi bene balo ryeko kacel ki deyo woko kit meno. Dano ma laryeko paro ki i cwinye me tiyo gin ma tye atir, ento ŋat ma lamiŋ paro ki i cwinye me timo gin marac. Kadi bed inen lamiŋ tye ka wot iyo, noŋo tye ma wiye odiŋ, dok miyo en waco bot dano ducu ni en lamiŋ. Ka ce inen kiniga omako laloc magwa i komi, pe iwek kabedoni pien gitwero timo kica pi bal madito ka onoŋo ibedo giri mot laliŋ, Tye gin marac ma aneno i lobo obedo calo bal ma oa ki bot laloc: jo mamiŋ aye gimiyo gibedo i kabedo me dito, kun lulonyo gibedo i kabedo ma piny adada, Aneno opii aye gitye ka ŋwec ki aguragura, kun rwodi giwoto awota ki tyengi calo gin opii. Ŋat ma okwinyo bur bipoto i bur ma en okwinyo; ki ŋat ma muko kicika me ot bene twol bikayo, Ŋat ma mukogot, got biŋolo; ki ŋat ma baro yen, yen biketo ret ikome. Ka ce latoŋ lake olu, ka pe ipako lake, myero iti ki tekoni makato; ento ryeko ber konyo dano weko ticce woto maber. Ka ce twol okayo dano ma peya won yat okweyo, latim yatyat doŋ pe bedo ki kony mo. Lok ma dano maryek loko miyo dano gipwoye, ento ŋat ma lamiŋ loko gin ma kelo can i kome kekene. Acakki me lokke opoŋ ki miŋo keken, lokke me agikki bene loko calo ŋat ma tye ki apoya marac. Lamiŋ medo lok nyayo doko dwoŋ, kadi bed dano mo pe ŋeyo gin ma bibedo i anyim; aŋa kono ma twero tito bote gin ma bitimme lacen i anyim ma noŋo en doŋ eto woko? Lamiŋ aye kome nyonne woko ki tic ma en tiyo, miyo pe ŋeyo yo ma cito i gaŋ, Wubineno can wun jo me lobo, ma kabakawu obedo calo latin matidi, ki rwodiwu bene gicamo karama wa odiko! Wutye ki yomcwiny wun jo me lobo ma kabakawu odoŋo i gaŋ kal, kun rwodiwu bene gicamo cam i kare ma mitte, wek gilim teko, ento pe pi mero! Ka won ot obedo dano ma lacarcar ci wi ode ryebbe woko, dok pi wackome miyo wi ot cwer ka kot ocwer. Cam miyo dano bedo ki nyero, ki kono vino kelo yomcwiny bot jo ma gimato, lim aye ma miyo jami ducu twero tine. Pe ilok lok marac i kom kabaka i tammi, dok bene pe ilok lok marac i kom lulonyo ka itye i ot butoni; miyo winyo me polo tino lok ma iwaco-ni tero woko, nyo kit gin mo ma bwome tye twero tuco lok meno woko ka maleŋ, Cwal cammi bot jo ma tye loka nam tuŋcel, ibinoŋo iye magoba i ŋe mwaka mapol ma pud tye anyim. Pok jamini woko i dul abiro, nyo aboro, pien pe iŋeyo gin marac ma bitimme i lobo, Ka ce kot doŋ opoŋ i pol, ci cwer bino piny i lobo; dok ka ce yat opoto odok tuŋ acuc, nyo tuŋ acam, doŋ kabedo ma yat opoto iye-ni, en aye yat bibuto iye. Ŋat ma kuro ni koŋ enen yamo, pe twero coyo kodi i ŋom; dok ŋat ma bedo ka neno mere pol, pe bikayo gin mo. Kit macalo pe iŋeyo kit ma latin ma i ot nyodo pa dako dokokwede gin makwo, kumeno bene pe iŋeyo tic pa Lubaŋa ma tiyo jami ducu-ni. Co kodini i odiko, dok i otyeno bene kit meno pe ijuk ciŋi ka tic; pien pe iŋeyo mene ma bicek mabup, man nyo maca, nyo ka gwok gin aryo ducu gibibedo marom ci gicek maber. Leŋpiny gin maber, neno ceŋ yomo cwiny dano. Ka ce dano mo obedo i lobo ori pi mwaka mapol, myero en obed ki yomcwiny pi lwak kare magi ducu; ento wiye myero opo ni nino me colpiny bibedo dwoŋ. Gin ma bino ducu gin ma konnye pe. Bed ki yomcwiny i kare me tinoni ma pud in awobi, lub kit gin ducu ma cwinyi mito ki gin ma waŋi oneno. Ento ber iŋe ni pi jami magi ducu Lubaŋa biŋolo iye kop i komi. Kwany tam me par mapol woko ki i tammi, wek pe ibed ki arem i komi; pien kare me tinoni ki acakki me kwoni gir Ducu konygi pe. I kare me tinoni, ber ipo kom Lacwec mucweyo In, ma pud peya kare ma opoŋ ki gin marac oo, ma mwaka-gu peya onyiko cok, en i kare ma ibiwacci, “Pe atye ki yomcwiny mo i komgi”; ma pud peya ceŋ ki derone, dwe ki lakalatwe gucido woko, dok pol bene pe biwarre woko ma doŋ kot otyeko cwer. En i kare meno bene lugwok-ot komgi bimyel, ki jo ma komgi tek gibidoko goro, ki jo ma girego kal ticgi bigik pien gin nok, ki jo ma gineno piny ki i waŋ dirica pe dok gibimedde ki neno piny. Dok doggola me yo ducu gicego woko; ma noŋo kidi rego pe winnye matek twatwal, ki dano bia malo ka owinyo dwan winyo ma kok, ki anyira ma gin jo ma luwer ducu gibidwokogi woko piny. Dano tye ki lworo bene pi gin ma tye malo, ki pi gin marac ma twero poto i komgi; ki yat yaa bene tye ka turu, ocene tye ka lak alaka ento dano pe doŋ tye ki miti mo; pien dano cito gire i gaŋŋe ka ma ecibedo iye matwal, kun jo ma tye ki kumo giwoto i yo gudo. Myero wii opo ni nyor me ryal bicot woko, dok atabo me jabu to ŋinnye woko, nyo agulu pii to woko i waŋ it, nyo gituro lawala woko ki tuŋ wiye, ki apwa bene dok i kom ŋom ka ma yam oa ki iye, ki cwiny dano dok “bot Lubaŋa ma yam omiyo-ni. Konnye pe, konnye pe adada, Latit-lok ma waco; man ducu konnye pe, Medo i kom ryeko, Latit-lok bene opwonyo lwak ki gin ma en ŋeyo, ma pimo dok ŋiyo matut, ka doŋ ocano carolok ducu kikore kun gwokke matek. Latit-lok otemo noŋo lok ma kweyo cwiny dano, ci en ocoyo lok me ada ki cwiny ma tye atir. Lok ma dano maryek waco ducu obedo macalo dim, dok calo cumar ma giguro odonyo matek, en gin lok ma Lakwat acel loko. Latinna, tye dok gin mo ma amedo i kom magi ma myero igwokke iye. Coyo buk mapol pe gik, dok kwan twatwal mukato kare olo kom dano noŋo. Man aye agikki me, lok meno; lok ducu doŋ jo gutyeko winyone. Lwor Lubaŋa dok ilub cikke ducu; Lubaŋa biŋolo kop pi kit tim ducu ma watiyo, wa ki gin ducu ma watimo i muŋ, kadi ber nyo rac. Man wer pa Solomon ma yomo cwiny makato wer ducu. Kono ikwako kora ki badi, mar meri ma it ye kwede i koma lim makato koŋo mamit. Moo me wir meri kur adada, ka awinyo gilwoŋo nyiŋi ci wiya po piri; pi meno anyira ducu gimari. Wek alub kori, ci wawot wacit woko oyotoyot; in kabakana tera wa i kicikani. Wabibedo ki yomcwiny ka it ye kacel kwedwa; wabidwori pi mar meri makato koŋo mamit ma wamato. Jo ducu gimari pien in imyero. An acol matek, aber kwede, wun anyira Jerucalem; anen mwonya mada calo kema pa jo Kedar, anen maber calo boŋŋi me kicika pa Solomon. Pe myero wucik waŋwu wunena pi raŋi del koma-ni, pien lyeto me ceŋ ocido koma woko. Kiniga omako omegina i koma, guketo an abedo ka tic i potti olok; ento pe abedo ki kare me tic i poto olokka an kikoma. Titta, in ma amaro ki c winya ducu, ibitero romini ka cam tuŋ kwene? Gibiywe kwene i dyeceŋ? Imito abed macalo ŋat ma lak alaka piŋo i kin romi pa lukwat luwoti? Ka pe iŋeyo, in nyako ma nen mwonya makato mon ducu-ni, cit ilub kor romi, wek inoŋ ka cam pa dyegini ka ma cok ki kema pa lukwat. In nyako ma amaro, apori ki min aguragura ma riŋo ki gadigadi pa Parao. Iruko ruk me deyo i iti ryoryo ducu ma miyo inen mwonya mada, iruko jami me wel-gu ma girubo ki tol i ŋuti. Wabiyubo ruk me deyo kijabu piri, ma tiko ŋutte ducu bedo me ryal keken. I kare ma kabaka obedo i ka yweyo, moona ma ŋwece kur ocako duny ma ŋwece otyeko piny woko. En ŋat ma amaro-ni pire tek bota macalo pi adomo moo makur, ma aketo i kora. En ŋat ma amaro-ni pire tekka calo pi ature me tim ma turu maber adada ma turu i potti olok ma tye i Engedi. Nen, in ma amaro-ni inen mwonya mada; dok waŋi ryeny aryenya macalo komamam. Nen, in ma amaro-ni, inen ber adada, adada neni yomo cwinya matek. Wabibuto i wi lum ma pud olot alota; jaŋ yadi me cedar aye bibedo rii me otwa, bao me ciprec aye bibedo kwori me dan ot. An acal ki ature ma i bar Caron, nyo leŋa ma aturene kwar ma maro twi i nota. Nyako ma amaro-ni rom ki ature leŋa ma odoŋo i kin okuto, i kin anyira luwote. En laco ma amaro-ni calo yat acuga ma i kin yadi ma i buŋa, ka aporo ki co mukene. Amaro bedo i te tipone, ki kome bene noŋo lim alima i doga. Okelo an i ot me karamane, ki benderane ma en otiŋo pira aye mar. Miya acam olok mutwo-gu, dok wek acam acuga wek koma olim tek; pien mar omiya adoko latwo kombeddi. Kono ateno wiya i kom ciŋe ma lacam, kun en noŋo okwaka ki ciŋe lacuc. Acikowu matek, wun anyira Jerucalem, ki nyiŋ bure ki til me tim, ni pe wuco nyako ma amaro nio ka kare oromo. Awinyo dwan laco ma amaro-ni. Nen, en tye ka bino, tye ka riŋo ariŋa ki i wi godi, tye ka riŋo ki i wi cere-gu laro tuŋ bota. Laco ma amaro-ni obedo calo bure, nyo calo twon til Nen, en ocuŋ i ŋe celwa ca, ociko wane tye ka neno piny ki i wan ot, dok obedo ka nena ki i wan dirica. En laco ma amaro-ni loko kweda kun wacci, “A ibin, in ma amaro, in nyako maber atika, bin waciti. “Nen, kare me cwir doŋ okato ki kot bene ocok woko matwal. Ature doŋ ocako turu i lobo, kare me wer doŋ en, akuri tye ka koko ma dwane winnye wa i pottiwa. Oduro ocako nyako nyige, ki olok bene tye ka turu; ŋwec aturene tye ka duny makur. A ibin, in ma amaro-ni, laber-ri, bin wacit kacel kwedi. In ikanne calo akuri i kin got mubar i ka-kanne ma tye i kor got ma wiye bit: wek anen waŋi ma neno ber-ri do, dok awiny dwani mamit twatwal-li. Wumak too ducu, too matinone, ma pud peya gubalo olokwa woko ma doŋ tye ka turu-ni.” Laco ma amaro-ni mera kikome ki an bene a mere. En kwayo romine i kin lena ma oturu. Lokke idwogi, in laco ma amaro-ni, calo bure nyo wod til ma pud tidi ma tye i wi godi, nio wan ma yamo me odiko ocako kodo manic, ki nio waŋ ma colpiny doŋ pe. Abuto anino i kabutona dyewor, abedo ka leko lek i kom en ma amaro-ni: abedo ka yenyone, ento pe amedo ki noŋe; alwoŋo en, ento en pe ogamo doga. “Abia kombeddi acito arumo gaŋ woko, abiwoto wa i dye gudo-gu ki wa i dye bar-gu: abibedo ka yenyo en ŋat ma amaro ni.” Ayenye, ento pe amedo ki none. Lukur-piny ma onoŋo gitye ka wot me loŋo dye gaŋ gunoŋa, Ci an apenyogi ni, “Wuneno en ŋat ma amaro-ni?” I kare ma akato lukur-piny manok, ci atugi noŋo en ma amaro-ni woko cut. Akwako kore, ma pe onoŋo atwero weko en ni ocit ka mo nio ka akelo en wa i ot pa maa, wa i kicika ot pa maa munywala-ni. Acikowu matek, wun anyira Jerucalem, ki nyiŋ bure ki til me tim, ni pe wuco nyako ma amaro nio ka kare oromo. Meno gin aŋo ma oa ki i tim ma tye ka bino-ni, calo yito ma duny ma a ki i mac ma giwaŋo kwede murra ki odok eceta, dok calo gin ma ŋwecgi kur-gu ducu ma lucat-wil gicato? Nen, gitye ka tino kitara maber pi Solomon; jo ma gin oteka lweny ma romo pyerabicel aye gurumo, co ma gin oteka lweny ma i Icrael’ Gin ducu jo makwiri i tic ki pala lucwan-gu, dok guŋiyo ki lweny, Dano acel acel i kingi tye ki pala lucwanne ma otweyo i eme, ma doŋ gikuro gin mo keken ma timme i wor. Gitiŋo kabaka Solomon ki kitara ma giyubo ki bao mabeco adada me yadi me Lebanon. Wir ma oketo pi lagon wiye ma ocuŋ, en otiyo ki ryal, ŋeye otiyo ki jabu, ki kabedone oumo ki boŋo ma obedo lamar lamar. Ki tuŋ iye gidero maber twatwal, ma anyira Jerucalem aye guyubo pi cwiny me mar ma gitye kwede. Wun anyira Cion, wubin wunen kabaka Solomon. En oruko lalukana ma minne oketo i wiye i nino ma onyomo iye dakone, i nino ma en obedo kwede ki yomcwiny madw Nen, inen mwonya matek, in nyako ma amaro, pien in iber adada! Waŋi tye ka ryeny arvenya ki i ne kitambara me wii, Yer wii ocuŋ lijur calo lwak dyegi, ma giwoto gicito piny i kor got Gilead. Laki tar calo megi romi matar ma giŋolo yer komgi woko, calo megi romi ma pud gia ka lwoko alwoka, Gin ducu gigwaro rut keken, pe tye mo acel i kingi ma orwenyo. Del dogi kwar calo uci makwar, dok bedo me yomcwiny mada me winyo lok ma iloko. Lemi ducu noŋo opoŋ woko calo nyig pomegranat ma gipoko iye i dul aryo, ma nen ki i ŋe kitambara me wii. Ŋuti bor calo ot pa Daudi ma wiye ocudo malo, ma gigero pi kano jami lweny, ma giŋabo iye kwodi ma romo alip acel kulu, ma gin ducu kwodi pa oteka lweny. Tunoni ryoryo ducu nen calo bure aryo, calo litino til aryo ma gin rudi, ma gitye ka cam i kin lena ma oturu. Abibedo i wi got me murra, ki i wi cere me odok luban, nio waŋ ma yamo me odiko ocako kodo maŋic, ki nio wan ma colpiny doŋ pe. In inen mwonya mada, nyako ma amaro, pe it ye ki gin mo marac i komi. Waa woko kwedi ki i wi got Lebanon, in nyako ger ma mera; waa woko kwedi ki i Lebanon. Lor ibin piny ki i wi got Amana, ki i got Cenir ki got Kermon, ka ma lwak labwor ki kwac gibedo iye, Ka aneno waŋi, in gin amarana ki nyako ger ma mera, kadi ki nyig tiko acel i kom gin-ŋut ma iruko-ni, otyeko lok ki i cwinya woko liweŋ. Mar ma ibedo kwede i koma miya yomcwiny madit, in gin amarana ki nyako ger ma mera, mar ma it ye kwede i koma kato kono mamit woko, dok ŋwec mooni kur kato aŋwece makur ducu. Nyako ma amaro, dogi lim calo kic, lok ma iloko mit bota calo cak ki moo kic. Ŋwec boŋŋini dunv makur calo ŋwec got me Lebanon. Nyako ger ma mera ma amaro, en poto me muŋ, poto ma girumo woko ki cel, wan it ma gimwono woko maber. Ginapita doŋo kunnu maber atika. Gidoŋo-calo yadi pomegranat ma ginyako nyig mabeco makato ducu, ki ature makur ki yadi me moo ma ŋwece kur, moo ki lena ki lum ma ŋwecgi kur ki yadi me odok luban, murra ki moo ma ŋwece kur: ki kit yadi ducu mapatpat ma ŋwecgi kur. En waŋ it ma piine bido ŋom ma i poto, ma piine gunnye molamola, ma mol a ki i kom got Lebanon cito piny i ora kulu. Co woko, in yamo me tuŋ acam, inyamo me tuŋ acuc bene ibin, ikod i potona; wek ŋwec yamone obed makur ma duny o wa ka mabor. Wek laco ma amaro-ni obin i potone ocam kit nyig yadi ducu mabeco ma iye mito. An doŋ atyeko bino i potona, In gin amarana, nyako ger ma mera. Atye kapwono murra ki aŋwece, atye ka camo moo kicca ki i peda kic: atye ka mato koŋo vinona kacel ki cak ma mera. Wun lurema, wumat mat, mo waŋ ma mar oromowu! Abedo ka nino, ento cwinya bedo ka lwodo lok. Awinyo en ma amaro-ni ka dwono doggola. “Yabba doggola do in gin amarana, nyako ma amaro ma yomo cwinya, in ileŋ calo akuri, pe tye gin marac mo i komi. Toyo odyako wiya woko, ki lupu ma duny i dyewor bene omwono yer wiya woko.” “Doŋ atyeko lunyo boŋona woko imito dok aruk aye? Doŋ atyeko lwoko tyena woko bene imito dok anywangi woko ki ŋom? En ma amaro-ni orwako ciŋe i waŋ kika, ci cwinya opoto nilik. I kare ma aa ka yabo doggola bot en ma amaro-ni, ci ciŋa odyak woko ki moo murra lweta-gu odyak woko ki pig murra maliyo, i kom lalor ma gimako ka giyabo kwede doggola. Ayabo doggola bot en ma amaro-ni, ento anoŋo ni doŋ olokke ocito woko. I kare ma nene en oloko-ni tipo koma oto woko lirut, Ayenye twatwal ento pe amedo ki none: alwoŋo bene kwe, pe ogamo doga. Lukur-piny ma gubedo ka loŋo dye gaŋ gunona; gugoya dok guketo ret i koma, lukur-piny meno ma gikuro cel me gaŋ gulunyo boŋona lagen koyo woko ki i koma. Acikowu matek, wun anyira Jerucalem, ka wunoŋo en ŋat ma amaro-ni, wutitte ni mar kombeddi omiya adoko latwo. In nyako maber ma nen mwonya makato anyira ducu-ni, tittiwa kit ŋat ma imaro-ni. Kit gin aŋo ma miyo gitwero bedo ki ur pire, ma omiyo icikowa kuman-ni? En ŋat ma amaro-ni nen maber dok lome kwar, en ber kato jo alip apar. Yer wiye boco dok ominne amina yeme col calo kom okur, tye me wel makato jabu woko. Waŋe nen calo kom akuri ma tye i ŋet waŋ it ma piine mol, ginen calo akuri ma gikwan i cak, nyo ki di me wel ma gimwono maber, Leme obedo calo poto ma gipito iye yat aŋwece, ma ŋwece kur mada, Doge nen maber calo ature leŋa, ma moo murra tye ka mol ki iye. Bade calo jabu ma giluŋo adunu, en oruko jami me wel-gu, Kome pwot calo kom lak lyec, ma gideyo ki kidi capir. Tyene obedo calo wir mapwot, ma gicibo i kom got ma gideyo ki jabu. Kite nen calo got Lebanon, ma nen maber mada ki yat cedar mabecone. Lok ma en loko winnye ma mit twatwal, ki gin mo keken ma dok i kome yomo cwinya matek. Man aye ŋat ma amaro-ni ma en larema, wun anyira Jerucalem. In nyako maber ma nen mwonya makato anyira ducu-ni, en ŋat ma imaro-ni kono ocito kwene? En olokke odok yo tuŋ kwene? Wacwa, wek wakonyi ki yenyone. En ma amaro-ni ocito odok gire yo tuŋ piny i potone, ka ma yadi ma ŋwecgi kur doŋo iye. En tye ka kwayo romine i poto, en tye bene ka pwono ature lena. Laco ma amaro-ni mera kikome ki an bene a mere. En kwayo romine i kin lena ma oturu. In nyako ma amaro iber calo gaŋ Tiŋa, inen mwonya mada calo gaŋ Jerucalem, inen lik calo buca mony ma gutiŋo bendera. Lok waŋi cen pe inena, pien miyo apari mada. Yer wii ocuŋ lijur calo lwak dyegi, ma giwoto’ gicito piny i kor got Gilead. Laki tar calo megi romi matar ma giŋolo yer komgi woko, calo megi romi ma pud gia ka lwoko alwoka. Gin ducu gigwaro rut keken, pe tye mo acel i kingi ma orwenyo. Lemi ducu noŋo opoŋ woko calo nyig pomegranat ma gipoko iye i dul aryo, ma nen ki i ŋe kitambara me wii. Mon ker welgi romo pyerabicel ki mon aŋeca welgi pyeraboro, ki anyira doŋ welgi pe kwanne. Ento nyako ma amaro en ŋat acel keken ma nen mwonya mada calo akuri. En latin nyako acel keken bot minne, en latin ma kite ber ma minne maro’ adada. Anyira ducu ginene ci gilwoŋe ni layomcwiny lwak mon ker ki mon aneca-gu giwero wer me pako eno “Man aŋa ma nen calo rupiny-nyi? En nen mwonya mada calo dwe ma ryeny, dok calo cen ma ryeny maleŋ, ma nen lik calo buca mony ma gutiŋo bendera.” Acito i poto ka ma gipito iye yadi ma nyak nyiggi calo yaa, ka aneno ginapita ma pud doŋo adoŋa ma tye i nota, dok acito ka neno ka olok doŋ ocako luro me keto nyige, ki me neno ka yadi pomegranat doŋ turu. Ma pud peya onoŋo ayubbe, abedo ka tamo ni wabedo kwedi atena i gadigadi me ker. Wer pa anyira me Jerucalem Dwog cen, dwog cen, in nyako me Culam, dwog cen, dwog cen, wek waneni. Wer pa lanyom Piŋo wumito neno nyako me Culam, kun myelo i nyim dul lumyel aryo ducu? Tyeni ma iruko war iye-ni ber rommene, in nyako ma nen calo daker! Emi nen muluŋŋe calo tiko ŋut maber, ma bedo calo gin ma ladiro aye otiyo. Peni obedo kiluka calo ŋut opoko ma gipiko iye koŋo vino mamit jwijwi. Ii obedo calo ŋano ma giduro kacel, ma ature lena orumo woko dyere. Tunoni obedo calo litino til ma ginywalogi rudi, dok obedo calo litino bure aryo. Ŋuti otonne calo wir lak lyec ma ocudo malo likuŋ, Waŋi nen calo kut ma i Kecibon, ma cok ki dog gaŋ me Bat-rabim. Umi ber calo lubele me Lebanon, ma okemo Damaciko. Wii omiyo inen maber calo got Karmel, yerre olot muluk ma nen maber calo boŋo ma obedo lamar lamar; pi neno ber me yer wii omiyo kabaka odoko macalo lamabuc. In iber, inen mwonya mada, in nyako ma amaro adada imiyo abedo ki yomcwiny madwoŋ. In icalo yat otit, dok tuno ma i kori obedo calo tuga otit. An awacci abiito yat otit ci amako jaŋe apwono nyige, Ki tuŋ bota tunoni nen calo tuga nyig olok, ki yweyo me dogi kur calo yat ma ŋwece kur, lok ma a ki i dogi bene winyone mit rom ki koŋo vino mamit adada. Ka imato imwonyo cito i ii mapwot, ma kato ki i dogi ki i kin laki-gu. Laco ma amaro-ni mera kikome, mitine ducu tye i koma. Bin, in ma amari-ni, wek wacit kacel kwedi i potoni, ka doŋ wabibuto i dyewor i gaŋi ma tye kunnu. Wabia malo wa con wacito i potti olok, wek wacinen ka ce olok doŋ ocako luro me keto nyige, dok me neno ka ce olok doŋ turu, me neno bene ka yadi pomegranat doŋ turu. Abinyuto mar mera boti ki kunnu. Ŋwec yat nyodo tye ka duny makur, ki yadi mabeco ducu ma i ŋet doggolawa gutyeko nyak woko, In ma amaro agwoko nyig yadi ma yomo cwiny piri, maconne kacel ki manyenne Kono yam ibedo omera, ma idoto cak ki i tuno pa maa. Ka onoŋo arwatte kwedi i gudo, onoŋo atwero noto lemi ma ŋat mo pe twero caya. Onoŋo atwero telo wii ateri i ot pa maa, wa i kicika pa en maa munywala-ni. Onoŋo atwero mini kono yino ma ŋwece kur imato, ki kono me pig nyig pomegranat mera. Kono ateno wiya i kom ciŋe ma lacam, kun en noŋo okwaka ki ciŋe lacuc. Acikowu matek, wun anyira Jerucalem, ni pe wuco nyako ma amaro nio ka kare oromo. Meno aŋa ma oa ki i tim ma tye ka bino-ni, ma ojeŋŋe i kom laco ma en maroni? Acoyo in i kare ma it ye i te yat acuga, en i kabedo ma meni onywali iye ki arem madwoŋ-ŋi, i kabedo meno meni munywali-ni obedo iye ki arem madwoŋ, Myero imar an keken ki cwinyi ducu, dok itiŋa i badi macalo gin ma meri kikome; pien mar tek calo to, ki nyeko bene ger calo lyel. Meny calo leb mac ma lyel, leb mac ma lyel ki tek makato ducu. Pe tye pii mo kadi opoŋ madit ma twero balo mar woko, kadi lalele ma mol matek pe twero mwonyo mar woko. Ento ka dano mo otemo wilo mar ki lonyone ducu ma en tye kwede i ode, jo gibicaye matek makato. Watye ki laminwa matidine, tunone pud peya ogulo. Wabitimo gin aŋo pi laminwa-ni, i kare ma awobi mo bilok kwede kun mito ni enyom? Ka nen laminwa obedo macalo cel gaŋ, onoŋo watwero yubo lubele me ryal ma ocudo malo likuŋ i kome. Ka en obedo macalo doggaŋ, watwero lorone ki bao me yat cedar. An abedo macalo cel, doŋ tunona gubedo calo wi cel ma ocudo malo. En ŋat ma mara-ni doŋ ŋeyo, atir ni an ŋat ma kelo kuc, Solomon yam tye ki poto olokke i kabedo ma gilwoŋo ni Baal-amon. En oyero lupur me gwoko poto olokke; ma dano acel acel myero ocul bo te lim me ryal alip acel pi olok mucek iye. At ye ki poto olok ma mera kikoma ma tye pira kena; in Solomon, itwero gamo giri lim me ryal alipacel-li; ki lupur ma gigwoko olokki ibimiyo botgi lim me ryal miya aryo. In ma ibedo i potti, luwota gimito winyo dwani; lok wek awiny. Bin bota oyotoyot, in ma amaro-ni, bed calo bure nyo calo wod til ma bedo i wi godi ka ma yadi ma ŋwece kur doŋo iye. Man aye lok ma Lubaŋa onyuto bot Icaya wod pa Amoj mukemo Juda ki Jerucalem i kare pa Ujia, Yocam, Akaj ki Kejekia ma gubedo luker me Juda. Koŋ iwiny, in polo, ter iti in lobo; pien Rwot doŋ oloko ni, “Apito litino awobe, amiyo gudoŋo, ento doŋ gujemo woko i koma, Twon ŋeyo rwode, kana ŋeyo ka ma rwode miye iye cam’ ento Icrael pe ŋeyo, lwakka pe giniaŋ.” Oii, rok ma lubalo, gubedo jo ma bal onurogi woko, likwayo pa lutim tim maraco, litino ma kitgi doŋ oballe woko! Doŋ gubwoto Rwot woko, gicayo ŋat Maleŋ me Icrael bene, gupokke kweda woko, gudok cen matek. Piŋo pud dok wumito gimedde ki goyowu? Dok wumedde ameda ki jemo piŋo? Wunen bur doŋ oromo wiwu woko ducu, cwinywu bene doŋ odoko nyap. Cakke ki i tyenwu piny o kwede wa i wiwu malo, ka mo maber pe kadi ki acel; ret ki bur dwoŋ iye ata, ma waŋ ret mogo bene remone pud tye ka cwer acwera; pe gibiyo tut ki iye, dok bene pe gitweyo waŋ rette, pe gibido bene ki moo. Lobowu odoŋ nono, gaŋiwu ducu doŋ giwaŋo woko ki mac: lurok gumayo lobowu woko ma wun bene wuneno, lobowu odoŋ nono, rom ki lobo ma lurok guyako. Guweko gaŋ me Cion odoŋ calo bolo ma giweko i poto olok, dok calo ka gony ma giweko i poto okono, calo gaŋ ma lumony doŋ gutyeko rumone woko. Kono nene Rwot me mony pe oweko dano mogo gudoŋ, kono wabedo calo Codom, kono doŋ wadoko calo Gomora. Wuwiny lok pa Rwot, wun luloc me Codom! Wuter itwu wuwiny pwony pa Lubaŋawa, wun jo Gomora! Gitumwu ma wutyero mapol kit meno-ni kono, konnye ŋo ki bota? Man Rwot aye owaco; nyogi romiwu ma wutyero me gitum awaŋa-ni doŋ oroma woko, kacel ki moo dwolo me limwu makwo ma gucwene; cwinya pe mito remo twoni, kadi remo nyogi romi nyo remo nyogi dyegi. Ka wubino i nyima, aŋa muwaco botwu kono ni wunyon dyekalla? Pe wumedde ki kela gitum ma konnye pe bota, yito odok eceta ma ŋwece kur odoko gin me kwer mada ki tuŋ bota. Por dwe, cabit, ki lwoŋo dano i cokke, pe atwero ciro balwu i cokkewu madito me wora. Por dwe mewu ki ninowu madito ma yam giciko pigi, gin ducu cwinya dagi; gudoko ter mapek twatwal bota, aol woko doŋ ki tinogi. Ka wutaŋo ciŋwu, abiumo waŋa woko pe anenowu: kadi bed wulega tyen mapol ata, pe abiwinyo legawu wacel; pien ciŋwu obedo remo keken. Koŋ wulwokke woko, wubed maleŋ, wubol timwu maraco woko cen ka mabor wek pe dok obed ka nen i nyima; wuwek doŋ timo gin marac, wupwonnye me timo gin maber. Wulub ŋolo kop atir, wukony jo ma giunogi; wular litino ma wongi pe, dok wupid pi mon ma coggi oto. “Wubin koŋ kombeddi, wek walar lok kacel, Rwot ma owaco; kadi bed doŋ balwu kwar ma rom mene, bidoko matar calo pee; kadi bed kwar calo pala, bidoko calo yer romo matar. Ka ce wuye lok, ma wutye ki winy, ci wubicamo gin mabeco ma ocek i lobo. Ento ka wukwero kun wujemo woko, pala lucwan bityekowu woko; pien man Rwot kikome aye ma owaco.” Gaŋ ma yam genne doŋ odoko malaya adada, gaŋ ma yam ŋolo kop ma atir tye iye-ni! Kit ma atir bene onoŋo tye iye, ento kombeddi doŋ opoŋ ki nek keken. Ryalwu doŋ rom aroma ki cette, koŋo vinowu doŋ orubbe woko ki pii. Rwodiwu ducu doŋ gudoko lujemo, gudoko bene lurem lukwo. Dano acel acel i kingi maro lim me wil i muŋ, cwinygi tye mere me noŋo mot keken. Pe giparo pi litino kic ma wongi pe, pido pa mon ma coggi oto pe o i nyimgi. Meno omiyo Rwot, ma en Rwot me mony, Rwot ma en Won Twer me Icrael, owaco ni, “Oromo doŋ, cwinya doŋ bikwe i kom jo ma daga, abiculo kwor i kom lukworra. Abilokke dok alwenyo i komgi; abitwako cet ryalwu ducu, abiliyo woko, abigwaro kit rac mo woko liweŋ ki i komwu. Abidwoko luŋolkopwu gibedo kit macalo yam tye con, ki jo ma miyo tam botwu bene bedo kit macalo yam tye wi ati. Lacen gibilwoni ni in gaŋ ma kite atir, gaŋ ma genne.” Gibikoko Cion ki ŋolo kop atir, jo ma bedo iye ma giŋut gibikokogi pi kit ma atir. Ento jo ma lujemo ki lubalo gibinekogi woko kacel, ki jo ‘ma bwoto Rwot woko, gibityekogi woko liweŋ. Pien lewic bimakowu pi yadi kworo, ma cwinywu yom iye-ni: alee bitwodowu pi potti ma yam wuyerogi. Pien wubidoko macalo kworo ma pote oner woko, dok bene macalo poto ma pii pe iye. Dano matek bidoko calo lum mutwo ka mac ogudo, ki ticce bene bibedo cal ki mac ma mwoc kirre malo; gin aryo ducu gibiwan kacel, kun noŋo pe dok tye ŋat mo ma neko mac ki i komgi. Man aye lok ma, Lubaŋa onyuto bot Icaya wod pa Amoj mukemo Juda ki Jerucalem. Man bitimme i kare ma pud tye anyim: got me ot pa Rwot bicuŋ macalo got mabor makato godi ducu, borre bikato cere ducu; rok ducu gibimol gicito iye, dok lwak lurok mapol gibibino gibiwacci, “Wubin, waitu i wi got pa Rwot, i ot pa Lubaŋa pa Yakobo; wek en opwonywa kit mere, ka wek walub yo mere.” Pien cik bia ki i Cion, lok pa Rwot bia ki i Jerucalem. En biŋolo kop i kin rok mapol, dok biŋolo kop pa lwak rok mapol; gibiteto pala lucwangi doko lak kweri dyaŋ, ki toŋigi doko pala me ŋolo jaŋ olok; rok mo pe bitiŋo pala lucwan i kom rok wadigi, pe doŋ gibimedde ki pwonyo lweny. Wun jo me ot pa Yakobo wubin wacitu kun ceŋ pa Rwot ryeny menyowa. Pien in Rwot iweko lwakki woko ata, ibwoto jo me ot pa Yakobo, pien lutyet ma gua tuŋ wokceŋ gupoŋ iye mada, ki lutak dano macalo jo Piliciti, gitye ka yoko ciŋgi ki lurok. Lobogi opoŋ ki ryal ki jabu, lonyogi pe twero tum; aguragura bene dwoŋ twatwal i lobogi, gadigadi lwenygi bene pe twero tum. Cal jogi dwoŋ i lobogi twatwal, giworo tic ma gutiyo ki ciŋgi, gin ma gutiyo pigi kengi ki ciŋgi, Meno omiyo doŋ gikwanyo dit pa dano woko, co doŋ gudoko jo ma rwomgi piny adada; pe itim kica botgi pi bal man! Dony i i got, kanne woko i i apwa, pi twon lworo madit i kom Rwot ki pi riŋo deyo me ditte. Gibijuko bwono pa dano woko, wakke pa co bikwe woko. Gibipako Rwot keken i nino meno. Pien Rwot me mony tye ki ninone, pi gin ducu ma wakke ki ma lyerre, pi gin ducu ma tye malo, ma oille malo; pi yadi cedar ducu me Lebanon, maboco ki ma tye malo; ki pi kworo ducu me Bacan; pi godi ducu ma gucuŋ likuŋ wa malo ki pi lobo ducumubedo cere, pi gedo ducu mabocoboco, ki pi cel me gaŋ ducu ma gigero matek; pi mel ducu me Tarcic, ki pi yeya ducu ma giber me anena. Gibijuko bwono pa dano woko, wakke pa co bikwe woko. Gibipako Rwot keken i nino meno. Cal jogi ducu gibijwero woko. Dano bidonyo i boro got, ki i bur ma gikwinyo i ŋom, pi twon lworo madit i kom Rwot ki pi riŋo deyo me ditte, ka en bia malo ka ryano kom jo ma bedo i lobo. Inino meno cal jogt me ryal ki me jabu, ma dano gutiyo me aworagi, gibibolo woko bot buyu ki bot olik, ci gibidonyo ii got ma obar, ki i kin got ma okak atata, pi twon lworo madit i kom Rwot, ki pi riŋo deyo me ditte, ka en bia malo ka ryano kom jo ma bedo i lobo. Wek dano ma yweyo tye i ume-ni obedi: dano kono konyo aŋo? Pien, koŋ inen, Rwot, ma en Rwot me mony, tye ka kwanyo woko ki bot Jerucalem ki jo Juda gin ducu ma yam kwogi ocuŋ i kome, cam ducu ma kwogi jeŋŋe iye, ki pii bene ma kwogi ojeŋŋe iye. Tye ka kwanyo dano matek dok ma lamony, laŋolkop ki lanebi, latyet ki ladit, lutel wi jo pyerabic ki jo me awora, lumi-tam ki lutak maryekke, ki luryeko ma gitiyo Lwit me gwoko kom. Abimiyo awobe bedo rwodigi, litino matino aye ma biloyogi. Dano gibibedo ka unne kekengi, kun ŋat man uno lawote, dano acel acel uno wadigi; awobi binywaro ladit, laboŋ ata binywaro dano ma giworo. I nino meno dano bimako ominne i ot pa wonne, biwacci, “In it ye ki boŋo me aruka, in aye doŋ ibibedo ka loyowa, wi obur man bibedo i te locci.” I nino meno en bilok kun wacci, “An gira pe abibedo lacan-dano; kwon ki boŋo pe i oda; pe wubiketa me bedo ŋat ma loyo lwak.” Pien Jerucalem doŋ cok poto woko, Juda doŋ opoto mere woko; pien lok ma giloko ki gin ma gitimo kemo Rwot, gujemo woko i kome dok gubalo deyone woko, Kitgi ma giyeko kwede kin dano-ni bibedo caden i komgi; ginyuto balgi woko ka maleŋ calo Codom, pe gikano akana, Can i wigi! Pien gin aye ma gukelo can i komgi kengi. Wutit bot jo ma kitgi atir ni gibibedo maber, pien gibilimo bakacic me gin ma gitimo. Can bipoto i kom jo maraco! Can ma bipoto i komgi bibedo marac mukato kare; pien gin ma ciŋgi otimo, en aye bene ma gibitimo i komgi. Litino gitye ka uno lwakka, kombeddi doŋ gitye i te loc pa mon. Wun lwakka, lutelwu tye ka rwenyowu arwenya, gitye ka ŋakowu woko ki i yo ma myero wuwot iye. Rwot doŋ obino woko ka pido, en ocuŋ ka ŋolo kop I kom lwakke. Rwot doŋ oyabo pido woko i kom lwakke, ocako pido ki ludoŋo pa lwakke ki rwodigi. “Wun kikomwu aye ma wucamo poto olok, jami ma wuyako ki bot lucan tye i odiwu. Wuninyo lwakka woko kono piŋo kun wutimo lucan malit mukato?” Man lok pa Rwot Lubaŋa me mony kikome. Rwot owacci, “Pien anyira me Cion giwakke, giwoto ma gutono ŋutgi atona kun gineno dano ki waŋ me kwele, ginyedo wot anyeda ki wi tyengi kun gara ma i tyengi yeŋŋe, tye ka kok maloŋo; pi meno, Rwot bimiyo wi anyira Cion tokke woko doko bur Rwot bimiyo komgi bene doŋ noŋo ka maleŋ. I nino meno Rwot bikwanyo atego me tyen monwu mabeco-ni woko ki tiko ma girubo me tur nyimgi, ki mola me cal dwe; mola ŋut ma ryeny aryenya, atego ŋut cin, ki kitambara me adwala i ŋut; boŋŋigi me atweya i wic, ogul me bad, del me tweyo pyer, cupa moo me wir, lwit ma gitweyo e gwoko kom; agit ciŋ, agit ma girwako lum; boŋŋigi mabeco ma giruko i nino madito, gomci, boŋŋi me ummegi, ki kicaa me ciŋ; ginaruka mogo ma mareprep, boŋŋi camanini kitambara ma gidwalo i wic ki kitam: bara me geŋo waŋ. Ma ka moo ma ŋwece kur bibedo gin mukwok; ma ka del me tweyo pyer bibedo tol: ma ka yer ma gikedo akeda maber wigi bital woko; ma ka ruko boŋŋi mogo me wel, gibitweyo boŋo cola aye i pyergi; ma ka nen mwonya, gibibedo ki lewic. Gibineko cogwu woko ki pala I ucwan, co ma gin oteka lwenywu gibito imony. Kumo ki koko me can biwinnye i dogcel me Cion; bibedo calo dako ma giyako jamine woko ducu, ma obedo piny i nom. I nino meno mon abiro gibipoto i kom laco acel kun gimake woko Iikin ma giwacce ni, “Wan giwa wabicamo camwa dok bene wabiyenyo ginarukawa kikomwa, ento in myero itrm ber ilwonwa ki nyiŋi; kwany lewic woko ki i wiwa.” I nino meno ginapita ma Rwot omiyo olot odoŋo bibedo maber kun bene noŋo tye ki deyone; gin mucek i lobo bimiyo jo Icrael mubwot gibiwakke kun bene noŋo gitye ki deyo. Jo mudoŋ i Cion ki jo ma pud bedo! Jerucalem gibilwoŋo ni jo maleŋ, jo ducu ma doŋ gicoyo nyiŋgi ni myero gubed kwo i Jerucalem, i kare ma noŋo Rwot doŋ olwoko cilo ki i kom mon me Cion woko, kun bene doŋ noŋo otyeko lonyo remo woko i dye Jerucalem pi cwiny me ŋolo kop atir ki cwiny me waŋo gin marac woko. Rwot doŋ biketo pol dyeceŋ, ki yito ki mac ma caro piny Lyel dyewor, i kabedo ducu ma tye i wi got me Cion, ki i wi dano ducu ma gucokke iye; pien gin mo ma gitiyo macalo kema biumo wi deyone ducu. Gin meno bibedo me geŋo lyeto dyeceŋ, ki me geŋo yamo ki kot. Wek koŋ awer wer bot ŋat ma amaro-ni, wer me mar i kom poto olokke. Ŋat ma amaro-ni onoŋo opuro poto olokke i wi cere ka ma ceko cam twatwal. Oboto poto, ka doŋ oteno, ocoko gweŋ bene woko ducu ki iye ka doŋ ocako pito iye olok mabeco ma oyero ayera; oketo lubele me neno pinyi dyere, ka dok okwinyo bur tye me jolo pige. En doŋ ocako bedo ki gen ni binyako nyige mabeco, ento dok onyako mere nyige calo olok me tim. Kombeddi doŋ, wun jo ma bedo i Jerucalem, ki wun jo me Juda, wutim ber wuŋol kop, i kin an ki poto olokka. Gin aŋo madog ma onoŋo myero atim i poto olokka ma pe atimo? I kare ma abedo ki gen ni olok binyako nyige mabeco, piŋo dok onyako mere nyige calo olok me tim? Wuwek koŋ doŋ atit botwu, gin ma abitimo i kom poto olokka. Abimuko cel woko ki i ŋete, wek doŋ oballe woko; abicoro lobo me celle areto woko piny, wek lee onyon lobo ma iye woko atata, Abibwoto bakke ki doo liyuk, pe doŋ abiŋolo jaŋe, kadi wa doyo tere, okuto ki ocok bitwi, ci gidoŋo iye; abiciko pol ducu wek pe dok gumi kot ocwer iye. Pien poto olok pa Rwot me mony, gin aye jo Icrael; ki jo Juda. Gin ducu gubedo gin ma en opito me yomo cwinye; onoŋo en tye ki gen ni Gibiŋolo kop atir, ento koŋ inen, gitye ka nekke woko kekengi; onoŋo tye ki gen ni gibibedo jo ma kitgi atir, ento koŋ iwiny, twon koko me can ma gikok kwede! Gibineno can, jo ma kubo odi i kom odi wadigi, ma gimedo potti i kom potti ma gitye kwede, nio waŋ ma ka mo doŋ pe odon ki jo mukene, kun noŋo doŋ gudoŋ kengi i lobo. Rwot me mony okwonne ma awinyo ni, “Adada, odi mapol igi bidoŋ noŋo, odi madoŋo, mabeco bidoŋ laboŋo ŋat mo ma bedo i igi, Poto olok eka apar, bia iye koŋo vino ma romo debe aryo keken; ki kodi kutiya adek kulu, bia iye debe aryo keken.” Gibineno can, jo ma puk odiko con, ka yenyo koŋo arege me amata, ki jo ma ri i te koŋo nakanaka wa dyewor, nio wan ma gumer matek. Gibedo ki opuk, nana, ajaa ki nyamulere i karamagi, kun koŋo bene pe lwenyo iye; ento pe giparo pi tic ma Rwot otiyo wacel, kadi wa loko wangi me neno gin ma en otiyo ki ciŋe. Meno aye gin mumiyo gitero lwakka i opii pi kwiya pinygi; co mogo i kingi ma giworo kombeddi gitye ka to ki kec, ki lwakgi mapol orwo pii onekogi matek. Meno omiyo lyel tye ka mwonyo laa twatwal, kun oŋamo doge malac mukato kare, deyo pa Jerucalem ki lwak jone gidonyo iye, jo ma wo ma cwinygi yom bene. Gikwanyo doŋ dit pa dano woko, co doŋ gudoko jo ma rwomgi piny adada, jo ma lyerre bene doŋ wakkegi ogik. Ento Rwot me mony dit dok gidwore pi ŋolo kop atir, Lubaŋa Maleŋ nyutte ni elen i timo gin ma tye atir, Romi gibibedo ka cam i Jerucalem macalo gicamo i oletgi, dok lim makwo mucwe ki dyegi gibicam i wi obur. Gibineno can jo ma ywayo kit marac ki tol me goba, ma giywayo bal macalo tol ma ywayo gadigadi, ma giwaco ni, “Wek en oru timone oyotoyot, wek oti ticce bene oyotoyot twatwal, wek wanen; wek gin ma Gat Maleŋ me Icrael oyubo ni ebitiyo obin cok, obin, wek wan bene waŋe.” Gibineno can, jo ma lwoŋo gin marac ni ber, kun dok gilokke gilwoŋo gin maber ni rac, ma giketo colpiny ma ka leŋo, ki leŋo ma ka colpiny, gin makec giloko doko gin malim, ki gin malim giloko doko gin makec! Gibineno can, jo maryek i wangi kengi, jo ma nenne kengi ni giryek. Lumat koŋo madoŋo bineno can, ki jo ma gin ludiro i rubo boŋo mamit, ma gimiyo ŋat mubalo loyo kop pi lim ma owilogi kwede i muŋ, ma pe dwoko jami pa ŋat ma pe ki bal mo cen bote. Pi meno kit macalo leb mac wano kwede ren kal, ki kit ma lum mutwo mac gamo kwede, gin bene gibibedo macalo yat ma otop woko, nyo macalo yat ma ka ture otwo ci duny calo apwa: pien gukwero winyo cik pa Rwot me mony, kun gicayo lok ma ŋat Maleŋ me Icrael oloko. Meno aye gin mumiyo akemo omako Rwot i kom lwakke, omiyo en oryeyo cine i komgi, ci onekogi woko; godi madoŋo guyeŋŋe, guto ma noŋo komgi oradde ata macalo yugi ma tye i dye gudo. Man ducu pe, okweyoakemopa Rwot en pud tye ka ryeyo ciŋe aryeya i komgi. En bitiŋo benderane pi rok ma tye ka mabor, bilwoŋogi ki i agikki piny ki lwiyo; nen gin ca, gitye ka riŋo, gibino oyotoyot. Dano mo muni ma tye ka gwanne atata pe i kingi, ŋat ma nur ki nino nyo ma onino pe i kingi, ŋat mo pe ma boŋo ma i pyere ogony woko, tol war bene pe ocot ki i tyen ŋat mo. Aterogi bit twatwal, guciko atumgi ki tol ma doŋ gutelo woko matek, obon tyen aguraguragi obedo calo pata got, tyen gadigadigi wirre calo yamo lapiru. Gin ducu gimor calo dwan labwor ma kok, gikok calo litino labwor; ginur ci gimako lee ma gitye ka dwarone, giywayo giterogi gigi laboŋo ŋat mo ma twero kwanyone woko ki botgi. Gibinur i kome i nino meno, macalo nam ma mor. Ento ka ce iloko waŋi me neno lobo, ci ibineno colpiny ki can keken, kun noŋo pol oumo wan cen woko. I mwaka ma kabaka Ujia oto iye, aneno Rwot mubedo i wi komkerre, kun onyedde malo, madit twatwal, ma dog boŋone opoŋo i ot pa Lubaŋa woko liweŋ, Lucerapi gucuŋ malo ka wiye, ma lacerapi acel acel bwome tye abicel; aryo me umo wangi, aryo me umo tyengi, ki aryo mukene me tukgi malo. Onoŋo gitye ka wer ma ŋat acel acel gamo dog lawote ni, “Rwot me mony leŋ, leŋ dok leŋ; lobo ducu opoŋ ki deyone.” Te guti me doggola ocako yeŋŋe pi wer ma guwero-ni, yito bene omwono i ot woko limuk. Ka doŋ awacci, “Aneno can doŋ ba! Ato woko do! Pien an dano ma lok ma a i doga pe leŋ, dok bene abedo i kin rok ma lok ma giloko pe leŋ: ento aneno kabaka ki waŋa, ma en aye Rwot me mony.” Cutcut ŋat acel i kin lucerapi otuk obino bota, kun omako lodi mac i ciŋe, ma en okwanyo ki i keno tyer, kun okaro ki lakar mac. Ogudo ki doga kun wacci. “Nen, gin man ogudo del dogi; gin maracci doŋ gikwanyo, ki balli doŋ giweko.” Cutcut awinyo dwan Rwot ma wacci, “Abioro aŋa mono? Aŋa ma bicito piwa?” Agamo ni, “An ene; ora.” Ka doŋ en owacca ni, “Cit iwac ki rok man ni, ‘Winyone mere wubiwinyo, ento pe wubinian te lokke; nenone wubineno, ento pe wubineyo gin ma tye.’ Mi rok man cwinygi odok nwaŋ, mi itgi bene odiŋ woko, wek pe gunen ki waŋgi, pe bene guwiny ki itgi, pe bene guniaŋ iye ki cwinygi, wek omi pe gulokke gudwog bota acaŋgi.” Ka doŋ apenyo ni, “Pi kare ma rom mene, ai Rwot?” Ci en odokka iye ni, “Nio waŋ ma gaŋi ducu igi odoŋ nono, laboŋo dano mo ma bedo i igi, jo mogo ma gibedo i odi bene doŋ pe, lobo doŋ odoŋ nono laboŋo gin mo kadi ki acel, kun Rwot doŋ ocwalo dano woko cen ka mabor, wi obur ma gibwoto doŋ dwoŋ ata i lobo. Kadi bed acel me apar pa jo ma onoŋo gubedo kenyo gudoŋ iye, pud dok gibiwaŋogi woko aye, calo kworo nyo opok, ma ajutte odon, ma noŋo doŋ gityeko toŋo kom vat woko piny.” Ajutte aye bedo kodi maleŋ. I kare pa Akaj wod pa Yocam, wod pa Ujia, kabaka me Juda, Rejin kabaka me Ciria, ki Peka wod pa Remalia, kabaka me Icrael, gin aryo ducu yam gubino i Jerucalem pi lweny i kome, ento pe gutwero loyone. I kare ma gitito lokke bot likwayo pa Daudi ni, “Jo Epraim doŋ guribbe woko ki jo Ciria,” cwiny Akaj ki pa lwakke omyel twatwal kit macalo yamo yeŋo kwede yat ka tye ka kodo. Rwot owaco bot Icaya ni, “Cit irwatte ki Akaj, in kacel ki wodi Cear-yacub. Cit irwatte kwede i agikki me yo pii ma mol a ki i joro ma malo, i yo gudo ma cito i poto pa lalwokboŋo, ci iwacce ni, ‘Gwokke, bed mot laboŋo lworo mo, cwinyi bene pe opoti pi kiniga malyet ma omako Rejin ki jo Ciria ki wod pa Remalia, pi ajut aryo ma guwan woko ma yitogi tye Ica dunynyi. Pien jo Ciria ki jo Epraim ki wod pa Remalia guporo lok marac ma myero gitim i komi, kun giwacci, “Wacitu walwenyu i kom Juda, wami obed ki lworo madwoŋ, wek wamaa woko obed mewa, ci waketu wod pa Tabcel me bedo kabaka iye.” Meno omiyo Rwot. Lubaŋa owaco kuman ni, Cobo tamgi biloyogi woko, pe bicobbe ada. Pien Damaciko aye gaŋ madit me Ciria, ki Rejin aye rwot me Damaciko. (Ma pud peya mwaka pyerabicel wiye abic otum, gibiŋinyo jo Epraim, bimiyo pe dok gimedde me bedo rok.) Camaria aye gaŋ madit me Epraim, ki wod pa Remalia aye rwot me Camaria. Ka ce pe wubiye, adada, pe wubicun matek.’ ” Rwot dok owaco ki Akaj ni, “Peny pi Lanyut mo ki bot Rwot Lubaŋani; kadi lanyut ma tye piny ka matut i lyel nyo kadi ma tye malo i polo.” Ento Akaj ogamo kun wacci. “Pe abipenyo Lanyut mo, dok pe abitemo Rwot.” En dok owaco ni, “Koŋ wuwiny wun likwayo pa Daudi! Yelo dano ma wuolo komgi pe romowu, mumiyo wutye ka olo kom Lubaŋana dok bene-ni? Pi meno, Rwot kikome aye ma bimiyo botwu lanyut. Nen, nyako mo ma peya oneyo laco biyac, ci nywalo latin laco, gibicako nyiŋ latin meno ni Immanuel. Latin meno bimato cak lukulu ki moo kic, ka doŋ oneyo kwero gin marac ki yero gin maber. Pien ma pud peya latin-nu ŋeyo kwero gin marac ki yero gin maber, lobo ma itye iye ki lworo madit i kom lukerre aryo-nu gibiweko doŋ noŋo. Rwot bimiyo kare mo bino i komi ki i kom lwakki, ki i kom jo me doggola me ot pa kwaru ma yam peya onen cakke ma jo Epraim gupokke woko ki jo Juda; en bikelo kabaka me Aciria.” I kare meno, Rwot bilwoŋo lwaŋi ma bedo i acakki kulu me Ejipt, ki kic ma bedo i lobo Aciria ki lwiyo. Gin ducu gibibino gio woko lirut i luŋ matut, ki i kin got ma obar, ki i wi okuto-gu ducu, ki i olet ducu, I kare meno Rwot bikelo dano mo ki loka kulu Euprate, ma en kabaka me Aciria. En bitimowu malit calo dano ma gilyelo yer wiye ki yer kome woko ducu, bilyelo yer tik woko bene. I kare meno dano bigwoko roya ki megi romi aryo, doŋ pi cak madwoŋ twatwal ma gibimiyo bot dano-nu, miyo dano meno bimato cak lukulu ki moo kic. I kare meno potti ducu ma yam ginoŋo iye tyen olok alip acel, ma poto acel acel gicato i wel me cekel me ryal alip acel bene, bibedo okuto ki ocok keken. Dano bicito kunnu ki atum ki atero, pien okuto ki ocok biromo lobo ducu; ento lobo ducu ma bedo cerecere ma yam onoŋo gipuro ki kweri, pe dok wubicito iye pi lworo okuto ki ocok. Kabedo meno bidoko ka ma dyaŋi camo iye kengi; dok romi ki dyegi gibibedo ka nyono piny iye atata. Rwot dok owacca ni, “Kwany got malac ci ico iye coc ki nukuta ma lwak ducu giŋeyo ma giromo kwanone, ‘Maer-calal-cak-baj.’ ” Cutcut anoŋo caden ma genne, ajwaka Uria ki Jakaria wod pa Yeberekia, me bedo lucadenna. Adonyo bot lanebi ma dako ma obedo dakona, ci ogamo ic, onywalo latin laco. Cutcut Rwot owacca ni, “Cak nyiŋe ni Maer-calal-kacbaj; pien ma pud peya latin meno ŋeyo lwoŋo ni, ‘Aba,’ nyo ‘mama,’ gibigwaro lonyo pa jo Damaciko kacel ki jami ayaka pa jo Camaria gitero woko kwoŋo nyim kabaka me Aciria.” Rwot dok oloko bota aye ni, “Pien jo man doŋ gukwero pii me Ciloa ma mol mot gulokke gigi gubedo ki myelkom i nyim Rejin ki i nyim wod pa Remalia; pi meno, Rwot bimiyo pii me kulu Euprate ma mol matek dok bene dwoŋ twatwal corre i komgi, ma en kabaka me Aciria ki deyone ducu. Bipoŋ i wan lalele ducu, kun noŋo mol atata liyakyak; bimol kato cito i Juda, ma noŋo mol atata liyakyak, kato cito anyim, bipoŋ o wa malo i ŋut dano. Pien Lubaŋa tye kwedwa. En biyaro bwome me gwoko lobo man.” Wumwolle woko kekenwu, wun rok ducu, cwinywu myero opoti; wuter itwu, wun lobo ducu ma wutye ka mabor, wuyubbe bene ma cwinywu poto, wuyubbe pi lweny ma cwinywu poto. Wupor lok kacel, ento gin mo pe ma bia iye; wulok lok, ento gin ma wumito pe bicobbe, pien Lubaŋa tye kwedwa. Rwot oloko bota kit man pien onoŋo odiya woko matek ki ciŋe, dok bene ocika ni pe alub kit pa jo me rok man, kun waco ni, “Pe wulwoŋ ni piro lok i muŋ gin ma jo me rok man lwoŋo ni piro lok i muŋ, pe wulwor bene gin ma gilworo, lworo mo ma onyo koyo i komwu bene obed pe. Ento myero wuŋe ni Rwot me mony aye ŋat maleŋ, en aye ŋat ma myero wubed ka lworone, dok en aye ma myero omiwu lworo ma onyo koyo i komwu. En oidoko kabedo maleŋ, ki got ma miyo dano yokke ka giwoto, bidoko ariya ki tuŋ botgi, makato jo me doggola pa luker aryo-nu ducu, me Juda ki me Icrael, dok bibedo owic ki kinu me ciko jo ma gibedo i Jerucalem. Jo mapol gibiyokke iye; gibipoto gitur giŋinnye woko; gibicikogi ki kinu ci gimoko.” Jo ma winyo lok ma apwonyo myero gugwok maber pe orweny woko. Rwot okanne woko ki bot jone, ento an abikure kun atye ki gen i kome. Nen an-kacel ki litino ma Rwot doŋ omiya, wabedo lanyut ki lanen bot jo Icrael ma oa ki bot Rwot me mony, ma komkerre tye i wi got Cion. Ka ce guwaco botwu ni, “Koŋ wucit wupeny lutyet ki ajwagi ma giloko wee wee, calo ŋat ma dumo aduma,” gibiwaco ni, “Rok mo-ni myero gupeny Lubaŋagi; ento myero dok gupeny tipo pa jo muto pi jo makwo?” Ento wuwiny pwony ki lok ma atuco botwu! Adada, giloko lok man pien gitye i piny macol, piny peya oru botgi. Dano biŋolo gikato ki i dye lobo ma noŋo gitye ki peko madwoŋ twatwal, ma kun noŋo kec onekogi matek. Gibitokke ki kiniga ma kun noŋo kec tye ka nekogi, ci gicako ceno kabakagi ki Lubaŋagi woko. Gibitiŋo wangi gineno malo i polo, dok gibikulo wigi kun gineno piny i lobo, ento pe gibinoŋo gin mo, gibineno can ki ‘colpiny keken, ki mutu mucido licuc me arem madwoŋ: gibicwalogi i colpiny mucido Licuc. Yo mo bibedo pe me bwot ki i arem madwoŋ. Dano yam gicayo lobo Jabulon ki lobo Naputali, ento en bimiyo piny ma neno yo tuŋ i nam, loka Jordan, Galilaya pa lurok, doko me deyo. Jo ma yam gibedo i piny macol doŋ guneno dero cen madit; ki jo ma yam bedo i lobo me mutu me piny macollicuc, ceŋ doŋ oryeny omenyogi. In doŋ imiyo jo me rokwa onya, imedo bene yomcwiny botgi; gibedo ki yomcwiny i nyimi, kit ma dano bedo kwede i kare me kac, kit ma dano bedo kwede ki yomcwiny ka gipoko jami ma guyako. Pien okolgi mapek, ki odoo ma goyo gwokgi, ki odoo ma yam giburogi kwede tektek me tiyo tic, in doŋ iturogi woko ducu, macalo i nino pa jo Midian. Pien war pa oteka lweny ducu ma ginyono ki piny i dye lweny, ki boŋŋi ducu ma ginywano woko ki remo, gibiwaŋogi woko ki mac ma ka yen. Pien doŋ ginywalo botwa latin, gimiyo botwa latin laco; gibimiyo en tiŋo twero me Loc i wi gwoke, nyiŋe gibicako ni, “Lami-tam ma giuro, Lubaŋa Won Twer, Won ma bedo nakanaka, Laloc ma kelo kuc.” Doŋ medde me locce ki kuc ma bia iye ka gikke bibedo pe, i wi komker pa Daudi, ki i wi kerre, me mokone ocuŋ matek ki gwokone wek pe opoti, i ŋolo kop atir ki i kit ma atir, cakke tin dok me bedo matwal. Arima pa Rwot me mony bimiyo man cobbe. Rwot ocwalo lok i kom Yakobo, lok meno bipoto i kom Icrael; lwak ducu biŋeyo, Epraim ki jo ma bedo i Camaria, ma gin jo ma luwakke ma gicayo dano ki i cwinygi kun giwaco ni, “Matafali doŋ opoto woko piny, doŋ wabigero gedo ki got ma gipayo apaya; olam doŋ gitoŋo woko, ento wan wabileyo kakargi ki yat cedar.” Rwot tye ka kelo lumerok i komgi, dok tye ka tugo lukworgi. Jo Ciria yo tuŋ wokceŋ ki jo Piliciti yo tuŋ potoceŋ guŋamo doggi, gitye ka mwodo jo Icrael woko. Man ducu pe okweyo kiniga pa Rwot, en pud tye ka ryeyo cine aryeya ikomgi. Ento dano pe gulokke gudwogo bot ŋat ma opwodogi-ni, pe bene guyenyo Rwot me mony, Pi meno omiyo Rwot oŋolo wi Icrael woko kacel ki yibe, oŋolo bene jaŋ otit ki lagada i nino acel. Ludito kacel ki jo ma giworo gubedo lutel wi Icrael, doŋ lanebi ma pwonyo lok me goba en aye yib Icrael. Jo ma telo rok man gurwenyo lwak me rok man woko, jo ma gitelogi tamgi oballe woko. Meno omiyo Rwot pe obedo ki yomcwiny i kom awobegi, kica bene pe mako i kom litino ma wongi pe, ki mon ma coggi oto; pien ŋat acel acel i kingi pe woro Lubaŋa, dok gin ducu gudoko lutim tim maraco, lok ducu ma giloko obedo lok me miŋo keken. Man ducu pe okweyo kiniga pa Rwot, en pud tye ka ryeyo ciŋe aryeya i komgi. Pien tim maraco waŋ woko calo mac, waŋ calo okuto ki ocok ma wan imac; gamo agaba ma i buŋa, kun gin ducu gidoko yito ma duny cito malo. Pien akemo pa Rwot me mony omiyo lobo tye ka waŋ ki mac, jo ma gibedo iye ducu doŋ gudoko calo yen ma waŋ i mac; pe tye ŋat mo iye ma timo kica ki ominne. Gimayo ki tuŋ lacuc, ento noŋo kec pud tye ka nekogi, gicamo ki tuŋ lacam, ento noŋo pud pe romogi; dano acel acel camo riŋo kom lawote. Manace camo Epraim, ki Epraim bene camo Manace, gin aryo ducu guribbe kacel guero lweny i kom Juda. Man ducu pe okweyo kiniga pa Rwot en pud tye ka ryeyo ciŋe aryeya i komgi. Jo ma keto cik ma pe atir gibineno can, ki lucoc ma gicoyo lok me uno dano; ma gigeŋo jo ma piny obwoyogi woko i ŋolo kop atir, ma gimayo jami pa lucan ma gibedo i kin lwakka; giyako jami pa mon ma coggi oto, ki jami pa litino kic bene gimayo woko. Wubitimo gin aŋo i nino ma gibiketo iye can i komwu, i dye yamo kot ma bia ki ka mabor? Wubirtno wucito bot aŋa wek okonywu? Doŋ lonyowu kono wubiweko kwene? Gin mo pe ma bidoŋ, kono me ŋone me donyo i kin mabuc aye, nyo to atoya i kin jo ma ginekogi i lweny. Man ducu pe okweyokiniga pa Rwot, en pud tye ka ryeyo cine aryeya i komgi. Jo Aciria gubedo odoo me nyuto kinigana, ki odoo me nyuto akemona mager. Abicwalogi gicito ka lweny i kom rok ma gukwero woro Lubaŋa, abicikogi gicito i kom jo ma akemo omaka i komgi, pi yako jamigi ki coko jamigi ma guyako ki nyonogi woko piny i dye gudo calo coto. Ento jo Aciria onoŋo pe guyubbe me timo kumeno, dok bene onoŋo pe gutamo tam macalo meno i cwin ygi; ento tamgi onoŋo tye pi nek ki pi jwero jo me rok mapol woko liweŋ. Ladit latel wigi owacci, “Ludito wi monnya ducu pe gin luker? Kalno pe rom aroma ki Karkemic’! Kamat kono pe rom ki Arpad? Camaria kono pe rom ki Damaciko? Kit macalo ciŋa doŋ ogudo kwede ker ducu ma giworo cal jogi, ma cal jogi ma gupayo onoŋo kato pa jo Jerucalem ki pa jo Camaria woko, pe abitimo gin mo i kom Jerucalem ki cal jogine kit ma yam atimo i kom Camaria ki cal jogine?” Ka Rwot doŋ otyeko ticce ducu ki i Wi got Cion, ki i kom Jerucalem, biketo can i kom kabaka me Aciria pi wakkene ki nyattene ki pi Iyerrene. Pien kabaka me Aciria owacci, “Atimo man pi tek ciŋa, ki pi ryekona, pien atye ki ŋec ma oromo. Atyeko doŋ kobo waŋ co me lobo pa lurok woko, ayako bene lwak lonyogi woko ducu, areto jo ma gubedo i wi komker macalo twon ma coro jami. Onoŋo ciŋa coko lonyo pa rok mapol ma obedo yot twatwal calo ot winyo; kit ma dano gicoko kwede ton winyo ma mingi doŋ oweko woko, an bene doŋ acoko lobo woko ducu kit meno; pe tye ŋat mo ma otiŋo ciŋe, dano mo bene pe onamo doge, pe okok.” Latoŋ twero wakke i kom ŋat ma tiyo kwede me toŋo yat? Nyo cumeno twero pakke kene i nyim ŋat ma tiyo kwede? Odoo pe twero tiŋo dano, dano aye tiŋo odoo, tal bene pe twero tiŋo dano malo, dano aye ma tiŋe malo. Pi meno, Rwot ma en Rwot me mony bicwalo two ma jonyo kom dano woko i komjone ma gin lulweny, dok bicwinyo mac i te deyogi ci waŋ woko, bilyel calo mac. Ceŋ pa jo Icrael bidoko mac, Lubaŋagi maleŋ-ŋi bidoko calo leb mac: biwaŋo okuto ki ocok tyeko woko i nino acel. Deyo me buŋane ki lobo ma ceko cam matek, Rwot bityeko kwone ki kome woko ducu; bibedo calo latwo ma ojony, Yadi ma bidoŋ i potone bedo nok twatwal ma latin bene bitwero coyo welgi. I nino meno jo Icrael ma gudoŋŋe, ki jo me ot pa Yakobo ma doŋ gubwot, pe dok gibijenne i kom ŋat ma opwodogi-ni, ento doŋ gibijenne i kom Rwot, ma en ŋat Maleŋ me Icrael, i ada. Jo ma gudoŋ gibidwogo cen bot Lubaŋa Won Twer, ma gin aye jo me ot pa Yakobo ma gudoŋŋe, Kadi lwakwu jo Icrael gubed macalo kweyo me dog nam, jo mogo man ok keken ki i kingi ma gudoŋ aye gibidwogo cen. Lubaŋa doŋ omoko me tyekogi woko, pien-en gire kite atir, Pien Rwot, ma en Rwot me mony, bityekogi woko ducu i lobogi kit ma en doŋ omoko, Meno aye gin mumiyo Rwot, ma en Rwot me mony, owaco ni, “Wun lwakka ma wubedo i Cion, pe wulwor jo Aciria ka ce gigoyowu ki odoo, ma gitiŋo odoogi i komwu kit macalo jo Ejipt yam gutimo. Pien doŋ odoŋ kare manoknok mo akemona bigik woko, kinigana bilokke i komgi, at yekogi woko. Rwot me mony biyeŋo odoo i komgi, kit macalo yam otyeko kwede jo Midian i ŋet got Oreb; en biriyo odoone i wi nam, ci tiŋo malo bene kit macalo yam otino ki i Ejipt. I nino meno ter mere bia woko i wi gwokwu, gibituro okolle woko ki i ŋutwu.’ Lukwor doŋ gua woko ki i Rimon, doŋ guo i Ayat; kun giwok ki i Migron, gukano tergi i Mikmac. Guŋolo ki i kin godi ka madin, ci gucito gubuto i Geba; jo Rama komgi myel, jo Gibea pa Caulo doŋ guriŋo woko. Wudoŋ oduru matek, wun jo Gallim! Wuwiny, wunjo Laica! Wugam doggi ba, wun jo Anatot! Jo Madmena tye ka “riŋo woko, Ki jo ma bedo i Gebim giriŋo pi laro kwogi. Lukwor onoŋo doŋ gitye i Nob i nino meno, gitye doŋ ka yeŋo ciŋgi i kom got Cion, ma en aye got me Jerucalem. Nen, Rwot ma en Rwot me mony, bimiyo gipoto piny lirum ki tek ma kela lworo: jo madonone gibinunogi woko piny, ŋat mo pe ma bidoŋ ma ocuŋ malo. Rwot bitoŋo agaba ducu ma i buŋa ki latoŋ, kadi yadi ma pigi tek ma tye i Lebanon, gin ducu gibiretogi woko piny. Yat manyen bilot kun tuc ki i kom ajut pa Yece, jaŋe bituc ki i lwite ci doŋo. Cwiny pa Rwot bibedo i-kome, cwiny me ryeko ki me niaŋ, cwiny me poro lok ki me tek, cwiny me ŋec ki me lworo Rwot. Cwinye bibedo yom i lworo Rwot. En pe biŋolo kop pi gin ma en neno anena ki waŋe, nyo kadi ki ŋolo kop pi lok ma en winyo awinya ki ite; ento en biŋolo kop pa lucan atir, dok biŋolo kop atir pi jo mamwol me lobo. En bigoyo lobo ki odoo me doge, bineko jo maraco woko ki alur me yweyo me doge, Del me tweyo pyere aye bibedo kit ma atir, ki kite ma genne-ni aye bibedo del me tweyo iye. Orudi bibedo kacel ki latin romo, kwac ki latin dyel bene gi bi buto piny kacel, roya ki labwor gibidoŋo kacel, latin matidi aye ma bitelogi. Dyaŋ ki ŋuu mager gibicam kacel, litinogi bene gibibuto piny kacel; labwor bicamo lum calo twon. Latin ma dot bituko i dog ot twol, latin ma pud gikwanyo doge akwanya ki i dog cak, birwako ciŋe i ot twol ororo, Tim mo marac me nek nyo me keto ret i kom dano, pe binen i wi gotta maleŋ, pien lobo ducu bipoŋ ki ŋec pa Rwot, macalo pii ma poŋ i nam, I nino meno lakwar Yece bicuŋ calo bendera ma rok mapol twero nenone; lurok ducu gibipenyo tam ki bote, ka ma en bedo iye bibedo kabedo me deyo. I nino meno Rwot bimedde ki ryeyo cine pi tyen me aryo me kwanyo jone ma gudoŋ i Aciria, i Ejipt, ki i Etiopia, ki i Elam, ki i Cinar, ki i Kamat, ki i dog nam. En bitiŋo benderane malo pi lurok, ka doŋ coko jo Icrael ma giryemogi-ni; bicoko jo Juda ma onoŋo yamguket woko ata gurogi kacel, cokogi ki i twok lobo aŋwen ducu. Nyeko pa Epraim i kom Juda bigik woko, jo ma giuno jo Juda gibimiyo girwenyo woko matwal; Epraim pe bibedo ki nyeko i kom Juda, Juda bene pe bibedo ka uno Epraim. Gibimwomme giriŋo piny i kor got pa jo Piliciti ki tun potoceŋ, gibiribbe kacel giyako jo ma tye tuŋ wokceŋ. Gibilweny i kom jo Edom ki Moab, jo Ammon bibedo i te locgi, Rwot bimiyo pii ma i jaŋ nam me Ejipt two woko liweŋ, biyeŋo ciŋe i wi kulu Euprate, bigoyo miyo pokke woko doko kulu abiro, dano biŋolo iye kun gin mo pe ma dyako wargi. Yo gudo ma a i Aciria doŋ bibedo tye, pi jone ma gudoŋ, kit macalo yam otimme kwede pi jo Icrael i kare ma gia ki i lobo Ejipt. I nino meno wubiwero ni, “Abipwoyi, ai Rwot, pien yam cwinyi owaŋ i koma, kinigani doŋ okwe woko, ka doŋ ikweyo cwinya. “Nen, Lubaŋa aye Lalarra; abigeno en, pe dok abibedo ki lworo; pien Rwot Lubaŋa aye tekka, ma apako ki wer, en doŋ odoko lalarra.” Wubitwomo pii ki yomcwiny ki i waŋ it me larre. I nino meno wubiwero wer ni: “Wupwo Rwot, wulwoŋ nyiŋe; wumi lurok guŋe gin ma co doŋ otiyo. Wutit pire, ni en Lubaŋa ma nyiŋe malo twatwal. “Wuwer wer me pako Rwot, pien doŋ otiyo ticce ki deyo madit twatwal; wumi lok man onene i wi lobo ducu. Wugo kijira, wuwer bene ki yomcwiny, wun jo ma wubedo i Cion, pien ŋat Maleŋ me Icrael dit i kinwu. Man lok ma pire tek ma Lubaŋa owaco bot Icaya wod pa Amoj i kom Babilon, Wutiŋ bendera malo ka maleŋ, wulwongi ki dwan maloŋo, wuyeŋ ciŋwu wek gudony, i dogcel pa ludito me awora, An Rwot kikoma doŋ aciko lwakka woko pi lweny, doŋ alwoŋo co ma gin oteka lwenynya, me miyo kinigana ocob ticce, lwakka ma giwakke kun giŋatte aŋata. Koŋ wuwiny woo ma tye malo i wi godi calo woo pa lwak dano ma gucokke lipim! Koŋ wuwiny kit ma jo me ker ducu, ki jo me rok mapatpat gitye ka kok kun gicokke kacel! Rwot me mony tye ka ywayo monnye pi lweny. Gua ki i lobo ma tye ka mabor twatwal, gibino kun gia ki i agikki me te polo; Rwot tye ki akemo, oebino ki jami lwennye me tyeko lobo woko ducu. Wukok, pien nino pa Rwot doŋ tye cok; bibino calo to-piny ma oa ki bot Won Twer Ducu! Meno bimiyo ciŋ jo mapol doko goro, dok dano acel acel cwinye bionyo koyo, cwinygi biballe woko. Arem madit me lworo ki me kumo me can bimakogi matek; gibitwennye calo dako ma tye ka rem ki nywal. Gibinenne kekengi kun komgi myel; waŋgi bibokke woko calo mac. Wunen, nino pa Rwot tye ka bino. En ger, dok akemo ki kiniga mo mager omake, ma bimiyo lobo doŋ obur, tyeko lubalo woko ducu ki iye. Pien lakalatwe me polo ki kulgi mapatpat pe gibiryeny; ceŋ bicido woko macollicuc ma pud noŋo tuc atuca ki tuŋ wokceŋ, dwe bene pe biryeny, Abiketo can i kom lobo pi timme marac, ki i kom jo maraco pi balgi; abigiko wakke pa jo ma ginyatte abimiyo jo ma lyerre ma pe gin lukica kwe woko. Abimiyo co bedo me wei twatwal, makato jabu ma giliyo maberre; dano bene bibedo me wel twatwal, makato jabu me Opir woko. Pi meno abimiyo polo yenne, lobo bene biyeŋŋe ki i kabedone, pi akemo pa Rwot me mony, i nino me kinigane mager twatwalli. Macalo ruda ma giryemo, nyo romi ma ŋat mo pe ma cokogi, dano acel acel bidok bot lutugi, ŋat acel acel biriŋo dok i lobo tugi kikome. Ŋat ma gibinoŋo, gibicobo iye gituco woko pil, ŋat ma gimako, gibineko woko ki pala lucwan. Gibinyoto litino lukeregi woko ma noŋo gin bene gineno ki waŋgi; gibiyako odigi woko bene, dok gibimako mongi gibuto kwedgi tektek. Nen, doŋ atugo jo Medi woko me bino ka lweny i komgi; gin jo ma pe paro pi lim, dok bene pe gibedo ki yomcwiny pi lonyo jabu. Gibicelo awobe ki aterogi gineko woko; kica pe bimakogi i kom latin mo wacel; pe bene gibiparo pi litino ki cwiny me kica. Doŋ Babilon ma deyone dit kato deyo pa luker mukene ducu, gaŋ maber ma jo Kaldaya giwakke iye twatwal-li, bibedo calo Codom ki Gomora i kare ma yam Lubaŋa oretogi woko. Dano pe dok bibedo iye, dano mo me Arab pe biguro kemane kunnu, pe tye lukwat bene ma gibimiyo romigi buto piny kunnu. Ento lee me tim aye bibuto kunnu, gin makwo ma kok bipoŋ woko i odigi; udu bene bibedo kunnu, kun jogi noŋo myelo amyela macalo dyegi. Lanudi bikok i odigi ma ocudo malo likuŋ, ki too bene bikok i odigi mabeco me ker; Babilon doŋ pe biri, karene doŋ cok twatwal. Rwot bitimo kica ki Yakobo, biyero jo Icrael doki, ci dwokogi i lobogi kikome, rok mukene biribbe kwedgi, ci doŋ gimoko matwal i kom ot pa Yakobo. Rok mapol bilwoko jo Icrael tero i kabedogi, ka doŋ jo Icrael lokogi woko gidoko opiigi ki aŋecagi i lobo pa Rwot; gibimako jo ma yam omakogi giloko gidoko opiigi, dok gibiloyo jo ma yam ounogi. Kare ma Rwot bimiyowu iye yweyo i kom can mewu, ki i kom myelcwiny ma wubedo kwede ki tic mapek ma wubedo ka tiyone, wubicako nywaro kabaka me Babilon ki wer kuman ni, “Koŋ inen kit ma ŋat ma uno dano doŋ okwe kwede, kit ma kolo mager pa won pala doŋ okwe kwede mot! Rwot doŋ oturo odoo pa jo maraco woko, kacel ki odoo ker pa luloc, jo ma gubedo ka goyo lurok kun gitye ki akemo madit adada, ma pe gujuko ciŋgi i komgi; jo ma gubedo ka loyo lobo ki kiniga, ma pe giweko keto ayela i komgi. Lobo doŋ oywe, tye ma okwe mot, jo ma bedo iye doŋ gimoro wer keken. Yadi ciprec cwinygi yom piri, ki yadi cedar me Lebanon giwaco ni, ‘Cakke i kare ma gidwoki kwede piny, ŋat mo ma obino ka toŋowa pe.’ Lyel bene otugge woko ki piny kuca, me rwatte kwedi ka ibino, tye ka coyo tipo pa jo muto me bino ka moti, jo ducu ma yam gubedo lutel i wi lobo; luker ducu ma yam guloyo rok mapatpat omiyogi ducu gua woko ki i wi komkergi. Gin ducu gibilok, kun giwaco boti ni, ‘In bene doŋ idoko goro calo wan! Idoko doŋ calo wan!’ Deyoni doŋ giketo woko piny i lyel, kacel ki koko naŋani; kwidi doŋ gudokokitanda ma ibuto i wiye, ki kwidi ma camo kom dano-ni doŋ gudoko giummi. Kit ma imwomme ki i polo ipoto kwede piny, in lakalatwe me dyeceŋ, wod pa Ru-piny! Kit ma gitoni kwede woko piny, in ma ireto rok mapatpat-gu! Iwaco ki i cwinyi ni, ‘Abiito acito malo i polo; abicibo komkerra malo i wi lakalatwe pa Lubaŋa; abibedo i wi got me cokke ka mabor yo tuŋ acam; abiito malo twatwal i wi pol, doŋ abikette kena me bedo macalo ŋat Mamalo Twal.’ Ento in doŋ gikeli giketi wo ko piny i lyel, i te bur ka matut adada. Jo ma neni gibiciko waŋgi i komi, kun gilwodo lok i komi ni, ‘Man pe en ŋat ma nene omiyo kom lobo omyel twatwal-li, ma bene omiyo ker mapol oyeŋŋe? Pe en aye ma yam omiyo lobo odoko calo tim aroo, ma obedo ka reto gaŋi ma iye woko liweŋ, ma pe oye ni mabucce gucit paco?’ Luker me rok mapatpat gibuto gigi piny i deyo, ŋat acel acel buto i lyelle ma giyike iye; ento in doŋ giboli woko cen, ka mabor mada ki lyelli, calo latin ma gibwogo abwoga ma dano gukwero, giumo komi ki kom dano ma gineko, jo ma gicobogi ki pala lucwan, jo ma donyo piny i gweŋ ma tye i te bur matut piny, macalo kom dano muto ma ginyono piny. In pe ibiribbe kwedgi ka giyiki, pien in doŋ ibalo loboni woko, dok ineko lutuwu woko. “Likwayo pa lutim maraco pe myero doŋ gicak nyiŋgi matwal! Wuyub ka neko litinone pi bal alii pa kwarogi, wek pe dok gua gulo lobo, guger gaŋigi onya obed madwoŋ ata i wi lobo.” “Abia ka lweny i kom jo Babilon,” man lok pa Rwot me mony, “abimiyo nyiu dano rwenyo woko ki i Babilon, jo mo pe bidoŋ iye, kadi litino matino nyo likwayo,” Rwot ma owaco. “Abimiyo coo leyo lobogi, dok bene ka ma pii poŋ gurre iye bibedo pol ata, abiyweyo woko maleŋ calo dako ma oyweyo ode maleŋ kun pe oweko gin mo iye.” Rwot me mony doŋ okwoŋo kwoŋ ni, “Kit ma doŋ atyeko yubone kwede con, bitimme bene kit meno, kit macalo atamo kwede bitimme bene doŋ kumeno. Abituro jo Aciria ki i lobona woko, abinyonogi woko piny i wi gotta; okolle biluny woko bene ki i tyen jona, ki ter bene kumeno ki i wi gwokgi.” Man aye doŋ gin ma ayubo mukemo lobo ducu; dok man en-ni ciŋa ma doŋ atyeko ryeyone woko i wi rok ducu. Pien Rwot me mony doŋ otyeko yubo yubbe woko, aŋa mo no ma dok bibalone? Doŋ bene oryeyo ciŋe woko, aŋa kono ma dok bidolone? Lok man yam obino oa ki bot Lubaŋa i mwaka ma kabaka Akaj oto iye, kun waco ni, “Wun jo Piliciti ducu, cwinywu pe obed yom ni pien odoo ma yam gibedo ka goyowu kwede-ni doŋ otur woko, pien ororo bia ki i kin likwayo twol, tone bidoko twol ma tuk cito malo. Rwot bikwayo jo ma lucan i kin lwakke, bimiyo jo ma piny obwoyogi buto piny ki kuc; ento in, abimiyo kec neko likwayi woko, joni mogo ma gudoŋŋe bene abinekogi woko. Doŋ oduru, in dogcel, in gaŋ bene ikok ba; wun jo Piliciti ducu, wumi lworo ocak onyo koyo i komwu! Pien lukwor tye ka bino ki yo tuŋ acam, pe tye dano mo ma i kingi ma opokke kene.” Wubiwaco gin aŋo, bot lukwena pa rok meno? Wubiwaco ni. “Rwot omiyo Cion ocuŋ matek, jone ma giuno doŋ giuno gularre iye.” Man aye lok ma pire tek ma gitito i kom Moab. Pien Ar doŋ gijwero woko i dyewor acel keken omiyo Moab doŋ ogik woko; pien Kir bene gijwero woko i dyewor acel keken, omiyo Moab doŋ ogik woko., Jo Dibon doŋ gucito malo i wan jogigi ka koko kunnu; jo Moab tye ka kok pi Nebo ki pi Medeba, Wi dano ducu doŋ otal woko, yer tik-gu ducu bene doŋ gilyelo woko. Dano giruko boŋo cola i dye gudo; ki i wi odigi kadi wa i dye gaŋgi jo ducu noŋo kok ma pig wangi mol amola i korgi. Jo Kecbon kacel ki jo Eleale bene gitye ka koko, dwangi winnye ka mabor wa i Jakaj; meno omiyo lulweny me Moab gudoko lwor mada; cwinygi doŋ onabbe anaba, Cwinya rem twatwal pi Moab; jo ma lurin-lweny ma yam gibedo iye doŋ guriŋo woko i Joar, guriŋo bene wa i Eglat-celicia, Guito cere me Lukit, gicito malo kun gikok ki pig waŋgi; ki i yo ma cito piny i Koronaim gukok pi neno kit macalo lobo doŋ gibalo kwede woko. Pii ma i Nimrim doŋ otwo woko liweŋ; lum oner woko pe doŋ lot, gin mo ma twi bene doŋ pe matwal. Meno omiyo jami mabup ma yam onoŋo ginoŋo, kacel ki jami ma yam gikano, gin ducu doŋ giyakogi gitero woko loka kulu Arabim. Pien koko doŋ dwoŋ twatwal, doŋ owoto oromo i lobo Moab woko ducu; nen koko pa dano doŋ winnye wa i Elam, dok bene doŋ owinnye wa i Beerelim. Pii me Dibon doŋ odoko remo keken; kadi bed kumene pud dok abimedo can mukene i kom Dibon, abikelo labwor kikome doŋ i kom jo Moab ma gubwot ma guriŋo woko, ki i kom jo ma gudoŋ i lobo meno. Gucwalo litino romi bot luloc me lobo meno, gucwalo ki i Cela, obino owok ki i tim aroo, gitero i wi got Cion. Gibedo calo winyo ma teŋo bwomgi, dok girom ki litino winyo ma gikeyogi woko atata ki i odigi, jo Moab gitye kit meno, gikuro piny i waŋ wat me kulu Amon. “Mi tamwu i kom lok man, dok bene wuŋol kop kakare; wuwek tipowu obed calo dyewor i cwiny dyeceŋ malyet kilkil; wukan jo ma giryemogi woko iye, pe wudot jo ma doŋ guriŋo lweny. Wuwek jo Moab ma giryemogi woko-ni gubed i kinwu; doŋ wubed macalo kalarregi kii ciŋ jo ma doŋ otimogi malit-ti. I kare ma noŋo jo ma yam unogi doŋ gipe, ki nek ki uno’ dano bene noŋo doŋ ogik wako, ki ŋat ma nyonogi diyogi piny doŋ orwenyo wokoki i lobo, i kare meno aye gibicibo iye komker i kom mar ma pe lokke, dano ma gene aye bibedo i wiye i kema pa Daudi, ŋat ma ŋolo kop dok ma mito ŋolo kop kakare, ŋat ma kome mit ka tiyo gin ma tye atir.” Wan wawinyo pi wakke pa Moab, kit ma onoŋo giwakke kwede; wakkegi, lyerregi ki ŋalagi, nyattegi-nu ducu meno obedo goba keken. Pi meno wekjo Moab gukoki, dano ducu myero gukok pi lobo Moab, Myero gukok matek pi poki olok mutwo me Kir-karecet ma yam gubedo ka camone-ni. Potti ma i Kecbon ducu doŋ guballe woko, ki olok me Cibma; olok ma yam kono vinone mero rwodi me rok mapatpat-ti doŋ giretogi woko piny. Jaŋe yam ojany oo wa i Jajer: olak oo wa i tim; jaŋe matocone yam ojany matek, okato oŋolo dye nam woko ari, Meno aye gin mumiyo atye ka kok pi olok me Cibma, kit macalo akok kwede pi gaŋ Jajer; pig waŋa cwer i komwu, in Kecbon ki Eleale; pien dano tye ka wo ki woo me lweny i kom olokwu ma yam wupwono-ni. Yomic ki yomcwiny madwoŋ doŋ gikwanyo woko ki i potti ma yam olok nyak iye matek ca, dok bene pe doŋ giwero wer i potti olok, woo mo bene pe dok winnye iye, nyono olok i bur me biyo koŋo vino bene doŋ ogik; woo ma yam dano giwo kwede ka gipwono olok-ki doŋ pe. Meno omiyo cwinya tugge twatwal me loko lok i kom Moab calo naŋa ma kok, cwinya tugge bene me loko lok i kom Kir-kerec. Kadi bed mine kene me olo kome nonono me cito i waŋ jogi ma tye malo i wi godi ka woro lubaŋane i kabedo maleŋ, pe bitwero wacel. Man aye lok ma yam Rwot oloko con i kom Moab. Ento kombeddi Rwot owacci, “I mwaka adek ma obedo calo mwaka pa lapakaca-ni, deyo pa Moab bidoko gmacaya kadi bed en tye ki lwak jo mapol at; jo ma bidoŋ gibibedo nok twatwal, dok bene noŋo dok gin jo ma goro keken.” Man aye lok ma pire tek ma gitrto I kom Damaciko, Nen, Damaciko doŋ pe bimedde me bedo macalo gaŋ, doŋ bi doko obur matwal. Gaŋine ducu doŋ gibiweko gidoko tim matwal; Bibedo ka cam pa romi ki dyani-gu, ma gibibuto piny kunnu laboŋo ŋat mo ma miyo lworo makogi. Cel matek birwenyo woko ki i Epraim, ker bene birwenyo woko ki Damaciko; ento jo ma gudoŋ gibibedo macalo deyo pa jo Icrael. Man lok pa Rwot me mony kikome, I nino meno deyo pa Yakobo bijwik woko, kome bene bijony woko. Man bibedo kit macalo lakaa kac kayo kwede kal i poto, kun noŋo kayo wit kal ki ciŋe dok kit macalo en beko kwede wit kal ma odoŋ i luŋ me Repaim. Nyo kit macalo gidino kwede yat jeituni, ma gin mo manoknok aye doŋ i kome, doŋ ma romo aryo nyo adek keken i wi jaŋe malo kunnu; aŋwen nyo abic keken en aye doŋ i jaŋ yat ma nyak. Man lok pa Rwot Lubaŋa me Icrael kikome. Ka nino meno oromo, dano gibilokke bot Lacwecgi pi kony, gibiciko waŋgi kun gmeno ŋat Maleŋ ma en Lubaŋa pa jo Icrael. Doŋ pe gibiketo gengi i kom keno tyer ma yam gutiyo ki ciŋgi, pe gibigeno gin ma gin kikomgi yam gutiyo, kadi yadi ma gipito ka ma grworo iyejok ma dako ma gilwoŋo Acera nyo keno tyer me waŋo odok eceta. I nino meno gaŋigi matek bibedo calo wi obur pa jo Kiv ki pa jo Amor ma yam gua woko ki iye pi jo Icrael; lobogi doŋ bidoŋ nono. Pien wun jo Icrael wiwu doŋ owil woko i kom Lubaŋa ma olarowu dok ma gwokowu macalo got, matek ka ma wuriŋo wularo iye. PI meno kadi bed wupit gin mogo ma yomo cwiny, dok bene kadi bed wupit yadi mogo ma gin yadi pa lubaŋa pa lurok, kadi wumi gutwi i nino meno ma wupitogi iye-ni, dok kadi wumiyo gituru woko i odiko ma gipitogi iye, ento pe wubikayo iye gin mo, wubibedo ki can ki arem ma pe gik keken. Koŋ wuwiny kit ma lwak me rok mapol dwangi mor kwede calo kot ma mor; gimwoc ki woo kit macalo pii nam wo kwede. Koŋ wuwiny woo pa lwak me rok mapol; giwo calo mor pa pii biamwonyi matek ma tye ka twagge. Rok ducu gimor calo pii madit twatwal, ento Lubaŋa bijukogi, miyo giriŋo woko ka mabor; gibiryemogi woko calo cuŋ kal ma yamo tino tero i wi got malo, dok macalo apwa ma wirre i kare ma yamo kot tye ka kodo matek adada. Koŋ wunen, lworo madit mada bimako dano otyeno, ento ma noŋo piny peya oru gibibedo pe! Meno aye can ma bipoto i kom jo ma giyako jamiwa ki i lobowa, meno aye dul ma gipoko botgi gin jo ma yakowa. In lobo ma tye loka kulu Etiopia, in ma bwomi ŋur calo yamo lapiru; ma ioro lukwenani ma cuŋ pi loboni giwok ki i kulu Nail, kun giwoto ki yeya ma gitiyo ki togo ma kwan i wi pii! Wudok cen, wun lukwena madwir, wudok bot rok ma jone gudoŋo maboco dok ma komgi pwot, bot rok ma jone gilworogi i kabedo ducu, rok matek, ma jone aye loyo i lweny, ma kulu mapol opoko lobogi woko i dyere. Wuwiny, wun jo ducu ma wubedo i wi lobo, wun jo ma wubedo i lobo, ka ce gitiŋo bendera malo i wi got, myero wunen! Ka ce bene gikuto buriji, myero wuwiny! Pien Rwot owacca ni, “Abineno liŋliŋ ki i kabedona, calo lyeto me ceŋ ma ryeny dyeceŋ, calo pol ma miyo toyo luk i kare me kac.” Pien ma pud peya kare me pwono olok oromo, ma ture doŋ ocako o woko, kun ture doŋ oluro odoko nyig olok ma doŋ ocako cek, en biŋolo olok ma tye ka lot woko ki pala me ŋolo olok, ki jaŋ olok ma ojany bene en toŋo woko. Gibiweko kom jo ducu ma ginekogi ata, bot acut ma tye i wi got malo, ki bot lee me tim. Acut bicamogi woko i oro, ki lee me tim bicamogi woko i cwir. I kare meno rok ma jone odoŋo maboco ma komgi pwot, gibikelo mot bot Rwot me mony. Gin rok ma jone gilworogi i kabedo ducu, rok matek, ma jone aye loyo i lweny, ma kulu mapol opoko lobogi woko i dyere-ni. Gibikelo motgi-nu i wi got Cion, ka ma giworo iye Rwot me mony. Man aye lok ma pire tek ma gitito i kom Ejipt. Nen, Rwot tye ka wot madwir twatwal i pol, kun woto ki bino kwede i Ejipt; cal jogi me Ejipt komgi bimyel nyime, cwiny jo Ejipt bibedo ka ryaŋŋe aryaŋa, Abitugo jo Ejipt me lweny i kom wadigi kekengi, dano acel acel bilwenyo gin ki ominne, ŋat acel acel bene bilwenyo gin ki lawote, gaŋ bilwenyo i kom gaŋ mukene, ki ker bene bilwenyo i kom ker wadigi. Cwiny jo Ejipt doŋ bibarre woko matwal, tamgi ma yam gumoko-gu ducu bituro woko, gibicito ka penyo tam ki bot cal jogi apaya kibot lutyet, ki bot lukor tipo ki ajwagi. Dok abimiyo jo Ejipt i ciŋ rwot ma locce gwa atika, kabaka mager twatwal aye ma biloyogi, Man lok pa Rwot me mony kikome. Pii me kulu Nail bene bidwono woko, pii ma i cwiny kulu kikome bitwo woko, yo pii ma gikwinyo akwinya bi doko ŋwe, jaŋ kulu Nail me Ejipt bidoko nok ci two woko bene, lagada kacel ki togo ducu ma tye iye gibitop woko. Lobo ma tye i ŋet kulu Nail ducu bital woko doko bar, i dog kulu Nail kikome; ginapita ducu ma gicoyogi i ŋet Nail bitwo woko, yamo bitero woko matwal ma pe dok binen. Lumakrec gibikumo dok gibikok, jo ducu ma yuto rec ki goli i kulu Nail; jo ducu ma giciko obwogi i dye pii gin ducu cwinygi biballe woko. Jo ma cwero tol tworo ki jo ma cweyo boŋo matar cwinygi bia woko i kom ticgi, Jo ma gubedo twoni pa jo madito i lobo, gibininyogi woko, dok jo ducu ma camo mucara cwinygi biballe woko. Luloc me Joan gimin mada; luryeko ducu ma miyo tam bot Parao, gin ducu gimiye tam me miŋo keken. Itwero waco bot Parao niŋniŋ ni, “Kwarowa ducu yam gubedo jo maryek,” dok ni, “Kwarowa ducu yam gubedo luker?” Ci doŋ joni maryek-ki gitye kwene? Koŋ iwek gutitti lok dok gumi iŋe gin ma Rwot me mony oyubbe me timo i kom Ejipt, Rwodi me Joan doŋ gulokke gudoko lumiŋ, ki me Mempic gibwologi woko; jo ma gubedo lutel wic i kakagi ducu aye mumiyo jo Ejipt oŋak. Rwot doŋ oketo cwiny me adwala i igi; omiyo jo Ejipt doŋ gicatte acata i gin ducu ma gitiyo, kit macalo lamero cato kwede i nokke. Dano mo pe bidoŋ i Ejipt dok pe tye gin mo ma dano mo bitiyo, kadi latel wic nyo kadi dano mo ata, kadi jaŋ otit nyo lagada. I kare meno jo Ejipt bibedo calo mon, kun komgi myel amyela pi cin Rwot me mony ma en biyeŋo i komgi. Lobo Juda bimiyo lworo bot jo Ejipt; jo ducu gibiwinyo nyiŋe gibibedo ki lworo pi lok ma Rwot me mony doŋ otyeko yubo con me timo i komgi, I kare meno gaŋi abic bibedo i lobo Ejipt ma jo ma bedo i igiloko leb jo Kanaan, dok bene ma gikwoŋo kwoŋ i nyiŋ Rwot me mony. Doŋ gaŋ acel ki i kingi gibilwoŋo ni gaŋ me Ceŋ. I kare meno keno tyer pa Rwot bibedo i dye lobo Ejipt, ki got ma gicibo ocuŋ atir pi po pi Rwot bicuŋ i waŋ lobone kikome. Got man bibedo macalo lanen ma nyuto ni Rwot me mony tye i Ejipt. Ka ce jo kunnu bikok bot Rwot pi jo ma unogi, en bicwalo botgi ŋat ma bilarogi, ŋat ma bilok kun cuŋ pigi ka dok larogi. Rwot binyutte kene bot jo Ejipt. I Kare meno jo Ejipt biŋeyo Rwot, gibiwore kun gityero bote gitum ki gitum awaŋa, dok bene gibikwoŋo kwongi i nyim Rwot ci gibicobo bene gin ma gukwoŋo. Rwot bipwodo jo Ejipt kun goyogi dok canogi woko. Gibidwogo cen bot Rwot, ci biwinyo legagi dok bene bicaŋogi, I kare meno yo gudo bia ki i Ejipt cito wa i Aciria. Jo Aciria bicito i Ejipt, jo Ejipt bene bicito i Aciria, doŋ jo Ejipt kacel ki jo Aciria, gin ducu biworo Lubaŋa kacel. I kare meno jo Icrael bibedo me adek me bedo kacel ki jo Ejipt ki jo Aciria, ci gibimiyo lobo ducu gibedo ki gum. Rwot me mony bimiyo botgi gum, kunwacci, “Oum obed i komjona jo Ejipt, ki i kom jo Aciria, ma gin aye jo ma an atiyogi ki ciŋa, ki i kom jo Icrael ma gin doŋ gudoko jona kikome.” I mwaka ma lawimony madit ma Cargon kabaka me Aciria ocwalo obino i Acidod, olwenyo i kom jone, ci omayo gaŋ woko, i kare meno Rwot onoŋo yam omiyo Icaya wod pa Amoj otito lokke kun wacci “Cit igony boŋo cola woko ki i pyeri, ka igony war woko bene ki i tyeni.” Ci en ocito otimo kit meno, odoŋ munero ma war bene pe i tyene, Yam Rwot dok owacci, “Kit macalo laticca Icaya owoto munero, kun tyene bene tye noŋo, pi mwaka adek kulu pi nyuto gin ma bitimme i kom jo Ejipt ki jo Etiopia kit meno bene kabaka me Aciria bitero jo Ejipt woko i opii, ki jo Etiopia bene; bitero jo matino ki jo madito kun giwoto munero, ma tyengi bene noŋo tye noŋo, ki dudgi nono tye nono, ma meno aye bikelo lewic i Ejipt. Meno bibalo cwinygi woko, lewic bene bimakogi pi Etiopia ma yam onoŋo gigeno, ki pi Ejipt ma onoŋo yam ginyatte pire-ni. I nino meno jo ma bedo i dog nam gibiwacci, ‘Koŋ doŋ wunen gin ma otimme i kom jo ma yam wageno, ma yam wariŋo walaro botgi wek gukonywa, wek bene gularwa ki i ciŋ kabaka me Aciria. Ci man doŋ wabibwot niŋniŋ?’ ” Man lok ma pire tek ma gitito i kom Babilon, ma en aye lobo ma tye i dog namo Kit macalo yamo lapiru kodo kwede i Negeb, tye can mo ma bino kit meno kun a ki yo tuŋ i tim, kun a ki i lobo ma dano lworo twatwal. Lubaŋa onyuto bota lok mapek mada; layak gire yako jami pa dano ayaka, ŋat ma balo lobo bene neko dano woko liweŋ ki i lobo. In Elam, cit malo i lweny, ki in Media, doŋ irum gaŋ woko! Kit can ducu ma Babilon okelo abityeko woko, abimiyo gik woko licwic. Pi meno omiyo arem madwoŋ oketo pyera woko, omiyo koma ducu rem mwodde atata, calo dako ma rem ki nywal; odiya woko doŋ piny ma pe miyo aromo winyo kit gin mo; poyo koma apoya, ma pe doŋ aromo neno gin mo. Tam doŋ oloya woko, lworo madit adada doŋ obalo wiya woko; ma abedo ka paro piny macol ma piny doŋ ribiribi-ni; meno dok okelo myelkom bota mada. Doŋ giyubo meja woko gipeto mukeka bene doŋ woko, gitye doŋ ka cam kun gimato mat bene; Wun rwodi wua malo, wuwir kom kwot ki moo. Pien Rwot owaco bota kuman ni, “Cit ikel lakur-piny, myero otit gin ma en tye ka nenone. Ka en bineno wegi aguragura ma giriŋo aryo aryo, jo ma i wi kana ki jo ma i wi kinaga, myero en ocik ite matek, dok onengi maber twatwal.” Ŋat ma oneno odaŋŋe ni “Ai Rwot, acuŋ i wi Lubele malo dyeceŋ jwi, acuŋ i kabedona bene dyewor benebene. Nen wegi aguragura gitye ka riŋo ki aryo aryo.” Cutcut gugamo doge ni, “Babilon doŋ opoto, opoto gire woko; cal jogi apaya-gu ducu gininyogi woko piny.” Wun jona, ma gidinowu woko ka gipyetowu woko calo kal, gin ma awinyo ki bot Rwot me mony, ma en Lubaŋa me Icrael en aye atito botwu. Man lok ma pire tek ma gitito i kom Duma: ŋat mo tye ka lwoŋa ki i Ceir, kun penya ni, “Lakur-piny, dyewor obedo niŋniŋ? Lakur-piny, dyewor obedo niŋniŋ?” Lakur-piny ogamo ni, “Piny doŋ oru woko, dyewor dok bidwogo. Ka ce wumito penya pire, ci wutwero dwogo dok ka penya; wutwero dwogo cen kany gire pi tyen me aryo.” Lok ma gitito i kom lobo pa jo Arab Man lok ma pire tek ma gitito i kom lobo pa jo Arab: Wun jo Dedan ma wutye ka mol ki kinagawu-ni, wubibuto i dye okuto mutwe ma tye i lobo pa jo Arab. Wumi pii amata bot jo ma orwo pii onekogi, wumi bene cam bot jo murino lweny, wun jo ma wubedo i lobo Tema. Pien guriŋo pala lucwan, pala doŋ giwoto woko ki i i akura, ki atum ma giketo iye atero ma doŋ gitelo woko, ki can mogo ma lweny kelo. Pien man aye lok ma Rwot owacca, ni, “Doŋ odoŋ mwaka acel keken, calo mwaka me tiyo pakaca, pi meno deyo me Kedar ducu bidoko ginacaya; dok jo me Kedar ma gin oteka ma gibidoŋ ki i kin jo ma celo atero, welgi bibedo nok; pien Rwot ma en Lubaŋa pa jo Icrael doŋ oloko man.” Man lok ma pire tek ma gitito i kom luŋ ma Lubaŋa onyuto iye ginanyuta mogo bot Icaya. Aŋo ma dok otimme ma wun ducu wutye malo i wi odiwu? Piŋo dano ma i gaŋ ducu gitye ka daŋŋe ki woo, ma wuwoto wuŋatte aŋata ki yomcwiny? Joni ma gineko i lweny ca, pe ginekogi ki pala lucwan, pe bene ginekog i i lweny kadi ki acel. Lulocci ducu onoŋo doŋ guriŋo woko kacel, giŋuko makogi woko ma peya gulwenyo. Jo ducu ma ginoŋogi gimakogi woko, kadi bed jo mogo i kingi guriŋo ka mabor twatwal. Mumiyo awaco ni, “Wulok waŋwu cen, pe myerowunena, wuwek akok matek pi cwercwiny ma atye kwede. Ŋat mo pe oyelle ka kweyo cwinya, pien jona ma ginekogi pol twatwal.” Pien Rwot Lubaŋa me mony tye ki ninone, ma ninone obedo nino me woo, ki me nyono dano woko piny, ki nino me baŋo dano ducu i luŋ ma yam en onyuto iye ginanyuta mogo, ma en aye bene nino me muko cel gaŋ woko dok dano gibiwo iye atata i kin godi. Mony mua ki i Elam guŋabo juru aterogi doŋ aŋaba, ki mony mua ki i Aram gutweyo aguraguragi i kom gadigadi, kun mony mua ki i Kir doŋ gitye ma guterre woko ki kwodigi. Notawu mabeco-gu gupoŋ ki gadigadi lweny keken, dok wegi aguragura gitye gucuŋ woko i dogcel me gaŋ. Gin ma yam jo Juda gigeŋo ki komgi doŋ orwenyo woko. I nino meno wuneno jami lweny ma tye i ot me Buŋa. Wuneno kit ma gimuko kwede cel me gaŋ pa Daudi, dok wunoŋo yo bene me guro pii ma tye piny i ŋom i joro. Wukwano odi ducu ki i Jerucalem, ka wureto odi mogo woko piny wek wunon gweŋ me gero cel matek, wukwinyo bene joro me pii i kin cel aryo me jolo pii me joro macon. Ento yam koŋ noŋo pe wutamo pi Lubaŋa ma oyubo lok-ki con, dok ma omiyo otimme kit meno-ni. I nino meno Rwot Lubaŋa me mony onoŋo tye ka lwonowu, me bino ka koko ki ka kumo, me bino ka lyelo yer wiwu ki ka ruko boŋo cola. Koŋ wunen kit ma wunyero kwede ki yomcwiny, wuneko twoni dyaŋi ki romi ma pe wacce, wucamo riŋo dok wumato koŋo vino jwi. Wuwaco ni, “Wek wacamu cam, dok wamatu mat bene, pien diki wabito woko.” Rwot me mony onyutte kene bota kun waco ni, “Adada, pe gibitimo kica botgi pi bal man, nio waŋ ma guto.” Man lok ma Rwot Lubaŋa me mony aye owaco. Rwot Lubaŋa me mony owaco ni, “Bin icit bot Cebna, lakan-jami, ma en aye lalo jami ma i ot pa kabaka, cit ipenye ni, “Tic aŋo ma itiyo kany? Dok aŋa ma tye boti kany, ma omiyo it ye ka golo bur lyelli kekeni-ni? Piŋo kono itoŋo lyelli kekeni i wi got malo? Nen, Rwot bikwanyi ki tek boli woko cen, kadi bed onoŋo nene ibedo dano mo matek twatwal. En bimaki woko matek Iikin, en biluni woko aduno calo odi lo ci boli woko cen i lobo mo malac mada. Ibito kunnu, i ŋet gadigadini ma onoŋo inyatte kwede twatwal-li, in giri ma ikelo lewic i ot pa laditti. Abikwanyi woko ki i dog ticci, ci adwoki woko cen i rwom mapiny. “I nino meno ka man doŋ otimme, abilwono laticca Eliakim wod pa Ilkia, ci abimiyo en aye ruko boŋŋini me tic, ki del me tweyo pyer, ki kitambara me tweyo wic; tweroni ducu abidwoko i cine, En bibedo calo wego bot jo Jerucalem ki jo Juda, Abimiyo twero ducu me ot pa Daudi bedo i wiye. Abimiye layab me loro doggola, ma ka en oloro, ci ŋat mo pe dok twero yabone; dok ka oyabo, ŋat mo pe twero lorone. Abimiyo en bedo tek calo teke ma giguro matek, jo me ot pa wonne ducu binoŋo deyo pire. “Jo me ot pa wonne ki wadine ducu bibedo ter mapek twatwal i wiye. Gin ducu gibinabbe i kome calo kikopo ki cupa ma giŋabo malo. Ka man bitimme i nino meno, ci teke ma yam giguro matek-ki biyogge woko doko logologo poto woko piny, Meno aye bibedo agikki pa jami ducu ma yam guŋabbe i kome. Man lok ma Rwot doŋ otyeko waco.” Man lok ma pire tek ma gitito i kom Turo. Wukok ba, wun mel me Tarcic, pien Turo doŋ odoŋ nono, laboŋo ot mo kadi waŋ wat mo. Onyuto botgi lokke i yo i kare ma gidwogo ki i Caiprac. Wucuŋ mot, wun jo ma wubedo i dog nam, wun Lucat-wil me Cidon. Lukwenawu yam guŋolo nam, gubedo i wi pii madwoŋ adada. Lim ma yam gunoŋo aye obedo kal me Cikor, ma gukayo ki i dog kulu Nail. In onoŋo yam ibedo lacat-wil ma cato wil i rok mapol. Lewic myero omaki, in Cidon, pien nam doŋ oloko, cel gogo matek me dog nam bene owaco ni, “Rem me nywal pe ocana gire, pe bene anywal, pe bene apito latin mo omedo ki doŋo, latin awobi nyo kadi latin nyako.” Ka lok man biwinnye i Ejipt, cwiny dano bicwer matek twatwal pi winyo lok i kom Turo. Wukat wucit wa i Tarcic, wucit wukoki, wun jo ma wubedo i dog nam! Man gaŋ ma yam dano tye iye ki yomcwiny madwoŋ, gaŋ ma yam ocakke con twatwal, en aye gaŋ ma yam ocwalo lukwenane guŋolo nam, me cito ka bedo i lobo mogo mukene. Aŋa ma oyubo lok man i kom Turo, gaŋ ma poko Lalukana me deyo me Loc, ma lucat-witle bene yam gubedo rwodi, ma gubedo jo ma pigi dito adada i lobo? Rwot me mony aye ma onoŋo oyubo, pi balo wakkegi me deyo woko ducu, dok pi miyo jo ma i lobo ducu ma yam giketo deyo i komgi doko mwol. Wucit wupur lobo, wun jo ma wubedo i Tarcic; pien waŋwat me Turo doŋ pe, Rwot doŋ oryeyo ciŋe woko i wi nam, en bene doŋ otyeko yeŋo ker ducu mapatpat; Rwot doŋ otyeko miyo cik i kom Kanaan, ni myero gitur waŋ apidiŋŋe matek-ki. En owaco ni, “Yomcwiny ma yam wutye kwede doŋ ogik, wun jo Cidon; kombeddi doŋ gidiyowu woko matek, ma kadi bed wukat i Caiprac, kunnu bene pe wubinoŋo ka yweyo.” Koŋ wunen lobo pa jo Kaldaya! Gin aye rok ma onoŋo gumoko ni Turo bibedo kabedo pa lee tim, ento pe jo Aciria. Gin aye ma gutado lubele ma gucudo malo likuŋ kunnu, ka dok gumuko odi madito woko ducu ki kunnu, gumiyo dok ‘odoko wi obur. Wukoki, wun mel me Tarcic, pien ka-kannewu ma yam tek-ki doŋ giketo woko. I kare meno wi dano biwil woko i kom jo Turo pi mwaka pyerabiro kulu, ma rom aroma ki kare me kwo pa kabaka acel. Ka mwaka pyerabiro doŋ otum, ci Turo bibedo calo malaya ma giwero pire ni, “Kwany opuk agoya, cit kwede i dye gaŋ, in dako ma malaya ma wi dano owil woko i komi-ni! Mi dwan opuk okok ma winnye mamit, wer bene wer mapol, wek dano gucak po piri.” I kare ma mwaka pyerabiro doŋ otum, Rwot dok bilimo Turo, ci dok bicako dwoke i dog ticce. En dok bitic i lobo mapatpat ma tye i wi lobo, kun tiyo kwedgi dok terogi macalo malaya. Magoba ducu ma en binono i cato wille-nu, pe bigwoko, pe bene bikano mo kadi me mono, ento bityero ‘woko me bedo gin maleŋ bot Rwot, ci gibiwilo ki cam mabup ki boŋŋi mabeco pi jo ma bedo i nyim Rwot. Nen, Rwot biweko lobo doŋ nono, bimiyo doko obur, dok en biloko lobo bedo okani, ci keyo dano woko me bedo iye. I Kare meno can ma opoto i kom ajwaka bibedo rom ki can ma opoto i kom dano ata; can ma opoto i kom opii bedo rom ki can ma opoto i kom laditte; can pa aŋeca bene bedo rom ki can pa min ot ma en tiyo bote; can pa lacat-wil bibedo rom ki can pa lawil-wil; can pa lami-banya bibedo rom ki can pa laden-banya; can pa ŋat ma pido banya bedo rom ki pa ŋat ma tye ki banya. Lobo bidoŋ nono laboŋo gin mo, kun noŋo giyako jami ma tye iye woko ducu; pien man lok pa Rwot kikome. Lobo tye ka kumo, tekone bene orwenyo woko, wi lobo ducu piny oballe woko, teko pa lobo orwenyo woko, polo ducu doŋ onyoŋŋe woko. Lobo doŋ oballe gire woko i nyim Lubaŋa, pi jo ma bedo iye; pien dano doŋ guturo cik pa Lubaŋa woko, pe gulubo gin ma yam en ociko, guturo bene wa gicikke ma ri nakanaka-ni woko. Meno omiyo Lubaŋa oceno lobo woko, jo ma bedo iye gitye ka neno can iye pi balgi; meno en gin mumiyo jo ma i lobo tye ka waŋ, jo manoknok keken aye gudoŋ, Koŋo vino bene tye ka kumo, olok kikome bene doŋ oballe woko, jo ducu ma cwinygi yom tye ka cur acura. Ajaa agoya ma kok maloŋo pi yomo cwiny dano doŋ oliŋ woko, woo pa jo ma daŋŋe ki yomcwiny madwoŋ doŋ olin woko, yomcwiny mo ma miyo dano goyo opuk bene doŋ pe. Dano pe dok mato koŋo vino ki wer i doggikit ma yam con; lumat koŋo doŋ noŋo koŋo kec i doggi marac. Jami ma i gaŋ ducu doŋ onyobbe woko, odi ducu ma tye iye giloro doggi woko wek dano pe gudony iye. Dano tye ka daŋŋe ki koko pi koŋo vino ma doŋ orwenyo woko; kit yomcwiny ma yam gitye kwede doŋ ogik woko, yomcwiny mo doŋ pe i lobo. Gaŋ doŋ giweko odoko obur, dog cel bene gituro, ci giŋidowoko matitino. Bitimme kit meno i kin lurok ma gibedo i wi lobo, bibedo calo yaa ma doŋ gipwono nyige woko, nyo macalo olok ma doŋ gikoro nyige woko. Dano ilo dwangi malo kun giwero wer me yomcwiny; woo ma gidaŋŋe kwede pi dit pa Rwot winnye wa yo tuŋ potoceŋ. Pi meno wun jo ma wutye wokceŋ, wumi deyo bot Rwot; ki wun jo ma wubedo i dog nam, wumi deyo i nyiŋ Rwot me Icrael. Cakke ki i agikki piny wawinyo dano giwero wer me pako Rwot, ŋat Maleŋ deyone dit rom mene! Ento an agamo ni, “Ajony likon, ajony likoŋ, can i wiya gira! Pien jo ma luroro doŋ gutany woko ki lok rorogi i kom dano, pi lok rorogi-ni omiyo gidoto dano marac twatwal.” Lworo ki bur, ki owic, bimakowu, wun jo ma wubedo i lobo, ŋat ma oriŋo woo ma bikelo lworo, bipoto woko i bur; ka ce okatti woko kii bur, ci bimoko i owic. Pien polo doŋ oyabbe woko, acakki me te lobo bene, tye ka yeŋŋe. Lobo doŋ oballe woko, lobo doŋ obar woko i dyere, lobo oyeŋŋe matek twatwal. Lobo doŋ tagge calo lamero koŋo, yeŋŋe calo ot aduc; balle doŋ dwoŋ, onure woko, orette woko piny ma pe dok twero a malo. I kare meno Rwot biketo can i kom mony me polo, ki i polo kunnu, ki i lobo kany, i kom luker me lobo. Gin ducu gibidoko lumabuc, ka gicokogi woko kacel i but; gibiloro wigi woko i ot mabuc, ka doŋ gicako keto can i komgi ma noŋo doŋ koŋ kare okato malac. Olee bitwodo dwe woko, lewic bene bimako cen; pien Rwot me mony aye bibedo kabaka i wi Cion, ki i Jerucalem, binyuto deyone i nyim ludoŋone. Ai Rwot, in aye Lubaŋana; abidwori dok abipako nyiŋi, pien doŋ itiyo jami me aura twatwal, dok icobo gin ma yam iyubo con, ki gen ki ada. Iloko gaŋ odoko obur; kadi wa gaŋi ducu ma yam girumogi ki cel matek; odi pa lurok bene gudoko obur; pe dok gibigero gedo mukene kakare. Meno bimiyo lwak rok matego giketo deyo i komi; gaŋi pa lurok ducu ma kica pe iye gibilwori. Pien in aye kabedo matek ma lucan giriŋo gilaro iye, in cel gogo matek ka ma jo ma piny obwoyogi bene giriŋo gilaro iye, in aye ka ma dano gwoko iye yamo kot ki lyeto me cen; pien alur yweyo dog dano ma gin pe lukica calo yamo kot ma kodo kun pyeto kot wa i kor cel, nyo calo lyeto ka piny doŋ otwo. Doŋ ijuko woo pa lukwor woko, macalo tipo pol ma kweyo lyeto; meno omiyo jo ma pe lukica doŋ guliŋ, pe dok giwero wer. Rwot me mony bitedo karama pi rok ducu i wi got Cion, karama ma gicamo iye riŋo mogo makur, ki mato koŋo vino ma ocek mamit adada, ki riŋo ma miyu, ma moo ma i cogo dwoŋ iye ata, ki koŋo vino ma giliyo woko maber ka doŋ ocek mamit adada. Dok Rwot biyeco boŋo ma giumo ki rok woko ducu, i wi got man, ki kitambara ma gubedo ka rukone i kare me kwero cola. Rwot Lubaŋa doŋ bimwonyo to woko matwal, dok en bidunyo pig waŋ dano woko ducu, ci kwanyo lewic woko ki i wi jone i nyim jo ducu i wi lobo; pien man lok ma Rwot aye owaco. I nino meno gibiwaco ni, “Nen, man aye Lubaŋawa ma wabedo ka kurone pi larowa. Man aye Rwot ma wabedo ka kurone-ni; wabedu doŋ ki yomcwiny pi kit ma en olarowa kwede.” Pien ciŋ Rwot biywe i wi got Cion, ento Moab mere gibinyono woko piny i kabedone, kit macalo dyaŋ’ nyono kwede reŋ kal i bur mna gionyo iye cet dyaŋ, Jo Moab biryeyo badgi i dyere kit ma dano mo ma tye ka kwaŋ ryeyo kwede bade me kwaŋ; ento Rwot bimiyo wakkegi gik woko kacel ki dito ma gitye kwede. Celgi ma gugero ma ocudo malo likuŋ ca gibidwoko woko piny, ka gicoro gireto woko piny i lobo, poto wa i apwa. I nino meno gibiwero wer man i lobo me Juda, ni, “Watye ki gag matek adada; Rwot aye omiyo larre tye, oketo celle oguro orumo piny woko. Wuyab dogcel woko, wek rok ma kitgi atir, ma gigenne, gudony iye. Ŋat ma tamme tye i komi, imiyo bedo ki kuc me ada, pien noŋo geni. Gen Rwot nakanaka, pien Rwot Lubaŋa aye ma bigwokowa kare ducu. Pien doŋ odwoko woko piny jo ma yam gibedo i gag ma otiŋŋe i wi cere malo. En ocorogi oretogi woko piny i lobo, oretogi piny i apwa. Dano doŋ onyonogi ki tyengi, tyen lucan, ki tyen jo ma piny obwoyogi.” Yo pa dano ma kite atir obedo apyel, cere pe iye, yo-nu in aye ma iyubo. Ai Rwot, wan wakuri i yo ma inyuto botwa i ŋolo koppi; cwinywa bene tye i kom nyigi, dok bene watamo piri twatwal. Aparo piri dyewor, tipona ma tye iiya puk odiko con ka yenyi. Pien ka iŋolo kop ilobo, jo ma bedo iye pwonyo kit ma atir. Dano marac kadi bed gitine gin maber, pe twero pwonnye me bedo dano ma kite atir; bedo mere ka timo tim mogo ma pe tye atir i lobo pa dano ma cwinygi atir, kun pe neno dit pa Rwot. Ai Rwot, badi tye otiŋŋe malo, ento lukworri pe gineno. Mi lewic omakgi, ai Rwot. Mi gunen kit ma imaro kwede joni; cwal doŋ mac ma iyubo pi jo macalo meno, wek otyekgi woko. Ai Rwot, ibimiyo wabedo ki kuc, pien ticwa ducu in aye ma itiyo piwa. Ai Rwot Lubaŋawa, rwodi mukene ma pe in yam guloyowa, ento wan wabedo ka tuco nyiŋi keken. Gin doŋ guto woko, pe dok gibibedo kwo! Doŋ gudoko tipo, pe dok gibitwero a malo! In icito ilimogi ci ityekogi woko, imiyo wi dano bene doŋ wil woko i komgi. Ento doŋ imiyo rokwa onya, ai Rwot, in doŋ imiyo rokwa man onya; in aye ma imiyo dano guketo deyo i komi, imedo waŋ lobowa bene odoko malac. Ai Rwot, wan wabedo ka legi i kare ma watye i can, i kare ma iketo can i komwa, wan wabedo ka yenyi. Wabedo calo dako ma tye ka minne ki arem, kun twennye atwenya ki koko pi arem ma en tye kwede; wan bene yam wabedo kit meno i nyimi, ai Rwot. Wan wabedo ka minne i arem, ento ka nywalo latin dano pe doŋ wanywalo gin mo. Pe tye loc mo ma wan waloyo pi lobowa, pe tye gin mo ma watiyo ci watyeko. Joni ma yam doŋ guto woko, pud dok gibibedo kwo, komgi muto-ni dok bicer. Wun jo ma wubedo i apwa, wuco woko wek wuwer wer pi yomcwiny! Pien toyoni aye toyo me leŋo, pi meno ibimiyo toyo bedo tye i lobo pa jo ma yam doŋ guto woko. Wubin, wun jona, wudony i kicikawu, ka wulor doggola woko; koŋ wukanne kunnu PI kare mo manoknok, nio waŋ ma akemo pa Rwot doŋ okato. Pien nen, Rwot tye ka bino kun a ki i kabedone pi keto can i kom jo ma bedo i lobo pi balgi; remo ma doŋ oo i lobo binen woko ka maleŋ, lobo bene pe doŋ biumo kom jo muto. I nino maca, Rwot biketo can i kom Leviatan, ma en aye twol ma ŋeyo paŋŋe twatwal me laro kwone; Rwot biketo can i kome ki twon pala lucwanne matek, mabit mada, dok bineko min kulu ma bedo i nam. I nino maca, Rwot biwacci, “Wuwer wer i kom poto olok ma yomocwiny, ma an Rwot aye agwoko; dok aonyo pii iye kare ducu. Agwoko dyeceŋ ki dyewor, wek ŋat mo pe obal woko; pe atye ki akemo. Ka kono nene okuto ki ocok tye iye, kono acito alwenyo kwedgi, ka awaŋogi woko ducu liweŋ. Nyo ka ce gularo bota ni akonygi, myero gucikke me bedo kweda ki kuc, myero gucikke me bedo kweda ki kuc.” I Kare ma bino anyim Yakobo bicomo lwite i ŋom, Icrael bituru, dok bicako lot, ci nyige bipono lobo ducu. Rwot mono yam ojwero Icrael woko lirwatrwat kit ma gijwero ki lukworgi ma gujwerogi ca? Nyo onekogi woko bene kit macalo en oneko ki jo ma onekogi ca? Ai Rwot, yam ipyem kwedgi, ka iryemogi woko, kun ikutogi ki yamo dogi me nyiko woko cen, i kare ma yamo me oro tye ka kodo. Man bimiyo igonyo Yakobo woko ki i balle, dok man aye bibedo adwoggi me kwanyo balle: en biloko godi ducu me keno tyer doko calo gweŋ ma giodo woko mapwot, kun Acera ma jok ma dako nyo keno tyer me wano odok eceta pe dok tye mo ma ocuŋ, Gaŋ me cel gogo doŋ giweko odoŋ obur, kabedone doŋ giweko odoŋ nono calo tim ata; roci dyaŋ gicamo lum kunnu, gibuto ki kunnu kun gijwero pot oboke woko ducu ki i jaŋ yadi. I kare ma jaŋ yadi doŋ otwo woko, ci gicako turone woko; mon toŋo woko me yen tedo. Pien gubedo rok ma pe niaŋ, Lubaŋa ma oketogi pe kica mo bimako i komgi wacel, Lubaŋa ma ocweyogi pe bitimogi maber. I kare maca Rwot bidino kal cakke ki i kulu Euprate o kwede wa i kulu me Ejipt; Rwot bicokowu woko kacel wun jo Icrael. Dok bene i nino meno, gibikuto iye tum madit mada, ka doŋ bimiyo jo ma yam onoŋo gurwenyo woko i lobo Aciria, ki mukene ma onoŋo giryemogi gucito i lobo Ejipt, gibidwogo cen ka woro Rwot i wi got maleŋ, i Jerucalem. Tok me wakke pa lumero me lobo Epraim bineno can, kacel ki ature me deyone mamwonya mada, ma en aye deyo ma ner woko, ma tye malo i ŋet nota ma ceko twatwal, ma obedo pa jo ma koŋo vino doŋ oloyogi woko. Nen, Rwot tye ki dano mo matek ma tye ki twero; macalo yamo kot ma kotte tye ka cwer ki pee, yamo ma balo piny woko abala, dok macalo yamo kot madit twatwal, ma piine mol lak woko ata, en bireto dano woko piny ki tek kit meno. Tok me wakke pa lumero me lobo Epraim gibinyono woko piny ki tyen; ki ature me deyone mamwonya mada-ni, ma en aye deyo ma ner woko, ma tye malo i ŋet kufu ma ceko cam twatwal bibedo ma rom aroma ki nyig oduro mukwoŋo cek, ma ŋolo kare me oro peya oo; dano ka oneno, ruyo camone oyotoyot tekke ka oo i ciŋe, I nino meno Rwot me mony bibedo macalo deyo, ki lalukana maber twatwal, bot jone ma gudoŋ; en aye bibedo cwiny me ŋolo kop atir bot gat ma ŋolo kop, dok bibedo tek pa ŋat ma juko lweny i, dogcel me gaŋ. Jo man bene doŋ gipaŋŋe apaŋa ki wot ki koŋo vino ma gumato, gitagge ki wot pien gumato koŋo vino makec mada; ajwagi ki lunebi gipaŋŋe ki wot pi mato koŋo mogo makec twatwal, koŋo vino ma gumato-ni doŋ obalo wigi woko, gipaŋŋe doŋ apaŋa pi mato koŋo mogo makec twatwal. Wigij doŋ pe mako ginanyuta ma Lubaŋa tye ka nyuto botgi maber, pe giŋolo kop kakare; pien wi meja ducu ŋolo opoŋ ki nok keken, pe tye kabedo mo ma gin mo marac pe iye. “En bipwonyo aŋa doki? En dok bitito lokke bot aŋa? Bot litino ma pud gigenogi dot agena bo? Bot jo ma pud gikwanyo doggi akwanya ki i dog tuno bo? Lokke ducu tere pe, pe waniaŋ lokke; en temo pwonyowa nukuta ki nukuta, iwinyo kany acel, dok iwinyo kuca acel.” Adada, Rwot doŋ bilok ki jo magi, ki leb pa jo ma dumo aduma, ki leb pa jo ma gin welo; ma yam guwaco botgi ni, “Man aye yweyo; wumi yweyo bot ŋat muol, kun en tye kany”; ento gin gigi gukwero winyo lokke woko. Meno bimiyo lok pa Rwot doko gin ma tere pe botgi, pe gibiniaŋ lokke; bibedo macalo en opwonyogi nukuta ki nukuta, ma giwinyo kany acel, dok giwinyo kuca acel. Wek gin gudok gupot woko ki yo ŋegi, gutur woko, ka gieikgi ki owic gimakgi woko. Pi meno wuwiny lok pa Rwot, wun luŋala, ma wutye ka loyo rok man i Jerucalem! Pien wuwaco ni, “Doŋ watyeko cikke woko ki to, dok bene doŋ waporo lok woko kacel ki lyel; ka ce can madit twatwal owok ki i kinwa, pe bigudo komwa, gire; pien doŋ wa-loko goba odoko kalarrewa, wakanne woko i lok ma pe ada”; pi meno omiyo Rwot Lubaŋa owacci, “Nen, doŋ aketo got me wel i Cion got ma gitemo ma okatti woko doŋ maber, ma en aye bibedo acakki me te guti: ŋat ma ye pe bibedo ki lworo mo ma baŋe woko. Abiloko ŋolo kop atir doko tol me pimo ot, kun kit ma atir bedo birigi: pee bimolo kalarrewu ma opoŋ ki goba-ni woko, pii bene bipoŋ woko libyeny i kakannewu.” Meno bimiyo cikkewu ma wucikke ki to tur woko, ki lok ma wuporo kacel ki lyel bene pe bicuŋ: dok ka can madit biwok kii kinwu, can meno bigoyowu wupwodde piny lirwat. Kare ducu ma can meno biwok ki i kinwu, ci terowu woko, pien biwok dyeceŋ ki dyewor nino kinino; doŋ niaŋ i lok meno bikelo lworo madit twatwal. Pien bibedo rom ki dano ma otemo buto i kitanda macek, kun umme ki gium ma pe romme kadi ki acel. Pien Rwot bia malo macalo yam koŋ otimo i wi got Perajim, akemo bimake kit macalo yam koŋ omake kwede i luŋ me Gibeon’ pi cobo ticce, ento ticce dok pat twatwal ba! Pi cobo ticce ento ticce weloba! Kombeddi doŋ wuwek ŋala obedi, wek pegitwewu dok matek twatwal; pien awinyo ka Rwot Lubaŋa me mony ociko pi tyeko lobo woko ducu: Wucik itwu, wuwiny dwana; wuter itwu, wuwiny lokka. Ŋat ma puro potone wek eco iye kodi, bedo ka purone nakanaka ma pe giko purone? En bedo ka boto poto ki lokone nakanaka? Ka doŋ otyeko tenone, doŋ pe coyo iye toke, pito iye okwer, ka dok pito iye ŋano i tyeŋ ki tyen, ki cayiri bene pe pito kakare, ki ŋano matino i ŋet lak peto? Pien Lubaŋane pwonye maber, kun niaŋe bene maber kit ma myero en oti kwede. Toke mere pe gidino ki yat me dino bel, okwer bene pe giloro tyen gadigadi ki iye; toke gire giteno atena ki odoo, ento okwer gityero atyera ki kidi me tyerone. Kai kwon bene gidino adina, ento pe gidino matek twatwal ma gityero nyige woko. Kadi aguragura ywayo tyen gadigadi wok ki iye, pe tyero nyige gire. Man bene oa ki bot Rwot me mony, en Rwot ma giuro i miyo tam, ryekone dit ma pe wacce. Ariel doŋ oneno can ma rom mene? Ariel ma en aye gaŋ ma onoŋo Daudi oguro kemane iye-ni, Wuwek mwaka koŋ okat aryo nyo adek mo, kun wubedo ka kwero nino madito mapatpat i karegi kikome. Ento abimiyo Ariel neno can; koko ki kumo bibedo tye iye, bibedo calo keno me waŋo gitum awaŋa, Abiguro kemana i ŋeti kun arumi woko dyere, abirumi woko ki lubele ma gucudo malo likuŋ, abitoro lobo abako i nyimi calo cel. Abidwoki piny i te lobo, ibilok ki piny i apwa, dwani bidonyo i te lobo calo dwanjok, ki lokki biwinnye liwewe kun donyo kwede i apwa. Ento lukworri bibedo mapol calo apwa, ki jo ma kica pe i cwinygi bibedo calo cuŋ kai ma yamo tero. Dok cutcut i kare meno, Rwot me mony bilimi, kun miyo kot mor mwoc atata, oyeŋyeŋ bedo tye ki woo bene bedo dit, ki yamo lapiru, yamo kot, kacel ki mac mager twatwal. Lwak mony me rok mapatpat mubakke lipim ma lwenyo i kom jo Ariel, jo ducu ma gilwenyo i komgi ki i komkabedo matek me kalarregi, ma unogi, gin ducu gibidoko calo lek, gin ma Lubaŋa nyuto dyewor. Kit macalo dano ma kec neko leko ni etye ka cam, ci cutcut co woko ma noŋo iye noŋo, nyo macalo dano ma orwo pii oketo leko ni etye ka mato pii, cutcut co woko ma noŋo orwo pii doŋ okete matek, kun mito mato pii; lwak rok ducu ma lwenyo i kom got Cion bene, gibibedo kit meno. Wubaŋŋe giwu kekenwu wek wubed lumiŋ, wubal waŋwu woko kekenwu wek wubed lutowaŋ! Wumer, laboŋo mato koŋo vino mo; wupaŋŋe apaŋa ki wot laboŋo koŋo mo ma wumato! Pien Rwot doŋ oonyo i komwu cwiny me nino matek; omiyo waŋwu woko, ma gin aye lunebiwu; ki wiwu bene oumo woko ma gin aye jo ma neno piny. Gin ma Lubaŋa nyuto bot lunebi ducu doŋ odoko calo buk ma gimwono doge woko ki tuŋ botwu, ma ka gimiyo bot dano mo ma ŋeyo kwan kun giwacce ni, “Bin ikwan man,” ci en gamo ni, “Pe atwero kwanone pien gimwono doge woko.” Dok bene ka gimiyo bot ŋat ma kwiya kwan, kun giwacce ni, “Bin ikwan man,” en gamo ni, “Pe aŋeyo kwan.” Ka doŋ Rwot owaco ni, “Rok man kara ginyiko cok kweda ki doggi noŋo, giketo deyo i koma bene ki doggi noŋo, cwinygi pe tye i koma wacel, lworo ma gilwora kwede-ni meno cik pa dano ma gipwonyogi kwede. Pi meno, dok abitimo gin me aura i kom rok man, gin me aura dok me tano twatwal; mamiyo ryeko rwenyo woko bot jo maryek, ki ŋec pa jo megi ma giniaŋ matut bikanne woko.” Jo ma kano tamgi woko ki bot Rwot ka matut, jo ma tiyo ticgi ka macol, jo meno bineno can, dok ma giwaco ni, “Aŋa kono ma nenowa? Aŋa kono ma neyowa?” Koŋ wunen kit ma wun wuloko kwede kiloŋ! Gitwero poro lacwe-agulu ki lobo agulu ma en cweyo? Gin ma gitiyo atiya twero waco ki ŋat ma ocweye ni, “Pe in aye ma icweya”? Nyo gin ma gicweyo twero waco ki ŋat ma ocweye ni, “In pe iŋeyo gin mo?” Odoŋ kare manok twatwal Lebanon bidoko poto ma ceko cam mabup mada, kun poto ma yam ceko cam mabup twatwal-li doŋ olokke odoko buŋa, I nino meno jo ma itgi odiŋ gibiwinyo lok ma gikwano ki i buk, lutowaŋ bene waŋgi biyabbe, kun gia woko ki i mutu ki colpiny, Jo mamwol dok gibinoŋo yomcwiny i Rwot, lucan bene gibibedo ki yomcwiny i ŋat Maleŋ me Icrael. Pien jo ma pe ki kica doŋ bibedo pe, jo ma gin luŋala bene gibitum woko, lulib dano dyewor me timo tim maraco gibityekogi woko liweŋ, ki jo ma miyo kop loyo dano pi lokgi, ma giciko owic pi ŋat ma jukogi i kabedo me ŋolo kop, ma gicwalo ŋat ma kite atir woko pi lok mogo ma tere pe. Meno omiyo Rwot, ma yam olaro Abraim, oloko lok i kom ot pa Yakobo ni, “Lewic pe dok bimako Yakobo, waŋe bene pe dok biballe. Pien ka en bineno litinone, ma gin aye tic ma an atiyo ki ciŋa, kun gitye bote, gibimiyo nyiŋa bedo me awora; gibiŋeyo atir ni ŋat Maleŋ pa Yakobo gire leŋ, gibibedo ki lworo i kom Lubaŋa me Icrael. Jo ma ŋak woko ki i cwinygi biniaŋ, ki jo ma bedo ka ŋur aŋura bene biye ni gipwonygi.” “Litino ma lujemo gibineno can,” Rwot ma owaco, “jo ma tiyo ki tamgi, ma pe mera; dok ma giribbe ki rok ma cwinya dagi, me medo bal i kom bal; ma gucako wotgi me cito i Ejipt, laboŋo penyo koŋ tam ki bota, pi laro bot Parao ni ogwokgi, dok pi yenyo ka kanne i tipo me Ejipt! Pi meno ka gwokkewu ki bot Parao bilokke miyowu lewic, dok tipo me kannewu i Ejipt bimiyo alee twodowu woko. Pien kadi bed luditone tye i Joan, dok lukwenane o wa i Kanec, ŋat acel acellewic bimako, pi rok ma pe twero konyogi, ma pe ginoŋo iye kony mo kadi gin mo maber, ento ginoŋo lewic ki cac keken.” Man lok ma Lubaŋa oloko i kom lee me Negeb. I dye lobo ma tye iye ayelayela madit ki can mapek, ka ma min labwor ki twon labwor gia iye, kacel ki twol ororo ki ma tuk cito malo, gutiŋo lwak lonyogi madwoŋ adada i ne lwak kana, ki lim akanagi i kom aruk pa kinaga, kun gitero bot rok ma pe twero konyogi. Pien kony ma Ejipt miyo lam, dok gin mo maber pe iye; meno omiyo acako nyiŋe ni, “Rakab ma bedo abeda laboŋo tic mo,” Kombeddi doŋ icit igor coc i nyimgi i kom got ma apada, ka dok bene ico i buk, wek gigwok obed tye pi kare me anyim, macalo caden ma bedo nakanaka. Pien gin gubedo lujemo ma lugoba, litino ma kwero winyo lok pa Rwot; ma giwaco bot jo ma neno piny ni, “Pe wunen piny.” Ki bot lunebi giwaco ni, “Pe wutit botwa lok ma tye atir; ento wutit botwa lok mabecone keken, wutit lok me goba keken, wuŋak woko, wuwek yo, wek pe wamedde ki winyo lok mo pi ŋat Maleŋ me Icrael.” Meno omiyo ŋat Maleŋ me Icrael owaco ni, “Pien wun doŋ wucayo lok man, ento wuketo genwu i uno dano ki bwologi, kun wujeŋŋe i kom timwu meno ma wutimo; meno bimiyo balwu man bedo komwu, macalo cel ma ocudo malo likuŋ ma obar woko dok cok muk me poto woko piny, ma mukwoko-lipuny oyotoyot. Mukke bedo rom ki to agulu ma gicweyo, ma giŋido woko laboŋo kica mo, kun otakone mo pe ma odon, ma gitwero tic kwede me karo mac ki i keno, nyo ma romo twomo pii ki i joro.” Man aye lok ma Rwot Lubaŋa owaco, ma en ŋat Maleŋ me Icrael, “Wudwog cen, wubed mot, wek wularre; ka wubedo mot ki gen, wubinoŋo teko.” Ento ceŋ wukwero woko, kun wuwaco ni, “Pe, wan giwa wabiriŋo ki aguragura,” meno bimiyo wuriŋo oyot mada, dok ni, “Wabiriŋo madwir twatwal,” meno bimiyo jo ma ryemo korwu bedojo madwir adada, Jo alip kulu biriŋo pi lworo dano acel keken, wun wubiriŋo pi lworo lukwor abic keken, nio waŋ ma wudoŋ calo yat bendera ma tye i wi got, calo bendera ma tye i wi cere malo. Kadi bed kumeno, ento Rwot tye ka kuro me nyuto berre botwu; meno omiyo en oyubbe pi timowu kica. Pien Rwot aye Lubaŋa ma ŋolo kop atir, jo ducu ma gibedo kun gikure gitye ki gum. Adada, wun jo Ci on ma wubedo i Jerucalem pe doŋ wubikok matwal. Rwot bitimowu kica ka ce owinyo kokowu; ka owinyo ci en bigamo dogwu. Kadi bed Rwot omi wucam kwon me aroma, ki dokomi wumat pii me can, ento Lapwonywu pe dok bikanne, wubibedo ka neno Lapwonywu ki waŋwu, Ka ce onoŋo wuŋak woko, ci wubiwinyo lok ma a ki yo tuŋ ŋewu, kun waco ni, “Yo ene, wulubi,” ka wulokke yo tuŋ lacuc nyo yo tuŋ lacam. Ka dok wubicako balo cal jogiwu ma gipayo apaya ma wudeyo komgi ki ryal, kacel ki calwu ma giliyo aliya, ma wudeyo komgi ki jabu, wubibologi woko calo gubedo gin me kwer, kun wuwaco ni, “Wudirre cen!” Rwot bimiyo kot cwer botwu pi kodi ma doŋ wucoyo i potti ki pi cam ma tye ka cek i potti, bimiyo camwu cek maber dok mabup twatwal. I kare meno dyaŋiwu bibedo ka cam i bar olet malac; ci bimiyo twoniwu ki kanawu ma gipuro bicamo cam ma girubo ki kado, ma gipyeto woko ki odero. Kulu me pii ma mol bibedo tye i wi godi ducu ki i wi cere ducu, i nino ma gibineko iye dano matek i kare ma gedo mogo ma ocudo malo likuŋ bimuk poto woko piny., Dok bene dwe biryeny maleŋ twatwal kun caro piny calo ceŋ maryeny, ento ceŋ bibedo ma rom meno tyen abiro, i nino ma Rwot bitweyo iye waŋ ret pa jone, ki caŋo waŋ bur ma en kikome aye oketo rette i kom jone. Nen, nyiŋ Rwot bino kun a ki ka mabor, kun kinigane tye ka waŋ calo mac, ma yito ocido licuc duny cito malo ma oculle woko Iikiŋ; kun kiniga opoŋ woko i doge, ki lebe bene calo mac ma tye ka waŋo piny, kun ‘waŋo jami woko duculiweŋ; yamo doge calo kulu ma piine opoŋ libyeny mol atata liyakyak, ma mwonyo dano o wa i ŋute, me yeko rok mapatpat ki odero me to, ki pi keto del i dog dano ma miyo girwenyo woko. Wubibedo ka wero we i macalo wuwero i dyewor me kwero nino madit pa Rwot; cwinywu bene bibedo yom calo ŋat ma woto kun dano tye ka kuto nyamulere, me cito i wi got pa Rwot, bot ŋat ma obedo Got pa jo Icrael. Rwot bilok ci miyo dwane me deyo winnye, dok bene bimiyo bade nen ma en oryeyo okemo piny, kun tye ki akemo mo madit ma pe wacce, ki leb mac ma waŋo piny woko ducu, kacel ki kot ma mwoc kun cwer corre piny ki pee. Lworo madit mada bimako jo Aciria, ka ce guwinyo dwan Rwot, kun en goyogi ki odoone. Goco acel acel ma en goyogi kwede ki odoo ma Rwot biketo i komgi bimalle ki koko ajaa ki opuk; en bilwenyo kwedgi kun yeŋo bade pi lweny. Pien ka wanoŋe doŋ gityeko yubone woko wa con; ada, doŋ gityeko yubone woko pi kabaka, kabedone giyubo matut dok malac twatwal, ma mac ki yen bene tye madwoŋ ata, yamo dog Rwot katti calo gweŋ ma giliyo woko i mac, en aye calfa, ma bimoko mac iye. Jo ma cito i Ejipt ka yenyo kony gibineno can matek, jo ma guketo gengi i kom aguragura, ki i kom gadigadi me lweny, pien gipol, ki i kom wegi aguragura, pien gitek twatwal, ento pe gutiŋo waŋgi malo guneno Dat Maleŋ me Icrael, kadi ki penyo tam ki bot Rwot. Ento kono en ryek, dok kelo can marac twatwal i kom dano, pe dok dwoko lok ma en oloko cen” en bia ‘malo i kom jo me odi pa lutim tim maraco, ki i kom lukony dano ma lutim bal. Jo Ejipt mere gin dano, pe gubedo Lubaŋa; aguraguragi bene gubedo kom mamwa, pe gin cwiny. Ka Rwot oryeyo bade, ci lami-kony bipaŋŋe litamtam, ki ŋat ma gikonyo bipotowoko piny, gin ducu gibito kacel gitum woko, Pien Rwot owacobota kuman ni, Kit ma labwor nyo latin labwor mor kwede i kom lee ma en omako, ma kadi ilwoŋ lwak lukwat mapol ka Lweny i kome, kome pe myel ka owinyo dwangi dok bene lworo pe mako kadi giwo matek twatwal, meno aye kit ma Rwot me mony bibino kwede piny ka lweny i kom got Cion ki i kom cerene-gu ducu, Rwot me mony bigwoko Jerucalem: kit macalo winyo Lyerre kwede: en bigwoko dok bene bilaro, en bikoyo Jerucalem, miyo bwot. Wun jo Icrael myero wudok cen bot ŋat ma wujemo i kome magwa twatwal-li, Pien i nino meno dano acel acel bibolo cal jogine me ryal woko kacel ki cal jogine me jabu ma onoŋo wutimo bal pi tiyogi ki ciŋwu-ni, “Gibineko jo Aciria woko ki pala lucwan ma pe pala pa dano; pala lucwan ma pe pala pa dano bijwerogi woko lirwatrwat; gibiriŋo woko pi lworo pala lucwan, gibidiyo awobegi tektek me tiyo tic muroni mapek, Lworo bimiyo patagi rwenyo woko, myelkom bene biweko luditogi bolo bendera woko.” Rwot ma macce tye i Cion, ki ma tanurre otwak i Jerucalem aye ma owaco. Nen, kabaka biloyo loc ki kit atir, rwodine bene gibibedo i loc kun giŋolo kop atir. Ŋat acel acel bibedo macalo kagwok ka yamo tye, dok macalo ka-gwok ka kot ocorre piny, macalo kulu mapol ma piine mol i kabedo mutwo, dok macalo tipo got mo madit ma tye i lobo mutwo matar atara ligwek. Jo ma neno piny pe gibiumo waŋgi, jo ma winyo bene gibiciko itgi, Dano ma gitimo jami oyotoyot, gibiniaŋ iye dok gibiŋeyo maber, jo ma te lebgi odwalle biloko lok oyotoyot, dok atir laboŋo peko mo. Ŋat mamiŋ pe gibilwoŋe ni dano me awora, ŋat ma kite rac bene pe gilwoŋo ni twon oteka. Pien lamiŋ mere loko lok me miŋo, tamme tye me timo bal keken; gin ma en timo ducu pe yomo cwiny Lubaŋa, loko lok marac i kom Rwot; en dok medo kec amedda bot jo ma kec noŋo doŋ nekogi, dok twono jo ma orwo pii oneko woko ki pii me amata. Dano ma kite rac, noŋo timme bene rac; en miyo tam me timo gin maraco, me balo lucan woko ki loko lok goba kadi bed lok pa ŋat ma can odiyo tye kakare. Ento dano me awora kelo tam ma jo mukene woro bene, en cuŋ mere i kit me woro keken. Wua malo, wun mon ma wutye ki kuc, wuwiny lokka; wuter itwu, wuwiny lok ma awaco, wun anyira ma pe wuparo gin mo-ni, Nino ma odon pe dok romo mwaka acel, komwu bibedo ka po apoya, wun mon ma pe wuparo gin mo-ni; pien nyig olok bibedo pe, dok bene pe gibipwono nyig yadi. Wubed ki myelkom wun mon ma wutye ki kuc, komwu bene myero obed ka po apoya, wun ma pe wuparo gin mo-ni; wugony boŋŋi woko ki i komwu, wutwe boŋo cola i pyerwu. Wudoŋ korwu pi pottiwu ma yomo cwinywu, pi olok ma nyak matek twatwal, pi lobo pa jona, ma okuto ki ocok bidoŋo iye; ki pi odi ducu ma gitye i gaŋ ma dano tye iye ki yomcwiny madwoŋ. Pien kabaka bia ‘woko ki i ode, gaŋ ma dano pol iye bene bidoŋ noŋo; got Opel ki ka ma ocudo malo likuŋ me ŋiyo piny bidoko boro matwal; kana me tim cwinygi bibedo yom pigi, bidoko ka ma gikwayo iye romi ki dyegi; nio waŋ ma Lubaŋa oonyo Cwiny Maleŋ i komwa kun a ki malo, ma noŋo tim bene doŋ odoko poto ma ceko cam mabup twatwal, kun poto ma yam ceko cam doŋ olokke odoko buŋa, I kare meno ŋolo kop atir bibedo i tim, kit ma atir bibedo mere i poto ma ceko cam. Kit ma atir bikelo kuc, dok bikelo bene bedo mot ki gen ma bedo nakanaka. Jona bibedo i kabedo me kuc, ka ma ayela mo pe iye, kabedo maber me yweyo mot. Pee bicorre, miyo buŋa ducu lwer o woko piny, gaŋ bene gijwero woko rwatrwat. Wutye ki yomcwiny, wun jo ma wucoyo kodi i dog kulu ducu, ma wumiyo twoni ki kana-gu giwoto ata. Ibineno can, in ŋat ma ineko dano, ma kun in kikomi pe gineki, in ŋat ma doto dano, kun ŋat mo pud peya oketo lok roro i komi. Ka doŋ iweko neko dano woko, in bene doŋ gibijweri woko; ki ka doŋ iweko tim me doto dano woko, in bene doŋ gibiketo lok roro ikomi. Ai Rwot, timwa ber, wan wakuri. Bed macalo bad wa piny ma ru ki piny ma ru, larwa i kare ma watye i can. Rok mukene giriŋo woko ka guwinyo dwan dano ma wo; ka in ia malo ka lweny piwa, lurok giket woko atata. Giyako jami calo okwil ma camo cam i poto; ma gipye apyeya iye calo bonyo, Rwot dit adada, pien bedo malo; en bimiyo jo Cion ducu ŋolo kop atir, kun kitgi bene bedo atir; i karewu en bimiyo wucuŋ matek, dok bilarowu, miyowu ryeko ki ŋec madit; doŋ gin ma pire tek botwu en aye myero wulwor Rwot. Koŋ wunen, kit ma jo ma gitek i lweny kok kwede! Dok lukwena me kuc bene gikok ki cwercwiny ma pe wacce! Yo gudo ducu doŋ gudoŋ noŋo, dano mo ma wote iye doŋ pe. Nen, gicikke doŋ gituro woko, caden ducu doŋ gicayogi acaya, pe doŋ bene giparo pi dano. Lobo doŋ oballe woko; alee bene otwodo Lebanon, tekone bene tye ka rwenyo woko. Caron doŋ odoko calo tim aroo; Bacan ki Karmel pot yadigi doŋ tye ka o woko aoya piny. Rwot owaco ni, “Kombeddi doŋ abia woko, abitiŋŋe malo; doŋ abikette gira abedo dit. Wuyaco cuŋ kai, ento wunywalo ren kal; yweyo ma a ki i dogwu aye bibedo mac ma bityekowu. Rok ducu bidoko calo buru mac ma odoŋ ka mac oto, macalo okuto ma gitoŋo ka doŋ giwaŋo i mac.” Wun jo ma wutye ka mabor wuwiny gin ma doŋ atimo, ki wun jo ma wutye cok, myero wuŋe twero ma atye kwede. Lubalo ma tye i Cion doŋ lworo omakogi woko, jo ma kwero Lubaŋa komgi doŋ myel amyela. “Aŋa i kinwa ma twero bedo i ŋet mac ma wan neko dano? Aŋa i kinwa ma twero bedo i ŋet mac malyel nakanaka ma pe to?” ŋat ma kite atir i nyim Lubaŋa ma loko lok ada, ma cwinye tye atir, ma cwinye dag lonyo ma ginoŋo pi uno dano, ma bene teno cine pe ye gamo lim me wil i muŋ, ma culo ite woko bene, pe winyo lok me neko dano, ma miyo waŋe woko wek pe onen gin marac. En bibedo malo ka gwokkene bibedo i cel gogo ma gicweyo ki got; gibimiye camme, ki pii amatane bene pe bijwik. Wubineno kabaka ki wanwu ki deyone; wubineno lobo ma oyarre malac wa ka mabor, Cwinywu bilwodo lok i kom lworo madit twatwal. “Lakwan wel kono tye kwene? Dano ma giculo mucoro bote kono tye kwene? Lakwaŋ lubele ma gucudo malo likuŋ-ŋi tye kwene?” Pe dok wubineno rok ma luŋala, rok ma loko leb mapat atika, ma pe wuniaŋ i gin ma giloko, ma gidumo leb ma niaŋ iye tek. Koŋ wunen Cion, gaŋ ma wukwero iye ninowu madito ma giciko! Wubineno Jerucalem ki wanwu, ma en gaŋ ma oliŋ mot calo kema ma pe gikobo ki kakare, ma teke ma giguro kwede pe giputo, dok tolle bene pe cot, Ento Rwot binyuto deyone kunnu, ka ma kulu madoŋo ki matinone tye iye, ka ma mel ma gikwano ki pol pe wok ki iye, ki yeya me deyo bene pe wok ki iye. Pien Rwot aye lanolkopwa, en lalocwa, Rwot aye kabakawa, en bilarowa. Tol yeyawu ogony woko; pe mako te yat cuŋ matek i kabedone, pe bene gitwero yaro boŋo iye wek yamo okuti. I kare meno jami ayaka bibedo mubakke ata lipim ma dano bipoko i kingi; kadi wa luŋolo bene gibinoŋo jami mogo olo twal. Pe tye dano mo ma bedo i lobowa ma biwaco ni, “An koma lit.” Jo ma bedo iye ducu gibitimo botgi kica pi balgi. Wubin wunyik cok, wun rok ducu wek wucik itwu wuwiny! Jo ducu ma bedo i lobo, myero gubin guwiny. Pien akemo doŋ omako Rwot i kom rok ducu, kiniga okete woko adada i kom monygi, en doŋ otenyogi wek gijwergi woko ki pala lucwan calo gineko lee. Kom danogi ma doŋ gineko gibibolo woko ata, ŋwec komgi biduny maŋwe, remogi bene bimol i wi godi. Lakalatwe me polo ducu bitop woko, polo bidolle woko calo buk adola. Monygi ducu bipoto woko piny, kit ma pot olok o kwede piny, kit ma pot oduro poto kwede piny ki i wi jaŋe, Pien doŋ ayubo pala lucwanna woko ki i polo, abino piny ka ŋolo kop i kom jo Edom, i kom jo ma doŋ gimiyo me aneka. Rwot tye ki pala lucwan ma remo opune woko i lake, moo dwolo bene doŋ odyako kome woko liweŋ, remo romi ki remo dyegi, moo dwolo olan pa nyogi romi. Pien Rwot bityero gitum i Bojra, dok bineko dano matek i lobo Edom. Dano bitiŋŋe poto piny libut calo twonjubi. Lobogi bipoŋ ki remo ma mol liyakyak, dok moo dwolo bimiyo lobogi bedo ma miyu adada, Pien Rwot tye ki nino me culo kwor, tye bene ki mwaka me koko Cion ki bot lukworre. Kulu ducu me Edom bilokke doko calo odok Lam, lobone bene bidoko calo gweŋ calfa, doŋ lobo maca ducu bidoko calo odok Lam ma tye ka waŋ. Mac bilyel dyeceŋ ki dyewor benebene ma pe to, yitone biduny mucido cito malo lituu nakanaka, I kare pa yalwak ducu lobo bidoŋ nono, dano mo pe ma biwok ki iye ma twal. Olwit ki coo bileyo ci doko megi, dok tula ki agak bene gibibedo iye. Rwot biryeyo tol i kome, miyo jebbe woko atata, ki birigi ma miyo doŋ noŋo ma kelo anyobanyoba i kom ludito ducu. Gibilwoŋo nyiŋe ni, Loc pe kunnu, dano madito bibedo pe iye. Okuto bidoŋo i wi odine madito, ayila ki ocok bidoŋo i gaŋ gogone, too ki udu gibibedo iye, Lee me tim birwatte ki lalur, cen mubedo calo dyegi bikok bot luwotgi, min lee muti ma nen dyewor keken bicito ka yenyo ka yweyo kunnu. Tula bigero ode kunnu, ci bibolo iye toŋe, dok bitoko litinone bene ki kunnu, ka coko litinone woko i te bwome, Kwateŋ bene bicokke kunnu, kun acel acel i kingi tye ki cware, Koŋ wuyeny wukwan ki i buk pa Rwot: pe tye mo i kin magi ma birwenyo, pe tye mo ma bibedo kene laboŋo cware. Pien Rwot doŋ ociko ni obed kit meno, en kikome aye bicokogi kacel. En obolo kwir pigi, en kikome aye ma opoko botgi lobo kun pimo ki tel. Doŋ bibedo megi matwal, gibibedo iye i kare pa yalwak ducu. Lobo mutwo kacel ki tim bibedo ki yomcwiny, ature bituru iye calo lena, Ature bibedo iye calo jo ma cwinygi yom, kun giwero wer ki yomcwiny madwoŋ twatwal; deyone bene bibedo dit mada calo got me Lebanon, bibedo ma mwonya twatwal calo potti me Karmel ki Caron. Gibineno deyo pa Rwot, ki twer ma Lubaŋawa tye kwede. Wujiŋ; ciŋ jo ma badgi okwe, wumi jo ma coŋgi goro odok matek. Wuwac bot jo ma tye ki lworo i cwinygi ni, “Pe wubed lwor, wubed tek! Nen, Lubaŋawa bikokowu, en biculo kwor i kom lukworwu. En bibino ci larowu.” I kare meno lutowaŋ waŋgi biyabbe, jo ma itgi odiŋ bene itgi biyabbe. I kare meno luŋolo bipye malo calo til, ki jo ma te lebgi oto gibicako wero wer ki yomcwiny. Pien pii bimwoco piny woko i dye tim, ki kulu bene piine bibedo ka mol i lobo mutwo; kweyo ma mil amila bigolle woko doko kut, pii bibedo ka gunnye atata i lobo mutwo likaŋ. Lum ki lagada bidoŋo madwoŋ twatwal, i kabedo ma yam too aye bedo iye. Yo gudo madit bibedo kunnu, yo ma gibicako nyiŋe ni, “Yo Maleŋ.” Jo ma gin lubalo pe gibilubo yo meno, jo mamiŋ pe bimiyo jo ma lubo yo meno rwenyo. Labwor mo pe bibedo kunnu, lee mo mager bene pe bicito kunnu, pe tye mo ma gibinoŋo kunnu; ento jo ma doŋ gikokogi aye bilubo yo meno. Jo ma Rwot okokogi bidwogo cen i Cion, gibibino ma noŋo giwero wer licur. Yomcwiny ma ri nakanaka pe birwenyo ki i wigi, gibibedo maber ki yomcwiny madwoŋ, cwercwiny ki cur ma yam gubedo kwede doŋ bia woko ki i cwinygi. I mwaka me apar wiye aŋwen me loc pa kabaka Kejekia, en aye Cenakerib kabaka me Aciria obino kwede ka lweny i kom gaŋi ducu me Juda ma girumogi ki cel gogo, ci omayogi ducu. Kabaka me Aciria ocwalo Larabcake bot kabaka Kejekia i Jerucalem, kun Larabcake a ki i Lakic ki dul mony madit twatwal. Ci ocito ocuŋ i ŋet yo pii ma mol ki i joro ma malo, i yo gudo ma cito i poto pa Lalwok-boŋo. Jo adek me Juda cutcut gubino me rwatte kwede: Eliakim wod pa Ilkia, ma en aye ladit ma loyo jami ma i ot pa kabaka, kacel ki Cebna ma karan, ki Joa wod pa Acap, laco lok matimme. Larabcake owaco botgi ni, “Wuwac bot Kejekia ni, ‘Kabaka madit, kabaka me Aciria, owaco kuman ni, In igeno gin aŋo? In itamo ni lok me dog noŋo bedo rom ki ryeko me lweny ki mony madit me loyo lwennye. In kombeddi ijeŋŋe i kom aŋa, mumiyo ijemo woko i koma-ni? Neo, kombeddi iloko Ejipt odoko odoo ma’ ijeŋŋe i kome, kun en lagada ma otur otyer woko, ma bituco ciŋ dano mo ma ojeŋŋe i kome. Meno kit ma Parao kabaka me Ejipt bedo ka timo kwede jo ducu ma gijeŋŋe i kome. Ento ka wuwacca ni, “Wan wajeŋŋe giwa i kom Rwot ma Lubaŋawa,” pe en aye wan jogine ma i wi godi, ki keno tyerre, ma Kejekia doŋ omukogi woko, kun waco bot jo Jerucalem ki Juda ni, “Wubiworo Lubaŋa i nyim keno tyer man ma i Jerucalem?” Koŋ ijeŋ gin me camme ki laditta kabaka me Aciria! An abimiyi aguragura alip aryo, ka ce in ki tuŋ boti bene itwero noŋo lubed i wigi. In itwero dwoko ladit lweny acel mo cen ki i kin lutic pa laditta matinone, ka ce ijeŋŋe i kom Ejipt pi gadigadi lweny ki wegi aguragura? Dok bene in itamo ni abino ka lweny i kom kabedo man wek atyek woko laboŋo twero pa Rwot? Wai Rwot aye ma owacca ni, ‘Cit icilweny i kom lobo man ityek woko yo!’ ” Cutcut Eliakim ki Cebna, ka Joa guwaco bot Larabcake ni, “Walegi ilok ki wan luticci i leb Aram, pien wawinyo. Pe ibed ka lok kwedwa i leb Juda ma lwak ma gitye i wi cel bene giwinyo.” Ento Larabcake ogamo doggi ni, “itamo ni rwoda ocwala ka loko lok magi bot laditwu ki botwu keken bo, pe bot lwak ma gubedo i wi cel bene, ma gin kacel ki wun gukemo can me camo cetgi kengi ki mato lacgi?” Larabcake ocuŋ ocako daŋŋe ki dwan maloŋo i leb Juda ni, “Wuwiny lok pa kabaka madit, kabaka me Aciria! Kabaka owaco ku man ni, ‘Pe wuwek Kejekia obed ka bwolowu, pien en pe bitwero larowu. Pe wuwek Kejekia omiwu wujenne i kom Rwot kun wuwacci, “Rwot aye bilarowa, gaŋ man pe gibimiyo i ciŋ kabaka me Aciria.” Pe wubed ka winyo lok pa Kejekia; pien man aye lok ma kabaka me Aciria owaco, ni meno wuyub lok me kuc kweda, ci wukatti woko bota; kit meno ŋat acel acel bicamo nyig olok ma i potone, ŋat acel acel bicamo nyig odurone, ki ŋat acel acel bimato pii ma i taŋine kikome; nio ka abiterowu wa i lobo ma rom ki mewu-ni, lobo ma ceko kal ki koŋo vino, lobo ma miyowu kwon, ma tye iye poto olok-gu. Wugwokke, pe wubed ka winyo lok pa Kejekia ma tye ka bwolowu marac kun wacci, “Rwot bilarowa.” Tye Lubaŋa pa lurok mo ma yam olaro lobone ki i cin kabaka me Aciria? Lubaŋa pa jo Kamat ki Arpad gitye kwene kaa? Lubaŋa pa jo Ceparvaim gitye kwene? Gin yam gularo Camaria ki i ciŋa bo? Lubaŋa me lobo mene ki i kin lubaŋa ducu ma gitye ki lobogi, ma yam koŋ olaro lobone ki i ciŋa mono, mumiyo wutamo ni Rwot bilaro Jerucalem ki i ciŋa-ni?’ ” Ento lwak ducu guliŋ aliŋa, pe gudokke iye lok mo kadi ki acel, pien onoŋo kabaka ociko ni, “Pe wubigamo doge.” Lacen Eliakim wod pa Ilkia ma en aye ladit ma loyo jami ma i ot pa kabaka, kacel ki Cebna ma karan, ki Joa wod pa Acap ma laco lok ma timme guyeco boŋŋigi gucito kwede wa bot Kejekia, gutitte lok ducu ma Larabcake owaco. Ka kabaka Kejekia owinyo, ci oyeco boŋŋine woko, ocako umme ki boŋo cola, ocito kwede wa i ot pa Rwot. Ci ooro Eliakim ma lalo jami ma i ode, kacel ki Cebna ma karan, ki ajwagi pa Lubaŋa ma guteggi ma guumo komgi woko ki boŋo cola, ocwalogi guwoto bot Icaya wod pa Amoj, ma lanebi. Guwaco bote ni, “Kejekia owaco kuman ni, “Tin piny doŋ oloyowa woko, gibiburowa, lewic omakowa mada. Latin doŋ obino i yo nyodo, ci tek me nywalone aye peke. Gwok nyo Rwot Lubaŋani doŋ otyeko winyo lok pa Larabcake, ma laditte kabaka me Aciria ocwale kwede ka nywaro Lubaŋa makwo-ni, ci bimiyo Rwot Lubaŋani juko lokke. Pienno, tin legani malo pi jo ma gubwot, ma gudoŋ-ŋi.’ ” Ka lutic pa kabaka Kejekia guo bot Icaya, Icaya owaco botgi ni, “Wuwac bot laditwu ni, ‘Rwot owaco kuman ni, pe ibed ki lworo mo pi lok ma iwinyoni ma lutic pa kabaka me Aciria gubedo ka yeta kwede, Nen, abiketo cwiny mo i iye, ci biwinyo lok mo ma oywek, ci dok woko wa i lobo tugi; ci abimiyo gineko en woko ki pala lucwan ki i lobo tugi kunnu.’ ” Ka Larabcake odok, ci onoŋo kabaka me Aciria tye ka lweny i kom Libna; pien onoŋo owinyo ni kabaka otyeko a woko ki i Lakic. Ka ce kabaka owinyo lok i kom Tiraka kabaka me Etiopia, ni otiŋo yo me bino ka lweny i kome, en dok ocwalo lukwena bot Kejekia kun wacci, “Wubiwaco bot Kejekia kabaka me Juda kit man ni, ‘Pe iwek Lubaŋani ma igeno-ni obwoli ni pe ebimiyo Jerucalem i ciŋ kabaka me Aciria. Nen, doŋ ityeko winyo gin ma kabaka me Aciria otimo i kom lobo ducu. Iwinyo kit ma en otyekogi kwede woko, ci in kono ibibwot niŋniŋ? Kwarowa yam gujwero gaŋi Gojan, Karan ki Recep, ci guneko jo Eden ma onoŋo yam gibedo i Telacar, ento jogigi mo pe olarogi. Luker ma giloyo gaŋi magi gitye kwene? Kabaka me Kamat, ki me Arpad, kabaka me Ceparvaim, ki me Ena kacel ki me Iya, gin ducu kombeddi gitye kwene?’ ” Kejekia ogamo waraga ki i ciŋ lukwena-nu ci okwano. Ka oa ocito i ot pa Rwot, ci oyaro waraga meno woko i nyim Rwot. Kejekia olego Rwot ni, “Ai Rwot Lubaŋa me mony, Lubaŋa pa Icrael, ma ibedo i wi komkerri ka wi lukerubi; in keni giri aye ibedo Lubaŋa ma iloyo dul lobo mapatpat ducu ma i wi lobo. In aye ma iketo polo ki lobo. Tim ber icik iti iwinywa, ai Rwot, yab waŋi inenwa, dok bene iwiny lok ducu ma Cenakerib ocwalo kun ŋalo kwede Lubaŋa makwo. Ada, ai Rwot, waŋeyo ni luker me Aciria guneko rok ducu ma omiyo lobogi doŋ noŋo, dok bene guwaŋo lwak jogigi wo ko ki mac; pien onoŋo gin pe Lubaŋa kikome, gin tic me ciŋ dano, yen ki got-gu, mumiyo gityekogi woko. Mumiyo kombeddi doŋ, ai Rwot Lubaŋawa, larwa ki i ciŋe, wek ker ma I WI lobo ducu guŋe ni in giri aye ibedo Lubaŋa keni.” Icaya wod pa Amoj odwoko lok bot kabaka Kejekia kun wacce ni “Rwot Lubaŋa pa Icrael owaco kuman ni, Atyeko winyo legani ma icwalo bota pi Cenakerib kabaka me Aciria. Man aye doŋ lok ma Rwot owaco i kome ni, ‘Jo Cion gicayi calo nyako ma obedo ka cayi kun jeri; jo Jerucalem bene gicayi, calo nyako ma tye ka yeŋo wiye ki i ŋeyi, ‘In icayo aŋa, aŋa mono ma iyetoni? Imoro dwani i kom aŋa, ma itiŋo waŋi ki wakke-ni? I kom ŋat Maleŋ me Icrael kulu! In aye ma imiyo lukwenani giŋalo Rwot, dok iwaco ni in iito malo i wi godi kun itye ki lwak gadigadi lwennyi, nio wa malo i wi got Lebanon. Iwakke bene ni itoŋo yadi cedar maboco ki kunnu woko ki yadi ciprec mabecone mada-ni: dok iwaco ni, ‘Adonyo bene i buŋana ka mabor, ka ma yadi oculle iye likiŋ, Akwinyo waŋ pii, amato pii pa lurok; anyono lobo Ejipt, atwoyo pii ma i jaŋ kulu Nail ducu. ‘In peya iwinyo bo ni atyeko yubo wa con kuca? Gin ma atye ka timo kombeddi yam ayubo tamma wa i kare macon ca, ni in myero itur gaŋi ma gicelo ki cel gogo, ilokgi odok obur ma odurre lipim kun jo ma gibedo iye gidoko goro: cwinygi oballe, lewic omakogi, gudoko macalo ginapita ma i poto gicalo lum alita,’ gicalo lum ma otwi i wi ot ma obwarre woko ma pud otwi atwiya. ‘Ento aŋeyo bedoni piny, ki citoru woko ki donyoni i ot ki jennyeni i koma.’ Pien ibedo ka jennye i koma ki akemo, lok me nyatteni bene otyeko donyo i ita, mumiyo abirwako golina i umi, abiketo tolla i doggi, abidwoki cen i yo ka ma yam iwok ki iye.’ ” Lacen Icaya owaco bot kabaka Kejekia ni, “Man aye gin ma binyuto gin ma bitimme. I mwaka man ki i mwaka ma lubo wubicamo cam ma otwi kene, ento i mwaka me adekke wubicoyo kodi, dok wubikayo kac, wubipito olok, dok bene wubicamo nyige. Jo ma, bibwot, ma gibidoŋ i ot pa Juda, gibibedo macalo yat ma oguro lwite odonyo piny i ŋom, dok ma nyako nyige lamalo. Pienno jo ma gudoŋ gibikato woko ki i Jerucalem, lwak jo mubwot gibikato woko ki i wi got Cion. Man bitimme pi nyeko ma Rwot me mony tye kwede piwu, “Pienno Rwot owaco lok kuman i kom kabaka me Aciria ni, En pe bidonyo I gaŋ man, pe bibayo atero mo iye, pe binyiko cok kwede ki kwot pe bene bitoro cel lobo me rumone: En bidok cen ki ŋeye kun lubo yo ma yam en obino kwede, pe bidonyo i gaŋ man, Man lok pa Rwot kikome, An abilweny pi gaŋ man me larone pira kena ki pi laticca Daudi.’ ” I dyewor meno lamalaika pa Rwot ocito, oneko jo Aciria alip miya acel ki pyeraboro wiye abic ki i gonygi. Ka dano gua malo odiko con nen gunoŋo kom jo Aciria muto oradde lirat. Cenakerib ka baka me Aciria ocako a ocito, odok wa i gaŋŋe ci obedo i Nineve. Ka yam en tye ka miyo woro i ot pa lubaŋane Nicirok, ci awobene, Adramelek ki Carejer guneke woko ki pala lucwan, ci guriŋo woko gularo komgi wa i Ararat. Wode Ecar-kadon aye oleyo ka tyene. I kare meno two omako Kejekia ma onoŋo cok to woko. Lanebi Icaya wod pa Amoj ocito bote owacce ni, “Rwot owaco ku man ni, ‘Yub odi obed maber pien ibito woko, twoni pe bicaŋ.’’’ Kejekia oloko waŋe i kom kicika ot olego Rwot, kun wacci, “Tim ber, ai Rwot, koŋ ipo, inen kit kwo ma abedo kwede i nyimi, kun abedo ŋat ma geni, alubi ki cwinya ducu, kun abedo ka tiyo gin ma nen maber i waŋi.” Ci Kejekia ocako koko matek twatwal kun cwinye cwer. Cutcut lok pa Rwot dok obino bot Icaya kun wacce ni, “Cit iciwac bot Kejekia ni, Rwot Lubaŋa pa kwarowu Daudi owaco kuman ni, ‘Atyeko winyo legani, dok bene aneno pig waŋi; nen, abimiyo dok pud ibedo i lobo pi mwaka apar wiye abic. Abilari kacel ki gaŋ man ki i cin kabaka me Aciria, dok bene abigwoko gaŋ man. “Man larien ma binyuto ni Rwot bitiyo gin ma otyeko ciko pire: En bicoro tipo cen dok cen tyen apar i kom gin me poro cen pa Akaj.” Tipo cen bene odok cen tyen apar kulu ma onoŋo okato i kom gi-porone, I Kare ma doŋ Kejekia ocan ki i twone, ocako coyo wer man me pako Lubaŋa: Yam onoŋo atamo ni abito ma noŋo pud atektek, atamo ni onoŋo doŋ icwala woko i lobo pa jo muto, ka cito ka bedo kunnu doŋ matwal, kun pe aneno neya. Onoŋo yam atamo ni pe doŋ abineno Rwot, i lobo pa jo makwo; pe dok abineno dano mo, ki i kinjo ducu ma gibedo i wi lobo. Doŋ onoŋo giputo kwona woko, gitero ka mabor, calo kema pa lakwat ma giputo woko, adolo kwona woko calo lacwe-bono ma odolo, ma oŋolo woko ki i kom yat lacwe-boŋo. Rwot, onoŋo doŋ imiyo kwena-ni ogik woko, cakke odiko o kwede wa i dyewor. Akok dyewor benebene pi kony kun atye ki arem madit twatwal; en turo cogona woko ducu calo labwor. Rwot, onoŋo doŋ imiyo kwena-ni ogik woko,’ cakke odiko o kwede wa i dyewor, Dwana onoŋo doŋ winnye calo lakalagwec ma kok, nyo owalu, onoŋo doŋ akok calo akuri. Waŋa onoŋo doŋ ojony woko ki ne no malo, giuna doŋ marac; ai Rwot, lara do! An kone dok atwero loko gin aŋo? Pien oloko kweda, dok en kikome aye ma omiyo man otimme, i dyewor pe anino wacel, pi cwercwiny ma onoŋo atye kwede. Ai Rwot; dano bedo kwo pi gin magi, an gira kwona ocuŋ i komi keken; cana woko wek abed kwo, Nen cwercwiny madit ma onoŋo atye kwede, miya iye kuc; in aye ilaro kwona ki i dog bur me to, pien ibolo balla woko ducu yo tuŋ i neyi. Pien pe tye ŋat mo i lobo pa jo muto, ma twero paki kun pwoyi bene; jo ma donyo piny i lyel pe dok gitye ki gen i kom adani. Dano makwo aye twero pwoyi, kit macalo an tin apwoyi kwede-ni; won litino tito ki litinone, kit ma in igenne kwede. Rwot doŋ cok lara, wabigoyo naŋa ki opuk-gu ci wapaki kwede, wabiwero wer me paki i odi ka ma giwori iye, pi kare me kwowa ducu. Icaya onoŋo owaco bot kabaka ni gilun nyig oduro ci gimwon i waŋ odekene, wek burre ocaŋ woko. Kabaka Kejekia onoŋo openyo ni, “Kit lanen aŋo ma nyuto ni abicito i ot pa Rwot?” I kare meno kabaka me Babilon, Merodak-baladan wod pa Baladan, owinyo ni kabaka Kejekia kome lit; ci owcalo lukwena gutero waraga kacel ki mot bote, pien onoŋo doŋ bene owinyo ni twone ocaŋ woko. Kejekia ojologi maber, ocako nyuto botgi or kano Limme ducu; guneno ryal ki ‘jabu, aŋwece, moo me wel, ki ot kano jami lwennye ducu, onyuto botgi gin ducu ma onoŋo tye i ot kano jami mere. Pe tye gin mo ma odoŋ ma en pe onyuto botgi ma onoŋo tye i ode ki i lobo ducu ma onoŋo tye i te locce, Lacen lanebi Icaya obino bot kabaka Kejekia, openyo ni, “Jo-nu guwacci lok aŋo? Gin kono gua ki kwene?” Kejekia ogamo ni, “Gua i lobo mabor, gua wa i Babilon.” Icaya dok openye ni, “Guneno gin aŋo ki i odi?” Kejekia ogamo ni, “Gutyeko neno jami ducu ma tye i oda; pe tye gin mo ma odoŋ ma tye i odi kano limma ma pe anyuto botgi.” Icaya dok owaco bot kabaka ni, “Koŋ doŋ iwiny lok ma Rwot me mony owaco: Nen ba, kare doŋ cok romo, ma jami ducu ma i odi, ki ma yam kwarini gukano nio wa onyoo, gibiterogi woko wa i Babilon; pe tye gin mo ma bidoŋ kadi ki acel, man Rwot ma owaco. Ki awo beni mogo bene, ma in inywalogi, gibiterogi woko bene, gibikolo mangi woko, ci gidoko lutic i gaŋ kal me Babilon.” Kabaka Kejekia oniaŋ ni kuc bibedo tye i kare me locce laboŋo alokaloka mo, meno aye gin mumiyo en owaco bot Icaya ni, “Lok pa Rwot ma iwaco-ni ber mere.” Wukwe cwiny lwakka, wukwe cwinygi! Man lok ma Lubaŋawu owaco. Wucuk cwiny jo Jerucalem, wuwac botgi ni, karegi me bedo opii doŋ ogik woko, doŋ gityeko timo kica botgi i kom balgi ducu. Can ma Rwot oketo i komgi obedo dit mada, rom ki bal ma gutimo tyen aryo kulu. Dwan dano mo ma daŋŋe i tim ni, “Wuger yo pa Rwot, wutir yone ocuŋ atir i tim aroo pi Luban awa. Luŋ ducu gibitoro woko, godi ki cere ducu gibidwokogi woko piny, ka ma ogonne gibitiro cuŋ atir, dok yo ma obedo burbur gibipiro woko, Deyo pa Rwot doŋ binen ka maleŋ, dano ducu bineno kacel, pien Rwot kikome aye ma doŋ owaco.” Dano mo’ tye ka waco ni, “Daŋŋe!” Cutcut agamo ni, “Imito adaŋŋe niŋniŋ?” Gin mo ducu ma tye ki kom obedo calo lum, berre ducu rom ki ber pa ature me tim. Lum ner, ature bene o woko, ka Rwot okuto iye ki yweyone; ada, dano mere gical ki lum. Lum ner, ci aturene o woko, ento lok pa Lubaŋa bedo matwal, In Cion ma ikelo lok maber, it malo i wi got mabor. In Jerucalem ma itito lok maber-ri, med dwani malo ki tek, med dwani malo, pe ilwor. Wac bot jo ma bedo i gaŋ me Juda ni, “Wunen Lubaŋawu ba!” Wunen Rwot Lubaŋawu tye ka bino ki tek, bade aye ma tye ka loc pire; nen, baka cicee tye bote, cul me ticce bene tye i nyime. En bikwayo romine calo lakwat, bitiŋo litino romine i bade, en bitiŋogi i kore, ci mako litino romi ma dot, peyogi motmot. Aŋa ma yam koŋ opimo pii i dye ciŋe, dok ma opimo polo ki ciŋe? Aŋa ma ojobo apwa me lobo ci oonyo i gi-pimo jami, nyo ma yam opimo godi i mijan, ki ka ma obedo cerecere i ratili? Aŋa ma yam koŋ obedo ka’ telo Cwiny Rwot, nyo aŋa ma yam koŋ obedo ka miye tam macalo lapwony mere? Aŋa ma yam koŋ Rwot onoŋo tam ki bote, nyo aŋa ma opwonye ki ŋolo kop atir? Aŋa ma yam koŋ opwonye me medo ŋecce, nyo ma onyutte yo me bedo ki niaŋ matut? Nen rok ducu rom ki pii ma oton kicel i agulu, dok gikwanogi macalo apwa ma tye i mijan; nen, en tiŋo cula woko ki i dye nam calo gin matidi mo. Yen ducu ma gitoŋo ki i buŋa me Lebanon, pe romo waŋo gitum awaŋa, lee ma tye iye bene nok, pe giromo me atyera bot Lubaŋa, Rok ducu pe gin mo i nyime, gin ducu pe gubedo gin mo ki tun bote, gin ducu mwa. Doŋ ibiporo Lubaŋa ki aŋa, nyo itwero poro calle ki kit cal aŋo? Cal jok ma gitwako atwaka, latet t wero twakone, layub jabu mwono kome woko ki jabu, dok tiyo nyor ryal pire. Ŋat ma can odiyo adada, yero yat matek ma pe top me gityer, yenyo lapac ma ladiro, wek opane cal apaya, ma pe dok giromo kwanyone ki ka ma giketo iye. Pe wuŋeyo bo? Yam peya wuwinyo? Yam onoŋo pe gitito botwu pire con? Peya wuniaŋ nia wa i acakki keto lobo? ŋat ma bedo i wi komkerre malo en aye ma oketo, en bedo wa malo twatwal i ŋe pol, jo ma bedo piny i lobo ginen matino calo ocene. En ryeyo polo calo boŋo kicika, dok yaro bene calo kema me bedo iye. En miyo luloc me lobo gidoko gin ma konygi pe, en dwoko rwodi ducu me lobo woko piny lirwap. Gin gubedo calo ginapita ma pud gipito apita, ma pud gicoyo acoya kun guryeyo Lwitgi pud aryeya i ŋom, ma ka Rwot ocwalo yamo i komgi ci giner woko; ka ce yamo lapiru okodo i komgi, ci tiŋogi calo cuŋ kal terogi woko. Doŋ wubipora ki aŋo mono, wek abed cal kwede? Man peny ma ŋat Maleŋ openyo. Koŋ wutiŋ waŋwu malo wunen polo, aŋa ma oketo jami magi? ŋat ma telo monygi, ŋeyo welgi ducu, dok bene lwoŋogi ki nyiŋgi, Tekone dwoŋ twatwal, meno aye gin mumi yo mo ki i kingi pe rwenyo. Piŋo it ye ka koko, in Yakobo? Piŋo kono it ye ka waco ni, Rwot pe neni, in Icrael, kun iwaco ni Lubaŋa tika pe tye ka paro piri? Pud pe wuŋeyo bo? Yam peya wuwinyo? Rwot en Lubaŋa ma bedo nakanaka, en aye ma oketo wi lobo ducu. En pe ol, pe bene doko goro; ŋecce tut ma pe wacce, kadi tato tere bene pe twerre. En miyo tek bot jo magoro, dok bene medo tek bot ŋat ma tekone odok woko piny, Kadi ki awobe bene gitwero doko goro, gitwero ol bene ma giromo poto woko piny; ento jo ma neno bot Rwot, teko bidwogo cen i komgi. Gibituk gicito malo calo ocur, gibiriŋo ma pe giol, gibibedo ka wot nakanaka ma komgi pe biloc. Wuliŋ mot, wuwiny lokka, wun lobo ma tye i dog nam; wek rok ducu gulim tek manyen; gucak bino wek gulok lokgi. Myero wan ducu wanyiku cok wek wanolu kop i kinwa kekenwa. Aŋa ma otugo ŋat ma oa ki yo tuŋ wokceŋ, ma loyo lweny i kabedo ducu ma en woto iye? Aŋa ma miyo rok mapol i ciŋe, ka doŋ nyono luker maditodito woko i te tyene piny? Pala lucwanne miyo dano gidoko calo apwa, aterone nekogi, tiŋogi woko calo cuŋ kai ma yamo tero. Ryemogi, ci kato i nyimgi ki kuc, ma noŋo dwir mada, kun tyene pe gudo piny, Aŋa ma omiyo gin man otimme? Aŋa ma omiyo lwak jami mapatpat ma kombeddi tye-ni obedo tye kit macalo kombeddi tye kwede-ni nia i acakki piny? An Rwot aye abedo mukwoŋo nia i acakki piny, an Rwot Lubaŋa abibedo tye bene i agikki piny. Lobo ma tye i dog nam doŋ guneno gin ma atiyo, lworo omakogi, komgi obedo ka myel amyela; gin ducu doŋ gubino gunyiko cok. Dano acel acel konyo lawote, kun waco bot ominne ni, “Di cwinyi!” Lapac cuko cwiny latet jabu, ŋat ma yubo kom cal apaya wek obed pwot cuko cwiny ŋat ma goyo agoya i kom got ki nyono, kun waco ni, “Gin meno ma gimwononi ber”; ci giguro cal meno woko matek ki cumar wek pe dok oput woko. Ento in laticca Icrael, in Yakobo ma doŋ atyeko yeri, lakwar Abraim ma en ŋat ma amaro; in ma ceŋ akeli ki i agikki lobo, nen alwoŋi ki i gul ka mabor adada, kun awacci ni, “In laticca, doŋ atyeko yeri, dok bene pe abiboli woko cen.” Pe ilwor, an atye kwedi, cwinyi pe opoti, pien an Lubaŋani; abimiyi tek, dok abikonyi, abimaki ki ciŋa lacuc, ma miyo aloyo lukworra-ni. Wunen, jo ducu ma kiniga omakogi i komwu, gibimiyo lewic makogi, dok alee bene twodogi woko; jo ma pyem kwedwu, wun jona, gibidoko calo gin ma konnye pe, ci gito woko. Wubiyenyo jo ma lwenyo kwedwu, ento pe wubinoŋogi: jo ma bicobo mony i komwu, gibidoko calo gin ma konnye pe. Pien an a Rwot Lubaŋawu, doŋ amako ciŋwu ma lacuc woko likiŋ; an atye ka waco botwu ni, “Pe wulwor, an abikonyowu.” Pe ilwor Yakobo, kadi bed ibedo calo kwidi, pe wulwor, wun jo Icrael, kadi wugoro mada! Abikonyowu, Rwot ma owaco; ŋat ma bikokowu en aye ŋat Maleŋ me Icrael, Nen, abimiyo wudoko dul me dino kal, mapek, dok manyen, ma dino kal maber twatwal; wubidino godi ci wuŋinyogi woko, dok wubiloko lobo ma gubedo cere gidoko calo cuŋ bel. Wubipyetogi, ci yamo bitiŋogi woko, yamo lapiru me kot bikeyogi woko atata. Ento wun wubibedo ki yomcwiny i Rwot; wubiwakke bene mada pi ŋat Maleŋ me Icrael. Ka ce lucan kacel ki jo ma piny obwoyogi gibiyenyo pii me amata, kun pii pe nen wacel, ma noŋo dwangi otwo dok ma lebgi omoko woko likaŋ, an Rwot abiwinyo legagi ci abidok iye bene, an Lubaŋa pa Icrael pe abitenyogi ata. Abimiyo pii mol i wi godi ka ma pii pe iye, pii bibedo ka gunnye agunya ki piny i luŋ-gu; abimiyo pii poŋ i dye tim ka ma yam otwo woko, waŋ it doŋ bibedo tye i lobo mutwo. Abimiyo yadi cedar doŋo i dye tim, ki okuto lacari ki yadi matino ma ŋwecgi kur, ki yaa; Abiketo yadi culle ‘doko buŋa i dye t im ka ma yadi pe iye, yadi ciprec kacel ki k it yadi mukene mapatpat. Dano gibineno wek guŋe ni, Rwot Lubaŋa Maleŋ pa Icrael aye omiyo kit gin man otimme: gin gibitamo pire mtot lacen giniaŋ ni, Rwot aye ma tye ka timo man. Rwot Lubaŋa mna en kabaka pa jo pa Yakobo owaco ni, “Wun lwak lubaŋa pa lurok, wunyut lok ma wutye kwede, dok wukel pidowu mogo matek bota. Wubin wunyut botwa gin ma bitimme i anyim.’ Doŋ wutit bot lwak gin ma yam otyeko timme woko, wek koŋ watam; wutittiwa gin ma bia ki i kom gin ma doŋ otyeko timme-nu; wek wan bene waniaŋ i lok ma bi timme, Wutittiwa gin ma bitimme i anyim, wek omi waye ni wun wubedo lubaŋa. Koŋ wutim gin maber nyo marac, ma poto cwinywa ma miyo bene lworo makowa. Wun pe wugin mo kadi ki acel, gin ma wutiyo-gu ducu konnye pe; jo ma yerowu doko gin me kwer ki tuŋ bota. Doŋ atyeko tugo ŋat ma bedo i lobo ma yo tuŋ acam ci en bene obino; atuge me bino ka lweny kun oa ki i yo tuŋ wokceŋ; en binyono luloc woko piny ki tyene calo nyono coto, calo lacwe agulu ma nyono lobo me ticce; en bilwoŋo nyiŋa, Aŋa ma yam otito botwa lok macon ni waŋe, nyo ma otito botwa con ni lok macalo man bitimme, wek waye ni en oloko lok ma tye atir dok ada? ŋat mo ma otito botwa pe, dok bene ŋat ma otuco pe, pe tye ŋat mo ma owinyo ka wubedo ka loko gin mo. An Rwot aye akwoŋo tito lok man bot jo Cion, dok bene acwalo lakwena ocito i Jerucalem wek otit lok maber bot jo ma bedo kunnu. Ento ka aŋiyo piny aneno gin lwak lubaŋa-gu, pe anoŋo mo acel ma twero miyo tam, ma twero dok i peny ma apenyo. Nen, gin ducu konygi pe, ticgi ma gitiyo ducu mwa; calgi ma gitiyo ki mola ma giliyo, ducu mwa calo yamo. Rwot owaco ni, “Nen, laticca ma an akonyo, ma an kikoma aye ayero ma cwinya yom i kome. Doŋ atyeko keto cwiny Maleŋ i ko me, en doŋ bikelo ŋolo kop atir bot jo me rok ducu. En pe bikok dok pe bidaŋŋe kun ilo dwane malo, pe gibiwinyo dwane i waŋa yo; en pe bituro lagada ma okak, dok pe bineko mac tara ma Lyel niminimi; en bikelo ŋolo kop atir ki gen. En bibedo ki gen nakanaka ma cwinye pe balle nio ka doŋ omiyo ŋolo kop atir oromo lobo ducu; lobo ma i dog nam ducu gitye ka kuro cikke. Rwot Lubaŋa ma oketo polo, ka doŋ oryeyo ocuŋ atir, ma oyaro wi lobo ki jami ma tye iye ducu, ma omiyo yweyo bot jo ducu ma bedo iye, ki kwo bot jo ducu ma woto iye, en owaco kuman ni, “An Rwot, doŋ atyeko lwoni me bedo ki kit ma atir, amako ciŋi, dok bene agwok i: doŋ atyeko miyi woko bot lurok macalo gicikke, me bedo ceŋ ma menyogi. In aye ibiyabo waŋgi, wek igonygi woko ki i mabuc ka ma gitweyogi iye, wek bene ikwanygi wo ko ki i piny macol ka ma onoŋo gibedo iye. An nyiŋa Rwot, pe amiyo deyona bot ŋat mo mukene, kadi wa pak ma gipaka kwede bene pe abimiyo bot cal jogi ma gipayo apaya. Nen, gin mukwoŋo ma yam atito pire doŋ otimme woko, kombeddi atito botwu pi gin manyen; ma pud peya ocako timme.” Wuwer wer manyen me pako Rwot, wupake wun lobo ducu! Wek nam omor kacel ki jami ducu ma tye iye, lobo ma tye i dog nam ki jo ducu ma bedo iye, Tim aroo ki lwak gaŋi ducu ma tye iye myero gupak Rwot, jo Kedar ducu myero gupake! Wek jo ma gibedo i Cela guwer pi yomcwiny, wek bene gudaŋŋe ki woo ki i wi godi pi yomcwiny. Dano ducu ma gibedo i dog nam ka mabor, myero bene gupak Rwot, kun gimiye deyo. Rwot cito ka lweny calo oteka lweny, akemone tugge calo dano ma lalweny, en daŋŋe dok bene wo ki dwan maloŋo adada, ento nyuto tekke i kom lukworre, Rwot ocikke me konyo jone Lubaŋa owacci, “Aliŋ aliŋa doŋ pi kare malac twatwal, abedo ka diyo cwinya kun pe agamo dog jona; kombeddi doŋ abicako yelle pigi, myero doŋ acak omo cwinya ki yweyo calo dako ma tye ka colle ki arem me nywal. Abibalo lobo ma obe to godi godi kacel ki godi ducu, dok bene abimiyo gill ducu ma otwi iye two woko; abimiyo kulu ma pii tye iye two tal woko Iikaŋ, abimiyo pii two woko liweŋ ki i kabedo ducu ma yam pii logo iye. Abitelo lutowan, i yo ma gin pe ŋeyo, i yo ma yam peya guwok ki iye, en aye abipeyogi ki iye. Abimiyo colpiny ma-yam umogi woko-ni doko leŋo, ka ma obedo burbur abipiro woko doko mapwot. Magi aye gin ma abitimo, pe abitenyogi ata liyak. Dano ducu ma gigeno cal jogi ma gipayo apaya, gin jo ma waco bot cal jogi ni, ‘Wun aye Lubaŋawa,’ gibidwokogi cen ki lewic madwoŋ twatwal.” Rwot dok owacci, “Wuwiny lokka wun ludiŋit, wun lutowaŋ bene wuyab waŋwu, wek wunen piny, Tye ŋat mo ma wane oto calo waŋ laticca, nyo ite odin calo it lakwena ma aoro-ni? Aŋa ma waŋe oto calo waŋ danona ma doŋ otyeko dyero kwone pira, nyo ma waŋe oto calo waŋ laticca an Rwot? Icrael neno jami mapol twatwal, ento pe keto cwinye me nenogi maber, ite tye twolo ma romo winyo lok, ento pe winyo gin mo wacel. Pi kit ma atir pa Rwot, en mito ni giwor cikke, wek obed ki deyo. Ento man jo me rok ma doŋ giyakogi, dok gimayo limgi woko, gin ducu doŋ gicikogi woko ki bur, gikanogi woko i ot mabuc; gudoko doŋ ginayaka pa dano laboŋo ŋat ma larogi, gin doŋ mere ginayaka laboŋo ŋat mo ma waco ni, ‘Dwok cen kakare!’ Aŋa i kinwu ma biciko ite ka winyo lok man, aŋa ma biketo cwinye wek cwiny pi kare ma tye anyim? Aŋa ma omiyo Yakobo i ciŋ ŋat ma oyake, ki Icrael i ciŋ luyak? Meno pe obedo Rwot ma wan watimo bal i nyime-ni? Pe en aye Rwot ma gukwero lubo yo ma en mito-ni; ma bene gukwero lubo cikke wokoni? Pi meno omiyo en ocoro Lyeto me akemone i komwa, ki tek me mony; macce olyel oromo i lobolcrael ducu, ento wan pe wamedo ki niaŋ gin ma tye ka timme, macce owaŋowa, ento pe waparo pire wacel.” Kombeddi doŋ Rwot Lubaŋa ma oketo in Yakobo, ma ocweyo in Icrael, owaco kuman ni, “Pe ilwor, pien doŋ atyeko koko in woko. An alwoŋi ki nyiŋi, in i mega. Ka ibiwok ki i dye nam matut, abibedo kwedi, abigwoki; pii ma i kulu bene pe bimwonyi; kadi ibiwot iwok ki i dye mac, pe ibiwaŋ, leb mac pe bigudo komi. Pien an a Rwot Lubaŋani, an ŋat Maleŋ pa Icrael ma lari. Abimiyo Ejipt calo lim mo me koko in, Etiopia ki Seba bibedo gin ma giwili kwede. Pien in ibedo gin me wel mada bota, piri dit, dok amari adada, meno aye gin mumiyo amiyo dano me koko in, dok amiyo rok mapatpat pi laro kwoni. Pe ilwor, an atye kwedi, abikwanyo likwayi woko ki yo tuŋ wokceŋ akelogi kany, dok abicoko joni woko ki yo tuŋ potoceŋ adwokogi kany bene. Abiwaco bot jo ma tye yo tuŋ acam ni, ‘Doŋ wuweke,’ dok abiwaco bot jo ma tye yo tuŋ acuc ni, ‘Pe doŋ wumedde ki make” wek awobena kacel ki anyirana gudwog woko doŋ ki ka mabor, wek gua gudwog cen ki i lobo ducu. Gin jona, gilwoŋogi ki nyiŋa, an ma aketogi dok acweyogi wek guket deyo i koma.” Jo Icrael gubedo caden pa Rwot Lubaŋa owaco kuman ni, “Wukel lwakka i kabedo me ŋolo kop. Waŋgi tye, ento pe gineno piny; itgi tye, ento pe giwinyo loko Wek rok ducu gucokke kacel, mi dano ducu gucokke kunnu i ka ŋolo kop, Aŋa i kingi ma twero tito lok man, ma twero nyuto botwa gin ma yam doŋ otimme wa con? Myero gukel cadengi pi tito lok i komgi wek gulo lok, wek ka doŋ guwinyo lok, gumok kacel ni lokke kakare dok ada.” “Wun jo Icrael, wun cadenna,” Rwot ma owaco, “wun wubedo luticca ma an aye yam ayero, wek wuneya dok bene wuye an, wuniaŋ atir ni an aye Lubaŋa kena. Cakke yam con lubaŋa mo pe obedo tye, dok bene pe doŋ mo bibedo tye ma biluba. “An kena aye a Rwot, pe dok tye ŋat mo mukene ma twero larowu. An yam atito pire, alarowu dok atuco lokke Ka maleŋ bot dano, i kare ma onoŋo lubaŋa mo ma welo pud pe i kinwu; wun bene wubedo cadenna,” Rwot ma owaco. “An Lubaŋa, pud bene abimedde me bedo Lubaŋa nakanaka; pe dok tye ŋat mo mukene ma twero larogi ki i ciŋa: pe tye ŋat mo ma twero geŋa tiyo ticca.” Rwot Lubaŋa pa Icrael ma larowu owaco kuman ni, “Me larowu, abicwale mony i kom jo Babilon; gibituro rii me dogcel woko ducu, woo my yomcwiny pa jo Kaldaya bilokke doko kumo. An a Rwot Lubaŋawu Maleŋ, an aye ma acweyowu wun jo Icrael, dok an kabakawu.” Rwot yam oyabo yo i dye nam, en mumiyo yo obedo tye i dye pii ma katone tek adada, En opeyo dul mony matek twatwal okelogi ci onekogi woko, ki lwak gadigadi kacel ki aguragura. Gin ducu gupoto piny ma pe dok giromo a malo, odiyogi woko licwic calo mac tara ma gineko.” En Rwot owaco ku man ni, “Wiwu myero doŋ owil woko i kom gin ma yam otimme con twatwal, pe wubed ka tamo gin ma yam doŋ otimme woko con. Myero wucik waŋwu wunen gin manyen ma atye ka timone; kombeddi doŋ tye ka timme. Wun pe wuneno ce? Abituco yo baro ki i dye tim, ki kulu bicako bedo tye i tim aroo kunnu. Lee tim ducu gibiwora, too ki udu gibipaka; pien amiyo pii onen i dye tim ata, ki kulu i tim aroo, pi miyo pii ki jona ma ayero wek gumati, Gin rok ma an aye acweyogi pira kena, wek guwer wer me paka.” Rwot owaco ni, “Ento in yam pe iwora, in Yakobo, onoŋo doŋ iol kweda woko, in Icrael. Onoŋo doŋ pe ikelo romini ityero bota me gitum awaŋa, onoŋo bene pe doŋ iwora ki gitummi. Anbene pe abedo ka yeli pi gitum, pe bene abedo ka olo komi pi odok luban. Pe iwilo lum makur ki lim ikelo bota, dok pe imiya ayeŋ ki moo dwolo me gitumwu ma wubedo ka tyerone bota, Ento wumiya atiŋo peko me balwu kun wuolo koma ki balwu maraco twatwal-li. “Myero wuŋe ni an a en, ajwayo balwu woko; atimo ku meno pi kit ma an atye kwede, pe doŋ abipo pi balwu. Wupo wiya wek walar lok kacel kwedwu, wukel lok ma nyuto ni lokwu tye atir wek wulo giwu kop. Kwarowu mukwoŋo bene obalo, lulocwu bene yam gutimo roc mapol i koma. Pi meno amiyo kipwola i kom rwodi ma giloyo kabedo maleŋ woko, amiyo Yakobo odoŋ me aneka, Icrael doŋ odoko gin ayeta pa dano.” Rwot owaco kuman ni, “In laticca Icrael, winy ba, wun jona ma ayero, likwayo pa Yakobo. An a Rwot ma aketi, ma acweyi nia ii meni, an aye ma abedo ka konyi i kare ma kwo doŋ cakke i komi, Pe ibed ki lworo Yakobo, pien in laticca, in Jecurun ma an aye ayero. “Pien abionyo pii i lobo mutwo, ma pii pe iye, abimiyo ora kulu toŋŋe cako mol i lobo mutwo; abiketo Cwiny Maleŋ i kom likwayi, dok abimiyogum bene bot likwayi. Gibibedo maber calo lum ma pii oromo kome, calo yat ma odono i ŋet kulu ma piine mol. Jo mogo gibiwacci gin jo pa Rwot, gibicako bino bot jo pa Yakobo me ribbe kwedgi, jo mukene bicoyo nyiŋ Rwot i ŋut ciŋgi, doŋ gibilwonne kengi ni gin dano ma tye i kin jo pa Icrael.” Rwot ma en kabaka me Icrael, Rwot me mony ma laro jo Icrael owaco ni, “An aye abedo mukwoŋo ki me agikki; pe dok tye lubaŋa mo mukene kono an keken. Aŋa ma calo an, ma twero tito kikore gin ma bitimme i kare me anyim, cakke ki i acakkine o kwede wa i agikkine? Wek gutit botwa gin ma bibedo i anyim. Pe wulwor, komwu bene pe omyel; yam atito lok man botwu woko con, kun anyuto jami ducu ma bitimme. Wunyam wubedo cadenna, Dok tye Lubaŋa mo mukene ma pe an? Tye dok Lubaŋa mo matek twatwal ma an peya awinyo pire?” Dano ducu ma tiyo cal jogi gubedo jo ma konygi pe, dok cal jogi ma pigi tek botgi-ni pe konyo gin mo kadi ki acel. Jo ducu ma giworo cal jogi meno gin lutowaŋ ma pe giniaŋ; gin jo-nu gibimiyo lewic makogi matek. Aŋa ma tiyo cal jok, nyo ma liyo cal me awora ma twero konyo gin mo? Nen, gibimiyo lewic mako jo ducu ma giworo cal jogi macalo meno. Jo ma tiyo cal jogi-nu gubedo dano adana mamwa. Myero gin ducu gucokke kacel, gubin gucuŋ i kabedo me ŋolo kop; lworo bimakogi, dok alee bene bitwodogi gin ducu, Latet nyonyo tiyo ticce ki mac. Tek ma tye i bade en aye tiŋo kwede nyol me luŋo nyonyo. Kec neko, orwo pii bene make matek, ci miyo tekone cako dok woko piny. Ento lapac cako pimo bao, ci cero ka waŋe woko ki kalam kalu, cwero ki rana, ka doŋ cako pimone ki gi-ticce. En yu bo calle-nu woko tiyo bedo calo dano kikome, ma noŋo nen maber bene twatwal calo dano, me aketa i ot me worone. En twero toŋo yadi cedar, nyo twero yero yat mo ma tye i buŋa i tim, ci toŋo gire. Kare mukene en kikome pito yat cedar, ka kot ocwer ci miyo doŋo, Lacen yat meno bikonyo dano macalo yen me awaŋa i mac, kun dulle mukene bedo me tiyo cal jok. Dulle tuŋcel bedo me kuto mac me aoya ki me tedo; dul mukene en doŋ bitiyo ki cal jok me aworane. Nucu dulle en kuto ki mac, bulo ki riŋo me acamane ma miyo en limoteko. Ka doŋ tye ka oyo mac ci wacci, “Macce mit adada! Olyeto koma doŋ atika!” Ka dulle mudoŋŋe ‘ducu en tiyo ki caljokke me aworane; en woro calle-nu, kun lego ni; “In aye lubaŋana, lara do!” Jo-nu pe giŋeyo dok bene pe giniaŋ gin ma gitiyo, Pien cal jok ma giworo-ni oumo waŋgi woko, pe, giromo neno piny; tamgi bene oballe woko pe gitwero niaŋ i gin ma tye ada. Pe tye ŋat mo i kin jo ma tiyo cal jogi ma tamo tam, nyo ma tye ki ŋec, ma twero niaŋ ci miyo wacci, “Nucu yat ma atiyo ki cal jok-k i mogo awaŋo woko i mac, lodine atedo ki mugati, abulo ki riŋo ci acamo woko; dulle mukene ma doŋ odoŋŋe en aye atiyo ki cal jokka me awora. An doŋ atye kany ka woro odul yat en.” En moko buru; tamme me miŋo ca omiyo en doŋ orwenyo woko matwal, ma pe doŋ romo larre kene, pe bene twero niaŋ ni cal jok apaya ma emako i cine-ni pe lubaŋa kadi ki acel. Rwot owaco ni, “In Yako bo koŋ ipo i lok magi, myero ipo ni in laticca. An yam aketi ni ibed laticca, wiya pe biwil i komi wacel, in Icrael. Doŋ ayweyo balli woko ducu calo pol, ki tim maraco ducu ma yam ibedo ka timogi doŋ aketogi woko bene macalo lupu. Doŋ idwog cen bota, pien doŋ atyeko koki woko, “Wudaŋŋe ki wer me yomcwiny, wun lwak me polo, pien Rwot doŋ otyeko tiyo lok man! Wudaŋŋe ba, wun tut-piny! Wuwo ki wer, wun godi ducu, ki yadi ducu ma tye i buŋa i tim, Pien Rwot doŋ okoko Yakobo, deyone doŋ binen i kom Icrael.” Rwot ma oketi, ma ocweyi ki meni, ma en Rwot Lalar meri waco kuman ni, “An aye a Rwot ma oketo jami ducu, aryeyo polo kena; i kare ma atiyo lobo ŋat mo onoŋo pe ka neta, ma okonya ki tiyone. Amiyo lanen pa lugoba odoko gin ma konnye pe, dok amiyo lutyet gudoko jo mamiŋ; acoro jo maryek adwokogi cen, amiyo guŋeyo ada ni ryeko kara pe gin mo, Amiyo lok ducu ma luticca gutito ocobbe kakare, gin ma lukwenana guwaco bene amiyo ocobbe. A waco bot Jerucalem ni dano dok bibedo i iye kunnu, ki gaŋ me Juda ni dok gibigerogi odoco; ka ma yam wi obur doŋ bidoko gaŋ, Aciko pii ma i nam matut ki ma i kulu ducu ni myero odwon woko, ci pii bene odwono woko. Awaco bot Ciro ni en bibedo laloc ma kakara, ni en bitiyo gin ma amito ni otine; en bimiyo gigero Jerucalem, dok bimiyo giketo te guti ot me wora.” Rwot owaco ni, Ciro doŋ odoko kabaka ma doŋ atyeko wirone ki moo, amako ciŋe ma lacuc aketo en me loyo rok mapol, acwale wek ocit otur teko pa luker woko, atye ka yabo nyime ma pe dok biumme. Rwot owaco bot Ciro ni, “Abitelo nyimi, abiyubo yo bedo mapwot piri, abituro doggola ma gitiyo ki mola woko liweŋ, abitoŋo nyonyo rii me dogcel-gu aturo woko bene, Abimiyo boti lim ma gikano ka macol, ki jami mogo ma gikano i kabedo ma tye i muŋ, wek iŋe ni an Rwot Lubaŋa pa Icrael, an aye ma atyeko yeri dok alwoni ki nyiŋi, Aketi ni ikony laticca Yakobo, jo Icrael ma gin jona, meno aye gin mumiyo ayeri; alwoni ki nyiŋi, amiyi nyiŋ pak kadi bed pe iŋeya. “An keken aye abedo Rwot, pe dok tye Rwot mo mukene, Lubaŋa mo mukene bene doŋ pe kono an keken; abimii teko kadi pe ineya, Man atimo wek dano guŋe ni an kena aye a Rwot, cakke ki i but lobo tuŋ potoceŋ o kwede tuŋ ka mukene, pe dok tye lubaŋa mo mukene kono an keken. An aye ma aketo leŋo ki colpiny, amiyo kuc bedo tye ki can bene bedo tye, an Rwot aye ma atiyo jami magi ducu. Abionyo loc o piny i lobo kun a ki i polo, abimiyo cwer calo kot, lobo biyabbe pi gamo larrre, dok bedo ki kit ma atir bene bicakke i lobo; an Rwot abimiyo lok man timme ada. “Dano ma pyem ki Lubaŋa ma okete bineno can. Agulu lobo twero pyem ki ŋat ma ocweye? Lobo twero penyo lacwe agulu gin ma en tiyo? Nyo agulu twero waco bot lacwe agulu ni pe gitiye maber? Latin ma penyo wonne ni, ‘In inywalo aŋo?’ latin-nu bineno can; nyo ma penyo minne ni, ‘Gin aŋo ma miyo it ye ka winyo arem me nywal?’ ” Rwot, en ŋat Maleŋ ma oketo Icrael, owaco kuman ni, “Wun pe wuromo penya lok i kom litinona, dok bene pe wutye ki twero mo me titta gin ma myero ati. An aye ma aketo lobo, ka doŋ aketo dano me bedo iye: aryeyo polo obedo tye kit macalo tye kwede-ni pi tekka, an bene aye ma aciko jami ma i polo ni gubed kit macalo gitye kwede-ni. An aye ma aketo Ciro i ticce me loc, abimiyo en cobo tic ducu kakare, en bigero gaŋŋa, dok bigonyo jona woko ki i opii, pe pi cul nyo kadi pi pwoc mo ma abimiyo bote.” Man lok ma Rwot me mony aye owaco. Rwot owaco ki Icrael ni, “Lonyo ducu me. Ejipt ki jami acata ducu me Etiopia, gin ducu bidoko meri, ki jo Seba ma gin twoni jo maboco, gin ducu gibibino boti ci gidoko opiini, gibilubo kori ma noŋo doŋ gitweyogi woko ki nyor, gibiryebbe piny i nyimi ka wori. Gin ducu gibimwolle woko i nyimi kun giwacci, ‘In keken giri aye it ye ki Lubaŋa, in keni, lubaŋa mo mukene doŋ pe kono meri-ni keken.’ ” Ada, in aye ibedo Lubaŋa ma kanne woko, ai Lubaŋa pa Icrael, in aye ma ilaro dano. Lewic bimako jo ducu ma tiyo cal jogi, alee bitwodo gin ducu. Ento jo Icrael Rwot bilarogi woko, lar ma en larogi kwede biri nakanaka; lewic pe bimakogi wacel, alee mo bene pe bitwodogi liweŋ. Pien Rwot aye gire ma oketo polo, en bene aye ma obedo Lubaŋa! En ocako tic me keto lobo, ci otiyo otyeko, en omiyo ocuŋ omoko matek kakare. En yam pe oketo lobo ci oweko woko kun onyobbe atata, en oketo ni dano twero bedo iye. En Rwot aye ma owaco ni, “An a Rwot, pe dok tye Rwot mo mukene. An yam pe aloko lok i muŋ, i lobo ma tye i piny macol, an gira yam pe awaco bot likwayo pa Yakobo ni, ‘Wubiyenya i kabedo ma obedo atata.’ An Rwot aloko lok ada, dok anyuto gin ma tye kakare.” Rwot owaco ni, “Wucokke kacel, ci wubin, wubin wunyik cok, wun jo me rok mapatpat ma doŋ wubwot. Jo ma bedo ka tiŋo cal jogi ma gipayo apaya gin jo ma pe giniaŋ gin mo kadi ki acel; gubedo ka lego cal jok ma pe twero larogi-ni. Wubin wunyut lokwu i kabedo me pido; wek jo ma pido gupennye kengi. Aŋa ma oweko lok man oŋene cakke i kare macon? Pe an Rwot aye ma ceŋ atimo? Pe dok tye lubaŋa mo mukene kono an keken, an aye Lubaŋa ma kite atir, ma laro dano, pe dok tye mo mukene kadi ki acel. “Wulokke wubin bota, wek alarwu, wun jo ma bedo i wi lobo ducu! Pien an Lubaŋa kena, pe tye mo mukene. An doŋ atyeko kwoŋŋe ki nyiŋa kena, lok ma aloko tye atir; lok meno pe bipoto piny i ŋom ma noŋo pe ocobbe. ‘Jo ducu gibirumo coŋgi i nyima, dano ducu gibikwoŋo kwoŋ ki nyiŋa. “Dano gibiwaco ni, kit ma atir ki tek gire noŋŋe ki bot Rwot; jo ducu ma yam cwinygi obedo ka waŋ i kom Rwot, gibibino bote ma noŋo lewic makogi mada. Likwayo Icrael ducu gibiloyo kop pi Rwot, ci gicako doŋ bedo ki deyo.” “Jogi pa jo Babilon doŋ cok gik woko! Bel ki Nebo ma yam giworo-ni, kombeddi doŋ gudoko gin ma lee tiŋo, man doŋ gudoko yec mapek twatwal ma miyo lee ol adada. Gin ducu doŋ gukulle piny, guguŋo kacel, cal jogi pe gitwero larre kengi; ento doŋ gimakogi woko gimito terogi i opii. “Wuwiny lokka, wun jo me ot pa Yakobo, wun jo ma wudoŋ i ot pa jona Icrael. Abedo ka gwokowu cakke wa ki i i megiwu, atiŋowu cakke i kare ma ginywalowu, An Lubaŋawu ma bigwokowu, abigwokowu nio waŋ ma wuti; abibedo ka tiŋowu kadi wa i kare ma noŋo lwar doŋ otwi i wiwu. An aye ma aketowu dok agwokowu bene, abikonyowu, dok abilarowu. “Wupora ki aŋa mono? Tye ŋat mo ma rom kweda? Wupora do wek wabed calcal. Jo ma jobo jabu ajoba ki i kicaa Em, ma gipimo ryal ki mijan, giculo lim bot latet jabu wek oti botgi cal jok, ka doŋ giryebbe piny i nyime ka worone. Gitiŋo giketo i wi gwokgi, gicibo i kabedone, ci cuŋ iye matwal, kun pe twero a woko kene ki i kabedone-nu. Ka dano mo kok bote pi kony, en pe gamo doge, pe laro dano meno ma okok bote i kare me canne. “Ber wupo i kom lok man, wun lubalo; koŋ wutam, wulwod lokke ki i cwinywu, Wupo i kom gin ma yam otimme con, pien an Lubaŋa kena, pe dok tye mo mukene ma cal kweda. Cakke con i acakki piny, anyuto kit ma gin ‘man bitimme kwede woko, ki kit ma bigik kwede bene. Awaco ni gin ducu ma ayubo bicobbe, dok abitimo gin mo keken ma ayubbe me tiyone. Abilwoŋo dano calo acut ki yo tuŋ wokceŋ; dano meno bia ki ka mabor, me cobo gin ma doŋ atyeko yubo con. Doŋ aloko, dok abicobone, doŋ atyeko yu bone, dok bene abitimo. “Wuwiny lokka, wun jo ma cwinywu nwaŋ, wun jo ma wutamo ni larre bor kwedwu twatwal. Nino ma abilarowu iye doŋ cok, pe doŋ bor wacel, pe abigalle me laro dano, abilaro Cion, pi Icrael ma anoŋo deyona pire.” Rwot owaco ni, “In Babilon ma imwonya mada, in gaŋ pa jo Kaldaya ma irom ki nyako ma peya oneyo laco mo, bin ilor piny ibed i apwa! Bed piny i nom, pe i wi komker! Pien pe dok gibiwaco ni, in iyom twatwal, pe iromo tiyo gin man. Kwany nya kidi wek ireg moko, gony kitambara woko ki i wii, luny boŋoni mabor-ri woko wek tyeni odoŋ noŋo, ŋol ki i dye kulu ikat loka tuŋcel. Ibidoŋ munero, komi ma myero pe onen doŋ binen ka maleŋ. An doŋ aculo kwor, pe abiweko dano mo bwot kadi ki acel.” Ŋat ma kokowa nyiŋe Rwot me mony, en ŋat Maleŋ pa Icrael. Wubed ma Wuliŋ mot, kun wutye i piny macol, wun jo Kaldaya; pien pe doŋ gibilwoŋo gaŋwu ni mego ma loyo rok mapol. Kiniga yam omaka i kom jona, amiyo gubedo calo gin kipyeda; amiyo gubedo i te locci, ento kica pe omaki i komgi wacel; okol ma itweyogi kwede obedo mapek twatwal bot jo muteggi. Onoŋo iwaco ni ibibedo ka loyo rok mapol nakanaka, omiyo pe giri iketo cwinyi i lok magi, kadi po pi kit ma bigik kwede bene pe ipo, Pi meno winy lok man, in ma imaroyomcwiny twatwal-li, ibedo ka ramo ni pe tye ŋat mo ma rom kwedi, dok ni pe ibibedo macalo dato nyo ni kadi ki litinoni bene pe bito. Kit can aryo-nu ducu bipoto i komi, i nino acel, i dakika mo manoknok; to pa litino ki doko dato, gin ducu bipoto i wii lawaŋacel magwa, kadi bed itim lwak tim jokjok mapol ata, kadi bed doŋ it yet tyet ma rom mene. In noŋo doŋ itamo ni it ye ki kuc i kom tim maraco ma ibedo ka timone-gu, kun itamo ni ŋat mo pe ma neni, Ryekoni kacel ki ŋec ma it ye kwede gubedo ka rwenyi arwenya, ibedo ka tamo ki i cwinyi ni pe tye ŋat mo ma rom kwedi. Ento gin marac bipoto i komi, ma pe itwero timo gin mo mejukone. Can bipoto i komi, ma pe ibitwero kwanyone wacel; to bene bipoto i komi oyot mada, ma in pe iŋeyo iye gin mo, Cuŋ matek i tyet dok imedde ki timo tim me jokjok, ma yam ibedo ka timone cakke wa i tinoni; gwok nyo man twero konyi i yo mo, nyo bene twero miyo dano gilwori. Tekoni doŋ otum woko, kadi bed gitye ka miyo boti tam twatwal; koŋ gin doŋ gubin gulari, gin jo ma ŋeyo poko polo, ki jo ma niyo lakalatwe kun giciko wangi malo ligan, jo ma ka i por dwe manyen ducu gitito gin ma bitimme i komi-ni. Nen girom ki cuŋ kai, mac wanogi woko; pe gitwero laro kwogi pigi kengi, ki i tek me leb mac. Mac man pe obedo mac me aoya, pe bene mac ma gitwero bedo i ŋete. Jo ma ibedo ka yelle kwedgi-ni tye kit meno ki tun boti, ma ibedo ka balo kareni botgi cakke wa ka tinoni. Gin ducu gibitenyi wokc ata liyak, kun ŋat acel acel cito i yone pat; ŋat mo ma bilari pe. Koŋ wuwiny man, wun jo me ot pa Yakobo, ma gilwoŋowu ki nyiŋ Icrael, wun likwayo pa Juda, Wun wukwoŋo kwoŋ I nyiŋ Rwot, kun wutuco bene nyiŋ Lubaŋa pa Icrael, ento pe i ada, dok pe i yo ma atir. Ento gilwoŋŋe kengi ni gin jo me gaŋ maleŋ, dok gijeŋŋe i kom Lubaŋa pa Icrael, ma nyiŋe Rwot me mony. “Yam atito con gin ma bitimme i-anyim, lokke yam okatti ki i doga, ci amiyo dano guŋeyo woko; aruyugi me timme oyotoyot, ci bene otine ocobbe kakare. Pien onoŋo aŋeyo ni cwinywu nwaŋ, kun wujino-ler ŋutwu woko bene matek calo nyonyo, dok tur nyimwu bene obedo macalo mola; en mumi yo yam atittiwu lokke con, atuco lok man botwu con ma peya otimme, wek ka otimme pe wuwac ni cal jogiwu aye mutimo, kun wumedde ki waco ni cal apayawu ki cal ma wuliyo aliya ki mac aye ma guwaco ni otimme. “Doŋ wutyeko winyo lok man, kombeddi doŋ wuneno gin magi ducu; pe wubitito pire? Cakke kombeddi cito kwede anyim abimiyo wuwinyo jami mogo manyen, gin mukene ma pe wun wuŋeyo kadi acel. Pud amiyo timme kombeddi, pe con twatwal; peya yam wuwinyo pigi kadi ki acel, wek pe wuwac ni yam onoŋo wuneyogi con. Peya yam wuwinyo pigi, dok bene peya onoŋo wuŋeyogi, cakke wa con itwu onoŋo pud odiŋ woko. Pien onoŋo aŋeyo woko ni wubibedo ki tim aranyi me goba, dok bene cakke wa ki i ic, onoŋo wubedo jo ma lujemo. “Koŋ abimiyo kinigana galle pi nyiŋa, koŋ abijuko kinigana woko piwu wek dano gupaka, wek pe atyekwu woko. Nen, doŋ atyeko Iiyowu woko, ento pe macalo ryal, atemowu i mac buk me can magwa adada. Man atimo pira kena, atimo pira kena, atwero weko gipyedo nyiŋa niŋniŋ? Pe atwero miyo deyona wacel bot lubaŋa mo mukene. Rwot bikoko jo Icrael “Wuwiny lokka, wunjo pa Yakobo wun jo Icrael ma an alwonowu. An a en, an aye abedo mukwoŋo dok abedo me agikki, An aye ma aketo te guti me lobo ki ciŋa, ayaro polo ki ciŋa lacuc; ka alwoŋogi, ci gin ducu a kacel. “Wun ducu wugurre kacel, wek wuwiny lokka. Aŋa i kingi ma otito ni gin magi bitimme? ŋat ma an Rwot amaro en aye abioro me cobo yubba i kom Babilon, en bilwenyo i kom jo Kaldaya. An gira, an kikoma doŋ aloko, dok bene doŋ atyeko lwone woko, doŋ akele, nyime bibedo leŋ, bibedo bene maber. Wunyik cok bota kany, wek wuwiny: cakke i acakki piny, pe aloko gin mo i muŋ, cakke i kare ma ocako timme, onoŋo atye kunnu.” Kombeddi Rwot Lubaŋa doŋ oora ki Cwiny Maleŋ. Rwot ma en ŋat Maleŋ me Icrael, ma en aye okokowu ki i opii, owaco kuman ni, “An a Rwot Lubaŋawu amito pwonyowu wek wubed maber, kun atelowu i yo ma myero wuwot iye, Kono yam wubedo ka winyo cikka, kono ber! Kono kucwu omol calo kulu ma moljwi, kono wuloyo lok calo nam ma piine mol laboŋo yweyo-ni. Likwayowu kono calo kweyo, dano ma gua ki i komwu kono doŋ gidwoŋ calo apwa; kono nyiŋgi pe orwenyo kadi ki acel, kono bene pe gijwerowu woko liweŋ ki i nyima.” Wua woko ki i Babilon, wurin woko ki bot jo Kaldaya, wunyut lok man kun wugoyo kijira, dok wutit pire bene, wucwallokke ocit wa i agikki piny, kun wuwaco ni, “Rwot doŋ okoko laticce Yakobo woko!” I kare ma en obedo ka telogi i tim, orwo pii pe onekogi matek; omiyo pii otuc omol pigi, kun a ki i kom pata got, obaro got ci pii onyette woko ka maleŋ. “Kuc pe pi jo ma gin lutim maraco” Man lok ma Rwot owaco. Wuwiny lokka, wun lobo ma wutye i dog nam, wucik itwu wuwiny, wun rok ma wua ki ka mabor. Rwot olwoŋa ma onoŋo pud atye i ic, ocako nyiŋa ma onoŋo pud atye i kom maa. En omiyo lok ma katti ki i doga obedo bit calo lak pala lucwan, okana woko i tipo ciŋe; en omiyo adoko calo atero ma gipako lake, okana woko i juro aterone. En owaco ni, “In laticca, in Icrael ma abinoŋo deyo pire.” Ento an awacci, “Ayelle me tiyo tic noŋo, atyeko tekona woko ducu nonono, laboŋo kony mo; ento kadi bed kumeno, gin ma myero pira tye bot Rwot, Lubaŋa gire bicula pi tic ma atiyo.” Ma pud peya ginywala, onoŋo Rwot doŋ oyera woko, en oketa me bedo laticce ma bidwoko jo pa Yakobo cen bote, ki me coko jone jo Icrael ma yam guket woko ata, pien Rwot oketo deyo i koma, Lubaŋana aye miya teko. En Rwot owaco ni, “Doko laticca obedo gin mayot twatwal me tiŋo kaka pa Yakobo mapatpat malo, ki me dwoko Icrael ma agwoko cen; an doŋ abiketi me bedo ceŋ bot lurok, wek imi larre oo wa i agikki piny ducu.” Rwot ma en ŋat Maleŋ me Icrael, ma en aye koko jo Icrael, en owaco kit man bot ŋat ma gicayo matek, ŋat ma rok papatpat doŋ okwero woko, ma tye macalo latic pa luloc: “Luker bineni ci gia woko malo, rwodi bineni ci giryebbe woko piny; man bitimme pi Rwot, ma en lagen, ŋat Maleŋ me Icrael ma oyeri.” Rwot owaco kuman ni, “Yam agamo dogi i kare me timo ber bot dano, yam akonyi i kare me laro dano, atyekogwoki bene, dok amiyoibedo macalo gicikke bot rok ducu, abimiyo doŋ ibedo i lobo pa kwarowu ma kombeddi doŋ odoko obur-ri. Abiwaco bot lumabuc ni, ‘Wukatti woko,’ ki bot jo ma tye ka macol ni, ‘Wukatti woko ka maleŋ.’ Gibibedo calo romi ma camo lum i ŋet yo ducu, ka camgi bibedo i wi cere ducu ka ma yadi pe iye. Kec pe binekogi, kadi orwo pii bene pe binekogi, yamo malyet ki cen bene pe biwaŋogi, pien ŋat ma kica omako i komgi aye ma bitelogi, bitelogi kelogi wa i ŋet waŋ it ma piine gunnye agunya ki i ŋom. Abiketo yo wok ki i wi godina ducu, gibituco yo gudona cito malo i wi godi. Nen, gibia ki ka mabor, kun gia ki tuŋ acam ki yo tuŋ potoceŋ, jo mukene gibia ki i lobo Ciene.” Wer wer ki yomcwiny, in polo, cwinyi obed yom ba in lobo; wumwoc ki wer, wun godi! Pien Rwot doŋ okweyo cwiny jone, kica bimake i kom jone ma guneno can twatwal. Ento jo Cion guwacci. “Rwot doŋ obwotowa woko ata, wiye doŋ owil woko i komwa.” Ci Rwot ogamo cutcut ni, “Wi dako twero wii i kom latinne ma en doto, kica pe twero make i kom wode ma en onywalo? Kadi bed dano wiye twero wil, ento an wiya pe biwil i komwu. Nen, in Cion doŋ atyeko goro nyiŋi woko ki coc i ci na, celli tye i nyima kare ducu. “Lugedoni gibitic oyot twatwal, makato jo ma yam guyaki, jo ma muki amuka bia woko ki boti. Tiŋ waŋi malo, nen kabedo ducu; gin ducu gicokke gibino boti. Rwot owaco ni, ‘Kit macalo atye kwo-ni, ibirukogi calo gin me deyo, ibitweyogi i komi kit macalo dako manyen tweyo ki tiko me wel i nute.’ “Adada, wi oburri doŋ odoŋ noŋo, loboni doŋ otyeko balle woko; ento kombeddi doŋ bibedo madiŋ mada bot jo ma bibedo kunnu, jo ma yam gumwonyi woko-ni doŋ gibibedo ka mabor. Litinoni ma ginywalogi i opii, pud dok ibiwinyo giwaco ni, ‘Kabedona diŋ twatwal; myero dok gimed kabedo botwa.’ Ibicako pennye kekeni ki i cwinyi ni, ‘Aŋa ma onywalo jo magi? An yam abedo lalur, dok abedo ki cwercwiny madit, gikwanya gitera woko cen calo opii; aŋa kono dok ma opito litino magi? Koŋ inen, yam adoŋ kena, ento litino magi dok gua ki kwene kono?’” Rwot Lubaŋa owaco ki jone kuman ni, “Nen, abiryeyo ciŋa bot lurok, ci abitiŋo benderana malo bot rok mapol; gibikelo awobeni kun gikwakogi i korgi, dok bene gibitiŋo anyirani i wi gwokgi; luker bidoko wegi litinoni ci gipitogi, mon pa luker bibedo macalo megigi ma bidotogi. Gibiryebbe piny i nyimi ka wori, gibinano apwa ki i tyeni. Meno bimiyo iŋeyo ni an a Rwot; lewic pe bimako jo ma kura. Gitwero kwanyo jami ayaka woko ki i ciŋ dano matek, nyo gitwero mayo opii woko ki i ciŋ dano mager? Ento Rwot owaco kuman ni, “Opii ma dano matek omakogi, gibimayogi woko ki bote, jami ayaka ma tye i ciŋ ŋat mager bene gibikwanyo woko ki bote, pien abipyem ki jo ma pyem kwedwu, ci abilaro litinoni woko. Abimiyo jo ma unowu gicamo riŋo komgi kekengi, dok gibimato remogi kekengi gimer kwede calo gumato koŋo Vino. Meno bimiyo dano ducu ŋeyo ni, an a Rwot ma Lalarwu, ŋat Matek pa Yakobo ma kokowu.” Rwot owaco kuman ni, “Waraga me keto nyom ma yam aryemo ki minwu tye kwene, ma ceŋ amiye i kare ma onoŋo aryeme-ni? Yam acatowu bot aŋa i kin jo ma yam onoŋo acamo banyagi? Nen, yam gicatowu pi balwu, dok pi turo cik, en aye ma oweko giryemo minwu woko. “Piŋo kono yam pe anoŋo dano mo i kare ma abino-ni? Dok i kare ma alwoŋo lwoŋo, piŋo ŋat mo kono pe ogamo doga? Wutamo ni ciŋa cek, pe twero koko wu? Tekona pe me larowu? Koŋ inen, nam otwo woko i kare ma ajuko, atwero loko kulu ducu doko tim aroo; rec ma i igi bidoko coo pi can pii, gito woko pi orwo pii. Atwero bene loko polo doko macol licuc, ci aumo woko ki boŋo cola.” Rwot Lubaŋa doŋ opwonya i lok ma myero aloki, wek aŋe lok ma miyo teko bot dano ma ool. En coya woko ki i waŋ nino kare ducu odiko, en coya awiny gin ma en pwonya kwede. Rwot Lubaŋa doŋ otyeko yabo ita woko, pe ajemo, pe bene alokke neya, Aloko neya bot jo ma goya, dok bene aloko lema bot jo ma telo yer tika; pe akano waŋa woko ki lewic ki i laa ma giŋulo iye. Pien Rwot Lubaŋa konya, mumiyo alee mo pe otwoda; meno omiyo waŋa obedo matek calo got, dok onoŋo aŋeyo bene ni pe gibiketo lewic i wiya; pien ŋat ma bimiyo aloyo kop tye cok kweda. Ŋat mo tye ma mito pido kweda? Owek wacuŋ kacel kwede i nyim lukiko. Aŋa ce ma lakworra-ni? En mono obin cok i ŋeta kany. Nen, Rwot Lubaŋa konya, aŋa ma biŋolo kop loya ni an labal? Nen, gin ducu gibiti woko calo boŋo, nyenye bicamogi woko. Aŋa i kinwu ma lworo Rwot, ma winyo lok ma laticce waco? Aŋa ma woto i piny macol ma pe neno yo ma en tye ka wot iye-ni, ento geno gire Rwot, kun jeŋŋe i kom Lubaŋane? Nen, wun jo ducu ma wumoko mac, wun jo ma moko mac i kom yen! Wuwot i dero mac ma doŋ wumokoni, kun noŋo mac ma wumoko i lak yen ca lyel menyo yo botwu. Gin ma wubinoŋo ki bota en ene: wubibuto piny ma noŋo wutye ki arem madit twatwal. “Wuwiny lokka, wun jo ma wumito larre, wun jo ma yenyo Rwot; koŋ wunen got ma yam gipayowu ki iye, ki bur madit adada me gweŋ matek ma gikwinyowu ki iye. Koŋ wutam pi kwarowu Abraim, ki Cara ma obedodawu; i kare ma alwoŋo Abraim onoŋo pe tye ki latin mo, ento lacen amiye gum, ci onywalo litino, dok anyayo likwaye odoko mapol twatwal. Pien Rwot bikweyo cwiny Cion; bikweyo cwiny kabedone ducu ma gibalo woko, tim ma iye bibedo calo Eden, ki tim aroo mutwo bibedo calo poto pa Rwot; yomcwiny madwoŋ bibedo tye kunnu, kun dano giwero wer me pwoc ki me pak. “Wuwiny lokka, wun jona, wuter itwu wuwiny lokka, wun rokka; pien abimiyowu cik, ki ŋolo kop atir ma bibedo macalo cen bot lurok. Kare me locca doŋ onyiko cok twatwal, larre ma abikelo tye ka bino, an ki koma aye abiloyo rok ducu; lobo ducu ma tye i dog nam gitye ka kura, gitye ki gen ni abilarogi. Wutiŋ waŋwu malo i polo, dok wukul waŋwu piny wunen lobo; pien polo ma wuneno-ni biket woko macalo yito, ento lobo biti woko calo boŋo, ka doŋ jo ma bedo iye gito woko calo ober; ento larre ma abikelo biri nakanaka, locca pe bigik wacel. “Wuwiny lokka, wunjo ma wuŋeyo kit ma atir, wun jo ma doŋ wumako cikka i cwinywu; pi meno pe wubed ki lworo kadi dano cayowu, cwinywu bene pe myero oballe ka ce giyetowu. Pien nyenye bicamogi woko calo boŋo, okok bene bicamogi woko calo yer romo, ento locca pe bigik wacel, larrena bibedo pi yalwak me kare ducu.” Co, co woko ki i waŋ nino, wek iruk teko, in ciŋ Rwot; co woko macalo i kare ma okato, ki lwak jo me kare macon. Pe in aye yam iŋolo Rakab iŋido woko matitino, icobo min kulu ineko woko? Pe in aye ma yam imiyo pii ma i nam otwo woko, pii madit ma onoŋo yam tut twatwal-li; pe imiyo yo obaro dye nam matut ca, wek jo ma gikokogi gukat ki iye wa loka nam tuŋcel? io ma Rwot okokogi bidwogo i Cion, gibibino kun giwero wer. Yomcwiny ma ri nakanaka pe birwenyo ki i wigi, gibibedo ki yomcwiny madwoŋ, cwercwiny ki cur bia woko ki botgi. “An aye abedo ŋat ma kweyo cwinyi. Piŋo ilworo dano mamwa ma to woko-ni, latin pa dano ma giketo calo lummi?” Piŋo wii owil woko i kom Rwot ma oketi, ma oryeyo polo, dok bene ma ocibo te guti me lobo? Piŋo kono ibedo ki lworo nakanaka nino ducu, pi akemo malyet pa jo ma giuno dano wadigi, ka ce gucako ticgi me neko dano? Akemo malyet pa ŋat ma uno dano-ni kono tye kwene? ŋat ma onoŋo gitweyo macalo mabuc gibigonyo woko oyotoyot; en pe bito donyo piny i bur lyel, cam bene pe biremme. Pien an a Rwot Lubaŋani, ma tugo pii ki i nam, miyo twagge kun mor, nyina Rwot me mony. Doŋ atyeko keto lokka i dogi, akano waŋi woko bene doŋ i tipo ciŋa, aryeyo polo, aketo te guti me lobo, awaco bot jo Cion ni, ‘Wun wujona.’ ” Co woko ki i waŋ nino, co woko, a malo, in Jerucalem, in ma doŋ imato kikopo me akemo ma Rwot aye omiyo boti, i kare ma imato ducu, ci icako tagge. Pe tye ŋat mo ma twero peye, i kin litinone ducu ma en onywaloni; pe tye ŋat mo ma twero mako ciŋe, i kin litino ducu ma en opitogi. Can magi aryo-ni ducu opoto i komi lawaŋ acel, aŋa ma binywako kumo pi can magi kacel kwedi? Giyako loboni gibalo woko liweŋ, kec ki neko dano opoto iye magwa; man aŋa ma bikweyo cwinyi? Awobeni guwille woko, gubuto piny liraba ka ma yo ogik iye ducu, calo til ma omoko ki obwo; akemo pa Rwot doŋ oketo komgi woko, ki juk ma Lubaŋani obedo ka jukogi kwede. Pi meno, wun jona ma giunowu doŋ wuwiny lok man, wun jo ma wumer, ento pe wumer ki koŋo vino. Rwot Lubaŋawu ma pido lok pa jone owaco kuman ni, “Nen, doŋ atyeko kwanyo kikopo woko ki i ciŋwu, en kikopo ma miyo wumer wutagge-ni; agulu me akemona pe dok wubimedde ki matone. Doŋ abimiyo i cin jo ma unowu, ma yam doŋ guwaco botwu ni, ‘Wuryebbe piny wek wukati’; omiyo wuloko ŋewu doŋ odoko ŋom me anyonagi, dok ŋewu onoŋo doŋ tye macalo yo ma gilubo.’ Co woko, co woko ki i waŋ nino, ruk tekoni, in Cion; ruk boŋŋini mabecone, in Jerucalem, gaŋ maleŋ, pien dano mo ma pe giliro, ki jo ma komgi ki keni, pe dok gibidonyo boti. Teŋ apwa woko ki i komi wek ia malo, in Jerucalem ma yam ibedo opii. Wugony tol woko doŋ ki i ŋutwu, wun jo Cion ma yam wubedo opii. Pien Rwot owaco kuman ni, “Pe yam giculo lim mo me wilowu, dok bene pe gibiculo lim mo me kokowu. Yam wuwoto wucito i lobo Ejipt macalo lubedo, lacen jo Aciria guunowu laboŋo bal mo. Koŋ wunen kombeddi dok gitero jona woko i Babilon nonono; gitye ka ŋalo lulocgi, dano gitye ka cayo nyiŋa dyeceŋ jwi. Pi meno jona doŋ gibineya, wubineyo ni an Lubaŋa, wubineyo ni an a en ma atye ka lok kwedwu.” Neno tyene ber mada i wi godi, ŋat ma kelo lok maber, ma tito pi kuc, ma kelo lok maber me gin maber, ŋat ma tito lok me larre, ma waco bot Cion ni, “Lubaŋani tye ka loc.” Koŋ iwiny, lukur gaŋŋi gitye ka wer ki dwan maloŋo, giwero wer me yomcwiny kacel; pien gitye ka neno Rwot ki wangi, kun tye ka dwogo cen i Cion. Wumwoc ki wer lawaŋacel, wun ducu, wun wi obur Jerucalem; pien Rwot doŋ okweyo cwiny jone, doŋ okoko Jerucalem woko. Rwot doŋ oyabo tekone maleŋ ka maleŋ i nyim rok ducu; dano ducu ma i wi lobo gibineno, kit ma Rwot Lubaŋawa olarowa kwede. Wua, wua woko, wua woko ki kunnu, pe wugud gin mo ma kome ki keni; wua woko ki kunnu, wek wucit wulonnye kekenwu, wun jo ma tino jami pa Rwot. Pe wubia oyotoyot ma komwu myel, pe bene wubiriŋo arina, pien Rwot bitelo nyimwu Rwot Lubaŋa pa Icrael bibedo i newu kun gwokowu cawa ducu, Rwot owaco ni, “Nen, tic pa laticca tye ka wot maber, gibiwore ci gitiŋe malo: en bibedo dano mamalo twatwal. Jo mapol ma gunene gubedo ki ur matek; waŋe onoŋo nen pat mada ki waŋ dano, ki kome bene onoŋo pe rom ki kom dano. En bipoyo kom rok mapol kit meno, luker ducu doggi bitwo woko pire; pien gibineno gin ma yam pe gitittigi pire, dok gibinian i gin ma yam peya guwinyo pire.” Rwot, aŋa ma yam oye lok ma wan watito? Dok aŋa ma Rwot onyuto tekone bote? Pien odoŋo i nyime calo ginapita ma pud tye ka doŋo adoŋa, ma pud lwite donyo adonya i ŋom mutwo. En pe tye ki kom mo maber nyo deyo ma kono omi wacik waŋwa i kome, gin mo ma ywayo tam padano onoŋo pe bote kadi ki acel, dok gin mo ma twero miyo wabedo ki tam i kome bene pe. Dano gicaye gikwere woko-gu, obedo ki cwercwiny madwoŋ ki arem madit ma okato kare, En bedo calo ŋat ma dano guumo waŋgi woko i kome, dano gicaye, ma pe waparo pire wacel. Adada, en ociro can piwa, otiŋo aremwa ducu i kome; gigoye dok gitime marac atika, mumiyo wabedo ka tamo ni Lubaŋa aye ma oketo can man i kome. Yam gicobe pi balwa, giketo ret i kome pi timwa marac; can ma giketo i kome-ni okelo kuc botwa, pi goc ma gigoye kwede omiyo wacan, Wan ducu onoŋo yam waŋak warwenyo woko calo romi, ŋat acel acel onoŋo okwanyo yone kene, ento Rwot doŋ otiŋo balwa ducu oketo i kome. Yam giune, giketo can i kome, ento en pe oŋamo doge me loko lok mo; calo latin romo ma gitero ka nekone, dok calo romo ma olin i nyim lunyar yerre, kit meno en pe onamo doge me loko. Giune, giŋolo kop i kome, ka gikwanye woko; aŋa kono ma oparo pi gin ma otimme i kome, ni gikwanye woko ki i lobo pa jo makwo, gigoye pi bal pa jo me rokwa? Gikwinyo lyelle kacel ki lyel pa lutim maraco, dok kacel ki lulonyo i kare me tone, kadi bed onoŋo en pe otimo bwami mo, dok pe oloko lok goba ki doge, Ento Rwot aye yam omito ni giket can i kome; omiyo obedo ki twon arem madit. I kare ma en bimine kene me bedo gitum pi bal, en bineno likwaye, ci bimedo nino me kwone bene. En bicobo gin ma Rwot doŋ mito yubo; bineno doŋ gin maber ma oa ki i cwercwiny ma yam owok ki iye; meno bikweyo cwinye. Laticca ma kite atir, bimiyo gikwano jo mapol ni kitgi atir; en bitiŋo balgi ducu i kome. Meno bimiyo amiyo bote kabedo me woro i kin jo madito, en bene binywako jami ma giyako i lweny kacel ki jo matego. Pien en doŋ omine kene me to woko, mumiyo gikwane kacel ki lubalo; ento en otiŋo bal pa dano mapol, dok obako doge olego pi lubalo adada. “Wer wer ki dwan maloŋo, in dako ma lalur ma pe yam inywalo latin mo-ni, mwoc ki wer kun idaŋŋe matek, in dako ma pud peya yam arem ogoyi! Pien litino pa dako ma giweko odoŋ kene bibedo pol makato litino pa dako ma ginyomo ma bedo kacel ki cware, man Rwot ma owaco. Med kabedo me kemani obed malac, wek giyar boŋŋi aŋaba me kicikani woko i kabedoni; pe ibed ladur, med tolli obed maboco, dok bene gur teke me kemani ocuŋ matek likiŋ. Pien waŋ loboni bimedde dok tuŋ lacuc ki tuŋ lacam, likwayu bileyo kabedo pa lurok dok gibinya gipoŋo gaŋŋi ducu ma yam gudoŋ obur-ri. “Pe ilwor, pien lewic pe bimaki; pe iwek alee otwodi, pien pe gibiketo lewic i komi. Wii biwil woko i kom lewic ma yam onoŋo ibedo kwede me tinoni, pe dok ibipo i kom cac ma gibedo ka cayi kwede pi bedo keni macalo dato. Pien ŋat ma ocweyi aye obedo cwari, nyiŋe Rwot me mony: ŋat mukoki ki i can en aye ŋat Maleŋ me Icrael, gilwoŋe ni Lubaŋa me wi lobo ducu. “Pien Rwot doŋ otyeko lwoŋi woko, calo dako ma gibwoto odoŋ kene, kun tye ki cwercwiny, calo dako ma ginyomo ma onoŋo en pud nyako ka giryemo woko, man Lubaŋani ma owaco. Yam onoŋo aweki keni pi kare mo manok keken, ento abidwoki woko bota ki kica madwoŋ, Yam akano waŋa woko ki boti, pi kare manok ma onoŋo akemona dwoŋ twatwal, ento abitimo kica boti ki mar ma pe gik, man Rwot ma Lakok meri aye ma owaco. “Pien man ki tuŋ bota rom aroma ki kare pa Nua: kit macalo akwoŋo ni pii pa Nua pe dok bimedde ki poŋ i wi lobo ducu, kit meno bene doŋ akwoŋo nikiniga pe doŋ bimaka i komi, dok bene pe abijuki. Pien godi twero a, ki cere-gu gitwero kobo woko ka mukene, ento marra ma pe lokke pe bia ki i komi, dok cikkena me kuc pe gibidiro woko cen. Meno lok pa Rwot ma kica omake i komi. “In gaŋ ma ineno can, ma yamo okodo i komi ki tek, ma pe gikweyo cwinyi, nen, abimwono got meri ki libi, dok abiketo te gutini ki capir. Abitiyo wi labila odini ki tiko makwar me wel, dogcelli abitiyo ki got makwar ma mil amila, ki kor celli doŋ abideyo ki litino kidi me wel mapatpat. “Litinoni ducu Rwot aye bipwonyogi, litinoni gibibedo maber twatwal. Kit ma atir bimiyo ibedo icuŋ matek: pe gibiuni kadi ki acel, lworo mo pe bimaki pire; jo ma giuni pe gibinyiko cok ka ŋeti. Ka ce dano biero daa i komi, meno noŋo pe oa ki bota; ŋat ma ero daa i komi bipoto gire pire kene. “Nen, an ma aketo latet, ma buko lodi mac, ci teto jami lweny pi ticce; dok bene aketo ŋat ma labal lobo wek ojwer jami woko ducu. Pe tye jami lweny mo ma giteto pi lweny i komi ma bicobo ticce, ibiloyo lok me adot ducu ma gikelo i komi. Man aye gum ma lutic pa Rwot binoŋo, loyo kopgi a ki bota, man lok pa Rwot kikome.” “Wubin wutwom pii, wun jo ducu ma orwo nekowu; ŋat ma limme mo pe, myero bene obin owil cam. Wubin wuwil koŋo vino ki cak laboŋo lim, laboŋo wel mo. Piŋo wubalo limwu i kom gin ma pe kwon, piŋo kono wutyeko tekowu woko ka noŋo gin ma pe yeŋowu? Wucik itwu atika i lokka, ci wucam cam maber, dok wubed ki yomcwiny pi cam ma miyu ma amiyowu, Wucik itwu wuwiny lokka, ci wubin bota; wuwiny lokka, wek wubed kwo; ci abicikke kwedwu i gicikke ma ri nakanaka, abimiyowu mar mera ma pe lokke, ma genne, ma yam aciko pi Daudi. Nen, yam akete obedo caden bot lurok, latel ki lami-cik bot lurok. Nen, wun wubilwono rok mapatpat ma pe wuŋeyogi, ki rok mapol mapatpat ma yam pe gineyowu gibiriŋo gibino botwu, pi Rwot Lubaŋawu, ma en ŋat Maleŋ me Icrael, pien en doŋ otyeko keto deyo i komwu. “Wuyeny Rwot i kare-ma en pud twero noŋŋe, wukok bot Rwot ma pud en tye cok. Latim marac myero obwot timme marac, ki dano ma pe kite atir bene owek tamme ma pe ber-ri; olokke odwog cen bot Rwot, wek Rwot otime kica, myero odwog cen bot Lubaŋawa, pien en biweko balle woko ducu. “Pien tamma pe tamwu, ki yowu bene pe yona,” man Rwot ma owaco. Kit macalo polo tye malo ka mabor makato lobo-ni, yona bene tye malo kit meno makato yowu, ki tamma bene tye malo kato tamwu woko. “Kit macalo kot ki pee corre bino piny kun gia ki i polo, ma pe dok gidok malo kunnu, ento gikweyo lobo, miyo ginapita twi ci doŋo, mi yo kodi bot laeo-kodi ki miyo kwon bene bot dano me acama, lok ma a ki i doga bene bibedo kit meno; pe bidwogo bota noŋo ma noŋo pe otiyo gin mo, lokka bitiyo gin ma amito ni oti, dok bicobo gin ma acwale pire. ‘“‘Pien wubikato woko kun wucito ki yomcwiny, gibiterowu ki kuc; godi ducu ki cere ducu ma i nyimwu gibimwoc ki wer licur, ki yadi ducu me tim biyeŋŋe ki yomcwiny, Yat ciprec bitwi ma ka okuto; ki yadi ma ŋwecgi kur bitwi ma ka ocok; meno bibedo gin me po nakanaka, ma pe birwenyo, me nyuto ni an Rwot aye ma cen atiyo man.” Rwot owaco bot jone kuman ni, “Myero wuŋol kop atir, dok wuti gin ma tye atir, pien doŋ acok larowu, lar ma alarowu kwede binen ka maleŋ, Dano ma timo man tye ki gum madwoŋ, ki dano ma omako matek likiŋ, ma gwoko ceŋ cabit kun pe pyedo, dok gwoko ciŋe pe timo gin marac.” Larok mo ma obino oribbe ki Rwot pe myero owac ni, “Rwot bikoya woko matwal ki i komjone miyo abedo kaikena”; ki dano ma gikolo bene pe myero owac ni, “Nen, doŋ atye macalo yat ma otal.” Pien Rwot doŋ owaco kuman ni, “Jo ma gikologi ma gigwoko cen cabitta, ma giyero tiyo gin ma yomo cwinya, ma gumako gicikkena likiŋ, abimiyo botgi gin mo me po nyiŋgi ma bibedo i ot ka ma giwora iye i dye gaŋŋa, maber makato bedo ki litino awobe nyo litino anyira; abimiyo botgi nyiŋ ma bedo matwal, ma pe birwenyo kadi ki acel. “Doŋ lurok ma guribbe ki Rwot, me tic bote, kun gimaro nyiŋe, dok ma gimine me bedo luticce, dano ducu ma gwoko ceŋ cabit, kun pe pyedo, ma omako gicikkena woko likiŋ, gin jo-nu aye abikelogi i got mera maleŋ, dok abiyomo cwinygi i ot me lega ka ma giwora iye. Abigamo gitum awanagi ki gityer ma gityero bota, magi ducu abigamo i wi keno tyerra; pien oda gibilwoŋo ni ot me lega pa jo me rok ducu.” Rwot Lubaŋa ma ocoko jo Icrael ma onoŋo giryemogi woko owaco kuman ni, “Dok abicoko jo mukene agurogi bota, amedo i kom jo ma doŋ atyeko cokogi-ni.” Wun lee tim ducu wubin, wumwod riŋo, wun lee ducu ma wubedo i buŋa. Lukur-piny pa jo Icrael ducu wangi oto, gin ducu gipe ki ŋec kadi ki acel, gin ducu gicalo gwogi ma te lebgi oto, pe dok gitwero gweyo; gibuto piny gibedo ka lek aleka, gimaro nino nino matut keken. Gin gwogi ma giwor twatwal ma cam pe romogi. Gin lukwat ma pe giniaŋ gin mo; ŋat acel acel i kingi kwanyo mere yone kene, ŋat acel acel bene yenyo magobane kit ma cwinye mito. Gilwoŋŋe kekengi ni, “Wubin wacitu ka kelo koŋo vino, wubin wamatu kono makec wek wameru woko, diki dok binonne, madit makato ducu.” Dano ma kite atir to, ŋat mo pe ma keto iye cwinye. Jo ma maro Lubaŋa gikwanyogi woko; ŋat mo pe ma paro pigi. Pien dano ma kite atir noŋo gikwanyo woko ki i can, en cako donyo i kuc; jo ma bedo kun cwinygi atir, giywe mot i kabutogi. Ento wun wubin wunyik cok bota kany, wun litino pa dako ma latal, ma latim abor aye onywalo ki malaya. Meno wutye ka nywaro aŋa ce? Wunamo dogwu malac kumeno i kom aŋa ma lebwu okatti woko kumeno-ni? Wun litino pa lutim bal, litino ma ginywalogi ki lok me goba, wun jo ma mitiwu pe kwe i te yat kworo, i te yadi ducu ma pote olot liyuk; ma wuneko litinowu woko i luŋ-gu, i te pata got ma obar? Gin ma gibipoko botwu tye i kin got mapwot ma tye i luŋ piny, gin jami-nu ducu mewu; pien doŋ wutyeko tyero gityer amata woko botgi, wukelo bene gityerwu me mo ko kwon, wutyero. Cwinya bibedo yom pi kodi tim macalo meno? Doŋ wuketo kabutowu i wi got ma wiye bor, wun doŋ wutyeko cito kunnu ka tyero gitumwu bot jok. Wuketo bene cal jok i ne kika ki i ne yat me doggola; pi weka woko, omiyo wupeto kabutowu. Wudonyo iye ka wuyaro obedo malac; wutyeko cikke kwedgi woko doŋ piwu kenwu, dok bene wumaro kabutowu, wuneno tim munero me lewic. Wucito bot jok Molek ki moo, wumedo moowu ma ŋwece kur onya odoko mabup; wuoro lukwenawu gucito ka mabor, wucwalogi bene gucito wa piny i lyel. Wot mabor oolo komwu woko, ento pe wuwaco ni, “Konnye pe”; wunoŋo kwo manyen ma medo tekowu, omiyo pe wuwillee giwu i waŋayo, Aŋa ma onoŋo wulworo twatwal, ma omiyo komwu myel, ma oweko wuwaco lok goba, wiwu doŋ owil woko pewupo i koma, ma pe doŋ wutwero tamo pira? Pe atemo diyo cwinya pi kare malac, ma oweko pe wubedo ki lworo mo i koma? En kitwu ma wutamo ni tye atir-ri, ki gin ducu ma wutimo abituco woko ka maleŋ, ento magi ducu pe bikonyi. Ka ce wukok matek pi kony, gin cal jogiwu-ni myero gularwu do! Yamo bitiŋogi terogi woko, aluu dog bicwalogi woko wa cen. Ento ŋat ma riŋo laro bota bileyo lobo, dok bene bibedo i kom got mera maleŋ. Gibiwaco ni, “Wutor yo, wutor yo, wuyub yo, wuput ajut-gu woko liweŋ ki i yo pajona.” Lubaŋa ma en ŋat Mamalo Twal, ma bedo nakanaka i kabedo ma otiŋŋe malo, ma bedo matwal, ma nyiŋe len-ni, owaco ni, “An abedo i kabedo maleŋ ma otiŋŋe malo, dok bene abedo kacel ki ŋat mamwol, ma cwinye cwer, dok ma ŋut, pi miyo kwo manyen bot jo ma cwinygi cwer dok ma giŋut, Pien pe abibedo ka pyem nakanaka, dok bene kiniga pe bimaka kare ducu, pien cwiny dano oa ki bota, an aye ma amiyogi yweyo me kwo, amiyo bedo tye. Bal pa jona ki paro lim aye oweko akeco; omiyo agoyogi, akanne woko, kun kiniga maka, ento gumedde ameda ki jemo kun gitiyo gin ma cwinygi mito. Doŋ atyeko neno kitgi, ento pud abicaŋogi; abitelogi, abiculogi bene ki gin ma kweyo cwinygi, kun amiyo jo ma kumo pigi giloko lok me pwoc. Abimiyo kuc bot jo ma tye ka mabor ki jo ma tye ka ma cok, dok bene abicaŋo jona. Ento jo maraco gubedo calo nam ma twagge, ma pe koŋ twero pye mot, kun piine kelo yugi ki coto keken. Kuc mo pe pi jo ma gin lutim maraco.” Man lok ma Lubaŋawa owaco. “Daŋŋe matek, pe iliŋ, yab dwani owinnye maloŋo calo koko tum, tit bot jona roc ma gin gutimo, tuc bot jo me ot pa Yakobo balgi. Nen kono giyenya nino ducu ba, cwinygi bene yom me ŋeyo gin ma an amito ni guti, ginyutte macalo jo me rok ma kitgi atir, ma pe giweko lubo-cik pa Lubaŋagi: gipenya bene pi ŋolo kop aitr, cwinygi yom pi bedo cok ki Lubaŋa. Dano gipenyo ni, ‘Piŋo wabedo ka ri kec, kun in pe ineno? Piŋo kono wabedo ka mwolle kenwa i nyimi, kun in pe iparo lok mo iye wacel?” Lubaŋa ogamo ni, “Koŋ wunen, i nino me ri kecwu, wuketo mere tamwu i timo gin ma yomo cwinywu keken, kun bene wuuno jo ma tiyo tic botwu. Koŋ wunen, wun wuri kec ki daa dok ki lweny, wudoŋo dano bene ki ciŋwu ma wuŋino woko ki kolo pi lweny. Kit ri kecwu ma wutye ka ri i kare-ni, pe bimiyo dwanwu winnye malo i polo. Wutamo ni kit ri kecwu-ni en aye gin ma an ayero, nino mo ma dano mwolle kekene? Ri kec ma dano kulo iye wiye piny calo lagada ma okulle, peto boŋo cola, pworo buru iye, ka doŋ cako buto iye, wulwoŋo man ni ri kec, ki nino ma Rwot Lubaŋawu pwoyo? “Kit ri kec ma an amito ene: gonyo tol me tim maraco woko, ki gonyo okol woko ki i tyen opii, weko jo ma giunogi guwot i kuc, ki turo okol woko ki i tyen dano. Poko cam bot jo ma kec nekogi, kelo lucan ma pacogi pe i gaŋi; ka ineno dano ma tye munero myero iruk boŋo i kome, pe myero ikanne woko ki i nyim joni. Ceŋ bituc boti calorupiny, waŋ bur ma tye i komi bicaŋ woko oyotoyot, Kit ma atir ma it ye kwede bitelo nyimi, deyo pa Rwot aye ma bigeno ŋeyi. Dok bene ibilwoŋo, ci Rwot gamo dogi, ibikok bote, en bigamo ni; ‘An ene.’ “Ka ce, ibikwanyo okol woko ki i kinwu, cimo dano ki lwet ciŋ ki loko lok maraco, ka ce ibimiyo kwori pi konyo jo ma kec nekogi, dok bene icobo miti pa jo ma giunogi, man bimiyo ceŋ tuc piri ki i piny macol, piny macol licuc boti bidoko macalo dyeceŋ, Rwot biteli i kare ducu, en bicobo mitini ki jami mabeco, bimiyo cogoni bedo matek; ibibedo calo poto ma gionyo pi i oromo iye maber twatwal, ibibedo macalo pii ma gunnye agunya kare ducu, ma piine pe two kadi ki acel. Gibigero gaŋ i wi oburri macon doki, ibigero i kom acakki te guti ma yam kwarowu gugero, gibilwoŋi ni in layub celma otur, ŋat ma yabo yo ma yam oballe ducu doko maber. “Ka ce iworo ceŋ cabit macalo kabedo maleŋ, iweko timo gin ma yomo cwinyi i nino maleŋ, ka ce iworo ceŋ cabit macalo nino me yomcwiny, dok macalo nino ma Rwot olonyo ma obedo maleŋ me deyo; ka ce imiyo deyo bot Rwot, kun pe ilubo yoni keni, kadi ki yenyo gin ma yomo cwinyi, nyo loko lok atata; ci cwinyi bibedo yom i kom Rwot, abimiyo iriŋo i wi cere mutiŋŋe maloi lobo; ibibedo ki yomcwiny i lobo ma yam kwaru Yakobo oleyo, pien Rwot kikome aye ma doŋ owaco lok man.” Nen, bad Rwot pe odoko cek, ma pe doŋ twero laro dano, ite bene pe odiŋ ma pe romme winyo lok; ento timwu marac aye opokowu woko ki Lubaŋawu, balwu omiyo waŋe doŋ oumme woko i komwu, omiyo doŋ pe winyo kokowu, Pien remo doŋ onywano ciŋwu woko, lwet ciŋwu opoŋ ki tim me bal keken; dok bene wuloko lokgoba ki dogwu, ki lebwu bene muno lok me timo tim maraco. Pe tye dano mo ma doto lawote i lok ma tye ada, pe tye ŋat mo ma cito i lukiko ci pido pido kakare; dano ducu gijeŋŋe i lok ma tere pe kun giloko lok goba keken, giparo pi timo gin marac ma kela can. Dano ducu ginywalo tim marac calo toŋ lacocodo, giciko obwogi calo oboropyen; ŋat ma camo toŋgi to woko, ento ka onyono anyona ororo a iye, Ento obwogi macalo meno pe bikonyogi wacel, pe bikonyogi me aruka kadi ki me umme, Ticgi ma gitryo obedo tic me bal, ki ciŋgi bene timo tim bwami. Tyengi yot giriŋo kwede madwir ka timo gin marac, giwille awila me cito oyotoyot ka neko jo ma pe ki bal. Gitamo megi tam me cito ka timo gin marac, yak ki balle me lobo tye yo gudogi ducu. Pe giŋeyo yo me kuc, ŋolo kop atir bene pe i gudogi, gin gugomo yogi woko, pe tye ŋat mo ma wok ki iye ma ŋeyo kuc. Meno omiyo ŋolo kop atir bor kwedwa, kit ma atir bene peya oo botwa; wayenyo leŋpiny, ci waŋono mutu, ma ka woto i ceŋ wawoto i colpiny. Wabedo ka boŋo kor ot ki ciŋwa calo lutowaŋ, wabono calo jo ma waŋgi oto; wayokke ki wot ma piny pud leŋ calo watye ka wot i dyewor, wanen calo jo muto ki i kin jo ma komgi tek. Nen doŋ watye ka ŋur aŋura calo lee, wabedo ka kok akoka calo amam, wakuro ŋolo kop atir ento pe wanoŋo; wakuro larre, ento tye ka mabor kwedwa. Pien balwa doŋ odurre mapol i nyimi, roc ma watimo aye doŋ obedo caden i komwa; pud wapo i kom bal wa, waŋeyo gin marac ma watimo. Wakalo wi cik, wakwero Rwot woko, waweko bene lubo kor Lubaŋawa, kun waloko lok me uno dano kijemo, wagamo lok goba bedo i cwinywa, ci waloko bene ka maleŋ, Ento ŋolo kop atir gidwoko cen, kit ma atir bene pe doŋ nyiko cok i ŋetwa, ki ada bene opoto woko i kabedo Ducu i dye gaŋ, gin mo ma tye kakare pe doŋ noŋo yo me donyo. Ada doŋ pe matwal, ŋat ma kwero timo tim marac giyako jamine woko. Rwot oneno ci cwinye ocwer matek, pien ŋolo kop atir doŋ pe. En oneno ni dano mo doŋ pe; ouro mada pien ŋat mo doŋ pe ma twero laro pigi, En kikome aye doŋ bilarogi ki tekke kene, kit ma atir bimiyo en cuŋ matek. Oruko kit ma atir macalo gin me geŋo kore, ki otaŋ nyonyo me lar bene oruko i wiye; cwiny me culo kwor bibedo macalo boŋo arukane, dok akemo biboyo kome woko calo jor. En biculogi kun poro kit macalo timgi tye kwede, akemo bot lumonene, ki cul bot lukworre; dok biculo cul marac bot lobo ma tye i dog namo Meno bimiyo gilworo nyiŋ Rwot cakke ki yo tuŋ potoceŋ, ki deyone cakke ki i tuŋ wokceŋ; pien biruyo bino oyotoyot calo pii ma mol mager, ma yamo pa Rwot aye ma twago. Rwot owaco bot jone ni, “An abibino i Cion ka kokowu ki i opii, wun jo pa Yakobo ma wuweko timo gin marac. “Doŋ ki tuŋ bota, man en aye obedo gicikke ma acikke kwede kwedwu, Cwiny Maleŋ ma mera ma doŋ atyeko miyo botwu, ki lokka ma doŋ atyeko keto i dogwu, pe doŋ bia ki i dogwu, kadi ki i dog litinowu, nyo i dog litino pa litinowu, cakke tin cito kwede anyim kun bedo bene nakanaka.” A malo ba, in Jerucalem, pien ceŋŋi doŋ otuc woko, deyo pa Rwot doŋ otuc ocaro komi woko. Nen, colpiny biumo lobo woko, mutu macol licuc biumo rok mukene woko, ento Rwot bituc pi caŋo komi, gibineno deyone i komi. Lurok gibibino i Ieŋ pinnyi, luker bibino i dero ceŋ ma otuc i komi. Tiŋ waŋi malo wek koŋ inen piny, jo ducu gibicokke kacel, gibibino boti; awobeni gibia ki ka mabor, anyirani gibitiŋogi atiŋa i kor. Ibineno ci komi biryeny aryenya, cwinyi bimyel ci icako bedo ki yomcwiny; pien lim mabup me nam doŋ gibiweko i ciŋi, ki lonyo pa rok mapol gibikelo boti. Lwak kinaga mapol biumi woko, litino kinaga me Midian ki me Epa; kadi wa jo me Ceba ducu gibibino boti. Gibibino gikelo jabu ki odok luban, gibitito ki pak pi gin mabeco ma Rwot otimo. Romi ducu me Kedar gibicokogi boti, nyogi romi me Nebayot bikonyi; gibikelo macalo gitum i wi keno tyer me atyera bota, ci agamogi, dok abimedo deyo i kom oda me deyo. Magi kono jo mene ma gituk calo pol-li, nyo macalo amam ma gidok i dog odigi? Pien rok ma tye i dog nam bikura, mel ma oa ki i Tarcic aye bitelo yo, me kelo Litinoni ki ka mabor kacel ki lonyo madwoŋ twatwal, pi nyiŋ Rwot Lubaŋani ma en ŋat Maleŋ me Icrael, pien en doŋ oketo deyo i komi. Lurok bigero celli, lukergi bikonyi ki tic; pien i kare ma yam akemo omaka, agoyi, ento pi mitina kena doŋ atyeko timo kica boti, Dogcelli bibedo twolo kare ducu, pe gibiloro i dyeceŋ kadi i dyewor; wek dano gukel lonyo pa rok ducu boti, kun giwoto ma gidorre dorre me deyo kacel ki lukergi, Pien rok ki ker ma pe biye locci bito; kodi rok macalo meno pud dok gibibalo lobogi woko aye. Deyo me Lebanon bibino boti, ciprec ki yadi mabeco ducu, wek omi kabedona maleŋ onen ma mwonya; dok bene abimiyo kabedo me teno tyena poŋ ki deyo. Litino pa jo ma yam giuni gibibino boti laguno; ki jo ma yam gubedo ka cayi gibiryebbe piny i te tyeni; gibilwoŋi ni in ibedo gaŋ pa Rwot, Cion ma obedo gaŋ pa ŋat Maleŋ me Icrael, Ento kono yam koŋ giweki ata, gikweri woko, kun ŋat mo pe wok boti, abimiyo ibedo dit nakanaka, jo me kare ducu bibedo ki yomcwiny piri. Ibibedo ka doto cak pa jo me rok ducu, ibidoto tuno pa luker; ibiŋeyo ni an a Rwot, anaye lalarri, dok an aye ma akoko in, an a Won Twero ma abedo Lubaŋa pa Yakobo. Ma ka mola, an abikelo jabu, ma ka nyonyo, abikelo ryal, ma ka bao, abikelo mola, ma ka gweŋ abikelo nyonyo. Abimiyokucaye bedo maka ludoŋo ma loyo tic, kit ma atir aye bibedo nyamparani. Tim me bwami pe dok biwinnye i loboni, kadi yak nyo kadi balle pa lobo pe binen i waŋ apokki loboni. Ibicako nyiŋ celli ni, Larre, ki dogcelli ibilwoŋo ni, Pak. Ceŋ pe dok bimenyi dyeceŋ, kadi Leŋo me dwe bene pe bimenyi dyewor; Rwot aye ma bimenyi nakanaka, Lubaŋani aye ma bimiyo ibedo ki deyo. Ceŋŋi pe dok bipoto, dwe bene pe birwenyo; pien Rwot aye ma bimenyi nakanaka, kare me kumoni bene bigik. Joni ducu doŋ gibibedo jo ma kitgi atir; gibileyo lobo doŋ doko megi matwal, gibinen macalo jaŋ yat ma an aye apito, tic ma an kikoma aye atiyo wek dano gumiya deyo. Doggola pa joni nok ento olo doŋ bidoko kaka, ŋat matidi mada bi doko twon rok mo matek. An a Rwot; abimiyo man timme oyot ka karene oromo. Rwot Lubaŋa doŋ ocwalo Cwiny mere i koma, pien doŋ owira woko ki moo, wek ater lok me kwena maber bot jo ma giunogi. Oora bene me caŋo jo ma cwercwiny onurogi, ki me tito bot jo ma tye i opii ni gibigonyogi woko, ki jo ma gitweyogi i mabuc ni gibiyabo botgi doggola gibikatti woko; dok ni atit pi mwaka ma Rwot bitimo iye ber bot dano, ki kare me culo kwor pa Lubaŋawa; pi kweyo cwiny jo ma kumo. Oora me miyo lalukana me deyo bot jo ma kumo i Cion ma ka buru, moo wir me yomcwiny ma ka kumo, ruk me pako Lubaŋa ma ka bedo ki cwiny magoro. Gibilwoŋogi ni yadi me kit ma atir, yadi ma Rwot opito, wek omiye deyo, Gibigero gedo odoco i wi obur ma yam oballe con, ka ma yam giyako-gu ducu gibigero odoco; gibiyubo gaŋi ducu ma onoŋo gibalogi woko, ma onoŋo oballe con i kare pa yalwak mapol mukato anec, Lurok gibicuŋ kun gikwayo romiwu, gin bene aye ma gibipuro potowu ki poto olokwu; ento wun gibilwonowu ni ajwagi pa Rwot, dano gibilwonowu ni wun lutic pa Lubaŋawa; wubicamo lonyo pa rok mapol, wu bibedo bene ki deyo pi limgi. Ma ka lewic ma yam omakowu gibimiyowu lim mabup tyen kiryo, ma ka jerowu ki yet, wubibedo ki yomcwiny pi gin mabup ma doŋ tye i ciŋwu, Pi meno wubinono lim ma gipokkiwu i lobowu kiryo i wi wadigi; wubibedo doŋ ki yomcwiny nakanaka, Rwot owaco ni, “An amaro ŋolo kop atir, adag yak ki tim marac; abiculo waŋ can ma opoto i komgi cakare, abicikke kwedgi i gicikke ma ri nakanaka. Likwayogi binene matek i kin lurok, ki nyiŋ litino ma gin gunywalo biwinnye adada i kin rok ducu; jo ducu ma gibinenogi gibinian i komgi, ni gin gubedo rok ma Rwot omiyo botgi gum.” Cwinya bibedo yom matek i Rwot, abium pi Lubaŋana; pien doŋ otyeko ruka woko ki boŋo me larre, dok bene ouma woko ki jor me kit ma atir, macalo lanyom ma orukke maber ki tok me deyo, dok macalo dako manyen ma orukke ki ruk me wel. Pien kit macalo jami mapatpat twi i lobo, ki poto bene weko gin ma gicoyo iye twi, kit meno Rwot Lubaŋa bene bimiyo kit ma atir, ki pak, twi i nyim rok ducu. Pe abiliŋ pi Cion, pe bene abiywe pi Jerucalem, nio waŋ ma locce doŋ ocaro piny calo dero ceŋ dok larrene bene omenyo piny calo mac. Rok ducu bineno locci, in Jerucalem, ki luker ducu gibineno deyoni; doŋ gibilwoni ki nyiŋ manyen ma Rwot kikome aye bicako. Ibibedo calo tok me deyo ma tye i ciŋ Rwot, dok ibibedo macalo tok me ker ma nyuto loc pa Lubaŋani. Pe doŋ gibimedde ki lwoŋi ni gaŋ ma doŋ gibwoto woko, loboni bene pe gibilwoŋo ni lobo ma odoŋ obur, ento gibilwoŋi ni gaŋ ma calo dako ma cwinya yom i kome, kun gilwoŋo loboni bene ni dako ma ginyomo; pien Rwot cwinye yom i komi, dok loboni bibedo macalo dako ma ginyomo. Pien kit macalo awobi nyomo nyakoawobeni bene binyomi kit meno, dok kit macalo lanyom cwinye bedo yom pi nyako ger, Lubaŋani bene cwinye bibedo yom piri kit meno, In Jerucalem, aketo lukur-piny i wi celli malo; pe gibilin dyeceŋ ki dyewor benebene, Wun jo ma poyo wi Rwot, pe wuywe, dok bene pe wumiye kare me yweyo nio wan, ma en doŋ omiyo Jerucalem ocuŋ matek ma doŋ omiyo odoko gin ma gipako i wi lobo ducu. Rwot doŋ okwoŋo kwoŋ matek twatwal, kun kwoŋo ki bade me twer ni, “Pe dok abimiyo lukworri gicamo kani, lurok bene pe dok gibimato koŋo vinoni ma in iyelle me tiyo tic pire; ento jo ma gukayo kal gibicamo ci gipako iye Rwot, ki jo ma gupwono olok gibimato koŋo vinone i dyekal me kabedona maleŋ,” Wuwok ki kunnu, wuwok ki i dogcel, wuyub yo pi lwak; wutor yo, wutor yo gudo-gu woko, wucok gweŋ woko bene ki fye, ka doŋ wuil bendera malo pi rok ducu, Nen, Rwot doŋ otyeko tito lok man oo wa i agikki lobo, ni, wuwac bot jo Cion ni, “Nen larrewu doŋ tye ka bino; nen, bakacicce tye bote cul me ticce bene tye i nyime.” Gibilwoŋogi ni gin rok maleŋ, gin jo ma Rwot okokogi ki i can; dok bene gibilwoŋini, Gaŋ ma Rwot omaro, ma pe oweko woko ata. Man aŋa ma bino ki i Edommi, ki i Bojra ma oruko boŋo makwarri, ma oruko ruk me deyo-ni, kun tye ka nyatte ki twon tekone madit-ti? “Meno an ennu atye ka tito lok me loyo kop, an atek, atwero laro dano.” Piŋo kono boŋoni ma iruko-ni kwar, kun nen calo boŋo pa ŋat ma nyono olok me biyo pige? “Anyono olok i bur me biyo pige an kena, kun ŋat mo mukene ma oa ki i rok rriapat onoŋo pe bota; anyonogi woko lirwatrwat ki akemo adada; pige makwar macalo remo obedo ka kir i koma matek, omiyo boŋona ducu onywane woko marac. Pien nino me culo kwor onoŋo iye i cwinya, mwaka me koko jona bene doŋ oromo. “Anene piny, ci anoŋo ni pe tye ŋat mo ma twero kenya; auro twatwal, ento onoŋo pe tye ŋat mo ma romo miya teko; meno omiyo ciŋa an kikoma aye loyo loc, akeca aye omiyo anoŋo teko. Cen anyono rok mapol woko ducu piny ki kinigana, akemona omiyo gulimo atwom twatwal, dok aonyo remogi omol piny i ŋom.” Rwot onyuto berre bot jo Icrael Abitito pi mar pa Rwot ma pe lokke, kun anyuto pak pa Rwot bene, pi gin ducu mabe co ma en Rwot otimo piwa, ki twon ber madit ma en onyuto bot jo Icrael ma en otimo botgi pi kicane, kun lubo bene mar mere madwoŋ ma pe lokke. Pien en owacci, “Adada, gin jona, litino ma pe gibibwola”; cutcut en odoko Lalargi. 1 cangi ducu en bene oneno iye can, en kikome aye olarogi, pe lakwenane mo nyo kadi ki lamalaika. En okokogi pi mar mere ki pi krcane; en otiŋogi, ci obedo ka byelogi nine ki nino i kare macon. Ento gin gujemo woko i kome, omiyo kiniga omako Rwot, Cwiny mere maleŋ okumo twatwal. Pi meno en olokke odoko lakworgi, omiyo en kikome olwenyo kwedgi. Dano dok gupo pi kare macon, i kare pa Moses, ma latic pa Rwot, ci gupenyo ni, “ŋat ma yam okwanyo lukwat romine ki i nam-mi tye kwene’! En ŋat ma oketo Cwiny mere maleŋ i kingi-ni kono tye kwene? ŋat ma yam omiyo ciŋe me deyo owoto i ŋet Moses tuŋ lacuc, ma omiyo pii opokke dul aryo i nyimgi wek enoŋ nyiŋ ma ri nakanaka, ma otelogi kun giwok ki i dye nam matut-ti?” Gubedo calo aguragura ma woto i tim, pe gubedo ka gatte kadi ki acel. Cwiny pa Rwot omiyo botgi yweyo, calo dyaŋi ma guo i luŋ. Yam itelo joni kumeno, wek inoŋ kwede nyiŋ me deyo. Lega pi kica ki kony Kul waŋi ki i polo inen piny i lobo, inen piny ki i kabedoni maleŋ me deyo. Arimani ki tekki kono doŋ tye kwene? Mar meri ki kicani kono tye kwene? Tim ber, pe ikwerwa woko. Pien in aye i Wonwa, kadi bed Abraim pe neyowa, dok Icrael bene pe paro piwa; in Rwot giri ibedo Wonwa, dok ibedo lakokwa cakke yam con. Piŋo imiyo waŋak woko ki i yoni, ai Rwot? Piŋo imiyo wadoko jo ma cwinywa nwaŋ kun pe walwori? Dwog cen botwa pi jo ma gitiyo piri, pi kaka ducu ma gubedo meri kikomi. Joni maleŋ gubedo i kabedoni maleŋ pi kare manok mo twatwal, lukworwa doŋ gunyono kabedo man ki tyengi gubalo woko. Doŋ wadoko calo jo ma yam in pe iloyogi, wadoko calo jo ma pe gilwoŋogi ki nyiŋi. Kono ibaro polo woko likwak ilor piny, kono ber! Kono imiyo godi guyeŋŋe i nyimi, kit macalo mac moko kwede i lak yen, dok bene miyo pii walo, wek omi lukworri guŋe nyiŋi, dok rok ducu komgi myero omyel i nyimi! Yam itiyo gin mogo ma kelo lworo madwoŋ ma wan kikomwa pe waromo tamo pire, yam ilor piny, ci godi guyeŋŋe i nyimi. Cakke yam con ŋat mo gire pe owinyo, ŋat mo pe ma owinyo ki ite, ŋat mo bene pe oneno Lubaŋa mapat kono in keken, Lubaŋa ma tiyo tic pi jo ducu ma tye ka kure. In irwatte ki ŋat ma tiyo tic ma atir ki yomcwiny, irwatte ki jo ma po piri i yoni ducu. Nen, kiniga ceŋ omaki, pien onoŋo wabalo; wabedo ka timo bal pi kare malac twatwal. Tika wan wabilarre ada? Wan ducu doŋ wadoko calo ŋat ma kome ki keni, gin ma atir ducu ma watimo doŋ nen calo boŋo ma onyobbe woko ki gin me kwer. Wan ducu waner woko calo pot yat, balwa bene terowa woko calo yamo ma kodo. Pe tye dano mo ma lwoŋo nyiŋi, ma cukke ka maki Iikiŋ; pien in ikano want woko ki botwa, doŋ ibwotowa i balwa. Ento kadi bed kumeno, ai Rwot, in pud i Wonwa; wan lobo agulu, in aye lacwewa: wan ducu wabedo gin ma in aye itiyowa ki ciŋi. Ai Rwot, pe myero kiniga dok omaki matek, pe bene ibed ka po i kom balwa nakanaka, Koŋ inen, dok ipar, wan ducu wabedo joni. Gaŋini maleŋ ducu doŋ gudoko tim, Cion doŋ odoko tim, Jerucalem doŋ odoko obur. Otwa maleŋ, maber twatwal-li, ka ma yam kwarowa gipaki iye-ni, doŋ gityeko wanoŋe woko ki mac; kabedo ducu ma yam yomo cwinywa doŋ odoko obur. Ibidiyo cwinyi i kom jami magi, ai Rwot? Ibiliŋ, kun iunowa matek? Yam ayubbe pi gamo lok pa jo ma pe gikok bota, ento gin gigi pe gumito penya. Ayubbe bene ni myero gunona, ento pe gigi gutemo yenya. Abedo ka waco botgi ni, “An atye en, an atye en.” Aloko bot rok ma onoŋo doŋ pe gilwoŋo nyiŋa. Abedo ka ryeyo ciŋa dyeceŋ jwi bot jo ma gijemo woko ajema, jo ma woto i yo ma pe ber wacel, kun gilubo gigi ryekogi kengi, Gibedo ka ŋeto cwinya kare ki kare, kun gibedo ka tyero gitum bot jogi i potti, giwaŋo odok eceta-gu i kom matafali; gibedo ka bedo i lyel-gu, i dyewor gibedo i kabedo mogo ma i muŋ; gibedo ka camo riŋo opego-gu, jami tedogi ducu onyobbe woko ki pig riŋo lee ma gikwero. Gin jo ma giwaco ni, “Bed kaikeni kunnu, pe ibin cok kweda, pien an doŋ gipoka woko pat kwedi pien an aleŋ,” Jo magi calo yito ma duny i uma, gicalo mac ma pe to kadi ki acel. Nen, doŋ gityeko coyo lok i nyima ni, “An pe abilin aliŋa, ento abiculo. Adada, abiculogi gire, timgi maraco kacel ki tim maraco pa kwarogi, man Rwot ma owaco pien gubedo ka waŋo odok eceta i wi godi, dok gubedo ka yeta bene i wi ceregu ducu; abiporo culgi ma oromogi abiculogi pi balgi macon.” Rwot owaco kuman ni, “Kit macalo koŋo vino noŋŋe ki i nyig olok, doŋ dano giwaco ni, ‘Pe ibal woko, pien gum tye iye’, abitimo kit meno pi luticca, pe abityekogi woko ducu. Abimiyo likwayo a ki i kom Yakobo, ki jo ma bileyo wi godi na a ki i Juda; jona ma ayero gibileyo bedo megi, doŋ luticca gibibedo kunnu. Caron bidoko ka ma gikwayo iye romi, ki luk me Akor bidoko kabuto pa dyaŋi, bibedo pa jona ma gubedo ka yenya. Ento wun jo ma doŋ wubwoto Rwot, ma wiwu doŋ owil woko i kom got mera maleŋ, ma wuyubo meja pa jok wek omiwu gum, ma wupiko kono ma ginyo bo poŋ kikopo pi jok wek nyimwu obed leŋ, abimiyo ginekowu woko ki pala lucwan, wun ducu wubiguŋo aguŋa ka giŋolo ŋutwu, pien i kare ma yam alwonowu wun wukwero gamo doga woko, i kare ma abedo ka lok bene pe wuciko itwu ka winyo lokka, ento wubedo ka timo gin ma nen marac i nyima, wuyero bene gin ma pe yomo cwinya.” Meno omiyo Rwot Lubaŋa owaco ni, “Nen, luticca bicamo cam, ento wun kec binekowu; luticca bimato pii, ento wun orwo pii binekowu matek; luticca gibibedo ki yomcwiny, ento wun gibimiyo lewic makowu; yomcwiny bimiyo luticca giwera ento cwercwiny bimiyo wukok, dok bene bimiyo wudaŋŋe matek ki koko. Nyinwu bidoŋ bot jona ma doŋ ayero giceno ki dano, Rwot Lubaŋa kikome aye ma binekowu; ento luticce doŋ en bilwoŋogi ki nyiŋ mapat. Pi meno, ka ce ŋat mo lamo gum i kome kekene i lobo, en bilamo gum i kome kene ki nyiŋ Lubaŋa me ada, dok ŋat ma bikwoŋo kwoŋ i lobo man, bikwoŋo ki nyiŋ Lubaŋa me ada, pien wiwu doŋ biwil woko i kom can ma yam wuneno con, can meno doŋ birwenyo woko ki i wiwu.” Polo manyen ki lobo manyen Rwot dok owaco kuman ni, “Pien nen, aketo polo manyen ki lobo manyen; pe doŋ gibipo pi jami macon, pe bene dano mo bitamo pigi. Ento myero cwinywu obed yom kun wubedo ki yomcwiny nakanaka i kom jami magi ma aketogi-ni; pien nen, Jerucalem ma aketo bibedo me yomcwiny, jone bene bibedo ki yomcwiny madwoŋ. Abibedo ki yomcwiny i Jerucalem, cwinya bibedo yom i kom jona; dwan mo me koko pe dok biwinnye iye, kadi koko mo me can bene pe biwinnye iye, Latin mo ma ginywalo ma ri pi kare manoknok keken bene pe bibedo tye iye, kadi ladit mo muti ma pe bicobo karene, latin bito ma noŋo mwaka me ditte doŋ romo miya acel, labalo ma mwakane biromo miya acel noŋo giceno woko acena. Dano gibigero odi ci gibedo i igi, gibipuro poto olokgi, ci gibicamo nyige bene. Pe gibigero odigi ci giweko ŋat mukene aye bedo iye, pe gibipuro poto olokgi ci giweko ŋat mukene aye ma dok camo nyige, Jona gibiri ma rom aroma ki yat, jona ma an aye ayerogi gibibilo tic me ciŋgi pi kare malac. Ŋat mo i kingi pe biyelle ki tic noŋo, dok bene pe gibinywalo latin ci dok neno can; pien gin doŋ gibibedo litinic pa jo ma Rwot doŋ otyeko miyogr gum, kun gumgi-ni mako bene wa litinogi. Ma peya gulwoŋo lwoŋo, an abigamo doggi, ma pud gitye ka lok aloka, abiwinyo lokgi woko. Orudi ki latin romo gibicam kacel, labwor bicamo lum calo twon; twol bene bimoko apwa. Pe gibiketo ret i kom dano nyo kadi ki nek, i wi got mera maleŋ ducu.” Man Rwot ma owaco. Rwot owaco kuman ni, “Polo aye komkerra, lobo obedo kom me teno tyena. Kit ot aŋo ma onoŋo wutwero gero pira? Ka yweyona kono onoŋo bedo kwene? Jami magi ducu atiyogi ki ciŋa, pi meno jami magi ducu gubedo mega. Man Rwot aye ma owaco. Doŋ man aye dano ma abiciko waŋa i kome, dano mamwol, ma ŋut bene i cwinye, dok ma kome myeli lok ma an awaco. “Dano ma neko twon rom ki ŋat ma neko dano; ŋat ma tyero latin romo macalo gitum, rom ki ŋat ma turo ŋut gwok; ŋat ma kelo gityer me moko kwon tyero bota, rom ki ŋat ma tyero remo opego; ŋat ma waŋo odok luban macalo gityer me po rom ki ŋat ma lego gum i kom cal jok. Jo magi guyero yogi pigi kengi, cwinygi yom mere ayoma i timgi me-kipyeda. An bene abiyero can ma myero omakgi, abiyero can ma miyo lworo makogi marac twatwal; pien i kare ma yam alwoŋogi, ŋat ma ogamo doga pe, i kare ma aloko kwedgi, ŋat mo pe ma owinyo lokka; ento gutimo gin ma neo marac i nyima, guyero gigi gin ma pe yomo cwinya.” Wuwiny lok pa Rwot, wun jo ma komwu myel i lokke, “Utmegiwu ma gidagwu, ma guryemowu wucito woko cen pi nyiŋa, doŋ giwaco ni, ‘Koŋ wumi doŋ deyo bot Rwot wek koŋ wanen yomcwinywu’; ento gin aye gigi ma gibiweko lewic makogi kekengi. “Koŋ wuwiny woo madit ma tye i gaŋ; dwan mo ma a ki i ot pa Lubaŋa! Meno dwan Rwot, ma tye ka culo kwor i kom lukworre. “Dako nywal cutcut ma peya mwoc ogoyo? En twero nywalo latin laco ma peya arem ocakke i kome? Aŋa ma yam koŋ owinyo kit gin macalo meno? Aŋa kono ma yam oneno kit gin macalo meno? Gibinywalo lobo i nino acel kaken? Dok bene gitwero nywalo rok kulu i dakika mo manok keken? Pien i kare ma arem pud ocakke acaka i kom Cion, cutcut en onywalo litino awo bene woko. itamo ni ka amiyo kare me nywalo jona oromo, ci pe aweko ginywalogi? An ma amiyo dano nywal-li aye dok abicego ot nyodo woko wek Cion pe onoŋ litino?” Man Rwot ma owaco, “Cwinywu obed yom kacel ki Jerucalem, cwinywu bene obed yom pire, wun jo ducu ma wumare; wubed ki yomcwiny madwoŋ kacel kwede, wun jo ducu ma kumo pire; wek wudot cak ki i tunone okwe cwinywu, calo latin ma doto tuno pa minne, wek bene wumwony cakke ki yomcwiny, pien cak dwoŋ twatwal i kore.” Pien Rwot owaco kuman ni, “Nen, abinyayo kuc bedo dit bote calo kulu, ki lonyo pa lurok calo kulu ma opoŋ ma mol twatwal; wubidoto cak ki i tunone, en bitiŋowu woko i laknete, dok bene wubibedo ka tuko i eme. Abikweyo cwinywu, calo latin ma minne kweyo cwinye; cwinywu bikwe i Jerucalem. Wubineno, ci cwinywu cako bedo yom, komwu bibedo yot calo lum ma pud lot alota; meno bimiyo wuŋeyo ni, Rwot konyo jo ma tiyo pire ento akemone tye i kom lukworre. “Pien nen, Rwot bibino ki mac, kun gadigadine ducu bedo madwir calo yamo lapiru; me coro akemone i komgi ki kiniga malyet adada, kun jukogi ki leb mac, Pien Rwot biŋolo kop i kom dano kimac, dok bene en bineko jo mapol woko ki pala lucwan; jo ma en Rwot bineko bibedo pol mada. “Jo ma gilonnye kekengi doŋ me bedo leŋ me cito i potti, kun gilubo dano mo ma tye i dyere, ma gicamo riŋo opego ki gin mogo me kwer ki oyoo adeŋ-gu, gin ducu gibitum woko kacel dok lawaŋacel,” man Rwot ma owaco. “Pien aŋeyo ticgi ki tamgi, abibino me coko rok ducu ma loko leb maptpat kacel; gin gibibino ci gineno deyona, abiketo lanyut i kingi. Abikwanyo jo mubwot ki i kingi kenyo, abicwalogi bot lurok, bot jo Tarcic, Put ki Lud, ma gin jo ma gitelo atum, bot jo Tubal ki Javan, ki i lobo ma tye i dog nam ka mabor, ma pud peya guwinyo kit ma nyiŋa oywek kwede, kadi neno deyona i kin lurok. Gibikelo utmegigi ki i rok ducu macalo gityer me atyera bot Rwot, kun gikelogi ki aguragura, gadigadi, kitara, kana ki kinaga-gu wa i wi got mera maleŋ ma tye i Jerucalem, kit macalo jo Icrael kelo kwede gityergi me moko kwon i atabo maleŋ i ot pa Rwot. Abikwanyo jo mukene i kingi bene me bedo ajwagi ki Lulevi, man Rwot ma owaco. “Pien kit macalo polo manyen ki lobo manyen ma abitiyo, biri i nyima,” Rwot ma waco, “likwayowu kadiwa nyinwu bene biri kit meno. Por dwe ki por dwe, cabit ki cabit jo ducu gibibino i nyima ka wora,” Rwot ma owaco. “Gibikato woko gicito ka neno kom dano muto ma yam onon o, gujemo woko i koma; pien kwidi ma camo komgi-ni pe to, mac ma iye bene pe giromo nekone, gin gudoko gin ma i dano ducu okwero.” Man lok pa Jeremia wod pa Ilkia, ma en ŋat acel i kin ajwagi ma yam onoŋo gibedo i Anatot i lobo pa Benjamin. Lok pa Rwot obino bote i mwaka me apar wiye adek me loc pa Yocia wod pa Amon, kabaka me Juda. Lokke obino bene bote i kare me loc pa Yekoyakim wod pa Yocia kabaka me Juda, o kwede wa i agikki mwaka me apar wiye acel me loc pa Jedekia, wod pa Yocia, kabaka me Juda, o wa i kare ma doŋ gitero kwede jo Jerucalem woko i opii i dwe me abic. I kare meno lok pa Rwot obino bota ma wacci, “I kare ma onoŋo peya acweyi i i meni onoŋo doŋ aŋeyi, dok i kare ma peya ginywali onoŋo doŋ atyeko kweri woko ibed leŋ pi ticca, ayeri me bedo lanebi bot rok ducu,” Ka doŋ agamo lokke kun awaco ni, “Aya, Rwot Lubaŋa! Nen, an pe aŋeyo lok, pien an pud latin mamwa.” Ento Rwot odok iye owacca ni, “Pe iwacci, ‘An latin mamwa’; pien ibicito bot jo ducu ma abicwali ni icit botgi, dok bene gin ma an abiciki kwede en aye in ibiloko, Pe ibed ki lworo mo i komgi, pien atye kwedi, abilari, man Rwot ma owaco.” Cutcut Rwot ocwalo ciŋe ogudo doga; ka en Rwot owacca ni, “Nen, doŋ atyeko keto lokka i dogi. Nen, doŋ atyeko keti i nino man me loyo rok mapol ki ker mapol, pi putogi ki mukogi wo ko bene, pi balogi ki turogi woko bene, ka gerogi odoco ki ka pitogi bene,” Lok pa Rwot dok obino bota ma penya ni, “Jeremia, it ye ka neno aŋo?” Ci agamo ni, “At ye ka neno yat otit.” Lacen Rwot owacca ni, “Ineno kara maber, pien atitti ni atye ka neno lokka, amito ni oti ticce ocob kakare.” Lok pa Rwot dok obino bota pi tyen me aryone, ma wacci, “It ye ka neno gin aŋo?” An adok iye awacci, “Anene agulu ma pii tye ka walo ki iye, ma doge olokke okemo yo tuŋ acam.” Ci Rwot owaco bata ni, “Gin marac bia ki yo tuŋ acam bino poto i kom jo ducu ma gibedo i lobo man. Pien nen, atye ka lwoŋo rok ducu ma gitye i te ker ducu ma yo tuŋ acam, gibibino ci ŋat acel acel bicibo komkerre i dog gaŋ me Jerucalem, ma girumo celle woko litit pi lweny i kome, ki pi lweny i kom gaŋi ducu me Juda, Man Rwot ma owaco, Dok abiŋolo koppa i kom jo Juda pi timgi maraco ducu ki pi bwota woko; gubedo ka waŋo odok eceta bot lubaŋa mogo mukene, kun gibedo bene ka woro gin ma gutiyo atiya ki ciŋgi. Ento in, di cwinyi matek; a malo, ci itit botgi kit gin ducu ma aciki kwede. Cwinyi pe myero oballe i komgi, wek an bene pe abal cwinyi i nyimgi. Doŋ inen, atye ka miyo ibedo macalo gaŋ me cel go go matek, macalo wir nyonyo, ki cel mola, pi gwoki i kom jo me lobo man ducu, pi gwoki ki i kom luker me Juda, rwodine, ajwagine, ki i kom lwak ducu me lobo man. Gibilweny i komi, ento pe gibitwero loyi, pien an atye kwedi pi lari.” Man lok pa Rwot kikome, Lok pa Rwot obino bota ma wacci, “Cit ituc lok man bot jo Jerucalem, wek guwiny. Rwot owaco kuman ni, Pud apo pi gen ma ibedo kwede i koma nia ka tinoni, mar ma ibedo kwede macalo nyako ger, kit ma ibedo ka luba kwede wa i dye tim, i lobo ma yam pe gicoyo iye kodi mo, Icrael onoŋo yam obedo rok ma gikwero obed maleŋ pi Rwot, macalo cam ma okwoŋo cek ma en okayo, Jo ducu ma gucamo cam meno gulokke gudoko lubal; gin maraco obino opoto i komgi, man Rwot ma owaco.” Wuwiny lok pa Rwot, wun jo me ot pa Yakobo, ki wun jo me doggola ducu me ot pa Icrael. Rwot dok owaco kuman ni, “Kit gin aŋo marac ma kwarowu gunoŋo ni atimo ma omiyo gua woko ki bota gucito woko ka mabor kweda-ni, gubedo ka lubo gin ma konnye pe, omiyo gin bene gudoko jo ma konygi pe-ni? Gin pe gupenyo ni, ‘Rwot ma okwanyowa woko ki i lobo Ejipt-ni mono tye kwene, ma otelo wiwa i dye tim, i lobo tim aroo ma tye iye lwak bur mapol, i lobo mutwo ki mutu me colpiny ma ocido licuc, ki lobo ma yam dano mo pe kato ki iye, ka ma dano mo bene pe bedo iye?’ Ci akelowu i lobo ma ceko cam mabup adada wek wuyom cwinywu kun wucamo cam ma ocek iye ki gin mabeco ducu ma tye iye. Ento i kare ma wubino-ni wubalo lobona woko, wuloko gipinnya odoko gin me kwer. Ajwagi bene gupenyo ni, ‘Rwot mono tye kwene?’ Jo ma gin ludiro i cik bene onoŋo pe giŋeya; luloc gutimo roc i koma; lunebi gubedo ka tyeto lok i nyiŋ jok Baal, gubedo ka lubo kor cal jogi ma pe konyo.” Rwot owaco ni, “Pud abipenyo dogwu, abipenyo bene wa dog likwayowu, Pi meno koŋ iŋol nam ikat loka Caiprac wek inen, nyo koŋ icwal dano ocit i Kedar wek ociŋi maber twatwal; nen ka ce gin ma kit meno yam obedo tye con. Tye rok mo ma oloko lubaŋane pi lubaŋa mo mukene, kadi bed onoŋo gin jogi mamwa? Ento jona doŋ guloko Deyogi woko pi gin ma pe konyogi kadi ki acel. In polo, bed ki ur pi lok man, bed ma inen, ma lworo obwoyo komi woko adada, man Rwot ma owaco, pien jona doŋ gutyeko timo bal aryo maraco; doŋ gubwota woko, kun-an aye abedo-wan it me pii me kwo, gin dok gukwinyo taŋi pii megi pigi kengi, taŋi mutur, ma pe twero jolo pii kadi matidi mo, “Icrael mono obedo opii? En latic ma ginywalo anywala i paco? En doŋ odoko macalo ginayaka kono niŋniŋ? Lwak labwor ducu doŋ gukok woko i kome matek, gubworo kun gikok ki dwangi maloŋo adada. Gubalo lobone woko odoŋ noŋo; gaŋine ducu doŋ gudoko wi obur, laboŋo dano mo ma bedo i igi. Medo i kom meno, jo Mempic ki jo Tapanec doŋ guketo ret i wiye woko. Pe wun giwu aye ma wukelo can man i komwu kekenwu pi bwoto Rwot Lubaŋawu, i kare ma yam en obedo ka telo yo botwu-ni? Doŋ kombeddi ka wucito i Ejipt ci wunoŋo iye kit kony aŋo, kun wucito ka mato pii ma i kulu Nail? Nyo ka wucito i Aciria kono wuno-. Ŋo iye kit kony aŋo, kun wucito ka mato pii ma i kulu Euprate? Balwu aye bikelo pwod i komwu, ki bwoto Lubaŋa woko aye bikelo can i komwu me jukowu. Wuŋe dok wunen ni man gin marac dok me cwercwiny pi wun me bwoto Rwot Lubaŋawu woko; kit lworo mo ma wulwora kwede pe i iwu wacel, man Rwot Lubaŋa me mony aye ma owaco. “Yam con wuturo okolwu woko dok bene wucodo ogwil ma gitwe-yowu kwede woko; ci wuwacci, ‘Pe abibedo laticci.’ Iyo, i wi cere mamalo ducu kadi i te yat ma pote oluk-gu wubedo ka ryebbe piny macalo malaya, An yam onoŋo apitowu kun wua ki i kom olok mamit, akwanyowu ki i kom olok ma nyige ducu beco adada. Wun dok wucako lokke niŋniŋ ci wudoko olok me tim-mi? Kadi bed wulwok komwu ki cabun magwa kadi bed wulwokke ki cabun ma bwoyone dwoŋ, lwit bal aliiwu noŋo pud odoŋ tye i nyima, man Rwot Lubaŋa ma owaco. Wutwero waco niŋniŋ ni, ‘An gira pe anyobbe ki bal, pe bene abedo ka woro jogi Baal’? Koŋ inen ojwe tyeni ma iwoto kwede i luŋ; dok myero iŋe gin ma doŋ itimo. In ibedo calo roya kinaga ma woto lubo yone kene, calo kana me tim ma doŋ oniyo woko ki bedo i tim, ma ywayo yamo ki ume kun mito twon! Aŋa ma twero juko gin ma cwinye pyette iye? Jo ducu ma giyenye pe myero guol komgi; gibinoŋe i dwene kikome. Gwok tyeni pe iwot kwede laboŋo war, ki dwani bene wek pe otwo woko ki orwo pii. Ento in iwaco ni, ‘Pe doŋ konyo, pien doŋ amaro lubaŋa pa lurok, dok bene doŋ abiwoto alubo korgi.’ “Kit macalo lakwo lewic mako ka ce gimako ka kwalo gin mo, kit meno jo me ot pa Icrael lewic bene bimakogi: gin kikomgi, lukergi, rwodigi, ajwagigi, kadi wa lunebigi, ma giwaco ki yat mo-ni ni, ‘In i wora,’ dok giwaco ki got mo-ni ni. ‘In aye ma inywala.’ Pien onoŋo guloko ŋegi woko bota, pe onoŋo ginena ki waŋgi, Ento i kare ma gitye i can giwacci, ‘A malo ilarwa!’ Ento lwak lubaŋawu-gu, ma wutiyo piwu kenwu gitye kwene? Wek gua malo ka ce gitwero larowu, i kare ma noŋo wutye i can; pien lwak lubaŋawu gipol ma girom aroma ki wel gaŋiwu, Wun jo Juda.” Rwot owacci, “Piŋo wuŋur i koma? Wun ducu doŋ onoŋo wujemo woko i koma. Yam apwodo litinowu kwe, pe kitgi oyubbe kadi ki acel; pala lucwanwu kekenwu aye ma oneko lunebiwu otyeko woko calo labwor ma owor ma tyeko dano woko. Doŋ wun jo me kare man, wuwiny lok pa Rwot. An mono onoŋo abedo macalo tim bot jo Icrael, nyo macalo lobo me mutu? Piŋo kono jona giwacci, ‘Wan wabibedo kit macalo wamito, pe wabibino boti matwal’? Wutamo ni nyako mo wiye twero wil i kom ginaruka me deyone, nyo nyako ger wiye twero wil i kom gomcine me nyom? Ento jona wigi owil woko i koma pi lwak nino ma welle pe kwanne. “Kit ma dok iŋeyo yo maber me maro kit me tarwaŋ! Kadi wa mon ma kitgi raco in aye ma ipwonyogi ki tim me tarwaŋ. Dok bene i kom boŋo ma i pyeri gityeko noŋo iye remo pa lucan ma pe gitye ki bal alii mo; yam bene pe inoŋogi ka turo ot wek gidony iye. Doŋ i kom lok magi ducu in iwacci, ‘An ape ki bal mo; adada kinigane doŋ otyeko a woko ki i koma.’ Nen, abiŋolo kop i komi pi waco ni, ‘Pe onoŋo abalo.’ Piŋo ibedo ka wirre ki wot kun iloko yoni atata! Jo Ejipt gibimiyo lewic maki kit macalo yam jo Aciria guketo lewic i komi-ni. Ibia ki kunnu idwogo woko cen ma noŋo idodo ciŋi i wii, pien Rwot doŋ okwero jo ma it ye ka genogi-ni woko, dok gin pe gibikonyi miyo ibedo maber wacel.” Rwot owaco ni, “Ka laco mo oryemo dakone woko, ce dakone oa ki bote ocito woko, ci doŋ odoko dako pa laco mukene, cware mukwoŋo-ni pud dok bidok bot dako-nu? Ci meno pe bimiyo lobo nyobbe woko ki bal twatwal? Ibedoka timotimkwele ki jo mapol; ci dok pud itwero dwogo bota adada? “Tiŋ waŋi malo wek inen cere mutiŋŋe malo mabor-gul Wi cere mene mudoŋ ma pe co obuto kwedi iye? I ŋet yo ducu ibedo ka kuro pacogi ducu ma gimari-ni calo Laarab mo ma bedo i dye tim. Doŋ ibalo lobo woko ki tim kwele kwele me malayani-ni, Mumiyo kadi kot bene doŋ ojukke woko, ki kot me oro ma onoŋo myero ocwer bene doŋ pe; ento tarwaŋ pud omoro waŋi i tim me kwele, ikwero woko ni lewic pe omaki. Pud pe ilwoŋa kombeddi ni, ‘Wora, in ibedo larema nia wa ka tinona’? Kun itamo ni, ‘En pe bibedo ki kiniga i koma nakanaka, pe bibedo ki akeca nio wa i agikki.’ Nen, in doŋ iloko, ento kono doŋ ityeko timo kit bal ducu macalo itwero.” I kare pa kabaka Yocia, Rwot owaco bota ni, “Doŋ ineno gin ma Icrael ma pe genne-ni otiyo, kit macalo obedo ka cito kwede i wi godi maboco ki i te yadi muluk-gu kun timo iye tim kwele kwelene? Abedo ka tamone, ni ‘Ka doŋ en otyeko timo timme ducu ci en bidwogo bota’; ento en pe omed de ki dwogo cen, kadi laminne Juda ma jone lugoba-ni bene oneno. Kadi bed Juda oneno ni laminne Icrael obedo ka timo abor twatwal i nyima, en gin mumiyo yam aryeme woko kun amiyo bote waraga ma nyuto ni doŋ apokke woko kwede, ento Juda lacarcar-ri pe obedo iye ki lworo mo wacel. En bene ocito obedo ka timo tim me kwele kwele. Pien onoŋo tim me kwele obedo gin mayot ki tuŋ bote, omiyo obalo lobo woko ki bedo ka timo abor ki got wa ki yat-gu, Ento pi lok man ducu Juda ma laminne ma lacarcar-ri pe olokke odwogo bota ki cwinye ducu, ento odwogo i nyima ki kome keken, man Rwot ma owaco.” Rwot owacca ni, “Icrael ma pe genne-ni balle nen nok i waŋa kato pa Juda ma jone lugoba-ni, Cit ituc lok magi i but piny yo tuŋ acam, kun iwacci, ‘Dwog cen, in Icrael ma pe genne-ni, man Rwot ma owaco. Pe abineni ki kiniga, pien an lakica mada. Kiniga pe bimaka nakanaka. Man Rwot ma owaco. Ye balli keken, ni ityeko jemo woko i kom Rwot Lubaŋani, ci ikeyo berri woko i kin lubaŋa pa lurok, kun ibedo ka worogi i te yadi ducu muluk-gu, dok bene pe ibedo ka winyo lokka, man Rwot kikome ma owaco. “Wudwog cen, wun litino ma pe genne, Rwot ma owaco; pien an laditwu; abikwanyowu, kun akwanyo dano acel ki i gaŋ acel acel, ki jo aryo ki i kaka acel acel, ci abikelowu i Cion. “‘Abimiyo botwu bene lukwat ma yomo cwinya, wek gukwawu, ma gipitowu kun gitye ki ŋec wa ki niaŋ maber. Ka ce doŋ inen ni wunya i lobo ma welwu omedde i kare meno, man Rwot ma owaco, pe dok gibibedo ka lwoŋo nyiŋ canduk me gicikke pa Rwot. Pe dok wubitamo pire, pe wubipo pire, dok bene pe gibiyubo odoco. I kare meno doŋ gibilwoŋo Jerucalem ni komker pa Rwot, ci rok ducu gibicokke iye i nyim Rwot, kun pe dok gilubo tam maraco i cwinygi matwal, ŋutgi bene pe doŋ bibedo nwaŋ. I kare meno jo me ot pa Juda gibiribbe woko kacel ki jo me ot pa Icrael, ci gibia kacel ki i lobo ma tye yo tuŋ acam gibino i lobo ma yam amiyo bot kwarogi me bedo gipinygi. “‘Abedo ka tamo kit macalo abiketowu kwede i kin litinona, kun amiyowu bene lobo ma yomo cwinywu, gipiny maber makato lobo pa rok mukene ducu. Dok abedo ka tamo ni gwok wubilwoŋa ni an a Wonwu, dok ni pe wubilokke wuweko luba. Adada, kit macalo dako ma pe lagen weko kwede cware, wun bene wubedo laboŋo gen i koma kit meno, wun jo me ot pa Icrael, man Rwot ma owaco.’’’ Dwan dano ma kok tye ka winnye ki i wi cere mubedo barbar, kun pido kwede pi litino pa Icrael, pien guŋak woko ki i yogi, wigi doŋ otyeko wil woko i kom Rwot Lubaŋagi. “Wudwog cen bota, wun litino ma wupe ki gen, an aye ma abicaŋo cwinywu ma pe ki gen-ni woko.” “Nen, wabino boti; pien in aye i Rwot Lubaŋawa. Adada kony mo pe ginoŋo ki i wi got ka ma woo pa lwak dano winnye a ki iye-nu. Adada larre pa Icrael tye bot Rwot Lubaŋawa. “Ento cakke wa ka tinowa tim me lewic ocamo gin ducu ma yam kwarowa guyelle pigi, dyegigi ki romigi, dyaŋigi, awobegi ki anyiragi. Weku doŋ wabutu piny ki lewicwa-ni, wek tim maraco me lewic ma watimo aye oum komwa woko; pien doŋ watyeko timo bal i kom Rwot Lubaŋawa, waŋ kacel ki kwarowa, cakke wa ka tinowa o kwede wa onyoo. Dok bene pe wabedo ka lubo lok pa Rwot Lubaŋawa.” “Ka ce wudwogo cen bota, wun jo Icrael, man Rwot ma owaco, myero wudwog giwu. Ka ce wukwanyo gin me kwerwu woko ducu ki i nyima, ma pe doŋ wu biŋak woko aye, dok bene ka ce wukwoŋo kwoŋ ni, ‘Kit macalo Rwot tye kwe-ni,’ myero wukwoŋ i ada, kun wulubo ŋolo kop atir, dok bene ki lencwiny, ci lurok ducu gibilego Rwot wek oony gum mere i komgi, doŋ gibibedo ka miye deyo.” Rwot owaco kuman bot jo Juda ki bot jo ma gibedo i Jerucalem ni, “Wucer poto botwu woko maber, pe wuco kit kodi mo i kin okuto, Wun doŋ myero wulirre woko pi tiyo tic pa Rwot, wulirre i cwinywu, wun jo Juda kacel ki jo ma wubedo i Jerucalem; wek akemona pe okatti woko ma lyel macalo mac, ma biwaŋo piny woko ma ŋat mo pe romo nekone, pi gin marac ma onoŋo wutimo.” Wutit lok man i Juda, kun wutuco pire bene i Jerucalem, ma wuwacci, “Wukut tum wek kokone orom i lobo woko ducu; wudaŋŋe matek kunwuwacci, ‘Wucokke kacel wek wacitu i gaŋi me cel gogo-gu!’ Wutiŋ benderawu malo wukem Cion, wuriŋ woko wular komwu, pe wubedi, pien amito kelo gin marac ki yo tuŋ acam, ki to-piny madit mada ma neko danotyeko wako. Labwor doŋ okatti woko ki i buŋa muculle likuŋ, lanek rok ducu doŋ okatti woko; oa woko ki i kabedone wek ebal lobowu woko odoŋ obur; gaŋiwu ducu doŋ bidoko wi obur laboŋo dano mo ma bedo i igi. Pi man wutwe boŋo cola i pyerwu, wukum kun wukok; pien kiniga mager pa Rwot pe olokke oa woko ki i komwa.” Rwot owacci, “I nino meno tekcwiny pa luker ki pa rwodi bitum woko; ajwagi bibaŋŋe woko, ki lunebi bene gibiuro matek.” Cutcut agamo awacci, “Aya, Rwot Lubaŋa, adada in doŋ ibwolo lwak man ki jo Jerucalem marac mada, kun iwacci, ‘Wubibedo maber ki kuc’; kun doŋ onoŋo imiyo ginekogi woko ki pala lucwan.” I kare meno gibiwaco bot lwak man ki bot jo Jerucalem ni, “Yamo malyet oa ki i wi cere ma yadi pe iye ma tye i tim aroo, kun kodo dok kwede yo tuŋ bot lwakka, pe pi pyetogi macalo kal wek gubed maleŋ; yamo ma acwalo-ni ger mupoŋ mada, ma pe doŋ romo pyetogi apyeta wek gubed maleŋ, An aye kombeddi ma atye ka lok pi ŋolo kop i komgi.” Nen, tye ka bino calo pol, gadigadi lwennye ducu gibedo calo yamo lapiru; aguragurane gidwir giloyo ocur woko. Can i wiwa, pien doŋ wato watum woko matwal! Wun jo Jerucalem, myero wulwok cwinywu woko i timo tim maraco, wek wularre. Tamwu maraco-gu bibedo mono i cwinywu pi kare ma rom mene? Dwan dano winnye kun a ki i Dan ma tito ki i wi got Epraim pi gin marac ma bitimme. Tit lok man bot rok ducu, ni en tye ka bino; tit ki Jerucalem bene ni. “Mony ma rumo gaŋ bino kun gia ki i lobo mabor; gidaŋŋe ki woo mapol i kom gaŋi me Juda. Gurumo Juda woko dyere calo lukur poto ma gurumo poto woko litit, pien onoŋo Juda ojemo woko i koma, man Rwot kikome ma owaco. Kitwu ki gin ma wutimo ducu aye okelo can man i komwu. Man aye kipwolawu, can makec bene atika; can man oton wa i cwinywu kikome.” Arem doŋ omaka woko, omaka woko do! Arem doŋ wano koma adada. Oii, mil wa i pal cwinya kikome! Adunona tye ka gone atata matek lirimrim; pe atwero liŋ wacel; pien abedo ka winyo koko tum ma gikuto, pi oduru me lweny. Can madit poto dodde i kom can madit wadi, lobo ducu doŋ gibalo woko, piny odoŋ obur. Gijwero kemana woko oyotoyot mada, gimuko kicikana woko bene pi dakika manok keken. Abibedo ka neno bendera pi kare marom mene, kun abedo ka winyo koko tum? “Pien jona-gu gin lumiŋ, pe giŋeya; gin litino ma wigi odiŋ, pe gitye ki kit niaŋ mo. Giryek megi i tiyo gin marac keken, ento pe giŋeyo tiyo gin maber.” Ka aneno lobo, ci aneno oballe woko odoko obur, laboŋo gin mo ma odon iye; ki malo i polo kuca, lakalatwe ki dwe bene pe giryeny. Aneno wi godi, ci aneno gitye ka yeŋŋe ayeŋa ni yegeyege, cere-gu noŋo tye ka wirre liwir ma gigwennye agweriya, Aneno ci anoao dano mo pe kunnu, winyo me polo ducu gutuk gucito woko. Aneno piny, ci anoŋo ni lobo ma yam ceko cam twatwal-li doŋ odoko tim aroo, gaŋi ma i iye ducu doŋ gibalo woko gudoko obur nyim Rwot ma onoŋo kiniga mager omako-ni. Pien Rwot onoŋo owaco kuman ni, “Lobo man ducu bidoko obur; ento pe abityekone woko liweŋ. Lobo bikumo pi lok man, ki polo bene bicido woko macol licuc. Pien doŋ atyeko tito ka maleŋ gin ma onoŋo ayubbe me timone; kica pe bimaka wacel, dok bene pe abiloko tamma.” Jo ma i gaŋ ducu guriŋo woko pi woo pa wegi aguragura ki wegi atero; gudonyo woko i buŋa macol, gucito wa i kin got-gu; gaŋi ducu doŋ gibwoto woko, dano mo pe ma bedo i igi. In gaŋ ma doŋ idoko wi obur-ri, piŋo iruko boŋo makwar? Piŋo kono idero komi ki gin me deyo ma obedo jabu jabu, kun iwiro waŋi woko ki rani wek onen maber makato? Iyelle noŋo me deyo komi ni onen maber. Pacogi-gu ducu gicayi acaya; giyenyo yo me neki woko. Awinyo koko mo ma cal ki koko pa dako ma tye ka rem ki nywal, ma tye ki arem madwoŋ calo dako ma pud nywalo latin kayone anywala, Ci on tye ka koko kun kwitte pi noŋo yweyo, kun ryeyo ciŋe woko ma wacci, “Can i wiya gira! Awille woko i nyim lunek dano.” Wurir; kun wugwennye agwenya i dye yo me Jerucalem, wunen ci myero wuniaŋ iye maber! Wuyeny piny i dyekalle ducu wek wunen ka wutwero noŋo dano mo iye ma ŋolo kop kakare, ma yenyo ada bene; ka wek atim kica ki Jerucalem. Kadi bed gikwoŋo kwoŋ kun giwacci, “Kit macalo Rwot tye makwo-ni” ento noŋo gikwoŋo kwoŋ me goba goba. Ai Rwot, in mono pe iyenyo ni inen ada ki waŋi? Ipwodogi matek, ento pe guwinyo kit arem mo madwoŋ wacel; ityekogi woko bene, ento gin gukwero winyo pwonnyi. Gujiŋo cwinygi odoko matek makato got; gukwero nut woko. Dok awacci, “Magi lucan keken, pe gitye ki kit ŋec mo; pien pe giŋeyo yo pa Rwot, ma en aye cik pa Lubaŋagi. Abicito bot jo madito ma gin wegi twero, ci abiloko kwedgi; pien giŋeyo yo pa Rwot, ma en aye cik pa Lubaŋagi.” Ento gin bene onoŋo guturo okol woko, dok bene onoŋo gucodo ogwil woko. Pi meno, labwor mo bia ki i buŋa ci nekogi woko, orudi ma bedo i tim aroo bibino tyekogi woko, Kwac aye ma doŋ tye ka kuro gaŋigi, ŋat mo ki i kingi ka oa okato woko ci gibiŋido woko matitino; pien balgi doŋ odoko dwoŋ, tim me kwele bene doŋ omedde wo ko i kingi adada. “Atwero timowu kica niŋniŋ? Litinowu doŋ gubwota woko, kun gubedo ka kwoŋo kwoŋ ki nyiŋ lubaŋa mogo ma pe Lubaŋa kikome. I kare ma amiyo gucamo cam guyeŋ adada, gutimo abor, dok guwoto kacel gucito i odi pa malaya. Gipitogi guyeŋ maber macalo twon aguragura ma mito tigo, kun ŋat acel acel kok pi dako pa lawote. Pe abiketo can i komgi pi lok magi? man Rwot ma openyo; dok bene pe abiculo kwor i kom rok macalo man? “Kat icit i potone ki i kin olok ci ilwer, ento pe ityekgi woko liweŋ; Lwer jaŋe woko, pien gin pe gubedo pa Rwot, Pien jo me ot pa Icrael ki jo me ot pa Juda pe gubedo ki gen mo wacel i koma, man Rwot ma owaco. Gubedo ka loko lok goba goba i kom Rwot, kun giwacci, ‘En pe bitimo gin mo; gin marac benepe bipoto i komwa; pe gibilweny i komwa ki pala lucwan, kadi ki kec bene pe bipoto i lobowa. Lunebi gibilokke gidoko yamo; ma lok pa Lubaŋa pe i igi. Meno gin ma bitimme i komgi!’ ” Pi meno Rwot Lubaŋa me mony owaco kuman ni, “Pien doŋ guloko lok man, nen, atye ka loko lokka ma tye i dogi-ni wek odok mac, ki lwak man aloko gidoko yen, ci mac biwaŋogi woko. Nen, abikelo rok mo ma a ki ka mabor i komwu, wun jo me ot pa Icrael, man Rwot ma owaco. Rokke rok matek, dok rokke rok macon, rok ma wun pe wuŋeyo loko lebgi, dok bene pe wuromo niaŋ gin ma giwaco. Aterogi ducu neko dano woko, Gin ducu gicogi oteka keken, Gibicamo kal ma wukayo ki camwu mukene woko liweŋ; gibicamo awobewu ki anyirawu woko; gibicamo dyegiwu ki romiwu kadi wa dyaŋiwu woko; gibicamo olokwu ki odurowu. Gaŋiwu ducu ma girumogi ki cel gogo ma wugeno-ni gibijwero wo ko ki pala licwan.” Rwot owacci “Ento kadi wa I kare meno pe abityekowu woko liweŋ. Ka ce lutuwu gibiwacci, ‘Piŋo Rwot Lubaŋawa otimo gin magi i komwa?’ in ibiwaco botgi ni, ‘Kit macalo wubwota woko kun wubedo ka tiyo bot lubaŋa pa lurok i lobowu, kit meno wubitiyo bene bot lurok i lobo ma pe mewu.’ ” Tuc lok man i ot pa Yakobo, tit pire i lobo Juda ni, “Wuwiny lok man, wun lumiŋ ki jo ma wiwu odiŋ, ma wanwu tye, ento pe wuneno, ma itwu tye, ento pe wuwinyo. Pe wulwora? Man Rwot ma owaco. Komwu bene pe myel i nyi ma? Aketo kweyo obedo waŋ apokki pi nam, apokki ma ri nakanaka ma en pe twero kato ki iye; kadi bed biamwonyi me nam twagge, pe bibalo woko, kadi piine mor, pe biromo kato ki i wiye. Ento lwak man gin jo ma ŋutgi tek dok lujemo ki i cwinygi; ci gulokke guŋak, gucito gigi, guweka woko, Pe giwaco ki i cwinygi ni, ‘Myero walworu Rwot Lubaŋawa, ma miyo kot i karene, kot me oro ki kot me poto kot, dok ma gwoko piwa lwak kare ma giciko me kac.’ Balwu ma wutimo doŋ oryemo jami magi woko, balwu ogenowu noŋo jami magi mabeco. Pien jo maraco gitye i kin jona; gibedo ka kiyo piny calo ludwar winyo. Giciko owicgi; ci gimako dano, Odigi opoŋ ki lok roro, calo aduku ma opoŋ ki winyo; pi meno doŋ gudoko jo madito dok bene gulony, gucwe dok komgi nen liyu mada, Gitimo ballataya ma ka gikke pe; pe giŋolo kop atir, pe gikonyo litino kic wek gubed maber, dok bene pe gipido lok pa jo ma piny obwoyogi kakare, Rwot owacci, “Pe abiketo can i komgi pi lok magi? Dok bene pe abiculo kwor i kom rok macalo man?” Man ginaura mada ma miyo lworo ma doŋ otimme i lobo: lunebi gitito lok goba goba, ki ajwagi bene gitye ka tiyo gin maigi mito; jona gimaro kit tim macalo meno, Ento gibitimme niŋniŋ ka agikkine doŋ oo? Wun jo pa Benjamin, wuriŋ woko wular komwu! Wua woko ki i Jerucalem! Wukut tum okoki i Tekoa, ci wutiŋ bendera malo i Betakerem, pien gin marac tye ka bino a ki yo tuŋ acam, ma bityeko lobo woko liweŋ. Wun jo Cion, wubedo calo olet maber pi ka cam pa dyaŋ. Doŋ lukwat ki romigi ki dyegigi gibibino ka lweny i kome; ci giguro kemagi girume kwede woko dyere; gibikwayo lim makwogi kenyo, kun dano acel acel kwanyo kabedo ma en oyero. Gibiwacci, “Yub lweny doŋ ikome! Wuyubbe doŋ wabicito walwenyo i kome cwiny dyeceŋ!” Ci dok gibiwacci, “Can i wiwa, pien ceŋ doŋ oleŋo woko cok poto, pien tipo ma umo piny otyeno-ni doŋ olyanne woko mabor!” “Wuyubbe, wek wacitu walwenyu i kome dyewor, wek wabalu kabedone woko!” Pien Rwot me mony owaco kuman ni, “Wutoŋ yadine-gu woko ducu piny; wutor cel lobo wurum ki Jerucalem woko. Man en aye gaŋ ma myero giket can i kome; pienjo ma iye gibedo ka uno dano. Kit macalo waŋ it gwoko piine bedo maleŋ, Jerucalem bene kit meno tye ka gwoko tim maraco. Awinyo tim bwami ki nek i dye gaŋ; aneno two ki waŋ bur keken iye. Wuwek lok man obed calo lok ma acikowu kwede, wun jo Jerucalem, wek pe aa awekwu woko; wek bene pe awek gaŋwu odok o bur, lobo ka ma dano mo pe bedo iye.” Rwot me mony owacci, “Gibikwanyo jo Icrael woko liweŋ calo gipwono nyig olok ki i jaŋe, ŋat mo ma bidoŋ pe, Pi meno myero ilar jo ma itwero larogi, calo lapur ma beko nyig olokke.” Agamo ni, “Abiloko bot aŋa wek acikgi, wek guwiny lokka? Nen, gudiŋo itgi woko, pe gitwero winyo loko Nen, gukwero winyo pwonnyi, gicayo lokki ma iloko-gu acaya, ai Rwot, pe giketo iye cwinygi, Pi meno doŋ aol woko ki akemo pa Rwot; doŋ aol woko ki tinone, “To akemoni i kom litino ma gitye i dye yo, ki i kom awobe ma gucokke kacel bene. Co kacel ki mon gibikwanyogi giterogi woko, jo muteggi ki jo muti. Gibimiyo odigi woko bot jo mukene, pottigi kacel ki mongi; pien abiketo can i kom jo ma gibedo i lobo-ni” man Rwot ma owaco. “Cakke i kom jo matino o kwede wa i kom jo madito dano acel acel owor woko pi lim pi noŋo magoba i yo ma pe atir; cakke i kom lunebi o kwede wa i kom ajwagi, gin ducu gitiyo ki goba keken ma pe gigenne, Gibedo ka tuko ki waŋ bur pa jona atuka ma pe gicano woko liweŋ, kun giwacci, ‘Kuc, kuc,’ ma noŋo kun kuc mo pe. Tika yam lewic omakogi i kare ma gutiyo gin me kwer? Pe gire, lewic mo pe omakogi wacel; pe gumiyo waŋgi omyeno wacel ki lewic. Pi meno gin gibipoto calo jo mukene ma doŋ gibipoto-ni i kare ma abiketo can i’ komgi gibitum woko ducu.” Man Rwot ma owaco. Rwot owaco bot jone kuman ni “Wucuŋ ka ma yo oŋolle iye wek wunen, dok wupeny bene pi yo me kare macon, ka ma yo maber tye iye, wun bene wucak wot wulubi, wek wunoŋ yweyo ki kuc i cwinywu. Ento gin giwacci, ‘Wan pe wabilubo yone kadi ki acel.’ Aketo lukur-piny me kurowu kun awacci, ‘Wuwiny koko tum!’ Ento gin guwacci, ‘Pe wabiwinyone kadi matidi mo.’ Pi meno wuwiny wun lwak me rok ducu, dok wuŋe gin ma bipoto i komgi, wun lurok ma wucokke kany. Winy ba, in lobo, nen, atye ka kelo gin marac wek opot i kom lwak man, adwoggi me gin maraco ma yam gubedo ka timone pien gin ducu pe gubedo ka winyo lokka, dok bene gukwero lubo cikka woko. Piŋo gikelo odok luban bota ki i lobo Ceba, nyo lum malim ma ŋwece kur ki i lobo ma tye ka mabor? Gitum awaŋawu ducu pe abigamo kadi wa gityerwu-gu ducu pe yomo cwinya. Pi meno Rwot owaco kuman ni ‘Abicibo gin mayoko dano i waŋayo pa lwak man, ma ka gibiwot giyokke kwede matek; wego kacel ki litino, luwotgi kacel ki luremgi ducu gibito.’ ” Rwot owaco kuman ni “Nen, lwak me lok mo-ni tye ka bino kun gia ki i lobo ma yo tuŋ acam, rok matek ma tye ka mabor mada tye ka yubbe pilweny. Doŋ gumako, atumgi ki tonigi woko Iikiŋ, giger adada, pe gitye ki ki ca mo wacel; woogi winnye calo nam ma tye ka mor. Giriŋo ki aguragura, ma gurye woko, calo jo ma doŋ kuro lweny akura, i komwu wun jo Cion!” Doŋ watyeko winyo lok ma gikelo botwa pire, ciŋwa ducu okwe woko ma doŋ pe timo gin mo; remcwiny madwoŋ dok oketo komwa wokoducu, calo arem pa dako ma, tye ka rem ki nywal, Pe wukatwokowucit i dye bar, pe bene wuwot i yo; pien lukworwu gitye ki pala lucwan, i kabedo ducu inoŋo tye gin ma kelo lworo i kom dano. Wun jona, wutwe boŋo cola i pyerwu, dok bene wubed ka ŋenne i buru. Wukok kit macalo onoŋo wutwero kok kwede pi latin acel keken ka oto, wukok ki keccwiny kun pig waŋwu cwer adada; pien ŋat ma bino ka tyekowa-ni bibino oyotoyot poto woko i komwa. “Atyeko keti i kin jona me bedo ŋat ma niyogi dok ma temogi; temgi wek iŋe dok inoŋ kit ma gibedo kwede, Gin ducu jo ma lujemo ima ŋutgi nwaŋ, ma giwoto ki lok kwot keken i kabedo ducu; gubedo matek calo mola ki nyonyo, giri ducu lutim bal keken. Lutet gubuko mac olyetti okur adada ma mwoc matek, mac doŋ olenyo cet nyonyo woko, doŋ ŋat ma tye ka liyone yelle noŋo, pien jo maraco pe gikwanyogi giterogi woko cen. Gibilwoŋogi ni cet ryal ma gikwero, pien Rwot doŋ otyeko kwerogi woko.” Lok pa Rwot obino bot Jeremia ma wacci, “Cuŋ i doggola me ot pa Rwot, ci itit lok man kunnu, kun iwacci, Wuwiny lok pa Rwot, wun jo ducu ma wudonyo ki i doggola magi kun wucito ka woro Rwot. Rwot me mony, ma Lubaŋa pa Icrael, owaco kuman ni, Wuyub kitwu kacel ki tim mewu ducu, ci abiweko wubedo i kabedo man. Pe wubed ka geno lwak lok magi me bwola-gu, ni, ‘Man ot pa Rwot, ot pa Rwot, ot pa Rwot.’ “Pien ka ce wuyubo kitwu ki timwu ducu adada, ka ce wuŋolo kop ma atir i kinwu kekenwu, ka ce pe wuuno labedo mo, litino kic nyo mon to, dok bene pe wuneko dano ma pe ki bal i kabedo man, ma pe wuworo lubaŋa mukene ma miyo wupoto i can, ci abimiyo wubedo i kabedo man, i lobo ma yam amiyo bot kwarowu i kare macon me bedo megi matwal-li. “Nen, wuketo genwu i lok me bwola ma pe konyo-gu, Pud wukwalo kwo, pud wuneko dano, wutimo abor, wukwoŋo kwoŋ gobagoba, pud wuwaŋo odok eceta bot Baal, dok bene wuworo lubaŋa mogo ma yam pe onoŋo koŋ wuŋeyo. Wubedo ka timo gin ma iya dagi, dok bene wubino wucuŋ kwede i nyima i ot man, ma gilwoŋo ki nyiŋa, kun wuwacci, ‘Doŋ gilarowa woko!’ Ento pud dok wumedde ki timo gin magi me kwer i koma! Wutamo ni oda ma gilwoŋo ki nyina-ni odoko boro pa luyak ki botwu? Nen, an kikoma aye doŋ atyeko nenone, man Rwot ma owaco. Kombeddi doŋ wucit i Cilo i kabedona macon, ka ma yam aketo nyiŋa obedo iye mukwoŋo, wek wunen gin ma atiyo iye pi gin maraco ma jona Icrael gutimo. Wun doŋ wutimo gin magi ducu ma akwanogi-ni, Kadi bed abedo ka wacciwu lok teretere, ento wun wukwero winyone woko, dok bene i kare ma alwoŋowu, wun pe wugamo doga, man Rwot ma owaco. Pi meno abitimo gin ma atimo i Cilo i kom oda ma gilwoŋo ki nyina ma wuketo iye genwu-ni. Abitiyo gin ma rom kit meno i kabedo man ma yam amiyo botwu ki bot kwarowu, kit macalo nene atiyo i Cilo. Abiryemowu woko ducu ki i nyima, kit macalo aryemo kwede lutuwu ma likwayo pa Epraim. “Doŋ in Jeremia, pe myero ileg pi lwak man, pe itiŋ dwani ka koko nyo ka lega pigi; pe ibak dogi bota pigi bene, pien pe abiwinyo lokki kadi ki acel. Pe ineno gin ma gitye ka tiyone i gaŋi me Juda ducu ki i dye yo me Jerucalem? Litino gicoko yen, wegigi gimoko mac, ki mon ginywaŋo moko me tedo mugati pi daker me polo; dok bene gionyo gityer amata-gu bot lwak lubaŋa, pi ŋeto cwinya wek kiniga omaka. Man an aye ma gitye ka ŋeto cwinya-ni? Man Rwot ma owaco. Pe gitye ka kelo can i komgi kengi, ma miyo lewic makogi? Mumiyo Rwot Lubaŋa owaco kuman ni, nen, abitoyo kinigana ki akemona woko i kom kabedo man, i kom dano ki i kom lee, i kom yadi ma i tim-gu ki ginapita ducu mucek i poto; macce biwaŋ adada ma pe gitwero nekone.” Rwot me mony ma en Lubaŋa me Icrael owaco kuman ni, “Wurib gitum awaŋawu i kom gitum mukene-gu, dok wucam riŋone. Pien i kare ma akwanyo kwarowu akelogi woko ki i lobo Ejipt, pe acikogi pi lok i kom gitum awaŋa ki gitum mukene-gu, Ento acikogi ni myero guwiny lokka, wek abed Lubaŋagi, dok wek gin gubed jona. Dok acikogi me lubo kit ma acikogi me bedo kwede, wek gubed ma jami ducu woto maber botgi. Ento gin pe gulubo cikka, dok bene pe guciko itgi ka’ winyo lokka, ento gubedo ka lubo tamgi kengi ki nwaŋ cwinygi ma opoŋ ki gin marac, ci gujer gudok woko cen ki ŋegi ma pe gumedde guwoto anyim. Cakke i kare ma kwarowu gua kwede woko ki i lobo Ejipt o kwede wa ka onyoo, abedo ka cwalo botgi luticca ma gin lunebi teretere, nino ki nino; ento gin pe guwinyo lokka, pe guciko itgi bene me winyone, ento gujiŋo ŋutgi odoko tek. Gutimo gin marac adad a ma okato gin ma yam kwarogi otimo-gu woko. “Kit meno, Jeremia, ibiloko lok magi ducu botgi, ento gin pe gibiwinyo lokki. Ibilwoŋogi bene, ento pe gibigamo dogi. Ci ibiwaco botgi ni, ‘Man aye rok ma pe nene jone gulubo lok pa Rwot Lubaŋagi, pe bene guye lok me pwony; lok ada doŋ otyeko rwenyo woko liweŋ, pe doŋ giloko pire matwal. Wulyel yer wiwu ci wubol yerre woko; wucak wo ki koko i kabedo ma odoŋ nono ma i wi godi, pien Rwot doŋ otyeko kwero dok obwoto jo me yalwak man ma akemo omake i komgi-ni.’ “Jo Juda doŋ gutimo gin marac i nyima. Guketo cal jogigi ma en gin me kwer ki tuŋ bota-ni i ot ma gilwoŋo ki nyiŋa, me balone woko. Man Rwot ma owaco. Guyubo waŋ jok i nota pa wod pa Kinom ma gilwoŋo ni Topet, ka ma gitwero waŋo iye awobegi ki anyiragi ki mac. Pe yam acikogi ni gutim kit meno, dok bene pe abedo ka tamo lok macalo meno wacel. Pi meno, nen, kare tye ka bino ma pe dok gibilwoŋo ni Topet, nyo nota pa wod pa Kinom. Gibilwoŋo ni nota me Nek: pien gibiyiko dano i Topet, pien kabedo mo pe tye ka mukene kadi ki acel. Doŋ kom jo magi ma guto-ni bidoko cam pa winyo ki pa lee me tim; ŋat mo pe ma biryemogi woko. Lobo bidoko tim aroo, doŋ i gaŋi me Juda ki i dye gudo me Jerucalem abijuko woo me yomcwiny ma dano gitye kwede, kadi wa dwan lanyom ki dwan nyako ger bene. “I kare meno cogo pa luker me Juda, cogo pa rwodine, cogo pa ajwagi, cogo pa lunebi, ki cogo pa jo ducu ma gibedo i Jerucalem gibikwanyo giwoto woko ka maleŋ ki i lyelgi. Man Rwot ma owaco. Ci gibimoyogi woko i nyim ceŋ ki dwe ki i nyim lakalatwe me polo, ma yam gumarogi kun gitiyo botgi-ni, ma yam gubedo ka lubo korgi, ma yam guyenyo tam ki botgi ka guworo-ni, Pe gibicokogi kacel kadi ki yikogi, gibibedo calo cet dyaŋ muket ata i nom. Jo ducu me rok man marac ma gubwot, ma gibedo i kabedo ka ma yam aryemogi gucito iye, gibimito ni twara kono gito woko loyo ma gibedo kwo. Man lok ma Rwot me mony aye owaco. “Ibiwaco botgi ni, Rwot owaco kuman ni, Ka dano gupoto piny, pe dok gia malo? Ka ce ŋat mo onak woko, ci en pe lokke dwogo cen? Piŋo rok man kono guŋak woko ma gitye ka medde ameda ki weko yona? Gimoko woko Iikiŋ i lok me bwola, gikwero lokke woko me dwogo cen. Abedo ka tero ita ka winyo lokgi, ento gin pe guloko lok ma tye atir; dano ma ŋut i gin maraco ma en otimo pe, kun wacci, ‘Onoŋo atimo gin aŋo?’ Ŋat acel acel gire woto kit ma iye mito, calo aguragura ma tye ka ŋwec laro lweny. Kadi winyo acebe ma bedo malo i polo bene ŋeyo karene me dwogo cen; ki akuri, lakalagwec ki ogoro gigwoko karegi me binogi; ento jona gikwiya cik ducu ma Rwot yam omiyo. “Wutwero waco niŋniŋ ni, ‘Wan waryek, cik pa Rwot bene tye botwa’? Nen doŋ lupwony-cik ma pe gigenne gutyeko loko cik woko ki cocgi, guloko odoko lok goba. Lewic bimako luryeko, cwinygi biballe ci gimakogi woko. Nen, gutyeko kwero lok pa Rwot; kit ryeko aŋo ma dok gitye kwede? Pi meno abimiyo mongi woko bot co mukene, ki pottigi bot jo ma otayogi ki lweny, pien cakke ki i kom jo matino o kwede wa i kom jo madito dano acel acel owor woko i noŋo magoba i yo ma pe atir; cakke ki i kom lunebi o kwede wa i kom ajwagi gin ducu gitiyo ki goba keken ma pe gigenne. Gibedo ka tuko ki waŋ bur pa jona atuka ma pe gicano woko liweŋ, kun giwacci, ‘Kuc, kuc,’ ma noŋo kun kuc mo pe. Tika yam lewic omakogi i kare ma gutiyo gin me kwer? Pe gire, lewic mo pe omakogi wacel; pe gumiyo waŋgi omyeno wacel ki lewic. Pi meno gin bene gibipoto calo jo mukene ma gibipoto; kare ma abiketo can i komgi gibitum woko ducu.” Man Rwot ma owaco. “I kare ma onoŋo myero aeokgi, man Rwot ma owaco, nyig olok pe tye i wi yat olok, ki nyig oduro bene pe i wi yat oduro; pote-gu bene ducu otwo woko, ki gin ma yam amiyogi-ni bene doŋ otyeko kato woko ki botgi.” Piŋo pud dok wabedo mot? Wugurre kacel wek wacitu i gaŋi ma girumo ki cel gogo wek wacitoyu kunnu; pien Rwot Lubaŋawa doŋ oketoean i komwa ni wato, omiyowa bene pii ma tye iye kwir marac wamato, pien onoŋo doŋ watimo bal i kom Rwot. Wabedo ka yenyo kuc, ento gin mo maber ma wano ŋo pe, i kare ma onoŋo myero wacaŋ iye, wanoŋo gin ma kelo lworo keken. “Yweyo me kiniga pa aguragura pa lukworwa winnye wa i Dan; ka twoni aguraguragi okok ci lobo ducu yeŋŋe. Gubino ka balo lobowa woko kacel ki jami ducu ma tye iye, pi jwero gaŋwa woko kacel ki jo ma gibedo iye. Pien nen, atye ka cwalo twol ikinwu, twol uyu ma kwirre rac ma pe gitwero baŋone ki yat, ci gibikayowu malit,” man Rwot ma owaco. Can ma atye kwede doŋ dit ma pe romo caŋ, atye ki two madit me cwercwiny mada i cwinya. Koŋ iwiny, koko pa jona orumo i lobo woko ducu, kun gikok ni, “Rwot mono pe i Cion? Kabakane mono doŋ pe iye?” Rwot ma kabakagi ogamo ni, “Piŋo kono wuŋeto cwinya ki cal jogiwu, wumiyo kiniga omaka ki lubaŋa pa lurok mogo ma pe gikonyo-gu?” Dano gikok ni, “Kare me kac doŋ okato woko, ki kare me oro bene dog ogik, ento pud pe gilarowa.” Cwinya rem calo bur odet iye pien jona doŋ giketo bur woko i komgi, akumo pi can, ma cwercwiny doŋ obwoyo koma woko. Yat me caŋo dano doŋ pe i Gilead bo? Daktar kono pe kunnu? Piŋo kono pe gicano jona? Ka twerre onoŋo myero wiya obed waŋ it me pii, ki waŋa noŋo myero obed. Waŋ it ma gunnye ki pig waŋ, wek omiya abed ka kok dyeceŋ ki dyewor benebene pi jona ma dog ginekogi woko-ni, Onoŋo amito ni kono nene kabedo mo obed tye ma abedo iye macalo ka gony pa luwot i tim aroo, kono aweko jona ci acito woko ka mabor kwedgi! Gin ducu lutim abor, gin ducu lutim tim aranyi. Gin kare ducu guyubbe woko me loko lok goba; bedo laboŋo gen doŋ oloyo lobo woko ma kaka tim me ada. Rwot owacci, “Sona gitimo gin marac teretere, dok bene pe giŋeya.” Dano acel acel myero ogwokke i kom lawote, ki bene pe myero ogen ominne: pien omego acel acel obedo labwola calo Yakobo, dok dano acel acel bene kwoto lawote. Ŋat acel acel bwolo lawote, dano mo ma loko ada pe; doŋ gutyekopwonyo Lebgi woko me loko lok goba, gitimo bal giyelle iye adada ma pe giromo nut. Gibedo ka uno dano teretere, dok gitimo gin me bwola teretere, gikwero woko ni pe giŋeya, man Rwot ma owaco. Mumiyo Rwot me mony owaco kuman ni, “Nen, abitemogi macalo nyonyo ma giliyo. Jona doŋ gutimo gin marac, gin aŋo kono ma dok atwero tiyo kwedgi? Lebgi obedo calo atero ma lake ki kwir marac; giloko lok me bwola keken. Dano acel acel loko lok mamit bot lawote, ento ki i cwinye noŋo tye ki yub me kanne wek eneke woko. An pe abiketo can i komgi pi lok magi? Pe abiculo kwor i kom rok macalo man?” Man Rwot ma owaco. Jeremia owacci, “Wek dog akok pi godi, dok abikok kun cwinya cwer pi olet-gu, pien doŋ gutwo woko, ŋat mo ma woto kun ŋolo ki iye doŋ pe. Koko pa dyaŋi bene pe doŋ winnye kunnu; winyo ki lee tim ducu doŋ guriŋo gurwenyo woko, doŋ gipe matwal.” Rwot owacci, “Abiloko Jerucalem doko wi obur me gin ma gimuko ki iye, kabedo ma too-aye bedo iye: gaŋi me Juda ducu doŋ bidoko tim noŋo, ka ma ŋat mo pe bedo iye.” Dano mene maryek ma wacci etwero niaŋ lok man? Rwot mono oloko lok magi bot aŋa, ni wek otit lokke? Pmo lobo doŋ oballe woko odoko wi obur calo tim ma iye odoŋ nono, ma dano mo pe wok kato ki iye? Rwot owacci, “Man otimme pien jona gubwoto cikka ma nene amiyo botgi-ni, dok bene pe guwinyo lokka, pe gubedo kun gilubo cikka. Ento ma ka timo meno gumiyo nutgi obedo nwaŋ, gubedo ka woro jogi Baal mapatpat, kit macalo kwarogi opwonyogi kwede. Pi meno Rwot me mony, ma en Lubaŋa pa Icrael, owaco kuman ni, Nen, abimiyo jo magi gimato yat roka, dok bene abimiyo gimato pii ma giketo iye kwir. Abikeyogi woko i kin lurok ma gin kikomgi pe giŋeyo, kadi wa kwarogi bene yam pe guŋeyo; abicwalo dul mony lubo korgi ki pala lucwan nio waŋ ma atyekogi woko liweŋ.” Rwot me mony owaco kuman, ni, “Koŋ wutam lok, ci wulwoŋ monma giŋeyo wer koko-gu gubin; wucwal lok wulwoŋ mon makwiri gubin; wek gurune gubin oyotoyot ci guwo ki koko i komwa, wek pig waŋwa omo locit piny lipyaa, ma del waŋwa bene odyak woko ki pii. Koŋ wuwiny dwan me koko ma a ki i Cion, ‘Doŋ watum woko do! Lewic doŋ omakowa woko marac, pien doŋ waa woko ki i lobowa, pien aaniwa doŋ gijwero woko licwic.’ ” Jeremia owacci, “Wun mon, wuwiny doŋ lok ma Rwot owaco, wucik itwu wek wuwiny lok ma oa ki i doge. Wupwony anyirawu ki koko, Ŋat acel acel opwony lawote ki wer lyel. To doŋ obino woko i komwa ki i waŋ dirica, ci odonyo woko i gaŋ kalwa ducu, oneko litino woko ducu ki i dye yo ki awobe-gu ki i dye bar. Kom jo muto gibikeyo woko ata gikeyo woko macalo odur cet dyaŋ muket ata i olet, calo kal ma lukac gukayo guweko odoŋ i poto, ma ŋat mo doŋ pe ma bicoko tero i gaŋ. Man aye gin ma Rwot owacca ni atiti.” Rwot owacca kuman ni, “Dano maryek myero pe onyatte ki ryekone-ni, kadi ki dano matek bene pe myero onyatte ki tekone, ki dano mulony bene pe myero onyatte ki lonyone. Ento ka ŋat mo mito nyatte, myero onyatte ni eniaŋ dok eneyo an, ni an a Rwot ma atye ka tiyo gin ma nyuto mar ma pe lokke, anyuto bene ŋolo kop atir ki bedo ki kit ma atir i lobo. Magi gin aye jami ma cwinya mito. Man Rwot ma owaco. Rwot owacci, “Nen nino tye ka bino, en aye kare ma abiketo iye can i kom jo ma gilirogi ki i del komgi ki woko ento pe ki i cwinygi. Abiketo can i kom Jo Ejipt, jo Juda, jo Edom, jo Ammon, jo Moab ki jo ducu ma gibedo i tim aroo ma ginyaro yer wigi woko doŋ macego; rok magi ducu pe gulirre ki i cwinygi, ki jo me ot pa Icrael bene pe gulirre ki i cwinygi.” Wun jo Icrael wuwiny lok ma Lubaŋa tye ka lokone botwu. Rwot owaco kuman ni, “Pe wupwony kit pa lurok, dok cwinywu bene pe myero oballe ka wuneno lanyut mo tye i polo, kadi bed rok mukene-gu cwinygi oballe woko pire. Pien kit pa lurok obedo gin me bwolo, pe ada. Gitoŋo yat gireto woko piny i buŋa, ci lapac payo woko maber ki koyone nyo ki jami mukene me pac. Dano gidero kome woko ki ryal nyojabu; gikwanyo nyono giguro ki cumari iye wek ocun matek likiŋ pe opot woko piny, Cal lubaŋagi-nu obedo calo wir yat ma gicibo ocun i poto okwer pi ryemo winyo, pe bene gitwero lok; gitiŋogi mege atiŋa, pien pe giwoto. Pe ilworgi, pe gitwero timo gin mo marac i komi, dok bene pe gitye ki twero mo me timo gin mo maber.” Pe tye lubaŋa mo macalo in, ai Rwot; in idit, dok nyiŋi bene dit ki tek. Aŋa mono ma pe mvero olwori, in kabaka ma loyo rok ducu? Man aye kiti, myero dano gulwori. Pe tye ŋat mo macalo in i kin luryeko ducu me rok mapatpat, kadi ki i te kergi ducu. Danogi ducu ma luryeko gubedo jo ma lumiŋ dok wigi bene odin. En bao ma giyubo ni cal lubaŋa-ni tika pwonyogi ki gin mo? Cal lubaŋagi gidero kome woko ki ryal ma gidino woko ma gikelo ki i Tarcic, ki jabu ma gikelo ki i Upaj, Gin ducu gubedo tic pa lupac ki dok bene tic ma latet jabu otiyo ki ciŋe: ginarukagi obedo makwar ki dok lamar lamar; gin ducu gubedo tic ma jo ma kwiri aye gutiyo. Ento Rwot aye Lubaŋa me ada, en Lubaŋa makwo, dok bene en Kabaka ma bedo nakanaka. Ka inen, ce akemo omake ci lobo yeŋŋe, rok ducu pe twero ciro kinigane. Ibiwaco botgi kit man ni, “Lubaŋa mogo-gu ma pe guketo polo ki lobo-ni gibijwerogi ‘woko. Pe doŋ gibibedo tye i kabedo mo i wi lobo ki i te polo.” Rwot oketo lobo ki twerone, dok ocibo lobo ocuŋ matek pi ryekone, ki pi niaŋ matut ma en tye kwede omiyo oyaro polo woko. I kare ma dwane mor, ci pii twagge matek ki i polo, dok miyo lupu duny kun a ki i agikki lobo. En miyo lutkot wil ka kot cwer, dok bene miyo yamo kodo kun a ki i ot kano jamine. Dano ducu bedo lumiŋ dok bene ma wigi odiŋ; lewic mako latet jabu pi cal jokke ma en otiyo; pien cal jogine-gu ducu pe lubaŋa me ada, dok bene pe gitye ki kit kwo mo i igi. Konygi pe, gitiyogi mere me acaya keken; i kare ma Rwot bibino ka keto can i komgi gibito gitum woko. Lubaŋa pa Yakobo pe obedo calo cal jogi magi; pien en aye ŋat ma oketo jami ducu, dok bene en oyero jo Icrael wek gubed jone kikome, Nyiŋe gilwoŋo ni Rwot me mony. Gibitero dano i opii Wun jo Jerucalem ma mony doŋ orumowu woko-ni, wutin yecwu woko ki i ŋom, pien kombeddi doŋ Rwot biryemowu woko ki i lobo-ni; en biŋinyowu waŋ ma wuwinyo litte. Jo Jerucalem gikok ni, “Giketo ret woko i komwa marac kuman! Waŋ burwa tye marac mada ma pe bicaŋ, Yam watamo ni man en aye gin ma watwero ciro, kara pe! Kemawa doŋ gibalo woko, ki tol ducu ma onoŋo gitweyogi kwede gicodo woko; litinowa doŋ guwekowa, gin ducu doŋ gipe. Ŋat mo pe ma odoŋ ma myero ogur kemawa odoco kakare; pe tye ŋat mo ma myero otwe boŋo kicika megi malo.” Jeremia ogamo ni, “Lutel doŋ gudoko lumiŋ; pe gipenyo Rwot wek otelgi. Meno aye gin mumiyo yam pe gubedo maber; lwakgi ducu doŋ guket woko ata. “Winy lok! Nen tye ka bino! Twon gin ma mor tye ka katti bino ki i lobo ma yo tuŋ acam, dul monnye bino me jwero gaŋi me Juda woko wek odoŋ obur, odok kabedo ka ma too bedo iye.” Ai Rwot, aŋeyo ni dano pe loyo kwone kene nio i agikkine; pe tye ŋat mo ma tye ki twero me loyo kwoŋe. Ai Rwot, pwony lwakwa; ento pe itimwa marac aye. Pe ipwonywa i kare ma noŋo kiniga omaki; miyo wabito woko ducu. Kiniga myero omaki i kom rok ma pe giŋeyi, ki i kom lurok ma pe gilwoŋo nyiŋi-ni, Doŋ gityeko likwayo pa Yakobo woko; ci gubalo lobowa woko odoŋ obur. Rwot oloko ki Jeremia, ni, “Winy lok ma mako gicikke nan. Tit bot jo Juda ki jo ma gibedo Jerucalem ni, an, Rwot Lubaŋa pa crael, doŋ atyeko ceno dano ma pe winyo dok ma pe lubo lok ma mako icikke man. En gicikke ma yam keto ki kwarowu i kare ma akwanyogi woko ki i lobo Ejipt, en lobo ma obedo alo buk mac me teto nyonyo ma otwak me waŋogi. I kare meno awaco otgi ni guwiny lokka dok guti gin ducu ma yam acikogi ni guti. Atito otgi ni ka gulubo ci gibibedo jona kin bene abibedo Lubaŋagi, Aciko botgi ni an bene abicobo kwoŋ ma am akwoŋo i nyim kwarogi kun miyo botgi lobo ma mol cak ki moo Ic, kit macalo gitye iye wa onyoo-ni.” Ci an Jeremia agamo ni, “Wek obed kumeno, Rwot.” Rwot dok owacca ni, “Tit lok magi ducu i gaŋi me Juda, ki i dye yo me Jerucalem. Tit lokka kunnu, kun iwaco bot lwak ni guwiny lok ma mako gicikke man dok bene gulubi kun gitiyo. I kare ma akwanyo kwarowu woko ki i lobo Ejipt, acikogi matek, kun bene abedo ka cikogi teretere, nio wa onyoo, kun awaco botgi ni gulub lokka. Ento gin pe gulubo dok pe guciko itgi me winyo lokka. Ma ka timo meno, dano acel acel omedde ameda ki bedo ki nwaŋ cwiny marac. Mumiyo acobo lok me gicikke man woko ducu i komgi, ma yam acikogi ni guti, ento pe gutiyo-ni.” Rwot dok owaco bota ni, “Jo Juda kacel ki jo ma bedo i Jerucalem gitye ka jemo woko i koma. Gulokke gudok cen ka timo bal pa kwarogi ma gukwero winyo lokka woko-ni; gubedo ka lubo lubaŋa mukene kun giworogi bene: Jo me ot pa Icrael ki jo me ot pa Juda doŋ guturo gicikkena woko ma yam acikke kwede ki kwarogi-ni. Pi meno Rwot owaco kuman ni, Nen, atye ka kelo gin marac wek aket i komgi ma pe gitwero loyo ki iye wacel. Ka gibikok bota pi kony, an pe abiwinyo kokogi. I kare meno jo Juda kacel ki jo ma bedo i Jerucalem gibicito gikok bot lubaŋa ma yam gibedo ka waŋo iye gitum botgi-ni, ento lubaŋa magi pe twero larogi i kare me can. Pien lubaŋawu doŋ gudoko pol ma guporo wel gaŋiwu, wun jo Juda; ki wun jo ma wubedo i Jerucalem bene doŋ wuyubo lwak keno tyer mapol ata ka ma wuwaŋo iye gitum me lewic bot jok Baal, ma rom ki wel yo ma tye i dye gaŋ me Jerucalem. “Pi meno Jeremia, pe ibed ka lega, pe bene ipid kweda pi lwak man. Ka inen ce gitye i can ka gukok bota pi kony, an pe abiwinyo kokogi.” Rwot owaco ni, “Jona ma amaro-ni gitye ka timo tim kipyeda. Doŋ gitye ki kit twero aŋo ma weko gibedo i oda? Gitamo ni tyero lee me gitum ki kwoŋo kwoŋ mogo ma gicikke kwede atata twero geŋo can woko me poto i komgi? Gitamo ni gitwero bwot i yo ma kit man? Yam alwoŋogi ni yat jeituni ma pote olot madwoŋ, ma nyige bene nen mwonya adada; ento abiwaŋo pote woko ki mac ma yamone mor mager, dok abituro jaŋe woko ducu, “An Rwot me mony ma yam apito jo Icrael ki jo Juda, macalo yat jeituni-ni, kombeddi doŋ awacci abiketo gin marac i komgi, Gukelo gigi can man i komgi pigi kengi pien gin gutimo gin marac. Guneto cwinya omiyo kiniga omaka pi waŋo gitum bot jok Baal.” Rwot omiyo aŋeyo dok aniaŋ lok ma lukworra gupiro, ki gin marac ma onoŋo gimito timo i koma. Ento an abedo calo latin romo mamwol ma gitero woko ka nekone, onoŋo pe aŋeyo ni gupiro lok me timo gin marac i koma. Gubedo ka waco ni, “Watoŋu yat man waretu woko piny wa ki nyige ducu; waneke woko wek ŋat mo pe doŋ obipo i kome matwal i lobo-ni.” Lacen an Jeremia alego ni, “Ai Rwot me mony, in laŋolkop ma ŋolo kop atir, dok itemo tam pa dano ki gin ma giparo ki i cwinygi. Wek anen ka iculo kwor i kom lwak man, pien an doŋ atyeko keto lokka woko ducu i ciŋi.” Pi meno Rwot owaco kuman, i kom jo Anatot, ma onoŋo gimito neko Jeremia woko kun giwacce ni ka ce en omedde ki tito lok i nyiŋ Rwot ci gibineke woko. Rwot me mony owaco lok i komgi ni, “Nen, abiketo can i komgi. Awobegi ducu gibinekogi woko i lweny ki pala lucwan; litinogi ducu bito woko ki kec. Ŋat mo ma bidoŋ pe ka kare oromo, en kare ma doŋ amoko me keto iye can i kom jo Anatot.” Ai Rwot, ka apido lokka kwedi, anoŋo ni in giri lokki tye atir. Ento myero pud dok apenyi lok ma mako ŋolo kop. Piŋo jo maraco gibedo maber dok gilony? Piŋo lutim aranyi kono gicobo tiyo gin ma cwinygi mito? In aye ma yam ipitogi, mumiyo giroyo lwitgi donyo i ŋom gidoŋo ci ginyak bene. Kare ducu gin giloko lok maber i komi, ento ki i cwinygi noŋo gitye ka mabor, pe giparo piri. Ento in Rwot, iŋeya, ineno gin ma atiyo, dok itemo tamma pi neno kit macalo amari kwede. Makgi ikelgi woko ki tek calo romi me aneka, kogi woko iketgi pat nio ka nino me nekogi oromo. Lobowa mono bibedo mutwo pi kare ma rom mene, dok lum ducu ma i tim bitwo woko nio wa awene? Lee ki winyo gitye ka to pi tim maraco pa jo ma gibedo i lobo man, ma giwaco ni i, “In pe ineno kit ma gitye ka bedo kwede.” Rwot owacci, “Jeremia, ka ce iol woko i ŋwec ma kun ipyemki dano, ci ibiŋweco ipyem ki aguragura niŋniŋ? Ka ce ipoto piny i lobo ma kuc tye iye, ci doŋ ibikwo niŋniŋ ka ibedo i kin yadi mukadde ma tye i ŋet Jordan? Kadi ki omegini, ma gin jo me ot pa woru kikome, gin bene gutimo tim aranyi i komi, gin guribbe ka lweny i komi bene. Pe igengi, kadi bed giloko lok maber me larem boti.” Lubaŋa owacci, “An doŋ aweko jona woko, doŋ akwero rok ma yam ayerogi-ni woko; doŋ atyeko miyo jona ma amaro-ni woko i ciŋ lukworgi. Jona ma ayerogi-ni doŋ gulokke woko i koma calo labwor ma tye i buŋa; gumor ki koko matek i koma pi meno omiyo adaggi. Jona ma ayerogi-ni gubedo calo tula, ma winyo wadigi lwenyo i kome i kabedo ducu. Wubin, wun lee tim; wubin wuribbe ka cam kacel. Lukwat mapol doŋ gutyeko balo poto olokka woko, gunyono dul lobo ma gipokka woko piny ki tyengi, guloko dul lobona ma yomo cwinyani odoko tim ma iye odoŋ noŋo. Gumiyo doŋ odoko tim ma konnye pe; odoko tim ma iye odoŋ noŋo i nyima. Lobone ducu doŋ gibalo woko odoŋ noŋo, ento ŋat mo ma paro pire pe. I wi cere ducu ma tye i tim aroo, jo ma lutyek piny doŋ gubino ka yako Doŋ an Rwot atyeko cwalo lweny me tyeko lo bo woko ducu; ŋat mo pe ma bitwero bedo ki kuc. Jona yam gucoyo bel ento gukayo okuto, gubedo ka tiyo tic matek guolo komgi woko, ento pe gulimo iye gin mo. Lewic bimakogi pien gin ma gucoyo ducu pe ocek pi kiniga mager pa Rwot.” Rwot owaco kuman ni, “At ye ki lok mo ma myero awac bot jo ma gibedo ka ŋet jo Icrael ma doŋ gubalo lobo ma amiyo bot jona jo Icrael-li woko. Nen, abikwanyo rok man woko ki i lobogi, dok bene abilaro jo Juda akwanyogi ki i kingi. I kare ma doŋ akwanyogi woko, ci kica bimaka i komgi, Abikelo rok acel acel adwoko cen i lobone dok i kabedone kikome. Dok ka kare biromo, ka ce gipwonyo kit pa jona ki cwinygi ducu, ma kun gikwoŋo ki nyiŋa ni, ‘Macalo Rwot tye makwo-ni,’ macalo yam gupwonyo jona me kwoŋo ki nyiŋ jok Baal, ci miyo gin ducu doŋ gibirubbe woko ki jona ci gibibedo maber. Ento ka ce tye rok mo ma pe biwinyo lokka, ci abiputo woko ki lwite ducu ci abalo woko licwic, man Rwot ma owaco.” Rwot owacca kuman ni, “Cit iwil boŋo camanini me aruka i pyer, ci itwe i pyeri, ento pe ilut i pii.” Ci awilo boŋo me pyer kun alubo lok ma Rwot otitta-ni, ci aruko i pyera. Lok pa Rwot dok obino bota tyen me aryone ma wacci, “Kwany boŋo me pyer ma nene iwilo iruko i pyeri-ni, ci ia icit i dog kulu Euprate, ci icikan woko kunnu i kin got mubar.” An aa acito ci akano woko i ŋet kulu Euprate kit macalo Rwot ocika kwede. I ŋe nino mapol Rwot dok owacca ni, “A malo icit wa i kulu Euprate ci ikwany boŋo me aruka ma yam aciki ni icikan kunnu-ni.” Cutcut aa acito i kulu Euprate ci akwinyo ŋom, ci akwanyo boŋo aruka me pyer ki i kabedo ka ma yam onoŋo akano iye-ni. Ento anoŋo ni boŋo ca doŋ oballe woko, pe dok ber pi gin mo. Lacen Rwot dok pud oloko bota aye. En oloko bota kuman ni, “Man aye kit macalo abityeko kwede wakke pa Juda ki wakke madit ma Jerucalem tye kwede. Lwak magi marac ma gukwero winyo lokka, ma gumiyo ŋutgi obedo nwaŋ gulubo gigi gin ma cwinygi mito, ma gubedo ki lubaŋa mukene kun gitiyo botgi, gibibedo calo boŋo pyer man ma pe doŋ ber me aruka. Kit macalo boŋo me atweya i pyer moko kwede i kom dano, kumeno bene aketo jo me ot pa Icrael ki jo me ot pa Juda aridogi woko i koma matek likiŋ, wek gubed lwak ma gibikelo nyiŋ maber bota, ma gibimiyo dano gipaka dok gimiya deyo, ento gin onoŋo pe gitwero winyo lok wacel.” Man Rwot ma owaco. Rwot owaco kuman ni, “Jeremia, in itit lok man bot jo Icrael ni, ‘Rwot Lubaŋa me mony owaco kuman ni, “Agulu acel acel bipoŋ woko ki koŋo vino.” Gibiwaco botwu ni, ‘Pe wamito waŋe ni agulu acel acel bipoŋ wo ko ki koŋo vino’ Ci lacen in ibiwaco botgi ni, ‘Nen, abipiko jo ducu ma gibedo i lobo man ki koŋo vino ci gidoko lumero, luker ma gibedo i wi komker pa Daudi, ajwagi, lunebi kacel ki jo ducu ma gibedo i Jerucalem. Abicanyo ŋat man ki lawote, wego ki litinogi kacel, man Rwot ma owaco, Pe abiparo pigi, pe abiweko gibedo kwo, kadi wa kica bene pe bimaka i komgi, wek pe atyekgi woko.’ ” Wuter itwu, wuwiny; pe myero wubed ki wakke, pien Rwot doŋ otyeko loko. Wumi deyo bot Rwot Lubaŋawu ma pud peya okelo colpiny, ma pud tyenwu pe ogwaŋŋe i wi godi ma piny ribiribi; ma pud peya noŋo olokke odoko mutu macol licuc, en leŋpiny ma onoŋo wutye ka genone-ni. Ka ce pe wubiwinyo, ci abikok laliŋliŋ i muŋ pi wakkewu: abikok matek noŋo pig waŋa mol cito piny lipyaa, pienjo pa Rwot doŋ giterogi woko macalo opii. Rwor owaco bot Jeremia ni, “Tit bot kabaka gin ki minne ni gua ki i komkergi gubin woko i kabedo mapiny, pien lalukanagi maber twatwal doŋ opoto woko piny ki i wigi.” Gaŋi me Negeb ducu doŋ gilorogi woko, pe tye ŋat mo ma myero oyabgi, Jo Juda ducu doŋ giterogi woko i lobo ma pe megi, gin ducu doŋ giterogi woko i opii. “Wun jo Jerucalem wunen! Lukworwu tye ka bino kun gia ki i lo bo ma tye yo tun acam! Jo ma miyogi i ciŋwu ni wugwokgini gitye kwene, danowu macalo lwak romi ki dyegi ma gibeco adada-ni? Ibiwaco gin aŋo ka jo ma yam in kikomi aye ipwonyogi ni wek gubed luremi, aye giketogi me lovi? Arem matek pe biketo komi woko, calo arem pa dako ma tye ka nywal? Doŋ ka ce ipenyo ni piŋo gin ma kit man obino i komi, piŋo boŋo ma i pyeri bene giyeco woko, dok ginywari kwede-gu; man otimme pien onoŋo balli doŋ rac ma okato kare. Laetiopia mo tika twero loko rani me del kome, nyo kwac bene twero kwanye rani ma i kome ma obedo kwicikwicini woko? Ka tye kit meno, wun ma wuniyo ki timo gin marac keken-ni, wutwero pwonnye me tiyo gin ma tye atir. Abikeyowu woko calo cuŋ kal ma yamo kodo ki i tim aroo ci tero woko. Man aye gin ma gipokki, dul ma doŋ atyeko pimone woko piri, man Rwot ma owaco, pien wii doŋ otyeko wil woko i koma ibedo ka geno lok goba keken. An Rwot kikoma aye ma abiwalo boŋoni woko ki i pyeri aumo ki waŋi, miyo lewicci nen woko ka maleŋ, Doŋ atyeko neno gin me kwer ma itimo, tim me abor ki mito tigoni, ki tim malayani marac adada, ma ibedo ka timone i wi cere i dye tim. Can i wiwu, wun jo Jerucalem! Gin man bitero kare ma rom mene ma noŋo pud peya gilonyowu wudoko leŋ?” Rwot owaco bot Jeremia pi two pii ma okemo Juda woko ni, “Juda tye ka kumo gaŋine bene tye ka to woko. Jo Juda ducu gibuto piny ki twon cwercwiny mo ma pe wacce; ma noŋo jo Jerucalem gitye ka kok matek adada pi kony. Luditogi me awora gicwalo luticgi ka twomo pii; gicito i waŋ taŋi me pii, emo pe ginoŋo, gidwogo ki gin latwom piigi ma noŋo iye noŋo. Lewic makogi dok bene alee twodogi woko ci giumo wigi woko. Pien lobo doŋ oballe woko, kit macalo kot doŋ pe obedo ka cwer i lobo-ni, lewic omako lupur mada ma noŋo cwinygi cwer ma giumo wigi auma. Kadi bed wa megi til ma tye i tim bene no no gubwoto litinogi ma gunywalo woko pien lum mo ma myero gucam pe. Kana me tim-gu gicuŋ i wi cere matar atara ligwek, ginamo doggi malac me yweyo calo too; waŋgi olwal woko pien onoŋo pe tye lum mo ma myero gucam. “Kadi bed ka ce balwa dotowa, ai Rwot konywa kit macalo yam iciko. Wabedo ka lokke wabwoti woko tyen mapol; watyeko bene timo bal-gu i komi. In “keken aye ŋat ma jo Icrael gigeno, in aye ma ilarowa i kare ma noŋo watye i can. Piŋo ibedo macalo larok i lobowa, dok macalo lawot ma yenyo kabuto? Piŋo ibedo macalo dano ma wiye onyobbe woko ma pe ŋeyo gin ma myero etim, calo ŋat mo ma en oteka ma pe twero laro dano ki i mony? Ento adada in Rwot it ye kwedwa, dok waŋ bene gilwonowa ki nyiŋi; pi meno pe ibwotwa woko.” Rwot owaco kuman i komjone ni, “Yam gumaro wot atata kit meno, pe gujuko tyengi ka wot; pi meno omiyo Rwot pe gamogi. Kombeddi doŋ en bipo i kom bal megi ci biketo can i komgi pi balgi.” Rwot owaco bota ni, “Pe myero ilega ni an akony lwak man. Kadi bed giri kec, pe abiwinyo koko ma gikok kwede bota pi kony, dok kadi bed gutyer gitum awaŋa ki gityer me moko kwoŋ, pe abigamogi; ento abinekogi atyekogi woko liweŋ ki pala lucwan, ki kec malit mupoto i lobo, wa ki two gemo-gu.” Dok awacci, “Ai Rwot Lubaŋa, nen lunebi onoŋo doŋ gutyeko tito bot lwak man woko ni, ‘Pe gibinekowu ki pala lucwan, dok bene kec mo pe bipoto i lobowu, ento Rwot bimiyo botwu kuc me ada ma bedo nakanaka i kabedo man.’’’ Ento Rwot odokka iye owacca ni, “Lunebi gitye ka tito lok goba keken ki nyiŋa; an pe acwalogi, pe acikogi, dok bene pe bene pe aloko kwedgi. Gitye ka tito botwu ginanyuta me goba ki tyeto tyet ma konnye pe, kun gibwolo dano abwola ki tam ma gutamo pigi kengi, Pi meno an Rwot awaco kuman lok i kom lunebi ma gitito lok i nyina kadi bed an aye pe acwalogi, ma giwacci, ‘Pala lucwan ki kec madit pe bibino i kom lobo man wacel,’ awaco ni, Lunebi magi gibine-kogi ki pala lucwan kacel ki kec. Jo ma gin gubedo ka tito lok botgi bene gibibologi woko i dye yo me Jerucalem, ma noŋo ginekogi ki pala lucwan kacel ki kec; ŋat mo pe ma biyikogi. Man bitimme i komgi ducu, i kom mongi, litino awobegi, ki anyiragi bene, pien abimiyo gineno can pi tim maracogi. “In ibiwaco botgi lok man ni, ‘Wek pig’ waŋa omol ocit piny I kora lipyaa dyeceŋ ki dyewor benebene; wek pig waŋa pe ojwik woko, pien jona gityeko goyogi woko ki twon bur madit adada, ma giketo ret woko i komgi marac atika. Ka ce acito woko i tim, nen, anoŋo jo ma ginekogi ki pala lucwan dwoŋ ata! Dok ka ce adonyo i gaŋ, aneno lwak dano mapatpat gitye ka two ki two me kec! Pien lunebi kacel ki ajwagi giwoto kun gitiyo ticgi i lobo, kun pe gitye ki ŋec mo.’ ” In doŋ mono ikwero Juda woko matwal, Rwot? Cwinyi bene doŋ ocido woko i kom Cion bo? Piŋo doŋ ipwodowa kuman ma pe doŋ waromo can? Wabedo ka yenyo kuc, ento gin mo maber ma wanoŋo pe; i kare ma myero wacan iye wanoŋo gin ma kelo lworo keken. Ai Rwot, waŋ doŋ waneyo gin maraco ma wabedo ka timone, kadi wa bal pa kwarowa ducu waneyo, pien ada, waŋ wabalo i komi. Pe cwinyi ocid woko i komwa, pi dit me nyiŋi; dok bene pe ibal woro me komkerri ma nen me deyo-ni woko. Po piwa, pe itur gicikkeni woko kwedwa. Tika tye kit lubaŋa mo i kin lubaŋa me gobagoba me rok ducu ma twero miyo kot cwer? Nyo polo kono twero miyo kot mo ŋido i lobo? Pe in aye ma itiyo magi ducu, ai Rwot Lubaŋawa? Wan ducu wageno in, pien in aye ma itiyo jami magi ducu. Lacen Rwot owacca ni, “Kadi bed Moses ki Camuel gubedo ka Cuŋ i nyima kun gipido kweda, an kica pe bimaka i kom lwak man wacel. Wek gua ki i nyima gucit woko. Ka ce inen gupenyo ka kwene ma myero gicit iye, wuwac botgi ni an Rwot awaco botgi ni, “Jo mogo bito woko ki two gemo, meno en aye ka ma gibicito iye! Jo mukene gibito i lweny ginekogi woko ki pala lucwan, meno en aye ka ma gibicito iye! Jo mogo kec aye ma binekogi meno en aye ka ma gibicito iye! Ki jo mogo gibimakogi giterogi woko macalo opii, meno en aye ka ma gibicito iye! An Rwot, dok atyeko moko kit jami aŋwen maraco ma bityekogi: gibinekogi woko liweŋ ki pala lucwan, gwogi biywayo komgi muto-ni bedo me acamagi, winyo bene gibicamo komgi; ki lee mager me tim doŋ gibimwodogi gityekogi woko liweŋ, Dok abimiyo gibedo gin ma miyo ker me lobo ducu gibedo ki lworo, pi gin ma Manace wod pa Kejekia kabaka me Juda yam otimo i Jerucalem. “Aŋa ma kica bimako i komwu, wun jo Jerucalem, nyo aŋa kono ma bikumo piwu? Aŋa ma koŋ bilokke cuŋ pi kare malac pi penyo kit macalo wun wutye kwede? Wun doŋ wutyeko kwera woko, man Rwot ma owaco, wumedde wubedo ka dok cen kare ducu. Pi meno aye mumiyo aryeyo ciŋa i komwu ci anekowu atyekowu woko; doŋ aol woko ki timo kica botwu, I gaŋi ducu ma i lobowu, abedo ka pyetowu ki oderona. Anekowu atyekowu woko, wun jona, pien pe wumedo ki lokke wuweko timo timwu marac-ci. Anyayo wel-mon-togi doŋ odoko dwoŋ makato kweyo me dog nam woko. Aneko awobewu woko ma komgi pud tek, dok amiyo megigi gubedo ki can ki arem malit adada. Amiyo bene remcwiny ki lworo madwoŋ opoto i komgi oyotoyot laboŋo galle. Dako ma onoŋo onywalo litinone abiro kulu cwinye odem woko; otemo yweyo ci pe romo ywe kadi matidi mo. Dyeceŋ ma en tye iye olokke odoko colpiny; obedo ki lewic ma noŋo cwinye opoŋ woko ki can. Doŋ jo megi mukene ma gudoŋ, abimiyo lukworgi nekogi woko ki pala lucwan, man Rwot ma owaco.” Can i wiya! Piŋo maa onywala? Oweko alwenyo, nyo ada dok apyemo ki jo ducu ma i lobo. An cen pe amiyo limma me konyo ŋatti, kun amito magoba iye, dok bene nene pe adeno lim ki bot ŋat mo; ento inoŋo ni dano acel acel tye ka loko lok me cena woko acena. Ai Rwot, mi lok ma giloko kun gicena kwede-ni obed kumeno ka ce nene pe atiyo gin ma tye atir i nyimi, dok ka ce nene pe apido kwedi lok wa i kom lukworra i kare ma onoŋo gitye i can dok ki cwercwiny mukato kare. Dano twero turo nyonyo, nyonyo ma gikelo ki i lobo ma tye yo tuŋ acam kacel ki mola? “Lonyowu kacel ki limwu ma yam wukano abimiyo giyako woko laboŋo wel, pi balwu ducu ma doŋ wutyeko timo ma oromo i lobowu-ni woko liweŋ, Abimiyo wubedo opii pa lumerokwu kun wutiyo tic botgi i lobo ma pe wuŋeyo, pien mac doŋ olyel ki i kinigana ma bibedo ka waŋ nakanaka.” Mumiyo Jeremia owacci, “Ai Rwot, in iniaŋ dok iŋeyo, Po pira dok ikonya, dok bene myero icul kwor i kom jo ma mito neka woko-ni. Pe myero idi cwinyi i kom jo ma gimito neka woko; myero iŋe bene ni piri omiyo atye ka ciro lok me cac matek. Ka yam lokki obino bota, ci acamo ki cwinya matek, lokki olokke odoko gin me yomcwiny bota, dok obedo gin ma yomo cwinya adada; pien an doŋ gilwoŋa a ki nyiŋi, ai Rwot Lubaŋa me mony. Yam pe abedo kacel ki jo ma nyero nyero ata pi noŋo yomcwiny me lobo-ni, an kikoma gira cwinya pe obedo yom wacel. Pi tic ma onoŋo in imiya, abedo kena, dok kinigani oketo koma woko. Piŋo mono aremma pe gik, ma burra bene doŋ odoko gin ma pe can, okwero gire Caŋ woko? In imito ilokke ibed bota calo kulu ma bwolo dano abwola, calo pii ma two woko-ni?” Pi meno Rwot owaco kuman ni, “Ka ilokke idwogo bota, ci abigami doki, ci ibicuŋ i nyima kare ducu. Ka ce ibedo ka loko lok maber ma konnye tye, ma pe iloko gin mo ma konnye pe, abiloko in doŋ ibedo ma ka doga. Dano gibilokke gidwogo boti, ento in pe ibilokke idok botgi. Doŋ abiketo in ibedo bot lwak man macalo cel gogo me mola ma girumo maber; gin jo-nu gibilwenyo i komi, ento pe gibiloyi ki lweny, pien an atye kwedi abikoki dok abilari, man Rwot ma owaco. Abilari woko ki i ciŋ jo maraco, dok abikoki woko ki i ciŋ jo ma tye laboŋo kica.” Rwot dok oloko bota owacci, “In pe ibinyomo dako mo, dok pe ibibedo ki litino awobe nyo kadi ki litino anyira i kabedo man. Pien Rwot owaco lok kuman i kom awobe ki anyira ma ginywalogi i kabedo-ni, dok bene oloko i kom mego ki wego ma gunywalo litino magi i kabedo man ni, Two maraco atika binekogi woko. Dano pe bikok pigi, dok bene pe gibiyikogi, ento gibibedo macalo cet dyaŋ muket ata i ŋom; Gibinekogi woko ki pala lucwan, ki kec bene binekogi woko, doŋ komgi muto-ni bidoko cam pa winyo ki lee me tim.” Rwot dok owaco kuman ni, “Pe myero idony i ot ka ma dano tye iye ka kumo, pe myero icit ka koko nyo ka kumo pigi; pien doŋ atyeko kwanyo kucca woko ki bot lwak man, man Rwot ma owaco, kadi wa mar mera ma pe lokke ki kicana bene. Jo mulony kacel ki lucan gibito i lobo man, ento ŋat mo pe ma biyikogi nyo ma bikok pigi. Ŋat mo bene pe biŋolo kome kekene kun lyelo yer wiye woko pi nyuto can ma tye i cwinye. Pe tye ŋat mo ma binywako cam kacel ki dano ma tye ki kumo, wek okwe cwinye pi dano muto ca. Dano mo bene pe bimiyo ginamata mo ma nyuto cwiny me kica bot ŋat ma wonne nyo minne oto. Pe myero idony i ot ka ma dano tye ka camo iye karama, me bedo kwedgi kunnu ka cam ki ka mat. Rwot me mony ma en Lubaŋa me Icrael owaco kuman ni, Nen, i kabedo man en aye abijuko iye woo me yomcwiny woko matwal ki i waŋwu ma wun bene wuneno, ki i karewu, dwan me oree ki me yomcwiny, dwan lanyom kacel ki dwan nyako ger. “Ka doŋ itito lok magi ki lwak man, ce gupenyi ni, ‘Piŋo Rwot kono otimo gin marac macalo man i komwa? Wabalo aŋo? Kit bal aŋo ma waŋ watimo i kom Rwot Lubaŋawa?’ ci in ibitito botgi ni, ‘Kwarowu yam gubwota woko, man lok ma Rwot owaco, dok gubedo ka lubo kor lubaŋa mogo mukene, gutiyo botgi, gubedo ka worogi bene. Gubwota woko dok bene pe gugwoko cikka. Ento wun aye doŋ wutiyo gin marac atika ma kato gin ma yam kwarowu gutimo. Wun ducu wubedo jo ma ŋutwu nwaŋ ki ma kitwu rac, wukwero winyo lokka woko. Pi meno abikwanyowu woko ki i lobo man abolowu woko i lobo mukene ma yam wun nyo kadi kwarowu pe guŋeyo. Doŋ ka wutye kunnu en aye wubibedo ka woro lubaŋa mukene-gu dyeceŋ ki dyewor benebene, pe doŋ abinyuto botwu kicana wacel.’ “Pi meno wunen, kare tye ka bino, man Rwot ma owaco, ma pe dok ŋat mo biwaco ni, ‘Macalo Rwot tye makwo-ni, ma en aye okwanyo waŋ jo Icrael okelowa woko ki i lobo Ejipt,’ ento wubiwacci, ‘Macalo Rwot tye kwo-ni, ma okelo jo Icrael woko ki i lobo ma yo tuŋ acam, dok ki i lobo ducu ka ma yam en oryemogi gucito iye.’ Pien abikwanyogi adwokogi cen i lobogi kikome ma yam amiyo bot kwarogi. “Nen, atye ka cwalo dano mapol, man Rwot ma owaco, ma gibimakogi macalo gimako rec; lacen dok abicwalo jo ma gin ludwar mapol, ma gibidwarogi ki i wi godi-gu ducu kadi ki i wi cere-gu, kadi wa ki i kin got mubar. Pien aciko waŋa atye ka neno kitgi ducu; gin pe gukanne ki bota wacel, dok balgi mo ma tye macalo muŋ ma gikano woko ki tuŋ bota pe tye. Abiculo waŋ balgi ki bal ma gutimo kiryo, pien gupyedo lobona woko ki cal jogigi ma rom ki kom jo muto-gu, doŋ gupoŋo gipinnya ki timo gin me kwer keken.” Ai Rwot, in i tek mera ki cel gogona matek ka ma ariŋo alaro iye i kare me can, rok ducu gibia gibino boti, kun gia ki i agikki lobo, ma giwacci, “Kwarowa yam guleyo gin ma tere pe, lok goba keken, guleyo jami ma konygi pe ma pe gunoŋo iye magoba mo. Dano twero tiyo lwak lubaŋa pire kene? Kit gin macalo meno pe lubaŋa wacel.” “Pi meno, abimiyo giŋeyo, abimiyo giŋeyo twerona ki tekona kicel keken, ci doŋ gibiŋeyo ni an nyina Rwot.” Rwot owacci, “Wun jo Juda, balwu doŋ gicoyo woko ki kalam nyonyo, gigoro woko bene i cwinywu ki kidi dayaman ma lake bit, ki i kom ten keno aŋwen ma tye i kom keno tyerwu, en ma miyo litinowu po i kom keno tyerwu ki i kom cal Acera ma jok ma dako ma wucibo i ŋet yadi ducu ma potgi oluk, i wi cere mabocogu, ki i wi godi ducu ma tye i dye tim. Lonyowu kacel ki limwu ma yam wukano abimiyo giyako woko, pi balwu ducu ma doŋ wutyeko timo ma oromo i lobowu-ni woko liweŋ. Wubikwanyo ciŋwu woko ki i kom gipiny ma yam amiyo botwu, abimiyo wubedo opii pa lumerokwu kun wutiyo tic botgi i lobo ma pe wuŋeyo, pien mac doŋ olyel ki i kinigana ma bibedo ka waŋ nakanaka.” Rwot owaco kuman ni, “Ŋat ma keto genne i kom dano giceno woko, ma keto genne i kom kero pa dano, ŋat ma loko cwinye woko ki i kom Rwot. En bedo calo yat ma i dye tim aroo, ma pe bineno gin mo maber ka bino. En bibedo mere i kabedo mutwo mubedo kado kado ma gir, mo pe doŋo iye, i kabedo ka ma dano pe bedo iye. “Dano ma geno Rwot tye ki gum, ma genne ducu ocuŋ i kom Rwot. En bedo calo yat ma gipito i ŋet kulu, ma cwalo lwite donyo woko piny wa i laora kulu. Ka i kare me lyeto ma piny otwo en pe lworo gin mo, pien pote bedo madyak kumeno, dok bene i mwaka ma cen ryeny teretere ma pii pe en pe paro gin mo, dok pe giko nyako nyige.” Cwiny dano en aye gin ma bwolo dano ma kato gin mukene-gu ducu, opoŋ ki gin marac adada; aŋa ma twero niaŋ iye? “An Rwot aŋiyo tam pa dano dok bene atemo cwiny dano, wek ami bot dano acel acel gin ma lubo kite, dok ma lu bo kit gin ma en otiyo.” Macalo ayweri ma coko litino i te bwome ma en kikome pe otoko, ŋat ma noŋo lonyo i yo ma pe atir bene tye kit meno; ka doŋ oteggi inoŋo ni lonyone rwenyo woko, i agikkine en gire doko lamiŋ. Kabedowa maleŋ me woro Lubaŋa nen calo kom me deyo adada, ma ocuŋ malo i wi got nia i acakkine. Ai Rwot, gen pa jo Icrael ducu tye i komi, jo ducu ma gibwoti woko lewic bimakogi matek; jo ma gilokke giweki woko gibirwenyo woko calo nyiŋ ma gicoyo i apwa, pien gin doŋ gutyeko bwoto Rwot woko, ma en aye waŋ it me pii me kwo. Jeremia okok bot Rwot Caŋa, ai Rwot, ci abicaŋ woko maber; lara, ci bene abilarre; pien an apako in kare ducu. Nen, giwaco bota ni, “Lok pa Rwot tye kwene? wek lokke obin!” An pe adiyo in ni myero icwal gin marac, dok bene an pe amito nino me can amita, meno in iŋeyo; gin ma oa ki i doga ducu ma aloko, aloko atyer ka waŋi. Pe ibed gin ma kelo lworo bota; in i kalarrena i kare ma noŋo piny rac. Wek lewic omak jo ma giketo ayela i koma, ento pe iwek lewic omaka; wek cwinygi aye oballe woko, ento in pe’ iwek meri cwinya oballe; mi kare ma gin marac myero opot kwede i komgi; tyekgi woko licwic ki nek ma iketo i komgi kiryo! Rwot owaco bota kuman ni, “Cit icuŋ i dogcel pa Benjamin, en aye ka ma luker me Juda gidonyo kwede i i gaŋ dok bene yo ma gikato kwede woko; cuŋ bene i dogcel ducu me Jerucalem, ci iwac botgi ni, ‘Wuwiny lok pa Rwot, wun luker me Juda, ki jo Juda ducu, ki jo ducu ma gibedo i Jerucalem, ma gidonyo ki i dog gaŋi magi. Rwot owaco kuman ni, Ka wumaro kwo myero pe wutiŋ ter i ceŋ cabit; dok pe myero wukel gin mo kun wuwok ki i dog gaŋi ducu me Jerucalem. Dok bene pe myero wutin ter ki i otwu i ceŋ cabit, dok pe wuti tic mo, ento myero wukwer nino me cabit obed maleŋ kit macalo yam aciko ki kwarowu. Ento kwarowu yam pe guwinyo, gujiijo nutgi obedo matek, pe guciko itgi ka winyo lokka, wek pe guwiny dok gugam pwony ma mera. “‘Ento ka wuwinyo lokka, man Rwot ma owaco, ma pe wukelo ter mo ki i dogcel ducu me gaŋ man i ceŋ cabit, ento kun wukwero ceŋ cabit bedo nino maleŋ ma pe wutiyo tic mo i nino meno, doŋ lukerwu ki rwodiwu bidonyo ki i dogcel me Jerucalem ma gibedo i wi komker pa Daudi. Gin ki rwodigi ducu kacel ki jo Juda ki jo Jerucalem, gibiriŋo ki gadigadi ki aguragura, doŋ meno bimiyo gaŋ me Jerucalem bipoŋ ki lwak dano mapol matwal. Dano gibia gibino ki i gaŋi me Juda ki i gaŋi matitino ma i ŋet Jerucalem; gibibino ki i lobo pa Benjamin, ki i lobo me Cepela, ki i lobo ma obedo godigodi, dok bene gibia gibino ki i Negeb, kun gikelo gityer me gitum awaŋa, gityer me moko kwoŋ, ki odok luban, dok gikelo gityer me pwoc bene i ot pa Rwot. Ento ka wun pe wuwinyo lokka me kwero ceŋ cabit wek obed maleŋ, dok ni pe wutiŋ ter mo wudony kwede ki i dogcel me Jerucalem i ceŋ cabit, ci abimiyo mac lyel i dogcelle ducu biwaŋo odi madoŋo me Jerucalerri woko ducu ma macce pe doŋ gibiromo nekone matwal.’ ” Rwot owacca ni, “A malo icit i ot pa lwacwe agulu, ci abimiyo iwinyo lokka ki kunnu.” Ci aa acito i ot pa lacwe agulu, ci anoŋo en tye ka cweyo agulune i kom lawala. Ci lobo agulu ma onoŋo lacwe agulu tye ka cweyone-ni oballe woko ki i cine, ci en oloko woko otiyo kwede gin mukene mapat kit macalo en lacwe agulu oneno ni ber bote me atima. Rwot dok owaco bota ni, “Wun jo me ot pa Icrael, pe atwero tiyo i komwu gin ma lacwe agulu otiyo-ni? Man Rwot ma owaco. Nen, wun jo Icrael bene wutye i ciŋa macalo lo bo ma tye i cin lacwe agulu. Ka ce i kare mo awaco pi rok mo ni abiputo dok aturo woko ci abityeko woko, ka ce doŋ rok meno ma aloko pire-ni olokke oweko timo gin marac, ci abinut pi gin marac ma onoŋo atamo ni atimo i kome ca, Dok bene ka ce onoŋo awacci abipito nyo agero rok nyo ker mo-ni, ce rok meno okwero winyo doga olokke ka timo gin marac, ci abiloko tamma i kom gin maber ma onoŋo awaco ni abitimo botgi-ni. Kombeddi doŋ itit bot jo Juda ki jo ma bedo i Jerucalem ni, ‘Rwot owaco kuman ni, Nen, atye ki yub marac piwu dok ayubbe me keto can i komwu. Wulokke wudwog cen, ŋat acel acel owek kit marac woko, dok oyub kite kun tiyo gin ma tye atir.’ “Ento gin gigamo ni, ‘Lokke pe konyo! Wabilubo yub ma waŋ kikomwa aye wayubo, ki ŋat acel acel bene bitiyo gin ducu ma oporo rac cwinye ma nwan-ni.’ “Mumiyo Rwot owaco kuman ni, Ka imito koŋ ipeny i kin lurok, aŋa ma yam owinyo lok mo ma cal ki man? Jo Icrael ma amaro doŋ gutimo gin marac adada. Pee me Lebanon mo no twero weko lacol got me Cirion? Kulu ma piine nie ma mol a ki i wi godi twero two woko liweŋ? Ento jona doŋ wigi otyeko wil woko i koma; gibedo ka wano odok eceta bot cal lubaŋa-gu; gubedo ka yokke atata i kit me wot megi, pe gulubo yo macon, dok bene guwoto ki i yo mogo ma wok ki cen, pe guwoto ki i yo gudo, ma guloko lobogi odoko gin ma miyo lworo bot dano, ma bibedo gin ma gijwat pire kun gicayo nakanaka. Jo ducu ma gibikato ki i ka ŋete gibibedo ki ur madit twatwal kun giyeno wigi. Abikeyo jona woko i nyim lukworgi, calo apwa ma yamo wokceŋ tye ka tinone. Abiloko neya woko botgi; pe abikonyogi ka can opoto komgi.” Lacen lwak guwacci, “Wubin wapiru lok i kom Jeremia! Kare ducu wabibedo ki ajwagi ma giromo pwonyowa, ki luryeko bene ma gibibedo ka miyo botwa tam, dok wabibedo ki lunebi ma gimedde anyim ki tito lok pa Lubaŋa, Wubin, wek wakelu lok me pido i kome, doŋ bene wagiku keto cwinywa i lok ducu ma en owaco-gu.” Pi meno Jeremia olego Lubaŋa, kun wacci, “Rwot, winy lok ma atye ka wacone-ni, ki dok bene iwiny lok ma lukworra gitye ka lokone i koma. Gin marac mono aye giculo ki ŋat ma timo gin maber? Doŋ gutyeko kwinyo bur woko ni myero apot iye. Koŋ ipo kit macalo abino kwede i nyimi kun apido pigi ma aloko lok maber, wek ikwany akemoni woko ki i komgi. Pi meno doŋ imi kec onek litinogi otyekgi woko; dok bene wek ginekgi woko i lweny ki pala lucwan. Wek mongi gudoŋ laboŋo litino dok bene gudok mon-to. Wek two gemo aye onek coggi otyekgi woko, ki awobegi bene myero ginekgi woko i mony ki pala lucwan. Cwal dul mony atura me yako gaŋigi woko, wek guwo ki koko ma kelo lworo. Doŋ gutyeko kwinyo bur woko wek apot iye, dok guciko owic woko wek amok iye. Ento in, ai Rwot, iŋeyo kit macalo gipiro kwede lok i koma wek gineka woko. Pe itimgi ki ca pi gin marac ma gitimo, pe bene ijwa balgi woko matwal ki i nyimi. Wek gibed ka loyogi kumeno i nyimi; ti kwedgi i kare ma noŋo kiniga omaki.” Rwot owaco kuman ni, “Cit iciwil abino ma lacwe agulu ocweyo, kwany ludoŋo pa lwak ki ajwagi ma guteggi ma doŋ guri i dog tic icit kwedgi, ci wucit wukat woko wa i nota pa wod pa Kinom, kun wudonyo ki i dogcel me Labaltak, ci icitit lok ma awaco boti-ni ducu ki kunnu. Ibiwacci, ‘Wuwiny lok pa Rwot, wun luker me Juda ki jo ma bedo i Jerucalem. Rwot me mony ma en Lubaŋa pa Icrael owaco kuman ni, Nen, atye ka kelo gin marac twatwal i kom kabedo man, mi yo dano ducu ma gibiwinyo pire itgi bibedo ka wo awoya liwaŋ waŋ. Abitimo gin ma kit man pien dano gutyeko bwota woko, dok bene gubalo kabedo man woko, kun giwaŋo iye odok eceta bot lwak lubaŋa mukene ma gin kikomgi nyo kwarogi kadi ki luker me Juda onoŋo yam pe guŋeyo. Gupoŋo kabedo man woko ki remo pa jo ma gipe ki bal, dok bene gugero waŋ jogi pi jok Baal ka ma giwaŋo iye awobegi ki mac macalo gitum awaŋa bot jok Baa!. Meno gin ma yam pe awaco ni gutim, pe acikogi pire, dok bene pe atamo pire wacel ni gutim. Pi meno, nen, kare tye ka bino, man Rwot ma owaco, i kare meno kabedo man doŋ pe gibilwoŋo ni Topet nyo nota pa wod pa Kinom, ento doŋ gibilwoŋo ni nota me Nek, I kabedo man en aye abibalo iye yub pa jo Juda ki jo Jerucalem woko, Abimiyo lukworgi giloyogi woko, ci ginekogi woko ki pala lucwan i lweny. Abimiyo komgi muto bedo cam pa winyo ki pa lee me tim, Abibalo gaŋ man woko marac twatwal wek dano ducu ma gikato ki ka ŋete gubed ki jwat ki ur madit pi gin marac ma doŋ otyeko timme-ni. Abimiyo jo ma gubedo kunnu gicamo kom litino awobegi ki litino anyiragi, ma ŋat acel acel bicamo riŋo kom lawote, i kare ma noŋo mony doŋ orumogi woko, ma doŋ gitye ka madin pi can ma jo ma mito nekogi woko gukelo i komgi.’ “I kare meno en aye ibineko kwede agulu i nyim jo meno ma giwoto kwedi-ni, ci ibiwaco botgi ni, ‘Rwot me mony owaco kuman ni, Abituro jo magi woko kit meno wa ki gaŋ man, calo ŋat ma neko agulu, miyo pe dok gitwero yu bone wek odwog kakare. Gibiyiko dano ducu i Topet pien kabedo mo mukene me yik doŋ bibedo pe, Meno aye gin ma abitiyo i kabedo man, man Rwot ma owaco, man bene gin ma abitimo i kom jo ma bedo iye, dok abimiyo gaŋ man lokke nen calo Topet. Lwak odi ducu ma i Jerucalem ki odi pa luker me Juda, ma gin odi ma yam gibedo ka wano odok eceta i wigi botmony me polo, ki on yo gityer amata-gu bot lubaŋa mukene, gibimiyo balle woko macalo kabedo me Topet.”” Lacen Jeremia oa ki i Topet ka ma onoŋo Rwot ocwale iye ka tito lokke, obino ci ocuŋ i dyekal me ot pa Rwot, ci owaco bot lwak ducu ma gitye kenyo ni, Rwot me mony, ma en Lubaŋa pa Icrael, owaco kuman ni, “Nen, atye ka kelo gin marac ma yam aloko pire i kom gaŋ man, aketo i kome ki i kom gaŋi matino ma gurumo ka ŋete, pien gumiyo nutgi odoko nwaŋ, kun gikwero kwede winyo lokka.” I kare meno ajwaka Packur wod pa Imer, ma onoŋo en aye ladit ma loyo ot pa Rwot, owinyo ka Jeremia tito lok magi. Cutcut Packur otugi go yo lanebi Jeremia woko, ‘ci otweye ki okol ma tye i dogcel ma malo pa Benjamin me ot pa Rwot. Orwone Packur ogonyo Jeremia ki i okol, ci Jeremia owacce ni, “Rwot pe lwoŋo nyiŋi ni Packur, ento lwoŋi ni Lworo tye i kabedo ducu. Pien Rwot owaco kuman ni, Nerr, abimiyo ibedo gin ma kelo lworo i komi kekeni ki i kom luremi ducu. Lukworgi gibinekogi woko ki pala lucwan ka ma in bene inenogi, Abimiyo jo Juda woko ducu i cin kabaka me Babilon; en biterogi woko i opii i Babilon, ci en binekogi woko ki pala lucwan. Dok bene abimiyo lonyo ducu me gaŋ man kacel ki magobane, ki jami ducu ma pigi tego botgi ducu, ki kit lonyo mapatpat pa kabaka me Juda i cin lukworgi, ma biyako jamigi, kun gimakogi, ci giterogi woko i Babilon. Doŋ in Packur, kacel ki jo ma gibedo i odi, gibiterowu woko i opii i Babilon; ci doŋ wubito kunnu, gibiyikowu bene kunnu, in kacel ki luremi ma yam ibedo ka tito lok gobagoba botgi-ni.” Ai Rwot, in doŋ ibwola, oweko bene gibwola. In i tek ikata woko, doŋ ityeko loya woko. Doŋ adoko ginanyera pa dano dyeceŋ jwi; dano ducu giŋala aŋala. Ka atye ka loko lok mo ci aloko ki dwan maloŋo kun adaŋŋe matek ni, “Tim bwami ki balle me lobe!” Gicaya dok ginywara kare ducu pien ni atito lok pa Rwot. Ka ce awacci, “Pe doŋ abilwoŋo nyiŋ Rwot, nyo ni pe doŋ abiloko lok mo ki nyiŋe matwal,” ci i cwinya kuca noŋo tye iye gin mo ma waŋ calo mac, ma tye okanne woko i cogona, doŋ aol woko ki juko doga wek pe aloki, pe doŋ atwero. Awinyo lwak tye ka lok lawewe. Gilwoŋa doŋ ni, “Gin ma kela lworo i kabedo ducu.” Giwacci, “Dote woko! Wek wadote woko!” Man lurema ma aŋiyo kwedgi aye giwaco; gitye ka neno kit macalo abipoto kwede i can. Dok giwacci, “Gwok nyo gibibwole abwola, ci wabimake woko, waculo waŋ kworwa i kome.” Ento in, Rwot, it ye kweda, in oteka lweny ma gilworo, pi meno jo ma giketo ayelayela i koma gibiyokke atata; pe gibiloya kadi matidi mo. Lewic bimakogi matek mada, pien pe doŋ gitwero loyo. Lewic ma bimakogi-ni bedo matwal, wi dano pe biromo wil i kome wacel. Ai Rwot me mony, in itemo dano me neno ka kitgi tye atir, iŋeyo gin ma tye i cwinygi ki gin ma gitamo. Pi meno wek anen ka iculo kwor i kom lukworra, pien an doŋ anyuto lokka woko ducu boti. Wuwer wer bot Rwot! Wupak Rwot! Pien otyeko laro kwo pa jo ma piny obwoyogi ki i ciŋ lutim maraco. Gicen nino ma cen ginywala iye-ni! En nino ma yam maa onywala iye, wek gum obed pe i kom nino meno! Gicen dano ma okelo lok maber bot wora ni, “Inywalo latin laco,” omiyo obedo ki yomcwiny madwoŋ. Wek dano-nu obed calo gaŋi ma Rwot ojwero woko laboŋo kica; wek owiny koko i odiko ki oduru ma gigoyo i cwiny dyeceŋ, pien pe oneka ki i i maa; kono ot nyodo pa maa doŋ olokke odoko macalo lyella, kono ot nyodo pa maa obedo pek matwal. Piŋo akatti kono ki i ic ka noŋo tic matek ki cwercwiny, dok ka tyeko ninona ducu ki lewic keken? Man aye lok pa Rwot ma obino bot Jeremia i kare ma kabaka Jedekia ooro Packur wod pa Malkia ki ajwaka Jepania wod pa Maceya bot Jeremia kun wacci, “Lok bot Rwot piwa, pien Nebukadnejar kabaka me Babilon tye ka ero lweny i komwa. Gwok nyo Rwot bitiyo jami taŋone mogo piwa, ci bimiyo. Nebukadnejar jer dok cen ki ŋeye.” Ci Jeremia otito ki jo ma onoŋo gicwalo bote-ni ni gucitit bot Jedekia ni Rwot, ma en Lubaŋa pa Icrael, doŋ otyeko waco ni, “Abecito ka ryemo askari ma Jedekia tye ka tic kwedgi me lweny i kom kabaka me Babilon ki dul monnye, ma doŋ gitye ka rumo cel me gaŋ woko ducu-ni adwokogi cen. Abicoko jami lwenygi aduro woko i dye gaŋ, An kikoma aye doŋ abilwenyo i komwu ki tekona ducu, ki kiniga, ki akeca madit. Abineko jo ducu ma gibedo i gaŋ man, dano kacel ki lee, gin ducu two gemo marac adada biketogi woko. Lacen abimiyo Jedekia kabaka me Juda, ki luticce, ki jo ma gitye i gaŋ man ma gubwot ma two gemo pe onekogi, jo ma pe ginekogi ki lweny ki pala lucwan, ma kec madit pe onekogi, abimiyogi woko i cin Nebukadnejar kabaka me Babilon, cin lukworgi ma gimito nekogi woko. Nebukadnejar binekogi woko ducu ki pala lucwan; kadi wa kica bene pe bimako en i komgi, pe bene biparo pigi, dok pe biwekogi gibedo kwo. Man Rwot ma owaco.” Lacen Rwot dok ociko Jeremia me tito ki lwak ni, “Wuwiny, an Rwot am iyo botwu twero me yero yo ma tero dano i kwo nyo yo ma tero dano i to. Ŋat ma pud bedo i gaŋ man gibineko woko ki pala lucwan i lweny, nyo kec bineko, nyo two gemo bibino neko woko. Ento ŋat mo ma bia cito woko kun mine bot jo Babilon ma doŋ kombeddi gurumo gaŋ woko, en aye bibedo kwo dok kwone bibedo bote macalo mot me lweny. Doŋ amoko tamma woko pe me bwoto gaŋ man, ento doŋ ayubbe me balone woko, Gibimiyo i cin kabaka me Babilon, ci en biwaŋo woko ki mac ŋinyiŋinyi. Man Rwot ma owaco.” “Wac bot jo me ot pa kabaka me Juda ni, ‘Wuwiny lok pa Rwot, wun jo me ot pa Daudi! Rwot owaco kuman ni, “‘Wuŋol kop atir piny ma ru ki piny ma ru, dok myero wular dano ki i ciŋ ŋat ma unogi kadi ki ŋat ma doŋ gityeko yako jamine woko, wek pe akemona okatti wokomacalo mac ma lyel, ma waŋo piny ma ŋat mo pe romo nekone, pi gin marac ma wubedo ka timone.’ ” “Nen, atye ki lok i komwu, wun jo ma wubedo i nota, kadi ki in got ma it ye i dye bar, man Rwot ma owaco; wun ma wuwacci, ‘Aŋa kono ma bilor piny bino ka lweny i komwa?’ dok bene wuwaco ni, ‘Aŋa ma bidonyo i kabedo ka ma wabedo iye?’ Abiketo can i komwu kun lubo kit gin ma wutimo, man Rwot ma owaco; abimoko mac i buŋawu, ci awaŋo gin ducu ma orumo ŋete atyeko woko liweŋ.” Rwot owaco kuman ni, “Cit bot jo me ot pa kabaka me Juda, ci iciwac lok man kunnu, ni, ‘Winy lok pa Rwot, in kabaka me Juda, ma ibedo i wi komker pa Daudi, in kacel ki luticci, ki lwakki ma gidonyo ki i dogcel ducu me gaŋ man. Rwot owaco kuman ni, Wutim gin ma tye kakare dok ma atir, wular dano ma gibedo ka unogi ki i ciŋ ŋat ma oyako jamigi. Pe wutim gin marac nyo tim aranyi i kom larok mo, i kom litino kic ki mon to, dok bene pe wunek dano mo ma pe ki bal i kabedo man. Ka ce wulubo gin ma an doŋ acikowu ni wulubi, ci likwayo pa Daudi gibimedde ki bedo luker. Gin kacel ki luditogi ki lwak, gibimedde ki donyo i dogcel ducu me gaŋ kal man kun giriŋo ki gadigadi kacel ki aguragura. Ento ka ce pe wulubo lokka, an doŋ akwoŋŋe ni nyiŋa kena botwu ni gaŋ kal man bidoko wi obur. Man Rwot ma owaco. Pien Rwot owaco lok ma okemo ot pa kabaka me Juda ni: “‘In ibedo calo lobo Gilead ki tuŋ bota, calo wi got Lebanon mabit, ento kadi bed kumeno abiloki idoko tim aroo, gaŋ ka ma dano pe bedo iye. Abiyubo lulweny ma gibilweny komwu, ŋat acel acel bimako jami lwennye; gibitoŋo yadi cedarwu mabeco-gu gireto woko piny, ci gicoko gibolo woko i mac. “‘Lacen lurok mapol gibikato ki i ŋet gaŋ man, kun dano acel acel biwaco bot lawote ni, “Piŋo Rwot otimo gin macalo man i kom gaŋ man madit-ti?” Gibidok iye kun giwacci, “Pien onoŋo gubwoto gicikke pa Rwot Lubaŋagi woko, dok gubedo ka woro lwak lubaŋa mukene-gu kun gitiyo botgi bene.” Pe ikok pi Yocia ma doŋ oto woko, dok bene cwinyi pe myero oton pire; ento kok pi ŋat ma doŋ a cito woko doŋ matwal, pien en doŋ pe bidwogo cen wacel me neno lobo ma yam ginywale iye. Pien Rwot owaco lok kuman mukemo Calum wod pa Yocia kabaka me Juda, ma obedo ka loc ma ka wonne Yocia, ma onoijo oa woko ki i kabedo man ocito gire woko ni, “En doŋ pe bidwogo cen kany matwal, ento en bito mere i kabedo ka ma gitere iye i opii, pe dok bineno lobo man tyen me aryo.” “Can i wi dano ma gero ode ki kit tim ma pe atir, ma ogero kicika odine ma malo-gu ki ŋolo kop ma pe atir, ma miyo luwote tiyo tic bote noŋo laboŋo cul mo, dok bene pe culo mucaragi. Can i wi ŋat ma wacci, ‘Abigero ot madit pira kena kun aweko kicikane ma malo bedo malac twatwal.’ Ci en biketo waŋ dirica i ode, bipeto bao cedar i kicika me ot, ka dero woko ki rani makwar. Itamo ni man bimiyo in idoko kabaka, me gero odi ki yadi cedar odi mabeco ma gikato odi ma gigero ki yadi mukene woko-gu? Woru aye yam ocamo kuc me lobeni mada. Kare ducu en obedo dano ma genne dok ma ŋolo kop atir, omiyo gin ducu ma en obedo ka tiyone owoto maber. Obedo ka ŋolo pido pa lucan ki jo ma piny obwoyo maromrom, omiyo en obedo ki kwo maber. Man aye tyen lok me ŋeyo Rwot. Ento ibedo ka neno mitini kekeni keken; wek inoŋ lonyo pi uno dano; ineno jo ma gipe ki bal mo, dok bene itimo tim bwami me uno lwakki. Man Rwot ma owaco, Pi meno Rwot owaco lok not Yekoyakim wod pa Yocia kabaka me Juda ni, “Ŋat me pe bikumo pi tone, kun wacci, ‘Omera do!’ nyo ni, ‘Lamera do!’ Ŋat mo ma bikok pe, kun wacci, ‘Rwoda do!’ nyo ni, ‘Kabakana do!’ Gibiyiko ki kit yik ma giyiko kwede kana, gibipeyo gitero ci gibolo woko i ŋe cel me Jerucalem.” “Wun jo Jerucalem, wucit i wi got Lebanon ci wucidaŋŋe kunnu, dok wucit i lobo Bacan ci wucikok kunnu; wulwoŋ lwoŋo matek ki i Abarim, pien jo ma nene wumarogi-ni ducu doŋ gityekogi woko. Aloko kwedwu i kare ma onoŋo wutye ki lonyo madwoŋ, ento wun giwu wukwero winyo lokka woko. Man aye kit gin ma wubedo ka timone cakke wa ka tinowu; pe wulubo gin ma abedo ka waco botwu wacel. Yamo bikodo ci tero lutelwu woko ducu, jo ma wumarogi-ni gibiterogiwoko i opii, lewic bimakowu dok alee bitwodowu pi gin maraco ducu ma doŋ wutyeko timone, Wun jo ma wubedo i Lebanon, wubedo laboŋo lworo mo i kin yadi cedar; ento ka arem me can opoto i komwu wubicur marac calo dako ma tye ka rem ki nywal!” ŋolo kop pa Yekonia Rwot owacci, “Kit macalo atye kwo-ni, kadi bed in Yekonia wod pa Yekoyakim kabaka me Juda, ibedo agit me diyo ciŋ ma tye i ciŋa tuŋ lacuc, pud abicori woko aye, ci abimiyi i ciŋ jo ma gimito neki woko, i ciŋ jo ma ibedo ki lworo i komgi-ni, Abimiyi bene i ciŋ Nebukadnejar kabaka me Babilon kacel ki jo Kaldaya. Abiboli woko i lobo mukene kacel ki meni ma onywali, ka ma yam pe ginywali iye, ci ibito woko ki kunnu. Ento pe doŋ ibidwogo cen i lobo ma imito ni kono ineno ki waŋi-ni.” Jeremia owacci, “En Yekonia mono doŋ olokke odoko macalo agulu muto ma doŋ gikwanyo gibolo woko, ma ŋat mo doŋ pe mito? Piŋo kono gikwanyo en kacel ki litinone gibologi i lobo ma gin pe giŋeyo lok i kome? “In lobo, in lobo we, in lobo! Winy lok ma Rwot doŋ owaco: “Giŋolo koo woko i kom laco man ni latinne mo bibedo pe, en dano ma pe obedo ki gumkom i kare me kwone ducu; likwayone mo pe ma bibedo ki gumkom me bedo i wi komker pa Daudi. Man lok pa Rwot kikome.’ ” “Can i wi lukwat ma gineko dok ma gikeyo romi ki i oletta!” Man Rwot ma owaco. Mumiyo an Rwot, Lubaŋa pa Icrael, awaco lok kuman ma okemo lukwat ma gigwoko romina ni, “Wun doŋ wukeyo romina woko, ci wuryemogi gucito woko, ento pe wubedo ka gwokogi wacel. Pi meno abiketo cwinya me keto can i komwu pi gin marac ma wutimo, man Rwot ma owaco. Lacen abicoko romina ma gudoŋ woko liweŋ ki i lobo ducu ka ma yam aryemogi gucito iye, abidwokogi cen kany aketogi i dwolgi, ci gibinywal ginya matek. Abiketo lukwat ma bigwokogi, man miyo doŋ pe gibibedo ki lworo mo, dok cwinygi bene pe biballe, ki mo ma birwenyo bene bedo peke, man Rwot ma owaco. “Nen, kare tye ka bino, man Rwot ma owaco, ma abiketo iye lakwaro Daudi kikome me bedo kabaka. En bibedo jaŋ yat ma bilot ki k it ma atir, ma biloyo loc ki ryeko, dok bitiyo gin ma tye atir dok kakare i lobo man, I kare ma onoŋo en tye kabaka, jo Juda gibibedo mot laboŋo lworo mo, ki jo Icrael bene doŋ gibibedo ki kuc. Gibilwoŋo kabaka meno ki nyiŋ ni, ‘Rwot aye ma miyowa kit ma atir.’ “Pi meno wunen, kare tye ka bino, man Rwot ma owaco, ma pe dok ŋat mo biwaco ni, ‘Macalo Rwot tye makwo-ni, ma en aye okwanyo waŋ jo Icrael okelowa woko ki i lobo Ejipt,’ ento wubiwacci, ‘Macalo Rwot tye kwo-ni, ma okelo jo Icrael woko ki i lobo ma yo tuŋ acam, dok ki i lobo ducu ka ma yam en oryemogi gucito iye.’ Pien abikwanyogi adwokogi cen i lobogi kikome ma yam amiyo bot kwarogi.” Jeremia otito lok ma okemo lunebi, “Cwinya oballe woko omiyo koma ducu tye ka myel amyela, Man otimme pi Rwot, kun bene lubo lok mere maleŋ; atye doŋ calo dano mumer ki koŋo, dano ma omato koŋo vino madwoŋ, Pien lobo doŋ opoŋ ki lutim abor keken; gibedo ki kit kwo marac dok bene gitiyo ki tekogi i yo marac. Lobo tye ka kumo pien Rwot doŋ oceno woko, ki olet-gu bene doŋ gutwo woko.” Rwot owacci, “Lunebi kacel ki ajwagi pe giworo Lubaŋa; anonogi ma gitye ka timo gin marac i ot pa Lubaŋa kikome. Pi meno yo ma gilubo, yone bibedo pwot dok col; abimiyo giyokke ci gipoto. Abimiyo gin marac poto i komgi; kare me keto can i komgi tye ka bino, man Rwot ma owaco. Doŋ atyeko neno bal pa lunebi me Camaria: gubedo ka tito lok i nyiŋ Baal, ci gutelo jona jo Icrael, gumiyo guŋak gubwota woko. Ento aneno lunebi ma i Jerucalem dok gitimo gin ma kelo lworo mukato kare: gitimo abor dok giloko lok goba; gikonyo lutim gin marac medde ki timo gin marac, wek ŋat mo pe olokke owek timo bal. Gin ducu gudoko calo Codom ki tuŋ bota, ma girac adada calo jo Gomora.” Mumiyo Rwot me mony owaco lok ma kemo lunebi kuman ni, “Nen, abimiyo gimato yat roka, abimiyo bene gimato pii ma giketo iye kwir; pien gunyayo kit me woro jogi gumiyo oromo i lobo woko ducu.” Rwot me mony owaco kuman bot jo Jerucalem ni, “Pe wuwiny lok ma lunebi gitito, pien gitye ka pi ko gen mogo me gobagoba ma pe konyo i iwu. Gitito botwu ginanyuta mogo ma gin gutamo atama ki wigi, ento noŋo pe gin ma an Rwot aloko. Giwaco lok teretere bot jo ma gicayo lok pa Rwot ni, ‘Wubibedo maber laboŋo ayela mo’; gitito bene bot jo ma cwinygi nwaŋ ma gitiyo gigi gin ma igi mito ni, ‘Can mo pe bipoto i komwu wacel.’ ” Aŋa i kingi mono ma doŋ ocuŋ i cokke pa Rwot, ma gunene dok ma guwinyo lokke? Aŋa i kingi ma owinyo lokke ci olubo? Nen, akemo pa Rwot okatti ocito woko calo yamo kot, calo yamo lapiru mager; bimwoc woko i wi lutim maraco. Kiniga pa Rwot pe bigik nio waŋ ma Rwot otiyo dok ocobo gin ma en oketo i tamme. I nino ma pud tye anyim wubiniaŋ iye maber adada. “An gira onoŋo pe aoro lunebi magi, ento gin guriŋo ariŋa oyotoyot. Pe aloko botgi bene lok mo, ento gubedo ka tito loko Ka nene gucuŋ i cokkena, kono gutito lokka bot jona, kono guloko jona ki i kit kwo marac ma onoŋo gitye iye-ni, kono gulokke guweko timo gin marac.” Rwot owacci, “An mono Lubaŋa ma atye ka macok keken, pe atye ka mabor? Dano mo twero kanne woko i kabedo mo ma tye i muŋ ma pe atwero nene? man Rwot ma owaco. Pe an aye ma apoŋo polo ki lobo? man Rwot ma owaco. Doŋ atyeko winyo lok ma lunebi guwaco ma gitito lok goba ki nyina, kun giwacci, ‘Aleko lek, aleko lek!’ Lunebi magi gibikano goba i cwinygi ma gitito lok gobagoba me bwola ma giparo ki i cwinygi kengi pi kare ma rom mene? Gitamo ni lekgi ma gitito-ni bimiyo wi jona wil woko i koma, kit macalo kwarogi yam wigi owil woko i koma ci gulokke gudok ka woro jok Baal-li. Lanebi ma oleko lek myero otit lekke, ento lanebi ma doŋ owinyo lok myero otit lok meno ki gen adada. Ka giporo ren kal ki kal kikome mono berre nen niŋniŋ? man Rwot ma owaco. Lokka obedo calo mac dok calo nyol ma tyero gweŋ woko matitino, man Rwot ma owaco. Pi meno, nen, atye ki lok i kom lunebi ma gikwalo lok ki bot luwotgi ki i kingi kekengi ka gitito kun giwacci gitito lokka. Dok bene atye ki lok i kom lunebi ma gitito gigi lokgi, kun giwaco ni, ‘Man Rwot ma owaco.’ At ye ki lok i kom lunebi ma gitito lekgi ma opoŋ ki goba keken-ni, man Rwot ma owaco, ma gitito lekgi-ni ci gitelo jona miyo giŋak gibwota woko pi gobagi ki kitgi me nyatte, ma kun noŋo pe acwalogi dok noŋo bene pe acikogi ni guciti; pe gitye ki kit kony mo wacel bot lwak man. Man Rwot ma owaco. “Jeremia, ka ŋat mo i kin jona, nyo kadi lanebi nyo ajwaka, openyi ni, ‘Lok mapek ma Rwot owaco mono en gin aŋo?’ Ci wubidok iye ni, ‘Wun aye gin mapek bot Rwot, pi meno en bikwanyowu bolowu woko matwal, man Rwot ma owaco.’ Ka ce inen lanebi kadi ki ajwaka, nyo ŋat mo acel i kom lwak man ma biwaco ni, ‘Lok mapek ma Rwot owaco,’ an abiketo can i kom dano meno ki jo ma i ode ducu. Ma ka waco lok meno, myero ŋat man openy lawote nyo ominne ni, ‘Rwot mono doŋ odok iye niŋo?’ nyo ni, ‘Rwot mono oloko gin aŋo?’ Ento lok man ni lok mapek ma Rwot owaco pe doŋ wubiloko matwal, pien lok mapek ma wuloko pire-ni en aye obedo lok pa dano acel acel ma en waco pire kene; pi meno wudwalo lok pa Lubaŋa makwo woko, ma en Rwot me mony dok Lubaŋawa. In Jeremia, peny lunebi ni, ‘Oin aŋo doŋ ma Rwot odok iye ki wun?’ Nyo ni, ‘Rwot oloko gin aŋo?’ Ento ka guwacci, ‘Lok mapek ma Rwot owaco,’ ci itit botgi ni pien guwaco lok man, kun onoŋo acikogi woko matek ni pe gulok lok man, pi meno, adada abikwanyogi atiŋogi malo ci abologi woko cen ki i nyima, gin kacel ki gaŋ ma yam amiyo botgi ki bot kwarogi. Doŋ abikelo lewic marac ki cac ma bedo nakanaka aketo i komgi, ma wi dano pe biwil iye matwal.” Rwot onyutta aduku aryo mupoŋ ki nyig oduro ma giketo i nyim ot pa Lubaŋa, Man otimme lacen i ne kare ma Nebukadnejar kabaka me Babilon otero kwede Yekonia wod pa Yekoyakim kabaka me Juda me bedo opii, kun okwanyo ki i Jerucalem kacel ki lutel me Juda, ludito tic mapatpat kacel ki lutet ducu oterogi i Babilon. Aduku acel onoŋo opoŋ ki nyig oduro mabeco, ma gukwoŋo cekke; ento aduku mukene-ni opoŋ mere ki nyig oduro maraco keken, girac adada ma dano pe twero camone. Cutcut Rwot owacca ni, “Jeremia, ineno aŋo?” Ci adok iye ni, “Aneno oduro, oduro mabecone-ni gibeco adada, ki oduro maracone-ni giraco twatwal, ma pe gitwero camone.” Rwot dok owaco bota ni: “An Rwot Lubaŋa pa Icrael, atamo ni jo ma acwalo woko i lobo pa jo Kaldaya-ni gubedo calo nyig oduro mabeco-gu, an abitic kwedgi kun kica maka i komgi. Abibedo ka gwokogi maber ci akelogi adwokogi cen i lobo man. Abigerogi calo ot ci gicuŋ matek, ma pe abimukogi aretogi woko piny; abipitogi calo ginapita, ento pe abiputogi woko. Abimiyo gibedo ki miti i cwinygi me ŋeyo ni an aye a Rwot. Lacen doŋ gibibedo jona, ki an bene abibedo Lubaŋagi, pien doŋ gibilokke gidwogo bota woko ki cwinygi ducu. “Ento Rwot owaco kuman ni, Jedekia kabaka me Juda, kacel ki rwodine, ki jo Jerucalem ma gudoŋ gubedo i lobo man, ki jo mukene ma gucito gubedo i lobo Ejipt, an Rwot abitic kwedgi kit macalo atiyo ki nyig oduro maraco twatwal ma pe gitwero camogi-ni. Abikelo can marac kit meno aketo i komgi ma bimiyo rok ducu gibedo ki lworo. Dano bicayogi, gibidoko lok aboka, kun dano giloko lok aŋec i komgi dok gi bitic ki nyiŋgi macalo lok lacen dano i kabedo ducu ma abiryemogi gicito iye. Abimiyo gilwenyo i komgi ki pala lucwan, abimiyo kec nekogi ki two gemo bene poto i komgi, nio ka guto gutum woko ducu ki i lobo ma yam amiyo botgi ki bot kwarcgi-ni.’ I mwaka me aŋwen me loc pa Yekoyakim wod pa Yocia kabaka me Juda, lok pa Rwot obino bot Jeremia ma okemo jo Juda ducu. (Man aye obedo mwaka mukwoŋo me loc pa Nebukadnejar kabaka me Babilon.) Lanebi Jeremia owaco bot jo Juda ducu ki bot jo ducu ma bedo i Jerucalem ni, “Kombeddi doŋ odoko mwaka pyeraryo wiye adek kulu, cakke i mwaka me apar wiye adek me loc pa Yocia wod pa Amon kabaka me Juda nio kwede wa onyoo, Rwot oloko kweda dok an bene abedo ka tittiwu lokke teretere ma pe aliŋ; ento wun pe wuketo cwinywu ka winyo lokke. Wun pe wuwinyo dok pe wuciko itwu ka winyo lokke, kadi bed Rwot obedo ka cwalo luticce lunebi teretere botwu. Gin gutito botwu ni myero wulokke wuwek kitwu me timo gin marac, man bimiyo wubedo i lobo ma yam Rwot omiyo Wa con botwu ki bot kwarowu me’ bedo mewu matwal. Gin bene gutito botwu ni pe wuwor lubaŋa mukene dok pe wuti botgi bene, dok bene pe myero wuŋet cwiny Rwot wek kiniga omake ki cal lubaŋa ma wutiyo ki ciŋwu. Ka onoŋo nene wulubo gin ma Rwot oloko, kono nene en pe oketo can i komwu. Ento Rwot kikome owacci wun wukwero winyo lokke, Ma ka meno, wuŋeto cwinye wumiyo kiniga omake ki cal lubaŋa ma wutiyo atiya ki cinwu-ni, mumiyo wun aye ma wukelo can ma onoŋo en mito ketone i komwu, wukelo giwu i komwu kenwu. “Pi meno, kit macalo wukwero winyo lokke-ni, omiyo Rwot me mony owaco kuman ni, ‘Abecwalo rok ducu ma gibedo i lobo ma tye yo tuŋ acam ki laticca Nebukadnejar kabaka me Babilon i komwu. Abekelo lwak me rok ducu me lweny i kom rok man ki jone ducu, ki i kom rok ducu murumogi dyere. Abinekogi atyekogi woko liweŋ; abimiyo lworo mako dano kun gijwat pi gaŋi ma odoŋ obur, man bibedo macalo cac matwal. Dok bene abijuko dwan me woo me yomcwiny madwoŋ woko ki botgi, dwan nyako ger ki dwan lanyom, ki mor pa kidi rego, kun aneko mac taragi woko bene. Lobo man ducu bidoko obur ma iye odon noŋo, doŋ rok magi gibibedo i te loc pa Nebukadnejar kabaka me Babilon pi mwaka pyerabiro kulu. Lacen ka mwaka pyerabiro doŋ otum, abiketo can i kom kabaka me Babilon, ki i kom lobone lobo pa jo Kaldaya, pi balgi. Abibalo lobogi woko abiweko doŋ obur mwatwal. Man Rwot ma owaco. Abiketo can i kom rok meno ki gin ducu ma doŋ atyeko wacone, ki gin ducu ma gicoyo i buk man, ki gin ducu ma Jeremia oloko mukemo rok magi ducu. Rok mapol ki luker mapol gibiloko wa jo Kaldaya gidoko opii, ci abiculogi kun lubo gin ma gutimo.’ ” Rwot Lubaŋa pa Icrael owacca ni, “Ene, gam kikopo kono yino ma opoŋ ki akemona. Gam ci imi jo me rok ducu ka ma abicwali iye gumati. Ka doŋ gumato, ci gibicato ki wot dok bene gibibedo mamiŋ i tamgi pi lweny ma abicwalo i komgi-ni.’ Kit meno agamo kikopo ki i ciŋ Rwot, ci amiyo jo me rok ducu ka ma Rwot ocwala iye gumato. Jerucalem ki gaŋi ducu me Juda, kacel ki lukergi ki rwodigi ducu gumato; pi meno lobogi doŋ bidoko tim aroo ma iye odoŋ noŋo, bimiyo dano gijwat kun giuru, miyo dano gibitic ki nyiŋgi macalo lok lacen dano kit macalo tye kwede wa onyoo-ni. Jo mukene bene ma gibimato akemo pa Rwot gin ene: Parao kabaka me Ejipt, luticce, rwodine, lwakke ducu; ki jo me rok mukene ducu ma gibibedo i kingi; luker ducu me lobo Uj ki luker ducu me lobo Piliciti (Acikelon ki Gaja, Ekron, ki jo Acidod ducu ma gudoŋŋe); ki jo ducu me Edom, Moab, ki jo Ammon; luker ducu me Turo, luker ducu me Cidon, ki luker me lobo ma tye i dog nam; jo ducu me gaŋi me Dedan, Tema, ki Buj; jo ducu ma ginyaro yer wigi doŋ macego; luker me Arabia ducu ki luker me kaka mapatpat ma gurubbe aruba ma gibedo i tim aroo; luker ducu me Jimri, Elam, ki Media; luker ducu me lobo ma tye yo tuŋ acam, jo ma bedo ka mabor ki jo ma bedo ka macok, kun gin ducu gilubbe aluba kikore. Rok ducu ma tye i wi lobo bene myero gumati. Ka me agikkine doŋ kabaka me Babilon bimato.’ Lacen Rwot owaco bota ni, “Tit bot lwak ni an Rwot me mony, Lubaŋa pa Icrael, acikogi me mato akemona nio waŋ ma gumer dok gunok, nio ka gupoto piny ma pe doŋ gitwero a malo pi lweny ma abecwalo i komgi-ni, “Ka ce gukwero gamo kikopo ki i ciŋi wek pe gimat akemona, tit botgi ni Rwot me mony owacci, Myero wumati. Pien nen, doŋ abecako timo gin marac i kom gaŋ ma gilwoŋo ki nyina-ni. Wun wutamo wubibwot ma pe aketo can i komwu? Pe kumeno, ento abiketo can i komgi, pien abecwalo lweny i kom jo ducu ma gibedo i wi lobo. Man an Rwot me mony kikoma aye ma awaco. “In Jeremia, myero itit lok magi ducu ma an awacci-ni, Myero itit bot jo magi ni, ‘Rwot bimoro dwane ki i polo, en bilok bene ki i kabedone maleŋ. En bimoro dwane matek adada i kom jone; bidaŋŋe calo dano ma tye ka nyono olok, pi meno jo ducu ma gibedo i wi lobo gibiwinyo lokke. Mor dwane biwinnye wa i agikki piny, pien Rwot tye ki pido i kom rok ducu. En biŋolo kop i kom jo ducu, ci bimiyo gineko jo maraco woko ki pala lucwan. Man Rwot ma owaco.’ ” Rwot me mony owaco ni can tye ka bino i kom rok ducu ki acel acel kun lubogi kikore kikore, ki yamo lapiru mager tye ka kodo kun a ki i agikki piny. I nino meno kom jo ma ginekogi gibikeyo woko ata i but lobo ducu. Pe gibikumo pigi, pe gibicokogi, pe bene gibiyikogi. Komgi biradde i ŋom lirwat macalo cet dyaŋ muket ata. “Wukoki, kun wudaŋŋe, wun lukwat, wuŋenne i buru wun lukwat romi, pien kare doŋ oromo me nekowu en, kare me ketowu ata, Gibiŋolo ŋutwu calo giŋolo nut nyogi romi mucwe. Kabedo mo ma lukwat giriŋo gilaro iye pe bidoŋ, kadi ki kabwot mo ma lutel pa romi gibibwot kwede pe bidoŋ, Winy koko pa lukwat, winy bene ka lutel pa romi gikok! Pien Rwot tye ka balo kakwat woko ki kiniga, oweko dwol romine ma onoŋo tye ki kuc-ci odon obur. Rwot doŋ otenyo jone woko calo labwor ma oweko borone, pien lobogi doŋ iye odoŋ nono pi pala lucwan pa joma giuno dano, ki pi kiniga mager pa Rwot.” Cutcut i ŋe kare ma Yekoyakim wod pa Yocia odoko kabaka me Juda, Rwot owaco lok man bot Jeremia ni, “Cuŋ i dyekal me ot pa Rwot, dok iwac lok bot jo ducu me Juda ma gibino ka woro Lubaŋa i ot pa Rwot. Tit botgi lok ducu ma doŋ aciki me lokone; pe ikan lok mo iwek odoŋ, Gwok nyo gibiwinyo lok man, ci miyo dano acel acel lokke we ko yone marac, wek an anut pi gin marac ma onoŋo atamo ni abitimo i komgi pi gin marac ma gin gubedo ka timone-ni, Ibiwaco botgi ni, ‘Rwot owaco kuman ni, Ka ce pe wubiwinyo lokka, kun wulubo cikka ma amiyo botwu, ki ka pe wuwinyo lok pa luticca lunebi ma acwalogi me bino botwu pi oyotoyot, kadi bed pe wuketo cwinywu ka winya, ci abibalo ot man woko kit macalo yam atimo i kom Cilo, dok abimiyo rok ducu ma gibedo i wi lobo gitiyo ki nyiŋ gaŋ man me ceno dano.’ ” Ajwagi ki lunebi ki lwak ducu guwinyo ka Jeremia waco lok magi i ot pa Rwot. Ka Jeremia doŋ otyeko loko lok ma Rwot ocike me loko bot lwak ducu, ki bot ajwagi ki lunebi, ci lwak ducu gumake woko likiŋ, kun giwacce ni, “Myero ito woko! Piŋo kono itito lok ki nyiŋ Rwot, kun iwacci, ‘Ot man bidoko calo Cilo, ki gaŋ man bene bidoko wi obur, bidoŋ noŋo laboŋo dano mo ma bedo iye’?” Lwak ducu gucokke gurumo Jeremia woko dyere i ot pa Rwot. Ka rwodi me Juda guwinyo lok magi, ci gua ki i ot pa kabaka gucito gubedo i kabedogi i ŋet doggaŋ manyen ma gidonyo kwede i ot pa Rwot. Ci ajwagi ki lunebi guwaco bot rwodi kacel ki lwak ni, “Dano man myero giŋol kop me to i wiye, pien oloko lok marac i kom gaŋwa, kit macalo wun bene wuwinyo ki itwu-ni.” Jeremia dok onwoyo loko lok bot rwodi kacel ki lwak ducu kun wacci, “Rwot oora me tito lok i kom ot man ki i kom gaŋ man, lok ducu ma wun doŋ wuwinyo atito botwu-ni. Pi meno kombeddi myero wuyub kitwu ki gin ma wutimo, ci wulub lok ma Rwot Lubaŋawu owaco botwu, ci Rwot biŋut i kom gin marac ma onoŋo en doŋ oyubbe me timone i komwu-ni. Doŋ an mera atye i te twerowu. Wuti i koma giwu gin ma wuneno ni ber dok tye atir. Lok acel keken ma amito wuŋe ni, en aye ni tekke wuneka woko, ci wubineko dano ma pe ki bal, dok bene alii me tona bibedo i wiwu ki i kom gaŋ man ki jo ducu ma bedo iye, pien i adane Rwot oora botwu pi loko lok magi ducu wek wuwiny ki itwu.” Lacen rwodi kacel ki lwak ducu guwaco bot ajwagi ki lunebi ni, “Dano man pe myero giŋol kop me to i wiye, pien en otito lok botwa ki nyiŋ Rwot Lubaŋawa.” I ŋe meno ludoŋo mogo i kin ludoŋo me lobo gua malo ci guwaco bot lwak ducu ma gucokke ni, “Mika ma en dano me Morecet yam otito lok i kare pa Kejekia kabaka me Juda, ma owaco bot jo ducu ni, ‘Rwot me mony owaco kuman ni, Cion gibipuro woko macalo poto; Jerucalem bidoko wi obur, ki got ma gigero ot pa Rwot i wiye bidoko buŋa.’ “Tika mono Kejekia kabaka me Juda kacel ki jo Juda guneko Mika woko? Kejekia pe olworo Rwot ci otemo tiyo gin maber ma Rwot pwoyo? Ci meno pe omiyo Rwot oŋut i kom gin marac ma onoŋo en oyubbe me timone i komgi? Ento wan kombeddi aye giwa wamito kelo can madit i komwa kekenwa.” Tye dano mo mukene bene ma otito lok nyiŋ Rwot, en aye Uria wod pa Cemaya me Kiriat-jearim. En otito lok i kom gaŋ man ki rok man i lok marom ki pa Jeremia-ni. I kare ma kabaka Yokoyakim ki twoni lwennye ki rwodi ducu guwinyo lokke, kabaka otemo miyo gineke kwede woko; ento i kare ma Uria owinyo lok man, ci lworo omake omiyo en olwi oriŋo woko i Ejipt. Mumiyo kabaka Yokoyakim ocwalo jo mogo kacel ki Elnatan wod pa Akbor ki jo mukene kacel kwede, oorogi me cito i Ejipt, ci gin gumako Uria wa ki i Ejipt gukelo bot kabaka Yekoyakim ma oneke woko i kabedo me yik ka ma giyiko iye dano ata-gu. Ento Akikam wod pa Capan ogwoko Jeremia maber, omiyo pe gimiye bot lwak wek guneke woko. Cutcut i ŋe kare ma Jedekia wod pa Yocia doŋ odoko kabaka me Juda, en aye lok pa Rwot obino kwede bot Jeremia. Rwot owaco bot Jeremia kuman ni myero en oyub del olir woko me tol kacel ki yat rii kweri dyaŋ ci oketgi otwegi i ŋute. Ka Rwot dok otitte me cwalo lok bot luker me Edom, Moab, Ammon, Turo ki Cidon, kun wok ki bot lukwenagi ma gubino i Jerucalem ka limo Jedekia kabaka me Juda. Rwot me mony, ma en Lubaŋa pa Icrael, otito bot Jeremia me ciko lukwena magi me waco bot lukergi ni Rwot doŋ otyeko waco kuman ni, “An aye ma acweyo lobo ki twerona dok ki tekona, wa dano ki lee ducu ma gitye i wi lobo; doŋ atwero miyogi bot ŋat mo keken ma ayero. Kombeddi doŋ atyeko miyo lobo magi woko ducu i ciŋ laticca Nebukadnejar, kabaka me Babilon, dok bene amiye wa lee tim ni guti bote. Rok ducu bitiyo bote, gibitiyo bot wode ki bot lakware, nio ka kare biromo ma labone doŋ gibiloyo woko. Lacen doŋ rokke bibedo opii, gibitiyo bot rok matego mapol ki luker madito. “Ka ce inen rok mo nyo ker mo pe bitic bot Nebukadnejar kabaka me Babilon, ma gibimine i te loc pa kabaka me Babilon macalo dyaŋ, abiketo can i kom rok meno kun aneko jone woko ki pala lucwan i lweny, amiyo kec nekogi, ki two gemo bene poto i komgi, nio waŋ ma amiyo gutum woko i te twero pa Nebukadnejar. Man Rwot ma owaco. Pi meno pe myero wuwiny lok pa lunebi, lutyet, lulek lek, lutyet ki ajaa ki lutal-gu, ma gibedo ka waco botwu ni, ‘Pe wubidoko opii pa kabaka me Babilon.’ Gitye ka bwolowu abwola, ma adwoggine en aye ni abimiyo gikwanyowu woko ki i lobowu giterowu woko ka mabor. Abiryemowu woko, ci wubito wutum woko ducu. Ento ka ce rok mo omine kene i te loc pa kabaka me Babilon kun tiyo bote, abiweko en doŋ bedo i lbone, kun puro iye, dok bedo kunnu bene, man Rwot ma owaco.” Jeremia owaco lakit lok acel-lu bot Jedekia kabaka me Juda ni, “Wumine kenwu i te loc pa kabaka me Babilon. Wuti bote kacel ki bot lwakke ci wubibedo kwo. Piŋo imito ni in kacel ki lutuwu ginekwu woko i lweny, nyo kec onekwu woko, ki two gemo bene opot i komwu? Man aye gin ma Rwot doŋ otyeko wacone ma bitimme i kom rok ma pe bimine kene i te loc pa kabaka me Babilon. Pe myero iwiny lok pa lunebi ma giwaco botwu ni pe wubitiyo bot kabaka me Babilonni. Gin gitye ka bwolowu abwola. Rwot kikome owacci en gire pe eorogi, gin gitye ka loko lok goba botwu ki nyiŋe, Doŋ adwoggine en aye ni en biryemowu woko ci wubito wutum woko, wun kacel ki lunebi ma giloko lok goba magi botwu-ni.” Ci Jeremia owaco bot ajwagi kacel ki lwak ni, “Rwot owaco kuman ni, Pe myero wuwiny lok pa lunebi ma gitito botwu ni jami ma gitiyo kwedgi i ot pa Rwot doŋ cok gibidwokogi cen ki i Babilon. Lok meno ma gitye ka titone botwu-ni lok goba. Pe wuwiny lokgi; wuti mewu tic bot kabaka me Babilon wek wubed kwo. Piŋo gaŋ man gibal woko odok wi obur? Ka ce inen ni gin lunebi adada, dok ka lok ma gitito-ni obedo lokka, wek guleg Rwot me mony, ni wek pe oye gikwany jami ma gitiyo kwedgi i ot pa Rwot ma gudoŋ i Jerucalem ki i ot pa kabaka me Juda, pe gitergi woko i Babilon.” Rwot me mony owaco lok kuman mukemo wir-gu, nam, okar mac, ki mukemo jami mukene ma yam gitiyo kwedgi i ot pa Lubaŋa ma gudoŋ i Jerucalem, ma yam Nebukadnejar pe okwanyogi oterogi woko, i kare ma en omako Yekonia wod pa Yekoyakim kabaka me Juda kacel ki ludito ducu me awora me Juda ki Jerucalem oterogi woko i opii i Babilon, owacci, “Wuwiny gin ma an Rwot me mony, Lubaŋa pa Icrael, atye ka wacone mukemo jami ma gitiyo kwedgi i ot pa Rwot ma giwekogi i ot pa Rwot ki i ot pa kabaka me Juda ki i Jerucalem ni, Gibikwanyogi giterogi woko i Babilon nio waŋ ma an dok atamo pigi. Ci abicokogi adwokogi cen aketogi kakargi i kabedo man. Man Rwot ma owaco.” I mwaka acel-lu, i dwe me abic me mwaka me aŋwen me loc pa Jedekia kabaka me Juda, Anania wod pa Ajur, ma en lanebi ma tugi Gibeon, oloko ki Jeremia i ot pa Rwot. En olok ki Jeremia i nyim ajwagi kacel ki lwak ni Rwot me mony, Lubaŋa pa Icrael owaco kuman ni, “Doŋ atyeko turo twero ki teko me loc pa kabaka me Babilon woko. Ma noŋo mwaka aryo peya otum, abikelo jami ducu ma yam gitiyo kwedgi i ot pa Rwot ma yam Nebukadnejar kabaka me Babilon okwanyo ki i ot pa Lubaŋa otero woko i Babilon-ni, adwokogi cen i kabedo man. Dok bene abikwanyo Yekonia wod pa Yekoyakim kabaka me Juda, kacel ki jo Juda ma yam giterogi i opii i Babilon, akelogi adwokogi cen i kabedo man. Pien doŋ abituro twero ki teko me loc pa kabaka me Babilon woko. Man Rwot ma owaco.” Ka dok Jeremia oloko ki lanebi Anania i nyim ajwagi kacel ki i nyim lwak ducu ma onoŋo gucuŋ i ot pa Rwot; ci lanebi Jeremia owacci, “Amen! Ka Rwot bitimo man ci ber. Rwot myero omi lok ma ibedo ka titone-ni obed ada, wek okwany jami ma gitiyo kwedgi i ot pa Rwot kacel ki jo ma giterogi i opii i Babilon odwokgi cen i kabedo man. Ento kombeddi koŋ wuwiny lok ma awaco botwu ki bot lwak ducu. Lunebi ma gukwoŋo nyimwu ki nyima i kare macon adada, onoŋo gunyuto ni i anyim lweny bibedo tye, kec bibedo tye, ki two gemo bipoto i kom rok mapol ki i kom ker matego. Mumiyo lanebi mo ma bitito lok kom kuc, ka lokke obedo ada, ci gibiŋian adada ni Rwot kara aye ma ocwalo lanebi meno ada.” Ci lanebi Anania ogonyo rii bao woko ki i ŋut lanebi Jeremia, ci oturogi woko. Anania oloko lok i nyim lwak kun waco ni, “Rwot owaco kuman ni meno aye bene kit ma ebituro kwede okol ma Nebukadnejar otweyo i ŋut jo me rok ducu ma onoŋo mwaka aryo peya otum.” Ento lanebi Jeremia oa gire ocito woko. Lacen i ne kare ma lanebi Anania onoŋo doŋ oturo kwede rii bao woko ki i ŋut lanebi Jeremia-ni, Rwot owaco bot Jeremia ni ocit owac bot Anania ni, “Rwot owaco ni meno itwero turo rii bao kit macalo ituro-ni, ento en bileyo kakargi ki rii nyonyo. Rwot me mony, Lubaŋa pa Icrael, owa co ni, ‘Doŋ atyeko keto rii nyonyo i ŋut jo me rok ducu wek guti bot Nebukadnejar kabaka me Babilon; gibitiyo bote, pien doŋ bene atyeko miyo bote kadi wa lee me tim.’ ” Ci lanebi Jeremia owaco bot lanebi Anania ni, “Anania, winy, onoŋo Rwot gire pe ocwali, ento in doŋ imiyo lwak gibedo ka geno lok goba ma itito botgi. Mumiyo Rwot owaco ni, ‘Nen, abikwanyi woko ki i lobo. I mwaka man kikome ibito iye woko, pien ibedo ka tito bot dano ni gujem woko i kom Rwot.’ ” I mwaka meno cut i dwe me abiro, lanebi Anania oto woko. Lanebi Jeremia ocoyo waraga bot lutel ducu ma gitye i kin opii, ki bot ajwagi ki lunebi, ki bot lwak ducu ma yam Nebukadnejar omakogi ki i Jerucalem ci oterogi woko i opii i Babilon. En ocoyo waraga man lacen i kare ma onoŋo doŋ kabaka Yekonia kacel ki minne, jo ma gikologi, rwodi me Juda ki Jerucalem, ludiro tic mapatpat onoŋo doŋ gua woko ki i Jerucalem. Gimiyo waraga man bot Elaca wod pa Capan gin ki Gemaria wod pa Ilkia, ma yam Jedekia kabaka me Juda oorogi gucito i Babilon bot Nebukadnejar kabaka me Babilon. Waragane onoŋo lokke kwanne kit man ni, “Rwot me mony, ma en Lubaŋa pa Icrael, owaco kuman bot jo ducu ma en oweko Nebukadnejar omakogi ki i Jerucalem ci oterogi woko i Babilon ni, ‘Wuger odi ci wubed doŋ iye. Wupur poto ci wucam gin ma ocek iye. Wunyom mon wek wunywal awobe ki anyira. Wuwek awobewu bene gunyom, wek gin bene gunywal litino. Myero wunya, welwu omedde ma pe odok cen. Wuti tic maber pi berbedo me gaŋ ka ma amiyo giterowu iye me bedo opii. Wulega pi nyiŋ gaŋ meno, pien ka gaŋ meno kwone tye maber miyo wun bene wubibedo maber. Rwot me mony, Lubaŋa pa Icrael, owaco kit man ni, Pe wuwek lunebiwu ki lutyet ma gitye i kinwu gubwolwu, dok bene pe wuwiny lok me lek mogo ma gin leko-ni, pien lok ma gitye ka titone botwu ki nyiŋa-ni meno lok goba; an pe acwalogi gira, man Rwot ma owaco.’ “Rwot owaco kuman ni, Ka mwaka pyerabiro ma gimiyo ki Babilon doŋ otum, ci an abilimowu, abicobo cikkena piwu ci abikwanyowu adwokowu cen i kabedo man. An keken aye aŋeyo yub ma atye kwede piwu, man Rwot ma owaco, yub me berbedo ento pe yub pi gin marac, yub pi kelo botwu kare me anyim ma wutye ki gen pire-ni, Ci wubibino bota wulega, an abiwinyo legawu. Wubiyenya ci wubinoŋa bene, ka ce onoŋo wuyenya ki cwinywu ducu. Iyo, awacci wubinoŋa ci abidwoko gumwu botwu kun acokowu woko ki i rok ducu ki i kabedo ducu ka ma yam aryemowu wucito iye, ci abikelowu adwokowu cen i kabedo ka ma yam akwanyowu ki iye giterowu i opii-ni, “Pien wun doŋ onoŋo wuwaco ni, Rwot doŋ omiyowu lunebi ki i Babilon, koŋ wuwiny lok ma Rwot owaco i kom kabaka ma tye ka loc kun obedo i wi komker pa Daudi, ki dok lok ma okemo jo me gaŋ man, ki lutuwu ma yam pe gucito kacel kwedwu i opii-ni, Rwot me mony owaco kit man ni, ‘Abekelo lweny, kec ki two gemo, ci abimiyo gibedo calo nyig oduro mutop ma doŋ rac adada ma pe gitwero camone. Abilubo korgi ki lweny, kec ki two gemo, abimiyo gibedo ginacaya bot jo me rok me wi lobo ducu, gibitic ki nyiŋgi macalo lok lacen dano, gibibedo gin ma miyo lworo bot dano, ma kelo jwat matek, ki lok me cac i kin rok ducu ka ma onoŋo aryemogi gucito iye. Man bitimme i komgi pien gin pe gubedo ka keto cwinygi me lubo lok ma onoŋo acwalo botgi teretere kun wok ki bot luticca lunebi; ento gukwero winyo lokka woko. Man Rwot ma owaco.’ Wuwiny lok pa Rwot, wun jo ducu ma yam gimakowu ki i Jerucalem giterowu woko i opii I Babilon-ni: ‘Rwot me mony, Lubaŋa pa Icrael, owaco lok ma okemo Akab wod pa Kolaya ki Jedekia wod pa Maceya ma gitito lok me goba botwu ki nyinani. En owaco ni ebimiyogi woko i ciŋ Nebukadnejar kabaka me Babilon, ci en binekogi woko ka maleŋ i nyimwu. Ka inen jo ma yam gikwanyogi ki i Jerucalem giterogi i opii i Babilon gimito ceno ŋat mo, ci gibiwaco ni, “Rwot myero oti kwedi kit macalo en otiyo kwede ki Jedekia gin ki Akab, ma kabaka me Babilon obulogi woko makwo ki mac-ci.” Man aye bibedo can ma bipoto i komgi pien gubedo ka timo tim mogo ma pe myero, gutimo abor ki mon pa luwotgi, dok bene gubedo ka loko lok goba ki nyiŋa ma kun an pe acikogi ni guloki. An aye ma aŋeyo, dok bene atye macalo caden, man Rwot ma owaco.’ ” Rwot me mony, Lubaŋa pa Icrael owaco bot Jeremia me tito bot Cemaya me Nekelam ni, “In icwalo waraga i nyiŋi keni bot jo Jerucalem ducu, ki bot Jepania wod pa ajwaka Maceya, ki bot ajwagi mukene-gu ducu kun iwacci, ‘Rwot oketi ibedo ajwaka ma ka ajwaka Yekoyada, wek ibed ladit ma loyo ot pa Rwot kun ineno lupoya ducu ma gitito lok, ci imakgi itwegi ki okol kun iroyo irwako ogul nyonyo i ŋutgi. Piŋo pe ijuko Jeremia ma en dano me Anatot ma tye ka tito lok botwu-ni? Pien en onoŋo ocwalo lok botwa i Babilon ma wacci, Kare me bedowu i opii bibedo dwoŋ; wuger odi ci wubed iye. Wupur poto ci wucam gin ma ocek iye.’ ” Ajwaka Jepania okwano waraga man bot lanebi Jeremia wek en owiny. Rwot dok owaco bot Jeremia ni, “Cwal lok bot jo ma giterogi i opii, kun iwacci, ‘Rwot owaco lok ma okemo Cemaya dano me Nekelam kuman ni, Kit macalo Cemaya doŋ otito lok botwu ma onoŋo an pe acwalo en-ni, dok bene omiyo doŋ wuketo genwu i lok me goba, pi meno Rwot owaco kuman ni, Nen, abiketo can i kom Cemaya dano me Nekelam kacel ki likwayone. Pe bidoŋ ki ŋat mo makwo ki i kom lwak man ma bineno gin maber ma abitimo bot jona, pien en oloko lok ma omiyo dano gujemo i kom Rwot. Man Rwot ma owaco.’’’ Man lok ma Rwot oloko ki Jeremia. Rwot ma en Lubaŋa pa Icrael owaco ni, “Co lok ducu ma abedo ka loko boti-ni i buk, pien kare tye ka bino ma abidwoko iye gum bot jona jo Icrael ki jo Juda. Abikwanyogi adwokogi cen i lobo ma yam amiyo bot kwarogi, gibileyo doŋ bedo megi. Man Rwot ma owaco.” Magi gin aye lok ma Rwot oloko ma okemo Icrael ki Juda: Rwot owaco kuman ni, “Wawinyo koko ma baŋo dano, koko ma kelo lworo, ento pe ma kelo kuc. Koŋ ipennye kekeni ci dok itam ni, laco mono twero nywalo latin? Piŋo kono aneno laco acel acel mako pyere ki ciŋe calo dako ma tye ka rem ki nywal? Piŋo waŋ dano olwal woko? Maa do! Nino marac tye ka bino, pe tye nino mo ma rom kwede; en aye nino me can bot likwayo pa Yakobo; kadi bed kumeno gibilarogi ki i can meno.” Rwot me mony owaco ni, “Ka nino meno oromo abituro rii bao woko ki i ŋutgi dok bene abicodo nyor ma gitweyogi kwede woko; cakke i kare meno pe doŋ gibibedo opii pa lurok matwal. Bnto gin gibitiyo bot Rwot Lubaŋagi, ki bot Daudi kabakagi, ma an aye abimiyo botgi me bedo kabakagi. “Pe wulwor, wun likwayo pa laticca Yakobo; wun jo Icrael, cwinywu pe myero oballe woko, Abilarowu ki i lobo ca ma tye ka mabor-ri, abilaro likwayowu bene ki i lobo ma yam giterogi iye i opii. Likwayo pa Yakobo gibidwogo cen ci gibibedo mot ki kuc; ŋat mo pe ma bimiyo gibedo ki lworo. Man Rwot ma owaco. Abibedo kwedwu pi larowu. Abijwero jo me rok ducu atyekogi woko, i kin jo ma yam akeyogi iye; ento wun pe abityekowu woko liweŋ. Abipwodowu maberber pe ki kiniga twatwal, ento pe abiwekowu ma pe aketo can i komwu. Man Rwot ma owaco.” Rwot owaco bot jone ni, “Waŋ retwu pe doŋ caŋ, waŋ burre odet marac. Ŋat mo pe ma twero cuŋ piwu, yat bene pe me aketa i waŋ burwu, waŋ burwu pe doŋ can. Jo ma gimarowu-ni ducu wigi doŋ owil woko i komwu; gin pe doŋ giparo piwu wacel. Pien alwenyo i komwu macalo lukworra; dok bene aketo can magwa i komwu laboŋo kica, pien balwu dwoŋ, ki gin marac ma wutimo bene pol. Piŋo pud wukok pi ret ma wulimo? Aremwu pe doŋ caŋ. Aketo can i komwu kit man, pren balwu dwoŋ, ki gin marac ma wutimo bene pol mada. Pi meno jo ducu ma tyekowu, gin bene gibitye kogi woko, lukworwu ducu bene gibimakogi giterogi woko i opii. Jo ducu ma unowu gin bene gibiunogi, ki jo ducu ma yako jamiwu gin bene gibiyako jamigi woko. Pien abimiyo wubedo doki ma komwu yot, abicano waŋ burwu woko bene, kadi bed lukworwu giwacci, ‘Cion doŋ odoko gin ma gibolo woko; ŋat mo doŋ pe ma paro pire.’ Man Rwot ma owaco.” Rwot owacci, “Nen, abidwoko likwayopa Yakobo cen i lobogi dok kica bimaka i kom jo me doggola acel acel; gibigero gaŋ acel acel odoco i kabedone macon, ki ot acel acel bene gibigero kakare. Jo ma kunnu doŋ gibiwero wer me pwoc; gibibedo ka daŋŋe bene pi yomcwiny. Abimiyo ginya gidoko pol ma pe welgi jwik, ci abikelo deyo botgi. Litinogi bibedo pol kit macalo yam gubedo kwede i kare macon, ki lwakgi bene bicuŋ i nyima matek likiŋ; abiketo can i kom jo ducu ma unogi. Ŋat ma bibedo laker ma loyogi bene bia ki i kingi, ŋat ma bibedo laloc gi bibedo dano me rokgi kikome. Ka alwoŋe, ci en binyiko cok bota; pien ŋat mo pe twero ette me bino cok bota ka pe alwone, Wun wubibedo jona, ki an abibedo Lubaŋawu.” Koŋ inen yamo kot pa Rwot! Akemone bedo calo yamo lapiru mager, ma bimwoc woko lituc i wi jo maraco. Akemone pe bigik nio waŋ ma en ocobo tiyo gin ma onoŋo doŋ otamo me timone. I kare ma lacen, i nino ma pud tye anyim, jone gibiniaŋ maber makato. Rwot owacci, “Kare tye ka bino ma abibedo Lubaŋa pa jo me doggola ducu pa jo Icrael, ki gin bene gibibedo jona, Ceŋ anyuto kicana bot jo ma gubwot ki i lak to i dye tim. I kare ma jo Icrael giyenyo yweyo, an anyutte botgi ki ka mabor. Wun jo Icrael kare ducu abedo ka marowu, kit meno pud amedde ki nyuto botwu mar mera ma pe lokke. Abigerowu woko odoco wun jo Icrael, ci wubicuŋ. Doki wubikwanyo ajaa agoya-gu ci wubimyelo myel ki yomcwiny madwoŋ. Doki bene pud wubipito olok i wi cere me Camaria, doŋ jo ma pito olok meno, gibicamo mucekke. Ada, kare tye ka bino ma lukur-piny gibidanne gilwoŋo lwoŋo ki i wi cere me lobo Epraim ni, ‘Wubin kany! Wacitu malo i Cion, bot Rwot Lubaŋawa.’ ” Rwot owacci, “Wuwer wer ki dwan maloŋo ki yomcwiny pi jo pa Yakobo, wudaŋŋe matek pien gin rok madit i kin rok ducu. Wuwer wer me pak kun wuwaco ni, ‘Rwot doŋ olaro jone, olaro jo Icrael ducu ma yam gudoŋ.’ Nen, abikelogi woko ki i lobo ma tye yo tuŋ acam, abicokogi bene ki ka mabor ki i agikki piny, Lutowaŋ ki luŋolo gibibino kacel kwedgi, mon ma guyac kacel ki mon ma doŋ gicok nywal; gibidwogo cen gibedo rok matek. Gibibino ki koko, gibibedo ka lega kun noŋo atelogi kwede me dok cen; abimiyo giwoto ki i ŋet laora kulu ma pii opoŋ iye, gibilubo yo atir ma pe gibiyoko tyengi wacel; pien atye macalo wego bot jo Icrael, Epraim aye obedo latin ma akwoŋo nywalone. “Wuwiny lokka, wun rok ducu, an Rwot, ci wutit lokka ka maboco i lobo ma tye i dog nam-gu, An ma akeyo jo Icrael woko-ni aye dok abicokogi adwokogi cen, abigwokogi woko maber kit macalo lakwat gwoko kwede romine. Doŋ atyeko koko jo pa Yakobo woko ki i opii, alarogi bene ki i ciŋ rok matek makatogi. Gibibino giwero wer matek pi yomcwiny i wi got Cion, mot ma an Rwot amiyogi-ni biyomo cwinygi mada, kal, koŋo vino, ki moo, romi ki dyani-gu. Gibibedo calo poto ma gionyo iye pii muromo kare ducu, pe gibiŋeyo cwercwiny doŋ matwal. Anyira bimyelo myel ci cwinygi bedo yom, awobe ki jo muteggi ducu gibibedo ki yomcwiny madwoŋ. Abikweyo cwinygi ci aloko kumogi doko yomcwiny, cwercwiny ma git ye kwede bene bilokke doko yomcwiny. Abimiyo ajwagi gicamo cam mabeco mabup giyeŋ adada, aoŋ motta bityeko miti pa jona woko liweŋ, man Rwot ma owaco.” Kica omako Rwot i kom jo Icrael Rwot owacci, “Koko tye ka winnye i Rama, koko ki kumo madwoŋ. Lakeri tye ka kok pi litinone; en okwero woko ni pe doŋ gikwe cwinye, pien litinone doŋ gipe. Wek koko obedi, duny pig waŋi bene woko. Ticci ducu ma itiyo bot litinoni gibimiyi bakacic pire; gibidwogo cen ki i lobo pa lukworwu. Man Rwot ma owaco. Gen tye pi karewu me anyim; litinowu gibia gidwogo cen lobogi kikome. Man Rwot ma owaco. Awinyo ka jo Epraim tye ka koko ki cwercwiny kun giwacci, ‘Rwot, waŋ wabedo calo dyaŋ mudin ma pe winyo lok, ento doŋ ipwodowa adada, ci ipwonyowa me lubo gin ma imito. Kwanywa idwokwa cen, ci waŋ bene wabidok; pien in i Rwot Lubaŋawa. Onoŋo walokke wabwoti woko, ento i ŋeye cutcut waŋut wabedo ki cwiny me dwogo cen. I kare ma doŋ ityeko keto can i komwa, wakulo wiwa woko ki cwercwiny me can. Lewic omakowa mada dok alee otwodowa woko, pien watimo bal i kare ma onoŋo pud watino.’ “Epraim, in latinna ma amaro adada, latin ma amaro makato ducu. Pien kare ducu ka alwoŋo nyiŋi, atamo piri ki mar madit. Cwinya kutte akuta i komi; abibedo ki kica i komi bene. Man Rwot ma owaco. Wuket lanyut ma nyuto botwu waŋa yo; wugur yat mogo i ŋet yo ma binyutowu yo; wutam pi yo gudo ma en yo ma wulubo i kare ma wubino-ni, Wudwog cen, wun jo Icrael, wudwog cen i gaŋ ma nene wuweko-ni. Wubibedo ka kalakala pi kare ma rom mene, wun jo ma pe genne? Pien Rwot doŋ oketo jami manyen i lobo: dako aye ma gwoko laco.” Rwot me mony, Lubaŋa pa Icrael, owaco kuman ni, “Ka doŋ adwoko lwak man i lobogi, gin doki gibiwaco ki i lobo Juda ki i gaŋine ducu ni, ‘Rwot myero omi gum i kom got maleŋ me Jerucalem, kabedo maleŋ ka ma en bedo iye.’ Dano gibibedo i Juda ki i gaŋine ducu, lupur ki lukwat ki romigi bene gibibedo kunnu. Abimiyo jo ma guol gilimo tek, dok abimiyo jo ducu ma kec doŋ onyono komgi woko giyeŋ ki cam. Man bimiyo dano giwacci, ‘Anino woko ci odiko aco anoŋo atye maber ma koma yot.’ “An Rwot, doŋ awaco ni, Kare tye ka bino ma abipoŋo lobo Icrael ki Juda woko ki dano kacel ki lee. Kare bibino kit macalo agwokogi i kare me putogi, i kare me mukogi, i kare me turogi, i kare me tyekogi, ki i kare me keto can i komgi, kit meno bene abigwokogi ka pitogi ki ka gerogi wek gudoŋ malo. Man Rwot ma owaco. Ka kare meno oromo, dano pe dok gibimedde ka waco ni, ‘Kwarowa gucamo nyig olok mawac, man odiŋo lak lidiŋ woko.’ Ento dano acel acel bito pi balle en kikome; kit meno dano acel acel ma bicamo nyig olok mawac lake bidin woko.” Rwot owaco ni, “Nen, kare tye ka bino ma abiketo iye gicikke manyen ki jo Icrael ki jo Juda bene. Gicikke man pe bibedo calo gicikke ma yam aketo ki kwarogi i kare ma onoŋo akwanyogi woko ki i Ejipt akelogi woko ca. Gin guturo gicikke ma aketo kwedgi, kadi bed onoŋo an abedo cwargi. Man Rwot ma owaco. Ka kare meno oromo, man aye gicikke ma abiketo ki jo Icrael: Abimiyo gibedo ki cikka i tamgi, abicoyo bene bedo i cwinygi, An abibedo Lubaŋagi, ki gin gibibedo jona. Man Rwot ma owaco. Ŋat mo pe doŋ bipwonyo lawote, ŋat mo bene pe biwaco bot ominne nyo lutugi ni, ‘Ŋe Rwot,’ Gin ducu gibineya, cakke i kom jo matino o kwede wa i kom jo madito ma i kingi. Abiweko balgi, pe dok abibedo ka po i kom gin marac ma gubedo ka timone. Man Rwot ma owaco.” Rwot miyo ceŋ ryeny i dyeceŋ, dwe ki lakalatwe en miyo giryeny dyewor, En rubo pii me nam, ci miyo mor; nyiŋe gilwoŋo ni Rwot me mony. Rwot ocikke ni Icrael kare ducu bibedo rok, bibedo pi kare malac kun lubo kit ma cik ma eketo i lobo-ni biri kwede. Rwot owacci, “Ka ce onoŋo gitwero pimo pol, nyo ka gitwero roto te guti me lobo ki piny, meno keken aye bimiyo akwero jo Icrael pi gin ducu ma doŋ gutyeko timo. Man Rwot ma owaco.” “Nen, kare tye ka bino, man Rwot ma owaco, ma gaŋ man gibigero odoco pi Rwot cakke ki i kom lubele ma gilwoŋo Kananel o kwede wa i dogcel ma i twok gaŋ. Doŋ tol me pimone gibimiyo cito wa ka mabor atir o kwede wa i got Gareb, ka bigono piny o kwede i Goa. Nota ka ma gicoro iye kom jo muto ki bu rin ki tim ducu ma i ŋet laora kulu me Kidron nio kwede wa i dogcel me Aguragura dok kwede tuŋ wokceŋ, bibedo gin maleŋ bot Rwot. Pe dok gibiputo nyo gituro woko matwal.” Rwot oloko ki Jeremia i mwaka me aparre me loc pa Jedekia kabaka me Juda, ma en aye bene obedo mwaka me apar wiye aboro me loc pa Nebukadnejar kabaka me Babilon. I kare meno dul mony pa kabaka me Babilon obedo ka lweny i kom Jerucalem, dok giloro wi lanebi Jeremia woko i dyekal pa lukur-piny ma tye i gaŋ kal pa kabaka me Juda. Kabaka Jedekia onoŋo otweye i mabuc kunnu pien gidote ni otyeto lok ni Rwot owaco ni, “Nen, abemiyo gaŋ man woko i ciŋ kabaka me Babilon, en bimayo woko bene doko mere. Kabaka Jedekia pe bibwot wacel ki i ciŋ jo Kaldaya, Gibimiye i ciŋ kabaka me Babilon; en binene waŋ ki waŋ dok bene bilok kwede atyer ka maleŋ, Gibitero Jedekia woko i Babilon, en bibedo kunnu nio waŋ ma an aye abilime. Kadi bed en bibedo ka lweny i kom jo Kaldaya, ento en pe biloyogi. Man Rwot ma owaco.” Jeremia owacci, “Rwot owacca ni Kanamel, ma en wod pa nera Calum, bibino bota kun mito ni awil lobone ma tye i Anatot, pien an a watte macok kwede adada, dok atye ki twero me wilone. Cutcut kit macalo Rwot owaco, omara Kanamel obino bota i dyekal pa lukur-piny, ci owaco bota ni, ‘Willobona ma tye i Anatot i lobo pa Benjamin. In aye i watta ma cok kweda adada, it ye ki twero me kokone ki me bedo iye bene, In kikomi aye myero iwil.’ Ci i kare meno aŋeyo woko ni Rwot aye ma ocika ni atim gin macalo man. “Ci awilo poto meno woko ki bot omara Kanamel kun apimo lim woko bene bote ma welle oromo cekel me ryal apar wiye abiro. Aketo ciŋa i waragaŋe ci amwono woko, caden ma guneno obedo tye, ka apimo lim woko ki mijan. Ci akwanyo waragaŋe me wilo lobo ma onoŋo amwono doge woko, ma tito kit kare ma biri kwede ki cik ma myero gilubi, ki kopine ma onoŋo pe gimwono, ci amiyo bot Baruk wod pa Neria ma wod pa Maceya. Amiyogi ducu bote i nyim Kanamel, i nyim caden ma guketo ciŋgi i waraga me wilo poto ca, ki i nyim Lujudaya ducu ma onoŋo gubedo i dyekal. Aciko Baruk ki i nyimgi ducu kun awaco ni, ‘Rwot me mony, ma Lubaŋa pa Icrael, owaco kuman ni, Kwany waraga man me wil ma gimwono doge woko ki ma pe gimwono doge-ni, ci iketgi i abino ma gicweyo ki lobo, wek gigwokgi guri pi kare malac. Rwot me mony, Lubaŋa pa Icrael, owaco ni, odi ki potti ki poto olok pud doki gibiwilo ki i lobo man.’ “Lacen ma doŋ atyeko miyo waraga me wil bot Baruk, ci alego ni, ‘Ai Rwot Lubaŋa! In aye ma iketo po lo ki lo bo ki tweroni dok ki tekki! Pe tye gin mo matek ma in pe iromo tiyone. Ibedo ka nyuto mar meri ma pe lokke bot jo alip ki alip, ento in bene iculo kwor i kom dano, iketo can i komgi pi bal pa kwarogi. In Lubaŋa madit dok it ye ki twero ducu; nyiŋi Rwot me mony. Ibedo ki yub me aura, dok itiyo gin matego ma dano uro; ineno bene gin ducu ma dano tiyo, imiyo bakacic bot dano acel acel kun lubo kit kwo ma en obedo kw ede ki kit gin ma en obedo ka timone. Yam itiyo taŋo ki lanyut-gu i lobo Ejipt. Pud imedde bene ka tiyogi wa onyoo, itiyo i Icrael ki i kin rok mukene ducu, mumiyo kombeddi doŋ giŋeyi i kabedo ducu, Doŋ tano ki lanyut ma itiyo-gu omiyo lukworwa gubedo ki lworo marac, dok itiyo ki tweroni ki tekki ikelo joni jo lerael woko ki i lobo Ejipt. Imiyo botgi lobo man ma mol cak ki moo kic, kit macalo yam ikwoŋo ni ibimiyo bot kwarogi-ni. Ento i kare ma doŋ gubino gudonyo i lobo man dok gucamo obedo megi, pe gulubo gin ma icikogi kwede dok bene pe gulubo pwonnyi wacel, pe gutiyo gin mo kadi ki acel i kom gin ma yam icikogi ni guti-ni. Pi meno en aye mumiyo ikelo can man iketo i komgi. “‘Nen, jo Kaldaya doŋ gutoro cel lobo gurumo ki gaŋ litit wek gima woko, doŋ bene gitye ka lweny, Pi man lweny, kec ki two gemo biweko gimiyo gaŋ man woko i ciŋ jo Kaldaya ma gitye ka lweny i keme-ni. Gin ma yam iloko doŋ otimme, kun in bene it ye ineno giri. Ai Rwot Lubaŋa, in aye ma yam ibedo ka waco bota ni, Wil poto man ki lim, dok inoŋ lucaden, kadi bed gaŋ doŋ gimiyo woko i ciŋ jo Kaldaya.’ ” Cutcut Rwot owaco ki Jeremia ni, “An a Rwot Lubaŋa pa dano ducu, Tye gin mo matek bota ma pe aromo tiyone? Pi meno abemiyo gaŋ man woko bot kabaka Nebukadnejar kabaka me Babilon ki jo Kaldaya, gibimonyo gaŋ gimayo woko, Jo Kaldaya ma gitye ka lweny i kom gaŋ-ŋi gibibino gicwinyo mac i kom gaŋ ci waŋ woko. Gibiwaŋo woko kacel wa ki odi ka ma yam giwaŋo iye odok eceta bot jok Baal i wi ot-gu, ki onyo gityer amata-gu bot lubaŋa mukene me neto cwinya oweko kiniga omaka. Cakke wa con i acakki me kwogi, jo Icrael ki jo Juda gubedo ka tiyo gin ma pe yomo cwinya keken; jo Icrael gumiyo kiniga omaka pi cal lubaŋa ma gutiyo ki cingi-ni, man Rwot ma owaco. Gaŋ man omiyo kinigana ki akemona obedo ka medde woko ameda, cakke i kare ma gigero kwede nio wa onyoo. Doŋ atyeko moko me kwanyone woko ki ka waŋa, pi gin marac ma jo magi gutimo: jo Icrael ki jo Juda, kacel ki lukergi, ki lutel megi, ajwagigi ki lunebigi, jo Juda ki jo Jerucalem. Guloko ŋegi bota ento pe nyimgi; dok bene kadi bed abedo ka pwonyogi teretere ento gin pe guwinyo pwony ma abedo ka pwonyogi kwede. Guketo cal lubaŋagi ma en gin me kwer-ri i ot ma gilwoŋo ki nyina, pi balone woko. Gugero waŋ jogi mapol me woro Baal i nota pa wod pa Kinom ka ma gityero iye awobegi ki anyiragi bot jok Molek. Pe awaco botgi ni gutim man, dok bene gin ma kit meno onoŋo pe odonyo i tamma ni gibitimo gin macalo meno ma bimiyo jo Juda timo bal.” Rwot, ma en Lubaŋa pa Icrael, owaco lok mukemo gaŋ man kuman ni, “Jeremia, in doŋ itito bot lwak man ni lweny, kec ki two gemo biweko gimiyo gaŋ man woko i ciŋ kabaka me Babilon. Kombeddi winy lok mukene ma an aewaco. Nen, abecito ka coko lwak man woko ducu ki i lobo ducu ka ma yam aryemogi gucito iye i kare ma onoŋo kiniga ki akemo ki akeca omaka i komgi; abidwokogi i kabedo man, abimiyo gibedo maber ki kuc. Gin gibibedo jona, ki an bene abibedo Lubaŋagi, Abimiyo gibedo ki cwiny acel ki kit acel, wek gubed ka wora matwal, wek gin ki litinogi ma gi bilubogi i anyim gubed maber. Abiketo gicikke ma bedo nakanaka kwedgi, ni pe abilokke aweko timo gin maber botgi, dok bene abimiyo gibedo ka lwora ki i cwinygi, wek pe gulokke gubwota woko. Cwinya bibedo yom ka timo gin maber botgi, dok abiketogi gibedo i lobo man matwal ki gen madit kun aketogi ki cwinya ducu ki tipona ducu. “Kit macalo akelo can man aketo i kom lwak man, pi meno bene abecito ka miyogi jami ducu mabeco ma yam acikke ni abimiyo botgi. Gibiwilo potti ki i lobo man ma iwacci, doŋ odoko tim aroo ka ma dano ki lee doŋ pe gibedo iye, dok bene iwaco ni gibimiyo woko i cin jo Kaldaya. Potti gibiwilo pi lim, ki waraga me wilo lobo bene gibiketo iye cin ci gimwono woko kun caden bene noŋo tye i lobo pa Benjamin, i kabedo ducu ma gurumo Jerucalem, ki i gaŋi me Juda, i gaŋi me lobo godigodi, i gaŋi me Cepela ki i gaŋi me Negeb, Abidwoko gum pa jo man botgi kun adwokogi cen i lobogi kikome. Man Rwot ma owaco.” Lok pa Rwot doki obino bot Jeremia tyen me aryone ma onoŋo en pud gitweye woko i mabuc i dyekal pa lukur-piny. Rwot ma oketo lobo, ma ocweyo omiyo ocun i kabedone, oloko ki Jeremia. En ma nyiŋe gilwoŋo ni Rwot-ti owaco kuman ni, “Lwona, ci abigamo dogi; abititti pi gin madito dok ma giuro ma pud peya iŋeyo gin mo i komgi liweŋ, An Rwot Lubaŋa pa Icrael, awaco ni odi ma i Jerucalem ki gaŋ kal pa luker me Juda gibimukogi giretogi woko piny. Konnye pe me cito ka lweny i kom cel lobo ma jo Kaldaya gutoro-ni, Jo Kaldaya gitye ka bino ka lweny ki ka poŋo gaŋ man woko ki kom jo ma guto, ma an kikoma aye abinekogi ki kinigana kacel ki akemona, An doŋ aloko neya woko i kom gaŋ man pi tim ducu maraco ma jo ma bedo iye gutimo. “Abicaŋo gaŋ man dok abimiyo gibedo ma komgi yot. Abicaŋo jo ma gibedo iye ci anyuto botgi kuc madit ma bimiyo gibedo laboŋo lworo. Abidwoko gum pa jo Juda botgi ki pa jo Icrael, abigerogi odoco kit macalo yam gubedo con. Abilonyogi woko maleŋ ki i kom bal aliigi ki bal ma yam gutimo i koma, abiweko bal aliigi ki lok me jemo ma yam gujemo kwede i koma. Pi meno gaŋ me Jerucalem bibedo gaŋ me yomcwiny, gaŋ me pak ki me deyo bota; dok rok ducu ma i wi lobo bilworo, dok komgi bene bimyel, ka onoŋo guwinyo pi gin maber ma atye ka tiyone pi jo Jerucalem, ki pi berbedo ma atye ka kelone i gaŋ man.” Rwot owaco kuman ni, “Dano giwacci kabedo man obedo calo tim aroo; dano kadi ki lee ma bedo iye pe. Obedo lok ada ni gaŋi me Juda ki yo me Jerucalem gitye noŋo; dano nyo lee mo pe ma bedo kunnu. Ento i kabedo magi doki wubiwinyo aye dwan me yomcwiny ki yomcwiny madwoŋ, dwan anyira ger ki dwan lunyom. Wubiwinyo dano giwero wer ka gikelo gityer me pwoc i oda; gibiwacci, ‘Wumi pwoc bot Rwot me mony, pien Rwot ber, mar mere ma pe lokke bedo nakanaka.’ Abimiyo lobo man bedo lobo mulony kit macalo yam onoŋo tye kwede wa con, man Rwot ma owaco.” Rwot me mony owaco kuman ni, “I lobo man ka ma obedo calo tim aroo, dok ka ma kadi dano nyo Lee pe bedo iye, i kare me anyim lum dok bibedo tye iye ka ma lukwat gitero romigi iye ka cam. I gaŋi me lobo godigodi, i gaŋi me Cepela, ki i gaŋi me Negeb, i lobo pa Benjamin, i kabedo ducu ma orumo Jerucalem, ki i gaŋi me Juda, lukwat dok gibikwano romigi. Man Rwot ma owaco. “Nen, kare tye ka bino, en aye kare ma abicobo iye cikke ma yam aketa ki jo Icrael ki jo Juda. I nino meno ki i kare meno abiketo iye lakwaro Daudi kikome me bedo kabaka. En bibedo jaŋ yat ma bilot ki kit ma atir, ma biloyo loc ki ryeko, dok bitiyo gin ma tye atir dok kakare i lobo man. I kare ma noŋo en tye kabaka, jo Juda gibibedo mot laboŋo lworo mo, ki jo Icrael bene doŋ gibibedo ki kuc. Gibilwoŋo kabaka meno ki nyiŋ ni, ‘Rwot aye ma miyowa kit ma atir.’ “An Rwot, doŋ atyeko cikke ni kare ducu dano mo bibedo tye ma en Lakwar Daudi ma myero obed kabaka me Icrael, dok bene kare ducu ajwagi bibedo tye ma gia ki i kaka pa Levi ma gin aye gibicuŋ i nyima nakanaka ka tyero gitum awaŋa, gityer me moko kwoŋ, ki gitum mukene-gu ducu.” Rwot owaco ki Jeremia ni, “Bedo tek me turo gicikkena ki ceŋ ki dyewor, wek pe omi ceŋ ki dyewor gubin i karegi ma mitte kikome. Kit meno bene bedo tek me turo gicikkena ki laticca Daudi, wek pe en obed ki lakware mo ma myero obed kabaka, ki dok bene me turo gicikkena ki ajwagi ma gua ki i kaka pa Levi ma gin aye gitye ka tic bota. Abimedo wei likwayo pa laticca Daudi ki wel ajwagi bene ma gua ki i kaka pa Levi ma gitiyo bota, wek bene kwanogi obed tek kit macalo kwano lakalatwe ma i polo nyo nyig kweyo me dog nam tek kwede.” Rwot owaco bot Jeremia ni, “Tika iŋeyo kit ma dano gilok kwede ni an doŋ atyeko kwero Icrael ki Juda woko, gin kaka aryo ma onoŋo ceŋ ayerogi-ni? En meno gin mumi yo gineno jona ki waŋ me cac dok bene pe gitamo pigi ni gin rok, Ento an Rwot, aketo gicikkena ki ceŋ ki dwe, dok bene aketo cik ma tye ka loyo polo ki lobo. Doŋ kit macalo ada atyeko timo man, kit meno bene abigwoko gicikkena ki likwayo pa Yakobo ka dok ki laticca Daudi. Kare ki kare abiyero dano ki i kom likwayo pa Daudi me loyo likwayo pa Abraim, Icaka ki Yakobo. Abidwoko gumgi kakare botgi, dok kica bibedo ka maka i komgi.” Rwot oloko ki Jeremia i kare ma Nebukadnejar kabaka me Babilon ki dul monnye, ki dul mony pa lurok ducu ki jo me rok ducu mapatpat ma gitye i te locce, onoŋo gitye ka lweny i kom Jerucalem ki i gaŋi ducu ma gurumo macokcok kwede, Rwot Lubaŋa pa Icrael, owaco bot Jeremia ni ocit owac ki Jedekia kabaka me Juda ni, “Nen, abemiyo gaŋ man woko i cin kabaka me Babilon, ci en biwaŋo woko licwic ki mac. Pe ibibwot ki i ciŋe, Gibimaki woko ci gimii bote. Ibineno kabaka me Babilon ki waŋi dok bene ibilok kwede Waŋ ki waŋ; ci i kare meno gibiteri woko i Babilon. Kabaka Jedekia, winy gin ma an Rwot atye ka wacone mukemo in. Pe gibineki i lweny ki pala lucwan. In ibito ki kuc, dok kit macalo gu bedo ka wano aŋwece i kare ma giyiko kwarowu, ma onoŋo gin luker ma gukwoŋo nyimwu, kit meno dano bene gibiwaŋo gin ma ŋwece kur piri, Gibikoki kun giwacci, ‘Kabakawa doŋ oto woko do!’ An Rwot doŋ atyeko loko lok man.” Cutcut lanebi Jeremia otito lok man bot Jedekia kabaka me Juda ki i Jerucalem, i kare ma dul mony pa kabaka me Babilon tye ka lweny i kom Jerucalem ki i kom gaŋi ducu me Juda ma yam giweko gudoŋ, Lakic ki Ajeka; magi keken aye onoŋo gubedo gaŋi ma girumo ki cel gogo ma gudoŋ i Juda. Rwot oloko ki Jeremia lacen i kare ma doŋ kabaka Jedekia otyeko keto gicikke ki jo ducu ma i Jerucalem me tito pi gonyo opiigi woko, Guketo gicikke ni dano acel acel bigonyo opiine ma gin jo Ibru, laco kacel ki dako, wek ŋat mo pe olok Lajudaya lawote obed opii. Ci dano ducu kacel ki lutelgi gumoko gicikke meno pi gonyo opiigi woko, pe dok me makogi wek gubed opii tyen me aryo. Gugonyo opiigi woko guweko gucito gire. Ento lacen dok gumako opii ma co ki ma mon, gumakogi gudwokogi cen kun yam gugonyogi woko, ci gumiyo gudok i te locgi macalo opii. I kare meno en aye Rwot, Lubaŋa pa Icrael, owaco bot Jeremia ni, “Yam aketo gicikke ki kwarowu i kare ma akwanyogi ki i lobo Ejipt, ki i ot me can. Awaco botgi ni, i tum mwaka me abicel dano acel acel myero ogony Laibru lawote ma yam gicato bote macalo opii ma doŋ otyeko tic bote pi mwaka abicel; myero gugonygi woko wek doŋ pe guti botgi. Ento kwarowu yam pe guketo cwinygi i lokka dok bene pe guciko itgi me winyone. Ento i kare ma okato macokcok-ki onoŋo wun Wuŋut ci wutiyo gin ma tye atir i waŋa kun wutito lok me gonyo opiiwu, dano acel acel ki lawote, dok bene wuketo gicikke i nyima i ot ma gilwoŋo ki nyina-ni, Ento lacen dok wulokke ci wupyedo nyina kun dano acel acel dok okwanyo opii ma co ki ma mon odwokogi cen bote, ma’ onoŋo nene doŋ wugonyogi woko macalo mitgi tye, ci wukelogi wuketogi i te loc me opii doki aye. Pi meno, an Rwot awaco kuman ni, onoŋo pe wulubo cikka i kare ma wutito lok me gonyo opiiwu, pe wugonyo jo Ibru wadiwu woko ki i opii, Pi meno, an aye doŋ atito botwu ni, abigonyowu wek ginekwu woko i lweny, two gemo binekowu ki kec bene binekowu woko. Man Rwot ma owaco. Abimiyo wudoko gin ma kelo lworo bot ker ducu ma tye i wi lobo. Abimiyogi woko i ciŋ lukworgi. Abimiyogi woko i ciŋ jo ma mito nekogi, doŋ komgi muto-ni winyo ki ŋuu me tim aye ma bicamo. Abimiyo Jedekia kabaka me Juda kacel ki rwodine i cin lukworgi ma gimito nekogi. Abimiyogi woko bot dul mony pa kabaka me Babilon, ma gugiko lweny woko i komwu-ni. Nen, abicikogi, ci gidwogo cen i gaŋ man. Gibilweny i kome, gibimako, ci giwaŋo woko licwic ki mac. Abimiyo gaŋi me Juda ducu lokke doko macalo tim aroo ka ma dano mo pe bedo iye. Man Rwot ma owaco.” I kare ma Yekoyakim wod pa Yocia onoŋo obedo kabaka me Juda, Rwot oloko ki Jeremia ni, “Cit i kaka pa jo Rekab ci ilok kwedgi, Ka doŋ ikelgi i kicika ma tye i ot pa Rwot ci imi botgi kono yino gumati.” Ci Jeremia okwanyo Jajania wod pa Jeremia mukene, wod pa Kabajinia, ki omegine, ki awobene ducu, ki jo Rekab ducu, ci okelogi i ot pa Rwot. Oterogi i kicika pa awobe pa Kanan, wod pa Igdalia, ma en dano pa Lubaŋa, Kicika man onoŋo tye cok ki kicika pa rwodi, ina tye malo ka wi kicika pa Mecaya wod pa Calum, ma en dano ma lakur doggola me ot pa Rwot. Ci Jeremia oketo kikopo ki abino ma koŋo vino opoŋ iye i nyimgi, ka doŋ owaco botgi ni, “Wumat koŋo.” Ento gin gudok iye ni, “Wan pe wamato koŋo vino pien Jonadab wod pa Rekab, ma en kwarowa, otito ni waŋ kacel ki likwayowa ducu pe wabimato koŋo vino matwal. En bene otito botwa ni pe myero wager odi, pe wapur poto, pe bene wapit olok kadi ki wilone ki lim bene pe wawil. Ocikowa me bedo i kema pi kare me kwowa ducu, wek wabed ka medde ki bedo i lobo ma waŋ wawelo iye-ni pi kare malac. Wan walubo pwony pa Jonadab wod pa Rekab, ma en obedo kwarowa. Wan kikomwa pe wamato koŋo, kadi monwa, awobewa ki anyirawa bene pe gimato. Pe wagero odi ma myero wabed iye, pe watye ki poto olok mo, kadi ki potti mukene, kodiwa bene pe; wan giwa wabedo i kema. Wan wabedo ka lubo kit cik ducu ma kwarowa Jonadab ocikowa kwede. Ento i kare ma Nebukadnejar kabaka me Babilon obino omonyo kwede lobo man, wamoko tamwa me bino i Jerucalem pi riŋo woko ki bot mony pa jo Kaldaya ki Ciria. Meno aye gin mumiyo kombeddi watye ka bedo i Jerucalem-mi.” Rwot me mony, Lubaŋa pa Icrael dok owaco bot Jeremia me cito ka waco bot jo Juda ki Jerucalem, ni “An Rwot apenyowu ni piŋo wukwero gamo pwonnya ki winyo lokka? Likwayo pa Jonadab ducu gulubo dok gugwoko cik ma en ocikogi kwede, pe gumato koŋo vino, kadi wa onyoo pe tye ŋat mo i kingi ma mato koŋo, pien gilubo cik ma kwarogi ocikogi kwede. Abedo ka lok botwu teretere ento wun pe wuwinyo lokka. Abedo ka cwalo botwu luticca lunebi teretere, gin bene gubedo ka tito botwu ni wulokke wuwek kit yo mewu marac-ci dok wuti gin ma tye atir. Gin guciko bene matek ni pe myero wuwor lubaŋa mogc mukene dok pe wuti botgi, wek pud wumedde ki bedo i lobo ma yam amiyo botwu ki bot kwarowu. Ento wun pe wuciko itwu dok bene pe wuwinyo lokka. Likwayo pa Jonadab gire gulubo gin ma kwarogi ocikogi kwede, ento wun pe wulubo lokka wacel. Pi meno, an Rwot me mony, Lubaŋa pa Icrael, abekelo can ma yam acikke pire ni aketo i kom jo Juda ki Jerucalem-mi. Abitimo man pien wun pe wuwinyo lokka i kare ma aloko kwedwu, dok bene ka alwoŋowu wun pe wugamo doga.” Ci Jeremia owaco ki jo me kaka pa Rekab ni Rwot me mony, Lubaŋa pa Icrael, owacci, “Wun doŋ wutyeko lubo cik ma kwarowu Jonadab yam ocikowu kwede; wulubo pwonnye woko ducu liweŋ, dok bene wutiyo gin ducu ma onoŋo en ocikowu ni wuti. Pi meno, omiyo an Rwot me mony, Lubaŋa pa Icrael, acikke ni Jonadab wod pa Rekab kare ducu bibedo ki lakware mo ma laco ma bitic bota.” I mwaka me aŋwen me loc pa Yekoyakim wod pa Yocia kabaka me Juda, Rwot owaco bot Jeremia ni, “Kwany buk adola ci ico iye lok ducu ma atito boti mukemo Icrael ki Juda, kacel ki rok ducu. Co gin ducu ma atito boti tyen mukwoŋo, i kare ma onoŋo Yocia aye kabaka o kwede wa onyoo. Gwok nyo ka jo Juda guwinyo pi can ma onoŋo ayubbe me kelo i komgi, miyo gin ducu gibilokke giweko yogi marac-ci. Ci abiweko balgi ki gin maraco ducu ma yam gutimo.” Kumeno Jeremia olwoŋo Baruk wod pa Neria, ci okwano bot Baruk gin ducu ma onoŋo Rwot owaco bote, kun Baruk obedo ka coyo woko liweŋ i buk adola. Ka doŋ Jeremia ociko Baruk kun wacce ni, “An doŋ gigeŋa woko ni pe adony i ot pa Rwot. Ento amito in icit kunnu i kare mo ma noŋo dano tye ka ri kec, ci ikwan lok ma i buk adola-ni woko matek ki dwan maloŋo, wek jo ducu ma gitye i ot pa Rwot guwiny lok ma Rwot onoŋo owaco bota, en lok ma an akwanogi boti icoyo i buk adola-ni, Myero ikwan lok magi bot jo Juda ducu ma gua ki i gaŋigi wek guwiny. Gwok nyo gibilego lega me bako doggi bot Rwot, ci gilokke giweko timo gin marac, pi lok ma Rwot doŋ oloko i kom lwak man ki kiniga kacel ki akemo mager.” Kit meno Baruk okwano lok pa Rwot i ot pa Rwot kit macalo lanebi Jeremia ocike kwede ni myero en oti. I dwe me aboŋwen i mwaka me abicce me loc pa Yekoyakim kabaka me Juda, dano gubedo ka ri kec wek Rwot okonygi, Jo ma gubedo ka ri kec onoŋo obedo jo ma gubedo i Jerucalem kacel ki jo ma gua ki i gaŋi ducu me Juda ci gubino kunnu. I kare ma dano guciko itgi ka winyo lok, ci Baruk okwano lok ducu ma Jeremia owacce ma en ocoyo i buk adola. Baruk otiyo man i ot pa Rwot i kicika pa Gemaria wod pa Capan ma karan. Kicikane onoŋo tye cok ki dyekal mamalo, i kabedo ma gidonyo kwede i dog gaŋ Manyen me ot pa Rwot. Mikaya wod pa Gemaria, wod pa Capan, owinyo ka Baruk kwano lok ma Rwot owaco ki i buk adola. Cutcut en oa ocito i gaŋ kal, ci odonyo i kicika pa karan pa kabaka, Onoŋo rwodi ducu gucokke kunnu: Elicama karan, Delaya wod pa Cemaya, Elnatan wod pa Akbor, Gemaria wod pa Capan, Jedekia wod pa Anania ki rwodi ducu. Ci Mikaya owaco botgi lok ducu ma en owinyo i kare ma Baruk okwano lok ki i buk adola i nyim lwak-ki, Ci rwodi guoro Jekudi wod pa Netania, wod pa Celemia, wod pa Kuci, me waco bot Baruk ni, “Kwany buk adola ma ikwano bot lwak-ki imak i ciŋi ci ibin.” Kit meno Baruk wod pa Neria okwanyo buk adola omako i ciŋe ci obino kwede botgi. Ci guwaco bote ni, “Bed piny ikwan buk meno.” Kit meno Baruk okwano botgi lok meno. I kare ma doŋ guwinyo lok magi woko ducu, ŋat acel acel olokke bot lawote ki lworo madwoŋ, ci guwaco bot Baruk ni, “Myero wuwac lok man woko bot kabaka.” Ka gupenyo Baruk ni, “Tittiwa, lok magi ducu icoyogi niŋniŋ i Jeremia aye ma obedo ka wacone boti ka in icoyo?” Baruk odok iye ni, “Jeremia obedo ka waco lok magi ducu bota ki acel acel, ka acoyogi i buk adola ki kalam vino.” Ci rwodi guwaco bot Baruk ni, “In kacel ki Jeremia myero wucit wukanne woko, pe wuwek ŋat mo oŋe ka ma wutye iye.” Lacen rwodi gucito guketo buk adola i kicika pa Elicama, ma karan, ka doŋ gucito i gaŋ pa kabaka, ci gutito lok woko ducu bot kabaka ki kunnu. Cutcut kabaka ooro Jekudi me cito ka gamo buk adola. Jekudi ocito okwanyo ki i kicika pa Elicama ka okwano bot kabaka kacel ki rwodi ducu ma onoŋo gucuŋ ka ŋete. I dwe me aboŋwen onoŋo kare me cwir, kabaka bene onoŋo tye i gaŋ kalle ma en bedo iye i cwir, ci onoŋo obedo ka oyo mac. I kare ma Jekudi kwano buk adola, ka okwano oo i dul coc me adek nyo me aŋwen, ci kabaka ŋolo woko cutcut ki pala matidi ci bolo woko i mac. Obedo ka timo man nio ka buk adola owan otum woko ducu. Ento ŋat mo kadi kabaka nyo luticce ma guwinyo lok magi ducu pe gubedo ki lworo, dok bene pe guyeco boŋŋigi, Kadi bed Elnatan, Delaya, kacel ki Gemaria gulego kabaka ni pe owaŋ buk adola-ni woko, kabaka pe oketo cwinye me winyo lokgi wacel. Lacen kabaka ociko wode Jeramel, kacel ki Ceraya wod pa Ajriel, ki Celemia wod pa Abdcel ni gumak Baruk karan kacel ki lanebi Jeremia, ento Rwot okanogi woko. Jeremia dok ocoyo buk adola mukene’ Lacen ma doŋ kabaka otyeko waŋo buk adola ma Jeremia aye owaco lokke bot Baruk ka Baruk ocoyo-ni, Rwot ociko Jeremia ni okwany buk adola mukene ka oco iye lok ducu ma onoŋo tye i buk adola mukwoŋo ca ma kabaka Yekoyakim doŋ otyeko wano woko-ni. Rwot otitte me waco bot kaba ka Yekoyakim ni; “Doŋ ityeko wano buk adola ca woko, dok bene ipenyo Jeremia ni piŋo en ocoyo ni kabaka me Babilon bibino ada ci tyeko lobo man woko kun neko jo ducu kacel ki lee ma tye iye, Pi meno an Rwot, awaco bot in Yekoyakim ka baka me Juda ni, pe tye dano mo ki i kom Likwayu ma bibedo kabaka. Ka ito komi gibibolo woko ka ma Lyeto ceŋ biwaŋo ki dyeceŋ ki nico me pee dyewor. Abiketo can i komi kacel ki likwayu, ki luticci, pi balwu ducu ma wutye ka timone. Dok in, kadi ki jo Jerucalem nyo jo Juda, pe wubedo ka keto cwinywu me winyo lok ma abedo ka waco botwu teretere, pi meno abekelo can ma onoŋo yam doŋ aciko pire ni aketo i komwu-ni.” Ci Jeremia dok okwanyo buk adola mukene ci omiyo bot Baruk karan, ci Baruk ocoyo lok woko ducu ki acel acel kit macalo Jeremia obedo ka wacce kwede. Baruk ocoyo lok ducu ma onoŋo tye i buk adola mukwoŋo ma kabaka Yekoyakim owaŋo woko ki mac-ci. Jeremia dok omedo iye lok mapol maromrom ki lok me wiati ca. Nebukadnejar kabaka me Babilon yam oketo Jedekia wod pa Yocia me bedo kabaka me Juda ma ka Yekonia wod pa Yekoyakim. Ento Jedekia ki luticce, ka wa lwak bene pe guwinyo lok pa Rwot ma Rwot omiyo bot lanebi Jeremia ni otit botgi-ni. Kabaka Jedekia ocwalo Yekukal wod pa Celemia, ki ajwaka Jepania wod pa Maceya bot Jeremia, kun giwacce ni, “Myero ileg Rwot Lubaŋawa-ni piwa.” I kare meno onoŋo Jeremia pud tye ka wirre ata i kin dano, donyo i ot ci kato woko gire kit ma cwinye mito, pien onoŋo pud peya gitweye i mabuc. I kare meno bene mony pa Parao oa ki i Ejipt obino; i kare ma jo Kaldaya ma onoŋo gitye ka rumo Jerucalem guwinyo lok man, ci gucako dye woko ki i Jerucalem gudok woko cen ki ŋegi. Ka doŋ Rwot, Lubaŋa pa Icrael, owaco bot lanebi Jeremia ni, “Wac bot kabaka me Juda ma ocwali me lok kweda ni, ‘Dul mony pa Parao ma onoŋo bino ka konyi-ni doŋ bidok woko i lobo Ejipt. Ci jo Kaldaya bidwogo cen. Gibibino gilwenyo i kom gaŋ man, gimayo woko ka doŋ giwaŋo woko ki mac. An Rwot acikowu matek ni pe myero wubed ka bwolle kekenwu kun wutamo ni jo Kaldaya pe bidwogo cen, myero wuniaŋ ni gibidwogo. Kadi bed wuloyo dul mony pa jo Kaldaya ma gibino ka lweny i komwu-ni, ma noŋo doŋ jo mudoŋŋe keken, en aye jo ma noŋo giketo ret i komgi ma gibuto i kemagi, jo-nu bene pud gibiromo a malo ci giwaŋo gaŋ-ŋi woko ki mac.’ ” Dul mony pa jo Kaldaya gudok woko cen ki i Jerucalem ki ŋegi pien onoŋo mony pa Parao doŋ onyiko cok mada. Ci Jeremia oa ki i Jerucalem ocito i lobo pa Benjamin ka gamo dul lobo ma gipoko bote ki i kin lutugi. Ento i kare ma Jeremia oo i dog gaŋ pa Benjamin, onoŋo ladit ma loyo askari tye ka tic kunnu, nyiŋe gilwoŋo Irija wod pa Celemia ma wod pa Anania; cutcut omako Jeremia woko kun wacce ni, “In it ye ka lwi woko icito bot jo Kaldaya.” Jeremia odok iye ni, “Meno lok goba, an pe atye ka lwi woko acito bot jo Kaldaya.” Ento Irija onoŋo pe twero winyo lok pa Jeremia mumiyo omake otere bot rwodi. Ci kiniga omako rwodi matek i kom Jeremia, gugoye ka gutweye kwede woko i mabuc i ot pa Yonacan ma karan, pien onoŋo doŋ giloko odoko ot mabuc. Gitweyo Jeremia i ot ma obedo bur ma tye i te ŋom, ci giweko ori kunnu pi kare malac. Ci kabaka Jedekia ocwalo dano ka kelo Jeremia bote, ci gikelo, en ojolo Jeremia maber. Kabaka ocako penye ki i ot i muŋ kun penye ni, “Tye lok ma Rwot otitti?” Jeremia ogamo ni, “Lok tye.’, Dok omedo lok kun wacce ni, “Gibimiyi woko i ciŋ kabaka me Babilon.” Jeremia owaco bene ki kabaka Jedekia ni, “Gin marac aŋo ma an atimo boti nyo bot luticci kadi ki bot lwak man, mumiyo itweya woko i mabuc-ci? Gin aŋo mutimme i kom lunebini ma yam gutyeto lok boti ni kabaka me Babilon pe bibino ka lweny i komi kadi ki i kom lobo man? Kombeddi doŋ, ai laditta, alegi iwiny kokona pe dok idwoka cen i ot pa Yonacan karan, weko abito woko ki kunnu.” Pi meno Jedekia omiyo cik, ci gukelo Jeremia guketo me bedo i dyekal pa lukur-piny, kun oye gibedo ka miye mugati nino ki nino, mugati ma gigamo ki i yo pa luted mugati, nio waŋ ma mugati doŋ otum woko liweŋ ki i gaŋ, Kit meno Jeremia obedo kunnu i dyekal pa lukur-piny, I kare-nu Cepatia wod pa Matan, Gedalia wod pa Packur, Jukal wod pa Celemia ki Packur wod pa Malkia gubedo ka winyo lok ma Jeremia obedo ka wacone bot lwak. En obedo ka waco botgi ni Rwot owaco ni, “Ŋat mo ma bidoŋ bedo i gaŋ gibineko woko ki pala lucwan, kec bineko ki two gemo bene bipoto i kome neke wako. Ento ŋat ma bia cita ka mine kene bot jo Kaldaya pe gibineko, bibedo kwo; en bilaro kwone ci bedo bote macalo mot me lweny.” Jeremia bene onoŋo obedo ka tito lok bot lwak ni Rwot owaco kuman ni, “Abemiyo gaŋ man woko i ciŋ dul mony pa kabaka me Babilon, ci en bimako woko.” Ci rwodi guwaco bot kabaka ni, “Laco man myero ginek woko, pien en miyo cwmyaskari kacel ki lwak ma odoŋ i gaŋ doko lwor, pi lok ma en loko botgi-ni. Dano man pe tye ka yenyo yo me miyo kony pi berbedo pa lwak, ento mito kelo can i komgi aye.” Kabaka Jedekia owacci, “Nen, twero tye i ciŋwu, wutim gin ma wumito i kome; an pe atwero genowu gira.” Ci gumako Jeremia gubole woko i waŋ it pa Malkia, ma en wod pa kabaka, ma onoŋo obedo i dyekal pa lukur-piny, Gutweye ki tol gucwale kwede piny i waŋ it kunnu. Pii onoŋo pe i waŋ it, ento coto keken aye onoŋo odoŋ, ci Jeremia ocako mwony woko i coto. Kadi bed kumeno, Ebed-melek Laetiopia, dano ma gikolo, ma yam tiyo i gaŋ kal pa kabaka, owinyo ni gibolo Jeremia woko i waŋ it. I kare meno onoŋo kabaka obedo ki lukikone i dog gaŋ pa Benjamin. Ci Ebedmelek oa ki i gaŋ kal pa kabaka ocito bot kabaka owacce ni, “Laditta, jo magi gutimo gin marac atika. Gubolo Jeremia woko i waŋ it, ka ma ageno ni kec bi neke woko ki kunnu. Cam mo ma romo doŋ pe i gaŋ.” Ci kabaka omiyo twero bot Ebed-melek Laetiopia me kwanyo jo adek gucit kwede ka ywayo Jeremia woko ki i waŋ it ma peya noŋo oto. Ci Ebed-melek okwanyo jo meno adek ka ocito i ot pa kabaka, odonyo ka ma giketo iye boŋo i ot kano jami, ci okwanyo ketuketu boŋo muti ki boŋo mogo muyec, ci otweyo ki tol ocwalo piny i waŋ it bot Jeremia. Ci Ebed-melek owaco ki Jeremia ni, “Ket ketuketu boŋo ki boŋo muyec i te yweti ka iket tol i kome.” Jeremia otimo kit meno, ci guywaye ki tol ki i waŋ it gukele woko ka maleŋ, Ci Jeremia omedde ka bedo i dyekal pa lukur-piny, Kabaka Jedekia ocwalo dano gikelo Jeremia bote ki i doggola me adek me donyo i ot pa Rwot. Kabaka owaco bot Jeremia ni, “Abipenyi peny acel, doŋ pi meno pe amito imuŋ lok mo woko bota.” Jeremia owaco bot Jedekia ni, “Ka ce atitti lok ada, ibineka woko, dok bene ka ce amiyi tam, ci pe ibiketo cwinyi iye.” Pi meno kabaka Jedekia okwoŋne bot Jeremia i muŋ kun wacci, “Macalo Rwot tye kwe-ni, ma omiyowa kwo, pe abineki, dok bene pe abimiyi i cin jo ma gimito neki woko-ni.” Ci Jeremia owaco bot Jedekia ni Rwot Lubaua me mony, Lubaŋa pa Icrael owaco kuman ni, “Ka ce ibimine keni bot rwodi pa kabaka me Babilon, ci gibiweki ibedo kwo, ki gaŋ man bene pe gibiwaŋo woko ki mac. Ento in kacel ki jo ma i odi wubikwo. Ento ka ce pe imine keni bot rwodi pa kabaka me Babilon, ci gaŋ man gibimiyo woko i ciŋ jo Kaldaya, gibiwaŋo woko, pi meno in pe ibibwot ki i ciŋgi wacel.” Kabaka Jedekia owaco bot Jeremia ni” “Alworo Lujudaya ma doŋ gumme woko kengi bot io Kaldayani, pien kare mukene gimiya woko i ciŋgi, ci gibitima ki tim anywar marac.” Jeremia owacce ni, “Pe gibimiyi botgi. Kombeddi doŋ ilub lok pa Rwot i gin ducu ma awacci, ci ibibedo maber, dok bene gibibwoti ibedo kwo. Ento Rwot doŋ onyutta ginanyuta i waŋ lek, gin ma bitimme ka ce ikwero mine woko keni botgi. Nen, mon ducu ma yam giweko gudoŋ i gaŋ kal pa kabaka me Juda doŋ gitye ka terogi woko bot rwodi pa kabaka me Babilon. Winy lok ma gitye ka wacone kun giwoto gicito kwede ni, ‘Luremi ma igenogi-ni doŋ gubwoli, dok bene guloyi woko, Doŋ kombeddi kit macalo tyeni omwony woko i coto-ni, gulokke guweki woko keni.’ ” Jeremia dok owaco ni, “Monni ducu kacel ki litinoni gibiterogi woko bot jo Kaldaya, ki bene pe ibibwot ki i ciŋgi, Kabaka me Babilon bimaki woko macalo opii, ki gaŋ man bene gibiwaŋo woko ki mac.” Jedekia owaco bot Jeremia ni, “Pe iwek gat mo oŋe lok ma wawaco, ci pe ibito. Ka ce rwodi guwinyo ni aloko kwedi, ka gubino boti guwacci ni, “Tit botwa gin ma in iwaco bot kabaka ki gin ma kabaka owaco boti, pe imuŋ lok mo botwa pien waŋ giwa pe wabineki,’ ibiwaco botgi ni, ‘Akok bot kabaka ki mwolo kun abako doga bote ni pe myero odwoka cen i ot pa Yonacan me to kunnu.’’’ Ci rwodi ducu gua gubino bot Jeremia gupenye ci en bene odok iye botgi kit macalo kabaka opwonye kwede. Mumiyo guweko lok kwede woko, pien lok ma gubedo ka lokone-ni gat mo muwinyo pe. Gigwoko Jeremia i dyekal pa lukur-piny nio waŋ ma Jerucalem gimayo woko, I mwaka me aboŋwen me loc pa Jedekia kabaka me Juda, i dwe me apar en aye Nebukadnejar kabaka me Babilon obino kwede ki monnye ducu i kom Jerucalem, ci orumo gaŋ woko. Gaŋ girumo kit meno nio wa i mwaka me apar wiye acel me loc pa kabaka Jedekia. I dwe me aŋwen, ninone aboŋwen, en aye gumuko kwede cel gag woko. I kare ma doŋ gimayo Jerucalem woko, ci rwodi ducu pa kabaka me Babilon gubino gubedo i dog gaŋ ma i dyere ma tye i gaŋ kai: gin aye Nergal-carejer, Camgar-nebo, Carcekim Larabcaric, Nergal-carejer ma Larabmag, ki ludito mukene ducu pa kabaka me Babilon. I kare ma Jedekia kabaka me Juda kacel ki askari ducu gunenogi, ci guweko gaŋ guriŋo woko i dyewor, kun giwok ki i dog gaŋ ma i kin cel aryo me gaŋ ma onoŋo guwok i poto pa kabaka; ci gucito gulubo yo ma dok tun Araba. Ento mony pa jo Kaldaya guryemo korgi, ci gumako Jedekia wa i bar me Jeriko; doŋ i kare ma gumake woko gukele bot Nebukadnejar kabaka me Babilon i Ribla, ma i lobo Kamat; ci oŋolle iye kop, Kabaka me Babilon oneko awobe pa Jedekia woko i Ribla ki i nyime ma waŋe neno, dok kabaka me Babilon oneko ludito me awora me Juda-gu woko ducu. Ci okolo waŋ Jedekia giloyo woko, ka gitweye ki nyor, gitere kwede wa i Babilon. Jo Kaldaya guwaŋo ot pa kabaka, ki odi pa lwak ducu, ci gumuko kicika cel ma orumo Jerucalem woko. Ki jo ma yam gudoŋ i gaŋ, ki jo ma yam gukobo gigi kengi bot kabaka me Babilon, kacel ki lwak ma gudoŋŋe ducu, Nebujaradan ma ladit pa lugwok kabaka oterogi woko i opii i Babilon. Ento Nebujaradan ladit pa lugwok kabaka yam oweko lu can mogo ma limgi pe gudoŋ i lobo, ci omiyogi poto olok ki potti mukene bene i kare meno. Nebukadnejar kabaka me Babilon omiyo cik mukemo Jeremia kun wok ki bot Nebujaradan, ladit pa lugwok kabaka kun wacci, “Tere, gwoke maber, pe itim gin mo marac i kome, ento ti kwede i yo ducu kit macalo en titti.” Ci Nebujaradan ladit pa, lugwok kabaka, Nebucajban Larabcaric, Nergal-carejer ma Larabmag, ki ludito madoŋo ducu pa kabaka me Babilon gucwalo dano okelo Jeremia ki i dyekal pa lukur-piny, Ci gumiye bot Gedalia wod pa Akikam, ma wod pa Capan, wek otere paco. Ci omiyo en obedo i kin dano. Rwot oloko ki Jeremia i kare ma onoŋo gitweye woko i dyekal pa lukurpiny. Owaco bot Jeremia me tito bot Ebed-melek Laetiopia ni Rwot me mony, Lubaŋa pa Icrael, owacci, “Nen, abicobo lokka kun aketo can i kom gaŋ man, pe abitimo gin mo maber, lok man bicobbe i nyimi in kikomi i nino meno. Ento an Rwot abilari, pe gibimiyi i ciŋ jo meno ma it ye ka lworogi-ni. Pien adada an abilari, mumiyo pe gibineki woko ki pala lucwan, ento ibibedo kwo, ci kwoni bibedo boti macalo mot me lweny, pien iketo genni ducu i koma, man Rwot ma owaco.” Rwot oloko ki Jeremia i kare ma doŋ Nebujaradan, ladit pa lugwok kabaka ogonye woko ki i Rama. Onoŋo yam gitweyo Jeremia woko ki nyor kacel ki jo mapol ma gimakogi ki i Jerucalem ki Juda, ma giterogi woko i opii i Babilon. Ladit pa lugwok kabaka okwanyo Jeremia ci owacce ni, “Rwot Lubaŋani doŋ otytiko tito pi kit can ma bipoto i kabedo man; Rwot doŋ otimo gin ma nene en owaco ni ebitimo-ni. Man ducu otimme pien lutuwu gutimo bal i kom Rwot dok bene pe guwinyo lokke. Kombeddi doŋ abegonyo nyor woko ki i ciŋi ci aweko icito laboŋo ayela mo. Ka ce imito wot kacel kweda me cito i Babilon, ci itwero, an abigwoki. Ka ce pe imito cito itwero bene bedo giri. Nen lobo-ni ducu tye en, yer ka mo ma itamo ni ber nyo oporre me cito iye.” Ento Jeremia pe ocito, mumiyo Nebujaradan owacce ni, “Dok cen bot Gedalia wod pa Akikam, ma wod pa Capan, ma nene kabaka okete me bedo laloc me gaŋi me Juda ducu. Itwero bedo kacel kwede i kin lwak, nyo itwero giri cito ka ma itamo ni ber me cito iye.” Ci ladit pa lugwok kabaka omiye cam ki mot mogo ka doŋ oweko en ocito gire. Jeremia ocito bot Gedalia wod pa Akikam i Mijpa, ci obedo kacel kwede i kin lwak ma onoŋo gudoŋ i lobo meno. Ludito mogo ki askari pa Lujudaya onoŋo pud gibedo i tim. Guwinyo ni kabaka me Babilon otyeko keto Gedalia wod pa Akikam me bedo laloc me lobo, dok oketo en me loyo jo ducu mudoŋ, co, mon kacel ki litino, ma yam pe giterogi i opii i Babilon, ma gin aye doŋ jo ma lucan adada i lobo meno. Ci Icmael wod pa Netania, Yokanan wod pa Karea, Ceraya wod pa Tanumet, likwayo pa Epai ma jo Netopa, ki Jejania ma Lamaaka gucito kacel ki lwak megi bot Gedalia i Mijpa. Gedalia wod pa Akikam, ma wod pa Capan, okwoŋŋe botgi kacel ki lwakgi ducu kun wacci, “Pe myero wubed ki lworo me tic bot jo Kaldaya. Wubed kunnu ci wuti bot kabaka me Babilon, ci wubibedo maber ki kuc. An gira abibedo i Mijpa kun abedo macalo lawaŋwu ka jo Kaldaya gubino kany. Ento wun wutwero kano koŋo vino, nyig yat ki moo jeituni, ci wubed kwede i gaŋi ma doŋ wumayogi-ni.” Kit meno bene, Lujudaya ducu ma onoŋo yam gitye i lobo Moab, Ammon, Edom ki lo bo mukene ducu ma yam giryemogi gucito iye, guwinyo ni kabaka me Babilon oweko jo mukene odoŋ i Juda, dok bene en oketo Gedalia wod pa Akikam, ma wod pa Capan me bedo laloc ma loyogi. Ci Lujudaya ducu guweko lobo ka ma yam giryemogi gucito iye ni, gucako dwogo cen i Juda. Gubino bot Gedalia i Mijpa, ci gucoko koŋo yino madit ki nyig yadi me oro madwoŋ adada. I ŋe meno, Yokanan ki ludito ducu ma giloyo askari ma onoŋo gitye i tim gubino bot Gedalia i Mijpa, ci guwacce ni, “Tika iŋeyo ni Baalic kabaka pa jo Ammon otyeko cwalo Icmael wod pa Netania me neki woko?” Ento Gedalia wod pa Akikam pe oye lokgi. Ka doŋ Yokanan oloko ki Gedalia i muŋ i Mijpa, kun wacce ni, “Wek acit acinek Icmael wod pa Netania woko, pien ŋat mo pe biŋeyo lok man. Piŋo en mito neki woko, kun miyo Lujudaya ducu ma gurumi woko gibiket woko, dok bene miyo jo ma yam gudoŋ i Juda gito woko?” Ento Gedalia wod pa Akikam owaco ki Yokanan wod pa Karea ni, “Pe ibitimo gin ma kit meno, pien it ye ka loko lok goba keken i kom Icmael.” I dwe me abiro, lcmael el wod pa Netania ma wod pa Elicama, ma ginywale i ot ker, ma en ŋat acel i kin ludito ‘pa kabaka, obino ki jo apar bot Gedalia wod pa Akikam i Mijpa. I kare ma gitye i Mijpa ka camo cam kacel, cutcut Icmael ki jo apar ma guwoto kwede-ni gua gutoŋo Gedalia wod pa Akikam, ma wod pa Capan woko ki pala lucwan ci guneke woko. En aye onoŋo ŋat ma kabaka me Babilon oketo me bedo laloc me lobo-ni, Icmael bene oneko Lujudaya ducu ma onoŋo gitye kacel ki Gedalia i Mijpa: kadi wa askari pa jo Kaldaya ma ginoŋogi kunnu. Orwone, ma pud peya ŋat mo oneyo pi aeko Gedalia, jo pyeraboro gua ki i Cekem ki Cilo ka Camaria gubino. Gubino ma gulyelo tikgi woko, guruko bene boŋŋi muyecoyec, komgi bene guŋolo woko. Gubedo ka kela gityer me moko kwoŋ ki odok eceta me atyera i ot pa Rwot. Icmael wod pa Netania oa ki i Mijpa obino ka rwatte kwedgi, kun woto ki koko. I kare ma en rwatte kwedgi owaco botgi ni, “Wubin wudony bot Gedalia wod pa Akikam.” I kare ma doŋ gubino gudonyo i gaŋ, ci Icmael wod pa Netania ki jo ma onoŋo gitye kacel kwede gunekogi woko, ci gutiŋo komgi gubolo woko i waŋ it. Ento onoŋo tye jo apar i kingi ma guwaco bot Icmael ni, “Pe inekwa, watye ki naŋo, kal, moo jeituni, ki moo kic ma gikano i poto.” Ci ojukke kene pe onekogi ki luremgi ducu. Waŋ it ma onoŋo Icmael obolo iye kom dano ma en onekogi-ni onoŋo dit dok lac mada. En aye waŋ it ma kabaka Aca yam okwinyo me gwoko kwo pa dano ki i kom kabaka Baaca me Icrael. Icmael opoŋo waŋ it meno woko ki kom jo ma en onekogi-ni, Ci Icmael omako anyira pa kabaka ki jo ducu ma yam gudoŋ i Mijpa gudoko opiine, ginjo ma Nebujaradan, ladit pa lugwok kabaka, yam omiyogi I ciŋ Gedalia wod pa Akikam. Icmael wod pa Netania oterogi woko i opii kun giwoto gicito me ŋolo kulu pi kato loka bot jo Ammon. Yokanan kacel ki ludito monnye ducu guwinyo pi lok me nek ma Icmael otimo-ni. Ci gucoko jo ma megi, gucito ka lweny i kom Icmael wod pa Netania. Gubino ka lweny i kome i joro madit ma tye i Gibeon. I kare ma opii pa Icmael guneno Yokanan kacel ki ludito monnye, cwinygi obedo yom. Kit meno jo ducu ma yam Icmael omakogi macalo opii ki i Mijpa, gulokke gudwogo cen, ci gucito bot Yokanan wod pa Karea. Ento Icmael wod pa Netania olwi woko ki jo aboro, ci gucito bot jo Ammon. Lacen Yokanan wod pa Karea ki ludito monnye kacel kwede gukwanyo dano ma yam gudoŋ, ma Icmael wod pa Netania omakogi ki i Mijpa oterogi woko i opii i ŋe neko Gedalia wod pa Akikam, askari, mon, litino, ki jo ma gikologi, ma Yokanan odwokogi cen ki i Gibeon. Ci gucito gubedo i Gerut Kimam ma cok ki Beterekem. Onoŋo doŋ gitye ki tam me cito wa i Ejipt pien onoŋo gilworo jo Kaldaya. Gin gubedo ki lworo pien Icmael onoŋo oneko Gedalia, wod pa Akikam, ma kabaka me Babilon onoŋo oketo me bedo laloc me lobo. Ludito wi mony ducu, kacel ki Yokanan wod pa Karea ki Ajaria wod pa Kocaya, gubino ki lwak dano ma kitgi patpat, jo matino ki jo madito ducu, gubino cok, ci guwaco bot lanebi Jeremia ni, “Tim gin ma waŋ wabako dogwa boti pire! Leg Rwot Lubaŋawa piwa. Leg pi waŋ ducu ma wadon ‘lam onoŋo wadwoŋ, ento kit macalo ineno, kombeddi doŋ wadon jo manok keken. Legi, wek Rwot Lubaŋawa onyut botwa yo ma myero walubi ki gin ma myero watim.” Lanebi Jeremia odok iye botgi owacci, “Doŋ awinyo lokwu; pi meno abilego Rwot Lubaŋawa piwu kit macalo onoŋo wupenya, kit gin ducu ma Rwot bidok iye ki wun an abitito botwu. Pe abikano kit gin mo wacel ma pe atito botwu.” Ci guwaco bot Jeremia ni, “Rwot myero obed caden me ada dok ŋat ma genne i komwa me timowa rac ka ce pe wabilubo lok ducu ma Rwot Lubaŋani bicwali kwede botwa. Kadi bed gin maber nyo marac, waŋ wabilubo lok pa Rwot Lubaŋawa ma wacwali bote-ni. Ka walubo lokke ci wabibedo giwa maber.” Lacen i ŋe nino apar Rwot oloko ki Jeremia, Ci Jeremia olwon o Yokanan wod pa Karea, ki ludito wi mony ducu ma onoŋo gitye kacel kwede, ki lwak dano ducu, jo matino ki madito. Ka doŋ owaco botgi ni, “Rwot, Lubaŋa pa Icrael, ma wucwala hote ki lega me bako dogwu-ni owacci, ‘Ka ce wumito bedo i lobo man abigerowu wucuŋ matek macalo ot, pe abiretowu woko piny; abipitowu pe abiputowu woko. Doŋ aŋut pi can ma onoŋo aketo i komwu ca. Pe doŋ wubed ki lworo i kom kabaka me Babilon. Pe wulwore, pien atye kwedwu; abilarowu dok abikwanyowu woko ki i ciŋe. Kica bimaka i komwu ci amiyo en bene kica make i komwu ci miyo wubedo i lobowu kikome.’ Ento wun jo ma wudoŋ i Juda pe myero wukwer winyo lok pa Rwot Lubaŋawu kun wukwero bene bedo i lobo man woko. Pe myero wuwacci, ‘Pe, waŋ giwa wabicito wabedo i Ejipt, ka ma pe wabineno iye lweny mo doki ki wanwa, dok bene pe wabiwinyo koko tum ma gikuto pi lweny, ki kec bene pe binekowa.’ Wuwiny lok pa Rwot, wun jo ma wudoŋ i Juda. Rwot me mony, Lubaŋa pa Icrael, owaco kuman ni, ‘Ka ce doŋ wumoko tamwu me cito me bedo i Ejipt, ci lweny ma wulworoni binoŋowu kunnu i lobo Ejipt; ki kec bene ma wulworo-ni bilubowu kunnu, ci wubito woko i lobo Ejipt. Jo ducu ma doŋ gumoko tamgi me cito me bedo i Ejipt gibito, nyo i lweny, nyo kec aye ma binekogi, kono two gemo gire. Pe tye ŋat mo i kingi ma bidoŋ bedo kwo, gat mo bene pe ma bibwot ki i can ma abikelo aketo i komgi-ni.’ “Rwot me mony, Lubaŋa pa Icrael, owaco kuman ni, Kit macalo yam atoyo kinigana ki akemona i kom jo ma gibedo i Jerucalem, kit meno bene abionyo akemona woko i komwu ka ce wucito i Ejipt. Wubidoko lok lacen dano, gin ma kelo lworo madwoŋ, ki gin ma dano gibedo ka loko lok aŋec i komgi. Pe dok wubineno kabedo man matwal. Rwot doŋ owaco botwu wun jo ma wudoŋ i Juda ni, ‘Pe wuciti i Ejipt.’ Myero wuŋe atikatika ni an doŋ atyeko cikowu i kare man ni wun doŋ wuŋak woko ma doŋ wumito ada ni kwowu orweny woko. Wun wucwala ni acit bot Rwot Lubaŋawa kun wuwacca ni, ‘Leg Rwot Lubaŋa piwa! Tit botwa bene gin ducu ma en owaco ni wati, ci waŋ bene wabitiyo.’ Nen, kombeddi dog atito botwu, ento wun wukwero lubo gin ducu ma Rwot Lubaŋawa oora ni atit botwu. Pi meno kombeddi myero wuŋe atikatika ni wubito i lweny, kec binekowu, ki two gemo bene binekowu i kabedo ma wumito twatwal me cito iye-ni.” I kare ma Jeremia doŋ otyeko loko lok ducu bot lwak ducu ma gucokke, ma Rwot Lubaŋagi aye oore me tito botgi, ci Ajaria wod pa Kocaya ki Yokanan wod pa Karea, ki jo ducu ma yam gin luŋala guwaco bot Jeremia ni, “It ye ka tito lok goba. Rwot Lubaŋawa pe ocwali ni itit botwa ni, ‘Pe myero wucit ka bedo i Ejipt.’ Ento Baruk wod pa Neria aye opiyi i komwa, wek imiwa i ciŋ jo Kaldaya, wek gunekwa woko, nyo guterwa woko i opii i Babilon.” Kit meno Yokanan wod pa Karea ki ludito wi mony ducu kacel ki lwak ducu pe gulubo lok pa Rwot, me doŋ i lobo Juda. Ento Yokanan wod pa Karea ki ludito wi mony ducu gumako dano ducu gutero woko i Ejipt. Gutero jo ducu ma yam gudoŋ gudwogo ka bedo i Juda kun gua ki i rok mapatpat ka ma yam giryemogi guket iye, co, mon, litino kacel ki anyira pa kabaka. Gutero jo ducu ma yam Nebujaradan ladit pa lugwok kabaka owekogi bot Gedalia wod pa Akikam; ma wod pa Capan; guterogi kacel ki lanebi Jeremia ki Baruk wod pa Neria. Pe gulubo gin ma Rwot ociko, mumiyo gubino i lobo Ejipt wa i kabedo ma gilwoŋo ni Tapanec, Rwot owaco ki Jeremia i Tapanec ni, “Kwany gweŋ madito imak i ciŋi, ci iyikgi woko i te cementi ma i kin gweŋ ma gicano ma gidonyo kwede i gaŋ kal pa kabaka Parao i Tapanec, yikgi i nyim jo Juda ma gin bene gineno. Ci iwac botgi ni an Rwot me mony, abekelo laticca Nebukadnejar kabaka me Babilon, Abicibo komkerre i wi gweŋ man ma ayiko-ni, ka doŋ ayaro kema me ker woko i wigi. Nebukadnejar bibino ci loyo jo Ejipt woko. Jo ma myero guto ki two, two gemo binekogi woko, ki jo ma myero gitergi i opii, gibiterogi woko i opii, ki jo ma myero guto i lweny gibinekogi woko ki pala Lucwan, En bimoko mac i odi pa lwak lubaŋagi, ci biwaŋogi woko liweŋ, nyo tiŋogi cito kwede gire, Kit macalo lakwat yero nyugi ki i kom boŋone, ci kabaka me Babilon bene biyero kit-jami ducu ki i lobo Ejipt, bia kunnu cito ki kuc. En bimuko wir me got ma tye i Eliopolic ma tye i lobo Ejipt; dok en biwaŋo odi pa lwak lubaŋa me Ejipt-gu woko ducu ki mac.” Rwot oloko ki Jeremia lok ma kemo Lujudaya ducu ma gibedo i Ejipt, i gaŋi me Migdol, Tapanec, ki Mempic, ki i lobo Patroc. Rwot me mony, Lubaŋa pa Icrael, owaco kuman ni, “Wun kikomwu doŋ wutyeko neno kit can ducu ma aketo i kom Jerucalem ki i kom gaŋi ducu ma i Juda. Kadi wa kombeddi gitye macalo wi obur, ŋat mo pe ma bedo i igi. Atimo man pien onoŋo dano gutimo gin maraco dok bene guneto cwinya omiyo kiniga omaka. Gubedo ka waŋo odok eceta bot lwak lubaŋa mogo ma gin kikomgi pe giŋeyo, wun bene pe wuŋeyo kadi ki kwarowu bene yam pe guworo lwak lubaŋa macalo meno. Abedo ka cwalo luticca lunebi botwu teretere, kun gitito botwu ni pe myero wutim gin marac me kwer ma iya dagi-ni, Ento wun pe wuwinyo dok pe wuketo cwinywu i lokka. Pe bene wumedo ki weko timo gin marac wacel, kadi waŋo odok eceta bot lwak lubaŋa-gu. Pi meno omiyo aonyo kinigana ki akemona mager woko i kom gaŋi me Juda ki yo me Jerucalem ci awanogi woko ki mac. Gudoko obur kit macalo tye kwede wa onyoo-ni. “Pi meno an Rwot me mony, Lubaŋa pa Icrael, kombeddi apenyowu gin aŋo mumiyo wutimo gin marac madit macalo man i komwu kekenwu. Wun wumito kelo can i kom co ki mon, i kom litino ki litino lukere, wek ŋat mo obed pe ma bidoŋ ki i kin lutuwu i lobo Juda? Piŋo wuneto cwinya miyo kiniga maka ki cal jogiwu ma wutiyo atiya ki ciŋwu, ki dok pi waŋo odok eceta bot lwak lubaŋa mukene-gu i lobo Ejipt, ka ma doŋ wubino me bedo iye? Wutimo man ni wek wuto woko, wek rok ducu ma i wi lobo gulok lok aŋec i komwu, dok bene guti ki nyiŋwu macalo gin me ceno dano? Wiwu mono doŋ owil woko i kom gin maraco ma gitimo i gaŋi me Juda ki I yo me Jerucalem, ma kwarowu gutimo, dok luker me Juda kacel ki mongi, ki wun bene kacel ki monwu wutimo? Ento kadi wa onyoo pe wumedo ki mwolle kenwu pe wubedo ka lwora, dok bene pe wubedo ka lubo cikka ki gin ma an aciko ma amiyo botwu ki bot kwarowu. “Pi meno an Rwot Lubaŋa me mony, Lubaŋa pa Icrael, abiketo can i komwu, abineko jo Juda woko ducu. Doŋ pi jo Juda ma onoŋo gumoko tamgi me cito me bedo i Ejipt, gin ducu gibinekogi woko, Gin ducu cakke i kom jo matino o kwede i kom jo madito, gibito i lobo Ejipt, i lweny nyo kec ma binekogi. Gibidoko lok lacen dano, dok gin ma kelo lworo madwoŋ bot dano; dano gibibedo ka loko lok aŋec i komgi kun gitiyo ki nyiŋgi macalo gin me ceno dano. Abiketo can i kom jo ma gibedo i Ejipt, kit macalo aketo can i kom Jerucalem, ki lweny, kec ki two gemo. Pe tye ŋat mo ki i kom jo Juda ma gudoŋ ma gubino ka bedo i Ejipt ma bibwot dok bedo kwo. Dano mo acel i kingi pe bidok cen i Juda, ka ma gitye ka tamo ni myero gidok cen gicibed iye-ni. Ŋat mo ma bidok cen pe, kono luriŋ ayeta mogo manok keken aye gibidok kunnu.” Lacen jo ducu ma guŋeyo ni mongi gutyero odok eceta bot lwak lubaŋa mukene, ki mon ma gucuŋ ka winyo lokke, cokke madit, jo ducu ma gubedo i Patroc i lobo Ejipt, gudok iye ki Jeremia ni, “Wadag winyo lok ma imito tito botwa i nyiŋ Rwot. Ento waŋ wabitiyo gin ducu ma doŋ watyeko kwoŋo kwoŋ pire, wabiwaŋo odok eceta bot daker me polo kun waonyo gityer amata-gu bene bote, kit macalo yam watimo, waŋ ki kwarowa, lukerwa ki rwodiwa, i gaŋi me Juda ki i yo ma tye i Jerucalem. I kare meno onoŋo watye ki cam madwoŋ, onoŋo walony, dok bene pe onoŋo waneno kit can mo. Ento i kare ma doŋ waweko waŋo odok eceta bot daker me polo ki onyo gityer amata-gu bote jami ducu doŋ ocako remowa woko, gicako nekowa woko i lweny, ki kec bene onekowa otyekowa woko.” Mon gumedde ki lokgi kun giwaco ni, “I kare ma watedo mugati ma porre ki cal pa daker me polo, kun wawaŋo bote odok eceta, dok waonyo bote gityer me amata, cogwa onoŋo guye dok guneno gin ma wabedo ka tiyone.” Ci Jeremia owaco bot lwak ducu, mon kacel ki co ma gudokke iye kit man ni, “Odok eceta ma wubedo ka wanone i gaŋi me Juda ki i yo me Jerucalem, wun ki kwarowu, lukerwu ki rwodiwu, kacel ki jo me lobo meno, wutamo ni Rwot doŋ wiye owil woko i kom gin ma wutimo? Wutamo ni Rwot pe ŋeyo? I kare-ni lobowu doŋ odoko obur laboŋo dano mo ma bedo iye. Odoko gin ma kelo lworo madwoŋ bot dano, ma dano gitiyo ki nyiŋe macalo gin me ceno dano, pien Rwot doŋ onoŋo pe twero ciro gin maraco ki gin me kwer ma wubedo ka timone. Can man opoto i komwu kit macalo tye wa onyoo-ni, pien wubedo ka waŋo odok eceta dok wutimo bal i kom Rwot. Pe wubedo ka lubo cikke ki gin ma en ociko kadi wa lok me cadenne.” Jeremia otito ki lwak ducu, makatone bot mon, gin ma Rwot me mony, Lubaŋa pa Icrael, onoŋo owaco bot jo Juda ma gibedo i lobo Ejipt ni, “Wun kacel ki monwu wucikke acika bot daker me polo. Wucikke ni wubiwaŋo odok eceta bote, kun bene wuonyo gityer amata-gu bote, ci wun giwu wugwoko kwoŋ ma wukwoŋo, wucobo bene kakare. Pi meno wumok kwoŋwu wuti bene wucobi! Ento wuwiny lok me cikke ma an Rwot doŋ atyeko ketone kun akwoŋŋe ki nyiŋa madit bot jo Juda ducu ma gibedo i lobo Ejipt ni, Pe dok amiyo ŋat mo kwoŋo kwoŋ ki nyiŋa kun wacci, ‘Macalo Rwot Lubaŋa tye kwe-ni.’ Nen, abene-to ni gunen can, pe gubed maber wacel; jo Juda ducu ma gitye i lobo Ejipt gibinekogi woko i lweny, kec binekogi, nio waŋ ma guto gutum woko liweŋ. Ento jo manok ki i kinwu gibibwot ki i lak to, en aye gibia ki i lobo Ejipt gidok i lobo Juda. Ci jo Juda ducu ma gudoŋ ki i kom jo ma yam gubino i Ejipt gibiŋeyo lok pa aŋa ma obedo me ada, mera nyo megi. An Rwot abinyuto botwu lanyut man ma nyuto ni abiketo can i komwu i kabedo man, wek wuŋe ni lok ma aloko me keto can i komwu bibedo ada. Abimiyo Parao Kopra kabaka me Ejipt woko i ciŋ lukworre ma gimito neke, kit macalo amiyo Jedekia kabaka me Juda woko i ciŋ Nebukadnejar kabaka me Babilon, ma onoŋo obedo lakworre ma omito neke woko.” I mwaka me aŋwen me loc pa Yekoyakim wod pa Yocia kabaka me Juda, en aye Baruk wod pa Neria ocoyo iye lok ma Jeremia owaco bote kikore kikore. Ci lanebi Jeremia owaco bot Baruk ni, “Rwot, Lubaŋa pa Icrael, owaco kuman ni, Baruk, in iwacci, ‘Can i wiya gira! Rwot dok omedo cwercwiny i kom arem ma atye kwede. Doŋ aol woko ki cur dok pe alimo yweyo mo wacel!’” Pi meno Rwot owaco bot Jeremia me tito bot Baruk ni, “Abemuko gin ma yam agero dok aputo gin ma yam apito-ni woko. Abitimo man i kom lobo kulu. Itye ka yenyo gin mogo madito piri keni? Pe iyenygi. Pien nen, abekelo can i kom dano ducu ma bedo i lobo, ento olo twal ibibwot, abimiyo kwoni bedo boti macalo mot me lweny i kabedo ducu ma icito iye. An Rwot kikoma aye doŋ aloko man.” Rwot oloko ki lanebi Jeremia lok ma okemo lurok. Man aye lok ma en owaco ma okemo Ejipt, Rwot oloko i kom mony pa Parao Neko, kabaka me Ejipt, ma yam Nebukadnejar kabaka me Babilon oloyo i lweny i Karkemic ma cok ki kulu Euprate i mwaka me aŋwen me loc pa Yekoyakim wod pa Yocia kabaka me Juda, kun wacci, “Ludito me Ejipt gidaŋŋe ni, ‘Wuruk nyonyo me geŋo korwu dok wuyubbe ki kwotwu bene, ci wucit i lweny! Wutwe kom me bedo i ne aguragura; wubed i wigi, wun wegi aguragura! Wucuŋ i tyeŋ ci wuruk otan nyonyo! Wupak Leb toŋwu obed mabit! Wuruk koti nyonyowu i komwu!’ ” Rwot openyo ni, “Aneno gin aŋo? Gitye ka lokke gidok woko cen ki lworo madwoŋ, kun cwinygi oballe woko. Twoni lwenygi ducu giketo ret i komgi, ci guriŋo woko oyotoyot; ma pe guneno ŋegi, pien lworo onoŋo oketo komgi woko!” Man Rwot ma owaco. Jo ma gidwir i ŋwec pe gitwero bwot; ki lulweny matego bene pe gitwero bwot. Yo tuŋ acam i ŋet kulu Euprate giyokke atata ci gipoto woko. “Man aŋa ma tye ka tiŋŋe malo calo pii me kulu Nail-li, macalo pii ma opoŋ woko libyeny wa i dog geŋ ma mol amola? Ejipt aye tye ka tiŋŋe macalo pii me kulu Nail, calo kulu ma piine opoŋ woko libyeny wa i dog gen, Ejipt wacci, Abitiŋŋe aumo lobo woko, abijwero gaŋi kun aneko jo ducu ma bedo iye woko.’ Cok aguragura gucak wot, ki gadigadi bene gucak lorre! Cwallulweny gucit gukat anyim: jo Etiopia ki Put ma gumako kwot, wegi atum ma ludiro i mako atum ma gua ki i Lud. “Man aye nino pa Rwot Lubaŋa me mony; tin doŋ en biculo kwor, tin doŋ en biketo can i kom lukworre. Binekogi woko ki pala lucwan nio waŋ ma otyekogi woko liweŋ, ma noŋo leb palane doŋ opune woko ki remo keken; tin en aye Rwot Lubaŋa me mony tyero lukworre macalo gitum i lobo ma tye yo tuŋ acam, i ŋet kulu Euprate. Wun jo Ejipt, wucit i Gilead, ci wuyeny yat me caŋo two! Yatwu-gu ducu nen gin ma konnye pe; gin mo ma caŋowu pe. Lurok doŋ guwinyo pi kit lewic ma wutye kwede; jo ducu doŋ guwinyo kokowu oromo i lobo woko; pien lalweny acel acel doŋ tye ka yokke ki lawote, ci gin ducu gipoto woko i ŋom.” Rwot oloko ki lanebi Jeremia i kare ma Nebukadnejar kabaka me Babilon obino ka lweny i kom Ejipt, kun wuwacci, “Tuc lok man i gaŋi me Ejipt, kun itito i Migdol, Mempic, ki Tapanec ni, ‘Wucuŋ matek, doŋ wuyubbe me lweny; gin ducu ma wutye kwede gibibalo woko i lweny!’ Piŋo Apic doŋ owekowu woko? Cal twon ma wutiyo-ni kono pe ocuŋ piŋo? Pien Rwot ojwere woko lirwat piny. Lwakwu guyokke ci gupoto, kun dano acel acel waco bot lawote ni, ‘Wot oyotoyot! Wek wadok cen bot lutuwa, wek wabwot woko ki i lak pala pa lukworwa!’ “Lwon Parao, kabaka me Ejipt, ki nyiŋ manyen ni, ‘Ŋat ma wo twatwal omiyo karene okato.’ An a Rwot me mony, an aye kabaka. An Lubaŋa makwo, Calo got Tabor ma wiye bor kato wi godi ducu, ki got Karmel ma ocuŋ mabor dognam, tek pa ŋat ma bino ka lweny komwu tye kit meno. Wuyubbe kun wutweyo yecwu woko me cito i opii, wun jo Ejipt. Pien Mempic doŋ bidoŋ noŋo, bidoŋ wi obur, ma dano mo pe bedo iye. Ejipt nen calo laroya dyaŋ maber mucwe, ento lwaŋo ma gikayo dyaŋi ma gua yo tuŋ acam gitye ka lweny i kome. Kadi askarine-gu ma gipaŋogi apaŋa ki lim calo roya mucwe kun gimoo adada gudoko goro ma tekogipe. Gin gulokke guriŋo woko kacel, pe gucuŋ, pien nino me keto can i komgi onoŋo doŋ oromo,’ en bene aye nino me togi, Ejipt tye ka riŋo woko kun kok calo twol, pien lukworre gitye ka bino ki tek, ma gibino ka lweny i kome ki latoŋgu calo jo ma tye ka toŋo yadi. Gibitoŋo yadi me buŋane-gu woko, kadi bed onoŋo buŋane pe giromo kato ki iye, pien jone gidwoŋ mada ma pe gitwero kwano welgi, askarigi pol ma welgi kato wel bonyo woko. Wun jo Ejipt, lewic bimakowu, gibimiyowu woko i ciŋ jo ma gua ki i lobo ma tye yo tuŋ acam.” Man Rwot ma owaco. Rwot me mony, Lubaŋa pa Icrael, owacci, “Abeketo can i kom Amon, ma en lubaŋa me Tebec, kacel ki Ejipt ki lwak lubaŋane ki lukerre ducu. Abeketo can i kom Parao kacel ki jo ducu ma gigeno eno. Abimiyogi i cin jo ma mito nekogi, abimiyogi i ciŋ Nebukadnejar kabaka me Babilon ki luditone, Ento lacen dano dok gibibedo i Ejipt aye, kit macalo yam gubedo i kare ma okato con. An a Rwot me mony doŋ aloko.” “Pe wulwor, wun likwayo pa laticca Yackobo; wun jo Icrael, cwinywu pe myero oballe woko. Abilarowu ki i lobo ca ma tye ka mabor-ri, abilaro likwayowu bene ki i lobo ma yam giterogi iye i opii. Likwayo pa Yakobo gibidwogo cen ci gibedo mot ki kuc; ŋat mo pe bimiyo gibedo ki lworo. Pe wulwor, wun likwayo pa laticca Yakobo, man Rwot ma owaco, pien atye kwedwu. Abijwero jo me rok ducu atyekogi woko, ki ka ma yam aryemowu wuket iye, ento wun pe abityekowu woko liweŋ, Pe abiwekowu ma pe aketo can i komwu; abipwodowu maberber pe ki kiniga twatwal. Man Rwot ma owaco.” Ma pud peya Parao olwenyo i kom Gaja, Rwot oloko ki lanebi Jeremia lok ma okemo jo Piliciti. Rwot owaco kuman ni, “Nen, pii otiŋŋe yo tuŋ acam, bimol calo kulu ma opoŋ woko libyeny ma piine mol calo lalele. Bimwonyo lobo woko calo pii aluka ki gin ducu ma tye iye, gaŋ kacel ki jo ma bedo i igi. Dano gibidanne matek, ki jo ducu ma gibedo i lobo gibikok. Gibiwinyo ojwe tyen aguragura, ki mor pa gadigadi lweny, ki koko pa lawala me gadigadi, Wego pe doŋ gibilokke me neno litinogi; ciŋgi bene noŋo doŋ okwe woko. Pien kare doŋ oo me tyeko jo Piliciti woko, me juko ki i Turo ki Cidon kit kony ducu ma onoŋo pud odoŋ. An Rwot kikoma aye ma abityeko Lupiliciti, jo ducu ma gua gubino ki i dog nam me Kaptor. Cwercwiny madit doŋ obino bot io Gaja, ki jo Acikelon guto gutum woko. Wun jo Anak mudoŋ wubikumo pi kare ma rom mene? Wun wudaŋŋe ni, ‘Pala lucwan pa Rwot!’ Ibibedo ka jwerogi woko pi kare ma rom mene? Rwakke kekeni i akurani, wek iywe, ibed mot!’ Biywe niŋniŋ, ma kun an Rwot doŋ atyeko miyo tic woko bo te me atiya-ni? Atyeko cikone pi lweny i kom Acikelon ki i kom jo ma gibedo i lobo ma tye i dog nam.” Man aye lok ma Rwot me mony, Lubaŋa pa Icrael, owaco i kom Moab ni, “Can i wi jo Nebo, pien gaŋgi doŋ gijwero woko odoŋ nono! Kiriataim doŋ gimako woko, cel gogone matego-gu ducu doŋ gimukogi woko piny, ki jone giketo lewic i wigi matek; deyo pa Moab doŋ orwenyo woko matwal. Lumerok tye ka piro lok me timo gin marac i kom Moab i Kecbon, ni, ‘Wek watyeku rok me Moab woko.’ In gaŋ Madmen bene ibilin woko liwic; dul mony biwoto kun cito ka lweny i komi. “Jo Koronaim tye ka daŋŋe ni, ‘Tim bwami! To-piny doŋ obino woko!’ Doŋ gijwero Moab woko; koko tye ka winnye ka mabor wa i Joar. Guito cere me Lukit, gicito malo kun gikok ki pig waŋgi; ki i yo ma ci to piny Koronaim gukok pi neno kit macalo lobo doŋ gibalo kwede woko. Giwacci, ‘Wuriŋ oyot! Wuriŋ, wular kwowu! Wurin calo kana me tim!’ Wun jo Moab, yam wugeno cel gogowu ki lonyowu, ento kombeddi doŋ gibiterowu woko; ki Kemoc ma lubaŋawu-ni gibitero kacel kwedwu i opii, kacel ki ajwagine ki rwodine ducu, Lamuk gaŋ bibino i kom gaŋi ducu, pe tye gaŋ mo ma bibwot; nota kacel ki bar gibibalowoko, kit macalo Rwot doŋ otyeko lokone. Wuket gweŋ me lyel pi Moab, pien doŋ gibijwero woko. Gaŋine ducu gibiweko doŋ obur, dano mo pe ma bibedo kunnu doki.” Gicen dano ma pe tiyo tic pa Rwot ki cwinye ducu! Gicen ŋat ma pe neko dano ki pala lucwanne! Rwot owacci, “Moab yam obedo mot maber, dok bene yam pe gitero jone i opii. Moab obedo calo koŋo ŋino ma giweko ni ocek mot, ma pe giyelo, dok pe gionyo woko ki i opoko ma tye iye-ni i i opoko mukene. Mitte bene pe oballe, bille mere mamit kit macalo yam tye kwede con, “Pi meno, nen, kare tye ka bino, abicwalo dano gionyo Moab woko calo gionyo kono yino. Gibionyo koŋo vinone woko piny, ci gineko opokone giŋido woko matitino. Man bimiyo lewic mako jo Moab pi Kemoc ma lubaŋagi, kit macalo lewic yam omako jo Icrael pi Betel, ma en lubaŋa ma onoŋo yam gigeno twatwal-li. “Wun jo Moab, piŋo wunwette ka waco ni wun cogi oteka lweny, wun askari ma cwinywu tek dok wuloyo lweny? Gibijwero Moab woko liweŋ ki gaŋine; awobene mabeco ma giyerogi ayera gibinekogi gityekogi woko. An kabaka, Rwot me mony, aye ma awaco man. Can ma biuo i kom Moab doŋ tye cok, to pinnye doŋ tye ka bino oyotoyot. Wukum pi rok meno, wun jo ma wubedo cok ka ŋete, wun ducu ma wuŋeyo ywekane. Wuwacci, ‘Doŋ gituro twero matek me locce woko do! deyone ki tekke doŋ pe matwal.’ “Wun jo ma wubedo i Dibon, wulor woko ki i kabedowu me deyo wubin woko piny, ci wubed i ŋom i apwa! Pien lamuk Moab doŋ obino i komwu, omuko cel gogone matego-gu ducu woko oweko odoŋ obur. Wun jo ma wubedo i Aroer, wucuŋ i ŋet yo koŋ wukur; wupeny co ki mon ma gitye ka lwi gicito woko wek gutit botwu gin mutimme. Ci gibidok iye botwu ni, ‘Moab doŋ otyeko poto; wukok pire, doŋ gityeko keto lewic woko i wiye. Tit lok man i ŋet kulu Amon ni Moab doŋ gijwero woko, iye odoŋ noŋo!’ “Ŋolo kop doŋ obino i kom lobo ma obedo barbar; obino i kom Kolon, Jakaja, Mepat, Dibon, Nebo, Betdiblataim, Kiriataim, Betgamul, Betmeon, Keriot, Bojra ki gaŋi ducu me lobo Moab ma tye ka mabor ki ma tye ka macok. Moab doŋ gininyo adada, tekone bene gityeko woko. Man Rwot ma owaco. “Wumi Moab omat mat omer, pien doŋ ojemo woko i koma, an Rwot. Moab bibedo ka nenne i nokke kekene, ci dano gibinyere kun gicaye. In Moab korr’ ipo kit macalo ibedo ka ŋalo kwede jo Icrael. Itimogi marac calo onoŋo imakogi kacel ki lukwo. “Wun jo ma wubedo i Moab myero wuwek gaŋi woko! Wucit wubed i kin got ma obar. Wubed calo akuri ma gero ode i kor got ma oculle. Moab wakke twatwal! Doŋ watyeko winyo kit wakke, nyatte, ki bwola ma dano gitye kwede i cwinygi kun gitamo pigi kengi. An Rwot, aŋeyo ŋalagi. Dok nyattegi bene obedo gin me bwolo, kadi gin ma gitiyo ducu bene obedo gin me bwolo. Pi meno, abikok pi Moab, kun akumo pi jo Moab ducu. Abikumo bene pi jo Kirkerec. Abikok pi jo Cibma makato ma akok pi jo Jajer. In gaŋ me Cibma ibedo calo yat olok ma jaŋe boco oŋolo nam oo wa loka tuŋcel, ma ocito oo wa i Jajer. Ento nyig yadiwu me oro ki nyig olokwu doŋ gibalo woko. Yom, cwiny ki yomic madwoŋ ma yam dano gitye kwede doŋ gikwanyo woko ki i lobo Moab ma onoŋo ceko cam-mi. Ajuko koŋo vino woko omiyo pe mol ki i bur ka ma ginyono nyig olok; pe tye ŋat mo ma nyono nyig olok kun daŋŋe pi yomcwiny. “Jo Kecbon ki Eleale gitye ka daŋŋe matek, dwangi winnye ka mabor wa i Jakaj; jo ma tye i Joar bene winyo dwangi, dok bene winnye ka mabor wa i Koronaim ki i Eglat-celiciya. Pii me Nimrim bene doŋ otyeko two woko liweŋ. Abijuko jo Moab pe dok gibityero gitum ki waŋo odok eceta i waŋ jogi bot lubaŋagi. An Rwot, doŋ aloko man. “Mumiyo atye ka kumo i cwinya pi Moab ki pi jo Kir-kerec calo dano ma tye ka kuto nyamulere ki wer lyel, pien lonyo ki jami ducu ma yam gulimo doŋ orwenyo woko matwal. Dano acel acel olyelo wiye dok onyaro yer tike woko pi kwero cola. Ciŋgi ducu giŋolo bedo bur, dok dano acel acel tye oruko boŋo cola i pyere. I wi odi ducu ma tye i Moab ki i dye gaŋi ducu iwinyo koko keken, pe gin mo mukene mapat. Doŋ atyeko neko Moab woko macalo agulu ma ŋat mo pe paro pire. An Rwot doŋ aloko, Kit ma gineko kwede Moab! Kit macalo gikok kwede! Kit macalo Moab oloko kwede ŋeye ki lewic! Moab doŋ odoko giriayeta, gin ma kelo lworo madwoŋ bot jo ducu ma gibedo ma gurumo en.” “An Rwot, doŋ atyeko ciko woko ni tye rok mo ma bituk oyotoyot bino Lyanne piny i kom Moab calo ocur ma onoŋo oyaro bwome woko. Gaŋi kacel ki cel gogo ducu gibimakogi woko. I nino meno cwiny lulweny me Moab bipoŋ ki lworo calo dako ma tye ka rem ki nywal. Gibijwero Moab woko doŋ pe bibedo rok matwal, pien doŋ onoŋo ojemo woko i koma. Gin ma kelo lworo madwoŋ, bur ki owic doŋ tye ka kurowu wun jo Moab. An Rwot, doŋ aloko, Gat mo ma bitemo ni eriŋ gin man ma kelo lworo madwoŋŋi bipoto i bur, ki ŋat ma bia ki i bur katti woko bimoko i owic, pien doŋ atyeko keto kare me keto can i kom jo Moab. An Rwot, doŋ aloko. Luriŋ ayela ma doŋ gigoro gitye ka yenyo ka gwok i gaŋ me Kecbon. Ento Kecbon, ma en aye gaŋ ma yam kabaka Cikon obedo ka Joe iye, doŋ tye ka waŋ ki mac. Mac doŋ otyeko waŋo ka Cuŋo pa jo Moab ki wi godi maboco ma yam lulweny me Moab gimaro-ni. Can i wiwu, wun jo Moab! Gineko jo ma yam giworo Kemoc woko, dok awobegi ki anyiragi giterogi woko i opii. Ento I kare ma tye anyim, abidwoko gum pa Moab bote kakare. Man lok pa Rwot kikome.” Kop ma giŋolo i kom Moab ogik kany. Man aye lok ma Rwot owaco ma okemo jo Ammon ni, “Jo Icrael gitye kwene? Pe gitye ki laleyo mo ma, myero ocun i kom lobogi? Piŋo guweko jo ma giworo Milkom gukwanyo dul ma i kaka pa Gad dok gubedo iye kunnu? Pi meno, nen, nino tye ka bino, en kare ma abimiyo jo me Raba winyo dwan me koko me lweny. Gaŋ pa jo Ammon gibiweko doŋ obur ki gaŋine matino ducu gibiwaŋogi woko ki mac. Lacen jo Icrael doŋ bimayo lobogi woko ki i ciŋ jo ma yam gumayo woko ki botgi ca. An Rwot, doŋ aloko. Wukoki, wun jo Kecbon! Pien Ai ma gaŋwu doŋ gijwero woko, iye odoŋ non! Wukoki, wun anyira Raba! Wuruk boŋo cola ci wubed ka kumo. Wubed ka ŋwec atata ki i wi cel-gu. Milkom ma lubaŋawu-ni gibitero i opii, kacel ki ajwagine ki rwodine bene. Piŋo wun jo ma pe wugenne-ni wutye ka nyatte pi notawu? Piŋo wugeno lonyowu kun wuwaco ni ŋat mo pe ma bitwero bi no ka lweny i komwu? Nen, abikelo gin ma miyo lworo madwoŋ makowu ki i kabedo ducu. Wun ducu gibiryemowu woko. Dano acel acel biriŋo laro kwone, ŋat mo bene bibedo pe ma bicoko luriŋ ayela dwokogi cen kacel. An Rwot me mony, doŋ aloko, “Ento lacen abidwoko gum pa jo Ammon botgi doki. An Rwot, doŋ aloko.” Man aye gin ma Rwot me mony owaco ma okemo Edom ni, “Ryeko me ŋolo kop maber doŋ orwenyo woko ki bot jo Teman? Lumi-tamgi doŋ pe twero tito botgi gin ma myero gutim? Ryekogi mono doŋ orywenyo woko liweŋ? Wun jo Dedan, wulokke wurin woko! Wucit wukanne woko ka matut! Abeneko likwayo pa Ecau woko, pien kare doŋ oo ma myero aket iye can i komgi. Ka dano gubino ka pwono olok, ci giweko mogo i wi yatte; dok bene ka lukwo gubino dyewor, giyako jami ma oromo kit ma gimito keken. Ento ajwero likwayo pa Ecau woko adada, dok ajwero kabedogi ma onoŋo gukanne iye abalo woko, man miyo doŋ pe gibikanne matwal. Jo Edom ki wadigi ki luwotgi ducu doŋ ginekogi woko, Gat mo pe odoŋ. Wuwek litino kicwu ma wegigi pe-ni bota, an abigwokogi. Mon towu ducu gibigeno an.” Rwot owaco kuman ni, “Ka ce onoŋo jo ma pe myero giket can i komgi-ni gumato kikopo me can, doŋ wutamo ni wun wubibwot ma pe koŋ noŋo giketo can i komwu? Pe gire, myero koŋ wumat kikopo me can! An doŋ atyeko kwoŋo kwoŋ woko ki nyina kekena ni gaŋ me Bojra bidoko gin marac ma dano uro, dok tim aroo ma iye odoŋ noŋo; dano gibiloko lok aŋec i kome kun gitiyo ki nyiŋe macalo gin me ceno dano. Gaŋi ma i ŋete-gu ducu bi doko wi obur matwal. An Rwot, doŋ aloko.” Jeremia owacci, “Anoŋo lok ma oa ki bot Rwot. En ooro lakwena me tito bot rok ducu ni, Wucok dul monywu ducu kacel wubin ka lweny i kom Edom! Wuyubbe doŋ pi lweny! Rwot bimiyo rokwu bedo goro, dok dano gibicayowu mada. Wakke ma wubedo kwede obwolowu mere noŋo. Ŋat mo pe ma lworowu kit macalo wutamo ni gilworowu-ni. Wubedo i kin got ma obar, malo wa i wi got mabor; ento kadi bed wuger odiwu malo calo ocur ma gero ode malo, Rwot bikelowu woko ki kunnu wa piny. Man lok pa Rwot kikome.” Rwot owacci, “Can marac kit man bipoto i kom Edom ma bimiyo jo ma gikato ki ka kenyo gibedo ki ur, dok lworo makogi marac pi gin ducu ma guneno ma doŋ otyeko timme i kom Edom-mi. Kit gin acel ma otimme i kom Codom ki Gomora-ni i kare ma gin ki gaŋi ma gitye i netgl-gu gityekogi woko bitimme bene i kom Edom. Ŋat mo ma bibedo kunnu pe, kadi bed pi kare mo manok keken. An Rwot, doŋ aloko, Nen, abibino macalo labwor ma bino i dye olet romi kun a ki i buŋa ma yatte oculle Likiŋ ma tye i dog kulu Jordan, abimiyo jo Edom giriŋo woko ki i lobogi, Doŋ lacen dano mo ma ayero ni obed latel aye biloyo rok meno. Aŋa ma gitwero poro ki an? Aŋa ma twero ette ka lwoŋa pi lweny? Kit lakwat aŋo mono ma twero cuŋ i nyima? Pi meno, doŋ wuwiny kit yub ma an Rwot, doŋ atyeko yubone i kom jo Edom, ki gin ma doŋ ayubbe me timone i kom jo ma bedo i gaŋ me Teman. Kadi bed wa litinogi gibiywayogi woko, ci bimiyo dano ducu gibedo ki ur matek i kom can meno mupoto i komgi-ni. Ka Edom opoto ci morre bimiyo lobo yeŋŋe, ki koko oduru bene biwinnye ka mabor wa i Nam Makwar. Nen, lamerok bibino lwenyo i kom Bojra calo ocur ma tuk ki malo i pol Lyanne piny ma noŋo oyaro bwome woko. I nino meno lulweny me Edom cwinygi bibedo ki lworo calo cwiny dako ma tye ka reŋi ki nywal.” Man aye lok ma Rwot oloko ma okemo Damaciko ni, “Jo ma i gaŋi me Kamat ki Arpad alee doŋ otwodogi woko, pien guwinyo lok marac. Cwinygi doŋ tye ma oŋabbe anaba ki lworo, calo nam ma twagge, ma pe twero limo yweyo mo wacel. Jo Damaciko ducu doŋ gudoko goro, doŋ gulokke me riŋo woko ki lworo madwoŋ. Gitye ki arem ki cwercwiny madwoŋ calo dako ma tye ka rem ki nywal, Gaŋ ma yam oywek ma onoŋo yomcwiny dwoŋ iyeni doŋ gibalo woko iye odoŋ noŋo. I nino meno awobe kacel ki askari ducu gibinekogi woko i dye gaŋ. An Rwot me mony, doŋ aloko. Abimoko mac i kom odi madoŋo me Damaciko, ci awaŋo gaŋ kal pa Benadad woko.” Man aye lok ma gitito i kom kaka me Kedar ki ker ducu me Kajor ma yam Nebukadnejar kabaka me Babilon olwenyo i komgi ci oloyogi woko-ni, Rwot owaco kuman ni, “A icit ka lweny i kom jo Kedar, ci inek jo me kaka ma tye wokcen-ni woko. Gibiyako kemagi, ki romigi, ki boŋo kicika me kemagi wa ki jami ducu ma tye i-kemagi. Gibiyako kinagagi kun gitito bot lwak ni, Lworo madwoŋ doŋ oromo i lobo ducu!” Rwot owacci, “Wun jo Kajor, acikowu ni myero wurin wukanne woko ka mabor. Pien Nebukadnejar kabaka me Babilon doŋ otyeko yubo yub me timo gin marac i komwu, kun wacci doŋ bene etyeko piro lok woko i komwu. “Wua wubin, wucit ka lweny i kom rok ma yam bedo ki kuc laboŋo ayelayela mo-ni! Gaŋgi pe tye ki dog gaŋ kadi wa rii me lorone bene pe, pi meno tye kene, ŋat ma gwoko pe. Man Rwot ma owaco. “Kinagagi kacel ki dyaŋigi gibiyako woko! Abikeyo jo ma nyaro yer wigi doŋ macego-ni woko i kabedo ducu, dok bene abikelo can madit ki i kabedo ducu aketo i komgi. Man Rwot ma owaco. Kajor bidoko tim aroo matwal, kabedo ka ma too keken aye bedo iye. Ŋat mo pe bibedo kunnu, dok ŋat mo pe bicito kunnu me’ bedo iye.’ ” Cutcut i acakki me loc pa Jedekia kabaka me Juda, Rwot oloko ki Jeremia lok i kom lobo Elam. Rwot me mony owaco kuman ni, “Abineko wegi atum ma gumiyo lobo Elam odoko matek-gu woko ducu liweŋ. Abimiyo yamo a ki i twok piny aŋwen-ni kodo i kom Elam kun keyo jone woko ki i kabedo ducu, nio waŋ ma lobo mo pe odoŋ ka ma gin luriŋ ayela ma kit meno pe gularo iye. Abimiyo jo Elam gibedo ki lworo i kom lukworgi ma mito nekogi wokoni. Abikelo gin marac i komgi ki kinigana madit dok abicwalo mony i komgi nio waŋ ma gityekogi woko liweŋ. Abineko luker ki rwodi pa jo Elam woko, ci abicibo komkerra woko kunnu. Man Rwot ma owaco. Ento lacen abidwoko gum pa jo Elam botgi doki. Man Rwot ma owaco.” Man aye lok ma Rwot oloko bot lanebi Jeremia i kom Babilon ma en aye lobo pa jo Kaldaya ni, “Wutuc lok man bot rok ducu dok wutit pire bene. Wutiŋ bendera malo ka maleŋ ci wutit lok man. Pe wugwok lok man obed macalo lok me muŋ, ento wuwacci, ‘Babilon doŋ opoto! Bel ma lubaŋane doŋ lewic omako woko. Merodak bene cwinye oballe woko. Cal lubaŋane-gu ducu doŋ lewic omakogi woko, ki cal jogine doŋ gininyo woko!’ Rok ma oa ki i lobo ma tye yo tuŋ acam obino ka lweny i kom Babilon, bibalo lobo miyo doko tim aroo. Dano ki lee gibiriŋo woko, doŋ ŋat mo ma bibedo kunnu bedo pe.” Rwot owacci, “Ka kare meno oo jo Icrael ki jo Juda gibibino ki koko, kun giyenya an Rwot Lubaŋagi, Gibipenyo pi yo ma cito i Cion, gibicito gikemo kunnu atir. Gibiketo gicikke ma bedo nakanaka ki Rwot ma pe gibiturone, dok wigi bene pe biwil iye. “Jona doŋ gitye macalo romi niurwenyo, ma lukwatgi aye oweko gurwenyo woko i wi godi. Gubedo ka wot ki i kom got man kun gicito i kom got mukene, ma wigi owil woko ka ma pacogi tye iye. Jo ducu ma onoŋogi gunekogi woko lukworgi doŋ wacci, ‘Onoŋo gutimo bal i kom Rwot ma en aye kabedogi me ada, ma kwarogi yam gigeno; pi meno gin ma watimo-ni pe rac wacel.’ “Wun jo Icrael wuriŋ woko ki i Babilon! Wuwek lobo pa jo Kaldaya! Wubed jo mukwoŋo me weko lobo macalo nyok dyel ma telo nyim dyegi! Nen, abetugo lwak pa rok ma gitego ma gitye yo tuŋ acam, am iyo gibino ka lweny i kom gaŋ me Babilon. Gibirye woko i tyeŋ pi lweny i kom gaŋ me Babilon ci gimako woko. Ci gicelo atero macalo lulweny ma gikwiri ma pe gicelo aterogi piny noŋo. Gibiyako lobo pa jo Kaldaya; jo ma biyako bene gibiyako gin ducu ma igi mito, man Rwot ma owaco.” “Wun jo Babilon doŋ wuyako rokka woko. Kadi bed cwinywu yom, kun wuwakke macalo laroya dyaŋ ma nyono bel, nyo macalo twon aguragura ma kok, gaŋwu doŋ bipoŋ ki lewic dok ki cac madit. Lobo Babilon ma en aye minwu doŋ bilokke doko rok mo matidi adada i kin rok ducu; bidoko lo bo mutwo dok tim aroo ma pii pe iye. Pi kinigana, ŋat mo pe ma bibedo i Babilon; lobo man ducu bidoko obur ma iye odoŋ noŋo. Jo ducu ma gibikato ki i ŋet Babilon gibibedo ki ur madit kun gijwat pi gin man ma otimmeni. “Wun wegi atum, wucuŋ i tyeŋ pi lweny i kom Babilon, wurum woko. Wucel aterowu ducu i kom Babilon, pien doŋ otyeko timo bal woko i koma, an Rwot. Wudaŋŋe ki woo me lweny kun wurumo kwede gaŋ woko. Babilon kombeddi doŋ omine woko kene. Celle ducu doŋ gimuko gireto woko piny. Man an Rwot aye atye ka culo kwor i kom jo Babilon, Pi meno wucul kwor i komgi, wutimgi kit macalo yam gin gutimo kwede jo mukene-ni, Pe myero wuwek lucoc guco kodi i Babilon, ki jo ma gimako pala me kayo kac bene obed pe. Larok mo keken ma bedo kunnu bibedo ki lworo i kom mony ma tye ka lweny ci bimiyo dok cen i lobone kikome. “Jo Icrael gubedo calo romi ma labwor odwaro ci oryemogi oketogi woko ata. Mukwoŋo kabaka me Aciria yam olwenyo i komgi, ka dok Nebukadnejar kabaka me Babilon omwodo cogogi woko. Pi meno, an Rwot me mony, Lubaŋa pa Icrael, abiketo can i kom kabaka Nebukadnejar ki lobone, kit macalo yam aketo kwede can i kom kabaka me Aciria-ni. Abidwoko jo Icrael woko cen i lobogi. Gibibedo ka camo cam ma cek i wi got Karmel ki i dul lobo me Bacan, dok bene gibicamo gin ducu ma igi mito ma ocek i wi cere i lobo Epraim ki Gilead. Ka kare meno oromo, ci pe gibinoŋo bal mo i Icrael, kadi ki tim maraco bene pe gibinoŋo i Juda, pien pe abitimo kica bot jo ma aweko gibedo kunnu. Man Rwot ma owaco. “Wucit wulweny i kom jo Merataim, ki Pekod. Wunekgi wutyekgi woko liweŋ. Dok wuti gin ducu ma acikowu. Man Rwot ma owaco. Woo me lweny doŋ tye ka winnye i lobo ki to-piny madit adada doŋ obino woko. Babilon doŋ ogoyo lobo woko piny ki nyol, ento koni nyol meno doŋ onidde woko matitino. Rok ducu gitye ki ur madit pi gin ma doŋ otimme i kom Babilon-ni. Babilon, doŋ ityeko moko woko i owic ma aciko piri, kun pe onoŋo iŋeyo. Ginoni doŋ imoko woko pien onoŋo ilwenyo i koma. Doŋ ayabo kabedo ka ma akano iye jami lwennya, akwanyogi akelogi woko ki kiniga, pien an Rwot Lubaŋa me mony, atye ki tic ma myero ati i lobo Babilon. Wubin wacak lweny i kome i kabedo ducu; wuyab dero belle woko-gu ducu. Wucan jami ma giyako-ni wek odurre lipim calo kal ma giduro. Wujwer gaŋ woko rwatrwat! Pe wuwek gin mo odoŋ iye kadi ki acel. Wunek twonigi woko ducu! Wunekgi woko liweŋ. Can i wi jo Babilon, pien karegi doŋ oromo Kare doŋ oo me keto can i komgi!” Luriŋ ayela ma gin jo ma gubwot ki i Babilon gubino i Cion, dok gutito kit macalo Rwot Lubaŋawa oculo kwede kwor pi gin ma yam jo Babilon otimo i kom ot mere. “Wulwon wegi atum me lweny i kom Babilon. Wucwal jo ducu ma giŋeyo telo atum ki celo atero guciti. Wurum gaŋ woko, pe wuwek ŋat mo obwoti. Wucul kwor i kome pi gin ducu ma yam en otimo, dok bene wutim en kit macalo yam en otimo kwede jo mukene-ni, pien en yam oette i koma ki wakke madit, an Rwot ŋat Maleŋ pa Icrael. Pi meno awobegi gibinekogi woko i dye gaŋ, ki askarine bene gibinekogi gityekogi woko i nino meno. Man Rwot ma owaco. “Nen, atye ki lok i komwu wun jo ma luwakke, man Rwot me mony ma owaco; pien ninowu doŋ oo, en aye kare ma abiketo iye can i komwu. Rokwu ma lawakke-ni biyokke ci poto woko, doŋ ŋat mo ma bikonyowu ilowu malo pe tye. Abicwinyo gaŋiwu woko ducu ki mac, dok gin ducu ma orumo gaŋi gibibalo woko liweŋ.” Rwot me mony owaco kuman ni, “Gitye ka uno jo Icrael ki jo Juda matek mada. Jo ma doŋ gumakogi macalo opii gitye ka gwokogi adada, ma pe giye ni guciti wacel. Ento ŋat ma kokogi-ni tek, nyiŋe Rwot me mony. En kikome aye ma doŋ bipido lokgi, dok bikelo kuc i lobo, ento bikelo can i kom jo Babilon.” Rwot owacci, “Ginek jo Babilon! Ginek jo Kaldaya woko! Ginek rwodine ki luryekone ducu woko. Ginek lutyet ma lugoba, ma gin coggi lumiŋ mogo ma pe twerre-ni. Ginek lulwennye, myero ginekgi gityekgi woko. Wunek aguragurane dok wubal gadigadi lwennye wutyek woko! Wunek jo me dul mony pa lurok ma giwilogi ki lim me bino ka lweny; doŋ gibidoko goro calo mon. Wubal lonyone-gu woko ducu, wuyak jamigi woko liweŋ. Can pii myero opot i lobone, wek piine otwo woko liweŋ! Babilon aye lobo ma opoŋ ki cal jogi maraco, ci oloko dano gudoko lupoya, “Pi meno lee me tim gibibedo kacel ki lanudi ki udu i Babilon, dano doŋ pe bibedo kunnu matwal, dok bene dano pe doŋ bibedo iye pi kare pa yalwak ducu. Kit gin acel-lu bitimme i kom Babilon, ma yam otimme i kom Codom ki Gomora-ni, ki i kom gaŋi pa luwotgi ma otumo ka ŋetgi ma Lubaŋa otyekogi. Dano mo pe bibedo kunnu, dok ŋat mo bene pe bibedo iye macalo welo. Man Rwot ma owaco. “Nen, lwak me rok mo-ni tye ka bino kun gia ki i lobo ma tye yo tuŋ acam; rok matek ki luker mapol ma tye ka mabor mada tye ka yubbe pi lweny. Doŋ gumako atumgi ki tonigi woko likiŋ; giger adada, pe gitye ki kica mo wacel; woogi winnye calo nam ma tye ka mor. Guriŋo ki aguragura, ma gurye woko calo jo ma doŋ kuro lweny akura, i komwu, wun jo Babilon! Kabaka me Babilon bene doŋ otyeko winyo lok i komgi, cine bene doŋ okwe woko ma pe doŋ timo gin mo; remcwiny madwoŋ doŋ oketo kome woko, calo arem pa dako ma tye ka rem ki nywal. “Nen, abibino macalo labwor i olet romi kun aa ki i buŋa me Jordan ma yatte oculle likiŋ, ci abimiyo jo Babilon giriŋo woko ki i lobogi. Doŋ lacen dano mo ma ayero ni obed latel aye biloyo rok meno. Aŋa ma gitwero poro ki an? Aŋa ma twero ette ka lwona pi lweny? Kit lakwat aŋo mono ma twero cuŋ i nyima? Pi meno, doŋ wuwiny kit yub ma an Rwot, doŋ atyeko yubone i kom jo Babilon, ki gin ma doŋ ayubbe me timone i kom lobo pa jo Kaldaya. Kadi bed wa litinogi gibiywayogi woko, ci abimiyo dano ducu gibedo ki ur matek i kom can meno mupoto i komgi. Ka Babilon opoto, ci morre bimiyo lobo yeŋŋe, ki koko oduru ma gigoyo pire bene biwinnye wa i kin rok mukene ducu.” Rwot owaco kuman ni, “Abekelo gin ma neko piny i kom Babilon ki i kom jo Kaldaya. Abicwalo lurok ka pyeto Babilon calo cuŋ kai ma gipyeto ma yamo kolo tero woko. Ka nino me can man obino ci gilwenyo i kom dano i kabedo ducu, gibiweko lobo doŋ noŋo. Pe wumi kare ki jo Babilon me celo aterogi nyo me ruko koti nyonyogi me lweny. Pe wubwot awobegi gubed makwo. Wutyek dul monygi woko licwic. Gibiketo ret i komgi ci gito woko i lobo pa jo Kaldaya ki i dye yo me gaŋigi, An Rwot Lubaŋa me mony, pe abwoto jo Icrael ki jo Juda, kadi bed onoŋo gutimo bal i koma, an ŋat Maleŋ me Icrael. Wuriŋ woko ki i Babilon! Wuriŋ wular kwowu! Pe myero ginekwu woko pi bal me Babilon. Pien man en aye kare me culo kworra ki me keto can i kom Babilon ma oporo gin ma en otimo. Babilon onoŋo obedo macalo kikopo jabu i ciŋa, ma omiyo lobo ducu omer. Rok ducu gumato koŋo vinone, ci gudoko lupoya woko. Babilon doŋ opoto woko oyotoyot, kun gijwero woko licwic. Wukok pire! Wukel yat wuket i waŋ rette, gwok nyo bimiyo can. Lurok ma onoŋo gibedo kunnu guwacci, ‘Watemo konyo Babilon ki yat wek ocan, ento onoŋo doŋ pe twero larre. Wubwote, wek wacitu wadoku cen paco, Lubaŋa doŋ otyeko keto can i kom Babilon ki tekke ducu, ci ojwero obalo woko adada.’’’ Rwot owacci, “Jona gidaŋŋe ni, ‘Rwot doŋ onyuto ni lokwa tye atir. Wubin wacitu watitu bot jo ma bedo i Cion gin ma Rwot Lubaŋawa doŋ otyeko timone-ni.’ ” Rwot doŋ otugo cwiny luker pa jo Medi woko, pien doŋ oyubbe me tyeko Babilon woko. Man aye kit macalo en biculo kwede kwor pi ot mere ma gimuko gireto woko piny-nyi. Ludito wi mony doŋ giwaco bot askari ni, “Wupak leb aterowu! Wumak kwotwu i ciŋwu! Wutwe bendera ocuŋ ma nyuto lweny i kom cel me Babilon. Wucuk cwiny lukur-piny pe gubed lwor! Wupok lukur-piny woko i kabedo mapatpat. Wumi jo mukanne woko guki piny!” Rwot doŋ otyeko timo gin ma yam en oyubbe ni ebitimo, gin ma yam en oloko ni ebitimo i kom jo ma gibedo i Babilon. Babilon tye ki kulu madwoŋ ki lonyo mabup, ento karene doŋ otum, ki tol uci me kwone doŋ giŋolo woko. Rwot me mony doŋ okwoŋne ki nyiŋe kekene ni ebikelo lwak dano mapol calo bonyo ka lweny i kom Babilon, ka doŋ gibidaŋŋe ki dwan me woo me loyo lweny. Rwot oketolobo ki twerone; dok ocibo lobo ocuŋ matek pi ryekone, ki pi niaa matut ma en tye kwede omiyo oyaro polo woko. I kare ma dwane mor, ci pii twagge matek ki i polo, dok miyo lupu duny kun a ki agikki lobo. En miyo lutkot wil ka kot cwer, dok miyo yamo kodo kun a ki i ot kano jamine. Dano ducu bedo lumiŋ dok bene ma wigi odiŋ; lewic mako latet jabu pi cal jokke ma en otiyo, pien cal jogine-gu ducu pe lubaŋa me ada, dok bene pe gitye ki kit kwo mo i igi. Konygi pe, gitiyogi mere me acaya keken; i kare ma Rwot bibino ka keto can i komgi gibito gitum woko. Lubaŋa pa Yakobo pe obedo calo cal jogi magi; pien en aye ŋat ma oketo jami ducu, dok bene en oyero jo Icrael wek gubed jone kikome. Nyine Rwot me mony. Rwot owacci, “Babilon, in ibedo nyonona, ki jami lwennya. Atiyo kwedi me ŋinyo rok ducu woko atiyo kwedi me tyero ker woko ducu, atiyo kwedi nie neko aguragura ki jo ma riŋo kwede kun anyotogi woko, atiyo kwedi me turo gadigadi lweny kacel ki jo ma ŋweco kwedgi atyeko woko, atiyo kwedi me neko co wa ki mon, atiyo kwedi me neko co muti wa ki awobe-gu,’ atiyo kwedi me ooko awobe wa ki anyia, atiyo kwedi me nyoto lukwat ki romigi woko ninyininyi, atiyo kwedi me neko lupur wa ki twoni ma gipuro kwede, atiyo kwedi me neko luloc wa ki ludito wi mony-gu ducu. “Wubineno gin me culo kwor ma abitimo i kom Babilon ki i kom jo aldaya ducu pi gin marac ma gutimo i kom Cion. In Babilon, ibedo calo got ma otyeko lobo woko, ento an Rwot aye lakworri. Abimaki woko licwic, ci arudi woko i ŋom, ci abiweki idoŋ buru calo got ma owaŋ. Pe gibikwanyo gweŋ mo ki i komi wacel ma gibitic kwede pi gedo doki,’ me twok ot kadi ki me te guti me ot. Ibidoko doŋ macalo tim aroo matwal, Man Rwot ma owaco. “Wugur bendera ocuŋ i ŋom pi lweny! Wukut tum wek rok ducu guwiny! Doŋ wulwoŋ rok woko ducu pi lweny i kom Babilon! Wuwac ki ker magi, Ararat, Mini, ki Acikenaj, gubin gulweny i kome. Wuket ladit ma loyo wi mony ducu me lweny i kome. Wukel aguragura-gu mapol calo lwak bonyo ma corre, Wuyub rok ducu, luker pa jo Medi, luloc me lobo ki ludito ma konyogi, ki lobo ducu ma tye i te locgi me lweny i kom Babilon. Lobo tye ka yeŋŋe dok jo ma iye tye ka kayo lakgi ki arem madwoŋ, pien Rwot doŋ tye ka cobo gin ma en oyubo, En biloko Babilon doko tim aroo, ka ma dano mo pe bedo iye. Lulweny me Babilon doŋ gugiko lweny woko, ci gubedo woko i cel gogogi. Tekcwinygi doŋ otum woko, doŋ gudoko calo mon. Dog gaŋ ducu doŋ gituro woko; dok odi-gu ducu doŋ gicwinyo woko ki mac tye ka waŋ. Luor giriŋo teretere me rwatte ki luwotgi, kun gicito ka tito bot kabaka me Babilon ni gaŋ doŋ gituro woko ki i kabedo ducu. Lukwor gumako mel ki yeya me ŋolo kulu woko dok gucwinyo lum-gu ki mac. Askari me Babilon ducu doŋ gubaŋŋe woko, Lukworgi cok jwerogi woko piny ci ginyonogi woko ki tyengi calo bel ma tye i laro moyo.” Man Rwot me mony, Lubaŋa pa Icrael, aye ma owaco. Nebukadnejar kabaka me Babilon ocama otyeka woko; oŋinya woko kicikici. Oweko gaŋ odoŋ ma iye noŋo calo i agulu; ci omwonya woko calo min kulu, Okwanyo gin ma iye mito, ci obolo gin mukene mudoŋŋe-gu woko. Wek jo Cion guwacci, “Alii myero obed i wi Babilon gire, pi tim bwami ma gitimo i komwa!” Wek jo Jerucalem guwacci, “Aliimyero obedi wi jo Kaldaya gire pi danowa ma ginekogi!” Pi meno Rwot owaco bot jo Jerucalem kuman ni, “Abipido lokwu, dok abiculo kwor piwu bene. Abimiyo pii me nam me Babilon two woko, ki waŋ itte-gu ducu amiyo two woko. Babilon doŋ bidoko odur ma obakke lipim i wi obur ka ma too me tim gibedo iye. Bibedo kabedo marac ma miyo lworo, ŋat mo pe ma bibedo kunnu wacel, doŋ jo ducu ma gibinene gibijwat mada i kom kabedo man ma odoŋ nono laboŋo ŋat mo ma bedo iye-ni. Jo Babilon ducu gibikok calo labwor, dok gibiŋur calo litino labwor. Ka gin jo ma luworo, ci abitedo karama pigi, Abimiyo gimato mat gimer woko ci cwinygi bedo mayom. Gibinino woko, ento pe doŋ gibico wacel. Abiterogi woko macalo litino romi, macalo nyogi dyegi nyo nyogi romi. Man Rwot ma owaco. “Babilon ma en aye gaŋ ma wi lobo kulu pako-ni, doŋ gimako woko! Babilon doŋ odoko gin ma kelo lworo marac bot rok ducu! Nam doŋ ocorre woko limuk i kom Babilon, ci biamwonyine ma mor oume woko lipuk. Gaŋine ducu doŋ odoko gin ma giuro ma kelo lworo marac, dok tye macalo tim aroo ma pii pe iye, ka ma dano mo pe bedo iye dok pe giwoto iye. Abiketo can i kom Bel, ma en lubaŋa me Babilon, dok abikwanyo jami ma yam en omwonyo-gu woko ducu ki i doge. Rok ducu pe gibicito ka wore kit ma yam con. “Cel me Babilon doŋ opoto woko. Wun jo Icrael wurin woko ki kunnu! Dano acel acel tye ka riŋo woko laro kwone ki i kom kiniga mager pa Rwot. Pe myero cwinywu oballe woko, dok pe wubed ki lworo pi lok magi ma wuwinyo-ni. Mwaka ki mwaka lok mapat winnye ket i kabedo ducu, lok me tim bwami i lobo, ki dok lok i kom kabaka mo ma tye ka lweny ki kabaka lawote mukene. Pi meno, kare tye ka bino, en kare ma abitic kwede i kom cal jogi me Babilon. Lobo Babilon kulu bipoŋ ki lewic madwoŋ, ki jone ducu gibinekogi woko. Gin ducu ma tye i wi lobo ki i polo gibibedo ki yomcwiny kun giwero wer, ka ce Babilon opoto i ciŋ jo ma gubino ki i lobo ma tye yo tuŋ acam ka tyekone woko. Man Rwot ma owaco. Babilon aye ma okelo to i kom dano ducu ma bedo i wi lobo; kombeddi doŋ Babilon bipoto, pien omiyo jo Icrael mapol ata guto. “Wun jona ma wutye i Babilon doŋ wubwot ki i lak to! Kombeddi doŋ wuciti, pe dok wukur gin mo! Kadi bed wutye ka mabor ki paco myero wutam pira, an a Rwotwu, wiwu bene myero opo pi Jerucalem. Wuwacci, ‘Lewic omakowa pien wawinyo lok me cac ma gicayowa kwede; wadoko doŋ jo ma goro atika, pien lurok doŋ gubino i kabedo maleŋ ma i ot pa Rwot.’ Pi meno awacci, kare tye ka bino, en kare ma abitic kwede i kom jogi me Babilon, jo ma giketo ret i komgi gibibedo ka ŋur i kabedo mapol i lobone ducu. Kadi bed Babilon it malo wa i pol, kadi bed oger gaŋ me cel gogone kunnu, pud abicwalo dano aye me cito ka tyeke woko. An Rwot doŋ aloko. Can ma pud tye ka medde i kom Babilon “Wuwiny dwan me koko ma tye i Babilon, wuwiny ka dano gidaŋŋe pi can ma doŋ opoto i lobo pa jo Kaldaya. Doŋ abejwero Babilon woko, amiyo tekke bene tum ci liŋ mot. Mony tye ka rune bino oyotoyot calo pii biamwonyi ma mor, gibino ka lweny i kome ki woo matek. Doŋ gubino woko ka keto can i kom Babilon, gimako lulwennye woko, ki atumgi bene gituro giŋido woko matitino. An Rwot Lubaŋa ma aketo can i kom dano pi bal, abiculo kwor aketo can i kom Babilon pi bal ma jone gutimo. Abimiyo rwodine gimer woko, jo maryek, luloc me lobo, ki ludito wi mony ducu, ki lulweny. Gibinino woko, ginino ento pe dok gibico wacel. An Kabaka doŋ aloko, an Rwot me mony. Cel me Babilon malac-ci gibimuko gireto woko i nom, ki dog gaŋŋe mamalo-gu gibiwaŋo woko ki mac. Tic ma lurok gutiyo-gu ducu obedo me noŋo; gin ma rok ducu guyelle iye ka tiyo ticce matek doŋ mac owaŋo woko.” Man lok pa Rwot me mony kikome. Gicwalo lok pa Jeremia i Babilon Ceraya wod pa Neria ma wod pa Maceya, yam obedo ŋat ma gwoko kabaka Jedekia. I mwaka me aŋwen me loc pa Jedekia kabaka me Juda, Ceraya onoŋo cito i Babilon, ci Jeremia otitte kit lok mogo ma myero en owot kwede. Jeremia ocoyo i buk lok kom can ma bipoto i kom Babilon, ki lok mukene-gu ducu ma gicoyo ma okemo Babilon. Owaco bot Ceraya ni, “Ka io i Babilon nen ni ikwano lok magi ducu kit macalo gicoyo-ni bot lwak. Ci myero ileg ni, ‘Ai Rwot, yam onoŋo iwaco ni ibijwero kabedo man woko, wek pe gin makwo obed iye, dano nyo kadi lee, ci koŋ bibedo macalo tim aroo matwal.’ Ka doŋ ityeko kwano buk man bot lwak, ci itwe gweŋ i kome, ka doŋ ibol kwede woko i dye kulu Euprate, kun iwacci, ‘Man aye kit macalo Babilon bimwony kwede woko, ma pe doŋ bikatti woko matwal, pi can ma abekelo ma abiketo i kome.’ ” Jedekia ocamo ker ma mwaka me ditte pyeraryo wiye acel, ci obedo ka loc i Jerucalem pi mwaka apar wiye acel. Nyiŋ minne Kamutal, nya pa Jeremia me Libna. En obedo ka tiyo gin ma nen marac i waŋ Rwot, kun lubo gin ducu ma yam Yekoyakim otiyo. Pi kiniga ma omako Rwot, ka kare oromo, omiyo Rwot obayo Jerucalem ki Juda woko ki i nyime. Jedekia ocako jemo woko i kom kabaka me Babilon. I mwaka me aboŋwen me locce, i dwe me apar, i nino dwe apar, en aye Nebukadnejar kabaka me Babilon obino kwede ki monnye ducu i kom Jerucalem, ci orumo gaŋ woko, ka dok gutoro cel lobo orumo woko dyere. Gaŋ girumo kit meno nio wa i mwaka me apar wiye acel me loc pa kabaka Jedekia. I kom nino dwe aboŋwen me dwe me aŋwen onoŋo kec odoko marac i Jerucalem, ma omiyo cam pe dok nen pi lwak. Ka gumuko cel me gaŋ woko, ci lwak lulweny ducu gumol guriŋo ki i dyewor, kun giwok ki i dog gaŋ ma i kin cel cel aryo me Jerucalem, ma i ŋet poto pa kabaka, kadi onoŋo jo Kaldaya gurumo gaŋ woko. Gucito gulubo yo ma dok tuŋ Araba. Ento mony pa jo Kaldaya guryemo kor kabaka, ci gumake woko i bar me Jeriko; ci monnye guket woko ducu ki i kome. Ka gumako kabaka, ci gukelo en bot kabaka me Babilon i Ribla, ka ma oŋolle iye kop. Kabaka me Babilon ocako neko awobe pa Jedekia woko ki i nyime ma waŋe neno, dok bene oneko rwodi me Juda woko ducu ki i Ribla. En okolo waŋ Jedekia oloyo woko ka omiyo gitweye ki nyor, gitere kwede wa i Babilon, ci gikete i mabuc nio wa i nino me tone. I dwe me abic, i kom nino dwe apar, ma en aye mwaka me apar wiye aboŋwenne me loc pa kabaka Nebukadnejar, ma kabaka me Babilon, en aye Nebujaradan ma ladit pa lugwok kabaka, ma latic pa kabaka me Babilon, obino i Jerucalem. Ocako waŋo ot pa Rwot woko ki ot pa kabaka, ki odi ducu ma tye i Jerucalem; owaŋo odi madito woko ducu ki mac. Ki mony pa jo Kaldaya ducu, ma yam gitye kacel ki ladit pa lugwok kabaka, gumuko kicika cel murumo Jerucalem woko, Ki lwak ma yam gudoŋ i gaŋ, ki jo ma yam gukobo gigi “kengi bot kabaka me Babilon, kacel ki lwak ma gudoŋŋe ducu, Nebujaradan ma, ladit pa lugwok kabaka oterogi woko I opu, Ento oweko jo mogo ma gin lucan adada gudoŋ i lobo wek gubed lugwok poto olok ki lupur ki kweri dyaŋ, Ki wir mola ma yam gitye i ot pa Rwot ki litino gadigadi, ki nam me mola ‘ma yam gitye i ot pa Rwot, jo Kaldaya guturo gunido woko, ka gutero mola mere wa i Babilon. Gutero lwak agulu ducu ki akwaya; latokke-gu ki magac-gu, ki becen, ki atabo me odok eceta, ki jami me mola ducu ma yam gitiyo kwedgi i ot pa Rwot ki atabo matino ki weer me waŋo mac bene, ki atabo, me liyo gityer amata. Gin ma yam otiyo ki jabu ladit pa lugwok kabaka otero macalo jabu, gin ma yam otiyo ki ryal, otero macalo ryal. Lok ma dok i kom wir aryo-ni, ki nam acel, ki litino gadigadi ducu ma yam Solomon otiyo pi ot pa Rwot, pek me mola ma oa ki i kom jami magi ducu dwoŋ, pe pimme, Bor pa wir acel acel romo futi pyeraryo wiye abiro, gipimo kor wir ki tol ci ditte oromo futi apar wiye aboro. Iye onoŋo twolo, kome ducu kinoŋ ma romo nyig ciŋ aŋwen, I wiye yam giketo iye lalukana me mola, kun lalukana borre romo futi abiro ki nucu. I kom lalukana onoŋo giketo iye obwo ki cal nyig okwer pomegranat, ma gin ducu gitiyogi ki mola ma girumo lalu: kana dyere. Wir me aryo bene rom ki lawote, kun tye ki cal nyig pomegranat. Cal pomegranat onoŋo romo pyeraboŋwen wiye abicel ki yo tun ŋeye ducu ki woko; cal pomegranat ducu doŋ romo miya acel ma orumo obwo ma gitiyo orumo woko ducu-ni, Ladit pa Lugwok kabaka, otero Ceraya bene ma ajwaka madit, ki Jepania ajwaka me aryone, ki lukur doggola me ot pa Rwot gin adek. Ka dok okwanyo ladit ma loyo lumony ki i dye gaŋ, ki lumemba abic me lukiko pa kabaka ma onoŋogi i dye gaŋ; ki karan pa ladit me mony, ma yam coko jo me lobo pi lweny; ki jo pyerabicel i kin wegi lobo ma ginonogi i dye gaŋ. Nebujaradan, ladit pa lugwok kabaka omakogi, oterogi wa i Ribla bot kabaka me Babilon. Kabaka me Babilon onekogi woko ducu ki i Ribla ma i lobo Kamat. Jo Juda ma gikwanyogi woko ki i lobogi giterogi woko i opii kit meno. Man aye wel dano ma yam Nebukadnejar omako otero woko i opii: i mwaka me abiro otero Lujudaya ma romo alip adek ki pyeraryo wiye adek. I mwaka me apar wiye aboro me locce en okwanyo dano ma romo miya aboro ki pyeradek wiye aryo ki i Jerucalem oterogi woko i opii. I mwaka me pyeraryo wiye adek me loc pa Nebukadnejar, Nebujaradan ladit pa lugwok kabaka otero Lujudaya ma romo dano miya abiro ki pyeraŋwen wiye abic i opii. Wel dano ducu ma giterogi i opii doŋ oribbe alip aŋwen ki miya abicel’ I kare me mwaka pyeradek wive abirone nia ma gitero kwede Yekoyakin kabaka me Juda i opii, i dwe me apar wiye aryo, i kom nino dwe pyeraryo wiye abic, en aye Evil-merodak, kabaka me Babilon, otimo kica ki Yekoyakin kabaka me Juda, ogonye woko ki i mabuc i mwaka ma en ocamo iye ker. Obedo ka lok kwede mot maber, oketo en obedo i kom madit makato ducu ki i kin kom pa luker ma yam gibedo kwede i Babilon. Kit meno Yekoyakin olunyo boŋo mabuc mere woko, obedo ka cam i wi meja pa kabaka jwijwi, pi kare me kwone ducu. Pi miye gin me konnye kwede, kabaka dok obedo ka miye lim me tic kwede jwijwi, nino ducu me kwone. Gaŋ man ma yam dano gubedo iye-ni doŋ odoŋ nono niŋniŋ kaa! Onoŋo obedo gaŋ madit mada i kin lurok, doŋ odoko lam calo dako ma cware oto. En yam obedc daker i kin gaŋi-gu ducu, koni doŋ odoko ŋat ma giloyo. En kok matek twatwal i dyewor, pig waŋe mol wa i leme cito piny; pe tye ŋat mo kadi ki acel i kin lureme ma romo kweyo cwinye; lureme ducu doŋ gulokke gudoko lukworre, ma timo en marac ki lok me roro. Gutero jo Juda woko i opii ka neno can madwoŋ ki ka tiyo tic matego; kombeddi doŋ gitye ka mal i kin lurok ata, ma pe ginoŋo ka mo ma myero guywe iye; jo ma guryemo korgi gumakogi woko i waŋayo i kare ma onoŋo can doŋ obwoyogi woko marac. Jo ma wok ki i yo ma cito i Cion tye ka kumo, pien ŋat mo pe ma cito ka kwero nino madito ma giciko; dog gaŋŋe ducu doŋ odoŋ noŋo, ajwagine gicur acura; anyirane cwinygi ton mada dok obalo tamgi woko, en kikome tye ki arem malit adada. Lumerokke doŋ gudoko luloc, lumonene gibedo maber ki kuc; pien Rwot oye can ni opot i kome, pi lwak bane mapol; litinone doŋ gucito woko, gudoko opii pa lumerok ma oyakogi. Deyo ki dit doŋ oa woko ki i kom Cion. Rwodine ducu doŋ gudoko calo til, ma pe ginoŋo olet mo ka ma myero gicam iye lum; guriŋo laboŋo teko mo, i nyim jo muryemo korgi. I nino me can ki keccwiny ma ebedo kwede Jerucalem tye ka po pi jami me wel-gu ducu ma yam etye kwede nia wa con. Kare ma yam jone gupoto i cin lumerokgi; onoŋo pe tye ŋat mo ma myero okonye, lumerok gitiŋo waŋgi gunene, kun giŋalo can ma opoto i kome-ni aŋala, Jerucalem otimo bal madito adada, omiyo odoko lacilo; jo ducu ma yam giwore doŋ gicaye acaya, pien guneno ni en doŋ tye munero; nen, en bene tye ka cur, kun oloko waŋe okemo ka mukene. Kenine tye omoko i dog boŋone, yam pe obedo ki tam mo ni kwone bigik ki can. Can mupoto i kome-ni rac atikatika, ŋat ma kweyo cwinye pe; “Ai Rwot, nencan mupoto i koma magwa-ni, pien lukwor gitye ka waya i wiya ki wayo me loc!” Lamerok doŋ oryeyo ciŋe i kom jamine mabeco me wel-gu, iyo, en onoŋo oneno lurok ka gidonyo i kabedone maleŋ-ŋi, gin jo ma yam gigenogi woko ni pe gudony i cokke pa Lubaŋa, Lwakke ducu tye ka cur acura kun giyenyo kwon: gicato jamigi mabeco woko liweŋ pi cam, wek komgi dok olim tek. “Nen, ai Rwot, pien doŋ gitye ka caya mada.” “Man pe gin mo ki tuŋ botwu, wun ducu ma wutye ka kato akata ki i ŋeta-ni? Wulok waŋwu wunen ka tye cwercwiny mo, ma rom ki cwercwinv ma gikelo i koma-ni ma Rwot omiyo opoto i koma, i kare ma kinigane olyetti woko marac i koma-ni. “En ocwalo mac oa ki malo, opoto i kom cogona: ociko obwo wek tyena omok iye, ci oloka woko atataro; ka doŋ oweka ma abaŋŋe woko, kun abedo ma koma lit dyeceŋ jwi. “Balla ducu gitweyogi woko i kom okol, otweyogi woko likiŋ ki ciŋe; ka doŋ orwakogi i ŋuta, omiyo tekona otum liweŋ; Rwot omiya i ciŋ jo ma pe aromo cuŋ i nyimgi. “Rwot otuko ki oteka lwennya ducu ma i kin jona; olwoŋo cokke me neno lok i koma, wek ginid awobena woko; Rwot onyono jo Juda piny kit macalo ginyono kwede koŋo vino i bur. “Akok pi lok magi ma pig waŋa mol adada; pien ŋat ma kweyo cwinya tye ka mabor, ŋat ma kono oteg cwinya; litinona doŋ gutum woko liweŋ, pien lamerok aye doŋ oloyo.” Cion oryeyo cine, ento pe tye dano mo ma kweyo cwinye; Rwot yam oywayo mony i kom Yakobo, wekjo ma girume gudoklumerokke’ Jerucalem olokke odoko gin ma cilo ma gicayo i kingi. “Rwot lokke tye atir, pien ajemo akwero winyo lokke; ento wun lwak me rok ducu wuwiny, wunen arem ma atye kwede; pien anyirana ki awo bena doŋ giterogi woko i opii. “Alwoŋo jo ma amarogi-ni, ento gubwola abwola; ajwagina ki ludoŋona ducu, guto gutum woko i gaŋ, i kare ma onoŋo giyenyo cam wek omi komgi dok olim tek. “Ai Rwot, nen, atye ki can marac, cwinya doŋ orubbe woko marac; nen, cwinya tye ka poto lilin malit, pien abedo ŋat ma lajemo; gitye ka neko dano woko i waŋayo ki pala lucwan, kadi wa ki i ot bene to poto komgi. “Koŋ iwiny ka acur, pe tye ŋat mo ma kweyo cwinya, Lukworra ducu doŋ guwinyo pi can ma opoto i koma; cwinygi yom ni itimo man i koma ber, Cwal nino ma yam doŋ itito pire-ni obin, wek gin bene gubed ki can calo an. “Wek gin marac ducu ma gutiyo oo i nyimi, ci itim gin ma itimo i koma i kingi bene, gin ma itimo i koma, pi lwak balla ducu ma yam atimo; pien atye ka cur mada, tek doŋ otum woko ki i cwinya.” Rwot oumo Cion woko ki pol, kun onoŋo tye ki kiniga; okwanyo deyo pa Icrael ki i polo obolo woko piny i lobo; pe dok wiye opo i kom laten tyene, i kare ma doŋ onoŋo kiniga omake woko. Rwot ojwero odi pa jo pa Yakobo woko ducu, laboŋo kica mo; omuko cel gogo pa jo Juda woko ducu ki kinigane okelogi wa piny i nom ki lewic, ker kacel wa ki lulocce ducu. Odwoko tek pa Icrael woko ducu piny, ki kinigane mager okwanyo ciŋe ma lacuc woko ki i komgi, ki i nyim ukworgi; obedo ka waŋ i Yakobo calo mac ma lyel ma waŋo jami ma ka ŋete woko ducu. En otelo atumme calo lamerok, ki ciŋe lacuc mujiŋo bade woko calo lakwor: oneke jo ma yam yomo cwinywa woko ducu ki i kema pa jo Cion; ocoro kirugane mage i kome calo mac. Rwot doŋ odoko macalo lakwor, otyeko Icrael woko liweŋ; otyeko odi madoŋo mapol woko ducu, omiyo cel gogo ducu doŋ gudoko obur; doŋ onyayo kumo ki koko odoko dwoŋ bot jo Juda. Oturo bolone woko piny macalo bolo mo ma i poto-ni, omiyo kabedo me kwero nino madito ma giciko odoŋ obur; Rwot doŋ omiyo kwero nino madiro ki cen me cadit ogik woko i Cion; pi akemone mager, omiyo ocayo kabaka ki ajwaka pa Lubaŋa. Rwot doŋ ocayo keno tyerre mada, okuno bene kabedone maleŋ-ŋi woko: otyeko doŋ miyo odi madoŋo woko ducu i ciŋ lukworre; koko owo i ot pa Rwot, macalo i kare me kwero nino madit. Rwot oyubbe pi muko cel me Cion woko wek kabedone doŋ obed wi obur; opimo woko ki tol, otyeko woko ma pe ojuko ciŋe; omiyo gogo ki cel ducu gukok, komgi ducu oloc woko kacel. Dog gaŋŋe ducu gumwony woko piny i ŋom, omuko liweŋ, oturo wa kikane woko bene; kabakane ki rwodine gitye i kin lurok, cik doŋ pe matwal. Lunebine bene doŋ pe gineno ginanyuta ma a ki bot Rwot. Ludoŋo pa jo Cion, gibedo piny laliŋ; guonyo apwa i wigi, doŋ guruko boŋo cola; anyira Jerucalem doŋ gukulo wigi piny. Abedo ka koko ki pig waŋa, ma cwinya doŋ orubbe woko; cwinya opoŋ woko ligwik ki can, pi lwak jo Cion ma gityekogi woko-ni, pien litino matino ki litino lukere gutum woko i dye yo ma i gaŋ. Gikok bot megigi ni, “Kwon ki kono yino kono tye kwene?” kun gitye ka wille woko calo jo ma ret omakogi, i dye yo ma i gaŋ, kun kwogi tum woko, ki i kor megigi. Atwero loko gin aŋo, piri, dok atwero pori ki ŋo, in Jerucalem? Atwero waco ni ibedo calo aŋo, wek arom kweyo cwinyi, in Cion ma amaro-ni? Pien oburri doŋ lac calo nam; aŋa ma twero dwoko cwinyi cen? Lunebini yam guneno ginanyuta me go ba ki me bwolo piri, pe gunyuto balli kamalen pi dwoko gummi ducu boti; ento gubedo ka neno lok me go ba me teri i can. Jo ma woto gikato ki i gudo gidoŋo ciŋgi piri; kun gijwat ma giyeno wigi pi Jerucalem, ni, “Man aye gaŋ ma yam gilwoŋo ni mwonya twatwal-li, ma yomo cwiny lobo ducu-ni?” Lukworri giŋali, gijwat ma gikayo lakgi; ma gidaŋŋe ni, “Doŋ watyeko neke woko! Iyo, man en aye kare ma yam wabedo ka paro pire-ni, doŋ oo, dok waneno ki waŋwa!” Rwot doŋ otiyo kit macalo en o yubo, ocobo gin ma yam en omoko, kit macalo yam oyubo wa con ca; omuko gaŋwu oreto woko laboŋo kica; omiyo lukwor gubedo ki yomcwiny madwoŋ i komwu, dok omiyo tek bot oteka lweny pa lumerokwu. Kok matek bot Rwot, in Cion! Wek pig waŋi omol ocit piny macalo pii ma i kulu, ma mol dyeceŋ ki dyewor benebene, ma pe mii kare mo me yweyo, ma pig waŋi pe cok! A malo, kok matek i dyewor, i kare ducu ma nino doŋ kur doko mit! Ony can ma tye i cwinyi woko macalo pii i nyim Rwot! “Taŋ ciŋi malo bot Rwot, kun ikok bote pi kwo pa litinoni, ma kec nekogi miyo giwille woko i yo ducu ma tye i dye gaŋ. Nen, ai Rwot, ci itam! Aŋa ma itimo calo man? Myero mon ocam litinogi, litino lukere ma gutiŋo i korgi? Imito ginek ajwagi ki lunebi i kabedoni maleŋ bo, Rwot? Litino ki ludito muti gubuto piny i apwa i dye yo-gu; anyirana ki litino awobena ginekogi woko liweŋ ki pala lucwan; inekogi i kare ma onoŋo it ye ki kiniga; inekogi woko laboŋo kica mo. Ilwoŋo lukworra guruma woko dyere ma gumiya lworo twatwal i kare me kwero nino madit ma iciko pire. Ki i kare ma Rwot onoŋo kiniga omako, pe tye dano mo ma obwot nyo ma obedo kwo; lukwor guneko litino ma yam atiŋogi dok apitogi-ni. An aye dano ma oneno can twatwal pien awinyo arem ma ogoya kwede ki akemo; Oryema woko otera i colpiny ka ma leŋo pe iye. Adada en bedo ka pwoda, pwoda dok pwoda dyeceŋ jwi. En omiyo riŋo koma ki del koma oballe woko, oturo cogona woko bene. Omonya ci ogura woko dyere, ma cwinye kec ki can ma mito keto i koma. Oketa abedo i colpiny, calo dano muto yam wa con. Ocweyo cel oruma kwede woko dyere wek pe alwi akat woko abwot pi laro kwona; otweyo okol i tyena ki nyor mapek adada. Kadi bed alwoŋ lwoŋo ma kun akok ni gikonya, en juko legana woko pe winnye. Otyeko cego yona woko ki godi ma gipayo, omiyo yona obedo mugomogom. Obedo calo ŋuu ma obuto tye ka kiyo piny, calo labwor ma okanne woko. Opeya woko ki i yona ci okila woko matitino, omiyo doŋ adoko gin ma konnye pe. Otelo atumme, okema kwede omiyo adoko ginacela ki aterone. Ocelo adunona woko ki atero ma okwanyo ki i jurone. Doŋ adoko ginanyera pa lwak me rok ducu, nyiŋa odoko lok aboka dok giwera ki wer dyeceŋ jwi. Omiya apon ki keccwiny madit mada, omiyo ayeŋ ki odir yat. Omiyo amwodo kweyo ki laka, kun anyonne woko ki buru. Gikwanyo kuc woko ki i cwinya, wiya doŋ owil woko i kit ma yomcwiny tye kwede. Omiyo awacci, “Deyona doŋ otum woko, ki gin ma ageno ki bot Rwot bene pe doŋ otimme.” Po i kom canna ki keccwinya, ki camo odir yat ki keda makec! Cwinya nino ducu tamo pire, ci ŋur woko piny ki iiya. Ento abekaoo lokke iiya, pi meno miyo dok pud abedo ki gen. Mar pa Rwot ma pe lokke bedo matwal pe gik, ki kicane bene pe gik. Giroc gidoko nyen rupiny ki rupiny; in igenne mada. Awaco ki i cwinya ni, “Rwot aye dul ma gipokka, pi meno abigeno en.” Rwot ber bot jo ma kure, ki bot dano ma yenye ki i cwinye. Bedo ber ka dano kuro lar pa Rwot mot. Bedo ber ka dano oye juk pa Rwot ma noŋo pud en tidi. Wek obed kene laliŋ ka giwacce lok me juk; wek omok apwa ki doge, gwoknyo gen pud bibedo tye: wek olok leme bot ŋat ma odoŋe, wek oyeŋ ki lewic madwoŋ. Pien Rwot gire pe bolo dano woko matwal, ento kadi bed kel cwercwiny me can, pud kica mako aye macalo mar mere ma pe lokke dwon-ni; pien pe keto can nyo cwercwiny i kom dano akaka, Ka ginyono lumabuc ma i wi lobo woko ducu piny i te tyen, ka gikwanyo twer ma dano tye kwede woko i nyim ŋat Mamalo Twal, ka gibalo te pido pa dano woko akaka, Rwot pe cwinye yom iye, Aŋa muciko lok ci otimme bene, ka pe Rwot aye ma ociko? Gin maber ki gin marac ducu pe gia ki i dog ŋat Mamalo Twal? Dano makwo kok piŋo? Dano myero okok ka can opoto i kome pi balle? Koŋ watemu neno kitwa dok waŋiyu kwowa, ci walokke wadwog bot Rwot. Myero watiŋu cwinywa ki ciŋwa, bot Lubaŋa malo i polo kun wawacci, “Waŋ doŋ wabalo dok wajemo, in bene pe iweko bal wa. “Imiyo kiniga oboyo komi woko omiyo iryemo korwa, inekowa woko laboŋo paro piwa, Imiyo pol oboyi woko wek lega mo pe otuc oo boti, Imiyo wadoko ginanyera ma gitaro, i kin lurok ducu. “Lukworwa ducu doŋ gitye ka ŋalowa aŋala; gin ma bano dano ki lworo opoto i komwa kacel ki to-piny ma obino ka tyekowa. Pig waŋa mol calo pii ma i kulu pien jona doŋ ginekogi woko matwal. “Pig waŋa bibedo ka mol ma pe cok, bimedde mere ameda, nio waŋ ma Rwot oneno piny ki i polo; waŋa miyo aneno piny ki can, ki keckom pa anyira ducu ma i gaŋŋa, “Lukworra gibedo ka dwara macalo gidwaro winyo, kun tyen lok mo mumiyo gidwara pe; gibola woko makwo i bur, dok gubolo got woko i wiya; pii omwonyo wiya woko, omiyo awacci, ‘Ato do!’ “Ai Rwot, alwoŋo nyiŋi, ki i bor piny ka matut; ci iwinyo koko na ma akok boti ni, ‘Pe idiŋ iti ka winyo kokona, kenya do!’ Yamibino cok i kare maakok boti; in iwacca ni, ‘Pe ilwor!’ “In doŋ icuŋ ka pido pira, ai Rwot ci ikoko kwona ki i to. Ai Rwot, in bene doŋ ineno gin marac ma gitimo i koma; in aye iŋol koppa. Ityeko neno culo kworgi ducu; lok ducu maraco ma gubedo ka porone i koma. “Ai Rwot, iwinyo bene lok aŋec ma giloko, ki lok ducu maraco ma gubedo ka porone i koma, Lok ki tam ma lulweny i koma gubedo kwede, gilwenyo i Koma dyeceŋ jwi. Nen kit bedogi ki kit a malogi; adoko gin ma gicako wer i kome. “Ai Rwot, in aye ma ibiculo kwor i komgi, kun lubo kit ma ticgi tye kwede. Ibimiyo cwinygi bedo tek; ibicenogi woko. Ibiryemo korgi ki kiniga ci ityekogi woko, ki i te poloni, ai Rwot.” Jabu kono dok ocido woko licuc niŋniŋ, jabu ma giliyo maber-ri doŋ kite olokke woko niŋniŋ! Godi me ot maleŋ guket woko piny atata; guromo yo woko ducu. A wobe Cion, gubedo me wei calo jabu mapek mabeco; kombeddi doŋ ginenogi macalo agulu, tic ma lacwe agulu ocweyo ki lobo! Kadi too bene miyo tuno weko litino doto cak i tunone; ento jona doŋ gudoko ger woko, calo udu ma gibedo i tim. Leb latin lakere ma romo dot omoko woko i dane pien doge otwo woko ki orwo pii; litino tye ka lego cam, ento ŋat mo ma miyo botgi pe. Jo ma yam camo cam mabeco, gibito woko liweŋ i dye gudo; jo ma ginyebogi ki ruko boŋo ma lamar lamar, gibuto i wi odur. Can ma giketo i kom jo tuwa, dit makato can ma giketo i kom Codom woko, ma yam gireto woko piny oyotoyot i waŋ ca wa mo manok keken-ni, kun dano mo pe ogudo kome ki ciŋe, Rwodine yam komgi leŋ makato pee woko, komgi tar makato cak; komgi yam kwar makato gweŋ makwar me wel, yam ginen beco calo kidi capir mulil mapwot-ti, Ento kombeddi waŋgi ocido woko licuc makato cuk bilo, dano pe gineyogi ka giwok ki i gudo; komgi ojony woko linok i kom cogogi, komgi otwo woko matek calo yen mutwo. Jo ma ginekogi ki pala lucwan komgi gum makato jo ma kec aye tye ka nekogi, jo ma gujony linok ma komgi odoŋ geŋ noŋo, pien cam mo pe mucek i poto. Mon ma lukica ma gimaro litinogi aye gutedo kom litinogi kikomgi; ci gudoko camgi me amwodagi i kare ma gituro iye jo tuwa-ni. Rwot doŋ omiyo akemone olyetti woko marac, ocoro kinigane malyet i komgi; omoko mac i Cion, ma owaŋo te gutine otyeko woko liweŋ, Luker me lobo yam pe guye, nyo kadi ŋat mo i kin jo ma bedo i wi lobo, ni lumerok nyolukwor twero donyo i dog gaŋ me Jerucalem. Man obedo pi bal pa lunebine ki pi bal pa ajwagine, ma guneko jo ma kitgi atir woko i dye gaŋ, Gubedo ka wot ata i dye gudo, ma waŋgi oto woko, gunyobo komgi woko ki remo, omiyo i dano doŋ dag gudo boŋŋigi ma odoko gin me kwer. Dano gidaŋŋe i komgi kun giwacci, “Wulenwa yo! Wun jo ma komwu ki keni!” “Wulen yo! Wulen yo! Pe wugud komwa bene!” Guriŋo woko gubwot, gubedo ka mal ata i kin lurok, ci jo ma i rok guwacci, “Pe dok gibibedo kacel kwedwa kany wacel.” Rwot kikome aye ma doŋ okeyogi woko, pe doŋ biparo pigi matwal; deyo mo ma gimiyo bot ajwagi bene obedo pe, gin mo maber ma gutimo bot ludoŋo pe. Waŋwa ocikke ka neno yo neno kun jo ma konyowa pe; wabedo ka kuro rok ma pe gitwero larowa. Lumerok doŋ gudiŋo korwa woko omiyo pe doŋ watwero woto i dye gudowa; agikkiwa onoŋo doŋ onyikocok: wel ninowa bene doŋ gikwano woko; pien agikkiwa doŋ oo. Jo ma guryemo korwa gubedo dwir ma gikato acut ma tuk cito malo, gulubo korwa wa i wi godi, gukanne gubedo ka kiyowa i dye tim. Ŋat ma Rwot doŋ owiro woko ki moo, ma pire tek botwa macalo kwowa, gimako gitere woko i opii, en ma yam waloko pire ni, wabibedo i te bwome i kin lurok. Wun jo Edom, wubed ki wakke, cwinywu bene obed yom, wun ma wubedo i lobo Uj; ento kikopo me can bene bimakowu; wubimer woko ci wulunyo bonniwu woko wudoŋ munero. Wun jo Cion, can ma giketo i komwu pi balwu doŋ gicobo kakare, Rwot doŋ pe bibworowu i opii matwal; ento wun jo Edom, en biketo can i komwu bene pi balwu, en binyuto kom balwu woko ducu ka maleŋ. Ai Rwot, koŋ ipo i kom gin ma opoto i komwa-ni; cik waŋi inen lewic ma watye kwede! Giloko gipinywa doŋ odoko pa jo mukene; ki gaŋiwa gudoko pa lurok. Waŋ doŋ walokke wadoko calo litino kic, ma wegigi pe; megiwa doŋ gudoko calo mon ma coggi oto, Myero wawil pii ma wamato-ni awila ki lim, yen bene ma wanoŋo myero wawil awila. Giryemowa woko ki tek kun watye ki okol i ŋutwa: komwa oloc woko, pe gimiyowa kare me yweyo. Wacikke ki jo Ejipt ki ciŋwa, ki bot jo Aciria, wek gumiwa cam maromowa. Kwarowa yam gubalo, ci guto woko matwal; balgi aye ma doŋ okelo can i komwa. Opii aye doŋ giloyowa; ŋat mo pe ma myero olarwa ki i ciŋgi. Wadyero komwa pi noŋo cam, ma noŋo wawok ki i Lak pala lucwan i dye tim. Del komwa doŋ odoko lyet calo keno ki lyeto me kec ma tye ka waŋowa. Gimako mon i Cion ci gibuto kwedgi tektek, ki anyira ma peya co obedo kwedgi ma gitye i gaŋ me Juda. Giguro luker woko i kom yat ki ciŋgi; woro mo ma gimiyo bot ludoŋo pe, Gidiyo litino awobe tektek me rego kai awobe gicato ki yen mapek ma guyeyo i wi gwokgi. Co muteggi pe doŋ gigurre i dog gaŋ, awobe bene pe doŋ gigoyo wer. Gin ma yam yomo cwinywa doŋ ogik; myel ma yam wamyelo-ni doŋ olokke odoko kumo. Lalukana opoto woko piny ki i wiwa’ waŋeno can, pien wabalo! Pi lok man omiyo cwinywa doŋ odoko goro, pi jami magi omiyo waŋwa bene doŋ ocido wako. Got Cion ma doŋ odoŋ obur-ri; too aye ma doŋ gitye ka wot i wiye. Ento in, ai Rwot, ibedo i loc nakanaka; komkerri bedo nakanaka i kare pa yalwak ducu. Piŋo wii wil woko i komwa, ibwotowa woko liyak pi kare ma rom man piŋo? In aye giri idwokwa boti, ai Rwot, wek wadwogi! Roc kare me bedowa odok manyen kit macalo yam tye con ca! Gwok nyo doŋ ikwerowa woko matwal ba! Kiniga doŋ omaki i komwa mukato kare? I nino dwe abic me dwe me aŋwen i mwaka pyeradek noŋo, onoŋo atye abedo kacel ki Lujudaya ma gin opii i ŋet kulu Kebar i lobo Babilon, Ci aneno polo oyabbe, cut atugi neno Lubaŋa i ginanyuta, Man otimme i nino dwe abic i mwaka me abicce cakke ma gitero kabaka Yekoyakin kwede i opii, I kare ma atye i lobo pa jo Kaldaya i ŋet kulu Kebar, an Ejekiel wod pa ajwaka Buji, awinyo ka Rwot loko kweda dok awinyo ka Rwot oketo ciŋe i koma. I kare ma aneno piny, ci aneno yamo ma kodo mager oa ki i lobo ma tye yo tuŋ acam, kacel ki pol madit ma onoŋo lutkot tye ka wil ki iye, kun mac bedo ka lyel teretere. I dye mac onoŋo tye iye gin ma ryeny macalo mola. Doŋ i dye mac man aneno gin mo ma nen calo lee makwo aŋwen. Gubedo calo dano, ento ŋat acel acel onoŋo waŋe tye aŋwen, dok bene ŋat acel acel bwome onoŋo tye aŋwen. Tyengi ocuŋ atir, ki dye tyengi onoŋo nen calo dye tyen oboŋ wod dyaŋ, ma giryeny calo mola ma gijwayo maleŋ. I te bwomgi aŋwen-ni onoŋo tye iye ciŋ aŋwen macalo ciŋ dano, Doŋ gin lee aŋwen-ni onoŋo yam waŋgi ki bwomgi tye kit man: bwomgi okubbe ogudo lawotgi, kun ŋat acel acel cito ma okemo nyime atir, giwoto ma kun pe gilokke ka mo. Kit macalo waŋgi nen kwede, lee acel acel onoŋo waŋe tye aŋwen mapatpat: ki tuŋ i nyime waŋe nen calo waŋ dano; ki yo tuŋ lacuc waŋe nen calo waŋ labwor, ki yo tuŋ lacam waŋe nen calo waŋ twon, doŋ ki yo tuŋ i ŋeye waŋe nen calo waŋ ocur. Waŋgi yam obedo kit meno. Lee acel acel bwome aryo onoŋo oyarre dok otiŋŋe malo kun ogudo wi bwom lee lawote mukene ma cok kwede, ki bwomgi aryo mukene oumo komgi woko. Lee acel acel woto kemo nyime atir; ka ma cwinygi onoŋo mito ni gucit iye, giwoto ma kun pe gilokke ka mo. I kin lee makwo-ni onoŋo yam tye iye gin ma lyel calo miri mac, ma obedo calo mac ma wirre i kin lee makwo, macce onoŋo lyel maleŋ, ki lutkot bene owil ki i mac kunnu, Lee magi bene onoŋo gitye ka wirre gidok tuŋŋi ki tuŋŋi calo mil pa lutkot. I kare ma aneno lee magi aŋwen, aneno lawala aŋwen ma gudo ŋom, lawala acel acel ocuŋ i ŋet lee acel acel bene. Lawala acel acel onoŋo ryeny calo kidi me wel, ci gin lawala aŋwen-ni ducu ginen maromrom, Kit ma gitiyogi kwede nen calo lawala acel acel girwako odonyo i i lawala mukene. Ka doŋ gucako wot, gucito ma gukemo yo aŋwen mapatpat ma kun pe gilokke ka mo, Gin Lawala magi aŋwen-ni yam doggi tye, cili bene onoŋo tye i komgi, kun waŋ mapol orumo doggi woko ducu litit, Ka inen lee makwoni giwoto gicito anyim, ci lawala magi bene giwoto kacel kwedgi, ka ce inen lee gua malo ki i ŋom, ci lawala bene gitiŋŋe kwede malo. Ka ma cwiny mito ni gucit iye, gin bene gicito iye, ci lawala bene gitiŋŋe malo gicito kacel kwedgi; pien onoŋo cwiny lee aŋwen-ni tye i i lawala ducu. Ka lee tye ka wot, nyo ka gucuŋ woko, dok ka gua malo, ci lawala aŋwen-ni bene gitimo kit meno, pien cwiny lee-gu tye i igi ma miyo gitimo kumeno. Ki malo ka wi lee magi makwo-ni onoŋo giriyo iye gin mo ma nen calo pete me polo, ma ryeny aryenya calo pee, kun opette lamalo ka wigi. I te pete meno onoŋo guyaro iye bwomgi, kun bwomgi acel acel gukemme ki luwotgi; ki lee acel acel onoŋo tye ki bwome aryo me umo kome woko. Awinyo bwomgi ka ŋuro i kare ma gitye ka tuk, bwomgi mor calo mor pa pii ma corre, macalo mor pa Won Twer Ducu, ki dok macalo woo madwoŋ pa dwan jo me mony madit; ka gucuŋ mot, ci giumo bwomgi woko. Ci dwan owinnye kun oa ki malo i ne pete ma orine malo ka wigi-ni; i kare ma onoŋo gucuŋ mot, guumo bwomgi woko. Malo i wi pete ma tye ka wigi-ni onoŋo tye iye gin mo calo komker, ma nen calo got capir ma bulu; doŋ gin ma neno calo dano obedo i wi komker meno. Gin meno mubedo calo dano-ni onoŋo tye ka ryeny calo mola ocakke ki i pyere odok kwede malo, ma nen calo mac ma omoko orumo kome woko ducu; cakke ki i tuŋ pyere dok kwede piny, onoŋo nen calo mac, mac bene onoŋo tye ka lyel orume woko dyere. Nen calo danyu ma nen i kom pol ka i nino me kot, mac ma yam obedo ka lyel ma orume dyere-ni bene obedo kit meno. Meno aye kit ma yam cal me deyo pa Rwot nen kwede. I kare ma aneno ci atugi poto woko piny aryeba ic, cutcut awinyo dwan ŋat mo ma tye ka loko Ŋat ma onoŋo tye ka lok-ki owaco bota ni, “Wod pa dano, a icuŋ, ci abilok kwedi.” I kare ma tye ka lok kweda, Cwiny pa Lubaŋa odonyo i iya ci omiyo acuŋ; pud awinyo en omedde kun loko kweda ni, “Wod pa dano, abecwali icit bot jo Icrael, ma gujemo ci gulokke ka lweny i koma-ni. Gin pud lujemo wa onyoo kit macalo yam kwarogi gujemo ci gutimo bal i koma-ni. Gin aye io ma kitgi obedo acak dok ŋutgi bene nwaŋ pe giwora. Abecwali me tito botgi gin ma an Rwot Lubaŋa abewaco botgi. Ka gibiwinyo lokki nyo gikwero winyone, (pien gin jo ma lujemo) ento gibiŋeyo ni lanebi yam obedo i kingi. Doŋ in wod pa dano, pe myero ilworgi, pe bene ilwor lok ma gin waco. Gibirumi woko macalo okuto lano ma orumi, kun ibedo i wi oton mapol; pe ilwor lokgi, cwinyi bene pe myero oballe kadi gineni ki waŋ marac, pien gin jo ma lujemo. Ibiloko lokka botgi, kadi ka giwinyo nyo gikwero winyone; pien gin jo ma lujemo, “Ento in, wod pa dano, winy gin ma an awacci; pe ibed lajemo calo jo meno ma lujemo. Ŋam dogi ci icam gin ma abemiyo boti me acama.” I kare ma aneno piny, ci aneno ciŋ mo ma giryeyo tuŋ bota; ci nen Onoŋo omako buk adola ma gicoyo iye coc. Ci oyaro buk-ki i nyima; aneno gicoyo ryoryo ducu, iye ki yo tuŋ i ŋeye bene. Aneno lok ma gicoyo iye onoŋo obedo lok me koko me can, kumo ki can. Lubaŋa owacca ni, “Wod pa dano, cam gin: ma doŋ gimiyi; cam buk adola man, ci icit ilok bot jo me ot pa Icrael.” Kit meno aŋamo doga, ci omiya buk adola ni acam. Ci owacca ni, “Wod pa dano, cam buk adola man ma amiyo boti, nio ka iyeŋ woko kwede ma ii odeŋ.” Ci acamo; anoŋo obedo lim mada i doga calo moo kic. Lubaŋa dok owacca ni, “Wod pa dano, cit io bot jo me ot pa Icrael ci it it botgi gin ducu ma atye ka wacci-ni, Pe atye ka twali ni icit i rok mo ma jone loko leb ma’ niaŋ iye tek. Ento abecwali bot jo me ot pa Icrael. Ka ce acwali bot rok ducu ma jone loko leb matek mapatpat ma in pe iniaŋ iye, ci kono guwinyo lok ma iwaco botgi. Ento jo me ot pa Icrael pe gibiwinyo lokki; dok bene pe gibiwinyo lokka. Pien gin’ ducu cwinygi nwaŋ dok wigi tek: Nen, kombeddi doŋ abimiyo cwinyi bedo nwaŋ calo cwinygi ki wii bene bedo tek calo wigi. Abimiyo wii bedo tek calo got lela matek makato got mabit woko; pe ilworgi, pe bene ilwor kit waŋ ma gineni kwede, pien gin jo ma lujemo.” Lubaŋa omedde ki lokke kun waco bota ni, “Wod pa dano, lok ducu ma abiwacci myero igam obed i cwinyi, dok iwiny bene ki iti. Ka doŋ ia icit bot jo ma gitye i opii, cit bot lutuwu kikome, ci iwac botgi ni, ‘Rwot Lubaŋa owaco kuman ni’; kadi giwinyo nyo gikwero winyone.” Cutcut Cwiny pa Lubaŋa otiŋa woko malo, ci awinyo dwan ki yo tuŋ ŋeya ma mor matek calo oyeŋyeŋ ma yeŋo piny, kun daŋŋe ni, “Gipwo deyo pa Rwot i kabedone!” Awinyo bwom lee ka tye ka gone kacel i yamo, ki koko pa lawala bene mor matek calo oyeŋyeŋ ma yeŋo piny. I kare ma Cwiny pa Lubaŋa oila malo otera woko, ci abedo ki keco i cwinya, kiniga bene omaka woko, ci acito ma doŋ onoŋo Rwot tye ka diya matek ki cine, Acito i Tel Abib, ka ma onoŋo jo ma giterogi i opii gibedo iye, i ŋet kulu Kebar. Abedo kunnu i kingi pi nino abiro kun atye ki ur madit atikatika pi gin ma onoŋo aneno otimme i koma ca. Lacen i ŋe nino abiro-nu Rwot oloko kweda. En owacci, “Wod pa dano, doŋ aketi me bedo lakur-piny pi rok me Icrael. Ibitito botgi lok ducu ma acikogi kwede ma an awacci. Ka ce awaco ni dano ma latim marac bito ada, ento kun in pe ijuko en ma icike ni olokke owek timo gin marac, wek olar kwone, en bito i balle-ni; ento alii me tone abidwoko i wii. Ento ka ce onoŋo ijuko en latim marac meno, icike ni owek yo me tim maraco, ka pe olokke oweko timo gin maraco, nyo yo me tim maracone-ni, en bito i balle-nu; ento noŋo in giri ilaro kwoni. Dok bene ka ce dano ma kite atir olokke woko oweko timo gin ma tye atir, ce otimo bal, ce an aketo ariya mo i nyime, ci en bito, pien onoŋo in pe ijuke, en bito pi balle, ki tic ma atir ma yam en otiyo pe doŋ abipo pire; ento alii me tone abidwoko i wii. Dok bene ka ce ijuko dano ma kite atir ni pe otim bal, ka en owinyo lokki pe otimo bal, ci adada en bibedo kwo, pien owinyo lok ma ijuke kwede; ci in bene ibilaro kwoni.” Rwot oketo ciŋe i koma;’ ci owacca ni, “A malo, ci icit i dye bar, an abilok kwedi ki kunnu.” Ci aa malo acito i dye bar, ci aneno deyo pa Rwot ocuŋ kunnu ma rom ki deyo ma akwoŋo nenone i ŋet kulu Kebar; ci cutcut aryebbe woko piny, Ento Cwiny pa Rwot odonyo i koma, ci ociba acuŋ ki tyena; ci oloko kweda kun wacci, “Cit paco, ci ilor wii woko i odi. Ci in wod pa dano, gibitweyi woko ki tol, man bimiyo pe itwero cito woko i kin dano. Abimiyo te lebi dwalle woko ki i dogi, wek ibed ladogeoto ma pe doŋ itwero juko dano; pien gin jo ma lujemo. Ento ka ce doki aloko kwedi, ci abiyabo dogi, ci in ibiwaco botgi ni, ‘Rwor Lubaŋa owaco kuman ni’; ŋat ma biwinyo lok man wek owiny, ki ŋat ma kwero winyo lok man wek okwer; pien gin jo malujemo. “Doŋ in, wod pa dano, kwany matafali iket i nyimi, ci igo cal gaŋ i kome, cal Jerucalem kikome. Ci irum woko dyere, dok itor cel lobo orum woko dyere; ka iket gony orum woko bene, ci iket yadi latwom cel orum woko bene. Dok ikwany caniya nyonyo ci iket obed macalo cel nyonyo i kin in ki gaŋ me Jerucalem, kun waoi kemo gaŋ. Mony doŋ orumo gao woko. In aye ma doŋ irumo gaŋ woko pi lweny i kome. Man aye lanyut pi ot pa Icrael. “Dok ibut ma lakŋeti ma lacam odok piny, ci doŋ abiketo can me bal me ot pa Icrael-li i komi. Pi nino acel acel ma ibuto kwede ibitiŋo balgi, pi nino miya adek ki pyeraboŋwen, ma rom ki wel mwaka me can megi; in bene’ ibitiŋo can me ot pa Icrael pi kare ma rom meno. Ka doŋ ityeko tiyo meno, ibibuto piny doki pi tyen me aryone, ki lakŋeti ma lacuc, ci ibitiŋo can me ot pa Juda; amini nino pyeraŋwen, ma nino acel acel rom ki mwaka acel. Ibiciko waŋi ineno Jerucalem ma girumo woko-ni, kun badi tye noŋo; ci dok ibityeto lok kom gaŋ, Abitweyi woko ki tol ma pe doŋ ibitwero lokke tuŋŋi ki tuŋŋi nio ka ityeko nino ma girumi iye dyere-ni liweŋ. “Kombeddi doŋ ikwany ŋano, cayiri, murana, ŋor, gaya ki kal. Rubgi ducu kacel ci ited ki mugati. Meno aye cam ma in ibicamo pi nino miya adek ki pyeraboŋwen ma noŋo it ye ka buto ki lakŋeti ma lacam-mi. Cam ma ibicamo gibipimo apima, ma romo cekel pyeraryo pi nino acel acel, dok bene i nino acel acel ibicamo cam kicel. Pii ma imato bene gibipimo boti apima, kikopo aryo i nino acel acel, dok ibimato kicel keken. Ibimoko mac i cet pa dano mutwo ki i nyimgi, ci ibitedo mugati macalo capat ka doŋ icamo.” Rwot owaco kuman ni, “Ka aryemo jo Icrael akeyogi woko i kin rok ducu man aye kit macalo gibicamo kwede cam ma cik okwero ni pe gucam.” Cutcut agamo ni, “Pe, Rwot Lubaŋa! An peya abalo koma kekena ki gin me kwer. Cakke i ka tinona nio kwede wa onyoo peya acamo riŋo lee mo muto kene nyo ma ŋuu okayo. Pud peya acamo kit riŋo lee mo ma gitamo ni obedo me kwer.” Lubaŋa dok owacci, “Nen, doŋ abimii cet dyaŋ ma ka cet dano en aye itwero tedo iye mugatini.” Dok omedde ki lok kun wacci, “Wod pa dano, nen, abijuko kit cam ducu woko doŋ pe binen i Jerucalem. Gibicamo mugati ma gipimo apima kun gicamo ki lworo; ki pii bene ma gimato gibipimo apima, gimato ma noŋo cwinygi oballe woko. Abitimo man wek pe doŋ gunoŋ mugati ki pii muromo, wek dano acel acel obed ka neno lawote ma noŋo cwinygi oballe woko, wek komgi olocwoko i cangi-ni,” Lubaŋa owacci, “Wod pa dano, kwany pala lucwan mabit ci iti kwede macalo lyedi pa lalyel wic, lyel ki yer wii wa ki yer tiki bene; ka doŋ ikwany lapim, ci ipok yer woko i dul adek. Dul me adekke-ni ibiwaŋo woko i mac i dye gaŋ, kun iporo kare ma noŋo mony doŋ orumo gaŋ otum. Kwany dul me adek mukene ci itoŋ woko ki pala lucwanni i kare ma noŋo iwoto irumo gaŋ. Doŋ dul me adekke mudoŋ-ŋi kwany ibol i yamo ci an abilwenyo i kome ki pala lucwanna. Gwok yer mogo ci itwe woko i dog boŋoni. Dok ikwany yer mogo ki i kom yer ma onoŋo igwoko-ni, ci ibol woko i mac, wek owaŋ woko. Doŋ mac bia ki i kom yer man ci nya o kwede wa i kom ot pa Icrael.” Rwot Lubaŋa owaco kuman ni, “Nen, Jerucalem. Doŋ atyeko kete i cwiny rok ducu, kun lobo mapol orume woko dyere. Ento Jerucalem ojemo woko i kom gin ma an aciko ci olokke ka timo gin maraco atika makato rok mukene-gu ducu, obedo gin mudiŋ ma pe lubo cikka makato rok mukene ma yam gurumo en dyere-gu ducu. Jo Jerucalem gukwero tiyo gin ma an aciko, gukwero bene lubo cikka. Mumiyo Rwot Lubaŋa owaco kuman ni, wun aye doŋ rok ma luyela makato lurok ma gurumowu dyere-ni, en gin mumiyo pe wuye lubo cikka ducu ma aketo, dok bene pe wugwoko gin ma an aciko, ento wun dok wubedo ka lubo cik pa rok mukene ma gurumowu. Doŋ pi meno, an Rwot Lubaŋa atito botwu ni abiŋolo kop i komwu ma lwak me rok ducu gineno. Doŋ pi gin me kwer ducu ma doŋ wutyeko timone, abitimo gin ma yam pud peya atimo i komwu, en lakit gin acel-lu ma pe abitimo doki. Doŋ adwoggine aye ni wego ma i Jerucalem gibicamo awobegi woko, ki awobe bene gibicamo wegigi woko ki i dyewu. Dok bene abiŋolo kop i komwu acobo kakare, doŋ jo mogo ki i kinwu ma gibidoŋ gibedo kwo, abikeyogi woko ata. Pi meno, kit macalo an Lubaŋa makwo-ni, man lok pa Rwot Lubaŋa, adada, pien doŋ wubalo kabedona maleŋ woko ki tim me kwerwu-gu ducu, ki gin ducu ma obedo cilo ma cwinya dagi, pi meno abinekowu woko, pe abinenowu ki wan maber, dok bene kica pe bimaka i komwu wacel. Dul me adek pa lwak mewu, two gemo ki kec binekogi woko i dye gag; ki dul me adek mukene gibinekogi woko ki pala lucwan i ŋe gaŋ; doŋ dul me adek mudonne-ni abikeyo woko ata, doŋ abiwoto pala lucwan aye aryemogi kwede. “Kinigana bitum gire kene kit meno, doŋ abitoyo akecana i komgi ka doŋ cwinya bikwe. Ka man otimme gibiŋeyo ni an a Rwot, doŋ aloko ki nyeko, i kare ma atoyo akecana i komgi. Doŋ makato ducu abiweko pacowu doŋ obur wun wubibedo ginacaya i kin lurok ducu ma gurumowu dyere ki bot jo ducu ma gikato ki ka ŋet pacowu ma odon obur-ri. “I kare ma abiŋolo kop i komwu ma noŋo kiniga omaka ki akeca, abiketo can magwa i komwu. Rok ducu ma gurumowu gibibedo ki lworo madwoŋ. Gibicayowu kun giloko lok aŋec i komwu ci wubibedo lanen me pwonyogi. Abijuko kit cam ducu ma yam wunono-ni pe doŋ nen, man bimiyo kec nekowu matek. Wubiwinyo arem me kec matek mada calo atero ma lake bit ma gicelo i komwu wek otyekwu woko. Abicwalo kec ki guu-gu me neko litinowu woko, dok bene abicwalo two gemo ki tim bwami ki lweny me nekowu me tyekowu woko. An Rwot doŋ aloko.” Rwot ceŋ oloko kweda. En owacci, “Wod pa dano, cik waŋi inen godi me Icrael, ci itit lokka botgi. Wac bot godi me Icrael ni guwiny lok pa Rwot Lubaŋa, wek guwiny lok ma an Rwot Lubaŋa atye ka wacone bot godi, cere-gu, ki luŋ matut, ki notagu ducu: Nen, abikelo lweny ma gilwenyo i komwu ki pala lucwan, dok bene abijwero wan jogiwu woko liweŋ, Abimuko keno tyerwu woko, ki keno tyer ka ma wuwago iye odok eceta-ni bene abimuko woko. Lutuwu jo Icrael ma gitye kunnu gibinekogi woko i nyim cal jogiwu. Abipyelo kom jo Icrael muto i nyim cal jogigi; dok abikeyo cogogi arumo ki keno tyergi woko. I kabedo ducu ma wubibedo iye gaŋiwu ducu gibijwero woko doŋ obur, ki wag jogiwu ducu gibimuko woko, ki keno tyerwu ducu abimuko woko wuweko doŋ kene, ki cal jogiwu ducu gibitoŋo gibalogi woko, ki keno tyer me wano odok eceta bene gibitoŋo gireto woko piny, ki gin ducu ma wutiyo doŋ gibijwerogi woko liweŋ. Dok jo ma ginekogi komgi biradde ata, ci man miyo wun wubineyo ni an aye a Rwot. “Ento abimiyo jo mukene gibwot ki i lak to ci gibedo kwo. Ka doŋ jo mogo ma gubwot gibibedo i kin lurok, dok ka gikeyowu woko i rok ducu, ci doŋ lutuwu ma gubwot gibipo i koma ki i kin lurok ka ma noŋo giterogi iye i opii. Gibipo i koma ki kunnu kun giŋeyo ni yam aketo can i komgi wek ami lewic omakgi, pien cwinygi ma gen pe iye-ni onoŋo doŋ oa woko ki i koma pi tarwaggi, omiyo gumaro woro cal jogi makato an. Gibibedo ki keccwiny i komgi kekengi pi gin maraco me lewic ma gutimo-ni, ki pi gin me kwer ducu ma yam gutimo. Doŋ gibiŋeyo ni an aye a Rwot; dok lok ma yam aloko ni abitimo gin marac man i komgi-ni onoŋo pe aloko me noŋo.” Rwot Lubaŋa owaco kuman ni, “Wudoŋ korwu, wunyon tyenwu bene i ŋom kun wukok ni, Can madit doŋ opoto! Can man opoto pi bal me gin me kwer ma jo me ot pa Icrael gutimo. Pi meno, gibinekogi woko i lweny, kec ki two gemo bene binekogi woko. Jo ma gitye ka mabor two gemo aye ma binekogi; ki jo ma tye cok gibineko-gi woko ki pala lucwan; ki jo mudoŋ ma gubwot ki i lak to kec aye ma binekogi. Meno en aye kit macalo abitoyo kwede akecana i komgi. Kom jo muto biradde lirwat i kin cal jogi ki’ i kabedo ducu ma orumo keno tyergi, wa i wi cere-gu ducu, ki i wi godi maboco-gu, i te yadi ducu ma potgi oluk, ki i te yat kworo ma pote oluk, ki i kabedo ducu ka ma gityero iye gin ma ŋwece kur ma yomo cwiny bot cal jogigi. Ci gin ducu doŋ gibiŋeyo ni an aye a Rwot. Abiryeyo ciŋa woko i komgi, ci abibalo lobogi woko, amiyo iye doŋ noŋo, i kabedo ducu ka ma gibedo iye, cakke ki i tim nio kwede wa i Ribla. Ci gin ducu doŋ gibiŋeyo ni an aye a Rwot.” Rwot oloko kweda. En owacci, “Wod pa dano, an a Rwot Lubaŋa doŋ awaco bot lobo pa jo Icrael kuman ni, Agik! Agik doŋ obino woko i kom twok lobo aŋwen, “Jo Icrael, agik doŋ obino woko i komwu; abitoyo kinigana woko i komwu, pien abiŋolo kop i komwu kun poro kit gin ma wun wutimo. Dok bene abiketo can i komwu pi gin me kwer ducu ma wutimo. Pe doŋ abiparo piwu, kica doŋ pe bimaka i komwu. Ento abiketo can i komwu pi kit gin ducu ma wutimo, gin me kwer ma wumedde ki timogi-ni. Meno doŋ bimiyo wuŋeyo ni an aye a Rwot.” Rwot Lubaŋa owaco kuman ni, “Can me to-paco bibino i komwu kun lubbe aluba i ne lawote cutcut. Agik doŋ obino, doŋ oo; doŋ otyeko corre woko i komwu. Nen, tye ka bino. Agik man bino piwu wun jo ma wubedo i lobo man; kare bene doŋ oromo, nino me woo me lweny doŋ cok, pe nino me yomcwiny ma wuwo kwede i waŋ jogi ma tye i wi godi. Kombeddi doŋ acok toyo akemona woko i komwu, kun atoyo kinigana i komwu, dok bene abiŋolo kop i komwu kun lubo kit gin ducu ma wutimo. Abiketo can i komwu pi gin me kwer ducu ma wutimo. Pe doŋ abiparo piwu, kica doŋ pe bimaka i komwu. Ento abiketo can i komwu pi kit gin ducu ma wutimo, gin me kwer ma wumedde ki timogi-ni. Meno doŋ bimiyo wuŋeyo ni an aye a Rwot, ma apwodowu-ni. “Nen, nino tye ka bino! Topinywu doŋ obino woko. Tim bwami tye ka medde ameda, ki wakke bene doŋ omedde adada. Tim bwami doŋ onya omedde odoko odoo me tim maraco; doŋ ŋat mo pe bidoŋ ki i kin lutim maraco, kadi jami mabup ma gitye kwede, nyo lonyogi; dok bene dano mo madit pe bibedo tye i kingi. Kare doŋ oo, nino doŋ onyiko cok. Lawil jami myero cwinye pe obed yom, kadi lacat jami bene pe myero obed ki kumo, pien akemo pa Lubaŋa bipoto i komgi ducu maromrom. Lacat-wil doŋ pe bitwero dwoko jami ma yam en ocato-ni cen bote, ma noŋo en pud tye kwo. Pien akemo pa Lubaŋa bipoto i kom lwakgi ducu maromrom, pe bidok cen; dok gat ma bigwoko kwone pe pien gin ducu gubalo. “Gukuto tum, gin ducu doŋ gitye ka yubbe. Ento ŋat mo pe ma cito ka lweny, pien akemo pa Rwot opoto i kom lwakgi ducu maromrom. Lweny tye woko i dye gudo, two gemo ki kec tye i ot. Ŋat ma tye i tim gibineko woko ki pala lucwan; ki gat ma tye i gaŋ, kec ki two gemo bineko woko. Jo mogo ma gubwot gibilaro wi godi calo akuri me nota, ma gin ducu gibicur pi balgi. Ciŋ dano acel acel bidoko goro, ki coŋgi bene bimyel amyela calo pii ma milamila limakmak. Gibiruko boŋo cola i pyergi, ki lworo madwoŋ bimakogi; lewic bimakogi ducu, gin ducu gibilyelo wigi woko, Gibibolo ryalgi ki jabugi woko i dye gudo macalo gin ma pe leŋ, pien ryal ki jabu pe twero larogi i nino ma Rwot bionyo iye kinigane i komgi. Pe gibitiyo kwede me cobo mitigi, dok bene pe gibimiyo igi yen kwede. Ryal kijabu aye omiyo gupoto i bal. Yam onoŋo gubedo ka wakke pi ginarukagi me deyo ma giruko pi nyuto ditogi mamwa-ni, dok gutiyo kwede me yubo cal lubaŋagi me kwer ma giraco atika-ni. Meno aye gin mumiyo Rwot biloko lonyogi doko gin ma pe leŋ botgi. “Abimiyo lurok yakogi woko,” man Rwot ma owaco, “dok abimiyo lutim maraco ma tye i lobo yako jamigi ki lonyogi woko bene liweŋ, ci gibipyedo woko bene. Abiloko waŋa cen pe anenogi, wek gin gigi gupyed kabedona maleŋ twatwal-li: luyak bene gibidonyo iye ci gipyedo, ci gibiweko doŋ obur. “Lobo opoŋ ki nek ki gaŋi-gu ducu opoŋ ki tim bwami. Abikelo rok ma giraco makato ducu kany me leyo odigi me bedo iye. Abigiko tek me wakkegi woko ki kabedogi maleŋ-gu ducu gibipyedo woko. Ka remcwiny obino, cigibiyenyo kuc, ento pe gibimedo ki noŋone wacel. Can me to-paco bibino i komgi, kun lubbe aluba i ŋe lawote cutcut, ki ani bene bilubo lawote. Gibiyenyo ginanyuta ki bot lunebi kwe; ajwagi doŋ pe gibibedo ki kit gin mo ma myero gupwony ki dano, ki ludoŋo bene pe gibibedo ki tam mo ma myero gumi bot dano. Kabaka bikumo, rwot genne birwenyo woko, ki lwak bene komgi bimyel ki lworo madwoŋ. Abitimogi kun lubo kit timgi, abiŋolo kop i komgi kun lubo kit ma gin kikomgi giŋolo kwede kop i kom jo mukene. Man bimiyo giŋeyo ni an aye a Rwot.” I nino dwe abic, dwe me abicel, mwaka me abicel ma doŋ wabedo kwede i opii, ludoŋo me Juda onoŋo gubedo i oda gitye ka lok kweda. Cutcut tek pa Rwot Lubaŋa obino opoto i koma. Aneno ci aneno gin mo ma nen calo dano. Cakke ki i pyere tuŋ piny, onoŋo nen calo mac, doŋ a i pyere dok kwede malo onoŋo ryeny aryenya calo mola. Ci ocwalo gin ma obedo calo ciŋ dano ci omako yer wiya otiŋa kwede malo. Doŋ i ginanyuta man Cwiny pa Lubaŋa otiŋa malo wa i kin polo ki lobo ci otera i Jerucalem. Otera i dog gaŋ ma i iye ma tye’ yo tuŋ acam me ot pa Lubaŋa, ka ma onoŋo cal jok mo tye iye, co ma miyo nyeko mako Lubaŋa, I kare ma atye kunnu aneno deyo pa Lubaŋa pa Icrael kit macalo onoŋo aneno kwede deyone i ginanyuta ma aneno i nota. Lubaŋa owacca ni, “Wod pa dano, tiŋ waŋi malo kombeddi inen yo tuŋ acam.” Atiŋo waŋa malo aneno yo tuŋ acam, ci aneno cal jok ma kelo nyeko tye cok ki keno tyer i dog gaŋ ka ma gidonyo ki iye. Lubaŋa dok owacca ni, “Wod pa dano, tika ineno gin ma jo Icrael gitye ka timoneni, gin me kwer madito keken wek giryema woko ki i kabedona maleŋ? Pud dok ibineno gin me kwer madit makato man ma gitimo.” Dok okela i doggola me dyekal; i kare ma aneno piny, ci anene kor ot ka ma otuc. Ci en owacca ni, “Wod pa dano, muk kor-ot kany.” Ka amuko kom ot, ci anoŋo doggola. En owacca ni “Dony i ot ci inen gin me kwer me lewic ina gitye ka timone kany-nyi.” Kit meno adonyo i dyere ci aneno kor ot ducu gigoyo iye kit cal ducu mapatpat. Cal gin ma lak alaka piny, ki cal lee mogo ma komgi ki, keni ma gikwero, ki kit cal jogi ducu me ot pa Icrael. Doŋ onoŋo tye kunnu jo pyerabiro i, kom ludoŋo me ot pa Icrael ma gucuŋ i nyim cal jogi-gu, kacel ki Jajania wod pa Capan ma ocuŋ i kingi. Dano acel acel onoŋo omako atabo weerre i ciŋe, kun yito me odok eceta ma giwaŋo duny cito malo macalo pol. Dok en owacca ni, “Wod pa dano, tika doŋ ineno gin ‘ma ludoŋo me ot pa Icrael gitye ka tiyone i, muŋ i colpiny ca? Gin ducu gitye ka woro jogi i kicika ma opoŋ ki cal lubaŋa-gu. Gin giloko kekengi ni, “Rwot pe nenowa, Rwot doŋ otyeko bwoto lobo man woko.’ ” Rwot owacca ni, “Ibineno gin me kwer madito makato man ma gitimo.” Ci okela i doggola me dog gaŋ ma tye yo tuŋ acam me ot pa Rwot; ci anene mon gubedo kunnu gitye ka kok pi jok Tamuj. Ka openya ni, “Wod pa dano, doŋ ineno gin man?’ Pud dok ibineno gin me kwer madito makato: magi woko.” Ci otera i dyekal ma tye i ot pa Rwot. Ci aneno jo ma romo pyeraryo wiye abic tye cok ki doggola me ot pa Rwot, i kin keno tyer ki ka ma gidonyo kwede i ot. Gin jo-nu guloko ŋegi i kom ot pa Rwot, kun nyimgi okemo tuŋ wokceŋ, gitye ka ryebbe piny me woro ceŋ ma tye ka tuc ki yo tuŋ wokceŋ. Ci en openya ni, “Wod pa dano, doŋ ineno gin man? Man mono jo me ot pa Juda gineno ni lok matidi ki botgi ka gibedo ka timo gin me kwer kany, wek gubed ka miyo tim bwami omedde onya i lobo, kun gibedo ka neto cwinya jwi wek kiniga omaka doki aye? Nen kit macalo gitye ka nywara kwede i yo marac mukato kare. Pi meno, abitimogi ki akemo; pe abiparo pigi, dok bene kica pe bimaka i komgi, Kadi bed gukok bota kun gilego lega ki dwan maloŋo, pe abiwinyo kokogi.” Lacen awinyo Lubaŋa odaŋŋe ki dwan maloŋo kun wacci, “Wunyik cok, wun lunek ma wumito keto can i kom lubalo ma i gaŋ man. Wun ducu wukwany jami Lwenywu wubin kwede kun wumako i ciŋwu.” Cutcut jo abicel gubino ki i dog gaŋ ma malo ma tye yo tuŋ acam me ot pa Rwot; dano acel acel omako jami lwennye me nek i ciŋe, Dano mo bene ma oruko boŋo camanini owoto kacel kwedgi, en owoto ki gin mo ma eromo coc kwede. Gin ducu gudonyo i dyekal me ot pa Rwot ci gucuŋ i ŋet keno tyer me mola. I kare-nu onoŋo deyo pa Lubaŋa pa Icrael ma ryeny twatwal-li oa woko ki i kom lukerubi ka ma yam en bedo iye kun kato ocuŋ i doggola me ot pa Rwot; ci Rwot olwoŋo dano ma oruko boŋo camaniŋi-ni, ma onoŋo owoto ki gin me coc i laknete-ni. Rwot owacce ni, “Cit iwok ki i dye gaŋ me Jerucalem ducu, ci iket lanyut i tur nyim dano acel acel ma tye ki cwercwiny me can kun gicur pi gin me kwer ducu ma gitye ka timone i gaŋ me Jerucalem.” Awinyo bene ka Lubaŋa waco bot jo mukene ca ni, “Wulub kore kun wuwok ki i dye gaŋ ci wunek dano. Pe wupar pi ŋat mo, dok bene kica pe omakwu i kome. Wunek jo muti, awobe, anyira, mon ka litino matino, ento pe myero wugud kom ŋat ma doŋ gityeko keto lanyut i kome. Wucak ki kany ki i kabedona maleŋ.” Ci gucako ki ludoŋo ma onoŋo gucuŋ kunnu i ot pa Rwot. Lubaŋa owaco botgi ni, “Wubal ot pa Rwot woko. Wupoŋ dyekalle-gu ducu ki kom jo ma ginekogi-ni. Wucit mewu anyim.” Guwoto gucito anyim, ci gucako neko dano ma gitye i gaŋ. I kare ma gitye ka neko dano, an doŋ onoŋo adoŋ kena. Apoto piny i ŋom aryeba ic, ci akok ni, “Ai Rwot Lubaŋal Akemo doŋ omaki twatwal i kom Jerucalem mumiyo icito ka neko jo ducu liweŋ ma gudoŋ i Icrael-li?” Lubaŋa ogamo ni, “Jo Icrael ki jo Juda gutimo bal madito maraco adada. Gubedo ka neko dano i kabedo ducu ma’ i lobo igumiyo ŋolo kop ma pe atir: omedde onya i Jerucalem. Giwacci, ‘Rwot doŋ obwoto lobo man woko, dok Rwot bene pe neno.’ Doŋ ki tuŋ bota, pe abiparo pigi, kica bene pe bimaka, i komgi, ento abiculo kwor i komgi pi gin ducu ma yam gin gutimo.” Cutcut dano ma onoŋo oruko boŋo camanini, ma tye ki gin me coc i laknete-ni odwbko lok bot Rwot kun wacci, “Doŋ atyeko tiyo gin ma onoŋo icika ni acitim.” Aneno pete ma tye malo ka wi lukerubi, ci aneno gin mo ma tye ka wigi ma obedo calo komker ma gitiyo ki got capir ma bulu. Ci owaco ki dano ma oruko ooŋo camaniŋi-ni ni, “Wot idony wa i kin lawala ma tye ka wirre-ni, ki piny ka tyen lukerubi-ni, ci ijob bilo poŋ ciŋi ki i kin lukerubi, ci iket woko atata i dye gaŋ.” Aneno en ka cito gire. I kare meno onoŋo lukerubi gueun i ŋet ot yo tuŋ acuc, ka dano-nu doŋ odonyo i ot; ci pol ocako poŋo dyekal me ot woko. Ci deyo pa Rwot oa woko ki i kom lukerubi ocito wa i doggola me ot pa Rwot. Ci pol opoŋo ot pa Rwot woko, ki dyekal bene opoŋ woko ki deyo pa Rwot ma meny amenya. Mor pa bwom lukerubi owinnye wa i dyekal ma tye woko, calo dwan Lubaŋa Matwero Ducu ma onoŋo tye ka loko Ka doŋ ociko dano ma oruko boŋo camaniŋi-ni ni. “Kwany mac ki i kin lawala ma tye ka wirre-ni, ki i kin lukerubi,” dano-ni ocito odonyo i kin lawala ci ocun ka ŋet lawala mo acel. Ci I akerubi mo oryeyo ciŋe ki i kin lukerubi wadigi okemo mac ma onoŋo tye i kin lukerubi, ci okwanyo lodi mac mogo, ka oketo i ciŋ dano ma oruko boŋo camaniŋi-ni; dano-nu ogamo ci okato kwede woko. Lakerubi acel acel onoŋo tye ki gin mo i te bwome ma nen calo ciŋ dano. Dok bene aneno ni i ŋet lukerubi onoŋo tye iye lawala aŋwen, ka ŋet lakerubi acel acel onoŋo tye iye lawala acel. Lawala ducu onoŋo giryeny calo kidi me wel. Gin ducu onoŋo ginen rom, calo onoŋo lawala acel acel giroyo odonyo ki i kin lawala wadi. Ka doŋ gucako wot, gicito ma gukemo yo aŋwen mapatpat ma kun pe gilokke ka mo, kit yo mo keken ma lawala ma anyim okemo ci lawala mukene-gu ducu gilubo ma pe gilokke ka mo ma noŋo gitye ka wot. Gin lawala magi aŋwen-ni yam doggi tye, cili bene onoŋo tye i komgi, kun Waŋ mapol orumo doggi woko ducu litit. Lawala magi awinyo ka gilwoŋo ni lawala ma wirre calo yamo lapiru. Lee acel acel onoŋo waŋe tye aŋwen mapatpat: waŋ mukwoŋo onoŋo nen calo wan lakerubi, waŋ me aryo onoŋo nen calo waŋ dano, waŋ me adek onoŋo nen calo wan labwor, ki me aŋwenne onoŋo nen calo waŋ ocur. Magi gin aye lee ma yam koo anenogi i ŋet kulu Kebar-ni. Lukerubi gua gutuk woko i yamo. Ka inen lukerubi giwoto gicito, ci lawala bene woto ki ka ŋetgi; ka inen lukerubi guilo bwomgi me tuk woko ki i ŋom, ci lawala pud woto kacel kwedgi. Ka ce inen lee gucuŋ nyo ka gua malo, ci lawala aŋwen-ni bene gitimo kit meno, pien cwiny lee-gu tye i igi ma miyo gitimo kit meno. Ci deyo pa Rwot oa woko ki i doggola me ot pa Rwot, onyiko ocuŋ lamalo ka wi lukerubi. Lukerubi guyaro bwomgi ci gutuk woko ki i ŋom gucito ma an bene aneno, lawala bene onoŋo tye ka wot kacel kwedgi; ci gucuŋ i doggola ma tye yo tuŋ wokceŋ me ot pa Rwot, ki deyo pa Lubaŋa pa Icrael onoŋo tye ka wigi. Magi gin aye lee makwo ma yam anenogi i ŋet kulu Kebar ma otiŋo Lubaŋa pa Icrael i wi komkerre-ni, Aniaŋ ni gin lukerubi. Lee acel acel onoŋo waŋe tye aŋwen, bwome aŋwen, ki gin ma nen calo ciŋ dano onoŋo tye i te bwome acel acel. Doŋ wangi onoŋo nen calo waŋ ma nene aneno i ŋet kulu Kebar-ni kikome. Gin ducu giwoto kacel kun ŋat acel acel woto kemo nyime atir. Cwiny pa Lubaŋa otiŋa malo, ci otera wa i doggola ma tye yo tuŋ wokceŋ me ot pa Rwot. Doŋ i kare ma atye kunnu ka ma cok ki doggola ci aneno jo pyeraryo wiye abic, ma onoŋo i kingi tye iye Jajania, wod pa Ajur, ki Pelatia wod pa Benaya, ma onoŋo gin rwodi ma giloyo lwak. Lubaŋa owacca ni, “Wod pa dano, magi gin aye lutim maraco ma gitye ka yubo lok me timo gin marac i gaŋ man. Giwacci, ‘Kare ma wabigero iye odi doŋ cok. Gaŋ man obedo calo agulu me tedo, wan wabedo calo riŋo ma tye iye.’ Pi meno, wod pa dano, tit lok i komgi.” Cwiny pa Rwot opoto i koma, ci Rwot owaco bota ni atit lok man bot lwak ni, “Wun jo Icrael, aŋeyo gin ma wutye ka wacone, ki gin ma wutye ka yubone ki i tamwu. Wun doŋ wutyeko neko jo mapol i gaŋ kany mumiyo yo ma i gaŋ ducu opoŋ ki kom dano muto keken. “Mumiyo man en aye gin ma awaco botwu. Gaŋ man bidoko agulu me tedo, ento kom jo muto ma wunekogi ka wupyelogi i dye gaŋ gin aye riŋo me ateda. Ento wun gibikwanyowu woko ki i dye gaŋ, Yam wubedo ka lworo pala lucwan; ento abikelo dano ma gitye ki pala lucwan gilwenyo i komwu, man Rwot Lubaŋa ma owaco. Abikwanyowu ki i dye gaŋ akelowu woko, ci amiyowu i ciŋ lurok. Doŋ atyeko ŋolo kop me to i wiwu; gibinekowu woko i lweny ki pala lucwan i lobowu kikome. Man bimiyo wuŋeyo ni an aye a Rwot. Gaŋ man pe bibedo agulu me tedowu ki wun bene pe wubibedo calo riŋo ma tye i agulu. Abiketo can i komwu ki i kabedo ducu ma wubedo iye ki i lobo Icrael. Man bimiyo wuŋeyo ni an aye a Rwot, ki cik ma wuturo-ni meno cikka, ki gin ma giciko ni wuti-ni, ma pe wutiyo-ni, onoŋo an aye ma aciko, ento wubedo ka Lubo mewu cik pa lurok ma gurumowu.” I kare-nu ma atye ka tito lok, cutcut Pelatiya wod pa Benaya opoto ci oto woko. Ci apoto piny aryeba ic kun akok ki dwan maloŋo ni, “Ai do, Rwot Lubaŋal Ibineko jo ma onoŋo gudoŋ i Icrael-li woko ducu?” Rwot oloko kweda kun wacci, “Wod pa dano, jo ma gibedo i Jerucalem gitye ka lok piri kadi wa Luicrael wadiwu bene ma giterogi i opii. Giwacci, ‘Opii doŋ gitye ka mabor ma pe gitwero woro Rwot. En omiyowa lobo man ni wacam obed mewa.’ Kombeddi doŋ tit lok ma atye ka wacone-ni bot opii wadiwu. Acwalogi me cito ka bedo i lobo pa lurok ma tye ka mabor, ci akeyogi woko i lobo mukene ducu. Aye ni guwora i lobo ka ma gucito iye, ento pi kare me tutunu. “Pi meno tit botgi gin ma an Rwot atye ka wacone. Abicokogi woko ki i lobo ka ma yam akeyogi gucito iye, ci abimiyogi lo bo Icrael adwoko cen botgi. Ka gudok kunnu, gibijwero gin ducu ma obedo cilo, ki gin me kwergu ducu. Abimiyogi cwiny acel dok abiketo cwiny manyen i igi; abikwanyo cwiny matek calo got-ti woko ki i komgi, ci amiyogi cwiny pa dano. Doŋ miyo gibigwoko cikka dok bene giwinyo lokka kun gin yo gin ma an aciko ducu. Gibibedo jona, ki an bene abibedo Lubaŋagi. Ento abiketo can i kom jo ducu ma giworo gin ducu ma obedo cilo ki gin me kwer-gu. Abiculo kwor i komgi kun poro gin ducu ma yam gin gutimo, man Rwot Lubaŋa ma owaco.” Lukerubi gucako tuk me cito malo, ci lawala bene gucito kacel kwedgi. Deyo pa Lubaŋa pa Icrael onoŋo tye ka wigi. Ci deyo pa Lubaŋa oa woko ki i gaŋ ocito ocuŋ i wi got ma tye yo tuŋ wokceŋ me gaŋ. Cwiny pa Rwot otiŋa woko i ginanyuta, ci okela odwoka woko cen bot jo ma tye i opii i lobo Kaldaya. Lacen ginanyuta meno ma onoŋo aneno ocako rwenyo woko ki bota, ci atito gin ducu ma Rwot onyutta bot jo ma onoŋo gitye i opii. Rwot oloko kweda. Owacca ni, “Wod pa dano, in it ye ka bedo i kin jo ma lujemo. Waggi tye, ento pe gineno gin mo. Itgi bene tye, ento pe giwinyo lok, pien gin jo ma lujemo. “Doŋ kombeddi, in wod pa dano, yubbe kun itweyo yecci macalo lariŋ ayela, ci icak wot me cito i opii ki i nyimgi ki dyeceŋ, Wek gin ducu guneni ka icako wot me cito i kabedo mukene. Gwok nyo gin jo ma lujemo-ni gibinian gin ma itimo. Twe yecci woko ki dyeceŋ macalo larin ayela ma tweyo yecce kun gin bene gineno, wek guneni ka doŋ icito ki otyeno calo doŋ icito woko i opii, Tuc kor cel ma gin bene gineno, ci idony iye ikat icit woko. Ibitiŋo yecci ki i nyimgi ma gin gineno, ci iketo i wi gwoki, ci icito kwede woko i colpiny ma noŋo iboyo waŋi woko, wek pe inen lobo ka ma icito iye. Doŋ atyeko keto in me bedo lanyut bot jo Icrael.” Atiyo gin ma Rwot nene ocika ni ati. Akwanyo yecca akelo woko ki dyeceŋ, calo yec pa lariŋ ayela; ka doŋ piny odoko otyeno ci atuco kom cel ki ciŋa. Ci akwanyo yecca ma atweyo-ni atiŋo i wi gwoka ma kun gin bene gineno, ci acito woko i colpiny, Orwone ki odiko Rwot oloko kweda. Owacca ni, “Wod pa dano, kombeddi Luicrael ma gin lujemo-ni gitye ka penyi ni in it ye ka timo gin aŋo. Tit botgi gin ma an Rwot Lubaŋa atye ka lok botgi. Lok man ma pire tek-ki kemo laker ma tye ka loc i Jerucalem ki jo Icrael ducu ma gibedo kunnu. Tit botgi ni gin ma doŋ itimo-ni tye macalo lanyut me gin ma bitimme i komgi; gibiterogi woko i opii i lobo mukene. Doŋ laker ma loyogini bitiŋo yecce i wi gwoke i colpiny ci lwi donyo ki i waŋ cel ma gituco i kom cel-li kato woko gire. En biboyo waŋe woko, wek pe enen lobo ka ma ecito iye. Abiciko obwona pire, ci en bibino moko i owicca. Ka doŋ akwanye atere woko wa i lobo Babilon, ma en lobo pa jo Kaldaya, en bito ki kunnu ma noŋo pe oneno lobo-nu. Abikeyo jo ducu ma onoŋo gurume woko dyere-ni, lumi-tamine, ki jo ma gwoko en i yo ducu mapatpat; lukworgi biyenyogi mada wek ginekgi woko ki pala lucwan. “Ka akeyogi woko i rokmukeneki i lobo pa lurok, gibiŋeyo ni an aye a Rwot. Ento abiweko jo manok bwot ki i lweny, kec ki two gemo pe binekogi, wek guniaŋ ki i kin lurok kunnu, ci gutuc gin me kwer ma yam gutimo-ni, wek doŋ guŋe atir ni an aye a Rwot.” Rvot dok omedde oloko kweda, Owacca ni, “Wod pa dano, wek komi omyel ka it ye ka cam, wek komi bene omyel ki lworo ka it ye ka mato pii. Tit bot wegi lobo meno ni man aye lok pa Rwot Lubaŋa ma okemo jo Jerucalem ma pud gibedo i lobogi. Gibicamo cam ki lworo ma noŋ o komgi myel, dok bene gibimato pii ma cwinygi oballe woko. Gibiyako jami ducu ma tye i lobogi miyo i lobo doŋ noŋo, pien jo ducu ma gibedo iye gin lutim bwami keken. Gaŋi ducu ma dano gibedo iye gibijwero woko doŋ obur, ci lobo meno doŋ bidoko tim ata, Man bimiyo wuŋeyo ni an aye a Rwot.” Rwot oloko kweda. Owacca ni, “Wod pa dano, piŋo jo Icrael gimaro waco carolok man ni, ‘Kare tye ka kato, dok ginanyuta ma gineno i wan lek-ki ducu lokke pe ocobbe kakare’? Kombeddi doŋ itit botgi gin ma an Rwot Lubaŋa amito wacone pi lok man. Abigiko tic ki carolok meno woko. Pe dok gibibedo ka tic kwede i Icrael matwal. Ento tit botgi ni, ‘Kare doŋ oo, ki ginanyuta ducu doŋ bicobbe kakare.’ “Ginanyuta me gobagoba ki lok tyet me bwolo ma ŋako dano doŋ bibedo pe matwal i kin jo Icrael. An Rwot, doŋ abiloko botgi, ci gin ma awaco bitimme, Lok man pe dok bigalle. Abitimo gin ma acikowu ni abitimo-ni i kare me kwowu, wun jo ma lujemo. Man Rwot Lubaŋa ma owaco.” Rwot dok oloko kweda, kun wacci, “Wod pa dano, jo Icrael giwacci ginanyuta ma ineno-ni ki lok ma itito-ni tye pi kare me anyim ma pud ty bor. Pi meno tit botgi gin ma an Rwot Lubaŋa atye ka wacone ni, ‘Lok man pe dok bigalle. Gin ma awaco-ni bitimme.’ An Rwot Lubaŋa doŋ aloko.” Rwot oloko kweda. Owacci, “Wod pa dano, tit lok i kom lunebi me Icrael, tit lok kun itito bot jo ducu ma gitito lok ma gutamo atama ki wigi ni, ‘Wuwiny lok pa Rwot?’ Man aye gin ma Rwot Lubaŋa owaco ni, Can i wi lunebi ma lumiŋ-ŋi! Gilubo mere tam ma gutamo atama ki i cwinygi kun noŋo pe guneno ginanyuta mo. Wun jo Icrael, lunebiwu gubedo macalo too ma tye i gaŋi ma i kin obur. Pe bene gigwoko kabedo ka ma gimuko cel woko ki iye-ni, pe gimito gero cel odoco; mumiyo Icrael pe bicuŋ ka lweny obino i nino pa Rwot. Ginanyutagi ducu ma guneno obedo me goba. Gityeto bene lok me goba. Giwacci, ‘Man lok pa Rwot’, ento an gira pe aorogi. Gibedo ka tamo ni myero acob lokgi kakare. Awaco botgi ni, ‘Ginanyuta magi ducu ma wuneno obedo me goba, ki lok ma wutyeto-gu ducu obedo lok me goba keken. Wuwaco ni lok magi ducu lokka, ento an gira pe aloko kwedwu,’ ” Mumiyo Rwot Lubaŋa owaco botgi kuman ni, “Lokwu ducu obedo me bwolo ki ginanyuta ma wuneno-gu goba keken. Pi meno, atye ki lok i komwu. Man Rwot Lubaŋa ma owaco. Abiketo can i komwu, wun lunebi ma wuneno ginanyuta me bwolo-gu, dok bene wutyeto lok goba keken. Pe wubibedo tye ka jona gucokke kacci; dok bene pe gibicoyo nyinwu kacel ki nyiŋ jo Icrael mukene-gu; pe wubidok i lobowu matwal. Wubineyo ni an aye a Rwot Lubaŋa. “Lunebi gumiyo jona guŋak woko kun giwacci, ‘Kuc tye,’ ento noŋo kuc mo pe. Jona gubino gugero cel ci lunebi gubino gubuko woko ki raŋi matar me buko kor ot. Wac bot jo ma tye ka bukone ki rani matar-ri ni, cel bipoto woko piny. Kot ma corre acora bicwer matek, pee madwoŋ bicorre piny, ki yamo lapiru matek bicako kodo i kom cel. Cel bimuk poto woko piny, ci dano ducu gibipenyowu gin aŋo ma wutimo pi buko kom cel ki raŋi matarri.” Pi meno Rwot owaco kuman ni, “Abicwalo yamo matek cako kodo, kot ma corre acora bicwer, ki pee madwoŋ bicorre piny ki akemona ki kinigana, me muko cel woko. Abimuko cel ma wubuko ki rani matar-ri areto woko pinyi ŋom, ci aweko te gutiŋe doŋ noŋo. Ka cel opoto ci wuto woko ducu. Man bimiyo wun ducu wuŋeyo ni an aye a Rwot. “Meno aye kit ma abitoyo kwede akemona i kom cel ki i kom jo ma gubuko cel ki rani matar-ri. Abiwaco botwu ni, ‘Cel doŋ pe matwal, kadi ki jo ma gubuko kome ki rani matar-ri bene gipe, kadi lunebi ma gubedo ka tito lok ma okemo Jerucalem ni kuc tye iye, kun onoŋo kuc pe-ni bene doŋ gipe.’ ” Man Rwot Lubaŋa ma owaco. Rwot owacci, “Kombeddi in wod pa dano, nen mon ma gitye i kin lutuwu ma gitito lok ma gin tamo atama ki i cwinygi. Juk gin ma gitye ka titone-ni woko, kun itito botgi gin ma Rwot Lubaŋa tye ka waco botgi. “Can i wiwu wun mon ma wukwoyo lwit wutweyo i ŋut ciŋ dano, dok bene wukwoyo boŋo laum wic ma wuboyo iye lwit pi dano ducu kun wulubo kit bor pa ŋat acel acel, wutimo man ni wek gubed ki twero me rwenyo kwo pa dano woko! Imito tic ki twero me kwo ki me to i kom jona wek wuŋon giwu iye magoba ma cwinywu mito. Doŋ wutyeko pyeda woko i kin jona pi cayiri ma romo poŋ ciŋwu keken, ki pi kwon mogo matitino, kun wuneko dano ma onoŋo myero pe guto, ento wubwoto dano ma onoŋo myero guto aye gibedo kwo, pi gobawu ma wuloko bot jona, ma guwinyo lok gobawu-ni.” Man aye gin ma Rwot Lubaŋa tye ka wacone ni, “Adag lwit ma wukwoyo i komwu me bedo ki twero i kom dano me kwo ki me to. Abicodo lwit meno-gu woko ki i ŋut ciŋwu ci abimiyo dano ma onoŋo wutye ki twero me loyo kwogi-ni gibwot gicito laboŋo ayela calo winyo, Abiyeco boŋo laum wiwu woko bene, ci alaro jona woko ki i ciŋwu, pe doŋ gibibedo i te twerowu matwal. Man bimiyo wuŋeyo ni an aye a Rwot. “Wun doŋ wubalo cwiny jo ma kitgi atir woko ki lok me bwolo, kadi bed onoŋo an pe abalo cwinygi, ento wun wucuko cwiny jo ma gin lutim maraco, wek gulokke ki i yo me timgi maraco gular kwogi. Pi meno, pe doŋ wubineno ginanyuta me gobagoba matwal, dok bene pe wubityeto tyet. Abilaro jona woko ki i ciŋwu. Man bimiyo wuŋeyo ni an aye a Rwot.” Jo mogo i kin ludoŋo pa jo Icrael gubino bota ci gubedo piny i nyima. Cutcut Rwot oloko kweda. Owacci, “Wod pa dano, jo magi doŋ gitye ki cwiny me woro cal jogi dok gimiyo cal jogi magi nakogi woko terogi ka timo bal. Tika gitamo ni abimiyogi lagam ma gitye ka mitoneni? “Doŋ pi meno kombeddi lok kwedgi ci itit botgi gin ma an Rwot Lubaŋa atye ka wacone ni, ‘Laicrael mo ma tye ki cwiny me woro cal jogi dok ma bimiyo cal jogi magi nako en tere ka timo bal, ka obino bot lanebi ni okonye, ci an Rwot kikoma aye abimiye lagam. Lagam ma abimiyo bedo lagam ma okemo lwak cal jogine ma en otiyogu. Cal jogi magi ducu doŋ oloko cwiny jo Icrael woko ki i koma, ento ageno ni ki lagam man ma abimiyo botgi abidwoko cwinygi celi i koma miyo doŋ giwora.’ “Kombeddi doŋ itit bot jo Icrael gin ma an Rwot Lubaŋa atye ka wacone ni, ‘Wuŋuti wudwog cen bota wuwek woro cal jogiwu-ni. Dok bene wulokke wuwek timo gin me kwer ducu ma yam wubedo ka timogi-ni. “Ka inen dano mo ki i kin Luicrael nyo dano mo ki i kin lurok ma gibedo i kin jo Icrael ce olokke obwota woko kun doŋ tye ki cwiny me woro cal jogi, ka cal jogine oŋake otere ka timo bal, ka obino bot lanebi ni okonye, ci an Rwot kikoma aye abimiye lagam, Abikwero kit timme-nu woko, abimiyo en doko lanyut ki lok aboka pa dano. Abikwanye woko ki i kin jona, man bimiyo wuŋeyo ni an aye a Rwot. “Ka ce inen gibwolo lanebi mo ci en omiyo lagam gobagoba, meno noŋo an Rwot aye ma abwole. Ci abiryeyo ciŋa i kom lanebi meno, aneko woko ki i kin jona jo Icrael. Doŋ lanebi kacel ki ŋat ma bino ka noŋo kony ki bote-ni ducu gibilimo lakit can acel. Abitimo man wek jo Icrael pe guŋak gubwota woko, wek bene pe gubal komgi ki balgi ducu ma gitimo. Ento amito ni gin gubed jona ki an bene abed Lubaŋagi.” Man Rwot Lubaŋa ma owaco. Rwot oloko kweda. Owacci, “Wod pa dano, ka ce inen lobo timo bal i koma kun turo cikka, abiryeyo ciŋa ci ajwiko cam woko ki iye. Abicwalo kec neko dano ma gibedo iye kacel wa ki lee ducu. Kadi bed jo adek-ki, Nua, Daniel ki Yubu onoŋo gibedo kunnu, kitgi ma atir gire bilaro kwogi gin kengi,” man Rwot Lubaŋa ma owaco. Ka acwalo lee me tim ka neko dano woko ducu ki i lobo meno, ci gibimiyo lobo doŋ balle woko doko marac ma ŋat mo doŋ pe twero ŋolo kato ki iye, kadi bed nene jo adek-ki gubed kunnu, kit macalo an a Rwot Lubaŋa makwo-ni, onoŋo pe gitwero laro kadi wa litinogi kikomgi, Onoŋo gitwero laro kwogi gin kengi, ento onoŋo lobo ‘twero lokke doko tim ‘ata. “Ka ce akelo lweny i kom lobo meno kun acwalo jami lweny maraco wek ginek ki dano kacel ki lee woko ducu, kadi bed onoŋo jo adek-ki, Nua, Daniel ki Yubu gibedo kunnu, macalo an Rwot Lubaŋa makwo-ni, onoŋo pe gitwero laro kadi wa litinogi kikomgi. Onoŋo gitwero laro kwogi keken. “Ka ce acwalo two gemo i lobo meno, ka aonyo akemona kun arwenyo kwo pa jo mapol, ma aneko dano kacel ki lee me tim, kadi bed onoŋo Nua, Daniel ki Yubu gibedo kunnu, kit macalo atye kwo-ni, man Rwot Lubaŋa ma owaco, onoŋo pe gitwero laro kadi wa litinogi. Onoŋo kitgi ma atir aye gire bilaro kwogi gin kengi.” Man aye gin ma Rwot Lubaŋa tye ka wacone ni, “At ye ki can aŋwen ma abicwalo i kom Jerucalem, lweny, kec, lee tim-gu ki two gemo, wek onek dano woko ducu kacel ki lee ducu. Ka ce inen ŋat mo obwot obedo kwo ce olaro litinone, ka gubino botwu myero wunengi. Ci wubineno kit ma kitgi ki gin ma gitimo ducu rac kwede, man miyo wubiye ni can ma abiketo i kom Jerucalem tye kakare. Wubiye ka wuneno kitgi ki gin ma gitiyo kit ma rac kwede; ci bimiyo wuŋeyo ni onoŋo tyen lok ma atir mumiyo atimo gin ma doŋ atyeko timone-ni, man Rwot Lubaŋa ma owaco.” Rwot oloko kweda. Owacci, “Wod pa dano, gitwero poro yat olok ki yat mukene niŋniŋ? Doŋ yat olok ma giporo ki yat ma tye i buŋani berre rom mene? Itwero toŋo yatte itiyo ki gin mo? Dano gitwero tono gipayo dok teke ci giguro i kor ot me ŋabo jami? Yatte ber me obo mac mere keken. Ka mac doŋ owano doge ryoryo ducu ma doŋ oweko bilo i dyere, pud dok itwero kwanyone itiyo ki gin mo? Nen, ma pud pe yat meno owaŋ woko onoŋo konnye doŋ pe. Doŋ kit macalo mac owaŋo woko-ni kun oweko bilo bene i dyere, ci konnye doŋ bibedo pe rom mene, tika dok gitwero kwanyone gitiyo ki gin mo?” Man aye gin ma Rwot Lubaŋa tye ka wacone ni, “Kit macalo yat olok gikwanyo ki i kin yadi me buŋa ci waŋ woko-ni, kit meno bene abikwanyo jo ma gibedo i Jerucalem ci aketo can i komgi. Abiciko waŋa i komgi, kadi bed gubwot ki i mac, mac pud biwaŋogi; ci man bimiyo wuŋeyo ni an aye a Rwot, ka doŋ aciko waŋa i komgi. Abimiyo lobo doŋ doko tim ata, pien pe gubedo ka lubo cikka, man Rwot Lubaŋa ma owaco.” Rwot doki oloko kweda. Owacci, “Mi Jerucalem one gin me kwer ducu ma en otimo. Tit ki Jerucalem gin ma Rwot Lubaŋa tye ka wacone bote: In yam ginywali i lobo pa jo Kanan; woru obedo jo Amor, ki meni obedo anyira Kit. Doŋ kit macalo ginywali kwede, i nino ma ginywali iye kikome tol peni pe giŋolo, pe bene gilwoko komi ki pii wek komi obed maleŋ, pe giwiro kado i komi, pe bene giboyi woko ki boŋo. Ŋat mo ma obedo ki kica muromo i komi pe me tiyo gin macalo magi ducu i komi. I kare ma ginywali gubedo ki mar manok twatwal i komi mumiyo guboli woko i dye bar ka maleŋ. “I kare ma akato ki ka ŋeti, aneni ibedo ka kwitte i remo ma ginywali kwede, ci awacci ma it ye i remoni ni, ‘Bed kwo, ci idoŋ giri malo calo ginapita ma i poto.’ Ci idoŋo woko mabor wa malo idoko nyako madit. Tunoni ocako poŋ maber, ki yer wii bene olot maboco, ento onoŋo it ye munero laboŋo boŋo mo i komi. “Ka doki akato ki ka ŋeti ci aneni anoŋo ni mwakani doŋ oromo me mar; ci ayaro boŋo ma onoŋo atye kwede woko i komi, omiyo pe doŋ ibedo munero. Ada, aketo gicikke kwedi, ci in doŋ idoko mera. Acikke mada ni abimari.” Man Rwot Lubaŋa ma owaco. “Akwanyo pii alwoko remo woko ki i komi, ka doŋ awiro komi woko ki moo. Aruki woko bene ki boŋo mabor ma gidero maber, ka amini war ma delle ber makato ducu, ki boŋo camanini me boyo wii ki boŋo aridi me umi. Dok aruki ki ruk me deyo, ci arwako ogul i ciŋi, kun arwako nyor bene i ŋuti, Dok arwako agit um bene i umi, ka arwako agit it i iti ryoryo ducu, ka doŋ arwako lalukana maber mada i wii. Onoŋo yam giruki ki ruk ma obedo jabu ki ryal, ginarukani onoŋo obedo boŋo camanini mabecone, ki boŋo aridi ki boŋo ma gidero maber. Ibedo ka camo kwon ma mokone pwot mada, ki moo kic kacel ki moo yaa. Idoŋo ma inen mwonya maber mada, ci idoko daker. Berri oywek mada i rok ducu. Onoŋo ibedo mwonya maber mada pi deyo ma aketo i komi, pien aketi ma inen mwonya mada.” Man Rwot Lubaŋa maowaco. “Ento in giri ibedo ka geno berri ki ywekani, ci ibedo ka timo abor ki jo ducu ma gikato ki ka ma in it ye iye. Ikwanyo boŋŋini mogo ci iyubo odi jogi ci idero komgi woko maber, ka doŋ imiyo komi woko bot jo ducu i tim me abor calo malaya. Kit tim macalo man pud pe onen, dok bene pe doŋ binen matwal. Dok bene ikwanyo jami me wel me jabu ki ryal ma yam amiyo boti, ci icako tiyo cal dano ka doŋ itimo abor kwedgi. Ikwanyo boŋŋini ma gidero maber-ri iumo ki kom cal dano-gu, ci ityero moona woko ki odok ecetana botgi. Yam amini cam, amiyo icamo kwon mamokone pwot adada, moo yaa kacel ki moo kic, ento in dok ityero woko bot cal jogi macalo gin ma ŋwece kur ma yomo cwinygi. Man Rwot Lubaŋa ma owaco. “Lacen dok ikwanyo awobeni ki anyirani ma yam inywalogi kweda, ci ityerogi woko bot cal jogi me bedo gitum awaŋa. In itamo ni tim me abor ma itimo obedo lok matidi mo ki tun bota mumi yo ineko litinona ci ityerogi woko bot cal jogi-gu me bedo gitum awana-ni? I kom tim me kwerri ducu ki tim aborri ducu ma itimo wii pe opo i kom kare me tinoni, en kare ma onoŋo it ye munero ma ginaruka mo pe i komi, ma onoŋo it ye ka kwitte i remo ma ginywali kwede-ni.” Rwot Lubaŋa owacci, “Can i wii! Can i wii! Lacen ma doŋ ityeko timo tim maraco, ci igero kicika piri keru, ka igero kabedo ma otinne malo me woro cal jogi i ŋet yo ducu. I agikki yo ducu igero iye kabedo ma otiŋŋe malo ka doŋ icako nyuto berri kunnu calo malaya. Imiyo jo ducu ma gikato ki kenyo gibedo kwedi, ma imiyo tim me malayani onya omedde twatwal. Dok bene iweko luwoti ma gin lutarwaŋ ma gin jo Ejipt, gutimo abor kwedi, imiyo tim me aborri onya omedde, kun iŋeto ki cwinya ni wek kiniga omaka. “Nen, kombeddi doŋ aryeyo ciŋa woko me keto can i komi, ki dok me kwanyo dul me gum ma onoŋo yam apoko boti-ni woko. Doŋ atyeko miyi woko i ciŋ lukworri jo Piliciti, ma gidagi twatwal ma lewic omakogi mada pi tim me abor ma ibedo ka timone-ni. “Dok bene itimo abor ki jo Aciria, pien onoŋo abor ma itimo ki jo mukeneni pe orommi. Idoko malayagi, ento ducu mwa, gin ma gutimo i komi bene pud pe orommi. Imedde giri ki tim aborri ci itimo abor bene ki lucat-wil ma i lobo pa jo Kaldaya, ento kadi bed gubedo kwedi ci gin ma gutimo i komi bene pud pe orommi.” Man gin ma Rwot Lubaŋa tye ka wacone ni, “Cwinyi doŋ odoko goro woko ki mar, aneno itimo gin magi ducu calo malaya ma lewic pe mako. Igero kicika i agikki yo ducu dok igero kabedo ma otiŋŋe malo i ŋet yo ducu. Ento in onoŋo pe ibedo calo malaya, pien onoŋo pe itimo abor pi noŋo limo Ibedo calo dako ma timo abor ki lurok ma gin welo ma ka maro cware. Co aye ma gimiyo mot bot mon ma malaya, ento in aye doki imiyo mot bot co ma gimari-ni, kun iwilogi ki lim i muŋ ni gua ki i kabedo ducu gubin gubed kwedi. In dok ibedo malaya ma kite pat mada ki kit mon mukene ma gin malaya-gu. Ŋat mo ma onoŋo odiyo in me bedo malaya pe. Pe giculo gin mo boti, ento in aye dok iculo co ma onoŋo gimari-ni, Pi meno, in giri ki ti pat. “Pi meno doŋ, in malaya, winy lok ma Rwot tye ka wacone. Man gin ma Rwot Lubaŋa owaco ni, Ilunyo boŋŋini woko ki i komi ci imiyo co ma imarogi-ni gubedo kwedi, dok bene ineko litinoni ci ityero woko bot cal jogi me bedo gitum. Doŋ pi lok man omiyo abicoko jo ducu ma yam gimari, ma yam ibedo kwedgi ki yomcwiny, jo ducu ma onoŋo imarogi ki jo ducu ma onoŋo idaggi. Abicokogi ki i kabedo ducu ci amiyo gicuŋ girumi woko dyere, ka doŋ alunyo boŋo woko ki i komi idoŋ munero, wek guneni noŋo doŋ it ye munero. Abiŋolo kop i komi calo aŋolo kop i kom mon ma giketo nyom woko kun bene gineko dano. Ci abiŋolo kop i komi ki akemo ki nyeko madit miyo ito woko. Abimiyo ibedo i te twero pa co ma gimari, ci gibicoro kicikani gireto woko piny, dok bene gimuko kabedo ma otiŋŋe malo ma igero me woro cal jogi-ni woko. Gibilunyo boŋo woko ki komi ci gikwanyo jami me wel-gu woko ki boti, ka doŋ giweki idoŋ munero laboŋo boŋo mo i komi. “Gibikelo dul mony ka lweny i komi, gibiceli ki got ci giŋoli giŋidi woko matitino ki pala lucwangi. Gibiwaŋo odini-gu woko ducu, dok bene gibicobo kop ma aŋolo i komi ki i nyim mon mapol. Abijuki woko doŋ pe ibedo malaya, dok abimiyo doŋ igiko miyo mot bot co ma gimari-ni woko matwal. Abitoyo akemona woko i komi kit meno, ci nyeko ma onoŋo atye kwede bene doŋ bia woko ki i komi. Abibedo doŋ mamwol, kiniga bene pe doŋ bimaka i komi matwal. Onoŋo wii owil woko pe ipo kit macalo abedo ka timi kwede i ‘kare ma onoŋo in pud itidi, doŋ imiyo kiniga omaka pi gin magi ducu ma itimo-ni. Pi meno, abiculo kwor i komi ki gin ma itimo. Piŋo itimo tim me tarwaŋ imedo ki tim me kwer-gu ducu?” Man Rwot Lubaŋa ma owaco. “Nen, dano ducu ma loko carolok, gibiloko carolok i komi ni, ‘Nyako cal ki minne.’ In giri i nya pa meni kikome. En okwero cware ki litinone woko. Inen calo lumegini ma gukwero coggi ki litinogi-ni. Meni yam Lakit ki woru mere onoŋo en Laamor. Lameru ma okwono nyimi en aye Camaria, ma tye yo tuŋ acam ki gaŋine, Lameru matidine ma tye ki gaŋine i ŋete yo tuŋ acuc, en aye Codom. In yam pe ibedo ka lubo kitgi keken, kadi ki timo kit gin me kwer gu macalo gin, ento pi kare manok mo keken kiti ocako balle woko marac makato kitgi i kit yo ducu. “Doŋ kit macalo an atye kwe-ni,” man Rwot Lubaŋa ma owaco, “lameru Codom ki gaŋi ma i ŋete pe gutimo kit gin ma in kacel ki gaŋini wutimo-ni. Nen, man aye obedo bal pa lameru Codom. En kacel ki anyirane gubedo luwakke mada, pien onoŋo gitye ki cam madwoŋ ma gicamo loyogi kun gibedo mot ki kuc, ento pe gumiyo kit kony mo bot lucan ki boŋo ma piny obwoyogi. Onoŋo gubedo jo ma Lyerre mukato kare, ci gutimo gin me kwer mapol i nyima; pi meno, i kare ma aneno gin ma gutimo, atyekogi woko. “Camaria pe otimo bal ma romo nucu bal ma in itimo. Itimo gin me kwer mapol makato gin me kwer ma en otimo. Dok bene imiyo lumegini ginen calo jo ma kitgi atir ka giporogi kwedi, ki kit gin me kwer ducu ma doŋ ityeko timogi-ni. Doŋ kombeddi, in myero icir lewic. Balli doŋ rac atikatika makato bal pa lumegini ducu ma miyo ginen calo jo ma gipe ki bal mo-ni. Gin lokgi tye atir ma okato lokki. Kit meno in bene myero lewic omaki, dok myero icir cac ma gicayi kwede pien imiyo lumegini ginen calo jo ma kitgi atir.” Rwot owaco ki Jerucalem ni, “Abidwoko gumgi botgi, gum pa Codom ki gaŋi ma i ŋete, ki gum pa Camaria ki gaŋi ma i ŋete, Abidwoko gummi bene boti. Lewic bimaki i komi kekeni, dok bene cac ma gicayi kwede bikweyo cwiny lumegini. Gibibedo maber ki lonyo dok i, in bene kacel ki gaŋi ma i ŋeti ducu wubibedo maber kit ma yam con. I kare ma iwakke-ni onoŋo pe ibedo ka loko nyiŋ lameru Codom macalo lok aboka, i kare ma timmi maraco peya onen ka maleŋ-ŋi? Kombeddi doŋ ilokke idoko calo en, ginacaya pa jo Edom ki luwotgi ducu, ki pa jo Piliciti, jo ma gibedo cokcok ma gicayi-ni. Doŋ icir can malit pi bal me lewic ki gin me kwer mapol ma itimo.” Man Rwot ma owaco. Rwot Lubaŋa owacci, “Abitimi ma poro gin ma yam itimo, pien icayo kwoŋ meri dok bene ituro gicikke woko. Ento pud abipo i kom gicikkena ma aketo kwedi cakke i kare me tinoni. Doŋ abiketo gicikkena kwedi ma bedo nakanaka. Ibipo kit macalo ibedo kwede ducu, ci lewic bimaki ka akwanyo lameru madit ki lameru matidi adwokogi cen boti. Abimiyo doŋ gibedo macalo anyirani, ento pe pi gicikke man ma aketo kwedi-ni. Dok abimoko gicikkena kwedi, ci ibiŋeyo ni an aye a Rwot. I kare ma abiweko bal ducu ma yam itimo, ibipo i komgi ci lewic bimaki matek mada ma pe bene doŋ ibinamo dogi ka lok.” Man Rwot Lubaŋa ma owaco. Rwot oloko kweda. Owacci, “Wod pa dano, wac lok me koc lit, ci ilok carolok bot jo Icrael wek guŋe gin ma an Rwot Lubaŋa atye ka wacone. Yam tye ocur mo madit ma tye ki bwome madito, ma oyaro woko malac. Onoŋo yec kome nen mwonya mada ma tye ki raŋi mapol ma kitgi patpat. Otuk ocito i Lebanon ci oturo wi yat cedar me Lebanon woko. Oturo cwiny wi lano cedar me agikkine, ci ocito kwede otero wa i lobo pa lucat-wil, ci oketo i gaŋ pa lucat-wil. Dok okwanyo jaŋ yat ki obokene ki i lobo Icrael ci opito i lobo maberre ka ma pii dwoŋ iye wek odoŋ. Opito kit macalo gipito kwede yat ma doŋo i dog kulu, ci odoko yat olok ma ojany oluk lapiny, Jaŋe ojany okemo yo tuŋ bot ocur, ki lwite obedo ka ma yat ocuŋ iye, Kit meno ocako doko yat olok, ci oketo jaŋe mapol wa pote doŋ ocako lot oluk mada. “Ento yam onoŋo tye ocur mo mukene madit ma tye ki bwome madit ki yecce madwoŋ, Nen, lwit yat olok man olot oket ki piny i ŋom okemo yo tuŋ bote, ci oloko jaŋe ma pote oluk bene okemo yo tuŋ bote kun geno ni bimiyo ecwiyo pii muromo makato pii ma en limo i kabedo ka ma onoŋo en doŋo iye-ni. Ento onoŋo yam gipito i ŋom maberre ma tye i ŋet pii madwoŋ, wek oket jaŋe muteggi mapol, onyak nyige, wek odok yat olok ma pire tek adada.” Rwot Lubaŋa openyo kuman ni, “Yat olok man bidono maber ci bedo kwo? Ci ocur mukwoŋo-ni pe biputo woko ki lwite ducu, ci toŋo jaŋe woko, wek pote ma pud lot alota-ni otwo woko? Man pe bimito dano ma kome tek nyo lwak me rok ma gitek me putone woko ki lwite ducu. Ada, doŋ gipito, ento tika twero doŋo bedo kwo? Pe bitwo woko liweŋ ka ce yamo ma a yo tuŋ wokceŋ obino okodo matek i kome ci ocoro woko piny? Pe bitwo woko ki i kabedo ka ma onoŋo tye ka doŋo iye-ni?” Rwot owaco bota ni, “Peny jo magi ma gin Lujemo-ni ka ce giŋeyo te lok me carolok man. Wac botgi ni kabaka me Babilon obino i Jerucalem ci omako kabaka ki rwodine ci odok kwedgi cen i Babilon. Ci okwanyo latin ker acel, oketo gicikke kwede, kun omiye okwoŋo kwoŋ ni ebigwoko cikke meno. Omako jo madito ma nene oterogi woko wek ker doŋ okwe woko mot, pe dok oille malo, dok bene me neno ni gigwoko gicikkene wek ker ocuŋ. Ento kabaka me Juda ojemo woko ci ocwalo lukwena gucito i Ejipt, ka kelo bote lwak aguragura ki dul mony madit. Tika en biloyo lweny? En twero loyo pi timo gin ma kit meno? En twero turo gicikke ci riŋo bwot woko ma ps koŋ noŋo giketo can i kome? “Doŋ adada kit macalo atye kwo-ni,” man Rwot Lubaŋa ma owaco, “Kabaka-nu bito i Babilon, pien ocayo kwoŋŋe, dok oturo gicikke ma onoŋo en oketo ki kabaka me Babilon, ma okete me bedo i wi komker. Kadi ki Parao ki dul monnye matek-ki ki buca mony madit pe gibitwero konye ki lweny ka jo Babilon gutoro cel lobo gurumo woko pi neko lwak Jo mapol ma gibedo kenyo. Doŋ kit macalo en ocayo kwoŋŋe, kun oturo bene gicikke ma onoŋo en oketo, dok otimo gin magi ducu, pi meno en pe bibwot.” Mumiyo Rwot Lubaŋa owaco kuman ni, “An Lubaŋa makwo, pi meno abiketo can i kome pi kwoŋ ma okwoŋo i nyima ma en ocayo ki gicikkena bene ma en oturo woko-ni. Abiciko obwona wek omok iye, ci en bimoko i i owicca, abitere i Babilon ka doŋ acako ŋolo kop i kome ki kunnu pi lok roro ma en obedo ka ketone i koma. Lulweny ma giyerogi ayera gibinekogi woko ducu ki pala lucwan, ki jo ma gudoŋ makwo gibiket woko ata. Man bimiyo wuŋeyo ni an Rwot doŋ atyeko loko lok man.” Rwot Lubaŋa owaco kuman ni, “An kikoma aye ma abikwanyo cwiny yat cedar matocone-ni ki i lano wiye, abituro ki malo kunnu, an kikoma aye abipito, abipito i wi got mabor ma tye i Icrael-li; wek ojany iye mapol onyak nyige, ci odok yat madit wek kit kwa lee ducu me tim gubin gubed i tere; ki kit kwa winyo ducu gibigero odigi i tipo jaŋe ducu. Doŋ yadi ducu me tim biŋeyo ni an a Rwot aye ma amiyo yat madit ma odono mabor doko yat matidi, ki yat matidi amiyo doko yat madit ma odoŋo mabor, dok bene amiyo yat madyak two woko, ka amiyo yat mutwo pote lot ci luk mada. An Rwot doŋ atyeko loko lok man, dok bene abitiyo gin ma onoŋo doŋ awaco.” Rwot oloko kweda. Owacci, “Man kit carolok aŋo ma dano gibedo ka nwoyone teretere ma okemo lobo Icrael-li? ‘Kwarowa gucamo nyig olok mawac, man odino lak litino woko.’ “Doŋ kit macalo atye kwe-ni,” man Rwot Lubaŋa ma owaco, “pe doŋ wubiloko carolok man wunwoyo i Icrael matwal. Nen, kwo pa wego nyo pa latin ducu mera. Dano ma timo bal bito. “Koŋ itam pi dano ma kite atir, ma tiyo gin ma cik mito dok ma tye atir. En pe woro cal jogi pa Luicrael dok bene pe camo lee me gitum ma gityero i Waŋ jogi. En pe balo dako pa lawote, dok bene pe bedo ki dako i kare ma noŋo dako-nu twoyo two kwer. En pe uno dano mo dok bene pe yako jami pa ŋat mo. En kwanyo jami ma labanyane ojeŋo bote dwoko cen bot labanyane; miyo kwon bot jo ma kec nekogi, dok bene miyo boŋŋi me aruka bot jo ma tye munero. En pe miyo lim me den wek enon iye magoba., En kwero timo gin marac ento ŋolo kop ki ada ki gen i kin dano. En Lubo cikka ducu dok bene gwokke twatwal kun tiyo gin ma an aciko ducu. En kite atir doŋ pi meno adada en bibedo kwo,” man Rwot Lubaŋa ma owaco. “Pi meno ka gwok nyo en onywalo wode ma layak dok lanek dano bene, meno noŋo en otimo gin ma yam wonne pe otimo. En camo riŋo lee ma gityero i Waŋ jogi, dok bene balo dako pa lawote woko, En uno lucan ki jo ma piny obwoyogi, en yako jami pa dano, dok gwoko gin ma labanyane oketo bote macalo gi-jeŋ pe kwanyo dwoko cen bote. En woro cal jogi, dok bene timo gin me kwer ma pe wacce, en bene miyo lim me den kun noŋo mito ni enoŋ iye magoba. En tika bibedo kwo? Pe bibedo kwo. En doŋ otyeko timo gin me kwer magi ducu, pi meno en bito pigi. Alii me tone bibedo i wiye gire kene. “Koŋ iket ni dano-ni onywalo wode. Latin-nu neno kit bal ducu ma wonne otimo, ci bedo ki lworo, pe timo lakodi bal ma wonne otimo-ni. En pe woro cal jogi pa Luicrael, dok bene pe camo riŋo lee me gitum ma gityero i waŋ jogi. En pe balo dako pa lawote, pe timo ŋat mo marac, pe bene yako jami pa ŋat mo. En pe kwanyo gin mo me aketa macalo st-ieo kadi ki acel. En miyo kwon bot jo ma kec nekogi dok bene miyo boŋŋi me aruka bot jo ma tye munero. En kwero timo gin marac, pe miyo lim me den wek enoŋ iye magoba. En lubo cikka dok bene gwoko gin ma an aciko ducu kun tiyo bene. Pi meno en pe bito pi bal pa wonne; ento adada en gire bibedo kwo. Ento wonne bito pi balle; pien otimo tim me bura, dok oyako ominne bene, otimo gin ma pe nen maber wacel i kin lutugi. “Doŋ in ipenyo ni, ‘Piŋo latin pe myero onen can pi bal pa wonne?’ Lagam me peny man tye kit man ni, latin otiyo gin ma cik mito dok ma tye atir, dok bene ogwokke twatwal kun tiyo gin ma an aciko ducu. Adada en gire bibedo kwo. Ento dano ma timo bal bito mere. Latin pe bineno can pi bal pa wonne, kadi ki wego bene pe myero olim can pi bal pa wode, Dano ma kite atir gire bilimu bakacic pi gin ma tye atir ma en otiyo, ki latim marac bene bilimo can pi gin maraco maen otimo. “Ento ka dano ma latim marac olokke oweko timo bal ducu ma yam en otimo, ce olubo cikka kun tiyo gin ma cik mito dok ma tye atir, adada, en bibedo kwo; pe bito. Balle ducu ma yam en otimo an abiwekogi ducu, ci en bibedo kwo, pien otiyo gin ma tye atir.” Rwot Lubaŋa openyo ni, “Hamo ni cwinya bedo yom me neno ka latim marac to? Pe gire, amito en oŋuti owek timo bal ci olokke odwog bota wek obed kwo. “Ento ka ce dano ma kite atir olokke oweko tiyo gin ma tye atir woko ce ocako timo bal, kun timo bene gin me kwer kit ma latim marac timo-ni, tika en bibedo kwo? Doŋ gin ma tye atir ducu ma en otimo pe gibipo pire kadi ki acel. En bito pi lok roro ki pi bal mapol ma en otimo. “Ento wunjo Icrael wuwacci, ‘Gin ma Rwot tye ka timone-ni pe atir.’ Ento pe gin ma wun wutimo-ni aye ma pe atir dok pe kakare? Ka dano ma kite atir olokke oweko tiyo gin ma’ tye atir ce ocako timo bal, en bito pi ballenu. En bito pi bal ma doŋ otyeko timone. Ka dano ma latim marac oŋut i kom tim maraco ma en otimo ce olokke ocako tiyo gin ma cik mito dok ma tye atir, ci en bilaro kwone. Doŋ kit macalo en obedo ka lwodo lok ki i cwinye ci oŋut olokke oweko timo bal ducu ma yam obedo ka timogi, adada en bibedo kwo, pe bito. Ento wun jo Icrael pud wuwacci, ‘Gin ma Rwot tye ka timone-ni pe atir dok pe kakare.’ Wutamo ni gin ma atye ka timone pe atir dok pe kakare? Ento gin ma wun wutimo-ni aye ma pe atir dok pe kakare. “Pi meno abiŋolo kop i komwu, wun jo Icrael, aŋolo kop pa dano acel acel kun lubo gin ma en otimo. Wuŋuti ci wulokke wuwek timo bal, pe wuwek balwu otyekwu woko. Doŋ wuwek bal ducu ma yam wubedo ka timone i koma-ni, wucak doŋ bedo ki tam manyen dok ki cwiny manyen bene. Piŋo wun jo Icrael wumito ni wuto woko? Pe amito ni dano mo oto,” man Rwot Lubaŋa ma owaco. “Wulokke wuwek timo bal wek wubed kwo.” Wucak wer me kumo pi rwodi me Icrael, kun wuwero ni, Meni nene ubedo macalo minlabwor i kin lwak labwor! Obuto i kin litino labwor, kun pito litinone. Opito latinne acel ci opwonyo ki dwar; odoko wod labwor madit, ci obedo ka mako dano kun camogi woko. Rok mapol guwinyo pire ci gudoŋo oduru i kome; ci gukwinyo bur guweko en opoto iye. Gugole woko ki goli gukete I canduk ci gutere i lobo Ejipt, Ka minne doŋ oneno ni gibodo wiye noŋo, ma genne doŋ orwenyo woko, okwanyo latinne mukene oloko odoko wod labwor. I kare ma doŋ odoŋo, obedo ka wot kacel ki labwor mukene-gu. Opwonyo dwar kit me mako lee; ci obedo ka mako dano kun camogi woko. Oturo cel gogogi otyeko woko ducu, oketo gaŋigi woko ducu omiyo odoko wi obur; mumiyo jo ma gibedo i lobo ineno gubedo ki ur dok ki lworo madwoŋ, i kare ma noŋo en koko Jo me rok ducu gucokke ka lweny i kome; guciko owic woko i kabedo ducu me make, guciko obwogi gurume kwede woko; ci opoto woko i bur ma gin gukwinyo, Gugole woko ki goli ci gukete i canduk, ci gutere woko wa bot kabaka me Babilon. Gutere gukete i ot mabuc, wek pe doŋ giwiny kokone matwal i wi godi me Icrael. Meni yam obedo calo yat olok ma gipito i poto olok ma tye i ŋet pii. Pi pii madwoŋ ma onoŋo tye, omiyo oketo jaŋe mapol dok onyak nyige mabup. Jaŋ olok man onoŋo gitego mada, mumiyo odoŋo ci odoko odoo ker pa luloc. Olok man odoŋo mabor adada ma wiye mito gudo polo. Dano ducu guneno kit ma pote oluk kwede ki kit ma borre onoŋo tye kwede. Ento giputo olok woko ki lwite ducu ki kiniga, ci gibolo woko i ŋom. Yamo oa ki wokceŋ, okodo, ci otwoyo nyige woko. Gituro jaŋe-gu woko ducu; gutwo ci giwaŋo woko ki mac, Kombeddi dok ginako dok gipito i tim aroo, i lobo mutwo ma pii pe iye, Mac omoko ci olyel woko i kor yat olok; mac owaŋo jaŋe ki nyige-gu woko ducu liweŋ, Jaŋe ducu doŋ pe bibedo tek doki, odoo ker pa laloc pe doŋ bibedo iye. Man wer me kumo ma gibedo ka werone kare ki kare, Ludoŋo mogo ki i kin ludoŋo pa io Icrael gubino ka penyo dog Rwot i nino dwe apar dwe me abic, i mwaka me abiro, ci gubino i nyima. Rwot oloko kweda kun wacci, “Wod pa dano, lok ki ludoŋo pa Icrael-li, kun iwaco botgi ni, Rwot Lubaŋa owaco kuman ni, ‘Man wun wubino ka penyo doga bo? Kit macalo atye kwe-ni, pe wubipenyo doga. Man Rwot Lubaŋa ma owaco.’ “Wod pa dano, ibiŋolo kop i komgi? Ci doŋ iŋol kop i komgi. Po wigi i kom gin me kwer ma yam kwarogi gutimo. Tit botgi lok ma atye ka wacone-ni. I kare ma ayero Icrael, akwoŋo kwoŋ bot likwayo pa Yakobo. Anyutte botgi i lobo Ejipt, kun awaco botgi ni, ‘An a Rwot Lubaŋawu.’ I kare meno bene en aye acikke kwedgi ni abikwanyogi woko ki i lobo Ejipt ci aterogi i lobo ma ayero pigi, lobo ma mol cak ki moo kic, ma en aye lobo me deyo adada makato 1000 mukene-gu ducu, Awaco botgi bene ni gubol cal jogi me kwer ma gimaro-gu woko, dok ni pe myero gubal komgi ki lubaŋa mogo me gobagoba pa jo Ejipt, pien an aye a Rwot Lubaŋagi. Ento gin gujemo i koma gukwero winyo lokka. Gin ducu pe gubolo cal jogigi me kwer ma gimaro-gu woko dok bene pe gubwoto woro lubaŋa pa jo Ejipt me gobagoba-ni, “Mumiyo atamo ni onoŋo myero aony akemona i komgi dok ato kinigana woko i komgi ki i dye lobo Ejipt. Ento pe doŋ atimo gin ma onoŋo atamo ni abitimo-ni, pien meno onoŋo twero miyo pe giworo nyiŋa, miyo bene gipyedo nyina i kin lurok ka ma onoŋo jo Icrael gibedo iye; pien yam aloko bot jo Icrael ki i nyim jo ma gin gibedo i kingi ni abikwanyo jo Icrael ki i lobo Ejipt akelogi woko. “Kit meno akwanyogi woko ki i lobo Ejipt ci akelogi wa i dye tim. Amiyogi cikka dok anyuto botgi gin ma an aciko ducu, kun noŋo ŋat ma gwoko cikka aye bedo kwo. Amiyo botgi ceŋ cabit ni gin gugwoki, ma en aye lanyut ma tye i kin an ki gin, wek guŋe ni an Rwot aye ma alonyogi miyo gibedo maleŋ, Ento jo Icrael gujemo woko i koma ki i tim, pe gulubo cikka dok bene gukwero tiyo gin ma an aciko ducu, kun noŋo ŋat ma gwoko cikka aye bedo kwo. Gupyedo cabitta woko marac adada. “Mumiyo atamo ni onoŋo myero aony akemona woko i komgi ki i dye tim, wek atyekgi woko liweŋ matwal. Ento pe doŋ atimo gin ma onoŋo atamo ni abitimo-ni, meno onoŋo twero miyo pe giworo nyiŋa, miyo bene gipyedo nyiŋa i kin lurok kun an akwanyo jo Icrael ki i lobo Ejipt akelogi woko ma gin bene gineno-ni. Dok bene yam akwoŋo kwoŋ botgi ki i tim ni pe doŋ abiterogi i lobo ma onoŋo doŋ atveko miyone botgi, lobo ma mol cak ki moo kic, ma en lobo me deyo adada makato lobo mukene-gu ducu. Akwoŋo kwoŋ pien onoŋo gukwero lubo cikka, dok bene pe gubedo ka tiyo gin ma an aciko ducu, gupyedo cabitta bene. Gumaro gigi woro cal jogigi. Ento kica omaka i komgi, Pe anekogi woko dok bene pe atyekogi woko ki i tim kunnu, Awaco bot litino ni, ‘Pe wulub cik ma yam kwarowu guketo; pe wulub kitgi, dok bene pe wubal komwu ki cal jogigi-ni, An Rwot aye Lubaŋawu. Wulub cikka dok bene wugwokke kun wutiyo gin ma an aciko ducu. Wugwok cen cabitta obed nino maleŋ, wek obed lanyut me cikke ma waketo i kin an ki wun, wuŋe ni an aye a Rwot Lubaŋawu.’ “Ento litinogi gujemo woko i koma; pe gulubo cikka dok bene pe gugwokke me tiyo gin ma an aciko ducu, kun noŋo ŋat ma gwoko cikka aye bedo kwo. Gupyedo cabitta woko. Mumiyo atamo ni onoŋo myero aony akemona i komgi dok ata kinigana woko i komgi ki i dye tim. Ento ajuko ciŋa, pe doŋ atimo gin ma onoŋo atamo ni abitimo-ni, meno noŋo twero miyo pe giworo nyiŋa, miyo bene gipyedo nyiŋa i kin lurok, ka ma an akwanyo jo Icrael ki i lobo Ejipt akelogi woko ma gin bene gineno-ni, Dok bene akwoŋo kwoŋ mukene ki i tim ni abiketogi woko i kin lurok, akeyogi wako i wi lobo ducu. Atimo man pien gukwero lubo cikka dok bene gukwero tiyo gin ma an aciko ducu, gupyedo cabitta, dok gubedo ka woro cal jogi ma yam kwarogi guworo-ni, Lacen dok amiyo botgi cik maraco kun acikogi ki kit cik mogo ma pe twero miyo dano bedo kwo. Amiyo gubalo komgi ki mot mapatpat ma gityero bot cal jogi, dok bene amiyo gutyero litino kayogi ma co calo gitum awaŋa, Atimo man pi miyogi lworo madwoŋ ki pi keto can i komgi; wek guŋe ni an aye a Rwot. “Mumiyo kombeddi doŋ in wod pa dano, lok ki jo Icrael kun itito lok ma atye ka wacone botgi, Yo mukene ma yam kwarogi guŋayo kwede waŋa en aye ni yam gutiyo gin ma pe atir i koma. Akelogi i lobo ma yam onoŋo acikke ni abimiyo botgi. I kare ma guneno cere ki yadi ma potgi oluk i kabedo ducu, ci gutyero gitum woko ducu kunnu. Guŋeto cwinya oweko kiniga omaka pi gitum awanagi ma guwaŋo, ki pi gityer amata ma gukelo guonyo kunnu-ni, Apenyogi ni, ‘Waŋ jogi magi ma wucito iye-ni gin gin aŋo?’ Mumiyo nyiŋe gilwoŋo ni Bama nio wa onyoo, Kombeddi doŋ itit lok ma an atye ka wacone-ni bot jo Icrael. Piŋo wumito ni wutim lakit bal acel ma yam kwarowu gutimo-ni kun bene wuŋak woko wubedo ka woro cal jogi? Kadi bed wa i kare man pud wutyero lakit mot acel-lu dok bene wutyero awobewu i wi mac me gitum awaŋa, mumiyo wubalo komwu kekenwu pi woro cal iogiwu-gu ducu. Wun jo Icrael pud dok wubibino ka penyo doga? Kit macalo atye kwe-ni, pe wubipenyo doga. Man Rwot Lubaŋa ma owaco. Doŋ wutyeko moko tamwu eoko kun wumito wubed calo jo me rok mukene, wumito wubed calo jo me kaka ducu ma tye i wi lobo ducu, wek wuwor yadi ki godi, ento meno pe bitimme matwal.’ “Kit macalo atye kwe-ni, abilwenyo i komwu ki tekona ducu, ki akemona ma aonyo woko i komwu, ci doŋ abibedo kabaka ma loyowu. Man Rwot Lubaŋa ma owaco. Abinyuto twerona botwu kun aonyo akemona woko i komwu ka acokowu woko ducu ki i kin lurok ma i wi lobo ducu ka ma yam gikeyowu wucito iye, ci akelowŋ aketowu kacel. Abikelowu i tim pa lurok, ka doŋ abiŋolo kop i komwu ki kunnu waŋ ki waŋ, Kit macalo yam aŋolo kop i kom kwarowu i dye tim i lobo Ejipt, abiŋolo kop i komwu bene kit meno.” Man Rwot Lubaŋa ma owaco. “Abimiyo wukato ki acel acel ki te odoo ker ma giriyo, abimiyo wugwoko gicikke ma aketo kwedwu. Abikwanyo jo ma gin lujemo ki jo ma gin lutim bal i koma woko ki i kinwu. Abikwanyogi akelogi woko ki i lobo ka ma yam gubedo ka wot iye macalo welo, ento pe gibidonyo i lobo pa jo Icrael. Man bimiyo wuŋeyo ni an aye a Rwot.” Rwot Lubaŋa owacci, “Kombeddi doŋ wun jo Icrael, wun ducu wucit wuti giwu but cal jogiwu. Ento acikowu matek mada ni lacen i ŋe man myero doŋ wuwiny lokka, ma pe doŋ wupyedo nyiŋa maleŋ-ŋi matwal, dok pe doŋ wutyero motwu bot cal jogi bene.” Rwot Lubaŋa owacci, “Wun jo Icrael ducu wubiwora ki kunnu i lobo meno, i wi got mera maleŋ, ki i wi got me lobo Icrael mabor-ri. Doŋ cwinya bibedo yom i komwu ki kunnu, ci abimito motwu, ki motwu mabeco makato ducu me gityer, ki gityerwu maleŋ. Lacen ka doŋ acokowu woko ducu ki i kin lurok ma i wi lobo ducu ka ma yam gikeyowu wucito iye akelowu aketowu kacel, abijolo gitum awaŋawu ma ŋwece kur me lakwe cwiny. Ci doŋ abinyutte botwu ni an aleŋ dok rok ducu gibineno man ki waŋgi. Ka doŋ akwanyowu adwokowu cen i lobo Icrael, en lobo ma yam akwoŋo pire ni abimiyo bot kwarowu-ni, ci wubineyo ni an aye a Rwot. Wubipo pi balwu ki gin ducu me kwer ma wutimo mumiyo wubalo komwu woko kekenwu. Wubibedo ki keccwiny i komwu kekenwu pi gin maraco me lewic ma wutimoni. Wun jo Icrael wubineyo ni an aye a Rwot, pien pe atiyo kwedwu kun lubo gin maraco ma wutimo, nyo muporo kitwu marac, ento atiyo kwedwu kun aawoko deyo me nyiŋa wek giwora.” Man Rwot Lubaŋa aye ma owaco. Rwot Lubaŋa oloko kweda. Owacci, “Wod pa dano, nen yo tuŋ acuc. Wac lok i kom kabedo ma tye yo tuŋ acuc, dok bene itit lok i kom lobo buŋa me Negeb. Wac ki buŋa me Negeb owiny gin ma Rwot tye ka wacone ni, Nen, abemoko mac, ci abiwaŋo yadi mutwo ki yadi madyak ducu woko ki i in! Gin mo ma bineko leb mac man ma lyel-li pe. Mac man biwaŋ nya cakke ki yo tuŋ acuc o kwede wa yo tuŋ acam ci waŋo kabedo ducu. Dano ducu gibineno ni an Rwot aye ma acwinyo mac man wek ŋat mo pe onek woko.” Ci awacci, “Rwot Lubaŋa, dano ducu giwaco lok i koma ni, ‘Piŋo en bedo ka lok kwedgi i carolok me koc-lit kare ducu?’ ” Rwot oloko kweda. Owacci, “Wod pa dano, cik waŋi inen Jerucalem ci itit lok mukemo kabedone ducu maleŋ ka ma dano giworo iye Lubaŋa-ni, Tit lok bene mukemo lobo Icrael. Wac bot dano ducu ma gibedo i lobo Icrael ni, an a Rwot awacci, ‘At ye ki lok i komwu. Abiwoto pala lucwanna woko ki i akurane, ci anekowu woko ducu, jo ma kitgi atir ki jo ma gin lutim maraco ducu. Doŋ ka atiyo man, abitic ki pala lucwanna kun anekowu woko ducu, jo ma kitgi atir ki jo ma gin lutim maraco, cakke ki yo tuŋ acam o kwede wa yo tuŋ acuc. Dano ducu gibiŋeyo ni an a Rwot doŋ awoto pala lucwanna woko ki i akurane; pe doki gibidwoko i akurane matwal.’ “Wod pa dano, cur calo cwinyi mito dem kun noŋo gen mito rwenyo woko. Cur ki keccwiny madit mada i kabedo ka ma jo ducu twero neni. Ka inen dano gupenyi ni piŋo it ye ka cur, ci itit botgi ni pi lok man ma mito timme-ni. Tit botgi ni ka inen lok man bitimme cwinygi bipoŋ ki lworo. Ciŋgi bikwe woko doko goro. Tekcwiny ma yam gitye kwede bitum wako. Coŋgi bene bibedo ka myel amyela calo pii ma tagge. Nen, kare doŋ obino woko; lok man doŋ bicobbe kakare.” Man Rwot Lubaŋa ma owaco. Rwot owacca ni, “Wod pa dano, tit lokka. Tit lok ma an atye ka waconeni bot dano ni, ‘Palalucwan, palalucwan doŋ gipako lake woko mabit, dok bene gijwayo kome olil woko maber. Gipako lake mabit me neko dano, gijwayo ni wek omeny calo lutkot. Ŋat mo ma twero jukone pe; pien wun doŋ wukwero winyo tamma ma amiyo botwu. Doŋ gimiyo pala Lucwan gitye ka rudone, wek doŋ obed maber ma giromo makone. Doŋ gipako lake woko mabit dok bene gijwayo kome woko wek doŋ gimi woko i ciŋ lanek dano. Wod pa dano, daŋŋe matek kun ikok kwede, pala lucwan man gimiyo pi neko jona, ki pi neko rwodi ducu me Icrael. Gibinekogi woko kacel ki jona ma gudonne-gu ducu. Mumiyo myero idoŋ emi pi gen ma doŋ orwenyo woko!’ “Man gitye ka temowu atema. Ento ka pud wumedde ki kwero winyo tam ma gimiyo botwu, ci doŋ wutamo ni gin ma kit magi pe bitimme?” Man Rwot Lubaŋa ma openyo. “Kombeddi doŋ, wod pa dano, tit lokka. Doŋ ciŋi, ci pala lucwan bibino piny kiryo nyo kidek. Man pala lucwan ma neko mere dano, pala lucwan ma miyo lworo dok ma neko dano tyeko woko ducu. Pala lucwan man miyo tekcwiny pa jona rwenyo woko, ki Jo mapol gibipoto i dog gaŋi ducu. Doŋ atyeko miyo pala lucwan ma mil amila; gijwayo meny calo lutkot ma wil, doŋ gityeko rudone woko bene pi neko dano. Ŋol tuŋ acuc ki tuŋ acam, in pala lucwan mabit-ti! Ci an bene abidoŋo ciŋa, kinigana doŋ bitum woko. An Rwot ‘doŋ aloko.” Rwot doki oloko kweda. Owacci, “Wod pa dano, pur yo aryo ka ma kabaka me Babilon bibino ki iye ki pala lucwanne. Gin yo aryo ducu gia ki i lobo acel-lu, Doŋ icib bao aryo me lanyut yo i agikki yo ma cito ka donyo i gaŋ. Lanyut acel binyuto yo ma cito i Raba ma en aye gaŋ pa jo Ammon, ki mukenene-ni binyuto yo ma cito i Juda, ma cidonyo wa i dye Jerucalem kikome ma girumo woko ki cel gogo matek-ki. Kabaka me Babilon ocuŋ i aŋaka ŋaka yo aryo ka ma gicibo iye bao me lanyut yo-ni. Kabaka ocuŋ kenyo ka tyeto tyet, wek enen yo mene ma myero elubi; oyeno atero-gu, ka openyo cal lubaŋane, ci oŋiyo cwiny lee ma gityero me gitum. Doŋ kwir ma en omako i ciŋe lacuc nyuto Jerucalem. Man tito bote me ŋamo doge me koko, ki me daŋŋe ki dwan me mony, me keto yat latwom cel orum gaŋ woko bene; ki toro cel lobo orum gaŋ woko. Man binen macalo tyet me goba ki tuŋ bot jo Jerucalem, pi kwoŋ maleŋ ma doŋ gukwoŋo-ni, Ento lok man opoyo wigi i kom balgi ci nyuto ni gibimakogi woko. Man aye gin ma an Rwot Lubaŋa atye ka wacone. Wumiyo gipo i kom balwu, mumiyo balwu ginyuto giyaro ka maleŋ. Dano ducu giŋeyo ni wubalo. Dok wunyuto balwu woko i gin ducu ma wutiyo. Doŋ atyeko ŋolo kop woko i komwu, pi meno abimiyowu woko i ciŋ lukworwu. “Ninoni tye ka bino, in latim marac, rwot marac ma loyo Icrael, en aye nino ma gibiketo iye can i komi me agikki. An Rwot doŋ aloko. Kwany lalukana ki kitambara labo wic woko ki i wii. Pe tye gin mo ducu ma bibedo kit macalo gitye kwede-ni. Abitiŋo lucan malo ka maber! Jo ma gitye ki twero me loc-ci gibidwokogi woko piny! Abimiyo gaŋ man doŋ doko wi obur, wi obur, wi obur! Ento gin man pud pe bitimme nio wan ma ŋat ma doŋ ayero me keto can i kom gaŋ-ŋi obino. Lubaŋa biŋolo kop i kom jo Ammon “In wod pa dano, tit lok kun iwacci, Rwot Lubaŋa doŋ owaco lok mukemo jo Ammon, ki kit ma gitye kwede ka yeto jo Icrael. Wac botgi ni, ‘Pala lucwan, pala lucwan doŋ giyubo woko me neko dano; doŋ gijwayo woko tye ka meny amenya calo lutkot ma wil.’ Tit bot jo Ammon ni ginanyuta ma gineno i waŋ lek-gu ducu goba, dok bene gityeto tyet me’ goba me bwologi. Ninogi tye ka bino, gin jo maraco, en aye nino ma gibiketo iye can i komgi me agikki, Gibiŋolo ŋutgi woko ki pala lucwan. “Dwok pala lucwan i akura kakare. Abiŋolo kop i komi i kabedo ka ma yam kwoni ocakke iye, i lobo ka ma yam ginywali iye. Abionyo kinigana i komi; dok bene abikuto mac me akemona i komi miyo iwinyo arem malit twatwal. Abimiyi woko i ciŋ jo mager ma gin lutim bwami marac ma giŋeyo neko dano twatwal, ci gibineki woko, Gibiwani woko ki mac. Gibineki woko i lobowu kikome, pi meno ŋat mo ma bipo piri doŋ bedo pe matwal. Pien an Rwot doŋ atyeko loko.” Rwot dok oloko kweda. Owacci, “In wod pa dano, in tika iyubbe me ŋolo kop i kom gaŋ man ma opoŋ ki lunek mapol twatwal-li? Tit bot jo Jerucalem gin me kwer ducu ma doŋ gutyeko timone-ni. Wac botgi ni, Rwot Lubaŋa owaco kuman ni, Aya, doŋ wutyeko neko jo mapol ma gibedo i gaŋ man, dok bene doŋ wubalo komwu kekenwu pi woro cal jogi, pi meno karewu tye ka bino. Doŋ wutiŋo alii pi dano ma wunekoni, dok bene komwu oballe woko pi cal jogi ma wutiyogi-ni; mumi yo doŋ wudiro niŋowu onyiko cok, kare me mwakawu ma giciko doŋ oo pi meno amiyo wudoko ginacaya bot lurok ducu, ki ginaŋala bot jo me lobo ducu. Jo ma gitye cok kwedwu ki jo ma gitye ka maboco ducu gibinalowu, wun lo ma nyinwu doŋ oballe woko, ma tye ka koko licur-ri. Nen, rwodi ducu me Icrael ma gitye i gaŋ man, gigene tekogi ci gibedo ka neko dano. Pe tye ŋat mo i gaŋ man ma woro lunyodone Gibedo ka uno labedo; dok gitime litino kic ki monto marac twatwal Gubedo ka cayo jamina maleŋ-gu dok bene gupyedo cen cabitta. Tye jo mogo i kinwu ma giloko lok me toŋo dano wek ginek woko. Jo mukneu i kinwu gicamo cam ma gityero bot cal jogi i waŋ jogi ma tye i wi godi. Gitime tim kipyeda twatwal i dye gaŋ. Dano gibedo ki megigi ki ci-wegigi i Jeruca lem; dok bene gidiyo mon i kare ma noŋo gitwoyo two kwer tetek ci gibutu kwedgi. Gitimo gin me kwer bene kun gitimo abor ki mon pa luwotgi Jo mukene gitimo tim kipyeda i koo ci-wodgi, ki jo mukene gibalo k lumegigi ima anyira pa wegtgi kikome jo mogo gineko dano pi lim ma noŋo giculogi kwede jo mukene limo magobi madwoŋ, ki noŋo lim mukene pi yako jami pa luwotgi tektek; mumiyo wigi doŋ owil woko i koma.” Man Rwot Lubaŋa ma owaco. “Nen, pi meno doŋ abiŋino Ciŋi me lweny i kom jo Jerucalem pi magoba ma gulimo i yo ma pe atir-ri, ki dok bene pi lok me neko dano ma wubedo ka nekogi i dye gaŋ man. Tika wubibedo ki tekcwiny me ciro lweny` ki ciŋwu kono bibedo tek ma romo lweny i nino ma abilweny iye i komwu’ An Rwot doŋ atyeko loko, dok bene abitiyo. Abikeyowu woko i kin lurok, dok amiyo wuket i wi lobo ducu ci doŋ abityeko tim marac woko Iiweŋ ki i gaŋ man. Nyiŋwu biballe ma lurok ducu gineno; ci man bimiyo in Jerucalem iŋeyo ni an aye a Rwot.” Rwot owacca ni, “Wod pa dano jo Icrael doŋ gudoko gin ma konygi pe ki tuŋ bota. Gin ducu gudoko calo cet nyonyo, ryal, mola, koc, nyonyo ki racac mapek ma gitye ka liyone i ruk mac. Pi meno Rwot Lubaŋa owac kuman ni, Doŋ kit macalo wudoko cet ryal-li, pi meno, wunen abicokowu agurowu woko kacel i dye gaŋ me Jerucalem. Kit macalo dano coko ryal, mola, nyonyo, ki nyonyo racac mapek ki koc ci ketogi i ruk mac ci kuto mac i kome wek oleny woko, kit meno bene an abicokowu woko ki kinigana kacel ki akemona, ci abiketowu i mac ci alenyowu woko. Abicokowu ci akuto mac me akemona i komwu, ci wubileny woko i dye gaŋ. Kit macalo gilenyo ryal i ruk mac, wun bene gibilenyowu woko i dye gaŋ kumeno; ci wubiŋeyo ni an Rwot doŋ aonyo akemona woko i komwu.” Rwot dok oloko kweda, Owacci, “Wod pa dano, tit ki jo Icrael ni gin jo ma pe leŋ, dok jo ma kot pe ocwer i komgi i kare me kinigana, Rwodigi ducu gicalo labwor ma kok kun tye ka kilo riŋo lee ma en omako. Guneko dano gutyeko woko; guyako lonyo kacel ki jami me wel-gu ducu. Gumiyo mon mapol gudoko mon-to i dye gaŋ me Jerucalem. Ajwagigi ducu gukwero lubo cikka, dok bene gupyedo jamina maleŋ-gu woko. Pe guketo nipoko i kin jami maleŋ ki jami me nino ducu. Pe bene gupwonyo dano ki nipoko ma tye i kin gin ma keni ki gin ma pe keni, dok bene pe gubedo ka gwoko cen cabitta, meno omiyo gitye ka pyeda i kin jona, Rwodi ma gitye i Jerucalem ducu gicalo orudi ma tye ka kilo riŋo lee ma gumako, ma gioyo remo pa dano, kun gineko dano woko liweŋ wek ginoŋ magoba i yo ma pe atir. Lunebigi bene gubedo ka buko cel woko ki rani matar, ma gineno bene ginanyuta me gobagoba, dok bene gityeto botgi tyet me goba keken kun giwacci, ‘Rwot Lubaŋa owaco kuman,’ ma kun noŋo Rwot gire pe oloko lok mo. Jo me lobo man doŋ gunyebbe ki timo buma ci giyako jami pa dano woko. Guuno lucan kacel ki jo ma piny obwoyogi, kun gibumo lurok ma gibedo i kingi marac twatwal. Onoŋo abedo ka yenyo dano mo ma myero oger cel mupoto-ni kun cuŋ i nyima ka mubar-ri pi lobo man, wek pe ajwer woko; ento pe amedo ki noŋo ŋat mo wacel. Pi meno omiyo aonyo kinigana woko i komgi; awanogi woko ki mac me ake-mo, ci aculo kwor i komgi pi gin ducu ma yam gutimo.” Man Rwot Lubaŋa ma owaco. Rwot oloko kweda. Owacci, “Wod pa dano, yam tye mon aryo, ma gin anyira ma megigi acel. I kare ma onoŋo gin pud litino anyira, ma gibedo i Ejipt, gubedo ka timo tim kwele kwele; dano gibedo ka kwako korgi kun gimako tunogi ma ogulo-gu, Nyako maditte-ni onoŋo gilwoŋo nyiŋe ni Okola, ki laminne onoŋo nyiŋe gilwoŋo Okoliba. Anyomogi gudoko monna ici gunywalo litino co ki litino anyira. Okola aye Camaria, ki Okoliba aye Jerucalem. Okola otimo tim kwele kwele ma kun an doŋ anyome woko, ci cwinye omaro jo Aciria twatwal, ma lulweny ma guruko boŋo ma obedo lamar lamar, luloc me dul lobo ki ludito wi mony, gin ducu awobe mabeco ma ginen mwonya mada; gin wegi aguragura ma giriŋo ki aguragura. En omine kene ka timo tim kwele kwele kwedgi, gin oyita lweny me Aciria ma giyerogi ayera. Ci obalo kome, woko kekene ki woro cal jogi pa jo ducu ma en omarogi-ni. En yam pe oweko timo tim me malayane-ni ma en obedo ka timone ki i Ejipt i kare ma pud en nyako; co gubuto kwede gukwako kore gunyono tunone mugulo-ni, kun gutyeko mitigi woko i kome calo gubedo ki malaya, Pi meno, amiye i ciŋ pacoge, i ciŋ jo Aciria ma en omarogi-ni. Jo meno guweke odoŋ munero, gumako awobene ki’ anyirane; ento en guneke woko ki pala Lucwan. Ci odoko lok aboka i kin mon, i kare ma doŋ giŋolo kop woko i kome. “Laminne Okoliba oneno tim man, ento en dok onoŋo rac atika makato laminne Okola i marre ki i tim kwele kwelene, ma doŋ obedo rac ma okato pa laminne woko. En omaro jo Aciria luloc me dul lobo ki ludito wi mony, lulweny ma gurukke woko ki jami lweny ducu, wegi aguragura, ma giriŋo ki aguragura, gin ducu awobe mabeco ma ginen mwonya mada. Ci aneno en doŋ oballe woko, gin anyira aryo ducu gubedo ka timo tim kwele acel-lu, Ento en obedo ka medde ameda ki tim kwele kwelene-ni; ci oneno cal co ma gigoro i kom ot, ki cal lubaŋa pa jo Kaldaya ma gidero woko ki raŋi makwar, ma gutweyo pyergi ki del, ma gin ducu guboyo wigi woko ki kitambara maboco me boyo wic; gin ducu ginen calo jo ma tye ki rwom me tic madito; meno obedo cal pa jo Babilon ma lobogi kikome aye Kaldaya. Cutcut i kare ma en onenogi cwinye ocako pyette i komgi, ci ooro lukwena gucito hotgi i Kaldaya. Ci jo Babilon gubino bote gubuto kwede i wi kitanda me mar, gubale woko ki tim me abor ma gutimo i kome, lacen ma doŋ gimiyo en onyobbe woko ki bal, ci en olokke woko ki botgi ma onoŋo cwinye ocido woko marac twatwal. I kare ma en omedde ki tim kwele kwelene-ni kun timo atyer ka maleŋ ma bene onoŋo bedo munero, an bene alokke woko ki bote ma cwinya ocido woko, kit macalo alokke woko ki bot laminne-ni. Ento en pud omedde ameda ki tim me malayane, kun po pi kare ma onoŋo en pud nyako, i kare ma en obedo ka timo tim malayane i lobo Ejipt-ni. Ci cwinye opyette i kom co ma gimaro tim kwele kwele, ma komgi me co obedo calo pa kana, ma pig komgi bene obedo calo pa aguragura. Kit meno in Okoliba ibedo ka yenyo tim me tarwaŋ ma itimo ka tinoni, i kare ma jo Ejipt gukwako kori ci gunyoŋo tunoni ma onoŋo pud ogulo agula-ni. “Nen, mumiyo an Rwot Lubaŋa awaco boti in Okoliba, kuman ni, cwinyi doŋ ocido woko i kom pacogi ma yam imarogi-ni, abekelogi i komi, kun gia ki i kabedo ducu murumi: jo Babilon ki jo Kaldaya ducu, jo Pekod, jo Coa ki jo Koa, ki jo Aciria ducu kacel kwedgi. Gin ducu awobe mabeco ma ginen mwonya mada, luloc me dul lobo ki ludito wi mony, ludito ki lulweny, gin ducu onoŋo giriŋo ki aguragura. Ci gibibino i komi, ki yo tuŋ acam ki gadigadi lweny ki gadigadi ma otino vec, ki lwak mony. Gibirumi woko dyere ki kwot ocal ki kwot bani ki otaŋ nyonyo, doŋ abimiyogi twer me ŋolo kop i komi kit macalo ŋolo kopgi tye kwede. Abimiyo kinigana kemi, wek gutwe-nyi malit. Gibiŋolo umi ki iti woko, ka doŋ i agikkine gibineki woko ki pala lucwan. Gibimako litino awobeni ki litino anyirani ci giwaŋogi woko makwo ki mac. Gibilunyo boŋo woko ki i komi ci gikwanyo jamini mabeco me wel-gu woko. Doŋ an abigiko tim kipyeda ki tim kwele kwele ma ikelo ki i Ejipt-ni woko. Pe ibineno jo Ejipt dok bene pe doŋ ibipo pigi matwal.” Rwot Lubaŋa owaco kuman ni, “Nen, abimiyi woko i ciŋ jo ma idaggi-ni, i ciŋ jo ma ilokke ki botgi ma cwinyi ocidc woko. Kit macalo gidagi-ni gibimayo jamini ma itiyo tic pire-gu woko ducu, ci gibiweki idoŋ munero, nono laboŋo gin mo; gibinyuti woko ka maleŋ i waŋ dano ma noŋo itye munero calo malaya, Tim kipyedani ki tim kwele kweleni aye ma okelo can man i komi, pien itimo abor ki lurok, ci inyebo komi woko ki cal jogigi. In doŋ ilubo kit lameru, pi meno abiketo can acel-lu ma aketo i kemo-ni i komi.” Rwot Lubaŋa owaco kuman ni, “Ibimato kikopo pa lameru kikopone lac dok iye tut. Dano binyeri kun gicayi acaya, pien kikoponi opoŋ woko ligwik. Ibimer woko ci ibedo ki cwercwiny, pien kikopo me lworo ki balle pa piny, en aye kikopo pa lameru Camaria. Ibimato gin ma i i kikopo ci icwiyo ducu, ibiputo yet wii, ka doŋ ibiŋolo tunoni ki ŋinyoŋinyo kikopo ma oto-ni. Pien an Rwot Lubaŋa doŋ atyeko loko.” Pi meno Rwot Lubaŋa owaco kuman ni, “Kit macalo wii doŋ owil woko i koma, dok bene doŋ ityeko bola woko yo ŋeyi, pi meno myero doŋ icir gin mua ki i tim kipyedani ki tim kwele kweleni.” Rwot owaco bota ni, “Wod pa dano, tika ibiŋolo kop i kom Okola ki Okoliba? Ci tuc botgi gin me kwer ducu ma gin gutimo. Gubedo ka timo abor dok bene guneko dano, gutimo abor ki cal jogigi-ni, dok bene litino awobegi ma gin kikomgi gunywalo kweda gutyero woko bot cal jogi me bedo camgi. Medo i kom meno gin dok gutimo gin magi: gubalo kabedona maleŋ i nino acel, dok bene gupyedo ceŋ cabitta. Ka doŋ guneko litinogi me gitum ci gutyero bot cal jogigi, en i nino acel-lu gua gubino kwede i kabedona maleŋ ci gupyedo woko. Doŋ inen, man aye gin ma gutimo i oda. “Gin bene gucwalo lukwena bot jo ma tye ka mabor ni gubin, ci nen, gubino. Ilwoko komi woko pigi, ka iwiro waŋi, dok bene idero komi woko ki ruk me deyo, Ci ibedo i wi kitanda me deyo, kun meja bene doŋ giketo ka kenyo ma gipeto kitambara maber woko i wiye, ci iketo iye odok ecetana ki moona. Woo pa lwak dano ma gutoyo tokgi ata onoŋo owinnye bote, io ma gubedo ka wo-ni onoŋo lumero me nino ducu-ni ma gikelogi ki i tim aroo. Guketo ogul i ŋut ciŋ mon, ki lalukana mabeco atika gurwako i wigi, Ka doŋ awacci, Co pe gitye ka timo abor ki dako ma doŋ oti oloc woko ma oŋiyo woko ki’ tim kwele kwele-ni? Pien gucito bote gubedo kwede, kit macalo co gicito bot dako ma malaya ci gibedo kwede-ni, Kit meno bene gucito bot Okola ki Okoliba ka timo tim kipyeda. Ento jo ma kitgi atir biŋolo kop i kom gin mon ma lutim abor ki mon ma lunek dano-gu, pien gutimo abor kun gineko dano bene.” Rwot Lubaŋa owaco kuman ni, “Kel mony obin olweny i komgi wek komgi omyel ki lworo madwoŋ dok giyakgi woko, Ci mony bicelogi ki gweŋ dok gibitonogi woko ki pala lucwan, gibineko awobegi ki anyiragi woko, kun bene giwaŋo odigi woko ki mac. Doŋ abityeko tim me tarwaŋ woko ki i lobo man, wek mon ducu guwiny cik ma acikowu kwede, pe gutim tim me tarwan kit macalo wun doŋ wutimoni. Abiketo can i komwu wun lumego aryo-ni pi timwu me tarwaŋ, dok bene wubilimo can malit pi balwu marac atika pi woro cal jogi, Ci doŋ wubineyo ni an aye a Rwot Lubaŋa.” Rwot oloko kweda i nino dwe apar, dwe me apar, i mwaka me aboŋwen. Owacca ni, “Wod pa dano, co nyiŋ nino matin-ni woko, en nino matin-ni kikome. Kabaka me Babilon doŋ otyeko rumo Jerucalem woko i nino man kikome. Tuc lok man woko atyer i lok abola i carolok bot jo ma lujemo kun iwaco botgi ni, Rwot Lubaŋa owaco kuman ni, Cib agulu i mac, cib i mac, ony iye pii bene; ket iye riŋo ma giŋolo woko matino, ket riŋo ducu mabecone, riŋo em ki riŋo kwaya gwok, ket iye cogo mabeco ma iyero ayera wek opoŋ woko, Kwany riŋo romo maberre ki i kin romi luwotgi, ci irwak yen ma giŋunogi i dul dul i te agulu; ci ited riŋo ma iketo iye-ni, dok bene ited cogone iye.” Pien Rwot Lubaŋa doŋ owaco kuman ni, “Can i wi gaŋ ma opoŋ ki remo, ki agulu ma nyal omako, ma nyalle bene pe twero kwannye ki iye! Kwany riŋo ma giŋido-ni woko ki iye ki acel acel, kun pe iyero ayera. Pien remo dano ma ginekogi i dye gaŋ-ŋi pud tye iye; remone oo wa i kom got bene, pe gineko dano i ŋom ka ma remogi onoŋo gitwero umone woko ki putu. Pi tugo akemona wek acul kwor, omiyo aketo remo dano ma en oneko-ni i kom got, wek pe gium woko.” Pi meno Rwot Lubaŋa owaco kuman ni, “Can i wi gaŋ ma opoŋ ki remo! An bene aye ma abiduro yen me tedo madit. Dok ican yen, ci imok mac, ci ited riŋo woko maber, ka doŋ iony pige woko wek cogo owaŋ. Lacen doŋ iket i wi lodi mac ma iye tye noŋo, wek olyetti, wek molane owaŋ woko, wek cilo ma tye iye bene oleny woko, ki nyalle bene owarre otum woko. Abedo ka olo koma noŋo, mac pe twero kwanyo nyal mapek ma tye iye-ni. Nyal meno ma tye iye-ni en aye tim macol me tarwaŋ ma wubedo ka timone, wun io Jerucalem. Onoŋo kono alonyowu wudoko maleŋ, ento pe doŋ gilonyowu i kom timwu macol, pe doŋ wubilonnye matwal nio waŋ ma atoyo akemona mager-ri woko i komwu kit macalc amito. An Rwot doŋ atyeko loko man; ka ce kare oromo, abitiyo, Pe abidok cen ki ŋeya, kica pe bimaka, dok bene pe abiŋuti kun alubo kitwu ki gin ma wutimo; ento abiŋolo kop i komwu,” man Rwot Lubaŋa ma owaco. Rwot dok oloko kweda. Owacci, “Wod pa dano, nen, doŋ acok kwanyo ŋat ma yomo cwinyi ma nenone miti-ni woko ki boti kun adoni kicel keken. Ento pe ibikumo, pe ibikok, dok bene pig waŋi pe bimol cito piny lipyaa. Pe icur matek, ento cur laliŋliŋ; pe ikum pi dano muto. Twe kitambarani i wii, ci iruk warri i tyeni, pe ium dogi, pe bene icam kwon pa jo ma tye ka kumo.” Kit meno aloko bot lwak i odiko, ci oo otyeno dakona oto woko. Orwone odiko atiyo kit macalo-onoŋo gicika kwede, Ci lwak gupenya ni, “Pe itwero tito: botwa tyen lok me gin magi piwa, mumiyo in itiyo gin macalo man-ni?” Ci awaco botgi ni, “Rwot oloko kweda ci owacca ni atit lok ma en eloko-ni botwu, wun io Icrael, Rwot Lubaŋa owaco kuman ni, ‘Nen, abipyedo kabedona maleŋ-ŋi woko, ma en aye tekowu ma wutye ka wakke pire, ma wumaro nenone, dok ma yomo cwinywu twatwal-li. Doŋ awobewu ki anyirawu ma wuwekogi i ŋewu i Jerucalem-mi gibinekogi woko ki pala lucwan. Wubitiyo kit macalo an doŋ atyeko tiyone-ni; pe wubiumo dogwu, dok bene pe wubicamo kwon pa jo ma tye ka kumo. Wiwu bibedo atweya ki kitambara ki war bene bibedo i tyenwu; pe wubikumo, dok bene pe wubikok, ento komwu biballe woko pi balwu kun wucur kekenwu ma ŋat acel acel cur bot lawote. Kit meno Ejekiel doŋ bibedo botwu calo lanyut; kit gin ducu ma doŋ en otiyo wun bene wubitiyo. Ka man otimme, ci wubineyo ni an aye a Rwot Lubaŋa.’ “Doŋ in wod pa dano, i nino meno aye abikwanyo iye celgi matek-ki woko, yomcwinygi ki deyogi, gin ma gimaro nenone, kin gin ducu ma yomo cwinygi-ni. Abikwanyo bene awobegi ki anyiragi woko. I nino ma atimo lok man, ŋat mo ma obwot ki i lak to bibino ci titti pi gin ma otimme. I nino meno kikome en aye dogi binamme iye me lok bot dano mubwot-ti, ci ibiloko lok ma pe doŋ ibibedo ladoge-oto matwal. Kit meno ibibedo lanyut botgi; ci doŋ gibiŋeyo ni an aye a Rwot.” Rwot oloko kweda, Owacci, “Wod pa dano, nen piny yo tuŋ bot jo Ammon, ci it it lok i komgi. Wac bot jo Ammon ni. Wuwiny lok pa Rwot Lubaŋa: Rwot Lubaŋa owaco kuman ni, Pien wun doŋ wuwacci, ‘Iyoya!’ i kom kabedona maleŋ i kare ma doŋ gipyedo woko, ki i kom lobo Icrael i kare ma doŋ gijwero woko odon obur, ki i kom jo Juda i kare ma giterogi woko i opii, pi meno an doŋ abemiyowu woko bot jo ma gitye yo tuŋ wokceŋ me bedo ginaleyagi. Gibigero gonygi i kinwu, dok gibiyubo kabedogi i dyewu. Gibicamo camwu ci gibimato cakwu bene. Abimiyo Raba bedo ka cam pa kinaga, ki gaŋi pa jo Ammon abiloko doko dwol ka ma romi ki dyegi gibibedo iye, Man bimiyo wuŋeyo ni an aye a Rwot. Rwot Lubaŋa doŋ owaco kuman ni, Pien doŋ wudoŋo ciŋwu dok wubedo ka nyono tyenwu matek i ŋom kun cwinywu obedo yom ki tim maraco ducu ma tye i iwu i kom lobo Icrael, pi meno, nen, abiryeyo ciŋa woko i komwu, ci abimiyowu woko bot lurok me bedo ginayaka botgi. Abityekowu woko liweŋ ki i kin jo ducu ma bedo i wi lobo, abimiyo wuto woko ki i wi lobo ducu; abinekowu woko. Man bimiyo wuŋeyo ni an aye a Rwot.” Rwot Lubaŋa owaco kuman ni, “Jo Moab onoŋo yam guwacci, Nen, jo Juda doŋ gicalo jo me rok mukene-gu ducu. Pi meno abimiyo lweny poto i gaŋi murumo Moab ma gikuro waŋ lobo pa jo Moab-ni, kadi wa ki deyo me lobo Moab ma en aye Bet-jecimot, Baal-meon, ki Kiriataim. Abimiyo lobogi woko, kacel ki jo Ammon, bot jo ma tye wokceŋ me bedo megi, wek pe doŋ gipo i kome matwal i kin lurok. Dok bene abiŋolo kop i kom jo Moab. Man bimiyo giŋeyo ni an aye a Rwot.” Rwot Lubaŋa owaco kuman ni, “Kit macalo jo Edom gutimo tim me culo kwor i kom jo Juda mumiyo gutiŋo bal alii madit twatwal me culo kwor i komgi, pi meno omiyo Rwot Lubaŋa owaco kuman ni, Abiryeyo ciŋa alwenyo i kom jo Edom, abineko dano ducu kacel ki lee ma gibedo i lobo Edom. Abimiyo lobogi doŋ doko obur; nia i Teman nio kwede wa i Dedan jone ducu gibinekogi ki pala lucwan. Abimiyo jona jo Icrael culo kwor i kom jo Edom ma kakara, ci gibitiyo i Edom kit meno kun jo Edom giwinyo arem me kinigana ki akemona mager-ri. Ci jo Edom doŋ biŋeyo kwor ma aculo i komgi,” man Rwot Lubaŋa ma owaco. Rwot Lubaŋa owaco kuman ni, “Kit macalo jo Piliciti gutimo tim me culo kwor dok bene guculo kwor ki raccwiny me neko nek ma kelo mone ma pe gik; pi meno Rwot Lubaŋa owaco kuman ni, Nen, abiryeyo ciŋa alwenyo i kom jo Piliciti, abijwero jo Ceret ki lobo mukene ma tye i dog nam-gu woko. Abiculo kwor madit i komgi kun apwodogi ki akemo madwoŋ twatwal Man bimiyo giŋeyo ni an aye a Rwot, ka doŋ aculo kworra i komgi.” I kom nino dwe mukwoŋo i mwaka me apar wiye acel, Rwot oloko kweda. Owacci, “Wod pa dano, kit macalo jo Turo giloko lok i kom Jerucalem ni, ‘Iyoya, dogcel pa lurok doŋ gituro woko, ma doŋ owirre oyabbe woko botwa-ni, doŋ abidoko lalonyo, pien doŋ gityeko balone woko,’ pi meno Rwot Lubaŋa owaco kuman ni, Nen, atye ki lok i komwu, wun jo Turo, abikelo jo me rok mapol ka lweny i komwu, kit macalo pii biamwonyi me nam twagge kwede-ni. Gibimu-ko cel me Turo gireto wo ko piny, ki lubelene gibituro gireto woko bene piny, Abiyweyo ŋomme woko ducu ci aweko got keken aye doŋ. En bibedo wa i dye nam macalo kabedo ka ma lumakrec gimoyo iye obwogi. Pien an Rwot Lubaŋa doŋ atyeko loko. Lurok doŋ gibiyako Turo woko, dok bene gibineko jone ma gibedo i lobone kikome woko liweŋ ki pala lucwan. Man bimiyo giŋeyo ni an aye a Rwot.” Rwot Lubaŋa owaco ku man ni, “Abikelo kabaka matek makato luker ducu, en aye Nebukadnejar kabaka me Babilon, ka lweny i kom Turo, En bibino ki lwak aguragura, gadigadi lweny, wegi aguragura, ki dul mony ma tye iye askari mapol. Jo ma bedo i gaŋi ma tye i wi tura gibinekogi woko i lweny. Ci lumerok doŋ gibigero cel girumowu kwede woko, dok bene gibitoro cel lobo i nyimwu, ka doŋ gibibino ma gutiŋo kwotgi ci giumo komgi kwede woko. En bitworo celwu ki twor latwom cel, ci bitcno lubele ki latoŋŋe reto woko piny. Aguragurane bibedo pol atikatika ma apwa tyengi biboyowu woko. Doŋ woo pa wegi aguragura ki mor pa gadigadi ma otino yec, ki lwak gadigadi lweny, biyeŋo celwu i kare ma noŋo gidonyo i dogcelwu macalo ŋat mo ma donyo i gaŋ ma doŋ mony oturo celle woko. Wegi aguragura biriŋo ki aguragura ki i yowu ducu, gibineko danowu woko ki pala lucwan. Gibireto wirwu matek-gu poto woko piny i ŋom, Gibiyako lonyowu ka gicoko jami acatawu. Gibimuko celwu gireto woko piny, dok bene gibibalo odiwu mabeco ma yomo cwinywu-ni woko. Gibikwanyo gweŋ, bao ki ŋom ma wuyubo pi gedo, gibolo woko i pii wa i dye namo Abijuko wer ducu ma gigoyogi agoya, ki dwan opuk ma gigoyo bene doŋ pe biwinnye matwa!. Abimiyo in Turo doŋ idoko kabedo me moyo obwo pa lumak-rec ma ayweyo ŋomme woko ducu ci aweko got keken aye doŋ. Gaŋ man doŋ pe gibigero odoco matwal. An Rwot doŋ atyeko loko.” Man Rwot Lubaŋa ma owaco. Rwot Lubaŋa owaco lok i kom gaŋ me Turo kuman ni, “I kare ma noŋo gitye ka monyi, jo ducu ma gibedo i dog nam gibibedo ki lworo madwoŋ pi cur pa joni ma gunoŋo ret ka doŋ ginekogi. Ci rwodi ducu me dog nam gibilor woko piny ki i wi komkergi, gibilunyo jorgi ki boŋŋigi ma gidero maber, ka doŋ gibedo piny i ŋom ki myelkom. Gibibanne woko ki lworo pi can ma opoto i komgi, miyo komgi bedo ka myel amyela i cawa ducu, Gibicako wer lyel i komi kun giwero ni, ‘In doŋ irwenyo woko matwal ki i nam niŋniŋ! In gaŋ ma yam iywek twatwal-li, ma onoŋo itek twatwal i kom nam-mi, in kacel ki jo ma gibedo i ii, ma ikelo lworo madwoŋ i kom jo ducu ma gibedo i dog nam! I nino ma ipoto iye-ni kikome, cula ducu guyeŋŋe; ada, gin cula ma gitye i dye nam-mi, jo ma bedo i igi cwinygi oballe woko.’ ” Rwot Lubaŋa owaco kuman ni, “Abimiyo in Turo iballe woko calo gaŋi ma dano pe bedo i igi. Dok bene abikelo pii aumi kwede woko miyo imwony woko ka matut i nam Ci abiboli piny i bur lyel kacel ki jo ma cito i lobo pa io muto, me bedo kunnu kacel ki jo ma yam gubedo i lobo i kare ma con twatwal. Abimiyo ibedo i lobo ma i te ŋom i kin obur ma ori twatwal, kun noŋo it ye ka bedo kacel ki jo muto. Dano pe dok bibedo i ii dok bene pe ibinoŋo kabedo mo i lobo pa jo makwo. Abimiyo itum woko i yo ma kelo lworo, ibirwenyo matwal; kadi bed giyenyi, pe gibinoni.’ Man Rwot Lubaŋa ma owaco. Rwot oloko kweda. Owacci, “Wod pa dano, kombeddi cak wer lyel kun ikok kwede pi Turo, ma en gaŋ ma ocuŋ i dog nam, dok bene lacat-wil ki jo ducu ma gibedo i wanwat mapatpat ma orumo dog namo Tit ki Turo ni Rwot Lubaŋa owaco kuman ni, “In Turo, onoŋo iwaco ni, ‘An aber anen mwonya mada.’ Waŋ apokki loboni ducu tye wa i cwiny dye nam madit; jo ma gugeri gugeri woko maber ma inen mwonya ada calo mel. Gupayo bao me apeta mapol ki i kom yat odwon ma gukelo ki i got Cenir. Gutoŋo bene yat cedar ki i Lebanon ci guyubo ki yat me yaro boŋo mel wek yamo okuti. Gutoŋo kworo me Bacan ci guyubo pol me cero yeyani; gipeto dye kabedoni ki bao me yadi mabeco ma gikelo ki i lobo Caiprac, kun gidero woko bene ki lak lyec. Boŋo me ayara malo i wi yat me mel obedo boŋo camanini ma gidero maberre ma gikelo ki i Ejipt, gitwero neno ki cen ci giŋeyo oyotoyot. Kemani giyubo ki boŋo maberre, boŋo ma obedo bulu ki lamar lamar, ma gikelo ki i cula nam me Elica. Jo ma gibedo i Cidon ki i Arvad gin aye gubedo lucer yeyani, Joni ma gikwiri aye gubedo ludwo mel. Ludoŋo me Gebal ki jone ma gikwiri onoŋo bene gibedo i kin joni, ma giyubo mel me wot i nam; mel ducu me nam ki jo ma dwoyogi gubedo i kin joni, gubedo ka cat i dukanni. “Askari ma gua ki i Percia, Lud ki Put onoŋo gitye i dul monnyi macalo lulwennyi; gunabo kwot ki otaŋ-wic i gaŋ monnyi. Gin bene aye ma gumiyi deyo. Jo Arvad ki monygi guito i kom celli doŋ gurumo woko, ki jo Gamad guito malo i wi lubeleni ducu. Gunabo kwotgi i kom cel gurumo kwede woko. Gin aye ma gumiyo inen maber ma mwonya twatwal-li. “Ibedo ka cato wil i lobo Tarcic kun igamo ryal, nyonyo koc ki racac ma gimiyi pi wilo jamini mabeco madwoŋ ata. Jo Javan, Tubal, ki Mecek gubedo ka cato wil ki joni kun gimiyo danogi ki jami mola-gu giloko ki jami ma joni gicato. Joni gucato jamigi woko kun giloko ki aguragura me tiŋo yec, ki aguragura ma giŋweco kwedgi i lweny, ki kana-gu ma gikelogi ki i Bet-togarma. Jo Rodec bene gubedo ka cato wil ki joni; lobo mapol me dog nam gudoko cukki, ka ma joni giwilo iye lak lyec mapol ki poi kun gi loko ki jamigi. Jo Edom bene gubedo ka cato wil ki joni pi jamini madwoŋ-gu; gubedo ka lokogi ki emeradi ma en kidi me wel madwoŋ, boŋo ma lamar lamar, ki boŋŋi ma gidero komgi maber, boŋo camanini maberre, ki tiko makwar me wel. Jo Juda ki jo ma i lobo Icrael gubedo ka cato wil ki joni; guloko jamigi ki nano, nyig jeituni, ki nyig oduro me wi mwaka, moo kic, moo mukene-gu ki yat ma ŋwece kur. Jo Damaciko gubedo ka cato wil ki joni pi jamigi madwoŋ-gu, pi lwak lonyoni mapatpatti oweko gumini kono vino ma gikelo ki i Kelbon, ki yer romi matarre, ki kono yino ma gikelo ki i Ujal, gukelo ki jamini mabeco-gu; nyonyo ma giteto, kacia ki lum ma ŋwece kur guloko woko ki jami acatani. Jo Dedan gubedo ka cato wil ki joni kun gimiyo bot joni boŋŋi ma gitweyo i ŋe kana me bedo pa dano. Jo Arab ki rwodi ducu me Kedar yam gubedo jo ma yomo cwinyi mada pi cato boti litino romi ki nyogi romi ki dyegi-gu, i kare ma gubedo ka cato wil kwedi. Lucat-wil me Ceba ki Raama bene uibedo ka cato wil kwedi; gumiyo boti cit aŋwece ducu mapatpat mabeco makato ducu, ki kidi me wel-gu ki jabu, kun giloko ki jamini. Jo Karan, Kane, Eden, Acur, ki Ki lmad bene gubedo ka cato wil kwedi. Jo magi gubedo ka cato wil kwedi pi boŋŋi mabeco adada, ki pi boŋŋi ma bulu ki ma gikwoyo ki ciŋ ma gidero komgi woko maber, ki kapet ma gidero ki raŋi mapatpat, ma gitweyo woko matek likiŋ ki tol; gubedo ka cato wil boti pi jami meno. Mel me Tarcic obedo ka wot kun tiŋo jami acatani. “Ilokke doŋ idoko calo mel ma tye i dye nam ma gicano jami mapek opoŋo woko ligwik. Ludwo melli guteri woko wa ka mabor i dye namo Doŋ yamo ma a yo tuŋ wokceŋ okodo omiyo melli otur woko wa i cwiny dye nam. Lonyoni ducu, jami acatani ducu, lutic i mel ki ludwo mel, lumwon waŋ bao ka ma bao okubbe iye ki wadi, ki lucat-willi ma pigi tego, askarini ducu ma gin lu lweny ma gitye i mel, gin ducu ki dul monnyi ma gitye i dye joni, gumwony woko libuc i cwiny dye nam i kare ma melli otur woko-ni. I kare ma koko pa ludwo mel owinnye, lobo ma cokcok kenyo ducu guyeŋŋe. Wegi pol yeya gukatti woko ki mel kun gumako pol me cero yeya ciŋgi. Lutic i mel ki ludwo mel ducu ma woto i nam gucuŋ i wi tura i dog nam. Gin gidaŋŋe ki koko matek piri, kun gikok ma cwinygi kec adada. Gionyo putu i wigi kun giŋenne bene i buru pi cwercwiny. Gilyelo wigi doŋ maleŋ piri, dok giruko boŋo cola me kumo, gikok kwede piri ma cwinygi ton, kun bene gikumo ma cwinygi kec. Ka gikok ci giwero wer lyel piri gikok piri kun giwacci, ‘Aŋa ma gitwero poro ki Turo, ma gijwero oliŋ woko i dye nammi? Ka yam ikelo jami acatani ki bot jo ma tye loka nam, noŋo ico bo miti pa jo me rok ducu. Luker ducu me lobo gudoko lulonyo ki lonyoni ki lwak jami acatani madwoŋ-gu, Kombeddi doŋ mel otur woko i dye nam, i dye pii ka matut atika; jami acatam ki jo ducu ma gitiyo i mel gumwony woko i nam libuc kacel kwedi, Dano ducu ma gibedo i lobo ma orumo dog nam gubedo ki ur madit mada pi can man ma opoto i komi-ni; lukergi doŋ gudoko lwor twatwal, wangi olwal woko pi lworo. Lucat-wil ma gitye i kin lwak gujwat piri mada; doŋ io i agikki ma kelo lworo adada, doŋ ibirwenyo woko matwal ma pe dok ibinen.’ ” Rwot oloko kweda. Owacci, “Wod pa dano, wac bot kabaka me Turo ni Rwot Lubaŋa owaco kuman ni, ‘Itye ki wakke i cwinyi omiyo iwacci in lubaŋa. Dok iwacci kit macalo in ibedo lubaŋa-ni, ibedo i wi komker ma nam orumo woko dyere, Ento in i dano, in pe lubaŋa, kadi bed itamo ni in iryek calo Iubaŋa. Kono in iryek ikato Daniel, pe tye muŋ mo ma okanne ki boti ma pe iŋeyo. Ryeko madit ki niaŋ ma it ye kwede, omiyo ilimo lonyo piri keni kun icoko jabu ki ryal i ot kano limmi. Ryeko madit me cat ma it ye kwede omiyo imedo lonyoni, kun ibedo ka noŋo magoba teretere. Mumiyo doŋ icako bedo ki wakke i cwinyi pi lonyoni-ni.’ ” Pi meno Rwot Lubaŋa owaco ni, “Doŋ kit macalo itamo ni in iryek calo lubaŋa mo-ni, pi meno, nen, abikelo lumerok ma gin lurok ka lweny i komi. Gin jo me rok mager makato jo me rok mukene ducu. Gibiwoto pala lucwangi gilwenyo i komi ci gibalo ber me ryekoni ma nen mwonya-ni woko, ci gibalo deyoni me aura-ni woko. Gibineki woko ci gicori ipoto piny i bur lyel i cwiny dye nam Ka ce gubino ka neki, in pud ibimedde ki waco ki i nyimgi ni in lubaŋa? Ka ce doŋ jo ma gineki-ni gumaki woko i ciŋgi pud noŋo it ye dok dano, ento pe lubaŋa wacel. Ibito meri macalo dano ma pe gilirogi i ciŋ lurok ma pe giŋeyo Lubaŋa. An Rwot Lubaŋa doŋ atyeko loko lok man.” Rwot doki oloko kweda, Owacci, “Wod pa dano, kok pi kabaka me Turo, kun iwacce ni Rwot Lubaŋa owaco kuman ni, ‘In onoŋo yam ibedo lanen me gin maber makato ducu. Onoŋo bene ir yek dok iber ma inen mwonya mada. Onoŋo ibedo i Eden, ma en aye poto pa Lubaŋa, ci ibedo ka rukke ki kit kidi me wel mapatpat ducu, ma gin aye: kamelian, topaj, ki jacipa, kurocolit, ki onik, capir, kabankel, ki emeradi; gin ma gidero ‘ducu onoŋo yam gitiyo ki jabu, ki gin ducu ma yam it ye kwede gigoro komgi woko. Giyubogi piri i nino ma giketi iye-ni kikome. Aketo lakerubi ma giwiro woko ki moo me gwoko in. Onoŋo ibedo i wi got maleŋ pa Lubaŋa dok bene iwoto ki i dye gaŋ ma lyel mac. Cakke i kare ma giketi iye, kiti onoŋo ber; onoŋo pe it ye ki bal mo nio wa i kare ma doŋ icako timo bal. Ibedo ka wilo jami teretere kun icato bene kumeno, omiyo icako timo tim bwamici itimo bal. Ci aryemi woko ki i wi got mera maleŋ calo gin ma gipyedo, dok lakerubi ma onoŋo gwoki ca bene oryemi woko ki i dye gweŋ ma lyel mac. Yam ibedo ka wakke ki i cwinyi pi berri; deyoni me aura-ni omiyo ibalo ryekoni woko. Areti woko i ŋom, ci am iyo inen woko ka maleŋ i nyim luker ducu, wek guneni, waŋgi oniaŋ woko tiktik i komi. Pi balli mapol ata ma itimo i cato wil i yo ma pe atir-ri omiyo ipyedo kabedoni maleŋ-gu woko ducu. Ci acwinyo gaŋ woko ki mac, owaŋ woko liruk, Aloki idoko buru i lobo i nyim jo ducu ma guneni. Jo ducu ma giŋeyi i kin lwak me rok ducu gitye ki ur madit mada i komi; doŋ io i agikki me toni ma kelo lworo, doŋ ibirwenyo woko matwal.” Rwot oloko kweda owacci, “Wod pa dano, cik waŋi koŋ inen yo tuŋ Cidon, ci itit lok i kome, kun iwaco bot jo ma gibedo iye ni Rwot Lubaŋa owaco kuman ni, Nen, atye ki lok i komwu, wun jo Cidon; abinyuto deyona woko ka maleŋ i dyewu. Man bimiyo jo ducu gipaka pi gin ducu ma atiyo botwu, ci gibiŋeyo ni an aye a Rwot, ka anyuto kit macalo aleŋ kwede kun aketo can i kom jo ma gibedo i gaŋ man, Pien abicwalo two gemo i gaŋ man, ki remo i dye gudone ducu. Gibi-lwenyoi komwu ki i kabedo ducu, jowu bene gibinekogi woko ki pala lucwan. Man bimiyo wuŋeyo ni an aye a Rwot. “Jo me ot pa Icrael okuto Lacar pe doŋ bicobogi matwal, nyo kadi ki kit okuto mo pe bicobogi ma minigi ret, i kin luwotgi ducu ma gutimogi marac kun gicayogi-ni. Man bimiyo giŋeyo ni an aye a Rwot Lubaŋa.” Rwot Lubaŋa owaco kuman ni, “Ka acoko jo Icraelki i kin lurok ka ma yam akeyogi gucito iye, dok bene ka anyuto bot rok ducu kit macalo aleŋ kwede, ci gibibedo i lobogi kikome, en lobo ma yam amiyo bot laticca Yakobo-ni, Gibibedo i lobo meno laboŋo lworo mo, dok gibigero odi kun gipuro” poto olok bene. Gibibedo laboŋo lworo mo, i kare ma abiŋolo kop i kom luwotgi ducu ma gutimogi marac kun gicayogi-ni, Man bimiyo giŋeyo ni an aye a Rwot Lubaŋagi.’ I nino dwe apar wiye aryo, dwe me apar, i mwaka me apar, Rwot oloko kweda kun wacci, “Wod pa dano, cik waŋi inen Parao kabaka me Ejipt, ci itit lok i kome ki i kom lobo Ejipt ducu. Lok kun iwacci, Rwot Lubaŋa owaco kuman ni, “Nen, atye ki lok i komi, in Parao kabaka me Ejipt, ma ibedo calo nyaŋ ma min kulu ma buto i laora kulu-gu kun iwacci, ‘Kulu Nail mera, en mera kikome, an aye ma atiyo.’ Abigolo cwaki woko ki goli, ci amiyo rec ducu ma tye i kuluni gimoko woko i poki; ci abiywayi ki i dye kuluni atiŋi woko malo, kacel ki rec ducu me kuluni ma gumoko woko i kom poki-ni. Ci doŋ abiboli woko i tim, in kacel ki rec ducu ma gitye i kuluni, wubipoto i dye tim ka maleŋ, pe apicokowu dok bene pe gibiyikowu. Doŋ atyeko miyowu woko me bedo cam pa lee tim ki pa winyo me polo. “Man bimiyo jo ducu ma gibedo i lobo Ejipt giŋeyo ni an aye a Rwot. Pien in ibedo calo odoo lagada bot jo me ot pa Icrael; i kare ma gumaki ki ciŋgi ci itur ityer, ci iŋolo gwokgi iyeco woko ducu. Ka dok gujeŋge i komi, ci itur, imiyo pyergi ducu omyel. Pi meno Rwot Lubaŋa owaco kuman ni, Nen, abekelo lweny i komwu, ci aneko dano kacel ki lee woko ducu ki i kinwu. Lobo Ejipt doŋ bidoko obur ma odoŋ oballe woko. Man bimiyo giŋeyo ni an aye a Rwot. “Pien doŋ iwacci Nail meri in aye ma iketo, pi meno, nen, an doŋ atye ki lok i komi, dok bene atye ki lok i kom laora kuluni ducu, mumiyo abimiyo lobo Ejipt doko obur balle woko, iye doŋ noŋo, cakke ki i Migdol dok kwede yo tuŋ Ciene nio kwede wa i waŋ apokki lobo Etiopia. Pe tye dano mo nyo lee ma biwoto kun kato ki iye, bibedo kumeno ma pe gibedo iye pi mwaka pyeraŋwen kulu, Abimiyo lobo Ejipt doko obur ma iye doŋ noŋo makato lobo mukene-gu duou; ki gaŋi murumo ducu igi bidoŋ noŋo pi mwaka pyeraŋwen ki i kin gaŋi ducu ma doŋ gityeko balogi woko-ni. Abikeyo jo Ejipt woko i kin rok ducu, dok bene abimiyo giket gicito i lobo ducu.” Rwot Lubaŋa owaco kuman ni, “I agikki me mwaka pyeraŋwen abicoko jo Ejipt woko ki i kin lurok ka ma yam akeyogi gucito iye-ni, ci abidwoko gum pa jo Ejipt botgi, kun akelogi aketogi gibedo i lobo Patroc, co aye lobogi macon ka ma ginywalogi iye kikome. Doŋ ki kunnu gibibedo ki ker magoro. Kergi bibedo ker magoro adada ki i kin ker ducu, man miyo pe doki gibiloyo lobo mukene ducu. Abimiyo gibedo jo ma pigi pe tek twatwal, dok bene pe doki gibiloyo lobo mukene-gu ducu. Jo Icrael doŋ pe gibijenne i komgi pi kit kony mo wacel. Doŋ can ma bipoto i kom jo Ejipt bipoyo wi jo Icrael ni gin onoŋo gitimo bal me jeŋŋe i kom jo Ejipt wek ginoŋ kony mogo, Man bimiyo giŋeyo ni an aye a Rwot Lubaŋa.” I nino dwe acel, dwe me acel, mwaka pyeraryo wiye abiro, Rwot oloko kweda, Owacci, “Wod pa dano, Nebukadnejar kabaka me Babilon omiyo dul monnye otiyo tic matek me lweny i kom Turo, omiyo wi dano ducu otal woko ki gwokgi bene ducu opwac woko, ento kadi bed kumeno, kabaka ki dul monnye pe gunoŋo kit gin mo pi tic ma gubedo ka yelle ka tiyone i kom Turo-ni, Pi meno, Rwot Lubaŋa owaco kuman ni, ‘Nen, abimiyo lobo Ejipt woko bot Nebukadnejar kabaka me Babilon; en biyakogi kun mayo jamigi woko, ci bitiŋo lonyo me lobo Ejipt loko doko mucara me culo jo ma i dul monnye. Doŋ atyeko miyo bote lobo Ejipt me culo waŋ tic ma en obedo ka yelle me tiyone-ni, pien jo me dul monnye gubedo ka tic pira. Man Rwot Lubaŋa ma owaco.’ “I nino meno ka gin ma kit meno otimme, ci abimiyo jo Icrael gidoko tek, dok abimiyo’ in Ejekiel ilok woko ka maleŋ atyer ka ma dano ducu gitwero winyo lokki. Man bimiyo giŋeyo ni an aye a Rwot.” Rwot doki oloko kweda. Owacci, “Wod pa dano, tit lok kun iwaco gin ma an a Rwot Lubaŋa atye ka lokone kuman ni, “Wukok ni, ‘Tin aye nino ma kelo lworo!’ Ninone doŋ cok, en nino ma Rwot bitic iye-ni, Man bibedo nino ma opoŋ ki pol keken, en aye bene kare ma can bipoto kwede i kom rok ducu. Lweny bibedo i Ejipt, ki remcwiny madwoŋ bibedo i Etiopia. Jo ma gibedo i Ejipt gibinekogi woko; gibiyako lonyone ducu gitero woko, ci gibiweko doŋ obur. “I lweny meno gibineko askari ma giwilogi ki lim ma gua ki i Etiopia, Put ki Lud, Arabia, ki Libya, ki wegi lobona kikomgi.” Rwot owaco kuman ni, “Cakke i Migdol o kwede yo tuŋ Ciene, jo ducu ma gikonyo jo Ejipt gibinekogi woko i lweny. Dul mony pa jo Ejipt ma giwakke ni gitek-ki gibijwerogi woko ducu. Gibinekogi woko ki pala lucwan i dye gaŋ. Man Rwot Lubaŋa ma owaco. Lobe Ejipt bidoko gin ma iye odoŋ nono, gaŋine igi bidoŋ nono ki i kin gaŋi ducu ma doŋ gityeko balogi woko. Ka acwinyo Ejipt woko ki mac, dok bene ka gineko jo ma konyogi woko, man bimiyo giŋeyo ni an aye a Rwot. “Ka nino meno oo, ma Ejipt doŋ gijwero woko, abicwalo lukwena ma gikwaŋo mel wek gumi lworo omak jo Etiopia ma cwinygi pe peto-ni; gibibedo ki remcwiny madwoŋ i nino ma can bipoto i kom jo Ejipt; pien niŋone tye ka bino!” Rwot Lubaŋa owaco kuman ni, “Abitic ki Nebukadnejar kabaka me Babilon me giko te lonyo me Ejipt woko. En kacel ki jone, ma gin jo me rok mager adada, gibikelogi me balo lobo woko; ci gibilwenyo i kom jo Ejipt ki pala lucwan, man miyo lobo doŋ bipoŋ ki kom dano muto keken. Abimiyo pii kulu Nail two woko, dok bene abicato lobo woko bot jo maraco; abibalo lobo kacel ki jami ducu ma tye iye amiyo iye doŋ noŋo. Lurok gibijwero lobo woko ducu. An Rwot doŋ atyeko loko.” Rwot Lubaŋa owaco kuman ni, “Abijwero cal jogi apaya ki cal lubaŋa mogo me goba ki i Mempic; laker mo doŋ pe bibedo i lobo Ejipt. Kit meno abimiyo lworo bedo tye i lobo Ejipt. Abimiyo lobo Patroc doŋ noŋo, dok bene abicwinyo mac woko i kom Joan, ci abiŋolo kop i kom jo Tebec kun alubo te cik kikome me ŋolo kop. Dok bene abionyo akemona i kom jo Pelucium, ma en aye cel gogo matek pa jo Ejipt, ka dok aneko lwak me Tebec woko ducu. Ci abiketo mac woko i kom Ejipt; ki jo Pelucium gibibedo ki toncwiny madit adada. Gibimuko cel me gaŋ Tebec gireto woko piny, ki gaŋ bene bipoŋ woko ki pii aluka. Awobe On ki awobe Pibecet gibinekogi woko i lweny, ki mon gibimakogi giterogi woko i opii, Piny bicido woko i Tapanec i kare ma abituro ker me Ejipt woko, ki tekke ma onoŋo jone giwakke k wede-ni bene doŋ bigik. Pol biumo Tapanec woko, ci jone gibiterogi woko i opii. Meno aye kit ma abiŋolo kwede kop i kom Jo Ejipt kun alubo te cik me ŋolo kop. Man bimiyo giŋeyo ni an aye a Rwot.” I nino dwe abiro dwe me acel, i mwaka me apar wiye acel, Rwot oloko kweda, owacci, “Wod pa dano, doŋ atyeko turo bad Parao ka baka me Ejipt woko. Doŋ inen ŋat mo ma otweyo ki bandej wek ocaŋ woko pe, wek dok odok tek me mako pala lucwan. Pi meno Rwot Lubaŋa owaco kuman ni, Nen, atye ki lok i kom Parao ka baka me Ejipt. Abituro bade ryoryo ducu, bade matekke-ni ki bade ma yam otur-ri; ci amiyo pala lucwan poto woko piny ki i cine. Abikeyo jo Ejipt woko i kin jo me rok ducu, abimiyo giket giromo wi lobo woko ducu. Doŋ abijiŋo bad kabaka me Babilon ryoryo ducu bedo matek, ci amiyo pala lucwanne i ciŋe en mako; ento abituro bad Parao ryoryo ducu woko, miyo en doŋ bibedo ka cur i nyim kabaka me Babilon calo dano ma doŋ gityeko keto ret woko i kome. Abijiŋo bad kabaka me Babilon bedo matek, ento bad Parao bipoto woko; ci bimiyo giŋeyo ni an aye a Rwot. Ka doŋ aketo pala lucwanna i ciŋ kabaka me Babilon, ci en biryeyo woko i kom lobo Ejipt; ci akeyo jo Ejipt woko ducu i kin lurok, kun aketogi i wi lobo ducu. Man bimiyo giŋeyo ni an aye a Rwot.” I nino dwe acel, dwe me adek, i mwaka me apar wiye acel, Rwot oloko kweda. Owacci, “Wod pa dano, wac bot Parao kabaka me Ejipt ki bot lwakke ni, “In mono giporo ditti ki dit pa aŋa? Nen, abipori ki yat cedar me Lebanon, ma jaŋe oluk dok tipone bene calo buŋa, ma odoŋo mabor adada, wiye kikome bor oo wa i kin pol. Pii onoŋo tye omiyo yat meno odoŋo, dok bene obedo ka cwinyo pii ma tye i te ŋom. Gibedo ka onyo pil i kabedo ka ma onoŋo yat tye ka doŋo iye, ka gumiyo ora kulu-gu gumol, piine ocito i te yadi ducu ma i buŋa, En aye mumiyo yatte odoŋo woko mabor ma okato yadi ducu ma gidoŋo i buŋa woko; jaŋe odoŋo maboco dok mapek, pi pii mabup ma onoŋo tye i pote. Winyo ducu me polo gigero odigi i jaŋe; ki lee tim ducu ginywalo litinogi i te tipone, dok rok madito me wi lobo ducu giywe i te tipone. Onoŋo nen maber mada i ditte, ki i boco me jaŋe ducu; pien lwite odonyo piny i ŋom ka ma pii mabup tye iye. Yadi cedar ma gudoŋo i poto pa Lubaŋa pe gitwero pyem kwede, kadi ki yadi ma gudoŋo maboco bene pe gitwero poro kwede. Pe tye yadi ma komgi pwot ma giporo ki jaŋe wacel, Pe tye yat mo i poto pa Lubaŋa ma onoŋo nen ber calo eno Aketo obedo ma nen maber, ma jaŋe ojany woko i kabedo ducu. Yadi ma i Eden ducu doŋ nyeko omakogi woko i kome, gin yadi ma onoŋo yam gitye i poto pa Lubaŋa-ni.” “Pi meno, Rwot Lubaŋa owaco kuman ni, Kit macalo yat meno odoŋo mabor, wiye oo wa i kin pol, ka doŋ ocako wakke ki i cwinye pi berre-ni, mumiyo an doŋ akwero yat meno woko, am iyo woko bot laloc me rok mukene. En bitic ki yat man i kit yo ducu ma lubo rac kite. Lurok, ma gin jo mager adada ma gikato rok mukene ducu, gibitoŋo yat meno gireto woko i ŋom ka doŋ giweko kunnu. Jaŋe bipoto i wi godi ki i nota ducu, ci gibitur woko lirum i dye kulu ma gimol i lobo ducu. Mumiyo jo ducu ma gibedo i wi lobo gibia woko ki i te tipone giweko yat meno. Winyo bibino gibedo i kom yat mupoto-ni, ki lee tim bene gibibedo ka wot ki i wi jaŋe mutur-ri. Man ducu bitimme wek yadi ducu ma gidoŋo ka ŋet pii pe gudoŋ maboco twatwal, dok bene pe wigi oo wa i kin pol, wek yat mo ki i kin yadi ducu ma cwiyo pii pe odoŋ mabo cŋ calo gin. Gin ducu mere gin luto keken calo dano, ma ka guto myero gudony piny i lyel i lobo pa jo muto ka ribbe ki jo muto ma tye kunnu.” Rwot Lubaŋa owaco kuman ni, “I nino ma yat ‘meno doŋ odonyo piny i lobo pa jo muto, abimiyo pii ma tye ii te ŋom ume ci kumo pire. Abijuko kulu madoŋo-gu woko ducu, miyo ora kulu ducu doŋ pe bimol kato woko, Pi yat meno abimiyo piny cido woko i kom got Lebanon ci amiyo yadi ducu ma doŋo i buŋa two woko. I kare ma abicwalo en kwede me cito i lobo pa jo muto, mor me potone keken bimiyo rok ducu yenne, Yadi ducu me Eden, ki yadi ducu me Lebanon ma gibeco adada, ki yadi ducu ma gicwiyo pii, gibikweyo cwinygi i lo bo ma tye piny, Gin bene gibicito piny kacel kwede, me bedo ki jo ma yam doŋ gityeko nekogi woko i lweny-nyi, Iyo, jo ducu ma gitye i kin lurok ma yam gibedo i te tipone gibito. “Yat ma giloko i kome-ni en aye kabaka me Ejipt ki lwakke ducu. Kadi bed yadi me Eden onoŋo pe gitye kit meno i deyo ki i bocogi, gibikelo in ibedo kacel ki yadi me Eden idonyo i lobo ma tye piny; ci ibiribbe ki jo ma pe gilirogi dok ki jo ma yam ginekogi i lweny.” Man Rwot Lubaŋa ma owaco. I nino dwe, acel, dwe me apar wiye aryo, i mwaka me apar wiye aryo, Rwot oloko kweda. Owacci, “Wod pa dano, daŋŋe ki koko pi Parao kabaka me Ejipt, kun iwacce ni, itamo ni ibedo calo labwor i kin rok ducu, ento in ibedo meri calo nyaŋ ma min kulu ma bedo i nam, kun baro dye pii ki i kulu. Irubo pii woko ki coto tyeni, miyo ibala pii ma i kulu-gu woko ducu. Rwot Lubaŋa owaco kuman ni, Ka Tok ducu gucokke kacel, abiciko obwona ci amaki kwede woko, ka doŋ amiyo giywayi kwede i wi tura. Abiboli woko piny i ŋom, kun acanyi woko matek i ŋom ka maleŋ, ci doŋ amiyo winyo ducu gipye i komi ki lee ducu ma i lobo gibicami woko, Abipoŋo wi godi ki nota-gu ducu ki komi mutop. Abidyako lobo kadi wa godi bene ki remoni ma mol-li, ma ora kulu ducu bipoŋ woko ki remoni keken. Ka doŋ atyeko neki woko, ci abiumo pol woko, kun amiyo lakalatwene ducu gicido macol licuc; abimiyo pol umo ceŋ woko, ki dwe bene doŋ pe biryeny ma miyo derone caro piny. Abikwanyo dero me gin ma ryeny ducu ma tye i polo woko ci amiyo loboni doŋ i colpiny. Man Rwot Lubaŋa ma owaco. “Abiryano cwiny jo me rok mapol, ka aterowu i opii i kin lurok i wi lobo ducu ka ma yam onoŋo pe wuŋeyo. Abimiyo lwak me rok mapol gibedo ki ur twatwal i komi, ki lukergi bene komgi bimyel ki lworo piri. Ka atiŋo pala lucwanna i nyimgi i kare ma ibilimo iye can-ni, lurok kacel ki lukergi komgi bibedo ka myel amyela cawa ducu, kun noŋo dano acel acel paro pi kwone keken.” Rwot Lubaŋa owaco kuman ni, “Kabaka me Babilon bibino ci lwenyo i komi ki pala lucwanne. Abiweko askari ma gua ki i rok mager ducu giwoto pala lucwangi ci gineko ki lwakki woko. Gibijwero jami ducu ma it ye ka wakke pigi-ni, ci gineko lwakki woko. Abineko dyaŋini woko ducu ki i waŋ pii’ mapatpat, Doŋ dano nyo lee mo bibedo pe matwal ma birubo pii balo woko ki coto doki. Abimiyo piine pye mot ci doko maleŋ, dok abimiyo pii ma i kuluni ducu mol mot calo moo ma mol. Man Rwot Lubaŋa ma owaco. I kare ma amiyo lobo Ejipt odoko obur ma iye odoŋ nono, dok ka jami ducu ma yam opoŋo loboni doŋ gijwero woko, ka bene aneko jo ducu ma gibedo iye, man bimiyo giŋeyo ni an aye a Rwot. Man bilokke doko wer lyel. Mon me rok ducu gibiwero wer man me lyel-li, kun gikok kwede pi Ejipt ki lwakke ducu; gibigoyo wer lyel man ki jami agoya-gu. Man Rwot Lubaŋa ma owaco.” I nino dwe apar wiye abic, dwe me acel, i mwaka me apar wiye aryo, Rwot oloko kweda. Owacci, “Wod pa dano kok pi lwak ma gibedo i Ejipt, ci icwalgi kacel ki mon me rok matego gudony piny i lobo pa jo muto, ka ribbe ki jo ma yam doŋ guto giyikogi i lyel kunnu-ni, Wac botgi ni, ‘Wun dok wubeco wunen mwonya wukato jo mukene woko? Wuciti, wudony piny wubut i lyel pa jo ma pe gilirogi.’ Gibito kacel ki jo ma ginekogi i lweny. Dok bene lweny ma tye-ni giyubo pi neko jo Ejipt ducu. Rwodi ma gin cogi oteka gibiloko pigi ki pi jo ma yam konyogi, ma noŋo doŋ gitye i dye lyel, kun giwacci, ‘Doŋ gutyeko donyo piny kany, gibuto woko mot, gin jo ma pe gilirogi ma ginekogi i lwenynyi.’ “Aciria tye kunnu, ki lyel pa askari me monnye bene orume woko dyere. Gin askari-gu ducu ginekogi ki pala lucwan. Lyelgi tye piny wa i dye bur ka matut adada, ki askari dul monnye gurumo lyelle woko; gin ducu doŋ ginekogi woko ki pala lucwan, gin jo ma yam nyayo lworo marac i lobo pa jo makwo-ni. “Elam bene tye kunnu, kun lwakke ducu gurumo lyelle woko; gin ducu ginekogi woko ki pala lucwan. Ci gudonyo piny i lyel i lobo pa jo muto ma kun pe gilirogi. Gin aye jo ma ginyayo lworo marac i lobo pa jo makwo, ento gibedo ki lewic kacel ki jo ma gidonyo piny i bur. Gipeto kitanda pi jo Elam i kin jo ma ginekogi kacel ki lwakke ducu, dok lyel pa askarine orume woko dyere. Gin ducu jo ma pe gilirogi, ginekogi woko ki pala lucwan. Yam lworo i komgi onya i lobo pa jo makwo, ento koni doŋ gibedo ki lewic kacel ki jo ma gidonyo piny i bur; giketogi i kin jo ma ginekogi. “Mecek ki Tubal gitye kunnu, kacel ki lwakgi ducu, ki lyel pa askari monygi bene orumogi woko dyere. Gin ducu jo ma pe gilirogi ginekogi woko i lweny ki pala lucwan; pien gubedo ka nyayo lworo marac i lobo pa jo makwo. Dano pe miyo botgi woro i kare ma giyikogi, kit macalo gimiyo woro kwede i kare ma giyiko twoni oteka lweny macon, ma giketogi i lyel ma gurukke woko ki jami lwenygi, giteno wigi ki pala lucwangi dok giumo komgi ki kwotgi. Gin twoni oteka magi onoŋo yam gitego mada ma gubedo ka miyo lworo marac omako jo makwo. “Meno aye kit macalo jo Ejipt bibuto kwede ma noŋo doŋ ginyotogi woko i kin jo ma pe gilirogi, kacel ki jo ma ginekogi ki pala lucwan. “Edom tye kunnu kacel ki lukerre ki rwodine ducu. Gin onoŋo gubedo askari matego mada, ento kombeddi doŋ giyikogi kacel ki jo ma pe gilirogi ma yam ginekogi i lweny. “Rwodi me lobo ma: yo tuŋ acam ducu gitye kunnu, ki jo Cidon ducu bene tye kunnu. Tekogi ma yam gitye kwede-ni onoŋo onyaye lworo mada, ento kombeddi doŋ gudonyo i lyel: ki lewic kacel ki jo ma ginekogi i lweny, gubuto doŋ ma pe gilirogi. Doŋ gibedo ki lewic kacel ki jo ma’ gidonyo piny i bur. “Ka Parao kabaka me Ejipt onenogi ducu, cwinye bikwe pi tone kekene ki pi to pa askari me monnye ma ginekogi woko i lweny-nyi.’ Man Rwot Lubaŋa ma owaco. “An aye ma amiyo kabaka me Ejipt onyayo lworo i kom jo makwo, ento kombeddi en kacel ki askari me monnye gibinekogi woko ci gipyelogi i lyel i kinjo ma pe gilirogi, ma ginekogi i lweny, Parao kacel ki lwakke ducu.” Man Rwot Lubaŋa ma owaco. Rwot oloko kweda. Owacci, “Wod pa dano, tit bot lutuwu jo Icrael kun iwaco botgi gin ma timme ka akelo lweny i lobo mo-ni. Gin wegi lobo meno giyero dano ki i kingi me bedo lakur-pinygi. Ka ce oneno lukwor gibino i lobo, ci kutotum wek dano guŋe komgi; Ka ce inen dano mo owinyo koko tum, ce pe oketo iye cwinye, ka lukwor gubino guneke, lok me tone bibedo i wiye kekene. Tone bedo balle gire, pien kadi en owinyo koko tum, ci pe oketo iye cwinye. Ka nene oketo iye cwinye, kono onoŋo olaro kwone. Ento ka ce lakur-piny oneno lukwor bino ce pe ‘okuto tum, wek otit bot dano guŋe komgi, ce lukwor gubino guneko ŋat mo ki i kingi; doŋ dano ma ‘kit meno bito i balle, mumiyo abidwoko alii me tone i wi lakur-piny. “Doŋ kombeddi, in wod pa dano, aketi me bedo lakur-piny pi rok me Icrael. Ibitito botgi lok ducu ma acikogi kwede ma an awacci, Ka ce awaco bot latim marac ni, In latim marac, ibito ada, ento ka pe iloko bote kun icike me lokke owek timo gin marac, ci dano meno ma latim marac bito i ballenu, ento alii me tone abidwoko i wii. Ento ka ce onoŋo ijuko en latim marac meno, kun icike ni owek yo me tim maraco, ka ce pe olokke oweko yo me tim maracone-ni, en bito i balle-nu, ento noŋo in giri ilaro kwoni, “Doŋ in, wod pa dano, wac bot jo me ot pa Icrael ni, Wun wuwaco kuman ni, ‘Tim aranyiwa ki balwa ducu gire tye i wiwa, doŋ gimiyo wato woko ata; dok watwero bedo kwo niŋ iniŋ?’ Wac botgi ni, Macalo atye kwe-ni, man Rwot Lubaŋa ma owaco, cwinya pe bedo yom me neno ka latim marac to, ento amito en oŋuti owek timo bal ci olokke odwog bota wek obed kwo. Wulokke, wudwog cen wuwek timo bal; piŋo wumito ni wuto woko, wunjo me ot pa Icrael? “Kombeddi, in wod pa dano, wac bot lutuwu jo Icrael ni, Ka dano ma kite atir otimo bal, ci gin maber ma en otiyo doŋ pe twero lare. Ka ce dano ma latim marac oweko timo gin marac, pe gibiketo can i kome, ento ka ce dano ma kite atir ocako timo bal, pe dok bimedde ki bedo kwo. Ento kadi bed awaco bot dano ma kite atir ni bibedo kwo ada, ento ka ce en ojeŋŋe i kom kite ma atir-ri ce ocako timo bal, ci pe abipo i kom gin mabeco ducu ma en otiyo kadi ki acel. En bito pi ballenu ma en otimo-ni. Doki kadi awaco ki dano ma latim marac ni, ‘In ibito ada,’ ento ka ce en olokke oweko timo bal, ce otiyo gin ma cik mito dok ma tye atir, Labolle tye kit man ni, ka ce latim marac meno okwanyo gin ma gijeŋo bote odwoko cen bot rwode, dok bene ka en odwoko gin ma yam en oyako ayaka cen, kun lubo cik ducu ma miyo kwo, ma pe doŋ timo kit bal mo; en bibedo kwo ada, pe bito gire. Doŋ abiweko bal ducu ma yam en otimo pe doŋ abipo pigi. En doŋ gire bibedo kwo ada pien otimo gin ma cik mito dok ma tye atir. “Ento lutuwu giwacci, ‘Gin ma Rwot tye ka timone pe atir!’ Meno pe kakare, gin ma gin timo aye pe atir. Ka ce dano ma kite atir olokke oweko timo gin ma tye atir, ce otimo bal, en bito pi balle-nu. Ento ka latim marac olokke oweko timme maraco, ce otiyo gin ma cik mito dok ma tye atir, en bibedo kwo pire. Ento wun wuwacci, ‘Gin ma Rwot tye ka timone pe atir. Abiŋolo kop i komwu kun Lubo gin ma wutimo wun jo Icrael.” I nino dwe abic, dwe me apar, i mwaka me apar wiye aryo, ma onoŋo doŋ giterowa watye i opii, dano mo ma obwot ki i Jerucalem obino bota ci otitta ni gaŋ me Jerucalem doŋ opoto woko. Otyeno ma onoŋo dano-nu pud peya obino bota, onoŋo doŋ alimo tek ma nyuto ni Rwot onoŋo odiya ki ciŋe i cawa meno. I odiko ma doŋ dano-nu obino bota ci Rwot oyabo doga omiya teko me lok ci doga oyabbe, pe dok abedo ma doga oto. Rwot oloko kweda, Owacci, “Wod pa dano, jo magi ma gibedo i gaŋi magi ma doŋ odoŋ obur i lobo Icrael-li giwacci, ‘Abraim yam obedo dano acel keken, ento gimiye lobo man ocamo woko ducu obedo mere kene. Ento wan wapol, adada lobo-ni doŋ gimiyowa me bedo mewa.’ “Pi meno in myero itit botgi gin ma an Rwot Lubaŋa atye ka wacone kuman ni, Wun wucamo riŋo ma tye ki remo i kome, kun wuilo waŋwu malo wuworo cal jogi. Wuneko dano bene, ci wutamo ni lobo-ni wubicamo bedo mewu ada? Wun doŋ wujeŋŋe mewu i kom pala Lucwan, wutimo gin me kwer mapol kun dano acel acel balo dako pa lawote; ci wutamo ni wubicamo-lobo-ni bedo mewu ada? “Wac botgi ni Rwot Lubaŋa owaco kuman ni, Kit macalo atye kwe-ni, adada jo ma gibedo i kabedo ma doŋ odoko wi obur-ri gibinekogi woko ki pala Lucwan; ki jo ma ginoŋogi gibedo i tim ata abimiyo ŋuu mwodogi woko. Doŋ jo ma gibedo i gaŋi me cel gogo, ki jo ma gibedo i boro got-gu two gemo binekogi woko. Abimiyo lobo-ni doko obur dok kabedo ka ma dano mo pe bedo iye, Man bimiyo teko ma onoŋo giwakke pire-ni doŋ gik woko. Godi me Icrael doŋ bidoŋ noŋo ma ŋat mo pe dok bikato ki i kingi. Ka inen amiyo lobo odoko obur, dok ka ma dano pe bedo iye, pi tim me kwergi ducu ma gutimo, ci bimiyo giŋeyo ni an aye a Rwot.” Rwot owacci, “In, wod pa dano, lutuwu gitye ka lok piri ka gurwatte i ŋet cel me gaŋ nyo i dog odigi. Dano acel acel waco ki lawote ni, ‘Bin, waciwiny kit lok aŋo ma oa ki bot Rwot kombeddi.’ Ci gibino boti kit macalo dano kare ducu gibino-ni, gibedo piny i nyimi macalo jona, kun giwinyo gin ducu ma in itito botgi, ento pe gicitiyo gin ma in itito botgi-ni. Ginyuto ni gitye ki mar madwoŋ ki lok goba ma giloko ki doggi keken, ento guketo cwinygi mere i noŋo lim i yo ma pe atir. Doŋ in inen botgi calo dano mo ma wero wer me mar ma noŋo winyo dwane mit, kun bene goyo agoya ki nana, Giwinyo lok ducu ma iwaco-gu, ento pe gilubo mo kadi ki acel. I kare ma lokki bitimme, ci bitimme ada, man bimiyo giŋeyo ni lanebi mo yam obedo i kingi.” Rwot oloko kweda. Owacci, “Wod pa dano, tit lok i kom lukwat pa jo Icrael, ma gin romina. Tit botgi lok ma an Rwot Lubaŋa atye ka wacone botgi kuman ni, Can i wiwu, wun lukwat me Icrael! Wugwoko komwu keken, ento pe wupito romina. Wumato cakgi, wuruko yer romo-gu, wuneko romi mucwe-gu me acamawu, ento pe wupito romina. Pe wubedo ka gwoko jo magoro, pe wucano jo ma komgi lit, pe wutweyo tyen jo ma gulimo ret, jo muŋak pe wudwokogi cen, pe wubedo ka yenyo jo ma gurwenyo, ento wubedo ka loyogi ki tek dok ki gero, Kit meno guket woko, pien lakwatgi mo onoŋo pe; mumiyo romi gudoko cam pa ŋuu ducu. Romina guket woko gubedo ka lak ata i wi godi ducu ki i wi cere maboco-gu ducu. Romina guket woko i wi lobo ducu, ento ŋat mo pe ma oyenyogi nyo ma otemme me nonogi. “Kombeddi wun lukwat, wuwiny gin ma an Rwot atye ka wacone botwu. Adada kit macalo an Rwot Lubaŋa makwo-ni, myero wuwiny lokka. Romina doŋ gudoko lee me amaka, gudoko cam pa ŋuu, pien onoŋo pe gitye ki lakwat mo. Lukwat pe guyenyo romina, ento gubedo ka pito komgi keken, ma pe gubedo ka pito romina. Pi meno, wuwiny lokka, wun lukwat. An Rwot Lubaŋa atuco botwu atyer ni atye ki lok i komwu. Abikwanyo romina woko ki botwu, abimiyo pe wubedo lukwatgi matwal, dok bene pe doŋ wubimedde ki pito komwu kekenwu. Abilaro romina woko ki i dogwu, pe doŋ wubibedo ka camogi. “An Rwot Lubaŋa, atito botwu ni an kikoma aye doŋ abiyenyo romina, dok abiketo cwinya me gwokogi. Kit macalo lakwat keto kwede cwinye me yenyo romine ma guket woko i kabedo ma tye ka maboco-gu, kit meno bene an abiketo cwinya me gwoko romina, abilarogi, akwanyogi woko ki i kabedo ducu ma yam guket iye i nino me pol ki mutu mapek macol licuc. Abikwanyogi ki i kin lurok, kun acokogi ki i wi lobo ducu, ci akelogi wa i lobogi kikome. Abimiyo gibedo ka cam i wi godi me Icrael, i ŋet waŋ it ma gunnye agunya, ki i kabedo ducu ma i lobo ka ma dano bedo iye. Abimiyo gicamo lum mabeco i kakwat maberre, ki i kabedo ma tye i wi godi maboco me Icrael; gibibuto kunnu i olet ma lobone ber me kakwat, dok gibicamo lum mabeco i wi godi me Icrael. An kikoma aye abibedo lakwat romina, ci abimiyo gibuto piny, man Rwot Lubaŋa ma owaco. Abiyenyo romi ma gurwenyo, dok abikwanyo romi ma yam gitye ka lak ata adwokogi cen, abitweyo tyen romi ma ret tye iye, abimiyo romi magoro gijiŋ gidoko tek, dok abiketo waŋa me ne-no romi mucwe ki mategone; abipitogi i kit ma atir. “Kombeddi doŋ, wun romina, an Rwot Lubaŋa atittiwu ni abiŋolo kop i komwu wun ducu, kun apoko kinwu woko, aketo jo mabeco pat, ki jo maraco bene aketogi pat kaikengi; apoko romi woko ki i kom dyegi. Lum ma wucamo i kakwat maber-ri mono pe romowu, ma weko wunyono lum mukene wo ko piny ki tyenwu-ni? Dok bene wumato pii maleŋ, ento wurubo pii mukene ki tyenwu wubalo woko! Wutamo ni myero romina gucam lum ma doŋ wunyono woko piny ki tyenwu, dok wumito gumat pii ma wurubo ki tyenwu wubalo wokoni? “Pi meno, an Rwot Lubaŋa doŋ abiŋolo kop i kin romi mucwe ki romi mujony. Kitmacalo wubedo ka coro romi magoro ki lakŋetwu ki gwokwu, kun wutuco igi woko pil ki tuŋwu, wumiyo guket gucito woko wa ka maboco-ni, an abilarogi, pe gibibedo me amaka pa ŋuu; ci abiŋolo kop i kin romi ki romi luwotgi. Abiketo laticca Daudi bedo lakwatgi, lakwat acel keken; en bipitogi kun bene bedo lakwatgi. Doŋ an Rwot Lubaŋa abibedo Lubaŋagi, ki laticca Daudi bibedo rwot i kingi. An Rwot doŋ atyeko loko man, Abiketo gicikke me kuc kwedgi kun atyeko ŋuu ma yelogi-ni woko ducu ki i lobogi, wek doŋ gubed i dye tim laboŋo ayela mo, kun bene gibuto wa i buŋa. Abimiyo gum i komgi ki i kom kabedo ducu murumo got mera maleŋ, Dok abimiyo kot cwer botgi i kare ma noŋo gimito, kot kikome, ci bikelo gum botgi, Yadi ducu me tim binyako nyiggi, ki lobo bene bimiyo ginapita ma gipuro iye cek nya mabup, man miyo gibedo i lobogi laboŋo ayela mo. Ka doŋ alaro jona woko ki i ciŋ jo ma yam gulokogi gudoko opiigi, kun bene aturo rii okol ma yam gitweyogi kwede woko, ci doŋ gibiŋeyo ni an aye a Rwot, Pe doŋ gibibedo lee me amaka pa lurok matwal, kadi ki ŋuu me tim bene doŋ pe bimwodogi; gibibedo maber laboŋo ayela mo, dok bene ŋat mo pe ma bimiyo gibedo ki lworo. Abimiyogi ŋom maber ma ceko cam mabup atika, ma bimiyo kec doŋ pe binekogi matwal i lobogi, doŋ pe gibibedo ginacaya pa jo me rok ducu, Ci gin ducu gibiŋeyo ni an aye a Rwot Lubaŋa gi, atye ka gwokogi, dok bene gin jo me ot pa Icrael gin jona. Man Rwot Lubaŋa ma owaco. Doŋ wunromina, an aye ma akwayowu i oletta, an Lubaŋawu,” man Rwot Lubaŋa ma owaco. Rwot oloko kweda. Owacci, “Wod pa dano, cik waŋi inen got Ceir, ci itit lok i kome. Wac bot jo ma gibedo kunnu ni, an Rwot Lubaŋa awaco kuman ‘ni, Nen, atye ki lok i komwu, wun jo ma i kom got Ceir. Abiryeyo ciŋa i komwu ci amiyo lobowu doko obur ka ma dano mo pe bedo iye. Abiweko gaŋiwu ducu doko obur, ki wun doŋ wubibedo i lobo ma oballe woko. Man bimiyo wuŋeyo ni an aye a Rwot. “Wun onoŋo wubedo lumone pa jo Icrael ducu, kun wumiyo gibedo ka nekogi woko ki pala lucwan i kare ma can opoto i komgi, ki i kare me keto can i komgi me agikki. Pi meno, kit macalo atye kwo-ni, man Rwot Lubaŋa ma owaco, doŋ abiyubo to aye ma binekowu, ma binekowu nakanaka tyekowu woko; pien wutye ki bal alii me nek, pi meno to bibedo ka nekowu nakanaka. Abimiyo got Ceir doŋ obur, ki lobone doŋ iye noŋo; doŋ abimiyo jo ma gibino ki jo ma gicito gikato ki kenyo gitum woko matwal. Abipoŋo wi godiwu ki kom dano ma ginekogi; ki jo ma ginekogi ki pala lucwan gibipoto i wi cerewu ducu ki i notawu ki loŋowu ducu. Abimiyo lobowu iye doŋ noŋo kare ducu, ki gaŋiwu bene ducu dano doŋ pe bibedo iye. Man bimiyo wuŋeyo ni an aye a Rwot. “Yam wubedo ka wacci rok magi aryo, Icrael ki Juda, ki lobogi ducu bidoko mewu, dok bene wubicamo bedo mewu, kadi bed an Rwot aye abedo Lubaŋagi. Pi meno, kit macalo atye kwo-ni, man Rwot Lubaŋa ma owaco, abitic kwedwu kun lubo kit kinigawu ki nyekowu ma doŋ wutyeko nyutogi woko ka maleŋ-ŋi, pien wubedo ki adagadaga i kom jona. Abimiyo wuneya i kinwu kekenwu, ka doŋ acako ŋolo kop i komwu pi gin ma wutimo i kom jona. Man bimiyo wuŋeyo ni an Rwot onoŋo awinyo lok ma wubedo ka wacone ki cac i kom godi me Icrael, kun wuwacci doŋ gudoŋ igi noŋo, dok ni doŋ gimiyo botwu ni wucam obed mewu, Dok bene wumine kenwu me bedo dit makato an woko, kun wunyatte kwede i koma ma wuloko lok mapol; ento meno an awinyo woko.” Rwot Lubaŋa owaco kuman ni, “Abimiyo lobowu iye doŋ noŋo, wek jo me wi lobo ducu gubed ki yomcwiny pi can ma opoto i komwu. Kit macalo wubedo ki yomcwiny pi ginaleya pa jo me ot pa Icrael, ni pien lobogi doŋ odoŋ nono, an bene abitimowu kit meno, wun jo ma wubedo i got Ceir, ki jo Edom ducu. Man bimiyo giŋeyo ni an aye a Rwot.” Rwot owacci, “In wod pa dano, tit ki godi me Icrael kun iwaco botgi ni guwiny lok ma an Rwot Lubaŋa atye ka loko botgi ni, ‘Lukwor pa jo Icrael giwacci, Doŋ wuneno, cere macon-gu ducu doŋ gudoko mewa.’ “Tit lok kun ituco gin ma an Rwot Lubaŋa atye ka wacone. I kare ma rok ma cokcok ma gurumo lobo Icrael gulwenyo dok guyako godi me Icrael woko, gin ducu gubedo ka nywaro jo Icrael ki lok aŋec. Pi meno, wun godi me Icrael, wuwiny lok ma an Rwot Lubaŋa atye ka wacone bot godi ki cere, bot ora kulu ki nota, ki bot gaŋi ma yam doŋ giweko gudoŋ obur, ki gaŋi ma yam doŋ gitenyo woko, ma rok ducu ma gurumo ka ŋetgi guyako ci doŋ odoko ginacayagi. “Mumiyo an Rwot Lubaŋa dok aloko woko atyer ka maleŋ i kom rok ma gurumo Icrael ki kiniga malyet at ika, makatone alok i kom Edom. Pien gin jo-nu gubino ki yomcwiny madit kun gitye ki cac bene, ci gumako lobona gucamo odoko megi wek giyak jami ma tye iye woko ducu. Pi meno, tit lok ma kemo lobo Icrael, kun iwaco bot godi ki cere-gu, bot nota ki loŋo-gu ni Rwot Lubaŋa owaco kuman ni, Nen, atye ka lok ki nyeko ki akemo, pien doŋ wuciro cac pa lurok ma omiyowu lewic mada. “Mumiyo Rwot Lubaŋa owaco kuman ni, Akwoŋŋe akwoŋa ni lurok ducu ma gurumowu dyere gin kikomgi gibicayogi mada kun lewic bene makogi marac. Ento wun godi me Icrael, yadi dok gibidoŋo i wiwu ci ginyako nyiggi pi jona jo Icrael; pien gin doŋ cok dwogo paco. Pien an atye piwu, wun jona, dok abineno ada ni lobowe gipuro dok gipito kodi iye bene. Abimiyo wunya wudoko mapol, wun jo me ot pa Icrael ducu, Wubibedo i gaŋi doki, ki kabedo ma yam gijwerogi gudoŋ obur-ri wubigerogi odoco, Abimiyo dano kadi wa lee ginya gimedde. Welwu bimedde wubedo pol makato kit ma yam wutye kwede con ca, kun wunywalo litino mapol. Abimiyo wubedo kunnu kit macalo yam koŋ wubedo i kare mukwoŋo ca ci abimiyowu lonyo mabup makato lonyo ma onoŋo yam wutye kwede. Man bimiyo wuŋeyo ni an aye a Rwot. Abikelowu adwokowu cen, wun jona jo Icrael, amiyo wuwoto i dye lobowu. Wubileyo lobo man doŋ bedo mewu, doŋ bedowu i lobo-ni pe doŋ bimiyo kec neko litinowu wacel. “An Rwot Lubaŋa, awacci ada, dano kara gilwoŋo godi ni, ‘Lucam dano’, kun giwaco bene’ ni godi gineko litino pa rok ma gibedo iye woko. Ento cakke tin cito kwede anyim pe doŋ gibibedo lucam dano, ma giyako litino ki botwu ci gimwodo wako. Man Rwot Lubaŋa ma owaco. Dok bene abimiyo pe doŋ wuwinyo cac pa lurok matwal, pe doŋ wubibedo ki lewic i kin lurok, dok godi pe doŋ gibineko litino pa rok man matwal. Man Rwot Lubaŋa ma owaco.” Rwot oloko kweda. Owacca ni, “Wod pa dano, i kare ma jo Icrael gubedo i lobogi gubalo woko ki kitgi ki gin ducu ma gubedo ka timone. Aneno kitgi obedo calo gin ma keni calo two kwer ma dako twoyo ka karene oromo. Mumiyo aonyo akemona woko i komgi pi dano ma gubedo ka nekone i lobo, dok bene pi cal jogi ma gutiyo ma gubalo kwede lobo woko-ni. Yam akeyogi woko i kin lurok, ci guket guromo wi lobo ducu. Yam aŋolo kop i komgi kun onoŋo alubo kitgi ki gin ducu ma onoŋo gutimo. Ento i kare ma gucito i kin lurok, i kabedo ducu ma gubedo ka cito iye, gupyedo nyiŋa maleŋ-ŋi, pien dano gubedo ka loko lok i komgi ni, ‘Magi dano pa Rwot, ento gin gua guweko lobo ma yam Rwot omiyogi-ni woko.’ Ento an onoŋo abedo ka paro pi nyiŋa maleŋ-ŋi, ma jo Icrael gumiyo gibedo ka pyedone i kin lurok ma gin gucito gubedo i kingi-ni. “Pi meno, wac bot jo Icrael lok ma an Rwot Lubaŋa amito waco botgi, ni, ‘Gin ma aecito ka timone-ni pe pi wun jo Icrael, ento abetimo pi nyiŋa maleŋŋi, ma doŋ wun wupyedo woko i kin lurok ka ma wucito iye-ni, Abinyuto kit ma nyiŋa leŋ kwede, ma doŋ gityeko pyedone woko i kin lurok, ma wun wupyedo i kingi-ni. Ka anyuto kit ma aleŋ kwede-ni i komwu ma lurok bene gineno, ci bimiyo giŋeyo ni an aye a Rwot, Man Rwot Lubaŋa ma owaco. Abikwanyowu ki i rok ducu, dok acokowu woko liweŋ ki i wi lobo ducu, ci akelowu i lobowu kikome, Abikiro pii maleŋ i komwu miyo wulonnye woko i kom gin ma keni ducu, ki i woro cal jogiwu ducu, ci doŋ alonyowu miyo wubedo leŋ. Abimiyowu cwiny manyen dok aketo cwiny manyen i iwu; abikwanyo cwiny matek calo got-ti woko ki i komwu, ci amiyowu cwiny pa dano. Dok abiketo cwiny mera i iwu, kun am iyo wubedo ka lubo cikka kun wugwokke ka tiyo gin ma an aciko ducu. Wubibedo i lobo ma yam amiyo bot kwarowu, wun wubibedo jona, ki an abibedo Lubaŋawu, Abilarowu ki i gin ducu ma keni ma yam wutimo; ci abimiyo bel cek botwu mabup atika, doŋ pe abimiyo kec bedo ka nekowu. Abimiyo yadi nyak nyig mabup dok bene amedo cam ma i poto cek mabup, wek pe doŋ wubed ki lewic i kin lurok pi kec. Man bimiyo wupo i kom kitwu maraco, ki i kom gin maraco ma wutimo; mumiyo wubibedo ki keccwiny i komwu kenwu pi balwu me lewic ki gin me kwer ducu ma wutimo. Myero wuŋe atir ni gin ma abitimo-ni pe atimo piwu. Lewic omakwu dok alee bene myero otwodwu pi timwu maraco. Man Rwot Lubaŋa ma owaco.” Rwot Lubaŋa owaco kuman ni, “I nino ma abilonyowu woko ki i kom balwu ducu, abimiyo dano doŋ gibedo i gaŋi, ki kabedo ducu ma yam gudoŋ obur-gu gibigerogi odoco. Doŋ lobo ma yam onoŋo iye odoŋ nono gibicako purone, miyo pe doŋ nen macalo lobo ma gibalo woko bot jo ma gikato ki ka ŋete, Gibiwacci lobo man ma yam odoko tim ata-ni, doŋ olokke odoko calo poto Eden, dok gaŋi ma yam gijwero igi odoŋ nono ma gudoko obur-ri kombeddi doŋ dano gibedo i igi dok bene gigero cel gogo orumogi woko dyere. Doŋ man bimiyo lurok ma gudoŋ gibedo ka ŋetwu ma gurumowu giŋeyo ni an Rwot doŋ agero kabedo magi ducu ma yam odoko obur-ri odoco, ka dok amiyo gipuro ka ma yam odoko tim ata-ni woko. An Rwot doŋ atyeko loko ni abitimo man, dok bene abitimo.” Rwot Lubaŋa owaco kuman ni, “Abitiyo gin makato maca ma yam atiyo-ni. Abiweko jo Icrael gilega ni akonygi. Abimiyo ginya welgi medde calo lwak romi. Gaŋi magi ducu ma kombeddi doŋ gudoko obur-ri doŋ bipoŋ ki lwak dano mapol ata calo Jerucalem ma yam opoŋ ki lwak: romi ma onoŋo giterogi me atyera me gitum i nino madito ma giciko. Man bimiyo giŋeyo ni an aye a Rwot.” Rwot onoŋo odiya matek ki ciŋe, ci okela woko ki Cwiny mere, ci ociba piny i dye nota ma opoŋ ki cogo keken. Otela awoto arumo nota woko aduno i kin cogo; ci aneno lwak cogo mapol ata tye kunnu, dok onoŋo doŋ gutwo woko adada. Ci Rwot owacca ni, “Wod pa dano, cogo magi doki gitwero bedo kwo?” An adok iye ni, “Ai Rwot Lubaŋa, in giri aye iŋeyo.” Rwot dok owacca ni, “Tit lok bot cogo magi, kun iwaco botgi ni, Wun cogo mutwo, wuwiny lok pa Rwot. Wac botgi ni an, Rwot Lubaŋa, abewaco botgi kuman ni, ‘Abeketo yweyo me kwo i iwu ci amiyo doki wubedo kwo. Dok bene abiketo ler i komwu, ci amiyo riŋo bino i komwu, ci amiyo del kom umo komwu woko. Abiketo yweyo me kwo i iwu, ci wubibedo kwo doki. Man bimiyo wuŋeyo ni an aye a Rwot.’ ” Kit meno atito lok kit macalo onoŋo giwacca ni atiti. I kare ma atye ka tito lok, awinyo woo, ci cogo gucokke guribbe woko kacel, ŋat man omoko i kom lawote. I kare meno abedo ka nenogi, ci aneno ler komgi, ki riŋo komgi bene doŋ obino i komgi, ka del-komgi doŋ oumogi woko. Ento yweyo onoŋo pe i igi. Rwot Lubaŋa owacca ni, “Wod pa dano, tit lok bot yamo. Tit ki yamo ni an aciko ni en yamo obin kun a ki tuŋŋi ki tuŋŋi ducu, me kelo yweyo i kom dano magi ma guto-ni wek doki gucak bedo kwo.” Atito lok kit meno kit macalo Rwot ocika kwede, ci yweyo me kwo odonyo i igi, ci gucako bedo kwo, gucuŋo ki tyengi. Onoŋo gin dano ma romo dul mony madit twatwal. Lubaŋa dok owacca ni, “Wod pa dano, cogo magi gin aye jo me ot pa Icrael. Giwaco ni cogogi doŋ otwo woko; ki gengi doŋ pe matwal pi kwogi me kare me anyim. Pi meno, tit lok bot jona jo Icrael ni an, Rwot Lubaŋa, abiyabo lyel woko. Abicero jona-ni woko ki i lyel, ci doŋ adwokogi cen paco i lobo Icrael. Gin jona gibiŋeyo ni an aye a Rwot, ka doŋ ayabo lyelgi, ma acerogi woko ki i lyel. Dok abiketo Cwiny mera i igi, ci miyo gibedo kwo, abiketogi bene gibedo i lobogi kikome. Man bimiyo giŋeyo ni an aye a Rwot. Yam acikke ni abitimo man, ci doŋ atyeko timone. Man Rwot ma owaco.” Rwot oloko kweda. Owacci, “Wod pa dano, kwany odoo yat mo ci ico coc i kome ni, ‘Pi Juda, dok pi jo Icrael ma yam guribbe kwede.’ Ka dok ikwany odoo yat mukene ci ico i kome ni, ‘Pi Yucepu ma koni doŋ tye i ciŋ Epraim dok pi jo Icrael ducu ma yam guribbe kwede.’ Ci doŋ irib odoo aryo-ni woko kacel wek doŋ gudok odoo acel ki i ciŋi, Ento lutuwu gibipenyi ni itit botgi pi odoo magi aryo-ni. In itit botgi ni an, Rwot Lubaŋa, abekwanyo odoo ma ocuŋ pi Icrael, ci aketo i kom odoo ma ocuŋ pi Juda-ni. Gin odoo magi aryo-ni abimiyo gidoko odoo acel kun amako i ciŋa bene. Ka doŋ inen imako odoo magi aryo ma icoyo coc i komgi-ni i ciŋi ma gin gineno, ci doŋ itit botgi kuman ni an, Rwot Lubaŋa, abekwanyo jo Icrael woko ki i kin lurok ka ma yam gucito gubedo i kingi-ni, abicokogi woko ki i kabedo ducu, akelogi aketogi i lobogi kikome. Abiribogi gidoko rok acel keken i lobogi, i wi godi me Icrael. Doŋ gibibedo ki kabaka acel keken ma loyo gin ducu, pe gibipokke gibedo rok aryo, dok bene pe gibipokke me bedo ki ker aryo, Pe dok gibibalo komgi kekengi ki cal lubaŋagi ki gin me kwer mogo maraco ma yam gitimo, pe bene gibibalo komgi ki kit balgi ducu. Abilarogi ki i yo ducu ma giŋak gidok kwede ka timo bal, mumiyo guŋayo waŋa woko, ci abilonyogi gibedo leŋ; gin doŋ gibibedo jona, ki an abibedo Lubaŋagi, Laticca Daudi aye doŋ bibedo kabaka ma loyogi. Gin ducu doŋ gibibedo ki lakwat acel. Gibilubo cikka dok bene gibigwoko gin ma an aciko ducu kun gitiyo bene, Gibibedo i lobo ma yam kwarowu gubedo iye, ma onoŋo amiyo bot laticca Yakobo. Gibibedo kunnu matwal kacel ki litinogi wa ki likwayogi bene ducu. Laticca Daudi biloyogi matwal. Doŋ abiketo gicikkena kwedgi; gicikke man ma aketo kwedgi-ni bedo gicikke me kuc ma ri matwal. Abimiyo gum botgi dok abimiyo ginya gimedde, ci doŋ abiketo kabedona maleŋ i dyegi matwal. Abibedo kunnu kacel kwedgi kun abedo Lubaŋagi, ki gin bene gibedo jona. Man bimiyo lurok doŋ giŋeyo ni an Rwot doŋ alonyo Icrael woko, ka guneno kabedona maleŋ ma bedo matwal-li tye i dyegi.” Rwot oloko kweda. Owacci, “Wod pa dano, cik waŋi inen Gog ma tye i lobo Magog, En aye laker madit me lobo Mecek ki Tubal. Tit lok i kome, kun iwacce ni Rwot Lubaŋa owaco kuman ni, ‘Nen, atye ki lok i komi, in Gog, laker madit ma loyo Mecek ki Tubal. Abimiyo ilokke ineno ka mukene, ci aŋolo cwaki woko ki goli, apeyi kwede akeli ka maleŋ kacel ki monnyi ducu, aguragura ki jo ma nweco kwedgi, ma gin ducu gurukke woko ki jami lweny. Gin lwak ma gitye i dul mony madit, ma gin ducu gutnako kwot ocal ki kwot kikome, ki pala lucwan. Jo Percia ki Kuc, ki jo Put bene gitye kacel kwedgi, ma gin ducu gumako kwot kun bene guruko tok me lweny. Jo Gomer ki dul monygi ducu, ki jo Bet-togarma ma gua ki ka mabor i lobo ma tye yo tuŋ acam gubino ki dul monygi ducu, ki lwak me rok mukene bene ducu gubino gitye kacel kwedgi.’ “Tit bote ni en myero doŋ, en kacel ki dul monnye ducu ma gucokke bote gubed ma doŋ guyubbe woko pi winyo cikke. I ŋe mwaka mapol kare bibino ma abicwale ni ocit olweny i kom lobo mo ma dano doŋ gubedo iye laboŋo lworo mo me lweny, en lobo ka ma yam gikelo dano iye ma gicokogi ki i kin rok mapol, wek gubed i wi godi me Icrael ma onoŋo yam odoko titn ata-ni. Jone gikelogi woko ki i kin lurok ci kombeddi gin ducu doŋ gibedo maber laboŋo ayela mo. Doŋ en ki dul monnye kacel ki lwak me rok mapol ma gitye kacel kwede, gibibino calo yamo lapiru ka lweny, ma giumo lobo woko calo pol ma oumo piny.” Rwot Lubaŋa owaco kuman bot Gog ni, “I nino meno ibicako yubo tam i cwinyi me timo gin marac. Ci ibimoko tammi me cito ka lweny i kom lobo ma jone gibedo mot maber laboŋo ayela mo i gaŋi ma pe girumogi ki cel, rii nyonyo bene pe, kadi ki doggan-gu bene pe ma romo gwokogi ka lweny oturre. Ibiyako jami pa dano ma gibedo i gaŋi ma yam odoko obur-ri ci itero woko. Yam gicokogi ki i kin lurok mapatpat ci kombeddi doŋ gitye ki lwak dyaŋi, ki jami mapol, ci gibedo i dye lobo kikome. Jo Ceba, jo Dedan ki lucat-wil ma i gaŋi ma tye i Tarcic gibipenyi ni, ‘In ibino kara ka yako jami? Doŋ ityeko guro dul monnyi woko me tiŋo jami ma giyako, ibino pi coko ryal ki jabu, me coko dyaŋi ki lwak jami mapol, nyo me tiŋo jami madit ma giyako?’ ” Pi meno, Rwot Lubaŋa oora ni atit ki Gog ni etye ka waco lok kuman ni, “I nino meno ka jona jo Icrael gibedo maber laboŋo ayela mo, ci cwinyi bitugge kekeni kun ia ki i kabedoni ma tye ka mabor i lobo ma tye yo tuŋ acam. Ibibino kun itelo wi dul mony madit dok matek ma askari ma gitye iye gua ki i rŋk ducu, gin ducu jo ma nweco ki aguragura. In Gog ibibino ilwenyo i kom jona jo Icrael calo pol ma umo lobo. Lacen ka kare oromo, abicwali icito ka lweny i kom lobona, wek omi lurok guneya, dok pi nyuto ni an aleŋ pi gin ma atiyo ki ciŋi in Gog, kun gin bene gineno. In aye ŋat ma yam abedo ka loko pire i kare mukato con ca, i kare ma amiyo lokka bot luticca lunebi me Icrael, ma gutito lok ni i kare ma pud tye anyim abikeli me lweny i komgi.” Man Rwot Lubaŋa ma owaco. Rwot Lubaŋa owacci, “I nino ma Gog bibino ka lweny iye i kom Icrael, abidoko ger ma noŋo akemo omaka ma pe wacce. Atuco lok ka maleŋ ki nyeko me akemona ma lyel alyela ni, I nino meno oyeŋyeŋ biyeŋo lobo matek. Man bimiyo rec me nam ducu, winyo, lee tim, ki gin ducu ma lak alaka i ŋom-gu, ki jo ducu ma gibedo i lobo komgi myel pi lworo an. Godi ducu gibicorre gipoto woko piny, ki loŋo-gu bene bipoto woko, dok cel ducu gibicorre gipoto woko i nom. Abimiyo Gog bedo ki lworo madwoŋ atika, kun noŋo akelo kit can ducu mapatpat aketo i kome. An Rwot Lubaŋa doŋ aloko. Jone ducu gibinekke woko kekengi ki pala lucwan kun dano acel acel neko lawote. Abiketo can i kome kun akelo two gemo i kome ki neko dano. Abicoro kot ma cwer ki yamo matek, pee ma corre, gweŋ calfa ma mac oliyo woko, ma cwer i kome kacel ki i kom lwak me rok mapatpat ma onoŋo gitye kacel kwede. Kit meno abinyuto bot lwak me rok ducu ni an adit dok aleŋ, kun anyutte i nyimgi ni wek guŋe ya. Man bimiyo giŋeyo ni an aye a Rwot.” Rwot Lubaŋa owacci, “In wod pa dano, tit lok i kom Gog, ma en laker madit ma loyo lobo Mecek ki Tubal, ci ititte ni atye ki lok i kome. Abimiyo en lokke neno ka mukene ci akwanye woko wa i lobo ma tye ka mabor yo tuŋ acam, nio waŋ ma en obino wa i godi me Icrael. Ci abigoyo atumme ki i ciŋe lacam poto woko, dok bene amiyo aterone poto woko ki i cine ma lacuc. Gog ki dul monnye ki lwak me rok mapatpat ma gitye kacel kwede gibipoto gito woko i wi godi me Icrael, ci abimiyo komgi doŋ doko cam pa kwa winyo ducu ma camo riŋo ki pa ŋuu-gu. Gibipoto i dye bar ka maleŋ gito woko. An Rwot Lubaŋa doŋ aloko man. Abicwalo mac i Magog dok i kom jo ma gibedo mot laboŋo ayela i lobo murumo dog nam, man bimiyo giŋeyo ni an aye a Rwot. Abimiyo jona jo Icrael giŋeyo nyiŋa maleŋ-ŋi, doŋ pe abimiyo gipyedo nyina maleŋ-ŋi matwal. Ci rok ducu doŋ gibiŋeyo ni an aye a Rwot, Gat Maleŋ pa Icrael.” Rwot Lubaŋa owaco kuman ni, “Nino ma aloko pire-ni ada doŋ tye ka bino. Jo ma gibedo i gaŋi me Icrael gibicito woko gicoko jami lweny ma giweko-gu giobo ki mac calo yen. Gibiobo mac i kom kwot, atum, atero, odoo madito ki toni, ma gibibedo ka obogi pi mwaka abiro kulu. Man doŋ pe bimiyo gibedo ka coko yen ki i tim, dok bene pe doŋ gibitoŋo yen ki i buŋa, pien doŋ gibimoko mac ki jami lweny ma giweko-gu. Gibiyako jami pa jo ma yam guyako jamigi gucito kwede.” Man Rwot Lubaŋa ma owaco. Rwot Lubaŋa owacci, “I nino meno abimiyo kabedo me yik bot Gog i lobo Icrael, i Nota pa Luwot, ma tye yo tuŋ wokceŋ me nam me Kado. Gog ki jo me dul monnye ducu gibiyikogi kunnu, ci notane doŋ gibilwoŋo ni Nota me Mony pa Gog. Jo Icrael gibibedo ka yiko kom jo muto-ni pi dwe abiro kulu, pi lonyo lobogi wek obed maleŋ kit ma yam con. Wegi lobo ducu gibibedo ka yiko kom jo-nu, man bimiyo giworogi pi gin ma gutimo i nino ma ali mo iye locca-ni. An Rwot Lubaŋa doŋ aloko. Gibiyero jo mogo ki i kingi bedo ka wot kun giwok gikato ki i lobogi teretere me yiko kom jo mogo ma yam noŋo pud gudoŋ, ma onoŋo pe giyikogi, pi lonyo lobogi wek dok obed maleŋ kit ma yam tye kwede con. Doŋ i ŋe dwe abiro gibibedo ka ŋiyo piny i kabedo ducu me neno ka doŋ giyiko jo muto ducu ki i lobo. I kare ma noŋo jo ma giyerogi-ni tye ka wot i lobo, ka ce ŋat mo onoŋo cogo dano, ci keto lanyut mo ka ŋet cogo-nu, nio waŋ ma luyik dano guyiko woko i Nota me Mony pa Gog. (Gaŋ mo tye kunnu ma, gilwoŋo ni Kamona.) Meno aye kit macalo gibilonyo ki lobo wek obed maleŋ kit ma yam con.” Rwot Lubaŋa owaco bota kuman ni, “In wod pa dano, lwon kwa winyo ducu mapatpat ki lee tim ducu me cokke ka camo gitum ma atye ka yubone pigi. Man bibedo karama madit i wi godi me Icrael, ka ma gibicamo iye riŋo dok bene gimato iye remo. Gibicamo kom askari ma gin cogi oteka, dok gibimato remo pa luloc me lobo, remo nyogi romi ki pa litino romi, pa dyegi ki pa twoni, ma gin ducu lim makwo me Bacan ma gucwe. Ka aneko jo magi macalo lee me gitum, winyo kacel ki lee gibicamo kit moo ducu ma giromo noŋone, dok gibimato remo nio wan ma gumer woko. Gibicamo gin ducu ma gunoŋo i wi me jana ma giromo camone, aguragura ki jo ma giŋweco kwedgi, riŋo kom askari ki pa oteka lweny.” Man Rwot Lubaŋa ma owaco. Rwot Lubaŋa owacci, “Abinyuto deyona i kin lurok wek gunen, dok bene abinyuto botgi kit macalo atiyo ki twerona me ŋolo kop atir, ma noŋo aketo ciŋa i komgi, Cakke i nino meno cito kwede anyim, jo Icrael gibiŋeyo ni an aye a Rwot Lubaŋagi, Lurok doŋ gibigeyo ni jo Icrael yam giterogi i opii pi balgi, pien onoŋo gutimo bal maraco atika i koma, mumiyo aloko geya woko botgi ci amiyo Lukworgi gumakogi ka gunekogi ducu ki pala lucwan. Atimogi muporo balgi ki rocgi ma gutimo, ci alokke woko ki botgi.” Rwot Lubaŋa owacci, “Pi meno kombeddi, kica bimaka I kom likwayo pa Yakobo, ma gin aye jo Icrael, ci abidwoko gumgi botgi. Abibedo ki nyeko kun agwoko nyiŋa maleŋ-ŋi, Wigi biwil woko i kom lewic ma yam gubedo kwede, ki bal me tim roro ma gubedo ka timone i koma, ka doŋ gibibedo i lobogi mot ma ŋat mo pe bimiyo gibedo ki lworo. Abikwanyogi ki i wi lobo ducu ka ma lukworgi gibedo iye ci adwokogi cen, kun anyuto bot rok mapol ni an aleŋ, Man bimiyo jona giŋeyo ni an aye a Rwot Lubaŋagi, pien yam amiyo giterogi i opii i kin lurok, ka dok acokogi adwokogi cen i lobogi kikome. Pe doŋ gibibwoto dano mo i kingi doŋ i kin lurok wacel. Pe doŋ abilokke woko ki botgi doki, ka doŋ atyeko onyo Cwiny mera i komgi gin jo Icrael.” Man Rwot Lubaŋa ma owaco. I nino dwe apar i acakki me mwaka manyen, i ŋe mwaka pyeraryo wiye abic ma doŋ wari kwede i opii, i mwaka me apar wiye aŋwen ma onoŋo gaŋ me Jerucalem doŋ gituro woko, i nino meno kikome Rwot odiya ki ciŋe, ci otiŋa woko i ginanyutane, okela i lobo Icrael, ka ociba piny i wi got mabor. Aneno lwak gedo mapol i nyima ma ginen calo gaŋ ma akemme kwede. I kare ma doŋ en okela kunnu, ci aneno dano mo ma nen calo mola, omako tol tworo ki lagada i ciŋe me pimo piny; en danonu onoŋo ocuŋ i doggaŋ, Ci dano-nu owacca ni, “Wod pa dano, nen piny ki waŋi, dok iwiny lok ki iti, ci iket cwinyi me tamo pi gin ducu ma abinyutti, pien gikeli kany ki tyen lok ni myero anyutti gin meno ducu; in doŋ ituc gin ducu ma inenogi-ni bot jo Icrael.” Gin ma aneno-ni aye ot pa Lubaŋa, ma girumo woko litit ki cel. Laco-nu okwanyo odoo lagadane me pimo piny ma borre romo futi apar, ci opimo cel. Onoŋo ni borre me dok malo romo futi apar, ki lacce nyo dit me kome bene romo futi apar. Lacen oa ocito i doggaŋ ma tye yo tuŋ wokceŋ. Ka oito rwom ocito malo, ci opimo doggola ki piny i ŋom, ci oromo futi apar. Ki i ŋeye onoŋo tye yo ma gikato kwede, onoŋo tye iye kicika pa lukurpiny ma romo adek i ŋete acel acel. Kicika acel acel borre onoŋo tye futi apar ki lacce bene futi apar, ki cel ma onoŋo tye i kingi, lacgi nyo dit komgi onoŋo romo futi aboro. I ŋe kicika pa lukur-piny onoŋo tye iye yo me wot ma borre romo futi apar, yone onoŋo cito donyo i kicika madit ma okemo ot pa Lubaŋa. Lacen opimo kicika meno ma okemo ot pa Lubaŋa-ni, onoŋo lacce romo futi apar wiye aryo. Cel ma i ŋet doggaŋ tuŋŋi ki tuŋŋi onoŋo romo futi adek, kicika me donyo iye onoŋo tye cok ki ot pa Lubaŋa kikome. Onoŋo tye kicika adek tuŋŋi ki tunnl i doggola ma tye yo tuŋ wokceŋ; gin kicika adek-ku ducu onoŋo ditogi romrom, ki cel ma i kin kicika bene onoŋo ditogi romrom. Ka dok opimo lac me doggaŋ ma gidonyo kwede-ni, ci oromo futi pyeraryo wiye aryo, ki doŋ ka ma twolo i doggaŋ onoŋo futi apar wiye abicel. Doŋ ki i nyim kicika pa lukur-piny acel acel onoŋo tye cel macek ma borre romo incic pyeraryo, ki dit me kome bene onoŋo romo incic pyeraryo. Dok opimo lac me doggaŋ cakke ki i kor ot me kicika acel o kwede wa i kor ot me kicika mukene ma okemme ki lawote, ci oromo futi pyeraŋwen, Dano-nu dok opimo kicika me donyo ma gikato kwede i dyekal mukene, onoŋo oromo futi pyeradek wiye aryo. Doŋ bor pa yo ducu cakke ki woko i ne doggaŋ cito kwede atir wa i kicika me agikki onoŋo romo futi pyeraboro. Onoŋo waŋ dirica madiŋŋe tye i kicika acel acel ki i cel ma onoŋo tye i kingi. Kicika ma i doggola me donyo bene dirica onoŋo orumo woko ducu. Cel ma i kin kicika bene onoŋo gigoro iye cal yadi otit. Lacen dano-nu okwanya okela i dyekal ma tye yo tuŋ woko. Onoŋo tye kunnu kicika pyeradek ma orumo dyekal woko; i nyimgi tye ka ma gipeto ki gweŋ maber. Ka ma gipeto iye gwen-ni onoŋo omedde orumo dyekal woko. Man onoŋo borre rom ki bor pa doggaŋ; en aye dyekal ma woko ma tye piny ma gipeto iye gweŋ, Ka dok opimo bor piny me dyekal ma tye yo tuŋ iye ki i nyim doggaŋ ma piny, dok kwede i ŋe dyekal ma i iye, ci borre oromo futi miya acel ki pyerabicel. Ci lacen dano-nu otelo nyima ocito to tuŋ acam, ci nen, onoŋo tye kunnu doggaŋ ma okemo yo tuŋ acam, ma en aye doggaŋ me dyekal ma woko. Ci opimo borre ki lacce. Onoŋo tye kicika adek tuŋŋi ki tuŋŋi kicika-ni, ki cel ma i kingi, ki kicika me donyo ma gikato kwede i dyekal mukene, gin ducu ditogi romrom ki dito pa gin ma tye doggaŋ mukene ca. Bor me doggaŋ onoŋo romo futi pyeraboro ki lacce onoŋo romo futi pyeraŋwen. Kicika madit, waŋ dirica, ki cal yadi otit ma gigorogi i kom kicika onoŋo girom kimukene me doggaŋ ma okemo yo tuŋ wokceŋ-ni. Kany bene onoŋo tye iye rwom abiro ma gicito kwede i doggaŋ ki kicika me donyo onoŋo tye ki yo tuŋ i iye. Dogcel ma donyo i dyekal ma i iye onoŋo okemo dogcel ma tye yo tuŋ acam kit macala tye kwede yo tuŋ wokceŋ. Ci opimo nia ki i dogcel mukene o kwede wa i kom dogcel ma tye yo tuŋcel, oromo futi miya acel ki pyerabicel. Ka dok dano-nu otela tera yo tuŋ acuc; ka wao kunnu ci waneno dogcel mukene. Ci opimo cel ma i ŋet doggaŋ ki tuŋŋi, ki kicika me donyo; onoŋo ditogi rom ki mukene-gu. Onoŋo tye waŋ dirica i dogcel man ki i kicika me doggola me donyo, ma girom ki waŋ dirica mukene-gu. Borre onoŋo romo futi pyeraboro, ki lacce futi pyeraŋwen. Onoŋo tye kunnu rwom abiro ma gicito kwede i doggaŋ, ki kicika me doggola me donyo onoŋo tye ki yo tuŋ i iye. Onoŋo bene giciro cal otit i cel ma i ŋet doggolane; acel tye tuŋcel ki mukene tye tuŋcel. Dok bene onoŋo tye dogcel mo yo tuŋ acuc i dyekal ma i iye. Dano-nu opimo bor piny ma tye i kin dogcel aryo-nu okemo yo tuŋ acuc, ci borre oromo futi miya acel ki pyerabicel. Lacen dano-nu okela i dyekal ma i iye kun wadonyo ki i dogcel ma tye yo tuŋ acuc. Ci opimo dogcel ma yo tuŋ acuc, onoŋo ni ditte rom ki dito pa dogcel mukene-gu. Kicika ma i ŋetegu, ki cel ma i ŋet doggolane, ki kicika ma doggola me donyo onoŋo ditogi romrom ki dito pa kicika mukene-gu. Onoŋo tye waŋ dirica mapol ma orumo ki yo tuŋ i iye ki i kicika me doggola me donyo; borre onoŋo romo futi pyeraboro, ki lacce onoŋo romo futi pyeraŋwen. Dok bene kunnu onoŋo tye iye mapol ma i doggola me donyo ma gurumo woko; borgi onoŋo romo futi pyeraŋwen ki lacgi onoŋo romo futi aboro. Kicika ma i doggola me donyo onoŋo okemo dyekal ma woko, ki cal yadi otit onoŋo gitye i kom cel ma i ŋet doggolane, ki yone me ito onoŋo tye ki rwom aboro. Ka dok okela i dyekal ma i iye kun wawok ki i dogcel ma tye yo tuŋ wokceŋ. Opimo dogcel, ci onoŋo ni ditte rom ki mukene-gu ducu. Kicika ma i ŋete-gu, cel ma i ŋet doggolane, ki kicika ma i doggola me donyo onoŋo ducu rom ki mukene-gu. Onoŋo tye waŋ dirica mapol ma orumo woko ki tuŋ i iye, ki kicikane ma i doggola me donye borre onoŋo romo futi pyeraboro, ki lacce onoŋo romo futi pyeraŋwen. Kicica ma i doggola me donyune onoŋo okemo yo tuŋ dyekal ma woko. Onoŋo cal yadi otit ma gogorogo i kom cel ma ŋet doggolane ducu, acel tye yo tuŋcel ki mukene yo tuŋcel ki yone me ito malo onoŋotye ki rwom aboro. Dok okela i dogcel ma tye yo tuŋ acam, ci opimo, onoŋo ditte obedo rom ki dito pa mukene-gu. Kicika ma ŋete-gu, ki cel ma i ŋet doggolane ki kicika ma i doggola me donye onoŋo ditogi ducu rom ki dito pa mukene-gu, onoŋo bene tye iye waŋ dirica mapol ma orumo woko dyere. Borre onoŋo romo futi pyeraŋwen. Kicika ma doggola me donyo onoŋo okemo yo tuŋ dyekal ma woko. Onoŋo cal yadi otit tye ma gigoro i kom cel ma i ŋet doggolane ducu, acel tye yo tuŋcel, ki mukene tye yo tuŋcel ki yone ma ito malo onoŋo tye ki rwom aboro. I dyekal ma woko onoŋo tye iye kicika mo ki doggolane ma okubbe ki kicika me doggola me donye-ni, ka ma onoŋo gilwoko iye riŋo lee ma gityero me gi tum awaŋa. Onoŋo tye meja aŋwen i kicika me doggola me donyo, aryo tye tuŋcel ki aryo mukene gicibo tuŋcel, ma lee me gitum awaŋa ki gitumme bal kigitum me tiŋo alii onoŋo giŋolo gi i wi meja magi, Doŋ yo tuŋ i ne kicika me doggola me donyo ka ma gidonyo iye i dogcel ma tye yo tuŋ acam, onoŋo tye iye meja aryo; ki dok i ŋet kicika ma i doggola me donyo onoŋo bene tye iye meja aryo. Pi meno i i kicika onoŋo tye iye meja aŋwen, ki tuŋ woko bene onoŋo tye iye meja aŋwen, magi ducu doŋ ribbe doko meja aboro, ma lee ma gityero me gitum awaŋa ducu giŋologi i wigi, Dok bene onoŋo tye meja aŋwen me got ma gipayo apaya ma gitiyo kwedgi pi yubo lee me gitum awaŋa, Onoŋo borgi romo incic pyeraryo ki lac wigi onoŋo romo incic pyeradek i twokke acel acel ducu. Doŋ jami tic ma gitiyo kwedgi me ŋolo lee me gitum awaŋa onoŋo giketo i wigi. Goli ducu ma bocogi rom ki lac ciŋ, onoŋo gigurogi gurumo i kicika woko ducu. Riŋo ma gimito tyerone me gitum koŋ giketo i wi meja magi. Ka dok okwanya ki i dyekal ma woko okela i dyekal ma i iye, ci aneno onoŋo tye kunnu kicika aryo; acel onoŋo tye i ŋet dogcel ma tye yo tuŋ acam, okemo yo tuŋ acuc, ki acel onoŋo tye yo tuŋ dogcel ma tye yo tuŋ acuc, okemo yo tuŋ acam. Ci danonu otitta ni kicika ma okemo yo tuŋ acuc-ci meno pa ajwagi ma giloyo tic i ot pa Lubaŋa. Ento kicika ma okemo yo tuŋ acam meno pa ajwagi ma giloyo tic i kom keno tyer. Ajwagi magi ducu gin Lulevi ma gin aye likwayo pa Jadok; ma gin keken ki i kin likwayo pa Levi aye giyegi me cito i nyim Rwot ka tic bote. Ci dano-nu opimo dyekal ma i iye, borre onoŋo romo futi miya acel ki pyerabicel i twokke acel acel. Keno tyer onoŋo tye i nyim ot pa Lubaŋa kikome. Lacen otera i i kicika ma tye i doggola ma gidonyo kwede i ot pa Lubaŋa, Ci opimo doggola me donyo; borre obedo futi aboro ki lacce futi pyeraryo wiye adek, ki dit me kom cel onoŋo romo futi abic i ŋete ryoryo ducu. Bor pa kicika ma i doggola me donyo, ki lacce, onoŋo romo futi apar wiye aboŋwen, onoŋo bene tye rwom apar me ito malo iye. Dok bene onoŋo wir tye kunnu i ŋet doggola me donyo tuŋŋi ki tuŋŋi. Lacen dok dano-nu okela i kicika ma i dyere, Ci opimo yo ma gikato ki iye onoŋo borre romo futi apar, ki lacce onoŋo futi apar wiye abicel, ki dit me kom cel onoŋo romo futi aboro yo tuŋ ryoryo ducu. Ka dok opimo kicika onoŋo borre romo futi pyerabicel wiye aŋwen, ki lacce romo futi pyeradek wiye aryo, Lacen dano-nu odonyo i kicika me agikkine. Ci opimo doggola me donyo, bone futi ‘adek ki lacce futi apar, ki dit kom kicika yo tuŋ ryoryo ducu onoŋo romo futi apar wiye acel. Ka opimo kicika borre oromo futi pyeradek wiye aryo ki lacce futi pyeradek wiye aryo, Ka lacen owacca ni, “Man aye kabedo maleŋ makato ducu.” Dano-nu opimo cel me ot pa Lubaŋa ci ditte oromo futi apar, Doŋ i kom cel man ma orumo ot pa Lubaŋa woko ducu, onoŋo tye iye kicika matitino, ma lacgi onoŋo romo futi abicel. Kicika ma i ŋete onoŋo tye i dul adek ma gukubbe gudok malo, ma acel acel onoŋo ododde i wi wadi kun dul odi acel acel tye ki kicika pyeradek. Onoŋo bene tye gin me latyel kor kicika ducu ma orumo cel me ot pa Lubaŋa woko me teno kicika ducu, wek pe gutenne i kom cel me ot pa Lubaŋa, Doŋ kicika ma i nete-gu gudoko malac kun gutinne woko malo likuŋ i wi odi wadigi ki dul odi acel acel, ma guporo lac pa gin latyel kor kicika a i kom dul ot acel o kwede i kom dul ot mukene ma gurumo ot pa Lubaŋa, Onoŋo bene tye yo ma giito kwede malo i ŋet ot pa Lubaŋa, kit meno dano-nu twero a ki i dul odi ma piny dok malo i dul odi ma tye i wiye me agikki, kun kato ki dul odi ma tye i dyere. Ci aneno kabedo murumo ot pa Lubaŋa bene otinne malo i kabedo ducu. Ci gipimo te guti ma i ŋete ducu ginoŋo ni borre oromo bor pa lagada acel ma rom ki futi apar. Doŋ dit me kom cel ma woko me kicika ma i ŋete ducu oromo futi aboro; ki dul abam ma gibwoto tye noŋo onoŋo romo futi aboro bene. Dok me a i kin abam me ot pa Lubaŋa o kwede i kicika me dyekal ma gurumo ot pa Lubaŋa woko, onoŋo lacce romo futi pyeradek wiye aryo. Doggola me kicika ma i nete-gu ducu gukemo abam ma onoŋo gibwoto tye nono-ni. Doggola acel okemo yo tuŋ acam, ki doggola mukene okemo yo tuŋ acuc, doŋ lac pa dul ma gibwoto odon nono-ni onoŋo romo futi aboro ma orumo ot woko ducu, Ot mo ma onoŋo okemme ki ot pa Lubaŋa ki tun potoceŋ onoŋo lacce romo futi miya acel ki apar wiye aryo, ki cel ma orumo onoŋo ditte romo futi aboro; ki borre onoŋo romo futi miya acel ki pyeraŋwen wiye aŋwen, Lacen dano-nu dok opimo ot pa Lubaŋa, borre obedo futi miya acel ki pyerabicel. Dok opimo piny ki yo tuŋ i ŋe ot pa Lubaŋa dok kwede ariari yo tuŋ i dyekal, medo ki gedo ki celle, borre oromo futi miya acel ki pyerabicel. Nyim ot pa Lubaŋa ma okemo yo tuŋ wokceŋ ki dyekalle, onoŋo romo futi mi ya acel ki pyerabicel. Ka dok opimo bor pa gedo ma onoŋo okemme ki dyekal ma onoŋo tye yo tuŋ potocenni, ki celle ducu ryoryo, oromo futi miya acel ki pyerabicel. Kicika maditte ma gidonyo kwede i ot pa Lubaŋa, ki kicika ma i iye, ki kicika ma i doggola me donyo ma tye yo tuŋ woko, onoŋo gipetogi woko maber ki bao ma oumo kor ot woko ducu; gin adek-ki ducu onoŋo gitye ki wan dirica mapol madin, Ki malo ka wi dye ot i doggola me ot pa Lubaŋa onoŋo giguro kome ducu girumo ki bao, cakke ki i dye ot piny dok kwede malo wa i waŋ dirica (waŋ dirica onoŋo giumogi woko) nio wa i kabedo ma tye malo ka wi doggola, wa i kicika ma i iye ki yo tuŋ woko bene. Doŋ ki i kom cel murumo woko ducu ki i kicika ma i iye ki kicika maditte, onoŋo gigoro cal lukerubi ki cal yadi otit. Giketo cal yat otit i kin lukerubi ma gigwennye agwenya. Lakerubi acel acel onoŋo waŋe tye aryo, waŋ mo ma nen calo waŋ dano onoŋo okemo otit ki yo tuŋcel, ki tuŋcel bene waŋ ma nen calo wan labwor okemo otit, Gigorogi girumo kwede ot pa Lubaŋa woko litit; cakke ki i dye ot piny dok kwede malo ka wi doggola gigoro iye cal lukerubi ki cal otit i kor ot, Bao me doggola ducu obedo latwoke aŋwen: ki i nyim kabedo maleŋ onoŋo tye iye gin mo ma obedo calo ke no tyer ma gitiyo ki bao, Onoŋo borre romo futi abic ki lacce futi adek. Twoke ducu, ki tedi tere ki murumo ducu onoŋo gitiyo ki bao. Lacen dano-nu owacca ni, “Man aye meja ma gicibo cuŋ i nyim Rwot.” Onoŋo tye doggola la iye aryo i agikki me yo ma donyo i kicika madit, dok bene onoŋo tye doggola la iye aryo i agikki yo ma cito i kabedo maleŋ makato ducu-ni. Doggola acel acel onoŋo giyubo laiye aryo ma giwirre giyabbe i dye ot ka maleŋ, Dok i kom doggola me kicika maditte onoŋo gigoro iye cal lukerubi ki cal yadi otit, kit macalo onoŋo koŋ gigoro i kor ot me kicika ducu-ni. Ki yo tuŋ woko onoŋo tye iye bolo me bao me geŋo tipo ma tye i nyim doggola me donyo. Dok bene onoŋo tye waŋ dirica madin tuŋcel, ki yadi otit tye tuŋcel ki tuŋcel, i kom cel ma i ŋet kicika ma i doggola me donyo. Dano-nu dok otelo nyima otera i dyekal ma i iye ma tye yo tuŋ acam-mi, ci okela wa i kicika mapol ma onoŋo gukemme ki dyekal me ot pa Lubaŋa ma onoŋo okemme ki ot ma tye yo tuŋ acam-mi. Ot man ma onoŋo tye yo tuŋ acam-mi borre onoŋo romo futi miya acel ki pyerabicel, ki lacce onoŋo romo futi pyeraboro. Ki tuŋcel onoŋo okemo kabedo ma lacce romo futi pyeradek wiye aryo ma i ŋet ot pa Lubaŋa, ki tuŋcel onoŋo okemo kabedo ka ma gicano iye gweŋ ma i dyekal ma woko. Ot man onoŋo yam gigero i dul adek ma gukubbe malo i wi wadi, dul ot acel acel onoŋo tye ki yo mukemo yo wadi ma donyo i odi ma gukubbe malo i dul adek-ki. I nyim kicika magi onoŋo yo tye iye me donyo i ot ki yo tuŋ i iye kunnu, lacce onoŋo romo futi apar wiye abicel ki borre futi miya acel ki pyerabicel; doggolagi ducu onoŋo tye yo tuŋ acam, Kicika ma malo onoŋo gigero madin, pien kicika ma piny ki ma i dyere onoŋo gumayo kabedo malac woko ki piny. Pien onoŋo gitye odi ma gukubbe malo i dul adek, onoŋo wir bene pe i igi calo wir ma onoŋo tye i dyekal ma woko-ni, Mumiyo kicika ma malo gidiyo woko obedo madin makato kicika ma gucuŋ i ŋom ki ma i dyere-gu. Onoŋo bene tye cel ki woko ma opimme ki kicika ducu atir, kun okemo yo tuŋ dyekal ma woko, doŋ ka ma okemme ki kicika onoŋo borre romo futi pyeraboro. Kicika ma onoŋo tye i kom dyekal ma woko onoŋo bocogi romo futi pyeraboro, kun kicika ma okemo ot pa Lubaŋa-gu bocogi onoŋo romo futi miya acel ki pyerabicel. Ki yo tuŋ piny i te kicika magi onoŋo tye iye doggola me donyo yo tuŋ wokceŋ, ka onoŋo dano gidonyo i igi ki yo tuŋ i dyekal ma woko, ka ma cel ma tye yo tuŋ woko ocakke ki iye. Onoŋo tye kicika mogo bene yo tuŋ acuc ma gukemme ki dyekal dok gukemme ki ot madit-ti, onoŋo yo bene tye i nyimgi. Onoŋo giromrom ki kicika ma gitye yo tuŋ acam, ma bocogi ki lacgi bene rom, ki kit ma gigerogi kwede bene rom, wa doggolagu ducu girom, Onoŋo tye doggola me donyo yo tuŋ wokceŋ ki piny i te kicika ma gitye yo tuŋ acuc, ka ma dano donyo ki iye tuc i yo, ki dok cel ma opoko kingi onoŋo okemme kwedgi. Dano-nu dok owacca ni, “Kicika magi ducu ma tye yo tuŋ acam ki kicika ma gitye yo tuŋ acuc ma gukemme ki dyekal-li gin aye kicika maleŋ, I kicika magi en aye ajwagi ma gidonyo ka tic i nyim Rwot gicamo iye gityer maleŋ makato ducu, Kunnu aye giketo iye gityer maleŋ makato ducu, gityer me moko kwon, gitum pi bal, ki gitum pi tino alii, pien kabedo meno aye kabedo maleŋ. Ka inen ajwagi doŋ gudonyo i kabedo maleŋ, pe gibia gikato woko ki iye gicito i dyekal ma woko laboŋo weko boŋŋigi ma giruko ka gitye ka tic kunnu, pien boŋŋi magi gileŋ. Gibiruko boŋŋi mukene ma pud peya noŋo gucito cok ki kabedo ka ma lwak gicokke iye.” Lacen ka doŋ dano-nu otyeko pimo kabedo ma tye yo tuŋ i iye murumo ot pa Lubaŋa, ci otelo nyima otera wadonyo ki i dogcel ma okemo yo tuŋ wokceŋ, ci ocako pimo kabedo ma orumo ot pa Lubaŋa ki woko, Opimo kabedo ma tye yo tuŋ wokceŋ ki lagada me pimo piny, ci opimo ki lagada meno oromo futi miya aboro. Ka olokke dok opimo kabedo ma tye yo tuŋ acam, opimo ki lagada me pimo piny oromo futi miya aboro. Ka dok olokke opimo kabedo ma tye yo tuŋ acuc, opimo ki lagada me pimo piny oromo futi miya aboro, Lacen olokke yo tuŋ potoceŋ ci opimo ki lagada lapim piny oromo futi miya aboro. Opimo twoke aŋwen ducu. Onoŋo bene tye cel murumo woko, ma borre romo futi mi ya aboro ki lacce bene futi mi ya aboro, wek opok kin kabedo maleŋ ki kabedo me nino ducu. Lacen dok dano-nu okela wa i dogcel ma okemo yo tuŋ wokceŋ. Nen, deyo pa Lubaŋa pa Icrael oa ki yo tuŋ wokceŋ, kun mor calo mor pa pii ma corre; omiyo lobo obedo ka ryeny aryenya ki deyone, Dok aneno ginanyuta ma obedo rom ki ginanyuta ma yam aneno ma onoŋo Rwot obino ka jwero gaŋ woko-ni, dok bene obedo calo ginanyuta ma yam aneno i ŋet kulu Kebar-ni. Ci cutcut apoto aryebbe woko piny. Deyo pa Rwot okato ki i dogcel ma tye yo tuŋ wokceŋ ci odonyo i ot pa Lubaŋa. Ci Cwiny pa Rwot otiŋa woko malo, okela i dyekal me ot pa Lubaŋa ma i iye; ci aneno deyo pa Rwot opoŋo ot pa Lubaŋa woko. I kare ma onoŋo dano-nu pud ocuŋ ka neta, awinyo ŋat mo tye ka lok kweda ki i ot pa Lubaŋa, kun wacca ni, “Wod pa dano, man aye kabedo ka ma komkerra bedo iye, dok bene en aye kabedo ka ma ateno iye tyena; en aye ka ma abibedo iye i kin jo Icrael matwal. Doŋ jo Icrael, nyo lukergi, pe gibimedde ki balo nyiŋa maleŋ-ŋi, kun giwoi o lubaŋa mukene nyo gucibo gin me po lukergi mogo ma doŋ guto woko-gu, Lukergi yam guyubo doggolagi okemme ki doggolana ki dok guketo yat doggolagi okemme ki mera, man omiyo doŋ tye cel acel keken ma opoko kinwa kwedgi. Gubalo nyiŋa maleŋ-ŋi ki gin me kwer-gu ma gutimo, omiyo kiniga omaka atyekogi woko liweŋ. Kombeddi doŋ myero gukwany cal lubaŋagi-gu gubol woko, ki gin me po lukergi ma yam doŋ guto woko-gu, gubol woko ka mabor ki ka ŋeta, ci an abibedo i dyegi matwal.” Ci Rwot dok omedde ki lokke owacca ni, “Wod pa dano, tit kit me ot pa Lubaŋa bot jo Icrael, tit botgi kit ma nen kwede ki kit yubbe, wek omi lewic omakgi pi balgi. Ka doŋ ineno lewic omakogi pi bal ducu ma yam gutimo, ci doŋ itit botgi yub ma gigero ki ot pa Lubaŋa-ni, kit ma gigero kwede doggolane me donyo ki dogcel ka ma gikato ki iye ki ka ma gidonyo ki iye, ki kit ma gedo me ot pa Lubaŋa ducu ocuŋ kwede, Dok bene imi guŋe kit me lubo cikke ducu, ki gin ma Rwot ociko ducu; co woko piny i nyimgi ma gin bene gineno, wek omi gin gugwok dok guti gin ma giciko ducu kun gilubo cik ducu. Man aye cik me ot pa Lubaŋa: Kabedo ducu murumo ma tye i wi got bibedo kabedo maleŋ makato ducu. Man aye cik me ot pa Lubaŋa.” Magi aye kit pim ma gipimo kwede keno tyer, kun gitiyo ki gin me pimo piny ma rom ki kit macalo gipimo kwede ot pa Lubaŋa-ni, Ka ma orumo te tedi me keno tyer wo ko ducu onoŋo tye futi acel ki incic aboro, ki lacce bene futi acel ki incic aboro, ki rii ma tye ka wiye borre romo incic apar. Meno aye bor me keno tyer tuŋ malo, Dul kom keno tyer ma pinnye makato ducu onoŋo borre romo futi adek. Dul mukene ma lubo onoŋo giketo ocun cen manok tuŋŋi ki tuŋŋi oromo futi acel ki incic aboro, ki borre onoŋo romo futi abiro. Ki dul mukene ma tye i wi meno ma giketo ocuŋ cen manok tuŋŋi ki tuŋŋi oromo futi acel ki incic aboro. Meno aye wi keno tyer ka ma giwaŋo iye gitum awaŋa; onoŋo borre bene romo futi abiro. Ten keno aŋwen-gu ducu onoŋo giboco gikato wi keno tyer mukene-gu ducu. Wi keno tyer onoŋo tye latwoke aŋwen ma romrom, ma twoke acel acel onoŋo romo futi pyeraryo, Ki dul ma i dyere bene onoŋo obedo latwoke aŋwen, ma romrom, ma acel acel onoŋo romo futi pyeraryo wiye adek; ki rii ma giketo orumo ducu borre onoŋo romo incic apar. Tedi te re onoŋo lacce ducu romo futi acel ki incic aboro, Ki rwom me cito malo i kom keno tyer onoŋo tye yo tuŋ wokceŋ. Rwot Lubaŋa dok owacca kuman ni, “Wod pa dano, magi gin aye cik me keno tyer: Ka doŋ gityeko gerone me tyero lee me gitum awaŋa i wiye ki pi coro remo i kome, ci ibimiyo twon me gitum pi bal bot ajwagi ma gin Lulevi ma gin jo me dog ot pa Jadok, ma gibino cok kweda ka tic bota, Ibikwanyo remo mogo ki i kom remo pa twon ca, ci iket i ten keno tyer aŋwen-gu ki i kom twok doge aŋwen, ka dok i kom rii ma giketo orumo woko-ni, Meno aye kit macalo ibilonyo kwede keno tyer wek obed maleŋ, imiyo bedo laboŋo bal mo i kome. Dok bene ibikwanyo twon me gitum pi bal, gibiwaŋo woko i kabedo ma giyero ma i ŋet ot pa Lubaŋa, ki yo tuŋ woko me kabedo maleŋ, Ka dok i kom nino me aryone ibityero nyok dyel ma kome pe ki mwonyo me gitum pi bal, ci gibilonyo keno tyer bene kit meno macalo gikwoŋo lonyo ki twon-ni, Ka doŋ ityeko lonyone, ci doŋ ibityero twon ma kome pe ki mwonyo ki nyok romo ma gikwanyo ki i kin lwak romi ma kome pe ki mwonyo. Ibityero bot Rwot, ki ajwagi gibikiro kado i komgi ka doŋ gicako tyerogi bot Rwot macalo gitum awaŋa. Dok ibimiyo dyel pi nino abiro me gitum pi bal, kun i nino acel acel noŋo imiyo dyel acel. Dok bene gibimiyo twon ki nyok romo ma gikwanyo ki i kin lwak romi ma kome pe ki mwonyo. Gibityero gitum lakwany bal pi keno tyer pi nino abiro kun gilonyo, dok gikwero bene. Ka doŋ gutyeko nina magi abiro, ci doŋ cakke i nino me aborone cito kwede anyim, ajwagi gibityero gitum awaŋawu ki gityer lakwecwiny i kom ke no tyer, ci an abigamowu, An Rwot Lubaŋa doŋ atyeko loko man.” Lacen dano-nu odwoka cen i dogcel ma woko me kabedo maleŋ, ma onoŋo tye yo tuŋ wokceŋ; ento onoŋo giloro woko. Ci owacca ni, “Dogcel man bibedo alora kare ducu, pe gibiyabo, dok bene ŋat mo pe bidonyo ki iye; pien Rwot, ma en Lubaŋa pa Icrael, doŋ otyeko donyo ki iye. Pi meno bibedo alora kare ducu, Laker keken gwok bibedo iye ka camo kwon i nyim Rwot; en bidonyo ki i yo ma wok ki i kicika ma i doggola me donyo, dok bene bikato ci to woko ki i yo acel-lu.” Ci dano-nu okela kun wok kweda ki i dogcel ma tye yo tuŋ acam wa i nyim ot pa Lubaŋa. Ka aneno piny ci aneno ni deyo pa Rwot opoŋo ot pa Lubaŋa woko, Cutcut apoto aryebbe woko piny, ci Rwot owacca ni, “Wod pa dano, ket cwinyi me niaŋ maber i gin ducu ma ineno ki ma iwinyo ki iti, Abetitti cik ducu me ot pa Lubaŋa ki gin ducu ma myero dano guti dok gulubi. Dok iket cwinyi me niaŋ maber i kom kit dano ma giyegi me donyo i ot pa Lubaŋa, ki jo ducu ma pe giyegi me donyo i kabedo maleŋ. “Doŋ iwac bot jo Icrael ma gin jo ma lujemo-ni ni, an Rwot Lubaŋa awaco kuman ni, Gin jo Icrael myero doŋ gugik kit tim me kwergi-gu woko ducu. Gupyedo oda pi ye lurok ma pe gilirogi i cwinygi ki i komgi me bedo i kabedona maleŋ, ka doŋ gutyero bota camma, moo dwolo ki Temo, Pi meno jona doŋ gutyeko turo gicikkena woko, medo i kom gin me kwer-gu ducu ma yam gutimo. Pe bene gubedo ka gwoko kit ma gitiyo kwede ki jamina maleŋ-gu ducu; ento guketo lurok aye me tic i kabe dona maleŋ. “Mumiyo an Rwot Lubaŋa, awaco kuman ni, Pe tye larok mo ma pe giliro i cwinye ki i kome ma bidonyo i kabedona maleŋ, kadi bed larok mo ma i kin lurok ducu ma gibedo i kin jo Icrael. “Ento Lulevi ma yam gua woko ki bota gucito woko ka mabor, ma guŋak gubwota woko calo jo Icrael ma yam guŋak woko gubedo ka woro jogi, kombeddi doŋ atye ka keto can i komgi. Gin gibibedo luticca i kabedona maleŋ, kun gigwoko dogcel me ot pa Lubaŋa, kun gitiyo bene tic i ot pa Lubaŋa. Gin aye ma gibineko lee ma dano gikelo me atyera me gitum awaŋa ki gitum pi lwak, dok bene gibibedo i dog ticgi kun gitiyo bot lwak. Ento kit macalo gubedo ka telo, jo Icrael ka woro cal jogi ma gipayo apaya ma en aye gin mumiyo jo Icrael gupoto i bal, pi meno an Rwot Lubaŋa doŋ akwoŋo kwoŋ woko mukemogi ni abiketo can i komgi. Pe doŋ gibibedo ka tic bota macalo ajwagi, dok bene pe gibinyiko cok i kom jamina maleŋ-gu ki i kom jami ma gileŋ gikato ducu-gu, Ento lewic bimakogi pi gin me kwer ma yam gutimo-gu. Kadi bed kumeno pud abiyerogi aketogi me tic i ot pa Lubaŋa, kun gitiyo kwa ticce ducu ki kwa tic ducu ma mitte ma myero giti iye.” Rwot Lubaŋa owacci, “Ajwagi ma gin Lulevi, ma gin likwayo pa Jadok, ma gubedo ka tiyo tic i kabedona maleŋ i kare ma jo Icrael guŋak gubwota woko, gin aye gibibino cok bota ka tic bota. Gin aye gibitiyo bota kun gityero bota moo dwolo ki remo. Gin aye gibidonyo i kabedona maleŋ, kun bene ginyiko cok ki mejana, pi tiyo tic bota, ki pi lubo gin ma an aciko ducu. Ka gudonyo i dogcel me dyekal ma woko, ci gibiruko boŋŋi camanini. Pe gibibedo ki ginaruka mo me yer romo i komgi i kare ma noŋo gitye ka tic i dogcel me dyekal ma i iye, ki bene i ot pa Lubaŋa kikome. Gibiboyo wigi ki kitambara me boŋo camanini, dok bene gibiruko pali boŋo camanini i pyergi; pe gitweyo nyo giruko gin mo ma miyo kwok makogi. Ka inen gikato gicito woko bot lwak i dyekal ma woko, gibilunyo boŋŋi ma gubedo ka tic kwedgi-ni woko ki i komgi, ci giketo bedo i kicika maleŋ-gu, Doŋ gibiruko boŋŋi mukene, wek pe gunyob lwak ki boŋŋigi maleŋ-gu, Ajwagi pe gibilyelo wigi woko doŋ maleŋ, dok bene pe gibiweko yer wigi lot maboco; ento gibinyaro yer wigi woko anyara keken, Ajwaka mo pe bimato koŋo yino ka cito ka donyo i dyekal ma i iye ma i ot pa Lubaŋa, Ajwagi pe gibinyomo daa-to mo, nyo dako ma cware oryemo woko, ento gibinyomo nyako ma pe oŋeyo laco i dog ot pa jo Icrael kikome, Dok bene gitwero nyomo daato mo ma onoŋo yam koŋ cware obedo ajwaka, “Gibipwonyo jona me ŋeyo apokapoka ma tye i kin jami maleŋ ki jami me nino ducu-gu, kun ginyuto botgi bene kit ma myero gupok kwede kin gin ma keni ki gin ma pe keni, Ka ce lok daa nyo pido mo tye, ci gin ajwagi gibibedo luŋolkop, ci giŋolo kop kun gilubo kit ma an aŋolo kwede kop, Gibigwoko cikka ki gin ma an aciko, i kwero nino madito ma giciko ducu, dok bene gibigwoko ceŋ cabitta ducu bedo nino maleŋ. “Ajwagi pe bibalo komgi kekengi pi cito cok ki kom dano muto; gwok nyo gitwero balo komgi ka ce kom dano mo muto obedo wegigi nyo megigi, kom latin awobi liyo nyako, kom omegigi nyo kom lumegigi ma pe ginyomogi, Lacen ma noŋo doŋ ajwaka mo obalo kome woko kekene, ci en bikwano nino abiro ma myero ebed kwede, ka doŋ i ŋeye lonnye woko bedo leŋ. I nino ma en cito i kabedo maleŋ, i dyekal ma i iye, ka tic kunnu, en ajwaka bityero gitum pi balle, Man Rwot Lubaŋa ma owaco. “Dul pa ajwagi i kom gin ma amiyo bot jo Icrael me aleyagi en aye ticgi me bedo ajwagina, Gin ajwagi pe gibibedo ki kit jami mo i Icrael; lonyo ma gimiyo pigi me agwoka aye an, Ajwagi gibicamo gityer me moko kwon, gitum pi bal, ki gitum me tiŋo alii; ki gin ducu ma gidyero i ciŋa i Icrael bibedo megi. Ajwagi myero gimi botgi cam ducu mukwoŋo cek i potti ki kit kwa gin mukene-gu ma gityero bota. Pi tyen mukwoŋo ma noŋo lwak gitedo mugati myero gukwany mugati ma gikwoŋo tedone gumi bot ajwagi, wek gumma obed i pacogi, Ajwagi pe gibicamo kit gin mo ma oto kene nyo lee mo ma ŋuu aye okayo, kadi winyo nyo lee tim. “Ka ce wupoko lobo kun wumiyo dul ki kaka acel acel, ci dul acel myero giket cen pat obed gin maleŋ pa Rwot, Bor pa dul lobo man myero obed mairo apar ki lacce mairo aboro. Doŋ dul lobo meno woko ducu bibedo kabedo maleŋ. Dul lobo mo ma twoke aŋwen ducu romrom myero giwek pi ot pa Lubaŋa, ma twoke acel acel noŋo romo futi miya aboro, Kabedo ma giweko noŋo bene bibedo tye murumo kabedo meno woko dyere ma lacce romo futi pyeraboro. I kom dul lobo man maleŋ-ŋi myero gipim dul mo ma borre romo mairo apar ki lacce mairo aŋwen, gipok waŋe woko obed pat, at pa Lubaŋa bibedo i kabedo man, ma en aye kabedo maleŋ makato ducu. Man bibedo dul lobo maleŋ dok bene bibedo pi ajwagi ma gitiyo i kabedo maleŋ, kun ginyiko cok bot Rwot me tic bote. Man bene bibedo kabedo ka ma odigi bibedo iye ki kabedo maleŋ pi ot pa Lubaŋa. Dul mukene ma borre romo mairo apar ki lacce mairo aŋwen, gibiketo pat bedo dul pa Luleyi ma gitiyo tic i ot pa Lubaŋa, Dullobo man Luleyi gibicamo bedo megi matwal, dok bene i kabedo man aye gibigero iye gaŋi ka ma gibibedo iye, I ŋet dul lobo ma giketo pat me bedo kabedo maleŋ-ŋi, myero gipim kabedo ka ma gibigero iye gaŋ, ma borre romo mairo apar ki lacce mairo aryo. Kabedo man bibedo pa jo Icrael ducu. “Myero bene gipim dul lobo giket pi laker, Cakke i kom kabedo murumo kabedo maleŋ ki i kom gaŋ, lobone bidok kwede yo tuŋ potoceŋ ki yo tuŋ wokceŋ i waŋ apokki ma tye yo tuŋ wokceŋ. Cakke ki yo tuŋ wokceŋ o kwede yo tuŋ potoceŋ borre bibedo rom ki bor pa dul lobo ma gipoko gimiyo ki kaka me Icrael-li, Meno bibedo dul lobo pa laker i lobo Icrael. Doŋ lukerra ma gin luloc pe doŋ gibiuno jona matwal; ento gibimiyo jo Icrael gigamo lobo kun lubo kakagi ducu.” Rwot Lubaŋa owaco kuman ni, “Wun luloc me Icrael doŋ wutimo bal oromo! Wugik tim bwami ki uno dano woko. Wutim gin ma tye atir dok kakare, Pe myero dok wuryem jona woko ki i lobogi, An Rwot Lubaŋa aye ma atye ka waco botwu lok man. “Wun ducu, ŋat acel acel myero obed ki ratili maber ma en pimo kwede jami ki gen dok kakare. Epa ma gipimo ki jami mutwo bibedo rom ki bat ma gipimo kwede jami ma pige. Bat rom ki acel me apar me komer, ki epa bene rom ki acel me apar me komer; doŋ komer aye bibedo gin ma dano ducu myero gupim ki jami. Cekel acel bibedo rom ki gera pyeraryo; cekel abic bibedo cekel abic, ki cekel apar bibedo cekel apar, ka doŋ mina acel bibedo rom ki cekel pyerabic, “Man aye gityer ma wubikelo me atyera: acel me abicel me epa ma oa ki i kom komer acel acel me ŋano, ki acel me abicel ma oa ki i kom komer acel acel me cayiri. Kit dul ma gimoko me pimo moo tye kuman: acel me apar me bat ma oa ki i kom kor acel acel (kor obedo calo komer, tye iye bat apar). Dok bene wubikwanyo romo acel ki i kin lwak romi miya aryo, kun wukwanyogi ki boŋo me dog ot pa Icrael ducu. Man aye gityer ma gibityero pi gityer me moko kwon, gitum awaŋa, ki gityer lakwecwiny, pi timo gin me lakwany bal woko ki i komgi. Man Rwot Lubaŋa ma owaco. “Lwak ducu me lobo man gibimiyo gityer man bot laker ma tye i Icrael. Doŋ ŋat ma tye ka loc aye ma bimiyo lee me gitum awaŋa, gityer me moko kwon, ki gityer amata i kare me kwero nino madito, i por dwe, ki nino me cabit ducu, ki i kare me kwero nino madito ducu ma giciko pi jo Icrael. En laloc meno bimiyo lee me gitum pi bal, gityer me moko kwon, gitum awaŋa, ki gityer lakwecwiny, pi timo gin me lakwany bal woko ki i kom jo Icrael.” Rwot Lubaŋa owaco kuman ni, “I nino mukwoŋo me dwe mukwono, wubikwanyo latin twon ma kome pe ki mwonyo, ci wulonyo kwede kabedo maleŋ. Ajwaka bikwanyo remo manok me gitum pi bal ci keto i kom doggola me ot pa Lubaŋa; biketo bene i twok keno tyer aŋwen-ni, ki i kom yat me dogcel me dyekal ma i iye. Ibitimo kit meno i nino me abiro me dwe mukwoŋo pi dano mo ma otimo bal pi roc mo nyo pi kwiya piny. Ibitimo gin lakwany bal woko pi lonyo ot pa Lubaŋa wek obed maleŋ. I nino dwe apar wiye aŋwen me dwe mukwoŋo, en aye wubikwero iye nino me Kato (Paska), kun wubedo ka camo mugati ma tobi pe iye pi nino abiro. I nino meno laloc bikwanyo latin romo miyo me gitum pi bal pi en ki pi lwak ducu me lobowu. Dok i nino acel acel i kom nino abiro me kwero nino me Kato-ni en bimiyo litino twoni abiro ki nyogi romi abiro ma komgi pe ki mwonyo, tyero me gitum awaŋa bot Rwot. En bene bibedo ka tyero nyok dyel acel acel nino ki nino me gitum pi bal. En dok bimiyo gityer me moko kwon ma romo agwata adek pi twon acel acel, ki dok agwata adek pi nyok romo acel acel, ki moo ma romo cupa apar pi moko kwon ma romo agwata adek adek. “I nino dwe apar wiye abic me dwe me abiro ki pi nino abiro ma gibedo ka kwero nino madito me Bolo-ni, en pud dok bimedde ki miyo gitum pi bal, gitum awaŋa, ki gityer me moko kwon, ki moo bene i kit acel-li.” Rwot Lubaŋa owaco kuman ni, “Dogcel me dyekal ma i iye ma tye yo tuŋ wokceŋ gibiloro woko pi nino abicel, ma en aye kare ma noŋo dano gitye ka tic, Ento gibiyabo i nino me cabit ki i nino me por dwe, Doŋ laloc bidonyo kun wok ki i kicika ma i doggola me donyo ma tye yo tuŋ woko, ci bicuŋo cok ki yat me dogcel. Ka doŋ ajwagi gicako tyero gitum awaŋane ki gityer lakwecwiny ma en okelo, ci en doŋ cako woro Lubaŋa i dyekal ma tye cok ki dogcel. Ka i ŋeye doŋ en bia kato woko, ento dogcel pe gibiloro nio wa otyeno. Lwak me lobo gibibedo ka woro Rwot i kabedo ka ma gidonyo ki iye ma tye i dogcel meno i nino me cabit ducu ki i nino me por dwe-gu ducu. Gitum awaŋa ma laloc bityero bot Rwot i nino me cabit bibedo litino romi abicel ma komgi pe ki mwonyo, ki nyok romo acel ma kome pe ki mwonyo. En bikelo gityer me moko kwon pi nyok romo ma romo epa acel, gityer me moko kwon pi litino romi en bikelo kit macalo en twero, kacel ki cupa apar me moo pi agwata adek adek me moko. I kare me por dwe en bityero latin twon ma kome pe ki mwonyo, litino romi abicel ki nyok romo acel, ma gin ducu myero komgi pe obed ki mwonyo. Gin ma en bityero macalo gityer me moko kwon aye agwata adek pi wod twon, ka dok agwata adek pi nyok romo, ki pi litino romi moko kwon kit macalo en twero noŋone, kacel ki cupa apar me moo pi agwata adek adek me moko. Ka laloc donyo i ot pa Lubaŋa, ci en bidonyo kun wok ki i kicika ma i doggola me donyo me dogcel, dok bene en bia kato woko ki yo acel-lu, “Ka inen lwak me lobo meno gubino ka woro Rwot i nino madito ma giciko, jo ma gibidonyo ki i dogcel ma tye yo tuŋ acam, ka gutyeko woro Rwot ci gibikato woko ki i dogcel ma tye yo tuŋ acuc. Jo ma bidonyo ki i dogcel ma tye yo tuŋ acuc, gibikato woko ki i dogcel ma tye yo tuŋ acam. Ŋat mo pe bidok cen ki ŋeye ki i dogcel ma onoŋo en odonyo kwede-ni, ento dano acel acel bicito atir kato woko ki i dogcel ma i nyime. Ka inen lwak gidonyo ka woro Rwot, ci laloc bene donyo kacel kwedgi, ka gikato woko, en bene bikato woko kacel kwedgi. I kare me kwero nino madito ki kare ma giciko, gibikelo gityer me moko kwon ki latin twon ma rom ki epa acel, ki nyok romo ma rom ki epa acel, ki litino romi ki moko kwon kit macalo dano mo-ni twero miyone kwede; kacel ki cupa apar me moo pi ‘epa acel acel me moko. “Ka ce laker mito miyo gityer ma iye opwoyo, kadi gitum awaŋa nyo gityer lakwecwiny calo gin ma iye opwoyo bot Rwot, ci gibiyabo bote dogcel ma tye yo tuŋ wokceŋ-ni, en donyo ki iye, Ka doŋ en cako tyero gitum awaŋane nyo gityer lakwecwiny kit macalo en tyero i nino me cabit. Lacen en doŋ a kato woko, ki i ŋeye ma en doŋ noŋo okato woko gibiloro dogcel woko kakare. “Laloc dok bimiyo latin romo acel me mwaka acel ma kome pe ki mwonyo me gitum awaŋa bot Rwot nino ki nino, i odiko. Dok bene myero omi gityer me moko kwon kacel ki gitum awaŋa i odiko odiko, acel me abicel me epa, ki moo cupa adek wek okwe moko woko, ma gimiyo calo gityer me moko kwon bot Rwot. Man aye cik ma myero gilubi pi gitum awaŋa ma gityero nino ducu. Gityer ma gikelo pi gitum awaŋa me nino ducu odiko odiko, tye kit man, latin romo ki gityer me moko kwon ki moo.” Rwot Lubaŋa owaco kuman ni, “Ka ce inen laker mito miyo mot bot latinne mo ki i kin awo bene bene, kun poko ki kom dul lobo ma yam gimiyo me bedo ginaleyane, meno bibedo ginaleya pa awo bene ducu, meno doŋ odoko jamigi. Ento ka ce okwanyo dul ma gipokke omiyo me mot bot luticce, lacen bibedo jami pa laloc ka mwaka me kuc doŋ oo, Pien ginaleya-ni doŋ mere, kono litinone keken aye gitwero gamone bedo megi matwal. Laloc pe bikwanyo kit dul mo ki i kom ginaleya pa lwak, pe bikwanyo jamigi woko ki botgi. En myero omi dul mo bot litinone me bedo megi kun kwanyo ki i kom lobo ma doŋ gimiye me bedo mere, wek pe en oun dano mo ki i kom jona kun kwanyo lobogi woko.” Lacen dano-nu dok otera wa i doggola ka ma gidonyo kwede i kicika mapol ma tye cok ki dogcel ma tye yo tuŋ acam me dyekal ma i iye. Magi aye kicika maleŋ ma giyubo pi ajwagi. En ocimo bota kabedo mo ma tye wa i agikki me kicika magi ma tye yo tuŋ wokceŋ-ni, ci aneno. Ci en owacca ni, “Man aye kabedo ka ma ajwagi myero guted iye gitum me tino alii ki gitum pi bal, ki ka ma bene gitedo iye gityer me moko kwon, wek pe gutiŋ gin mo maleŋ gukel i dyekal ma woko ka ma gitwero nyobo lwak kwede.” Lacen okela i dyekal ma woko, ci otela otera i twok dyekal aŋwen-ni; i twoke acel acel onoŋo dyekal matidi tye iye. I twok dyekal aŋwen-ni onoŋo tye iye dyekal matitino, ma acel acel borre romo futi pyerabicel wiye aŋwen ki lacce futi pyerabic, gin aŋwen-ni ducu onoŋo ditogi rom, Dyekal acel acel onoŋo girumo woko ki cel ma gigero ki got, ki keno ka ma gikuto iye mac bene giyubo i ŋet cel. Ci dano-nu owacca ni, “Magi aye cokon ka ma lutic ma gitiyo i ot pa Lubaŋa myero guted iye gitum ducu ma lwak gityero.” Dano-nu dok otela odwoka cen i doggola ka ma gidonyo ki iye i ot pa Lubaŋa. Ci aneno pii tye ka mol kun katti ki i te doggola dok yo tuŋ wokceŋ (pien ot pa Lubaŋa bene onoŋo tye okemo yo tuŋ wokceŋ). Pii onoŋo tye ka mol bino piny kun a ki piny yo tuŋ acuc i te doggola me ot pa Lubaŋa, kun wok kwede i ŋet keno tyer yo tun acuc. Lacen okela woko kun wok kweda ki i dogcel ma tye yo tuŋ acam, ci owoto kweda orumo cel ki yo tuŋ woko obino kwede i dogcel ma woko ma okemo yo tun wokceŋ, Laora kulu onoŋo tye ka mol katti woko i ŋet dogcel yo tuŋ acuc. I kare ma wacito wadok yo tuŋ wokceŋ dano-nu omako lagada lapim piny i ciŋe, ci opimo piny yadi miya abic kun lubo i laora yo tuŋ piny dok kwede yo tuŋ wokceŋ, ci omiyo akato ki i dye pii. Piine onoŋo tut o wa i odilo tyena. Ka dok opimo piny yadi ‘miya abic, ci omiyo awoto ki i pii ki tyena; piine onoŋo tut o wa i waŋcoŋ, Dok opimo piny yadi miya abic, ci omiyo anyono dye pii; piine onoŋo doŋ tut o wa i pyera. Ka doki opimo yadi miya abic, ci laora doŋ odoko kulu mo ma pe doŋ atwero kato ki i dyere, pien pii onoŋo doŋ opoŋ omedde woko. Kulunu onoŋo doŋ tut ma pe gitwero ŋolo ne ki tyen kono ka gikwaŋ iye akwaŋa aye romo katte. Ci owacca ni, “Wod pa dano, ityeko neno gin man ducu?” Ka doŋ odwoka cen kun woto kweda ki i dog kulu. I kare ma atye ka wot me dok cen, aneno yadi mapol twatwal i dog kulu tunŋi ki tuŋŋi. Ci en owacca ni, “Pii man tye ka mol kemo lobo ma tye yo tuŋ wokceŋ ci cito wa i Araba. Ka pii doŋ oo i pii me nam ma ocuŋ mot liywii ma pe mol, ci pii me nam doŋ cako doko leŋ. I kabedo ducu ma kulu man mol cito iye, gin ma corre limuk ma gibedo i pii gibibedo kwo, rec bene bibedo pol ata. Pii man mol cito kunnu wek pii me nam odok leŋ; dok bene gin makwo ducu gibibedo kwo ka ma kulu-ni mol cito iye ducu. Cakke ki i Engedi dok kwede yo tuŋ i waŋ pii En-eglaim, lumak-rec bibedo kunnu i dog nam, ci gibimoyo obwogi ka two kunnu. Kwa rec mapatpat bibedo kunnu calo rec ma gibedo i Nam Madit. Ento pii ma tye i kabedo ma obedo dagodago ki i joro-gu pe bidoko leŋ. Gibiweko piine ducu bedo pii me kado. Doŋ i dog kulu ryoryo ducu, yadi ducu ma kitgi patpat bidono iye kun ginyako nyiggi me acama pa dano. Potgi bene pe bitwo dok bene pe gibigiko nyak. Gibibedo ka nyak dwe ki dwe, pien gilimo pii ma mol a ki i kabedo maleŋ-ŋi, Nyiggi bibedo me acama pa dano, ki potgi bibedo yat me caŋo two ki i kom dano.” Rwot Lubaŋa owaco kuman ni, “Magi aye waŋ apokki lobo ma ibilubo ka ipoko lobo i kin kaka apar wiye aryo me Icrael me bedo ginaleyagi, Ento jo me kaka pa Yucepu ibipoko botgi dullobo ma do do pa jo mukenegu kiryo. Yam onoŋo akwoŋo kun acikke bot kwarowu ni abimiyo lobo man botgi gicamo doko megi; pi meno kombeddi myero ipok woko marom i kinwu, “Waŋ apokki lobo bibedo kit man: Yo tuŋ acam, cakke ki i Nam Madit kun wok ki i Ketlon cito kwede i yo ma donyo i Kamat, o kwede wa i Jedad, Berota, Cibraim (ma tye i waŋ apokki i kin Damaciko ki Kamat), dok medde cito kwede wa yo tuŋ Kajer-atikon; ma tye i wan apokki me Kauran. Kit meno waŋ apokki lobo ma tye yo tuŋ acam bicakke ki i nam cito kwede yo tuŋ Kajar-enon, ma tye i waŋ apokki me Damaciko, ki waŋ apokki me Kamat tye yo tu acam. “Waŋ apokki lobo ma tye yo tuŋ wokceŋ bicakke ki i Kajar-enon i kin Kauran ki Damaciko, ma lubo kulu Jordan i kin Gilead ki lobo Icrael, dok kwede i nam ma tye yo tuŋ wokceŋ kun o kwede wa i Tamar. “Waŋ apokki lobo ma tye yo tuŋ acuc bicakke ki i Tamar cito wok kwede ki i pii me Meriba-kadec, ka doŋ lubo laora kulu me Ejipt o kwede wa i Nam Madit. “Waŋ apokki lobo ma tye yo tuŋ potoceŋ bicakke i dog Nam Madit cito i kabedo ma okemme ki yo ma donyo i Kamat. Man aye bibedo waŋ apokki ma tye yo tuŋ potoceŋ, “Ibipoko lobo man woko i kinwu kit meno kun lubo kit macalo wel kaka pa Icrael tye kwede. Ibipoko lobo man kun ibolo ki kwir me bedo ginaleyawu kikome, ki pi lurok ma gin lubedo ma gibedo i kinwu, ma doŋ bene gutyeko nywalo litinogi i kinwu. Wubitic kwedgi macalo gin anywalli me Icrael kikome, ma gin bene gibibolo kwir kacel kwedwu wek ginoŋ dullobo mo me bedo ginaleyagi ki i kin kaka pa Icrael. Larok acel acel ma labedo gibimiye dul lobo me bedo ginaleyane, kacel ki lwak me kaka mo-ni ma en bedo i kingi. An Rwot Lubaŋa doŋ atyeko loko. “Magi aye nyiŋ kaka ducu: Cakke ki i waŋ apokki lobo ma tye yo tuŋ acam, kun a ki i nam wok ki i Ketlon cito kwede i yo ma donyo i Kamat, nio kwede wa i Kajar-enon (ma tye yo tuŋ acam me waŋ apokki lobo me Damaciko ki yo tuŋ malo i kom Kamat), kun medde kwede a ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot Dan. I waŋ lobo murwatte ki lobo pa Dan, cakke ki yo tuŋ wokceŋ dok kwede yo tuŋ potoceŋ, gimiyo iye dullobo acel bot Acer. I waŋ lobo murwatte ki lobo pa Acer, cakke ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot Naputali. I waŋ lobo murwatte ki pa Naputali, cakke ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot Manace. I waŋ lobo murwatte ki lobo pa Manace, cakke ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot Epraim. I waŋ lobo murwatte ki Epraim, cakke ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot. Reuben, I waŋ lobo murwatte ki lobo pa Reuben, cakke ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot Juda. “I waŋ lobo murwatte ki lobo pa Juda, cakke ki yo tuŋ wokceŋ dok kwede yo tuŋ potoceŋ, bibedo dul ma ipoko bedo pat ma lacce romo mairo apar ki borre bibedo rom ki bor pa dul lobo ma doŋ gityeko pokogi bot jo me kaka pa Icrael-li, cakke ki yo tuŋ wokceŋ dok kwede yo tuŋ potoceŋ, kun noŋo kabedo maleŋ tye i dyere. “Lobo ma ibipoko bedo pat pi Rwot-ti borre bibedo mairo apar ki lacce bibedo mairo aboro. Magi aye bibedo kit macalo gipoko kwede dul lobo maleŋ: Ajwagi gibimiyo botgi dullobo ma tye yo tuŋ acam ma borre romo mairo apar, ki yo tuŋ potoceŋ lacce romo mairo aŋwen, ki yo tuŋ wokceŋ bene lacce romo mairo aŋwen, ki borre yo tuŋ acuc romo mairo apar, kun kabedo maleŋ pa Rwot tye i dyere. Kabedo ducu murumo kabedo man maleŋ-ŋi bibedo pa ajwagi ma gin likwayo pa Jadok. Gin gutiyo bota ki ada, pe guŋak gubwota woko i kare ma jo Icrael guŋak woko ca, kit macalo Lulevi gutimo. Dul lobo man bibedo botgi calo dullobo ma gipoko ki i kom dul lobo maleŋ, ma en aye kabedo maleŋ makato ducu, murwatte ki lobo pa Lulevi. Doŋ i ŋet lobo pa ajwagi, gipoko iye dul lobo bot Lulevi, ma borre romo mairo apar ki lacce mairo aŋwen. Borre ka giribo ducu doŋ bedo mairo apar ki lacce mairo aboro. Dul lobo ma gidyero bot Rwot-ti obedo dul maber makato ducu, pe tye mo ma gitwero cato nyo lokone ki gin mo, dok bene pe gitwero kobone bot larok mo, Pien man dul lobo maleŋ, doŋ odoko pa Rwot. “Ento dul lobo mudoŋ ma borre romo mairo apar ki lacce mairo aryo, meno lwak ma gibedo i gaŋ gibitic kwede kit me nino ducu; gitwero bedo iye dok bene gitwero weko mukene bedo macalo bar. Gaŋ bibedo i dyere, dok bibedo latwoke aŋwen ma bocogi romrom ma twoke acel acel borre romo yadi alip adek ki miya aryo ki pyeraryo. I kabedo ducu murumo gaŋ i twoke acel acel, bar bibedo tye iye ma borre ari romo yadi miya acel ki pyerabic. Dul lobo mudoŋŋe ma orabo ŋet dul lobo maleŋ, borre bibedo mairo aŋwen yo tuŋ wokceŋ, ki mairo aŋwen yo tuŋ potoceŋ, Cam ducu ma bicek iye bibedo cam pa lutic ma gitiyo i gaŋ. Lutic ducu ma gitiyo i ‘gaŋ, ma gua ki i kaka ducu pa Icrael, gibipuro lo bo meno. Dul lobo ma ibipoko bedo pat bibedo latwoke aŋwen, ma bor pa twoke acel acel bibedo mairo apar; meno noŋo oribo dullobo maleŋ wa ki lobo pa jo ma gibedo i gaŋ. “Lobo ma odoŋ i ŋet dul lobo maleŋ ki lobo pa jo ma gibedo i gaŋ en aye lobo ma odoŋ tuŋŋi ki tuŋŋi i ŋet dul lobo ma latwoke aŋwen ma borre ki lacce romo mairo apar, bibedo pa laloc, Waŋ apokkine bibedo wan apokki me lobo kikome tuŋ wokceŋ ki tuŋ potoceŋ, Dullobo maleŋ-ŋi, ki kabedo maleŋ ma ot pa Lubaŋa tye i dyere-ni, ki lobo pa Lulevi kacel ki lobo pa jo ma gibedo i gaŋ, meno ducu bibedo i dye lobo ma doŋ gipoko me bedo pa laloc. Lobo pa laloc bibedo i kin dul lobo ma gipoko bot kaka, kun waŋ lobo pa jo Juda tye yo tuŋ acam ki wan lobo pa jo Benjamin tye yo tuŋ acuc. “Doŋ poko dul lobo bot kaka mudoŋŋe tye kit man: cakke ki yo tuŋ wokceŋ nio kwede yo tuŋ potoceŋ, kenyo gipoko iye dul lobo acel bot Benjamin. I waŋ lobo murwatte ki lobo pa Benjamin, cakke ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot Cimeon. I waŋ lobo murwatte ki lobo pa Cimeon, cakke ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot Icakar, I waŋ lobo murwatte ki lo bo pa Icakar, cakke ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot Jabulon. I waŋ lobo murwatte ki lobo pa Jabulon, cakke ki yo tuŋ wokceŋ dok kwede yo tuŋ potoceŋ, kenyo gimiyo iye dul lobo acel bot Gad. Ka doŋ i waŋ lobo murwatte ki lobo pa Gad, waŋ lobone biwoto kun cakke ki i Tamar ka wok ki i pii Meriba-kadec, kun wok kwede ki i ŋet laora kulu me Ejipt cito o kwede i Nam Madit. “Man aye lobo ma ibipoko i kin kaka pa Icrael me bedo ginaleyagi, doŋ magi aye gin dul mapatpat ma gipoko. Man Rwot Lubaŋa ma owaco. “Magi aye bibedo dogcel ma gidonyo kwede i gaŋ. Yo tuŋ acam gipimo romo yadi alip adek ki miya aryo ki pyeraryo. Onoŋo tye iye dogcel adek, dogcel pa Reuben, dogcel pa Juda, ki dogcel pa Levi. Dogcel me gaŋ onoŋo gicako nyiŋgi ki nyiŋ kaka pa Icrael. Yo tuŋ wokceŋ bene onoŋo gipimo yadi alip adek ki miya aryo ki pyeraryo, Onoŋo bene tye iye dogcel adek, dogcel pa Yucepu, dogcel pa Benjamin, ki dogcel pa Dan. Yo tuŋ acuc bene gipimo oromo yadi alip adek ki miya aryo ki pyeraryo. Onoŋo tye iye dogcel adek, dogcel pa Cimeon, dogcel pa Icakar, ki dogcel pa Jabulon. Me agikkine yo tuŋ potoceŋ gipimo oromo yadi alip adek ki miya aryo ki pyeraryo. Onoŋo tye iye dogcel adek, dogcel pa Gad, dogcel pa Acer, ki dogcel pa Naputali. Doŋ bor pa cel murumo gaŋ ducu onoŋo romo yadi alip apar wiye aryo, ki miya aboro ki pyeraboro. Cakke i kare man cito kwede anyim, nyiŋ gaŋ doŋ gibilwoŋo ni, Rwot tye kany.” I mwaka me adekke me loc pa Yekoyakim kabaka me Juda, Nebukadnejar kabaka me Babilon obino i Jerucalem ci orumo woko, Rwot omiyo Yekoyakim kabaka me Juda i ciŋe, ci Nebukadnejar okwanyo jami mo go ma gitiyo kwedgi i ot pa Lubaŋa, oterogi woko i lobo Cinar, oketogi i ot pa lubaŋane, ka oketo jami magi i ot kano lim pa lubaŋane, Cutcut kabaka ociko Acipenaj ma en ladit ma loyo jo ma gikologi, me kelo dano mogo ki i kom jo Icrael, jo ma gin litino ker kacel ki litino pa jo ma gin luye, awobe ma komgi pe ki mwonyo, jo mabeco ma gupwonnye i kit ryeko ducu, dok ma gikwiri, ki jo ma tye ki ŋec muromo, ma gitwero tic i gaŋ kal pa kabaka, ki me pwonyogi ki nukuta ki leb pa jo Kaldaya, Kabaka omiyogi ca mo cam maheco nino ducu, kit cam ma en ecamo-ni, ki mato koŋo yiŋo ma yam en mato-ni, Myero gibed ka pwonyogi pi mwaka adek; i agikki mwaka meno ka doŋ gikelgi gucuŋ i nyim kabaka. I kin jo magi onoŋo tye iye Daniel, Anania, Micael, ki Ajaria ma gin ducu dano me kaka pa Juda. Ci ladit ma loyo jo ma gikolo ocako nyiŋgi kit man: Daniel olwoŋo ni Beltecajar, Anania en olwoŋo ni Cadrak, Micael olwoŋo ni Mecak, ki Ajaria doŋ en olwoŋo ni Abednego. Ento Daniel omoko tamme pe me camo gin me kwer me cam mabeco pa kabaka-ni, kadi ki me balo kome ki koŋo viŋo ma kabaka mato-ni; pi meno openyo ladit ma loyo jo ma gikologi ni oye tamme-ni wek pe ebal kome kekene, Ci Lubaŋa omiyo gum ki kica bot Daniel i nyim ladit ma loyo jo ma gikolo, Ento ladit ma loyo jo ma gikolo owaco ki Daniel ni, “Alworo rwoda kabaka, ma oyero cam ma myero wucam ki ginamata-gu; ka oneno ni komwu pe yot ma rom ki kom awobe wadiwu ma mwaka me ditogi bene rom ki mewu, ci wubimiyo kabaka neka woko,” Lacen Daniel owaco ki lakan jami ma onoŋo ladit ma loyo jo ma gikolo oyero me gwoko Daniel, Anania Micael ki Ajaria ni, “Koŋ itemwa pi nino apar, ladit, wek gibed ka miyowa dek ŋor aye wacam ki pii amata keken, Ka wek lacen doŋ inen komwa ci ipor ki kom awobe ma gicamo cam mabeco ma kabaka bene camo-ni, ka doŋ iti giri kwedwa kit macalo ineno,” Ladit ma loyo jo ma gikolo owinyo lok meno ma gititte-ni, ci otemogi kumeno pi nino apar. I agikki me nino apar gineno ni komgi leŋ dok gucwe bene makato awobe ma ca ma gicamo cam pa kabaka mabeco-ni, Cutcut lakan jami okwanyo cam mabeco-gu ki koŋo vino ki botgi, ci omiyo dek ŋor botgi wek gucam. Lubaŋa omiyo pwonnye ma malo bot awobe magi aŋwen, i kit kwa nukuta ducu, omiyo gubedo kwiri i lok ducu ki i ryeko ducu, kun Daniel onoŋo niaŋ i ginanyuta ki lek-gu ducu, I agikki me kare meno, ma kabaka doŋ ociko ni gikelgi i nyime, ci ladit ma loyo jo ma gikolo okelogi i nyim kabaka Nebukadnejar. Gubino gucuŋ i nyim kabaka, ci kabaka oloko kwedgi; i kingi ducu pe ginoŋo ŋat mo kadi ki acel ma rom ki Daniel, Anania, Micael ki Ajaria. Doŋ i kwa lok ducu ma kabaka openyogi kwede, onoŋo ni gikato lutyet ki lukor tipo ducu ma tye i te kerre tyen apar kulu. Ci Daniel omedde ki bedo kunnu nio wa i mwaka mukwoŋo me loc pa Ciro. I mwaka-me aryo me loc pa kabaka Nebukadnejar, Nebukadnejar oleko lek; obedo ka yelo cwinye mada ma nino bene pe mako waŋe, Ci kabaka ociko ni gilwoŋ lutyet, lukoi tipo-gu ki lutal ducu kacel ki jo Kaldaya ka gonyo te lekke. Ci gubino gudonyo i ot gucuŋ i nyim kabaka. Kabaka ocako waco botgi ni, “Aleko lek, ento cwinya obedo ka yelle mada ma amito ni aŋe te lekke.” Cutcut jo Kaldaya guwaco ki kabaka ni, “In kabaka bed kwo nakanaka! Doŋ itit lek meno botwa wan luticci ci wabigonyo tere boti.” Kabaka odok iye bot jo Kaldaya ni, “Lok ma aloko bedo me ada. Ka ce pe wumiyo aŋeyo lek man, kacel ki tyen lokke, ci gibinidowu woko matitino, dok bene gibimuko odiwu wo ko ducu doko wi obur. Ento ka wumiyo aŋeyo lek man kacel ki tyen lokke, ci wubigamo mot ki bakacic ki bota kun wulimo bene woro madwoŋ, Pi meno myero wunyutta lek man ki tyen lokke.” Gudok iye tyen me aryone ni, “Wek kabaka koŋ onyut botwa lekke wan luticce, ci wabinyuto tyen lok me lekke bene.” Kabaka ogamo ni, “Aŋeyo adada ma pe akalo akala ni wun wumito medo kare ameda, pien wuneno atir lok ma aloko bedo me ada. Ka pe wumiyo aŋeyo lek man, tye mere cik acel keken mumakowu. Wun doŋ wutyeko ye me loko bota lok goba ma nyayo tim me bal keken nio wan ma kare olokke. Pi meno wutitta lek man, ci miyo abiŋeyo ni wun kara wutwero nyutta tyen lok me lekke.” Jo Kaldaya gudok iye ki kabaka ni, “Pe tye dano mo kadi ki acel i lobo ma twero co bo miti pa kabaka; dok bene pe tye kabaka mo madit nyo matek twatwal ma openyo lutyet, lukor tipo nyo jo Kaldaya mo ki kit peny macalo meno. Lok ma kabaka openyo-ni lokke tek, pe tye nar mo ma twero nyuto bot kabaka kono lubaŋa-gu ma kabedogi pat ki pa dano.” Lok man omiyo kiniga omako kabaka, odoko ger marac; cutcut ociko ni ginek co maryek ma gibedo i Babilon woko liweŋ. Ci gitito pi cik man oromo i lobo ducu ni myero ginek co maryek woko, guyenyo Daniel ki lureme bene wek ginekgi woko, Lacen Daniel oloko lok ki ryeko ki tam maber bot Ariok, ma onoŋo en aye ladit ma loyo askari ma gigwoko kabaka, ma onoŋo okato woko ocita ka neko luryeko ma i Babilon, Daniel openyo Ariok ni, “Piŋo cik pa kabaka bedo magwa kit man?’ Ci Ariok otito lok meno bot Daniel. Lacen Daniel ocito odonyo bot kabaka olege me miye kare mo, wek enyut te lok me lek meno bot kabaka. Lacen Daniel odok cen i ode ci ocako tito lokke bot luwote Anania, Micael ki Ajaria, Otito botgi ni guleg kica ki bot Lubaŋa me poloma mako lok me muŋ man, wek en Daniel ki luwote-gu pe ginekgi woko kacel ki luryeko mu kene me Babilon. Lacen ginyuto lok me muŋ man bot Daniel i ginanyuta i dyewor. Mumiyo Daniel opwoyo Lubaŋa me polo mada. Daniel owacci, “Gipwo Lubaŋa ki nyiŋe nakanaka, pien ryeko ki tek tye bote. En aye ma loko cawa ki kare me cwir nyo me oro, en aye ma kwanyo luker woko ki i kergi ci keto luker manyen me leyo ka tyengi; en miyo ryeko bot jo maryek dok miyo ŋec bot jo ma twero niaŋ maber. En nyuto gin ma tye ka matut’ ki gin mukanne i muŋ en nyuto woko ka maleŋ; dok ŋeyo gin ma tye i colpiny, ki leŋo bene bedo bote. Ai Lubaŋa pa kwarowa, amiyo pwoc ki pak boti, pien in aye ma imiya ryeko ki tekkom, kombeddi doŋ imiyo waŋeyo gin ma onoŋo wapenyo pire bati, pien doŋ imiyo waŋeyo lok pa kabaka.” Mumiyo Daniel ocito bot Ariok, ma en dano ma kabaka oyero ni onek luryeko me Babilon otyek woko ducuni; ci owaco bo te ni, “Pe inek luryeko me Babilon ityekgi woko; tera i ot i nyim kabaka, ci abinyuto bot kabaka te lok me lekke.” Ariok orune oyotoyot ki myelkom otero Daniel i ot i nyim kabaka, ci owaco bot kabaka ni, “Anoŋo dano mo ki i kin opii ma gikelogi ki i Juda ma twero gonyo te lok me lekki-ni.” Kabaka openyo Daniel ma gilwoŋo bene ni Beltecajar ni, “Itwero nyutta gin ma aneno i lekke, dok itwero gonyo te lok me lekka-ni?” Daniel odok iye ki kabaka ni, “Pe tye luryeko mo, lukor tipo, nyo lutyet kadi ki wa jo ma niyo lok kom lakalatwe ma gitwero nyuto kit muŋ mukanne macalo man bot kabaka ma onoŋo kabaka openyo pire-ni. Ento tye Lubaŋa mo i polo ma nyuto kit muŋ ducu mukanne, en aye mumiyo kabaka oneyo lok ducu ma bitimme i kare ma pud tye anyim. Doŋ lek ma ileko-ni ki ginanyuta ma obino i wii i kare ma ibuto piny i wi ki tanda gin ene: I kare ma ibuto i wi kitanda, ai kabaka, tam obino i wii ma nyutti gin ma bitimme i kare me anyim, doŋ en ŋat ma yabo muŋ ducu mukanne woko ka maleŋ-ŋi, onyuto boti omiyo iŋeyo gin ma bitimme. Ento ki tuŋ bota ginyutta muŋ man mukanne, pe te lokke ni an aryek akato gin makwo ducu, ento wek agony te lok me lek man wek in kabaka iŋe, ki dok bene wek iŋe tam ma tye i cwinyi. “Ai kabaka, yam ineno cal mo ma gitiyo ki cin. Cal man dit dok ryeny matek mukato kare, Ocuŋ i nyimi; doŋ kit ma nen kwede mi yo lworo ma ko dano. Wi cal man gitiyo ki jabu ma giliyo maberre, kore ki bade ducu gitiyo ki ryal, ki doŋ iye ki eme gitiyo ki mola. Ooto tyene gitiyo ki nyonyo, ki’ tyene ma gicibo kwede piny gitiyo dulle mogo ki nyonyo ki mogo gicweyo ki lobo. I kare ma ineno, got obar ci otyer woko kekene ma pe dano aye otyero ki ciŋe, ci cutcut ocelo cal meno woko i tyene ka ma gitiyo ki nyonyo ki ma gicweyo ki lobo, ci oŋidogi woko matitino. Meno omiyo nyonyo, lobo, mola, ryal ki jabu ducu guŋinnye woko matitino, ci gudoko calo cun kai ma i laro moyo me oro, ma yamo doŋ otinogi oterogi woko, ma pe dok gitwero yenyo yogi ginoŋo. Ento got meno ma ocelo cal-li olokke odoko twon got madit mada ma poŋo lobo woko ducu. “Meno aye lekke; kombeddi doŋ wabigonyo te lek bot kabaka, Doŋ in kabaka, in aye kabaka ma loyo luker ducu, dok Lubaŋa me polo aye mumiyo icamo ker, en mumiyi twero ki tek, wa ki deyo bene, dok omiyo dano ducu, lee tim ki winyo me polo ducu i ciŋi, ka ma gibedo iye ducu; omii twero me loyogi liweŋ, in aye ibedo latel wic me jabu, Lacen i ne locci, ker mo matidi twatwal bicakke, ma kabakane tidi in iloyo ki dit, ka lacen bibedo ker me adek me mola, ma biloyo lobo ducu. Ka dok ker me aŋwenne bicakke ma bibedo matek calo nyonyo, pien nyonyo turo jami ducu, dok nidogi woko matitino, ci tyekogi woko liweŋ; kit macalo nyonyo ŋinyo kwede jami, en bene bituro ci ŋinyo ker mukwoŋo-gu woko ducu. Kit macalo ibedo ka neno dul tyene ki lwet mogo gitiyo ki lobo pa lacwe agulu, ki dulle mogo gitiyo ki nyonyo, meno ker mupokke; ento nyonyo mogo ma miyo cuŋ matek bibedo i kine, kit macalo wuneno nyonyo ma orubbe ki lobo daba-ni. Kit macalo Lwet tyene dulle mukene gitiyo ki nyonyo ki mukene gitiyo ki lobo, kit meno bene ker man bibedo matek i kare mogo ki dok bibedo goro adada ci tur woko i kare mukene. Kit macalo ineno nyonyo orubbe woko ki lobo daba-ni, gibirubbe woko bene kit meno kun ginyomme i kingi kekengi, ento bedo maber kacel pe bibedo tye i kingi, kit macalo nyonyo bene pe rubbe ki lobo-ni. Dok i kare pa luker meno Lubaŋa me polo biketo ker mukene ma ri nakanaka ma pe gitwero balone, kadi dit me locce bene pe gibiweko i ciŋ rok mukene. Ker meno manyen-ni bituro ker magi ducu ŋidogi woko matitino, ci tyekogi woko ducu, en aye doŋ bicuŋ bedo matwal, kit macalo ineno maca obar otyer woko ki i kom got madit ma pe dano aye otyero ki cine, ci oturo nyonyo, mola, lobo, ryal ki jabu oŋidogi woko ducu matitino. Lubaŋa madit doŋ otyeko nyuto bot kabaka gin ma bitimme i kare me anyim. Lekke obedo alfu ki te lokke bene tye atir.’ ” Cutcut kabaka Nebukadnejar oryebbe piny, omiyo woro bot Daniel, ka doŋ ociko ni myero gikel gityer ki odok eceta gibed ka tyerone bot Daniel. Kabaka owaco bot Daniel ni, “Ada, Lubaŋani-ni aye Lubaŋa ma loyo lwak lubaŋa-gu ducu, dok en bene Rwot ma loyo luker ducu, en ŋat ma nyuto muŋ ducu mukanne woko ka maleŋ, pien in bene ibedo ki twer me nyuto muŋ man mukanne-ni.” Lacen kabaka omiyo deyo mamalo ki mot madwoŋ bot Daniel, ka okete me bedo laloc i lobo ducu me Babilon, dok bene me bedo ladit ma loyo luryeko ducu ma tye i Babilon. Daniel olego kabaka, ci kabaka bene oye legane omiyo en oyero Cadrak, Mecak ki Abednego, oketogi me bedo ludito ma loyo lwak ki ne no lok ducu ma timme i lobo Babilon. Ento Daniel obedo mere i gaŋ kal pa kabaka. Kabaka Nebukadnejar otiyo cal lubaŋa ki jabu; borre obedo futi pyeraboŋwen ki lacce futi aboŋwen Ci ocibo ocuŋ i bar me Dura, i lobo Babilon. Cutcut kabaka Nebukadnejar ocwalo lok me lwoŋo luloyo madoŋo, ludito pa lwak, ki luloc me dul lobo mapatpat, lumi-tam, lugwok-lim, luŋolkop madito ki matino, ki ludito ducu me dul lobo mapatpat, gubin ka kwero cal lubaŋa ma kabaka Nebukadnejar yam otiyo ocibo ocuŋ likuŋ-ŋi, Lacen luloyo madoŋo, ludito pa lwak, ki luloc me dul lobo mapatpat, lumitam, lugwok-lim, luŋolkop madito ki matino, ki ludito ducu me dul lobo mapatpat gucokke kacel ka kwero cal lubaŋa ma kabaka Nebukadnejar otiyo ci ocibo ocuŋ likuŋ-ŋi; ci gin ducu gucuŋ i nyim cal lubaŋa ma Nebukadnejar ocibo-ni, Gicwalo kwena ki lok ma winnye maloŋo bot lwak ducu ni, “Wun lwak me rok ducu, ki rok ducu mapatpat, gicikowu ducu ni, ka wuwinyo bila nyo obute okok, lwere ma gikuto, opuk, aduŋu, naŋa ki nyamulere-gu, ki kit wer ducu ma gigoyo, myero wun ducu wuryebbe piny wuwor cal lubaŋa man me jabu ma kabaka Nebukadnejar otiyo ci ocibo ocuŋ likuŋ-ŋi. Doŋ ŋat mo ma pe biryebbe pmy ka woro cal lubaŋa man, gibimake woko oyot gibole i ruk mac mukur malyet-ti.” Pi meno, i kare ma lwak me rok ducu guwinyo koko bila, koko nyamulere, ki koko opuk, ki adunu, nana, obute, ki kit wer ducu mapatpat ma gigoyo agoya, ci lwak me rok mapol, rok ducu mapatpat, ki jo ma loko leb mapatpat ducu guryebbe piny guworo cal lubaŋa me jabu ma kaba ka Nebukadnejar otiyo ci ocibo ocuŋ likuŋ-ŋi. I kare meno jo Kaldaya mogo ma onoŋo gitye ki tam maraco gutyerre ka maleŋ, gucako doto Lujudaya. Guwaco bot Nebukadnejar ni, “In kabaka myero ibed kwo nakanaka! In kabaka, onoŋo doŋ ityeko keto cik ni, ka dano ducu guwinyo koko bila, koko nyamulere, ki koko opuk, ki aduŋu, naŋa, obute, ki kit wer ducu mapatpat ma gigoyo agoya, ci guryebbe piny ka woro cal lubaŋa me jabu; doŋ ka dano mo pe biryebbe piny ka worone, gibimake woko oyot gibole woko i ruk mac mukur malyet-ti. Ento tye Lujudaya magi, Cadrak, Mecak ki Abednego ma iyerogi iketogi me bedo ludito ma loyo lwak dok ma neno lok ducu ma timme i lobo Babilon. Ai kabaka, jo magi adek-ki pe gilubo cikki wacel. Pe giworo lubaŋani, dok bene pe giworo cal lubaŋa me jabu ma itiyo ci ici bo ocuŋ likuŋ-ŋi.” Cutcut kiniga omako Nebukadnejar woko, omiyo ociko ki keccwiny ni myero gicikel Cadrak, Mecak ki Abednego koŋ bote. Ci gicito gikelo jo magi adek-ki i nyim kabaka. Ci cutcut Nebukadnejar openyogi ni, “Lok ma gititta-ni mono ada, ni, wun Cadrak ki Mecak ka Abednego, pe wuworo lubaŋana, dok bene pe wuworo cal lubaŋa me jabu ma an aye atiyo ci acibo ocuŋ Iikun-ni? Ka ce kombeddi doŋ wuwinyo koko bila, ki koko nyamulere, ki koko opuk, ki aduŋu, naŋa, obute ki kit wer mapatpat ma gigoyogi agoya, ka wuyubbe dok wuye me ryebbe piny ka woro cal lubaŋa man ma an aye atiyo-ni, ci noŋo ber adada; ento ka ce pe wuworo, ci gibimakowu oyotoyot laboŋo galle, gibolowu woko i ruk mac mukur malyet-ti; ci lubaŋa mene ma bilarowu kwanyowu woko ki i ciŋa-ni?” Pi meno, Cadrak, Mecak ki Abednego gugamo lok gudok iye ki kabaka ni, “Ai Nebukadnejar, pe wamito walok boti gin mo pi lok man, Ka lok doŋ tye kumeno, ci Lubaŋawa ma waworo-ni bitwero larowa ki i ruk mac mukur malyet-ti; dok en bene bilarowa kwanyowa woko ki i ciŋi, in kabaka, Ento ka ce pe, myero in kabaka iŋe maber ni, wan pe wabiworo lubaŋani dok pe wabiworo cal lubaŋa me jabu ma itiyo ci ici bo Ocuŋ likuŋ-ŋi.” Cutcut akemo mager omako Nebukadnejar woko, omiyo waŋe bene olokke wo ko mapat i kom Cadrak, Mecak ki Abednego. Oyotoyot ociko ni gimed mac olyetti tyen abiro kulu makato kit munoŋo lyet kwede wi ati ca, Ka doŋ ociko jo mogo ma gin twoni oteka ma gitye i dul monnye ni gutwe Cadrak, Mecak ki Abednego woko, ci gubolgi i ruk mac mukur malyet. Ci gutweyo jo-nu woko ma onoŋo gitye ki ginaruka magi i komgi, jor, kanyi, tok me wigi, ki boŋŋigi mu kene ducu, gibologi kwede woko ducu i ruk mac mukur malyet-ti. Cik pa kaba ka onoŋo obedo gwa matek, ki ruk mac bene onoŋo doŋ odoko lyet matek, ma leb macce ma lyel bene oneko jo meno ma gutero Cadrak, Mecak ki Abednego ka bologi woko i mac. Jo magi adek-ki, Cadrak, Mecak ki Abednego, gibologi gupoto wa i dye ruk mac ma doŋ gitweyogi woko gulugulu. Lacen kabaka Nebukadnejar obedo ki ur madit omiyo oa malo oyotoyot, Ci openyo lumi-tamme ni, “Pe wabolo jo adek i mac ma onoŋo doŋ gitweyogi woko?” Gudokke iye ni, “Ada, kabaka, iloko kakare.” Kabaka dok ogamo kun wacci, “Ento kombeddi atye ka neno jo aŋwen ma pe gitweyogi gitye ka wot awota i dye mac, kun mac bene pe waŋogi; dok aneno dano me aŋwenne-ni nen calo lubaŋa mo.” Ci Nebukadnejar obino onyiko cok ki doggola me kabedo ka ma ruk mac tye ka lye iye-ni, ci owacci, “Cadrak, Mecak ki Abednego, wun lutic pa Lubaŋa Mamalo Twal, wukatti woko, wubin kany!” Cutcut Cadrak, Mecak ki Abednego gukatti woko ki i mac, Ci luloyo madoŋo, ki ludito pa lwak, ki luloc me dul lobo mapatpat kacel ki lumi-tam pa kaba ka gucokke kacel, ci guneno ni mac pe owaŋo jo-nu; yer wigi mo ma mac oroyo pe tye, ginarukagi bene mac pe ogudo, dok ŋwec mac bene obedo pe i komgi. Mumiyo Nebukadnejar otuggi wacci, “Gipwo Lubaŋa pa Cadrak, ki Mecak ka Abednego ma ocwalo lamalaika ci olaro luticce woko, ma gigeno en, ma gubalo bene cik pa kabaka woko, gudyero kwogi me to ma ka woro lubaŋa mo ata ma pe Lubaŋagi kikome. Pi meno doŋ aketo cik kombeddi ni, Lwak me rok ducu nyo rok ducu mapatpat, nyo leb mo ma biloko lok mo marac i kom Lubaŋa pa Cadrak, Mecak ki Abednego gibiŋidogi wo ko matitino, ki odigi bene gibimuko woko doŋ obur; pien doŋ pe tye lubaŋa mo mukene ma twero laro dano kit man,” Mumiyo kabaka ocako medo rwom me tic pa Cadrak, Mecak ki Abednego i lobo Babilon. An kabaka Nebukadnejar acoyo lok man botwu, wun lwak me rok ducu, nyo rok ducu mapatpat, ki jo ma loko Leb mapatpat, ma wubedo i wi lobo ducu, Awaco botwu ni, Kuc omedde madwoŋ botwu! Onoŋo onen ber ki tuŋ bota ka anyuto lanyut mogo ki taŋo mogo ma Lubaŋa Mamalo Twal otyeko tiyo i koma, Lanyut ducu ma en onyuto-ada dit rom mene, ki tano ma en otiyo tekke rom mene! Kerre en aye ker ma ri nakanaka ki locce bene bedo i kare pa yalwak ducu. An Nebukadnejar onoŋo yam abedo mot i oda ma piny okwe, dok abedo ki gum me noŋo lonyo madwoŋ ki i gaŋ kaila. I kare ma abuto i wi kitanda aleko lek ma omiya lworo marac; dok ginanyuta mogo obino i wiya omiyo apo woko lirikrik. Pi meno omiyo aketo cik ma wacci myero gikel luryeko ducu ma i Babilon i nyima, wek gumiya aŋe tyen lok me lek ma aleko-ni. Cutcut lutyet ki lukor tipo, Lukaldaya ki jo ma tyeto lok kom lakalatwe gubino gudonyo bota; ci atito botgi lek ma aleko-ni, ento pe gutwero gonnya te lekke. Lacen i agikkine Daniel obino odonyo ocun i ima, en ŋat ma nyiŋe mukene gilwoŋo Beltecajar-ni, macalo nyiŋ lubaŋana, en dano ma cwiny pa lubaŋa maleŋ bedo i iye, ci atito bo te lek ma aleko kun awa cecni, “In Beltecajar, ladit ma loyo lutyet ducu, doŋ atyeko ŋeyo ni cwiny pa lubaŋa maleŋ-gu bedo i ii, dok aniaŋ ni pe tye muŋ mo mukanne ma nyutone woko ka maleŋ tek ki boti. Lek ma onoŋo aleko-ni en ene; gonnya te lokke. Ginanyuta mubino i wiya i kare ma abuto i wi kitanda gin ene: nen, aneno yat mo ma Ocuŋ i dye lobo; maber mukato kare woko. Yat tu odoŋo ci odoko tek, ki wiye bene ogudo polo, dok onoŋo nen woko liweŋ ki i agikki lobo ducu. Pote ducu onoŋo nen mabeco, ki nyige bene onoŋo pol mada, obedo cam ma yam gin makwo ducu camo. Lee ducu me tim giywe i te tipone, ki winyo me polo bene gibedo i jaŋe ducu, doŋ gin makwo ducu gikwo pi camo nyige, “I kare ma abuto i wi kitanda dok ginanyuta mogo obino i wiya, ci aneno lakur-piny mo maleŋ, ma olor piny oa ki i polo. Odaŋŋe matek kun waco ni, ‘Toŋ yat meno iret woko piny, ci itoŋ jaŋe bene woko ducu, ka ilwer pate woko ducu, dok iket nyige woko atata; wek lee gua ki i tere gurin woko, ki winyo bene gua woko ki i jaŋe, Ento myero iwek ajutte ki lwite mucuŋ i ŋom-mi, ci itwe ajutte woko ki rubota nyonyo, ki mola, obed i dye lum alita i tim. Wek toyo ma a ki i polo odyak kome woko, dok wek obed i kin lee ma gibedo i lum i lobo. Wek gilok tamme woko ki i tam pa dano, ci gimiye obed ki tam pa lee; wek ori mwaka abiro. Lukur-piny aye gumoko lok man, kun gulubo lok pa jo maleŋ, wek i agikkine omi gin makwo ducu guŋe ni, Ŋat Mamalo Twal aye ma loyo ker pa dano, dok tye kt twero me miyone bene bot ŋat ma en mito, kun keto kadi wa dano ma rwomgi piny adada me loyo lwak.’ Man aye lek ma an kabaka Nebukadnejar aneno. Doŋ kombeddi Beltecajar, myero ituc te lok me lek man, pien luryeko ducu ma gitye i te kerra pe gutwero gonyo te lek man bota, ento in itwero, pien cwiny pa lubaŋa maleŋ-gu bedo i ii,” Daniel ma nyiŋe mukene Beltecajar koŋ dok cwinye oballe woko pi cawa mo manok, ki tamme ducu opoyo tipo kome woko. Ci kabaka owacce ni, “Beltecajar, pe iwek lek man nyo gonyo tere opo tipo komi.” Beltecajar odokke iye ni, “Rwoda, lek man myero obed pi jo ma gidagi, ki te lokke bene obed pilukworri! Yat ma onoŋo ineno ma odoŋo odoko matek, ma wiye ogudo polo, ma onoŋo nen wa ki i agikki lobo ducu-ni, ma pote ducu onoŋo nen mabeco ki nyige bene onoŋo pol mada, obedo cam ma yam gin makwo ducu camo, ma lee ducu me tim giywe i te tipone, ki winyo me polo bene gibedo i, jaŋe ducu, en aye in kabaka ma doŋ idoŋo idoko tek. Ditti bene doŋ odoŋo oo wa i polo, ki locci bene oyarre oo wa i agikki lobo. Onoŋo kabaka mere oneno lakurpiny, ma en ŋat maleŋ-ui, ka oa ki i polo lor piny kun wacci, ‘Toŋ yat meno iret woko piny, ci ibal woko, ento wek ajutte ki lwite mucuŋ i ŋom-mi, ci itwe ajutte woko ki rubota nyonyo, ki mola, obed i dye lum alita i tim. Wek toyo ma a ki i pol odyak kome, dok wek obed mere i kin lee ma gibedo i lum i lobo, nio Waŋ ma mwaka abiro okato.’ Man aye te lok me lekke, ai kabaka: Man aye cik pa Ŋat Mamalo Twal, ma obino i kom rwoda kabaka, man nyuto ni gibiryemi woko ki i kin dano, doŋ ibibedo kacel ki lee me tim; gibimiyo icamo lum calo twon, dok toyo ma a ki i polo bene bidyako komi woko, ci ibiri mwaka abiro, nio wan ma iŋeyo ni ŋat Mamalo Twal aye loyo ker pa dano, dok en tye ki twero me miyone bot ŋat ma en mito. Kit macalo onoŋo giciko ni giwek ajut yat ki lwite, ada ker bibedo meri matwal cakke i kare ma in doŋ iŋeyo kwede ni Polo aye laloc. Pi meno in kabaka, myero iye tamma-ni; nut iwek balli woko ducu ci icak bedo ki kwo ma atir, kun iweko balli kitimo kica bot jo ma giunogi, wek gwok nyo kare me locci ibimedde ki bedo ki kuc ki yweyo muromo.” Lok magi ducu otimme i kom kabaka Nebukadnejar, I ne dwe apar wiye aryo kabaka doŋ onoŋo tye ka wot i wi ot me gaŋ kal me Babilon, ci en kabaka owacci, “Man aye pe Babilon madit-ti, ma an aye agero ki tek me twerona wek obed gaŋ me bedo pa luye, ki pi deyo me ditta?” I kare ma kabaka pud tye ka lok, dwan oa ki i polo ma wacci, “Ai kabaka Nebukadnejar, lok man giwaco boti ni, ker doŋ gikwanyo woko ki boti, dok gibiryemi woko ki i kin dano, doŋ ibibedo kacel ki lee me tim; gibimiyo icamo lum macalo twon, pi mwaka abiro, nio waŋ ma ipwonnye ni Dat Mamalo Twal aye ma lo yo ker pa dano, dok tye ki twero me miyone bene bot ŋat ma en mito.” Oyotoyot lok man ocobbe kakare i kom Nebukadnejar. Ci cutcut giryeme woko ki i kin dano, ocako camo lum calo twon, ki toyo ma oa ki i polo bene odyako kome woko nio waŋ ma yer kome ducu olot maboco macalo yec kom ocur, ki lwete bene olot maboco calo Lwet winyo. I agikki me kare meno ducu, an Nebukadnejar, ailo waŋa aneno polo, ci tipo koma ocako dwogo, omiyo apwoyo En ŋat Mamalo Twal mada, ka dok apake kun aketo deyo i kome en ma bedo kwo nakanaka-ni. Locce bedo matwal, ki kerrebene bedo i kare pa yalwak ducu; jo ducu ma bedo i lobo bene gin pe gin mo; en tiyo gin ma cwinye mito i mony me polo ki i kin jo ma bedo i lobo bene; ŋat mo pe ma twero juke, nyo ma twero wacce ni, “Itimo aŋo?” I kare meno kikome bene en aye tipo koma ocako dwogo kwede ki deyo me kerra, ki ditta ki berra ducu odwogo i koma. Lumi-tamma ki luye mera guyenya, ci gidwoka dok i kerra, ki dit mukene makato dok gimedo bota. Mumiyo kombeddi an, Nebukadnejar, apako, adworo dok aworo Kabaka me polo; pien ticce ducu tye atir, ki kwo me bedone ducu tye atir; jo ma luwakke en twero kwanyogi ci dwoko rwomgi woko piny. Kabaka Belcajar otedo karama madit pi luditone me awora ma welgi romo alip acel, ci omato koŋo vino i nyimgi. I kare ma doŋ Belcajar obilo koŋo, ociko ni gikel kikopo jabu ki me ryal-gu ma yam wonne Nebukadnejar ocoko woko ki i ot pa Lubaŋa ma tye i Jerucalem-mi, wek en kabaka ki luditone me awora, kacel ki monne ki mon aŋecane ducu giti kwede me mato koŋo, Ci gikelo jami magi me ryal ki me jabu ma yam giyakogi ki i ot pa Lubaŋa ma tye i Jerucalem; ci kabaka ki lwak luditone me awora, ki monne, ki mon aŋecane gumato kwede. Gumato koŋo vino, kun gipako lwak lubaŋa me jabu ki me ryal, me mola, me nyonyo, me yat ki me got. Cutcut gineno lwet cin dano mo ka tye ka coyo coc i kor ot ma i gaŋ kal pa kabaka, ma okemme ki okar mac; kabaka oneno ka ciŋ dano-nu tye ka coc. Man omiyo wan kabaka olokke woko ki tamme bene omiyo cwinye opoto lilin; pyere otoŋŋe woko, ki coŋe aryo ducu gubedo ka gone kacel. Omiyo kabaka okok ki dwan maloŋo ni gikel lukor tipo ki jo Kaldaya ki jo ma Jjiyo lok kom lakalatwe. Kabaka owaco bot luryeko ducu ma i Babilon ni, “ŋat mo ma bikwano coc man, ce ogonnya te lokke, gibiruko ki boŋo ma obedo lamar lamar, gibirwako nyor me jabu bene i ŋute, ci doŋ bibedo laloc me adek i te ker man.” Ci luryeko pa kabaka ducu gubino gudonyo i ot bote, ento pe gutwero kwano coc ma i kor ot kadi ki gonyo te lokke bot kabaka bene oloyogi. Man omiyo cwiny kabaka Belcajar opoto liliŋ, wa kome ducu oballe woko, ci luditone me awora guuro guŋeŋ woko ata. I kare ma daker owinyo lok pa kabaka ki pa luditone me awora-gu ducu, obino odonyo i ot ka ma gitye iye ka camo karama; ci owaco ni, “Ai kabaka, bed kwo nakanaka! Pe myero iwek tammi omi cwinyi obed ka poto, dok pe iwek komi oballe. Tye dano mo i te kerri kany ma cwiny pa lubaŋa maleŋ-gu bedo i iye. I kare pa woru onoŋo yam ginanyuta me muŋ ducu ki niaŋ wa ryeko, macalo ryeko pa lubaŋa-gu ducu, ginoŋo ni en tye kwede, mumiyo woru, kabaka Nebukadnejar, okete me bedo dano ma loyo lutyet, lukor tipo, jo Kaldaya ki luryeko ducu ma ŋiyo lok i kom lakalatwe. Dano man Daniel, yam kabaka ocako nyiŋe ni Beltecajar, onoŋo tye ki cwiny maber makato, onoŋo bene tye ki ŋec wa ki niaŋ muromo me gonyo te lok me lek ducu, kun gonyo wa te lok macalo koc Lit-gu woko bene, dok cobo lok me peko mogo ma dano tye kwede. Kombeddi myero ilwoŋ Daniel obin, ci en aye bigonyo te lok man.” Cutcut gikelo Daniel i nyim kabaka, Kabaka ocako lok ki Daniel kun penye ni, “In aye Daniel, ŋat acel i kin jo Juda ma yam wora omakogi ki i Juda ci okelogi kany-nyi? Awinyo lok i komi ni cwiny pa lubaŋa maleŋ-gu tye i komi, dok bene ni it ye ki ryeko me nyuto muŋ mogo, ki niaŋ wa ki ryeko makato pa jo mukene. Kombeddi onoŋo gikelo luryeko ki lukor tipo-gu i nyima ni gukwan coc man dok gumiya aŋe te lokke; ento pe gutwero nyutta te lokke. Ento onoŋo awinyo ni itwero gonyo te lok mapol, dok bene icobo lok me peko ma dano tye kwede. Doŋ kombeddi ka ce itwero kwano coc man ki gonyo te lokke wek aŋe, ci gibiruki ki boŋo ma lamar lamar, gibirwako nyor me jabu bene i ŋuti, dok bene ibibedo laloc me adek i te ker man.” Ci Daniel odok iye ki kabaka ni, “Gwok motti ducu obed piri giri, dok imi bakacic ma imito miya bot ŋat mukene; kadi bed pe agamo gin mo ma imiya pud abikwano coc man boti, kabaka, dok bene abigonyo te lokke iŋeyo. Ai kabaka, Lubaŋa ma En Ŋat Mamalo Twal yam omiyo woru obedo kabaka ma loyo lobo, omiye bene dit ki deyo wa ki twero ducu. Pi dit ma yam gimiye, oweko lwak me rok ducu ki rok mapatpat ducu ki jo ma loko leb mapatpat komgi omyel dok gubedo ki lworo i nyime. Ka yam cwinye omito ni enek dano mo ci neko mere aneka, ka omito ni ewek dano mo-ni obed kwo, ci weko bedo kwo; ka omito ni emi dit bot ŋat mo ci miyo, ka omito ni edwok rwom pa dano mo-ni piny ci dwoko bene. Ento i kare ma doŋ en ocako kette malo kekene ki i cwinye, omiyo cwinye odoko nwaŋ ci ocako loc ki wakke marac, omiyo gikwanye woko ki i wi komkerre, wa ki deyone bene gikwanyo woko ki i kome. Giryeme woko ki i kin dano ci giloko tamme odoko macalo tam pa lee me tim, obedo ka camo lum calo twon, toyo ma a ki i po lo obedo ka dyako kome, nio ka oneyo ni Lubaŋa Mamalo Twal aye ma loyo ker pa dano, dok en bene aye ma keto ŋat ma cwinye mito me bedo laloc iye. Doŋ in Belcajar, in wode kikome, ento pe ibedo mwol i cwinyi, kadi bed onoŋo iŋeyo lok man ducu. Ento ikette malo kekeni ci iette giri i kom Rwot me polo; dok jami ma yam gitiyo kwede i ode ducu gikelogi giketogi i nyimi, ci in kacel ki ludito me aworani, monni, ki mon aŋecani ducu wutiyo kwede me mato koŋo vino. Wubedo bene ka pako lwak lubaŋa me jabu, me ryal, me mola, me nyonyo, me yat ki me godi-gu, ma pe gineno piny, pe giwinyo lok, dok ma pe giŋeyo gin mo-ni. Ento in pe ibedo ka woro Lubaŋa ma omiyo kwo ki yweyo boti-ni, kun en bene aye ma gwoki i kit bedoni ducu. “Doŋ gicwalo ciŋ dano ki i nyime, ci ocoyo coc man. Coc ma gicoyo-ni onoŋo tye kit man: MENE MENE TEKEL PARCIN. Doŋ te lok man tye kit man: MENE, Lubaŋa doŋ otyeko kwano wel nino me kerri woko, dok onyuto bene ni agikkine doŋ cok. TEKEL, doŋ gipimi i mijan, ci ginoŋo ni pud iyot; PEREC, kerri gipoko iye woko ci gimiyo bot jo Medi ki bot jo Percia.” Cutcut Belcajar omiyo twero, ci giruko Daniel ki boŋo ma lamar lamar, ka girwako nyor me jabu i ŋute, ci gitito lok i kome oromo piny ducu ni en aye doŋ bibedo laloc me adekke i te ker me Babilon. I dyewor me nino meno kikome gineko kabaka Belcajar woko. Ci Dario ma jo Medi oleyo ker, ma doŋ mwaka me ditte romo pyerabicel wiye aryo. Dario omoko tamme me keto luloyo madoŋo miya acel ki pyeraryo me bedo luloc i te kerre i kabedo ducu mapatpat. Ka dok oketo luloc madito adek me loyogi; i kin jo-nu onoŋo Daniel bene tye iye, dok luloyo madoŋo ducu myero guter lok ma mako ticgi bot luloc madito adek-ki, wek lim pa kabaka pe olannye ata. Lacen ginoŋo ni Daniel dok kwiri mada makato luloc mukene madito aryo-ni woko, loyo wa rwodi-gu ducu, pien cwiny maber makato onoŋo tye i kome; doŋ omiyo kabaka obedo ki yub me keto en me loyo lobo ma i te kerre ducu. Mumiyo luloc madito kacel ki rwodi gubedo ka yenyo yo ma myero ginoŋ ki bal i kom Daniel ma mako lok ker; ento pe gunoŋo ka cuŋo mo me dot kadi ki roc mo, pien Daniel onono obedo dano ma lagen, ma pe tye ki kit roc mo, dok lok mo me bal bene pe ginoŋo i kome. Lacen jo meno guwacci, “Pe wabinono lok me doto Daniel nio ka wayenyo kit lok ma lubbe ki cik pa Lubaoŋne-ni.” Ci luloc madito kacel ki rwodi magi guporo lok kacel ci guye woko lawaŋacel ka gua gubino bot kabaka guwacce ni, “Ai kabaka Dario, bed kwo nakanaka! Luloc ducu madito me ker man, kacel ki ludito pa lwak, rwodi, lumitam ki luloc me dul lobo mapatpat guye lawaŋacel ni kabaka myero omok cik ki miyo twero ma pe gitwero lokone ni, ka ce gibinoŋo ŋat mo ka lego lubaŋa mo nyo ka woro dano mukene ma pe in kabaka, pinino pyeradekrdano macalo meno gibibolo woko i kin lwak labwor. Pienno kombeddi in kabaka myero imok cik ci iket ciŋi i buk ma gicoyo iye cik ma pe giloko atata, kit macalo cik pa jo Medi ki Percia tye kwede, ma pe giloko atata-ni.” Pi meno kabaka Dario oketo ciŋe i buk me cik kun moko cik man. I kare ma doŋ Daniel oŋeyo ni giketo cin i buk me cik, oa ocito i ode odonyo i kicikane ma tye malo ma tye ki waŋ dirica, ci oyabo dirica ma okemo yo tuŋ Jerucalem; ci obedo ka rumo coŋe piny ka lega kun miyo pwoc bot Lubaŋane tyen adek nino ki nino, kit macalo yam con koŋ obedo ka timone-ni. Lacen jo-nu ‘gucako bino bot Daniel kit macalo onoŋo doŋ gutyeko yubone-ni, ci gunoŋo Daniel tye ka lega kun bako doge bot Lubaŋane. Ka gudok cen gucito i nyim kabaka, gunyiko cok ci gucako wacce lok ma dok i kom cik ma pe lokke-ni ni, “Ai kabaka, onoŋo mono pe iketo ciŋi i buk me cik ma pe lokke atata-ni, kun iciko ni ka ce gibinoŋo ŋat mo ka lego lubaŋa mo nyo ka woro dano mo mukene ma pe in kabaka, pi nino pyeradek, dano macalo meno gibibolo woko i kin lwak labwor?” Kabaka odok iye botgi ni, “Lok meno pud ocuŋ matek kit macalo cik pa jo Medi ki Percia tye kwede, ma pe gitwero lokone atata-ni.” Ci gumedde ki tito lok bot kabaka ni, “Wanoŋo Daniel ma en ŋat acel i kin jo ma yam giyakogi ki i Juda, pe lubo cikki, ai kabaka, kadi wa cik ma pe lokke ma iketo iye ciŋi i buk-ki, ento bedo mere ka lego Lubaŋane tyen adek nino ki nino.” I kare ma doŋ kabaka owinyo lok magi ducu, cwinye ocwer mada, obedo ki tam pi laro Daniel; ci obedo ka yelle matek ki tam i cwinye nio ka cen opoto, pi yenyo kit yo ma myero el are kwede. Lacen jo magi dok gubino kacel bot kabaka, kit macalo onoŋo doŋ guyubo kwede, ci guwaco bot kabaka ni, “Ai kabaka, myero iŋe ni, man aye cik pa jo Medi ki jo Percia ni, cik mo ma kabaka doŋ omoko pe twero lokke.” Cutcut kabaka omiyo twero, gicito gikelo Daniel ci gibolo woko i kin lwak labwor. Ci kabaka owaco bot Daniel ni, “Myero Lubaŋani ma iworo jwijwi-ni tin koŋ olari ba!” Gikelo got acel madit ci giloro ki dog boro pa lwak labwor-ri woko, ka kabaka bene odiyo agit cine i odok ma gimwono ki got meno kacel ki agit ciŋ pa luditone me awora, ma moko ni myero pe gilok gin mo pi lok kom Daniel. Lacen kabaka ocako dok i gaŋ kalle, obedo ka ri kec dyewor benebene; gin mo pe ma gitero bote me yomo cwinye, nino bene okwero mako waŋe woko. I kare ma piny doŋ oyabbe odiko, kabaka oa malo ci okato woko ocito oyotoyot twatwal i dog boro pa labwor. Ka doŋ oo cok ki boro ka ma onoŋo Daniel tye iye-ni, ci odaŋŋe kun kok matek pi remcwiny, ci owaco bot Daniel ni, “Ai Daniel, latic pa Lubaŋa makwo, en Lubaŋani ma iworo jwijwi-ni mono doŋ otwero lari ki i dog lwak labwor magi?” Daniel odok ki kabaka ni, “Ai kabaka, bed kwo nakanaka! Lubaŋana ocwalo Lamalaika otweyo dog lwak labwor magi woko, mumiyo pe gumwoda woko, pien ginoŋo ni pe atye ki bal mo i nyime, kadi wa i nyimi bene, ai kabaka, pe atimo gin mo marac kadi ki acel.” Lok meno omiyo kabaka obedo ki yomcwiny matek, ci omiyo twero ni gikwany Daniel woko Kii boro pa labwor gikel woko ka maleŋ. Pe ginoŋo kadi latin ret mo i kome wacel, pien onoŋo en obedo ka geno Lubaŋane. Cutcut kabaka ociko ni gikel jo ma gudoto Daniel-li, ci gibologi woko i boro i kin lwak labwor, gin ducu kacel ki mongi wa ki litinogi. Doŋ ma pud peya gupoto piny i te boro, labwor ogamogi woko lamal likapkap ci gumwodogi gutyero ocogogi woko lipwacpwac. Lacen kabaka Dario ocoyo waraga bot lwak me rok ducu, ki rok mapatpat, kadi wa bot jo ma loko leb mapatpat ma gibedo i lobo ducu kun wacci, “Kuc myero onya omedde botwu. Aketo kombeddi cik ni, i kabedo ducu ma i te locca madit-ti dano ducu myero komgi omyel dok gubed ki lworo i nyim Lubaŋa pa Daniel, pien en aye Lubaŋa makwo, ma bedo nakanaka; kerre bene pe gituro, locce bene pe bigik. Lubaŋane laro dano dok konyogi bene, tiyo lanyut ki tano-gu i polo ki i lobo, en aye ma olaro Daniel ki i teko pa lwak labwor.” Mumiyo Daniel olimo gum ki lonyo madwoŋ i kare me loc pa Dario ki i kare me loc pa Ciro ma jo Percia. I mwaka mukwoŋo me loc pa Belcajar kabaka me Babilon, Daniel oleko lek dok bene ginanyuta obino i wiye i kare ma en obuto i wi kitandane. Ci ocoyo gin ma en oleko-ni woko piny, dok otito kit lokke woko bene. Daniel owacci, “Man aye gin ma aneno i ginanyuta i dyewor ki i waŋ lek; aneno yamo aŋwen ducu gubedo ka rubo pii me nam madit. Ci cutcut aneno lee madito aŋwen gukatti woko ki i nam, kun lee acel acel nen pat mada ki lawote. Lee mukwoŋo nen calo labwor, dok onoŋo tye ki bwome macalo bwom ocur. I kare ma abedo ka neno ci giputo bwome woko giilo woko ki i nom giketo Ocuŋ ki tyene aryo calo dano; ci gimiye bene cwiny pa dano. Dok aneno lee mukene me aryone, nen calo ŋuu, Otino tyene tuŋcel malo; tye ki cogo riŋo ‘lakŋet adek i doge i kin lake. Ci gititte ni, ‘A malo, imwod riŋo madwoŋ.’ I ŋe man aneno piny, ci aneno dok lee mukene mubedo calo kwac, ma tye ki bwome aŋwen macalo bwom winyo i ŋeye; onoŋo wiye tye aŋwen, dok bene gimiye loc. I ŋe man oo i dyewor aneno ginanyuta, ci aneno lee me aŋwenne, ger miyo kom dano myel marac ma lworo noŋo oketo komgi woko, dok tekone dwoŋ ma pe wacce; lake ducu obedo nyonyo matek; obedo ka mwodo riŋo lee otyero woko lipwacpwac, ka doŋ onyono gin mudoŋŋe woko piny ki tyene. Onoŋo nen pat dok twatwal ki lee mukene ma gukwoŋo nyime ca, onoŋo tuŋe tye apar kulu. Abedo ka tamo lok i kom tune apar-ri, ci aneno tuŋe mukene dok otwi olot ki i kin luwote; tye matidi mo. Ka otwi, ma onoŋo giputo tune adek i kom gin mukwoŋo twi-ni woko ki tergi ducu pi wekke kabedo, ci aneno waŋ tye i tun lee man ma obedo calo wan dano, ma doge onoŋo tye ka loko lok mogo me wakke adada. “I Kare ma abedo ka nenone, ci aneno, gicibo komker mogo ci Ŋat ma yam okwoŋo bedo kwo wa con obino obedo i wi komker acel. Boŋone tar calo pee, dok bene yer wiye rom ki yer romo ma gilwoko odoko matar adada; komkerre obedo leb mac ma lyel keken ki lawalane obedo mac ma tye ka wan, Laora kulu me mac ocako mol, ka mol a ki i nyime katti woko. Dano alip ki alip gitiyo bote; ki jo alip apar tyen alip apar gibedo ka cuŋ i nyime, ci laŋolkop ocako bedo ki lukiko pi ŋolo kop, ci omiyo oyabo buk. “Abedo ka neno piny i cawa meno pi lok me wakke ma tuŋ lee onoŋo tye ka lokone. I kare ma abedo ka nenone, ci gineko lee-nu woko, ka giwaŋo kome ki mac gityeko woko liweŋ, Doŋ lee mukene-ne-gu gikwanyo locgi woko ki botgi, ento giwekogi ni koŋ gubed kwo i lobo pi oro ki kare manok. I dyewor aneno ginanyuta macalo magi: cutcut aneno ŋat mo macalo dano, kun lor bino piny ki pol me polo. Ci obino bot ŋat ma yam okwoŋo bedo kwo wa con-ni, gitere bene wa i nyime. Gitiŋo loc ducu gimiyo i ciŋe, kacel ki ker ducu ki deyone, wek lwak me rok ducu ki rok ducu, ki jo ma loko leb mapatpat-gu ducu, gubed luticce. Locce aye loc ma bedo matwal, locce pe bigik, ki kerre bene pe gitwero turone. “An Daniel, cwinya onoŋo oballe woko pi lek ma obino i wiya opoyo tipo koma. Ci acito anyiko cok bot ŋat mo acel i kin jo ma onoŋo gucuŋ ka kenyo, ci apenye kun amito en otitta ada me lok magi ducu. En otitta, omiyo aŋeyo te lokke ducu, kun wacci, ‘Lee tim magi aŋwen madito-gu gin aye luker aŋwen ma gibia ki i lobo. Ento jo maleŋ pa ŋat Mamalo Twal aye gibicamo ker, dok gibibedo wegi ker nakanaka.’ “Dok amito twatwal me ŋeyo lok ada ma dok i kom lee me aŋwenne ma onoŋo nen mapat ki lee mukene-gu, ma onoŋo ger ma miyo kom dano myel marac, ma lworo noŋo oketo komgi woko-ni. Lake ducu obedo nyonyo, ki Lwete ducu obedo mola, ma obedo ka mwodo riŋo lee tyero cogone woko lipwacpwac, ka doŋ onyono gin mudoŋŋe woko piny ki tyene. Abedo ka tamo lok i kom tuŋe apar ma onoŋo tye i wiye-ni, ki i kom tuŋe mukene ma dok otwi olot ki i kin luwote, kun otwi ma onoŋo giputo tuŋe adek i kom gin ma gukwoŋo twi-ni pi wekke kabedo. En tuŋ lee ma onoŋo waŋe tye ma obedo calo waŋ dano-ni, kun doge bene tye ma obedo ka loko kwede lok me wakke adada. Onoŋo en dit makato lee luwote mukene-gu woko. I kare ma abedo ka nenone, ci aneno tuŋ lee meno oero lweny i kom jo maleŋ, ci otayogi woko, nio waŋ ma ŋat ma yam okwoŋo bedo kwo wa con-ni obino, ci oŋolo kop pa jo maleŋ pa ŋat Mamalo Twal, ka doŋ kare oo ci jo maleŋ gugamo ker woko. “En dok owaco kuman ni, ‘Lok i kom lee me aŋwenne tye kit man: Ker me aŋwen bibedo tye i lobo; kerre bibedo pat ki ker mukene-gu ducu. Ker man bicamo jo me lobo tyeko woko ducu, binyonogi woko piny ki tyene, dok ŋinyogi woko matitino. Doŋ lok i kom tuŋ lee apar-ri tye kit man: Tye luker apar ma gibia ki i te ker man, dok kabaka acel mukene bia ki i ŋegi: en bibedo pat mada ki luker ma gukwoŋo nyime-gu, dok bene bituro ker pa luker adek woko. En biloko lok marac i kom ŋat Mamalo Twal, biuno jo maleŋ pa ŋat Mamalo Twal-li, Bitemo loko karegi me woro Lubaŋa, ki cik ma en omiyogi. Gibimiyo jo maleŋ i ciŋe pi mwaka adek ki nucu. Lacen gibibedo ki lukiko pi ŋolo kop i kome, ci gikwanyo locce woko ki bote, kun gibalo dok gityeko woko matwal nio wa i agikkine. Doŋ ker ki loc ki dit me ker ducu ma tye i te polo gibimiyo woko bot lwak pa jo maleŋ pa ŋat Mamalo Twal. Kergi bibedo ker ma bedo nakanaka, kun loc me lobo ducu bibedo ka worogi dok gibilubo cikgi.’ “Doŋ agikki me lok man tye kit man. An Daniel, tamma omiyo cwinya opoto matek, ki koma bene oballe woko; ento akano lok man i cwinya pira kena.” I mwaka me adek me loc pa kabaka Belcajar, an Daniel aneno ginanyuta i waŋ lek, i ŋe ginanyuta mukwoŋo ca. I kare ma aneno ginanyuta ki i waŋ lek anoŋo ni doŋ atye wa i gaŋ kal madit me Cuca, ma tye i lobo Elam; dok bene aneno ni atye wa i dog kulu Ulai. Ailo waŋa malo ci aneno nyok romo ocuŋ i wi tera i dog kulu. Nyok romo-nu onoŋo tuŋe tye aryo; tuŋe aryo-ni ducu giboco, ento acel onoŋo dok bor kato lawote; en me aryone-ni otwi lacen. Aneno nyok romo ka witte ki tek kun loko tuŋe tuŋ potoceŋ ki yo tuŋ acam, ka lokke yo tuŋ acuc bene, ma lee tim mo onoŋo pe twero cuŋ i nyime. Onoŋo ŋat mo bene pe ma twero larogi ki i tekone; en yam otimo gin ma iye mito kun dworre kekene bene. I kare ma abedo ka lwodo lok cutcut aneno nyok dyel obino kun oa ki yo tuŋ potoceŋ ma ŋolo dye lobo ducu arii, ma tyene pe gudo ŋom; nyok dyel-lu onoŋo tye ki tuŋe i kin waŋe ma nen wa ki cen. Nyok dyel oa obino bot nyok romo ma tye ki tune aryo-ni, ma onoŋo aneno Ocuŋ i wi tera i dog kulu ca, ci ocako riŋo ka lweny i kom nyok romo ki akemo madit adada. Aneno obino odirre cok twatwal ki nyok romo, ci kolo ocako mako i kom nyok romo ci otwomo nyok romo oturo oputo tuŋe aryo ca woko; nyok romo onoŋo pe tye ki teko mo liweŋ me cuŋ i nyim nyok dyel, ci orete woko piny i ŋom ka onyone ki tyene; onoŋo pe tye ŋat ma twero laro nyok romo ki i teko pa nyok dyel. Meno omiyo nyok dyel odworre kekerie mukato kare; ento i kare ma onoŋo en pud tek-ki, tuŋe madit-ti otur woko. Cutcut dok aneno tuŋe aŋwen mukene gutwi ma ginen ki cen ma gukemo yamo aŋwen me polo. Dok aneno tuŋe mo matidi otwi okatti ki i kom tuŋe acel ki i kingi, olot mabor okemo yo tuŋ acuc, ki yo tuŋ wokceŋ, ma okemo kwede lobo me deyo. Odoŋo madit oo wa i kom mony me polo; ento obolo lakalatwe mogo woko piny i ŋom, ci onyonogi woko ki tyene. Ocako dworre kekene o kwede wa i kom Laker me mony meno; ci okwanyo gitum awaŋa me nino ducu-ni woko ki bote, ka ojwero ode maleŋ-ŋi obalo woko. Gitiŋo mony kacel ki gitum awaŋa me nino ducu gimiyo i ciŋe pi bal; ci gibolo lok ada woko piny i ŋom, ci tuŋe obedo ka tic omedde matek twatwal. Cutcut awinyo ŋat maleŋ tye ka loko ki ŋat maleŋ mukene owaco bote ni. “Ginanyuta ma aneno i wan lek ma okemo gitum awaŋa me nino ducu biri pi kare ma rom mene, ma okemo bene bal ma nyayo gin malik, ki ma okemo miyo ot pa Lubaŋa ki mony me polo me anyona woko ki tyen-ni?” Ci ŋat maleŋ ma obedo ka lok-ki owacce ni, “Biri pi nino alip, acel ki miya acel ki pyerabic ma pe gibityero iye gitum me odiko ki otyeno, ka lacen gibiroco ot pa Lubaŋa gidwoko i kit ma myero.” I kare ma onoŋo an Daniel aneno ginanyuta, abedo ka yenyo yo me niaŋ iye; ci cutcut aneno ŋat mo ma ocuŋ i nyima ma nen calo dano. Ci awinyo dwan dano ma lok oa ki i kin kulu Ulai, ci olwoŋo ni, “Gabriel, mi danonu one te lok me ginanyuta ma en oneno-ni.” Ci ocako bino cok ki ka ma onoŋo acuŋ iye; i kare ma obino abedo ki lworo ci apoto aryebbe woko piny, Ento en owacca ni, “In wod pa dano doŋ iniaŋ ni, ginanyuta ma inenoni nyuto gin ma bitimme kale me agik.” I kare ma en tye ka lok kweda, nino omako waŋa woko acako nino nino matut kun akulu waŋa i ŋom; ento en oguda ci ociba acuŋ ki tyena. Owaco bota ni, “Nen, abinyutti gin ma bitimme lacen i kare me agik me akemo pa Lubaŋa; pien lokke kemo nino me agik ma yam giciko pire con. Doŋ lok ma dok i kom nyok romo ma ineno ma tuŋe tye aryo-ni, magi gin aye luker me Media ki me Percia. Ento nyok dyel meno kabaka pa jo Grik; doŋ tune madit ma i kin wane-ni meno aye kabaka mukwoŋo, Doŋ tuŋe ma gituro-ni, ma tune aŋwen mukene otwi kakare ca, meno ker aŋwen ma bia ki rokke, ento tekogi pe bibedo rom ki mere. Ento lacen ki i ŋe locgi, i kare ma noŋo lubalo welgi onya omedde, ci kabaka mo ma waŋe ocwiny bia cako loc, ŋat ma niaŋ i lok me koc lit-gu, Tekone bibedo dit twatwal, en bitiyo gin ma tyeko piny woko ma miyo lworo, gin ma en bitiyo ducu biwoto maber, bineko jo ma gin twoni oteka kacel ki rok pa jo maleŋ. Pi ryekone marac, miyo bwola bimedde ameda i ciŋe, dok bibedo ka dworre ke kene ki i tamme. En bineko jo mapol tyekogi woko atura; dok bene bia lwenyo kadi wa i kom Laloc madit ma loyo luker ducu; ento gibiture woko laboŋo ciŋ dano mo ma ogudo kome. Pi meno ginanyuta ma loko i kom gitum me odiko ki otyeno gire obedo ada; doŋ imwon ginanyuta meno ikan woko, pien pud kare tye bor.” Dok an Daniel, ryeko onoŋo orwenyo woko ki bota, omiyo two omaka abuto kwede pi nino mapol manoknok; ka lacen aa acito ka tiyo tic pa kabaka; ento abedo ka uro ginanyuta meno ma aneno i waŋ lek-ki, dok pe amedo ki niaŋ iye wacel. I mwaka mukwoŋo me loc pa Dario wod pa Akacwero, ma en anywalli pa jo Media, en aye Dario odoko iye kabaka, ci oloyo ker pa jo Kaldaya. An Daniel onoŋo akwano i buk lok ma yam Rwot onyuto bot lanebi Jeremia, gin ma myero okwoŋ timme ma noŋo Jerucalem bibedo obur; ci anoŋo kare meno ginyuto wel mwakane ni biromo pyerabiro kulu. Lacen aloko waŋa bot Rwot Lubaŋa, kun ayenye, alego dok abako doga bote, kun ari kec ma aruko boŋo cola ma abuko koma ki buru bene. Abedo ka lega i nyim Rwot Lubaŋana kun atuco balwa ma awacci, “Ai Rwot Lubaŋa, in idit, dok wabedo ki lworo i nyimi. In Lubaŋa me ada dok igwoko gicikkeni ki mar meri ma pe lokke pi jo ma gimari dok ma gilubo cik meri. Watyeko balo, wabedo ka timo roc mapol kun watimo bene gin maraco adada, dok wajemo woko i komi, waloko ŋewa woko boti, pe walubo cikki; dok bene pe watiyo gin ducu ma yam iciko. Pe wabedo ka winyo lok pa luticci ma gin lunebi, ma gubedo ka tito lok ducu ki nyiŋi bot lukerwa, rwodiwa, ki bot kwarowa kacel ki bot lwak ducu ma gibedo i lobowa. Ai Rwot, kit ma atir gire tye boti keken, ento ki tuŋ botwa Lewic doŋ obalo wanwa woko, kit macalo otimme kwede i nino man i kom jo Juda, i kom jo ma bedo i Jerucalem, ki i kom jo Icrael ducu, jo ma bedo ka macok ki jo ma gibedo ka mabor, i lobo ma yam iryemogi iterogi iye ducu, pi tim me roro ma onoŋo gubedo ka timone i komi. Ai Rwot nen lewic abalo wanwa woko, wan ducu kacel ki lukerwa, rwodiwa, ki kwarowa, pien onoŋo watimo bal i komi. Kica ki weko bal tye bot Rwot Lubaŋawa, kadi bed onoŋo wajemo woko i kome. Pe wabedo ka winyo lok dog Rwot Lubaŋawa, dok pe walubo cik ma onoŋo en oketo piwa kun wok ki bot luticce lunebi. Jo Icrael ducu gubalo cikki woko, ka guloko ŋegi woko boti, gukwero winyo lok dogi ma ibedo ka loko botgi. Pi meno oweko lok me ceno dano ki lok me lamo dog ma yam gicoyo i buk pa Moses ma en laticci, gikwanyo gionyo woko i komwa, pien doŋ watimo bal i komi. In doŋ icobo gin ma yam oloko i komwa ki i kom luloc ma onoŋo giloyowa, ci ikelo can madit i komwa; kit tim man pud peya nen i piny ma tye i te polo, en kit gin acel-lu ma yam gitimo i kom Jerucalem. Kadi bed can madit man opoto i komwa, kit macalo gicoyo i buk me cik pa Moses, ento pe walego kica bot Rwot Lubaŋawa, pe waweko balwa ducu, kun wamine kenwa me lubo ada meri. Meno aye gin mumiyo Rwot okano can madit piwa, ka lacen oketo i komwa; pien Rwot Lubaŋawa oporre i gin ducu ma en tiyo, ento wan aye pe wabedo ka winyo lokke. Kombeddi doŋ, ai Rwot Lubaŋawa, yam ikwanyo joni woko ki i lobo Ejipt ki tek me badi, yam imiyo nyiŋi oywek iye, kit macalo tye kwede i kare man, ento onoŋo wabalo, dok watimo gin maraco adada. Ai Rwot, kit macalo gin ducu ma itiyo tye atir, jwa kinigani ki akemoni woko ki i kom Jerucalem ma en aye gaŋ kaili ki gotti maleŋ, pien pi bal mewa aye, ki pi bal mapol ma yam kwarowa gutimo, omiyo Jerucalem kacel ki lwakki gudoko lok aboka i kin rok ducu ma gibedo ka netwa ma gurumowa dyere, Pi meno kombeddi, ai Lubaŋawa, winy legana an laticci, ki lega me bako dog ma akelo i nyimi; dok bene ai Rwot, mi waŋi oryeny i kom ot meri maleŋ, ma doŋ odoŋ obur-ri. Ai Lubaŋana, cik iti iwiny, yab waŋi ci inen to-piny ma opoto i komwa, ki i kom gaŋ ma gilwoŋo ki nyini-ni. Pe wabako dogwa boti kun wageno ni kitwa tye atir, ento pi geno kica meri madwoŋ. Ai Rwot, winywa ba; ai Rwot, wek balwa; ai Rwot, cukke ci iti gin mo, pe igalle, pi nyiŋi keni keken, ai Lubaŋana, pien gaŋ man kacel ki lwak ducu ma gibedo iye gilwonŋgi ki nyiŋi.” Kumeno abedo ka lok kun alego, atuco balla ki pa lutuwa jo Icrael, kun bene akelo lega me bako doga i nyim Rwot Lubaŋana pi got mere maleŋ. I kare ma atye ka lok kun alego kwede, cutcut atuggi neno dano ma nyiŋe Gabriel, dano ma onoŋo doŋ atyeko nenone i waŋ lek i ginanyuta mukwoŋo ca; aneno obino bota kun ŋweco madwir adada i cawa me gitum me otyeno, En obino ci owacca ni, “Daniel, kombeddi abino ka miyo boti ryeko ki niaŋ muromo. I acakki lega me bako doggi lok mo okatti ma oa ki bot Lubaŋa, kombeddi abino ka titti pire, pien Lubaŋa mari matek twa twal. Pi meno tam tyen lok man wek iniaŋ i te lok me ginanyuta ma ineno. “Mwaka miya aŋwen ki pyeraboŋwen en aye kare ma giciko ma okemo lutuwu ki gaŋwu maleŋ, pi tyeko bal me kalo wi cik, pi giko bal woko doŋ matwal, ki pi kwanyo bal woko ki i komwu doŋ wulim kit ma atir ma bedo nakanaka, wek ginanyuta kacel ki lok ma yam lanebi oloko ocobbe kakare, dok bene pi wiro kabedo maleŋ makato ducu-ni ki moo. Doŋ amito iŋe dok iniaŋ maber ni, nia i kare ma lok man cito kwede woko pi roco ki pi gero Jerucalem odoco, nio wa i bino pa dano ma giwiro ma en laker, bibedo mwaka pyeraŋwen wiye aboŋwen. Ci gaŋ bibedo mwaka miya aŋwen ki pyeradek wiye aŋwen ma doŋ gigero odoco ki dyekalle ki cel lobo ma gitoro atora, ento meno bibedo i kare ma noŋo ayelayela dwoŋ adada. I ne mwaka miya aŋwen ki pyeradek wiye aŋwen, ŋat mo ma giwiro gibikwanye woko ma pe dok gibiketo ŋat mo me leyo kakare; ci lwak pa laker ma gikuro binone-ni bijwero gaŋ kacel ki kabedo maleŋ gibalo woko. Agikkine doŋ bibedo macalo pii aluka, ka doŋ lweny bibedo teretere nio wa i agikki; en aye to-piny ma yam gicikoni. Ci en dano-nu bimoko gicikke ki jo mapol pi mwaka abiro; ki pi mwaka adek ki nucu, en bijuko tyero gitum ki gityer woko. Dano ma bikelo to-piny-nyi bibino kun noŋo obone woko i tim me kwer ma dano gitye ka timone, nio waŋ ma agikkine ma yam giciko-ni doŋ gionyo woko i kome.” I mwaka me adek me loc pa Ciro kabaka me Percia Lubaŋa onyuto lok mo bot Daniel, ma nyiŋe mukene Beltecajar. Lokke obedo lok ada, dok okelo ayelayela madwoŋ adada ci Daniel oniaŋ i lok, obedo ki niaŋ matut bene i ginanyuta ma en oneno. I kare meno ducu, onoŋo an Daniel abedo ka kumo pi cabit adek kulu. Pe abedo ka camo cam mo mamit, pe acamo riŋo kadi ki kono vino bene pe odonyo i doga, dok pe awiro koma ki moo wacel, pi cabit adek-ki kulu. I nino dwe pyeraryo wiye aŋwen me dwe mukwoŋo, anoŋo ni acuŋ i dog kulu madit, ma en aye Tigric. Atiŋo waŋa aneno malo ci aneno dano mo ma oruko boŋo camanini, ma otweyo pyere ki del jabu me Upaj. Kome onoŋo obedo calo got berul ma mil amila, ki tur nyime nen calo lutkot ma wil, ki wane ryeny calo mac, bade ki tyene-gu ducu nen calo mola ma girudo maleŋ adada, ki lokke ma en loko-ni winnye calo woo pa lwak dano mapol. An Daniel keken aye ma aneno ginanyuta; jo ma onoŋo gitye kacel kweda pe guneno, ento myelkom madit opoto i komgi, omiyo guriŋo ka kanne woko. Guweka adoŋ kena, ci aneno ginanyuta man madit. I kare ma doŋ aneno tek mo pe odon i koma; kit ber me koma olokke woko ma lworo maki woko cut. Ka doŋ awinyo dwane ki lok ma en obedo ka lokone, ci apoto piny aryeba-ic anino nino matut adada kun pe aŋeyo koma. Cutcut ciŋ dano mo-ni oguda omiyo ciŋa ki coŋa ducu gumyel matek. En dano-nu owacca ni, “Daniel, in dano ma gimaro adada, gwok lok ducu ma atye ka lokone boti. A itirre icuŋ atir, pien an kombeddi giora boti.” I kare ma onoŋo pud en tye ka loko lok meno, aa malo acuŋ ma koma myel amyela likwakkwak. Ka lacen owaco ni, “Daniel, pe ilwor, pien cakke i nino mukwoŋo ma iketo kwede cwinyi ka niaŋ ki ka mwolle woko keni i nyim Lubaŋani, lokki ducu doŋ onoŋo Lubaŋa otyeko winyone, nen an doŋ atyeko bino pi lokki. Lamalaika ma rwot me ker me Percia ogena woko pi nino ma romo pyeraryo wiye acel kulu; ento Mikael, ŋat acel madit i kin rwodi ducu, oa obino ka konya ci aweke kunnu gin ki rwot me ker me Percia, abino ka niani wek iŋe can ma bipoto i kom rokwu i kare me lacen. Pien ginanyuta man ma ineno-ni bene lokke bitimme i kare ma tye anyim.” I kare ma doŋ oloko bota kit lok macalo magi ducu, akulo waŋa piny i ŋom adoko calo ladoge oto. Nen, ŋat mo acel ma obedo calo dano ogudo del doga; ci aŋamo doga aloko bene. Awaco bote en ŋat ma onoŋo ocuŋ i nyima-ni ni, “Ai rwoda, pi tyen lok me ginanyuta man ma aneno omiyo arem mapol obino i koma, pe doŋ atye ki teko mo wacel. An laticci atwero ŋwette ka lok ki rwoda niŋniŋ? Pien kombeddi teko mo doŋ pe odoŋ i koma liweŋ, dok bene yweyo mo ma odon i cwinya pe.” Lacen doki ŋat ma nen calo danoni oguda tyen me aryo ci omiya teko. Ka doŋ owacca ni, “In dano ma gimaro adada, pe ilwor; ibibedo maber dok ki kuc. Bed tek ki tekcwiny.” I kare ma oloko kweda, alimo teko kun awaco ni, “In rwoda aye doŋ iloki, pien doŋ ityeko miya teko.” En openya ni, “In iŋeyo tyen lok mumiyo abino boti-ni? Ento kombeddi doŋ abilokke adok ka lweny i kom rwot me Percia. Ka doŋ atyeko lweny kwede, nen, rwot pa jo Grik bibino. Ento an abitito bote gin ma gicoyo i buk me lok ada: pe tye ŋatti mo ma tye ka ŋeta ma dok lwenyo ki jo man kono Mikael keken, ma en aye rwotwu. “I mwaka mukwoŋo me loc pa Dario ma en jo Medi, Mikael oa malo ka konya ki ka miya tek. “Kombeddi doŋ abinyutti lok me ada. Nen, lobo Percia dok bibedo ki luker mu kene adek; ento kabaka me aŋwenne bibedo lalonyo makatogi ducu; ka doŋ inen odoko tek pi lwak lonyonegu, en bitugo rok ducu pi lweny i kom ker pa jo Grik. Lacen kabaka matek bituc, ma biloyo lobo ki loc madit kun tiyo gire gin ducu kit ma iye mito. Ka doŋ ineno en ocako loc kit meno ci kerre bitur gipoko iye woko i kin yamo aŋwen me polo, ento pe bibedo pi likwaye, dok pe bilubo kit loc ma onoŋo en loyo kwede lobo; pien gibitiŋo kerre woko ki berre gimiyo bot jo mukene ma pe likwaye. “Dok kabaka ma loyo lobo ma tye yo tuŋ acuc bibedo matek, ento ŋat acel ki i kin rwodine bibedo tek makato en, dok locce bene bibedo loc madit. I ŋe mwaka mogo gibiribbe woko, ci nya pa kabaka me lobo ma tye yo tuŋ acuc bibino bot kabaka ma loyo lobo ma tye yo tuŋ acam pi yubo lok me kelo kuc; ento teko pa dako-nu aye birwenyo woko, man miyo kabaka kacel ki likwaye pe gibiciro nakanaka, gibicayo pire gitenye woko ata ki luticce, ki latinne bene, wa ki cware kadi ki ŋat ma ocamo lobone-ni bene. “I kare meno nya pa kabaka binywalo latin calo yat ma olot ki i kom ajut, en aye bileyo ka tyen wonne; en bibino ka lweny i kom dul mony ci donyo wa i gaŋ ma girumo ki cel gogo pa kabaka me lobo ma yo tuŋ acam; en bilwenyo i komgi ci biloyogi bene. En bicoko lwak lubaŋa megi ki cal jogigi ma giliyo aliya ki jami me wel ma gitiyo ki ryal ki jabu, ci terogi i Ejipt; ka doŋ pi mwaka mogo en koŋ doŋ bibedo ma pe lwenyo i kom kabaka ma loyo lobo ma tye yo tun acam. Lacen kabaka ma loyo lobo bibino donyo i lobo pa kabaka ma yo tuŋ acuc, ento bidok gire i lobone kikome. “Awobene gibiero mony ci gibiguro lwak dano me mony madito kacel, ma gibibino i kom lukworgi ci giretogi woko ka gikato giwok ki i dye lobone gimedde ki tero mony wa i cel gogone. Ci kiniga bimako kabaka me lobo ma yo tuŋ acuc matek, miyo en bibino ka lweny i kom kabaka me lobo ma yo tuŋ acam; biguro lwak mony madit, ci gibimiyo lukworre i ciŋe bene. Ka doŋ owaro lwak woko, ci doŋ bibedo ki wakke i cwinye; en bineko jo alip ki alip, ento pe biloyo. Kabaka me lobo ma yo tuŋ acam pud bimedde ki coko lwak dano me mony, ma loyo jo ma wiati ca; ka doŋ i ne mwaka mogo en cako bino ki mony madit ki lwak jami me lonyo adada. “I kare meno ducu dul mony mapol bicako lweny i kom kabaka me lobo ma yo tuŋ acuc; dok lutim bwami ma i kin lutuwu kikome gibinwette me cobo te lok me ginanyuta ma ineno i waŋ lek, ento pe gibitwero. Dok kabaka me lobo ma yo tuŋ acam bibino rumo gaŋ, ci mako gaŋ meno ma girumo ki cel gogo maber adada. Ento dul lulweny ma gua ki i lobo ma tye yo tuŋ acuc pe gibicuŋ, kadi wa twoni lweny ma giyerogi ayera, pien teko mo me cuŋ bibedo pe. Doŋ ŋat ma oebino ka lweny i kome bitimo kit ma cwinye mito, ŋat mo ma bicuŋ i nyime peke; en bicuŋ i lobo me deyoni, lobo meno ducu doŋ bibedo i te twerone. En biciko waŋe me bi no ki tek i te kerre ducu, en bikelo lok me kuc ci tiyo dok cobo bene. En bene bimiyo nya pa dako mo aye jwero ker woko; ento lobone pe bicuŋ kadi wa meddene bene doŋ bibedo pe. Lacen biloko waŋe kemo yo tuŋ lobo ma tye i dog nam, ci mako jo mapol ki i kingi; ento latel wi mony bikanne woko pi lewic; ada, en dok bidwoko lewicce cen i kome. Ci bilokke i ŋeye neno cel gogo me lobone kikome; ento en biyokke poto woko piny, ci pe dok gibinoŋo. “Lacen ŋat mo dok bibino leyo kakare ma bicwalo lajog lim madit kun wok ki i deyo me ker; ento pi kare manok keken gibituro woko, pe ki kiniga nyo kadi ki lweny mo. Ci dano mo malam ma yam pe gimiye dit me ker bibino leyo kakare; en bibino atura ci gamomerekerwoko ki lok bita. Mony ducu gibijwerogi giturogi woko i nyime, kadi wa ladit me gicikke pa Lubaŋa bene gibineko woko. Cakke i kare ma en biye cikke me ribbe kwede, bibedo ka tic ki lok me bwola keken; en bimedde doko tek ki jo mogo manok. En bio atura i dul lobo ma lonyo dwoŋ iye, ci bitiyo gin mo ma kwarine ducu ka wegi kwarine yam pe gutiyo, me keyo luyak woko ki i kingi liweŋ, ki jami ma yam giyako ayaka ki jami mapatpat ducu. En biyubbe me lweny i kom gaŋi me cel gogo matego, ento man bibedo pi kare manok mo keken. “En bitugo tekone ki tekcwinye i kom kabaka me lobo ma yo tuŋ acuc ki mony madit; ci kabaka me lobo ma yo tuŋ acuc biero lweny ki dul mony madit matek adada; ento en pe bitwero cuŋo, pien piro lok ki yub mapol gibibedo ka yubone twatwal i kome. Kadi ki jo ma camo camme mabeco-ni gin aye jo ma bineke gibijwero monnye woko, ci gineko lwak jo mapol ma komgi biradde piny i nom lirat. Doŋ luker aryo-ni gibibedo ka paro lok me kwarcwiny keken; gibibedo ka loko lok goba kadi bed gicamo i meja acel. Ento lokke pe bikonyo; pien kare me cobo lokke peya oromo, ento bitimme i kare ma giciko. En bidok i lobone ki lwak jami madwoŋ, co to pud bibedo ki kwarcwiny i kom gicikke maleŋ, En bitiyo kit ma cwinye mito, ci dok i lobone kikome. “I kare ma giciko en bilokke dwogo yo tuŋ acuc; ento i kare man, pe bibedo kit macalo yam obedo kwede wiati. Dano mo mua ki yo tuŋ potoceŋ bibino ki lwak mel mapol ka lweny i kome, Lworo bimake ci jukke woko kene; ci bidok cen ki ŋeye, cako lweny ki akemo madit i kom gicikke maleŋ. En bidok cen ka konyo jo ma doŋ gibwoto gicikke maleŋ woko. Dul mony ma a ki bote bibino dok pyedo ot pa Lubaŋa ki cel gogo woko, ci bikwanyo gitum ‘awaŋa ma gityero nino ducu woko gicako keto gin me kwer malik. En biywayo lweny i kom jo ma gibalo gicikke kun bitoŋi abita keken; ento jo ma giŋeyo Lubaŋagi gibicuŋo likiŋ ci gilwenyo bene matek pi niyegi. Doŋ jo mogo ma luryeko ma gitye i kin lwak gibimiyo jo mapol giniaŋ, kadi bed gibinekogi woko ki pala lucwan, dok giwaŋogi woko bene ki mac, nyo giterogi i opii, ma giyako jamigi woko pi kare mogo. Ka gitimogi marac, ci gibilimo kony mo manok. Doŋ jo mapol gibiribbe kwedgi ki lok bita. Ci luryeko mogo ma i kingi bipoto woko, ento meno bimiyo lwak gilonnye gidoko leŋ macalo jabu ma giliyo maber, ci mi yo gidoko matar laboŋo cilo, nio waŋ ma kare me agik oromo, ma en kare ma yam giciko. “Kabaka gire bitiyo gin ducu kit macalo cwinye mito; en binwette me bedo dit makato lubaŋa ducu, ka cako loko lok mogo ma giuro i kom Lubaŋa ma loyo lwak lubaŋa ducu. En bimedde kun pud bedo ki dit wic nio ka tic me akemo pa Lubaŋa doŋ otum woko liweŋ; pien gin ma Lubaŋa omoko bitimme. Kabaka pe bibedo ki winy mo woko liweŋ i kom lwak lubaŋa pa kwarine, nyo bot jok ma mon maro adada-ni; pe bimiyo kit winy mo bot lubaŋa mukene, pien en bikette kene me bedo dit ma loyo jami ducu. Kaka woro magi en bibedo ka woro lubaŋa me cel gogo ma en aye lubaŋa ma yam kwarine pe guŋeyo-ni; en bityero bote jabu kacel ki ryal, ki kidi matino me wel, ki mot ma welgi malo adada. En biketo lurok ma giworo lubaŋa mapat pi gwoko cel gogo mere; jo ma guye ditte en biketogi i rwom me dito ki deyo. En biketogi gibedo luloc ci giloyo jo mapol, dok bipoko lobo botgi me awila. “I kare me agikki kabaka me lobo ma yo tuŋ acuc bilwenyo i kome; ento kabaka me lobo ma yo tuŋ acam birune bi no i kome woko oyotoyot calo yamo lapiru, kun bino ki lwak gadigadi ki wegi aguragura-gu, ki lwak mel madwoŋ ata; en bibino donyo i lobo mapatpat ci gimol ki wot gikato ki iye. En bibino wa i lobo me deyo. Jo alip apar gibinekogi, woko, ento jo magi aye gibilarogi ki i cine: jo Edom ki jo Moab; ki jo Ammon ma gudoŋ, En biryeyo ciŋe me lweny i kom lobo mapol, kadi ki lobo Ejipt bene pe bibwot. En bi doko laloc ma loyo lonyo me jabu ki me ryal, ki jami me wel ma i Ejipt-gu ducu; doŋ jo Libya ki do Etiopia gibilubo kore. Ento lok ma biwinnye kun a ki yo tuŋ wokceŋ ki yo tun acam bi mi yo cwinye poto; en bia cito kunnu ki twon akeca madit ka jwero dano woko ki neko jo mapol bene, En biguro kemane madito i kin nam ki got maleŋ me deyo; ci kare me tone biromo ma noŋo ŋat mo ma konye doŋ pe. “I kare meno Mikael bibino, ma en rwot madit ma loyo rokwu. Dok kare me can bibedo tye, kit can macalo man peya onen cakke wa con i kare pa rok mo-ni nio kwede wa i kare meno. I kare meno aye gibilaro iye rokwu, jo ma gibinoŋo yam gicoyo nyiŋgi i buk. Dok jo mapol i kom jo ma gibuto i apwa me ŋom gibico woko, jo mukene gibidonyo i kwo ma bedo nakanaka, ento jo mukene gibinoŋo megi lewic ki cac ma bedo nakana ka, Jo maryek biryeny macalo pete me polo; ki jo ma loko jo mapol dwogo i kit ma atir, gibidoko calo lakalatwe matwal. Ento in Daniel, um lok man woko, ci imwon buk-ki woko, nio wa i kare me agik. Jo mapol gibibedo ka riŋo tuŋŋi ki tuŋŋi, ki ŋec bene bimedde.” Cutcut ki i ne meno an Daniel aneno piny, ci aneno jo mukene aryo gucuŋ i dog kulu, acel ocuŋ i dog kulu tuŋŋi ki acel ocuŋ i dog kulu tuŋcel. Ci owaco bot dano ma onoŋo oruko boŋo camanini, ma obedo malo i wi pii ma i kulu ni, “Man bitero kare ma rom mene nio ka agikki me ginaura magi bio?” Dano ma onoŋo oruko boŋo camaniŋi-ni ma obedo malo i wi pii ma i kutu, otiŋo ciŋe aryo ducu okemo polo; ci awinyo en ka kwoŋo kwoŋ ki nyiŋ ŋat ma bedo matwal-li ni gin meno bibedo pi mwaka adek ki nucu, Ka doŋ ineno nino me turo tek pa jo maleŋ otum ci jami magi ducu bene bitimme cobo kakare, Awinyo, ento onoŋo pe aniaŋ. Mumiyo awaco ni, “Ai rwoda, agikki me jami magi bibedo niŋniŋ?” Odok iye ni, “In icit meri citoni Daniel, pien pud giumo lokke dok gimwono woko kuro kare me agik. Jo mapol gibilonnye, gibilokke gidoko tar, kun bene gilonyogi odoco; ento jo maraco gibibedo megi ka timo gin maraco. Pe tye ŋat mo i kin lutim maraco ma biniaŋ iye; ento jo maryek aye biniaŋ iye. Cakke i kare ma gikwanyo iye gitum awaŋa me nino ducu ca, kun doŋ giketo gin me kwer malik, bibedo nino alip acel ki miya aryo ki pyeraboŋwen. Ŋat ma kuro nio ka nino alip acel ki miya adek ki pyeradek wiye abic oromo bedo ki gum. Kombeddi cit giri nio ka kare me agik oromo; ento i agikki me kare meno ibiywe ci ibicuŋ i kabedo ma gipoko boti.” Man lok pa Rwot ma yam obino bot Kocea, wod pa Beeri i kare pa Ujia, Yocam, Akaj ki Kejekia ma gin luker me Juda, ki i kare pa Jeroboam wod pa Yoaci kabaka me Icrael. I kare ma Rwot okwoŋo lok ki i dog Kocea, Rwot owaco bot Kocea ni, “Cit icinyom nyako ma lakwele, wek inywal kwede litino me kwele, pien lobo tye ka timo tim kwele pi kwero lubo Rwot.” Kocea ocito onyomo Gomer nya pa Diblaim, ci Gomer ogamo ic, onywalo latin laco. Rwot owaco bot Kocea ni, “Cak nyiŋe Jejreel, pien odoŋ kare manok, abiketo can i kom ot pa Yeko pi remo ma oonyo i Jejreel, dok abimiyo ker me ot pa Icrael doŋ gik woko. Dok i nino meno abituro atum pa Icrael woko ki i nota me Jejreel.” Gomer doki ogamo ic, ci onywalo latin nyako, Rwot owaco bot Kocea ni, “Cak nyiŋe Lo-rukama, pien pe dok abimedde ki timo kica i kom ot pa Icrael, pe abiweko balgi kadi ki acel. Ento abitimo kica ki ot pa Juda, abilarogi pi tok pa Rwot Lubaŋagi; pe abilarogi ki atum, kadi ki pala lucwan, nyo ki lweny, nyo ki aguragura, kadi ki wegi aguragura.” Ka doŋ Gomer ogeŋo latin doto cak, ci ogamo ic, onywalo latin laco. Rwot owacci, “Cak nyiŋe, Lo-ammi, pien wun pe wujona, dok an pe Lubaŋawu.” Ento wel jo Icrael bibedo macalo kweyo me dog nam, ma pe pimme, ma pe kwanne bene; dok i kabedo ka ma ceŋ giwaco botgi ni, “Wun pe wujona” gibiwaco botgi ni, “Wun litino pa Lubaŋa makwo.” Jo Juda ki jo Icrael gibicokke kacel, ci gibiketo ŋat acel ma bi telo wigi; ci gibia woko ki i lobo meno, pien nino pa Jejreel bibedo dit twatwal. Wuwac bot ominwu ni, “Ammi,” ki bot laminwu ni, “Rukama.” “Wupyem ki minwu, wupyem kwede, pien en pe dakona, an bene pe a cware, wek okwany tim kwele woko ki i waŋe, dok okwany abor woko ki i kin tunone. Ka pe kumeno, abimiyo kome doŋ munero abimiyo en bedo noŋo macalo i nino ma yam ginywale iye; abiloke doko calo tim, abimiye bedo calo lobo mutwo, abineke woko ki orwo pii. Pe abitimo litinone kica, pien gin litino me kwele. Pien mingi obedo lakwele, pien oyac pi timo tim me lewic. Pien owacci, ‘Abilubo kor meya, ma gimiya kwonna ki piina, yer romona, pambana, moona ki ginamatana.’ Pi meno abicelo yone woko ki okuto, abigero cel arume kwede woko wek pe onoŋ yo wotte. En biryemo kor meye, pe bimakogi i waŋayo; en biyenyogi, ento pe binoŋo komgi. Lacen en biwacci, ‘Abilokke, adok bot cwara mukwoŋo ca, pien onoŋo abedo maber makato ma kombeddi.’ En yam pe oneyo ni an aye amiye kai, ki koŋo vino ki moo, pe oniaŋ ni an aye amiyo ryal onya bo te, ki jabu ma gitiyo kwede bot jok Baal. Pi meno ka kare biromo abitwonne ki kaila, ki koŋo vinona ka kare oromo; abikwanyo yer romona ki pambana, ma onoŋo oumo nyime ma tye munero-ni. Koni abimiyo en moyo timme me lewic i nyim meye, ŋat mo pe bilare ki i ciŋa. Abimiyo yomcwinye gik woko, ninone madito, por dwe, ki cabitte, ki nino madito ducu ma yam aciko pigi, Abibalo olok ki odurone, ma en loko i komgi ni, ‘Magi aye motta ma meya gumiya.’ Abilokogi gidoko buŋa, lee tim bicamogi woko. Abiketo can i kome pi nino madito pa Baal, ma en waŋo iye odok eceta botgi, kun rukke maber ki agit ki tiko ŋut me wel-gu, ka lubo kwede kor meye, kun wiye wil woko i koma, man lok pa Rwot kikome. “Pi meno, nen, abibite mot, ci abitere woko wa i tim, kun adweko ki lok mamit. Abimiye poto olokke ki kunnu, abiloko nota Akor doko doggola me gen. Ci en bidokka iye ki kunnu kit ma yam en loko kwede ka tinone, ma rom ki lok ma oloko ma onoŋo a ki i lobo Ejipt. “I nino meno, man lok pa Rwot kikome, ibilwona iye ni, ‘Cwara,’ pe dok ibilwoŋa ni, ‘Baal mera.’ Pien abikwanyo nyiŋ Baal woko ki i doge, dano pe gibilwoŋo nyiŋgi matwal. Dok i nino meno abiketo gicikke piwu kun acikke ki lee tim, kacel ki winyo me polo, ki gin ma lak alaka i ŋom; dok abijuko atum, ki pala lucwan, kacel ki mony i wi lobo, wek ami wubut piny ki kuc. Abinyomi ibedo mera matwal; abinyomi atir, ki lencwiny, ki mar ma pe lokke, kacel ki kica. Abinyomi ki gen ma pe lokke, dok ibiŋeyo Rwot. “I nino meno, man lok pa Rwot kikome, abidok iye bot polo ki polo bidok iye bot lobo; ki lobo bidok iye bot kai, ki bot koŋo vino, ki bot moo, ci gin gibidok iye bot Jejreel; ci an ki koma aye abicoyo kodine piny i lobo. Abitimo kica ki Lo-rukama abiwaco bot Lo-ammi ni, ‘Wun jona;’ en biwacci, ‘In Lubaŋana.’ ” Rwot owacca ni, “Dok icimar dako ma meye maro, ma latim abor; macalo Rwot maro jo Icrael, kadi bed gulokke gudok bot jogi kun gimaro poki olok mutwo.” Ka doŋ awile pi cekel apar wiye abic me ryal, ki cayiri ma romo guniya aŋwen ki nucu, Ci awacce ni, “Myero ibed macalo dakona pi kare malac, kun pe ibedo lakwele, pe ibed ki laco mo; an bene abibedo kwedi kit meno.” Pien jo Icrael biri pi kare malac laboŋo kabaka mo nyo laker mo, laboŋo gitum nyo wir me aworagi, laboŋo cal lubaŋa mo me tyet. Lacen jo Icrael bilokke, gibicako yenyo Rwot Lubaŋagi, ki kabakagi Daudi; pi meno ber pa Rwot bimiyo gidwogo bote ki woro i kare ma tye anyim. Wuwiny lok pa Rwot, wun jo Icrael; pien Rwot tye ki da i kom jo ma bedo i lobo man; pien ada pe, mar pe, ki ŋec mo i kom Lubaŋa bene pe i lobo. Gin ma tye en aye kwon, goba, nek, kwalo kwo ki timo abor; Pi meno lobo tye ka kumo, jo ducu ma bedo iye komgi oloc woko, ki lee tim bene, kacel ki winyo me polo; wa rec me nam bene guto woko. Ento dano mo pe okel lok me da, dano mo pe odot lawote pien in aye ŋat ma ada kwede, in ajwaka. Ibitwomme dyeceŋ, lanebi bene bitwomme kwedi, dyewor, dok abineko meni woko, Jona gitye ka to pi ŋecgi manok, pien in ikwero bedo ki ŋec, omiyo akwero ni pe ibed ajwakana. In wii owil woko i kom cik pa Lubaŋani, an bene wiya biwil woko i kom litinoni. Ka wei ajwagi omedde mapol, ci gimedde ki bali koma; abiloko deyogi doko me lewic, Giloko bal pa jona doko camgi, kun cwinygi yom kom roc pa jona. Abimiyo ajwagi bedo calo dano ata; abiketo can ikomgi pi kitgi, abiculogi pi timgi. Gibicam, ento pe gibiyeŋ; gibitimo kwele, ento pe gibinya; pien guweko Rwot woko, pi miyo kwogi i tim kwele. Koŋo vino ki koŋo vino maliŋonc, rwenyo tam pa dano. Jona gicito ka penyo dog kac, odoogi aye nyuto botgi lok. Pien cwiny me kwele omiyo guŋak woko, omiyo guweko Lubaŋagi pi timo tim kwele. Gitumo gitum malo i wi godi, giwaŋo gitumgi i wi cere malo, i te kworo, atega ki olwedo, pien tipogi ber, Pi meno mumiyo anyirawu gitimo kwele, ki anyira gerwu gitimo abor. Pe abiketo can i kom anyirawu ka gitimo kwele, kadi i kom anyira gerwu ka: gitimo abor; pien co kikomgi gitye ka nywako yo ki lukwele, dok gitumo gitum-gu kacel ki malaya me ot jogi. Rok ma pe giniaŋ, pinygi bito woko. Kadi bed in, Icrael, itimo kwele, pe Juda odok labal. Pe wudony i Gilgal, pe wuwot i Bet-awen, pe bene wukwon ni, “Macalo Rwot tye ma kwo-ni.” Icrael bene lapele; calo roya ma lapele, Rwot tika kombeddi twero pitogi, macalo latin romo ma gikwayo i olet malac-ci? Epraim oribbe ki cal jogi, wek doŋ obed gire. Gin lwak ma lumero, komgi mit ka timo kwele; gimaro lewic makato deyogi. Yamo oboyogi woko i bwome, lewic bimakogi pi keno tyergi. Wuwiny lok man, wun ajwagi pa Lubaŋa, wuket cwinywu, wun ot pa Icrael. Wucik itwu, wun ot pa kabaka. Pien kop ma giŋolo otiko komwu; pien wun wubedo owic i Mijpa, ki obwo ma giciko i wi Tabor. Gikwinyo bur matut i Citim, ento abiketo can i komgi ducu. Aŋeyo Epraim, Icrael pe okanne ki bota. In Epraim kombeddi idoko latim kwele, Icrael bene doŋ oballe gire woko. Tim megi genogi dwogo bot Lubaŋa; pien cwinygi me timo kwele doŋ tye i igi, genogi ŋeyo Rwot. Wakke pa Icrael odoko caden ma tye i nyime; Epraim bitwomme pi balle; Juda bene binywako twomme kwedgi. Gibiwoto ki romi ki dyaŋigi me gitum pi yenyo Rwot, ento pe gibinoŋo kome; pien Rwot doŋ otyeko a woko ki botgi. Gin pe gubedo lugen bot Rwot, pien ginywalo litinogi ki lurok ata. Koni por dwe binekogi woko, kacel ki pottigi ducu. Wukut bi la i Gibea, wukut gwara i Rama. Wugo oduru i Bet-awen; komi omyel, in Benjamin! Epraim bidoko obur i nino ma giketo can i kome. Anyuto lok me ada ma bitimme i kin kaka ma i Icrael ducu. Luker me Juda gubedo macalo jo ma gikobo got ma poko wan lobo; abicoro kinigana i komgi macalo pii. Epraim doŋ gidiyo matek, pe giŋolle kop kakare, pien otyeko mine ka lubo kor gin ma konnye pe. Pienno adoko calo nyenye ma naŋo kom Epraim, dok abedo calo tut ma camo ot pa Juda. Kare ma Epraim oneno twone, kit ma Juda bene oneno wan burre-ni, omiyo Epraim owoto wa i Aciria, ci ocwalo kwena bot kabaka madit. Ento en pe twero caŋowu, kadi ki bur mewu bene pe twero caŋo. Pienno abibedo macalo labwor bot Epraim, dok abibedo macalo latin labwor i kom ot pa Juda. An, an kikoma aye abikilo komwu woko, ka doŋ abiwot gira; abitinowu woko, ŋat ma bilarowu pe. Abidok gira i kabedona, nio waŋ ma guniaŋ balgi ka doŋ gicako yenyo koma, gibiyenyo i kare ma gitye i can, kun giwacci, “Wubin wek wadoku bot Rwot; pien en okilo komwa woko; wek en aye ocaŋwa; en otyeko pwodowa matek, dok bitweyo waŋ retwa. Ka nino okato aryo, en bicerowa woko, i nino me adekke bimiyowa kwo, wek dok wabed ma komwa yot i nyime. Weku doŋ waŋeyu Rwot, wacuku cwinywa ka ŋeyo en; en bidwogo ada macalo rupiny; en bibino botwa macalo kot oma moyo, calo kot me cwir ma bido lobo.” Abitimi niŋniŋ, in Epraim? Abitimi niŋniŋ in Juda? Mar mewu rom ki pol ma umo piny odiko, rom ki toyo ma two woko oyot. En mumiyo amiyo lunebi otoŋogi woko, anekogi ki lok mua i doga; kop ma aŋolo i komgi ryeny calo ceŋ, An cwinya mito mar ma pe lokke, pe lee me gitum, ŋeyo Lubaŋa ber, kato gitum awaŋa. Ento gin gukalo wi gicikke macalo i Adam, gutiyo gin ma pe atir i koma ki kunnu, Gilead aye gaŋ pa lutim aranyi, ma remo doŋ i obot tyengi. Macalo luyak gikiyo dano, ajwagi bene gicokke kacel kumeno; gineko dano i yo ma cito i Cekem, kun gitimo gin marac twatwal. Aneno gin mo marac makato i ot pa Lubaŋa pa Icrael, Tim kwele pa Epraim tye kunnu, Icrael bene oballe woko. In bene Juda, kare me kac doŋ ginyuto woko. I kare ma amito dwoko gum bot jona, ki i kare ducu ma amito caŋo iye Icrael, ci bal pa Epraim otugi nen woko cut, ki tim maraco ma jo Camaria gutimo; pien gitimo bwami, lakwo turo ot, kun luyak giyako dano ki i gudo. Ento pe giparo ni an apo i kom gin maraco ducu ma gitiyoni. Koni timgi doŋ orumogi woko i dyere, doŋ timgi tye i nyima. Giyomo cwiny kabaka ki timgi mareco-ni kun giyomo cwiny rwodigi ki bwolagi. Gin ducu lutim abor; girom ki keno malyet, ma lated mugati pe dok cwako iye mac, nia i kare ma en orubo iye tobi ki moko nio ka oyenyo, ocako kwot. I nino pa kabaka mewa, rwodi ducu gucako two pi lyeto koŋo vino; kabaka ocako ryeyo ciŋe malo kacel ki luŋala. Pien cwinygi obedo malyet calo keno; pi lok ma gubedo ka piro; kinigagi okur calo mac dyewor benebene, odiko obedo ma lyel calo mac arum. Gin ducu gidoko lyet macalo keno, guneko lulocgi woko ducu, Lukergi ducu guto woko, pe tye ŋat mo i kingi ma okok bota. Epraim orubbe woko i kin lurok; Epraim en mugati capat ma pe giloko. Rok mukene gutyeko tekke woko, ento en pe oneyo; lwar okwaŋ i wiye, ento en pe ŋeyo, Wakke pa Icrael odoko caden i kome; ento pe gudwogo bot Rwot Lubaŋagi, kadi bed gineno can, pe giyenyo Lubaŋa. Epraim min rom ki amam ma wiye bene pe tiyo; gikok mere bot Ejipt, dok cito mere wa i Aciria. Abiciko obwona i yo ma gicito iye ducu, aretogi piny macalo winyo ma tuk malo, abipwodogi pi timgi maraco-ni. Gibineno can, pien guŋak guweka woko! Gityekgi woko, pien gujemo koma! Onoŋo amito larogi, ento giloko lok goba i koma. Pe gikok bota ki cwinygi ducu, ento gibedo ka cur ki i wi kitandagi; giŋolo komgi kekengi ki pala pi kal ki koŋo vino, kun gijemo kwede i koma. Kadi bed yam apwonyogi kun amiyo badgi bedo matek, ento gin gidok ka yubo lok marac i koma. Gilokke gidok bot jok Baal; girom ki atum ma bayo piny. Rwodigi bi to ki pala lucwan, pi ŋala ma i doggi. Man bimiyo gicayogi wa i lobo Ejipt. Wukut gwara! Pien acut tye malo i wi ot pa Rwot; pien guturo gicikkena, gukalo wi cikka. Gikok bota ni, “Lubaŋawa, wan jo Icrael waŋeyi.” Icrael doŋ obolo gin maber woko, lumerok doŋ biryemo kore. Guketo lukergi laboŋo twerra, guketo rwodigi laboŋo ŋecca. Gutiyo cal jogigi ki ryal ki jabugi; gutiyo gin ma neko gin kikomgi. Abwono latin twonni, in Camaria. Kinigana otedde i komgi calo mac. Jo Icrael bitero kare ma rom mene kaa ka doŋ gibibedo laboŋo bal? Gibiŋido latin twon me Camaria woko matitino, pien ladiro tic otiyo gin ma pe Lubaŋa kikome. Pien gucoyo yamo, miyo gikayo lapiru. Kal ma i poto pe oŋok, moko pe bia iye; ka nene mogo ocek, kono lurok guyako woko ducu. Icrael doŋ gimwonyo woko; gin doŋ gitye i dye lurok, macalo gin ma konnye pe. Pien Icrael ocito wa i Aciria macalo kana me tim ma woto kene; Epraim owilo meye ki lim. Kadi bed guwilo mecgi i kin lurok, abidwokogi woko oyotoyot. Bimiyo koŋ giweko wiro kabakagi ki rwodigi ki moo pi kare mo manok. Pien jo Epraim gunyayo lwak keno tyer mapol pi tiyo bal, omiyo keno tyergi odoko gin me tiyo bal. Kadi kono aco cikka alip apar botgi, gibineno macalo gin ma welo. Gimaro gitum; gin gitumo lee pi camo riŋone; ento cwiny Rwot pe yom komgi: I kare man Rwot bipo pi timgi maraco-ni, biketo can i komgi pi bal megi; gibidok cen wa i Ejipt, Pien Icrael wiye doŋ owil woko i kom ŋat mucweyo en, ocako gero gaŋ kal madoŋo; Juda ogero gaŋi mony mapol ma girumogi ki cel gogo; ento abicwalo mac i kom gaŋi mere, ci biwaŋo gaŋi mony maditone woko ducu. Pe ibed ki yomcwiny, in Icrael! Cwinyi pe obed yom macalo rok mukene; pien in iweko Lubaŋani ci idoko lakwele, imaro timo kwele pi noŋo lim, wa i laro moyo ducu, Laro moyo ki bur koŋo Vino, pe bipitogi, kono Vino manyen bene biremogi. Pe gibibedo i lobo pa Rwot ento Epraim bidok cen i Ejipt, dok gibicamo cam ma cik ogeno ki Aciria. Pe gibiliyo koŋo vino me gitum amata bot Rwot pe gibiyomo cwinye ki gitum megi. Mugati megi bibedo calo mugati pa jo ma kwero cola; jo ducu ma gucamo gudoko keni. Pien kwongi bibedo me lanek kec keken, pe myero gikel wa i ot pa Rwot. Wubitimo gin aŋo i nino madit ma giciko pire, ki i nino madit me woro Rwot? Koŋ inen ka gicito wa i lobo Aciria, jo Ejipt aye bicokogi kacel, Mempic aye biyikogi, Jamigi ducu me ryal ma yomo cwinygi, doo bimayo woko, okuto bitwi wa i odigi. Kare me keto can doŋ obino, kare me culo adwoggi me bal doŋ oromo; Icrael biŋeyo. Lanebi en aye dano ma lamiŋ, dano ma tye ki Cwiny pa Lubaŋa odoko lapoya, pi bal mewu madwoŋ ki adagadaga madwoŋ. Lanebi en aye lakur-piny pa Epraim, ma gin jo pa Lubaŋana, ento giciko owic pa ladwar i waŋayone ducu, ki adagadaga tye i ot pa Lubaŋane. Gin gudonyo i bal matut twatwal, macalo i kare me Gibea. En bipo pi tim megi maraco-ni, dok biketo can i kcmgi pi bal megi. I kare ma yam anoŋo Icrael, acob kome macalo nyig olok ma, i tim. Con aneno kwarowu obedo calo nyig oduro ma ocako cek aceka, Ento ka cen guo i Baal-peor, ci gucako mine kengi bot cal jogi, omiyo gudoko gin ma cwiny dano dagi ma tom ki gin ma gin gimaro. Deyo pa Epraim biket woko ata, macalo winyo ma twarre, nywal bibedo pe, wa gamo ic bibedo pe ki doŋo ic bene pe. Dok kadi bed gupit litinogi, abityekogi woko ducu, mo pe bidoŋ I kare ma abia woko ki botgi, gibineno can madit twatwal! Dok litino pa Epraim, kit macalo anenogi kwede, gibinekogi woko macalo lee tim; Epraim myero ocwal litino awobene bot lunekgi. Migi ba, ai Rwotibimiyogi gin aŋo kaa? Migi poto ic, ki tunogi obed mutwo libeŋ, Racgi ducu tye i Gilgal, ka ma yam cwinya ocako kwerogi iye. Pi gin maraco ma gubedo ka timone, abiryemogi woko ki i oda. Pe dok abimarogi matwal; rwodigi ducu gubedo jo ma lujemo. Epraim rom ki yat ma doŋ gireto woko piny, ma lwite oner woko, pe doŋ binyako nyige. Dok kadi bed ginywal, abineko litinogi ma gimaro-ni woko. Lubaŋana bibayogi woko pien gukwero winyo lokke; gibibedo lumalgaŋ i kin rok ducu. Icrael obedo calo olok ma nyige onyak ma mwonya, ci ocek mabup. Ka nyige omedde ki nyak madwoŋ, en bene medo ki caŋo keno tyer mapol; kalo bone omedde odoko maber, en bene omedde ki yubo wir jogi me aworane mabeco. Cwinygi opoŋ ki lok me miŋo; kombeddi myero doŋ gunen can pi balgi. Rwot kikome aye bimuko keno tyergi woko dok en bene bitoŋo wir jogigi woko ducu ma gucibo me aworagi. Koni doŋ gibipennye ni, “Pe watye ki kabaka, pien wan pe walworo Rwot, dok kabaka twero timowa kit gin aŋo?” Giloko lok doggi noŋo, gimoko gicikke ki kwon me goba; kumeno gimiyo ŋolo kop twi doŋo macalo yat to ma neko dano ma lot i poto ma gipuro. Jo ma gibedo i Camaria komgi omyel, pi latin twon me Bet-awen. Jo mere gibikwero colane, ajwagine ma giworo cal jok gibikok pire, pi deyone ma doŋ oa woko ki bote. Cal twon meno kikome aye gibitero woko wa i Aciria, macalo mot ma gitero bot kabaka madit. Gibimiyo lewic mako Epraim, ki Icrael bene lewic bimako pi cal jokke. Kabaka me Camaria pe binen, gibitero woko macalo yat munidde ma kwan i wi pii. Kabedo madito me woro Lubaŋa ma tye i wi got me Awen, en aye ka ma Icrael tiyo iye bal, gibijwero woko. Okuto ki ocok gibitwi i wi keno tyergi, ci gibiwaco ki godi madoŋo ni, “Umwa” ki bot godi matino ni, “Wupot i komwa.” In Icrael ibedo ka bal nia wa i kare me Gibea; nia wa i kare ca wubedo ka medde ameda. Mony pe bipoto i komgi i Gibea; An abibino ka pwodo jo mujemo; lurok bene bicokke kacel i komgi i kare ma abipwodogi pi bal megi aryo-nu. Epraim yam roya ma gipwonyo, ma maro dino bel, ento’ aketo rii kweri i ŋute maber-ri. Abiketo Epraim ka ywayo kweri, ki Juda myero opur pire kene. Yakobo myero onud poto botte kene. Wuco kodi me kit ma atir, wek wuka nyig me mar ma pe lokke wucer poto bot woko, pien man aye kare me yenyo Rwot, wek en obin omi lar mere ocwer i komwu macalo kot. Yam wupuro bal, ci wukayo kit ma pe atir, omiyo wucamo nyig gobawu. Pien wubedo ka geno gadigadi lwenywu, ki lwak twoni otekawu, pi meno oduru me lweny biwo i kinjowu, odiwu ma girumo ki cel gogo gibimuko woko liweŋ, macalo Calman yam omuko Betarbel i kare me mony, megi litino yam ginyotogi woko kacel ki litinogi. Meno en kit ma gibitimowu kwede, wun ot pa Icrael, pi balwu madit twatwal-li. Kabaka me Icrael gibinekone woko kwar-piny. I kare ma Icrael pud latin, onoŋo amare, yam alwoŋo woda nia ki i Ejipt. Ka yam amedde ki lwoŋogi gin bene gimedde ki a woko ki bota; gubedo gigi ka tumo gitum bot jok Baal, kun bene giwaŋo odok eceta bot cal jogi. Kun kono an aye cen apwonyo jo Epraim ki wot, yam atiŋogi i kora; ento pe guŋeyo ni an aye acaŋogi. Yam abedo ka telogi ki tol, ki twon mar madwoŋ ma atweyogi kwede, Dok abedo ka tiŋogi macalo latin, ma abolo i wi gwoka, kun akulle piny botgi ka pitogi, Gibidok woko wa i lobo Ejipt, Aciria aye bibedo kabakagi, pien gukwero dwogo bota. Pala lucwan bilweny i kom gaŋigi ducu, bitoŋo rii doggola me dog celgi woko, dok bene binekogi woko ki i cel gogogi. Jo mera doŋ gumoko tamgi me a woko ki bota; pi meno gibiketogi woko i kol, pe tye dano mo ma bigonyogi. Atwero weki woko, in Epraim? Atwero miyi bot ŋat mukene niŋniŋ, in Icrael? Atwero miyo idoko calo Adma niŋniŋ? Abitimo in macalo Ceboim niŋniŋ? Cwinya doŋ odwogo woko i komi, iya doŋ okwe woko pi mari. Pe doŋ abitic ki kiniga malyet, pe dok abineko Epraim atyeko woko; pien an Lubaŋa, pe a dano, an a ŋat Maleŋ i kinwu, pe abibino pi tyekowu woko. Gibilubo kor Rwot, ci en bimor macalo labwor; eyo, en bimor, litinone gibibino gia ki tuŋ potoceŋ ma komgi myel; gibia ki i Ejipt gibino ma komgi myel calo winyo, dok gibia ki i Aciria macalo amam, ci abidwokogi wa i pacogi, man lok pa Rwot kikome. Epraim doŋ ogura dyere ki gobane, dok ot pa Icrael obedo ka bwola abwola. Ento Lubaŋa pud ŋeyo Juda, ni en pud tye ka geno Ŋat Maleŋ. Epraim kwayo yamo ma ka dyegi, leko kor yamo ma tuŋ wok ceŋ dyeceŋ benebene; ticgi me nyayo goba ki tim bwami; gicikke ki jo Aciria, dok gitero moo wa i Ejipt. Rwot tye ki lok i kom Juda, en biketo can i kom Yakobo ma poro kite, dok bicule ma rom ki tim mere, Kare ma en tye i ic, omako opuny tyen ominne, ka doŋ oteggi, olwenyo ki Lubaŋa. Olwenyo ki lamalaika, ci oloyo, obako doge bot lamalaika ki pig waŋe. Dok orwatte ki Lubaŋa i Betel, Lubaŋa ocako lok kwede ki kunnu. En Rwot Lubaŋa me mony, ma nyiŋe Rwot, owacci, “Pi meno in doŋ idwogi, Lubaŋani tye ka konyi, mok i kom mar ki ŋolo kop atir, kun ikuro Lubaŋani kare ducu.” En lacat-wil ma tye ki mijan ma pe pimo kakare, en maro bumo dano. Epraim owacci, “Nen an lalonyo, anoŋo limma gira ki wiya”; ento lonyone pe romoculo balle ma obalo-ni. An a Rwot Lubaŋawu, nia wa ki i lobo Ejipt; abimiyo doki wubuto i kema, macalo i kare me kwero nino madito ma aciko. Yam aloko bot lunebi, an aye ma amiyo ginanyuta onya madwoŋ, dok amiyo carolok katti ki bot lunebi. Ka ce bal mo tye i Gilead ci gibitum woko ducu ada; ka ce gityero twoni me gitum i Gilgal, keno tyergi bene bidoko calo gweni ma giguro i poto ma gipuro. Yakobo yam oriŋo ocito wa i lobo Aram, Icrael con otiyo tic kunnu pi nyomo dako, en yam okwayo romi wek enon dako. Rwot yam omiyo lanebi okwanyo Yakobo woko ki i Ejipt, dok omiyo lanebi ogwoke. Epraim doŋ oŋeto cwiny Rwot matek; omiyo Rwotte biweko remo balle bedo i wiye, dok bidwoko cacce ducu i wiye. Epraim ka yam oloko, kom dano myel; Epraim yam dit matek i Icrael; ento en okelo bal i kome pi jok Baal, ci oto woko. Kombeddi balgi doŋ tye ka medde ameda, gitye ka tiyo gigi cal ryal ma giliyo pigi kengi, kun gitiyo lwak cal jogi ki diro; magi ducu obedo tic pa ludiro, Gin guwaco ni, “Wutum gitum bot jogi magi.” Dano gunot lem latin twon dyaŋ! Pi meno gibibedo calo lupu ma poto odiko, calo toyo ma o woko oyotoyot, calo cuŋ kal ma yamo kolo woko ki i laro, onyo yito ma duny ki i wan dirica. An a Rwot Lubaŋani, nia wa ki i lobo Ejipt; pe tye Lubaŋa mukene ma iŋeyo, kono an keken, lalar mo mukene pe tye, kono an keken. An aye yam aneyowu wa ki i tim, i lobo ma can pii dwoŋ iye. Ento i kare ma gicamo giyeŋ, ka guyeŋ, ci cwinygi ocako wakke matek; omiyo wigi ocako wil woko i koma. Abilokke botgi adoko macalo labwor, dok abibedo ka kiyogi i ŋet yo macalo kwac. Abipoto i komgi macalo ŋuu mager ma litinone gineko woko, abiyeco korgi adado woko, abimwodogi ki kunnu macalo labwor; kit ma lee tim twero kilo ki komgi. In Icrael, abityeki woko; aŋa ma bikonyi? Kabakani doŋ tye kwene, ma romo lari; rwodini ducu gitye kwene ma lucundwarri, jo ma nene iwaco pigi ni, “Miya ka baka ki rwodi”? Cen amiyi luker ki kiniga, ka dok akwanyogi woko ki akemona. Bal pa Epraim maraco ducu gicoyo woko piny, balle doŋ gikano woko. Arem macalo me nywalo latin doŋ opoto i kome, ento en latin ma pe ryek; pien i kare-ni obuto ari, wiye pe otikke ki yo nyodo. Myero alargi ki i twer me Lyel? Abikokogi woko ki i dog to? In lo, two gemoni tye kwene? In Lyel, to-pinnyi kono tye kwene? Kica doŋ pe maka i komgi. Kadi bed en nya matek macalo lagada, yamo oro ma Rwot ocwalo bibino ki i tim, ci waŋ piine ma gunnye-ni bitwo woko ki itte bene bidwono woko; yamo bimayo jamine mabeco ducu ma yam yomo cwinye, ma onoŋo okano-ni, Camaria bineno can pi bane, pien en ojemo woko i kom Lubaŋane’ pala lucwan aye binekogi woko, litinogi gibijwatogi woko piny, ginyotogi woko, ki mongi ma giyac gibiryeko igi woko. In Icrael, doŋ idwog bot Rwot Lubaŋani, pien doŋ itwomo tyeni pi balli, Wuwot ki lok me dogwu, wudok bot Rwot; wuwac bote ni, “Kwany balwa woko ducu; gam motwa maber-ri, wek wacul waŋ balwa ki lok ma i dogwa, Aciria pe bilarowa, pe wabirino ki aguragura; pe doŋ wabiwaco ki tic me ciŋwa ni, ‘Wun Lubaŋawa.’ Latin kic noŋo kica ki boti.” Abimiyo niyegi magoro-ni doko tek, abimarogi pi bercwinya, pien kinigana doŋ oa woko i komgi. Abibedo macalo toyo bot jo Icrael; en bituru macalo leŋa bicwalo lwite piny macalo atega. Bilot, ci jany, bibedo ber macalo jeituni, dok ŋwece bibedo kur macalo ŋwec Lebanon. Gibidwogo ci gibibedo i te tipona, gibinywal macalo kal ma i poto; gibituru calo olok, ŋwecgi bibedo makur macalo ŋwec koŋo vino me Lebanon. In Epraim, cal jogi konyi ki gin aŋo kaa? An keken aye ma agamo dogi, dok an aye agwoko in. An abedo calo yat ciprec ma pote pe ner; an aye amiyo nyak. Ŋat ma ryek biniaŋ lok magi; dano ma cwinye lwodo lok aye bineyogi; pien yo pa Rwot ducu tye atir, jo ma cwinygi atir aye gilubo yone, ento jo ma gikalo wi cik pa Lubaŋa gitwomo iye tyengi. Man lok pa Rwot ma yam obino bot Joel wod pa Petuel. Wuwiny lok man, wun ludoŋo muteggi, wuter itwu, wun jo ducu ma wubedo i lobo man, Gin macalo man yam otimme i karewu, nyo i kare pa kwarowu? Wutit pire bot litinowu, wek litinowu gutit bot litinogi, ki likwayogi bene guwac bot yalwak ma bilubogi. Gin ma bonyo adwek ocamo odon, bonyo abum ocamo woko, Gin ma abum ocamo odoŋ, bonyo lagara ocamo woko, gin ma lagara ocamo odon, labar ocamo otyeko woko liweŋ, Wuco woko, wun jo ma lumero, wukoki; wukok matek, wun jo ducu ma mato koŋo vino, pi koŋo vino malino-ni, pien doŋ gityeko jukone woko ki i dogwu. Pien rok mo doŋ obino ka lweny i kom lobona, mony matek ma pe kwanne, Lakgi calo lak labwor, lakgi boco calo lagili lak min labwor. Gubalo olokka ducu, odurona bene gunido woko; gupaco poke, gubolo piny, jaŋgi okwor matar. Wukok, macalo nyako ma oruko boŋo cola, ma kumo pi cware ma pud onyome anyoma. Gityer me moko kwon ki gityer amata gigiko kelogi woko i ot pa Rwot. Ajwagi ma lutic pa Rwot, gitye ka kumo, Potti oballe, piny oto woko do, pien kal doŋ oballe, koŋo vino doŋ pe, moo doŋ pe nen. Lewic omakwu, wun lupur, wukok matek, wun lupur olok pi naŋo ki cayiri; pien cam me poto doŋ olal woko. Olok oner, oduro bene oballe woko; Okwer pomegranat, ki otit ki acuga, yadi ducu ma i poto guner woko; yomcwiny doŋ pe bot litino pa dano. Wuruk boŋo cola, wun ajwagi, wukok can, wukok matek, wun lutic i keno tyer. Wudony i ot, wubut i boŋo cola, wun lutic pa Lubaŋana. Pien gityer me moko kwon ki gityer amata doŋ gijuko kelogi woko i ot pa Lubaŋawu. Wukwer kare me ri kec, wulwoŋ cokke madit me woro Lubaŋa, Wucok ludoŋo ki jo ducu ma gibedo i lobo man, gubin i ot pa Rwot Lubaŋawu, gukok bot Rwot. Oyi, nino-ni do! Pien nino pa Rwot doŋ cok, bino macalo to-piny ma Won Twer Ducu ocwalo. Cam doŋ gibalo ki i nyimwa ma wan waneno. Yomcwiny ki um dok tye i ot pa Lubaŋawa? Kodi otuŋ i ŋom ka ma gicoyogi iye, dula odoŋ noŋo; dero ducu oballe woko, pien kal pe ocek. Kit ma lee cur kwede! Piny oloyo dyaŋi woko, pien kakwayogi doŋ pe; wa romi bene gujony woko, Akok boti, ai Rwot, pien mac doŋ owano olet ma i tim, leb mac doŋ owaŋo yadi ducu ma i poto. Wa lee me tim ducu gikok boti, pien pii ma i nota doŋ otwo woko, mac doŋ owaŋo olet ma i tim. Wukut gwara i Cion, wugo oduru i wi got mera maleŋ! Wuwek jo ducu ma bedo i lobo komgi omyel, pien nino pa Rwot tye ka bino, doŋ cok, nino me colpiny ki me mutu, nino me pol ki mutu macol licuc. Rok madit, ma jone tego, gumone i wi got macalo piny macollicuc; rok mo macalo man peya onen nia wa con, dok pe binen i anyim i kare pa yalwak ducu. Mac waŋ i nyimgi, ki tuŋ ŋegi bene mac tye ka lyel. I nyimgi lobo nen calo poto Eden, ento tuŋ ŋegi calo tim ma odoŋ nono; gin ma obwot iye pe, Calgi nen calo aguragura, giriŋo macalo aguragura me lweny. Gipye i wi lacol godi, kun gimor calo gadigadi lweny, gimor calo leb mac ma waŋo reŋ kal mutwo; gical ki dul mony matek ma oyubbe pi lweny. Rok ducu gitye ki remcwiny madwoŋ i nyimgi, waŋ jo ducu oballe woko. Gimwomme ki ŋwec macalo lulweny matek, giito ki i wi cel calo askari. Ŋat acel acel lubo yone kene pe giwirre giweko tyen megi. Pe tye ŋat mo i kingi ma twomo lawote, ŋat acel acellubo yone kene; gicorojami lweny magibayogikwede, gin mo pe ma jukogi, Gimwomme i kom gaŋ, giriŋo i wi cel; giito malo i odi, giito ki i waŋ dirica macalo lakwo. Lobo yenne i nyimgi ka giwoto, polo bene yeŋŋe, Cen ki dwe gucido macol, lakalatwe bene doŋ pe giryeny, Dwan Rwot mwoc, winnye ki i nyim monnye; monnye tek makato, ŋat ma cobo lok ma en oloko noŋo tek twatwal. Pien nino pa Rwot dit, kelo atiba i kom dano; aŋa mono ma twero ciro? Rwot kikome owacci, “Kadi bed kombeddi, doŋ wudwog bota ki cwinywu ducu, kun wuri kec, ki koko, dok ki kumo madwoŋ; pe wuyec ginaruka mewu, ento wulok cwinywu aye,” Wudwog bot Rwot Lubaŋawu, pien en latim kica, en won kica madwoŋ. Kiniga pe make oyot, mar mere ma pe lokke dwoŋ, dok ŋut, pe timo gin marac. Aŋa ma ŋeyo ka pe bilokke, ci ŋut kun weko gum doŋ i yo ŋeye, gityer me moko kwon kigityer amata pi Rwot Lubaŋawu? Wukut gwara i Cion, wukwer kare me ri kec; wulwoŋ cokke madit me woro Lubaŋa, wucok dano kacel. Wulony lwak mucokke; wugur ludoŋo kacel; wucok litino bene, wa lukere ma gitye i kor. Lanyom oa woko owek ode, nyako ger bene owek kicikane, Wek ajwagi ma lutic pa Rwot gukok, i dye doggola ot pa Rwot ki keno tyer, kun giwacci, “Ai Rwot, tim kica ki joni, pe imi giyet ginaleyani, pe imi nyiŋgi odok carolok me abola i kin lurok. Piŋo iweko rok mukene giwacci, ‘Lubaŋagi tye kwene?’ ” Omiyo nyeko omako Rwot pi lobone, kica omake i kom jone. Rwot odok iye ki jone ni, “Nen abecwalliwu kal ki koŋo vino ki moo, ma wubiyen kwede; pe dok abiweko giyetowu i kin lurok. “Abicwalo jo ma tuŋ acam ka mabor ki wun, abiryemo monygi woko wa i lobo ma otwo ma odoŋ nono; jo mutelo yo bicorre i nam ma tuŋ wokceŋ, jo ma i ŋegi bicorre i nam ma tuŋ potoceŋ. Komgi mukwok ma nwe biduny ma coo, pien gutiyo tic madito. “Pe ilwor, in lobo; bed ki yomcwiny ki um, pien Rwot doŋ otiyo tic madito! Pe wulwor, wun lee me tim, pien olet ma i tim doŋ olot. Yadi tye ka nyak, oduro ki olok gitye ka nyak maber. “Cwinywu ohed yom, wun litino me Cion, cwinywu obed yom i kom Rwot Lubaŋawu; pien omiyowu kot me cwir me kwanyo kop i komwu, omiyo kot ocwer piwu madwoŋ, omiyowu kot me cwir ki me oro, kit macon. “Laro bipoŋ ki kal me adina, bur me koŋo vino ki me moo ducu, gibipon woko libyeny. Abiculo waŋ mwaka ducu ma bonyo abum ocamo, ki bonyo adwek, ki lagara, ki labar, mony mera madit ma cen acwalo i dyewu, “Wubicamo cam madwoŋ dok wubiyen, wubipako nyiŋ Rwot Lubaŋawu, ma otiyo kwedwu i kit me aura. Jona pe dok gibiketo lewic i komgi. Wubineyo ni an atye i dye Icrael, dok ni an Rwot an Lubaŋawu, pe dok tye mukene. Jona pe dok gibiketo lewic i komgi. “Lacen abionyo Cwiny mera Maleŋ i kom jo ducu; litino awobewu ki anyirawu gibitito lok pa Lubaŋa, jowu muti gibileko lek, awobewu gibineno ginanyuta. I kare meno abionyo Cwiny mera wa i kom lutic ma co ki ma mon. “Abinyuto taŋo i polo ki i wi lobo, remo ki mac ki yito ma duny, Cen bicido woko macol, dwe bidoko remo ma noŋo nino pa Rwot madit ma kelo lworo peya oo. I kare meno jo ducu ma gilwoŋo nyiŋ Rwot gibilarogi; pien jo mubwot gibibedo i wi got Ci on ki i Jerucalem, macalo Rwot yam owaco; i kin jo mudoŋŋe bibedo iye jo ma Rwot olwoŋo. “Pien nen, i nino meno, ki i kare maca, i kare ma abidwoko gum me Juda ki me Jerucalem, abicoko rok ducu, abikelogi i nota pa Yekocapat. Ci abinologi kop ki kunnu, pi jona Icrael ma ginaleyana, pien gukeyogi woko i kin lurok, dok gupoko lobona woko, gubedo ka bolo kwir pi jo mera, kun gicato awobi pi malaya, dok gicato nyako wek ginoŋ koŋo vino, ci gumato. “Wun jo Turo ki jo Cidon, ki wun jo ducu ma i lobo Piliciti, wun kono wudoko gin aŋo ki bota? Wun wumito cula pi gin mo ma atiyo? Ka ce wucula, ci abidwoko cul me tim mewu i wiwu kenwu oyotoyot dok aruya bene. Pien wukwanyo ryal mera ki jabuna, dok wutero jamina mabeco ma pigi tego bota, ci wuketogi i ot jogiwu. Wucato Lujuda ki jo me Jerucalem bot jo Grik, kun wuterogi ka mabor ki wan lobo megi. Ento koni abitwarogi malo wek gua woko ki i kabedo ka ma yam wucatogi iye; ci abidwoko cul me tim mewu i wiwu kenwu. Abicato litino awobewu ki anyirawu bot jo Juda. Ci gin gicatogi bot jo Ceba, en rok ma tye ka mabor; pien Rwot doŋ owaco.” Wutit lok man i kin rok ducu! Wuywa mony, wulyet cwiny oteka lweny, Wek lulweny ducu gurwa cok, gubin wa malo kany, Wutet kweri dyaŋ gudok pala I ucwan, wutet pala lanol olok odok toni; wek lagoro owacci, “An laco.” Wurune, wubin oyot, wun rok ducu ma orumo kany-nyi; wucit, wugurre kunnu. Rwot, doŋ ikel cogi coni! Wek rok ducu doŋ gumukke, gubin, gubin kany wa i nota pa Yekocapat; an abibedo piny kunnu ka ŋolo kop ki rok ducu ma orumo kany. Wumak pala kac, pien kal doŋ ocek. Wuwot ka nyono olok, pien bur doŋ opoŋ woko. Bur koŋo vino ducu opoŋ woko libyeny, pien balgi doŋ dwoŋ twatwal. Lwak madwoŋ, lwak madwoŋ gucokke, i nota me moko tam. Pien nino pa Rwot doŋ tye cok, i nota me moko tam. Cen ki dwe bicido woko licuc, lakalatwe bene pe gibiryeny. Rwot mor ki i Cion, dwane winnye ki i Jerucalem, polo ki lobo giyeŋŋe. Ento Rwot aye ka-larre pa jone, en ka ma jo Icrael gibwot iye, “Kit meno wubiŋeyo ni an a Rwot Lubaŋawu, ma abedo i Cion ma got mera maleŋ, Jerucalem bene bibedo maleŋ, ci lurok doŋ pe gibibaro dyere matwal. “I nino meno koŋo vino maliŋo bicwer ki i godi, cak bimol ki i wi cere ducu, pii bipoŋ, mol ki i kulu ma i Juda ducu; wan it bigunnye ki i ot pa Rwot, ci bibido nota me Citim. “Ejipt bidoŋ obur, Edom bi doko tim ata, pi timgi me gero i kom jo Juda, pien guonyo remo pa jo ma pe ki bal i lobogi. Ento dano doŋ bibedo i Juda matwal, ki i Jerucalem pi kare ducu, Abiculo kwor me remogi pe abikwanyo kop woko ki i kom lutiŋ alii, pien Rwot bedo i Cion.” Man aye lok pa Amoc, ma en yam ŋat acel i kin lukwat romi me Tekoa, gin ma en oneno i kom Icrael i kare pa Ujia kabaka me Juda, ki i kare pa Jeroboam wod pa Y oaci kabaka me Icrael, ma odoŋ mwaka aryo ma peya oyeŋyeŋ oyeŋo lobo. Amoc owacci, “Rwot mor ki i Cion, dwane winnye ki i Jerucalem; olet pa lukwat otwo woko, got Karmel bene wiye oner.” Rwot owaco kuman ni, “Pi lwak bal mapol pa jo Damaciko, pe abidwoko cwinya cen i can ma abimiyogi, pien gudiŋo Gilead ki nyonyo ladin bel. Kumeno abicwalo mac i kom ot pa Kajael, biwaŋo odi madoŋo i gaŋ pa Benadad. Abituro larii doggaŋ me Damaciko, abityeko jo ma bedo i nota Awen, ki lamak odoo ker ma i Bet-eden; jo Ciria gibiterogi i opii i lobo Kir,” man Rwot aye owaco. Rwot owaco kuman ni, “Pi lwak bal mapol pa jo Gaja, pe abidwoko cwinya cen i can ma abimiyogi; pien gutero rok woko kulu i opii, gumiyo i ciŋ Edom. Kumeno abicwalo mac i kom cel me Gaja, biwaŋo odine madoŋo ducu, Abityeko jo ma bedo i Acidod woko, ki lamak odoo ker ma i Acikelon; abitiŋo ciŋa i kom Ekron, jo Piliciti mudou gibitum,” man Rwot Lubaŋa aye owaco. Rwot owaco kuman ni, “Pi lwak bal mapol pa jo Turo, pe abidwoko cwinya ceŋ i can ma abimiyogi; pien gin gumiyo rok woko kulu i cin jo Edom, wigi pe opo i kom gicikke me omego, Kumeno abicwalo mac i kom cel me Turo, biwaŋo odine madoŋo ducu.” Rwot owaco kuman ni, “Pi lwak bal mapol pa jo Edom, pe abidwoko cwinya cen i can ma abimiyogi; pien oryemo kor ominne ki pala lucwan, obolo kica woko ducu, kinigane obedo lyet nakanaka, en kano akemone bedo matwal. Kumene abicwalo mac i kom Teman, biwaŋo odi madoŋo me Bojra.” Rwot owaco kuman ni, “Pi lwak bal mapol pa jo Ammon, pe abidwoko cwinya cen i can ma abimiyogi; pien gubaro i mon Gilead ma gitye ki ic, pi medo wan lobogi. Kumeno abicwinyo mac i kom cel me Raba, biwaŋo odine madoŋo ducu, ki woo madwoŋ i kare me lweny, dok ki yamo mager i kare pa lapiru; kabakagi gibitero i opii, en kacel ki lukalle bene,” man Rwot aye ma owaco. Rwot owaco kuman ni, “Pi lwak bal mapol pa jo Moab, pe abidwoko cwinya cen i can ma abimiyogi; pien owano cogo pa kabaka me Edom omiyo odoko buru, Kumeno abicwalo mac i kom Moab, biwaŋo odi madoŋo ducu me Keriot. Moab bito i lweny ki woo madwoŋ, kun dano gidaŋŋe, obute kok maloŋo, Abikwanyo laloyo ki i dyere, abineko lukalle ducu kacel kwede,” man Rwot aye ma owaco. Rwot owaco kuman ni, “Pi lwak bal mapol pa jo Juda, pe abidwoko cwinya cen i can ma abimiyogi; pien gikwero lubo cik pa Rwot, pe gigwoko lok ma en ociko. Jokgi me goba ma yam kwarogi gulubo, orwenyogi woko ki iyo, Kumeno abicwalo mac i kom Juda, biwaŋo odi madoŋo ducu me Jerucalem.” Rwot owaco kuman ni, “Pi lwak bal mapol pa io Icrael, pe abidwoko cwinya cen i can ma abimiyogi; piengicato dano ma kite atir pi lim, dano ma piny obwoyo giwilo ki war tyen, Ginyono wi lucan i apwa me ŋom, gigeŋo yo ki jo ma gineno can; dano ribbe ki wonne pi donyo bot dako acel, miyo nyiŋa maleŋ-ŋi balle, Gibuto girumo ŋet keno tyer woko ducu i kom boŋŋi ma gijeŋo botgi; gimato kono pa jo ma guŋolo cul i komgi i ot pa Lubaŋagi. “Ento yam atyeko jo Amor ki i nyimgi, ma yam giboco calo yat cedar, ma gitego calo kworo, Atyeko nyige ki malo, ki lwite piny. An kono cen akwanyowu woko ki i lobo Ejipt, atelowu i tim pi mwaka pyeraŋwen kulu, wek wucam lobo pa jo Amor, Akwanyo litinowu mogo pi bedo lunebi, ayero awobewu mogo pi bedo litino ajulana. Ada onoŋo pe tye kumeno, wun jo Icrael? “Ento wuloko litino ajulana gudoko lumat kono, wuciko lunebi kun wuwacci, ‘Pe wutit lok pa Lubaŋa.’ “Nen, abidiyowu piny i kabedowu, calo gadigadi mupoŋ ki kal ma kal diyo piny. Ŋwec biloyo ŋat madwir, latekkom tekone birwenyo, twon oteka pe bilaro kwene. Lamak atum pe bicuŋ, ŋat ma tyene dwir pe bilarre, kadi ŋat ma riŋo ki aguragura pe bilaro kwone; ki ŋat ma cwinye nwaŋ i kin oteka binweco woko munero i nino meno.” Man lok pa Rwot kikome. Wuwiny lok ma Rwot doŋ oloko i komwu, wun jo Icrael, i kom kaka ducu ma yam akwanyogi woko ki i lobo Ejipt: “Wun keken aye aŋeyowu i kin kaka ducu ma wi lobo; pi meno abiketo can i komwu pi balwu ducu. “Jo aryo giwoto kacel, ka pe gucikke? Labwor kok i buŋa, ka pe omako lee? Latin labwor kok ki i boro, ka pe ocamo gin mo? Winyo pye moko ki tol i ŋom, ka pe gitero owic pire? Owic tuk noŋo ki i Bom, ka pe omako gin mo? Obute ka gikuto i gaŋ, lworo pe mako dano? Gin marac poto i gaŋ, ma Rwot aye pe otiyo? Adada Rwot Lubaŋa pe timo gin mo, laboŋo yabo muŋŋe bot luticce ma lunebi. Labwor doŋ okok; aŋa ma lworo pe mako? Rwot Lubaŋa doŋ oloko; aŋa ma pe tito lokke?” Wutuc lok bot odi madoŋo ma i Aciria, ki odi madoŋo ma i lobo Ejipt. Wuwac ni, “Wugurre kacel i wi godi me Camaria, wunen arubaruba madwoŋ ma iye, ki kit ma giuno kwede-dano i gaŋ meno.” “Pe giŋeyo timo gin ma atir,” man lok pa Rwot kikome, “jo meno gikano ‘gero ki yak i odigi madoŋo.” Pi meno Rwot Lubaŋa owaco kuman ni, “Lakwor birumo lobowu, bidwoko tekwu woko piny; odiwu madoŋo gibiyako woko.” Rwot owaco kuman ni, “Macalo lakwat laro tyen romo aryo, nyo dul it, ki i dog labwor, jo Icrael ma gibedo i Camaria gibilarogi kit meno, kacel ki but kom mo ki dul kitanda.’ “Wuwiny, ci wubed caden i kom ot pa Yakobo,” Rwot Lubaŋa ma owaco, Lubaŋa me mony. “I kom nino ma amiyo can ki Icrael pi balgi, abiketo can i kom keno tyer me Betel, Ten keno me keno tyer gibiturogi woko ci poto piny i ŋom. Abigoyo ot cwir wa ki ot oro; odi ma gideyo ki lak lyec gibityekogi woko, odi madoŋo bigik.” Man lok pa Rwot kikome. “Wuwiny lok man, wun dyaŋi me Bacan, ma bedo i wi got me Camaria. Wun mon ma wuburo lucan, ma wuninyo jo ma piny obwoyogi, wun ma wuwaco bot cogwu ni, ‘Kel, wek wamati!’ Rwot Lubaŋa doŋ okwoŋo kwoŋ ki kite maleŋ, owaco ni, Nen, kare oebino i komwu, gibiywayowu woko ki goli, wa jowu me lacen bene gibiywayogi ki goli lamak rec. Wubikato woko ki i wan cel ma gimuko, kun dako acel acel woto atir i nyime, ci gibibolowu woko i Armon,” Man lok pa Rwot kikome. “Wubin i Betel, ci wutim bal; wubin i Gilgal, ci wumedde ki bal; wukel gitumwu rupiny ki rupiny, wumi dul acel me aparwu nino adek adek; wutyer gitum me pwoc ki mugati ma girubo iye tobi, wutit pi gityerwu ma iwu opwoyo wek lwak guwiny; pien wun jo Icrael wumaro timo kumeno!” Man lok pa Rwot Lubaŋa kikome. “Yam amiyo kec opoto i gaŋiwu ducu, amiyo kwon oremowu i kabedowu ducu, ento wun pe wumedo ki dwogo bota.” Man lok pa Rwot kikome. “An bene yam atwonowu ki kot i kare ma kac onoŋo pud odoŋ dwe adek; amiyo kot ocwer i gaŋ acel, kun pe amiyo cwer i gaŋ mukene; poto acel kot cwer iye, poto ma pe kot ocwer iye otwo woko, Jo me gaŋi aryo nyo adek gubedo ka wirre i gaŋ acel keken, ka mato pii, ci pe oromogi; ento wun pe wumedo ki dwogo bota,” Man lok pa Rwot kikome. “Yam apwodowu, abwaro belwu, amiyo odoko ocone, aweko pottiwu ki poto olokwu otwo woko, bonyo gucamo oduro ki yadi jeituniwu; ento wun pe wumedo ki dwogo bota.” Man lok pa Rwot kikome. “Yam acwalo two gemo i komwu macalo two gemo me Ejipt; aneko awobewu ki pala lucwan, ayako aguragurawu mapol; am iyo ŋwec gonywu oduny i umwu ma ŋwe; ento wun pe wumedo ki dwogo bota,” Man lok pa Rwot kikome. “Yam areto jo mogo ma i kinwu, kit macalo yam Lubaŋa oreto kwede Codom ki Gomora; wun onoŋo wubedo calo dog yen ma gikwanyo ki i mac; ento pe wumedo ki dwogo bota.” Man lok pa Rwot kikome. “Pi meno, wun jo Icrael, abitimowu kit man; doŋ wuyubbe pi rwatte ki Lubaŋawu, wun jo Icrael, pien abitimo man i komwu.” Pien nen ba, ŋat ma lacwe godi dok laket yamo, ma tito tamme bot dano, nar ma loko rupiny doko piny macol, ki ma nyono wi lobo malo, nyiŋe Rwot, Lubaŋa me mony! Wuwiny lok man ma awero i komwu macalo wer kumo, wun jo me ot pa Icrael: “Otyeko poto, pe dok bia, en nyako Laicrael; gikwere woko i lobone, ŋat mo pe ma ile malo.” Pien Rwot Lubaŋa owaco kuman ni, “Gaŋ ma otero jo alip i lweny bidoŋ ki dano miya keken; gaŋ ma otero jo miya bidoŋ ki dano apar keken, wun jo me ot pa Icrael.” Rwot owaco bot jo me ot pa Icrael kuman ni, “Wubin bota, wek wubed kwo; pe wubed ka wot i Betel, wuwek donyo i Gilgal, pe wukat wa i Beer-ceba; pien Gilgal gibitero woko i opii, ki Betel pe bibedo gin mo.” Wubin bot Rwot, wek wubed kwo, wek pe omwoc i ot pa Yucepu calo mac, ci waŋogi woko, kun ŋat mo pe i Betel ma romo nekone, wunjo ma ŋolo kop kikiniga, ma ka ŋolo kop atir, kun wubolo kit ma atir woko piny. Ŋat ma otiyo lakalatwe, Yoggo ki Lyemyim, ŋat ma loko colpiny doko odiko, ma ci do dyeceŋ doko wor, ŋat ma lwoŋo pii me nam, ci coro woko i wi lobo, nyiŋe Rwot. En balo gedo matek ŋinyo woko macalo lutkot, miyo gituro cel gogo gininyo woko. Gin gidag ŋat ma jukogi i ka ŋolo kop, cwinygi kwero ŋat ma loko lok ada. Pien wunyono wi lucan kun wujogo kal ki botgi tektek, pi meno kadi bed wugero odiwu ki gweŋ apaya, pe wubibedo i igi; dok kadi bed wupito olok i pottiwu ma yomo cwinywu, pe wubimato koŋo vinone. Pien aŋeyo ni wutimo bal mapol, aŋeyo kit balwu madoŋo, kit ma wuyelo ki jo ma kitgi atir, kun wugamo lim lawilwu, ci wuryemo jo ma piny obwoyo ki i kabedo me ŋolo kop. Pienno ŋat ma laryeko bilin aliŋa i kare ma kit meno, pien karene rac mada. Wulub gin maber, pe gin marac, wek wubed kwo; kumeno Rwot, ma en aye Lubaŋa me mony, bibedo kwedwu, kit macalo doŋ wuwaco. Wukwer gin marac, wumar gin maber, wumi giŋol kop atir i dog gaŋ; gwok nyo noŋo Rwot, ma Lubaŋa me mony, bibedo ki kica bot jo pa Yucepu ma gudoŋ, Pi meno Rwot, Lubaŋa me mony ma en Rwot, owaco kuman ni, “Koko bibedo i dyekal ducu; i waŋa yo ducu dano bikok ni, ‘Aya! Aya!’ Gibilwoŋo lupur ni gubin ka kumo, ki jo ma ŋeyo wer lyel wek gubin, gukoki. Koko bibedo wa i poto olok ducu, pien abikato awok ki i dyewu,” man Rwot aye owaco. Wun jo ma wumito nino pa Rwot komwu kec! Piŋo wumito nino pa Rwot? Piny bibedo col i nino meno laboŋo leŋo mo. Bibedo rom ki dano ma oriŋo labwor, dok orwatte ki kwac; nyo odonyo i ot ojeŋo bade i kom ‘kicika, ci twol dok okaye. I nino pa Rwot piny bibedo col aye, ma leŋo mo pe, piny bicido woko licuc, gin mo ma ryeny iye pe, “Akwero ninowu madito, acayogi woko, cokkewu me wora pe yomo cwinya wacel. Kadi bed wutyero bota gitum awaŋa ki gityer me moko kwon, pe abigamogi; gityer lakwecwinywu me lim mucwe pe abiciko iye waŋa. Woo me werwu wukwany woko ki bota; pe abiwinyo dwan naŋawu kadi mit. Ento wuwek ŋolo kop atir aye omol macalo pii, kitwu obed atir calo kulu ma mol nakanaka. “Yam wubedo ka kela bota gitum ki gityer i tim pi mwaka pyeraŋwen, wun jo me ot pa Icrael? Pe kumeno, ento koni doŋ wutibino Cakkut ma kabakawu, ki Kaiwan, lubaŋawu ma lakalatwe, ki cal jogiwu ducu ma wupayo piwu kenwu. Pi meno abikobowu woko i opii i ŋe Damaciko,” man Rwot aye “Gibineno can, jo meno ma komgi okwe i Cion, ki gin ma gitamo ni gitye ki kuc i wi got me Camaria, jo-nu jo me rok madit ma ginene i kin rok ducu, ma jo me ot pa lerael gibedo ka bino botgi. Wukat wa i Kalne, ci wunen; wua ki kunnu, wuwok wa i Kamat, ma en gaŋ madit-ti; ka dok wucit piny i Gat pa jo Piliciti, Gin gibeco makato kerwu woko ce? Nyo lobogi lac makato lobowu ‘? Wun wumito diro nino marac cen, ento wutye ka kelo loc magwa cok: “Can i wi jo ma gibuto i wi ki tanda ma gidero ki lak lyec! Wuryene i wi komwu mayom, wucamo litino romi, ki roci ma gipito i dwol; wuwero werwu kun wulubo dwan naŋa, wuroto gin-wer manyen me agoya calo Daudi; wumato koŋo vino ki becen me keno tyer, wuwiro komwu ki moo mabecone, ento cwinywu pe cwer pi waŋ ret pa Yucepu. Pienno koni wun jo ma gibikwoŋo terogi i opii, karama pa jo ma ryene i kom bitum woko.” Rwot Lubaŋa doŋ okwoŋŋe ki nyiŋe kene ni. “Iya okwero wakke pa Yakobo, akwero odine madoŋo; abimiyo gaŋŋe bot lukwor, kacel ki gin ducu ma tye iye.” Man lok pa Rwot kikome, Lubaŋa me mony. Ci ka jo apar gudoŋ i ot acel gibito. Lacen wat pa dano mo-ni, ma en dano ma myero owaŋ kome, bitiŋo kome pi kelo cogone woko ki i ot, ci en biwaco bot ŋat ma tye i tyelo ni, “Pud odoŋ ŋat acel mo boti kenyo?” Ci en bigamo ni, “Pe.” Dok biwacci, “Liŋ! Pe myero walok nyiŋ Rwot.” Pien nen, Rwot biciko ci gibitwomo ot madit gituro woko, ot matidi gibiŋinyo matitino. Aguragura giriŋo i kom pata? Gipuro nam apura ki kweri dyaŋ? Ento wun wuloko ŋolo kop atir odoko kwir, adwoggi me tim ma atir wumiyo odoko yat makec, wun jo ma wutye ka um pi Lodebar, ki ma waco ni, “Wamako Kamaim pi tekowa kenwa keken.” Pien nen, abiilo rok mukene i komwu, wun jo me ot pa Icrael ci gibiunowu nia ki i yo me donyo i Kamat nio kwede wa i kulu ma i Araba. Man lok pa Rwot kikome, Lubaŋa me mony. Rwot Lubaŋa onyutta man: nen, en cen rye ka cweyo lwak bonyo i kare ma bel ma gicoyo me aryo ocako twi, en bel ma gicoyo ka doŋ gikayo pa kabaka. I kare ma doŋ gutyeko camo lum woko ki i lobo, awacci, “Ai Rwot Lubaŋa, timgi kica do! Yakobo twero cuŋ niŋniŋ, ma kun en tidi kumeno!” Ci Rwot oŋut i kom lok man kun wacci, “Man pe doŋ bitimme.” Rwot Lubaŋa dok onyutta man: nen, Rwot Lubaŋa onoŋo tye ka ciko ni giŋol kop i kom jone ki mac; ci mac owaŋo kut matut otyeko woko, obedo ka waŋo lobo-ni. Ci awacci, “Ai Rwot Lubaŋa, doŋ iwek do! Yakobo twero cuŋ niŋniŋ, ma kun en tidi kumeno?” Ci Rwot Lubaŋa oŋut i kom man kun wacci, “Man bene pe doŋ bitimme.” Dok onyutta man: nen, Rwot yam ocuŋ i ŋet cel me gaŋ ma gigero kun gipimo ki birigi,” kun omako birigi i ciŋe. Ci Rwot owacca ni, “Amoc, ineno gin aŋo?” Ci agamo ni, “Birigi.” Dok Rwot awacca ni, “Nen, aeketo birigi i dye jona jo Icrael, pe dok abikato ki ka ŋetgi, Kabedo pa Icaka ma yam giwora iye i wi godi gibidoŋ noŋo, ki kabedo pa jo Icrael maleŋ gibidoŋ obur; ci abipoto i kom ot pa Jeroboam ki pala lucwan.” Ci doŋ Amajia, ajwaka me Betel, ocwalo lok bot Jeroboam, kabaka me Icrael, ni, “Amoc opiro lok i komi i dye jo me ot pa Icrael; lobo-ni pe twero ciro lwak lok ducu ma en owaco. Pien Amoc doŋ owaco kumeno ni, ‘Jeroboam gibineko ki pala lucwan, jo Icrael gibikwanyogi ki i lobogi giterogi i opii.’ ” Ci Amajia owaco bot Amoc ni, “In lanen, citi iriŋ woko i lobo Juda, icam kwonni kunnu, it yet lok lanebi lanebi ki kunnu. Ento pe dok it yet lok i Betel, pien kany kabedo maleŋ pa kabaka, man ot woro Lubaŋa me ker man.” Amoc odok iye ki Amajia ni, “An pe lanebi, an bene pe latin pa lanebi mo; ento yam an lakwat, ki layub nyig olam me acama. Ci Rwot okwanya ki ka lubo kor romi, ci owacca ni, ‘Cit itit lokka boŋonajo Icrael.’ “Pi meno, koni doŋ iwiny lok pa Rwot. In iwacci, ‘Pe it it lok pa Lubaŋa i kom Icrael,’ dok ni, ‘Pe ibed ka lok i kom ot pa Icaka.’ Pi meno, Rwot owaco kuman ni, ‘Dakoni bibedo malaya i gaŋ, awobe ki anyirani gibinekogi ki pala lucwan, pottiwu gibipoko woko kun gipimo ki tol; in kikomi ibito i lobo ma keni, ci jo Icrael gibikwanyogi woko ki i lobogi, giterogi i opii ada.’ ” Rwot Lubaŋa onyutta man: nen, aduku ma tye iye nyig yadi me acama ma gicek i agikki mwaka. Ci owacca ni, “Amoc, ineno gin aŋo?” Agamo ni, “Aduku ma tye iye nyig yadi me acama ma gicek i agikki mwaka.” Rwot dok owacca ni, “Agikki doŋ oo i kom jona jo Icrael; pe dok abikato ki ka ŋetgi. Wer me ot pa Lubaŋa bidoko me koko i nino meno. Kom jo muto gibibedo mapol; gibibologi woko laliŋ i kabedo ducu.” Man lok pa Rwot Lubaŋa kikome. Wuwiny man, wun ma wunyono jo ma piny obwoyogi, ki ma wumito tyeko lucan woko ki i lobo, ma wuwacci, “Kwero por dwe bitum awene, wek wacat bel? Cabit bitum awene, wek wakel ŋanowa me acata?” Dok ni, “Wek wacat belwa ki agwata matidi, wapim limgi ki cekel mapek, kun wabumu dano ki mijan ma pe pimo kakare, wek wawil lucan ki ciliŋ, wacat jo ma piny obwoyogi pi war tyen, wacatu wa ki cuŋ bel bene.” Rwot otyeko kwoŋo kwoŋ ki nyiŋ gin ma jo pa Yakobo giwakke iye ni, “Wiya pe biwil i kom timgi mo acel ma gitimo. Lobo pe biyeŋŋe pi lok man, kun ŋat acel acel ma obedo iye koko can? Lobo ducu biille malo macalo kulu Nail ka opoŋ, biyeŋŋe dok piny calo kulu Nail ma i Ejipt.” Man lok pa Rwot Lubaŋa kikome, ni, “I nino meno abimiyo Ceŋ poto cwiny dyeceŋ, abicido lobo woko i kare ma cen ryeny. Abiloko ninowu madito doko nino me kwero cola, ki werwu ducu doko me kumo. Abimiyo jo ducu tweyo boŋo cola i pyergi, wi dano ducu gibilyelo woko; abimiyo bedo calo koko pi latin ma dano onywalo acel keken, agikkine bibedo nino me cwetcwiny madwoŋ.” Man lok pa Rwot Lubaŋa kikome, ci, “Nen, kare obebino ma abicwalo kec i lobo-ni, pe kec kwon, kadi ki orwo pii, ento kec me winyo lok pa Rwot. Dano bimal ata nia ki i nam man nio wa i nam mukene, ki nia ki tuŋ acam nio tuŋ wokceŋ; gibiriŋo ata pi yenyo lok pa Rwot, ento pe gibinoŋo. “I nino meno anyira ma gibeco ki litino awobe komgi biloc woko pi orwo pii. Jo meno ma gikwoŋo kwon ki nyiŋ Acima me Camaria, ma giwaco ni, ‘Macalo lubaŋani tye kwo, in Dan,’ dok ni, ‘Macalo yo Beer-ceba tye makwo-ni,’ gibipoto piny Yam aneno Rwot ocuŋ i ŋet keno tyer, owacci, “Go lalukana wi wir, wek larii doggo la oyeŋŋe, turgi woko wek guŋinnye i wi jo-nu ducu. Jo mudoŋ i komgi abinekogi kipala lucwan, ŋat acel mo pe biriŋo, ŋat acel mo pe bibwot. “Kadi bed gukwiny piny wa i Lyel, abikwanyogi ki kunnu ki ciŋa; kadi bed guito malo i polo, abiomogi woko ki kunnu adwokogi piny; kadi bed gukanne i wi got Karmel, abiyenyogi ki kunnu, amakogi woko; kadi bed gukanne ki ka waŋa wa i te nam, abiciko twol ki kunnu toŋogi, Kadi bed giterogi i opii i nyim lukworgi, abiciko ginekogi woko ki kunnu ki pala lucwan, ci abiciko waŋa i komgi pi timo gin marac, pe pi timo gin maber.” Rwot Lubaŋa me mony, ka ogudo lobo, ci leny woko, jo ducu ma gibedo iye gikok; lobo ducu iile woko calo kulu Nailka opoŋ, ci dok piny calo kulu Nail ma i Ejipt. En gero kicikane ma malo i polo, kun miyo daŋŋe gulle i wi lobo; en lwoŋo pii me nam, ci coro woko i wi lobo; nyiŋe Rwot. “Wun pe wurom ki jo Etiopia ki tuŋ bota, wun jo Icrael?” Man lok pa Rwot kikome. “Yam pe akwanyo jo Icrael ki i lobo Ejipt, ki Lupiliciti ki i Kaptor, ki jo Ciria ki i Kir bene? Nen, Rwot Lubaŋa tye ka neno ker ma tye ki bal, ci abijwero woko ki i wi lobo; kono ot pa Yakobo pe abityeko ducu.” Man lok pa Rwot kikome. “Pien nen, abiciko, ci abiyeŋo ot pa Icrael i kin rok mukene ducu, calo ŋat ma kiyo moko ki keikei, ento nyig gweŋ acel mo pe bipoto i ŋom. Lubalo ducu ma i kin jona gibinekogi ki pala lucwan, gin jo ma giwacci, ‘Gin marac mo pe bipoto i komwa, ariya mo pe binen i nyimwa.’ “I nino meno abigero aduc pa Daudi ma yam opoto, abiyubo guti ma yam omuk, ka ma yam oballe abiilo malo, abiroco odoco bedo kit macalo yam con; wek gucam lobo pa jo Edom ma yam odoŋ, ki rok ducu ma yam gilwonogi ki nyiŋa.’ Man lok pa Rwot kikome ma bitimo man. Man lok pa Rwot kikome, ni, “Kare oebino ma kare me kac bilubo kare me pur oyot, kare me nyono olok bilubo kare me coyo kodi oyot; koŋo vino manyen bicwer ki i wi godi, bimol i wi litino godi ducu. Abidwoko gum pa jona jo Icrael botgi, ci gibigero gaŋi ma yam oballe odoco, gibedo iye, gibipito olok, ci gibimato koŋo vinone, gibipuro potti, ci gicamo cam ma ocek iye. Abipitogi i lobogi, gimoko calo yat, ci pe dok gibiputogi woko ki i lobo ma doŋ amiyo botgi.” Man lok pa Rwot Lubaŋawu kikome. Man en lok ma Lubaŋa onyuto bot Obadia, Rwot Lubaŋa owaco lok man ma okemo Edom. Wan doŋ wawinyo lok mua ki bot Rwot, gityeko cwalo lakwena me cito bot lurok ka waco ni. “Wua malo! Wek wacitu ka lweny kwede!” Rwot owaco bot jo Edom ni, “Nen, abimiyo wudoko jo manok i kin lurok, ma jo ducu bicayowu matek mada, Wakke ma tye i cwinywu onoŋo obwolowu, wun jo ma wubedo i kin got mubar, ma wubedo i kabedo ma tye malo twatwal-li, ka doŋ wuwaco ki i cwinywu ni, ‘Aŋa kono ma twero dwoka piny i ŋom!’ Kadi bed wubed malo calo ocur, kadi wuger odiwu malo i kin lakalatwe, ento pud abicorowu woko piny aye ki kunnu. Man lok pa Rwot kikome. “Ka ce lukwo ma gin luyak gubino botwu dyewor, kadi bed giyak jamiwu mukato kare, gin pe gibikwalo ka jami ma romogi keken? Ka ce lupwon nyig olok gubino botwu, nyig olok mogo pe twero doŋ ma dok wubibekone lacen? Giyako Ecau marac twatwal guyenyo wa lonyo ducu ma yam en okano! Jo ducu ma yam wuribbe kwedgi gubwolowu abwola, guryemowu guterowu wa i waŋ lobo; gin jo ma yam wubedo kwedgi ki kuc-ci doŋ guloyowu woko; ki luremwu ma yam wugenogi bene guciko owic ka ma wuwoto iye, ma niaŋ iye tek mada, I nino meno en aye abityeko iye jo ma ryek woko ki i Edom, kacel ki jo ma giniaŋ bene ma gibedo i got Ecau, Man lok ma Rwot kikome aye oloko, Dok in Teman, jo ma gin twoni lwennyi komgi bionyo koyo woko lirut, dok dano acel acel ma bedo i got Ecau gibineko woko. Pi tim me bwami ki nek ma itimo i kom omeru Yakobo, lewic bimaki pire matek, in bene gibineki dok nyiŋi birwenyo woko matwal. Gin mumiyo giketo can i kom jo Edom “I nino ma onoŋo wucuŋ cen ca, i nino ma welo mogo guyako iye lonyone gucito kwede woko-ni, kun lurok bene gudonyo i dogcelle ka gubolo kwir pi Jerucalem, wun bene wubedo rac calo gin. Onoŋo pe bedo ber botwu me bedo ki yomcwiny i nino meno pi gin marac ma otimme i kom omegiwu; pe ber onoŋo me um i kom jo Juda, i nino ma gijwerogi iye. Dok pe obedo ber wun me wakke awaka i nino ma can opoto i komgi. Onoŋo myero pe wudony i dogcel pa lwakka i nino ma onoŋo can opoto i komgi; pe onoŋo myero wubed ki um pi can mumakogi i nino me can madwoŋ mupoto i komgi; onoŋo myero pe wugud jamigi mo i nino ma can madwoŋ opoto ikomgi. Pe onoŋo myero wucuŋ i aŋakaŋaka yo me ŋolo jo munoŋo giriŋo woko me laro komgi; dok pe onoŋo myero doŋ wumak danogi ma gubwotte ki miyogi i cin lukworgi, i nino me can. Pien nino pa Rwot doŋ cok bino i kom rok ducu. Gin ma wun doŋ wutyeko timo, gibitimo i komwu bene, tim mewu bidwogo i wiwu gire. Kit gin ma wubedo ka matone i wi got mera maleŋ, rok ducu ma orumowu bene gibimato; gibimato matek dok gibimwonyo woko, ci gibidoko macalo jo ma yam gipe. Jo ‘Icrael ma gubwot gibilogi malo “Ento jo mubwot gibibedo i wi got Cion, ci bibedo kabedo maleŋ; jo me ot pa Yakobo gibibedo ki lobo ma megi kikome. Jo me pt pa Yakobo gibidoko mac, ki jo me ot pa Yucepu gibibedo leb mac, jo me ot pa Ecau gibibedo megi ren kaal; gibiwaŋogi ci gibityekogi woko ducu, pe tye dano mo me ot pa Ecau ma, bidoŋ; pien Rwot doŋ otyeko loko. Jo Negeb gibileyo got Ecau, jo Cepela bileyo lobo pa jo Piliciti; gibileyo lobo Epraim ki lobo Camaria ento Benjamin bileyo Gilead. Jo Icrael ma giterogi i opii i Kalak, gibileyo Kanaan nio wa Jarepat; ki opii ducu ma yam gimakogi ki i Jerucalem ma gitye i Ceparad gibileyo gaŋi ducu me Negeb. Lular dano gibibino giito malo i wi got Cion me loyo got Ecau; Rwot aye bibedo lakergi.” Lok pa Rwot cen obino bot Yona wod pa Amittai, kun wacci, “A, icit Nineve, ma en gaŋ madit, itit lok i kom jone, pi tim megi marac ma doŋ otyeko ŋene wa bota.” Ento Yona oa me lwi woko ki i nyim Rwot pi wot Tarcic. En ocito i Jopa ka onoŋo mel ma cito Tarcic; ci oculo lim ma mitte pi wot, odonyo i mel, me cito kwedgi Tarcic, wek ca woko ki i nyim Rwot. Ento Rwot ocwalo yamo madwoŋ twatwal i nam, omiyo pii me nam otagge matek twatwal, ma mel onoŋo doŋ cok tur woko. Cutcut lukwaŋ mel gudoko lwor, omiyo dano acel acel ocako kok bot lubaŋane, kun gibolo jami ma onoŋo tye i mel woko i nam, wek mel odon mayot. Ento Yona ocito mere wa i gul mel, obuto piny kunnu, ci onino matek. Ladit me mel obino bote ocako penye ni, “itamo gin aŋo, in lanino-ni? A malo, ileg lubaŋani! Gwok nyo lubaŋani bitamo piwa miyo pe wato.” Ci guloko kekengi kun giwacci, “Koŋ wabolu kwir, wek waŋe aŋa ma oweko gin marac man opoto i komwa.” Gubolo kwir, ci kwir opoto i kom Yona. Guwacce ni, “Tittiwa, aŋa ma oweko gin marac man opoto i komwa? Ticci tic aŋo? la ki kwene? Loboni gilwoŋo nino? In dano me rok mene?” En ogamo doggi ni, “An Laibru; alworo Rwot Lubaŋa me polo, ma oketo nam ki lobo.” Ci lworo omako jo-nu matek, omiyo gupenye ni, “Man gin aŋo ma itimoni?” Pien jo-nu onoŋo guŋeyo ni en tye ka lwi woko ki i nyim Rwot, pien onoŋo koŋ otittigi. Dok guwacce ni, “Watim gin aŋo i komi, wek nam ojukke okwe mot piwa?” Pien nam onoŋo tiŋŋe medde ameda. En ogamo doggi ni, “Wutiŋja, wubola woko i nam, ka wek nam okwepiwu; pien aŋeyo ni tagge me nam man matek twatwal-li obino i komwu pi an,” Kadi bed kumeno jo-nu gukwaŋo mel matek me dok cen i wi tera, ento pe gutwero, pien tagge me nam obedo ka medde ameda i komgi. Pi meno omiyo gukok bot Rwot kun giwaco ni, “Wabako dogwa boti, in Rwot, pe iwek wato ka waneko laco man, pe imi temo pa ŋat ma pe ki bal odok i wiwa; pien in Rwot doŋ ityeko timo kit macalo imito.” Kumeno gutiŋo Yona, ci gubole woko i nam, omiyo tagge me nam otuggi kwe woko. Omiyo jo-nu gulworo Rwot twatwal; dok gumiyo gitum bot Rwot kun gikwoŋo kwoŋ. Rwot omiyo rec madit omwonyo Yona woko i iye; ci Yona ori i i rec meno pi nino adek dyeceŋ ki dyewor. Yona olego Rwot Lubaŋane ki ii rec kun wacci, “Ceŋ akok bot Rwot i canna, ci en ogamo doga; ceŋ akok ki i i lyel, ci iwinyo dwana. “Pien onoŋo ibola ka matut, i cwiny dye nam, pii ma mol oruma woko dyere; tagge me pii ki correne, omol okato ki i wiya. Ka dok awacci, ‘Giryema woko ki i nyimi; abineno dok ot meri maleŋ niŋniŋ?’ “Pii omwonya woko, kut matut oruma dyere; tiro okadde woko i wiya; kun alwiny piny i te godi. Alor acito piny wa i lobo ca, giloro dogganne i wi ya woko matwal. Kadi bed kumeno idwoko kwona nia ki i bur, in Rwot Lubaŋana. Ka tipo koma ool woko ci doŋ apo i kom Rwot; ki legana owinnye boti i ot meri maleŋ, Jo ma giworo cal jogi mamwa-ni gibalo mar me ada. Ento an abimiyi gitum mera ki dwan me pwoc; gin ma doŋ atyeko kwoŋo pire bene abicobo. Lar tye bot Rwot.” Rwot oloko ki rec, ci rec oŋoko Yona woko i wi tera. Lacen lok pa Rwot dok obino bot Yona pi tyen me aryone, ma wacci, “A icit Nineve ma en gaŋ madit, itit iye lok ma aciki pire.” Yona oa ocito Nineve, kit macalo Rwot owacce. Nineve onoŋo gaŋ madit twatwal, ma ŋolo dyere ari keken teri wot me nino adek. Yona ocako donyo i gaŋ, oterre wot me nino acel. Ka odaŋ;mŋe ni, “Odoŋ nino pyeraŋwen, Nineve gibiketo woko.” Ci jo me Nineve guye Lubaŋa; guciko bene pi kare me ri kec, kun giruko boŋo cola, cakke ki i kom jo madoŋo, o kwede wa i kom jo matino. Ka lok oo bot kabaka me Nineve, ci en oa malo ki i wi komkerre, ogonyo jorre ki i kome, oruko boŋo cola ka obedo kwede i buru. Dok omiyo lok oket i dye Nineve ducu ni, “Pi cik pa kabaka ki luditone: Pe dano mo, kadi lee, kadi dyaŋ, kadi romo, obil gin mo; pe gucam, dok pe gumat pii. Ento wek dano ki lee giumgi ki boŋo cola, wek gukok matek bot Lubaŋa; iyo, wek ŋat acel acel olokke owek kit marac-ci, ki bene tim me yak ma en bedo ka timone. Aŋa ma ŋeyo ka Lubaŋa bijuko cwinye, bilokke weko kinigane mager-ri, wek pe wato?” Ka Lubaŋa oneno gin ma gutiyo, kit ma gulokke kwede, guweko tim megi marac, Lubaŋa ojuko cwinye i kom gin marac ma onoŋo nene en owaco ni ebitimo i komgi, ci pe doŋ otiyo. Ento man owaŋo i Yona matek, omiyo kiniga omake. Ci Yona olego Rwot, kun owacci, “Akwayi, in Rwot, man pe en aye gin ma nene awaco i kare ma onoŋo pud atye i lobona? Meno en aye gin mumiyo alwi woko oyotoyot me cito Tarcic; pien aŋeyo ni in Lubaŋa ma latim kica, ma timo kica bot dano, kiniga pe maki oyot, mar meri dwoŋ ma pe lokke, dok ijuko cwinyi i tim marac. Koni doŋ in Rwot, kwany kwona woko ki i koma, akwayi, pien bedo ber ka ata kato ma abedo kwo.” Ci Rwot ogamo ni, “itamo ni ber me bedo ki kiniga?” Lacen Yona oa woko ki i Nineve, ci ocito obedo koŋ wokceŋ me gaŋ; kunnu otiyo iye bolo pire kene. En obedo piny i tipo i te bolone, wek koŋ enen gin ma bitimme i kom gaŋ. Ka dok Lubaŋa omiyo keno otwi odoŋo olak ka wi Yona, wek tipone ogen ka wiye, pi kweyo cwinye i canne. Kumeno Yona cwinye obedo yom twatwal pi keno-nu. Ento ka piny oru nino mukene, Lubaŋa omiyo kwidi ocobo keno-nu, ci oner woko. I kare ma cen doŋ otuc, Lubaŋa omiyo yamo malyet okodo twatwal ki koŋ wokceŋ, ci ceŋ owaŋo wi Yona nio ka kome oloc woko; omiyo Yona okwayo ni twora eto, kun wacci, “Bedo ber ka ata kato ma abedo kwo.” Ento Lubaŋa odok iye ki Yona ni, “Hamo ni ber me bedo ki kiniga pi keno-nu?” Yona ogamo ni, “Atamo ni ber me bedo ki kiniga, kiniga ma romma to.” Rwot dok owaco ni, “Kica omaki i kom keno ma in pe itiyo tic mo pire-ni, in ma pe imiyo odoŋo, ma otwi i dyewor acel ka dok oto woko i dyewor acel. An pe myero kica omaka pi Nineve ma en gaŋ madit, ma tye iye jo makato alip miya acel ki pyeraryo ma pe giŋeyo poko kin ciŋgi ma lacuc ki ma lacam, ki dok bene dyaŋi mapolgu?” Man lok pa Rwot ma ceŋ obino bot Mika Lamorecet ma en oneno okemo Camaria ki Jerucalem, i kare pa Yocam, Akaj, ki Kejekia, luker me Juda. Wuwiny, wun rok, wun ducu; cik iti in lobo, ki gin ducu ma tye iye, wek Rwot Lubaŋa obed caden ma nyuto bal i komwu, kun lokke winnye ki i ot mere maleŋ, Pien nen, Rwot tye ka bino nia ki i kabedone, bibino piny, binyono wi cere mutiŋŋe i wi lobo. Godi bileny i te tyene luŋ bibarre, macalo odok kic ma i ŋet mac, macalo pii ma corre cito i luŋ. Man ducu bibino pi tim aranyi pa Yakobo ki pi bal me ot pa Icrael. Tim aranyi pa Yakobo en gin aŋo? Pe en aye Camaria? Ki bal me ot pa Juda en gin aŋo? Pe en aye Jerucalem? Pi meno abiloko Camaria doko obur ma i dye tim, bidoko kabedo me pito olok; dok abicoro gweŋine piny i luŋ, ka doŋ abiyabo te gutine. Cal apayane ducu gibiŋido woko matitino, mucarane bene ducu gibiwaŋo ki mac, ki cal jogine-gu ducu abibalo woko; pien ocokogi ki lim ma giculo ki malaya, gibidok ceŋ i mucara pa malaya. Pi man abikumo, dok abikok; abiwot ki tyena noŋo, kun atye munero; abikok calo too, dok abikumo macalo udu. Pien waŋ rette doŋ pe twero caŋ; otyeko bino i Juda, doŋ oo i dogcel pa jona, wa i Jerucalem. Pe wutit pire i Gat, pe wukoki; wuŋenne piny i apwa i Bet-le-apra. Wucit anyim, wun jo Capir, kun wuwoto munero ma lewic omakowu marac; wun jo ma bedo i Jaanan pe wukat woko; koko ma winnye a ki i Bet-ejel nyuto ni ka-larrewu doŋ pe kunnu, Jo ma bedo i Marot gitye ka kuro gin maber ki par madwoŋ, pien gin marac ma oa ki bot Rwot doŋ oo wa i dogcel me Jerucalem, Wutwe aguragura i kom gadigadi lweny madwir, wun jo Lakic; wun aye mukwoŋo kelo bal i kom jo Cion, tim aranyi pa jo Icrael ceŋ ginoŋo i komwu. Pi meno wubimiyo mot me pokke bot Morecet-gat; odi me Akijib bidoko gin bwola bot luker me Icrael. Dok abikelo i komwu dano ma bwoyowu, wun jo Mareca; deyo pa Icrael bicito i Adulam. Wulyel yer wiwu woko, wek wiwu obed maleŋ, pi litino ma yomo cwinywu; wuwek wiwu otal woko macalo wi acut, pien litino gibiwekowu, gibiterogi woko i opii. Gibineno can, jo ma paro pi timo gin marac, ma giparo pi timo bal i wi kabutogi! Ka piny oru, ci gitimo, pien twerone tye i ciŋgi. Giparo potti, ci gigamo tektek; giparo odi-gu, ka dok gimayogi woko; gidiyo dano ki bura, gimayo ode, kadi wa lobo ma oleyo ki bot wonne. Pi meno Rwot owaco kuman ni, Nen, aparo lok marac i kom ot man, ma pe dok wubiwoto ŋutwu ki iye; pe dok wubiwot kun wuŋatte ki wakke, pien kare meno bibedo kare marac. I nino meno gibiwerowu ki wer aŋec, dok bene gibikoko koko me can, kun giwacci, “Giyakowa doŋ atika; lobo ma yam opoko botwa Rwot omiyo woko ki jo mukene; iuro aura kit ma en ogamo kwede ki botwa! En opoko pottiwa woko i kin jo ma guterowa i opii.” Pi meno pe wubibedo ki ŋat mo i cokke pa Rwot, ma bibolo tol me poko nom me apura bot wu, Gitito lok kun giwacci, “Pe wutit lok, at mo pe myero otit kit lok macalo magi; lewic pe bimakowa.” Myero giwac man, wun jo me ot pa Yakobo? Rwot pe twero diyo cwinye? Magi ducu gin ticce? Lokka pe timo ber bot ŋat ma cwinye atir? Ento wun wutwarre i kom jona macalo lukwor; wumayo kanyi-gu woko ki i kom jo ma gibedo mot, jo ma gikato ki i netwu ki gen, ma pe gitye ki tam mo me lweny. Wuryemo mon pa jona woko ki i odigi ma yomo cwinygi-ni; wukwanyo deyona woko matwal ki i kom litinogi matino. Wua, doŋ wuciti, pien man pe ka yweyo; pi gin ma keni ma balo dano, ma kelo bal marac twatwal. Ka ce dano mo woto atata, kun tye ki cwiny me goba, ma wacci, “Abitittiwu pi koŋo vino ki mat mogo makec,” en bibedo latit-lok bot jo man! Adada abicoko wun ducu, wun jo pa Yakobo, abicoko jo Icrael mudoŋ; abigurogi kacel macalo romi ma tye i dwolgi, macalo lwak romi ma gitye i olet, lwak jo ma giwo. Ŋat ma yabo yo bitelo nyimgi; gibituro, ka gibikato woko ki i dogcel. Kabakagi bikato i nyimgi, kun noŋo Rwot telo wigi. Awacci, Wuwiny, wun ludito ma telo wi jo pa Yakobo ki wun luloc me ot pa Icrael! Pe ticwuaye me ŋeyo ŋolokop atir? Wun wuk wero ber ento wumaro rac, wupwaco del kom jona, dok wudano riŋo korugi ki ikom cogogi; wun wucamo riŋo kom jona, kun bene wuyaŋo del komgi, dok wuŋido cogogi matitino, ka doŋ wuŋwekogi woko macalo riŋo ma tye i agulu, nyo macalo riŋo ma tye i cupuriya. Lacen wubikok bot Rwot, ento en pe bigamo dogwu; i nino maca pe wubineno waŋe, pien timwu rac twatwal. Man lok ma Rwot owaco i kom lunebi ma ginako jona, ma gidaŋŋe ni, “Kuc” i kare ma noŋo gitye ki ginacama, ento pud giero lweny i kom ŋat mo ma pe pitogi ki’ cam. Meno omiyo Rwot owaco ni, Piny bibedo mutu, pe wubineno ginanyuta mo, dok piny bidoko col kun pe wunono lagam me gin ma wutyeto. Ceŋ bipoto i wiwu, wun lunebi, piny bicido woko botwu; lewic bimako lunen piny, ki lutyet bene gibiketo lewic i wigi; gin ducu gibimiyo doggi woko, pien Lubaŋa pe bimiyo botgi lagammo. Ento ki tuŋ buta, atye ki tek, ki Cwiny pa Rwot, dok ki ŋolo kop atir, ki teko, pi tito ki Yakobo tim aranyine, ki pi nyuto balle bot Icrael. Wuwiny man, wun lutel wi jo pa Yakobo ki wun luloc me ot pa Icrael, ma wudag ŋolo kop atir kun wubalo te kop ducu ma tye atir, ma wugeto Cion ki remo ki Jerucalem bene ki tim marac. Lutel wi jo Jerucalem giŋolo kop pi lim wil me muŋ, ajwagine gipwonyo pwony pi mucara, lunebi bene gityeto tyet pi lim; ento pud gijeŋŋe i kom Rwot kun giwacci,’’ “Rwot pe tye i kinwa? Rac mo pe bibino i komwa.” Pi meno, pi tim mewu, Cion gibipuro woko macalo poto; Jerucalem bidoko obur, ki got ma gigero ot pa Rwot i wiye bi Man bitimme i kare ma pud tye anyim: got me ot pa Rwot bicuŋ macalo got mabor makato godi ducu, borre bikato cere ducu; rok ducu gibimol gicito iye, dok lwak lurok mapol gibibino, gibiwacci, “Wubin, waitui wi got pa Rwot, i ot pa Lubaŋa pa Yakobo; wek en opwonywa kit mere, ka wek walub yone.” Pien cik bia ki i Cion, lok pa Rwot bia ki i Jerucalem, En biŋolo kop i kin rok mapol, dok biŋolo kop pa lwak rok matego ma gitye ka mabor; gibiteto pala lucwangi doko lak kweri dyaŋ, ki toŋigi doko pala me ŋolo jaŋ olok; rok mo pe bitiŋo pala lucwan i kom rok wadigi, pe doŋ gibimedde ki pwonyo lweny; ento ŋat acel acel bibedo i te olokke ki i te odurone, pe tye ŋat mo ma bimiyo gibedo lwor; pien dog Rwot me mony doŋ otuco. Pien rok ducu giwoto kun ŋat acel acel woto nyiŋ lubaŋane, ento wan wabiworo Rwot Lubaŋawa nakanaka. Koko jo Icrael ki i opii Rwot owaco kuman ni, I nino maca abicoko luŋolo, dok abicoko jo ma giryemogi woko, ki jo ma an kikoma doŋ atyeko unogi. Abimiyo luŋolo gidoko jo mubwot, ki jo ma yam giryemogi gucito woko ceŋ gibidoko rok matek; Rwot biloyogi i got Cion nia i kale man nio nino ma pe tumo In lubele me dwol romi, dok in cere pa jo Cion, locci macon bidwogo i ciŋi, ma en aye ker pa jo Jerucalem. Koni ikok matek piŋo? Pe tye kabaka mo liŋ? Lami-tammi doŋ oto woko, mumiyo immne ki arem calo dako ma rem ki nywal? Wubed ki arem, kun wucur, wun jo Cion, macalo dako ma rem ki nywal; pien koni wubia woko ki i gaŋ wubibedo i tim ata; dok wubicito i Babilon. Rwot bilarowu ki kunnu, en bilarowu ki i ciŋ lukworwu. Koni rok mapol gucokke ka lweny i komwu, kun giwacci, “Wek wabalgi woko wek wanen Cion.” Ento gin pe giŋeyo tam pa Rwot pe giniaŋ yubbe bene, ni en aye ocokogi macalo wit kal ma i laro moyo. Wua malo wudin kal, wun jo Cion, macalo twon dyaŋ ma nyono wit kal me dinone, pien abimiyo tuŋwu doko nyonyo ki obon tyenwu bidoko mola; wubituro rok mapol i dul i dul, wubidyero limgi bot Rwot, doŋ bidoko lonyo pa Rwot me wi lobo ducu. Koni cel orumowa woko dyere, lukwor doŋ gurumowa woko; doŋ gitye ka goyo lem laloc me Icrael ki odoo. Loc pa lalar bia ki i Beterekem Ento in, Beterekem Eprata, in itidi pe iporre me bedo i kin kaka me Juda, dano ma bibedo laloc i Icrael bibmo pi an kun a ki i in: acakki me binone obedo con, iua i kare macon mada. Pi meno en biwekogi ata nio ka kare biromo nio ka dako ma tye ka rem ki nywal doŋ onywal; lacen utmegine ducu ma gudoŋ gibidwogo bot jo Icrael. En bicuŋ, dok bikwayo romine pi tek pa Rwot, ki i dit me nyilj Rwot Lubaŋane. Dok gibibedo ki kuc, pien koni en bibedo dit nio i agik me lobo. Pien dano-nu bikelo kuc, i kare ma jo Aciria gibibino i lobowa, maginyono lobowa bene ki tyengi. Wabicwalo lukwat abiro ka lweny i komgi, kun rwodi aboro aye ma gibitelo wi lwak; gibiloyo lobo me Aciria ki pala lucwan, ki lobo pa Nimulodi ki pala lucwan ma gitiŋo; gibilarowa ki i cin jo Aciria ka gubino i lobowa, ma tyengi onyono apokki me wan lobowa. Lacen jo pa Yakobo ma gudoŋ gibibedo i dye rok mapol, macalo toyo ma oa ki bot Rwot, calo kot ma ŋido i kom lum, ma pe twero dikke pi dano, kadi wa kuro litino pa dano. Jo pa Yakobo ma gudoŋ gibibedo i kin lurok, i dye rok mapol, macalo labwor ma i kin lee me buŋa, macalo latin labwor ma i kin romi ma gucokke; ka owok ki i kingi, ci nyonogi piny, dok kilogi woko, pe tye ŋat mo ma larogi. Ciŋi bitiŋŋe malo i kom lukworri, lumoneni ducu ibityekogi woko. I nino maca, abikwanyo aguragurawu woko ki botwu, dok abityeko gadigadi lweny mewu woko, man Rwot aye ma owaco. Abikwanyo gaŋiwu ducu ma i lobowu, dok abimuko cel mewu matek-gu ducu; abikwanyo tim jokjok woko ki i ciŋwu, pe dok wubibedo ki lutyet i kinwu; abikwanyo cal apaya mewu ki wir jogi mewu ma tye i kinwu, pe dok wubimedde ki guno piny ka woro tic me ciŋwu; abiputo yadi woko ducu ma wucomo pi woro jok ma dako ma gilwoŋo ni Acera, dok abibalo gaŋiwu ducu. Doŋ i akemo ki kiniga aye abiculo kwedekwor i kom lurok ma yam pe guwinyo Wuwiny gin ma Rwot owaco: Wua, wupid lokwu i nyim godi, wek cere ducu owiny dwanwu. Wun godi, wuwiny daa pa Rwot, ki wun guti me te lobo ducu ma ri nakanaka; pien Rwot tye ki daa i kom jone, en bilaro lok ki jo Icrael. “Wunjona, atimo gin aŋo i komwu? Ceŋ amiyo wuol i gin aŋo? Wudokka iye! Pien ceŋ akwanyowu ki i lobo Ejipt, dok akokowu ki i ot me opii; kun acwalo Moses i nyimwu kacel ki Aron ki Miriam bene. Wun jona, wupo lok ma Balak kabaka me Moab oporo, ki gin ma Balaam wod pa Beor odokke iye, ki gin ma ceŋ otimme nia i Cittim nio i Gilgal, wek wuŋe kit ma Rwot otiyo kwede pi larowu.” “Abibino i nyim Rwot ki gin aŋo, ka wek aguŋ i nyim Lubaŋa ma tye malo? Abibino i nyime ki gitum awaŋa, nyo ki roci me mwaka acel acel? Tika Rwot bibedo ki yomcwiny kom nyogi romi alip, ki dok i kom kulu alip apar ma moo opoŋ i igi? Abimiyo latin kayona pi tim aranyina, ami latinna ma an kikoma aye anywalo pi bal ma i cwinya?” Rwot doŋ onyutti gin maber, in dano; gin ma Rwot mito ki boti en aye timo tic ma nen atir, ki maro kica, ki wot kacel ki Lubaŋani ki mwolo. Rwot daŋŋe ki dwan maloŋo bot wegi gaŋ, dok bedo me ryeko mada me lworo nyiŋe: “Wuwiny, wun kaka ki wun jo mucokke i gaŋi Wiya pe twero wil i kom lonyo ma tye i ot pa dano ma latim marac, kacel ki lapim jami ma pe pimo kakare, ma cwinya dag nenone. Myero awek dano ma tye ki mijan marac ma kicaane opoŋ ki kidi me bwola ma pe pimo kakare-ni? Jowu ma gulony gin jo mager mada; jo ma gibedo i gaŋiwu giloko lok goba, lebgi aye kelo lok goba i doggi. Pi meno doŋ acako pwodowu, kun awekowu wudon wi obur ata pi balwu. Jowu gibicamo cam, ento pe gibiyeŋ, kec binekowu; wubikano ento pe wubigwoko, dok gin ma wugwoko abimiyo ki pala lucwan. Wubicoyo kodi, ento pe wubikayo; wubinyono jeituni, ento pe wubiwirre ki moone; wubibiyo olok, ento pe wubimato koŋo vinone. Pien wugwoko cik pa Omri, ki tic ducu me ot pa Akab; kun wulubo tamgi; wek ami gaŋwu odoŋ obur, ki jowu gibibedo me acaya; pi meno wubiciro anywar pa lurok.” Doŋ aneno can! Pien alokke adoko macalo i kare ma gityeko coko nyig yat me oro, ma doŋ gityeko gwero obot olok, nyige me acama mo doŋ pe, oduro mo ma okwoŋo cek ma cwinya mito pe tye. Dano pa Lubaŋa doŋ guto woko ducu ki i lobo, pe tye ŋat mo ma cwinye atir ki i kin dano; gin ducu gitye ka libo jo me aneka, dano acel acel dwaro ominne ki obwo. Ciŋgi tye i kom gin marac, gimito timone ki cwinygi ducu; rwot ki laŋolkop gipenyo pi lim wil me muŋ, dano madit trto miti marac ma tye i cwinye; kit meno timgi ducu rwatte kacel. Ŋat maber i kingi calo ocok, ŋat ma cwinye atir i kingi calo cel okuto. Nino pa lukur-piny megi, ki me keto can i komgi, doŋ obino; kare me cabbe acaba i tamgi doŋ cok. Pe iket genni i kom lawoti, pe ibed ki gen i kom laremi; gwok dogi i kom ŋat ma buto i kori; pien latin laco pe keto deyo i kom wonne, latin nyako bene pyem ki minne, ci-wod bene pyem ki daane; lukwor pa dano gin aye jo ma i ode. Ento ki tuŋ bota, abineno bot Rwot, abikuro Lubaŋa lalar mera; Lubaŋana biwinyo lokka. Pe ium i koma, in lakworra; ka apoto, abia; ka abedo i colpiny, Rwot bibedo ceŋ ma menya. Abiciro kiniga pa Rwot, pien abalo i nyime, nio waŋ ma en opido lokka, ka omiya aloyo loko En bikela i ceŋ; abineno lar mere. Lakworra bene bineno, dok lewic bimako ŋat ma yam penya ni, “Rwot Lubaŋani tye kwene?” Abinene ki waŋa ka gitye ka nyone piny, macalo coto ma tye i dye yo. Nino me gero cel gaŋwu bibino! I nino maca gibimedo wan lobowu cito ka mabor. I nino maca gibibino botwu nia ki i Aciria nio wa Ejipt, dok nia ki i Ejipt nio i kulu Euprate, nia i nam ki nio i nam, nia i got dok nio i got. Ento lobo bidoŋ noŋo pi jo ma gibedo iye, pi gin marac ma gin timo. Kica pa Rwot i kom jo Icrael. Kwa joni ki odooni, ai Rwot, ma gin romi ma gimiyi me bedo meri matwal, ma gibedo kengi i buŋa i dye lobo ma ceko cam; wek gikwagi i Bacan ki i Gilead macalo i kare macon. Macalo i kare ma yam wua kwede ki i lobo Ejipt abinyuto botgi jami me aura. Lurok gibineno, dok lewic bimakogi i kom twer megi ducu; gibiumo doggi ki ciŋgi; itgi bidin woko; gibimoko apwa macalo twol, macalo jami ma mol i wi lobo; gibia ki i kabedogi ma gicelo matek, ma noŋo komgi myel amyela, gibilokke bot Rwot Lubaŋa ki lworo madwoŋ, gibibedo ki lworo i nyimi. Aŋa ma dok Lubaŋa calo in, ma gonyo bal, ma weko bal pa jone kikome ma gudoŋ? Pe moko kinigane bedo matwal, pien cwinye yom i mar mere ma pe lokke, En dok bibedo ki kica i komwa, en binyono balwa piny i te tyene. Ibibolo balwa ducu i kut me namo. In ibinyuto gen bot Yakobo ki mar meri ma pe lokke bot Abraim, macalo ceŋ ikwoŋo bot kwarowa nia i kare macon. Man lok ma pire tek ma gicoyo ma okemo Nineve; ma Lubaŋa onyuto bot Nakum, ma en dano me Elkoc. Rwot en Lubaŋa ma lanyeko dok lacullakwor, Rwot culo kwor kun tye ki akemo madwoŋ; Rwot culo kwor i kom lukworre dok kano akemone pi jo ma gin lumonene. Rwot kiniga pe mako oyot, en tye ki tek madwoŋ twatwal, dok pe kwanyo kop i kom lubalo. Yo me wotte tye i yamo lapiru ki i yamo kot, pol obedo apwa me tyene. En juko nam, ci piine two woko, en miyo pii ma i kulu ducu dwoŋ woko. Olet ma i Bacan two woko, got Karmel ner bokke woko, ature me Lebanon bene ner woko. Godi ducu giyeŋŋe ka Rwot onen, cere-gu leny i nyime; piny doŋ noŋo matar ligwek, lobo ki jo ducu ma gibedo iye komgi myel. Ka ce akemo omako Rwot, aŋa twero cuŋ i nyime? Aŋa ma twero ciro kinigane malyetti? En onyo akemone calo mac, dok ‘muko gweŋ, ŋido woko matitino. Rwot gire ber, en aye ka kanne i kare me caŋ; dok en ŋeyo jo ma riŋo laro bote. Ento en bijwero lukworre doki ki lalele me pii ma mol ki teko madwoŋ twatwal; en biryemo lumonene naka wa i colpiny. Wun jo Nineve wutye ka piro lok aŋo i kom Rwot? En bityekowu woko liweŋ; en biculo kwor kiryo i kom lukworre. Gibiwaŋogi woko macalo okuto ma okadde, macalo reŋ kal mutwo. Dano mo nene oa ki i kinwu, ma opiro lok marac i kom Rwot, dok omiyo tam marac bot jo mukene. Rwot owaco kuman ni, “Kadi bedjo Aciria gitekmagidwoŋ niŋo, gibityekogi woko dok nyiŋgi birwenyo woko matwal. Kadi bed yam aunowu, pe dok abiunowu aye. Kombeddi abituro okol ma jo Aciria gurwako i ŋutwu abicodo nyor ma gutweyowu kwede bene.” Man aye cik ma Rwot oketo pi jo Aciria: “Nyiŋwu pe dok biwinnye matwal. Abijwero cal jogi woko liweŋ ki i ot pa lubaŋawu, abikwinyo bur lyel me yikowu, pien konywu doŋ pe.” Lok kom turo gau me Nineve Koŋ wunen, tyen ŋat ma kelo lok maber tye i wi godi en tuco lok me kuc. Wun jo Juda, wukwer nino madito, dok wucob kwoŋwu, pien jo maraco pe dok gibimedde lo bino i komwu, pien doŋ gijwerogi woko matwal. Lanek piny doŋ obino i komwu eno. Wugwok cel me gaŋ maber; wubed ka neno yo; wutwe pyerwu ki del; wubed ma doŋ wuyubbe pi lweny. Rwot doŋ tye ka dwoko dit bot Yakobo ma rom ki dit pa Icrael, pien luyak onoŋo guyako jamigi ducu girom ki yat ma gibalo jaŋe woko. Co ma gin twoni oteka lwennye gumako kwodi mubok, askarine ducu guruko boŋo makwar. Gadigadi lwenygi meny calo leb mac ka giryeyogi i tyen aguragura lwenygi loco ŋwec aloca. Gadigadi lwenygi riŋo ata i dye yo, gimwomme ki ŋwec tuŋŋi ki tuŋŋi i dyekal me gaŋ; gimeny lipilpil calo mac lak raa, gibedo ka mil amila calo lutkot. Doŋ gityeko lwoŋo ludito ma giloyo lwak, gitye ka paŋŋe apana ki wot ca, girune, gicito i kom cel gogo, kun gumako kwot me lagen komgi, Yo kulu ducu giyabo woko, jo ma i gaŋ kal pa kabaka cwinygi oballe woko. Ci-abila gitero i opii, kun anyirane gitye ka kok ma gikumo akuma calo amam, ma gidoŋo korgi ki cwercwiny. Nineve obedo calo pii dam ma omuk, ma piine mol cito woko liweŋ, Gidaŋŋe ni, “Cuŋ ba! Cuŋ!” ento pe tye ŋat mo ma lokke dwogo cen. Wuyak ryal, wuyak jabu-gu! Lonyo ma gikano dwoŋ, pe tum, ki jami me wel mabeco ma yomo cwiny dano. Nineve doŋ gijwero woko odoŋ obur! Cwinygi poto kun coŋgi myel amyela, arem doŋ omako pyer dano ducu waŋgi ducu olwal woko! Boro pa labwor tye kwene kaa, ka cam pa litino labwor, ka ma yam labwor tero iye lee ma omako, ka ma ceŋ litinone bedo iye laboŋo ŋat mo ma yelogi? Twon labwor yam mako lee kilo woko matitino pi megi labwor ki litinogi; poŋo borone ki lee ma omako, ki riŋo ma okilo oŋido woko. Rwot me mony owaco ni, Nen, an abedo lakworwu, abiwaŋo gadigadi lwenywu woko ducu, yitone biduny. Dok pala lucwan bene bityeko litino labworwu woko liweŋ; abimiyo lee ma wucamo doŋ tum woko ki i lobo, ki dwan lukwenani bene pe doŋ biwinnye matwal. Can bipoto i kom gaŋ ma oyo remo pa dano, en gaŋ ma opoŋ ki goba ki jami magiyako, tim me yak pegik ki iye! Koŋ wuwiny kit ma del anino cot kwede, ki mor pa lawala, kit ma aguragura pye kwede, kacel ki mor gadigadi ma giriŋo. Koŋ inen kit ma wegi aguragura gitye ka ŋwec kwede, ma noŋo pala lucwangi meny amenya lipilpil, ki tonigi bene ryeny aryenya! Lwak dano ma guneko, komgi odurre lipim; dano tye ka to medde ameda, dano woto ma giyokke ayoka ki kom jo muto! Man ducu tye ka timme pi bit waŋ pa dako ma lakwele-ni, en yomo cwiny co ki timme me yatyat, en aye ma kelo can i kom rok mapol pi timme me kwele kwele, rwenyo jo mapol ki timme me yatyat. Rwot me mony owaco ni, Nen, an doŋ abipwodo in gaŋ Nineve, abiwalo boŋo woko ki i pyeri aumo ki wii; abimiyo lurok gineni ka doŋ it ye munero, lewic bimaki pien ker ducu bineni. Abinywano komi ki gin me kwer, dok abitimo tim me cac i komi; abimiyo dano giciko waŋgi i komi. Jo ducu ma bineni gibijer woko ki boti kun giwaco ni, Nineve odoŋ obur; aŋa ma bikumo pire? En binoŋo jo ma kweyo cwinye kwene? In mono iber ikato gaŋ Tebec ma yam tye i ŋet kulu Nail, ma pii orumo woko dyere, kun gwoke macalo cel mere? Tek mere yam ocun i kom Etiopia, ki i kom Ejipt ma tekogi onoŋo pe gik; Put ki Libya bene yam gubedo ka konye, Kadi bed kumeno, jo Tebec yam giterogi woko, giterogi woko i opii; Litinone ducu ginyotogi woko i agikki yo ducu; dok gibolo kwir pi luditogi ma giworo, jo madito ducu gitweyogi woko ki nyor, In ibimer, dok ibibaŋŋe woko; ibiyenyo ka larre ki i ciŋ lukworri. Cel gogoni ducu bibedo macalo yat oduro ma nyige pud cek aceka, ka giyeno yatte ci nyige poto piny i dog jo ma camo. Nen, lulwennyi girom ki mon mamwa. Dogcel me lo boni giyabo malac i nyim lukworri, mac doŋ owaŋo rii me dogcelli woko. Twom pii, iyub celli obed matek, lukworri gibibino girumi woko; pye i bur lobo inyon lobo, mak bao igo matafali! Mac biwaŋi woko ki kunnu, pala lucwan bene bitoŋi woko, macalo bonyo tyeko kwede cam. Wunya wumedde giwu calo bonyo, wunya wumedde calo ocene! Imedo lucat-willi doŋ gudoko mapol ma gikato lakalatwe ma i polo. Bonyo-yaro bwome, tuk cito woko. Rwodini gipol macalo ocene, karani meri gidwoŋ calo lwak bonyo ma gicorre i wi cel i kare ma koyo ŋic. Ka cen doŋ otuc, ci gituk gicito woko; ŋat mo ma ŋeyo ka ma gitye iye pe. In kabaka me Aciria, lukwatti gunino woko; luditoni me awora guywe woko matwal. Lwakki guket woko ata i wi godi ŋat mo ma romo cokogi kacel pe. Ret ma giketo i komi pe twero caŋ, waŋ burre odet marac twatwal. Jo ducu ma giwinyo lok man i komi gidoŋo ciŋgi piri ki yomcwiny. Rac ma itimo dikdik-ki peya opoto i kom aŋa? Man lok pa Lubaŋa ma pire tek ma lanebi Kabakuk oneno, Rwot, imito akok boti pi kare ma rom me ne pi kony, ka wek iwiny kokona? Dok kadi akok boti pi tim bwami, in pe ilarowa. Piŋo imiyo aneno tim maraco kun waŋa neno tim aranyi? To-piny ki bwami guruma woko dyere, lweny ki daa ocakke i kabedo ducu, Pi meno omiyo cik doŋ odoko goro dok gin ma konnye pe, ŋolo kop atir bene doŋ pe. Jo maraco gudiyo jo ma kitgi atir, omiyo ŋolo kop atir doŋ oballe woko. Wuŋi i kin lurok murumowu, wunen; wubibedo ki ur matek twatwal. Atye ka tiyo tic mo i karewu-ni ma pe wubiye ka gitito botwu lacen. Wunen, atye ka kela jo Kaldaya, gin rok mager, ma girune me bino oyotoyot, ma giwoto giŋolo dye lobo arii, wek gimak kabedo pa jo mukene ma pe megi, Gin jo ma kelo lworo ki myelkom madwoŋ; ŋolo kopgi ki rwom me ditogi bedo megi kengi gigi. Aguraguragi dwir makato kwac, giger gikato orudi muwor; luriŋ ki aguraguragi giŋweco gicito anyim ki wakke. Iyo, luriŋ ki aguraguragi gia ki ka mabor; gituk oyotoyot macalo ocur ma Lyanne piny ka ceyo camme. Gin ducu gucorre magwa; dano acel acel bedo ki lworo marac ka gunyiko cok. Gimako opii ina welgi pe kwanne, calo kweyo. Giŋalo luker, ginyero luloc kun gicayogi. Cel gogo ducu ginyero anyera, pien gitoro ŋom i ŋete ci gimako woko oyot. Gikato calo yamo ma kodo, ma gicito mere matwal. Lubalo magi guloko tekkomgi odoko lubaŋagi. Rwot, in ma ibedo tye nia i acakki piny! In Lubaŋana, ŋat Maleŋ, pe wabito. Ai Rwot, in yam iyerogi pi keto can i komwa; in Got, ityeko cikogi me cobo gin ma iŋolo i komwa, In waŋi leŋ, pe romo neno gin marac, cwinyi dag neno jo ma timo dano marac, Piŋo iketo cwinyi ka neno jo ma guŋayo waŋi woko-ni, kun iliŋ aliŋa ka jo maraco gimwonyo jo ma kitgi atir ma katogi? Iketo dano gubedo macalo rec me nam, macalo gin ma gila k alaka ma rwotgi pe. En yutogi woko ducu ki goli, ywayogi woko ki obwo, ci cokogi i ogwane; cako doŋ myel ki yomcwiny pi rec ma omako. Pi meno en tyero gitum i nyim obwone, waŋo odok eceta i nyim ogwane; pien pi timo kumeno en bedo ki lonyo, dok bedo ki cam madwoŋ, Myero en omedde ameda ki lweny ki pala lucwan, kun neko rok mapol ki nek marac laboŋo kica? Abicuŋ i kabedona kun akiyo, abiito malo i wi lubele, abikuro wek anen gin ma Rwot bitito bota, ki gin ma abidok iye bote ma kemo ŋurona. Rwot omiya lagam man ni, “Co gin ma ineno; co maber i kom got ma apada ma twero kwanne bene, wek ŋat ma okwano oniaŋ oyotoyot. Ginanyuta man tye kuro kare ma Rwot ociko; en ginanyuta me ada, kare me cobone doŋ cok, tye ka wot oyotoyot mada. Kadi bed nen ni bino motmot, bed ikur; kare man bibino ada, pe dok bigalle. Nen, ŋat ma pe cwinye atir pe bikwo, ento ŋat ma kite atir bibedo kwo pi niyene i kom Lubaŋa, Can ma bipoto i kom jo ma pe kitgi atir “Kadi bed kumeno, lonyo en gin ma bwolo dano; dano ma lawakke pe biri. En laworo calo lyel; rom ki to dok pe yen. En coko rok ducu pire kene, en guro rok ducu bedo lwakke kikome.” Gin ducu gibiloko lok agec i kome, ma giŋale ki lok makec kun giwacci, “Ibineno can, in ŋat ma icoko gin ma pe meri ci iduro kacel lipim. Ibibedo ki jami man pi kare ma rom mene? Ibineno can in dano ma icoko jami madwoŋ ma gijeŋo boti pi lim!” Jo ma gitye ki banyani pe gibia gijemo woko i komi? Jo ma wangi twolo pe gibiburi ki myelkom matek? Ci in ibidoko ginayaka botgi. Pien doŋ iyako rok mapol, rok mudoŋŋe ducu gibiyako in, kit macalo ibedo lanek dano ki latim bwami i lobo, ki i kom gaŋi ki jo ducu ma gibedo iye. Ibineno can, in dano ma inoŋo magoba ki bwami pi konyo ki jo meri, wek iger ki odi malo i wi cere, ka ma gin marac pe twero o iye boti! In aye ikelo lewic i kom jo ma i odi, pien ineko rok mapol; omiyo ilanyo kwoni nono. Godi ma gigero ki kom ot gibikok matek, ci bao me ri ot ducu gibigamo kokogi. Ibineno can, in ŋat ma igero gaŋ madit kun ibedo ka oyo remo pa dano, ma iketo te guti me gaŋ i kom bal! Tic ma lurok gitiyo mac biwaŋo woko. Rok ducu gitye ka olo komgi nono pi gin ma konnye pe. Rwot me mony aye omiyo obedo kumeno. Ento lobo bipoŋ ki ŋec me deyo pa Rwot macalo pii ma poŋ i nam Ibineno can in ŋat ma itoyo kinigani i kom luwoti, ma miyo gidoko macalo lumero, wek icik waŋi inen kit ma lewic omakogi kwede! Ibibedo ki lewic madwoŋ ma ka bedo ki deyo. In kikomi aye myero imati, wek ipaŋŋe ki wot! Ki kopo pa Rwot ma tye i ciŋe tuŋ lacuc bibino boti, ma biloko deyo me locci doko lewic. Bwami ma ityeko timone i kom Lebanon biumi woko lipuk; nek ma ineko ki lee tim bimiyi lworo madwoŋ, man bitimme i komi pi bedo lanek dano ki latim bwami i kom lobo, ki i kom gaŋi ki jo ducu ma gibedo iye. Cal jok apaya tye ki kony aŋo? En gin ma dano opayo, cal nyonyo mamwa, ki lapwony ma lagoba. Kony aŋo ka lapa cal jok keto genne i kom gin ma en otiyo? En cal lubaŋa ma doge oto ma pe loko-ni. Ibineno can, in ŋat ma iwaco ki cal yat ma ipayo ni, “Co woko.” Ki dok bot got ma pe loko ni, “A malo!” Cal meno twero pwonyo dano mo? Nen, gideyo kome ki jabu ki ryal, ento yamo me yweyo pe tye i iye wacel. Ento Rwot tye i ot mere maleŋ; wek jo ducu ma i lobo guliŋ mot i nyime. Lega pa lanebi Kabakuk. Rwot, atyeko winyo pi gin ma itiyo, tic ma itiyo omiya lworo ki myel kom. Dok iti aye i karewa tic madito ma yam ibedo ka tiyogi i kare mukato, wek ticci onene i dye mwaka ducu; bed lakica kadi bed kiniga maki. Lubaŋa obino ki i Teman, Ŋat Maleŋ oa ki i wi got Paran. Deyone oumo pol woko, derone oryeny oromo lobo ducu. En bino ma ryeny calo ceŋ, derone wil a ki i ciŋe; en kano twerone kunnu. En cwalo two gemo i nyime, ka ociko to me lubo kore. I kare ma ocuŋ, lobo oyeŋŋe; ka oneno piny, rok ducu guket woko ata; lacen godi ma ri nakanaka gumuk woko liweŋ, ki cere ma bedo matwal gidik gidonyo piny, ki i yo ma en yam woto iye i kare macon. Aneno kema pa jo Kucan tye ki can’ boŋo kicika pa jo Midian gubaŋŋe woko ducu. Rwot, akemo mono onoŋo omaki i kom kulu, kinigani onoŋo tye i kom kulu? Gwok nyo ibedo ki akemo i kom nam ba, i kare ma irino ki aguragurani, ki i wi gadigadini me kelo loc bot joni? Doŋ ityeko telo atummi me celo piny, dok juruni opoŋ ki atero madwoŋ. Imiyo kulu obaro i lobo opoko woko. I kare ma godi guneni, guyeŋŋe matek, pii ocako mol ki lalele marac twatwal; pii matut ma i te lobo omor matek, wa biamwonyme ducu oille malo adada. Ceŋ ki dwe gucuŋ mot i kabedogi pi dero me ateroni ma doŋ ibayogi, ki wil pa tonni ma ryeny twatwal-li. Iwoto i dye lobo ki akemo magwa, dok inyono rok woko piny ki kiniga. Icito ka lweny pi laro lwakki, ki pi laro kabakani ma iwiro. Ininyo latel wi jo maraco woko, kun iweke odoŋ munero cakke ki i eme o wa i ŋute. Icobo wi lulwennye woko ki jami lwennyi, ma onoŋo gubino macalo yamo lapiru ma gimito keta woko, gupoŋ ki yomcwiny madwoŋ ma gimito neko lucan woko i muŋ. Inyono nam ki aguragurani, kun iŋolo ki i dye pii matek ma gunnye agunya. Ka awinyo man, ci koma omyel marac, del doga bene omyel pi morre. Cogona ducu oŋo odoko pii keken, noŋo tyena myel amyela ka awoto. At ye ka kuro nino me can mot en nino ma bibino i kom jo ma gulwenyo i komwa-ni. Kadi bed yat oduro pe gituru, ki olok bene pe ginyak, dok yat jeituni bene pe twero ceko ginmo potti ducu pe doŋ ceko cam, kadi bed romi ma i dwol gityekogi woko ma dyaŋi bene doŋ pe i dwol, pud abibedo ki wakke pi Rwot, abinyatte ki yomcwiny madwoŋ pi Lubaŋa lalarra. Lubaŋa, ma en Rwot, aye tek mera; en miyo tyena bedo yot calo tyen til, en bigwoka ka awoto i wi cere-gu. Man lok pa Rwot ma yam obino bot Jepania wod pa Kuci, wod pa Gedalia, wod pa Amaria, wod pa Kejekia i kare pa kabaka Yocia me Juda, wod pa Amon. “Abijwero jami ducu ki i wi lobo,” Rwot ma owaco. “Abijwero dano wa ki lee; abijwero winyo me polo ki rec me namo Abireto jo maraco; dok abityeko dano woko ki i wi lobo,” Rwot ma owaco. “Abiryeyo bada i kom Juda, ki i kom jo ducu ma gibedo i Jerucalem; abijwero jo pa Baal ma gudoŋ woko ki i kabedo man, ki nyiŋ ajwagi me cal jogi bene abiŋolo woko. Dok abityeko jo ma ryebbe piny i wi ot ka woro mony me polo; ki jo ma giryebbe piny ka kwoŋo kwoŋ oot Rwot ma kun kono gikwoŋo ki nyiŋ Milkom; jo ma gudok cen, ma pe gilubo Rwot, ma pe gicito bot Rwot kadi wa penyo doge.” Wuliŋ mot i nyim Rwot Lubaŋa! Pien nino pa Rwot doŋ tye cok; Rwot doŋ otyeko yubo gitum, dok olonyo welene. I nino ma Rwot bitumo iye gitumme, “Abiketo can i kom luloc ki litino pa kabaka ki i kom jo ducu ma giruko ruk pa rok mukene. I nino meno abiketo can i kom jo ducu ma gikalo larii doggola, jo ma gumiyo bwami ki goba opoŋ i ot pa laditgi.” “I nino meno,” man lok pa Rwot, “koko biwinnye ki i Dogcel me Rec, koko me can biwinnye ki i dul gaŋ me Aryo, mor piny madwoŋ biwinnye ki i wi cere. Wukok can, wun jo ma wubedo i Pany! Pien lucat-wil doŋ gipe, jo ma pimo lyal doŋ gityekogi woko. I kare meno abiŋiyo Jerucalem ki mac tara, abiketo can i kom jo ma gibedo abeda macalo koŋo yino ma ori, ma atinyane opoto woko, jo ma giwaco ki i cwinygi ni, ‘Rwot pe bitiyo gin maber, dok pe bitimo gin marac.’ Jamigi gibiyako woko, odigi bene gibiketogi woko. Kadi bed guger odi, pe gibibedo i igi; kadi bed gupit olok, pe gibimato kono vinone.” Nino madit pa Rwot tye cok, tye cok dok tye ka bino oyotoyot; dwan me nino pa Rwot, dwan magwar, dano matek kok iye ki dwan maloŋo. Nino meno aye nino me akemo, nino me can ki me remcwiny madwoŋ, nino me ninyo ki me balo piny, nino me colpiny ki mutu, nino me pol ki colpiny mapek, nino me koko gwara ki woo me lweny i kom gaŋi ma gicelo matek ki i kom cel ma gigero maboco. Abikelo can i kom dano, ma bimiyo giwoto calo lutowaŋ, pien gubalo i nyim Rwot; gibionyo remogi woko macalo apwa, ki riŋo komgi gibibolo calo cet. Kadi ryalgi nyo jabugi pe bilarogi i nino me akemo pa Rwot. Mac me akemo me nyekone bi waŋo lobo ducu; en bityeko dano ducu ma gibedo i lobo magicel dok oyotoyot. Wubin, wucokke kacel, wun rok ma lewic pe makowu, ma pud peya giryemowu woko macalo cuŋ kail ma yamo tiŋo, ma peya kiniga mager pa Rwot obino i komwu, ma peya nino me akemo pa Rwot obino i komwu. Wuyeny Rwot, wun jo ducu mamwol me lobo man, ma wucobo cikke; wulub kit ma atir wubed ki mwolo; gwok nyo gibibwotowu i nino me akemo pa Rwot. Pien Gaja bidoŋ nono, Acikelon bidoko obur, jo Acidod gibiryemogi woko dyeceŋ, Ekron gibiputo woko. Wubineno can wun jo ma wubedo i dog nam, wun rok me Keret! Lok pa Rwot otikowu, in Kanaan, lobo pa jo Piliciti; abityek i woko nio waŋ ma ŋat mo pe bidoŋ bot i. In dog nam, ibidoko olet, bar pa lukwat ki dwol romi. Lobo dog nam bidoko pa jo Juda ma gudoŋ, gibikwayo romigi iye; gibibuto piny otyeno i odi me Acikelon. Pien Rwot Lubaŋagi biparo pigi, bidwoko gum botgi. “Doŋ awinyo lok aŋec pa jo Moab ki yet pa jo Ammon, kit ma giŋeco ki jona, kun ginyuto wakke i kom lobogi, Pi meno, macalo atye makwo-ni, “Rwot me mony ma owaco, Lubaŋa pa Icrael, “Moab bidoko calo Codom, jo Ammon bidoko calo Gomorra, lobo ma opoŋ ki ayila ki bur kado, ma oballe doŋ matwal. Jona ma gudoŋ biyakogi, jona ma gubwot ki i kin rokka bileyo lobogi.” Man bitimme i komgi macalo adwoggi me wakkegi, pien guŋalo jo pa Rwot me mony dok bene guwakke i komgi. Rwot bikelo lworo madwoŋ i komgi bineko lwak lubaŋa me wi lobo ducu ki kec, lobo pa lurok ducu gibiryebbe piny i nyime, rok acel acel i kabedone. Wun jo Etiopia bene, gibinekowu ki pala lucwanna. En biryeyo ciŋe tuŋ acam, ajwagine gicido gin maleŋ woko, bityeko Aciria woko; en bi loko Nineve doko obur kun otwo calo tim aroo. Lim makwo bibuto i dyere ki lee tim ducu; acut ki coo gibibedo i wir odine; tula bikok ki i waŋ dirica agak bikok i larii doggola; pien tic bao cedar doŋ bigik woko. Man aye gaŋ ma yam nyatte-ni, ma obedo ki kuc, ma oloko kekene ni, “An atye, dok pe tye ŋat mo mukene.” Kit ma en odoko kwede obur, ki boro pa lee tim! Ŋat acel acel ma kato ki i ŋete jwiye kun yeŋo ciŋe ma oŋino-ni. Can bipoto i kom gaŋ ma lajemo, ma oballe woko, dok uno dano! En pe winyo dwan ŋat mo, Pe ye juk pa ŋat mo, Pe geno Rwot, pe nyiko cok ki Lubaŋane. Ludito ma gitye iye gin twoni labwor ma mor; luŋolkoppe gin orudi me dyewor ma pe giweko gin mo doŋ nio wa odiko. Lunebine gin jo ma wor, jo ma pe genne; gitimo tim bwami me balo cik. Rwot ma bedo iye oporre, pe tiyo gin marac; odiko odiko ducu en ŋolo kop kakare, en pe ken ticce rupiny ki rupiny, ento ŋat ma labal pe ŋeyo lewic. “Atyeko jwero rok mapol; celgi matek odoko obur; atyeko balo yogi woko, ma miyo ŋat mo pe woto iye; gaŋigi odoŋ obur, laboŋo dano, kadi ki ŋat mo ma bedo iye. Awacci, ‘Adada Jerucalem bilwora, biye juk; wiye pe biwil i kom lok ducu ma acike kwede.’ Ento gimedde ameda ki mitkom me balo kit timgi ducu.” “Pi meno, wukura,” Rwot ma owaco, “wukur nino ma abia iye malo ka dot. Pien amoko tamma me coko rok ducu, ki pi guro ker mapol kacel, wek ata kinigana i komgi, wek akemona malyet-ti otum; pien akemo me nyekona biwaŋo lobo ducu. “Ada, i kare meno abimiyo rok ducu doggi bedo maleŋ, kun giloko lok kakare, wek gin ducu gulwoŋ nyiŋ Rwot, dok guti bote ki cwiny acel. Jo ma gikelo kwacgi bota, jona ma guket woko ata-ni, gibikella motta kun gia ki loka kulu me Etiopia. “I nino meno pe gibiketo lewic i komi pi tim ma ijemo kwede i koma; i ka re meno abikwanyo woko ki i kinwu jo ma yam giŋatte ma gikette malo; pe dok wubimedde ki lyerre i wi gotta maleŋ. Jo mamwol ma lucan abiweko doŋ i kinwu, Gin jo ma gudoŋ i Icrael, gibiyenyo kalarre i nyiŋ Rwot; pe gibitimo gin marac, dok pe gibiloko lok goba; leb ma bwolo dano pe binoŋŋe i doggi. Gibicam, dok gibibuto piny, pe tye ŋat mo ma bimiyogi lworo.” Wuwer ki dwan maloŋo, wun jo Cion; wugo kijira, wun jo Icrael! Wubed ki yomcwiny wuŋatte ki cwinywu ducu, wun jo Jerucalem. Rwot doŋ okwanyo kop woko ki i komwu, dok bene otyeko ryemo lukworwu. Rwot tye i kinwu, en kabaka me Icrael; pe dok wubilworo gin marac. I nino meno gibiwaco ki Jerucalem ni, “Pe wulwor, wun jo Cion; pe wuwek ciŋwu odok nyap, Rwot Lubaŋawu tye i kinwu, en twon oteka lweny ma bikelliwu loc, En bium i komwu ki yomcwiny, pi mar mere botwu en birocowu wudoko manyen, binyuto yomcwiny madit i komwu ki wer maloŋo macalo i nino madito. “Abikwanyo can woko ki i komwu, wek pe giyetwu pire. Nen, i kare meno abitiyo ticca i kom dano ducu ma yam giunowu. Abilaro luŋolo, dok abicoko jo ma yam giketogi woko, abiloko lewicgi doko pak, ci nyiŋgi biwinnye i lobo ducu. I kare meno abikelowu paco, i kare ma abicokowu kacel. Iyo, abimiyo wuŋene-dok gibipakowu, i kin jo ducu ma gibedo i lobo, i kare ma abidwoko gum botwu kun wuneno ki waŋwu,” Rwot ma owaco. I mwaka me aryo me loc pa kabaka Dario, i nino dwe acel me dwe me abicel, lok pa Rwot obino bot Aggai, ma myero en otit bot Jerubabel wod pa Cealtiel, ma onoŋo laloc pa jo Juda, ki bot Yocwa wod pa Yekojadak, ma en ajwaka madit, ni, “Rwot me mony owaco kuman ni, Rok man giwacci, kare peya oromo me gero ot pa Rwot odoco.” Lok pa Rwot obino kun owok ki i dog lanebi Aggai, ma wacci, “Man aye kare ma myero wubed i odiwu ma wugero wigi mabeconi, ma kun wuneno ot man oket woko? Pi meno omiyo, Rwot me mony owaco kuman ni, Koŋ wutam pi kit kwowu. Wucoyo kodi madwoŋ, ento wukayo manok; wucamo cam, ento pe wuyeŋ; wumato mat-gu, ento pe romowu; dok wurukke, ento ŋat mo ma kome bedo lyet bene pe; dok ŋat ma camo mucara camo mucara me aketa i kicaa ma tere otuc. “Rwot me mony owaco kuman ni, Koŋ wutam pi kit kwowu. Wuit i wi godi, wukel yadi me gedo, wek wuger ki ot ma yomo cwinya, wek anyut deyona iye, man Rwot aye owaco. Wubedo ka geno ni wunoŋ cam mabup, ento wucoko manok; dok ka wukelo paco, amiyo rwenyo woko. Piŋo? Man Rwot me mony aye ma openyo, kun dok gamo ni, Pien oda tye ma oket woko, kun ki tuŋ botwu, ŋat acel acel tye ka bolle abola i tic ode. Meno aye gin mumi yo polo ki malo okwero miyo toyo, dok lobo bene okwero ceko cam. An bene aciko ni can pii myero obed tye i lobo, ki i kom godi, i kom kal, i kom koŋo vino manyen, i kom moo, ki i kom ginapita ducu ma doŋo i lobo, i kom dano, ki i kom dyaŋi, ki i kom ticgi ducu ma gitiyo,” Meno omiyo Jerubabel wod pa Cealtiel, ki Yocwa wod pa Yekojadak, ajwaka madit pa Lubaŋa, kacel ki jo ducu ma gudoŋ, guwinyo lok pa Rwot Lubaŋagi, ki lok pa lanebi Aggai, kit macalo Rwot Lubaŋagi oore kwede; lwak gucako bedo ki lworo i nyim Rwot. Lacen Aggai, lakwena pa Rwot, otito lok pa Rwot bot lwak ni, “An atye kwedwu, man lok pa Rwot kikome.” Rwot otugo cwiny Jerubabel wod pa Ceahiel, laloc me Juda, ki cwiny Yocwa wod pa Yekojadak, ajwaka madit, ki cwiny jo ducu ma gudoŋ; cut gubino ci gucako tic i kom ot pa Rwot me mony, ma Lubaŋagi. Gin gucako tic i nino dwe pyeraryo wiye aŋwen me dwe me abicel. I mwaka me aryo me loc pa kabaka Dario, i nino dwe pyeraryo wiye acel me dwe me abiro, lok pa Rwot obino bot lanebi Aggai ni, “Tit bot Jerubabel wod pa Cealtiel, laloc me Juda, ki bot Yocwa wod pa Yekojadak, ajwaka madit, ki bot jo ducu ma gudoŋ, kun iwacci, ‘Tye ŋat mo ma pud odoŋ i kinwu ma ceŋ oneno ot man ki deyone macon? Kombeddi wuneno tye niŋniŋ? Pe nen ki i waŋwu macalo gin ma konnye pe? Kadi kumeno, in Jerubabel, kombeddi myero ibed ki tekcwiny, man lok pa Rwot kikome; bed ki tekcwiny, in Yocwa, wod pa Yekojadak, ajwaka madit; ki wun jo ducu ma wubedo i lobo-ni, wubed ki tekcwiny, man lok pa Rwot kikome; wuti tic, pien atye kwedwu, man lok pa Rwot me mony kikome, macalo ceŋ acikke kwede kwedwu i kare ma wua ki i Ejipt, Cwiny mera bedo i kinwu; pe wulwor. Pien Rwot me mony owaco kuman ni, Odoŋ kare man ok keken, abiyeŋo polo ki lobo, nam ki ŋom mutwo, Dok abiyeŋo rok ducu, wek lonyo me rok ducu obin iye, ka doŋ abipoŋo ot man ki deyo, man Rwot me mony aye owaco. Ryal aye mera, jabu bene mera, man lok pa Rwot me many kikome. Deyo me ot man ma lacen bikato mukwoŋo; dok abimiyo kabedo man bedo ki kuc, man Rwot me mony aye owaco.’ ” I mwaka me aryo me loc pa Dario, i nino dwe pyeraryo wiye aŋwen me dwe me aboŋwen, lok pa Rwot obino, kun owok ki i dog lanebi Aggai, ma wacci, “Rwot me mony owaco kuman ni, Peny ajwagi wek gugam peny man, ‘Ka ce dano mo otiŋo riŋo ma gityero gilonyo odoko maleŋ i dog boŋone, ce dog boŋone-nu ogudo kwon, nyo dek, nyo koŋo vino, nyo moo, nyo kit cam mo keken, ci lonyo cam meno doko leŋ?’ ” Ajwagi gugamo ni, “Pe kumene.” Aggai dok openyo ni, “Ka ce dano mo ma kome ki keni pi gudo kom dano muto, ogudo gin mo i kin jami magi, gin bene doko gin ma keni?” Ajwagi gudok iye ni, “Doko gin ma keni.” Aggai dok owacci, “Lok pa jo man ki lok pa rok ma tye i nyima tye kit meno, man lok pa Rwot kikome. Man bene mako tic ciŋgi ducu; dok gin ma gityero kunnu gin ma keni, Koŋ wutam pi gin ma bitimme cakke tin. Ma noŋo peya gidodo kidi i wi wadi i ot pa Rwot, yam kwowu obedo niŋniŋ? I kare meno ka nar ma obino i odur kal ka ma myero onoŋ iye adita pyeraryo, noŋo ma romo adita apar keken; ka ŋat ma obino i bur koŋo vino pi twomo opoko pyerabic, noŋo opoko pyeraryo keken. Yam apwodowu, abwaro camwu, amiyo pee ogoyo; ki tic ciŋwu ducu atimo kumeno; ento pe wumedo ki dwogo bota, man lok pa Rwot kikome. Koŋ wutam cakke tin, i nino dwe pyeraryo wiye aŋwen me dwe me aboŋwen cito kwede anyim. Dok wutam, nia i kare ma giketo te guti me ot pa Rwot, kodi pud tye i dero? Olok, oduro, okwer pomegranat peya ginyak? Cakke tin cito kwede anyim, abimiyowu gum.” Lok pa Rwot dok obino bot Aggai tyen me aryo i nino dwe pyeraryo wiye aŋwen ma wacci, “Tit bot Jerubabel, laloc me Juda, ni, Acok ka yeŋo polo ki lobo, abituro rok mapol; dok acok tyeko teko me ker pa lurok, abireto gadigadi kacel ki jo ma ŋweco kwedgi, aguragura ki wegigi, ŋat acel acel bipoto piny ma noŋo pala lucwan pa lawote aye oneko. I nino meno, Rwot me mony ma owaco, abitero in Jerubabel, wod pa. Cealtiel, laticca, Rwot ma owaco, abiloki wek ibed macalo agit ciŋ ma gidiyo me lanyut, pien doŋ atyeko yeri, man lok pa Rwot me mony kikome.” Lok pa Rwot yam obino bot lanebi Jekaria wod pa Berekia, wod pa Iddo, i dwe me aboro, i mwaka me loc pa Dario me aryone, kun wacci, “Kiniga yam omako Rwot matek i kom kwariwu, Pienno in iwac botgi ni, Rwot me mony owaco kuman ni, Wudwog bota, an bene abidwogo botwu, man lok pa Rwot me mony kikome, Pe wubed macalo kwariwu ma yam lunebi macon gibedo ka tito botgi lok ni, Rwot me mony owaco kuman ni, ‘Wuwek kit mewu maraco ki tim mewu maraco ducu.’ Ento yam pe gumedo ki winyone, pe guketo cwinygi i koma, man lok pa Rwot kikome, Kwariwu kombeddi gitye wa kwene mono? Ki lunebi gibedo kwo nakanaka ce? Ento lokka ki cikka ma con aciko ki luticca ma lunebi pe ceŋ gumako kwarowu i waŋayo? Omiyo gin guŋut kun giwacci, Rwot me mony doŋ otiyo kit ma yam en oyubo kwede pi timowa muporo kitwa ki tim mewa.” Lok pa Rwot con obino bot Jekaria wod pa Berekia, wod pa Iddo, i kom nino dwe pyeraryo wiye aŋwen, i dwe me apar wiye acel, ma gilwoŋo ni Cebat, i mwaka pa Dario me aryone Jekaria ocako wacci, “Aneno dano mo i dyewor, ma oyito wi aguragura makwar, ocuŋ kwede i kin yadi ma ŋwecgi kur ma gitye i luŋ; ki tuŋ yo ŋeye onoŋo tye iye lwak aguragura makwar ki ma opilopilo, ki matarre, Acako penyo ni, ‘Magi gin aŋo, ladit?’ Ci lumalaika ma onoŋo obedo ka lok kweda-ni owacca ni, ‘Abinyuto kit ma gitye kwede boti.’ Dano ma onoŋo ocuŋ i kin yadi ma ŋwecgi kur-ri ocako gamo ni, ‘Magi gin aye lwak jo ma Rwot oorogi ka wirre pi loŋo i lobo ducu.’ Gin gucako dwoko lok bot lamalaika ma onoŋo ocuŋ i kin yadi ma ŋwecgi kur kun giwacci, ‘Doŋ watyeko wirre ka loŋo i lobo ducu; nen, i lobo ducu tye mukwe gire mot.’ Lacen lamalaika pa Rwot dok openyo ni, ‘Ai Rwot me mony, ibitero kare ma rom mene ma noŋo peya itimo kica ki Jerucalem, kacel ki gaŋi ma i Juda-gu, ma in doŋ ikeco i komgi pi mwaka pyerabiro kulu-ni?’ Rwot odok iye ki lamalaika mubedo ka lok kweda-ni, kun wacce lok mabeco me kica bene, Omiyo lamalaika mubedo ka lok kweda-ni owacca ni, ‘Tit lok man kun idaŋŋe matek ni, Rwot me mony owaco kuman ni, Nyeko tye ka maka matek ma kato ducu pi Jerucalem ki pi Cion. Kiniga maka matek i kom rok mapol ma gitye ki kuc; pien i kare ma kiniga maka iye manoknok-ki, en aye dok kare ma gin bene gimedo iye lwak can mapol. Pienno omiyo Rwot owacci, An doŋ atyeko dwogo cen i Jerucalem ki kica madwoŋ, gibigero iye oda, man lok pa Kwot me mony kikome, doŋ gibicako ryeyo tol me pimo Jerucalem. Dok imed daŋŋe ki lok man ni, Rwot me mony owaco kuman ni, Gaŋina ducu gin mabeco bidurre iye lipim doki, ci Rwot dok bikweyo cwiny Cion ka dok biyero Jerucalem aye.’ ” Atiŋo waŋa malo ci aneno tuŋ lee aŋwen! Ci apenyo lamalaika ma obedo ka lok kweda-ni ni, “Magi kit gin aŋo?” En odokka iye ni, “Magi gin aye tuŋ lee ma gukeyo i Juda woko atata, ki Icrael ki Jerucalem bene.” Rwot dok onyutta lutet aŋwen, Acako penyo ni, “Jo-nu gubino ka timo kit gin aŋo kaa?” En ogamo ni, “Magi gin aye tuŋ lee ma yam gukeyo i Juda woko atata-ni, omiyo ŋatti mo pe oette ka tiŋo iye wiye. Jo-nu gubino pi miyogi lworo, ki pi reto tuŋ rok ducu woko piny ma yam gutiŋo tuŋgi me twomo ki lobo Juda wek iye oket woko atata.” Atiŋo waŋa malo ci aneno dano mo ma tye ki tol lapim piny i ci;ŋe! Dok apenye ni, “In mono ibicito wa kwene kaa?” En owacca ni, “Acito ka pimo Jerucalem, wek anen kit ma lacce tye kwede ki kit ma borre tye kwede.” Lamalaika ma obedo ka lok kweda-ni ocako bino, ki lamalaika mukene bene obino ka rwatte kwede. Ci owaco bot lawote ni, “Rin icit wa bot awobi ca iciwacce ni, ‘Jerucalem bibedo apero laboŋo cel murume, pi lwak dano ki lim makwo madwoŋ ma bibedo iye. Pien an kikoma aye abibedo macalo cel gogo me mac ma orumogi, an aye abibedo deyone ma nen ki i iye kunnu, man lok pa Rwot kikome.’ ” Wun jo-ni! Wun jo-ni! Wuriŋ, wua woko ki i lobo ma yo tuŋ acam, man lok pa Rwot kikome, pien con aketo iwu woko atata macalo yamo aŋwen me polo, man lok pa Rwot kikome. Wun jo-ni, wulwi, wuriŋ woko wa i Cion, wun jo ma wubedo i Babilon. Pien ŋat ma ogudo komwu noŋo ogudo pal cwiny Rwot me mony, I kare ma en Won Deyo oora bot lurok mapatpat ma yam guyakowu, en Rwot me mony owaco kuman ni, “Koŋ wunen ba, abiyeŋo ciŋa i wigi ci gin lurok gibidoko ginayaka pa jo ma yam koŋ gubedo opii-gi. Tim macalo meno bimiyo wuŋeyo ni, Rwot me mony aye muora. Doŋ wuwer ki yomcwiny, wun jo Cion; pien nen an doŋ abino ka bedo i dyewu, man lok pa Rwot kikome. Rok mapol gibiribbe i kom Rwot i nino meno, ci doŋ gibidoko jona. An bene abibedo i dyewu, dok wubineyo ni, Rwot me mony aye muora botwu. Rwot bigamo Juda macalo dul ma gipokke ki i lobo maleŋ; en dok biyero Jerucalem aye.” Wuliŋ mot i nyim Rwot wun jo ducu, pien en doŋ oco woko ki i kabedone maleŋ. En dok onyutta Yocwa, ajwaka madit, ma onoŋo ocuŋ i nyim lamalaika pa Rwot, ma onoŋo Catan bene ocuŋ tuŋ ciŋe malacuc ka doto eno Rwot ocako waco ki Catan ni, “Rwot myero ojuki, in Catan! Rwot ma ceŋ oyero Jerucalem myero ojuki! Man pe en aye dog yen ma gikwanyo woko ki i mac?” Yocwa onoŋo ocuŋ i nyim lamalaika kun oruko boŋŋi ma cilo omakogi marac. Lamalaika ocako waco ki jo ma ocuŋ i nyime ni, “Wuluny boŋŋi ma cilo omakogi marac-ci woko ki i kome.” Ka dok owaco bote ni, “Nen, ka doŋ atyeko kwanyo balli woko ki i komi, doŋ abiruki ki ginaruka me deyo.” Dok owaco ni, “Wek gidwal kitambara maleŋ i wiye.” Ci gucako dwalo kitambara maleŋ i wiye, ka dok giruke ki boŋŋi, ma kun lamalaika pa Rwot ocuŋ ka ŋete. Lamalaika pa Rwot dok ociko Yocwa matek kun waco ni, “Rwot me mony owaco kuman ni, Ka ce ibilubo yona, kun igwoko lok ma aciko, ci ibiloyo oda, kun igwoko dyekalla bene, dok abimiyi twer me bino wa bota i kin jo ma gucuŋ kanynyi. Winy ba, Yocwa, ajwaka madit, in kacel ki luremi ma gibedo piny i nyimi, pien wun aye lanyut ma cimo gin ma bitimme i anyim. Nen, an doŋ abikelo laticca, en aye Jaŋ Yat. Pien nen, kidi ma aketo i nyim Yocwa, kidi acel ma tye ki twoke abiro, en aye abigoro coc mere i kome, man lok pa Rwot me mony kikome, dok abikwanyo alii me bal me lobo-ni woko i nino acel keken. I nino meno, ŋat acel acel ma i kinwu bilwoŋo lawote wek obin ginywak bedo kwede i te olokke ki i te odurone, man lok pa Rwot kikome.” Lamalaika ma ceŋ obedo ka lok kweda dok obino bota, ocako co na woko, macalo gicoyo ki dano ki i waŋ nino. Ocako penya ni, “Ineno gin aŋo?’ Ci agamo doge ni, “Aneno okar mac tara ma kome ducu obedo jabu ki bakul i i wiye, ki tara abiro gicibo i wiye, kun tara acel acel ma gicibo i wiye-ni tye ki doge abiro. Yadi jeituni aryo tye i ŋete, acel tuŋ malacuc me bakuli, ki acel mukene tuŋ acam.” Cutcut apenyo lamalaika ma obedo ka lok kweda ni, “Magi gin aŋo kaa, ladit?” Ci lamalaika ma obedo ka lok kweda odokka iye ni, “In pe iŋeyo jami magi?” An dok agamo bote ni, “Pe aŋeyo gira, ladit.” En dok ogamo doga ni, “Man en aye lok ma Rwot owaco bot Jerubabel, ni, ‘Pe ki twer kadi ki teko, ento pi Cwiny mera, man lok pa Rwot me mony k ikome. In gin aŋo kaa, in got madit?’ Ibidoko bar i nyim Jerubabel. En bikelo got me wi ot kun dano giwo ni, ‘Gum obed bote, gum obed bote!’’’. Lok pa Rwot dok omedde ki bino bota kun wacca ni, “Cin Jerubabel doŋ oketo guti me ot man; cine bene aye bityekone, Man bimiyo wuŋeyo ni Rwot me mony en aye muora botwu. Pien ŋat ma cayo nino me lok man ok, bibedo ki yomcwiny, dok bene bineno birigi i ciŋ Jerubabel. Magi abiro-ni gin aye waŋ Rwot ma gibedo ka ŋiyo lobo ducu.” Anwoyo penye dok ni, “Ento yadi jeituni ma gitye tuŋ acuc ki tuŋ acam-mi ca kono gubedo gin aŋo?” Ka dok apenye tyen me aryone ni, “Jaŋ yadi jeituni aryo-ni kono gubedo gin aŋo, ma tye i ŋet paipo aryo me jabu ma moo tye ka mol ki i igi-nu?” Ka dok en openya ni, “Pe iŋeyo jami magi?” An adokke iye ni, “Pe aŋeyo, ladit.” Ka en otitta ni, “Magi jo aryo ma gityeko wirogi ki moo ma gicuŋ i ŋet Rwot me lobo ducu.” Ka atiŋo waŋa malo, ci aneno buk adola ma twarre! Lamalaika openya ni, “Ineno gin aŋo?” An adokke iye ni, “Aneno buk adola ma twarre; borre romo futi pyeradek, ki lacce romo futi apar wiye abic.” Ka lamalaika dok owacca ni, “Man en lok me ceno dano, ma woto i lobo ducu, pien gicoyo tuŋ cel ni jo ducu ma kwalo kwo gibiryemogi woko cakke tin, dok gicoyo i tuŋ mukene ni, jo ducu ma kwoŋo kwoŋ me go ba gibiryemogi woko bene cakke tin, Doŋ abicwalo buk man me ceno dano me wot woko, wek ocidony i ot pa lakwo ki i ot pa ŋat ma kwoŋo kwoŋ i nyiŋa go ba goba; bibedo i ode kun tyeko woko, kadi wa bao ki godi ducu ma gigero kwede.” Man lok pa Rwot me mony kikome. Lacen lamalaika ma obedo ka lok kweda obino owacca-ni, “Tiŋ waŋi malo koŋ inen gin ma tye ka kato woko-ni.” Ka apenye ni, “Man kono gin aŋo?” En odokka iye ni, “Man aduku ma kato woko.” Ka dok owacci, “Man bal ma tye i lobo-ni ducu.” Nen, gitiŋo nyonyo racac mapek ma onoŋo giumo ki doge, ci aneno dako mo onoŋo tye obedo i aduku! Lamalaika owaco ni, “Man aye tim marac.” Odiyo wi dako odwoko i aduku, dok odiro nyonyo mapek ca ocego ki doge woko. Atiŋo waŋa dok malo, ci aneno mon aryo ma gitye ka twarre ma gibino kun yamo tye i bwomgi; onoŋo gitye ki bwomgi macalo bwom acebe. Gucako tiŋo aduku gitero i kin lobo ki polo. Ka dok apenyo lamalaika ma tye ka lok kweda ni, “Gitero aduku-ni kono kwene?” Lamalaika odokka iye ni, “I lobo me Cinar, wek giger ot pire; ka man doŋ gigero otum, gibicibo aduku i kabedo ma giyubo pire kunnu.” Dok atiŋo waŋa malo, ci aneno gadigadi lweny aŋwen ma gua ki i kin godi aryo; godine onoŋo gubedo godi me mola. Gadigadi mukwoŋo tye ki aguragura makwar, me aryone tye ki aguragura macol, me adekke tye ki aguragura matarre, ki gadigadi me aŋwenne tye ki aguragura ma ɣubedo abacabac. Apenyo lamalaika ma obedo ka lok kweda ni, “Magi gin aŋo, ladit?” Lamalaika odokka iye ni, “Magi gubecito i yamo aŋwen me polo, kun onoŋo gukwoŋo cuŋ i nyim Rwot me lobo ducu. Gadigadi ma tye ki aguragura macol-li woto dok mere kemo lobo ma tye tye yo acam, aguragura matarre gicito megi gidok yo tun potoceŋ, ki ma gubedo abacabac-ci giwoto gidok tuŋ lobo ma tye yo tuŋ acuc.” I kare ‘ma aguragura gikatti woko, gurune oyotoyot me cako wotgi me loŋo lobo. Ka doŋ ocikogi ni, “Citu, wuloŋ lobo.” Gin bene guwoto guloŋo lobo. En olwoŋa ki dwan maloŋo owacca ni, “Nen gin jo ma gudok i lobo ma tye yo tuu acam gukweyo Cwinya ki i lobo ma tye yo tuŋ acam.” Lok pa Rwot dok obino bota ni, “Kwany jo magi ki i kin jo ma yam giterogi i opii, Keldai, Tobiya ki Jedaya, ma doŋ gudwogo ki i Babilon; wot kacel kwedgi nio wa i ot pa Yocia wod pa Jepania, Gam ryal ki jabu ki botgi, ci iti kwede lalukana me ker, Rwak lalukana i wi Yocwa wod pa Yekojadak, ajwaka madit. Dok ititte ni, ‘Rwot me mony owaco kuman ni. “Nen dano ma nyiŋe Jaŋ Yat ene, En bidoŋo i kabedo ka ma en tye iye, dok en bigero ot pa Rwot. En kikome aye bigero ot pa Rwot; en bibedo ki deyo ma porre pi kabaka, bibedo i wi komkerre, ka bicako loyo piny. Ajwaka bicuŋ i ŋet komker mere, niaŋŋe ma kelo kuc bibedo tye i kingi gin aryo.” Lalukana meno bibedo i ot pa Rwot macalo gin me poyo wic bot Keldai, Tobiya, Jedaya ki Yocia wod pa Jepania. “Jo ma tye ka mabor gibibino, gibikonyo jo ma gigero ot pa Rwot; meno bimiyo wuŋeyo ni Rwot me mony muora botwu. Man bitimme ka ce wubiketo Lok pa Rwot obino bot Jekaria i mwaka me loc pa kabaka Dario me aŋwenne, i nino dwe aŋwen, me dwe me aboŋwen ma gilwoŋo Kiclev. Jo me Betel onoŋo ceŋ guoro Carejer ki Regem-melek kacel ki lwakgi wek gucit ka lego gum ki bot Rwot dok bene me penyo ajwagi me or pa Rwot me mony kacel ki lunebi ni, “Myero abed ka koko, dok ari kec i dwe me abic kit macalo yam abedo ka timo kwede pi lwak mwaka mapol-li?” Lok pa Rwot me mony obino bota ni, “Peny jo ducu me lobo kacel ki lunebi ni, I kare ma yam wubedo ka ri kec ki ka koko i dwe me abic ki me abiro, pi mwaka pyerabiro ma okato-ni, yam onoŋo wubedo ka ri kec pira? I kare ma wutye ka cam ki ka mat, pe noŋo wucamo dok bene wumato piwu kenwu? I kare ma jo gibedo i Jerucalem, kun gibedo ki kuc, kacel ki i gaŋi ma gurume ducu, ma jo gibedo wa i Negeb bene ki i pwor-gu, pe meno aye lok ma Rwot otito ki i dog lunebi me kare macon?” Lok pa Rwot dok obino bot Jekaria ni, “Rwot me mony owaco kuman ni, Wuŋol kop kakare, wutim ber ki kica ŋat man bot ominne, pe wubur da to, latin kic, labedo nyo lacan; pe myero ŋatti i kinwu oyub lok marac ki i cwinye i kom ominne.” Ento gin gukwero winyo, kun gicerre acera;: ma guloko ŋegi, gudiŋo itgi woko ni wek pe giwiny, Jo gumiyo cwinygi odoko tek calo got wek pe giwiny cik ki lok pa Rwot me mony ma yam ocwalo ki Cwiny mere Maleŋ ki i dog lunebi me kare macon. Omiyo kiniga madit mada obino ma oa ki bot Rwot me mony, “Kit macalo alwoŋogi gin pe guwinya, i kare ma gin bene gilwoŋa, ci an bene akwero winyogi,” man lok pa Rwot me mony kikome. “Aketogi woko ki yamo lapiru ma oterogi i kin rok ducu ma yam pe giŋeyo. Kit meno omiyo lobo ma guweko oballe woko, pe tye ŋatti mo ma bedo ka wirre iye, omiyo lobo ma yomo cwiny dano odoŋ obur.” Lok pa Rwot me mony obino bota, kun wacci, “An nyeko omaka pi Cion ki twon nyeko mo madwoŋ, an nyeko omaka pire ki twon akemo madwoŋ-gu. Rwot owaco kuman ni, Abidwogo wa i Cion, ci abibedo wa i dye Jerucalem, pienno Jerucalem gibilwoŋo ni gaŋ me agena, got pa Rwot me mony, got maleŋ. Rwot me mony owaco kuman ni, Co muti ki mon muti dok gibibedo piny i dye Jerucalem, ki jo muti gibikomo ki tal ma ŋat acel acel omako i ciŋe, Yo ducu ma i dye Jerucalem bipoŋ ki awobe ki anyira ma gituko i dye yo. Rwot me mony owaco kuman ni, Ka ce lokke obedo me aura i nyim jo ma gudoŋ i kare man, myero lokke obed me aura wa i nyima bene? Man lok pa Rwot me mony kikome, Rwot me mony owaco kuman ni, Nen ba, an abilaro jona ki i lobo ma yo tuŋ wokceŋ ki i lobo ma yo tuŋ potoceŋ bene; ci abikelogi gibibedo wa i dye Jerucalem; gin gibibedo jona ki an bene abibedo Lubaŋa megi, me agena ki muporre.” Rwot me mony owaco kuman ni, “Jiŋ badwu obed matek, wun jo ma i kare man wubedo ka winyo lok ma lunebi gitye ka waco, nia wa i kare ma gicako keto kwede guti me ot pa Rwot me mony, wek gicak gero iye ot mere. I kare ma con ca yam pe giculo mucara ki dano mo, wa pi lee bene pe giculo, dok bene onoŋo kuc pe tye bot dano mo me kato ki me dwogo, pi lumerok; pien onoŋo amiyo ŋat acel acel mon ki lawote. Ento i kare man pe doŋ abitimo jo ma gudoŋ-ŋi kit ma yam atimo i kom jo ma con ca, man lok pa Rwot me mony kikome. An abimiyo kuc romo kabedo ducu, olok binyako nyige, lobo biceko cam, ki polo bene bimiyo toyo luk i kome; abimiyo jo ma gudoŋ-ŋi camo jami magi ducu. Wun jo me ot pa Juda ki me ot pa Icrael, yam nyinwu odoko me lacen dano i kin rok ducu; kombeddi doŋ abilarowu, wek wubed lukel gum i kom jo mukene bene. Pe wulwor, wujiŋ badwu obed matek.” Pien Rwot me mony owaco kuman ni, “Kit macalo yam doŋ ayubbe me timowu marac, nia wa i kare ca ma kwarowu gumiyo akemo omaka, akayo iye laka, Rwot me mony ma owaco, kit meno i kare man bene dok ayubbe me timo Jerucalem maber ki ot pa Juda bene; pe doŋ wulwor. Man gin ma myero wutim: ŋat man olok lok me ada bot lawote; wuŋol kop me ada i dog gaŋwu, ma kelo kuc i kin dano; pe myero ŋat mo i kinwu oyub lok marac ki i cwinye i kom ominne; pe wumar kwoŋo kwoŋ me goba, pien lok meno ducu cwinya dag matek, man lok pa Rwot kikome.” Lok pa Rwot me mony obino bota, kun waco ni, “Ri kec me dwe me aŋwen, ki ri kec me dwe me abic, ki ri kec me dwe me abiro, ki ri kec me dwe me apar, gibibedo nino madito me yomcwiny ki kwe ic pi ot pa Juda, ki me karama me yomcwiny; pienno wumar ada ki kuc. “Rwot me mony owaco ku man ni, Rok mapatpat pud gibimedde ki bino, wa jo ma gibedo i gaŋi mapol-gu; jo ma gibedo i gaŋ acel gibiwot i gaŋ mukene, kun giwacci, ‘Wubin wacitu ka lego gum bot Rwot, waciyenyu Rwot me mony; an doŋ abecito.’ Rok mapol ki rok matego gibibino i Jerucalem ka yenyo Rwot me mony ki me lego kica bote. Rwot me mony owaco ku man ni, I kare meno jo apar ma gua ki i lwak rok ma lebgi patpat gibimako dog kanyi pa Lajudaya, kun giwacci, ‘Wek wanywak wot kwedi, pien wawinyo ni Lubaŋa tye kwedwu.’ ” Lok ma pire tek Lok pa Rwot opoto i lobo Kadrak, ci bipye i kom Damaciko, Pien gaŋi ma i Aram gitye i ciŋ Rwot, kacel ki kaka me Icrael ducu mere; Kamat bene ma tye i waŋ apokki lobone, Turo ki Cidon bene, kadi bed giryek mada. Turo ogero celle pire kene gire, oguro ryal oyido malo calo kweyo, ki jabu bene macalo daba ma i gudo. Ento, nen ba, Rwot biyako jamine woko, bicoro lonyo mere ducu i nam, en Turo kikome gibiwaŋo ki mac. Acikelon bineno, dok lworo bimake; Gaja bene bineno, ci biminne i arem; Ekron bene kit meno, pien lewic bi make i genne. Kabaka birwenyo woko ki i Gaja; Acikelon bidoŋ noŋo laboŋo dano mo. Likwayo pa lurok ata gibibedo i Acidod; abigiko wakke pa lobo Piliciti. Abikwanyo remo mere woko ki i doge, cam me gipyeda ma en camo abikwanyo woko ki i kin lake; gibidoko jo ma gudoŋ pi Lubaŋawa; gibidoko macalo kaka ma tye i Juda, Ekron bidoko calo jo Jebuc. Abiguro kemana i ŋet oda macalo lakur-piny, wek ŋat mo pe obed ka kato ki i ŋete; ŋat mo ma burogi pe dok bidonyo i kingi, pien kombeddi an kikoma aye aneno ki waŋa. Wubed ki yomcwiny madwoŋ, wun jo Cion! wugo kijira, wun jo Jerucalem! Wunen ka kabakawu bino botwu; ki waya me loyo lweny, kun obedo wi kana ki mwolo, i wi latin kana, Abijwero gadigadi lweny woko ki i Epraim, ki aguragura lweny ki i Jerucalem, atum me lweny ducu gibiturogi woko. En aye bitito lok me kuc bot rok ducu; kerre biloyo piny nia i nam tuŋcel nio i nam mukene, kun a ki i kulu Euprate o wa i agikki lobo. Ki tuŋ boti bene, an aketo remo me gicikke wan kwedi, abiwoto joni ma giterogi i opii ki i bur ma pii pe iye. Wudok cen wa i cel gogowu, wun lumabuc ma tye ki gen, tin atuco atir ni abiculo waŋe kiryo. Pien doŋ atyeko gomo Juda macalo atum; aketo Epraim odoko aterone. Abitugo kin awobewu wun jo Cion, i kom awobewu, wun jo Grik, abitinowu macalo oteka lweny ma mako pala lucwan. I kare meno Rwot binen lamalo kawigi, aterone biwil macalo lutkot, ci Rwot Lubaŋa bikuto tum matek, biwot ki yamo lapiru ma tuŋ acuc. Rwot me monyaye bigwokogi, gibiteŋo lataŋdiyo ma gicelo woko, gibinyono lacelone woko piny; gibimato remogi macalo koŋo vino, ci gibiyeŋ macalo becen mupoŋ, calo remo ma gicoro i gul keno tyer, I nino meno Rwot Lubaŋa bilarogi macalo romine, pien gin jone; macalo litino kidi me wel ma ryeny i kom lalukana gibibedo ka ryeny i lobone kit meno. Berre ki mwonyane dit ma rom mene! Kom awobe bibedo bulubulu pi kal agwe, ki kom anyira bibedo bulub Wugat kot ki bot Rwot i potokot, ka wugat bote i dye cwir, wek oa ki bot Rwot ma miyo pol mapek, ma miyo kot ma ŋido i lobo, ka dok miyo dek twi i poto pa dano ducu, Pien cal jogi-gu giloko lok ma konnye pe, ki lutyet gineno gin ma bwolo dano, jo ma leko gitito lek me goba, gikweyo cwiny dano nono. Omiyo lwak gilak ata macalo romi; gineno can pien lakwatgi pe, “Kinigana olyetto twatwal i kom lukwat, abiketo can i kom lutel-wic; pien Rwot me mony paro pi romine, ma en aye ot pa Juda, bilokogi gidoko calo aguragurane ma wakke i lweny. “Got me twoke bia i kingi, teke me guro kema bene bia ikomgi, atum me lweny bene bia i komgi, dok luloc ducu bene gibia i komgi. Gin ducu gibibedo macalo oteka lweny, kun ginyono lukwor piny i daba ma i dye yo; gibilweny pien Rwot tye kwedgi, gibimiyo lewic mako jo ma giriŋo ki aguragura. “Abimedo tek bot jo me ot pa Juda, dok abilaro ot pa Yucepu. Abidwokogi cen pien kica omaka i komgi, gibibedo macalo jo ma yam pe akwerogi, pien an a Rwot Lubaŋagi, abigamo doggi. Erpaim bidoko macalo twon oteka lweny, cwinygi bibedo yom calo lumat koŋo vino. Litinogi binenone, ci yomo cwinygi, gibibedo ki yomcwiny i kom Rwot. “Abilwoŋogi ki lwiyo kun acokogi kacel, pien doŋ atyeko kokogi, gibibedo mapol kit ma ‘yam con ca. Kadi bed akeyogi woko i kin lurok, ento gibipo pira ki i lobo ducu ma tye ka mabor, gin kacel ki litinogi gibibedo kwo, dok gibidwogo. Abidwokogi paco ki i lobo Ejipt, dok abicokogi woko ki i Aciria, abikelogi wa i lobo me Gilead ki Lebanon, nio waŋ ma kabedo biremogi woko. Gibiŋolo ki i dye nam me Ejipt, gibigoyo biamwonyi ma tagge i nam, kut ducu ma i kulu Nail bitwo woko, Gibijuko wakke pa jo Aciria woko, odoo ker me Ejipt birwenyo. Abimiyo gibedo matek i Rwot, gibinyatte ki wot i nyiŋe,” man lok pa Rwot kikome. Yab doggolani, in Lebanon, wek mac owaŋ yadi cedami woko! Kok ba, in ciprec, pien yat cedar doŋ gireto woko piny, pien yadi mabecone doŋ guballe woko! Wukok ba, wun kworo me Bacan, pien buŋa muculle doŋ gijwero woko! Koŋ doŋ iwiny koko pa lukwat, pien deyogi doŋ peke! Koŋ iwiny mor pa labwor-gu, pien yadi mukadde i dog Jordan doŋ pe! Rwot Lubaŋana owaco kuman ni, “In myero idok lakwat romi ma gipitogi me aneka. Jo ma giwilo romi ginekogi ento pe giketo can mo i komgi, Jo ma gicato romi giwacci, ‘Gipwo Rwot pien doŋ adoko lalonyo’; wa lukwatgi bene kica pe makogi i komgi. Pien kica dok pe bimaka i kom jo ma gibedo i lobo-ni, man lok pa Rwot kikome. Nen, abimiyo ŋat acel acel poto i ciŋ lakwatte, dok ŋat acel acel bipoto i ciŋ kabakane; gibibalo lobo, giweko doŋ noŋo, pe abilaro dano mo ki i ciŋgi.” Kit meno adoko lakwat pi lukwat romi ma giwilogi me aneka-ni. Akwanyo odoo aryo, ci acako nyiŋ acel ni Kica, ki mukene acako nyiŋe Ribbe, Ci acako kwayo romi, Yam aneko lukwat meno adek-ki i dwe acel. Ento onoŋo pe doŋ atwero diyo cwinya i komgi, ki gin bene igi doŋ okwera woko. Lacen awaco ni, “An gira pe abibedo lakwatwu. Romi ma myero oto, wek oto; romi ma myero gineki, wek gineki, ka wek mudoŋŋe, ŋat acel acel omwod riŋo kom lawote.” Ka akwanyo odoona ma nyiŋe Kica, ci aturo woko, kun aturo kwede gicikke ma nene acikke kwede ki rok ducu, Kit meno gicikke-nu gituro woko i nino meno; lucat romi ma gubedo ka nena, guŋeyo ni meno obedo lok pa Rwot. Ka doŋ awaccigi ni, “Ka ce wuneno ni ber, wumiya mucarana; ka kono pe, wuwek obedi.” Ci gupimo cekel pyeradek me ryal me mucarana. Rwot ocika ni, “Bol i ot me kano lim,” en lim ma gin gucula kwede i wel maber twatwal-li. Kit meno atero cekel pyeradek-ku abolo ‘i ot kano lim ma i ot pa Rwot. Lacenne dok aturo odoo me aryone, ma’ nyiŋe Ribbe-ni, kun bene aturo kwede ribbe ma tye i kin Juda ki Icrael. Rwot dok ocika ni, “Dok igam jami tic pa lakwat ina konnye pe-ni. Pien nen, abeyero lakwat mo ki i lobo-ni ma pe biparo pi romi ma gito gitum woko-ni, pe bene biyenyo romi ma rwenyo, dok pe bicano romi ma olimo ret, kadi pita gin ma komgi yot, ento en bimwodo riŋo pa romi ma ocwe-ne, kun yeco riŋo wa i oboŋ tyengi ducu. “Lakwatta ma konnye pe bineno can, ma weko romi mere ata! Pala lucwan myero oton bade, dok ocob waŋe malacuc! Wek bade otal woko matwal, ki waŋe malacuc bene myero oto woko libok!” Lok ma pire tek. Man lok pa Rwot i kom Icrael: Rwot ma cen oryeyo polo, dok oketo guti me te lobo, ma oketo cwiny dano i i dano, owaco kuman ni, “Nen acok miyo Jerucalem doko kikopo ma mero rok ducu ma tye i ŋete, I Juda bene lukwor gibirumo Jerucalem, I nino meno abimiyo Jerucalem bedo got mapek twatwal bot rok ducu; jo ducu ma gibitiŋo gibilimo ret marac. Rok ducu me wi lobo biribbe kacel me lweny i kome. I nino-nu abibano kom aguragura ducu, ki jo ma riŋo kwedgi gibidoko lupoya. Ento abiyabo waŋa i kom ot pa Juda i kare ma abicoro waŋ aguragura pa lurok ducu. Ka doŋ kaka me Juda bilok i cwinygi kekengi ni, ‘Jo ma gibedo i Jerucalem gitye ki tek ma oa bot Rwot me mony ma Lubaŋagi.’ “I nino meno abimiyo kaka me Juda bedo macalo otako ma mac tye ka lyel iye i dye yen, nyo macalo mac raa ma lyel i kin ren kal. Gibiwaŋo rok ducu ma tye i ŋetgi, ma tye tuŋ lacuc ki tuŋ lacam, ento Jerucalem pud bidoŋ kakare kun jo mere gibedo iye. “Rwot bikwoŋo miyo loc i kema pa Juda, wek deyo me ot pa Daudi ki deyo pa jo ma gibedo i Jerucalem pe obed dit makato pa Juda, I nino meno Rwot bigeno jo ma bedo i Jerucalem ki kwot, mi yo dano magoro i kingi bibedo calo Daudi, ki ot pa Daudi bibedo calo Lubaŋa, macalo lamalaika pa Rwot ma telo nyimgi, Doki nino meno abiketo tek me jwero rok ducu ma gibino ka lweny i kom Jerucalem. “Abionyo cwiny me kica ki cwiny me bako dog i kom ot pa Daudi ki i kom jo ma bedo i Jerucalem, wek ka gineno ŋat ma gicobo, ci gikum pire, macalo ŋat ma kumo pi latinne acel keken ma en onywalo, kun kok matek macalo dano ma koko latin kayo. I nino meno kumo bibedo dit twatwal i Jerucalem ma rom ki kumo pi Adad-rimmon i bar me Megido. Lobo bikumo, kun jo me doggola acel acel kumo pigi kengi; jo me ot pa Daudi pat kun noŋo mongi bene kumo pat; jo me ot pa Natan pat kun mongi bene kumo pat; jo me ot pa Levi pat kun mongi bene kumo pat; jo me doggola pa Cimei pat kun mongi bene kumo pat. Ki jo ducu me doggola mukene ma gudoŋ, acel acel bikumo pigi kengi, kun mongi bene gikumo kengi pat. “I nino meno gibituco waŋ it pi jo me ot pa Daudi kacel ki pi jo ma gibedo i Jerucalem, wek gilwok bal ki keni ducu woko ki i komgi. “I nino meno, man lok pa Rwot me mony kikome, abiŋolo nyiŋ cal jogi ducu woko ki i lobo, wek wi dano pe dokopo i komgi; dok bene abikwanyo lunebi kacel ki cen maraco woko ki i lobo. Ka ce ŋat mo pud tito lok macalo lanebi, ci wonne ki minne ma gunywale gibiwacce ni, ‘Pe ibibedo kwo, pien iloko lok me goba i nyiŋ Rwot’; ci wonne ki minnema gunywale gibicobe woko pil ka ce en bitito lok macalo lanebi. I nino meno lewic bimako lanebi acel acel pi ginanyutane ma en tito pire macalo lanebi. En pe biruko boŋo ma obedo yer yer me bwolo jo, ento en biwaco ni, ‘An gira pe lanebi, an abedo lapur poto, pien poto man obedo mera ocakke wa ka tinona.’ Ka ŋat mo openye ni, “Lwak bur ma tye i ŋeyi-ni kono, gin aŋo mutimo?” En bidok iye ni, ‘meno ducu ret me waŋ odoo ma gigoya kwede ki i ot pa lurema.’ ” “In pala lucwan, co woko lweny i kom lakwatta i kom dano ma ocuŋ ka ŋeta,” man Rwot me mony aye owaco. Go lakwat, wek romi guket woko ata. Abicwalo ciŋa wa i kom jo matinone. I lobo man ducu, man Rwot aye owaco, dul jo aryo me adek gibinekogi woko, acel me adekke aye bidoŋ makwo. Dul man me acel me adek abiketo imac, abiliyo kit ma dano liyo ki ryal, abitemogi kit ma dano temo ki jabu. Gibilwoŋo nyiŋa, ci abigamo doggi. Abiwacci, ‘Gin aye jo mera’; gin gibigamo ni, ‘Rwot en aye Lub Nen ba, nino pa Rwot tye obebino, ma jami ma onoŋo giyako ki botwu gibipokogi woko i kinwu. Pien abicoko rok ducu kacel ka lweny i kom Jerucalem. Gibimayo gaŋ woko, gibiyako odi, gibimako mon gibuto kwedgi tektek, nucu jo ma i gaŋ gibiterogi woko i opii, ento jo mukene ma gudoŋ pe gibiryemogi woko ki i gaŋ, Lacenne Rwot bicito ka lweny i kom rok meno ducu, kit ma lwenyo i nino me lweny. I nino meno tyene bicuŋ i wi got me Jeituni, ma tye i nyim Jerucalem tuŋ wokceŋ; got me Jeituni bibarre iye aryo, cakke ki tuŋ wokceŋ dok kwede tuŋ potoceŋ, kun weko luŋ malac twatwal. Nucu got tuŋ cel bidok tuŋ acam, ki nucune mukene-ni bidok tuŋ acuc. Luŋ me godina bitorre woko, pien luŋ me godi biwok ki i ŋete. Wubirino macalo ceŋ wuriŋo oyeŋyeŋ i kare pa kabaka Ujia me Juda. Lacenne Rwot Lubaŋawu bibino kacel ki jo mere maleŋ ducu. I nino meno ŋico ki koyo bibedo pe. Piny bibedo dyeceŋ nakanaka, Rwot ŋeyo man, pe dyeceŋ kadi dyewor, pien i otyeno ceŋ biryeny. I nino meno pii makwo bimol kun a ki i Jerucalem, nucune bimol cito i nam ma tye tuŋ wokceŋ ki nucune mukene mol cito i nam ma tye tuŋ potoceŋ; bibedo ka timme kumeno i oro kit macalo timme kwede i cwir. Rwot bidoko kabaka ma loyo lobo ducu. I nino meno Rwot bibedo acel kun nyiŋe bene bedo acel. Lobo ducu bidoko bar, cakke i Geba o wa i Rimmon ma tye i ŋet Jerucalem yo tuŋ acuc. Ento Jerucalem bidoŋ ma odyedde kakare cakke ki i dogcel pa Benjamin o kwede wa i dogcel macon, nio i dogcel ma i twok gaŋ, ki dok cakke i lubele ma gilwoŋo Kananel o wa i bur ka ma gibiyo iye pig olok pa kabaka. Dano bibedo iye, pien pe dok gibidyero me ajwera woko. Jerucalem doŋ dano bibedo iye ki kuc. Man bibedo two gemo ma Rwot bipwodo ki rok ducu ma ywayo mony i kom Jerucalem: riŋo komgi bitop ma noŋo pud gicuŋ ki tyengi, wangi bitop woko ki i opoko waŋgi, ki lebgi bitop ki i doggi. I nino meno, atiba madwoŋ ma oa ki bot Rwot bibaŋo komgi woko, man bimiyo ŋat acel acel bimako ciŋ lawote, ci doŋo lawote ki ciŋe, Ci bimiyo ŋat acel acel tiŋo ciŋe i kom lawote. Koŋ inen, kadi Juda bene bilweny i kom Jerucalem. Gibicoko lonyo pa rok ducu ma tye i ŋete, macalo jabu, ryal ki ginaruka mapol ata. Kit gemo macalo man bipoto i kom aguragura, kana, kinaga, ki i kom loo ducu ma i gony meno. Ŋat acel acel ma obwot ki i kom rok ducu ma gubino ka lweny i kom Jerucalem, bibedo ka wot i Jerucalem mwaka ki mwaka ka woro Kabaka, ma en Rwot me mony, ki pi kwero nino madito me bolo. Ka ce jo me kaka mo me wi lobo pe bicito i Jerucalem ka woro Kabaka, Rwot me mony, kot pe bicwe botgi. Ka ce jo me doggola me Ejipt pe ocito, ma pe onen kunnu, gemo ma yam Rwot ouno ki rok ma pe gucito ka kwero nino madito me bolo-ni bipoto i komgi. Man aye kit ma gibiculo ki bal me Ejipt, ki kit ma gibiculo ki bal pa rok ducu ma pe gucito ka kwero nino madito me bolo. I nino meno gibigoro coc i kom olaŋ pa aguragura ni, “Maleŋ pi Rwot.” Agulu ma tye i ot pa Rwot bibedo macalo becen ma tye i nyim keno tyer, Agulu ducu ma tye i Jerucalem ki Juda gibikwerogi bedo maleŋ pi Rwot me mony, wek jo ducu ma gityero gitum bot Lubaŋa gubin gukwany ki i kingi, guted ki riŋo lee ma gityero bot Lubaŋa, Lacat-wil mo pe dok binen i ot pa Rwot me mony i nino meno. Man lok ma pire tek ma Rwot oloko bot jo Icrael ma Malaki otito. “Doŋ atyeko marowu,” man Rwot aye owaco. Ento wun wuwacci, “In ityeko marowa niŋniŋ?” Rwot ogamo ni, “Ecau pe omin Yakobo? Ento yam amaro Yakobo akwero Ecau; abalo lobone ma obedo gotgot, dok amiyo lobo ma en oleyo bot too me tim.” Ka jo Edom guwacci, “Giŋinyowa woko piny, ento wabigedo odoco i wi obur,” Rwot me mony odok iye ni, “Gwok nyo gibigero gaŋi, ento an abireto odigi ducu woko piny, nio waŋ ma gibilwoŋo ni, lobo pa lubalo, ki jone gibilwoŋo jo ma kiniga bimako Rwot i komgi nakanaka.” Wubineno man ki waŋwu, dok wubiwaco ni, “Rwot dit, wa i ŋe apokki waŋ lobo me Icrael.” “Latin woro wonne, ki opii woro laditte. Ka an a wonwu, piŋo pe wuwora? Ka an ladit, ci piŋo pe wulwora? Man: lok ma Rwot me mony aye oloko botwu, wun ajwagi, ma wucayo nyiŋa. Wuwaco ni, ‘Wacayo nyiŋi niŋniŋ?’ Pi tyero cam me kwer i wi keno tyerra, Dok wuwaco ni, ‘Watimo tim me kwer iye niŋniŋ?’ Kun wutamo ni meja pa Rwot myero obed gin acaya. Ka wutyero lee ma waŋgi oto me gitum, meno pe bal? Dok wutyero gin ma oŋol nyo ma two, meno pe bal? Ka wumiyo meno bot laloc mewu, cwinye bibedo yom i komwu? Dok bitimowu ber? Man lok ma Rwot me mony aye oloko. Doŋ kombeddi wukwa kica pa Lubaŋa, wek otimwa ber. Ki ka wukelo mot macalo meno bote, en binyuto ber mere bot ŋat mo i kinwu? Man lok ma Rwot me mony owaco. Kono onoŋo tye ŋat mo i kinwu ma bieego doggola, wek pe wumok mac i keno tyer mera nononono! Cwinya pe yom i komwu, dok pe abigamo gityer ki i ciŋwu. Man lok ma Rwot me mony owaco. Pienno wuŋe ni cakke tuŋ wokceŋ nio tuŋ potoceŋ nyiŋa dit i kin lurok, dok i kabe do acel acel giwaŋo iye gin ma ŋwece kur, pi nyiŋa, ki gityer maber ma myero; pien nyiŋa dit i kin lurok, man lok ma Rwot me mony owaco. Ento wun wupyedo nyiŋa, ka wuwaco ni, meja pa Rwot odoko gin me kwer, dok kadi wa cam ma wutyero iye wucayo acaya. Dok wun wuwaco ni, ‘Nen, gin man olo dano rom kwene!’ Dok bene wujwiya, man lok ma Rwot me mony owaco. Wukelo gin ma gimayo tektek, nyo ma oŋol, nyo gin ma two, wukelo macalo gityerwu, Abigamo gityer ma kit meno ki i ciŋwu? Man lok ma’ Rwot me mony owaco. Ŋat ma laram myero gicen, ka tye ki nyok i kin romine, kun kwoŋo ni ebityero, ento tyero bot Rwot gin ma roc tye i kome; pien an kabaka madit, nyiŋa bene gilworo i kin lurok. Man lok ma Rwot me mony owaco. “Doŋ koni wun ajwagi, cik man tye piwu. Ka pe wubiwinyo, ka pe wubiketo cwinywu iye pi miyo deyo i nyiŋa, miyo abicwalo can i komwu, dok abiceno gum mewu; adada doŋ atyeko ceno, pien pe wuketo iye cwiny, wu. Man lok ma Rwot me mony owaco. Nen, abijuko likwayowu, dok abipuyo waŋwu ki wee, en wee me gitum mewu, abiryemowu woko ki i nyima. Kit meno wubiniaŋ ni ceŋ acwalliwu cik man, wek cikkena ki Lulevi omok matek, man lok ma Rwot me mony owaco. Cikkena ma acikke kwede ki gin yam obedo cikke me kwo ki me kuc. Amiyo botgi wek gubed ki lworo; ci gulwora, gubedo ki woro i nyiŋa, Gibipwonyo lok me ada, pe ginoŋo bal mo i doggi. Yam gibedo kweda ki kuc, kun cwinygi tye atir, gumiyo jo mapol gulokke guweko timo bal. Ajwaka myero opwony dano guŋe Lubaŋa, dano myero guyeny pwony ma a ki i doge, pien en lakwena pa Rwot me mony. Ento wun wuweko yo-meno; wumiyo jo mapol gigatte pi pwony mewu; wubalo bene gicikke ma yam acikke kwedwu, man lok ma Rwot me mony owaco. Pi meno amiyo wubedo me acaya dok mayot i nyim jo ducu, pien pe wulubo yona, ento wuyeko kin dano i pwony mewu.” Wan ducu pe wonwa acel? Pe Lubaŋa acel-li aye ma ocweyowa? Piŋo dok ŋat acel acel i kinwa bwolo ominne, kun wapyedo gicikke ma Lubaŋa oketo i kin en ki kwarowa? Jo Juda guŋayo waŋ Rwot, ci gutimo gin me kwer i Icrael ki i Jerucalem; pien jo Juda gupyedo kabedo maleŋ pa Rwot ma en maro, gunyomo anyira pa jo ma giworo lubaŋa me rok mukene. Rwot myero ojwer jo ducu ma gitimo man ki i kema pa Yakobo, pe dok gukel gityer bot Rwot me mony! Dok wutimo man. Wudyako keno tyer pa Rwot ki pig waŋwu, kun wukok, wucur, pien en pe dok keto cwinye pi gityer, pe gamo bene ki yomcwiny ki i ciŋwu. Wupenyo ni, “Piŋo en pe gamo?” Pien Rwot obedo caden me cikke i kin in ki dako ma inyomo i kare me awobini, ma doŋ pe igene-ni, kadi bed en lawoti, en dako ma yam icikke kwede. Pe Lubaŋa acel-li aye ma otiyo dok ogwoko cwiny me kwo piwa? En mito aŋo? Litino ma giworo Lubaŋa, Pi meno wugwokke kenwu, ŋat mo pe myero obed ma pe geno dako ma en onyomo i kare me awobine. “Pien adag gonyo nyom, man lok ma Rwot Lubaŋa pa Icrael owaco, ki ŋat ma ryemo dakone woko tektek. Man lok ma Rwot me mony owaco. Pi meno wugwokke kenwu, dok pe myero wubed laboŋo gen.” Wutyeko olo kom Rwot ki lokwu. Ka pud dok wuwaco ni, “Waolo kome niŋniŋ?” Pi waco ni, “Ŋat ma timo gin marac i nyim Rwot en aye ber, iye bene yom i kome.” Nyo gwok pi penyo ni, “Lubaŋa ma ŋolo kop atir tye kwene?” Lubaŋa owacci, “Nen, acwalo lakwenana ocito anyim ka yubo yo ma peya abino, doŋ Rwot ma wuyenyo-ni bibino oyotoyot i ot mere. Lakwena me gicikke ma cwinywu yom i kome, nen, en bibino, man lok ma Rwot me mony owaco. Ento na ma twero ciro nino me binone, dok aŋa ma twero cuŋ ka en binen? “Pien en tye macalo mac lali ryal, ki dok calo cabun pa lalwok boŋŋi; en bibedo piny macalo ŋat ma liyo ryal wek obed maleŋ, bilonyo likwayo pa Levi, dok bilonyogi gidoko leŋ macalo dano ma liyo ryal ki jabu, nio waŋ ma gibityero gityer ma myero bot Rwot. Lacenne gityer pa jo Juda ki gityer pa jo Jerucalem biyomo cwiny Rwot macalo i kare macon ki i mwaka mapol mukato aŋec. “Abinyiko cok botwu pi ŋolo kop; abibedo caden ma kome mit i kom lutal, i kom lutim abor, i kom jo ma kwoŋo kwon goba, i kom jo ma buro lupakaca pi mucaragi, ki ma buro mon-to ki litino kic, i kom jo ma ryemo lubedo ma i kingi gicwalogi cen, kun pe gilwora, man lok ma Rwot me mony owaco. “Pien an a ‘Rwot, pe alokke; pi meno wun likwayo pa Yakobo peya gityekowu. Nia i kare pa kwarowu wunak ki i cik mera, pe wugwokogi. Wudwog bota, an bene abidwogo botwu, man lok ma Rwot me mony owaco. Ento wuwacci, ‘Wabidwogo niŋniŋ?’ Dano twero yako Lubaŋa? Ento wun wuyaka. Dok wuwaco ni, ‘Wayaki niŋniŋ?’ I dul acel me apar ki gityer mewu. Gicenowu ki cen, pien wun wa ki rok mewu ducu wutye ka yaka. Wukel dul acel me apar i ot kano cam, wek cam obed tye i oda; dok wutema, ka pe abiyabo botwu waŋ dirica me polo, wek aony gum ma opoŋ madwoŋ i komwu,” man lok ma Rwot me mony owaco. “Abijuko bonyo, wek pe otyek cam ma ocek i pottiwu; nyig olokwu pe biballe, man lok ma Rwot me mony owaco. Miyo lurok ducu gibilwoŋowu ni jo ma komgi gum, pien wubibedo i lobo me yomcwiny,” man lok ma Rwot me mony owaco. “Wuloko lok marac i koma,” man lok ma Rwot me mony owaco. “Wun wuwaco ni, ‘Walok i komi nino?’ Wuwaco ni, ‘Woro Lubaŋa konnye pe. Dok cobo cikke nyo bedo i nyim Rwot me mony macalo jo ma kwero cola konyo gin aŋo? Nia koni walwoŋo jo ma wakke ni lugumkom; lutim maraco gin aye limgi nya; pe meno keken, ka gitemo Lubaŋa, gibwot.’ ” I kare meno jo ma gilworo Rwot guloko ki luwotgi; Rwot otero ite, ci owinyogi, Gicoyo buk me po i kom jo ma yam gilworo Rwot dok ma gitamo pire. Ci Rwot owacci. “Gibibedo mera, mera kikome, i nino ma abitic iye, dok abitimogi kica macalo dano timo kwede kica ki wode ma tiyo bote. Miyo doki wupoko kin jo ma kitgi atir ki jo maraco, kin ŋat ma tiyo bot Lubaŋa ki ŋat ma pe tiyo bote. “Pien nen, nino bibino ma waŋ calo keno ma mac tye iye; jo ma wakke, ki lutim maraco ducu gidoko macalo ren kal; nino ma bino-ni biwaŋogi woko, pe dok biwekogi lwite kadi jaŋe, man lok ma Rwot me mony owaco. Ento pi wun jo ma wulworo nyiŋa cen me Lar mera bituc ma tye ki gin me caŋo dano i bwome. Wun wubikato woko kun wupye macalo roci ma gua ki i dwol. Wubinyono jo maraco piny, gibidoko macalo butu i te tyenwu, i nino ma abitic iye. “Wupo pi cik pa laticca Moses, cik ki gin ma yam acike kwede i Koreb pi jo Icrael ducu. “Nen, abicwalo lanebi Elia botwu” ma peya nino pa Rwot oo, nino madit ki ma kelo lworo. En biloko cwiny wegi litino i kom litinogi ki cwiny litino i kom wegigi, wek pe abin abal lobogi woko macalo gin ma giceno.” Man lok ma Rwot me mony owaco. Magi aye gubedo kwaro Yecu Kricito, Lakwar Daudi, lakwar Abraim. Abraim onywalo Icaka, Icaka onywalo Yakobo, Yakobo onywalo Juda ki omegine; ka doŋ Juda ki Tamar gunywalo Perej ki Jera, ci Perej onywalo Kejeron, Kejeron onywalo Aram; ci Aram onywalo Aminadab, Aminadab onywalo Nakucon, ka Nakucon onywalo Calmon; Calmon ki Rakab gunywalo Boaj, ci Boaj ki Ruth gunywalo Obed, ki Obed onywalo Yece; ka yece onywalo kabaka Daudi. Daudi ki dako pa Uria gunywalo Solomon; ci Solomon onywalo Rekoboam, Rekoboam onywalo Abija, Abija onywalo Aca; Aca onywalo Yekocapat, Yekocapat onywalo Joram, Joram onywalo Ujia; Ujia onywalo yocam, Yocam onywalo Akaj, Akaj onywalo Kejekia; Kejekia onywalo Manace, Manace onywalo Amoc, Amoc onywalo Yocia; Yocia onywalo Yekonia ki omegine, i kare ma giterogi woko kwede i Babilon. Lacen ma onoŋo doŋ giterogi woko i Babilon, Yekonia onywalo Cealtiel, ci Cealtiel onywalo Jerubabel; Jerubabel onywalo Abiud, ka Abiud onywalo Eliakim, Eliakim onywalo Ajor; Ajor onywalo Jadok, Jadok onywalo Akim, Akim onywalo Eliud; Eluid onywalo Eleajar, Eleajar onywalo Matan, Matan onywalo Yakobo; Yakobo onywalo Yucepu cwar Maliam mubedo min Yecu ma gilwoŋo Kricito-ni. Kit meno kwaro ducu ma yam ginywalogi cakke ki i kom Abraim o kwede i kom Daudi, ducu onoŋo welgi romo apar wiye aŋwen, dok cakke ki i kom Daudi o wa i kare ma yam giterogi kwede i Babilon, onoŋo romo kwaro apar wiye aŋwen, dok cakke i kare ma giterogi kwede i Babilon o kwede wa i kom Kricito romo kwaro apar wiye aŋwen. Man aye obedo kit ma yam ginywalo kwede Yecu Kricito. I kare ma minne Maliam Yucepu doŋ ocunu oye, ma peya kingi orwatte, ginoŋo ni Maliam tye ki ic pa Cwiny Maleŋ. Cware Yucepu yam onoŋo obedo dano ma kite atir, pe omito ni eket lewic i wi Maliam; ento onoŋo mito ni eryem woko liŋliŋ i muŋ. Ento i kare ma onoŋo Yucepu pud tye ka lwodo lok meno ki i cwinye, cutcut lamalaika pa Rwot onen bote i waŋ lek, kun wacce ni, “Yucepu, lakwar Daudi, pe ilwor kwanyo Maliam me bedo dakoni, pien ic ma en tye kwede-ni obedo ic pa Cwiny Maleŋ. En binywalo latin awobi, ibicako nyiŋe Yecu, Pien bilaro dano ki i balgi.” Lok man ducu otimme wek lok pa Rwot ocobbe kakare kit macalo yam oloko i dog lunebi ni. “Nen, nyako mo ma peya oŋeyo laco biyac, binywalo latin ma laco, gibicako nyiŋe Emmanuel”, te lokke ni, Lubaŋa tye kwedwa. I kare ma Yucepu oco ki i waŋ nino, otimo kit macalo lamalaika pa Rwot ocike kwede; okwanyo dakone otero bote, ento pe obedo kwede, nio waŋ ma ginywalo latin, ci ocako nyiŋe Yecu. Ka doŋ ginywalo Yecu i Beterekem ma i Judaya i kare me loc pa kabaka Kerode, nen, luryeko mogo ma gua yo tuŋ wokceŋ gubino i Jerucalem, kun gipenyo ni, “En latin ma ginywalo me bedo kabaka pa Lujudaya-ni tye kwene? Pien onoŋo waneno lakalatwene yo tuŋ wokceŋ, ci man wabino ka wore.” I kare ma kabaka Kerode owinyo lok man, cwinye opoto matek, kadi wa jo Jerucalem bene ducu cwinygi opoto matek; pi meno omiyo kabaka Kerode ocoko ajwagi madito ki lupwony-cik me rokgi ducu, ci openyogi ni, “Kricito mono gibinywalo kwene?” Jo-nu gudokke iye ni, “I Beterekem ma i Judaya, pien lanebi yam ocoyo ni, ‘In Beterekem i lobo me Juda, in pe itidi twatwal ki i kin luloc me Juda; pien laloc bia ki i in, en aye ma biloyo jona jo Icrael.’ ” Ci Kerode olwoŋo luryeko i muŋ, guniaŋe kun gititte kare ma lakalatwe onen iye. Ka doŋ ocwalogi me cito i Jerucalem kun waco botgi ni, “Wuciti wupeny lok kom latin man maber kikore, ce ka wunoŋe ci wudwokka lok, wek an bene acit awore.” I kare ma doŋ guwinyo lok pa kabaka, gucito ki yogi ci guneno lakalatwe ma yam koŋ guneno yo tuŋ wokceŋ ca otelo nyimgi, obino ocuŋ ki malo wa i kabedo ka ma onoŋo latin-nu tye iye. Ka guneno lakalatwe meno, cwinygi obedo yom adada. Ka gudonyo i ot, ci guneno latin kacel ki minne Maliam cutcut guryebbe piny guwore. Gugonyo yecgi ma onoŋo tye iye lonyo madwoŋ, ci gumiye mot, jabu ki odok luban ki murra. Lacen Lubaŋa ocikogi ni pe gudok cen ki ŋegi bot Kerode, ci gudok tugi doŋ kun gilubo yo mukene. I kare ma luryeko gucito woko, ci lamalaika pa Rwot onen bot Yucepu i waŋ lek kun wacci, “A malo, kwany latin ki minne, riŋ ilar kwedgi Ejipt, ci wubed kunnu nio waŋ ma awaco lok botwu, pien Kerode doŋ cok yenyo latin man wek enek woko.” Ci Yucepu oa malo okwanyo latin ki minne ki dyewor, ocito kwedgi i Ejipt; gubedo kunnu nio ka Kerode oto. Lok man otimme wek lok ma yam Rwot oloko ocobbe kakare, ma yam olok ki i dog lanebi ni, “Yam alwoŋo Woda nia ki i Ejipt.” I kare ma Kerode doŋ oniaŋ ni luryeko gutimo ryeko i kome, akemo omake matek twatwal, ci ocwalo dano guneko litino co woko ducu ki i Beterekem kacel ki i kabedo ducu murumo kenyo, cakke ki i kom litino me mwaka aryo dok kwede piny, kun poro ki kare ma yam luryeko guniaŋe pire ca. Man omiyo lok ma yam lanebi Jeremia oloko ocobbe kakare ni, “Koko owinnye ki i Rama, kumo ki koko lyel; Lakeri onoŋo kok pi litinone. Okwero woko ni pe myero gikwe cwinye, pien litinone doŋ gipe.” I kare ma doŋ onoŋo Kerode oto woko, lamalaika pa Rwot onen bot Yucepu i waŋ lek ki i Ejipt, kun wacce ni, “A malo, kwany latin ki minne, ci idok kwedgi cen i lobo Icrael, pien jo ma onoŋo nene gimito neko latin-ni doŋ guto woko.” Ci Yucepu oa okwanyo latin ki minne odok kwedgi cen i lobo Icrael. Ento ka Yucepu owinyo ni Arkelao aye doŋ tye ka loc i Judaya ma ka wonne Kerode, omiyo lworo omake me dok kunnu; ento Lubaŋa ocike i waŋ lek omiyo owoto ocito i Galilaya. En ocito obedo i gaŋ ma nyiŋe Najaret, wek gin ma yam lunebi guloko ocobbe kakare ni, “Gibilwoŋe ni Lanajaret.” I kare meno Jon Labatija obino kun tito lok i tim me Judaya, kun wacci, “Wuŋuti, pien ker me polo doŋ onyiko cok.” Pien man aye dano ma yam lanebi Icaya otito pire ni, “Dwan dano mo ma daŋŋe i tim ni, Wuger yo pa Rwot, wutir yone ocuŋ atir.” Jon yam onoŋo ruko boŋo yer kinaga, kun tweyo pyere ki del, onoŋo camo bonyo ki moo kic ma i tim. Onoŋo pol dano gia ki i Jerucalem, ki lobo Judaya ducu, ki lobo ducu ma tye cok ki Jordan, gimol gibino bote. Gituco balgi, ci en batijagi i kulu Jordan. Ento i kare ma en oneno Luparicayo ki Lucadukayo gibino kun gimito ni en ebatijagi, owaco botgi ni, “Wun litino twol ororo, aŋa ma owaco botwu ni myero wuriŋ woko ki i akemo pa Lubaŋa ma mito bino-ni? Doŋ wuti gin ma nyuto ni wuŋut i kom balwu, pe dok wucak tamo ni, ‘Watye ki kwarowa Abraim.’ Koŋ wunen awaco botwu ni, Lubaŋa tye ki twero me miyo gweŋ magi olokke odok likwayo Abraim. Kombeddi doŋ giketo latoŋ woko i lwit yadi, yat acel acel ma pe nyak nyige mabeco, gitoŋo gireto woko piny, ci gibolo woko i mac. “An abitijawu ki pii pi nyuto ni doŋ wuŋut woko i kom balwu, ento ŋat ma bino luba-ni tek kata woko; pe amyero me mako war tyene. En bibatijawu ki Cwiny Maleŋ, dok ki mac bene. Oderone me pyeto bel tye i ciŋe, en biyubo larone woko maber, ci coko kalle dilo i dero, ento cuŋe en biwaŋo woko ki mac ma pe to.” Yecu oa ki i Galilaya obino bot Jon i dog kulu Jordan, wek Jon obatija en. Jon onoŋo mito kwero woko, owaco bot Yecu ni, “Amito in aye ibatija an, ento in dok ibino bota ni an aye abatija in?” Ento Yecu odokke iye ni, “Wek koŋ doŋ obed kumeno kombeddi, pien porre botwa me cobo gin ducu ma tye atir.” ci Jon oye lokke. I kare ma doŋ gityeko batija Yecu, ci en okatti woko ki i pii oyotoyot; cutcut polo oyabbe, ci oneno Cwiny Maleŋ pa Lubaŋa ma bino kun lyanne piny macalo akuri, ci opye i kome. Ci dwan ocako winnye ma a ki i polo ma wacci, “Man aye Woda ma amare, ma cwinya yom i kome.” Cutcut Cwiny Maleŋ otero Yecu wa i tim wek Catan obite. Ci Yecu ori kec nino pyeraŋwen dyeceŋ ki dyewor, ka lacen kec ocako neke. Labit dano obino ci owacce ni, “Ka in i Wod pa Lubaŋa, wac ki godi magi gulokke gudok kwon.” Ento Yecu odok iye ni, “Yam gicoyo ni, ‘Dano pe bibedo kwo ki kwon keken, ento bedo kwo ki lok ducu ma a ki i dog Lubaŋa.’ ” Catan dok otere i gaŋ maleŋ, ci ocibe ocuŋ i wi labila ot pa Lubaŋa, ci owacce ni, “Ka in i Wod pa Lubaŋa. koŋ ia ki malo kun ipoto piny pien yam bene gicoyo ni, ‘En biciko lumalaikane piri,’ dok bene ni, ‘Gibijoli ki ciŋgi, wek pe iyok tyeni i kom got.’” Yecu dok ogamo doge owacci, “Yam bene gicoyo ni, ‘Pe iom i Rwot Lubaŋani.’ ” Catan dok otere malo i wi got mabor adada, ci onyutte ker ducu ma i wi lobo ki deyogi ducu. Ci Catan owacce ni, “Magi ducu abimiyo boti, ka iryebbe iwora.” Ci Yecu owacce ni, “Nyik icit cen, Catan, pien yam gicoyo ni, ‘Wor Rwot Lubaŋani, dok bene iti pire keken.’ ” Cutcut Catan oweke, ci lumalaika gubino gukonye. Cutcut ka Yecu owinyo ni gimako Jon gitweyo woko i mabuc, oa obino i Galilaya; oweko Najaret, ci ocito obedo i Kapernaum ma tye i dog nam, i lobo Jabulon ki Naputali, wek lok ma yam lanebi Icaya oloko ocobbe kakare ni, “Lobo Jabulon ki lobo Naputali, yo tuŋ i nam, loka Jordan, Galilaya pa Lurok. Jo ma yam gibedo i piny macol doŋ guneno dero ceŋ madit, jo ma yam gibedo i lobo ki i tipo me to, ceŋ doŋ otuc woko omenyogi.” Cakke i kare meno Yecu ocako tito lok kun wacci, “Wuŋuti, pien ker me polo doŋ onyiko cok.” I kare ma Yecu obedo ka wot kun rabo dog nam Galilaya, ci oneno omego aryo, Cimon ma gilwoŋo Petero ki ominne Anderiya, ka gitye ka bolo obwo recgi i nam; pien onoŋo gin lumak-rec. Ci olwoŋogi ni, “Wubin wulub kora, ci an abimiyo wudoko lumak dano.” Ci cutcut gutugi weko obwogi, gulubo kore. Ka dok owoto anyim manok, ci oneno omego mukene aryo, Yakobo ki ominne Jon, gin awobe pa Jebedayo, ma onoŋo gitye i yeya kacel ki wongi Jebedayo ka kubo obwo recgi, ci olwoŋogi. Cutcut gutugi weko yeya ki wongi Jebedayo, ci gulubo kore. Yecu owoto orumo lobo Galilaya ducu, kun pwonyo i kacokkegi, dok bene onoŋo tito lok me kwena maber me ker pa Lubaŋa, ocaŋo bene kit two ducu ki kit goro ducu ki i kin dano. Mumiyo nyiŋe oywek i lobo Ciria ducu, ci dano gukelo jo ducu ma komgi lit bote, jo ma gitwo kit two mapatpat ki jo ma arem obwoyogi, jo ma tye ki cen maraco, jo ma twoyo two alili, ki jo ma twoyo two akweya, ci en ocaŋogi. Lwak dano mapol ata ma gua ki i Galilaya, Dekapoli, Jerucalem, Judaya ki loka Jordan ducu gulube. Yecu ka oneno lwak, ci oito woko malo i wi got, ka doŋ obedo piny, ci lupwonnyene gucito bote. Ocako pwonyogi kun wacci, “Gitye ki gum jo ma giŋeyo ni gin lucan i lok me cwiny, pien ker me polo megi. “Gitye ki gum jo ma kumo, pien gibikweyo cwinygi. “Gitye ki gum jo ma mwol, pien gibileyo lobo doko megi. “Gitye ki gum jo ma kec ki orwo pii nekogi pi bedo jo ma kitgi atir, pien gibimiyo giyeŋ. “Gitye ki gum lukica, pien gin bene gibitimo kica botgi. “Gitye ki gum jo ma cwinygi leŋ, pien gin aye gibineno Lubaŋa. “Gitye ki gum jo ma kelo kuc, pien gin aye gibilwoŋogi ni litino pa Lubaŋa. “Gitye ki gum jo ma giketo ayelayela i komgi pi bedo jo ma kitgi atir, pien ker me polo megi. “Wutye ki gum ka dano ŋalowu, kun giyelowu ma giwaco kit lok ducu maraco gobagoba i komwu pira. Wupwo, cwinywu obed yom atika, pien bakacic ma gibimiyowu me pwoc dit, tye i polo, pien lunebi ma yam gukwoŋo nyimwu dano guketo ayelayela i komgi kit meno.” “Wun wukado me lobo; ento kado ka doŋ odoko bot, ci gibitimo niŋniŋ wek dok odok mit? Konnye doŋ noŋo pe, myero giony woko dano onyon. “Wun wuceŋ me lobo. Gaŋ ma gigero i wi got pe twero kanne. Dok pe gicwinyo tara me auma ki aduku, ento gicibo i wi okar, ci lyel caro piny bot jo ducu ma tye i ot. Wun bene wubed jo ma menyo piny calo tara bot dano, wek gunen tic mabeco ma wutiyo ci gumi deyo bot Wonwu ma tye i polo. “Pe wutam ni an abino ka geŋo dano ni guwek lubo cik ki lok pa lunebi woko; pe abino ka geŋo dano lubogi, ento me cobogi acoba. Ada awaco botwu ni, nio waŋ ma polo ki lobo bitum woko, latin ton mo acel, kadi ki nukuta mo acel me cik pe birwenyo, nio ka lok ducu ocobbe kakare. Pi meno, dano mo ma bimiyo cik mo acel ki i kom cik magi doko yogoyogo, kun pwonyo ki dano kit meno, gibilwoŋo ni en dano matidi i ker me polo; ento ŋat ma gwoko cik magi, kun pwonyo ki dano, gibilwoŋe ni en dano madit i ker me polo. Pien awacciwu ni, ka pe kitwu obedo atir makato kit lupwonycik ki pa Luparicayo, ci pe wubidonyo i ker me polo. “Doŋ wuwinyo lok ma yam giwaco bot jo macon ni, ‘Pe ineki; ŋat ma oneko dano gibiŋolo kop i kome.’ Ento an awaco botwu ni ŋat mo ka kiniga omako i kom ominne gibiŋolo kop i kome; dano ma yeto ominne gibitero i Lukiko, ki ŋat ma biwaco ni, ‘In lamiŋ’ gibibolo woko i mac me Geena. Pi meno, ka ikelo motti bot Lubaŋa, ma itye ka tyerone i kom keno tyer, ka ce ipo ni omeru onoŋo tye ki lok mo i komi, ci myero iwek motti kunnu i nyim keno tyer, ci idok cen; mukwoŋo koŋ wumer wuribbe ki omeru, ka lacen doŋ idwogi ityer motti. Mak larem woko oyotoyot ki ŋat mudoti, i kare ma pud wutye ka wot kwede i yo wucito i lukiko, wek dano mudoti-ni pe oteri i nyim laŋolkop, ci laŋolkop bimiyi bot lakur-piny, ci teri tweyi woko i mabuc. Ada awacci ni, pe ibikatti woko ki kunnu, nio ka iculo ducu, ma wi cente mo pe orem “Doŋ wuwinyo ka yam giwaco ni, ‘Pe itim abor.’ Ento an awaco botwu ni, dano mo ma neno dako ce paro ni ebed kwede, meno noŋo doŋ otimo abor woko kwede ki i cwinye. Ka ce waŋi tuŋ lacuc aye ma miyo ipoto i bal, kol ci ibol woko ka mabor; pien bedo ber ka dul komi mo acel orwenyo, kato ma kono gibolo komi woko kulu i Geena. Ka ce ciŋi ma lacuc aye miyo ipoto i bal, toŋ iŋun ibol woko; pien bedo ber ka dul komi mo acel orwenyo, kato ma kono gibolo komi woko kulu i Geena. “Yam giwaco ni, ‘Dano mo ma ryemo dakone, myero omiye waraga me keto nyom.’ Ento an awaco botwu ni, dano mo ma ryemo dakone, kono pi lok me tim me tarwaŋ keken, noŋo doŋ omiyo dako-nu odoko latim abor; dok dano ma onyomo dako ma cware oryemo noŋo otimo abor. “Dok bene yam wuwinyo lok ma onoŋo giwaco bot jo macon ni, Pe ikwoŋ kwoŋ goba, ento cob kwoŋŋi ducu bot Rwot. Ento an awaco botwu ni, Pe myero wukwoŋ kwoŋ mo kadi ki acel, kadi ki nyiŋ polo, pien meno komker pa Lubaŋa, nyo ki nyiŋ lobo, pien meno kom me teno tyene, nyo kadi ki nyiŋ Jerucalem, pien meno gaŋ pa Kabaka madit. Dok bene pe ikwoŋ kwoŋ ki wii, pien in pe itwero loko yer wii mo acel doko matar nyo macol. Ento wuwek lokwu obed ni ‘Iyo’ nyo ‘Pe’; gin mukene makato lok man noŋo oa ki bot Larac. “Doŋ wuwinyo yam ka giwaco ni, ‘Waŋ giculo ki waŋ, lak giculo ki lak.’ Ento an awaco botwu ni, Pe icul kwor i kom dano mo ma otimo gin marac i komi. Ka ce ŋat mo odoŋo lemi tuŋ lacuc, lok bote lemi tuŋ lacam wek odoŋ bene; dok ka ce ŋat mo mito pido kwedi ni wek eter kotini, ci miye kanyini bene. Ka ce dano mo odiyi tektek ni itiŋ yecce icit kwede i wot me mairo acel, wot kwede wot me mairo aryo. Ka dano mo olegi gin mo ci myero imiye, dok bene pe myero ikwer pi den bot ŋat ma mito deno jami ki boti. “Dok wuwinyo bene ka yam giwaco ni, ‘Mar lawoti ento ikwer lakworri.’ Ento an awaco botwu ni, Wumar lukworwu, dok bene wuleg Lubaŋa pi jo ma keto ayelayela i komwu, wek wudok litino pa Wonwu ma tye i polo. Pien en miyo ceŋŋe tuc bot jo maraco ki jo mabeco bene, dok miyo kot cwer bot dano ma kitgi atir, ki bot jo ma pe kitgi atir bene. Pien ka wumaro jo ma marowu keken, ci wubinoŋo iye kit pwoc aŋo? Lujog-mucoro kono pe gitimo kit meno? Ka ce imoto utmegini keken, ci noŋo itimo gin aŋo maber makato jo mukene? Lurok ma pe giŋeyo Lubaŋa-ni bene pe gitimo kit meno? Wubed jo ma bal mo pe i komwu, kit macalo Wonwu ma tye i polo bal mo pe i kome-ni. “Wugwokke, pe wunyut kitwu ma atir i nyim dano ni wek gunenwu. Ka wutimo kumeno ci pe wubinoŋo bakacic mo ki bot Womwu ma tye i polo. “Tye kuman, ka ikonyo lucan pe ikut tum, macalo lugoba mogo gitimo i kacokke ki i yo-gu, ni wek dano opakgi. Ada awaco botwu ni, doŋ gutyeko gamo bakacic woko. Ento in ka imiyo kony bot lucan, pe iwekciŋi ma lacam oŋe gin ma ciŋi ma lacuc timo, wek imi kony bot lucan i muŋ; ento Woru ma neni i muŋ bimiyi bakacic. “Dok ka wutye ka lego Lubaŋa, pe wubed calo jo ma lugoba, pien gimaro lego Lubaŋa kun gicuŋ acuŋa i kacokke ki i aŋaka ŋaka yo-gu ducu, ni wek dano onengi. Ada awaco botwu ni, gin doŋ gutyeko gamo bakacicgi woko. Ento ka ilego, cit idony i kicikani ci ilor doggola woko, ka ileg Woru ma tye i muŋ; ci Woru ma neni i muŋ-ŋi bimiyi bakacic. “Ka wutye ka lega pe wudur lwak lok mapol kit macalo Lurok ma pe giŋeyo Lubaŋa gitimo-ni; pien gitamo ni Lubaŋa winyo legagi pi lwak lok mapol ma giduro-ni. Pe wubed calo gin, pien Wonwu ŋeyo gin ma wumito ma noŋo peya wupenye. Doŋ wuleg kit man ni, ‘Wonwa ma tye i polo, giwor nyiŋi maleŋ. Ker meri obin; giti gin ma imito i lobo kit ma gitiyo i polo. Miwa tin camwa me tin. Iwek balwa, macalo wan waweko bal pa dano ma gibalo botwa. Pe iterwa i abita, ento ilarwa bot Larac. [Pien ker ki tek ki deyo obedo meri matwal. Amen]’ Ka wutimo kica bot dano pi balgi, ci Wonwu ma tye i polo bene bitimowu kica; ento ka pe wutimo kica bot dano pi balgi, ci Wonwu ma tye i polo bene pe bitimowu kica pi balwu. “Ka wuri kec pe wubed macalo lugoba ma waŋgi noŋo olwal woko, pien gibalo waŋgi kit meno ni wek dano onen ni gitye ka ri kec. Ada awaco botwu ni, doŋ gutyeko gamo bakacicgi woko. Ento ka wuri kec, wuwir wiwu woko ki moo, ci wulwok waŋwu woko bene, wek dano pe gunen ni wutye ka ri kec, ento Wonwu ma tye i muŋ aye onen; en Wonwu ma nenowu i muŋ bimiyowu bakacic. “Pe wukan lonyo piwu kenwu i lobo, ka ma nyenye ki nyal gibalo woko, dok ka ma lukwo gibino gituro ot ci gikwalo woko. Ento wukan lonyo piwu kenwu i polo, ka ma nyenye ki nyal pe gibalo, dok ka ma lukwo pe bino gituro ot ci gikwalo. Ka ma lonyowu tye iye cwinywu bene bedo iye. “Tara me kom aye waŋ. Ka ce waŋi bal mo pe iye, ci komi kulu bibedo leŋ. Ento ka ce waŋi tye ki bal mo i kome, ci komi kulu bibedo i colpiny. Doŋ ka leŋo ma i ii-ni odoko col, ci colle doŋ bedo rom mene! “Pe tye dano mo ma twero tic ki rwodi aryo; pien bikwero ŋat acel ci maro mukene-ni, nyo bimoko i kom ŋat acel, ci cayo ŋat mukene-ni. Pe wutwero tic pi Lubaŋa ka dok wutiyo pi lim bene. “Pi meno awaco botwu ni, pe wubed ki tam mapol pi kwowu, ni wubicamo aŋo, nyo ni wubimato aŋo, nyo pi komwu, ni wubiruko aŋo. Kwo pe pire tek kato cam? Ki kom kono pe pire tek kato ginaruka? Koŋ wunen winyo me polo; pe gicoyo kodi dok bene pe gikayo, pe bene gidilo cam i dero, ento Wonwu ma tye i polo pud pitogi. Wun pe piwu tek kato pigi woko? Doŋ aŋa i kinwu ma twero medo mwaka acel i kom kwone pi bedo ki tam mapol? Piŋo wubedo ki par mapol pi ginaruka? Koŋ wutam pi leŋa me tim, kit ma gidoŋo kwede. Pe giwiyo uci, dok bene pe gicweyo boŋo; ento pud amedde ki waco botwu ni, kadi bed Solomon orukke ki deyone ducu, ento pe orukke macalo mo acel i kingi. Ka ce Lubaŋa ruko lum ma i tim kit meno, ma bedo tye pi nino ma tin keken, ento diki inoŋo gibolo woko i keno, ci en pe birukowu makato, wun jo ma niyewu nok? Pi meno pe wubed ki par mapol kun wuwacci, ‘Wabicamo aŋo?’ nyo ni, ‘Wabimato aŋo?’ nyo ni, ‘Wabiruko aŋo?’ Pien Lurok gitye ka yenyo jami magi ducu; Wonwu ma tye i polo ŋeyo bene ni wumito jami magi ducu. Ento koŋ wukwoŋ keto cwinywu i kom kerre, ki noŋo kit ma atir ma en tye kwede, ci jami magi ducu gibimedo botwu. Pe wubed ki par mapol pi nino ma diki, pien nino ma diki biparo pire kene. Wuwek can me nino acel acel otum ki ninone. “Pe wuŋol kop i kom jo mukene, wek wun bene pe giŋol kop i komwu. Pien kop ma wuŋolo-ni bene gibiŋolo i komwu, dok gin ma wupimo kwede jami, en aye doki gibipimo kwede jami botwu. Piŋo ineno cuŋ kal ma tye i waŋ omeru, ento dul yat ma tye i waŋi in kikomi pe ineno? Nyo itwero waco bot omeru niŋniŋ ni, ‘Wek akwany cuŋ kal ma tye i waŋi-ni woko’ kun in bene dul yat tye i waŋi? In lagoba, koŋ ikwoŋ kwanyo dul yat ma tye i waŋi-ni woko, ci miyo doŋ ineno piny maber me kwanyo cuŋ kal ma tye i waŋ omeru ca. “Pe myero wunywak jami maleŋ ki jo ma pe guye Lubaŋa. Pien gibilokke gilwenyo i komwu. Man noŋo rom macalo bolo kidi mo me wel i nyim opego, ma gibinyono megi anyona ki tyengi woko-ni. “Wulegi, ci gibimiyo botwu; wuyeny, ci wubinoŋo; wudwoŋ doggola ci gibiyabo botwu. Pien dano ma lego gimiye, ki ŋat ma yenyo bene noŋo, ki ŋat ma dwoŋo doggola bene gibiyabo doggola bote. Aŋa i kinwu ma won latin, ma ka latinne olege ni omiye kwon, ci bimiye gweŋ? Nyo ka olege ni omiye rec, ci bimiye twol? Doŋ ka ce wun jo maraco wuŋeyo miyo mot mabeco bot litinowu, ci Wonwu ma tye i polo pe bimiyo jami mabeco makato ducu bot jo ma lege! Kit gin ducu ma wumito ni dano gutim botwu, wun bene wutim botgi kit meno; pien man aye tyen lok me cik pa Moses ki me pwony pa lunebi. “Wudony ki i doggola madiŋ, pien doggola ma tero dano i to lac, dok yone gipiro maber, dok jo ma donyo ki iye pol. Pien doggola ma tero dano i kwo diŋ, ki yone bene rac, dok jo ma noŋo yo meno ginok. “Wugwokke i kom lunebi ma lugoba, ma gibino botwu ma gurukke woko calo romi, ento ki i cwinygi noŋo gitye calo orudi muwor. Wubiŋeyogi i kom kitgi. Gitwero pwono olok ki i kom yat okuto, nyo nyig oduro ki i kom yat tworo? Kit meno, yat maber nyako nyige mabeco, ento yat marac nyako nyige maraco. Yat maber pe twero nyako nyige maraco, ki yat marac bene pe twero nyako nyige mabeco. Kit yat ducu ma pe nyako nyige mabeco gitoŋo ci gibolo woko i mac. Kit meno wun bene wubiŋeyogi i kom kitgi. “Pe dano ducu ma gilwoŋa ni, ‘Rwot, Rwot’ aye gibidonyo i ker me polo, ento ŋat ma tiyo gin ma Wora ma i polo mito. I nino meno jo mapol biwaco bota ni, ‘Rwot, Rwot, yam pe watito lok pa Lubaŋa i nyiŋi, dok pe waryemo cen maraco-gu woko ducu i nyiŋi? Yam pe watiyo tic mogo matek madito i nyiŋi?’ Ci abituco botgi ka maleŋ ni, ‘Onoŋo pe aŋeyowu; wua woko ki bota, wun lutim gin maraco.’ “Dano acel acel ma winyo lokka ce tiyo, bibedo calo dano maryek, ma ogero ode i kom pata got. Kot ocwer, lalele omol matek, ci yamo okodo matek i kom ot meno oyeŋo, ento ot pe opoto, pien te gutine gikwinyo i kom pata. Ento dano acel acel ma winyo lokka ce pe tiyo bibedo calo dano ma lamiŋ ma ogero ode i kom kweyo. Kot ocwer, lalele omol matek, yamo okodo matek i kom ot oyeŋo, ci ot opoto woko; potone owinnye matek adada.” I kare ma Yecu doŋ otyeko loko lok magi ducu, lwak guuro kit pwonnye matek, pien opwonyogi calo ŋat ma tye ki twero, pe macalo lupwony-cik. I kare ma Yecu doŋ oa ki i wi got olor piny, lwak dano mapol gulube. Ci cutcut ladobo obino bote, orumo coŋe piny i nyime kun wacce ni, “Ladit, ka imito, itwero lonya.” Yecu oryeyo bade ogude, kun wacce ni, “Amito; lonnye.” Cutcut dobone otugi caŋ woko. Yecu ocike ni, “Nen ni pe iwaco lok man bot ŋat mo; ento icinyutte bot ajwaka pa Lubaŋa ci ityer mot ma yam Moses ociko pire-ni, wek dano gunen ni ada in kara doŋ icaŋ.” I kare ma Yecu odonyo i Kapernaum, ladit mo ma loyo asakari obino bote, ma lege kun wacci, “Ladit, laticca tye twoyo two akweya, obuto piny i gaŋŋa, ma noŋo arem doŋ oketo kome woko.” Ci Yecu odokke iye ni, “Aebino ka caŋe.” Ento ladit ma loyo askari ogamo lokke ni, “Ladit, an pe amyero me wek ibin idony i oda; ento wac lok awaca keken, ci laticca bicaŋ. An bene dano ma giloya aloya i dog tic, atye ki askari bene ma an aloyogi. Ka awaco bot askari mo acel ni, ‘Citi’, ci cito, dok ka awaco bot ŋat mukene ni, ‘Bin’, ci bino, ka awaco bene bot opiina ni, ‘Tim man’, ci timo.” Yecu owinyo lok man ma dano-nu oloko, ci ouro twatwal. Owaco bot lwak ma gulube-ni ni, “Ada awaco botwu ni, peya anoŋo niye ma rom ki man, kadi i Icrael. Atittiwu ni jo mapol bia ki tuŋ wokceŋ ki tuŋ potoceŋ gibibedo i dog cam kacel ki Abraim, Icaka ki Yakobo i ker me polo, ento litino me ker gibibologi woko i colpiny, ka ma dano bikok kun gikayo lakgi iye.” Lacen Yecu owaco bot ladit ma loyo askari ni, “Citi, myero otimme boti kit macalo doŋ iye kwede-ni.” Ci laticce ocaŋ woko cut i cawa meno. Lacen i kare ma Yecu odonyo i ot pa Petero, ci oneno maro Petero obuto piny onoŋo tye ki two lyeto. Yecu ogudo ciŋe, ci two lyeto ocaŋ woko ki i kome, oa malo ocako gwoko Yecu. Otyeno me nino meno dano gukelo bote jo mapol ma onoŋo cen maraco tye i komgi; ci oryemo cen woko ki lok keken, dok bene ocaŋo jo ducu ma onoŋo komgi lit. Man otimme wek lok ma yam lanebi Icaya oloko ocobbe kakare ni, “En otiŋo gorowa, dok otiŋo twowa ducu i kome.” Ka Yecu oneno lwak dano orume woko dyere, ci owaco ni myero gukat loka nam tuŋcel. Lapwony-cik mo oa obino bote owacce ni, “Lapwony, abilubi ka ma icito iye ducu.” Ento Yecu odokke iye ni, “Too tye ki boro, winyo me polo bene tye ki odigi, ento Wod pa dano pe tye ki ka ma myero epyel iye wiye.” Dok dano mo acel i kin lupwonnyene owacce ni, “Ladit, koŋ iwek aciyik wora.” Ento Yecu odokke iye ni, “Luba, wek jo muto guyik jo muto wadigi.” Ka Yecu odonyo i yeya, ci lupwonnyene gulube. Cutcut pii me nam ocako twagge matek, ma yeya onoŋo doŋ cok lwiny woko i te pii; ento Yecu onoŋo onino woko. Ci gucito gucoye, kun giwacce ni, “Larwa Rwot, nen wato woko do.” En owaco botgi ni, “Piŋo wubedo ki lworo, wun jo ma niyewu nok?” Ci oa woko ojuko yamo ki nam, nam ocako liŋ mot. Mumiyo dano guuro matek, kun giwacci, “Man dok kit dano aŋo ma yamo ki nam giwinye-ni?” Ka Yecu doŋ oo loka nam tuŋcel, i lobo pa Lugadara, cutcut jo aryo ma cen maraco tye i komgi gurwatte kwede; onoŋo gua ki i kin lyel. Onoŋo giger adada ma ŋat mo pe twero kato ki i yo kenyo. Ci gudaŋŋe matek ni, “Ilaro aŋo kwedwa, in Wod pa Lubaŋa? In mono ibino kany ka unowa ma kare peya oromo?” Lwak opego mapol onoŋo gitye ka cam ka ma onoŋo gitye ka lok iye. Ci cen maraco gubako doggi bote kun giwaco ni, “Kace imito ryemowa woko, cwalwa i opego-gu.” Ci Yecu owaco botgi ni, “Wuciti.” Gua woko ki i kom jo-nu ci gudonyo i i opego; cutcut lwak opego gutwarre ki ŋwec gularo piny i luŋ ci gupoto woko i nam, gumwony guto woko i pii. Lukwat guriŋo woko, gucito wa i gaŋ ci gutito lok i kom gin ducu mutimme, wa lok mutimme i kom jo aryo ma cen tye i komgi. Mumiyo lwak dano ducu ma i gaŋ meno gubino ka rwatte ki Yecu; ka gunene, ci gubako doggi bote ni en myero oa woko ki i lobogi. Yecu odonyo i yeya oŋolo nam okato loka tuŋcel, ci obino i lobo tugi kikome. Ci gikelo bote dano mo ma twoyo two akweya kom kun obuto i wi kitandane. Ka Yecu oneno niyegi, ci owaco bot latwo ni, “Di cwinyi, latinna, balli doŋ giweko woko.” Mumiyo lupwony-cik mogo gucako loko lok kekengi ni, “Dano man tye ka yeto Lubaŋa.” Ento Yecu oŋeyo tamgi woko, ci openyogi ni, “Piŋo wutamo tam marac i cwinywu? Mene mayot makato, me waco ni, ‘Balli doŋ giweko’, nyo ni, ‘A, iwoti’? Ento man me miyo wek wuŋe ni, Wod pa dano tye ki twero i lobo man me weko bal”, ci owaco bot latwo ni, “A, kwany kabutoni idok paco.” Ci oa odok paco. Ka lwak guneno gin mutimme, lworo omakogi, ci gumiyo deyo bot Lubaŋa, ma omiyo kit twero macalo meno bot dano. I kare ma Yecu tye ka kato ki kunnu, ci oneno laco mo ma nyiŋe Matayo obedo ka ma gijogo iye mucoro owacce ni, “Lub kora.” Ci oa malo olubo kore. I kare ma Yecu obedo i ot i dog cam, lujog-mucoro mapol ki lubalo gubino gubedo kacel ki Yecu ki lupwonnyene. Ka Luparicayo guneno man, guwaco bot lupwonnyene ni, “Piŋo lapwonywu camo kacel ki lujogmucoro ki lubalo?” I kare ma en owinyo ogamo ni, “Jo ma komgi yot pe gimito daktar, ento kono jo ma komgi lit aye. Wuciti wupwonye tyen lok man ni, ‘Amito kica, pe lee me gitum.’ Pien pe abino ka lwoŋo jo ma kitgi atir, ento lubalo.” I kare meno lupwonye pa Jon gubino bot Yecu, gupenye ni, “Piŋo wan kacel ki Luparicayo wari kec, ento lupwonnyeni pe giri kec?” Ci Yecu odok iye botgi ni, “Lurem lanyom twero kumo ma noŋo lanyom pud tye kacel kwedgi? Kare bibino ma gibikwanyo lanyom woko ki botgi, ka doŋ gibiri kec i kare meno. Pe tye ŋatti mo ma dabo boŋo manyen i kom ginaruka muti. Pien kiraka biyec woko ki i kom ginaruka, ci waŋ boŋo yec medde nen marac. Dok bene pe tye ŋatti mo ma piko koŋo vino manyen i kicaa macon; ka opiko, ci koŋo vino biyeco kicaa woko, koŋo vino bio woko ki kicaa bene biballe. Ento koŋo vino manyen myero gipik i kicaa koŋo vino manyen, wek gin aryo ducu gigwokgi maber.” I kare ma Yecu tye ka lok botgi, cutcut laloc mo obino odonyo i ot orumo coŋe, i nyime kun wacce ni, “Nyara oto pud kombeddi, ento alegi ibin iket ciŋi i kome, ci bibedo kwo.” Yecu oa olubo kore kacel ki lupwonnyene. Ci dako mo ma onoŋo yam otwoyo two agobi pi mwaka apar wiye aryo obino ki tuŋ i ŋe Yecu ogudo dog boŋone, pien onoŋo otamo ki i cwinye kekene ni, “Ka ce agudo boŋone keken, ci abicaŋ.” Yecu olokke, ka onene owacce ni, “Di cwinyi nyara; niyeni ocaŋi.” Ka Yecu obino i ot pa laloc, oneno lukut nyamulere, kun lwak tye ka koko, ci owacci, “Wua woko; nyakoni pe oto ento onino anina.” Ci gin gunyere anyera. Ento i kare ma doŋ oryemo lwak gukato woko, ci en odonyo i ot omako latin nyako-nu ki ciŋe, nyako-nu oa malo. Lok meno oywek owinnye oromo lobo meno ducu. I kare ma Yecu doŋ oa ki kunnu omedde ki wotte, ci lutowaŋ aryo gulube, ma gudaŋe matek ni, “Kica omaki i komwa do, Lakwar Daudi.” Ka doŋ Yecu odonyo i ot, lutowaŋ aryo magi gubino bote; ci en openyogi ni, “Wuye ni atwero timo man?” Gudokke iye ni, “Itwero, Ladit.” Yecu ogudo waŋgi kun wacci, “Myero otimme botwu kit macalo niyewu tye kwede.” Cutcut waŋgi otugi yabbe woko.Yecu ocikogi matek twatwal ni, “Wunen ni dano mo pe oŋeyo lok man.” Ento gin gucito guketo lok man omiyo nyiŋe oywek oromo i lobo meno ducu. I kare ma gia me cito woko, dano gukelo bote dano mo ma doge oto, ma onoŋo tye ki cen marac. Ka doŋ Yecu oryemo cen woko, cutcut ladogeoto-nu ocako lok, mumiyo lwak ma onoŋo gitye kenyo guuro matek, kun giwacci, “Cakke yam con kit gin macalo man peya onoŋo onen i Icrael.” ento Luparicayo guwacci, “En ryemo cen pi twero pa ladit pa cen.” Yecu owoto orumo gaŋi mapatpat ki gaŋi matino ma i caro-gu ducu, kun pwonyo i kacokkegi, dok tito kwede lok me kwena maber me ker pa Lubaŋa ki caŋo kit two ducu kadi wa kit goro ducu. Ka oneno lwak ci kica omake i komgi mada, pien onoŋo gitye ka unogi matek, doŋ gudoko goro, calo romi ma lakwatgi pe. Lacen owaco ki lupwonnyene ni, “Kac dwoŋ, ento lutic nok. Pi meno, wuleg Won poto wek ocwal lutic ka kayo kacce.” Yecu olwoŋo lupwonnyene apar wiye aryo bote, ci omiyogi twero me ryemo cen maraco, ki me caŋo kit two ducu kadi wa goro-gu. Nyiŋ lukwena magi apar wiye aryo gin ene: mukwoŋo Cimon, ma gilwoŋo ni Petero, ki Anderiya ominne; Yakobo wod pa Jebedayo, ki Jon ominne: Pilipo ki Bartolomayo; Tomaci ki Matayo lajog-mucoro; Yakobo wod pa Alipayo, ki Tadayo; Cimon ma yam obedo i kin jo ma gimito locken, ki Juda me Keriot, ma odobe. Dano magi apar wiye aryo Yecu oorogi, kun cikogi ni, “Pe wucit i kin Lulork, pe bene wudony i gaŋ pa Lucamaria mo, ento wucit bot jo Icrael, ma gitye calo romi murwenyo. I kare ma wutye ka wot wutit lok, kun wuwaco ni, ‘Ker me polo doŋ onyiko cok.’ Wucaŋ lutwo, wucer jo muto, wucaŋ ludobo wek gulonnye, wuryem cen maraco. Wun wugamo nono laboŋo cul mo, wumi bene nono laboŋo cul. Pe wuwot ki jabu, kadi ryal, kadi lim mo i del pyerwu, pe wuter kadi kicaa mo me wotwu, kadi ki bamo kanyi aryo, kadi war tyen, kadi ki odoo; pien latic myero gimiye cam ocam. Gaŋ madit nyo paco mo ma wudonyo iye, koŋ wuniaŋ aŋa ma myero ma bedo iye, ci wubed bote nio waŋ ma wua ki kenyo. Ka wuedonyo i ot koŋ wumot dano ma i ot meno. Ci ka ot meno myero, wumi kuc i kom jo me ot meno; ento ka ce pe myero, ci wuwek kucwu odwog cen botwu. Ka ce ŋat mo pe bijolowu nyo pe biwinyo lokwu, ci wuteŋ apwa woko ki i tyenwu i kare ma noŋo wua wuweko ot nyo gaŋ meno. Ada, atittiwu ni, i nino me ŋolo kop can pa Codom ki Gomora bibedo tworatwora, ento can ma gibikelo i kom gaŋ meno doŋ bikato. “Nen, doŋ acwalowu me cito woko macalo romi i kin orudi; pi meno wubed ryek calo twol dok wubed laboŋo bal mo i komwu calo akuri. Dok wugwokke i kom dano; pien gibiterowu i lukiko, dok gibigoyowu i kacokkegi, gibiywayowu giterowu i nyim luloc ki luker-gu pira, wubitito lok ma bedo caden botgi ki bot Lurok bene. Ka giterowu i lukiko, pe wubed ka tamo kit ma myero wulok kwede, nyo kit lok aŋo ma wubilokone; pien lok ma myero wuloki gibimiyowu i cawa meno; pien pe wun aye wubilok, ento Cwiny Maleŋ pa Wonwu aye bilok ki i iwu. Omego bimiyo ominne ni ginek woko, ki wego bene bimiyo latinne ni ginek woko, ki litino gibitugge i kom lunyodogi, gimiyo lunyodogi ni ginekgi woko; dok dano ducu bikwerowu pira. Ento ŋat ma ciro kun diyo cwinye nio i agikki bilarre.. Ka inen guketo ayela i komwu i gaŋ acel, ci wuriŋ woko i gaŋ ma cok kwede; pien ada awacciwu ni, pe wubiwoto i gaŋi me Icrael wurumo woko ducu, ma noŋo peya Wod pa dano obino. “Dano ma pud gipwonyo apwonya pe bedo dit makato ŋat ma pwonye, kadi latic bene pe bedo dit makato laditte; ento romo ka dano ma gipwonyo-ni odoko calo ŋat ma pwonye, ki latic bene ka odoko calo laditte. Ka onoŋo gulwoŋo won ot ni Beeljebul, ci doŋ jo ma i pacone gibilwoŋogi ki nyiŋ marac ma rom mene? “Pi meno, pe wulworgi; pien pe tye gin ma giumo ma pe gibiyabo ka maleŋ, kadi ki gin ma gikano ma pe biŋene. Gin ma awaco botwu i colpiny, myero wutit i leŋpiny; ki gin ma gikwilo akwila i itwu lawewe, wutuc lokke wa i wi labila ot. Pe wulwor jo ma neko kom, ento pe gitwero neko tipo; ento myero wulwor ŋat ma twero neko tipo ki kom ducu i Geena. Ojwinyojwiny aryo pe gicato pi cente apar? Ento mo acel pe poto piny i ŋom ma Wonwu pe ŋeyo. Kadi bed wa yer wiwu doŋ gikwanogi woko liweŋ. Pi meno, pe wulwor; pien piwu tek twatwal makato pi ojwinyojwiny mapol. Pi meno dano ducu ma bituco nyiŋa i nyim dano, an bene abituco nyiŋe i nyim Wora ma tye i polo, ento ŋat ma bikwera i nyim dano, an bene abikwere woko i nyim Wora ma tye i polo. “Pe wutam ni abino me kelo kuc i lobo; an pe abino me kelo kuc, ento pala lucwan. Pien abino me poko kin dano woko ki wonne, nyako bipokke woko ki minne, ki ci-wod bene bipokke woko ki dane. Lukwor pa dano bibedo jo ma i pacone. Ŋat ma maro wonne nyo minne makato an pe myero me bedo danona; ki ŋat ma maro wode nyo nyare makato an pe myero me bedo danona. Dok bene dano ma pe tiŋo yatariyane kun lubo kwede kora pe myero me bedo danona. Dano ma noŋo kwone, birwenyo kwone woko arwenya; ento ma rwenyo kwone pira binoŋo. “Dano ma jolowu noŋo ojolo an, ki ma jola noŋo ojolo ŋat ma oora. Ŋat ma jolo lanebi ni pien obedo lanebi, bilimo bakacic pa lanebi; ki ŋat ma bijolo dano ma kite atir ni pien dano ma kite atir, bilimo bakacic ma rom ki pa dano ma kite atir-ri. Dok bene dano ma bimiyo pii maŋic me amata bot ŋat acel i kom jo magi matino ni pien en obedo, lapwonnyena, ada awacciwu ni, pe bikeŋ bakacicce.” I kare ma Yecu doŋ otyeko ciko lupwonnyene apar wiye aryo-ni, oa ki kunnu ocito ka pwony ki ka tito lok i gaŋi ma cok ki kunnu. I kare ma Jon owinyo pi tic pa Yecu ki i mabuc, ci ooro lupwonnyene bot Yecu wek gupenye ni, “In aye ŋat ma myero obin-ni, nyo dok wakur ŋat mukene?” Ci Yecu odok iye botgi ni, “Wucitit bot Jon gin ma wuwinyo ki ma wuneno; lutowaŋ waŋgi oyabbe guneno piny, luŋolo guwoto, ludobo gilonyogi, ki ludiŋit guwinyo lok, ki jo muto gicerogi woko, ki lucan bene gitito botgi lok me kwena maber. Dano ma pe tamme oballe i koma tye ki gum.” I kare ma doŋ gitye ka dok woko, Yecu ocako lok ki lwak lok i kom Jon, ni, Onoŋo wucito i tim ka neno gin aŋo? Onoŋo wucito ka neno lagada ma yamo obedo ka yeŋone? Wucito kunnu kono piŋo? Wucito ka neno dano ma oruko boŋŋi mabeco? Nen, jo ma ruko boŋŋi mabeco noŋo gibedo i odi pa luker. Wucito kunnu piŋo? Wucito ka neno lanebi mo? Iyo, awacciwu ni ka neno ŋat ma kato lanebi. Man aye ŋat ma yam gicoyo lok i kome ni, “Nen, acwalo lakwenana otelo nyimi, ma bigero yoni ma peya noŋo in ibino.” Ada, awaco botwu ni, pe tye dano mo ki i kin jo ma mon onywalogi ma kato Jon Labatija ki dit; ento ŋat matidi twatwal i ker me polo aye dit kate. Cakke i kare pa Jon Labatija o kwede wa onyoo ker me polo gilaro ki tek, jo ma gin lutim bwami aye gimayo woko ki tek. Pien cik ki lunebi gibedo ka titone nio wa i kare pa Jon; ka ce wumito ye lokke en aye Elia ma myero obin-ni. Ŋat ma ite tye me winyo lok man myero owiny. Abiporo yalwak me kare man ki gin aŋo? Girom ki litino ma bedo i cuk ma gilwoŋo litino wadigi kun giwacci, “Yam wakuto nyamulere botwu, ento wun pe wumyelo; wawero wer lyel, ento wun pe wukok.” Pien Jon yam obino ma pe camo cam, dok bene onoŋo pe mato gin mo, mumiyo guwacci, “Dano-nu tye ki cen marac.” Wod pa dano dok obino kun camo cam kadi wa mato mat bene, meno bene guwacci, “Nen, dano ma laworo dok lamero bene, larem lujogmucoro ki lubalo! Ento ryeko pa Lubaŋa oloyo kop pi ticce ma en otiyo.” Lacen Yecu ocako loko lok ki kiniga i kom gaŋi mogo ka ma onoŋo en otiyo iye ticce matego madito, pien jo ma tye iye gukwero ŋut woko. “Ibikoko aŋee, in Korajin! Ibikoko aŋee, in Betecaida! Kono yam tic madito ma gitiyo i ii gitiyo i Turo ki Cidon, kono onoŋo jone guŋut wa con, kun giruko boŋo cola, ma gibedo i buru bene. Ento atitti ni, can pa Turo ki Cidon bibedo tworatwora i nino me ŋolo kop, makato can ma bipoto i komi. Ki in Kapernaum gibitiŋi woko malo i polo? Pe kumeno, gibidwoko malo i polo? Pe kumeno, gibidwoki woko piny i lyel. Kono yam tic matek madito ma gitiyo i ii-ni gitiyo i Codom, kono obedo tye nio wa onyoo. Ento atitti ni, can pa Codom bibedo tworatwora i nino me ŋolo kop, makato can ma bipoto i komi.” I kare meno Yecu otuco ni, “Apwoyi Wora, in Rwot me polo ki me lobo, pien ikano lok magi woko ki bot luryeko ki luŋe-piny, ci inyutogi bot litino lukere. Iyo, Wora, pien onoŋo kit meno ineno ber i waŋi, ipwoyo kit yo macalo meno. Jami ducu doŋ Wora otyeko miyogi woko bota; ŋat mo pe ma ŋeyo Wod, kono Won keken, dok bene ŋat mo pe ma ŋeyo Won kono Wod keken ki ŋat ma Wod oyero me nyuto Won bote. Wubin bota, jo ducu muol ki ma yec onurowu, ci abimiyo wuywe. Wutiŋ yatta, ci wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu. Pien yatta yot, ki yecca bene pe pek.” I kare meno Yecu owoto kun ŋolo ki i poto bel i ceŋ cabit. Onoŋo kec neko lupwonnyene, ci gucako rito wit bel gumwodo. Ento ka Luparicayo guneno, ci guwaco bot Yecu ni, “Nen, lupwonnyeni gitiyo gin ma cik ogeŋo ni pe giti i ceŋ cabit.” Yecu odok iye botgi ni, “Wun pe wukwano gin ma Daudi otiyo, i kare ma onoŋo kec oneke, en kacel ki jo ma onoŋo gitye kwede? Kit ma en odonyo kwede i ot pa Lubaŋa, ci ocamo mugati ma giketo i nyim Lubaŋa, ma yam cik ogeŋo ni en pe ocam, kadi ki jo ma onoŋo gitye kacel kwede, ento kono ajwagi pa Lubaŋa keken?. Dok bene pe wukwano i cik ni i ceŋ cabit ajwagi ma i ot pa Lubaŋa gipyedo ceŋ cabit, ento gipe ki bal? Atittiwu ni gin madit makato ot pa Lubaŋa tye kany. Ka ce onoŋo wuŋeyo tyen lok man ni, ‘Amito kica, pe lee me gitum’, onoŋo myero pe wuŋol kop olo jo ma pe ki bal. Pien Wod pa dano aye Rwot me cabit.” Yecu oa ki kunnu ocito odonyo i kacokke. Nen, onoŋo yam tye kunnu dano mo ma bade otal. Ci gupenye ni, “Cik ye ni gicaŋ dano i ceŋ cabit?” Gupenye kit meno pien onoŋo gimito ni gidote. Yecu openyogi ni, “Aŋa i kinwu ma ka tye ki romo acel ce romo meno opoto i bur i ceŋ cabit, en pe bimako ywayo kelo woko ka maleŋ? Dano pe pire tek twatwal kato pi romo? Pi meno cik ye ni myero gitim gin maber i ceŋ cabit.” Ci owaco bot dano-nu ni, “Rye badi.” Dano-nu oryeyo bade, ci bade ocaŋ woko maber odoko calo mukene-ni. Ento Luparicayo gukato woko ci guporo lok i kom Yecu, kit macalo myero gineke kwede. Ka Yecu oŋeyo lok man, oa woko ki kunnu. Jo mapol gulube, ci en bene ocaŋogi woko ducu, ocikogi ni pe myero gumi pire oŋene. Man otimme wek lok ma yam lanebi Icaya oloko ocobbe kakare, ni, “Nen, laticca ma ayero ma amaro, ma cwinya yom i kome. Abiketo Cwiny Maleŋ i kome, en bituco ŋolo kop atir bot Lurok. Pe bida, pe bene bidaŋe matek, ŋat mo pe biwinyo dwane i waŋayo; pe bituro lagada ma okak, dok pe bineko mac tara ma lyel nio waŋ ma en omiyo ŋolo kop atir oloyo loc; ento Lurok bigeno gin maber pi nyiŋe.” Ci gikelo bote latowaŋ mo ma tye ki cen marac, ma pe loko, ci Yecu ocaŋe. Cutcut ladogeoto otugi lok dok oneno piny bene. Jo ducu ma onoŋo gitye kenyo guuro matek kun giwaco ni, “Man twero bedo Lakwar Daudi?” Ento Luparicayo guwinyo ci guwacci, “Dano-ni ryemo cen pi twero pa beeljebul, ma en aye ladit pa cen.” Ka Yecu oŋeyo tamgi, ci owaco botgi ni. “Ka ker iye opokke aryo, ker meno lobone balle woko, ki gaŋ bene nyo ot ka opokke iye aryo pe twero cuŋ. Ka ce Catan ryemo Catan, noŋo opokke i dul aryo i kome kekene; ci kerre doŋ bicuŋ niŋniŋ? Ka an aryemo cen pi twero pa Beeljebul, ci litinowu kono giryemo cen pi twero pa aŋa? Pi meno gin aye gibibedo luŋolkopwu. Ento ka ce an aryemo cen pi twero pa Cwiny pa Lubaŋa, ci doŋ nen ni ker pa Lubaŋa doŋ obino woko botwu. Dano mo twero donyo i ot pa ŋat ma kome tek niŋniŋ, ci cako yako jamine ducu, nio ka en otweyo laco meno ma kome tek-ki woko? Ka lacen doŋ cako yako ode. Ŋat ma pe tuŋ bota, meno noŋo en lakworra, dok ŋat ma pe nywako coko kweda, keto mere aketa. Pi meno awacciwu ni, bal ducu ma dano timo, ki lok ducu ma giyeto kwede Lubaŋa, gibiwekone woko, ento bal me yet ma giyeto ki Cwiny Maleŋ pe gibiwekone matwal. Dok dano ma loko lok marac i kom Wod pa dano gibiweko balle; ento ŋat ma loko lok marac i kom Cwiny Maleŋ pe gibiweko balle, kadi i kare man nyo i kare ma bino anyim. “Myero wuŋe ni yat maber nyak nyige mabeco, ki yat marac nyak nyige maraco; pien yat giŋeyo i kom nyige. Wun litino ororo, wutwero loko lok maber niŋniŋ, ma kun wun jo maraco? Pien lok ma ogurre i cwiny dano, en aye dog bene loko. Dano maber kwanyo gin maber ki i kin jamine mabeco ma en okano, dano marac kwanyo gin marac ki i gin maraco ma en okano. Atittiwu ni, lok ducu me carocaro ma dano giwaco ma pe gigwokke iye-ni, gibipidogi pire i nino me ŋolo kop; pien lok pa iloko aye bimiyo iloyo kop, ki dok bene lok ma iloko aye bimiyo giŋolo kop loyi.” Jo mogo i kin lupwony-cik ki Luparicayo guwaco bot Yecu ni, “Lapwony, wamito neno lanyut mo ma a ki boti.” Ento Yecu odok iye owaco botgi ni, “Yalwak pa jo maraco ki lutim abor giyenyo lanyut, ento pe gibimiyo botgi lanyut mo kono lanyut pa lanebi Yona keken. Pien kit macalo Yona yam otyeko nino adek, dyeceŋ ki dyewor, i i rec, kit meno Wod pa dano bene bityeko nino adek, dyeceŋ ki dyewor i cwiny lobo. Jo Nineve bicuŋ kacel ki yalwak me kare man, i kare me ŋolo kop, ci miyo kop loyogi; pien gin yam guŋut pi lok ma Yona onoŋo otito ento nen, gin madit makato Yona tye kany. Kabaka ma dako ma tye yo tuŋ acuc bicuŋ kacel ki yalwak me kare man, i kare me ŋolo kop, ci miyo kop loyogi; pien en oa ki i agikki lobo obino ka winyo ryeko pa Solomon, ento nen, gin madit makato Solomon tye kany. “Ka cen marac doŋ oa woko ki i kom dano mo, ci cito wirre i kabedo ka ma pii pe iye kun yenyo ka ma ebiywe iye; ento pe noŋo kabedo mo kadi ki acel. Ci cako wacci, ‘Abidok gira i oda ka ma yam aa ki iye-ni.’ Ka obino, ci noŋo ode tye nono, giyweyo woko, dok giyubo woko maber. Ka doŋ cito kelo cen mukene abiro ma giraco gikate woko, ci gidonyo gibedo i ode-ni; lacen dano-nu bibedo marac makato kit ma onoŋo yam obedo kwede con. Bibedo kit meno bene bot yalwak pa jo maraco me kare man.” I kare ma Yecu pud tye ka lok bot lwak, nen, minne kacel ki omegine onoŋo gucuŋ woko, kun giwaco ni gimito lok ki Yecu. Ci dano mo acel owacce ni, “Nen, meni ki omegini gitye gucuŋ woko gimito lok kwedi.” Ento Yecu odok iye ki dano-nu ni, “Maa aŋa? Ki omegina kono aŋagi?” Ka oryeyo bade yo tuŋ bot lupwonnyene, ci owaco botgi ni, “Wunen, maa ki omegina aye jo ma tye kany! Pien dano ma tiyo gin ma Wora ma tye i polo mito, meno aye omera ki lamera, ki maa bene” I nino meno acel-li Yecu oa woko ki i ot, ci ocito obedo i dog nam. Lwak madwoŋ twatwal gucokke bote, omiyo en odonyo i yeya ci obedo iye, lwak ducu gucuŋ i wi tura. Obedo ka loko botgi lok mapol i carolok, kun wacci, “Lacoc ocito ka coyo kodi. Ka kun coyo, kodi mogo okir i ŋet yo, winyo gubino gucamo woko. Kodi mukene okir i kom pata ka ma ŋom tye iye manok. Cutcut gutwi, pien ŋom pe tut. Ento ka ceŋ oryeny, owaŋogi gutwo woko, pien onoŋo lwitgi pe. Kodi mukene okir i kin okuto, okuto olot odiyogi woko. Kodi mukene okir i ŋom maber, ci gunyako nyiggi, mogo miya acel, mukene pyerabicel, ki mogo pyeradek. Ŋat ma tye ki it me winyone owiny.” Lacen lupwonnye gubino bot Yecu gupenye ni, “Piŋo iloko kwedgi i carolok?” En odok iye botgi ni, “Wun gimiyo botwu mot me ŋeyo muŋ me ker me polo, ento jo maca pe gimiyo botgi. Pien ŋat ma tye ki gin ma gibimiyo doki makato, ci en bibedo ki jami mabup; ento ŋat ma pe ki gin mo, kadi gin ma en tye kwede gibikwanyo woko ki bote. Man aye gin mumiyo aloko kwedgi i carolok, pien kadi neno piny pe gineno, kadi winyo lok bene pe giwinyo, dok bene pe giniaŋ. Ento lok pa Lubaŋa ma yam lanebi Icaya otito ocobbe kakare i komgi ni, ‘Winyone mere wubiwinyo, ento pe wubiniaŋ te lokke; nenone wubineno, ento pe wubiŋeyo gin ma tye. Pien jo me rok man cwinygi doŋ odoko nwaŋ, ki itgi bene doŋ odiŋ woko ka winyo lok, dok gumiyo waŋgi woko, wek pe ginen ki waŋgi, pe bene giwiny ki itgi, pe bene giniaŋ iye ki cwinygi, pe gilokke gidwog bota acaŋgi.’ “Ento wun waŋwu tye ki gum, pien gineno piny, itwu bene tye ki gum, pien giwinyo lok. Ada, awaco botwu ni, lunebi mapol ki jo ma kitgi atir yam guparo pi neno gin ma wun wuneno-ni, ento pe guneno, ki me winyo gin ma wuwinyo, ento pe guwinyo. “Koŋ doŋ wuwiny carolok i kom lacoc. Ka dano mo owinyo lok me ker pa Lubaŋa ce pe oniaŋ iye, Larac bino ci mayo kodi ma gicoyo i cwinye-ni woko; man aye kodi ma onoŋo gicoyo okir i ŋet yo. Doŋ kodi ma gicoyo i kom pata tye kit man, man aye dano ma winyo lok ci oyotoyot mako lok meno ki yomcwiny; ento pe noŋo tye ki lwite i iye, ri pi kare manok. Ka can obino, nyo yelo dano pi lok man, cutcut dano-nu tugi poto woko. Doŋ kodi ma gicoyo okir i kin okuto, man aye dano ma winyo lok, ento paro lok me lobo man, ki maro lonyo, diyo lok woko, ci miyo pe nyak. Ento kodi ma gicoyo okir i ŋom maber-ri, aye dano ma winyo lok dok niaŋ iye; en ada cako nyako nyig dok cek, mukene miya acel, ki mukene pyerabicel, ki mukene pyeradek.” Dok obolo botgi carolok mukene kun wacci, “Ker me polo rom ki dano mo ma ocoyo kodi mabeco i potone. Ento i kare ma dano doŋ gubuto woko, lakworre obino ci ocoyo doo i kin kal, ka ocito gire woko. I kare ma ginapita-nu otwi odoŋo, kal oŋok, ci doo bene ocako nen. Lutic pa won ot gucito bot won ot gupenye ni, ‘Ladit, yam onoŋo pe icoyo kodi mabeco i potoni? Piŋo dok waneno doo tye iye?’ Won ot odok iye owaccigi ni, ‘Lakwor aye ma otimo man.’ Ci lutic gupenye ni, ‘Imito ni wacit wacok doo magi woko?’ Ento won ot odok iye owacci, ‘Pe, ka wudoyo doo magi woko, miyo wuputo kal woko bene kacel ki doo. Koŋ wuwek doo ki kal ducu gudoŋ kacel nio wa i kare me kac; i kare me kac abiciko lutic ni, Koŋ wucok doo woko mukwoŋo ci wutwegi woko i dul i dul me awaŋa, ento kal aye wukaa wuket i derona.’” Dok obolo botgi carolok mukene, kun wacci, “Ker me polo rom ki kodi dek karadali, ma dano okwanyo ci ocoyo i potone. Kodi dek karadali-ni dok tidi twatwal ki i kin kodi ducu, ento ka odoŋo doko yat madit makato dek ducu. Doko yat mo madit ma winyo me polo gibino gigero odigi i jaŋe.” Obolo botgi dok carolok mukene ni, “Ker me polo rom ki tobi ma dako mo okwanyo orubo ki moko mugati ma romo adita adek, nio ka moko ducu oyenyo, okwot.” Lok magi ducu Yecu oloko bot lwak i carolok. I adane en pe obedo ka lok kwedgi lok mo laboŋo bolo carolok, wek omi lok ma yam lanebi oloko ocobbe kakare ni, “Abiwaco botwu lok i carolok, abitito botwu lok ma yam okanne woko cakke wa i acakki piny.” Ka oweko lwak ci ocito odonyo i ot, lupwonnyene gubino bote guwacce ni, “Koŋ itit botwa carolok i kom doo ma i poto.” Yecu odok iye ni, “Ŋat ma ocoyo kodi mabeco-ni aye Wod pa dano; poto aye lobo man, dok kodi mabeco te lokke ni litino me ker pa Lubaŋa, doo aye litino pa Larac. Lakwor ma ocoyogi aye Catan; kac, meno agikki piny, lukac aye lumalaika. Kit macalo gicoko kwede doo giwaŋo woko i mac, bibedo bene kit meno i agikki piny. Wod pa dano bioro lumalaikane, gibicoko ki i te kerre gin ducu ma miyo dano gipoto i bal, kacel ki jo ducu ma gin lutim maraco, ci bologi woko i ruk mac, ka ma dano bibedo iye ka koko kun gikayo lakgi. I kare meno jo ma kitgi atir biryeny calo ceŋ i ker pa Wongi. Ŋat ma ite tye myero owiny. “Ker me polo rom ki lonyo ma gikano i poto, ma dano onoŋo ci dok oyiko woko. Doŋ pi yomcwinye omiyo en ocito ocato jami ducu ma onoŋo en tye kwede, ci owilo poto meno woko. “Dok ker me polo rom ki lacat-wil ma onoŋo yam obedo ka yenyo tiko mabeco me wel. I kare ma doŋ onoŋo tiko mo acel me wel, ocito ocato jami ducu ma onoŋo en tye kwede, ci owilo tiko meno woko. “Dok ker me polo rom ki obwo ma giciko i nam ci omako kit kwa rec-gu ducu. I kare ma doŋ gupoŋo woko ki rec, dano guywayo gukelo woko i wi tura, gucako bedo piny guyero mabecone guketo i aduku, ki maracone gubolo woko. Bibedo kit meno i agikki piny. Lumalaika gibino ci gipoko jo maraco woko ki i kom jo ma kitgi atir, gibibologi woko i ruk mac, ka ma dano gibikok kun gikayo lakgi.” Cutcut Yecu openyogi ni, “Doŋ wuniaŋ i lok man ducu?” Gudokke iye ni, “Iyo.” Yecu dok owaco botgi ni, “Pi meno lapwony-cik mo ma gipwonyo pi ker me polo rom ki dano mo ma won ot, ma kwanyo gin manyen ki macon ki i kom lonyone.” I kare ma Yecu doŋ otyeko loko carolok magi, oa woko ki kunnu, ci odwogo i lobo tugi. Opwonyogi i kacokkegi, omiyo guuro matek kun giwacci, “Dano-ni onoŋo ryeko man ki kwene? Dok tic matego macalo magi ma en tiyo-gu oa ki kwene? Minne pe Maliam? Ki omegine pe Yakobo ki Yucepu ki Cimon ka Juda? Lumegine ducu pe gitye kacel kwedwa kany? Ci dano-ni onoŋo kit man ducu ki kwene?” Cutcut cwinygi ocako a woko i kome. Ento Yecu owaco botgi ni, “Lanebi giketo deyo i kome, ento pe giketo deyo i kome i lobo tugi ki i ode.” Pe otiyo tic matego mapol kunnu, pien onoŋo niyegi pe. I kare meno Kerode ma laloc madit owinyo pi yweka pa Yecu; mumiyo owaco bot luticce ni, “Man aye Jon Labatija. Lubaŋa ocere woko ki i kin jo muto, en aye mumiyo lakit teko macalo meno tye ka tic i kome-ni.” Pien onoŋo yam Kerode omako Jon, otweyo ci oketo woko i mabuc pi Kerodia, ci-ominne, dako pa Pilipo; pien Jon onoŋo owaco bote ni, “Cik pe oye ni ibed ki ci-omeru.” Kadi bed omito neke woko, ento olworo lwak, pien lwak onoŋo giworo Jon ni en lanebi. Ento ka kare me po pi nywalo Kerode oromo, ci nya pa Kerodia omyelo i nyim welo ci oyomo cwiny Kerode mada. Mumiyo Kerode ocikke kun kwoŋŋe akwoŋa bot nyakonu ni ebimiye gin ducu ma en bipenyo pire. Minne otitte lok roro, omiyo nyako-nu ocito olego kabaka ni, “Amito imiya wi Jon Labatija i weer kombeddi.” Ci kabaka Kerode okumo matek; ento pi kwoŋ ma en okwoŋo ki welone omiyo ociko ni myero gimiye. Ci ooro dano ocito omiyo giŋolo ŋut Jon woko ki i mabuc, ci giketo wiye i weer gikelo gimiyo bot nyako-nu, ka nyako-nu otero bot minne. Lacen lupwonnye pa Jon gubino gutiŋo kome guyiko woko i lyel; ka gucito gutito pire bot Yecu bene. Ka Yecu owinyo lok man, ci oa woko ki kunnu, owoto ki yeya ocito i kabedo ka ma dano pe iye kaikene. Ento ka lwak guwinyo pire, ci gulube kun giwoto ki tyengi ma gia ki i gaŋi mapatpat. Ka Yecu okato i wi tura, oneno lwak madwoŋ; kica omake i komgi, ci ocaŋo lutwo ma gukelo bote. Ka oo otyeno, lupwonnyene gubino bote, guwacce ni, “Man kabedo ka ma dano pe iye, cawa bene doŋ okato woko; cwal lwak gucit i kin paco macokcok, guwil cam pigi kengi.” Yecu odok iye ni, “Pe myero gucit woko; ento wun wumi botgi cam gucam.” Guwacce ni, “Watye kany ki mugati abic ki rec aryo.” Yecu owaco ni, “Wukel mugati ki rec aryo-ni bota kany.” Ka ociko lwak ni gubed piny i kom lum alita. Ka okwanyo mugati abic ki rec aryo, ci oneno malo i polo, olego gum, obaro i mugati omiyo ki lupwonnyene, ci lupwonnyene gumiyo bot lwak. Gin ducu gucamo guyeŋ. Gicoko ŋide cam mudoŋ, opoŋo duku apar wiye aryo. Jo ma gucamo cam meno onoŋo giromo co alip abic, ma noŋo pe gikwano iye mon ki litino. Cutcut Yecu ociko lupwonnyene ni gudony i yeya, gukwoŋ nyime me cito loka ca, kun noŋo en pud eciko lwak. Lacen ma doŋ ociko lwak, ci ocito i wi got ka lega kaikene. I kare ma piny doŋ oyuto, onoŋo en tye kunnu kene. Yeya onoŋo doŋ okato woko mairo madwoŋ nia ki i wi tura, kun pii tye ka twago yeya; pien onoŋo yamo kodo bino ki i nyimgi. I kine okogweno, Yecu oa obino botgi kun woto i wi nam ki tyene. Ento ka lupwonnye gunene kun woto i wi nam ki tyene, tipo komgi oto woko lirut, kun giwacci, “Man tipo!” Ci gudaŋŋe matek pi lworo. Ento oyotoyot Yecu oloko kwedgi kun waco ni, “Wudi cwinywu, an enni; gwok wulwor.” Ci Petero ogamo doge owacce ni, “Rwot, ka meno aye in, ci wek abin boti kunnu kun awoto ki i wi pii.” Yecu odokke iye ni, “Bin.” Ci Petero oa woko ki i yeya, owoto ki i wi pii obino bot Yecu. Ento ka oneno yamo tye ka kodo, ocako doko lwor, onoŋo bene doŋ cako lwiny woko i pii, ci odaŋŋe matek ni, “Rwot, lara do.” Oyotoyot Yecu ocwalo ciŋe ci omake, kun wacce ni, “In dano ma niyeni nok, piŋo onoŋo ibedo ka kalo akala?” Ka doŋ gudonyo i yeya, ci yamo ocako pye mot. Jo ducu ma onoŋo gitye i yeya gucako woro Yecu kun giwaco ni, “Ada, in giri i Wod pa Lubaŋa.” Ka doŋ gukato loka ca, ci gukato i wi tura i lobo Genecaret. Ka jo ma i kabedo meno doŋ guŋeye, ci gucwalo lok i kabedo ducu macokcok ki kunnu, ci dano gukelo bote jo ducu ma yam onoŋo komgi lit. Gubako doggi bote ni myero oye gugud dog boŋone keken; jo ducu ma gugudo dog boŋone gucaŋ woko ducu maber. Luparicayo ki lupwony-cik gua ki i Jerucalem gubino bot Yecu, ci gupenye ni, “Piŋo lupwonnyeni pe gilubo kit kwer pa ludoŋo? Pien gicamo cam ma pe gulwoko ciŋgi.” Yecu odok iye botgi ni, “Piŋo wun kono pe wulubo cik pa Lubaŋa pi lubo kit kwerwu? Pien Lubaŋa yam ociko ni, ‘Wor woru ki meni’, ka dok ni, ‘Ŋat ma loko lok marac i kom wonne nyo i kom minne myero ginek woko aneka.’ Ento wun wuwaco ni, ‘Ka dano mo owaco bot wonne nyo bot minne ni, Gin ma kono akonyi kwede doŋ amiyo woko bot Lubaŋa, en pe myero owor wonne.’ Kit meno pi kit kwerwu, wumiyo lok pa Lubaŋa doŋ odoko goro. Wun lugoba! Lanebi Icaya yam oloko i komwu kakare i kare ma en owacci, ‘Rok man kara giwora ki doggi nono, ento cwinygi pe i koma wacel; giwora nono, pwony ma gipwonyo obedo pwony ma mako kit pa dano.’” Yecu olwoŋo lwak bote, ci owaco botgi ni, “Wuwiny lokka, ci wuniaŋ iye. Pe gin ma donyo i dog dano aye balo dano, ento kono gin ma a ki i dog aye balo dano.” Ci lupwonnye gubino guwacce ni, “Iŋeyo ni Luparicayo cwinygi ocwer twatwal i kare ma guwinyo lok ma in iwaco?” Yecu odok iye ni, “Kit ginapita ducu ma Wora ma tye i polo pe opito gibiputo woko ki lwite. Wek gubedi; meno gin lutowaŋ ma gipeyo lutowaŋ wadigi. Ka ce latowaŋ peyo latowaŋ lawote, ci gin aryo ducu gibipoto woko i bur.” Ento Petero owacce ni, “Gony te lok me carolok man botwa.” Ci Yecu openyogi ni, “Wun kara peya wuniaŋ bene? Pe wuneno ni gin ma donyo i dog dano kato cito i ic, kit meno a ki kunnu kato woko? Ento gin ma katti ki i dog a ki i cwiny dano, man aye balo dano. Pien gin ma a ki i cwiny dano aye tam maraco, nek, abor, cot, kwalo kwo, bedo caden me goba, yet. Magi aye gin ma balo dano; ento camo cam ma pe gilwoko ciŋ pe balo dano mo.” Ci Yecu oa ki kunnu, ocito wa i lobo ma tye cok ki Turo ki Cidon. Ci nen, dako mo ma en Lakanaan ma oa ki i lobo meno obino kun daŋŋe adaŋa ni, “Ai Rwot, Lakwar Daudi tima kica do; nyara tye ki cen, tye ka une marac twatwal.” Ento Yecu pe ogamo dog dako-nu kadi ki acel. Mumiyo lupwonnyene gubino gubako doggi bote ni, “Ryem dako ni ocit woko cen, pien tye ka daŋŋe yo tuŋ i ŋewa.” Yecu odok iye ni, “Yam giora bot jo Icrael keken, pien gitye calo romi murwenyo.” Ento dako-nu obino oguŋo i nyime, kun wacci, “Rwot, konya.” Ci Yecu odok iye ni, “Pe ber me kwanyo cam pa litino me bolone woko bot gwogi.” Dako-nu odok iye ni, “Rwoda, meno iwaco kakare. Kadi bed kumeno gwogi bene gicamo ŋide cam ma poto ki i wi meja pa ladit do.” Ka dok Yecu owaco bot dako-nu ni, “In dako-ni niyeni dit. Myero obed boti kit macalo imito.” Ci nyare otugi caŋ woko cut i cawa meno. Yecu oa ki kunnu, omedde ki wotte, oŋolo ki i dog nam Galilaya. Ocito oito i wi godi matitino ci obedo kunnu. Ci lwak dano gukelo bote luput ki luŋolo, jo ma te lebgi oto, ki lutowaŋ, ki lutwo mukene mapol, gupyelogi piny ka tyen Yecu, ci en ocaŋogi. Mumiyo lwak guuro twatwal ka guneno lutelebgi oto guloko, jo ma ciŋgi okwe gucaŋ, jo ma tyengi oŋol guwoto, kadi wa lutowaŋ bene guneno piny; gupako Lubaŋa pa jo Icrael matek. Yecu olwoŋo lupwonnyene bote ci owaco botgi ni, “Kica maka i kom lwak man, pien doŋ gubedo kweda kany pi nino adek, ma kun pe gitye ki cam mo. Pe amito ni acwalgi woko ki kec, miyo kec bwoyogi woko i yo.” Ci lupwonnye gudokke iye ni, “Kara man wabinoŋo mugati kwene ma twero romo lwak macalo man i tim kany?” Yecu openyogi ni, “Wutye ki mugati adi?” Gugamo ni, “Abiro, ki rec mogo matitino manok.” Ociko lwak ni gubed piny i ŋom, ci omako mugati abiro-nu ki rec bene, ka doŋ opwoyo, obaro igi, ci omiyogi bot lupwonnyene, ka lupwonnyene gumiyo bot lwak. Gin ducu gucamo guyeŋ; gucoko ŋide cam ma oloyogi, oromo adita abiro mupoŋ. Jo ma gucamo cam meno onoŋo giromo co alip aŋwen, ma pe gikwano iye mon ki litino. Lacenne ka doŋ ociko lwak, odonyo i yeya, ci ocito i lobo Magadan. Luparicayo ki Lucadukayo gubino, gubito Yecu ni onyut botgi lanyut ma oa i polo. Yecu ogamo doggi ni, “Ka piny oyuto, wuwacci, ‘Piny bibedo maber; pien polo nen makwar.’ Dok i odiko wuwacci, ‘Tin kot bicwer madit, pien polo nen makwar, dok ocido woko licuc.’ Wuŋeyo poko kin gin ma nen i pol, ento pe wutwero poko lanyut me kare. Yalwak pa jo maraco ki lutim abor yenyo lanyut, ento pe gibimiyo botgi lanyut mo kono lanyut pa Yona keken.” Ci oa woko ki botgi ocito ka mukene. I kare ma lupwonnye guo loka tuŋcel, onoŋo wigi owil woko me tero mugati mo. Ci Yecu owaco botgi ni, “Wugwokke i kom tobi pa Luparicayo ki pa Lucadukayo.” Gubedo ka laro lok i kingi kekengi kun giwaco ni, “Pe wakelo mugati.” Ka Yecu oŋeyo, ci openyogi ni, “Piŋo wupennye kekenwu ni mugati pe, wun jo ma niyewu nok? Peya wuniaŋ ce, nyo pe wupo pi mugati abic pi jo alip abic-ci? Yam wucoko ŋide opoŋo aduku adi? Nyo mugati abiro pi jo alip aŋwen, yam wucoko ŋide opoŋo adita adi? Piŋo pe wuniaŋ ni an pe aloko botwu lok i kom mugati kikome? Wugwokke i kom tobi pa Luparicayo ki pa Lucadukayo.” Lacen guniaŋ maber ni, Yecu onoŋo pe oloko botgi me gwokke i kom tobi me mugati, ento i kom pwony pa Luparicayo ki pa Lucadukayo Ka Yecu doŋ oo i lobo ma cok ki Cecaria Pilipi, ci openyo lupwonnyene ni, “Dano mono giwacci Wod pa dano en aŋa?” Guwacce ni, “Jo mogo giwacci Jon Labatija, jo mukene giwacci Elia, ki jo mogo giwacci Jeremia nyo ŋat mo acel i kin lunebi.” Ka dok openyogi ni, “Wun kono wuwacci an aŋa?” Cimon Petero ogamo ni, “In i Kricito ma Lubaŋa oyero, Wod pa Lubaŋa makwo.” Ci Yecu odokke iye ni, “Itye ki gum, Cimon wod pa Yona! Pien gin mo ma tye i kom ki remo pe onyutti lok man, ento Wora ma tye i polo aye. Doŋ awacci ni in i Petero, ma te lokke Pata, ci abimiyo lwak jo muye an gicuŋ i kom pata man, teko me to pe bitwero loyone. Abimii layab me ker me polo, doŋ gin ducu ma in itweyo i wi lobo man gibitweyo bene wa i polo, dok gin ducu ma igonyo i wi lobo man gibigonyo bene wa i polo.” Ci ocikogi matek twatwal ni pe gutit bot ŋat mo ni en e Kricito ma Lubaŋa oyero. Cakke i kare meno Yecu ocako nyuto bot lupwonnyene ni myero ecit i Jerucalem, dok myero ecir can madwoŋ ki bot ludoŋo ki ajwagi madito pa Lubaŋa ki lupwony-cik; gibineke, ento i nino me adekke gibicere woko. Ci Petero otere cen, ocako juke, kun wacci, “Lubaŋa myero pe oye ni gitimi kit meno, Rwot! Gin macalo man pe bitimme i komi wacel.” Ento Yecu olokke owaco bot Petero ni, “Dok cen i ŋeya, in Catan! Idoko ariya woko bota, pien tammi pe lubo pa Lubaŋa, ento pa dano.” Yecu otito bot lupwonnyene ni, “Ka ce dano mo mito lubo kora, myero okwoŋ kwerre kekene, ka ocak tiŋo yatariyane, olub kwede kora. Pien dano ma mito laro kwone birwenyone arwenya, ento dano mo ma rwenyo kwone pira aye binoŋone. Konyo dano ma olimo lobo ducu ki gin aŋo mono, ka ce kwone gikwanyo woko? Dano dok bimiyo kit gin aŋo ma ka kwone? Pien Wod pa dano bidwogo ki deyo pa Wonne kacel ki lumalaikane, ci biculo dano acel acel kun lubo kit tic ma yam dano-ni otiyo. Adada, awacciwu ni, tye jo mogo ma gucuŋ kany ma pe gibibilo to wacel, ma peya guneno Wod pa dano ka bino i kerre.” Ka nino okato abicel, ci Yecu otero Petero ki Yakobo ki Jon ominne, oito kwedgi i wi got mabor i muŋ gin kengi. Kome ocako lokke woko i nyimgi, waŋe oryeny calo ceŋ, ginarukane odoko tar ma wil calo dero ceŋ. Ci Moses ki Elia gucako nen botgi, gubedo ka lok ki Yecu. Petero owaco bot Yecu ni, “Rwot, ber mada me bedo kany. Ka ce imito, abigero aduc adek kany, acel meri, acel pa Moses, ki acel pa Elia.” I kare ma pud tye ka lok, nen, tipo pol ma ryeny oumogi woko lipuk, ci dwan owinnye ki i pol ma wacci “Man aye Woda ma amaro; wuwinye.” Ka lupwonnye guwinyo man, guryebbe piny, lworo omakogi matek. Yecu obino botgi ogudogi, kun waco botgi ni, “Wua malo; pe wubed ki lworo.” I kare ma gutiŋo waŋgi malo, pe guneno ŋat mo ento kono Yecu keken. I kare ma doŋ gitye ka lor piny ki i wi got, Yecu ocikogi ni, “Pe wutit bot dano mo gin ma wuneno, nio waŋ ma Wod pa dano ocer ki i kin jo muto.” Ci lupwonnyene gupenye ni, “Piŋo lupwony-cik giwacci, Elia aye koŋ kwoŋo bino?” Yecu odok iye ni, “Elia aye myero okwoŋ bino, ka wek ocak dwoko jami ducu kakare. Ento atito botwu ni Elia doŋ otyeko bino wa con, ento gin pe guŋeye, gutimo gin ma gimito i kome. Wod pa dano bene bilimo can madwoŋ ki i ciŋgi kit meno.” Lacen lupwonnye guniaŋ ni Yecu oloko botgi lok i kom Jon Labatija. Ka doŋ guo bot lwak, ci dano mo oa obino bote oguŋo i nyime kun wacci, “Rwot, kica omaki i kom woda, pien two alili omake marac twatwal miyo tyen mapol bolle woko i mac, dok tyen mapol bolle woko bene i pii. Nakanen akele bot lupwonnyeni, ento caŋone oloyogi.” Ci Yecu ogamo ni, “Wun yalwak me kare man niyewu pe, kitwu bene doŋ oballe woko, abibedo kwedwu nio wa awene? Wukel en bota kany.” Ci Yecu ogerre i wi cen, cen oa woko ki i kome, cutcut awobi-ni ocaŋ woko i cawa meno. Lacen lupwonnye gubino bot Yecu i muŋ gupenye ni, “Gin aŋo mugeŋowa ryemone?” Yecu odok iye botgi ni, “Pien niyewu nok. Pien ada, awacciwu ni, ka ce niyewu obedo calo nyig kodi karadali, ci wubiwaco ki got man ni, ‘Dirre i kabedo ma tye loka ca’, kit meno bidirre; ci gin mo pe biloyowu.” [“Kit gin macalo man pe twero katti woko, kono ki lega ki ri kec keken.”] I kare ma gucokke kacel i Galilaya, Yecu owaco bogti ni, “Wod pa dano gibimiye woko i ciŋ dano, gibineke woko, ento bicer woko i nino me adekke.” Ci gin ducu gukumo matek twatwal. Ka guo i Kapernaum, jo ma jogo mucoro me ot pa Lubaŋa gucito bot Petero ci guwacce ni, “Lapwonywu pe culo mucoro me ot pa Lubaŋa?” Petero ogamo ni, “Culo.” I kare ma odwogo paco, Yecu oloko kwede mukwoŋo, kun penye ni, “Itamo gin aŋo, Cimon? Luker me lobo man gijogo mucoro nyo luwalo ki bot aŋa? Gijogo ki bot litinogi nyo ki bot jo mukene?” I kare ma ogamo ni, “Ki bot jo mukene”, Yecu owacce ni, “Ka kit meno ci litinogi ducu tye ki kuc. Kadi bed kumeno, pe wabal tamgi, cit i dog nam, bol goli i pii, yut rec mukwoŋo moko; ka iyabo doge ci ibinoŋo iye cekel. Kwany cekel meno imi botgi pira ki piri bene.” I kare meno lupwonnye gubino bot Yecu, gupenye ni, “Aŋa ma loyo ki dit i ker me polo?” Ci Yecu olwoŋo latin mo bote, ocibo ocuŋ i kingi, ka owaco botgi ni, “Ada awaco botwu ni, ka pe wulokke wudoko macalo litino, pe wubidonyo i ker me polo wacel. Dano ma mwolle woko kekene calo latin man, en aye ma loyo ki dit i ker me polo. Dano ma jolo latin mo acel macalo man i nyiŋa, noŋo ojolo an. “Ento dano ma miyo ŋat acel ma i kin jo magi matino ma guye an-ni poto i bal, onoŋo bedo ber makato ducu ka gitweyo kidi rego madit i ŋute ci gibole kwede woko wa i nam matut. “Lobo bineno can pi gin ma miyo dano gipoto i bal. Pien gin ma miyo dano poto i bal myero obin, ento dano ma kelo gin ma miyo dano poto i bal bineno can! Ka ce ciŋi nyo tyeni aye miyo ipoto i bal, ci toŋ iŋun ibol woko; twara ma idonyo i kwo ma ciŋi lakucel peke nyo laput, ber makato ma ibedo ki ciŋi aryo nyo tyeni ducu giboli kwede woko i mac ma pe to. Ka ce waŋi aye miyo ipoto i bal, ci kol woko; twara ma idonyo i kwo ma waŋi lakucel, kato ma kono giboli ki waŋi aryo ducu i mac Geena. “Myero wunen ni pe wucayo ŋat mo acel ki i kin jo magi matino-ni; pien awacciwu ni, i polo kuca lumalaikagi neno waŋ Wora ma tye i polo kare ducu. [Pien Wod pa dano obino ka laro jo murwenyo.] Wutamo gin aŋo? Ka ce dano mo tye ki romine miya acel, ka acel i kingi ocito orwenyo woko, pe biweko romi pyeraboŋwen wiye aboŋwen-ni i wi cere-gu, ci cito ka yenyo en murwenyo-ni? Ka onoŋe, ada awaco botwu ni, cwinye bibedo yom pire makato pi romi pyeraboŋwen wiye aboŋwen ma pe onoŋo gurwenyo-ni. Kit meno Wora ma tye i polo bene pe mito ni ŋat mo acel i kin jo magi matino myero oto. “Ka ce omeru obalo bal mo boti, cit bote inyutte balle, i kin in ki en keken. Ka owinyo lokki, ci doŋ inoŋo omeru. Ento ka pe owinyo lokki, kwany dano acel nyo aryo mukene wucit kwedgi, wek lok ma caden aryo nyo adek giloko omok lok ducu. Ka ce okwero winyo lokgi, tit pire bot lwak jo muye an; ka ce okwero winyo wa lok pa jo muye an, wek obed boti calo Larok ki lajog-mucoro. “Ada awaco botwu ni, gin mo ducu ma wutweyo i wi lobo man gibitweyo kadi wa i polo, gin mo ducu ma wubigonyo i wi lobo man gibigonyo bene wa i polo. Dok bene awaco botwu ni, ka jo aryo i kinwu biye kacel lok i kom gin ma gilego, ci Wora ma tye i polo bitimo pigi. Pien ka ma jo aryo nyo adek gucokke kacel i nyiŋa, an bene noŋo atye kunnu i kingi.” Petero oa obino bot Yecu ci openye ni, “Rwot omera mono bibalo bal bota tyen adi, ka dok atim kica bote. Pud dok abitimo bote kica ka obalo tyen abiro?” Yecu owacce ni, “Pe awacci ni ma romo tyen abiro, ento ma romo tyen pyerabiro tyen abiro. “Pi meno ker me polo gitwero poro ki kabaka mo ma onoŋo yam omito yubo lok me banya ki luticce. I kare ma doŋ ocako kwano wel, ci gikelo ŋat mo acel ma onoŋo tye ki banyane ma romo milion mapol ata. Kit macalo onoŋo doŋ pe twero culo banya-nu, ci laditte ociko ni myero gicate woko i opii, en kacel ki dakone ki litino, ki kit jami ducu ma onoŋo en tye kwede, wek gicul ki banya meno. Cutcut latic-cu orumo coŋe piny i nyime, kun bako doge bote ni, ‘Ladit, koŋ idi cwinyi i koma do, ci abiculli gin ducu.’ Ci kica omako ladit i kom laticce-nu, ogonye woko dok oweko banyane bene. Ento latic-cu i kare ma okato woko, orwatte ki latic mo i kom lutic wadigi ma onoŋo tye ki banyane ma romo ciliŋ miya abic, ci omake ki ŋute kun peye ma wacci, ‘Cul banyana!’ Ento latic lawote-ni oryebbe piny kun bako doge bote ni, ‘Koŋ idi cwinyi i koma, abiculo banyani.’ En okwero woko, ocito otweye i mabuc nio ka biculo banyane. Ka lutic wadigi guneno gin ma otimme-ni, ci cwinygi ocwer matek twatwal, gucito gutito gin ducu ma otimme bot laditgi. Cutcut ladit olwoŋe ci owacce ni, ‘In latic marac! Aweki banya ca woko ducu pien onoŋo ilega kun ibako dogi bota; onoŋo in bene pe kica twero maki i kom latic lawoti-nu, kit macalo onoŋo kica omaka i komi-ni?’ Kiniga omako ladit twatwal oweko omiye bot askari lugwok mabuc, nio ka oculo banyane ducu. Wora ma tye i polo bene bitimowu kit meno, ka ce pe wutimo kica bot dano ki i cwinywu, dano acel acel ki ominne.” I kare ma Yecu doŋ otyeko loko lok magi, oa woko ki i Galilaya, ci obino i dul lobo me Judaya ma tye loka Jordan. Lwak madwoŋ gulube, ci ocaŋogi ki kunnu. Luparicayo mogo gubino bote, ci gucako omo cwinye kun gipenye ni, “Cik miyo twero ni dano oryem dakone pi tyen lok mo keken?” Yecu odok iye ni, “Pud pe wukwano lok ma wacci, cakke i acakki piny Lacwec ocweyogi co ki mon? Dok owaco ni, ‘Pi tyen lok man dano biweko wonne ki minne ci moko i kom dakone, gin aryo-nu gicako doko kom acel’? Kit meno pe doŋ gibedo kom aryo ento kom acel. Pi meno gin ma Lubaŋa oribo kacel, dano pe opok kingi.” Dok gupenye ni, “Ka kumeno, piŋo Moses yam ociko ni gimi waraga me keto nyom, ki ryemo dako woko?” En owaco botgi ni, “Pi nwaŋ cwinywu oweko Moses oye ni wuryem monwu, ento cakke i acakki piny onoŋo yam pe tye kit meno. Ento awaco botwu ni, dano mo ma oryemo dakone, ma pe pi tim me tarwaŋ, ce onyomo dako mukene, noŋo otimo abor.” Lupwonnye guwacce ni, “Ka ce lok i kom laco ki dakone tye kit meno, ci doŋ pe myero dano gunyomme do.” Ento Yecu owaco botgi ni, “Dano ducu pe twero mako pwony macalo man, ento kono jo ma gimiyo botgi keken aye. Pien tye jo mogo ma gikolo cakke wa i i megigi, ma ginywalogi kit meno; tye mukene ma gidoko jo ma gikolo pien noŋo dano mukologi; tye jo mukene ma gikolle kengi pi ker me polo. Dano ma twero ye lok man, wek oye.” Lacen gikelo litino bot Yecu ni oket ciŋe i komgi kun lego Lubaŋa. Lupwonnye gujuko dano woko. Ento Yecu owaco botgi ni, “Wuwek litino gubin bota, pe wugeŋgi, pien ker me polo tye pi jo macalo gin.” Ci oketo ciŋe i komgi, ka doŋ oa woko ki kunnu. Nen, dano mo obino bot Yecu kun penye ni, “Lapwony, atim gin aŋo maber wek alim kwo ma pe tum?” Yecu openye ni, “Piŋo ipenya pi gin maber? Ŋat maber tye acel keken. Ka imito donyo i kwo, ci igwok cik.” Openyo Yecu ni, “Cik mene?” Yecu owacce ni, “Pe ineki, Pe itim abor, Pe ikwal, Pe ibed caden me goba, Wor woru ki meni, ki dok ni, Mar lawoti macalo imarre keni.” Awobinu odokke iye ni, “Magi ducu doŋ atyeko makogi; gin aŋo ma pud odoŋ?” Yecu ogamo doge ni, “Ka ce imito bedo maber laboŋo roc mo i komi, cit icat jami ducu ma itye kwede, ci imi limme ki lucan, ci ibibedo ki lwak lonyo ma gikano piri i polo; ka doŋ ibin ilub kora.” Awobi-nu ka owinyo lok man, ocako cito woko kun cwinye cwer twatwal; pien onoŋo yam tye ki lim madwoŋ. Ci Yecu owaco bot lupwonnyene ni, “Ada awaco botwu ni, bibedo tek mada bot dano ma lalonyo me donyo i ker me polo. An dok awaco botwu aye ni, kinaga twero donyo i waŋ libira oyot, makato lalonyo me donyo i ker pa Lubaŋa.” Ka lupwonnye guwinyo lok man, ci guuro twatwal kun gipenye ni, “Aŋa ma dok twero larre?” Ento Yecu onenogi ci owaco botgi ni, “Ki bot dano man pe twerre, ento ki bot Lubaŋa jami ducu twerre.” Petero ogamo kun wacci, “Nen, wan waweko jamiwa ducu ci walubi. Wabinoŋo iye gin aŋo?” Yecu owaco botgi ni, “Ada awaco botwu ni, i kare ma Lubaŋa oketo lobo manyen, ka Wod pa dano bibedo i wi komkerre me deyo, wun jo ma doŋ wulubo kora bene wubibedo i wi komker apar wiye aryo, kun wuŋolo kop i kom kaka apar wiye aryo me Icrael. Doŋ dano acel acel ma yam oweko odi, nyo omege nyo nyimege, nyo wonne, nyo minne, nyo litino, nyo pottine, pi nyiŋa, binoŋo jami makato magi tyen miya, ci en binoŋo kwo ma pe tum. Jo mapol ma gubedo jo mukwoŋo yo gibidoŋ cen, ki jo ma gudoŋ cen gibibedo jo mukwoŋo. “Ker me polo rom ki dano ma en won ot ma opuk woko odiko con ocito ka wako lutic i poto olokke. Oyubo lok kwedgi ni ebiculogi i wel lim ma mitte pi nino acel acel macalo kite tye, ci ocwalogi i poto olokke. I cawa adek en ocito woko, ci oneno jo mukene ma gucuŋo acuŋa i cuk laboŋo gin ma gitiyo. Won ot owaco botgi ni, Wun bene wucit i poto olokka, dok abimiyowu gin ma atir. Ci gucito. I kare ma dok en okato ocito woko i cawa abicel ki cawa aboŋwen, otimo ma rom ki me wiati. I kin cawa apar wiye acel en dok ocito onoŋo jo mukene gucuŋo acuŋa kunnu; ci openyogi ni, ‘Piŋo wucuŋ kany dyeceŋ jwi laboŋo tiyo gin mo?’ Gudokke iye ni, ‘Pien dano mo pe owakowa.’ Ci won ot owaco botgi ni, ‘Wun bene wuciti i poto olokka.’ Ka oo otyeno, won poto olok owaco bot lakan jamine ni, ‘Lwoŋ lutic, ci icul mucaragi. Cak ki i kom jo ma gucako tic lacen, nio kwede wa i kom jo ma gukwoŋo bino.’ Ka jo ma gucako tic i cawa apar wiye acel-li gubino, ci dano acel acel i kingi ogamo mucara me nino acel kulu. Ka jo ma onoŋo gukwoŋo cako tic-ci gubino, gutamo ni gwok nyo gibinoŋo mabup makato; ento ŋat acel acel i kingi gimiye mucara me nino acel. Ka doŋ gugamo, gucako ŋur bot won ot, kun giwacci, ‘Jo magi ma gubino lacen-ni gutiyo tic pi cawa acel keken, ento in imiyo gubedo rom kwedwa kun wacanne i tic i ceŋ malyet dyeceŋ jwi.’ Ento won poto odok iye ki dano acel i kingi ni, ‘Larema, pe atye ka timi marac. Yam pe icikke kweda ni ibigamo wel mucara meno? Gam meri en, citi. An amito me miyo bot dano man ma lacen kit ma amiyo boti-ni. Pe myero ati ki jamina kit macalo iya mito? Gwok nyo cwinyi oballe woko pi gin maber ma atiyo-ni ba?’ Kit meno jo ma gudoŋ cen gibibedo jo me ati, ki jo me ati gibidoko jo ma lacen.” I kare ma Yecu tye ka ito cere me cito i Jerucalem, otero lupwonnyene i muŋ. Ka gitye i yo owaco botgi ni, “Wunen, doŋ watye ka ito cere wacito i Jerucalem. Wod pa dano doŋ gibimiye i ciŋ ajwagi madito pa Lubaŋa ki lupwony-cik, gibiŋolle kop me to, ci gibimiye i ciŋ Lurok wek guŋale, gupwode ki del; gibigure woko i kom yatariya, ento bicer woko i ŋe nino adek.” Lacen megi litino pa Jebedayo obino bot Yecu kacel ki litino awobene, ci oguŋo piny i nyime, ci olege pi gin mo. Yecu openye ni, “Imito aŋo?” Odok iye ni, “Cik pi litinona aryo-ni ni, ŋat acel obed i kom badi tuŋ lacuc, ki acel bene obed i kom badi tuŋ lacam, i ker meri.” Ento Yecu odokke iye ni, “Wun pe wuŋeyo gin ma wulego. Wun wutwero mato ki kikopo ma abimato kwede-ni?” Gudokke iye ni, “Watwero.” Yecu dok owaco botgi ni, “Kikopo ma an abimato kwede-ni wun bene wubimato kwede, ento lok me bedo i kom bada ma lacuc nyo ma lacam pe an aye apoko. Meno bibedo pa jo ma yam Wora oyubo pigi wa con.” Ka jo mukene apar guwinyo lokke, ci cwinygi ocwer mada i kom omego aryo-nu. Ento Yecu olwoŋogi bote, ci owacci, “Wun wuŋeyo ni, jo ma gilwoŋogi ni gin lulo Lurok giloyo dano ki tek, dok luditogi bene gibedo ki twero i komgi. Pe bibedo kit meno i kinwu; ento ŋat ma mito bedo ladit i kinwu aye myero obed laticwu, ki ŋat ma mito bedo mukwoŋo i kinwu, en aye myero obed opiiwu ducu. Kumeno Wod pa dano bene pe obino ni gitine, ento ni wek en aye eti ki dano, ki pi miyo kwone me koko jo mapol.” I kare ma doŋ gubea woko ki i Jeriko, lwak madwoŋ gulubo kore. Nen, lutowaŋ aryo ma gubedo piny i ŋet yo ka guwinyo ni meno aye Yecu ma obekato-ni, ci gudaŋŋe matek ni, “Lakwar Daudi, timwa kica ba!” Lwak gujukogi, kun giwaco botgi ni guliŋ; ento gin gumedde ameda ki daŋŋe ni, “Rwot, timwa kica do, Lakwar Daudi!” Yecu ocuŋ ci olwoŋogi, kun wacci, “Wumito atim gin aŋo piwu?” Gudokke iye ni, “Rwot wamito waŋwa oyabbe.” Cutcut kica omako Yecu i komgi, ci ogudo waŋgi. Oyotoyot gucako neno piny, ka doŋ gulubo kore. I kare ma doŋ gicok o i Jerucalem, gubino i Betepage, i kor got Jeituni. Ci Yecu ooro lupwonnyene aryo, ocikogi ni, “Wucit i gaŋ ma tye i nyimwu. Cutcut wubinoŋo kana ma gitweyo, tye gin ki latinne; wugonygi ci wukelgi bota. Ka ce dano mo biwaco lok mo botwu, wubidokke iye ni ‘Rwot aye mitogi’, ci en bicwalogi kany oyotoyot.” Man otimme wek lok ma yam lanebi oloko ocobbe kakare ni, “Wuwac bot jo Cion ni, Nen ka kabakawu bino botwu, kun obedo i wi kana ki mwolo, i wi latin kana.” Lupwonnye gucito gutimo kit macalo Yecu ocikogi kwede-ni, gukelo kana ki latinne, gupeto boŋŋigi i kome ka doŋ Yecu obedo i wiye. Jo mapol i kin lwak gupeto boŋŋigi i dye yo, ki jo mogo gutoŋo jaŋ yadi gupeto i dye yo. Ci jo ma gutelo yo ki jo ma gulubo kore gudaŋŋe ni, “Ojana, wupak Lakwar Daudi! Lubaŋa omi gum i kom ŋat ma bino i nyiŋ Rwot! Ojana malo i wi polo!” Ka doŋ odonyo i Jerucalem ci gaŋ ducu otugge woko pire, kun dano giwacci, “Man aŋa?” Lwak gugamo ni “Man aye lanebi Yecu ma oa ki i Najaret me Galilaya.” Yecu odonyo i ot pa Lubaŋa, ci oryemo jo ducu ma onoŋo gicato wil ki ma giwilo jami i ot pa Lubaŋa. Oryebo meja pa lulok cente, ki kom pa lucat amam. Ci owaco botgi ni, “Gicoyo ni, ‘Oda gibilwoŋo ni ot me lega’; ento wun wuloko odoko boro pa luyak.” Lutowaŋ ki luŋolo gubino bote i ot pa Lubaŋa ci en ocaŋogi. Ento i kare ma ajwagi madito pa Lubaŋa ki lupwony-cik guneno gin me aura ma en otiyo, ki litino ma daŋŋe i ot pa Lubaŋa kun giwaco ni, “Ojana, wupak Lakwar Daudi!” man omiyo kiniga omakogi matek. Gupenye ni, “Iwinyo gin ma jo-nu tye ka wacone?” Yecu ogamo ni, “Awinyo. Yam pe wukwano ni, ‘Wer ma litino lukere ki litino ma pud dot giwero me paki ber atika’?” Lacen owekogi, oa ki i gaŋ ocito i Betania ci obuto kunnu. Odiko ma en doŋ dok i Jerucalem, kec oneke. Ka oneno yat oduro mo i ŋet yo, ci oŋak i tere, pe onoŋo iye gin mo, ento onoŋo pote keken. Yecu owaco bot yat oduro-nu ni, “Pe dok ibinyako nyigi matwal.” Cutcut oduro meno otugi tal woko. Ka lupwonnye guneno ci guuro twatwal, kun giwacci, “Yat oduro-ni dok otugi two woko niŋniŋ?” Yecu odok iye botgi ni, “Ada awaco botwu ni, ka onoŋo wutye ki niye, kun pe wukalo akala, onoŋo pe wutwero timo gin ma otimme i kom oduro-ni keken, ento kadi bed wuwac ki got man ni, ‘Mukke wek itiŋŋe ipot wa i nam’, ci bitimme bene. Gin ducu ma wupenyo i legawu, wubinoŋo, ka ce wutye ki niye.” I kare ma Yecu odonyo i ot pa Lubaŋa, ci ajwagi madito pa Lubaŋa ki ludoŋo pa lwak gubino bote ma onoŋo en tye ka pwony, gupenye ni, “Twer mene mumiyo itimo gin magi, dok aŋa ma omiyoni twero meno?” Yecu ogamo doggi ni, “An bene abipenyowu ki peny acel; ka ce wudokka iye, ci doŋ abitito botwu gin mumiyo atimo gin magi. Batija pa Jon twerone oa ki kwene? Oa ki i polo nyo ki bot dano?” Ci gucako pyem i kingi kekengi kun giwacci, “Ka wawacci, ‘Twer man oa ki i polo’, ci en bipenyowa ni, ‘Piŋo kono onoŋo pe wuye en?’ Ento ka ce wawacci, ‘Oa ki bot dano’, walworo lwak; pien gin ducu giŋeyo maber ni Jon aye lanebi atika.” Mumiyo gudok iye bot Yecu ni, “Pe waŋeyo.” Yecu bene owaco botgi ni, “An bene pe abitito kit twer mumiyo atiyo gin magi. “Wutamo aŋo? Laco mo onoŋo yam tye ki awobene aryo. Oa ocito bot latin mukwoŋo, owacce ni, ‘Latinna, tin cit ka tic i poto olok.’ Latin-nu ogamo ni, ‘Pe abicito’, ento lacen oŋut ci ocito ka tic i poto olok. Laco-nu dok oa ocito bot latinne me aryo ci owacce lok ma rom ki maca; ci wode odok iye ni, ‘Ladit, abicito’; ento pe omedo ki cito. I kin awobe aryo-nu aŋa ma otiyo gin ma onoŋo wonne mito?” Gudokke iye ni, “Latin mukwoŋo.” Yecu owaco botgi ni, “Ada awaco botwu ni, lujog-mucoro ki mon ma malaya bikwoŋo donyo i ker pa Lubaŋa ati botwu. Pien Jon yam obino botwu kun lubo yo me kit ma atir, ento wun wukwero ye en woko; ento lujogmucoro ki mon ma malaya guye en. Dok bene kadi bed wuneno gin mutimme, lacen pe wuŋut, dok pe wuye en. “Koŋ dok wuwiny carolok mukene. yam tye dano mo ma opito olok i potone, ci orumo woko ducu ki cel, ka okwinyo iye bur me biyo pige, ogero iye lubele, oweko bot lupur, ci ocito woko i lobo mukene. Ka kare me pwono nyig olok doŋ onyiko cok, ci ocwalo luticce bot lupur ka kelo nyig olokke. Lupur gumako luticce, gugoyo ŋat acel, ki ŋat acel guneko woko, ki mukene gucelo woko ki got. En dok ocwalo lutic mukene mapol, ma gikato jo mukwoŋo ca, jo-nu bene gitimogi ki kit tim acel ma gitimo i kom lutic mukwoŋo ca. Lacen doŋ en ocwalo wode kikome botgi, kun waco ni, ‘Gibiworo woda.’ Ento ka lupur guneno wode, gucako lok kekengi ni, ‘Man aye doŋ lale lim; wubin waneke woko, wek lim ma en bileyo-ni obed mewa.’ Ci gumake gubole woko ki i poto olok, ka guneke woko. Pi meno ka won poto olok obino, bitimo lupur niŋniŋ?” Ci gugamo ni, “En bineko lupur woko ki kit nek marac atika, ci miyo poto olok woko bot lupur mukene ma gitwero miye nyig olok ka karene oromo.” Yecu ogamo doggi ni, “Yam pe wukwano lok ma gicoyo i ginacoya ni, ‘Got ma lugedo gukwero-ni en aye odoko got madit ma i twok ot; man Rwot aye ma otiyo, obedo botwa lok me aura’? Pi meno awaco botwu ni, gibikwanyo ker pa Lubaŋa woko ki botwu, ci gimiyo bot rok ma binyako nyig ma mitte iye kikome.” [Dano ma bipoto i kom got man tur ŋidde woko matitino; ento ka got man opoto i kom dano mo, ci nyoto woko.] Ka ajwagi madito pa Lubaŋa ki Luparicayo guwinyo carolokke, ci guniaŋ ni onoŋo kara Yecu tye ka lok i komgi. Gutemo make, ento gulworo lwak, pien lwak onoŋo ŋeyo ni en lanebi. Yecu dok oloko kwedgi i carolok kun wacci, Ker me polo rom ki kabaka ma yam otedo karama me nyom pa wode, ci ooro luticce me cito ka lwoŋo jo ma onoŋo yam gilwoŋogi i karama meno, ento gukwero bino woko. Dok ooro lutic mukene, kun waco botgi ni, “Wuwac bot jo ma onoŋo gilwoŋogi ni, Nen, doŋ ayubo cam ducu tye, twonina ki rocina ma moo doŋ ginekogi woko, doŋ giyubo jami ducu tye; wubin i karama me nyom.” Ento pe guketo cwinygi iye, gucito citogi, ŋat acel ocito i potone, ŋat mukene ocito i cato wille, jo mukene ma gudoŋŋe gumako luticce, gutimogi ki tim me lewic, ci gunekogi woko. Kiniga omako kabaka, ci ocwalo monye guneko lunek-gu woko, dok guwaŋo gaŋigi woko bene. Dok owaco bot luticce ni, “Karama doŋ giyubo, ento jo ma onoŋo nene gilwoŋogi pe doŋ gimyero. Pi meno wucit i yo madito, wulwoŋ jo mapol ma wubinoŋo, wuwek gubin i karama me nyom.” Lutic magi gucito i yo gudo ci gucoko jo ducu ma gunoŋo; jo maraco kacel ki jo mabeco; mumiyo ot me nyom opoŋ woko ligwik ki welo. “Ento i kare ma kabaka odonyo i ot ka neno welo, ci oneno laco mo obedo kunnu ma pe onoŋo oruko boŋo me nyom. Cutcut otugi penye ni, ‘Larema, idonyo kany niŋniŋ ma kun pe iruko boŋo me nyom?’ Laco-nu oliŋ aliŋa litik. Mumiyo kabaka ociko lugwok-welo ni, ‘Wutwe ciŋe wa ki tyene woko, ci wubole kwede woko i piny macol; kunnu dano gibikok kun gikayo lakgi.’ Pien jo ma gilwoŋo pol, ento ma giyero nok.” Luparicayo gucito guporo lok kit macalo myero gimak kwede lok ma a i doge. Ci guoro bote lupwonnyegi kacel ki jo pa Kerode, kun giwacci, “Lapwony, wan waŋeyo ni in dano me ada, dok ipwonyo yo pa Lubaŋa ki ada, dok bene pe iparo pi dano mo, pien in pe ineno kom dano ki woko. Tit botwa gin ma itamo. Cikwa ye ni gicul mucoro bot cecar nyo pe?” Ento Yecu oŋeyo raccwiny ma gitye kwede, ci owaco botgi ni, “Wun wubwola piŋo, wun lugoba? Koŋ wunyutta kom lim ma giculo kwede mucoro-ni.” Ci gukelo bote. Yecu openyogi ni, “Cal ki coc ma gicoyo i kome-ni pa aŋa?” Gugamo ni, “Pa Cecar.” Ci owaco botgi ni, “Wudwok jami pa Cecar bot Cecar, ki jami pa Lubaŋa wudwok bot Lubaŋa.” I kare ma guwinyo lokke guuro matek; ci guweke gucito woko. I nino meno bene Lucadukayo gubino bot Yecu, gin aye jo ma onoŋo giwacci jo muto pe gicer. Ci gupenye ki peny mo acel, ni, “Lapwony, Moses yam owaco ni, ‘Ka ce laco mo oto ma pe onywalo latin, ci ominne myero olak dakone, wek onywal kwede litino ma ka-ka ominne.’ Yam onoŋo tye co abiro i kinwa ma gin ducu omego. Laco mukwoŋo onyomo dako, ci oto woko ma pe obwoto latin mo, oweko dako bot ominne. Dano me aryo ki me adekke bene ducu kit meno, nio wa i kom dano me abirone. Lacen ki i ŋegi ducu, dako bene oto. Doŋ i kare me cer dako-nu bibedo pa aŋa i kin co abiro-nu? Pien gin ducu onoŋo gubedo kwede.” Ento Yecu odok iye ni, “Wun wurwenyo, pien pe wuŋeyo gin ma gicoyo i ginacoya, kadi wa teko pa Lubaŋa bene wukwiya. Pien i kare ma dano gibicer woko, doŋ pe gibinyomme, ento gibibedo macalo lumalaika ma i polo. Ento i kom lok man me cer ki i kin jo muto-ni, yam pe wukwano lok ma Lubaŋa oloko botwu ni, ‘An Lubaŋa pa Abraim, ki Lubaŋa pa Icaka, ki Lubaŋa pa Yakobo’? En pe Lubaŋa pa jo muto, ento Lubaŋa pa jo makwo.” Ka lwak guwinyo, ci guuro pwonye matek. I kare ma Luparicayo guwinyo ni Yecu otwoyo dog Lucadukayo woko ki lok, ci gucokke kacel. Dano mo i kingi onoŋo lapwony-cik, oteme openye ki peny acel, ni “Lapwony, cik mene madit makato cik ducu?” Yecu odokke iye ni, “Mar Rwot Lubaŋani ki cwinyi ducu, ki tiponi ducu, ki tammi ducu. Man aye cik madit dok mukwoŋo. Ki me aryone ma rom kwede en ene ni, Mar lawoti macalo imarre keni. I kom cik magi aryo lok ducu ma tye i cik ki i pwony pa lunebi gucuŋ iye.” I kare ma Luparicayo doŋ gucokke kacel, Yecu openyogi kun wacci, “Wutamo gin aŋo i kom Kricito ma Lubaŋa oyero? En lakwar aŋa?” Gudokke iye ni, “Lakwar Daudi.” Yecu dok openyogi ni, “Piŋo kono Cwiny Maleŋ dok omiyo Daudi olwoŋe ni Rwot? Pien yam oloko ni, ‘Rwot owaco bot Rwoda ni, Bed i kom bada ma lacuc, i kabedo me deyo, nio ka abiketo lukworri piny i te tyeni.’ Ka en Daudi aye yam olwoŋe ni Rwot, ci en dok bedo lakwarre niŋniŋ?” Dano mo pe ma otwero dokke iye lok mo kadi ki acel, dok cakke i kare meno ŋat mo pe oette me penye ki kit peny mo. Lacen Yecu owaco bot lwak ki bot lupwonnyene ni, “Lupwony-cik ki Luparicayo gibedo i wi kom pa Moses; pi meno lok ducu ma gipwonyowu kwede, wuti dok wugwok bene, ento pe wuti gin ma gin tiyo, pien giloko aloka keken pe gitiyo. Gitweyo yec mapek ma yeyone tek, ci giketo i wi gwok dano; ento gin kikomgi pe gitwero dirone ki lwet ciŋgi acel. Gitiyo ticgi ducu ni wek dano onengi; pien giyaro pulakiterigi bedo malac, dok bene gimedo dog boŋŋigi bedo maboco adada, dok gimaro bedo i kabedo me deyo i karama, ki bedo i kom me dito i kacokke. Dok bene gimito ni dano omotgi wa i cuk-gu, gimaro bene ni dano myero gulwoŋgi ni, ‘Lapwony.’ Ento wun pe myero gilwoŋwu ni, ‘Lapwony’, pien wutye ki lapwony acel, pi meno wun ducu doŋ wudoko omege. Dok bene pe wulwoŋ dano mo ni wonwu i wi lobo, pien Wonwu tye acel, en aye ŋat ma tye i polo. Pe bene gilwoŋwu ni lutel, pien wutye ki latelwu acel, ma en aye Kricito ma Lubaŋa oyero. Dano madit ma loyo ki i kinwu aye bibedo laticwu. Pien ŋat ma kette kene ni edit, gibidwoke piny, ento ŋat ma mwolle kene gibimiyo doko dit. “Wubineno can, wun lupwony-cik ki Luparicayo, wun lugoba! Pien wuloro doggola me ker me polo woko bot dano; wun kikomwu pe wudonyo iye, dok bene wugeŋo jo ma mito donyo iye woko. Wubineno can wun lupwony-cik ki Luparicayo, wun lugoba! Pien wumayo odi pa mon-to, dok wulego lega maboco me buta keken. Gibiŋolo kop madit makato ducu i wiwu. “Wubineno can, wun lupwony-cik ki Luparicayo, wun lugoba! Pien wuwoto wuloŋo piny ki i dye nam kun wuwoto wa i wi tura-gu wek wulok dano acel owek dinine odwog i mewuni, ento ka doŋ olokke, wumiyo doko latin me Geena ma rom aroma kwedwu tyen aryo. “Wubineno can, wun lutel dano ma waŋwu oto, ma wuwaco ni, ‘Ka ce dano mo kwoŋo kwoŋ ki ot pa Lubaŋa, lok mo bedo pe iye, ento ka ŋat mo okwoŋo kwoŋ ki jabu ma i ot pa Lubaŋa, kwoŋŋe-ni bimake gire.’ Wun lutowaŋ ma lumiŋ! Gin mene ma pire dit kato, jabu nyo ot pa Lubaŋa ma omiyo jabu odoko maleŋ? Dok wuwaco ni, ‘Ka ce dano mo okwoŋo kwoŋ ki keno tyer, lok mo pe iye, ento ka ce ŋat mo okwoŋo ki mot ma giketo i wi keno tyer, kwoŋŋe-ni bimake woko gire.’ Wun lutowaŋ! Gin mene madit makato, mot nyo keno tyer ma miyo mot doko maleŋ? Pi meno dano ma kwoŋo kwoŋ ki keno tyer, kwoŋo bene ki jami ducu ma tye i wi keno tyer. Dano ma kwoŋo ki ot pa Lubaŋa, noŋo okwoŋo ki ot pa Lubaŋa kadi wa ki ŋat ma bedo iye. Dano ma kwoŋo ki polo, noŋo kwoŋo ki komker pa Lubaŋa kadi wa ki ŋat ma bedo i wiye-ni. “Wubineno can, wun lupwony-cik ki Luparicayo, wun lugoba! Pien wumiyo dul acel me apar me malakwaŋ ki toke ki okwerwu, ento wutenyo lok ma pigi tego me cik woko, gin macalo ŋolo kop atir, timo kica ki bedo jo ma tye ki niye. Magi ducu myero wutim, kun bene pe wuweko mukene ca. Onoŋo gitamo ni wun aye myero wubed lutel, ento wun lutowaŋ, pe wuŋeyo gin mo. Wuketo cwinywu i lok ma pe pigi tego, ento wubwoto lok ma pigi tego-gu woko. Meno rom macalo wukwanyo lwaŋo ki i pii amatawu, ento wumwonyo kinaga woko kacel ki pii-nu, pien onoŋo pe wuŋeyo ni tye iye! “Wubineno can, wun lupwony-cik ki Luparicayo, wun lugoba! Pien wulwoko ŋe kikopo ki caani ki woko wek obed leŋ, ento ki igi noŋo gupoŋ ki tim me yako dano ki miti mogo ma pe twero jukke. Wun Luparicayo ma lutowaŋ! Mukwoŋo myero koŋ wulwok i kikopo ki i caani obed leŋ, ka wek ŋeye bene obed leŋ. “Wubineno can, wun Lupwony-cik ki Luparicayo, wun lugoba! Pien wurom ki lyel ma gipuyo ki gin matar, kun ki yo tuŋ woko nen maber, ento igi noŋo opoŋ ki cogo pa jo muto, ki jami ducu ma keni keken. Wun bene kit meno, ki woko wunen bot dano ni wun jo ma kitwu atir, ento iwu noŋo opoŋ ki gin maraco keken. “Wubineno can, wun lupwony-cik ki Luparicayo, wun lugoba! Pien wucano got i wi lyel pa lunebi, ka dok wudeyo kom gin ma yam gigero pi po pi jo ma kitgi atir, wuyubo woko onen maber, kun wuwacci, ‘Ka nene onoŋo wabedo i kare pa kwarowa, kono onoŋo pe waribbe kwedgi ka neko lunebi.’ Wun giwu wutuco kenwu ni wun likwayo pa jo ma yam guneko lunebi-ni. Ber, doŋ wucob tic pa kwariwu! Wun twol, litino ororo, wubibwot niŋniŋ ki i ŋolo kop me bolowu i Geena? Pi meno abioro botwu lunebi ki luryeko ki lupwony-cik, ma jo mogo i kingi wun wubinekogi ci wugurogi woko i kom yatariya, ki jo mogo wubigoyogi ki del i kacokkewu, kun wuyelo ki gaŋ ki gaŋ; wek remo pa jo ducu ma kitgi atir ma ginekogi i lobo obed i wiwu, cakke ki i kom remo pa Abel ma balle pe-ni nio kwede i kom remo pa Jekaria wod pa Barakia, ma yam wuneko i kin kabedo maleŋ ki keno tyer pa Lubaŋa. Ada awaco botwu ni, lok man ducu bipoto i kom jo ma gin yalwak me kare man. “Jerucalem, Jerucalem, in ma ineko lunebi, ma icelo jo ma gioro boti woko ki got, tyen adi ma nene amito coko litinoni woko macalo min gweno ma coko litinone i te bwome, ento wun pe wuye giwu! Nen, doŋ gitenyo otwu botwu, iye odoŋ nono. Atito botwu ni pe wubinena nio ka wubiwacci,‘Gipwo ŋat ma bino i nyiŋ Rwot!’” Yecu okato woko ki i ot pa Lubaŋa. Ma doŋ tye ka cito, lupwonnyene gubino gunyutte gedo me ot pa Lubaŋa. Odok iye botgi ni, “Wuneno gin magi ducu, pe kumeno? Ada awaco botwu ni, pe gibiweko got acel mo kany ma ododde i wi wadi, ma pe gibicoro woko piny.” I kare ma Yecu obedo i wi got Jeituni, lupwonnye gubino bote i muŋ gucako penye ni, “Tit botwa, lok man bitimme awene, dok kit gin aŋo ma binyuto dwogoni, ki agikki piny?” Ci Yecu odok iye botgi ni, “Wugwokke, ŋatti mo owek rwenyowu. Pien jo mapol gibibino i nyiŋa, ma giwacci, ‘An aye a Kricito ma Lubaŋa oyero’, ci gibimiyo jo mapol rwenyo woko. Dok bene wubiwinyo pi mony, ki lok ma yweko pi mony; pe wuwek tipo komwu oto woko lirut; pien koŋ myero man otimme, ento noŋo nino me agiki pud peke. Pien rok bilweny ki rok wadi, ki ker bene bilweny ki ker wadi, ki kec bene bipoto i lobo, ki oyeŋoyeŋ biyeŋo lobo i kabedo mapol; gin magi ducu gin aye acakki me te can ma bipoto i lobo. “I kare meno gibiketo lok roro i komwu wek wunen can, gibinekowu woko; jo me rok ducu bikwerowu pi nyiŋa. I kare meno jo mapol bipoto, gibiketo lok roro i kingi gidotte kekengi, dok gibibedo ki adagadaga i kingi kekengi. Lunebi mapol ma lugoba bibino ma gibirwenyo jo mapol. Kit macalo tim maraco bibedo ka medde ameda-ni, mar pa jo mapol bikwe woko. Ento ŋat ma biciro nio wa i agikki bilarre. Doŋ lok man me kwena maber me ker pa Lubaŋa gibitito i wi lobo ducu, me bedo caden bot rok ducu; ka doŋ lacen agikki piny bibino. “Doŋ ka wubineno gin mo me kwer, malik, ma balo cwiny dano, ma yam Daniel otito pire, kun ocuŋ i kabedo maleŋ (dano ma kwano myero oniaŋ iye), i kare meno jo ma tye i Judaya myero guriŋ woko i wi godi. Dano ma onoŋo tye i wi ot pe dok olor piny me bino ka kwanyo gin mo ma tye i ode; ki dano ma tye i poto bene pe odok cen paco ka omo ginarukane. Dok mon ma giyac gibineno can i kare meno, ki mon ma gidoto litino bene! Wuleg wek ŋwecwu pe otimme i cwir nyo i ceŋ cabit. Pien i kare meno twon can madit atika bitimme iye, ma yam peya onen i lobo, nia wa i acakki lobo nio kwede wa onyoo, dok pe bene binen. Kono nene Rwot pe ojwiko kare-nu obedo manok mo, kono dano mo pe obwot; ento pi jo ma giyero, miyo gibijwiko wel nino bedo manok. “I kare meno ka ce dano mo biwaco botwu ni, ‘Nen, Kricito ma Lubaŋa oyero tye kany’, nyo ni, ‘Nen, tye kuca’, pe wuye. Pien Kricito ma lugoba, kacel ki lunebi-gu ma lugoba gibibino, gibinyuto lanyut ki tyo jami me taŋo, wek girweny jo mapol ka gitwero, wek girweny wa ki jo ma Lubaŋa oyero bene. Nen, doŋ atyeko tito botwu con. Ka ce gibiwaco botwu ni, ‘Nen, en tye i tim kuca’, pe wucit kunnu, nyo ni, ‘Tye i kicika ot ma i iye’; pe wuye. Kit macalo lutkot a ki yo tuŋ wokceŋ ci wil menyo piny wa yo tuŋ potoceŋ, dwogo pa Wod pa dano bene bibedo kit meno. ka ma kom dano muto tye iye, acut bene gicokke kunnu. “Oyotoyot i ŋe can madit me kare meno bibedo kit macalo yam gicoyo ni ‘Ceŋ bicido woko macol licuc, ki dwe bene pe biryeny, lakalatwe bia ki i polo gipoto piny, ki twer ducu ma i polo bene biyeŋŋe’; “ka doŋ gin ma nyuto Wod pa dano binen i polo. Ci i kare meno kaka ducu ma i wi lobo bikumo, ci gibineno Wod pa dano ka bino ki i wi pol me polo, ki twero madwoŋ, ki deyo madit. En bioro lumalaika ki tum ma kok maloŋo, gibicoko jone ma en oyero ki i twok piny aŋwen ducu, nia ki i agikki polo tuŋcel nio kwede wa i agikkine mukene. “Wupwony carolok i kom yat oduro. Cutcut ka jaŋe olot, ci pote luk, ci doŋ wuŋeyo ni oro cok. Ki wun bene ka ce wuneno gin magi ducu, ci wuŋe ni en doŋ tye cok, tye wa i doggola. Ada awaco botwu ni, yalwak man pe bitum, nio waŋ ma lok magi ducu otimme. Polo ki lobo bitum, ento lokka pe bitum. “Ento nino meno ki cawa meno, pe tye ŋat mo ma ŋeyo, kadi wa lumalaika ma i polo, kadi wa Wod, ento kono Lubaŋa Won keken aye ŋeyo gire. Kit macalo ceŋ otimme i kare pa Nua, bitimme kit meno bene i kare me dwogo pa Wod pa dano. I kare ca ma peya pii aluka ocorre i wi lobo onoŋo gicamo, gimato, dok awobe ki anyira ginyomme, nio wa i nino ma Nua odonyo kwede i yeya; pe gumedo ki ŋeyo gin mo nio ka pii aluka opoŋ, ci omologi woko ducu. Bibedo kit meno bene i kare ma Wod pa dano bidwogo iye. I kare meno co aryo bibedo i poto; gibikwanyo ŋat acel, gibiweko ŋat acel doŋ. Mon aryo bibedo ka rego kacel; gibikwanyo ŋat acel, gibiweko ŋat acel doŋ. Pi meno, wubed ma waŋwu twolo, pien pe wuŋeyo nino ma Rwotwu bibino iye. Ento myero wuŋe man, ni, ka ce nene won ot oŋeyo cawa mene i dyewor ma lakwo onoŋo obebino kwede, kono obedo ka kiyo piny, kono pe oweko gituro ode. Pi meno, wun bene wubed ma wuyubbe; pien Wod pa dano bibino i cawa ma noŋo pe wutamo pire. “Aŋa ma lagwok ot ma lagen dok maryek, ma laditte biweko dano ducu ma bedo i ode i te locce, wek opok botgi camgi i kare ma mitte? Latic meno tye ki gum, ma laditte ka obino onoŋo en tye ka tiyo ticce kit meno. Ada awaco botwu ni ladit-tu bimiye twero me loyo jamine woko ducu. Ento ka latic meno oloko kekene ni, ‘Laditta doŋ ogalle ka bino’, ci cako goyo lutic luwote, kun camo, mato dok mer kacel ki lumero, ladit pa latic meno bidwogo i nino ma en pe tamo pi dwogone, dok i cawa ma en pe ŋeyo, bipwode, ci kete kacel ki lugoba; ka ma dano gibibedo iye ka koko kun gikayo lakgi. “I kare meno ker me polo gibiporo ki anyira apar ma yam gutero taragi, gucito ka jolo lanyom. Jo abic i kingi onoŋo lumiŋ, ki jo abic onoŋo luryeko. Anyira ma lumiŋŋu gutero taragi laboŋo moo, ento jo ma luryeko gutero moo i cupa kacel ki taragi. I kare ma lanyom pud ogalle, gin ducu nino omako waŋgi, ci gunino woko. Ka doŋ oo i cwiny dyewor woo owinnye madwoŋ ni, ‘Nen, lanyom doŋ bino! Wukat woko ka jole.’ Anyira ca ducu gua cut, ci guyubo taragi. Ento anyira ma lumiŋŋu gulego anyira ma luryeko-ni, ni, ‘Wumiwa moowu-ni mogo do, pien mac tarawa mito to woko.’ Ento anyira meno ma luryeko-ni gudok iye botgi ni, ‘Nen calo moo ma watye kwede pe biromowa ki wun bene; myero wucit bot lucat-wil, ci wuwil mewu.’ I kare ma gucito ka wilo moo, cutuct lanyom obino; jo ma nene gitye ma guyubbe gudonyo kacel kwede i ot i karama me nyom, ci giloro doggola woko. Lacen anyira ca ma lumiŋ-ŋi gubino, kun gibako doggi ni, ‘Ladit, ladit, yab doggola botwa do!’ Ento en odok iye botgi ni, ‘Ada awaco botwu ni, an gira pe aŋeyowu.’ Pi meno wuki, pien pe wuŋeyo nino kadi wa cawa. “Pien bibedo rom ki dano ma cito ka wot i lobo mukene, olwoŋo luticce, ci oweko jamine i ciŋgi ni gulo. Ci omiyo bot latic acel ciliŋ alip abic, bot dano mukene omiyo ciliŋ alip aryo, ki bot ŋat mukene omiyo ciliŋ alip acel; omiyo bot dano acel acel dul lim kit macalo en romo tic kwede. Ci oa gire ocito i wotte. Dano ma onoŋo ciliŋ alip abic-ci ocako tic kwede woko oyotoyot i cato wille; onoŋo magoba ciliŋ alip abic bene. Ki ŋat ma ogamo ciliŋ alip aryo-ni bene onoŋo magoba ciliŋ alip aryo. Ento dano ma nene ogamo ciliŋ alip acel-li ocito okwinyo bur i ŋom, ci okano lim pa laditte woko iye. Ka doŋ kare okato malac, ladit pa lutic magi odwogo, ocako kwano lim kacel kwedgi. Dano ma nene ogamo ciliŋ alip abic-ci okwoŋo bino anyim, kun okelo ciliŋ alip abic mukene, owacci, ‘Ladit, nene imiya ciliŋ alip abic; nen dok anoŋo ciliŋ alip abic mukene.’ Laditte owacce ni, ‘Itimo ber mada, in latic maber dok lagen. Onoŋo ibedo lagen i kom jami matidi mo, abiketi doŋ ibedo ki twero i kom jami mapol. Dony i yomcwiny pa laditti.’ Lacen ŋat ma gimiye ciliŋ alip aryo-ni bene obino anyim, owacci, ‘Ladit, onoŋo nene imiya ciliŋ alip aryo; nen dok anoŋo ciliŋ alip aryo mukene.’ Laditte owacce ni, ‘Itimo ber mada, in latic maber dok lagen. Onoŋo ibedo lagen i kom jami matidi mo, abiketi doŋ ibedo ki twero i kom jami mapol. Dony i yomcwiny pa laditti.’ Ka dok ŋat ma nene ogamo ciliŋ alip acel-li bene obino anyim, owacci, ‘Ladit, onoŋo aŋeyo ni in dano magwa, ikayo ka ma yam pe icoyo iye kodi, icoko bene ka ma pe iketo; oweko abedo ki lworo, acito akano ciliŋŋi woko piny i ŋom. Ene, gam giri limmi.’ Ento laditte odokke iye ni, ‘In latic marac dok bene in lawackom! Onoŋo iŋeyo ni akayo ka ma pe acoyo iye kodi, dok bene acoko ka ma yam pe aketo iye? Aŋo mugeŋi tero limma bot jo ma loyo beŋŋe, wek i kare ma abino agam limma kacel ki magobane? Pi meno wukwany ciliŋ alip acel-li woko ki bote, wumi bot dano ma tye ki ciliŋ alip apar-ri. Pien dano acel acel ma tye ki gin mo, gibimiye doki makato, ci en bibedo ki jami mabup. Ento ŋat ma pe ki gin mo, kadi wa gin ma en tye kwede gibikwanyo woko ki bote. Wubol latic ma konnye pe-ni i colpiny ma tye woko, ka ma dano gibikok kun gikayo iye lakgi.’ “I kare ma Wod pa dano bidwogo ki deyo kacel ki lumalaikane ducu, ci en bibedo i wi komkerre me deyo. Rok ducu bicokke kacel i nyime, en bipoko kingi woko patpat, kit macalo lakwat poko kwede romi ki i kom dyegi. Biketo romi yo tuŋ ciŋe ma lacuc, ento dyegi en biketo yo tuŋ ciŋe ma lacam. Ci kabaka biwaco bot jo ma tye yo tuŋ ma lacuc ni, ‘Wubin, wun jo ma Wora omiyowu gum, wule ker ma yam giyubo piwu cakke wa i acakki keto lobo. Pien nene kec oneka, wun wumiya cam, orwo oneka, wumiya pii amato, onoŋo a welo, wun wujola; nene onoŋo atye munero, wuruko boŋo i koma, koma obedo lit, ci wubino ka lima, dok i kare ma atye i mabuc, wun wubino bota.’ Ci jo ma kitgi atir bidok iye bote ni, ‘Rwot, yam waneni awene ka kec neki, ci wamii cam, nyo ka orwo neki, ci wamii pii imato? Yam waneni awene ka i welo, ci wajoli; nyo ka itye munero, ci waruko boŋo i komi? Dok onoŋo waneni awene ka komi lit nyo ka itye i mabuc, ci walimi?’ Kabaka bidok iye botgi ni, ‘Ada awaco botwu ni gin ma wutimo bot dano acel i kin utmegina magi matino, meno wutimo bota.’ Lacen en doŋ biwaco bot jo ma tye yo tuŋ ciŋe ma lacam ni, ‘Wun jo ma giceno, wua woko ki i nyima, wudony i mac ma pe to ma giyubo pi Catan ki lumalaikane. Pien nene kec neka, wun pe wumiya cam, orwo pii oneka, pe bene wumiya pii me amata; yam a welo, ento pe wujola, onoŋo atye munero ci pe wuruko boŋo i koma, nene koma lit dok abedo i mabuc, ento wun pe wubino ka lima.’ Gin bene gibidokke iye ni, ‘Rwot, waneni awene ka kec neki nyo ka orwo neki, nyo ka i welo, nyo ka itye munero, nyo ka komi lit, nyo ka itye i mabuc, ci pe wakonyi?’ En bidok iye botgi ni, ‘Ada awaco botwu ni, kit macalo pe wutimo bot dano mo acel i kin jo magi matino, pe wutimo bota.’ Ci gibicito woko i can ma pe tum, ento jo ma kitgi atir bicito i kwo ma pe tum.” I kare ma Yecu doŋ otyeko loko lok magi ducu, owaco bot lupwonnyene ni, “Wuŋeyo ni odoŋ nino aryo ci doŋ bedo nino madit me Kato (Paska), ci Wod pa dano gibimiye woko me agura i kom yatariya.” I kare meno ajwagi madito pa Lubaŋa ki ludoŋo pa lwak gucokke i gaŋ kal pa ajwaka madit pa Lubaŋa, ma nyiŋe Kayapa, ci guporo lok kacel me mako Yecu ki ryeko ka doŋ gineke. Ento guwacci, “Pe i nino madit, miyo lwak bitugge.” I kare ma Yecu tye i Betania i ot pa Cimon ladobo, ci dako mo obino bote kun tye ki adomo moo ma ŋwece kur, ma welle bene dit, ci oonyo i wiye ma onoŋo en obedo ka cam. Ento ka lupwonnye guneno, cwinygi ocwer, guwacci, “Piŋo moo man gibalo abala kit man? Pien moo man ka kono gicato acata, onoŋo kono okelo lim madit atika, ka wek gimi bot lucan. ” Ento Yecu oŋeyo lok man, ci owaco botgi ni, “Wuyelo dako-ni piŋo? En otiyo gin maber twatwal i koma. Pien wun wutye kacel ki lucan kare ducu, ento pe wubibedo kweda kare ducu. Moo man ma dako-ni oonyo i koma-ni en otimo man pi yubo koma me ayika. Ada awaco botwu ni, i wi lobo ducu ka ma gibitito iye lok man me kwena maber-ri, gin ma dako-ni otiyo bene gibitito pire, wek obed me po en.” I kare meno Juda Lakeriot, ma en dano acel ma i kin jo apar wiye aryo-ni, ocito bot ajwagi madito pa Lubaŋa, ci openyogi ni, “Wubimiya gin aŋo ka amiye i ciŋwu?” Ci gucule ki lim ryal pyeradek ma onoŋo obedo lim me kare ca. Cakke i cawa meno cutcut Juda ocako yenyo kare maber ma eromo miyo kwede Yecu i ciŋgi. I nino mukwoŋo me nino madito me Mugati ma Tobi Pe Iye, lupwonnye gubino bot Yecu, ci gupenye ni, “Imito waciyubbi kabedo kwene wek icam iye cam me Kato?” Yecu ogamo ni, “Wucit i Jerucalem bot dano mo-ni, ci wuwacce ni, ‘Lapwony owaco ni, Karena doŋ cok. Abicamo cam me Kato i odi kacel ki lupwonnyena.’ ” Lupwonnye gucito gutiyo kit macalo Yecu ocikogi kwede, ci guyubo cam me Kato kunnu. Ka piny doŋ oyuto, ci Yecu obedo piny kacel ki lupwonnye apar wiye aryo. I kare ma doŋ gitye ka cam, Yecu owaco botgi ni, “Ada, awaco botwu ni, ŋat acel i kinwu bidoba.” Ci lupwonnye gucako kumo cut, kun gipenye ki acel acel ni, “An bo, Rwot?” Yecu odok iye ni, “Dano ma tye ka gweyo dek i atabo acel kwedani aye bidoba. Wod pa dano tye ka wot kit macalo yam gicoyo i kome-ni; ento dano ma odobo Wod pa dano-ni bineno can mada! Kono nene obedo ber ka dano-nu pe ginywalo.” Juda ma en ŋat ma odobe openye bene ni, “Lapwony, an mono?” Yecu odokke iye ni, “In iwaco giri kit meno.” Ka gitye ka camo cam, Yecu omako mugati, ci olego gum i kome, ka ocako baro iye, omiyo bot lupwonnye, kun wacci, “Wugam, wucam; man aye koma.” Ka dok otiŋo kikopo, ka doŋ opwoyo, ci omiyo botgi, kun wacci, “Wun ducu wumat man; pien man aye remona me gicikke, ma oo pi jo mapol pi weko bal. Atito botwu ni, cakke tin, pe dok abimato pig olok, nio wa i nino maca ka abimatone doki kacel kwedwu i ker pa Wora.” I kare ma doŋ gutyeko wero wer, gua gucito i wi got Jeituni. Yecu owaco botgi ni, “I dyewor matin, wun ducu wubitenya woko kena, pien yam gicoyo ni, ‘Abigoyo lakwat, ci romi gibiket woko ata.’ Ento lacen ka doŋ acer woko abitelo nyimwu me cito i Galilaya.” Petero otuco bot Yecu ni, “Kadi ka jo mukene ducu gibitenyi woko, ento an pe abitenyi ata.” Yecu owacce ni, “Ada awacci ni, tin ki i dyewor, ma noŋo twon gweno peya okok, ibikwera woko tyen adek.” Ento Petero dok ogamo ni, “Kadi bed mitte ni myero ato kacel kwedi, pe abikweri.” Lupwonnye mukene-ni bene ducu guwaco kit meno. Lacen Yecu ocito kwedgi i kabedo mo ma nyiŋe Gececemane, ci ociko lupwonnyene ni, “Wun koŋ wubed kany, an koŋ acit kuca ka lego Lubaŋa.” Okwanyo Petero ki litino pa Jebedayo aryo me wot kwede, ci cwinye ocako poto matek ki kumo bene madwoŋ. ci owaco botgi ni, “Cwinya tye ka waŋ matek, mito neka woko. Wubed ka kiyo piny kacel kweda.” Ocako cito anyim manok, ci oguŋo oryebbe piny olego ni, “Wora, ka ce imito, kwany kikopo man woko ki i koma; ento pe obed kit macalo an amito, gin ma in imito aye myero otimme.” Ka oa odwogo bot lupwonnye onoŋo gunino woko, ci owaco bot Petero ni, “Pe itwero kiyo piny pi cawa acel mo kacel kweda? Wuki wuleg Lubaŋa, wek pe wudony i abita mo; cwiny kikome mito loyo abita pa Catan, ento kom aye nyap.” Dok odok ka lego Lubaŋa tyen me aryo kun lego ni, “Wora, ka kikopo man pe twero kato ma pe amato, wek gin ma imito otimme.” Dok odwogo onoŋo gunino woko, pien onoŋo nino doŋ omako waŋgi twatwal. Ka dok owekogi ocito olego lubaŋa tyen me adekke, kun nwoyo lego lega acel-lu. Ka oa odwogo bot lupwonnye openyogi ni, “Wun pud wunino ce? Pud wutye ka yweyo bo? Nen, cawa doŋ onyiko cok, Wod pa dano doŋ gimiyo woko i ciŋ lubalo. Doŋ wua malo, wacitu; nen dano ma doba doŋ tye cok.” I kare ma Yecu pud tye ka lok, Juda otugi bino; en yam ŋat acel i kin jo apar wiye aryo-ni. Obino ki lwak ma gua bot ajwagi madito pa Lubaŋa ki ludoŋo pa lwak, kun gitye ki pala lucwan ki odoo-gu. Juda ma odobe-ni yam omiyo botgi lanyut. En owacci, “Dano ma abimoto kun anoto leme, meno aye en kikome; wutugi makone woko.” Cutcut obino bot Yecu atir, ocako mote ni, “Lapwony itye!” Ci onoto leme. Yecu owaco bot Juda ni, “Larema, ibino kany piŋo?” Ci gubino gutugi poto i kome, gumake woko cut. Ento dano mo acel i kom jo ma onoŋo gitye kacel ki Yecu oryeyo ciŋe ci owoto pala lucwanne, otoŋo ki opii pa ajwaka madit pa Lubaŋa, oŋuno ite woko. Ci Yecu owaco ki dano-nu ni, “Dwok pala lucwanni kakare i akura; pien jo ducu ma mako pala lucwan, gibinekogi bene ki pala lucwan. Itamo ni pe atwero lego Wora wek ocwalla lumalaika makato dul mony apar wiye aryo woko, i cawa man? Ci lok ma yam gicoyo i ginacoya-ni doŋ bicobbe kakare niŋniŋ, ni myero obed kit meno?” I kare meno Yecu owaco bot lwak ni, “Wubino bota ki pala lucwan ki odoogu me maka, macalo wubino i kom layak? Abedo ka pwony i ot pa Lubaŋa jwijwi, ci pe yam wumaka do. Ento gin magi ducu doŋ otimme, wek lok ma yam gicoyo i buk pa lunebi ocobbe kakare.” I kare meno cut lupwonnye gubwote guriŋo woko. Jo ma gumako Yecu gutere bot Kayapa ajwaka madit pa Lubaŋa, ka ma onoŋo lupwony-cik ki ludoŋo-gu gucokke iye. Ento Petero obedo ka lubo kor Yecu ki cencen, nio kwede wa i dyekal pa ajwaka madit; odonyo ci obedo kacel ki lukur-piny kun kuro wek enen gin ma bitimme. Ajwagi madito ki jo ma i Lukiko ducu guyenyo lok me caden me goba i kom Yecu wek gineke woko. ento pe gumedo ki noŋo lok mo, kadi bed lucaden ma lugoba mapol gukelo lok goba. Me agikkine jo aryo gubino, guwacci, “Dano-ni owaco ni, ‘Atwero keto ot pa Lubaŋa, ka dok agero woko kakare i nino adek.’ ” Cutcut ajwaka madit pa Lubaŋa oa malo ci owacci, “Pe idok iye lok mo? Kit lok aŋo ma jo-ni gudoti kwede-ni?” Ento Yecu oliŋ woko aliŋa. Ajwaka madit pa Lubaŋa dok owacce ni, “Amito ikwoŋ kwoŋ ki nyiŋ Lubaŋa makwo, tit botwa ka ce in aye i Kricito ma Lubaŋa oyero, Wod pa Lubaŋa.” Yecu odokke iye ni, “In iwaco giri kit meno; ento awaco botwu ni, cakke kombeddi wubineno Wod pa dano ka obedo piny i kabedo me deyo ka ŋet Won Twer tuŋ lacuc, kun bino ki pol me polo.” Ci ajwaka madit pa Lubaŋa ocako yeco ginarukane woko kekene, kun wacci, “Oyeto Lubaŋa; pud dok wumito caden me ŋo? Kombeddi doŋ wuwinyo kit ma en oyeto kwede Lubaŋa. Wutamo iye lok aŋo?” Gudokke iye ni, “Balle romme to.” Cutcut guŋulo laa i waŋe, ka gudoŋe. Jo mogo gudoŋe kun giwaco ni, “In lanebi-ni! In Kricito ma Lubaŋa oyero-ni, tuci! Aŋa mugoyi?” Petero onoŋo tye woko, obedo piny i dyekal. Ci aŋeca mo obino bote, owacce ni, “In bene onoŋo itye kacel ki Yecu Lagalilaya.” Ento Petero okwero woko i nyim dano ducu, kun wacci, “An pe aniaŋ gin ma ibeloko-ni.” Ka Petero okato woko i doggaŋ, aŋeca mukene dok onene, ci owaco bot jo ma onoŋo gucuŋ kunnu ni, “Dano man bene onoŋo tye kacel ki Yecu me Najaret.” Petero dok okwero woko kun kwoŋŋe akwoŋa ni, “An gira pe aŋeyo dano-ni.” Ka kare okato manoknok, jo ma onoŋo gucuŋ kenyo gubino guwaco bot Petero ni, “Ada, in i ŋat acel i kingi, pien kit ma iloko kwede nyuti woko.” Petero ocako kwoŋŋe kun lamme kekene ni, “Pe aŋeyo danoni.” Cutcut twon gweno otugi kok. Ci Petero ocako po lok ma nene Yecu owacce ni, “Ma noŋo twon gweno peya okok, ibikwera woko tyen adek kulu.” Ci okato woko okok ki cwercwiny madwoŋ Ka piny doŋ oru, ajwagi madito pa Lubaŋa ki ludoŋo pa lwak guporo lok i kom Yecu kit me neke woko. Ci gutweye gutere gumiye bot Pilato ma onoŋo laloc i kare meno. Ka Juda, ŋat ma yam odobe-ni, oneno ni doŋ giŋolo kop oloyo Yecu, oŋut ci odwoko lim ryal pyeradek ca bot ajwagi madito pa Lubaŋa ki ludoŋo, kun waco botgi ni, “Abalo pi dobo dano ma pe ki bal.” Gudokke iye ni, “Meno obedo lokwa bo? Meno lokki giri.” Juda obolo lim piny i ŋom i ot pa Lubaŋa, ci ocito odene woko. Ento ajwagi madito gukwanyo lim meno kun giwaco ni, “Cik pe ye ni myero giket lim man i kicaa lim me ot pa Lubaŋa, pien giwilo ki remo.” Ci guporo lok kacel, guwilo lim meno woko ki poto pa lacwe-agulu, odoko ka yiko lurok. Pi meno omiyo gilwoŋo poto-nu ni poto me remo nio wa onyoo. Mumiyo lok ma yam lanebi Jeremia oloko ocobbe kakare ni, “Yam gutero ciliŋ pyeradek, i wel ma jo mogo i kin likwayo pa Icrael oŋolo kwede welle, ci gimiyo pi poto pa lacwe-agulu ca kit macalo Rwot ocika kwede.” Yecu ocuŋ i nyim laloc ci laloc openye ni, “In i kabaka pa Lujudaya bo?” Yecu ogamo ni, “Iwaco kakare gire.” Ento i kare ma ajwagi madito pa Lubaŋa ki ludoŋo gudote, en pe ogamo iye gin mo. Pilato openye ni, “Pe iwinyo kit lwak adot mapol ma gidoti kwede-ni?” Ento Yecu pe odok iye lok mo kadi ki acel i lok ducu ma gikelo i kome; man omiyo laloc ouro twatwal. I kare me nino madito onoŋo yam Pilato gonyo iye lamabuc mo woko pi lwak ma gin mito. I kare-nu onoŋo gitye ki lamabuc mo ma ŋene ma nyiŋe Baraba. I kare ma doŋ onoŋo gucokke kacel, Pilato openyogi ni, “Wumito ni agony botwu aŋa, baraba nyo Yecu ma gilwoŋo Kricito?” Pien Pilato onoŋo oŋeyo woko ni gumiyo Yecu bote pi nyeko. Dok bene i kare ma doŋ Pilato obedo i wi kom me ŋolo kop, dakone ocwalo kwena bote ni, “Pe itim gin mo i kom dano meno ma kite atir-ri, pien tin i waŋ lek aneno can madit twatwal pire.” Ento ajwagi madito pa Lubaŋa ki ludoŋo gubito lwak ni myero gupeny pi Baraba, guwek ginek Yecu woko. Laloc dok openyogi ni, “I kin jo aryo-ni wumito agony botwu aŋa?” Lwak gudokke iye ni, “Baraba.” Pilato dok openyogi ni, “Ci Yecu ma gilwoŋo Kricito-ni doŋ abitimo niŋniŋ?” Gin ducu gudokke iye ni, “Wek gigure i kom yatariya.” Pilato dok openyogi ni, “Piŋo kaa, otimo kit gin aŋo marac?”. Ento lwak gumedde ki wo ni, “Wek gigure woko i kom yatariya.” Pilato ka oneno ni lok man onoŋo doŋ pe twerre, woo onoŋo tye ka medde ameda, ci okwanyo pii, olwoko ki ciŋe i nyim lwak kun wacci, “Bal me remo pa dano-ni gire pe i koma, lokwu giwu.” Dano ducu gugamo ni, “Remone obed i wiwa ki i wi litinowa!” Ci ogonyo botgi Baraba; lacen ka doŋ otyeko goyo Yecu ki del omiye woko ni gigure i kom yatariya. Askari pa laloc gutero Yecu i Praitorion, ci gucoko buca monygi ducu i nyime. Gulunyo boŋone woko ki i kome, ka doŋ guruke ki boŋo makwar. Gucweyo lalukana okuto, gurwako i wiye, ci guketo odoo lagada i ciŋe lacuc. Gurumo coŋgi piny i nyime, gucako ŋale kun giwacci, “Itye ba, kabaka pa Lujudaya!” Guŋulo laa i kome, gukwanyo odoo lagada ci gugoyo ki wiye. Ka doŋ gutyeko ŋale, ci gulunyo boŋo makwar woko ki i kome, ka dok guruke ki boŋone kikome, ci gutere kwede woko ka gure i kom yatariya. I kare ma doŋ onoŋo gikato woko, gurwatte ki dano mo me Cirene ma nyiŋe Cimon, ci gudiye tektek me tiŋo yatariya pa Yecu. I kare ma guo i kabedo ma gilwoŋo ni Golgota, ma te lokke ni kabedo me cogo wic, gumiye koŋo vino ma girubo ki keda ni omati, ento i kare ma obilo, pe oye matone. Ka doŋ gugure i kom yatariya, ci gupoko boŋŋine woko i kingi kun gibolo iye kwir. Ka lacen doŋ gubedo piny kunnu ka kiye. Lok me adot ma gidote kwede-ni giguro malo ka wiye, kun gicoyo ni, “Man aye Yecu kabaka pa Lujudaya.” Gigure kacel ki luyak mogo aryo, dano acel tuŋ lacuc ki acel tuŋ lacam. Jo ma gimol gikato ki ka ŋete gubedo ka yete, kun giyeŋo wigi, ma giwacci, “Nye, in ma imuko ot pa Lubaŋa woko, ci igero pi nino adek-ki, doŋ ilarre keni ba! Ka ce in i Wod pa Lubaŋa, lor woko piny ki i kom yatariya.” Ki ajwagi madito pa Lubaŋa ki lupwonycik ki ludoŋo bene guŋale kit meno kun giwacci, “Yam bedo ka laro jo mukene, pe twero larre kene. En kabaka pa jo Icrael do; wek olor piny ki i kom yatariya, ci wabiye en. En geno Lubaŋa, wek Lubaŋa koŋ olare kombeddi, ka mite; pien yam owacci, ‘An a Wod pa Lubaŋa.’” Ki luyak bene ma onoŋo gigurogi kacel kwede gucaye i kit acel-lu. Cakke i cawa abicel, piny ocido woko macol i lobo ducu, nio wa i cawa aboŋwen. I kin cawa aboŋwen Yecu odaŋŋe ki dwan maloŋo ni, “Eloi, Eloi, lama cabaktani?” ma te lokke ni, “Lubaŋana, Lubaŋana, itenya woko piŋo?” Ka jo ma onoŋo gucuŋ kunnu guwinyo lokke, ci guwacci, “Laco man tye ka lwoŋo Elia.” Cutcut dano acel i kingi oriŋo okwanyo amor, ci oluto i koŋo vino mawacce, orwako i wi tal lagada, ka omiyo bot Yecu ni omati. Ento jo mukene guwacci, “Koŋ wukur, wek mono wanen ka Elia bino ka lare.” Yecu dok odaŋŋe ki dwan maloŋo, ka doŋ omiyo kwone woko. Ci nen, boŋo kicika ma i ot pa Lubaŋa oyec opokke woko i dul aryo, cakke ki malo, nio kwede wa i tere piny. Piny oyeŋŋe, ki pata-gu gubar woko; ki lyel bene doggi oyabbe woko, ki kom jo maleŋ mapol ma yam guto gucer woko. Gukatti woko ki i lyelgi i kare ma Yecu doŋ ocer, gucito i Jerucalem gunyutte bot jo mapol. Ladit ma loyo askari kacel ki jo ma onoŋo gitye kwede, ma gubedo ka kiyo Yecu, ka guneno kit ma piny oyeŋŋe kwede ki gin ma doŋ otyeko timme, gubedo ki lworo madit mada, ci guwacci, “Adada, man onoŋo Wod pa Lubaŋa!” Dok bene onoŋo nene tye mon mapol kunnu ma gucuŋ ki cen ka nenone, ma gulubo kor Yecu cakke ki i Galilaya, gubedo ka konye bene. I kin mon magi onoŋo tye iye Maliam Lamagdala ki Maliam min Yakobo ki Yucepu, ki min litino pa Jebedayo. I kare ma piny doŋ oyuto, dano mo ma lalonyo me Arimataya ma nyiŋe Yucepu obino; en kikome bene onoŋo yam obedo lapwonny pa Yecu. Ocito bot Pilato ci olego kom Yecu. Ci Pilato ociko ni gimiye. Yucepu okwanyo kom Yecu, ci oboyo woko ki boŋo camanini maleŋ-ŋe, ka opyelo i lyelle kikome manyen, ma yam onoŋo okwinyo oroko i i got; ci oŋilo got madit oloro ki dog lyel, ka doŋ oa ocito gire. Maliam Lamagdala ki Maliam mukene-ni bene onoŋo gitye kunnu gubedo piny gukemme ki lyel. Orwone, ma en aye nino ma lubo nino me Yubbe, ajwagi madito pa Lubaŋa ki Luparicayo gucokke i nyim Pilato, guwaco bote ni, “Ladit, wapo kit ma dano ma lagoba ca oloko kwede, i kare ma pud en kwo; ma owaco ni, ‘I ŋe nino adek abicer woko doki.’ Pi meno cik gigwok lyel maber adada nio wa i nino me adekke, wek lupwonnyene pe gucito gukwal kome woko, ka doŋ giwaco bot lwak ni, ‘En doŋ ocer woko ki i kin jo muto’, man bimiyo bwola man bedo rac makato mukwoŋo ca.” Pilato owaco botgi ni, “Wutye ki askari ma gin lukur-piny; wuciti, wugwok maber mada kit macalo wutwero.” Ci gucito guloro dog lyel woko maber kun gimwono lanen iye i kom got, ka guketo lukur-piny me gwokone. Ka cabit doŋ okato, i kine okogweno me nino mukwoŋo me cabit, Maliam Lamagdala ki Maliam mukene gucito ka neno lyel. Ento oyeŋyeŋ madit oyeŋo piny; pien lamalaika pa Rwot olor ki i polo obino piny ci oŋilo got woko ki i dog lyel, ka obedo i wiye. Lamalaika meno onoŋo nen calo lutkot ma wil, ki ginarukane onoŋo nen matar calo pee. Pi lworo en omiyo lukur-piny komgi omyel, ci gudoko calo jo muto. Ento lamalaika owaco bot mon ni, “Pe wulwor; pien aŋeyo ni wutye ka yenyo Yecu ma yam giguro i kom yatariya-ni. Pe tye kany, pien ocer woko kit macalo nene en owaco. Wubin wunen ka ma onoŋo en obuto iye. Ci wuciti oyotoyot wutit bot lupwonnyene ni en doŋ ocer woko ki i kin jo muto, nen, en doŋ okwoŋo nyimwu me cito i Galilaya; wun wubinene ki kunnu. Nen, doŋ atyeko tito botwu.” Ci gua woko ki i wi lyel oyotoyot ki lworo ki yomcwiny madwoŋ, guriŋo gucito ka tito bot lupwonnyene. Ento nen, Yecu orwatte kwedgi, ci omotogi ni, “Wutye ba!” Gin gubino bote gumako tyene ci guwore. Ka dok Yecu owaco botgi ni, “Pe wulwor; wuciti wutit bot utmegina ni myero gucit i Galilaya, ci gibinena ki kunnu.” I kare ma gitye ka wot, jo mogo ki i kin lukur-piny gudok i gaŋ ka dwoko lok bot ajwagi madito pa Lubaŋa pi gin ducu ma doŋ otimme-ni. Ka doŋ gucokke kacel ki ludoŋo, ma doŋ guporo lok, ci gumiyo lim madit bot askari, kun giwacci, “Wuwac bot lwak ni, ‘Lupwonnyene gubino ki dyewor ci gukwalo kome i kare ma onoŋo wanino woko.’ Ka ce laloc biwinyo lok man, ci wan wabiniaŋe ki lok ducu, wek can mo pe opot i komwu.” Askari bene gugamo lim, ci gutimo kit macalo gicikogi kwede; omiyo lok man obedo ka ywek i kin Lujudaya nio wa onyoo. I kare meno lupwonnye apar wiye acel gucito i Galilaya, i wi got ma yam en ocikogi ni gucit iye. Ka gunene ci guwore; ento jo mogo gubedo ka kalo akala. Yecu obino ci owaco botgi ni, “Twero ducu ma i wi polo ki i lobo doŋ gityeko miyo woko bota. Pi meno doŋ wuciti wucilok jo me rok ducu gudok jo ma luba, kun wubatijagi i nyiŋ Won ki Wod ki Cwiny Maleŋ, wupwonygi me gwoko gin ducu ma doŋ atyeko cikowu kwede. Nen, atye kwedwu kare ducu, nio i agikki piny.” Acakki me lok me kwena maber i kom Yecu Kricito, Wod pa Lubaŋa, kit ma gicoyo kwede i buk pa lanebi Icaya ni, “Nen, acwalo lakwenana otelo nyimi, ma bigero yoni; dwan dano mo ma daŋŋe ki i tim ni, Wuger yo pa Rwot, wutir yone ocuŋ atir.” Kit meno, Jon Labatija ocako nen i tim, kun tito lok ni, “Wuŋut wek wulim batija, wek Lubaŋa owek balwu.” Ci jo ma i lobo Judaya ducu ki jo ducu ma i gaŋ Jerucalem gucito bote. Gutuco balgi, ci en obatijagi i kulu Jordan. Jon yam ruko boŋo yer kinaga, ka tweyo pyere ki del, kun camo bonyo ki moo kic ma i tim. En obedo ka tito lok kun wacci, “Dano mo obebino kun lubo kora ma kato an ki dit, ma an pe aromo guŋo piny ka gonyo del war tyene. An abatijawu ki pii, ento en bibatijawu ki Cwiny Maleŋ.” I kare meno Yecu oa ki i Najaret me Galilaya obino bot Jon, ci Jon obatija en i kulu Jordan. Ka Yecu obea woko ki i pii, otugi neno ka polo yabbe, ki Cwiny Maleŋ ma bino kun lyanne piny macalo akuri ci opye i kome. Ci dwan ocako winnye ma a ki i polo kun wacci, “In aye i Woda ma amaro, ma cwinya yom i komi.” Cutcut Cwiny Maleŋ otero Yecu woko wa i tim. Ci obedo i tim nino pyeraŋwen; Catan ocako bite, ma onoŋo en tye kacel ki lee tim, kun lumalaika gikonye. I kare ma gitweyo Jon woko i mabuc, Yecu ocako bino i Galilaya kun tito lok me kwena maber ma a ki bot Lubaŋa; owacci, “Kare doŋ oromo, ker pa Lubaŋa onyiko cok; wuŋut, wuye lok me kwena maber.” Ka Yecu onono woto rabo dog nam me Galilaya, ci oneno Cimon ki ominne Anderiya, ka gitye ka bolo obwo recgi i nam; pien gin lumak-rec. Yecu ocako lwoŋogi ni, “Wubin wulub kora, ci an abimiyowu wudoko lumak dano.” Ci cutcut gutugi weko obwogi, gulubo kore. Ka dok guwoto anyim manok, ci oneno Yakobo ki ominne Jon, gin awobe pa Jebedayo, ma onoŋo gitye i yeya ka lubo obwo recgi. En otugi lwoŋogi cut, ci giweko wongi Jebedayo odoŋ ki luticce i yeya, gucako lubo kore. Gucako cito wa i Kapernaum, ci cutcut i ceŋ cabit Yecu odonyo i kacokke, ocako pwonyogi. Dano guuro kit pwonnye matek, pien owonyogi macalo won twero, pe macalo lipwony-cik. Ci cutcut dano mo ma tye ki cen marac onen i kacokke; ocako daŋŋe matek ni, “Ilaro gin aŋo kwedwa kaa, in Yecu Lanajaret? Doŋ ibino ka tyekowa bo? An aŋeyi, in i dano maleŋ pa Lubaŋa.” Ento Yecu ojuke, kun wacce ni, “Liŋ mot, a woko ki i kome!” Cen marac oryeye ki koko matek, ka oa woko ki i kome. Dano ducu guuro matek, kun gipenye kekengi ni, “Man gin aŋo? Man aye dok kit pwony manyen bo? Nen en ka ciko wa cen maraco-gu ki twero, ci gin bene giwinyo doge.” Ci pire oywek oromo kabedo ducu murumo lobo Galilaya. Ci cutcut gua woko ki i kacokke, gudonyo i ot pa Petero ki Anderiya, gunywako wot ki Yakobo ki Jon. Maro Petero onoŋo tye ki two lyeto, obuto piny, ci cutcut gutito pire bot Yecu. Yecu ocito omako ciŋe otiŋe kwede malo, ci two lyeto ocaŋ woko ki i kome, ka ocako gwokogi. Otyeno ma ceŋ opoto woko, gucako kelo bote lutwo ducu ma komgi lit, ki jo ma cen marac omakogi. Jo ducu ma i gaŋ gucokke i doggola. Ci en ocaŋo lutwo mapol ma onoŋo gitye ki kwa two mapatpat, kun ryemo ki lwak cen-gu mapol; pe oye cen mo oloko, pien onoŋo giŋeye. Odiko con ma piny pud col, Yecu oa malo, ci opuk ocito woko wa i kabedo ma dano pe iye, ci obedo ka lego Lubaŋa kunnu. Cimon ki jo ma gitye kwede gucako lubo kore; ka gunoŋe ci guwacce ni, “Dano ducu gitye ka yenyi.” En ogamo doggi ni, “Dok wakobu woko i gaŋ mukene ma tye cok ki kany, wek acitit lok kunnu bene; pien meno en aye gin mumiyo abino.” Ci Yecu ocako tiŋo wot orumo lobo Galilaya ducu, kun woto ki tito lok i kacokkegi ki ryemo cen-gu bene. Ladobo mo obino bot Yecu, kun orumo coŋe piny obako doge bote, olege ni, “Ka imito, itwero lonyo koma.” Ci kica omako Yecu i kome, ocako ryeyo ciŋe ogudo kome, kun wacce ni, “Amito; komi olony.” Ci cutcut dobo ocaŋ ki i kome, kome odoko leŋ. Yecu ocike matek, ka ocwale kwede ocito. Ocike ni, “Winy ba, pe icitit ki dano mo; ento ber icit ci icinyutte keni bot ajwaka pa Lubaŋa, wek imi gityer pi komi ma doŋ ocaŋ-ŋi, kit ma yam Moses ociko, wek obed lanyut botgi.” Ento en ocito, ocako tito lokke atyer bot lwak, ci lokke oywek. Pieno omiyo Yecu pe doŋ twero donyo i gaŋ mo ka maleŋ; ocako bedo i kabedo ma dano pe iye, ento lwak gumol gucito bote ma gua ki i kabedo ducu. Ka nino okato manok, Yecu dok odwogo i Kapernaum, ci pire owinnye ni en tye paco. Ci lwak gucokke kacel, ma kabedo odoko diŋ, pe romogi, piny opoŋ wa i doggola-gu; en obedo ka tito lok botgi. Jo mogo gukelo bote dano ma twoyo two akweya kom, jo aŋwen aye gutiŋo en. Ka yo me tere i nyim Yecu oloyogi pi lwak, ci guyabo wi ot ki malo ka ma en tye iye. Ka gutyeko mukone ci gucwalo kitara ma latwo obuto iye piny i nyime. Yecu ka oneno niyegi, ci owaco bot latwo ni, “Latinna, balli doŋ giweko woko.” Ka lupwony-cik mogo, ma onoŋo gibedo kunnu, gubedo ka pyem kekengi wa i cwinygi ni, “Dano man loko kuman piŋo? En oyeto Lubaŋa! Aŋa ma twero weko bal kono ŋat acel keken, en aye Lubaŋa?” Oyotoyot Yecu ocako niaŋ ki i cwinye kene ni gitye ki pyem ma kit meno i cwinygi, ci openyogi ni, “Piŋo cwinywu tye ka pyem lok macalo man? Lok mayotte tye kwene ka awaco bot latwo ni, ‘Balli doŋ giweko woko’, kono nyo ni, ‘A malo wek itiŋ kabutoni, icit wa paco’? Ento kombeddi abinyuto botwu ni Wod pa dano tye ki twero me weko bal i wi lobo.” Ci cut owaco bot latwo akweya kom ni, “An awacci ni, a malo, itiŋ kabutoni, icit giri paco.” En ocako a malo, otiŋo kabutone oyotoyot, ocito woko ki i nyimgi; omiyo gin ducu guuro twatwal, gucako pako Lubaŋa kun giwacci, “Ma naka yam peya waneno kit gin macalo man.” Yecu dok ocito i dog nam Galilaya; ci lwak ducu gubino bote, ocako pwonyogi. Ka okato i yo, ci oneno Levi, wod pa Alipayo, ka obedo piny ka jogo mucoro, ci owacce ni, “Luba.” Ci oa malo, olubo kore. Ka doŋ en obedo piny i ode, ci lujog-mucoro ducu ki lubalo gubino gubedo piny kacel ki lupwonnyene; pien ceŋ onoŋo tye jo mapol ma kit meno ma gubedo ka lube Lupwonycik ma i kin Luparicayo, ka guneno ni en ocamo kacel ki lubalo ki lujog-mucoro, gupenyo lupwonnyene ni, “Piŋo en camo kacel ki lujog-mucoro ki lubalo?” Yecu owinyo ci ogamo ni, “Jo ma komgi yot pe gimito daktar, pe abino ka lwoŋo jo ma kitgi atir, ento lubalo.” Lupwonnye pa Jon ki pa Luparicayo onoŋo gitye ka ri kec; jo mogo gubino gupenye ni, “Piŋo lupwonnye pa Jon ki pa Luparicayo giri kec, ento lupwonnyeni pe giri kec?” Yecu odok iye botgi ni, “Lurem lanyom twero ri kec ma kun lanyom tye kwedgi? Pi kare ducu ma lanyom tye kwedgi pe gitwero ri kec. Ento kare bibino ma gibikwanyo lanyom woko ki botgi, ka doŋ gibiri i kare meno. Pe tye ŋatti mo ma dabo boŋo manyen i kom ginaruka muti. Ka otimo kit meno, ci kiraka ma gidabo kwede-ni telo boŋo meno; en manyen-ni juŋ woko ki kom muti, ci waŋ boŋo yec medde. Pe tye ŋatti mo ma piko koŋo vino manyen i kicaa macon; ka opiko, ci koŋo vino biyeco kicaa woko, koŋo vino bio woko, ki kicaa bene biballe. Ento koŋo vino manyen myero gipik i kicaa manyen.” Ka yam onoŋo Yecu woto kun ŋolo dye poto bel i nino me cabit, ka gitye ka wot, lupwonnyene gucako rito wit bel. Luparicayo gupenye ni, “Piŋo lupwonnyeni gitiyo gin ma cik okwero ni pe giti i ceŋ cabit?” En odok iye botgi ni, “Wun pe wukwano gin ma Daudi otiyo ka en tye ma kec oneko marac, en ki jo ma tye kacel kwede? Kit ma en odonyo kwede i ot pa Lubaŋa i kare ma Abiatar aye ajwaka madit pa Lubaŋa? Ocamo mugati ma giketo i nyim Lubaŋa, ma yam cik okwero ni dano mo pe ocam, kono ajwagi pa Lubaŋa keken. Daudi ocamo, dok opoko ki jo ma tye bote.” Otittigi ni “Cabit giketo pi dano, pe dano aye giieto pi cabit. Kumeno Wod pa dano aye rwot me cabit.” Yecu dok odonyo i kacokke, ma onoŋo tye iye dano mo ma bade otal. Gukiye ka nyo bicaŋe i ceŋ cabit, wek gikel kop i kome. Yecu owaco bot labade otal ni, “A malo icuŋ i dyere.” Openyogi ni, “I ceŋ cabit, cik ye ni gitim iye gin maber nyo gin marac, gilar iye kwo nyo ginek woko?” Ento gin guliŋ aliŋa. En olworo waŋe i komgi ki kiniga, cwinye ocwer pi nwaŋ cwinygi. Owaco bot dano-nu ni, “Rye badi.” En oryeyo bade ci bade ocaŋ. Luparicayo gukato woko, cutcut gucako poro lok kacel ki jo pa Kerode kit ma myero gineke kwede. Yecu ki lupwonnyene gua gucito i dog nam. Lwak madwoŋ ma gua i Galilaya gulube ki jo ma gua i Judaya, ki i Jerucalem, ki Idumea ki loka Jordan, ki i lobo ma orumo Turo ki Cidon; lwak madwoŋ gucokke bote, pien guwinyo pi tic mapol ma en otiyo. En ociko lupwonnye ni guyub yeya matidi pire, wek pe lwak gubed ka diyo en. Pien onoŋo ocaŋo jo mapol, ma omiyo jo ducu ma komgi lit gidine i kome ka boŋe. Ka cen maraco gunene, ci guryebbe i nyime, gukok kun giwaco ni, “In giri Wod pa Lubaŋa.” Yecu ojukogi ni pe myero giwek dano oŋeye. Yecu oito malo i wi got, ocako lwoŋo jo ma en mito bote; ci gucito bote. Oyero jo apar wiye aryo wek gubed kacel kwede, dok wek eorgi gubed lukwena me tito lok, dok gubed ki twero me ryemo cen. Mukwoŋo Cimon ma en ocako nyiŋe Petero; ki Yakobo wod pa Jebedayo, ki Jon omin Yakobo, ma en ocako nyiŋgi ni Boanergi, te lokke ni, jo ma gimor calo kot; ki Anderiya ki Pilipo ki Bartolomayo ki Matayo, ki Tomaci, ki Yakobo wod Alipayo, ki Tadayo, ki Cimon ma obedo i kin jo ma gimito locken, ki Juda me Keriot, ma yam odobe. Yecu odok paco; lwak dok gucokke, omiyo en ki lupwonnyene pe gitwero noŋo kare me cam. Ka jo tugi guwinyo, ci gubino ka make pien giwaco ni, “En opo woko.” Lupwony-cik ma gua i Jerucalem guwaco ni, “En tye ki jok Beeljebul,” dok ni, “En ryemo cen pi twero pa ladit pa cen.” Yecu olwoŋogi bote, oloko kwedgi i carolok ni, “Catan twero ryemo Catan niŋniŋ? Ker ka opokke aryo, ker meno pe twero cuŋ. Dok ot ka iye opokke aryo, ot meno pe twero cuŋ. Dok ka Catan ocako lweny i kome kekene ce opokke kene, ci pe twero cuŋ, kerre gik woko. Ento pe tye ŋatti mo ma twero donyo i ot pa dano ma kome tek ka yako jamine; ento koŋ kwoŋo tweyo dano ma kome tek-ki, ka doŋ biyako jamine ma i ode. Ada awaco botwu ni, bal ducu ma dano timo, ki lok ducu ma giyeto kwede Lubaŋa, gibiwekone woko, ento ŋat ma yeto Cwiny Maleŋ pe gibiweko balle matwal, pien noŋo otimo bal ma ri nakanaka,” pien onoŋo guwaco ni, “En tye ki cen marac.” Minne ki omegine gubino, gucuŋ woko, gucwalo kwena me lwoŋe. Lwak onoŋo gubedo kun gurume dyere. Giwacce ni, “Nen, meni ki omegi gitye woko, giyenyi.” En openyo ni, “Maa ki omega gin aŋagi?” Olworo waŋe i kom jo ma gurume ma gubedo piny, owaco ni, “Maa ki omega gin ene. Dano ma tiyo gin ma Lubaŋa mito, en aye omera, ki lamera, ki maa.” Yecu dok ocako pwony i dog nam. Lwak madwoŋ twatwal gucokke bote; pi meno oito i yeya, obedo iye i dye nam, lwak ducu gubedo i witura. Opwonyogi ki lok mapol i carolok. I pwonnye owaco ni, “Wuwiny! Lacoc ocito ka coyo kodi. Ka kun coyo, kodi mogo okir i ŋet yo, winyo gubino, gucamo woko. Kodi mukene okir i kom pata ka ma ŋom tye iye manok. Cutcut gutwi, pien ŋom pe tut. Ka ceŋ oryeny, owaŋogi gutwo woko, pien lwitgi pe odonyo matut. Kodi mukene okir i kin okuto, okuto olot odiyogi woko, pe gunyako nyiggi. Kodi mukene okir i ŋom maber, gutwi, gujany, gunyako nyiggi, mukene pyeradek, mukene pyerabicel, mukene miya.” Lacen owaco ni, “Ŋat ma tye ki it me winyone, owiny.” Ka onoŋo Yecu odoŋ kene, ci jo murume dyere kacel ki jone apar wiye aryo, gubino gupenye lok i kom carolok meno. En ogonyo botgi tere ni, “Wun gimiyowu me ŋeyo muŋ me ker pa Lubaŋa, ento bot jo maca ma gitye woko giloko kwedgi i carolok, wek ka gineno, gunen, ento pe guniaŋ maber, dok ka giwinyo, guwiny, ento pe guniaŋ tere maber; wek pe gudwog cen, ci Lubaŋa owek balgi.” Yecu openyogi ni, “Pe wuniaŋ te carolok man? Wubiniaŋ niŋniŋ carolok ducu? Lacoc coyo lok pa Lubaŋa. Magi gin aye jo ma i ŋet yo, ka ma lok gicoyo iye; ka guwinyo, cutcut Catan bino, kwanyo lok ma gicoyo i igi woko. Kit meno magi gin aye ma gicoyo i ŋom ma obedo pata; gin ka guwinyo, oyotoyot gimako lok ki yomcwiny; ento pe gitye ki lwitgi i igi, giri pi kare manok; ka can obino, nyo libo dano ocakke, pi lok meno, cutcut gipoto woko. Tye mukene ma gicoyo i kin okuto; gin aye jo ma giwinyo lok, ce paro lok me lobo man, ki maro lonyo, ki miti me jami mukene, ka odonyo i cwinygi ci diyo lok, pe nyak. Ento maca ma gicoyogi i ŋom maber-ri, gin aye jo ma giwinyo lok, ci gigamo, ginyako nyiggi, mukene pyeradek, mukene pyerabicel, mukene miya.” Lacen openyogi ni, “Tara mono gikelo i ot me auma ki aduku, nyo me aketa i te kitanda? Pe gicibo i wi okar? Pien pe tye gin mo ma okanne ma pe biŋene, kadi gin ma giumo ma pe binen kamaleŋ. Ka ŋatti mo tye ki it me winyone, owiny.” Owaco botgi ni, “Wugwokke i kom lok ma wuwinyo; kit gin mo ma wupimo kwede-ni, en aye gibipimo ki mewu bene, dok gibimedone botwu. Pien ŋat ma mere tye, gibimedde, ŋat ma mere pe gibikwanyo woko ki bote kadi wa gin ma en tye kwede ducu.” Yecu owaco ni, “Ker pa Lubaŋa tye kit man, macalo dano ma coyo kodi i ŋom. En buto piny i dyewor, dok a i dyeceŋ, ci kodi cako twi, doŋo, kun en pe ŋeyo kit ma timme kwede. Ŋom kene aye miyo kodi nyako nyige; mukwoŋo koŋ twi, lacen ŋok, ka nyig bel corre. Ento ka bel ocek, ci dano cako kayone cut, pien noŋo kare me kayo bel doŋ oromo.” Dok owaco ni, “Wabiporo ker pa Lubaŋa ki kit gin aŋo? Nyo wabinyuto ki kit carolok aŋo? Ker pa Lubaŋa rom ki kodi dek karadali; ka gicoyo i ŋom, kadi bed en tidi twatwal makato kodi ducu ma i wi lobo-ni, ento ka gicoyo, ci doŋo, doko dit makato dek ducu, jaŋe jany madito, miyo winyol me polo twero gero odigi i te tipone.” Otito botgi lok i carolok mapol calo meno, kit ma gitwero niaŋ kwede. Pe oloko kwedgi laboŋo carolok, ento ka en tye ki lupwonnyene, ci gonyo te lok ducu botgi. I nino meno ka piny doŋ oyuto, Yecu owaco botgi ni, “Wakatu loka ca.” Guweko lwak, ci gukwaŋo en ki yeya ma onoŋo en tye iye-ni; ki yeya mukene bene onoŋo tye kacel kwedgi. Yamo madwoŋ ocako kodo, pii otwagge, ocorre i yeya, omiyo i yeya ocako poŋ woko. Ento en onoŋo tye i tik yeya, kun onino i kom laten-wic. Gucoye, guwacce ni, “Lapwony, in pe iparo? Nen, wato woko do.” En ocako co woko ci ojuko yamo, owaco ki nam ni, “Liŋ, pye mot.” Yamo ocako kwe, nam oliŋ mot. Openyogi ni, “Piŋo wulwor kit man? Wun pe wutye ki niye?” Gubedo ki lworo madwoŋ, ci gucako penye kekengi kun giwaco ni, “Man aŋa kaa, ma yamo ki nam giwinye-ni?” Gubino i loka nam tuŋcel, i lobo pa Lugeraca. Ka Yecu okato woko ki i yeya, ci cutcut dano mo ma tye ki cen marac obino bote, ma oa ki i kabedo ka ma giyiko iye jo muto. En bedo i kin lyel, pe tye dano mo ma twero tweyo en kadi ki nyor; pien yam gitweye tyen mapol ki atego ki nyor, ento ocodo nyor, oturo atego woko, pe tye dano mo ma tye ki tek ma loye. Nino ducu, dyewor ki dyeceŋ, en bedo i kin lyel ki i wi cere kun kok, dok ŋolo kome kene ki kidi. Ka oneno Yecu ki ka mabor, ci oriŋo, oryebbe i nyime, owore. Ci odaŋŋe ki dwan maloŋo ni, “Ilaro aŋo kweda, Yecu Wod pa Lubaŋa Mamalo Twal? Alami ki nyiŋ Lubaŋa, pe iyela.” Pien onoŋo ocike ni, “A woko ki i kom dano man, in cen marac.” Yecu openye ni, “Nyiŋi aŋa?” Ogamo ni, “Nyiŋa Legion, pien wapol.” En obako doge bote matek ni, pe myero ocwal cen maraco woko ki i lobo meno. Lwak opego mapol onoŋo gitye ka cam i kor got kunnu; gubako doggi bote kun giwaco ni, “Cwalwa i opego, wek wadony i igi.” Yecu oyegi. Cen maraco gua, gudonyo i opego, lwak opego ma gimito romo ka alip aryo, gutwarre ki ŋwec gucorre i loŋo got, gumwony woko i nam. Lukwat guriŋo gutito lokke i gaŋ madit, ki i kin paco. Dano mapol gumol gubino ka neno gin ma otimme. Gubino bot Yecu, guneno dano ma yam tye ki cen maraco, obedo piny, oruko boŋo, odoko ryek, en ma yam onoŋo tye ki buca mony me cen maraco; lworo ocako makogi. Jo ma guneno gutito botgi lok ducu ma otimme i kom dano ma yam tye ki cen maraco, ki gin ma otimme i kom opego-gu. Gubako doggi bot Yecu ni myero oa woko ki i lobo tugi. Ka en tye ka ito i yeya, ci dano ma yam tye ki cen maraco obako doge bot Yecu ni myero ebed bote. Ento Yecu okwero woko, owacce ni, “Dok paco bot lutuwu, icitit gin madit ma Rwot otimo i komi, ki kit ma otimi kwede kica.” En ocito, ocako tito lok madit ma Yecu otimo i kome i Dekapoli, omiyo jo ducu guuro. Ka Yecu doŋ okato loka nam tuŋ ca, lwak madwoŋ gucokke bote; en obedo i dog nam. Ŋat acel ma i kin ludito me kacokke ma nyiŋe Yairo obino; ka onene, ci oryebbe piny ka tyene, obako doge bote matek ni, “Nyara matidi mito to woko. Bin iket ciŋi i kome wek ocaŋ, obed makwo.” Yecu ocito kacel kwede, kun lwak madwoŋ gilube, kun gidiye. Onoŋo tye dako mo ma yam otwoyo two agobi mwaka apar wiye aryo. En olimo can madwoŋ ki bot ludaktar mapol; olanyo limme ducu pe okonye ento twone medde ameda. Ka owinyo lok i kom Yecu, obino ki i yo ŋeye ki i kin lwak, ci ogudo dog ginarukane; pien otamo ni, “Ka agudo kadi kom ginarukane keken, ci abicaŋ.” Oyotoyot two agobine ocaŋ woko, ci oŋeyo ki i kome kene ni doŋ ecaŋ woko ki i twone. Ka Yecu oŋeyo ki i kome ni tek oa ki i kome, ci olokke i dye lwak cut, openyo ni, “Aŋa ma ogudo ginarukana?” Lupwonnyene gugamo ni, “Ineno lwak tye ka diyo in, ka dok pud ipenyo ni, ‘Aŋa ma oguda?’ ” Ci olworo waŋe wek enen ŋat ma ogude-ni. Ci dako meno, ka oŋeyo kit gin ma otimme i kome, obino bot Yecu ki lworo, kun kome myel, oryebbe i nyime, otitte lok ducu me ada. Yecu owacce ni, “Nyara, niyeni ocaŋi; wot ki kuc, twoni doŋ otyeko caŋ matwal.” Ma kun en pud loko, jo mogo gubino ma gua ki i ot pa ladit me kacokke, guwaco ni, “Nyari doŋ oto woko, pud dok iyelo Lapwony piŋo?” Yecu pe oketo cwinye i kom lok ma guwaco, ento ociko ladit me kacokke ni, “Pe ilwor, in iye meri ayeya keken.” Pe oye dano mo olube, kono nyo Petero ki Yakobo ki Jon omin Yakobo keken. Gubino i ot pa ladit me kacokke, Yecu oneno lwak ma giwo, kun gikok ma gidaŋŋe matek. Ka odonyo i ot, openyogi ni, “Piŋo wuwo ki koko? Latin man peya oto, ento onino anina.” Gunyere matek, ci oryemogi ducu woko, ocako tero won latin ki minne ki jo ma onoŋo gitye kacel kwede, gudonyo ka ma latin tye iye. Omako ciŋe, owacce ni, “Talita kum”, te lokke ni, “Latin anyaka, awacci ni, a malo.” Oyotoyot nyako oa malo, owoto, pien onoŋo mwaka me ditte doŋ romo apar wiye aryo. Guuro matek twatwal. Yecu ocikogi matek ni ŋatti mo pe myero oŋe lok man; ocikogi ni gimi ki nyako-nu cam mo ocam. Yecu oa woko ki kunnu, odok i lobo tugi, lupwonnyene gulube. Ocako pwonyogi i kacokke i ceŋ cabit. Jo mapol ma guwinye, guuro, kun giwaco ni, “Laco man onoŋo ryeko man ducu ki kwene? Kit ryeko aŋo ma gimiye-nu? Dok kit tic aŋo matek madito ma rom man ma en tiyogi-ni? Man pe lapac, wod pa Maliam, omin Yakobo, ki Yoce, ki Juda ki Cimon? Dok nyimegine pe gitye botwa kany?” Ci cwinygi ocako a woko i kome. Yecu owaco ni, “Lanebi giketo deyo i kome, ento pe giketo deyo i kome ki i lobo tugi ki i kin jo tugi, ki i ode.” Pe otwero tiyo tic matego kunnu, ento oketo ciŋe i kom lutwo mogo, ocaŋogi. Yecu ouro pien pe gitye ki niye. En obedo ka wirre i kin gaŋi kun pwonyo dano. Yecu olwoŋo bote jone apar wiye aryo, ci oorogi ki aryo aryo, omiyogi twero i kom cen maraco. Ocikogi matek ni pe guwot ki gin mo, kono odoo keken, laboŋo cam mo, kadi kicaa, kadi lim mo i del pyergi; ento guwot kun giruko war tyengi, pe guwot ma gubamo kanyi aryo i komgi. Ocikogi ni, “Ka wudonyo i ot mo, wubed kenyo nio ka wubia ki i kabedo meno. Kabedo ducu ma pe bijolowu, ma pe biwinyowu, ka ce wubia woko ki kunnu, ci wuteŋ apwa woko ki i tyenwu wek obed caden botgi.” Kit meno gucako cito, gutito lok ni myero dano oŋuti. Guryemo lwak cen mapol, dok guwiro lutwo mapol ki moo kun gicaŋogi. Kabaka Kerode owinyo pire, pien onoŋo nyiŋ Yecu doŋ oywek twatwal. Jo mogo guwaco ni, “Jon Labatija aye ocer woko ki i kin jo muto; en aye mumiyo lakit teko macalo meno tye ka tic i kome.” Ento jo mukene guwaco ni, “En Elia”, jo mukene ni, “En lanebi, cal ki ŋat mo i kin lunebi macon.” Ka Kerode owinyo pire ci owacci, “Jon ma yam atoŋo wiye en aye ocer woko.” Pien Kerode yam ooro dano, gumako Jon, gutweyo i mabuc, pi Kerodia ci-ominne, dako pa Pilipo, ma yam okwanyo me bedo dakone. Pien Jon owaco bot Kerode ni, “Cik pe oye ni ibed ki ci-omeru.” Kerodia obedo ki keccwiny i kome, omito neke woko, ento pe otwero, pien Kerode onoŋo lworo Jon, kun ŋeyo ni en dano ma kite atir, ki maleŋ, ci obedo ka gwoke maber. Ka owinyo lok ma en otito, lokke otwoyo doge woko, ento pire obedo mit bote ka winyo lokke. Ento kare maber oromo i nino ma Kerode oyubo iye karama me po pi nywale, ci olwoŋo iye luditone ki lutel-wi-lweny ki ludoŋo me Galilaya. Nya pa Kerodia odonyo i ot omyelo, ci oyomo cwiny Kerode ki welone. Kabaka owaco bot nyako ni, “Legga gin ducu ma imito, abimiyi.” Okwoŋo akwoŋa kun wacce ni, “Gin ducu ma ibilegga abimiyi, kadi bed nucu kerra.” Nyako okato woko, openyo minne ni, “Abilego gin aŋo?” Odok iye ni, “Leg wi Jon Labatija.” Oyotoyot odwogo i ot bot kabaka ki mit kome, olege ni, “Amito imiya wi Jon Labatija i weer kombeddi.” Kabaka okumo matek, ento pi kwoŋŋe ki pi welone omiyo pe omito twonne. Oyotoyot kabaka ooro askari ma lakur, ocike ni okel wi Jon. Ocito oŋolo ŋute ki i ot mabuc, okelo wiye i weer, omiyo bot nyako; nyako omiyo bot minne. Ka lupwonnye pa Jon guwinyo pire, gucito gutiŋo kome, guyiko i lyel. Lukwena gudwogo bot Yecu gutitte lok ducu ma gutiyo ki ma gupwonyo. En owaco botgi ni, “Wubin kenwu ka ma dano pe iye, wuywe manok.” Pien jo mapol onoŋo gibedo ka bino, gidok cen, kun gigwennye agwenya, omiyo pe gubedo ki kare mo me cam. Gucito kengi ki yeya i kabedo ma dano pe iye. Jo mapol gunenogi ka gicito, guŋeyogi, ci guriŋo kunnu ki tyengi kun gia ki i gaŋi ducu; gin aye gukwoŋo o kunnu wiati. Ka Yecu okato i wi tera, oneno lwak madwoŋ; kica ocako make i komgi, pien gitye macalo romi ma gipe ki lakwat; ci opwonyogi ki lok mapol. Ka oo otyeno, lupwonnyene gubino bote guwacce ni, “Kabedo man tye i dye tim, cawa bene doŋ okato. Cwal lwak gucit i kin paco ki i gaŋi ma cokcok, guwil ginacama pigi kengi.” Ento en odok iye ni, “Wun aye wumigi ginacama.” Gin gugamo ni, “Wacit wawil kwon me ciliŋ miya aryo, wami botgi wek gucam?” Ento en openyogi ni, “Wutye ki mugati adi? Koŋ wucit wunen.” Ka guŋeyo guwacce ni, “Abic, ki rec aryo.” Yecu ociko jo ducu ni gubed piny i dul ki dul, i kom lum alita. Kit meno lwak gubedo piny i dul ki dul, miya miya, ki pyerabic pyerabic. Okwanyo mugati abic ki rec aryo, oneno malo i polo olego gum, obaro i mugati, omiyo ki lupwonnyene wek guket i nyim lwak; dok opoko rec aryo i kingi ducu. Gin ducu gucamo, guyeŋ Gicoko ŋide mugati ma obaro-nu mudoŋ, ki rec bene, opoŋo aduku apar wiye aryo. Jo ma gucamo mugati giromo co alip abic. Oyotoyot Yecu ociko lupwonnyene ni gudony i yeya, gukwoŋ nyime me cito loka ca, wa i Betecaida, kun en pud ciko lwak. Ka doŋ ocikogi, ci ocito i wi got ka lega. Ka piny oyuto, yeya onoŋo doŋ tye wa i dye nam, en kene aye onoŋo tye i wi tura. En onenogi kun gicanne ki cero yeya, pien onoŋo yamo kodo bino ki i nyimgi. I kine me koko gweno, en ocako bino botgi kun woto i wi nam ki tyene. Omito katogi akata, ento ka gunene kun woto i wi nam ki tyene, gutamo ni gwok nyo tipo, ci gudaŋŋe matek; pien gin ducu gunene, ci tipo komgi oto woko. Ento oyotoyot oloko kwedgi kun waco ni, “Wudi cwinywu. An enni; gwok wulwor.” Odonyo botgi i yeya, ci yamo oliŋ mot. Gin guuro matek twatwal ki i cwinygi, pien nakanen pe guniaŋ lok ma i kom mugati, ento cwinygi pud obedo nwaŋ. Ka doŋ gukato loka ca, ci gukato wi tura i lobo Genecaret, gutweyo yeya kunnu. Ka gutyeko a woko ki i yeya, ci lwak guŋeyo Yecu oyotoyot. Gucako riŋo gurumo kabedo ducu ma tye kunnu, kun gikelo lutwo ma gutiŋogi ki kitara, giterogi i kabedo ducu ma guwinyo ni en tye kunnu. I kabedo ducu ma yam en obino iye, i kin paco-gu, ki i gaŋi-gu, ki i kin caro, gipyelo lutwo wa i cuk-gu, kun gibako doggi bote ni oye wek gugud kadi dog ginarukane keken; ci lutwo ducu ma gugudo gucaŋ. Luparicayo ki lupwony-cik mogo ma gua ki i Jerucalem gucokke bot Yecu. Guneno jo mogo ma i kin lupwonnyene ma pe gilubo kwer, ento gicamo ma pe gulogo ciŋgi. Pien Luparicayo ki Lujudaya ducu ka pe gulogo ciŋgi kakare pe gicamo, pien gumako kit pa ludoŋo Ka gudwogo ki i cuk pe gicamo, nio ka gulwokke. Dok gitye ki lwak kit kwer mapol ma gilubo, macalo kit me lwoko kikopo-gu ki agulu-gu ki jami mola-gu ducu. Luparicayo ki lupwony-cik gupenyo Yecu ni, “Piŋo lupwonnyeni pe gilubo kit kwer pa ludoŋo? Piŋo gicamo ki ciŋgi ma pe gulogo ma lubo kwer?” Yecu odok iye botgi ni, “Wun lugoba, Icaya con oloko i komwu kakare, macalo en ocoyo ni Lubaŋa owacci, ‘Rok man kara giwora ki doggi nono, ento cwinygi pe i koma wacel; giwora nono, pwony ma gipwonyo obedo pwony ma mako kit pa dano.’ Wuweko cik pa Lubaŋa, kun wuketo cwinywu ka lubo kit pa dano.” Yecu dok owaco botgi ni, “Wutimo ber pi kwero cik pa Lubaŋa, wek wulub giwu kit cikwu! Moses yam owacci, ‘Wor woru ki meni’; dok ni, ‘Ka ŋatti mo oceno wonne nyo minne, gibineke woko’; ento wun wuwaco ni, ‘Ka dano mo owaco ki wonne nyo minne ni, Gin ma kono akonyi kwede en lim me Korban’ (te lokke ni, gin ma gimiyo ki Lubaŋa), en pe dok omi lim mo me konyo wonne nyo minne, kun wumiyo lok pa Lubaŋa doko goro, pien wupwonyo dano ni gulub kit cikwu. Dok wutiyo bene gin mapol macalo meno.” Yecu dok olwoŋo lwak bote, ci owaco botgi ni, “Wun ducu wuwiny lokka, ci wuniaŋ. Pe tye gin mo ma donyo i i dano ma oa ki woko ma twero balo en, ento gin ma a ki i dano en aye balo dano. Ma tye ki it me winyone, ci owiny.” Ka oweko lwak woko, ci odonyo i ot, lupwonnyene gucako penye pi carolok meno ma obolo-ni. En ogamo ni, “Kara wun bene peya wuniaŋ tere bo? Pe wuŋeyo ni, gin ducu ma donyo i dano ma a ki woko pe twero balo en? Pien pe odonyo wa i cwinye, ento wok kato i cin iye, ci kato woko.” (Ka otyeko wacone ki meno, nyuto ni olonyo kwa cam ducu.) Yecu dok owaco ni, “Gin ma a ki i dano aye balo dano. Pien gin ma a ki i cwiny dano, en aye bedo tam maraco, cot, kwalo kwo, nek, abor, paro lim, bal maraco, bwolo dano, kwele, nyeko, yet, wakke ki miŋo. Tim magi maraco-ni ducu gia ki i cwiny dano, gin aye gibalo dano.” Yecu ocako a ki kunnu, ocito wa i lobo ma tye cok ki Turo ki Cidon. Ci odonyo i ot mo kunnu; onoŋo en pe mito ni ŋatti mo oŋe ni etye kunnu, ento pe twero kanne. Cutcut dako mo ma nyare tye ki cen marac owinyo pire, ci obino oryebbe ka tyene. Dako-nu onoŋo Lagrik, ma rokke Curo-Poiniki. Ocako lego Yecu ni oryem cen woko ki i kom nyare. Yecu owacce ni, “Koŋ iwek litino gukwoŋ yeŋ, pe ber gikwany cam pa litino, gibol ki gwogi.” Dako-nu odok iye ni, “Rwoda, meno iwaco kakare; kadi bed kumeno ci litino gwogi ma gitye i te meja gin bene gicamo ŋide cam pa litino do.” Yecu owacce ni, “Pi lok ma iloko-ni, ber doŋ idok paco, cen doŋ otyeko a woko ki i kom nyari.” En odok paco, ci onoŋo latin tye obuto i wi kitanda, ma cen doŋ otyeko a woko ki i kome. Yecu oa ki i lobo ma cokcok ki Turo, ci owok ki i cidon, ka okato ocito wa i nam Galilaya, ka otuc kwede wa i dye lobo Dekapoli. Ci gikelo bote dano ma ite odiŋ ma te lebe oto, gucako bako doggi bote ni oket ciŋe i kome. Yecu ocako mako en ki i kin lwak otere cen i muŋ, ci oketo ciŋe i it dano meno, ka oŋulo laa ci ogudo lebe; ocako neno malo i polo, ocur, kun waco ni, “Eppata”, te lokke ni, “Yabbe.” Ite oyabbe woko ki te lebe bene ogonnye, ocako lok atir. Yecu ocikogi ni pe gutit ki ŋatti mo; ento kadi bed ocikogi kumeno, gin bene gumedde ameda ki tito pire. Gin gubedo ka urone makato ducu, ma kun giwacci, “En otimo gin ducu maber; pien omiyo jo ma itgi odiŋ giwinyo lok, ki jo ma te lebgi oto giloko.” I kare meno, ka lwak dok gucokke mapol, kun pe gitye ki camgi, ci Yecu olwoŋo lupwonnyene bote, ocako waco botgi ni, “Kica maka i kom lwak man, pien gutyeko bedo kweda kany pi nino adek ma kun pe gitye ki camgi mo. Ka acwalogi ni gudok wa tugi ki kec, ci kec bibwoyogi woko i yo, pien jo mukene i kingi gua ki ka mabor.” Lupwonnyene gudok iye ni, “Kara man, dano twero miyo mugati ma romo dano-ni i tim kany niŋniŋ?” Yecu openyogi ni, “Wutye ki mugati adi?” Gugamo ni, “Abiro.” Ociko lwak ni gubed piny i ŋom, ci omako mugati abiro-nu, opwoyo, ka obaro igi, ocako miyo bot lupwonnyene guket i nyimgi, ci guketo i nyim lwak. Onoŋo gitye ki rec matino manok bene; ka doŋ olego iye gum, ociko ni magi bene myero giket i nyimgi. Lwak gucamo nio ka guyeŋ; gucako coko ŋide cam ma oloyogi-ni, oromo adita abiro mupoŋ. Jo ma onoŋo gitye kunnu welgi romo jo alip aŋwen. Ka ociko lwak, ci odonyo i yeya cutcut kacel ki lupwonnyene, ocito wa i lobo Dalmanuta. Luparicayo gubino bot Yecu ci gucako pyem kwede, kun gimito lanyut ma a ki bot Lubaŋa, me laom iye. Yecu ocur ki i cwinye matek kun wacci, “Piŋo yalwak me kare man gimito lanyut? Adada, awacciwu ni, pe gibimiyo lanyut mo bot yalwak me kare man.” Yecu oa woko ki botgi, ci odonyo i yeya, oŋolo nam okato wa loka ca. Lupwonnyene wigi onoŋo owil woko ka tero mugati, onoŋo gitye kimugati acel keken i yeya. Yecu ocikogi matek twatwal kun wacci, “Wugwokke i kom tobi pa Luparicayo ki tobi pa Luparicayo ki tobi pa Kerode.” Lupwonnye gubedo ka laro lok kekengi kun giwacci, “Pe watye ki mugati.” Ka Yecu oŋeyo ci openyogi ni, “Piŋo wubedo ka laro lok ni pe wutye ki mugati? Peya wuniaŋ ce? Pe wumako maber? Cwinywu pud nwaŋ? Wutye ki waŋwu, ci pe wuneno kwede? Wutye ki itwu, pe wuwinyo kwede? Wun pe wupo ce? Ka yam abaro i mugati abic pi jo alip abic-ci, ci wucoko ŋide aduku adi?” Gugamo ni, “Apar wiye aryo.” “Ka yam abaro i mugati abiro pi jo alip aŋwen-ni, onoŋo wucoko ŋide opoŋo adita adi?” Dok gugamo ni, “Abiro.” En openyogi ni, “Peya wuniaŋ aye?” Gin gucako bino i Betecaida, ci jo mogo gukelo bote dano ma waŋe oto woko, gubako doggi ni oboŋ kome. Yecu ocako mako ciŋ lawaŋe-oto, ci otere woko wa i ŋe gaŋ; ci oŋulo laa i waŋe, ka dok oketo ciŋe i kome, openye ni, “Ineno gin mo doŋ?” Laco meno otiŋo waŋe malo, ocako waco ni, “Aneno kom dano; ento pud ginen macalo yadi ma woto.” Yecu dok onwoyo keto ciŋe i waŋ lawaŋe-oto; ci ociko waŋe matek, waŋe odok kakare ma neno piny maber. Yecu ocwalo en wa i paco tugi, kun cike ni, “Pe idony i gaŋ kunnu.” Yecu ki lupwonnyene gucito i kin gaŋi me Cecaria Pilipi. I kare ma gitye i yo, openyo lupwonnye mere ni, “Dano mono giwacci an aŋa kaa?” Guwacce ni, “Jon Lubatija; jo mogo giwacci, ‘Elia’, ki jo mukene ni in ŋat acel i kin lunebi.” Dok openyogi ni, “Ento wun kono wulwoŋa mono ni an aŋa?” Petero ogamo ni, “In i Kricito ma Lubaŋa oyero.” Yecu ociko matek ni pe gitit pire ki dano mo. Yecu ocako pwonyo lupwonnye mere ni, “Wod pa dano myero olim can madwoŋ, dok ludoŋo ki ajwagi madito pa Lubaŋa ki lupwony-cik myero gukwere woko, ci guneke, ento en cako cer woko i ŋe nino adek.” Yecu oloko lok meno atyer ka maleŋ. Petero otero en cen, ocako juke matek. En olokke bot lupwonnyene ci oloko ki Petero matek, kun wacci, “Dok cen i ŋeya, in Catan! Pien tammi pe lubo pa Lubaŋa, ento pa dano.” Yecu olwoŋo lwak bote kacel ki lupwonnyene, ci otito botgi ni, “Ka ce dano mo mito lubo kora, myero okwoŋ kwerre kekene, ka ocak tiŋo yatariyane, olub ki kora. Pien dano ma mito laro kwone birwenyone arwenya, ento ka dano mo orwenyo kwone pira ki pi lok me kwena maber, en aye bilaro kwone. Konyo dano ma olimo lobo ducu ki gin aŋo mono, ka ce kwone gikwanyo woko? Dano dok bimiyo kit gin aŋo ma ka kwone? Ka ce dano mo lewic omake i koma ki i lokka i kare man me bal ki weko Lubaŋa, Wod pa dano bene lewic bimake i kome i kare ma en bidwogo ki deyo pa Wonne kacel ki lumalaika maleŋ.” Dok oloko botgi, ni “Adada awacciwu ni, tye jo mogo ma gucuŋ i kinwu kany ma pe gibibilo to wacel, nio waŋ ma guneno ka ker pa Lubaŋa doŋ otyeko bino ki tek.” Ka nino okato abicel, ci Yecu otero Petero ki Yakobo ki Jon, ocako yito kwedgi i wi got mabor i muŋ gin kengi. Kome ocako lokke i nyimgi, ginarukane odoko tar ma wil, matar dok twatwal; pe tye lalwok boŋo mo i wi lobo ma twero lwoko lony matar ma rom meno. Ci Elia ki Moses gucako nen botgi, gubedo ka lok ki Yecu. Petero ocako penyo Yecu ni, “Lapwony, bedo kany ber mada; wek doŋ wager aduc adek, acel meri, acel pa Moses, ki acel pa Elia.” Onoŋo Petero pe doŋ ŋeyo kit gin ma myero eloki, pien onoŋo lworo omakogi mada. Pol ocako bino ci tipone oumo komgi woko lipuk, ci dwan owinnye ki i pol, ma wacci, “Man aye Woda ma amaro; wuwinye.” Lupwonnye gucako ŋiyo piny oyotoyot, ci waŋgi pe omedo ki neno dano mo, guneno kom Yecu ma tye kwedgi-ni keken. I kare ma doŋ gitye ka lor piny ki i wi got, Yecu ocikogi ni pe gutit lokke bot dano mo i kom gin ma guneno, nio waŋ ma Wod pa dano ocer ki i kin jo muto. Lupwonnye gumako lok meno, gubedo ka penye kekengi ni, “Cer ki i kin jo muto kono te lokke aŋo?” Gucako penyo Yecu ni, “Piŋo lupwony-cik guwacci, Elia aye koŋ kwoŋo bino?” Yecu otito botgi ni, “Adada Elia aye myero okwoŋ bino, ka wek ocaka dwoko jami ducu obed kakare. Ento lok man dok gicoyo i kom Wod pa dano piŋo kaa, ni, myero en koŋ olim can madwoŋ, ka dok ni, gibicaye matek? Ento doŋ atito botwu atir ni Elia doŋ otyeko bino wa con, ci gutyeko timo gin ma gimito i kome, macalo yam gicoyo i kome.” Ka gubino piny bot lupwonnye mukene, ci guneno lwak mapol gurumogi dyere, kun lupwony-cik gitye ka pyem kwedgi. Ka lwak guneno Yecu, guuro en mada, gutwarre oyotoyot guriŋo ka mote. Yecu openyogi ni, “Wubedo ka pyem kwedgi pi lok aŋo?” Ci dano mo acel ki i kin lwak ogamo doge ni “Lapwony, wayi onoŋo akelo woda boti. En tye ki cen marac ma pe loko, ka tekke cen omako i kabedo mo, ci tugi retone woko piny likuŋ, ci bwoyo yenyo i doge, cako kayo lake-gu matek, kun poyo kome lirikrik. Apenyo lupwonnyeni ni guryem woko, ci ryemone oloyogi.” Yecu ocako gamo ni, “Wun yalwak ma niyewu lam, abibedo kwedwu nio wa awene? Dok abidiyo cwinya i komwu nio wa awene ba? Wukel en bota kany.” Gukele bot Yecu. Ka cen marac-ci onene, ci oyeŋo kom awobi-nu, orete woko piny; ocako ŋenne i ŋom ma kun bwoyo yenyo i doge-gu. Yecu openyo wonne ni, “Two man obedo ka timme kit man pi lwak kare ma rom mene?” Wonne ogamo ni, “Nia wa ka tinone. Otemo neke woko tyen mapol; kine mogo rete i mac kadi wa i pii-gu. Ka ce itwero timo iye gin mo, ci tim ber, ikonywa do.” Yecu ogamo doge ni, “Ka ce atwero? Gin ducu twerre ki bot dano ma ye Lubaŋa.” Won latin ogamo doge oyotoyot kun daŋŋe matek ni, “Aye; kony niyena ma lam-mi.” Ka Yecu oneno lwak giriŋo gibino bote, ogerre i wi cen marac, kun wacce ni, “In cen ma pe loko-ni, ma iti odiŋ-ŋi, aciki ni, a woko ki i kom awobi-nu, pe dok idwog i kome matwal.” En okok, ci ocako ryene aryeya ki tek, ka oa woko i kome. Awobi-nu koŋ obedo macalo dano muto, omiyo jo mapol doggi ocer ni, “En doŋ oto woko ada.” Ento Yecu omako ciŋe, oile kwede malo, ci en ocuŋ. Ka Yecu odonyo i ot, ka ma gubedo iye kengi, ci lupwonnyene gupenye ni, “Gin aŋo mugeŋowa ryemone?” En owaco botgi ni, “Kit cen macalo man pe ryemme pi gin mo, ento ki lega keken.” Gua woko ki kunnu, guŋolo ki i Galilaya. Yecu pe omito ni dano mo oŋe pire, pien onoŋo en tye ka pwonyo lupwonnyene kun waccigi ni, “Wod pa dano gibimiye i ciŋ dano; gibineke woko, ci en bicer woko i ŋe nino adek.” Ento gin pe guniaŋ kit lokke-nu, dok gulworo penye. Gibino i Kapernaum. Ka gitye i ot, Yecu ocako penyogi ni, “Wubedo ka laro lok aŋo i waŋayo kekenwu-ni?” Gin guliŋ aliŋa, pien gubedo ka laro lok kekengi i waŋayo ni, “Aŋa ma ladit i kingi?” Yecu ka obedo piny ci olwoŋo jone apar wiye aryo, ocako waccigi ni, “Ka dano mo mito bedo mukwoŋo, myero en aye odoŋ cen i ŋe luwote ducu, en aye obed latic megi ducu.” Okwanyo latin mo, ci omiyo ocuŋ i kingi, ka otiŋo i kore ci okwako, ocako waco botgi ni, “Dano mo ma ojolo latin acel macalo man pi nyiŋa, meno rom ki ma ojolo an; ka dok dano ma ojolo an, meno rom ki ma ojolo ŋat muora-ni.” Jon owaco bot Yecu ni, “Lapwony, waneno ŋatti mo ka tye ka ryemo cen ki nyiŋi, ma en pe nywako wot kwedwa, ci wajuke woko.” Ento Yecu ogamo ni, “Pe wujuke; pien pe tye dano mo ma tiyo tic matek ki nyiŋa, ma twero waco lok mo marac i koma oyot. Pien ŋat ma pe lakworwa, en aye lawotwa. Adada awacciwu ni, dano mo ma bimiyowu pii me amata i kikopo, pien wun jo pa Kricito, limo motte pe biloyo en kadi matidi mo. “Ka dano mo miyo ŋat mo acel ma i kin jo magi matino ma guye an-ni gupoto i bal, ci bedo ber makato ducu ka gitweyo kidi rego madit i ŋute ci gibole kwede wa i nam. Ka ce ciŋi aye omiyo ipoto i bal, ci toŋ iŋun woko, twara ma idonyo i kwo ma ciŋi lakucel peke, ber makato ma giboli i Geena ma itye ki ciŋi aryo ducu, kun idonyo kwedgi i mac ma pe to, [ ka ma kwidi ma camogi pe to, ki macce bene pe to.] Ka ce tyeni aye omiyo ipoto i bal, ci toŋ woko, twara idonyo i kwo ma tyeni lakucel peke, ber makato ma kono giboli ki tyeni aryo i Geena, [ ka ma kwidi ma camogi pe to, ki macce bene pe to.] Ka ce waŋi aye omiyo ipoto i bal, ci kol woko; twara ma idonyo i ker pa Lubaŋa ma waŋi lakucel, kato ma kono giboli ki waŋi aryo ducu i Geena, ka ma kwidi ma camogi pe to, ki macce bene pe to. Pien kado ma bilonyo kom dano acel acel en aye mac. Kado ber, ento kado ka odoko bot, ci dok gibiyubo niŋniŋ wek odok mamit? Wubed ki kado i iwu, dok wubed ki kuc kekenwu.” Yecu oa woko ki kunnu, ci obino wa i lobo Judaya ma loka Jordan, ci lwak dok gucokke bote; ocako pwonyogi doki, macalo kit pwonnye tye kwede. Luparicayo mogo gubino bote, ci gucako omo cwinye kun gupenye ni, “Cik miyo twero ni laco oryem dakone woko?” Yecu ocako gamo doggi ma kun penyogi ni, “Moses yam ocikowu niŋniŋ?” Gugamo ni, “Moses yam oye miyo twero ki laco ni myero omi waraga me laryem dakone woko, nyomgi oket woko.” Yecu owaco botgi ni, “Moses omiyowu cik meno pi cwinywu manwaŋ. Ento nia i acakki keto lobo ‘Lubaŋa oketo laco ki dako.’ ‘Pienno dano twero weko wonne ki minne, moko i kom dakone matwal. Ci gin aryo-nu gicako doko kom acel.’ Gin pe dok gibedo kom aryo, doŋ gibedo kom acel keken. Gin ma Lubaŋa oribo kacel dano pe opok kingi.” Ka onoŋo gitye i ot, ci lupwonnyene gupenye i kom lok meno. En owaco botgi ni, “Ka dano mo oryemo dakone woko, ce dok onyomo dako mukene, lanyom meno otimo abor, noŋo obalo i nyim dakone; ki dako bene kit meno, ka ce oa woko ki bot cware dok ogero laco mukene, ci dako-nu otimo abor.” Ka lwak gukelo litinogi bot Yecu ni wek en oboŋ komgi, ci lupwonnyene gujukogi. Ka Yecu oneno ci cwinye ocwer matek, ocako wacogi ni, “Wuwek litino gubin bota, pe wugeŋgi; pien ker pa Lubaŋa tye pi jo macalo gin. Adada awacciwu ni, dano ma pe oye ker pa Lubaŋa macalo latin, pe bidonyo i kerre kadi matidi mo.” Ocako tiŋogi i kore omiyogi gum, kun keto ciŋe i komgi. Ka Yecu oa obino wa i yo, ci dano mo ocako riŋo i kore, ci orumo coŋe i nyime kun penye ni, “Lapwony maber, atim aŋo wek alim kwo ma pe tum?” Yecu owaco ni, “Piŋo ilwoŋa ni aber? Pe tye dano mo maber, Lubaŋa kene aye ber. In iŋeyo cik, ni, ‘Pe ineki, Pe itim abor, Pe ikwal gin mo, Pe ibed caden me goba, Pe ibed, Pe ibum dano mo, Wor woru ki meni.’ ” En ocako gamo ni, “Lapwony, atyeko mako cik magi ducu nia wa i ka tinona.” Yecu ociko waŋe onene ci cwinye omare, owacce ni, “Gin mo acel aye pud orem boti. Koŋ icit icat jamini ducu ma itye kwede ci imi limme ki lucan, ci ibibedo ki lwak lonyo ma gikano piri i polo. Ka doŋ ibin icak lubo kora.” Awobinu ka owinyo Yecu oloko bote kit meno, ci waŋe oballe woko, ocako dok cen ki cwercwiny, pien onoŋo en tye ki lwak limme madwoŋ. Yecu olworo waŋe ci owaco bot lupwonnyene ni, “Bibedo tek mada bot jo ma lulonyo me donyo i ker pa Lubaŋa!” Lupwonnyene guuro lokkenu matek. Yecu dok ocako wacogi ni, “Litino, donyo i ker pa Lubaŋa tek marac! Kinaga twero donyo i waŋ libira oyot, makato lalonyo me donyo i ker pa Lubaŋa!” Ci omiyo lwak guuro matek, ci gupenyo ni, “Ka kumeno, ci aŋa dok ma larre?” Yecu ocako nenogi, ci owacci, “Ki bot dano pe twerre, ento ki bot Lubaŋa twerre, pien gin ducu twerre ki bot Lubaŋa.” Petero ocako wacce ni, “Ce wan kono ma waweko jamiwa ducu, ci walubi-ni?” Yecu owacce ni, “Adada awacciwu ni, pe tye ŋatti mo ma oweko ode, nyo omege, nyo nyimege, nyo minne, nyo wonne, nyo litino, nyo pottine, pira ki pi lok me kwena maber, ma en pe bilimo lwak jami makato meno tyen miya i kare man, gin aye odi, omego, lamego, mego, litino, ki potti, kacel ki libo; ka dok wa i kare me anyim en binoŋo kwo ma pe tum. Lwak jo mapol ma gubedo jo mukwoŋo yo gin aye gibidoŋ cen, ki jo ma gudoŋ cen, gin aye dok bitelo yo.”. I kare ma gicito i yo ma cito Jerucalem, ma kun Yecu aye tye ka telogi yo, guuro matek, dok lupwonnyene gubedo ki lworo. En dok ocako tero lupwonnyene apar wiye aryo, ci otito botgi kit ma bitimme i kome, kun wacci. “Nen ba, wan doŋ watye ka ito malo i yo Jerucalem. Wod pa dano doŋ gibimiye i ciŋ ajwagi madito pa Lubaŋa ki lupwony-cik, gibiŋolle kop me to, ci gibimiye i ciŋ Lurok; giŋale, giŋulo laa i kome dok gibipwode ki del, ci gibineke; ento en bicer woko i ŋe nino adek.” Yakobo ki Jon gin litino pa Jebedayo, gubino i nyim Yecu, ci guwacce ni, “Lapwony, wamito in itim ki wan gin ma walegi pire-ni.” En ocako penyogi ni, “Wun wumito ni atimmiwu kit gin aŋo?” Gugamo, ni, “Ye wek ŋat acel obed i kom badi tuŋ lacuc ki acel bene obed i kom badi tuŋ lacam i kare me deyoni.” Yecu owaco botgi ni, “Wun pe wuŋeyo gin ma wulego. Wun wutwero mato ki kikopo ma abimato kwede-ni; nyo wutwero limo batija kit ma gibatija kwede an-ni?” Gugamo ni, “Watwero.” Yecu dok owaco botgi ni, “Kikopo ma an abimato kwede-ni, wun bene wubimato kwede, ki kit batija ma an abibatija kwede-ni, wun bene gibibatijawu kwede; ento lok me bedo i kom bada ma lacuc nyo me lacam pe an aye apoko. Meno bibedo pa jo ma yam doŋ giyubo pigi wa con.” Ka jo mukene apar-ri guwinyo lokke, ci cwinygi ocako cwer i kom Yakobo ki Jon. Yecu ocako lwoŋogi bote, ci owaco botgi ni, “Wun wuŋeyo ni, jo ma gilwoŋogi ni gin lulo Lurok giloyo dano ki tek, dok luditogi bene gibedo ki twero i komgi. Pe myero wun wubed kit meno; ento ŋat ma mito bedo ladit i kinwu en aye myero obed laticwu,. ki ŋati ma mito bedo mukwoŋo i kinwu, en aye myero obed opiiwu ducu. Kadi wa Wod pa dano bene pe obino ni gutine, ento en aye eti ki dano; en obino pi miyo kwone me lakok lwak dano mapol.” Ka gubino i Jeriko, ci i kare ma en doŋ obea woko ki i Jeriko, kacel ki lupwonnyene ki lwak madwoŋ, ci latowaŋ ma nyiŋe Bartimayo, wod pa Timayo, onoŋo obedo piny i ŋet yo. Ka owinyo ni meno aye Yecu me Najaret, ocako daŋŋe ni, “Yecu Lakwar Daudi, timma kica ba!” Lwak gujuke matek ni oliŋ, ento en omedde ameda ki daŋŋe ni, “Lakwar Daudi, timma kica ba!” Ka Yecu ocuŋ, ci owacci, “Wulwoŋe obin.” Gucako lwoŋo lawaŋe-oto ni, “Doŋ idi cwinyi, a malo, olwoŋi.” En otugi bolo ginarukane woko, ci oa malo, obino bot Yecu. Yecu ocako penye ni, “Imito atimmi gin aŋo?” Ci latowaŋ ogamo ni, “Lapwony, amito waŋa onen piny do.” Yecu ocako wacce ni “Doŋ iciti, niyeni ocaŋi.” Ocako neno piny cut, ci olubo kor Yecu kun woto kwede i yo. I kare ma doŋ gicok o i Jerucalem, ki tuŋ Betepage ki Betania, i kor got Jeituni, ci Yecu ocako oro jo aryo ki i kin lupwonnyene, ocikogi ni, “Wucit i gaŋ ma tye i nyimwu. Ka ce wudonyo iye, ci wutugi noŋo latin kana ma gitweyo, ma ŋatti peya oito i wiye; ci wugony, wek wukel. Ka ce dano mo openyowu ni, ‘Wugonyo woko piŋo kaa?’ wudokke iye ni, ‘Rwot aye mito; ci bicwalo dwoko woko kany oyotoyot.’ ” Gucako cito, gunoŋo gitweyo latin kana i doggola woko ki i ŋet yo, ci gugonyo. Jo mogo ma gucuŋ kunnu gupenyogi ni, “Wubetimo gin aŋo, ma wugonyo ki latin kana-ni?” Gudok iye kit ma Yecu ocikogi kwede, ci guye ni gucit kwede. Ci gukelo latin kana bot Yecu, gucako peto boŋŋigi i kome, ocako bedo i wiye. Jo mapol gupeto boŋŋigi i dye yo, ki jo mogo gupeto jaŋ yadi ma potgi oluk ma gu jako ki i potti. Ci jo ma gutelo yo ki jo ma gilubo kore gidaŋŋe ni, “Ojana! Lubaŋa omi gum i kom dano ma bino i nyiŋ Rwot! Lubaŋa omi gum i kom ker pa kwarowa Daudi ma obebino-ni! Ojana malo i wi polo!” Yecu ocako donyo i Jerucalem ki i ot pa Lubaŋa bene, oŋiyo kit jami-gu ducu, ka odok i Betania kacel ki jone apar wiye aryo, pien onoŋo piny doŋ oyuto woko. Orwone dok gua ki i Betania, ma kun kec neke. Ka oneno yat oduro ki cen ma pote oluk, ci ocito ka nenone ni gwok nyo enoŋ iye mucekke. Ka oo i te yat, ci pe onoŋo iye gin mo, onoŋo pote keken, pien onoŋo peya kare me cekke. Lupwonnyene guwinyo ka en wacci, “Ŋat mo pe ocam nyigi matwal.” Ka gubino i Jerucalem, ci Yecu odonyo i ot pa Lubaŋa, ocako ryemo lucat-wil ki luwil jami i ot pa Lubaŋa. Ci oryebo meja pa lulok cente, ki kom pa lucat amam; pe onoŋo dok ye ni dano mo oŋol i ot pa Lubaŋa ki yec mo. Ka dok ocako pwonyogi kun loko ni, “Pe yam gicoyo ni, ‘Oda gibilwoŋo ni ot me lega pa rok ducu’? Ento wun wuloko odoko boro pa luyak.” Ajwagi madito pa Lubaŋa ki lupwony-cik gubedo ka winyo lokke, ci gucako yenyo kit yo mo me neke woko; pien gin gitye ka lworo en. Pien onoŋo lwak ducu gitye ka uro kit pwonnye. Ka piny oyuto, ci ocako a woko ki i Jerucalem. Odiko ka gitye ka wot i yo meno, guneno oduro otal nia wa i lwite. Petero ocako po pire, ci owacci, “Lapwony, nen yat oduro ma iceno-ni otal woko.” Yecu ogamo ni, “Wuye Lubaŋa. Adada awacciwu ni, dano ma biwaco ki got man ni, ‘Mukke wek itiŋŋe ipot wa i nam,’ ma kun pe kalo akala i cwinye, ento noŋo oye ni gin ducu ma elego-ni bitimme, ci bitimme ada. Pi lok man mumiyo awacciwu ni, gin ducu ma wupenyo ci wulego Lubaŋa pire, ber wuye ni doŋ wulimo ci wubinoŋone ada. Ka ce wutye ka lega i nyim Lubaŋa, ka onoŋo wutye ki kop mo i kom dano mo, ci wutimme kica, ka wek Wonwu ma tye i polo bene otimwu kica i kom balwu. [ Ento ka pe wutimo ki dano kica, ci Wonwu ma tye i polo pe bitimowu kica i kom bal mewu.”] Gin dok gudwogo i Jerucalem. Ka onoŋo en tye ka wot i ot pa Lubaŋa ci ajwagi madito pa Lubaŋa ki lupwonycik ki ludoŋo gubino bote. Gupenye ni, “Twer mene mumiyo itimo lok macalo man? Dok aŋa mumiyi twero meno?” Yecu ogamo doggi ni, “An koŋ apenyowu ki peny mo acel; wek wun bene wudokka iye, ka an abititowu kit twero mumiyo atiyo lok man. Batija pa Jon twerone oa ki bot Lubaŋa nyo oa ki bot dano? Wun wudokka iye.” Gucako bedo ki pyem i kingi kekengi, kun gipyem ni, “Ka koni wawacci, ‘Twerone oa ki bot Lubaŋa’, ci en dok bipenyowa ni, ‘Ci piŋo pe wuye lokke?’ Ka dok wawacci twerone oa ki bot dano kono?” Ento gin gulworo lwak, pien lwak ducu giŋeyo maber ni, Jon aye lanebi atika. Guwaco bot Yecu ni, “Wan pe waŋeyo.” Yecu bene owacogi ni, “An bene pe abitito botwu kit twero mumiyo atiyo man.” Yecu ocako lok kwedgi i carolok ni, “Yam tye dano mo ma opito olok i potone, ci orumo woko ducu ki cel, ka okwinyo bur me biyo pige, ci ogero iye lubele, oweko i ciŋ lupur, ci ocito woko wa i lobo mukene. Ka kare oromo, ci ocako cwalo laticce bot lupur ka omo nyige mucekke i potone. Lupur gumake, ci gupwode, ka guryeme kwede woko, omedo ki dok ki ciŋe nono. En dok ocwalo laticce mukene; gin gugoyo en bene, gugoyo wiye lero, gutime ki tim me lewic. Ka dok omedde oro dano mukene, ci guneko dano meno woko. Gubedo ka keto can i kom jo mapol; jo mukene gupwodogi apwoda, ki mukene gunekogi aneka. Pud onoŋo en odoŋ ki dano mo acel bote, en aye wode ma en maro-ni. Lacen en ocwalo wode kikome botgi, kun wacci, ‘Gibiworo woda.’ Lupur gucako lok kekengi ni, ‘Man aye doŋ lale lim; wubin waneke woko, wek lim ma en bileyo-nu obed mewa.’ Ci gumake, guneke woko, gubole woko wa i ŋe poto olok. Ci won poto olok bitimogi niŋniŋ? En bibino, ci neko lupur woko ducu, ci miyo poto olok woko bot jo mukene. Yam pe wukwano lok ma gicoyo i ginacoya ni, ‘Got ma lugedo gukwero-ni en aye odoko got madit ma i twok ot; man Rwot aye ma otiyo, obedo botwa lok me aura’?” Gutemo pi make, ento gulworo lwak, pien guniaŋ atir ni obolo carolok meno i komgi. Ci gua gucito gigi woko. Gin gucako oro Luparicayo ki jo pa Kerode bene, wek gumak lok ma a i doge. Ka gin gubino bote, ci gucako wacce ni, “Lapwony, wan waŋeyo ni in i dano ma itye ki ada, dok pe ito i kom ŋatti mo, pien in pe ineno kom dano ki woko, in ipwonyo yo pa Lubaŋa ki ada. Ci myero gicul mucoro bot Cecar nyo pe? Wacul nyo pe wacul?” Yecu oŋeyo bwolagi, ocako waco ni, “Wun mono wubwola piŋo kaa? Koŋ wucikella kom lim ma giculo kwede, anen.” Gin gucako kelone bote, ci en openyogi ni, “Cal ki coc ma gicoyo i kome-ni pa aŋa?” Ci gugamo ni, “Pa Cecar yo.” Yecu ocako wacogi ni, “Wudwok jami pa Cecar bot Cecar, ki jami pa Lubaŋa wudwok bot Lubaŋa.” Gin gucako urone matek. Lucadukayo gucako bino bot Yecu; gin aye jo ma giwacci cer pa jo muto pe tye kulu. Gucako penyo peny ni, “Lapwony, Moses yam ocoyo ni, ka laco mo oto woko, ce oweko dakone, ma kun pe obwoto latin mo, ci myero ominne olak dakone, wek onywal kwede litino ka wi ominne. Ci yam onoŋo tye co abiro ma gin ducu omego. Ka laco mukwoŋo nyomo dako-nu oto woko ma pe obwoto latin mo, ci me aryo ocako lako dako-nu, en bene oto woko ma pe obwoto latin mo; ki dano me adekke bene kumeno; ci gin ducu abiro pe gubwoto latin mo. Lacenne en dako bene oto woko. I kare me cer ki i kin jo muto, dako-nu doŋ bibedo dako pa aŋa? Pien gin co abiro-ni ducu gubedo kwede.” Yecu ocako wacogi ni, “Wun wurwenyo pi lok man, pien wukwiya ginacoya, wa tek pa Lubaŋa bene wukwiya. Ka ce dano gibicer woko ki i kin jo muto, ci doŋ pe gibinyomme, doŋ gibibedo macalo lumalaika ma i polo. Ento i kom lok man me cer ki i kin jo muto-ni, wun pe mukwano i buk pa Moses, ka ma ocoyo lok i kom caka, ki kit ma Lubaŋa yam oloko kwede ni, ‘An Lubaŋa pa Abraim, ki Lubaŋa pa Icaka, ki Lubaŋa pa Yakobo’? En pe Lubaŋa pa jo muto ento en Lubaŋa pa jo makwo; wun wuŋak wurwenyo woko marac.” Ka lapwony-cik mo obino cok, ci obedo ka winyo ka gilaro lok. Ka oneno kit ma Yecu dok iye ki gin lok maber ma atir, ocako penyo Yecu ni, “Cik mene maditte mukwoŋo ki i kom lwak cik ducu?” Yecu ogamo ni, “Cik mukwoŋo en ene, ‘Wuwiny wun jo Icrael, Rwot Lubaŋawa en Rwot acel. Ci mar Rwot Lubaŋani ki cwinyi ducu, ki tiponi ducu, ki tammi ducu ki tekki ducu.’ Ki me aryone en ene ni, ‘Mar lawoti macalo imarre keni.’ Pe dok tye kit cik mo ma pire tek makato cik magi aryo-ni.” Lapwony-cik ogamo ni, “Iloko kakare, Lapwony; iloko atir ni, Lubaŋa tye acel, pe dok tye Lubaŋa mo mukene, kono en kene. Dok ni gimare ki cwiny ducu, ki ryeko ducu, ki tek ducu, ki maro lawoti macalo imarre keni, cik magi aye pigi tek makato gitum ma giwaŋo ducu ki berre ki gitum mukene ducu.” Ka Yecu oneno ni odok iye maber ki ryeko, ocako dok wacce ni, “In pe ibor ki ker pa Lubaŋa.” Lacen pe dok tye ŋat mo ma odiyo cwinye ka penye ki lok mo. Ka Yecu onoŋo tye ka pwony i ot pa Lubaŋa, ci openyo ni, “Lupwony-cik mono giwacci Kricito lakwar Daudi piŋo? Ki tuŋ bot Daudi kikome en dok oloko i tek pa Cwiny Maleŋ ni, ‘Rwot owaco bot Rwoda ni, Bed i kom bada ma lacuc, i kabedo me deyo, nio ka abiketo lukworri piny i te tyeni.’ Ka ce en Daudi aye yam olwoŋe ni Rwot, ci en dok bedo lakwarre niŋiŋ?” Lwak mapol guwinyo lokke ki yomcwiny madwoŋ mada. I kare ma Yecu tye ka pwonyo dano, owacci, “Wugwokke i kom lupwony-cik ma gimaro wot ma guruko boŋŋi maboco-ni, dok gimito dano gubed ka motogi wa i cuk-gu, dok gimaro bedo i kom pa ludito ka gitye i kacokke, dok gimaro bedo i kabedo me deyo i karama. Gin gimayo odi pa mon-to, dok gibedo ka lego lega maboco me buta keken. Gibiŋologi kop madit makato ducu.” Yecu obedo i ot pa Lubaŋa ka ma okemme ki canduk me coko lim, ci obedo ka neno kit ma lwak gibolo ki motgi i canduk lim; lwak lulonyo gubolo iye mapol. Ento dato ma lacan obino ci obolo iye cente aryo, ma rom ki cente abic me kare-ni. Ocako lwoŋo lupwonnyene bote, ci owacogi ni, “Adada awacciwu ni, dato man ma lacan-ni en aye dok obolo lim madwoŋ makato jo ducu; pien jo mapol gugito but limgi madwoŋ-ŋi aye gubolo, ento en i canne-ni, obolo limme ducu ma en tye kwede ma onoŋo konyo kwone.” Ka Yecu okato woko ki i ot pa Lubaŋa; ci ŋat acel mo ki i kin lupwonnyene owacce ni, “Lapwony, nen kit ma godi magi dito kwede ki kit ma gedone beco kwede!” Yecu ogamo ni, “Wuneno gedo magi madito twatwal-li? Godi ducu gibimukogi gireto woko piny, pe gibiweko got acel mo kany ma ododde i wi wadi.” Yecu ka obedo piny i wi got Jeituni, kun otikke ki ot pa Lubaŋa, ci Petero ki Yakobo ki Jon ki Anderiya gucako penye i muŋ ni, “Tit botwa, lok man bitimme wa awene, dok kit gin aŋo ma binyuto ni lok meno doŋ cok cobbe kakare?” Yecu ocako wacogi ni, “Wugwokke, ŋatti mo owek rwenyowu. Pien jo mapol gibibino ki nyiŋa, ma giwacci, ‘An aye a en!’ ci gibimiyo jo mapol girwenyo woko. Dok ka wubiwinyo pi mony, ki lok ma yweko pi mony, pe tipo komwu oto woko lirut; myero koŋ meno otimme, ento noŋo nino me agik pud peke. Pien rok bilweny ki rok wadi, ki ker bene bilweny ki ker wadi, ki oyeŋyeŋ biyeŋo lobo i kabedo mapol, ki kec bene bipoto; meno gin aye acakki me te can ma bipoto i lobo. “Ento wun aye myero wugwokke kenwu; pien gibiterowu i lukiko, dok gibigoyowu i kacokke-gu. Wubicuŋ i nyim luloc ki luker-gu pira, wubitito lok ma bedo caden botgi. Myero koŋ gikwoŋ tito lok me kwena maber bot rok ducu. Ento ka giterowu i lukiko wek giŋol kop i komwu, pe wubed ka tamo kit lok aŋo ma wubilokone, ento wulok ma gibimiyowu i cawa meno; pien pe wun aye wubilok, ento Cwiny Maleŋ aye bilok. Omego en aye bimiyo omegine i to, ki wego bimiyo litinogi i to, litino bitubbe i kom lunyodogi, miyo gineko lunyodogi woko. Jo ducu gibikwerowu pi nyiŋa; ento ŋat ma diyo cwinye nio wa i agik, en aye bilarre. “Ka wuneno gikelo gin mo me kwer, malik, giketo i kabedo ma myero pe giket iye (wek dano ma kwano oniaŋ) ci jo ma i Judaya myero guriŋ woko wa i godi; dano ma onoŋo tye i wi ot pe dok olor piny, pe bene odony i ot ka kwanyo iye gin mo, ki dano ma tye wa i poto pe odok cen paco ka omo ginarukane. Dok mon ma giyac gibineno can i kare meno, ki mon ma gidoto litino bene! Wuleg wek pe obin otimme i cwir. Pien i kare meno bibedo iye twon can madit atika ma yam peya onen i lobo, nia wa i acakki lobo ma Lubaŋa oketo-ni, nio kwede wa onyoo, dok bene pe binen. Kono nene Rwot pe ojwiko nino-nu obedo manok mo, kono dano mo pe obwot; ento pi jo ma giyero, ma en oyerogi, omiyo en ojwiko wel nino obedo manok. “I kare meno ka ce dano mo owacciwu ni, ‘Nen, Kricito ma Lubaŋa oyero tye kany’, nyo ni, ‘Nen en tye kuca’, pe wuye. Kricito ma lugoba kacel ki lunebi-gu ma lugoba gibibino, gibinyutowu lanyut ki tiyo jami taŋo, wek girweny jo mapol ka gitwero, wek girweny wa ki jo ma giyero bene. Ento wun aye wugwokke, doŋ atyeko titowu gin ma bibedo i anyim con. “Ento i kare meno ki i ŋe can madit-ti, bibedo kit macalo yam gicoyo ni. ‘Ceŋ bicido woko macol licuc, ki dwe bene pe biryeny; lakalatwe bia ki i polo, gipoto piny ki twer ducu ma i polo bene biyeŋŋe.’ Ka doŋ gibineno Wod pa dano ka bino ki pol, ki twero madwoŋ, ki deyo. Ci en bioro lumalaikane ka coko jone ma en oyero, kun gicokogi ki i twok piny aŋwen ducu, nia kwede wa i agikki lobo nio kwede wa i agikki polo. “Wupwony carolok i kom yat oduro. Ka ce jaŋe doŋ olot, ci pote luk, ci doŋ wuŋeyo ni oro doŋ cok. Ki wun bene ka ce wuneno gin magi gutimme, ci wuŋe ni en doŋ cok, tye wa i doggola. Adada awacciwu ni, yalwak me kare man pe gibitum, nio waŋ ma lok magi ducu bitimme. Polo ki lobo gibitum ento lokka pe bitum. “Ento nino meno ki cawa meno pe tye ŋat mo ma ŋeyo, kadi wa lumalaika ma i polo, kadi wa Wod, ento Lubaŋa Won kene aye ŋeyo gire. Wugwokke, waŋwu obed twolo ma nen, pien wun pe wuŋeyo nino ma kare biromo iye. Bedo rom ki dano ma ocito welo. Ka yam a weko gaŋŋe, ci omiyo twero bot luticce, kun miyo ŋat acel acel ki ticce, kun ociko lagwok doggola ni obed ka kiyo piny. Mumiyo wun wubed ka kiyo piny, pien pe wuŋeyo kare ma won ot bidwogo kwede; gwok dwog wi otyeno, nyo cwiny dyewor, nyo okogweno, nyo odiko. Wugwokke, ka ce obino oyotoyot pe onoŋwu wunino woko. Lok ma awaco botwu-ni, awaco bot dano ducu ni, Wuki piny.” Nino madito me Kato (Paska) ki me Mugati ma Tobi Pe Iye onoŋo odoŋ nino aryo, ajwagi madito pa Lubaŋa ki lupwony-cik guporo lok me mako Yecu ki ryeko ka wek gineke. Pien onoŋo guloko ni, “Pe gimak i nino madito, miyo lwak bitugge.” I kare ma Yecu tye i ot pa Cimon ladobo, i kare ma obedo ka cam, dako mo obino ma kun tye ki adomo moo nard kikome ma welle dwoŋ-ŋi; ocako turo dog adomo moone, ci oonyo i wiye. Ento cwiny jo mogo ocwer, ci gucako lok kekengi ni, “Piŋo moo man gibalo abala? Pien moo man kono nene gicato woko, kono nene okelo lim ma romo ciliŋ miya adek kulu ki makato bene, ka wek gimi ki lucan.” Ci gucako tugge i kom dako-nu matek. Yecu ocako waco ni, “Wuweke obed mot, wuyelo piŋo? En otiyo gin maber twatwal i koma. Pien wun wutye kacel ki lucan kare ducu, dok wutwero konyogi i kare ducu ma wumito; ento an pe abibedo kwedwu kare ducu. En otiyo gin ma en twero; dok en aye okwoŋo onyo moo i koma me yika. Adada awacciwu ni, i kabedo ducu ma i wi lobo ma gibitito iye lok me kwena maber, gin ma dako-ni otiyo bene gibitito pire, wek obed me po en.” Juda Lakeriot, ma en dano acel ma i kin jo apar wiye aryo-ni, ocito bot ajwagi madito pa Lubaŋa pi miyo Yecu i ciŋgi. Ka guwinyo lokke oyomo cwinygi, gucako cikke me miye lim; ki en bene ocako yenyo kare maber ma eromo miyo ki Yecu i ciŋgi. I kom nino mukwoŋo me nino madito me Mugati ma Tobi Pe iye, ma gitumo iye latin romo me Kato, lupwonnye gupenye ni, “Imito waciyubbi kabedo mene wek icam iye Kato?” En ooro lupwonnyene aryo ki i kingi kun cikogi ni, “Wucit wa i Jerucalem; ci wubirwatte iye ki laco mo ma oyeyo agulu pii, en aye wulub kore. Ka ma en odonyo iye-ni, en aye wupeny iye won ot ni, ‘Lapwony owacci, ot welo ma atiro iye tye kwene, ka ma abicamo iye cam me Kato, kacel ki lupwonnyena?’ Ci en binyuto botwu kicika ot ma malone, ma gipeto, giyubo maber, wuyubwa kabedo kunnu.” Lupwonnye gucito, ci gudonyo i Jerucalem, gunoŋo kit macalo en owaco botgi-ni, gucako yubo cam me Kato kunnu. Ka piny doŋ oyuto ci obino ki jone apar wiye aryo. Ka gubedo piny ci gucako camo cam, ci Yecu owacogi ni, “Adada awacciwu ni, ŋat acel i kinwu bidoba, en aye dano ma camo kacel kweda.” Gin gucako kumo cut, kun dano acel acel penye ni, “An bo?” Yecu owacogi ni, “Tye ŋat acel i kinwu wun jo apar wiye aryo-ni, en aye dano ma tye ka gweyo i atabo acel kweda-ni. Pien Wod pa dano tye ka wot kit man pi cobo kit ma gicoyo i kome-ni; ento dano ma odobo Wod pa dano-ni bineno can! Kono nene obedo ber ka dano-nu pe ginywalo.” Ka gitye ka camo cam, Yecu omako mugati; ci olego gum i kome, ocako baro iye, omiyo bot lupwonnye, kun wacci, “Wugam man, man aye koma.” Dok otiŋo kikopo, ci opwoyo, ocako miyone botgi, gin gumato. Yecu owaco botgi ni, “Man aye remona me gicikke ma ocwer pi jo mapol. Adada awacciwu ni, pe dok abimato pig olok, nio wa i kare ma abicako dok matone manyen wa i ker pa Lubaŋa.” Ka doŋ gutyeko wero wer, ci gucito i wi got Jeituni Yecu owaco botgi ni, “Wun ducu wubitenya woko kena, pien yam gicoyo ni, ‘Abigoyo lakwat, ci romi gibiket woko ata.’ Ento lacen ka doŋ acer woko ci abitelo nyimwu me cito i Galilaya.” Petero ogamo ni, “Kadi ka jo mukene ducu gibitenyi woko, ento an pe abitenyi ata.” Yecu owacce ni, “Adada awacci ni, tin ki i dyewor, ma noŋo twon gweno peya onwoyo koko kiryo, noŋo in doŋ ityeko kwera woko tyen adek kulu.” Ento Petero dok ogamo matek twatwal ni, “Twara ma ato kacel kwedi, pe abikweri.” Gin ducu gucako loko kit meno bene. Gucito i kabedo ma nyiŋe Gececemane, ci ociko lupwonnyene ni, “Wun koŋ wubed kany, an koŋ acileg Lubaŋa.” En otero Petero ki Yakobo ki jon, ci cwinye ocako poto matek ki kumo bene madwoŋ. Ocako wacogi ni, “An cwinya tye ka waŋ matek, mito neka woko. Wubed ka kiyo piny kany.” Ocito anyim manok, ci oguŋo oryebbe piny olego ni, “Ka ce twerre, lakit cawa-ni doŋ oa woko i koma.” Ci olego ni, “Abba, Wora, jami ducu twerre ki boti; kwany kikopo man woko ki i koma; ento pe obed kit ma an amito, obed kit ma in imito.” Ka odwogo botgi onoŋo gunino woko, ci owaco bot Petero ni, “Cimon, inino woko ce? Pe itwero kiyo piny pi cawa acel mo? Wuki, wuleg Lubaŋa, wek pe wudony i abita mo; cwiny kikome mito loyo abita pa Catan, ento kom aye nyap.” Dok odok ka lego Lubaŋa, kun nwoyo lego lega acel-lu. Ka dok odwogo onoŋo gunino woko, pien onoŋo nino doŋ omako waŋgi twatwal; pe doŋ giŋeyo gin ma myero gidokke iye. Ka dok odwogo botgi tyen me adekke, openyogi ni, “Wun pud wunino ce? Pud wutye ka yweyo bo? Doŋ otum, ki cawa bene doŋ oromo; wod pa dano doŋ gimiyo woko i ciŋ lubalo. Doŋ wua malo, orya wunu wacitu; nen dano ma odoba doŋ tye cok.” Cutcut ma Yecu pud tye ka lok-ki, Juda otugi tuc; en yam ŋat acel ma i kin jo apar wiye aryo-ni. En obino ki lwak ma gua bot ajwagi madito pa Lubaŋa ki lupwony-cik ki ludoŋo, ma gitye ki pala lucwan ki odoo-gu. Juda ma odobe-ni yam omiyogi lanyut. En owacci, “Dano ma abimoto kun anoto leme, meno aye en kikome; wutugi make woko, wutere kun wugwoke maber.” Ka Juda obino ci okemo bot Yecu atir, ocako mote ni, “Lapwony,” ci onoto leme. Gin bene gutugi poto i kome, gumake woko cut. Dano mo acel ma onoŋo ocuŋ ka ŋete ocako woto pala lucwanne, otoŋo ki opii pa ajwaka madit pa Lubaŋa, oŋuno ite woko. Yecu owaco botgi ni, “Wubino bota ki pala lucwan ki odoo-gu me maka, macalo wubino i kom layak mo? Abedo ka pwony i ot pa Lubaŋa jwijwi, ma kun abedo iye kwedwu, ci pe yam wumaka do. Doŋ wumaka, wek ginacoya ocobbe kakare.” Gin ducu guriŋo woko, guweke odoŋ kene. Awobi mo odwalo cuka boŋo camanini keken i kome, ci olubo ki kor Yecu; gin gumake bene, ento en oweko cukane odoŋ, ci oriŋo woko nono laboŋo mo. Gutero Yecu bot ajwaka madit pa Lubaŋa, kun onoŋo ajwagi madito ki ludoŋo-gu ki lupwony-cik gucokke kacel. Petero obedo ka lubo kor Yecu ki cencen nio kwede wa i dyekal pa ajwaka madit; obedo ka oyo mac kacel ki lutic. Ajwagi madito ki jo ma i Lukiko ducu guyenyo lok me caden ma mako kom Yecu ma miyo gineke; guyenyo kwe pe gunoŋo mo. Lwak lucaden mapol gubedo ka kelo lok goba i kome, ma lokgi ducu pe rwatte. Jo mukene gua malo, ci gukelo lok goba i kome ni, “Wan wawinyo ka en loko ni, ‘An amuko ot pa Lubaŋa-ni woko, ma yam gigero ki ciŋ-ŋi, ci dok agero mukene-ne nino adek keken, ma pe gitiyo ki ciŋ.’ ” Kadi bed gukelo lok goba kit meno, ento lok ma gukelo pe rwatte. Ajwaka madit otirre malo ci ocuŋ i dyere, ocako penyo Yecu ni, “Lwak adot ma lucaden gudoti kwede-ni in igamo niŋniŋ?” Yecu pe ogamo, oliŋ gire aliŋa. Ajwaka madit dok openye ni, “In aye Kricito ma Lubaŋa oyero, Wod pa Lubaŋa ma gipwoyo-ni bo?” Yecu ogamo ni, “An aye a en; dok bene wubineno ka Wod pa dano obedo ki Won Twer atena i wi kom me deyo ka ŋete, tuŋ acucce; ka dok bino ki pol me polo-gu.” Ajwaka madit ocako yeco ginarukane woko kekene, kun wacci, “Pud dok wumito kit caden aŋo kaa? Doŋ wutyeko winyo kit ma en yeto kwede Lubaŋa. Wutamo iye lok aŋo doŋ?” Gin ducu guŋolo lokke ni, balle romme to. Jo mukene gucako ŋulo laa i kome, kun giumo waŋe woko, ka gidoŋe kwede, ma kun giwacci, “In ma lanebi-ni, tuc ba,” ki lutic-gu gupoto i kome kun gipale ki ciŋgi. I kare ma onoŋo Petero tye piny i dyekal, ci aŋeca pa ajwaka madit acel mo obino kenyo. Ka oneno Petero ka oyo mac, ka obolo waŋe i kome ci owacce ni, “In bene onoŋo itye ki dano meno mua ki i Najaret, en Yecu.” Petero ocako kwero woko, ma kun wacci, “An pe aŋeyo, pe bene aniaŋ gin ma ibeloko.” Ka Petero okato woko i doggaŋ, ci twon gweno otugi kok cut. Aŋeca meno dok onene, ci dok ocako tito bot jo ma gucuŋ kunnu ni, “Dano man en bene ŋat acel ma i kingi.” Petero dok ocako kwerone woko aye. Kare dok okato manok mo, jo ma onoŋo gucuŋ kenyo dok guwaco ki Petero ni, “Ada in i ŋat acel ma i kingi, pien in Lagalilaya.” En ocako kwoŋŋe kun lamme kekene ni, “An pe aŋeyo dano man ma wun wuloko pireni.” Dok cutcut twon gweno okok tyen me aryone. Petero ocako po lok ma nene Yecu owacce ni, “Ma noŋo twon gweno peya onwoyo koko kiryo, noŋo in doŋ ityeko kwera woko tyen adek kulu.” Ci ocako koko matek cut. Ka piny doŋ oru, oyotoyot ajwagi madito ki ludoŋo ki lupwony-cik ki jo ma i Lukiko ducu, gupiro lok kacel. Ci gutweyo Yecu woko gutere kwede gumiye bot Pilato. Pilato ocako penye ni, “In i kabaka pa Lujadaya bo?” Yecu ogamo ni, “Iwaco kakare gire.” Ajwagi madito gucako dote ki lwak adot mapol. Pilato dok openye ni, “Pe koŋ idok iye ce? Pe ineno kit lwak lok mapol ma gidoti kwede-ni?” Yecu dok pe omedo ki dok iye lok mo, omiyo Pilato ouro matek. Ka i kare me nino madito onoŋo Pilato gonyo lamabuc mo woko ma dano gulege pire. I kare-nu onoŋo tye laco mo ma nyiŋe Baraba, ma yam gitweyo i mabuc i kin jo mujemo ma guneko dano i kare me jemogi-nu. Lwak gucako cito bot Pilato, gupenye wek otim kit ma yam tiyo-ni. Pilato openyogi ni, “Wumito mono ni agonnyiwu kabaka pa Lujudaya?” Onoŋo Pilato oŋeyo ni ajwagi madito gumiyo Yecu bote pi nyeko. Ajwagi madito gupiyo lwak ni twara gigonnyigi Baraba. Pilato dok openyo lwak ni, “Dano ma wulwoŋo ni kabaka pa Lujudaya-ni doŋ abitimo niŋniŋ?” Lwak gucako wo ni, “Gure woko i kom yatariya.” Pilato dok openyogi ni, “Piŋo kaa, otimo kit gin aŋo marac?” Ento lwak gumedde ki wo ni, “Gure woko i kom yatariya.” Pi mito kweyo cwiny lwak, omiyo Pilato oye gonnyigi Baraba, ocako pwodo Yecu ki del, ka omiye wek gigure woko i kom yatariya. Askari gutero Yecu wa i ot pa kabaka, ma gilwoŋo Praitorion, ci gulwoŋo buca monygi ducu gucokke kacel. Ka gucako ruko Yecu ki boŋo makwar, ka gucweyo lulakana okuto, gurwako i wiye, kun gimote ni, “Itye ba, kabaka pa Lujudaya!” Gucako goyo wiye ki gayi, ka guŋulo laa i kome-gu, kun girumo coŋgi me miye woro. Ka doŋ gutyeko ŋale, ci gulunyo boŋo makwar woko ki i kome, ka dok guruke ki boŋone kikome, ci gutere kwede woko ka gure i kom yatariya. Gucako mako dano mo ma onoŋo obekato mua ki i kin gaŋ ci gudiye ka tiŋo yatariya pa Yecu, nyiŋe Cimon dano me Cirene, ma won Alegijanda ki Rupo. Gutero Yecu i kabedo ma gilwoŋo ni Golgota, ma te lokke ni kabedo me cogo wic. Gucako miye koŋo vino ma girubo iye yat murra; ento en okwero matone woko. Ka doŋ gugure i kom yatariya, ci gupoko boŋŋine woko i kingi, kun gibolo kwir wek ginen boŋŋi ma ŋat acel acel bitero. Giguro Yecu i kom yatariya i cawa adek me odiko. Gicoyo i waraga gin ma nyuto lok ma gidote iye ni, “Kabaka pa Lujudaya.” Gigure kacel ki luyak mogo aryo, dano acel tuŋ lacuc ki acel tuŋ lacam. [ Omiyo ginacoya ocobbe kakare ni, “Gikwane i kin lubalo.”] Jo ma yam gimol gikato ki ka ŋete gubedo ka yete, kun giyeŋo wigi, ma giwacci, “Nye, in ma imuko ot pa Lubaŋa woko, ci igero pi nino adek-ki, doŋ ilarre keni, a woko ki i kom yatariya!” Ki ajwagi madito bene guŋale, ma giloko ki luwotgi kacel ki lupwony-cik-gu, kun giwacci, “Yam bedo ka laro jo mukene, pe twero larre kene. Wek tin Kricito, ma kabaka me Icrael, olor piny ki i kom yatariya, wek wanen ka wacak ye.” Wa jo ma gigurogi kacel kwede bene gucaye. Ka cawa oromo abicel, piny ocido woko macol i lobo ducu, nio kwede wa i cawa aboŋwen. I kom cawa aboŋwen Yecu odaŋŋe ki dwan maloŋo ni, “Eloi, Eloi, lama cabaktani?” ma te lokke ni, “Lubaŋana, Lubaŋana, itenya woko piŋo?” Ka jo ma onoŋo gucuŋ kunnu guwinyo lokke, ci guwacci, “Winyu ka en lwoŋo Elia ca.” Ci dano acel oriŋo, okwanyo amor, oluto i koŋo vino mawacce, orwako i wi tal gayi, omiyo ki Yecu ni omati, kun wacci, “Weku mono koŋ wanen ka Elia bino ka kwanye woko ki i kom yatariya.” Yecu dok odaŋŋe ki dwan maloŋo, ka oto. Ci boŋo kicika ma i ot pa Lubaŋa ocako yec woko opokke dul aryo, oyec ki malo, nio kwede wa i tere piny. Ladit ma loyo askari, ma onoŋo ocuŋ cok i nyime, ka oneno kit ma Yecu oto kwede, owacci, “Adada, dano man onoŋo Wod pa Lubaŋa!” Dok onoŋo tye mon mogo ma gucuŋ ki cen ka nenone; onoŋo tye Maliam Lamagdala, ki Maliam min Yucepu matidine ki Yoce, ki Calume. Gubedo ka lubo kor Yecu ki i Galilaya, gubedo ka konye bene, dok onoŋo tye lwak mon mapol ma gubino kwede wa i Jerucalem. I kom nino me Yubbe, en nino ma i nyim cabit, ka piny doŋ oyuto, Yucepu me Arimataya obino; en yam dano madit ma lamemba me Lukiko ma gipwoyo bene, en kikome obedo ka kuro ker pa Lubaŋa. En odiyo cwinye, ci odonyo wa bot Pilato, olego kom Yecu. Pilato ouro ka doŋ otyeko to woko oyot kumeno; ci olwoŋo ladit ma loyo askari, openye ka ce doŋ oto woko. Ka ladit ma loyo askari otyeko niaŋo en, ci omiyo kom Yecu bot Yucepu. Yucepu owilo boŋo camanini, ci okwanyo kom Yecu woko ki i kom yatariya, oboyo ki boŋo camanini, otero kome opyelo i lyel ma en okwinyo oroko i got, ci ocego wiye woko ki got ma oloro ki dog lyel. Maliam Lamagdala ki min Yoce guneno ka ma giyiko iye kome. Ka cabit doŋ okato, ci Maliam Lamagdala ki Maliam min Yakobo, ki Calume guwilo aŋwece pi wot kwede ka wiro kom Yecu. I kom nino mukwoŋo me cabit mon gupuk odiko con ma ceŋ otuc, ci gucito i wi lyel. Gucako pennye kekengi ni, “Aŋa mono ma bidirowa got woko cen ki i dog lyel?” Ka gutiŋo waŋgi ci guneno got meno doŋ gidiro woko cen; onoŋo gotte dit twatwal. Ka gudonyo i lyel, ci guneno latin orobo mo ma oruko boŋo matar, obedo kwede yo tuŋ acuc; gucako urone mada. En owaco botgi ni, “Pe wubed ka urone; wun wubeyenyo Yecu me Najaret ma giguro i kom yatariya-ni. En doŋ ocer woko, pe doŋ tye kany. Koŋ wunen ka ma gipyelo iye kome. Ento wucit wutit ki lupwonnyene, ki bot Petero bene ni, en doŋ tye ka wot me telo nyimwu wa i Galilaya kuca; wubineno kome kunnu, kit ma yam en otito botwu-ni.” Ci mon gukatti woko ki i lyel, gucako ŋwec ki myelkom pi lworo ma omakogi matek twatwal; lworo ogeŋogi tito lokke ki ŋatti mo. [ Ka en doŋ ocer odiko con i nino mukwoŋo me cabit, okwoŋo nyutte bot Maliam Lamagdala, ma yam en oryemo cen abiro i kome-ni. En otugi tero lok bot jo ma yam gibedo kwede, i kare ma gitye ki cola ki kumu-gu. Ka guwinyo ni en tye gire makwo, dok ni otyeko nyutte, kome onen bot Maliam, pe guye lokke. Lacen Yecu dok onyutte onen bot jo mukene i kit mapatte; onen bot lupwonnye ma onoŋo gicito ka wot i kin gaŋ. Gin dok gucito gutito bot jo mudoŋ-ŋi, gin bene dok pe guye lokgi. Ka lacen dok onyutte onen bot jone apar wiye acel ma onoŋo gitye i dog cam. Ocako da i komgi pi kwero ye lok, ki pi tekcwinygi, pien gukwero ye lok pa jo ma doŋ guneno kome i kare ma ocer-ri. Ka doŋ owaco botgi ni, “Wucit i lobo ducu, wucitit iye lok me kwena maber bot ginaketa ducu. Dano ma oye, ce gibatija en, ci bilarre; ento dano ma okwero ye aye kop biloyo en. Lanyut magi binen ki bot jo ma giye: gibiryemo cen pi lwoŋo nyiŋa, gibiloko ki leb manyen, gibimako wa twol-gu, dok ka gibimato gin ma neko dano, ci pe bitimogi marac; gin bene gibiketo ciŋgi i kom lutwo ci gibicaŋ” Ka Rwot Yecu doŋ otyeko lok kwedgi, ci gitiŋe gitere woko malo i polo, ci ocako bedo piny ka ŋet Lubaŋa atena i kabedo me deyo yo tuŋ acucce. Ci lupwonnye gucito ka tito lok i kabedo ducu, kun Rwot kikome bene tye ka tic kwedgi, kun moko lok ma gitito ki lanyutte.] Jo mapol doŋ gutemo coyo lok i kom gin ma otimme i kinwa, macalo jo ma guneno ki waŋgi nia i acakki, dok ma gudoko lutic me lok meno, gukwaŋo botwa. Pi meno, Ladit Teopilo, ka doŋ aŋiyo gin ducu nia i acakki, an bene atamo ni bedo ber ka acoyo piri, kun aryeyo kikore, wek iniaŋ ada me lok meno ma yam gipwonyi kwede. I kare pa Kerode kabaka me Judaya, onoŋo tye ajwaka pa Lubaŋa mo ma nyiŋe Jekaria, me waŋ tic pa Abia; yam tye ki dakone ma i kin anyira pa Aron, nyiŋe Elicabet. Gin aryo ducu yam kitgi atir i nyim Lubaŋa, kun gilubo cik pa Rwot ducu laboŋo bal. Ento onoŋo gipe ki litino, pien Elicabet yam lalur, gin aryo ducu onoŋo doŋ guti woko. I kare ma Jekaria tye ka tiyo tic me ajwaka i nyim Lubaŋa, i kare me waŋ ticce, macalo kit pa ajwagi tye, kwir okwanye me donyo i ot pa Rwot ka waŋo gitye woko ka lega i cawa me waŋo odok eceta. Lwak dano ducu onoŋo gitye woko ka lega i cawa me waŋo odok eceta Lamalaika pa Rwot onen bote kun ocuŋ yo tuŋ lacuc i ŋet keno tyer me waŋo odok eceta. Ka Jekaria onene, ci cwinye opoto, lworo omake. Ento lamalaika owacce ni, “Pe ilwor, Jekaria, pien legani doŋ Lubaŋa owinyo. Dakoni Elicabet binywalli latin laco, ibicako nyiŋe Jon. Ibibedo ki yomcwiny, cwinyi bikwe, jo mapol cwinygi bibedo yom pi nywalle; pien en bibedo madit i nyim Rwot. En pe bimato koŋo vino kadi gin ma mero dano; en bipoŋ ki Cwiny Maleŋ, nia i i minne. En bidwoko Luicrael mapol bot Rwot Lubaŋagi, en bitelo nyime i cwiny ki tek pa Elia, pi loko cwiny wegi litino i kom litinogi; pi dwoko dano ma pe winyo cik i ryeko pa jo ma kitgi atir, dok me yubo pi Rwot dano ma doŋ guyubbe” Jekaria openyo lamalaika ni, “Abiŋeyo man niŋniŋ? Pien an doŋ ati woko, dakona bene doŋ oti.” Lamalaika ogamo doge ni, “An Gabriel, acuŋ i nyim Lubaŋa; giora ka lok kwedi, akelli kwena man maber. Winy ba, ibiliŋ ma pe itwero lok, nio i nino meno ma lok man bitimme iye, pien pe iye lokka, ma bicobbe ka kare oromo.” Lwak onoŋo gubedo ka kuro Jekaria, guuro rune twatwal i ot pa Lubaŋa. Ka Jekaria okatti woko, onoŋo pe twero lok kwedgi, omiyo guniaŋ ni oneno ginanyuta i ot pa Lubaŋa macalo lek. En obedo ka gwelogi kun pe twero lok. Ka kare me ticce otum, ci odok i pacone. Ka kare okato manok, dakone Elicabet ogamo ic. Okanne kwede pi dwe abic, kun waco ni, “Rwot otimo kit meno i koma, i kare ma onena iye, me kwanyo lewic woko ki i koma i kin dano.” I dwe me abicel Lubaŋa ooro lamalaika Gabriel i gaŋ mo i Galilaya, ma nyiŋe Najaret, bot nyako ma peya oŋeyo laco, ma laco ma nyiŋe Yucepu otoŋo keny i kome; nyako meno nyiŋe Maliam. Lamalaika obino bote, omote ni, “Itye ba, in ma gimiyi gum! Rwot tye kwedi! Ento Maliam cwinye opoto pi lok man, obedo ka tamo te lok me mot man. Lamalaika owacce ni, ‘Pe ilwor, Maliam pien ilimo pwoc ki bot Lubaŋa. Nen, ibiyac, ibinywalo latin laco, ibicako nyiŋe Yecu. En bibedo dit, gibilwoŋe ni, Wod pa En Mamalo Twal; Rwot Lubaŋa bimiye komker pa kwarone Daudi. En biloyo jo me ot pa Yakobo matwal; kerre pe bigik.’ ” Maliam openyo lamalaika ni, “Lok man bibedo niŋniŋ, ma kun an pe aŋene ki laco?” Lamalaika odokke iye ni, “Cwiny Maleŋ bibino i komi, tek pa En Mamalo Twal biumi macalo tipo; pi meno latin ma gibinywalo-ni gibilwoŋe Maleŋ, Wod pa Lubaŋa. Nen, watti Elicabet doŋ oyac i tiyone, binywalo latin laco; en ma yam gilwoŋo ni lalur kombeddi doŋ tye ki ic me dwe abicel. Pien pe tye gin mo ma loyo Lubaŋa.” Maliam owaco ni, “Nen, an aŋeca pa Rwot; wek obed bota kit macalo iwaco.” Lacen lamalaika oa woko ki bote. I kare meno Maliam oa, ocito oyotoyot i lobo ma obedo gotgot i gaŋ mo me Juda. ci odonyo i ot pa Jekaria, omoto Elicabet. Ka Elicabet owinyo mot pa Maliam, ci latin otiŋŋe ki i iye. Elicabet opoŋ ki Cwiny Maleŋ, odaŋŋe ki dwan maloŋo ni, “Itye ki gum i kin mon, latin ma i ii bene tye ki gum! Lok man kono oa ki kwene, lutuwa, min Rwoda me bino bota? Pien nen, ka awinyo dwan me motti, latin ma i iya otiŋŋe ki yomcwiny. Itye ki gum, in ŋat ma oye, pien lok ma Rwot otito boti bicobbe kakare.” Maliam owaco ni, “Kwona pako Rwot, cwinya yom i kom Lubaŋa Lalarra, pien oneno can pa aŋecane. Nen, nia tin yalwak me kare ducu gibilwoŋa ni lagumkom; pien Won Twer Ducu otima gin madit, nyiŋe bene leŋ. Kicane tye bot yalwak me kare ducu, i kom jo ducu ma gilwore. Otiyo tic matek ki bade, olalo luwakke i tam me cwinygi. Oreto luker ki i wi komkergi omiyo dito bot lucan. Jo ma kec nekogi omiyo giyeŋ ki gin maber, oryemo lulonyo gudok cen nono. Okonyo laticce Icrael, opo pi timo kica, macalo oloko bot kwariwa, bot Abraim ki bot likwaye matwal.” Maliam ori bot Elicabet dwe adek, ka lacen odok i pacone. Ka kare me nywal pa Elicabet doŋ oromo, ci onywalo latin laco. Ka luwote ki wadine guwinyo ni Rwot onyuto kicane madwoŋ i kome kuman, cwinygi obedo yom kacel kwede. I nino me aborone gubino ka liro latin. Gumito cako nyiŋe ki nyiŋ wonne Jekaria, ento minne ogamo ni, “Pe kit meno, gibilwoŋe ni Jon.” Gudokke iye ni, “Pe tye ŋat mo ma nyiŋe calo meno i kin wadiwu ducu do.” Gugwelo wonne ni en mito cako nyiŋe aŋa? En openyo pi got coc, ci ocoyo ni, “Nyiŋe Jon.” Gin ducu guuro. Cutcut dog Jekaria oyabbe, te lebe ogonnye, ci oloko kun pako Lubaŋa. Lworo omako dano ducu ma bedo cok i ŋetgi; lok meno ducu oywek i lobo Judaya ducu ma obedo gotgot. Dano ducu ma guwinyo gumako i cwinygi, kun giwaco ni, “Latin man kite bibedo niŋniŋ?” Pien ciŋ Rwot tye kwede. Wonne Jekaria opoŋ ki Cwiny Maleŋ, oloko macalo lanebi ni, “Gipwo Rwot Lubaŋa pa Icrael, pien doŋ olimo jone, okokogi. Otiŋo piwa lalar matek i ot pa laticce Daudi, macalo yam oloko i dog lunebine maleŋ ma gubedo nia con ki con, me larowa ki bot lukworwa, ki i ciŋ jo ducu ma kwerowa; pi timo kica bot kwariwa kun opo pi gicikkene maleŋ ki kwoŋ ma okwoŋo bot kwarowa Abraim,, ni ebimiyowa watiyo bote laboŋo lworo, kun olarowa ki i ciŋ lukworwa, kun waleŋ, dok kitwa atir i nyime pi nino me kwowa ducu. In bene latin, gibilwoŋi lanebi pa En Mamalo Twal pien ibitelo nyim Rwot pi yubo yone, kun imiyo ŋec me lar bot rokke ma bino pi weko balgi, pi kica madwoŋ pa Lubaŋawa ma oweko piny oru piwa ki malo, me menyo jo ma bedo i piny macol ki i tipo me to, ki me tiro tyenwa i yo me kuc.” Latin odoŋo, tek omedde i cwinye, obedo i tim nio i nino ma ginyute iye bot jo Icrael. I kare meno cik oa bot Cecar Augucito ni gico nyiŋ dano ducu ma i wi lobo. Man obedo coc mukwoŋo ma gicoyo, i kare ma Kurenio loyo lobo Ciria. Dano ducu gucito ka cone, ŋat acel acel i gaŋgi. Yucepu bene oa ki i Galilaya, ki i gaŋ me Najaret, ocito i Judaya, i gaŋ pa Daudi ma gilwoŋo Beterekem, pien en yam ŋat acel i kin likwayo pa Daudi, wek econe ki dakone Maliam ma onoŋo otoŋo keny i kome, ma onoŋo oyac. I kare ma gitye kunnu, kare me nywalle oromo. Onywalo latin kayone ma laco, oumo kome ki boŋo, opyele kwede i weer pa dyaŋ, pien onoŋo ot opoŋ woko pigi i ot welo. I lobo kunnu onoŋo tye iye lukwat ma gibedo i tim, kun gigwoko romigi dyewor. Cutcut lamalaika pa Rwot oturo ki bino, ocuŋ i kingi, deyo pa Rwot oryeny orumogi, ci lworo omakogi matek. Lamalaika owaco botgi ni, “Pe wulwor, pien nen, akelliwu lok maber me yomcwiny ma bibedo bot dano ducu. Tin i gaŋ pa Daudi ginywalo piwu lalar, en Kricito Rwot. Man bibedo gin ma nyuto: wubinoŋo latin ma giumo ki boŋo, ma gipyele, obuto i weer pa dyaŋ.” Oyotoyot lwak mony me polo onoŋo tye kacel ki lamalaika meno; ci gipako Lubaŋa kun giwaco ni, “Deyo obed bot Lubaŋa malo i wi polo kuc obed i kin jo ma en pwoyo!” Ka doŋ lamalaika oa woko ki botgi, odok i polo, ci lukwat guloko kekengi ni, “Koŋ wacitu mono wa i Beterekem, wek wacinenu gin man ma otimme, ma Rwot otittiwa pire-ni.” Gucito oyotoyot, gunoŋo Maliam ki Yucepu, ki latin lakere ma gipyelo i weer pa dyaŋ. Ka guneno, gutito bot dano lok ma yam gitito botgi i kom latin meno; dano ducu ma guwinyo guuro lok ma lukwat gutito botgi. Ento Maliam okano lok magi ducu, kun tamo ki i cwinye. Lukwat gudok kun gimiyo deyo bot Lubaŋa, gipake pi gin ducu ma guwinyo, dok guneno, macalo yam gitito botgi. Ka nino aboro doŋ oromo me liro latin, gicako nyiŋe Yecu, nyiŋ ma lamalaika yam ocako ka en pud peya tye i ic. Ka kare doŋ oromo me lonnyegi macalo cik pa Moses tye, ci gutere i Jerucalem wek gityere bot Rwot, macalo gicoyo i cik pa Rwot ni “Litino kayo ducu ma co gibilwoŋogi maleŋ bot Rwot”, dok wek gityer gitum, macalo gicoyo i cik pa Rwot ni, “amam aryo, nyo litino akuri aryo.” Yam tye i Jerucalem dano mo ma nyiŋe Cimeon. En yam dano ma kite atir ma lworo Lubaŋa, kun kuro kare ma gibikweyo iye cwiny jo Icrael; Cwiny Maleŋ onoŋo tye kwede. Cwiny Maleŋ onoŋo otyeko nyuto bote ni, en pe bito ma peya oneno Kricito pa Rwot. En obino i ot pa Lubaŋa kun Cwiny Maleŋ aye tele. Ka lunyodo gukelo latin Yecu wek gitimme macalo kit me cik tye, Cimeon otiŋe i bade, opwoyo Lubaŋa kun waco ni, “Koni doŋ icik laticci, Rwot, ocit ki kuc macalo yam iciko; pien waŋa doŋ oneno larri ma iyubo i nyim rok ducu, me bedo ceŋ ma yabo muŋ bot Lurok, ki deyo pa joni Icrael.” Wonne ki minne guuro lok ma giwaco i kome. Cimeon olego gum i komgi, kun waco bot minne Maliam ni, “Nen, latin man giketo wek Luicrael mapol opoti, wek gua doki ki me bedo lanyut ma giyeto, dok bene pala lucwan bicobo cwinyi pil, wek tam ma i cwiny dano mapol oyabbe ka maleŋ.” Yam tye lanebi mo ma dako, nyiŋe Anna, nya pa Panuel, pa jo Acer. Onoŋo doŋ oti twatwal, pien otyeko mwaka abiro bot cware cakke i kare ma en pud nyako; ka doŋ cware oto ori nio i mwaka pyeraboro wiye aŋwen me ditte. En yam pe a ki i ot pa Lubaŋa, obedo ka woro Lubaŋa kun ri kec dok lego dyewor ki dyeceŋ. En obino i cawa-nu, opwoyo Lubaŋa, otito pi latin-nu bot dano ducu ma yam kuro kare me koko jo Jerucalem. Ka lunyodone doŋ gutyeko cobo lok ducu ma tye i cik pa Rwot, ci gudok i Galilaya, i gaŋgi Najaret. Latin odoŋo odoko matek, kun opoŋ ki ryeko; cwiny Lubaŋa obedo yom i kome. Lunyadone yam gicito i Jerucalem mwaka ki mwaka pi nino madit me Kato. Ka mwaka me ditte oromo apar wiye aryo, ci gucito kunnu macalo kit me nino madit tye. Ka nino madito doŋ otum, ma gidok paco, latin Yecu odoŋ woko i Jerucalem. Lunyodone onoŋo pe giŋeyo, ento gutamo ni en tye i kin lwak. Guwoto wot me nino acel, guyenye i kin lutugi ki i kin luwotgi; ka pe gunoŋe, ci gudok cen i Jerucalem ka yenye. Ka nino adek okato, ci gunoŋe i ot pa Lubaŋa; obedo i kin lupwony, kun winyo pwonygi, dok penyogi. Dano ducu ma yam guwinye guuro niaŋŋe, ki kit ma en dok kwede i peny. Ka lunyodone gunene, guuro; minne openye ni, “Latinna, piŋo itimowa kit man? Nen woru ki an wabedo ka yenyi kun wakumo.” En ogamo doggi ni, “Wuyenya piŋo? Pe wuŋeyo ni myerona me bedo i ot pa Abana?” Ento pe guniaŋ lok ma en oloko botgi. Owoto kacel kwedgi, obino Najaret, obedo kun winyogi; minne okano lok meno ducu i cwinye. Yecu odoŋo kun medde i ryeko, dok kun medde ki noŋo pwoc ki bot Lubaŋa ki bot dano bene. I mwaka me apar wiye abic me loc pa Tiberio Cecar, Pilato onoŋo loyo Judaya, Kerode onoŋo loyo Galilaya, ominne Pilipo kono onoŋo loyo lobo Ituria ki Trakoniti, Lucania onoŋo loyo Abilene, Anac ki Kayapa aye onoŋo gin ajwagi madito pa Lubaŋa. I kare meno lok pa Lubaŋa obino bot Jon wod pa Jekaria i tim. En owoto i lobo ducu ma cokcok ki Judaya kun tito lok me kwenane ni, “Wuŋut, wek gibatijawu, ci Lubaŋa biweko balwu,” macalo gicoyo i buk me lok pa lanebi Icaya ni, “Dwan dano mo ma daŋŋe i tim ni, Wuger yo pa Rwot, wutir yone ocuŋ atir. Luŋ ducu gibitoro woko, godi ki cere ducu gibidwokogi woko piny, ka ma ogonne gibitiro cuŋ atir, dok yo ma obedo burbur gibipiro woko. Dano ducu gibineno kit ma Lubaŋa olarowa kwede.” Jon owaco bot lwak ma gubino bote pi batija ni, “Wun litino ororo, aŋa ma otito botwu ni wuriŋ kiniga ma mito bino? Doŋ wuti gin ma nyuto ni wuŋut i kom balwu, pe dok wucak tamo ni, ‘Watye ki kwarowa Abraim’. Koŋ wunen, awaco botwu ni, Lubaŋa tye ki twero me miyo gweŋ magi olokke odok likwayo Abraim. Kombeddi doŋ giketo latoŋ woko i lwit yadi; yat acel acel ma pe nyak nyige mabeco, gitoŋo gireto woko piny, ci gibolo woko i mac.” Lwak gupenye ni, “Watim aŋo doŋ?” En odok iye botgi ni, “Ŋat ma tye ki kanyi aryo opok bot ŋat ma pe kwede; ŋat ma tye ki cam otim kit meno bene.” Lujog-mucoro bene gubino wek gibatijagi, gupenye ni, “Lapwony, wan kono watim aŋo?” Owaco botgi ni, “Pe wujog makato wel ma gicikowu.” Askari bene gupenye ni, “Wan kono watim aŋo” En owaco botgi ni, “Pe wuyak ŋatti ki tek, pe wudot dano mo ki lok goba, wek mucarawu oromwu.” Ka lwak gitye ka kuro, kun gipennye ki i cwinygi pi Jon, ka kono en Kricito ma Lubaŋa oyero, Jon odok iye botgi ni, “An abatijawu ki pii, ento ŋat ma kata ki tek tye ka bino, ma an pe amyero me gonyo warre. En bibatijawu ki Cwiny Maleŋ, dok ki mac. Oderone tye i ciŋe me pyeto bel ducu ma i larone, en bidilo belle i dero, ento cuŋe en biwaŋo woko ki mac ma pe to.” Jon otito lok me kwena maber bot lwak kun cuko cwinygi ki lok mukene mapol. Ento Kerode rwot madit ma yam Jon ojuko pi Kerodia ci-ominne, otweyo Jon i mabuc, opoŋo kwede wi balle mukene ducu. Ka doŋ obatija dano ducu, ma Yecu bene doŋ gibatija, ma kun en tye ka lega, ci polo oyabbe, Cwiny Maleŋ olyanne piny macalo akuri i cal me kom, ci opye i kome. Ci dwan ocako winnye ma a ki i polo kun wacci, “In aye i Woda ma amaro, ma cwinya yom i komi.” I kare ma Yecu ocako ticce onoŋo doŋ tye ki mwaka ma mito romo pyeradek me ditte. Yam en wod pa Yucepu, macalo gitamo, ma en wod pa Eli, wod pa Matat, wod pa Levi, wod pa Melki, wod pa Janai, wod pa Yucepu, wod pa Matatia, wod pa Amoc, wod pa Nakum, wod pa Eceli, wod pa Naggai, wod pa Maat, wod pa Yocek, wod pa Yoda, wod pa Yoanan, wod pa Reca, wod pa Jerubabel, wod pa Cealtiel, wod pa Neri, wod pa Melki, wod pa Addi, wod pa Kocam, wod pa Elmadam, wod pa Er, wod pa Yecu, wod pa Eliejer, wod pa Yorim, wod pa Matat, wod pa Levi, wod pa Cimeon, wod pa Juda, wod pa Yucepu, wod pa Yonam, wod pa Eliakim, wod pa Melea, wod pa Menna, wod pa Matata, wod pa Natan, wod pa Daudi, wod pa Yece, wod pa Obed, wod pa Boaj, wod pa Cala, wod pa Nakucon, wod pa Aminadab, wod pa Admin, wod pa Arni, wod pa Kejeron, wod pa Perej, wod pa Juda, wod pa Yakobo, wod pa Icaka, wod pa Abraim, wod pa Tera, wod pa Nakor, wod pa Cerug, wod pa Reu, wod pa Peleg, wod pa Eber, wod pa Cela, wod pa Kainan, wod pa Arpakcad, wod pa Cem, wod pa Nua, wod pa Lamek, wod pa Metucela, wod pa Enok, wod pa Jared, wod pa Maalalel, wod pa Kainan, wod pa Enoci, wod pa Ceji, wod pa Adam, wod pa Lubaŋa. Yecu odwogo ki i Jordan kun opoŋ ki Cwiny Maleŋ, cutcut Cwiny Maleŋ otere wa i tim. Ci ori i tim pi nino pyeraŋwen, kun Catan obedo ka bite. Pe ocamo gin mo i kare meno ducu; ka otum, ci kec oneke. Catan owacce ni, “Ka in i Wod pa Lubaŋa, wac ki got man olokke odok kwon.” Ento Yecu odok iye ni, “Yam gicoyo ni, ‘Dano pe bibedo kwo ki kwon keken.’ ” Catan dok otere malo, onyutte ker ducu ma i wi lobo i kine me kare matidi mo, owacce ni, “Abimiyi twer man ducu ki deyo man ducu, pien gityeko miyo bota, atwero miyo bot ŋat ma an amito. Pi meno, ka iwora, ci jami magi ducu bibedo meri.” Yecu odokke iye ni, “Yam gicoyo ni, ‘Wor Rwot Lubaŋani, dok bene iti pire keken.’ ” Dok otere i Jerucalem, ci ocibe ocuŋ i wi labila ot pa Lubaŋa, ci owacce ni, “Ka in i wod pa Lubaŋa, a ki malo kany ipot piny, pien yam bene gicoyo ni, ‘En biciko lumalaikane piri, wek gugwoki,’ dok bene ni, ‘Gibijoli ki ciŋgi, wek pe iyok tyeni i kom got.’ ” Yecu dok ogamo doge owacce ni, “Yam giwaco ni, ‘Pe item i Rwot Lubaŋani.’ ” Ka Catan doŋ otyeko bite, ci oweke kun kuro kare maber. Yecu odwogo i Galilaya pi tek pa Cwiny Maleŋ; pire oywek i lobo ducu ma orumo kunnu. Opwonyo i kacokkegi, dano ducu guketo deyo i kome. Obino i Najaret ka ma yam odoŋo iye, odonyo i kacokke i ceŋ cabit, kit macalo kite onoŋo tye. Oa malo ka kwan; gimiye buk pa lanebi Icaya. Oyabo buk, oyenyo ka ma gicoyo ni. “Cwiny pa Rwot tye i koma, pien doŋ owira woko ki moo wek atit lok me kwena maber bot lucan. Oora me tito bot jo ma tye i opii ni gibigonyogi, ki bot jo ma waŋgi oto ni gibiyabo waŋgi, ki me gonyo jo ma giunogi wek gucit ki kuc, dok pi tito pi mwaka ma Rwot binyuto iye berre bot dano.” Ci odolo buk, odwoko bot latic, obedo piny ka tito lok; dano ducu ma i kacokke guciko waŋgi i kome. Ocako tito botgi ni, “Tin ginacoya man ocobo kakare kun wuwinyo ki itwu.” Dano ducu guloko lok maber i kome, kun giuro lok me kica ma oa ki i doge. Gupenyo ni, “Man pe wod pa Yucepu” En ogamo doggi ni, “Aŋeyo atir ni wubibolo carolok man i koma, ni, ‘Daktar, caŋŋe keni, tic ma yam wawinyo itiyo i Kapernaum, ti kany bene i pacowa kikome.’ ” Dok omedde kwede ni, “Ada awacciwu ni, lanebi mo pe ma gijole i lobo tugi. Ento atito botwu atir ni, i lobo Icrael i kare pa Elia yam tye iye mon mapol ma coggi oto, ka kot okwero cwer pi mwaka adek ki dwe abicel, ci kec laparanat opoto i lobo meno ducu; ento Lubaŋa pe ocwalo Elia bot ŋat mo i kingi, kono bot da to mo ma i Carepat i lobo Cidon. Dok i lobo Icrael i kare pa lanebi Elica onoŋo yam tye iye ludobo mapol; ento pe gilonyo mo i kingi, kono Naaman Laciria keken.” Ka dano ducu ma i kacokke guwinyo lok man, kiniga omakogi matek. Gutwarre malo, gutere woko ki i gaŋ, gukele i wi got ma gigero gaŋgi i wiye wek gicore piny. Ento Yecu opucce woko ki i dyegi, ci ocito gire. Yecu ocito i Kapernaum ma en gaŋ ma i Galilaya. Obedo ka pwonyogi i ceŋ cabit; guuro pwonnye, pien oloko ki twero. I kacokke onoŋo tye iye dano ma tye ki cen marac; odaŋŋe ki dwan maloŋo ni, “Ilaro gin aŋo kwedwa kaa, in Yecu Lanajaret? Doŋ ibino ka tyekowa bo? An aŋeyi, in i Ŋat Maleŋ pa Lubaŋa.” Ento Yecu ojuke kun wacce ni, “Liŋ mot, a woko ki i kome!” Cen orete piny i nyimgi, ci oa woko ki i kome kun pe otime marac. Dano ducu guuro, kun gipenye kekengi ni, “Man lok aŋo? Pien en ciko cen maraco ki twero ki tek, ci gia woko.” Pire oywek i kabedo ducu ma orumo kunnu. Yecu oa okato woko ki i kacokke, odonyo i ot pa Cimon. Maro Cimon onoŋo tye ki two lyeto ma obwoye matek; gubako doggi bote pire. Yecu ocuŋ ka ŋete, ojuko lyeto, ci two ocaŋ woko ki i kome; cutcut oa malo, ocako gwokogi. Ka ceŋ doŋ mito poto, dano ducu ma tye ki lutwo, ma twogi patpat, gukelogi bote. Oketo ciŋe i kom ŋat acel acel ki i kingi ocaŋogi. Cen maraco bene oa ki i kom jo mapol, kun gidaŋŋe ni, “In i Wod pa Lubaŋa!” Ento Yecu ojukogi, pe oye cen mo oloko, pien giŋeye, ni en Kricito ma Lubaŋa oyero. Ka piny oru, Yecu ocito i kabedo mo ma dano pe iye. Ento lwak gubedo ka yenye, ci gubino bote, gutemo juke wek pe oa ki botgi. Ento en owaco botgi ni, “Myero atit lok me kwena maber me ker pa Lubaŋa i gaŋ mukene bene, pien giora pi lok man.” En obedo ka tito lok i kacokke me Judaya. I kare ma gudiyo Yecu cok pi winyo lok pa Lubaŋa, onoŋo ocuŋ i dog nam Genecaret. Onoŋo yeya aryo i dog nam; lumak-rec onoŋo gua woko ki i igi, gitye ka lwoko obwogi. Oito i yeya acel ma onoŋo pa Cimon, olege ni koŋ okwaŋ manok i nam. En obedo piny, opwonyo lwak kun tye i yeya. Ka doŋ otyeko lok, ci owaco bot Cimon ni, “Kwaŋ icit i kut, wubol obwowu wumak rec.” Cimon odokke iye ni, “Ladit, wayelle dyewor benebene, pe wamako gin mo. Ento pi lokki abibolo obwo.” Ka gutimo kit meno, ci gumako lwak rec mapol ata, obwogi ocako cot. Ci gugwelo lutic wadgi ma i yeya mukene ni gubin gukonygi. Gubino guloko rec i yeya aryo ducu gupoŋ woko, omiyo gucako mwony. Ka Cimon Petero oneno, opoto piny i coŋ Yecu, owaco ni, “Rwot, cit giri, iweko, pien an labalo.” Pien en ki dano ducu ma tye kwede guuro pi rec ma gumako. Yakobo ki Jon litino pa Jebedayo, ma gin yam ribbe ki Cimon i dog tic, bene guuro. Yecu owaco bot Cimon ni, “Pe ilwor; cakke koni ibimako dano.” Ka doŋ gukelo yeyagi i wi tera, guweko gipinygi ducu gulube. Ka yam tye i gaŋ mo, dano mo obino ma dobo orwato i kome. Ka oneno Yecu, ci oryebbe piny olege ni, “Ladit, ka imito, itwero lonya.” Yecu oryeyo ciŋe ogudo kome, kun wacce ni, “Amito; komi olony.” Cutcut dobo ocaŋ ki i kome. Yecu ocike ni pe myero otit bot dano mo; ento ni, “Cit, inyutte keni bot ajwaka pa Lubaŋa, imi gityer pi komi ma doŋ ocaŋ-ŋi, kit ma yam Moses ociko, wek obed lanyut botgi.” Ento pire oywek matek makato, lwak mapol ocokke ka winye dok wek ocaŋgi ki i kom twogi. Ento Yecu yam lwitte kare ki kare cito ka lega i tim. I nino mo acel onoŋo Yecu tye ka pwony, kun Luparicayo ki lupwony-cik ma gua ki i kin gaŋi ducu me Galilaya ki Judaya ki Jerucalem gubedo kunnu; tek pa Rwot me caŋo dano onoŋo tye i kome. Cutcut dano gukelo bote lagoro mo ma twoyo two akweya kom, ma obuto i wi kitara. Guyenyo yo me tere i ot wek gikete i nyim Yecu; ento ka pe gunoŋo yo, pi pol pa lwak, guito i wi ot, gucwale ki kitarane ki i kin mategula i dye ot i nyim Yecu. Ka Yecu oneno niyegi, ci owaco ni, “In ba, balli doŋ giweko woko.” Lupwony-cik ki Luparicayo gucako pennye kekengi, kun giwaco ni, “Man aŋa ma loko lok me yeto Lubaŋa-ni? Aŋa ma twero weko bal, kono Lubaŋa keken?” Ka Yecu oniaŋ penygi, ci odok iye botgi ni, “Piŋo wutye ka pennye i cwinywu? Mene ma yot, me waco ni, ‘Balli doŋ giweko,’ nyo ni, ‘A, iwoti’? Ento meno wek muŋe ni Wod pa dano tye ki twero me weko bal i wi lobo” ci ociko lagoro ni, “Awacci ni, A, ikwany kitarani, idok paco.” Cutcut oa malo ocuŋ i nyimgi, okwanyo gin ma onoŋo obuto iye odok paco kun pako Lubaŋa. Dano ducu guuro matek twatwal, gupako Lubaŋa. Lworo omakogi, guwaco ni, “Waneno gin me aura tin.” Ka man otum, ci Yecu okato woko, oneno lajog-mucoro mo ma nyiŋe Levi, kun obedo piny i ka jogo mucoro; ci owacce ni, “Luba.” Levi oweko jamine ducu, oa olubo kore. Levi otedo karama madit i ode pi Yecu, lwak lujog-mucoro mapol ki jo mukene gubedo piny i dog cam kacel kwedgi. Luparicayo ki lupwony-cik guŋur i kom lupwonnyene, kun gipenyo ni, “Piŋo wucamo dok wumato kacel ki lujog-mucoro ki lubalo?” Yecu odok iye botgi ni, “Jo ma komgi yot pe gimito daktar; ento jo ma komgi lit aye mito. An pe abino ka lwoŋo jo ma kitgi atir, ento lubalo, wek guŋuti.” Guwacce ni, “Lupwonnye pa Jon giri kec kare ki kare, dok gilego bene, ki pa Luparicayo bene kit meno, ento lupwonnyeni gicamo dok gimato do.” Yecu openyogi ni, “Wutwero miyo luwot lanyom ri kec ma kun lanyom tye kwedgi? Ento kare bibino ma ka gikwanyo lanyom woko ki botgi, ka doŋ gibiri kec i kare meno.” Dok obolo botgi carolok ni, “Pe tye ŋatti mo ma yeco kiraka ki i kom ginaruka manyenne woko, ci dabo i kom ginaruka muti; ka otimo kit meno, ci biyeco manyen-ni woko, dok kiraka ma i kom manyen-ni pe birwatte ki muti-ni. Dok pe tye ŋatti mo ma piko koŋo vino manyen i kicaa macon; ka opiko, ci koŋo vino biyeco kicaa woko, kicaa bene biballe. Ento koŋo vino manyen myero gipik i kicaa manyen bene. Pe tye ŋat mo ma ka omato koŋo vino macon ci dok mito manyenne, pien wacci, ‘Macon-ni mit.’ ” I kare meno Yecu owoto kun ŋolo ki i poto i ceŋ cabit. Lupwonnyene gurito wit bel, gutinyo i ciŋgi, gumwodo. Ento jo mogo i kin Luparicayo gupenyogi ni, “Piŋo wutimo gin ma cik okwero ni pe giti i ceŋ cabit?” Yecu odok iye botgi ni, “Wun pe Wukwano gin ma nene Daudi otiyo ce? Ka nene kec oneke, en ki jo ma onoŋo gitye kacel kwede, en odonyo i ot pa Lubaŋa, ocamo mugati ma giketo i nyim Lubaŋa, ma yam cik okwero ni dano mo pe ocam, kono ajwagi pa Lubaŋa keken, dok omiyo bot jo ma onoŋo en tye kwede.” Owaco botgi ni, “Wod pa dano aye rwot me cabit.” I cabit mukene Yecu odonyo i kacokke, opwonyo; onoŋo tye iye dano mo ma bade malacuc otal. Lupwony-cik ki Luparicayo gukiye ka en bicaŋe i ceŋ cabit, wek giyeny yo me kelo kop i kome. Ento Yecu oŋeyo tamgi woko, owaco bot labade otal ni, “Bin icuŋ kany.” Oa, ocuŋ kunnu. Yecu owaco botgi ni, “Apenyowu ni, i ceŋ cabit cik ye ni gitim iye gin maber, nyo gin marac, gilaro iye kwo nyo gineko woko?” Olworo waŋe i komgi ducu, owaco bot dano-nu ni, “Rye badi.” Ci labade otal oryweyo bade, ci bade ocaŋ. Ento kiniga omakogi matek, guporo lok i kingi kekengi, gin ma myero gitim i kom Yecu. I kare meno Yecu ocito i kin godi ka lega; obedo ka lego Lubaŋa dyewor benebene. Ka piny oru, olwoŋo lupwonnyene bote, oyero jo apar wiye aryo ki i kingi, omiyogi nyiŋ ni gin lukwena; gin ene: Cimon ma en ocako nyiŋe ni Petero, ki Anderiya ominne, Yakobo ki Jon, Pilipo ki Bartolomayo, Matayo ki Tomaci, Yakobo wod pa Alipayo, Cimon ma gilwoŋo ni dano ma mito locken, Juda wod pa Yakobo, ki Juda me Keriot, ma yam olokke odobe. Olor kwedgi piny, ci ocuŋ ka ma olanne. Lwak ki lupwonnyene mapol onoŋo gitye kunnu, ki lwak dano mapol ma gua ki i Judaya ki i Jerucalem ki i dog nam me Turo ki Cidon ma gubino pi winyo pwonnye, dok wek ocaŋgi i kom twogi; jo ma cen maraco yelogi gucaŋ bene. Lwak ducu gubedo ka yenyo yo me gudo kome, pien tek onoŋo a ki i kome ci caŋogi ducu. Otiŋo waŋe bot lupwonnyene, owaco botgi ni, “Wutye ki gum, pien ker pa Lubaŋa mewu. “Wutye ki gum, wun jo ma kec nekowu koni, pien wubiyeŋ. “Wutye ki gum, wun jo ma wukok koni, pien wubinyero. “Wutye ki gum ka dano dagwu, ka ce gityemowu woko ki i kingi, ka giŋalowu, ka gicayo nyiŋwu ni rac, pi Wod pa dano! Cwinywu obed yom i nino meno, kun wupye ki yomcwiny, pien bakacic ma gibimiyowu me pwoc dit, tye i polo; pien kwarigi yam gutimo lunebi kit meno. “Ento wubineno can, wun lulonyo pien doŋ wutyeko gamo gin maber me kweyo cwinywu. “Wubineno can, wun jo ma yeŋ koni, pien kec binekowu. “Wubineno can, wun jo ma nyero koni, pien wubikumo, wubikok. “Wubineno can, ka dano ducu pwoyowu, pien kwarigi yam gupwoyo lunebi ma lugoba kit meno. “Ento wun jo ma winyo, awaco botwu ni, Wumar lukworwu, wutim ber bot jo ma dagwu. Wulam gum i kom jo ma cenowu, wuleg pi jo ma nywarowu. Ŋat ma owoŋo lemi tuŋcel, lokke tuŋcel bene; ŋat ma omayo kanyini, pe itwonne koti bene. Mi bot dano ducu ma legi; ŋat ma omayo jami ni, pe ipenygi doki ki bote,. Kit ma wumito dano gutimwu, wun bene wutimgi kumeno “Ka wumaro dano ma marowu, pwoc aŋo ma wulimo iye? Pien lubalo bene maro jo ma marogi. Ka wumito ber bot dano ma timowu ber, pwoc aŋo ma wubilimo iye? Pien lubalo bene gimito kit meno. Dok ka wumiyo banya bot dano ma wugeno ni gitwero culowu, pwoc aŋo ma wulimo iye? Lubalo bene miyo banya bot lubalo wek giculgi marom. Ento wumar lukworwu, wutim ber, wumi banya, kun pe wugeno ni gibiculowu, ci mot me pwoyowu bibedo madwoŋ, dok wubibedo litino pa En Mamalo Twal; pien en timo ber bot jo ma pe pwoye ki bot jo maraco. Wubed lukica macalo wunwu lakica. “Pe wuŋol kop i kom jo mukene, wek wun bene pe gibiŋol kop i komwu; pe wuŋol kop olo jo mukene, wun bene pe gibiŋolo kop loyowu. Wutim kica bot dano pi balgi, ci wun bene gibiweko balwu. Wumi, gibimiyowu. Gibimiyowu gin ma gipimo maber i korwu, ma gidilo, ma giyeŋo, ma o. Pien kit gin ma wupimo kwede jami en aye bene gibipimo kwede Jami botwu.” Yecu obolo botgi carolok. Owacci, “Latowaŋ twero peyo latowaŋ lawote Gin aryo ducu pe gibipoto woko i bur? Lapwonnye pe dit kato dano ma pwonye; ento dano ducu ka doŋ gipwonyogi maber, gibidoko macalo lapwonygi. Piŋo ineno cuŋ kal ma tye i waŋ omeru, ento dul yat ma tye i waŋi in kikomi pe ineno. Nyo itwero waco bot omeru niŋniŋ ni, ‘Omera, wek akwany cuŋ kal ma tye i waŋi-ni woko,’ kun in kikomi pe ineno dul yat ma tye i waŋi In lagoba, koŋ ikwoŋ kwanyo dul yat ma tye i waŋi-ni woko, ci miyo doŋ ineno piny maber me kwanyo cuŋ kal ma tye i waŋ omeru ca. “Pien pe tye yat maber ma twero nyako nyige maraco; ki yat marac bene pe twero nyako nyige mabeco; yat acel acel giŋeyo pi nyige. Pe gipwono olam ki i kom oryaŋ, dok bene pe gipwono olok ki i kom ocok. Dano maber kwanyo gin maber i kin jami mabeco ma en okano i cwinye, dano marac kwanyo gin marac ma i kin jami maraco ma en okano, pien dog dano loko gin ma opoŋ i cwinye. “Piŋo wulwoŋa ni, ‘Rwot, Rwot,’ kun pe wutiyo gin ma acikowu? Dano ducu ma bino bota ma winyo lokka, dok tiyo, abinyuto botwu ŋat ma en cal kwede. Rom ki dano ma ogero ot ma okwinyo matut, ma ocibo guti i kom pata got; ka pii opoŋ, ci kulu ocorre i kom ot, ento pe otwero yeŋone, pien bigero maber. Ento dano ma winyo lokka kun pe tiyo, rom ki dano ma ogero ot i ŋom laboŋo guti; ka kulu omol ki tek i kome, oyotoyot opoto, ogannye woko piny lirubuku.” Ka Yecu doŋ otyeko lokke ducu kun dano giwinyo, ci odonyo i Kapernaum. Ladit mo ma Laroma ma loyo askari miya yam tye ki laticce ma en maro twatwal, ma kome lit, cok to. Ka en owinyo pi Yecu, ci ooro ludoŋo pa Lujudaya bote kun lege ni obin ocaŋ laticce. Ka gubino bot Yecu, gubako doggi bote ki cwinygi ducu kun giwaco ni, “En ber, myero itimme man, pien maro rokwa, en aye ogero kacokkewa.” Yecu ocito kacel kwedgi. Ka doŋ oo cok ki gaŋ, ladit ma loyo askari ooro lureme bote, kun wacce ni, “Ladit, pe icanne, pien an pe amyero me wek ibin idony i oda, en aye gin mumiyo atamo ni, kadi an bene pe aromo bino boti. Ento wac lok awaca keken ci laticca bicaŋ. Pien an bene a dano ma giloya aloya i dog tic, atye ki askari bene ma an aloyogi. Ka awaco bot askari mo acel ni, ‘Citi,’ ci cito, dok ka awaco bot ŋat mukene ni, ‘Bin’, ci bino dok ka awaco bene bot laticca ni, ‘Tim man,’ ci timo.” Yecu ka owinyo man, ci ouro twatwal, olokke bot lwak ma lube, owaco botgi ni, “Atito botwu ni, peya anoŋo niye ma rom ki man, kadi i Icrael.” Ka luor doŋ gudok paco, gunoŋo latic doŋ kome yot. Ka kare okato manok, ocito i gaŋ ma gilwoŋo Nain; lupwonnyene ki lwak madwoŋ guwoto kacel kwede. Ka doŋ onyiko cok ki dogcel me gaŋ, nen, gitye ka lebo dano muto, latin ma minne onoŋo onywale en kene, minne yam da-to. Lwak dano ma gua ki i gaŋ onoŋo gitye kacel kwede. Ka Rwot onene, kica omake i kome, owacce ni, “Wek koko obedi.” En obino ogudo kitara, ci jo ma gitye ka lebo lato gucuŋ mot. Yecu owaco ni, “Awobi, awacci, a malo.” Dano ma oto-ni oa, obedo, ocako lok. Yecu omiye bot minne. Lworo omakogi ducu, gupako Lubaŋa kun giwaco ni, “Lanebi madit doŋ onen i kinwa!” dok ni, “Lubaŋa doŋ olimo jone!” Lok man ma en otiyo-ni oywek i lobo Judaya ducu ki i lobo ducu ma orumo. Lupwonnye pa Jon gutito lok magi ducu bote. Jon olwoŋo jo aryo ki i kin lupwonnyene oorogi bot Rwot ka penye ni, “In aye ŋat ma myero obin-ni, nyo dok wakur ŋat mukene?” Ka jo-nu gubino bot Yecu, guwacce, ni, “Jon oorowa boti, kun penyo ni, ‘In aye i ŋat ma myero obin-ni, nyo dok wakur ŋat mukene?’ ” I kare meno onoŋo Yecu ocaŋo lutwo mapol ma gitye ki arem ki cen maraco, omiyo lutowaŋ mapol guneno piny. Yecu odok iye botgi ni, “Wucitit bot Jon gin ma wuneno ki ma wuwinyo; lutowaŋ guneno piny, luŋolo guwoto, ludobo gilonyogi, ludiŋit guwinyo lok, ki jo muto gicerogi woko, ki lucan bene gitito botgi lok me kwena maber. Dano ma tamme pe oballe i koma tye ki gum.” Ka doŋ lukwena pa Jon gudok, Yecu ocako lok ki lwak i kom Jon ni, “Onoŋo wucito i tim ka neno gin aŋo? Onoŋo wucito ka neno lagada ma yamo obedo ka yeŋone? Onoŋo wucito kunnu kono ka neno gin aŋo? Wucito ka neno dano ma oruko boŋŋi mabeco? Nen, jo ma ruko boŋŋi me deyo, dok ma bedo ki jami me wel, gibedo i gaŋ kal pa luker. Doŋ onoŋo wucito kunnu ka neno gin aŋo? Wucito ka neno lanebi mo? Iyo, awaco botwu ni ŋat madit makato lanebi. Man aye ŋat ma yam gicoyo lok i kome ni, ‘Nen, acwalo lakwenana otelo nyimi, ma bigero yoni ma peya in ibino.’ Awaco botwu ni, pe tye dano mo ki i kin jo ma mon onywalogi ma kato Jon ki dit; ento ŋat matidi twatwal i ker pa Lubaŋa aye kate.” Ka guwinyo lok man, lwak ducu wa lujog-mucoro guye ni Lubaŋa oporre, pien yam gibatijagi ki batija pa Jon, ento Luparicayo ki lupwony-cik gukwero gin ma Lubaŋa oyubo pigi, pien nene pe gulimo batija ki bot Jon. Yecu dok owacci, “Doŋ abiporo jo me kare man ki gin aŋo? Gin calo aŋo? Girom ki litino ma gibedo i cuk ma gilwoŋo litino wadigi kun giwaco ni, ‘Yam wakuto nyamulere botwu wun pe wumyelo; wawero wer lyel, wun pe wukok.’ Pien Jon Labatija doŋ obino kun pe camo kwon, pe mato koŋ vino bene wun wuwaco ni, ‘En tye ki cen marac.’ Wod pa dano dok obino kun camo dok mato bene, wun wuwaco ni, ‘Nen, dano ma owor ki lameno, larem lujogmucoro ki lubalo.’ Ento ryeko pa Lubaŋa oloyo kop pi litinone ducu.” Ŋat acel i kin Luparicayo olwoŋe ka cam bote; Yecu ocito i ot pa Laparicayo ci obedo piny i dog cam. Nen, tye dako mo ma labalo i gaŋ meno. Ka oŋeyo ni Yecu tye ka cam i ot pa Laparicayo, ci okelo adomo moo ma ŋwece kur. Ocuŋ i ŋe Yecu tuŋ tyene kun kok, pig waŋe oton i tyen Yecu, obedo ka jwayo ki yer wiye kun noto tyene, owiro ki moo. Ka Laparicayo ma onoŋo olwoŋe-ni oneno, oloko i iye kekene ni, “Kono dano man lanebi, kono oniaŋ i kom dako ma ogude-ni, ki kite, ni en labalo.” Yecu odokke iye ni, “Cimon, atye ki lok mo ma amito awacci.” Cimon ogamo ni, “Wacca, Lapwony.” Yecu ogamo ni, “Ŋat mo ma lami-banya yam tye ki dano aryo ma gucamo banya bote. Ŋat acel onoŋo tye ki banya me ciliŋ miya abic, ŋat mukene pyerabic. Ka culone oloyogi, otimo kica botgi gin aryo ducu. Mene i kingi ma bimare makato?” Cimon odokke iye ni, “Atamo ni en ma gitimo kica pi wel banya madwoŋ-ŋi.” Ogamo ni, “Iŋolo kakare.” Olokke bot dako, openyo Cimon ni, “Ineno dako man? Adonyo i odi, pe imiya pii me lwoko tyena, ento en otono pig waŋe i tyena, ojwayo ki yer wiye. In pe imota kun inoto lema, ento cakke i kare ma adonyo i ot, en pe oweko noto tyena. In pe iwiro wiya ki moo, ento en owiro tyena ki moo ma ŋwece kur. Pi meno atitti ni, doŋ giweko balle mapol-gu ducu, kit ma marre madwoŋ-ŋi nyuto-ni; ento ŋat ma giweko balle manok, marre nok. Owaco bot dako ni, ‘Balli doŋ giweko.’” Jo ma onoŋo tye i dog cam gucako lok i kingi kekengi ni, “Man aŋa, ma weko bal-li?” Owaco bot dako ni, “Niyeni olari; wot doŋ giri ki kuc.” Ka kare okato manok, Yecu owoto i kin gaŋi madoŋo ki matino kun tito dok nyuto lok me kwena maber i kom ker pa Lubaŋa. Jone apar wiye aryo onoŋo tye kwede, kacel ki mon mogo ma yam en ocaŋogi i kom cen maraco ki i kom two; Maliam ma gilwoŋo ni Maliam me Magdala, ma cen maraco abiro yam oa woko ki i kome, Joana dako pa Kuja, lagwok-lim pa Kerode, Cucana, ki mon mukene mapol, ma yam gikonye ki limgi. Ka lwak mapol gucokke kacel, kun dano gubino bote ma gia ki i gaŋi mapol, Yecu oloko i carolok ni, “Lacoc ocito ka coyo kodine. Ka kun coyo, ci kodi mogo okir i ŋet yo, dano gunyono, winyo me polo gubino gucamo woko. Kodi mukene okir i kom pata; ka odoŋo, otwo woko, pien pii pe i tere. Kodi mukene okir i kin okuto; okuto odoŋo kacel kwede, odiye. Kodi mukene okir i ŋom maber, ci odoŋo, guceko ma dodo tyen miya.” Ka doŋ oloko lok man, ci odaŋŋe owaco ni, “Ŋat ma tye ki it me winyone, owiny.” Ka lupwonnyene gupenye te lok me carolok man, ci en ogamo ni, “Wun gimiyowu me ŋeyo muŋ me ker pa Lubaŋa; ento jo mukene gimiyogi i carolok wek ka gineno, pe gunen, dok ka giwinyo, pe guniaŋ tere. “Carolok-ki tere ene: Kodi aye lok pa Lubaŋa. Gin ma i ŋet yo gin aye jo ma winyo; lacen Catan bino, kwanyo lok ki i cwinygi woko, wek pe guye, pe gularre. Gin ma i kom pata aye jo ma winyo, ci gigamo lok ki yomcwiny; ento pe gitye ki cwitgi, giye pi Kare manok, ento i kare me omo cwiny gipoto woko. Gin ma okir i kin okuto, gin aye jo ma winyo, ento ka kare okato, ci tam mapol, ki lim, ki yomcwiny me kwo man diyogi, nyiggi pe cek maber. Gin ma i ŋom maber, gin aye jo ma ka guwinyo lok, ci gimako matek ki cwiny ma genne ki maber, ginyak nyiggi kun gidiyo cwinygi. “Pe tye ŋat mo ma cwinyo tara, ci dok umo woko ki aduku, nyo keto i te kitanda, ento keto i wi okar, wek jo ma bino i ot gunen mac. Pien pe tye gin mo ma gikano ma pe binen ka maleŋ, dok pe tye gin mo ma giumo ma pe gibiŋeyo, dok ma pe gibiyabo ka maleŋ. Pi meno wugwokke kit ma wuwinyo ki lok; pien ŋat ma mere tye gibimedde, ŋat ma mere pe, gibikwanyo woko ki bote kadi wa gin ma en tamo ni etye kwede.” Minne ki omegine gubino, ento onoŋo pe gitwero o bote pi lwak. Gititte ni, “Meni ki omegini gitye gucuŋ woko, gimito neni.” Ento Yecu odok iye botgi ni, “Maa ki omegina gin aye jo ma winyo lok pa Lubaŋa, dok gitiyo.” I nino mo acel Yecu odonyo i yeya kacel ki lupwonnyene, owaco botgi ni, “Wakatu wacitu loka nam tuŋ ca.” Gucako wot; i kare ma gitye ka wot ki yeya, Yecu onino woko. Yamo okodo matek i dye nam, pii ocako poŋ i yeya, onoŋo gitye marac! Guwoto, gucoye kun giwaco ni, “Ladit, wato woko do!” Yecu oco, ci ojuko yamo, ki pii ma onoŋo twagge; opye mot, ki nam oliŋ. Openyogi ni, “Niyewu tye kwene?” Lworo omakogi, guuro kun gupennye kekengi ni, “Man aŋa kono kaa, ma ciko yamo ki pii, ci giwinye-ni?” Gubino i lobo pa Lugeraca, ma okemme ki Galilaya. Ka Yecu okato i wi tera, ci dano mo me gaŋ meno ma tye ki cen obino bote. Dano-nu onoŋo ori pi kare malac ma pe ruko boŋo, pe bedo i ot bene, ento bedo mere i kin lyel keken. Ka oneno Yecu, ci odaŋŋe oryebbe i nyime, owaco ki dwan maloŋo ni, “Ilaro aŋo kweda, Yecu, Wod pa Lubaŋa Mamalo Twal? Abako doga boti, pe iyela.” Pien onoŋo Yecu ociko cen marac ni oa woko ki i kom dano-nu. Pien tyen mapol dwogo i kome. Onoŋo gigwoke agwoka kun gitweye ki nyor ki nyonyo, ento yam turo gin ma gitweye kwede woko, cen ryeme, tere i tim. Yecu openye ni, “Nyiŋi aŋa?” Ogamo ni, “Legion”; pien cen mapol onoŋo tye i kome. Cen gubako doggi bote ni pe ocikgi ni gicit i Bur. Lwak opego mapol onoŋo gitye ka cam i kor got kunnu. Cen gubako doggi bote ni owek gidony i opego. Cen gua ki i kom dano-nu, gudonyo i opego, lwak opego gutwarre ki ŋwec nia ki i kor got malo, ci gumwony woko i nam. Ka lukwat guneno gin ma otimme, ci guriŋo, gutero lokke i gaŋ madit ki i kin paco. Dano gucito ka neno gin ma otimme, gubino bot Yecu, gunoŋo dano ma cen oa ki i kome-ni obedo ka tyen Yecu, oruko boŋo, odoko dano; lworo omakogi. Jo ma guneno lok man gutito botgi kit ma dano meno ma yam tye ki cen ocaŋ kwede. Jo ducu ma gibedo i lobo pa Lugeraca ma orumo kunnu gulego Yecu ni myero oa woko ki botgi, pien onoŋo lworo omakogi matek; omiyo Yecu odonyo i yeya, odok cen. Dano ma cen oa ki i komeni obako doge bot Yecu ni myero ebed bote; ento Yecu ocwale kun cike ni, “Dok i paconi, icitit gin madit ma Lubaŋa otimo i komi.” Ocito otito i kin gaŋa meno ducu lok madit ma Yecu otimo i kome. Ka Yecu odwogo, lwak gujole ki yomcwiny, pien onoŋo gin ducu gitye ka kure. Dano mo obino, nyiŋe Yairo, ma onoŋo ladit me kacokke. Oryebbe piny ka tyen Yecu, obako doge bote ni obin i ode, pien onoŋo yam tye ki nyare ma onywalo acel keken ma onoŋo doŋ cok to; mwaka me ditte mito romo apar wiye aryo. I kare ma Yecu tye ka wot, lwak odiye. Dako mo onoŋo tye kunnu ma yam onoŋo twoyo two agobi pi mwaka apar wiye aryo, ma doŋ obalo limme ducu bot daktar, ento pe otwero caŋ. Obino cok i ŋe Yecu, ci ogudo dog ginarukane; cutcut remo ma cwer ocok woko. Yecu openyo ni, “Aŋa ma oguda-ni?” Ka dano ducu gukwero woko, ci Petero ki jo ma tye kacel kwede, gugamo ni, “Ladit, lwak orumi dyere, gidine i komi.” Ento Yecu owaco ni, “Ŋat mo oguda gire, pien awinyo tek oa woko ki i koma.” Dako-nu oneno ni pe etwero kanne, ci obino kun kome myel, oryebbe i nyime, otito i nyim lwak ducu gin ma omiyo egude, ki kit ma ecaŋ kwede oyotoyot. Yecu owacce ni, “Nyara, niyeni ocaŋi; wot ki kuc.” I kare ma Yecu pud tye ka lok, dano mo obino ma oa ki i gaŋ pa ladit me kacokke, owaco ni, “Nyari doŋ oto woko, pe doŋ iyel Lapwony.” Ento ka Yecu owinyo, owacce ni, “Pe ilwor, ye ayeya keken, ci en bicaŋ.” Ka obino i ot, pe oye ni dano mo odony kwede i ot, kono Petero ki Jon, ki Yakobo, ki won latin ki minne keken. Dano ducu onoŋo gitye ka koko kun gikumo pire; ento Yecu owaco ni, “Wuwek koko obedi; pien nyako-ni pe oto, ento onino anina.” Gunyere matek, pien giŋeyo ni nyako-ni oto woko. En omako bad latin, olwoŋe, owacce ni, “Nyako, a malo.” Ci cwinye odwogo, oa malo oyotoyot, Yecu ociko ni gimine cam. Lunyodone guuro mada; ento Yecu ocikogi matek ni pe myero gutit pi gin ma otimme-ne bot dano mo. Yecu olwoŋo jone apar wiye aryo kacel, omiyo botgi tek ki twero i kom cen ducu, ki me caŋo two, oorogi ka tito lok i kom ker pa Lubaŋa ki ka caŋo lutwo. Ocikogi ni, “Pe wuwot ki gin mo, kadi ki odoo, kadi kicaa, kadi kwon, kadi lim, dok pe wubed ki kanyi aryo. Ot ma wubidonyo iye, wubed kunnu, nio ka wubia, wucito giwu. Ka ma pe gijolowu iye, ka wua ki i gaŋ meno, wuteŋ apwa tyenwu obed caden botgi.” Gua gucito i kin gaŋ, gutito lok me kwena maber kun gicaŋo lutwo bene i kabedo ducu. Ento Kerode rwot madit ka owinyo pi gin ducu ma obedo ka timme, wiye ocuŋ woko, pien jo mogo guwaco ni Jon Labatija aye ocer ki i kin jo muto, jo mukene ni, Elia aye doŋ onen, jo mukene ni, ŋat acel i kin lunebi macon aye ocer. Kerode owaco ni, “Jo yam atoŋo wiye woko do; ento man aŋa ma dok awinyo lok macalo magi i komeni?” Oparo pi nene twatwal. Ka lukwena gudwogo, gutitte lok ducu ma gutiyo. Yecu oterogi, ocito kwedgi i gaŋ ma gilwoŋo Betecaida i muŋ. Ka lwak guwinyo, ci gulubo kore, en ojologi, otito botgi lok i kom ker pa Lubaŋa, ocaŋo jo ma komgi lit. Ka piny doŋ mito yuto, jone apar wiye aryo gubino bote, guwacce ni, “Cwal lwak gucit i kin gaŋ ki i pacci ma orumo kany, wek guyeny kabuto, gunoŋ cam; pien kany watye i dye tim.” Ento Yecu odok iye botgi ni, “Wun wumi botgi cam.” Gugamo ni, “Watye ki mugati abic ki rec aryo keken, nyo ka ce imito waciwil cam pi lwak man ducu.” Pien onoŋo gimito romo dano alip abic. Ociko lupwonnyene ni, “Wumi dano gubed piny i dul, i dul acel acel dano pyerabic.” Gutimo kumeno, gumiyo dano ducu gubedo piny. Yecu okwanyo mugati abic ki rec aryo-nu, oneno malo i polo, olego iye gum, obaro iye, omiyo bot lupwonnyene wek guket i nyim lwak. Gin ducu gucamo guyeŋ. Gicoko ŋide mudoŋ oromo aduku apar wiye aryo. Ka onoŋo en tye ka lega kaikene, kun lupwonnyene bene tye kacel kwede, en openyogi ni, “Dano mono giwacci an aŋa?” Gudok iye ni, “Jon Labatija, jo mukene giwacci Elia, ki jo mukene ni ŋatti mo acel i kin lunebi macon aye doŋ ocer.” Openyogi ni, “Wun kono wuwacci an aŋa?” Petero ogamo ni, “In i Kricito ma Lubaŋa oyero.” Ento Yecu ocikogi matek ni pe myero gutit lok man bot dano mo. Dok owaco ni, “Wod pa dano myerone okany can madwoŋ, dok ludoŋo ki ajwagi madito pa Lubaŋa ki lupwony-cik myero gukwere woko, ci guneke, ento myero gicere woko i nino me adekke.” Dok owaco bot dano ducu ni, “Ka dano mo mito lubo kora, myero okwoŋ kwerre kekene, otiŋ yatariyane nino ducu, ci olub ki kora. Pien dano ma mito laro kwone, birwenyone arwenya, ento dano ma rwenyo kwone pira, bilaro kwone. Pien konyo dano ma olimo lobo ducu ki gin aŋo kun kwone rwennye woko, nyo balle? Dano ma lewic make pira ki pi lokka, Wod pa dano bene lewic bimake i kome, i kare ma en bidwogo i deyone ki deyo pa Lubaŋa Won kacel ki pa lumalaika maleŋ. Ento atito botwu ni, tye jo mogo ma gucuŋ kany ma pe gibibilo to, ma pud peya guneno ker pa Lubaŋa.” Ka nino ma mito romo aboro okato i ŋe lok magi, Yecu otero Petero ki Jon ki Yakobo, oito kwedgi i wi got ka lega. I kare ma onoŋo en tye ka lega, waŋe olokke mapat, ginarukane odoko matar ma ryeny lidaŋdaŋ. Nen, jo aryo gubedo ka lok kwede, jo-nu onoŋo aye Moses ki Elia, ma gunen kun gitye ki deyo, guloko pi ane ki i lobo man, ma en myero ocob i Jerucalem. Petero ki jo ma tye kacel kwedgi onoŋo nino omako waŋgi matek, ento gubedo ma waŋgi twolo, guneno deyone ki jo aryo ma gucuŋ kacel kwede. Ka jo aryo-nu mito a woko ki bote, ci Petero owaco ni, “Ladit, bedo kany ber; kono wagero aduc adek, acel meri, acel pa Moses, ki acel pa Elia”. Onoŋo Petero pe ŋeyo gin ma myero eloki. ka pud loko lok man, pol obino, oumogi; lworo omakogi ka gidonyo i pol. Dwan oa i polo ni, “Man aye Woda ma doŋ ayero; wuwinye.” Ka dwan man doŋ oloko, ci ginoŋo Yecu odoŋ kene. Lupwonnye guliŋ aliŋa; i kare meno, pe gutito bot dano mo lok mo i kom gin ma guneno. Orwone, ka doŋ gulor piny ki i wi got, lwak madwoŋ gurwatte kwede. Nen, laco acel ki i kin lwak odaŋŋe ni, “Lapwony, abako doga boti, inen woda, pien anywalo en acel kene. Nen, cen bino i kome, ci miyo kok cut; ryeye, kelo bwoyo i doge, nyoŋo kome woko, pe a ki i kome oyotoyot. Abako doga bot lupwonnyeni ni guryem woko, ento ryemone oloyogi.” Yecu odok iye ni, “Wun yalwak me kare man, pe wutye ki niye, kitwu doŋ oballe woko. Abibedo kwedwu wa awene? Abidiyo cwinya i kwomwu nio wa awene? Kel wodi kany.” Ka onoŋo tye ka bino, cen orete woko piny, oryeye matek. Ento Yecu ogerre i wi cen marac, ocaŋo awobi-nu, odwoke bot wonne. Dano ducu guuro dit pa Lubaŋa. Ento ka pud gitye ka uro gin ducu ma en otiyo, Yecu owaco bot lupwonnyene ni, “Wuwek lok man odony i itwu; pien Wod pa dano gibimiye i ciŋ dano.” Ento lupwonnyene pe guniaŋ lok man; lok man okanne woko ki botgi wek pe guniaŋ iye; ci gulworo penye pi lok meno. Pyem yam ocakke i kingi, ni aŋa ma i kingi ma loyo ki dit. Yecu ka oŋeyo pyem ma i cwinygi, okwanyo latin matidi, omiye ocuŋ i ŋete, owaco botgi ni, “Dano ducu ma jolo latin man i nyiŋa, noŋo ojolo an, dano ducu ma jolo an, noŋo ojolo ŋat ma oora; pien ŋat matidi twatwal i kinwu ducu en aye ŋat madit.” Jon ogamo ni, “Ladit, waneno ŋat mo ma ryemo cen i nyiŋi, wageŋe, pien en onoŋo pe lubi kacel kwedwa.” Ento Yecu odok iye ni, “Pe wugeŋe, pien ŋat ma pe lakworwu, noŋo tye tuŋ botwu.” Ka kare doŋ mito romo me tiŋe malo, ociko waŋe matek me cito i Jerucalem. Ooro lukwena gukwoŋo nyime; gucito, gudonyo i gaŋ mo pa Lucamaria pi yubbe kabedo. Ento Lucamaria pe gujole, pien waŋe okemo Jerucalem. Ka lupwonnyene Yakobo ki Jon guneno, guwaco ni, “Rwot, imito wacik mac oa ki i polo, otyekgi woko?” Ento Yecu olokke, ojukogi, [kun waco ni, “Pe wuŋeyo kit cwiny ma wutye kwede; pien Wod pa dano pe obino ka tyeko kwo pa dano, ento pi larogi.”] Gucito i gaŋ mukene. Ka gitye ka wot i yo, dano mo owacce ni, Abilubi ka ma ibicito iye ducu. Yecu odokke iye ni, “Too tye ki boro, winyo me polo tye ki odigi, ento Wod pa dano pe tye ki ka ma myero epyel iye wiye.” Owaco bot dano mukene ni, “Luba.” Ento danonu ogamo ni, “Ladit, koŋ iwek aciyik wora.” Yecu odokke iye ni, “Wek jo muto guyik jo muto wadigi; ento in iciti, inya lok i kom ker pa Lubaŋa.” Ŋat mukene owaco ni, “Abilubi, ladit; ento koŋ iwek acit, acik jotuwa.” Yecu owacce ni, “Pe tye dano mo ma mako kweri dyaŋ, ka dok neno ŋeye, ma biromo bedo i ker pa Lubaŋa.” Ka man otum, Rwot oyero jo mukene pyerabiro, oorogi ki aryo aryo wek gukwoŋ nyime, me cito i gaŋi ducu ki i kabedo ducu ka ma en kikome bibino iye. Owaco botgi ni, “Kac tye dwoŋ, ento lukac aye nok; pi meno wuleg Won poto, wek ocwal lutic ka kac. Wucit giwu; nen, acwalowu macalo litino romi i kin orudi. Pe wuwot ki kicaa lim nyo opiro, kadi war; pe wumot ŋat mo i waŋayo. Ot ducu ma wudonyo iye, wukwoŋ waco ni, ‘Kuc obed i ot man.’ Ka latin me kuc tye kunnu, ci kucwu bibedo i kome; ento ka pe, ci kucwu bidwogo botwu. Wubed i ot meno, kun wucamo dok wumato gin ma gimiyowu, pien latic myero gimiye mucarane. Pe wubed ka kobo i ot ki ot. Ka wudonyo i gaŋ mo, ce gijolowu, wucam gin ma giketo i nyimwu; wucaŋ lutwo ma tye iye, wutit botgi ni, ‘Ker pa Lubaŋa doŋ onyiko cok botwu.’ Ento ka wudonyo i gaŋ mo, ce pe gijolowu, ci wucit i waŋayo me gaŋ meno, wuwac ni, ‘Wa apwa me gaŋwu ma omoko i tyenwa, wateŋo i komwu; kadi bed kit meno, myero wuŋe man ni, ker pa Lubaŋa doŋ onyiko cok.’ Atito botwu ni, i nino meno can pa Codom bibedo twaratwara makato pa gaŋ meno. “Ibikoko aŋee, in Korajin! Ibikoko aŋee, in Betecaida! Pien kono yam tic madito me twer ma gitiyo botwu gitiyo i Turo ki Cidon, kono jone guŋut wa con, kun giruko boŋo cola ma gibedo i buru bene. Ento can pa Turo ki Cidon bibedo twaratwara i nino me ŋolo kop, makato can ma bipoto i komi. Ki in Kapernaum, gibitiŋi woko malo i polo? Pe kumeno, gibidwoki woko piny i Lyel. “Ŋat ma winyowu, noŋo owinyo an, ŋat ma kwerowu, noŋo okwero an; ŋat ma kwera, noŋo okwero ŋat ma oora.” Dano pyerabiro-nu gudwogo cen ki yomcwiny, kun giwaco ni, “Rwot, wa cen maraco bene guwinyo cikwa pi nyiŋi!” En odok iye ni, “Yam aneno Catan kun poto piny nia ki i polo macalo lutkot. Nen, doŋ amiyowu twero me nyono twol ki oton, ki me loyo tek ducu pa lakwor; gin mo pe bitimowu marac. Kadi bed kumeno cwinywu pe obed yom pi man ni, cen guwinyo cikwu; ento cwinywu obed yom, pien nyiŋwu gicoyo i wi polo.” I cawa meno Yecu obedo ki yomcwiny i Cwiny Maleŋ kun waco ni, “Apwoyi, Wora, in Rwot me polo ki me lobo, pien ikano lok magi woko ki bot luryeko ki luŋe-piny, ci inyutogi bot litino lukere; iyo, Wora, pien onoŋo ipwoyo kit yo macalo meno. Jami ducu doŋ Wora otyeko miyogi woko bota; ŋat mo pe ma ŋeyo ni Wod en aŋa, kono Wod keken, dok bene ŋat mo pe ma ŋeyo ni Wod en aŋa, kono Won keken, ki ŋat ma Wod oyero me nyuto Won bote.” Yecu olokke bot lupwonnyene, owaco botgi i muŋ ni, “Tye ki gum, dano ma neno gin ma wun wuneno! Pien atittiwu ni, lunebi ki luker mapol yam guparo pi neno gin ma wun wuneno, ento pe guneno, ki winyo gin ma wun wuwinyo, ento pe guwinyo.” Nen, ŋat mo acel lapwony-cik oa malo, otemo i Yecu kun penye ni, “Lapwony, atim aŋo wek alim kwo ma pe tum?” Yecu openye ni, “Gicoyo ni ŋo i cik? Ikwano niŋniŋ?” Odok iye ni, “Mar Rwot Lubaŋani ki cwinyi ducu, ki tiponi ducu; ki tekki ducu, ki tammi ducu; mar lawoti bene macalo imarre keni.” Yecu ogamo doge ni, “Idok iye kakare; tim kit meno, ci ibikwo.” Ento dano-nu pi mito loyo kop, openyo Yecu ni, “Lawota aŋa?” Yecu odok iye ni, “Yam tye dano mo ma oa ki i Jerucalem, cito piny tuŋ Jeriko, ci orwatte ki luyak; gulunyo boŋŋine ki i kome, gupwode, gucito, guweke kun doŋ cok to. Ajwaka mo pa Lubaŋa onoŋo bene tye ka lubo yo meno; ka onene, ci obarre okato ki i ŋete. Kit meno Lalevi ka oo i kabedo meno, onene, obarre okato ki i ŋete. Ento Lacamaria mo ma onoŋo bene tye ka wot i yo-nu, oo ka ma en tye iye. Ka onene, kica omake i kome. Ocito bote, oonyo moo jeituni ki koŋo vino i waŋ rette, otweyo. Lacen okete i wi kanane, otere i ot welo, ogwoke. Orwone okwanyo lim, omiyo bot ŋat ma gwoko ot welo, ocike ni, ‘Twoye; gin ducu ma ibimiyo makato, an abiculi ka adwogo.’ Aŋa i kin jo adek-ki ma itamo ni obedo lawot dano-nu ma orwatte ki luyak-ki?” Odok iye ni, “Ŋat ma otime kicani.” Yecu owacce ni, “In bene cit, icitim kit meno.” Ka gitye ka wot i yo, ci Yecu odonyo i gaŋ mo, ci dako mo ma nyiŋe Marita ojole i ode. Yam tye ki laminne nyiŋe Maliam ma obedo ka tyen Yecu kun winyo lokke. Ento Marita onoŋo obedo ka canne ki tic mapol; ocito bot Yecu, openye ni, “Ladit, pe iparo ni lamera oweka atye ka tic kena? Wac bote wek okonya.” Ento Rwot ogamo ni, “Marita, Marita, ibedo ki tam mapol, cwinyi oŋabbe pi jami mapol, ento tye gin acel keken ma mitte. Maliam oyero dul maber ma pe gibikwanyo woko ki bote.” Yecu onoŋo yam tye ka lega i kabedo mo; ka doŋ otyeko, ci ŋat acel i kin lupwonnyene owacce ni, “Rwot, pwonywa ki lega, kit macalo yam Jon opwonyo lupwonnyene.” Yecu odok iye botgi ni, “Ka wulego, wuwac kit man ni, ‘Wonwa, giwor nyiŋi maleŋ. Ker meri obin. Miwa nino ki nino camwa me nino ducu. Iwek balwa, pien wan kikomwa waweko bal pa dano ducu ma gibalo botwa. Pe iterwa i abita.’” Dok owaco bitgi ni, “Aŋa i kinwu ma tye ki lareme ci bicito bote cwiny dyewor ka penye ni, ‘Larema, konya ki mugati adek; pien larema mo oa i wot, ocora, ci pe atye ki cam mo ma myero aket i nyime.’ En bidokke iye ki i ot ni, ‘Wek yela; doŋ acego doggola woko, wan ki litinona doŋ wabuto; pe atwero a malo ka mini gin mo.’ Atito botwu ni, kadi bed en pe bia malo ka miye gin mo pi bedo lareme, ento pi dide ci bia, bimiye gin ducu ma en mito. Dok acikowu ni, Wulegi, ci gibimiyo botwu; wuyeny, ci wubinoŋo, wudwoŋ doggola, gibiyabo botwu. Pien dano ma lego gimiye, ki ŋat ma yenyo bene, noŋo; ŋat ma dwoŋo doggola bene, gibiyabo doggola bote. Aŋa i kinwu ma won latin, ka latinne olege ni omiye rec, ci bimiye twol ma ka rec? Nyo ka olege ni omiye toŋŋweno, ci bimiye oton? Ka wun jo maraco wuŋeyo miyo mot mabeco bot litinowu, ci Wonwu ma tye i polo pe bikatowu, bimiyo Cwiny Maleŋ makato bot jo ma lege?” Yam onoŋo Yecu tye ka ryemo cen ma pe loko; ka cen doŋ oa ki i kom dano ma onoŋo tye ki cen, ma te lebe oto, oloko, ci lwak guuro. Ento jo mogo i kingi guwaco ni, “En ryemo cen pi twero pa Beeljebul ladit pa cen.” Jo mukene onoŋo giyenyo lanyut ki bote ma a ki i polo, pi teme. Ento Yecu oŋeyo tamgi, ci owaco botgi ni, “Ka ker iye opokke aryo, ci ker meno lobone balle woko; ot poto i wi wadi. Catan bene ka opokke kene i dul aryo, ci kerre bicuŋ niŋniŋ? Pien wun wuwaco ni aryemo cen pi twero pa Beeljebul. Ka an aryemo cen pi twero pa Beeljebul, ci litinowu kono giryemo cen pi twero pa aŋa? Pi meno gin aye gibibedo luŋolkopwu. Ento ka ce an aryemo cen pi ciŋ Lubaŋa, ci doŋ wuŋe ni ker pa Lubaŋa doŋ obino botwu. Ka oteka ma oruko jami lwennye ducu tye ka gwoko gaŋ kalle, jamine ducu bedo ki kuc, ento ka dano ma kate ki tek olwenyo i kome ce oloye, bicoko jami lwennye ma ya en geno, bipoko jami ma yam en oyako ki bote. Ŋat ma pe tuŋ bota, meno noŋo en lakworra, dok ŋat ma pe nywako coko kweda, keto mere aketa. “Ka cen marac doŋ oa ki i kom dano mo, ci cito wirre i kabedo ma pii pe iye kun yenyo ka ma ebiywe iye; ento ka noŋone oloye woko, ci wacci, ‘Abidok gira i oda ka ma yam aa ki iye-ni.’ Ka obino, ci noŋo giyweyo i ot woko maleŋ, giyubo maber. En dok, cito kelo cen mukene abiro ma giraco gikate woko, ci gidonyo gibedo i ode-ni; lacen dano-nu bibedo marac makato kit ma onoŋo yam obedo kwede con.” Ka oloko lok man, ci dako mo ki i kin lwak owoto dwane, owacce ni, “Tye ki gum ic ma onywali, ki tuno ma idoto!” Ento Yecu ogamo ni, “Makato gitye ki gum, jo ma giwinyo lok pa Lubaŋa, dok gigwoko!” Ka lwak gumedde mapol, ci Yecu ocako waco ni, “Yalwak pa jo maraco giyenyo lanyut, ento pe gibimiyo botgi lanyut mo, kono lanyut pa lanebi Yona keken. Pien kit macalo Yona yam odoko lanyut bot jo Nineve, kit meno Wod pa dano bene bidoko lanyut bot yalwak me kare man. Kabaka ma dako ma tye yo tuŋ acuc bicuŋ kacel ki yalwak me kare man i kare me ŋolo kop, ci miyo kop loyogi; pien en oa ki i agikki lobo obino ka winyo ryeko pa Solomon, ento nen, gin madit makato Solomon tye kany. Jo Nineve bicuŋ kacel ki yalwak man i kare me ŋolo kop, ci miyo kop loyogi, pien gin yam guŋut pi lok ma Yona onoŋo otito, ento nen, gin madit makato Yona tye kany. “Pe tye ŋatti mo ma cwinyo tara ci kano i gul, nyo umo auma ki aduku; ento cibo i wi okar, wek dano ducu ma gibino i ot gunen derone. Tara me komi aye waŋi; ka ce waŋi bal mo pe iye, ci komi kulu bibedo leŋ. Ento ka ce waŋi tye ki bal mo i kome, ci komi kulu bibedo i colpiny. Gwokke wek leŋo ma tye i ii-ni pe odok col. Doŋ ka komi kulu bedo i leŋo, kun colpiny pe iye, ci komi kulu bibedo leŋ, macalo tara ma menyi ki derone ka tye ka lyel.” Ka yam onoŋo tye ka lok, Laparicayo mo olwoŋe ka cam bote; Yecu odonyo i ot, obedo i dog cam. Laparicayo ouro ka oneno ni ocako cam ma pe koŋ ologo ciŋe. Rwot owacce ni, “Wun Luparicayo wulwoko ŋe kikopo ki ŋe atabo, kun iwu opoŋ yak ki tim maraco. Wun lumiŋmiŋ! Ŋat ma tiyo gin ma woko pe en aye bene otiyo gin ma i iye? Wumi gin ma i atabowu bot lucan wek okonygi; ci nen, jami ducu bibedo maleŋ botwu. “Ento wubineno can, wun Luparicayo, pien wumiyo dul me apar me oyado ki ocobo ki kit pot dekwu ducu, kun wuweko ŋolo kop atir ki maro Lubaŋa; meno ducu myero wutim kun pe wuweko magi bene. Wubineno can, wun Luparicayo, pien wumaro kabedo me dito i kacokke, dok wumito ni dano gumotwu i cuk. Wubineno can! Pien wurom ki lyel ma pe ginen ma dano woto i wigi kun pe giŋeyo.” Ŋat acel i kin lupwony-cik ogamo doge ni, “Lapwony, ka iwaco kit man nyuto ni iyeto wa wan bene.” Yecu odokke iye ni, “Wubineno can, wun lupwony-cik bene! Pien wumiyo dano yeyo yec mapek, ma yeyone tek, kun wun kikomwu pe wugudo kadi ki lwet ciŋwu acel. Wubineno can, pien wucano got i wi lyel pa lunebi ma yam kwariwu guneko. Kit meno wun wucaden, wupwoyo tic pa kwariwu, pien gin guneko, wun wucano got i wi lyelgi. Pi man Ryeko pa Lubaŋa owaco ni, ‘Abioro botgi lunebi ki lukwena, jo mogo i kingi gibinekogi gibilibogi,’ wek remo pa lunebi ducu ma gionyo nia i acakki piny gicul kworre i kom yalwak me kare man, cakke i kom remo pa Abel nio kwede i kom remo pa Jekaria ma oto i kin keno tyer pa Lubaŋa ki kabedo maleŋ. Iyo atito botwu ni, gibiculo kworre i kom yalwak me kare man. Wubineno can, wun lupwony-cik, pien wumayo layab me ŋeyo piny woko, kun wun kikomwu pe wudonyo iye, dok wugeŋo dano ma mito donyo iye bene.” Ka doŋ oa ki kunnu, ci lupwonycik ki Luparicayo gucako dine matek ma girobo doge ki peny mapol, kun gikiye wek gimak lok ma a ki i doge. I kare meno, lwak dano alip ki alip gucokke kacel, kun doŋ ginyonne kekengi. Mukwoŋo, Yecu ocako waco bot lupwonnyene ni, “Wugwokke i kom tobi pa Luparicayo, ma en aye buta. Pe tye gin mo ma giumo ma pe gibiyabo ka maleŋ, kadi gin ma gikano ma pe biŋene. Lok ducu ma wuloko i colpiny biwinnye i leŋpiny; dok gin ducu ma wukwilo lokke i tyelo, gibitito lokke i wi ot malo. “Lurema, atito botwu ni, pe wulwor jo ma neko kom, ma pe dok gitwero timo gin mo makato meno. Ento abinyuto botwu ŋat ma myero wulwor; wulwor ŋat ma ka doŋ oneko, ci tye ki twero me bolo i Geena; iyo, atito ni, wulwore. Ojwinyojwiny abic pe gicato pi cente pyeraryo? Ento pe tye mo acel i kingi ma wi Lubaŋa twero wil iye. Kadi bed wa yer wiwu ducu bene doŋ gikwanogi woko liweŋ. Pe wulwor; pien piwu tek twatwal makato pi ojwinyojwiny mapol. “Atito botwu ni, dano ducu ma tuco nyiŋa i nyim dano, Wod pa dano bene bituco nyiŋe i nyim lumalaika pa Lubaŋa; ento ŋat ma kwera i nyim dano, gibikwere bene i nyim lumalaika pa Lubaŋa. Dano ducu ma loko lok marac i kom Wod pa dano gibiweko balle; ento ŋat ma yeto Cwiny Maleŋ pe gibiweko balle. Ka giterowu i nyim kacokke ki i nyim luloc ki wegi twer, pe wubed ka tamo kit ma myero wulok kwede, nyo ni wubigamo niŋniŋ, nyo ni kit lok aŋo ma wubiloko. Pien Cwiny Maleŋ bipwonyowu i cawa meno i gin ma myero wuwaci.” Ŋat acel i kin lwak owaco bot Yecu ni, “Lapwony, wac bot omera wek wapok ginaleya kwede.” Ento Yecu ogamo doge ni, “Nyeri, aŋa ma oketa me bedo laŋolkop ki lapok jamiwu?” Owaco botgi ni, “Wunen, wugwokke i paro lim; pien kwo pa dano pe cuŋ i wel lim mapol ma en tye kwede.” Obolo botgi carolok ni, “Yam tye dano mo ma lalonyo ma cam ocek madwoŋ i potone. Dano-nu opennye kekene ki i cwinye ni, ‘Abitimo aŋo, pien pe atye ki ka onyo bella?’ Owaco ni ‘Abitimo kit man: abimuko derona ducu, abigoyo mukene maditone, abionyo bella ki jamina ducu i igi. Abiwaco ki cwinya ni, Cwinya, itye ki jami mapol ma birommi pi mwaka mapol; ywe, cam, mati, bed ki yomcwiny.’ Ento Lubaŋa owacce ni, ‘In lamiŋ! I dyewor ma tin gibikwanyo kwoni woko ki boti; jami ma iyubo-ni bibedo pa aŋa ce?’ Tye kit meno ŋat ma kano lonyo pire kene, kun pe tye ki lonyo bot Lubaŋa.” Yecu owaco bot lupwonnyene ni, “Pi meno awaco botwu ni, pe wubed ki tam mapol pi kwowu, ni wubicamo aŋo; nyo pi komwu, ni wubiruko aŋo. Pien kwo pire tek kato cam, kom pire tek kato ginaruka. Koŋ wupar mono pi agak; pe gicoyo kodi, dok bene pe gikayo, pe gitye ki dula kadi dero, ento Lubaŋa pitogi. Wun pe piwu tek kato pi winyo? Aŋa i kinwu ma twero medo mwaka acel i kom kwone pi bedo ki tam mapol? Ka gin manok macalo man timone loyowu, piŋo wubedo ki tam mapol pi lok mukene? Koŋ wutam pi lega me tim, kit ma gidoŋo kwede; pe giwiyo uci, dok bene pe gicweyo boŋo; pud amedde ki waco botwu ni, kadi bed Solomon yam orukke ki deyone ducu, ento pe orukke macalo mo acel i kingi. Ka ce Lubaŋa ruko lum ma i tim kit meno, ma bedo tye pi nino ma tin keken, ento diki inoŋo gibolo woko i keno, ci en pe birukowu makato, wun jo ma niyewu nok? Pe wuyeny gin ma wubicamo, nyo gin ma wubimato; cwinywu pe obed ka tamo lok mapol. Pien rok ducu ma i wi lobo yenyo jami magi; Wonwu ma tye i polo ŋeyo ni wumitogi. Ento ma ka meno, wuket cwinywu i kom kerre, ci jami magi ducu gibimedo botwu. “Pe wulwor, wun romi manok, pien Wonwu oye atika me miyo botwu ker. Wucat jamiwu, wukony ki lucan; wukwo kicaa lim ma pe ti, wukan lonyo ma pe tum i polo, ka ma lakwo pe o iye, dok nyenye pe balo. Pien ka ma lonyowu tye iye, cwinywu bene bedo iye. “Wubed ma wutweyo pyerwu, kun tarawu lyel; wubed macalo jo ma kuro laditgi ka bidwogo nia ki i karama me nyom, wek giyabbe doggola oyotoyot ka en obino, odwoŋo. Tye ki gum lutic meno ma laditgi ka odwogo noŋo peya gunino. Ada awaco botwuni, en bitweyo pyere kene, bimiyo gibedo i dog cam, ci bibino, cako miyogi cam. Ka obino cwiny dyewor nyo okogweno, kun onoŋogi kit meno, lutic meno gitye ki gum. Ento myero wuŋe man ni, Kono nene won ot ŋeyo cawa ma lakwo bibino iye kono okiyo ma pe oweko dano oturo ode. Pi meno, wun wubed ma wuyubbe pien Wod pa dano bibino i cawa ma pe wutamo.” Petero openyo ni, “Rwot, ibolo carolok man botwa keken, nyo bot dano ducu?” Rwot ogamo ni, “Aŋa ma lagwok-ot ma lagen dok ma laryeko, ma laditte biweko dano ducu ma bedo i ode i te locce, wek opok botgi camgi i kare ma mitte? Latic meno tye ki gum, ma laditte ka odwogo binoŋe kun tye ka tiyo ticce meno. Ada awaco botwu ni, ladit-tu bimiye twero me loyo jamine woko ducu. Ento ka litic meno oloko kekene ni, ‘Laditta doŋ ogalle ka bino’, ci cako goyo lutic ma co ki ma mon, kun camo, mato, dok mer, ladit pa latic meno bidwogo i nino ma en pe tamo pi dwogone, dok i cawa ma en pe ŋeyo; bipwode, bikete i kin jo ma pe genne. Latic meno ma oŋeyo gin ma laditte mito, ento pe oyubbe iye, dok pe olubo gin ma laditte mito, gibipwode matek twatwal. Ento ŋat ma pe oŋeyo, ce otiyo gin ma twero miyo gipwode pire, gibipwode manok. Dano ma gimiye madwoŋ, gibimito madwoŋ ki bote; dok ŋat ma gikano jami mapol bote, gibipenye mapol makato. “Abino ka cwinyo mac i lobo; kono doŋ omoko, kono ber! Atye ki batija ma myero abatija kwede; kit ma aridde kwede nio ka ocobbe! Wun wutamo ni abino ka kelo kuc i lobo? Atito botwu ni pe; kono apokapoka. Cakke tin jo abic ma i ot acel gibibedo kun gipokke; jo adek bikwero jo aryo, jo aryo bikwero jo adek. Won latin bipokke woko ki latinne, latin bene bipokke woko ki wonne; mego bipokke ki nyare, nyako bipokke woko ki minne; dayo bipokke woko ki ci-wode, ki ci-wod bene bipokke woko ki daane.” Yecu dok owaco bot lwak ni, “Ka wuneno pol otiŋŋe tuŋ potoceŋ, oyotoyot wuwaco ni, ‘Kot koni cwer’; ci cwer bene. Dok ka wuneno yamo kodo ki i but piny tuŋ acuc, wun wuwaco ni, ‘Piny bibedo lyet matek’; ci timme bene. Wun lubuta! Wuŋeyo poko kin gin ma nen i lobo ki i polo; piŋo pe wuŋeyo poko kin lanyut me kare man? “Piŋo pe wuŋolo gin ma tye atir piwu kenwu? Ka icito bot laŋolkop kun inywako yo ki ŋat ma doti, tem matek me yubo lok kwede ma kun pud wutye i yo, wek pe oteri i nyim laŋolkop, laŋolkop owek miyi bot askari, askari owek teri i mabuc. Atitti ni, pe ibia ki kunnu nio ka iculo ducu ma wi cente mo pe orem.” I kare meno onoŋo tye jo mogo kunnu ma gutitte pi Lugalilaya mogo ma yam Pilato orubo remogi kigitumgi. En odok iye botgi ni, “Wutamo ni Lugalilaya meno gin lubalo makato Lugalilaya mukene ducu, ma omiyo guneno can kit meno-ni? Atito botwu ni, pe; ento ka pe wuŋut, ci wun ducu wubito kit meno. Nyo jo apar wiye aboro meno ma yam ot ma wiye bor opoto i komgi onekogi i Ciloam, wutamo ni gin onoŋo gutimo bal makato jo mukene ducu ma bedo i Jerucalem? Atito botwu ni, pe; ento ka pe wuŋut, ci wun ducu wubito kit meno.” Yecu obolo carolok ni, “Yam tye dano mo ma onoŋo tye ki oduro ma gipito i poto olokke. En obino kun yenyo nyige, ento pe onoŋo. Owaco bot lapur ni, ‘Nen, koni doŋ odoko mwaka adek kun abino, ayenyo nyig oduro man, pe anoŋo. Toŋ woko; piŋo balo ŋom nono?’ Lapur odokke iye ni, ‘Ladit, koŋ iwek obed pi mwaka man doki, nio ka abako ŋom i tere, aonyo iye cet dyaŋ mutwo. Ka binyak i mwaka ma bino-ni, ci ber; ento ka pe, ci ibitoŋo giri.’ ” Yam onoŋo Yecu tye ka pwony i kacokke mo i ceŋ cabit. Dako mo onoŋo tye kunnu ma tye ki cen ma okelo goro i kome pi mwaka apar wiye aboro; onoŋo doŋ ogome woko, ma pe twero tirre. Ka Yecu onene, olwoŋe, owacce ni, “Dako, gigonyi woko i kom goroni.” Oketo ciŋe i kome; cutcut dako-nu otirre, ci opako Lubaŋa. Ento kiniga omako ladit me kacokke, pien Yecu ocaŋo dano i ceŋ cabit. Owaco bot lwak ni, “Tye nino abicel ma myero giti iye tic; wubin i nino meno wek gicaŋwu, pe i ceŋ cabit.” Rwot odokke iye ni, “Wun lubuta! Ŋat acel acel ki i kinwu pe gonyo twonne nyo kanane ki i ka-camgi, ci tero i pii i ceŋ cabit. Dako man, ma en nya pa Abraim,, ma ceŋ Catan otweye pi mwaka apar wiye aboro kulu, pe myero gigonye ki i twec man i ceŋ cabit?” I kare ma Yecu oloko lok man, ci lewic omako lukworre ducu; lwak ducu cwinygi obedo yom pi tic me deyo ducu ma en otiyo. Pi meno en owaco ni, “Ker pa Lubaŋa rom ki gin aŋo? Abiporo ki gin aŋo? Rom ki kodi dek karadali ma dano mo okwanyo, ocoyo i potone; ci odoŋo, odoko yat madit, winyo me polo gibino gigero odigi i jaŋe.” Dok owaco ni, “Abiporo ker pa Lubaŋa ki gin aŋo? Rom ki tobi ma dako mo okwanyo, orubo ki moko mugati ma romo adita adek, nio ka moko ducu oyenyo, okwot.” Yecu omedde ki wotte i kin gaŋi madito ki matino, kun pwonyo, dok kwede tuŋ Jerucalem. Ŋat mo openye ni, “Jo manok aye bilarre?” Yecu owaco botgi ni, “Wuket tek wek wudony ki i doggola madiŋ; pien awaco botwu ni, jo mapol gibitemo donyo, ento pe gibitwero. Ka won ot doŋ oa malo ocego doggola, wun wubicuŋ ki woko wudwoŋo doggola kun wuwaco ni, ‘Ladit, yab botwa doggola ba!’ En bidok iye botwu ni, ‘An pe aŋeyo ka ma wua iye.’ Ci wun wubiwaco ni, ‘Yam wacamo dok wamato kacel kwedi, dok bene ipwonyo dano i dye gaŋwa.’ Ento en biwaco botwu ni, ‘Awaco botwu ni, pe aŋeyo ka ma wua iye; wua woko ki i nyima, wun lutim maraco ducu!’ Kunnu wubikok, wubikayo lakwu, ka wuneno Abraim ki Icaka ki Yakobo ki lunebi ducu kun gitye i ker pa Lubaŋa, ento wun kikomwu gibolowu woko. Dano gibibino kun gia ki tuŋ wokceŋ, ki tuŋ potoceŋ, ki yo tuŋ acam, ki tuŋ yo acuc, gibibedo piny i dog cam i ker pa Lubaŋa. Nen, jo mogo ma lacen gibibedo meati, ki jo mogo meati gibibedo me lacen.” I cawa meno luparicayo mogo gubino, guwaco bot Yecu ni, “Cit woko ki kany, pien Kerode mito neki.” Yecu odok iye botgi ni, “Wucit, wuwac bot too can ni, ‘Nen, abiryemo cen dok abicaŋo dano tin ki diki, i nino me adekke abicobone. Kadi bed kit meno, myero amedde gira ki wotta, tin ki diki ki diki maca; pien lanebi pe myero oto ka mukene ma pe i Jerucalem.’ Jerucalem, Jerucalem, in ma ineko lunebi, ma icelo dano ma gioro boti woko ki got, tyen adi ma nene amito coko litinoni woko, macalo min gweno coko litinone i te bwome, ento wun pe wuye giwu! Nen, doŋ gitenyo otwu botwu. Atito botwu ni, pe wubinena nio ka wubiwacci, ‘Gipwo ŋat ma bino i nyiŋ Rwot.’ ” I ceŋ cabit mo acel, ka Yecu ocito ka cam i ot pa laloc mo ma Laparicayo, gubedo ka kiye matek. Onoŋo tye i nyime dano mo ma twoyo two akwota kom. Yecu openyo lupwony-cik ki Luparicayo ni, “Cik ye ni gicaŋ dano i ceŋ cabit, nyo pe?” Ento guliŋ aliŋa. Yecu omako latwoni, ci ocaŋe, ocike ni ocit gire. Openyogi ni, “Aŋa i kinwu ma ka tye ki kanane nyo twonne ka opoto i waŋ it matut ci pe biywaye woko cutcut i ceŋ cabit?” Dok i lok meno oloyogi woko. Ka oneno kit ma dano ma gilwoŋogi giyero ki kabedo mabeco, ci obolo botgi carolok ni, “Ka gilwoŋi i karama me nyom, pe icibed i kabedo maber; gwok nyo gilwoŋo bene dano madit makati, ci lalwoŋ wun aryo ducu bibino, biwaco ni, ‘Wek kabedo bot dano man.’ Ibidok i kabedo mapiny ki lewic madwoŋ. Ento ka gilwoŋi, cit ibed i kabedo mapiny, wek ka dano ma olwoŋi obino en biwacci ni, ‘Larema, nyik i kom mamalo’, ci ibibedo ki deyo i nyim dano ducu ma wubedo kwedgi i dog cam. Pien ŋat ma kette kene ni edit, gibidwoke piny, ŋat ma mwolle kene gibimiye doko dit.” Owaco bene bot dano ma olwoŋe ni, “Ka ilwoŋo dano i cam me dyeceŋ nyo me otyeno, pe ilwoŋ luremi, nyo omegini, nyo watti, nyo lulonyo ma bedo cok ka ŋeti; wek gin bene guwek lwoŋi, wek gucul waŋ lwoŋoni. Ento ka itedo karama, lwoŋ lucan, luŋolo, jo ma komo, ki kutowaŋ, ci ibibedo ki gum, pien pe gitwero culo waŋ lwoŋoni. Culi bibedo i kare ma jo ma kitgi atir bicer iye.” Ka ŋat acel ma gubedo kwede i dog cam owinyo lok man, owaco ni, “Tye ki gum dano ma bicamo kwon i ker pa Lubaŋa!” Ento Yecu odokke iye ni, “Dano mo yam otedo karama madit, olwoŋo iye jo mapol. Ka kare me karama oromo, ci en ooro laticce ka poyo wi jo ma gilwoŋogi ni, ‘Wubin, pien doŋ giyubo jami ducu.’ Ento gin ducu gucako bako doggi ni gitim kica botgi. Ŋat mukwoŋo owacce ni ‘Awilo poto, myero acit ka nenone alegi itima kic.’ Dano me aryo owaco ni, ‘Awilo twoni apar me pur, acito ka ŋiyogi, alegi itima kica.’ Ŋat mukene owaco ni, ‘Pud anyomo dako anyoma nyen, pi meno pe atwero bino.’ Latic-cu odwogo otito bot laditte kit meno. Kiniga omako won ot, owaco ni, ‘Cit oyotoyot i waŋayo, ki i kin gaŋ, icikel lucan, luŋolo, lutowaŋ ki jo ma komo.’ Ci latic owaco ni, ‘Ladit, watimo gin ma iciko, ento kabedo gire pud tye.’ Ladit owaco bot laticce-nu ni, ‘Cit i gudo madito ki i ŋet yo, icuk dano ki tek wek gudony i ot, wek odaa opoŋ. Pien atito botwu ni, pe tye ŋatti mo i kin jo ma yam gilwoŋogi ma bibilo karamana.’ ” Lwak mapol guwoto kacel ki Yecu, ci Yecu olokke botgi owaco botgi ni, “Ka ŋat mo obino bota, ma kun pe okwero wonne ki minne, dakone ki litinone, omegine ki nyimegine, kadi wa kwone kikome, pe twero bedo lapwonynyena. Ŋat ma pe tiŋo yatariyane, kun luba, pe twero bedo lapwonnyena. Pien aŋa i kinwu ka mito gero ot ma wiye bor, ci pe koŋ kwoŋo bedo piny ka kwano wel lim ma mitte, ka ce etye kwede ma eromo tyekone? Ka pe kumeno, miyo ka ocibo guti, ma tyekone oloye woko, dano ducu ma gibineno gibicako ŋale, kun giwaco ni, ‘Dano man ocako gedo, ento tyekone oloye woko.’ Nyo kabaka mene, ma oecito i mony ka lweny ki kabaka mukene, pe koŋ bedo piny poro lok, ka ce etwero tero dano alip apar me romo ki jo alip pyeraryo? Ka pe kumeno, en cwalo kwena ma kabaka ca pud tye ka mabor, pi ribbe kwede ki kuc. Kit meno, dano ducu ma i kinwu ma iye pe twero cayo gin ducu ma etye kwede, pe twero bedo lapwonnyena. “Kado ber; ento ka doŋ odoko bot gibitimo niŋniŋ wek odok mit? Pe doŋ ber me aketa i poto, dano gibolo woko ata. Ŋat ma tye ki it me winyo lok, owiny.” Lujog-mucoro ki lubalo onoŋo yam ginyiko cok ka winyo lok pa Yecu. Luparicayo ki lupwony-cik guŋur kun giwaco ni, “Dano man jolo lubalo dok camo kwedgi.” Omiyo Yecu obolo botgi carolok man ni, “Aŋa i kinwu ma tye ki romi miya acel, ka ŋat acel i kingi orwenyo, pe biweko romi pyeraboŋwen wiye aboŋwen i olet, ci cito ka yenyo en murwenyo-ni, nio waŋ ma onoŋe? Ka onoŋe, ci bolo i wi gwoke, kun cwinye yom. Ka oo paco, lwoŋo lureme ki luwote kacel, ci waco botgi ni, ‘Cwinywu obed yom kacel kweda, pien doŋ anoŋo romona ma yam orwenyo-ni.’ Kit meno atito botwu ni, bibedo yomcwiny madit twatwal i wi polo i kom labalo acel ma oŋut, makato i kom jo pyeraboŋwen wiye aboŋwen ma kitgi atir ma pe mito ŋut. “Nyo dako mene, ma tye ki ciliŋ apar, ka ciliŋ acel orwenyo pe bicwinyo mac tara, ci yweyo ot kun yenyo matek nio waŋ ma onoŋo? Ka doŋ onoŋo, ci lwoŋo lureme ki luwote kacel, kun waco botgi ni, ‘Cwinywu obed yom kacel kweda, pien doŋ anoŋo ciliŋ-ŋa ma onoŋo orwenyo-ni.’ Kit meno atito botwu ni, bibedo yomcwiny i nyim lumalaika pa Lubaŋa i kom labalo acel ma oŋut.” Dok owaco ni, “Yam tye dano mo ma tye ki awobene aryo. Matidine owaco bot wonne ni, ‘Aba, miya dul lim ma ka mera.’ Wongi opoko limme i kingi. Lacen ka nino okato manoknok, awobi matidi-ni ocoko jamine ducu, ocako wotte me cito i lobo mabor; obalo limme kunnu pi bedo me carocaro. Ka limme doŋ otum ducu, ci kec laparanat matek opoto i lobo meno, awobi-nu ocako mal ata. Ocito odak bot ŋat mo ma i lobo meno; dano nu ocwale i olette ka kwayo opego. Iye oparo yeŋ ki pok cam ma opego camo; pe tye ŋat mo ma omiye gin mo. Ento ka oniaŋ pire kene, ci owaco ni, ‘Lutic pa wora tye adi ma gicamo kwon loyogi, ento an kono ato kec kany! Abia, acito bot wora, abiwacce ni, “Aba, doŋ abalo bot polo ki i nyimi; doŋ pe amyero gilwoŋa ni an a wodi; loka abed macalo ŋat acel i kin liticci.” ’ Ci oa obino bot wonne. Ento ka onoŋo pud tye cen ka mabor, wonne onene. Kica omake i kome, oriŋo okwako ŋute, onoto leme. Wode owacce ni, ‘Aba, doŋ abalo bot polo ki i nyimi, pe doŋ amyero gilwoŋa ni an a wodi.’ Ento wonne owaco bot luticce ni, ‘Wukel jor maber makato ducu oyot, wuruk i kome; wurwak agit i lwet ciŋe, ki war i tyene. Wukel bene wod twon mucwe, wuneki, wek wacamu, wabed ki yomcwiny; pien latinna-ni yam oto, koni doŋ kwo; yam orwenyo, doŋ ginoŋe.’ Gucako bedo ki yomcwiny. “Wode madit onoŋo tye i poto; ka dwogo ma onyiko cok ki ot, owinyo wer ki myel. Olwoŋo ŋat acel i kin lutic, openye ni, ‘Man kono gin aŋo ma tye ka timme-ni?’ Latic-cu odokke iye ni, ‘Omeru doŋ odwogo, woru onekke wod twon mucwe, pien ogame ma kome yot kun kwo.’ Ento kiniga omake, okwero donyo i ot. Wonne okatti woko obako doge bote, ento en odokke iye ni, ‘Nen, pi mwaka magi mapol ata an atiyo boti, ma naka yam peya akwero winyo cikki, ento peya imiya kadi ma latin dyel mamwa, wek cwinya obed yom ki lurema. Ento latinni man obino ma olanyo limmi ducu i kom mon ma lucoco, in inekke wod twon mucwe!’ Wonne ogamo doge ni, ‘Latinna, in nino ducu itye kweda, jamina ducu meri. Ber wacam kun wabedo ki yomcwiny, pien omeruni yam oto, koni doŋ kwo, yam orwenyo, doŋ ginoŋe.’ ” Yecu owaco bot lupwonnyene ni, “Yam tye ŋat mo ma lalonyo, ma tye ki lagwok-jamine. Gidoto danonu bote ni tye ka lanyo jamine. Olwoŋe, openye ni, ‘Lok aŋo mono ma awinyo i komi-ni? Kella wel jami ma ikano, pien pe dok itwero bedo lagwok-jami.’ Lagwok-jamine oloko kekene ni, ‘Abitimo gin aŋo? Pien laditta mito kwanya woko ki i tic me gwoko jami. Pe atek ma aromo pur, lewic bene maka ka lego lim alega. Aŋeyo gin ma abitimo, ka giryema woko ki i tic me gwoko jami, wek dano gujola i odigi.’ Olwoŋo lubanya pa laditte ki acel acel, owaco bot dano mukwoŋo ni, ‘Wel banya adi pa laditta ma tye boti?’ En odokke iye ni, ‘Moo jeituni ma romo agulu miya acel.’ Owacce ni, ‘Kwany waraga banyani, ibed piny oyotoyot, ico pyerabic.’ Lacen openyo ŋat mukene ni, ‘In kono itye ki wel banya adi?’ En ogamo ni, ‘Ŋano ma romo dwoŋo miya acel.’ Owacce ni, ‘Kwany waraga banyani, ico pyeraboro.’ Laditte opwoyo lagwok-jami ma pe lagen, pien otiyo ki ryeko; pien dano me lobo man giryek i yalwakgi, makato dano me ceŋ. Atito botwu ni, wumak lurem pi tic ki lim ma pe atir, wek ka bitum, gijolwu i kabedo ma bedo matwal. “Ŋat ma lagen i kom jami matidi mo, bibedo lagen bene i kom jami madwoŋ; ŋat ma pe lagen i kom jami matidi mo, pe bibedo lagen bene i kom jami madwoŋ. Doŋ ka yam pe wubedo lugen i kom lim ma pe atir, aŋa ma bimiyowu lonyo me ada? Ka yam pe wubedo lugen i kom jami pa dano mukene, aŋa ma bimiyowu jamiwu kikome? Pe tye latic mo ma twero tiyo ki rwodi aryo; pien bikwero ŋat acel, bimaro ŋat mukene, nyo bimoko i kom ŋat acel, bicayo ŋat mukene. Pe itwero tic pi Lubaŋa ka dok pi lim bene.” Luparicayo ma yam lumar lim guwinyo lok man ducu, ci gunyware. Ento Yecu owaco botgi ni, “Wun aye jo ma nyuto kit ma atirwu bot dano, ento Lubaŋa ŋeyo cwinywu; pien gin ma dano dworo, en aye gin me kwer i nyim Lubaŋa. “Cik ki lunebi obedo tye nio wa i kare pa Jon; cakke i kare meno gitito lok me kwena maber i kom ker pa Lubaŋa, dano ducu gitye ka donyo iye ki tek. Ento bedo yot bot polo ki lobo me tum woko, makato ton acel me cik me balle. “Dano ducu ma oryemo dakone, ka dok onyomo mukene otimo abor, ki ŋat ma onyomo dako ma cware oryemo bene otimo abor. “Yam tye dano mo ma lalonyo ma ruko boŋo ma lamar lamar ki kanyi maber me boŋo camanini kun camo cam me wel madwoŋ nino ducu. I dog gaŋŋe lacan mo onoŋo buto iye, nyiŋe Lajaro, ma kome orwato bur, kun iye paro yeŋo ki gin ma oo piny ki i wi meja pa lalonyo-nu; gwogi bene onoŋo gibino ginaŋo waŋ burre. Ka lacan oto, ci lumalaika gutiŋe, gutere i kor Abraim. Lalonyo bene oto, ci giyike woko. Oilo waŋe ki i Lyel kun tye ki can, oneno Abraim tye ka mabor kun Lajaro ojeŋŋe i kore. Odaŋŋe ni, ‘Wora Abraim, tima kica, cwal Lajaro olut lwet ciŋe i pii, okwe ki leba, pien atye ki arem madwoŋ i mac man.’ Ento Abraim odokke iye ni, ‘Woda, po ni, i kare me kwoni gimiyi gin mabeco, ki Lajaro kit meno gimiye gin maraco; ento koni doŋ gikweyo cwinye kany, in kono itye ki arem. Dok bene i kom lok man ducu, i kin wan ki wun giketo iye loŋo matut, wek ka jo ma gimito ŋolo nia ki kany, me bino botwu, pe otwerre, wek ŋat mo bene pe oŋol nia ki kunnu me bino botwa kany.’ En owaco ni, ‘Doŋ alegi ba, wora, ore i ot pa abana, pien atye ki omegina abic, wek en ocitit botgi, gin bene guwek bino i kabedo man me can.’ Ento Abraim odokke iye ni, ‘Gitye ki Moses ki lunebi; wek guwiny lokgi.’ En owaco ni, ‘Pe, wora Abraim; ento ka ŋat mo i kin jo muto ocito botgi, ci gibiŋut.’ Abraim owacce ni, ‘Ka pe giwinyo lok pa Moses ki lunebi, ci kadi bed ŋat mo oa ki i kin jo muto bene, pe gibiye lokke.’ ” Yecu owaco bot lupwonnyene ni, “Gin ma miyo dano poto i bal pe bigeŋŋe; ento bineno can ŋat ma kelo gin ma miyo dano poto i bal! Kono obedo ber bot dano meno ka gitweyo kidi rego i ŋute, gibolo kwede i nam, kato ma en weko ŋat acel i kin litino matino magi poto i bal. Wugwokke kenwu; ka omeru obalo, juke, ka oŋut, ci timme kica. Ka otimo bal i komi tyen abiro i nino acel, ce olokke boti tyen abiro, kun legi ni, ‘Aŋut,’ time kica.” Lukwena guwaco bot Rwot ni, “Med niyewa!” Rwot ogamo ni, “Kono yam wutye ki niye macalo nyig kodi dek karadali, kono wuwaco ki yat man ni, ‘Putte keni, ipitte i dye nam,’ kono owinyo dogwu. “Aŋa i kinwu ma tye ki laticce ma puro ki kweri dyaŋ nyo kwayo romi, ma ka odwogo ki i poto ci wacce ni, ‘Bin oyotoyot ibed piny ka cam’? Pe koŋ en biwacce ni, ‘Yubba cam me otyeno, itwe pyeri ikella cam, nio ka an acamo, amato, lacen in ibicamo ibimato’? En pwoyo latic-cu pien olubo lok ma gicike kwede? Pe gire. Wun bene kit meno, ka wutyeko tiyo gin ducu ma gicikowu, myero wuwac ni, ‘Wan lutic ma pe konyo gin mo; watiyo gin ma myero keken.’ ” Ka onoŋo Yecu oecito Jerucalem, ci owok ki i waŋ apokki me Camaria ki Galilaya. Ka odonyo i paco mo, ci ludobo guromo kwede, kun gucuŋ ka mabor, gudaŋŋe ni, “Yecu, Ladit, timwa kica.” Yecu onenogi, owaco botgi ni, “Wucit wunyutte kenwu bot ajwagi pa Lubaŋa.” Man pud gitye ka cito, komgi olony. Ŋat acel i kingi ka oneno ni ecaŋ woko, ci odwogo cen kun pako Lubaŋa ki dwan maloŋo; oryebbe piny ka tyen Yecu, kun pwoye. En onoŋo Lacamaria. Yecu openyo ni, “Yam pe gilonyo dano apar? Jo aboŋwen kono gitye kwene? Pe tye ŋat mo i kingi ma odwogo cen ka pako Lubaŋa, ento kono larok man keken?” Owacce ni, “A, icit giri, niyeni ocaŋi.” Luparicayo gupenyo Yecu ni, “Ker pa Lubaŋa bibino awene?” En odok iye botgi ni, “Ker pe Lubaŋa pe bibino ki lanyut ma gineno. Pe gibiwaco botwu ni, ‘Nen, en ene!’ nyo ni, ‘En ca!’ pien nen, ker pa Lubaŋa doŋ tye i kinwu.” Owaco bot lupwonnyene ni, “Kare bibino ma wubiparo pi neno nino acel mo pa Wod pa dano, ento pe wubineno. Gibiwaco botwu ni, ‘Nen, en ene!’ nyo ni, ‘Nen, en ca!’ Pe wucit iye, pe wulubgi. Pien macalo lutkot wil, ci menyo but lobo tuŋcel nio tuŋcel, Wod pa dano bene bibedo kit meno i ninone. Ento myero koŋ okany can madwoŋ, kun yalwak me kare man gikwere. Macalo yam otimme i kare pa Nua, bitimme kit meno bene i kare pa Wod pa dano. Yam gicamo, gimato, awobegi ki anyira ginyomme, nio i nino ma Nua odonyo kwede i yeya, pii aluka ocorre otyekogi ducu. Kit meno bene i kare pa Lot, onoŋo gicamo, gimato, giwilo jami, gicato jami, gipito ginapita, gigero odi; ento i nino ma Lot oa woko ki i Codom mac ki gweŋ calfa ma mac oliyo ocwer ki i polo, otyekogi ducu. Bibedo kit meno i kare ma gibinyuto iye Wod pa dano. I nino-nu, ŋat ma tye i wi ot kun jamine tye i ot, pe myero olor piny ka cokogi; kit meno bene ŋat ma tye i poto pe myero odwog paco. Wupo mono i kom dako pa Lot. Ŋat ma mito laro kwone birwenyone, ento ŋat ma rwenyo kwone, bigwoko. Atittiwu ni,, i dyewor meno co aryo bibuto wi kitanda acel, gibikwanyo ŋat acel, gibiweko ŋat acel doŋ. Mon aryo gibibedo ka rego kacel; gibikwanyo ŋat acel, gibiweko ŋat mukene doŋ. Co aryo bibedo i poto, gibikwanyo ŋat acel, gibiweko ŋat acel doŋ.” Gupenye ni, “Kwene, Rwot?” En owaco botgi ni, “Ka ma kom dano muto tye iye, acut bene gicokke kunnu.” Obolo botgi carolok ma pwonyogi ni myero guleg jwijwi, guwek ol. Owaco botgi ni, “Yam tye laŋolkop i gaŋ mo, ma pe lworo Lubaŋa kadi woro dano. I gaŋ meno yam tye iye dato mo ma bino bote jwijwi kun wacce ni, ‘Cul kworra i kom lukworra.’ Tyen mapol laŋolkop obedo ka kwero; ento lacen oloko kekene ni, ‘Kadi bed pe alworo Lubaŋa ba, kadi woro dano, ento dato man yela, abiculo kworre; gwok nyo bijonya nono ki bino bota nino ducu.’ ” Rwot owaco ni, “Wuwiny lok ma laŋolkop ma pe kite atir owaco. Lubaŋa pe biculo kwor pa jo ma en oyero, ma gikok bote dyeceŋ ki dyewor? En bigalle ma pe timo gin mo i komgi? Atito botwu ni, en biculo kworgi oyotoyot. Ento Wod pa dano ka bibino, tika binoŋo niye i lobo?” Dok obolo carolok bot jo ma genne kengi, ni kitgi atir, kun gicayo jo mukene. Owaco ni, “Jo aryo yam gucito ka lega i ot pa Lubaŋa, ŋat acel Laparicayo, ŋat mukene lajog-mucoro. Laparicayo ocuŋ, olego gire kene kun waco ni, ‘Lubaŋa, apwoyi pien an pe acalo jo mukene, lubuma, jo ma pe genne, lutim abor, pe bene acalo lajogmucoro man. Ari kec kiryo i cabit acel; amiyo dul me apar me jamina ducu ma alimo.’ Ento lajog-mucoro ocuŋ ka mabor, onoŋo pe mito ilo waŋe malo i plo, ento en odoŋo kore, kun waco ni, ‘Lubaŋa, tima kica, pien an labalo!’ Atito botwu ni, dano man odok i ode kun oloyo kop makato ŋat mukene ca; pien dano ducu ma kette kene ni edit gibidwoke piny, ento ŋat ma mwolle kene gibimiye doko dit.” Gukelo bote litino matino, wek oket ciŋe i komgi; ka lupwonnyene guneno, gujukogi. Ento Yecu olwoŋogi bote, owaco ni, “Wuwek litino gubin bota, pe wugeŋgi; pien ker pa Lubaŋa tye pi jo macalo gin. Ada awaco botwu ni, ŋat ma pe jolo ker pa Lubaŋa macalo latin matidi, pe bidonyo iye.” Laloc mo openye ni, “Lapwony maber, atim gin aŋo wek alim kwo ma pe tum?” Yecu openye ni, “Piŋo ilwoŋa ni aber? Pe tye ŋat mo maber kono Lubaŋa keken. Iŋeyo cik, ni, ‘Pe itim abor, Pe ineki, Pe ibed caden me goba, Wor woru ki meni.’ ” Ogamo ni, “Amako lok magi ducu cakke wa ka tinona.” Ka Yecu owinyo, ci owacce ni, “Pud iweko lok acel; cat jami ducu ma itye kwede, mi limme ki lucan, ci ibibedo ki lwak lonyo ma gikano piri i polo; ka doŋ ibin icak lubo kora.” Ento ka owinyo lok man, okumo, pien onoŋo en lalonyo twatwal. Yecu kun tye ka nene, owaco ni, “Tek mada bot lulonyo me donyo i ker pa Lubaŋa! Pien bedo yot bot kinaga me donyo ki i waŋ libira, kato lalonyo me donyo i ker pa Lubaŋa.” Dano ducu ma guwinyo guwaco ni, “Ci aŋa ma twero larre?” Ento Yecu owaco ni, “Gin man pe twerre ki bot dano, ento ki bot Lubaŋa twerre.” Petero owaco ni, “Nen, wan waweko pacciwa, walubi.” Owaco botgi ni, “Ada, awacciwu ni, pe tye ŋatti mo ma oweko ode, nyo dakone, nyo omegine, nyo lunyodone, nyo litinone, pi ker pa Lubaŋa, ma pe bilimo makato meno tyen mapol i kare man, ki i kare ma bibino anyim en binoŋo kwo ma pe tum.” Yecu otero jone apar wiye aryo i muŋ, owaco botgi ni, “Wunen, waecito Jerucalem, lok ducu ma lunebi gucoyo i kom Wod pa dano bicobbe kakare. Pien gibimiye bot Lurok, gibiŋale, gibitimo aranyi i kome, gibiŋulo laa i kome; gibipwode ki del anino, gibineke, i nino me adekke en bicer.” Ento pe guniaŋ lok ma en owaco; gikano te lok man woko botgi, pe gumedo ki ŋeyo lok ma giwaco botgi. Ka doŋ gunyiko cok ki Jeriko, latowaŋ mo onoŋo obedo piny i ŋet yo kun lego lim. Ka owinyo lwak tye ka mol ki ka ŋete, ci openyo ni, “Meno kono gin aŋo?” Gititte ni, “Yecu me Najaret aye tye ka kato.” Latowaŋ odaŋŋe ni, “Yecu Lakwar Daudi, tima kica ba!” Dano ma onoŋo gutelo nyim Yecu gujuke ni, “Liŋ, nye;” ento en omedde ameda ki daŋŋe ni, “Lakwar Daudi, tima kica!” Yecu ocuŋ, ociko ni gikele bote. Ka obino cok, Yecu openye ni, “Imito atimmi gin aŋo?” Latowaŋ ogamo ni, “Ladit, amito waŋa onen piny.” Yecu owacce ni, “Nen giri piny, niyeni ocaŋi.” Oyotoyot ocako neno piny, ci olubo kor Yecu kun miyo deyo bot Lubaŋa. Dano ducu ka guneno, ci gupako Lubaŋa. Yecu odonyo i Jeriko kun oekato akata. Onoŋo tye kunnu dano mo ma nyiŋe Jakayo, lajogmucoro madit, dok lalonyo bene. Oparo pi neno Yecu, ento pe otwero pi lwak, pien en cek. Oriŋo anyim, oito i wi yat olam wek enen, pien Yecu onoŋo oewok ki i yo-nu. Ka Yecu oo i kabedo-nu, oneno malo, owacce ni, “Jakayo, lor piny oyotoyot; pien tin myero abed i odi.” Jakayo olor oyotoyot, ojole ki yomcwiny. Ka dano ducu guneno, ci guŋur kun giwaco ni, “En odonyo i ot ka bedo welo pa dano ma labalo.” Jakayo oa malo, owaco bot Rwot ni, “Nen, Ladit, abimiyo nucu jamina bot lucan; ka abumo ŋat mo i gin mo, abicule waŋ aŋwen.” Yecu owacce ni, “Tin lar obino i ot man, pien en bene lakwar Abraim. Pien Wod pa dano obino ka yenyo ki ka laro jo ma orwenyo.” Ka pud giwinyo lok man, Yecu omedde ki lokke, obolo botgi carolok, pien onoŋo doŋ cok ki Jerucalem, dok pien onoŋo gitamo ni ker pa Lubaŋa binen cutcut. Pi meno owaco ni, “Yam tye wod ker mo ma oa ocito i lobo mabor ka limo twerone me loc ka doŋ odwog cen. Olwoŋo luticce apar, opoko botgi ciliŋ alip acel, owaco botgi ni, ‘Wucat ki wil nio waŋ ma an adwogo.’ Ento dano me lobone gukwere, gucwalo lukwena i kore ki lok ni, ‘Pe wamito dano man olowa.’ Ka doŋ en odwogo, ma doŋ ocamo ker, ociko ni gilwoŋ lutic ma yam emiyogi lim-mi, wek eŋe wel magoba ma gulimo i cato wilgi. Dano mukwoŋo obino i nyime, owaco ni, ‘Ladit, ciliŋ miya ma imiya-ni omedde iye ciliŋ alip acel mukene.’ Ogamo ni, ‘Ber, in latic maber! Pien yam ibedo lagen i kom jami matidi mo, ibibedo ki twero i kom gaŋi apar.’ Dano me aryone obino, owaco ni, ‘Ladit, ciliŋ miya dok omedde iye ciliŋ miya abic mukene.’ Owacce ni, ‘In bene ibibedo ki twero i kom gaŋi abic.’ Ŋat mukene dok obino, owaco mere ni, ‘Ladit, limmi en, agwoko, aboyo i kitambara, pien onoŋo alwori, pien in i dano magwa; ikwanyo gin ma pe ikano, ikayo ka ma pe icoyo.’ Owacce ni, ‘Abiŋolo kop loyi kun lubo lok ma oa ki i dogi keni, in latic marac! Yam iŋeyo ni an a dano magwa, akwanyo gin ma pe akano, akayo ka ma pe acoyo, piŋo doŋ pe ikano limma i beŋŋe, wek ka adwogo, anoŋ kun acoko limma ki magobane?’ Owaco bot jo ma gucuŋ ka ŋete ni, ‘Wugam ciliŋ miya-ni woko ki bote wumi bot won ciliŋ alip acel-li.’ Guwacce ni, ‘Ladit, en doŋ tye ki ciliŋ alip acel!’ Ci en owacci, ‘Atito botwu ni, dano ducu ma mere tye gibimedo bote gin mo; ento ŋat ma mere pe, gibikwanyo woko ki bote kadi wa gin ma tye bote. Ento lukworra magi, ma gin gukwera ni pe alogi-ni, wukelgi kany, wunekgi ki pala lucwan i nyima.’ ” Ka Yecu otyeko loko lok man, ci owoto anyim kun cito malo i Jerucalem. Ka doŋ onyiko cok ki Betepage ki Betania, i te got ma gilwoŋo Jeituni, Yecu ocako oro jo aryo ki i kin lupwonynyene, kun cikogi ni, “Wucit i gaŋ ma tye i nyimwu. Ka ce wudonyo iye wubinoŋo latin kana ma gitweyo, ma ŋat mo peya oito i wiye; ci wugony, wukel kany. Ka ŋatti mo openyowu ni, ‘Wugonye piŋo?’ wun wubidok iye kit man ni, ‘Rwot aye mito.’ ” Kit meno jo ma giorogi gucito, ci gunoŋo kit macalo Yecu otito botgi-ni. Ka gitye ka gonyo latin kana, wegine gupenyogi ni, “Wugonyo latin kana piŋo?” Gudok iye botgi ni, “Rwot aye mito.” Gukelo latin kana bot Yecu. Ka doŋ gupeto ginarukagi i wiye, ci gicibo Yecu i wiye. Ka en oewoto, gipeto ginarukagi i waŋayo. Ma doŋ onyiko cok ki Jerucalem, i luŋ me got Jeituni, lwak lupwonnyene ducu cwinygi obedo yom, gupako Lubaŋa ki dwan maloŋo pi tic madito ma guneno, kun giwaco ni, “Lubaŋa omi gum i kom Kabaka ma bino i nyiŋ Rwot! Kuc obed i wi polo, ki deyo obed i kabedo ma malo twal!” Luparicayo mogo ma i kin lwak guwacce ni, “Lapwony, juk lupwonnyeni.” Yecu odok iye ni, “Atito botwu ni, ka kono jo-ni guliŋ, godi magi kikomgi kono gudaŋŋe.” Ka doŋ onyiko cok, ma oneno gaŋ, okok pire, kun waco ni, “Tin-ni ka kono iŋeyo lok ma kelo kuc boti, kono ber! Ento koni gikano woko ki boti. Pien kare bibino i komi ma lukworri gibitoro lobo rumi dyere, gibidiri tuŋŋi ki tuŋŋi, gibireti piny, in ki litinoni; pe gibiweko gweŋ mo acel i ii doŋ ma ododde i wi wadi; pien yam pe iŋeyo kare ma gibilimi iye.” Yecu odonyo i ot pa Lubaŋa, ocako ryemo lucat-wil woko ki iye, kun waco botgi ni, “Yam gicoyo ni ‘Oda bibedo ot me lega’; ento wun wuloko odoko boro pa luyak.” Yecu obedo ka pwony i ot pa Lubaŋa nino ducu. Ajwagi madito pa Lubaŋa ki lupwony-cik ki jo madito i kin lwak guyenyo yo me neke; ento pe gunoŋo gin mo ma myero gutim i kome, pien dano ducu guketo cwinygi ka winyo lokke. I nino mo acel ka Yecu tye ka pwonyo dano i ot pa Lubaŋa kun tito lok me kwena maber, ajwagi ki lupwony-cik ki ludoŋo gubino, gupenye ni, “Tit botwa, twer aŋo mumiyo itimo gin magi; nyo aŋa ma omiyoni twero man?” Yecu odok iye botgi ni, “An bene abipenyowu ki peny acel; wudokka iye. Batija pa Jon twerone oa ki i polo nyo ki bot dano?” Guporo lok kekengi kun giwaco ni, “Ka wawacci, ‘Oa ki i polo,’ en bipenyowa ni, ‘Piŋo pe wuye en?’ Ento ka wawaco ni, ‘Oa ki bot dano,’ dano ducu bicelowa ki got; pien dano ducu giye atika ni Jon aye lanebi.” Mumiyo gudok iye bot Yecu ni pe giŋeyo ka ma oa iye. Yecu owaco botgi ni, “An bene pe abitito botwu kit twer mumiyo atiyo lok magi.” Yecu ocako bolo carolok man bot lwak ni, “Yam tye dano mo ma opito olok i potone, ci oweko bot lupur, ocito woko wa i lobo mukene, ori kunnu pi kare malac. Ka kare oromo, ci ooro luticce bot lupur ni myero gumine nyig olok mogo; ento lupur gugoye, guryeme ci odok ki ciŋe nono. En dok ooro latic mukene; gin gugoyo en bene, gutimo tim aranyi i kome, guryeme kwede odok ki ciŋe nono. Dok ooro me adekke; guketo ret i kom man, gucwale woko. Lacen won poto olok owaco ni, ‘Abitimo gin aŋo doŋ? Abioro woda ma amaro; gwok nyo gibiwore.’ Ento ka lupur gunene, guloko kekengi ni, ‘Man aye doŋ lale lim; waneke woko, wek lim ma en bileyo-ni obed mewa.’ Gucwale woko ki i poto olok, guneke. Won poto bitimogi niŋniŋ? En bibino, ci neko lupur meno woko ducu, miyo poto olok bot jo mukene.” Ka guwinyo lok man, guwaco ni, “Pe kumeno!” Ento Yecu ociko waŋe i komgi, owaco ni, “Man kono gin aŋo ma yam gicoyo ni, ‘Got ma lugedo gukwero-ni en aye odoko got madit ma i twok ot’? Dano ducu ma poto i kom got man bitur woko; ento ka got man opoto i kom ŋat mo, binyote woko.” Lupwony-cik ki ajwagi madito pa Lubaŋa gumito make i cawa-nu, ento gulworo lwak; pien guniaŋ ni en obolo carolok man i komgi. Giŋiyo kare maber, ci gioro lurot, ma giporo bedo ni gin jo ma genne, wek gimak lok ma a i doge, wek gimiye i te loc ki twero pa laloyo. Gupenye ni, “Lapwony, waŋeyo ni in iloko dok ipwonyo lok ma tye atir, pe ipoko kin dano, ento ipwonyo yo pa Lubaŋa ki ada. Myero wacul mucoro bot Cecar nyo pe?” Ento en oniaŋ ryekogi, openyogi ni, “Koŋ wunyutta lim ma giculo kwede. Cal ki coc ma tye i kome-ni pa aŋa?” Gugamo ni, “Pa Cecar.” Yecu owaco ni, “Wudwok jami pa Cecar bot Cecar, ki jami pa Lubaŋa wudwok bot Lubaŋa.” Pe gutwero mako lok mo ma oa ki i doge i nyim lwak; ento guuro kit ma en ogamo kwede lok, ci guliŋ aliŋa. Lucadukayo mogo gubino bot Yecu, gin aye jo ma onoŋo giwacci jo muto pe gicer. Gupenye ni, “Lapwony, Moses yam ocoyo botwa ni, ka laco mo oto woko oweko dakone ma pe ki litino, ominne myero olak dako-nu, wek onywal kwede litino ka wi ominne. Yam tye omego abiro; ŋat mukwoŋo onyomo dako, ci oto laboŋo litino; me aryone, ki me adekke bene gulako dako-nu, kit meno gin abiro ducu gubedo ki dako-nu, guto laboŋo litino. Lacen dako-nu bene oto. I kare me cer ki i kin jo muto, dako-nu bibedo dako pa aŋa i kingi? Pien gin co abiro-ni ducu gubedo kwede.” Yecu owaco botgi ni, “Jo me kare man ginyomme; ento jo ma gikwanogi ni myero guo i lobo maca, ki i cer ki i kin jo muto, pe ginyomo, pe gibigero co, pien pe dok gitwero to, doŋ girom ki lumalaika; gin litino pa Lubaŋa, ma gin litino me cer. Ento ni jo muto twero cer, Moses kikome bene onyuto, i dul ma gikwano iye lok i kom caka, ka ma en olwoŋo iye Rwot ni, ‘Lubaŋa pa Abraim, Lubaŋa pa Icaka, ki Lubaŋa pa Yakobo.’ Doŋ Lubaŋa pe Lubaŋa pa jo muto, ento Lubaŋa pa jo makwo; pien dano ducu bedo kwo pire.” Jo mogo i kin lupwony-cik gugamo doge ni, “Lapwony, iwaco kakare.” Pien pe dok gudiyo cwinygi me penye ki lok mo. Ento Yecu openyogi ni, “Giwaco niŋniŋ ni Kricito ma Lubaŋa oyero en lakwar Daudi? Pien Daudi kikome bene owaco i buk me Jabuli ni ‘Rwot owaco bot Rwoda ni, Bed i kom bada malacuc, i kabedo me deyo nio ka abimiyo lukworri doko kom me teno tyeni.’ Kit meno ka ce Daudi yam olwoŋe ni Rwot, ci dok en bedo lakwarre niŋniŋ?” I kare ma lwak ducu winyo lokke, Yecu owaco bot lupwonnyene ni, “Wugwokke i kom lupwony-cik ma gimaro wot ma guruko boŋŋi maboco, dok gimito ni dano gubed ka motogi wa i cuk-gu, gimaro bedo i kom pa wa ludito, ka gitye i kacokke, dok gimaro bedo i kabedo me deyo i karama. Gin gimayo odi pa mon-to, dok gibedo ka lego lega maboco me buta keken. Giŋolo kop madit i wigi makato.” Yecu otiŋo waŋe malo, ci oneno lulonyo kun gibolo motgi i canduk lim i ot pa Lubaŋa. Oneno dato mo ma lacan, ma obolo cente aryo ma rom ki cente abic me kare-ni. Owaco ni, “Adada awaco botwu ni, dato man ma lacan-ni obolo lim madwoŋ makato dano ducu; pien gin ducu gugito but limgi madwoŋ-ŋi aye gubolo, ento en i canne-ni, obolo lim ducu ma tye bote, ma konyo kwone.” Ka onoŋo jo mogo i kin lupwonnyene gubedo ka lok pi ot pa Lubaŋa, kit macalo gideyo kwede ki godi mabeco ki gityer ma gimiyo pire, ci Yecu owaco ni, “Gin magi ducu ma wuneno-ni, kare bibino, ma pe gibiweko got acel mo ma ododde i wi wadi ma pe gibicoro woko piny.” Lupwonnye gupenyo Yecu ni, “Lapwony, man bitimme awene, dok kit gin aŋo ma binyuto ka man doŋ cok timme?” Yecu ogamo ni, “Wugokke, ŋatti mo owek rwenyowu; pien jo mapol gibibino i nyiŋa, ma giwacci, ‘An aye a en!’ dok ni, ‘Kare doŋ onyiko cok!’ Pe wulubgi. Dok ka wubiwinyo pi lweny ki pi arubaruba, pe wubed ki lworo, pien meno koŋ myero otimme, ento agik pe bibino oyotoyot.” Lacen owaco botgi ni, “Rok bilweny ki rok wadi, ker bilweny ki ker wadi; ki oyeŋyeŋ madoŋo biyeŋo lobo, kec laparanat ki two gemo mapatpat bipoto i kabedo mapol; ki gin ma miyo lworo mako dano, ki lanyut madoŋo bene, bia ki i polo. Ento ma peya gin meno ducu otimme, koŋ gibimakowu, gibilibowu, gibiterowu i nyim kacokke, gibitweyowu i mabuc, gibikelowu i nyim luker ki i nyim luloc pi nyiŋa. Man aye bibedo kare botwu me tito lok me caden i koma. Pi meno, wumok i tamwu ni pe wubitamo con kit ma wubidok iye, pien abimiyowu twero me dok ki ryeko, ma ŋat mo i kin lukworwu pe bitwero ette i kome, kadi pyem kwede. Kadi wa lunyodowu ki omegiwu ki wadiwu ki luremwu bene gibidobowu, jo mogo i kinwu gibinekogi; dano ducu bimon kwedwu pi nyiŋa. Ento yer wiwu acel mo pe birwenyo. Ka wudiyo cwinywu, ci wubilaro kwowu. “Ento ka wuneno mony orumo Jerucalem, ci wuŋe ni kare me ketone doŋ onyiko cok. Jo ma tye i Judaya myero guriŋ i wi godi, jo ma tye i gaŋ myero guriŋ woko ki iye, jo ma tye woko i kin paco pe dok gudony i Jerucalem. Pien kare meno bibedo kare me culo kwor, ki cobo lok ducu ma yam gicoyo. Dok mon ma giyac gibineno cam i kare meno, ki mon ma gidoto litino bene! Pien can man madit bipoto i lobo, ki kiniga madwoŋ bipoto i kom jo me rok man. Gibinekogi ki pala lucwan, gibiterogi me bedo opii i kin rok ducu; Lurok gibinyono Jerucalem piny, nio ka kare pa Lurok ocobo kakare. “Lanyut binen i kom ceŋ, i kom dwe ki i kom lakalatwe, rok mapol ma i wi lobo bikumo kun noŋo cwinygi oŋabbe aŋaba pi mor me biamwonyi. Kom dano bimyel ki lworo, ka gibitamo gin ma bipoto i kom lobo; pien twer ducu ma i polo biyeŋŋe. Lacen gibineno Wod pa dano kun bino i wi pol ki tek ki deyo madit. Ka gin magi ocako timme, myero wunen malo, myero wutiŋ wiwu malo, pien kare me kokowu doŋ onyiko cok.” Dok obolo carolok botgi ni, “Koŋ wunen yat oduro, ki yadi mukene ducu; ka doŋ olot, wuneno piwu kenwu, ci wuŋeyo ni oro doŋ cok. Kit meno wun bene, ka wuneno gin magi otimme, myero wuŋe ni ker pa Lubaŋa doŋ onyiko cok. Ada awaco botwu ni, yalwak me kare man pe bitum nio waŋ ma lok magi ducu otimme. Polo ki lobo gibitum, ento lokka pe bitum. “Ento wugwokke kenwu, cwinywu owek doko nwaŋ pi woro cam, ki mero koŋo, ki pi lok me kwo man ma miyo wubedo ki tam mapol, wek nino-nu pe obin oumwu atura macalo akum; pien bibino i kom jo ducu ma bedo i wi lobo ducu. Ento wubed ma waŋwu twolo i kare ducu, kun wulego ni myero wubed ki tek me bwot ki i lok magi ducu ma bitimme, ki cuŋ i nyim Wod pa dano.” Nino ducu onoŋo Yecu pwonyo i ot pa Lubaŋa dyeceŋ, ento dyewor woto buto i wi got ma gilwoŋo got Jeituni. Odiko con dano ducu gibino bote i ot pa Lubaŋa ka winyo lokke. Nino madito me Mugati ma Tobi Pe Iye ma gilwoŋo Kato (Paska) onoŋo onyiko cok. Ajwagi madito pa Lubaŋa ki lupwony-cik gubedo ka yenyo kit yo ma myero gineke kwede; pien onoŋo gilworo lwak. Catan odonyo i cwiny Juda Lakeriot ma en onoŋo dano acel i kin jo apar wiye aryo-ni. Ocito oporo lok ki ajwagi madito pa Lubaŋa ki ludito askari me ot pa Lubaŋa, kit ma myero emiye kwede botgi. Cwinygi obedo yom, gucako cikke me miye lim. Omiyo Juda oye, ci oyenyo kare maber ma myero emiye kwede botgi ma noŋo lwak pe. Nino me Mugati ma Tobi Pe Iye oromo, ma gitumo iye latin romo me Kato. Yecu ooro Petero ki Jon, kun cikogi ni, “Wucit wuyub cam me Kato piwa, wek wacam.” Gupenye ni, “Imito ni waciyub kwene?” Yecu owaco botgi ni, “Nen, ka wudonyo i gaŋ me Jerucalem, ci laco mo birwatte kwedwu kun oyeyo agulu pii; en aye wulub kore wa i ot ma en bidonyo iye, wutit bot won ot ni, ‘Lapwony penyi ni, Ot welo tye kwene, ka ma abicamo iye cam me Kato kacel ki lupwonnyena?’ Ci en binyuto botwu kicika ot malac ma malo ma gipeto, giyubo maber; wuyub kabedo kunnu.” Gucito gunoŋo kit macalo Yecu owaco botgi-ni, guyubo cam me Kato kunnu. Ka cawa oromo, Yecu obedo piny i dog cam, kacel ki lukwena. Yecu owaco botgi ni, “Abedo ka paro mada me camo cam me Kato man kwedwu, ma kun pud peya aneno can; pien awaco botwu ni, pe dok abicamo nio ka ocobo kakare i ker pa Lubaŋa.” Ci otiŋo kikopo, ka doŋ orwoyo owaco ni, “Wumak man, wupok i kinwu; pien awaco botwu ni, nia koni pe dok abimato pig olok nio waŋ ma ker pa Lubaŋa obino.” Omako mugati, ka doŋ opwoyo, ci obaro iye, omiyogi kun wacci, “Man aye koma [ma gimiyo piwu, wutim kuman me po pira.” Kumeno ka gucamo otum otiŋo kikopo, kun wacci, “Kikopo man aye gicikke manyen i remona ma oo piwu.] Ento, nen, ŋat ma bidoba ciŋe tye kacel kweda i dog cam. Pien Wod pa dano cito gire kit macalo yam giciko; ento dano meno ma dobo Wod pa dano bineno can!” Lupwonnye gucako pennye kekengi ni, aŋa i kingi ma bitimo lok man. Pyem bene ocakke i kin lupwonnye ni aŋa i kingi ma gitamo ni bedo ladit. Yecu owaco botgi ni, “Luker pa Lurok gibwoyo lwakgi ki tek, jo ma tye ki twero i komgi gilwoŋogi ni lutim-ber. Ento pe kit meno botwu; ŋat madit i kinwu myero odok macalo ŋat matidi, ki latel-wic myero obed macalo ŋat ma tiyo pi dano. Pien aŋa madit, ŋat ma bedo i dog cam, kece mono ŋat ma kelle cam? Pe ŋat ma bedo i dog cam? Ento an abedo i kinwu macalo ŋat ma tiyo pi dano. “Wun aye jo ma wubedo ka ŋeta jwijwi i kare ducu ma gibedo ka tema. Macalo Wora omiya ker, an bene abimiyowu, wek wucam, wumati i dog mejana i kerra, dok wubed i wi komker kun wuŋolo kop ki kaka apar wiye aryo pa jo Icrael. “Cimon, Cimon, nen Catan otyeko penyo piwu me apyeta macalo bel, ento alego piri ni niyeni pe odok cen. In bene ka doŋ ilokke, myero ijiŋ cwiny utmegini.” Petero owacce ni, “Rwot, doŋ ayubbe me cito kwedi i mabuc ki i to.” Yecu odokke iye ni, “Petero, awacci ni, tin twon gweno pe bikok, nio waŋ ma ikwera tyen adek ni pe iŋeya.” Yecu openyo lupwonnyene ni, “I kare ma yam aorowu laboŋo kicaa lim, nyo opiro, kadi war, gin mo oremowu?” Gugamo ni, “Pe.” Ocikogi ni, “Ento koni, ŋat ma tye ki kicaa lim, myero oter, ki opiro bene kit meno. Ŋat ma pe ki pala lucwan myero ocat kanyine, wek owil kwede, pien awaco botwu ni, ginacoya man myero ocobbe kakare i koma ni, ‘Gikwane kacel ki lubalo’; pien lok ma gicoyo i koma tye ka cobbe kakare.” Guwacce ni, “Rwot, nen, pala lucwan tye kany aryo.” En odok iye botgi ni, “Meno romo.” Yecu okato woko, ocito i wi got Jeituni macalo kite tye; lupwonnye gulubo kore. Ka oo i kabedo meno, ci owaco botgi ni, “Wuleg Lubaŋa, wek pe wudony i abita mo.” Opokke kwedgi ma rom ki ka ma gibayo iye lakidi, ci otumo coŋe piny, olego ni, “Wora, ka imito, kwany kikopo man woko ki bota, ento pe obed macalo an amito; gin ma in imito aye myero otimme.” Lamalaika ma oa ki i polo onen bote kun miye tek. Ka kun onoŋo tye ki kumo twatwal, omedde ki lega matek; omiyo kwok ocorre i kome macalo remo ma ton cwer i ŋom. Ka oa ki ka lega, obino bot lupwonynye, onoŋo gunino woko pi cwercwiny, openyogi ni, “Wunino piŋo? Wua, wuleg Lubaŋa, wek pe wudony i abita mo.” Ka onoŋo Yecu pud tye ka lok, lwak gubino, kun dano ma nyiŋe Juda aye otelo wigi, en ŋat acel i kin jo apar wiye aryo-ni. Onyiko cok bot Yecu wek emote kun enoto leme. Ento Yecu openye ni, “Juda, in idobo Wod pa dano ki noto lem?” Ka jo ma i ŋete guneno gin ma mito timme, ci gupenyo ni, “Rwot, watoŋ dano ki pala lucwan?” Ŋat acel i kingi otoŋo opii pa ajwaka madit pa Lubaŋa, oŋuno ite malacuc woko. Ento Yecu owacci, “Ogik doŋ ki man keken!” Oboŋo ite, ocaŋe. Lacen Yecu owaco bot ajwagi madito pa Lubaŋa ki ludito pa askari me ot pa Lubaŋa, ki ludoŋo ma gubino i kome, ni, “Wubino i koma ki pala lucwan ki odoo-gu me maka macalo wubino i kom layak mo? Yam abedo kwedwu jwijwi i ot pa Lubaŋa, pe wumaka. Ento koni aye karewu ki twero me colpiny.” Ci gumako Yecu, gutere, gukele i ot pa ajwaka madit pa Lubaŋa. Petero olubo kore kun tye ki cen ka mabor. Ka gimoko mac i dyekal, ma gubedo piny kacel, Petero bene obedo piny i kingi. Aŋeca mo onene kun obedo ka ma mac ocaro; ka oŋiye matek, ci owaco ni, “Dano man bene nakanen tye kacel kwede.” Ento Petero okwero woko kun waco ni, “Dako, pe aŋeye gira.” Kare okato manok, ŋat mukene onene, owacci, “In bene i ŋat acel i kingi.” Ento Petero owaco ni, “Nye, an ko!” Ka kare okato ma mito romo cawa acel, ŋat mukene oloko kun moko ni, “Ada, dano man nakanen tye kacel kwede; pien en Lagalilaya.” Ento Petero ogamo ni, “Nye, an akwiya lok ma itye ka wacone-ni.” Cutcut ma pud en waco lok man, twon gweno otugi kok. Rwot olokke oneno Petero. Ci Petero opo lok pa Rwot, kit macalo nene Yecu owacce ni, “Ma noŋo twon gweno peya okok tin, ibikwera woko tyen adek kulu.” Ci okato woko okok ki cwercwiny madwoŋ. Jo ma gumako Yecu gunyware, gugoye; guboyo waŋe woko bene ki kitambara kun gipenye ni, “Ka in lanebi tuci! Aŋa mugoyi?” Guloko lok mukene mapol i kome, kun giyete. Ka piny doŋ oru, ludoŋo pa lwak, kacel ki ajwagi madito pa Lubaŋa ki lupwony-cik, gucokke kacel; gukele i nyim Lukikogi, guwaco ni, “Tit botwa ka ce in aye i Kricito ma Lubaŋa oyero.” Ento Yecu owaco botgi ni, “Ka atito botwu, wun pe wubiye; ka apenyowu wun pe wubidokka iye. Ento nia koni Wod pa dano bibedo piny i kabedo me deyo ka ŋet Lubaŋa Won Twer tuŋ lacuc.” Gin ducu gugamo ni, “Doŋ in i Wod pa Lubaŋa do?” Yecu ogamo ni, “Wun wuwaco ni an a en.” Guwaco ni, “Dok wamito caden me ŋo? Wan doŋ wawinyo piwa kenwa ki i doge kene.” Lwak ducu gutwarre, gutero Yecu i nyim Pilato. Gudote kun giwaco ni, “Dano man wanoŋo tye ka rwenyo rokwa, ogeŋowa ni pe wacul mucoro bot Cecar, kun lwoŋŋe kene ni en Kricito, kabaka.” Pilato openye ni, “In i Kabaka pa Lujudaya bo?” Yecu ogamo ni, “Iwaco kakare gire.” Pilato owaco bot ajwagi madito pa Lubaŋa ki lwak ducu ni, “Pe anoŋo kop marac i kom dano man.” Ento gin gudiye kun giwaco ni, “Dano-nu poyo lwak, kun pwonyo i lobo Judaya ducu, cakke ki i Galilaya nio kwede wa kany.” Ka Pilato owinyo lok man openyo ka gwok nyo Yecu Lagalilaya. Ka oniaŋ ni en tye i te loc pa Kerode, ci ocwale bot Kerode, ma en kikome bene onoŋo tye i Jerucalem i kare-nu. Ka Kerode oneno Yecu, cwinye obedo yom twatwal, pien onoŋo yam con paro pi nene, pien owinyo pire, dok onoŋo geno ni ebineno lanyut mo ma en bitiyo. Omiyo Kerode openyo Yecu ki peny mapolpol; ento Yecu pe omedo ki dok iye lok mo. Ajwagi madito pa Lubaŋa ki lupwony-cik gucuŋ i ŋete kun gidote ki tek. Kerode ki askarine bene guŋale, gunyware; guruke ki boŋo me deyo, gudwoke kwede bot Pilato. Kerode ki Pilato gudoko lurem i nino meno cut, pien yam con onoŋo gimon kekengi.. Pilato olwoŋo ajwagi madito pa Lubaŋa ki luloc ki lwak kacel, owaco botgi ni, “Wun wukelo dano man bota ni en ŋat ma rwenyo lwak, an apenye i nyimwu, ci nen, pe anoŋo kop mo marac i kome i kom lok ducu ma wudote kwede; kadi Kerode bene pe onoŋo, pien Kerode odwoko en botwa. Nen, pe otimo gin mo ma myero gineke pire; pi meno abigoye, ci abigonye. [ I kare me karama, yam mitte ni myero ogony botgi ŋat acel pigi.]” Ento lwak ducu gudaŋŋe lawaŋacel ni, “Tere woko! Gony botwa Baraba!” Baraba kono yam dano ma gitweye i mabuc pi tugo lwak i Jerucalem ki pi nek. Pilato dok oloko botgi, kun mito gonyo Yecu; ento lwak gumedde ki daŋŋe ni “Gure woko i kom yatariya, gure woko i kom yatariya!” Pilato owaco botgi tyen me adekke ni, “Piŋo kaa? Otimo kit gin aŋo marac? An gira pe anoŋo kop mo marac i kome ma myero gineke pire; pi meno abigoye, ci abigonye.” Ento lwak guwo ki daŋŋe kun gidiye ni myero gigure i kom yatariya. Dwangi oloyo. Omiyo Pilato oŋolo kop ni myero gitim Yecu kit macalo gimito. Ogonyo dano ma yam gitweyo i mabuc pi tugo dano ki pi nek, ma lwak gubako doggi bote pire; ento omiyo Yecu botgi wek gutime kit macalo gimito. Ka gitye ka tere doŋ woko, ci gimako Cimon, dano mo me Cirene ma onoŋo donyo i gaŋ kun oa ki i kin paco, gucibo yatariya i kome, wek otiŋ, olub ki kor Yecu. Lwak dano madwoŋ gulube, ki mon mapol ma gikumo kun gikok pire. Ento Yecu olokke botgi owaco ni, “Anyira Jerucalem, pe wukok pira, ento wukok piwu kenwu ki pi litinowu. Pien nen, kare bibino ma gibiwaco ni, ‘Tye ki gum lulur, kiot nyodo ma pe nywal, ki tuno ma pe gidoto!’ Lacen dano biwaco bot godi matino ni, ‘Wupot i komwa’; ki bot godi matino ni, ‘Umwa.’ Pien ka gitimo man ma yat pud dyak, bibedo niŋniŋ ka yat doŋ otwo?” Jo aryo mukene bene, ma lutim maraco, giterogi wek ginekgi kacel kwede. Ka guo i kabedo ma gilwoŋo Cogo Wic, gigure i kom yatariya kunnu, ki lutim maraco, ŋat acel tuŋ lacuc, ŋat acel tuŋ lacam. Yecu owaco ni, “Aba, wayi tim kica botgi, pien pe giŋeyo gin ma gitye ka tiyone.” Gubolo kwir pi poko ginarukane. Lwak gucuŋ kun gineno; ento luloc guŋale kun giwaco ni, “Yam olaro jo mukene, koŋ olarre kene ka en Kricito pa Lubaŋa, ma en oyero!” Askari bene gunyware, gubino gumine koŋo vino mawac, kun giwaco ni, “Ka in i Kabaka pa Lujudaya, larre keni!” I waraga ma giketo ka wiye, gicoyo nukuta me leb Grik, ki me leb Roma, ki me leb Ibru ni, “Man aye Kabaka pa Lujudaya.” Ŋat acel i kin lutim maraco ma giguro kacel kwede ocaye kun waco ni, “In pe i Kricito ma Lubaŋa oyero ce? Larre keni wa ki wan bene!” Ento lawote-ni ojuke kun waco ni, “In pe ilworo Lubaŋa, ma kun giŋolo kop i komi kwede ma rom? Wan giwa giŋolo kop i komwa kakare; pien watye ka limo cul ma myero, pi timwa; ento dano man pe otimo gin mo marac wacel.” Ci owaco ni, “Yecu, po pira ka ibidonyo i kerri.” Yecu odok iye bote ni, “Ada, awacci ni, tin wabibedo kwedi i Paradic.” Ka cawa doŋ mito romo abicel, piny ocido macol i wi lobo ducu nio wa i cawa aboŋwen, kun waŋ ceŋ oumme woko; boŋo kicika me ot pa Lubaŋa obar, dyere opokke aryo. Yecu odaŋŋe ki dwan matek, owaco ni, “Aba, amiyo cwinya i ciŋi!” Ka owaco lok man, ci oto. Ka ladit ma loyo askari oneno gin ma otimme, opako Lubaŋa kun waco ni, “Ada, dano man kara dano ma kite atir!” Lwak ducu ma gucokke ka nene, ka guneno gin ma otimme, gudok paco kun gidoŋo korgi. Lureme ducu ki mon ma yam gubino kwede nia i Galilaya, gucuŋ ki cen kun gineno gin man. I kare-nu onoŋo dano mo ma nyiŋe Yucepu tye kunnu ma oa ki i gaŋ mo pa Lujudaya ma gilwoŋo Arimataya. En onoŋo ŋat acel i kin jo ma bedo i Lukiko, en dano maber, dok kite atir, yam pe ocwako tamgi kadi ki ticgi, ento onoŋo kuro ker pa Lubaŋa. Dano man ocito bot Pilato, olego pi kom Yecu. Okwanye ki i kom yatariya, ci oboye ki boŋo camanini maleŋŋe, ka opyele i lyel ma gikwinyo i got, ka ma peya gipyelo iye kom ŋat mo. Nino-nu onoŋo nino me Yubbe, cabit bene onoŋo doŋ cok cakke. Mon ma yam gubino kwede nia ki i Galilaya, guneno lyelle, ki kit ma gipyelo kwede kome; gudok, guyubo aŋwece ki moo wir. I cabit, guywe kit macalo cik tye. I nino mukwoŋo me cabit, mon gupuk kwarpiny, gubino i wi lyel, kun gikelo aŋwecegi ma guyubo. Gunoŋo ni giloro got woko ki i dog lyel, ento ka gudonyo iye, pe gunoŋo kom Rwot Yecu. Ka onoŋo pud guro lok man, nen, co aryo gucuŋ i ŋetgi ma guruko jor ma ryeny lidaŋdaŋ. Ka komgi oryaŋŋe, ci guryebbe piny, co-nu gupenyogi ni, “Piŋo wuyenyo dano makwo i kin jo muto? [ En pe tye kany, ento ocer woko.] Wupo lok ma yam en owaco botwu i kare ma pud en tye i Galilaya, ni, Wod pa dano myero gimiye i ciŋ lubalo, gigure i kom yatariya, ki cer woko i nino me adekke.” Gupo lokke, ka gua ki i wi lyel gudok, gutito lok man ducu bot jo apar wiye acel ca, ki bot jo mukene ducu. Jo ma yam gutito lok man bot lukwena gin aye Maliam Lamagdala, Joana, ki Maliam min Yakobo, ki mon mukene ma onoŋo tye kwedgi. Lokdgi obedo calo lok miŋo ki bot lukwena, pe guye lokgi. [ Ento Petero oa, oriŋo wa i wi lyel; ka ocuŋ oneno lyel, oneno boŋŋi camanini ma tye kengi pat; odok paco kun uro gin ma otimme.] I nino-nu kikome jo aryo ki i kingi onoŋo nene gicito i paco ma gilwoŋo ni Emau, ma mito romo mairo abiro ki i Jerucalem, kun giboko lok kekengi i kom gin ma otimme. Ka kun giboko lok ma bene gilaro kacel, Yecu kikome onyiko cok, owoto kwedgi. Ento waŋgi oumme woko, pe guŋeye. Owaco botgi ni, “Wularo lok aŋo kekenwu kun wutye ka wot-ti?” Gucuŋ ma waŋgi nen ki can. Ŋat acel i kingi ma nyiŋe Kelopa, odok iye bote ni, “In i welo keni i Jerucalem ce, ma pe iŋeyo lok ma otimme kunnu i kare man?” Yecu openyogi ni “Gin aŋo?” Gudokke iye ni, “Lok i kom Yecu Lanajaret, ma yam obedo lanebi matek i lokke ki i ticce i nyim Lubaŋa, ki i nyim dano ducu, ki kit ma ajwagi madito pa Lubaŋa ki lulocwa gudobe wek giŋol kop i kome me neke, gugure i kom yataria. Ento yam wageno ni en aye ŋat ma bikoko Icrael. Iyo, medo i kom meno ducu, tin doŋ nino me adek nia ma lok man otimme. Mon mogo i kinwa bene gumiyowa ur. Gupuk i wi lyel odiko con, pe gunoŋo kome; gudwogo cen kun giwaco ni guneno lumalaika ma onyutte botgi, kun giwaco ni en kwo gire. Jo mukene ma onoŋo tye kacel kwedwa gucito i wi lyel, gunoŋo tye kit macalo mon guwaco; ento pe guneno kome.” Yecu owaco botgi ni, “Wun lumiŋ, ki luwackom i cwinywu pi ye lok ducu ma lunebi yam guloko! Pe myero ni Kricito ma Lubaŋa oyero onen can magi, wek odony i deyone?” Cakke wa i kom Moses, ki lunebi ducu, en ogonyo botgi lok ducu ma i ginacoya ma mako kome. Ka gunyiko cok ki paco ma onoŋo gicito iye-ni, Yecu otimo macalo mito kato akata ki wotte, ento gudiye matek kun giwaco ni, “Bed botwa, pien piny doŋ cok yuto, ceŋ bene doŋ cok poto woko.” Odonyo i ot obedo kwedgi. Ka tye i dog cam kacel kwedgi, omako mugati, opwoyo, obaro iye, omiyo botgi. Waŋgi oyabbe, guŋeye; ci cutcut orwenyo woko ki i waŋgi. Gupennye kekengi ni, “Cwinywa nakanen pe obedo ka pukke i kare ma en tye ka lok kwedwa i waŋayo, kun yabbiwa ginacoya?” Gua i cawa-nu, gudok i Jerucalem; gunoŋo jo apar wiye acel ca gucokke kacel, ki jo ma onoŋo tye botgi. Jo-nu guwaco ni, “Rwot ocer ada, onyutte bot Cimon!” Gutito lok ma otimme i waŋayo, ki kit ma giŋeye kwede i kare ma obaro mugati. Ka pud gitye ka loko lok man, Yecu kikome ocuŋ i kingi, [owaco botgi ni, “Kuc obed i komwu!”] Ento komgi oto woko lirut, gulworo kun gitamo ni gineno tipo. Yecu openyogi ni, “Piŋo cwinywu opoto? Piŋo wupennye kekenwu i cwinywu? Wunen ciŋa, ki tyena, man an kikoma; wuboŋa, wunena; pien tipo pe tye ki kom ki cogo kit macalo wuneno an atye kwede.” [ Ka doŋ owaco lok man, ci onyuto ciŋe ki tyene botgi.] Ento ka pud peya giye pi yomcwiny, kun giuro, owaco botgi ni, “Wutye ki gin mo kany me acama?” Gumiye but rec ma gubulo, ogamo, ci ocamo i nyimgi. Lacen owaco botgi ni, “Man aye lokka ma yam aloko botwu i kare ma onoŋo pud atye kwedwu, ni, lok ducu ma gicoyo i koma i cik pa Moses, ki i lunebi, ki i jabuli myero ocobbe kakare.” Oyabo tamgi wek giniaŋ ginacoya,, owaco botgi ni, “Yam gicoyo kit man ni, Kricito ma Lubaŋa oyero myero onen can, ci i nino me adekke myero ocer ki i kin jo muto, dok myero gitit lok i kom ŋut ma kelo weko bal i nyiŋe bot rok ducu kun gicako ki i Jerucalem. Wun wucaden me lok man. Nen, abicwalo botwu gin ma Wora ociko; ento myero wubed i Jerucalem, nio ka gibirukowu ki tek ma a ki i polo.” Lacen oterogi woko nio wa Betania, otiŋo ciŋe malo olamo gum i komgi. Ma kun pud lamo gum i komgi, ci opokke woko ki botgi, [gitiŋe, gitere i polo.] Guwore, lacen gudwogo i Jerucalem ki yomcwiny madwoŋ, guri i ot pa Lubaŋa jwijwi, kun gipwoyo Lubaŋa. I acakki piny Lok onoŋo tye, Lok tye bot Lubaŋa, Lok en Lubaŋa. En ceŋ tye bot Lubaŋa i acakki piny; jami ducu en aye ceŋ otiyo, pe tye gin mo ma ceŋ giketo laboŋo en. I en con tye kwo, kwo meno con ceŋ pa dano. Ceŋ oryeny i piny macol, ento piny macol pe ogeŋo ryeny. Yam tye dano mo ma Lubaŋa ooro, nyiŋe Jon. En obino pi bedo caden me tito lok i kom ceŋ, wek dano ducu guye pi lokke. En kikome onoŋo pe ceŋ, ento obino pi tito lok me caden i kom ceŋ. Ceŋ me ada ma menyo dano ducu onoŋo oebino i lobo. En con tye i lobo, en aye ceŋ otiyo lobo, ento lobo pe obedo ki ŋec i kome. En obino tugi, ento jone pe gujole. Ento dano ducu ma ceŋ gujole, ma guye nyiŋe, omiyogi twero me doko litino pa Lubaŋa; ma pe ginywalogi ki remo, kadi pi miti me kom, kadi pi mit pa dano, ento pi miti pa Lubaŋa. Lok odoko dano, obedo i kinwa, kun opoŋ ki kica ki ada; wan waneno deyone, deyo macalo pa latin acel keken ma oa bot Won. Jon obolo lok me caden i kome kun daŋŋe ni, “Man aye ŋat ma yam atittiwu pire ni, ‘Ŋat ma bino i ŋeya kata ki dit, pien en okwoŋo nyima con.’ ” Nia i lonyone mapol wan ducu gimiyowa kica i kom kica. Pien cik yam gimiyo kun wok ki bot Moses, ento kica ki ada, Yecu Kricito aye okelo. Pe tye ŋat mo ma yam oneno Lubaŋa; Wod acel keken, ma tye i kor Won, omiyo Won oŋene. Man lok me caden ma Jon obolo, ka Lujudaya guoro ajwagi ki jo Levi nia Jerucalem pi penye ni, “In aŋa?” En otuco ka maleŋ, pe omuŋo, otuco ni, “An pe a Kricito ma Lubaŋa oyero.” Gupenye ni, “In doŋ aŋa? In Elia bo?” En odok iye ni, “Pe.” “In lanebi meno?” En ogamo ni, “Pe”. Dok gupenye ni, “In aŋa kaa? Tittiwa, wek wadwok lok bot jo muorowa. Ilwoŋŋe kekeni ni in aŋa?” En odok iye ni, “An a dwan ŋat ma daŋŋe i tim ni, ‘Wutir yo pa Rwot ocuŋ atir,’ macalo lanebi Icaya owaco.” Jo mogo ma ceŋ gioro nia i kin Luparicayo gupenye ni, “Doŋ piŋo ibatija dano, ka in pe i Kricito ma Lubaŋa oyero, nyo Elia, nyo lanebi meno?” Jon odokkigi iye ni, “An abatija dano ki pii; ento i kinwu ocuŋ ŋatti mo ma wun wukwiya, en aye ŋat ma bino ki i ŋeya, ma an pe amyero ka gonyo del warre.” Lok man ducu otimme i Betania loka Jordan, ka ma Jon yam obedo ka batija iye dano. Orwone Jon oneno Yecu kun woto bino tuŋ bote, owaco ni, “Nen Latinromo pa Lubaŋa ma kwanyo bal me lobo! Man aye ŋat ma yam awaco pire ni, ‘I ŋeya bibino ŋat ma kata ki dit, pien en okwoŋo nyima con.’ An kikoma onoŋo pe aŋeye, ento pi lok man omiya abino kun abatija dano ki pii, wek ginyute bot jo Icrael.” Jon otito lok me caden i kome ni, “Ceŋ aneno Cwiny Maleŋ kun bino nia ki i polo macalo amam, opye, obedo i kome. An kikoma yam pe aŋeye; ento ŋat ma oora ka batija dano ki pii-ni owacca ni, ‘Ŋat ma ibineno Cwiny Maleŋ bino, pye, bedo i kome, en aye ŋat ma bibatija dano ki Cwiny Maleŋ.’ Doŋ aneno, dok atito lok me caden i kome ni, man en Wod pa Lubaŋa.” Orwone doki, Jon ka ocuŋ ki jo aryo i kom lupwonnyene, oneno Yecu kun woto, owaco ni, “Nen Latin-romo pa Lubaŋa!” Lupwonnye meno aryo guwinyo kun waco lok man, ci gulubo Yecu. Yecu olokke, onenogi kun gilube, openyogi ni, “Wuyenyo aŋo?” Gin gupenye ni, “Rabbi (ma te lokke ni, Lapwony) ibedo kwene?” Odok ki gin ni, “Wubin, wunen.” Gubino, guneno ka ma en onoŋo bedo iye; ci gubedo bote i nino meno, pien cawa doŋ onoŋo cok romo apar. Ŋat acel i kin jo aryo ma yam guwinyo Jon kun loko, ci gulubo Yecu, onoŋo Anderiya, omin Cimon Petero. En okwoŋo noŋo ominne Cimon, owacce ni, “Watyeko noŋo Meciya” (ma te lokke ni, Kricito). En okele bot Yecu. Yecu onene, owacce ni, “In aye Cimon, wod pa Jon? Gibilwoŋi ni, Kepa” (ma te lokke ni, Petero ). Orwone Yecu omito cito i Galilaya. Orwatte ki Pilipo, owacce ni, “Luba.” Pilipo yam Labetecaida, ma gaŋgi kacel ki Anderiya ki Petero. Pilipo onoŋo Natanael, otitte ni, “Watyeko noŋo ŋat ma Moses yam ocoyo pire i cik, ma lunebi bene gucoyo pire, en aye Yecu me Najaret, wod pa Yucepu.” Natanael openye ni, “Gin mo maber twero katti ki i Najaret?” Pilipo odokke iye ni, “Bin, inen.” Yecu oneno Natanael kun bino bote, oloko i kome ni, “Nen Laicrael me ada, ma pe tye ki goba mo i cwinye!” Natanael openye ni, “Iŋeya niŋniŋ?” Yecu odokke iye ni, “Ma peya Pilipo olwoŋi, kun ibedo i te olam, an aneni.” Natanael odokke iye ni, “Lapwony, in giri i Wod pa Lubaŋa. In i Kabaka me Icrael!” Yecu odokke iye ni, “In iye pien awacci ni, ‘Aneni kun ibedo i te olam’? Ibineno lok madito makato magi.” Dok owacce ni, “Adada awacciwu ni, wubineno polo kun oyabbe, kun lumalaika pa Lubaŋa giito dok gilor piny i kom Wod pa dano.” I nino me adekke nyom obedo i Kana, gaŋ mo me Galilaya. Min Yecu onoŋo tye kunnu, Yecu ki lupwonnyene bene gilwoŋogi i nyom. Ka koŋo vino otum, min Yecu otitte ni, “Vinogi doŋ pe.” Yecu odokke iye ni, “Maa, walaro aŋo wan kwedi? Cawana pud peya oromo.” Minne ociko lutic ni, “Wutim gin ducu ma en biwacciwu.” Onoŋo tye kunnu dak pii me got abicel ma gicibo pi kit me lonnye pa Lujudaya; i dak acel acel twero a iye agulu abic nyo abicel. Yecu owaccigi ni, “Wuony pii i dak” Guonyo opoŋ woko libyeny. Owaccigi ni, “Doŋ wutwom, wuter bot ladit me nyom”; gutero. Ka ladit me nyom obilo pii ma doŋ olokke odoko vino, kun pe oŋeyo ka ma oa iye (ento lutic ma gutwomo pii giŋeyo), ladit me nyom olwoŋo lanyom, owacce ni, “Dano ducu koŋ kwoŋo miyo jo vino mamit; ka doŋ dano gumato oromogi, ka gikelo ma pe mit twatwalle; ento in ikano meri vino maber nio koni.” Lanyut meno mukwoŋo Yecu otiyo i Kana me Galilaya, kun nyuto kwede deyone; lupwonnyene guye en. Ka man otum, Yecu ocito i Kapernaum kacel ki minne ki omegine ki lupwonnyene; guri kunnu pi kare manok. Kato (Paska) pa Lujudaya onoŋo doŋ tye cok, omiyo Yecu ocito malo i Jerucalem. I ot pa Lubaŋa onoŋo tye iye jo ma cato twoni ki romi ki amam, ki lulok-cente ma gubedo piny. Yecu okedo anino ogwil matino, ci oryemogi ducu woko ki i ot pa Lubaŋa, kacel ki romi ki twoni. Oketo lim pa lulok-cente, oryebo mejagi. Ociko lucat amam ni, “Teru jami magi woko, pe wulok ot pa Abana odok cuk.” Lupwonnyene gupo lok ma yam gicoyo ni, “Arima pi odi mito neka woko.” Pi man Lujudaya gupenye ni, “Lanyut aŋo ma inyuttiwa ma omiyo itiyo jami magi?” Yecu ogamo doggi ni, “Wuket ot pa Lubaŋa man woko, an abigerone pi nino adek.” Lujudaya guwacce ni, “Ot pa Lubaŋa man gigero pi mwaka pyeraŋwen wiye abicel kulu. In ibigerone pi nino adek keken?” Ento en onoŋo loko pi kome ma ot pa Lubaŋani. Ka doŋ gicere ki i kin jo muto, lupwonnyene gupo ni yam owaco lok man; ci guye ginacoya ki lok ma yam Yecu oloko. Ka onoŋo en tye i Jerucalem i nino madit me Kato (Paska), jo mapol guye nyiŋe pi neno lanyut ma en obedo ka tiyogi; ento Yecu kikome pe obedo ki gen i komgi, pien en ŋeyo jo ducu, pe omito ni ŋat mo otit lok i kom dano mo bote, pien en kikome ŋeyo gin ma tye i cwiny dano. Ceŋ tye dano mo i kin Luparicayo ma nyiŋe Nikodemo, ma en ŋat acel i kin jo madito me Judaya. En obino bot Yecu dyewor, owacce ni, “Lapwony, waŋeyo ni in lapwony ma ia ki bot Lubaŋa; pien pe tye ŋatti mo ma twero tiyo lanyut meno ma in itiyo, ka Lubaŋa pe tye kwede.” Yecu odokke iye ni, “Adada awacci ni, dano ka pe ginywale tyen me aryo* pe twero neno ker pa Lubaŋa.” Nikodemo openye ni, “Dano gitwero nywale niŋniŋ ka doŋ oti? Twero donyo doki i ot nyodo pa minne tyen me aryo, ci ginywale?” Yecu odok iye ni, “Adada awacci ni, dano ka pe ginywale ki pii ki Cwiny, pe twero donyo i ker pa Lubaŋa. Ma ginywale ki kom en kom, ma ginywale ki Cwiny en cwiny. Pe iŋur pien awacci ni, ‘Myero ginywalwu tyen me aryo.’ Yamo kodo dok ka ma en mito; iwinyo dwane, ento pe iŋeyo ka ma oa iye, nyo ka ma dok iye; dano ducu ma ginywale ki Cwiny tye kameno.” Nikodemo openye ni, “Man twero timme niŋniŋ?” Yecu odokke iye ni, “In lapwony pa Icrael, pe iŋeyo lok man? Adada awacci ni, wan waloko i kom gin ma waŋeyo, wabedo caden i kom gin ma waneno, ento wun pe wuye lok ma watito botwu. Ka attitiwu lok me lobo, wun pe wuye, wubiye niŋniŋ ka atittiwu lok me polo? Pe tye ŋat mo ma yam oito i wi polo, kono en ma ceŋ olor piny nia ki i polo, en aye Wod pa dano, ma bedo i polo. Kit macalo Moses yam otiŋo twol malo i tim-mi, Wod pa dano bene myero gitiŋe malo kumeno, wek dano ducu ma ye en olim kwo ma pe tum.” Pien Lubaŋa con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum. Lubaŋa pe ooro Wode i lobo ni oŋol kop i kom lobo, ento wek lobo olarre pi en. Ŋat ma ye en pe doŋ giŋolo kop i kome, ento ŋat ma pe ye en, doŋ giŋolo kop oloye con; pien pe oye nyiŋ Wod acel keken pa Lubaŋa. Ŋolo kop tye kit man, ceŋ con obino i lobo, ento dano gumaro piny macol makato ceŋ, pien timgi rac. Pien dano ducu ma timo gin marac dag ceŋ, pe bino i ceŋ, wek timme pe onen ka maleŋ. Ento ŋat ma timo gin me ada bino i ceŋ, wek ticce onen ka maleŋ, ni en tiyo i Lubaŋa. Ka man otum, Yecu ocito i lobo Judaya kacel ki lupwonnyene; obedo kwedgi kunnu kun batija dano. Jon bene onoŋo tye ka batija dano i Ainon, cok ki Calim; pien pii onoŋo dwoŋ kunnu, dano gubino, en obatijagi. Onoŋo peya gitweyo Jon i mabuc.. Pyem ocakke i kin lupwonnye mogo pa Jon ki Lajudaya mo i kom lok me lonnye. Gubino bot Jon, guwacce ni, “Lapwony, ŋat ma ceŋ itye kwede loka Jordan, ma ceŋ ibolo lok me caden i kome-ni, nen, en tye ka batija dano, jo ducu gibino bote.” Jon odok iye ni, “Dano pe twero noŋo gin mo pire kene, ka pe gimiye nia ki i polo. Wun kikomwu onoŋo wubedo cadenna ni yam atito ni, ‘An pe a Kricito ma Lubaŋa oyero ento giora akwoŋo nyime’. Ŋat ma cuŋ i ŋet nyako aye lanyom; larem lanyom ma cuŋ i ŋete kun winye, cwinye bedo yom twatwal pi winyo dwan lanyom; pi meno an bene cwinya yom kakare. En myero omedde, ento an myero adok piny.” Ŋat ma oa ki malo loyo ducu; ŋat ma oa i lobo en dano me lobo, loko lok me lobo; ŋat ma oa i polo loyo ducu. En bedo caden i kom gin ma oneno ki i kom gin ma owinyo, ento pe tye ŋat mo ma ye lok ma en otito. Ŋat ma ye lokke, nyuto tamme ni, Lubaŋa en me ada. Ŋat ma Lubaŋa ooro loko lok pa Lubaŋa, pien Lubaŋa pe miyo Cwiny kun pimo apima. Won omaro Wod, ci omiyo jami ducu i ciŋe. Dano ma ye Wod tye ki kwo ma pe tum; ŋat ma pe winyo dog Wod, pe bineno kwo, ento kiniga pa Lubaŋa bedo i kome. Ka Rwot oŋeyo ni Luparicayo guwinyo ni Yecu tye ka loko jo mapol doko lupwonnyene ki batijagi, makato Jon, (kun Yecu kikome pe obatija dano, kono lupwonnyene aye gubatijagi), ci en oa ki i lobo Judaya, odok i Galilaya. Ceŋ myero en oŋol ki i Camaria. Obino i gaŋ mo me Camaria ma nyiŋe Cukar, cok ki poto ma Yakobo yam omiyo bot wode Yucepu. Waŋ it pa Yakobo onoŋo tye kunnu; Yecu ool ki wot, ci obedo piny i ŋet waŋ it. Onoŋo doŋ cawa oromo ka abicel. Dako mo me Camaria obino ka twomo pii. Yecu owacce ni, “Miya pii, amati.” Pien onoŋo lupwonnyene gucito i gaŋ ka wilo cam. Dako Lacamaria openye ni, “In Lajudaya ikwaya pii piŋo, ma kun an a dako me Camaria?” Pien Lujudaya pe gimer ki Lucamaria. Yecu odok iye bot dako ni, “Kono yam iŋeyo mot ma Lubaŋa miyo, dok ka kono iniaŋ i kom ŋat ma kwayi ni, ‘Miya pii, amat-ti’, kono ikwayo en, kono omii pii me kwo.” Dako odokke iye ni, “Ladit, in ipe ki gitwomo, waŋ it bene tut; inoŋo pii me kwo meno ki kwene? In i dit ikato kwarowa Yakobo, ma yam omiyowa waŋ it man, ma omato piine, en ki litinone ki lwak limme?” Yecu odokke iye ni, “Dano ducu ma mato pii man, orwo dok bineke aye; ento dano ma bimato pii ma an abimiye, orwo pe bineke nino ducu. Pii ma an abimiye, bidoko waŋ it ma gunnye i iye nio wa i kwo ma pe tum.” Dako okwaye ni, “Ladit, miya pii meno, wek orwo pe dok oneka, awek bino wa kany ka twomo pii.” Yecu owacce ni, “Cit ilwoŋ cwari, ci idwog kany.” Dako odokke iye ni, “An cwara pe.” Yecu owaco ki dako ni, “Iwaco kakare ni cwari pe. Yam ibedo ki co abic, man ma koni itye kwede-ni pe cwari; man iwaco kakare.” Dako owacce ni, “Ladit, aneno in giri lanebi. Kwariwa yam giworo Lubaŋa i kom got man, ento wun wuwaco ni kabedo ma myero giwor iye Lubaŋa tye i Jerucalem.” Yecu ogamo dog dako ni, “Dako, ye lokka; kare bibino ma pe wubiworo Won i kom got man, kadi i Jerucalem. Wun wuworo gin ma pe wuŋeyo, wan waworo gin ma waŋeyo, pien larre oa ki bot Lujudaya. Ento kare bibino, dok bene doŋ oo, ma ka jo ma woro i ada gibiworo Won i cwiny ki ada, pien Won yenyo jo macalo meno pi wore. Lubaŋa en cwiny, jo ma wore myero guwore i cwiny ki ada.” Dako owacce ni, “Aŋeyo ni Meciya bibino (en ma gilwoŋo Kricito); en ka bibino, bitittiwa lok ducu.” Yecu odokke iye ni, “An a en ma loko kwedi-ni.” Cutcut lupwonnyene gubino. Ci guuro pien onoŋo en tye ka lok ki dako, ento pe tye ŋat mo i kingi ma owaco ni, “Imito aŋo?” nyo ni, “Piŋo iloko kwede?” Dako oweko agulu piine, ocito i gaŋ, owaco bot dano ni, “Wubin, wunen laco mo-ni ma otitta gin ducu ma yam atiyo. Man mono pe en aye Kricito ma Lubaŋa oyero?” Dano gua ki i gaŋ, gucito bote. I kine-nu lupwonnyene gubako doggi bote kun giwaco ni, “Lapwony, cam ba.” Ento en owaccigi ni, “Atye ki cam ma acamo ma wun pe wuŋeyo.” Omiyo lupwonnyene gupennye kekengi ni, “Ŋatti mo okelle cam?” Yecu owaco botgi ni, “Camma en tiyo gin ma ŋat ma oora mito, ki cobo ticce. Wun pe wuwaco ni, ‘Pud odoŋ dwe aŋwen me cako kac’? Atittiwu ni, wutiŋ waŋwu malo, wunen kit ma doŋ poto ocek kwede me akaya. Ŋat ma kayo limo mucara, coko nyig pi kwo ma pe tum, wek lacoyone ki lakayone igi obed yom kacel. Pien carolok man tye kakare. ni, ‘Lacoyo pat, lakayo pat.’ Ceŋ aorowu ka kayo gin ma yam pe wucanne iye; jo mukene gucanne iye, wun wudonyo i cannegi.” Lucamaria mapol ma i gaŋ meno guye en pi lok pa dako, ma owaco ni, “Otitta gin ducu ma yam atiyo.” Ka Lucamaria gubino bote, gukwaye ni koŋ myero obed kwedgi; ci en ori kunnu nino aryo. Jo mukene mapol guye en pi lokke. Guwaco bot dako ni, “Koni pe waye pi lokki keken, pien wawinyo giwa ki itwa, doŋ watyeko niaŋ ni, ada dano man en Lalar me lobo.” Lacen ka nino aryo meno okato, en ocito i Galilaya. Pien Yecu kikome otito ni, “Lanebi mo pe ma giketo deyo kome i lobo tugi.” Ka obino i Galilaya, Lugalilaya gujole, pien guneno gin ducu ma en otiyo i Jerucalem i kare me nino madit, pien gin bene ceŋ gucito pi kwero nino madit. En dok odwogo i Kana me Galilaya ka ma yam oloko iye pii odoko koŋo vino. Yam tye latic mo madit i kal pa kabaka ma kom wode lit i Kapernaum. Ka owinyo ni Yecu oa i Judaya, obino i Galilaya, ocito obako doge bote ni obin ocaŋ wode, pien onoŋo doŋ cok to. Yecu odokke iye ni, “Ka pe wuneno lanyut ki taŋo, ci pe wubiye kadi matidi mo.” Latic i kal owacce ni, “Ladit, bin ma peya latinna oto.” Yecu owacce ni, “Cit giri, wodi bikwo.” Dano meno oye lok ma Yecu owacce, ci ocito. Ka pud tye ka bino i yo, orwatte ki luticce. Guwacce ni, “Latinni doŋ kwo.” En openyogi cawa mene ma twone ocako dok cen. Gin gugamo ni, “Laworo cawa abiro aye lyeto oa ki i kome.” Wonne oniaŋ ni meno aye cawa ma Yecu owacce iye ni, “Wodi bikwo”; omiyo en ki jo ma i ode ducu guye. Man doŋ lanyut me aryo ma Yecu otiyo ka oa ki i Judaya, obino i Galilaya. Lacen ka man otum, Yecu ocito i Jerucalem pi nino madit pa Lujudaya ma onoŋo tye. I Jerucalem, i ŋet dogcel me romo, yam tye iye kut ma gilwoŋo i dog jo Ibru ni Beteceda, ma tye iye bolo abic. Lwak lutwo mapol onoŋo buto iye, lutowaŋ, luŋolo ki lugoro, [ma gikuro twagge me pii. Pien kare mogo lamalaika pa Rwot bino i kut, rubo pii. Ŋat ma okwoŋo lutte i pii kun pud girubo aruba, caŋ i kom kit two ducu ma yam tye i kome.] Onoŋo tye kunnu laco mo ma twone doŋ ori i kome mwaka pyeradek wiye aboro. Ka Yecu onene kun obuto, dok oŋeyo ni en ori kunnu pi kare malac, openye ni, “Imito icaŋ?” Latwo ogamo ni, “Ladit, pe atye ki ŋat ma bola i kut ka pii orubbe. Ka atye ka komo, ŋat mukene dok kwoŋo leŋŋe iye i nyima.” Yecu odokke iye ni, “A, ikwany gibutoni, iciti.” Oyotoyot dano meno ocaŋ; okwanyo gibutone, ocito gire. Onoŋo ninone ceŋ cabit, omiyo Lujudaya guwaco bot dano ma gicaŋo ni, “tin cabit, cik pe ye ni ikwany gibutoni.” Ento en odok ki gin ni, “ Ŋat ma ocaŋa aye owacca ni, ‘Kwany gibutoni, iciti.’ ” Gupenye ni, “Dano meno ma owacci ni, ‘Kwany gibutoni, iciti-ni’, en aŋa?” Dano ma gicaŋo pe ŋeyo ŋat ma ocaŋe, pien onoŋo Yecu ocito gire woko, lwak onoŋo opoŋ kunnu. Lacen Yecu onoŋe i ot pa Lubaŋa, owacce ni, “Nen, doŋ icaŋ. Pe dok ibal, wek gin marac makato meno pe opot i komi.” Danonu ocito, otito bot Lujudaya ni, “Yecu aye ocaŋa.” En aye gin mumiyo Lujudaya gulibo Yecu, pien otimo jami magi i cabit. Ento Yecu odokkigi iye ni, “Wora tye ka tic nio koni, an bene atye tic.” En gin mumiyo Lujudaya dok gumedde ka yenyo yo me neke, pe pi turo cabit keken, ento bene pi lwoŋo Lubaŋa ni wonne, ma kun kette kene ni erom ki Lubaŋa. Yecu odok iye ni, “Adada awacciwu ni, Wod pe twero tiyo gin mo pire kene, ento tiyo gin ma eneno Won tiyo; pien gin ma en tiyo, Wod bene tiyo kit meno. Won maro Wod, ci nyutte gin ducu ma en tiyo; dok binyutte tic madito makato magi, wek wuur. Pien macalo Won cero jo muto, miyogi kwo, kit meno Wod bene miyo kwo bot jo ma en mito. Won pe ŋolo kop i kom dano mo, ento doŋ otyeko miyo twer me ŋolo kop ducu bot Wod, wek dano ducu oket deyo i kom Wod, macalo giketo deyo i kom Won. Ŋat ma pe keto deyo i kom Wod, pe keto deyo i kom Won ma ceŋ oore. Adada awacciwu ni, dano ma winyo lokka, ma ye ŋat ma oora, tye ki kwo ma pe tum; pe gibiŋolo kop i kome, ento doŋ oa i to, oo i kwo. “Adada awacciwu ni, kare bibino, dok bene doŋ oo, ma jo muto biwinyo iye dwan Wod pa Lubaŋa; jo ma guwinyo bikwo. Pien macalo Won tye ki kwo i iye kene, kit meno en bene omiyo Wod bedo ki kwo i iye kene, dok omine twer me ŋolo kop, pien en Wod pa dano. Pe wuur lok man; pien kare bibino ma jo ducu ma tye i lyel biwinyo iye dwane. ci gibikatti woko. Jo ma ceŋ gutimo maber bidonyo i cer me kwo, jo ma ceŋ gutimo marac bidonyo i cer me ŋolo kop. “An pe atwero tiyo gin mo pira kena; aŋolo kop kit macalo awinyo; kop ma aŋolo tye atir, pien pe ayenyo yo me tiyo gin ma iya mito kena, ento ma ŋat ma ceŋ oora mito. Ka abolo lok i koma kena, lok ma abolo pe bedo me ada. Tye ŋat mukene ma en aye cadenna, aŋeyo ni lok ma en bolo i koma lok me ada. Wun ceŋ wuoro kwena bot Jon, en obolliwu lok me ada me caden. An pe aye lok ma dano bolo i koma; ento awacciwu lok magi wek wularre. En ceŋ tara ma gicwinyo, ma lyel, yam wumito bedo ki yomcwiny pi kare manok i dero macce. Ento atye ki lok me caden ma pire dit makato pa Jon; pien tic ma Won omiya me acoba, tic magi kikomgi ma atye ka tiyogi, bedo caden i koma ni Won aye oora. Doki Won ma ceŋ oora en kikome obedo cadenna. Wun yam pe wuwinyo dwane, pe wuneno wa calle; pe wubedo ki lokke i iwu, pien pe wuye ŋat ma en ooro. Wuyenyo i ginacoya, pien wutamo ni i gin wutye ki kwo ma pe tum, kun gin aye caden ma tito lok i koma; ento wukwero bino bota, wek wulim kwo. An pe alimo deyo ki bot dano, ento aŋeyo ni pe wutye ki mar pa Lubaŋa i iwu. An abino i nyiŋ Wora, ento wun pe wujola; ka ŋat mukene obino i nyiŋe kene, wun wubijole. Wun wutero ye niŋniŋ, ka ŋat acel limo deyo ki bot lawote, ento pe wuyenyo deyo ma a bot Lubaŋa ma en acel keken? Pe wutam ni abidotowu bot Won; ŋat ma dotowu en Moses, ma wun wugeno. Ka kono wuye Moses, kono wuye an bene; pien en ocoyo lok i koma. Ento ka pe wuye lok ma en ocoyo, wubiye niŋniŋ lok ma an atittiwu?” Ka man otum, Yecu ocito loka nam Galilaya, ma en nam me Tiberia. Lwak madwoŋ olube, pien ceŋ guneno lanyut ma en otiyo i kom lutwo. Yecu oito malo i wi got, obedo piny kunnu kacel ki lupwonnyene. Kato (Paska), ma en nino madit pa Lujudaya, onoŋo doŋ cok. Ka Yecu otiŋo waŋe, oneno lwak madwoŋ kun bino bote, openyo Pilipo ni, “Wabiwilo kwon kwene wek jo man ocam?” En oloko lok man pi teme, pien en kikome onoŋo ŋeyo gin ma ebitiyo. Pilipo odokke iye ni, “Kwon me denari miya aryo pe biromogi, wek ŋat acel acel ogam manok.” Ŋat acel i kin lupwonnyene, en Anderiya omin Cimon Petero, owacce ni, “Latin awobi mo tye kany, ma tye ki mugati abic me cayiri, ki rec aryo; ento magi konyo aŋo bot lwak ma rom man?” Yecu owacci, “Wuwek lwak obed piny.” Lum onoŋo olot twatwal i kabedo meno; dano ma gubedo piny welgi mito romo alip abic. Lacen Yecu okwanyo mugati, opwoyo, opoko bot jo ma gubedo piny, ki rec bene, kit macalo gimito. Ka doŋ guyeŋ, ci owaco bot lupwonnyene ni, “Wucok ŋide ma odoŋ, gin mo owek rwenyo.” Gucoko ŋide, gupoŋo aduku apar wiye aryo ki i kom mugati abic me cayiri ma lwak gucamo odoŋ. Ka lwak oneno lanyut ma en otiyo, guwaco ni, “Ada, man en lanebi meno ma bino i lobo.” Ka Yecu oniaŋ ni gimito bino ka make tetek pi kete me bedo kabaka, ci olwi, ocito i wi got kene. Ka piny oyuto, lupwonnyene gucito i dog nam, gudonyo i yeya, gucako ŋolo dye nam me cito Kapernaum. Piny onoŋo doŋ col, Yecu onoŋo peya obino botgi. Nam otiŋŋe pi yamo ma onoŋo tye ka kodo. Ka onoŋo doŋ gucero yeya ma romo mairo adek nyo aŋwen, ci guneno Yecu kun woto i wi nam ki tyene. Lworo omakogi, ento en owaccigi ni, “An ennu, gwok wulwor”, omiyo guye odonyo i yeya. Cutcut yeya oo i wi tera ka ma gimito cito iye. Orwone jo ma yam gudoŋ loka nam tuŋcel guneno ni onoŋo tye yeya acel keken kunnu, dok ni Yecu nene pe oito i yeya kacel ki lupwonnyene, ento lupwonnyene ceŋ gucito kengi. Kadi bed kumeno, yeya mukene ma gia Tiberia gubino cok ki kabedo ka ma dano gucamo iye kwon ma Rwot opwoyo. Ka lwak guneno ni Yecu pe kunnu, kadi wa lupwonnyene bene, gin kikomgi guito i yeya, gucito Kapernaum ka yenyo Yecu. Ka gunoŋe loka nam tuŋ ca, gupenye ni, “Lapwony, ibino kany awene?” Yecu odokkigi iye ni, “Adada awacciwu ni, wutye ka yenya pe ni pien yam wuneno lanyut, ento ni pien wucamo kwon, wuyeŋ. Pe wuti pi cam ma top woko, ento pi cam ma ri nio wa i kwo ma pe tum, ma Wod pa dano bimiyowu; pien Lubaŋa Won oketo lanen mere i kome.” Gin dok gupenye ni, “Myero watim gin aŋo wek wati tic pa Lubaŋa?” Yecu odok iye botgi ni, “Man en tic pa Lubaŋa, ni wubed ki niye i kom ŋat ma en ooro.” Gupenye ni, “Lanyut aŋo ma in itiyo, wek wanen, waye in? Tic aŋo ma in itiyo? Kwariwa yam gucamo manna i tim, macalo gicoyo ni, ‘Omiyogi kwon me acama mua ki i polo.’ ” Yecu ogamo doggi ni, “Adada awacciwu ni, pe Moses aye yam omiyowu kwon meno mua ki i polo; ento Wora en aye tye ka miyowu kwon me ada nia ki i polo. Pien kwon pa Lubaŋa en kwon ma bino piny nia ki i polo, ma miyo kwo ki lobo.” Guwacce ni, “Rwot, miwa kwon meno nino ducu.” Yecu owaco botgi ni, “An a kwon me kwo; ŋat ma bino bota, kec pe bineke; ŋat ma ye an, orwo pe dok bineke matwal. Ento yam atito botwu ni, wun doŋ wunena, ento pe wuye. Dano ducu ma Wora omiya bibino bota; ŋat ma bino bota, pe abiryeme. Pien doŋ alor piny ki i polo, pe ka tiyo gin ma iya mito pira kena, ento ka tiyo gin ma ŋat ma yam oora mito. Man en gin ma ŋat ma oora mito, ni i kom dano ducu ma en omiya awek rwenyo iye ŋatti mo, ento acergi woko ducu i nino me agik. Man en gin ma wora mito, ni, dano ducu ma neno Wod, ma ye en, myero olim kwo ma pe tum; ci an abicere woko i nino me agik.” Lujudaya guŋur i kome pien owaco ni, “An a kwon ma olor piny nia i polo.” Guwaco ni, “Man pe Yecu, wod pa Yucepu, ma wonne ki minne waŋeyo? Piŋo en dok waco ni, ‘An alor piny nia i polo’?” Yecu odok iye ki gin ni, “Pe wuŋur i kinwu kenwu. Dano mo pe twero bino bota, ka Wora ma yam oora pe opeye; ci an bene abicere woko i nino me agik. Gicoyo i buk pa lunebi ni, ‘Lubaŋa bipwonyogi ducu.’ Dano ducu ma owinyo lok ki bot Won, ce omako lokke, bino bota. Pe ni ŋat mo yam oneno Won, kono ŋat ma yam oa bot Lubaŋa, en aye oneno Won. Adada awacciwu ni, ŋat ma ye an tye ki kwo ma pe tum. An a kwon me kwo. Kwariwu yam gucamo manna i tim, guto woko. Man en kwon ma lor piny nia i polo, ma ka dano mo ocamo, pe bito. An a kwon makwo, ma olor piny nia i polo; ka ŋat mo ocamo kwon man, en bibedo kwo nakanaka. Kwon ma abimiyo en koma, ma amiyo wek lobo obed ki kwo.” Lujudaya guero pyem i kingi kekengi, kun giwaco ni, “Dano man twero miyowa kome me acama niŋniŋ?” Yecu owaccigi ni, “Adada awacciwu ni, ka pe wucamo kom Wod pa dano, wumato remone, pe wutye ki kwo i iwu. Ŋat ma camo koma, ma mato remona, tye ki kwo ma pe tum, ci an abicere woko i nino me agik. Pien koma en cam meada, remona en ginamata meada. Ŋat ma camo koma, ma mato remona, bedo i an, an bene abedo i iye. Macalo Won makwo ceŋ oora, kun an abedo kwo pi Won kit meno ŋat ma cama bikwo pira. Man en kwon ma olor piny nia i polo, pe kit kwon ma yam kwariwu gucamo, guto woko; ŋat ma camo kwon man bibedo kwo nakanaka.” En oloko lok magi i kare ma en pwonyo i kacokke i Kapernaum. Lupwonnyene mapol ka guwinyo, guwacci, “Man lok matek; aŋa ma twero winyo?” Ento Yecu ka oŋeyo ki i cwinye kene ni lupwonnyene tye ka ŋur i kom lok man, openyogi ni, “Lok man obalo tamwu? Bibedo niŋniŋ ka kono wuneno Wod pa dano kun ito ka ma yam en tye iye con? Gin ma miyo kwo en aye cwiny, kom pe konyo gin mo; lok ducu ma awacciwu gin aye cwiny ki kwo. Ento tye jo mogo i kinwu ma pe giye.” Pien nia i acakki Yecu onoŋo ŋeyo jo meno ma pe ye, ki ŋat ma bidobe. En dok owaco ni, “Man en gin mumiyo ceŋ atittiwu ni, pe tye ŋat mo ma twero bino bota, ka Won pe omiye twer.” Cakke i kare meno, lupwonnyene mapol gudok cen, pe dok gubedo ka wot kacel kwede. Yecu openyo jone apar wiye aryo ni, “Wun bene wumito ket woto?” Cimon Petero ogamo doge ni, “Rwot, wabicito bot aŋa? In itye ki lok me kwo ma pe tum. Wan waye, dok watyeko niaŋ ni, in i ŋat Maleŋ pa Lubaŋa.” Yecu odokkigi iye ni, “Ceŋ pe ayerowu wun apar wiye aryo? Ento acel i kinwu pa Catan.” En onoŋo oloko i kom Juda wod pa Cimon me Keriot, ŋat acel i kin jo-nu apar wiye aryo, ma bidobe. Ka man otum, Yecu obedo ka wot i kin Galilaya; pe omito cito i Judaya, pien Lujudaya gimito neke. Nino madito me Bolo pa Lujudaya onoŋo cok. Omegine guwacce in, “A ki kany, icit i Judaya, wek lupwonnyeni gunen tic ma in itiyo. Pe tye dano mo ma tiyo tic i muŋ, ka en kikome mito ni dano guŋeye. Ka itiyo tic magi, nyutte keni bot lobo.” Pien kadi omegine kikome bene pe guye en. Yecu owaccigi ni, “Karena pud peya oo, ento karewu nino ducu tye. Lobo pe twero kwerowu, ento okwero an, pien an atuco lok i kome, ni ticce ducu racu. Wun wucit ka kwero nino madito; an pe acito i nino madito, pien karena peya oromo maber.” Ka doŋ oloko lok man botgi, ci odoŋ i Galilaya. Ento ka omegine doŋ gutyeko cito pi nino madito, ci en bene ocito, pe atyer, ento i muŋ. Lujudaya gubedo ka yenye i nino madito kun gipenyo ni, “En tye kwene?” Lwak onoŋo giŋur twatwal pire. Jo mukene guwaco ni, “En gire dano maber,” jo mukene ni, “Pe, en rwenyo lwak.” Ento pe tye ŋat mo ma waco nyiŋe ka maleŋ, pien gilworo Lujudaya. Ka doŋ oo i dye nino madito, Yecu ocito i ot pa Lubaŋa, ocako pwonyo dano. Lujudaya guuro, kun giwaco ni, “Dano man oŋeyo nukuta niŋniŋ, kun kono pe okwano?” Yecu odok iye ki gin ni, “Pwony mera pe mera kikoma, ento pa ŋat ma ceŋ oora. Ka ŋat mo mito tiyo gin ma Lubaŋa mito, en biniaŋ ka ce pwony man oa ki bot Lubaŋa, nyo ka aloko pira kena. Ŋat ma loko pire kene yenyo deyone pire kene, ento ŋat ma yenyo deyo pi ŋat ma oore, dano-nu en me ada, gin ma pe atir pe i iye. Moses ceŋ pe omiyowu cik? Ento pe tye ŋat mo i kinwu ma gwoko cik. Piŋo wumito neka?” Lwak odok iye ni, “In giri itye ki cen! Aŋa ma mito neki?” Yecu ogamo doggi ni, “Yam atiyo tic acel, wun ducu wuuro. Moses ceŋ omiyowu cik me lirre (pe ni oa ki bot Moses, ento ki bot kwaro), wun bene wuliro dano i ceŋ cabit. Ka giliro dano i ceŋ cabit, wek cik pa Moses pe oballe, piŋo iwu waŋ i koma pi caŋo dano i ceŋ cabit? Pe wuŋol kop pi neno ki waŋ, ento wuŋol kop atir.” Jo mogo me Jerucalem guwaco ni, “Man pe dano ma gimito neko-ni? Ento, nen, en tye ka lok ka maleŋ, gin pe guwacce lok mo. Luloc tika niaŋ ni man en Kricito ma Lubaŋa oyero? Ento wan waŋeyo ka ma dano man oa iye; ka Kricito binen, pe tye dano mo ma biŋeyo ka ma en oa iye.” I kare ma Yecu pwonyo i ot pa Lubaŋa, en odaŋŋe, owaco ni, “Wun wuŋeya, wuŋeyo ka ma aa iye? An pe abino pira kena. Ŋat ma oora en me ada, wun pe wuŋeye. Ento an aŋeye, pien aa ki bote, en aye oora.” Gumito make, ento pe tye ŋat mo ma oketo ciŋe i kome, pien karene peya oromo. Ento jo mapol i kin lwak guye en. Guwaco ni, “Ka Kricito ma Lubaŋa oyero binen, bitiyo lanyut mapol makato ma dano man tiyo?” Luparicayo guwinyo ka lwak tye ka ŋur i kome, omiyo ajwagi madito pa Lubaŋa ki Luparicayo gucwalo askari ka make. Yecu owaco ni, “Pud dok abibedo kwedwu pi kare manok, lacen abidok bot ŋat ma yam oora. Wubiyenya, ento pe wubinoŋa; ka ma abedo iye, wun pe wutwero o iye.” Lujudaya gupennye kekengi ni, “Dano man mito cito kwene, ma wan pe wabinoŋe-ni? En mito cito bot jo mewa muket ata i kin jo Grik, ka pwonyo jo Grik? Man te lokke niŋo, ni, ‘Wubiyenya, ento pe wubinoŋa,’ dok ni, ‘Ka ma abedo iye, wun pe wutwero o iye’?” I nino me agikki me nino madito, ma en aye nino madit, Yecu oa malo, odaŋŋe, owaco ni, “Ka orwo neko dano mo, en myero obin omat bota. Ŋat ma ye an, macalo ginacoya owaco, ‘Kulu me pii makwo bimol nia i iye’.” En yam oloko lok man i kom Cwiny Maleŋ, ma jo ma giye en bilimo; pien onoŋo Cwiny Maleŋ peya gimiyo, pien onoŋo Yecu peya giketo deyo i kome. Ka guwinyo lok magi, jo mogo i kin lwak guwaco ni, “Adada, nye man en lanebi meno.” Jo mukene guwaco ni, “Man gire Kricito ma Lubaŋa oyero.” Jo mukene dok gipenyo apenya ni, “Kricito ma Lubaŋa oyero yam a i Galilaya? Ginacoya pe tito ni, Kricito ma Lubaŋa oyero a ki i anywalli pa Daudi, ki i Beterekem, i gaŋ ma yam Daudi bedo iye?” Kumeno apokapoka obedo i kin lwak pire. Jo mogo i kingi omito make, ento pe tye ŋat mo ma oketo ciŋe i kome. Askari gudwogo bot ajwagi madito pa Lubaŋa ki Luparicayo. Gin gupenyogi ni, “Piŋo pe wukele?” Askari gugamo doggi ni, “Pe tye ŋat mo ma yam oloko macalo dano man.” Luparicayo gudok iye ni, “Wun bene gityeko rwenyowu? Tye ŋat mo i kin luloc nyo i kin Luparicayo ma oye en? Ento lwak man ma kwiya cik doŋ gicenogi.” Nikodemo ma yam obino bote, ma en bene ŋat acel i kingi, openyogi ni, “Cik mewa ŋolo kop i kom dano kun peya giwinyo lok ma a i doge, pi niaŋ i kom gin ma en timo?” Gudokke iye ni, “In bene ia ki i Galilaya? Koŋ iyeny, ibineno ni pe tye lanebi mo ma bia ki i Galilaya.” [ Ŋat acel acel odok i ode. Ento Yecu ocito wa i wi got Jeituni. Odiko con en dok odwogo i ot pa Lubaŋa; jo ducu gucokke bote, en obedo piny, opwonyogi. Lupwonycik ki Luparicayo gukelo dako mo ma gimako ka timo abor. Gukete i dyere, guwacce ni, “Lapwony, dako man gimako ka timo abor, ginoŋe iye kikome. I cik Moses ocikowa ni, dano macalo man myero gicel woko ki got. I kono iŋolo niŋniŋ?” Guwaco lok man pi teme, wek ginoŋ lok ma gibidote kwede. Ento Yecu okulle piny, ocoyo ŋom ki lwete. Ka gumedde ka penye, en oille malo, owaccigi ni, “Ŋat ma i kinwu ma pe ki bal okwoŋ cele ki got.” En dok okulle piny, ocoyo ŋom ki lwete. Ka guwinyo lok man, ci guket ki acel acel, kun ocakke ki i kom jo madito; ci Yecu odoŋ kene kun dako-nu pud ocuŋ i dyere. Yecu oille, openyo dako ni, “Dako, gin kono gitye kwene? Pe tye ŋat mo ma oŋolo kop loyi?” En ogamo ni, “Pe tye ŋat mo, ladit.” Yecu owaco ni, “An bene pe abiŋolo kop loyi. Cit giri; cakke tin pe dok ibal.”] Yecu dok oloko ki gin kun waco ni, “An a ceŋ me lobo; ŋat ma luba pe biwoto i piny macol, ento bibedo ki ceŋ me kwo.” Luparicayo guwacce ni, “In giri ibolo lok me caden i komi keni, lok ma ibolo pe me ada.” Yecu odok iye ni, “Kadi bed abolo lok i koma kena, lok ma abolo me ada, pien aŋeyo ka ma aa iye, ki ka ma acito iye, ento wun pe wuŋeyo ka ma aa iye, ki ka ma acito iye. Wun wuŋolo kop i kit pa dano, ento an pe aŋolo kop i kom ŋat mo. Kadi bed aŋol kop, ŋolo koppa tye atir, pien pe atye kena, ento wan ki ŋat ma oora. I cikwu gicoyo ni, lok pa caden aryo bedo ada; an abolo lok me caden i koma kena, dok Wora ma oora bene cadenna.” Gipenye ni, “Woru tye kwene?” Yecu odok iye ni, “Wun pe wuŋeyo an, kadi Wora. Kono wuŋeya, kono wuŋeyo Wora bene.” En oloko lok man i kare ma pwonyo dano i ot pa Lubaŋa, i ot lim, ento pe tye ŋat mo ma omake, pien karene peya oromo. En dok owaco ki gin ni, “An abicito woko. Wun wubiyenya, wubito i balwu; ka ma acito iye, wun pe wutwero bino iye.” Lujudaya guwaco ni, “En binekke kene, pien owaco ni, ‘Ka ma acito iye wun pe wutwero bino iye’?” En owaccigi ni, “Wun wua ki piny, an aa ki malo; wun jo me lobo, an pe a dano me lobo. Atyeko wacciwu ni, wubito i balwu; pien wubito i balwu ka pe wuye ni an a en.” Gupenye ni, “In aŋa?” Yecu odok ki gin iye ni, “An a ŋat ma yam atittiwu con nia i acakki. Atye ki lok mapol me aloka i komwu, ki kop mapol me aŋola; ento ŋat ma oora en me ada, atito ki lobo gin ma doŋ awinyo ki bote.” Pe guniaŋ ni en tye ka tittigi pi Lubaŋa Won. Omiyo Yecu owaco ki gin ni, “Ka doŋ wutiŋo Wod pa dano malo, ci wubiniaŋ ni an a en, dok ni pe atiyo gin mo pira kena, ento aloko gin ma Wora opwonya iye. Ŋat ma oora tye kweda; pe oweka kena, pien nino ducu atiyo gin ma iye mito.” Ka oloko lok man, jo mapol guye en. Yecu owaco bot Lujudaya ma guye en ni, “Ka wumoko i lokka, ci wun lupwonnyena adada; miyo wubiŋeyo lok me ada, lok me ada bigonyowu.” Gudokke iye ni, “Wan likwayo pa Abraim; ma naka yam peya wabedo opii pa ŋatti mo. Man doŋ in iwaco niŋniŋ ni, ‘Gibigonyowu’?” Yecu odokkigi iye ni, “Adada awacciwu ni, dano ducu ma timo bal, en opii me bal. Opii pe bedo i ot nakanaka, ento latin anywalli bedo gire nakanaka. Pi meno, ka Wod ogonyowu gibigonyowu atika. Aŋeyo ni wun likwayo pa Abraim; ento wumito neka, pien lokka pe noŋo kabedo i iwu. An aloko gin ma aneno ki bot Wora, wun wutiyo gin ma wuwinyo ki bot wonwu.” Gudok iye ni, “Abraim en wonwa.” Yecu owaccigi ni, “Kono wun litino pa Abraim, kono wutiyo macalo Abraim. Ento koni wumito neka, an dano ma atittiwu lok me ada ma awinyo ki bot Lubaŋa; Abraim yam pe otiyo kit meno. Wun wutiyo gin ma wonwu otimo.” Gidok iye bote ni, “Wan pe ginywalowa i abor; watye ki wonwa acel, en aye Lubaŋa.” Yecu ogamo doggi ni, “Kono Lubaŋa wonwu, kono wumara, pien an aa ki bot Lubaŋa, koni doŋ atye kany; pe abino pira kena, en aye oora. Piŋo pe wuniaŋ lok ma awaco? Pien pe wutwero winyo lokka. Wun wua ki bot wonwu, Catan, wumito cobo gin ma wonwu mito. Nia i acakki piny en con lanek, pe cuŋ i ada, pien lok me ada pe i iye. Ka en loko lok goba, en lok macalo kite tye, pien en lagoba, doki won goba. Ento pe wuye an, pien an aloko lok me ada. Aŋa i kinwu ma nyuto lok me bal i koma ma loya? Ka atito lok me ada, piŋo pe wuye an? Ŋat ma oa bot Lubaŋa winyo lok pa Lubaŋa; gin ma omiyo wun pe wuwinyo, pien pe wua bot Lubaŋa.” Lujudaya gudokke iye ni, “Wan pe wawaco kakare ni, in Lacamaria, itye ki cen?” Yecu odok iye ni, “An pe atye ki cen; ento aworo Abana, wun pe wuwora. An pe ayenyo deyona pira kena; tye Ŋat ma yenyo ma kakara, en aye biŋolo kop. Adada awacciwu ni, ka ŋat mo mako lokka, pe bito matwal.” Lujudaya gudokke iye ni, “Koni doŋ waniaŋ ni itye ki cen. Abraim yam oto, ki lunebi bene guto, ento in iwaco ni, ‘Ka ŋat mo mako lokka, ci pe bibilo to matwal’. In i dit ikato kwarowa Abraim, ma ceŋ oto-ni? Lunebi bene guto, do! In ikette ni in aŋa?” Yecu ogamo ni, “Ka aketo deyo i koma kena, deyona mwa; Wora aye keto deyo i koma, en ma wun wuwaco ni Lubaŋawu-ni. Wun pe wuŋeye; ento an aŋeye. Ka kono awaco ni pe aŋeye, kono adoko lagoba macalo wun; ento an aŋeye, amako lokke. Kwarowu Abraim yam obedo ki yomcwiny ni ebineno ninona; ci oneno, cwinye obedo yom matek.” Lujudaya guwacce ni, “In ma mwakani bene peya oromo pyerabic-ci, ineno Abraim?” Yecu ogamo doggi ni, “Adada awacciwu ni, ma Abraim pud pe, onoŋo doŋ an atye.” Omiyo gukwanyo got me cele; ento Yecu okanne, ci okato woko ki i ot pa Lubaŋa. Ka ceŋ en oekato ki i yo, oneno dano ma ginywale ma waŋe oto. Lupwonnyene gupenye ni, “Lapwony, aŋa ma obalo, laco man, kece nyo jo ma gunywale, ma omiyo ginywale ma waŋe oto?” Yecu ogamo ni, “Laco man pe obalo, kadi jo ma gunywale, ento man otimme wek tic pa Lubaŋa onen i kome. Myero wati tic pa ŋat ma oora ma ceŋ pud tye; dyewor bibino ma ŋat mo pe twero tic. Ka pud atye i lobo, an a ceŋ me lobo.” Ka oloko lok man, oŋulo laa piny, orubo ki ŋom, ci owiro ki waŋ laco-nu. Owacce ni, “Citi, ilwok i kut me Ciloam” (ma te lokke ni, Ma gioro). En ocito olwoko, ci odwogo ma waŋe doŋ neno piny. Luwote ki jo ma yam ginene kun kwayo lim guwaco ni, “Man pe laco ma bedo kun kwayo lim-mi?” Jo mogo guwaco ni, “En kikome”; jo mukene ni, “Pe, ento cal kwede acala.” En ogamo ni, “An ennu, do!” Gupenye ni, “Waŋi oyabbe niŋniŋ?” En ogamo ni, “Dano ma gilwoŋo nyiŋe ni Yecu aye orubo ŋom, owiro ki waŋa, ci ocika ni, ‘Cit ilwok i Ciloam.’ Ci acito, alwoko, acako neno piny.” Dok gupenye ni, “En tye kwene?” Ogamo ni, “Pe aŋeyo.” Gikelo dano ma yam waŋe oto-ni bot Luparicayo. Nino ma Yecu orubo ŋom iye, oyabo ki waŋe, onoŋo ceŋ cabit. Luparicayo dok gupenye ni, “Waŋi oyabbe niŋniŋ?” En odok ki gin iye ni, “En owiro ŋom i waŋa, alwoko, ci aneno piny.” Luparicayo mogo guwaco ni, “Dano man pe oa ki bot Lubaŋa, pien pe gwoko cabit.” Ento jo mukene guwaco ni, “Dano ma labalo twero tiyo lanyut ma rom man?” Omiyo apokapoka obedo i kingi. Dok gupenyo dano ma yam onoŋo waŋe oto-ni ni, “In itamo lok aŋo i kome, pien oyabo waŋi?” En odok iye ni, “En lanebi.” Lujudaya pe guye ni en yam obedo lawaŋoto, dok ni giyabo waŋe, nio ka gilwoŋo jo ma gunywalo dano ma giyabo waŋe-ni. Gipenyogi ni, “Man en latinwu ma wuwaco ni ginywale ma waŋe oto? Gin aŋo ma omiyo doŋ en neno piny koni?” Jo ma gunywale gudok iye ni, “Waŋeyo ni man latinwa, dok yam ginywale ma waŋe oto. Ento kit ma en neno ki piny koni, pe waŋeyo; dok wan pe waŋeyo ŋat ma oyabo waŋe. Wupenye; en doŋ dit, en bilok pire kene.” Jo ma gunywale guwaco lok man pien gilworo Lujudaya, pien onoŋo Lujudaya guporo lok kacel ni, ka ŋat mo otuco ni Yecu en Kricito ma Lubaŋa oyero, ci gibiryeme woko ki i kacokke. En aye gin mumiyo jo ma gunywale guwaco ni, “,En doŋ dit, wupenye.” Pi lok man omiyo gulwoŋo dano ma yam waŋe oto tyen me aryo, guwacce ni, “Mi deyo bot Lubaŋa; wan waŋeyo ni dano man labalo.” En ogamo ni, “Ka en labalo, pe aŋeyo; gin acel keken ma aŋeyo, en aye ni, yam waŋa oto, ento koni doŋ aneno piny.” Gin gupenye ni, “En otimmi niŋniŋ? Oyabo waŋi niŋniŋ?” En odokkigi iye ni, “Doŋ atittiwu con, wun pe wuwinyo. Piŋo pud wumito winyo? Wun bene wumito doko lupwonnyene, ce?” Ci guyete kun giwaco ni, “In giri aye lapwonnyene ento wan giwa lupwonnye pa Moses. Waŋeyo ni Lubaŋa yam oloko ki Moses, ento dano man pe waŋeyo ka ma oa iye.” Dano ca odok iye ni, “Man lok me aura twatwal! Wun pe wuŋeyo ka ma en oa iye, kun en oyabo waŋa. Waŋeyo ni Lubaŋa pe winyo lubalo, ento ka ŋat ma woro Lubaŋa, dok tiyo gin ma en mito, Lubaŋa winye. Ma naka yam peya owinnye ni ŋat mo oyabo waŋ dano mo ma ginywale ma waŋe oto. Ka kono dano man onoŋo pe oa ki bot lubaŋa, kono pe otwero timo gin mo wa acel.” Gugamo doge ni, “In ma ginywali i bal keken-ni bene ipwonywa?” Ci guryeme woko. Yecu ka owinyo ni giryeme woko, onoŋe, openye ni, “In iye Wod pa dano?” En odok iye ni, “En aŋa, ladit, wek aye en?” Yecu owacce ni, “Doŋ inene, en aye ŋat ma tye ka lok kwedi-ni.” En owaco ni, “Aye, Rwot”; owore. Yecu owacce ni, “An abino i lobo ka ŋolo kop, wek jo ma pe neno piny gunen, jo ma neno gudok luwaŋoto.” Luparicayo mogo ma cok kwede guwinyo lok man. Gupenye ni, “Wan bene waŋwa oto?” Yecu odok iye ni, “Kono ka waŋwu oto, kono pe wutye ki bal; ento wun wuwaco ni, ‘Waneno’; pi meno balwu pud bedo gire. “Adada awacciwu ni, ŋat ma pe donyo i dwol romo ki i doggola, ento ito ki ka mukene, dano meno lakwo ki layak; ento ŋat ma donyo ki i doggola, en lakwat romi. Lagwok-doggola yabbe kika, romi winyo dwane; en lwoŋo romi ki nyiŋgi, ci terogi woko. “Ka doŋ ocwalo mere ducu woko, en woto i nyimgi, romi lube, pien giŋeyo dwane. Pe gilubo welo, ento giriŋo woko ki bote, pien pe giŋeyo dwan welo.” Yecu oloko ki gin carolok man, ento pe guniaŋ lok ma en otito botgi. Yecu dok owaco ki gin ni, “Adada awacciwu ni, an a doggola me romi. Jo ducu ma yam obino okwoŋo nyima, gin lukwo dok luyak; ento romi pe owinyo dwangi. An a doggola; ka ŋatti mo odonyo ki bota, en bibwot, bidonyo, bikatti woko, binoŋo cam. Lakwo pe bino pi lok mo mukene, ento kono pi kwalo, pi neko ki pi tyeko; an abino wek gunoŋ kwo, gubed kwede madwoŋ. An lakwat maber. Lakwat maber miyo kwone pi romi. Ŋat ma tiyo pi mucara, ma pe lakwat, ma romi pe mere kikome, ka oneno orudi bino, weko romi, riŋo woko; orudi makogi, keyogi. En riŋo woko pien tiyo pi mucara keken, pe paro pi romi. An lakwat maber; aŋeyo romina, mera bene ŋeya, macalo Won ŋeya, an bene aŋeyo Won; amiyo kwona pi romi. Atye ki romi mukene bene, ma pe me dwol man; myero akelgi bene, gibiwinyo dwana. Kit meno bibedo lwak acel ki lakwat acel. Gin mumiyo Won mara, pien amiyo kwona wek doki agam. Pe tye ŋatti mo ma mayo ki bota; amiyo gira pira kena. Atye ki twer me miyo kwona, dok atye ki twer me gamo doki; alimo cik man ki bot Wora.” Apokapoka dok obedo i kin Lujudaya pi lok man. Jo mapol ki i kingi guwaco ni, “En tye ki cen, opo apoya; piŋo wuwinyo lokke?” Jo mukene guwaco ni, “Lok man pe pa dano ma tye ki cen. Cen twero yabo waŋ dano ma waŋe oto?” I kare meno nino madit me kwero ot pa Lubaŋa obedo i Jerucalem. Onoŋo piny cwir, Yecu onoŋo tye ka wot i ot pa Lubaŋa, i te baraja pa Solomon. Lujudaya gucokke, gurume i dyere, gupenye ni, “Ibimiyo wakalo akala pi kare ma rom mene? Ka in i Kricito ma Lubaŋa oyero, tittiwa atir.” Yecu odokkigi iye ni, “Atyeko tittiwu, wun pe wuye. Tic ma atiyo i nyiŋ Wora gin cadenna. Wun pe wuye, pien pe wutye i kin romina. Romina winyo dwana, an aŋeyogi, gin luba. Amiyogi kwo ma pe tum; gin pe bito matwal, pe tye ŋatti mo ma bimayogi ki i ciŋa. Wora ma omiyogi bota dit makato ducu, pe tye ŋatti mo ma twero mayogi ki i ciŋ Won. An ki Won wan acel.” Lujudaya dok gukwanyo got me cele. Yecu owaccigi ni, “Atyeko nyuttiwu tic mabeco mapol ma oa ki bot Won; wumito cela ki got pi tic mene?” Lujudaya gudokke iye ni, “Pe waceli pi tic mo maber, ento pi yeto Lubaŋa; pien in i dano adana, ikette keni ni in Lubaŋa.” Yecu ogamo doggi ni, “Pe gicoyo i cik mewu ni, ‘An awaco ni wun lubaŋa’? Ka en lwoŋo jo ma lok pa Lubaŋa obino botgi ni gin lubaŋa(ci ginacoya pe twero turre), wun wuwaco bot ŋat ma Won olonyo, oore i lobo, ni, ‘Iyeto lubaŋa,’ pien an awaco ni, ‘An Wod pa Lubaŋa’? Ka pe atiyo tic pa Wora, ci pe myero wuye an; ento ka atiyo ticce, kadi bed pe wuye an gira, myero wuye tic; wek wuŋe dok wuniaŋ ni Won tye i an, ki an i Won.” Dok gutemo make, ento en opucce woko ki i ciŋgi. En dok ocito loka Jordan, i kabedo ka ma yam Jon okwoŋo batija dano iye, obedo kunnu. Jo mapol gubino bote; guwaco ni, “Jon yam pe otiyo lanyut mo ento lok ducu ma Jon otito i kom dano man obedo me ada.” Jo mapol guye en ki kunnu. Ceŋ tye dano mo ma kome lit i Betania ma nyiŋe Lajaro, i paco pa Maliam ki laminne Marita. En Maliam ma yam owiro Rwot ki moo, dok ojwayo tyene ki yer wiye, aye ominne kome lit-ti. Nyimege gucwalo kwena bote kun giwaco ni, “Rwot, ŋat ma imaro kome lit.” Ento ka Yecu owinyo, owaco ni, “Two man pe obino pi neke, ento pi kelo deyo bot Lubaŋa, wek pire gimi deyo bot Wod pa Lubaŋa.” Yecu yam maro marita ki laminne ki Lajaro. Ka owinyo ni kome lit, ci omedde ki ri doki nino aryo i kabedo ma yam en tye iye. Lacen owaco bot lupwonnyene ni, “Wadoku doki i Judaya.” Lupwonnyene gudokke iye ni, “Lapwony, Lujudaya nene gimito celi ki got, in dok idok kunnu?” Yecu ogamo ni, “Cawa me dyeceŋ pe apar wiye aryo? Ka ŋatti mo woto i dyeceŋ, pe yokke, pien neno ceŋ me lobo man. Ento ka ŋatti mo woto dyewor, yokke, pien ceŋ pe i iye.” En owaco kit man, lacen owaco botgi ni, “Laremwa Lajaro doŋ onino, acito wek acicoye woko ki i waŋ nino.” Lupwonnyene guwacce ni, “Rwot, ka onino, ci bicaŋ.” Yecu onoŋo loko pi to mere, ento gin gitamo ni oloko pi yweyo me nino. Lacen Yecu otittigi atir ni, “Lajaro doŋ oto; cwinya yom piwu pien onoŋo pe atye kunnu, wek wun wuye. Ci doŋ wacitu bote.” Tomaci (ma te lokke ni, Baŋi) owaco bot lupwonnye luwote ni, “Wan bene wacitu, wek watoyu kacel kwede.” Ka Yecu oo, onono ni Lajaro doŋ ori i lyel nino aŋwen. Betania onoŋo cok ki Jerucalem, mito romo mairo aryo; jo mapol i kin Lujudaya onoŋo gubino bot Marita ki Maliam pi kweyo cwinygi pi omingi. Ka Marita owinyo ni Yecu oebino, en ocito, oromo kwede, ento Maliam odoŋ, obedo i ot. Marita owaco bot Yecu ni, “Rwot, kono nene itye kany, kono omera pe oto. Dok koni aŋeyo ni gin ducu ma ibilego ki bot Lubaŋa, Lubaŋa bimiyi.” Yecu owacce ni, “Omeru bicer.” Marita ogamo doge ni, “Aŋeyo ni en bicer i cer me nino me agik.” Yecu owacce ki, “An nicer ki kwo; ŋat ma ye an, nadi oto, dok bikwo; dano ducu makwo ma ye an, pe bito matwal. In iye man?” En odok iye ni, “Iyo Rwot; doŋ aye ni in i Kricito ma Lubaŋa oyero, Wod pa Lubaŋa, ma bino i lobo.” Ka Marita oloko lok man, ci ocito olwoŋo laminne Maliam, okwille ni, “Lapwony tye kany, lwoŋi.” Ka en owinyo, ci oa oyotoyot, ocito bote. Yecu onoŋo peya oo i gaŋ-ŋu, ento onoŋo pud tye ka ma Marita oromo iye kwede. Ka Lujudaya ma onoŋo gitye bote i ot kun gikweyo cwinye guneno Maliam oa malo oyotoyot, okato woko, gulubo kore, kun gitamo ni en cito i wi lyel ka koko kunnu. Ka Maliam oo ka ma Yecu tye iye, ka onene, ci opoto piny ka tyene, owacce ni, “Rwot, kono nene itye kany, kono omera pe oto.” Ka Yecu onene kun kok, ki Lujudaya ma gubino kwede bene gikok, cwinye opoto, iye owaŋ matek. Openyo ni, “Wukete kwene?” Gudokke iye ni, “Rwot, bin inen.” Yecu okok ki pig waŋe. Omiyo Lujudaya guwaco ni, “Nen, yam mare mada.” Ento jo mogo i kingi guwaco ni, “En ma ceŋ oyabo waŋ lawaŋoto pe twero geŋo dano man to?” Yecu dok iye owaŋ matek, ojwat, ci obino i lyel; lyel meno onoŋo yam obedo boro got, ma giloro doge ki got. Yecu owaco ni, “Kwanyu got woko.” Marita lamin dano ma oto-ni owaco ni, “Rwot, koni doŋ ŋwe, pien ori nino aŋwen.” Yecu odokke iye ni, “Nakanen pe awacci ni, ka iye, ci ibineno deyo pa Lubaŋa?” Ci gikwanyo got woko. Yecu otiŋo waŋe malo, owaco ni, “Aba, apwoyi pien doŋ iwinya. An aŋeyo con ni iwinya kare ducu, ento awaco lok man pi lwak ma gucuŋ ka ŋeta, wek guye ni in yam iora.” Ka doŋ owaco lok man, ci odaŋŋe ki dwan madit ni, “Lajaro, katti woko!” En ma ceŋ oto-ni okatti woko, kun ciŋe ki tyene giriyo ki boŋo, waŋe giboyo ki kitambara. Yecu ocikogi ni, “Wugonye, wuweke ociti.” Jo mapol i kin Lujudaya ma gubino kacel ki Maliam, ka guneno gin ma Yecu otiyo, guye en. Ento jo mukene i kingi gucito bot Luparicayo, gutittigi gin ma Yecu otiyo. Omiyo ajwagi madito pa Lubaŋa ki Luparicayo gulwoŋo Lukiko, guwaco ni, “Wabitimo gin aŋo? Pien dano man tye ka tiyo lanyut mapol. Ka waweke kit meno, ci dano biye en, Luroma bibino, gibiketo kabedowa maleŋ ki rokwa woko.” Ento ŋat acel i kingi, en Kayapa, ma en ajwaka madit i mwaka meno, owaco ki gin ni, “Wun pe wuŋeyo gin mo kadi matidi mo, dok pe wutamo ni bibedo ber botwu ka dano acel oto pi lwak, wek pe gityek rokwa.” En pe owaco lok man pire kene, ento pi bedo ajwaka madit i mwaka meno ceŋ en otito macalo lanebi ni Yecu bito pi rok meno; pe pi rok meno keken, ento wek ocok litino pa Lubaŋa ma guket ata, gubed acel. Cakke i nino meno guribo lok me neke. Pi meno Yecu pe dok obedo ka wot ka maleŋ i kin Lujudaya, ento oa ki kunnu, ocito i lobo ma cok ki tim, i gaŋ ma gilwoŋo Epraim; obedo kunnu ki lupwonnyene. Kato (Paska) pa Lujudaya onoŋo doŋ tye cok. Jo mapol gia ki i kin pacci gicito Jerucalem ma peya Kato (Paska) oromo, wek gilonnye kengi. Giyenyo Yecu, kun giloko kekengi ma gicuŋ i ot pa Lubaŋa ni, “Wutamo niŋniŋ? Nyo en pe bibino pi nino madit?” Ajwagi madito pa Lubaŋa ki Luparicayo onoŋo doŋ guciko dano ni, ka ŋat mo oŋeyo ka ma en tye iye, myero onyuttigi, wek gimake. Ka ceŋ odoŋ nino abicel me o i Kato (Paska), Yecu obino i Betania, ka ma Lajaro bedo iye, en ma ceŋ Yecu ocere ki i kin jo muto-ni. Gitedde cam me otyeno kunnu; Marita obedo ka poko cam, Lajaro onoŋo ŋat acel i kin jo ma obedo kwede i dog cam. Maliam okwanyo moo ma ŋwece kur me wel madwoŋ, moo nard magili, ma romo ratili acel, owiro ki tyen Yecu, ojwayo tyen Yecu ki yer wiye; ci ŋwec moo oromo i ot ducu. Ento Juda me Keriot, ŋat acel i kin lupwonnyene, en ma bidobe, openyo ni, “Piŋo moo man pe gicato i wel me ciliŋ miya adek, wek gimi bot lucan?” En owaco lok man, pe ni en paro pi lucan, ento pien en yam lakwo, yam gwoko kicaa lim, ci kwanyo gin ma gibolo iye. Yecu owaco ni, “Wuweke, wek en okan pi nino me yika. Lucan wutye kwedgi nino ducu, ento an pe abibedo kwedwu nino ducu.” Ka lwak Lujudaya madwoŋ guniaŋ ni en tye kunnu, ci gubino, pe pi Yecu keken, ento bene pi neno Lajaro ma en ocero ki i kin jo muto. Pi meno ajwagi madito pa Lubaŋa guyubo lok me neko Lajaro bene, pien pire Lujudaya mapol gua woko ki botgi, guye Yecu. Orwone lwak jo mapol ma yam gubino i nino madit guwinyo ni Yecu bino i Jerucalem. Gukwanyo jaŋ otit, gukato ka jole, kun gidaŋŋe ni, “Ojana! Lubaŋa o mi gum i kom ŋat ma bino i nyiŋ Rwot, ma en Kabaka pa Icrael!” Yecu onoŋo latin kana, obedo i wiye, kit macalo gicoyo ni, “Pe wulwor, wun jo Cion. Nen, kabakawu bino botwu, obedo i wi latin kana!” Lupwonnyene pe guniaŋ man koŋ; ento ka doŋ giketo deyo i kom Yecu, ci gupo ni ceŋ gicoyo lok magi i kome, dok ni gitimo i kome. Lwak ma yam onoŋo tye bote ka en lwoŋo Lajaro ki i lyel me cere ki i kin jo muto gutito pire. En aye mumiyo lwak ocito ka jole, pien guwinyo ni en otiyo lanyut man. Luparicayo guloko kekengi ni, “Doŋ wuneno ni pe wukonyo gin mo. Nen, lobo ducu doŋ owirre ka lube.” I kin jo ma yam gucito ka woro Lubaŋa i nino madit onoŋo jo mogo Lugrik. Jo-nu gucito bot Pilipo me Betecaida ma tye i Galilaya, guwacce ni, “Ladit, wamito neno Yecu.” Pilipo ocito, otito bot Anderiya; Anderiya ocito kacel ki Pilipo, gutito bot Yecu. Yecu odokkigi iye ni, “Cawa doŋ oromo me keto deyo i kom Wod pa dano. Adada awacciwu ni, nyig bel ka pe opoto i ŋom, oto, bedo kene; ento ka oto, ci ceko nyige mapol. Ŋat ma maro kwo mere, birwenyone; ŋat ma kwero kwone i lobo man, bigwoko nio i kom kwo ma pe tum. Ka ŋat mo tiyo pira, myero oluba; ka ma an abedo iye, laticca bene bibedo kunnu; ka ŋat mo tiyo pira, ci Won binyuto worone i kome. “Cwinya koni oŋabbe aŋaba. Abiwaco lok aŋo? Abana, lara i kom cawa man? Ento pi lok man omiyo ao i kom cawa-ni. Abana, ket deyo i kom nyiŋi.” Dwan oa ki i polo ni, “Doŋ aketo deyo i kome, dok abiketo aye.” Lwak ma gucuŋ ka ŋete guwinyo, ci guwaco ni, “Polo omor.” Jo mukene ni, “Lamalaika oloko kwede.” Yecu ogamo ni, “Dwan man pe obino pira, ento piwu. Koni gitye ka ŋolo kop i kom lobo man; koni lalo lobo man gibibole woko. An ka gitiŋa malo nia i lobo, ci abipeyo dano ducu bota.” En oloko lok man pi nyuto kit to ma ebito kwede Lwak gugamo doge ni, “Wan wawinyo ki i cik ni Kricito ma Lubaŋa oyero bedo nakanaka. In dok iwaco niŋniŋ ni Wod pa dano myero gitiŋe malo? Wod pa dano man en aŋa?” Yecu owaccigi ni, “Ceŋ pud tye botwu pi kare manok. Wuwot ma kun wutye ki ceŋ, wek piny macol pe oŋukwu. Ŋat ma woto i piny macol pe ŋeyo ka ma ecito iye. Ka pud wutye ki ceŋ, wuye ceŋ, wek wudok litino me ceŋ.” Yecu ka oloko lok man, ci opokke ki botgi, okanne woko ki botgi. Kadi bed otiyo lanyut ma rom meno i nyimgi, pe guye en; wek lok pa lanebi Icaya ocobbe kakare, ni, “Rwot, aŋa ma oye lok ma watito? Dok aŋa ma Rwot onyuto tekone bote?” Man en gin mumiyo pe gitwero ye, pien Icaya dok owaco ni, “En oneko waŋgi, omiyo cwinygi odoko nwaŋ, wek pe gunen ki waŋgi, pe bene guniaŋ ki cwinygi, wek omi pe gulokke gudwog bota acaŋgi.” Icaya owaco lok man pien oneno deyo mere, oloko pire, Kadi bed kit meno, jo mapol ma i kin luloc bene guye en, ento pi lworo Luparicayo omiyo pe gituco, wek pe giryemgi woko ki i kacokke; pien gimaro deyo ma dano keto i komgi makato ma Lubaŋa miyo. Yecu odaŋŋe, owacci, “Ŋat ma ye an, pe oye an, ento oye ŋat ma oora. Ŋat ma onena, noŋo oneno ŋat ma oora. An abino i lobo pi bedo ceŋ me lobo, wek dano ducu ma ye an owek bedo i piny macol. Ka dano mo winyo lokka ci pe mako, an pe aŋolo kop i kome; pien pe abino ka ŋolo kop i kom lobo, ento abino ka laro lobo. Ŋat ma kwera, ma pe winyo lokka, tye ki ŋat ma biŋolo kop i kome; lok ma aloko biŋolo kop i kome i nino me agik. Pien pe aloko pira kena: Won ma oora, en kikome aye omiya cik, i gin ma myero awaci ki ma myero aloki. Aŋeyo ni cikke en kwo ma pe tum; pi meno gin ma awaco, awaco macalo Won oloko bota.” Ma peya nino madit me Kato (Paska) oo, Yecu onoŋo ŋeyo ni cawane doŋ oromo me weko lobo man me dok bot Won; yam maro jone ma tye i lobo man; omarogi nio i agik, Ka pud gitye ka camo cam me otyeno, ma doŋ Catan oketo tam i cwiny Juda wod pa Cimon me Keriot me dobe, Yecu onoŋo ŋeyo ni Won otyeko miyo jami ducu i ciŋe, dok ni ea ki bot Lubaŋa, dok edok bot Lubaŋa. Oa malo ki i dog cam, olunyo boŋŋine oketo teŋe, okwanyo taulo, otweyo i pyere. Oonyo pii i becen, ci ocako lwoko tyen lupwonnye, ojwayo ki taulo ma otweyo i pyere. Ka en oo bot Cimon Petero, Petero openye ni, “Rwot, in kulu aye ilwoko tyena?” Yecu odokke iye ni, “In pe iŋeyo gin ma atye ka tiyo, ento ibiniaŋ lacen.” Petero owacce ni, “In pe ibilwoko tyena matwal.” Yecu odokke iye ni, “Ka pe alwoki, noŋo ribbe pe i kinwa.” Cimon Petero owacce ni, “Rwot, pe doŋ tyena keken, ento ciŋa ki wiya bene.” Yecu owacce ni, “Ŋat ma doŋ olwokke, pe doŋ myero olwok kome, ento kono tyene keken, pien noŋo kome ducu leŋ. Wun wuleŋ, ento pe wun ducu.” En onoŋo oŋeyo ŋat ma bidobe; en aye gin mumiyo en owaco ni, “Pe wun ducu wuleŋ.” Ka doŋ olwoko tyengi, okwanyo boŋŋine, odok i kabedone, openyogi ni, “Wuniaŋ gin ma atimo i komwu? Wulwoŋa ni Lapwony dok ni Rwot; meno ber, pien atye kit meno. Ka an a Rwotwu ki Lapwonywu, alwoko tyenwu, wun bene myero wulwok tyenwu kekenwu; pien an anyuttiwu lanen, wek wun bene wutim gin ma an atimo i komwu. Adada awacciwu ni, latic pe bedo dit makato laditte, ŋat ma gioro pe dit kato ŋat ma oore. Ka wuŋeyo lok man, ci wubibedo ki yomcwiny ka wutiyogi. Pe aloko man i komwu ducu; aŋeyo jo ma doŋ ayero; ento wek ginacoya ocobbe kakare, ni, ‘Ŋat ma camo kwon kacel kweda otiŋo opunye i koma.’ Koni atittiwu lok man ma peya otimme, wek ka bitime, wuye ni an atye. Adada awacciwu ni, ŋat ma jolo dano ma an aoro, noŋo ojolo an; ŋat ma jolo an, ojolo ŋat ma oora.” Ka Yecu oloko lok man, ci cwinye opoto, oloko atyer ni, “Adada awacciwu ni, ŋat acel i kinwu bidoba.” Lupwonnye gunenne kekengi, pe guniaŋ ŋat ma en oloko i kome. Ŋat acel i kin lupwonnye, en ma Yecu maro, onoŋo obuto cok ki kor Yecu. Cimon Petero ogwele, owacce ni, “Tucciwa ŋat ma en oloko i kome.” En ma ojeŋŋe i kor Yecu openye ni, “Aŋa, Rwot?” Yecu ogamo ni, “En aye ŋat ma abigweyo dek, amiyo bote.” Ka doŋ ogweyo dek, ci omiyo bot Juda wod pa Cimon me Keriot. Ka doŋ ogamo, ci Catan odonyo i iye. Yecu owacce ni, “Gin ma imito timo, tim oyot.” Pe tye ŋat mo i dog cam ma oniaŋ gin ma omiyo oloko lok man bote. Jo mogo gutamo ni, pien Juda onoŋo gwoko kicaa limgi, mumiyo Yecu owacce ni, “Wil jami ma mitte pi nino madit”; nyo ni myero omi gin mo bot lucan. Ka en doŋ ocamo dek ma gigwene, ci okato woko cut; onoŋo piny doŋ col. Ka doŋ okato woko, Yecu owaco ni, “Koni doŋ giketo deyo i kom Wod pa dano, dok giketo deyo i kom Lubaŋa pire. Ka giketo deyo i kom Lubaŋa pire, Lubaŋa bene biketo deyo i kome pire kene, biketo deyo i kome oyotoyot. Litino aduno, pud atye kwedwu pi kare manok. Wubiyenya, ento macalo ceŋ atito bot Lujudaya, kit meno atittiwu bene koni ni, ‘Ka ma acito iye, wun pe wutwero bino iye.’ Amiyowu cik manyen, ni, wumarre kekenwu; wumarre kekenwu macalo ceŋ amarowu. Pi man dano ducu biŋeyo ni wun lupwonnyena, ka mer tye i kinwu.” Cimon Petero openye ni, “Rwot, icito kwene?” Yecu ogamo ni, “Ka ma acito iye, pe itwero luba koni, ento ibiluba lacen.” Petero dok openye ni, “Rwot, piŋo pe atwero lubi koni? Abimiyo kwona piri.” Yecu ogamo ni, “Ibimiyo kwoni pira? Adada awacci ni, twon gweno pe bikok, nio ka koŋ ikwera tyen adek. “Cwinywu owek ŋabbe aŋaba; wuye Lubaŋa, wuye an bene. I ot pa Abana tye iye kabedo mapol; kono pe kit meno, kono atittiwu ni acito ka yubo ki wun kabedo? Ka acito, ayubo ki wun kabedo, dok abidwogo ka omowu bota, wek ka ma an abedo iye, wun bene wubed iye. Ka ma an acito iye, wun wuŋeyo yone.” Tomaci owacce ni, “Rwot, wan pe waŋeyo ka ma icito iye; watwero ŋeyo yone niŋniŋ?” Yecu odokke iye ni, “An a yo, ki ada, ki kwo: pe tye ŋat mo ma bino bot Won, kono ki i an keken. Kono ceŋ wuŋeya, kono wuŋeyo Wora bene; nia koni wuŋeye, doŋ wunene.” Pilipo ogamo doge ni, “Rwot, nyuttiwa Won, ci biromowa.” Yecu odokke iye ni, “Doŋ ari kwedwu kare malac rom man, pud peya iŋeya, Pilipo? Ŋat ma oneno an doŋ oneno Won: itwero waco niŋniŋ ni, ‘Nyuttiwa Won?’ In pe iye ni, an atye i Won, ki Won i an? Lok ma aloko botwu pe aloko pira kena, ento Won ma bedo i an aye tiyo ticce. Wuye ni an atye i Won, ki Won i an; nyo ka pe kit meno, wuye an pi tic keken. “Adada awacciwu ni, ŋat ma ye an, en bene bitiyo tic ma an atiyo; dok bitiyo tic madito makato man, pien acito bot Won. Gin ducu ma wubilego i nyiŋa, abitiyone, wek giket deyo i kom Won pi Wod; ka wubilego gin mo i nyiŋa, abitiyo. “Ka wumara, ci wubigwoko cikka. Abilego Won, en bimiyowu Lacuŋudwar mukene ma bibedo kwedwu nakanaka, en Cwiny me ada, ma lobo pe twero limo, pien lobo pe nene, dok pe ŋeye. Wun wuŋeye, pien en bedo kwedwu, dok bibedo i iwu. “Pe abiwekowu macalo litino kic; abidwogo botwu. Odoŋ kare manok, lobo pe dok binena, ento wun wubinena; pien an akwo, wun bene wubikwo. I nino meno wubiŋeyo ni an atye i Won, ki wun i an, ki an i wun. Ŋat ma tye ki cikka, ma gwokogi, en aye ŋat ma mara; ŋat ma mara Wora bimare, an bene abimare, abinyutte kena bote.” Juda ma pe me Keriot openye ni, “Rwot, man bibedo niŋniŋ, ni ibinyutte keni botwa, ento pe bot lobo?” Yecu odokke iye ni, “Ka ŋat mo mara, en bimako lok mera; Wora bimare, wabibino bote, wabiyubo kabedo piwa kenwa bote. Ŋat ma pe mara, pe mako lokka; lok ma wuwinyo pe mera, ento pa Won ma ceŋ oora. “Lok man atittiwu kun pud atye botwu. Ento Lacuŋudwar, ma en Cwiny Maleŋ, ma Won bicwalo i nyiŋa, en bipwonyowu jami ducu, en bipoyo wiwu i lok ducu ma yam atittiwu. Awekkiwu kuc, kuc mera amiyo botwu. Amiyowu, pe macalo lobo miyo. Cwinywu owek ŋabbe aŋaba, pe wulwor. Doŋ wuwinyo awacciwu ni, an abicito woko, dok abidwogo botwu. Kono wumara, kono cwinywu yom, pien acito bot Won; pien Won dit kata. Koni atittiwu lok man ma peya otimme, wek ka bitimme, wuye. Pe dok abiduro lwak lok mapol kwedwu, pien lalo lobo man tye ka bino. En pe tye ki twer i koma; ento man timme wek lobo oŋe ni, an amaro Won, atiyo macalo Won ocika. “Ayu, wacitu. “An aye olok me ada, Abana en lapur. Jaŋe ducu ma i koma ma pe nyak en lwero woko, ento jaŋa ducu ma nyak en lonyo, wek omedde, onyak mapol. Wun doŋ gityeko lonyowu pi lok ma aloko botwu. Wubed i an, an bene i iwu. Macalo jaŋ olok pe twero nyak pire kene, ka pe tye i kom yatte, kit meno wun bene pe wutwero, ka pe wubedo i an. An olok, wun jaŋe. Ŋat ma bedo i an, ki an i en, en nyako nyige mapol, pien pe wutwero timo gin mo ka an a pe. Ka dano mo pe bedo i an, ci gibole woko macalo jaŋ yat, two woko. Gicokogi, gibologi i mac, giwaŋ woko. Ka wubedo i an, kun lokka bedo i wun, ci wuleg gin ducu ma wumito, gibitimo piwu. Man bikelo deyo i kom Abana, ka wunyako nyig mapol; kit meno wubidoko lupwonnyena. Macalo Won ceŋ omara, an bene amarowu kit meno; wubed i marra. Ka wugwoko cikka, wubibedo i marra, kit macalo ceŋ agwoko cik pa Abana, abedo i marre. Lok man atittiwu wek yomcwinya obed i iwu, wek wupoŋ ki yomcwiny. “Man aye cikka, ni wumarre kekenwu macalo ceŋ amarowu. Pe tye ŋat mo ma tye ki mar madit makato man, ni dano miyo kwone pi lureme. Wun lurema ka wutiyo gin ducu ma acikowu. Pe dok alwoŋowu lutic, pien latic pe ŋeyo gin ma laditte tiyo; ento alwoŋowu lurema, pien gin ducu ma yam awinyo ki bot Wora doŋ atyeko nyuttiwu. Pe wun aye wuyera, ento an aye ayerowu, dok aketowu wek wuciti, wunyak nyigwu, dok wek nyigwu ori; wek gin ducu ma wubilego ki bot Won i nyiŋa, en omiwu. Gin ma acikowu en ene ni, wumarre kekenwu. “Ka lobo okwerowu, wuŋe ni yam okwoŋo kwera ma kun peya okwerowu. Kono wun jo me lobo, kono lobo omaro wun jone; ento wun pe me lobo, ento ayerowu ki i lobo; pi meno lobo kwerowu. Wupo i lok ma yam atito botwu ni, ‘Latic pe bedo dit makato laditte.’ Ka yam giliba, wun bene gibilibowu; ka yam gimako lokka, gibimako mewu bene. Gin magi ducu gibitimo i komwu pi nyiŋa, pien pe giŋeyo ŋat ma yam oora. Kono pe nene abino, aloko botgi, kono pe gitye ki bal; ento koni doŋ pe gitye ki lok ma gibipido pi balgi. Ŋat ma kwera, okwero Wora bene. Kono yam pe atiyo i kingi tic ma dano mo mukene pe otiyo, kono pe gitye ki bal, ento koni doŋ guneno dok gukwero an ki Wora. Ento man otimme wek lok ma gicoyo i cik megi ocobbe kakare, ni, ‘Gikwera nono.’ Ento ka Lacuŋudwar bibino, ma abioro botwu nia ki bot Won, ma en aye Cwiny me ada ma a ki bot Won, en bibedo cadenna. Wun bene wucaden, pien wubedo bota nia i acakki. “Atyeko tittiwu lok man wek pe komwu oryaŋŋe. Gibiryemowu woko ki i kacokke; kare bibino ma dano ducu ma nekowu bitamo ni etye ka tic pi Lubaŋa. Gibitimo man i komwu pien pe giŋeyo Won, kadi an. Ento atittiwu lok magi wek ka karegi bio, wupo ni yam atittiwu pigi. “Yam pe atito lok man botwu i acakki, pien onoŋo pud atye kwedwu. Ento koni adok bot ŋat ma ceŋ oora. Pe tye ŋat mo i kinwu ma penya ni. ‘Icito kwene?’ Cwinywu opoŋ ki kumu pien atittiwu lok man. Ento atye ka tittiwu lok ada, ni, bibedo ber botwu ka an acito; pien ka pe acito, ci Lacuŋudwar pe bibino botwu. Ento ka acito, ci abiore botwu. En ka obino, bimiyo lobo niaŋ i kom bal, ki kit ma atir, ki ŋolo kop; i kom bal, pien pe giye an; i kom kit ma atir, pien adok bot Won, pe dok wubinena; i kom ŋolo kop, pien laloc me lobo man doŋ giŋolle kop woko. “Pud atye ki lok mapol me awaca botwu, ento pe wutwero kanyo koni. Ka Cwiny me ada bibino, en bitelowu i ada ducu; pien en pe bilok pire kene, ento gin ducu ma en biwinyo, biwaco botwu, bitittiwu gin ma bitimme anyim. En biketo deyo i koma, pien bikwanyo gin ma tuŋ bota, nyuttiwu. Gin ducu ma Won tye kwede mega; en mumiyo awacciwu ni, en bikwanyo gin ma tuŋ bota, nyuttiwu. “Odoŋ kare manok, pe dok wubinena; dok odoŋ kare manok, wubinena.” Lupwonnyene mogo guloko kekengi ni, “Man gin aŋo ma en waco botwa, ni, ‘Odoŋ kare manok, pe wubinena, dok odoŋ kare manok, wubinena’; dok ni, ‘Pien adok bot Won’?” Guwaco ni, “Man kono te lokke niŋo, ni, ‘Odoŋ kare manok’? Pe waniaŋ gin ma en tye ka waco.” Yecu oŋeyo ni gin mito penye, omiyo en owaccigi ni, “Wutye ka pennye kekenwu pi lok ma nen awacciwu, ni, ‘odoŋ kare manok, pe dok wubinena; dok odoŋ kare manok, wabinena’? Adada awacciwu ni, wubikok, wubikumo, ento lobo cwinye bibedo yom; cwinywu bicwer, ento cwercwinywu bilokke doko yomcwiny. Ka mwoc ogoyo dako, kumo, pien cawane doŋ oromo; ento ka doŋ onywal, pe po i can pien noŋo cwinye yom pi nywalo dano i lobo. Koni cwinywu cwer, ento abinenowu doki, ci cwinywu bibedo yom, pe tye ŋat mo ma bikwanyo yomcwinywu ki botwu. I nino meno pe wubipenya lok mo. Adada awacciwu ni, ka wubilego gin mo bot Won, en bimiyowu i nyiŋa. Nio koni yam pe wulego gin mo i nyiŋa; wulegi, wubinoŋo, wek wupoŋ ki yomcwiny. “Lok man atittiwu i carolok; kare bibino ma pe dok abilok kwedwu i carolok, ento abitittiwu ka maleŋ lok i kom Won. I nino meno wubilego i nyiŋa. Pe awacciwu ni abilego Won piwu, pien Won kikome marowu, pien wun wumara, dok wuye ni an aa bot Won. An aa bot Won, abino i lobo; doki aweko lobo, adok bot Won.” Lupwonnyene guwaco ni, “Nen, koni iloko ka maleŋ, pe i carolok. Koni waŋeyo ni, in iŋeyo gin ducu, dok penyi pe dok mitte; pi man waye ni ia ki bot Lubaŋa.” Yecu odok iye ki gin ni, “Koni doŋ wuye? Kare bibino, bene doŋ oo, ma wubiket woko, ŋat acel acel i pacone, wubiweka kena. Ento pe atye kena, pien Won tye kweda. Awaco lok man botwu wek wubed ki kuc i an I lobo wutye ki can; ento wudi cwinywu, an doŋ aloyo lobo.” Yecu ka oloko man, otiŋo waŋe malo i polo, owaco ni, “Abana, kare doŋ oromo; ket deyo i kom Wodi, wek Wodi bene oket deyo i komi, macalo yam imiye twero i kom gin ducu ma tye ki kom, wek omi kwo ma pe tum bot jo ducu ma ceŋ imiyo bote. Man en kwo ma pe tum, ni giŋe in Lubaŋa acel me ada, ki Yecu Kricito ma yam ioro. Doŋ aketo deyo i komi i lobo, kun acobo tic ma ceŋ imiya me atiya. Doŋ koni, Abana, ket deyo i koma i nyimi, ki deyo ma yam abedo kwede i nyimi ma peya iketo lobo. “Atyeko nyuto nyiŋi bot jo ma ceŋ imiya ki i lobo. Gin ceŋ meri, in imiyogi bota, gin gugwoko lokki. Koni giŋeyo ni jami ducu ma imiya oa ki boti; pien doŋ amiyogi lok ma ceŋ imiya, gin doŋ gujolo, giŋeyo atikatika ni an aa ki boti; dok giye ni in iora. Alego pi gin; pe alego pi lobo, ento pi jo ma ceŋ imiya, pien gin meri. Jamina ducu meri, ki meri ducu mera, alimo deyo pigi. An pe dok abedo i lobo, ento gin gitye i lobo, an abino boti. Won Maleŋ, gwokgi i nyiŋi ma con imiya, wek gibed acel macalo wan acel. Ka ceŋ atye kwedgi kacel, agwokogi i nyiŋi ma imiya; akurogi, pe tye mo ma orwenyo ki i kingi, kono dano ma myero orweny, wek ginacoya ocobbe kakare. Ento koni abino boti; lok man aloko i lobo, wek gubed ki yomcwiny mera, gupoŋ kwede. Atyeko miyogi lok meri; ci lobo okwerogi, pien gin pe jo me lobo, macalo an pe a dano me lobo. pe alego ni myero ikwanygi woko ki i lobo, ento ni igwokgi ki i kom gin marac. Gin pe jo me lobo, macalo ceŋ an pe a dano me lobo. Lonygi i ada gibed maleŋ: lokki en ada. Macalo iora i lobo, an bene aorogi i lobo. An alonnye kena pigi, wek gin bene gilonygi i ada. “Pe alego pi jo man keken, ento pi jo ma biye an pi lokgi, ni gin ducu gubed acel macalo in, Abana, ibedo i an, an bene i in, gin ducu gubed i wan, wek lobo oye ni in iora. Deyo ma ceŋ imiya, an amiyo botgi, wek gubed acel macalo wan acel, an i gin ki in i an, gubed acel atika, wek lobo oŋe ni in iora, dok imarogi macalo imara. Abana, amito jo-ni, ma gin mot ma imiya, gibed bota ka ma an atye iye, wek ginen deyo mera ma imiya pi mar meri ma imara kwede ma ocakke ma peya icibo guti me lobo. Ai Won muporre, lobo con pe oŋeyi, ento an aŋeyi; jo man ŋeyo ni in iora. Amiyo nyiŋi oŋene botgi, dok abimiyo ŋene, wek mar ma imara kwede obed i gin, ki an i igi.” Ka Yecu doŋ oloko man, ocito kacel ki lupwonnyene, guŋolo nota me Kidron, ka ma onoŋo tye iye poto; odonyo iye kacel ki lupwonnyene. Juda, ma ceŋ odobe, bene onoŋo ŋeyo kabedo meno, pien Yecu ki lupwonnyene yam gimaro cokke kunnu. Juda ogamo lwak askari ki ludito tic mogo ki bot ajwagi madito pa Lubaŋa ki Luparicayo, gucito kunnu ki tara ki mac raa ki jami lweny. Yecu onoŋo ŋeyo gin ducu ma bitimme i kome; okato botgi, openyogi ni, “Wuyenyo aŋa?” Gudokke iye ni, “Yecu me Najaret.” Yecu ogamo ni, “An a en.” Juda ma odobe onoŋo ocuŋ kacel kwedgi. Ka Yecu owaco ki gin ni, “An a en,” gujer ki ŋegi, gupoto piny. Dok openyogi ni, “Wuyenyo aŋa?” Gudokke iye ni, “Yecu me Najaret.” Yecu owaco ni, “Atyeko tittiwu ni an a en; ka wuyenya, wuwek jo man guciti.” Man otimme wek lok ma ceŋ en oloko ocobbe kakare, ni, “I kin jo ma ceŋ imiya, pe tye mo ma orwenyo.” Cimon Petero onoŋo tye ki pala lucwan; ci owoto, otoŋo ki opii pa ajwaka madit, oŋuno ite malacuc. Nyiŋ opii meno Maliko. Yecu ociko Petero ni, “Dwok palani i akurane. Kikopo ma Abana omiya pe abimato?” Lwak askari ki laditgi ki lutic pa Lujudaya gumako Yecu, gutweye. Gukwoŋo tere bot Anac, ma Kayapa onyomo nyare, ma onoŋo en ajwaka madit i mwaka meno. Kayapa en aye ceŋ omiyo tam bot Lujudaya ni ber dano acel oto pi lwak. Cimon Petero olubo kor Yecu, kacel ki lapwonnye meno mukene. Lapwonnye man onoŋo ŋeyo ajwaka madit, omiyo en odonyo i dyekal pa ajwaka madit kacel ki Yecu; ento Petero ocuŋ woko i doggaŋ. Lapwonnye meno ma ajwaka madit ŋeyo ocito, oloko ki aŋeca ma gwoko doggaŋ, ci okelo Petero i gaŋ. Aŋeca ma gwoko doggaŋ openyo Petero ni, “In bene pe itye i kin lupwonnye pa dano man?” En ogamo ni, “An a pe i kingi.” Lutic ki ludito tic onoŋo gumoko mac miri, pien piny onoŋo ŋic, ci gicuŋ kun gioyo mac. Petero bene onoŋo ocuŋ kacel kwedgi ka oyo mac. Ajwaka madit openyo Yecu pi lupwonnyene, ki i kom lok ma en pwonyo. Yecu odokke iye ni, “Yam aloko ka maleŋ bot lobo; nino ducu abedo ka pwony i kacokke ki i ot pa Lubaŋa, ka ma Lujudaya ducu gicokke iye. Pe aloko lok mo i muŋ. Ipenya piŋo? Peny jo ma yam guwinyo lok ma awaco botgi; gin ŋeyo lok ma awaco.” Ka oloko lok man, ci ŋat acel i kin ludito tic ma ocuŋ i ŋete odoŋo lem Yecu, kun waco ni, “Igamo dog ajwaka madit kumeno?” Yecu ogamo ni, “Ka aloko marac, nyut caden me gin marac; ento ka aloko maber, ci idoŋa piŋo?” Lacen Anac ocwale bot Kayapa, ajwaka madit, kun pud gitweye. Cimon Petero onoŋo ocuŋ kun oyo mac. Gupenye ni, “In bene pe i ŋat acel i kin lupwonnyene?” En okwero woko, owaco ni, “An ko.” Ŋat acel i kin opii pa ajwaka madit, wat pa dano ma Petero oŋuno ite-ni, openye ni, “Nanen pe aneni kacel kwede i poto?” Petero dok okwero; ci twon gweno otugi kok cut. Lacen gikwanyo Yecu ki i ot pa Kayapa, gitere i Praitorion. Onoŋo piny doŋ cok ru. Gin kikomgi pe gudonyo i Praitorion, pien pe gimito balle, ento koŋ gicam Kato (Paska). Pi man omiyo Pilato okato woko botgi, openyogi ni, “Wudoto dano man pi kop aŋo?” Gudokke iye ni, “Kono dano man pe latim marac, kono pe wakele boti.” Pilato owaccigi ni, “Wun kikomwu wutere, wuŋolle kop kun wulubo cikwu.” Lujudaya gudokke iye ni, “Pe giye wan wanek dano mo.” Man otimme wek lok ma Yecu owaco ocobbe kakare, kun nyuto kit to ma ebito kwede. Pilato dok odonyo i Praitorion, olwoŋo Yecu, openye ni, “In i Kabaka pa Lujudaya?” Yecu ogamo ni, “In iwaco lok man piri keni, kece mono jo mukene aye gutitti?” Pilato odok iye ni, “An Lajudaya? Rokki ki ajwagi madito pa Lubaŋa gukeli bota. In itimo gin aŋo?” Yecu ogamo ni, “Kerra pe me lobo man. Kono kerra me lobo man, kono jona gulwenyo pira, wek pe gimiya i ciŋ Lujudaya; ento kerra pe me lobo man.” Pilato openye ni, “In doŋ i kabaka, bo?” Yecu ogamo ni, “In iwaco ni an a kabaka. Ginywala pi man, abino i lobo bene pi man, pi bedo caden me lok ada. Dano ducu me ada winyo dwana.” Pilato openye ni. “Ada en gin aŋo?” Ka owaco lok man, ci okato woko bot Lujudaya, otittigi ni, “An gira pe anoŋo kop mo i kome. Ento wun wutye ki kitwu ni myero agonnyiwu ŋat acel i kare me Kato (Paska). Wumito agonnyiwu Kabaka pa Lujudaya?” Gin dok guwo ni, “Pe en, ento Baraba.” Baraba kono ceŋ layak. Pilato otero Yecu, ogoye ki anino. Askari gucweyo lalukana okuto, gurwako i wiye, dok guruke ki boŋo makwar. Gibino bote kun guwaco ni, “Amoti, Kabaka pa Lujudaya!” gidoŋe. Pilato dok okato woko botgi, owaco ki gin ni, “Nen, akelo en botwu, wek wuŋe ni pe anoŋo kop mo i kome.” Yecu okatti woko botgi kun oruko lalukana okuto ki boŋo makwar. Pilato owaccigi ni, “Nenu dano man.” Ka ajwagi madito pa Lubaŋa ki ludito tic gunene, guwo ni. “Gure kom yat! Gure kom yat!” Pilato owaco botgi ni, “Wun wutere, wugure kom yat, pien an gira pe anoŋo kop mo i kome.” Lujudaya gugamo doge ni, “Wan watye ki cik; pi cik meno en myero oto, pien okette kene ni en Wod pa Lubaŋa.” Ka Pilato owinyo lok man, lworo omedde i kome. Dok odok i Praitorion, openyo Yecu ni, “In ia ki kwene?” Ento Yecu pe ogamo doge. Omiyo Pilato owacce ni, “Pe igamo doga? Pe iŋeyo ni atye ki twer me gonyi, ki twer me guri kom yatariya?” Yecu odokke iye ni, “Kono nene pe gimiyi twer ma oa ki malo kono pe ibedo ki twer i koma; pi meno ŋat ma omiya boti tye ki bal madit makato.” Nia i kare meno Pilato ocako yenyo yo me gonye, ento Lujudaya guwo ni, “Ka igonyo dano man, ci in pe larem Cecar. Dano ducu ma kette kene bedo kabaka, noŋo pyem ki Cecar.” Ka Pilato owinyo lok man, okelo Yecu woko, obedo i wi kom me ŋolo kop i kabedo ma gicano iye got; i leb Ibru gilwoŋo ni, Gabbata. Onoŋo nino ca nino me Yubbe me Kato (Paska), cawa cok romo abicel. En owaco bot Lujudaya ni, “Nenu, Kabakawu en!” Dano guwo ni, “Tere woko! Tere woko! Gure i kom yatariya!” Pilato openyogi ni, “Agur kabakawu i kom yatariya?” Ajwagi madito pa Lubaŋa gudok iye ni, “Wan pe watye ki kabaka, kono Cecar keken.” Omiye botgi wek gigure i kom yatariya. Gitero Yecu, okato woko kun tiŋo yatariyane, ocito i kabedo ma gilwoŋo Cogo Wic; i leb Ibru gilwoŋo ni, Golgota. Gigure i kom yatariya kunnu, ki jo mukene aryo kacel kwede, acel tuŋcel, acel tuŋcel, kun Yecu tye i dyere. Pilato ocoyo lok, oguro i wi yatariya; gicoyo ni, “Yecu me Najaret, Kabaka pa Lujudaya.” Lujudaya mapol gukwano lok man, pien ka ma giguro iye Yecu onoŋo tye cok ki gaŋ, dok gicoyo i leb Ibru, i leb Roma ki i leb Grik. Ajwagi madito pa Lubaŋa pa Lujudaya guwaco bot Pilato ni, “Pe ico ni, ‘Kabaka pa Lujudaya,’ ento ni, ‘Dano man owaco ni, An Kabaka pa Lujudaya.’ ” Ento Pilato odok iye ni, “Gin ma acoyo, doŋ acoyo.” Ka askari gutyeko guro Yecu i kom yatariya, gukwanyo ginarukane, gupoko i dul aŋwen, dul acel pi askari acel acel; ki kanyine bene. Kanyine onoŋo pe gikwoyo akwoya, ento gicweyo acweya, cakke ki malo. Guloko kekengi ni, “Pe myero wayecu, ento wabol kwir iye, wek wanen ŋat ma bitero.” Man otimme wek ginacoya ocobbe kakare, ni, “Gipoko ginarukana i kingi, gibolo kwir i kom boŋona.” Askari gutimo man; ento min Yecu ki lamin minne, Maliam dako pa Kelopa, ki Maliam Lamagdala onoŋo gucuŋ i te yatariyane. Ka Yecu oneno minne, ki lapwonnye meno ma en maro kun gucuŋ i ŋete, owaco bot minne ni, “Maa, nen wodi!” Ka dok owaco bot lapwonnye meno ni, “Nen meni.” Nia i cawa meno lapwonnye meno otere paco, ogwoke. Lacen ka man otum, Yecu oŋeyo ni ducu doŋ otum; wek ginacoya ocobbe kakare, owaco ni, “Orwo neka.” Agulu koŋo vino mawac onoŋo gicibo kunnu; girwako amor ma opoŋ iye koŋo vino mawac i wi anyero, giketo i doge. Ka Yecu doŋ omato koŋo vino mawac, owaco ni, “Doŋ otum.” Okulo wiye, omiyo cwinye. Nino meno obedo ceŋ me Yubbe, omiyo Lujudaya gukwayo Pilato ni myero gitur tyen dano ma gigurogi, gitergi woko, wek komgi pe ori i wi yat i ceŋ cabit, pien cabit meno en nino madit. Askari gubino, guturo tyen dano mukwoŋo, ki tyen dano me aryone ma ceŋ giguro kacel kwede; ento ka guo i kom Yecu, guneno ni doŋ otyeko to woko, ci pe dok guturo tyene. Ento ŋat acel i kin askari ocobo lakŋete ki toŋ; ci oyotoyot oa iye remo ki pii. Ŋat ma ceŋ oneno obedo caden, lok ma en obolo tye ada, en ŋeyo ni ebolo lok ada, wek wun bene wuye. Pien meno ducu otimme wek ginacoya ocobbe kakare, ni, “Cogone mo pe gibituro.”” Dok dul ginacoya mukene owaco ni, “Gibineno ŋat ma gicobo.” Ka man otum, Yucepu me Arimataya, ma onoŋo en lapwonnye pa Yecu, ento i muŋ, pi lworo Lujudaya, olego Pilato ni myero eter kom Yecu; ci Pilato oye. Obino, otero kome. Nikodemo bene, ma yam ocito bot Yecu dyewor, obino kun okelo murra ma girubo ki atakarac, ma pekke mito romo ratili miya. Gutero kom Yecu, guboyo ki boŋo camanini, kacel ki aŋwece, macalo kit me yik pa Lujudaya tye. Ka ma gigure iye onoŋo tye poto, i poto meno onoŋo tye iye lyel manyen ka ma yam peya giyiko iye ŋat mo. Pi ceŋ me Yubbe pa Lujudaya, dok pien lyel meno obedo cok, omiyo giyiko Yecu kunnu. I nino mukwoŋo me cabit, Maliam Lamagdala opuk i lyel odiko con ma piny pud col oneno ni gikwanyo got woko ki i dog lyel. En oriŋo, ocito bot Cimon Petero, ki bot lapwonnye meno mukene ma Yecu maro, otittigi ni, “Gikwanyo Rwot woko ki i lyel, pe waŋeyo ka ma gikete iye.” Petero ki lapwonnye meno mukene gumako yo, gucito i lyel. Gin aryo ducu guriŋo kacel, lapwonnye meno oyomo Petero ki ŋwec, okwoŋo o i lyel. Oguŋo, oŋiyo iye, oneno boŋŋi camanini ma giboye kwede gudoŋ kakare; ento pe odonyo iye. Cimon Petero obino kun lube, odonyo i lyel, oneno boŋŋi camanini gudoŋ kakare, ki kitambara ma ceŋ tye i wiye, pe tye kacel ki boŋŋi camanini, ento odolle, tye kene pat. Lacen lapwonnye meno mukene ma okwoŋo o i lyel bene odonyo iye; oneno, ci oye. Pien ceŋ peya giniaŋ ginacoya, ni myerone ocer ki i kin jo muto. Lupwonnye meno gudok paco. Ento Maliam ocuŋ i ŋet lyel kun kok; ka tye ka koko, ci oguŋo, oŋiyo i lyel. Oneno lumalaika aryo ma rukgi tar, kun gubedo ka ma gipyelo kom Yecu iye, acel tuŋ wiye, acel tuŋ tyene. Gupenye ni, “Dako, ikok piŋo?” Odok iye ki gin ni, “Gikwanyo Rwoda woko, pe aŋeyo ka ma gikete iye.” Ka doŋ oloko lok man, ci olokke, oneno Yecu kun ocuŋ i ŋeye, ento pe oŋeyo ni en Yecu. Yecu openye ni, “Dako, ikok piŋo? Iyenyo aŋa?” Otamo ni gwok nyo en lapur-poto, owacce ni, “Ladit, ka in aye itere, titta ka ma ikete iye, wek acikwanye.” Yecu olwoŋe ni, “Maliam.” En olokke, owacce i leb Ibru ni, “Rabboni!” ma te lokke ni, Lapwony. Yecu owacce ni, “Wek maka, pien peya acito bot Won. Ento cit bot utmega, itittigi ni, acito bot Wora ki bot Wonwu, bot Lubaŋa na ki bot Lubaŋawu.” Maliam Lamagdala ocito, owaco bot lupwonnye ni. “Aneno Rwot”; otittigi ni en owaco lok man bote. Otyeno me nino meno, ma en nino mukwoŋo me cabit, ma kun gicego doggola ka ma lupwonnye gucokke iye, pi lworo Lujudaya, Yecu obino, ocuŋ i dyegi, owaco ki gin ni, “Kuc obed botwu.” Ka owaco lok man, ci onyuttigi ciŋe ki lakŋete. Lupwonnye cwinygi obedo yom ka guneno Rwot. Yecu dok owaco ki gin ni, “Kuc obed botwu. Macalo Won ceŋ oora, an bene aorowu.” Ka en owaco man, ci oywe i komgi, owaco ki gin ni, “Wugam Cwiny Maleŋ. Ka wugonyo bal pa ŋat mo, ci doŋ gigonyo; ka pe wugonyo bal pa ŋat mo, ci doŋ pe gigonyo.” Tomaci, ŋat acel i kin jo apar wiye aryo, ma gilwoŋo ni Baŋi, onoŋo pe botgi i kare ma Yecu obino. Lupwonnye mukene gutitte ni, “Waneno Rwot.” Ento en odok iye ki gin ni, “Ka pe aneno poyo me cumar i ciŋe, ki keto nyig ciŋa i waŋ poyo me cumar, ki keto ciŋa i lakŋete, pe abiye kadi matidi mo.” Ka nino aboro okato, lupwonnyene doki gubedo i ot, Tomaci bene onoŋo tye kwedgi. Onoŋo gucego doggola, ento Yecu obino, ocuŋ i dyegi, owaco ni, “Kuc obed botwu.” Lacen owaco bot Tomaci ni, “Cwal nyig ciŋi kany, inen ciŋa; rye ciŋi, iket i lakŋeta; iwek bedo ma pe iye, ento ma ye.” Tomaci ogamo ni, “In i Rwoda ki Lubaŋana” Yecu openye ni, “Pien inena omiyo iye? Tye ki gum dano ma pe guneno, ma guye.” Yecu otiyo lanyut mapol i nyim lupwonnyene, ma pe gicoyogi i buk man. Ento magi gicoyo wek wuye ni, Yecu en Kricito ma Lubaŋa oyero, Wod pa Lubaŋa, ci ka wuye, wek wubed ki kwo i nyiŋe. Ka man otum, Yecu dok onyutte bot lupwonnyene i dog nam Tiberia, onyutte kit man. Cimon Petero, Tomaci ma gilwoŋo ni Baŋi, Natanael me Kana me Galilaya, litino pa Jebedayo ki jo aryo mukene i kin lupwonnyene onoŋo gitye kacel. Cimon Petero owaco ki gin ni, “Acito ka mako rec.” Gugamo doge ni, “Wan wacito kwedi.” Gucito, gudonyo i yeya; ento i dyewor meno pe gumako gin mo. Ka piny pud oru aruya, Yecu ocuŋ i wi tera, ento lupwonnyene pe giŋeyo ni en Yecu. Yecu openyogi ni, “Litino, wunoŋo dek mo twal?” Gudokke iye ni, “Pe”. En owaccigi ni, “Wubol obwo tuŋ malacuc me yeya. ci wubinoŋo.” Gubolo, tiŋo obwo oŋayogi pi pol rec. Lapwonnye meno ma Yecu maro owaco ki petero ni, “Meno Rwot!” Ka Cimon Petero owinyo ni meno Rwot, oruko boŋŋine, pien onoŋo ogonyogi woko pi tic, okworre i nam. Ento lupwonnye mukene gubino i yeya, kun giywayo obwo ma opoŋ ki rec, pien onoŋo pe gibor ki wi tera, mito romo tyen miya acel. Ka doŋ gukatti woko i wi tera, guneno mac miri kunnu, ma giketo rec i wiye, ki mugati. Yecu owaccigi ni, “Wukel rec mogo ma pud wumako amaka-ni.” Cimon Petero oito i yeya, oywayo obwo, okelo i wi tera, kun opoŋ ki rec madito, miya acel ki pyerabic wiye adek. Kadi bed gipol ento obwo pe oyec. Yecu owaccigi ni, “Wubin ka cam.” Pe tye ŋat mo i kin lupwonnye ma odiyo cwinye me penye ni, “In aŋa?” Pien giŋeyo ni en Rwot. Yecu obino, okwanyo mugati, opokkigi, ki rec bene kit meno. Man doŋ tyen me adekke ma Yecu onyutte kwede bot lupwonnyene, ma doŋ en ocer ki i kin jo muto. Ka doŋ gicamo otum, Yecu openyo Cimon Petero ni, “Cimon wod pa Jon, in imara makato jo-ni?” En ogamo ni, “Iyo, Rwot, in iŋeyo an amari.” Ocike ni, “Kwa litino romina.” Openye tyen me aryo ni, “Cimon wod pa Jon, in imara?” En ogamo ni, “Iyo Rwot, in iŋeyo an amari.” Ocike ni, “Gwok romina.” Dok openye tyen me adekke ni, “Cimon wod pa Jon, in imara?” Petero okumo pien openye tyen me adekke ni, “Imara?” Owacce ni, “Rwot, in iŋeyo jami ducu; in iŋeyo an amari.” Yecu ocike ni, “Kwa romina. Adada awacci ni, ka ceŋ in pud awobi, itweyo boŋoni keni, iwoto ka ma imito; ento ka doŋ iti, ibiryeyo badi, ci ŋat mukene bitweni boŋoni, biteri ka ma pe imito.” Owaco man pi nyuto kit to ma en biketo kwede deyo i kom Lubaŋa. Ka oloko lok man, owacce ni, “Luba.” Petero olokke, oneno lapwonnye meno ma Yecu maro kun lubogi, en aye ŋat ma ceŋ ojeŋŋe i kor Yecu i dog cam me otyeno, ma owaco ni, “Rwot, aŋa ma bidobi?” Ka Petero onene, openyo Yecu ni, “Rwot, danoni kono?” Yecu owacce ni, “Ka amito ni en ori nio ka abidwogo, ilaro aŋo iye? In luba.” Lok man oywek i kin utmego, ni lapwonnye man pe bito; ento Yecu ceŋ pe owaco ni en pe bito, ento ni, “Ka amito ni en ori nio ka abidwogo, ilaro aŋo iye?” Man aye lapwonnye ma obedo caden i kom lok magi, dok ocoyogi; wan bene waŋeyo ni lok ma en obolo obedo ada. Tye bene gin mukene mapol ma Yecu otiyo; ka kono gicoyogi ki acel acel, atamo ni kadi lobo kulu pe twero romo buk ma gicoyo. I buk mukwoŋo; Teopilo, acoyo iye lok ducu ma yam Yecu ocako tiyo ki pwonyone, nio kwede wa i nino ma gitere kwede i polo, i ŋe miyo cik i tek pa Cwiny Maleŋ bot lukwenane ma yam oyerogi. Obedo ka nen botgi tyen mapol pi moko ni etye makwo lacen ki i ŋe tone. Obedo ka nen botgi pi nino pyeraŋwen, kun pwonyogi ki lok i kom ker pa Lubaŋa. I kare ma obedo kwedgi, ocikogi ni pe gua ki i Jerucalem, ento gukur gin ma Lubaŋa Won ociko pire, kun wacci, “En gin ma con wuwinyo ki bota-ni. Jon yam batija dano ki pii, ento odoŋ nino manok ma wun gibibatijawu ki Cwiny Maleŋ.” Ka gucokke kacel, ci gupenye ni, “Rwot, i kare man en aye ibidwoko iye ker bot jo Icrael bo?” En ogamo ni, “Pe wun aye myero wuŋe kare wa nino ma yam Lubaŋa Won omoko i te twero mere. Ento wun wubilimo tek ka Cwiny Maleŋ bibino i komwu, ci wubibedo lucadenna i Jerucalem ki i Judaya ducu ki i Camaria, wa i agikki lobo ducu.” Ka doŋ otyeko loko lok meno, ci gitiŋe malo, ma gin bene gineno, ka pol ogame woko ki i nyimgi. Ka giciko waŋgi malo i kore ma kun en cito, ci nen, jo aryo gucuŋ ka ŋetgi ma guruko kanyi matar, ma giwaco ni, “Wun Lugalilaya, piŋo wucuŋ wuneno malo i polo? Yecu man ma doŋ gitiŋo malo ki botwu gitere i polo, bidwogo doki kit macalo wuneno gitere kwede i polo-ni.” Ka doŋ gucako dok i Jerucalem ki i wi got Jeituni, ma cok ki Jerucalem, rom ki wot me ceŋ cabit. Ka gudonyo i gaŋ ci gucito i kicika ma malo, ka ma yam gibedo iye-nu, gin aye Petero ki Jon ki Yakobo ki Anderiya, Pilipo ki Tomaci, Bartolomayo ki Matayo, Yakobo wod pa Alipayo, Cimon ma yam obedo i kin jo ma gimito locken, ki Juda wod pa Yakobo. Gin ducu gumine ka lega ki cwiny acel, kacel ki mon ki Maliam min Yecu ki omegine. I kare meno Petero ocuŋ i kin lwak utmego ma giromo miya acel ki pyeraryo kun wacci, “Utmego, lok ma yam gicoyo myero ocobbe kakare, macalo yam Cwiny Maleŋ oloko ki i dog Daudi i kom Juda ma otelo wi jo ma gumako Yecu ca. Pien yam gikwano en i kinwa, en bene obedo i dog tic man.” Dano meno owilo poto ki lim ma onoŋo pi tim aranyine, ka opoto aryeba cwiny ci iye otyer obar woko, cin iye owukke woko ducu. Lok man oŋene bot jo ducu ma gibedo i Jerucalem, ci poto meno gilwoŋo ki i lebgi ni Akel-dama, en aye Poto me Remo. Petero omedo lokke kun wacci, “Lokke gicoyo i buk me Jabuli ni, ‘Wek kabedone obakke woko, wek ŋatti mo pe obed iye’; dok ni, ‘Ticce ŋat mukene oter.’ Myero giyer ki i kin jo man ma gubedo kwedwa i kare ducu ma Rwot Yecu obedo ka wirre i kinwa, ma gucako nia wa i kom batija pa Jon nio wa onyoo ma doŋ gitiŋe kwede malo ki i kinwa; wek ŋat acel i kin jo man gikwan kwedwa me bedo lacaden me cerre.” Ci gukelo dano aryo. Yucepu ma gilwoŋo Barcaba ma nyiŋe mukene Yucito, ki Matiya. Ka gucako lega kun giwaco ni, “Rwot ma iŋeyo cwiny dano ducu, nyut botwa i kin jo man aryo-ni ŋat ma in doŋ iyero, me leyo kabedo me tic man ki tero kwenane, ma yam Juda oweko ci olokke odok cen, odok gire i kabedone.” Gubolo kwir pigi, ci kwir opoto i kom Matiya, ka giketo en i kom wel lukwena apar wiye acel-li. Ka nino me Pentekote doŋ oromo, onoŋo gin ducu gucokke kacel i kabedo acel. Oyotoyot woo owinnye kun oa ki i polo macalo yamo ma kodo mager, opoŋo ot ducu ka ma gubedo iye. Ci gin mo onen botgi macalo leb mac ma opokke ci opye i wi ŋat acel acel i kingi. Ka doŋ gin ducu gupoŋ ki Cwiny Maleŋ, ci gucako dumo leb mukene mapatpat macalo Cwiny Maleŋ omiyogi me lokone. Onoŋo tye Lujudaya ma gibedo i Jerucalem, jo ma giworo Lubaŋa ma gua i rok ducu ma tye i wi lobo. Ka woo meno owinnye, lwak ducu gucokke kun wigi ocuŋ woko, pien onoŋo ŋat acel acel winyogi ka giloko leb tugi kikome. Ci guuro matek twatwal ma kun giwacci, “Jo ma giloko-ni mono pe gin ducu Lugalilaya? Piŋo wan ducu dok wawinyogi kun ŋat acel acel tye ka lok i leb tugi kikome ma ginywale iye? Wan Luparti, jo Media, jo Elam, ki jo ma gibedo i Mecopotamia, Judaya ki Kapadokia, Ponto ki Acia, Purugia ki Pampulia, Ejipt ki lobo Libya ma dok tuŋ Cirene, ki welo ma gua ki i Roma ma gin Lujudaya ki jo ma gulokke gudonyo i diniwa, Lukurete ki Luarab, wan ducu wawinyogi ka gitito pi tic madito me twero pa Lubaŋa i leb tuwa kikome.” Gin ducu guuro ma pe gitwero niaŋ, ma giloko kekengi ni, “Man te lokke aŋo?” Ento jo mukene gunyerogi anyera kun giwaco ni, “Jo-ni gumer ki koŋo vino manyen.” Ento Petero ocuŋ kacel ki lukwena apar wiye acel, odaŋŋe ki dwan madit kun waco botgi ni, “Wun co me Judaya, ki wun jo ducu ma wubedo i Jerucalem, ber wuŋe lok man, dok wucik itwu ka winyo lokka. Jo man pe gumer, macalo wun wutamo, pien cawa pud adek keken me odiko. Ento man aye lok ma yam lanebi Joel oloko pire kun wacci, Lubaŋa owaco ni, ‘Lacen abionyo Cwiny mera Maleŋ i kom jo ducu; litino awobewu ki anyirawu gibitito lok pa Lubaŋa, awobewu gibineno ginanyuta, jowu muti gibileko lek. Iyo, i kare meno abionyo Cwiny mera wa i kom luticca ma co ki ma mon, ci gibitito lokka. Abinyuto taŋo malo i polo ki lanyut mapatpat piny i wi lobo, remo ki mac ki yito ma duny. Ceŋ bicido woko macol, dwe bidoko makwar calo remo, ma noŋo nino pa Rwot peya obino, nino madit ki me deyo madwoŋ. I kare meno jo ducu ma gilwoŋo nyiŋ Rwot gibilarogi.’ “Wun jo Icrael, wuwiny lok man: Yecu Lanajaret obedo dano ma Lubaŋa aye onyuto botwu kun moko ki tic madito me twero, ki taŋo ki lanyut mapol ma Lubaŋa otiyo kacel kwede i kinwu, macalo wun wuŋeyo. Yecu man gimiye botwu macalo Lubaŋa yam onoŋo oyubo kun oŋeyo gin ma bitimme i anyim, ci wun wugure i kom yatariya, wuneke ki ciŋ jo ma pe guye Lubaŋa. Ento Lubaŋa ocero en woko, kun gonye woko ki i arem me to, pien to pe twero moko i kome. Pien Daudi yam oloko i kome ni, ‘Kare ducu aŋeyo ni Rwot tye kweda; pe gibidira woko cen, pien en tye yo tuŋ ciŋa malacuc. Pi meno omiyo abedo ki yomcwiny madwoŋ, leba bene loko ki yomcwiny, nino ducu abedo maber kun atye ki gen. Pien in pe ibitenya ata i lobo pa jo muto, pe ibiweko kom danoni ma geni top woko. In doŋ inyutta yo ma tera i kwo; bedoni kweda bimiyo abedo ki yomcwiny madwoŋ mada.’ “Utmego, myero alok botwu i kom kwarowa Daudi atir ni yam en oto dok giyiko kome, watye ki lyelle botwa kany nio wa tin. Onoŋo yam en lanebi, dok oŋeyo ni Lubaŋa yam okwoŋo kwoŋ bote ni ebiketo dano mo ma i kin likwaye ma bedo i wi komkerre. En yam oneno gin ma bitimme i anyim ka oloko bene i kom cer pa Kricito ma Lubaŋa oyero ni, pe gitenye ata i lobo pa jo muto, kome bene pe otop. Man en Yecu ma Lubaŋa ocero woko, wan ducu wacaden i kom lok meno. Ka gitiŋe malo wek obed i ŋet Lubaŋa yo tuŋ acuc i kabedo me deyo, ci ogamo Cwiny Maleŋ ki bot Wonne kit ma yam Lubaŋa ociko, ci oonyo i komwa gin man ma doŋ wuneno dok bene wuwinyo-ni. Pien Daudi yam pe ocito i polo; ento en aye owaco ni, ‘Rwot owaco bot Rwoda ni, Bed i ŋeta tuŋ acuc i kabedo me deyo, nio ka abimiyo lukworri doko kom laten tyeni.’ Myero jo me ot pa Icrael ducu guŋe atika ni, Lubaŋa otyeko keto en me bedo Rwot dok Kricito ma Lubaŋa oyere, en Yecu man ma wun wuguro i kom yatariya-ni.” Ka guwinyo man, cwinygi oton, ci guwaco bot Petero ki lukwena mukene ni, “Utmego, wabitimo aŋo?” Petero owaco botgi ni, “Wuŋut, gibatijawu ŋat acel acel ki i kinwu i nyiŋ Yecu Kricito, wek Lubaŋa owek balwu; ci wubilimo mot me Cwiny Maleŋ. Pien lok man giciko piwu ki pi litinowu ki pi jo ducu ma gitye ka mabor, ma Rwot Lubaŋawa bilwoŋogi bote.” Ka dok otito botgi lok mukene mapol, ma tuco matek dok cuko cwinygi kun waco ni, “Wularre kenwu wua woko ki bot yalwak man muŋak-ki.” Ci jo muye lok ma en owaco botgi gibatijagi, ci gumedde i nino meno jo ma romo alip adek. Gin gumine kengi ka winyo pwony pa lukwena, ka ribbe kacel ki jo ma guye Yecu, ka camo mugati ma gibaro, ki ka lega. Ci lworo omako dano ducu; ci lukwena gubedo ka tiyo lwak taŋo ki lanyut mapol. Jo ma guye Yecu gucokke kacel, kun ginywako jami ducu kacel. Gucato lonyogi ki jamigi, ka gupoko ki jo ducu kit macalo mitte bot ŋat acel acel. Nino ducu gibedo ka cokke i ot pa Lubaŋa ki baro mugati i pacogi, kun gicamo kacel ki yomcwiny ki cwiny acel, kun gipako Lubaŋa, ma dano ducu pwoyogi, ci Lubaŋa obedo ka medo i komgi jo ma gularre nino ducu. I nino mo Petero ki Jon guito malo i ot pa Lubaŋa i cawa me lega, cawa aboŋwen Onoŋo tye dano mo laput nia i kare ma ginywale ma gitiŋo ci giketo i doggola ot pa Lubaŋa ma gilwoŋo Maber, pi lego kony bot jo ma gidonyo i ot. Ka oneno Petero ki Jon gimito donyo i ot pa Lubaŋa, ci openyogi ni gumiye kony. Petero kacel ki Jon guciko waŋgi i kome, ci Petero owacci, “Nen komwa.” Ci oketo cwinye ka nenogi, kun geno ni gibimiye gin mo. Ento Petero owacci, “Pe atye ki lim mo, ento amii gin ma atye kwede; i nyiŋ Yecu Kricito Lanajaret, woti.” Ka omako bade lacuc ci otiŋe kwede malo; ci tyene ki odilo tyene omoko woko matek cut. Oa, otirre ocuŋ, owoto odonyo kwedgi i ot pa Lubaŋa, ma woto kun pye, dok pako Lubaŋa. Lwak jo mapol ducu gunene ka woto kun pako kwede Lubaŋa, ci guniaŋ ni en dano ma yam lego kony i doggola Maber-ri. Guuro matek ma doggi otwo woko pi gin ma otimme i kome-ni. Ka pud omoko i kom Petero ki Jon, ci lwak dano ducu guriŋo gucokke botgi i te baraja ma gilwoŋo ni pa Solomon. Ka Petero onenogi, ci owaco bot lwak ni, “Wun jo Icrael wuuro lok man piŋo? Piŋo wuciko waŋwu i komwa macalo wan aye ma watimo lok man ki tekwa, nyo ni pien wan jo ma lworo Lubaŋa omiyo dano-ni owoto? Lubaŋa pa Abraim, ki pa Icaka ki pa Yakobo, Lubaŋa pa kwarowa, yam oketo deyo i kom laticce Yecu ma wun wumiyo i ciŋ Pilato kun wukwere woko i kare ma Pilato oyubbe me gonyo en. Ento wun wukwero en Ŋat Maleŋ ki ma Kite Atir-ri, kun wulego ni omi botwu lanek. ci wuneko Won Kwo. Ento Lubaŋa ocere woko ki i kin jo muto, wan lucaden i kom lok man. Pi nyiŋe, ki pi ye nyiŋe, en aye omiyo kom laco man odoko tek macalo wuneno dok wuŋeyo; pi ye Yecu omiyo laco man olimo yotkom i nyimwu ducu. “Iyo, utmega, aŋeyo ni yam wutimo man ma onoŋo wukwiya, macalo luditowu bene. Ento macalo yam Lubaŋa oloko i dog lunebine ducu ni Kricito mere myero onen can, ci doŋ omiyo ocobbe kakare kumeno. Iyo, wuŋut, wudwog cen, wek balwu gijwa woko, wek nino me yweyo ma a ki bot Rwot obin botwu, wek en ocwal Kricito ma oyero piwu, en Yecu, ma myero gijole i polo nio ka kare oromo me dwoko jami ducu kakare, ma yam Lubaŋa oloko pire i dog lunebine maleŋ nia wa con. Moses yam owacci, ‘Rwot Lubaŋa bicwalo lanebi mo piwu ma bia ki i kin utmegiwu macalo ocwalo an. Wubiwinyo en i lok ducu ma bititowu. Dok ka obinen dano mo ma pe biwinyo lanebi meno, waŋe birwenyo woko ki i kin lutugi.’ Ki lwak lunebi ducu ma yam guloko, cakke wa i kom Camuel ki jo ma gulubo kore, gutito bene pi kare man. Wun likwayo pa lunebi, ki lule gicikke ma yam Lubaŋa omiyo bot kwarowu, kun waco bot Abraim ni, ‘Rok ducu gibilimo gumgi ki i kom likwayi.’ Ka doŋ Lubaŋa otyeko keto laticce, okwoŋo cwale botwu pi kelliwu gum ma miyo ŋat acel acel lokke weko timo bal.” Ka pud gitye ka lok ki dano, ci ajwagi ki ladit askari me ot pa Lubaŋa ki Lucadukayo gubino botgi, ma gujul woko, pien onoŋo gipwonyo lwak kun gitito pi cer pa Yecu ki i kin jo muto atyer. Ka gumakogi ci guketogi i mabuc nio wa odiko, pien onoŋo piny doŋ oyuto woko. Ento lwak jo mapol i kin jo ma guwinyo lokgi guye, wel dano omedde oo alip abic. Ka piny oru, ci luloc ki ludoŋo ki lupwony-cik gucokke i Jerucalem, kacel ki Anac, ajwaka madit, ki Kayapa ki Jon ki Alegijanda, ki lwak ducu ma gitye i doggola pa ajwagi madito. Ka giketogi i dyere, gupenyogi ni, “Wun wutiyo man pi kit tek aŋo, nyo pi nyiŋ aŋa?” Ka Petero opoŋ ki cwiny Maleŋ, ci owaco botgi ni, “Wun lulo lwak ki ludoŋo, ka tin gipenyowa lok mudok i kom gin maber ma otimme i kom laput, ki kit ma dano man ocaŋ kwede, wek oŋene botwu ducu ki bot lwak jo Icrael ducu ni, pi nyiŋ Yecu Lanajaret, ma wun wuguro i kom yatariya, ma Lubaŋa ocero woko ki i kin jo muto-ni aye laco man ocuŋ i nyimwu ma kome yot. Man aye got ma wun lugedo wukwero woko ento ma odoko got madit me twok ot. Pe tye larre mo i ŋat mukene, pien pe tye nyiŋ mo mukene i wi lobo man ma gimiyo ki wan dano ma myero walarre iye.” Ka doŋ guneno tekcwiny pa Petero ki Jon, ma guniaŋ bene ni gin jo mogo ata ma pe gupwonnye, ci guuro; ka doŋ guniaŋ ni gin yam gubedo kacel ki Yecu. Ento ka guneno laco ma gicaŋo-ni ocuŋ ka ŋetgi, lok mo ma myero guwac doŋ obedo pe. Ka gucikogi ni koŋ gukat woko ki i Lukiko, ci guyubo lok kekengi, kun giwaco ni, “Jo man wabitimogi niŋniŋ? Pien gutyeko tiyo lanyut ma kome nen bot dano ducu ma gibedo i Jerucalem, wan bene pe watwero kwerone. Ento pi kit me juko wek pe oket orom kin dano, ber wajukugi ni pe gimedde ki tito bot ŋat mo pi nyiŋ man.” Ci gulwoŋogi gucikogi ni pe gutit kadi pwonyo lok mo i nyiŋ Yecu kadi matidi mo. Ento Petero ki Jon gugamo ni, “Wun wuŋol ka ce nen ber i waŋ Lubaŋa me winyowu makato winyo Lubaŋa; pien wan pe watwero weko tito pi gin ma yam waneno ki ma wawinyo.” Ka doŋ guburogi matek, ci guwekogi gucito; pe gunoŋo yo me keto can i komgi pi lwak dano, pien gin ducu gubedo ka pako Lubaŋa pi gin mutimme-ni. Dano ma lanyut me twer me caŋo dano otimme i kome-ni onoŋo doŋ dit ma mwakane kato ka pyeraŋwen woko. Ka gigonyogi ci gucito bot luremgi ka gutito botgi gin ma ajwagi madito pa Lubaŋa ki ludoŋo guwaco botgi. Ka guwinyo, ci gutiŋo dwangi malo kacel bot Lubaŋa kun giwaco ni, “Ai Rwot Lubaŋa, in ma con iketo polo ki lobo ki jami ducu ma tye i igi, con iloko i dog kwarowa Daudi ma laticci i tek pa Cwiny Maleŋ ma owaco ni, ‘Piŋo Lurok gitye ka wo kacel, dok piŋo rok mapol gipiro lok ma konnye pe? Luker me lobo gurye i tyeŋ, ki luloc bene gucokke gugurre kacel i kom Rwot ki i kom ŋat ma en oyero ka doŋ owiro.’ “Adada gucokke gugurre kacel i gaŋ man i kom laticci maleŋ twal Yecu, en ma in iwiro ki moo, gin Kerode ki Pontio Pilato, kacel ki Lurok ki jo Icrael ducu, pi tiyo ducu ma yam iyubo pi tweroni ki mitti ni myero otimme. Iyo, Rwot, doŋ inen bura megi, ci imi wan luticci watit lokki ki tekcwiny laboŋo lworo mo, kun in iryeyo ciŋi me caŋo dano, wek lanyut ki taŋo mapol otimme i nyiŋ laticci Yecu maleŋ twal.” Ka gutyeko lega, ci kabedo ma gugurre iye-ni oyeŋŋe, gin ducu gupoŋ ki Cwiny Maleŋ, ci gutito lok pa Lubaŋa ki tekcwiny laboŋo lworo. Lwak jo muye ducu gubedo ki cwiny acel ki tam acel, kun pe tye ŋat mo ma waco ni lim ma etye kwede-ni mere kene, ento gunywako jami ducu kacel. Lukwena gubolo lok i kom cer pa Yecu ki tek, ci gum madit opoto i komgi ducu. Pe tye ŋat mo i kingi ma gin mo orem bote, pien jo ma gitye ki pottigi nyo odigi gucatogi woko, ka gukelo lim mua iye, guketo ka tyen lukwena, ka gupoko kit ma mitte bot ŋat acel acel. Kit meno Yucepu ma nyiŋe me aryone lukwena gucako ni Barnaba (ma te lokke ni ŋat ma jiŋo cwiny dano), Lalevi ma ginywalo i Caiprac, ocato potone ma en tye kwede, ci okelo limme oketo ka tyen lukwena. Ento laco mo ma nyiŋe Anania ki dakone Capira gucato jamigi, ci en okano dul lim mogo woko ma dakone bene ŋeyo, ka okelo dul acel, ci oketo ka tyen lukwena. Ento Petero owacce ni, “Anania, piŋo Catan opoŋo cwinyi, omiyo itemo bwolo Cwiny Maleŋ kun ikano dul lim ma oa i loboni? Ka nene pe icato, kono pe obedo meri giri? Dok ka doŋ icato, pe onoŋo tye giri i te twerri? Piŋo itamo lok macalo meno i cwinyi? Pe ibwolo dano ento ibwolo Lubaŋa giri.” Ka Anania owinyo lok meno, ci opoto piny oto woko cut, ci lworo madit omako jo ducu ma guwinyo pire. Litino awobe gua ci guboyo kome, ka gutere woko ka yike. Lacen ka cawa okato kine ka adek, ci dakone obino odonyo, kun pe ŋeyo gin mutimme-ni. Petero owacce ni, “Titta ka onoŋo wucato lobowu i wel ma rom meno.” Ento Petero owacce ni, “Piŋo wun aryo ducu wuribbe ka bwolo Cwiny pa Rwot? Nen, tyen jo muyiko cwari ka tye i doggola, in bene gibiteri woko.” Ci dako opoto piny ka tyene, oto woko cut, ka litino awobe gubino gudonyo i ot, ci gunoŋo en oto, ci gutere woko, guyike ka ŋet cware. Lworo madit omako lwak jo muye Yecu ducu, ki jo ducu ma guwinyo lokke. Lwak lanyut ki taŋo mapol otimme i kin dano ki i ciŋ lukwena. Onoŋo gin ducu gibedo kacel i te baraja pa Solomon. Pe tye ŋat mo ma oette me ribbe kwedgi, ento onoŋo dano guketo deyo madit i komgi. Lwak jo mapol ma guye gumedde bot Rwot, co wa ki mon, mumiyo gikelo lutwo wa i yo, gipyelogi i wi kitanda ki i wi gibuto, wek ka Petero kato ka ŋetgi, ci tipone owok i kom jo mogo i kingi. Lwak dano bene gua ki i gaŋ murumo Jerucalem, gucokke kun gikelo lutwo ki jo ma cen marac yelogi, ci gin ducu gucaŋ. Ento ajwaka madit oa kacel ki jo ma gitye kwede, ma gin aye dul pa Lucadukayo, ma nyeko omakogi matek, gumako lukwena guketogi i mabuc. Ento i dyewor lamalaika pa Rwot oyabo dog ot mabuc, ci okelogi woko kun waco ni, “Wucit wucuŋ i ot pa Lubaŋa, wutit bot dano lok me Kwo man ducu.” Ka guwinyo lok man, ci gudonyo i ot pa Lubaŋa okogweno gubedo ka pwonyo dano. Ka ajwaka madit obino ki jo ma onoŋo gitye kwede, ci gucoko Lukiko kacel ki ludoŋwo ducu pa jo Icrael, ka gucwalo kwena ka omogi ki i mabuc. Ento ka ludito pa askari gucito, pe gunoŋogi i buc, ka gudwoko lok ni, “Wanoŋo ot kol giloro maber, kun lukur-piny bene gucuŋ i doggola, ento ka wayabo ci pe wanoŋo ŋat mo iye.” Ka ladit pa askari me ot pa Lubaŋa ki ajwaka madit guwinyo lok meno, ci tamgi ocuŋ woko, kun gipennye kekengi kit ma lokke bitum kwede. Ka ŋat mo obino otittigi ni, “Jo ma wuketogi i ot kol-li, gitye gucuŋ i ot pa Lubaŋa ka pwonyo dano.” Ci ladit ki askarine gucito gukelogi, ento pe ki tek mo, pien onoŋo gilworo ni lwak celogi ki got. Ka doŋ gukelogi, ci guketogi i nyim lukiko, ka ajwaka madit openyogi, kun waco ni, “Wan wacikowu matek ni pe wupwony lok mo i nyiŋ man ento koni wupoŋo i Jerucalem woko pi pwonywu-ni, dok wumoko tamwu me kelo remo pa dano man i komwa.” Ento Petero ki lukwena mukene gudok iye ni, “Myero wawiny Lubaŋa makato dano. Lubaŋa pa kwarowa ocero Yecu ma wun wuneko ku wuŋabe i kom yat. Lubaŋa otiŋe malo i ŋete yo tuŋ acuc i kabedo me deyo pi bedo Laker ki Lalar, wek jo Icrael gunoŋ kare me ŋut ci en owek balgi. Wan aye lucaden me lok meno, kacel ki Cwiny Maleŋ ma Lubaŋa omiyo bot jo ma giwinye.” Ka guwinyo lok man, ci gutugge ki akeca ma gimito nekogi. Ento Laparicayo mo ma i lukiko ma nyiŋe Gamaliel, lapwony-cik ma dano ducu giworo, oa malo ci ociko ni koŋ gicwalgi woko pi kare manok. Ka owaco bot jo mucokke ni, “Jo Icrael, ber wugwokke i gin ma wutimo i kom jo man. Pien yam con i kare ca Teyuda otuc ci omine kene ni en e dano madit, ki jo mogo ma giromo ka miya aŋwen guribbe kwede; ento gineke woko ki jo ma gilube ducu guket woko ata. Dok i ŋeye Juda ma Lagalilaya dok otuc io kare me kwano wel dano, ci otero jo mukene ma gilube; en bene oto, jo ma gilube bene guket woko ata. Iyo, i lok ma tye kombeddi atito botwu ni cwinywu oa woko i kom jo man, wuwek gubedi; pien ka ce yub man nyo tic man pa dano, ci bigik ata, ento ka pa Lubaŋa, ci pe wubiloyogi, wun bene wubinen macalo wulwenyo i kom Lubaŋa!” Ci gujolo tamme, ka gilwoŋo lukwena gudwogo, ci gugoyogi kun gicikogi ni pe gulok i nyiŋ Yecu, ka doŋ giwekogi gucito. Gua woko ki i nyim Lukiko ma onoŋo cwinygi yom pien Lubaŋa otamo ni gimyero pi dit man me noŋo lewic pi nyiŋ Yecu. Dok nino ducu pe guweko pwonyo dano ki tito lok me kwena maber ni Yecu en aye Kricito ma Lubaŋa oyero i ot pa Lubaŋa ki i paco pa dano. I kare meno ka lupwonnye welgi omedde, ci Lujudaya ma giloko leb Grik gubedo ki ŋuro i kom Lujudaya ma giloko leb Ibru, ni pien nino ducu ka gipoko lim pe giparo pi mon togi. Ka lukwena apar wiye aryo gulwoŋo lwak lupwonnye kacel ci guwaco botgi ni, “Pe myero wabwot tito lok pa Lubaŋa pi tic i kom meja. Pienno, utmego, wuyer i kinwu jo ma giloko nyiŋgi maber, jo ma gupoŋ ki Cwiny Maleŋ ki ryeko, ma myero waketgi i dog tic man. Ento wan wabimine ka lega ki tito lok.” Lokgi oyomo cwiny lwak ducu, ci guyero Citefano, en dano ma opoŋ ki niye ki Cwiny Maleŋ, ki Pilipo, ki Porokulo, ki Nikanori, ki Timon, ki Parmena, ki Nikolao ma en aye dano me Antiokia ma doŋ gigamo i dini pa Lujudaya. Ci giketogi i nyim lukwena, ka gulego ci guketo ciŋgi i komgi. Ci lok pa Lubaŋa omedde; ki wel lupwonnye bene omedde madwoŋ twatwal i Jerucalem, ki lwak ajwagi pa Lubaŋa mapol bene gujolo niye. Ka Citefano opoŋ ki kica pa Lubaŋa ki tek, ci obedo ka tiyo taŋo ki lanyut i kin lwak. Ci jo mogo ma gua ki i kacokke ma gilwoŋo ni kacokke pa jo ma gigonyogi ki i opii, kacel ki jo mogo me Cirene ki me Alegijanderia, ki jo ma gua Cilicia ki Acia, gubedo ka pyem ki Citefano. Ento ryekone oloyogi, ki Cwiny Maleŋ ma en loko kwede. Ci gupiyo dano i muŋ kun giwaco ni, “Wawinyo en ka loko kun yeto Moses ki Lubaŋa.” Ci gutugo lwak ki ludoŋo ki lupwony-cik, ka gubino gumake ci gutere i nyim Lukiko, kun gikelo lucaden me goba ma giwaco ni, “Laco man pe weko loko lok marac ma kemo kabedo man maleŋ ki cik pa Moses, pien wabedo ka winyo en ka loko ni Yecu man me Najaret bimuko ot man woko, ka dok biloko kit ma yam Moses omiyowa me aluba.” Jo ducu ma gubedo i Lukiko guciko waŋgi i kome, ci guneno waŋe calo wan lamalaika. Ka ajwaka madit openye ni, “Lok tye kit meno?” Ci Citefano ogamo ni, “Utmega ki utwora, wuwiny ya. Lubaŋa me deyo yam onyutte bot kwarowa Abraim ma onoŋo pud tye wa i Mecopotamia, ma peya obedo i Karan, kun wacce ni, ‘A woko ki i lobowu ki i kin watwu, icit i lobo ma abinyutti.’ Ka doŋ oa woko ki i lobo pa jo Kaldaya, ci obedo i Karan, ka lacen wonne oto, ci Lubaŋa okwanyo en ki kunnu, okele wa i lobo man ma koni wubedo iye-ni. Ento pe omiye oleyo gin mo kany, kadi wa dul lobo mo ma rom ki tyen dano, ento ocikke me miyo bote me bedo lobone ki pa likwaye ma gibilube, kadi onoŋo latinne mo pud pe. Ci Lubaŋa owaco ni likwaye gibibedo i lobo pa jo mukene ma gibilokogi gubedo opiigi, gitimogi marac pi mwaka miya aŋwen. Ka Lubaŋa owacci, ‘Abiŋolo kop i kom jo ma giyelogi, ci lacen gibia ki kunnu, ci gibiwora i kabedo man.’ Ci omiyo ki Abraim gicikke me lirre. Kit meno Abraim onywalo Icaka ci oliro en i nino me aboro me ditte; ki Icaka onywalo Yakobo, ki Yakobo onywalo kwarowa apar wiye aryo. “Nyeko omako kwarowa i kom Yucepu, ci gucate woko i Ejipt, ento Lubaŋa onoŋo tye kwede, ci olare ki i can ducu, omiye gum ki ryeko i nyim Parao, kabaka me Ejipt, ma oketo en me bedo laloyo ma loyo lobo Ejipt ki ot pa kabaka ducu. I kare ma kec opoto i lobo Ejipt ducu ki i Kanaan, okelo can madwoŋ ma omiyo kit me noŋo cam oloyo kwarowa woko. Ento ka Yakobo owinyo ni kal tye i Ejipt, ci ocwalo kwarowa kunnu tyen mukwoŋo. Ka gudok tyen me aryo, ci Yucepu onyutte kekene bot omegine ci gitito bot Parao pi kaka pa Yucepu. Ka Yucepu ocwalo dano ka lwoŋo wonne ki wadigi ducu, ma gin jo pyerabiro wiye abic, Yakobo ocito i Ejipt, ci oto woko, en kikome ki kwarowa ducu, ci gitiŋo komgi gidwoko cen i Cekem ci giyikogi i lyel ma yam Abraim owilo ki lim ryal ki bot awobe pa Kamor i Cekem. “Ento ka kare ma giciko onyiko cok, ma yam Lubaŋa omiyo bot Abraim, ci dano gumedde ki nya i Ejipt, nio ka giketo kabaka mukene ma pe ŋeyo Yucepu. En otimo aranyi i kom jo me rokwa, ci oruyo kwarowa ni myero gubol litinogi woko wek pe gubed makwo. I kare meno en aye ginywalo iye Moses. Yam onoŋo mwonya mada i waŋ Lubaŋa, ci gibedo ka pite i ot pa wonne dwe adek. I kare ma gikane woko i dog kulu, ci nya pa Parao oloke obedo latinne, opite macalo wode kikome. Ci Moses gipwonyo ki ryeko ducu pa Luejipt; yam con onoŋo en laco adada i lokke ki i ticce. “Ka doŋ mwaka me ditte oromo pyeraŋwen, ci tam obino i cwinye me limo utmege, likwayo pa Icrael. Ka oneno ŋat acel i kingi gitimo marac, ci okonyo dano ma gibwoyo-ni, ka oculo kwor ogoyo Laejipt. En yam otamo ni gwok nyo omegine giŋeyo ni Lubaŋa oyubo ni bimiyo gilarre pi ticce, ento pe guniaŋ. Dok orwone otuc botgi ma onoŋo daa tye i kingi; onoŋo en mito ribo kingi, ci owaco botgi ni, ‘Wun omego, piŋo wutimme marac kekenwu?’ Ento latim lawote marac-ci ocwale cen kun wacci, ‘Aŋa ma oketo in me bedo laŋolkop ki lalowa? In imito neka kit ma laworo ineko Laejipt-ti?’ Ci Moses oriŋo woko pi lok meno, ka ocito odoko labedo i lobo Midian, onywalo iye litino awobe aryo. “Ka mwaka okato pyeraŋwen, ci lamalaika onen bote i tim ma i ŋet got Cinai i leb mac ma lyel i caka. Ka Moses oneno, ouro kite; ka onyiko cok ka neno, ci dwan obino, ni, ‘An Lubaŋa pa kwarowu, Lubaŋa pa Abraim, ki pa Icaka, ki pa Yakobo.’ Ci kom Moses omyel, lworo ogeŋe nenone. Ka Rwot owaco bote ni, ‘Luny war woko ki i tyeni, pien kabedo ma in icuŋ iye-ni ŋom maleŋ. An doŋ aneno adada atwom pa jona ma gitye i Ejipt, awinyo wa cur megi, an doŋ alor piny ka larogi. Bin doŋ acwali i Ejipt.’ “Moses man onoŋo yam gukwero woko kun gipenyo ni, ‘Aŋa muketo in me bedo lalowa ki laŋolkopwa?’ Lubaŋa ocwale macalo laloc ki lalar ki i ciŋ lamalaika ma onen bote i cakani. Okwanyogi woko ki i Ejipt kun tiyo taŋo ki lanyut mapol i Ejipt ki i Nam Makwar ki i tim mwaka pyeraŋwen. Moses man aye ceŋ otitc bot jo Icrael ni, ‘Lubaŋa bicwalo lanebi piwu ma bia ki i kin utmegiwu macalo ocwalo an-ni.’ Man aye ŋat ma onoŋo yam tye i kin lwak ma i tim kacel ki lamalaika ma oloko kwede i got Cinai, ma oloko bene ki kwarowa; kunnu olimo iye lok makwo me akela botwa. Kwarowa yam gukwero winyo lokke ento gucwale woko cen, dok cwinygi odok woko cen i Ejipt, kun giwaco bot Aron ni, ‘Tim ki wan lubaŋa ma bitelo wiwa, pien Moses man ma okwanyowa woko ki i lobo Ejipt, pe doŋ waŋeyo ka ma odok iye,’ Ci gitimo cal wod twon i kare meno, gucako tyero gitum bot cal lubaŋa-nu, ma cwinygi obedo yom i kom tic me ciŋgi. Ci Lubaŋa olokke omiyogi kare me woro mony me polo, kit ma yam gicoyo i buk pa lunebi ni, ‘Wun jo me ot pa Icrael, yam koŋ wunekka lee me gitum pi mwaka pyeraŋwen i tim? Pe kumeno. Yam wutiŋo kema pa jok Molok, ka cal lakalatwe pa lubaŋa ma nyiŋe Repan, ma gin cal jogiwu ma wupayogi me awora. Pi meno an bene abikobowu woko wa i ŋe Babilon.’ “Kwarowa yam gitye ki kema lok me caden i tim, ma Lubaŋa ma yam loko ki Moses ociko ni otim kun lubo cal ma en oneno. Kwarowa bene gukelo ka gubino ki Yocwa i kare ma gicamo lobo pa rok mapol ma Lubaŋa oryemogi woko ki i nyim kwarowa. Con tye botgi nio kwede wa i kare pa Daudi, ma olimo gum mua ki bot Lubaŋa dok openyo ni giwek eyeny kabedo pi Lubaŋa pa Yakobo. Ento Solomon aye ogero ot pire. Kadi bed kumeno, en Ŋat Mamalo Twal pe bedo i ot ma gitiyo ki ciŋ; macalo yam lanebi owaco ni, ‘Polo aye komkerra, man Rwot aye ma owaco. lobo obedo kom me teno tyena. Kit ot aŋo ma wubigero pira? Ka yweyona kono onoŋo bedo kwene? Pe ciŋa aye otiyo lwak jami-ni ducu?’ “Wun jo ma ŋutwu tek, jo ma pe wulirre i cwinywu, ma itwu bene odiŋ, wun wulwenyo ki Cwiny Maleŋ jwijwi; macalo yam kwarowu gutiyo, wun bene wutiyo kit meno. Lanebi mene ma yam kwarowu pe gulɩbo? Dok guneko jo ma yam gutuco con pi bino pa Ŋat ma Kite Atir-ri ma wun wuketo roro i kome ci wuneko woko, wun jo ma gimiyowu cik pa Lubaŋa ma lumalaika yam gukelo, ci pe wulubo.” Ka guwinyo lok meno, ci gutugge ma gukayo lakgi woko likiŋ Ento Citefano noŋo opoŋ ki Cwiny Maleŋ, ci ociko waŋe i polo oneno deyo pa Lubaŋa, kun Yecu ocuŋ i ŋet Lubaŋa yo tuŋ acuc, ci owacci, “Nen, aneno polo oyabbe ki Wod pa dano ocuŋ i ŋet Lubaŋa yo tuŋ acuc.” Ci gudaŋŋe, guwo ki dwangi matek ma gidino itgi woko, ci gucorre i kome kacel. Ka gubole woko i ŋe gaŋ, ci gucele ki got, ka lucaden gupyelo ginarukagi ka tyen awobi mo ma nyiŋe Caulo. I kare ma gitye ka celo Citefano ki got, en olego ni, “Rwot Yecu, gam cwinya,” Ka orumo coŋe piny, ci odaŋŋe ki dwane matek ni, “Rwot, pe iket bal man i komgi.” Ka otyeko lok kit man, ci oto. Caulo bene opwoyo tone apwoya. I kare meno ayelayela madwoŋ opoto i kom jo muye Yecu ma i Jerucalem; ci gin ducu guket woko ata i lobo ducu me Judaya ki Camaria, lukwena keken aye gudoŋ. Jo ma giworo Lubaŋa aye guyiko Citefano, kun gikoke matek twatwal. Ento Caulo onoŋo mito ni etyek lwak jo muye Kricito woko ducu; donyo i ot ki ot ci ywayo co wa ki mon ka tweyogi i mabuc. Jo ducu ma guket ata guwoto kun gitito lok me kwena maber. Pilipo ocito i gaŋ mo me lobo Camaria ci otuco botgi pi Kricito ma Lubaŋa oyero. Ci lwak ma gucokke gujolo lok ma Pilipo otito botgi ki cwiny acel i kare ma guwinyo, kun gineno bene lanyut ma en otiyo. Pien jo mapol ma cen marac omakogi, cen oa woko ki i komgi kun gidaŋŋe ki koko matek; ki lwak lutwo akweya ki lugoro bene gucaŋ woko. Kit meno yomcwiny obedo dwoŋ i gaŋ meno. Ento yam onoŋo tye dano mo i gaŋ meno ma nyiŋe Cimon ma en lajok. En miyo rok pa jo Camaria giuro mada kun en wacce kekene ni en e dano madit. Gin ducu giketo cwinygi i lok ma en waco, litino wa ludito bene, kun giwaco ni, “Man aye dano ma tye ki tek pa Lubaŋa ma gilwoŋo ni Madit-ti” Gibedo ka keto cwinygi ka winyo lokke, pien obedo kwedgi pi kare malac kun miyo giuro tim jokjokke. Ento ka guye lok me kwena maber ma Pilipo otito i kom ker pa Lubaŋa ki i kom Yecu Kricito, ci gibatijagi, co wa ki mon. Kadi wa Cimon bene oye, ka gibatija en ci omedde obedo kacel ki Pilipo kun neno lanyut ki taŋo madito ma en tiyo, ci ouro mada. Ka lukwena ma gitye i Jerucalem guwinyo ni Lucamaria guye lok pa Lubaŋa, ci gucwalo botgi Petero ki Jon. Gin bene ka gucito kunnu, ci gulego pigi wek gulim Cwiny Maleŋ; pien onoŋo peya obino i kom ŋat mo i kingi, ento yam gibatijagi i nyiŋ Yecu keken. Ka guketo ciŋgi i komgi, ci gulimo Cwiny Maleŋ. Ka Cimon oneno ni gulimo Cwiny Maleŋ pi keto bad pa lukwena, ci okelo lim botgi kun waco ni, “Wumiya tek man bene, wek an bene ka aketo ciŋa i kom dano mo olim Cwiny Maleŋ.” Ento Petero owacce ni, “Centeni myero orweny woko matwal, kacel ki in, pien itamo pi wilo mot pa Lubaŋa ki lim! In pe itye ki gin mo nyo dul mo i lok man, pien cwinyi pe leŋ i nyim Lubaŋa. Doŋ iŋut i kom balli man, dok ileg Rwot, wek ka twerre lok ma tye i cwinyi gitimi iye kica. Pien aneno cwinyi kec calo keda, bal otweyi woko idoko lamabucce.” Ci Cimon odok iye ni, “Wuleg Rwot pira wek gin ma wuwaconi pe opot i koma.” Ka gutyeko tito lok me caden ki tuco lok pa Rwot, ci gudok i Jerucalem, kun gitito lok me kwena maber i paco mapol ma i Camaria. Ento lamalaika pa Rwot owaco ki Pilipo ni, “A iwot idok tuŋ acuc i yo ma a Jerucalem dok piny i Gaja.” Yo ma kunnu wok ki i tim. Ci oa ocito. Nen, laco mo Laetiopia, ma gikolo, oa ka woro Lubaŋa i Jerucalem. En onoŋo latic madit pa Kandake, kabaka ma dako me lobo Etiopia, ladit ma lakan jamine ducu. I kare ma dok i lobogi, obedo i gadigadine kun kwano buk pa lanebi Icaya. Cwiny Maleŋ owaco bot Pilipo ni, “Nyik cok, irwatte ki gadigadi man.” Ka Pilipo oriŋo bote, ci owinyo en ka kwano buk pa lanebi Icaya, ci openye ni, “In iniaŋ lok ma ikwano-ni?” En ogamo ni, “Aniaŋ niŋniŋ kono, ka ŋat mo pe okonya?” Ci olwoŋo Pilipo ni obed kwede kacel. Dul ma en obedo ka kwanone obedo kit man: “Calo romo ma gitero ka nekone, nyo latin romo ma oliŋ i nyim lanyar yerre, kit meno en pe oŋamo doge ka lok. Pi mwolo mere pe giŋolle kop ma atir. Aŋa ma twero yeko kit likwaye? Pien kwone doŋ gikwanyo woko ki i lobo.” Ci laco ma gikolo owaco bot Pilipo ni, “Alegi, titta, lanebi oloko lok man i kom aŋa, i kome kene nyo i kom ŋat mukene?” Ci Pilipo ocako lok; ocako ki lok man ma yam gicoyo kun tito lok me kwena maber i kom Yecu. Ka guwoto kacel i yo, ci guo ka ma pii tye iye. Laco ma gikolo owacci, “Nen pii doŋ ene! Gin aŋo ma geŋa limo batija?” [ Ci Pilipo owacce ni, “Ka iye ki cwinyi ducu ci itwero.” En odok iye ni, “An aye Yecu Kricito, ni en Wod pa Lubaŋa.”] Ci ociko ni gadigadi myero ocuŋ; gin ducu gulor i pii, Pilipo ki laco ma gikolo, ci Pilipo obatija en. Ka gukatti woko ki i pii, Cwiny pa Rwot otiŋo Pilipo, otero woko, laco ma gikolo-ni pe dok onene, ci owoto wotte ki yomcwiny. Ento Pilipo otuc wa i Ajota kun wirre ka tuco lok me kwena maber i gaŋi ducu nio ka obino wa i Cecaria. Ento Caulo onoŋo pud buro lupwonnye pa Rwot kun mito nekogi, ci ocito bot ajwaka madit pa Lubaŋa, olege waraga me cito kwede i Damaciko, wek ka enoŋo dano ma lubo Yo ma gitye kunnu, co wa ki mon, ci etwegi, ekelgi i Jerucalem. I kare ma en tye ka wot, ma doŋ onyiko cok ki Damaciko, ci dero oa ki i polo oryeny ocaro kome. Ka opoto piny ci owinyo dwan ma waco bote ni, “Caulo, Caulo, iyela piŋo?” Ogamo ni, “In aŋa, Rwot?” Ci owacce ni, “An aye Yecu, ma itye ka yelone-ni. Ento a idony i gaŋ, ci gibititti gin ma myero iti.” Jo ma yam guwoto kwede gucuŋ laliŋ, ma kun giwinyo dwan ento pe gineno ŋat mo. Caulo oa malo ki ka ma opoto iye piny i ŋom-mi, ento ka oyabo waŋe, ci pe oneno gin mo. Gipeye ki ciŋe gikele i Damaciko. Obedo nino adek ma pe neno piny pe camo dok pe mato bene. Onoŋo tye lapwonnye mo i Damaciko ma nyiŋe Anania. Rwot owacce i waŋ lek ni, “Anania.” En ogamo ni, “An atye en, Rwot.” Ci Rwot owaco bote ni, “A ilub yo ma gilwoŋo ni Atir, ipeny i ot pa Juda laco mo ma nyiŋe Caulo me Taruco; en bene noŋo tye ka lega. En oneno dano mo i waŋ lek ma nyiŋe Anania ka donyo bote kun keto ciŋe i kome wek waŋe oyabbe.” Ento Anania odok iye ni, “Rwot, yam awinyo lok i kom dano man ki bot jo mapol pi kit ma otimo kwede joni marac i Jerucalem. En obino kany bene ki twero pa ajwagi madito me tweyo jo ducu ma gilwoŋo nyiŋi.” Ento Rwot owacce ni, “Citi, pien en aye gin ticca ma doŋ ayero pi tero nyiŋa i nyim Lurok ki luker ki jo Icrael. An kikoma abinyutte can madwoŋ ma en myero ocir pi nyiŋa.” Ci Anania oa ocito odonyo i ot. Oketo ciŋe i kome kun waco ni, “Ominwa Caulo, Rwot Yecu ma onyutte boti i waŋa yo ma ibino iye-ni ocwala boti wek waŋi oyabbe, wek ipoŋ bene ki Cwiny Maleŋ.” Ci gin macalo atura opoto woko ki i waŋe cut, ocako neno piny. Ka oa ci gibatija en, ka lacen ocamo cam ci olimo tek. Obedo kunnu pi kare manok ki lupwonnye ma i Damaciko. Ocako tuco lok i kom Yecu i kacokke cut kun waco ni, “En Wod pa Lubaŋa.” Ci jo ducu ma guwinyo lokke guuro, kun giwaco ni, “Man pe en aye laco ma yam omito tyeko jo ma gikwoŋo nyiŋ man i Jerucalem-mi? Dok en bene obino kany pi lok meno, pi tweyo dano wek etergi bot ajwagi madito.” Ento teko pa Caulo omedde ameda, omiyo lewic omako Lujudaya ma gibedo i Damaciko, pien en onyuto atir ni Yecu en aye Kricito ma Lubaŋa oyero. Ka nino okato mapol, ci Lujudaya gucokke, gupiro lok me neke. Ento Caulo owinyo pi lok ma giyubo. Onoŋo gikuro en i dogcel me Damaciko dyeceŋ ki dyewor wek gineke woko; ento lupwonnyene gutiŋe ki aduku i dyewor, ci gucwale piny ki i wi cel. Ka Caulo obino oo i Jerucalem ci otemo ribbe ki lupwonnye; ento gin ducu guwore, pien onoŋo peya guye ni en lapwonnye pa Yecu. Ento Barnaba otere, ci okele bot lukwena, ka otito botgi kit ma en oneno kwede Rwot i yo, oloko kwede, dok obedo i Damaciko ka tito lok ki tekcwiny laboŋo lworo i nyiŋ Yecu. Ci doŋ en obedo kacel kwedgi, obedo ka wirre kwedgi i Jerucalem, kun tito lok i nyiŋ Rwot ki tekcwiny laboŋo lworo. Oloko bene ki Lujudaya ma giloko leb Grik, kun pyem kwedgi; ento gin guyenyo yo me neke. Ka utmego guŋeyo lokke, ci gularo kwede i Cecaria, ci gucwale i Taruco. Lwak muye Yecu ma i Judaya ducu ki Galilaya ki Camaria doŋ gubedo ki kuc, ci gudoŋo gucuŋ matek, kun gilworo Rwot i kwogi me nino ducu. Cwiny Maleŋ obedo ka jiŋo cwinygi, welgi bene medde ameda. I kare meno Petero obedo ka wirre i kingi ducu, ci ocito piny bot jo pa Lubaŋa ma gibedo i Lida. Kunnu en onoŋo iye dano ma nyiŋe Ainea, ma yam obuto i wi kitanda mwaka aboro pi two akweya. Ci Petero owaco bote ni, “Ainea, Yecu Kricito ocaŋo twoni woko; a malo ipet kabutoni.” Ci otugi a malo oyot. Jo ducu ma gibedo i Lida ki Caron gunene, ci gulokke bot Rwot. Yam tye i Jopa lapwonnye ma dako ma nyiŋe Tabica, ma i leb Grik gilwoŋo ni Dorka, te lokke Lajwa. En yam tiyo tic mabeco mapol mada, dok konyo lucan. I kare meno two omake ci oto woko. Ka gityeko lwoko kome ci gupyelo i kicika ma malo. Macalo Lida cok ki Jopa, ka lupwonnye guwinyo ni Petero tye kunnu, ci gucwalo dano aryo bote, gulege ni, “Tim ber, ibin oyot botwa, pe iru.” Petero oa, owoto kwedgi; ka oo, gutere i kicika ma malo. Mon-to ducu gucuŋ kun gikok ka ŋete, ma ginyuto koti ki boŋŋi mukene ma Dorka okwoyo ma onoŋo pud tye botgi. Ento Petero ocwalogi ducu woko, ka orumo coŋe piny ocako lega. Lacen olokke bot lato kun wacci “Tabica, a malo.” Ci Tabica oyabo waŋe; ka oneno Petero ci oa obedo abeda. Petero omako ciŋe, ka otiŋe malo. Ka olwoŋo jo pa Lubaŋa ki mon-to, ci omiye botgi makwo. Pire oywek i Jopa ducu, kun jo mapol guye Rwot. Petero obedo i Jopa pi nino mapol tuŋ pa dano mo ma nyiŋe Cimon, lanyoŋ pyen. Yam onoŋo tye laco mo i Cecaria ma nyiŋe Kornelio, ladit me dul askari ma gilwoŋo ni me Itali, laco ma woro Lubaŋa, en ki jo ma i ode ducu. En yam miyo jami mapol me konyo dano bot Lujudaya, kun lego Lubaŋa jwijwi. I kin cawa aboŋwen me dyeceŋ oneno lamalaika pa Lubaŋa kun bino donyo bote, ma owacce i waŋ lek ni, “Kornelio” En ociko waŋe i kome ki lworo madit, ci owaco ni, “Gin aŋo ba, ladit?” Ci owaco bote ni, “Legani ki motti me kony oito malo obedo gin me po i komi i nyim Lubaŋa. Kombeddi doŋ icwal dano i Jopa, wek oom Cimon ma gilwoŋo Petero. En otiro bot Cimon lanyoŋ pyen, ma ode cok ki dog nam.” Ka lamalaika ma oloko kwede-ni otyeko wot, ci Kornelio olwoŋo luticce aryo ki askari acel ma woro Labaŋa ki i kin jo ma gitiyo bote-ni. Ka otyeko tito botgi lok ducu, ci oncwalogi i Jopa. Orwone ka guwoto guo cok ki gaŋ ma gicito iye-ni, ci Petero oito i wi ot malo ka lega i kin cawa abicel. Kec ocako neke, kun mito ni ecam gin mo, ento onoŋo pud giyubo cam ayuba; ci owille woko, oneno ka polo oyabbe, ki jami mo olor piny, macalo cuka madit, kun bino piny ma tye ki twoke aŋwen. Onoŋo tye iye kit kwa lee ducu, wa kwa anyai ducu ki winyo me polo. Ci dwan obino bote ma wacci, “Petero, a ineki wek icam.” Ento Petero ogamo ni, “Pe, Rwot, peya acamo jami ata me kwer.” Dwan dok obino bote tyen me aryone ni, “Gin ma Lubaŋa olonyo in pe ilwoŋ ni obedo me kwer.” Man otimme tyen adek, ci jami meno gidwoko woko i polo. I kare meno Petero iye obedo ka kalo akala kun tamo ni gin ma eneno i waŋ lek man nyuto gin aŋo? Nen, jo ma Kornelio ocwalogi gubedo ka penyo pi ot pa Cimon, kun gucuŋ i dog ot, gilwoŋo lwoŋo matek kun gipenyo ka nyo Cimon ma gilwoŋo Petero otiro kenyo. I kare ma Petero iye tye ka lwodo pi lek man, Cwiny Maleŋ owacce ni, “Nen, jo adek gitye ka yenyo in. A, ilor piny iwot kwedgi kun pe ikalo akala, pien an aye acwalogi.” Ci Petero olor piny bot jo meno kun waco ni, “An aye ŋat ma wun wuyenyoni. Wun wubino kany piŋo?” Gugamo ni, “Kornelio ma ladit me askari en dano ma cwinye atir, lalwor Lubaŋa, ma rok Lujudaya ducu giloko ki nyiŋe maber; lamalaika maleŋ aye ocike ni ocwal dano boti wek icit wa i ode, wek owiny gin ma ibiwaco.” Ci olwoŋogi oterogi i ot, gubedo welone. Orwone en oa ci ocito kwedgi, ki utmego mogo ma gibedo i Jopa gunywako kwede yo. Ka orwone mukene gudonyo i Cecaria, Kornelio obedo ka kurogi ma olwoŋo lutugi ki lureme ma gicokcok kwede ci gucokke bote. Ka Petero oo i dog ot, ci Kornelio oromo kwede, opoto oryebbe piny i te tyene kun wore. Ento Petero oile malo, kun waco ni, “A malo icuŋ; an bene adano adana.” Ka oloko kwede ci odonyo i ot, onoŋo lwak dano gucokke iye. Owaco botgi ni, “Wun wuŋeyo ni bedo me kwer bot Lujudaya me ribbe kwedwu, kadi wa limo larok mo. Ento Lubaŋa otyeko nyuto bota ni pe alwoŋ dano mo ni dano ata nyo ni me kwer. Mumiyo ka gilwoŋa ci abino laboŋo pyem mo. An dok apenyo aye ni wulwoŋa piŋo?” Kornelio ogamo ni, “Tin nino me aŋwenne i kin cawa man, onoŋo atye ka lega i oda i cawa me aboŋwen, ci nen ba, laco mo ocuŋ i nyima ma oruko boŋo ma ryeny, kun waco ni, ‘Kornelio, legani otyeko winnye, ki motti me kony bene gipo pigi i nyim Lubaŋa. Mumiyo in icwal dano i Jopa gupeny pi Cimon ma gilwoŋo Petero; en tye otiro i ot pa Cimon lanyoŋ pyen i dog nam.’ Kit meno acwalogi boti cut, ci in bene itimo ber ibino. Kombeddi wan ducu watye kany i nyim Lubaŋa pi winyo lok ma Rwot ociki kwede ducu.” Petero ocako lok ci owacci, “Adada aniaŋ atir ni Lubaŋa pe poko kin dano, ento en jolo dano ma i rok ducu ma gilworo en ki ma gitiyo gin ma tye atir. Wun wuŋeyo lok ma Lubaŋa ocwalo bot jo Icrael, kun tito lok me kwena maber me kuc ma Yecu Kricito okelo; en aye Rwot pa dano ducu. Lok man yam gituco oromo lobo Judaya ducu kun ocakke i Galilaya i ŋe kare ma Jon otito lok i kom batija. Wuŋeyo kit ma Lubaŋa owiro kwede Yecu Lanajaret ki Cwiny Maleŋ ki tek; kit macalo en yam wirre kwede kun tiyo gin maber dok caŋo jo ducu ma Catan yelogi; pien onoŋo Lubaŋa tye kwede. Dok wan lucadenne i kom gin ma en otiyo ducu i lobo Judaya ki i Jerucalem. Yam gineke kun giŋabe i kom yat, ento Lubaŋa ocere woko i nino me adekke, onyute bot dano; pe bot dano ducu, ento bot wan jo ma yam Lubaŋa oyero pi bedo lucaden. Wan wacamo dok wamato kwede kacel i kare ma doŋ ocer woko ki i kin jo muto. Dok ocikowa ni watiti lok ki dano kun wamiyo caden ni, man aye ŋat ma yam Lubaŋa oyero me bedo laŋolkop pa jo makwo ki jo muto. Lunebi ducu gubedo caden ni, dano ducu ma ye en gibiweko balgi woko pi nyiŋe.” I kare ma Petero pud tye ka loko lok meno, Cwiny Maleŋ opye i kom jo ducu ma gubedo ka winyo lokke. Lujudaya ma guye Yecu ma onoŋo gubino ki Petero guuro mada pien mot me Cwiny Maleŋ doŋ gionyo wa i kom Lurok. Guwinyo gin bene ka gidumo leb mapatpat kun gipako Lubaŋa. Petero openyo ni, “Ŋat mo tye ma twero geŋo kelo pii wek pe gibatija jo man, kun noŋo doŋ gulimo Cwiny Maleŋ macalo wan-ni?” Ci ociko ni gibatijagi i nyiŋ Yecu Kricito. Gin gulege ni obed kwedgi pi kare mo. I kare meno lukwena ki utmego ma gitye i Jerucalem guwinyo ni Lurok bene doŋ guye lok pa Lubaŋa. Ka Petero ocito i Jerucalem, ci dul pa jo ma mito ni jo muye Kricito myero koŋ gilirgi gucako ŋono en, kun giwaco ni, “Piŋo nene icito bot jo ma pe gilirogi ci icamo kwedgi?” Ento Petero ogamo, ocako tito botgi ki kore kun wacci, “I kare ma abedo i gaŋ me Jopa ma abedo ka lega, ci awille woko. Aneno gin mo ma lor piny macalo cuka madit ki i waŋ lek, kun bino piny ma tye ki twoke aŋwen, ci olor wa piny i nyima. Ka aŋiyo kome cok, ci aneno iye lee, ki ŋuu ma camo riŋo, ki kwa anyai ducu ki winyo me polo. Ci awinyo dwan ma wacca ni, ‘Petero, a malo inek wek icam.’ Ento agamo ni ‘Pe, Rwot, pien peya jami ata ki me kwer odonyo i doga.’ Ento dwan odok iye ki i polo ni, ‘Gin ma Lubaŋa olonyo in pe ilwoŋ ni obedo me kwer.’ Man otimme tyen adek, ci jami meno gidwoko woko i polo. I kare meno kikome en aye jo adek ma gicwalogi bota ki i Cecaria guo kwede i ot ma yam watye iye-ni. Cwiny Maleŋ otitta ni awot kwedgi, ma pe apoko kin dano. Anywako wot ki utmego man abicel, ka wadonyo i ot pa dano meno. Ci en otito botwa kit ma oneno ki lamalaika ocuŋ kwede i ode kun wacce ni, ‘Cwal kwena i Jopa wek guom Cimon ma gilwoŋo Petero; en aye bititti lok ma bilaro in ki jo ma i odi ducu.’ I kare ma acako lok, ci Cwiny Maleŋ opye i komgi kit ma con okwoŋo pye i komwa-ni, ci apo lok ma yam Rwot owaco, ni, ‘Jon yam obatija dano ki pii, ento wun gibibatijawu ki Cwiny Maleŋ.’ Ka ce Lubaŋa omiyogi mot ma rom ki ma omiyowa i kare ma waye iye Rwot Yecu Kricito, ci an aŋa ma atwero pyem ki Lubaŋa?” Ka guwinyo lok man, ci guliŋ litik, ka gucako pako kun giwaco ni, “Lurok bene Lubaŋa doŋ omiyogi ŋut me donyo i kwo.” Jo ma yam guket i kare me libo ma ocakke i kom Citefano-ni guwoto nio wa Poiniki ki Caiprac ki Antiokia, kun pe gitito lok bot ŋat mo, kono bot Lujudaya keken. Ento jo mukene i kingi, jo me Caiprac ki me Cirene, ka guo i Antiokia ci guloko ki Lugrik bene kun gitito pi Rwot Yecu. Rwot oketo ciŋe i komgi, ci lwak jo mapol gulokke bote. Lok man owinynye bot jo muye Kricito ma i Jerucalem, ci gucwalo Barnaba i Antiokia.. Ka oo ci oneno tic me kica pa Lubaŋa, cwinye obedo yom iye. Ocuko cwinygi me moko i kom Rwot matek ki cwinygi ducu. Onoŋo en dano maber ma opoŋ ki Cwiny Maleŋ ki niye. Ci lwak jo mapol gumedde bot Rwot. Barnaba ocito Taruco ka yenyo Paulo; ka onoŋe ci okele i Antiokia. Gubedo kacel ki jo muye Kricito pi mwaka kulu kun gipwonyo lwak jo mapol. Nyiŋ lupwonye gikwoŋo lwoŋo ni Jo pa Kricito ki i Antiokia. I kare meno lunebi mogo gua ki i Jerucalem gucito i Antiokia. Ŋat acel i kingi ma nyiŋe Agabo ocuŋ ci otito lok pi Cwiny Maleŋ ma onyutte lok ma i anyim, ni waŋ mo kec bipoto i lobo ducu; ci otimme i kare pa Kalaudio ma laloc madit. Pieno lupwonynye gumoko ni ŋat acel acel omi kony ki utmego ma gibedo i Judaya macalo twero; ci gutimo kit meno, ka gucwalo bot ludoŋo kun Barnaba ki Caulo aye gitero. I kare meno kabaka Kerode oketo ciŋe i kom jo mogo i kin jo muye Kricito. Oneko Yakobo omin Jon ki pala lucwan; ka doŋ oneno ni oyomo cwiny Lujudaya, ci omako Petero bene. Man otimme i kare me nino madito me mugati ma Tobi pe Iye. Ka doŋ omake, ci okete i mabuc, omiye bot lukur-piny aŋwen aŋwen wek gukure, kun mito ni gipid lok i kome i ŋe nino madito me Kato (Paska.) Gibedo ka kuro Petero i ot mabuc kit meno; ento lwak jo muye Kricito gubedo ka lego Lubaŋa pire matek. I dyewor ma Kerode mito kele iye woko-ni, onoŋo Petero obuto onino i kin askari aryo, ma gitweye woko ki nyor aryo, ki lukur-piny bene onoŋo gitye ka kuro dog ot mabuc. Nen, lamalaika pa Rwot onen, ci dero ocaro i kicika. Ogoyo but Petero ocoye woko, kun waco bote ni, “A malo oyot.” Ci nyor opoto woko ki i ciŋe. Lamalaika owacce ni, “Ruk ginarukani, irwak war i tyeni,” ci otimo kit meno. Dok owacce ni, “Dwal boŋoni i komi ci ilub kora.” Ci okato woko, olubo kore. En pe oŋeyo ni gin ma lamalaika timo-ni bedo me ada; en tamo ni etye ka lek. Ka doŋ gukato lukur-piny mukwoŋo ki me aryone, ci guo i dog ot ma giloro ki nyonyo ma gikato kwede woko i dye gaŋ. Doggola oyabbe kene, ci gukato gucito woko, gulubo yo acel, ka lamalaika oweke woko. Petero ocako niaŋ pire kene kun waco ni, “Doŋ atyeko niaŋ kombeddi ni Rwot ocwalo lamalaikane olara woko ki i ciŋ Kerode ki i kom gin ducu ma Lujudaya gigeno ni bitimme i koma-ni.” Ka doŋ oniaŋ, ci ocito i ot pa Maliam min Jon ma nyiŋe mukene Marako, ka ma jo mapol gucokke gugurre iye, ma gitye ka lega. Ka odwoŋo dog gaŋ ma i yo, ci aŋeca ma nyiŋe Roda obino ka niaŋ i kome. Ka oniaŋ dwan Petero, yomcwiny ogeŋe yabo dog gaŋ woko, ento oriŋo omwomme i ot owacci, “Petero tye ocuŋ woko i dog gaŋ.” Guwacce ni, “In lapoya.” Ento en orido ni tye ada. Gugamo ni, “Meno lamalaikane!” Ento Petero dok omedde ki dwoŋone, ka guyabo, ci guneno en, ci guuro. Ka ojukogi ki ciŋe ni guliŋ, ci otito botgi kit ma Rwot okwanye kwede ki i mabuc, kun waco ni, “Wupor lok man bot Yakobo ki bot utmego.” Ka oa woko ki kenyo, ocito woko ka mukene. Ka piny oru, ci piny ocako lyetti woko ki bot askari, ni Petero man otimme niŋniŋ. Ka Kerode oyenye ci pe onoŋe, ka openyo askari ma lukur-piny, ci ociko ni ginekgi woko. Ka en oa ki i Judaya ocito i Cecaria, obedo kunnu. Kiniga omako Kerode i kom jo Turo ki Cidon; ci gucokke gubino bote ma onoŋo gimer ki Blacito, ladit ma loyo ot pa kabaka. Gupenyo ni gimito kuc, pien lobogi limo cam ma a ki i lobo pa kabaka. I kom nino ma giciko, Kerode oruko iye jor me kerre, oito obedo kwede i wi komker, oyabo lok botgi. Ci lwak guwo matek ni, “Dwan Lubaŋa, pe dwan dano!” Lamalaika pa Lubaŋa ogoye woko cut, pien pe omiyo deyo bot Lubaŋa; ci kwidi ocamo kome ci oto woko. Ento lok pa Lubaŋa onya omedde ameda. Ka Barnaba ki Caulo gudwogo ki i Jerucalem ma doŋ gucobo tic ma giorogi iye, ci gukelo Jon ma nyiŋe mukene Marako. I kare meno lwak jo muye Yecu ma tye i Antiokia onoŋo doŋ gitye ki lutit lok pa Lubaŋa ki lupwony, Barnaba, Cimeon ma gilwoŋo Niga, Lukia me Cirene, ki Manaen ma odoŋ kacel ki Kerode laloyo, ki Caulo. I kare ma gitye ka miyo woro bot Rwot ki ri kec, ci Cwiny Maleŋ owaco ni, “Wukwannya Barnaba ki Caulo pi tic ma alwoŋogi pire-ni.” Lacen ka doŋ gutyeko lega ki ri kec, ci guketo ciŋgi i komgi ka gucikogi. Ka Cwiny Maleŋ ocwalogi, ci gucito i dog nam i Celeukia; ka gua ki kunnu gukwaŋ gucito i Caiprac. Ka guo i Calamic, gutuco iye lok pa Lubaŋa i kacokke ducu pa Lujudaya; onoŋo gitye kacel ki Jon ma lakonygi. Ka guwoto gurumo i cula ducu nio wa i Papo, ci gurwatte ki laco mo ma obedo latyet, lanebi ma lagoba ma Lajudaya, ma nyiŋe Bar-Yecu. En obedo kacel ki laloyo, Cergio Paulo, en laco ma laryeko. Laloyo olwoŋo Barnaba ki Caulo bote kun noŋo mito winyo lok pa Lubaŋa. Ento Elima ma latyet (meno aye te lok me nyiŋe) ocako pyem kwedgi kun mito ŋako laloyo woko ki i niye. Ento Caulo ma gilwoŋo bene ni Paulo, ka opoŋ ki Cwiny Maleŋ, ociko waŋe i kome, ci owacce ni, “In latin pa Larac, in lamerok me kit ducu ma tye atir, ipoŋ ki lok me bwola, labal wi dano, in pud ibimedo ka dwanyo yo pa Rwot mucuŋ atir-ri? Kombeddi ciŋ Rwot opoto i komi; waŋi bicor woko, pe ibineno ceŋ kare mo” Lupu ocido waŋe oyotoyot, ci opaŋŋe pi yenyo dano wek omak bade opeye kwede. Laloyo oye Yecu ka oneno gin ma otimme-ni, pien obedo ka uro kit pwony ma gimiyo i kom Rwot. Lacen Paulo ki luwote gukwaŋ gua ki i Papo, gucito i Perga i lobo Pampulia. Jon owekogi odok woko i Jerucalem. Ento gin gua ki i Perga gucito i Antiokia me lobo Picidia, ci gudonyo i kacokke i nino me cabit, gubedo piny. Ka doŋ gityeko kwano cik pa Moses ki lok pa lunebi, ci ludito me kacokke gucwalo lok botgi kun gipenyogi ni, “Utmego, ka wutye ki lok mo me cuko cwiny dano, ci wuwaci.” Ka Paulo ocuŋ ci ojukogi ki ciŋe kun waco ni, “Jo Icrael, ki wun dano ma wulworo Lubaŋa, wuwiny. Lubaŋa pa rok man, jo Icrael, yam oyero kwarowa, ci omiyo dano gunya madwoŋ i kare ma gubedo i Ejipt, ci oryeyo bade okwanyogi woko ki kunnu ki tek mere. Odiyo cwinye i komgi i tim mwaka pyeraŋwen. Doŋ ka otyeko rok abiro ma i lobo Kanaan-ni woko, ci omiyogi lobo meno me bedo megi pi mwaka ma romo miya aŋwen ki pyerabic. Lacen omiyogi luŋolkop o wa i kom Camuel ma lanebi. Dok gupenyo pi kabaka; ci Lubaŋa omiyo botgi Caulo wod pa Kic, laco ma i kaka pa Benjamin, pi mwaka pyeraŋwen. Ka doŋ okwanye woko, ci dok otiŋo Daudi, oketo me bedo kabakagi. Otito pi Daudi kun waco ni, ‘Atyeko noŋo Daudi wod pa Yece; en laco ma yomo cwinya, ma bitiyo gin ma amito ducu.’ Lubaŋa okelo Lalar bot jo Icrael ki i kin likwayo pa laco meno, macalo yam, ociko, en Yecu. I kare ma peya obino, Jon otito lok i kom batija me ŋut bot jo Icrael ducu. I kare ma Jon cobo ticce, owacci, ‘Wun wutamo ni an aŋa? An pe a dano ma wukuro-ni; ento dano ma bibino ma lubo kora, an pe amyero me gonyo war tyene.’ “Utmego, wun likwayo ma i kaka pa Abraim, ki jo mukene ma i kinwu ma gilworo Lubaŋa, wan aye gicwalo botwa lok man me larre. Ento jo ma yam gibedo i Jerucalem, ki luditogi, onoŋo pe giniaŋ i kome, pe bene guniaŋ lok ma yam lunebi gutito ki ma gikwano nino ducu i ceŋ cabit. Ci gucobo lok pa lunebi kun giŋolo ni kop oloyo Yecu. Giŋolle kop me to, kadi pe gunoŋo bal mo i kome, ka dok gulego Pilato wek oye gineke. Ka doŋ gutyeko cobo lok ma yam gicoyo i kome ducu, ci gukwanye woko ki i kom yat, gupyelo kome i lyel. Ento Lubaŋa ocere woko ki i kin jo muto; ci obedo ka nen pi nino mapol bot jo ma yam gua kwede ki i Galilaya gubino kwede i Jerucalem, ma koni gin aye cadenne bot lwak. Wan bene wakelo botwu lok me kwena maber ni, gin ma yam Lubaŋa ociko pire bot kwariwa, en ocobo bot wan likwayogi pi cero Yecu, macalo yam gicoyo bene i jabuli me aryo ni, ‘In i Woda, tin doŋ anywali.’ “Lok i kom cero en ki i kin jo muto, ma pe kome dok bitop woko, yam oloko kit man ni, ‘Abimini gum maleŋ ki ma genne ma yam aciko pi Daudi.’ Dok owaco bene i jabuli mukene ni, ‘Pe ibiweko kom danoni ma geni top woko.’ Pien ka Daudi yam otyeko tic kun cobo yub pa Lubaŋa, en oto, ci giyiko kacel ki kwarine, kome otop woko. Ento ŋat ma Lubaŋa ocero woko-ni kome pe otop. Utmego, myero wuŋe ni, pi dano man en aye Lubaŋa weko bal pa dano, kun kwanyo i kom ŋat acel acel ma oye en bal ducu ma pe gitwero kwanyo i komwu i te cik pa Moses. Ber doŋ wugokke, wek gin ma yam lunebi guloko pire-ni pe opot i komwu. Guwacci, ‘Nen ba, wun luŋala, wuur matek, ci wubirwenyo woko matwal; pien atye ka tiyo tic mo i karewu-ni ma pe wun wubiye kadi matidi mo, kadi ŋat mo otuco pire botwu.’ ” I kare ma gikato woko, lwak gulego ni lok man myero gitit botgi odoco i cabit ma bino. Ka lwak ma gubedo i kacokke doŋ guket woko, ci lwak Lujudaya ki jo mulokke ma luworo i dini pa Lujudaya bene gulubo kor Paulo ki Barnaba, ci gin gubedo ka lok kwedgi kun gicuko cwinygi ni myero gumedde i kica pa Lubaŋa. I cabit ma olubo pol dano ma i gaŋ meno gucorre gugurre kacel pi winy lok pa Lubaŋa. Ento ka Lujudaya guneno lwak, ci nyeko omakogi, gucako pyem ki lok ma Paulo tito, ci guyete bene. Paulo ki Barnaba guloko ki tekcwiny laboŋo lworo, kun giwaco ni, “Onoŋo myero koŋ kikwoŋ tito lok pa Lubaŋa botwu. Ento macalo doŋ wucwalo woko cen-ni, doŋ wuŋolo giwu kenwu ni pe wumyero pi noŋo kwo ma pe tum. Doŋ wunen, walokke giwa bot Lurok. Pien Rwot yam ocikowa kun wacci, ‘Aketo in me bedo ceŋ bot Lurok, wek imi larre oo wa i agikki piny ducu.’ ” Ka Lurok guwinyo lok man, ci cwinygi obedo yom, gucako pilo wi lok pa Lubaŋa; ci jo ducu ma myero gunoŋ kwo ma pe tum guye Yecu. Lok i kom Rwot omedde oromo lobo meno ducu. Ento Lujudaya gurubo i mon ma giworo Lubaŋa ma gitye i rwom me dito ma malo, kacel ki ludito me gaŋ ma giloyo dano, ci gubalo cwinygi woko; gucako yelo Paulo ki Barnaba ka guryemogi woko ki i lobogi. Ento guguteŋo apwa woko ki i tyengi me bedo caden i komgi, ka gucito i Ikonio. Lupwonnye cwinygi obedo yom dok gupoŋ ki Cwiny Maleŋ. Ka doŋ gitye i Ikonio, gudonyo i kacokke pa Lujudaya i kit acel-lu, ci doŋ pi kit ma guloko kwede omiyo lwak dano mapol guye Rwot, Lujudaya wa ki jo Grik bene. Ento Lujudaya ma pe guye gutugo Lurok kun gumiyo cwinygi odoko kec i kom utmego. Gubedo kunnu pi kare malac kun giloko pi Rwot ki tekcwiny laboŋo lworo, Rwot bene omiyogi twero me tiyo lanyut ki taŋo mapol ma omoko kwede lok ma gitito i kom kicane. Ento jo Ikonio igi opokke woko; dul mogo gudok kom Lujudaya, ki dul mogo i kom lukwena. Ka Lurok ki Lujudaya guyutte kacel ki lulocgi pi bino ka timogi marac ki celogi ki got, ka gugwilo lokke ci gupucce woko wa i Licitra ki Derube, gaŋi ma i lobo Likaonia ki i lobo ma orumo kenyo; gubedo ka tuco lok me kwena maber kunnu. I Licitra onoŋo tye laco mo ma bedo abeda kun pe woto ki tyene; con en laput nia i kare ma ginywale, pe omedo ki wot. En obedo ka winyo ka Paulo loko, ci Paulo ociko waŋe onene, ci oniaŋ ni en tye ki niye ma romo miye caŋ maber. Owacce matek ni, “A malo, icuŋ ki tyeni atir.” Ci oleŋŋe malo opye, ka cako wot. Ka lwak guneno gin ma Paulo otiyo, ci gudaŋŋe matek i leb Likaonia kun giwaco ni, “Lubaŋa gulor piny botwa macalo dano!” Gulowoŋo Barnaba ni Jeuc ki Paulo ni Ermec, pien en aye lalok makato. Ajwagi pa Jeuc ma gitye ki ot woro jokgi i nyim gaŋ gukelo twon ma gideyo ki ature i dog gaŋ gimito tyero gitum kacel ki lwak. Ento ka lukwena Barnaba ki Paulo guwinyo pire, ci guyeco boŋŋigi kun gibaro dye lwak ki daŋŋe ni, “Wun co, wutimo kuman piŋo? Wan bene wa dano, ma kitwa rom ki mewu. Wakelo botwu lok me kwena maber, wek wun wua woko ki bot gin ma konnye pe, wulokke bot Lubaŋa makwo ma yam oketo polo ki lobo ki nam ki jami ducu ma tye iye. Yam i kare macon en oye ni rok ducu gulub yogi kengi. Kadi bed kumeno, kare ducu en bedo ki cadenne ma nyuto ni en tye. En otimowu ber kun cwalo botwu kot mucwer ki i polo, dok miyowu kit cam mapatpat ma cek ka karegi oromo ma miyo wuyeŋ ki cam, cwinywu bene bedo yom.” Kadi bed guloko lok meno, juko lwak wek pe gutyer gitum botgi obedo tek twatwal. Ento Lujudaya mogo gucito kunnu ma gua ki i Antiokia ki i Ikonio. Gupiyo lwak, ka gucelo Paulo ki got ci guywayo woko gutere i ŋe gaŋ, kun gitamo ni doŋ oto woko. Ento ka lupwonnye gucokke bote, ci oa malo odonyo i gaŋ. Orwone guwoto gin ki Barnaba wa i Derube. Ka doŋ gutuco lok me kwena maber i gaŋ meno, ki noŋo lwak lupwonnye mapol, ci gudok cen i Licitra ki Ikonio ki Antiokia ma i lobo Picidia, kun gijiŋo cwiny lupwonnye, kun gicuko cwinygi ni gumedde i niye, ma giwaco ni, myero wadony i can madoŋo ka wakat kwede i ker pa Lubaŋa. I lwak jo muye Yecu i kabedo acel acel guketo ludoŋo ma ka-kagi ki lega ki ri kec, ci gumiyogi i ciŋ Rwot ma yam guye-ni. Ka guwoto gukato ki i Picidia, ci gubino wa i lobo Pampulia. Ka gutyeko tito lok pa Lubaŋa i Perga ci gucito piny i Atalia, ka gua ki kunnu gukwaŋ nio i Antiokia, ka ma yam gimiyogi iye i ciŋ Lubaŋa wek en okonygi ki kicane i kom tic ma doŋ gutyeko cobone-ni. Ka guo i Antiokia, gucoko lwak muye Yecu kacel, ci gutuco gin ducu ma doŋ Lubaŋa otyeko tiyo kacel kwedgi, ki kit ma oyabo kwede doggola me niye bot Lurok. Ci gubedo kunnu ki lupwonnye pi kare malac. Ento jo mogo gubino ki i Judaya ma gupwonyo utmego ni, “Ka pe gilirowu macalo kit pa Moses tye, pe wutwero larre.” Mumiyo Paulo ki Barnaba gubedo ka laro lok ki pyem kwedgi matek. Ci giyero Paulo ki Barnaba ki jo mukene, gicwalogi Jerucalem bot lukwena ki ludoŋo pi lok man. Kit meno ka lwak muye Yecu gutyeko lwokogi ci guwok ki i Poiniki ki lobo Camaria kun gitito kit ma Lurok gulokke kwede bot Kricito ci gukelo yomcwiny madwoŋ bot utmego ducu. Ka guo i Jerucalem, lwak muye Kricito, kacel ki lukwena ki ludoŋo, gujologi maber, ci gutuco gin ducu ma Lubaŋa obedo ka tiyone kwedgi. Ento jo mogo ma guye ma gitye i dul pa Lubaparicayo gua malo bene kun giwaco ni, “Myero koŋ gilirgi, ki cikogi ni gumak cik pa Moses.” Lukwena ki ludo jo gucokke gugurre ka laro lok man. Ka pyem doŋ obedo dwoŋ, ci Petero oa malo owaco botgi ni, “Utmego, wun wuŋeyo ni yam con Lubaŋa oyero an ki i kinwu ni Lurok gibiwinyo lok me kwena maber ki i doga ka guye. Dok Lubaŋa ma ŋeyo cwiny dano ducu obedo cadengi pi miyogi cwiny Maleŋ macalo yam omiyo botwa. En pe oketo nipoko i kinwa ki gin, ento olonyo cwinygi pi niye. Piŋo wun wutemo i Lubaŋa ma wumito riyo okol mapek i ŋut lupwonynye ma tiŋone oloyo kwarowa kadi wa wan bene? Ento wan waye ni wabilarre pi kica pa Rwotwa Yecu, ki gin bene kit meno.” Ka doŋ jo mucokke ducu guliŋ mot, kun giwinyo ka Barnaba ki Paulo gitito kit lanyut ki taŋo ma Lubaŋa obedo ka tiyogi ki ciŋgi i kin Lurok. Ka doŋ gutyeko lokgi, ci Yakobo ogamo ni, “Utmego, wuwinya. Cimeon doŋ otito kit ma Lubaŋa okwoŋo nyuto kwede ni eparo pi Lurok kun okwanyo ki i kingi lwak ma gilwoŋo ki nyiŋe. Man aye lok ma yam lunebi gucwako, macalo gicoyo ni, ‘I ŋe meno abidwogo ci abigero aduc pa Daudi ma yam opoto piny-nyi, abigero odoco ka ma yam oballe, abiroco odoco amiyo cuŋ maber, wek jo mudoŋŋe guyeny Rwot, kacel ki Lurok ducu ma gilwoŋogi ki nyiŋa. Meno Rwot aye ma owaco ma omiyo lok meno oŋene nia wa con.’ Mumiyo an aŋolo ni, pe myero wayelu Lurok ma gulokke bot Lubaŋa, ento myero wacoyu warag botgi ni pe gucam gin mo ma gityero i nyim jogi, pien odoko gin me kwer, pe gutim tim tarwaŋ, pe gucam riŋo lee ma gideyo adeya, pe gucam remo. Pien cakke i kare macon Moses tye ki jo ma gitito lokke i gaŋ ducu, kun gikwano cikke i kacokke i ceŋ cabit ducu.” Ka doŋ lukwena ki ludoŋo, kacel ki lwak muye Kricito ducu, gutamo ni ber giyer dano ki i kingi, gicwalgi i Antiokia kacel ki Paulo ki Barnaba. Ci gucwalo Juda ma gilwoŋo Barcaba, ki Cira, gin aye jo ma gidito i kin utmego, gumiyogi waraga ma kwanne kit man ni, “Bot utmego ma Lurok ma i Antiokia ki Ciria ki Cilicia. Wan utmegiwu ma lukwena ki ludoŋo wamotowu mada. Wawinyo ni dano mogo ma gua ki botwa gubedo ka yelowu ki lok mapol, ki rubo tamwu woko, kadi bed wan pe wacikogi ki kit lok macalo meno. Pi meno wan ka wacokke waneno ni ber wayer dano wacwalgi botwu kacel ki Barnaba ki Paulo, ma wamarogi twatwal, gin jo ma doŋ gudyero kwogi pi Rwotwa Yecu Kricito. Mumiyo wacwalo botwu Juda ki Cira, gin bene kikomgi gibititowu lok ki doggi ma rom ki man ma wacoyo-ni. Cwiny Maleŋ oneno ni ber, kacel ki wan bene, pe waket yec mapek twatwal i komwu makato lok magi ma pigi tego: pe wucam gin ma gityero bot jogi, pe wucam remo ki riŋo lee ma gideyo adeya, pe wutim tim mo me tarwaŋ. Ka wugwokke i kom meno ducu, ci wubitimo ber. Doŋ wubed maber.” Kit meno ka gicwalogi, ci gin gucito i Antiokia; ka doŋ gucoko lwak kacel, ka gimiyogi waraga. Ka jo kunnu gutyeko kwano, ci cwinygi obedo yom i kom lok ma gicoyo iye me cuko cwinygi. Juda kacel ki Cira, ma gin bene lutit lok pa Lubaŋa, gucuko cwiny utmego ki lwak lok mapol ma miyogi teko. Ka gutyeko nino mapolpol kunnu, ci gulwokogi ki kuc i kare ma gidok bot utmego ma yam gucwalogi-ni. [ Ento Cira otamo ni ber edoŋo kunnu.] Ento Paulo ki Barnaba gudoŋ i Antiokia, kun gipwonyo dano ki tito lok pa Rwot, kacel ki jo mukene mapol bene. I kare mo Paulo owaco ki Barnaba ni, “Bin wek wadok ka limo utmego ma i gaŋ ducu ma yam watuco iye lok pa Rwot, wanen kit ma gitye kwede.” Ci Barnaba onoŋo mito ni giwot ki Jon ma nyiŋe mukene Marako, ento Paulo otamo ni pe dok ber me tero dano ma yam oa owekogi i Pampulia, pe woto kwedgi i dog tic. Ci gubedo ka laro lok magwa, nio ka kingi opokke woko. Barnaba owoto ki Marako ci gukwaŋo nam gucito i Caiprac, ento Paulo oyero Cira ci gua ka doŋ utmego gumiyogi i ciŋ Rwot wek okonygi ki kicane. Owoto obaro i Ciria ki Cilicia kun miyo tekcwiny bot lwak muye Kricito. Ka dok oo wa i Derube ki Licitra, lapwonnye mo onoŋo tye kunnu ma nyiŋe Temceo, wod pa dako mo ma Lajudaya ma oye Kricito, ento wonne aye Lagrik. Utmego ma i Licitra ki Ikonio giloko ki nyiŋ Temceo maber. Paulo omito ni ewot kwede; ka otere, ci olire pi Lujudaya ma gitye kunnu, pien gin ducu onoŋo giŋeyo ni wonne Lagrik. I kom wotgi ducu ma giwoto iye i gaŋi mapatpat gubedo ka miyo bot dano ma guye Kricito cik me aluba ma yam lukwena ki ludoŋo gumako i Jerucalem. Kit meno lwak muye Kricito i kabedo acel acel gumoko matek i niye, gubedo ka medde mapol nino ducu. Ka guwoto gubaro i lobo Perugia ki Galatia, ci Cwiny Maleŋ ogeŋogi ni pe gulok lok pa Lubaŋa i Acia. Ka guo ma gukemo Micia, ci gutemo dok tuŋ Bitinia, ento Cwiny pa Yecu pe oye ki gin, mumiyo gukato ki i Micia, gucito piny i Teroa. Paulo oneno gin mo i waŋ lek dyewor, laco mo me Makedonia noŋo ocuŋ i nyime, obako doge bote kun waco ni, “Kwaŋ nam ibin i Makedonia ikonywa.” Ka otyeko neno man i waŋ lek, ci oyotoyot wayubbe me cito i Makedonia, kun watamo ni Lubaŋa aye olwoŋowa pi tito lok me kwena maber bot jo kunnu. Wacako kwaŋo nam ki i Teroa, wakwaŋ atir nio wa i Camotrake, ci orwone wao i Neapoli. Ki kunnu wacito i Pilipi gaŋ pa jo Roma ma en aye gaŋ madit makato ma i lobo Makedonia. Ci wabedo i gaŋ meno pi kare manok. I ceŋ cabit wacito woko i ŋe doggaŋ i kabedo mo ma i dog kulu, ma watamo ni gwok nyo ka lega tye kunnu; ci wabedo piny ka lok mon ma gugurre. Ŋat acel ma obedo ka winyo lokwa en aye dako ma nyiŋe Ludia ma oa ki i gaŋ ma gilwoŋo Tuatira. En lacat boŋo ma lamar lamar, dano ma woro Lubaŋa. Rwot oyabo tamme omiyo oketo cwinye ka winyo lok ma Paulo waco. Ka doŋ gibatija en kacel ki jo ma i ode, en obako doge botwa kun waco ni, “Ka wuneno ni an lagen bot Rwot, ci wubin wubed i oda,” nio ka en oridowa, wadoko welone. Ka ceŋ wacito i kabedo me lega, ci warwatte ki nyako mo ma aŋeca ma tyeto tyet ki jok ma bedo bote, kun kelo lwak lim mapol bot luditone pi lok ma en tyeto. En obedo ka lubo korwa, kun daŋŋe ni, “Jo man gin aye lutic pa Lubaŋa Mamalo Twal ma gituco botwu yo me larre.” En timo kit meno nino ducu. Ento kiniga omako Paulo, ci olokke owaco ki jok ni, “Aciko in i nyiŋ Yecu Kricito, a woko ki i kome.” Ci oa woko i kome i cawa meno cut. Ento ka luditone guneno ni gen me noŋo lim doŋ oa woko, gumako Paulo ki Cira guywayogi guterogi wa i cuk i nyim luloc, ka guketogi i nyim luŋolkop, ci guwaco ni, “Jo man gin Lujudaya, ci gurubo gaŋwa woko. Gin gipwonyo kit mogo ma cikwa pe ye ni wagam nyo walubgi, pien wan Luroma.” Ci lwak guribbe ka lweny i komgi; luŋolkop bene guyeco ginarukagi ki i komgi ci guciko ni gipwodgi ki odoo. Ka gityeko pwodogi matek, ci gucwalogi i mabuc, kun giciko lalo mabuc ni ogwokgi maber. Ka doŋ owinyo cik ma kit meno, oketogi i kicika ma i tyelo, oroyo okol i tyengi. Ento i cwiny dyewor Paulo ki Cira gubedo ka lega ki ka wero wer bot Lubaŋa ma lumabuc bene giwinyogi. Ci lobo ocako yeŋŋe matek, guti me ot mabuc oyeŋŋe, ci doggola ducu guyabbe woko cut, ki nyor pa ŋat acel acel ogony woko. Ka lalo mabuc oco ci onoŋo ni dog ot mabuc oyabbe woko tye twolo, owoto pala lucwanne kun mito nekke kekene, pien otamo ni lumabuc gulwi woko. Ento Paulo odaŋŋe ki dwane matek ni, “Pe itimme kekeni marac, wan ducu watye kany.” Lalo ot mabuc ociko ni gikel mac, ci odonyo i tyelo oyot kun kome myel ki lworo, oryebbe piny i nyim Paulo ki Cira. Ka en okelogi woko ci owaccigi ni, “Luditona, myero atim aŋo wek alarre?” Guwaco bote ni, “Ye Rwot Yecu, ci ibilarre, in ki jo ma i odi ducu.” Ci guloko lok pa Rwot bote ki bot jo ducu ma i ode. I dyewor i cawa meno kikome oterogi olwoko waŋ retgi, ci gibatija en cut ki jo me ode ducu. Ka oterogi i ode, omiyogi cam; cwinye obedo yom ki jo me ode ducu, pien doŋ otyeko ye Lubaŋa. Ka piny oru, ci luŋolkop gucwalo askari ka waco ni, “Wek jo meno doŋ guciti.” Ci lalo mabuc otito ki Paulo ni, “Luŋolkop gucwalo lok ni myero wuciti. Wukat woko kombeddi wuwot ki kuc.” Ento Paulo owaco botgi ni, “Gityeko goyowa i nyim lwak, ma peya giŋolliwa kop, ma wan Luroma, doŋ gitweyowa i i mabuc, ka kombeddi dok gigonyowa muŋ? Pe; wek gin aye gubin gugonywa pigi kengi.” Ci askari gutito lok man bot luŋolkop, ci gubedo ki lworo ka guwinyo ni gin Luroma. Ka gubino gubako doggi botgi, ka gukwanyogi woko, gucikogi ni gua woko ki i gaŋ meno. Ka gukato woko ki i mabuc, gucito i ot pa Ludia; ka doŋ gutyeko neno utmego, ci gucuko cwinygi, ka gucito. Ka doŋ gutyeko wok ki i Ampipoli ki Apolonia, ci gubino i Tecalonika, ka ma kacokke pa Lujudaya tye iye. Paulo odonyo iye macalo kite tye, ori kunnu pi cabit adek kun obedo ka laro lok kwedgi i kom lok ma i ginacoya. Obedo ka tito lok kikore ma moko ni Kricito myero onen can ki cer woko ki i kin jo muto, kun waco ni, “Yecu man ma atito botwu-ni en aye Kricito ma Lubaŋa oyero.” Ci jo mukene i kingi lok ocobo cwinygi, guribbe i kom Paulo ki Cira, ki lwak jo Grik mapol ma giworo Lubaŋa, kacel ki mon madito madwoŋ. Ento Lujudaya nyeko omakogi, gukelo jo ma tubo kin dano atata, ci gucoko dano gukelo woo matek i gaŋ gurumo ot pa Yacon kun giyenyo Paulo ki Cira pi kelogi woko bot lwak ki tek. Ka nojogi oloyogi, ci guywayo Yacon ki utmego mogo guterogi i nyim luloc me gaŋ kun gidaŋŋe ni, “Jo man gitito gin mapat, gitye ka loko tam pa dano me lobo woko, gubino kwede wa kany. Yacon aye ojologi; gin gitye ka balo cik pa Cecar ma giwaco ni tye kabaka mukene, en Yecu.” Ka lwak dano ki luloc me gaŋ guwinyo lok man, ci gucako tugge. Luloc gumiyo Yacon ki utmego mukene guculo lim me lajeŋ, ka lacen guwekogi gucito. Utmego gucwalo Paulo ki Cira gucito woko i dyewor meno wa i Berea cut; ka guo ci gucito i kacokke pa Lujudaya. Lujudaya ma kunnu onoŋo yam gin jo ma kitgi beco makato jo ma i Tecalonika. Gujolo lok ma gitito botgi ki ciŋgi aryo, kun giŋiyo ginacoya ma yam gicoyo nino ducu pi neno ka lok ducu tye kit meno ada. Mumiyo lwak jo mapol guye Yecu, ki lwak mon madito ma Lugrik ki co mapol. Ento ka Lujudaya ma i Tecalonika guwinyo ni Paulo ki Cira gitye ka tuco lok pa Lubaŋa i Berea bene, gin bene gubino kunnu, gurubo dano dok gutugo lwak. Utmego gucwalo Paulo woko oyot i yo ma cito i dog nam, ento Cira ki Temceo gudoŋ. Jo ma gulwoko Paulo-ni gutere wa i Atene; ka ocikogi pi Cira ki Temceo ni gucit bote oyotoyot, ka gua, gudok. I kare ma Paulo tye ka kurogi i Atene, ka oneno gaŋ meno opoŋ ki cal jogi, ci olyeto cwinye mada. Obedo ka laro lok ki Lujudaya ki jo ma giworo Lubaŋa i kacokkegi, ki i cuk bene ki jo ma en rwatte kwedgi jwijwi. Luryeko mogo me dul pa Luepikurea ki Lucitoiki bene gurwatte kwede. Jo mukene guwacci, “Lalok atata-ni temo tito lok i kom gin aŋo?” Jo mukene guwacci, “En nen calo tito lok i kom jogi mogo ma welo,” pien noŋo en tye ka tito lok me kwena maber i kom Yecu ki i kom cer i kin jo muto. Ci gimake gitere i nyim cokke ma yam rwatte i wi got ma gilwoŋo Areopago, kun giwaco ni, “Wamito ŋeyo kit pwony manyen ma ikelo-ni, pien in dok ikelo lok ma welo twatwal i itwa, ci wamito niaŋ tere.” I kare meno lwak jo Atene ducu ki welo ma gibedo kunnu gityeko karegi ducu ka tito lok ki winyo lok i kom gin manyen. Ka Paulo ocuŋ i dye cokke me Areopago, ci owaco ni, “Wun jo Atene, aniaŋ ni i kit ducu wun ludini mada, pien i kare ma awoto i dye gaŋ aneno keno tyer mo ma gicoyo i kome ni, ‘Pa lubaŋa ma pe ŋene.’ Gin ma wuworo ma pe wuŋeyo, man aye atuco botwu-ni. Lubaŋa ma yam ocweyo lobo ki jami ducu ma tye iye-ni, en aye Rwot me polo ki lobo, pe bedo i ot ma dano gutiyo ki ciŋgi, pe bene mito ni dano guwore ki gin ma gutiyo atiya ki ciŋgi, macalo gin mo orem bote, pien en kikome aye miyo kwo ki dano ducu wa ki yweyo ki jami ducu. En yam ocweyo rok ducu nia ki i kom dano acel wek gubed i wi lobo ma onoŋo en omoko kare kikome ma myero gubed iye, ki waŋ apokki lobo me kabedogi, wek gubed ka yenyo Lubaŋa, wek ka giboŋo aboŋa gwok nyo gugud kome ci ginoŋe, pien en pe tye cen ka mabor ki bot ŋat acel acel i kinwa. ‘Wakwo i en, wawoto i en, wabedo i en’, macalo ŋat mo ocoyo. Ŋat acel i kin lucocwu bene ocoyo ni, ‘Wan bene wan litinone.’ Kit meno ka wan litino pa Lubaŋa, pe myero watamu ni Lubaŋa cal ki cal mo me jabu nyo ryal nyo got ma gipayo ki diro ki tam pa dano. I kare me kwiya piny Lubaŋa yam pe oyaro pire, ento i kare man en doŋ ociko ni dano ducu myero guŋut i kom balgi, pien en doŋ otyeko moko nino ma en biŋolo iye kop i kom dano ducu ma i lobo i kit ma atir, kun doŋ oyero dano ma myero oŋol kop ma ka-kare, omiyo bene lanen ma nyuto ni man bitimme pi cero dano meno ki i kin jo muto.” Ka guwinyo Paulo ka loko lok i kom cer ki i kin jo muto, jo mogo gucako caye ki jo mukene guwacci, “Wamito imed tito lok man botwa kare mukene.” Ka Paulo okato woko ki botgi, owoto gire. Ento jo mukene gumako i kome, guye lokke. I kingi onoŋo tye Dionecio ma Laareopago, ki dako mo ma nyiŋe Damali, ki jo mukene bene. Ka meno otum, Paulo oa ki i Atene, ocito Korint. Kunnu en onoŋo Lajudaya mo ma nyiŋe Akwila ma ginywalo i Ponto, ma pud obino kenyo abina nia ki i Itali kacel ki dakone Pricikila, pien laloc madit Kalaudio onoŋo ociko ni Lujudaya ducu myero gua woko ki i Roma. Paulo ocito ka limogi ci obedo botgi, pien gin ducu gitiyo kit tic acel, ci gucako tic, pien gin lutim kema. En obedo ka laro lok i kacokke i nino me cabit ducu, kun temo loyo tam pa Lujudaya ki jo Grik. Ka Cira ki Temceo gua ki i Makedonia, gunoŋo Paulo ogeto ka tito lok kun tito ki Lujudaya ni Kricito ma Lubaŋa oyero-ni aye Yecu. Ka gilulo i kome, giyete, ka oteŋo ginarukane, owaco botgi ni, “Remowu obed i wiwu! An iya gira leŋ. Cakke tin abicito bot Lurok.” Ka oa ki kunnu ci ocito i ot pa laco mo ma nyiŋe Titio Yucito, lawor Lubaŋa ma ode tye cok ki kacokke pa Lujudaya. Kuricipo, ladit me kacokke, oye Rwot ki jo ma i ode ducu; ki lwak jo mapol ma i Korint ma giwinyo lok pa Paulo guye bene, ci gibatijagi. Rwot onen bot Paulo i waŋ lek dyewor owacce ni, “Pe ibed i ki lworo, ento bed ka lok, pe iliŋ; pien an atye kwedi, pe tye ŋat mo ma bitubbe i komi ki timi marac, pien atye ki lwak jo mapol i gaŋ man.” Ci obedo kunnu mwaka acel ki dwe abicel kun pwonyo lok pa Lubaŋa i kingi. Ento i kare ma Galio aye obedo laloyo me lobo Akaya, ci Lujudaya gucokke gutube i kom Paulo, ŋukele wa i nyim kom me ŋolo kop, kun giwaco ni, “Laco man tye ka bito dano ni guwor Lubaŋa i yo ma pe lubo cik.” Ento i kare ma Paulo mito ŋamo doge ka lok, Galio owaco ki Lujudaya ni, “Ka onoŋo lok man ocuŋ i kom tim mo marac, nyo kom bal mo marac, onoŋo myero awiny kokowu, wun Lujudaya. Ento kit macalo obedo pyem i kom lok mogo nyo nyiŋ mogo ma dok i kom cik ma mewu-ni, wun aye wunen giwu kite; an akwero bedo laŋolkop i lok macalo meno.” Ci oryemogi woko ki i nyim kom me ŋolo kop. Ka gin ducu gumako Cocitene, ladit me kacokke, ci gigoye i nyim kom me ŋolo kop. Ento Galio pe oketo iye cwinye. Ka man otum, ci Paulo dok odikke kunnu, ka oweko utmego ci okwaŋo nam ocito i lobo Ciria kun Pricikila ki Akwila gunywako kwede yo. Ci olyelo wiye i Cenkeria, pien onoŋo okwoŋo kwoŋ. Ka gucito i Epeco, ci oweko Pricikila ki Akwila kunnu; ento en ocito i kacokke, olaro lok ki Lujudaya. Ka gulego ni koŋ obed kunnu kare malac, ci okwero woko. Ento i kare ma en cikogi owacci, “Abidwogo botwu ka Lubaŋa biye,” ci ocako kwaŋ nia ki i Epeco. Ka doŋ otyeko o i Cecaria, ci ocito i Jerucalem ka moto jo muye Kricito, ka doŋ olor piny i Antiokia. Odikke koŋ kunnu, ka lacen dok oa olimo kabedo ducu ma i lobo Galatia ki Perugia kun jiŋo cwiny lupwonnye ducu. Lajudaya mo ma nyiŋe Apolo ma ginywalo i Alegijanderia yam obino i Epeco. En laco ma lalok twatwal, tye ki ŋec matut i ginacoya. Onoŋo yam gibedo ka pwonye yo pa Rwot, ma lok okur i cwinye, kun pwonyo lok i kom Yecu atir mupye, kun kono ŋeyo lok me batija pa Jon keken. En yam loko ki tekcwiny laboŋo lworo i kacokke, ento ka Pricikila ki Akwila guwinyo lokke, ci gutere gumiye pwony matut i kom Lubaŋa ma niaŋe makato. I kare ma en mito kwaŋ cito i Akaya, utmego gujiŋo cwinye, ka gucoyo waraga bot lupwonnye wek gujole,. Ka ceŋ oo kunnu, ci okonyo jo ma yam gulimo gum me niye mada, pien oloyo tam pa Lujudaya atyer i nyim lwak kun nyuto ki i ginacoya ni Kricito ma Lubaŋa oyero aye Yecu. Ka Apolo tye i Korint, Paulo orabo piny ki malo ka obino i Epeco. Onoŋo lupwonnye mogo kunnu, ci openyogi ni, “Wun yam wulimo Cwiny Maleŋ i kare ma wuye Kricito?” Gugamo ni, “Pe, wan peya wawinyo ni Cwiny Maleŋ tye.” Owaco botgi ni, “Con gibatijawu ki kit batija aŋo?” Gugamo ni, “Ki batija pa Jon.” Paulo ogamo ni, “Jon yam batija dano pi ŋut i kom balgi, kun tito bot dano ni guye ŋat ma bibino lubo kore-ni, meno en Yecu.” Ka guwinyo lok man, ci gibatijagi i nyiŋ Rwot Yecu. Ka Paulo oketo ciŋe i komgi, ci Cwiny Maleŋ obino i komgi; gucako dumo leb mapatpat kun gitito lok pa Lubaŋa. Gin ducu welgi romo ka apar wiye aryo. Paulo odonyo i kacokke kun loko ki tekcwiny laboŋo lworo pi dwe adek, kun laro lok ki bolo lok i kom ker pa Lubaŋa. Ento jo mogo ma pe guye ma gudiŋ gucako loko lok marac i kom Yo meno i nyim lwak, ci Paulo opokke woko kwedgi, kun woto kacel ki lupwonynye, obedo ka laro lok nino ducu i cukul pa Tirano. Man omedde otyeko mwaka aryo, mumiyo jo ma gibedo i Acia guwinyo lok pa Rwot, Lujudaya ki Lugrik ducu. Ci Lubaŋa otiyo taŋo madoŋo ki i ciŋ Paulo. Wa kitambarane nyo boŋŋine me tic yam gikwanyo woko ki bote ka gitero bot lutwo, ci two caŋ woko, ki cen bene a woko ki i kom dano. Lujudaya mogo ma lumalgaŋ, ma gin luryem cen, gucako tuco nyiŋ Rwot Yecu i nyim jo ma cen omakogi kun giwaco ni, “Akwoŋowu ki nyiŋ Yecu ma Paulo tito pire-ni.” Yam tye Lujudaya mo ajwaka madit ma nyiŋe Cekewa, ma awobene abiro gitimo kit meno. Ento cen marac odok iye botgi ni, “Yecu aŋeyo, ki Paulo bene aŋeyo; ento wun aŋagi?” Ci laco ma cen marac omako-ni okato i komgi ci obwoyogi woko, oryemogi, ci gumwomme woko ki i ot kun gitye munero ki ret omakogi bene. Lok man oŋene bot jo ma gibedo i Epeco ducu, Lujudaya ki Lugrik bene; lworo omakogi ducu, ci giworo nyiŋ Rwot Yecu. Ki lwak jo ma koni doŋ guye Yecu gubino kun gituco ci giyeko te tyetgi ducu. Ki jo ma yam lujogi gukelo buk tyetgi guguro kacel guwaŋogi woko i nyim lwak ducu. Ka gikwano welgi ci ginoŋo romo lim ryal alip pyerabic kulu. Kit meno lok pa Rwot odoŋo omedde ki twero madwoŋ. Lucen ka meno otum ci Paulo otamo ki i cwinye me cito i Makedonia ki i Akaya ka ekat kwede i Jerucalem, kun waco ni, “Myero acit anen wa Roma bene.” Ci ocwalo lukonnye aryo i Makedonia, Temceo ki Eracto; en kikome odoŋ i Acia pi kare manok. I kare meno atubatuba magwa ocakke i kom Yo pa Kricito. Laco mo ma nyiŋe Demetrio latet ryal, yam teto ryal timo kwede cal jok ma dako ma nyiŋe Atemi ci kelo kwede lim madwoŋ bot ludiro tic. En ocokogi ogurogi kacel ki jo mukene ma gitiyo kit tic acel-lu, ci owaco botgi ni, “Lutuwa, wun wuŋeyo ni lonyowa a i tic man. Doŋ wuneno dok wuwinyo bene ni Paulo man tye ka bito dano, pe i Epeco keken ento oromo i Acia ducu. Tye ka loko jo mapol me lubo kore, kun titogi ni lubaŋa-gu ma gitiyo ki ciŋ pe gin lubaŋa. Doŋ gin marac onen, pe i kom ticwa man keken ma gilanyo pire, ento wa ot me woro lubaŋawa madit, Atemi, bene pire doŋ biboto woko, ki deyone bene gibikwanyo woko, en ma dano i lobo Acia ki me lobo ducu giworo-ni.” Ka guwinyo lok man ci gutwarre malo ki kiniga gucako wo matek ni, “Atemi pa jo Epeco dit mada.” Kit meno gaŋ iye orubbe woko; gin ducu guriŋo i ka poro tuko kun giywayo Gayo ki Aristako, Lumakedonia ma yam guwoto kacel ki Paulo. Paulo onoŋo mito cito ka donyo i dye lwak, ento lupwonnye pe guye. Ludito me lobo Acia mogo bene ma gin lureme gucwalo lok bote ni pe otem donyo i ka poro tuko. Jo mogo gidaŋŋe mapat ki jo mogo giloko pat, pien lwak mucokke ducu doŋ gukeco woko, pol pa dano bene pe giŋeyo lok ma ogurogi kacel. Jo mogo ma i lwak gutamo ni lokke otiko Alegijanda, pien Lujudaya gukete i nyim cokke, ci Alegijanda ojukogi ki ciŋe kun mito pido lok i nyim lwak. Ento ka guniaŋ ni en Lujudaya, gucako wo awoya ci gudaŋŋe ki dwan acel pi cawa aryo kulu ni, “Atemi pa Jo Epeco dit mada.” Lacen ladit ma en aye karan me gaŋ ojuko dano ci owaco botgi ni, “Wun jo Epeco, aŋa ma pe ŋeyo ni gaŋ Epeco aye lagwok ot woro Atemi madit, ki got maleŋ ma yam opoto ki i polo-ni? Lok man pyem mo pe iye, wun doŋ myero wubed mot, pe wutim gin mo ki kurokuro. Wun wukelo jo man ma pe guyako gin mo ki i ot jok, pe bene guyeto lubaŋawa ma dako-ni. Ka ce Demetrio ki lutet gitye ki lok adot i kom ŋat mo, lukiko tye, luloyo bene gitye; wek gupidde ki kunnu. Ento ka tye lok mukene ma wumito, meno gibityekone i cokke me nino ducu macalo cik tye. Pien watwero poto i can pi gin ma otimme tin-ni kun giwacci watimo bwami, pien pe tye tyen lok mo ma watwero nyuto pi kit woo ma otimme tin.” Ka otyeko loko lok man, ci oketo cokke woko. Ka doŋ atubatuba ogik, Paulo olwoŋo lupwonnye bote, ka otyeko cuko cwinygi, ci ocikogi, ocito woko i Makedonia. Owok i dye lobo meno kun cuko cwiny dano ki lok mapol, ka oo i lobo pa jo Grik. Otyeko dwe adek kunnu, ento ka oyubbe me kwaŋo nam pi cito i Ciria, Lujudaya gupiro lok i kome, ci Paulo omoko ni doŋ ebidok ewok ki i Makedonia. Copater wod pa Piro olwoke, kacel ki Lutecalonika Aristako ki Cekundo, ki Gayo Laderube, ki Temceo, kacel ki jo Acia, Tukiko ki Tropimo. Gin gucito anyim, gukurowa i Teroa. Wan wakwaŋ waa ki i Pilipi ma nino madito me Mugati ma Tobi Pe Iye doŋ okato, ka wakwaŋ pi nino abic ci wao botgi i Teroa, watyeko kunnu nino abiro. I kom nino mukwoŋo me cabit, ka wacokke ka baro mugati, Paulo obedo ka lok kwedgi pien onoŋo mito wot woko odiko; ci oloko kare malac nio wa i cwiny dyewor. Mac tara mapol obedo ka lyel i kicika ka ma wacokke iye-ni. Onoŋo tye awobi mo ma nyiŋe Yutiko ma obedo i waŋ dirica. I kare ma Paulo ori ka lok, ka nino onuro awobi-nu mada, ci opoto piny nia ki i ot me adekke, gitiŋe ma oto woko. Ka Paulo olor piny, ci oryebbe i kome okwake, owaco ni, “Pe cwinywu opoti, kwone pud tye.” Ka Paulo oito odok malo, ka obaro i mugati ci gucamo. Obedo ka lok kwedgi nio kwarpiny, ka opokke kwedgi. Gucito ki awobi meno makwo, cwinygi obedo yom matek. Wan watelo yo wadonyo i mel, ci wakwaŋ wao i Acco ma wageno ni Paulo bidonyo i mel kunnu, pien onoŋo en ociko kumeno kun mito ni ewok ki i wi tura. Ka oromo kwedwa i Acco, ci wagamo en i mel, wacito kwede wa i Mitulene. Ka wakwaŋ waa ki kunnu ci orwone wakemo Kioc; ka orwone mukene wao wa Camoc, i ŋe nino meno wao i Mileto. Pien Paulo onoŋo omoko ni ebikwaŋ ewok kun ekato Epeco akata, wek pe etyek kare i Acia, pien onoŋo nene rune wek ebed i Jerucalem ka twerre i nino me Pentekote. I kare ma en tye i Mileto ci ocwalo kwena i Epeco pi lwoŋo ludoŋo pa lwak muye Kricito gubin bote. Ka guo bote, ci owaco botgi ni, “Wun kikomwu wuŋeyo kit ma yam abedo kwede i kinwu wun ducu, nia i kare ma tyena okwoŋo nyono lobo Acia, kun atiyo ki Rwot ki mwolo ducu, ki pig waŋ, ki ayela mupoto i koma pi Lujudaya ma gupiro lok i koma. An yam pe aŋuny adok ki ŋeya aweko tuco lok mo botwu ma twero konyowu, kun apwonyowu i dye lwak ki i ot ki ot. Atito atyer bot Lujudaya ki bot jo Grik bene ni myero guŋut i kom balgi, gudwog cen bot Lubaŋa, ci guye Rwotwa Yecu Kricito. Kombeddi an doŋ abecito i Jerucalem, ma an lamabuc pa Cwiny Maleŋ, kun pe aŋeyo gin ma bipoto i koma kunnu. Kono Cwiny Maleŋ aye bedo ka titta ki i gaŋ ducu ni twec ki can madwoŋ aye tye ka kura. Ento kwona doŋ pe obedo gin me wel ki tuŋ bota, pe pire doŋ dit ki bota, ento myero an doŋ acob ŋwecca keken ki dog tic ma alimo ki bot Rwotwa Yecu, me tito lok me kwena maber me kica pa Lubaŋa. Kombeddi doŋ aŋeyo ni wun ducu ma yam abedo ka wot i kinwu kun apwonyowu ki lok i kom ker pa Lubaŋa pe doŋ wubineno waŋa. Mumiyo atito botwu tin atyer ni, ka kwo pa ŋat mo i kinwu orwenyo, aliine pe tye i wiya, pien pe aŋuny adok ki ŋeya aweko tuco botwu gin ducu ma Lubaŋa oyubo. Wugwokke kekenwu ki dwol romiwu ducu ma Cwiny Maleŋ oketowu me bedo lugwokone, wek wukwa lwak pa Lubaŋa ma en owilogi ki remo me wel madwoŋ pa Wode. Aŋeyo ni ka apokke woko kwedwu, orudi mager bidonyo i kinwu ci pe gibitimo kica bot romi. Dok i kin wun kikomwu bene bia iye jo ma gibiloko lok ma ŋako dano ci gibwolo lupwonnye miyo gilubo korgi. Mumiyo acikowu ni wugwokke, kun wupo ni yam abedo ka pwonyo ŋat acel acel i kinwu ma pe aliŋ pi mwaka adek kulu dyeceŋ ki dyewor kun akok ki pig waŋa. Kombeddi doŋ amiyowu, i ciŋ Lubaŋa ki i lokke me kica ma twero, miyo wudoŋo wubedo matek, miyo wunoŋo dulwu ki i kom gin ma Lubaŋa oyubbe me miyo bot jo ducu ma en olonyogi gudoko maleŋ. An yam cwinya pe opukke i kom lim pa ŋat mo kadi ki ginarukane. Wuŋeyo kekenwu ni anoŋo gin ducu ma mitte pira ki pi jo ma atye kwedgi ki tic ma atiyo ki ciŋa en-ni. I kare ducu atyeko nyuto botwu ni pi tiyo tic matek macalo meno myero wakony lugoro kun wapo lok pa Rwotwa Yecu ma yam owaco ni, “Miyo mot kelo gum makato gamo agama.” Ka otyeko loko lok meno, ci orumo coŋe piny olego kwedgi ducu. Gin ducu gukok kun gikwako ŋut Paulo ki mot me mar. Gin mucwero cwinygi twatwal makato ducu obedo lok ma en owaco botgi ni pe dok gibineno waŋe. Ci gulwoke wa i mel. Ka doŋ opokke kwedgi, wacako kwaŋ wakemo yo atir nio wa i Koc. Orwone wao i Rodec, ka dok waa kunnu wao i Patara. Ka wanoŋo mel ki kunnu ma cito Poiniki, ci wadonyo iye, wacako wot. Ka doŋ wao ka ma waneno Caiprac, ci warabo ŋete kun waweko odoŋ tuŋ lacam, wacito wa i lobo Ciria ka wakato woko i wi tura i Turo, pien onoŋo myero gikwany yec woko ki i mel ki kunnu. Wayenyo lupwonnye ci wari kunnu nino abiro. Cwiny Maleŋ omiyo gujuko Paulo ni pe ocit i Jerucalem. Ka doŋ watyeko karewa, wapokke kwedgi ci wamedde ki wotwa. Gin ducu gulwokowa, wa mon ki litino, gukelowa wa i ŋe gaŋ; ka warumo coŋwa i dog nam, walego, wacikke kwedgi. Lacen wan wadonyo i mel, ci gin gudok paco. Ka watyeko kwaŋ nia ki i Turo, ci wao i Potolemai; ka wamoto utmego, ci wabedo kwedgi nino acel. Orwone wapokke kwedgi, wacito i Cecaria, ci wadonyo i ot pa Pilipo latuc lok me kwena maber, ma yam en ŋat acel i kom jo abiro ca, wabedo bote. Yam en tye ki anyirane aŋwen ma pe ginyomogi, ma yam gitito lok pa Lubaŋa. Ka wadikke kunnu pi nino mapolpol, lanebi mo ma nyiŋe Agabo obino kunnu nia ki i Judaya. Ka obino botwa okwanyo del pyer Paulo otweyo ki tyene ki ciŋe kene, ci owaco ni, “Cwiny Maleŋ owaco kit man ni, Lujudaya ma i Jerucalem gibitweyo won del pyer man kit man, ci gibimiye i ciŋ Lurok.” Ka wawinyo lok man, wan ki jo ma kunnu walego Paulo ni pe ocit i Jerucalem. Paulo odok iye ni, “Wun wumito gin aŋo, ma wukok wubalo ki cwinya-ni? An pe ayubbe pi mabuc keken, ento wa pi to i Jerucalem pi nyiŋ Rwot Yecu.” Ka doŋ pe oye, ci waweko kun wawaco ni, “Gin ma Rwot mito myero otimme.” Ka kare meno otum, wayubbe ci wacito i Jerucalem. Wawoto ki lua pwonnye mogo ma guwoto kwedwa nia ki i Cecaria ci guterowa i ot pa Munacon dano me Caiprac ma yam odoko lapwonnye wa con, ka ma myero wagony iye. Ka wao i Jerucalem, utmego gujolowa ki yomcwiny. Orwone Paulo ocito kwedwa bot Yakobo ma onoŋo ludoŋo ducu gitye. Ka doŋ omotogi, Paulo otito kikore gin mapol ma Lubaŋa otiyo i kin Lurok pi ticce. Ka guwinyo, gupako Lubaŋa. Ci guwaco bote ni, “Koŋ inen, ominwa, tye Lujudaya alip adi ma gitye i kin jo ma doŋ guye Kricito. Gin ducu giryek twatwal i kom cik pa Moses. Gin gubedo ka winyo lok i komi ni ipwonyo Lujudaya ducu ma gitye i kin Lurok ni gubwot cik pa Moses woko, dok bene ni itito lok botgi kiloŋ ni pe gulir litinogi, pe gulub kitwa. Gin aŋo doŋ ma myero watim? Pien gin gibiwinyo ni ibino. Mumiyo doŋ itim gin ma waciki. Watye ki jo aŋwen kany ma yam gukwoŋo kwoŋ. Ter jo meno ci ilonnye kwedgi kacel, ci icul lim ma mitte pigi, wek gulyel wigi. Kit meno dano ducu gibiŋeyo ni lok ma gibedo ka loko i komi pe kakare, ento in bene itye ka gwoko cik. Ento ki tuŋ bot Lurok ma guye Rwot watyeko cwalo waraga botgi ki lok ma waŋolo ni, pe gucam gin ma gityero bot jogi, pe gucam remo, ki riŋo lee ma gideyo adeya, gukwer bene tim tarwaŋ.” Paulo otero jo meno ci orone olonnye kacel kwedgi ka gucito i ot pa Lubaŋa pi nyuto kare ma nino me lonynye megi doŋ bitum, wek gutyer tyer pi gin ki acel acel. Ka onoŋo nino abiro me lonnyegi doŋ cok tum, Lujudaya ma gua ki i Acia guneno Paulo i ot pa Lubaŋa, ci gutugo lwak ducu, gumake, kun gidaŋŋe matek ni, “Wun jo Icrael, wumi kony. Man aye laco ma tye ka pwonyo dano i kabedo ducu marac, kun kwero rokwa ki cikwa wa ki kabedo man bene. Ki makato ducu en okelo Lugrik bene i ot pa Lubaŋa, opyedo kabedo man maleŋ woko.” Pien onoŋo guneno Tropimo ma Laepeco ma gitye kacel kwede i gaŋ, ci gutamo ni Paulo okele i ot pa Lubaŋa. Ci gaŋ ducu otwarre woko, ka dano guriŋo kacel. Gumako Paulo, guywaye woko ki i ot pa Lubaŋa, ci giloro doggola woko cut. Gimito neke woko, ento lok oo bot kapten me mony ni Jerucalem doŋ otugge woko. En olaro kunnu ki ŋwec ki lumony mapol kacel ki luditogi ma loyo dano miya miya, gujuko lugo Paulo. Ka lwak guneno kapten ki lumony, guweko goyo Paulo. Kapten ocito ka make, ka ociko ni gitweye ki nyor aryo. Ka openyo ni en aŋa, dok obalo gin aŋo? Jo mogo ma i kin lwak gudaŋŋe ni pi man, ki mukene ni pi man. Ka kapten doŋ pe oniaŋ i kom lok kikome pi woo ma obedo madwoŋ, ociko ni gitere i gogo. Ka guo i rwom me ito malo, lumony gutiŋo Paulo atiŋa pi gero pa lwak, pien lwak dano ma otubbe gilubo korgi kun gidaŋŋe ni, “Wuneke woko!” I kare ma onoŋo gidonyo ki Paulo i gogo, Paulo owaco bot kapten ni, “Ber koŋ alok boti lok mo?” Ci ogamo ni, “In iŋeyo leb Grik? Pe in aye Laejipt ma yam otubo dano ci otero lunek alip aŋwen woko i tim?” Paulo ogamo ni, “An Lajudaya, ginywala i Taruco ma i Cilicia, gaŋ ma ŋene mada. Alegi miya alok ki lwak.” Ka oye, Paulo ocuŋ i rwom ci ojuko lwak ki ciŋe. Ka piny oliŋ litik, ocako lok kwedgi i leb Ibru kun waco ni, “Utmego ki wego, wuwiny pido ma akelo i nyimwu.” Ka guwinyo en ka loko kwedgi i leb Ibru, gumedde ki liŋ mot. En owacci, “An Lajudaya, ginywala i Taruco i Cilicia, ento adoŋo i gaŋ man, lapwonynya obedo Gamaliel. Gipwonya ki cik pa kwarowa kun gimiyo agwokke twatwal; abedo ki nyeko pi Lubaŋa macalo wun bene wutye kwede tin. Abedo ka libo jo me Yo ma, anekogi bene. Atweyogi, aterogi i mabuc, co wa ki mon; ajwaka madit pa Lubaŋa ki kacokke pa ludoŋo gin aye cadenna i kom lok man. Alimo waraga ki botgi pi utmego, ci acako wot i Damaciko ka mako jo ma gitye kunnu ki tweyogi me akela kany i Jerucalem wek giket can i komgi. “I kare ma atye ka wot ma doŋ anyiko cok ki Damaciko, cwiny dyeceŋ, ci dero madit oa ki i polo, oryeny ocaro koma. Ka apoto piny, awinyo dwan ma wacca ni, ‘Caulo, Caulo, piŋo itye ka yela?’ An agamo ni, ‘In aŋa, Rwot?’ Ci owacca ni, ‘An aye Yecu ma itye ka yela-ni.’ Jo ma guwoto kweda guneno dero, ento pe guwinyo dwan ŋat ma tye ka lok kweda-ni. Ci agamo ni, ‘Atim gin aŋo, Rwot?’ Ci Rwot owacca ni, ‘A malo idony i Damaciko, ci gibititti ki kunnu gin ducu ma yam giyubo ni myero iti.’ Ka pe doŋ aneno piny pi dero meno ma ocaro waŋa, ci jo ma gitye kweda gupeya ki ciŋa nio wa i Damaciko. “Ŋat mo ma nyiŋe Anania, dano ma woro Lubaŋa kun lubo cikke ducu, ma Lujudaya ducu ma gitye kunnu giloko nyiŋe maber, obino bota, ci ocuŋ ka ŋeta, owacca ni, ‘Ominwa Caulo, wek waŋi doŋ oyabbe!’ Ci waŋa oyabbe woko i cawa meno cut, ka aneno kome. Ci owacca ni, ‘Lubaŋa pa kwarowa oyero in wek iŋe gin ma en mito, inen Ŋat ma Kite Atir, iwiny bene ka en loko ki doge; pien in ibibedo cadenne bot dano ducu pi gin ma ineno ki ma iwinyo. Man dok pud ikuro aŋo? Doŋ ia malo gibatija in, gilwok balli woko kun ilwoŋo nyiŋe.’ “Ka atyeko dwogo i Jerucalem, ka atye ka lego i ot pa Lubaŋa, awille woko, ci anene. En owacca ni, ‘Rune oyot, ia woko ki i Jerucalem, pien pe gibiye lok me caden ma itito pira.’ Agamo ni, ‘Rwot, gin kikomgi giŋeyo ni i kacokke acel acel abedo ka pwodo dano ma guye in, atweyogi bene i mabuc. Dok i kare ma gineko lacadenni Citefano an onoŋo acuŋ kunnu apwoyo gin ma otimme, agwoko bene boŋo pa jo ma guneke.’ Ci owacca ni, ‘A woko ki kany, pien abicwali ka mabor bot Lurok.’ ” Gubedo ka winyo nio wa i lok man; ento ka doŋ oloko, gucako daŋŋe ki dwan maloŋo ni, “Wutere, wuneke woko! Dano macalo meno pe romo bedo i lobo!” Gubedo ka daŋŋe matek, ma giteŋo boŋŋigi, gidunyo apwa malo. Kapten ociko ni giter Paulo i gogo, ci gipenye kun gipwode ki del wek eniaŋ gin mumiyo gidaŋŋe i kome kit meno. Ento ka doŋ gityeko tweye ki del, Paulo oloko ki ladit ma loyo dano miya ma ocuŋ ka ŋete ni, “Cik ye ni gipwod dano ma Laroma ma peya giŋolo kop oloye bo?” Ka ladit meno owinyo, ci ocito bot kapten, owacce ni, “Man ibitimo niŋniŋ? Dano man Laroma.” Ci kapten obino bote openye ni, “In Laroma?” Ogamo ni, “Iyo.” Kapten owaco ni, “An awilo dit man ki lwak lim mabup.” Paulo owaco ni, “Ento an ginywala kwede anywala.” Jo ma gubedo ka penye-ni gugwarre gucito woko cut. Kapten bene obedo ki lworo, pien oniaŋ ni Paulo bene Laroma ma onoŋo etweyo-ni. Orwone omito ni eniaŋ tyen lok kikome ma Lujudaya gudoto iye Pauloni, ci ogonye woko, ka ociko ni ajwagi madito ki lumemba me Lukiko ducu myero gugurre kacel, ka otero Paulo oketo i nyimgi. Paulo ociko waŋe i kom lumemba me Lukiko mucokke ci owacci, “Utmego, an abedo ma cwinya leŋ i nyim Lubaŋa nio wa i kare man.” Ka owaco man, Anania, ajwaka madit, ociko jo ma gucuŋ ka ŋet Paulo ni gudoŋ doge. Paulo owaco bote ni, “Lubaŋa bene bidoŋi, in kor ot ma gipuyu matar-ri! In ibedo ka ŋolla kop i te cik, dok iciko ni gidoŋa laboŋo lubo cik?” Jo ma gucuŋ ka ŋete guwacci, “In iyeto ajwaka madit pa Lubaŋa?” Paulo ogamo ni, “Utmego, pe onoŋo aŋeyo ni en ajwaka madit; pien gicoyo ni, ‘Pe ilok marac i kom ladit ma loyo lwak.’ ” Ento ka Paulo oniaŋ ni dul acel i kingi Lucadukayo ki dul mukene i kingi Luparicayo, ci odaŋŋe i lukiko ni, “Utmego, an Laparicayo, wod pa Luparicayo. Lok opoto i koma pi geno cer pa jo muto.” Ka owaco lok man, pyem opoto i kin Luparicayo ki Lucadukayo, nio ka Lukiko iye opokke woko. Pien Lucadukayo giwaco ni cer pa jo muto pe, kadi lamalaika, kadi cwiny mo; ento Luparicayo giye ducu. Ka pyem omedde matek, lupwonycik ma i dul pa Luparicayo gutwarre malo ka guwaco ni, “Pe wanoŋo kop mo ma dano-ni, obalo. Ka cwiny nyo lamalaika aye oloko kwede, ci timo aŋo?” Ka pyem otedde magwa, kapten olworo ni gibiyeco Paulo woko atata, ka ociko lumony ni gulor piny gukwanye woko ki i kingi ki tek, gukete i gogo. Orwone dyewor, Rwot ocuŋ ka ŋet Paulo, owacce ni, “Di cwinyi. Macalo ibedo ka tito lok i koma i Jerucalem, kit meno bene myero ibed cadenna bene wa i Roma.” Ka piny oru, Lujudaya gutudo doggi kacel kun gikwoŋo ni pe gibicamo cam kadi wa mato pii nio ka gineko Paulo. Onoŋo tye jo makato pyeraŋwen ma gukwoŋo kwoŋ kit meno. Ka gucito bot ajwagi madito ki ludoŋo guwacci, “Wan watyeko kwoŋŋe matek ma watweyo ni pe wabibilo cam mo nio ka waneko Paulo. Pi meno wun ki Lukiko wucwal lok kombeddi bot kapten wek okele piny botwu macalo wubicito ka ŋiyo kop i kome kikore. Noŋo wan wayubbe me neke ma peya oo botwu.” Ento okeyo Paulo owinyo kit ma gikiye kwede, ci ocito odonyo i gogo otito ki Paulo. Paulo olwoŋo ladit mony acel lalo dano miya, owacce ni, “Ter awobi man bot kapten. En tye ki lok mo ma mito tito bote.” Otere bot kapten ci owacce ni, “Paulo ma lamabuc-ci olwoŋa ci olega ni akel awobi man boti, pien tye ki lok mo ma mito tito boti.” Kapten omako ciŋe, otere cen i muŋ ka openye ni, “Gin aŋo ma onoŋo imito tito bota?” Ogamo ni, “Lujudaya guyubbe me penyi wek iter Paulo botgi i Lukiko, ma nen calo gimito ni gimed penyo lok i kome wek guniaŋ iye maber. Ento pe iye legagi, pien dano makato pyeraŋwen gubuto ka kiye. Gukwoŋŋe ni pe gibicamo gin mo kadi mato pii nio ka gineko Paulo. Kombeddi doŋ guyubbe, gikuro cik ma a ki boti.” Kapten ocwalo awobi-nu kun cike ni, “Pe dok itit bot ŋat mo ni itito lok man bota.” Ci olwoŋo lumony aryo ma lulo dano miya miya, owaco botgi ni, “Wuyubbe i kin cawa adek me dyewor ki askari miya aryo, ki wegi aguragura pyerabiro, ki wegi toŋ miya aryo wek gucit Cecaria. Dok inoŋ aguragura bene pi Paulo wek oriŋ kwede wek itere ki kuc bot Pelici laloyo.” Ci ocoyo waraga ma kwanne kit man: “An Kalaudio Licia amoto in Laloyo Maber Pelici. Laco man Lujudaya aye gumako, onoŋo doŋ gicok neke woko, ka acito botgi ki lumony alare ki i ciŋgi, pien onoŋo aniaŋ ni en Laroma. Pi mito niaŋ i kom lok ma gidote iye atere i Lukikogi. Ci anoŋo ni gidote ki adot ma dok i kom cikgi, pe onoŋo tye lok mo ma romo ŋolo kop me to iye i kome, kadi mabuc bene. Ka gikwilla lok ni tye dano ma gitye ka kiyo laco man, acwale woko oyot kun aciko ludote-gu gutit adotgi ma i kome i nyimi.” Lumony gutero Paulo kit ma gicikogi kwede. Gukwanye dyewor gutere wa i Antipatric. Orwone gudwogo i gogo, kun giweko wegi aguragura gumedde ki wot kwede. Ka guo Cecaria gumiyo waraga bot laloyo, ka gutero Paulo bene i nyime. I kare ma laloyo doŋ okwano waraga, openye ni en oa i lobo mene. Ka oniaŋ ni oa i lobo Cilicia, ci owacci, “Abiwinyo lokki ka ludoti guo.” Ociko ni gigwoke i ot madit pa Kerode Ka nino abic okato, ajwaka madit Anania obino ki ludoŋo mogo, kacel ki laplida mo ma nyiŋe Tertulo, ci gutero adotgi i nyim laloyo pi doto Paulo. Ka doŋ gilwoŋe, Tertulo ocako adotte kun waco ni, “Laloyo Maber, ladit Pelici, wabedo ki kuc piri nia wa con, dok itamo pi rokwa, ikelo alokaloka mapol ma okonyowa i kit yo ducu ki i kabedo ducu, wan bene wajolo ki yomcwiny madwoŋ, ladit. Ento pe doŋ agal wii, abako doga boti pi kicani iwiny lokwa macegocego-ni. Wanoŋo ni dano man lanek piny, en aye lakel jemo i kin Lujudaya ducu ma i lobo ducu, en latel wi dul pa Lunajaret. En bene otemo pyedo wa ot pa Lubaŋa maditte, ci wamake woko. [Onoŋo wamito ŋolo kop i kome kun walubo cikwa-ni, ento kapten Licia obino omaye woko ki i ciŋwa tektek, ci ociko ni ludote myero guo i nyimi.] Ka in kikomi ipenye, ibiniaŋ ki bote lok ducu ma wadote iye.” Luyudaya bene guribbe i adot meno, kun gimoko ni lok man ducu tye kit meno. Ka laloyo ocime ni oloki, Paulo odok iye ni, “Ladit, aŋeyo ni ibedo ka ŋolo kop i rok man pi mwaka malac, mumiyo apido lokka i nyimi ki yomcwiny. Macalo ni bene itwero noŋo ka ipenyo dano, wel nino ma okato nia i kare ma acito i Jerucalem ka woro Lubaŋa peya okato apar wiye aryo. Pe ginoŋo ni atye ka pyem ki dano mo, nyo tubo lwak, kadi i ot pa Lubaŋa, nyo i kacokke me lega, nyo i dye gaŋ. Dok bene pe gitwero nyuto ni lok ma gikelo i koma kombeddi tye kakare. Ento aye lok man boti ni, aworo Lubaŋa pa kwarowa kun alubo kit Yo ma gin gilwoŋo ni dul. Aye lok ducu ma gicoyo i cik pa Moses ki i buk pa lunebi. Pi niyena i kom Lubaŋa atye ki gen ni dano gibecer woko, jo ma kitgi atir wa ki jo ma kitgi pe atir, ci gin bene gitye ki kit gen acel-lu. Pi meno an bene atemo mada kare ducu wek abed ma cwinya leŋ i nyim Lubaŋa ki i nyim dano. “Ma doŋ abedo cen pi mwaka mapolpol acito i Jerucalem ka tero mot bot jo me rokka pi konyo lucan, ki ka tyero gitum. I kare ma atye ka tiyo man, gunoŋa i ot pa Lubaŋa ma doŋ atyeko lonnye woko i kit ma mitte. Pe abedo ki lwak mo, woo bene obedo pe. Ento Lujudaya mogo ma gua ki i Acia, gin aye kono myero gubed kany i nyimi gukel adotgi, ka gitye ki lok mo i koma. Nyo wek jo man kikomgi gunyut gin marac ma gunoŋo i koma i kare ma acuŋ i nyim Lukiko. Tye lok man keken, i kare ma acuŋ i kingi adaŋŋe ni, ‘Pi lok kom cer pa jo muto aye omiyo wutye ka ŋolo lok i koma tin.’ ” Ento Pelici obedo ki ŋec muromo i kom Yo pa Rwot, ci pe otyeko lok woko cut. Owacci, “Abiŋolo kopwu ka kapten Licia bibino kany.” Ka ociko ladit mony ma loyo dano miya ni myero ogwok Paulo i buc ento obed laboŋo ayela mo, pe gigeŋ lureme ka gimito mine kony. Ka kare okato manok,, Pelici obino ki dakone Drucila ma anyira Judaya. Olwoŋo Paulo, ci obedo ka winyo ka loko i kom niye i kom Kricito Yecu. I kare ma en tye ka lok i kom kit ma atir ki gwokke kekene, ki ŋolo kop ma bibedo i kare me anyim, lworo omako Pelici omiyo owacci, “Koŋ doŋ iciti; ka dok anoŋo kare ci abilwoŋi.” Onoŋo bene en geno ni Paulo bimiye lim, pienno obedo ka lwoŋe jwijwi ci boko lok kwede. Ento ka mwaka aryo okato, Porcio Festo oleyo ka tyen Pelici. Pelici onoŋo mito ni Lujudaya gupwoye, omiyo oweko Paulo i mabuc. I kare ma Festo obino i lobo ma gimiye ni en olo, i ŋe nino adek, oa i Cecaria, ocito i Jerucalem. Ajwagi madito pa Lubaŋa ki ludito me lobo Judaya gutitte pi lok i kom Paulo, ci gubako doggi bote, ni otim ber oye cwale i Jerucalem, kun onoŋo guyubo ni dano gibikiye ci gineke woko i waŋa yo. Ento Festo ogamo ni gitye ka gwoko Paulo i Cecaria, en bene emito cito kunnu i kare macok-ki. Ci owacci, “Pi meno, jo ma i kinwu ma gitye ki twero myero gucit kweda. Ka onoŋo tye roc mo i kom laco meno, wek gudote bota.” Obedo i Jerucalem pi nino aboro nyo apar, ka odok i Cecaria. Orwone obedo i kom me ŋolo kop, ci ociko ni gikel Paulo. Ka doŋ obino, Lujudaya ma gua i Jerucalem gucuŋ ma gurume dyere, gudote ki lwak adot mapol mapek ma pe gitwero moko kite. Paulo opido ni, “Peya abalo lok mo i kom cik pa Lujudaya kadi ot pa Lubaŋa, kadi wa bot laloc madit Cecar.” Ento Festo onoŋo mito ni Lujudaya gupwoye, ci owaco bot Paulo ni, “Imito giteri i Jerucalem wek aŋol kop i komi pi adot magi ki kunnu?” Paulo ogamo ni, “Acuŋ kany i nyim kom me ŋolo kop pa Cecar, en aye ka ma myero giŋolla iye kop. Pe abalo bal mo bot Lujudaya, meno in bene iŋeyo maber. Ka abalo bal ma romma to, lok mo pe, gitwero neka, pe akwero; ento ka adotgi i koma tere pe, ci pe tye ŋat mo ma twero miya i ciŋgi. Abolo pi Cecar.” Ka Festo otyeko poro lok ki lukikone, odok iye ni, “Ibolo pi Cecar; ibicito bot Cecar.” Ka nino okato manok, kabaka Agripa ki Bernike guo i Cecaria ka jolo Festo. Ka gudikke kunnu pi kare malac, Festo oketo adot i kom Paulo i nyim kabaka kun wacci, “Tye laco mo kany ma Pelici oweko i mabuc. I kare ma atye i Jerucalem, ajwagi madito pa Lubaŋa ki ludoŋo pa Lujudaya gutitta lok i kome, ci gulega ni aŋol ni kop oloye. Adok iye botgi ni, pe kitwa wan Luroma me miyo dano mo i ciŋ ludote ma peya gimiye kare me cuŋ i nyimgi waŋ ki waŋ wek opid pidone i kom lok ma gidote iye. Ka gubino kany, ci an bene pe adikke, ento orwone abedo i kom me ŋolo kop ci aciko ni kigele. Ka ludote gua ka lok, pe gukelo adot mo i kome ma mako bal mo marac, macalo yam atamo; ento gubedo ka laro lok kwede ma dok i kom dinigi, ki i kom ŋat mo ma nyiŋe Yecu ma yam oto, ma Paulo waco ni tye makwo. Yeko te lok macalo meno oloya, mumiyo apenye ka en mito cito i Jerucalem wek giciŋol lokke ki kunnu. Ento Paulo okoko apil ni myero gigwoke i mabuc pi kuro ŋolo kop pa laloc madit ma won deyo-ni. Ci aciko ni gigwoke nio ka abicwale bot Cecar.” Agripa owaco bot Festo ni, “An kikoma amito winyo lok pa danonu ka twerre.” Ogamo ni, “Diki ibiwinyo lokke.” Orwone Agripa ki Bernike gucito ki deyo madwoŋ, ci gudonyo i kicika me winyo ŋolo kop kacel ki kapten mogo me mony ki jo ma giŋene ma i gaŋ meno. Ka Festo ociko, ci gikelo Paulo. Festo owacci, “Kabaka Agripa ki wun ducu ma wutye kwedwa kany, wun doŋ wuneno dano man ma lwak Lujudaya ducu gubako doggi bota pire i Jerucalem wa ki kany bene, kun gidaŋŋe ni pe myero obed kwo. Ento an pe anoŋo otimo gin mo ma romo miyo giŋolle kop me to. Doŋ macalo en aye gire okoko apil pi laloc madit, an bene amoko ni abicwale. Ento peya atye ki lok mo kikome ma myero aco i kome bot rwoda, en gin mumiyo akele i nyimwu, ki makato i nyimi, in Kabaka Agripa, wek ka wabipenye abed ki lok mo me acoya. Pien aneno ni kony mo pe me cwalo lamabuc ka pe ginyuto lok ma i kome.” Agripa owaco bot Paulo ni, “Giye ni ilok giri piri keni.” Ci Paulo oryeyo bade ka ocako pidone kun wacci, “Ladit, tin koma gum mada me cuŋ i nyimi, in Kabaka Agripa, pi pido lokka i kom kop ducu ma Lujudaya gudota iye. Makato ducu pien in iŋeyo maber twatwal kit pa Lujudaya ducu ki lok ma gilaro i kingi kengi; pi meno alegi ni idi cwinyi wek iwiny lokka mot ma cwinyi opye. “Lujudaya ducu giŋeyo kit kwona nia ka tinona. Pi kwona ducu, cakke i acakkine, abedo i kin rokwa ki i Jerucalem bene. Giŋeyo nia wa con, ka giye tucone, ni abedo ka lubo kit pa lugwok dini matek makato ma i kinwa, ma gin aye Luparicayo. Kombeddi acuŋ kany ka pido koppa pi geno cikke ma Lubaŋa omiyo bot kwarowa, pi geno gin ma kakawa apar wiye aryo ducu gigeno ni gibinoŋo, kun giworo Lubaŋa ki cwinygi ducu dyewor ki dyeceŋ. Lujudaya gitye ka pida pi gen man, ai kabaka, macalo obedo bal! Piŋo pe wutwero ye ni Lubaŋa cero jo muto? “Won an kikoma yam atamo ni myero ati matek pi lweny ki nyiŋ Yecu me Najaret. Yam atimo kit meno i Jerucalem; atweyo jo pa Lubaŋa mapol i mabuc kun atiyo ki twer ma anoŋo ki bot ajwagi madito. Ka ginekogi, abolo kwir ni myero gito. Tyen mapol aketo can i komgi i kacokke ducu, kun atemo miyogi yeto nyiŋ Kricito; agerre i komgi, ayelogi wa i gaŋi pa lurok. “Kit meno awoto Damaciko kun atye ki twero ki cik ma ajwagi madito gumiya. I cwiny dyeceŋ, kabaka, aneno ki i waŋa yo ka dero a ki i polo ma ryeny matar makato ceŋ; oryeny oboyo koma dyere ki jo ma guwoto kweda bene. Wan ducu wapoto piny, ci awinyo dwan ma loko kweda i leb Ibru ni, ‘Caulo, Caulo, iyela piŋo? Itye ka keto ret i komi keni, macalo twon ka gweyo dim.’ Agamo ni, ‘In aŋa, Rwot?’ Ci Rwot owaco ni, ‘An aye Yecu ma itye ka yela-ni. Ento a icuŋ, pien anen boti pi lok man pi keti ibed laticca ki lacaden pi gin ma ineno ma dok i koma, ki pi gin ma ibineno ka dok anyutte boti i kare me anyim. Abilari ki bot jo me rokwu, ki bot Lurok bene ma abiori botgi. Ibiyabo waŋgi wek gua woko ki i colpiny, gubed i ceŋ, gua woko ki i te twer pa Catan, gulokke bot Lubaŋa, wek owek balgi ci gunoŋ kabedo i kin jo ma Lubaŋa olonyogi gudoko jone, pi niyegi i koma.’ “Kumeno, Kabaka Agripa, pe akwero winyo cik ma gimiya mua ki i polo, ento acako tuco lok, mukwoŋo i Damaciko, ka lacen i Jerucalem ki lobo Judaya ducu ki bot lurok bene, kun atito botgi ni myero guŋut i kom balgi, gulokke gudwog cen bot Lubaŋa, dok guti kit tim ma nyuto ni doŋ guŋut. Pi tyen lok man aye omiyo Lujudaya gumaka i ot pa Lubaŋa, gutemo neka woko. Nio wa i kare man abedo ka limo kony ma a ki bot Lubaŋa; kombeddi doŋ acuŋ kany pi miyo caden bot jo matino ki bot ludito. Lok ma aloko en gin ma lunebi wa ki Moses bene guwaco ni bitimme keken, pe lok mo mapat, ni Kricito ma Lubaŋa oyero, myero onen can, dok ni en bikwoŋo cer ki i kin jo muto wek otit bot rokwa ki bot Lurok bene pi ceŋ ma biryeny menyogi.” Ka doŋ otyeko pidone kit meno, Festo ogerre ki lok ni, “Paulo, in lapoya. Kwano lok mapol mada omiyo ipo apoya.” Ento Paulo ogamo ni, “Pe an lapoya, ladit Festo, ento atye ka loko lok me ada keken kun wiya tye ka tic. Kabaka Agripa ŋeyo lok man ducu, atwero lok bote laboŋo lworo mo. Aŋeyo ni pe tye lok mo ma okato ite, pien lokke pe otimme i muŋ. Kabaka Agripa, in iye lok pa lunebi? Aŋeyo ni iye lokgi.” Agripa owaco bot Paulo ni, “Itamo ni iloka adok lalub Kricito pi kare manok mo kuman?” Paulo ogamo ni, “Kadi pi kare manok nyo madwoŋ, kono alego Lubaŋa ni idok macalo an, pe in keken ento wa dano ducu ma gitye ka winyo lokka tin, ento laboŋo nyor-ri aye.” I ŋe meno kabaka ki laloyo ki Bernike ki jo ma gubedo kwedgi gua malo. Ka doŋ gucito woko, guloko kekengi ni, “Laco man pe otimo gin mo ma romme to, kadi bedo i mabuc.” Ci Agripa owaco bot Festo ni, “Kono dano-ni pe obolo pi Cecar, kono gitwero gonye woko.” Ka doŋ gimoko ni doŋ wakwaŋ wacit i Itali, gimiyo Paulo ki lumabuc mukene i ciŋ ladit mo ma nyiŋe Julio ma lalo dano miya i kin dul mony ma gilwoŋo ni pa Augucito. Wadonyo i mel mo ma oa ki i Adramitio ma doŋ cok kwaŋ dok tuŋ waŋwat mogo ma i dog nam me lobo Acia. Wanywako yo ki Aristako, Lamakedonia ma gaŋgi Tecalonika. Orwone wao i Cidon, ci Julio otimo Paulo maber mada, oyene me wot ka limo lureme wek gugwoke. Waa ki kunnu, wakwaŋ warabo ŋet Caiprac, pien yamo okemowa, ka doŋ waŋolo nam atir i ŋet lobo Cilicia ki Pampulia, wao i Mira ma i lobo Licia. Ki kunnu ladit mony onoŋo mel mua ki i Alegijanderia ma cito Itali, ci omiyo wadonyo iye. Wakwaŋ pi nino mapol, ci wao i Kunida ki tek. Yamo ogeŋowa wot anyim atir, mumiyo warabo ŋet Kurete cok ki Calamone. Warabo ŋet Kurete ki tek ka wao i kabedo ma gilwoŋo ni Waŋ Wat Mabeco, ma cok ki gaŋ ma nyiŋe Lacea. Kare malac onoŋo doŋ oballe, omiyo wot i nam doŋ odoko rac pien nino madit me ri kec bene doŋ okato woko, ci Paulo omiyo botgi ryeko, owacci, “Ludito, aneno ni wotwa-ni bibedo rac ci kelo lannye me jami mapol, pe me yec ma gitiŋo i mel keken, ento wa mel kikome kadi wa kwowa bene.” Ento ladit mony oketo cwinye i lok pa ladit ma loyo mel ki lok pa won mel, makato lok ma Paulo owaco. Waŋwat meno pe romo maber me tiro iye i kare me koyo, pi meno pol pa dano gutamo ni ber gua ki kunnu wek ka twerre guo Poinike, ma en aye waŋwat me Kurete ma neno tuŋ wokceŋ tuŋ acam ki tuŋ wokceŋ tuŋ acuc, wek guri kunnu pi kare me koyo.. Ka yamo ma a tuŋ acuc ocako kodo mot mupye, gutamo ni doŋ orwatte ki tamgi. Guywayo lajuk mel woko ki i pii, gucako kwaŋ gurabo Kurete ma cok ki tura. Ento ka kare okato manok keken, yamo lapiru mager twatwal ocoro, ma gilwoŋo ni Yurakwilo, okodo nia ki i wi tura. Omako mel, opaŋo wiye ma pe doŋ twero kemo yamo, ci waweko mel doŋ woto ka ma yamo oterowa. Ka warabo ŋet latin cula mo ma nyiŋe Kauda watemo ki tek me laro yeya. Ka lukwaŋ doŋ guywayo yeya gutiŋo ki i pii, gukelo i mel, ci guywayo tol mogo gutweyo te mel piny ki i te pii. Lacen guywayo boŋo ma malo piny, wek yamo pe omi mel owot oyot twatwal, pien gilworo ni gwok nyo gibidonyo i kweyo me Cirtic i dog nam me Libya, ci guweko yamo otero mel kumeno. Ka doŋ biamwonyi twago pii matek, ci orwone lutic mel gucako kwanyo jami ma i mel gubolo woko i pii. I nino me adekke gucako bolo jami tic me mel woko i pii ki ciŋgi. Wari pi nino mapol ma pe waneno ceŋ nyo lakalatwe, yamo bene obedo ka kodo mager twatwal, ci lacen pe doŋ wabedo ki gen mo ni wabilarre. Ka doŋ guri pi kare malac ma pe gicamo cam mo, Paulo obino ocuŋ i dyegi ci owacci, “Luditona, kono yam wuwinyo doga ma pe wua ki I Kurete, kono pe wapoto i can man ki lannye pa jami. Ento koni acikowu ni wudi cwinywu pien kwo pa ŋat mo i kinwu pe birwenyo, ento mel aye. Pien tin i dyewor man lamalaika pa Lubaŋa ma an a danone, ma an aworo-ni, obino ocuŋ ka ŋeta, ci owacca ni, ‘Paulo, pe ibed ki lworo. In myero icuŋ i nyim Cecar; nen Lubaŋa doŋ omiyo boti dano ma iwoto kwedgi ducu.’ Pi meno wudi cwinywu, pien an ageno Lubaŋa, aŋeyo ni bitimme kit ma giwaco bota-ni. Ento myero mel oyokke i cula mo aye.” Ka nino oromo apar wiye aŋwen, ma yamo terowa i dye nam me Adria, i cwiny dyewor, lukwaŋ gutamo ni tye lobo mo ma cok kwedwa. Ka giporo oromo futi miya acel ki pyeraryo. Ka doŋ gidirre manok, dok giporo oromo futi pyeraboŋwen. Gulworo ni gwok nyo mel bicorre i kom got, ci gubolo lajuk mel aŋwen i pii ki tuŋ tere, ci gulego ni piny myero koŋ oru. Lukwaŋ guyenyo yo me lwi woko ki i mel, ento ka doŋ gucwalo yeya i nam kun gitimo macalo gimito bolo lajuk yo tuŋ nyime, Paulo owaco bot ladit mony ki bot lumony ni, “Ka pe jo man gubedo i mel; pe wubilarre.” Ka lumony guŋolo tol yeya, guweko yeya okwaŋ ocito. Ka piny doŋ mito ru, Paulo odiyogi wek gin ducu gucam cam mo, ci owaco ni, “Tin doŋ nino me apar wiye aŋwenne ma wubedo ka ri kec ma cwinywu oŋabbe aŋaba, pe wucamo gin mo. Pi meno abako doga botwu ni wucam cam mo wek wunoŋ tek; pien kadi wa yer i kinwu.” Ka doŋ owaco lok man, okwanyo mugati, omiyo pwoc bot Lubaŋa i nyimgi ducu ci ocako camone. Ka gin ducu cwinygi odoko tek ci gucamo cam pigi kengi. Onoŋo wan ducu ma wabedo i mel waromo dano miya aryo ki pyerabiro wiye abicel. Ka doŋ gucamo guyeŋ, ci doŋ guyako jami woko ki i mel kun gibolo ŋano woko i nam. Ka piny doŋ oru, lukwaŋ pe guŋeyo lobo ma guo iye, ento guneno gul nam ma kweyo tye iye ci gutamo ni ka twerre myero gikel mel i dog tura kunnu. Guŋolo tol ma mako lajuk ducu, guweko odoŋ i nam; i kare meno bene gugonyo tol ma onoŋo gutweyo ki pol ma giwiro ki mel, ka doŋ guŋabo boŋo matidi ki tuŋ nyime wek yamo omaki, ci guweko mel omol owoto kun kemo tura. Ento ka guo ka ma tol pii mager aryo oromo iye, ci nyim mel otomme ki lobo ma i te pii, ogeto woko likiŋ, te mel bene pii otugge oturo woko. Askari guyubo ni ginek lumabuc woko ducu, wek acel mo pe okwaŋ oriŋ woko matwal, ento ladit mony omito laro Paulo, ci ojukogi pe oye ni gulub tamgi-nu. Ociko ni jo ma giŋeyo kwaŋ gukworre i pii wi ati gucak kwaŋ wek gukat i wi tura, ka lacen jo ma gudoŋ gulub korgi i wi bao mogo nyo i wi dul mel. Kit meno gin ducu gukonnye kekengi gukato i wi tura. Ka doŋ watyeko larre, ci waniaŋ ni cula meno gilwoŋo Molta. Wegi lobo meno gutimowa tim me kica ma pe nen atata; gumoko mac, gujolowa ducu, pien onoŋ kot ocako cwer ki koyo bene onoŋo ŋic. Paulo ogwaro rido yen, obolo i mac, ci twol lacocodo omwomme woko pi lyeto ka orine i ciŋe. Ka wegi lobo-nu guneno twol mulyerre ki i bade, gucako lok kekengi ni, “Ada, laco man lanek. Kadi ka olarre ki i nam, laŋolkop atir pe ye ni obed kwo.” Ento Paulo oyeŋo bade obolo kwede twol i mac ma pe otime gin mo marac. Gukuro kun gitamo ni bade bikwot woko nyo bipoto piny ci to woko cut; ento ka doŋ gukuro pi kare malac ci guneno ni gin mo marac pe otimme i kome, guloko tamgi, gucako waco ni ebedo lubaŋa mo. Ladit ma loyo cula meno, laco ma nyiŋe Publio, onoŋo tye ki pottine cok ki kunnu, ci ojolowa, ogwokowa pi nino adek. Won Publio onoŋo two kun obedo ka winyo lyeto, cado bene. Paulo olime, olego pire kun keto ciŋe i kome, ci ocaŋe. Ka man otimme, lutwo mukene ducu ma i cula-nu gubino bote ci gucaŋ. Gumiyowa mot mapol; ka doki i kare ma wacako wot guketo jami ma mitte pi konyowa i mel. I ŋe dwe adek wamedo wotwa i mel mo mua ki i Alegijanderia ma tye ki cal Rudi i nyime, ma odikke i cula meno pi kare me koyo. Wakwaŋ wao i Cirakuca, wadikke kunnu nino adek. Waa ki kunnu, warabo piny nio i Regio. Ka nino okato acel, yamo ma a tuŋ acuc okodo, orwone wao i Puteoli. Wanoŋo utmego kunnu, ci gulwoŋowa, wabedo botgi nino abiro, ci wao i Roma. Ka utmego ma i Roma guwinyo piwa, gubino wa i Cuk pa Appio, ki i kabedo ma gilwoŋo Ot Welo Adek pi jolowa. Ka Paulo onenogi, opwoyo Lubaŋa ci cwinye odoko tek. Ka doŋ wao i Roma, giye ni Paulo obed i ode kene ki askari ma gwoke. Ka nino okato adek, olwoŋo ludito pa Lujudaya ma gibedo kunnu. Ka gucokke bote, owaco botgi ni, “Utmego, kadi bed pe atimo gin mo marac i kom rokwa nyo i kom kit pa kwarowa, ento gimaka, i Jerucalem gitweya, gimiya i ciŋ Luroma. Ka Luroma gutyeko ŋiyo lokka, gumito ni gigonya woko, pien onoŋo pe tye tyen kop mo ma romo neka. Ento ka Lujudaya gucerre iye, meno omiyo abolo pi Cecar, pien yo mukene doŋ onoŋo pe, kadi bed pe atye ki adot mo ma apido ki rokka. Meno aye gin mumiyo amito ni anenwu ci alok kwedwu, pien gitweya ki nyor man pi gin ma gen pa jo Icrael ocuŋ iye.” Gugamo ni, “Pe walimo waraga ma oa ki i Jerucalem ma loko komi, pe tye ŋat mo i kin omegiwa mua kunnu ma okelo lok mo i komi, nyo ma oloko lok mo marac i komi. Ento wamito waniaŋ tammi ki boti, pien waŋeyo ni i kabedo ducu giloko lok marac i kom dul man ma icwako-ni.” Guciko nino ci gubino bote i ot ma en bedo iye, mapol makato tyen mukwoŋo ca, ci oyeko lok ducu kikore cakke odiko nio wa otyeno kun tito lok kom ker pa Lubaŋa atyer ci otemo ywayo tamgi wek guye Yecu ki lok ma okwanyo ki i cik pa Moses ki i buk pa lunebi. Jo mukene guye lok ma otitoni ento jo mukene gukwero ye. Ci gucako ket woko ma kingi opokke woko kumeno ka doŋ Paulo oloko lok acel ni, “Cwiny Maleŋ yam oloko kakare bot kwarowu ki i dog lanebi Icaya ni, ‘Cit iwac ki rok man ni, Winyone mere wubiwinyo, ento pe wubiniaŋ te lokke; nenone wubineno, ento pe wubiŋeyo gin ma tye. Pien jo me rok man cwinygi odoko nwaŋ, itgi bene odiŋ woko, dok gumiyo waŋgi woko wek pe ginen ki waŋgi, pe bene giwiny ki itgi, pe bene giniaŋ iye ki cwinygi, pe gilokke gidwog bota acaŋgi.’ Myero doŋ wuŋe ni, larre man ma Lubaŋa omiyo doŋ gicwalo woko bot Lurok; gin gibiwinyo.” [ Ka owaco lok meno, Lujudaya guket woko kun gitye ka pyem matek i kingi kekengi.] Paulo obedo kunnu pi mwaka aryo kun kwo ki limme kene ci jolo lwak jo ducu ma bino bote. Obedo ka tito lok me ker pa Lubaŋa, pwonyo bene lok kom Rwot Yecu Kricito atyer ma pe gijuko. Waraga man oa ki bot Paulo ma en latic pa Yecu Kricito, ma Lubaŋa olwoŋo me bedo lakwena, ka doŋ gimiye tic me tito lok me kwena maber ma oa ki bot Lubaŋa. Lok me kwena maber onoŋo yam Lubaŋa ociko pire con i lok ma lunebi yam gutito, dok bene onoŋo gicoyo woko i ginacoya maleŋ. Lok me kwena man maber-ri gicoyo okemo Wode. I kit me kom, Wode-nu yam ginywale i kin likwayo pa Daudi, ento pi Cwiny Maleŋ Lubaŋa onyuto en obedo Wode i tic matek ma ocere kwede ki i kin jo muto, en aye Yecu Kricito Rwotwa. Pire omiyo wan walimo kica pa Lubaŋa, ki tic me bedo lukwena wek wami dano ma i rok ducu gulub niye pi nyiŋe; ma wun bene wutye i kingi, wun dano ma doŋ gilwoŋowu me bedo jo pa Yecu Kricito. Bot wun jo ducu ma wutye i Roma ma Lubaŋa marowu, dok olwoŋowu me bedo jone kikome: Lubaŋa Wonwa ki Rwotwa Yecu Kricito omiwu kica ki kuc. Mukwoŋo apwoyo Lubaŋana i Yecu Kricito pi wun ducu, pien niyewu doŋ gituco pire oromo wi lobo woko ducu. Lubaŋa ma aworo ki i cwinya kun bene atito lok me kwena maber i kom Wode, en aye cadenna ma ŋeyo ni atuco nyiŋwu i legana i kare ducu ma pe akeŋ. Alego ni ka twerre, ka Lubaŋa oye, olo myero anoŋ yo me bino botwu i kare-ni. Atye ka paro me nenowu mada, wek apok botwu mot mogo me cwiny me jiŋowu wek wubed matek. Gin ma aloko en aye ni wun kacel ki an wabikonnye lawaŋacel; en aye ni niyena bikonyowu, ki niyewu bene bikonya. Gin ma amito wuŋe, utmegina, en aye ni onoŋo abedo ka tamo tyen mapol ni myero abin botwu, wek omiya anoŋ jo mogo ki i kinwu. Lurok mukene ducu, ento meno pe otwerre; kadi wa onyoo bene pud gigeŋa woko. Atye ki banya bot Lugrik ki bot lurok ma gikwiya piny, bot luryeko ki bot lumiŋ; en aye gin mumiyo atye ki miti me tito lok me kwena maber botwu bene wun jo ma wubedo i Roma. Lewic pe maka pi lok me kwena maber, ma en aye teko pa Lubaŋa me laro jo ma tye ki niye, mukwoŋo Lujudaya, ka doŋ Lugrik bene. Pien lok me kwena maber nyuto kit ma Lubaŋa kwano ni dano bedo ma kite atir, ma man timme pi niye keken, cakke ki acakkine o kwede wa i agikkine. Kit macalo gicoyo ni, “Dano ma kite atir pi niye bibedo kwo.” Pien doŋ ginyuto akemo pa Lubaŋa woko ki i polo pi tim pa jo maraco ducu ma pe giworo Lubaŋa, ma gitye ka geŋo lok ada ni pe oti tic, pi timgi maraco. Pien gin ma dano twero ŋeyone i kom Lubaŋa doŋ onen woko ka maleŋ botgi, Lubaŋa doŋ onyuto botgi. Cakke i kare ma giketo lobo, kit pa Lubaŋa ma onoŋo pe nen doŋ onen, kun giŋeye i jami ducu ma en otiyo, en aye tekone ma pe gik, ki dit ma en Lubaŋa tye kwede. Mumiyo dano doŋ pe gitye ki lok mo ma myero gupid pi geŋo ŋegi; pien kadi bed onoŋo yam giŋeyo Lubaŋa, ento pe guwore macalo Lubaŋa, pe bene gupwoye, ento tamgi odwokogi i gin ma pe konyo, ki tam ma i cwinygi me miŋomiŋo bene doŋ ocido woko odoko col. Gulwoŋŋe kengi ni gin luryeko, ento gulokke dok gudoko lumiŋ. Ci guloko deyo pa Lubaŋa ma pe to woko, kun giporo ki cal pa dano ma to, nyo ki cal pa winyo, nyo me pa lee, nyo me pa twol-gu. En mumiyo Lubaŋa otenyogi woko liyak i miti me caro ma tye i cwinygi, wek gubal kwede deyo me komgi kekengi. Guloko lok ada i kom Lubaŋa guwilo woko ki goba, kun giworo dok gitiyo bot ginaketa, ma ka woro ki tic bot Ŋat ma oketogi, ma gipwoyo nakanaka. Amen. Pi tyen lok man omiyo Lubaŋa otenyogi i tamgi mugom ma gitamo ma kelo lewic. Kadi wa mongi bene guweko bedo ki co i kit ma ginywalogi ni gubed kwede-ni, ento dok gucako tiyo gin mapat. Ki co bene kit meno guweko bedo ki mon woko i kit ma ginywalogi ni myero gubed kwed-ni, ento mitigi dok ocako waŋo komgi calo mac, kun gimito ni gibed ki luwotgi, kun co buto ki co wadgi, ma meno tim me lewic mada, ento gilimo can malit i komgi pi kit balgi-nu. Doŋ kit macalo gin pe guneno gin mo ma konyogi i ŋeyo Lubaŋa-ni, Lubaŋa bene otenyogi woko i tamgi ma konnye pe, wek doŋ gutim gin ma pe myero. Onoŋo yam gupoŋ ki kwa bal mapol ducu, tim maraco, woro me lim, raccwiny. Onoŋo bene gupoŋ ki cwiny me nyeko, nek, daa, goba, ki kwarcwiny. Onoŋo bene gubedo lukwot dano, luyet dano, dok jo ma dag Lubaŋa. Gubedo luŋala, jo ma lyerre, jo ma wakke, lurot kit me timo tim maraco, jo ma pe winyo lunyodogi, jo ma kwiya piny, jo ma pe genne, pe gitye ki mar i cwinygi, kica bene pe makogi i kom dano. Kadi bed giŋeyo cik pa Lubaŋa ni jo ma timo gin macalo meno gibito, ento gin pe gitimo jami macalo meno atima keken, gipwoyo bene jo ma tye ka timone. Pi meno, gin mo ma myero ipid pire doŋ pe, in dano, kadi in aŋa, ka iŋolo kop i kom dano lawoti; pien pi kop ma iŋolo i kom dano mukene ca, noŋo doŋ iŋolo kop oloyi woko, pien in laŋolkop kikomi bene itimo kit gin acel-lu. Wan waŋeyo ni Lubaŋa ŋolo kop atir dok kakare ka oŋolo kop oloyo jo ma gitimo gin macalo meno. Doŋ in dano ma iŋolo kop i kom jo mukene ma gitimo gin macalo meno-ni, kun in kikomi bene itimo, itamo ni ibibwot ki ŋolo kop pa Lubaŋa? Nyo icayo lonyo me kica pa Lubaŋa ki kit ma en jukke kwede pi bal pa dano, ki kit ma en diyo kwede cwinye. Adada in iŋeyo ni Lubaŋa lakica, pien teli wek iŋut i kom balli. Ento pi tek cwinyi, en cwinyi ma idag ŋut kwede-ni, meno itye ka kano giri mono me akemo pa Lubaŋa piri keni pi kuro nino me akemo, en kare ma gibinyuto iye ŋolo kop ma atir pa Lubaŋa. En biculo dano acel acel kun lubo kit tic ma dano mo-ni otiyo. Jo ma diyo cwinygi kun gicanne me tiyo gin maber, ma giyenyo deyo ki woro, ki kwo ma pe to, en bimiyo botgi kwo ma pe tum. Ento dano ma gilaro dito, ma pe gilubo lok ada, ento gilubo gigi kit marac, Lubaŋa biculogi kun timogi ki akemo dok ki kiniga mager atika. Can ki remcwiny bidiyo dano ducu ma timo gin marac, mukwoŋo Lujudaya ka doŋ jo Grik bene. Ento dano ducu ma timo gin maber binoŋo deyo ki woro ki kuc, mukwoŋo Lujudaya ka doŋ jo Grik bene; pien Lubaŋa gire pe leŋŋe tuŋ bot dano mo pi kit ma en tye kwede. Jo ma gutimo bal laboŋo cik pa Moses, gibito laboŋo cik bene; ento jo ma gutimo bal i te cik, gibiŋolo kop i komgi kun lubo cik. Man pe te lokke ni jo ma winyo lok me cik awinya ki itgi gin aye jo ma kitgi atir i nyim Lubaŋa; ento jo ma tiyo gin ma cik mito aye gibikwanogi ni gin jo ma kitgi atir. Ka Lurok ma gipe ki cik gitiyo gin ma cik mito pi kitgi ma ginywalogi kwede, meno noŋo doŋ gin kikomgi gudoko wegi cik, kadi bed cik pa Moses pe botgi. Ginyuto ni gin ma cik mito doŋ gicoyo woko i cwinygi, dok ŋec ma gitye kwede ma nyuto botgi balgi bene aye bedo caden kacel kwedgi, kun tamgi bedo ka yokke ayoka; mogo ŋolo ni kop oloyogi, ki mogo noŋo cwakogi acwaka. Bibedo kumeno i nino meno ma Lubaŋa biŋolo kop i kom dano pi gin ma gitiyo i muŋ, ma miyo Yecu Kricito aye ŋolo, kun lubo lok me kwena maber ma atye ka titone-ni. Ento ka ilwoŋŋe keni ni in Lajudaya kono? Noŋo i jeŋŋe i kom cik, kun iwakke bene pi Lubaŋa, dok bene iŋeyo gin ma en mito, dok ipwoyo gin maber makato, pien doŋ gipwonyi woko ki cik. Doŋ ki tuŋ boti, in iŋeyo ni in latel lutowaŋ, in i ceŋ ma ryeny menyo dano ma gitye i piny macol, dok bene in aye ma tiro lumiŋ, in lapwony pa litino, pien i cik itye ki ŋec ki lok ada kikome. Doŋ in lapwony ma ipwonyo jo mukene, pe ipwonnye kekeni bo? Itito lok ni, “Pe ikwal”, in kono ikwalo kwo? Itito ni, “Pe itim abor”, in kono itimo abor? Cwinyi dag woro jogi, ento ikwalo gin ma tye i ot jok? Iwakke pi cik, ento ituro cik kun icayo Lubaŋa? Tye kit macalo yam gicoyo i ginacoya ni, “Giyeto nyiŋ Lubaŋa i kin Lurok piwu.” Lirre konyo ka ce ilubo cik, ento ka ituro cik, dwoki cen ibedo calo pe onoŋo giliri. Doŋ ka inen dano ma pe giliro olubo gin ma giciko ma tye i cik, dano ma pe giliro-nu pe gibikwane calo ŋat ma giliro? Meno miyo dano ma pe gilirogi, ma gilubo cik, biŋolo kop loyi, pien itye ki cik ma yam doŋ gicoyo woko acoya, dok bene giliri, ento pud ituro cik. Pien dano ma nen Lajudaya ki woko keken meno pe Lajudaya kikome; dok bene lirre ma nen ki woko i kom, meno pe lirre kikome. Lajudaya kikome aye dano ma bedo Lajudaya ki i cwinye, dok bene lirre me ada aye lirre ma dano bedo kwede ki i cwinye, ma en aye tic pa Cwiny Maleŋ, pe nukuta ma gicoyo acoya. Doŋ ŋat macalo meno kadi bed dano pe gipwoye, ento Lubaŋa pwoye. Ka doŋ tye kit meno, ci Lajudaya kato jo mukene-gu ki ŋo? Nyo kony me lirre kono gin aŋo? Konyo matek i yo ducu. Mukwoŋo, Lujudaya yam gimiyo botgi lok pa Lubaŋa ma pire tek kun gigenogi ni gibigwoko. Lok man bedo niŋniŋ ka jo mogo i kingi onoŋo yam gin pe lugen? Kit macalo gin pe genne-ni, man bene twero miyo Lubaŋa doko ŋat ma pe genne? Pe kumeno! Waket Lubaŋa obed me ada, kadi bed dano ducu lugoba, kit macalo gicoyo ni, “Wek gin ma iloko onyut ni kiti atir, dok bene wek ilo lok ka giŋolo kop i komi.” Ento ka kitwa ma pe atir nyuto kit ma atir ma Lubaŋa tye kwede, ci wan dok wabiwaco lok aŋo? Wabiwaco ni Lubaŋa pe kite atir pi keto akemone i komwa? (Man atye ka lok i kit pa dano.) Pe kumeno! Ka tye kit meno, ci Lubaŋa twero ŋolo kop i kom dano ma gibedo i wi lobo niŋniŋ? Ka ce gobana-ni miyo ada pa Lubaŋa medde ameda kun bene kelo deyo bote, ci piŋo pud dok giŋolo kop i koma calo an labalo? Piŋo pe watimo gin marac wek gin maber oa iye? Pien tye jo mogo ma gicoko dogwa ki lok goba ma giwacci wan waloko kumeno. Ka giŋolo kop oloyo jo macalo meno noŋo giŋolo kakare. Gin aŋo doki? Wan Lujudaya watye maber makatogi woko? Pe wacel; pien doŋ anyuto woko i lokka me adot ni, Lujudaya ki jo Grik ducu bal doŋ oloyogi, kit macalo yam gicoyo ni, “Ŋat mo ma kite atir pe, pe kadi ki acel; ŋat mo ma niaŋ bene pe, ŋat mo ma yenyo Lubaŋa bene pe. Gin ducu doŋ guŋak woko, gudoko jo ma kitgi raco; pe tye ŋat mo ma tiyo gin maber, pe, kadi ki acel.” “Guŋamo doggi calo lyel ma twolo, kun giloko lok mamit me bwolo dano.” “Lok ma giloko obedo calo kwir pa ororo.” “Lokgi ducu ma giloko obedo lok makec ma giceno ki dano acena.” “Tyengi yot giriŋo kwede madwir ka neko dano, balle me lobo ki cwercwiny keken aye tye i yo gudogi ducu, pe giŋeyo yo me kuc.” “Pe gineno gin ma miyo gilworo Lubaŋa.” Waŋeyo ni gin ma cik oloko, loko bot jo ma tye i te cik, wek dano ducu guliŋ woko pe guŋam doggi ka lok, ki wi lobo ducu myero obed i tye ŋolo kop pa Lubaŋa. Pien pe gibikwano dano mo ni kite atir i nyim Lubaŋa pi cobo cik; cik ticce aye me niaŋo dano wek guŋe bal. Ento kombeddi kit ma Lubaŋa kwano ki dano ni kite atir pe pi lubo cik doŋ onen woko ka maleŋ. Cik pa Moses ki pa lunebi bene yam otito pire; en kit ma Lubaŋa kwano ki dano ni kite atir pi niyene i kom Yecu Kricito, dok bene tye pi jo ducu ma ye en. Apokapoka mo pe iye; pien dano ducu gubalo, pe gio i kom deyo pa Lubaŋa. Lubaŋa kwanogi ni kitgi atir nono, miyogi macalo mot pi kicane pi kit ma Yecu okokogi kwede. Lubaŋa okete me bedo gin-kok me kwanyo bal ki remone, pi jo ma ye en, wek enyut kwede kite ma atir-ri, pien Lubaŋa yam ojukke kene, pe otimo gin mo i kom bal ma yam dano gutimo con, wek enyut kit ma atir i kare man, ni, en kikome kite atir, dok ekwano dano ni kite atir pi ye Yecu. Ka wakkewa kono doŋ tye kwene? Doŋ gigeŋo woko. Pi cik mene? Pi cik me tic? Pe kumeno gire, ento pi cik me niye. Mumiyo wamoko tamwa ni dano gikwano ni kite atir pi niyene, ento pe pi tic me cobo cik. Lubaŋa mono tye pi Lujudaya keken? Pe en bene Lubaŋa pa Lurok? Iyo, ada, en bene Lubaŋa pa Lurok, pien Lubaŋa tye acel, en bikwano dano ma gilirogi ni kitgi atir pi niyegi, dok bene bikwano jo ma pe gilirogi ni kitgi atir pi niyegi. Wan mono watye ka bolo cik pa Moses woko pi man? Pe kumeno wacel, wan giwa wamoko cik amoka. Wan mono wabiwaco lok aŋo i kom Abraim, ma en aye kwarowa i kit me kom-mi? Kono yam gikwano Abraim ni kite atir pi tic ma en otiyo, kono en tye ki gin mo ma en otiyo, kono en tye ki gin mo ma en nyatte pire, ento pe i nyim Lubaŋa. Doŋ coc ma yam gicoyo i ginacoya waco lok aŋo? Ginacoya waco ni, “Abraim onoŋo oye Lubaŋa, mumiyo kikwane ni en dano ma kite atir.” Dano ma tiyo tic pe gimiye mucarane macalo mot, ento gimiye macalo jami ma en otiyo pire. Ento dano ma pe tiyo, ma ye Ŋat ma kwano jo ma pe lworo Lubaŋa ni kitgi atir, kit dano macalo meno gikwano ni kite atir pi niyene. I kit acel-lu, Daudi bene yam oloko pi gum ma dano tye kwede, ka Lubaŋa okwane ni en dano ma kite atir laboŋo tic mo ma en otiyo, macalo yam gicoyo ni, “Jo ma doŋ giweko balgi gitye ki gum, ma balgi bene doŋ gikwanyo woko; dano ma Rwot doŋ pe kwano bal mo i kome tye ki yomcwiny.” Gum man mono tye pi jo ma gilirogi, nyo pi jo ma pe gilirogi bene? Wawaco ni, pi niye omiyo gikwano Abraim ni kite atir. Onoŋo mono yam gikwano i kome niŋniŋ? Onoŋo gikwane ma pud pe gilire, nyo lacen ma onoŋo doŋ gityeko lire woko? Pe ma doŋ gityeko lire, ento ma pud peya gilire. Gimiye lirre macalo lanyut anyo lanen ma nyuto ni gikwano ni kite atir pi niyene ma onoŋo peya gilire. Meno miyo Abraim bedo kwaro dano ducu ma giye ma peya gilirogi, wek gin bene gikwangi ni kitgi atir, dok bene en kwaro pa jo ma gilirogi bene, pe pa dano ma gilirogi alira keken, ento pa jo ma gilirogi ma gilubo bene niye ma yam kwarowa Abraim obedo kwede ma onoŋo pud pe gilire. Cikke ma onoŋo yam Lubaŋa ociko bot Abraim ki likwaye, ni, wi lobo ducu bibedo megi, gin mumiyo ociko, pe ni Abraim yam ocobo cik, ento pein en onoŋo oye Lubaŋa, ka doŋ gikwane ni kite atir. Ka ce jo ma cobo cik gin aye jo ma wi lobo-ni ducu bedo megi, kono niye doŋ konnye pe, ki cikke bene kono konnye pe. Pien cik miyo akemo mako Lubaŋa i kom dano, ento ka ma cik pe iye, turo cik bene pe. Meno aye gin mumiyo cikke pa Lubaŋa ocuŋ i kom niye, wek obed me kica, dok pi moko cikkene bot likwayo pa Abraim ducu, pe bot jo ma lubo cik keken, ento kadi wa bot jo ma gibedo ki niye macalo Abraim. Pien en kwarowa ducu, macalo yam gicoyo ni, “Doŋ aketi wek ibed kwaro rok mapol.” Cikke man doŋ gimoko i nyim Lubaŋa ma yam Abraim oye-ni, en Lubaŋa ma miyo kwo i kom jo muto, dok bene ma lwoŋo gin mogo ma yam komgi pe gibedo tye. Abraim yam oye, kun onoŋo oketo genne i kom gin ma nen calo pe gitwero geno, omiyo en odoko kwaro rok mapol, kit macalo yam gicoyo ni, “Likwayu bibedo kit meno.” En pe obedo nyap i niye i kare ma obedo ka paro pi kome kekene, ma onoŋo yam rom aroma ki gin ma oto, pien mwaka me ditte onoŋo doŋ cok romo miya acel kulu, dok bene medo i kom meno, dakone Cara onoŋo lalur. Niyene pe odok cen, pe obedo ka cabbe acaba i tamme i kom cikke pa Lubaŋa, ento niyene omedde ameda odoko matek, kun en miyo deyo bot Lubaŋa, ma onoŋo lok donyo matut i cwinye ni, Lubaŋa twero tiyo gin ma ocikke pire. “Pi niyene omiyo gikwane ni en dano ma kite atir.” Ento lok man ni, “Yam gikwane” onoŋo pe gicoyo pi en kene, ento gicoyo pi wan bene. Wan bene gibikwanowa ni kitwa atir, wan jo ma doŋ waye Lubaŋa ma yam ocero Rwotwa Yecu Kricito ki i kin jo muto-ni, en ŋat ma yam gineko pi balwa, ci Lubaŋa ocere woko wek gikwanwa ni kitwa atir. Pi meno, kit macalo gikwanowa ni kitwa atir pi niye, watye doŋ ki kuc i nyim Lubaŋa, pi Rwotwa Yecu Kricito. Pire omiyo giyabo botwa yo me limo kica man ma ocuŋ pi niye-ni, kun wabedo ki yomcwiny pi gen ma watye kwede me nywako deyo pa Lubaŋa. Makato meno, wabedo ki yomcwiny i can mogo mapatpat ma opoto i komwa, kun waŋeyo ni bedo ki can kelo diyo cwiny me ciro can, diyo cwiny i ciro can weko gipwoyo kitwa, ka doŋ pwoyo kitwa-ni miyowa bedo ki gen. Genwa meno pe kelo botwa cwercwiny, pien Cwiny Maleŋ doŋ omiyo gionyo mar pa Lubaŋa woko i cwinywa. Pien i kare ma yam pud wagoro, ma kare doŋ oromo, Kricito oto pi dano ma pe gilworo Lubaŋa. Kadi pi ŋat ma kite atir, bedo tek twatwal bot dano mo me to pire. Gwok nyo ka obedo dano ma kite ber, ŋat mo twero diyo cwinye me to pire. Ento Kricito yam oto piwa i kare ma pud wan lubalo; meno nyuto kit mar ma Lubaŋa marowa kwede. Macalo wan i kare man gikwanowa ni kitwa atir pi remone, makato twatwal-le wabilarre pire ki i kom akemo pa Lubaŋa. I kare ma onoŋo wan pud lukwor pa Lubaŋa, en odwokowa cen bote, pi to pa Wode; ka kit meno, ma gidwokowa cen bote, wabilarre twatwal-le pi kwo pa Wode. Pe meno keken, ento wabibedo ki yomcwiny i Lubaŋa pi Rwotwa Yecu Kricito, pien en aye ma omiyo gidwokowa cen bot Lubaŋa. Pi meno, kit macalo bal yam obino i lobo kun wok ki i dano acel, ka doŋ to obino pi bal, kit meno bene to onya oromo kin dano ducu, pien dano ducu gubalo. Bal onoŋo tye i lobo con ma peya gimiyo cik, ento ka ma cik pe iye, bal bene pe gikwano i wi ŋat mo. Ento to ocako loc ki i kom Adam oo kwede wa i kom Moses, ci oloyo jo ma yam pe gutimo bal marom ki bal pa Adam, ma yam oturo cik ma gimiye. Adam aye lanyut ma cimo ŋat ma mito bino-ni. Ento mot me kica ma Lubaŋa omiyo pe rom ki bal pa Adam; pien kadi bed dano mapol yam guto pi bal pa ŋat acel ca, ento kica pa Lubaŋa ki mot me nono ma obino pi kica pa dano acel-li, Yecu Kricito, obedo dit makato, onya oromo lwak dano mapol ata. Dok mot me nono pe rom ki bal pa dano acel ca, pien pi bal pa ŋat acel ca omiyo giŋolo kop oloyo dano ducu, ento tic me kica ma olubo bal mapol okelo loyo kop. Ka ce pi bal pa dano acel omiyo to obedo ka loc pi dano acel ca en Adam, makatone jo ma gulimo kica mabup, ki mot me nono ma omiyo gikwanogi ni kitgi atir, gibibedo kwo kun noŋo gitye ka loc, pi dano acel-lu bene, en Yecu Kricito. Doŋ kit macalo bal pa ŋat acel omiyo kop oloyo dano ducu, kit meno bene tic me kit ma atir pa dano acel okelo loyo kop ki kwo pi jo ducu. Pien macalo pi dano acel ma pe obedo ki winy omiyo dano mapol ata gudoko lubalo, kit meno bene pi winy pa dano acel jo mapol ata gibikwanogi ni kitgi atir. Cik onoŋo odonyo iye me nyayo bal; ento ka ma bal onya iye, en bene ka ma kica onya iye makato ducu-ni. Kit meno, kit macalo bal yam oloyo loc i to, kica bene myero olo loc pi kwano dano ni kitgi atir, wek omi gunoŋ kwo ma pe tum, pi Yecu Kricito Rwotwa. Wan mono doki wabiwaco aŋo? Myero wamedde ki timo bal wek kica onya? Pe kit meno! Ci wan ma doŋ yam wato tuŋ bot bal dok watwero bedo kwo iye niŋniŋ? Pe wuŋeyo ni wan ducu ma gityeko batijawa me donyo i Kricito onoŋo gibatijawa me donyo i tone? Giyikowa kacel ki Kricito i tone i batija ma walimo, wek wabed calo en. En yam ocer woko ki i kin jo muto pi deyo pa Wonne, wek wan bene doŋ walub kit kwo manyen-nu. Pien ka doŋ waribbe kacel kwede i to mo ma cal ki tone-ni, kit meno bene wabiribbe kwede i cer ma cal ki cer ma gicero en kwede-ni. Pien waŋeyo man, ni, kwowa macon yam giguro kwede kacel i kom yatariya, wek kwo me bal ma onoŋo watye kwede oto woko, wek wan doki pe wadok opii me bal. Pien ŋat ma oto, balle doŋ gik woko. Ento ka doŋ wato kacel ki Kricito, waye ni wabibedo kwo kacel kwede bene. Pien waŋeyo ni Kricito ma yam doŋ ocer ki i kin jo muto-ni pe doki bito; to doŋ pe ki loc mo i kome. To ma en oto, oto pi bal, tyen acel keken, ento kwo ma en kwo kwede, kwo tuŋ bot Lubaŋa. Wun bene kit meno, myero wutam i komwu kekenwu ni, wun jo muto tuŋ bot bal, ento wubedo kwo tuŋ bot Lubaŋa. Pe wuwek bal olo komwu ma to-ni, wek pe gumi wubed ka lubo mitigi. Pe dok wumi dul komwu mapatpat i timo bal, macalo jami tic me tiyo gin marac; ento wumine kenwu bot Lubaŋa calo jo ma gua woko ki i to, ma doŋ guo i kwo. Wumi dul komwu ducu bot Lubaŋa me tiyo gin ma tye atir. Pien bal pe doki bibwoyowu, pien wun doŋ pe wutye i te cik, ento wutye i te kica pa Lubaŋa. Gin aŋo doki? Dok watimu bal, pi te lokke ni wan pe watye i te cik ento i te kica? Pe kumeno gire! Pe wuŋeyo ni ka doŋ wumine kenwu bot ŋat mo calo opii me winyo gin ma en loko, doŋ bene wudoko opii pa ŋat ma wuwinyo lokke-ni? Nyo wudoko opii me bal ma terowu i to, nyo wudoko opii me winyo lok pa Lubaŋa, ma telowu i kit ma atir. Ento myero wupwo iye Lubaŋa, pien yam wubedo opii me bal, ento doŋ wutye ka lubo kit pwony ma gipwonyowu kwede ni wulube ki cwinywu ducu. Doŋ gityeko gonyowu woko ki i opii me bal, wudoko opii me kit ma atir. Atye ka lok i kit pa dano, pi gorowu ma ginywalowu kwede. Pien macalo yam wumiyo dul komwu ducu me bedo opii me tim caro ki tim maraco, omiyo doŋ wudoko lutim maraco, kombeddi doŋ wumi dul komwu ducu gubed opii me kit ma atir, wek wudok jo maleŋ. I kare ma onoŋo pud wubedo opii me bal, onoŋo pe wubedo i te loc me kit ma atir. Yam wunoŋo gin aŋo i gin ma lewicce kombeddi tye ka makowu-ni? Agikki pa jami macalo meno ducu aye to. Kombeddi doŋ gigonyowu woko ki i opii me bal, doŋ wudoko opii pa Lubaŋa; gin ma wunoŋo en aye ni wudoko doŋ jo maleŋ, agikkine en kwo ma pe tum. Pien mucara me bal en to, ento mot ma Lubaŋa miyowa nono, en aye kwo ma pe tum i Yecu Kricito Rwotwa. Utmegina, atye ka lok ki jo ma ŋeyo cik; pe wuŋeyo ni cik mako dano ka pud kwo keken? Dako ma ginyomo bene cik tweyo i kom cware ka cware pud kwo, ento ka cware doŋ oto, en gonnye woko i cik pa cware. Mumiyo ka cware pud kwo, ce dako-nu oa okobo woko bot laco mukene, gibilwoŋe ni latim abor. Ento ka cware doŋ oto, en noŋo ogonnye woko i cik meno; ka dok onyomme ki laco mukene noŋo pe otimo abor. Kumeno, utmegina, wun bene yam wuto tuŋ bot cik pi Kricito ma wuribbe i kome-ni, wek wudok bot ŋat mukene, en aye ŋat ma yam gicere woko ki i kin jo muto, wek wanyak nyig pi Lubaŋa. Pien i kare ma yam pud watye i kwo me anywalli, gin maraco me bal ma cik doŋ otugo woko onoŋo tye ka tic i dul komwa mapatpat me nyako nyige pi to. Ento kombeddi doŋ gigonyowa woko i kom cik, doŋ wato ki tuŋ bot gin ma con omakowa. Omiyo wan doŋ watye ka tic i yo manyen me Cwiny, pe dok i yo macon ca me lubo cik ma yam gicoyo acoya. Wabiwaco lok aŋo mono? Cik mono bal? Pe kumeno gire! Ento kono yam cik pe obedo tye, onoŋo kono gira pe aŋeyo bal. Ka kono yam cik pe owaco ni, “Cwinyi pe opukke i kom jami pa ŋat mukene,” kono onoŋo bene pe abedo ki miti macalo meno. Ento bal onoŋo kare odonyo i cik ca, ka doŋ ocako kelo kwa miti ducu me pukke cwiny i cwinya. Pien ka cik pe, ci bal to woko. Yam onoŋo abedo kwo laboŋo cik mogo, ento i kare ma cik ca obino, bal ocako bedo kwo, an ato woko. Cik ca-ni kikome onoŋo myero okel kwo, ento dok okelo to bota. Pien bal onoŋo kare odonyo i cik, obwola, ka doŋ oneka woko. Pi meno, cik leŋ, ki gin ma giciko bene leŋ, tye atir, dok ber bene. Gin ma yam ber ca aye dok okelo to i koma? Pe kumeno! Bal aye onoŋo mumiyo ato, kun tiyo ki gin maber, wek omi onen woko ka maleŋ ni meno bal ennu. Kit meno gin ma giciko ca omiyo bal odoko marac mukato kare. Waŋeyo ni cik obedo gin me cwiny; kun an dano me kom ma gicato woko macalo opii i te bal. Gin ma atiyo-gu ducu pe aniaŋ iye. Pien gin ma amito pe atiyo, ento dok atiyo gin mogo ma pe amito-ni. Doŋ ka atiyo gin ma pe amito, noŋo aye ni cik ber. Meno doŋ pe an aye ma atiyo, ento bal ma bedo i iya aye ma tiyo gire. Pien aŋeyo ni gin mo maber pe ma bedo i iya, ma en aye i koma ma ginywala kwede. Atwero mito gin ma atir, ento pe atwero tiyone. Pien pe atiyo gin maber ma amito-ni, ento gin marac ma pe amito-ni aye dok atiyo. Ci ka atiyo gin ma pe amito-ni, meno doŋ noŋo pe an aye ma atiyo, ento noŋo bal ma bedo i iya aye tiyo. Mumiyo doŋ onen bota macalo cik ni, ka amito tiyo gin ma atir, ci gin marac nyiko cok kweda. Pien amaro kwano cik pa Lubaŋa, kun alwodo lokke ki iya. Ento dok aneno cik mukene i dul koma ducu, kun tye ka lweny ki cik ma i tamma, tera i opii i te cik me bal ma bedo i dul koma ducu. An ma koma kec kuman-ni, aŋa ma bilara ki i kom man ma to woko-ni? Apwoyo Lubaŋa pi Yecu Kricito Rwotwa! Doŋ an kikoma aworo cik pa Lubaŋa ki tamma, kun i koma ma ginywala kwede aworo cik me bal. Pi meno, kombeddi pe dok giŋolo kop loyo jo ma gibedo i Kricito Yecu. Pien cik pa Cwiny me kwo ma tye i Kricito Yecu doŋ ogonya woko ki i te cik me bal ki to. Gin ma onoŋo cik pe twero tiyo, pien kwowa ma ginywalowa kwede onoŋo oloko odoko goro, Lubaŋa aye ma doŋ otiyo. En ooro Wode kikome me bino i kit kom ma cal ki mewa ma bal obwoyo wokoni, macalo gitum ma gityero bot Lubaŋa pi bal. Kombeddi doŋ en oŋolo kop oloyo bal ma tye i komwa ma ginywalowa kwede, wek gin ma cik mito ocobbe i komwa, wan jo ma pe doŋ walubo kit me kom ma ginywalowa kwede, ento walubo yo pa Cwiny Maleŋ. Pien jo ma gibedo i kit pa dano, giketo tamgi bene i kom gin ma lubo kit pa dano; ento jo ma gibedo kun gilubo kit pa Cwiny Maleŋ giketo tamgi bene i kom gin me Cwiny. Tam ma lubo kit pa dano kelo to, ento tam ma lubo kit pa dano kelo to, ento tam ma lubo kit pa Cwiny Maleŋ miyo kwo ki kuc. Pien tam ma giketo i kit pa dano ki tuŋ bot Lubaŋa en kwor, pien pe winyo cik pa Lubaŋa, pe bene twero winyone. Jo ma gibedo kun gilubo kit pa dano pe gitwero yomo cwiny Lubaŋa. Ento wun pe wutye i kit pa dano, wun wutye i Cwiny, ka ce Cwiny pa Lubaŋa bedo i iwu. Ŋat mo ma pe ki Cwiny pa Kricito, noŋo en pe dano pa Kricito. Ento ka Kricito tye i iwu, kadi bed komwu to pi bal, ento cwinywu bedo kwo, pien yam doŋ gikwanowu woko ni kitwu atir. Ka ce Cwiny pa ŋat ma ocero Yecu ki i kin jo muto-ni bedo i iwu, en Ŋat ma ocero Kricito Yecu ki i kin jo muto-ni bene bimiyo kwo kadi wa i komwu ma doŋ oto woko, pi Cwiny mere ma bedo i iwu-ni. Mumiyo utmegina, watye ki banya, ento pe me kit pa dano, me lubo kit pa dano. Pien ka wubedo kun wulubo kit pa dano wubito; ento ka wuneko tic me kom woko pi Cwiny Maleŋ, ci wubibedo jo makwo. Pien jo ducu ma Cwiny pa Lubaŋa telogi, gin aye litino pa Lubaŋa. Yam pe onoŋo wugamo cwiny me bedo opii, wek wudok cen i lworo; ento wugamo cwiny me bedo litino me paco. Mumiyo wakok ni, “Abba! Wora!” Cwiny Maleŋ kikome ribbe ki cwinywa kun tuco ni, wan litino pa Lubaŋa. Ka doŋ wan litino, ci wan lule jami, wan lule jami pa Lubaŋa kun wanywako lonyone kacel ki Kricito, ka ce waciro can kacel kwede, wek bene walim deyo kacel kwede. Atamo ni can me kare man pe myero gipor ki deyo ma gibinyuto botwa. Pien ginaketa ducu gitye ka kuro nyuto litino pa Lubaŋa ki miti madwoŋ mukato kare. Ginaketa ducu onoŋo yam giketogi i te twero me gin ma tere pe, pe pi mitgi kengi, ento pi mit pa Lubaŋa ma yam oketo i te twero meno; kun gen tye ni, ceŋ mo gibigonyo ginaketa woko ki i opii me bedo gin ma top, wek gunoŋ kuc ki deyo ma gimiyo ki litino pa Lubaŋa. Waŋeyo ni jami ducu ma giketogi aketa, gubedo ka cur acura ki arem nio wa i kare-ni. Pe gin keken, wan bene ma gimiyowa Cwiny Maleŋ macalo mot mukwoŋo, ma nyuto gin ma gibimiyowa i anyim, wan bene watye ka cur acura ki i iwa kun wakuro kare me lokowa wek wadok litino me paco, en aye me koko komwa. Pien yam gilarowa pi bedo ki gen man. Pi meno gen ma kome nen noŋo pe doŋ gen. Aŋa ma geno gin ma en neno kome? Ento ka ce watye ki gen me noŋo gin ma pe waneno kome, ci wakuro gin meno kun wadiyo cwinywa. I kit acel-lu Cwiny Maleŋ bene konyowa ka ma wagoro iye. Pe waŋeyo lego Lubaŋa i kit ma myero waleg kwede, ento Cwiny kikome bako doge ma ka-kawa, kun cur laliŋliŋ. Ŋat ma ŋiyo cwiny dano ŋeyo tam pa Cwiny Maleŋ, pien Cwiny Maleŋ bako doge pi jo pa Lubaŋa kun lubo gin ma Lubaŋa mito. Waŋeyo ni i gin ducu Lubaŋa tiyo pi kelo gin maber ki jo ducu ma gimare jo ma en olwoŋogi kit macalo en oyubo. Jo ma yam en oŋeyogi con, omoko bene ni myero gunywak cal pa Wode, wek omi Wode obed latin kayo i kin utmego mapol. Jo ma yam en omoko tamme i komgi con, gin aye bene en olwoŋogi, jo ma en olwoŋogi, okwanogi ni kitgi atir; jo ma doŋ okwanogi ni kitgi atir omiyo deyo botgi. Wabiwaco aŋo mono doki i kom lok man? Ka Lubaŋa tye tuŋ botwa, ci aŋa ma lakworwa? En yam pe oweko Wode kikome, ento omiye pi wan ducu. Pe bene doŋ bimiyowa jami ducu kacel kwede? Aŋa mono ma bipido ki jo ma Lubaŋa doŋ otyeko yerogi? Lubaŋa aye ma kwanogi ni kitgi atir. Aŋa ma twero ŋolo kop loyogi? Kricito Yecu aye yam oto, dok makato meno yam gicere woko. En bene tye obedo i kabedo me deyo ka ŋet Lubaŋa yo tuŋ acuc, en aye ma bako doge piwa. Aŋa ma bipokowa ki i kom mar pa Kricito? Neno can, nyo kumo, nyo ayelayela, nyo kec, nyo bedo munero, nyo gin marac, nyo pala lucwan? Kit macalo yam gicoyo ni, “Gibedo ka nekowa dyeceŋ jwi piri, gikwanowa macalo romi me aneka.” Ento gin magi ducu watye ka loyogi matek pi ŋat ma ceŋ omarowa-ni. Pien aŋeyo ada ni, kadi to, kadi kwo, kadi lumalaika, kadi luloc, kadi gin ma tye i kare man, kadi gin ma mito bino, kadi teko, kadi gin ma tye malo, kadi gin ma tye piny, kadi ki gin mo keken i kom ginaketa ducu, pe bibedo ki twero mo me pokowa woko ki i kom mar pa Lubaŋa ma tye i Kricito Yecu Rwotwa. Atye ka loko lok ada i Kricito, pe aloko goba; ŋec ma i cwinya ma nyuto balla bota bene bedo caden kacel ki Cwiny Maleŋ, ni, atye ki cwercwiny madit kun cwinya rem mada ma pe jukke. Pi mitta kekena, kono yam giceno an kikoma woko, wek gikwanya woko ki bot Kricito, pi utmegina, ma gin wadina me rokka. Gin jo Icrael, jo ma Lubaŋa olokogi gudoko litinone me paco, omiyogi deyone ki gicikke ducu, omiyogi bene cik ki kit yo ma myero guwore kwede, dok bene yam onoŋo ocikke pigi, ni ebimiyo botgi gin mogo mabeco. Kwarowa macon ducu yam obedo megi, dok Kricito bene ginywalo i kingi i kit pa dano. Myero gipwo Lubaŋa ma loyo jami ducu nakanaka. Amen. Ento pe awacci, lok pa Lubaŋa pe otiyo gin mo; pien jo ma ginywalo i kin jo Icrael pe gin ducu jo Icrael, dok bene gin ducu pe litino pa Abraim, pien gin likwaye; ento yam gicoyo ni, “Litino pa Icaka aye gibilwoŋogi ni likwayu.” Man te lokke ni, pe litino ma ginywalogi i kit pa dano ma gin aye gibedo litino pa Lubaŋa, ento litino ma ginywalogi pi cikke pa Lubaŋa aye gilwoŋogi ni gin likwayo. Pien man aye gin ma cikke oloko ni, “Abidwogo i kare macalo man, ka doŋ Cara binywalo latin awobi.” Pe meno keken, ento i kare ma Labeka bene oyac ki laco acel, ma en aye kwarowa Icaka, ento ma pud peya onywalo litinone, dok bene ma peya gutiyo gin mo maber nyo marac, wek omi yub pa Lubaŋa me yer omedde, pe pi tic ento pi lwoŋone, giwaco bot Labeka ni, “Latin matidi biloyo latin kayo.” Kit macalo gicoyo ni, “Yam amaro Yakobo, ento akwero Ecau.” Wan doki wabiwaco gin aŋo? Wabiwaco ni Lubaŋa pe ŋolo kop atir dok kakare? Pe kumeno! Pien yam owaco bot Moses ni, “Abitimo kica bot ŋat ma abitimo kica bote, dok bene abinyuto berra bot ŋat ma abinyuto berra bote.” Kumeno, pe cuŋ i kom gin ma dano mito, nyo i kom ticce ma en canne pire, ento cuŋ i kom kica pa Lubaŋa. Pien ginacoya waco bot Parao ni, “Atiŋi malo pi lok man wek omi anyut tekona i komi, wek nyiŋa oywek i wi lobo ducu.” Kit meno en timo kica bot ŋat ma en mito etimme kica, dok bene loko cwiny ŋat ma en mito doko nwaŋ. Gwok nyo ibipenya ni, “Piŋo mono en pud waco ni wan lubalo? Aŋa ma twero geŋo gin ma en mito?” Ento in dano adana-ni in aŋa, ma igamo dog Lubaŋa? Gin ma gicweyo acweya twero penyo ŋat mucweye ni, “Piŋo icweya kuman?” Lacwec pe ki twero i kom lobo, me cweyo atabo acel me wel ki mukene ma pe me wel, kun tiyo ki lobo ma en oŋino aŋina acel madit? Onoŋo bedo niŋniŋ ka Lubaŋa odiyo cwinye pi kare malac i kom atabo mogo me akemone ma doŋ guromo me aneka woko, pi mito nyuto akemone ki me miyo tekone oŋene? Otimo man wek emi lonyo me deyone oŋene i kom atabo me kica, ma en yam oyubo wa con wek obed ki deyo, man aye wan kikomwa, wan jo ma en olwoŋo, pe ki i kin jo Icrael keken, ento kadi wa ki i kin Lurok ducu bene. Kit macalo yam en oloko i buk pa Kocea ni, “Jo ma yam onoŋo gin pe jona, abilwoŋogi ni, ‘jona’, dako ma onoŋo yam pe amaro abilwoŋo ni, ‘dako ma amaro.’ ” “Dok bene i kabedo ka ma yam awaco botgi iye ni, ‘Wun pe wujona,’ gibilwoŋogi iye ni, ‘litino pa Lubaŋa makwo.’ ” Icaya bene yam okok ki dwan maloŋo i kom Icrael ni, “Kadi wel jo Icrael obed rom ki kweyo me dog nam, jo mogo manok ki i kingi ma gudoŋ aye gibibwot; pien Rwot biŋolo kop i wi lobo bicobo bene woko oyotoyot.” Dok tye kit macalo yam Icaya oloko ni, “Kono nene Rwot me mony pe oweko botwa likwayo mogo, kono wabedo calo Codom, kono doŋ wadoko calo Gomora.” Wan doki wabiwaco gin aŋo? Wabiwaco ni Lurok ma yam pe guyelle pi doko jo ma kitgi atir doŋ gikwanogi ni kitgi atir, ento kitgi ma atir meno gunoŋo pi niye. Ento jo Icrael ma yam guyelle pi cobo cik ni wek gibed jo ma kitgi atir, cobo cik oloyogi. Piŋo? Pien pe gubedo ka yenyone i yo me niye, ento gubedo ka yenyone calo gin ma ocuŋ i kom tic. Guyokke ki got ma yoko dano-ni, kit macalo gicoyo ni, “Nen, doŋ aketo got ma yoko dano i Cion, ariya ma miyo dano poto; lewic pe bimako ŋat ma oye en.” Utmegina, gin ma amito ki cwinya ducu ma alego Lubaŋa pire, en aye ni myero jo Icrael gularre. An abedo cadengi kun aŋeyo ni gumoko matek i kom Lubaŋa, ento kadi bed gumoko, ci pe gucuŋo i ŋec kikome. Onoŋo pe giŋeyo kit ma Lubaŋa kwano kwede dano ni kite atir, ento gubedo ka yenyo ni gitwero noŋo kit ma atir pigi kengi, pe gumine kengi i kit ma atir ma Lubaŋa miyo. Pien cik doŋ ogik woko i Kricito, wek omi jo ma ye en gikwangi ni kitgi atir. Moses yam owaco ni dano ma tiyo tic ma atir ma cik mito, bikwo pire. Ento kit ma atir ma ginoŋo pi niye loko kit man ni, “Pe ilok kekeni ni, ‘Aŋa ma biito malo i polo? (ni, me kelo Kricito piny), nyo ni, ‘Aŋa ma bidonyo i bur ma tere pe gik?’ (ni, me kelo Kricito woko ki i kin jo muto). Ento waco gin aŋo? Waco ni, “Lok man doŋ tye cok kwedi, tye i dogi ki i cwinyi bene,” ma en aye lok i kom niye ma watito pire-ni. Pien ka ituco ki dogi ni, “Kricito aye Rwot,” ma kun iye bene ki i cwinyi ni Lubaŋa yam ocere woko ki i kin jo muto, ci ibilarre. Pien dano ye ki cwinye, en aye miyo gikwane ni kite atir, ka dok tuco ki doge, ka doŋ miyo Lubaŋa lare. Pien coc ma yam gicoyo i ginacoya wacci, “Lewic pe bimako ŋat ma ye en.” Apokapoka mo pe i kin Lujudaya ki jo Grik; gin ducu Rwotgi acel, en bene poko lonyone bot jo ducu ma kok bote. Yam gicoyo ni, “Jo ducu ma gilwoŋo nyiŋ Rwot gibilarogi.” Ento dano gibikok bote niŋniŋ, ma peya guye en? Gitwero ye en kono niŋniŋ ka pe guwinyo lok ma gitito i kome? Gitwero winyo lok i kome niŋniŋ ka ŋat mo pe ma tito lokke botgi? Dano gitwero tito lok niŋniŋ ka pe giorogi? Kit macalo yam gicoyo ni, “Neno tyengi ber rom mene jo ma kelo lok me kwena maber!” Ento pe gin ducu yam guye lok me kwena maber; pien Icaya yam oloko ni, “Rwot, aŋa ma yam oye lok ma wan watito?” Adada, niye bino pi winyo lok ma gitito, lok ma giwinyo a i lok ma gitito i kom Kricito. Ento koŋ amito apeny ni, “Onoŋo yam pe guwinyo?” Guwinyo, kit macalo yam gicoyo i Jabuli ni, “Dwangi winnye teretere i wi lobo ducu, ki lok ma giloko oo wa i agikki piny.” Dok apenyo ni, “Jo Icrael mono yam pe guniaŋ?” Moses aye ma okwoŋo waco ni, “Abimiyo nyeko makowu i kom jo ma pe gin rok kikome, abimiyo kiniga makowu i kom rok mamiŋ.” Icaya doki cwinye obedo tek me waco ni, “Jo ma yam pe giyenya doŋ gunoŋa, doŋ bene atyeko nyutte woko ka maleŋ bot jo ma onoŋo pe gipenyo pira.” Ento i kom jo Icrael owaco ni, “Yam abedo ka ryeyo ciŋa dyeceŋ jwi bot jo ma pe giwinyo doga, jo ma ŋipyem kweda.” Apenyo ni, “Lubaŋa mono doŋ okwero jone woko?” Pe kumeno gire. An kikoma bene an Laicrael, lakwar Abraim, ma i kaka pa Benjamin. Lubaŋa pe okwero jone ma yam en oŋeyogi con. Pe wuŋeyo gin ma yam gicoyo i ginacoya ma oloko lok i kom Elia, kit ma en obako kwede doge bot Lubaŋa i kom jo Icrael ni, “Rwot, doŋ guneko lunebini woko, gumuko keno tyerri-gu woko ducu, an kena aye doŋ adoŋ, dok bene gimito neka woko.” Ento Lubaŋa yam odokke iye gin aŋo? Odok iye ni, “Pud aweko jo alip abiro gudoŋ bota, ma peya gurumo coŋgi i nyim Baal.” I kit yo acel-lu tye jo mogo i kare man ma gudoŋ, ma Lubaŋa oyerogi pi kicane. Ci ka giyerogi pi kica, man noŋo doŋ pe ocuŋ i kom tic ma gin gutiyo; ka nene ocuŋ i kom tic ma dano otiyo, kono kica doŋ pe gilwoŋo ni kica. Gin aŋo doki? Jo Icrael pe gunoŋo gin ma gubedo ka yenyone. Jo ma giyerogi keken aye gunoŋo, ento jo mukene onoŋo cwinygi odoko nwaŋ, kit macalo yam gicoyo ni, “Lubaŋa doŋ omiyo botgi cwiny me diŋo, omiyo waŋgi pe neno, itgi bene pe winyo lok, kadi wa onyoo.” Daudi bene owaco ni, “Wek karamagi ma gicamo-ni otyekgi woko macalo owic ma makogi; wek obed gin ma miyo gipoto i bur pi culo waŋ balgi. Mi waŋgi ocor woko, wek pe gunen piny; mi pyergi ogom woko matwal.” Dok apenyo ni, “Jo Icrael yam guyokke gumito poto woko piny?” Pe kumeno! Pi balgi omiyo larre bene doŋ obino bot Lurok, wek omi nyeko omak jo Icrael. Ka balgi doŋ okelo lonyo bot lobo, dok bene ka potogi okelo lonyo bot Lurok, berre doŋ bibedo rom mene ka gin ducu gudwogo woko liweŋ? Kombeddi atye ka lok kwedwu, wun Lurok. Doŋ kit macalo an lakwena kwede bot Lurok-ki, adworo ticca, wek gwok nyo ami nyeko omak jo me rokka, ka wek alar jo mogo ki i kingi. Pi bologi woko omiyo Lubaŋa odwoko lobo ducu bote; ka doŋ ogamogi, ci bikelo aŋo? Pe bibedo calo kwo ma oa ki i kin jo muto? Ka ginywaŋo moko manok ma gityero calo gin me wi mwaka, moko ducu noŋo doŋ leŋ; ka ce lwit yat leŋ, ci jaŋe ducu bene gibedo leŋ kit meno. Ento ka ce jaŋe mogo gituro woko ki i kom yat jeituni maberrre, ka doŋ gijako jaŋ yat jeituni mo me tim, ci gicomo ka-kagi wek omok i tyen yat maber ca, ka doŋ cako nywako ywayo pige ma miyu ma a ki i lwite. Jaŋ yat ma gijako ki i tim ca en aye in; ento pe myero iwakke i kom jaŋe mukene ca. Kadi bed iwakke, pe in aye ma itiŋo lwite, ento lwite aye ma otiŋi. Ibiwaco ni, “Yam gituro jaŋe mogo ni wek gicoma i kom yat.” Adada, yam giturogi woko pien gin pe guye Lubaŋa, in pud icuŋ pien niyeni tye. Pe myero ibed ki tam me wakke, ento bed ki lworo. Ka Lubaŋa yam pe oweko jaŋ yat kikome, ci doŋ pe biweki. Koŋ inen kica pa Lubaŋa ki gerone. En ger i kom jo ma gupoto, ento nyuto kicane boti, ka imedde kun icuŋ i kicane. Ka pe, gibitoŋi woko bene. Dok gin Lujudaya bene ka guweko bedo laboŋo niye, ci gibidwokogi i kom yat; pien Lubaŋa tye ki twero me dwokogi iye. Pien in Larok irom ki jaŋ yat jeituni me tim ma gitoŋo woko, gicomo i kom jeituni maberre, ma yam onoŋo pe olot i kom yat jeituni ma gipito apita. Pe bedo yot twatwal bot Lubaŋa me dwoko jaŋ yat mukene ca i kom yat kikome ma yam giturogi ki iye-ni? Utmegina, tye muŋ mo ma amito wuŋe, wek omi pe wutam kekenwu ni wuryek; man en aye ni, jo Icrael cwinygi odoko nwaŋ pi kare mo manok, nio ka wel Lurok biromo. Lacen doŋ Lubaŋa bilaro jo Icrael ducu, kit macalo yam gicoyo ni, “Lalar bibino kun a ki i Cion, en bikwanyo kit me lworo Lubaŋa woko ki bot Yakobo”; “man aye gicikke ma abiketo kwedgi i kare ma abikwanyo balgi woko.” Doŋ pi lok ma dok i kom lok me kwena maber, gin gudoko lukwor pa Lubaŋa piwu, ento pi lok ma kemo yer, Lubaŋa marogi pi kwarogi. Mot me kica pa Lubaŋa, ki lwoŋone, pe twero lokke. Yam pe wuwinyo dog Lubaŋa, ento kombeddi doŋ en otimo kica botwu, ma onoŋo doŋ gin gukwero bedo ki winy woko i kome. I kit acel-lu kombeddi doŋ gukwero winyo doge i kare ma en otimo botwu kica, wek omi gin bene gitim kica botgi kit meno. Pien Lubaŋa oketo dano ducu i mabuc me kwero winyo doge, wek etim kica bot jo ducu. Lonyo pa Lubaŋa dwoŋ ma okato kare! Ryekone kacel ki ŋecce tut twatwal! Lok ma en ŋolo tere pe tatte, niaŋ i kite tek! “Aŋa ma ŋeyo tam pa Rwot? Aŋa ma yam miye tam?” “Aŋa mono ma yam koŋ omiye gin mo me mot, ka en bene odwoko cen bote?” Pien en aye yam oketo jami ducu, jami ducu yam obedo tye pire, dok bene obedo mere. Deyo obed bote nakanaka. Amen. Pi meno, utmegina, abako doga botwu pi kica pa Lubaŋa, wumine kenwu macalo gitum makwo ma gityero bot Lubaŋa, gin maleŋ ma yomo cwiny Lubaŋa; ma en aye woro me cwinywu. Pe wulub tam me lobo man, ento wuwek Lubaŋa olok tamwu odok nyen, wek omi wuniaŋ i gin ma Lubaŋa mito, gin maber, ma yomo cwinye, ma roc mo pe iye. Pi mot me kica ma gimiyo bota atito botwu ducu ni, dano acel acel myero pe opar pi ditte mukato kare, ento wubed ki par ma tye atir, kun ŋat acel acel lubo kit pok me niye ma Lubaŋa doŋ opimo omiye. Watye ki dul komwa mapol i kom acel, dul kom magi bene pe gitiyo kit tic acel keken; kit meno, wan bene kadi bed wapol, wan kom acel i Kricito, ma dano acel acel bedo calo dul kom lawote. Watye ki mot mapatpat ma lubo gum ma Lubaŋa omiyo botwa; myero wati kwedgi. Ka ce gimiyo botwa mot me tito lok pa Lubaŋa, myero watit kit macalo niyewa tye kwede. Ka ce omiyowa mot me tic pi dano, myero wati tic botgi. Ŋat ma lapwony myero opwony dano; ŋat ma cuko cwiny dano myero ocuk cwinygi; ŋat ma poko jamine, myero opok ki cwinye ducu; ŋat ma latel myero otel dano ki mitkom, ŋat ma konyo lucan, myero okonygi ki yomcwiny. Wuwek mar ma wutye kwede obed mar me ada. Wukwer gin marac, wumok matek i kom gin maber. Wumarre kekenwu ki cwinywu ducu macalo omego, kun dano acel acel miyo deyo bot lawote. Komwu obed mit, laboŋo wackom, wubed lyet wa i cwinywu, kun wutiyo bot Rwot macalo luticce. Cwinywu obed yom pi gin ma wugeno; wudi cwinywu i can, kun wumine kenwu i lego Lubaŋa ki cwinywu ducu. Wupok jamiwu bot jo pa Lubaŋa ma gitye ki peko; wuket cwinywu bene ka gwoko welo. Wuleg gum i kom jo ma giunowu; wulam gum botgi, ento pe wucengi acena. Wubed ki yomcwiny kacel ki jo ma tye ki yomcwiny, wukok bene kacel ki jo ma kok. Wubed ki niaŋ ma atir i kinwu kekenwu; pe wuwakke, ento wuribbe ki dano ata ducu. Pe wukette kekenwu ni wuryek. Pe wucul waŋ gin marac ki gin marac i kom dano mo, ento wutam pi gin ducu ma dano ducu pwoyo ni ber. Ka ce twerre ki tuŋ botwu, myero wubed ki kuc ki dano ducu. Luwota ma amaro, pe wucul kwor, ento wuwek kare ki kiniga pa Lubaŋa, pien yam gicoyo ni, “An aye ma abiculo kwor, abiculo waŋe lacen, man Rwot ma owaco.” Yam gicoyo bene ni, “Ka ce kec neko lakworri, miye kwon ocam; dok ka orwo pii neke, miye pii omati; pien ka itimo kumeno, ibibako miri mac i wiye.” Pe wuwek gin marac olowu, ento wun aye myero wulo gin marac ki timo gin maber. Dano acel acel myero owiny luloc ma giloye; pien pe tye kit twero mo ma pe oa ki bot Lubaŋa; luloc ma gitye-ni Lubaŋa aye oketogi. Pi meno ŋat ma pyem ki luloc noŋo pyem ki ŋat ma Lubaŋa oyero; gibiŋolo kop i kom jo ma pyem kwedgi. Pien jo ma tiyo gin maber pe gibedo ki lworo mo i kom luloc, ento jo ma tiyo gin marac aye gibedo ki lworo. Imito ni pe ibed ki lworo i kom dano ma tye ka loc? Ti gin maber, ci en bipwoyi; pien en latic pa Lubaŋa ma tiyo ticce pi konyi. Ento ka itimo gin marac, ci myero ibed ki lworo i kome, pien twero me neko dano doŋ gimiye woko. En latic pa Lubaŋa ma kelo kiniga pa Lubaŋa i kom jo ma timo gin marac. En mumiyo myero wuwiny luloc, pe pi lworo kiniga pa Lubaŋa keken, ento me miyo wek wubed bene ma iwu leŋ. Man bene aye tyen lok mumiyo wuculo mucoro, pien luloc gin lutic pa Lubaŋa ma gitiyo tic meno kikome. Wucul gin ma myero bot ŋat acel acel, wucul mucoro bot wegi mucoro, ki ajog bot wegi ajog, wulwor jo ma myero me alwora, wuwor jo ma myero me awora. Pe wubed ki banya pa ŋat mo i komwu. Ento wubed ki banya me marre kekenwu; pien jo ma maro luwotgi noŋo doŋ gucobo cik. Pien cik mogo ma waco ni, “Pe itim abor, pe ineki, pe ikwal, cwinyi pe opukke i kom jami pa ŋat mukene,” ki kwa cik mogo mukene-gu gucokke kacel ki lok man ni, “Mar lawoti macalo imarre keni.” Ŋat ma maro dano, pe timo gin marac bot dano lawote; pi meno mar aye ma cobo cik. Wuti man kun wuŋeyo kare ma wutye iye, ni, kare doŋ oromo myero wuco woko ki i waŋ nino. Pien larrewa doŋ onyiko cok twatwal, kato ma i kare ma yam wakwoŋo ye iye Rwot-ti. Dyewor doŋ cok tum, piny doŋ mito ru. Doŋ wabolu tic me piny macol woko, waruku jami lweny me dyeceŋ. Myero walubu kit ma myero me dyeceŋ, laboŋo maro tuko marac me yomcwiny marac, ki mero, laboŋo timo abor ki tim mogo me tarwaŋ, laboŋo daa ki nyeko. Wuruk Rwot Yecu Kricito calo wuruko boŋowu, dok bene pe wutam pi kwowu me kit pa dano ma ginywalowu kwede pi cobo mitte. Wujol dano ma niyene goro, ento pe wupyem kwede i kom tam mogo ma en tamo. Dano mo twero bedo ki niye me camo gin mo keken, ento ŋat ma niyene goro camo pot dek keken. Dano ma camo gin ducu myero pe oca ŋat ma pe camo, ki dano ma pe camo gin ducu pe myero oŋol kop i kom ŋat ma camo gin ducu; pien Lubaŋa doŋ otyeko jole. In aŋa mono ma iŋolo kop i kom latic pa ŋat mukene-ni? Meno lok pa ŋat ma loye me ŋolo kop i kome, ka cuŋo nyo ka poto. Ento en bicuŋ gire, pien Rwot tye ki twero ma miyo en cuŋ. Dano acel paro ni nino acel dit kato nino mukene, kun noŋo dano mukene paro ni nino ducu rom. Dano acel acel myero omok tamme pire kene. Dano ma paro pi nino mo, paro pi Rwot, ki ŋat ma camo bene camo pi Rwot, pien pwoyo Lubaŋa; dano ma kwero cam bene kwero pi Rwot, pwoyo Lubaŋa bene. Pien dano mo pe ki i kinwa ma kwo pire kene, dok bene dano mo pe ma to pire kene. Ka wakwo, wakwo pi Rwot; ka wato bene, wato pi Rwot. Mumiyo kadi wakwo, nyo wato, wan jo pa Rwot. Pien Kricito yam oto ka doki obedo kwo wek ebed Rwot pa jo muto ki jo makwo. Piŋo iŋolo kop i kom omeru? Nyo in, piŋo icayo omeru? Wan ducu wabicuŋ i nyim komker me ŋolo kop pa Lubaŋa. Pien yam gicoyo ni, “Macalo atye kwo-ni man Rwot ma owaco. jo ducu gibirumo coŋgi i nyima, ki dano ducu gibipako Lubaŋa.” Kit meno, ŋat acel acel i kinwa bidok i lok ma i kome pire kene bot Lubaŋa. Myero doŋ wagiku ŋolo kop woko i kom luwotwa; ento gin ma myero wamoki en aye pe me tiyo gin mo ma bimiyo ominwa yokke nyo poto i bal. Aŋeyo dok aniaŋ maber i Rwot Yecu ni, pe tye gin mo ma obedo me kwer pire kene; ento bedo me kwer bot ŋat ma tamo ni obedo me kwer. Ka ce imiyo omeru bedo ki cwercwiny pi gin ma in icamo, noŋo doŋ pe itye ka lubo yo me mar. Pe iwek gin ma in icamo obal kwo pa dano ma Kricito oto pire. Pe wuwek dano gulok i kom gin maber ki tuŋ botwu ni obedo gin marac. Pien ker pa Lubaŋa pe te lokke cam ki mat, ento kit ma atir, kuc, ki yomcwiny ma Cwiny Maleŋ miyo. Dano ma tiyo tic pa Kricito kit meno aye yomo cwiny Lubaŋa, dok bene dano gipwoye. Myero doŋ watamu pi gin ma kelo kuc ki gin ma doŋo niyewa i kinwa kekenwa. Pe wubal tic pa Lubaŋa pi lok me cam mamwa-ni. Jami ducu leŋ, ento bedo rac ka dano mo camo gin ma miyo lawote poto i bal. Bedo ber mada ka pe icamo riŋo, nyo kadi ki mato koŋo, nyo tiyo gin mo ma bimiyo omeru poto. Doŋ niye ma itye kwede myero ibed kwede i kin in ki Lubaŋa keken. Tye ki gum dano ma pe ki tyen lok ma ŋolo kop loye kekene i gin ma en pwoyo. Ento dano ma kalo akala i cwinye kop loye ka ce ocamo, pien gin ma en timo-ni noŋo pe oa i niye, pien gin ducu ma pe oa i niye meno bal. Wan jo ma watek myero wakonyu jo magoro i gin ma loyogi, ento pe watamu pi yomo cwinywa kekenwa. Ŋat acel acel i kinwa myero oyom cwiny dano lawote, me konye, wek odoŋ i niyene. Pien Kricito yam pe oyomo cwinye kekene, ento obedo kit macalo yam gicoyo ni, “Yet pa jo ma giyeti kwede doŋ opoto i koma.” Gin ducu ma yam gicoyo i kare macon ca onoŋo gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya. Wucir can ki cuko cwiny ma a ki bot Lubaŋa; myero en omi wubed ki niaŋ maber i kinwu kekenwu, kun wulubo kit pa Kricito Yecu, wek wuribbe ka pako Lubaŋa Won Rwotwa Yecu Kricito ki dwan acel. Wujolle kekenwu, kit macalo Kricito yam doŋ ojolowu kwede, pi deyo pa Lubaŋa. Atittiwu ni, Kricito yam olokke odoko latic ma okonyo Lujudaya, pi nyuto ni Lubaŋa loko lok ada, kun bene cobo gin ma yam Lubaŋa ocikke iye bot kwarowa macon, dok pi miyo Lurok gubed ka pako Lubaŋa pi kicane, kit macalo yam gicoyo ni, “Pi meno abikori i kin Lurok, dok abiwero wer me pako nyiŋi.” Dok yam bene owaco ni, “Wun Lurok, wubed ki yomcwiny kacel ki jone”; dok ni, “Wupak Rwot, wun Lurok ducu, wek lwak me rok ducu gupake.” Icaya bene yam owaco ni, “Lakwar Yece bibino, en bibino ka loyo Lurok; Lurok bene gibigeno en.” Lubaŋa ma miyo dano ducu bedo ki gen myero omi yomcwiny ducu ki kuc opoŋ i iwu pi niyewu i kome, wek genwu obed ka medde ameda pi tek pa Cwiny Maleŋ. Aŋeyo atir ni wun jo mabeco twatwal, wutye ki ŋec muromo, dok bene wutwero pwonnye giwu kekenwu. Ento doŋ atyeko coyo botwu lok mogo ki tekcwiny madit, kombeddi amito apo wiwu iye. Atimo meno pi mot ma Lubaŋa omiya, me bedo latic pa Kricito Yecu bot Lurok. Atye ka tic macalo ajwaka pa Lubaŋa kun bene atito lok me kwena maber ma oa ki bot Lubaŋa, wek omi Lurok gubed calo gitum ma gityero ma Lubaŋa pwoyo, ma Cwiny Maleŋ doŋ olonyo woko odoko maleŋ. Atye ki tyen lok ma miyo awakke i Kricito Yecu pi ticca ma atye ka tiyone pi Lubaŋa. Pe abiette ka loko lok mo mukene, ento kono pi gin ma Kricito otiyo pi kelo lurok i te locce keken, kun tiyo kacel kweda i lok ki i tic, pi teko ma onen i kom lanyut mogo ki taŋo mogo, pi tek pa Cwiny Maleŋ. Meno omiyo doŋ atyeko tito lok me kwena maber i kom Kricito atika, cakke ki i Jerucalem, wok kwede wa i Illiriko; pien onoŋo aketo cwinya me tito lok me kwena maber ka ma yam dano peya guwinyo nyiŋ Kricito, wek omi pe aket gedo i wi guti ma yam doŋ ŋat mukene ocako gero iye mere, ento wek obed kit macalo gicoyo ni, “Jo ma yam peya gitito botgi lok i kome doŋ gibinene, jo ma yam peya guwinyo pire gibiniaŋ i kome.” Man aye gin ma obedo ka geŋa tyen mapol me bino botwu. Ento kombeddi doŋ pe atye ki ka tic mo kany, dok bene onoŋo doŋ abedo ka mito pi mwaka mapol ni abin botwu. Ageno ni abinenowu ka awok ki kunnu ma noŋo akato acito i Cipein, ageno bene ni wubikonya i wotta me cito kunnu lacen, ma noŋo koŋ ari botwu pi kare manoknok. Ento kombeddi pud koŋ acito i Jerucalem pi tero jami me kony bot jo pa Lubaŋa. Pien jo pa Lubaŋa ma gitye i Makedonia ki Akaya doŋ gumoko tamgi me jogo lim me konyo jo pa Lubaŋa ma gitye i Jerucalem ma can omakogi. Gumoko tamgi kit meno, ento gitye bene ki banya bot jo Jerucalem, pien ka Lurok ginywako gamo mot me Cwiny kacel ki Lujudaya, myero gin bene gukony Lujudaya ki jami ma mitte me gwoko kom. Ka doŋ meno otum, ma noŋo doŋ atyeko miyo botgi gin ma gijogo pigi, ci abiwok ki botwu ka doŋ akato acito i Cipein. Aŋeyo ni ka ao botwu noŋo abino ki gum madit ma oa ki bot Kricito. Abako doga botwu utmegina, pi Rwotwa Yecu Kricito ki pi mar pa Cwiny Maleŋ, wuket tek wuribbe kacel i legawu pira bot Lubaŋa, wek abwot woko ki bot jo ma pe guye Kricito ma gitye i Judaya, dok bene wek omi jo pa Lubaŋa ma gitye i Jerucalem gupwo tic ma acito ka tiyone kunnu. Pi meno ka Lubaŋa oye wek abin botwu ki yomcwiny madwoŋ, ci koŋ aywe bene kacel kwedwu. Lubaŋa won kuc obed kwedwu ducu. Amen. Anyuto botwu laminwa Foibe, ma en latic pa lwak jo ma guye Kricito ma tye i Kenkeria. Wujole i Rwot kit macalo jo pa Lubaŋa myero gujol kwede dano, dok bene myero wukonye i gin ducu ma en bimito ki botwu; pien yam okonyo jo mapol, okonya bene. Wumot Pricika ki Akwila, ma gitiyo kacel kweda i Kricito Yecu. Gin yam gudyero kwogi pi laro kwona; pe an kena aye ma apwoyogi, ento kadi wa Lurok ducu ma guye Kricito bene gipwoyogi. Wumot bene jo muye Kricito ma gicokke i otgi. Wumot larema Epaenato; en aye obedo ŋat mukwoŋo ye Kricito i Acia. Wumot Maliam ma yam otiyo tic matek i kinwu-ni. Wumot Anduroniko ki Yunia, ma gin wadina ma yam gitweyogi kacel kweda i mabuc. Gin jo ma giŋene mada i kin lukwena, gin bene aye ma gukwoŋo bedo i Kricito kweda. Wumot Ampuliato, ma en larema ma amaro i Rwot. Wumot Urbano latic wadwa i Rwot, ki Citakic larema ma amaro. Wumot Apelle, ma en dano ma genne i Kricito. Wumot jo me ot pa Aricitobulo. Wumot Kerodion ma en watta, ki jo me ot pa Narocico ma gitye i Rwot, ma gin aye Terapaina ki Terpoca, ki larema Perici bene ma otiyo tic matek i Rwot. Wumot Rupo, dano ma ŋene i Rwot, gin ki minne ma alwoŋo ni maa bene. Wumot bene Acinkerito, Pelegon, Keremec, Patroba, Keremac ki utmego ma gitye kacel kwedgi. Wumot bene Pilologo ki Julia, Nerea gin ki laminne, ki Olimpa, ki jo pa Lubaŋa ducu ma gitye kacel kwedgi. Wumotte kekenwu ki mot maleŋ me mar. Lwak jo ma guye Kricito i kabedo mapatpat ducu gumotowu. Abako doga botwu, utmegina, wunen jo ma gikelo apokapoka i lok ma miyo dano poto i bal, ma pe rwatte ki pwony ma yam gipwonyowu kwede. Pe wuribbe ki jo macalo meno. Jo macalo meno pe gin lutic pa Rwotwa Kricito; rwotgi ma gimaro aye igi. Gibwolo tam pa dano ma gipe ki tam marac, ma kun noŋo giloko lok maber ma winyone mit adada. Kit winy ma wubedo kwede bot Lubaŋa doŋ owinnye bot jo ducu, meno aye gin mumiyo wuyomo cwinya. Doŋ amito wubed luryeko i gin maber, ento myero wubed maleŋ laboŋo bal; ci Lubaŋa won kuc binyoto Catan woko oyotoyot piny i te tyenwu. Kica pa Rwotwa Yecu Kricito obed kwedwu. Temceo ma tiyo kacel kweda i Rwot omotowu; ki Lukio, ki Jacon, ki Cocipater, ma gin giwadina. An Tertio aye ma acoyo waraga man amotowu i Rwot. Gayo ma en ŋat ma abuto i ode bene omotowu, en aye ma gwoko lwak ducu muye Kricito. Eracto ma en lakan-lim me gaŋ man, ki ominwa Kwarto bene gumotowu. [ Kica pa Rwotwa Yecu Kricito obed kwedwu wun ducu. Amen.] Myero wami deyo bot Lubaŋa ma twero miyo wucuŋ matek, macalo apwonyo kwede i lok me kwena maber ma abedo ka titone-ni, ki lok ma gitito i kom Yecu Kricito. Muŋ man yam Lubaŋa okano oliŋ woko litik pi lwak mwaka mapol, ka lacen doŋ oyabo ka maleŋ. Kombeddi doŋ ginyuto woko ka maleŋ i lok ma lunebi yam gucoyo ma omiyo lurok ducu guŋeyo kit macalo Lubaŋa ma pe to yam ociko, wek omi gulub niye. Deyo obed bot Lubaŋa nakanaka, ma en keken aye won ryeko, pi Yecu Kricito. Amen. Waraga man oa ki bot Paulo, ma pi mit pa Lubaŋa yam Lubaŋa olwoŋe me bedo lakwena pa Kricito Yecu, ki dok ki bot ominwa Coctene. Bot jo muye Lubaŋa ma gitye i Korint, ma gin jo ma gilonyo gudoko maleŋ i Kricito Yecu, ma Lubaŋa olwoŋogi me bedo jone kikome, kacel ki jo ducu ma gitye i kabedo ducu, ma gilwoŋo nyiŋ Rwotwa Yecu Kricito, Rwotgi ki mewa bene: Lubaŋa Wonwa ki Rwotwa Yecu Kricito omiwu kica ki kuc. Nino ducu amiyo pwoc bot Lubaŋana pi kicane ma en omiyowu i Kricito Yecu, pien pi bedowu i Kricito omiyo doŋ wudoko lulonyo i yo ducu. Wutye bene doŋ ki ŋec ducu, dok wutwero doŋ lok maber, pien lok ma wabedo ka titone i kom Yecu Kricito odonyo matek i iwu. Omiyo mot mo me cwiny pe orem botwu, ma kun pud wutye ka kuro kare me nyuto Rwotwa Yecu Kricito. En bigwokowu miyo wucuŋ matek nio wa i agikki, noŋo pe wutye ki gin mo ma myero gidotwu iye i nino pa Rwotwa Yecu Kricito. Lubaŋa ma olwoŋowu me ribbe kacel ki Wode Yecu Kricito Rwotwa, en ŋat ma genne. Abako doga botwu, utmegina, pi nyiŋ Rwotwa Yecu Kricito, ni wun ducu myero wulok lok acel, apokapoka mo pe myero obed tye i kinwu, ento myero wuribbe i cwiny ki tam acel. Pien jo mogo ma gua ki bot Koloe gutitta lok i komwu, ni meno daa tye i kinwu, utmegina. Gin ma awaco en aye ni, dano acel acel i kinwu tyeka waco ni, “An dano pa Paulo,” nyo ni “An dano pa Kepa,” “An dano pa Apolo,” “An dano pa Kricito.” Kricito mono iye opokke? Yam kono giguro Paulo i kom yatariya piwa? Onoŋo yam gibatijawu i nyiŋ Paulo? Apwoyo Lubaŋa mada pien an gira yam pe abatija dano mo i kinwu, kono abatija Kricipo ki Gayo keken, wek ŋat mo pe owac ni gibatija en i nyiŋa. Abatija bene jo ma i ot pa Citepana; pe doŋ atwero po ka onoŋo dok abatija ŋat mukene. Kricito pe ocwala ka batija dano, ento ka tito lok me kwena maber ma pe atito ki ryeko mo me lok, wek pe omi to pa Kricito i kom yatariya obed gin ma konnye pe. Lok i kom yatariya ki tuŋ bot jo ma tye ka rwenyo woko, nen calo gin me miŋo, ento ki tuŋ botwa, wan jo ma Lubaŋa tye ka larowa, obedo tek pa Lubaŋa. Pien yam gicoyo ni, “Abityeko ryeko pa jo maryek, abibalo niaŋ pa jo ma ŋeyo piny woko.” Jo maryek tye kwene? Lupwony-cik kono tye kwene? Lupyem me lobo man tye kwene? Lubaŋa pe oloko ryeko me lobo man odoko me miŋo? Pi ryeko pa Lubaŋa omiyo jo me lobo pe guŋeye pi ryekogi, ento Lubaŋa pi twerone olaro jo muye en pi lok me miŋo ma watito. Lujudaya gimito neno lanyut mogo, ki jo Grik giyenyo megi ryeko; ento wan giwa watito pi Kricito ma yam giguro i kom yatariya, ma lokke ki tuŋ bot Lujudaya obedo lok atata, ki bot Lurok nen lok me miŋo. Ento bot jo ma gilwoŋogi, Lujudaya ki jo Grik, Kricito obedo tek ki ryeko pa Lubaŋa. Pien miŋo pa Lubaŋa kato ryeko pa dano woko ki ryeko, goro pa Lubaŋa bene tek kato teko ma dano tye kwede woko. Utmegina, koŋ wutam pi lwoŋo ma Lubaŋa olwoŋowu kwede. Jo mapol i kinwu onoŋo pe giryek i kit me lobo, jo mapol i kinwu onoŋo pe gitye ki twero, dok jo mapol i kinwu onoŋo pe gubedo wegi deyo. Ento Lubaŋa oyero gin mamiŋ me lobo, wek oket lewic i kom luryeko; Lubaŋa oyero gin ma goro i lobo-ni wek oket lewic i kom gin jo matek; Lubaŋa oyero gin mogo me lobo ma gicayogi, ma rwomgi piny, kadi jami mogo ma pe gitye, wek omi gin ma tye odok gin ata, wek dano mo pe owakke i nyim Lubaŋa. Lubaŋa aye mumiyo wubedo i Kricito Yecu, ma Lubaŋa omiyo odoko ryekowa. Pi Kricito bene omiyo Lubaŋa okwanowa ni kitwa atir, olonyowa wadoko jo maleŋ, okokowa bene ki i opii me bal. Doŋ kit macalo yam gicoyo, “Ŋat ma nyatte myero onyatte pi Rwot.” Utmegina, yam pe abino botwu ki lok mo nyo ki ryeko mo mamalo i kare ma atuco botwu lok me muŋ me yub pa Lubaŋa. Onoŋo amoko tamma pe me ŋeyo gin mo i kinwu, kono Yecu Kricito keken, kit ma gigure kwede i kom yatariya. Yam abedo kwedwu ma agoro, abedo ki lworo madwoŋ, koma bene omyel matek. Lokka ki gin ma atito yam pe obedo lok mo me ryeko me ywayo tamwu, ento onyuto tek pa Cwiny Maleŋ, wek niyewu pe ocuŋ i kom ryeko pa dano, ento i kom tek pa Lubaŋa. Watito ryeko bot jo muteggi, ento ryeko man pe ryeko me lobo-ni, nyo ryeko pa luloc me kare man, ma twerogi rwenyo woko-ni. Ento wan watito ryeko pa Lubaŋa ma en muŋ ma gikano, ryeko ma yam Lubaŋa oyubo wa con me kelo deyo botwa. Pe tye laloc mo me lobo man ma oniaŋ iye; ka nene guniaŋ, kono pe guguro Rwot, won deyo, i kom yatariya. Ento macalo yam gicoyo, “Gin mogo ma dano pe guneno ki waŋgi, dok bene pe guwinyo ki itgi, gin mogo ma pe donyo i tam pa dano, gin magi en aye gin ma Lubaŋa oyubo pi jo ma mare,” dok gin ma Lubaŋa omiyo Cwiny Maleŋ onyutogi botwa. Pien Cwiny Maleŋ ŋiyo jami ducu, kadi wa tam ma Lubaŋa okano i iye ka matut. Aŋa ma ŋeyo tam ma tye i i dano mukene? Pe cwiny dano-nu ma tye i iye keken aye ŋeyo? Kit meno bene, pe tye ŋat mo ma ŋeyo tam pa Lubaŋa, kono Cwiny pa Lubaŋa keken. Yam pe gimiyowa cwiny me lobo man, ento gimiyowa Cwiny ma oa ki bot Lubaŋa, wek omi waniaŋ i kom kit mot ducu ma Lubaŋa miyowa pi kicane. Meno aye lok ma watito; pe waloko lok ma gipwonyo ki ryeko pa dano, ento watito lok ma Cwiny Maleŋ opwonyowa kwede, kun wanyuto lok me Cwiny bot jo ma tye ki Cwiny pa Lubaŋa. Ento dano ma pe ki Cwiny pa Lubaŋa pe twero gamo gin ma Cwiny pa Lubaŋa miyo, pien ki tuŋ bote obedo gin me miŋo, en pe twero niaŋ iye, pien gin macalo meno Cwiny Maleŋ aye miyo dano ŋeyo pimo. Dano ma tye ki Cwiny pa Lubaŋa ŋeyo pimo jami ducu, ento ŋat mo pe ma ŋolo kop i kome. Yam gicoyo ni, “Aŋa ma ŋeyo tam pa Rwot? Aŋa ma yam miye tam?” Ento wan watye ki tam pa Kricito Ento wun utmegina, yam pe onoŋo atwero lok kwedwu calo jo ma tye ki Cwiny pa Lubaŋa, ento aloko kwedwu macalo jo ma pud tye ki kit ma ginywalogi kwede, macalo litino lukere i Kricito. Yam apitowu ki cak, pien onoŋo peya wutwero camo cam matek; kadi wa kombeddi bene pud pe wuromo camo cam matek, pien pud wutye ki kit ma ginywalowu kwede. Ka pud wutye ki nyeko i kinwu, ma wuda kekenwu, meno pe nyuto ni pud wutye i kit ma ginywalowu kwede, kun pud wulubo kit pa dano? Ka dano mo i kinwu waco ni, “An dano pa Paulo,” ki ŋat mukene bene waco ni, “An dano pa Apolo,” meno noŋo pe nyuto ni wun pud wubedo dano adana? Apolo mono en aŋa? Paulo kono en aŋa? Wan aye lutic ma miyo wuye Yecu. Ŋat acel acel tye ki tic ma Rwot opoko bote. Yam acoyo kodi, Apolo oonyo iye pii, ento Lubaŋa omiyo odoŋo. Kadi bed kumeno, ŋat mucoyo kodi nyo ŋat ma oonyo iye pii, gin ducu pe gin mo, kono Lubaŋa keken aye ma miyo jami doŋo. Dano ma ocoyo kodi ki ŋat muonyo pii iye, gin ducu girom, ŋat acel acel binoŋo mucarane muporo tic ma en otiyo. Pien wan lutic kacel ki Lubaŋa; wun poto pa Lubaŋa, dok bene wun gedo pa Lubaŋa. Pi kica pa Lubaŋa ma gimiya, omiyo aketo te guti me gedo macalo ladit me gedo ma ladiro; ki dano mo mukene tye ka gero ot i wiye. Ento dano acel acel myero ogwokke kit macalo etye kwede ka gedo. Pien pe tye te guti mo mukene ma gitwero ketone, kono maca ma doŋ tye-ni keken, en aye Yecu Kricito. Doŋ ka ŋat mo ogedo i wi te guti mukwoŋo-nu ki jabu nyo ryal, nyo godi me wel-gu, nyo yat nyo lum, nyo reŋ kal, tic ma dano acel acel otiyo binen woko ka maleŋ. Pien mac me Nino maca binyuto tic pa dano acel acel, ci nyuto ka maleŋ kit macalo ticce tye kwede. Ka ce inen gedo pa dano-nu odoŋ, en gedo ma ogero i kom te guti mukwoŋo-ni, dano meno bilimo bakacic me pwoc. Ento ka ce gedo pa dano mo owaŋ woko, ci en pe binoŋo kabacic mo me pwoc, ento en kikome bibwot, macalo ŋat ma koŋ owok ki i mac ka doŋ okatti ka maleŋ. Pe wuŋeyo ni wun aye wubedo ot pa Lubaŋa me woro en, dok Cwiny pa Lubaŋa bedo i iwu? Doŋ ka ŋat mo obalo ot pa Lubaŋa, Lubaŋa bene biteke woko; pien ot pa Lubaŋa leŋ, wun kikomwu aye wu ot meno. Ŋat mo pe obwolle kekene. Ka ce dano mo i kinwu tamo ni eryek i lobo man, en koŋ myero olokke odok lamiŋ, ka wek doŋ odok maryek. Pien gin ma dano me lobo man gitamo ni obedo me ryeko, i nyim Lubaŋa obedo gin me miŋo. Pien yam gicoyo ni, “En mako jo maryek i ryekogi kengi, macalo i owic,” dok ni, “Rwot ŋeyo ni tam pa luryeko mere gin ma konnye pe.” Pi meno ŋat mo pe myero owakke i kom dano, pien jami ducu obedo mewu; kadi ki Paulo, nyo Apolo, nyo Kepa, nyo lobo man, nyo kwo, nyo to, nyo gin ma tye kombeddi, nyo gin ma bibedo tye i anyim. Magi-gu ducu mewu; wun jo pa Kricito, ki Kricito pa Lubaŋa. Myero ginenwa macalo lutic pa Kricito, ki lugwok muŋ pa Lubaŋa. Gin ma mitte ki bot lugwok jami, en aye ni myero gubed jo ma genne. Ki tuŋ bota man lok matidi mo twatwal ka wuŋolo kop i koma, kadi lukiko mo pa dano bene. An kikoma bene pe aŋolo kop i koma kena. Pien aŋeyo ni cwinya leŋ, ento man pe twero miyo aloyo kop. Rwot aye ma ŋolo kop i koma. Pi meno, pe wuŋol kop mo ma peya kare oromo, ma pud peya Rwot odwogo. En aye ma bimenyo gin ducu mukanne i piny macol, dok binyuto tam ma tye icwiny dano miyo nen woko ka maleŋ. I kare meno Lubaŋa bipwoyo dano acel acel i kit ma myero. Utmegina, lok magi aloko odok i koma ki i kom Apolo piwu, wek omi wun wapwonnye i komwa ki te lok man, ni, “Wubed kun wulubo gin ma yam gicoyo,” wek dano mo i kinwu pe owakke, ma pako dano acel kun cayo kwede ŋat mukene. Doŋ aŋa mono ma neno in macalo dano mapat ki jo mukene? Gin aŋo ma itye kwede ma pe gimii amiya? Ka gimii amiya, piŋo iwakke kwede kumeno calo pe gimii amiya nono? Doŋ wuyeŋ woko! Doŋ wudoko lulonyo bene! Doŋ bene wudoko luker, kadi bed wan pe luker! Atikane kono, onoŋo wamito ni wudok luker, wek wan bene wabed luker kacel kwedwu. Pien atamo ni, Lubaŋa onyutowa wan lukwena calo jo mudoŋ cen twatwal, macalo jo ma giŋolo kop me to i wigi; pien doŋ wadoko ginanena pi jo ma i wi lobo ducu, bot lumalaika ki bot dano. Doŋ wadoko lumiŋ pi Kricito, ento wun wuryek i Kricito. Wan wagoro, ento wun wutek. Giketo deyo i komwu, ento wan gicayowa acaya. Nio kombeddi kec tye ka nekowa, orwo pii oketowa woko, boŋowa pe me aruka, gidoŋowa ki ciŋ, ki pacowa-gu bene pe; wacanne kun watiyo tic matek ki ciŋwa. Ka dano giyetowa, wan walamo gum i komgi; ka giunowa, wan waciro acira; ka gibalo nyiŋwa, wan wanwerre giwa anwera ki mwolo. Doŋ wadoko calo yugi me wi lobo; wan doŋ cilo me jami ducu. Pe acoyo lok man ni wek lewic omakwu, ento me pwonyowu macalo litinona ma amaro. Kadi bed wutye ki lupwony alip ki alip ma gitelowu i yo pa Kricito, pe wutye ki wego mapol. Yam adoko wonwu i Kricito pi lok me kwena maber. Pi meno alegowu, wulub kita. Man en gin mumiyo acwalo Temceo botwu. Temceo aye latinna ma amaro i Rwot, dok genne. En bipoyo wiwu i yo ma atye ka lubone i Kricito Yecu, ma apwonyo ki jo ducu muye Kricito i kabedo ducu. Jo mogo i kinwu gitye ka tamo ni an pe abibino botwu, omiyo gitye ka wakke. Ento ka Rwot oye abio botwu oyot, ka wek abinene tek pa jo ma gitye ka wakke-ni, ento pe lok ma giloko aloka. Ker pa Lubaŋa pe ocuŋ i kom gin ma giloko aloka ento i kom tek. Wumito gin aŋo? Wumito abin botwu ki odoo, nyo abin ki mar ki cwiny me mwolo? Atye ka winyo lok ni tim mo me kwele kwele tye i kinwu. Tim me kwele ma kit meno gire pe nen wa i kin jo ma pe ŋeyo Lubaŋa, ni tye dano mo i kinwu ma omayo ci-wonne ci tye ka bedo kwede macalo dakone. Pud bene wuwakke pire! Cwinywu pe myero ocwer, wek giryem ŋat ma otimo kit tim macalo meno woko ki i kinwu? An ki tuŋ bota, kadi ape kunnu, cwinya tye botwu kunnu; kit macalo atye kunnu-ni doŋ atyeko ŋolo kop woko i kom dano meno ma doŋ otimo tim marac-ci. Myero wucokke kacel i nyiŋ Rwotwa, ma noŋo an bene atye kwedwu i cwiny ki tek pa Rwotwa Yecu, ka doŋ wumi dano macalo man bot Catan wek onek kome woko, wek cwinye aye obilarre i nino pa Rwot. Wakkewu-ni pe ber. Pe wuŋeyo ni tobi matidi mo yenyo moko ducu ma girubo me tedo mugati? Wukwany tobi macon woko, wek wubed mugati manyen. I adane, tobi pe i komwu, pien latin romowa me Kato (Paska) doŋ gityero woko, en aye Kricito. Pe doŋ myero wakweru Katowa ki tobi macon, en tobi me raccwiny ki tim mogo maraco, ento myero wakweru ki mugati ma tobi pe iye, ma en aye leŋ ic ki ada. Yam acoyo botwu i waragana ni meno, pe wuribbe ki jo ma gitimo tim kwele. Pe onoŋo aloko i kom dano me lobo-ni ma gitimo tim kwele, nyo luworo me jami, ki luyak, nyo jo ma woro cal jogi. Pe kumeno; ka kuman onoŋo myero wua woko ki i lobo. I adane acoyo botwu ni pe wuribbe ki ŋat mo ma gilwoŋo ni dano pa Kricito, ka otimo tim kwele, nyo ka en obedo laworo me jami, nyo obedo dano ma woro cal jok, gwok nyo layet dano, lamero nyo layak; pe wunywak cam kacel ki kodi dano-nu. Meno pe ticca me ŋolo kop i kom jo ma pe guye Yecu. Lubaŋa aye ma biŋolo kop i komgi. Pe myero wun aye wuŋol kop i kom jo muye Lubaŋa ma gitye i kinwu? Wuryem dano marac woko ki i kinwu. Ka dano mo i kinwu tye ki lok mo i kom lawote, piŋo lewic pe make me pido ki dano-nu i nyim jo ma kitgi pe atir, ma ka pido kwede i nyim jo pa Lubaŋa? Pe wuŋeyo ni jo pa Lubaŋa aye ma biŋolo kop i kom dano me lobo? Ka wun kulu aye ma wubiŋolo kop i kom lobo, ci pe wuromo ŋolo kop mogo matitinone piwu kenwu? Pe wuŋeyo bene ni wan aye ma wabiŋolo kop i kom lumalaika? Ento kop ma mako kwo ma watye iye-ni kono? Ka ce wutye ki lok mogo me kwo ma watye iye-ni, piŋo wutero i nyim jo ma pigi pe tek bot jo muye Kricito? Awaco lok man wek lewic omakwu. Pe tye ŋat mo maryek i kinwu ma romo tyeko lok ma tye i kin omegine? Ma ka timo kit meno, nen, dano moni dok pido ki ominne kadi wa i nyim jo ma pe guye Kricito. Ka wupido pido i komwu kekenwu kit meno, noŋo pe doŋ wupoto woko? Piŋo pe ber botwu me ciro gin marac? Bedo ber ka kono wuweko dano gubuyowu. Ma ka timo kit meno, wun kikomwu aye dok wulokke wudok ka timo dano marac, dok bene wubuyo kadi wa utmegiwu. Pe wuŋeyo ni jo ma pe kitgi atir-ri, ker pa Lubaŋa pe bibedo megi? Pe wuwek gibwolwu; kadi lutim tim kwele, nyo jo ma woro cal jogi, ki lutim abor, nyo jo ma buto ki co wadgi, nyo lukwo, nyo luworo me jami, nyo lumero, nyo luyet dano, nyo luyak, ker pa Lubaŋa pe bibedo megi. Jo mogo i kinwu bene yam gubedo macalo jo meno. Ento wun doŋ gityeko lonyowu me bedo jo maleŋ, gityeko kwanowu ni wun jo ma kitwu atir pi nyiŋ Rwot Yecu Kricito ki piny Cwiny pa Lubaŋawa. Ŋat mo biwacci, “Atwero timo jami ducu.” Ento meno pe nyuto ni jami ducu tye ki kony. “Atwero timo jami ducu,” ento pe abiye ni gin mo oloka adok opiine. Wuwacci, “Cam tye pi ic, ki ic bene pi cam.” Ento gin aryo-nu ducu Lubaŋa bityekogi woko. Kom pe tye pi tim kwele, ento tye pi Rwot, Rwot bene tye pi kom. Lubaŋa yam ocero Rwot woko ki i kin jo muto, en bicerowa woko bene pi twerone. Pe wuŋeyo ni komwu aye obedo dul kom Kricito? Nen myero ka akwanyo dul kom Kricito, aloko odoko dul kom malaya? Pe twerre! Pe wuŋeyo ni dano ma ribbe ki malaya doko kom acel kwede? Pien “gin aryonu gibidoko kom acel,” macalo yam gicoyo. Ento ŋat ma ribbe ki Rwot, doko cwiny acel kwede. Wubol tim kwele woko. Bal mukene ducu ma dano timo tye woko, pe gudo kome; ento ŋat ma timo tim kwele balo kome kene. Pe wuŋeyo ni komwu aye ot pa Cwiny Maleŋ ma bedo i iwu, ma Lubaŋa omiyo botwu? Wun pe wutye piwu kenwu; doŋ giwilowu awila ki wel. Pi meno myero wumi komwu oket deyo i kom Lubaŋa. Doŋ me dok i lok ma wucoyo waraga bota pire, bedo ber ka laco mo pe ogudo dako, ento pi geŋo tim me abor, myero laco acel acel obed ki dakone, ki dako acel acel bene myero obed ki cware. Laco myero ocob miti pa dakone, ki dako bene myero ocob miti pa cware. Dako pe loyo kome kene, ento kono cware aye ma loyo; kit meno laco bene pe loyo kome kene ento dakone bene ma loyo. Dano acel acel pe myero okwer pi kome bot lawote, kono gwok nyo pi kare manok mo keken ma wuyubo ayuba dok wuye kacel, wek wunoŋ kare me bedo ka lego Lubaŋa. Ka lacen dok wuribbe kacel, wek Catan pe obitwu, pi miti ma wutye kwede ma pe jukke. Awaco lok man kun aye ayeya keken, ento pe aketo macalo cik. Kono onoŋo twerre amito dano ducu gubed kit macalo atye kwede-ni; ento dano acel acel tye ki kit motte mutiko en, ma Lubaŋa omiye; inoŋo ni dano mo-ni tye ki mot man, ki dano mukene tye ki mapatte. Bot jo ma pud peya gunyomo, ki bot mon ma coggi oto, awaco kit man ni, bedo ber ka kono gubedo macalo an. Ento ka pe giromo jukke kengi, myero gunyom, pien nyom ber kato ma laco nyo dako obedo ka ciro miti me kom. Bot jo ma doŋ gunyomme, acikogi ni dako pe okwer cware, ento man pe an aye ma aciko, Rwot gire aye muciko. Ento ka ce dako mo doŋ oweko cware, myero obed kene, nyo odwog cen bot cware, pe oger laco mo mukene. Dok laco bene pe myero oryem dakone. Bot jo mukene-gu, an kikoma aye ma atye ka lok, pe Rwot gire, ni, ka ce Lakricitayo mo tye ki dakone ma pe oye Yecu, ka dako-nu oye me medde ki bedo kwede, laco pe myero oryeme woko. Ka dako mo bene tye ki cware ma pe oye Yecu, ka ce cware oye me medde ki bedo kwede, pe myero okwere. Pien laco ma pe oye Yecu doko leŋ pi dakone, ki dako ma pe oye Yecu bene doko leŋ pi cware ma Lakricitayo-ni. Ka pe kumeno, kono litinowu pe gibedo leŋ, ento kit macalo tye gileŋ gigi. Ento ka ŋat ma pe oye Yecu mito pokke woko ki lawote, wek opokke. Doŋ lok macalo meno Lakricitayo ma laco nyo ma dako pe tye iye ki dic mo, pien Lubaŋa olwoŋowa ni wabed ki kuc. In dako, iŋeyo niŋniŋ ka ibilaro cwari? Nyo in laco, iŋeyo niŋniŋ ka ibilaro dakoni? Myero doŋ dano acel acel olub kit kwo ma Rwot omiye, en kwo ma yam en tye iye i kare ma Lubaŋa olwoŋe. Man en gin ma aciko ki jo ducu ma guye Kricito. Tye dano mo ma onoŋo doŋ olirre i kare ma gilwoŋe? En pe myero openy yo me dwoko kome macalo dano ma pe giliro. Tye dano ma onoŋo doŋ pe gilire i kare ma gilwoŋe? En pe myero openy yo me lirre. Pien bedo ma giliri ki bedo ma pe giliri pe konyo gin mo; ento gwoko cik pa Lubaŋa aye konyo. Dano acel acel myero obed ki kite macon ma onoŋo en tye kwede i kare ma gilwoŋe. I kare ma gilwoŋi onoŋo ibedo opii? Pe ipar. Ento ka inoŋo yo me a woko ki i opii, ci ti kwede. Ŋat ma gilwoŋo me bedo i Kricito ma onoŋo en opii, en aye dano ma Rwot doŋ ogonyo woko ki i opii. Kit meno bene, ŋat ma onoŋo lone kene ka gilwoŋe, doŋ odoko opii pa Kricito. Wun jo ma giwilo ki wel; pe wudok opii pa dano mo. Utmegina, dano acel acel myero obed i nyim Lubaŋa ki kite ma ceŋ gilwoŋe kwede ca. Lok ma dok i kom jo ma pud peya gunyomme, pe anoŋo cik mo ma oa ki bot Rwot, ento amiyo tamma iye macalo dano ma Lubaŋa doŋ otyeko timo kica bote, en mumiyo abedo ŋat ma genne. Doŋ atamo ni, pi can ma odiyowa marac, bedo ber ka dano moni obedo kit macalo tye kwede. Itye ki dako? Pe item gonyo nyom woko. In dakoni pe? Pe imit nyom. Ento ka inyomo, noŋo pe itimo bal mo. Nyako bene ka ginyomo noŋo pe otimo bal. Ento jo ma nyomme gibinoŋo ayelayela me kwo me lobo man; amito ni ka twerre kono akwanyo ayelayela meno woko ki i komwu. Utmegina, gin ma aloko en ene ni, kare doŋ odoko diŋ; cakke kombeddi jo ma tye ki mon myero gubed calo jo ma pe ki mon, ki jo ma kumo myero gubed calo jo ma pe kumo, jo ma cwinygi yom calo jo ma pe cwinygi yom, jo ma wilo jami gubed calo jo ma pe tye ki gin mo, jo ma tiyo ki jami me lobo man calo jo ma pe gitye ka tic kwede, pien lobo kit ma tye kwede-ni bitum woko. Amito wubed laboŋo par mo. Dano ma pud peya onyomo, cwinye paro lok pa Rwot, kit ma myero eyom kwede cwiny Rwot. Ento dano ma doŋ onyomo, paro mere lok me lobo kit ma ebiyomo kwede cwiny dakone; tamme pokke i dul aryo. Dako ma pe ginyomo, nyo nyako, bene paro lok pa Rwot, wek ebed maleŋ i kome ki i cwinye. Ento dako ma ginyomo paro mere lok me lobo, kit ma myero eyom kwede cwiny cware. Awaco lok man pi konyowu, pe me geŋowu ageŋa, ento wek omi gin ducu owot kakare, cwinywu bene obed i kom Rwot, ma gin mo pe ywayo tamwu tero woko cen. Ka ŋat mo tamo ni kit bedone ki nyako ma ecikke kwede pe tye atir, ka marre dit i kome, en doŋ myero otim kit macalo cwinye mito, ka tamo ni obed ki meno. Bal mo pe iye, gitwero nyomme megi. Ento ka dano mo cwinye tek kun pe tye gin mo ma diye, ma doŋ bene noŋo otyeko mine me weko nyako-nu ma pe ginyomme, noŋo otimo ber ka ce twero loyo tamme. Kumeno ŋat munyomo nyako ma ecikke kwede noŋo otimo ber, ento ŋat ma pe onyomo nyako ma en ocikke kwede noŋo otimo ber makato. Cik geŋo dako ka pud cware tye kwo, ento ka cware doŋ oto woko, ci en bedo ki kare me nyomme ki laco mo mukene ma cwinye mito, ma tye i kin jo pa Rwot keken. Ci twero miyo dako-nu cwinye bedo yom makato ka ce en obedo kit meno ma pe dok onyomme; meno tamma, atamo bene ni atye ki cwiny pa Lubaŋa. Lok ma dok i kom cam ma gityero bot jogi. Waŋeyo ni, “wan ducu watye ki ŋec.” Kit ŋec meno miyo dano giwakke awaka, ento mar medo tek bot dano. Dano ma tamo kekene ni eŋeyo gin mo, noŋo pe ŋeyo gin mo kit ma onoŋo myero eŋe kwede. Ento ka ŋat mo maro Lubaŋa, ci Lubaŋa bene ŋeye. Doŋ lok ma dok i kom cam ma gityero bot jogi; waŋeyo ni, “jok pe gin mo i lobo,” dok ni, “Lubaŋa mo mukene pe, kono en Lubaŋa acel-li keken.” Kadi bed tye gin mogo ma gilwoŋo ni lubaŋa i polo nyo i lobo, kit macalo tye lwak lubaŋa ki lwak rwodi mapol mapatpat-ti, ento ki tuŋ botwa Lubaŋa tye acel, en Lubaŋa Won, ma jami ducu a ki bote, ma wan wabedo tye pire; dok bene tye Rwot acel keken, Yecu Kricito, ma miyo jami ducu bedo tye, wan bene wabedo tye pire. Kadi bed kumeno, jo mapol pe gitye ki ŋec macalo meno. Jo mogo doŋ guŋiyo woko i woro jogi nio wa ceŋ tin; gicamo cam ma kun noŋo pud gitamo ni, “Man adada gin ma gityero bot jok,” miyo tam ma tye i igi ma nyuto botgi balgi balle woko. Cam pe bimiyo Lubaŋa pwoyowa; pe wabibedo marac ka pe wacamo cam, pe bene wabibedo maber ka wacamo. Ento wugwokke, wek twero ma wutye kwede pe odok gin mo ma miyo dano magoro poto i bal. Pien ka dano mo ma tam ma i iye ma nyutte balle pud goro oneno ni ma itye ki ŋec ibedo ka cam i ot jok, pe bimedo tekcwiny bote me camo riŋo ma gityero bot jogi? Kono en dano ma niye mere goro-ni obedo omeru ma yam Kricito oto pire, en bito pi ŋecci! Doŋ ka wubalo kit man bot utmegiwu ma niyegi goro, ka dok wubalo tamgi ma nyuto botgi balgi ma pud goro, noŋo wubalo i kom Kricito. Pi meno, ka cam aye miyo omera poto i bal, pe doŋ abicamo riŋo matwal, wek pe ami omera opot i bal. An pe alone kena? An pe lakwena? Yam pe aneno Rwotwa Yecu Kricito? Wun pe adwoggi me ticca i Rwot? Kadi bed jo mogo pe giye ni an lakwena, ento ki tuŋ botwu an lakwena, pien wun kikomwu aye wubedo lanyut me kwenana i Rwot. Meno aye pidona bot jo ma giroka ki peny. Pe watye ki twero me noŋo cam ki mat ma iwa mito? Pe atye ki twero me tero dako ma Lakricitayo kacel kweda i wotta, macalo lukwena mukene, ki omego pa Rwot, ki Kepa? Nyo wan ki Barnaba keken aye myero wati pi camwa piwa kenwa? Aŋa ma cito i mony, ci cako culo mucarane pire kene? Aŋa ma pito olok i potone ma pe camo nyig olok mucek iye? Lakwat mene ma pe mato cak ma a i kom lim ma en kwayo. Atye ka loko lok man i kit pa dano keken? Cik kono pe loko lok ma rom ki man? Pien i cik pa Moses gicoyo ni, “Pe itwe dog twon ka tye ka nyono bel.” Lubaŋa mono tamme tye twatwal pi dyaŋ? En pe oloko lok meno piwa? I adane lokke yam gicoyo piwa, pien lapur myero opur pur kun noŋo tye ki gen, ŋat ma dino bel bene myero odin kun tye ki gen me noŋo dul mo iye. Ka wacoyo kodi me cwiny i kinwu, meno lokke bedo lok madit twatwal ka wakayo jami mogo me kom ki botwu? Ka jo mukene gitye ki twero meno i komwu, ci wan doŋ pe wakatogi kwede woko? Ento kadi bed twero meno tye botwa, pe watiyo kwede; wadiyo cwinywa i lok ducu wek pe omi waket ariya mo ma geŋo tito lok me kwena maber i kom Kricito. Pe wuŋeyo ni, jo ma gitiyo tic i ot pa Lubaŋa ginoŋo camgi ki i ot pa Lubaŋa, dok jo ma gitiyo i kom keno tyer gipoko botgi gitum ma gityero? Rwot bene yam ociko i kit yo acel-lu ni, jo ma tito lok me kwena maber myero gunoŋ gin ma gikwo kwede pi tito lok me kwena maber-ri. Ento an pe atiyo ki twero macalo meno wacel. Dok bene pe acoyo lok man ni kono wutima kit meno. Bedo ber ka ato, kato ma dano mo loko wakkena doko gin ma ka cuŋone pe. Ka atito lok me kwena maber, myero pe awakke pire, pien gidiya iye adiya. Ka pe atito lok me kwena maber, ci abineno can. Ka atimo man pi twerona kena, abinoŋo bakacic, ento ka atimo ma kun pe amito, noŋo atye ka cobo tic ma gimiya. Abinoŋo kit bakacic aŋo? Bakacicca en aye yomcwiny ma anoŋo i tito lok me kwena maber, laboŋo ŋolo kit cul mo iye bot dano ma giwinyo, kun bene pe atiyo ki twero ma atye kwede wek anoŋ kony mo ki bot jo ma atito botgi lok me kwena maber. Kadi bed alone kena i nyim dano ducu, ento doŋ atyeko mine me bedo opii pa jo ducu, wek anoŋgi mapol. Ka abedo bot Lujudaya alokke abedo macalo Lujudaya, wek anoŋ Lujudaya mogo; bot jo ma tye i te cik pa Moses abedo bene macalo ŋat ma tye i te cik, kadi bed an kikoma pe atye i te cik, wek anoŋ jo ma tye i te cik. Bot Lurok ma pe i te cik pa Moses abedo macalo ŋat ma pe i te cik, kun noŋo pe atye laboŋo cik pa Lubaŋa, ento abedo i te cik pa Kricito. Bot jo ma gigoro i niyegi, alokke adoko dano magoro bene, wek anoŋ jo magoro. Alubo kit ducu ma dano gitye kwede, wek omiya alar jo mogo i yo ducu. Meno ducu atiyo pi lok me kwena maber, wek an bene anywak gum mo ma a iye kacel kwedgi. Pe wuŋeyo ni, jo ma gipyem i ŋwec ducu giriŋo, ento dano acel keken aye ma limo mot me pwoc? Wun bene wuriŋ kumeno wek wunoŋ mot me pwoc. Dano acel acel ma pyem i tuko myero ogwokke kene i yo ducu. Gitimo meno wek ginoŋ lalukana ma balle woko, ento wan watimo pi noŋo lalukana ma pe ballene. An mera ariŋo atir ma pe acabbe atata; ka awacci atye i tuko me doŋŋe, pe adoŋo piny macalo ŋat ma doŋo yamo ata. Acano koma, kun bene aloye calo opiina, wek ka doŋ atyeko tito lok bot jo mukene, pe abed ŋat ma pe gipwoyo. Utmegina, amito wuŋe ni, kwarowa ducu yam gubedo i te pol, gin ducu guwok ki i dye nam, gin ducu bene yam gibatijagi i i pol ki i nam, wek doŋ gubed jo pa Moses. Gin ducu yam gucamo cam acel me cwiny, gin ducu bene gumato ginamata acel me cwiny. Pien gumato pii mua ki i kom got me cwiny ma woto kacel kwedgi, got meno yam en Kricito. Kadi bed kumeno, Lubaŋa pe opwoyo pol jo mogo ma i kingi; pien guto gutum woko liweŋ i tim. Lok meno ducu odoko labol botwa, ma cikowa ni pe myero wabed ka paro gin maraco macalo yam gin guparo. Pe wawor jogi macalo jo mogo i kingi, kit macalo yam gicoyo ni, “Lwak gubedo piny gucamo ka gumato, ci gua malo ka myel.” Wan pe myero wadonyu i timo tim kwele, macalo jo mogo i kingi yam gutimo, ci jo alip pyeraryo wiye adek guto woko ducu i nino acel. Pe waomu cwiny Rwot, macalo jo mogo i komgi yam guomo cwinye, ci omiyo twol onekogi woko. Pe waŋur, macalo jo mogo i kingi yam guŋur kwede, ci omiyo Lanek oŋinyogi woko. Meno ducu yam otimme i komgi macalo lapo wic, ka doŋ gicoyo me cikowa, wan jo ma agikki piny oo i komwa-ni. Pi meno ŋat mo ma tamo ni etwero cuŋ myero ogwokke wek pe opoti. Pe tye bita mo ma makowu ma pe mako dano ducu; Lubaŋa genne, pe biye ni gibitwu matek makato ma wuromo cirone, ento i kare ma Catan tye ka bitowu, Lubaŋa bimiyowu yo ma myero wubwot kwede, wek wubed ki twero me ciro. Pi meno, wun luwota ma amaro, wubol woro jogi woko matwal. Aloko kwedwu macalo jo ma luryeko; wubed ki tam kekenwu i lok ma aloko. Kikopo me gum ma walego iye gum, pe waribbe iye i remo pa Kricito? Pien mugati tye acel, wan ma wapol-li bene wabedo kom acel, pien wan ducu wanywako camo en mugati acel-lu. Koŋ wunen jo Icrael; jo ma camo gitum ma gityero bot Lubaŋa pe giribbe ki keno tyer? Ka aloko kumeno noŋo atamo aŋo? Ni cam ma gityero bot jogi obedo gin mo, nyo ni jogi gubedo gin mo? Pe, gin ma awaco en ene ni, gitum ma jo ma pe ŋeyo Lubaŋa gutyero, gityero bot jogi, ento pe gityero bot Lubaŋa. Pe amito wuribbe ki jogi. Pe wutwero mato ki kikopo pa Rwot ki pa jogi. Pe wutwero cam i meja pa Rwot ki dok i meja pa jogi. Wamito omo cwiny Rwot wek nyeko omake? Wan mono watye ki tek wakato en? “Atwero timo jami ducu,” ento meno pe nyuto ni jami ducu tye ki kony. “Atwero timo jami ducu,” ento man pe nyuto ni jami ducu doŋ niye pa dano. Dano pe olub gin ma konyo en keken, ento myero olub gin ma konyo lawote bene. Wucam kit riŋo ducu ma gicato i cuk, pe wubed ka penyo gin mo iye pi lworo bal. Pien lobo ki jami ducu ma tye iye obedo jami pa Rwot. Ka ce dano mo ma pe oye Lubaŋa olwoŋowu ka cam, kun wumito wucit wucam, ka wuo i gaŋŋe wucam gin ducu ma giketo i nyimwu, pe wubed ka penyo gin mo iye pi lworo bal. Ento ka ŋat mo owaco botwu ni, “Man gin ma doŋ gityero bot jok,” pe wucam, pi paro pi ŋat ma doŋ otito lok meno pi poyo wiwu-ni, ki pi tamme ma i cwinye ma nyuto balle bote. Meno aloko pi tam ma tye i cwiny dano mukene ca, pe pi tam ma i cwinyi. Piŋo gigeŋo kuc ma atye kwede me timo gin mo-ni woko, pi tam ma tye i cwiny dano mukene? Ka anywako camo cam ki jo mukene kun apwoyo Lubaŋa bene, piŋo giyeta pi gin ma doŋ atyeko pwoyo Lubaŋa pire? Doŋ ka wucamo cam nyo ka wumato mat, nyo gin ducu ma wutiyo, wutim ducu pi miyo deyo bot Lubaŋa. Pe wubal cwiny Lujudaya, kadi jo Grik, nyo jo muye Lubaŋa, macalo an atemo yomo cwiny jo ducu i gin ducu ma atiyo, kun pe alaro pi gin ma konyo an kena, ento alaro pi gin ma konyo jo mapol, wek gularre. Wulub kita, macalo an bene alubo kit pa Kricito. Apwoyowu pien i lok ducu wupo pira, kun wumako pwonnya ma yam akelo botwu. Ento amito wuŋe ni wi laco acel acel en aye Kricito, wi dako aye cware, ki wi Kricito aye Lubaŋa. Laco mo-ni ma lego Lubaŋa, nyo ma tito lok pa Lubaŋa kun oboyo wiye, meno noŋo oketo lewic i wiye; ento dako ma lego Lubaŋa nyo ma tito lok pa Lubaŋa, ma kun pe oboyo wiye noŋo oketo lewic i wiye, pien pe tye apokapoka mo i kin en ki dako ma olyelo wiye woko. Ka dako mo pe boyo wiye, myero onyar yer wiye woko. Ka bedo me lewic ka dako olyelo wiye, nyo onyaro yer wiye anyara, en doŋ myero obo wiye woko. Laco pe myero obo wiye, pien en cal pa Lubaŋa dok deyo pa Lubaŋa bene; ento dako aye deyo pa laco. Laco yam pe giketo nia ki i kom dako, ento dako aye oa i kom laco. Laco yam pe giketo pi dako, ento dako aye giketo pi laco. En mumiyo dako myero obed ki lanyut me twero i wiye, pi lumalaika. Ento i kwowa me bedo i Rwot, dako pe twero cuŋ kene laboŋo laco, ki laco bene pe twero cuŋ kene laboŋo dako; pien macalo dako yam gitiyo oa i kom laco, i kit acel-lu laco bene dako aye ma nywalo, dok jami ducu a ki bot Lubaŋa. Koŋ wuŋol lok man kenwu; tika nen ber ka dako olego Lubaŋa ma pe oboyo wiye? Kit ma ma ginywalowa kwede bene pe pwonyowu ni, ka laco oloto yer wiye odoŋo maboco, ci miyo ginyware? Ento dako gire ka yer wiye olot maboco meno bedo me deyo bote, pien gimiye yer maboco-nu me umme kwede. Doŋ ka ŋat mo mito kelo pyem iye, wan giwa wape ki kit macalo meno, pe bene tye i kin jo ducu muye Lubaŋa. Acikowu kun bene atye ki lok mogo ma cwinya pe yom iye i komwu, pien cokkewu-ni gin mo ma konyo pe iye, kelo bal keken. Lok mukwoŋo ma atyeko winyone en aye ni, ka lwak gucokke kacel, apokapoka bedo tye i kinwu. An bene tuŋcel aye lok meno, pien dul mogo myero gubed i kinwu, wek jo ma tye maber gunen woko ka maleŋ. Pien ka wucokke kacel pe wucamo. Cam pa Rwotwa, pien wun ducu ŋat acel acel kwoŋo camo camme woko, kun jo mogo bedo ki kec, ki jo mogo gimer megi woko. Wun mono pacowu pe, ka ma wutwero camo iye camo iye cam ki mato mat-gu? Nyo wucayo jo ducu muye Lubaŋa, kun wuketo lewic i kom jo ma pe tye ki gin mo? Myero awac botwu gin aŋo? Wumito apwowu? Pe atwero pwoyowu pi lok man. Pien pwony ma yam apwonyowu kwede, Rwot aye mumiya, ni, i wor meno ma giketo roro i kome-ni, Rwot Yecu omako mugati; ka doŋ opwoyo, ci obaro iye, omiyogi kun wacci, “Man aye koma ma tye piwu. Wutim kuman me po pira.” Kumeno ka gucamo otum, otiŋo kikopo kun wacci, “Kikopo man aye gicikke manyen i remona. Wutim kuman i kare ducu ma wumato, me po pira.” Pien i kare ducu ma wucamo mugati man, dok bene ka wumato ki kikopo-ni, noŋo wutye ka yweko lok me to pa Rwot, nio ka en bidwogo. En mumiyo ka dano mo ocamo mugati man, nyo omato kikopo man ma kun kite pe myero, noŋo en odoko labal pi pyedo kom ki remo pa Rwot. Dano acel acel myero koŋ okwoŋ ŋine kene, ka doŋ ocak camo mugati meno ki mato gin ma tye i kikopo meno. Pien ŋat ma camo nyo mato kun pe oniaŋ maber i kom gin ma gilwoŋo ni kom Rwot, noŋo en tye ka kelo kop i kome kene ka ce ocamo nyo omato. Meno gin mumiyo jo mapol i kinwu gitwo, dok gigoro bene, ki jo mogo doŋ guto woko. Ka kono nene wan kikomwa waŋolo kop i komwa kekenwa ki ada, kono pe giŋolo kop i komwa. Doŋ ka Rwot aye ma ŋolo kop i komwa, en pwodowa me pwonyowa, wek pe giŋol kop olowa kacel ki jo me lobo. Pi meno doŋ, utmegina, ka wucokke ka camo cam pa Rwotwa, ŋat acel acel myero koŋ okur lawote. Ka dano mo kec neko, myero koŋ ocam cam i pacone, wek pe kop olowu ka wucokke kacel. Lok mukene mudoŋ, abiyubo ka ao botwu. Utmegina, amito wuniaŋ lok i kom mot ma Cwiny Maleŋ miyo. Wuŋeyo ni i kare ma yam onoŋo pud pe wuŋeyo Lubaŋa, noŋo wurwenyo woko ata ka woro cal jogi ma pe loko, ka ma giterowu iye ducu-ni. Pi meno amito wuniaŋ ni, pe tye ŋat mo ma Cwiny pa Lubaŋa telo ma wacci, “Yecu giceno;” dok bene pe tye ŋat mo ma twero wacci, “Yecu aye Rwot,” ento Cwiny Maleŋ keken ma twero miye eloko. Mot tye ma kitgi patpat, ento Cwiny tye acel. Tic ma gitiyo pi Rwot bene tye ma kitgi patpat, ento Rwot tye acel. Tek pa Lubaŋa tiyo i yo mapatpat, ento Lubaŋa acel-lu aye ma tiyo i yo ducu ki pi jo ducu. Dano acel acel gimiyo bote lanyut me Cwiny ma konyo lwak. Cwiny Maleŋ miyo bot dano acel kwena me ryeko; en Cwiny acel-lu bene miyo bot dano mukene kwena me ŋec. En Cwiny acel-lu miyo niye bot ŋat mukene, ki bot dano mukene en Cwiny acel-lu miyo mot me caŋo two i kom dano. Bot ŋat mukene en miyo mot me tiyo taŋo, bot ŋat mukene mot me tito lok pa Lubaŋa, bot ŋat mukene miyo ryeko me poko kin cwiny mapatpat, bot ŋat mukene miyo dumo leb mapatpat, bot ŋat mukene miyo ryeko me gonyo leb mapatpat. Ento Cwiny acel-lu aye ma tiyo tic i mot magi ducu; en poko mot mapatpat bot dano acel acel kit macalo en mito. Pien Kricito calo kom acel ma tye iye dul mapol; ento noŋo pud tye kom acel, kadi bed gitye dul mapol. Pien wan ducu, Lujudaya ki jo Grik, opii ki jo ma gilone kengi, gibatijawa wadoko kom acel i Cwiny acel-lu pa Lubaŋa, wan ducu wamato en Cwiny acel-lu. Pien kom dano pe tye iye dul acel keken, ento tye iye dul mapol. Ka kono tyen wacci, “Pien an pe a ciŋ, an pe a dul kom,” meno pe geŋe bedo dul kom. Ka kono it wacci, “Pien an pe a waŋ, an pe a dul kom,” meno pe geŋe bedo dul kom. Ka kono kom ducu obedo waŋ, kono giwinyo lok ki ŋo? Dok kono kom ducu obedo it, kono giŋweyo ki ŋo? Ento kit ma tye kwede-ni, Lubaŋa oketo dul mapatpat i kom, dul acel acel kit macalo en mito. Ka kono gin ducu gubedo dul acel, kom kono obedo kwene? Kit macalo tye-ni, tye dul mapol, ento kom tye acel. Waŋ pe twero waco ki ciŋ ni, “An pe amiti.” Wic pe twero waco ki tyen ni, “An gira pe amitowu.” Ma kaka meno, dul kom maca ma gitamo ni goro mitte twatwal, dok bene dul maca me kom ma gitamo ni deyogi pe, dul magi aye girukogi ki deyo makato, ki dul komwa ma nen marac warukogi ki ruk ma nen maber makato,, ma kun dul komwa ducu ginen maber ma pe dok gimito gin mo. Lubaŋa oketo dul mapol me kom kun ribogi kacel, kun miyo deyo madwoŋ makato bot dul ma deyogi nok, wek apokapoka mo obed pe i kom, ento omi dul acel acel opar pi dul wadgi. Ka dul mo acel tye ki arem, ci dul kom mukenegu bene rem kacel kwede; ka gipako dul acel, dul mukene-gu bene ducu ribbe kwede ki yomcwiny. Kombeddi doŋ wun kom Kricito, dano acel acel obedo dul kom Kricito. Ento Lubaŋa oketo jo magi i lwak muye Kricito; mukwoŋo lukwena, me aryone lutit lok pa Lubaŋa, me adekke lupwony, ki dok jo ma tiyo tic me taŋo; ki jo ma lubo gin jo ma gimiyo botgi mot me caŋo two ki i kom dano, jo ma tiyo tic me kony, jo ma romo loyo tic, ki jo ma gidumo leb mapatpat. Jo ducu gin lukwena? Jo ducu gitye ki mot me tito lok pa Lubaŋa? Jo ducu tye ki mot me caŋo dano? Jo ducu gidumo leb mapatpat? Jo ducu gin lugony leb? Wuket cwinywu i noŋo mot ma pigi dito. Kadi aloko leb pa dano ki pa lumalaika, ka pe atye ki mar, abedo calo olaŋ ma kok, gara ma wo awoya. Ka atye ki mot me tito lok pa Lubaŋa macalo lanebi, ma aniaŋ i muŋ ducu, dok bene noŋo atye ki ŋec ducu, ma atye bene ki niye ducu, ma atwero bene kobo kwede godi madoŋo-gu woko ka mukene, ce pe atye ki mar, ci pe a gin mo. Ka apoko jami ducu ma atye kwede, ma bene amiyo koma ni giwaŋ woko ki mac, ento ka pe atye ki mar, ci pe konya ki gin mo. Mar diyo cwinye, dok lakica bene; mar pe lanyeko, pe wakke; pe nyatte, pe tiyo gin ma pe myero, pe yenyo gin mukemo en kene; pe bedo ki keccwiny, pe bedo kun keto cwinye i kom gin marac ma gitimo i kome; cwinye pe bedo yom i kom tim ma pe atir, ento cwinye bedo yom i lok ada. Mar diyo cwinye i kom jami ducu, ye lok ducu,, dok bedo ki gen i kare ducu, keto tek bene me ciro jami ducu. Mar pe gik; ento lok atita bitum woko; kadi ki dumo leb bene bigik woko; kadi ŋec bene bitum woko, pien wan waŋeyo dul mogo manoknok keken, lutit lok pa Lubaŋa gitito dul mogo manoknok keken; ento gin makulu ka obino, ci gin ma obedo duldul bigik woko. I kare ma pud an latin, aloko lok calo latin, aparo jami ducu calo latin; ento kombeddi ma doŋ ateggi-ni, doŋ abwoto kit me tino woko. Gin ma waneno kombeddi cal ki tipo ma nen ribiribi i kiyo; ento i kare ma bino anyim ca wabinenne waŋ ki waŋ. Kombeddi aŋeyo dul mo manok keken, ento i nino ma bino anyim ca abibedo ki ŋec ducu liweŋ, kit macalo Lubaŋa tye ki ŋec ducu i koma-ni. Doŋ tye gin adek ma gibedo matwal: niye, gen, mar; ento gin ma pire dit ma katogi ducu en aye mar. Wuket mar aye obed tamwu mukwoŋo ma pire dit; wuket cwinywu bene me noŋo mot ma Cwiny Maleŋ miyo, makato ducu mot me tito lok pa Lubaŋa. Pien dano ma dumo leb mapatpat pe loko ki dano, ento noŋo loko ki Lubaŋa. Ŋat mo ma niaŋ i lokke pe, pien noŋo en tye ka loko muŋ me Cwiny Maleŋ. Ento dano ma tito lok pa Lubaŋa loko ki dano kun doŋo niyegi, cuko cwinygi dok kweyo cwinygi bene. Dano ma dumo leb mapatpat doŋo niyene kene; ento ŋat ma tito lok pa Lubaŋa noŋo tye ka doŋo jo muye Kricito i niyegi. Amito ni wudum leb mapatpat, ento makato ducu amito wutit lok pa Lubaŋa. Dano ma tito lok pa Lubaŋa pire dit kato ŋat ma dumo leb mapatpat, kono nyo ka ce tye dano mo ma twero gonyo bot dano gin ma en loko, wek okony jo muye Kricito i doŋo. Utmegina, ka abio botwu kunnu ma kun noŋo adumo leb mapatpat, abibedo ki kony aŋo botwu, ka pe akelo botwu lok pa Lubaŋa ma ginyutta, nyo ŋec mo, nyo lok mo ma Lubaŋa omiya me atita, nyo pwony mo? Kadi wa gin ma pe ki kwo, ma kok calo nyamulere nyo naŋa, ka ce dwane pe owinnye maber, ci dano gibiniaŋ niŋniŋ i wer ma gikuto nyo gigoyo? Buriji bene ka pe gikuto i dwan me lwoŋo kikome, ci aŋa ma biyubbe pi cito i lweny? En i yo acel-lu, aŋa ma biniaŋ i gin ma wuloko ka wudumo aduma ki leb mapatpat, kun wuloko lok ma pe niaŋŋe? Lokwu biket woko i yamo ata. Tye leb mapol ma kitgi patpat i wi lobo, ento pe tye mo ma te lokke pe. Ento ka pe aŋeyo leb ma dano mo-ni tye ka loko, abedo macalo larok bote, ki en bene bedo macalo larok bota. Doŋ kit meno, macalo wuketo cwinywu me noŋo mot me Cwiny, wutem loyo jo mukene ducu i gin ma doŋo jo muye Kricito, miyo gicuŋ matek. Pi meno, dano ma dumo leb mapatpat myero oleg Lubaŋa wek okonye me gonyo tyen lok ma eloko. Pien ka alego Lubaŋa ma kun noŋo adumo aduma, cwinya bene lego, ento noŋo tamma pe timo iye gin mo. Atim aŋo doki? Abilego Lubaŋa ki cwinya kun alego ki tamma bene; abiwero wer ki cwinya kun awero ki tamma bene. Ka pe kumeno, ka ipwoyo Lubaŋa ki cwinyi keken, dano mukene ata ma obino i cokkewu twero gamo “Amen” i pwocci-nu i kite mene, ma kun pe oniaŋ i gin ma iloko? Kadi bed onoŋo imiyo pwoc maber, pe konyo dano mukene ca me doŋo kadi ki acel mo. Apwoyo Lubaŋa pien an adumo leb mapatpat ma akatowu ducu, ento i cokke pa jo muye Kricito amito loko lok abic mo keken ki tamma wek apwony ki jo mukene, makato loko lok alip ki alip kun adumo aduma ki leb mapatpat. Utmegina, pe wubed calo litino i tamwu. Wubed litino i timo gin marac, ento i tamwu myero wubed jo muteggi. Yam gicoyo i cik ni, “Abiloko ki jo me rok man i leb ma jo dumo kwede aduma ki i dog jo ma gin lurok ento kadi bed kumeno, gin pe gibiwinyo lokka, man lok pa Rwot.” Meno nyuto ni, dumo leb mapatpat gimiyo wek obed lanyut bot jo ma pe guye Kricito, pe bot jo muye, ento tito lok pa Lubaŋa tye pi jo muye, pe pi jo ma pe guye. Doŋ ka dano ma guye Kricito gucokke kacel kun jo ducu ma iye gidumo leb mapatpat, dok ka jo mukene ata, nyo ma pe guye, gubino iye, pe gibiwaco ni wun jo mubaŋŋe? Ento ka dano ducu tye ka tito lok pa Lubaŋa, ce ka dano mo ma pe ye obino iye, nyo dano mo ata obino i ot, en tika biniaŋ i balle pi gin ma en owinyo ki bot jo ducu; lok ma dano ducu guloko biŋolo kop i kome, muŋ ma tye i cwinye bene en bituco woko ka maleŋ, ka doŋ biryebbe piny ci cako woro Lubaŋa kun tuco ni, “Adada, Lubaŋa gire tye i kinwu.” Lokke doŋ tye niŋniŋ, utmegina? Ka wucokke kacel, dano acel acel noŋo tye ki gin mo; ŋat mo noŋo tye ki wer, mo tye ki pwony, mo tye ki lok ma ginyutte, mo dumo leb mapatpat, ki mo mukene noŋo ŋeyo gonyo te lokke. Gin-nu ducu myero otimme i yo ma konyo doŋo jo muye Kricito. Ka dano dumo leb mapatpat, myero gubed gin aryo nyo adek, pe okat wel ennu-ni, kun gileyo aleya, ma ŋat mo gonyo te lokke. Doŋ ka onoŋo pe tye ŋat mo ma gonyo, ci myero dano ma mito lok i leb mapatpat oliŋ aliŋa i cokke pa jo muye Kricito, en olok kekene ki Lubaŋa. Ento jo aryo nyo adek ma gitito lok Lubaŋa gitwero lok, kun jo mukene-gu giŋiyo lok ma giloko. Ka ce inen Lubaŋa onyuto lok mo bot ŋat mukene ma obedo piny, doŋ dano ma nen tye ka lok ca myero oliŋ woko. Pien wun ducu wutwero tito lok pa Lubaŋa kun wuleyo aleya, wek jo ducu gupwonnye, dok bene ocuk cwinygi. Jo ma gitito lok pa Lubaŋa gitwero loyo cwiny ma gimiyogi me tito lok; pien Lubaŋa pe ticce me kelo anyobanyoba, en gire won kuc. Macalo timme i cokke ducu pa lwak muye Yecu, ma gin jo pa Lubaŋa, mon myero guliŋ woko litik ka gitye i kacokke. Pien pe giyegi me lok; gin myero gubed i te loc, macalo cik pa Lujudaya bene oloko. Ka ce gimito ŋeyo lok mo, myero gupeny coggi ki paco. Bedo me lewic mada, dako me lok i cokke pa lwak dano ma guye Kricito. Gwok nyo wutamo ni lok pa Lubaŋa yam oa ki botwu ba, dok obino botwu keken? Ka ŋat mo tamo ni en latit lok pa Lubaŋa, nyo etye ki mot mogo me Cwiny, myero oŋe ni, lok ma acoyo botwu-ni en aye cik mua ki bot Rwot. Ento ka ŋat mo pe oketo lok man i tam, pe bene gibeketo tam i kome. Kit meno, utmegina, wuket cwinywu i tito lok pa Lubaŋa, lok me dumo leb mapatpat bene pe wugeŋ. Ento gin mo ducu wutim i kit maber, dok kore ki kore. Utmegina, amito poyo wiwu i kom lok me kwena maber ma yam atito botwu, ma doŋ wugamo-ni, en bene ma doŋ wucuŋ iye-ni; en lok ma wularre pire-ni, ka doŋ wumako matek kit ma yam atittiwu kwede, ka onoŋo pe wuye nono. Pien lok ma nene amiyowu ma pire dit mukwoŋo, en lok ma yam gimiya, ma waco ni, Kricito yam oto pi balwa, kun lubo coc ma yam gicoyo; dok bene ni giyike, ka doŋ gicere woko i nino me adekke, kun lubo coc ma yam gicoyo, dok ni yam onen bot Petero, ka dok onen bot jo apar wiye aryo ca. Ka dok onen bot utmego makato miya abic lawaŋacel; pol dano mogo i kom jo-nu pud gitye kwo, kadi bed jo mogo doŋ guto woko. Dok oturu ki nen bot Yakobo, lacenne onen bot lukwena ducu. Me agikkine ducu, ci bene onen bota, kadi bed abedo calo latin ma gibwogo abwoga. Pien an atidi twatal i kin lukwena ducu, ma onoŋo pe porre me lwoŋa ni an lakwena, pien yam aketo can i kom jo pa Lubaŋa muye Kricito. Pi kica ma Lubaŋa omiya en mumiya atye macalo atye-ni; kicane ma tye bota-ni yam pe obedo me nononono. An yam abedo ka medde ki tiyo tic matek twatwal makato jo-nu ducu; ento pe an aye ma atiyo, ento kica pa Lubaŋa aye ma otiyo kacel kweda. Doŋ kadi bed onoŋo an nyo gin jo-nu, lok ma wan doŋ watito en ennu, lok ma wun wuye bene-ni en ennu. Doŋ ka lok me kwenawa tito ni gicero Kricito ki i kin jo muto, piŋo jo mogo i kinwu giwaco ni cer pa jo muto pe tye? Ka ce cer pa jo muto pe, ci Kricito bene kara pe gicero. Ka Kricito yam pe gicero, ci kwena ma watito-ni doŋ yone pe, kadi wa niyewu bene yone pe. Medo ki meno, wan bene lucaden me goba i kom Lubaŋa, pien waloko lok i kom Lubaŋa ni en ocero Kricito, ento ka dano pe gicero, ci yam Kricito bene pe gicere. Pien ka cero jo muto pe, noŋo Kricito bene yam pe gicero. Ka Kricito yam pe gicero, ci kony me niyewu bene pe, noŋo pud wutye i balwu. Man doŋ tyen lokke ni, jo muto i Kricito noŋo doŋ gurwenyo woko matwal. Ka genwa i kom Kricito konyowa i kwo me kare-ni keken, ci doŋ noŋo watye marac makato jo ducu. Ento i adane, Kricito doŋ gicero woko ki i kin jo muto, en tye macalo wi mwaka pa jo muto. Pien dano aye mukelo to, dok bene cer pa jo muto dano mukelo. Pien macalo dano ducu to i Adam, en i kit yo acel-lu jo ducu gibimiyogi kwo i Kricito. Ento ŋat acel acel i kakare: mukwoŋo Kricito, me wi mwaka, ka lacenne jo pa Kricito i kare me dwogone. Ka doŋ agikki piny bio, ma Kricito bimiyo iye ker i ciŋ Lubaŋa Won, ma noŋo doŋ otyeko turo kit loc ki twero ki tek ducu me cwiny. Pien en myero obed ka loc, nio ka Lubaŋa biketo lukworre ducu piny i te tyene. Lakwor ma gibityeko woko me agikki en aye to. Pien yam gicoyo ni, “Lubaŋa oketo en obedo lalo jami ducu.” Ka giwaco ni oketo “jami ducu” i te locce, nen ka maleŋ ni pe gikwano iye Lubaŋa kikome, ma oketo jami ducu i te loc pa Kricito. Ka doŋ gityeko keto jami ducu i te locce, en Wod kikome bene gibiketo i te loc pa Lubaŋa, wek Lubaŋa doŋ ocok jami ducu i te locce. Iyo, ka jo muto pe gibicer, ci doŋ jo ma gibatija pi jo muto-ni gibibedo niŋniŋ? Ka ce cero jo muto pe tye kadi ki acel, piŋo kono dok gibatija pigi? Piŋo wan kono wacuŋ ka marac cawa ducu? An mera ato nino ducu, utmegina; meno awaco botwu atir, pi wakke ma atye kwede i komwu i Rwotwa Yecu Kricito. Ka kono nene alwenyo ki lee mager i Epeco, macalo dano giwaco-ni, kono ki kony mene ma anoŋo iye? Ka cero jo muto pe, ci ber doŋ “wacamu, wamatu, pien diki wabito woko.” Pe wuwek gibwolwu: “Bedo ki jo maraco balo kit mabeco.” Wudwog cen i tam ma atir ma pe me mero, ci wugik bal woko cut. Pien jo mogo pe gitye ki ŋec mo i kom Lubaŋa. Awaco man wek lewic omakwu. Gwok nyo ŋat mo bipenyo ni, “Jo muto gicerogi niŋniŋ? Gibibedo ki kit kom macalo niŋniŋ?” In lamiŋmiŋ! Kodi ma icoyo i potoni pe twero noŋo kwo nio ka doŋ oto woko. Gin ma icoyo-ni obedo mere kodi nono, nyo kodi kal, nyo kit kodi mukene-ne, pe en kom ginapita ma bidoŋo-ni. Ento Lubaŋa miyo kom ki kodi meno kit macalo yam en oyero, kodi acel acel ki kiti kome. Riŋo kom gin makwo ducu pe rom; riŋo dano pat, riŋo lee pat, me pa winyi pat, ki me pa rec bene pat. Dok bene tye kom me polo ki kom me lobo; ento deyo pa kom me polo tye ki yone pat, ki deyo pa kom me lobo bene tye ki yone pat. Ceŋ tye ki deyone, deyo pa dwe bene mapat, ki lakalatwe-gu bene gitye ki deyo mapatpat; pien lakalatwe bene kitgi patpat, omiyo deyo ma gitye kwede bene tye patpat. Tye bene kit meno i kom cer pa jo muto. Kodi ma gicoyo-ni en gin ma top; ento ka doŋ gicero pe dok to. Gicoyo ma noŋo deyone pe, gicero ma noŋo deyone tye; gicoyo ma noŋo pud goro, ento gicero ma noŋo doŋ tye ki tek. Gicoyo i kom me lobo man, ci gicero i kom me cwiny. Ka kom me lobo man tye, ci kadi wa kom me cwiny bene tye. Yam gicoyo ni, “Dano mukwoŋo, Adam, odoko gin makwo”; ento Adam me agikkine odoko cwiny ma miyo kwo. Pe kom me cwiny koŋ aye ma kwoŋo bino, ento kom me lobo man, ka doŋ kom me cwiny bino lacen. Dano mukwoŋo yam gitiyo ki apwa me lobo, ento dano me aryone oa ki i polo. Jo me lobo gicalo dano ma gitiyo ki ŋom; ento jo me polo bene gical ki dano ma oa ki i polo. Doŋ macalo waruko cal pa dano ma gitiyo ki ŋom, kit meno bene wabiruko cal pa dano ma oa ki i polo. Man aye gin ma aloko botwu, utmegina, ni, gin ma tye ki kom ki remo pe twero leyo ker pa Lubaŋa, gin ma top bene pe twero leyo gin mo ma pe top. Koŋ wuwiny muŋ man, ni, pe wan ducu wabito, ento wan ducu gibilokowa woko, oyotoyot, pi kare manok mo keken, macalo waŋ ma neno piny litubetube, ka buriji me agikki doŋ bikok. Pien buriji bikok, ka doŋ gibicero jo muto woko kun pe dok gibito, wan bene gibilokowa woko. Pien gin ma balle myero orukke ki gin ma pe balle, ki gin ma to myero orukke ki gin ma pe to. Ka gin ma balle doŋ orukke ki gin ma pe balle, dok ka gin ma to doŋ orukke ki gin ma pe to, ka doŋ miyo lok ma yam gicoyo obicobbe kakare ni, “To doŋ gimwonyo woko, giloyo woko matwal.” “In to, locci doŋ tye kwene? In to, aremmi kono tye kwene?” Arem me to aye bal, doŋ tek me bal aye cik. Ento myero wapwoyu Lubaŋa ma miyowa loc pi Rwotwa Yecu Kricito. Pi meno, utmegina ma amaro, wucuŋ matek ma pe wuyeŋŋe, kun wumedde bene ki tic pa Rwot nino ducu, kun wuniaŋ ni, i Rwotwa yellewani pe me nono. Doŋ lok ma mako jogo lim me konyo jo pa Lubaŋa: kit macalo yam aciko jo muye Kricito ma gibedo i Galatia ni guti, wun bene wutim kumeno. Nino mukwoŋo i cabit acel acel, dano acel acel i kinwu myero opok lim mogo oket pat, kun lubo kit ma en noŋo kwede, ci okan, wek pe gibed ka joŋo limwu ki ka koma, ma doŋ an ao botwu. Ka ao botwu kunnu, ci abicwalo jo ma wun wuyero me tero motwu i Jerucalem, kun noŋo amiyogi bene waraga. Ka ce onoŋo nen ni myero an bene aciti, ci wabicito kacel kwedgi. Abio botwu ma noŋo doŋ koŋ awoto ao i Makedonia, pien atamo me wok ki kunnu. Gwok nyo abibedo botwu pi kare manok mo, gwok nyo pi kare me koyo woko ducu, wek wubikonya bene i wotta ka ma abicito iye doki. Pien pe amito ni anenwu malomalo, ageno abibedo botwu pi kare malac, ka Rwot oye. Ento abibedo i Epeco nio wa i kare me Pentekote, pien doŋ giyabo yo bota malac me tiyo tic matek kany, dok jo ma geŋo tic pol. Ka Temceo obino, wunen ni wumiyo en obedo i kinwu laboŋo lworo mo, pien en bene tiyo tic pa Rwot calo an kikoma. Ŋat mo pe myero ocaye, ento wukonye wek owot i kuc, wek odwog bota, pien akure ki utmegiwa. Lok i kom ominwa Apolo, yam alege mada ni koŋ myero oo botwu, kacel ki utmego mukene, ento en pe omito bino kadi ki acel i kare-ni; atamo doŋ en bibino ka ce onoŋo kare maber. Wuki piny, wucuŋ matek likiŋ i kom niyewu, wubed co kikome, wubed ki teko. Gin ducu ma wutimo, wuti ki mar. Utmegina, wuŋeyo ni Citepana ki jo ma i ode aye gin jo mukwoŋo doko Lukricitayo i lobo Akaya, dok bene gumine kengi i tic pi jo pa Lubaŋa. Doŋ aleguwu me bedo ki winy bot jo-nu, ki jo mukene ducu ma giyelle kun gitiyo kacel kwedgi. Cwinya yom i bino pa Citepana gin ki Portunato ki Akaiko, pien gin gucuŋ ma kakarwu. Gin doŋ gudwoko cwinya, ki cwinywu bene. Gin jo macalo meno myero wutam pigi. Jo muye Kricito ducu ma gibedo i Acia gumotowu. Akwila ki Pricika gumotowu matek i Rwot, kacel ki lwak jo muye Kricito ma gicokke i otgi. Utmego ducu gumotowu. Wumotte kekenwu ki mot maleŋ me mar. An Paulo amotowu ki coc ma acoyo ki ciŋa. Ŋat ma pe maro Rwot myero gicen woko. Bin Rwotwa! Kica pa Rwotwa Yecu Kricito obed kwedwu. Mar mera obed kwedwu ducu i Kricito Yecu. Amen Waraga man oa ki bot Paulo ma en lakwena pa Kricito Yecu pi miti pa Lubaŋa, ki bot ominwa Temceo. Bot jo muye Lubaŋa ma tye i Korint, kacel ki jo pa Lubaŋa ducu ma gitye i lobo Akaya ducu: Lubaŋa Wonwa ki Rwotwa Yecu Kricito omiwu kica ki kuc. Myero gipwo Lubaŋa Won Rwotwa Yecu Kricito, Won ma lakica, Lubaŋa ma kweyo cwiny dano ducu. En kweyo cwinywa i can ducu ma walimo wek wan bene wabed ki twero me kweyo cwiny jo ma tye ki can mo mapatpat, kun wakweyo cwinygi i kit yo acel-lu ma Lubaŋa okweyo kwede cwinywa-ni. Kit macalo can madit ma Kricito yam ociro doŋ opoto i komwa bene, kit meno bene pi Kricito wan bene gikweyo cwinywa twatwal. Ka ce waneno can, meno miyo gikweyo cwinywu, dok wunoŋo larre; ka gikweyo cwinywa, meno bene miyo gikweyo cwinywu, ci miyo wucako noŋo tek bene me ciro kit can acel ma wan waciro-ni. Watye ki gen matek i kom Lubaŋa piwu, pien waŋeyo ni, ka wunywako kwedwa can ma waciro, kumeno bene gibikweyo cwinywu kit macalo yam gikweyo kwede cwinywa. Utmegina, wamito ni wuniaŋ i kom can ma waneno i Acia; pekone odiyowa mukato kare woko ma pe dok cirre, omiyo pe doŋ wabedo ki gen mo me bedo kwo doki. Onoŋo doŋ waŋeyo ni gityeko ŋolo kop me to i wiwa. Meno otimme wek pe wajeŋŋe i komwa kekenwa, ento wajeŋŋe i kom Lubaŋa ma cero jo muto. En olarowa ki i can me to marac macalo man, dok bene bilarowa; wamoko bene genwa i kome ni bilarowa doki. Myero wuribbe kwedwa i lega, wek omi jo mapol gupwo Lubaŋa piwa, pi gin maber ma gitimo botwa pi lega pa jo mapol. Gin ma wanyatte pire en ene: waŋeyo i cwinywa ada ni wakwo i lobo man, makatone wan wakwo kacel kwedwu, laboŋo bal mo, kun cwinywa bene leŋ i kit ma Lubaŋa mito, pe pi ryeko pa dano, ento pi kica pa Lubaŋa. Wan wacoyo botwu gin ma wutwero kwano dok wuniaŋ. Ageno ni wubiniaŋ matut, kit macalo doŋ wuniaŋ manoknok, ni, i nino pa Rwotwa Yecu wubiwakke piwa calo wan bene wabiwakke piwu. Onoŋo ceŋ aniaŋ man maber, omiyo yam ayubo ni koŋ acak wotta ki botwu, wek wunoŋ kica kiryo. Pien onoŋo yam amito awok botwu i wotta i Makedonia, ki i dwogona ki kunnu, wek wukonya i wotta me cito i Judaya. I kare ma ayubo kit meno onoŋo pe abedo ka cabbe acaba i lokka. Pe ayubo macalo dano mo ma koŋ ye, ka dok kwero woko. Macalo Lubaŋa genne, lok ma yam wawaco botwu pe waloko ka dok lacen wakwero woko. Pien Yecu Kricito Wod pa Lubaŋa ma yam wan ki Silvano ki Temceo watito pire botwu pe obedo ŋat ma ye ka dok lacen lokke kwero woko, ento en doŋ omoko lok pa Lubaŋa; i en gin ma Lubaŋa ociko ni etimo ducu ocobbe kakare i kome. Meno aye gin mumiyo wawaco ni Amen i Yecu Kricito pi miyo deyo bot Lubaŋa. Ŋat ma miyo wacuŋ matek kacel kwedwu i Yecu Kricito, dok owirowa ki moo, en Lubaŋa. En doŋ omwono lanen mere woko i komwa, dok oketo Cwiny mere Maleŋ i iwa, me moko ni en bimiyowa gin ducu ma en yam ociko. Alwoŋo Lubaŋa me bedo cadenna kun awacciwu ki cwinya ducu ni, gin mumiyo pe abino i Korint, pien onoŋo amito timowu kica. Pe te lokke ni wan watye ki twero i kom niyewu, ento watiyo kwedwu kacel wek wubed ki yomcwiny, pien wucuŋo matek i kom niye. Ento ki tuŋ bota onoŋo atamo ni dwogowa botwu myero pe dok okel botwu remcwiny. Ka awaŋo cwinywu, ci aŋa ma biyomo cwinya? Pe en dano ma awaŋo cwinye-ni? Meno en gin mumiyo yam acoyo waraga maca botwu, wek ka abino, jo ma myero guyom cwinya pe gumiya remcwiny, pien onoŋo ageno wun ducu kun aŋeyo ni, yomcwinya en yomcwiny-wu wun ducu. Yam acoyo botwu waraga kun pig waŋa cwer madwoŋ twatwal pi cwercwiny ki kumo ma abedo kwede, pe pi cwero cwinywu, ento wek omi wuŋe mar madit ma atye kwede i komwu. Ka ŋat mo okelo cwercwiny, pe onoŋo ocwero cwinya, ento noŋo otemo cwero cwinywu ducu, nyo wek awacci, jo mapol i kinwu, pien pe myero awac lok mapek mukato kare. Kit dano macalo meno, can ma jo mapol i kinwu guketo i kome twero romme; en mumiyo myero doŋ wutimme kica, dok wukwe cwinye, wek omi cwercwiny madit mukato kare pe onure woko. Man omiyo abako doga botwu, myero wunyut bote mar ma wutye kwede i kome. Man aye lok mumiyo yam acoyo waraga maca, me temowu, wek anen ka wuwinya i yo ducu. Ŋat mo ma wun wutimo kica bote, an bene atimme kica. Pien ka atimo kica ki dano pi bal mo, atimo meno piwu i nyim Kricito, wek Catan pe olowa ki ryekone, pien wan pe wakwiya tamme Ma doŋ ao i Teroa pi tito lok me kwena maber i kom Kricito, yam anoŋo ni Rwot oyabba yo; ento cwinya pe opye pien pe anoŋo omera Tito kunnu. Ci aciko jo kunnu, ka akato acito i Makedonia. Myero gipwo Lubaŋa ma nino ducu tye ka telowa i dorre me nyuto loc pa Kricito, dok tiyo kwedwa wek Kricito oŋene, macalo gin makur ma ŋwece duny i kabedo ducu. Pien wan wacal ki gin makur ma Kricito owaŋo otyero bot Lubaŋa, ma ŋwece duny mamit; jo ma tye i yo me larre ki jo ma tye i yo me rwenyo woko doki giŋweyo. Doŋ bot jo ma tye ka rwenyo, ŋwecwa obedo gin muto ma kelo to; ento ki bot jo ma tye ka larre, ŋwecwa obedo gin makwo ma kelo kwo. Aŋa mono ma twero tic man? Wan pe wacal ki pol pa dano mukene, ma girubo lok pa Lubaŋa ki lok mukene, macalo lucatwil ma pe genne; ento wan watito mere lok pa Lubaŋa keken, watito i Kricito ma cwinywa leŋ i nyim Lubaŋa, macalo jo ma Lubaŋa ooro. Wan dok wacako pakke kenwa? Nyo wamito waraga me pakowa botwu, macalo jo mogo gitye kwede, nyo waraga ma wun kikomwu aye wucoyo? Wun kikomwu aye doŋ wubedo waraga me pakowa, ma gicoyo i cwinywa, ma dano ducu gitwero ŋeyo dok gikwano. Doŋ wutyeko nyuto ka maleŋ ni wun wubedo waraga ma oa ki bot Kricito, ma wan wakelo. Pe gicoyo ki vino, pe gicoyo i kom got; ento ma ka got, Kricito ocoyo i cwiny dano kun coyo ki Cwiny pa Lubaŋa makwo. Gin mumiyo aloko kit meno, pien wacuŋ matek i kom Lubaŋa pi Kricito. Wan kikomwa pe waromo loko ni gin mo oa ki botwa; tekwa ducu oa ki bot Lubaŋa. En bene mumiyo waromo bedo lutic me gicikkene manyen, pe lutic me cik ma gicoyo acoya, ento me Cwiny Maleŋ; pien gin ma gicoyo acoya kelo to, ento Cwiny Maleŋ kelo kwo. Cik ma yam gigoro ki nukuta i kom got apaya ma ticce me kelo to, onoŋo obino ki deyo, omiyo neno waŋ Moses oloyo jo Icrael pi nyim Moses muryeny ocaro waŋgi woko, ma ryeny i tur nyime-nu otugi rwenyo woko. Iyo, tic pa Cwiny pa Lubaŋa deyone pe bikato maca matek twatwal? Pien ka tic ma miyo kop loyo dano tye ki deyo, ci tic ma miyo gikwano dano ni kitgi atir deyone pe doŋ kato maca woko? Kombeddi doŋ gin ma yam tye ki deyo doŋ odoko gin ma pe ki deyo kadi ki acel mo, pi deyo mukene ca ma doŋ kate matek twatwal-li. Pien ka gin ma yam orwenyo woko obino ki deyo, gin ma ri myero doŋ obed ki deyo makato. Pien wan watye ki kodi gen man, en mumiyo waloko ki tekcwiny. Pe dok wacal ki Moses ma yam oumo waŋe ki boŋo, wek jo Icrael pe gunen kit ma ryeny mucaro waŋgi-ni tye ka rwenyo woko kwede i tur nyime, ci otum woko. Ento onoŋo tamgi yam oumme woko; nio wa tin tamgi pud oumme i kite acel-lu ka gikwano botgi gicikke macon, pien laum ca twero kwannye pi Kricito keken. Kadi wa i kare-ni ka gikwano botgi cik pa Moses, laum pud bedo kakare, umo tamgi woko. Ento ka dano mo olokke bot Rwot, laum meno kwannye woko matwal. Rwot ma waloko pire kany-nyi en Cwiny Maleŋ; ka ma Cwiny pa Rwot tye iye, kunnu kuc bene tye iye. Ki wan ducu ma doŋ gikwanyo laum woko ki i waŋwa watye macalo kiyo ma miyo deyo pa Rwot nen macalo ryeny ceŋ, mumiyo watye ka lokke me doko calo en, kun deyone medde ameda i komwa; meno aye tic pa Rwot, ma en Cwiny Maleŋ. Pi meno, wan ma doŋ giorowa i tic man pi kica pa Lubaŋa cwinywa pe dok tye ka dok cen. Wan doŋ wadag kit ducu ma gikano, ki kit me lewic; dok bene watyeko kwero tic me bwolo woko ki nyobo lok pa Lubaŋa, ento pi loko lok ada ka maleŋ wageno ni ŋec ma tye i cwiny dano acel acel ma nyutte balle bipwoyowa. Ka ce lok me kwena maber ma wan wakelo oumme woko, noŋo oumme ki tuŋ bot dano ma gitye ka rwenyo woko arwenya. Gin jo ma pe giye-nu, lubaŋa me lobo man doŋ oumo tamgi woko wek pe gunen leŋo me lok me kwena maber i kom deyo pa Kricito, ma en cal pa Lubaŋa kikome. Wan pe watito lok i komwa kenwa, ento i kom Yecu Kricito, ma en aye obedo Rwot, ma wan kikomwa wadoko luticwu pi Yecu. Pien Lubaŋa ma yam owaco ni, “Leŋo myero oryeny kun a i colpiny,” en aye ma doŋ oryeny i cwinywa, omiyowa leŋo me ŋeyo deyo pa Lubaŋa ma oryeny i waŋ Kricito. Ento watye ki lonyo man i atabo ma gicweyo ki lobo, me nyuto ni tek madwoŋ me twero obedo gire pa Lubaŋa, pe oa ki botwa. Gidiyowa woko tuŋŋi ki tuŋŋi, ento pe giridowa ma okato kare; tamwa ocuŋ woko, ento genwa pe oballe; giunowa, ento pe giwekowa ata; gibolowa piny i ŋom ligwek, pe bene wato. Nino ducu watiŋo to pa Yecu i komwa, wek kwo pa Yecu bene onen woko ka maleŋ i komwa-ni. Pien nino ducu wan ma wakwo wamine me to pi Yecu, wek omi kwo pa Yecu onen woko ka maleŋ i komwa ma to-ni. Mumiyo to tye ka tic i komwa, ento kwo tye ka tic i komwu. Wan watye ki kit cwiny acel-lu me niye ma yam omiyo gicoyo ni, “Aye, en mumiyo aloko.” Wan bene waye, mumiyo watye ka lok. Waŋeyo ni, ŋat mucero Rwotwa Yecu bicerowa bene kacel ki Yecu, ci bikelowa i nyime kacel kwedwu. Pien meno ducu otimme piwu, wek kica pa Lubaŋa omedde bot jo mapol, wek gin bene gumedde ki pwoc madwoŋ ma kelo deyo bot Lubaŋa. En aye gin mumiyo cwinywa dok pe tye ka dok cen. Kadi bed kwowa ma woko tye ka balle, ento kwo ma i iwa tye ka roc, doko nyen nino ki nino. Pien un ma giunowa kwede pe pek, bedo pi kare manok mo keken, dok bene tye ka yubo botwa deyo mapek ma pe tum, ma dit matek makato; pien pe waciko waŋwa i kom gin ma nen, ento i kom gin ma pe nen. Gin ma nen bedo pi kare manok mo keken, ento gin ma pe nen ri nakanaka. Pien waŋeyo ni ka komwa me lobo man oballe woko, ma wabedo iye macalo wabedo i kema-ni wan watye ki gedo mukene ma Lubaŋa bimiyo botwa, ot ma pe gigero ki ciŋ, ot ma tye doŋ bedo matwal i polo. I adane wan watye ma wacur acura i kema man, kun wamito matek ni girukwa ki kabedowa ma a i polo, wek wabam i kom man, ma ka doŋ watyeko rukone, ci pe gibinoŋowa watye munero. Pien ka pud watye i kema man, wacur acura pi cwercwiny ma onurowa; pe ni meno wamito ni wabed ma pe warukke, ento wamito ni waruk kom manyen i wi man, wek kwo omwony gin ma to woko. Ŋat ma oyubowa pi lok man kikome aye Lubaŋa, dok bene omiyowa Cwinye calo gin ma Lubaŋa omiyo ma moko ni en bicobo gin ma ociko. En mumiyo nino ducu wadiyo cwinywa maber, kun bene waŋeyo ni, ka watye i paco me komwa en-ni, wabedo bor ki Rwot, pien kwowa cuŋ i kom niye, pe i neno piny ma waneno. Wan wadiyo cwinywa maber, kun watamo ni twra wawot ma wabwoto komwa woko, wabed paco bot Rwot. Doŋ kadi watye i paco kany nyo kunnu, waketo cwinywa me bedo jo ma giyomo cwiny Rwot. Pien wan ducu myero wacuŋ i nyim Kricito wek oŋol kop i komwa, wek dano acel acel onoŋ gin mutiko en, ma lubo kit ma yam otiyo kun tye i kom, ka ber nyo ka rac. Doŋ macalo waŋeyo ni Rwot myero gilwor, watemo ywayo tam pa dano, ma kitwa nen woko ka maleŋ bot Lubaŋa; ageno bene ni kitwa otyeko nen botwu ki ŋec ma tye i cwinywu ma nyuttiwu bal. Pe dok wapakke kenwa, ento watye ka miyo botwu gin ma myero wuwakke kwede piwa, wek wubed ki yo me gamo dog jo ma giwakke pi gin ma nen ki woko, pe pi kit ma dano tye kwede i cwinye. Ka doŋ wadoko jo ma lupoya, wapo giwa pi Lubaŋa; ento ka wiwa tye ka tic maber, meno bikonyowu. Pien mar pa Kricito loyo kwowa, pien doŋ waŋolo kop kit man ni, ŋat acel oto pi jo ducu, meno mumiyo jo ducu doŋ guto. En yam oto pi dano ducu, wek jo makwo pe gumedde ki bedo kwo pigi kengi, ento gubed ki kwo pi ŋat ma yam oto ka ocer pigi ca. En mumiyo cakke kombeddi, wan pe waŋeyo dano mo i kit me lobo man; kadi bed yam waŋeyo Kricito i kit me lobo, pe dok waŋeye kit meno. En mumiyo ka ŋat mo tye i Kricito, en doŋ bedo gin ma giketo manyen; gin macon noŋo doŋ orwenyo woko, gin manyen doŋ oleyo kakare. Meno ducu obedo tic ma Lubaŋa otiyo, ma yam odwokowa kwede bote, pi Kricito, dok bene omiyowa tic me dwoko dano bote; ni meno, i Kricito, Lubaŋa onoŋo yam tye ka dwoko dano ma i lobo bote, kun pe okwano balgi i komgi, dok bene omiyowa lok me kwena i kom kit ma en doŋ odwokogi kwede bote. En mumiyo wadoko lukwena, luwaŋ Kricito; Lubaŋa legowu ki dwanwa, wan bene wabako dogwa botwu ma ka Kricito ni, Wuwek Lubaŋa odwokwu bote. Ŋat ma yam pe oŋeyo bal, Lubaŋa oloke odoko bal piwa, wek pire wadok jo ma nywako kit pa Lubaŋa ma tye atir. I ticwa kacel ki Lubaŋa bene walego ni, kit ma doŋ wunoŋo kwede kica pa Lubaŋa-ni, pe wuwek oballe nono, pien en yam owaco ni, “Yam awinyi i kare me timo dano maber, yam akonyi i kare me laro dano.” Wunen, man aye kare ma gitimo iye ber bot dano. Tin aye nino me larre. Wan pe wamito waket ariya mo i yo pa ŋat mo, wek dano pe guwac ni ticwa rac; ento i kare ducu wanyuto berwa kenwa macalo wan lutic pa Lubaŋa kun waciro matek twatwal, i can ki peko ki ayelayela ma odiyowa. Gipwodowa, gitweyowa i buc, dano giroko lwak me lweny i komwa, watiyo tic matek, ma nino ki cam bene oremowa. Wanyuto ni wan lutic pa Lubaŋa pi kitwa maleŋ, pi ŋec ma watye kwede, pi diyo cwinywa ki pi kicawa; pi Cwiny Maleŋ, ki pi mar ma watye kwede ma goba pe iye, pi tito lok me ada, ki pi tek pa Lubaŋa. Doŋ wamako jami lweny me kit ma atir i ciŋwa ryoryo, tuŋ lacuc ki tuŋ lacam. Giketo deyo i komwa, dok bene giketo lewic i komwa, giyetowa dok bene gipakowa. Giterowa macalo lugoba, ento kun wan jo me ada. Giterowa macalo jo ma pe giŋene, ento giŋeyowa twatwal. Gilokowa wadoko calo jo muto, kun wan mere jo makwo. Kadi gitimwa gujiguji, pe ginekowa; kadi gimiwa kumo, cwinywa noŋo pud bedo yom nino ducu; wanen macalo lucan, ento wan aye ma wamiyo jo mapol gidoko lulonyo; wanen calo pe watye ki gin mo, ento kun kono watye ki jami ducu. Wun jo Korint, wan doŋ waloko kwedwu ka maleŋ, dok bene doŋ wayabo cwinywa botwu malac. Wan pe waumo cwinywa woko botwu, ento wun aye wuumo cwinywu. An aloko kwedwu macalo wun litinona; kit ma watimowu kwede, wun bene wutim kit meno; wuyab cwinywu botwa malac. Pe wuribbe kun wubedo kacel ki jo ma pe guye Yecu, pien kitwu patpat. Doŋ kit ma atir ki tim maraco gitwero bedo lurem niŋinŋ? Leŋo ki colpiny gitwero ribbe gibedo kacel niŋniŋ? Doŋ tam pa Kricito ki pa Belial twero rwatte? Gin aŋo ma dano ma oye Yecu twero nywako gin ki ŋat ma pe oye? Ot pa Lubaŋa kono twero ribbe niŋniŋ ki cal jogi? Pien wan aye wabedo ot pa Lubaŋa makwo; macalo en Lubaŋa doŋ owaco ni, “An abibedo i igi, abibedo ka wot awota i kingi, abibedo Lubaŋagi, gin bene gibibedo jona. Pi meno doŋ wua woko ki i kingi, wupokke woko kwedgi, man lok pa Rwot, pe wugud gin mo ma kome ki keni. miyo abijolowu, abibedo wonwu, wun bene wubibedo awobena ki anyirana; man lok pa Rwot Won Twer Ducu.” Wun ma amaro, cikke meno yam giciko piwa. Pi meno, myero walonnye woko kekenwa i gin mo ducu ma cido komwa nyo cwinywa, kun walworo Lubaŋa, wek wadoku jo maleŋ atikatika. Wuyab cwinywu botwa; pe watimo ŋat mo marac, pe wabalo ŋat mo, pe bene wabuyo ŋat mo pi mito lim. Pe awaco man ni wek kop olowu, pien yam awaco botwu koŋ ni wun piwu lit botwa mada, wek wato dok wakwo kacel kwedwu. Atye ki gen mada i komwu; awakke bene matek piwu. Cwinya okwe maber, dok apoŋ ki yomcwiny i canwa ducu. Cakke i kare ma wao i Makedonia pe wabedo ki yweyo mo. Can onoŋo orumowa woko tuŋŋi ki tuŋŋi, lweny i kin dano ki lworo ma onoŋo tye i cwinywa. Ento Lubaŋa ma kweyo cwiny jo ma can obwoyogi, okweyo cwinywa pi bino pa Tito. Pe pi binone keken, ento bene pi kit ma wun wukweyo kwede cwinye. En otito botwa pi mit ma wutye kwede me nena, cwercwiny ma wutye kwede, ki kit ma wularo kwede pira, ci omedo yomcwinya ameda. Kadi bed waragana ca yam ocwero cwinywu, an pe doŋ aŋut pi coyone, kadi bed yam aŋut pien aneno ni waraga ca ocwero cwinywu pi kare mo. Kombeddi an cwinya yom, pe te lokke ni, pien awaŋo cwinywu, ento pien waŋ cwinywu omiyo wuŋut. Waŋcwinywu meno onoŋo oa ki bot Lubaŋa, wek omi pe wunoŋ can mo piwa. Pien waŋcwiny ma Lubaŋa miyo kelo ŋut ma tero dano i larre, ma pe doŋ gitwero waco ni, “Kono yam pe atimo”; ento waŋcwiny me lobo kelo to. Koŋ wunen kit ma Lubaŋa otiyo kwede ki waŋcwinywu! Doŋ wunen kit ma wuketo kwede cwinywu, kit ma doŋ wuketo kwede tek me nyuto ni wupe ki bal, kit akemowu, kit lworo, kit mit ma wutye kwede me nena, kit ma wularo kwede pira, ki kit ma wuculo kwede kwor! Wun doŋ wutyeko nyutte woko kenwu i yo ducu ni pe wutye ki bal mo i lok meno. Mumiyo kadi bed acoyo botwu waraga, pe acoyo pi ŋat ma otimo gin marac, kadi pi ŋat ma gitimo gin marac i kome, ento acoyo wek omi kit ma wularo kwede pira onen woko ka maleŋ botwu i nyim Lubaŋa. Man en aye gin mumiyo cwinywa doŋ okwe. Medo i kom kwecwinywa, yam wabedo ki yomcwiny mada pi yomcwiny pa Tito, pien wun ducu wukonyo me kweyo cwinye. Kadi bed yam awakke i nyime piwu, lewic pe omaka; ento kit macalo yam lok ducu ma wabedo ka Tito botwu obedo lok me ada, kit meno wakkewa bene i nyim Tito obedo me ada. Ka ce en po i kom kit macalo wun ducu wuwinye kwede, ki kit ma wujole kwede ki lworo ki myelkom, mar medde ameda i iye i komwu. An cwinya yom, pien atye ki gen madit i komwu i yo ducu. Utmegiwa, wamito wuŋe pi cwiny me kica ma oa ki bot Lubaŋa ma onen bot lwak dano ma guye Kricito ducu ma gitye i Makedonia. Gin guciro un ducu ma gitemogi kwede matek, ento gin mua ki i yomcwiny madit ma gin gubedo kwede i dye can madit mada ma yam odiyogi ca, en aye lonyo madit me cwiny ma gubedo kwede me miyo mot. Pien gin yam gumiyo gin ma giromo miyone, ki makatone bene, kit ma an kikoma aneno, ma pe gidiyogi iye adiya. Gin gulegowa ma gibako doggi ni watim ber, waye gin giribbe kwedwa i konyo jo pa Lubaŋa. Yam gutiyo tic mukato genwa woko, pien gukwoŋo mine kengi bot Lubaŋa, ka doŋ pi mit pa Lubaŋa gucako mine kengi botwa bene. Ka doŋ wacuko cwiny Tito ni, kit macalo yam doŋ en ocako tic man me kica i kinwu, myero bene doŋ ocob woko. Doŋ macalo wun wuloyo dano i yo ducu, i kom niye, i loko lok, i ŋec, i keto cwinywu ki i mar ma wutye kwede i komwa, ber wulo dano bene i tic man me kica. Gin ma aloko-ni pe obedo cik ma an aye amiyo, ento anyuto botwu kit ma jo mukene giketo cwinygi, wek anen mar ma wutye kwede ka obedo mar me ada. Pien wuŋeyo cwiny me kica ma Rwotwa Yecu Kricito obedo kwede; kadi bed nene en lalonyo, ento piwu olokke odoko lacan, wek i canneni wun wudok lulonyo. Man tamma ma amiyo i lok man: twero bedo ber ka wutyeko gin ma yam wucako i mwaka mukato-ni woko. Yam wun aye wubedo jo mukwoŋo, pe i tic keken, ento i yeyo me tiyo tic bene. Kombeddi amito wumedde wuwot anyim ki ticwu ca, wucob woko. Wubed ki miti me tyekone ma rom aroma ki maca ma yam wukwoŋo kwede, kun wukwanyo gin ma mitte ki i kom gin ma tye botwu. Lubaŋa gamo mot ma dano tye kwede, tekke en obedo ki miti me miyone, ma pe paro gin ma pe etye kwede. Pe awaco ni jo mukene gubed maber, wun aye can odiwu, ento ni dano ducu gubed maromrom. Kit macalo kombeddi wutye ki jami mabuppi, wukonygi i cangi, wek ka waŋ mo gin gubedo ki jami mabup, gin bene gubikonywu ki gin murem botwu, ci doŋ miyo wubedo maromrom; macalo yam gicoyo ni, “Ŋat ma ocoko mabup, gin mo pe odoŋ bote, ŋat mucoko manok mo, gin mo pe orem bote.” Wapwoyo Lubaŋa pien oketo i i Tito miti madwoŋ ma rom ki mewa me konyowu. En pe ojolo legawa keken, ento cwinye tye iye matek, mumiyo en gire bino botwu pi mitte kene. Waore kacel ki ominwa ca ma ŋene twatwal bot jo ducu ma guye Kricito pi kit ma en tito kwede lok me kwena maber. Pe meno keken, ento lwak dano ducu ma guye Kricito yam guyere me wot kacel kwedwa i tic man me kica ma watye ka tiyone pi miyo deyo bot Rwot, ki pi mitiwa me miyo kony bot dano. Watemo gwokke matek wek ŋat mo pe onoŋ bal mo i kit ma watye ka tic kwede ki mot man mabup ma giketo i ciŋwa-ni. Tamwa tye me timo gin maber, pe i nyim Lubaŋa keken, ento kadi wa i nyim dano bene. Doŋ waorogi kacel ki ominwa mukene ma wabedo ka temo kite pi kare malac, ci wanoŋo ni en obedo dano ma keto cwinye i kom tic mapol, ento i kare-ni doŋ tye ka keto cwinye matek twatwal makato ma yam con, pi gen madit ma en tye kwede i komwu. Tito lawota dok latic wadiwa piwu, ki utmegiwa mukene-gu, gin luor pa jo ducu ma guye Kricito, gin bene aye jo ma kelo deyo bot Kricito. Pi meno, wunyut mar ma wutye kwede woko ka maleŋ bot dano ducu ma guye Kricito, wek gunen ni nyattewa ma wanyatte kwede piwu onoŋo tye atir. Kombeddi pe mitte ki tuŋ bota me coyo botwu lok i kom mot ma gimiyo pi konyo jo pa Lubaŋa, pien aŋeyo miti ma wutye kwede. Atye ka nyatte piwu mada bot jo Makedonia ni meno, “Jo Akaya guyubbe woko wa con cakke i mwaka mukato.” Pi cukke ma wubedo ka cukke kwede, omiyo polgi bene guketo cwinygi. Doŋ acwalo utmegiwa botwu ennu wek nyattewa piwu i lok man pe ogik i lok keken, ento myero wubed ma wuyubbe i kit ma awaco botgi-ni. Ka ce ao kunnu ki jo Makedonia mogo, ka gibinoŋo ni pe wuyubbe, ci miyo doga two woko, pi gen ma onoŋo waketo i komwu; ento wun kono? Meno aye gin mumiyo atamo me cuko cwiny utmegiwa me kwoŋo nyima me bino botwu, wek gin aye koŋ gunen ka mot man ma yam wucikke me miyone-ni wuyubo; wek doŋ obed ma giyubo woko macalo mot ma wumiyo giwu ki cwinywu kenwu ma pe gidiyowu iye adiya. Lok tye kit man ni, dano ma coyo kodi manok, bikayo bene manok, ŋat ma coyo kodi madwoŋ, bikayo bene mabup. Dano acel acel myero otim kit macalo cwinye mito, laboŋo waŋcwiny mo nyo dic mo. Pien Lubaŋa maro ŋat ma miyo jamine ki yomcwiny. Dok Lubaŋa twero miyo botwu jami mabeco mapol ata, wek kare ducu wubed ki jami ma romowu maber, ma weko wun bene wutwero miyo kony mabup pi kony tic ducu mabeco, macalo yam gicoyo ni, “Ocoro jamine mapol, omiyo ki lucan, berre bedo nakanaka.” Ŋat ma miyo kodi bot dano ma laco kodi, ki cam me acama, bimiyowu kodi dok binyayone bene, ci doŋ miyo gin mua i kom cwiny maber ma wutye kwede bedo dit twatwal. En bimiyo wulony i yo ducu, ma romo miyo wubedo ki cwiny maber me miyo mot i kare ducu; pi ticwa bimiyo dano gipwoyo Lubaŋa. Pien tic me kony macalo man ma wutiyo bikelo gin ma mitte bot jo pa Lubaŋa; ento pe meno keken, bikelo bene pwoc madit twatwal bot Lubaŋa. Pi gin maber ma ticwu kelo, bimiyo jo mapol gimiyo deyo bot Lubaŋa, pien nyuto winy maber ma wutye kwede i lok me kwena maber i kom Kricito ma watito, ki pi cwiny maber ma wupoko kwede limwu bot jo-nu ki bot jo mukene ducu. Gibilego Lubaŋa piwu bene kun cwinygi paro piwu, pi kica pa Lubaŋa madit ma okato kare ma doŋ onen i komwu. Gipwo Lubaŋa pi motte maber ma pe wacce. An Paulo akok botwu kun abako doga, an ma giwaco ni amwol dok awor bene ka atye kacel kwedwu, ento abedo ger ka atye woko cen. Alegowu i lok man pi mwolo dok pi kica pa Kricito. Alegowu ni ka abino botwu, pe wumiya abed ki kit gero ki tekcwiny ma ageno ni atwero bedo kwede i kom jo mogo ma gitamo ni wan walubo kit me lobo man. I adane wan wabedo i lobo, ento pe watye ka lweny ki jami lweny me lobo. Jami lweny ma watiyo kwedgi me lwenywa pe obedo jami lweny me lobo man, ento gubedo jami lweny me tek pa Lubaŋa, ma turo cel gogo pa lumerokwa woko. Waturo kwede tam ma pe atir, ki kit wakke ducu ma tiŋŋe me pyem, ma geŋo dano miyo pe giŋeyo Lubaŋa, kun wamako tam acel acel macalo opii, waketo i te loc pa Kricito. Dok bene wayubbe me keto can i kom dano ducu ma gipe ki winy, ka onoŋo wun doŋ wutyeko mine kenwu i te locwa. Wunen gin ma tye i nyimwu. Ka ce dano mo genne kekene ni en dano pa Kricito, koŋ myero otam bene ni, macalo en dano pa Kricito, wan bene watye kit meno. Pien kadi bed anyatte matek twatwal pi twero ma Rwot omiyo botwa, lewic pe bimaka; twero meno en omiyo botwa me konyowu, pi doŋowu, ento pe me dwokowu cen. Pe amito anen botwu macalo ŋat ma tye ka burowu ki waraga ma acoyogu. Pien dano gitye ka waco ni waragana pek dok gwa, ento ka ao botwu koma nen goro, dok bene gin mo pe i lokka ma aloko botwu. Jo macalo meno myero guniaŋ ni, pe tye apokapoka mo i lok ma wacoyo i waragawa ka watye cen ka mabor, ki gin ma wabitimo ka watye kacel kwedwu. Pe watiŋŋe me kette kenwa i rwom acel ki dano mogo ma i kin jo ma gimaro korre kengi, nyo me porre kenwa kwedgi. Kit ma gitye ka pimme kwede i kingi kekengi, dok bene giporre kengi ki gin me porregi ma ginoŋo i kingi kengi, kit jo macalo meno gin lumiŋ. Ento wan giwa pe wabinyatte makato kare; wabigik mewa ka ma yam Lubaŋa opoko botwa, ma wun bene wutye iye. Wan pe wamedo ka gikwa, calo pe gipoko botwa me o botwu, pien wan aye ma yam wakwoŋo bino botwu me tito lok me kwena maber i kom Kricito. Pe wanyatte ma okato kare i kom tic ma jo mukene aye guyelle iye; ento watye ki gen ni ka niyewu doŋ omedde, ticwa bene bimedde matek i kinwu, kun lubo ka ma yam gityeko poko botwa. Man bimiyo watito lok me kwena maber i lobo ma tye yo tuŋ i ŋewu kuca, kun pe wanyatte pi tic ma jo mukene gutiyo i ka tic pa ŋat mukene. “Ŋat ma nyatte myero onyatte pi Rwot,” macalo yam gicoyo. Pien pe ŋat ma pakke kekene en aye ma Lubaŋa pwoyo, ento dano ma Rwot dworo. Kono wudiyo cwinywu manok mo i koma i miŋona-ni. Koŋ wudi cwinywu ba! Nyeko omaka piwu ki lakodi nyeko ma Lubaŋa tye kwede bene-ni; pien wucal ki nyako ma ayubo me nyomme ki laco acel, kun ageno ni abitere bot cware, en aye Kricito, kun en nyako maleŋ ma pud pe laco mo obedo kwede. Ento atye ki lworo ni, kit macalo twol yam obwolo Kawa ki ryekone, wun bene dano bibalo tamwu woko, ma miyo pe doŋ wubimaro Kricito ki cwinywu ducu ki mar maleŋ. Pien ŋat mo ma obino botwu, ka cako tito botwu pi Yecu mukene mapat ki maca ma watito pire botwu-ni, nyo omiyowu cwiny mapat ma yam pe wutye kwede, nyo otito lok me kwena mo mapat ma yam pe wugamo, meno wudiyo cwinywu iye maber twatwal. Ki i tamma, aneno ni lukwena madoŋo ma gukato kare ca pe gikata kadi ki acel. Gwok nyo pe aryek i lok, ento aryek i ŋec mada. Meno yam doŋ wanyuto botwu ka maleŋ, i yo ducu ki i kare ducu. Yam atimo bal ka mwolle kena wek aket dit i komwu, kun atito botwu lok me kwena maber mua ki bot Lubaŋa nono, laboŋo gamo cul mo? Gitwero waco ni yam ayako lwak pa Kricito ka mukene piwu, pien ceŋ agamo lim ki botgi pi ticca botwu. Dok bene i kare ma onoŋo atye botwu, ka can jami mo omaka, pe ayelo ŋat mo i kinwu, pien utmego ma gua ki i Makedonia gukelo gin ducu ma mitte pira. Onoŋo abedo ma agwokke, dok bene abigwokke, wek pe amiwu peko mo. Doŋ awaco botwu ni, macalo ada pa Kricito tye i cwinya, pe gibigeŋo nyattena i lok man i lobo Akaya ducu. Piŋo? Pien ni pe amarowu? Lubaŋa ŋeyo ni amarowu. Gin ma atiyo abimedde ki tiyone, wek pe ami jo ca gunoŋ kare ma gimito wek gimi onen ni gin girom aroma kwedwa i tic ma ginyatte iye-nu. Pien jo-nu pe gin lukwena kikome, gin lutic ma gibwolo dano, ma gilokke woko ginen calo lukwena pa Kricito. Ŋat mo myero pe obed ki ur i lok man, pien kadi Catan kikome bene lokke nen macalo lamalaika ma menyo piny. Man pe doŋ gin ma pire dit twatwal ka ce lutic pa Catan gilokke ginen calo lutic ma tiyo gin ma atir; agikkigi bibedo rom ki gin ma gutiyo. Koŋ doki awac ni, ŋat mo pe opar ni an lamiŋ; ka ce onoŋo wutamo kit meno, ci doŋ wujola macalo dano mamiŋ, wek omiya bene anyatte manoknok. (Gin ma atye ka wacone botwuni pe gin ma Rwot omiya ni awac botwu; aloko calo dano mamiŋ ki gen man ma atye kwede me nyatte. Macalo jo mapol ginyatte pi gin me lobo i kit me dano, an bene abinyatte.) Pien wudiyo cwinywu ki yomcwiny i kom jo ma lumiŋ, kun wun jo maryek. Wudiyo cwinywu kadi ka ŋat mo lokowu me doko opiine, nyo camo limwu, nyo buyowu, nyo um i komwu nyo kadi doŋo lemwu. Lewic omaka omiyo aye ni wan yam pe wabedo tek i yo meno! Ento gin mo keken ma dano okette me nyatte pire, an bene akette woko me nyatte kit meno, ma onoŋo pud aloko macalo lamiŋ. Gin mono jo Ibru? An bene. Gin jo Icrael? An bene. Gin mono likwayo Abraim? An bene. Gin lutic pa Kricito? An gira aloko calo dano ma lapoya, awacci, akatogi woko. Atiyo tic aloyogi, ari i mabuc akatogi, gigoya ma wel odoone pe kwanne, abwot ki i lak to tyen mapol. Lujudaya gugoya tyen abic ki del pyeradek wiye aboŋwen. Gigoya ki odoo tyen adek, gicela bene ki got kicel, mel otur woko kweda tyen adek; abuto ari i nam matutu dyeceŋ ki dyewor benebene tyen acel. Ari i wot mapol ma can bene opoto i koma, can mua ki i lwak kulu mupoŋ ki pii, can mua bot luyak, can mua bot lutuwa, can ma lurok guketo i koma, can ma nen i gaŋ, can ma nen i tim, can ma poto i nam, ki can ma a ki bot utmego ma gin lugoba. Acanne twatwal i tic matek; tyen mapol pe anino dyewor. Ari kec ki orwo pii; tyen mapol abedo laboŋo cam mo ma romma, dok abedo i piny maŋic laboŋo ginaruka. Medo i kom gin jami mukene-gu ducu, tye gin acel ma kelo peko bota kare ki kare, en aye par ma atye kwede pi jo muye Kricito i kabedo mapatpat ducu. Tye ŋat mo ma goro ma kun an pe agoro? Tye ŋat mo ma gimiyo opoto i bal ma cwinya pe owaŋ pire? Ka ce onoŋo myero anyatte, abinyatte pi gin ma nyuto gorona. Lubaŋa Won Rwotwa Yecu Kricito, ma gipwoyo nakanaka, en ŋeyo ni pe aloko goba. I kare ma onoŋo atye i Damaciko, laloc mo me dul lobo ma tye i te loc pa kabaka Areta obedo ka kiyo gaŋ meno ni wek emaka, ento gicwala woko ki aduku madit kun gimiyo akato ki i waŋ dirica ma i kom cel, ci omiyo abwot woko ki i ciŋe. Myero anyatte; kadi bed pe konyo gin mo, abilok i kom gin ma aneno i waŋ lek ki gin ma Rwot onyuto bota. Aŋeyo dano mo i kin jo pa Kricito ma yam gitiŋo gitero woko malo wa i polo me adekke, kombeddi doŋ okato mwaka apar wiye aŋwen kulu.(Ka kono Lubaŋa otiŋo kome, kono nyo omiye oleko aleka, an gira pe aŋeyo, ento Lubaŋa ŋeyo.) Aŋeyo ni dano meno yam gitiŋe malo gitere wa i Paradic. (Ka ce Lubaŋa otiŋo kome, gwok nyo omiye oleko aleka, pe aŋeyo, ento Lubaŋa ŋeyo.) Yam owinyo lok mogo ma pe myero lokke ka maleŋ, ma pe giye ni dano mo otuci. Kit lok pa dano macalo meno aye bimiyo anyatte, ento pira kena pe abinyatte, ento kono pi gorona aye keken. Kadi bed onoŋo nen calo amito nyatte, pe abibedo lamiŋ pien noŋo aloko lok ada. Ento pe abinyatte, wek dano mo pe obed ki par i koma makato gin ma en oneno i koma, nyo lok ma en owinyo awinya ki bota. Me gwoka wek pe alyerre kena ma okato kare pi lwak jami mapol ma yam Lubaŋa onyuto bota, yam girwako okuto i koma, ma onoŋo en pud lwakena pa Catan wek oket can i koma, wek pe akette malo kekena ma okato kare. Yam alego Rwot pi man tyen adek ni jami macalo meno oa woko ki i koma. Cutcut en ogamo ni, “Kicana tye ma rommi, pien tekona bedo tek twatwal ka ma goro tye iye.” En meno gin mumiyo anyatte ki yomcwiny madit twatwal pi gorona, wek tek pa Kricito obed i koma. Pi Kricito omiyo cwinya yom pi goro mapatpat ma atye kwede, ki pi yet, ki pi can, ki pi peko mogo ma giuna kwede, ki peko ma diya matek; pien ka ma agoro iye, kenyo en aye ka ma atek iye. Onoŋo abedo lamiŋ! Wun aye mucora iye, pien onoŋo myero wun aye wudwora. Lukwena madito mukato kare ca pe gikata kadi ki acel, kadi bed an pe a gin mo. Gin ducu ma nyuto ni an lakwena kikome yam otimme i kinwu ki diyo cwiny madit, lanyut mogo, taŋo ki tic me aura madito. Ŋo ma yam oremowu makato lwak muye Kricito i kabedo mukene ducu? Gwok nyo man keken ni an yam pe abedo ka nurowu ki peko? Wutimma ber, ka ce onoŋo abalo pi koyowu woko kit meno! Man doŋ tyen me adek ma ayubbe me bino kwede botwu, ento doŋ pe abimiyo peko nurowu. Pien an pe amito jamiwu, ento amito wun kikomwu. Pe litino aye ma myero gukan jami me mono pi lunyodogi, ento lunyodo aye myero gukan jami pi litinogi. Abibedo ki yomcwiny madit me miyo jami ducu ma atye kwede, kadi wa tek koma ducu, pi konyo kwo me tipowu. Wubimara manoknok ni, pien amarowu matek? Wubiloko ni, “Meno ber, en kikome pe onurowu ki peko, ento en ladwala, yam omakowa woko cutcut ki lok goba.” Tye ŋat mo i kin jo ma nene acwalogi botwu-ni, ma obuyo gin mo ki botwu pira? Onoŋo alego Tito ni myero ociti, ka dok aoro ominwa mukene me wot kacel kwede. Tito obuyowu? Yam pe watiyo tic ki kit cwiny acel? Onoŋo pe walubo yo acel keken? Wun wutamo ni watye ka pido piwa kenwa kare man ducu i nyimwu? Pe kumeno; wan watye ka lok i nyim Lubaŋa, macalo jo pa Kricito. Dok bene, wun ma amaro, aloko me konyowu wek wudoŋ wudok jo muteggi. Pien alworo ni ka ao kunnu, gwok nyo abinoŋo wupat ki kit ma amito wubed kwede, dok wun bene gwok nyo wubinoŋo apat ki kit ma wumito abed kwede. Gwok nyo abinoŋo wutye ki daa, nyeko, kiniga malyet, laro dito, yet, lok kwot, lok me bwolo ki anyobanyoba. Alworo bene ni ka adwogo botwu i anyim, Lubaŋana bimiyo lewic maka woko i nyimwu; ci bimiyo akok pi jo mapol i kin dano ma yam gutimo bal, ka doŋ gukwero ŋut woko i kom timgi me caro, me abor ki me kwele. Man doŋ tyen me adek ma abio kwede botwu. Caden ma romo aryo nyo adek aye myero gumok lok ducu ma gikelo me alara, macalo yam gicoyo. Lok man yam atito botwu con i kare ma atye i wotta me aryo, dok anwoyo wacone kombeddi ma doŋ atye cen, bot jo ma yam gubalo, ki bot jo mukene ducu, ni meno, ka dok adwogo botwu pe abitimo kica ki ŋat mo, pien wubimito neno gin ma moko ni Kricito aye ma tye ka lok i doga. En pe goro ki botwu, ento nyuto tekke i iwu. Yam gigure i kom yatariya pi gorone, ento kombeddi en kwo pi tek pa Lubaŋa. Kadi wan bene wagoro i en, ento i bedowa kwedwu wabibedo kacel kwede pi tek pa Lubaŋa. Koŋ wuŋine kekenwu, wek wunen ka ce wucuŋ matek i niyewu. Wutemme kekenwu. Pe wuniaŋ ni Yecu Kricito tye i iwu, tekke ka wubedo dano ma Lubaŋa pwoyo? Ageno ni wubiniaŋ maber ni wan mere pe wabedo jo ma pe gipwoyogi. Walego Lubaŋa piwu ni pe wutim gin mo marac, pe me nyuto ni wan jo ma Lubaŋa pwoyo, ento wamito ni wun wutim gin maber, kadi bed wanen calo jo ma en pe opwoyo. Pien wan pe watwero tiyo gin mo ma pe rwatte ki lok ada, ento watwero tiyo gin ma rwatte ki gin ma tye ada keken. Cwinywa yom ka wagoro ma noŋo wun wutek, dok walego piwu ni wudok jo muteggi. Gin mumiyo acoyo lok ma pud atye ka mabor kwedwu, wek pe abed ger i komwu ka abino, kun atiyo ki twero ma yam Rwot omiya wek akonywu me doŋo, ento pe me dwokowu cen. Me agikkine, utmegina, doŋ wubedi. Wuyub kitwu doŋ obed maber, dok bene myero wuwiny kokona pi gin ma alegowu pire. Wubed ki cwiny acel, wubed bene ki kuc, ci Lubaŋa ma won mar ki kuc bibedo kwedwu. Wumotte kekenwu ki mot me mar. Lwak pa Lubaŋa ducu gumotowu. Kica pa Rwotwa Yecu Kricito, ki mar pa Lubaŋa, ki ribbe ma Cwiny Maleŋ kelo obed kwedwu ducu. Waraga man oa ki bot Paulo ma en lakwena. Pe dano mogo aye ma ceŋ guore, or ma mere me bedo lakwena pe yam owok ki bot dano mo, ento oa ki bot Yecu Kricito ki bot Lubaŋa Won ma ceŋ ocere woko ki i kin jo muto. Utmegiwa ducu ma gitye kacel kweda kany bene gumotowu. Bot jo ducu ma guye Kricito ma gibedo i Galatia: Lubaŋa Wonwa ki Rwotwa Yecu Kricito omiwu kica kacel ki kuc, en Kricito ma yam omine kene pi balwa wek elarwa woko ki i gin marac me kare man, kun lubo gin ma Lubaŋa Wonwa mito. Deyo obed bote nakanaka. Amen. An auro kit ma wulokke kwede oyot, kun wubwoto ŋat ma ceŋ olwoŋowu i kica pa Kricito, dok wulokke woko wutye ka lubo lok me kwena maber mo mukene. Lok me kwena maber mo mukene gire pe, ento tye jo mogo ma balo cwinywu woko, kun gimito gilok lok me kwena maber pa Kricito odok gin mapat. Ento kadi bed wan, nyo lamalaika mo mua ki i polo, otittiwu lok me kwena maber mapat ki lok ma nene watito botwu-ni myero gicen woko. Kit macalo nene watito botwu, pud dok atittiwu aye ni, ka ce tye ŋatti mo ma dok tye ka tittiwu lok me kwena maber ma pokke woko ki ma yam doŋ wuye-ni, myero gicen woko. Kombeddi atye ka yenyo cwak pa dano, nyo pa Lubaŋa? Gwok nyo atye ka temme me yomo cwiny dano ba? Ka ce nene abedo ka yomo cwiny dano, onoŋo myero pe abed latic pa Kricito. Utmega, amito wuŋe lok man, ni, lok me kwena maber ma ceŋ atito botwu-ni pe obedo gin pa dano. Pe yam agamo lok man me kwena maber ki bot dano mo, dok bene pe gipwonya kwede apwonya, ento anoŋo ki bot Yecu Kricito ma ceŋ onyutte bota-ni. Wutyeko doŋ winyo lok i kom kwona macon i kare ma onoŋo pud alubo dini pa Lujudaya, kit ma abedo ka libo kwede jo muye Lubaŋa, kun atimo bwami i komgi, dok atemme mada me nekogi woko liweŋ. I dini pa Lujudaya an aye ma onoŋo aloyo jo mapol ma gin yalwakka ma gin jo me rokka, kun aketo cwinya adada me lubo kit me tekwaro pa kwarowa. Ento Lubaŋa yam oyera wa con, oketa woko pat ma onoŋo pud peya ginywala, ka dok olwoŋa gire pi kicane. Cwinye obedo yom me nyutta Wode, wek acit atit pire bot Lurok. I kare ma lok man otimme, pe aa acito bot dano mo ni omiya tam, dok bene pe aa acito i Jerucalem bot jo mukwoŋo bedo lukwena kweda, ento acito gira cen wa i Arabia, ka aa ki kunnu dok adwogo cen i Damaciko. I ŋe mwaka adek acito i Jerucalem ka limo Kepa, ci abedo kunnu pi nino apar wiye abic. Ento i kin lukwena aneno Yakobo omin Rwot keken. (Me ada kadi wa i nyim Lubaŋa, lok ducu ma acoyo botwu i waraga man goba pe iye.) Ka dok acito i lobo Ciria ki Cilicia, kun onoŋo lwaka dano mapol ma guye Kricito ma gitye i kabedo ducu i Judaya peya giŋeya dok peya guneno koma. Onoŋo guwinyo lok i koma keken ma gitittigi ni, “Ŋat ma yam obedo ka yelowa-ni, kombeddi tye ka tito lok i kom niye man ma yam koŋ otemo tyekone wokoni.” Omiyo gupako Lubaŋa pira. Lacen i ŋe mwaka apar wiye aŋwen dok acito i Jerucalem aye kacel ki Barnaba, dok bene atero Tito me wot kacel kweda. Gin mumiyo acito kunnu, pien Lubaŋa onoŋo onyutta ni myero aciti. Ka ao kunnu, ci aketo lok me kwena maber ma abedo ka titone bot Lurok-ki i nyimgi, i muŋ bot jo ma ŋene, wek ticca ma atiyo, nyo ma doŋ atyeko tiyone con, pe obed me nono. Ento Tito ma onywako wot kweda, kadi bed onoŋo en Lagrik, pe gibedo ka diye ni myero gilire. Kadi bed onoŋo tye jo mogo ma gikelogi i kinwa ma pe gin utmego kikome, magi gin jo ma gubino ka roto kit kuc ma watye kwede i Kricito Yecu, ka wek gilokwa wadok opii. Ento kare mo obedo pe ma waye ni gulowa, wek wagwok lok ada me kwena maber piwu. Ki tuŋ bota pe onoŋo aparo pi jo ma giŋene ni gin ludito, pien Lubaŋa gire pe leŋŋe tuŋ bot ŋat mo pi kit ma en tye kwede. Gin jo ma ŋenenu pe gumedda gin mo. Ento guniaŋ ni Lubaŋa doŋ omiya tic me tito lok me kwena maber bot Lurok, ma rom ki kit macalo yam gimiyo ki Petero tic me tito lok me kwena maber bot Lujudaya; pien ŋat mutiyo kacel ki Petero tic me tito lok me kwena maber bot Lujudaya, obedo ka tic i koma bene bot Lurok. Yakobo ki Kepa ki Jon ma yam giŋeyogi ni gubedo lutel, ka doŋ guniaŋ pi kica ma Lubaŋa omiya ci gugamo an ki Barnaba macalo lutic wadigi, kun gipoko tic ni wan myero wacit bot Lurok ki gin gubecito bot Lujudaya. Gin gulegowa lok acel keken ni myero wapo pi lucan, ma man aye onoŋo gin ma aketo cwinya ni myero atim. I kare ma Kepa obino i Antiokia ajuke woko atyer ka maleŋ pien onoŋo otimo gin ma pe ber. Pien i kare ma jo mogo ma gua ki bot Yakobo peya gubino, onoŋo Kepa nywako cam kacel ki Lurok; ento ka gubino ci Kepa ojer onyiko woko cen, opokke woko ki botgi pi lworo dul pa jo ma mito ni jo muye Kricito myero koŋ gilirgi. Lujudaya mukene gucako lubo kit pa Kepa me goba, kadi ki Barnaba bene ocako ŋak woko kun lubo kitgi ma pe nyuto cwiny me ada. Ento i kare ma aneno ni guweko ada me lok me kwena maber woko ma onoŋo tamgi tye ka wot atata, ci awaco bot Petero i nyimgi ducu ni, “Ka in ma Lujudaya-ni ilubo kit pa Lurok, ma pe ibedo calo Lajudaya, ci itwero diyo Lurok niŋniŋ me lubo kit pa Lujudaya?” Wan kikomwa wan Lujudaya nia wa i anywalli, pe wan Lurok, jo ma lubalo-gu. Ento waŋeyo ni dano pe gikwano ni kite atir pien tiyo gin ma cik mito, kono pi ye Yecu Kricito keken. Kadi wa wan Lujudaya bene watyeko ye Yecu Kricito wek gikwanwa ni kitwa tir pi ye Kricito, ento pe pi tiyo gin ma cik mito; pien pe gibikwano dano mo ni kite atir pien tiyo gin ma cik mito. Ento kombeddi, ma watye ka yelle wamito gikwanwa ni kitwa atir pi Kricito, ka wan kikomwa dok ginoŋo ni wan lubalo, ci Kricito mono obedo lakwena me tic pi bal? Adadaneni pe kumeno! Ka dok agero gedo ma yam amuko areto woko piny-nyi odoco, ci an kara labal marac. Pien pi temo tiyo gin ma cik mito omiyo yam ato pi cik, wek abed kwo tuŋ bot Lubaŋa. Yam gigura i kom yatariya kacel ki Kricito; pe dok an ma akwo-ni, ento Kricito aye ma bedo kwo i iya. Kwo ma kombeddi atye kwede i komani, abedo kwo pi ye Wod pa Lubaŋa, ma ceŋ omara ka omine gire pire kene pira. An gira pe abolo kica pa Lubaŋa; pien ka gikwano dano ni kitgi atir pi cik, ci Kricito yam oto nono laboŋo tyen lok mo. Wun jo Galatia kara wumiŋ kuman! Aŋa murogowu, wun jo ma ceŋ ginyuto botwu atyer kit ma giguro kwede Yecu i kom yatariya macalo wuneno ki waŋwu? Koŋ apenywu ki peny man keken: wun mono yam wulimo Cwiny Maleŋ pi lubo cik, kono nyo pi ye lok me kwena maber ma wuwinyo gitito botwu-ni? Wun kara wubedo miŋ kuman! Wucako lubo kit me Cwiny, ci kombeddi doŋ wumito wugik ki tekkomwu? Gin jami mapol madoŋo macalo meno otimme botwu nono? I adane onoŋo otimme ki tyen lok! En Lubaŋa ma omiyowu Cwiny Maleŋ-ŋi, dok otiyo bene taŋo mapol i kinwu, en tiyo man pien ni wulubo cik, kono nyo pi ye lok ma wuwinyo ma gitito botwu? Kit ma meno bene yam gicoyo lok i kom Abraim ni, “En oye Lubaŋa, omiyo gikwane ni en dano ma kite atir.” Myero wuŋe ni jo ma tye ki niye, gin aye likwayo pa Abraim kikome. Luco ginacoya yam con onoŋo doŋ guŋeyo woko ni, Lubaŋa bikwano Lurok ni gin jo ma kitgi atir pi niye. Lubaŋa yam otito lok me kwena maber con bot Abraim kun wacce ni, “Rok ducu bilimo gum piri.” Pi meno, jo ma tye ki niye gibinoŋo gum kacel ki Abraim mubedo ki niye. Jo ducu ma gujeŋŋe i kom tic me lubo cik doŋ gicenogi woko; pien yam gicoyo ni, “Cen opot i kom jo ducu ma pe gilubo gin ducu ma gicoyo i buk me cik, kun gicobo bene ticce kakare.” Kombeddi lok doŋ oŋene woko ni, pe gikwano dano mo ni kite atir i nyim Lubaŋa pi tiyo gin ma cik mito; pien gicoyo ni, “Ŋat ma kite atir pi niye bibedo kwo.” Ento cik pe ocuŋ i kom niye, pien gicoyo ni, “Ŋat ma tiyo kun lubo gin ma cik mito bikwo pire.” Kricito aye ma nene okokowa ki i cen ma opoto i komwa pien pe walubo cik; en obino ci olokke odoko dano ma giceno ma ka-kawa. Pien yam gicoyo ni, “Cen opoto i kom dano ma giŋabo malo i wi yat.” Lok man otimme wek gum ma Lubaŋa ceŋ omiyo ki Abraim Lurok bene gunoŋ pi Yecu Kricito, ka wek wan bene walim Cwiny Maleŋ ma yam giciko pire-ni pi niye. Utmega, koŋ anyut labol me lok i kom dano. Ka jo aryo gucikke i gin mo-ni, ma gumoko gicikkegi, ŋat mo pe dok twero lokone, dok bene pe twero medo gin mo i gicikke meno. Lubaŋa yam ocikke gin ki Abraim ki bot lakware bene. Ento yam ginacoya pe owacci, “Ki bot likwayu,” ma nyuto ni gipol, ento owacci, “Ki bot lakwaru,” ma nyuto dano acel keken, ma en aye Kricito. Gin ma myero aloki tye kit man ni, cik ma doŋ obino lacen i ŋe mwaka miya aŋwen ki pyeradek pe doŋ romo turo gicikke ma con Lubaŋa otyeko mokone woko-ni, dok bene pe bimiyo gin ma ociko lal nono. Ka ce leyo jami ma gimiyo ki Abraim obedo pi cik, meno noŋo pe lubo kit cikke mo. Ento Lubaŋa yam omiyo bot Abraim i gicikke macalo mot. Cik dok mitte piŋo? Cik yam gimedo ni wek turo cik onen woko ka maleŋ, nio waŋ ma lakwaro Abraim ma giketo cikke pire-ni obino. Lumalaika aye ma ceŋ gukelo cik, ci gumiyo i ciŋ ŋat ma larib dano kacel. Ento larib dano pe mitte pi ŋat acel keken, ento Lubaŋa aye tye acel. Cik doŋ tye ka pyem ki gicikke pa Lubaŋa? Pe kit meno gire, pien ka nene gimiyo cik ma twero miyo kwo, kono kwano dano ni kite atir obedo pi lubo cik. Ento coc ma yam gicoyo otweyo dano ducu macalo lumabuc i te twero me bal, wek cikke ma nene giciko pi ye Yecu Kricito gimi bot jo muye en. I kare ma niye peya obino, cik aye munoŋo gwokowa, kun otweyowa woko macalo mabuc, nio waŋ ma ginyuttiwa niye. Kit meno cik aye obedo lagwokwa ma myero olowa nio ka Kricito obino, ka doŋ gicako kwanowa ni kitwa atir pi niye. Kit ma doŋ niye tye-ni, pe dok wabedo i te twero pa lagwokwa; pien wun ducu doŋ wudoko litino pa Lubaŋa pi niye Yecu Kricito. Wun jo ducu ma doŋ gityeko batijawu i nyiŋ Kricito, doŋ wuruko Kricito macalo wuruko boŋowu. Apokapoka mo doŋ pe i kin Lajudaya ki dano me Grik, i kin opii ki ŋat ma lone kene, kadi i kin laco ki dako, pien wun ducu doŋ wurom i Kricito Yecu. Ka wun doŋ wulwak pa Kricito, ci doŋ wun likwayo pa Abraim; dok pi cikke pa Lubaŋa, wun lule gin ma yam en ociko bot Abraim. Awaco kit man ni, laleyo ka pud latin bedo rom ki opii, kadi bed en won jami ducu. En koŋ bedo i te loc pa jo ma gwoke ki jo ma gwoko jamine, nio ka kare ma wonne ociko oromo. Wan bene watye kit meno; i kare ma wan pud litino, yam wabedo opii pa jogi ma gitye ka loc i wi lobo-ni. Ento ka kare kikome ma giciko-ni doŋ oromo, ci Lubaŋa ocwalo Wode ma dako onywalo, kun ginywalo i te cik, wek okok jo ma yam tye i te loc me cik, ka wek wan bene gilokwa wadok litino me paco. Kit macalo wun doŋ litino me paco, en aye mumiyo Lubaŋa ocwalo Cwiny Wode i iwa, ma kok ni, “Abba! Wora!” Kit meno, pi tic pa Lubaŋa omiyo in doŋ pe opii, ento latin me paco; ka doŋ in latin paco, man nyuto ni in doŋ lale jami. I kare macon ma onoŋo peya wuŋeyo Lubaŋa, wubedo opii pa gin mogo atata ma i adane pe gin lubaŋa wacel. Ento kombeddi doŋ wuŋeyo Lubaŋa, nyo koŋ awacci, Lubaŋa doŋ ŋeyowu; ci dok wutwero dok cen niŋniŋ bot jogi macon ma gigoro, ma piny bene oloyogi woko-ni? Piŋo dok wumito bedo opiigi pi tyen me aryo? Wuketo cwinywu me gwoko nino, ki dwe,. ki kare mapatpat, ki mwaka-gu! Abedo ki lworo matek, pien ticca ma ayelle kwede botwu, kara aneko iye koma nono. Utmega, alegowu ni wubed calo an, pien an bene doŋ adoko calo wun. Wun giwu yam pe wutimo gin mo marac i koma. Wuŋeyo ni, pi lit koma omiyo atittiwu lok me kwena maber pi tyen mukwoŋo. Yam pe wuŋala dok pe wucaya, kadi lit koma okelo botwu aoma cwiny, ento wujola maber calo wujolo lamalaika pa Lubaŋa, dok calo wujolo Kricito Yecu kikome. Gin aŋo dok muŋolle i yomcwiny ma onoŋo wubedo kwede-ni? An cadenwu ma aloko ni, ka ce nene twerre, kono wukolo waŋwu woko ci wumiyogi bota. An alokke adoko lamerokwu pi tito botwu lok me ada? Jo mukene ca gibwolo waŋwu nono, tamgi rac. Gimito cego wiwu woko, wek wucak dworogi. Dworre pi gin maber, ber kare ducu, pe ka an atye botwu keken. Litinona, pud dok atye ka ciro arem kwedwu macalo dako ciro arem i kare me nywal, nio ka kit pa Kricito ocwene i iwu. Onoŋo amito ni kono abino abedo kwedwu kombeddi, ka wek aniaŋ kit gin ma myero alok botwu ki kunnu, pien tamma i komwu doŋ ocuŋ woko ata. Wun jo ma wumito ni cik olowu, wun pe wuwinyo cik? Koŋ doŋ wutitta mono. Pien yam gicoyo ni, Abraim onoŋo tye ki awobe aryo, acel obedo wod pa aŋeca, ki acel obedo wod pa dakone kikome. Ento wod pa aŋecani yam ginywalo i kit me kom, ki latin pa dako kikome-ni ginywalo pi cikke ma yam Lubaŋa ociko. Man ma awaco-ni obedo carolok: Mon aryo magi nyuto gicikke aryo bene. Ŋat acel oa ki i wi got Cinai, litino ma en onywalo gubedo opii; dako meno en aye Agar. Kombeddi Agar nyuto got Cinai, ma tye i Arabia; rom ki Jerucalem me kare-ni, pien en tye i opii kacel ki litinone. Ento Jerucalem ma tye i polo lone kene, en aye obedo minwa. Pien yam gicoyo ni, “Bed ki yomcwiny, in dako ma lalur ma yam pe inywalo latin mo-ni, mwoc ki wer kun idaŋŋe matek, in dako ma pud peya yam arem ogoyi! Pien litino pa dako ma gitenyo pol, kato litino pa dako ma bedo gin ki cware kacel.” Utmega, wan wacal ki Icaka, wan litino me cikke pa Lubaŋa. Ento macalo i kare ca onoŋo latin ma ginywalo i kit me kom obedo ka uno latin ma ginywalo pi Cwiny pa Lubaŋa, i kare-ni bene tye kit meno. Ento ginacoya kono wacci ŋo? Wacci, “Ryem aŋeca-ni woko gin ki wode, pien wod pa aŋeca pe bileyo jami kacel gin ki wod pa dako kikome.” Kit meno, utmega, wan pe litino pa aŋeca, ento wan litino pa dako kikome. Kricito doŋ otyeko gonyowa woko ki i pii wek wabed jo me kuc ma walone kenwa. Wacuŋ doŋ matek; pe dok wuye rwako tyenwu i okol me opii. Wuwiny ba, an Paulo kombeddi awacciwu ni, ka gilirowu, ci kony pa Kricito doŋ pe botwu. Anwoyo lokka doki bot dano acel acel ma giliro ni, en doŋ tye ki banya me lubo cik ducu. Wun jo ma wumito ni gikwanwu ni kitwu atir pi lubo cik, wun doŋ wupokke woko kenwu ki bot Kricito; doŋ wunyiko woko cen, wubwoto kica pa Lubaŋa. Watye ki gen madwoŋ pi Cwiny Maleŋ me noŋo kit ma atir ma gimiyo pi niye. Pien i Kricito lirre nyo bedo ma pe giliro ducu konygi pe; niye keken aye konyo, ma ticce aye mar. Onoŋo nene wucako riŋo ŋwec maber; aŋa mono ma dok ogeŋowu i lubo lok me ada? Bito dano macalo man pe oa ki bot ŋat ma ceŋ olwoŋowuni. Ka gitedo mugati, tobi matidi mo keken aye yenyo moko woko ducu. Atye ki gen i Rwot ni, tamwu pe bipokke ki mera; ento ŋat mo-ni ma tye ka balo cwinywu woko-ni, kadi bed en aŋa, Lubaŋa biŋolle kop. Utmega, piŋo dok pud giuna, ka an kikoma aye atito ni lirre ber? Ka nene atito lok kumeno, kono pe tye gin mo i lok i kom yatariya ma obedo macalo ajut ma yoko dano. Kono jo ma tye ka balo cwinywu-ni gumedde anyim, gukolle woko kekengi gigi! Utmega, yam gilwoŋowu me bedo ki kuc kun wulone kenwu; ento pe dok wulok kucwu odok me cobo mit ma ginywalowu kwede. Ma ka timo meno, myero dano acel acel omine me konyo luwote pi mar keken. Pien cik ducu giribogi woko i lok acel keken ni, “Mar lawoti macalo imarre keni.” Ento ka wubedo ka kane kekenwu ki lakwu, kun wutimo dano wadiwu calo guci, myero wugwokke wek pe wutum woko kekenwu. Ento awacciwu ni, wuye Cwiny Maleŋ pa Lubaŋa aye otelwu, wek pe wucob miti me kit pa dano. Pien miti me kit pa dano pyem ki miti pa Cwiny Maleŋ, dok miti pa Cwiny Maleŋ bene pyem ki miti me kit pa dano. Gin aryo-ni gimon, meno aye gin ma geŋowu tiyo gin ma wumito. Ento ka Cwiny Maleŋ aye ma tye ka telowu, ci doŋ pe wubedo i te cik. Tic me kit pa dano ma nen woko ka maleŋ gin en: tim kwele, caro, tarwaŋ, woro cal jogi, talo dano, mone, daa, nyeko, kiniga, laro dito, pyem, pokke, nek, mero ki koŋo, cam me yomcwiny me miŋo marac, ki mogo mukene macalo meno. Pud dok ajukowu matek, kit macalo nene koŋ ajukowu, ni, jo ma timo gin macalo magi, ker pa Lubaŋa pe bibedo megi. Ento nyig ma nyak pi Cwiny Maleŋ gin aye mar, yomcwiny, kuc, diyo cwiny, kica, ber, gen, mwolo, gwokke ken; cik mo pe ma kwero gin macalo magi. Dano ma gin jo pa Kricito Yecu doŋ gutyeko neko par ki miti me kit pa dano woko, ci guguro woko bene i kom yatariya. Ka wabedo kwo pi Cwiny Maleŋ, ci myero doŋ wawotu kun walubo en. Pe myero wabed ka wakke awaka, pe wabutte ki tek i kom luwotwa, dok pe myero wabed ki nyeko i kinwa kenwa. Utmega, ka ce gimako dano ka timo bal mo, wun jo ma wutye ki Cwiny pa Lubaŋa wukonye wek odwog i yo ma atir, kun wubedo kwede ki cwiny me mwolo. Koŋ iŋine kekeni, wek in bene pe gibiti. Wutiŋ peko pa luwotwu, meno aye bimiyo wucobo cik pa Kricito. Pien ka dano mo tamo ki i cwinye kene ni en e gin mo, kun i adane noŋo en pe gin mo, noŋo en bwolle abwola kene. Dano acel acel koŋ oŋi ticce kene ka ber, meno miyo tyen lok me wakkene bedo pi ticce kikome ma en otiyo, ma pe dok poro ki tic pa lawote. Pien dano acel acel tye ki yecce ma myero otiŋ. Dano ma gitye ka pwonyo ki lok i kom Kricito myero onywak jami ducu mabeco ma etye kwede ki ŋat ma pwonye. Pe wuwek gibwolwu; Lubaŋa pe gituko kwede. Gin ma dano ocoyo, en aye bene en bikayo. Ŋat ma ocoyo kodi i poto me kit pa dano, gin ma en bikayo ki iye en aye to; ento ŋat ma coyo kodine i poto me Cwiny Maleŋ, bikayo mere kwo ma pe tum pi Cwiny Maleŋ. Pe myero waol ka tiyo gin maber, pien ka kare oromo, ka cwinywa pe odoko nyap, ci wabikayo kac. Doŋ kit macalo pud watye ki kare-ni, myero watiyu gin maber bot dano ducu, makato ducu myero watiyu bot utmegiwa ma guye Kricito. Koŋ doŋ wunen kit nukuta madoŋo ma atye ka coyone ki ciŋa-ni. Jo ma tye ka diyowu ni myero wulirre-ni, gin aye jo ma mito ni gin maber ma gitiyo onen ki woko. Tamgi tye ni pe myero giungi pi yatariya pa Kricito. Kadi gin ma gilirogi-ni pe gimako cik, ento gimito ni gilirwu ka wek giwakke i gin ma gitimo i kom ki woko. Ento an pe amito awakke pi gin mo, kono pi yatariya pa Rwotwa Yecu Kricito keken, pien ki tuŋ bot lobo ducu doŋ giguro woko i kom yatariya, ki an kikoma bene doŋ gigura woko ki tuŋ bot lobo. Pien bedo ma gilirre nyo ma pe gilirre lok mo pe iye; ento gin ma pire dit twatwal en aye me bedo ginaketa manyen. Kuc ki kica obed i kom jo ma poro kwogi ki cik man, ki i kom jo pa Lubaŋa ducu. Cakke kombeddi pe amito ŋat mo oyela, pien atye ki poyo ma doŋ giketo i koma ma nyuto ni an opii pa Yecu. Kica pa Rwotwa Yecu Kricito obed kwedwu, utmega. Amen. Waraga man oa ki bot Paulo ma en lakwena pa Kricito Yecu pi mit pa Lubaŋa. Bot jo pa Lubaŋa ma tye i Epeco, ma gin aye jo ma genne i Kricito Yecu: Lubaŋa Wonwa ki Rwot Yecu Kricito omiwu kica ki kuc. Myero gipwo Lubaŋa, Won Rwotwa Yecu Kricito, pien i Kricito doŋ omiyowa kit gum me cwiny ducu ma tye i polo. En oyerowa wa con i Kricito ma pud peya ocako keto lobo, wek wabed jo maleŋ i nyime laboŋo bal mo i komwa pi mar mere. Lubaŋa pi mitte kene onoŋo doŋ oyubo con ni wan myero wadok litinone pi tic pa Yecu Kricito. En otimo man wek wapak motte me kica me deyo madit ma en omiyo ki wan pi Wode ma emaro. Pi remo me to pa Wode ma ocwer piwa, doŋ gikokowa woko, giweko balwa, kit macalo lonyo me kicane dwoŋ kwede, ma en omiyo botwa madit lawaŋacel, Pi ryekone ki pi niaŋŋe ducu, en doŋ omiyo waŋeyo muŋ me mit mere, kun lubo yub maber ma ceŋ en oyubo me cobo i Kricito. Yub pa Lubaŋa ma en bicobo ka karene oromo, en aye me coko jami ducu ma tye i polo ki i wi lobo, ki ribogi woko kacel i Kricito. Pien jami ducu tine kun lubo tam pa Lubaŋa ki mitte. En oyerowa i Kricito pi tamme, wek wan wabed jone, kun onoŋo yam en doŋ oyubo woko con ni, wan Lujudaya ma wan aye jo mukwoŋo bedo ki gen i kom Kricito, myero wami dano gupak deyo pa Lubaŋa. Oyero wun Lurok bene ma wutye i Kricito, ma yam wuwinyo lok ada, ma en aye lok me kwena maber me larrewu. Wun wuye en, en mumiyo gimiyowu Cwiny Maleŋ ma con Lubaŋa ociko pire-ni, wek obed macalo lanen ma mere ma doŋ giketo i komwu. En aye gin ma gijeŋo ma nyuto ni wabinoŋo gin ducu ma Lubaŋa oyubbe me miyo botwa i kare ma Lubaŋa bikoko jone kikome, ma bimiyo dano gipako deyone matek. Pi lok man, cakke ma awinyo pi niyewu i kom Rwotwa Yecu, ki pi mar ma wumaro kwede jo pa Lubaŋa ducu, omiyo pe akeŋ pwoyo Lubaŋa piwu, kun alwoŋo nyiŋwu bene i legana. Alego Lubaŋa pa Rwotwa Yecu Kricito, Lubaŋa Won deyo, wek omiwu cwiny me ryeko, dok bene onyutwu ŋec i kome kekene. Dok bene alego ni en omeny tamwu, wek wuniaŋ i kom gen ma en olwoŋowu iye, ki i kom mot me lonyo ki deyo madwoŋ ma en miyo bot jone wek obed megi matwal. Alego bene wek wuniaŋ i kit ma tekone madwoŋ twatwal ma pe pimme-ni tye ka tic kwede i iwa, wan jo ma waye Yecu. Man rom aroma ki tic madit me twer ma en tye kwede, ma ceŋ ocero kwede Kricito ki i kin jo muto, ka okete obedo i kabedo me deyo ka ŋete tuŋ acuc i polo. En doŋ tye malo, loyo kit loc ducu ki twero ki teko ki dito ducu ma tye i polo, ki nyiŋ mo ma oywek i lobo me kare man ki i lobo me kare ma bibino-ni bene. Lubaŋa doŋ oketo jami ducu i te twer pa Kricito wek olo, dok omiye bot lwak jo muye en wek en obed macalo wic, kun loyo jami ducu maber. Lwak jo ma guye Yecu gin aye kom Kricito, ma miyo en opoŋ otum maber woko licwic, kun Kricito bene opoŋ i jami ducu ma i kabedo ducu. I kare mukato onoŋo wubedo jo muto pi turo cik ki balwu. I kare ca onoŋo wulubo yo maraco me lobo man, kun wuwinyo lok pa ŋat ma loyo twer mogo ma tye malo i dye yamo, ma en aye cwiny ma kombeddi tye ka tic i i jo ma dag winyo lok ma Lubaŋa waco. Wan ducu yam warom ki jo meno i lubo miti ma ginywalowa kwedeni, kun wacobo miti me komwa ki gin ma watamo piwa kenwa; omiyo pi kit ma yam watye kwede, kiniga pa Lubaŋa myero opot i komwa calo poto i kom jo mukene ducu. Ento Lubaŋa lalonyo i kicane, mar ma en omarowa kwede dit twatwal; en mumiyo kadi bed onoŋo wadoko jo muto pi turo cikke, en omiyo wadoko kwo kacel ki Kricito. Lubaŋa olarowu pi kicane. Pi ribbewa ki Kricito Yecu en ocerowa woko kacel kwede, ka doŋ oketowa wabedo kacel kwede i polo. En otimo man ducu wek enyut i kare ducu ma pud tye anyim lonyone madwoŋ ma pe pimme me kica, ma onen ki berre botwa i Kricito Yecu. Pien pi kicane omiyo en olarowu pi niye. Man pe otimme pi tic mo ma wun wutiyo; meno obedo mot pa Lubaŋa gire. Pe otimme pi ticwu mo, mumiyo ŋat mo owek wakke pire. Wan wabedo ginaketa pa Lubaŋa; en oketowa i Kricito Yecu ni wek wabed jo ma tiyo tic mabeco ma yam en oyubo ni myero wati. Koŋ wupo i kit ma wun wubedo kwede, wun ma wubedo Lurok i kit me anywalli. Lujudaya gilwoŋowu ni wun jo ma pe giliro, kun gilwoŋŋe kengi ni gin jo ma gulirre, pi lirregi ma ciŋ dano otiyo i riŋo komgi. Koŋ wupo bene ni i kare ca-ni onoŋo wupokke woko mabor ki Kricito; yam gikoyowu woko ki i kom lwak me Icrael, pe wunywako gicikke pa Lubaŋa ki gin ducu ma en ociko ni ebitimo pi jone. Yam wubedo i lobo man laboŋo gen mo, Lubaŋawu bene onoŋo pe. Ento kombeddi i Kricito Yecu wun jo ma yam wutye ka mabor doŋ gikelowu cok pi to pa Kricito. En kikome okelo kuc i kinwa, omiyo wan kwedwu doŋ wadoko lwak acel. Pi miyo kome kene en doŋ okwanyo mone woko ki i kinwa macalo doŋ omuko cel ca ma yam poko kinwa woko-ni. Pi kelo kuc omiyo en ojwayo cik pa Moses woko ki gin ma giciko iye ducu, wek omi wan jo me dul aryo-ni wadok rok acel manyen ma guribbe kacel i en. Pi tone i kom yatariya odwoko wan aryo ducu bot Lubaŋa i kom acel, omiyo mone ogik woko. Yam en Kricito obino otito lok me kwena maber me kuc botwu wun jo munoŋo wutye ka mabor, ki botwa wan jo ma onoŋo watye cok. Pi Kricito wan ducu, wan Lujudaya ki wun Lurok, giyabo botwa yo i Cwiny Maleŋ acel-li me o bot Lubaŋa Won. Kombeddi doŋ wun pe wubedo lurok nyo lubedo; wun kacel ki jo pa Lubaŋa doŋ wutye ki paco acel, wun doŋ wu jo me ot pa Lubaŋa. Wun doŋ kombeddi wudoko ot ma gigero, ma gutine obedo lukwena ki lutit lok pa Lubaŋa. Yecu Kricito kikome obedo got madit me twoke. Gedo man okubbe kacel ki Kricito, dok bene tye ka doŋo me doko ot pa Lubaŋa maleŋ i Rwot. Wun bene gitye ka gerowu kacel i kome, wek wubed ot ma Cwiny pa Lubaŋa bedo iye. Pi lok man, alego Lubaŋa piwu, an Paulo ma abedo lamabuc pi Kricito piwu wun Lurok. Abedo ki tam ni wun doŋ wutyeko winyo kit ma Lubaŋa omiyo abedo lakan-lim me kicane ki tuŋ botwu. dok bene kit ma onyutta kwede muŋŋe, omiyo aŋeyo, macalo doŋ atyeko coyo pire macekcekki. Ka wukwano ci wutwero neno maber kit ma aniaŋ kwede i muŋ ma otiko Kricito. I kare mukato yam Lubaŋa pe onyuto muŋ man bot dano adana-ni, ento kombeddi doŋ onyuto bot lukwenane maleŋ ki lutit lokke, pi Cwiny Maleŋ. Muŋ meno tye kit man ni, pi lok me kwena maber omiyo Lurok doŋ gudoko lule lonyo pa Lubaŋa kacel ki Lujudaya; gudoko dul kom acel kwedgi, gin bene gunoŋo gin mo ducu kacel kwedgi ma yam Lubaŋa ociko pire i Kricito Yecu. An giketa abedo latic me lok me kwena maber pi mot me kica pa Lubaŋa, ma omiya pi tic me twerone. Kadi bed atidi twatwal ki i kin jo pa Lubaŋa ducu, ento en omiya mot man me kica me tito lok me kwena maber bot Lurok i kom lonyo madwoŋ pa Kricito ma tere pe tatte, dok me miyo kit ma en ocobo kwede yub mere me muŋ onen woko ka maleŋ bot jo ducu. Onoŋo Lubaŋa mucweyo jami ducu-ni okano muŋ man pi kare ducu mukato aŋec, wek kombeddi oti ki lwak jo muye Yecu me miyo luloc ki wegi twero ducu ma tye i polo guŋe ryeko pa Lubaŋa ma kite patpat. Man lubo tam pa Lubaŋa ma onoŋo yam tye con, ma en ocobo i kom Yecu Kricito Rwotwa; pire omiyo wan jo ma waye Yecu walimo tekcwiny, pien oyabo botwa yo me o i nyim Lubaŋa ki gen. En mumiyo alegowu ni, pe myero cwinywu odok nyap pi can ma gitye ka una kwede piwu; can man aye kelo botwu deyo. Lok man aye mumiyo arumo coŋa i nyim Lubaŋa Won, en ka ma nyiŋ man me won ocuŋ iye i doggola pa jo me odi ducu ma tye i polo ki ma tye i lobo. Alego ni pi lonyone me deyo myero omi Cwiny mere opoŋwu ki teko ki kero madwoŋ i iwu, Kricito bene obed i iwu pi niyewu. Dok bene alego ni Lubaŋa omi wucuŋ matek i mar macalo yat ma lwite odonyo matut i ŋom, wek wubed ki teko, ki cwiny me niaŋ, kacel ki jo pa Lubaŋa ducu, kit ma mar pa Kricito lac kwede, kit mabor kwede, ki kit ma odoŋo kwede malo, dok kit ma tut kwede, wek wuŋe mar pa Kricito ma kato ŋec ducu, wek wupoŋ ki gin mo ducu ma opoŋ i i Lubaŋa. Deyo obed bot Lubaŋa ma twero tiyo tic madwoŋ twatwal ma kato gin ma watwero lego pire nyo keto i tamwa, pi tekone ma tye ka tic i komwa. Deyo obed bote nakanaka i Kricito Yecu ki i lwak jo ducu muye en, i kare pa yalwak ducu. Amen. Pi meno, an ma abedo lamabuc pi Rwot alegowu ni wulub kit kwo ma myero, ma rwatte ki lwoŋo ma yam gilwoŋowu iye. Wuwor jo mukene, wubed mwol, dok wubed jo ma ciro gin ducu ma balo cwiny dano, kun ŋat acel acel diyo cwinye i kom lawote ki mar. Wuket tek me gwoko ribbe ma Cwiny Maleŋ omiyowu wek wubed acel i twec me kuc. Kom tye acel, Cwiny Maleŋ bene tye acel, kit macalo gen bene tye acel ma Lubana olwoŋowu iye. Rwot tye acel, niye acel, batija acel, Lubaŋa bene tye acel ma en aye Won dano ducu. En loyo jami ducu, tiyo i gin ducu, dok bene tye i gin ducu. Ŋat acel acel i kinwa olimo mot me kica, ma oporre ki mot ma Kricito omiye. En mumiyo yam giwaco ni, “Ka ceŋ oito malo, otero opii mapol ma en oyako i lweny, ci omiyo mot bene bot dano.” “Oito malo” te lokke aŋo? Te lokke ni olor piny bene i lobo ka matut. Ŋat mulor piny en acel-lu bene aye oito malo ka mabor i ŋe polo ducu, wek epoŋ jami ducu woko liweŋ. Mot ma en omiyo gin en: omiyo jo mogo me bedo lukwena, jo mukene me bedo lutit lok pa Lubaŋa, jo mukene gubed lutit lok me kwena maber, jo mukene lukwat ki lupwony. Ticgi obedo me yubo jo pa Lubaŋa i ticgi me konyo dano, dok me doŋo kom Kricito, nio waŋ ma wan ducu wadoko acel i niyewa ki i ŋeyo Wod pa Lubaŋa, nio ka wadoko dano mucwiny, ma wadoŋo warom ki Kricito, ma en aye jami ducu opoŋ iye. Pi meno pe dok myero wabedu calo litino ma giweko yamo me pwony mapatpat wirogi dwokogi tuŋŋi ki tuŋŋi; ryeko pa dano, ki lok ma giporo me goba, pe dok bimiyo wacabbe acaba. Ma ka meno, myero walok lok ada ki mar, wek wamedde, wadoŋu malo i kit yo ducu nio bot Kricito, ma en aye lawiwa. En aye wic, dul kom ducu guribbe woko i kome, dok gukubbe kacel i waŋ mwot ducu ma tye iye. Ka dul acel acel tye ka tiyo ticce kakare, miyo kom doŋo maber i mar. En mumiyo awaco lok man botwu kun acikowu i Rwot ni, pe myero pud dok wubed i kit ma Lurok gibedo kwede, i tamgi ma konnye pe. Tamgi doŋ onyobbe woko, pe doŋ gitwero niaŋ gin mo, kwo ma Lubaŋa miyo nen gin ma welo ki tuŋ botgi, pi kwiya piny ma obino botgi pi cwinygi ma odoko nwaŋ. Gin pe doŋ giparo gin mo, oweko doŋ gumine kengi i tim me tarwaŋ, dok bene giwor matek i timo lwak tim caro caro mapol. Ento lok kom Kricito yam pe gipwonyowu kit meno, ka kono nene wuwinyo lok i kome ada, dok gipwonyowu, wun jo ma lubo en, ki lok ada ma tye i Yecu. Kit kwowu macon ma yam wubedo kwede ca, kombeddi myero doŋ wuwek obedi; kit kwo maca doŋ oballe woko pi miti maraco ma obwolowu. Wuwek Lubaŋa doŋ oroc tam me cwinywu odok manyen, ka doŋ wuruk kit pa dano manyen ma giketo i cal pa Lubaŋa kikome i ada me kit ma atir ki maleŋ. Pi meno, wuwek goba obedi; dano acel acel myero olok lok ada bot dano lawote, pien wan watye macalo dul kom luwotwa. Ka kiniga omakowu, pe wupot i bal; ceŋ pe myero opoti ma noŋo pud wujul wutye ki kiniga i cwinywu, dok bene pe wumi kare ki Catan. Dano ma yam bedo ka kwalo jami pa jo mukene myero doŋ owek kwo obedi; myero en ocak tiyo tic maber ki ciŋe, wek onoŋ gin ma myero opok ki jo ma megi pe. Lok mo marac myero pe okatti ki i dogwu; wulok lok mabeco keken ma doŋo tam pa dano i yo ma mitte, wek jo ma winyo lokwu gunoŋ kony ki iye. Pe wumi Cwiny pa Lubaŋa okum, en Cwiny ma gimiyowu me bedo lanen ma gimwono woko doŋ i komwu pi kuro nino ma gibikokowu iye. Wuwek doŋ keccwiny ducu, ki waŋ-ic ki kiniga, da i wi dano mukene, yet, kacel ki raccwiny ducu. Wubed jo ma lukica ki cwiny maber; dano acel acel myero otim ber bot lawote. Wutim kica i kinwu kekenwu ki luwotwu i kom balwu, macalo Lubaŋa otimowu kica i Kricito. Wulub kit pa Lubaŋa, pien wun litinone ma en maro. Wubed kun wulubo yo me mar, macalo Kricito ceŋ omarowa, ci omine kene piwa wek ebed macalo gitum ma ŋwece kur ma gityero bot Lubaŋa. Doŋ pi meno tim kwele ki tim caro caro ducu, ki woro me lim pe myero gilwoŋ nyiŋgi i kinwu; meno aye gin ma myero bot jo pa Lubaŋa. Gin me lewic ki lok miŋmiŋ, nyo kadi ki loko lok oree ma konnye pe, myero bene pe owinnye botwu. Ma ka timo jami magi, wumi pwoc bot Lubaŋa. Wuniaŋ maber ni, pe tye ŋat mo i kin lutim tim abor nyo tim caro, nyo jo ma wor i kom jami, ma binoŋo dul mo ma bedo mere i ker pa Kricito ki pa Lubaŋa. Pe wuye ŋat mo obwolwu ki lok mogo ma tere pe, pien kiniga pa Lubaŋa bino i kom jo ma pe winyo lokke pi kit timgi nu. Pi meno, pe wuribbe kwedgi. Yam wubedo colpiny, ento kombeddi doŋ wudoko dyeceŋ i Rwot; kitwu myero doŋ obed kit pa jo me ceŋ. Pien nyig ma onyak pi ceŋ nen woko i gin ducu ma tye maber, dok atir, ki me ada. Wutem pwonyo gin ma yomo cwiny Rwot. Pe wuribbe i tic mo ducu me piny macol ma pe konyo, ento wunyut kit tic meno woko ka maleŋ. Pien bedo me lewic me loko i kom gin ma gitiyo i muŋ aloka keken. Gin mo-ni ma leŋo onyuto nen woko ka maleŋ; pien gin ma nen ka maleŋ noŋo tye i ceŋ. Man aye gin mumiyo giwaco ni, “Co woko, in ma inino, cer woko ki i kin jo muto, ci Kricito bimenyi.” Wugwokke maber i kwo ma wubedo kwede; pe wubed macalo jo ma kwiya piny, ento calo jo maryek. Kare ma tye myero iti kwede i yo maber, pien nino me kare-ni opoŋ ki gin marac. Pi meno, pe wubed miŋ, ento wutem niaŋ gin ma Rwot mito wuti. Dok pe myero wumer ki koŋo, pien mero kelo kit me caro. Ma ka mero, wuwek Cwiny Maleŋ opoŋ cwinywu, kun wuloko i kinwu kekenwu lok me jabuli, ki wer, ki wer me cwiny, kun wuwero dok wukuto wer me pako Rwot ki cwinywu ducu. Wupwo Lubaŋa Won i kare ducu pi jami ducu i nyiŋ Rwotwa Yecu Kricito. Wumine kenwu i te loc pa jo mukene, ŋat man bot lawote, pi woro Kricito. Wun mon wumine kenwu i te loc pa cogwu, macalo wumine kenwu bot Rwot. Pien laco obedo lawi dakone, macalo Kricito en aye lawi lwak muye en, en bene lalargi; gin lwak meno aye kome. Macalo lwak muye Kricito gibedo i te locce, kit meno mon bene myero gubed i te loc pa coggi i kit yo ducu. Wun co bene wumar monwu i kit macalo Kricito omaro kwede lwak muye en, ci omiyo kwone pigi, wek elonygi gubed leŋ, ma doŋ otyeko lwokogi ki pii ki lok, wek ekel lwak muye en i nyime kene macalo nyako mamwonya twatwal, kun pe tye ka mo ma ojuŋŋe i kome, nyo kadi ki poyo mo bene pe, wek obed leŋ laboŋo ka mo murocce. Kit meno, co bene gumar mongi macalo gimaro komgi kengi. Ŋat ma maro dakone, maro kome kene. Pe tye ŋat mo ma dag kome kekene, ento pito ki cam dok gwoko maber macalo Kricito bene tiyo ki lwak jo muye en, pien wan wa dul kome. Yam gicoyo ni, “Pi lok man dano biweko wonne ki minne, ci giribbe woko gin ki dakone, gin aryo doŋ gidoko kom acel.” Man muŋ madit twatwal. An ki tuŋ bota agonyo tyen lokke ni Kricito ki lwak muye en. Pi meno, laco acel acel i kinwu myero omar dakone macalo maro kome kene, ki dako bene myero onen ni eworo cware. Wun litino, wuwiny lunyodowu i Rwot, pien meno aye ber. Yam gicoyo ni, “Wor woru ki meni.” Man aye cik mukwoŋo ma giciko pi gin mo maber ma bia ki iye, ni, “wek ibed ma nyimi leŋ dok iri i lobo pi kare malac.” Dok wun wego, pe wuket kolo i kom litinowu ma miyo kiniga makogi, ento wupitgi gudoŋ maber kun wupwonyogi dok wunyebogi ki kit mabeco ma Rwot pwoyo. Wun lutic, wuwiny luditowu me lobo man ki cwinywu acel, macalo wuwinyo Kricito, kun wulworogi ki myelkom. Ticwu myero pe obed tic ma yeŋo waŋ keken me yomo cwiny dano, ento myero wuti gin ma Lubaŋa mito ki cwinywu ducu, macalo wun lutic pa Kricito. Wuti ticwu ki cwiny maber, macalo wutiyo bot Rwot, ento pe wutiyo bot dano ni gunen wek gupwowu, kun wuŋeyo ni, gin mo ducu ma dano mo otiyo maber, Rwot bicule pire ma rom aroma ki ticce ma en otiyo, kadi en latic nyo dano ma lone kene. Dok wun wegi lutic, wuti bene ki luticwu i yo acel-lu; wuwek burogi obedi, kun wupo ni ladit ma loyogi wa ki wun bene tye i polo, en tero jo ducu maromrom. Me agikkine, wubed tek i Rwot ki twero me tekone. Wuruk jami lweny ducu ma Lubaŋa miyo, wek wucuŋ kun wugeŋŋe kekenwu i roro pa Catan. Pien wan pe walwenyo i kom dano ma tye ki kom ki remo, ento walwenyo ki luloc ki wegi twero ma woko, ki i kom gin ducu ma loyo wi lobo ducu i kare man me colpiny, dok ki dul mony mogo maraco me cwiny ma tye i polo. Pi meno myero wukwany jami lweny ducu ma Lubaŋa miyo, wek obikonywu me cuŋo matek i nino marac, pud wubicuŋ ma noŋo doŋ wuyelle i kit yo ducu. Pi meno, myero wucuŋ ma wutweyo pyerwu woko ki ada, wuruk bene kit ma atir wek obed nyonyo me geŋo korwu, kun wuyubbe me tito lok me kwena maber me kuc ma bedo macalo war ma wuruko i tyenwu. Makato ducu, niye aye myero obed kwotwu ma bimiyo wutwero neko mac ki i kom atero ma Larac bayo. Wumak larre aye obed tok nyonyo me wiwu, ki lok pa Lubaŋa ma en aye pala lucwan pa Cwiny Maleŋ. Wuleg kare ducu i Cwiny ki lega me bako dog. Wubed ma wuyubbe i lega kare ducu kun wuciro peko, kun wulego pi jo pa Lubaŋa ducu. Wuleg bene pira wek Lubaŋa oyab doga, omiya gin ma myero aloki, wek atuc muŋ me lok me kwena maber ki tekcwiny. An lakwenane ma rom ki ŋat mo-ni ma cuŋ pi lobone, ento gitweya woko ki nyor. Lubaŋa omiya atit ki tekcwiny, kit ma myero alok kwede. Tukiko, ominwa ma gimaro dok en latic pa Rwot me agena, bitittiwu lok ma dok i koma ki i kom ticca. Acwalo en botwu pi lok man kikome, wek en omi wuŋe kit ma wan watye kwede, dok ocuk cwinywu. Kuc ki mar ki niye ma a bot Lubaŋa Won ki Rwotwa Yecu Kricito obed bot utmegiwa. Kica pa Lubaŋa obed bot jo ducu ma maro Rwotwa Yecu Kricito ki mar ma pe to. Waraga man oa ki bot Paulo ki Temceo, ma gin lutic pa Kricito Yecu. Bot jo pa Lubaŋa ducu ma tye i Kricito Yecu ma gibedo i Pilipi, kacel ki lutel ki jo ma konyogi: Lubaŋa Wonwa ki Rwotwa Yecu Kricito omiwu kica ki kuc. Apwoyo Lubaŋa i kare ducu ma noŋo atye ka po piwu. I legana ducu alego piwu ducu ki yomcwiny, pien cakke i nino mukwoŋo o kwede wa onyoo, wuribbe kweda i tic me tito lok me kwena maber. Aniaŋ maber ni, Lubaŋa ma ocako tic man i kinwu bicobo kakare nio wa i nino pa Kricito Yecu. Oporre bota me paro piwu ducu kit meno, pien piwu litta twatwal, pien wun ducu wuribbe kacel kweda i nywako kica ma Lubaŋa omiya kanyi buc, ki dok i kare ma alaro pi lok me kwena maber wek omok matek. Lubaŋa aye obedo cadenna ma ŋeyo ni, par matut ma abedo kwede piwu a i mar pa Kricito Yecu kikome. Dok alego Lubaŋa ni meno, mar mewu myero odoŋ omedde ameda i ŋec kikome ki niaŋ matut, wek wupwo gin maber makato. Man bimiyo wubedo ma cwinywu leŋ laboŋo bal mo i nino pa Kricito, dok bene bimiyo ticwu ducu mabeco me kit ma atir nya i komwu pi Yecu Kricito, kun kelo deyo ki pak bot Lubaŋa. Utmega, amito wuŋe ni, lok mutimme i koma okonyo matek me nyayo lok me kwena maber. Lwak askari pa Cecar ducu, ki jo mukene ducu, kombeddi giŋeyo maber ni, an atye i buc pi Kricito. Dok utmegiwa mapolle gengi omedde i kom Rwot pi bedona i buc, omiyo gitito lok pa Lubaŋa ki tekcwiny madwoŋ twatwal, laboŋo lworo. Ada, jo mogo tito pi Kricito ki cwiny me nyeko ki daa, ento jo mukene gitito ki cwiny maber. Jo ma tito ki cwiny maber-ri gitito pi mar, kun giŋeyo ni Lubaŋa oketa kany ka lweny pi lok me kwena maber. Jo mukene ca gitito nyiŋ Kricito pi laro dito kun noŋo cwinygi pe leŋ, tamgi tye me medo can bota i buc kany. Lok mo pe, an gira cwinya yom ayoma, pien i yo ducu, kadi i goba nyo lok ada, gitye ka tito pi Kricito. Iyo, pud dok abibedo ki yomcwiny. Pien aŋeyo maber ni, pi legawu ki pi kony ma a ki bot Cwiny Maleŋ pa Yecu Kricito, bimiyo abwot ki i can. Pien mitina ki genna madwoŋ tye ni, lewic pe bimaka i gin mo, ento atamo me miyo deyo bot Kricito i koma-ni ki tekcwiny madwoŋ, i kare-ni macalo i kare ducu, kadi akwo nyo kadi ato. Pien ki tuŋ bota, bedo kwo en aye Kricito, ki to kono miyo anoŋo magoba. Ka abedo kwo i kom, miyo abitiyo tic mogo ma konyo ento pe aŋeyo gin ma abiyero. Kwanyo acel i kom gin aryo-ni ocuŋo wiya woko. Mitina tye ni kono ato wek abed kacel ki Kricito, pien meno aye ber makato ducu. Ento bedo kwo i kom mitte twatwal piwu. An doŋ aniaŋ i lok man, omiyo aŋeyo ni pud abibedo, dok abiri botwu ducu wek wumedde wuwot anyim, wubed ki yomcwiny i niyewu. Meno bimiyo wakkewu pira i Kricito. Yecu bedo dwoŋ twatwal, ka dok adwogo botwu. Gin acel ma pire dit en ene ni, kit kwo me bedowu myero orwatte ki gin ma lok me kwena maber i kom Kricito mito, wek kadi abino me nenowu, nyo kadi abedo bor kwedwu, ka awinyo lok i komwu, myero aŋe ni, wucuŋ matek i cwiny acel ki tam acel, kun wulwenyo kacel pi niye ma bino pi lok me kwena maber. Pe wuwek lukworwu gumiwu lworo i gin mo. Man aye lanyut ma cimo botgi ka maleŋ ni gibirwenyo woko matwal, ento lanyut man nyuto botwu ni gibilarowu; meno gire gin ma a ki bot Lubaŋa. Pien en omiyowu mot me kica pi Kricito, pe mot me ye en keken, ento me neno can pire bene. Wudonyo doŋ i kit lweny ma yam wuneno i koma-ni, dok bene kombeddi pud wuwinyo ni atye iye. Pi meno, ka wunoŋo tekcwiny mo pi bedo i Kricito, nyo mar mo ma miyo wudiyo cwinywu, nyo ka gimiyowu ribbe mo i Cwiny Maleŋ, nyo cwiny mo me kica weko wutimo ber bot jo mukene, doŋ wumi yomcwinya ocobbe maber kit man: wubed ki tam acel ki mar acel, kun wuribbe kacel i cwinywu, tamwu bene myero obed acel. Pe wutim gin mo pi laro dito nyo pi wakke awaka keken, ento wubed ki mwolo, kun dano acel acel woro lawote macalo ŋat madit loye. Pe itam pi gin ma konyi keken, ento tam pi gin ma konyo jo mukene bene. Wubed ki cwiny ma rom ki cwiny ma yam Kricito Yecu obedo kwede-ni. I calle kadi bed en Lubaŋa kikome, ento pe oridde ki tek me bedo rom ki Lubaŋa. Oweko meno ducu, ci okwanyo kit me opii, ka ginywale macalo dano. Ka doŋ okatti macalo dano, omwolle woko gire kene, obedo lawiny nio wa i to, nio bene wa i to i kom yatariya. Pi meno, Lubaŋa omiye dit ma malo twatwal, dok bene omiye nyiŋ ma tye malo makato nyiŋ mukene ducu, wek gin ducu ma tye i polo ki i lobo, kadi wa gin ducu ma tye piny i te lobo, gurum coŋgi piny me woro nyiŋ Yecu, leb ducu myero otuc bene ni, Yecu Kricito aye Rwot, kun kelo deyo bot Lubaŋa Won. Pi meno, wun ma amaro, macalo yam wuwinyo lokka i kare ducu ma onoŋo pud atye botwu, myero wubed ki winy makato kare kombeddi ma doŋ atye bor kwedwu-ni. Wuti tic me cobo larwu kenwu kenwu ki lworo kacel ki myelkom, pien Lubaŋa aye ma tye ka tic i cwinywu, kun miyowu miti ki teko me tic, wek wun wuyom cwinye. Wuti tic ducu laboŋo ŋuru nyo pyem mo, wek wubed laboŋo lok mo ma loyowu, ma bal mo bene pe i cwinywu, litino pa Lubaŋa ma bal mo pe i komwu liweŋ i kin lwak jo me kare-ni ma guballe woko-ni. Wutye ka ryeny i lobo i kin dano calo lakalatwe. pien wumako lok me kwo doŋ matek. Meno bimiyo awakke i nino pa Kricito ni, yam kara onoŋo pe ariŋo ŋwec nono, dok bene pe ayelle nono. Kadi bed giony remona me bedo macalo gityer amata ma gionyo i wi keno tyer, kun niyewu kacel ki ticwu bote bedo macalo mot ma gitumo bot Lubaŋa, an gira cwinya yom kacel ki wun ducu. Kit meno, wun bene myero cwinywu obed yom, wek wuribbe kweda i yomcwiny. Atye ki gen i Rwot Yecu me cwalo Temceo botwu oyot, wek omi awiny kit ma wutye kwede, kun cuko cwinya bene. Pe atye ki ŋat mo mukene doki ma tye ki kit cwiny ma en tye kwede, ma twero paro piwu adada macalo en. Jo mukene-gu ducu giparo pi gin ma konyogi keken, pe gitamo pi gin ma dok i kom Yecu Kricito. Ento wun wuŋeyo kit Temceo ki konnye ma en onyuto. En ki an wabedo calo wego ki latinne; waribbe kwede i tic kacel pi lok me kwena maber. Pi meno atye ki gen me cwale botwu oyot, tek aniaŋ kit ma piny tye ka wot kwede ki tuŋ bota kany. Dok bene atye ki gen i Rwot ni an kikoma abio botwu i kare macokcok-ki. Atamo bene ni myero acwal omera Epaprodito botwu, ma en latic wadwa ma olwenyo kacel kweda, en ŋat ma yam wuore bota pi konya i pekona-ni. Pien en paro pi wun ducu, kun mito ni enenwu, dok bene cwinye obedo ka cwer matek, pien yam wuwinyo onoŋo ni kome lit. Adada, kome onoŋo obedo lit matek ma obwot to woko. Ento Lubaŋa okonye, pe en keken, ento kadi wa an bene, wek pe omedda cwercwiny i kom cwercwiny mukene ca. Meno gin mumiyo amito twatwal ni myero acwale botwu wek wubed ki yomcwiny ka dok wunene, ki an bene pe doŋ myero abed ki cwercwiny madwoŋ. Wujole i Rwot ki yomcwinywu ducu; dok bene wuket deyo i kom jo ma cal kwede. Pien en yam omiyo kwone adada ma obwot to woko pi tic pa Kricito, wek ecob gin murem i kom kony ma yam wumiya. Me agikkine, utmega, wubed ki yomcwiny i Rwot. An pe aol gira me nwoyo coyo lok ma yam koŋ acoyo botwu, dok bene twero jukowu miyo pe wupoto i gin marac. Wuyab waŋwu wunen gwogi-gu, ma gin lutim maraco, ma giŋolo dul kom dano woko-ni. Pien wan aye jo mulirre me ada, wan jo ma waworo Lubaŋa i Cwiny Maleŋ, dok ma wawakke i Kricito Yecu, kun pe watye ki gen mo i kom gin ma nen ki woko. Ento an kikoma bene aromo bedo ki gen macalo meno; kadi ka ŋat mo tamo ni etwero bedo ki gen i kom gin ma nen ki woko, an gira aloye. An gilira i nino me aboro me ditta, rokka jo Icrael ma i kaka pa Benjamin. An Laibru ma jo Ibru aye gunywala. I lok ma dok i kom cik pa Moses, an abedo Laparicayo. Lok ma dok i kom keto cwiny, yam alwenyo i kom lwak jo muye Yecu marac. Dok lok ma dok i kom bedo ki kit atir ma cuŋ i lubo cik, onoŋo gire lok mo pe i koma. Ento gin ducu ma yam atamo ni konya, kombeddi doŋ anenogi macalo gin ma konygi pe, pi Kricito. Adada, tye gin mo maber makato, en aye ŋeyo Rwotwa Yecu Kricito; meno aye gin mumiyo aneno jami ducu macalo gin ma konygi pe. Pe Kricito omiyo alokke adoko lacan jami ducu, dok anenogi calo yugi, wek anoŋ Kricito, wek aribbe bene kacel kwede. Pe atye ki kit ma atir ma mera kikoma, kadi ki mo ma bino pi lubo cik bene pe, ento amito abed ki kit ma atir ma ginoŋo pi ye Kricito, ma oa ki bot Lubaŋa kikome, dok ma en omiyo pi niye. Amito aŋe Kricito, ki teko ma en ocer kwede, amito bene anywak kwede can ma en ociro, adok calo en i tone, wek ka twerre ao wa i cer ki i kin jo muto. Pe atye ka waco ni doŋ anoŋo, nyo ni doŋ ao iye, ento pud amedde me wot anyim kun atemo matek me mako gin ma Kricito Yecu doŋ omaka pire. Utmega, pe atamo ni doŋ atyeko makone; tye gin acel keken: wiya bedo ka wil i gin mukato aŋec, kun alaro gin ma tye anyim calo dano ma tye i ŋwec me pyem. Ariŋo acito anyim atir kun akemo tol, wek anoŋ mot, ma en aye lwoŋo ma Lubaŋa tye ka lwoŋowa kwede malo i Kricito Yecu. Wan ducu jo muteggi myero wabedu ki kit tam meno; dok bene ka tamwu opokke woko i lok mo, Lubaŋa binyuto man bene botwu. Gin ma mitte keken aye ni myero wamedde me cuŋ matek i yo ma doŋ wao iye. Utmega, wuribbe kacel kun wulubo kitta. Wan doŋ watyeko nyoto botwu lanen ma myero wulubi; wucik waŋwu me neno jo ma lubo lanen meno. Abedo ka tittiwu lok man tyen mapol ata, dok bene tin anwoyo tito botwu ki pig waŋa ni, tye jo mapol ma kwogi omiyo gibedo lukwor me to pa Yecu i kom yatariya. I agikkine, jo meno gibirwenyo woko matwal, pien lubaŋagi en aye igi, ginoŋo deyogi i gin ma myero omi lewic omakgi, tamgi kemo jami me lobo man keken. Pien wan gaŋ kalwa madit tye i polo; watye ka kuro Lalarwa ma bia ki kunnu, en aye Rwotwa Yecu Kricito. En biloko komwa marac-ci doko calo kome me deyo, kun tiyo ki tekone ma miye twer me kelo jami ducu i te locce. Pi meno utmega, ma amaro dok ma aparo piwu twatwal, wucuŋ matek i Rwot kit meno, pien wun aye wubedo yomcwinya ki tok wiya me deyo, luwota. In Euodia ki in Cintuke, alegowu me bedo ki cwiny acel i Rwot. In latic wadwa me ada bene, alegi ikony mon man ba, pien gin bene gulwenyo kacel kweda pi lok me kwena maber kacel ki Kelemente bene ki lutic wadiwa mukene ducu, ma doŋ gityeko coyo nyiŋgi woko i buk me kwo. Wubed ki yomcwiny i Rwot kare ducu. Dok anwoyo waco botwu aye ni, Wubed ki yomcwiny. Wuwek jo ducu guŋe mwolo ma wutye kwede. Rwot doŋ cok. Pe wubed ki par i kom gin mo, ento i lok ducu wumi Lubaŋa oŋe gin ma wumito i lega ki i bako dogwu kacel ki miyo pwoc bene. Man bimiyo kuc pa Lubaŋa ma kato ŋec pa jo ducu gwoko cwinywu ki tamwu maber i Kricito Yecu. Me agikkine, utmega, wuket tamwu i kom lok macalo magi: gin ducu ma tye ada, gin ducu ma romo awora, gin ducu ma tye atir, gin ducu maleŋ, gin ducu ma mwonya, gin ducu ma dano pwoyo, ki gin mo maber makato, ma myero apaka. Wuti gin ma nene wupwonyo, ma wugamo, ma wuwinyo, dok ma wuneno ki bota; ci Lubaŋa won kuc bibedo kwedwu. An atye ki yomcwiny matek i Rwot pien kombeddi dok wuparo pira kit ma yam con. I adane-ni, pe wuweko paro pira, ento kare me konya aye obedo pe botwu. Dok bene pe akoko can, pien doŋ apwonnye woko ma aŋeyo ni, gin ma atye kwede romma. Aŋeyo bedo ki gin manok, dok bene aŋeyo bedo ki gin mabup. Adonyo i dul pa jo ma ŋeyo bedo ki gin mo ma ginoŋo i kare mo keken, yeŋo matek mukato kare, nyo ciro kec, bedo ki lonyo madwoŋ nyo bedo ki can. Atwero jami ducu liweŋ pi Kricito ma miya teko. Ento wun yam wutimo ber me ribbe kweda i can munoŋo odiya. Dok wun jo Pilipi wuŋeyo maber ni, i kare ma yam aa i Makedonia i acakki tito lok me kwena maber pe tye lwak mo i kin jo muye Rwot ma guribbe kweda i yo man me miyo ki gamo mot, ento kono wun keken. Kadi wa i kare ma atye i Tecalonika wucwalla kony ma mitte tyen aryo kulu. Pe tyen lokke ni amito mot, ento amito nyayo magoba ma gibikwano botwu. Atyeko gamo gin ma wumiya ducu, obedo dwoŋ mukato kare. Oromma doŋ maber, pien Epaprodito bene omiya mot ma wucwale kwede ni okel bota. Man gin aye gin ma ŋwece kur ma gityero bot Lubaŋa, ma en opwoyo, dok ma yomo cwinye. Ento Lubaŋana bimiyowu jami ducu ma wumito, kun kwanyo ki i lonyone me deyo ma en tye kwede i Kricito Yecu. Deyo obed bot Lubaŋa Wonwa nakanaka. Amen. Wumot jo pa Lubaŋa ducu i Kricito Yecu. Utmega ma gitye kacel kweda kany bene gumotowu. Jo pa Lubaŋa ducu gumotowu, makatone jo me ot pa Cecar. Kica pa Rwotwa Yecu Kricito obed kwedwu. Waraga man oa ki bot Paulo ma en lakwena pa Yecu Kricito pi mit pa Lubaŋa, ki bot ominwa Temceo. Bot jo pa Lubaŋa ki utmego ma genne i Kolocai, ma gitye i Kricito: Lubaŋa Wonwa omiwu kica kikuc. Wapwoyo Lubaŋa Won Rwotwa Yecu Kricito kare ducu ma walego piwu. pien wawinyo pi niyewu i kom Kricito Yecu ki pi marwu ma wumaro kwede jo pa Lubaŋa ducu. Meno ducu obino pi gin ma wugeno ma gikano i polo piwu, ma yam doŋ wuwinyo pire con i lok me ada, ma en aye lok me kwena maber mubino botwu. Tye bene ka nyako nyige kun nya doŋo i wi lobo ducu i kit yo acel-lu, macalo tye ka timme botwu, cakke i nino ma wuwinyo iye, ka doŋ oweko wuniaŋ i kica pa Lubaŋa i ada, kit ma yam Epapira opwonyowu kwede, ma en latic wadiwa ma wamaro. En latic pa Kricito piwa ma genne. En bene mutittiwa pi mar ma wutye kwede i Cwiny Maleŋ. Cakke i nino ma wawinyo pire, walego Lubaŋa piwu ma pe wakeŋ, kun walego ni myero dok wuniaŋ matut i gin ma en mito, kun wubedo ki ryeko ki niaŋ ducu ma Cwiny Maleŋ miyo. En okonywu, wek kwowu obed ma myero bot Rwot, ma yomo cwinye maber, kun wutiyo tic mabeco ma miyo kwowu nyak nyig madwoŋ, dok wumedde bene ka ŋeyo Lubaŋa. Lubaŋa omiwu tek ducu ma rwatte ki twero me deyone, wek wucir can ducu kun wudiyo cwinywu i yo ducu ki yomcwiny. Wumi pwoc bot Lubaŋa Won ma omiyowa twer me nywako kacel ki jone maleŋ jami ducu ma en bimiyo botgi i leŋpiny. En ceŋ olarowa ki i loc me piny macol ci okobowa woko i te loc pa Wode ma emaro. Koko dano, ma en aye weko bal, a ki bote. Kricito obedo cal pa Lubaŋa ma pe nen-ni, latin kayo me ginaketa ducu ma Lubaŋa oketo, pien i en Lubaŋa ocweyo jami ducu, gin ma tye i polo ki gin ma tye i wi lobo, gin ma nen ki gin ma pe nen, kadi wa wegi komker ki wegi dito, ki luloc, ki wegi twer ducu. Jami ducu yam giketo pi twerre dok pire bene. En aye mukwoŋo katti ati ki jami ducu, dok bene i en jami ducu ribbe kacel. En aye wic, ki jo muye en gubedo kome. En obedo acakki, en mukwoŋo cer ki i kin jo muto, wek etel yo i kin jami ducu. Pien Lubaŋa oye bedo i en wek epoŋ iye i kit yo ducu ma en tye kwede; dok bene oye dwoko jami ducu bote i Kricito, gin ma tye i wi lobo ki gin ma tye i polo, kun Kricito okelo kuc pi remo me tone i kom yatariya. Wun yam wupokke woko ki Lubaŋa; onoŋo wubedo lukworre i tamwu, kun wutimo gin maraco. Ento kombeddi doŋ pi to pa Wode ma con odoko dano, en odwokowu woko bote, wek ekelwu i nyime ma noŋo wutye maleŋ, dok bene ma wutye laboŋo bal mo, ma lok mo marac pe i komwu. Wumedde me bedo ki niye, kun wucuŋ matek, dok wumoko woko likiŋ ma pe wuleŋŋe ki i gen me lok me kwena maber ma doŋ wuwinyo, ma gitito bot ginaketa ducu ma tye i te polo, dok bene an Paulo kikoma yam adoko latic pire. Kombeddi an gira cwinya yom i can ma aneno piwu, pien pi arem ma atye ka cirone i koma, atye ka miyo kony me tyeko gin murem i can pa Kricito, pi kome, ma en aye jo muye en. Pire omiyo yam adoko latic ma konyo lwak man, pi tic ma Lubaŋa omiya piwu, wek ami lok pa Lubaŋa oŋene. En muŋ mukanne pi kare malac bot lwak mapol ata, ento kombeddi doŋ Lubaŋa omiyo onen woko ka maleŋ bot jone. Lubaŋa gire otamo ni emi jone guŋe kit ma muŋ man pire dit kwede i kin Lurok, dok me deyo madwoŋ, i mitine kene. Muŋ meno en ene, ni, Kricito bedo i iwu, miyo wubedo ki gen me nywako deyo pa Lubaŋa. Wan watuco pi Kricito kun waciko jo ducu, dok bene wapwonyo jo ducu ki ryeko ducu, wek wakel dano acel acel i nyim Lubaŋa ma doŋ oteggi i Kricito. Man aye gin mumiyo ayelle matek, kun acukke ki tekone madwoŋ ma tye ka tic i iya. Amito wuŋe kit ma acukke kwede ka tic piwu, ki pi jo ma tye i Laodikia, kadi ki jo ducu ma pud peya guneno waŋa, wek cwinygi obed tek, dok wek guribbe kacel i mar. Dok amito gubed macalo lulonyo pi lok ma odonyo matut i cwinygi, mumiyo guniaŋ maber, dok bene guŋeyo muŋ pa Lubaŋa ma en Kricito kikome. ma Lubaŋa okano iye lonyone ducu me ryeko ki ŋec. Awaco man wek ŋat mo pe oŋakwu ki pyem me gobagoba me bwola. Kadi bed pe atye kacel kwedwu i kom, ento watye kacel i cwiny kun cwinya yom me neno kit ma wuwoto kwede maber i lok ducu, ki niyewu mucuŋ matek i kom Kricito. Macalo yam doŋ wuye Rwot Yecu Kricito, myero bene wubed i en. Lwitwu odony ocuŋ matek i kome, dok wubed macalo ot ma gigero i kome, ma wucuŋ matek i niyewu kit macalo yam gipwonyowu kwede, kun pwocwu bene medde ameda. Wugwokke wek ŋat mo pe oŋakwu woko ki tam me ryeko nyo me bwola mo ma tere pe, kun wulubo kit pa kwaro ki pwony pa jogi macon me lobo, ma pe wulubo Kricito. Pien i kom Kricito ma odoko dano-ni en aye Lubaŋa opoŋ iye kit ma etye kwede i yo ducu. Wun bene doŋ wupoŋ ki kwo i kit ducu i Kricito. En obedo lawi luloc ki wegi twer ducu. I Kricito bene doŋ yam gilirowu woko ki lirre mere kikome, pe i lirre ma dano gutiyo ki ciŋgi i komwu, ento pi kwanyo kit me kom woko ki i komwu. Dok i kare ma gibatijawu giyikowu kacel ki Kricito, ka lacen wucer woko kacel kwede i niyewu i kom tic pa Lubaŋa matek ma yam ocero kwede Yecu Kricito ki i kin jo muto. Wun ma yam onoŋo doŋ wuto woko pi balwu, ki ni pien pe giliro riŋo komwu, wun aye doŋ Lubaŋa omiyo wukwo kacel kwede, kun bene doŋ oweko balwa woko ducu. En bene yam oŋolo banya ducu ma gicoyo i wiwa pi cik ma ceŋ omiyo kop oloyowa, ocwalo cen ci oguro woko i kom yatariya. Kricito doŋ otyeko mayo jami lweny woko ki bot jogi ma gin luloc ki wegi twer, kun nyutte ka maleŋ i kom yatariya ni doŋ eloyogi. Pi meno, ŋat mo pe myero oŋol kop i komwu pi lok kom cam nyo ginamata, kadi pi nino madito, nyo por dwe, nyo pi cabit. Magi ducu gubedo tipo keken ma nyuto gin ma bibino, ento kom gin meno tye bot Kricito. Ŋat mo pe oŋol ni kop oloyowu, kun mito pire kene ni dano gumwolle kekengi gobagoba me woro lumalaika, ma noŋo en ocuŋ pi ginanyuta ma en oneno. Kit dano macalo meno wakke mere mwa laboŋo tyen lok mo, kun tamo tam me kom keken, ento kun pe omako Kricito matek ma en aye wic, ma miyo dul kom ducu limo cam, dok gikubbe kacel i waŋ mwot ki i ler, ka doŋ cako doŋo i kit ma Lubaŋa mito ni odoŋ kwede. Ka wun yam doŋ wuto woko kacel ki Kricito, ka doŋ gigonyowu woko ki i te loc pa jogi macon me wi lobo, piŋo pud dok wumedde ki bedo calo jo me lobo, kun wugwoko bene cik macalo magi, “Pe imaki, pe ibil, pe igudi”? Magi ducu gubedo cik ki pwony pa dano, ma kemo mere jami ma tum woko ka gitiyo kwedgi-ni. Ada, cik magi nen calo tye iye ryeko pi keto cik me woro Lubaŋa ma wun wuroto giwu piwu kenwu, dok pi mwolle ken me yelo kom i can, ento pe konyo kadi ki acel me loyo mit me kom. Macalo yam doŋ wucer kacel ki Kricito, wuket cwinywu doŋ i kom jami ma tye malo, ka ma Kricito tye iye i kabedo me deyo i ŋet Lubaŋa tuŋ acuc. Wuket cwinywu i kom jami ma tye malo i polo ento pe i kom jami me lobo. Pien yam wuto woko, ento kombeddi doŋ gikano kwowu kacel ki Kricito bot Lubaŋa. Ka Kricito ma en kwowa binen, wun bene wubinen kacel kwede i deyo. Pi meno myero doŋ wunek gin ducu me lobo ma tye i iwu, ma gin aye abor, caro, mit me kom, ki par marac ma kelo lewic, ki woro me jami ma rom ki woro jogi. Akemo pa Lubaŋa bino pi kit tim macalo meno i kom jo pe winyo lokke. I kit kwo ma yam wubedo kwede, magi aye gin tim ma onoŋo wubedo ka lubogi. Ento kombeddi myero doŋ wubwotgi woko ducu: kiniga, kwar cwiny, raccwiny, yet, ki loko lok mogo me lewic ma pe myero giwiny ka katti ki i dogwu. Pe myero wubwolle kekenwu, pien doŋ wubwoto kwowu macon ki ticce ducu, ci doŋ wuruko dano manyen ma Lacwec tye ka rocone i ŋec manyen me dwoko i calle kikome. Kenyo doŋ apokapoka pe iye i kin Lugrik ki Lujudaya, ŋat ma giliro ki ŋat ma pe giliro, larok ma kwiya piny mere ata ma pe ŋeyo leb, rok ma pud gudoŋ cen i kit me wi lobo, opii, ki ŋat ma doŋ lone kene, pien Kricito doŋ ocoko gin ducu dok bene tye i igi ducu. Ento wun aye jo ma Lubaŋa doŋ oyero, jo maleŋ ma Lubaŋa maro; pi meno myero doŋ wuruk cwiny ma miyo wuparo pi can pa luwotwu, wubed ki kica, mwolo, woro ki diyo cwiny. Wudi cwinywu kekenwu, ŋat acel acel odi cwinye i kom lawote, kun wutimo kica ki luwotwu i kinwu kekenwu pi balwu. Ka ŋat mo i kinwu tye ki lok mo i kom lawote, timo kica pi bal myero obed tye macalo Rwot bene ceŋ otimowu kica. Ento makato magi ducu, myero wubed kun wupoŋ ki mar. Pien mar keken aye tweyo jami ducu, ribogi kacel ma cobo bene maber licwic. Wuwek kuc pa Kricito ma yam olwoŋowu i kom acel aye olo cwinywu, ka wek doŋ wubed jo ma miyo pwoc kare ducu. Wuwek lok pa Kricito obed i iwu mulony, ka wupwonnye, kun wujukke bene kekenwu ki ryeko ducu ma Lubaŋa omiyowu. Dok bene ka wuwero jabuli, wer me pako Lubaŋa ki wer mogo mukene me dini, wuwer bot Lubaŋa ki pwoc i cwinywu. Gin ducu ma wutiyo, kadi ki i lok nyo i tic mogo, wutigi i nyiŋ Rwot Yecu, kun wumiyo pwoc bot Lubaŋa Won wok ki bote. Wun mon, wumine kenwu i te loc pa cogwu, pien meno aye gin ma myero i kin jo ma tye i Rwot. Wun co bene, wumar monwu, pe wubed ki gero i komgi. Wun litino, wuwiny lunyodowu i lok ducu, pien meno aye yomo cwiny Rwot. Wun wego bene, pe myero wuket kolo i kom litinowu, miyo cwinygi balle woko. Wun lutic, myero wuwiny luditowu me lobo man i lok ducu ki cwiny acel, pe i tic ma bwolo waŋ dano keken, kun wumito wuyom cwiny dano, ento wuti i cwiny me lworo Rwot. Tic mo keken ma wutiyo, wuti maber ki cwinywu ducu, macalo wutiyo bot Rwot, ento pe pi dano. Wuŋe ni wubilimo jami ducu ma Rwot oyubo wa con pi jone macalo bakacicgi. Wun lutic pa Rwotwa Kricito. Pien latim marac mere gibicule pi gin marac ma en otimo, pien Rwot pe poko kin dano. Wun wegi opii, wuti ki opiiwu i yo ma atir ma romrom. kun wuŋeyo ni, wun bene laditwu tye malo i polo. Wumedde matek i lega, ma pe wunino, ento wumiyo pwoc bene. wuleg piwa bene, wek Lubaŋa oyab botwa doggola me tito lok, wek watuc muŋ pa Kricito, pien pi lok meno aye omiyo koni atye i buc kany, wek anyut ka maleŋ i kit ma myero. Wubed dok wuti ticwu ki ryeko twatwal i nyim jo ma pe guye Yecu, kun wutiyo ki kare ma tye bene i yo maber. Lok ma wuloko myero obed lok mamit ma kado oromo maber, wek omi wuŋe kit ma myero wudok kwede i peny pa ŋat acel acel. Ominwa Tukiko ma wamaro, ma obedo latic ma genne, dok latic macalo an i Rwot, bitito botwu lok ducu ma dok i koma. Acwalo en botwu pi lok man kikome, wek en omi wuŋe kit ma watye kwede kany, dok bene myero ocuk cwinywu. Acwale me bino kacel ki ominwa mukene ma wamaro, en aye Onesimo; en bene dano ma genne, dok en oa ki botwu. Gin bitito botwu gin ducu ma doŋ otimme kany. Aristako ma lamabuc lawota omotowu, ki Marako okeyo Barnaba ma yam doŋ acikowu pire; ka en oo botwu myero wujole maber, ki Yecu ma nyiŋe mukene Yucito bene omotowu. Jo magi adek-ki keken aye gin Lujudaya ma gitiyo tic kacel kwedwa kany i ker pa Lubaŋa. Gukweyo cwinya twatwal. Epapira latic pa Yecu Kricito ma en ŋat acel mua ki botwu, bene omotowu. En po piwu kare ducu i legane matek, wek wubed jo muteggi, kun wuniaŋ maber i gin ducu ma Lubaŋa mito ma pe wukalo akala wacel. An cadenne omiyo amoko ni en otiyo tic matek piwu ki pi jo ma tye i Laodikia ki Kerapoli. Luka ma en daktar ma wamaro, kacel ki Dema bene gumotowu. Wumot utmego ma tye i Laodikia, dok wumot Nimpa bene kacel ki jo muye Kricito ma gicokke i ode. Ka doŋ waraga man gityeko kwanone i kinwu, myero wumi gikwan bene bot jo muye Kricito ma gitye i Laodikia, ki wun bene myero wukwan waraga ma jo Laodikia gicwalo botwu. Dok wuwac bot Arkipo ni, “Myero inen ni icobo tic ma doŋ igamo i Rwot.” An Paulo acoyo botwu lok me mot man ki ciŋa.Wupo i kom twec man ma gitweya kwede ki nyor. Kica pa Lubaŋa obed kwedwu. Amen. Waraga man oa ki bot Paulo gin ki Silvano ka Temceo. Bot jo muye Kricito ma gibedo i Tecalonika ma gitye i Lubaŋa Won ki Rwotwa Yecu Kricito: Kica ki kuc obed botwu. Wapwoyo Lubaŋa jwijwi piwu ducu kun walwoŋo nyiŋwu i legawa me kare ducu, kun wapo i nyim Lubaŋa Wonwa i kit ma wuketo kwede niyewu i tic, ki kit ma wucanne kwede pi mar, dok ki kit ma wudiyo kwede cwinywu pi gen ma wutye kwede i Rwotwa Yecu Kricito. Utmegiwa ma Lubaŋa maro, waŋeyo ni Lubaŋa doŋ otyeko yerowu,, pien lok me kwena maber ma watito botwu yam pe obino botwu i lok keken, ento obino ki teko, ki i Cwiny Maleŋ kun onoŋo lok meno odonyo matut i cwinywu. Wuŋeyo maber kit ma wan wabedo kwede i kinwu kun wakonyowu. Wun bene yam wucako poro kitwa ki kit pa Rwot, pien wuye lokke i kare ma onoŋo giunowu matek ma wubedo ki yomcwiny ma Cwiny Maleŋ miyo. Man omiyo wudoko lanen bot jo ducu muye Yecu ma gitye i Makedonia ki Akaya. Pien wumiyo lok pa Rwot owinnye, pe i Makedonia ki Akaya keken, ento lok pi niyewu i kom Lubaŋa doŋ oywek oromo kabedo ducu, ma wan kikomwa dok pe waromo loko iye gin mo. Pien gin kikomgi aye gitito lok mukemowa, kit macalo yam wujolowa kwede, kadi wa kit ma wulokke kwede bot Lubaŋa, kun wubwoto woro jogi pi woro Lubaŋa makwo, dok me ada, dok wutye ka kuro Wode ma bidwogo ki i polo, ma yam en ocero woko ki i kin jo muto, en aye Yecu ma olarowa ki i akemo pa Lubaŋa ma bibino. Utmegiwa, wun kikomwu wuŋeyo ni, binowa botwu yam pe obedo me nono. Kadi bed waneno can, dok bene gitimo tim me lewic i komwa i Pilipi macalo wun wuŋeyo, kadi pyem obedo dwoŋ, Lubaŋawa omiyo botwa tekcwiny me tito botwu lok me kwena maber ka maleŋ. Pien lok ma wakelo pe oa ki i tam mugom nyo tam ma pe leŋ, goba bene pe iye. Ento kit macalo Lubaŋa doŋ opwoyowa, ci cut omiyowa lok me kwena maber me atita, wan bene doŋ watito kit meno, pe pi yomo cwiny dano, ento pi yomo cwiny Lubaŋa ma ŋiyo cwinywa. Wuŋeyo ni, wan yam pe waboko lok mabeco nono, pe wakano tamwa pi noŋo lim, Lubaŋa aye cadenwa. Pe bene wayenyo deyo ki bot dano mo, kadi ki botwu nyo ki bot jo mukene; kadi bed onoŋo watye ki twero me keto peko i komwu, pien wan lukwena pa Kricito. Ento yam wabedo wamwol i kinwu macalo lapidi ma gwoko litinone. Waparowu mada, omiyo nene pe wamito miyo botwu lok me kwena maber keken ma oa ki bot Lubaŋa, ento kadi wan kikomwa doŋ watyeko mine woko botwu, pien wamarowu dok piwu tek botwa twatwal. Utmegiwa, wutwero po kit ma ceŋ wacanne kwede i tic, i kare ma watittiwu lok me kwena maber ma oa ki bot Lubaŋa, kun watiyo dyeceŋ ki dyewor wek pe waket peko i kom ŋat mo i kinwu. Wun wucadenwa, ki Lubaŋa bene ŋeyo kit ma wabedo kwede maleŋ dok ma kitwa atir, laboŋo lok mo ma oloyowa i nyimwu wun jo muye Yecu. Dok wuŋeyo kit ma wabako kwede dogwa botwu, kun waparo pi dano acel acel ma i kinwu, dok wacuko cwinywu macalo won litino cuko cwiny litinone. Dok wacikowu bene ni, wulub kit kwo ma myero bot Lubaŋa ma olwoŋowu i kerre ki i deyone. Man aye gin mumiyo wapwoyo Lubaŋa kare ki kare, pien cakke ma wugamo lok pa Lubaŋa ma wuwinyo ki botwa, pe wugamo macalo lok pa dano, ento macalo lok pa Lubaŋa. Ada aye lok pa Lubaŋa tye bene ka tic i iwu wun jo muye Yecu. Utmegiwa, wun bene wumako kit pa lwak jo muye Lubaŋa ma tye i Kricito Yecu, i kabedo ducu ma tye i Judaya, pien wun bene wuneno can ki bot lutuwu kikome ma rom ki can ma gin guneno bot Lujudaya, ma ceŋ guneko Rwot Yecu ki lunebi, ka guryemowa woko bene. Pe guyomo cwiny Lubaŋa, ento gupyem apyema ki jo ducu, kun gigeŋowa me tito lok bot Lurok wek gularre. Man omiyo gumedde ameda ki timo gin marac. Ento akemo pa Lubaŋa doŋ obino woko i komgi matwal. Utmegiwa, ka ceŋ gipokowa woko kwedwu pi kare manok, i kom ento pe i cwiny, watemo twatwal ki miti madwoŋ me noŋo yo wek dok wanenne kwedwu waŋ ki waŋ. Yam onoŋo wamito mada me bino botwu. An Paulo atemo tyen mapol, ento Catan ogeŋowa woko. Genwa ki yomcwinywa ki lalukana me nyattewa i nyim Rwot Yecu Kricito i dwogone, en gin aŋo? Pe wun? Pien wun aye wubedo deyowa ki yomcwinywa. I kare ma doŋ waneno ni pe waromo ciro wacel, wamito ni wadoŋ woko cen kenwa i Atene, ci waoro botwu Temceo, ma en ominwa ki latic pa Lubaŋa i tito lok me kwena maber i kom Kricito, wek ojiŋ cwinywu obed tek dok odi cwinywu i kom niyewu, wek can magi pe oryaŋ kom dano mo. Wun kikomwu wuŋeyo ni can ma kit meno myero opot i komwa. Pien i kare ma pud watye kacel kwedwu watittiwu con ni, i kare mo i anyim wabineno can, ma doŋ bene otimme woko kit macalo wuŋeyo-ni. Pi lok man,, ka doŋ anoŋo ni pe aromo diyo cwinya, aoro dano botwu wek aniaŋ i kom niyewu, ka ce labit dano doŋ obitowu woko, nyo ticwa ma watiyo bene doŋo olal nono. p Ento kombeddi Temceo doŋ odwogo botwa kun oa ki botwu. En okelo botwa lok mamit i kom niyewu ki mar ma wutye kwede, dok bene ni wupo piwa jwijwi ki kica madwoŋ kun wuparo pi nenowa mada macalo wan bene waparo me nenowu. Utmegiwa, meno aye gin mumiyo cwinywa okwe i komwu pi niyewu, i can ki i un ma giunowa kwede ducu; kombeddi doŋ wabedo kwo ka wacuŋ matek i Rwot. Kit pwoc aŋo muporre ma waromo miyo bot Lubaŋa piwu, ki pi yomcwiny ducu ma wumiyowa ma miyo cwinywa bedo yom i nyim Lubaŋa? I dyeceŋ ki dyewor walego Lubaŋa matek twatwal pi nenowu waŋ ki waŋ, wek wamed botwu gin murem i kom niyewu. Lubaŋa Wonwa kikome, ki Rwotwa Yecu Kricito, myero omi wanoŋ yo me bino botwu. Dok walego Rwot omiwu wumedde matek twatwal i mar, kun ŋat acel acel maro lawote ki jo ducu, i kit ma wan wamarowu kwede, wek en ojiŋ cwinywu obed tek dok wubed jo maleŋ laboŋo lok mo ma loyowa i nyim Lubaŋa Wonwa, i kare me dwogo pa Rwotwa Yecu ki jone maleŋ ducu. Me agikkine utmegiwa, walegowu kun wabako dogwa botwu i Rwot Yecu ni, wumedde anyim nakanaka me bedo ki kit kwo ma wumako ki botwa, ma yomo cwiny Lubaŋa, ma wutye ka lubone-ni. Pien wuŋeyo cik ma yam wamiyo botwu pi Rwot Yecu. Gin ma Lubaŋa mito en ene, ni myero wudok jo maleŋ; wuwek tim me kwele obedi. Dano acel acel myero oŋe bedo ki dakone kene i cwiny maleŋ dok me woro. Pe wuwek miti me kom obwowu, macalo lurok ma pe ŋeyo Lubaŋa. Ŋat mo pe otim bal bot ominne, dok pe obwole i lok man; pien Rwot culo kwor i lok magi ducu macalo wan yam watito botwu kun wacikowu bene matek. Lubaŋa pe olwoŋowa ka nyobbe ki bal, ento ka bedo jo maleŋ. Kit meno ŋat mukwero cik man, noŋo pe okwero dano, ento noŋo okwero Lubaŋa gire ma omiyowu Cwiny Maleŋ. Lok mudok i kom mar me omego, pe myero gico botwu lok mo iye, pien wun kikomwu yam Lubaŋa doŋ opwonyowu woko ni wumarre kekenwu; doŋ ada wun wumaro utmego ducu ma tye i Makedonia. Ento wabako dogwa botwa ni wumedde ka timo kit meno nakanaka, dok wuket cwinywu ka bedo mot. Dano acel acel opar pi ticce kun tiyo ki ciŋe kit macalo wacikowu kwede, wek jo ma tye woko gupwo kitwu, dok gin mo pe myero orem ki botwu. Utmegiwa, pe wamito wubed ma wukwiya lok i kom jo ma doŋ guto; meno weko wubibedo ki cwercwiny macalo jo mukene ma gipe ki gen. Wan waye ni Yecu oto, ci ocer woko. Jo muto ma kun yam giye Yecu bene gitye kit meno; Lubaŋa bikelogi kacel ki Yecu. Watito botwu lok pa Rwot ma en owaco, ni, wan jo makwo ma wadoŋ nio wa i nino me dwogo pa Rwot, pe wabitelo nyim jo ma doŋ guto. Rwot kikome bilor piny kun a ki i polo ki lwoŋo me twer, ma dwan lamalaika maditte biwinnye, tum pa Lubaŋa bikok. Jo ma yam guto i Kricito aye ma gibikwoŋo cer, ka lacen wan jo makwo, ma wadoŋ gibigwarowa kacel kwedgi i pol, wek warwatte ki Rwot i dye yamo; ci doŋ wabibedo kacel ki Rwot nakanaka. Pi meno, wukwe cwinyu kekenwu ki lok magi. Ento lok ma dok i kom kare, ki nino, utmegiwa, pe myero aco pire botwu, pien wun kikomwu doŋ wuŋeyo maber ni, nino pa Rwot bibino macalo lakwo ma bino i dyewor. Ka dano giwaco ni, “Kuc tye, piny okwe mot, gin mo marac pe,” to biturugi atura calo arem me nywal ma turu dako muyac, ka larre biloyogi woko. Ento wun pe wutye i piny macol, utmegiwa, ma twero miyo nino-nu turuwu atura calo lakwo. Pien wun ducu wubedo jo me ceŋ, jo me dyeceŋ; wan pe jo me dyewor nyo me piny macol. Pi meno, pe myero waninu anina macalo jo mukene, ento wabed ka neno piny kun wagwokke. Pien jo ma nino, ginino dyewor, jo ma mer ki koŋo gimer bene dyewor, ento wan jo me dyeceŋ myero wabed jo ma wagwokke. Waruku niye ki mar gubed nyonyo me geŋo korwa, waruku bene gen me larre obed tok wiwa me lweny. Pien Lubaŋa pe oyerowa ni kinigane opot i komwa, ento ni walarre pi Rwotwa Yecu Kricito, ma yam oto piwa, ni wek kadi ka waneno nyo wanino, wabibed kwo kacel kwede. Pi meno wucuk cwinywu kekenwu, dok wukonnye bene kekenwu wek wudoŋ i cwinywu, ŋat acel acel okony lawote me doŋo, kit macalo wutye ka timone-ni. Wabako dogwa botwu utmegiwa, wuwor jo ma tye ka tic i kinwu ma gicanne piwu i Rwot, kun gipwonyowu. Wuket deyo madwoŋ i komgi pi ticgi, dok wumargi bene. Wubed ki kuc i kinwu kekenwu. Dok wabako dogwa botwu, utmegiwa, wujuk jo ma balo kare laboŋo tic, wucuk cwiny jo ma cwinygi odoko nyap, wukony jo ma goro, wudi cwinywu bene i kom dano ducu. Wunen maber ni ŋat mo i kinwu pe ocul gin marac pi tim marac ma gitimo i kome, ento kare ducu wutem me timo ber i kinwu kekenwu ki bot jo ducu. Cwinywu obed yom kare ducu. Wuleg Lubaŋa ma pe wukeŋ. Wumi pwoc i kit gin ducu, pien meno aye gin ma Lubaŋa mito ki botwu i Kricito Yecu. Pe wugeŋ Cwiny Maleŋ me tiyo ticce i iwu, pe wuca bene lok ma Lubaŋa miyo bot dano me atita, ento wubed ki waŋ mabit me neno jami ducu; wumak gin maber matek. Wukwer tim maraco ducu. Lubaŋa kikome ma en won kuc omiwu wudok jo maleŋ i yo ducu, ogwok cwinywu ki tipowu ki komwu wek wubed laboŋo lok mo ma loyowu i kare me dwogo pa Rwota Yecu Kricito. Ŋat mulwoŋowu-ni genne, dok bitiyo. Utmegiwa, wuleg Lubaŋa piwa. Wumot utmego ducu ki mot me mar. Acikowu matek i nyiŋ Rwot ni, myero wukwan waraga man bot utmego ducu. Kica pa Rwotwa Yecu Kricito obed kwedwu. Waraga man oa ki bot Paulo gin ki Silvano, ka Temceo. Bot lwak jo muye Kricito ma gibedo i Tecalonika ma gitye i Lubaŋa Won ki Rwotwa Yecu Kricito: Lubaŋa Won ki Rwotwa Yecu Kricito omiwu kica ki kuc. Utmegiwa, wan myero wapwo Lubaŋa jwijwi piwu. Myero wapwoye pien niyewu tye ka doŋo matek twatwal, ki mar ma dano acel acel maro ki lawote bene tye ka medde. Pi meno wan bene wanyatte piwu i kin jo muye Lubaŋa i kabedo ducu, pi diyo cwinywu ki pi niyewu i un ma giunowu kwede ki i can ducu ma wutye ka cirone. Meno aye lanen ma nyuto kit ma Lubaŋa ŋolo kwede kop atir dok kakare, wek gibikwanwu ni wun jo ma myero i ker pa Lubaŋa ma wutye ka neno can pireni. Pien bot Lubaŋawa nen atir ni, myero ecul can bot jo muketo can i komwu, ka doŋ miyowu yweyo, wun jo ma giketo can i komwu, ka wa wan bene. Meno en bitimo i kare ma Rwot Yecu binen iye ma kun a ki i polo kacel ki lumalaikane matek i dye mac ma lyel. I kare meno en biculo kwor i kom jo ma pe ŋeyo Lubaŋa, ki i kom jo ma pe gilubo lok me kwena maber i kom Rwotwa Yecu. Kop ma gibiŋolo i komgi en aye can me to ma pe gik, kun giryemogi woko ki i nyim Rwot dok ki i nyim deyo me tekone, i nino meno, i kare ma en bidwogo kun jone miyo deyo bote, ma noŋo giure i kin jo ducu muye en; pien yam doŋ wuye lok ma watito botwu. Meno aye gin mumiyo walego Lubaŋa piwu nino ducu, wek en omi wubed jo ma myero ma kwowu rwatte ki lwoŋo ma en olwoŋowu kwede, wek Lubaŋa okonywu ki tekone me cobo mitwu ducu mabeco ki tic ducu ma wutiyo pi niye. Meno bimiyo dano keto deyo i nyiŋ Rwotwa Yecu Kricito piwu dok wun bene wubinoŋo deyo pire, pi kica pa Lubaŋawa ki Rwotwa Yecu Kricito. Utmegiwa, lok i kom dwogo pa Rwotwa Yecu Kricito ki cokkewa me rwatte kwede, wabako dogwa botwu ni, pe wuwek tamwu ogwaŋŋe oyotoyot, cwinywu pe myero opoti, kadi pi lok ma wuwinyo ki bot lanebi mo nyo pi lok ma gitito, nyo kadi pi waraga mo ma giwaco ni oa ki botwa, ma tito ni, nino pa Rwot doŋ oo. Pe wuwek ŋat mo obwolwu i yo ducu, pien nino meno pud pe bibino, nio waŋ ma jemo i kom Lubaŋa koŋ obedo tye, dok bene nio waŋ ma dano ma turo cik koŋ onen, dano ma myero orweny woko matwal. En pyem, dok kette kene me bedo malo ma loyo gin ducu ma gilwoŋo ni lubaŋa, nyo gin mo ma giworo; dok bibedo i wi komme i ot pa Lubaŋa, kun nyutte kene ni en Lubaŋa. Pe wupo ni yam atittiwu lok man i kare ma pud atye botwu? Wuŋeyo bene gin ma tye ka geŋe i kare-ni, wek onen ka doŋ kare oromo. Pien twero ma miyo dano turo cik kombeddi doŋ tye ka tic i muŋ; ento ŋat ma geŋe pud bigeŋo nio ka doŋ giryeme woko. Lacenne dano ma turo cik binen, ci Rwot Yecu bineko woko ki alur doge, tyeke woko, i kare ma en bidwogo turu ki nen woko ka maleŋ. Bino pa dano ma turo cik a ki i tic pa Catan kun tye ki teko ducu, ki lanyut mogo ki taŋo mogo me goba. Dok bibedo ki lwak bwola maraco pi jo ma birwenyo matwal, pien gukwero maro lok me ada ma kono olargi. Pi meno Lubaŋa biketogi i te twero me bwola, wek guye goba, wek giŋol kop oloo jo ma pe ye lok me ada, ento cwinygi yom i timo gin ma pe tye atir. Utmegiwa ma Rwot maro, myero wapwo Lubaŋa piwu nino ducu, pien Lubaŋa okwoŋo yerowu con wek elarwu pi Cwiny Maleŋ ma lonyowu wubedo maleŋ, ki pi ye lok me ada. Olwoŋowu i man ki lok me kwena maber ma watito, wek gimi wunoŋ deyo pa Rwotwa Yecu Kricito. Pi meno utmegiwa, wucuŋ matek, wumak kit ma wapwonyowu kwede, i lok nyo ki waraga. Kombeddi Rwot Yecu kikome, ki Lubaŋa Wonwa ma marowa dok okweyo cwinywa matwal ki gen maber ma obino pi kica, okwe cwinywu, omokwu matek i tic ki i lok ducu mabeco. Me agikkine, utmegiwa, wuleg Lubaŋa piwa, wek lok pa Rwot owinnye oywek woko oyotoyot, dano guket iye deyo macalo bene otimme i kinwu, dok bene wek walarre ki i ciŋ jo maraco, ma kitgi oballe woko; pien jo mogo pe gitye ki niye. Rwot genne, en bimiyowu teko, dok bigwokowu ki i kom gin marac. Watye ki gen i Rwot i komwu ni, wutye ka tiyo gin ma nene wacikowu ni wuti, dok bene wubimedde ki tiyone. Rwot myero otel cwinywu nio wa i mar pa Lubaŋa ki i diyo cwiny ma a ki bot Kricito. Utmegiwa, kombeddi wacikowu i nyiŋ Rwotwa Yecu Kricito ni, wupokke woko ki i kom ominwu mo ma lawackom ma bedo ka wirre kun balo kare nono labaŋo tic mo, ma pe lubo kit ma myero ma wun wumako ki botwa. Wun kikomwu wuŋeyo kit ma myero wulub kwede kitwa. I kare ma nene watye botwu pe wabedo luwackom kun wabalo kare nono laboŋo tic mo. Wan yam pe wacamo cam pa ŋat mo laboŋo culone, ento wacanne i tic dyeceŋ ki dyewor wek pe waket peko i kom dano mo i kinwu. Pe te lokke ni wan wape ki twero, ento wamine giwa kenwa me bedo lanen ma myero wun wulubi. Pien kadi i kare ma onoŋo watye botwu, wamiyowu cik man ni, ŋat ma dag tic myero wutwon ki cam. Pien wawinyo ni jo mogo i kinwu komgi wac, gibedo ka wirre kun gibalo kare nono ma pe gitiyo tic mo, ento giridde i tic pa jo mukene. Waciko kodi dano macalo meno, dok wabako dogwa botgi i Rwot Yecu Kricito ni, myero guti ticgi mot, wek ŋat acel acel opitte gire kene. Utmegiwa, pe wuol ka tiyo gin maber. Ka ŋat mo okwero lubo lok ma gicoyo i waraga man, myero wuniaŋ maber i kom dano meno, pe wuribbe kwede, wek lewic omake. Pe wunene macalo lakworwu, ento wucike macalo ominwu. Rwot ma en won kuc omiwu kuc i kare ducu, i yo ducu. Rwot obed kwedwu ducu. An Paulo acoyo botwu mot man ki ciŋa. Man aye lanen ma tye i waragana ducu; man aye kit ma acoyo kwede. Kica pa Rwotwa Yecu Kricito obed kwedwu ducu. Waraga man oa ki bot Paulo ma lakwena pa Kricito Yecu pi cik pa Lubaŋa Lalarwa ki Yecu Kricito ma genwa ocuŋ i kome. Bot Temceo latinna me ada i niye: Lubaŋa Won ki Kricito Yecu Rwotwa omii gum, kica, ki kuc. Macalo nene koŋ abako doga boti i kare ma acito i Makedonia, amito koŋ idoŋ i Epeco wek icik jo mogo pe gupwony pwony mo mapat, dok pe guket cwinygi i kom lok me ododo, ki nyiŋ mogo ma giryeyo mabocoboco ma lubo te kwaro, ma kelo tam atata, pe konyo yub pa Lubaŋa ma ocuŋ i kom niye. Yam aciki ni iwek dano gubed ki mar ma dano bedo kwede ka cwinye leŋ dok kite ber ma pe ki bala mo i kome, dok ma niyene goba pe iye. Jo mogo guŋak woko ki i lok man ci gudonyo ka boko lok atata ma konnye pe. Gimito bedo lupwony-cik, kun pe giniaŋ kadi wa lok ma giloko, nyo kadi gin ma gitye ka lok i kome, ma gucuŋ iye matek twatwal-li. Waŋeyo ni cik ber ka dano otiyo kwede i yo ma cik mito, kun waniaŋ ni, cik pe giketo pi jo ma kitgi atir, ento giketo pi lutur-cik ki pi jo ma pe ki winy, pi jo ma pe lworo Lubaŋa ki pi lubalo, pi jo ma pe gileŋ, jo ma pe keto cwinygi i kom Lubaŋa, pi jo ma neko wongi ki jo ma neko megigi, pi lunek dano mukene, dok pi jo ma timo tim kwele, jo ma buto ki co luwotgi, jo ma kwalo dano girwenyo kwede woko ali, lugoba, jo ma kwoŋo kwoŋ laboŋo tere, ki gin mukene ducu ma pe rwatte ki pwony me ada. Meno aye pwony ma noŋŋe i lok me kwena maber ma yam gimiya me atita, lok maber ma tito pi deyo pa Lubaŋa ma gipwoyo. Apwoyo ŋat ma omiya teko me tiyo tic man, en Kricito Yecu Rwotwa, pien doŋ okwana me bedo lagen, ka oketa bene i ticce, kadi bed yam abedo ka yete pi keto ayela i kome ki balo nyiŋe. Ento en otima kica, pien ceŋ atimo meno ki kwiya piny laboŋo niye, ka kica pa Rwotwa omedde twatwal i koma kacel ki niye ki mar ma tye i Kricito Yecu. Lok man lok me ada, myero dano ducu guye ni, Kricito Yecu yam obino i lobo pi laro lubalo. I kin lubalo an aye abedo labal mukwoŋo, ento otima kica pi lok man, wek i kin lubalo, Yecu Kricito okwoŋ nyuto diyo cwinye maber-ri bota macalo lanen bot jo mukene ma gibiye en, ka doŋ gicako noŋo kwo ma pe tum. Woro ki deyo obed nakanaka bot Kabaka ma loyo kare ducu, ma pe to, ma pe nen, en Lubaŋa acel kene. Amen. Latinna Temceo, amiyo boti cik man ma rwatte ki lok ma yam lutit lok pa Lubaŋa guloko i komi, wek ka ilubo lokgi wek ilweny lweny maber, kun imako niye matek ma ii leŋ. Pi kwero tam ma i igi ma nyuto botgi balgi, jo mogo niyegi oballe woko. Jo mogo i kingi, Kumenayo ki Alegijada, yam amiyogi i ciŋ Catan wek gupwonnye guwek yeto Lubaŋa. Lok mukwoŋo aciki ni, bako dog, lega, lega ma gilego pi jo mukene, ki miyo pwoc, myero gitim pi dano ducu, pi luker ki jo ma tye i rwom ma malo, wek omi wabed mot laboŋo ayela, ma waworo Lubaŋa kun kitwa beco i yo ducu. Man ber, dok Lubaŋa Lalarwa bene pwoyo. En mito laro jo ducu, dok mito ni jo ducu guŋe lok me ada. Pien Lubaŋa tye acel, Ŋat ma ribo Lubaŋa ki dano bene tye acel, ma obedo dano, en aye Kricito Yecu, ma omine kene me bedo gin-kok pi jo ducu; meno en aye caden ma yam gimiyo i karene kikome. Pi lok man, giketa me bedo latit-lok dok lakwena, (aloko lok ada, goba pe iye), an lapwony pa Lurok, i niye ki i lok ada. Man aye mumiyo amito ni co myero guleg Lubaŋa i kabedo ducu, kun gitaŋo ciŋgi maleŋ malo laboŋo kiniga nyo daa mo. Kit meno, mon bene myero gurukke maber ki mwolo, kun gigwokke, pe i yer wic ma gikedo, nyo jabu, nyo tiko ŋut,, nyo ruk mogo me wel ma malo; ento bergi myero onen i tic maber ma gitiyo, meno en gin ma mitte bot mon ma gilwoŋŋe kengi ni gin jo ma woro Lubaŋa. Dako myero opwonnye laliŋliŋ kun bedo ki winy. Pe aye ni dako opwony dano nyo obed ki twero i kom co; en myero obed oliŋ aliŋa. Pien Adam aye ma gikwoŋo cweyone, ka doŋ lacen gicweyo Kawa. Dok bene yam pe gibwolo Adam, ento gibwolo dako, ci omiyo opoto i bal odoko labalo. Kadi bed kumeno, dako gibilaro i kare me nywal, ka ce omedde ka bedo ki niye dok ki mar, kun bedo maleŋ ma gwokke kene. Lok man lok ada: ka ce dano mo mito tic me bedo latel jo pa Lubaŋa, noŋo en mito tic maber. Latel myero obed laboŋo lok mo ma gijuke iye, obed ki dako acel, ogwokke kene, obed ryek, obed dano ma giworo. Obed dano ma gwoko welo, lapwony maber, ma pe lamero koŋe, ma pe lakolo, ento obed dano mamwol, ma pe da atata, dok pe obed ŋat ma maro lim. Myero obed ŋat ma loyo ode maber kun gwoko litinone miyo gibedo ki winy bot jo madito, ma giworo dano i yo ducu; pien ka ce dano pe loyo ode kikome maber, ci en twero gwoko lwak jo muye Lubaŋa niŋniŋ? Myero pe obed dano ma pud olokke aloka nyen, miyo kette malo ki wakke, ci cut poto woko, lok loye macalo yam oloyo Catan. Medo i kom meno myero en obed dano ma jo ma woko pwoyo, wek pe okel yet i kome ma miye poto i owic pa Catan. Kit meno, ludikon myero bene gubed jo ma romo awora, jo ma pe doggi aryo, ma pe gin lumat koŋo matek twatwal, pe gubed luworo me noŋo lim; myero bene gubed jo ma niaŋ maber i muŋ me niyewa, kun cwinygi bene leŋ. Myero koŋ gikwoŋ temogi; ka ce ginoŋo ni lok mo marac pe i komgi ka doŋ giyegi guti tic me dikon. Mon bene kit meno, myero gubed mon ma romo awora, ma pe lucok dog dano, gubed jo ma gwokke kengi dok jo ma lugen i jami ducu. Ludikon myero gubed wegi mon acel acel, myero gulo litinogi ki odigi bene ducu maber,, pien ludikon ma gitiyo tic mabeco ginoŋ rwom maber pigi kengi, dok gidoko jo ma cwinygi tek i kom niye ma tye i Kricito Yecu. Atye ki gen me bino boti pi oyot, ento acoyo lok me pwony man boti wek, ka agalle, iŋe kit ma myero dano obed kwede i kin jo me ot pa Lubaŋa, ma en aye lwak jo muye Lubaŋa makwo, ma en aye obedo wir ki guti me te ot matek, me ada. Muŋ me dini ma watuco pire dit twatwal: Yam onyutte i kom, gikwane ni kite atir pi Cwiny Maleŋ, lumalaika gunene, gitito pire bot lurok, giye en i lobo ducu, ka doŋ gitero woko malo i deyo. Cwiny Maleŋ waco atir ni, i kare mo i anyim jo mogo bibwoto niyegi woko, gicako lubo jogi ma gin lugoba, ki pwony pa cen maraco. Pwony ma kit meno a ki bot jo ma luroro ma gin lugoba, ma tam ma i igi ma nyuto botgi balgi odiŋ woko macalo del kom dano ma giwaŋo ki nyonyo malyet. Gin jo-nu gijuko ni dano pe gunyom, dok bene giciko dano ni gukwer cam mogo, kun Lubaŋa yam oketo cam wek jo ma ye en, ma giŋeyo lok me ada, gugam ki pwoc. Pien jami ducu ma Lubaŋa oketo gibeco, pe tye mo ma myero gikwer ki i kingi, ka ce onoŋo gigamo ki pwoc; pien lok pa Lubaŋa ki lega lonyogi bedo maleŋ. Ka iketo pwony magi i nyim utmego, ci ibibedo latic pa Kricito Yecu maber, ma gipito ki lok me niye ki pwony mabeco ma ibedo ka luboneni. Kwer lok mogo me miŋo ma tere pe ma pe me lworo Lubaŋa. Pwonnye keni i kwo me lworo Lubaŋa. Pwonnye me rweyo ler kom tye ki kony, ento konnye nok; lworo Lubaŋa konyo i yo ducu, pien twero kelo botwa gum i kare man ki i kwo ma ki i kwo ma bibino i anyim, macalo Lubaŋa yam ociko. Lok man lok ada, myero dako ducu guye. Meno aye mumiyo wacanne dok wacukke me tic matek, pien waketo genwa i kom Lubaŋa makwo, ma en Lalar pa jo ducu, ento makatone pa jo ma ye Yecu. Cik lok magi dok ipwony ki dano. Pe imi ŋat mo ocayi ni pien in pud itidi, ento bed lanen maber bot jo muye, i lokki, i kiti, i mar, i niye, ki i bedo maleŋ laboŋo gin marac mo i komi. Mi kareni me kwano coc ma yam gicoyo i nyim lwak, i tito lok, ki i pwony, nio ka abino kunnu. Pe ibwot mot me cwiny ma itye kwede-ni oballe nono, ma yam gimii pi lok ma lutit lok pa Lubaŋa gutito i kare ma ludoŋo giketo ciŋgi i wii. Nyut lok magi ki tic, ket cwinyi iye, wek dano gunen kit ma itye ka wot kwede anyim. Gwokke keni, dok igwok pwonnyi bene; mak matek, pien ka itimo kumeno, in kikomi ibilarre kacel ki jo ma winyi bene. Pe ijuk ladit mo, ento cuk cwinye macalo woru; awobe myero inengi macalo omegini, nen mon madoŋo macalo mego, ki mon matino myero inengi macalo lumegini, laboŋo tam mo marac. Wor mon ma coggi oto, ma doŋ gudoŋ kengi. Ka ce dako ma cware oto tye ki litinone ki likwaye, myero gin koŋ gukwoŋ pwonyo ticgi me dini i odigi gin kikomgi, kun gimiyo kony bot lunyodogi pi kony mogo ma yam gumiyo botgi, pien meno aye Lubaŋa pwoyo. Dako ma cware oto ma odoŋ kene laboŋo ŋat mo ma konye, keto genne ducu i kom Lubaŋa, dok bene bako doge kun lego Lubaŋa dyeceŋ ki dyewor. Ento dako ma cware oto ma yenyo yomcwiny me jami mabeco keken, doŋ oto kadi bed pud kwo. Ket cik man, wek gubed laboŋo lok mo ma gijukogi iye. Ka ce dano mo pe miyo gin mo me konyo wadine, makato pi jo me ode kikome, noŋo doŋ okwero niyene woko, dok bene odoko rac makato ŋat ma pe oye Lubaŋa. Pe myero gico nyiŋ dako ma cware oto ma mwaka me ditte peya oromo pyerabicel nono, dok bene myero en obed dako ma yam obedo ki cware acel keken. Myero ginen ka ticce ber, ka ce yam opito litino, ka yam ojolo welo, nyo olwoko tyen jo pa Lubaŋa, ka okonyo jo ma yam giunogi, dok bene ka obedo ŋat ma yam omine kene i tiyo gin maber i yo ducu. Ento myero ikwer coyo mon ma pud gitino ma coggi oto; pien miti me komgi twero miyo gikwero Kricito woko, gicako mito nyomme doki aye, miyo giŋolo kop loyogi pi turo cikkegi mukwoŋo. Medo i kom meno, gilokke gidoko luwackom ma gibibedo ka wot awota i ot ki ot; pe gibedo luwackom keken, ento gidoko bene jo ma loko lok atata, ma giridde i gin ma pe megi, gibedo ka loko lok ma pe myero gilok wacel. Pi meno, omiyo amito ni mon matino ma coggi oto ginyomgi wek gunywal litino, gulo odigi, wek pe gumi kare ki lukworwa me loko gin mo marac i komwa. Pien jo mogo i kingi doŋ guŋak woko, gitye ka lubo Catan. Ka ce dako mo muye Rwot tye ki wadine ma gin mon to, myero en omi botgi kony, wek pe giket peko i kom lwak muye Yecu, ento lwak muye Yecu gubed ka konyo mon ma coggi oto ma lakonygi mo pe. Ludoŋo ma loyo loc maber myero giworgi twatwal, makato myero giwor jo ma tye ka yelle ka tito lok ki pwonyo dano. Pien lok ma yam gicoyo waco ni, “Pe itwe dog twon ka tye ka nyono bel,” dok bene ni, “Latic myero giculle mucarane.” Pe iye lok adot mo ma gikelo i kom ladit mo, gwok nyo ka tye lucaden aryo nyo adek macalo ginacoya owaco. Doŋ jo ma pud ocuŋ i kom balgi, myero ijukgi i nyim dano ducu, wek omi jo mukene gubed ki lworo. Aciki i nyim Lubaŋa ki Kricito Yecu ki lumalaika ma giyero, gwok cik magi ma pe i jeŋŋe i kom wat nyo larem. Dok bene pe irune me keto ciŋi i kom ŋat mo, nyo me ribbe ki jo mukene i balgi; ento gwokke ibed maleŋ. Cakke kombeddi, doŋ pe imat pii keken, mat bene koŋo vino manok pi konyo ii pi two ma maki kare ki kare. Bal pa jo mogo nen woko ka maleŋ ma cimo atir ni kop biloyogi, ento bal pa jo mukene nen lacen. Tic maber bene nen woko ka maleŋ; kadi pe kit meno, pe kanne matwal ma pe onen. Jo ducu ma gubedo opii, myero guti ki luditogi macalo jo ma romo awora i yo ducu, wek ŋat mo pe oyet nyiŋ Lubaŋa nyo pwonywa. Jo ma luditogi doŋ guye Rwot, myero pe gukwer worogi, ni pien gin doŋ gibedo omego, ento myero gumedde me tiyo tic maber makato botgi, pien jo ma gikonyo ki ticgi gubedo jo muye Rwot dok jo ma gin maro. Pwony lok magi dok icuk cwiny dano iye. Ka ŋat mo pwonyo mere lok mapat kun pe lubo lok ada pa Rwotwa Yecu Kricito pi pwony me diniwa, noŋo en okette malo kene ki wakke, ento pe ŋeyo gin mo kadi ki acel. Iye opoŋ ki par maraco me pyem ki daa i kom nyiŋ lok mogo; doŋ lok macalo meno a iye nyeko, pyem, yet ki par maraco ma miyo gen rwenyo woko i kin dano. Dok bene miyo jo ma ryekogi oballe, ma mako lok me ada oloyogi woko, gibedo ka wo awoya nono, kun gitamo ni dini aye yo me noŋo lonyo. Lonyo dit twatwal i dini ka ce iyeŋ ki gin mo keken ma itye kwede. Pien wan yam pe wakelo gin mo i lobo kany, dok bene pe wabitwero tero gin mo ka waa ki i lobo. Ento ka watye ki cam ki ginaruka, jami magi romowa gire. Ento jo ma mito bedo lulonyo miyo Catan bitogi ci gipoto i bal, ka doŋ gimoko i owic pa Catan pi mitgi mapol me miŋo ma tye ka unogi, miyo girwenyo dok gito woko matwal. Pien maro lim en aye acakki me gin maraco ducu; man en gin ma omiyo jo mogo gua woko ki i niye, ka doŋ gurwatte ki lwak can mapol ata mucorre i komgi. Ento in dano pa Lubaŋa, leŋ yo ki jami meno, ket cwinyi i kit ma atir, i lworo Lubaŋa, i niye, i mar, i diyo cwiny ki i mwolo. Lweny lweny maber me niye; mak kwo ma pe tum matek ma yam gilwoŋi iye i kare ma ituco niyeni i nyim lucaden mapol ata. Aciki i nyim Lubaŋa ma miyo kwo bot jo ducu, ki i nyim Yecu Kricito, ma otuco niyene maber i kare ma miyo lok me cadenne i nyim Pontio Pilato: Gwok cik ma gimiyi, bed laboŋo kit roc mo nyo lok mo ma gijuki iye, nio ka Rwotwa Yecu Kricito binen. Lubaŋa ma gipwoyo, en acel keken aye Won Twer, Kabaka pa luker ducu, Rwot pa rwodi, en binyuto man ka kare kikome doŋ oromo. En Lubaŋa acel keken ma pe to, ma bedo i Leŋo mo ma ŋat mo pe romo nyiko cok kwede, cakke con ŋat mo pud pe munene, dok bene dano mo pe twero nene. Woro ki twer ma pe gik obed bote. Amen Cik lulonyo me kare man ni guwek wakke, dok bene pe guket gengi i kom lonyo ma pe genne, ento guket gengi i kom Lubaŋa ma miyowa jami ducu mabup ma yomo cwinywa. Myero guti tic mabeco, gubed lulonyo i timo ber bot dano, i poko jami, ki i miyo mot ki yomcwiny. Ka gutimo meno, noŋo gukano mono maber pigi kengi pi kare me anyim, wek gumak kwo ma en aye kwo kikome. Ai Temceo, gwok gin ma yam doŋ gimiyo i ciŋi. Gwokke i boko lok mogo ma pe me woro Lubaŋa, ki i pyemmogo ma a ki gin ma gilwoŋo gobagoba ni, “Ŋec”, pien jo ma giwaco ni gitye ki kit ŋec meno gibayo piny nono i lok ma mako niye Kica pa Lubaŋa obed kwedi. Waraga man oa ki bot Paulo ma lakwena pa Kricito Yecu pi mit pa Lubaŋa, ma lubo cikkene me miyowa kwo ma tye i Kricito Yecu. Bot Temceo latinna ma amaro: Lubaŋa Won ki Kricito Yecu Rwotwa omini gum, kica ki kuc. Apwoyo Lubaŋa ma atiyo bote tic ki iya maleŋ, macalo kwarowa yam gutiyo bote, kun alwoŋo nyiŋi i legana me kare ducu. Ka apo pig waŋi, miyo i dyeceŋ ki dyewor aparo me neni, wek apoŋ ki yomcwiny. Apo i kom niyeni ma goba pe iye, ma yam koŋ okwoŋo bedo bot dani Loi, ki meni Yuneki, ma aŋeyo atir ma pe akalo akala ni tye boti bene. Man omiyo apoyo wii wek iti ki mot me kica ma yam Lubaŋa omii pi keto ciŋa i wii, ma doŋ odoko macalo mac ma doŋ okwe woko; buki wek olyel. Pien Lubaŋa yam pe omiyowa cwiny me lworo, ento omiyowa cwiny me teko ki me mar ki me gwokke kenwa. Pi meno lewic pe omaki me miyo caden i kom Rwotwa, lewic bene pe omaki i koma, an ma abedo lamabucceni, ento ribbe kwedwa i ciro can pi lok me kwena maber, i teko pa Lubaŋa. En olarowa dok olwoŋowa me bedo jo maleŋ, pe pi tic mogo ma wan watiyo, ento pi lubo gin ma en kikome oyubo, ki pi kicane ma yam en omiyo botwa i Kricito Yecu i acakki piny. Kombeddi doŋ ginyuto woko botwa i bino pa Lalarwa Kricito Yecu ma doŋ okwanyo to woko matwal, ci omiyo kwo ma bedo matwal onen woko ka maleŋ pi lok me kwena maber. Pi lok me kwena maber-ri, yam giketa abedo latit-lok, lakwena ki lapwony bene. Man en gin mumiyo aneno can kit macalo atye ka nenone wa i kare-ni. Ento lewic pe maka gira, pien aŋeyo ŋat ma aye, dok bene ageno atir ni, en twero gwoko gin ma omiyo i ciŋa nio i Nino maca. Lanenni me aluba myero obed lok me ada ma yam iwinyo ki bota, kun ilubo kwede niye ki mar ma tye i Kricito Yecu. Gwok gin maber ma gimiyo i ciŋi pi teko pa Cwiny Maleŋ ma bedo i iwa. In iŋeyo ni, jo ducu ma tye i Acia doŋ guloko ŋegi woko bota. Pugelo gin ki Kermogen gitye i kingi. Rwot myero otim kica i kom paco pa Oneciporo, pien yam obedo ka dwoko cwinya tyen mapol. Lewic pe omake pi twec ma gitweya kwede ki nyor, ento i kare ma en oo i Roma oyenya matek nio ka onoŋa. Rwot myero omi en onoŋ kica ma a bote i Nino maca. Dok in bene iŋeyo maber mada kit kony ma en obedo ka miyone i Epeco. Latinna, in doŋ itim tek i kica ma gimiyowa i Kricito. Gin ma doŋ ityeko winyo ki bota i nyim lucaden mapol, in bene myero itit bot jo ma genne ma giromo pwonyo ki jo mukene. Cir arem me gin marac ma gitimo i komi, kit macalo askari maber pa Yecu Kricito. Pe tye askari mo ma ka tye i dog tic dok rwakke i tiyo tic ma woko, pien tamme tye ni myero eyom cwiny ŋat ma ocoye i mony. Lapyem i tuko pe twero loyo tuko ka pe olubo cik me tuko meno kikome. Lapur ma en latic matek i potone en aye ma myero okwoŋ camo gin ma ocek iye. Tam gin ma aloko, pien Rwot bimiyo iniaŋ i jami ducu. Po i kom Yecu Kricito, ma ocer ki i kin jo muto, en lakwar Daudi, kit macalo an atito kwede lok me kwena maber. Lok meno me kwena maber en aye gin ma atye ka ciro can pire, kun gitweya woko ki nyor calo gitweyo labalo! Ento lok pa Lubaŋa gire pe gitweyo ki nyor. Meno en gin mumiyo atye ka ciro arem kare ducu, pi jo ma giyero, wek gin bene gunoŋ larre ma tye i Kricito Yecu, kacel ki deyo ma pe gik. Lok man lok ada, ni, “Ka wato kwede, wabikwo kwede bene, ka waciro can, wabibedo ka loc kacel kwede; ka wakwere, en bene bikwerowa; ka wan jo ma pe genne, en gire genne nakanaka, pien en pe twero kwerre kene.” Po wigi i kom lok man, dok icikgi i nyim Rwot ni gin guwek pyem i te lok mapatpat, pien meno pe konyo gin mo, ento dok medde me balo jo ma winyo abala. Ket tek kit macalo itwero pi mine keni bot lubaŋa macalo ŋat ma gipwoyo, latic ma pe ki gin mo ma lewic myero omake iye, ma tero lok me ada i yo atir. Kwer boko lok ma pe me woro Lubaŋa, pien lok ma kit meno medde ki rwenyo dano arwenya i woro Lubaŋa, dok bene lokgi bituco yone calo bur ma camo kom dano oyotoyot. Kumenayo gin ki Pileto gitye i kin jo meno. Doŋ guŋak woko ki i lok ada kun giwaco ni wan doŋ wacer con. Man gitye ka balo kwede niye pa jo mogo. Ento guti me ot ma Lubaŋa oketo doŋ tye ma ocuŋ woko matek likiŋ, ma bene tye ki coc man i kome ni, “Rwot ŋeyo jo ma gin jone kikome,” dok ni, “Dano acel acel ma lwoŋo nyiŋ Rwot myero opokke woko ki i bal.” I ot mo madit, pe bedo iye jami me jabu ki ryal keken, ento bedo iye bene jami mogo ma gitiyo ki bao ki ma gitiyo ki lobo; mogo gitiyo kwedgi i kare me deyo keken, ento mukene-gu gitiyo kwedgi i kare ducu. Ka ce ŋat mo olonnye kekene, kun oweko bedo ki kit marac woko, en bibedo atabo ma gitiyo kwede i kare me deyo, ma bedo maleŋ, ma konyo won ot, ma oyubbe pi tic ducu maber. Wek miti me awobi obedi, ento ket tammi i bedo ki kit ma atir, niye, mar ki kuc, kacel ki jo ducu ma kok bot Rwot kun igi leŋ. Kwer pyem me miŋomiŋo ma bino pi kwiya piny-gu woko; in iŋeyo kodi pyem macalo meno kelo daa. Latic pa Rwot myero obed ŋat ma pe da atata, myero obed ŋat ma lakica bot dano ducu, lapwony ma ladiro, ŋat ma diyo cwinye, ŋat ma tiro jo ma pyem kwede ki mwolo. Gwok nyo Lubaŋa bimiyogi cwiny me ŋut, ka wek doŋ guniaŋ maber i kom lok ada, miyo ryekogi dwogo, ci gibwot ki i owic pa Catan ma onoŋo yam omakogi, omiyo gutiyo gin ma en mito. Ento myero iniaŋ man ni, i kare me agikki, piny bibedo marac i kare mogo. Pien dano bibedo ka maro komgi kengi kun gibedo lumar lim, luwakke, lucac, lunywar jo mukene. Pe gibiwinyo lunyodogi, pe gibimiyo pwoc mo, gibibedo jo ma pe leŋ. Pe gibimaro dano wadgi, gibibedo jo ma pe timo kica bot dano, gibibedo lucok dog jo mukene, gibibedo jo ma mitgi pe jukke, jo ma ger ma gidag gin mo maber, luroro, jo ma tye atata ma pe giparo piny, jo ma gikette malo kengi ki wakke, jo ma maro yomcwiny ma ka maro Lubaŋa. Gibimako dini dok gibilubo i kitgi ma nen ki woko keken, kun gikwero tekone woko. Pokke woko ki i kom jo macalo meno Pien tye jo mogo i kingi ma giridde gidonyo i paco pa dano mukene, ci giloyo tam pa mon mogo ma gorogoro, ma peko me bal obwoyogi woko, ma mitgi tye patpat ci bedo ka ywayogi tuŋŋi ki tuŋŋi, kun gimito pwonnye i kare ducu, ento pe dok gitwero niaŋ i lok ada. Jo meno girom ki Yane ki Yambure ma yam gupyem ki Moses, pien gin bene gitye ka pyem ki lok ada i kit acel-lu; ryekogi doŋ oballe woko, niyegi pe tye kakare. Ento pe gibimedde kwede nakanaka, pien miŋoginu biŋene woko bot lwak, calo pa jo aryo ca. Ento in doŋ iŋiyo kweda woko kun ineno pwonnya, kita ki tam ma aketo i nyima. Ineno niyena, diyo cwinya, mar ma atye kwede, kit ma ayelle kwede kun aciro can. Ineno bene kit ma giuna kwede, ki can ma aneno; dok iŋeyo gin ma otimme i koma i Antiokia, i Ikonio, ki Licitra, kit ayelayela ma yam aciro; ento Rwot olara ki i gin ducu. Ada, jo ma mito lubo kit pa jo ma lworo Lubaŋa, kun gibedo i Kricito Yecu, gibiunogi, kun jo maraco ki jo ma lugoba gibimedde ki bedo marac makato kare, kun gibwolo dano, gin bene gibibwologi. Ento in myero imedde i gin ma ipwonyo, ki ma doŋ iye adada, kun iŋeyo jo ma yam gupwonyi iye. Iŋeyo bene ni, cakke i tinoni iŋeyo coc maleŋ ma yam gicoyo ma twero pwonyi i yo me larre pi ye Kricito Yecu. Ginacoya ducu ma yam gicoyo, gicoyo pi teko pa Cwiny pa Lubaŋa. Konyo me pwony, me juko dano, me tiro kit pa dano, me nyebo dano wek gulub kit ma atir, wek dano pa Lubaŋa obed muteggi, ma bene oyubbe i yo ducu, ma romo tiyo kit tic mo maber ducu. Aciki i nyim Lubaŋa ki i nyim Kricito Yecu ma biŋolo kop pa jo makwo ki jo muto, dok pi dwogone ki pi locce, ni meno, tit lok pa Lubaŋa, cuŋ iye matek i kare maber ki i kare marac, mi dano guniaŋ maber, jukgi kun idiyo cwinyi i pwony kare ducu. Pien kare tye ka bino ma dano doŋ pe biciro pwony me ada, ento itgi bibedo ka yilo ayila, kun gicoko lupwony ma twero pwonyogi ki gin ma gimito winyone. Gibiloko ŋegi wek pe giwiny lok ada, kun giŋak woko giwirre i lok ma tere pe. Ento in myero ibed ma igwokke i kare ducu; cir can ka opoto i komi, ti tic me tito lok me kwena maber, dok icob ticci ducu kakare. An doŋ dano cok neka woko calo gitum me atyera i wi keno tyer; karena doŋ oo me weko lobo man. Doŋ atyeko lwenyo lweny maber, atyeko cobo ŋwecca, dok agwoko bene niye. Kombeddi doŋ gikano pira mot me kit atir, ma Rwot ma ŋolo kop atir bimiya i Nino maca; pe bota keken, ento bot jo ducu ma doŋ cwinygi tye ka paro pi dwogone bene. Tem ki tweroni ducu me bino bota oyotoyot. Pien Dema doŋ oweka woko pi maro jami me lobo-ni, ocito gire woko i Tecalonika; Krecen ocito mere i Galatia, ki Tito ocito i Dalmatia. Luka kene aye odoŋ tye kweda kany. Wubin wun ki Marako, pien en ber twatwal dok konya. Tukiko aoro ocito i Epeco. Ka ibino, kella ki boŋo ma yam aweko i Teroa tuŋ pa Karpo. Kwokka bene bukka, makatone maca me del ca. Alegijanda latet mola otima marac twatwal; Rwot bicule pi timme-nu. In bene myero item gwokke i kom nyer-ru, pien en yam opyem ki lokwa matek mada. I pidona mukwoŋo, dano mucuŋ pira obedo pe. Jo ducu guriŋo gutenya woko liyak. Lubaŋa myero pe okwan lok man i wigi. Ento Rwot ocuŋo ka ŋeta, ka doŋ omiya teko me tuco lok kakare, wek Lurok ducu guwiny; olara kit meno ki i dog labwor. Rwot bikonya miyo aa woko ki i gin maraco ducu, kun lara wek ao i kerre me polo. Deyo obed bote nakanaka. Amen. Mot Pricika gin ki Akwila, ki jo me ot pa Oneciporo. Eracto mere yam odoŋ i Korint; Tropimo aweko two i Mileto. Ket tek io ma kare me koyo peya ocakke. Yubulo omoti, kadi ki Puden ki Lino, ki Kalaudia, kacel ki utmegiwa ducu. Rwot obed kwedi. Kicane obed kwedwu. Waraga man oa ki bot Paulo, latic pa Lubaŋa dok bene lakwena pa Yecu Kricito. Yam oora me nyayo niye pa jo ma Lubaŋa oyero, ki me niaŋogi i lok me ada ma rwatte ki kwo me woro Lubaŋa, wek gubed ki gen me noŋo kwo ma pe tum. Lubaŋa ma pe loko lok goba yam ociko pire i acakki piny, ka doŋ karene oromo ci onyuto woko ka maleŋ, i lokke ma gimiyo bota me atita pi cik pa Lubaŋa Lalarwa. Bot Tito, latinna me ada ma wanywako niye acel: Lubaŋa Wonwa ki Lalarwa Kricito Yecu omii kica ki kuc. Man gin mumiya aweki i Kurete, ni wek iyub gin ma yam odoŋ ma pe tye kakare, dok iket ludoŋo i gaŋi madoŋo ducu, kit ma nene aciki kwede ca. Jo meno myero gubed jo ma lok mo marac pe i komgi, ma ŋat acel acel bedo ki dako acel keken. Litinogi bene myero gubed jo muye Rwot, ma lok me caro caro mo pe owinnye i komgi, nyo kadi ki lok mo me pyem. Pien latel, macalo en lagwok jami pa Lubaŋa, myero obed dano ma lok marac mo pe i kome. Myero pe obed ŋat ma nyatte, nyo ma kiniga mako oyotoyot, nyo lamero, nyo lakolo, kadi laworo me noŋo lim. Myero obed dano ma gwoko welo, ma maro gin maber, dano ma lone kene, ma cwinye atir, dano maleŋ, dok ŋat ma gwokke kene. Dok bene myero en omak matek lok pa Lubaŋa me ada ma yam gipwonye kwede, ma miyo en twero cuko cwiny dano ki pwony me ada, dok twero loyo tam pa jo ma pyem kwede. Pien jo ma gin lupyem tye pol, jo ma loko lok ma tere pe, ki jo ma bwolo dano, makatone dul pa jo ma mito ni, jo muye Kricito myero koŋ gulirre. Kodi jo-nu myero gimi guliŋ woko, pien gitye ka balo dano mapol ki jo ma i odigi ducu, pi pwonyogi ki gin ma pe oporre ma pe myero gupwony ki dano, pi woro me noŋo lim. Ŋat mo acel i kin jo Kurete, ma en lanebigi kikome, yam owaco ni, “Jo Kurete kare ducu gin lugoba, lee maraco, luworo ma luwackom.” Caden meno tye ada; pi meno myero ijukgi ki tek, wek gucak bedo ki niye me ada, wek doŋ pe gubed ka keto cwinygi me winyo lok pa Lujudaya me ododo mogo ma tere pe, ki cik pa jo ma gidag lok ada. Bot jo maleŋ, jami ducu bene leŋ, ento bot jo ma doŋ guballe woko, ki jo ma pe tye ki niye, pe tye gin mo maleŋ ki botgi. Ryekogi kikome ki tam ma i igi ma nyuto botgi balgi doŋ otyeko balle woko. Gituco ki doggi ni giŋeyo Lubaŋa, ento dok gikwere woko ki gin ma gitimo; gudoko doŋ macalo gin ma i dano okwero, jo ma pe ki winy, ma pe doŋ giromo tiyo tic mo maber. Ento in, pwony gin ma rwatte ki lok ada. Lok bot jo madoŋo ni gubed jo ma gwokke kengi, jo ma romo awora, jo ma loyo tamgi kengi, jo ma niyegi ki margi tye kakare kun gicuŋ iye matek. Kit meno bene wac ki mon madito ni gin myero gubed ki woro i kit bedogi ducu, pe gucok dog jo mukene, pe gubed jo ma doŋ gudoko opii pa koŋo. Myero gubed jo ma pwonyo gin maber, ka doŋ gucak pwonyo mon matino me maro coggi ki litinogi, dok gubed mon ma loyo tamgi kengi, mon maleŋ ma pe gitye ki tam mo me caro caro, ma gigwoko pacogi, mon ma lukica kun giworo coggi bene, wek pe omi jo mukene guyet lok pa Lubaŋa. Kit meno bene, cuk cwiny awobe ni myero gugwokke kengi. In kikomi nyutte macalo lanen me tic maber i yo ducu. Mi pwonnyi obed mapek laboŋo gin mo marac iye, kun iloko lok ada ma pe gitwero noŋo roc mo iye, wek omi lewic omak ŋat mo ma mito pyem kwedwa, pien pe neno gin mo marac ma myero ewac i komwa. Wac ki opii ni guwor luditogi, guyom cwinygi i yo ducu. Pe gubed lupyem, kadi kwanyo gin mogo, ento myero gunyut ni gin jo ma genne maber twatwal, wek i gin ducu gumi pwony pa Lubaŋa Lalarwa onen ma mwonya. Pien kica pa Lubaŋa doŋ onen pi laro dano ducu. Kica meno pwonyowa me kwero lubo kit pa jo ma pe lworo Lubaŋa, kacel ki miti ducu me lobo man, dok pwonyowa me gwokke kenwa wek wabed ma cwinywa atir, kun walworo Lubaŋa, kun wakuro gum ma genwa ocuŋ iye, en aye me neno Yecu Kricito, Lubaŋawa madit ki Lalarwa, ka odwogo ki deyo. En yam omine kene piwa me kokowa woko ki i bal ducu, ki me lonyowa wabed jone kikome, ma watye ki miti madwoŋ me tiyo tic mabeco. Tit botgi lok magi; cuk cwinygi dok ijukgi ki twer ducu ma itye kwede. Pe imi ŋat mo ocayi. Po wigi ducu me mine kengi i te loc pa luloc, ki wegi twer, me bedo ki winy, ki me yubbe pi tiyo tic mo maber ducu. Guwek loko lok marac i kom ŋat mo, guwek da, gubed jo ma lukica, lunyut woro bot dano ducu i kare ducu. Pien wan kikomwa yam koŋ wabedo lumiŋ, jo ma pe luwiny; yam warwenyo woko ata, wabedo opii pa mitiwa ki jami mapatpat ma yomo cwinywa. Wabalo karewa i raccwiny ki mone, dano gukwerowa, ki wan onoŋo wadagge kekenwa. Ento i kare ma ber ki mar me kica pa Lubaŋa Lalarwa onen, en olarowa woko cut, pe pi tic mo ma wan watiyo i kit ma atir, ento pi kicane gire. Olarowa ki pii ma olwokowa me nywalle tyen me aryo ki me doko jo manyen pi Cwiny Maleŋ, ma yam en oonyo i komwa madwoŋ i Lalarwa Yecu Kricito, wek doŋ gikwanwa ni kitwa atir pi kicane, wek omi wanoŋ kwo ma pe tum ma genwa tye iye. Lok man lok ada. Amito wucuŋ matek i kom lok magi, wek jo ma doŋ guye Lubaŋa gubed ki tam me mine me tiyo tic mogo mabeco; meno aye ber, dok bedo me kony bot jo ducu. Kwer pyem mogo me miŋimiŋo, lok i kom nyiŋ kwaro, daa ki laro lok i kom cik; magi ducu pe konyo, dok tyen lokke pe. Dano ma kelo apokapoka ka doŋ iciko kicel nyo kiryo kwe, weke woko matwal, pe dok iribbe kwede, kun iŋeyo ni, kodi dano-nu doŋ oŋak woko, dok obalo, ki doŋ oŋolo kop woko i kome kene. Ka abioro Artema nyo Tukiko boti, ket tek ibin bota i Nikopoli, pien doŋ atyeko moko tamma me bedo kunnu i kare me koyo. Ket tek me konyo Jena ma en dano ma ŋeyo cik, gin ki Apolo, i wotgi, nen ni gin mo pe orem botgi. Danowa bene myero gummine kengi i tic mabeco wek gubed ki yo me konyo luwotgi ma can mo odiyo; pe gubed macalo yat ma pe nyak. Jo ducu ma gitye kacel kweda kany gumoti. Mot jo ma marowa i niye. Kica pa Lubaŋa obed kwedwu ducu. Waraga man oa ki bot Paulo ma lamabuc pi Kricito Yecu, ki bot ominwa Temceo. Bot Pilemon latic wadiwa ma wamaro gin ki laminwa Apia, ki Arkipo askari wadiwa, ki jo muye Kricito ma gicokke i odi: Lubaŋa Wonwa ki Rwotwa Yecu Kricito omiwu kica ki kuc. Apwoyo Lubaŋa kare ducu ka alwoŋo nyiŋi i legana, pien abedo ka winyo pi marri ki pi niyeni ma itye kwede i kom Rwotwa Yecu ki bot jo pa Lubaŋa ducu. Man omiyo alego ni, kit ribbe ma waribbe wan kwedi i kom niye odok matek ma romo niaŋowa matut i kom gin maber ducu ma watye kwede i Kricito. Pien marri okella yomcwiny, dok ojiŋo cwinya, omera, pien ikweyo cwiny jo pa Lubaŋa. Pi meno, kadi bed atye ki tekcwiny i Kricito ma miyo aciki acika me tiyo gin mo ma mitte, ento pi marri-ni aneno ni ber alegi alega, an Paulo ma acuŋ ma ka Kricito Yecu, ma kombeddi bene doŋ adoko lamabuc pire. Alegi pi latinna Onesimo, ma doŋ adoko wonne ki i buc kany. I kare mukato onoŋo konnye koŋ obedo pe boti, ento kombeddi doŋ konnye dit boti ki bota bene. Doŋ acwalo en me dwogo boti enno, en doŋ odoko macalo dul koma kikome. Onoŋo amito ni koŋ agwok en bota kany, wek omiya kony ma kakari ma kun pud atye i buc pi tito lok me kwena maber; ento pe amito ni atim gin mo ma kun noŋo in pe iye, wek berri pe obed macalo gin ma gidiyi iye adiya, ento obed pi yeyoni in kikomi. Gwok nyo man en gin mumiyo en yam opokke woko kwedi pi kare manok, ni wek doŋ igame matwal, pe dok macalo opii, ento makato opii woko, macalo ominwa ma wamaro. Makatone adada en pire tekka, ento ki tuŋ boti pire doŋ tek twatwal, macalo lakonnyi dok omeru bene i Rwotwa. Kit meno, ka iŋeyo ni an abedo lawoti, myero igame i kit ma kono igama kwede. Ka ce yam otimo gin mo marac i komi, nyo tye ki banyani mo, kwan magi ducu i wiya. An paulo kikoma aye acoyo lok man ki ciŋa, abiculi. Pe awaco ni in bene itye ki banyana, en kwoni kikome. Iyo, omera, amito kony mo ki boti i Rwotwa. Kwe cwinya i Kricito. Atye ki gen matek i komi ni ibiworo doga, oweko atye ka coyo boti lok man kun aŋeyo ni ibitimo makato ma awacci-ni. Medo ki meno, yubba kicika me buto pa welo, pien atye ki gen ni legawu biweko gimiya botwu. Epapira mabuc wadiwa i Kricito Yecu omoti, kadi Marako, Aristako, Dema ki Luka lutic wadiwa bene gumoti. Kica pa Rwotwa Yecu Kricito obed kwedwu. Yam con Lubaŋa oloko ki kwarowa i dul lok mapol dok i yo mapatpat, kun loko ki i dog lunebi; ento i kare man ma lacen-ni en doŋ oloko kwedwa i Wode. Jami ducu ma tye, Lubaŋa ceŋ otiyogi pi twer pa Wode, ma en oyubo ni myero obed won jami ducu. En dero me deyo pa Lubaŋa, cal pa Lubaŋa kikome tye i kome, dok en bene ma tiŋo jami ducu ma tye, ki teko me lokke. Ma doŋ en otyeko tic me lwoko bal, en obedo piny i kabedo me deyo tuŋ acuc i ŋet Won Deyo Madwoŋ ma tye malo i polo, kun doŋ en odoko ladit mada makato lumalaika ducu, ma rom aroma ki kit ma nyiŋ ma gimiye ber matek makato megi woko. Lubaŋa yam koŋ owaco ki lamalaika mo ni, “In i Woda, tin doŋ anywali”? Nyo dok ni, “An abibedo Wonne, en bibedo Woda”? Dok bene i kare ma okelo latin kayo i lobo en owaco ni, “Lumalaika pa Lubaŋa ducu myero guwore.” I kom lumalaika, Lubaŋa oloko ni, “En loko lumalaikane doko yamo, luticce en loko doko leb mac.” Ento i kom Wode en oloko ni, “Komkerri, in Lubaŋa, biri nakanaka, odoo kerri en odoo me ŋolo kop atir. In imaro kit ma atir, cwinyi dag tim marac; pi meno Lubaŋa, ma en Lubaŋani, owiri ki moo, moo me yomcwiny madwoŋ, makato luwoti ducu.” En dok oloko ni, “In Rwot wiati iketo guti me lobo, polo bene en tic me ciŋi. Gin birwenyo woko oyot, ento in iri nakanaka; gin ducu gibiti macalo boŋo, ibidologi woko macalo ibano koti, gibilokogi macalo ginaruka. Ento in ibedo ma kiti tye acel, mwakani pe bigik.” Lubaŋa yam owaco ki lamalaika mo ni, “Bed i ŋeta tuŋ acuc i kabedo me deyo, nio ka abimiyo lukworri gidoko kom laten tyeni?” Lumalaika kono dok gubedo aŋagi? Gin ducu gubedo cwiny mogo ma tiyo tic pa Lubaŋa; en orogi ka konyo jo ma binoŋo larre. Pi meno wan myero waketu cwinywa twatwal i gin ma yam wawinyo, wek pe waŋak woko ki iye. Lok me kwena ma yam lumalaika gukelo onoŋo omoko matek. Ka ŋat mo okalo wi cik mo, nyo okwero winyo, gimiye can iye ma oporo bal ma en obalo. Wan kono dok wabibwot niŋniŋ ka pe waketo cwinywa i larre man ma pire dit twatwal-li? Larre man Rwot aye mukwoŋo tuco pire, ka doŋ jo ma yam guwinyo ki bote, gumoko botwa lokke. Lubaŋa bene omedo cadenne kun tiyo lanyut mogo ki taŋo ki tic madito mapatpat, dok kun poko mot mogo me Cwiny Maleŋ pi mitte kene. Pien Lubaŋa pe oketo lobo ma mito bino ma wan waloko pire-ni i te loc pa lumalaika. Tye ka mo ma gituco ka maleŋ ni, “Dano gin aŋo, mumiyo ipo pire? Nyo latin pa dano, mumiyo iparo pire? Ikete ki piny i te lumalaika pi kare manoknok, iketo en obedo laloc ma loyo gin ducu ma iketogi; iketo en obedo lalo jami ducu.” Doŋ ka oketo jami ducu i te loc pa dano, pe oweko gin mo ma en pe loyo. Kit macalo tye-ni pud pe waneno ka giketo jami ducu i te twerone. Ento wan waneno Yecu ma yam gikete ki piny i te lumalaika pi kare manoknok, ento kombeddi doŋ gimiye deyo ki woro macalo kabaka pi arem me to ma en ociro, wek pi kica pa Lubaŋa ebil to pi jo ducu. Jami ducu tye pi Lubaŋa, dok en aye muketogi. doŋ ka yam en omito kelo litino mapol i deyone, gin ma en otimo obedo ma myero twatwal, en mumiyo latel wigi i larre doko dano muteggi pi ciro can. Ŋat ma olonyogi bedo maleŋ, ki jo ma gilonyogi-ni, gin ducu gua i kom ŋat acel; man en aye gin mumiyo lewic pe mako Yecu me lwoŋogi ni omegine, kun owaco ni, “Abitito nyiŋi bot utmegina, abipaki ki wer i dye lwak mucokke.” Dok ni, “Abiketo genna i kome,” ki dok ni, “An a ene, ki litino ma Lubaŋa doŋ omiya.” Kit macalo litino i kare ducu giribbe i kom ki remo, en bene kit meno onywako kwedgi komgi ki remogi, wek pi tone eŋiny ŋat ma tye ki twer i kom to woko, meno en aye Catan, ka doŋ egony jo ma yam gubedo i twec me opii pi kare me kwogi ducu pi lworo to. Doŋ onen maber ni, gin ma en otimo pe okemo lumalaika, ento okemo likwayo pa Abraim. Meno gin mumiyo en myero odok ma rom aroma ki utmegine i yo ducu, wek omi ebed ajwaka madit ma lakica dok lagen i tic pa Lubaŋa, wek omi ekwany bal pa jone woko. Pien en kikome yam oneno can dok Catan obite, en mumiyo en twero konyo jo ma gibitogi. Pi meno, wun utmegina maleŋ ma Lubaŋa olwoŋowu kacel kweda, koŋ wutam lok i kom Yecu ma en lakwana dok ajwaka madit me niye ma wan watuco. En obedo lagen bot Lubaŋa muyero okete i tic, ma rom aroma ki Moses ma yam obedo lagen i ot pa Lubaŋa. Lager ot gimiye deyo madit makato ot; kit meno Yecu bene nene gikwano ni deyone dit kato pa Moses woko. Pien ot mo keken dano aye ma gero, ento ŋat ma gero jami ducu en aye Lubaŋa. Moses yam obedo lagen i ot pa Lubaŋa ducu macalo latic, pi miyo caden i lok ma gibiloko i kare ma lacen. Ento Kricito obedo lagen i kom ot pa Lubaŋa macalo Wode. Wan aye wa ode ka ce wamoko matek i tekcwinywa, ki i wakkewa pi gen ma watye kwede. Doŋ macalo Cwiny Maleŋ oloko ni, “Ka wuwinyo dwan Lubaŋa tin, pe wumi cwinywu obed nwaŋ calo jo ma yam gujemo, i kare ma guomo kwede cwinya i tim, ka ma kwarowu guomo iye cwinya, gutema bene iye, kun gibedo ka neno ticca pi mwaka pyeraŋwen kulu. Pi meno cwinya owaŋ i kom jo me kare meno, omiyo awaco ni, ‘Gin kare ducu giŋak woko i tamgi; gin pe giŋeyo yona wacel.’ macalo yam akwoŋo ki kiniga, ‘Gin pe bidonyo i yweyo bota.’ ” Wugwokke, utmegina, wek ŋat mo i kinwu pe obed ki cwiny marac, cwiny ma pe ye Lubaŋa, ma twero miyo en a woko ki bot Lubaŋa makwo. Ento myero wujiŋ cwinywu kekenwu kare ducu ka pud wutwero lwoŋo ni, “Tin”, wek ŋat mo i kinwu pe cwinye odok nwaŋ pi bwola me bal. Pien wan wabedo jo ma ribbe ki Kricito, ka ce wamoko matek i genwa mukwoŋo nio wa i agikki, macalo yam giwaco ni, “Ka wuwinyo dwane tin, pe wumi cwinywu obed nwaŋ calo jo ma yam gujemo.” Aŋagi ma yam guwinyo dwan Lubaŋa ci gujemo woko-ni? Pe gin lwak dano ducu ma yam gua ki i lobo Ejipt ma kun Moses aye obedo ka telogi? Dok aŋagi ce ma yam cwinye owaŋ i komgi pi mwaka pyeraŋwen kulu-ni? Pe gin aye jo ma yam gutimo bal, ma komgi odoŋ i tim kunnu? Dok en yam okwoŋo kwoŋ bot jo mene ce ni, gin pe gibidonyo i yweyo bote? Pe okwoŋo kwoŋ meno bot jo ma yam pe gubedo luwiny? Pi meno wan waneno ni, jo meno yam pe gutwero donyo pien onoŋo gukwero ye Lubaŋa. Pi meno cikke me donyo i yweyo pa Lubaŋa pud tye, ento myero wabedu ma lwor, wek ŋat mo i kinwu pe ginoŋ ni opoto woko me o iye. Wan doŋ wawinyo lok me kwena maber bene calo gin, ento lok me kwena ma gin guwinyo pe okonyogi, pien pe orwatte ki niyegi. Wan jo ma waye aye wabidonyo i yweyo meno ma yam en oloko pire ni, “Macalo yam akwoŋo ki kiniga, ‘Gin pe bidonyo i yweyo bota,’” kadi bed ticce onoŋo yam otum woko cakke i acakki piny. Pien tye ka mo ka ma yam en oloko i kom nino me abiro ni meno, “Lubaŋa oywe i nino me abiro ki i kom ticce ducu.” Ka dok kany en bene oloko ni, “Gin pe bidonyo i yweyo bota.” Kit meno yo pud tye twolo wek jo mogo gudony iye. Jo ma yam gikwoŋo tito botgi lok me kwena maber pe gudonyo, pien gin gukwero bedo ki winy. En dok oketo nino mukene ma gilwoŋo ni, “Tin,” kun olok lacen ki i dog Daudi ma doŋ onoŋo okato kare malac ata, i lok ma nene waloko pire, ni, “Ka wuwinyo dwane tin, pe wumi cwinywu obed nwaŋ.” Pien ka kono yam Yocwa omiyogi yweyo, kono Lubaŋa pe oloko lacen pi nino mukene. Pi meno, yweyo me cabit pud tye pi jo pa Lubaŋa; pien ŋat ma doŋ odonyo i yweyo bot Lubaŋa noŋo doŋ oywe woko ki i ticce, calo Lubaŋa ma yam oywe woko ki i ticce-ni. Doŋ pi man, myero wayelle me donyo i yweyo meno, wek omi ŋat mo pe dok opot woko pi kwero bedo ki winy calo gin. Pien lok pa Lubaŋa obedo gin makwo, dok tiyo matek, bit bene kato pala lucwan ma lebe bit ryoryo woko. Lok meno tuco iwa pil, tuc tuŋcel ka ma tipo ki cwiny gurwatte iye, nyo ka ma waŋ mwot orwatte iye ki moo ma i i cogo, kun poko par ki tam mabecone ki maracone ma tye i i dano. Pe tye gin mo mukanne ki bot Lubaŋa ma en pe neno, jami ducu ma en oketo odurre woko ka maleŋ i waŋe, en aye ŋat ma biŋiyo kwowa. Kit macalo doŋ watye ki ajwaka madit twatwal ma doŋ otyeko donyo i polo, en Yecu, Wod pa Lubaŋa, pi meno myero wamok matek i niye ma watuco. Pien ajwaka madit ma watye kwede pe obedo ŋat ma pe winyo arem kacel kwedwa pi gorowa, pien en bene Catan yam obite i yo ducu calo wan, ento en pe omedo ki timo bal mo. Iyo, wan myero doŋ wanyiku cok i nyim komker pa Lubaŋa ki tekcwiny, ka ma kica tye iye, wek otimwa kica, wanoŋ bene kica ma konyowa i kare ma mitte. Pien ajwaka madit acel acel giyero ki i kin lwak, ka gikete me tiyo tic i nyim Lubaŋa ma kakagi, kun tyero mot ki gitum pi bal. En twero tic ki dano ki mwolo, jo ma kwiya piny ki jo muŋak, pien en kikome bene noŋo goro oketo kome woko. Pi man, en myero otyer gitum pi balle en kikome, kacel ki pi bal pa lwak. Dok bene pe tye ŋat mo ma yerre kene pi dit man, Lubaŋa aye ma lwoŋe iye, macalo olwoŋo Aron. Kit meno bene, Kricito yam pe oketo deyo i kome kekene me bedo ajwaka madit, ento Lubaŋa aye muyere, kun wacce ni, “In i Woda, tin doŋ anywali”; macalo owaco bene ka mukene ni, “In ibedo ajwaka nakanaka, i kit pa Melkijedek.” Yecu yam ocwalo legane bot Lubaŋa, i kare me kwone i lobo man, en aye bot ŋat ma yam twero lare ki i to, kun bako doge ma pe twerre ki koko ki pig waŋe, ci Lubaŋa bene owinye pi mwolone bote. Kadi en obedo Wod pa Lubaŋa, yam en opwonnye me bedo ki winy pi can ma en doŋ oneno. Ka doŋ oteggi, ci odoko ŋat ma kelo larre ma pe tum bot dano ducu ma winyo en, Lubaŋa cut oyere me bedo ajwaka madit i kit pa Melkijedek. Watye ki lok mapol ma myero walok i lok man, ento tek twatwal me niaŋowu, kit macalo wun doŋ wudoko nyap ka winyo lokwa-ni. Kombeddi onoŋo doŋ wuromo bedo lupwony, ento myero ŋat mo koŋ dok opwonywu odoco i lok mukwoŋo ma dok i kom lok pa Lubaŋa. Mito gipitwu koŋ ki cak, ento pe cam matek. Pien ŋat ma doto cak pe tye ki ŋec mo ma dok i kom bedo ki kit ma atir, pien noŋo pud en latin. Doŋ cam matek tye pi jo muteggi, ma ryekogi ma gupwonnye kwede me poko gin maber ki gin marac doŋ ojiŋ pi ketone i tic. Pi meno, koŋ waweku lok mukwoŋo i kom Kricito, ento wamedde anyim ki pwony pa jo muteggi, kun pe dok wanwoyo keto te gutine, ma en aye ŋut i kom tic ducu ma yam kwo pe iye, ki moko niyewa i kom Lubaŋa, ki dok me pwonnye i kom lok magi: kit batija mapatpat, keto ciŋ i wi dano, cer pa jo muto, ki kop ma giŋolo matwal. Wabitiyo man giwa ka Lubaŋa oye. Jo ma doŋ koŋ ceŋ omenyogi kicel, ma gubilo mot ma oa ki i polo, kun gibedo i kin jo mulimo Cwiny Maleŋ, ma bene doŋ gutyeko bilo lok pa Lubaŋa kit ma mit kwede dok gubilo gin ma bitimme i kare ma bibino i anyim, kit jo meno ka guŋak woko, pe dok gitwero rocogi wek gudok manyen ka doŋ guŋuti. Ka doŋ guŋak woko, meno gitye ka guro Wod pa Lubaŋa i kom yatariya pigi kengi, kun giketo lewic i kome i nyim lwak. Pien Lubaŋa miyo gum i kom lobo ma mato kot ma cwer i kome kare ki kare, ka dok ceko ginapita ma konyo jo ma gipuro pigi. Ento ka ce onyayo okuto ki ocok, konnye noŋo doŋ pe, kuro mere ka cen pa Lubaŋa keken, agikkine en aye mac ma gibiwaŋo kwede woko. Ento wun, luwota, kadi bed waloko kit man, wageno ni wutye maber ma wukato jo meno i lok ma dok i larre. Pien Lubaŋa gire pe ye gin ma pe tye kakare, wiye pe biwil i kom tic ma yam wutiyo, kadi ki mar ma wunyuto pire ki konyo jo pa Lubaŋa, ma pud wutye ka konyogi bene wa i kare-ni. Doŋ wamito ŋat acel acel i kinwu oket cwinye nio wa agikki, wek omi gin ma wuketo iye genwu-ni ocobbe kakare. Pe wudok luwackom, ento wulub kit pa jo ma pi niyegi, ki pi diyo cwinygi, gitye ka noŋo gin ma yam Lubaŋa ociko pire. I kare ma Lubaŋa cikke bot Abraim, kit macalo pe tye ŋat mo ma kate-ni ki dit ma myero en okwoŋ ki nyiŋe, en okwoŋo ki nyiŋe kekene, kun waco ni, “Adada abimii gum, dok abimiyo likwayu ginya gidoko mapol.” Doŋ Abraim pi diyo cwinye omiyo en onoŋo gin ma yam Lubaŋa ociko pire. Ka dano mo kwoŋo kwoŋ ci kwoŋo ki nyiŋ ŋat madit loye, dok ka pyem mo tye i kin dano, lok ma gimoko ki kwoŋ aye ma tyeko pyem meno. En gin mumiyo Lubaŋa omoko cikkene ki kwoŋ, pien onoŋo mito nyuto maber twatwal bot jo ma myero gunoŋ gin ma giciko pire ni, gin ma en doŋ etyeko yubo, pe dok ebiloko woko. Tye doŋ jami aryo ma pe dok lokke, ma Lubaŋa pe twero bwolo iye dano. Pi man, wan jo ma wariŋo walaro bote watye ki gin ma cuko cwinywa matek wek wamak gen ma giketo i nyimwa. Watye ki gen man macalo lajuk me mel, ma cwinywa cuŋ iye matek, ma pe wawirre atata. Gen meno donyo wa i kabedo maleŋ i ot pa Lubaŋa, i ŋe boŋo kicika, ka ma Yecu otelo yo odonyo iye piwa, kun doŋ odoko ajwaka madit ma bedo nakanaka i kit pa Melkijedek. Melkijedek man yam obedo kabaka me Calem, dok bene ajwaka pa Lubaŋa Mamalo Twal. En orwatte ki Abraim i kare ma Abraim onoŋo doŋ dwogo ki ka neko luker ca, ci cut olamo gum i kom Abraim; ka doŋ Abraim opokke dul acel me apar me jami ducu ma en onoŋo. Mukwoŋo en kabaka me kit ma atir, man aye te lok me nyiŋe, dok bene en kabaka me Calem, ma te lokke ni, ‘Kabaka me kuc.’ Wonne mo pe, minne-gu pe, kwarine bene pe, acakki me karene, kadi wa agikki me kwone bene pe. En obedo cal ki Wod pa Lubaŋa, obedo ajwaka nakanaka. Koŋ wunen kit ma en dit kwede! Abraim, ma en aye kwarowa, yam omiyo bote dul acel me apar me jami ma en oyako. Doŋ jo ma i kin likwayo pa Levi ma gubedo ajwagi, cik pa Moses yam ocikogi me jogo dul acel me apar ki bot jo Icrael. Meno onoŋo gijogo ki bot utmegigi, kadi bed gin bene gubedo likwayo pa Abraim. Ento danu-nu ma kwarone pat ki megi-ni ogamo dul acel me apar ki bot Abraim, ka dok olamo gum i kom ŋat ma Lubaŋa ocikke bote. Pe dok tye kalo akala mo me waco ni, lalam gum dit kato ŋat ma en olamo gum i kome. Dok ki tuŋcel waneno ni, jo ma jogo dul acel me apar gin jo ma to woko, ento ki tuŋcel ŋat ma jogo en ŋat ma yam gicoyo lok i kome ni pud kwo. Ŋat mo twero waco ni, ka Abraim, omiyo dul acel me apar, Levi bene kikome, ma jogo dul acel me apar, yam omiyo mere kun wok ki bot Abraim, pien i kare ca onoŋo en pud tye i kom Abraim ma kwarone i kare ma Melkijedek rwatte kwede ca. Doŋ ka kono yam gin ducu twero cobbe kakare pi ajwagi ma gin Lulevi, ma jo Icrael yam gunoŋo cik pa Lubaŋa kacel kwedgi-ni, piŋo gimito ni ajwaka mukene dok obin i kit pa Melkijedek, kun pe giwaco ni, i kit pa Aron? Pi meno ka giloko ajwaka, ci cik bene myero gilok woko. Pien Rwotwa ma giloko lok magi i kome-ni obedo dano me kaka mukene, ma ŋat mo i kingi peya otiyo tic mo i kom keno tyer. Ŋene gire maber ni, Rwotwa yam oa ki i kin likwayo pa Juda, dok Moses yam pe oloko lok mo i kom kaka meno ma mako ajwagi. Lok man doŋ otyeko nen woko ka maleŋ makato ka ajwaka mukene otuc macalo Melkijedek, ma odoko ajwaka, pe pi cik mo ma lubo kaka, ento pi tek me kwone ma gin mo pe romo tyeko. Pien coc ma yam gicoyo oloko ni, “En bibedo ajwaka nakanaka, i kit pa Melkijedek.” Cik macon doŋ gibolo woko, pien onoŋo goro, dok konnye pe, pien cik pa Moses yam pe ocobo gin mo kakare, ento kombeddi doŋ gikelo gen mo maber makato, ma twero miyo wanyiko cok bot Lubaŋa. Medo i kom meno bene, Lubaŋa yam okwoŋo kwoŋ i kome. Jo mukene ca gudoko ajwagi laboŋo kwoŋ mo, ento Yecu odoko ajwaka pi kwoŋ pa Lubaŋa ma yam owacce ni, “Rwot doŋ okwoŋo kwoŋ, pe dok biloko tamme, ‘In ibedo ajwaka nakanaka.’” Meno omiyo gicikke ma Yecu ocuŋ pire obedo ber makato mukene ca. Ajwagi mukene ca onoŋo yam welgi dwoŋ, pien to onoŋo ogeŋo nyimgi woko wek pe gumedde ki tic, ento Yecu bedo i dog ticce me ajwaka matwal, pien en bedo nakanaka. Mumiyo i kare ducu en tye ki twer me laro jo ma nyiko cok bot Lubaŋa, kun giwok ki bote, pien en bedo kwo kare ducu ka bako doge pigi. Ajwaka madit macalo meno aye ma romo cobo mitiwa. En leŋ, gin mo marac pe i iye, cilo me bal pe ogude. Yam gipoko en woko ki i kom lubalo, gitiŋe malo i wi polo. En pe calo ajwagi mukene madito ca, ma gityero gitum bot lubaŋa jwijwi, mukwoŋo pi balgi kengi, ka lacen doŋ pi bal pa lwak. Yecu otyero gitum kicel keken ma otyeko lok ducu i kare ma omine kene macalo gitum. Adada, cik pa Moses yero jo magoro ketogi bedo ajwagi madito, ento lok me kwoŋ ma gikwoŋo lacen i ŋe cik, oyero Wod pa Lubaŋa oketo obedo muporre matwal. Kombeddi gin ma pire dit ma watye ka lokone kany en ene: Wan watye ki ajwaka madit macalo man, ma doŋ obedo i kabedo me deyo yo tuŋ acuc i ŋet komker pa Won Deyo Madit i polo. En tiyo ticce i kabedo maleŋ, i kema me ada ma Rwot aye oguro, ento pe dano. Ajwaka madit acel acel giyere me miyo mot ki tyero gitum bot Lubaŋa; pi meno mitte bene ni Yecu myero obed ki gin mo me atyera. Kono nene en tye i lobo kany, kono pe obedo ajwaka wacel, pien ajwagi doŋ tye ma gimiyo mot kun gilubo cik pa Moses. Ento gin ma gitiyo giporo ki tipo ki cal keken me kabedo maleŋ ma tye i polo; pien i kare ma Moses doŋ yam cok guro kema, Lubaŋa ocike ni, “Nen ni itiyo jami ducu kun ilubo kit cal ma ginyutti ki i wi got.” Ento kit macalo tye, Kricito doŋ onoŋo tic maber atika makato megi-ni woko, rom ki kit gicikke ma en oyubo ma obedo ber matek makato mukene macon ca, pien Lubaŋa omoko kun onoŋo ociko pi miyo jami mabeco makato. Kono ka bal mo obedo pe i gicikke mukwoŋo, kono onoŋo gicikke mo me aryo doŋ pe mitte. Ento Lubaŋa onoŋo bal tye i komgi, pien owaco ni, “Kare biromo, man lok pa Rwot, ma abimoko iye gicikkena manyen ki jo me doggola pa Icrael, ki jo me doggola pa Juda. Pe dok bibedo calo gicikke ma yam aketo ki kwarogi ca, i kare ma yam amako kwede ciŋgi, ci akwanyogi woko ki i lobo Ejipt; pien gin yam pe gulubo gicikkena, omiyo an bene atenyogi woko ata, man lok pa Rwot Man aye gicikke ma abiketo ki jo me doggola pa Icrael ka kare meno oromo, Rwot ma awaco: Abiketo cikka ducu i tamgi, abicoyo bene bedo i cwinygi. An abibedo Lubaŋagi, gin gibedo jona. Ŋat mo doŋ pe bipwonyo lutugi, dok ŋat mo bene pe biwaco ki ominne ni, ‘Ŋe Rwot,’ pien gin ducu gibiŋeya, cakke ki i kom jo matino ma i kingi, o kwede wa i kom jo madito. Pien abitimo botgi kica i timgi maraco ducu, pe dok abipo i kom balgi mo kadi ki acel.” Ka oloko pi gicikke manyen, en tamo pi gicikke mukwoŋo ca macalo gin ma karene okato woko. Gin ma karene doŋ okato, ma oti woko bene, noŋo doŋ cok rwenyo. Kadi gicikke mukwoŋo ca bene yam obedo ki cik mogo me woro Lubaŋa, dok bene obedo ki kabedo mo maleŋ me lobo man. Pien yam tye kema ma giyubo, ma obedo ki dul acel yo tuŋ woko ma gilwoŋo ni Kabedo Maleŋ, ma tye iye okar-mac, ki meja, ki mugati ma giketo i nyim Lubaŋa. I ŋe boŋo kicika me aryo yam tye iye kema ma gilwoŋo ni Kabedo Maleŋ Makato Ducu. Keno tyer ma gitiyo ki jabu tye iye kunnu me waŋo odok eceta, ki canduk me gicikke ma gimwono kome woko ki jabu. I canduk me gicikke yam tye iye abino jabu ki manna ki odoo pa Aron ma yam olot-ti, ki got ma apada aryo ma ceŋ gicoyo iye lok me gicikkene. Ka wi canduk yam tye iye lukerubi me deyo, ma guumo kom me kica woko ducu ki bwomgi. Jami magi pe gitwero loko gin mo iye kikore kombeddi. Meno aye kit ma yam giyubo kwede. Ajwagi yam gidonyo i kema jwijwi teretere ka cobo ticgi me woro Lubaŋa. Ento kema me aryo ajwaka madit keken aye donyo iye kene, dok bene donyo iye kicel keken i mwaka acel acel, kun pe cito kunnu laboŋo remo, ma en tero me atyera pi balle ki pi bal pa lwak. Man aye ma miyo Cwiny Maleŋ nyuto ka maleŋ ni, yo me donyo i kabedo maleŋ peya giyabo ka kema mukwoŋo ma woko ca pud ocuŋ. Man aye lanyut me cal me kare man. Man te lokke ni, mot ki gitum ma gityero bot Lubaŋa pe twero miyo ŋat mo ma woro Lubaŋa doko dano ma cwinye leŋ, pien gitiko ka cam ki mat ki kit lwok mapatpat. Magi ducu gubedo cik ma nen ki woko me kom ma tye ka tic nio wa i kare ma Lubaŋa biloko jami ducu bedo manyen. Ento ka Kricito doŋ obino, ma en aye ajwaka madit me jami mabeco ma bibino, kema ma en tiyo iye kato maca, odoko dit maber makato maca, pien pe gitiyo ki ciŋ, man te lokke ni, pe gin me lobo man. En odonyo i Kabedo Maleŋ Makato Ducu kicel keken ma doŋ otyeko lok woko ducu, kun pe otero remo dyegi ki remo litino twoni, ento otero remone kikome, ci okokowa kwede doŋ matwal. Remo dyegi ki twoni, ki buru roya ma giwaŋo, ka gikiro i kom jo mubalo kwer, romo lonyogi, kun lwoko komgi bedo maleŋ. Remo pa Kricito pe kato maca mada? Pi Cwiny Maleŋ ma bedo matwal, omiyo en omine kene bot Lubaŋa kun roc mo pe i kome, pi lonyo cwinywu ma onoŋo ocido woko macol licuc pi tiyo tic ma kwo pe iye, wek wubed ma iwu leŋ, ka doŋ wawor Lubaŋa makwo. Pi meno Kricito aye ŋat muyubo gicikke manyen, wek emi jo ma gilwoŋo gunoŋ lim ma ri nakanaka ma Lubaŋa ociko me miyone; pi to ma yam onen, omiyo jo ma yam gikalo wi cik i te gicikke mukwoŋo kombeddi doŋ gikokogi woko. Pien ka ma gicikke me leyo lim tye iye, myero koŋ gimok ni, ŋat muciko doŋ oto. Kodi gicikke meno twero tic lacen i ŋe to keken; pe tye ki twer mo ka ŋat muciko pud kwo. Pi meno kadi wa gicikke mukwoŋo ca gimoko ki remo. Pien i kare ma yam Moses otyeko tito bot lwak gin ma giciko ducu ma tye i i cik, en okwanyo remo roci dyaŋ ki dyegi, kacel ki pii, ki yer romo makwar, ki yat anyero, okiro i kom buk kikome, ki i kom lwak ducu bene, kun waco ni, “Man aye remo me gicikke ma Lubaŋa ocikowu pire.” Dok i yo acel-lu, Moses okiro remo i kom kema ki jami ducu ma gitiyo kwedgi me woro Lubaŋa. I te cik, nen calo jami ducu gilonyo woko ki remo; ka ma pe gioyo iye remo, weko bal bene bedo pe iye. Onoŋo oporre kakare pi jami ma obedo lapor keken me gin ma tye i polo myero gilonygi gubed leŋ kit meno, ento jami me polo kikomgi myero olony ki gitum mabeco makato magi-gu ducu. Pien Kricito pe odonyo i kabedo maleŋ ma dano otiyo ki ciŋ, ma obedo lapor ki kabedo maleŋ me adane, ento odonyo i polo kikome, ma i kare man en tye ka nen kunnu i nyim Lubaŋa piwa. Dok bene en pe odonyo me mine kene kare ki kare calo ajwaka madit ma donyo i kabedo maleŋ mwaka ki mwaka, kun tero remo ma pe remone kikome. Ka nene obedo kit meno, kono en onwoyo to kare ki kare cakke i acakki piny. Ento kit ma tye kwede-ni, en onen kicel keken i agikki me kare wek ekwany bal woko pi mine kene macalo gitum. Dok kit macalo giyubo ni, dano to kicel, ka doŋ ki i ŋeye ŋolo kop cakke, kit meno Kricito bene otyerre kene kicel me tiŋo bal pa jo mapol, dok binen tyen me aryo, pe doŋ pi tic i kom bal, ento pi laro jo ma tye ka kure. Cik pa Moses gire tye iye tipo keken me jami mabeco me kare me anyim, pe calgi kikome. Pi cik dano gibedo ka kelo gitum ma kitgi acel nakanaka, mwaka ki mwaka; en doŋ pe tye ki twero mo matwal me loko jo ma bino bot Lubaŋa gudok jo mabeco muteggi. Ka nene tye kit meno, kono gitum pe doŋ ogik woko? Kono jo ma woro Lubaŋa doŋ gilwoko balgi woko matwal, kono pe dok gimedde me bedo ki kit ŋec mo i cwinygi ni gin lubalo. Ento gitum magi bedo ka poyo wi dano i balgi mwaka ki mwaka. Pien remo twoni ki remo dyegi pe twero kwanyo bal woko wacel. Pi lok man, i kare ma Kricito obino i lobo, en oloko ni, “In giri pe imito gitum kadi gityer, ento iketo koma tye. Ii pe obedo yom pi gitum awaŋa ki gitum ma gityero pi bal. Ka doŋ awaco ni, ‘An a ene, doŋ abino ka cobo mitini, in Lubaŋa,’ macalo yam gicoyo i koma i buk adola.” Mukwoŋo en oloko ni, “In pe imito gitum, kadi mot ma gityero, nyo gitum awaŋa ki gitum pi bal, cwinyi bene pe yom iye,” ma gin jami ma gityero pi cik. Ka dok oloko ni, “An a ene, doŋ abino ka cobo mitini.” Ojwayo mukwoŋone-ni woko wek omi ekel me aryone. Doŋ pi mitine meno, omiyo gilonyowa wadoko leŋ pi Yecu Kricito mumiyo kome ma ka gitum kicel keken ma otyeko lok woko ducu. Ajwaka acel acel cuŋ i dog ticce nino ducu kun tyero kit gitum acel-lu kare ki kare ma pe tye ki twero mo matwal me kwanyo bal. Ento Kricito yam otyero gitum acel keken pi bal, pi kare ducu, ka doŋ obedo piny i ŋet Lubaŋa tuŋ acuc i kabedo me deyo. Nia wa i kare ca en tye ka kuro nio ka gimiyo lukworre doko kom laten tyene, pien gitumme acel-lu omiyo jo ma en olonyogi bedo leŋ gudoko jo mabeco muteggi matwal. Cwiny Maleŋ bene omiyo cadenne botwa, pien ka doŋ oloko ni, “Man aye gicikke ma abiketo ki jo me doggola pa Icrael, ka kare meno okato, man lok pa Rwot: Abiketo cikka ducu i cwinygi, kun acoyo bedo i tamgi,” ka dok omedde kun loko ni, “Pe dok abipo i kom balgi ki timgi maraco.” Ka ma weko bal tye iye, gitum mo pi bal doŋ pe mitte. Pi meno, utmegina, wan doŋ watye ki yo me donyo i kabedo maleŋ ki tekcwiny pi remo pa Yecu. En oyabo botwa yo manyen, yo makwo, me donyo i ŋe boŋo kicika; yo meno aye en kome. Kit macalo doŋ watye ki ajwaka madit ma loyo ot pa Lubaŋa, myero doŋ wanyiku cok bot Lubaŋa ki cwiny me ada, kun niye bene doŋ odonyo matut i cwinywa, ma doŋ cwinywa leŋ, pien ŋec me gin maraco ma yam watimo doŋ gikwanyo woko, dok bene komwa doŋ gilwoko woko ki pii maleŋ. Wamoku matek likiŋ i gen ma watuco, laboŋo tagge atata, pien ŋat ma ocikowa-ni lagen. Dok bene myero watamu kit macalo watwero tugo kwede cwinywa kekenwa i mar ki i tiyo tic mabeco, kun pe waweko cokke kacel, kit macalo jo mogo doŋ guloko odoko kitgi-ni, ento myero wacuku cwinywa kekenwa, makatone kit macalo wuneno Nino maca doŋ tye ka nyiko cok-ki. Pien ka watimo bal akaka ma doŋ noŋo watyeko limo ŋec i kom lok me ada, gitum mo pe dok odoŋ ma gityero pi balwa. Odoŋ kuro ŋolo kop keken kun watye ki lworo madwoŋ, ki mac mager ma bityeko dano ma gipyem ki Lubaŋa. Dano ma pe lubo cik pa Moses gineko aneka laboŋo kica mo, ka ce lok oloye i nyim caden aryo nyo adek. Doŋ wutamo ni can ma rom mene ma gibiketo i kom ŋat ma ocayo Wod pa Lubaŋa, dok ma opyedo remo me gicikke pa Lubaŋa ma gilonye kwede me bedo maleŋ, dok ma oŋalo Cwiny Maleŋ me kica pa Lubaŋa? Pien wan waŋeyo ŋat ma oloko ni, “An aye abiculo kwor, abiculo waŋe lacen,” dok ni, “Rwot biŋolo kop i kom jone.” Bedo gin me lworo twatwal me poto i ciŋ Lubaŋa makwo. Ento koŋ doŋ wupo i kare mukato, kit ma yam wuciro kwede, kun wulwenyo ki lwak cam madwoŋ, i kare ma doŋ ceŋ pa Lubaŋa otyeko ryeny omenyowu. Kare mukene yam giyetowu dok giunowu i nyim lwak, kare mukene bene wuribbe ki jo ma gitimogi kit meno. Pien kica yam omakowu i kom mabuc, dok bene cwinywu obedo yom kadi giyako jamiwu, pien wun kikomwu onoŋo doŋ wuŋeyo ni wutye ki jami mukene mabeco makato magi, dok ma ri nakanaka. Pi meno pe wubwot tekcwiny woko, pien tye ki bakacic madit ma wubilimo. Mito wubed kun wuciro, wek omi wuti gin ma Lubaŋa mito, ci doŋ wunoŋo gin ma yam en ociko pire. Macalo yam en oloko ni, “Odoŋ kare manok mo, ci ŋat ma bino ca bibino woko oyotoyot ma pe bigalle. Doŋ danona ma kite atir bibedo kwo pi niye; ento ka odok woko cen, cwinya pe bibedo yom i kome.” Ento wan pe watye i kin jo ma dok cen, ka girwenyo woko matwal-li; wan watye i kin jo ma gitye ki niye, ma en aye doŋ gwoko kwogi. Niye aye ma moko gin ma dano geno, en gin ma niaŋowa maber ni, jami ma pe gineno komgi gitye. Pire omiyo Lubaŋa opwoyo jo macon. Pi niye waniaŋ ni, Lubaŋa yam oketo lobo kulu ki lokke, mumiyo gin ma nen gitiyo nia ki i kom gin ma pe nen. Pi niye Abel otyero gitum maber ma kato pa Kain woko bot Lubaŋa; meno omiyo gipwoye ni kite atir, kun Lubaŋa aye obedo cadenne pi gamo motte. En oto, ento pi niyene omiyo pud loko. Pi niye Enoka yam gitiŋo gitero woko malo wek pe obil to. Pe gimedo ki noŋone, pien Lubaŋa onoŋo doŋ otere woko. I kare ma pud peya gitere, gimiyo lok me caden i kome, ni oyomo cwiny Lubaŋa. Laboŋo niye pe twerre me yomo cwinye, pien ŋat ma mito nyiko cok bot Lubaŋa myero oye ni en tye ada, dok bene ni en miyo bakacic bot jo ma yenye. Pi niye Nua bene, ka Lubaŋa ociko en pi gin ma peya onen, owinyo doge, ka doŋ opayo yeya pi laro jo me ode. Niyene-nu omiyo kop oloyo lobo, omiyo en onoŋo kit ma atir ma bino pi niye. Pi niye Abraim owinyo dog Lubaŋa i kare ma olwoŋe me cito i lobo mo mukene ma onoŋo yam en mito miye ni obed mere. En oa ki i lobo tugi kun pe ŋeyo ka ma ecito iye. Pi niye omiyo en obedo macalo welo i lobo ma yam Lubaŋa ociko pire, macalo ebedo i lobo pa lurok, kun bedo i kema gin ki Icaka ka Yakobo, ma gin bene gimiyogi kit cikke acel-lu. Pien en onoŋo tye ka kuro gaŋ ca ma tye ki gutine ducu matek, ma Lubaŋa aye obedo ŋat mugoyo calle, ki lagedone kikome. Pi niye omiyo Cara onoŋo teko me yac, kadi bed mwaka me nywalle onoŋo doŋ okato woko. Man otimme pien en otamo ni, ŋat ma ociko-ni genne. Man omiyo i kom laco acel, ma yam rom ki ŋat muto, oa iye lwak likwayo mapol ata calo lakalatwe me polo, ki dok calo kweyo me dog nam ma kwanone loyo dano woko-ni. Jo magi ducu guto i kom niye, ma pud peya gimiyogi gin ma ceŋ Lubaŋa ociko pire, ento guneno anena ki ka mabor, gumoto ki kunnu, dok bene gutuco ni gin gibedo macalo lurok dok welo i wi lobo. Pien jo ma loko lok kit meno ginyuto ka maleŋ ni gitye ka yenyo lobo tugi kikome. Ka kono nene gubedo ka tamo pi lobo ma yam gin gua ki iye ca, kono gunoŋo yo me dok cen iye. Ento gin gitye ka paro pi lobo maber makato maca ca woko, en aye pacogi ma i polo. En meno gin mumiyo lewic pe mako Lubaŋa ka ce gilwoŋe ni Lubaŋagi, pien en doŋ otyeko yubo botgi gaŋ. Pi niye Abraim, ka yam giteme, otyero Icaka macalo gitum bot Lubaŋa; ŋat ma Lubaŋa ocikke bote oyubbe me tyero wode acel keken macalo gitum bot Lubaŋa, ma yam giloko pire ni, “Litino pa Icaka aye gibilwoŋogi ni likwayu.” En onoŋo otamo ni, Lubaŋa tye ki twero me cero dano ki i kin jo muto; dok bene gitwero waco ni Icaka odwogo i ciŋ Abraim calo oa ki i kin jo muto. Pi niye Icaka olamo gum i kom Yakobo ki Ecau pi kare me anyim. Pi niye Yakobo bene, ka doŋ to, olamo gum i kom litino pa Yucepu, kun lamo i kom latin acel acel, ma okulo wiye i wi odoo me komone, me woro Lubaŋa. Pi niye Yucepu, i agikki me kwone, oloko pi a pa jo Icrael ki i Ejipt, ka doŋ ociko pi kit macalo myero gibiyike kwede. Pi niye, ka yam ginywalo Moses, lunyodone gukane pi dwe adek kun pe gulworo cik pa kabaka, pien onoŋo guneno ni latin ca ber mada. Pi niye Moses, ka doŋ odoŋo, pe oye ni myero gilwoŋe ni en e wod pa nya pa Parao, kun oyero me neno can kacel ki jo pa Lubaŋa ma ka bedo ki yomcwiny me bal ma ri pi kare manok mo keken-ni. En otamo ni yet ma giciro pi Kricito obedo lonyo madit makato lonyo ducu ma tye i Ejipt, pien onoŋo ociko waŋe kun neno mot me kare me anyim. Pi niye Moses oa woko ki i Ejipt kun pe lworo kiniga pa kabaka; ociro matek, macalo en neno Lubaŋa ma pe nen. Pi niye bene omiyo en okwero nino madit me Kato, dok okiro remo, wek omi lanek litino kayo pe ogudgi. Pi niye jo Icrael guŋolo Nam Makwar macalo giwoto ki i wi ŋom mutwo; ento jo Ejipt gumwony woko liweŋ i nam i kare ma gin bene gutemo me kato kit meno. Pi niye omiyo cel me Jeriko orette opoto woko piny ma doŋ jo Icrael gurumo pi nino abiro. Pi niye Rakab ma obedo malaya pe oto kacel ki jo ma pe gubedo luwiny, pien onoŋo en yam ojolo lurot-piny ki kuc. Gin aŋo makato meno ma dok amedde me lokone? Pien kare aye bibedo nok bota me tittiwu pi Gideon, Barak, Samson, Jeputa, Daudi, Camuel ki lunebi-gu, ma gin bene pi niye omiyo gulwenyo ki luker me lobo mapatpat, guloyogi, gutiyo gin ma tye atir, gunoŋo gin ma yam Lubaŋa ociko pire. Gutweyo dog labwor-gu woko, guneko mac mager woko, gubwot ki i lak pala lucwan. Gorogi olokke odoko tekkom, gudoko jo matek i lweny, guryemo mony pa lurok woko. Mon gunoŋo danogi ma yam guto ma doŋ gucer woko. Jo mukene gigoyogi marac, guto kun gukwero ni pe gigonygi, wek gibicer i kwo maber makato. Jo mukene giŋalogi, gipwodogi, gitweyogi ki nyor ci giketogi i mabuc. Gicelogi ki got, giŋuno igi woko i dul aryo ki mucumeno, ginekogi ki pala lucwan. Gin guloŋo piny kun guruko laa romi ki laa dyegi, ma noŋo can oketo komgi woko, dano ounogi dok gitimogi ki tim maraco. Kit jo macalo meno lobo pe romo bedo kwedgi. Gubedo ka wot awota atata i tim, ki i wi godi, kun gibedo i boro ki bur mugwarre matut piny i ŋom. Jo magi giŋene maber pi niyegi, ento pe gumedo ki noŋo gin ma yam Lubaŋa ociko pire, pien onoŋo Lubaŋa oyubo gin mo maber makato kun otamo piwa, ni meno, gin pe myero gudok jo mabeco muteggi laboŋo wan. Doŋ kit macalo watye ki lwak caden mapol ma rom meno ma orumowa woko dyere, myero koŋ doŋ wabolu gin mogo mapek-gu woko ducu, ki bal ma maro tweyowa woko likiŋ, wek wariŋu doŋ ŋwec pyem ma tye i nyimwa, kun waciro bene peko ma tye iye. Wanenu Yecu ma en aye latel wiwa i lok kom niye, en ŋat ma ocobo niyewa kakare. Pi yomcwiny ma giketo i nyime en yam ociro yatariya, kun ocayo lewic ma giketo i kome; ento kombeddi doŋ obedo piny i kabedo me deyo yo tuŋ acuc me komker pa Lubaŋa. Wubed ki tam i kome, ki kit ma en ociro kwede adagadaga marac twatwal ki bot lubalo, wek pe wuol, ki cwinywu pe opoti. I lwenywu ma wulwenyo ki bal pud peya wulwenyo wuo wa i oyo remowu. Nyo wiwu owil woko ce i coc ma yam gicoyo me cuko cwiny dano, ma en loko kwedwa iye macalo litinone? Ni meno, “Latinna, pe ica pwony pa Rwot; ka en ogoyi, pe cwinyi opoti. Pien Rwot pwonyo jo ma en maro, pwodo latin acel acel ma en gamo.” Myero wucir matek, wek opwonywu. Lubaŋa tye ka tic kwedwu macalo litinone. Latin mene ma pe wonne pwonyo? Ka ce owekowu laboŋo pwonyowu macalo litinone mukene ducu, nyuto ni wun doŋ litino luk, pe litinone kikome. Kit meno wan watye ki wegiwa me lobo man ma yam gupwonyowa, wan bene waworogi. Pe doŋ myero wamine makato i te loc pa Wonwa me cwiny wek wabed kwo? Pien gin yam gupwonyowa pi kare manok mo keken i kit ma gin guneno ni ber, ento Lubaŋa pwonyowa pi konyowa, wek omi wadok jo maleŋ macalo en. Kit pwonnye ducu, ka pud watye iye, pe watamo obedo me yomcwiny, ento me kumo, ento i ŋeye lacen kelo kuc keken bot jo ma guyelle iye, pien noŋo doŋ gudoko jo ma kitgi atir. Pi meno, wutiŋ badwu mukwe-ni malo, wurye coŋwu magoro, wuyub yo ma tyenwu lubo ocuŋ atir, wek ŋat ma tyene oŋol pe dok tyene oputte woko liweŋ ki i waŋ mwot, ento myero ocaŋ woko acaŋa. Wuket tek me bedo ki kuc ki jo ducu, ki me bedo jo maleŋ; pien ŋat ma pe leŋ pe bineno Rwot. Wugwokke kun wuneno maber ni ŋat mo pe opoto ka gamo kica pa Lubaŋa. Wunen ni ŋat mo pe obedo macalo lwit yat makec ma ka otwi ci kelo ayela, dok balo jo mapol. Wunen ni ŋat mo pe obed latim abor, nyo dano ma pe lworo Lubaŋa calo Ecau, ma yam ocato ditte me anywalli me bedo latin kayo pi cam me tyen acel keken. Pien wuŋeyo ni, lacen ka en omito ni wonne olam gum i kome, ento wonne okwere woko, kadi bed onoŋo mito ma kok ki pig waŋe, pien en yam pe onoŋo yo me ŋut i gin ma otimo. Pien wun pe wubino i gin ma gitwero gudo kome, ki mac ma yam olyel i wi got Cinai, ki colpiny me mutu ma ocido woko licuc, ki yamo lapiru matek, ki koko tum, ki dwan ŋat ma tye ka lok. Jo ma guwinyo lokke gubako doggi mada ni pe dok gimed loko botgi lok mo, pien gin pe gitwero ciro cik ma giketo, ni meno, “Kadi ki lee mo ka ogudo got, myero gicel ki gweŋ ginek woko.” Gin munen kunnu obedo marac twatwal ma miyo dano lworo, man omiyo Moses owaco ni, “Lworo omaka adada ma koma myel amyela.” Ento wun wubino i got me Cion, ki gaŋ pa Lubaŋa makwo, Jerucalem me polo, ki bot lwak lumalaika ma welgi pe kwanne ma gucokke kacel ka woro Lubaŋa. ki i cokke pa litino kayo ma gicoyo nyiŋgi i polo, ki bot Lubaŋa ma en laŋolkop pa dano ducu, ki bot tipo pa jo ma kitgi atir, ma doŋ gimiyo gudoko jo mabeco muteggi, ki bot Yecu, layub gicikke manyen, ki bot remo ma gikiro, ma tito ki kica pi gin maber ma kato gin ma remo pa Abel otito pire. Wugwokke pe wukwer winyo lok pa ŋat ma tye ka lok. Jo ma yam gukwero winyo lok pa ŋat mucikogi i wi lobo pe gubwot. Wan kono wabibwot niŋniŋ, ka wakwero winyo lok pa ŋat ma tye ka cikowa ki i wi polo kulu-ni? I kare maca, dwane oyeŋo Iobo; ento kombeddi en ociko ni, “Odoŋ kicel, pe doŋ abiyeŋo lobo keken, ento abiyeŋo wa polo bene.” Lok man ni, “Odoŋ kicel,” nyuto ni, gibikwanyo gin ma yeŋŋe woko, meno ginaketa, ka gin ma pe yeŋŋe cako doŋ. Pi meno myero wapwoyu Lubaŋa, pien doŋ wanoŋo ker ma pe twero yeŋŋe, dok bene myero waworu Lubaŋa i yo ma twero yomo cwinye, kun bene wamiye deyo ki lworo, pien Lubaŋa-wa en aye mac ma waŋo piny. Wumedde ki mar i kinwu kekenwu macalo omego. Wiwu pe owil ka jolo welo, pien jo mogo ma yam gugwoko welo onoŋo gugwoko lumalaika i pacogi kun pe giŋeyo. Wupo pi jo ma tye i mabuc calo wutye kacel kwedgi i mabuc kunnu. Wupo bene pi jo ma gitimogi ki tim marac, kit macalo wun bene wutye i kom. Jo ducu myero guket deyo i kom nyom, dok kitanda pa jo ma gunyomme myero giwor obed maleŋ; pien Lubaŋa biŋolo kop i kom lutim tim me abor ki jo ma balo nyomgi. Pe wubed jo ma maro lim; jami ma wutye kwede myero oromwu, pien Lubaŋa yam oloko ni, “Pe abiboli, pe abibwoti ata.” En meno gin mumiyo cwinywa tek, kun wawaco ni, “Rwot en lakony mera, pe abibedo ki lworo; ŋo kono ma dano twero timo i koma?” Wupo i kom lutel wiwu macon, ma yam gitittiwu lok pa Lubaŋa. Wutam pi kwogi ki gin maber ma oa iye, ka doŋ wulub niyegi. Yecu Kricito gire kite tye acel keken laworo ki tin ki nino ma pe tum. pe wuwek pwony mogo mapatpat dok ma welo gurwenywu woko; ber kica pa Lubaŋa aye mumi teko i cwinywa, pe pi cik me cam mogo ma dano ma gulubo pe gunoŋo iye kony mo. Watye ki keno tyer ma lutic i kema macon ca pe gitye ki twero mo me cam iye. Pien lee ma yam ajwaka madit tero remogi i kabedo maleŋ me bedo gitum pi bal, komgi yam giwaŋo woko cen i ŋe gony. Kit meno bene Yecu yam oto cen woko i ŋe dogcel, wek omi elony dano ki remone kikome gubed maleŋ. Pi meno myero wacitu bene woko i ŋe gony, kun waciro anywar pire; pien kany pe watye ki gaŋ mo ma ri nakanaka, ento watye ka yenyo gaŋ ma tye anyim ma cok bino. Doŋ wamiyu pakwa bot Lubaŋa i kare ducu macalo gitum ma gityero bot Lubaŋa, kun wawok ki bot Yecu; meno aye pwoc ma wamiyo ki dogwa ka watuco nyiŋe. Pe myero wiwu owil ka timo gin maber, ki poko jami ma wutye kwede bene bot jo mukene; pien gitum macalo meno yomo cwiny Lubaŋa. Wuwiny lok pa jo ma telowu, dok wumine i te locgi, pien gin gitye ka gwoko tipowu laboŋo yweyo macalo jo ma Lubaŋa bipenyogi pi ticgi. Wumi guti ticgi ki yomcwiny, ma pe wumiyogi peko mo, pien meno pe konyowu kadi ki acel. Wuleg Lubaŋa piwa, pien wan waŋeyo ada ni cwinywa gire leŋ, dok wamito ni wati gin maber i kare ducu. Amedo cuko cwinywu ni wuleg Lubaŋa, wek odwoka botwu oyotoyot. Lubaŋa won kuc ma ocero Rwotwa Yecu Kricito ki i kin jo muto, ma en aye lakwat romi madit, pi remo me gicikke ma ri nakanaka, en myero omiwu gin ducu mabeco ma mitte, wek wuti wucob gin ma en mito; dok bene pi Yecu Kricito myero en oti kwedwa gin ma yomo cwinye. Deyo obed bot Yecu Kricito nakanaka. Amen. Utmegina, alegowu ni wudi cwinywu i lokka ma acoyo manoknok mo-ni ma acuko kwede cwinywu. Myero wuŋe ni ominwa Temceo doŋ gigonyo woko; wabibino kwede ka nenowu, ka ce orune obino oyot. Wumot lutelwu ducu, ki jo pa Lubaŋa bene ducu. Jo mua ki i Itali gumotowu. Kica pa Lubaŋa doŋ obed kwedwu ducu. Waraga man oa ki bot Yakobo ma latic pa Lubaŋa ki Rwotwa Yecu Kricito. Bot kaka apar wiye aryo ma guket woko ata: Amotowu ba. Utmegina, wubed ki yomcwiny madwoŋ ka gitemowu i yo mapatpat, pien wuŋeyo ni temo niyewu miyo wudiyo cwinywu. Wek diyo cwiny ocob ticce kakare, wek wubed jo muteggi, ma roc mo pe i komwu, dok wubed ma gin mo bene pe orem botwu. Ka ce tye ŋat mo i kinwu ma ryekone nok, myero en oleg Lubaŋa ma miyo bot jo ducu ki yomcwiny, kun pe twono ŋat mo; ci bimiye. Ento myero en oleg ki niye, ma pe kalo akala; pien ŋat ma kalo akala rom ki pii me nam ma twagge, ma yamo coro tagge atata. Kit dano macalo meno myero pe otam ni ebinoŋo gin mo ki bot Rwot, pien en obedo ma tamme aryo, ma pe cuŋ matek i kit yo me kwone ducu. Lacan myero owakke ka gitiŋe malo, lalonyo bene kit meno myero owakke ka gidwoke piny; pien lalonyo birwenyo woko calo tur lum. Pien ceŋ tuc ki lyetone matek, ci nero lum, ture o, berre bene rwenyo woko. Lalonyo bene kit meno birwenyo woko ata i dye ticce me kare ducu. Ŋat ma gitemo cwinye ka ocuŋ matek tye ki gum; pien ka doŋ giteme, ce en oloyo, ci binoŋo mot me lalukana me kwo ma Rwot ociko me miyo bot jo ma en maro. ka gibito ŋat mo, en pe myero owacci, “Lubaŋa aye ma bita”, pien Lubaŋa pe gibito ki tiyo gin marac, en bene pe bito ŋat mo. Dano acel acel gire mitine kene aye ma bite, ywaye, kun omo cwinye. Miti ka oyac ci nywalo bal. bal ka doŋ odoŋo muteggi nywalo to. Utmegina ma amaro, pe wuwek gibwolwu. Pien kit gin mo ducu maber, ki mot ducu mabeco twatwal ma gimiyowa, a ki malo, a ki bot Lubaŋa Won bino piny, ma en aye won gin ducu ma ryeny i polo, ma pe tye ki alokaloka mo, dok tipo mo ma nyuto lokkene bene pe. pi mitine gire kene, en onywalowa ki lokke me ada, wek wabed calo cam ma i poto mukwoŋo cek ki i kin ginaketa ducu. Utmegina ma amaro, wuŋe lok man. Dano acel acel myero owiny lok oyotoyot, ento pe myero orune me gamone, dok bene myero odi kinigane. Pien kiniga pa dano pe cobo tic ma atir i nyim Lubaŋa. Wubol woko cen gin ducu me lewic ki tim maraco ma doŋ onya botwu, wugam lok pa Lubaŋa ma opito i iwu ki mwolo, pien twero laro tipowu. Ento wubed jo ma keto gin ma giloko i tic, pe wubed jo ma winyo awinya keken kun wubwolle kenwu. Pien ka ce dano mo obedo lawiny lok keken ma pe tiyo, ci bedo calo ŋat ma ŋiyo waŋe ma ginywale kwede i kiyo. Ento ka doŋ otyeko ŋine kekene, cito woko, wiye wil woko oyotoyot i calle ma en obedo ka nenone twatwal-li. Ento ŋat ma neno cik maber ma kelo kuc, ka ori iye, ma pe bedo calo ŋat ma winyo ka dok wiye wil woko, ento ŋat ma keto lok ma en owinyo i tic, gibimiye gum i gin ma en otiyo ducu. Ka ce dano mo otamo ni en ladini kun pe juko lebe, noŋo bwolle abwola kene ki i cwinye, dinine-nu konnye pe. Dini me ada maleŋ, ma cilo pe iye i nyim Lubaŋa Wonwa en ene: konyo litino kic ki mon ma coggi oto i kom can ma gitye kwede, ki gwokke ken i kom bal me lobo. Utmegina, kit macalo doŋ wuye Rwotwa Yecu Kricito kwede-ni, ma en Rwot me deyo, pe dok wuket apokapoka mo i kin dano. Pien ka ce won agit jabu oruko boŋŋi mabeco obino kwede i cokkewu, ki lacan bene oruko boŋŋi mucido, wukwoŋo tamo pi dano ma oruko boŋŋi mabeco-ni, kun wuwaco ni, “Bed kany, ladit,” ento bot lacan wuwacce ni, “Cuŋ kuca,” nyo ni, “Bed piny ka tyena kany.” Meno noŋo pe doŋ wukelo apokapoka woko i kinwu kekenwu, kun wudoko bene luŋolkop ma tamwu ogom woko? Wuwiny ba, utmegina ma amaro, pe Lubaŋa aye muyero jo ma lucan i wi lobo wek gubed lulonyo i niye, dok me miyogi ker ma yam ociko ni ebimiyo bot jo ma mare? Ento wun wuketo lewic i kom lucan. Pe lulonyo aye ma burowu? Pe gin aye ma ywayowu kun giterowu tektek i nyim lukiko? Pe gin aye luyet nyiŋ maber ma gilwoŋowu kwede? Ka ce wumako cik me ker pa Lubaŋa kit ma yam gicoyo kwede i ginacoya ni, “Mar lawoti macalo imarre keni,” noŋo wutimo ber; ento ka ce wupoko kin dano, noŋo wutimo rac, noŋo cik ŋolo kop i komwu ni wun lubalo. Pien ŋat ma gwoko cik ducu, ka ce opoto i cik acel keken, noŋo oturo cik ducu. Pien ŋat ma owaco ni, “Pe itim abor,” owaco bene ni, “Pe ineki.” Ka inen ce pe itimo abor ento ineko dano, noŋo doŋ ituro cik. Lok ma wuloko, ki gin ma wutiyo, myero obed macalo pa jo ma gibiŋolo kop botgi i te cik ma kelo kuc. Pien ŋolo kop pe timo kica bot ŋat ma yam pe otimo kica; ento latim kica pe lworo laŋolkop. Konyo gin aŋo, utmegina, ka ŋat mo waco ni etye ki niye kun pe keto i tic? Ci niye meno twero lare? Ka ce omeru nyo lameru boŋone pe, kun cam me nino ducu bene remo, ci ŋat mo i kinwu waco botgi ni, “Wucit ki kuc, komwu obed momor, wuyeŋ,” kun pe wumiyo botgi gin mo ma mitte pi pito kom, ci meno konyo aŋo? Kit meno, niye kene ka pe giketo i tic, doŋ oto woko. Ŋat mo biwaco ni, “In itye ki niye, ento an atye ki tic; nyutta niyeni laboŋo tic mo, ka doŋ abinyutti niyena ki ticca.” Iye ni Lubaŋa tye acel, itimo ber. Kadi cen-gu bene giye kit meno, dok komgi myel. In lamiŋ, imito ginyutti ni, niye ma pe ki tic konnye pe? Kwarowa Abraim yam pe gikwano ni kite atir pi tic, i kare ma en otyero wode Icaka me bedo gitum i wi keno tyer? Doŋ ineno ni niyene yam ocobbe ki tic, omiyo lok ma yam gicoyo ocobbe kakare ni, “Abraim oye Lubaŋa, omiyo gikwane ni en dano ma kite atir”; dok bene gilwoŋe ni en larem Lubaŋa. Doŋ ineno ni dano gikwane ni kite atir pi tic, ento pe pi niye keken. Kit meno bene, Rakab, dako ma malaya, pe yam gikwane ni kite atir pi ticce, i kare ma yam en ojolo lukwena ka ocwalogi gucito woko i yo mukene? Kit macalo ka yweyo doŋ pe i kom, noŋo kom doŋ oto woko, kit meno bene, niye ka pe giketo i tic, noŋo doŋ oto woko. Utmegina, pe myero jo mapol i kinwu gudok lupwony, pien wuŋeyo ni wan lupwony gibiŋolo kop mapek i wiwa makato jo mukene. Wan ducu ŋat acel acel timo lwak roc mapol, ento ka ce inen ŋat mo pe roco i gin ma en loko, ci dano-nu noŋo dano maber twatwal, twero loyo kome ducu. Wan warwako nyonyo i dog aguragura wek guwinywa, ci wawiro komgi ducu dok tuŋ ka ma wamito. Koŋ wunen mel, ginen doŋo mada, dok yamo aye ma kologi, ento ŋat ma kwaŋo twero wiro cito ka ma en mito ki latin pol mo matidi keken. Kit meno, leb obedo dul kom ma nen tidi mo, ento wakke mada i jami madoŋo. Nen kit ma mac matidi mo keken waŋo kwede buŋa madit! Leb bene obedo calo mac. I kin dul komwa leb rom ki lobo ma gin ma en tiyo pe atir, ci balo komwa woko ducu, cwinyo mac i kwowa, i kit ma kwo wirre kwede ducu; mac me Geena moko i kome. Dano twero loyo kit lee ducu, wa winyi, twol-gu ki ginaketa ducu ma bedo i nam, dok bene giloyogi woko yam con. Ento pe tye dano mo ma twero loyo leb. Leb aye twon gin mo ma pe jukke, opoŋ ki kwir ma neko dano. Leb en aye gin ma wapwoyo kwede Rwot Lubaŋa Wonwa, en leb acel-lu bene waceno kwede dano ma giketogi i cal pa Lubaŋa. Pwoc ki ceno dano a i dog acel-lu. Utmegina, pe myero obed kit meno. Waŋ it acel twero mol iye pii mamit ki makecce? Utmegina, oduro mono twero nyak yaa? Nyo olok twero nyak oduro? Kit meno pii mamit bene pe twero mol kun a ki i waŋ it ma piine obedo kado kado. Aŋa i kinwu ma ryek dok niaŋ jami? En myero onyut tic me ryekone ki mwolo, pi kwone maber. Ento ka wutye ki nyeko marac i cwinywu, ki laro dito, pe wuwakke, pe bene wuwac lok goba i kom lok ada. Kit ryeko macalo meno pe oa ki i polo ento obedo me lobo, pe woro lubaŋa, ento pa Catan. Pien ka ma nyeko ki laro dito tye iye, inoŋo anyobanyoba ki tim ducu maraco tye iye. Ento ryeko mua ki malo, mukwoŋo bedo leŋ, dok bedo me kuc, me mwolo, gamo tam ducu mabeco, opoŋ ki kica, ki nyako nyig maber, ŋat ma tye kwede pe poko kin dano, bedo ma cwinye atir. Jo ma kelo kuc gicoyo kodigi i kuc me nyako kit ma atir. Gin aŋo ma kelo mony, ki gin aŋo ma kelo lweny i kinwu? Pe par ma wutye kwede aye tye ka lweny i dul komwu? wumito wunoŋ jami, ento pe wunoŋo, ci wucako neko dano. Dok wuparo jami pa jo mukene, ento pe wunoŋo, ka doŋ wuero lweny ki mony. Pe wunoŋo gin ma wumito, pien pe wulego. Wulego, pe wunoŋo, pien wulego marac, wulego ni wunoŋ wek wuti kwede me cobo mitiwu keken. Wun jo mubolo laremwu woko. Pe wuŋeyo ni, mako larem ki lobo miyo dano doko lakwor pa Lubaŋa? Pi meno, ŋat ma mito mako larem ki lobo lokke kene doko lakwor pa Lubaŋa. Nyo wutamo ni, lok ma yam gicoyo lok ma tere pe ni, “En tye ki par madwoŋ twatwal ki nyeko i kom cwiny ma yam en oketo ni obed i iwa?” Ento en medde ki miyo kicane; pi meno, lok ma yam gicoyo waco ni, “Lubaŋa pyem ki jo ma wakke, ento miyo kica bot jo mamwol.” Pi meno, wumine me bedo i te loc pa Lubaŋa. Wulweny matek ki Catan, ci en biriŋowu woko. Wunyik cok bot lubaŋa, ci en bene binyiko cok botwu. Wulwok ciŋwu woko, wun lubalo, ka doŋ wulony cwinywu obed maleŋ, wun jo ma tamwu tye aryo. Cwinywu myero owaŋ, wukum, wukok bene. Nyerowu myero olokke odok kumo, ki yomcwiny ma wutye kwede olokke odok can. Wumwolle kenwu i nyim Rwot, ci en bitiŋowu malo. Utmegina, pe wulok lok mo marac kun ŋat acel acel loko i kom lawote. Ŋat ma loko lok marac i kom ominne, nyo ŋolo kop i kom ominne, noŋo oloko lok marac i kom cik, noŋo doŋ bene oŋolo kop ki cik. Ento ka in iŋolo kop ki cik, in doŋ pe lacob cik ento idoko laŋolkop. Lami-cik ki laŋolkop tye acel, en twero larowu ki nekowu. In aŋa mono ma iŋolo kop i kom lawoti-ni? Koŋ wuwiny lokka, wun ma wuwaco ni, “Tin nyo diki wabicito i gaŋ munyo, wabityeko kunnu mwaka acel kun wacato wil dok wanoŋo magoba,” kun kono pe wuŋeyo lok ma bitimme diki. Kwowu tye niŋniŋ? Wun wubedo calo lupu ma nen pi kare manok mo keken, ci lacen ke woko. Ma ka loko lok kit meno, onoŋo myero wuwacci, “Ka Rwot oye, wabibedo kwo, wabitimo man nyo maca.” Ento wun lunyatte, dok wuwakke bene. Lakit wakke macalo meno ducu rac. Ŋat ma ŋeyo gin ma atir ma myero etim, ce pe otimo, noŋo doŋ otimo bal. Wuwiny ba, wun lulonyo, wukoki, dok wudaŋŋe, pi can ma bipoto i komwu. Lonyowu doŋ otop woko, kadi ki ginarukawu bene nyenye ocamo woko. Jabu ki ryalwu, nyal doŋ omako woko; nyal kikome aye bibedo caden i komwu, dok bicamo komwu woko calo mac. Wun doŋ wutyeko kano lonyo pi kare me agikki. Nen mucara pa lutic ma gitiyo i pottiwu ma wutwonogi kwede woko, tye ka kok; koko pa lukac doŋ owinnye bot Rwot me mony. Wun doŋ wubedo ki jami lonyo ma malo twatwal ki yomcwiny i lobo; wupitte ki cam, kun wucwe giwu, ento nino me nekowu doŋ oromo! Doŋ wuŋol kop i kom dano ma kite atir, en gire pe geŋowu. Kit meno utmegina, wudi cwinywu nio waŋ ma Rwot bidwogo. Wunen koŋ kit ma lapur kuro kwede gin ma pire tek ma cek i lobo; en diyo cwinye nio waŋ ma kot me cwir ki me oro ocwer. Wun bene wudi cwinywu, wucuŋ matek, pien dwogo pa Rwot doŋ cok. Pe wuŋur, utmegina, ŋat acel acel pe oŋur i kom lawote, wek pe giŋol kop i komwu. Nen, Laŋolkop doŋ tye ocuŋ i doggola. Utmegina, lanen me ciro can ki diyo cwiny nen i kom lunebi ma yam guloko i nyiŋ Rwot. Jo ma yam guciro matek, walwoŋogi ni lugumkom. Wutyeko winyo bene kit macalo Yubu yam ociro kwede can, dok wuneno agikki me tic pa Rwot i kome, kit ma Rwot won kica timo kwede ber bot dano. Makatone ducu, utmegina, pe wukwoŋ kwoŋ ki nyiŋ polo, kadi ki nyiŋ lobo, kadi kit kwoŋ mukene ducu; ento ye lokwu ducu myero obed ni, “Iyo,” nyo ni, “Pe,” wek pe giŋol kop i komwu. Ŋat mo i kinwu tye ki can? Myero oleg Lubaŋa. Tye ŋat mo ma tye ki yomcwiny? Myero en ower wer me pako Lubaŋa. Tye ŋat mo i kinwu ma kome lit? Myero en olwoŋ ludoŋo me lwak pa Lubaŋa, wek guleg Lubaŋa pire kun giwire ki moo i nyiŋ Rwot. Lega ma niye tye iye bicaŋo latwo, Rwot bitiŋe malo; ka ce onoŋo yam otimo bal mo, ci gibitime iye kica. Pi meno, wutuc balwu, ŋat acel acel otuc mere bot lawote, dok bene ŋat acel acel myero oleg Lubaŋa pi lawote, wek wucaŋ. Lega pa dano ma kite atir tek, tye ki twero madwoŋ. Elia yam obedo dano ma kite cal kwedwa, yam olego Lubaŋa matek ni kot pe ocwer, omiyo kot pe ocwer i lobo pi mwaka adek ki dwe abicel. Ka dok olego aye, omiyo kot ocako cwer, lobo oceko cam mabup. Utmegina, ka ce dano mo ki i kinwu oŋak woko ki i lok ada, ka ŋat mukene aye doŋ odwoke cen, myero wuŋe ni, ka ŋat ma okwanyo labalo ki i yone mugom odwoke cen, ŋat meno bilaro kwone woko ki i to, dok biumo balle mapol. Waraga man oa ki bot Petero, lakwena pa Yecu Kricito. Bot jo pa Lubaŋa ma guket woko ata, ma gubedo welo i Ponto, Galatia, Kapadokia, Acia ki Bitunia, ma Lubaŋa Won aye muyerogi pi yubbe ma en oŋeyo con, ma Cwiny mere Maleŋ doŋ olonyogi gudoko maleŋ wek guwiny lok pa Yecu Kricito, dok bene wek gikir remone i komgi: Kica ki kuc myero omedde botwu. Gipwo Lubaŋa Won Rwotwa Yecu Kricito! Pien pi kicane madit omiyo ginywalowa odoco wek wabed ki gen makwo pi cer pa Yecu Kricito ki i kin jo muto, ki dok wek wanywak ginaleya ma pe top, ma cilo pe ogudo, ma pe balle, ma gikano piwu i polo. Lubaŋa tye ka gwokowu ki tekke pi niyewu, wek wunoŋ larre ma giyubo, ma binen i kare me agikki piny. Wubed ki yomcwiny pi man, kadi bed kombeddi gwok nyo cwinywu twero cwer pi kare manoknok mo pi kit ma gitye ka omo ki cwinywu i yo mapatpat, wek ginen niyewu, ka ce tye niye me ada. Pien kadi jabu ma gitemo ki mac pe ri nakanaka, ento niyewa pire dit kato jabu, dok bene bikelo botwu pak ki deyo ki woro i kare ma Yecu Kricito binen iye. Kadi pud pe wunene, doŋ wumare. Dok bene kombeddi kadi pe wunene, wuye en kun wubedo ki yomcwiny madit ma pe wacce, dok bene me deyo. Adwoggi me niyewu omiyo wunoŋo larre me tipowu. Lunebi ma yam gutito pi kica ma gibimiyowu yam guyenyo matek, kun gipenyo lok i kom larre man. Gin yam gumito ni giŋe aŋa, nyo kit kare mene, ma Cwiny pa Kricito ma tye i igi tye ka nyuto, i kare ma otito iye pi can ma Kricito biciro, ki pi deyo ma dok bilubo. Yam onoŋo ginyuto botgi ni, kwena ma gimiyogi pe otiko gin kikomgi, ento otiko wun. En aye lok ma kombeddi doŋ jo ma gitito lok me kwena maber gutyeko tito botwu pi Cwiny Maleŋ ma gicwalo ma oa ki i polo; lok ma lumalaika bene guparo me nenone matek twatwal. Pi meno, doŋ wubed ma wuyubbe i tamwu, kun wugokke bene. Wuket genwu ducu i kom kica ma bibino botwu i kare ma Yecu Kricito binen iye. Macalo litino ma luwiny, pe wumi kwowu orwatte ki mitiwu ma yam koŋ wubedo kwede i kare ma onoŋo pud wukwiya piny ca. Kit macalo ŋat ma olwoŋowu leŋ, wun bene wubed jo maleŋ i kitwu ducu; pien coc ma yam gicoyo loko ni, “Wubedo jo maleŋ, pien an aleŋ.” Ŋat ma wulwoŋo ni Wonwu-ni ŋolo kop i kom dano acel acel ma pe leŋŋe, kun lubo kit tic ma ŋat acel acel otiyo; mumiyo myero wubed ki lworo i nyime kare ducu ma pud wutye kany macalo welo. Wun wuŋeyo ni gityeko kokowu ki i kit pa kwarowu ma pe konyo. Pe gikokowu ki gin ma balle woko, macalo ryal nyo jabu, ento gikokowu ki remo pa Kricito me wel madwoŋ ma rom ki latin romo ma bal mo nyo roc mo pe i kome. Lubaŋa onoŋo doŋ otyeko yere wa con, ma pud pe oketo guti me lobo, ka dok onyute woko piwu i kare man, ma en aye kare me agikki. Pire omiyo doŋ wadoko jo ma geno Lubaŋa ma ocero Yecu ki i kin jo muto, ci omiye deyo; en meno gin mumiyo niyewu ki genwu tye i kom Lubaŋa-ni. Doŋ wulonyo cwinywu woko odoko maleŋ pi lubo lok ada, wek wubed ki mar ma goba pe iye macalo utmego; pi meno myero wumarre kekenwu mada ki cwinywu ducucu. Doŋ ginywalowu odoco, pe ki kodi ma balle, ento ki kodi ma pe balle, pi twero me lok pa Lubaŋa, en lok ma tye ki kwo ma ri nakanaka; pien yam gicoyo ni, “Gin ducu ma tye ki kom obedo calo lum, deyone ducu rom ki deyo pa tur lum. Lum ner, ature bene o woko, ento lok pa Rwot ma en oloko bedo matwal.” Lok meno en aye lok me kwena maber ma yam gitito botwu. Pi meno, doŋ wubwot raccwiny ducu, ki kit me goba ducu, ki kit me adwala, nyeko ki kit yet ducu. Wumit cak magili me cwiny, calo litino lukere ma pud ginywalogi nyen, wek omi wudoŋ nio i larre; pien doŋ wutyeko bilo ber pa Rwot. Wubin bote, en got makwo ma yam dano gukwero, ento ki bot Lubaŋa obedo got me wel ma en oyero. Wubin calo godi makwo, wek giged kwedwu ci wudok ot pa Lubaŋa me cwiny, wek wubed ajwagi maleŋ, ka wutyer gitum me cwiny ma Lubaŋa pwoyo, pi Yecu Kricito; pien yam gicoyo ni, “Nen, doŋ aketo got me wel i Cion, ma ayero me got me twok ot, ŋat muye en, lewic pe bimako.” Pi meno, ki tuŋ botwu wun jo muye en, Kricito obedo me wel; ento ki bot jo ma pe guye en, tye macalo yam gicoyo ni, “Got ma lugedo gukwero, en aye odoko got madit me twok ot.” Odoko bene, “Got ma miyo dano yokke ka giwoto, ariya ma miyo dano poto.” Giyokke pien gukwero winyo lok pa Lubaŋa, macalo onoŋo yam giyubo pigi wa con. Ento wun wubedo rok ma giyero, ajwagi pa kabaka, rok maleŋ, jo pa Lubaŋa kikome, wek wutit pi tic me deyo pa ŋat ma olwoŋowu nia ki i piny macol wek wudony i leŋone me aura. Yam onoŋo pe wubedo dano pa Lubaŋa, ento kombeddi doŋ wudoko jone; yam pe gitimo botwu kica, ento kombeddi doŋ gitimo kica botwu. Wun ma amaro, abako doga botwu macalo wun wel, pe wun jo me lobo man, wukwer miti me kom woko ma lwenyo ki tipowu. Wubed ki kit maber i kin jo ma pe giŋeyo Lubaŋa, wek ka ce giyetowu ni wun lutim gin marac, gunen tic maber ma wutiyo, wek bene gumi deyo bot Lubaŋa i nino ma en bibino ka ŋolo kop iye. Pi Rwotwa, myero wumine me bedo i te loc me twero ducu ma tye i kin dano, bot laloc madit, pien en aye ma loyo jo ducu, ki bot luloc ma en ocwalogi pi keto can i kom jo ma timo gin maraco, ki pi pwoyo jo ma timo gin ma atir. Pien Lubaŋa mito ni wuti gin ma atir, wek wumi jo mamiŋ ma gikwiya piny guliŋ woko. Wubed calo jo ma lone kengi, ento pe wuti ki locken meno pi timo gin marac; wubed giwu macalo opii pa Lubaŋa. Wuwor dano ducu. Wumar omegiwu. Wulwor Lubaŋa. Wuwor laloc madit. Wun opii, wumine kenwu i te loc pa Luditowu ki kit woro ducu, pe bot jo ma lukica ki jo mamwol keken, ento bot jo mager bene. Man aye gin ma gipwoyo, ka ce dano ciro arem ma noŋo cwinye tye i kom Lubaŋa, ka giune ma noŋo pe obalo. Gipwoyowu ki ŋo, ka wudiyo cwinwyu ma noŋo gipwodowu pi bal? Ento ka ce wudiyo cwinywu ma noŋo wutye ka neno can pi timo gin maber, meno aye Lubaŋa pwoyo. Pien gilwoŋowu pi gin meno; pien Kricito bene yam oneno can piwu, oweko botwu lanen maber me aluba, wek wulub kore. Bal mo pe ma en otimo, doge bene pe oloko lok goba. I kare ma dano guyete, en pe oyetogi. I kare ma en oneno can, pe oburo dano; ento omine kene bot ŋat ma ŋolo kop atir. Ento en otiŋo balwa i kome kene i kom yatariya, wek wan wato i bal, ka doŋ wabed kwo i kit ma atir. Pi pwod ma gipwode kwede omiyo wucaŋ. Pien yam onoŋo wuŋak wurwenyo woko calo romi, ento kombeddi doŋ wudwogo bot Lakwat ki Lagwok tipowu. Kit meno bene, wun mon wumine me bedo i te loc pa cogwu, wek ka ce co mogo i kingi pe gilubo lok pa Lubaŋa, ci gitwero lokke pi kit pa mongi, kadi bed gin kikomgi pe giloko lok mo ki doggi, ento ka guneno kitwu maleŋ ma nen me woro. Rukwu pe obed ruk ma nen ki woko, macalo kedo yer wic, tweyo tiko jabu, ruko boŋŋi mabeco, ento rukwu myero obed kit me cwiny ma pe nen. Ruk ma pe balle en cwiny mamwol, ma liŋ mot; meno aye welle dit i nyim Lubaŋa. Pien i kare macon, mon maleŋ ma gumoko gengi i kom Lubaŋa yam girukke kit meno, kun bene gimine kengi me bedo i te loc pa coggi, macalo Cara yam winyo lok pa Abraim, kun pake bene ni, “Rwoda.” Wun bene kombeddi doŋ wun litinone, ka wutiyo gin maber, kun pe gin mo miyowu lworo. Kit meno bene, wun co wubed ki monwu ki niaŋ maber, kun wumiyo deyo bot dako macalo lawoti ma kome pe tek, pien gin bene ginywako kica pa Lubaŋa kwedwa ma en aye kelo kwo. Kumeno gin mo pe ma bigeŋo legawu. Me agikkine, wun ducu wubed ki tam acel dok ki cwiny acel. Wumarre calo omego, ma wutye ki kica dok ki cwiny mamwol. Pe wudwok tim marac pi tim marac, nyo yet ki yet; ento ma ka timo meno, wuleg gum pa Lubaŋa obed i komgi, pien gilwoŋowu pi man, wek wunoŋ gum. Pien yam gicoyo ni, “Ŋat ma maro kwo, ki ma mito ni eri pi kare malac kun bedo maber. Ogwok lebe pe olok gin marac, ki doge bene pe olok lok me bwola. Oa woko ki i gin marac, oti gin maber, oyeny kuc dok oti matek wek onoŋ. Pien Rwot neno jo ma kitgi atir, dok ciko ite, winyo legagi; ento dag neno jo ma lutim maraco.” Aŋa mono ma bitimowu marac ka wuketo cwinywu me tiyo gin maber? Ento kadi bed wuneno can pi lubo kit ma atir, ci wutye ki gum. Pe wulworgi, dok cwinywu bene pe opoti, ento wuwor Kricito i cwinywu macalo Rwotwu. Wubed ma wuyubbe kare ducu pi dok i lok ma dano bipenyowu kwede i kom gen ma wutye kwede; ento wudok iye ki mwolo dok ki woro. Wubed ma cwinwyu leŋ, wek lewic omak jo ma yeto kitwu maber i Kricito, ka ginywarowu. Bedo ber ka wuneno can pi timo gin maber, ka ce Lubaŋa mito kit meno, loyo ma wuneno can pi timo gin marac. Pien Kricito bene yam oneno can pi bal, kicel ma otyeko lok ducu; en ŋat ma kite atir oto pi jo ma kitgi pe atir, wek omi ekelwa bot Lubaŋa. Yam gineko kome, ento gicere woko i cwiny. En yam owoto i cwiny ocito otito lok bot tipo pa jo ma tye i mabuc, ma yam con pe guwinyo Lubaŋa, kadi bed Lubaŋa odiyo cwinye i komgi i kare pa Nua ma onoŋo en tye ka payo yeya, ma dano manok ma romo aboro keken aye gularre ki i pii. Gin ma rom ki man ma koni larowu en aye batija; pe me lwoko cilo me kom, ento obedo macalo lega bot Lubaŋa wek wudok jo ma cwinywu leŋ, pi cer pa Yecu Kricito, ma doŋ odok woko i polo, tye i kabedo me deyo i ŋet Lubaŋa tuŋ acuc, kun lumalaika ki twer ki teko ducu gitye i te locce. Kit macalo Kricito yam ociro arem me kom, wun bene myero wurukke ki tam acel kit meno, wek gimiwu tek. Pien ŋat mo ma doŋ ociro arem kom, pe doŋ medde ki bal, wek etyek kare me kwone i lobo man ma pud odoŋ kun pe dok lubo miti maraco ma dano paro, ento cobo gin ma Lubaŋa mito. Myero doŋ wuwek kare ma yam wubedo iye ka tiyo gin ma jo ma pe ŋeyo Lubaŋa gimaro timo oromwu. Yam wulubo kit me tarwaŋ, ki miti me kom, mero, karama me woro cam ki tuko marac, mat, ki woro jogi ma ic dagi. Giuro mada pien kombeddi doŋ pe wuribbe kwedgi i lok man me miti me kom ma pe jukke; meno aye mumiyo ginywarowu. Ento gibidok i lok man bot Lubaŋa ma oyubbe pi ŋolo kop pa jo makwo ki jo muto. Man en gin mumiyo yam gitito lok me kwena maber kadi wa bot jo muto, wek kadi giŋolo kop i komgi macalo giŋolo ki jo ducu, gin gubed kwo i cwiny macalo Lubaŋa. Agikki me jami ducu doŋ cok; pi meno wugwok kitwu, kun wuloyo mitiwu kenwu, wek wumine i lego Lubaŋa. Makato ducu wumok matek i marre kekenwu; pien mar umo lwak bal mapol. Wubed jo ma jolo welo ŋat man ki lawote, kun pe wuŋur bene. Kit macalo ŋat acel acel tye ki motte ma gimiye, wuti kwede pi konnye kekenwu, macalo lugwok-jami mabeco, ma tiyo ki mot me kica ma Lubaŋa omiyo ma kite patpat. Ka ŋat mo tito lok, myero otit macalo lok mua ki bot Lubaŋa; ŋat ma miyo kony oti macalo ŋat ma tiyo ki tek ma Lubaŋa omiyo; wek dano guket deyo i kom Lubaŋa i yo ducu pi Yecu Kricito. Deyo ki twero bedo mere nakanaka. Amen. Luwota ma amaro, pe wuur can ma rom ki mac ma bino i komwu pi temowu, ma kun wutamo ni gwok ca nyo gin mo mapat twatwal mupoto i komwu. Ento wubed ki yomcwiny i lok man ni, wuribbe i can pa Kricito, wek dok wubed ki yomcwiny madit i kare ma deyone binen. Wutye ki gum ka giyetowu pi nyiŋ Kricito, pien noŋo cwiny me deyo, ma en Cwiny pa Lubaŋa, bedo i komwu. Pe myero giket can i kom dano mo i kinwu pi nek, nyo pi kwo, nyo pi timo gin mo marac, nyo pi laro lok i gin pa ŋat mo mukene. Ento ka giketo can i kom dano mo pi bedo ŋat muye Kricito, lewic pe myero omake, ento omi deyo bot Lubaŋa pi lwoŋe ki nyiŋ meno. Pien kare me cako ŋolo kop doŋ oromo, kun cakke ki i jo pa Lubaŋa. Man ka ocakke ki botwa, ci agikki pa jo ma gukwero winyo lok me kwena maber ma oa ki bot Lubaŋa bibedo niŋniŋ? Coc ma yam gicoyo wacci, “Ka ce bedo tek bot dano ma kite atir me larre, doŋ labalo ma pe lworo Lubaŋa binene ka kwene?” Pi meno, jo ma gineno can i yo ma Lubaŋa mito, ber gumine kengi i ciŋ Lacwec ma genne, kun gitiyo gin ma atir. Abako doga bot ludoŋo ma gitye i kinwu, an ma ladit wadiwu ma abedo caden i can pa Kricito, dok bene abiribbe kwedwu i deyone ma binen. Wukwa romi pa Lubaŋa ma tye botwu, kun wunenogi maber, pe pi dic, ento pi mitiwu kenwu, i kit ma Lubaŋa mito, pe pi lim, ento pi mit me cwinywu. Pe wulo dano ma giketo i ciŋwu ki tek, ento wubed lanen maber bot romi; miyo ka Lakwat madit binen, wun wubinoŋo mot, lalukana me deyo ma pe balle. Kit meno, wun awobe bene, wuwiny loc pa ludoŋo. Wun ducu wurukke ki mwolo, ŋat acel acel i nyim lawote, pien “Lubaŋa pyem ki jo ma wakke, ento miyo kica bot jo mamwol.” Wumwolle kenwu i te twero pa Lubaŋa, wek ka kare oromo en otiŋwu malo. Wuket parwu ducu i kome, pien en tamo piwu. Wugwokke, wuki piny, pien lakworwu Catan tye ka wirre macalo labwor ma kok, kun yenyo dano me amwoda. Wucuŋ matek i nyime pi niye kun waŋeyo ni, utmegiwu ma gitye i lobo ducu gitye ka ciro kit can macalo meno. Ka doŋ wuneno can pi kare manok, Lubaŋa lami kica ducu, ma olwoŋowu i Kricito Yecu me nywako deyone ma ri nakanaka, en kikome aye ma bidwokowu kakare, bimiyowu tek, dok bimiyo wucuŋ matek likiŋ. Loc obed bote nakanaka. Amen. Acoyo botwu waraga man manok kun amiyo i ciŋ Silvano, ma aŋeyo ni ominwa ma genne, pi cuko cwinywu kunu aloko macalo caden ni, man en kica pa Lubaŋa ada; wucuŋ iye matek. Jo ducu muye Kricito ma gitye i Babilon ma Lubaŋa oyerogi kacel kwedwu gumotowu, ki woda Marako bene omotowu. Wumotte kekenwu ki mot me mar. Kuc obed botwu wun ducu ma wutye i Kricito. Waraga man oa ki bot Cimon Petero, latic dok lakwena pa Yecu Kricito. Bot wun jo ma wunoŋo niye ma pire tek ma rom ki mewa pi kit ma atir pa Lubaŋawa ma en Lalarwa Yecu Kricito: Kica ki kuc myero onya botwu pi ŋeyo Lubaŋa ki Rwotwa Yecu Kricito. Pi tekone Lubaŋa omiyowa jami ducu ma kelo kwo ki cwiny me lworo en, wek waŋe en mulwoŋowa i deyone ki ditte kikome. Pi deyo ki ditte en omiyowa cikke madoŋo twatwal ki me wel madwoŋ, wek ka walimo, wabwot woko ki i balle me kit pa dano ma tye i lobo pi miti marac, ka wek doŋ waribbe i kit pa Lubaŋa. Pi lok man, wucukke matek me medo kit maber i kom niyewu; ki bene wumed ŋec i kom kit maber; i kom ŋecwu wumed iye gwokke kenwu, ki i kom gwokke kenwu wumed iye diyo cwiny; i kom diyo cwiny wumed iye cwiny me lworo Lubaŋa; i kom cwiny me lworo Lubaŋa wumed iye mar me omego; ki i kom mar me omego wumed iye mar. Pien ka wutye ki gin magi ducu, ma wutye kwede bene mabup, ci bimiyo wubedo jo ma ŋeyo Rwotwa Yecu Kricito i yo ma konyo, dok ma wunyak nyig mabeco. Pien dano ma pe ki gin magi noŋo en latowaŋ, pe neno gin mo ki ka mabor, dok noŋo wiye doŋ owil woko ni yam gilwoke woko i kom balle macon. Pi meno, utmegina, myero wutemme me medde wek wumok i lwoŋowu matek, ki i yer ma Lubaŋa oyerowu kwde; pien ka wutimo kit meno, pe wubipoto kadi ki acel. Meno bimiyo yo yabbe botwu malac me donyo i ker ma ri nakanaka pa Rwotwa ma en Lalarwa Yecu Kricito. Meno en gin mumiyo kare ducu amito poyo wiwu i lok magi, kadi bed wuŋeyogi, dok bene wumako matek likiŋ lok ada ma gityeko kelo botwu. Atamo ni ber twatwal an me cuko cwinywu kun apoyo wiwu, ma pud atye ki kom me lobo man; pien aŋeyo ni, kare me weko koma doŋ cok, kit macalo Rwotwa Yecu Kricito yam onyutta kwede. Dok abiketo tek, wek wubed ki gin ma poyo wiwu i lok magi kare ducu, ka doŋ ato woko. Pien i kare ma yam watittiwu pi teko pa Rwotwa Yecu Kricito, ki pi dwogone, onoŋo pe walubo lok ododo mogo ma wan wayubo ayuba ki ryekowa, ento wan yam waneno deyo me ditte ki waŋwa. Yam waneno ka en olimo woro ki deyo ki bot Lubaŋa Won, i kare ma dwan oa ki bot Won Deyo Madit, obino botwa kun waco ni, “Man aye Woda ma amaro, ma cwinya yom i kome.” Dwan meno yam wawinyo oa ki i polo ada, pien onoŋo wan watye kacel kwede kunnu i wi got maleŋ. Meno doŋ omoko piwa lok ma yam lunebi guloko. Wun bene myero wuket cwinywu i lokgi, pien lokgi-ni bedo macalo tara ma lyel i latwok bene oryeny, omenyo cwinywu. Mukwoŋo myero wuŋe man ni, pe tye lok mo ma lunebi gucoyo ma ŋat mo twero gonyo pire kene; pien pe tye lok pa lanebi mo ma yam obino pi mit pa dano, ento Cwiny Maleŋ aye mumiyo dano guloko lok ma oa ki bot Lubaŋa. Ento lunebi ma lugoba bene yam gunen i kin dano, kit meno bene lupwony ma lugoba gibinen i kinwu. Gibikelo pwony mogo mapat i muŋ ma rwenyo dano, kun gikwero Laditgi woko ma owilogi, ento meno bimiyo gin kikomgi gibirwenyo woko oyotoyot. Jo mapol bilubo kitgi me timo tim coco, ci bimiyo dano cayo yo me ada pigi. Pi worogi me lim, miyo gibinoŋo lim ki botwu pi lokgi me goba ma gin guyubo ayuba. Ento lok ma yam giŋolo i komgi doŋ gitye ka yubone, ki to ma myero opot i komgi bene pe onino. Pien Lubaŋa yam pe oweko lumalaika ka gubalo, ento obologi woko piny i bur lyel, ocwalogi i bur ka macol, wek gigwokgi kunnu nio ka kare me ŋolo kop doŋ oromo. En yam pe oweko lobo i kare macon, ento ogwoko Nua keken, latit lok me kit ma atir, kacel ki jo mukene abiro, i kare ma yam en ocwalo pii aluka wek omwony lobo pa jo ma pe gilworo Lubaŋa woko. Owaŋo gaŋigi Codom ki Gomora woko ducu gudoko buru, kun oŋolo kop me tyekogi woko, ci omiyo gubedo lanen bot jo ma pe bilworo Lubaŋa i kare me anyim. Ento Lubaŋa olaro Lot, dano ma kite atir, ma yam cwinye ocwer twatwal pi tim kwele pa jo maraco. Pien tim maraco ma dano ma kite atir-ru obedo ka nenone ki ka winyone nino ki nino, i kare ma en obedo botgi, omiye waŋcwiny madwoŋ twatwal. Kit meno Rwot ŋeyo laro dano ma gilworo Lubaŋa ki i ayelayela ma giomo kwede cwinygi dok ŋeyo gwoko jo ma kitgi pe atir ka ma giketo iye can i komgi nio ka nino me ŋolo kop oromo, makatone gin jo ma lubo mitigi me kom ma cidogi woko, kun gicayo wegi twero. Cwinygi tek, gicerre woko acera gigi, pe bene gilworo yeto wegi deyo. Ento kadi bed lumalaika giloyogi ki tek ki twero, pe giyetogi ka gukelo lok i komgi i nyim Rwot. Ento jo-nu gical ki lee ma pe ryek, dok ma lubo kit ma giketogi kwede, ma ginywalogi me amaka ki me aneka; gicayo lok ma gikwiya. Gibinekogi woko calo lee, kun gitimogi marac pi gin marac ma gutimo. Cwinygi yom i karama maraco ma gicamo i dyeceŋ. Gikelo lewic ki bal ka guribbe kwedwu i camo karama, pien gimito megi gat me yomcwiny marac keken. Waŋgi yenyo mon ma myero gitim kwedgi abor, pe giywe ki yenyo yo me timo bal. Giciko owic me mako jo ma cwinygi wirre atata. Cwinygi doŋ opwonnye woko i yo me woro me lim. Gin doŋ jo ma giceno! Gubwoto yo ma atir, gurwenyo woko ata. Gulubo yo pa Balaam wod pa Beor, ma yam maro lim ma onoŋo pi timo gin marac, ento yam gijuke pi turo cik. Kana ma pe loko yam oloko ki dwan pa dano, ci ojuko apoya pa lanebi meno woko cut. Magi gin waŋ it ma pii pe iye, lupu ma yamo kot tero. Gityeko gwoko kabedo macol licuc pigi. Giloko lok mogo maditodito me wakke ma tere pe, kun gibito ki dano ma pud gibwot abwota ki i kin jo ma kitgi obedo atata, ka giterogi i timo abor-gu kun gilubo mit me kom. Gin gicikke me miyo jo meno gulone kengi, kun gin kikomgi gibedo opii pa gin ma balogi; pien ka gin mo oloyo kwo pa dano mo, en doŋ noŋo odoko opii pa gin meno. Ka ce dano doŋ gubwot woko ki i cilo me bal me lobo pi ŋeyo Rwotwa ma en Lalarwa Yecu Kricito, ka dok pud gumoko i kom bal meno ci loyogi woko matwal, bimiyo gibedo marac lacenne makato ma yam con. Onoŋo twero bedo ber ka kono gin pe guŋeyo yo me kit ma atir, kato ma guŋeyo ka dok giweko cik maleŋ ma gimiyogi woko. Man otimme i komgi calo lok ma carolok me ada oloko ni, “Gwok lokke dok ka naŋo ŋokke,” ki dok ni, “Opego ma gilwoko kome, lokke dok ka nywanne i coto.” Lurema, man doŋ waraga me aryo ma acoyo botwu. I gin aryo ducu acuko iye cwinywu wek wutam tam ma atir, kun apoyo wiwu bene, wek wupo i kom lok ma lunebi maleŋ yam guloko con, ki i kom cik pa Rwot ma en lalar, ma lukwenawu yam gukelo botwu. Mukwoŋo myero wuniaŋ man ni, i kare me agikki jo ma luŋala gibituc ki ŋalagi, kun gilubo mitigi kengi, kun gipenyo peny bene ni, “Cikke me dwogone ma gitito pire-ni tye kwene? Pien cakke ma kwarowa guto woko, jami ducu tye i kit ma yam gitye kwede i acakki keto lobo.” Gimiyo wigi wil woko akaka i lok man ni, polo yam onoŋo obedo tye con, ki lobo bene ma giketo ki pii mua ki i pii, pi lok ma lubaŋa oloko. Pii bene aye ma yam otyeko lobo me kare maca ka pii aluka ocorre omwonyo woko. Pi lok pa Lubaŋa acel-lu bene, polo ki lobo me kare man doŋ gikano pi kuro mac; ma gitye ka gwokone nio ka nino me ŋolo kop ki tyeko dano ma pe gilworo Lubaŋa oromo. Ento pe wiwu owil, lurema, i lok acel-li, ni, ki bot Rwot nino acel rom ki mwaka alip acel, mwaka alip bene rom ki nino acel. Rwot pe galle agala ka cobo cikkene kit macalo jo mogo gitamo kwede, ento en pud tye ka diyo cwinye i komwu, pien en pe mito ni ŋat mo orweny woko matwal, ento mito ni jo ducu guo i niŋut. Ento nino pa Rwot bibino macalo lakwo, ka doŋ polo birwenyo woko ki mor madwoŋ, lakalatwe bileny woko i mac, lobo ki jami ducu ma tye iye biwaŋ woko. Kit macalo jami magi ducu bitum woko kit meno-ni, myero wubed jo ma cal niŋniŋ, kun wulubo kit kwo maleŋ ki me woro lubaŋa? Myero wukur nino pa Lubaŋa, wuket cwinywu iye wek ninone oo oyotoyot. I nino meno polo bilyel, leny woko, ki lakalatwe bene bileny woko i mac. Ento macalo en yam ociko, watye ka kuro polo manyen ki lobo manyen, ka ma kit ma atir bedo iye. Pi meno, lurema, ka wutye ka kuro man, wuket tek wek Lubaŋa pe onoŋ roc mo nyo bal mo i komwu, ento onoŋ wutye ki kuc. Wutam ni, diyo cwiny pa Rwot aye larrewa ennu. Ominwa Paulo ma wamaro ocoyo botwu bene kit meno, pi ryeko ma gimiye. kun loko lok pi lok man macalo en loko pire i waragane ducu. I waragane tye lok mogo ma niaŋ iye tek, ma jo ma pe gupwonnye, ki jo ma pe gucuŋ matek, gidwalo tere woko, macalo gutimo bene ki coc mukene ma yam gicoyo, ma omiyo gin kikomgi gurwenyo woko matwal. Pi meno, lurema, kit ma doŋ onoŋo wuŋeyo man con, wugwokke pe wuwek jo ma pe giworo cik mo gubwolwu, dok pe guŋakwu woko i tamwu, miyo wupoto woko ki ka ma wucuŋ iye matek. Wumedde ki doŋo i kica pa Rwotwa, ma en Lalarwa Yecu Kricito, kun wumedde ka ŋeye bene. Deyo obed bote kombeddi ki nakanaka. Amen. Wan wacoyo botwu lok i kom gin mubedo tye nia i acakki piny, ma wan kikomwa wawinyo, dok bene waneno ki waŋwa. Wanene ada, dok wamulo kome ki ciŋwa, en lok me kwo. Kwo meno yam onen woko ka maleŋ, wan waneno. Wan doŋ kombeddi wabedo cadenne, kun watito botwu lok me kwo ma pe tum ma yam obedo bot Won, ka doŋ onen woko botwa. Gin ma wan waneno ki ma wawinyo en aye ma witito botwu bene, wek omi wuribbe kwedwa. Doŋ i ribbewa-ni waribbe kacel ki Won ki Wode Yecu Kricito. Wacoyo lok man wek yomcwinywa ocobbe maber. Man aye lok me kwena ma yam wawinyo ki bote, ma watye ka titone botwu, ni, Lubaŋa en leŋo, dok i en pe tye ka mo macol kadi ki acel. Ka wawaco ni waribbe kwede kun pud wawoto ka macol, wan lugoba, timwa noŋo ada pe iye. Ento ka wawoto ka maleŋ, macalo en bene tye ka maleŋ, noŋo waribbe ŋat man ki lawote, dok remo pa Wode Yecu Kricito bene lwoko bal ducu woko ki i komwa. Ka ce wawaco ni wape ki bal, meno noŋo wabwolle abwola kenwa, lok ada noŋo pe i iwa. Ka watuco balwa, en genne dok kite atir, biweko balwa, dok bilwoko tim maraco ma tye i komwa ducu. Ka wawaco ni pe wabalo, ci wamiyo Lubaŋa doko lagoba, lokke bene noŋo pe i iwa. Litinona, acoyo waraga man botwu wek pe wupot i bal; ento ka ŋat mo obalo, watye ki lakony ma cuŋ piwa bot Lubaŋa Won, en Yecu Kricito ma kite atir. Dok en kikome bene obedo gitum pi kwanyo balwa, pe balwa keken ento kadi wa bal pa jo ma i wi lobo ducu. Gin ma miyo waniaŋ maber ni waŋeye en aye ni, wan wagwoko cikke. Doŋ dano ma waco ni eŋeye, ma pe omako cikke, noŋo lagoba, ada pe i iye. Ento ŋat ma mako lokke, adada noŋo mar pa dano-nu i kom Lubaŋa tye muromo. Pi lok man watwero niaŋ ada ni watye i en: ŋat ma waco ni ebedo i en myero olub kit kwo acel ma yam Yecu olubo. Lurema, an pe atye ka coyo botwu cik mo manyen, ento cik macon ma yam watye kwede wa con nia i acakki piny. Cik macon meno en aye lok ma doŋ wutyeko winyone ma gitito botwu. Kadi bed kumeno, atye ka coyo botwu cik manyen; meno tye ada ki tuŋ bot Kricito ki tuŋ botwu bene, pien colpiny doŋ tye ka ke woko, ki ceŋ me ada doŋ tye ka ryeny. Dano ma waco ni etye i leŋo kun dag ominne, noŋo pud tye i colpiny aye. Ŋat ma maro ominne bedo i leŋo, ma pe iye gin mo ma miyo dano poto i bal. Ento ŋat ma dag ominnie tye i colpiny, dok bene noŋo tye ka wot ka macol, kun pe ŋeyo ka ma myero ecit iye, pien colpiny noŋo oumo waŋe woko. Acoyo waraga man botwu, wun litino ma pud wutino, pien balwu doŋ giweko woko pi nyiŋe. Acoyo botwu bene wun wego, pien wuŋeyo ŋat ma yam tye con nia i acakki piny. Acoyo botwu wun awobe, pien wuloyo Larac woko. Acoyo botwu wun litino, pien wuŋeyo Won. Acoyo botwu wun wego, pien wuŋeyo ŋat ma yam tye nia i acakki piny. Acoyo botwu wun awobe pien wutek, lok pa Lubaŋa bedo i iwu, dok bene doŋ wuloyo Larac woko. Pe wumar lobo, kadi gin ma tye i lobo. Ka dano mo maro lobo, noŋo mar pa Lubaŋa pe i iye. Pien gin ducu ma tye i lobo, macalo miti me komwa ma ginywalowa kwede, ki miti marac pi gin ma waneno ki waŋwa, ki dok wakke ki jami ma watye kwede i kwowa, magi ducu pe gua ki bot Won, ento gucakke i lobo kany. Lobo tum woko ki mitine ducu; ento ŋat ma tiyo gin ma Lubaŋa mito ri nakanaka. Litinona, man aye doŋ kare me agikki. Yam gitito botwu ni, lakwor pa Kricito bibino, ento kombeddi lukwor pa Kricito doŋ gubino woko mapol ata; en meno gin mumiyo waŋeyo ni, man doŋ kare me agikki. Gin gua woko ki botwa, pien onoŋo yam gin pe gubedo dano ma mewa; kono yam gubedo dano ma mewa, kono gumedde ki bedo botwa. Ento gin gua woko ki botwa wek onen ka maleŋ ni gin ducu pe gubedo dano ma mewa. Ento wun, Ŋat Maleŋ doŋ owirowu woko ki moo, wun ducu doŋ wutye ki ŋec. Pe acoyo botwu waraga man pien ni wukwiya lok me ada, ento pien wuŋeyo, dok wuniaŋ bene ni, pe tye goba mo ma oa i lok ada. Doŋ aŋa ma lagoba? Ŋat ma lagoba en aye dano ma kwero woko ni Yecu pe Kricito ma Lubaŋa oyero. Meno en aye lakwor pa Kricito, en noŋo okwero Won ki Wod. Pe tye ŋat mo ma kwero Wod ma dok tye gin ki Won. Dano ma oye Wod, noŋo tye ki Won bene. Wuwek gin ma wuwinyo nia con obed i iwu. Ka inen gin ma yam wuwinyo wa con bedo i iwu, wun bene wubibedo i Wod ki i Won. Man gin ma en ociko me miyowa, en aye kwo ma pe tum. Man acoyo botwu pi jo ma twero rwenyowu. Ento wun, moo me Cwiny Maleŋ ma yam Kricito owirowu kwede bedo doŋ i iwu, miyo pe mitte ni ŋat mo opwonywu; pien moo ma yam giwirowu kwede pwonyowu i lok ducu. En gin me ada, pe goba; macalo yam en owonyowu, wubed i en. Kombeddi doŋ ba, litinona, wubed i iye, wek ka en dok binen, wabed ki tekcwiny, ma pe lewic makowa i nyime ka odwogo. Ka ce wuŋeyo ni en kite atir, ci myero wuniaŋ ada ni, ŋat acel acel ma tiyo gin ma tye atir noŋo Lubaŋa munywalo. Koŋ wunen kit mar madit ma Won omiyowa, ni gilwoŋwa ni wan litino pa Lubaŋa; me atir, watye kumeno. Gin mumiyo lobo pe ŋeyowa, pien onoŋo yam pe oŋeye. Lurema, kombeddi doŋ wan litino pa Lubaŋa; kit ma wabibedo kwede peya onen, ento waŋeyo ni ka en binen, wan bene wabinen calo en, pien wabinene kit ma en tye kwede. Doŋ ŋat acel acel ma tye ki gen man ma omoko i kom Kricito, lonnye kene bedo maleŋ, macalo Kricito bene leŋ. Dano acel acel ma timo bal noŋo turo cik, bal aye turo cik. Wuŋeyo ni Kricito yam onen wek ekwany bal woko; i en kikome bal mo pe iye. Ŋat mo ma bedo i en pe timo bal; ŋat mo ma timo bal noŋo pe onene, dok bene noŋo pe oŋeye. Litinona, pe wuwek ŋat mo obwolwu. Ŋat ma timo gin ma tye atir, noŋo kite atir, macalo Kricito bene kite atir. Ŋat ma timo bal, meno noŋo dano pa Catan; pien Catan obedo ka timo bal nia i acakki piny. Gin mumiyo Wod pa Lubaŋa yam onen, en aye pi turo tic pa Catan woko. Pe tye ŋat mo ma Lubaŋa onywalo ma timo bal, pien kodi pa Lubaŋa bedo i iye; en pe twero balo, pien noŋo Lubaŋa munywale. Man aye gin ma bimiyo gineno jo ma gin litino pa Lubaŋa ki jo ma gin litino pa Catan: ŋat ma pe timo gin ma tye atir pe latin pa Lubaŋa, kadi wa ŋat ma pe maro ominne bene. Pien man aye lok ma wuwinyo nia i acakki, ni myero wamarre kekenwa. Pe wabed calo Kain ma yam obedo latin pa Larac, ci oneko ominne woko. Gin aŋo mumiyo oneke? Pien gin ma en otiyo ducu obedo rac, ento gin ma ominne timo onoŋo tye atir. Utmegina, pe wubed ki ur ka lobo kwerowu. Waŋeyo ni wakato ki i to, wao doŋ i kwo, pien wamaro utmegiwa. Dano ma pe ki mar, noŋo pud odoŋ i to. Ŋat ma dag ominne meno lanek, dok bene wuŋeyo ni, pe tye lanek mo ma kwo ma pe tum bedo i iye. Man doŋ miyo waniaŋ i kom mar, pien Kricito omiyo kwone piwa. Wan bene myero wami kwowa pi utmegiwa. Ka ŋat mo tye ki jami me lobo man madwoŋ, ce oneno ominne ma piny oloyo, ento okwero miye kony, ci mar pa Lubaŋa bedo i iye niŋniŋ? Litinona, pe wabedu ki mar i lok ma waloko ki dogwa keken, ento wamar dano ki mar me ada ma nen i tic. Man bimiyo waŋeyo ni wan jo ma tye ki ada; ci bimiyo cwinywa kwe i nyime; ka ce cwinywa ŋolo kop loyowa, ci waŋeyo ni Lubaŋa dit kato cwinywa woko, dok ŋeyo lok ducu. Lurema, ka cwinywa pe ŋolo ni kop oloyowa wabedo ki tekcwiny i nyim Lubaŋa; dok bene wanoŋo gin mo keken ma walege pire, pien wagwoko cikke dok watiyo gin ma yomo cwinye. Doŋ cikke en ene ni, myero waye nyiŋ Wode Yecu Kricito, dok wamarre kekenwa, macalo en yam ocikowa. Ŋat ma gwoko cik pa Lubaŋa bedo i Lubaŋa, Lubaŋa bene bedo i iye. Gin ma miyo waŋeyo ni en bedo i iwa, pi Cwiny Maleŋ ma en omiyo botwa. Lurema, pe wuye kit cwiny ducu, ento koŋ wutemgi, wunen ka gin cwiny mua ki bot Lubaŋa, pien lunebi mapol ma lugoba doŋ guket gucito woko i lobo. Wubiŋeyo Cwiny pa Lubaŋa kit man: cwiny ducu ma tuco ni Yecu Kricito yam obino kun tye ki kom dano, meno Cwiny pa Lubaŋa; ento cwiny ma pe tuco Yecu kit meno, pe oa ki bot Lubaŋa. Meno cwiny pa lakwor pa Kricito ma yam wuwinyo pire, ni tye ka bino, kombeddi doŋ tye i lobo. Litinona, wun litino pa Lubaŋa, doŋ wutyeko loyogi woko; pien ŋat ma tye i iwu-ni dit kato ŋat ma tye i lobo. Jo meno gin dano me lobo, en mumiyo gin ma giloko obedo me lobo, lobo bene winyogi. Wan jo pa Lubaŋa; ŋat ma ŋeyo Lubaŋa winyo lokwa, ento ŋat ma pe en dano pa Lubaŋa pe winyo lokwa. Meno aye gin ma miyo waŋeyo poko cwiny me ada ki cwiny me goba. Lurema, myero wamarre kekenwa, pien mar a ki bot Lubaŋa, ŋat ma maro noŋo en latin pa Lubaŋa, dok ŋeyo Lubaŋa. Ŋat ma pe ki mar, noŋo en pe ŋeyo Lubaŋa, pien Lubaŋa aye mar. Gin ma yam onyuto marre botwa en ene, Lubaŋa ocwalo Wode acel keken i lobo wek omi wabed kwo pire. Man en aye mar, pe ni wan wamaro Lubaŋa, ento en aye omarowa, ci ocwalo Wode me bedo gin me kwanyo bal woko ki i komwa. Lurema, ka Lubaŋa doŋ omarowa kit man, wan bene myero wamarre kekenwa. Pe tye dano mo ma yam oneno Lubaŋa; ka wamarre kekenwa, ci Lubaŋa bedo i iwa, marre bene bedo muteggi i iwa. Gin ma miyo waŋeyo ni wabedo i iye, ki en i iwa, pien omiyowa Cwiny mere. Wan doŋ bene waneno, dok wamiyo caden ni, Lubaŋa Won ocwalo Wode me bedo Lalar me lobo. Dano ma tuco ni Yecu en Wod pa Lubaŋa, Lubaŋa bedo i iye, ki en bene bedo i i Lubaŋa. Man omiyo waŋeyo mar ma Lubaŋa tye kwede i komwa, dok waye ni marowa. Lubaŋa aye mar, ŋat ma bedo i mar bedo i Lubaŋa, Lubaŋa bene bedo i iye. Ka marwa doŋ oteggi, wabibedo ki tekcwiny i nino me ŋolo kop, pien kit macalo Yecu obedo kwede, meno bene en aye kit macalo wan watye kwede i lobo man. Lworo mo pe i mar, ento mar ka doŋ oteggi ryemo lworo woko; pien lworo bino pi kuro keto can, doŋ dano ma lwor, noŋo marre pud peya oteggi. Gin mumiyo wabedo ki mar, pien en okwoŋo marowa. Ka ce dano mo waco ni emaro Lubaŋa, kun dag ominne, noŋo en lagoba; pien ŋat ma pe maro ominne ma en oneno kome, pe twero maro Lubaŋa ma pe oneno kome. Cik man wanoŋo ki bote ni, dano ma maro Lubaŋa myero omar ominne bene. Dano acel acel ma ye ni Yecu en Kricito ma Lubaŋa oyero, dano-nu latin pa Lubaŋa, dok dano mo ma maro ŋat ma onywalo latin, maro latinne bene. Ka wamaro Lubaŋa, ma walubo cikke bene, meno miyo waŋeyo ni wamaro litino pa Lubaŋa. Pien maro Lubaŋa en aye gwoko cikke. Dok cikke pe nurowa, pien dano acel acel ma Lubaŋa onywalo loyo lobo. Gin ma waloyo kwede lobo en aye niyewa. Aŋa mono ma loyo lobo? Pe ŋat ma ye ni, Yecu aye Wod pa Lubaŋa? Yecu Kricito aye ŋat ma yam obino ki pii ki remo. Pe obino ki pii keken, ento ki pii kacel ki remo bene. Cwiny Maleŋ tye macalo cadenne, pien Cwiny aye ada. Doŋ tye caden adek: Cwiny Maleŋ, pii ki remo; gin adek-ki ducu lok me cadengi orwatte. Wan waye lok me caden ma dano gimiyo, ento caden pa Lubaŋa dit kato megi woko Man aye lok me caden pa Lubaŋa, ma en omiyo i kom Wode. Doŋ ŋat ma ye Wod pa Lubaŋa tye ki caden i iye kene. Ŋat ma pe ye Lubaŋa, noŋo omiyo Lubaŋa odoko lagoba, pien noŋo en pe oye lok me caden ma Lubaŋa omiyo i kom Wode. Caden meno en ene ni, Lubaŋa doŋ omiyowa kwo ma pe tum, dok kwo meno tye i Wode. Ŋat ma tye ki Wod tye ki kwo, ŋat ma pe ki Wod pa Lubaŋa, pe tye ki kwo. Acoyo lok man botwu, wun jo muye nyiŋ Wod pa Lubaŋa, wek wuŋe ni wutye doŋ ki kwo ma pe tum. Gin ma miyo wabedo ki gen i kome en ene ni, ka walegge gin mo kun walubo gin ma en mito, ci en winyo legawa. Doŋ ka waŋeyo ni en winyo legawa, waŋeyo ni doŋ watyeko noŋo gin ma walego bote. Ka ce dano neno ominne tye ka timo bal mo ma pe tero dano i to, en bilego Lubaŋa, ci Lubaŋa bimiye kwo pi jo-nu ma balgi pe tero dano i to-ni. Tye bal ma tero dano i to; pe awaco ni myero waleg Lubaŋa pi kodi bal macalo meno. Gin marac ducu ma dano timo, meno doŋ bal, ento tye bal mogo ma pe tero dano i to. Waŋeyo ni dano ma Lubaŋa onywalo pe dok bedo ka timo bal, ento Wod pa Lubaŋa gwoke maber, miyo Larac pe gude. Waŋeyo ni wan litino pa Lubaŋa, dok waŋeyo ni lobo ducu tye i te loc pa Larac. Dok waŋeyo ni Wod pa Lubaŋa doŋ obino, ci omiyowa niaŋ me ŋeyo ŋat ma en aye ada. Dok wan wabedo i i ŋat ma tye ada, pien wabedo i i Wode, en aye Yecu Kricito. Man aye Lubaŋa me ada, dok man en kwo ma pe tum. Litinona, wugwokke, pe wuwor jogi. Waraga man oa ki bot ladit. Bot dako ma giyero ki litinone ma amaro i ada, pe an keken ento kadi wa jo ducu ma giŋeyo lok me ada, pi lok ada ma bedo i cwinywa, dok bene bibedo kwedwa nakanaka: Gum ki kica ki kuc ma a ki bot Lubaŋa Won, ki bot Yecu Kricito ma Wode bibedo kwedwa i ada ki mar. Cwinya yom twatwal me noŋo ni litinoni mogo gilubo lok me ada i kit ma yam Lubaŋa Won ocikowa kwede. Kombeddi doŋ alegi in dako, pe macalo dok atye ka coyo boti cik manyen ento pi en ma yam watye kwede con ca nia wa i acakki, ni wan myero wamarre kekenwa. Man aye mar, ni myero walub cik pa Lubaŋa; man aye cikke, macalo iwinyo nia i acakki, ni myero wabed ki mar. Pien lubwol dano mapol gitye guket woko i lobo, jo ma pe tuco ni Yecu Kricito obino kun tye ki kom dano; kodi dano-nu labwol dano, dok bene lakwor pa Kricito. Wunenne kenwu wek gin ma doŋ wutyeko tic pire pe orweny woko ki botwu, wek wunoŋ mucarawu ducu. Ŋat mo ma pe moko i pwony pa Kricito, ento kato mere akata anyim, dano macalo meno pe tye ki Lubaŋa; ŋat ma moko i kom pwony pa Kricito tye ki gin aryo ducu, Won ki Wod. Ka ŋat mo obino botwu ma pe okelo pwony man, pe wujole i ot, pe wumote bene; pien ŋat ma omote noŋo oribbe kwede i ticce marac. Kadi bed atye ki lok mapol ma myero aco pire botwu, atamo ni myero pe ati ki karatac ki vino, ento atye ki gen me bino ka nenowu, ci doŋ abilok kwedwu waŋ ki waŋ wek yomcwinywa ocobbe maber. Litino pa lameru ma giyero gumoti. Waraga man oa ki bot ladit. Bot larema Gayo ma amaro i ada. Larema ma amaro, alego Lubaŋa omi ibed maber i gin ducu, dok omi komi obed mayot. Aŋeyo ni itye maber i cwinyi. Abedo ki yomcwiny mada i kare ma utmego mogo gubino kany, ma gumiyo caden ma mako kit me ada, kit macalo in giri ilubo lok ada. Pe tye gin mo ma dok miya abedo ki yomcwiny madit makato me winyo ni litinona gitye ka lubo lok ada. Larema ma amaro, in lagen mada i ticci ma itiyo pi utmegiwa, makatone bot welo ma pe iŋeyogi, ma gumiyo caden i kom marri i nyim lwak dano ma guye Kricito. Tim ber ikonygi i kit ma myero, i wotgi i tic pa Lubaŋa. Pien gucako wotgi pi nyiŋ Kricito, pe gugamo gin mo ki bot jo ma pe guye Lubaŋa. Pi meno, myero wakonyu kodi jo macalo meno, wek omi wan bene wadok lutic wadigi i tito lok me ada. Doŋ atyeko coyo lok mogo bot lwak dano muye Kricito, ento Diotrepe, ma mito kette kene me bedo latel wigi, pe oye twerona. Mumiyo ka abino, ci abipoyo wigi i gin ma en obedo ka tiyone, kun coko lok mogo maraco i koma. Pe meno keken en kwero bene jolo utmegiwa, kun bene geŋo jo ma mito jologi woko, dok ryemogi woko ki i kin lwak dano muye Kricito Larema ma amaro, pe ilub gin marac, lub gin maber. Ŋat ma timo gin maber en dano pa Lubaŋa; ento ŋat ma timo gin marac pud peya oneno Lubaŋa. Jo ducu gumiyo caden maber i kom Demetrio, kadi lok ada obedo caden pire; an bene amiyo mera kumeno, in bene iŋeyo ni caden ma amiyo obedo ada. Atye ki lok mapol ma myero aco boti, ento pe amito ni aco ki kalam ki vino. Atye ki gen me neni oyot, ka wek doŋ wabilok waŋ ki waŋ. Kuc obed boti. Luremwa gumoti. Mot luremwa, mot ŋat acel acel ki nyiŋe Waraga man oa ki bot Juda ma latic pa Yecu Kricito, ma omin Yakobo. Bot jo ma Lubaŋa olwoŋogi ma gibedo i mar pa Lubaŋa Won, ma Yecu Kricito tye ka gwokogi. Kica, kuc ki mar myero omedde botwu. Lurema, onoŋo atemo ki tekka ducu me coyo botwu waraga pi lok i kom larre ma wan ducu waribbe iye, ci aneno ni myero aco acuk kwede cwinywu wek wulweny matek pi niye ma yam doŋ gimiyo bot jo pa Lubaŋa kicel ma doŋ otyeko lok ducu. Pien jo mogo ma pe gilworo Lubaŋa gilibbe aliba me donyo i kinwa, gin jo ma kop ma yam giŋolo i komgi doŋ ginyuto woko con i coc ma yam gicoyo. Gin guloko kica ma Lubaŋa omiyowa odoko tim me coco, gukwero Laditwa acel keken-ni ma en aye Rwotwa Yecu Kricito. Wun jo ma yam doŋ gimiyo wuŋeyo lok man con, koŋ amito dok apo wiwu ni, Rwot ma yam olaro jo Icrael ki i lobo Ejipt, lacenne en dok otyeko jo ma pe guye en woko. Lumalaika ma yam pe gigwoko ka locgi ma gimiyo botgi, ento guweko kabedogi woko, en ogwokogi ka macol ki nyor ma ri nakanaka, nio wa i kare me ŋolo kop i nino madit; kit macalo yam jo Codom ki Gomora ki gaŋi madoŋo ma i ŋetgi, gudonyo i tim me coco ki par maraco ma pe obedo me anywalli, macalo gin, ci giŋolo botgi can me mac ma pe to, gin mubedo macalo lanen bot jo ducu. Nen kadi kit meno, jo-nu bene i kit acel-lu, i lek ma gin leko, gubalo komgi woko, gukwero ker pa Lubaŋa woko, dok guyeto wegi deyo-gu bene ayeta. Ento i kare ma Mikael, lamalaika madit, yam olwenyo ki Catan kun pyem kwede pi kom Moses, en yam pe oŋwette pi ŋolo kop mo me yet, ento oloko ni, “Rwot myero ojuki.” Ento jo magi giyeto gin ma pe giniaŋ iye, ento gin ma giŋeyo pi lubo kit ma giketogi kwede, macalo lee ma pe ryek, tye ka tyekogi woko. Gibineno can ma rom man! Pien gilubo kit pa Kain, giketo tek mada i tam mogo ma pe atir pi mito lim kit macalo yam Balaam otimo, dok bene gito woko pi pyem kit macalo yam Kora ojemo kwede, Gikelo lewic i karamawu me mar ka gicamo matek mukato kare laboŋo lworo, kun giparo pi komgi keken. Gubedo calo pol ma pii pe iye ma yamo kolo; girom ki yadi ma nyiggi pe nen i kare me cekgi, ma giputo lwitgi woko, yam guto kiryo. Gical bene ki nam ma twagge mager ki bwoyo me lewicgi; gin lakalatwe ma wirre atata ma Lubaŋa otyeko yubo kakagi woko i kabedo macol licuc pi kare ma pe gik. Magi gin aye gin ma yam Enoka, ma obedo dano me abiro nia i kom Adam, yam otito pire macalo lanebi ni, “Wunen, Rwot bibino ki lwak jone maleŋ mapol ata, ka ŋolo kop i kom jo ducu, ki ka miyo kop wek olo jo ducu ma pe gilworo Lubaŋa pi timgi ma pe gilworo kwede Lubaŋa, ki pi lok ducu me gero ma lubalo ma pe gilworo Lubaŋa guloko i kome.” Meno gin jo ma bedo kar ŋur aŋura, ma gipyem apyema, kun gilubo mitgi keken, doggi opoŋ ki loko lok me wakke keken, gidworo dano wek ginoŋ gin ma cwinygi mito. Ento wun lurema ma amaro, myero wupo i lok ma yam lukwena pa Rwotwa Yecu Kricito gutito pire con. Gin yam gutito botwu ni, “I kare me agikki luŋala bibedo tye, ma gibilubo mitigi keken, ma pe gilworo Lubaŋa.” Jo ma kit meno gin aye lukel apokapoka, gin jo me lobo man, Cwiny pa Lubaŋa pe botgi. Ento wun luwota, wudoŋ matek i niyewu maleŋ twatwal-li, kun wulego Lubaŋa i Cwiny Maleŋ. Wugwokke kenwu i mar pa Lubaŋa, wukur kica pa Rwotwa Yecu Kricito nio wa i kwo ma pe tum. Wubed ki kica i kom jo mogo ma gitye ka cabbe acaba, wular jo mogo ma kit meno kun wuceyogi woko ki i mac. Wubed ki kica i kom jo mogo kun wulworo bene, dok wukwer bene ruk ma bal me kom tye iye. Deyo obed bot Ŋat ma twero gwokowu miyo pe wupoto, dok ma twero miyo wucuŋ laboŋo roc mo i nyim deyone ki yomcwiny. Deyo, dit, loc ki twer ducu obed bot Lubaŋa acel keken, ma Lalarwa, pi Yecu Kricito Rwotwa, cakke ma peya giketo lobo, nio koni, ki kare ma pe gik. Amen. Man aye gin ma Lubaŋa onyuto bot Yecu Kricito, wek omi en bene oniaŋ luticce i kom gin ma myero otimme oyotoyot i kare me anyim. En yam ocwalo lamalaika bot laticce Jon wek otitte oŋe. ka doŋ lacen i ŋeye Jon olokke odoko caden me lok ma Lubaŋa owaco, dok caden i kom lok me caden ma yam Yecu Kricito omiyo, kun bene otito pi gin ducu ma en oneno. Ŋat ma kwano lok ma gitito i buk man i nyim lwak tye ki gum, jo ma winyo bene tye ki gum, ki jo ma lubo gin ma gicoyo iye bene tye ki gum, pien kare doŋ cok. Lok man Jon mucwalo bot lwak muye Kricito ma gitye i kabedo abiro mapatpat i Acia: Kica ki kuc obed botwu, ma oa ki bot Lubaŋa ma tye, ma yam obedo tye wa con, dok ma bibino, kun a ki bot cwiny abiro ma gitye i nyim komkerre, ki ma a bene ki bot Yecu Kricito, lacaden ma genne, latin kayo i kin jo muto, kabaka madit ma loyo luker ducu ma i wi lobo-ni. Deyo obed bot ŋat ma marowa, ma nene ogonyowa woko ki i twec me balwa ki remone, ka doŋ olokowa wadoko lwak ma en loyo, kun wadoko ajwagi pa Lubaŋane ma Wonne bene. Deyo ki twero me loc obed bote nakanaka. Amen. Nen, en tye ka bino ki pol, dano ducu gibinene ki waŋgi, kadi jo ma yam gucobe; kaka ducu me wi lobo bikumo pire. Kit meno ada. Amen. “An Alupa ki Omega”, man Rwot Lubaŋa ma owaco, en Lubaŋa ma tye, dok ma yam onoŋo tye con, doki ma bibino, en Won Twer Ducu. An Jon, ominwu ma oribbe kwedwu i can ki i ker ki i diyo cwiny me ciro can ma wabedo kwede i Yecu. Onoŋo atye i cula ma gilwoŋo ni Patimo, pien onoŋo atito lok ma Lubaŋa oloko, ki lok me caden ma Yecu omiyo. Cwiny Maleŋ yam oyuto tamma woko i nino pa Rwot, ka doŋ cut awinyo dwan maloŋo yo tuŋ i ŋeya ma winnye calo koko tum ma gikuto. kun wacca ni, “Co gin ma itye ka nenone i buk-ki, ka doŋ icwal bot lwak jo muye Kricito ma gitye i kabedo abiro mapatpat, i Epeco, i Cumurna, i Pergamo, Tuatira, Cardic, i Piladelpia ki i Laodikia.” Ci alokke me neno dwan ma onoŋo tye ka lok kweda-ni. I kare ma doŋ alokke, ci aneno okar-mac me jabu abiro; i dye okar-mac abiro-nu aneno iye ŋat mo ma cal ki wod pa dano. Dano-nu orukke woko ki jor mabor, ki del me jabu ma otweyo i kore. Yer wiye onoŋo tar calo yer romo matar, tar calo pee; ki waŋe bene onoŋo obedo calo leb mac ma lyel, tyene aryo ducu onoŋo calo mola ma giliyo i keno, ka lacen doŋ girudo woko odoko maleŋ, kun dwane mor winnye calo mor pa pii ma corre. Onoŋo omako lakalatwe abiro i ciŋe tuŋ lacuc, ki pala lucwan mabit ryoryo okatti ki i doge, kun onoŋo nyime tye ka ryeny calo ceŋ ma ryeny matek. Ka doŋ anene, ci apoto woko piny ka tyene calo ŋat muto. Ento en oketo ciŋe lacuc i koma kun wacca ni, “Pe ilwor, an aye ŋat mukwoŋo ki me agikkine, an ŋat ma kwo-ni. Yam onoŋo ato woko, ento koŋ inen, kombeddi atye kwo, abibedo kwo matwal. Dok bene layab me To ki me Lyel tye bota. Kombeddi doŋ ico gin ma itye ka nenone-ni, gin ma tye ki gin ma bitimme lacen i anyim. Koŋ agonnyi tyen lok me muŋ me lakalatwe abiro ma ineno i ciŋa tuŋ lacuc, ki okar-mac abiro me jabu. Lakalatwe abiro gin aye lumalaika pa lwak muye Kricito ma gitye i kabedo abiro mapatpat, doŋ okar-mac abiro-ni gin aye lwak muye Kricito ma gitye i kabedo abiro mapatpat. “Bot lamalaika pa lwak muye an ma gitye i Epeco co kit man ni, ‘Man lok pa ŋat ma omako lakalatwe abiro i ciŋe tuŋ lacuc, ma tye ka wirre i dye okar-mac abiro. “‘Aŋeyo ticci ducu, kit ma icanne kwede ki kit ma idiyo kwede cwinyi. Aŋeyo bene kit macalo pe itwero ciro kwede tim pa jo maraco, ento itemo jo ma gilwoŋŋe kengi ni gin lukwena, kun gin gigi pe lukwena, mumiyo bene doŋ inoŋo ni gin lukwena ma lugoba. Aŋeyo itye ka diyo cwinyi, kun iciro can pi nyiŋa, dok bene pud pe iol giri. Ento atye ki lok man i komi, pien doŋ iweko mar ma onoŋo yam itye kwede mukwoŋo ca-ni woko. Koŋ ipo kit macalo onoŋo ipoto kwede i kabedo mamalo ma yam io iye-ni, ka doŋ iŋut, ci icak tiyo gin ma onoŋo ibedo ka tiyone i kare mukwoŋo ca. Ka pe iŋut, abibino boti ci akwanyo okar-macci woko ki i kabedone. Gin maber ma onen boti en aye ni, idag tic pa jo Nikolaiti ma an bene adagi-ni. Ŋat ma ite tye myero owiny lok ma Cwiny Maleŋ oloko bot lwak ducu ma guye an. Abimiyo ŋat ma oloyo camo yat me kwo ma tye i poto pa Lubaŋa.’ “Bot lamalaika pa lwak muye an ma gitye i Cumurna co kit man ni, “‘Man lok pa ŋat mubedo mukwoŋo ki me agikkine, ŋat ma yam oto ka dok ocer woko odoko kwo-ni. “‘Aŋeyo kit ayelayela ducu ma itye ka cirone, ki can lim bene ma itye kwede (ento in ilony). Aŋeyo bene yet pa jo ma giwaco ni gin Lujudaya, kun i adane gin pe Lujudaya, ento gin gubedo lwak me dul pa Catan. Pe ilwor can ma bipoto i komi. Nen, Catan bikwanyo jo mogo ki i kinwu bologi woko i mabuc wek etemwu. Gibibedo ka yelowu pi nino apar. Bed dano ma lagen nio wa i to, ci doŋ abimiyi tok me deyo me kwo. Ŋat ma ite tye myero owiny lok ma Cwiny Maleŋ oloko bot lwak ducu ma guye an. Ŋat ma oloyo, to me aryo doŋ pe biketo arem i kome.’ “Bot lamalaika pa lwak muye an ma gitye i Pergamo co kit man ni, “‘Man lok pa ŋat ma tye ki pala lucwan mabit ryoryo. “‘Aŋeyo ka ma ibedo iye, ka ma kom pa Catan tye iye. In giri imako nyiŋa woko matek likiŋ, pe ikwero niyeni i koma, kadi ki i kare pa Antipac ma obedo cadenna me ada, dano ma lagen ma yam gineko i kinwu, ka ma Catan bedo iye. Ento atye ki lok mogo manoknok i komi, pien itye ki jo mogo kunnu ma gumako pwony pa Balaam, ma yam opwonyo Balak me keto ariya i nyim jo Icrael wek gupot i bal, kun obitogi ni gucam riŋo ma gityero bot jogi, ki me timo tim tarwaŋ. Kit meno, in bene itye ki jo mogo ma gumako pwony pa jo Nikolaiti. Ka ce pe iŋut, ci abibino boti oyotoyot, ka doŋ alwenyo kwedgi ki pala lucwan me doga. Ŋat ma ite tye myero owiny lok ma Cwiny Maleŋ oloko bot lwak ducu ma guye an. Ŋat ma oloyo abimiye manna moyo ma onoŋo gikano woko, abimiyo got matar bene bote, ki nyiŋ manyen ma gicoyo i kom got meno ma ŋat mo pe ŋeyo, kono en ŋat ma gamo ni keken aye ŋeyo.’ “Bot lamalaika pa lwak muye an ma gitye i Tuatira co kit man ni, “Man lok pa Wod pa Lubaŋa ma waŋe calo leb mac ma lyel, ki tyene ducu calo mola ma girudo maleŋ adada. “‘Aŋeyo ticci ducu, mar ma itye kwede, niyeni ki ticci me konyo dano, ki kit ma idiyo kwede cwinyi. Aŋeyo ni ticci ma kombeddi itye ka tiyone kato me kare mukwoŋo ca. Ento atye ki lok man i komi, pud iweko dako ca, Jejebel, ma lwoŋŋe kene ni en lanebi-ni, kun tye ka pwonyo luticca miyo giŋak woko i yo me tim tarwaŋ, ki camo riŋo mogo ma noŋo doŋ gityero woko bot jogi. Onoŋo amiyo bote kare me ŋut, ento en okwero ŋut i tim tarwaŋe-ni. Nen,, abibolo dako-nu i wi kitanda ma noŋo two marac, pacogge bene abibologi woko i can madit atika, ka pe guŋut, gukwero lubo tim tarwaŋ pa dako-nu. Abineko litinone woko bene, wek lwak ma guye an i kabedo ducu guŋe ni an aŋiyo cwiny dano wa ki tamgi, dok abimiyo bot dano acel acel i kinwu gin ma lubo kit tic ma en otiyo. “‘Ento bot wun jo mukene ma wutye i Tuatira, ma pe wulubo kit pwony man, dok bene pe wupwonyo gin mo ma gilwoŋo ni ‘muŋ matut pa Catan’, doŋ atito botwu ni, pe doki abimiedo yec mo mukene botwu. Ento wumak gin ma wutye kwede-ni aye matek likiŋ, waŋ ma an adwogo. Ŋat ma loyo, dok ma obedo ka tiyo ticca nio i agikki, abimiye twero me loyo lurok. En biloyogi ki odoo nyonyo, calo ŋat ma goyo agulu ŋidogi woko matitino, kit macalo an bene alimo twero ki bot Wora; an abimiye latwok bene. Ŋat ma ite tye myero owiny lok ma Cwiny Malaŋ oloko bot lwak ducu ma guye an.’ “Bot lamalaika pa lwak muye an ma gitye i Cardic co kit man ni, “ ‘Man lok pa ŋat ma tye ki cwiny pa Lubaŋa abiro, ki lakalatwe abiro. “‘Aŋeyo ticci ducu; itye ki nyiŋ me bedo kwo, ento doŋ ito woko. Co woko ci ijiŋ gin ma pud odoŋ boti-ni obed tek, ma doŋ cok to-ni; pien anoŋo pe icobo ticci mo kakare i nyim Lubaŋana. Doŋ ipo i kom gin ma ilimo ki ma iwinyo; gwok gin meno ento iŋuti. Ka ce pe ico, ci abibino boti macalo lakwo, ma in pe iŋeyo cawa ma abibino kwede i komi. Kadi bed kumeno, pud itye ki jo mogo manoknok i Cardic ma peya gunywano boŋŋigi ki cilo. Gibiwoto kacel kweda ma noŋo guruko boŋŋi matar, pien gin aye gimyero. Ŋat ma oloyo gibiruko kit meno ki boŋŋi mater, dok bene pe abijwayo nyiŋe woko ki i buk me kwo. Abituco nyiŋe i nyim Wora, ki i nyim lumalaikane. Ŋat ma ite tye myero owiny lok ma Cwiny Maleŋ oloko bot lwak ducu ma guye an.’ “Bot lamalaika pa lwak muye an ma gitye i Piladelpia co kit man ni, “‘Man lok pa ŋat maleŋ ki me ada, ma en aye tye ki layab pa Daudi, en ŋat ma ka oyabo ci ŋat mo pe dok loro, ka oloro, ci ŋat mo bene pe dok yabo. “‘Aŋeyo ticci ducu. Nen, doŋ atyeko cibo doggola ma oyabbe woko i nyimi, ma ŋat mo pe twero lorone. Aŋeyo ni tekoni nok, ento kadi bed kumeno, doŋ imako lokka, dok bene pe ikwero nyiŋa. Nen, abimiyo lwak me dul pa Catan, jo ma yam gubedo ka cayi ma giwaco ni gin Lujudaya, kun i adane gin pe Lujudaya, ento giloko lok goba, nen, abimiyo gibino giryebbe piny i te tyeni, wek guniaŋ ada ni an amari. Pien imako lokka me diyo cwiny i ciro can, an bene abigwoki maber i kare me omo cwiny, ma tye ka bino i kom wi lobo ducu, me temo jo ma bedo i wi lobo-ni. Abebino oyotoyot. Mak gin ma itye kwede-ni matek likiŋ, wek ŋat mo pe oma lalukanani woko. Ŋat ma oloyo, abimiyo doko wir i ot pa Lubaŋana, pe bia kato woko ki iye. Abicoyo nyiŋ Lubaŋana, ki nyiŋ gaŋ pa Lubaŋana i kome, Jerucalem manyen ma bia ki i polo bot Lubaŋana bibino piny, dok bene ki nyiŋa kikome manyenne. Ŋat ma ite tye myero owiny lok ma Cwiny Maleŋ oloko bot lwak ducu ma guye an.’ “Bot lamalaika pa lwak muye an ma gitye i Laodikia co kit man ni, “‘Man lok ma oa ki bot Amen, ma en aye caden ma genne ki me ada, gin ducu ma Lubaŋa oketo yam ocakke ki i kome. “‘Aŋeyo ticci ducu. Pe iŋic, dok bene pe ilyet. Onoŋo twero bedo ber ka nene ibedo ŋic nyo lyet! Doŋ kit macalo onoŋo ibedo mormor, pe ibedo ŋic dok bene pe ibedo lyet, abiŋuli woko ki i doga. Pien in doŋ iwacci, “An alony, doŋ atye ki gin ducu ma miyo abedo ki kwo maber, gin mo pe ma doki amito.” Ento kun pe iŋeyo ni in aye ŋat ma piny doŋ oloyo atika, ma imiyo kica mako dano i komi twatwal, in lacan, waŋi oto woko, dok bene ibedo munero. Pi meno amiyo ryeko boti me wilo jabu maleŋ ma giliyo woko maber ki mac ki bota, wek omi idok lalonyo. Wil bene boŋŋi matar ki bota me arukani wek ium ki lewic me bedoni munero wek pe doŋ onen, ki yat mo bene me wiro waŋi, wek inen piny. Agoyo jo ma an amarogi, apwonyogi dok atirogi; pi meno ket tek iŋut woko. Nen, acuŋ i doggola kun adwoŋo. Ka ce ŋat mo owinyo dwana ci oyabo doggola, abidonyo bote ka acamo cam kacel kwede ki en bene camo kacel kweda. Ŋat ma oloyo, abimiye twero me bedo kacel kweda i wi komkerra, kit macalo an bene doŋ aloyo ci abedo kacel ki Wora i wi komkerre-ni. Ŋat ma ite tye myero owiny lok ma Cwiny Maleŋ oloko bot lwak ducu ma guye an.’ ” Lacen ka man otum, dok aneno doggola mo i polo ma onoŋo tye twolo. Doŋ dwan mukwoŋo ma onoŋo awinyo obedo ka lok kweda calo koko tum-mi, owacci, “It ibin malo kany, ci abinyutti gin ma bitimme lacen i ŋe man.” Cutcut Cwiny Maleŋ oyuto tamma woko, ci aneno komker ma gicibo i polo, ma dano mo onoŋo obedo i wiye. Ŋat ma onoŋo obedo i wi komker ca onoŋo ryeny calo got me wel matarre ki makwarre, ki danyu ma nen calo emeradi orumo komker woko dyere. Ka dok komker mukene pyeraryo wiye aŋwen orumo komkerre woko dyere, ki ludoŋo pyeraryo wiye aŋwen bene gubedo i wi komker magi, ma guruko boŋŋi matar, kun gurwako bene lalukana me jabu me deyo i wigi. Onoŋo tye gin mo ma wil awila calo lutkot ki i kom komker-ri, ki dwan mapol winnye iye, ki gin ma mwoc amwoca calo mwoc pa kot. I nyim komker onoŋo tye iye dog mac raa abiro ma tye ka lyel, ma gin aye cwiny pa Lubaŋa abiro. Ka dok aneno i nyim komker meno onoŋo tye iye gin ma nen calo nam me kiyo maleŋ calo gweŋ ma mil amila. Dok lee makwo aŋwen gurumo komker woko dyere i ŋete tuŋŋi ki tuŋŋi, waŋgi pol ma mogo tye tuŋ i nyimgi ki mogo tye yo tuŋ i ŋegi. Lee makwo mukwoŋo onoŋo nen calo labwor, ki me aryone onoŋo nen calo twon, lee makwo me adekke waŋe nen calo waŋ dano, ki lee makwo me aŋwenne onoŋo nen calo ocur ma tye ka tuk. Doŋ lee makwo aŋwen-ni onoŋo lee acel acel bwome tye abicel, ma waŋgi noŋo pol ata, muromo komgi woko ducu ki yo tuŋ woko wa ki yo tuŋ i iye bene. Dyeceŋ ki dyewor pe giweko wer ni, “Rwot Lubaŋa Matwero-ducu leŋ, leg dok leŋ, en ŋat ma yam tye con, koni tye, dok bibino!” I kare ducu ka lee makwo-gu gimiyo deyo ki woro ki pwoc bot ŋat ma obedo i wi komker ca, ma bedo kwo nakanaka,, ci ludoŋo pyeraryo wiye aŋwen-ni giryebbe piny i nyim en ŋat ma obedo i wi komker ca, ci guworo en ŋat ma bedo kwo nakanaka-ni; dok gubolo lalukanagi i nyim komker kun giwero ni, “Rwotwa ki Lubaŋawa, in imyero me noŋo deyo ki woro ki teko, pien in aye ma yam iketo jami ducu, dok bene pi mitti omiyo gubedo tye, meno aye gin mumiyo yam giketogi.” Onoŋo bene aneno buk adola tye i ciŋ ŋat ma obedo i wi komker-ri tuŋ lacuc, ma gicoyo woko ducu ryoryo, tuŋ iye wa ki tuŋ ŋeye bene, dok gimwono ki ginanena abiro. Dok aneno lamalaika mo matek twatwal ma onoŋo tye ka tito lok ki dwan maloŋo ni, “Aŋa ma myero me yabo buk adola-ni, ki me yabo ka ma gimwono kwede woko?” Pe tye ŋat mo i wi polo, kadi i wi lobo, kadi piny i te lobo ma twero yabo buk adola-ni kadi wa neno iye bene. Ci akok matek pien pe ginoŋo ŋat mo ma myero me yabo buk adola nyo kadi me neno iye. Cutcut ŋat acel i kin ludoŋo owacca ni, “Pe ikoki. Nen, Labwor ma i kaka me Juda, Lwit yat pa Daudi, en aye doŋ oloyo, pi meno en twero yabo buk adola ki yabo ginanenane abiro ma gimwono kwede-ni woko.” Lacen dok aneno Latin romo ma ocuŋ i kin komker ki lee makwo aŋwen ki i kin ludoŋo, nen calo doŋ gineko woko. Onoŋo tuŋe tye abiro, ki waŋe bene tye abiro, ma gin cwiny pa Lubaŋa abiro, ma en ocwalo i wi lobo ducu. Ci en ocito okwanyo buk adola woko ki i ciŋ ŋat ma onoŋo obedo i wi komker ma onoŋo omako tuŋ lacuc-ci. I kare ma doŋ en okwanyo buk adola-ni woko, ci lee makwo aŋwen-ni ki ludoŋo pyeraryo wiye aŋwen-ni guryebbe piny i nyim Latin romo, kun ŋat acel acel i kingi omako naŋa, ki atabo jabu ma gupoŋ ki odok eceta, ma en aye lega pa jo pa Lubaŋa. Ci gubedo ka wero wer manyen ma waco ni, “In imyero me kwanyo buk adolani, ki me yabo ginanena ma gimwono kwede, pien yam gineki woko, dok pi remoni ikoko dano pi Lubaŋa, ma gua i kaka mapol mapatpat, ki i leb ki rok mapatpat ducu, ilokogi gudoko lwak pa Lubaŋa ma en loyo, ma gin aye doŋ ajwagi ma gitiyo bote, gin bene gibiloyo lobo.” Ka dok aneno, ci awinyo dwan lumalaika ma welgi pe kwanne, alip ki alip, ma gurumo komker woko, ki lee makwo ki ludoŋo, kun giloko ki dwan maloŋo ni, “Latin romo ma gineko-ni en aye ma myero me noŋo twero, lonyo, ryeko ki teko, woro ki deyo kacel ki pwoc!” Ka dok awinyo ginaketa ducu ma tye i polo, ki i wi lobo, ki piny i te lobo, ki ma gitye i nam-gu ki gin ducu ma tye iye, ma giloko ni, “Pwoc ki woro ki deyo ki twero obed nakanaka bot ŋat ma obedo i wi komker, ki bot Latin romo!” Ci lee makwo aŋwen-ni gugamo ni, “Amen!” cutcut ludoŋo guryebbe piny guworo Lubaŋa ki Latin romo. Lacen aneno Latin romo oyabo kabedo acel ka ma onoŋo gimwono ki i kin kabedo abiro-ni, ci awinyo lee acel ki i kin lee makwo aŋwen ca oloko ki dwan macalo mor kot ni, “Bin!” Ka dok aneno aguragura matar, ki ŋat ma ŋweco kwede onoŋo omako atum. Gimiye lalukana, ci en ocito woko kun loyo lweny, dok bene ni wek ebed ka loyo lweny. Ka doŋ oyabo ka ma gimwono me aryone, ci awinyo lee makwo me aryone ka loko ni, “Bin!” Cutcut aguragura mukene makwar adada oa ki woko obino odonyo; ŋat ma ŋweco kwede gimiye twer me kwanyo kuc womo ki i wi lobo, wek dano gubed ka nekke kekengi, dok bene gimiye pala lucwan madit me lweny. Ka oyabo ka ma gimwono me adekke, ci awinyo lee makwo me adek ka loko ni, “Bin!” Cutcut atugi neno aguragura macol; onoŋo ŋat ma riŋo kwede omako mijan i ciŋe. Lacen dok awinyo dwan ma oa ki i kin lee makwo aŋwen-ni kun loko ni, “Ŋano agwata acel welle ciliŋ abic, cayiri agwata adek welle ciliŋ abic ento moo ki koŋo vino pe ibalgi!” I kare ma dok oyabo ka ma gimwono me aŋwenne, ci awinyo lee makwo me aŋwenne ka loko ni, “Bin!” Ka dok aneno aguragura ma obedo kibworo, ŋat ma ŋweco kwede onoŋo nyiŋe To, kun Lyel onoŋo lubo kore. Omiyogi twero i kom dul lobo acel me aŋwen me neko dano ki pala lucwan, ki kec, ki two gemo, ki lee tim mager. I kare ma oyabo ka ma gimwono me abicce, aneno tipo pa jo ma ginekogi pi lok pa Lubaŋa ki pi bedo caden me lok meno; aneno tipogi tye i te keno tyer. Gukok ki dwan maloŋo ni, “Ai Rwot Madit, Rwot maleŋ ki me ada, abitero kare ma rom mene ma noŋo peya iŋolo kop, dok ma noŋo peya iculo kwor me remowa i kom jo ma bedo i lobo?” Ci gimiyo jor matar bot ŋat acel acel, ka gicikogi ni pud koŋ doŋ guywe pi kare mo manoknok, nio waŋ ma wel lutic wadigi ki utmego ma gibinekogi calo gin ocobbe kakare. I kare ma en oyabo ka ma gimwono me abicelle, aneno, ci nen, oyeŋyeŋ oyeŋo lobo matek twatwal, omiyo ceŋ ocido woko macol lucuc calo boŋo cola, ki dwe odoko kwar calo remo. Lakalatwe me polo guo woko piny lirutrut calo nyig yat oduro me cwir ma poto ki i jaŋe ka yamo ma okodo matek oyeŋo. Ci polo bene orwenyo woko liweŋ calo karatac ma gidolo, kadi ki got ki cula nam gikobogi woko ducu ki ka-kargi. Ka doŋ luker me lobo, ki jo ma pigi dito, ki ludito me mony ducu, lulonyo ki wegi twero ki jo ducu ma i wi lobo, opii ki jo ma gilone kengi, gukanne woko i boro ki i kin got mubar ma i godi ducu, kun giwaco bot godi madoŋo ki godi matino ni, “Wupot i komwa ci wuumwa woko ki i waŋ ŋat ma obedo i wi komker, ki i akemo pa Latin romo; pien nino madit me akemogi doŋ oo, ci aŋa ma bitwero cuŋ iye?” Lacen aneno lumalaika aŋwen gucuŋ i but lobo aŋwen ducu, ma gigeŋo yamo me lobo woko, wek yamo mo pe okod i lobo, nyo i nam, kadi ki i kom yat mo. Dok aneno lamalaika mukene ma ito cito malo ki ka ma ceŋ tuc ki iye, onoŋo tye ki lanyut pa Lubaŋa makwo. Ci okok ki dwan maloŋo bot lumalaika aŋwen ma onoŋo gimiyogi twero me balo lobo ki nam, kun wacci, “Pe wubal lobo nyo nam kadi ki yadi, nio waŋ ma doŋ waketo lanyut i tur nyim lutic pa Lubaŋawa.” Ka dok awinyo bene wel dano ma giketo lanyut i komgi, gubedo dano alip miya acel ki pyeraŋwen wiye aŋwen, ma gua ki i kaka pa jo Icrael ducu. I kaka pa Juda giketo lanyut i kom dano alip apar wiye aryo. I kaka pa Reuben giketo lanyut i kom dano alip apar wiye aryo. I kaka pa Gad giketo lanyut i kom dano alip apar wiye aryo. I kaka pa Acer giketo lanyut i kom dano alip apar wiye aryo. I kaka pa Naputali giketo lanyut i kom dano alip apar wiye aryo. I kaka pa Manace giketo lanyut i kom dano alip apar wiye aryo. I kaka pa Cimeon giketo lanyut i kom dano alip apar wiye aryo. I kaka pa Levi giketo lanyut i kom dano alip apar wiye aryo. I kaka pa Icakar giketo lanyut i kom dano alip apar wiye aryo. I kaka pa Jabulon giketo lanyut i kom dano alip apar wiye aryo. I kaka pa Yucepu giketo lanyut i kom dano alip apar wiye aryo. I kaka pa Benjamin giketo lanyut i kom dano alip apar wiye aryo. Lacen aneno lwak dano mapol ata, ma ŋat mo pe romo kwano welgi, ma gua ki i rok ducu, ki i kaka ducu, ki dano ducu me wi lobo, ki leb ducu, ci gucuŋ i nyim komker ki i nyim Latin romo, ma gurukke ki jor matar, kun gumako jaŋ otit i ciŋgi. Ci gidaŋŋe ki dwan maloŋo ni, “Laro dano tye bot Lubaŋawa ma obedo i wi komker, ki bot Latin romo!” Lumalaika ducu onoŋo gucuŋo gurumo komker woko dyere, gurumo bene ludoŋo ki lee makwo aŋwen-ni, ka guryebbe piny i nyim komker ci guworo Lubaŋa, kun giwacci, “Amen! Pak ki deyo ki ryeko ki pwoc, ki woro ki twero ki teko obed bot Lubaŋawa nakanaka. Amen.” Ci ŋat acel ki i kin ludoŋo oloko kweda, kun penya ni, “Jo magi ma guruko jor matar-ri aŋagi, gua kono ki kwene?” Adokke iye ni, “Ladit, in iŋeyo.” En dok owaco bota ni, “Magi aye gin jo ma gua ki i can madit atika, gin bene doŋ gutyeko lwoko jorgi i remo pa Latin romo odoko matar adada. Pi meno, doŋ gitye i nyim komker pa Lubaŋa, ma gitiyo bote i ode dyeceŋ ki dyewor; ŋat ma obedo i wi komker bibedo i kingi kun gwokogi. Kec pe dok binekogi, kadi orwo pii bene pe dok binekogi, ceŋ pe dok biwaŋogi, kadi kit lyeto mo bene. Pien Latin romo ma tye i dye komker bibedo lakwatgi; en bitelogi terogi i waŋ it me pii me kwo, Lubaŋa bene bidunyo pig waŋgi woko ducu ki i waŋgi.” I kare ma Latin romo oyabo ka ma gimwono me abiro, polo oliŋ woko litik pi kare ma romo nucu cawa kulu. Ci lacen aneno lumalaika abiro ma gicuŋ i nyim Lubaŋa kare ki kare, gimiyo botgi tum abiro. Lamalaika mukene obino ci ocuŋ i nyim keno tyer, onoŋo omako atabo jabu me waŋo odok eceta. Gimiye odok eceta mabup wek omed ki lega pa jo pa Lubaŋa ducu i kom keno tyer jabu ma tye i nyim komker. Ci yito odok eceta ma giwaŋo oa ki i ciŋ lamalaika ma onoŋo tye i nyim Lubaŋa, oduny kacel ki lega pa jo pa Lubaŋa ocito malo. Lacen doki lamalaika okwanyo atabo me waŋo odok eceta, otoko lodi mac ki i keno tyer poŋ atabo meno, ci obolo woko piny i lobo; cutcut kot ocako mor kun mwoc matek adada, ma noŋo lutkot wil awila, ki oyeŋyeŋ bene oyeŋo piny. Cutcut lumalaika abiro ma onoŋo gitye ki tum abiro-ni guyubbe doŋ me kutone. Ci lamalaika mukwoŋo okuto tumme, omiyo pee ki mac ma orubbe ki remo ocorre i lobo. Meno omiyo acel me adek me lobo owaŋ woko, ki acel me adek me yadi bene, ki lum madyak ducu bene owaŋ wok licwic. Lamalaika me aryone okuto tumme, ci gin mo ma onoŋo nen calo got madit twatwal, ma onoŋo mac tye ka waŋone opoto woko i dye nam. Cutcut dul acel me adek me nam odoko remo, acel me adek me gin makwo ducu ma gibedo i nam guto, ki acel me adek me mel ducu bene guŋinnye woko. Lamalaika me adekke okuto tumme, ci lakalatwe madit oa ki i polo opoto piny, ma lyel calo mac dog raa, opoto i kom dul acel me adek me kulu ducu, ki i waŋ it ducu ma piine gunnye agunya. Nyiiŋ lakalatwe meno Yat roka. Dul acel me adek me pii odoko kec calo yat roka, pii meno oneko lwak dano mapol, pien onoŋo doŋ odoko kec. Lamalaika me aŋwenne okuto tumme, ci gin mo ogoyo dul acel me adek me ceŋ woko, ki dul acel me adek me dwe, ki dul acel me adek me lakalatwe, mumiyo dulgi me acel me adekke odoko col; dero mo ma ryeny obedo pe pi dul acel me adek me dyeceŋ ki dul acel me adek me dyewor bene. Ka dok aneno, ci awinyo ocur mo tye ka koko ki dwan maloŋo,, i kare ma onoŋo en tye ka tuk i dye yamo kun kok ni, “Can, can, can i wi jo ma bedo i lobo, pi dwan tum mukene ma pud gudoŋ ma lumalaika adek doŋ gicok kutone!” Lamalaika me abicce okuto tumme, ci aneno lakalatwe oa ki i polo opoto woko i ŋom, kun onoŋo gimiye layab me dog bur matut ma tere pe gik. En oyabo dog bur, ci yito oduny ki i doge calo yito ma oa ki i ruk mac madit adada ma tye i keno, ceŋ ki yamo gucido woko ki yito ma oa ki i bur. Lwak bonyo oa ki i yito meno omukke obino i lobo oumo woko lipuk; onoŋo yam gimiyo botgi kit twero ma rom ki twero ma oton me lobo-ni tye kwede. Gicikogi ni pe gubal lum me lobo, kadi gin ma twi atwiya, nyo yat mo, ento guket can i kom jo ma pe ki lanyut pa Lubaŋa i tur nyimgi. Pe giye ni gunek jo meno aneka, ento giyegi ni guungi auna pi dwe abic. Arem ma giwinyo pi un ma giunogi kwede onoŋo rom ki arem ma dano ma oton okayo bedo kwede. I kare meno dano biyenyo to, ento pe gibinoŋo; gibimito ni gito woko, ento to bilwi woko ki botgi. Lwak bonyo mumukke obino i lobo-ni onoŋo ginen calo lwak aguragura ma giyubogi woko pi lweny; onoŋo bene tye gin mogo i wigi ma nen calo lalukana jabu; waŋgi obedo calo waŋ dano, yer wigi obedo calo yer wi mon, lakgi obedo calo lak labwor. Korgi obedo calo nyonyo ma askari gigeŋo ki korgi, ma noŋo bwomgi ŋur winnye calo mor pa lwak gadigadi lweny ma lwak aguragura aye giywayo, kun gicito gilaro lweny. Yibgi onoŋo tye obedo calo lwak oton, kwirgi bene tye me kayo dano, ki twerogi me uno dano pi dwe abic onoŋo bene yam tye i yibgi. Laditgi ma onŋo loyogi macalo kabaka obedo lamalaika me bur matut ma tere pe gik. Nyiŋe i leb Ibru onoŋo gilwoŋo ni Abaddon; i leb Grik gilwoŋo ni Apollyon. (Te lokke ni Labal-piny). Can muikwoŋo doŋ okato. Nen, can aryo mukene pud odoŋ ma myero obin. Lamalaika me abicelle okuto tumme, ci awinyo dwan mo ma a ki i twok keno tyer aŋwen me jabu ma tye i nyim Lubaŋa. Owaco bot lamalaika me abicel ma tye ki tum-mi ni, “Gony lumalaika aŋwen ma gitweyogi i dog kulu madit me Euprate-ni woko.” Cutcut gigonyo lumalaika aŋwen ca, kun onoŋo doŋ giyubogi pi kare meno kikome, pi cawa meno, i nino meno, i dwe-nu me mwaka meno, wek gunek dul acel me adek pa dano ducu. Wel askari me mony ma onoŋo giŋweco ki aguragura onoŋo romo milion miya aryo; onoŋo awinyo ka giwaco welgi. Man aye kit ma lwak aguragura ki jo ma giŋweco kwedgi gunen kwede bota i ginanyuta: jo ma giŋweco kwedgi onoŋo yam guruko nyonyo me geŋo korgi ma raŋigi kwar calo lodi mac, dok obedo bulu calo kidi capir, ki dok raŋine obedo calo raŋi lwit opok, macalo gweŋ calfa. Aguragura onoŋo wigi calo wi labwor, kun mac ki yito ki alur me kidi calfa ma waŋ katti ki i doggi. Gemo magi adek-ki, mac, ki yito ki alur me kidi calfa ma okatti ki i doggi oneko jo ma romo dul acel me adek pa dano ducu. Pien twero pa lwak aguragura meno tye i doggi ki i yibgi. Yibgi obedo calo twol mapol ma tye ki wigi, en yibgi-nu aye giketo kwede arem i kom dano. Jo mukene ma two gemo magi pe onekogi yam pe guŋut pi gin ma onoŋo gin kikomgi gutiyo ki ciŋgi, pe guweko woro jogi, ki cal jogi ma gutiyo ki jabu, ki ryal ki mola, ki kidi me wel-gu, ki yadi, ma gin cal jogi ma pe gitwero neno gin mo, dok pe gitwero winyo lok mo, kadi ki wot bene pe gitwero wot. Jo meno yam bene pe guŋut pi nek ma guneko ki dano, nyo pi timgi me jokjok, kadi pi timo tim tarwaŋ, nyo pi kwalo kwo. Dok aneno lamalaika mukene matek twatwal oa ki i polo kun lor bino piny. Orukke woko ki pol, ma onoŋo danyu tye i wiye, waŋe onoŋo obedo calo ceŋ, ki tyene onoŋo obedo calo wir mac. Onoŋo buk adola matidi tye i ciŋe ma iye oyabbe woko. Oketo tyene tuŋ lacuc i nam ki tyene lacam oketo i wi lobo. Odaŋŋe ki dwan maloŋo calo labwor ma moro dwane; ka odaŋŋe, ci mor pa kot omwoc amwoca ma romo tyen abiro kulu. Ka kot doŋ omor omwoc tyen abiro, ci ayubbe ka coc, cutcut acako winyo dwan ma a ki i polo kun wacci, “Mwon lok ma mor kot abiro-ni guwaco woko, pe ico acoya.” Ci lamalaika ma onoŋo aneno ocuŋ i nam ki i lobo-ni otiŋo ciŋe lacuc malo i polo, ka okwoŋo kwoŋ ki nyiŋ ŋat ma bedo nakanaka, ma oketo polo ki jami ducu ma tye iye, ki lobo ki jami ducu ma tye iye, kacel ki nam ki jami ducu ma tye iye kun wacci, “Agalagala mo doŋ pe, ento ka kare oromo ma lamalaika me abiro bikuto tumme, Lubaŋa bicobo tamme ma tye i muŋ kit macalo yam otito bot luticce lunebi.” Doki awinyo ka dwan ma onoŋo oa ki i polo-ni tye ka lok kweda tyen me aryo kun wacci, “Cit ikwany buk adola ma oyabbe ma tye i ciŋ lamalaika ma ocuŋ i wi nam ki i lobo-ni.” Ci acito bot lamalaika meno, atitte ni omiya buk adola matidi-nu; ci en ogamo owacca ni, “Gam icam woko. Bibedo kec i ii, ento bibedo lim i dogi calo moo kic.” Cutcut agamo buk adola matidi ca woko ki i ciŋ lamalaika ci acamo woko. Obedo lim i doga calo moo kic, ento i kare ma doŋ atyeko camone, obedo makec i iya. Ka doŋ giwacca ni, “In myero doki itit lok pa Lubaŋa, i kom lwak dano mapatpat ki rok ki leb ki luker ducu.” Lacen gimiya lagada me pimo piny, ma obedo calo odoo, ci giwacca ni, “A icit ipim ot pa Lubaŋa, keno tyer, ki jo ma giworo Lubaŋa i ode. Ento pe ipim dyekal me ot pa Lubaŋa ma tye woko, wek meno obedi pien doŋ gityeko miyone woko bot jo ma pe giŋeyo Lubaŋa, gibibedo ka nyono gaŋ maleŋ woko pi dwe pyeraŋwen wiye aryo. Abimiyo twero bot lucadenna aryo-ni me tito lok pi nino alip acel ki miya aryo ki pyerabicel, ma noŋo guruko boŋo cola.” Lucaden aryo-ni gin aye yadi jeituni ki okar mac tara ma cuŋ i nyim Rwot me lobo. Ka ce onoŋo ŋat mo mito timogi rac, ci mac bicorre i doggi waŋo lukworgi woko liweŋ; doŋ ka ŋat mo mito timogi rac, meno aye kit ma gibineke kwede. Gitye ki twero me loro polo woko wek kot pe ocwer i kare ma noŋo gitye ka tito lok pa Lubaŋa. Gitye-bene ki twero me loko pii wek odok remo, dok me keto can i kom lobo i yo ducu, tyen mapol kit macalo cwinygi mito. Ka doŋ gutyeko miyo cadengi, ci lee maca ma okatti ki i bur ma tere pe gik-ki biero lweny i komgi, dok bene nekogi woko. Ci komgi muto biradde i dye yo me gaŋ madit, ma i carolok gilwoŋo nyiŋe ni Codom, ki dok ni Ejipt, en bene ka ma yam giguro iye Rwotgi i kom yatariya. Dano ma gua ki i kin lwak me wi lobo ki i kaka mapatpat ki leb-gu ki i rok mapatpat gibineno komgi muto pi nino adek ki nucu, kun pe giye ni giyikgi i lyel. Jo ma bedo i lobo biŋatte i komgi, gibibedo ki yomcwiny kun gicwalo mot i kingi kekengi, pien lutit lok aryo-nu onoŋo yam guuno dano ma bedo i lobo matek. Ento i ŋe nino adek ki nucu, yweyo me kwo oa ki bot Lubaŋa ci odonyo i komgi, ka doŋ gucako a malo, gucuŋo ki tyengi, mumiyo lworo madit twatwal omako jo ducu ma onenogi. Cutcut guwinyo dwan maloŋo ma oa i polo kun waco ni, “Wuit wubin malo kany!” Ci guito i polo i pol, ma lukworgi bene gineno. I cawa meno cutcut oyeŋyeŋ madit twatwal oyeŋo piny,. ci dul acel me apar me gaŋ meno omukke opoto woko piny. Oyeŋyeŋ meno oneko jo alip abiro, jo mudoŋ lworo omakogi matek, ci gumiyo deyo bot Lubaŋa me polo. Can me aryo doŋ okato; nen, can me adek doŋ cok bino. Lacen lamalaika me abirone okuto tumme, ci dwan mogo maloŋo owinnye i polo ma wacci, “Ker me lobo doŋ odoko ker pa Rwotwa ki Kricitone, en doŋ bibedo ka loc matwal.” Cutcut ludoŋo pyeraryo wiye aŋwen ma gibedo i wi komkergi i nyim Lubaŋa guryebbe piny guworo Lubaŋa, kun giwacci, “Wamiyo pwocwa boti, in Rwot Lubaŋa Matwero-ducu, in ma itye dok ma yam ibedo tye wa con, pien doŋ imako tekoni madit ci icako loc. Lurok yam gubedo ki akemo, ci akemoni obino, ki kare me ŋolo kop pa jo muto, kare me miyo mot me pwoc bot luticci ma lutit lokki, ki joni maleŋ, bot jo ducu ma gilworo nyiŋi, jo matino ki jo madoŋo, ki kare me neno jo ma tye ka balo lobo woko.” Ka doŋ giyabo ot pa Lubaŋa ma tye i polo, ci canduk me gicikke onen woko i ot pa Lubaŋa. Kot ocako cwer kun mor, mwoc amwoca ma lutkot wil awila, ki dwan owinnye maloŋo me mor pa piny, oyeŋyeŋ ocako yeŋo piny, ki pee bene ocorre madwoŋ twatwal. Ginanena mo madit adada onen i polo, dako mo ma onoŋo oruko ceŋ, kun dwe tye i te tyene, ki lalukana ma onoŋo en oruko i wiye obedo lakalatwe apar wiye aryo. Dako-nu onoŋo tye ki ic, onoŋo doŋ cok nywal; cutcut arem me nywal omiyo en omukke ki koko, kun pwodde apwoda ki remcwiny ma doŋ mito nywalo latin woko. Ci tinanena mo mukene dok onen i polo, min kulu mo makwar madit otuc, ma onoŋo wiye tye abiro, ki tuŋe tye apar, kun onoŋo lalukana abiro me loc tye i wiye ducu. Yibe opwodo dul acel me adek pa lakalatwe me polo, ci ocorogi woko piny i ŋom. Ka doŋ min kulu madit ca ocako cuŋ i nyim dako ma onoŋo mito nywal ca, wek ka dako-nu onywal, ci emwony latinne woko. Ci dako-nu cut onywalo latin awobi, en ŋat ma biloyo rok ducu ki odoo nyonyo. Ento latin meno gigamo woko, gitero bot Lubaŋa ki i komkerre. Ci dako-nu oa oriŋo woko i dye tim, ka ma Lubaŋa oyubo iye kabedo pire, ka ma gibibedo ka pite iye pi nino alip acel ki miya aryo ki pyerabicel. I kare meno cutcut lweny ocakke i wi polo, Mikael kacel ki lumalaikane gulwenyo i kom min kulu madit-ti. Min kulu madit-ti kacel ki lumalaikane bene gulwenyo, ento giloyogi woko, mumiyo kabedo doŋ odoko pe pigi i wi polo. Ci gibolo min kulu madit ca woko piny i ŋom, ma yam obedo min kulu macon-ni, ma gilwoŋo ni Ladot, ki Catan, labwol dano ma i wi lobo ducu; gibole woko piny i ŋom kacel ki lumalaikane. Cutcut awinyo dwan mo maloŋo i polo ma wacci, “Kombeddi doŋ laro dano, ki teko, ki ker pa Lubaŋawa ki twero pa Kricito doŋ oo, pien ŋat ma yam doto utmegiwa-ni doŋ gibolo woko piny i ŋom, en ŋat ma yam dotogi i nyim Lubaŋawa dyeceŋ ki dyewor-ri. Gin doŋ guloye woko pi remo pa Latin romo, ki pi lok me caden ma gubedo ka tucone, dok bene pe guparo pi kwogi, ento gumine kengi kadi wa i to. Bed ki yomcwiny, in polo, ki wun bene ma wubedo iye! Ento wun lobo ki nam, wubineno can malit atika, pien Ladot doŋ olor obino woko piny botwu ma tye ki akemo madwoŋ, pien ŋeyo ni karene tye manok!” I kare ma min kulu doŋ oneno, gibole woko piny i ŋom, ci ocako ryemo dako ca ma onoŋo onywalo latin awobini. Ento gimiyo bwom ocur madito aryo bot dako-nu, wek oa woko ki i nyim min kulu, otuk ocit woko i dye tim, i kabedone ca ka ma gibipite iye pi mwaka adek ki nucu. Ci min kulu oŋoko pii ki i doge i kor dako-nu, piine obedo calo pii me kulu, wek pii opoŋ omol dako-nu woko. Ento lobo okonyo dako-nu, lobo oŋamo doge ci omwonyo kulu meno ma onoŋo min kulu oŋoko woko ki i doge-ni. Kiniga omako min kulu i kom dako-nu, ci ocito oero lweny i kom likwayo pa dako ca mukene-gu ducu, i kom jo ma gilubo cik pa Lubaŋa, ma gimako bene lok me caden ma Yecu omiyo. Ka doŋ ocuŋ i kweyo me dog nam. Dok aneno lee mo ma oa ki i nam tye ka katti woko, ma tuŋe tye apar ki wiye bene onoŋo tye abiro, kun onoŋo lalukana apar me loc tye i tuŋe ducu; dok i wiye ducu onoŋo tye iye nyiŋ mo ma nyuto cac i kom Lubaŋa. Lee ma aneno-ni onoŋo obedo calo kwac, tyene obedo calo tyen ŋuu mager, ki doge onoŋo obedo calo dog labwor. Min kulu madit ca omiyo tekone, komkerre, ki twero madit ma en tye kwede bot lee meno. Aneno wiye onoŋo nen calo gigoyo giketo ret iye ma gimito nekone woko, ento ret meno ma onoŋo giketo i wiye-ni doŋ ocaŋ woko. Lobo ducu olubo lee-nu ki ur madit ma pe wacce. Dano gubedo ka woro min kulu ca pien onoŋo omiyo twerone woko bot lee-nu, dok bene guworo lee-nu kun giwacci, “Aŋa ma obedo calo lee man, dok aŋa ma twero lweny kwede?” Gimiyo twero bene bot lee-nu me loko lok mogo me wakke ki me yeto Lubaŋa, dok bene gimiye twero me tiyo gin ma iye mito pi dwe pyeraŋwen wiye aryo. Ci oŋamo doge me yeto Lubaŋa, kun yeto nyiŋe ki ka ma en bedo iye, kun yeto bene wa jo ducu ma gibedo i polo. Dok bene gimiye twero ma ero lweny i kom jo maleŋ ki tayogi woko. Gimiye bene twero me loyo kaka ducu, dano ducu ki leb-gu, wa rok mapatpat ducu. Jo ducu ma gibedo i lobo gibiworo lee-nu, dano acel acel ma onoŋo nyiŋe pe gicoyo i buk me kwo pa Latin romo ma yam gineko ca, cakke wa i acakki piny. Ka ŋat mo ite tye myero owiny lok man. Ka ce onoŋo yam giyubo ni gimak dano mo me bedo opii, ci gibitere woko i opii; ka ce ŋat mo neko dano ki pala lucwan, en bene myero gineke woko ki pala lucwan. Meno aye ka ma jo pa Lubaŋa myero gunyut iye kit ma giciro kwede can ki niyegi. Lacen dok aneno lee mukene ka katti i ki ŋom; onoŋo tuŋe tye aryo calo min kulu. En otiyo ki twero pa lee mukwoŋo ca ducu ma lee-nu bene neno, kun miyo lobo kacel ki jo ducu ma gibedo iye woro lee mukwoŋo, ma ret ma i wiye onoŋo doŋ ocaŋ woko-ni. En otiyo tic mogo madito ma bedo me aura twatwal, dok bene miyo mac a ki i polo bino piny i lobo ma dano bene gineno. Pi tic mogo ma onoŋo giyene me tiyone i nyim lee mukwoŋo ca, omiyo en obwolo dano ma gibedo i lobo, owaco botgi ni guyub cal mo obed ma ka-ka lee ma onoŋo yam giketo ret i kome ki pala lucwan, ma pud onoŋo obedo kwo-ni. Giyene bene me miyo yweyo i cal lee ma giyubo ca wek omi cal lee-nu olok lok, dok bene wek omi jo ma pe gibiworo cal lee-nu ginekgi woko. Dok bene en omiyo giketo poyo i kom dano ducu, jo matino ki jo madito, lulonyo ki lucan, jo ma gilone kengi wa ki opii bene, i ciŋgi tuŋ lacuc nyo i tur nyimgi. Gitimo man wek dano mo pe owil jami, nyo kadi ki catone, ka pe tye ki poyo meno i kome, ma meno obedo nyiŋ lee ca, nyo namba me nyiŋe. Gin man mito ryeko. Ŋat ma niaŋ, ma wiye tiyo twero kwano namba pa lee-nu, pien nambane obedo namba pa dano, nambane tye miya abicel ki pyerabicel wiye abicel. Lacen dok aneno Latin romo ma ocuŋ i wi got Cion; onoŋo jo alip miya acel ki pyeraŋwen wiye aŋwen tye kacel kwede, ma doŋ onoŋo gicoyo nyiŋe ki nyiŋ Wonne woko i tur nyimgi. Ci awinyo dwan mo oa ki i polo ma mor calo pii ma tye ka curre, ki dok calo kot ma tye ka mor matek. Dwan ma awinyo ca onoŋo obedo calo dwan lugo-naŋa ma tye ka goyo naŋagi. Onoŋo gitye ka wero wer manyen i nyim komker, ki i nyim lee makwo aŋwen-ni, ki i nyim ludoŋo-gu bene. Pe tye ŋat mo ma onoŋo twero pwonyo wer meno, kono jo alip miya acel ki pyeraŋwen wiye aŋwen ca keken ma doŋ gikokogi woko ki i lobo. Magi gin aye jo ma pe gubalo komgi ki timo tim tarwaŋ ki mon, pien gugwokke gubedo jo maleŋ; dok bene gin jo ma lubo Latin romo ka ma en woto iye ducu. Jo magi aye gin jo ma gikokogi ki i kin dano ducu, wek gubed calo cam mukwoŋo cek ma giyubo pi Lubaŋa ki Latin romo. Pe giwinyo lok goba mo i doggi; gubedo laboŋo roc mo i komgi. Dok aneno lamalaika mukene tye ka tuk wirre i dye polo; onoŋo tye ki lok me kwena maber me atita bot jo ma gibedo i wi lobo, bot rok ducu ki kaka ki leb-gu ki jo mapatpat ducu. Ci oloko ki dwan maloŋo ni, “Wulwor Lubaŋa, wumi deyo bote, pien karene me ŋolo kop doŋ oromo. Wuwor en ŋat ma oketo polo ki lobo ki nam ki waŋ it-gu.” Lamalaika mukene me aryone dok olubo kor lawote, kun wacci, “Babilon madit doŋ opoto, opoto gire woko, en gaŋ ma yam omiyo rok ducu mato koŋo vino me timme me tarwaŋ-ŋi.” Lamalaika mukene me adekke dok olubo korgi, kun loko ki dwan maloŋo ni, “Ka ce ŋat mo oworo lee-nu ki calle, ma noŋo giketo poyo i tur nyime nyo i ciŋe, ci en bimato koŋo vino me akemo pa Lubaŋa, ma oonyo i kikopo me kinigane ma pe girubo ki pii, gibibedo ka une ki mac ki gweŋ calfa ma mac oliyo woko, i nyim lumalaika maleŋ ki i nyim Latin romo bene. Yito mac ma giunogi kwede bedo ka duny nakanaka cito malo, kun pe giywe i dyeceŋ wa i dyewor bene, gin jo ma giworo lee-nu ki calle, kadi wa ŋat ma doŋ giketo poyo me nyiŋ lee meno i kome.” Meno aye ka ma jo pa Lubaŋa myero gunyut iye kit ma giciro kwede can, gin jo ma gwoko cik pa Lubaŋa ki niyegi i kom Yecu Kricito. Dok awinyo dwan mo oa ki i polo ma wacci, “Co lok man ni, Cakke kombeddi jo ma to ma noŋo gitye i Rwot tye ki gum.” Cwiny Maleŋ bene omoko lok man kun wacci, “Adada kit meno, doŋ gibiywe ki i tic matek ma yam gubedo ka tiyone, pien ticgi ma yam gutiyo-ni lubo korgi.” Lacen doki aneno pol matar, ki ŋat mo obedo i wi pol ma cal ki wod pa dano. Lalukana jabu onoŋo tye i wiye, ki pala kac mabit bene onoŋo tye i ciŋe. Ka dok lamalaika mukene okatti ki i ot pa Lubaŋa, kun daŋŋe matek bot ŋat ma onoŋo obedo i wi pol-li ni, “Cwal ciŋi ika kac ki pala kacci, pien kare me kac doŋ oromo, ki gin ma gikayo i lobo bene doŋ ocek woko.” Kit meno ŋat ma onoŋo obedo i wi pol-li oryeyo ciŋe i lobo ki pala kac, ci okayo gin mucek i lobo. Lamalaika mukene doki okatti ki i ot pa Lubaŋa ma tye i polo, en bene onoŋo omako pala kac mabit. Lamalaika mukene dok oa ki i ŋet keno tyer obino; lamalaika meno onoŋo tye ki twero i kom mac. Ci odaŋŋe matek bot ŋat ma onoŋo tye ki pala kac mabit ca ni, “Cwal ciŋi ki pala kacci ci icok nyig olok me lobo, pien nyige doŋ ocek woko.” Kit meno lamalaika oryeyo ciŋe i lobo ki pala kac, ci ocoko olok ducu me lobo, oonyo woko i bur madit me biyo pig olok me akemo pa Lubaŋa. Ci ginyono bur me biyo olok meno woko i ŋe gaŋ, remo omol ki i bur me biyo olok, ma borre romo mairo miya aryo, ki tute piny onoŋo mito romo cokcok futi abic. Dok aneno ginanyuta mo mukene madit i polo, ma obedo bene me aura mada, gin lumalaika abiro ma gitye ki gemo abiro. Magi gin aye doŋ gemo me agikkine, pien gin aye gimiyo akemo pa Lubaŋa cobbe kakare. Ka dok aneno gin mo ma nen calo nam me kiyo maleŋ ma orubbe ki mac; doŋ jo ma onoŋo gutayo lee ca ki calle, ki namba me nyiŋe, onoŋo gucuŋ i dog nam me kiyo, kun gumako naŋa pa Lubaŋa i ciŋgi. Onoŋo gitye ka wero wer pa Moses, ma obedo latic pa Lubaŋa, ki wer pa Latin romo kun giwacci, “Ticci ducu ma itiyo bedo me aura, dok gidito, ai Rwot Lubaŋa Won Twer Ducu! Kitti ducu tye atir dok me ada, in Kabaka ma iloyo rok ducu! Aŋa mono ma pe bilworo, ai Rwot? Aŋa kono ma pe bipako nyiŋi? Pien in keni aye ileŋ. Rok ducu gibino gibio wa i nyimi, gin ducu gibiwori, pien doŋ onen woko ka maleŋ ni ticci ducu tye atir.” Lacen aneno ot pa Lubaŋa, ma en kema lok me caden ma tye i polo; onoŋo oyabbe woko, ci lumalaika abiro gua ki i ot pa Lubaŋa gukatti woko ki gemo abiro. Onoŋo guruko boŋo camanini maleŋ adada, ma gutweyo korgi woko ki del jabu. Ci lee acel ki i kin lee makwo aŋwen-ni omiyo atabo jabu bot lumalaika abiro; onoŋo atabo magi gupoŋ woko ki kiniga pa Lubaŋa ma bedo kwo nakanaka. Yito ma oa ki i deyo pa Lubaŋa ki tekone omwono ot pa Lubaŋa woko limuk, ma ŋat mo onoŋo pe twero donyo iye, nio waŋ ma gemo abiro ma lumalaika abiro gukelo ca doŋ otum woko liweŋ. Dok awinyo dwan mo maloŋo oa ki i ot pa Lubaŋa ma waco bot lumalaika abiro ni, “Wucit wuony akemo pa Lubaŋa ma tye i atabo abiro ca-ni woko i lobo.” Lamalaika mukwoŋo ocito oonyo gin ma i i atabone woko i lobo. Ci two bur maraco ma toko kom dano atoka omako jo ma poyo pa lee ca tye i komgi ma giworo calle bene-ni. Lamalaika me aryone oonyo gin ma ii atabone woko i nam, ci olokke odoko calo remo pa dano muto, ki gin makwo ducu ma onoŋo gitye i nam guto woko. Lamalaika me adekke oonyo gin ma i i atabone i kulu ki i waŋ it-gu ducu ci gin ducu gulokke gudoko remo. Cutcut awinyo lamalaika ma loyo pii ka wacci, “Kop ma iŋolo-ni iŋolo giri atir, in ŋat ma tye, yam bene ibedo tye con, in Ŋat Maleŋ. Pien jo ma guoyo remo pa joni maleŋ, ki remo pa lutit lokki, in bene imiyo botgi remo me amatagi. Kakare, can meno oporo gin ma gutimo.” Dok awinyo keno tyer ka daŋŋe ni, “Ada, Rwot Lubaŋa Won Twer Ducu, kop ducu ma iŋolo bedo ada dok atir!” Lamalaika me aŋwenne oonyo gin ma i i atabone woko i kom ceŋ, dok bene giye ni owaŋ dano woko ki mac. Lyeto mager twatwal owaŋo dano atika, mumiyo dano guyeto nyiŋ Lubaŋa ma tye ki twero i kom gemo magi, pe guŋut dok bene pe gumiyo deyo bote. Lamalaika me abic oonyo gin ma i i atabone woko i kom komker pa lee ca, ci kerre doŋ ocako bedo i colpiny; arem madwoŋ omiyo dano gukayo lebgi ma pe wacce, guyeto Lubaŋa me polo pi arem ki bur ma otoko komgi woko, dok bene pe guŋut i kom gin ma gutimo. Lamalaika me abicelle oonyo gin ma i i atabone woko i kulu madit Euprate, ci piine otwo woko pi yubo yo pi wot pa luker ma gia ki yo tuŋ wokceŋ. Lacen aneno cen maraco adek ma gubedo calo ogwal ma okatti ki i doŋ min kulu, ki i dog lee, ki i dog lanebi ma lagoba, pien gubedo cen pa jok ma tiyo tic mogo me aura twatwal. Gin bene giwoto bot luker me wi lobo ducu ka cokogi woko kacel pi mony i nino madit pa Lubaŋa Won Twer Ducu. (Nen, abebino macalo lakwo! Dano ma bedo ma waŋe twolo kun kiyo piny tye ki gum, ma kun noŋo gwoko boŋŋine, wek pe ewot munero, ma dano gineno kome ma pe eruko iye boŋo!) Gucoko luker kacel i kabedo ma gilwoŋo i leb Ibru ni Armagedon. Lamalaika me abirone doŋ oonyo gin ma tye i atabone i dye yamo, ci dwan mo madit oa ki i ot pa Lubaŋa, ki i wi komker kun wacci, “Doŋ otimme!” Ci lutkot ocako wil awila, mor winnye matek, ki mwoc pa kot, ki oyeŋyeŋ madit oyeŋo piny, kit oyeŋyeŋ mo ma peya yam onen cakke ma dano gubedo i lobo; oyeŋyeŋ meno obedo dit adada. I gaŋ madit-ti obarre opokke dul adek, gaŋi pa lurok ducu gumuk gupoto woko piny. Ci Lubaŋa opo pi Babilon ma en gaŋ madit, pi miye ni omat koŋo vino i kikopo me akemone mager. Mumiyo cula nam ducu guriŋo woko, ki godi ducu bene doŋ gurwenyo woko ma pe doŋ giromo noŋogi. Pee mapek twatwal ocorre ki i polo opoto i kom dano, kun pek pa nyig pee acel acel onoŋo cok romo ratili miya acel; nio waŋ ma dano guyeto Lubaŋa pi gemo man me pee-ni, pien gemo meno onoŋo obedo rac ma okato kare. Lacen lamalaika acel i kom lumalaika abiro ma onoŋo gitye ki atabo abiro-ni obino bota owacca ni, “Bin wek anyutti kop ma doŋ giŋolo i kom dako ma lakwele marac, ma bedo i wi pii mapol-li. Luker me wi lobo ducu gutimo kwede abor, kadi wa jo ma bedo i lobo ma gumer ki koŋo vino me tim me aborre-ni.” Cutcut lamalaika otiŋa otera i tim, kun onoŋo Cwiny Maleŋ oyuto tamma woko, ci aneno dako mo ma obedo i wi lee mo makwar, ma gicoyo nyiŋ mogo i kom lee-nu ma nyuto cac i kom Lubaŋa; coc meno oromo kome ducu, lee-nu onoŋo wiye tye abiro ki tuŋe tye apar. Dako-nu oruko boŋo ma obedo lamar lamar ki makwar, ma odeyo kome ki jabu, ki kidi me wel, ki tiko matar me wel-gu, kun omako kikopo jabu i ciŋe ma opoŋ woko ki gin ma dano kwero, ki cilo me timme me abor-ri. I tur nyime gicoyo iye nyiŋ mo ma te lokke obedo me muŋ, ni, “Babilon madit, megi mon ducu ma gin malaya, ki jo ducu ma gitimo tim me kwer.” Aneno dako-nu omer woko ki remo pa jo pa Lubaŋa, dok bene ki remo pa lucaden pa Yecu ma ginekogi. Ka doŋ anene ci abedo ki ur madit twatwal. Ento lamalaika owacca ni, “Piŋo iuro? Abititti lok me muŋ pa dako-nu, ki pa lee ma dako obedo i wiye, ma wiye tye abiro ki tuŋe tye apar-ri. Lee ma ineno-ni onoŋo yam tye, ento kombeddi doŋ pe, bilor piny i bur ma tere pe gik, doŋ cito rwenyo woko matwal. Doŋ jo ma bedo i lobo ma yam pe gicoyo nyiŋgi i buk me kwo cakke i acakki piny gibiuro mada me neno lee-nu, pien yam con tye, kombeddi doŋ pe, ento bidwogo. Lok man mito tam ki ryeko. Wiye abiro-gu obedo godi matino abiro ma dako ca obedo iye. Gin bene gubedo luker abiro ma jo abic i komgi doŋ gupoto woko, acel tye, ento acel mukene peya obino. Ka obino, myero koŋ ori pi kare mo manok keken. Ento lee ma yam tye ca, ma kombeddi doŋ pe-ni, en kabaka me aboro, ento en ŋat acel i kin jo abiro ca, dok bicito woko ci rwenyo matwal. Doŋ tuŋ lee apar ma ineno ca gin aye luker apar ma peya gulimo twero me loc, ento myero gulim twero me loc macalo luker pi cawa acel, kacel ki lee ca bene. Jo magi onoŋo yam tamgi tye acel, ci gumiyo twerogi ki ditogi woko bot lee ca. Jo-nu biero mony i kom Latin romo, ento Latin romo bitayogi woko, pien Rwot pa rwodi, ki Kabaka ma loyo luker ducu, dok jo ma tye bote aye jo ma gilwoŋogi, ma giyerogi ma gin jo ma genne.” Dok owacca ni, “Pi madwoŋ ma i kulu ma ineno ca, ka ma dako ma lakwele obedo iye-ni, magi aye gin dano ma i wi lobo, ki lwak rok ducu ki leb-gu ducu. Doŋ tuŋ lee apar ma ineno ca, gin kacel ki lee gibikwero dako-nu ma lakwele-ni woko; gibitenye ata kun giweke doŋ munero, gibicamo riŋo kome ci giwaŋo woko ki mac. Pien Lubaŋa aye ma oketo mit man i cwinygi, wek gucob tamme kun gibedo ki cwiny acel, ka wek doŋ gumi twerogi bot lee ca, nio waŋ ma lok ma Lubaŋa owaco ocobbe kakare. Dako ma ineno ca en aye gaŋ madit ma tye ka loyo luker ducu me wi lobo.” Lacen dok aneno lamalaika mukene ka lor piny kun a ki i polo, ma onoŋo tye ki twero madit; deyone oryeny ocaro wi lobo ducu. Ci odaŋŋe ma dwane winnye matek twatwal ni, “Babilon madit doŋ opoto, opoto gire woko! Doŋ odoko kabedo pa jogi, odoko bene ka kanne pa cen maraco ducu, ki pa winyo maraco ma i dano kwero. Rok ducu gumato koŋo vino me timme macol me tarwaŋ ca, luker ducu me wi lobo gutimo kwede abor, ki lucat-wil ma i wi lobo ducu doŋ gumedde gudoko lulonyo pi bedone me caro ki tim twarwaŋe-ni ma okato kare.” Dok awinyo dwan mukene ma oa ki ipolo kun wacci, “Wun jona, wua woko ki bote, wek pe wuribbe kwede i balle, wek bene pe wunywak kwede gemo mogo ma poto i kome! Pien balle doŋ odurre malo lipim, oo wa i polo, Lubaŋa doŋ opo i kom tim maraco ducu ma yam en otimo. Wutim dako-nu ki kit tim ma yam en otimowu kwede, ma en otimo, wurub gin ma en mato obed mapek twatwal i kikopone kikome ma ya en orubo iye ginamata botwu-ni. Dok wumi bote arem ki kumo ma rom ki kit ma en obedo ka wakke kwede, ki timme me caro caro. Pien en waco ki i cwinye ni, ‘An daker, abedo i wi kom, pe arom ki da-to, pe abibedo ki kumo wacel’, pi meno gemone ducu bipoto i kome i nino acel, two odeke, kumo ki kec. Gibiwaŋe woko bene ki mac, pien Rwot Lubaŋa ma ŋolo kop i kome tekke dit.” Doŋ luker me wi lobo ma yam gutimo abor kwede, ma gulubo timme me tarwaŋ, gibikok pire kun gidoŋo oduru ma noŋo ginene doŋ tye ka waŋ i mac kun yitone duny. Gibicuŋ wa cen pi lworo kit can ma giune kwede, kun giwacci, “Ai do, ai do! Ineno can ba, in Babilon, gaŋ madit dok matek! Kop ma giŋolo i komi doŋ opoto i komi lawaŋacel.” Lucat-wil me lobo bene gitye ka koko kun gikumo pire, pien ŋat mo pe ma dok biwilo jami ma opoŋ i melgi, jabu, ryal, litino kidi me wel, tiko matar me wel, boŋo camanini maberre, boŋŋi ma obedo lamar lamar, boŋŋi aridi ki makwar, ki kit bao mapatpat ducu ma ŋwecgi kur, jami ducu ma gitiyo ki lak lyec-gu, jami ducu ma gitiyogi ki bao ma welgi malo twatwal, mola, nyonyo, ki got me gedo ma giliyo aliya maber twatwal, cinamon ki gin mogo mukene ma ŋwecgi kur, odok eceta me awaŋa, murra, odok luban, koŋo vino, moo jeituni, moko mapwot ki ŋano, dyaŋi ki romi, aguragura, ki gadigadi lweny, opii, kadi wa kwo pa dano kikome. “Nyig yat ma yam cwinyi paro twatwal-li doŋ gikwanyo woko ki boti, cam mogo mamit ma pe nen atata ki jami ma gipwoyo ki waŋ, doŋ gurwenyo woko ki boti, pe dok ibinoŋogi matwal!” Lucat-wil ma yam gicato jami magi ducu, ma doŋ gudoko lulonyo pi gaŋ meno, gibicuŋ wa cen ka mabor pi lworo ki can ma giune kwede, kun gikok matek ma kumo kwede ni, “Ai do, ai do, gaŋ madit-ti oneno can ba, en gaŋ ma yam onoŋo giruko woko ki boŋo camanini maberre, ki boŋŋi ma lamar lamar ki makwar, kun gidero woko ki jabu, kidi me wel, ki tiko matar me wel bene. Lonyo madit kit man-ni giketo woko teŋteŋ lawaŋacel.” Ludito me mel, ki jo ma woto i nam, ludwo mel ki jo ducu ma gitiyo tic me cato wil i nam, gucuŋ wa cen ka mabor, ci gudaŋŋe matek ka gunene tye ka waŋ kun yito duny, kun giwacci, “Gaŋ mene ma onoŋo yam rom ki gaŋ man madit-ti?” Ciguonyo putu i wigi, i kare ma gitye ka koko kun gikumo ma gidaŋŋe ki koko matek pire ni, “Ai do, ai do, ineno can ba, in gaŋ madit-ti, ka ma jo ducu ma yam gitye ki melgi i nam gudoko lulonyo pi lonyone madwoŋŋi! Giketo woko teŋteŋ i cawa acel keken. Wudaŋŋe ki wer me yomcwiny, wun lwak me polo, wun jo maleŋ, wun lukwena ki lutit lok pa Lubaŋa, pien Lubaŋa doŋ odwoko kop ma yam oŋolo i komwu-ni i kome!” Lalaikmaa mo matek otugi kwanyo gweŋ mo madit ma rom ki kidi rego, ci obolo woko i nam, kun wacci, “Babilon ma en gaŋ madit-ti gibitimo ki tim bwami gicanyo woko matek i ŋom, pe doŋ gibinoŋo matwal! Dwan lugo-naŋa ki jo ma goyo wer ducu, dwan lukut nyamulere ki lukut tum pe dok biwinnye boti matwal. Dano mo ma tiyo tic me diro pe dok binoŋŋe boti matwal. Mor pa kidi rego pe dok biwinnye boti matwal. Tara mo pe dok bilyel menyi, kadi ki dwan lanyom ki dwan nyako ger pe dok biwinnye boti matwal; pien lucat-willi onoŋo yam gin jo ma pigi dito atika i lobo yam bene ibwolo rok ducu ki tim jokjok ma ibedo ka timone. Remo pa lutit lok pa Lubaŋa ki pa jo maleŋa, remo pa jo ducu ma yam ginekogi i lobo, ginoŋo tye i Babilon.” Lacen i ŋe man awinyo woo madwoŋ macalo dwan lwak dano mapol ata ma gktye i polo ma giwacci, “Aleluya! Laro dano ki deyo ki teko tye bot Lubaŋawa, pien kop ma en ŋolo ducu tye ada dok atir. En doŋ oŋolo kop woko i kom dako ma malaya-ni, ma yam obalo lobo woko ki timme me abor-ri, dok bene oculo kwor me remo pa luticce i kome.” Gin dok gudaŋŋe tyen me aryone kun giwacci, “Aleluya! Yito me waŋo gaŋ-ŋi duny mucido cito malo lituu nakanaka.” Ci ludoŋo pyeraŋwen-ni kacel ki lee makwo aŋwen-ni guryebbe woko piny guworo Lubaŋa ma obedo i wi komkerri, kun giwacci, “Amen. Aleluya!” Dwan mo dok oa ki i wi komker ma wacci, “Wupak Lubaŋa, wun luticce ducu, wun jo ma wulwore, jo matino wa ki jo madito.” Ka dok awinyo dwan mo ma winnye calo lwak madit ma giwo, calo mor pa pii ma corre, dok calo mor kot ma mwoc matek. Guwacci, “Aleluya! Pien Rwot Lubaŋawa Won Twer Ducu, tye ka loc. Wabedu ki yomcwiny, kun wadwore, dok bene wami deyo bote, pien kare me nyom pa Latin romo doŋ oo, nyako gerre bene doŋ oyubbe woko; gimiyo boŋo camanini maberre ma ryeny dok maleŋ en aye ni en oruki.” Pien boŋo camanini maberre-nu obedo gin ducu ma tye atir ma jo maleŋ gitimo. Ci lamalaika owacca ni, “Co lok man ni, Jo ma gilwoŋogi i karama pa Latin romo tye ki gum.” Dok owacca ni, “Lok magi lok pa Lubaŋa.” Cutcut aryebbe woko piny ka tyene ka wore, ento en owacca ni, “Pe myero itim kit meno! An latic wadiwu, dok arom ki utmegini ma gumako lok me caden ma Yecu omiyo botgi-ni. Wor Lubaŋa.” Pien lok me caden ma Yecu omiyo aye cwiny ma miyo lutit lok gitito lok pa Lubaŋa Lacen aneno polo oyobbe, cut atugi neno aguragura matar! Ŋat ma obedo i wiye gilwoŋo ni ŋat ma Genne dok me Ada, gin ma en timo ducu tye atir i ŋolo kop kadi wa i lweny bene. Waŋe ryeny calo mac, dok onoŋo oruko lalukana mapol me loc i wiye; onoŋo bene tye ki nyiŋ mo ma gigoro ma ŋat mo pe ŋeyo, kono en keken gire aye ŋeyo. Oruko boŋo ma onoŋo giluto i remo, dok nyiŋ ma onoŋo gilwoŋe kwede en aye Lok pa Lubaŋa. Lwak mony mapol me polo ma guruko boŋo camanini maberre, matar dok maleŋ, gulubo kore ma giriŋo ki aguragura matar. Pala lucan mabit okatti ki i dogge, ma en bineko ki lurok woko ducu, ka doŋ bibedo ka loyogi ki odoo nyonyo; en binyono bur me biyo koŋo vino me akemo pa Lubaŋa mager ma en Won Twer Ducu-ni. Onoŋo gicoyo nyiŋ i kom jorre ki i eme ma kwanne ni, Kabaka ma loyo luker ducu ki Rwot pa rwodi. Ka dok aneno lamalaika mo ocuŋ i ceŋ. En olwoŋo kwa winyo ducu mapatpat ma gituk i dye yamo ki dwan maloŋo ni, “Wubin, wugurre kacel ka camo cam me otyeno ma Lubaŋa oyubo, ka camo riŋo kom luker, ki riŋo kom ludito wi mony, ki riŋo kom jo ma yam gin oteka, riŋo aguragura ki riŋo kom jo ma ŋweco kwedgi, ki riŋo dano ducu, jo ma gilone kengi kacel ki opii, jo matino ki madito ducu.” Lacen aneno lee ca ki luker me lobo guywayo monygi me lweny i kom ŋat ma obedo i wi aguragura kacel ki monnye. Ento gimako lee ca woko, kacel ki lanebi ma lagoba, ma yam obedo ka tiyo tic mogo me aura i nyime, ma obwolo dano ma onoŋo doŋ giketo poyo pa lee ca i komgi, ki ma yam onoŋo giworo calle-ni. Gin aryo-nu ducu, lee ki lanebi ma lagoba, gibologi woko makwo i nam me mac, ma tye ka lyel ki gweŋ calfa ma mac oliyo. Jo mudoŋŋe ducu ginekogi woko ki pala lucwan pa ŋat ma obedo i wi aguragura matar-ri, ki pala lucan ma okatti ki i doge; winyo ducu guyeŋ woko ki riŋo kom dano ma gucamo. Ka dok aneno lamalaika mo oa ki i polo kun lor bino piny; onoŋo omako layab me bur ma tere pe gik, ki nyor mapek adada. Ci omako min kulu madit ca, ma obedo twol macon-ni, ma en aye Ladot dok Catan bene, ka otweye woko pi mwaka alip acel, ci obole woko i bur ma tere pe gik, oloro dog bur woko, omwono woko bene kun oketo lanen i wiye wek pe dok omedde ki bwolo rok ducu, nio waŋ ma mwaka alip acel doŋ okato. I ŋe meno myero gigonye woko pi kare mo manoknok. Lacen dok aneno kamker mapol, jo ma gubedo i wigi obedo jo ma onoŋo gimiyo botgi twero me ŋolo kop. Aneno bene tipo pa jo ma yam giŋolo ŋutgi woko pi miyo cadengi i kom Yecu ki pi lok pa Lubaŋa, gin jo ma yam pe guworo lee ca, nyo calle, dok bene ma yam pe guketo poyone i tur nyimgi nyo i ciŋgi. Gin doki gubedo kwo, gubedo ka loc kacel ki Kricito pi mwaka alip acel. Jo muto mukene-gu ducu pe dok gubedo kwo, nio waŋ ma mwaka alip acel doŋ okato. Man aye cer mukwoŋo. Tye ki gum ŋat ma bibedo i cer man mukwoŋo-ni, dok bene en dano maleŋ pa Lubaŋa kikome. Jo macalo meno, to me aryo pe tye ki twero mo i komgi, ento gin doŋ gibibedo ajwagi pa Lubaŋa ki pa Yecu, dok bene gibibedo ka loc kacel kwede pi mwaka alip acel. Ka inen mwak alip acel doŋ otum, ci gibigonyo Catan woko ki i mabucce. Ci en bikatti woko cito ka bwolo rok ducu ma tye i but piny, ma en aye Gog ki Magog, bicokogi bene pi lweny, jo ma welgi pe kwanne ma girom ki kweyo me dog nam. Gumol gucito guket woko i wi lobo ka malac ci gurumo gony pa jo pa Lubaŋa ki gaŋ ma en maro-ni, ento mac oa ki i polo ci owaŋogi woko liweŋ. Catan ma yam obwologi-ni bene gibolo woko i nam me mac ki gweŋ calfa ma mac oliyo, ka ma lee ki lanebi ma lagoba bene gitye iye ca; gibibedo ki arem nakanaka dyeceŋ ki dyewor. Dok aneno komker mo madit matar, ki ŋat ma obedo i wiye. Lobo ki polo gua ki i nyime guriŋo woko, ento pe dok ginoŋo kabedo mo pigi. Ci aneno jo muto, jo madito ki jo matino, kun gucuŋ i nyim komker, onoŋo bene tye kenyo buk mogo ma giyabo igi woko. Giyabo bene buk mo mukene ma en aye buk me kwo. Giŋolo kop i kom jo muto kun gilubo gin ma yam gin gutiyo, kit macalo onoŋo gicoyo i buk magi. Nam bene odwoko jo ma yam guto i iye-ni woko cen, To ki Lyel bene gumiyo jo muto ma yam tye botgi; ci giŋolo kop pa dano acel acel kun gilubo gin ma yam gin gutiyo. Gibolo To ki Lyel woko i nam mac. Nam me mac aye meno to me aryo. Gam mo ma yam pe ginoŋo nyiŋe gicoyo i buk me kwo, gibolo woko i nam me mac. Lacen dok aneno polo manyen ki lobo manyen, pien polo mukwoŋo ki lobo mukwoŋo onoŋo doŋ gurwenyo woko, kadi wa nam bene onoŋo doŋ pe. Ci aneno gaŋ maleŋ, Jerucalem manyen, kun oa ki i polo bot Lubaŋa bino piny, ma giyubo woko macalo nyako ger ma gideyo pi cware. Ci awinyo dwan mo maloŋo ma oa ki i komker kun wacci, “Nen, kabedo pa Lubaŋa doŋ tye bot dano. En bibedo kacel kwedgi, ci gin gibibedo jone. Lubaŋa kikome aye bibedo kwedgi, kun bene bedo Lubaŋagi. En bijwayo pig waŋgi woko ducu. To bene doŋ bibedo pe, kadi kumo nyo koko, nyo arem, pien gin macon doŋ ducu gurwenyo woko matwal.” Ci ŋat ma obedo i wi komker owacci, “Nen, aketo jami ducu doko nyen.” Ka dok bene owacci, “Co lok man, pien lok magi lok ma genne dok me ada.” Ci owacca ni, “Doŋ otimme! An Alupa ki Omega, an acakki ki agikki. Ŋat ma orwo neko, abimiyo mato pii me waŋ it me kwo laboŋo wel mo. Meno aye mot ma ŋat ma oloyo binoŋo, ki an abibedo Lubaŋane, en bene bibedo latinna. Ento jo ma lwor, ma pe gin lugen, lutim tim mogo me kwer, lunek dano, lutim abor, lutim tim jokjok, luwor cal jogi, ki jo ducu ma gin lugoba, gibinoŋo mot ma gipoko botgi i nam ma tye ka lyel mac ki gweŋ calfa; meno aye to me aryo.” Ci malaika acel ki i kin lumalaika abiro ma onoŋo gitye ki atabo abiro ma gemo abiro me agikki tye i igi ca, obino oloko bota kun wacci, “Bin, anyutti Nyako ger, dako pa Latin romo.” Cutcut otiŋa, otera woko wa i wi got mo madit mabor twatwal, kun onoŋo Cwiny Maleŋ doŋ oyuto tamma woko, ka onyutta Jerucalem, gaŋ maleŋ, ma oa ki i polo bot Lubaŋa bino piny, ma onoŋo tye ki deyo pa Lubaŋa. Onoŋo ryeny calo kidi me wel madit makato ducu, ma pe nen atata, calo jacipa, dok leŋ calo gweŋ ma mil amila. Celle onoŋo dit ocudo malo likuŋ, doge onoŋo tye apar wiye aryo. Lumalaika apar wiye aryo onoŋo gitye i dogcel ducu, dok bene i dogcel onoŋo gicoyo iye nyiŋ kaka apar wiye aryo pa jo Icrael. Dogcel adek onoŋo tye yo tuŋ wokceŋ, yo tuŋ acam dogcel adek, yo tuŋ acuc dogcel adek, ki yo tuŋ potoceŋ bene dogcel adek. Cel me gaŋ bene onoŋo tye ki te gutine apar wiye aryo, ci i komgi onoŋo tye iye nyiŋ lukwena apar wiye aryo pa Latin romo. Ŋat ma oloko kweda-ni onoŋo tye ki odoo lagada jabu me pimo gaŋ ki dogcel ki cel kikome. Gaŋ meno onoŋo yam twoke tye aŋwen ma giromrom, borre rom ki lacce, ci opimo cel ki odoone, oromo mairo alip acel ki miya abic; borre ki lacce ki borre ma odok malo ducu gubedo rom. En bene dok opimo cel, ci oromo futi miya aryo ki apar wiye abicel ka gipimo ki bad dano, kit macalo lamalaika opimo kwede. Cel onoŋo gigero ki jacipa, ki gaŋ mere gigero ki jabu keken, ma noŋo nen maleŋ calo kiyo. Te guti ducu me gaŋ onoŋo gideyo woko ki litino kidi me wel mapatpat. Mukwoŋo obedo kidi ma gilwoŋo ni jacipa, me aryo capir, me adek agat, me aŋwen emeradi, me abic onik, me abicel karnelian, me abiro kuricolit, me aboro berul, me aboŋwen topaj, me apar kuricoparac, me apar wiye acel jacint, me apar wiye aryo ameticito. Gin me loro dogcel apar wiye aryo-ni onoŋo obedo tiko matar me wel apar wiye aryo, gin me loro dogcel acel acel gitiyo ki kit tiko-nu acel keken; yo ducu ma i gaŋ gipeto ki jabu keken, ma nen leŋ calo kiyo. Pe aneno ot mo me woro Lubaŋa i gaŋ meno, pien ot me woro Lubaŋa ki kunnu en aye Rwot Lubaŋa Won Twer Ducu kikome, ki Latin romo. Ceŋ nyo dwe pe bimitte i gaŋ meno me ryeny iye, pien deyo pa Lubaŋa aye leŋo ma tye kunnu, ki tarane en aye Latin romo. Leŋo ma tye iye bimiyo rok ducu giwoto maber; ki luker ducu ma i wi lobo gibikelo deyogi iye. Pe gibiloro dogcelle i dyeceŋ, ki dyewor bene bibedo pe kunnu. Gibitero iye deyo ki lonyo pa rok ducu. Ento gin mo ma kome keni pe bidonyo iye, kadi ki ŋat mo ma timo gin me kwer, nyo gin me goba, ento kono jo ma nyiŋgi doŋ gicoyo woko i buk me kwo-ni keken. Lamalaika dok onyutta kulu me pii me kwo, ma mil amila lamakmak calo gweŋ ma mil, ma onoŋo mol kun a ki i komker pa Lubaŋa ki pa Latin romo, onoŋo mol lubo dye yo me gaŋ meno. Dok bene i dog kulu ryoryo onoŋo yat me kwo tye iye, ma tye ki nyige mapatpat ma romo apar wiye aryo, onoŋo bene nyak dwe ki dwe. Pot yat meno onoŋo obedo yat me caŋo two pa jo me rok ducu. Gin ma giceno pe dok binen kunnu, ento komker pa Lubaŋa ki pa Latin romo aye bibedo iye, ki luticce gibiwore. Gibineno waŋe, ki nyiŋe bene bibedo i tur nyimgi. Dyewor doŋ pe bibedo tye matwal; pe dok gibimito mac ma caro piny, nyo ceŋ, pien Rwot Lubaŋa bibedo ceŋgi, ci gin gibibedo ka loc nakanaka. Ka dok owacca ni, “Lok magi lok ma genne, dok me ada. Rwot ma en Lubaŋa ma loyo cwiny lutit lokke doŋ ocwalo lamalaikane me nyuto bot luticce gin ma bitimme i kare macokcok-ki. Nen, doŋ acok bino.” Tye ki gum dano ma lubo lok ma gitito i buk man. An aye Jon, ŋat ma yam owinyo lok man dok oneno gin magi ducu. I kare ma awinyo lok man dok ma anenogi, cutcut aryebbe woko piny ka tyen lamalaika ma onyutta gin magi ka amiye woro; ento en owacca ni, “Pe myero itim kit meno! An latic wadiwu, arom ki utmegini ma gin lutit lok pa Lubaŋa, ki jo ma gilubo lok ma gicoyo i buk man. Wor Lubaŋa.” Ka dok owacca ni, “Pe imwon lok magi ma gitito i buk-ki woko, pien kare doŋ cok. Wek lutim maraco koŋ gumedde ki timo gin marac jo ma cilo me bal obwoyogi gumedde ki bedo ki bal, ki jo ma kitgi atir myero gumedde ki timo gin ma tye atir, ki jo maleŋ bene myero pud gumedde ki bedo leŋ.” “Nen, doŋ acok bino, kun akelo motta me pwoc, me culo dano acel acel muporo tic ma en otiyo. An Alupa ki Omega, mukwoŋo ki me agikki, acakki ki agikki.” Jo ma lwoko ginarukagi wek gibed ki twero me camo nyig yat me kwo, ki me donyo i gaŋ ma noŋo giwok ki i dogcel, jo-nu aye tye ki gum. I ŋe gaŋ woko tye iye jo ma timo tim calo gin gwogi, lutim tim jokjok, lutim abor, lunek dano, ki luwor cal jogi, ki jo ducu ma maro loko goba, kun gitiyo bene gin me gobagoba. “An Yecu doŋ acwalo lamalaikana me tito lok me caden botwu pi lwak jo muye an ducu ma gitye i kabedo ducu. An a lwit yat dok bene lakwar Daudi, an latwok ma ryeny twatwal-li.” Cwiny Maleŋ kacel ki nyako ger gitye ka wacci, “Bin!” Ŋat ma owinyo lok man bene myero ogam ni, “Bin!” Ŋat ma orwo neko myero obin, wek ŋat ma mito bene omat pii me kwo laboŋo wel. Doŋ aciko jo ducu ma guwinyo lok ma gitito i buk man, ni, ka ce dano mo dok omedo lok mo iye, Lubaŋa bene bimedo gemo ma gitito pire i buk kany-nyi i kome. Dok bene ka ce ŋat mo okwanyo lok mo woko ki i kom lok ma gitito i buk kany, Lubaŋa bene bikwanyo twerone me camo yat me kwo ki donyo i gaŋ maleŋ woko, ma gicoyo pigi i buk kany-nyi. Ŋat ma miyo caden i kom lok magi bene owacci, “Adada, binona doŋ cok.” Amen. Rwot Yecu, bin! Kica pa Rwot Yecu obed ki jo pa Lubaŋa ducu. Amen.