Ore apa te nkiterunoto, neitaa Enkai keper o enkop. Ore apa enkop nemeeta shoto, nemetii toki naa enaimin natii oriong o enguton, ore Enkiyang'et e Nkai nelo tioriong inkariak. Nejo Enkai; inchoo metijing'a ewang'an, nejing ewang'an. Nedol Enkai ajo ai sidai ewang'an. Nerishu Enkai ewang'an aitung'uaa enaimin. Neipot Enkai ewang'an ajo endama, neipot enaimin ajo enkewarie. Neaku eetae enteipa o entadekenya enkolong e dukuya. Nejo Enkai: “Inchoo metaa ketii o loing'ang'e erishata oo nkariak, naa inchoo metirisha inkariak o nkariak.” Neitayu Enkai oloing'ang'e nerish inkariak natii abori oloing'ang'e o nkariak naatii shumata oloing'ang'e, neaku nejia. Neipot Enkai oloing'ang'e ajo Keper. Neaku teipa neaku tadekenya enkolong e are. Nejo Enkai: “Inchoo inkariak natii abori e keper eiturrurrokino pooki nebo, naa inchoo enkop natoyio eibalayu.” Neaku neija. Neipot Enkai enkop natoiyio ajo Enkop, ore inkariak naaiturrurro tenebo neipot ajo inaaiposha. Nedol Enkai ajo aisidai. Nejo Enkai: “Inchoo enkop metoiu inkaitubulu, inkaitubulu naaiu ilanterera, o lkeek loo lng'anayio ooiu ilanterera too mpukunot enye te enkop.” Neaku neija. Neiu enkop inkaitubulu enyena, o nkaitubulu naaiu ilanterera te risioroto oo mpukunot enye, o lkeek ooiu ilng'anayio too lanterera lenye anaa empukunoto enye. Nedol Enkai ajo ai sidai. Metaa eetae enteipa neetae entadekenya enkolong e uni. Nejo Enkai “inchoo metaa keetae iwang'aritin to loing'ang'e le keper peyie erishu endama te nkewarie, neaku sii ilooitodolu ilmonek too nkatitin oo nkolong'i o larin. Inchoo sii metaa ketii iwang'aritin oloing'ang'e le keper peyie eisho ewang'an enkop.” Neaku neija. Neitayu Enkai iwang'aritin are sapuki, ore ina wang'an sapuk neitore endama, ore ewang'an kiti neitore enkewarie. Neitayu sii ilakir. Nepik ninche oloing'ang'e le keper peyie eisho ewang'an enkop neitore endama o enkewarie. Nerishu sii ewang'an tiatua enaimin, nedol Enkai ajo aisidai. Neaku teipa neaku tadekenya enkolong e ong'uan. Nejo Enkai, “Inchoo metijing'a nkariak ntokitin naaishu, inchoo sii imotonyi meshomo to loing'ang'e le keper aaingat enkop.” Metaa eitaa Enkai ing'uesi sapuki oo naaiposha o ntokitin naaishu pooki, o naaiserpepiari naatii atua enaiposha too mpukunot enye, o pooki motonyi terisioroto oo mpukunot enye, nedol Enkai ajo aisidai. Nemayian Enkai ninche ejo, “Entoisho niponariri aaiput inkariak oo naaiposha, naa nchoo sii imotonyi o loing'ang'e metubula te enkop.” Neaku teipa neaku tadekenya enkolong e imiet. Nejo Enkai, “Inchoo enkop meyau ing'uesi naaishu te risioroto oo mpukunot enye; inkishu o ng'uesi naaiserpepiari te nkop o ng'uesi e nkop te risioroto oo mpukunot enye.” Neaku neija. Neitayu Enkai ing'uesi e nkop te risioroto oo mpukunot enye o nkishu te risioroto oo mpukunot enye, o pooki toki naiserpepiari te nkop te risioroto empukunoto enye. Nedol Enkai ajo aisidai. Nejo Enkai; “Emaitobira tung'ani te nkitanyaanyukoto ang onyaanyukie iyiook, nikincho ninche meitoria isinkir le naiposha, o motonyi oloing'ang'e, o nkishu, o enkop pooki o pooki toki naiserpepiari te nkop.” Metaa eitayio Enkai oltung'ani te nkitanyaanyukoto enye makewan. Te nkitanyaanyukoto Enkai eitayio ninye ninche, olee o eng'oruoi. Nemayian Enkai ninche, nejoki “Entoisho entoponari emputa enkop nintorere. Entoria sii isinkir le naiposha o motony o loing'ang'e, o pooki toki ake ninye naishu naiseuseu te nkop.” Nejo Enkai: “Ng'ura, aaishoo iyie pooki aitubului naiu ilanterera natii oriong enkop, o pooki shani oota ilanterera too ilng'anayio lenyena intaa endaa. O pooki ng'ues e nkop, o pooki motonyi o loing'ang'e, o pooki toki naiserpepiari te nkop, o pooki toki naata enkiyang'et e nkishui aaishoo enkaitubului pooki nanyori peyie intaa endaa.” Neaku neija. Nedol Enkai pooki toki naitobirua ajo aisidai katukul. Neaku teipa neaku tadekenya enkolong e ile. Metaa eidipaki keper o enkop o lorora pooki lenye. Ore te nkolong e naapishana eidipa Enkai ina siaai enye nataasa neeng'iyeng'a te nkolong e naapishana te siaai enye pooki nataasa. Metaa etamayiana Enkai enkolong e naapishana neitisiny, amu teina olong apa eeng'iyeng'e Enkai te siaai enye pooki nataasa enkitobirare. Kuna ninche iishoritin e keper o enkop ina kata pee eitobiri. Ore te nkolong apa naitobirua Olaitoriani Enkai enkop o keper, eton meetae hoo ilkeek te nkop anaa nkaitubulu naabulu tiong'ota eton eitu eisho Olaitoriani enkop menoto enchan, nemeetae sii apa oltung'ani otur enkop. Kake enkinuku ake nadumunye te nkop aitashal oriong e nkop, pooki. Neitoki Olaitoriani Enkai aitobiru oltung'ani te nterit enkop. Nekutaki inkumeishin enyena entooma e nkishui, neaku oltung'ani oloota enkishui. Neun Olaitoriani Enkai enkurma, te Eden te nkalo oloosaen. Nepik ilo tung'ani oitobira atua. Neitubulu te nkop Olaitoriani Enkai ilkeek pooki oitiship inkonyek naa sidain sii te ndaa. Euno sii apa olchani le nkishui te mpolos enkurma. Netii sii olchani le eng'eno, oo supati, o ntorrok. Eturuke sii olkeju oing'uaa Eden opik enkurma enkare. Neoro ilo keju teine aaku ilkejek oong'uan. Ore enkarna olkeju le dukuya naa keji Pishon, naa ninye ilo oruko aman enkop pooki e Hafila, ine netii sahabu. Naa ore saabu eina kop aisidai. Etii isoito oimerlel te sidano. Ore olkeju li are naa Gihon; naa ninye oshi oman enkop pooki e Kush. Ore olkeju li okuni naa Tigris, nerukokino enkalo oloosaen te Asiria. Ore olkeju liong'uan naa Frati. Neya Olaitoriani Enkai ilo tung'ani apik ninye enkurma e Eden peyie etur neramat sii. Neitanap Olaitoriani Enkai oltung'ani ajoki, “Ore pooki shani otii atua enkurma indim ainosa, kake ore olchani le ng'eno oo supati o ntorrok minya ake, amu ore kenya enkolong ninya, meeta inchere pee miye.” Nejo Olaitoriani Enkai, “Meishiaakino neton olee aa ninye ake, ekaitaiki enkaretoni naishaakino ninye.” Metaa neitayu Olaitoriani Enkai pooki ng'ues e ong'ota o motonyi pooki oloing'ang'e neyau ninche enetii oltung'ani, pee edol eneiko teneisho ninche nkarn; naa ore enkarna ake ninye naba anaa enaishoo pooki toki neaku ina. Neisho ilo tung'ani inkarn inkishu pooki, o nena motonyi oloing'ange o pooki ng'ues e ong'ata; kake ore ilo tung'ani eitu etumi enkaretoni naishaakino ninye. Metaa etipika Olaitoriani Enkai injo naairoshi ilo tung'ani meirurayu. Ore eirura, neitayu olarasi obo lenye nenuk ine wueji too nkiri. Ore ilo arasi oitayio Olaitoriani Enkai te ilo tung'ani neitaa enkitok, nerikoki ninye ilo tung'ani. Nejo ilo tung'ani, “Esipa ele taata oloito loo loik laainei, naa eoroti osesen lai. Ekeipoti ninye aajo enkitok amu eitayioki ninye tiatua olee.” Metaa eorore olee menye o ng'otonye, neibung'are enkitok enye neaku pokira are osesen obo. Ore apa ilo tungani o enkitok enye meeta apa entoki naishopito nemedol enkurruna. Ore apa olasurai naa aing'en oleng alang ing'uesi pooki naaitobira Olaitoriani Enkai. Neikilikuan ninye enkitok ajoki, “Eji ketejo doi Enkai, ‘Eminya pooki ng'anayio lo lchani otii ena kurma?’ ” Nejoki enkitok olasurai, “Aikiindim iyiook aainosa ilng'anayio pooki loo lkeek le nkurma, kake etejo Enkai, ‘Eminya ilo ng'anayioi leilo shani otii empolos enkurma, nimishoroo hoo ninye arashu iyeye.’ ” Kake etiaka olasurai enkitok, “Miyeye ntae; amu eyiolo Enkai ajo ore tininosinoso ninye nebolo inkonyek inyi, nitiuu anaa Enkai, niyiolouu isupati o ntorrok.” Ore peyie edol enkitok ilo shani ajo sidai te ndaa, naa olchani sii oitiship inkonyek, naa olchani sii onguarrayu oiteng'en oltung'ani neitayu olng'anayioi lenyena neinos; neisho sii olpayian lenye embata, neinos ninye. Ore inkonyek e pokira nebolo, neyiolou ina kata aajo meishopo. Nerip mbenek olng'aboli aitaa nkilani. Nening ninche oltoilo lo Laitoriani Enkai elo te nkurma eiropija enkolong. Ore olpayian o enkitok enye neisudori peyie medol Enkai tiatua ilkeek le nkurma. Kake eipoto Olaitoriani Enkai ilo tungani nejoki ninye: “Kaji itii iyie?” Neng'amaa ajoki, “Atoning'o oltoilo lino te nkurma, naureishoyu amu atoduaa ajo maishopo naipirri aisudori.” Nejoki Enkai, “Aing'ae likitiaaka minchopo? Inosa o lng'anayioi lo lchani laitanapa apa intae ajoki eminya?” Nejo ilo tung'ani, “Ore ina kitok apa nikinchoo metaa tenebo nanu, ninye naaishoo olng'anayioi lo lchani, mainosa.” Ina pee ejoki Olaitoriani Enkai enkitok, “Kaa bae ena nitaasa?” Nejo enkitok, “Olasurai laateleja nanya.” Nejoki Olaitoriani Enkai olasurai, “Ore amu itaasa ena, kitediaaki iyie aaitulus too nkishu pooki o ng'uesi pooki entim, keaku iserpepiari te nkop, naa enterit ninye endaa ino, too nkolong'i pooki e nkishui ino. Ekapik olomang'ati erishata ino o enkitok. Neijia sii etiu erishata e ishoi ino o eishoi enye. Ekepurd ninye elukunya ino, ore iyie niony entutunyo enye.” Nejoki ninye enkitok, “Kaaponiki nanu emion te ishoi ino, te mion sapuk iiu inkera. Ore iyieunot inono pooki keaku ino lpayian lino, neaku sii ninye likintore iyie.” Nejoki ninye Adam, “Ore amu itoning'o oltoilo le nkitok ino, ninosa, ilo ng'anayioi lo lchani laaitanapa ajoki ‘Minya,’ etediaki enkop tenkaraki iyie, ekeaku enenkinyinyiret ake inya te nkishui ino pooki. Kebulu ilkiku o ntulele te nkurma, neaku inya nena aitubulu oo nkurman. Te nkinyinyiret inya endaa, ometaba anaa nirrinyokino enterit, amu teine apa kintobiruaki. Ira enterit naa enterit irrinyokino.” Neisho ilo tung'ani enkitok enye enkarna ajo Hawa amu ninye ng'otonye oo looishu pooki. Neitobiraki Olaitoriani Enkai Adam o enkitok enye nkilani oo ndapan, neishopoki ninche. Nejo Olaitoriani Enkai, “Ng'ura, etotiwuo oltung'ani anaa obo lang etayiolo isidain o ntorrok; ore tena kata, neidim ninye aitorioki enkaina enye olchani le nkishui ainosa, neishu ninye intarasi.” Metaa eitayio Olaitoriani Enkai ninye te nkurma e Eden peyie epuo aatur enkop apa naitobirunyeki ninche. Nearaa ninye ilo tung'ani. Ore te nkalo oloo saen e Eden, etipika ninye olmalaika, o lalem oyupuyup oman pooki alo peyie errip enkoitoi olchani le nkishui. Neyiolou Adam enkitok enye, neiroshiu neiu Kain ejo: “Anoto olee te retoto o Laitoriani.” Neitoki aiu olalashe lenye Abel. Ore apa Abel naa olairritani loo ntare, ore Kain naa olaturoni le nkop. Ore etulusoyie enkata, neyaki Kain Olaitoriani enkishoroto oo lng'anayio lenyena le nkop. Neyau sii ninye Abel ilkikaunot loo ntare enyena naapir. Neng'amaa Olaitoriani Abel tenebo enkishooroto enye. Kake eitu eng'amaa Kain tenebo enkishooroto enye. Negoro Kain nesot enkomom oleng. Nejoki Olaitoriani Kain, “Ainyoo peyie itagore naa ainyoo peyie isot enkomom? Amaa tiniaas isupati aimiking'amari? Naa teneitu ias isupati kigira ing'ok aarresh te nkutuk enkaji, naa iyie eyieu neibung kake eishiaakino nimir ninye.” Nejoki Kain olalashe lenye Abel, “Maape ong'ata.” Ore peyie ebaiki ong'ata nedumakino Kain olalashe lenye Abel aar metua. Nejoki Olaitoriani Kain, “Koree olalashe lino Abel?” Nejo, “Mayiolo, ainanu oshi olairritani lo la lashe lai?” Nejoki Olaitoriani, “Kaa bae ena nitaasa?” Aagira oltoilo lo sarge lo lalashe lino aishiraki te nkop. Ore taata iyie kitediaaki te nkop, ina natabolo enkutuk enye ang'amaa osarge lo lalashe lino te nkaina ino. Tinitur enkop, nemeiu ninye ae toki. Iyaku olaisikani olimana te nkop. Nejoki Kain Olaitoriani, “Aisapuk enkitamioto ai alang enaidimu. Ng'urai amu kitaarayie nanu ena olong aitung'uaa enkop, nikintalam sii enkomom ino peyie madol, naaku ololo te nkop metaa ore oltung'ani laatum naar nanu matua.” Nejoki Olaitoriani ninye, “Aime neijia etiu.” Ore oltung'ani oar Kain metua, neitamei ninye kat naapishana. Nepik Olaitoriani olmishire Kain peyie ore oloinepu ninye nemear metua. Neing'uaa Kain enkomom o Laitoriani, nelo amany enkop e Nod natii oloo saen e Eden. Neyiolou Kain enkitok enye, nenutayu neiu Enok, neshet enkanasa, neipot ina anasa ajo Enok anaa enkarna o layioni lenye. Neikini Enok Irad, neiu Irad Mehujael, neiu Mehujael Metushael neiu Metushael Lamek, Neyam Lamek inkituaak are. Ore enkarna e nabo naa keji Ada, neji enkarna enkae Sila. Neiu Ada Yabal laa ninye apa menye le lelo ootoni too lng'oborri neramat sii inkishu. Neji enkarna o lalashe lenye Yubal, laa ninye menye le lelo oosh ilwululi loo usin o ndulen. Neiu Sila Tubalkain, laa ninye olkunoni oidong'u inkinantani too suyan, o sekenke. Neji enkanashe e Tubalkain Naama. Nejoki Lamek inkituaak enyena, “Ada o Sila, entoning oltoilo lai; intae nakituaak e Lamek enining'o enajo nanu: Ataara oltung'ani metua laatipika olbae, laa olbarnoti laatoosho nanu. “Tenaa keitalaki elap Kain kat naapishana, nesipa ajo ore Lamek naa katitin ntomoni naapishana kat naapishana.” Neyiolou Adam enkitok enye aigil, neiu enkayioni neipot enkarna enye ajo Seti, amu etejo, “Aanyaaka Enkai apikaki nanu ae kerai najing ewueji e Abel amu etaara Kain ninye metua.” Neitokini aaiki Seti olayioni, neipoti enkarna enye aajo Enosh. Ore ina kata eiterutua iltung'ana aaipot enkarna Olaitoriani. Ore ena buku naa ene ishoi e Adam. Ore peyie eitayu Enkai oltung'ani, eitayio ninye te nkitanyaanyukoto enye makewan. Eitayio ninye olee o eng'oruoi nemayian ninche neipot ninche ajo, tung'ani peyie eitobiru. Ore peyie eishu Adam ilarin iip nabo o tomoni uni, neaku ninye menye lo layioni laa ninye kewan enyaanyukie, neipot ninye ajo Seti. Ore inkolong'i e Adam anaa peyie eaku menye le Seti naa ilarin iip isiet. Neeta apa kulikae ayiok o ntoyie. Metaa ore inkolong'i pooki e Adam naa ilarin iip naaudo o tomoni uni, neye ninye. Eishua Seti ilarin iip nabo o imiet, neaku menye le Enosh. Nebik seti anaa peyie eini Enosh ilarin iip isiet o naapishana, neeta apa kulikae ayiok o ntoyie. Metaa ore inkolong'i pooki e Seti naa ilarin iip naaudo o tomon aare, neye ninye. Ore peyie ebik Enosh ilarin intomoni naaudo, neaku menye le Kanan. Nebik Enosh eidipaki aatoiu Kanan ilarin iip isiet o tomon o imiet, neeta apa kulikae ayiok o ntoyie, metaa ore inkolong'i pooki e Enosh naa ilarin iip naaudo o imiet, neye ninye. Ore peyie ebik Kenan ilarin intomoni naapishana, neaku menye le Mahalel, nebik Kenan etoiwuoki Mahalel ilarin iip isiet o artam, neeta apa kulikae ayiok o ntoyie. Neaku inkolong'i pooki e Kenan ilarin iip naaudo o tomon, neye ninye. Ore peyie eishu Mahalel ilarin ntomoni ile o imiet, neaku menye le Yared. Nebik Mahalel etoiwuoki Yared ilarin iip isiet o tomoni uni, neeta apa kulikae ayiok o ntoyie. Metaa ore inkolong'i pooki e Mahalel naa ilarin iip isiet o ntomoni naaudo oimiet, neye ninye. Ore peyie eishu Yared ilarin iip o ntomoni ile oare, neaku menye Enok. Nebik Yared etoiwuoki Enok ilarin iip isiet, neeta apa kulikae ayiok o ntoyie. Metaa ore inkolong'i pooki e Yared naa ilarin iip naaudo o ntomoni ile oare, neye ninye. Ore peyie eishu Enok ilarin ntomoni ile o imiet, neaku menye le Metusela. Eiriamariyie Enok Enkai eidipaki aatoiu Metusela ilarin iip uni, neeta apa kulikae ayiok o ntoyie. Metaa ore inkolong'i e Enok naa ilarin iip uni o ntomoni ile o imiet. Nelo Enok tenebo Enkai, nelai ninye amu ewa Enkai ninye. Ore peyie eishu Metusela ilarin iip o ntomoni isiet o naapishana, neaku menye le Lamek. Nebik Metusela etoiwuoki Lamek ilarin iip naapishana o ntomoni isiet oare, neeta apa kulikae ayiok o ntoyie. Metaa ore inkolong'i pooki e Metusela naa ilarin iip naaudo o ntomoni ile o naaudo neye ninye. Ore peyie eishu Lamek ilarin iip o ntomoni isiet oare, neiu olayioni, neipot enkarna enye ajo Noa ejo: “Ore tiatua enkop natediaa Olaitoriani, ele ninye oyooki ayaki iyiook enkilejilej too siaaitin ang o too nyamalaritin oo nkaik ang.” Nebik Lamek etoiwuoki Noa ilarin iip imiet o ntomoni naaudo o imiet, neeta apa kulikae ayiok o ntoyie. Metaa ore inkolong'i pooki e Lamek naa iip naapishana o ntomoni naapishana o naapishana, neye ninye. Ore etaa Noa oloo larin iip imiet, neaku menye le Shem, o Ham, o Shafet. Ore peyie eiteru iltung'ana aaponari tioriong enkop, netoikioki ninche intoyie, nedol ilayiok le Nkai intoyie oo ltung'ana ajo aisidain, neyaki ate inkituaak anaa enagelu tenena, anaa enayieu. Nejo Olaitoriani: “Meitoki enkiyanget ai amany tung'ani ntarasi, amu ore ninye naa osesen. Keaku inkolong'i enyena ilarin iip nabo o tikitam.” Etii sii apa Ilnefilim enkop te nena olong'i, ore peyie epuonu ilayiok le Nkai aajing'aki aayiolou intoyie oo ltung'ana, neiki ninche inkera. Naa kulo apa iltung'ana magil liopa laa aiyiolot oleng. Nedol Olaitoriani enkarrueisho e tung'ani ajo etaa sapuk te nkop oleng, naa ore emusunoto endamunoto enye pooki e atua oltau naa entorroni ake eponaa. Neinosu Olaitoriani enkaraki naitobira oltung'ani te nkop, netum osina sapuk. Nejo Olaitoriani: “Kajutu tioriong enkop oltung'ani laitobira, tung'ani tenebo eng'ues, o pooki toki naiserpepiari, o motonyi o loing'ang'e, amu aanyaaka ainosu ajo ainyoo apa peyie aitobirua ninche.” Kake enoto Noa omom too nkonyek o Laitoriani. Kuna ninche iishoritin e Noa. Ore apa Noa naa oltung'ani oitashe too sipat, nemeeta entioto to lporror lenye: eiriamariyie Noa Enkai. Eeta sii apa Noa ilayiok o kuni, Shem, o Ham o Yafet. Etarruoyie apa enkop oleng too nkonyek e Enkai, neiputa ninye o larrabal. Nedol Enkai enkop ajo etarruoyie oleng. Amu ore iseseni pooki neitarruoitie inkoitoi enye te nkop. Nejoki Enkai Noa, “Atumuta to ltau ajo kaiting'ie pooki sesen, amu eiputa enkop o larrabal tenkaraki ninche, ng'ura kaidaikie nanu ninche o enkop. “Intaiki kewan esafina olchani le Gofer, nipik ilgilat atua esafina, nimur atua o oriong te nkoronko. Naa inji ayieu ninkunu. Ore enkadori e safina naa intemat e nkaina iip uni, ore elalai naa intemat e nkaina onom, ore enkilepata eiteru te kop naa intemat e nkaina tomoni uni. Ntushura sii esafina, ning'uaa erishata e ntemata nabo e nkaina, pee eyau ewang'an. Nipik sii kutuk aji e matua. Nipik atua iorot oo nkajijik e abori, e empolos, o neshumata. Amu ng'ura kayau olairrag loo nkariak shumata enkop, peyie eishu iseseni pooki oota enkiyang'et enkishui, napuku tiabori keper. Ore pooki toki natii enkop naa keye. Kake kaitasheyie olning'o lo sotua lai o iyie, naa aijing iyie e safina, iyie o layiok linono, o enkitok ino, o nkituaak oo layiok linono tenebo iyie. O pooki toki naishu e pooki sesen, iyau maare e pooki pukunoto atua e safina. Niramat ninche peyie meye; naa ore pooki naa oloing'oni ake o elipong. Enoo motonyi te risioroto oo mpukunot enye enoo ng'uesi te risioroto oo mpukunot enye, enoo naaiserpepiari te risioroto e mpukunoto enye. Ejing maare anaa impukunot enye enitii, peyie iramat meye. Ore sii, ayieu niya atua e safina indaiki oo mpukunot pooki tushuma. Naa keaku endaa ino o ninche.” Neas Noa ena; etaasa nena pooki naaitanapa Enkai ninye. Nejoki Olaitoriani Noa: “Tijing'a iyie o enkaji ino pooki atua e safina, amu atoduaa ajo ira oltung'ani oitashe too sipat te dukuya nanu tena ishoi. Iwa ing'uesi maare naapishana nemeeta entioto, oloing'oni ake o elipong. Iwa sii ing'uesi maare naapishana naata intiot, oloing'oni ake o elipong. Niya sii imotonyi oloing'ang'e maare naapishana, oloing'oni ake o elipong peyie eitubulaa impukunot enye tioriong enkop. Amu ore teneishunye inkolong'i naapishana, kairriu enchan shumata enkop too nkolong'i artam o nkewaritin artam. Metaa ore pooki toki naitobira, kajutu tioriong enkop.” Neas Noa nena pooki naitanapa Olaitoriani ninye. Ore apa Noa ina kata naa oloo larin iip ile te moruao, peyie elotu olairrag le nkare shumata enkop. Neaku ore Noa tenebo ilayiok lenyena o enkitok enye, o nkituaak oo layiok lenyena tenebo ninye, nejing e safina aailany olairrag le nkare. Ore ing'uesi pooki nemeeta ntiyiot o ng'uesi pooki naata ntiyot, o motonyi, o pooki toki naiserpepiari te nkop, maare maare, aa oloing'oni ake o elipong, etijing'a atua e safina tenebo Noa anaa enaitanapa Enkai Noa. Ore peyie eishunye inkolong'i naapishana, neiput olairrag sapuk le nkare shumata enkop. Ore to lari le iip ile le nkishui e Noa, to lapa li are enkolong e tomon o naapishana olapa, nedanya inkonyek oo nkariak naagut aaruko, nebolo sii ilusien e keper. Neshaiki enchan e shumata enkop inkolong'i artam o nkewaritin artam. Te ina olong ake etijing'a Noa, o Shem, o Ham, o Yafet ilayiok le Noa, o enkitok e Noa, o nkituaak uni oo layiok lenyena atua esafina. Ninche o pooki ng'ues te risioroto oo mpukunot enye, onkishu pooki te risioroto oo mpukunot enye, o pooki toki naiserpepiari te nkop te risioroto oo mpukunot enye, o motonyi pooki te risioroto oo mpukunot enye, o pooki motonyi e pooki pukunoto. Nejing pooki atua e safina tenebo Noa, maare maare oo seseni pooki oota enkishui. Ore nena naatijinga, oloing'oni o elipong e pooki toki naata osesen, nejing atua, anaa enaitanapa Enkai Noa. Neikenoo Olaitoriani ninye tiatua. Nebik olairrag le nkare tioriong enkop nkolong'i artam, neponari enkare o metudumu aing'atie enkop ailepie e safina. Neponari enkare oleng neiput enkop, nepor esafina shumata nkariak. Neponari enkare oleng te nkop, ometaa ore ildoinyo pooki adoru ootii abori keper neimisieki. Neitemoo enkare ildoinyo pooki metaa eng'uton ntemat e nkaina tomon o imiet. Neye pooki toki naata osesen naloolo te shumata enkop. Imotonyi, o nkishu, o ng'uesi, o pooki toki naishu te nkop, o pooki tung'ani, o pooki toki natii enkop natoyio naata enkiyang'et e enkishui, neye pooki. Etujutuoki pooki toki naishu natii enkoriong enkop, aa tung'ani, o ng'uesi, o pooki toki naiserpepiari, o motonyi oloing'ang'e, etujutuo ninye pooki te nkop. Noa ake etung'uayioki tenebo ilooboitare tiatua e safina. Nebik inkariak tioriong enkop inkolong'i iip o onom. Kake etadamua Enkai Noa o ng'uesi pooki, o nkishu pooki naaboitare ninye te safina. Neisho Enkai osiwuo meima shumata enkop, nengoroo enkare, neiken sii inkonyek oo nkariak e ng'uton o lusien e keper. Neguarra enchan e keper. Neiteru enkare te nkop ang'oroo. Ore te nkiting'oto enkolong, e iip o onom, etong'oroyie enkare aaku kiti, ore to lapa liopishana, te nkolong e tomon o naapishana o lapa, nedou esafina airrag te nchumata o ldoinyo le Ararat. Nengoroo inkariak o metabaiki olapa le tomon. Ore peyie ebau enkiting'oto o lapa le tomon, te nkolong e dukuya olapa, nelioyu inchumat oo ldoinyo. Ore peyie eishunye inkolong'i artam, nebol Noa elusie eina safina naitobirua apa. Neirriwaa ninye olkurruk, neloolo to loing'ang'e ometoito nkariak eishunye enkare. Neitoki airriwaa enturkulu meing'urai tenaa keishunye inkariak ti oriong enkop. Kake eitu etum eneroro, nerrinyokino ninye atua e safina, amu eton etii inkariak oriong enkop pooki. Neitorioo ninye enkaina enye aibung ninye neyau ninye atua e safina ine netii; Neitoki aanyu kulie olong'i naapishana, neitoki aigil airriwaa enturkulu aitupuku te safina. Nerrinyunye enturkulu teipa naa ng'ura eeta embeneyioi nashal te nkutuk enye naitayio to lchani lo loirien. Neyiolou ina kata Noa ajo eishunye enkare te nkop. Neitoki Noa aanyu kulie olong'i naapishana, neirriwaa enturkulu kake eitu eigil arrinyokino ninye. Ore to lari le iip ile o obo, to lapa le dukuya enkolong e dukuya o lapa, eishunye inkariak tioriong enkop neiwuang'ie Noa enkikenet e Safina, naa ng'ura, nedol ajo etoyio oriong enkop. Ore to lapa li are te nkolong e tikitam o naapishana o lapa, netoyio apa enkop. Neirorie Enkai Noa ajoki, “Tupuku te safina, iyie o enkitok ino, o layiok linono, o nkituaak oo layiok linono, mpungo shomo, toshoru tenebo iyie pooki toki naishu natii tenebo iyie e pooki sesen, imotonyi, o ng'uesi, o pooki toki naiserpepiari te nkop, peyie etum aatoisho aatubul aaiputa enkop.” Neipung Noa alo, o layiok lenyena, o enkitok enye, o nkituaak oo layiok lenyena. Ore pooki ng'ues, o pooki toki naiserpepiari, o pooki motonyi o pooki toki nalo tioriong enkop nepuku pooki anaa impukunot enye aaing'uaa e Safina nepuo. Ina peyie eshetaki Noa Olaitoriani ewueji olasar, neya pooki ng'ues nemeeta entioto, o pooki motonyi, nemeeta entioto, neitaki Enkai olasar opejori te nchumata olperere lo lasar. Ore peyie eing'uaya Olaitoriani esong'ouna narropil, nejo Olaitoriani toltau lenye; “Maitoki aekata adek enkop tenkaraki oltung'ani, amu ore endamunoto oltau lo ltung'ani eiteru te keraisho naa intorrok, nemaitoki aekata aidakie pooki toki naishu anaa enataasa. Ore eton eetae enkop, meishunye enkata eunore o enkata enkisampuare oo ndaiki, o enkirobi o enkirowuaj, olodalu, oloirujuruj, o endama o enkewarie.” Nemayian Enkai Noa o layiok lenyena, nejoki ninche: “Entoisho entubul entoponari, emputa enkop. Keureyuni intae neponari sii oloputukunyi te pooki ng'ues natii enkop, o pooki motonyi oloing'ang'e o pooki toki naiserpepiari te nkop, o pooki sinkirri le naiposha, keaku inkaik inyi etii. Ore pooki toki naishu nalo keaku endaa te intae anaa enaishoo intae endiati nanyori, aaishoo intae pooki toki. Minyanya ake inkiri naata enkishui enye, aa inchere osarge lenye. Amu ore to sarge le nkishui naa kaitalaku te nkitalukunoto; kaitalaku nanu te pooki ng'ues o te tung'ani; ore te pooki alashe lo ltung'ani naitalaku te nkishui oltung'ani. Ore oloba anaa oloibukoo osarge lo ltung'ani, naa oltung'ani oibukoo osarge lenye, amu eitayio Enkai oltung'ani te nkitanyaanyukoto enye makewan. Ore intae, entubul entoponari entaa kumok emputa enkop.” Nejoki Enkai Noa o te nebo ilayiok lenyena ooboitare: “Ing'ura ajo, kaitasheyie osotua lo lning'o o iyie o tenebo eishoi nikisuju, o pooki toki naishu nikiboitare, o imotonyi, o inkishu, o pooki ng'ues enkop nikiboitare, o pooki ake ninye natupukuo tiatua e safina. Naa kaitasheyie osotua lai o ntae, laa inchere maitoki aekata amut iseseni pooki to loirrag le nkare, nemeitoki aekata enkop amuta te nkare.” Nejo Enkai: “Ele ninye olmonekie lo sotua lo lning'o laitayu te rishata ai intae, o pooki toki naishu natii tenebo intae o too lporori oosuju. Atipika olokirrai lai atua enkatampoi naa keaku olmonekie lo sotua lai o enkop. Teneyau inkatampo te shumata enkop, nedoli olokirrai te nkatampoi, Naa kadamu nanu osotua lolning'o lai otii erishata ai o intae, o pooki toki naishu e pooki sesen, nemeitoki aekata nkariak aaku olairrag sapuk omut iseseni pooki. Ore etii olokirrai atua inkatampo, naa kaing'or ninye nadamu osotua lai lo lning'o ntarasi otii erishata Enkai o pooki toki naishu natii oriong enkop.” Nejoki Enkai Noa: “Ele ninye olmonekie lo sotua laitasheyie te rishata ai o pooki sesen otii oriong enkop.” Metaa ore ilayiok le Noa ootupukutuo te safina naa Shem, o Ham, o Yafet. Naa Ham apa menye le Kanaan. Ore kulo pokira okuni naa ilayiok le Noa, naa ninche ooibulaitie enkop pooki. Noa apa olaturoni le dukuya le nkop etuuno ninye enkurma oo sabibu. Neok Noa enaisho oo lsabibu nemera oleng neirrag to lng'obor lenye meishopo. Nedol Ham laa ninye menye le Kanaan emasipaisho e menye. Neliki ilalashera lenyena aare te boo. Ina peyie eyau Shem o Yafet olkila eiteleikino iloilila lenye, nepuo te siadi, neitoip emasipaisho e Papaai lenye; ore inkomomi enye neingorie dikae, neitu ninche edol emasipaisho e papaai lenye. Ore peyie einyototo Noa te merai e naisho, neyiolou enaitaasa olayioni lenye oti ninye, nejo ninye, “Metedeki Kanaan, keaku ninye orrindik loo rrindiki too ilalashera lenyena.” Nejo ake sii: “Metamayiana Olaitoriani Enkai ai Shem, naa inchoo Kanaan metaa orrindik lenye. Meitubulu Enkai Yafet naa inchoo metotona to lng'obor le Shem, neaku Kanaan osinka lenye.” Ore peyie eishunye olairrag le nkare, enyaaka Noa abik ilarin iip uni o onom. Ore inkolong'i pooki e Noa naa ilarin iip naaudo o onom neye ninye. Kuna iishoritin oo layiok le Noa, Shem, o Ham o Yafet, netoikioki ninche ilayiok te siadi olairrag le nkare. Ore ilayiok le Yafet naa kulo: Gomer, o Madai, o Yafan, o Tubal, o Mishek, o Tiras. Ore ilayiok le Gomer naa Askenas, o Rifat, o Togarma, ore ilayiok le Yafan naa Elisha, o Tarshish, o Kitim, o Dodaim. Te kulo etegelari iltungana loo lkirinen le naiposha aaidapashari. Ore kulo naa ilayiok le Yafet too nkuapi enye, oltung'ani ake o enkutuk enye, too lmareita lenye tiatua iloshon lenye. Ore ilayiok le Ham naa Kush, o Misri, o Put, o Kanaan. Ore ilayiok le Kush naa Seba, o Hafila, o Sabta, o Raama, o Sabteka. Ore ilayiok le Raama naa Sheba, o Dedan. Neiu Kush Nimrod laa ninye apa otang'asa aaku oltung'ani magilani te nkop. Ore apa Nimrod naa olang'oroni magilani te dukuya Olaitoriani. Ore enkaraki ina etejoki, “Olotiu anaa Nimrod olang'oroni magilani te dukuya Olaitoriani.” Ore enkiterunoto enkitoo enye naa Babel, o Erek, o Akad, o Kalneh o lelo pooki ootii enkop e Shinar. Nepuku teina kop alo Asiria neshet Ninawi o Rehobosuira, o Kala; o Rasen te rishata e Ninawi o Kala, aa ninye enkanasa kitok. Neaku Misri menye le Ludi o Anami, o Lehabi, o Naftuhi. O Patrusi, o Kasluhi, (laa ninye eing'uaa Ilfilisti) o Kafitori. Neaku Kanaan menye le Sidon ilo kikau lenye, o Het, o Lyebusi o Lamori, o Lgirgashi, o Lhifi, o Larki, Olsini, o Larfadi o Lsemari, o Lhamat; ore te siadi neidapasha ilmarei le Kanaan too nkuapi. Ore olpolosie le Kanaan edumunye te Sidon te nkalo e Gerar, ometabaiki Gasa, te nkalo e Sodom o Gomorra o Adma, o Siboiim ometabaiki Lasha. Kulo ninche ilayiok loo loshon lenye. Naa Shem sii menye loo nkera pooki e Eber, olalashe botor le Yafet, etoikioki sii ninye nkera. Ore ilayiok le Shem naa, Elam, o Ashur, o Arpakashad, o Lud, o Aram. Ore ilayiok le Aram naa Usi, o Hul, o Geter, o Mash. Neaku Arpakashad menye le shela, neaku Shela menye le Eber. Neikini Eber ilayiok oare, nejo obo enkarna Peleg, amu too nkolong'i enyena etoore enkop. Neji olalashe lenye Yokitan. Neaku Yokitan menye Almodad, o Shelaf, o Hasarmafet o Yara, o Hadoran, o Usal, o Dikla, o Obal, o Abimael, o Sheba, o Ofir, o Hafila o Yobab; ore lelo pooki naa ilayiok le Yokitan. Ore emanyisho enye epuku aing'uaa Mesha te nkalo e Sefar o metabaiki enkop oo ldoinyo te nkilepunoto enkolong. Kulo ilayiok le Shem to lmarei lenye, o too nkutukie enye, o too nkuapi enye, o too loshon lenye. Kulo ninche ilmarei loo layiok le Noa, te risioroto oo ishoritin enye, too loshon lenye. Naa te kulo eidapashakinote iloshon oriong enkop eidipa atulusoi oloirrag le nkare. Ore apa enkop pooki naa enkutuk nabo eeta o rorei kuti. Neaku ore peyie eidurru iltung'ana aaing'uaa oloosaen netum enkop naisiasha te nkop e Shinar, neitaa ine emanyisho enye. Nejokino ninche maate, “Wootu emaitayu Ilmatofali le sarng'ab nikipej te nkima oleng.” Neshetishore ilmatofali te rishata oo soito o lami te rishata osinyai oshula o enturoto. Ina pee ejo: “Wootu emateshetaki ate enkanasa naata oltalet olo abaiki keper, nikintaiki ate enkarna peyie mikindapashakino ineelakua ti oriong enkop pooki.” Nedou Olaitoriani aing'or ina anasa o ilo talet otesheta inkera oo ltung'ana. Nejo Olaitoriani, “Ng'ura, olorere obo ninche, neiro pooki enkutuk nabo, naa ena enkiterunoto oo siaaitin naas. Naa ore pooki nayieu neas metii engoloto te ninche. Wootu, emaape aadoyio aitarruoo enkutuk enye, peyie meitoki aaning'uno maate te nkiroroto.” Metaa eidapashaka Olaitoriani ninche oriong enkop pooki teine, nepal enchetata e nkanasa. Enkaraki eina peyie etejoki enkarna enye Babel, amu teine apa etomilo Olaitoriani enkutuk enkop pooki, naa teine eidapashaka Olaitoriani ninche oriong enkop pooki. Kulo ile ishoi e Shem. Ore peyie eaku Shem oloo larin iip nabo, etaa ninye menye le Arpakashad ilarin aare anaa neishunye oloirrag le nkare, enyaaka Shem abik ilarin iip imiet eidipaki aatoiu Arpakashad, neeta apa kulikae ayiok o ntoyie. Ore peyie eishu Arpakashad ilarin tomoni uni o miet, neaku menye le Shela. Enyaaka Arpakashad abik ilarin iip ong'uan o okuni eidipaki aatoiu Shela, neeta apa kulikae ayiok o ntoyie. Ore peyie eishu Shela ilarin tomoni uni, etaa ninye menye le Eber. Enyaaka Shela abik ilarin iip ong'uan o okuni eidipaki aatoiu Eber, neeta apa kulikae ayiok o ntoyie. Ore peyie eishu Eber ilarin tomoni uni oong'uan, etaa ninye menye le Peleg. Enyaaka Eber abik ilarin iip ong'uan o tomoni uni eidipaki aatoiu Peleg, neeta apa kulikae ayiok o ntoyie. Ore peyie eishu Peleg ilarin tomoni uni, etaa ninye menye le Reu. Enyaaka Peleg abik ilarin iip are o naaudo eidipaki aatoiu Reu, neeta apa kulikae ayiok o ntoyie. Ore peyie eishu Reu ilarin tomoni uni o aare, etaa ninye menye le Serug. Enyaaka Reu abik ilarin iip are o opishana eidipaki aatoiu Serug, neeta apa kulikae ayiok o ntoyie. Ore peyie eishu Serug ilarin tomoni uni, etaa menye le Nahor. Enyaaka Serug abik ilarin iip are eidipaki aatoiu Nahor, neeta apa kulikae ayiok o ntoyie. Ore peyie eishu Nahor ilarin tikitam ooudo, etaa ninye menye le Terah. Enyaaka Nahor abik ilarin iip o tomon o ooudo eidipaki aatoiu Terah, neeta apa kulikae ayiok o ntoyie. Ore peyie eishu Tera ilarin ntomoni naapishana etaa ninye menye le Abram, o Nahor o Haran. Naa kulo ile ishoi e Tera. Ore apa Tera naa menye le Abram, o Nahor, o Haran. Ore apa Haran naa menye le Lot. Nesiooyo Haran aye te dukuya Papaai lenye Tera teina kop natoiyeki ninye e Uri oo Ilkaldayo. Neyam Abram o Nahor inkituaak, neji enkitok e Abram Sarai, neji ene Nahor Milka, entito e Haran aa menye Milka o Iska. Ore apa Sarai naa koolupi amu meeta apa enkerai. Nerik Tera Abram olayioni lenye, o Lot olayioni le Haran olayioni lo layioni lenye, o Sarai, enkitok olayioni lenye Abram, nepuku aing'uaa pooki Uri oo Lkaldayo aapuo enkop e Kanaan. Ore peyie ebau Haran, eetuo aitaa ine emanyisho. Ore inkolong'i e Tera naa ilarin iip are o imiet neye ninye te Haran. “Nejoki Olaitoriani Abram, ‘Tupuku shomo tung'uai enkop ino o ltung'ana linono le sotua, o enkaji e papaai lino, shomo enkop naautaki. Naa kaaitainye iyie olosho sapuk, naa kaamayian iyie, naitaa enkarna ino kitok metaa iyaku emayianata. Ekamayian lelo likimayian ore ilo likidek naa kadek. Te iyie emayian ilmarei pooki le nkop ate.’ ” Neaku eshomo apa Abram anaa enatiaaka Olaitoriani ninye, neiriamariyie Lot ninye, eshomo Abram aing'uaa Haran aa oloo larin ntomoni naapishana o imiet. Nerik Abram enkitok enye Sarai, o Lot olayioni lo lalashe lenye, o masaa pooki enye naatasotutuo, o ltung'ana oonoto te Haran, nepuku aapuo enkop e Kanaan. Ore peyie ebau enkop e Kanaan, nedung Abram atua enkop o meshomo ewueji e Shekem o metabaiki eor e More. Ore ina rishata naa Lkanaan oomanya ina kop. Neipang'aki Olaitoriani Abram nejoki, “Ekaisho eishoi ino ena kop.” Metaa eteshetaka Abram Enkai teine olperere lo lasar ilo Aitoriani oipang'aka ninye. Neidur teine nelo oldoinyo le nkalo oloo saen e Betel, neun olng'obor lenye. Etii Betel enkalo e Moikuape, netii Ai oloo saen. Neshetaki teine olaitoriani olperere lo lasar neipot ninye enkarna o Laitoriani. Neitoki Abram aidur teine neito alo enkalo e Negeb. Netii apa enkop olameyu oleng. Nedou Abram alotu enkop e Misiri, aparan, amu etagolo olameyu asapuku te nkop. Ore pee eaku kebau Misiri, nejoki Sarai enkitok enye, “Ayiolo ajo aira enkitok sidai te neing'ori, naa tinikidol Ilmisiri, naa kejo, enkitok ele tung'ani ena. Naa kaar nanu matua nikincho iyie inchu. Tejo ira enkanashe ai peyie atum eseriani te nkaraki iyie, netum enkorrok ai atumunyana te iyie.” Ore peyie ejing Abram Misiri, nedol Ilmisiri aajo aisidai ina kitok oleng. Nedol ilkituaak le Farao ninye, nepejoo te Farao, neriki ninye enkaji e Farao. Ore te nkaraki Sarai, eitaasaki Abram isupati, metaa keeta intare, olmong'i, o nkishu, o sirkon, o laisiaayiak, o nkaisiaayiak, osirkon lipong'a o ntamesin. Kake eitamio Olaitoriani Farao o enkaji enye to lmeitai kitok te nkaraki Sarai enkitok e Abram. Neipot Farao Abram ajoki, “Kainyoo ena nikintaasa nanu? Ainyoo peyie eitu kiliki ajoki enkitok ino ninye? Ainyoo iyie pee itejo, enkanashe ai ninye,” metaa aawa ninye ayam aitaa enkitok ai? Ore naa iyie, nena enkitok ino toriko enchom. Neishoru Farao inkitanapat aisho iltung'ana te karaki Abram; neisho ninye meshomo, tenebo enkitok enye, o pooki toki naata. Metaa eilepa Abram alo aing'uaa Misiri, ninye o enkitok enye, o pooki toki naata, tenebo Lot aapuo enkop e Negeb. Naa karsis oleng Abram too nkishu o te nkosholai, o te sahabu. Neidur ninye aing'uaa Negeb ometabaiki Betel ewueji apa netii olng'obor lenye te nkiterunoto aa erishata Betel o Ai. Ewueji apa netang'asa aitobirie olperere lo lasar. Neipot Abram teine enkarna o Laitoriani. Ore sii ninye Lot oiriamunore Abram eboitare ninye neeta sii ninye inkishu, o ntare, olng'oborri, metaa meishaa enkop pokira aare te nemanya, amu aikumok imasaa e pookira. Nejing enchankar ilchekuti loo nkishu e Abram olchekuti loo nkishu e Lot. Ore apa ina kata, eton emanya Ilkanaan o Lperisi enkop. Nejoki Abram Lot, “Meishiaakino sii ake nejing erishata ang, enchankar, anaa ejing erishata oo lchekuti linono o lchekuti laainei amu aikira emudong. Aimetii enkop pooki dukuya iyie? Toorori te nanu. Teniito iyie enkaina e kedienye, naito ene tatene naa tiniito iyie ene tatene, naito nanu ene kedienye.” Neraposhu Lot inkonyek enyena, nedol ajo ore oyerata le Yordan keeta inkariak te pooki wueji, anaa enkurma o Laitoriani, anaa enkop e Misiri te nkalo e Soar, ina kata eton eitu eidaikie Olaitoriani Sodom o Gomorra. Metaa negelaki Lot kewan oyerata pooki le Yordan, nelo ninye oloo saen. Neoro o Abram teine. Nemany Abram e nkop e Kanaan, nemany Lot inkanas natii inkanas o Yarata, neidurrie olng'obor lenye ometabaiki Sodom. Ore apa iltung'ana le Sodom naa kaarruok, naa ilaingokok oleng te dukuya o Laitoriani. Nejoki Olaitoriani Abram, eidipa atoorori Lot ainguaa ninye, “Taraposhu inkonyek inono ing'ura aiteru teine nitii, moikuape, o kopikop o loo saen o oloo ntoluo. Ore ina kop pooki nidolita, naa kaaisho iyie tenebo eishoi ino ntarasi. Kaitaba eishoi ino anaa enterit enkop; metaa te neidimayu meikena oltung'ani enterit enkop, neidimayu sii meikeni eishoi ino. Tudumunye, shomo tudungo eneba enkadori o endapasho enkop, amu aaishoo iyie.” Neaku eidurrie Abram olng'obor lenye nelotu abik too lkeek oonyaanyukie ilngabolo le Mamre otii Hebron. Ore teine Neshetaki Olaitoriani olperere lo lasar. Ore too nkolong'i e Amrefel olaiguanani le Shina, Ariok olaiguanani le Elisar, Kedorloamer olaiguanani le Elam, o Tidal olaiguanani le Gooim, eipirutua kulo aiguanak olarrabal aarare Bera olaiguanani le Sodom, o Birsha olaiguanani le Gomora, o Shinab olaiguanani le Adma. O Shemeber olaiguanani le Sibooiim, olaiguanani le Bela (aa ninye Soar.) Neitushulu kulo pooki enjore aitaa nabo to erata le Siddim (aa taa enaiposha e munyan). Neisiaai Kederlaomer ilarin tomon aare, ore to lari le tomon oo kuni neiser ninche. Ore to lari le tomon oo ng'uan nelotu Kederlaomer, o laiguanak otii tenebo ninye aar Ilrefai te Ashterot-Karnaim, o Susim te Ham, o Emin te Sharekiriatiam. Olhori to ldoinyo lenye le Seir, ometabaiki Elparan olpolosie liong'ota. Neshukunye aapuo En-mishapat (aa ninye Kadesh) near enkop pooki oo Lmaleki, near sii Ilamori lelo oomanya Hasason tamar. Ore olaiguanani le Sodom o laiguanani le Adma, o Seboiim o Bela (aa ninye Soar), neipang aapuo aajing olarrabal to erata le sidim aashetaki tenebo Kederlaomer olaiguanani le Elam, olaiguanani Tidal le Gooim, o Amrefel olaiguanani le Shina, o Ariok olaiguanani le Elisar. Ilaiguanak oong'uan egilunore ilaiguanak imiet. Nebore o erata le Siddim ingumot naaturuno enturoto. Ore eilanyisho ilaiguanak le Sodom o Gomora, etusulakinote kulikae nena gumot, ore olkulikae nesaru oldoinyo. Metaa ewaita ilmang'ati imasaa e Sodom o Gomorra, o ndaiki enye pooki nepuo. Ewaita sii ninye Lot, olayioni lo lalashe le Abram omanya Sodom tenebo imasaa enyena nepuo. Ore obo oilanyishe, eewuo ainosaki Abram Olheburaniai omanya ina kata embata oo lkeek oonyanyukie ilng'abolo te Mamre o Lamori, olalashe le Eshkol o Aner, laa ilootoning'ore ninche Abram. Ore peyie ening Abram inchere ewaki oltung'ani lenye le mudong eararoto, nerik iltung'ana ooyiolo olarrabal laa iinot le nkaji enye, iltung'ana oora esiana iip uni o tomon oisiet, nelo asujaa ninche ometabaiki Dan. Neor ninye iltimito lenyena agilunore ninche kewarie. Etii sii ninye o ilaisiaayiak lenyena olarrabal, metaa ore ninye tenebo ilaisiaayiak lenyena, etudumutua ninche nemiraa ometabaiki Hoba natii moikuape e Dameski. Nerrinyu ninye imasaa pooki naawaki tenebo sii oltung'ani lenye le mudong Lot, omasaa enyena, o nkituaak o ltung'ana. Ore peyie eidip atushukunye eisulie olarrabal le Kedorloamer tenebo ilaiguanak ooboitare, etupukuo olaiguanani le Sodom alo anang'are to erata le Shafe, (aa ninye o erata lo laiguanani.) Neyau Melkisedek olaiguanani le Salem e mukate o enaisho oo sabibu: ore apa ninye naa Olapolosani le Nkai natii shumata aisul. Nemayian ninye ejo; “Metamayiana Enkai natii shumata aisul Abram, ilo oitobira shumata o enkop. Metamayiana Enkai natii shumata aisul, ilo otipika ilmang'ati linono inkaik inono.” Neisho Abram ninye ematua e tomon e pooki toki. Nejoki olaiguanani le Sodom Abram, “Inchooki olorere ake, ore imasaa niya aitaa ininono.” Kake etiaka Abram olaiguanani le Sodom, “Ainosa olmumai to Laitoriani Enkai natii shumata aisul, oitobira shumata o enkop, inchere maya hoo pito ebaiki enkeene enamuke, anaa toki ino pooki, peyie mijo ake aitaa nanu Abram karsis. Meeta toki naya nanu meteleku entoki nainosa ilbarnot laainei, o ematua oo ltung'ana laaturubare, aa Aner, o Eshkol, o Mamre erubata enye.” Ore tesiadi e kuna baa, eewuo ororei lo Laitoriani enetii Abram te nduaata ejo, “Miureishoyu Abram, ara nanu elong'o ino, kesapuku oleng enkishooroto nikinchori iyie.” Kake etejo Abram, “Olaitoriani Enkai, ainyoo doi kincho, adolita ajo eloito enkishon dukuya maata enkerai, ore olajung'oni le nkaji ai naa Eliesa le Dameski?” Neitoki ake ajo Abram, “Ng'urai, esipa eitu kincho nanu eishoi, ore osinka otoiwuoki te nkaji ai ninye oyooki aaku olajung'oni lai.” Ng'ura, neirorie Olaitoriani ninye ajo, “Ore ele tung'ani meaku olajung'oni lino, olayioni loo nkiri inono ninye likijung.” Neipang'unye ninye boo nejoki, “Ng'ura sii iyie keper, ninken ilakir tenaa aindim atipika esiana.” Neitoki ake ajoki, “Metaa neijia ebayu eishoi ino.” Neiruk ninye Olaitoriani, neikenakini ninye aajo oloitashe too sipat. Nejoki Olaitoriani ninye, “Ara Olaitoriani likintayio te Uri oo lkadayo peyie aaisho iyie ena kop intaa enino.” Kake etejo Abram, “Oi Olaitoriani Enkai, kaji aiko tenayiolou ajo keaku enaai?” Nejoki Enkai ninye, “Iyakaki entawuo oo larin okuni, o enkine oo larin okuni, o lmeregesh loo larin okuni, o enturkulu, o enkuoo e nturkulu.” Neyaki Abram ninye kuna tokitin pooki nesash ninche maare neiteleiki enkiperrati nabo aishiaakinye enkae; kake eitu edung nena motonyi asash. Ore pee edoiki ilkurragoso nena popoki, neiture Abram aitalamaa. Ore etaa kedoyio enkolong, netir injo naairoshi Abram; naa ing'ura, etijinga oloputukunyi kitok le naimin kitok shumata ninye. Nejoki Olaitoriani Abram, “Tayiolo miata olng'ash ajo keaku eishoi ino ilomon te nkop neme enenye, neaku sii irrindiki teine, naa keibookini enkop too larin iip ong'uan; kake kayau endungokinoto enkiguana olosho pooki oisiaaita, ore tesiadi, nepuku ninche teina kop etudupote. Ore iyie, ilo enetii iloo papaai lino to sotua, aikinukari itaa olpayian kitok oitobirakine enkirragata. Naa keshukunye ninche ene te ishoi e ong'uan, amu eton eitu elulung'ayu ing'ok oo Lamori.” Ore peyie edoyio enkolong etomisimiso enkop, ng'ura, nelioyu emoti napuru, o lang'at le nkima elo te rishata e nena sashat. Ore teina olong, eitobira Olaitoriani osotua o Abram ejoki, “Ore iishoritin inono ekaisho ena kop, eiteru to lkeju le Misiri o metabaiki olkeju sapuk ilo keju le Frati, enkop oo Lkanaan, o Lkeniti, o Lkenisi, o Lkadmoni, o Lhiti, O Lperisi, o lrafai o Lamori, o Lkanaani, o Lgirgashi, o Lyebusi.” Ore Sarai enkitok e Abram eitu eiki Abram inkera. Neeta apa enkaisiaayiani e Misiri naji enkarna enye Haga. Nejoki Sarai Abram, “Ng'ura sii ake, aatudung'o Olaitoriani eishoi, shomo enetii enkaisiaayiani ai, amu ebaiki natum inkera te ninye.” Neiruk Abram oltoilo le Sarai. Metaa ore eishua Abram ilarin tomon te nkop e Kanaan, ore Sarai enkitok e Abram, neya Haga ina aisiaayiani enye oo Lmisiri, neisho Abram olpayian lenye meitaa enkitok enye. Nelo Abram enetii Haga, neiroshiu. Ore peyie edol enkaisiaayiani ajo eiroshiwuo, nemenu Sarai. Nejoki Sarai Abram, “Inchoo ntorrok naaitaasitae meetu shumata iyie. Aaishoo iyie enkaisiaayiani ai ntamuata nkaik ore peyie edol ajo eiroshiwuo naamenu nanu. Inchoo Olaitoriani eiguanare erishata ai o enino!” Kake etiaka Abram Sarai, “Ng'ura, etii enkaisiaayiani ino inkaik inono, intaasa anaa enidol eishiaakino te iyie.” Neisomit Sarai ninye aisilisil o meisikie aitung'uaa kewan. Neinepu olmalaika lo Laitoriani ninye tembata enchorro enkare ti ong'ata. Etii ina shorro enkoitoi nalo Shur. Nejoki ninye, “Haga enkaisiaayiani e Sarai, kaji iyie ing'uaa naa kaji iloito?” Nejo Haga, “Kaisikita ailany ina naaitore ai naji Sarai.” Nejoki olmalaika lo Laitoriani ninye, “Torrinyokinoyu Sarai nilo ayanyit ninye.” Neitoki olmalaika lo Laitoriani ajoki ninye, “Ekaponaa oleng eishoi ino metaa meikenayu te nkumoi.” Nejoki olmalaika ninye, “Ng'ura ajo inuta, naa iiu enkayioni, nimpot enkarna enye ajo Ishmael, amu etoning'o Enkai osina lino.” Naa keaku ninye osikiria le ntim tiatua iltung'ana, keaku ore enkaina enye ear pooki tung'ani, ore inkaik e pooki tung'ani keaku kearr ninye. Naa keibayu ninye ilalashera lenyena. Metaa neipot enkarna Olaitoriani oirorie ninye ejo, “Ira iyie Enkai nadolita,” amu etejo, “Esipa doi katoduaa Enkai naton aishu aidipa atoduaa ninye.” Ore enkaraki eina eishooki ina shorro enkarna aajo Beerlahairoi, netii ninye erishata e Kadesh o Bered. Neiki Haga Abram enkayioni, neipot Abram enkarna enkayioni enye natoikio Haga ajo Ishmael. Ore apa Abram naa oloo larin ntomoni isiet o ile pee eiki Haga ninye Ishmael. Ore pee eaku Abram oloo larin intomoni naaudo o naaudo neipang'aki ninye Olaitoriani nejoki, “Ara nanu Enkai magilani, shomo te dukuya nanu miata entioto, naa kaitobir osotua lai te rishata ai o iyie, naa kaaponaa oleng.” Nebatata Abram te nkomom enye, neirorie Enkai ninye ajoki, “Ing'ura etii osotua lai tenebo iyie, naa iyaku menye loo loshon kumok. Mikintokini aajo enkarna Abram, kake keaku aikiji enkarna ino Abraham amu aaitaa iyie menye loo lororani too loshon. Naa kaapon oleng, naa kaitayu iloshon tiatua iyie, naa kepuku ilaiguanak tiatua iyie. Naa kaitasheyie nanu osotua lai te rishata ai o iyie o eishoi ino indipa iyie atulusoi tiatua iishoritin enye olning'o lo sotua lai loo ntarasi. Naa kaaku Enkai te iyie o tenebo eishoi ino nikisuju. Naa kaaisho iyie tenebo eishoi ino nikisuju enkop nitaayie omon, enkop pooki e Kanaan metaa enino oo ntarasi naa kaaku Enkai enye.” Neitoki Enkai ajoki Abraham, “Ore iyie imbung'a olning'o lai, lo sotua iyie o eishoi ino too iishoritin pooki naapuonu te siadi iyie. Osotua lai ele, limbung iyie, te rishata ai o iyie o eishoi nikisuju iyie: ore pooki lee tiatua intae, naa kemurati. Kemurati intae isuaten oo seseni linyi, naa keaku ina olmonekie lo sotua te rishata ai o ntae. Ore pooki ng'ae oitabayie inkolong'i isiet naa kemurati, pooki lee tiatua iishoritin pooki, oloba anaa olotoiwuoki te nkaji ino, anaa oloinyanguaki too mpisai inono te pooki omoni leme oinoti linyi. Ore ilo oino te nkaji ino oilo oinyanguno too mpesai, nemurati pokira. Metaa etii osotua lai atua iseseni linyi anaa osotua loo ntarasi Ore pooki lee lememurata esuate o sesen lenye, nedung'ori aaiwuang'ie tiatua iltung'ana lenyena amu etigila osotua lai.” Nejoki Enkai Abraham, “Ore Sarai enkitok ino, mintoki aipot ninye ajo Sarai, kake keaku keji enkarna enye Sara. Naa kamayian nanu ninye, ore sii naa kaaisho iyie enkayioni te ninye. Naa kamayian nanu ninye neaku ninye ng'otonye oo loshon, kepukunye ninye ilaiguanak loo loreren.” Nebatata Abraham te nkomom enye nekueni eirorie kewan ejo; “Keikini enkerai olpayian kitok oitabayie ilarin iip nabo? Keidim Sara naitabayie ilarin ntomoni naudo atoiu enkerai?” Nejoki Abraham Enkai, “Oi eishiaakino nincho Ishmael metotona te dukuya iyie.” Nejo Enkai, “A'a, esipa eikiiki enkitok ino Sara enkayioni, naa impot enkarna enye ajo Isaak, naa kaitasheyie osotua lai o ninye, metaa osotua loo ntarasi o too iishoritin naapuonu te siadi ninye. Ore Ishmael, aatoning'o iyie, ng'ura, kamayian nanu ninye naitubulaa naponaa oleng. Naa keaku ninye menye ilaiguanak tomon aare, naa kaitaa ninye olosho sapuk. Kake kaitasheyie nanu osotua lai te Isaak, aikiiki Sara iyie tena rishata, telde ari olotu.” Ore peyie eidip airorie ninye, nelo Enkai aing'uaa Abraham. Neya Abraham olayioni lenye o tenebo irrindiki pooki ootoiwuoki te nkaji enye anaa iloinyang'uaki too mpisai enyena o pooki lee otii atua ilewa le nkaji e Abraham, nemurat pooki isuaten oo seseni lenye ina olong, anaa enaitanapa Enkai ninye. Ore apa Abraham naa oloo larin intomoni naudo o naudo ina kata peyie emurati esuate osesen lenye. Ore Ishmael olayioni lenye naa oloo larin tomon oo kuni peyie emurati esuate osesen lenye. Ore teina olong ake nemurati Abraham tenebo olayioni lenye Ishmael. O lelo lewa pooki le nkaji enye, inot le nkaji enye, o lelo ooinyang'uaki too mpesai too lomon, nemurati pooki tenebo ninye. Neipang'aki Olaitoriani ninye te mbata oo lkeek oo nyaanyukie lng'abolo te Mamre, etonita te kutukaji olng'obor lenye eirowua enkolong. Neraposhu inkonyek enyena neing'orisho, naa ng'ura, eitashe iltung'ana okuni te dukuya ninye. Ore pee edol ninche, nepuku akuetu tiatua olng'obor anang'are ninche, neirrugo ninye abaiki enkop ejo: “Olaitoriani lai, tenanoto omom too nkonyek inono, migiroo ake osinka lino. Inchoo eyauni enkiti are peyie intukuyieyie inkejek inyi, niyeng'iyeng'ang'a te ntonata olchani. Naa kayau enkiti daa peyie intokiki aagolu nindimidimi aashom itagolo amu iimutua enetii osinka linyi.” Nejo ninche, “Taasa anaa enitejo.” Neisarrisar Abraham alo atua olng'obor enetii Sara, nejoki ninye, “Isiosionie imboreitin uni e ntapa napuyiapuy nimpurj aitobir imukateni.” Neipirri Abraham alo enetii inkishu enyena, nereu olashe onana sidai, neisho olaisiaayiani lenye, meisiosiono aitobir. Neyau eng'orno, o kule, o ilo ashe onana oitobira airragie te dukuya ninche. Neitashe te mbata ninche te ntonata olchani einosita endaa. Nejoki ninche ninye, “Koree doi Sara enkitok ino?” Neng'amaaa ajoki, “Etii atua olng'obor.” Nejoki Olaitoriani, “Meeta duoo inchere peyie maarrinyokino iyie te nkata olorujuruj, ore Sara enkitok ino, keaku anaata enkayioni ina kata.” Ore eiro einining'isho ake Sara te nkutuk olng'obor ti oriong e Abraham. Etaa apa moruak oleng ina kata Abraham o Sara, etaa kituaak oleng, metaa meekure duoo ninye eidim Sara atoiu enkerai. Nekweni Sara makewan ejo: “Aidipa ataa moruo, netamorua sii ninye olpayian lai, katum nanu murruna?” Nejoki Olaitoriani Abraham, “Ainyoo doi peyie etakuenia Sara nejo, ‘Kesipa hoo doi ajo kaiu enkerai, nataa taata moruo?’ Keetae entoki nagol to Laitoriani? Ore te nkata nageluno kaashukokino te nkata oloirujuruj, naa ketum Sara enkayioni.” Kake etomikio Sara ajo, “Eitu nanu akueni,” amu etureishe. Kake etiaka, ninye “A-a esipa itakuenia iyie.” Neinyototo lelo tung'ana te ine neing'or enkalo e Sodom neiriamariyie Abraham ninche aitarioo. Nejo Olaitoriani, “Kaisudorie Abraham embae netaa kaas, amaa adolita ajo ore Abraham naa keaku olosho kitok magilani, ore iloshon pooki le nkop kemayian ate te ninye? A'a, amu ategelua ninye peyie atum aitanapa nkera enyena olmarei lenye osuju ninye meibung'a orrekie lo Laitoriani eas isupati o sipat, peyie etum Olaitoriani ayaki Abraham imbaa naaisiligie ninye.” Metaa nejoki Olaitoriani, “Ore amu etaa olkiyioi sapuk te nkaraki Sodom o Gomora, netaa torrok oleng ing'ok tiatua e kadoyio alo aing'or tenaa ketaasa te risioroto olkiyioi oewuo enatii, naa tenemeneijia, nayiolou.” Neibelekenya iltung'ana te ine, nepuo aaitoriokino enkalo e Sodom. Kake eitirring'e Abraham aitashe te dukuya Olaitoriani. Nenyiku Abraham nejo, “Amaa doi aindaikie isupati tenebo iltorrok? Amaa naaji te netii iltung'ana onom supati atua ina anasa, indim aidakie ewueji pooki nimipalie lelo supati onom otii atua? Metalakuana ena bae te iyie pee mias ena bae, aar metuata isupati o ltorrok, eji metaa kenyaanyuk osupat o ltorrono! Metalakuana ina bae te iyie! Amaa ilo oiguanare enkop pooki aimeas esipata?” Nejo Olaitoriani, “Tenatum tiatua Sodom iltung'ana onom ooitashe too sipat, naa kapal enkanasa pooki te nkaraki ninche.” Newal Abraham ajo, “Ing'ura ajo, ayaua kewan peyie airorie Olaitoriani, nara nanu enterit o nkuruon. Amaa sa teneng'oru imiet te onom le lelo ooitashe too sipat, indaikie enkanasa pooki enkaraki natong'oro imiet.” Nejo Olaitoriani, “Maidaikie ninye tenainepu artam o miet te ine.” Neitoki ake airorie ninye ejo, “Oo tenaa artam etumi te ine?” Neng'amaaa ajoki, “Ore enkaraki lelo artam, maas ina.” Neitoki Abraham ajo, “Oi mincho Olaitoriani egoro naa kairo. Oo tenaa tomoni oni etumi te ine?” Newal ninye, “Maas nanu ina tenatum tomoni uni te ine.” Nejo Abraham, “Ing'ura ajo ayaua kewan airorie Olaitoriani. Oo tenaa tikitam etumi te ine?” Newaliki ninye ajoki, “Ore tenkaraki lelo tikitam maidaikie ninye.” Neitoki Abraham ajo, “Oi mincho Olaitoriani egoro, naa kairo ena ae nabo ake. Oo tenetumi tomon te ine.” Newaliki ninye ajoki, “Ore enkaraki e lelo tomon maidaikie nanu ninye.” Nelo Olaitoriani aing'uaa ine, eidipa airorie Abraham. Nerrinyo Abraham alo ewueji enye. Nepuonu ilmalaika oare Sodom teipa, ore Lot egira apa aton te kishomi e Sodom. Ore peyie edol Lot ninche, neinyototo alo anang'are, neirrugo aitabaiki e nkomom enye enkop, nejo, “Ilkituaak laainei embelekenyunye atasayia intae entijing enkaji osinka linyi, erraga, nintukuku inkejek inyi, nidumunyenye tadekenya aayok aapuo.” Nejo ninche, “A'a, aikiirrag enkoitoi nalala.” Kake etasayia Lot ninche oleng, o meibelekenyakinoto enkaji enye, neitaiki ninche osirua, nepejoki ninche imukateni neitu eisuisheki neinos ninche. Ore eton eitu eirura ninche eetuo iltung'ana le nkanasa e Sodom ilooti o lbotoro olorere pooki o metabaiki olobayie aaman enkaji, neipot Lot ejoki, “Koree iltung'ana ooetuo enitii ena kewarie? Intupuku ninche enikitii peyie kitum aatayiolo ninche.” Neipang'aki Lot ninche teboo, nerrinyoki enkikenet enkaji. Nejoki ninye ninche, “Atasayia intae ilalashera laainei emiaas entorroni naba inji. Eng'ura, aata intoyie are nemeyiolo olee, entasho matorikoki intae peyie ipuopuo aitaas eniyieuu ore kulo tung'ana emintaas ae amu eetuo aajing oloip le nkaji ai.” Kake etiakita ninche ninye, “Wuang'a iyie,” nejo sii, “Eewuo ele tung'ani aa olomoni naa ninye olotu aiguanare iyiook! Etaa kintaas iyie entorroni nalang enikintaas ninche.” Nerrumokino pooki aairony Lot, nenyikaki enkaji peyie egil kutuk aji. Kake eitaituo lelo tung'ana inkaik neyietaki Lot atua enkaji natii neiken kutuk aji. Neosh te modoki lelo tung'ana otii boo e kutuk aji e ina ilooti o lbotoro metaa eitanaura ate eirrapurrapu enetii kutuk aji. Nejoki lelo tung'ana Lot, “Ae yata kulikae tung'ana tene?” Aa ilaputak linono, o ntoyie, anaa tung'ani ake ninye liata te nkanasa, intupuku ninche tiatua ene wueji. Amu etinyikua peyie kindaikie ene wueji, amu etasapuka olkiyioi lenye te dukuya Enkai, neirriwua iyiook Olaitoriani maidaikie. Neipang Lot alo airorie ilaputak ooyam intoyie enyena, nejoki “Enyoito entupuku tene wueji, amu etinyikua peyie eidakie Olaitoriani enkanasa.” Kake etotiuo ninye too laputak anaa oltung'ani oiguranie ninche. Ore enasirie neisiosionie ilmalaika Lot ejoki, “Inyo toriko enkitok ino o ntoyie inono pokira are naatii ene, pee mindaaya te nkitamioto ena anasa.” Kake etotona ailitilito, ometaba anaa neibung lelo tung'ana enkaina enye o enkitok enye, o ntoyie enyena pokira are. Ore tenkaraki olng'ur le Nkai te ninye, eyautua ninye auluo enkanasa. Ore peyie eitupuku ninche ninye, etiakita, “Isikie enkishui ino, niminang ake silig, nimintashe ake te dikae to yarata isikaki indoinyo pee mindaaya.” Nejo Lot, “Oi mme neijia Olaitoriani lai. Ing'ura ajo enoto osinka lino omom too nkonyek inono, nitoponayie olng'ur lino te nanu anaa pee intajeu enkishon ai, kake maidim aisikaki indoinyo eitu aainepu enkidaata naye nanu. Ing'ura enda anasa nataana naa kiti sii, nchooki makuetiki ine aime kiti ninye? Naa keitajeuni enkishui ai.” Nejoki ninye, “Ing'ura ajo aatonyorrikia sii ina bae, metaa maidaikie ina anasa nitejo. Tasioi isikaki ine, amu maas ae o tabai ine.” Enkaraki ina peyie etejoki enkarna eina anasa Soar. Eilepua enkolong ina kata nabau Lot Soar, neitashaiki Olaitoriani Sodom o Gomorra isoito o oyupuyup o oishu o enkima, eing'uaa Olaitoriani eimu keper. Nemut ninye nena anas, o erata pooki o pooki omanya inkanas, o pooki toki nabulu e nkop. Kake etanang'a enkitok e Lot silig esujita ninye, neaku ninye eng'ape e Munyan. Neinyototo Abraham tadekenya alo ewueji neitasheyie te dukuya Olaitoriani. Neing'or ninye enkalo e Sodom o Gomorra o enkalo enkop pooki o yerata, naa ng'ura, upe eilepita empuruo eina kop anaa empuruo olkokuet. Metaa ina apa emutata oo nkanas natii oerata. Etadamua Enkai Abraham neirriwaa Lot aitung'uaa atua ineemuti, anaa peyie emut inkanas naamanya Lot. Nepuku Lot aing'uaa Soar, amany ildoinyo tenebo ntoyie enyena pokira are amu ekeure apa atotona te Soar, metaa etamanya enkapune tenebo ntoyie enyena pokira are. Nejoki entito botor enkanashe “Etamorua papa, nemetii oltung'ani te nkop oboitare iyiook to rrekie le kiyama. Wou, maitemera papa enaisho oo sabibu peyie kisiap ninye nikintudupaki ninye eishoi.” Neitemer menye te naisho oo sabibu ina kewarie, nejing entito botor aisiap menye, neitu eyiolou Lot enkata naisiapa ninye o enkata natupukuo aing'uaa. Ore peyie eaku enkolong e are, nejoki entito botor enkiti, “Ing'ura ajo aisiapa ng'ole papa; manyaaki aisho ninye enaisho ena kewarie, nilo sii iyie aisiap peyie kitum aaitudupai eishoi e papa lang.” Neitemer menye te naisho oo sabibu ina kewarie nasuju, nedumunye entito kiti aisiap menye, neitu eyiolou Lot enkata naisiapa ninye o enkata natudumunye. Metaa nenutayu isilan pokira are e Lot te menye. Ore entito botor etoiwuo enkayioni neipot enkarna enye ajo Moab, naa ninye menye lo Lmoabu ometabaiki ena olong. Neiu sii ninye enkiti enkayioni, neipot enkarna enye ajo Ben-ammi, naa ninye menye loo Lamoni o metabaiki ena olong. Neidur Abraham te ine alo enkalo enkop e Negeb, nemany erishata e Kadesh o Shur nelo sii Gerar. Etejo Abraham tialo Sara enkitok enye, “Enkanashe ai ninye.” Ore olaiguanani Abimelek le Gerar, eirriwayie enkutuk meyauni Sara aayaki. Kake eewuo Enkai kewarie enetii Abimelek te nkidetidet, nejoki, “Ing'ura ira iyie oltung'ani otua tenkaraki ina kitok niwa, amu ore ninye naa enkitok e likae tung'ani.” Ore eton eitu elo Abimelek anyikaki ninye, etejo, “Olaitoriani, oar metuata iltung'ana loo sipat? Keitu aajoki ninye makewan, ‘Enkanashe ai ninye?’ Netejo sii ninye enkitok, ‘Olalashe lai ninye.’ Metaa e supatisho oltau o sidano ataasie ena.” Nejoki Enkai ninye teina kidetidet, “Ee ekayiolo ajo itaasa ena te supatisho oltau lino, kake nanu laaibooyie peyie mikintaas eng'oki, metaa eitu aaisho iyie iseyie ninye. Ore tena kata ayieu nirrinyoki olpayian enkitok enye, amu ore ninye naa oloiboni le Nkai, naa aikiomonoki ninye peyie nipok. Kake Naa tinimirrinyu iyie ninye, tayiolo ajo meeta inchere peyie miye, iyie o pooki toki ino.” Neinyototo Abimelek tadekenya enasirie, neipotu ilaisiaayiak lenyena pooki neinosaki ninche kuna baa pooki, neureishoyu iltung'ana oleng. Neipotu Abimelek Abraham, nejoki ninye, “Kaa bae ena nintaasa iyiook? Naa kaa ng'oki aaitaasa nanu iyie eji metaa kiyaka iyie nanu o enkitoria ai eng'oki sapuk? Kintaasa nanu imbaa nemeishaakino neasi.” Nejoki Abimelek Abraham, “Ainyoo endamunoto niata peyie itaasa ena bae?” Nejo Abraham, “Ataasa amu atadamua ajo, metii ene euriata e Nkai katukul, naa kaari enkaraki enkitok ai. Ore sii enkae, ekesipa doi tenajo enkanashe ai amu ore ninye, naa entito e papaai lai neme entito e yieyio lai, netaa enkitok ai. Ore apa peyie aaisho Enkai maidurra te nkaji e papa, naatiaaka ninye, ‘Ena embae nikintaas nanu, ore pooki wueji nikijing', tejo tialo nanu, olalashe lai ninye.’ ” Neitayu Abimelek intare, o lmong'i o lewa o ng'oruo irrindiki, neisho pooki Abraham nerrinyoki ninye enkitok enye Sara. Nejo, Abimelek, “Ore enkop ai pooki, etii dukuya ino tamanya pooki neba anaa eninyor.” Nejoki Sara, “Ing'ura aishoo olalashe lino inkoshola enkalifu nabo, naaku ine nkitoipoto ino too nkonyek e lelo pooki likiboitare, ore te dukuya lelo pooki neaku aikinkenakini esipata.” Neomon Abraham Enkai, neishiunye Enkai Abimelek tenebo enkitok enye ng'oruo rrindiki metaa etoiwutuo inkera. Amu eteena apa Olaitoriani ng'ueseti enkaji pooki e Abimelek tenkaraki Sara enkitok e Abraham. Nemutan Olaitoriani Sara anaa apa enatejo, neitaas ninye anaa enaisiligie. Nenutayu Sara neiki Abraham enkayioni te nkata e moruao enye, te nkata erishata natiaka ninye Enkai. Neipot Abraham enkarna enkayioni enye natoikio ninye Sara ajo Isaak. Nemurat Abraham enkayioni enye Isaak etaa oloo nkolong'i isiet, te inoto, anaa enaitanapa Enkai ninye. Etaa Abraham oloo larin iip peyie eikini ninye enkayioni enye Isaak. Nejo Sara, “Aaitobiraka nanu Enkai enkuenia; ore pooki ng'ae oning, naa kaakueniyie nanu.” Nejo ninye, “Aing'ae aikata oidima atiaaki Abraham inchere keitanak Sara inkera? Ore ake eyia, natoikio ninye enkayioni te nkata emoruao enye.” Nebulu ina kerai, neoruni ilki, neitobir Abraham osirua sapuk ina olong naoruni Isaak ilki. Nedol Sara enkayioni e Hagar olmisiri, natoikio ninye Abraham eiguran o enkayioni enye Isaak. Nejoki ninye Abraham, “Taarai impang'ie ena kitok rrindik tenebo enkayioni enye, amu meaku enkayioni ena kitok rrindik olajung'oni tenebo olayioni lai Isaak.” Neaku torrono oleng ina bae te dukuya Abraham te nkaraki enkayioni enye. Kake etiaka Enkai Abraham, “Mincho kintagor ororei le nkerai o tenkaraki enkitok ino rrindik, ore pooki nikijoki Sara, taasa ina. Amu Isaak eipotieki eishoi ino. Naa kaitayu sii olosho tiatua enkayioni enkitok rrindik, amu ole ishoi ino sii ninye.” Neinyototo Abraham tadekenya enasirie, neya endaa o lbene lolchoni le nkare; neisho Hagar meiteleiki oloililai lenye tenebo ina kerai neisho ninche meshomo. Nedumunye alo nelimana ti ong'ota e Beer-sheba. Ore peyie emita enkare natii olbene lolchoni neing'uaa enkerai te ntonata osanag. Nelo aing'uaa aton tenelamita te wueji neba anaa engororoto e mbae. Amu etejo, “Mincho aduaaki keeya enkerai ai.” Ore eton tenelamita ninye, neilepie enkerai oltoilo aishir. Nening Enkai oltoilo leina ayioni, neipot olmalaika le Nkai Hagar eing'uaa keper nejoki ninye, “Ainyoo nikigira aitanyamal iyie Hagar? Miureishoyu, amu etoning'o Enkai oltoilo le nkishirata leina ayioni te ine netii. Inyo tudumu enkerai imbung'a tukurraki nkaik inono, amu kaitaa ninye olosho kitok.” Nebol Enkai inkonyek e Haga nedol enchorro enkare, nelo aiput ilo bene lenye lo lchoni enkare neisho ina ayioni metooko. Netii Enkai tenebo enkayioni nebulu ninye nebik tiong'ota, neaku olang'oroni padan le nkawuo. Nebik tiong'ata e paran, neyamaki ng'otonye enkitok naitung'uaa enkop e Misiri. Ore apa ina kata, etiaakita Abimelek tenebo Fiko aa olkitok le njore, Abraham, “Etii Enkai tenebo iyie too siaaitin pooki nias, ore naa taata, ayieu ninos olmumai te nanu ajo te Nkai mikintaas emonkoi, anaa intaas enkerai ai, anaa intaas eishoi ai. Kake ore anaa ina supatisho naaitaasa, ninye sii nanu intaasaki te ina kop nitaayie omoni.” Nejo Abraham, “Kanya olmumai.” Neing'unyung'unyaki Abraham Abimelek tenkaraki enchorro natoorutuo isinkan le Abimelek. Nejo Abimelek, “Mayiolo ajo aing'ae otaasa ena bae, eitu sii kiliki, neitu aekata aning ometabaiki ena olong.” Neyau Abraham nkerra o lmong'i neisho ninche Abimelek, neitayu pokira olning'o. Negelu Abraham isupeni naapishana e kerra too ntare meitasho oopeny. Nejoki Abimeleki Abraham, “Ainyoo eitodolu kuna supeni naapishana e kerra nitegelua meitasho oopeny.” Nejo, “Ore kuna supeni naapishana e kerra ining'amaa too nkaik aainei metaa iyaku iyie olchakeni lai inchere atuturo ena shorro.” Ore te nkaraki ina, neji ine Beer-sheba, amu te ine einosa pokira oare olmumai. Metaa eitaituo ninche olning'o te Beer-sheba. Nerrinyo Abimelek tenebo Fiko olkitok lenye le njore enkop oo Lfilisti. Neun Abraham enchani nanyaanyukie oloilei te Beer-sheba, neipot ninye te ine enkarna o Laitoriani, Enkai oo ntarasi. Nebik Abraham te nkop oo Lfilisti inkolong'i kumok. Ore etulusoitie kuna baa etetema Enkai Abraham ejoki ninye, “Abraham” nejo ninye, “Nele nanu.” Nejoki, “Toriko olayioni lino Isaak ilo laa ninye ake iata, ilo linyor, nipuopuo enkop e Moria, nintayu ninye te ine metaa olasar o pejori te nchumata o ldoinyo obo laaliki.” Metaa einyo Abraham tadekenya enasirie neirot osikiria lenye, nerik ilbarnot lenyena oare tenebo enkayioni enye Isaak. Nedung'u ilkeek ooinokie olasar opejori, nedumunye alo ewueji netiaka ninye Enkai. Ore te nkolong e uni, neraposhu Abraham inkonyek nedol ewueji nelakua. Nejoki Abraham ilbarnot lenyena, “Entotoni tene tenebo ele sikiria pee alo nanu o enkayioni idie aaseremisho peyie kintoki aashukunye.” Neya Abraham ilkeek ooinokieki olasar opejori, neiteleiki oloililai le Isaak enkayioni enye. Nenap te nkaina enye enkima o enkalem. Nepuo pokira are aairiamari. Nejoki Isaak papaai lenye Abraham, “Papaai!” Nejo Abraham “Nele nanu enkayioni ai.” Nejo Isaak, “Ing'ura ajo kiata enkima o lkeek paa koree doi olkuo le ker likintainye olasar opejori?” Nejo Abraham, “Ekeisho Enkai kewan olkuo le ker lolasar o pejori enkayioni ai.” Kaae nepuo pokira are aairiamari. Ore peyie ebau ewueji natuutaka Enkai ninye, neshetu Abraham olperere lo lasar te ine neirragie ilkeek aitobiraki, neen Isaak enkayioni enye, neirragie ninye te wueji o lasar te nchumata oo lkeek. Neitorioo Abraham enkaina enye nedumu enkalem nayieng'ie enkayioni enye. Kake eipoto ninye olmalaika lo Laitoriani eing'uaa keper ejoki, “Abraham! Abraham!” Nejo ninye, “Nele nanu.” Nejo, olmalaika, “Minteleiki enkaina ino enkayioni anaa intaas ninye ae, amu atayiolo taata ajo iure Enkai amu atoduaa ajo eitu kimitiki enkayioni ino ina naa ninye ake iata.” Neraposhu Abraham inkonyek enyena aing'orisho nedol te siadi ninye olmeregesh otaasha entim imowuarak enyena, nelo Abraham aya ilo meregesh, neitayu ninye aitaa olasar opejori te rishata e nkayioni enye. Neipot Abraham ine wueji ajo, “Eneishorunye Olaitoriani.” Naa ina arna eeta ine o taata, ore to ldoinyo lo Laitoriani keishoruni. Neitoki olmalaika lo Laitoriani aipot Abraham enkata e are eing'uaa shumata. Nejo, “Ainosa nanu olmumai te nkewan ai ejo Olaitoriani, ore amu itaasa ena neitu imit enkayioni ino aa ninye ake iata, ekaamayian iyie oleng', naa kaponaa eishoi ino metotiwuo anaa ilakir le keper netiu sii anaa osinyai le nkiyopata enaiposha. Ore eishoi ino neaku e nenye kishomi oo lmang'ati lenye. Naa tiatua eishoi ino emayian iloshon le nkop pooki ate, amu itoning'o oltoilo lai.” Nerrinyokino Abraham ilbarnot lenyena, nedumunye pooki aapuo Beer-sheba. Nebik Abraham te Beer-sheba. Neaku ore ti oriong kuna baa, etiakaki Abraham, “Ing'ura sii ajo, etoikio Milka olalashe lino Nahor inkera. Usi ilo kikau lenye, o Obus olalashe lenye, o Kemuel menye le Aram. Keseed, o Haso, o Pildash, o Yidlaf o Betuel.” Neaku Betuel menye le Rebeka. Lelo pokira isiet etoikio Milka olalashe le Abraham Nahor. Ore ake sii, ore ina apiani naji enkarna enye Reuma, etoiwuo Teba, o Gaham, o Tahash, o Maaka. Eishua apa Sara ilarin iip o tikitam o naapishana, lelo apa larin le nkishui e Sara. Neye Sara te Keriath-arba (aa ninye Hebron), te nkop e Kanaan. Nelotu Abraham aishiraki to sina Sara, neishir oleng. Neinyototo Abraham te dukuya ina tang'atang'a enye, nejoki lelo Hiti, “Ara olomoni o lalotoni tiatua intae, enchooki ewueji tiatua intae metaa ewueji enkurare pee atum atuturoi entang'atang'a ai aiwuang'ie too nkonyek aainei.” Newaliki Ilhiti Abraham aajoki, “Toning'o iyiook olkitok lai, ira iyie olkitok magilani tiatua iyiook. Tuturoi entang'atang'a ino te nkurare naba anaa enigelu too nkuraren ang', meetae hoo obo lang Likimitiki enkurare enye anaa kimitiki iturorie entang'atang'a ino.” Neinyototo Abraham neirrugo te dukuya lelo Hiti oopeny enkop. Nejoki ninche, “Tiniyieuu nanukaa entang'atang'a ai aiwuang'ie too nkonyek aainei, entoning enajo, entoomonokoki te Efron olayioni le Sohar, peyie aaisho enkapune e Makpela naata to lpijata lo lokeri lenye. Inchoo maaishoo te nkinyang'a enye pooki idolitata metaa ewueji ai oo nkuraren.” Neton sii apa ninye Efron tiatua Lhiti. Newaliki Efron ilo Hiti Abraham ening'ito ilhiti o pooki oim kishomi e nkanasa, ajo: “A-a, olkitok lai, toning'o enajo, ekaisho olokeri tenebo enkapune natii atua, te dukuya ilayiok pooki lo lorere lai, aaishoo iyie tunukarie entang'atang'a ino.” Neirugo Abraham te dukuya olorere le ina kop. Nejoki Efron ening'ito olorere le ina kop, “Kake tenaa aikining', aatasayia inchooki matalaa iropiani olokeri, tang'amai elaata te nanu peyie atum atuturoi entang'atang'a ai te ine.” Newaliki Efron Abraham ajoki, “Olkitok lai, toning'oki: amaa eoroti e nkop neimu shekeli iip ong'uan e nkosholai, ainyoo ina te rishata ai o iyie? Tuturoi entang'atang'a ino.” Nening'okino Abraham o Efron ina laata. Neikenaki Abraham Efron inkoshola naaipotuo ening'ito Lhiti, shekeli iip ong'uan e nkosholai anaa enkinyiang'a oo lamirak. Metaa ore olokeri le Efron otii Makpela natii oloosaen le Mamre olokeri oota enkapune tiatua o lkeek ootii olokeri, enkop pooki, eishooki Abraham metaa enenye te dukuya Ilhiti, o lelo pooki ooim enkishomi ejing enkanasa. Ore peyie eidipayu ina neturoo Abraham Sara enkitok enye te nkapune olokeri le Makpela natii oloo saen le Mamre (aa ninye Hebron) te nkop oo Lkanaan. Ore olokeri tenebo enkapune natii atua eishooitie Lhiti aaisho Abraham metaa ewueji e nkurare oo ltung'ana lenyena. Etaa apa Abraham olpayian kitok otobikoyie ilarin kumok oleng', netamayiana Olaitoriani Abraham te pooki toki. Nejoki Abraham osinka lenye otobiko oleng te nkaji laa ninye oitasheiki imasaa enyena pooki, “Tipika enkaina ino abori enkupes ai, naa kaainosie iyie olmumai to Laitoriani, te Nkai e keper o enkop, inchere miyamaki olayioni lai enkitok too ntoyie oo Lkanaan laa ninche amanya atua. Kake ilo enkop ai olgelata lai, nirikoki olayioni lai Isaak enkitok.” Nejoki olaisiaayiani ninye, “Eidimayu metanya enkitok aasuju alotu ena kop, karik olayioni lino arriny ina kop apa ning'uaa?” Nejoki Abraham ninye, “Toduaa ake mirriny olayioni lai ine. Ore Olaitoriani Enkai e keper laaitayio nanu te nkaji e papaai lai o te nkop apa naatoinyieki, laairorie naainosie olmumai aajoki, ‘Iishoritin inono aisho ena kop.’ Ekeirriwaa olmalaika lenye te dukuya iyie, naa ilo iyie arikoki olayioni lai entito te ine. Naa tenemeyieu enkitok nikisuju iyie, nimikintoki olmumai lai aibung': kake mirrinyoki ake olayioni lai ine.” Metaa nepik osinka enkaina enye abori enkupes e Abraham olkitok lenye, nenya olmumai tenkaraki ina bae. Nereu osinka intamesin tomon olkitok lenye nelo eya nkishorot kumok oo mpukunot pooki to lkitok lenye nedumunye alo Mesopotamia, enkanasa e Nahor. Neitigil intamesin kung tiauluo enkanasa te mbata enchorro etaa teipa erishata napuonu inkituaak aaoku enkare. Nejo ninye, “Oi o Laitoriani Enkai o lkitok lai Abraham, inchooki ena olong dupoto aatoomono iyie, nintodolu enyorrata ino nauno to olkitok lai Abraham. Ng'ura, aitashe nanu te mbata enchorro e nkare, ore intoyie oo ltung'ana lena anasa egira aapuku aaipang'u aoku enkare. Inchoo metaa ore entito najoki, aatoomono intadou emoti ino matooko enkare, naajoki tooko, naa kaokoki sii intamesin inono inchoo metaa ninye itegelaka osinka lino Isaak. Teina ayiolou ajo intodolua enyorrata nauno to olkitok lai.” Ore eton eitu eishu inkirorot, nemaniki Rabeka entito e Betuel olayioni le Milka, enkitok e Nahor olalashe le Abraham elotu eeta emoti to loililai lenye. Naa entito sidai oleng tiong'u, eselenkei neitu aikata eyiolou olee, nedoiki enchorro, neigany emoti enye, neilepu. Nekuet osinka anang'are ninye nejoki, “Aatoomono inchooki enkiti are naok te moti ino.” Nejo ninye, “Tooko olkitok lai”, “nesiokisioki aitadou emoti te nkaina enye neisho ninye metooko. Ore peyie eidip aishoo ninye metooko, etiaka, Ekaokoki sii intamesin inono o metaba anaa neraposho.” Metaa eijililiaka emoti enye empeut neipirri arrinyo enchorro aoku omeitaraposho intamesin enyena pooki. Neing'or osinka ninye aitirring'a meiro, ajurru tenaa keitudupo Olaitoriani elutunoto enye anaa keitu. Ore peyie eidip intamesin aatookisho, eitayio oltung'ani olgisoi le sahabu laa eoroti nabo e shekel enkiroishi, o lkataarri aare loo nkaik enyena oimu enkiroishi enye shekeli tomon e sahabu. Nejo, “Aatasayia tolikioki ajo ira entito e ng'ae? Ketii olgilata likirrag enkaji e papaai lino?” Nejoki ninye ninye, “Ara entito e Betuel olayioni le Milka otoikio Nahor.” Neitoki ajoki, “Kiata sii pokira olkujita o lgilat ooirragi.” Neirrug oltung'ani elukunya aserem Olaitoriani. Nejo: “Meisisi Olaitoriani Enkai olkitok lai Abraham, leitu eing'uaa enyorrata enye nauno o enchunet enye to Laitoriani lai. Ore nanu, aatorikuo Olaitoriani te nkoitoi arikoki enkaji oo lalashera lo lkitok lai.” Neipirri ina tito aliki enkaji e ng'otonye kuna baa. Eeta apa Rebeka olalashe oji enkarna enye Laban. Nepuku Laban akuet alo enetii ilo tung'ani te nchorro. Ore peyie edol olgisoi o lkataarri otii inkaik e nkanashe, nening'u sii irorei le Rebeka enkanashe enye oojo, “Neija aatiaaka oltung'ani,” eshomo enetii oltung'ani; nenyorriki eitashe tembata oo ntamesin te nchorro. Nejoki, “Tijing'u, olomayiana lo Laitoriani, ainyoo peyie intashe tiauluo: naidipa aitobira enkaji o ewueji oo ntamesin.” Metaa etijing'ua ilo tung'ani atua aji, nelaku Laban ilolan too ntamesin, neisho ninye ninche endaa oo ntamesin. Neisho sii ninye enkare naisujie inkejek enyena o tenebo lelo oiriamunore. Neirragakinyeki ninye endaa meinosa, kake etejo ninye; “Manya endaa o metaba anaa nairo ororei laayawua.” Nejoki Laban ninye, “Iroro.” Metaa etejo ninye, “Ara nanu osinka le Abraham! Netamayiana Olaitoriani olkitok lai oleng, neitaa ninye karsis: eishoo ninye inkishu, o ntare, inkoshola o sahabu, o sinkan, o nkaisiaayiak, o ntamesin o sirkon. Ore Sara, enkitok olkitok lai etoikio ninye enkayioni etaa moruo. Ore nena masaa pooki neishoo olayioni lenye. Aainosie olkitok lai olmumai ajoki, ‘Milo iyie ayamaki olayioni lai enkitok too ntoyie oo Lkanaan lena kop naamanya. Kake shomo enkaji e papa lai, o ltung'ana lang torikoki olayioni lai enkitok.’ Najoki nanu olkitok lai, ‘Eidimayu metanya enkitok aasuju nanu.’ Kake aatiaaka ninye nanu, ‘Ore Olaitoriani lalo te dukuya ninye naa keirriu olmalaika lenye tenebo iyie neitumunyan enkoitoi ino, nirikoki enkitok olayioni lai too ltung'ana lang le nkaji e papa. Niking'uaa ina kata olmumai tinilo enetii iltung'ana laainei. Naa tinikimitiki ninche ninye, nimikintoki aibung iyie olmumai lai.’ “Nalotu duoo nanu e nchorro najo, ‘Oi Olaitoriani Enkai olkitok lai Abraham, tenaa aitumunyana tena kata enkoitoi naim aitorioo, ing'ura aitashe nanu te mbata enchorro e nkare, inchoo entito nalotu aoku enkare naa tenajoki, “Aatoomono inchooki te moti ino; enkiti are naok. Naajoki nanu, Tooko naa kaokoki sii intamesin inono,” inchoo metaa ninye enkitok nategeleka Olaitoriani olayioni lo olkitok lai.’ “Ore sii ake eitu aishu enkiroroto oltau lai, ng'ura, nelotu Rebeka enapita emoti e nkare to loililai, nedoiki enchorro aoku enkare. Najoki ninye, ‘Aatoomono inchooki matooko.’ Nesioki aitadou emoti enye to loililai lenye nejo; ‘Tooko, naa kaisho sii ninche ntamesin inono.’ Neaku atooko nanu neisho sii nena tamesin enkare. Naitoki aikilikuan ninye ajoki: ‘Ira entito e ng'ae?’ Nejo, ‘Entito e Betuel olayioni le Nahor otoikio ninye Milka.’ Napik olgisoi enkume enye olkataarri inkaik enyena. Nairrug elukunya aserem Olaitoriani, naisis Olaitoriani Enkai o lkitok lai Abraham, ilo laatorikoyie te nkoitoi nasipa matoriko entito o lalashe lo lkitok lai arikoki olayioni lenye. Ore naa taata, tenaa aiyasiasa esupatisho o esipata to lkitok lai entolikioki nanu, naa tinimiasiasa entolikioki nanu peyie atum aibelekenyakinoyu enkaina e tatene arashu kedienye.” Newal Laban o Betuel aajo, “Ore ena bae naa Olaitoriani eing'uaa. Mikindiim aatiaaki iyie entorrono anaa esidai. Ing'ura neina Rebeka natii dukuya iyie, toriko ninye shomo metaa ninye enkitok olayioni lo lkitok lino anaa enairoro Olaitoriani.” Ore peyie ening olaisiaayiani le Abraham irorei lenye neirrugo abaiki enkop te dukuya Olaitoriani. Neyau ilo aisiaayiani intokitin naagol enkinyiang'a o enkosholai o sahabu o nkilani neisho ninche Rebeka. Eishoo sii ninye olalashe lenye tenebo ng'otonye intokitin naagol enkinyang'a. Ore ninye o lelo tung'ana apa ootii tenebo ninye, nedaa neokisho, neirrag ine. Ore pee einyototo ninche tadekenya, nejo ninye, “Entushukoki enetii olkitok lai.” Nejo olalashe tenebo ng'otonye, “Enchoo entito eng'as aton tenebo iyiook inkuti olong'i, anaa napaji inkolong'i tomon, ore peyie eishunye neidim ashomo.” Kake etiaka ninye ninche, “Mikintokiki ailitilit, anaa enaidipa Olaitoriani aitumunyana enkoitoi ai, enchooki mashomo enetii olkitok lai.” Nejo ninche; “Aikimpot entito aaikilikuan enajo.” Neipot ninche Rebeka, nejoki ninye, “Amaa airiamariyie ele tung'ani?” Newal ajo, “Ekalo.” Neaku eishoo ninche Rebeka enkanashe enye meshomo tenebo enkaisiaayiani enye, o sinka le Abraham tenebo iltung'ana lenyena. Nemayian ninche Rebeka ejoki: “Enkanashe ang taa iyie ng'otonye oo nkalifuni, oo nkalifuni tomon, naa inchoo metujung'o eishoi ino kishomi elelo ooiba ninche.” Nedumunye Rebeka tenebo inkaisiaayiak enyena, neked ntamesin neirukurukore ilo tung'ani, neaku etoriko ilo aisiayani Rabeka, nelo enkop enye. Eewuo apa Isaak ina kata eing'uaa Beer-lahai-roi nelotu abik te Negeb. Nepuku Isaak alo ong'ata adamisho teipa, neraposhu inkonyek enyena, ngura nedol intamesin naapuonu. Neraposhu Rebeka inkonyek enyena nedol Isaak, ore peyie edol ninye nedou te ntames, nejoki ilo aisiaayiani, “Kalo tung'ani lido olotu ti ong'ota anang'are iyiook?” Nejoki ilo aisiaayiani, “Olkitok lai.” Neitayu enkarasha aitoip kewan. Neinosaki ilo aisiaayiani Isaak imbaa pooki naataasate. Nerik Isaak ninye atua olng'obor. Neya Rebeka neaku ninye enkitok enye, nenyorru ninye. Neaku eitagoloki apa Isaak te nkeeya e ng'otonye. Neyam Abraham ae kitok naji enkarna enye Ketura. Neiki ninye Simran, o Yokshan, o Medan, o Midian, o Ishbak, o Shua, ore apa Tokshan naa ninye menye le Sheba, o Dedon. Ore ilayiok le Dedan, naa Asshurim, o Letushim, o Leumim. Ore ilayiok le Midian naa Epa, o Eper, o Hanok o Abida, o Eldaa. Ore apa kulo naa nkera e ketura. Neisho Abraham pooki toki naata Isaak. Kake eishoo Abraham ilayiok loo nkapiak enyena inkishorot, ore eton eishu, neidurrie ninche aitung'uaa olayioni lenye Isaak meshomo enkop oloosaen. Kuna inkolong'i oo larin le nkishui e Abraham, ilarin iip o ntomoni naapishana o imiet, neye Abraham etaa olpayian kitok etamorua amitunye, nepiki ninye eneiturrurrorre olorere lenye. Nenukaa ninye ilayiok lenyena Isaak o Ishmael te nkapune e Makpela te nkurma e Efron olayioni le Soha loo Lhiti. To loo saen le Mamre, te nkurma nainyiang'ua apa Abraham too Lhiti. Metaa te ine apa etunukayioki Abraham tenebo enkitok enye Sara. Ore peyie eidip Abraham atua, etamayiana Enkai Isaak olayioni lenye. Nebik Isaak te Beelarahoi. Kulo ninche ile ishoi e Ishmael olayioni le Abraham otoikio ninye Hagar e Misiri naa enkaisiaayiani apa e Sara. Kuna ninche nkarn oo layiok le Ishmael anaa enaikunakino te inoto enye: Nebaiot aa ninye olkikau le Ishmael o Kedar, o Adbeel, o Mibsam, Mishma, o Duma, o Masa, o Hadad, o Tema, o Yetur, o Napish, o Kedema. Kulo ninche ilayiok le Ishmael naa kuna inkarn enye, too nkangitie enye o too lngoborri lenye. Ilkituaak tomon o are anaa iloshon lenye. (Kulo ninche ilarin le nkishui e Ishmael ilarin iip o tomoni uni o naapishana, neitianya aye, neiturrurrokino ninye olorere lenye.) Nemany ebaiki Hafila o meshomo Shur, natii enkalo o loosaen le Misiri te nkalo e Asiria. Etamanya apa ninye enetalakinore olikae orere pooki lenye. Kulo ninche ile ishoi e Isaak olayioni le Abraham: ore apa Abraham naa ninye menye le Isaak. Ore apa Isaak naa oloo larin artam peyie eyam enkitok enye Rebeka, ina tito e Betuel le Aramean te Padan-aram, ina anashe e Laban le Aramean. Neomon Isaak Olaitoriani tenkaraki enkitok enye, amu koolupi apa ninye, newal Enkai enkomono enye, neiroshiu Rebeka enkitok enye. Nepupung'a nkera tiatua enkoshoke enye, nejo ninye, “Amaa tenaa inji etiu, ainyoo doi peyie aishu? Nelo ninye aikilikuan Olaitoriani ina bae.” Nejoki Olaitoriani ninye, “Etii iloshon aare atua enkoshoke ino, naa ore lelo tung'ana pookira liiu, naa ekeori; ekegolu obo aalang olikae, ore olbotor naa keisiaai oloti.” Ore peyie ebau inkolong'i enyena peyie ejing aji, ng'ura! Eeta ilmao te nkoshoke enye. Ore olotang'asunye naa kenyokie, naa keju osesen lenye pooki anaa ilpapit le nkila, neipot ninye aajo enkarna Esau. Neitoki olalashe lenye asuju, ore enkaina enye eibung'ita entutunyo e Esau, neipot ninye aajo Yakobo ore apa Isaak naa oloo larin ntomoni ile peyie eiki Rebeka ninye lelo mao. Ore peyie ebulu lelo ayiok, neaku Esau olang'oroni padan naa oltung'ani sii liong'ota. Ore Yakobo, naa oltung'ani obor ogira aton too lng'oborri. Kenyor apa Isaak Esau tenkaraki nkiri oo ng'uesi naayaki ninye. Ore Rebeka nenyor Yakobo. Ore nabo olong egira Yakobo ayier imotori oo nkaitubulu enkurma enye, nebau Esau eing'uaa ong'ota neeta esumash oleng. Nejoki Esau Yakobo; “Etaa kaye te sumash, inchooki mainosa ina toki nayiera natii emoti. Ore enkaraki ina, neji enkarna enye Edom.” Newaliki Yakobo ninye ajoki “Tang'asa timirakaki esipata e kikauisho ino.” Nejo Esau, “Etaa kaye, kenenyoo tipat naata esipata e kikausho te nanu?” Nejoki Yakobo, “Tang'asa inosakaki olmumai.” Neinos ninye olmumai, nemiraki ninye Yakobo esipata enye e kikausho. Neaku neisho Yakobo Esau emukate tenebo nena motori, nenya neok sii, neinyototo alo. Neaku etemenayie Esau esipata enye e kikausho. Enyaaka olameyu ajing enkop leme olapa ameyu le nkata e Abraham. Nelo Isaak Gera enetii Abimelek olaiguanani loo Lfilisti. Neipang'aki Olaitoriani ninye ejoki, “Midoyio alo Misiri, totona tamanya enkop naaliki. Indurrudurra tena kop, naa kaaku nanu tenebo iyie, naa kaamayian, amu iyie tenebo iishoritin inono aisho kuna kuapi pooki, naitabaya olmumai lainosie papaai lino Abraham. Kaponaa eishoi ino metotiwuo anaa ilakir le nkeper, naisho eishoi ino ena kop pooki naa te ishoi ino emayian iloshon le nkop pooki ate. Ore amu etoning'o Abraham oltoilo lai, neibung enkikoo ai, o nkitanapat aainei pooki.” Neaku etamanya apa Isaak Gera. Ore peyie eikilikuan ilewa leine imbaa naipirta enkitok enye, etejo ninye “Enkanashe ai ninye.” Amu eturia ninye ejo, “Enkitok ai” edamu ajo, “keidim ilewa leine ataar ninye metua tenkaraki Rebeka,” amu aisidai ninye oleng te nidol. Ore peyie ebik ninye teine enkata naado eturumishe te lusie Abimelek olaiguanani loo Lfilisti, nedol Isaak eirrapirap Rebeka enkitok enye. Metaa eipoto Abimelek Isaak nejoki, “Nyorriki ime enkitok ino, kaji inkuna peyie itejo ‘Enkanashe ai ninye’?” Nejoki Isaak ninye, “Amu atadamua ajo, ‘peyie maye tenkaraki ninye,’ ” Nejo Abimelek, “Ainyoo ena nintaasa iyiook? Eidim obo loo ltung'ana ashomo enetii enkitok ino, nipik iyiook entaboi te sunkureisho.” Metaa eikoo Abimelek iltung'ana pooki ejoki, “Ore pooki ng'ae oiseyie ele tung'ani anaa enkitok enye naa keari metua.” Neunisho Isaak teina kop ilo ari, netum enkisampuare iip nabore. Nemayian Olaitoriani ninye. Neaku apa ilo tung'ani karsis neponari imasaa oleng oleng, ometaa tetia. Eeta apa ntare kumok o luaat oo nkishu, olmarei sapuk ometaa etoduakita Ilfilisti olom. Nenuk Ilfilisti nchorroi pooki te nterit apa naatuturo ilaisiaayiak le menye aa Abraham. Nejoki Abimelek Isaak, “Shomo tung'uai iyiook, amu ira magilani aleng iyiook.” Neaku eidurra apa Isaak teine, nelo apik olng'obor lenye o erata le Gera nebik teine. Neitoki Isaak atur nena shorroi oonkariak naatuturoki apa too nkolong'i e Papaai lenye, Abraham, amu etapalaitie Ilfilisti ninche peyie eye Abraham. Neisho sii inkarn apa naishoo menye. Kake ore peyie eidip ilaisiaayiak le Isaak aatuturisho te yarrata netum teine enchorro e nkare naijirrijirru, neishankarrarre ilchekuti le Gera ilchekuti le Isaak ejoki, “Enaang ena are.” Neaku eipoto ina shorro enkare ajo Esek, amu eishankarrarre ninche ninye. Neitoki ninche aatur ae shorro, neitoki ake aishankarrarre ninye teina aaigil neaku eipoto enkarna enye ajo Sitina. Neidur teine atur ae shorro, neitu ejing enchankar ina, neaku eipoto enkarna eina Rehobot ejo, “Ore tena kata eitaikia iyiook Olaitoriani ewueji nelala, naa aikibul te nkop.” Nepuku teine ailep alo Beer-sheba. Neipang'aki Olaitoriani ninye ina kewarie nejoki, “Ara nanu Enkai e Abraham papaai lino, miureishoyu amu atii tenebo iyie, naa kaamayian iyie naitubul eishoi ino tenkaraki osinka lai Abraham.” Neaku etesheta olperere lo lasar teine neipot enkarna Olaitoriani, neun olng'obor lenye teine, Netur ilaisiaayiak le Isaak enchorro enkare teine. Neitoki adumunye Abimelek alo enetii ninye eing'uaa Gera tenebo Ahusa olautaroni lenye tenebo Fikol olkitok lenye le njore, nejoki Isaak ninche, “Ainyoo peyie ietuo enatii nadolita ajo aikimbaba intae nanu, nikitaaraitie aitung'uaa ate?” Nejo ninche, “Kidolita metii olng'ash aajo etii Olaitoriani tenebo iyie metaa kitejo, inchoo maitayu olmumai terishata ino o iyiook naa maitayu sii olning'o o iyie, inchere mintaas iyiook intorrok anaa eneitu kiseyie iyie neitu kintaas iyie entorroni meteleku eseriani ake nikincho iyie shomo te seriani. Ira taata iyie olomayiana lo Laitoriani.” Metaa eitobiraka ninye ninche osirua, nedaa neokisho. Ore peyie ekenyu, enyeito ninche enasirie aainos pooki olmumai, neisho Isaak ninche meshomo, nepuo aaing'uaa ninye to sotua. Ore ake teina olong eetuo ilaisiaayiak le Isaak aaliki ninye enchorro e nkare natuturo ejoki ninye, “Kinotito enkare.” Neisho enkarna ine aajo shiba, metaa ore enkarna eina anasa naa keji Beer-sheba o metabaiki ena olong. Ore peyie eaku Esau oloo larin artam, eyama Yudit entito e Beeri loo Lhiti tenebo Basemat entito e Elon oo Lhiti. Nepik emion enkishui e Isaak o Rebeka. Ore apa peyie eaku Isaak moruo oleng metaa eiliilaitie inkonyek metaa meekure edolisho neipotu Esau olkikau lenye, nejoki ninye, “Enkerai ai” neng'amaa menye ajoki, “Nele nanu.” Nejoki ninye ing'ura, atamorua nemayiolo enkolong naye. Tudumu imasaa inono, emootian ino tenebo enkawuo ino, nilo ong'ota pee kilo ang'oroki eng'ues. Nikintobiraki endaa namelok, anaa enoshi nanyor, nikiyaki mainosa peyie aatum atamayiana eton eitu aye. Ore apa Rebeka, einining'ito Isaak olayioni lenye Esau. Metaa ore peyie edumunye Esau alo ong'ata ang'or eng'ues, nayau nejoki Rebeka olayioni lenye Yakobo “Atoning'o papaai lino eirorie olalashe lino Esau ejoki, ‘Iyakaki eng'ues nikilotu aitobiraki endaa sidai. Natum ainosa naamayian iyie te dukuya Olaitoriani eton eitu aye.’ Ore naa tena kata olayioni lai, toning'o ororei lai anaa enaaitanap ajoki. Shomo intare, niking'uraki ilbalelon aare sidain, peyie aitobirie endaa namelok sidai naaijo enoshi nanyor papaai lino. Niyaki ninye papaai lino meinosa peyie kitum atamayiana eton eitu eye.” Kake etiaka Yakobo Rebeka ng'otonye, “Ng'ura ajo ore Esau olalashe lai naa oltung'ani oju, nara nanu oltung'ani osipa. Eidimayu naairrapirrap papa nanu, natiu nanu anaa oltung'ani olej ninye, nayaki kewan oldeket ajo emayianata aing'oru.” Nejoki ng'otonye ninye, “Inchoo oldeket lino elotu shumata nanu enkerai ai, toning'o ake iyie ororei lai nikilo aing'uraki ilbalelon.” Metaa eshomo ayau ninche ayaki ng'otonye, neitobir ng'otonye endaa sidai namelok naaijo enoshi nanyor. Neishopoki Rebeka inkilani sidan e Esau olkikau lenye, naata tiaji, olayioni lenye oti Yakobo, neripaki indapan oo lbalelon inkaik enyena tenebo emurt enye nasipa. Neisho ninye endaa sidai namelok tenebo emukate naitobira olayioni lenye Yakobo. Ore nena dapan oo lbalelon nepik inkaik enyena o ine wueji nesipa te murt enye; neisho ninye endaa sidai namelok tenebo emukate naitobiraka epik inkaik o layioni lenye Yakobo. Metaa eshomo ninye ajingaki menye nejoki, “Papa”. Neng'amaa ajoki, “Nele nanu, ira ng'ae enkerai ai?” Nejoki Yakobo menye, “Nanu doi Esau olkikau lino. Aidipa ataasa anaa enikitiaka. Inyo totona inosa inkiri oo ng'uesi aainei peyie kitum atamayiana.” Kake etiaka Isaak olayioni lenye, “Kaji doi inkuna peyie itasioko taata atum olayioni lai?” Newal ajoki, “Amu aaishoo Olaitoriani Enkai ina dupoto.” Ina pee ejoki Isaak Yakobo, “Wou tinyiku, peyie atum airrapirrapa ajur enkerai ai, matayiolo katukul metii olng'ash ajo ira olayioni lai Esau anaa aimira.” Neaku neigutaki Yakobo Isaak papaai lenye. Neirrapirrap ninye nejo, “Ore oltoilo naa oltoilo le Yakobo, kake ore inkaik naa ine Esau.” Neitu eyiolou ninye amu ore inkaik enyena naa keju anaa ino lalashe lenye Esau, neaku etamayiana ninye. Nejo ninye, “Aira hoo doi olayioni lai Esau?” Newal ajo, “Ekara.” Ina peyie ejo, “Iyakaki nanu peyie atum ainosa inkiri oo ng'uesi o layioni lai naatum atamayiana.” Neaku eyaua ninye ayaki ninye, nenya ninye; neyaki ninye enaisho oo sabibu neok ninye. Ina peyie ejoki Isaak olayioni lenye, “wou tinyikakaki tung'ututaki olayioni lai.” Metaa etinyikua ninye neng'utut ninye neing'uaya olng'usil too nkilani enyena, nemayian ninye ejo, “Ing'ura olng'usil lo layioni lai otiu anaa olng'usil liong'ata otamayiana Olaitoriani. Mikinchoo Enkai enkolielio e keper, tenebo empiron e nkop, tenebo enkisampuare sapuk o enaisho oo sabibu. Inchoo kisiaai iyie iloreren, nikigilaki kung iyie iloshon. Taa olkitok too lalashera linono, naa inchoo ilayiok le ng'utunyi kirrugokino iyie. Metedeki pooki ng'ae likidek, nemayiani pooki ng'ae likimayian iyie!” Ore ake enaidipie Isaak atamayiana Yakobo, ore ake enaipangie Yakobo aing'uaa ine netii Isaak Papaai lenye, nejingu olalashe lenye Esau eing'uaa engorore. Neitobir sii ninye endaa sidai namelok, neyau ayaki papaai lenye. Nejoki menye “Inchoo papa lai edumunye aton ainos inkiri e ng'ues pee kitum atamayiana.” Neng'amaa papaai lenye Isaak ajoki ninye, “Ira doi ng'ae?” Newal ajoki, “Nanu doi olayioni lino, olkikau lino Esau.” Netum Isaak olokirikiri sapuk le ng'oro nejo ninye; “Aing'ae doi naaji otang'oro eng'ues naayaki nanu, nainosa pooki eton eitu ibau, naidipa atamayiana ninye? Nesipa Ee, naa kemayiana ninye.” Ore peyie ening Esau irorei le papaai lenye neishir abuaku to ltoilo sapuk o te mion, nejoki papaai lenye, “Oi tamayianaki sii nanu, nchooki sii nanu emayianata ino, papaai lai!” Kake etiaka, “Eewuo olalashe lino to losek, neewa emayianata ino.” Nejo Esau, “Aime keji doi te sipata etejoki enkarna enye Yakobo? Naaeseka ninye nanu kuna katitin are. Ewa apa ninye esipata ai e kikausho, naa ng'ura ake ajo enyaaka tena kata aya emayianata ai.” Ina peyie ejoki “Keitu hoo ninye kilekaki nanu emayianata?” Newaliki Isaak Esau ejo, “Ing'ura ajo aitaa ninye olkitok lino, naa ore ilalashera lenyena, aishoo ninye meitaa isinkan, naa too lpaek tenebo enaisho oo sabibu aitotio ninye. Kaa naa taata aaitaas enkerai ai?” Nejoki Esau papaai lenye, “Ke mayianata nabo duoo ake iata papaai lai? Oi tamayianaki sii nanu, nchooki sii nanu emayianata ino, papaai lai!” Neilepie Esau oltoilo lenye neishir. Newaliki Isaak papaai lenye ajoki, “ng'ura, iyaku ololamita empiron enkop te manyisho ino, niaku sii ololamita enkoliolio e keper e shumata. Keaku olalem lino ninye inchuyie, niaku oloisiaai olalashe lino, naa tinigelunye te nkitoria enye, nigil enchata oo lmong'i natii emurt ino.” Ore ina kata, neibayu Esau Yakobo enkaraki emayianata natamayiana papaai lenye ninye. Nejo Esau to ltau lenye. “Etabautua inkolong'i naishiraki papaai, ore peyie eishunye natum ataara metua olalashe lai Yakobo.” Kake ore irorei le Esau ilo ayioni lenye botor etolikioki Rebeka; metaa eirriwayie Rebeka lkiliku meipoti ilo ayioni lenye oti, Yakobo nejoki ninye, “Ingura, ore olalashe lino Esau, eitagolito kewan oshoke pee kitum atara tua. Metaa ore tena kata enkerai ai toning'o oltoilo lai tudumunye isikaki enetii Laban olalashe lai otii Haran, niton tenebo ninye te nkiti rishata, ometaba anaa neyagaa engoro napi olalashe lino; o metaba anaa nerrinyo engoro olalashe lino. Nerikino enintaasa ninye, naa kairriu olkilikuai mikitorikuni te ine. Ainyoo peyie aiturraa intae pookira te keeya te nkolong nabo?” Ina peyie ejoki Rebeka Isaak, “Enaure enkishui ai tenkaraki kuna kituaak oo Lhiti. Teneyam sii ninye Yakobo nabo o nkituaak oo Lhiti naaijo kuna, nabo oo nkituaak ena kop, kainyoo tipat enkishui te nanu?” Neitoki Isaak aipot Yakobo, nemayian ninye, neitanap ejoki, “Mayieu niyam hoo nabo oo nkituaak oo Lkanaan. Inyo tudumunye shomo Padan-aram enkaji e Betuel laa ninye otoiwuo yeyioo lino, niyau aitaa enkitok teine entito nabo e Laban olalashe yieyioo lino. Mikitamayiana Enkai Magilani, nikintubul aponaa, metaa iaku olorere kumok too ltung'ana. Mikinchoo ninye iyie emayianata e Abraham o tenebo eishoi ino, niaku oloya enkop nitaa iyie omoni naishoo Enkai Abraham!” Neisho Isaak Yakobo meshomo. Nelo Padan-aram enetii Laban olayioni le Betuel le Aram, naa olalashe le Rebeka ng'otonye Yakobo o tenebo Esau. Etodua apa Esau ajo etamayiana Isaak Yakobo neisho ninye meshomo Padan-aram meing'oru enkitok teine netamayiana sii neitanap ejoki, “Mayieu niyam enkitok hoo nabo oo Lkanaan,” netoning'o Yakobo menye o yieyio lenye nelo Padan-aram. Metaa ore peyie edol Esau ajo eitu eitiship nena kituaak oo Lkanaan papaai lenye Isaak; nelo Esau enetii Ishmael, neyam aitaa enkitok, aponaa te nena kituaak naata, Mahalat entito e Ishmael, olayioni le Abraham; enkanashe e Naboiot. Neing'uaa Yakobo Beer-sheba alo enkalo e Haran. Nelotu ewueji neje neirrag ine ina kewarie, amu etadoyie enkolong nedumu osoit obo teine airishunye elukunya enye neirrag teine airura. Ore eirura, netum enkidetidet naitodolu olkedet ororita enkop ore enchumata enye nebaiki keper, naa ng'ura! Ilmalaika le Nkai oodou neilep te ilo kedet! Naa ng'ura eitashe Olaitoriani te nchumata ninye, nejo ninye, “Ara nanu Olaitoriani, Enkai e Abraham papaai lino, nara sii Enkai e Isaak, naa ore ena kop naa ninye irragie, ekaaisho nanu iyie tenebo o eishoi ino. Naa kebayu eishoi ino anaa enterit enkop naa aiponari aibulaa aidapashakino enkop te nkalo o loontoluo, o tenkalo o loosaen, o te nkalo e moikuape o te nkalo e kopikop; naa te iyie tenebo eishoi ino emayian iloshon le nkop pooki ate. Ing'ura atii nanu te nebo iyie naa kaarrip iyie te pooki wueji naba anaa enilo, naaitoki arrinyu ena kop, amu maaing'uaa nanu iyie o metaba anaa naas ina naatolikio.” Neinyototo Yakobo too njo enyena nejo, “Esipa etii Olaitoriani ene wueji, neitu duoo ayiolou.” Neureishoyu oleng nejo, “Kebaa eitureisho ene wueji! Meeta duoo inchere paa dikae ene wueji neme enkaji e Nkai, naa enkishomi (enkiimata najing'ieki) keper, ena.” Neaku einyo Yakobo tadekenya enasirie, neya oladuo soit oirishunye elukunya enye neitasheyie aitaa eng'ape nebukoki eilata shumata ninye. Neipot enkarna eine wueji ajo Betel, kake keji apa enkarna e ina anasa Lus te dukuya. Neinos Yakobo olmumai ejo, “Tenaa keaku Enkai tenebo nanu, naarrip nanu tena lototo, naaisho sii endaa nanya o nkilani naishop metaa anyaaka arrinyunye enkaji e papa lai te seriani, naa keaku Olaitoriani Enkai ai. Ore ele soit laitasheyie aitaa eng'ape, naa keaku enkaji Enkai, ore pooki nikincho nanu naa kaaisho iyie ematua e tomon.” Nedumunye Yakobo aibung enkoitoi alo, nebau enkop oo ltung'ana oomanya oloosaen. Ore eing'orisho, etoduaa enchorro ti ong'ata, ore ake sii, etodua iluaat uni oo nkishu o nkerrai eirrag te mbata eina shorro amu teina shorro eokokinyieki enkare naok. Netii osoit sapuk enkutuk enchorro. Naa tenereuni nkerrai pooki meirraga teine, neibeleleng'oo ilchekuti ilo soit te nkutuk enchorro peyie etum aishoo ntare enye enkare. Ore ake peyie eidip aaitooko pooki, neitoki aapising enchoro teilo soit aapik enkutuk enchorro. Nejoki Yakobo ninche, “Ilalashera laainei, kaji doi ing'uaa?” Nejo ninche, “King'uaa Haran.” Nejoki ninye ninche, “Amaa iyiololo Laban olayioni le Nahor?” Nejo ninche, “Aikiyiolo ninye.” Nejoki Yakobo ninche “Aisupat ninye?” Neng'amaa aajo, “Ee aisupat, naa ore entito enye Raheli elotu ereuta ntare!” Nejo Yakobo, “Ing'ura, eton aa enaipirie enkolong, eton menkata naiturrurri nkerrai aaokoki enkare peyie etum aashom aatadaata.” Kake etejo, “Mikintook omeiturrurroto nkerrai pooki tenebo, nikimbeleleng'oo osoit te nkutuk e nchorro nikitum aaitooko inkerrai.” Ore eton eirorie ninche, nebau Raheli ereuta ntare e papaai lenye aa ninye nairritita. Ore peyie edol Yakobo Raheli entito e Laban olalashe ng'otonye tenebo nkerrai e Laban olalashe ng'otonye nelo Yakobo aibeleleng'oo osoit te nkutuk enchorro, neitook inkerrai e Laban, olalashe ng'otonye. Neng'utut Yakobo Raheli eishir abuaku te nchipai. Neliki Yakobo Raheli ajoki ole sotua, naa olayioni le Rebeka. Neipirri Raheli ang alo aliki menye. Ore peyie ening Laban ilomon le Yakobo olayioni le nkanashe, neipirri alo anang'are ninye, neitamuat ninye inkaik neng'utut neriku ninye enkaji enye. Neliki Yakobo Laban kuna baa pooki, neaku etiaka Laban ninye, “Esipa tukul ajo ira oloito lai nira sii osesen lai!” Neton aboitare ninye olapa. Neitoki Laban ajoki Yakobo, “Ore amu ira ole sotua, aikisiaai iyie nanu pesho? Tolikioki ajo ainyoo elaata niyieu naalaaki?” Eeta apa Laban ntoyie are, neji entito botor Lea neji entito kiti Raheli. Aitorrok apa nkonyek e Lea ore Raheli naa aisidai neikishiaan. Nenyorru Yakobo Raheli, o metejo “Ekaaisiaai iyie ilarin oopishana tenkaraki Raheli ina tito ino kiti.” Nejo Laban, “Enaikash te naaisho iyie alang te naisho ninye likae lee; totona tenebo nanu.” Neaku eisiaayia apa Yakobo ninye ilarin oopishana tenkaraki Raheli, netiu lelo arin anaa inkolong'i kuti tenkaraki enyorrata sapuk naata te ninye. Neitoki Yakobo ajoki Laban, “Inchooki nanu enkitok ai peyie alo ayiolou ninye, amu aitabayie enkata ai.” Neiturrurru Laban iltung'ana pooki leine, neitayu osirua kake ore teipa ewa entito enye Leah ayaki ninye Yakobo; neboitare Yakobo ninye ina kewarie. (Eishooyie Laban enkaisiaayiani enye Silpa, aisho Lea entito enye metaa enkaisiaayiani enye.) Ore peyie ekenyu, ng'ura, Leah ngole eishooki Yakobo, Nejoki Yakobo Laban, “Ainyoo ena nikintaasa nanu? Aime enaji Raheli doi apa aaisiayie? Ainyoo naa peyie kiteleja iyie nanu?” Neng'amaa Laban ejo, “Measi oshi neijia te nkop ang, aaishooyo entito kiti eton eitu eishoori enkikau. Iishu e wiki ena, naa aikintoki aaisho iyie enkae tinikisiaai kulikae arin oopishana.” Neas Jakobo ina, neishu ewiki enye; neaku neishoo Laban ninye Raheli ina tito enye meitaa enkitok. (Eishooyie Laban enkaisiaayiani enye Bilha, aisho Raheli entito enye metaa enkaisiaayiani enye.) Neaku enyaaka sii Yakobo alo ayiolou Raheli nenyorru Raheli oleng aitalang enanyor Lea neisiaai Laban kulikae arin oopishana. Ore peyie edol Olaitoriani ajo keibai Lea, nebol eng'uset enye, kake ore apa Raheli naa koolupi. Nenutayu Lea neiu enkayioni neipot ninye enkarna ajo Ruben, amu etejo, “Enkaraki natoduaa Olaitoriani enkisilisiloto ai, nesipa taata ajo ekaanyoru olpayian lai.” Neitoki ake anutayu, neiu enkayioni, nejo, “Enkaraki natoningo Olaitoriani ajo kaaibai naaisho ena ayioni aigil.” Neipot enkarna enye ajo Simon. Neitoki ake anutayu neiu enkayioni nejo, “Ore taata naa kaibung'are olpayian lai, amu atoikio ninye ilayiok okuni.” Ina peyie eipot enkarna enye ajo Lawi. Neitoki anutayu neiu enkayioni nejo “Ore taata naa kaisis Olaitoriani,” metaa eipoto ninye enkarna ajo Yuda, ina pee edung eishoi. Ore peyie edol Raheli ajo eitu eiki Yakobo inkera, netum olom te nkanashe enye oleng, nejoki ninye Yakobo, “Nchooki nanu nkera ashu aye!” Negorokino Yakobo Raheli nejoki ninye, “Katii nanu ewueji Enkai nikitomitikio eishoi enguset ino?” Ina peyie ejo Raheli, “Neina enkaisiaayiani ai Bilha; shomo enetii peyie aaiki nanu nkera.” Metaa eishoo ninye Yakobo enkaisiaayiani enye Bilha meitaa enkitok. Nelo Yakobo ayiolou ninye. Neiroshiu Bilhah neiki Yakobo olayioni. Ina peyie ejo Raheli, “Aatudungoko Enkai enkiguana, netoning'o sii oltoilo lai naaisho nanu enkayioni.” Neaku eipoto enkarna enye ajo Dan. Neitoki errindik e Raheli anutayu neiki Yakobo olayioni le are. Ina peyie ejo Raheli, “Te nkesha nagol atigilunore enkanashe ai natimirishe;” neipot enkarna enye ajo Naftali. Ore peyie edol Lea ajo etudunge meekure eisho, neisho sii ninye enkaisiaayiani enye Silpa Yakobo meitaa enkitok. Neiki ina rrindik e Lea naji Silpa Yakobo olayioni. Nejo Lea, “Atumunyana!” Metaa eishoo enkarna enye ajo Gad. Neigil ake errindik e Lea naji Silpa aiki Yakobo ae ayioni e are. Ina pee ejo Lea, “Ashipa nanu! Amu kaaipot nanu inkituaak aajo nashipa.” Ina pee eipot enkarna enye ajo Asheri. Ore too nkolong'i enkisampuare e nkano eshomo Ruben olokeri neinepu nkaitubulu naaji tunkuja tiongota, neyaki ng'otonye Lea. Ina peyie ejoki Raheli Lea “Inchooki aatasayia embata oonkaitubulu e tukuja e nkayioni ino.” Kake etiaka Lea ninye, “Ijo doi kembae kiti tinikioru olpayian lai? Iyieu sii nintoki aya tunkuja olayioni lai?” Nejo Raheli, “Inchoo naa meirraga enitii ena kewarie te nkaraki tunkuja olayioni lino.” Ore peyie eshukunye Yakobo tiong'ata teipa, eshomo Lea anang'are ninye nejoki ninye, “Meeta inchere peyie mikilotu taata ayiolou, amu ainyiang'ua iyie te tunkuja olayioni lai.” Metaa etaboitare ninye ina kewarie. Nening Enkai Lea, nenutayu neiki Yakobo olayioni le imiet. Nejo Lea, “Aishoo Enkai elaakinoto ai amu aishooyie errindik ai aisho olpayian lai;” neipot enkarna ajo Isachar. Neitoki Lea anutayu, neiki Yakobo enkayioni e ile, ina peyie ejo Lea, “Aaishoo Olaitoriani enkishoroto sapuk; ekaayanyitu taata olpayian lai, amu atoikio ninye ilayiok ile;” neipot enkarna enye Sebulon. Neitoki ake te siadi aiu entito neipot enkarna enye ajo Dina. Neitoki Enkai adamu Raheli, nening Enkai ninye nebol eng'uset. Nenutayu neiu enkayioni nejo, “Eiwuangie Enkai esulare ai,” neipot enkarna enye ajo Yosef ejo, “Maatoponiki Olaitoriani ae ayioni.” Ore peyie eiki Raheli Yakobo Yosef, etiaaka ninye Laban, “Inchooki nanu mashomo, pee atum ashomo enkang ai o enkop ai. Inchooki inkituaak aainei tenebo nkera aainei nena naisiaayua te iyie nikincho mashomo amu iyiolo esiaai naataasaka.” Kake etiaka Laban ninye, “Tenaa aikincho matejo ena, atayiolo te limunoto olaitumusumusoni inchere aatamayiana Olaitoriani tenkaraki iyie. Tolimu elaakinoto ino naa kaishoru.” Nejoki Yakobo ninye, “Iyiolo iyie openy enaikuna tenaaisiaai, niyiolo sii eneikuna inkishu inono peyie eponari te nanu. Amu aikuti apa imasaa inono enalotunye, netoponari aaku kumok, nikitamayiana iyie Olaitoriani te pooki wueji naibelekenyakine. Paa amaa kanu kenya nanu agolie olmarei lai makewan?” Nejo Laban, “Ainyoo iyieu naaisho?” Nejo Yakobo, “Meeta entoki nikinchoo tini kintaas ena, ekaitoki ake aaku oloirrita naramat aing'or intare inono. “Nchooki matijing'a atua intare inono ena olong aitayu tiatua pooki ker naata oltipoto anaa nairimo o pooki kuo le ker orok, tenebo pooki kine oirimo tiatua inkineji; neaku nena elaakinoto ai. Metaa esipata ai ninye naawalaki te siadi, tinilotu aing'or elaakinoto ai te iyie. Ore pooki nemeeta oltipoto nemeirrimo sii tiatua inkineji, nerok sii tiatua lkuoo le kerra metaa tenelo netumi te nanu, neikenari aajo kepurruno.” Nejo Laban, “Aisidai! Inchoo etiu anaa enitejo.” Kake ore ina olong, eitayio Laban iloroi pooki o otipo neirrimo tenebo inkineji pooki netipo neirrimo pooki ake ninye naata eneibor, o pooki sitima lo ker orok, neisho ilayiok lenyena metaramata. Nelo Laban alamari elakuani oo nkolong'i uni elototo terishata enye o Yakobo; neirrita Yakobo kulie tare pooki e Laban. Neitayu Yakobo ing'usidin naashal too lkeek oonyaanyukie olporokuai, o seki o siteti nekinyu nkopit e oriong te nena keek metaa kelio ing'udisin eibor. Nepik nena ngudisin naatikinya te dukuya ntare too mpeuti aa taa, ine neokishoreki, ine nepuonu ntare aaokie enkare. Amu kesesh etonie ilmeregeshi anaa iloroi intare teine. Neraposhoyu intare te dukuya nena ngudisin metaa etoiwutuo ilbalelon oo rasha, o loo tipo, o loonkererin. Negelaa Yakobo isitiman, neing'orie inkomomi oo ntare enkalo natii inaarasha tenebo inaarook pooki naatii tiatua intare e Laban; neitalamaa inenyena, neitu eitushulaki ine Laban. Ore enkata pooki natonie ilmeregeshi anaa iloroi intare biot, neirragie Yakobo ing'udisin too mpeuti te dukuya ninche peyie etum aatotonie intare te nena ng'udisin, kake ore nena sasin too ntare, eitu eirragie ing'udisin teine; metaa ore nena sasin neaku ine Laban ore inaapir neaku ine Yakobo. Metaa etaa Yakobo karsis oleng, netum intare luaat kumok, o nkaisiaayiak o ilaisiaayiak o intamesin o sirkon. Etoning'o apa Yakobo ilayiok le Laban ejo, “Ewa Yakobo pooki apa naara ine papa lang; ore sii te nena pooki apa naara ine papa lang, nenoto ninye ena arsisisho.” Nedol Yakobo ajo meekure enyor Laban ninye anaa apa te dukuya. Ina peyie ejoki Olaitoriani Yakobo, “Torrinyoyu enkop oo loo papaai lino, tushukokinoyu iltung'ana linono naa kaaku nanu tenebo iyie.” Neirriwaa Yakobo olkilikuai aipotu Raheli tenebo Lea meetu ina ong'ata natii ntare enyena, nejoki ninche, “Adolita taata ajo meekure aanyor papaai linyi anaa apa. Kake etii Enkai e papaai lai tenebo nanu. Iyiololo aajo aisiaaiyia papaai linyi te ngolon ai pooki; ore ake eyia, aateleja papaai linyi aibelekeny olekoisiaayio lai katitin tomon, kake eitu eisho Enkai ninye maaitamio. Ore pee ejo, ‘Ore pooki naatipo naa keaku olekoisiaayio lino,’ ina pee eiu intare pooki inaata iltipot; naa tenejo, ninye, ‘Naata nkererin naaku olekoisiaayio lino,’ neiu intare pooki naata nkererin. Metaa neijia eikuna Enkai aya inkishu e papaai linyi naaisho ninche nanu. Ore te nkata nadumu iloroi anaa ilmaregeshi intare, atejo araposhu inkonyek aainei nadol te nkidetidet inchere ore iloroi pooki oo oodumu intare naa iloota nkererin o iltipot nerasha neirrimo. Ina peyie aajoki olmalaika le Nkai te nkidetidet, ‘Yakobo,’ nang'amaa ajo, ‘Nele nanu!’ Nejo ninye, ‘Taraposhu inkonyek inono ing'orisho, ore inkineji pooki naaitigiran tiaatua intare naa keeta nkererin, neeta iltipot nerasha; amu atoduaa nena pooki nikintaasa Laban iyie. Ara nanu Enkai e Betel, ine wueji apa nintisinyie eng'ape abukoki e ilata nikinosaki sii olmumai. Ore tena kata inyo shomo tung'uai ena kop nirrinyo alo enkop apa nikitoinyieki.’ ” Ina pee ewalaki Raheli o Lea aajoki ninye, “Ketii ae rubata arashu enjung'ore natung'ueikiaki iyiook te nkaji e papa lang? Amaa taata iyiook emeitaa iyiook ilomon? Amu etimira iyiook, netaasishore impisai naaishoruaki te nkaraki iyiook. Ore nena masaa pooki naawa Enkai aitung'uaa papaai lang eishoo metaa inkunaang o nkera ang, ore tena kata, ore pooki nikijoki Enkai iyie, taasa.” Neinyototo Yakobo neitaked ilayiok lenyena o nkituaak enyena intamesin, nereu ninye aidurrie inkishu enyena pooki, tenebo imasaa enyena pooki naanoto, inkishu enyena naanoto te Padan-aram, pee epuo enkop e Kanaan enetii papaai lenye Isaak. Eshomo apa Laban adung ilpapit loo nkerra enyena, ore Raheli nepurroo inkaitin enkaji e papaai lenye. Neluaya Yakobo eitu eliki Laban le Aram, ajoki ekeisikita alo. Neisik ninye o nena masaa pooki naata, neinyototo alang olkeju le Frati, neitoriokino oldoinyo le Gilead. Ore peyie elikini Laban te enkolong e uni inchere eisika Yakobo, nerik iltung'ana lenyena le sotua, nepuo aasuj ninye inkolong'i naapishana esuj aigutaki ninye oleng toldoinyo le Gilead. Kake eewuo Enkai enetii Laban le Aram te nkidetidet kewarie nejoki ninye, “Toduaa ake kewan mijoki Yakobo ororei hoo obo sidai arashu oltorrono.” Neinepu Laban Yakobo. Ore ina kata eidipa Yakobo atuuno olng'obor lenye te nkop ooldoinyo, ore Laban, o ltungana lenyena le sotua, etuuno ilng'oborri too ldoinyo le Gilead. Nejoki Laban Yakobo, “Kaa ena nikintaasa peyie kilotu alej aiko nji, niya intoyie aainei anaa iyarunot o lalem? Ainyoo peyie isika apurrorri, nikilej nanu, neitu kiliki nanu, metaa anaata aaishoo iyie shomo te nchipai o too sinkolioitin, o te ntampuri o to lwulul loo usin? Naa kainyoo peyie eitu kincho matung'ututa ilayiok laainei o ntoyie aainei aisho olesere? Itaasa tukul ene emodai. Ekaata engolon naitameyie kake aairorie Enkai e papaai lino ena kewarie aajoki, ‘Toduaa kewan ake mijoki Yakobo ororei hoo obo sidai arashu oltorrono.’ Ore taata ishomo aidur enkaraki niyieu oleng to ltau enkaji e papaai lino, kake ainyoo peyie itupurroyie inkaitin aainei?” Newaliki Yakobo Laban ajoki, “Amu atureishe, atadamua ajo aikindim atooru intoyie inono te ngolon. Ore ake ninye oltung'ani litum eeta inkaitin inono nemeitoki abik eishu. Ore te dukuya iltung'ana lang le sotua imbalunye entoki ino pooki naata pee iya.” Eitu eyiolou Yakobo ajo Raheli ninye natupurroyie nena aitin. Metaa etijing'a Laban olng'obor le Yakobo, neitoki alo olng'obor le, Lea neitoki oloo nkaisiaayiak enyena pokira, neitu etum ninche katukul. Nepuku aing'uaa olng'obor le Lea, nejing olng'obor le Raheli. Ore ina kata earr Laban ilng'oborri naa Raheli apa naawa inkaitin enkaji e Papaai lenye nepik abori olorika otonieki te ntames, netonie ninche. Near Laban olng'obor pooki, kake eitu etum ninche. Nejoki Raheli Papaai, lenye, “Mincho olkitok lai egoro amu maidim aitasho te dukuya iyie, amu kaata empukunoto oo nkituaak.” Metaa etuturuo aing'oru oleng neitu etum inkaitin enkaji enye tukul. Neaku etagore Yakobo oleng oleng metaa keitarriki Laban; nejoki Yakobo Laban, “Ainyoo doi enkitarruorroto ai? Ainyoo eng'oki ai pee kitusujua te ngoro sapuk? Ore hoo nitijing'a aisiamput intokitin aainei, ainyoo inoto tiatua naara imasaa nkaji ino? Iyau irragie tene te dukuya iltung'ana laaine le sotua o te dukuya iltung'ana linono le sotua pee etum aatirrish iyiook pokira. Kitaboitate tenebo iyie kulo arin tikitam; netiu aikata eibiru isupeni e kerra inono anaa inkineji inono, neitu ainos ilmeregeshi loo ntare inono. Ore nena naanya ing'uesi etim eitu ayaki, nanu onoto enyamali makewan; anaa aiyieu pooki too nkaik aainei; anaa enapurrorri dama anaa kewarie. Metaa neijia apa atiu aanya enkolong naa neijia etiu enkewarie, nemeekure apa atumoki aimula nkonyek airurayu. Ore te kulo arin tikitam natotona te nkaji ino; naataasaka esiaai ilarin tomon oong'uan te nkaraki intoyie inono pokira are, naataasaka esiaai ilarin ile too ntare inono, nimbelekenya olekoisiaayio lai katitin tomon. Tenaa aime Enkai duoo e papaai lai Enkai e Abraham tenebo olturiaki le Isaak ootii enkalo ai, esipa katukul inchere anaata kinchoo mashomo too nkaik naarook. Etoduaa Enkai osina lai tenebo esiaai oo nkaik aainei, nikisikong ng'ole kewarie.” Ina peyie ewalu Laban ajoki Yakobo, “Ore kuna toyie naa inaainei, ore kuna kera naa inaainei, ore kuna tare naa inaainei, naa ore pooki nidolita naa inaainei. Kake kaa naa aitaas kuna toyie aainei ena olong arashu inkera enye naatoiutuo ninche? Wou taata maitayu olning'o terishata ai o iyie; ore iyie o nanu; naa inchoo metijing'a shakeni erishata ang.” Ina peyie eyau Yakobo osoit, neitasheyie aitaa eng'ape. Nejoki Yakobo iltung'ana lenyena le sotua, “Entasotu isoito,” neyau pooki isoito neitayu osototi; neinos endaa te mbata e ilo sototi loo soito. Neipot Laban ine ajo Yegarsahaduta: nejo ninye Yakobo ajo Gilead. Nejo Laban, “Ore ele sototi loo soito naa shakeni terishata ino o nanu tena olong.” Metaa eipoto ine ajo Gilead, ore engape nejo Mispa, ketejo, “Inchoo meing'ura Olaitoriani erishata ai o enino, tinikipuo aalama, Tinintanyamal intoyie aainei, anaa tiniyam kulie kituaak neme intoyie aainei, ore hoo nemetii likae lee ine oyiolo, tadamu, ajo, Enkai ninye shakeni terishata ai o iyie.” Ina peyie ejoki Laban Yakobo, “Ing ura ele sototi loo soito tenebo eng'ape naitasheyie ena olong te dukuya iyie o nanu. Ore ele sototi naa shakeni naa neijia etiu eng'ape, inchere migiru ele sototi loo soito, nimilang'u sii iyie ele sototi loo soito kilang'aki, neijia eitiu eng'ape kilotu aitame nanu. Ore Enkai e Abraham, oe Nkai e Nahor oe Nkai oo papaai lenye inchoo metirisha iyiook.” Ina peyie einos Yakobo olmumai te uriata e papaai lenye, Isaak. Neitayu Yakobo olasar to ldoinyo neipoti iltung'ana lenyena le sotua meinosa endaa, nenya endaa netoni enkewarie pooki te ilo doinyo. Ore tadekenya enasirie, einyo Laban ayooki ang'utut inoo nkakuyiaa enyena tenebo intoyie enyena nemayian ninche; nerrinyo alo enkang enye. Nedumunye Yakobo alo arrinyo enkop enye, nenang'are ilmalaika le Nkai ninye. Ore peyie edol Yakobo ninche, etejo, “Enjore e Nkai ena!” Neipot enkarna eine ajo Mahanaim. Neirriwaa Yakobo ilkiliku meituruko aapuo enetii olalashe lenye Esau te nkop e Seir, natii enkop e Edom, neitaarriyian ninche ejoki, “Inji intae enchom entiaaki olkitok lai Esau inji ejo olaisiaayiani lino Yakobo, ‘Ataboitare Laban o taata, naata ilmong'i, o sirkon, o ntare o laisiaayiak lewa, o nkaisiaayiak ng'oruo nairriwua olkilikuai aliki olkitok lai, pee atum anoto omom too nkonyek inono.’ ” Nerrinyunye lelo kiliku enetii Yakobo nejoki, “Kitabaikitia olalashe lino Esau, naa elotu ninye peyie kinang'are iyie nerikito ilewa iip ong'uan.” Neureishoyu Yakobo oleng oleng netum enkiputukuny, oleng, Neor lelo tung'ana apa ooboitare, neor inkishu o ntamesin, neitainye pooki ntukusi are edamu ejo, “Tenelotu Esau aidaikie entukus nabo, neaku ore entukus natelekua neidim aisika.” Nejo Yakobo, “Na Ai Enkai e papa lai Abraham naa Enkai e papa lai Isaak, Lo Aitoriani, ilo apa laatiaaka nanu, ‘Torrinyoyu shomo enkop ino enetii olorere lino le sotua, naa kaitaas iyie esidai,’ maaishaakino nanu katukul ina nyorrata ino nauno, tenebo ina kisiligata nintodua iyie osinka lino, amu te ng'udi ai ake atalang'a ele keju le Yordan; nataa taata iltimito oare. Tokorduaki nanu, aatoomono iyie, te nkaina olalashe lai, te nkaina e Esau, amu kaure nanu ninye melotu ake aar iyiook pooki matuata, nkera o noo ngotonye. Kake itejo, ‘Ekaaitaas iyie esidai, naisho eishoi ino metaba anaa osinyai le naiposha, nemeikenayu te nkumoi.’ ” Metaa eirraga ine ina kewarie, neitayu te nena naata ninye enkishooroto naisho olalashe lenye Esau. Inkineji iip are, o oloroi tikitam, o supeni e kerra iip are tenebo ilmeregeshi tikitam, Intamesin naalepo tomoni uni o nkurrarrun enye o nkishu artam tenebo iloing'ok tomon, o sirkon lipong'a tikitam, o lamuyeishi tomon. Neitarasaa kuna too nkaik oo laisiaayiak lenyena, meeta ake ineitu erewi te luaata enye maate, ejoki sinkan lenyena, “Enchom enturuko ninchosho metaa ketii erishata eluaata ake o eluaata.” Neitaarriyian olorikito pooki ajoki, “Ore te nenang'are intae Esau olalashe lai, nikinkilikuan ajoki, ‘Ira iyie oleng'ae? Kaji iloito? Naa einkuneng'ae kuna nireutata?’ Naa ijoki ninye, ‘Ino sinka lino Yakobo naa enkishooroto nairriwaka olkitok lai Esau; ore ake sii, elotu ninye te siadi ang.’ ” Neitaarriyian ake sii ilo liare o ilo liokuni o lelo pooki ooreuta nena masaa ejoki, “Entiaaki Esau ina bae tininang'arere, ninye. Naa ijokiki intae, ‘Ore ake elotu osinka lino Yakobo te siadi.’ ” Amu etadamua ajo, “Kaidim aitoborro ninye too nkishorot naashomo te dukuya nanu, ore esuju ina naidim atoduaa enkomom enye; ebaiki naaidim atang'amai nanu.” Metaa neitogirori ninye enkishooroto ore ina kewarie eirraga ninye olng'obor. Ore ake ina kewarie nedumunye ninye arik inkituaak enyena pokira are, o nkaisiaayiak enyena pokira are tenebo inkera enyena tomon oobo nelang te lang'ata e Yabok. Neya ninche aitalang enkare, tenebo pooki toki naba anaa enaata, neing'uari Yakobo aa ninye ake; ore ina kewarie etii oltung'ani otupupungare enkewarie pooki o metamanai e sirua. Ore peyie edol ilo tung'ani ajo eitu eidimu Yakobo, neibung emorloo enkupes; nepuku enkupes e Yakobo terubata oloudo ina kata epupung'are ilo tung'ani. Ina peyie ejo oltung'ani, “Inchooki mashomo, amu ekenyua.” Kake etiaka Yakobo, “Maaisho hoo ilo o metaba anaa nikimayian.” Nejoki ninye, “Aikiji ng'ae enkarna?” Nejo, “Yakobo.” Ina peyie ejoki “Mikintokini aekata aajo Yakobo, kake Israel, amu itekeshare Enkai tenebo iltung'ana nisulie.” Neitoki Yakobo aikilikuan ninye ajoki, “Tolikioki aatasayia enkarna ino.” Kake etiaaka, “Ainyoo doi peyie inkilikuanu enkarna ai?” Nemayian ninye teine. Neipot enkarna ine wueji ajo Peniel ejoito, “Amu kitoduaate o Enkai too nkomomi, ore ake eyia neton aishu.” Neilepaki enkolong egiroo Penuel, neitong'ojinari te nkaraki enkupes enye. Ore enkaraki ina ebaiki ina olong; meinos Isiraeli emorloo o loudo; naatii enkong'u oloudo, tenkaraki naibung'a apa ninye enkong'u oloudo le Yakobo o emorloo enye. Neraposhu Yakobo inkonyek enyena aing'orisho, ng'ura, elotu Esau nerikito iltung'ana iip ong'uan. Metaa etooro inkera aoriki Lea o Raheli o nkaisiaayiak enyena. Nepik inkaisiaayiak tenebo inkera enye dukuya, ore Lea o nkera enyena, o Raheli o Yosef nepuonu te siadi, ore ninye makewan neituruk te dukuya ninche, neirrugo abaiki enkop katitin naapishana, o metaba anaa nenyiku olalashe lenye. Kake ekuetua Esau alo anang'are ninye, neng'utut ninye, nebatatakino emurt enye ang'utut, neishir pokira. Ore peyie eraposhu Esau nkonyek enyena, etodua inkituaak o nkera, nejo ninye, “Kakua kuna nikiboitare?” Nejo Yakobo, “Inkera naaishoo Enkai to lng'ur osinka lino.” Neitoki nena aisiaayiak aanyiku, ninche tenebo inkera enye, neirrugo aabaiki enkop; neitoki Lea tenebo inkera enyena aabau aanyiku neirrugo aabaiki enkop; ore te bayie e pooki nenyiku Yosef o Raheli, neirrugokino aabaiki enkop. Nejo Esau, “Ainyoo eutu ele orora pooki lainepua?” Newal Yakobo ajo, “Pee atum omom te dukuya nkonyek olkitok lai.” Kake etejo Esau, “Ekaata inaabaiki, olalashe lai; intaa pooki niata ininono.” Nejo Yakobo, “A'a, aatasayia, tenaa kanoto omom too nkonyek inono, neaku tang'amai naa enkishoroto ai too nkaik aainei; amu esipa tenajo ore enduaata natoduaa enkomom ino netiu anaa enduaata natoduaa enkomom e Nkai amu te nyorrata natiu neijia kitang'amua nanu. Tang'amai, aatasayia ina kishoroto ai nikiyakaki iyie, amu aaing'urrie Enkai oleng, naa kaata sii inaabaiki.” Ina peyie earaki ninye meewa, neya ninye. Neitoki Esau ajo, “Emaibung'a enkoitoi aapuo, naa kaituruk te dukuya iyie.” Kake etiaka Yakobo ninye, “Eyiolo olkitok lai ajo ore kuna ng'aturran naa kenana, naa nanu ogolie intare o nkishu tenebo ilasho lenye, naa te nerewi oleng enkolong nabo, naa keye imasaa pooki. Inchoo olkitok lai egiroo osinka lenye, pee ariku ninche maakutiti te risioroto e lototo oo nkishu naatii dukuya nanu o te risioroto e lototo oo inkera, omatabau enetii olkitok lai te Seir.” Neaku etejo Esau, “Inchooki maatung'ueiki embata oo ltung'ana laainei laata tene.” Kake etejo, “Meeta tipat ning'uarie. Ayieu ake duoo natum omom te dukuya enkomom ino olkitok lai.” Metaa etorrinye Esau ina olong alo Seir. Kake eshomo Yakobo Sukot, neshetaki kewan enkaji neitayu ninye ilngoborri loo nkishu enyena, metaa keji enkarna e ine wueji Sukot! Nelotu Yakobo te Seriani o metabaiki enkanasa naji Shekem, natii ina kop e Kanaan einguaa Padan-aram, neun ilngoborri te mbata enkanasa. Neinyang'u too layiok le Hamor, aa papaai le Shekem too mpisai iip nabo e seshati enkop naa ninye etuunie ilngoborri lenyena. Neshetu teine olperere lo lasar nedung'oki enkarna ine ajo El-Elohe Israel. Nedumunye Dina entito e Lea natoikio ninye Yakobo alo aparan inkituaak eina kop; ore peyie edol Shekem olayioni le Hamor le Hifi ilo kitok leina kop, neibung ninye te ng'olon aikony nesul ninye. Neng'uar ninye Dina oleng to ltau lenye ina tito e Yakobo; nenyorru ninye ina tito, neirorie ninye too rorei oobor. Metaa eshomo Shekem airorie papai lenye Hamor ajoki: “Ing'urakaki ena tito maitaa enkitok.” Nening apa Yakobo ajo einyala shekem entito enye Dina; netii apa ilayiok lenyena nkishu ti ong'ota, negira Yakobo eitu ejo ae o metaba anaa nepuonu ninche. Nelotu Hamor menye le Shekem enetii Yakobo airorie ninye. Nejing'u ilayiok le Yakobo eing'uaa ong'ota peyie ening ilo omoni; negoro ninche oleng pee ening ina bae amu etaasa Shekem ina nayaua esulare atua Israel aikony entito e Yakobo, amu ore embae neeijo ena nemeishaakino neasi. Kake eirorie Hamor ninche ejoki, “Etayiewua naleng oltau lo layioni lai Shekem entito ino; aatasayia, enchoo ninye meyama. Emayamata maate, enchoo iyiook intoyie inyi; niyaya sii intae intoyie ang. Nikishula aaku elatia, ore enkop neaku kebolokino intae, entamany nikintawal imasaa nitumutumu imasaa kumok.” Nejoki ake sii ninye Shekem menye ina tito tenebo ilalashera lenyena, “Nchooki manoto omom te dukuya inkonyek inyi, naa ore pooki nikijokiki intae naa kaishoru. Inkilikuanu te nanu imasaa pooki naaba anaa niyieu too nkishorot, naa kaishoru te risioroto eina nikijokiki nanu, kake intabai ake ena naata to ltau, inchooki ake ninye nanu ena tito metaa enkitok ai.” Newaliki ilayiok le Yakobo Shekem tenebo papaai lenye Hamor te nkeleekisho enkaraki nainyala enkanashe enye Dina. Etiakita ninche ninche, “Mikiindim iyiook aataas ena bae, aaisho enkanashe ang oltung'ani lememurata, amu keaku ina esulare te iyiook. Pooki ake pee kinyorraa tiniasiasa ena: Tiniakuku ake anaa iyiook ore pooki lee linyi nemurati. Ina peyie kinyorraa aaisho intae intoyie ang, nikiya sii iyiook intoyie inyi, nikiparana tenebo aaku olorere obo. Naa tinimining'ining'i iyiook ninchosho metumurati intae, neaku aikiya entito ang', nikipuo aaidur.” Neitiship irorei lenye Hamor olayioni lenye Shekem. Neaku eitu eitoki ilo barnoti aitumutiki ina bae, amu etonyorra ninye ina tito e Yakobo. Naa ninye apa enyorri oleng aaitulus to lmarei pooki. Metaa eshomo Hamor tenebo olayioni lenye Shekem kishomi enkanasa enye neirorie ilewa le nkanasa enye ejoki, “Ore kulo tung'ana naa iltung'ana supati, enchoo etoni tena kop nikimirakino intokitin, amu ing'ura ekelala enkop oleng te ninche, emayama intoyie enye nikincho sii ninche meyama intoyie ang. Tena bae ake eidim kulo tung'ana aatonyorrai aatotoni tiatua iyiook, nikiaku olorere obo: pee emurati pooki lee tiatua iyiook anaa pee emurata ninche. Aimeaku inkishu enye, o ntokitin enye o ng'uesi enye pooki inkunaang? Ematonyorrai ake duoo ina nayieu, naa kemany ninche atua iyiook.” Ore lelo pooki oimutua kishomi enkanasa enye, etonyorraitie nena pooki naatejo Hamor o Shekem metaa etumurataki pooki lee, o pooki ooimutua kishomi eina anasa. Ore te nkolong e uni, aa enamuratieki neton emueyiaa, nedumunye ilayiok aare le Yakobo, Simon o Lawi oong'arie kina Dina, neya ilalema lenye aarasaki e nkanasa meyiolo, near lelo lewa pooki metuata. Near Hamor metua tenebo olayioni lenye Shekem to lalem neitayu Dina aitung'uaa enkaji e Shekem, nepuo aaing'uaa. Nedoiki ilayiok le Yakobo aar enkanasa, near iltung'ana metuata neya ntokitin te nkanasa amu einyalaki enkanashe enye. Neya intare enye o nkishu enye o sirkon lenye o pooki toki ake ninye natii atua enkanasa o naatii nkurman. Neya pooki toki naata tipat, o nkera enye pooki tenebo inkituaak enye, o pooki toki natii atua inkajijik neibung aaisardakie ninche. Ina peyie ejoki Yakobo Simon o Lawi, “Kiyakita nanu enyamali amu kintong'ueita nanu tiatua olorere lena kop, too Ilkanaani o Ilperesi; aikuti iltungana laainei, naa tenelo neibung'a aaitoriokino aarare nanu, naa kaamuti nanu tenebo enkaji ai pooki.” Kake etejo ninche, “Keishaakino ninye neitaa enkanashe ang e mulayoi?” Nejoki Enkai Yakobo, “Tudumunye ilepa shomo Betel, nilo amany ine; nintobir teine olperere lo lasar, aitaiki Enkai ina nikimpang'aka ina kata apa peyie ilo ailany olalashe lino Esau.” Metaa etiaka Yakobo Enkaji enye o lelo pooki apa ootii tenebo ninye, “Ewuangie kulie aitin oo loreren naatii atua intae, nintisinyinyi ate, nimbelekenyenye inkilani inyi; ematudumunye aailep aapuo Betel, peyie atum aitayu teine olperere lo lasar aitaiki Enkai ina naatawalikia nanu te nkata osina, naataboitare te pooki wueji nashomo.” Ina peyie eisho Yakobo nena aitin oo loreren pooki naata, tenebo ilgiso ootii inkiyiaa enye; neisudoo Yakobo nena pooki te ntonata olchani onyaanyukie olngaboli otii embata Shekem. Ore eidur ninche nedoiki enkuretisho naing'uaa Enkai inkanas naamanita ninche, metaa eitu esujaa ninche ilayiok le Yakobo. Nelotu Yakobo Lus (aa ninye Betel), aa ninye natii enkop e Kanaan, ore ninye tenebo olorere pooki oboitare, neshet olperere lo lasar teine, nejo ine wueji El-betel, amu ine apa eibalakinye Enkai kewan ninye ina kata naisik alo aing'uaa olalashe lenye. Neye Debora enkaisiaayiani, teine nenukari te ntonata olchani onyaanyuuki olng'aboli tiabori Betel, metaa etejoki enkarna e ine Al'lonbakut. Neitoki ake Enkai aipang'aki Yakobo aigil, ina kata pee elotu aing'uaa Padan-aram, nemayian ninye. Nejoki Enkai ninye, “Aikiji enkarna ino Yakobo; meitokini aajo enkarna ino Yakobo, kake keji Israel, enkarna ino.” Metaa eipotoki enkarna enye aajo Israel. Nejoki Enkai ninye, “Ara Enkai magilani; entoisho entoponari, epuku te iyie olorere o lorora loo loreren, nepuku ilaiguanak te iyie. Ore ina kop apa naishoo Abraham o Isaak naa kaaisho iyie, naa kaisho ina kop eishoi ino nikisuju.” Nelo Enkai aig'uaa ninye teine neirorie ninche. Neitasheyie Yakobo eng'ape teine apa neirorie Enkai o ninye eng'ape osoit; nebukoki olasar opikuni enchumata enye, nebukoki eilata shumata enye. Metaa eishoo enkarna ine wueji neirorie Enkai ajo Betel. Neitoki ninche aaidur aapuo te Betel; ore eton elakuaniki Efrat, nesaisayu Raheli, near enkop oleng. Ore eitanyamal emion oleng', etiaka enkaitoyioni ninye, “Miureishoyu amu itum ae ayioni.” Ore ena kata edung'o tau (amu etua), neipot enkarna enye ajo Benoni; kake eipoto menye enkarna enye ajo Benchamen. Metaa etua Raheli, nenukari te nkoitoi epuoi Efrat, (aa ninye Betlehem), neitasheyie Yakobo eng'ape te nchumata enkurare e Raheli; naa eng'ape ina enkurare e Raheli, netii ina ng'ape o taata. Neidur Israel alo, neun olng'obor lenye te dukuya oltalet le Eder. Ore emanya Israel ina kop, nejing'aki Ruben aboitare Bilhah ina apiani e papaai lenye nening Israel ina bae. Nera ina kata ilayiok le Yakobo tomon aare. Ore ilayiok le Lea naa: Ruben, (olkikau le Yakobo), o Simion, o Lawi, o Yuda, o Isaakar o Sebulon. Ore ilayiok le Raheli naa: Yosef o Benchamen. Ore ilayiok le Bilhah enkaisiaayiani e Raheli naa: Dan o Naftali. Ore ilayiok le Silpa enkaisiaayiani e Lea naa Gad o Asheri. Kulo apa ilayiok le Yakobo ootoikioki ninye te Padan-aram. Nelotu Yakobo enetii Isaak papaai lenye te wueji neji Mamre, aashu Kiriat-tarba (aa ninye taa eji Hebron), ine apa etamanya Abraham o Isaak. Etabaitie ina kata inkolong'i e Isaak ilarin iip o ntomoni isiet. Neye ninye, nelo eneiturrurrorre iltung'ana lenyena apa ootuata, etaa oltung'ani moruo oiputakinote nkolong'i, ore ilayiok lenyena Esau o Yakobo nenukaa ninye. Kulo ninche ile ishoi e Esau (aa ninye Edom), etasayia Esau inkituaak enyena too lkanaani; Ada entito e Elon oo Lhiti, o Oholibama entito e Akna olayioni le Sibeon loo Lhifi, o Basemat entito e Ishmael enkanashe e Nebaiot. Neiki Adah Esau, Elifas; neiu Basemat Reul; neiu Oholibama Yeush o Yalam o Kora. Kulo ninche Ilayiok le Esau ootoikioki ninye te nkop e Kanaan. Neya Esau inkituaak enyena o layiok lenyena, o ntoyie enyena o ltung'ana pooki lo lmarei lenye, o nkishu enyena, o ng'uesi pooki enyena, o ntokitin enyena pooki e tipat naanoto te nkop e Kanaan; nelo enkop nalakua alam olalashe lenye Yakobo. Amu ore imasaa enye naa aikumok apa oleng nemeidim aatamany nebo; ore enkop apa naidurrakita ninche meekure eishaa tenkaraki enkumoi oo nkishu enye. Metaa eshomo Esau amany enkop oo ldoinyo e Seir. Esau aa ninye Edom. Kulo ninche ile ishoi e Esau menye loo le Edom teina kop ooldoinyo e Seir. Kuna ninche inkarn oo layiok le Esau: Elifas olayioni le Ada enkitok e Esau, Reul olayioni le Basement enkitok e Esau, ore ilayiok le Elisfas naa Teman, o Omar, o Sefo, o Gatam o Kenas (ore apa Timna naa enkapiani e Elifas, olayioni le Esau; neiki Elidas Amalek.) Kulo ilayiok le Ada, enkitok e Esau. Kulo ninche ilayiok le Reul: Nahat, o Sera, o Shamma, o Misa, kulo ninche ilayiok le Basemat, enkitok e Esau. Kulo ninche ilayiok le Oholibama entito e Ana olayioni le Sibeon, enkitok e Esau: Etoikio ninche Esau Yeush, o Yalam o Kora. Kulo ilarikok loo layiok le Esau. Ilayiok le Elifas olkikau le Esau: ilarikok ooji Teman, o Omar, o Sefo, o Kenas, o Kora, o Gatam o Amalek; kulo ilarikok le Elifas te nkop e Edom; Naa ilayiok le Ada. Kulo ninche ilayiok le Reul olayioni le Esau; ore ilarikok naa Natan, o Sera, o Shama, o Misa; kulo ninche ilarikok le Reul te nkop e Edom; naa ninche ilayiok le Basement, enkitok e Esau. Kulo ninche ilayiok le Oholibama, enkitok e Esau: ilarikok le Yeush, o Yalam o Kora; lelo ilarikok ootoikioki Oholibama entito e Ana, enkitok e Esau. Kulo ninche ilayiok le Esau (aa ninye Edom) naa kulo ilarikok lenye. Kulo ninche ilayiok le Seir loo le Hori iloopeny enkop: Lotan, o Shobal, o Sibeon, o Ana, o Dishon, o Eser, o Sisham; kulo apa ilarikok lo Lhori ilayiok le Seir te nkop e Edom. Ore apa ilayiok le Lotan naa Hori, o Heman; ore apa enkanashe e Lotan naa Timna. Kulo ilayiok le Shobal: Alfan, o Manahat, o Ebal, o Shefo o Onom. Kulo ninche ilayiok le Sibeon: Ayia, o Ana, Ana apa ilo onoto inchorroi nairowua tiong'ota, eirrita isirkon le Sibeon papaai lenye. Kuna ninche inkera e Ana, Dishon o Oholibama entito e Ana. Kulo ninche ilayiok le Dishon: Hemdan, o Eshban, o Itran o Keran. Kulo ninche ilayiok le Eser; o Bilham, o Saafan o Akan. Kulo ninche ilayiok le Dishan: Usi o Aran. Kulo ninche ilarikok le Hori: ore lelo arikok naa Lotan, o Shobal, o Sibeon o Ana, o Dishon, o Eser, o Dishan: kulo ninche ilarikok le Hori te risioroto oo ilgilat lenye te nkop e Seir. Kulo ninche ilaiguanak apa oitoreisho te nkop e Edom, eton eitu etumi hoo likae aiguanani oitoreisho too Siraeli. Eitoria Bela olayioni le Beori enkop e Edom, neji enkarna enkanasa enye Dinhaban. Neye Bela, neitoreisho Yobab olayioni le sera le Bosra te rishata enye. Neye Yobab neitoreisho Husham le nkop e Ltemani te rishata enye. Neye Husham neitoreisho Hadad olayioni le Bedad, laa ninye apa otimira ile Midian te nkop e Moab te rishata enye, neji enkarna e nkanasa enye Afiti. Neye Hadad, neitoreisho Samla le Masreka te rishata enye. Neye Samla, neitoreisho Shaul le Rehobot to lkeju le Frati te rishata enye. Neye Shaul, neitoreisho Baalhanan olayioni le Akbor te rishata enye. Neye Baalhanan olayioni le Akbor neitoreisho Hadar te rishata enye, ore enkarna e nkanasa enye neji Pau; neji apa enkarna enkitok enye Mehetabel, ina tito e Matred, entito e Mesahab. Kuna ninche inkarn oo larikok Le Esau, te risioroto oo ilmareita lenye o manyishoritin enye anaa enatiu inkarn enye; ore ilarikok naa Timna, o Alifa o Yelet, o Oholibama, o Ela, o Pinon, o Kenas, o Tenan, o Mibsar, o Magdiel, o Imran. Kulo ninche ilarikok le Edom (aa ninye eji Esau, menye le Edom), te risioroto oo manyishoritin enye teina kop nataa enenye. Nebik Yakobo teina kop apa naidurraka papaai lenyena te ina kop e Kanaan. Ena enkatini o lmarei le Yakobo. Ore aa oloo larin tomon oopishana Yosef, neirritita apa intare tenebo ilalashera lenyena; ore apa aa enkayioni ninye netii apa tenebo ilayiok le Bilha o Silpa nena kituaak e Papaai lenye, neyaki Yosef papaai lenye ilomon torrok ooipirta ilalashera lenyena. Kenyor apa Israel Yosef oleng aitalang inkera enyena pooki, amu etoikioki ninye etaa kitok oleng, neitobiraki ninye olkila oodo loo inkaik adoru. Ore peyie edol ilalashera lenyena aajo kenyor menye ninye aitalang ilalashera lenyena pooki, neibayu ninche ninye oleng, neaku meyieu neirorie ninye te supatisho. Netum Yosef enkidetidet, ore peyie eliki ilalashera lenyena neibayu ninche ninye oleng'. Nejoki ninye ninche, “Entoning ena kidetidet naidetidetua. Ng'ura, kigira iyiook aaen irridat le enkano tiatua enkurma naa ng'ura, ore orridati lai etudumunye aitashe, aitoriori naa ng'ura, ore irridat linyi pooki eetuo pooki aiturrurrokino aaman ninye, neirrugokino pooki orridati lai.” Nejoki ilalashera lenyena ninye, “Kesipa iyaku oloitore iyiook? Arashu iyaku oloota enkitoo te iyiook pooki?” Neaku eibaitie ninche ninye oleng too nkidetidetat enyena o too rorei lenyena. Neitoki ake atum ae kidetidet, neliki ilalashera lenyena nejo, “Ng'ura anyaaka aidetidet ae kidetidet; naa ng'ura, ore enkolong o lapa o lakir tomon oobo neaku kaapuonu aairrugokino.” Kake ore ake peyie eliki menye neliki sii ilalashera eisikong'a menye nejoki ninye, “Kainyoo doi ena kidetidet nindetidetu? Metaa kaalotu nanu tenebo yieyioo lino o lalashera linono aairrugo aabaiki enkop te dukuya iyie?” Netum ilalashera lenyena olom te nkaraki ninye, kake etushuma menye ina kiroroto to ltau. Nedumunye ilalashera lenyena aapuo airrita intare e menye te mbata e Shekem. Nejoki Israel Yosef, “Aimegira ilalashera linono aairrita intare te Shekem? Wou maairriwai enetii ninche.” Nejoki Yosef ninye, “Nele nanu.” Ina peyie ejoki ninye, “Shomo tena kata taleenoi tenaa keserian ilalashera linono, o ntare, nikintoki ayaki olomoni.” Neaku eirriwayie ninye to erata le Hebron, nelo Shekem. Neinepu oltung'ani ninye egira alilita too nkong'at; neikilikuan ilo tung'ani ninye ajoki, “Ainyoo doi ing'oru?” Nejo ninye, “Agira aing'oru ilalashera laainei, tolikioki sii ake aatasayia, kaji doi etii aairritayie intare.” Nejoki ilo tung'ani, “Eshomo aaidurraki dikae, amu atoning'o ninche ejo, ‘Maape Dotan.’ ” Metaa eshomo Yosef asujaa ilalashera lenyena, netum ninche te Dotan. Nedolu ninche ninye elakua ore eton eitu elotu anyikaki ninche, neinos ninche enkiguana peyie ear ninye metua. Nejokino maate, “Nelido oloshi aidetidetani olotu. Wootu taata, emataar ninye metua nikinang'aki ninye engumoto nabo te kuna, nikipuo aajo eng'ues entim ninye nainosa ninye, nikianyu aadol enaaku inkidetidetat enyena.” Kake ore peyie ening Ruben ina, neitajeu ninye too nkaik enye nejoki, “Mikiar ninye metua.” Nejoki Ruben ninche, “Emimbukoo osarge; entanang'aki ninye atua ena gumoto tene tiong'ota, kake eminteleiki ninye enkaina aar metua,” peyie etum aitajeu ninye aitung'ai enkaina enye, arrinyoki ninye papaai lenye. Metaa ore peyie elotu Yosef enetii ilalashera lenyena, neng'as aaoru ninye olkila lenye, ilo kila oodo oota inkaik adoru oishopito; neya ninye aanang'aki eng'umoto, ore ina gumoto nemetii toki, metii enkare atua. Netoni ninche te nkop aanya endaa, nejo mataraposhu nkonyek enye nedol encholiek oolamirak le Ishmael epuonu aaing'uaa Gilead, ereuta intamesin enye, enapita neeta intokitin naaji ubani, o Seu, o emanoo etii enkoitoi edoyio aapuo Misiri. Ina peyie ejoki Yuda ilalashera lenyena, “Ainyoo taa doi kitum tinikiar olalashe lang metua, nikituroo osarge lenye? Wootu, ematimir ninye aamiraki kulo tungana le Ishmael, nimikincho inkaik ang ebaiki ninye, amu olalashe lang ninye, olo sarge lang.” Nenyorraa ilalashera ina natejo. Ore peyie epuonu ilbiasharani le Midian aaim ine: neyietu Yosef aaitayu te ng'umoto, nemiraki ninye lelo tungana le Ishmael te shekeli tikitam e nkosholai; neya ninche Yosef Misiri. Ore pee eshukunye Ruben enaduoo gumoto nedol ajo meekure etii ine, nepolos inkilani enyena tosina sapuk, nerrinyo enetii ilalashera lenyena nejoki: “Metii enkayioni ine kaji taata alo nanu?” Neya olkila le Yosef, neyieng enkine, neitadoiki ilo kila osarge. Neirriwaa ilo kila adoru inkaik meyakini menye, nejo, “Nele olkila likinotito, ng'ura sii iyie tujurru tenaa kolkila lo layioni lino anaa aimeninye.” Neyiolou nabo kata ninye, nejo, “Olkila lo layioni lai; einosa eng'ues entim ninye; maing'ash tukul ajo etumuta Yosef ing'uesi.” Nepolos Yakobo inkilani enyena to sina nerreten olkuniyia te mpolos enye. Neishiraki olayioni lenye inkolong'i kumok. Neinyototo ilayiok pooki lenyena tenebo intoyie enyena pooki aaibung ninye aitagol; kake etanya ninye tukul eitagoli, nejo, “A-a ekalo abori enemeneng'a enetii olayioni lai, aishirita.” Metaa eishiraka menye ninye oleng. Ore ina rishata eidipa Ilmidian aatimir ninye te Misiri aamiraki Potifa, obo loo laitoriak le Farao, aa ninye olkitok loo larripok le wueji netii Farao. Ore te nena olong'i, etadoyie Yuda alo aing'uaa ilalashera nelo aitaa elatia oltung'ani obo le Adullam oji enkarna enye Hira. Ore etii ine nedol Yuda entito e likae tung'ani loo Lkanaan neji enkarna enye Shua; neyam ninye nelo aboitare. Neiroshiu neiu enkayioni, nedung'oki ninye enkarna ajo Eri. Neitoki ake anutayu neiu enkayioni, nedungoki ninye enkarna enye ajo Onan. Neitoki ake aigil aiu enkayioni, neisho ng'otonye enkarna enye ajo Shela. Naa Kesib apa etii peyie eiu Shela. Neyamaki Yuda olayioni lenye kikau Eri enkitok, naji enkarna enye Tamar. Kake ore apa ilo kikau lenye oji Eri, naa oltung'ani apa arruoni oleng te dukuya Olaitoriani; near Olaitoriani ninye metua. Ina peyie ejoki Yuda Onan, “Shomo tijing'aki ina kitok oliai o lalashe lino tayiolo ninye, pee etum olalashe lino nkera te iyie.” Kake eyiolo Onan ajo ore inkera naaiu nemeaku inenyena, neaku ore ake peyie elo ayiolou enkitok olalashe lenye, nebukoki enkare e le waisho enkop pee meisho ake inkera olalashe lenye. Ore ina nataasa, eitu katukul eitiship Olaitoriani, near sii ninye metua. Ina peyie ejoki Yuda Tamar ina kitok o layioni lenye. “Totona ira enkoliai te nkaji e papaai lino, o metaba anaa nebulu olayioni lai Shela.” Amu etureishe ajo keidim sii ninye atua anaa ilalashera lenyena. Metaa eshomo Tamar enkaji e menye. Ore etulusoyie enkiti rishata neye enkitok e Yuda, entito e Shua. Ore peyie eitagoli Yuda, nelo ninye tenebo olchore lenye Hira le Adulam ewueji neji Timna, ewueji negirae aabarnie intare enyena. Ore peyie elikini Tamar aajoki, “Ekeloito olaputani lino Timna abarn intare enyena.” Neitayu to sesen lenye inkilani enyena e nkoliai, nepika enkarasha aitoipie elukunya enye peyie medoli enkomom, nelotu aton te kishomi e Enaim, natii enkoitoi nalala nalo Timna; amu etodua ajo etubulua Shela, neitu eishori ninye meyama. Ore peyie edol Yuda ninye, nedamu ninye ejo inoshi kituaak naibor onyek, amu eitoipo ninye enkomom enye. Nelo ninye enetii te mbata enkoitoi nalala nejoki ninye, “Wou inchooki maatayiolo,” amu eitu eyiolou ninye ajo entito olayioni lenye. Nejo ninye, “Ainyoo naa kincho peyie kitum atayiolo?” Newal ajo, “Ekaairriwaki olkuoo too ntare aainei.” Nejo Tamar, “Amaa aikincho entoki ino naibung naarreshunye o terewakaki ilo kuo?” Nejo, “Ainyoo iyieu naaisho?” Newal ajo, “Inchooki olgisoi lino o enkeene ino, o ina ng'udi ino nimbung'ita te nkaina ino.” Neaku eishooyie ninye ninche nelo ayiolou ninye neiroshiu ninye. Neinyototo alo; neitayu enkarasha te nkomom neishop inkilani enyena e nkolia. Ore peyie eirriu Yuda olkuoo eyau olchore lenye le Adullam, peyie etum enaduoo kitok aishoru intokitin naata e Yuda nelotu alau ninye te naduoo wueji. Neikilikuan ninye iltung'ana ootii ine ajoki, “Koree ake enkitok mulayoi natii naaji embata enkoitoi nalala e Naim aton?” Nejo ninche, “Meetae emulayoi natii ene.” Neaku etushukokine Yuda nejoki, “Eitu alo atum, netejo sii iltung'ana le ine, ‘Metii emulayoi natii ine.’ ” Newal Yuda ajo, “Inchoo ninye eya nena tokitin aitaa inenyena, peyie mekueniyieki ake iyiook; idol ajo airriwaka ele kuo, neitu ilo ainepu ninye.” Ore peyie eishunye ilapaitin okuni, nelikini Yuda aajoki, “Ore Tamar enkitok o layioni lino, etaa emulayoi, ore ake sii eiroishi te nkerai e mulayaisho.” Nejo Yuda, “Entoriku entupuku boo peyie kipuo aapejoo ninye.” Ore eitupukuni boo, neirriwaa olkilikuai airriwaki olaputani lenye ejo, “Olopeny kuna tokitin anotie enkerai.” Nejo, “Ing'ura tujurru, aatasayia, ainkuneng'ae, kuna tokitin o lgisoi, o enkeene, o eng'udi.” Nenyorraa Yuda ninche nejo, “Aisinyati ninye peyie aalang, anaa keitu apa aitabaya ororei lai aisho ninye olayioni lai Shela meyama.” Neitu eitoki aikata ayiolou ninye. Ore peyie ebau enkata najing aji neiu ilmao te ishoi. Ore earita enkop, neitayu obo enkaina aitupuku neng'amaa enkaitoiyioni neeniki ina aina enkopito pile, ejoito, “Ele otang'asunye.” Kake ore erriny enkaina enye, ng'ura, nepuku olalashe, nejo enkaitoiyioni, “Metaa inji doi inkununye tinipuku!” Nedungokini ninye enkarna enye aajo Peres. Ore te siadi nepuku olalashe lenye eeta enaduoo opito pile eenikino enkaina enye; neipoti enkarna enye aajo Serah. Ewaki apa ina kata Yosef Misiri, ore Potifa laa obo loo lkituaak le Farao, olkitok le rripore, naa olmisiri sii, einyiang'ua Potifa ninye too ltung'ana le Ishmael laa ninche ooyautua ninye ina kop. Etii apa Olaitoriani tenebo Yosef, neaku oltung'ani otudupe oleng', netii enkaji olkitok lenye ilo Misiri, nedol olkitok lenye ajo etii Olaitoriani tenebo ninye, ore pooki naata neisho Olaitoriani metubula too nkaik enyena. Metaa enoto Yosef omom too nkonyek enyena, neisho ninye metaa oloitasheikinoni le nkaji enye pooki neaku ninye oitore pooki toki naata. Ore ebaiki ina kata neitaa ninye olaitasheikinoni le nkaji enye o pooki toki naata etamayiana Olaitoriani enkaji e ilo Misiri tenkaraki Yosef, ore emayianata Enkai nejing pooki toki naata, tiaji o te nkurma. Metaa etungueikia apa pooki naata metaa Yosef oitasheiki; neaku ore eeta ninye, eitu eitoki anyamaliki ae toki meteleku endaa ake nanya ninye. Ore apa Yosef naa oltung'ani sidai te nking'urata. Ore etulusoyie enkata, nekurraki enkitok olkitok lenye inkonyek enyena ang'uar Yosef, nejoki, “Irraga tenebo nanu.” Kake etanya ninye nejoki enkitok olkitok lenye, “Ing'ura, ore atii ene meekure enyamalaki olkitok lai ae toki tena aji, netipika pooki toki naata atua enkaina ai; Meekure aa kitok tena aji pee aalang nanu; nemeeta hoo ae toki naatirishie nanu meteleku iyie ake, amu ira iyie enkitok enye; kaji taa pasa aiko peyie aas enkarrueisho naba inji, naas eng'oki te dukuya Enkai?” Ore hoo duoo ninye neirorie Yosef anaake neitu ening Yosef ninye, peyie eirrag tenebo ninye, arashu eisiritore ninye. Kake ore nabo olong', eshomo Yosef atua enkaji aas esiaai enye nemeetae likae lee otii atua aji, neibung enkila enye ejoki, “Irraga tenebo nanu.” Kake etung'uayie ninye enkila enye te nkaina enye, neilanyisho aisik aipang te nkaji. Ore peyie edol ina kitok ajo etung'uayie enkila enye te nkaina enye eibung'ita, neisik alo aing'uaa enkaji, neipot ilewa le nkaji enye nejoki ninche, “Eng'ura, eyaka ninye iyiook Iheburaniai meeu amor iyiook; aaewuo ajing'aki ajo aboitare, naishir oleng to ltoilo sapuk; ore peyie ening ajo ailepie oltoilo lai aishir oleng', neing'uaa enkila enye te nkaina ai neilanyisho aipirri aipung boo.” Neirragie ninye ina kila enye tembata enye o meeu olkitok lenye ang'. Neliki ninye ina bae ake ajoki, “Ore ilo sinka loo Lhebrania, ilo liyaua atua iyiook, aaewuo ajing'aki amor; kake ore ake peyie ailepie oltoilo lai aishir, neing'uaa enkila enye aata neilanyisho aisik apuku te nkaji.” Ore peyie ening olkitok lenye lelo rorei o oiroro enkitok enye, “Neijia aaikuna osinka lino.” Neiyupuyup engoro enye. Neya olkitok le Yosef ninye apik korokoroni, ine wueji nepiki ilmapuusuni lo laiguanani. Nepiki ninye korokoroni. Kake etii apa Olaitoriani tenebo Yosef neitodol ninye enyorrata nauno, neisho ninye omom too nkonyek olaitasheikinoni le korokoroni. Ore ilo aitasheikinoni, nepik Yosef aitaa ninye oitasheiki lelo pooki ooikenoro te korokoroni neaku ore pooki naasi naa ninye oas. Ore ilo kitok le korokoroni eitu eitoki aitanyamaluo te pooki toki natipika inkaik e Yosef, amu etii Olaitoriani tenebo ninye; neaku ore pooki nataasa, neisho Olaitoriani meitobirari. Ore etulusoyie enkata, neyooki olaitasheikinoni le naisho oo sabibu lo laiguanani le Misiri tenebo olapejoni loo mukateni o laiguanani, aaitagor olkitok lenye ilo aiguanani le Misiri. Negoro Farao te nkaraki lelo aitasheikinok lenyena pokira, olaitasheikimoni kitok le naisho oo sabibu tenebo olapejoni kitok loo mukateni. Nepik ninche enkaji narripieki iltung'ana arruok natii enkaji olkitok le rripore, teina korokoroni naikenorieki Yosef. Ore ilo kitok le rripore neitanap Yosef meing'ura, neisaiai ninche. Netoni inkolong'i naaikash teina aji oo larruok. Ore enkewarie nabo, eidetideta pokira, olaitasheikinoni kitok le naisho oo sabibu tenebo olapejoni loo mukateni lo lkitok le Misiri, eikenoro te Korokoroni. Meeta ake oleitu eidetidet enkidetidet enye, nemeeta ake enkidetidet nemeeta enautu. Ore peyie eyooki Yosef ninche enasirie, nedol ninche, nenyorriki ajo kenyamal oleng pokira. Neaku eikilikuana ilaitasheikinok le Farao ootii tenebo te nkaji naenishoreki te enkaji olkitok lenye ajoki, “Ainyoo doi anaaijo kesoto taata intae inkomomi?” Nejoki ninche ninye, “Kindetideta duo, nemeeta hoo oltung'ani oidim aibelekenyaki iyiook atoliki aibalakinye.” Nejoki Yosef ninche, “Amaa doi enkibelekenyata aime ene Nkai? Entolikioki atasayia intae.” Ore ilo aitasheikinoni kitok le naisho oo sabibu, neliki Yosef enkidetidet enye nejoki ninye, “Ore te nkidetidet ai etii duoo o sabibu dukuya nanu, ore te nchumata eilo sabibu, etii ilng'osil okuni; ore ake peyie eitapuku, nelioyu esidano enye, neku enkimarrati aaku osabibu. Netii duoo enkikompe e Farao enkaina ai, naitayu ilng'anayio loo sabibu, naironyaki enkare enye ina kikompe, napik ina kikompe e Farao inkaik e Farao.” Ina peyie ejoki Yosef ninye, “Ena enkibelekenyata ena kidetidet: ore ilng'osil okuni naa inkolong'i uni, ore too nkolong'i uni naa aikidumu Farao endukuya ino nikinyaaki esiaai ino, neaku aipikaki Farao enkaina enye enkikompe enye anaa apake te dukuya aa olaitasheikinoni le naisho oo sabibu. Kake tadamuaki tenilo nitum eseriani, nikintaas sii nanu esupatisho peyie kimbalie sii nanu te dukuya Farao, pee kintayu nanu tena aji. Amu kesipa tukul ajo kapurruno te nkop oo Lhebrania; ore sii tene natii maata enataasa peyie aatipikaki atua ewueji e korokoroni.” Ore peyie edol olapejoni loo mukateni ajo ore enkibelekenyata naibelekenya Yosef ajo ekening'unoyu, etiaka sii ninye Yosef “Aidetideta sii nanu, etii nkikapuni uni oo mukateni elukunya ai, ore enkikapu natii shumata inkulie netii indaiki oo mpukunot pooki naapejuno e Farao, neinosita imotonyi nena daiki naatii enkikapu natii endukuya ai.” Newal Yosef ajoki, “Ena enkibelekenyata enye: Ore inkikapuni uni naa inkolong'i uni; ore too nkolong'i uni, naa kedumu Farao endukuya ino nikintung'uaa iyie! Nikilili iyie to lchani, ore imotonyi naa keinos inkiri osesen lino.” Ore te nkolong e uni, aa enkolong apa natoinyieki Farao, neitaiki ilaisiaayiak lenyena pooki o sirua nedumu endukuya olaitookoni kitok tenebo endukuya olayierani kitok tiatua ilaisiaayiak lenyena. Neshukoki olaitasheikinoni kitok le naisho oo sabibu, nepik enkikompe inkaik e Farao, kake eililio ilo apejoni kitok loo mukateni, anaa enatolikio apa Yosef ninche. Ore ake eyia, eitu edamu ilo kitok le naisho oo sabibu Yosef, etorikine ninye. Ore peyie eishunye ilarin oare oolulung'a, neidetidet Farao enkidetidet natoduaa kewan eitashe te mbata olkeju le Nail. Naa ng'ura etupukutuo aailepu to lkeju le Nail inkishu naapishana sidain naapir, nenya ilo alaa otii embata olkeju. Naa ng'ura, eetuo kulie kishu naapishana sasin, naaikinyoot aailepu to lkeju le Nail aasuju ninche, neitashe te mbata oo nkulie te nkiyopata olkeju le Nail. Ore nena kishu sasin naaikinyoot, einosa nena kishu sidain naapir. Neputunye Farao te nkidetidet. Neitoki airora neitoki aidetidet eniare; naa ng'ura, ilkiyiaa oopishana loo lpaek oopir naa sidain ebulu to lpaeki obo. Ng'ura ore ake peyie eitalioo inkiyiaa pokira naapishana, neitoki kulie kiyiaa naapishana aaliooyu naa sasin naaitoiyito enkijape naing'uaa enkalo oloosaen. Ore lelo kiyiaa sasin le ntapa etoijoitie ilkiyiaa oopishana sidain oopir. Neputunye Farao, naa ng'ura enkidetidet duoo ake ina. Metaa ore peyie ekenyu etanyamala oleng to oltau lenye; neirriwaa olkilikuai meipoti ilasakutok o ltung'ana le Misiri o olang'eni pooki; neliki Farao ninche ina kidetidet enye pooki, neitu etumi obo te ninche oidim aibelekenya ina kidetidet aliki Farao. Nejoki olaitasheikinoni kitok le naisho oo sabibu e Farao, “Atadamua taata inkitarruorrot aainei. Ore apa peyie egorokino Farao ilaisiaayiak lenyena, naapik nanu tenebo olapejoni kitok loomukateni enkaji narripieki iltung'ana arruok natii enkaji olkitok le rripore, nikindetidet pokira ina kewarie, ore iyiook pokira meeta oleitu eidetidet enkidetidet enye naata e utunoto enye. Netii apa oloti barnoti loo Lhebrania oboitare iyiook teine, olaisiaayiani lo lkitok le rripore, ore peyie kiliki ninye nena kidetidetat eibelekenyaka iyiook ninche, eisho ake enkipirta enkidetidet pooki ng'ae anaa enatiu enkidetidet enye. Naa ore peyie eliki iyiook, nelotu aaku ina natolimuo, naashukokini esiaai ai, ore olapejoni kitok loo mukateni nepuoi aailili.” Neirriwaa Farao olkilikuai meipoti Yosef, neyauni ninye aaitasieku aaitung'uaa korokoroni ore peyie eidip atabarnoyu neibelekeny sii inkilani enyena nelotu atua aitashe te dukuya Farao. Nejoki Farao Yosef, “Anoto det enkidetidet, nemeetae likae tung'ani laaidim aibelekenyaki ninye, natoning'o eji ore peyie ining enkidetidet naa indim aibelekenya.” Newaliki Yosef ajoki, “Ime, nanu etii ewalata keisho Enkai Farao ewalata sidai naitiship.” Ina peyie ejoki Farao Yosef, “Ng'ura, ore te nkidetdet ai, aitashe apa te nkiyopata olkeju le Nail, nepuonu inkishu naapishana naapir naa sidain aailepu to lkeju le Nail, nedaa aadaa tiatua olalaa, nepuonu kulie kishu naapishana enetii, naa ore ninche naa sasin neikinyoot ineitu aikata adol te nkop e Misiri. Ore nena kishu sasin naaikinyoot, neinos nena kishu e dukuya naapishana kake ore peyie eidip ainosa ninche, meetae hoo obo otayiolo ajo einosa ninche, meetae hoo obo otayiolo ajo einosa ninche inkulie amu eton ake emueyiaa naa sasin anaa enatiu te nkiterunoto. Ina peyie aputunye. Anyaaka ake sii te nkidetidet ai adol ilkiyiaa oopishana oobulu to lpaeki, obo oobore naa sidain. Ore kulie kiyiaa naapishana, netoito, naa sasin, neitoi olkutati lo loo saen. Etubulakita ninche, ore lelo kiyiaa sasin lo lpaek etoijoitie lelo kiyiaa oopishana sidan. Natolikio nanu nena kidetidetat ilasakutok kake metii hoo obo laaidima atoliki ina kidetidet.” Ina peyie ejoki Yosef Farao, “Ore enkidetidet e Farao naa nabo; eitoduaa Enkai Farao enataa kejo pee eas. Ore inkishu naapishana sidain naapir, naa ilarin oopishana, ore ilkiyaa oopishana sidain naa ilarin oopishana; ore enkidetidet naa nabo. Ore inkishu sasin naaikinyoot naapishana, naaetuo aasuju ninche naa ilarin oopishana, ore ilkiyiaa lemeeta toki oopishana ooitoyio olkutati lo loo saen naa ilarin lo lameyu oopishana. Eketiu anaa enatiaaka Farao, eitoduaa Enkai Farao enataa kejo pee eas. Kepuonu ilarin oopishana ootumieki endaa sapuk te nkop pooki e Misiri, kake ore ake peyie eishunye lelo arin, nepuonu ilarin oopishana lo lameyu sapuk, ore lelo arin pooki le ndaa sapuk nerikinisho te nkop pooki e Misiri, nemut olameyu ena kop, neaku meitokini ninye aadamu enapa naatae sapuk te nkaraki ilo ameyu osuju, amu ekeaku torrono oleng'. Ore nkigilata enkidetidet e Farao, eitodolu inchere ore ina siaai naa Enkai natipika, naa keyau Enkai aitaa te nkata nemelakua. Inchoo naa tena kata Farao egelu oltung'ani oisiligayu neeta sii eng'eno neisho ninye meitasheiki enkop e Misiri. Shomo dukuya tegelu ilaitashekinok tena kop niya e matua e imiet e pooki daa naiu enkop e Misiri te kulo arin oopishana le ndaa sapuk. Nincho ninche metasoto endaa pooki e kulo arin sidain oopuonu, neiteng'eli ilpaek tiabori enkitoria e Farao pee eaku endaa too nkanas, nincho ninche meiteng'ela. Ekeaku ina daa enashumi te nkaraki enkop te lelo arin oopishana lo lameyu oopuonu ena kop e Misiri, pee meidak enkop teina rishata o lameyu.” Ore ina bae naa sidai apa oleng te Farao o too laisiaayiak lenyena pooki. Nejoki Farao ilaisiaayiak lenyena, “Aikindim aanoto oltung'ani laijo ele, otii enkiyang'et e Nkai atua ninye?” Ina peyie ejoki Farao Yosef, “Ore amu kintoduaa Enkai kuna pooki, meetae likae arriyia naa ng'en laijo iyie; iyaku olaitasheiki enkaji ai ore iltung'ana laainei pooki ekeaku ilooning ina nintanap; meteleku tolorika le nkitoo ake aaku nanu kitok te iyie.” Nejoki Farao Yosef, “Ng'ura ajo aaitasheyie iyie ing'ura enkop pooki e Misiri.” Neitayu Farao olgisoi lenye lo lmishire te nkaina enye, nepik enkaina e Yosef; neishopoki ninye ilkilani le kitani napuyiapuy, nepik olpisiai le saabu emurt enye, neisho ninye meshomo ekedito engarri enye e are oo mbartan, neishir ninche te dukuya ninye ejo, “Entigil kung!” Neijia eikuna apik ninye meitasheiki ina kop pooki e Misiri. Ore ake sii, etiaka Farao Yosef, “Ekara Farao, naa ore teneitu inchoru orusa, meetae oltung'ani odumu enkaina anaa enkeju te nkop pooki e Misiri.” Neisho Farao Yosef enkarna oo Lmisiri ajo Safenatapanea; neisho ninye meyama Asenat, ina tito e Potifera olapolosani le Oni. Metaa eshomo Yosef enkop e Misiri. Oloo larin tomoni uni apa Yosef peyie ejing enkisiaayiare e Farao olaiguanani le Misiri. Nelo Yosef aing'uaa Farao, nelo aman enkop pooki e Misiri. Ore te lelo arin oopishana lo lari sapuk, enoto enkop eishoi sapuk, neiturrurru indaiki pooki oo larin oopishana eton eetae endaa sapuk te nkop e Misiri, neshum endaa pooki too nkanas, etushuma te pooki anasa ina daa naing'uaa nkurman naamanita. Neshum Yosef entapa te nkumoi naba anaa osinyai le naiposha, o metaa meekure eyiolo eneba ndaiki te nkumoi amu aimeekure etemayu. Ore eton eitu elotu olari lo lameyu, eeta Yosef ina rishata ilayiok aare, ootoikio Asenata entito e Potifera olapolosani le Oni. Nedung'oki Yosef ilo kikau lenye enkarna ajo Manase, amu etejo, “Aishoo Enkai maatorikinoto ingolikinot aainei pooki, o enkaji e papaai lai pooki.” Neipot enkarna oliare ajo Efraim, “Amu aitaa Enkai olotubula tena kop enyamali ai.” Nebau enkiting'oto oo larin oopishana le nkumoi; neiteru ilarin oopishana lo lameyu aabau, anaa enatejo apa Yosef. Neaku olameyu sapuk too nkuapi pooki; kake ore te nkop pooki e Misiri, netii endaa ina rishata. Ore peyie eishunye indaiki te nkop e Misiri to lorere, neishiraki olorere Farao meishoo endaa; nejoki Farao iltung'ana pooki le Misiri, “Enchom enetii Yosef; ore pooki najoki intae, entaas.” Metaa ore peyie eibulu olameyu ina kop pooki, nebol Yosef inkajijik naashumishoreki, nemiraki ninye Ilmisiri, amu etaa torrono olameyu oleng te nkop e Misiri. Ore ake sii, eetuo iloreren pooki le nkop Misiri enetii Yosef aainyiang'u ilpaek, amu aitorrono apa olameyu te nkop pooki nalulung'a. Ore peyie ening Yakobo ajo keetae entapa te Misiri, etiaka ilayiok lenyena, “Ainyoo doi peyie itonini aaing'ura maate tene?” Nejo, “Ng'ura, atoning'o ajo keetae ilpaek te Misiri; enchom ina kop enyang'u ilpaek einyiang'aki iyiook teine, peyie kibikoo eitu kiye.” Metaa eshomo ilalashera le Yosef tomon aainyiang'u ilpaek te Misiri. Kake eitu eirriwaa Yakobo Benchamen, olalashe le Yosef tenebo ilalashera lenyena, amu keure ajo ketum enyamali. Neaku eetuo apa ilayiok le Israel aainyiang'isho anaa olikae orere oetuo, amu etijing'a apa olameyu enkop e Kanaan. Ore apa ina kata naa Yosef olbalusui leina kop naa ninye enkorrok apa omiraki ilpaek olorere pooki le nkop. Nepuonu ilalashera le Yosef, neirrugo ninche te dukuya ninye aaitabaiki inkomomi enye enkop. Nedol Yosef ilalashera lenyena, neyiolou ninye ninche, kake eitaasa ninye ninche anaa lomon neirorie ninche te nkisikong'ata ejoki, “Kaji doi ing'uaa?” Nejo ninche, “Enkop e Kanaan king'uaa kietuo ainyiang'u endaa.” Metaa etayiolo Yosef ilalashera lenyena, kake eitu eyiolou ninche ninye. Nedamu Yosef inapa kidetidetat naaidetideta naipirta ninche; nejoki ninche, “Irara ilaikitalak, iyietuo aajur enchalan oo itung'ana lena kop.” Nejoki ninche ninye, “A-a olkitok lang, kake kietuo ainyiang'u endaa, ina pee eetuo isinkan linono. Aikira pooki ilayiok lo lpayian obo, nikira iltung'ana ooisiligayu, ore isinkan linono neme ilaikitalak.” Nejoki ninche, “A-a, iyetuo aajur enchalan oo ltung'ana lena kop.” Nejo ninche, “Ore iyiook isinkan linono, kira ilalashera tomon aare, ilayiok lo lpayian obo te nkop e Kanaan; naa ng'ura, ore oloti te iyiook eboitare ena olong papaai lang, ore obo nemeekure eetae.” Kake etiaka Yosef ninche, “Etiu taa anaa enatiaaka intae inchere irara ilaikitalak. Ore tenkaraki ina naa ketemi intae; ore te nkishui e Farao, mipuopuo aing'uaa ene wueji ometaba anaa nelotu olalashe linyi oti ene. Erriwai obo linyi olo ayau olalashe linyi, ore intae nianyunyu te Korokoroni pee etumi aatujur irorei linyi, tenaa ketii esipata atua intae, arashu anaa te nkishui e Farao, esipa irara ilaikitalak.” Nepik pooki tenebo Korokoroni too nkolong'i uni. Ore te nkolong e uni nejoki Yosef ninche, “Entaas ena peyie inchushu, amu kaure Enkai: tenaa irara iltung'ana loo sipat, enchoo olalashe linyi obo eing'uari eikenoro teine neikenorieki intae, nepuo ilkulikae aaya entapa tenkaraki olameyu loo lmareita linyi, nikiyakiki olalashe linyi, oti; pee etumi aatonyorrai irorei linyi, nimiyeye.” Neas ninche ina. Nejokino maate, “Ore taa te sipata einepua iyiook entorroni o lapa alashe lang, amu kitoduaa enyamali oltau lenye, ina kata peyie esai iyiook neitu kinining ninye katukul, neaku ena pee eewuoena nyamali atua iyiook.” Newal Ruben ajo, “Ekeitu apa ajoki intae emintaas entorrono enkayioni? Neitu kinining'ining'i. Metaa ore taata etabawua naa elaata osarge lenye.” Eitu ninche eyiolou aajo etoning'o Yosef irorei lenye pooki, amu etii apa olaibelekenyani erishata enye. Nepuku ninye aing'uaa ninche alo aishir; neshukunye airorie ninche. Neitayu ninye Simon tiatua ninche neen ninye te dukuya ninche. Neiitanapisho Yosef meiputi ilbenia lenye te ntapa, neshukokini pooki bene impisai nayautua ninche, neishori sii endaa nainosaa te nkoitoi. Neitaasi ninche ina. Neirot isirkon lenye too lpaek nedumunye aapuo. Ore pee ejo obo lenye abol olbene lenye pee eisho osikiria lenye endaa te wueji neirraga, etodua impisai enyena te nkutuk olbene lenyena; nejoki ilalashera lenye; “Aatushukokoki nanu impisai aainei, noona naatii enkutuk olbene lai!” Ore ake pee ening ina neikirikira tolkirutoto nerrinyokino maate ejokino, “Kaa bae ena naitaasa iyiook Enkai?” Ore pee epuonu enetii Yakobo; papaai lenye, te nkop e Kanaan, neliki nena pooki naanoto ninche, ejoki, “Ore ilo tung'ani, ilo kitok leina kop, eirorie iyiook te nkisikong'ata, neiko iyiook anaa aikira ilaikitalak leina kop. Kake kitiakita ninye, ‘Aikira iltung'ana ooisiligayu, mikira ilaikitalak; kira iyiook ilalashera tomon aare, ilayiok le papa lang; nemeekure eishu obo lang, ore oloti neboitare ena olong papaai te nkop e Kanaan.’ Ina peyie ejo ilo tung'ani, ilo kitok leina kop ajoki iyiook, ‘Tena ayiolou ajo irara iltung'ana asipak; entunguai olalashe linyi obo entung'ueikiaki, niyaya ilpaek aayaki olorere tenkaraki olameyu lo lmareita linyi, nipuopuo aarrinyo. Entorikokoki, olalashe linyi oti, pee atum atayiolo ajo mirara ilaikitalak kake iltung'ana ooisiligayu, naa kalaaki intae olalashe linyi, nindimidimi aataar biashara tena kop.’ ” Ore eitayu ntokitin too lbenia lenye, ng'ura, meeta ake oltung'ani lemeeta orridati loo mpisai enyena to lbene; ore pee edol ninche tenebo menye irridat loo mpisai, neirut oleng. Nejoki Yakobo papaai lenye ninche, “Kinchirie intae to sina sapuk aaiturrarrie inkera aainei: Meekure eetae Yosef, nemeekure eetae Simon, ore tena kata naa intokiki aaya Benchamen, ore kuna pooki naa inaanoto nanu.” Ina pee ejoki Reuben menye, “Taara ilayiok laainei aare metuata tenemayau ninye ashuku enitii; tipika ninye inkaik aainei naa kashuku ninye enitii.” Kake etejo, “Melo olayioni lai airiamarie intae, amu etua olalashe lenye, naa ninye ake taata etung'uayioki. Tenelo netum bata te nkoitoi ina kata ipuopuo, ataa nanu oltung'ani kitok oibor lukuya, ore osina likiyakiki nanu naa kaar nanu matua.” Etaa apa olameyu sapuk oleng te nkop. Ore pee emut ina tapa nayautua te Misiri, nejoki papaai lenye ninche, “Enyaaki enchom, enyang'aki iyiook enkiti daa.” Kake etiaka Yuda ninye, “Eitanapa apa iyiook ilo tung'ani ejoki iyiook, ‘Midolidolo enkomom ai, arashu tenaa ketii olalashe linyi tenebo intae.’ Tinirriwaa olalashe lang tenebo iyiook, naa aikipuo ainyang'aki iyie endaa teine, kake tinimirriwaa ninye nimikipuo ine, amu etiaka apa iyiook, ilo tung'ani, ‘Midolidolo enkomom ai tukul, arashu tinirikitoto ake olalashe linyi.’ ” Nejo Israel, “Ainyoo doi pee kinkuna inji aitamuoi aaliki ilo tung'ani aajoki iatata likae alashe?” Newal aajo, “Ore ilo tung'ani, eikilikuanishore iyiook te nkarriyiano aikilikuanu imbaa naaipirta iyiook olmarei lang ejoki iyiook, ‘Keton eishu papaai linyi? Iyatata likae alashe?’ Ore nena nikitiakita naa iwalat e nena kikilikuanat; ijo duoo aikinteiki aajo kejoki iyiook, ‘Eayau olalashe linyi ene?’ ” Nejoki Yuda Israel, Papaai lenye, “Inchoo enkayioni elo tenebo nanu, nikidumunye aapuo, pee kinchu eitu kiye, iyiook o iyie o tenebo inkera ang. Aitayio enkishui ai tenkaraki ninye metaa te nanu ing'oru ninye. Teneitu ashuku ninye enitii naitasheyie ninye te dukuya iyie, neaku entorroni ai intarasi. Amu teneitu taa doi apa kimutie anaata taata kindipa aashom ine katitin are nikishukunye.” Nejoki papaai lenye Israel ninche, “Tenaa neijia etiu, entaas ena: ewaita embata oo lnganayio gelunot lena kop too lbenia linyi, niyakiki ilo tung'ani enkishooroto, enkiti ilata narropil, o enkiti aisho, o emanoo, o enkorropil, o lng'anayio lo lchani onyaanyukie oseki. Niyiaya impisai kat are ipuopuo, nirrinyirrinyi inapa pisai naatushukokoki intae too nkutukie oo lbenia linyi; amu ebaiki apa naa keitu edoli. Entorik sii ninye olalashe linyi nidumunyenye aapuo, nishukokinono enetii ilo tung'ani; meishoo intae Enkai Magilani olng'ur te dukuya ilo tung'ani, pee etum aishoo intae entushuku olikae alashe linyi o Benchamen. Tenaa apa kaiturraa inkera aainei, inchoo aiturraa.” Neaku ewaita iltung'ana inkishorot, neya irridat maare loo mpisai tenebo ninche tenebo Benchamen; nedumunye aadoyio aapuo enkop e Misiri neitashe te dukuya Yosef. Ore pee edol Yosef Benchamen tenebo ninche, nejoki ilo aitasheikinoni le nkaji enye, “Toriku lelo tung'ana atua aji niyieng'aki, amu keinos ninche taata endaa tenebo nanu teneipir enkolong.” Neas ilo sinka anaa enaitanapa Yosef ninye, nerik lelo tung'ana enkaji e Yosef. Neureishoi iltung'ana amu eyauaki ninche enkaji e Yosef, nejo, “Enkaraki taa inapa pisai naatipikaki ilbenia lang te nkata e dukuya, ina pee etum anoto enaitaas iyiook nebaiki iyiook aitaa iyiook irrindiki neibung isirkon lang.” Metaa eshomo ninche enetii olaitasheikinoni le nkaji e Yosef, neirorie ninye te kutuk e nkaji ejo, “Oi olkitok lang, kietuo apa enkata e dukuya ainyiang'u endaa; ore kipuo te nkoitoi, ore ewueji nikirraga nikibol ilbenia lang, nemeeta olbene hoo obo lemetii irridat loo mpisai enkutuk olbene lenye, eba ake impisai anaa apake; neaku kitorrinyutuo pooki, nikiyautua sii too nkaik ang kulie pisai nikinosie endaa. Mikiyiolo aajo aing'ae otorrinyoko impisai ang ilbenia lang.” Nejoki olaitasheikinoni ninche, “Entotoni miatata enkuretisho; ore Enkai inyi o Enkai oo loo papaai linyi ninye natipika ilo shumati atua ilbenia linyi apikaki intae; atang'amayie impisai inyi.” Neriku ninye Simon enetii ninche. Ore pee eriku ilo tung'ani lelo tung'ana atua enkaji e Yosef, neishoo ninche enkare, neisuja inkejek enye, neidipa sii aishoo isirkon lenye olkujita onya. Nerretena aanyu elotunoto e Yosef enaipirie enkolong, amu etoning'o aajo kenya endaa tenebo teine. Ore pee elotu Yosef ang', eyautua atua enkaji enye inkishorot naata, neirrugokino ninche ninye aabaiki enkop. Neikilikuan ninye ninche ilomon le seriani ejo, “Aisupat papaai linyi, ilo apa payian kitok liimakiita? Keton eishu?” Nejo ninche, “Ore osinka lino, papaai lang naa aisupat neton eishu.” Neirrug ilukuny enye te dukuya ninye te nkanyit sapuk. Nedumu inkonyek enyena nedol olalashe lenye Benchamen, olayioni le ng'otonye nejo, “Kele doi olalashe linyi oti ilo apa likitolikitio? Miking'urrie iyie Enkai enkayioni ai!” Neisarrisar Yosef amu etayiewua oltau lenye olalashe lenye te nkirimo sapuk, nelo aing'oru ewueji nelo aishirie. Nejing atua olgilata, nelo aishir teine. Ore pee eidip aishira, neituku enkomom enye nepuku; neitagol kewan nejo, “Enchoo endaa eyauni.” Neng'asi aaisho ninye eton openy, neitokini aisho ninche etoni oopeny, ore Ilmisiri ootoni oopeny neishori sii ninche aa ninche ake, amu ebaiki nemeng'ar Ilmisiri endaa tenebo Ilhebrania, amu entoki ina naa enturuj too Lmisiri. Netoni pooki te dukuya ninye anaa enaikunari te mbotoro eiteru to lbotor te inoto ometabaiki oloti te inoto anaa kitisho enye; neing'or iltung'ana ate te nking'asia sapuk. Neyakini pooki endaa naing'uaa emesa e Yosef, kake ore ene Benchamen naa katitin imiet te sapuko elusoo too nkulie. Metaa etookishote ninche neshipa tenebo ninye. Ina pee eitanap olaitasheikinoni lenye le nkaji enye ajoki, “Imputa ilbenia le lelo tung'ana endaa, tipika enaba anaa enaidim ake ninche aatanap, nipik impisai e pooki tungani enkutuk olbene lenye. Nipik enkikompe ai ina kikompe enkosholai enkutuk olbene lo loti tenebo impisai enyena naainosie ilpaek.” Neas anaa enaitanapa Yosef ninye. Ore ake pee ekenyu, neishori iltung'ana epuo aareu isirkon lenye. Ore ake pee epuo aalamari penyo aalam enkanasa, nejoki Yosef olaitasheikinoni le nkaji, enye, “Inyo, tusuja lelo tung'ana, ore ake pee inepu, tiaaki ninche, ‘Ainyoo pee itushukutuo entorrono te sidai? Ainyo pee itupurroitie enkikompe ai enkosholai? Aime ena kikompe oshi eokishore olkitok lai, naa te ninye eibonisho? Itaasa entorroni teina nitaasa.’ ” Ore ake pee einepu ninche, neirorie ninche lelo rorei. Nejoki ninche ninye, “Ainyoo pee eiro olkitok lang irorei laijo kulo? Metalama isinkan linono ina aaku keidim aataas embae naijo ina! Ing'ura, ore inapa pisai nikinotito too nkutukie oo lbenia lang, kitushukutuo aashukoki iyie king'ua enkop e Kanaan; kaji naa kinko siake tinikipurroo enkosholai arashu sahabu te nkaji olkitok lino? Inchoo ake obo lang too sinkan linono otumi eeta, enchoo eye, nikiaku sii iyiook pooki irrindiki lo lkitok lang.” Nejo ninye, “Enchoo naa eaku anaa enitejo; ore ake olotumi eeta neaku orrindik lai, ore ilkulikae linyi pooki neaku meeta entioto.” Nesioki pooki ng'ae aitadou olbene lenye enkop, nebol pooki tung'ani olbene lenye. Neing'oru te pooki eiteru to lbotor neitabayie to loti; netumi enkikompe to lbene le Benchamen. Nepolos pooki inkilani enye, neirot pooki ng'ae esikiria enye, nerrinyo aapuo enkanasa. Ore pee elotu Yuda o lalashera lenyena enkaji e Yosef, eton ake etii Yosef ine; nebatata te dukuya ninye aabatatakino enkop. Nejoki Yosef ninche, “Kaa bae ena nikintaasa? Aimiyiololo aajo ore oltung'ani laijo nanu naa kaidim aibonisho?” Nejo Yuda, “Kaa taa kijoki olkitok lang? Ainyoo taa kiro aajo? Anaa kaji kinko tinikilaku ate? Enoto Enkai entorroni oo sinkan linono; ng'ura, kira iyiook irrindiki lo lkitok lang, iyiook pooki ometabaiki lido duoo linotie enkikompe.” Kake etejo, “Meidimayu te nanu mataasa ina! Oltung'ani ake onotieki enkikompe ninye ake oaku orrindik lai; kake ore intae, enchom te seriani enetii papaai linyi.” Ina pee elo Yuda enetii ninye nejoki, “Oi olkitok lang, inchoo osinka lino eiro, aatasayia, kaliki ororei enkiok o lkitok lai, nimincho engoro ino eyupuyup to sinka lino; amu itiu doi iyie anaa Farao enkorrok. Eikilikuana apa olkitok lai isinkan lenyena ajoki, ‘Iyatata papaai linyi anaa likae alashe?’ Nikiwal apa aajoki olkitok lang, ‘Kiata papa, naa olpayian kitok oleng, nikiata sii olalashe lang, oti olotioiwuoki te moruao enye, netua apa olalashe lenye, neaku ninye ake etung'uayioki too nkera e ng'otonye; naa kenyor menye ninye oleng.’ Nintoki ajoki isinkan linono, ‘Eyau ninye ene natii, pee adol ninye too nkonyek aainei.’ Nikijoki olkitok lang, ‘Meidim enkayioni atung'uai menye, amu tenelo aing'uaa menye, naa keye menye.’ Ina pee ijoki isinkan linono, ‘Pooki ake pee intokiki aadol enkomom ai, tenelotu olalashe linyi oti tenebo intae.’ “Ore pee kirrinyo enetii osinka lino, aa papa, nikiliki irorei lo lkitok lang. Ore pee ejo papaai lang, ‘Enchom enyaaki enyang'aki iyiook enkiti daa;’ nikijo, ‘Mikipuo katukul. Tenaa keiriamariyie iyiook olalashe lang oti naa aikipuo; amu mikindim katukul aatodol enkomom eilo tung'ani arashu ake kiata olalashe lang oti tenebo iyiook.’ Ina pee ejoki iyiook osinka lino papaai lang, ‘Iyiololo apa aajo aatoikio enkitok ai ilayiok oare; ore obo naatung'uayie nanu, ina pee ajo, esipa etumutaki apa aaitaa ndung'udung'ot, neitu aekata aitoki adol ninye. Tinintokiki sii taata aaya ele aaitung'uaa nanu nelo netum enyamali e nkitamioto niyauu ilpapit laainei ooibor to sina enemeneng'a.’ Ore naa taata, ore tenalotu enetii osinka lino papaai lang, nemetii enkayioni tenebo iyiook, neaku ore enkishui enye neibung'are ena ayioni, ore pee edol ajo metii enkayioni tenebo iyiook, neye ninye, neyau isinkan linono ilpapit ooibor lo sinka lino papaai lang to sina enemeneng'a. Amu etaa osinka lino oloitasheiki enkishui enkayioni, te papaai lang ejoki. ‘Teneitu ashuku ninye enitii, naaku oloota entorroni te dukuya papaai te nkishui ai pooki,’ metaa, ore naa taata, inchoo osinka lino, aatasayia, ejing erishata enkayioni aaku orrindik lo lkitok lai; nincho enkayioni eshuko tenebo ilalashera. Amu kaji naa aikunari tenarrinyokino papaai lai marikito enkayioni? Ekaure doi ninye ajo atoduaa intorrok naajing'aki papaai lai.” Neaku meekure eidim Yosef aibooi kewan te dukuya lelo pooki ooitashe te dukuya ninye; neishir ejo, “Enchoo pooki ng'ae otii ene aaipung aing'uaa.” Metaa meetae hoo oltung'ani obo otii ine ina kata eibalakinye Yosef kewan ilalashera lenyena. Nebuaku aishir ometoning'o Ilmisiri ninye, nening sii enkaji pooki e Farao. Nejoki Yosef ilalashera lenyena, “Ekara doi Yosef; keton eishu papaai?” Kake eitu eidim ilalashera lenyena aatawaliki ninye, amu eiputukunyo oleng te dukuya ninye. Ina pee ejoki Yosef ilalashera lenyena, “Wootu entinyiku enatii atasayia intae.” Nepuonu aanyiku. Nejoki ninye, “Ekara olalashe linyi Yosef, ilo apa litimirakita enkop e Misiri. Naa ore naa taata emiureishoyu, anaa igororo maate, te nkaraki nikitimirakita apa ena kop; amu Enkai apa naaiturukunye nanu maeu aitopok enkishui. Amu etijing'a olameyu enkop te kulo arin pokira aare; neton aa kepuonu kulikae arin imiet laa metumi enturore anaa enkisampuare. Naairriu apa Enkai ene pee aituruku te ntae, pee alotu aitajeu ilekunot te nkop naitasheyie tenkaraki intae pee meye ilkumok. Metaa mme intae apa likirriutua ene kake Enkai; naaeuo aaitaa menye le Farao, naaku olkitok le nkaji enye pooki o loitore e nkop pooki e Misiri. “Entasiooi esarisara enchom enetii papaai nijokiki ninye, ‘Inji ejo olayioni lino Yosef, aitaa Enkai olkitok le nkop pooki e Misiri; wou ene natii, mayieu nimutie. Ilotu amany enkop e Goshen nikilotu anyikaki iyie tenebo inkera inono o nkera oo nkera inono, o ntare inono, o nkishu inono, o pooki toki niata. Ore itii ine naaisho pooki toki niyieu, amu eton eetae kulikae arin imiet leton epuonu lo lameyu; pee mikiya iyie osina o lmarei lino pooki o pooki toki niata.’ “Idolitata too nkonyek inyi, nedolita nkonyek o lalashe lai Benchamen inchere enkutuk ai nairorie intae. Enchom entoliki papaai esikar pooki naata tene te Misiri, o pooki toki nitodua tene. Entasiooi eyau papaai ene.” Ina pee emuataki inkaik olalashe lenye Benchamen aishiraki; neishirakino pokira. Neng'utut ilalashera lenyena pooki neishiraki ninye ninche; ore pee eidip ina neiteru ilalashera aairorie ninye. Ore pee ening'i olomoni te nkaji e Farao, eji, “Eetuo ilalashera le Yosef,” neitiship ina Farao o ilaisiaayiak lenyena. Nejoki Farao Yosef, “Tiaki ilalashera linono, entaas ena ‘Eroto isirkon linyi nipuopuo aarrinyo enkop e Kanaan; nirikuku papaai linyi o pooki tung'ani loo lmareita linyi, nipuonunu enatii, naa kaisho nanu intae enkop naisul ena kop e Misiri te sidano, naa ainyanya empiron ena kop.’ Intanapa ake sii ninche tiaki, ‘Entaas ena: entereu ingarrin tena kop e Misiri pee enapunyeki inkera inyi o nkituaak inyi, niyauu papaai linyi nipuonunu. Niminkenaa aajo kitung'uaitie imasaa ang e tipat teine amu ore inaaisul enkop pooki e Misiri naa inkuninyi.’ ” Neas ilayiok le Israel ina; neisho Yosef ninche ingarrin te risioroto eina naitanapishe Farao, neisho sii ninche endaa nainosaa epuo te nkoitoi o epuonu. Meeta ake sii oleitu eisho te pooki lenye inkilani ng'ejuko kake eishoo Benchamen shekeli iip uni e nkosholai o nkilani imiet ng'ejuko. Ore papaai lenye, neirriwaki kuna; isirkon tomon naairoto too ntokitin sidain e Misiri, o lipong'a tomon oo sirkon naanapita entapa, o imukateni, o ntokitin naanya papaai lenye te nkoitoi. Ina pee eisho ilalashera meshomo, ejoki ninche, “Mayieu ake ninchankarrarra te nkoitoi.” Metaa etudumunye aapuo aaing'uaa Misiri nebau Kanaan enetii papaai lenye, Yakobo. Neliki ninye lelo omon, ejoki, “Eton doi ake eishu Yosef, naa ninye oitore enkop pooki e Misiri!” Neiterre Yakobo, amu eitu eiruk ninye ninche. Kake ore pee eliki ninche irorei pooki le Yosef, lelo apa ootiaka ninye ninche, ore ake sii pee edol ingarrin naaetuo pee enap ninye neitoki oltau le Yakobo papaai lenye apok; nejo Israel eidipe eton doi eishu olayioni lai Yosef; ekalo adol ninye eton eitu aye. Metaa etudumunye Yakobo alo o pooki toki naata, nepuonu Beer-sheba, neitayu ilasarri aaitaiki Enkai e papaai lenye Isaak. Neirorie Enkai Israel too nkitoduat e kewarie nejoki ninye, “Yakobo, Yakobo,” nejo ninye, “Nele nanu.” Ina pee ejoki, “Ara nanu Enkai, Enkai e papaai lino; miureishoyu ilo Misiri; amu kaalo aitaa olosho sapuk teine. Ekaairiamariyie iyie Misiri, naa kaaitoki ashuku ene, neaku inkaik e Yosef ilo airurare.” Ina pee epuku Yakobo aing'uaa Beer-sheba, nenap ilayiok le Israel Yakobo papaai lenye, o nkera enye, o nkituaak enye too ngarrin naairriwua Farao metanapa ninye. Eterewa sii inkishu enye o masaa enye, naanoto te nkop e Kanaan, nepuonu enkop e Misiri, Yakobo o eishoi enye pooki, ilayiok lenyena, o layiok loo layiok lenyena tenebo ninye, o ntoyie enyena, o ntoyie oo layiok lenyena, o eishoi enye pooki eyaua ninye pooki tenebo ninye Misiri. Kuna ninche inkarn e ishoi e Israel, naaetuo atua Misiri, Yakobo o layiok lenyena, Ruben, olkikau le Yakobo. Ore ilayiok le Ruben, naa: Hanok, o Palu, o Hesron, o Karmi. Ore ilayiok le Simon naa: Yemuel, o Yamin, o Ohal, o Yakin, o Sohar o Saul, aa layiok le nkitok oo Lkanaani. Ore ilayiok le Lawi naa: Gershon, o Kohat, o Merari. Ore ilayiok le Yuda naa: Eri, o Onan, o Shela, o Peres, o Sera (kake ore Eri o Onan netuata te nkop e Kanaan): ore ilayiok le Peres naa: Hesron, o Hamul. Ore ilayiok le Isaakar naa: Tola, o Pufa, o Yob, o Shimron. Ore ilayiok le Sebulon naa: Sered, o Elon o Yahaleel (kulo apa ilayiok le Lea ootoikio ninye Yakobo te Padan-aram, tenebo entito enye Dina; neaku pooki ilayiok o ntoyie enyena iltung'ana tomoni uni o kuni). Ore ilayiok le Gad naa: Sifion, o Haggi, o Shuni, o Esbon, o Eri, o Arod, o Areli. Ore ilayiok le Asheri naa: Imna, o Ishfa, o Ishfi, o Beria, tenebo Sera enkanashe enye. Ore ilayiok le Beria naa: Heber o Malkiel (kulo ninche ilayiok le Silpa oishoo Laban Lea entito enye; neaku kulo etoikio Yakobo - iltung'ana tomon o ile). Ore ilayiok le Raheli, enkitok e Yakobo naa: Yosef o Benchamen. Neikini Yosef te nkop e Misiri Manaseh o Efraim, laa ninche etoikio Asenat entito e Potifera olapolosani le Oni. Ore ilayiok le Benchamen naa: Bela, o Becher, o Ashbel, o Gera, o Naaman, o Ehi o Rosh, o Mupin, o Huppin o Ard (kulo ninche ilayiok le Raheli ootoikioki Yakobo - iltung'ana tomon oong'uan pooki.) Ore ilayiok le Dan naa: Hushim. Ore ilayiok le Naftali naa: Yahseel, o Guni, o Yeser, o Shilem, (kulo ninche ilayiok le Bilha, ooishoo Laban Raheli entito enye, neaku kulo ninye etoikio Yakobo - iltung'ana oopishana pooki.) Ore iltung'ana pooki le Yakobo ooetuo atua Misiri, laa ile ishoi enye enkorrok, nemeikenaro ilayiok loo nkituaak oo layiok lenyena naa iltung'ana intomoni ile o ile pooki; o layiok aare le Yosef ootoikioki ninye te Misiri; neaku ore olorere pooki le nkaji e Yakobo oetuo atua Misiri naa iltung'ana intomoni naapishana. Neirriwaa ninye Yuda meituruko alo enetii Yosef ajoki ninye menotore ninye te Goshen; nepuonu ninche enkop e Goshen. Neirot Yosef engarri enye oo mbartan nelo anang'are papaai lenye Israel te Goshen; nekuetik Yosef papaai lenye nemuataki inkaik enyena emurt, aishir te murt enye te nkata naado. Nejoki Israel Yosef, “Etaa taa nchooki matua amu aatoduaa enkomom nayiolo ajo eton ake inchu.” Nejoki Yosef ilalashera lenyena o enkaji e menye pooki; “Ekalo ainosaki Farao, naa kajoki ninye, ‘Ore ilalashera laainei o enkaji e papa pooki, otii apa enkop e Kanaan, eetuo enatii. Ore lelo tung'ana naa ilairritak, amu ilaramatak loo nkishu, neyautua intare enye, o nkishu enye o pooki toki naata.’ Ore teneipot intae nejoki intae: ‘Ainyoo esaiai inyi niasiasa?’ Enchom entejo, ore isinkan linono naa ilaramatak loo nkishu eiteru te keraisho o metabaiki ena kata, iyiook tenebo iloo papa lang; pee itumutumu aatamany enkop e Goshen; Amu ore pooki aramatani loo ntare naa olminong too Lmisiri.” Metaa eshomo Yosef ajing'aki Farao te nkaji, nejoki: “Ore papaai lai o lalashera laainei, tenebo intare enye o nkishu enye o pooki toki naata, eetuo aaing'uaa enkop e Kanaan. Netii taata ninche ina kop e Goshen.” Neriku too lalashera lenyena ltung'ana imiet arikoki Farao. Nejoki Farao ilalashera lenyena. “Ainyoo oshi esaiai inyi niasiasa?” Nejoki ninche Farao, “Ore isinkan linono naa ilaramatak, anaa enatiu apa iloo papa lang.” Nejoki ninche Farao, “Kietuo iyiook aamany ena kop, amu meeta indaat oo ntare isinkan linono, amu etaa olameyu sapuk te nkop e Kanaan; naa ore taata, kiomon iyie inchoo isinkan linono emany enkop e Goshen.” Ina pee ejoki Farao Yosef, “Eewuo papaai lino o lalashera enitii. Neina enkop e Misiri natii dukuya iyie, intamanya papaai lino o lalashera linono ine wueji sidai aisul tena kop, inchoo emany enkop e Goshen naa tiniyiolo iltung'ana airritak supati te ninche tipika ninche meitasheiki inkishu aainei.” Ina peyie eitijing'u Yosef Yakobo papaai lenye neitoton te dukuya Farao, nemayian Yakobo Farao. Nejoki Farao Yakobo, “Kaja inkolong'i oo larin le nkishui ino.” Nejoki Yakobo Farao, “Ore inkolong'i oo larin laainei lenkidurrudur ai naa ilarin iip o tomoni uni; kuti naa torrok inkolong'i oo larin le nkishui ai, neitu ebaiki inkolong'i oo larin le nkishui oo loo papa too nkolong'i enkidurrudur enye.” Nemayian Yakobo Farao nepuku alo aing'uaa Farao. Neaku eitamanya Yosef ilalashera lenyena, neisho ninye ninche enkop metaa enenye te Misiri, ewueji neisul te ina kop e Rameses, anaa enaitanapishe Farao. Neisho Yosef papaai lenye, tenebo ilalashera lenyena, o lmarei lenye pooki endaa, terisioroto esiana ooltung'ana lenye. Etaa meekure apa eetae endaa teina kop pooki; amu etasapuka olameyu oleng', metaa etaa enkop e Misiri o enkop e Kanaan enaisumash te nkaraki olameyu. Nesotu Yosef impisai pooki naanotoki te nkop e Misiri o te nkop e Kanaan, te ntapa nainyiang'utua; neyau Yosef nena pisai aya enkaji e Farao. Neaku ore pee emiri aaishu impisai pooki te nkop e Misiri o te nkop e Kanaan, eetuo Ilmisiri pooki enetii Yosef nejoki ninye, “Inchoo iyiook endaa; ainyoo pee kiye te dukuya nkonyek inyi? Amu kiishutua impisai ang'.” Newal Yosef ajo, “Enchoru inkishu inyi, naa kaisho intae endaa awalunye nkishu inyi tenetaa eishunye impisai inyi.” Metaa nerewaki inkishu enye Yosef; neisho Yosef ninche endaa awalunye imbartan enye, o intare, o nkishu, o sirkon: neisho ninye ninche endaa awalunye nkishu enye pooki teilo ari. Ore pee eishunye ilo ari, neitoki aapuonu to likae ari nejoki ninye, “Mikisudorie ate olkitok lang inchere eishunye impisai ang pooki, ore iluaat oo nkishu naa ino lkitok lang; metii ae toki natung'uayioki te dukuya olkitok lang meteleku iseseni lang ake o enkop ang'. Ainyoo pee kiye te dukuya inkonyek inono, iyiook tenebo enkop ang'? Inyang'u iyiook tenebo enkop ang te ndaa; ore iyiook tenebo enkop ang nikiaku irrindiki le Farao; nincho iyiook ilanterera pee kinchu nimikiye, neaku ena kop pooki mitil.” Metaa einyiang'ua Yosef enkop pooki e Misiri ainyang'aki Farao, amu etimira Ilmisiri inkurman enye amu ketarasua olameyu oleng te ninche. Neaku enkop pooki ene Farao; ore iltung'ana neaku, irrindiki pooki eiteru te nkiting'oto nabo e Misiri o metabaiki enkae kiting'oto. Enkop ake oo lapolosak eitu einyang'u; amu keeta apa ilapolosak emborei enye nauno naing'uaaa Farao, neishunyie ina borei enye naishoo Farao ninche; metaa eitu ninche emir enkop enye. Ina pee ejoki Yosef iltung'ana, “Ing'ura ainyiang'ua intae ena olong tenebo enkop inyi aitaa ene Farao. Ore naa, noolo ilanterera linyi, naa entuun enkop. Ore te nkata e nkisampuare ninchosho ematua e imiet Farao, ore ematua e ong'uan neaku inkuninyi ilanterera le nkop, neaku sii endaa inyi o lmarei linyi, o ndaiki naanya inkera inyi.” Nejo ninche, “Intajeuo enkishui ang; inchoo eitiship ena olkitok lang', aikiaaku iyiook irrindiki le Farao.” Metaa eitobirua Yosef nkiguanat naaipirta enkop e Misiri, neitashe nena kiguanat o taata, inchere etum Farao ematua e imiet; enkop ake oo lapolosak neitu eaku ene Farao. Metaa etamanya Israel Enkop e Misiri ina kop e Goshen; netum imasaa kumok teine, neisho oleng nebul te nkumoi. Neton Yakobo te nkop e Misiri ilarin tomon o oopishana; metaa ore inkolong'i oo larin le nkishui e Yakobo naa iip o artam oopishana. Ore pee enyiku inkolong'i pee eaku enkata nairura Israel, eipoto olayioni lenye Yosef nejoki ninye, “Tenetaa taata anoto omom too nkonyek inono, tipika enkaina ino abori enkupes ai nikisiligie ajo aikintaas nanu enkanyit o esipata. Mayieu nikinukaa nanu te Misiri, kake tunukayioki nanu tiatua inkuraren oo loo papa; tanapaki nanu intung'uayioki Misiri nikilo aturoo nanu te wueji enye neturorie olorere.” Newal ninye ajo, “Ekaas anaa enitejo.” Nejo, “Inosa olmumai te nanu.” Neinos ninye olmumai. Ina pee eirrug Israel endukuya enye te ndukuya e ndapash enye. Ore pee elusoo nena, nelikini Yosef aajoki, “Ing'ura kemuoi papaai lino;” metaa etoriko ninye ilayiok lenyena aare, Manase o Efraim. Nelikini Yakobo aajoki:, “Eewuo olayioni lino Yosef enitii;” neitagoluo Israel nenyok ainyototo aton te ndapash. Nejoki Yakobo Yosef, “Aaipang'aka Enkai magilani nanu te Lus te nkop e Kanaan naamayian nanu, naajoki nanu, ‘Ng'ura kaaisho iyie tubula, naa kaaponaa iyie, naaitaa iyie olorora loo ltung'ana kumok, naa kaisho ena kop eishoi ino nikisuju metaa enenye intarasi.’ “Ore ilayiok linono pokira aare likitoikioki te nkop e Misiri eton eitu alotu enitii tene te Misiri; naa ilaainei; Efraim o Manase eaku ilaanei anaa paa ilaainei Ruben o Simon. Ore eishoi nitum tesiadi ninche naa keaku ilinono; naa keipotieki ninche enkarna oo lalashera te njung'ore enye. Amu ore apa pee alotu te Padan-aram aainepua osina etua Raheli te nkop e Kanaan te nkoitoi, eton elakua elototo pee ebau Efrat. Naturoo ninye teine te nkotoi alotito Efrat (aa ninye Betlehem).” Ore pee edol Israel ilayiok le Yosef, etejo “Kakua doi kulo?” Nejoki Yosef papaai lenye, “Ilayiok laainei ninche, lelo apa laaishoo Enkai tene.” Nejo Israel, “Toriku ninche ene natii, aatasayia pee atum atamayiana ninche.” Ore ina kata, eiliilaitie nkonyek e Israel te moruao, metaa meidim ninye atisipu. Neaku eyaua Yosef ninche aitinyiaki ninye; neng'utut ninche neitamuat inkaik enyena. Nejoki Israel Yosef, “Majo apa kaaitoki adol enkomom ino; naa ng'ura, aaishoo Enkai matoduaa sii inkera inono.” Metaa eiwuangie Yosef ninche too nkung enyena, neirrugo ninye makewan abaiki enkop. Nerik Yosef ninche pokira, etii Efraim enkaina enye e tatene eitorioki enkaina e kedienye e Israel, netii Manase enkaina enye e kedienye eitorioki ninye enkaina e tatene e Israel, neriku ninche aitinyikaki ninye. Neitorioo Israel enkaina enye e tatene neiteleiki ninye endukuya e Efraim, laa ninye oloti, ore enkaina enye e kedienye eiteleikia endukuya e Manase, eitapaash inkaik, amu ore Manase naa ninye olbotor. Nemayian ninye Yosef ejo; “Ore ina Ai naisiaayia iloo Papa te dukuya enye, Abraham o Isaak, ina Ai naatorikoyie te nkishui ai pooki o metabaiki ena olong, Ilo malaika laaitajeuo nanu te pooki torroni, tamayiana kuna ayiok; Naa te ninche inchoo enkarna ai meipoti, tenebo enkarna oo loo papa Abraham o Isaak; Naa inchoo ninche ebulu aaku ilororani tiatua ena kop pooki.” Ore pee edol Yosef ajo eiteleikia menye enkaina e tatene shumata endukuya e Efraim neitu eitiship ninye, nedumu enkaina e menye aitayu aitung'uaa endukuya e Efraim apik ene Manase. Nejoki Yosef papaai lenye, “Ime neijia etiu papaai, amu ore ilo naa ninye olkikau; tipika enkaina ino e tatene shumata endukuya enye.” Kake etanya menye tukul nejo, “Ekayiolo olayioni lai, ekayiolo; ekeaku sii ninye kitok; kake ore ake eyia, ekeaku olalashe lenye oti kitok te ninye, ore eishoi enye naa keaku olorere kumok.” Metaa etamayiana ninye ninche ina olong ejoki, “Te iyie elo Israel aibalie imayianat ejo, ‘Mikintotiwuo Enkai anaa Efraim o Manase;’ ” neaku neija eikuna aitojool Efraim Manase. Ina pee ejoki Israel Yosef, “Ng'ura, etataana enkata pee aye, kake keaku Enkai tenebo iyie, naa aikintoki ayau iyie ina kop o loo papaai lino. Ore ake sii aaishoo iyie neitu aisho ilalashera linono Shekem enkiyopata o ldoinyo, ine wueji nepir naawa too nkaik oo Lamori to lalem lai o te nkawuo ai.” Ina peyie eipotu Yakobo ilayiok lenyena nejoki, “Enturrurroto tenebo, pee atum atoliki intae imbaa naatiu too nkolong'i naapuonu. Enturrurroto entoning, intae ilayiok le Yakobo, nining'ining'i Israel papaai linyi. Ruben, ira iyie olkikau lai, engolon ai, naa olng'anayioi le dukuya lai le ngolon ai. Oloituruk lo lwuasa naa oloituruk te ngolon. Olemeitirring'a anaa enkare, miaku iyie ololus te pooki, amu itijing'aka endapash e papaai lino; ina peyie isarkionie ninye ishomo endapash ai ainyal. Ore Simion o Lawi naa ilalashera, ore imasaa enye olarrabal naa ilalema lenye. Oi oltau lai, milotu ake enkiguana enye; Oi lotau lai, mintaa ninche encholiek. Amu te ngoro enye ear iltung'ana metuata, naa to lwuasa lenye etudung'o errishet o lkiteng. Metedeki engoro enye, amu kepi ninye; o engoro enye napi, amu ketolo! Ekaor ninche tiatua Yakobo, naidapash ninche tiatua Israel. Yuda, aikisis iyie ilalashera linono; Neibung inkaik inono imurto oo lmang'ati linono; ore ilayiok le papaai lino naa keirrugo te dukuya iyie. Ore Yuda naa ketiu anaa olkuoo lo lng'atuny; olotu eing'uaa engorore, enkerai ai ilepa iyie Itadowuo iyie anaa olng'atuny aibung, Anaa elipong olng'atuny, aing'ae oitieu atuputu ninye, Meing'uaa eng'udi e nkitoria enkaji e Yuda, arashu orinka le nkitoria empolos oo nkejek enyena, ometaba anaa nebaiki ninye olopeny, neaku enenye enkanyit oo iltung'ana pooki. Neeniki osikiria lenye olchani lo sabibu, ore olkurrarru lenye neeniki ilo sabibu gelunoti, Neisuj ninye inkilani enyena te naisho oo sabibu, neisuj inkilani enyena too lng'anayio oonyokie anaa osarge. Ekedoru inkonyek enyena te naisho oo sabibu, Neibor ilala lenyena te okoto e kule, Ore Sebulon naa kemany embata enaiposha, naa keaku ewueji neitasheyie imelin, Ore olpolosie lenye netii Sidon. Ore Isaakar naa osikiria ogol, neirrag te rishata oo muatat oo ntare; Etoduaa ajo ore eneyeng'iyeng'areki naa aisidai, naa ekeitishipisho enkop, metaa eirruguo oloililae lenye anap, neaku orrindik te siaai naarakini. Ekeiguanare Dan iltung'ana lenyena, anaa obo loo loshon le Israel. Keaku Dan olasurai te nkoitoi, enturbubua te nkoitoi, ina naony intutuny oo mbartan, ometusulu ilo okedito embarta. Ekaanyu enjeunoto ino, iyie Olaitoriani. Kerasaki ilapurrok Gad, kake eibelekenyakino ninye ninche amir ninche. Ore enkop e Asheri naa keiu endaa sapuk, Naa keitayu ninye endaa nanya olkitok. Ore Naftali naa enkolii naipirri etalaayioki, neitayu ororei sidai. Ore Yosef naa olng'osila oiu ilng'anayio, olng'osila loo lng'anayio te nkong'u enkare; eibulaa ilng'osil lenyena esuntai. Earare ilang'orok loo mbaa ninye te ng'olon, neng'or ninye, neitagor ninye oleng; Nemeing'unung'unieki hoo enkawuo enye, neitaariyiani inkaik enyena, inkaik Olmagilani le Yakobo (Te nkarna e ilo Shekut, Endapidapoi e Israel) Te Nkai e papaai lino laa ninye likiret iyie, Te Nkai Magilani laa ninye likimayian iyie, Too mayianat e keper e shumata. Imayianat oo neegut nairrag tiabori, imayianat oo lki o ene ng'uset. Ore Imayianat e papaai lino naa Magil aalus too mayianat oo ldoinyo loo ntarasi, Ore nena tokitin sidain naaing'uaa ndoinyo oo ntarasi; metotonie ninche endukuya e Yosef, o emaupe eilo apa otoorori too lalashera lenyena. Ore Benchamen, naa osuyiani otang'arase, neyooki enasirie aar eng'ues, ore teipa neor iyarunot.” Ore kulo pooki naa iloshon tomon oare le Israel; naa ina apa eitanapa menye pooki emayian ninye ninche, emayianaki pooki ng'ae emayianata naishiaakino ninye. Ina pee eitanap ninye ninche ejoki ninche, “Ore amu ekalo enetii iltung'ana lainei te keeya; etunukayioki tenebo iloo papa te nkapune natii enkurma e Efron le Hiti. Ina apune natii enkurma e Makpela, oloo saen le Mamre te nkop e Kanaan, nainyiang'ua apa Abraham tenebo ina kurma e Efron lo Lhiti aitaa enenye nanukarie iltung'ana lenyena. Teine apa etunukaitie ninche Abraham o Sara enkitok enye naa te ninye sii etunukayioki Isaak o Rebeka enkitok enye; naa teine sii atunukayie Lea. Ore ina kurma tenebo ina apune natii atua neinyang'uaki apa too Lhiti.” Ore pee eidip Yakobo aitanapa ilayiok lenyena, nerriny inkejek enyena endapash, neirurayie ina. Nepiki ninye eneiturrurrorre olorere lenye pooki. Ina pee ebatatakino Yosef enkomom e menye neishiraki ninye, neng'utut ninye. Neitanap Yosef isinkan lenyena lelo kitarrini meitobira osesen le papaai lenye pee mengueyu. Metaa eitobira ilkitarrini osesen le Israel pee mengueyu. Ewa enkielata inoshi ake olong'i artam naasieki ina siaai e nkitobirata o sesen. Neishiraki Ilmisiri ninye too nkolong'i ntomoni naapishana. Ore pee eishunye inkolong'i naaishirakinyeki ninye, neirorie Yosef olmarei pooki le Farao ejoki, “Ore taata tenanoto omom too nkonyek inyi eroro, atasayia intae entiaki Farao, aainosie apa papa olmumai aajoki, ‘Etaa kaye: te nkurare ai natuturoko kewan te nkop e Kanaan, ninye kinukarierie nanu.’ Metaa ore naa taata nchooki nanu mashomo atasayia ntae, pee alo anukaa papa, pee aitoki ashukunye.” Newal Farao ajo, “Shomo, tunukai papaai lino anaa apa enikinosie olmumai.” Metaa eshomo Yosef anukaa papaai lenye, neiriamarie ninye isinkan pooki le Farao, o lpayiani lo lmarei lenye pooki tenebo ilpayiani pooki le nkop e Misiri. Tenebo enkaji pooki e menye, o Yosef, o lalashera lenyena, o lmarei pooki le papaai lenye, nkera enye ake etung'uayioki o ntare, o nkishu te nkop e Goshen. Metaa eshomo tenebo ninye ingarrin oo mbartan o lakedok loo mbartan; metaa olorora kitok apa oleng. Ore pee ebau olkurroto oidong'ishoreki te wueji neji Atad natii oloo saen le Yordan, neishir teine olkiyioi sapuk le nkishirita o sina; neitobiraki Yosef enkishirata e papaai lenye too nkolong'i naapishana. Ore pee edol Ilkanaani aa ninche iloopeny ina kop enkishirata to lkurroto ooidongishoreki le Atad, nejo ninche, “Ore ena kishirata naa eno sina kitok too Lmisiri.” Metaa eishooki apa ine wueji enkarna aajo Abel-Misraim; naa dukuya e Yordan etii. Ina apa eitaasa ilayiok lenyena menye anaa enaitanapa ninche; amu etanapa apa ilayiok lenyena ninye aaya enkop e Kanaan, nenukaa ninye te nkapune natii enkurma e Makpela, natii oloo saen le Mamre, nainyiang'ua apa Abraham tenebo enkurma e Efron lo Lhiti, metaa ewueji enye oo nkuraren. Ore pee eidip atunukai papaai lenye, neshuko Yosef alo Misiri tenebo ilalashera lenyena o lelo pooki oiriamariyie ninye epuo aanukaa papaai lenye. Ore peyie edol ilalashera le Yosef aajo etua papaai lenye nejo ninche, “Ebaiki taa neibayu iyiook Yosef neitalak iyiook enapa lap nikintaasa iyiook ninye.” Metaa eirriwaitie ninche olkilikuai aairriwaki Yosef ejoki, “Eishorua apa papaai lino ena kitanapata eton eitu eye ejo, ‘Entiaki Yosef, tapalaki, aatasayia enkitarruorroto oo lalashera linono o engoki enye, amu kintaasa ninche iyie entorroni.’ Ore naa taata, kisai iyie, tapalaki inkitadiaat oo sinkan le Nkai e papaai lino.” Neishir Yosef pee eirorie ninche ninye. Nepuonu ilalashera nebatata te dukuya ninye nejoki, “Ng'ura, aikira iyiook isinkan linono.” Kake etiaka Yosef ninche, “Emiureishoyu, katii nanu ewueji e Nkai? Ore te intae, naa entorroni apa kiyiewuakiki; kake eitaa ninye Enkai esidai, pee etum aitopuaa iltung'ana kumok anaa enatiu ena olong. Metaa emiureishoyu; kaisho intae eretoto tenebo o nkera inyi.” Neijia eikuna aitisipaki ninche neitagol ninche. Metaa etotona Yosef te Misiri, ninye tenebo olmarei le papaai lenye; nebik Yosef ilarin iip o tomon. Einepua Yosef adol eishoi o layioni lenye Efraim e uni, etodua sii inkera e Makir olayioni le Manase naatoikioki olmarei le Yosef. Nejoki Yosef ilalashera lenyena, “Etaa kaye, kake kelotu Enkai amutan intae, nelotu aitayu intae aitung'uaa ena kop arik intae enkop nainosakinye Abraham olmumai, o Isaak o Yakobo.” Nenya Yosef olmumai too layiok le Israel ejoki, “Kemutan intae Enkai, naa entanap iloik lainei entung'uai ena kop.” Metaa eirure Yosef, aa oloo larin iip o tomon te moruao; neitobir ninche osesen lenye pee mengueyu, nepiki osesen lenye osanduku te Misiri. Kuna inkarn oo layiok le Yakobo ooetuo apa Misiri te nebo ninye, oltung'ani ake o lmarei lenye: Ruben o Simion o Lawi o Yuda, Isakar o Sebulon o Benchamen, Dan o Naftali, Gad o Asheri. Ore eishoi pooki e Yakobo naa iltung'ana ntomoni naapishana; netii Yosef apa laa obo lenye ina kata Misiri. Neye Yosef o lalashera lenyena pooki, o ina ishoi pooki. Kake ore apa eishoi e Israel naa kebul oleng neponari aaku kumok; neponari ninche neaku olosho ogol; neaku ore ina kop ninche oobore. Neitokini aaput likae aiguanani te Misiri lemeyiolo Yosef. Nejoki ninye iltung'ana lenyena, “Ng'ura, eikumok oleng iltung'ana loo Siraeli, negol oleng te iyiook. Wootu, maing'uraki ninche olosek, pee mebul ake, pee te nelo ake nikitum olarrabal, neibung'are ilmang'ati lang neing'ar iyook paa keisik te nkop.” Neaku kepik ilaitasheikinok ooitasheiki ninche pee eisilisil ninche te sinkaisho nagol; neshetaki Farao nkanas naashumishoreki naaji Pisom o Ramases. Kake ore anaa enaibookini ninche enkop, neponari neidapashakino enkop. Nejing iltung'ana le Misiri enkuretisho too ltung'ana loo Siraeli. Neaku eisho ninche iltung'ana loo Siraeli meisiaaisho to sina sapuk. Nepik enkishui enye emion te sinkaisho nagol, te nturoto o too soito, o too mpukunot pooki e siaai ti ong'ata; ore too siaitin enye pooki neisho ninche meisiaaisho te sinkaisho nagol. Neitoki ilo aiguanani le Misiri ajoki inkaitoyiok oo Lhebrania, aa keji nabo Shifra neji enkae Pua, “Ti nintoishosho nkituaak oo Lhebrania nidolidolo ina kata eisho, tenaa enkayioni niariara ninye metua; kake tenaa entito enchoo eton eishu.” Kake keure apa nena aitoyiok Enkai, neitu eas anaa enaitanapa ninche olaiguanani le Misiri, kake eishoo inkayiok etoni eishu. Metaa eipoto olaiguanani le Misiri nena aitoyiok, nejoki ninche, “Kainyoo pee itaasa ena, ninchosho nkayiok eishu?” Nejoki nena aitoyiok Farao, “Enkaraki nemetiu nkituaak oo Lhebrania anaa nkituaak oo Lmisiri; amu kegol nkituaak oo Lhebrania oishuaa, naa keisho eton eitu ebau enkaitoyioni.” Neitaas Enkai esidai nena aitoyiok; neponari iltung'ana aagolu neaku kumok oleng. Ore enkaraki naure nena aitoyiok Enkai neisho ninche ilmareita. Neitoki Farao aitanap iltung'ana lenyena pooki ajo, “Ore pooki ayioni naini too Lhebrania ninang'akiki olkeju oji Nail, kake enchoo intoyie eishu.” Nelo oltung'ani obo le nkaji e Lawi ayam entito e Lawi. Nenutayu ina kitok neiu enkayioni, ore ake pee edol ajo enkerai sidai, neisudoo ninye ilapaitin okuni. Ore ake pee eaku meekure eisudoroyu, neshetaki ninye enkikapu naitobiraki too seyia nemur te ntoki naji laam; nepik ninye enkerai atua paa kepik ina kikapu atua iseyia te mbata o lkeju. Neitashe enkanashe enye te nelakua, pee eyiolou enaitaasi ninye. Ore ina kata ake nelotu entito e Farao adou aisuja to lkeju, nepuonu nkaisiaayiak enyena te mbata o lkeju; nedol ninye enkikapu ti atua iseyia, neirriwaa enkaisiaayiani enye meyau. Ore ake pee ebol nedol enkerai, dol, eishirita ina looyo. Neing'urrie ninye nejo, “Enoo nkera oo Lhebrania ena.” Nejoki enkanashe eina looyo enye entito e Farao, “Aalo aipotoki enkaibung'ani too nkituaak oo Lhebrania pee kintubulaki ena kerai?” Nejoki entito e Farao ninye, “Shomo.” Nelo entito aipotu ng'otonye ina kerai. Nejoki entito e Farao ninye, “Iwa ina kerai, pee kintubulaki nanu, naa kaaisho nanu olekoisiaayio lino.” Neya ina kitok enkerai aitubulu. Nebulu ina kerai, neyau ninye ayaki entito e Farao, neaku ninye olayioni lenye, neipot enkarna enye ajo Musa, amu etejo, “Te nkaraki naitayio ninye ti atua ina are.” Ore nabo olong, etubulua Musa, neipang alo enetii iltung'ana lenyena nedol enkiroishi e siaai nagol naasita. Neitoki adol Olmisiri earita Iheburaniai, obo loo ltung'ana lenyena. Neing'oring'orisho, ore ake pee edol ajo melio oltung'ani hoo obo, near ninye ilo Misiri metua nenukaa ti atua osinyai. Ore pee eitoki aipang likae kekun, ng'ura Ilhebrania aare oopupung'a; nejoki ninye ilo tung'ani oitarruoyie, “Kainyoo pee iar oltung'ani lo lorere lino?” Nejoki ninye, “Kaing'ae likintaa iyie olkitok o larishani te iyiook? Ijo pee kiar nanu matua anaa enitaara Olmisiri metua?” Neirut Musa, nejo, “Esipa etayioloki ena bae.” Ore pee ening Farao ina, neing'oru pee ear Musa metua. Kake eisika Musa ailany Farao, nebik te nkop e Midian neton te mbata e nchorro. Etii apa olapolosani le Midian oota isilan naapishana, nepuonu aaoku enkare neiput impeuti pee eitook ntare e menye. Nepuonu ilairritak loontare aaraa ninche, kake eitasho Musa aretu ninche, neitook ntare enye. Ore ake pee epuonu ninche enetii menye lenye Reul, nejoki ninye ninche, “Kaji taata eikununo pee ietuo aasieku?” Nejo ninche, “Olmisiri oitajeuo iyiook too nkaik oo lchekuti o metooku ninye enkare neitook ntare.” Nejoki ninye nena silan enyena, “Paa kaji etii ninye? Kainyoo pee itung'uaitie ilo tung'ani? Empoto ninye pee elotu ainos endaa.” Nenyorraa Musa aton te nebo ilo tung'ani, neisho ninye Musa entito enye naji Sipora. Neiki ninye enkayioni, nejo ninye enkarna enye Gershom, amu etejo ninye, “Ara olomoni te nkop neme enaai.” Ore etulusoitie ilarin ooikash, neye ilo aiguanani le Misiri. Neton ake eisomita iltung'ana loo Siraeli te sinkaisho enye, neyietu aaishiru eretoto; ore ilo kiyioi lenye le sinkaisho neilep enetii Enkai. Nening Enkai ilo somit lenye, nedamu Enkai olning'o lenye lo sotua o Abraham o Isaak, o tenebo Yakobo. Nedol Enkai iltungana le Israel, neyiolou Enkai empukunoto enye. Eing'orita apa Musa ntare o laputani lenye oji Yesro, laa olapolosani le Midian, nerikoo eluaata enye aipirie enkalo o loontoluo le Midian, nelotu ewueji neji Horeb ilo doinyo le Nkai. Neipang'aki ninye olmalaika le Nkai to lng'ejep le nkima opuku te mpolos o sanag, neing'or, naa ng'ura, eyupuyupito osanag, neitu emut enkima. Nejo Musa, “Ekaibelekenya aing'or ena pukunoto e nking'asia kitok, inchere kainyoo pee eitu enya enkima ilo sanag.” Ore ake pee edol Olaitoriani ajo eibelekenye aing'or, neipot Enkai ninye ti atua empolos o sanag, nejo, “Musa, Musa!” Nejo ninye, “Nele nanu.” Neitoki ninye ajoki, “Milotu anyiku, intayu inamuka inono too nkejek inono, amu ore ine wueji nintasheyie naa ewueji nesinya.” Neitoki ajo, “Ara nanu Enkai e papa lino, Enkai e Abraham, Enkai e Isak o Enkai e Yakobo.” Neisudoo Musa enkomom enye amu keure aing'ura Enkai. Neitoki Olaitoriani ajo, “Atoduaa osomit loo ltung'ana laainei ootii Misiri, natoning'o olkiyioi lenye te nkaraki ilaitasheikinok lenye; ayiolo olosilisili lenye, naewuo nanu adou pee aitajeu ninche metupuku aing'uaa enkaina oo ltung'ana le Misiri, nayau ailepunye ninche metupuku aing'uaa ina kop nepuonu enkop sidai nalala naruko inaishi o kule, aapuo ewueji oo Lkanaani, o Lhiti, Ilamori, Ilperesi, Ilhifi o Lyebusi. Ore taata, ng'ura eewuo olkiyioi loo ltung'ana loo Siraeli enatii, natodua enkibookinoto e nkop naibookito iltung'ana le Misiri ninche. Wou, amu kaairriwaa nanu iyie enetii Farao, pee itum ashomo aitayu iltung'ana laainei, lelo ayiok loo Siraeli, metupuku aing'uaa Misiri.” Kake etiaaka Musa Enkai, “Kara nanu ng'ae olo enetii Farao, nayau ilayiok loo Siraeli aaitung'uaa Misiri?” Nejo ninye, “Ekaaku te nebo iyie, naa ena nalo aaku olmonekie te iyie, nchere aairriwayie: ore ake pee indip aitupuku iltung'ana aitung'uai Misiri naa ipuonunu aaisiaai Enkai tele doinyo.” Neitoki Musa ajoki Enkai, “Amaa te nalotu enetii iltung'ana loo Siraeli najoki ninche ‘Aairriwua nanu Enkai oo loo papaai linyi maeu enitii ntae’; naaikilikuan ninche aajoki, ‘Keji ng'ae enkarna enye?’ Kaa ajoki ninche?” Nejoki Enkai Musa, “ARA NANU ILO ORA.” Neitoki ajo, “Tiaaki ena iltung'ana loo Siraeli, ‘ARA NANU laairriwua nanu enitii.’ ” Neitoki Enkai ajoki Musa, “Tiaaki ena iltung'ana loo Siraeli, ‘Olaitoriani, Enkai oo loo papaai linyi, Enkai e Abraham, Enkai e Isaak o Enkai e Yakobo naairriwua nanu enitii’ ena enkarna ai ntarasi, naa ninye aadamunye iishoritin pooki. Shomo inturrurro ilpayiani loo Siraeli te nebo, nijoki ninche, Aaipang'aka nanu Olaitoriani, Enkai oo loo papaai linyi Enkai e Abraham, o ene Isaak, o ene Yakobo, ejo, Atisipua intae o ina naitaasaki intae te Misiri; naa kamut nchere kayau intae ailepunye aaitung'uaa osina le Misiri, aapuonu enkop o Lkanaani, Ilhiti, Ilamori, Ilperesi, Ilhifi te nebo o Lyebusi, enkop naruko kule o naishi.” Naa kenyoraa ninche ina nijoki; nilo iyie o lpayiani loo Siraeli enetii olaiguanani le Misiri nijokiki ninye, Enotore iyiook Olaitoriani, Enkai oo Lhebrania; ore taata nikiomon iyie, nchoo iyiook maape nkolong'i uni ong'ata, pee kitum aatopolosaki Olaitoriani Enkai ang. Ayiolo ajo meisho ntae olaiguanani le Misiri ipuopuo meteleku ake te nkaraki enkaina naata enkidimata naas ti atua ninye; ore te siadi ina niyaya karsisisho e Misiri. Metaa kaitorioo nanu enkaina ai aosh Misiri too mbaa pooki e nkingasia nalo nanu aas teine, ore te siadi ina naa kaisho intae enchom. “Naa kaisho nanu kulo tungana omom too nkonyek oo Lmisiri, naa ore tenipuopuo, nimipuopuo too nkaik naarook. Kake ore pooki kitok neomon ene latia enye, oina naboitare tiaji, imasaa e nkosholai o sahabu, o nkilani, nipik ninche ilayiok linono o ntoyie inono, ore teina niyaya karsisisho e Misiri.” Neitoki Musa awalu, nejo, “Ng'ura, maairuk ninche nanu aashu ening enajoki, amu kejo ninche, ‘Eitu kimpang'aki iyie Olaitoriani.’ ” Nejoki Olaitoriani ninye, “Kainyoo ina nimbung'ita te nkaina?” Nejoki ninye, “Eng'udi.” Neitoki ninye ajo, “Tanang'aki enkop.” Nenang'aki enkop, neaku ina ng'udi olasurai; neipirri Musa ailany. Kake etiaaka Olaitoriani Musa, “Ntorioi enkaina ino mbung'a olkidong'oe.” [Neitorioo enkaina enye neibung, neitoki aaku eng'udi te nkaina enye]. “Pee etum aairuko nchere Olaitoriani Enkai oo loo menye, Enkai e Abraham, Enkai e Isaak o Enkai e Yakobo nikimpang'aka iyie.” Neitoki ajoki Olaitoriani ninye, “Tipika enkaina ino olgoo lino.” Nepik ninye enkaina enye olgoo lenye; ore pee eitayu, ng'ura, etijing'a enkaina enye enkeeya oo lbolot, neibor anaa enturoto. Neitoki Enkai ajo, “Nyaaki tipika enkaina ino atua olgoo lino.” Neitoki ninye apik enkaina enye atua olgoo lenye; ore ake pee eitayu, ng'ura eitotiwuoki anaa osesen lenye pooki. Nejo Enkai, “Naa ti nimikiruk ninche, arashu te nemenyorraa enkitoduaata e dukuya, neidim ninche aairuko ina kitoduaata e are. Ore pe meiruk ninche ebaiki nena kitoduaat pokira arashu ening enijoki, niya iyie enkare to lkeju le Nail nilo abukoki enkop natoyio; ore ina are nilo aya to lkeju le Nail naa keaku osarge ti oriong enkop natoyio.” Kake etiaaka Musa Olaitoriani, “Olaitoriani lai, mara nanu oltung'ani arriyia te nkiguana, arashu ebaiki ena kata pee irorie osinka lino; kake kaimalees te nkiroroto na kaasha sii olng'ejep.” Neitoki Olaitoriani ajoki ninye, “Kaing'ae oitobira enkutuk e tung'ani oitiming'an te nkiroroto o te ning'oto, aashu oitodolisho aashu aitamodok? Aime nanu, Olaitoriani ake? Shomo naa taata, naa kaaku nanu te nebo enkutuk ino naaitayiolo enijo.” Kake etiaka ninye, “Oi, Olaitoriani lai, aatoomono, irriwai likae tung'ani.” Neyupuyup engoro e Nkai te nkaraki Musa neitoki ajo, “Aimetii Aron ilo alashe lino loo Lawi? Ayiolo ajo keidim airoro aituana naa ng'ura, elotu ninye pee kinang'are, naa ore pee kidol ninye neshipayu to ltau lenye. Nirorie iyie ninye nipik irorei enkutuk enye, naa kaitaarriyian nanu enkutuk ino o enkutuk enye naaitayiolo iyie eniaas. Keirorie ninye iltung'ana te rishata ino, neaku ninye enkutuk te iyie, nitiu te ninye anaa Enkai. Naa iya te nkaina ino ena ng'udi, naa ninye iasie nkitoduaat.” Nerrinyo Musa alo ashuko enetii Yesero olaputani lenye, nejoki ninye, “Aatoomono, nchooki nanu mashomo ashuko, pee ashukokino iltung'ana lang ootii Misiri pee adol tenaa keton eishu.” Nejoki Yesero Musa, “Shomo te seriani.” Nejoki Olaitoriani Musa te Midian, “Shomo tushukoyu Misiri; amu ore iltung'ana pooki apa ooing'oru enkishui ino netuata.” Nedumu Musa enkitok enye o layiok lenyena nepik osikiria, nelo ashuko enkop e Misiri; naa ore te nkaina enye neya Musa eng'udi e Nkai. Nejoki Olaitoriani Musa, “Ore irrinyo alo Misiri, toduaa nchere itaasa te dukuya Farao nena pooki enking'asia natipika nanu engolon ina kake kaitagol nanu oltau lenye, pee meisho ninye iltung'ana meshomo. Naa ilo ajoki Farao, Etejo Olaitoriani inchere, ore Israel naa olkikau lai, naajoki naa iyie, Nchoo olayioni lai elo pee aatum aisiaayia nanu. Ti nimitiki ninye elo naar nanu ilo kikau lino metua.” Ore te ine wueji neirraga te nkoitoi nenang'are Olaitoriani ninye nejo aar ninye metua. Neitayu Sipora olmurunya nedung'u isuaaten oo layiok lenyena amurat paa keelie nkejek e Musa, nejo, “Esipa ira olayamisho lo sarge te nkaraki emuratare.” Nejoki Olaitoriani Aron, “Shomo ong'ata tanang'are Musa.” Nelo ninye nenang'are ninye to ldoinyo le Nkai neng'utut ninye. Neliki Musa Aron irorei pooki lo Laitoriani laa ninche eirriunye ninye, o nkitoduaat pooki naaitanapa ninye metaasa. Nelo Musa o Aron aaiturrur te nebo ilpayiani loo ltung'ana loo Siraeli. Neliki Aron ninche irorei pooki ootiaaka Olaitoriani Musa, neas nkitoduaat te dukuya iltung'ana. Neiruk iltung'ana; ore ake pee ening nchere etumutana Olaitoriani iltung'ana loo Siraeli netoduaa osina lenye, neirrug ninche ilukuny enye aaserem. Ore te siadi ina nelo Musa o Aron enetii Farao nejoki, “Nji ejo Olaitoriani, Enkai oo Siraeli, ‘Nchoo iltung'ana laainei epuo, pee aatum aaitaiki osirua ti ong'ata.’ ” Kake etejo Farao, “Kaing'ae Olaitoriani, laidim nanu atoning'o oltoilo lenye naisho Isiraeli epuo.” Nejo ninche, “Enotore iyiook Enkai oo Lhebrania; nchoo iyiook maape, kitoomono iyie, maape elototo oo nkolong'i uni ti ong'ata pee kipolosaki Olaitoriani Enkai, mear ake iyiook to lmeitai aashu to lalem.” Nejoki ninche olaiguanani le Misiri, “Musa o Aron, kainyoo pee iyaya iltung'ana aaitung'uaa esiaai enye? Entorrinyoto enchom isiaaitin inyi.” Neitoki Farao ajo, “Ng'ura, ajo aikumok taata kulo tung'ana tena kop niyeng'iyeng'ie iyie ninche too siaitin enye!” Ore te ina olong ake neitanap Farao ilaitasheikinok le siaai o lkituaak le siai, “Mintokiki ae kata aaisho iltung'ana olkujita oitayunye ilmatofali anaa oshi eninkoko; enchoo ninche epuo aasotu olkujita maate. Ore esiana oo lmatofali apa naitayu enchoo eaku lelo ake, emintong'oriki ninche, amu aiturua ninche; neaku keishir, ‘Nchoo iyiook maape aaitaiki Enkai ang olasar.’ Nchoo esiaai nagol oleng eiteeki iltung'ana, pee etum aataasisho nemeitoki aainining lelo rorei le lejare.” Neaku eshomo lelo aitasheikinok o ilkituaak le siaai nejoki iltung'ana, “Ejo Farao nji, ‘Maisho nanu ntae olkujita. Enchom maate, eyau olkujita linyi te wueji neba anaa enitumiemie; kake ore esiaai meitong'ori hoo ninye peno.’ ” Neidapashakino iltung'ana enkop pooki e Misiri aasotu suut aaitaa olkujita. Netem apa lelo aitasheikinok aarrumoki ninche esiaai, ejoki, “Entabai esiaai inyi, e anaake, anaa apa eetae olkujita.” Ore ilkituaak loo ltung'ana loo Siraeli, laa ninche etipika ilaitasheikinok le Farao meitasheiki ninche, neari, neikilikuani aajoki, “Kainyoo pee eitu iasiasa esiaai inyi aaitobir ilmatofali taata anaa apa?” Nepuonu lelo kituaak loo ltung'ana loo Siraeli aaishiraki Farao, “Kainyoo pee intaas iyiook, isinkan linono, ena? Meetae olkujita ooishooki isinkan linono, ore ake eyia, nejoki ninche iyiook, ‘Entobira ilmatofali!’ Naa ng'ura earitae isinkan linono, kake ore enkitarruoroto netii atua iltung'ana linono ake.” Nejo ninye, “Irara turua, irara turua, neaku ijojo, ‘Nchoo iyiook maape aapolosaki Olaitoriani.’ Enchom taata, naa entaasisho; amu meetae olkujita oishori intae, ore ake eyia, niyauu enoshi ake siana oo lmatofali.” Nedol ilkituaak loo ltung'ana loo Siraeli aajo etii ninche erishata torrono, ina kata pee ejo ninche, “Meitong'ori hoo ninye peno esiana oo lmatofali linyi lintayuyu anaake.” Netumore ninche Musa o Aron, eanyita apa ninche, epuku aaing'ua enetii Farao. Nejoki ninche, “Nchoo eing'or ntae Olaitoriani neiguanare, amu intaa ntae iyiook ilarruok te dukuya Farao o laisiaayiak lenyena, nitipika olalem enkaina enye pee ear iyiook matuata.” Neitoki Musa aibelekenyakino Olaitoriani nejo, “Olaitoriani, kainyoo pee kintasima airriu nanu? Amu ore anaa nalotu enetii Farao airo te nkarna ino, neitaasa ninye ntorrok kulo tung'ana, neitu iyie intajeu iltung'ana linono tukul.” Kake etiaka Olaitoriani Musa, “Idol taata iyie ina naitaas Farao; amu te nkaina nagol eisho ninche meshomo, ee te nkaina nagol earaa ninche meshomo aaing'uaa enkop enye.” Neitoki Enkai ajoki Musa, “Ara Olaitoriani. Aipang'aka apa Abraham, o Isaak, o Yakobo anaa Enkai Magilani, kake ore te nkarna ai naji Olaitoriani eitu aitayiolo ninche. Aitobirua sii osotua lai o ninche, pee aisho ninche enkop e Kanaan, enkop apa natobikie aa lomon. Ore ake eyia natoning'o osina loo ltung'ana loo Siraeli ooitaa Lmisiri isinkan natadamua naa ilo ning'o lai. Tiaaki naa iltung'ana loo Siraeli, ‘Ara nanu Olaitoriani, naa kayau nanu ntae aitung'uaa esinkaisho enye, naa kalaku nanu ntae te nkaina naitoriori o too nkiasin sapuki e nkiguana. Naya nanu ntae aitaa iltung'ana laainei, naaku nanu Enkai inyi, naa iyiolouu ntae aajo ara nanu Olaitoriani Enkai inyi, naa ninye nayaua ntae aitung'uaa abori ilolan le sinkaisho oo Lmisiri. Naa kayau nanu ntae atua enkop apa nainosa olmumai ajo kaisho Abraham, o Isaak, o Yakobo; kaisho nanu ntae metaa eninyi enkorrok. Ara nanu Olaitoriani.’ ” Neliki Musa iltung'ana loo Siraeli nena, kake eitu ninche ening Musa nkaraki iltauja lenye oitingo osiligi te sinkaisho enye eng'ogong'i. Nejoki Olaitoriani Musa, “Shomo tijing'aki Farao olaiguanani le Misiri, tiaaki meishoo iltung'ana loo Siraeli meipang'a aapuo te nkop enye.” Nejoki Musa Olaitoriani, “Ng'ura, eitu ninche aaning nanu iltung'ana loo Siraeli; kaji naa eiko te naaning nanu Farao, nara oltung'ani leme arriyia te nkiroroto?” Kake eirorie Olaitoriani Musa o Aron, neisho ninche enkitanapata nayaki iltung'ana loo Siraeli o Farao olaiguanani le Misiri, pee eriku iltung'ana loo Siraeli aitung'uaa enkop e Misiri. Kuna ninche lukuny oo nkajijik oo loo menye: ilayiok le Ruben, olkikau le Israel; Hanok, Palu, Hesron, o Karmi, kulo ninche ilmareita le Ruben. Ilayiok le Simion: Yemuel, Yamin, Ohad, Yakin, Sohar, o Shaul, olayioni le nkitok oo Lkanaani; kulo ninche ilmareita le Simion. Kuna ninche nkarn oo layiok le Lawi te risioroto oo ishoritin enye: Gershon, Kohas, o Merari, ore larin le nkishui e Lawi naa ilarin iip o tomoni uni o oopishana. Ilayiok le Geshom: Libni o Shimei, too lmareita lenye. Ilayiok le Kohas: Amram, Ishar, Hebron o Usiel, era ilarin le nkishui e Kohas iip o tomoni uni o okuni. Ilayiok le Merari: Mahali o Mushi. Kulo ninche ilmareita loo le Lawi te risioroto oo ishoritin enye. Ewa Amram Yokobet ayam enkanashe e menye neiki ninye Aron o Musa, era ilarin le nkishui e Amram iip o tomoni uni o oopishana. Ilayiok le Ishar: Kora, Nefeg o Sichri. O layiok le Usiel: Mishael, Elsafan o Sisri. Neya Aron ayam Elisheba, entito e Aminadab naa enkanashe e Nashon; neiki ninye Nadab o Abihu o Eliesa te nebo Isamar. Ore ilayiok le Kora naa Alir o Elkana te nebo Abiasaf; kulo ninche ilmareita loo Lkorati. Neya Eliesa, olayioni le Aron, ayam entito nabo oo ntoyie e Putiel; neiki ninye Finihas. Kuna ninche lukuny oo nkajijik oo loo menye oo Lawi too lmareita lenye. Kulo lelo, Aron o Musa, laa ninche etiaka Olaitoriani, “Entayu iltung'ana loo Siraeli metupuku aaing'uaa enkop e Misiri too lororani lenye.” Ninche apa ooirorie Farao olaiguanani le Misiri eimaki enkitayunoto oo ltung'ana loo Siraeli metung'uai Misiri, kulo lelo Musa o Aron. Ore te ina olong neirorie Olaitoriani Musa te nkop e Misiri, nejoki Olaitoriani Musa, “Ara nanu Olaitoriani; tiaaki Farao olaiguanani le Misiri nena pooki naatiaka.” Nejoki Musa Olaitoriani, “Ng'ura, ara nanu oleme arriyia te nkiroroto, kaji naa eiko Farao te naaning?” Nejoki Olaitoriani Musa, “Toduaaki maaitotiu anaa Enkai te Farao neaku Aron olalashe lino oloiboni lino. Ilo iyie airo nena pooki naaitanapa; ore Aron olalashe lino nejoki Farao meishoo iltung'ana loo Siraeli meshomo aaing'uaa enkop enye. Kake kaitagol oltau le Farao, naa ore hoo tenaponaa nkitoduaat aainei o mbaa e nking'asia te nkop e Misiri, mikining iyie Farao; naitoki nanu aiteleiki enkaina ai shumata Misiri naitayu olorora lai, iltung'ana laainei lelo ayiok loo Siraeli, metupuku aaing'uaa Misiri too nkiasin sapuki e nkiguana. Neyiolou Ilmisiri aajo ara nanu Olaitoriani te naitorioo enkaina ai te shumata Misiri naitayu iltung'ana loo Siraeli metupuku ti atua ninche.” Neas Musa o Aron ina, neas anaa enaitanapa ninche Olaitoriani. Ore Musa naa oloo larin ntomoni isiet ore Aron naa oloo larin ntomoni isiet o okuni ina kata pee eirorie ninche Farao. Nejoki Olaitoriani Musa o Aron, “Enchoo ake pee ejoki ntae Farao, ‘Entisipa ate te asata o lbulabuli,’ nijoki Aron, ‘Tudumu ina ng'udi ino tanang'aki enkop te dukuya Farao, pee etum ataa olasurai.’ ” Nelo Musa o Aron enetii Farao neas anaa enaitanapishe Olaitoriani; nenang'aki Aron ina ng'udi enye enkop te dukuya Farao o sinkan lenyena, neaku ina ng'udi olasurai. Neipot Farao ilang'eni lenyena o lasakutok; ore sii ninche, lelo ang'eni le tung'ana le Misiri, neas ina te sakutore enye. Amu etanang'aka pooki tung'ani eng'udi enye enkop, neaku ilasuriaa. Kake etoijoyie eng'udi e Aron ing'udisin enye. Neton ake eitagoloki oltau le Farao, nemening ninye ninche anaa enatejo Olaitoriani. Neitoki Olaitoriani ajoki Musa, “Eitagoloki oltau le Farao, pee meisho ninye iltung'ana meshomo. Shomo enetii Farao tadekenya, ina kata elo enkare; taanyu ninye te ngilata o lkeju niya iyie te nkaina ino ina ng'udi apa naibelekenya aaku olasurai. Nijoki iyie ninye, ‘Airriwua nanu Olaitoriani enitii, Enkai o Lhebrania ejo, Nchoo iltung'ana laainei epuo, pee aatum aaisiaayia ti ong'ata; naa ng'ura, eton ake eitu iruk. Nji ejo Olaitoriani, Tena iyie iyiolou ajo ara nanu Olaitoriani: ng'ura, ekaosh nanu enkare natii atua olkeju le Nail tena ng'udi naata te nkaina ai, naa keibelekenya aaku osarge. Neye isinkir ootii atua olkeju le Nail neng'ueyu ilo keju le Nail.’” Nejoki Olaitoriani Musa, “Tiaaki Aron, ‘Tudumu eng'udi ino nintorioo enkaina ino ti oriong nkariak e Misiri, ti oriong ilkejek lenye, o erat lenye, o mugurri enye o lchorroi lenye, pooki loo nkariak, pee etum aataa osarge, neaku osarge te nkop pooki e Misiri too oketa oo nkeek o too oketa oo soito.’ ” Neas Musa o Aron anaa enaitanapishe Olaitoriani; ore te dukuya Farao o te dukuya ilaisiaayiak lenyena, neilepie ninye eng'udi neosh ina are apa natii atua olkeju le Nail; ore ina are pooki apa natii atua olkeju le Nail newala ina are pooki apa natii atua olkeju le Nail aaku osarge. Neye isinkir ootii atua olkeju le Nail; neng'ueyu olkeju le Nail o metaa meidim Ilmisiri aatook enkare naing'uaa olkeju le Nail; neaku osarge te nkop pooki e Misiri. Kake etaasa sii ninche ilasakutok le Misiri ina te sakutore enye; neton ake egol oltau le Farao, nemening ninye ninche anaa enatejo Olaitoriani. Neibelekenya Farao nelo atua enkaji enye, neitu duoo ninye epik ena oltau ashilaa. Netur Ilmisiri pooki mbat o lkeju le Nail aaing'oru enkare naok, amu meidim aatook enkare e ilo keju le Nail. Nelusoo nkolong'i naapishana anaa pee eosh Olaitoriani olkeju le Nail. Neitoki Olaitoriani ajoki Musa, “Shomo tijing'aki Farao nijoki ninye, ‘Nji ejo Olaitoriani, Nchoo iltung'ana laainei epuo peyie aatum aaisiaayia. Kake ti niany iyie incho ninche epuo, ng'ura naar enkop ino pooki too ntuaan. Neboreyu olkeju le Nail te nena tuaan naapuonu tiatua enkaji ino, o atua olgilata lino oirragi o enchumata endapash ino, o atua nkajijik oo laisiaayiak linono o noo ltung'ana linono, o ine wueji neyierishoreki o ngirran inono naaipurjishoreki. Eikipuonu nena tuaan aaked iyie, o ltung'ana linono o sinkan linono.’” Nejoki Olaitoriani Musa, “Tiaaki Aron, ‘Ntorioi enkaina ino o eng'udi ino te shumata oo lkejek, o te shumata oo erat, o te shumata oo lturot, nchoo ntuaan meetu enkop e Misiri!’ ” Neitorioo Aron enkaina enye tioriong nkariak e Misiri, neilepu ntuaan neiput enkop e Misiri. Neas ilasakutok anaa ina te sakutore enye, neyau ntuaan oriong enkop e Misiri. Neitoki Farao aipot Musa o Aron nejoki, “Entoomon Olaitoriani meiwuang'ie ntuaan maatung'uai nanu o ltung'ana laainei; naa kaisho nanu iltung'ana epuo aapolosaki Olaitoriani.” Nejoki Musa Farao, “Tiaakaki ake duoo iyie anaa eniyieu, kanu iyieu naaomonoki, o laisiaayiak linono o ltung'ana linono, peyie emuti ntuaan te iyie, o too nkajijik inono metaa olkeju le Nail ake etii.” Nejoki ninye, “Taisere.” Nejo Musa, “Metotiwuo anaa ina nitejo, peyie iyiolouu aajo metii likae onyaanyukie Olaitoriani Enkai ang. Eikipuo ntuaan aaing'uaa iyie o nkajijik inono o laisiaayiak linono o ltung'ana linono; neaku to lkeju ake le Nail eing'uari.” Neipang Musa o Aron aapuo aaing'uaa Farao, neishiraki Musa Olaitoriani te nkaraki ntuaan, anaa enatoning'okinote o Farao. Neas Olaitoriani te risioroto ororei le Musa, neye ntuaan too nkajijik o too ndung'orot o too nkong'at. Neiturrur ninche too olchalai neing'usilu enkop. Kake ore ake peyie edol Farao ajo eikasha enkop, neitagol oltau lenye, nemening ninye; anaa enatejo Olaitoriani. Neitoki Olaitoriani ajoki Musa, “Tiaaki Aron, ‘Ntorioi eng'udi ino toosho enterit e nkop, peyie eaku enkojong'ani te nkop pooki e Misiri.’ ” Neiko ninche neijia; neitorioo Aron enkaina enye o eng'udi enye neosh enterit e nkop, nelotu enkojong'ani ajing'aki tung'ani o eng'ues; neaku enterit pooki e nkop enkojong'ani te nkop pooki e Misiri. Netem ilang'eni le tung'ana te ng'eno enye aayau enkojong'ani eitu eidim. Neaku keetae enkojong'ani te pooki tung'ani o te pooki ng'ues. Nejoki ilang'eni le tung'ana Farao, “Olkimojino le Nkai ele.” Kake eitogoloki oltau le Farao neaku mening ninche; anaa enatejo apa Olaitoriani. Neitoki Olaitoriani ajoki Musa, “Tayooki inyo tadekenya taanyu Farao elotu enetii enkare, nijoki ninye, ‘Nji ejo Olaitoriani, Nchoo iltung'ana laainei epuo peyie aatum aaisiaayia nanu. Naa, ti nimincho iltung'ana laainei epuo, ng'ura, naaitame airriwaki iyie emus oo lojong'a o laisiaayiak linono, o ltung'ana linono, o atua nkajijik inono, neiput inkajijik oo le Misiri emus oo lojong'a, o ina kop naitasheyie ninche. Kake ore te ina olong naoru enkop e Goshen, naa ninye etonie iltung'ana laainei, metaa mejing emus oo lojong'a ine, peyie iyiolou nchere ara nanu Olaitoriani otii empolos e nkop. Metaa kaoru nanu ltung'ana laainei o ltung'ana linono. Taisere eaku ele monekie.’” Neiko neijia Olaitoriani; nelotu emus kitok oo lojong'a atua enkaji e Farao o atua nkajijik oo laisiaayiak lenyena; ore atua enkop pooki e Misiri nerruoyo enkop te nkaraki oo lojong'a. Neitoki Farao aipot Musa o Aron nejoki, “Enchom, entopolosaki Enkai inyi tiatua ena kop.” Kake etiaaka Musa, “Meishiaakino ti nikiaas ina; amu eikipolosaki Olaitoriani Enkai ang ilasarri ooitagor Ilmisiri. Amaa ti nikipolos ilasarri ooitagor Ilmisiri te dukuya nkonyek enye, aimear iyiook too soito? Eikipuo elototo oo nkolong'i uni ti ong'ata peyie kipolosaki Olaitoriani Enkai anaa enaitanap iyiook.” Nejo Farao, “Ekaisho intae enchom peyie ipolosakiki Olaitoriani Enkai inyi ti ong'ata; kake mipuopuo aalamari oleng. Entoomonokoki.” Neitoki Musa ajoki, “Ng'ura, kaaipang alo aing'uaa naa kaaomonoki to Laitoriani peyie elo emus oo lojong'a aing'uaa Farao, neing'uaa ilaisiaayiak lenyena, neing'uaa iltung'ana lenyena taisere; enyor ake nemeitoki Farao alej iyiook, amitiki iltung'ana meshomo aapolosaki Olaitoriani.” Nelo Musa aing'uaa Farao, neomon Olaitoriani. Neas Olaitoriani anaa enaikilikuanua Musa, neiwuang'ie ina mus oo lojong'a te Farao, o too laisiaayiak lenyena o too ltung'ana lenyena; eitu eing'uari obo. Kake eitagolo ake sii Farao oltau lenye tena kata, neitu eisho iltung'ana meshomo. Neitoki Olaitoriani ajoki Musa, “Shomo tijing'aki Farao, nijoki ninye, Nji ejo Olaitoriani, Enkai oo Lhebrania, ‘Nchoo iltung'ana laainei epuo, peyie aatum aaisiaayia. Amu ti niany iyie incho ninche epuo niton aibok ninche, ng'ura, nedoiki intae enkaina o Laitoriani olmeitai torrono nkishu inyi naatii ong'ata, mbartan, isirkon, ntamesin, iluaat oo nkishu o luaat oo ntare. Nerish Olaitoriani nkishu oo Siraeli o nkishu e Misiri, metaa meye hoo toki te nena pooki naara inoo ltung'ana loo Siraeli. Nedung'u Olaitoriani enkata, ejo Taaisere eas Olaitoriani ena bae ti atua ena kop.’” Ore ake peyie ekenyu neas Olaitoriani ena bae; neye nkishu pooki oo Lmisiri, kake ore nkishu oo ltung'ana loo Siraeli eitu ninye eye nabo. Neirriwaa Farao olkilikuai, naa ng'ura, eitu ninye eye hoo nabo oo nkishu oo Siraeli. Kake eitagoloki oltau le Farao, neitu ninye eisho iltung'ana meshomo. Nejoki Olaitoriani Musa o Aron, “Entayutu mboreitin oo nkaik oo nkurruon to lkokuet, ninchosho Musa metanang'aki shumata te dukuya Farao. Naa keaku enterit napuyiapui te nkop pooki e Misiri, neaku iltuduta ooiwotiota aaku mpaldakani te tung'ani o te ng'ues te nkop pooki e Misiri.” Neitayu ninche nkurruon to lkokuet, neitashe te dukuya Farao, nenang'aa Musa aipirie shumata, neaku iltuduta ooiwotiota aaku mpaldakani torrok te tung'ani o te ng'ues. Neitu eidimu lelo ang'eni le tung'ana oitasheito te dukuya Musa te nkaraki iltuduta, amu etijing'a iltuduta lelo ang'eni le tung'ana loo Lmisiri pooki. Kake eitagolo Olaitoriani oltau le Farao, neitu ninye ening ninche anaa enairorie Olaitoriani Musa. Neitoki Olaitoriani ajoki Musa, “Tayooki inyo tadekenya shomo ntasho te dukuya Farao nijoki ninye, ‘Nji ejo Olaitoriani, Enkai oo Lhebrania, Nchoo iltung'ana laainei epuo, peyie aatum aaisiaayia nanu. Amu ore ena kata naa kairriwaki ilmeita laainei pooki meetu oltau lino, o laisiaayiak linono peyie itum atayiolo ajo metii likae laanyaanyukie te nkop pooki. Amu ore taata anaata atudumua enkaina ai naaosh iyie o ltung'ana linono to lmeitai naa anaata kiwuang'ieki aaitung'uaa enkop. Kake te nkaraki ena aatapala inchu, peyie aaitodol iyie engolon ai peyie eibalunyeki enkarna ai te nkop pooki. Eton ake ijukaa kewan too ltung'ana laainei, nimincho ninche meshomo. Ng'ura ore taisere tena saa naitasha enchan oo soito neitu ae kata etumi te Misiri ebaiki apa peyie eiteruni o metabaiki taata. Ore naa taata irriwai ilkiliku meitushuri nkishu o pooki toki niatata too lng'oborri; amu kelotu enchan oo soito ashaiki pooki tung'ani o eng'ues pooki natii ong'ata nemeitokini aayau ang, naa keye.’” Ore ilo oure ororei lo Laitoriani ti atua ilaisiaayiak le Farao neisikie isinkan lenyena o nkishu aaya atua nkajijik; kake ore ilo leitu eshilaa ororei lo Laitoriani neing'uaa isinkan lenyena o nkishu enyena ti ong'ata. Nejoki Olaitoriani Musa, “Ntorioi enkaina ino ing'orie shumata, peyie ejing enchan oo soito enkop pooki e Misiri.” Neitorioo Musa eng'udi enye aing'orie keper; neirriu Olaitoriani enkikurrukur o enchan oo soito, nedou enkima alotu enkop. Neitasha Olaitoriani enchan oo soito te nkop e Misiri. Netii enchan oo soito o enkima naimerlelita ti atua enchan oo soito, enchan oo soito sapuk oleng, neitu ae kata ejing enkop e Misiri ebaiki apa pee eaku olosho. Near enchan oo soito pooki toki natii ong'ata te nkop pooki e Misiri, aa tung'ani o eng'ues; near enchan oo soito pooki aitubului e ong'ata, negil pooki shani li ong'ata. Ti atua enkop e Goshen ake, ine apa netii iltung'ana loo Siraeli metii enchan oo soito. Neirriwaa Farao iltung'ana, neipot Musa o Aron, nejoki ninche, “Ataasa nanu ing'ok tena rishata; Olaitoriani ninye olasipani ore nanu o ltung'ana laainei nikira ilenkarrueisho. Entoomon Olaitoriani, amu eidipa iyiook ena kikurrukur o ena shan oo soito; ekaisho ntae enchom, nimintokiki aabik.” Nejoki Musa ninye, “Ore ake peyie alo auluo ena ang, naitorioki Olaitoriani nkaik aainei, negira enkikurrukur nemeitoki atii enchan oo soito peyie itum atayiolo ajo eno Laitoriani enkop. Kake ore iyie o laisiaayiak linono ayiolo nanu ajo eton ake miurere Olaitoriani Enkai.” (Eitarruoyioki enkaitubului naji enkatani o shairi, amu eo apa shairi neitapuka enkatani. Kake eitu eitarruorri enkano amu eimutie te mbulunoto.) Neing'uaa Musa Farao alo auluo ina ang, neitorioki Olaitoriani nkaik enyena, neishunye enkikurrukur o enchan o soito neitu eitoki ashaiki oriong enkop. Ore ake peyie edol Farao ajo eishunye enchan, o enchan oo soito o enkikurrukur neigil aas eng'oki, neitagol oltau lenye, ninye o laisiaayiak lenyena. Neaku eitagoloki oltau le Farao neitu eisho iltung'ana loo Siraeli meshomo; anaa enairoro Olaitoriani aimunye Musa. Neitoki Olaitoriani ajoki Musa, “Tijing'aki Farao; amu aitagolo oltau lenye o oltau loo laisiaayiak lenyena, peyie atum aitoduaai kuna kitoduaat aainei enking'asia nataasa ti atua ninche, peyie itum aitoning'o olayioni lino o layioni lo layioni lino enaikuna peyie aitomod Ilmisiri too nkitoduaat aainei enking'asia nataasa ti atua ninche; peyie iyiolouu nchere ara nanu Olaitoriani.” Nelo Musa o Aron atua ine netii Farao, nejoki ninye, “Nji ejo Olaitoriani, Enkai oo Lhebrania, ‘Iany kenya o anu intobor kewan te dukuya nanu? Nchoo iltung'ana laainei epuo, peyie aatum aaisiaayia nanu. Amu ti nimitiki iltung'ana laainei epuo, ng'ura, ore taisere nayau olmaati atua enkop ino, naa keitoip oriong e nkop, metaa metii hoo ng'ae oidim atoduaa enkop; nenya ina nikitelekakaki te nchan oo soito, naa kenya pooki shani lino onyori obulu ti ong'ata, naa keiput nkajijik inono, o nkajijik oo laisiaayiak linono pooki o noo Lmisiri pooki; te nkoitoi neitu ae kata edol iloo papaai lino o loo nkakuyiaa lino, ebaiki apa peyie epuonu oriong e nkopo taata.’ ” Neibelekenya ninye neipang aing'uaa Farao. Nejoki ilaisiaayiak le Farao ninye, “Keaku kenya ele tung'ani orreshet te iyiook o anu? Enchoo kulo tung'ana epuo, peyie etum aaisiaayia Olaitoriani Enkai enye; keton ake midol ajo eitarruoyioki Misiri?” Neshukuni Musa o Aron meetu enetii Farao; nejoki ninye ninche, “Enchom esiaayia Olaitoriani Enkai inyi; kake kakua oopuo?” Nejo Musa, “Eikipuo iyiook o elelero ang o enkitoo ang; eikipuo iyiook o layiok lang o ntoyie ang o nkerrai ang o nchoo ang amu meeta inchere mikintaiki Olaitoriani osirua.” Nejoki ninye ninche, “Metaa Olaitoriani te nebo ntae tenaa kaisho ae kata ntae o ng'aturan inyi enchom! Ng'ura ajo iatata nkitobirat torrok too ndamunot inyi. A-a! Enchom ilewa ake, esiaayia Olaitoriani, amu ina iyieuu.” Nerumori ninche aaitung'uaa ine netii Farao. Neitoki Olaitoriani ajoki Musa, “Ntorioi enkaina ino ti oriong e nkop e Misiri te nkaraki olmaati, peyie elotu oriong e nkop e Misiri, nenya pooki aitubului te nkop, pooki toki natung'uayie enchan oo soito.” Neitorioo Musa eng'udi enye ti oriong e nkop e Misiri, neyau Olaitoriani olkutati le nkilepunoto e nkolong ina kop endama pooki o ina kewarie pooki; ore ake peyie ekenyu eyaua duoo olkutati lenkilepunoto e nkolong olmaati. Nelotu olmaati oriong e nkop pooki e Misiri, neton te nkop pooki e Misiri, emus sapuk oleng o lmaati neitu ae kata etumi nemeitokini ae kata aatum. Amu eitoipo oriong e nkop pooki, neaku eitomisimisoki enkop, nenya ninche pooki aitubului te nkop o pooki ng'anayioi loo lkeek otelekua enchan oo soito; eitu eleku hoo toki nabo nanyori, mme olchani neme enkaitubului e ong'ata, te nkop pooki e Misiri. Neitoki Farao aipot Musa o Aron te naipuk, nejo “Ataasa eng'oki to Laitoriani Enkai inyi o te ntae. Ore naa taata entapalakaki eng'oki ai, atoomono ntae, ena kata ake, nikiomonokiki to Laitoriani Enkai inyi peyie eiwuang'ie ake ninye ena keeya te nanu.” Neipang alo aing'uaa Farao neomon Olaitoriani. Neibelekeny Olaitoriani olkutati te ndoyioroto e nkolong laa ninye otudumua Olmaati neya arrumoki atua Enaiposha Nanyokie; eitu ninye eing'uari olmaati obo te nkop pooki e Misiri. Kake eitagolo Olaitoriani oltau le Farao, neitu ninye eisho nkera oo Isiraeli epuo. Neitoki Olaitoriani ajoki Musa, “Ntorioi enkaina ino ing'orie keper peyie ejing enaimin enkop e Misiri, enaimin narok ong'u.” Neitorioo Musa enkaina enye aing'orie keper nejing enaimin sapuk atua enkop e Misiri nkolong'i uni; neitu ninche eduaa maate neitu edumunye hoo ng'ae te wueji enye too nkolong'i uni; kake eeta iltung'ana loo Siraeli pooki ewang'an te ine nemanya ninche. Neitoki Farao aipot Musa nejo, “Enchom esiayia Olaitoriani; eidim sii nkera inyi aashom te nebo intae; enchoo ake metaa nkerrai inyi o nchoo inyi eing'uari.” Kake etejo Musa, “Meeta nchere peyie mincho iyiook maitayu ilasarri o nkishorot naapejori, peyie kipolosaki Olaitoriani Enkai ang. Ekepuo sii nkishu ang te nebo iyiook; meing'uari ninye oloisotoo, amu eikiya ninche peyie kipuo aaisiai Olaitoriani Enkai ang, nimikiyiolo aajo kainyoo kisiaayie Olaitoriani o metaba anaa nikibaya ine.” Kake eitagolo Olaitoriani Farao oltau, nemeisho ninche meshomo. Nejoki Farao ninye, “Shomo tung'uayioki, toduaa kewan miking'il ae kata adol enkomom ai; amu ore akenya enkolong nidol enkomom ai niye.” Nejo Musa, “Anaa enitejo! Maigil adol enkomom ino.” Nejoki Olaitoriani Musa, “Eng'or olmeitai obo layaki Farao o Misiri; ore te siadi naa keisho ntae enchom, te neisho ntae enchom naa kearaa ntae enchom katukul. Iroro naa taata metoning'o iltung'ana, peyie eomonu, pooki lee to lelatia enye, o pooki kitok ene latia enye ilgiso le nkosholai o sahabu.” Neisho Olaitoriani omom iltung'ana too nkonyek oo Lmisiri. Ore sii ele tung'ani oji Musa naa eikitok apa oleng te nkop e Misiri te dukuya ilaisiaayiak le Farao o te dukuya iltung'ana. Nejo Musa, “Nji ejo Olaitoriani: Ore te nkalo empolos e nkewarie naa Kaloolo ti atua enkop e Misiri. Ore ilkikaunot pooki ti atua enkop e Misiri naa keye, ebaiki ilo kikau le Farao otonita to lorika lenye le nkitoo o metabaiki olkikau le ina sinka natii oriong ine neidong'ieki, enkurma, lkikaunot pooki loo nkishu. Naa keaku olkiyioi sapuk ti atua enkop pooki e Misiri, leitu ae kata eaku nemeitoki ae kata aaku. Kake ore te pooki ng'ae too ltung'ana loo Siraeli aa oltung'ani aashu ing'uesi, mebuaaki ninye oldia ninche; peyie itumutumu aatayiolo nchere keor arishu Olaitoriani Ilmisiri o Siraeli. Ore kulo aisiaayiak linono pooki naa kedou aapuonu enatii, naairrugokino nanu ejo, ‘Tupuku iyie, o ltung'ana pooki likisujita iyie.’ Ore te siadi ina napuku nanu.” Neipang ninye aing'uaa Farao te ngoro sapuk. Neitoki Olaitoriani ajoki Musa, “Mikining Farao iyie; peyie eponari nena enking'asia aainei ti atua enkop e Misiri.” Neas Musa o Aron kuna pooki e nking'asia te dukuya Farao. Neitagol Olaitoriani oltau le Farao, neitu ninye eisho iltung'ana loo Siraeli meshomo aaipang te nkop enye. Nejoki Olaitoriani Musa o Aron tiatua enkop e Misiri, “Keaku ele apa te ntae enkiterunoto oo lapaitin; ekeaku olapa le dukuya lo lari te ntae. Entiaaki olturrur pooki loo Siraeli nchere ore te nkolong e tomon ele apa naa keitayu ake pooki tung'ani olkuoo le ker te risioroto oo nkajijik oo loo menye olkuoo le ker ake te nkaji; naa tenaa eikiti oleng enkaji to lkuo le ker, ore ake oltung'ani o lelatia enye otashare enkaji enye neitayu te risioroto esiana oo ltung'ana; anaa enaidim ake oltung'ani ainosa nintayuyu olkuo le ker obo. Ore ilo kuo le ker linyi enchoo metaa meeta entioto, ositima lo lari obo, nintayuyu ti atua nkerra arashu ti atua nkineji; nintaanyunyu ometabaiki enkolong e tomon o ong'uan ele apa, ina kata nayieng'ie eumata pooki o lturrur loo Siraeli ilkuoo lenye le kerra teipa. Neitayu ninche embata o sarge, nepik ntaloishin pokira are e kutuk aji o emolinka e kutuk aji enena ajijik naainosie ilkuoo le kerra. Nenya ninche nkiri ina kewarie, naatapejoki; te nebo imukateni neitu eisuijieki nenya sii mbenek naadua. Eminya ake te nena ejon arashu eitokitokieki te nkare, kake epejo endukuya enye te nebo loilelek lenyena o enkoshoke enye. Nimilekuku ake ae toki enye o mekenyu, ore pooki toki naton o mekenyu nipejoo. Naa tena oitoi inyanya; eena ntae impolosi, etii namuka nkejek inyi netii ng'udisin inyi nkaik inyi; ninyanya te naipuk. Eng'iroroto ena o Laitoriani. Amu kaim atua enkop e Misiri ina kewarie, naar metuata ilkikaunot pooki ti atua enkop e Misiri nadung'oki nanu enkiguana. Ara nanu Olaitoriani. Keaku ilo sarge olmonekie te ntae, too nkajijik nitii; naa te nadol osarge nagiroo ntae, nemetii olmeitai ojing ntae peyie emut ntae te naar enkop e Misiri. “Keaku ena olong te ntae enitumutumu aadamu, nimbung'ubung'u aitaa osirua to Laitoriani; ore ti atua ishoritin inyi pooki embung'a anaa enkitanapata oo ntarasi. “Enosa imukateni neitu eisuijieki nkolong'i naapishana; ore te nkolong e dukuya niwuang'ieng'ie enkisuijo aaitayu too nkajijik inyi, amu te nenya oltung'ani emukate naisuijo, ebaiki enkolong edukuya o metabaiki enkolong e naapishana nekepari ilo tung'ani aaitung'uaa Isiraeli. Ore te nkolong e dukuya entuum olturrur osinya; meetae esiaai naitayuni te nena olong'i; kake ina nanya pooki ng'ae ake ntobiriri. Ning'oring'oro osirua loo mukateni neitu eisuijieki, amu te ina olong apa aitayio ilororani linyi aitung'uaa enkop e Misiri: metaa embung'a ena olong ti atua iishoritin inyi pooki, anaa enkitanapata oo ntarasi. Ore to lapa le dukuya te nkolong e tomon o ong'uan o lapa te nkalo e nteipa, ninyanya imukateni neitu eisuijieki ninkoko neijia o metabaiki enkolong e tikitam o obo o lapa te nkalo e nteipa. Ore too nkolong'i naapishana enchoo metaa metumi enkisuijo too nkajijik inyi; amu te nenya oltung'ani emukate naisuijo, nekepari ilo tung'ani aitung'uaa olturrur loo Siraeli, enyor naa oldokunoti arashu oino teina kop. Minyanya pooki toki naisuijo; ore too manyishoritin inyi pooki enosa imukateni neitu eisuijieki.” Neipot Musa ilpayiani pooki loo Siraeli, nejoki ninche, “Entegelaki ate ilkuoo le kerra te risioroto oo lmareita linyi, niyieng'iyieng'e ilo kuoo le ker le ng'iroroto. Nintayuyu orridati le nkaitubului naji hisopu nilopilopiepie ilo sarge otii eng'irra, paa ieliele emolink'a oo ntaloishin pokira are te ilo sarge otii eng'ira; nemetii hoo obo linyi oipang aim kutuk aji e nkaji enye o mekenyu. Amu kegiroo Olaitoriani alo aar metuata Ilmisiri; naa ore te nedol osarge te molinka o too ntaloishin pokira e kutuk aji negiroo Olaitoriani kutuk aji nemeisho ilo arani metijing'u nkajijik inyi peyie ear ntae entuata. Embung'a ele kerreti anaa enkitanapata te ntae o too nkera inyi ntarasi. Ore kenya ake peyie ipuonunu enkop naisho ntae Olaitoriani, anaa enatejo, nimbung'ubung'u ena kisiaayiare. Ore ake peyie kijoki nkera inono, ‘Kene nyoo ena kisiaayiare?’ Tejo iyie, ‘Olasar lo Laitoriani le Pasaka, amu etogiroyie apa nkajijik oo ltung'ana loo Siraeli te Misiri apa peyie ear Lmisiri kake etapala nkajijik ang.’ ” Neirrug iltung'ana ilukuny enyeneserem. Nepuo iltung'ana loo Siraeli aas ina; anaa enaitanapa Olaitoriani Musa o Aron neiko neijia. Ore te mpolos e nkewarie near metuata Olaitoriani ilkikaunot pooki te nkop e Misiri, ebaiki ilo kikau le Farao oton to lorika lenye le nkitoo o metabaiki olkikau le ilo o ena te nkaji naenishoreki, o ilkikaunot pooki loo nkishu. Neinyototo Farao kewarie, ninye, o laisiaayiak lenyena pooki o Ilmisiri pooki; netii apa olkiyioi sapuk Misiri amu metii apa enkaji neitu eye oltung'ani obo. Neipot ninye Musa o Aron te nkewarie, nejo, “Enyeito, enchom entung'uai iltung'ana laainei, intae o ltung'ana loo Siraeli; enchom esiayia Olaitoriani, anaa apa enitejo. Ewaita nkerrai inyi o nchoo inyi anaa enitejo, enchom naa entamayianaki sii nanu.” Neipukie Ilmisiri iltung'ana, peyie earaa ninche metupuku aaing'uaa enkop te nkisarrisar amu etejo, “Kituata pooki.” Neya iltung'ana enkurma enye eton eitu eisuijiek, o ngirran naaipurjishoreki neimulumulari too nkilani enye nenap too loilila. Netaasa sii iltung'ana loo Siraeli anaa enatiaaka Musa, amu etoomonutuo ilgiso loo Lmisiri le nkosholai o le sahabu, o nkilani; neishoo Olaitoriani iltung'ana omom te dukuya Ilmisiri metaa eishoo nena naatoomunutuo. Nedupore Isiraeli Ilmisiri. Nepuo iltung'ana loo Siraeli te Rameses o metabaiki Sukot, ilewa oobaya nkalifuni ile too nkejek, metii nkituaak o nkera. Nelo sii olorora oshula te nebo ninche, o nkishu kumok oleng; o nkerrai o nchoo. Nepej ninche imukateni neitu eisuijieki enapa kurma nayautua aaitung'uaa Misiri neitu eishori metotoni, neitu sii eitobiraki ate endaa. Ore enkata natotona iltung'ana loo Siraeli te Misiri naa ilarin iip ong'uan o tomoni uni. Ore te siadi ilarin iip ong'uan o tomoni uni, te ina olong kewan, neipang aapuo ilororani pooki lo Laitoriani aaing'uaa Misiri. Enkewarie apa netagolie Olaitoriani ninche, aitupuku ninche te nkop e Misiri; metaa ore ena kewarie naa enkewarie naing'ori to Laitoriani iltung'ana pooki loo Siraeli ti atua iishoritin enye pooki. Nejoki Olaitoriani Musa o Aron, “Ena enkitanapata o sirua le Ng'iroroto: meetae oltung'ani omoni oinos ilo sirua. Kake ore pooki rrindik oinyiang'uaki too mpisai neidim ainosa te neidipi aatumurat ninye. Meinos olamutanani arashu olaisiaayiani oigeroki. Te nkaji nabo einos; minosinoso ake hoo ae kiring'o aaipang'unye ti aji; nimigiligili ake oloito lenye. Nchoo eibung ena olturrur pooki loo Siraeli. Naa te nelotu oltung'ani omoni aton te nebo ntae neyieu neitaiki Olaitoriani osirua le ng'iroroto, nchoo metumurati ilewa lenyena pooki. Kake meetae oltung'ani le memurata onya. Enkitanapata nabo ake eetae to inoti o to ltung'ani omoni oton ti atua intae.” Neiko neijia iltung'ana pooki loo Siraeli anaa enaitanapa Olaitoriani Musa o Aron, neas ninche. Ore te ina olong ake neitayu Olaitoriani iltung'ana loo Siraeli aaitung'uaa enkop e Misiri too lororani lenye. Nejoki Olaitoriani Musa, “Ntisinyakaki nanu ilkikaunot pooki; ore pooki toki naitera abol enkoshoke ti atua Siraeli te tung'ani o te ng'ues naa enaai.” Nejoki Musa iltung'ana, “Entadamu ena olong; naa ninye apa itupukunye aaing'uaa Misiri, aaing'uaa enkaji e sinkaisho, amu te ngolon e nkaina eitayio ntae Olaitoriani aaitung'uaa ene wueji; meinosi emukate naisuijieki. Ipuopuo intae ena olong to lapa le Abibu. Ore ake te neyau intae Olaitoriani atua enkop oo Lkanaani, o Ilhiti, o Ilamori, o Ilhifi o Lyebusi, apa nainosa olmumai too loo papaai linyi pee eisho intae enkop naruko kule o enaisho, nimbung'ubung'u ena kisiaayiare tele apa. Too nkolong'i naapishana, enosa imukateni neitu eisuijieki, ore te nkolong e naapishana neaku osirua to Laitoriani. Imukateni neitu eisuijieki einosi too nkolong'i naapishana; medoli emukate naisuijieki te ntae, nemedoli emukate naisuijieki te nkop inyi. Nijoki akenya olayioni lino te ina olong ‘Enkaraki e ina naaitaasa nanu Olaitoriani apa pee apuku aing'uaa Misiri.’ Naa ketiu te iyie anaa enkitoduaata te nkaina ino netiu anaa endamunoto te rishata oo nkonyek inono, pee etum enkitanapata o Laitoriani atijing'a enkutuk ino; amu te nkaina nagol kiyaua iyie Olaitoriani aitung'uaa Misiri. Metaa imbung naa ena kitanapata te nkata enye nageluno te pooki ari. “Ore akenya ti nikiyau Olaitoriani enkop oo Lkanaani, anaa enainosa olmumai te iyie o too loo papaai linyi, naa eikincho iyie. Ninteng'el iyie te nkaraki Olaitoriani nena pooki naatang'asa aabol enkoshoke. Ore ilkikaunot pooki loo nkishu inono oora ilbung'aiko, neaku ilo Laitoriani. Ore olkurrarru pooki le sikiria ong'asi aaiu, nelakuni to sitima le ker, naa te nimilaku iyie ninye niburukush emurt enye. Ore olkikau pooki loo layiok linyi nilaku. Ore te nkata nalotu te nikinkilikuan olayioni lino, ajoki, ‘Kainyoo doi eutu ena?’ Nijoki iyie ninye, ‘Te ngolon e nkaina eyaua iyiook Olaitoriani aitupuku te Misiri, aitung'uaa enkaji e sinkaisho. Amu ore apa pee eany Farao te ngolong'u eisho iyiook maape near Olaitoriani ilkikaunot pooki te nkop e Misiri, olkikau le tung'ani o le nkiteng. Metaa kapolosaki Olaitoriani ilbung'aiko pooki ootang'asa aabol enkoshoke; kake ore ilkikaunot pooki loo layiok laainei nawalu.’ Naa keaku olmishire te nkaina ino arashu te rishata oo nkonyek inono, amu te nkaina nagol eyaua iyiook Olaitoriani aitung'uaa Misiri.” Ore apa pee eisho Farao iltung'ana meshomo, neitu erikoo Olaitoriani ninche aimie nkoitoi e nkop oo Lfilisti, hoo naa ina apa nataana; amu etejo, “Mayieu neibelekenya iltung'ana te nedol olarrabal, neshuko aapuo Misiri.” Kake etorikoyie Enkai iltung'ana aitamanaa te nkoitoi o lpurkel aing'orie Enaiposha Nanyokie. Neilepu iltung'ana loo Siraeli aaipang'u te nkop e Misiri eterretenate to larrabal. Neya Musa iloik lo sesen le Yosef te nebo ninye, amu eitayio apa Yosef enkutuk neinos olmumai too ltung'ana loo Siraeli, ejo, “Kemutan intae Enkai; naa eiyaya intae iloik laainei te nebo intae aaitung'uaa Misiri.” Nedumunye ninche te Sukot neitayu ilng'oborri te Esam, te bayie o lpurkel. Nelo Olaitoriani dukuya ninche dama te nkatampoi naikununo anaa eng'ape pee erikoo ninche te nkoitoi, ore te nkewarie naa te nkima naikununo anaa eng'ape pee eitawang'aki ninche, pee etum aashom dama o kewarie. Ore ina atampoi neikununo anaa eng'ape te ndama o enkima naikununo anaa eng'ape te nkewarie neitu eiwuang te dukuya iltung'ana. Neitoki Olaitoriani ajoki Musa, “Tiaaki iltung'ana loo Siraeli metushukoto siadi aapik ilng'oborri dukuya e Pi-ha-hirot, erishata e Migdol o enaiposha, dukuya e Baal-sefon; enteshet ilng'oborri empirakinye embata e naiposha. Amu ejo ninye Farao ti alo iltung'ana loo Siraeli, ‘Eibookoki ninche atua ina kop eibooyie ninche olpurkel.’ Naa kaitagol nanu oltau le Farao, naa kesujaa ninche natum enkisisa te Farao o te njore enye pooki; naa keyiolou Ilmisiri aajo ara nanu Olaitoriani.” Neiko ninche neijia. Ore ake pee elikini olaiguanani le Misiri aajoki eisika iltung'ana, neibelekenya endamunoto e Farao o enoo laisiaayiak lenyena ti alo iltung'ana, nejo ninche, “Kainyoo ena nikitaasa nchere kinchoo Siraeli meshomo meekure esiaai iyiook?” Neitobir ninye engarri enye oo mbartan nedumu enjore enye, neya ingarrin oo mbartan naageluno iip ile o kulie garrin oo mbartan e Misiri ekedito ilkituaak ninche pooki. Neitagol Olaitoriani oltau le Farao olaiguanani le Misiri nesujaa ninye iltung'ana loo Siraeli ooisula aapuku te ng'olong'u. Nesujaa Ilmisiri ninche, mbartan pooki e Farao, o ngarrin oo mbartan o lakedok loo mbartan o enjore enye, neinepu ninche too lng'oborri te mbata e naiposha, te mbata e Pi-ha-hirot, te dukuya e Baal-sefon. Ore ake pee enyiku Farao, neraposhu iltung'ana loo Siraeli nkonyek enye, naa ng'ura, epuonu Ilmisiri te siadi ninche; neureishoyu oleng. Neishiraki iltung'ana loo Siraeli Olaitoriani; nejoki ninche Musa, “Kenkaraki nemetii nkuraren Misiri pee iyaua iyiook matuata to lpurkel? Kainyoo intaasa iyiook iyaua iyiook aitung'uaa Misiri? Aime ena apa kitiaakita iyie te Misiri, ‘Tapala iyiook naa nchoo maisiaayia Ilmisiri?’ Amu enaikash apa te iyiook ti nikisiai Ilmisiri alang ti nikiye to lpurkel.” Nejoki Musa iltung'ana, “Emiureishoyu, entasheito tukul, metii olng'ash pee idolidolo enjeunoto o Laitoriani, naitobiraki ninye ntae taata; amu ore kulo Misiri idolitata taata, mintokiki ae kata aadol. Kemitu intae Olaitoriani, metaa entirring'ata.” Nejoki Olaitoriani Musa, “Kainyoo pee kinchiraki nanu? Tiaaki iltung'ana loo Siraeli meshomo dukuya. Tudumu ilepie eng'udi ino, nintorioo enkaina ino te shumata enaiposha tooro, pee etum iltung'ana loo Siraeli aashom te nkop natoyio te mpolos e naiposha. Naa kaitagol iltauja loo Lmisiri pee epuo atua aasujaa ninche, naa katum enkitoo te Farao o te njore enye pooki, too ngarrin oo mbartan oo too lakedok loo mbartan. Neyiolou Ilmisiri aajo, ara nanu Olaitoriani, te naidip nanu anoto enkitoo te Farao, too ngarrin oo mbartan o too lakedok loo mbartan.” Neitoki olmalaika le Nkai apa orikito te dukuya e njore oo Siraeli aiwuang'a nelo siadi ninche; ore ina atampoi naikununo anaa eng'ape neiwuang'a te dukuya ninche neitashe te siadi ninche. Alotu te rishata e njore e Misiri o enjore oo Siraeli. Netii ina atampoi o enaimin; nelusoo enkewarie meetae enaewuo anyikaki enkae enkewarie pooki. Neitorioo Musa enkaina enye te shumata enaiposha; nereu Olaitoriani enaiposha siadi to siwuo ogol le nkilepunoto e nkolong e nkewarie pooki, neitaa enaiposha enkop natoyio, neoro nkariak. Nepuo iltung'ana loo Siraeli ti atua empolos e naiposha aaim enkop natoyio, etaa nkariak esuntai te ninche te nkaina e tatene o te kedienye. Nesujaa Ilmisiri, nepuo atua emirta ninche nepuo empolos e naiposha, mbartan pooki e Farao, ngarrin oo mbartan enyena, o lakedok lenyena loo mbartan. Ore tadekenya enasirie neing'or Olaitoriani ti atua ina kima naikununo anaa eng'ape o ina atampoi enjore o Lmisiri neisirng'ang'ie enjore oo Lmisiri, aun nkejek oo ngarrin enye metupurpurrito te lototo; nejo Ilmisiri, “Emaisika te dukuya Siraeli; amu kemitu ninche Olaitoriani aing'arraki Ilmisiri.” Neitoki Olaitoriani ajoki Musa, “Ntorioi enkaina ino te shumata enaiposha, pee eshukunye enkare shumata Ilmisiri, o shumata ingarrin enye oo mbartan o shumata ilakedok lenye loo mbartan.” Neitorioo Musa enkaina enye te shumata enaiposha, neshukunye enaiposha enoshi ake kirragata enye emanaa enkakenya; nejo Ilmisiri maisika aailany enkare kake eibooko ninche Olaitoriani empolos enaiposha. Neshukunye inkariak neimisie ingarrin oo mbartan, o lakedok loo mbartan o ina jore pooki e Farao, natusujaka ninche atua enaiposha; eitu ninye eleku obo lenye. Kake eshomo iltung'ana loo Siraeli te nkop natoyio te mpolos e naiposha, etaa nkariak esuntai te ninche te nkaina enye e tatene o te kedienye. Neiko neijia Olaitoriani aitajeu Isiraeli ina olong too nkaik oo Lmisiri; nedol Isiraeli Ilmisiri etuata te mbata e naiposha. Nedol Isiraeli esiaai sapuk naitaasa Olaitoriani Ilmisiri, neureyu iltung'ana Olaitoriani; neiruk ninche Olaitoriani o olaisiaayiani lenye Musa. Neranyaki Musa o ltung'ana loo Siraeli Olaitoriani ele sinkolio ejo, “Karanyaki nanu Olaitoriani, amu etimirishe oleng; ore embarta o lakedoni lenye etanang'aka atua enaiposha. Olaitoriani engolon ai naa osinkolio lai, netaa sii enjeunoto ai; Enkai ai ena naa kaisis ninye, Enkai e papa lai, naa karrep ninye. Ore Olaitoriani naa oltung'ani lo larrabal; keji enkarna enye Olaitoriani. Etanang'aka ingarrin oo mbartan e Farao o enjore enye atua enaiposha; ore ilkituaak lenyena gelunot eimiso te Enaiposha Nanyokie. Eimulumulaitie ninche inkariak; nepuo ninche aadoiki atua eng'uton anaa osoit. Ore enkaina e tatene o Laitoriani, keitoreisho te ngolon, ore enkaina e tatene o Laitoriani, kegiligili olmang'atinta. Ore te ngolon e nkitoo ino, nimir lelo liking'orunore; irriwaa engoro ino neyupuyupoki ninche anaa olkujita. Ore te nkutata oo nkumeishin inono neiturrurro nkariak, neitashe inkariak aarupa, netoyu enegut ti atua enaiposha. Etejo olmang'atinta, ‘Ekasujaa, ekainepu; naor nanu iyarunot enye naya pooki toki nayieu; nashutu nanu olalem lai, near enkaina ai ninche metuata.’ Itukuta te nkijape ino, neitemoo ninche enaiposha; neimis anaa osoit ti atua inkariak kituaak. Kaing'ae likinyaanyukie, iyie Olaitoriani, ti atua inkaitin? Kaing'ae otiu anaa iyie, kitok te sinyatisho, Olourei too nkiaasin e nkitoo, oas isapuki e nking'asia. Intorioyie iyie enkaina ino e tatene, neijoo ninche enkop. Te nyorrata ino osotua itoriko lelo tung'ana litokordua, ituutayie iyie te ngolon ino meshomo emanyisho ino sinyati. Etoning'o iloreren, neikirikira ninche; eibung'a emion lelo ootoni te Filistia. Eiputukunyo ilaiguanak le Edom; eibung'a ilarikok le Moabu olokirikiri; Etalepori to lkirutoto lelo pooki oomanya Kanaan. Nejing ninche olkirutoto o enkuretisho; te nkaraki enkitoo e nkaina ino, eitirring'ate ninche anaa osoit, o metaba anaa nelusoo iltung'ana linono, Olaitoriani, o metaba anaa nelusoo lelo apa linyiang'ua. Intijing'u iyie ninche atua, niun ninche te nchumata o ldoinyo lino, ine wueji, Olaitoriani, nintobira te nkaraki emanyisho ino, ine nesinya, Olaitoriani, nintobira iyie te nkaina ino. Ekeitoreisho Olaitoriani ntarasi o ntarasi.” Amu ore apa pee epuo mbartan e Farao o ngarrin enyena oo mbartan o lakedok lenyena loo mbartan atua enaiposha, neyau Olaitoriani ashuku inkariak e naiposha shumata ninche; kake eshomo iltung'ana loo Siraeli te nkop natoyio te mpolos e naiposha. Neitoki Miriam, ina oiboni, anashe e Aron, adumu entampuri te nkaina enye; neipang inkituaak pooki aasuj ninye too ntampurini eipidipid aaranyisho. Neranyaki Miriam ninche ejo: “Entaranyaki Olaitoriani amu etimirishe te nkitoo; ore embarta o ilo okedito netanang'aka ninye atua enaiposha.” Nerikoo Musa Isiraeli dukuya aaing'uaa Enaiposha Nanyokie, nepuo olpurkel le Shuri; nepuo nkolong'i uni to lpurkel neitu etum enkare. Ore ake pee epuonu Mara, neitu eidim aatook enkare e Mara amu kedua, neaku etejoki ine Mara. Neing'unyung'unyaki iltung'ana Musa, ejo, “Kainyoo kiok?” Neishiraki ninye Olaitoriani; neitodol ninye Olaitoriani olchani, nenang'aki atua enkare nemelonu enkare. Neisho ninche Olaitoriani nkitanapat teine naatum aaishuyie, netem ninche te ine ejo, “Tinining'ining'i intae oltoilo lo Laitoriani Enkai inyi, niasiasa ina sidai too nkonyek enyena, nining'ining'i nkitanapat enyena nimbung'ubung'u pooki, nemapik hoo nabo oo nkeyaitin ntae apa natipika Ilmisiri; amu ara nanu Olaitoriani oishiunye intae.” Neitoki ninche aapuonu Elim, ine apa netii nchorroi tomon o are e nkare, o ltuka ntomoni naapishana, neitayu ilng'oborri te ine te mbata e nkare. Nedumunye ninche aapuo aaing'uaa Elim, nepuonu olturrur pooki loo ltung'ana loo Siraeli olpurkel le Sini, otii erishata e Elim o Sinai, te nkolong e tomon o imiet o lapa li are eidipa aashom te nkop e Misiri. Neing'unyung'unyaki olturrur pooki loo ltung'ana le Misiri Musa o Aron te ilo purkel, nejoki ninche, “Enaikash apa tenaa eikituata te nkaina o Laitoriani te nkop e Misiri, ina kata apa kitoni te mbata oo motio oo nkiri nikinya imukateni aaraposho; amu impang'unye intae iyiook aayau ele purkel, aar ena umata pooki te sumash.” Neitoki Olaitoriani ajoki Musa, “Ng'ura, ekashau imukateni naaing'uaa shumata te nkaraki intae; naa keipang'u iltung'ana aaiturrurru endaa naidip ina olong, pee atem ninche tenaa keibung nkitanapat aainei anaa emeibung'. Ore te nkolong e ile eitobir nena naayau atua aji naa keaku katitin are eiturrur anaake.” Nejoki Musa o Aron iltung'ana pooki loo siraeli, “Ore teipa niyiolouu aajo Olaitoriani apa oyaua intae aitung'uaa enkop e Misiri; ore tadekenya nidolidolo enkitoo o Laitoriani amu etoning'o ninye inking'unyung'unyat inyi ing'unyung'unyakiki Olaitoriani. Amu eikira iyiook nyoo pee ing'unyung'unyakiki iyiook?” Nejo Musa, “Te neisho intae Olaitoriani teipa inkiri ninosinoso neisho intae tadekenya imukateni aiputaki, amu etoning'o Olaitoriani inking'unyung'unyakinot inyi ning'unyung'unyakita ninye. Eikira iyook nyoo? Ore enking'unyung'uny inyi neme enaang kake eno Laitoriani.” Nejoki Musa Aron, “Tiaaki olturrur pooki loo ltung'ana loo Siraeli, ‘Entinyiku wootu dukuya Olaitoriani, amu etoning'o ninye inking'unyung'unyat inyi.’ ” Ore anaa enairorie Aron olturrur pooki loo ltung'ana loo Siraeli, neing'or enkalo o lpurkel, ng'ura, neliooyu enkitoo o Laitoriani te nkatampoi. Nejoki Olaitoriani Musa, “Atoning'o inking'unyung'unyat oo ltung'ana loo Siraeli; tiaaki ninche, ‘Ore te nteipa ninosinoso inkiri, ore tadekenya neiputakini intae imukateni, ee iyiolouu aajo ara nanu Olaitoriani Enkai inyi.’ ” Ore teipa nepuonu nkurlen neiput lelo ng'oborri; ore tadekenya neirrag enkolioolio aman lelo ng'oborri. Ore ake pee edumunye enkolioolio te nkop netii enkoriong e ilo purkel entoki naibor, napurupurana natii oriong enkop, (naikununo anaa soito le nchan). Ore ake pee edol iltung'ana loo Siraeli nejokino maate, “Kainyoo ena?” Amu meyiolo apa ninche aajo kainyoo ina. Nejoki Musa ninche, “Emukate naa ninye eishoo Olaitoriani intae enosa. Ena eitanapishe Olaitoriani: ‘Entasotu, pooki tung'ani te ntae, anaa enaidim ainosa; ewaita emborei emoti naji omer, te risioroto e siana oo ltung'ana naba anaa enaata ake oltung'ani to lng'obor lenye.’ ” Neas ina iltung'ana loo Siraeli, nesotu ilkulikae nkumok, nesotu kulikae nkuti. Kake ore ake pee etem te mborei e ina moti naji omer, ore ilo apa otasotuo nkumok nemeeta entoki natelekua, ore ilo otasotuo nkuti netaraposhe; etasotuo ake oltung'ani enaba anaa enaidim ainosa. Nejoki Musa ninche, “Emincho oltung'ani eshum o mekenyu.” Kake eitu ninche ening Musa; etelekutua embata o mekenyiki neiu ilkuru neng'ueyu; negorokino Musa ninche. Nesotu ninche anaake tadekenya, oltung'ani ake anaa enaidim ainosa, kake ore ake pee eirowuaju enkolong neshola. Ore te nkolong e ile nesotu imukateni katitin are oo noshi ake, iyierat are ake oltung'ani; ore ake pee epuonu ilarikok pooki lo lturrur aaliki Musa, nejoki ninye ninche, “Ena eitanapishe Olaitoriani: ‘Enkolong e nkiyeng'iyeng taisere, sabato sinyati o Laitoriani; entapej ina nipejipeje niyieriyiere ina niyieriyiere; ore ina pooki naleku nirragiegie o mekenyu.’ ” Neirragie ninche o metaba anaa nekenyu, anaa enatasayiaka Musa ninche, neitu eng'uoyu neitu ejing ilkuru. Nejo Musa “Enosa taata, amu ore taata naa sabato o Laitoriani, mitumutumu taata ti ong'ata. Too nkolong'i ile isotutu; kake ore te nkolong e naapishana aa ene sabato nemetii hoo toki.” Ore te nkolong e naapishana nepuo kulikae tung'ana aasotu neitu etum hoo toki. Neitoki Olaitoriani ajoki Musa, “Ianyianya akenya imbungubungu nkitanapat o nkirorot aainei o anu? Toduaa! Eishoo intae Olaitoriani sabato, metaa ore te nkolong e ile neisho intae imukateni oo nkolong'i are; totona pooki tung'ani te ntae te wueji enye, emincho oltung'ani eipang alo te wueji enye te nkolong e naapishana.” Neyeng'iyeng'a iltung'ana te nkolong e naapishana. Nejo enkaji oo Siraeli enkarna e ina daa mana; neikununo anaa ilanterera ooibor, netiu emeloni enye anaa enoo nkaukau naaitobiraki te naisho. Nejo Musa, “Ena eitanapishe Olaitoriani: ‘Enchoo emborei e moti oo nkulukuok naji omer eshumi ti atua iishoritin inyi pooki, pee etum aatodol ina mukate naitotiyie nanu intae to lpurkel, inakata apa pee aitupuku intae aitung'uaa enkop e Misiri.’ ” Nejoki Musa Aron, “Tudumu eng'irra tipika emborei e omer e mana atua nirragie te dukuya o Laitoriani, neshumi tiatua iishoritin inyi.” Anaa enaitanapa Olaitoriani Musa, neiko neijia Aron airragie te dukuya Enchakenisho, metushumi. Neinos iltung'ana loo Siraeli mana ilarin artam, o metaba anaa nepuonu olpolosie le nkop e Kanaan. (Ore omer naa erubata e tomon e efa.) Nepuo olturrur pooki loo Siraeli to lpurkel le Sini too lkirragarien, anaa enaitanapa Olaitoriani, neitayu ilng'oborri te Refidim; kake metii apa enkare naok iltung'ana. Neilepilepaki iltung'ana Musa, nejo, “Nchoo iyiook enkare nikiok.” Nejoki Musa ninche, “Kainyoo pee kilepilepakiki nanu? Kainyoo pee itemiteme Olaitoriani?” Kake etotiro iltung'ana enkure oleng, neing'unyung'unyaki iltung'ana Musa, nejo, “Kainyoo apa pee iyaua iyiook aaitung'uaa Misiri, nilotu aar iyiook matuata o nkera ang o nkishu ang te nkure?” Neishiraki Musa Olaitoriani nejo, “Kaa aitaas kulo tung'ana? Etaa ninche kejo pee aanang too soito.” Nejoki Olaitoriani Musa, “Togiroi iltung'ana te dukuya, nishoroo te nebo iyie embata oo lpayiani loo Siraeli; niya te nkaina ino ina ng'udi apa nitooshie olkeju le Nail, nilo. Ng'ura kalo nanu aitashe te dukuya iyie te idie te nchumata e ndapidapoi te Horeb, niosh iyie ina dapidapoi, naa kepuku enkare ti atua ninye, pee etum iltung'ana aatook.” Neas Musa ina te dukuya ilpayiani loo Siraeli. Nejo ninye enkarna eine wueji Masa o Meriba, te nkaraki enkilepilep oo ltung'ana loo Siraeli, o enkaraki natetema ninche Olaitoriani ejo. “Ketii Olaitoriani te nebo iyiook arashu metii?” Neitoki Amalek alotu nearare Isiraeli te Refidim. Nejoki Musa Yoshua, “Tegelaki iyiook ilewa, nimpang'ipang'a aapuo, entaarata o Amalek; ore taisere naitashe nanu te nchumata e ndoinyo aata ina ng'udi e Nkai te nkaina ai.” Neas Yoshua enatiaaka Musa, nearare Amalek; nelo Musa o Aron o Huri enchumata e ndoinyo. Ore ake te neilepie Musa enkaina, nemirisho Isiraeli, ore ake te neitadou enkaina enye, nemirisho Ilmaleki. Kake etanaurate inkaik e Musa, neyau ninche osoit nepik abori ninye, netonie ninye nedumu Aron o Huri inkaik enyena aailepie, obo ake te nchoto nabo o likae ti ae shoto; metaa keitirring'a eitoriori inkaik enyena o metadoi enkolong. Nemir Yoshua aitadoyio Ilmaleki o ltung'ana lenyena neshurt te nepi o lalem. Nejoki Olaitoriani Musa, “Ing'ero ena te mbuku metaa endamunoto niliki Yoshua ajoki ekamut nanu aimisie endamunoto oo Ilmaleki aiwuang'ie ti abori keper.” Neshetu Musa olperere lo lasar nejo enkarna enye, Olaitoriani ninye enanka ai ejo, “Einosa Olaitoriani olmumai nchere kearare ninye Ilmaleki ebaiki eishoi o eishoi.” Nening Yesero, ilo apolosani le Midian, olaputani le Musa, nena pooki naaitaasa Enkai Musa o Siraeli iltung'ana lenyena, eneikunuwua Olaitoriani eitayu Isiraeli aitung'uaa Misiri. Nelotu ninye enetii Musa, neshoru te nebo ninye Sipora, enkitok e Musa natung'uayioki apa te siadi, o Gerishom o Eliesa, ilayiok lenyena pokira oare. (Etejo Musa, “Ataa apa olomoni te nkop oo le eiking'a neaku etejo olayioni obo Gerishom.”) Ore enkarna o likae naa Eliesa. (Amu etejo, “Enkai apa e papa lai ereretoto ai, naaitajeu nanu to lalem le Farao.”) Nelotu Yesero, olaputani le Musa, o layiok lenyena o enkitok enye enetii Musa to lpurkel te ine apa netipika ilng'oborri to ldoinyo. Ore ake pee ejoki oltung'ani obo Musa, “Elotu olaputani lino, Yesero, enitii tenebo enkitok ino o layiok lenyena pokira oare,” neipang Musa alo anang'are olaputani lenye, neirrugokino neng'utut ninye; neikilikuana maate ilomon lenye nejing ninche atua olng'obor. Neliki Musa olaputani lenye nena pooki naaitaasa Olaitoriani Farao o Ilmisiri te nkaraki Isiraeli, o sinaitin oogol pooki ooetuo shumata ninche te nkoitoi. Neng'idayu Yesero te pooki sidai naitaasa Olaitoriani Isiraeli, te ina nayaua ninche aitung'uaa enkaina oo Lmisiri. Nejo Yesero, “Meisisi Olaitoriani, laa ninye oitajeu intae aitung'uaa enkaina oo Lmisiri neitung'uaa enkaina e Farao. Ayiolo taata ajo eikitok Olaitoriani alang nkaitin pooki, amu eyaua iltung'ana aitung'uaa abori enkaina oo Lmisiri ina kata apa eisikong ninche.” Neitayu Yesero, olaputani le Musa, enkishoroto olasar opejori o nkishorot naapolosakini Enkai, nelotu Aron te nebo ilpayiani pooki loo Siraeli aanya endaa te nebo olaputani le Musa te dukuya Enkai. Ore ake pee ekenyu neton Musa arish iltung'ana, neitashe iltung'ana aaman Musa ebaiki tadekenya o metaa teipa. Ore ake pee edol olaputani le Musa nena pooki naasita te nkaraki iltung'ana, nejo, “Kainyoo ena niasita te nkaraki iltung'ana? Kainyoo pee iton openy, nikintashe aaman iltung'ana pooki ebaiki tadekenya o metaa teipa?” Nejoki Musa olaputani lenye, “Enkaraki napuonu iltung'ana enatii aaikilikuan mbaa e Nkai; ore te neeta enchankar, nepuonu enatii narish nanu oltung'ani o ilo le latia enye, naitayiolo nanu ninche nkitanapat e Nkai o nena naatejo ninye.” Nejoki olaputani le Musa ninye, “Ore ena niasita ne me sidai. Ore iyie o ltung'ana liboitare iariara ate, amu keiroishi ena te iyie; nimindim ataasa openy. Toning'o naa enaajoki amu kaaikok, naa, keaku Enkai te nebo iyie! Taa itii dukuya Enkai; ninteng'en ninche nkitanapat o naatejo, nintayiolo ninche enkoitoi napuoyie o enaishiaakino neas. Ore ake tegelu iltung'ana oata enkidimata too ltung'ana pooki, lelo ooure Enkai, iltung'ana ooisiligayu neiba eropare; nipik kulo payiani shumata iltung'ana aitaa ilarikok loo nkalifuni, loo maa iip, loo moo onom o loo maa tomon. Nincho ninche meiguenare iltung'ana nkatitin pooki; ore pooki bae sapuk neyau enitii kake ore embae kiti nedung oopeny, pee eleleku te iyie nenap sii ninche olola te nebo iyie. Te nias ena, anaa enikirikoo Enkai, naa ina kata ibikoo, nepuo sii kulo tung'ana pooki ewueji enye te seriani.” Nening Musa enkikoo o laputani lenye neas nena pooki naatejo ninye. Negelu Musa iltung'ana oata enkidimata ti atua Siraeli pooki, neitaa ninche ilukuny oo ltung'ana, ilaitoriak loo nkalifuni, loo maa iip, loo moo onom o loo maa tomon. Neiguenare ninche iltung'ana nkatitin pooki; ore ilomon oogol neyaki ninche Musa, kake ore embae pooki kiti nedung oopeny. Neisho Musa olaputani lenye meshomo, neibung ninye enkoitoi alo enkop enye. Ore te nkolong e dukuya olapa li okuni anaa pee epuo iltung'ana loo Siraeli te nkop e Misiri, ore ina olong nepuonu olpurkel le Sinai. Ore pee edumunye te Refidim aapuonu olpurkel le Sinai neitayu ilng'oborri to lpurkel; ore te ine nepik Isiraeli ilng'oborri dukuya o ldoinyo. Neked Musa alo enetii Enkai, neipot ninye Olaitoriani to ldoinyo, ejo, “Ena iyie ilo ajoki enkaji e Yakobo, niliki iltung'ana loo Siraeli: ajoki, Itoduaa intae enaikuna Ilmisiri, ina natanapa nanu intae too naipuko o lkurragos nayaki intae kewan ai. Ore naa taata tinining'ining'i oltoilo lai nimbung'ubung'u nkitanapat o sotua lai, niaakuku iltung'ana laainei tukul ti atua iltung'ana pooki; amu ore enkop pooki naa enaai, naa iakuku intae te nanu enkitoria oo lapolosak o losho osinya. Kulo ninche irorei lilo ajoki nkera e Israel.” Nelotu Musa neipot lelo payiani loo ltung'ana, neibalie te dukuya ninche kulo rorei pooki ooitanapa Olaitoriani ninye. Newal iltung'ana pooki te nebo nejo, “Ore nena pooki naatejo Olaitoriani eikiaas.” Nelikioo Musa irorei loo ltung'ana to Laitoriani. Nejoki Olaitoriani Musa, “Ng'ura, kalotu nanu te nkatampoi nairrusha, pee etum iltung'ana aatoning te naairorie iyie, pee kitum sii aairuko ntarasi.” Neitoki Musa aliki Olaitoriani irorei loo ltung'ana. Nejoki Olaitoriani Musa, “Shomo enetii iltung'ana nintisiny ninche taata o taisere, nincho ninche meisuja inkilani enye, nerretena te nkolong e uni; amu ore te nkolong e uni nelotu Olaitoriani adou enchumata o ldoinyo le Sinai metoduaa iltung'ana. Nipikaki iltung'ana olpolosie aitamanaa, ijo, ‘Entodol ake mipuopuo shumata o ldoinyo arashu iseyieyie olpolosie lenye; ore pooki ng'ae ororo oldoinyo neari metua. Nemeetae enkaina naiseyie ninye kake kenang'i too soito arashu eng'ori, aa eng'ues arashu oltung'ani, melo ninye eishu.’ Ore pee eru entarumpeta ayiataa, naa keilepu ninche aapuonu oldoinyo.” Nedou Musa to ldoinyo alotu enetii iltung'ana, neitisiny ninye iltung'ana neisuj ninche inkilani enye. Nejoki ninye iltung'ana, “Enterretenata te nkolong e uni, nimipuopuo aanyikaki nkituaak.” Ore takedenya te nkolong e uni, netii ndarat o nkiwuang'at, o enkatampoi nairrusha e nchumata oldoinyio, o endarata sapuk e ntarumpeta, o metaa einkirikirate iltung'ana pooki ootii ilng'oborri. Neyau Musa iltung'ana aitung'uaa ilng'oborri meetu aatumore Enkai; neitashe ninche te ntonata o ldoinyo. Neimulumul oldoinyo le Sinai empuruo, amu etadoikio Olaitoriani enchumata enye te nkima, neilep empuruo enye anaa empuruo o lkokuet, neikirikira oldoinyo pooki oleng. Naa ore anaa enadaru embuakunoto e ntarumpeta aponari, neiro Musa, newaliki ninye Enkai te ndarata. Nelotu Olaitoriani adoiki oldoinyo le Sinai, entopij o ldoinyo; neipot Olaitoriani Musa meshomo entopij o ldoinyo, neilep Musa alo. Nejoki Olaitoriani Musa, “Tadoi shomo inkoo iltung'ana, melang'u ake olpolosie memuta ake ilkumok lenye. Nchoo sii lelo apolosak oonyikaki Olaitoriani eitisiny ate, pee maitame ake ninche.” Nejoki Musa Olaitoriani, “Mepuonu iltung'ana aailepu oldoinyo le Sinai; amu iyie enkorrok ino oitanapa iyiook, ajo, ‘Entayu ilpolosien to ldoinyo, nintisinyinyi ninye.’ ” Nejoki Olaitoriani ninye “Tadoi shomo pee ilepu ayau Aron te nebo iyie; kake mincho ilapolosak o ltung'ana elang'u olpolosie aailepu enetii Olaitoriani menang'are ake Olaitoriani ninche.” Nelo Musa adoyio enetii iltung'ana neliki ninche. Neiro Olaitoriani kulo rorei pooki ajo, “Ara nanu Olaitoriani Enkai ino, ilo likiyau aitung'uaa enkop e Misiri, aitung'uaa enkaji e sinkaisho. Miaata ake kulie aitin te dukuya nanu. Mintobiraki kewan enkitanyaanyukoto nagueta, arashu ae nanyaanyukie ae toki te shumata te keper arashu enatii abori enkop, arashu enatii atua tiabori enkop. Mirrugokino ninche arashu isiaai ninche; amu ore nanu Olaitoriani Enkai ino ara Enkai olom, naitusuj nkera nkitarruorrot oo loo menye o metabaiki eishoi e uni o eni ong'uan e lelo laaiba nanu, kake kaitodolu enyorrata nauno too nkalifuni e lelo laanyor nanu neibung nkitanapat aainei. “Mimpot aasishore enkarna o Laitoriani Enkai ino pesho amu meikenaa Olaitoriani ajo meeta enkitarruoroto ilo oipot enkarna enye pesho. “Tadamu enkolong e Sabato, inchoo eaku sinyati. Too nkolong'i ile taasisho, nias isiaaitin inono pooki; kake ore te nkolong e naapishana naa sabato to Laitoriani Enkai ino; ore te ina olong nimiaas hoo ae siaai, iyie arashu olayioni lino, arashu entito ino, o sinka lino lee, arashu esinka ino, arashu inkishu inono, arashu olomoni otii atua enkang ino. Amu too nkolong'i ile eitobira Olaitoriani shumata o enkop, o enaiposha, o nena pooki naatii atua ninche, neyeng'iyeng'a te nkolong e naapishana. Metaa etamayiana Olaitoriani enkolong e naapishana neitaa sinyati. “Iyanyita minyi o ng'utunyi pee eaku inkolong'i inono kumok te ina kop nikincho Olaitoriani Enkai ino. “Miar metua. “Miloloito. “Mipurrisho. “Minteeniki ilo le latia ino elejare. “Ming'uar enkaji e ilo le latia ino; ming'uar enkitok e ilo le latia ino, arashu osinka lenye, arashu esinka enye, arashu olkiteng lenye, arashu osikiria lenye, arashu hoo ae toki ole latia ino.” Ore ake pee ening iltung'ana pooki ndarat nedol inkiwuang'at, o embuakunoto e ntarumpeta o empuruo to ldoinyo, neirut iltung'ana neikirikira, nelamari aaitashe tenelakua. Nejoki ninche Musa, “Irorie iyie iyiook, amu eikining; kake nchoo metaa mme Enkai nairorie iyiook, mikiye ake.” Nejoki Musa iltung'ana, “Emiureshoyu, amu keewuo ake Enkai atem intae, pee aa ore euriata enye nelotu dukuya nkonyek inyi, pee miasiasa ake ing'ok.” Nelamari iltung'ana aaitashe te nelakua, etaa kenyikaki Musa ina aimin nairrusha te ine netii Enkai. Nejoki Olaitoriani Musa, “Ena tiaaki iltung'ana loo Siraeli: ‘Itoduaakita ntae ate nchere airorie nanu intae atii keper. Mintayuyu nkaitin e nkosholai pee eaku te nebo nanu, nimintaikiki sii ate nkaitin e sahabu. Olperere le nkulupuoni ninye kintaikiki nanu nikipolosakiki te nchumata enye ilasarri linyi oo pejori o lasarri linyi le seriani; enker inyi o lkiteng linyi. Ore pooki wueji nagelu metadamunyeki enkarna ai naa kalotu enitii namayian intae. Naa ti nikintaikiki intae nanu olperere lo lasar loo soito, mishetutu too soito oogueta, amu ti niguetiguete te ntolu nisarkionienie. Nimikedikede too nkedeta olperere lai lo lasar, pee mimbalayuyu nchere michopopo.’ “Kuna ninche nkitanapat nipik dukuya ninche. Ti ninyiang'u orrindik loo Lhebrania, neasisho ninye ilarin ile, ore to lari liopishana neipang ninye alo elakuno, nemelak toki. Tenaa keewuo apa aa ninye ake, nelo ninye aa ninye ake; te neewuo apa eyamishe nelo enkitok enye te nebo ninye. Te neishoo apa olkitok lenye enkitok neiki ninye ilayiok arashu ntoyie, neaku enkitok o nkera enyena ino lkitok lenye nelo ninye openy. Kake te neibalunye orrindik ajo, ‘Kanyor olkitok lai, o enkitok ai, o nkera aainei; malo nanu alakunoyu,’ neyau olkitok lenye enetii Enkai, neyau ninye kutuk aji arashu ntaloishin e kutuk aji neud olkitok lenye enkiok enye to ltidu; neisiaai ninye te nkishui pooki. “Te nemir oltung'ani entito enye aitaa errindik nemelo ae kata anaa enapuo irrindiki lewa. Te nemeitiship olkitok lenye, laa ninye otisiraka kewan, neisho ninye meinyiang'uni ninye, meeta ninye esipata namirakinye iltung'ana loo loreren amu etonyorra apa ninye te sunkureisho. Te nesiraki oltung'ani olayioni lenye entito rrindik neiko ninye anaa entito enye. Te neyamaki kewan enkitok e are nemeitong'or endaa enye, o nkilani enyena o enjung'ore e ina kitok botor. Naa te nemeitaas olee ninye kuna pokira uni, nelo ninye aing'uaa ninye pesho, metii elaata oo mpisai. “Ore pooki ng'ae oosh oltung'ani near metua, neari metua. Kake te neitu eirrag arreshu ninye, kake Enkai ake natorikoyie metabatatakinoyu inkaik enyena, naa kegelaki intae ewueji naa ninye eisikaki. Kake te neotiki oltung'ani aitirraki olikae pee ear metua, ewaita intae ninye aaitung'uaa olperere lai pee eye. “Ore pooki ng'ae oosh menye arashu ng'otonye neari metua. “Ore pooki ng'ae opurroo oltung'ani, pee emir arashu etumi ninye ti atua imasaa enyena, neari metua. “Ore pooki ng'ae odek menye arashu ng'otonye neari metua. “Te neishankarra iltung'ana neosh obo olikae to soit arashu te nkaina neitu eye oltung'ani eirraga te rruat, ore pee edumunye ilo nelo te ntirma, ore ilo otoosho ninye nelakuni; kake elak ina kata naiturrayie neing'or ninye o meishiu alaari. “Te nedumu oltung'ani eng'udi neosh orrindik lenye, aa olee arashu enkitok, neye orrindik te ine, neitamei ilo tung'ani. Kake te neitu eye orrindik te nkolong nabo arashu too nkolong'i are, nemeitamei amu ore orrindik naa impisai enyena. “Te neara iltung'ana nepik entuaa olbae o metapololoyu, nemetii ae torroni natusuja, ore ilo otipika ninye olbae neitalaki te risioroto e nkitalakunoto naitalak ninye olpayian le ina kitok; nelak anaa enanyorraa iladung'ok le nkiguana. Te nesuju ae torroni neitalakuni enkishui te nkishui, enkong'u te nkong'u, olalae to lalae, enkaina te nkaina, enkeju te nkeju, enkinosata e nkima te nkinosata e nkima, olbae to lbae, olkordata to lkordata. “Te neosh oltung'ani enkong'u o rrindik lenye, olee arashu enkitok, neitarruoo, neisho ninye ilo rrindik meshomo te nkaraki enkong'u. Te neitayu olalae lo rrindik lenye, olee arashu enkitok, nelo ilo rrindik te nkaraki olalae. “Te near olkiteng oltung'ani lee arashu enkitok metua, neari ilo kiteng too soito metua; nemenyae inkiri enyena; ore olopeny ilo kiteng nelakuni. Kake te netamoo ilo kiteng ear iltung'ana, neikooki olopeny neany ening, near ilo kiteng metua olee arashu enkitok, neari ilo kiteng too soito metua, neari sii olopeny metua. Naa te neigeroki metawalu enkishui enye nelak ninye meitajeu enkishui enye esiana pooki naba anaa enatudung'okoki. Te near olkiteng olayioni le likae tung'ani arashu entito, neiguanareki olopeny te risioroto ena kitanapata nabo. “Te near olkiteng orrindik metua, olee arashu enkitok, neisho olopeny olkitok le ilo rrindiki shekeli tomoni uni e nkosholai. Neari ilo kiteng too soito metua. “Te neing'uaa oltung'ani engumoto menuka arashu te netur oltung'ani engumoto nemenuk, nedoiki olkiteng arashu osikiria atua, neitobir olopeny ina gumoto neisho impisai olopeny o lkiteng o sikiria neaku ina natua enenye. “Te near olkiteng le likae tung'ani olkiteng le likae metua nemir ninche ilo kiteng oishu neor impisai enyena. Neor sii ina ng'ues natua. Naa te neyioloi aajo etamoo oshi ilo kiteng earisho neitu eing'or olopeny, nelak ninye olkiteng to lkiteng neaku ina ng'ues natua enenye. “Te nepurroo oltung'ani olkiteng arashu enker, neyieng arashu emir, nelak ninye ilmong'i imiet to lkiteng obo, o nkerra ong'uan te nker nabo. Meeta nchere melak ninye ina toki natupurroyie. Te nemeeta ninye toki, nemiri ninye anaa orrindik, pee elak ina natupurroyie. Te netumi ina ng'ues natupurroyie ninye ti atua imasaa enyena, aa enkiteng, osikiria arashu enker nelak ninye are te nabo. Te neibung'i olapurroni egilita enkaji kewarie neari metua; ore ilo otaara ninye metua nemeeta iloikop. Kake tenaa dama ekenyua neeta ninye iloikop. “Te neisho oltung'ani inkishu edaa te nkurma anaa te nkurma oo sabibu anaa epalaa enkiteng meshomo ainos enkurma e likae tung'ani meeta nchere pee meitalakuni teina naisul naing'uaa enkurma enye oo sabibu. Te nenya enkima enkop, neibung ilkiku o metaa ore enkanasa nateenaki arashu enkano naitashe arashu enkurma nabulu einosa enkima, ore ilo oinua enkima nelak pooki. “Te neisho oltung'ani ole latia enye impisai arashu ntokitin metushuma, nepurrorri te nkaji enye, ore te netumi olapurroni, nelak ninye katitin are. Te neitu etumi olapurroni, ore ilo openy e nkaji nelotu ataaniki Enkai, aitodolu tenaa ketipika ninye enkaina enye atua intokitin ole latia enye arashu eitu epik. “Ore olomoni pooki opong'oreki, tenaa te nkaraki olkiteng anaa, enkaraki osikiria, anaa enkaraki enker, anaa enkaraki nkilani, arashu pooki toki naimina najoyie oltung'ani, ‘Ninye ena’, neyauni enchankar oo nkaloli pokira dukuya Enkai; ore ilo odung'oki Enkai enkiguana nelaaki katitin are ilo le latia enye. “Te neisho oltung'ani ole latia enye osikiria arashu olkiteng, arashu enker, arashu ae ng'ues pooki meing'ura, neye, arashu etum olbae, arashu eyae, eitu eduaaya hoo ng'ae, neaku olmumai to Laitoriani erishata enye pokira pee edoli tenaa ketipika ninye enkaina enye atua imasaa e ilo le latia enye. Nenyorraa olopeny olmumai nemeitalaku enyamu. Naa tenaa ketupurroyioki too nkaik enyena, nelaaki naa ninye olopeny. Tenaa ing'uesi e ntim naatara nchoo ninye eyau shakenisho; nemelak ninye enyamu te ina nataara ing'uesi e ntim. “Te neisilenoo oltung'ani ae toki to le latia enye, netum olbae arashu eye metii olopeny, nelak enyamu pooki. Naa te netii olopeny te nebo ina kiteng nemelak. Tenaa entoki apa naisilenuoki aasishore nelakieki enatoning'oteki. “Te neirorie oltung'ani entito neitu eyami, neboitare ninye, neishoru ninye ntokitin e nkaputi te nkaraki ninye, neitaa ninye enkitok enye. Te neany menye eisho ninye meyama, nelaaki impisai naarisiore ine nkiyama oo ntoyie neitu ae kata eyiolou olee. “Taara metua enkasakutoni. “Ore pooki ng'ae ololoitore eng'ues neari metua. “Ore pooki ng'ae opolosaki kulie aitin neme Olaitoriani ake neitarruorri tukul. “Eminyal olomoni arashu imbooki ninye enkop, amu irara sii apa intae ilomon te nkop e Misiri. Minosie osina enkoliai arashu enkerai okishi. Naa ti ninosie ninche osina naaishiraki ninche nanu, naa kaning nanu olkiyioi lenye, neyupuyup engoro ai, naar nanu intae to lalem, neaku inkituaak inyi inkolia, neaku inkera inyi okishin. “Ti nisilenoki impisai obo loo ltung'ana laainei otii atua intae ora aisinani, mitiu te ninye anaa oloitalaku esile niming'oru dupoto te ninye. Te nelo niya olkila le ilo le latia ino pee intalakunye esile tushukoki ninye eitu edoyio enkolong, amu ninye ake eitoipore, ninye enkitoipet to sesen lenye; kainyoo naa eitoipore? Naa te naaishiraki ninye nanu, naning amu kara oloata olng'ur. “Misukeny Enkai nimidek olarikoni loo ltung'ana linono. “Mimutie te nkishorunoto e nkiputakinoto e nkisampuare ino o te mborei nadooyo e naisho oo sabibu. “Ore olkikau loo layiok linono nikincho nanu. Ninko sii neijia too lmong'i o too ntare; nchoo eboitare ng'otonye too nkolong'i naapishana; ore te nkolong' e naapishana nikincho nanu. “Iakuku intae iltung'ana ooitisinyaki te nkaraki nanu; metaa eminyanya inkiri oo ng'uesi naatara lowuarak, enchoo ildiein. “Mintayuyu intae ilomon le lejare. Mimbung'arere oltung'ani torrono aaitayu enchakenisho e lejare. Mirubarere esiamo aas intorrok, nimintayuyu shakenisho te nkiguana aarubare esiamo pee inturraa esipata. Nimintodolu olkep to ltung'ani aisinani te nkiguana enye. “Ti ninang'arere enkiteng arashu osikiria lo lmanga'tinta lino eimina tushukoki ninye. Ti nidol osikiria li obo likimba etepetikia olola enkop, nimilo aing'uaa, taretoki ninye metudumu olola. “Mintapong'oo esipata naipirakinore ilo aisinani te nkiguana enye. Talama enkitang'oroto e lejare, nimiar metua ole meeta entioto o lasipani, amu maikenaki nanu esipata olarruoni. Niming'amu entoki e ropare, amu ore eropare naa keitamodok ilkituaak neinyal erishata e lelo loo sipat. “Misoruru olomoni, iyiololo oltau lo lomoni, amu irara apa intae ilomon te nkop e Misiri. “Too larin ile entuun nisampumpu nkurman inyi; kake ore to lari li opishana nipalipala nimisampumpu hoo ae toki nabulu. Pee enya ilaisinak le lelo tung'ana linyi; ore inaaleku nenya ing'uesi e ntim. Ninkoko neijia too sabibu linyi o too lng'anayio linyi. “Entaas esiaai inyi too nkolong'i ile, kake ore te nkolong e naapishana niyeng'iyeng'a pee etum olkiteng lino o sikiria lino enkiyeng'iyengata, negolu olayioni le rrindik ino o ilo dokunoti. Embung'a nena pooki natiaaka intae, nimimpotipoto ake nkarn e kulie aitin arashu minchosho metoning'i eimu nkutukie inyi. “Katitin uni to lari kintobiraki nanu osirua. Imbung'a osirua loo mukateni neitu eisuijieki, anaa apa enaaitanapa, ninya imukateni neitu eisuijieki too nkolong'i naapishana te nkolong natudung'oki olapa le Abibu amu te ninye apa itupukutuo aaing'uaa Misiri. Meetae oltung'ani olotu dukuya nanu too nkaik naarook. Imbung'a osirua le nkisampuare, oo lng'anayio le dukuya le siaai ino, te nena nintera aun ti atua enkurma, imbung'a osirua le nkiturrurrorre te nkiting'oto o lari, ti ninturrur te nkurma lelo ng'anayio le siaai ino. Katitin uni to lari epuonu ilewa linyi pooki dukuya o Laitoriani Enkai. “Mintayu osarge lo lasar lai te nebo imukateni naaisuijieki arashu inchosho eilata o sirua lai eirrag o mekenyu. “Ore ilng'anayio ooituruku le lelo le dukuya le nkop ino iyau enkaji o Laitoriani Enkai ino. Miyierie, olkuoo kule e ng'otonye. “Ng'ura, airriwaa olmalaika dukuya iyie, pee kirrip iyie te nkoitoi, nikiyau iyie ewueji naidipa aitobira. Toning'o ninye nias enajo, migolong'aki ninye, amu mikipalaki ninye enkitarruoroto ino; amu etii enkarna ai atua ninye. “Kake ti nining asipu oltoilo lenye nias nena pooki najo, naaku nanu olmang'atinta loo lmang'ati linono nagilunore lelo likigilunore iyie. “Te nelo olmalaika lai dukuya intae, neyau intae atua Ilamori, o Ilhiti, o Ilperesi, o Ilkanaani, o Ilhifi, o Ilyebusi, te najutu nanu ninche, (aishu), nimirrugokino iyie inkaitin enye, arashu aisiaai ninche, arashu aas anaa enaishiaakino isiaatin enye, kake tusulai ninche tukul nibel ing'apeta enye metaa mbelat. Olaitoriani Enkai ino isiayia, naa kamayian nanu emukate ino o enkare ino; naiwuang'ie emueyian ti atua intae. Ore te nkop ino nemetii enkitok naibiru arashu enkolupi. Kaaisho nanu iyie enkishui naado. Kairriu nanu olkirutoto lai meshomo te dukuya ntae napik enkiuyiaui iltung'ana pooki likiarare naisho ilmang'ati linono pooki mikimbelekenyata aailany. Kapik nanu ilmang'ati linono enkuretisho, naaraa Ilhifi, o Ilkanaani o Ilhiti mikishomo aaing'uaa. Maaraa nanu ninche meshomo te dukuya iyie to lari obo, pee meaku ake enkop ailitani neponari ilowuarak le ntim nikintanyamal. Maakutiti maa kutiti aaraa ninche meshomo te dukuya iyie, metaba anaa niponari nimbung enkop. Napik nanu olpolosie lino ebaiki Enaiposha Nanyokie o metabaiki enaiposha oo Lfilisti, o ebaiki olpurkel o metabaiki olkeju le Frati; amu kayau lelo oomanya enkop apik enkaina ino, niaraa iyie ninche te dukuya iyie. Mining'ore aitayunye osotua ninche arashu te nebo nkaitin enye. Metoni ninche te nkop ino, pee mikipik ake easata oo ng'ok ti alo nanu; amu ti nisiaai nkaitin enye meeta nchere pee meaku ina orreshet te iyie.” Nejoki ninye Musa, “Ilepu wou enetii Olaitoriani, iyie o Aron, o Nadabu, o Abihu o lpayiani ntomoni naapishana loo Siraeli, enteserem te nelakua. Musa ake olotu ataaniki Olaitoriani, kake mepuonu ilkulikae aanyiku, nemeilepu iltung'ana te nebo ninye.” Nelotu Musa, neliki iltung'ana irorei pooki lo Laitoriani o nkitanapat pooki; newalu iltung'ana pooki to ltoilo obo nejo, “Ore irorei pooki ooiroro Olaitoriani naa eikiaas.” Neiger Musa irorei pooki lo Laitoriani. Nedumunye ayooki tadekenya neshet olperere lo lasar te ntonata o ldoinyo, o ng'apeta tomon o are aitorisioki iloshon tomon o are loo Siraeli. Neirriwaa ilbarnot loo ltung'ana loo Siraeli, ooitaituo nkishorot oo ilasarri oopejori nepolosaki Olaitoriani nkishorot, ilasarri le seriani oo lmong'i. Nedumu Musa olpisiai lo sarge nepik ingirran, ore olikae pisiai lo sarge nebukoki olperere. Neitoki adumu embuku osotua neisomaki iltung'ana metoning'o; nejo ninche, “Ore nena pooki naatejo Olaitoriani naa eikiaas, naa eikining'ishoyu iyiook.” Nedumu Musa osarge neisuaaki iltung'ana nejo, “Eng'ura osarge lo sotua oitobira Olaitoriani o ntae te risioroto e kulo rorei pooki.” Neitoki Musa o Aron, o Nadabu o Abihu o lpayiani ntomoni naapishana loo Siraeli aailep, nedol ninche Enkai oo Siraeli, netii abori nkejek enyena entoki neeijo oltiren oitobiraki too soito sidain, ooikununo anaa keper te mua. Neitu ninye eiteleiki enkaina enye lelo arikok loo ltung'ana loo Siraeli; nedol ninche Enkai, neokisho nedaa. Nejoki Olaitoriani Musa, “Ilepu wou enatii to ldoinyo, nianyisho te ine; naa kaaisho nanu isoito dapashi, te nebo nkitanapat, naigero nanu te nkaraki enkiteng'enare enye.” Nedumunye Musa te nebo osinka lenye Yoshua, neilep Musa alo atua oldoinyo le Nkai. Nejoki ninye ilpayiani, “Entaanyu iyiook tene o metaba anaa nikintoki aapuonu enitii, naa ng'ura, etii Aron o Huri te nebo intae; ore pooki ng'ae oata enyamali nchoo elo enetii ninche.” Neilep Musa alo oldoinyo, neitoip enkatampoi oldoinyo, neton enkitoo e Nkai to ldoinyo le Sinai neitoip enkatampoi inkolong'i ile; ore te nkolong e naapishana neipot ninye Musa ti atua ina atampoi. Ore eloito e nkitoo o Laitoriani neikununo anaa enkima nayupuyup te nchumata o ldoinyo te dukuya iltung'ana loo Siraeli. Nejing Musa atua enkatampoi neilepaki oldoinyo. Netii apa Musa oldoinyo nkolong'i artam o nkewaritin artam. Nejoki Olaitoriani Musa, “Irorie iltung'ana loo Siraeli, pee aaitaiki enkishoroto. Tang'amu enkishoroto te rishata ai te pooki tung'ani otonyorra aishoru to lpela, ning'amu iyie enkishoroto te nkaraki nanu. Naa ena enkishoroto ning'amu te ninche: sahabu, o enkosholai, o suyai, nkarash pusi o sinteti, o naanyokie, o katani napuyiapui o lpapit loo nkineji, ndapan naanota oo lmeregeshi, o ndapan oo nkineji, imbaoi oo lera, eilata oo ltaai, o enkorropil o te ilata naaputishoreki o te rropili o lbani, o soito barrikon ooji oniks o lkulikae soito oopiki olkila lo lapolosani kitok o ina bene enye o lgoo. Nchoo ninche aaitobiraki nanu ewueji nesinya, pee atum atotona ti atua ninche. Anaa nena pooki naaitodol iyie naaipirta olchetei to lng'obor lo Laitoriani o masaa enyena pooki, neaku intobir aiko neijia. “Naa keitobir ninche osanduku too nkeek o lerai; intemat are o lpisiai enkadoro, entemata nabo o lpisiai endapasho, naa entemata nabo o lpisiai enkilepata. Nimur ninye te sahabu nasila, nintoip oriong o atua, nipik enkamanaa e sahabu aitaman ninye. Nipik ilgiso oong'uan le sahabu oonapieki, nipik ninche nkejek enyena pokira ong'uan, ilgiso oare te nchoto enye nabo, o lgiso oare te nkae shoto enye. Nintayu ing'apeta oo nkeek o lchani oji olerai, nimur ninche te sahabu. Nipik nena bokishi atua lelo giso too mbat o sanduku pee enapieki ilo sanduku. Netoni nena keek, ti atua lelo giso too mbat o sanduku pee enapieki ilo sanduku; nemeitayuni aaitung'uaa ninye. Nipik atua osanduku ina shakenisho naaishoo nanu iyie. Nintoki aitayu olorika lo lng'ur le sahabu nasila; laa intemat are o lpisiai enkadoro naa entemata nabo o lpisiai endapasho. Nipik ilmalaika oare ooji ilkerubi le sahabu; te nkidong'ore intobir ninche, too nkaloli pokira are e ilo orika lo lng'ur. Intayu olkerubi obo te nkalo nabo nintayu olikae te nkae shoto; te ntoki nabo intobira lelo kerubi o ilo orika lo lng'ur too nkaloli enyena pokira are. Nelak lelo kerubi inaipuko enye aaitushur olorika lo lng'ur too naipuko enye, neipira nkomomi enye eing'orita lkerubi ilo sanduku. Naa eipik ilo orika lo lng'ur enchumata o sanduku; ore atua ilo sanduku nipik ina shakenisho naaisho nanu. Te ine nanu aalotu atumore, naa te shumata olorika lo lng'ur o te rishata e lelo kerubi ootii enchumata o sanduku le nchakenisho, aairorie nanu iyie ti alo nena pooki naaisho nanu iyie too nkitanapat te nkaraki itung'ana loo Siraeli. “Naa ntobira emesa oo nkeek olerai ntemat are enkadoro, naa entemata nabo endapasho, naa entemata nabo o lpisiai enkilepata. Imulumula te sahabu nasila nipik enkamanaa e sahabu. Nipik aitaman enkamanaa e ntemata e ndapasho endap naa ntobiraki ilgiso oo ng'uan le sahabu nieniki lelo giso ilpijat pokira oong'uan too nkejek enyena pokira ong'uan. Neirrag lelo giso te mbata e nkamanaa pee eimieki nena bokishi naanapieki emesa. Nintayuyu mbokishi o lerai nimur te sahabu naa kuna enapieki emesa. Naa intobir isaanini enyena e nkorropil o masaa enyena naapikunyeki olasar opikuni te sahabu nasila ntobir ninche. Nipik emukate e Nkitaduaaroto emesa dukuya nanu anaake. “Naa intobir enkitashet e sahabu nasila napiki iltaai. Ore entonata o empolos enye neitobiri te siaai e nkidong'ore; ore nkikompeni enyena, o neeigululu enyena, o ntapuka enyena neitaae pooki nabo o enkitashet. Nepiki ilng'osil ile ooiipang too nkaloli enyena, ilng'osil okuni te nkibung'et te nkalo nabo o lng'osil okuni te nkibung'et te nkae alo enye; netii ake nkikompeni uni naikunuaki anaa intapuka o lgulului, eeta ake nabo eneigululu o entapukai, to lng'osila obo, o nkikompeni uni naikunuaki anaa ntapuka o lgulului, meetae ake ene meeta eneigululu o entapukai, to likae ng'osila, netiu neijia pokira ile ooipang'u te ina kibung'et. Ore te nkitashet kewan netii inkikompeni ong'uan naikunuaki anaa ilgululu, eeta ineigululu o ntapuka, netii ake eneigululu nabo abori ilng'osil oare o oiriamari te lelo ngosil ile le ina kitashet. Ore nena kiyiaa enye oo ntapuka o lng'osil lenye neitaa entoki nabo o ninye; neaku pooki entoki nabo e siaai naidong'uoki te sahabu nasila. Nintaiki iltaai oopishana, nepiki iltaai pee eitawang'aki dukuya enye. Ore intokitin naarieki iltaai o neeiteleikini naa ile sahabu nasila. Te ntalanta nabo e sahabu eitobiri te nebo kuna masaa pooki. Ning'or nchere, intobira te nkitanyaanyukoto enye, apa nikintoduaaki to ldoinyo. “Ore ake tenebo nena intobira, olng'obor le Nkai too lkarash le katani napuyiapui tomon, pusi, o lmorijo o lpilei, neripakini ilkerubi te nkarriayiano oleng. Ore enkadoro, e pooki karasha nchoo eaku intemat tikitam o isiet enkadoro, ore endapasho e pooki karasha naa intemat ong'uan endapasho. Nerisioroyu ilkarash pooki. Nchoo eripi ilkarash imiet aaibung'ie te nebo, neitokini aarip aaibung'ie ilkarash imiet te nebo. Intayu ilgoso le nkopito pusi loo nkarash te matua e oriong e lelo karash te ntukus e dukuya. Nintoki ake aiko neijia, aitayu ilkiintani pusi loo nkarash te matua e oriong e ina tukus e are. Ilkiintani onom intayu te ntukus nabo oo lkarash, nintoki aitayu ilkiintani onom te matua e oriong e ina tukus e are oo lkarash; ore lelo goso nchoo eipira. Intayu ilala onom le sahabu oololo paa ninche intutumie entukus oo lkarash o enkae pee eaku enkaji e Nkai entoki nabo. “Intobira sii nkilani oo lpapit loo nkineji naaitushur olng'obor; ntobira nkilani tomon o obo. Ore enkadoro e pooki kila naa intemat tomoni uni enkadoro naa intemat ong'uan e ndapasho; ore nena kilani pokira tomon o obo nerisioroyu. Nintutum ilkarash imiet te nebo, o nkilani ile te nebo, ore enkila e ile nipud te shumata te mbata e njing'et o lng'obor. Nintayu ilkiintani onom te matua e nkila ti oriong e ntukus nabo, o lkiintani onom te matua e oriong e ntukus e are e nkila. “Nintayu iltidii ooriwuo lo suyai onom, nipik lelo tidii atua lelo kiintani nintutum olng'obor te nebo metaa entoki nabo. Ore ina shoto naleku too lkarash o lng'obor, ilo pisiai lo lkarasha, neisiong'a ti oriong o lng'obor. Ore ina matua naleku te nchoto nabo, o ematua naleku te nkae shoto, te nkadoro oo nkilani o lng'obor. Neisiong'a too mbat o lng'obor enkikenet oo ndapan naanota oo lmeregeshi o noo nkineji. “Ntobira intorioi irubat oo sunta o lng'obor too nkeek o lerai. Ore ake erubata e suntai naa intemat tomon enkadoro o entemata nabo o lpisiai e ndapasho. Netii ake erubata nabo ilng'amat oare pee etumi aairuburubie te nebo; ninko neijia too rubat pooki ntobira nkeek o lng'obor, irubat tikitam e nkosholai te nkalo e kopikop. Nkitotoneta artam e nkosholai ti abori nena rubat tikitam oo sunta, nkitotoneta are ti abori erubata nabo too lng'amat lenyena pokira oare, o nkitotoneta are te rubata nabo too lng'amat lenyenapokira oare. Ore te nchoto e are o lng'obor, te nkalo e moikuape irubat tikitam oo sunta. O nkitotoneta enye tikitam e nkosholai, nkitotoneta are ti abori erubata nabo o nkitotoneta are ti abori enkae rubata. Ore ti oriong o lng'obor te nkalo o loo ntoluo nintayu irubat ile oo sunta. Nintayu irubat are too lpijat lo lng'obor ti oriong; nepaasha ninche te kop kake nchoo eibung'a te shumata, to lgisoi le dukuya, netiu inji te pokira are; neitayu ilpijat pokira are. Naa keaku irubat isiet, tenebo nkitotoneta enye e nkosholai, nkitotoneta tomon o ile, o nkitotoneta are tiabori erubata nabo, o nkitotoneta are tiabori enkae rubata. “Nintayu iloom lo lerai, imiet too rubat e nkalo nabo olng'obor, o loom imiet too rubat enkae alo o lng'obor, o loom imiet too rubat o lng'bor te nkalo e oriong te nkalo o loo ntoluo. Ore ilo loomi le mpolos oitorit nena rubat neng'ung'ur ebaiki enkiting'oto o metabaiki enkiting'oto. Nimulumul irubat te sahabu, nintayu ilgiso lenye le sahabu pee eibung iloom, nimur iloom te sahabu. Nishetu olng'obor te nkitanyaanyukoto apa anaa enikintoduaaki to ldoinyo. “Nintobir oliaatua too ntokitin pusi o sinteti o mpilei o nkarash e katani napuiyiapui. Neitobir te siaai e nkarriayiano neripakini ilkerubi. Neisiong ninche too ng'apeta o lerai nemur te sahabu, neeta ilala oo lolo le sahabu, too nkitotoneta ong'uan e nkosholai. Niik oliatua te lelo ala oo lolo, niyau osanduku le nchakenisho atua oliaatua; nikirishaki ilo liaatua ewueji sinyati o ine nesinya oleng. Nipik ilo orika lo lng'ur shumata ilo sanduku le nchakenisho ine wueji nesinya oleng. Nipik ina mesa oriong o liaatua, nipik enkitashet o ltaa enkalo e kopikop o lng'obor neipirakinore emesa; nipik emesa enkalo e moikuape. “Ore kutuk aji o lng'obor nintayu olkarasha pus o olmorijoi, o lpile, oitobiruno te kitani napuyiapui napiyaya, neikodi to ltidu. Nintaiki lelo karash ing'apeta imiet o lerai nimur te sahabu, ore ilala lenye oololo naa ile sahabu nintaiki nkitotoneta imiet o suyai. “Ntobira olperere too nkeek o lerai intemat imiet enkadoro naa intemat imiet endapasho; nerisioro olperere too nkaloli pooki. Ore enkilepata enye naa intemat uni. Nipik imowuarak lelo pijat lenyena pokira oong'uan; neaku nena mowuarak entoki nabo o ninye. Nimur to suyai. Nintayu imotioo enyena naaiwouo nkuruon, o ilkijikoni o ngirran o ntokitin naaitobirieki enkima; ore ntokitin enyena pooki naasishoreki nintobir to suyai. Nintaiki sii ngesherreta naashetuno to suyai; ore nena ngesherreta nipik ilgiso oong'uan lo suyai ilpijat lenyena pokira oong'uan. Tipika ina ng'esherrie abori emanaroto o lperere pee eitorit ina ng'esherrie o lperere ti abori. Nintayu imbokishi o lperere, imbokishi o lerai nimur ninche to suyai; nepiki nena bokishi aaimie lelo giso metaa ketii imbokishi nchot pokira o lperere te nenapi. Intobira too nkeek, nintugum anaa apa enikintoduaaki to ldoinyo, neitobirunye atiu neijia. “Intobira endung'oroto olng'obor le Nkai. Ore te nkalo e kopikop nepiki endung'oroto olkarasha oisiong'a sidai oshetuno too usin naapiyaya loo intemat iip enkadoro te nkalo nabo. Ore ing'apeta enye naa tikitam, ore nkitotoneta enye naa tikitam, lo suyai, kake ore ilala oololo loo ng'apeta, o olgoso lenye naa ine nkosholai. Neijia sii etiu enkadoro enye te nkalo e moikuape, tipika nkisiong'at oo ilkarash loo ntemat iip. Nera ing'apeta enye tikitam nera nkitotoneta enye tikitam naa ino suyai, kake ore lelo ala oololo loo lgoso lenye naa ile nkosholai. Ore te nkalo e ndoyioroto e nkolong tipika ilkarash onom te nkadoro o ng'apeta tomon o nkitotoneta tomon. Ore endapasho e ndung'oroto te nkalo najing'ieki te nkilepunoto e nkolong naa intemat onom. Ore ilkarash te nkalo nabo e kishomi naa intemat tomon o imiet, o ng'apeta uni o nkitotoneta uni. Ore te nkae shoto naa intemat tomon o imiet, o ng'apeta uni o nkitotoneta uni. Ore enkishomi e ndung'oroto nipik aitolok olkarasha loo ntemat tikitam te nkadoro oata emua pus o emorijoi o empile nashetuno te nkarasha sidai napuyiapui. Neikodoki te ripare o ltidu; nepiki ing'apeta ong'uan o nkitotoneta ong'uan. Ore ing'apeta pooki naamanita endung'oroto neitutumi te nkeene e nkosholai, ore lala lenye oololo naa ile nkosholai, ore nkitotoneta enye naa ino suyai. Ore enkadoro e ndung'oroto naa intemat imiet. Netii ilkarash ooluaa sidain oopuyiapui o nkitotoneta o suyai. Ore imasaa pooki e ilo ng'obor e pooki siaai, o ncheito enyena pooki endung'oroto naa ino suyai. “Nintanap iltung'ana loo Siraeli pee kiyaki ninche eilata naironyuno nasila oo loirienito te nkaraki ewang'an, pee eiki oltaa meiyupuyupo enkata pooki. Ore te ilo ng'obor o tumoreki, ti oriong ilo liatua otii dukuya enchakenisho, neitobir Aron o layiok lenyena ebaiki teipa o metabaiki tadekenya te dukuya Olaitoriani. Neaku enkitanapata ntarasi naibung'i ti atua iishoritin enye iltung'ana loo Siraeli. “Niyau iyie aitinyiku Aron, olalashe lino, o layiok lenyena te nebo ninye, laa ninche ti atua iltung'ana loo Siraeli laaisiaai anaa ilapolosak. Aron o layiok lenyena, Nadab o Abihu o Eliesa o Isamar. Nintaiki Aron olalashe lino ilkilani oosinya, te nkitoo o te sidano. Nirorie lelo pooki oata enkidimata, lelo laishoo eng'eno, pee eitobir ilkilani le Aron, pee eitisinyi te mpolosare ai. Kuna inkilani naaitobir ninche, enkila o lgoo, enkila dorrop, olkila oado, enkila e oriong naikodo o enkarasha e lukunya, o enkimeita; neitobir ninche nkilani naasinya te nkaraki Aron olalashe lino o layiok lenyena pee aaisiaai ninche anaa ilapolosak. “Neng'amu ninche sahabu o nkarash pusi o morijo o mpilei o enkatani napuyiapui napiyaya. Neitobir ninche enkila dorrop te sahabu, too usin pusi, o too morijo, o too mpilei o te katani napuyiapui napiyaya te nkarriayiano. Neeta inkeenta are ooronyi too lpijat lenyena pee eitutumieki te nebo. O enkimeita naitobiruno te nkarriyiano te nena tokitin, pee eenieki; te sahabu o too usin pusi o sinteti o naanyokie, o naaibor sidain. Niya isoito are barrikon naaji oniks niguetaki asiraki ninche nkarn oo layiok le Israel, nkarn enye ile to soit obo, ore nkulie ile naaleku ning'eroki olikae soit, too inot enye. Anaa enkarriyiano olaguetani omishir isoito, neijia sii iyie inkuna eng'uetakinoto e lelo soito oare nkarn oo layiok le Israel; nipik nena nitaguetua te sahabu. Nipik lelo soito pooki inkaloli ooronyi le ina kila dorrop, pee eaku isoito oodamunyeki ilayiok le Israel; nenap Aron inkarn enye te dukuya o Laitoriani too ronyi lenyena pee edamuni. Nipik nkikodot are e sahabu. O lpisia oare le sahabu nasila, ooirina anaa empito nipik nimbung'ie ina sahabu naikodore enkila. “Nintobir sii ina kila o lgoo e nkiguana, te nkarriyiano, anaa ina kila dorrop, te sahabu, o too usin pusi o morijo o mpilei o kitani napuyiapui napiyaya. Nerisioroyu nkaloli pooki, netasha, entemata e ndap enkadoro o entemata e ndap endapasho. Nipik ilkererin oong'uan loo soito, olkereri lo ltotoi barrikoi, oltotoi onyori o oltotoi onyokie oleng oaku olkereri le dukuya. Ore olkereri li are naa oltotoi sintet, oltotoi pus oata iltiil o ltotoi sidai oji almasi; ore olkereri li okuni naa oltotoi pile, oltotoi owang oji agat, o ltotoi pile oji ametist ore olkereri li ong'uan naa oltotoi oji beril, oltotoi oji oniks oltotoi pus oji Jaspa. Neitobir te nkikodo e sahabu. Nepik isoito tomon o are o nkarn enye anaa inkarn oo layiok le Israel. Netiu ninche anaa olmishire, meetae ake olemeguetuno enkarna enye, too loshon tomon aare. Nintobiraki ina kila o lgoo ilpisia ooipila anaa impi, le sahabu nasila; nintobiraki ina kila o lgoo ilgiso oare le sahabu nipik lelo giso oare ilpijat pokira oare le mbene o lgoo. Nipik lelo pisia aare le sahabu ooipila atua lelo giso ootii ile mowuarak le mbene o lgoo. Ore ineeiting'ie lelo pisia oare ooipila nimbung'ie lelo kererin oare le nkikodo e sahabu, nimbung'ie te nkalo e dukuya te nena keenta e nkila dorrop naatii ironyi. Nintoki aitayu ilgiso aare le sahabu nimbungie lelo lemowuarak aare le nkila to lgoo te nkalo e atua te mbata e ina kila dorrop. Nintoki aitayu ilgiso aare le sahabu, nimbung'ie ninche te nkalo e dukuya ti abori nena keenta are e nkila dorrop natii ironyi, te nchumata ina kimeita e nkila dorrop naripuno te nkarriyiano. Neitutum ninche ina kila o lgoo too lgiso lenyena o lgisoi le ina kila dorrop te nkeene pus, pee eirrag te ina kimeita e nkila dorrop naripuno te nkarriyiano, pee melolong'u ina kila o lgoo teina kila dorrop. “Nenap ninye Aron inkarn oo layiok le Israel te ina kila o lgoo e nkiguana, to ltau lenye, te nelo ninye atua ine wueji nesinya, pee edamuni ninche anaake te dukuya Olaitoriani. Ore ina kila o lgoo e nkiguana tipika Urimu o Sumimu, pee eaku ketii ninche oltau le Aron, te nebo ninye enkata nilo dukuya Olaitoriani. Neaku kenapita ninye Aron enkiguana oo ltung'ana loo Siraeli to ltau lenye te dukuya Olaitoriani anaake. “Nintayu iyie olkila li oriong pus muj le ina kila dorrop. Nipik ilo kila enaudoto naimieki endukuya; ore ina audoto neitamani eripata anaa enaudoto e nkila pee mepolosa. Ore eripata enye ti abori tiripaki ilonyek le usi pus, o empile o enanyokie aitaman, o ntualan e sahabu erishata enye, entuala e sahabu o long'u, nemanaa te ripata e abori olkila. Neishop Aron ele kila te neisiaaisho anaa olapolosani. Ore enkorui enye nening'i te nelo atua ine wueji sinyati dukuya Olaitoriani, o te neipang'u boo, pee meye. “Nintayu enchili e sahabu nasila niguetaki oriong enye, anaa isirat lo lmishire, ‘Sinyati to Laitoriani.’ Nieniki ina arasha narridieki endukuya te nkeene pus; tipika enkalo e dukuya e ina arasha narridieki endukuya. Neishop Aron te nkomom enye, neya ninye Aron enkorrok enye pooki torroni naitayuni to lasar osinya, oyanyit iltung'ana loo Siraeli anaa nkishorot enye naasinya. Neton ina masaai anaake te nkomom enye, pee eng'amari nena kishorot te dukuya Olaitoriani. “Niripu olkila te siaai tenkarriyiano te nkarasha sidai napuyiapui, nintayu ina arasha narridieki endukuya te nkarasha sidai napuyiapui, nintayu enkimeita aikodu to ltidu. “Ore ilayiok le Aron nintaiki ilkilani, o nkimeitani o imaupen. Nintayu ninche te nkitoo o te nkishiaa. Ninchopoki lelo kilani Aron olalashe lino, te nebo ilayiok lenyena, nibukoki eilata aput ninche, nikinteng'elaki peyie aatum aaisiaayia anaa ilapolosak. Nintaiki nkilani e atua te nkarasha sidai pee eitoip emasipaisho enye; nkilani naabaiki mpolosi nebaiki nkupesir; neishop Aron o layiok lenyena te nepuonu aanyikaki olperere lo lasar aaisiaisho te wueji sinyati, meyaki ake ate entorroni meye. Naa keaku ena enkitanapata nauno te ninye o too ishoritin enyena te siadi ninye. “Nji nkuna te nintisiny ninche, pee aatum aaisiaya anaa ilapolosak. Iwa oloing'oni obo oti o lmeregeshi aare le meeta entioto, o mukateni neitu eisuijieki o mukateni naamelok neitu eisuijieki naatipikaki eilata, o nkaukau o mukateni neitu eisuijieki naaelieki eilata. Te nkano sidai napuyiapui intayu ninche. Nepik atua entutua nabo, niyau ninche teina tutua, niyau ilo oing'oni o lelo meregeshi pokira oare. Niyau Aron o layiok lenyena kutuk aji o lng'obor le ntumo, nintuku ninche te nkare. Nintayu nkilani ninchopoki Aron enkila e oriong o enkila dorrop, o enkila o lgoo nien empolos te ina kimeita naripuno te nkarriyano e ina kila dorrop. Ninchopoki enkarasha narridieki endukuya enye. Nipik ilo marisian osinya enchumata e ina arasha. Niyau ina ilata naputishoreki, nibukoki endukuya enye aput ninye. Nintoki ayau ilayiok lenyena, ninchopoki ninche inkilani, nien impolosi enye too nkimeitani, ninchopoki imaupen; neaku enenye empolosare te nkitanapata nauno. Inji nkuna iput Aron o layiok lenyena apik esiaai sinyati. “Nintoki ayau oloing'oni dukuya ilo ng'obor le ntumo. Neiteleiki Aron o layiok lenyena inkaik enye endukuya e ilo oing'oni, niar ilo oing'oni metua te dukuya Olaitoriani te kutuk aji o lng'obor le ntumo. Niya embata o sarge lo loing'oni nipik imowuarak olperere lo lasar to lkimojino lino; ore olikae sarge mbukoi ti abori olperere lo lasar. Niya ina kurriny pooki naimulumul imonyit o lkina le monyua, o lairakuj pokira aare eeta enkurriny enye, nipej ninche ten chumata olperere. Kake ore nkiri o loing'oni, o lchoni lenye, o emodiei enye, nipejoo ninche te nkima tialuo ina ang oo lng'oborri; olasar ninye te nkaraki ing'ok. “Nintoiki aitayu obo loo lmeregeshi, neiteleiki Aron o layiok lenyena inkaik enye endukuya e ilo meregesh, niyieng ilo meregesh, nisuaaya osarge lenye te mbata o lperere lo lasar aitaman. Nintoki adung'udung ilo meregesh, metaa nkutiti kiri, nintuku enkoshoke enye o loilelek nipik ninche te nebo irubat enyena o endukuya enye, nipejoo olmeregesh pooki te nchumata o lperere lo lasar; olasar opejori te nkima ninye to Laitoriani, esong'ouna naitishipisho, o lasar le nkima to Laitoriani. “Nintoki aitayu olikae meregesh, neiteleiki Aron o layiok lenyena inkaik enye endukuya o lmeregesh, niyieng ilo meregesh, niya embata o sarge nipik esegerua e nkiok e tatene e Aron o segeruani oo nkiyiaa e tatene oo layiok lenyena, o lmogirrani loo nkaik enye e tatene, o lmogirrani loo nkejek enye e tatene ore ilo sarge otashare olperere lo lasar nisuaaya aitaman. Nisuaaya olikai sarge otii enchumata o lperere lo lasar o ina ilata naputishoreki nisuaaki Aron, o lkilani lenyena, o layiok lenyena o lkilani loo layiok lenyena te nebo ninye. Ore ninye o lkilani lenyena nesinyayu, o layiok lenyena, o lkilani loo layiok lenyena te nebo ninye. “Nintoki sii aitayu eilata o lmeregesh, o eilata o lkidong'oe o enkurriny e nkoshoke, o lkina le monyua o lairakuj pokira are eeta enkurriny enye o emuro e tatene (amu olmeregesh oputishoreki opikieki Aron o layiok lenyena esiaai sinyati), nintayu ti atua ntutuan oo mukateni neitu eisuijieki natii dukuya Olaitoriani, emukate nabo namelok natii o enkaukau nabo eilata, o emukate nipik kuna pooki nkaik e Aron, o nkaik oo layiok lenyena, niyukuyuk iyie ninche metaa olasar oyukuyuki te dukuya Olaitoriani. Nintoki iyie aitayu too nkaik enye, nipejoo to lperere lo lasar metoponai olasar opejori, pee eaku esong'ouna naitishipisho te dukuya Olaitoriani; olasar le nkima to Laitoriani. “Nintayu oloikulu le ilo meregesh otuputieki Aron aapik esiaai sinyati, niyuk pee eaku olasar oyuki te dukuya Olaitoriani; neaku erubata ino. Nintisiny oloikulu lo lasar oyuki, o ena muro aa ninye erubata o lapolosani, nayukoki, naa ninye eishoruaki teilo meregesh oputishoreki amu te nkaraki Aron o te nkaraki layiok lenyena. Naa keaku ninche ine Aron o noo layiok lenyena, erubata enye naisho ninche iltung'ana loo Siraeli anaake, too lasarri lenye le seriani; neaku olasar lenye to Laitoriani. “Ore lelo kilani sinyat le Aron naa keaku iloo layiok lenyena oosuju ninye, pee ebukokini eilata eishopito, neputi ninche eishopito. Ore ilo ayioni oaku olapolosani erishata enye neishop ninche inkolong'i naapishana, tenelotu atua olng'obor le ntumo aisiaaisho te wueji sinyati. “Niya ilo meregesh oputishoreki niyier nkiri enyena te wueji sinyati. Nenya Aron o layiok lenyena nkiri e ilo meregesh o mukateni naatii atua ltutuan te kutuk aji o lng'obor le ntumo. Nenya ninche nena tokitin naaitobirieki to lning'o lo sotua, pee epikieki ninche esiaai sinyati, neitisinyi, kake menya oltung'ani le boo, amu eisinyat ninche. Kake te neleku ae kirring'o naputishoreki arashu emukate o mekenyu, nipejoo iyie te nkima ina natelekua, meinosi ninye, amu eisinyati. “Nintaas ina Aron o layiok lenyena, te risioroto e nena pooki naaitanapa; too nkolong'i naapishana ipik ninche ina siaai sinyati. Ore ake te nkolong nintayu, nipolos oloing'oni pee eaku olasar loo ng'ok lo lning'o lo sotua. Nintayu sii olasar loo ng'ok te nkaraki olperere lo lasar, ti nintayu olning'o lo sotua te ninye, nibukoki ninye eilata, aitisiny. Too nkolong'i naapishana intayu olning'o lo sotua te nkaraki olperere lo lasar, nintisiny, neaku ilo perere lo lasar sinyati oleng; ore pooki toki naiseyie olperere lo lasar nesinyayu. “Naa ele olasar lintayu te nchumata o lperere lo lasar, ilkuoo oare le kerra lo lari obo, anaake te nkolong. Topolosa olkuoo obo le ker tadekenya, ore olikae kuo le ker nipolos teipa. Ore te nebo ilo kuoo le ker le dukuya irrantilini aare le nkano nasila naipurjare, emborei o ltulet leilata sidai, o emborei o ltulet le naisho oo sabibu pee eaku olasar. Ore olikae kuo le ker topolosa teipa ninko anaa ilo le tadekenya, nintayu te nebo ninye olasar le nkurma naidong'o, o lasar opikuni. Olasar le nkima ele to Laitoriani, neitishipisho esong'ouna enye. Keaku ninye olasar opeji anaake tiatua iishoritin inyi te kutuk aji o lng'obor le ntumo, te dukuya Olaitoriani, te ine natumore nanu intae, pee airorie nanu intae te ine. Te ine atumore iltung'ana loo Siraeli, neitisiny enkitoo ai ine. Naitisiny nanu ilo ng'obor le ntumo o lperere lo lasar; naitisiny sii Aron o layiok lenyena, pee aaisiaai ninche anaa ilapolosak. Namany nanu atua ltungana le Israel, naaku Enkai enye. Neyiolou ninche aajo ara nanu Olaitoriani Enkai enye, oyaua ninche aaitung'uaa enkop e Misiri, pee atum nanu atotona ti atua ninche. Ara nanu Olaitoriani Enkai enye. “Intobira olperere lo lasar pee ipejorie enkorropil enchumata enye. Too nkeek o lerai intobira. Entemata nabo enkadoro naa entemata nabo endapasho. Nerisioroyu nkaloli pooki, naa intemat are enkilepata; ore mowuarak enyena naa entoki nabo o lperere. Tumura te sahabu nasila enkoriong enye o matuan o mouarak enyena. Nipik enkamanaa e sahabu aitaman. Nintobiraki ilgiso oare le sahabu, ti abori enkamanaa, too nkaloli enyena pokira are, pee eibung nena bokishi naa ninche enapieki. Nintayu imbokishi o lerai nimur ninche te sahabu. Nipik ninye dukuya ilo liatua otii embata o sanduku le nchakenisho, otii dukuya olorika lo lng'ur, te nchumata shakenisho, te ine natumore nanu ntae. Nepej Aron enkorropil naisonkoyo oleng te nchumata enye, anaake tadekenya te neitobir iltaai nepej. Naa ore te neinok Aron iltaai teipa nepej, enkorropil oo nkolong'i pooki te dukuya Olaitoriani ti atua iishoritin inyi pooki. Mintayuyu ake enkorropil nemesinya te nchumata te ine, arashu olasar opejori, arashu olasar le nkurma naidong'o nimibukokiki olasar opikuni. Neitobir Aron olning'o lo sotua too mowuarak enyena kata nabo to lari; teilo sarge lo lasar loo ng'ok lo lning'o lo sotua eitobir ninye olning'o lo sotua nabo kata to lari ti atua iishoritin inyi pooki. Kesinya oleng to Laitoriani.” Nejoki Olaitoriani Musa, “Teninkenikene ltung'ana loo Siraeli, aayiolou esiana neishoru ake pooki ng'ae elakunoto te nkaraki enkorrok enye to Laitoriani te ninken iyie ninche, pee mejing ake olmeitai atua ninche te ninken iyie ninche. Ore pooki ng'ae oikenayioki te nkikenare neishoru ena: olpisiai loo mpisai naaji shekeli te risioroto e shekeli eine wueji sinyati. Neitayu olpisiai le shekeli anaa olasar to Laitoriani. Ore pooki ng'ae oikenayioki te nkikena, ebaiki ilarin tikitam neilep, neishoru olasar to Laitoriani. Meishoru olkarsis inkumok nemeishoru olaisinani inkuti, to lpisiai le shekeli, te ninchoru olasar lo Laitoriani aitaiyu olning'o lo sotua te nkaraki kewan ino. Niya iyie impisai o lning'o lo sotua too ltung'ana loo Siraeli, nigelu aitaa ine nkisiaayiare o lng'obor le ntumo, pee eyau iltung'ana loo Siraeli metadamuni te dukuya Olaitoriani, pee intobiribiri olning'o lo sotua te nkaraki intae maate.” Nejoki Olaitoriani Musa, “Intobira olmoti lo suyai oitukuoreki; ore eneitotonieki enye naa eno suyai, pee eitukuoreki. Nipik erishata o lng'obor le ntumo o lperere lo lasar, nipik enkare atua, pee aa ninye eitukuyie Aron o layiok lenyena inkaik enye o nkejek enye. Te nepuo atua olng'obor le ntumo, arashu te nepuonu embata o lperere lo lasar aaisiaisho, aapejoki Olaitoriani olasar te nkima, neitukuo ninche te nkare, meye ake. Neituku ninche inkaik enye o nkejek enye, meye ake. Neaku ena enkitanapata ntarasi te ninche, o te ninye o too ishoritin enyena ti atua ishoritin enye pooki.” Ore tenebo nena neitoki Olaitoriani ajoki Musa, “Ntayu isonkoyoni sidain oleng; shekeli iip imiet e manoo, naruko, o lpisiai le nena loo nkabobok o sinantei naarropil oleng, aa taa shekeli iip are o onom, o shekeli iip imiet o sinantei oojuno, te risioroto e ntemata e wueji sinyati, o eilata oo loirienito mboreitin imiet e mpirbil. Nintayu iyie te kuna eilata nasinya naputishoreki. Nibukoki aitisiny ilo ng'obor le ntumo o ilo sanduku le nchakenisho, o emesa o ntokitin enyena pooki, o enkitashet oo ltaai o ntokitin enyena pooki, o lperere le nkorropil, o lperere lo lasar opejorieki ilasarri tenebo ntokitin enyena, o eng'irra naitukuoreki o enkitotonet enye. Nintisiny iyie ninche pee etum aataa sinyat tukul. Ore pooki naiseyie ninye neaku sinyati. Nibukoki Aron o layiok lenyena aitisiny ninche, pee aatum aaisiaayia anaa ilapolosak. Nijoki iyie iltung'ana loo Siraeli, ‘Keaku ena eilata ai sinyati naputishoreki ti atua ishoritin inyi. Nemebukokini iseseni ake le pooki ng'ae, nimintayu ae nanyaanyukie te nkitobirunoto; kesinya ninye, naa keton esinya te iyie. Ore pooki tung'ani oitobira aitushulu ae nanyaanyukie, arashu pooki ng'ae opik ae te ninye oltung'ani le boo neiwuang'ieki ti atua iltung'ana lenyena.’ ” Nejoki Olaitoriani Musa, “Intayu intokitin naarropil, naaji natafi, o shekeli o kelbena; o ntokitin naarropil te nebo olbani osila nerisioroyu pooki. Intobira enkorropil naitushulaki te nkarriyiano, olaitobirani loo sonkoyoni natipikaki emunyan aasil neitisinyi; nindong iyie embata enye kiti oleng, nipik embata enye dukuya enchakenisho tiatua ilo ng'obor le ntumo te ine naatumore nanu iyie; neaku ninye te iyie sinyati oleng. Ore enkorropil nintayu te risioroto e enkitushulata enye, nimintayu te nkaraki intae maate, keaku ninye te ntae sinyati to Laitoriani. Ore pooki ng'ae oitayu ae nanyaanyukie pee easishore anaa esonkoyo neiwuang'ieki ti atua iltung'ana lenyena.” Nejoki Olaitoriani Musa, “Ng'ura, aipoto nanu te nkarna e Besalel olayioni le Uri, olayioni le Huri, lo losho le Yuda: naiputa nanu ninye Enkiyang'et e Nkai, te nkidimata o te nkalamasisho, o te ng'eno o te nkarriyiano pooki. Pee eipiru mbaa e nkarriyiano, neasisho te sahabu, o te nkosholai o to suyai, te ndung'oto oo soito oopiki iwuejitin, o te nguetata oo nkeek, te siaai e nkarriyiano pooki. Naa ng'ura, ategelua nanu te nebo ninye Oholiab olayioni le Ahisamak, lo losho le Dan; naishoo nanu iltung'ana pooki oodupa enkidimata, pee etum aaitobira nena pooki naaitanapa nanu iyie: ilo ng'obor le ntumo, o ilo sanduku le nchakenisho, o ilo orika lo lng'ur otii enchumata enye, o masaa pooki e ilo ng'obor, emesa o ntokitin enyena, o ina kitashet o ltaa e sahabu nasila te nebo ntokitin enyena pooki, olperere le nkorropil, o ilo perere lo lasar opejori te nebo ntokitin, enyena pooki, o lmoti oitukuoreki o eneitotonieki enye, o lelo kilani ootiripuaki aaikod le Aron olapolosani, o lkilani loo layiok lenyena, te nkisiaayiare enye anaa ilapolosak, o ina ilata naputishoreki o enkorropil naisonkoyo e ine wueji sinyati. Anaa nena pooki naaitanapa iyie. Neas ninche.” Nejoki Olaitoriani Musa, “Tiaaki iltung'ana loo Siraeli ‘Embung'a Sabatoni aainei amu olmonekie ele te rishata ai o ntae ti atua iishoritin inyi pooki, pee itumutumu aatayiolo nchere, nanu Olaitoriani oitisiny intae. Embung'a sabato amu eisinyati te ntae; ore pooki ng'ae oisarkionie neari metua; ore oltung'ani oasisho te ina olong neiwuang'ieki ninye ti atua iltung'ana lenyena. Too nkolong'i ile easi esiaai kake ore enkolong e naapishana naa sabato e nkiyeng'iyeng naitisinyi, sinyati to Laitoriani; ore oltung'ani oas pooki siaai te nkolong e sabato neari metua. Metaa keibung iltung'ana loo Siraeli sabato, neing'or sabato ti atua iishoritin enye pooki, anaa osotua loo ntarasi. Olmonekie ele intarasi te rishata ai o ltung'ana loo Siraeli nchere too nkolong'i ile eitobira Olaitoriani keper o enkop; ore te nkolong e naapishana neidip esiaai neyeng'iyeng'a.’ ” Neisho ninye Musa, ina kata pee eidip airorie te nchumata o ldoinyo le Sinai nena baoi are e nchakenisho, imbaoi o soit, naaigero tolkimojino le Nkai. Ore ake pee edol iltung'ana aajo eimutie Musa eitu elotu adou to ldoinyo, neiturrurro iltung'ana aasotokino Aron, nejoki ninye, “Inyo, intaiki iyiook nkaitin naapuo te dukuya iyiook, amu ore ele Musa, ele tung'ani laa ninye oyaua iyiook ailepunye aitung'uaa enkop e Misiri, mikiyiolo iyiook enataase te ninye.” Nejoki Aron ninche, “Entayutu lelo giso le sahabu ootii nkiyiaa oo nkituaak inyi, o ilayiok linyi, o ntoyie inyi, nikiyakiki nanu.” Neitayu iltung'ana pooki ilgiso le sahabu ootii nkiyiaa enye, neyaki ninche Aron. Neng'amu ninye ina sahabu too nkaik enye, neitobir te ntoki naguetishoreki, neitayu olashe le sahabu natosholaki; nejo ninche, “Kuna ninche nkaitin inyi, intae Isiraeli, naayautua aailepunye aaitung'uaa enkop e Misiri!” Ore ake pee edol Aron ena, neshetu ninye olperere lo laser te dukuya ninye; neitubulaa Aron ajo, “Ore taisere naa keaku osirua lo Laitoriani.” Neinyototo ninche aayooki taisere, neitayu ilasarri oopejori, neyau ilasarri le seriani; netoni iltung'ana aadaa neokisho, neinyototo aaiguran. Nejoki Olaitoriani Musa, “Tadoi shomo; amu ore iltung'ana linono, laa ninche apa iyaua ailepunye aitung'uaa enkop e Misiri, neinyala ate aagil nkitanapat, neibelekenyate aapaashaa aasioki aaing'uaa enkoitoi apa naa ninye aitanapa ninche; eitaikitia ate olashe oitobiruaki te sahabu nashola, neteserema ninche ninye neitaiki ninye olasar, nejo, ‘Kuna ninche nkaitin inyi intae Isiraeli, naa ninche naayautua intae aailepunye aaitung'uaa enkop e Misiri.’ ” Nejoki Olaitoriani Musa, “Atoduaa kulo tung'ana, naa ng'ura, iltung'ana oosho murto ore naa tung'uayioki nanu, pee etum engoro ayupuyupo neirowuaju te ninche amu aidim aidaikie ninche, kake ore te iyie naitayu olorere kitok.” Kake etasayia Musa Olaitoriani Enkai enye nejo, “Olaitoriani, kainyoo pee eyupuyup engoro ino airowuaju te nkaraki iltung'ana linono laa ninche apa iyaua aitung'uaa enkop e Misiri te ngolon sapuk o te nkaina e nkidimata? Kainyoo pee ejo Ilmisiri, e ntorroni apake eyiaraki ninche, pee eitupukuo alotu aar metuata too ldoinyo, nemut ninche aiwuang'ie ti oriong e nkop? Mbelekenyayu tapala engoro ino napi, nirridutena torroni te nkaraki iltung'ana linono. “Tadamu Abraham, o Isaak, o Isirael, isinkan linono, laa te ninche inosa olmumai te kewan ino, nijoki iyie ninche, ‘Kaponaa nanu eishoi ino anaa ilakir le shumata; ore ena kop pooki natonyorra aishoru, naa kaisho nanu eishoi ino nejung ninche ntarasi.’ ” Neirridu Olaitoriani ina torroni natadamua aitaas iltung'ana lenyena. Neibelekenya Musa, nelo adoyio to ldoinyo eeta mbaoi are e nchakenisho too nkaik enyena, mbaoi naaigero too nkaloli pokira are; eigero te nkalo nabo neigero te nkae alo. Ore nena soito dapashi naa esiaai e Nkai, ore ilkigerot naa ilkigerot le Nkai ootaguetakaki oriong nena soito dapashi. Ore ake pee ening Yoshua ololepilepi loo ltung'ana ebuakita, nejoki ninye Musa, “Etii ololepilepi lo larrabal atua enkang oo lng'oborri.” Nejo, “Mme oltoilo le mbuakunoto e nkisulata arashu oltoilo le nkishirata e mirata, kake oltoilo le ranyare ilo laning'ito.” Ore ake enyiku aataaniki ilng'oborri nedol ilo ashe o sinkolio, neyupuyup engoro e Musa airowuaju nenang'aa ninye nena baoi too nkaik enyena, nebel ninche te ntonata o ldoinyo. Neya ninye ilo ashe oitobirutua ninche, nepejoo ninye te nkima, neidong aitaa empunyua, neidapashaki oriong enkare, neitook iltung'ana loo Siraeli ina are. Nejoki Musa Aron, “Kainyoo kintaasa kulo tung'ana pee iyaua eng'oki sapuk shumata ninche?” Nejo Aron, “Mincho engoro o lkitok lai eyupuyup airowuaju; iyiolo iyie kulo tung'ana nchere eiulokinote entorroni. Amu aatiaakita ninche nanu, ‘Ntobiraki iyiook nkaitin, naapuo te dukuya iyiook; amu ore ele Musa, ilo tung'ani oyaua iyiook ailepunye aitung'uaa enkop e Misiri, mikiyiolo iyiook enatotiwuo te ninye.’ Najoki nanu ninche, ‘Enchoo pooki ng'ae oota sahabu eitayu,’ naaisho ninche nanu, nanang'aki nanu atua enkima, nepukunye ine ele ashe.” Ore ake pee edol Musa ajo meekure eitoriayu iltung'ana (etapalayie Aron metaa meitoriayu, aitukurru ninche ti atua ilmang'ati lenye), neitoki Musa aitashe te nkishomi e ina ang oo lng'oborri, nejo, “Kaing'ae ole nkalo o Laitoriani? Wou enatii.” Neiturrurro ilayiok le Lawi maate te ine netii ninye. Nejoki ninye ninche, “Nji ejo Olaitoriani Enkai oo Siraeli, ‘Teena pooki ng'ae olalem te mpolos enye, nilo aman enkang oo lng'oborri pooki ebaiki kishomi o enkae kishomi ning'l ake ashukunye, taara pooki tung'ani olalashe lenye, o lencholuek enye olelatia enye.’ ” Neas ilayiok le Lawi te risioroto ororei le Musa; nebatata ina olong iltung'ana oobaya nkalifuni uni. Nejo Musa, “Ore taata nituputo ate te nkisiayiare o Laitoriani, pooki ng'ae te nkinyiang'a o layioni lenye o eno lalashe lenye, pee eisho ninye Enkai ntae emayianata ena olong taata.” Ore taisere nejoki Musa iltung'ana, “Itaasa intae eng'oki sapuk. Ore taata naa kailep alo enetii Olaitoariani; amu ebaiki naitobir olningo lo sotua te nkaraki ing'ok inyi.” Neaku enyaaka Musa ashuko alo enetii Olaitoriani nejo, “Wooi etaasa kulo tung'ana eng'oki torrono oleng; eitayutuo nkaitin te sahabu neserem ninche. Tapalaki sii ake ninche eng'oki enye; naa ti nimipalaki, tujutoki aatasayia ti atua ina buku ino apa niking'erie.” Nejoki Olaitoriani Musa, “Ore pooki ng'ae otaasa eng'oki te nanu, ninye ajut enkarna enye ti atua embuku ai. Kake shomo taata toriko iltung'ana ine wueji apa naatiaaka; ng'ura, kelo olmalaika lai te dukuya iyie. Ore ake eyia, ore ina olong nabau nanu naitame ing'ok enye te shumata ninche.” Neirriwaki Olaitoriani olmeitai iltung'ana, enkaraki naitayutuo ilo ashe oitayio Aron. Nejoki Olaitoriani Musa, “Entudumunye enchom, intae o lelo tung'ana apa liyaua ailepunye aitung'uaa enkop e Misiri, meshomo ina kop apa naa ninye ainosie olmumai pee aisho Abraham, o Isaak o Yakobo, ajoki ‘Eishoi inyi aisho ninye.’ Naa kairriwaa nanu olmalaika dukuya intae, naaraa nanu meshomo Ilkanaani, Ilamori, o Ilhiti, o Lperesi, Lhifi o Lyebusi. Elepa enchom ina kop naruko kule o naishi; kake malo nanu ti atua intae, maidaikie ake intae te nkoitoi, amu irara iltung'ana oosho murto.” Ore ake pee ening iltung'ana kulo onom torrok, neishir, nemetii oltung'ani oonyaaka apika imasaa enyena. Amu etiaaka Olaitoriani Musa, “Tiaaki iltung'ana loo Siraeli, ‘Irara iltung'ana oosho murto; te nalo nanu te nkata nabo ti atua intae, naidaikie intae. Ore naa taata entayutu imasaa inyi entung'uai ate, pee ayiolou enaitaas intae.’ ” Metaa netupurro iltung'ana loo Siraeli ate too masaa enye, ebaiki oldoinyo le Horeb neito idia alo dukuya. Naa kesesh apa eya Musa olng'obor nelo aun aitaman ina ang oo lng'oborri, nejo ninye olng'obor le ntumo. Ore pooki ng'ae oing'oru Olaitoriani neipang alo ilo ng'obor le ntumo otii auluo ina ang oo lng'oborri. Ore ake enkata naipang Musa alo olng'obor, neinyototo iltung'ana pooki aaitashe, neitashe ake oltung'ani te kutukaji o lng'obor lenye, neduaaya Musa ometaba anaa nejing atua ilo ng'obor. Naa ore ake pee ejing Musa olng'obor, neirorie Olaitoriani Musa. Naa ore ake pee edol iltung'ana pooki ina ng'ape e nkatampoi eitashe te nkutuk o lng'obor, neinyototo iltung'ana pooki aaitashe aaserem, oltung'ani ake te kutuk aji o lng'obor lenye. Neirorie Olaitoriani Musa eing'ura too nkomomi anaa oltung'ani te neirorie olchore lenye. Ore pee eitoki Musa ashuko alo atua ina ang oo lng'oborri, ore osinka lenye Yoshua olayioni le Nuni, ilo barnoti neitu elo aing'uaa ilo ng'obor. Nejoki Musa Olaitoriani, “Ng'ura ajo kitiaaka nanu, ‘Toriku kulo tung'ana ilepunye,’ kake eitu kincho nanu matayiolo ajo kaing'ae irriwaa te nebo nanu. Ninyaaka ajo, ‘Kaayiolo nanu iyie enkarna, ninoto sii kirotetisho too nkonyek aainei.’ Ore naa taata, aatoomono, tenaa kanoto kirotetisho too nkonyek inono, ntoduaaki taata nanu inkoitoi inono, pee aatum nanu atayiolo iyie natum kirotetisho too nkonyek inono. Tadamu sii ajo ore ele osho naa iltung'ana linono.” Nejo ninye, “Kalo nanu te nebo intae, naa kaisho nanu intae enkiyeng'iyeng.” Nejoki Musa Enkai, “Ti nimilo iyie te nebo iyiook, miya iyiook aituang'uaa ene. Amu kaji naa eikoni pee eyiolouni aajo anoto kirotetisho too nkonyek inono, nanu o ltung'ana linono? Aime ti nilo iyie te nebo iyiook, pee kimbalayu iyiook, nanu o ltung'ana linono too ltung'ana pooki ootii oriong enkop?” Nejoki Olaitoriani Musa, “Ore nena baa nitejo naa kaas; amu inoto kirotetisho too nkonyek aainei, naa kaayiolo nanu iyie enkarna.” Nejo Musa, “Aatoomono nanu iyie ntoduaaki enkitoo ino.” Nejoki ninye, “Kaisho nanu enkishiaa ai pooki meshomo te dukuya iyie, naibalunye te dukuya iyie enkarna ai, ‘Olaitoriani’; naipirisie nanu ilo laipirisie naing'urrie ilo laing'urrie.” Nejo ninye, “Kake mindim iyie atoduaa enkomom ai; amu meetae oltung'ani odol enkomom ai neishu.” Neitoki Olaitoriani ajo, “Ng'ura, etii ewueji te mbata nanu naa ninye intasheyie te shumata e ndapidapoi; naa ore ina kata kigiroo enkitoo ai naapik iyie olbaata le ina dapidapoi, naaimulumul nanu iyie te nkaina ino o metaba anaa nalusoo, naitoki nanu aya enkaina ai, nikidol iyie nanu enkoriong ai, kake medoli enkomom ai.” Nejoki Olaitoriani Musa, “Tagueta isoito are dapashi naanyaanyukie inapa e dukuya, pee aiger nanu te nena soito dapashi irorei ootii nena soito dapashi e dukuya, apa nitebela. Tanapayu tadekenya, nilepu tadekenya alotu oldoinyo le Sinai, niyau kewan enatii te ine te nchumata o ldoinyo. Meetae oltung'ani oilepu alotu te nebo iyie, naa nchoo metaa meetae oltung'ani odoli too doinyo pooki; nchoo eaku medaa nkishu o nkerrai te dukuya ilo doinyo.” Neguetu Musa mbaoi dapashi are oo soito naanyaanyukie inapa e dukuya, nedumunye ayooki tadekenya neilep alo enchumata o ldoinyo le Sinai, anaa enaitanapa Olaitoriani ninye, neya te nkaina enye nena soito naagueta dapashi. Nedou Olaitoriani te nkatampoi neitashe te nebo ninye te ine neibalunye enkarna o Laitoriani. Neim Olaitoriani dukuya Musa nejo, “Olaitoriani, Olaitoriani, Enkai o lng'ur o empiris nemesioki agoro, nebore enyorrata nauno enkisiligata neibung enyorrata nauno too ltung'ana iip tomon, epalaki entorroni, o enkitarruoroto o eng'oki, kake mme oloikenaki oltung'ana loo ng'ok esipata tukul, naasujaki nkera ing'ok oo loo menye, o nkera oo nkera enye, o metabaiki eishoi e uni o eni ong'uan.” Neirrug Musa endukuya enye asioki metabaiki enkop, neserem. Nejo ninye, “Tenaa taata kanoto kirotetisho too nkonyek inono, Olaitoriani, nchoo Olaitoriani, aatomono iyie, shomo ti atua iyiook, hoo nikira iltung'ana oosho murto, nipalaki iyiook entorroni ang o ing'ok ang, niya iyiook mataa enjung'ore ino.” Nejo ninye, “Ng'ura, kaitayu nanu osotua. Ore te dukuya iltung'ana linono pooki naas nanu ine nking'asia, neitu ae kata easi ti atua enkop pooki arashu ti ae kop; ore lelo tung'ana litii iyie atua ninche nedol esiaai o Laitoriani; amu entoki naitureisho aitaas intae. “Imbung'a ina naaitanap iyie ena olong. Ng'ura, kaaraa nanu aipang'ie te dukuya intae Ilamori, Ilkanaani, Ilhiti, Ilperesi o Ilhifi, o Lyebusi. Toduaa ake kewan mintayu ake osotua o lelo oomanya enkop pooki nilo, meaku ake orreshet ti atua intae. Tusulaki enkop ilperereni loo lasarri lenye, nigil ing'apeta enye, nidung auroki enkop nena kitanyaanyukot naaji Asherim. (Amu miserem iyie ae Ai, amu ara Olaitoriani laa ore enkarna enye naa Olom, naa Enkai oo lom). Mintayu ake olning'o lelo oomanya enkop, amu te neas enkiborra oo nkonyek erubare nkaitin enye, nepolosaki ilasarri nkaitin enye, nikintoomon iyie obo lenye, nidaa iyie te ilo asar lenye, niya iyie intoyie enye ayamaki ilayiok linono, neas intoyie enkiborra oo nkonyek esujaa nkaitin enye neitasuroki ilayiok linono enkibor oo nkonyek esujaa nkaitin enye. “Mintobiraki kewan nkaitin oo ntokitin naatosholaki neidong'i. “Mbung'a osirua loo mukateni neitu eisuijieki. Too nkolong'i naapishana inosa mukateni neitu eisuijieki, anaa enaaitanapa, te ina kata nategeluaki to lapa le Abibu; amu teilo apa apa iewuo aipang'u aing'uaa Misiri. Ore pooki natabolo enkoshoke e ng'otonye naa enaai, ilewa linono pooki, olbung'aiko loo nkishu, o lkikaunot pooki loo nkishu o loo nkerra. Ore olkikau lo sikiria niwalu to lkuoo le ker, arashu ti nimiwalu nigil emurt enye. Ore ilkikaunot pooki loo layiok linono niwalu akordu nemetii hoo obo olotu dukuya nanu meeta toki. “Too nkolong'i ile taasisho, kake ore te nkolong e naapishana niyeng'iyeng'a; ore te nkata e nkiremore o te nkisampuare niyeng'iyeng'a. Ning'or aibung osirua loo wikii, olng'anayio le dukuya le nkisampuare e nkano, osirua lenkiturrurrorre te siadi ari. Katitin uni to lari eliooyu ilewa linono pooki te dukuya Olaitoriani Enkai, Enkai oo Siraeli. Amu kanang'aa nanu aiturraa iloreren te dukuya ntae; naitalala nanu ilpolosien linyi; nemetii oltung'ani ong'uar enkop inyi, ti nilepu alo alioyu te dukuya Olaitoriani Enkai ino katitin uni tolari. “Mintayu ake osarge lo lasar lai te nebo entoki naisuijo, nimincho sii olasar lo sirua le Ngiroroto eirrag o mekenyu. Ore lelo ng'anayio le dukuya ooituruku too lng'anayio le dukuya le nkop ino niyau atua enkaji o Laitoriani Enkai ino. Nimiyierie olkuoo kule e ng'otonye.” Nejoki Olaitoriani Musa, “Ing'ero kulo rorei; te risioroto e kulo rorei aitayio osotua te nebo iyie o te nebo Isiraeli.” Netii apa ninye ine te nebo Olaitoriani nkolong'i artam o nkewaritin artam, neitu enya emukate arashu eok enkare. Neiger ninye te nena soito dapashi irorei lo sotua, nena kitanapat tomon. Ore pee edou Musa to ldoinyo le Sinai, eeta mbaoi are dapashi e nchakenisho te nkaina enye elotu adou aing'uaa oldoinyo, neitu eyiolou Musa ajo etawang'a enkomom enye te nkaraki natigire airo te nebo Enkai. Ore ake pee edol Aron o ltung'ana pooki loo Siraeli Musa, ng'ura, kewang enkomom enye, neureyu ninche epuonu aanyikaki ninye. Kake eipotuo Musa ninche; neshukokino ninye Aron o larikok pooki lo lorere, neiro Musa te nebo ninche. Ore te siadi nepuonu aanyiku iltung'ana pooki loo Siraeli, neisho ninye ninche te nkitanapata nena pooki naairoro Olaitoriani te nebo ninye to ldoinyo le Sinai. Ore ake pee eidip Musa airorie ninche neitoip enkomom enye te nkarasha. Kake ore ake tenelo Musa dukuya Olaitoriani airo te nebo ninye, neiwuang'ie ina arasha naitoipie enkomom, o metaba anaa nelotu boo; naa ore te nelotu boo neliki iltung'ana loo Siraeli ina naitanapaki ninye, nedol iltung'ana loo Siraeli enkomom e Musa, neitoki Musa aitoip enkomom enye ometaba anaa nelo atua airo tenebo ninye. Neiturrurru Musa olorere pooki loo ltung'ana loo Siraeli nejoki ninche, “Kuna ninche ntokitin naaitanapa intae Olaitoriani entaas. Too nkolong'i ile easi esiaai inyi, kake ore te nkolong e naapishana nitumutumu sabato sinyati e nkiyeng'iyeng to Laitoriani; ore pooki ng'ae oas esiaai te ina olong neari metua. Minokinoko enkima too nkajijik inyi te nkolong e sabato.” Nejoki Musa olturrur pooki loo ltung'ana loo Siraeli, “Ena toki ninye eitanapishe Olaitoriani. Eyautu ti atua ntae enkishoroto eyaki Olaitoriani; ore pooki ng'ae oata oltau le leng'on nchoo ninye eyaki Olaitoriani enkishooroto; sahabu, o enkosholai o suyai; o iusin pusi, o morijo o mpilei o katani napuyiapui napiyaya; o lpapit loo nkineji, o ndapan naanota oo lmeregeshi o noo nkineji, o nkeek o lerai, o eilata oo ltaai, isonkoyoni te ina ilata naputishoreki, o te nkorropil naisonkoyo, oltoto barrikon, o ltoto pee epiki enkila dorrop o embene o lgoo. “Ninchosho pooki tung'ani oata enkidimata ti atua intae meetu aitobir nena pooki naaitanapishe Olaitoriani: olng'obor le Nkai, olng'obor lenye o entoki naitushurieki o enkitushurata enye, o lala oo lolo lenyena, o rubat enyena, o loom lenyena, ing'apeta enyena o neeitotonieki enyena; ilo sanduku o nkeek enyena, ilo orika lo lng'ur o ilo liatua lenye, o ina mesa o mbokishi enyena o masaa enyena pooki, o ina mukate naitoduari; nena kitasheta oo ltaai sii te nkaraki ewang'an te nebo imasaa enyena o ltaai lenyena, o eilata o ltaa; olperere le nkorropil te nebo mbokishi enyena, o ina ilata naputishoreki o ina orropil naisonkoyo o ilo odung'oro le kutuk aji te kutuk aji o lng'obor le Nkai; ilo perere lo lasar opejori te nebo ina ng'esherrie enye o suyai, imbokishi enyena o ntokitin enyena pooki oilo moti oitukuoreki o eneitotonieki enye; o nena kisiong'at endung'oroto, ing'apeta enyena o neeitotonieki enyena o ilo odung'oroto le kishomi e ndung'oroto; nena sheito e nkaji e Nkai o nena sheito o olodung'oro, o nkeenta enye; nena kilani naaripuno aaitobiruno te nkaraki enkisiaayiare te wueji sinyati, lelo kilani oosinya le Aron ilo apolosani, o lelo kilani loo layiok lenyena, te nkisiayiare enye anaa ilapolosak.” Nepuo olorere pooki loo ltung'ana loo Siraeli te ine netii Musa. Nepuonu ninche, ore pooki ng'ae otudumua oltau lenye, o pooki otuputuo oltau lenye, neyau enkishoroto o Laitoriani pee easishoreki te ilo ng'obor le ntumo, o te nkisiayiare enye pooki, o te lelo kilani oosinya. Nepuonu ninche, ilewa o nkituaak; ore pooki oora ilo ltau le yieunoto neyau ilgameta, o lmiintoni, o lgiso, o mankek (isaen loo murto) o lkataarri, o ntokitin oo mpukunot pooki e sahabu eiteng'elaki ake pooki tung'ani Olaitoriani enkishoroto e sahabu Olaitoriani. Ore pooki tung'ani oinepuaki eeta iusin pusi arashu morijo, arashu mpilei arashu katani napuyiapui napiyaya, arashu ilpapit loo nkineji arashu ndapan naanota oo lmeregeshi arashu inoo nkineji, neyau ninche. Ore pooki ng'ae oidim aitayu enkishoroto e nkosholai arashu osuyai neyau anaa enkishoroto o Laitoriani; ore pooki tung'ani oinepuni eeta enchata o lerai naata tipat te siaai, neyau ninye. Ore nkituaak pooki naata enkidimata napiyayisho too nkaik enye, neyau nena naapiyaya, too usin pusi, o morijo o mpilei o te katani sidai napuyiapui; ore nena kituaak pooki naatudumutua iltauja lenye te nkarriyiano nepiyai ilpapit loo nkineji. Neyau ilarikok iltoto barrikon ooji oniks o soito pee epiki, te nkaraki enkila dorrop o ina bene o lgoo, o sonkoyoni o eilata te nkaraki ewang'an, o ina ilata naputishoreki, o enkorropil naisonkoyo. Ore ilewa pooki o nkituaak, lelo tung'ana loo Siraeli, ootupututuo iltauja lenye eyau pooki toki te nkaraki ina siaai naitanapishe Olaitoriani te Musa metaasi neyau nkishorot enye olpela aaisho o Laitoriani. Nejoki Musa iltung'ana loo Siraeli, “Eng'ura, eipoto Olaitoriani te nkarna Besalel olayioni le Uri, olayioni le Huri lo losho le Yuda; neiputa Enkai ninye te nkiyang'et e Nkai, te nkidimata, o te nkalamasisho, o te ng'eno, o te nkarriyiano. Pee eipiru nkitobirat e nkarriyiano, neasisho te sahabu o te nkosholai o to suyai, te ndung'oto oo soito oopiki o te ng'uetata oo nkeek, te siaai e nkarriyiano pooki. Nchoo ninye enkidimata enye naiteng'enishore, ninye te nebo o Oholiab olayioni le Ahisamak lo losho le Dan. Eiputa ninye ninche te nkidimata metaasa empukunoto e siaai pooki naas laguetak loo soito, o ilasirak, o laripak loo usin pusi, o morijo o mpilei, o katani naapuyiapui napiyaya arashu ilashetak, te pooki pukunoto o laisiaayiani arashu olaipirunoni arriyia. “Ore Besalel o Oholiab o pooki tung'ani oota enkidimata, o enkalamasisho oishoo Olaitoriani metayiolo eneiko te neas pooki siaai e nchetare e ine wueji sinyati, neas te risioroto e nena pooki naaitanapishe Olaitoriani.” Neipot Musa Besalel o Oholiab o pooki tung'ani oota enkidimata otipika Olaitoriani enkarriyiano o pooki ng'ae odumu oltau lenye meeu aas esiaai; neng'amu ninche te Musa nena kishorunot pooki o lpela naayautua iltung'ana loo Siraeli pee easieki esiaai e ine wueji sinyati. Neitoki ake ninche aayaki ninye nkishorot olpela pooki akenya, o metaba anaa nepuonu lelo tung'ana pooki oata enkidimata apa oasita esiaai e mpukunoto pooki te ine wueji sinyati, oltung'ani ake te ina siaai apa naasita, nejoki Musa, “Ekeyau iltung'ana ntokitin kumok oleng naalusoo te asata e ina siaai apa naitanapa iyiook Olaitoriani mataas.” Neishoru Musa enkitanapata, neitubulari olomoni ti atua ina ang oo lng'oborri, aajo “Mincho olee arashu enkitok eitoki aas ae toki ti alo nkishorot e ine wueji sinyati.” Neiboori iltung'ana pee meitoki aayau. Amu ore ntokitin naata ninche naa keidip neasieki esiaai pooki, neleku. Ore lelo tung'ana pooki oata enkidimata ti atua lelo oasisho neitobir enkaji e Nkai too lkarash tomon; neitayu te katani napuyiapui napiyaya o too usin pusi, o morijo o mpilei, o lkerubi oitayioki te nkarriyiano. Ore enkadoro o lkarasha obo naa intemat tikitam o isiet, ore endapasho naa intemat ong'uan; nerisio ilkarash pooki te nkadoro. Neitutum ninye ilkarash imiet te nebo ore ilkulikae karash imiet neitutum te nebo. Neitayu ilidat oo lgoso pusi te manaroto e nkalo e oriong o lkarasha te ina tukus e dukuya; neitoki aiko neijia, neitayu ninche, te manaroto e oriong oo lkarash te ina tukus e dukuya; neitoki aiko neijia, neitayu ninche, te manaroto e oriong o lkarasha te ina tukus e are; neitayu ninye ilidat oolgoso onom to lkarasha obo, neitoki aitayu ilidat oo lgoso onom te manaroto o lkarasha le ina tukus e are; ore nena lidat oo lgoso naa keipirakino maate. Neitoki ninye aitayu ilala oo lolo onom le sahabu, neitutumie lelo karash te nebo te lelo gameta; metaa ore ina aji e Nkai naa nabo. Neitoki ninye aitayu ilkarash loo lpapit loo nkineji te nkaraki olng'obor meitushura enkaji e Nkai; neitayu ninye ilkarash tomon o obo. Ore ake enkadoro e pooki karasha naa intemat tomoni uni, naa ore ake endapasho e pooki karasha naa intemat ong'uan; ore lelo karash tomon o obo nerisio. Neitutum ninye ilkarash imiet maate, o lkarash ile maate. Neitayu ilidat oolgoso onom te manaroto e nkalo e oriong olkarasha le ntukus nabo, olgoso onom te manaroto olikae eitutum ilkarash. Neitoki ninye aitayu ilala oololo onom lo suyai pee eitutumie olng'obor te nebo pee etum ataa entoki nabo tukul. Neitaiki ninye ilo ng'obor eneitushurieki too ndapan naanota oo lmeregeshi, o ndapan oo nkineji. Neitoki ninye, aitobir irubat oo sunta naaitashe eilo ng'obor le Nkai too nkeek o lerai. Intemat tomon apa enkadoro e rubata nabo naa entemata nabo o lpisiai endapasho e rubata. Neeta pooki rubata ilng'amat are, ooiruburubieki te nebo; neas ninye ena too rubat oosunta pooki e ilo ng'obor le Nkai. Neitayu ninye irubat e ilo ng'obor le Nkai aikunu nji; irubat tikitam te nkalo e kopikop, neitobir ninye nkitotoneta artam e nkosholai ti abori nena rubat tikitam, nkitotoneta are ti abori erubata nabo too lng'amat lenyena aare, o nkitotoneta are ti abori olikae liatua too rubat enyena pokira are. Ore te nchoto e are e ilo ng'obor le Nkai, te nkalo e moikuape, neitayu ninye irubat tikitam o nkitotoneta enye artam e nkosholai are ti abori erubata nabo o nkitotoneta are ti abori enkae rubata. Ore tioriong e ilo ng'obor le Nkai te nkalo o loontoluo neitobir irubat ile. Neitobir ninye irubat are too lpijat lo ng'obor le Nkai tioriong. Naa kerisha apa ti abori kake eibung'a te shumata, to lgisoi le dukuya; neitayu ninye pokira are aikunu inji, too lpijat pokira aare. Era apa irubat isiet te nebo nkitotoneta enye e nkosholai nkitotoneta, tomon o ile, ore tiabori erubata nabo, naa nkitotoneta are. Neitayu ninye iloom lo lerai, iloom imiet too rubat te nkalo nabo e ilo ng'obor le Nkai, o loom imiet te nkae shoto e ilo ng'obor le Nkai, o loom imiet too rubat e ilo ng'obor le Nkai tioriong te nkalo o loontoluo. Neitayu ninye oloomi le polos pee eimieki ebaiki enkalo nabo o metabaiki enkae aitorit alo irubat. Nemur ninye nena rubat te sahabu, neitayu ilgiso lenye le sahabu too laibung'ak le lelo loom, nemur lelo loom te sahabu. Neitayu ninye oliatua lolkarasha loo usin pusi, o morijo, o mpilei, o katani napuyiapui napiyaya; o lkerubi ooitobiruaki te nkarriyiano. Ore te nkaraki ninye neitayu ing'apeta ong'uan o lerai nemuraa ninche te sahabu; ore ilala oololo lenye naa ile sahabu neiteleiki ninche nkitotoneta ong'uan e nkosholai. Neitayu sii olkarasha le kutukaji te nkaraki kutuk aji e ilo ng'obor, too nkarash naaripuno too usin pusi, o morijo, o mpilei o enkatani napuyiapui napiyaya, naikodo te siaai o ltidu; o ng'apeta enyena pokira imiet te nebo ilala lenyena oololo, nemuraa enchumata enye o nkeek enye te sahabu, kake ore nkitotoneta enye pokira imiet naa ino suyai. Neitayu Besalel osanduku loo nkeek o lerai, intemat are o lpisiai enkadoro, naa entemata nabo o lpisiai endapasho enye, naa entemata nabo o lpisiai enkilepata enye. Nemur ninye te sahabu nasila atua o oriong nepik enkamanaa e sahabu aitaman. Neitayu ilgiso oong'uan oonapieki le sahabu neibung'ie ninche lelo pijat lenyena pokira oong'uan, etii ake ilgiso aare enkalo nabo netii ilgiso aare enkae alo. Neitayu imbokishi naanapieki o lerai, nemur ninche te sahabu, nepik mbokishi lelo giso te pooki shoto e ilo sanduku pee enapieki ilo sanduku. Neitayu ninye olorika lo lng'ur le sahabu nasila, intemat are o lpisiai enkadoro enye naa entemata nabo o lpisiai endapasho enye. Neitoki ninye aitayu ilkerubi aare ooidong'uno te sahabu, neitayu ninche too matuan pokira are e ilo orika lo lng'ur, nepik olkerubi bayie nabo, nepik olikae kerubi enkae bayie; te ntoki nabo o ilo orika lo lng'ur eitobira ninye lelo kerubi too matuan enyena pokira are. Nelak lelo kerubi inaipuko enye aaitorioo, neitoip ilo orika lo lng'ur too naipuko enye eing'ura inkomomi enye maate, neing'or inkomomi e lelo kerubi ilo orika lo lng'ur. Neitoki sii aitayu emesa too nkeek o lerai; intemat are enkadoro, naa entemata nabo endapasho, naa entemata nabo o lpisiai enkilepata; neimulumul ninye te sahabu nasinya, nepik enkamanaa e sahabu aitaman. Nepik aitaman erubata naba anaa endap e nkaina te ndapasho nepik enkamanaa e sahabu ina rubata. Neitayu ninye ilgiso oong'uan le sahabu neeniki lelo giso lelo pijat pokira oong'uan too nkejek enyena. Netaaniki lelo giso ina rubata, ilooibung mbokishi naanapie ina mesa. Neitayu ninye imbokishi oo nkeek o lerai pee enapieki ina mesa, nemuraa ninche te sahabu. Neitoki aitayu ntokitin e sahabu nasila naa ninche epiki enchumata emesa o isaanini enyena, o ngirran o enkorropil, o lbakulini o siang'aun naapikunyeki olasar obukuni. Neitoki sii aitayu enkitashet o ltaa e sahabu nasila. Ore enkitotonata enye o empolos enkitashet neitayuni te siaai e nkidong'ore; ore inkikompeni enyena, o rubat enyena, o ntapuka enyena naaentoki nabo. Netii apa ilng'osil ile ooipang'u too murten enyena, neipang'u ilng'osil okuni le ina kibung'et o ltaa te nkae alo enye. Netii nkikompeni uni naaitayioki aaikunu anaa ilgululu, meetae ake ene meeta endukuya e entapukai, o lng'osila o nkikompeni uni naaitayioki aaikunu anaa ilgululu, meetae ake ene meeta endukuyao entapukai to likae ng'osila; nepuo lelo ng'osil pokira ile aaipang te ina kitashet o ltaa. Ore te ina kibung'et o ltaa kewan, netii nkikompeni naaitayioki aaikunu anaa ilgululu lo lchani onyaanyukie oseki, te nebo ilukuny enye o ntapuka enye, netii ake elukunya e rubata nabo te nebo ninye ti abori ilng'osil oare ooiriamari te lelo ng'osil ile oipang'u te ninye. Ore lukuny enye o lng'osil lenye naa entoki nabo; ore pooki umata naa entoki nabo e siaai enkidong'ore e sahabu nasila. Neitoki ninye aitayu iltaai lenyena oopishana, o ntokitin naarieki iltaai lenye o ngirran dapashi enyena e sahabu nasila. Neitobir ninye te nebo ntokitin enyena pooki te ntalanta e sahabu nasila. Neitayu olperere lo lasar le nkorropil too nkeek o lerai; ore enkadoro enye naa entemata nabo naa entemata nabo endapasho, naa kerisioro apa, naa intemat are enkilepata; ore apa imouarak enyena naa entoki nabo o ninye. Nemur ninye te sahabu nasila, enchumata enye, o matuan enyena aitaman, o mowuarak enyena; neitoki aitayu enkamanaa e sahabu aitaman, neitoki aitayu ilgiso aare le sahabu apik ti abori enkamanaa, too nkaloli enyena naaipirakino, pee eibung nena bokishi naanapieki. Neitayu ninye imbokishi o lerai nemuraa ninche te sahabu. Neitayu sii ninye eilata nasinya naputishoreki enkorropil naisonkoyo naaitushula olaitobirani loo sonkoyoni. Neitayu ninye olperere lo lasar opejori too nkeek o lerai; naa intemat imiet apa enkadoro enye naa intemat imiet endapasho, naa kerisioro apa, naa intemat uni enkilepata. Neitaiki ninye imowuarak too lpijat lenyena pokira oong'uan; ore nena mowuarak enyena naa entoki nabo o ninye, nemur ninye to suyai. Neitayu ninye ntokitin pooki o lperere lo lasar, imotioo, o inkisureta, o ngirran, o nkurteta o nena kiyuketa e nkima; ore nena tokitin enyena pooki neitobiru ninye to suyai. Neitaiki ninye ilo perere lo lasar eng'esherrie, naitobiruno to suyai ti abori elutoroto enye, aitoritie olperere lo lasar ti abori. Nepik ninye ilgiso oong'uan ilpijat pokira oong'uan o lpijat le ina ng'esherrie o suyai pee eibung nena ong'uan oo lpijat le ina ng'esherrie o suyai pee eibung nena bokishi; neitobir ninye too imbokishi oo nkeek o lerai, nemur ninche to suyai. Neimie ninye nena bokishi atua lelo giso too murten e ilo perere lo lasar, pee enapieki ninche; neitobir too mbaoi aitugum. Neitayu ninye olmoti lo suyai oitukuoreki o ina kitotonet enye o suyai, naitayioki too nking'ureta e nena kituaak apa naaisiaaisho te kutuk aji e ilo ng'obor le ntumo. Neitayu ninye endung'oroto, te nkalo e kopikop, ore nena kisiong'at e ndung'oroto naa katani napuyiapui napiyaya; nera ing'apeta enye tikitam naa tikitam nena kitotoneta o suyai, kake ore ilala oo lolo le nena ng'apeta o nena keek enye naa ine enkosholai. Ore te nkalo e moikuape naa intemat iip naa tikitam ing'apeta enye; ore nkitotoneta enye naa tikitam, o suyai, kake ore ilala oo lolo loo ng'apeta, ore irubat enyena naa ine nkosholai. Ore te nkalo o loontoluo netii ilkarash oo isiong'a loo ntemat onom, o ng'apeta enye o neeitotonieki tomon; o neegum tomon ore iyasheta loo ng'apeta o rubat enye naa ene nkosholai. Ore te dukuya te nkalo e nkilepunoto e nkolong, naa intemat onom. Ore ilkarash ooisiong'a te ntaloishi nabo e kishomi naa intemat tomon o imiet, o ng'apeta uni o nkitotoneta uni. Ore, e nkae matua; tena aina o tenda aina te mbata e kishomi e ndung'oroto netii ilkarash ooisiong'a loo ntemat tomon o imiet te nebo ing'apeta uni o nkitotoneta uni. Ore lelo karash pooki ooisiong'a oomanita le ndung'oroto naa ile nkatani napuyiapui napiyaya. Ore ntoneta oo ng'apeta naa ino suyai, kake ore ilala oo lolo loo ng'apeta o rubat enye naa ine nkosholai; ore enkimulumulata oo lukuny enye naa te nkosholai ake sii; ore ing'apeta pooki e ilopaashe neiruburubaki te nkosholai. Ore olkarasha le kishomi le ndung'oroto neikoduno te siaai o ltidu te usi pus o emorijoi o empile o enkatani napuyiapui napiyaya intemat tikitam enkadoro naa intemat imiet endapasho eilep, enyaanyukie ilkarash ooisiong'a le ina dung'oroto. Ore ing'apeta enye naa ong'uan; ore nkitotoneta enye pokira ong'uan naa suyai, o lala o lolo lenye le nkosholai, o emurata oo lukuny enye o rubat enye e nkosholai. Ore ncheito pooki e ilo ng'obor le Nkai o ne ina dung'oroto naamanaa naa ino suyai. Ena esiana oo ntokitin e ilo ng'obor le Nkai, ilo ng'obor le nchakenisho, anaa enaikenaki te ina kitanapata e Musa, te nkisiayiare oo Lawi ti abori erubaroto e Isamar olayioni le Aron ilo apolosani. Besalel olayioni le Uri olayioni le Huri lo losho le Yuda, oitobira nena pooki naaitanapa Enkai Musa; ore te nebo ninye netii Oholiab olayioni le Ahisamak lo losho le Dan, olaitobirunoni o laipirunoni naa olaikodoni too usin pusi, o morijo o mpilei o katani napuyiapui napiyaya. Ore ina sahabu apa nataasishoreki te siaai, te nchetare pooki e wueji sinyati teina sahabu naishorutua iltung'ana, naa talanta tikitam ooudo o shekeli iip naapishana o tomoni uni te risioroto eshekeli e wueji sinyati. Ore enkosholai naing'uaa olorere pooki apa ooikenaki, naa talanta iip nabo o imiet, te risioroto e shekeli e wueji sinyati. Beka nabo te lukunya, aa taa (olpisiai le shekeli te risioroto e wueji sinyati) te pooki ng'ae apa oikenaki, ebaiki ilarin tikitam neilep, too ltung'ana iip ile, o nkalifuni uni, o iip imiet oonom. Ore ntalantani iip e nkosholai naa inaaitobirieki apa nkitotoneta e wueji sinyati, o nkitotoneta e ilo karasha le ndung'oroto nera iip too ntalantani iip e ntalanta ake te nkitotonet. Ore too shekeli enkalifu o iip naapishana o ntomoni naapishana o imiet neitobir ilala oo lolo te nkaraki ing'apeta nemur ilukuny enye neitobiraki ninche irubat. Ore ilo suyai apa oishoruaki naa ntalantani ntomoni naapishana, o shekeli nkalifuni are o iip ong'uan; naa ninche eitobirie ninye nkitotoneta te nkaraki kutuk aji e ilo ng'obor le ntumo, olperere lo lasar lo suyai o eng'esherrie o suyai te nkaraki ninye o ntokitin pooki e ilo perere lo lasar; o nkitotoneta naamanita ina dung'oroto o nkitotoneta e kishomi e ina dung'oroto, o ncheito pooki o lng'obor le Nkai, o ncheito pooki naamanaa te dung'oroto. Ore too usin pusi o morijo o mpilei neitobir ninche te nkarriyiano ilkilani sidain, pee eisiaaishoreki te wueji sinyati; neitobir ninche lelo kilani oosinya te nkaraki Aron; anaa enaitanapa Olaitoriani Musa. Neitobir ninye enkila dorrop e sahabu, too usin pusi o morijo o mpilei, o katani napuyiapui napiyaya. Neidong ninche sahabu aaitadapash neboru nkorin ronkeni pee easishoreki aaitobirie ina arasha sidai, o nena tokitin pusi o morijo o mpilei, o katani napuyiapui napiyaya te nkarriyiano. Neitobir te nkaraki ina kila dorrop irubat oo ronyi, neitutumieki ninye ilcholo lenyena pokira are. Ore ina kimeita narripuno te nkarriyiano neenieki ninye, pee eibung ninye, naa te nena tokitin eripuno o te ina arriyiano, te sahabu o usin pusi o morijo o mpilei, o katani napuyiapui napiyaya nashetuno anaa enaitanapa Olaitoriani Musa. Neirragie isoito barrikon ooji oniks neikodi te sahabu, nepiki te nkarriyiano te nebo nkarn oo layiok le Isirael. Nepik ninye ninche imatuan pokira are oo ronyi le ina kila dorrop, pee eaku soito oodamishoreki te nkaraki ilayiok le Isirael; anaa enaitanapa Olaitoriani Musa. Neitobir ninye enkila o lgoo te siaai e nkarriyiano, anaa ina kila dorrop te sahabu o usin pusi o morijo o mpilei, o katani napuyiapui napiyaya. Nerisioro apa nkaloli pooki; ore apa ina kila o lgoo naa katitin are, entemata e ndap enkadoro naa entemata e ndap endapasho katitin are. Nepik atua ilkererin oong'uan loo soito. Olkereri loo ltoto barrikon, o oltoto sikitok, oltoto oonyori, olkereri le dukuya. Ore olkereri liaare naa iltoto oonyori, iltoto pusi ooitiil o ltoto sidain ooji almasi; ore olkereri li okuni naa iltoto pilei, osoit oji agate iltoto oowang o ltoto sinteti; ore olkereri li ong'uan naa iltoto oonyori, o iltoto barrikon, ooji oniks o ltoto pusi; neripakino apa kuna te sahabu. Kulo apa iltoto tomon aare o nkarn enye anaa nkarn oo layiok le Israel; netiu apa anaa ilmishiren, meeta ake olemeguetakino enkarna enye, too loshon pokira tomon aare. Neitobir ninche te ina kila o lgoo ilpisia oo ooipila oikununo anaa nkeenta, le sahabu nasila; nepik ilkererin aare le sahabu o lgiso aare le sahabu, nepik ilgiso ilpijat pokira aare le ina kila olgoo; nepik ninche nena keenta are e sahabu atua lelo giso pokira aare ootii ilpijat pokira aare le ina kila o lgoo. Ore nkiting'ot pokira are e nena keenta neibung'ieki lelo kererin pokira aare; neiko neijia aaibung'ie te nkalo e dukuya ooronyi le ina kila dorrop. Neitoki ninche aaitobir ilgiso aare le sahabu, nepik ninche ilcholo pokira aare le ina kila o lgoo te nkalo enye e atua te mbata e ina kila dorrop. Neitayu ninche ilgiso aare le sahabu, neibung'ie te nkalo e dukuya ti abori ironyi pokira aare le ina kila dorrop. Neitutum ina kila o lgoo too lgiso lenyena o lelo giso le nkila dorrop te nkeene pus, metaa kepetita ina kimeita narripuno te nkarriyiano ina kila dorrop, pee melolong'u ake te ina kila dorrop; anaa apa enaitanapa Olaitoriani Musa. Neitoki sii aitobir olkila oodo li atua ina kila dorrop laa eipus emua; ore ine neimieki endukuya te ilo kila oodo neikununo anaa enenkila, neeta erripata namanaa pee mepolosa. Ore erripata e abori e ilo kila oodo neripakini ilonyek oopurupurana too usin pusi, o morijo ompilei o katani napuyiapui napiyaya. Neitoki sii aitobir ntualan e sahabu nasila, nepik nena tualan errishata oo lonyek oopurupurana te ina manaroto e abori erripata o lkila; entuala o long'u, o entuala o long'u emanaa te ripata e abori olkila te nkaraki enkisiaayiare; anaa apa enaitanapa Olaitoriani Musa. Neitoki sii aaitobir Ilkilani li oriong te nkarasha napiyaya te nkaraki Aron o layiok lenyena, o ina arasha naenieki endukuya naitobiruno te katani napuyiapui te nkarasha naripuno sidai, o maupen e katani napuyiapui o nena kilani e atua e katani napuyiapui; o enkimeita e katani napuyiapui napiyaya naripa too usin pusi, o morijo, o mpilei naikodo te siaai o ltidu; anaa apa enaitanapa Olaitoriani Musa. Neitoki ninche aaitobir enchili e sahabu nasila e ilo marisian sinyati nesiraki ninye enkarna anaa enkarna nataguetakaki to lmishire, “Sinyati to Laitoriani.” Neeniki ninche ninye te nkeene pus, aakurraki shumata ina arasha naeniki endukuya; anaa enaitanapa Olaitoriani Musa. Neidipayu esiaai pooki e ilo ng'obor le Nkai; o ilo ng'obor le ntumo, netaasa iltung'ana loo Siraeli anaa nena pooki naaitanapa Olaitoriani Musa; neaku etaasa ninche. Neyau ninche ilo ng'obor enetii Musa, ilo ng'obor o ntokitin enyena pooki, o lala lenyena oo lolo, o rubat oo isunta enyena, o loom lenyena, o ng'apeta enyena, o nkitotoneta enyena; nena dapan naanota oo lmeregeshi o noo nkineji naaitushurieki o lkarash lo liatua oodung'ieki; o sanduku le nchakenisho o nkeek enyena, o lorika lo lng'ur; o emesa te nebo imasaa enyena pooki, o emukate e nkitoduaroto; o enkibung'et oo ltaai le sahabu nasila o ltaai lenyena te nebo ntukusi oo ltaai o ntokitin enye pooki, o eilata oo ltaai; olperere lo lasar le sahabu, o eilata naputishoreki o enkorropil naisonkoyo o lkarasha oisiong'a le kutuk aji o lng'obor, ilo perere lo lasar lo suyai o eng'esherrie enye o suyai, o mbokishi o ntokitin enyena pooki; o ilo moti oitukuoreki o enkitotonet enye; lelo karash ooisiong'a le ndung'oroto o ng'apeta enyena, o nkitotoneta enyena, o lkarash le kishomi e ndung'oroto, o inkeenta enyena o ncheito enyena; o masaa pooki te nkisiayiare e ilo ng'obor le Nkai; o ilo ng'obor le ntumo; lelo kilani ooitobiruno te nkisiayiare e wueji sinyati; lelo kilani oosinya le Aron olapolosani, o Ilkilani loo layiok lenyena pee easisho anaa ilapolosak. Anaa nena pooki apa naaitanapa Olaitoriani Musa esiaai pooki, naa ng'ura, etaasa ninche; anaa enaitanapishe Olaitoriani, neaku etaasa ninche ina. Nemayian Musa ninche. Nejoki Olaitoriani Musa, “Ore te nkolong e dukuya o lapa le dukuya tesheta iyie olng'obor le Nkai o ilo ng'obor le ntumo. Nipik atua ilo sanduku le nchakenisho, nidung'oo ilo sanduku to lkarasha loliaatua. Nintijing'u emesa, nipik ntokitin enyena aitobiraki; niyau nkitasheta oo ltaai nipik iltaai lenyena. Nipik olperere lo lasar le sahabu o enkorropil dukuya ilo sanduku le nchakenisho, nintoki apik enkarasha e kutuk aji o lng'obor le Nkai. Nipik olperere lo lasar opejori dukuya kutuk aji e ilo ng'obor le Nkai ilo ng'obor le ntumo, nipik ilo moti oitukuoreki erishata e ilo ng'obor le ntumo o lperere lo lasar, nipik enkare. Nintoki apik endung'oroto aitaman, niik olkarasha le kishomi e ndung'oroto. Nintoki aitayu eilata naputishoreki, nibukoki ilo ng'obor le Nkai o pooki toki natii atua, nintisiny ninye o masaa enyena pooki; naa keaku ninye sinyati. Nintoki sii abukoki eilata olperere lo lasar opejori o ntokitin enyena pooki, nintisiny ilo perere naa kesinyayu ilo perere oleng. Nintoki sii abukoki eilata ilo moti oitukuoreki o eneitotonieki, nintisiny ninye. Nintoki ariku Aron o layiok lenyena kutuk aji e ilo ng'obor le ntumo, nintuku ninche te nkare. Ninchopoki Aron ilkilani oosinya, nibukoki ninye eilata aput, nikinteng'elaki ninye, peyie aatum aisiaya anaa olapolosani. Niriku sii ilayiok lenyena ninchopoki ninche ilkilani, nibukoki ninche eilata aput, anaa enituputo menye lenye pee aatum aaisiaayia anaa ilapolosak; ore ina putoto embukokinoto enye e ilata neng'amari ninche metaa ilapolosak nkatitin pooki ti atua iishoritin enye pooki.” Neiko neijia Musa; te risioroto e nena pooki naaitanapa Olaitoriani ninye, neaku etaasa ninye. Ore to lapa le dukuya to lari li aare, te nkolong e dukuya o lapa, neitasheyieki olng'obor le Nkai. Neshet Musa olng'obor le manyisho e Nkai; neirragie nkitotoneta enyena, nepik irubat oo sunta enyena, nepik imbokishi enyena, neun ing'apeta enyena; neisalaash olkarasha te shumata o lng'obor le Nkai neitushur o lng'obor shumata ninye, anaa enaitanapa Olaitoriani Musa. Neya ninye ina shakenisho nepik atua osanduku, nepik nkeek ilo sanduku nepik ilo orika lo lng'ur enchumata e ilo sanduku; neitoki ayau ninche osanduku atua ilo ng'obor le Nkai, nepik ilkarash le ndung'oroto nedung'oo ilo sanduku le nchakenisho; anaa apa enaitanapa Olaitoariani Musa. Nepik ninye emesa atua ilo ng'obor le ntumo, te nkalo e moikuape e ilo ng'obor le Nkai, ti oriong ilo karasha lo liatua, nepik emukate aitobiraki te nchumata enye te dukuya Olaitoriani; anaa enaitanapa Olaitoriani Musa. Nepik ninye nkitasheta oo ltaai atua ilo ng'obor le ntumo, enkipirakinoto eina mesa te nkalo e kopikop e ilo ng'obor le Nkai. Nepik iltaai te dukuya Olaitoriani; anaa enaitanapa Olaitoriani Musa. Nepik ninye olperere lo lasar le sahabu atua ilo ng'obor le ntumo te dukuya ilo karasha lo liatua, nepej te ine enkorropil naisonkoyo tenchumta enye anaa enaitanapa Olaitoriani Musa. Nepik ilkarash oodung'oo kutuk aji e ilo ng'obor le manyisho e Nkai. Nepik ninye olperere lo lasar opejori kutuk aji eilo ng'obor le Nkai oilo ng'obor le ntumo, neitayu te nchumata enye olasar opejori o lasar le nkurma naidong'o; anaa apa enaitanapa Olaitoriani Musa. Nepik ninye ilo moti oitukuoreki erishata e ilo ng'obor le ntumo o lperere lo lasar, nepik enkare naitukuoreki; naa ninye eisujie Musa o Aron o layiok lenyena nkaik enye o nkejek enye; te nepuo ninche atua olng'obor le ntumo naa te neetaniki ninche olperere lo lasar, neitukuo; anaa enaitanapa Olaitoriani Musa. Neitasheyie ninye endung'oroto aitaman ilo ng'obor le Nkai o lperere lo lasar nepik ninye olkarasha te kishomi e ina dung'oroto. Neaku eidipa Musa esiai. Neitoki enkatampoi aitoip ilo ng'obor le ntumo, neiput enkitoo o Laitoriani ina aji e Nkai. Neitu eidim Musa atijing'a atua ilo ng'obor le ntumo, amu etobikie enkatampoi shumata ninye, neiput enkitoo o Laitoriani ilo ng'obor. Ore tiatua ilotot enye pooki, enkata ake nayae ina atampoi aaiwuang'ie teilo ng'obor, nepuo iltung'ana loo Siraeli dukuya; kake teneitu eyae ina atampoi aailepie, neitu ninche epuo, ometabau ina olong nayae aailepie. Amu ore tiatua ilolot enye pooki netii enkatampoi o Laitoriani shumata ilo ng'obor dama, netii enkima atua ninye kewarie, te dukuya ina aji pooki e Israel. Neipotu Olaitoriani Musa, neirorie ninye teilo ng'obor le ntumo, ejo, “Irorie iltung'ana loo Siraeli nijoki ninche, teneishoru ake oltung'ani te intae olasar aisho Olaitoriani, niyauu ilasarri linyi loo nkishu aashu iloo ntare. “Tenaa ore olasar lenye naa olasar opejori oing'uaa eluaata oo nkishu, neyau ninye olbung'ae lemeeta entioto, neishooyo ninye te kutuk aji olng'obor le ntumo, pee etum ninye ataa keng'amaroyu te dukuya Olaitoriani; neiteleiki ninye enkaina enye endukuya eilo asar opejori, naa keng'amari te nkaraki ninye pee eitobir olning'o lo sotua te nkaraki ninye. Neyieng ninye oloing'oni te dukuya o Laitoriani; ore lelo ayiok le Aron lelo apolosak neyau osarge, neisuaaya ilo sarge aaitaman ilo perere lo lasar ootii kutuk aji eilo ng'obor le ntumo. Neyieng ninye ilo asar opejori nedung'udung aitaa rubat, ore ilayiok le Aron ilo apolosani neinok enkima tenchumata olperere lo lasar nepik ilkeek aaitobiraki enkima; ore lelo ayiok le Aron apolosak nepik nena rubat enkima elukunya, o eilata aaitobiraki te nchumata lelo keek ootii enkima te nchumata olperere lo lasar; kake ore ore sorri e nkoshoke o loilelek lenyena neituku ninye te nkare. Nepejoo olapolosani pooki te nchumata olperere lo lasar, anaa olasar opejori, olasar le mpejoroto te nkima, esong'ouna narropil to Laitoriani. “Tenaa ore enkishorunoto enye o lasar opejori naa eluaata oo ntare eing'uaa nkerra aashu nkineji, naa keishoru ninye ositima lemeeta entioto; neyieng ninye te nkalo e moikuape olperere lo lasar te dukuya Olaitoriani, ore ilayiok le Aron lelo apolosak neisuaaya osarge lenye aaitaman ilo perere lo lasar. Nedung'udung aaitaa rubat tenebo endukuya enye o eilata, neirragie olapolosani ninche aitobiraki aiteleiki lelo keek ootii enkima te nchumata olperere lo lasar; kake ore sorri e nkayaitie o loilelek neituku ninye te nkare. Ore ilo apolosani neitayu olasar pooki, nepejoo ninye to lperere lo lasar, olasar ninye opejori, olasar le mpejoroto te nkima, esong'ouna narropil to Laitoriani. “Tenaa ore olasar lenye to Laitoriani naa olasar opejori loo motonyi, neyau ninye olasar lenye loo nturkuluoni aashu ntukurluoni kutiti. Neyau olapolosani olperere lo lasar; ore osarge lenye neibukori te mbata olperere lo lasar; naa keitayu ninye enkoshoke enye tenebo nkopir nenang'aki embata olperere lo lasar te nkalo o loosaen ewueji oo nkuruon; nepolos ninye ina motonyi too naipuko enyena kake meor aitaa are. Nepejoo olapolosani te nchumata olperere lo lasar, te nchumata e lelo keek ootii enkima; olasar opejori ninye, olasar le nkima esong'ouna narropil to Laitoriani. “Teneyau ake oltung'ani enkishorunoto e ntapa napuyiapui anaa olasar to Laitoriani, naa keaku ina kishorunoto enye olasar le ntapa sidai; nebukoki ninye eilata ina tapa, nepik olbani oriong ninye, neyaki ilayiok le Aron lelo apolosak. Neitayu ninye teina tapa napuyiapui emborei e nkaina eina tapa o eilata tenebo olbani pooki; nepejoo olapolosani ena metaa endamunoto te nchumata olperere lo lasar, olasar le nkima, esong'ouna narropil to Laitoriani. Ore entapa natelekua neaku ene Aron o layiok lenyena. Ninye erubata nasinya aisul too lasarri oopejokini te nkima Olaitoriani. “Teniyau iyie enkishorunoto e ntapa natapejoki to ljiko opising'a, aaitaa olasar, naa keaku imukateni neitu eisuishieki, e ntapa napuyiapui naipurjaki te ilata, napuyiapui naa tenaa ore enkishorunoto ino naa olasar le ntapa nateyiaraki te nkarae, nchoo eaku ole ntapa sidai neitu eisuishieki, naipurjaki te eilata; tebela ntaa imbelibelat nibukoki eilata oriong enye; olasar le ntapa ninye. Naa tenaa ore enkishorunoto ino naa olasar le ntapa nateyiaraki te moti eitobiruni te ntapa sidai o eilata. Naa iyau iyie ina kishorunoto e ntapa naitobiraki te kuna tokitin ayaki Olaitoriani; ore ake pee eitarasakini olapolosani, neyau ninye ilo perere lo lasar. Neya olapolosani teina kishoroto entapa ina rubata endamunoto nepejoo ena rubata te nchumata olperere lo lasar, olasar le nkima, esong'ouna narropil to Laitoriani. Ore entoki natelekua teilo asar le ntapa neaku ene Aron o layiok lenyena; erubata naa ninye nasinya aisul o lasar opejokini te nkima Olaitoriani. “Meetae enkishoroto e ntapa nayakini Olaitoriani naitobiruni te ntoki naisuisho, amu mipejokiki Olaitoriani te nkima entoki naisuisho aashu pooki aisho anaa olasar le nkima. Ore anaa enkishorunoto oo lng'anayio le dukuya indimidimi intae aayaki ninche Olaitoriani, kake meishoori ninche te nchumata olperere lo lasar aaitaa esong'ouna narropil. Tipika nena kishorot inono pooki e ntapa emunyan, nimincho ake eaku metii emunyan o lning'o lo osotua lino o Enkai ino o lasar lino le ntapa; ore too nkishorot inono pooki nchooi emunyan. “Teninchooyo iyie enkishoroto e ntapa oo lng'anayio le dukuya aisho Olaitoriani, ninchooyo iyie anaa olasar le ntapa loo lng'anayio le dukuya, ina tapa naidong'oki naing'uaa lukuny e ntapa naatisilaki te nkima. Nibukoki iyie eilata oriong ninye, ninteleiki olbani oriong enye, olasar le ntapa ninye. Nepejoo olapolosani anaa entoki nadamuni eoroti eina tapa naidong'oki o eilata tenebo olbani pooki; olasar opejokini te nkima Olaitoriani. “Tenaa ore enkishoroto o ltung'ani naa olasar le seriani, neishooyo ninye enkiteng te luata, olbung'ae aashu entawuo, nchoo eishooyo ina nemeeta entioto te dukuya Olaitoriani. Neiteleiki ninye enkaina enye endukuya eilo asar lenye neyieng ninye te kutuk aji eilo ng'obor le ntumo; ore lelo ayiok le Aron, lelo apolosak neisuaaki ilo osarge ilo perere lo lasar aaitaman. Ore teilo asar le seriani oishoruaki, anaa enkishoroto naishori te nkima Olaitoriani, neishooyo ninye enkurriny pooki naimulumulita enkoshoke o enkurriny pooki e nkoshoke. O lairakuj pokira oare tenebo ina kurriny naimulumulita ninche oilo kina le moinyua oya ninye tenebo ilairakuj. Nepejoo ilayiok le Aron te nchumata olperere lo lasar ti oriong ilo asar opejori, otii enchumata oo nkeek te nkima, olasar le mpejoroto te nkima, esong'ouna narropil to Laitoriani. “Tenaa ore enkishoroto enye o lasar le seriani oishori Olaitoriani naa enkiteng naing'ua eluaata olbung'ae aashu entauo neishoru enemeeta entioto. Teneishoru ninye olkuoo le ker aitaa olasar lenye, neishoru ninye te dukuya Olaitoriani, eiteleiki enkaina enye endukuya eilo asar lenye, neyieng ninye te dukuya ilo ng'obor le ntumo; ore lelo ayiok le Aron neisuaaki osarge ilo perere lo lasar aaitaman. Ore teilo asar le seriani anaa enkishoroto napejokini te nkima Olaitoriani, neishooyo ninye eilata enye, eilata o lkidong'oe, aitabaiki oloito le nkoriong oina kurriny naimulumulita enkoshoke, o enkurriny pooki e nkoshoke, o lairakuj pokira oare oina kurriny naimulumulita ninche, oilo kina le monyua neya ninye tenebo ilairakuj. Nepejoo olapolosani ninche te nchumata olperere lo lasar anaa endaa naishoruaki tialo enkima aaisho Olaitoriani. “Tenaa ore enkishoroto enye naa enkine, nchoo eishoru ninye te dukuya Olaitoriani, neiteleiki enkaina enye endukuya enye neyieng ninye te dukuya ilo ng'obor le ntumo, ore lelo ayiok le Aron neisuaaki osarge olperere lo lasar aaitaman. Netum taa aishooi te ninye, anaa olasar lenye oishori te nkima Olaitoriani, ina kurriny naimulumulita enkoshoke o enkurriny pooki enkoshoke, o lairakuj pokira oare tenebo ina kurriny enye, oilo kina le monyua oya ninye tenebo ilairakuj. Nepejoo olapolosani ninche te nchumata olperere lo lasar anaa endaa naishoori te nkima metaa esong'ouna narropil. Ore enkurriny pooki naa eno Laitoriani. Keaku ena enkitanapata e anaake tiatua iishoritin inyi pooki, tiatua imanyishoritin inyi pooki, nchere minyanya intae enkurriny aashu osarge.” Nejoki Olaitoriani Musa, “Tiaki iltung'ana le Israel, teneas oltung'ani ingok eitu eotiki tiae nabo oo mbaa naaitanapishe Olaitoriani pee measi, neas nabo te ninche, tenaa olapolosani otubukokoki eilata aaput oas eng'oki, ayau entorroni shumata iltung'ana, nchoo ninye eitayu tenkaraki ina ng'oki nataasa oloti oing'oni lemeeta entioto aisho Olaitoriani metaaolasar le ng'oki. Neyau ninye ilo oing'oni kutukaji eilo ng'obor le ntumo dukuya Olaitoriani, neiteleiki enkaina enye endukuya eilo oing'oni, neyieng ilo oing'oni te dukuya Olaitoriani. Ore ilo apolosani otubukokoki eilata aaput neya embata osarge leilo oing'oni atua ilo ng'obor le ntumo; neitadoiki olapolosani olkimojino lenye atua ilo sarge neisuaaki embata osarge katitin naapishana dukuya Olaitoriani te dukuya ilo karasha le wueji sinyati. Nepik ilo apolosani embata eilo sarge imowuarak ol perere lo lasar naatii enkorropil te dukuya Olaitoriani, apa otii atua olng'obor le ntumo. Ore ilo likae sarge lo loing'oni neibukoo te ntonata olperere opejorieki olasar otii kutukaji eilo ng'obor le ntumo. Ore enkurriny pooki eilo oing'oni lo lasar le ng'oki neitayu ninye, ina kurriny naimulumul isorri e nkoshoke o ina kurriny pooki e nkoshoke, o lairakuj lenyena pokira oare tenebo enkurriny enye oilo kina le moinyua oya ninye tenebo ilairakuj (anaa ake enayae to lkiteng lo lasar le seriani), nepejoo olapolosani tenchumata olperere lo lasar opejori. Kake ore olchoni leilo oing'oni o nkiri enyena tenebo endukuya enye, o loilelek lenyena, o sorri enyena e nkoshoke o moyok enyena nenap ninye oloing'oni pooki auluo ewueji nemeiduruk ine neibukorieki nkuruon, nepejoo ninye te nkima oo lkeek; ore te ine wueji neibukorieki nkuruon. “Teneas olturrur pooki loo Siraeli eng'oki eitu eotiki ore ina toki naisudoro too nkonyek eumata, neas ninche nabo oo mbaa naaitanapishe Olaitoriani pee measi neaku ilooitarruoitie; ore ake teneyiolouni ina ng'oki nataasa ninche, neitayu ina umata oloti oing'oni metaa olasar le ng'oki, neyauni ninye dukuya ilo ng'obor le ntumo, ore ilpayiani leilo turrur neiteleiki nkaik enye endukuya eilo oing'oni te dukuya Olaitoriani, neyieng'i ilo oing'oni te dukuya Olaitoriani. Neyau taa ilo apolosani otubukokoki eilata aaput embata o sarge leilo oing'oni atua ilo ng'obor le ntumo. Neitadoiki olapolosani olkimojino lenye atua ilo sarge neisuaaki katitin naapishana dukuya Olaitoriani tioriong olkarasha le wueji sinyati. Nepik ninye embata o sarge enchumata oo mowuarak eilo perere lo lasar otiii atua olng'obor le ntumo dukuya Olaitoriani; ore olikae sarge neibukoo te ntonata eilo perere lo lasar opejori otii kutukaji eilo ng'obor le ntumo. Ore enkurriny enye pooki neitayu ninye nepejoo te nchumata olperere lo lasar. Ina ninye eitaas ilo oing'oni; anaa enaitaasa ilo oing'oni lo lasar le ng'oki, neijia sii eiko tele. Neitobir olapolosani olning'o lo sotua te nkaraki ninche, naa kepalakini ninche. Nenap ninye ilo oing'oni auluo ilng'oborri nepejoo anaa enatapejoyie oloing'oni le dukuya; o lasar le ng'oki te nkaraki eumata. “Teneas oloitoreisho eng'oki, neas eitu eotiki ae nabo oo mbaa pooki naaitanapishe Olaitoriani Enkai enye pee measi, neaku oloitarruoyie, ore pee eitayioloi ninye ina ng'oki nataasa, neyau ninye anaa olasar lenye enkine, ositima lemeeta entioto, neiteleiki ninye enkaina enye endukuya eina kine, neyieng ninye te wueji neyieng'ieki lelo asarri oopejori te dukuya Olaitoriani; olasar le ng'oki ninye. Neya olapolosani embata eilo sarge lo lasar le ng'oki to lkimojino lenye nepik imowuarak olperere lo lasar opejorieki lasarri, neibukoo olikae sarge te ntonata olperere lo lasar opejorieki lasarri. Ore enkurriny enye pooki nepejoo te nchumata o lperere lo lasar, anaa enkurriny olasar loo nkishorot e seriani; neitobir olapolosani olning'o lo sotua te nkaraki ninye too ng'ok enyena, naa kepalakini ninye. “Teneas oltung'ani ake duoo eng'oki eitu eotiki aas ae nabo oo mbaa naaitanapishe Olaitoriani pee measi, neaku oloitarruoyie, ore ake pee eitayioloi ninye ina ng'oki nataasa neyau ninye aitaa enkishoroto enye enkine, esupen nemeeta entioto, te nkaraki ina ng'oki nataasa. Neiteleiki ninye enkaina enye endukuya eina kine o lasar le ng'oki, neyieng ilo asar le ng'oki te wueji neyieng'ieki ilasarri oopejori. Neya olapolosani embata eilo sarge lenye to lkimojino lenye nepik nchumat oo mowuarak eilo perere lo lasar opejorieki ilasarri, neibukoo olikae sarge te ntonata eilo perere lo lasar. Neitayu enkurriny enye pooki, anaa enaitayuni ina kurriny to lasar le seriani, nepejoo olapolosani te nchumata olperere lo lasar metaa esong'ouna narropil to Laitoriani; neitayu olapolosani olning'o lo sotua tenkaraki ninye, naa kepalakini ninye. “Teneyau ninye olkuoo le ker metaa enkishoroto enye o lasar le ng'oki, nchoo ninye eyau esupen nemeeta entioto, neiteleiki enkaina enye, endukuya eilo asar le ng'oki neyieng ninye aitaa olasar opejori. Neya olapolosani embata o sarge leilo asar le ng'oki to lkimojino lenye nepik nchumat oo mowuarak eilo perere lo lasar opejorieki ilasarri, neibukoo olikae sarge lenye te ntonata olperere lo lasar. Ore enkurriny enye pooki neitayuni anaa enaitayuni enkurriny o lker lo lasar le seriani, nepejoo olapolosani te nchumata olperere lo lasar, apejoki Olaitoriani te nkima te nchumata ine wueji oo nkishorot; neitayu olapolosani olasar olning'o lo sotuat enkaraki ina ng'oki nataasa ninye, naa kepalakini ninye. “Tenelo neas oltung'ani ake ninye eng'oki eipotuoki enkiguana meitayu shakenisho hoo naa olchakeni ninye, ore tenetoduaa ninye aashu tenetayiolo ina bae, ore ake etiu neijia nemelimu, nenap ninye eng'oki e ntorroni enye. Aashu tenelo neiseyie ake ninye oltung'ani entoki nemesinya, aa empopok e ng'ues nemesinya aashu empopok e nkiteng nemesinya aashu empopok oo ntokitin nemesinya naa embae naisudoro ena te ninye, neaku ninye ole mesinya, neaku ninye oloitarruoyie. Aashu tenelo neiseyie ninye mbaa nemesinya oo ltung'ana e pooki pukunoto laa te ninye eaku olemesinya, ore ina bae neisudoro te ninye, ore ake pee elotu ayiolou ina bae neaku ninye oloitarruoyie. Aashu tenelo neiro oltung'ani te nkutuk enye ainos olmumai pee eas entorroni aashu eas esidai olmumai ake duoo ninye oinos iltung'ana, naa tenaa embae ena naisudoro te ninye, ore ake pee elotu ayiolou neaku ninye te pooki e kuna oloitarruoyie. Tenaa oloitarruoyie oltung'ani tiae nabo e kuna, neibalunye ninye ina ng'oki nataasa, naa keyaki ninye nkishorot enyena e nkitarruorroto Olaitoriani teina ng'oki nataasa, esupen naing'ua eluaata oo ntare, olker aashu enkine pee eaku olasar le ng'oki, neitobir olapolosani olning'o lo sotua te nkaraki ninye teina ng'oki nataasa. “Kake tenemeeta ninye olker, neyau naa, anaa enkishoroto enye te nkitarruorroto nataasa to Laitoriani, teina ng'oki nataasa ninye, nturkuluoni are anaa nturkuluoni are kutiti, nabo naaku olasar le ng'oki o enkae naaku olasar opejori. Neyau ninye ninche enetii olapolosani, laa ninye ong'as aishooyo ina o lasar le ng'oki; neburukush ninye endukuya enye te murt enye kake medung'oo neisuaaki ninye embata o sarge leilo asar le ng'oki embata olperer lo lasar, ore olikae sarge nebukoki ninye e ntonata o lperere lo lasar; olasar le ng'oki ninye. Neitoki ninye aishooyo eniare metaa olasar opejori terisioroto oo nkitanapat; neitobiru olapolosani olning'o lo sotua te nkaraki ninye teina ng'oki nataasa ninye, naa kepalakini ninye. “Kake tenemeeta ninye nturkuluoni are, aashu nturkuluoni are kutiti, neyau naa, anaa enkishoroto enye teina ng'oki nataasa ninye, ematua e tomon e efa e ntapa napuyiapui metaa enkishoroto te nkaraki eng'oki, nemepik ninye eilata shumata ina tapa, nemepik olbani shumata enye, amu olasar ninye le ng'oki. Neyau ninye enetii olapolosani, neitayu ilo apolosani emborei enkaina eina tapa metaa erubata nadamuni nepejoo ina to lperere lo lasar, apejoki Olaitoriani teine neishoorieki ilasarri oopejori; olasar le ng'oki ninye. Neijia eiko olapolosani aitobiraki ninye olasar olning'o lo sotua teina ng'oki nataasa ninye tiae nabo e kuna baa naa kepalakini ninye. Ore enaleku neaku eno lapolosani anaa enkishoroto e ntapa.” Nejoki Olaitoriani Musa, “Tenelo neas oltung'ani ake ninye embae naainyal enkirukoto, neas eng'oki eitu eotiki, te pooki toki e nena sinyat o Laitoriani nchoo eyau ninye, neyau anaa enkishoroto enye o lasar lenkitarruorroto to Laitoriani, olmeregesh lemeeta entioto aitayu tiatua eluaata, nidung'oki iyie enkinyiang'a te shekeli e nkosholai terisioroto e shekeli e wueji sinyati; olasar le nkitarruorroto ninye. Nelak sii ninye ina apa naitarruoyie tialo ina bae sinyati, neponiki e rubata eimiet ina, neisho olapolosani; neitobiraki olapolosani ninye olning'o lo sotua teilo meregesh lo lasar le nkitarruorroto, naa kepalakini ninye. “Tenelo neas ing'ok oltung'ani aas nabo oo mbaa naaitanapishe Olaitoriani pee measi, hoo duoo ninye nemeyiolo, ore ake eyia netaa ninye oloitarruoyie naa kenap ninye enkitarruorroto enye. Neyau ninye enetii olapolosani olmeregesh lemeeta entioto aitayu te luata enye, nitudung'oko iyie enkinyiang'a nchere keishiakino enkinyiang'a e laata o lasar le nkitarruorroto, neitobir olapolosani olasar lo lning'o lo sotua te nkaraki ninye teina kitadiata nataasa ninye eitu eotiki; naa kepalakini ninye. Olasar le nkitarruorroto ilo; eitarruoyie ninye te dukuya, Olaitoriani.” Nejoki Olaitoriani Musa, “Tenelo ake neas oltung'ani eng'oki, neas embae naainyal enkirukoto tialo Olaitoriani, alej ole latia enye too mpisai naashumi aashu te embae natoning'okinoteki aashu aikonyaa, aashu aitorogony ole latia enye aashu adumu entoki naimina nelejishore ainos olmumai te lejare, tiae nabo oo mbaa naas iltung'ana netaasa eng'oki teina. Teneaku etaasa oltung'ani eng'oki neaku oloitarruoyie nerrinyu ninye ina toki nawa te nkikonyare, aashu ina nanoto te nkitorogonyata, aashu ina naishooki ninye meiteng'ela, aashu ina toki apa naimina natudumua ninye, aashu ae toki ake ninye nainosie ninye olmumai te lejare; nerrinyu ninye elulung'a neponiki erubata e imiet, neisho ilo ora olopeny, teina olong o lasar le nkitarruorroto enye. Naa keyaki ninye olapolosani olasar lenye le nkitarruorroto, aisho Olaitoriani olmeregesh lemeeta entioto aitayu tiatua eluaata enye, litudung'oko iyie enkinyiang'a nchere keiririkino olasar le nkitarruorroto; neitobir olapolosani olning'o lo sotua te nkaraki ninye te dukuya Olaitoriani, naa kepalakini ninye te pooki bae naba anaa enataasa oltung'ani neaku oloitarruoyie.” Nejoki Olaitoriani Musa, “Ntanapa Aron o layiok lenyena, tiaaki, Ena enkitanapata o lasar opejori. Ore ilo asar opejori neton te nchumata oo ng'esherreta o lperere lo lasar enkewarie pooki o mekenyu, ore enkima olperere lo lasar neishori metobiko ayupuyup te nchumata enye. Neishop olapolosani olkila lenye le kitani napuyiapui neishop enkila e atua e kitani napuyiapui, neitayu taa nena kuruon eilo asar otumuta enkima etapejoyioki to lperere lo lasar, nepik ninche embata olperere lo lasar. Neitoki aitayu nena kilani naaishopito neishop kulie kilani, nenap nena kuruon aya auluo ilng'oborri ewueji nemeiduruk. Ore ina kima olperere lo lasar nepali meyupuyupo, meishori metua, nepik olapolosani ilkeek e nkima ine anaake tadekenya, neirragie ilo asar opejori aiteleiki aitobiraki, nepejoo te nchumata enye enkurriny eilo asar le seriani. Neishori enkima meyupuyupo te shumata olperere lo lasar nkatitin pooki, meishori metua. “Ena enkitanapata o lasar le ntapa. Ilayiok le Aron ooishooyo te dukuya Olaitoriani, te dukuya ilo perere lo lasar. Neitayu obo emborei enkaina eina tapa napuyiapui o lasar le ntapa tenebo eilata o lbani pooki otii enchumata eina tapa o lasar, nepejoo ena metaa erubata nadamuni tenchumata olperere lo lasar, esong'ouna narropil to Laitoriani. Ore enkae pooki neinos Aron o layiok lenyena; nenyae ninye eitu eisuishieki tiatua ewueji sinyati; tiatua olgoriet leilo ng'obor le ntumo neinos ninche. Nemepeji ninye tenebo entoki naisuisho. Aishoo nanu ninche metaa erubata to lasar lai opejori te nkima, entoki ena nasinya oleng naikununo anaa olasar le ng'oki o lasar le nkitarruorroto. Eidim pooki lee too layiok le Aron ainosa ninye, anaa enaibalunyeki ntarasi tiatua iishoritin inyi pooki, tialo ilasarri lo Laitoriani oopejori te nkima; ore oloba anaa oloiseyie ninche neaku sinyati.” Nejoki Olaitoriani Musa, “Ele ninye olasar oisho Aron o layiok lenyena Olaitoriani teina olong nabukokini ninye eilata aaput: ematua e tomon e efa e ntapa napuyiapui metaa olasar le ntapa li anaake, olpisiai lenye tadekenya o likae pisiai teipa. Neitobiruni te eilata teina girra nayierishoreki, niyau iyie eipurjaki aaitobiraki, too rubat naatapejoki anaa olasar le ntapa, ninchooyo anaa esong'ouna narropil to Laitoriani. Ore ilo apolosani tiatua ilayiok le Aron, laa ninye etubukokoki eilata aaput pee etonie olorika lenye, neitarasaki ninye Olaitoriani anaa apa enaibalunyeki ntarasi; nepejori pooki. Ore pooki asar le ntapa lo lapolosani nepejori pooki nemeinosi ninye.” Nejoki Olaitoriani Musa, “Tiaki Aron o layiok lenyena, ena enkitanapata o lasar le ng'oki. Ore te wueji neteyieng'ieki olasar opejori, neyieng'i ilo asar le ng'oki te dukuya Olaitoriani; naa kesinya ninye oleng. Ore ilo apolosani oishooyo olasar te nkaraki eng'oki nenya ninye; nenya ninye tiatua ine wueji sinyati, tiatua olgoriet lo lng'obor le ntumo. Ore pooki toki naiseyie nkiri eilo asar neaku sinyati; naa tenelo neisuaakino osarge lenye olkila, nintuku iyie ilo sarge tiatua ewueji sinyati. Ore ina moti oo nkulupuok nateyierieki nkiri nerrarri; kake tenaa emoti osuyai eteyierieki neiutuuti ina, neitukui te nkare. Neidim pooki lee tiatua ilapolosak ainosa, entoki nasinya ena oleng. Kake meetae olasar le ng'oki onyae nkiri eyauaki osarge lenye atua olng'obor le ntumo pee eitobiri olning'o lo sotua tiatua ine wueji sinyati, kepejori ninye te nkima.” Ena ninye enkitanapata o lasar le nkitarruorroto. Eisinyati ninye oleng; ore teine wueji neyieng'ieki ilasarri oopejori teine eyieng' ninche olasar le nkitarruorroto, ore osarge lenye neisuaakini enchumata olperere lo lasar aaitaman. Ore enkurriny enye pooki neishoori, ina eilata olkidong'oe, oina kurriny pooki naimulumulita enkoshoke, o lairakuj pokira oare oina kurriny naimulumulita ninche, oilo kina lemoinyua oya ninye tenebo ilairakuj; nepejoo olapolosani ninche te nchumata olperere lo lasar anaa nkishorot naapejokini te nkima Olaitoriani; olasar le nkitarruorroto ninye. Eidim pooki lee tiatua ilapolosak ainosa, nenyae tiatua ewueji sinyati, eisinyati ninye oleng. Ore olasar le nkitarruroroto, neikununo anaa olasar le ng'oki, nabo enkitanapata e pokira; ore ilo apolosani oitayu olning'o lo sotua te ninye neya ninye. Neya ilo apolosani oitayu olasar opejori lo ltung'ani ake ninye olchoni leilo asar opejori oitayio ninye. Ore pooki kishoroto e ntapa natapejoki tiatua ewueji napejishoreki o pooki toki naitobiraki te ngirra aashu teneyierishoreki naa eneilo apolosani oitarasayie aishooyo. Ore pooki kishoroto e ntapa, naipurjakaki teilata aashu enatoyio, neaku enoo layiok pooki le Aron, neishori pooki aaitorisioki. “Naa ena enkitanapata o lasar le seriani oidim oltung'ani aishoo Olaitoriani. Teneishooyo ninye te nashe, neishooyo ninye imukateni neitu eisuishieki naaipurjaki te ilata, o nkaukau neitu eisuishieki o emukate e ntapa naelieki eilata napuyiapui naaipurjaki te eilata aaitobiraki. Ore tenebo ilo asar lenye le seriani le nkishoroto e nashe neyau ninye enkishoroto enye tenebo imukateni naaisuishieki. Ore te kuna neishooyo ninye emukate nabo te pooki kishoroto, anaa enkishoroto to Laitoriani, neaku ena kishoroto eneilo apolosani oisuaki ilo sarge lo lasar le seriani. Ore nkiri eilo asar lenye le seriani le nkishoroto e nashe nenyae teina olong olasar lenye; meisho ninye ae eleku o mekenyu. Kake tenaa ore olasar le nkishoroto enye naa enkitabaroto aashu enkishoroto olpela neinosi teina olong naishorua ninye olasar lenye, ore taisere entoki natelekua neinosi, kake ore entoki naleku too nkiri eilo asar te nkolong e uni nepejori te nkima. Teneinosi pooki toki oo nkiri eilo asar lenye le seriani te nkolong e uni, ore ilo oishorua ilo asar nemeng'amuni, nemeikenakini ninye ilo asar; neaku ilo asar olminong ore ilo oinos nenap ninye enkitarruorroto enye. “Ore nkiri naaiseyie pooki toki nemesinya nemeinosi; nepejori te nkima. Ore lelo pooki lemeiduruk neidim aainosa nkiri, kake ore ilo tung'ani onya nkiri eilo asar lo Laitoriani le seriani eata ninye olduruk, nedung'ori ilo tung'ani aaitung'uaa iltung'ana lenyena. Naa teneiseyie oltung'ani ake ninye entoki naiduruk nemesinya, tenaa olduruk te tung'ani aashu eng'ues nemesinya aashu ae toki naiduruk o lminong paa keitoki ainos nkiri olasar lo Laitoriani le seriani, neiwuang'ieki ilo tung'ani tiatua iltung'ana lenyena.” Nejoki Olaitoriani Musa, “Tiaaki iltung'ana le Israel, minyanya intae eilata, olkiteng, aashu enker, aashu enkine. Ore eilata e ng'ues natua openy, o eilata eina natara ilowuarak, neidimi aataasishore tiae oitoi, kake meeta nchere pee inosa intae. Amu ore pooki tung'ani oinos eilata e ng'ues naa ninye eishorieki Olaitoriani olasar te nkima neiwuang'ieki too ltung'ana lenyena. Niminosinoso sii osarge tukul, aa olemotonyi aashu aa oleng'ues, te pooki wueji nimanyimanya. Ore oloba anaa oloinos pooki sarge, neiwuang'ieki ilo tung'ani too ltung'ana lenyena.” Nejoki Olaitoriani Musa, “Tiaaki iltung'ana le Israel, ore ilo oishoru olasar le seriani loo nkishorot enyena aisho Olaitoriani neyaki ninye ina kishoroto enye Olaitoriani; teilo asar loo nkishorunot enyena e seriani. Neyau ninye too nkaik enyena makewan nena kishorunot naapejorieki te nkima olasar lo laitoriani; neyau ninye ina ilata tenebo oloikulu, pee etumi aayuko ilo oikulu olasar oyuki te dukuya Olaitoriani. Nepejoo olapolosani eilata te nchumata olperere lo lasar, kake ore oloikulu neaku ole Aron o layiok lenyena. Ore emuro e tatene nincho olapolosani anaa enkishoroto naing'uaa olasar lino loo nkishorot inono e seriani. Ore ilo tiatua ilayiok le Aron oishooyo osarge lo lasar le seriani o eilata neishori emuro enkalo e tatene metaa erubata enye. Amu ore ilo oikulu oyuki oina muro naishoori aawa nanu too ltung'ana loo Siraeli, aitayu tiatua ilasarri lenye loo nkishorot e seriani, naisho nanu ninche Aron ilo apolosani o layiok lenyena, anaa erubata e anaake naitayu iltung'ana le Israel. Ena ninye erubata e Aron o layiok lenyena naing'ua nena kishorot naapejorieki te nkima olasar lo laitoriani, naiteng'elakaki ninche ina olong apa naitarasayioki ninche pee eisiaisho anaa lapolosak lo Laitoriani; eitanapishe Olaitoriani ena pee eishori ninche iltung'ana le Israel, ina olong apa natubukokoki ninche eilata aaput; erubata enye anaake tiatua iishoritin enye pooki.” Ena ninye enkitanapata o lasar opejori, olasar le ntapa, olasar le ng'oki, o lasar le nkitarruorroto, o le nkitisinyata o lasarri le seriani, apa naitanapa Olaitoriani Musa te nchumata oldoinyo le Sinai, ina olong apa naitanapa ninye iltung'ana le Israel pee eyaki nkishorot enye Olaitoriani to lpurkel le Sinai. Nejoki Olaitoriani Musa, “Toriko Aron o layiok lenyena tenebo ninye, neya lkilani o eilata naputishoreki o loing'oni lo lasar le ng'oki, olmeregeshi oare, o enkikapu oo mukateni neitu eisuishieki; ninturrur eumata pooki te kutukaji olng'obor le ntumo.” Neas Musa anaa enaitanapa Olaitoriani ninye. Neiturrurri eumata te kutukaji olng'obor le ntumo. Nejoki Musa ilo turrur “Embae ena naitanapishe Olaitoriani metaasi.” Neriku Musa Aron o layiok lenyena neituku ninche te nkare. Neishopoki ninye olkila lioriong nerreten ninye te nkimeita, neitoki aishopoki ninye enkila sapuk, neishopoki tioriong enkila dorrop neen teina keene naripuno te nkarriyiano eina kila dorrop aeniki ninye. Nepik ninye enkila olgoo ore ina kila olgoo nepik Urim o Tumim. Nepik ninye enkarasha endukuya enye, ore ina arasha te nkalo enkomom nepik enkishili e sahabu, ina ilo marisian sinyati le nkitoo anaa enaitanapa Olaitoriani Musa. Ina pee eya Musa ina ilata naputishoreki neitisiny ilo ng'obor le Nkai o pooki toki natii atua, neitisiny ninche. Neisuaaki ninye embata eina ilata enchumata olperere lo lasar katitin naapishana, nebukoki ilo perere lo lasar tenebo imasaa enyena pooki, o lmoti oitukuoreki o enkitotonet enye, pee eitisiny ninche. Nebukoki embata eina ilata naputishoreki endukuya e Aron neput ninye neitisiny ninye. Neyau Musa lelo ayiok le Aron, neishopoki ninche ilkilani nerreten ninche too nkimeitani nkoishuaa nepik ninche imaupen, anaa enaitanapa Olaitoriani Musa. Neitoki ayau ilo oing'oni lo lasar le ng'oki; ore Aron o layiok lenyena neiteleiki nkaik enye endukuya eilo oing'oni lo lasar le ng'oki. Neyieng Musa ninye, neitayu osarge, ore to lkimojino lenye nepik enchumata oo mowuarak eilo perere lo lasar aitaman, neitisiny ilo perere lo lasar, neibukoo ilo likae sarge te ntonata olpererelo lasar, neitisiny ninye, pee eitobiru olning'o lo sotua tenkaraki ninye. Neitayu ninye enkurriny pooki enkoshoke olkina le moinyua o lairrakuj pokira oare tenebo enkurriny enye, nepejoo Musa ninche te nchumata olperere lo lasar. Kake ore ilo oing'oni, o lchoni lenye, o nkiri enyena, o modiok enyena nepejoo ninye te nkima tiauluo ilng'oborri, anaa enaitanapa Olaitoriani Musa. Neitoki ninye aitarasaa ilo meregesh lo lasar opejori neiteleiki Aron o layiok lenyena nkaik enye endukuya eilo meregesh. Neyieng Musa ninye, neisuaaki osarge enchumata eilo perere lo lasar aitaman. Ore ake pee edung'i ilo meregesh aarishirish, nepejoo Musa endukuya o nena rubat o enkurriny. Ore ake pee eitukui isorri e nkoshoke o loilelek te nkare, nepejoo Musa olmeregesh pooki to lperere lo lasar, anaa olasar opejori, esong'ouna narropil, olasar opejokini te nkima Olaitoriani, anaa enaitanapa Olaitoriani Musa. Neitoki aitarasaa olmeregesh liare, ilo meregesh le nkiteleikinoto oo nkaik; neiteleiki Aron o layiok lenyena nkaik enye endukuya eilo meregesh. Neyieng Musa ninye, neitayu embata eilo sarge lenye nepik enkitipet enkiok e Aron e tatene o lmogirra le nkaina enye e tatene o le nkeju enye e tatene. Neyauni ilayiok le Aron, nepik Musa oloti sarge nkitipeti oo nkiyiaa enye e tatene, o lmogirrani loo nkaik enye e tatene olmogirrani lenye le tene; neitoki Musa aisuaki osarge olperere lo lasar aitaman. Neitoki aitayu enkurriny o eilata olkidong'oe, oina kurriny pooki e nkoshoke, olkina le monyua, o lairakuj pokira oare o enkurriny enye, o emuro e tatene; ore teina kikapu oo mukateni neitu eisuishieki natii dukuya Olaitoriani neitayu ninye emukate nabo neitu eisuishieki, ore emukate nabo tenebo eilata, o enkaukau nabo neitatashaki ninche ina ilata oina muro e tatene; nepik ninye kuna pooki nkaik e Aron o nkaik oo layiok lenyena, neyuk ninche anaa olasar oyuki te dukuya Olaitoriani. Neitoki Musa aya ninche too nkaik enye, nepejoo ninche te nchumata olperere lo lasar tenebo nena kishorunot naapejori; anaa olasar le nkiteleikinoto oo nkaik, esong'ouna narropil, olasar opejokini te nkima Olaitoriani. Neya Musa oloikulu neyuk ninye anaa olasar oyuki te dukuya Olaitoriani; erubata apa e Musa ena to lmeregesh lo lasar le nkiteleikinoto oo nkaik, anaa enaitanapa Olaitoriani Musa. Neitoki Musa aya embata eina ilata naputishoreki o embata eilo sarge otii enchumata olperere lo lasar, neisuaaki Aron o lkilani lenyena, o layiok lenyena sii o lkilani loo layiok lenyena, neaku eitisinya ninye Aron o lkilani lenyena, o layiok lenyena o lkilani loo layiok lenyena, tenebo ninye. Nejoki Musa Aron o layiok lenyena, “Enteyier nena kiri te kutukaji o lng'obor le ntumo ninosinoso teine o nena mukateni naatii atua ina kikapu oo nkishorot enkiteleikinoto oo nkaik, anaa enaitanapishe nanu, ajo, Aron o layiok lenyena ooinos nena; ore entoki naleku too nkiri o too mukateni nipejoo te nkima. Nimipuopuo intae aaipang te kutukaji eilo ng'obor le ntumo too nkolong'i naapishana, o metaba anaa neishunye nkolong'i enkiteleikinoto oo nkaik, amu nkolong'i naapishana ine nkiteleikinoto oo nkaik te iyie. Anaa enataase taata, eitanapishe Olaitoriani metaasi pee eitobiri olning'o lo osotua te nkaraki intae. Ore te kutukaji e ilo ng'obor le ntumo entobik teine dama o kewarie too nkolong'i naapishana, intabayaya nena naaitanapishe Olaitoriani, pee miyeye ake; amu nena nanu aaitanapaki.” Neas Aron o layiok lenyena nena tokitin pooki naaitanapishe Olaitoriani aimunye Musa. Ore te nkolong e isiet neipotu Musa Aron o layiok lenyena o lpayiani le Israel, nejoki ninye Aron, “Iwa iyie oloti oing'oni intayunye olasar le ng'oki o lmeregesh ntayunye olasar opejori, ore te pokira meetae oloota entioto, nintarasaa ninche te dukuya Olaitoriani. Nijoki iltung'ana le Israel, ‘Ewaita ositima le kine, oaku olasar le ng'oki, o lashe o sitima le ker, naa ilo lari obo pooki nemetii oloata entioto, pee eaku olasar opejori o lkiteng o lmeregesh metaa olasar le seriani, pee ipolososo intae te dukuya Olaitoriani o enkishoroto e ntapa naipurja te ilata, amu ore taata keipang'aki intae Olaitoriani.’ ” Neyau ninche nena naaitanapishe Musa dukuya olng'obor le ntumo, neigutu olturrur pooki anyiku neitashe te dukuya o Laitoriani. Nejo Musa, “Ena bae eitanapa intae Olaitoriani pee iasiasa; naa keipang'aki intae enkitoo o Laitoriani.” Neitoki Musa ajoki Aron, “Tinyikaki olperere lo lasar, nintayu olasar lino le ng'oki ino o lasar lino opejori, nintobir olning'o le sotua te nkorrok ino o too ltung'ana; niyau enkishooroto e kulo tung'ana nintayu olning'o lo sotua te nkaraki ninche; anaa enaitanapishe Olaitoriani.” Nenyikaki Aron ilo perere lo lasar, neyieng ilo ashe lo lasar le ng'oki, te nkaraki enkorrok enye. Neitarasaki ilayiok le Aron ninye osarge, neitadoiki ninye olkimojino lenye atua osarge nepik osarge nena mowuarak o lperere lo lasar, nebukoki ilo sarge entonata o lperere lo lasar; kake ore enkurriny o lairakuj o lkina le monyua o ilo asar le ng'oki etapejoyie ninye te nchumata olperere lo lasar, anaa enaitanapa Olaitoriani Musa. Ore nkiri o lchoni nepejoo ninye te nkima tiauluo ilng'oborri. Neyieng ninye ilo asar opejori; neyaki ilayiok le Aron ninye osarge, neisuaaki ninye enchumata olperere lo lasar aitaman. Neyaki ninche ninye ilo asar opejori eitaaki rubat, o endukuya; nepejoo ninye ninche te nchumata olperere lo lasar. Neituku ninye isorri e nkoshoke o loilelek nepejoo ninche tenebo ilo asar opejori te nchumata olperere lo lasar. Neitoki aitarasaa nkishorot oo ltung'ana, neya ina kine o lasar le ng'oki te nkaraki iltung'ana, neyieng ninye, neishooyo ninye te nkaraki eng'oki anaa ilo asar le dukuya le ng'oki. Neitarasaa ninye ilo asar opejori, neishooyo ninye te risioroto e nkitanapata. Neitoki aitarasaa ilo asar le ntapa, neiput nkaik enyena, nepejoo te nchumata olperere lo lasar, aitatashaki ilo asar opejori le nkakenya. Nepolos sii olkiteng o lmeregesh, ilo asar le seriani te nkaraki iltung'ana neyaki ilayiok le Aron ninye osarge neisuaaki enchumata olperere lo lasar aitaman, ore enkurriny eilo kiteng o eno lmeregesh, o eilata o lkidong'oe leilo meregesh, oina kurriny naimulumul isorri enkoshoke, o lairakuj, o lkina le moinyua; neiteleiki ninche ina kurriny enchumata oo luikuluaa, nepejoo ninye ina kurriny te nchumata olperere lo lasar, kake ore lelo oikuluaa o emuro e tatene eyuko Aron anaa olasar oyuki te dukuya Olaitoriani; anaa enaitanapishe Musa. Neilepie Aron nkaik enyena aipirie iltung'ana nemayian ninche; nelotu ninye adou teine neishoorieki ilo asar opejori le ng'oki o lasar le seriani. Nepuo Musa o Aron atua ilo ng'obor le ntumo ore ake pee eipang'u ninche aapuonu boo nemayian ninche iltung'ana, neliooyu enkitoo o Laitoriani too ltung'ana pooki. Nelotu enkima naing'uaa dukuya Olaitoriani nemut ilo asar opejori oina kurriny natii shumata olperere lo lasar; ore ake pee edol iltung'ana pooki ina, nebuaku ninche nebatata too nkomomi enye. Ore apa Nadab o Abihu, lelo ayiok le Aron, meetae ake oleitu eyau emoti enye e nkima, nepik enkima atua, nepik enkorropil atua, neishooyo ninche enkima nemesinya te dukuya Olaitoriani, amu eitu eitanap Olaitoriani ninche meishooi. Nelotu enkima eing'uaa dukuya Olaitoriani nemut ninche, neye ninche te dukuya Olaitoriani. Nejoki Musa Aron, “Ena bae etejo Olaitoriani, ‘kaitoduaaya nanu kewan nchere kara sinyati tiatua lekua laataaniki nanu, ore te dukuya iltung'ana pooki naaisisi nanu.’ ” Negira Aron. Neipotu Musa Mishael o Elisafan, ilayiok le Usiel olenkapu le Aron, nejoki ninche, “Entinyiku, entanap ilalashera linyi ewuang'ie tiatua ewueji sinyati ewaita auluo ilng'oborri.” Nenyiku ninche, nenap ninche too lkilani lenye aaya auluo ilng'oborri anaa enatejo Musa. Neitoki Musa ajoki Aron o Eliesa o Itamar, lelo ayiok lenyena, “Emincho ake olpapita loo lukuny inyi eisiong'a, nimipolososo ilkilani linyi, pee miyeye ake, pee melotu engoro shumata ele turrur pooki; kake ore lelo alashera linyi, ina aji pooki e Israel neidim aaishira teina kinosata enkima nainuaa Olaitoriani. Nimipuopuo intae boo aaipang te kutukaji ele ng'obor le ntumo, pee miyeye ake; amu ore eilata o Laitoriani naputishoreki netii shumata intae.” Neas ninche te risioroto o rorei le Musa. Neitoki Olaitoriani airorie Aron, ajoki, “Miok ake enaisho aashu ae toki naoki napi, iyie aashu lelo ayiok linono ootii tenebo iyie, tenilo atua ilo ng'obor le ntumo, pee miyeye ake; keaku ena enkitanapata ntarasi tiatua iishoritin inyi pooki. Pee itumutumu aaitirishu enasinya o enemesinya, e nemeiduruk o enaiduruk; ninteng'ening'ene intae iltung'ana le Israel nena kitanapat pooki naairoro Olaitoriani aimunye Musa.” Nejoki Musa Aron o Eliesa o Itamar, lelo ayiok lenyena ootelekutua, “Entayu ilo asar le ntapa otelekua te lelo asarri oopejokini te nkima Olaitoriani, ninosinoso meisuisho te mbata olperere lo lasar, amu eisinyati oleng, ninosinoso intae te wueji sinyati, amu erubata ino o erubata oo layiok linono te nena kishorot naapejokini te nkima Olaitoriani; amu ina nanu aaitanapaki. Kake ore ilo oikulu oyukoki oina muro naishoruaki indimidimi aainosa te pooki wueji nemeiduruk, iyie o layiok linono o ntoyie inono tenebo iyie, amu eishoruaki ninche anaa erubata ino o erubata oo layiok linono te lelo asarri le seriani loo ltung'ana le Israel. Ore ina muro naishoruaki oilo oikulu oyuki keyau ninche tenebo lelo asarri e nkima oina kurriny, pee eyuki anaa olasar oyuki te dukuya Olaitoriani, naa olino o loo layiok linono tenebo iyie anaa erubata inyi ntarasi, anaa enaitanapishe Olaitoriani.” Neikilikuanua apa Musa ajurru ina kine o lasar le ng'oki, naa ng'ura etapejoyioki! Negorokino apa ninye Eliesa o Itamar, lelo ayiok le Aron apa ootelekutua, ejo “Kainyoo intae pee eitu inosinoso olasar le ng'oki tiatua ewueji sinyati naa entoki nasinya ninye oleng nikinchooki apa iyie pee itum atanapa entorroni ele turrur pee intobir olning'o lo sotua tenkaraki ninche te dukuya Olaitoriani? Ng'ura, eitu eyauni osarge lenye atua ewueji sinyati esipa eishaakino ninosa iyie tiatua e wueji sinyati, anaa enaitanapishe nanu.” Nejoki Aron Musa, “Ng'ura, eishooitie taata ninche olasar lenye le ng'oki o lasar lenye opejori te dukuya Olaitoriani, ore ake eyia aatadoikito nanu mbaa naaikununo nji! Amaa naaji tenaa kainosa nanu olasar le ng'oki taata, kanaata eaku keng'amaroyu te dukuya Olaitoriani?” Ore ake pee ening Musa ina neshipa. Nejoki Olaitoriani Musa o Aron, “Entiaki iltung'ana le Israel, Kuna ntokitin naaishu nindimidimi intae aainosa tiatua ing'uesi pooki naatii oriong enkop. Ore pooki toki nasasha loisotok neinyaku eng'amurai, tiatua ing'uesi indimidimi aainosa. Ore ake eyia ore tiatua nena naainyaku ingamura aashu esasha iloisotok niminosinoso kuna: entames amu keinyaku ninye eng'amurai kake mesasha loisotok, mesinya te intae. O enkijujur, amu keinyaku ninye eng'amurai kake mesasha iloisotok, mesinya te intae. Ore enkitejo, amu keinyaku ninye eng'amurai kake mesasha ninye iloisotok, mesinya te ntae. Olbitir amu kesasha ninye iloisotok kake meinyaku eng'amurai, mesinya te ntae. Ore nkiri enye minosinoso ake, ore mpopoki enye miseyieyie ake; mesinya ninche te intae. “Ndimidimi intae aainosa kuna, e pooki e nena naatii atua nkariak, ore pooki toki natii atua nkariak naata lopir o lpala aa atua enaiposha etii aashu ilkejek ndimidimi intae aainosa. Kake ore pooki toki natii inaaiposha aashu atua ilkejek nemeeta lopir, aashu ilpala, te nena naapuo tiatua nkariak o nena naaishu naatii atua nkariak naa olminong te intae. Nchoo eaku ninche olminong te intae, ore nkiri enye niminosinoso, ore mpopoki enye niminyikakiki. Nchoo eaku olminong te intae. Ore pooki toki natii atua nkariak naa entoki nemeeta lopir o lpala naa olminong te intae. “Naa kuna naaku olminong tialo imotonyi, nemeinosi ninche, amu olminong ninche: olkurragos o lmotonyi loo lmurran, o lmotonyi sapuk le nkare, o enkolepo, o lenkalem te risioroto oo mpukunot enye, o pooki kurruk te risioroto oo mpukunot enyena, o esidai, olmuntut, olmagiro, o entilalu terisioroto oo mpukunot enyena, o emotonyi oo nkiyiaa o enagor kewan, o enaibalasho. Olkupelia, o enaadokutuk o enkinyankik, o entirriid, o encharab o entilagos o emotoroki o mpukunot enyena, o lembae nabo, o enagor kewan. “Ore ntokitin pooki naata inaipuko naapuo too nkejek ong'uan naa olminong te intae. Ore etiu neijia, ore tiatua nena nyaun naata nkopir naapuo too nkejek moo ng'uan indimidimi intae aainosa nena naata ndapi too nkejek enye, naa ninche epuoyie te nkop. Ore te ninche nindimidimi aainosa olmaati te risioroto oo mpukunot enye, o entiantianyi o mpukunot enyena, o entaboi o mpukunot enyena o entargeeti o mpukunot enyena, kake ore nkulie nyaun pooki naata nkopir, neeta nkejek moo ng'uan naa olminong te ntae. “Naa te kuna iakuku intae ilo lduruk, ore pooki ng'ae oiseyie mpopoki enye neiduruku ninye o metaa teipa, ore pooki ng'ae ake ninye onap ae rubata oo mpopoki nelo aituku ilkilani lenyena neton ninye eiduruk o metaa teipa. Ore pooki ng'ues naiperra loisotok kake meeta loisotok oare, aashu meinyaku eng'amurai naa enturuj te intae, ore pooki ng'ae oiseyie ninche neiduruku. Ore pooki naapuo too ndapi, tiatua nena ng'uesi oo nkejek moo ng'uan naa olduruk te ntae; ore oloba anaa oloiseyie empopok enye neiduruku ometaa teipa. Ore ilo onap empopok enye nelo aituku ilkilani lenyena, neaku oloiduruk o metaa teipa; keiduruk ninche te ntae. “Naa kuna naara olduruk te intae tiatua nena tokitin naaikurtutari tioriong enkop: olmaima, enderoni, olmokua te risioroto oo mpukunot enyena, olmokua, olmaima, olpur, ologilalem, o tanki. Kuna naaiduruk te intae tiatua nena naaikurtutari; ore ilo oba anaa oloiseyie ninche teneye neton eiduruk o metaa teipa. Naa ore pooki toki nadoiki ninche etuata neaku enaiduruk, oi aa enchata, aashu enkila aashu olchoni, aashu olbene; pooki masaai ake ninye naasishoreki te pooki pukunoto; meeta nchere meitadoikini atua enkare, neton ninye aa olminong o metaa teipa; neitoki taa asidanu. Naa tenedoiki ake ninye nabo enye atua entoki naitobiruaki too nkulukuok ore ina toki pooki natii atua neaku eiduruk, ore ina moti oo nkulukuok entadany ninye. Ore pooki daa natii atua naidimi aainosa, netubukokine enkare neaku keiduruk; ore entoki pooki naidimi aatook too masaa naijo kuna neaku keiduruk. Ore pooki toki naba anaa enadoiki erubata ake ninye oo mpopoki enye neaku keiduruk, aa enepejishoreki aashu eneyierishoreki, nchoo ebeli aaitaa mbelibelat; keiduruk ninche naa keaku olduruk teintae. Ore ake etiu neijia ina ong'u enkare aashu eng'umoto natii enkare naa eisidai; kake ore ake teneshoroo mpopoki enye neaku keiduruk. Naa tenedoiki ake ninye erubata oo mpopoki enye ilanterera oopuoi aaun, ore lelo anterera naa aisidain ake; kake teneshuma olantererai tiatua enkare, nedoiki ake ninye pooki rubata enchumata e nena popoki e ilo antererai neaku keiduruk te intae. “Naa teneye ake ninye eng'ues nabo e nena nindimidimi aainosa, ore ilo oiseyie empopok enye neaku oloiduruk o metaa teipa, ore ilo onya nkiri enyena nelo aituku ilkilani lenyena neaku oloiduruk o metaa teipa. Ore sii ilo onap empopok nelo aituku ilkilani lenyena, neaku oloiduruk ometaa teipa. “Ore pooki toki naikurtutari ti oriong enkop naa keiduruk; meinosi ninye. Ore entoki naba anaa enalo te nkoshoke enye aashu pooki nalo too nkejek ong'uan aashu pooki toki naata nkejek kumok, nena tokitin pooki naaikurtutari ti oriong enkop, eminya ake, amu olminong ninche. Emintaa ake ate olminong te pooki toki naikurtutari; nimindurukiekie ate te ninche, pee miakuku ake ilolminong. Amu ara nanu Olaitoriani Enkai inyi, entisinya naa ate, pee iakuku sinyat amu kara nanu sinyati. Emindurukie ake ate tiae toki naikurtutari neiserpepiari ti oriong enkop. Amu ara nanu Olaitoriani ilo apa oitayio intae aitung'uaa enkop e Misiri, pee aaku Enkai inyi, entaa naa sinyat, amu kara nanu sinyati.” Ena ninye enkitanapata naipirta pooki ng'ues o entaritiki o pooki toki naishu nalo tiatua nkariak o pooki toki naishu naikurtutari ti oriong enkop, pee erishu nena naara inaaiduruk o nena nemeiduruk o nena ng'uesi naaishu naaidimi aainosa o nena ng'uesi naaishu nemeidimi aainosa. Nejoki Olaitoriani Musa, Tiaaki iltung'ana le Israel, tenenutayu enkitok, neiu enkayioni, neaku ninye enaiduruk too nkolong'i naapishana anaa te rishata enye o lapa, neiduruku ninye. Ore te nkolong e isiet nemurati ina ayioni. Neitoki ninye abik nkolong'i tomoni uni oo kuni teilo sarge lenye le nkitisinyata; nemeishori ninye meiseyie entoki sinyati aashu elotu atua enkaji Enkai o metaba anaa neishunye nkolong'i enyena enkitisinyata. Kake teneiu ninye entito, nebik ninye nkolong'i tomon oo ng'uan anaa te rishata enye olapa, nebik ninye teilo sarge lenye lenkitisinyata nkolong'i ntomoni ile o ile. “Ore pee eishunye nkolong'i enyena enkitisinyata aa to layioni aashu te ntito, neyaki ninye olapolosani te kutukaji olng'obor le ntumo olkuoo le ker lo lari obo oaku olasar opejori, o enturkuluo kiti aashu nturkuluoni naaku olasar le ng'oki. Neishooyo olapolosani te dukuya Olaitoriani neitobir olning'o lo osotua te nkaraki ninye, nesinyayu ninye teina rukunoto osarge lenye. Ena ninye enkitanapata tialo ina naiu enkerai aa enkayioni aashu entito. Naa tenemeidim ninye anoto olkuoo le ker, neya ninye nturkuluoni are aashu nturkuluoni are kutiti, nabo te nkaraki olasar opejori o enkae te nkaraki olasar le ng'oki. Neitobir olapolosani olning'o lo sotua te nkaraki ninye, nesinyayu ninye.” Nejoki Olaitoriani Musa o Aron, “Teneeta oltung'ani enetukurrunye to sesen lenye aashu oltudutai aashu olpepedoi, neibelekenya aaku enkeeya oo lbolot to lchoni lo sesen lenye, neyakini ninye Aron olapolosani aashu obo loo layiok lenyena lelo apolosak. Nejur ilo apolosani ine netii olpepedoi olchoni to sesen lenye, naa teneibelekenyate ilpapit leine wueji netii olpepedoi lenye, aaiborru, nelioyu ina muoyian etugumo to sesen lenye, naa enkeeya oo lbolot ina, ore pee eidip olapolosani atujurro ninye, neibalunye ninye ajo oloiduruk. Kake teneibor ilo pepedoi otii olchoni lo sesen lenye, nelioo ajo eitu eturoyu alang olchoni, neitu eibelekenya olpapita leine eitu eturoyu alang olchoni, neitu eibelekenya olpapita leine aiborru, neikenoo olapolosani ilo tamuoyiai nkolong'i naapishana, neitoki olapolosani ajur ninye te nkolong e naapishana. Naa tenetujurro too nkonyek enyena ina muoyian, neitu eitoki ina muoyian aponari to lchoni neitoki olapolosani aikenoo ninye kulie olong'i naapishana. Neitoki olapolosani ajur ninye te nkolong e naapishana naa tenetunukunye ilo pepedoi neitu eitoki ina keeya adaari to lchoni, neibalunye olapolosani ajo meiduruk ninye; olpepedoi ake, neituku ninye ilkilani lenyena nesidanu. Kake tenetadaari ilo pepedoi to lchoni lo sesen, ina kata eidipa aitoduaai kewan to lapolosani te nkitukuoto enye; neigil ninye alotu dukuya olapolosani; nejur olapolosani ninye, naa tenetubulayie ilo pepedoi to lchoni lo sesen lenye, netum olapolosani aibalunye nchere keiduruk enkeeya oo lbolot. “Teneidimu oltung'ani enkeeya oo lbolot, neyakini ninye olapolosani. Nejur olapolosani ninye, naa tenetii enetukurrunye neibor olchoni lo sesen lenye, neibelekenyate ilpapit leine aaiborru, niewotiote ine wueji naa enkeeya oo lbolot torrono natijing'a olchoni lo sesen lenye, neibalunye olapolosani ninye ajo keiduruk. Neikenoo olapolosani ninye aiwuang'ie to lorere amu keiduruk ninye. Naa teneipang'u ina keeya oo lbolot to lchoni lo sesen lenye, metaa eibulua enkeeya oo lbolot olchoni pooki lo sesen leilo tung'ani omuoi ebaiki endukuya o metabaiki nkejek, anaa enadol olapolosani nejur olapolosani ninye, naa teneibulua ina keeya oo lbolot osesen lenye, pooki neibalunye ninye ajo eisidai meiduruk teina muoyian; eibelekenye pooki aiborru, metaa meiduruk ninye. Kake tenelioyu ineewotiotate te ninye, neaku ninye oloiduruk. Nejur olapolosani ine neiwotiote, neibalunye ninye ajo keiduruk, ore ewueji neiwotiote to sesen naa keiduruk; amu enkeeya oo lbolot. Kake teneitoki ine neiwotiote aibelekenya neiborru, nelotu ninye enetii olapolosani, nejur olapolosani ninye, ore ake pee eibelekenya ina keeya aiborru, neibalunye olapolosani ilo tung'ani omuoi ajo meiduruk; eisidai ninye. “Naa tenetii oltudutai osesen lo ltung'ani, neishiu ore ine wueji apa oltudutai nejing ewueji naibor neteijia aashu ewueji oo ltipot ooibor o loo nyokie, nepuoi aaitodol olapolosani; ore olapolosani nejur ine, naa teneliooyu egut alang olchoni lo sesen ore ilpapit leine neibelekenyate aaiborru neibalunye olapolosani ninye ajo olo lduruk, enkeeya oo lbolot ninye nayopua ilo tudutai. Kake tenejur olapolosani ine, ore ilpapit leine neitu eiborru neitu egutu alang olchoni lo sesen kake etunukunye neikenoo olapolosani ninye aiwuang'ie to lorere nkolong'i naapishana; naa tenedaari to lchoni lo sesen, netum taa olapolosani aibalunye ninye nchere oloiduruk; etijing'a ninye enkeeya oo olbolot. Kake tenetoni lelo tipot te wueji nebo nemeponari naa enkiporoi ake oltudutai, neibalunye olapolosani ninye ajo meiduruk. “Naa teneeta osesen ewueji neinosa enkima to lchoni lenye, ore ine wueji neinosa enkima neaku oltipoti, onyokie aashu oloibor, nejur olapolosani ine, ore pee eibelekenyate ilpapit leine aaiborru netugumo ine alang olchoni lo sesen, naa enkeeya o lbolot, ninye nayopua ina kinosata enkima, neibalunye olapolosani ninye ajo olo lduruk; enkeeya oo lbolot ena. Kake tenejur olapolosani ine ore ilpapit leine neitu eiborru neitu egutu alang osesen, kake etunukunye, neikenoo olapolosani ninye aiwuang'ie nkolong'i naapishana. Nelotu olapolosani ajur ninye te nkolong e naapishana; naa teneibulayie to lchoni lo sesen lenye, neibalunye olapolosani ninye ajo oloiduruk naa keeta, enkeeya oo lbolot. Kake teneton ilo tipoti te wueji nebo nemeibulaa to sesen, kake etunukunye kake enetejia ake teina kinosata enkima neibalunye olapolosani ninye ajo meeta entioto; amu enkiporoi enkima ake. “Naa teneeta olee anaa enkitok enkeeya te ndukuya anaa to lboony. Nejur olapolosani ine; ore pee elioyu ine egut alang olchoni lo sesen lenye, ore ilpapit leine naa eisikitok naa nelamilama, neibalunye olapolosani ninye ajo olduruk; amu olpepedoi ilo, enkeeya oo lbolot e ndukuya aashu enolboony. Naa tenejur olapolosani ina muoyian e mion, nelioyu ajo megut alang olchoni lo sesen, nemetii ilpapit oorook ine, netum taa olapolosani aikenoi ilo tung'ani oota olpepedoi nkolong'i naapishana, ore te nkolong e naapishana nejur olapolosani ina keeya; naa teneitu eibulaa ilo pepedoi nemetii ilpapit sikitok, nemelio ilo pepedoi etugumo alang olchoni lo sesen, netum taa ilo tung'ani atabarno kewan kake mebarn ilo pepedoi; neitoki olapolosani aikenoo ilo tung'ani oata olpepedoi kulie olong'i naapishana ore te nkolong e naapishana neitoki olapolosani ajur ilo pepedoi, naa teneitu eibulaa ilo pepedoi to sesen nelioyu ajo megut alang olchoni lo sesen neibalunye olapolosani ajo meiduruk; neituku ninye ilkilani lenyena, nesidanu. Kake teneibulayie ilo pepedoi osesen eidipaki aaisuja ninye, neitoki olapolosani ajur ninye, ore ake pee eibulayie ilo pepedoi osesen lenye, nemeeta tipat pee eitoki olapolosani aing'oru ilpapit sikitok; amu keiduruk ninye kake tenetujurruoki ilo pepedoi too nkonyek enyena, netubulakitia ilpapit oorook neishiuo ilo pepedoi, meeta ninye entioto, neibalunye olapolosani ninye ajo meiduruk ninye. “Teneeta olee aashu enkitok iltipot to lchoni lo sesen lenye, iltipot ooibor, nelo olapolosani ajur, ore lelo tipot lo lchoni lo sesen lenye nemeibor oleng, naa ilgeet ootijing'a osesen lenye; meeta ninye olduruk. “Teneishunye ilpapit aapuku te ndukuya oltung'ani, naa endukuya ake natukurre, kake meeta ninye olduruk. Naa teneishunye ilpapit lo ltung'ani te nkalo enkomom enye o nkushu, naa endukuya ake natukurre te nkalo enkomom, kake meeta ninye olduruk. Kake tenetii ina kurroto e ndukuya aashu ina kurroto enkalo enkomom oloti pepedoi onyokie neibor, naa enkeeya oo lbolot natijing'a enkurroto enye e ndukuya aashu ina kurroto enye enkalo enkomom. Nelotu naa olapolosani ajur ninye naa tenenyokie neibor ine neteijia tenkurrunoto enye e ndukuya anaa te nelio etiu anaa empukunoto enkeeya oo lbolot to lchoni lo sesen, naa oltung'ani oata enkeeya oo lbolot ninye, neata ninye olduruk; neibalunye olapolosani ninye ajo olo lduruk endukuya etii ina keeya enye. “Ore ilo tung'ani oata enkeeya oo lbolot nchoo eishop nkilani naapolosa neisho ilpapit le ndukuya enye eisiong'a, neimulumul ninye enkutuk enye ajo, ‘Olo lduruk olo lduruk.’ Nebik ninye aa oltung'ani oata olduruk enkata pooki naba anaa enaata ina keeya; neaku ninye olaata entioto; neton ninye openy te wueji enye tiauluo ilng'borri. “Tenejing olduruk le nkeeya oo lbolot atua olkila, aa olkila loo ntare aashu olkila le kitani, tenaa oloripuno too usin anaa oloo nkarash naapuyiapui, anaa oloo lpapit loo ntare, anaa oloo ndapan, anaa ole pooki toki naitobiruaki too ndapan, anaa ole pooki toki naripuno too ndapan naa tenelioyu naa enkeeya oo lbolot enyori anaa enyokie to lkila, aa taa olkila oripuno too usin, anaa oloo ntokitin naapuyiapui, anaa oloo lpapit loo ntare, anaa oloo ndapan, anaa ole pooki toki naitobiraki too ndapan, naa enkeeya oo lbolot naa kepuoi aaitodol olapolosani. Nelo olapolosani ajur ina keeya, neikenoo ina naata enkeeya nkolong'i naapishana; neitoki taa alo ajur ina keeya te nkolong e naapishana. Teneibulayie enkeeya ilo kila, oripuno anaa oloo ntokitin naapuyiapui, anaa oloo ndapan, o endapana naasishoreki keiduruk ninye. Naa kelo ninye apejoo ilo kila, aa oloripuno too usin, arashu oloo ntokitin naapiyaya, anaa oloo lpapit loo ntare anaa ole kitani napuyiapui, anaa pooki toki oo ndapan, amu enkeeya torrono ina, naa kepejori te nkima. “Naa tenejur olapolosani, neitu eitoki ina keeya adaari teilo kila oripuno anaa o too ntokitin naapiyaya, anaa oloripuno anaa pooki toki oo ndapan, netum naa olapolosani aitanapisho meitukui ina toki natijing'a enkeeya neikenoo ninye nkulie olong'i naapishana; neitoki olapolosani ajur ina toki natijing'a enkeeya ina kata eidipaki aaitukuo. Naa teneitu eibelekenya emua e ilo tipoti le nkeeya, hoo neitu eibulaa ina keeya, naa olduruk; nipejoo iyie ninye te nkima, aa enkalo e oriong etii ilo tipoti le nkeeya oo lbolot aashu ene dukuya. “Kake tenejur olapolosani, nedol ajo eimisiloyie ilo tipoti eidipaki aaitukuo, netum naa ninye aigeru ilo tipoti aitayu teilo kila, aashu te ndapana, aashu teina naripuno aashu teina oo ntokitin naapiyaya. Naa teneigil aliooyu to lkila, oripuno too usin, anaa oloo ntokitin naapiyaya, anaa naaripuno o pooki toki oo ndapan, naa kegira adaari. Nilo apejoo te nkima ina natii enkeeya. Kake ore ilo kila, oripuno too usin, anaa too ntokitin naapiyaya anaa pooki toki oo ndapan nemeekure etii oltipoti le nkeeya indipa intae aaitukuo, neitokini aaigil aaituku, kat are nesidanu taa.” Ena ninye enkitanapata e nkeeya oo lbolot to lkila loo lpapit loo nkerra aashu le kitani, aa oloripuno aashu oloo ntokitin naapiyaya, aashu enaripuno aashu ae toki oo ndapan, pee eutu tenaa keeta olduruk aashu tenaa meeta olduruk. Nejoki Olaitoriani Musa, “Ena naaku enkitanapata tialo ilo oata enkeeya oo lbolot teina olong enkitukuoto enye; keyakini ninye olapolosani, neipang olapolosani alo auluo ilng'oborri nelo ilo apolosani ajur ninye. Ore ake pee eishiwuo ina keeya oo lbolot teilo oata enkeeya oo lbolot, neitanap olapolosani ninche mewaita te nkaraki ninye ilo oituku imotonyi are sidain nemeiduruk naaishu o nkeek oo ntarakua o enkarasha nanyokie o hisopo; neitanap olapolosani ninche meteyiang'a nabo e nena motonyi tiatua emoti oo nkulukuok te nkare naruko. Neya ninye ina motonyi naishu tenebo nkeek oo ntarakua oina arasha nanyokie o hisopo, neitadoiki ninche oina motonyi naishu atua ilo sarge leina motonyi nateyieng'aki te shumata ina are naruko neisuaaki ilo oitisinyi teina keeya oo lbolot katitin naapishana; netum taa aibalunye ninye nchere meiduruk, neing'ueiki ina motonyi naishu aisho meshomo te nkisiajata. Ore ilo oitisiny neituku ninye ilkilani lenyena, nebarn endukuya enye pooki, neituku kewan te nkare, nesidanu ninye, ore tesiadi ina nelotu ninye atua ang, kake keton teboo olng'obor lenye nkolong'i naapishana. Ore te nkolong e naapishana nebarn pooki te ndukuya. Nebarn ninye olmunyei lenye, olpapit loo nkonyek o lpapit lenyena pooki. Neitoki aituku ilkilani lenyena, neituku osesen lenye te nkare, neaku ninye olemeiduruk. “Ore te nkolong e isiet neya ninye isitiman oare le kerra lemeeta entioto o esupen nabo e ker olari obo nemeeta entioto, o lasar le ntapa imatuan uni e tomon e efa, entapa napuyiapui naipurjakaki eilata, o ltulet obo le ilata. Ore ilo apolosani oituku ninye nepik ilo tung'ani oitukui o kuna tokitin dukuya Olaitoriani, te kutukaji eilo ng'obor le ntumo. Neya olapolosani obo le lelo sitiman le kerra, nepolos ninye metaa olasar le ngoki tenebo ilo tulet le ilata, neyuk ninche anaa olasar oyuki te dukuya Olaitoriani, neyieng ninye ilo kuo le ker te wueji neyieng'ieki olasar le ngoki, o lasar opejori, te wueji sinyati, te nkaraki olasar le nkitarruorroto, ore olasar le ngoki, naa eneilo apolosani, kesinya ninye oleng. “Neya olapolosani embata eilo sarge lo lasar le nkitarruorroto, nepik olapolosani enchumata enkitipet e nkiok e tatene eilo oitukui, o enchumata olmogirra le nkaina enye e tatene, o le nkeju enye e tatene. Neitoki olapolosani aya embata eilata natii oltulet nebukoki endap enye e nkaina e kedienye neitadoiki olkimojino lenye le tatene atua ina ilata natii endap enkaina enye e kedienye neisuaaya embata eina ilata to lkimojino lenye katitin naapishana te dukuya Olaitoriani. Ore embata eina ilata naleku te nkaina enye nepik olapolosani enchumata enkitipet e nkiok e tatene eilo oitukui, o enchumata olmogirra lenye le nkaina e tatene, o le nkeju enye e tatene, shumata ilo sarge lo lasar le nkitarruorroto; ore ina ae ilata natii enkaina o lapolosani nepik ninye endukuya eilo oitisinyi. Neitobir taa olapolosani o lasar olning'o lo sotua te nkaraki ninye te dukuya Olaitoriani. Neishooyo olapolosani olasar le ngoki, aitobir olning'o lo sotua te nkaraki ilo oitisinyi te nkaraki enkiduruk enye. Ore te siadi neitoki ayieng olasar opejori, neishooyo olapolosani ilo asar opejori, o lasar le ntapa te nchumata olperere lo lasar. Neijia eiko olapolosani aitobir olning'o lo sotua te nkaraki ninye, neaku ninye olemeiduruk. “Kake tenaa aisinani ninye nemeidim anoto ntokitin kumok, neya naa ositima obo le ker pee eaku olasar le nkitarruorroto oyuki, pee eitobiri olning'o lo sotua te nkaraki ninye, o ematua e tomon e efa e ntapa napuyiapui naipurja te ilata pee eaku olasar le ntapa, o oltulet le ilata. O nturkuluoni are sii aashu nturkuluoni kutiti are, anaa enaidim ninye anoto; ore nabo naa olasar le ngoki ore enkae naa olasar opejori. Ore te nkolong e isiet neyau ninye ninche te nkaraki enkitukuoto enye ine netii olapolosani, kutukaji eilo ng'obor le ntumo, dukuya Olaitoriani; neya olapolosani ilo kuo le ker lo lasar le nkitarruorroto, o ilo tulet le ilata, neyuk olapolosani ninche metaa olasar oyuki te dukuya Olaitoriani. Neitoki ninye ayieng ilo kuo le ker lo lasar le nkitarruorroto, neya olapolosani embata osarge leilo asar le nkitarruorroto, nepik enchumata enkitipet e nkiok e tatene eilo oitukui, o enchumata olmogirra le nkaina enye e tatene, o lmogirra le nkeju enye e tatene. Nebukoki olapolosani embata eilata endap enkaina enye e kedienye; neisuaki to lkimojino lenye le tatene embata eina ilata natii endap enkaina enye e kedienye katitin naapishana te dukuya Olaitoriani. Nepik olapolosani embata eina ilata natii enkaina enye enchumata enkitipet enkiok e tatene eilo oitisinyi, olmogirra le nkaina enye e tatene, o le nkeju enye e tatene, teine wueji duoo netipikieki osarge lo lasar le nkitarruorroto; ore ina ae ilata naleku te nkaina olapolosani nepik ninye endukuya eilo oitisinyi, pee eitobiraki ninye olning'o lo sotua te dukuya Olaitoriani. Neishooyo ninye olasar loo nturkuluoni aashu nturkuluoni kutiti anaa ake duoo enaidim aishooi, nabo te nkaraki olasar le ngoki o enkae te nkaraki olasar opejori tenebo olasar le ntapa, neitobir olapolosani olning'o lo sotua te dukuya Olaitoriani tenkaraki ilo oitukui. Ena ninye enkitanapata te nkaraki ilo oata enkeeya oo lbolot, lemeidim ninye anoto olasar le nkitukuoto enye.” Nejoki Olaitoriani Musa o Aron, “Tenipuonunu kenya ina kop e Kanaan naisho nanu intae metaa eninyi, tenapik nanu enkeeya oo lbolot atua enkaji tiatua ina kop inyi, ore ilo openy enkaji nelotu ajoki olapolosani, ‘Etii enkeeya nemayiolo atua enkaji ai.’ Neitanapisho olapolosani ajo meitayuni ntokitin naatii ina aji eton eitu elo olapolosani ajurru ina keeya, pee meibalunyeki nena pooki naatii atua ina aji aajo keiduruk; ore te siadi neitoki olapolosani alo atua adol ina aji. Nelo ninye ajurru ina keeya, naa tenetii enkeeya isunta eina aji etii iltipot oo nyori o loonyokie, naa tenelioo aa eijo kegut aalang esuntai, neipang olapolosani teina aji alo kutukaji, neiken ina aji nkolong'i naapishana. Neitoki olapolosani alotu te nkolong e naapishana, aing'uraa, ore pee eidapashakine enkeeya isunta eina aji, netum taa olapolosani aitanapisho meitayuni lelo soito ootii enkeeya nenang'akini ninche atua ewueji neiduruk tiatua enkanasa; neisho ninye iliatuani leina aji meiutuuti nkaloli pooki, ore ina punyua nayutuutuni nepuoi aaibukoo te wueji neiduruk tiauluo enkanasa; neitokini taa aayau kulikae soito nepiki erishata e lekua soito, neyau ninye ae turoto nemurie enkaji. “Teneitoki ina keeya aigil ajing ina aji, eidipa ninye aitayu isoito neyutuuto ina aji neitoki amur le nturoto, nelo olapolosani aing'uraa, naa teneibulua ina keeya ina aji, naa enkeeya oo lbolot torrono natijing'a atua ina aji keiduruk ninye. Naa keuroo ninye ina aji, o soito lenyena o mbaoi enyena o ina turoto pooki e nkaji, nenap ninye ninche auluo enkanasa aya ewueji neiduruk. Ore sii oltung'ani ojing ina aji eton eikeno neaku ninye oloiduruk ometaa teipa; ore ilo oirrag tiatua ina aji neituku ilkilani lenyena, ore oloinos endaa tiatua ina o aji neituku ilkilani lenyena. “Kake tenelotu olapolosani ajurrisho, neitu eibulu ina keeya ina aji ina kata eidipaki aatumur te nturoto, neibalunye olapolosani ina aji ajo meiduruk, amu eishiunyeki ina keeya. Ore te nkipooto eina aji neya ninye nturkuluoni are kutiti, tenebo nkeek oltarakuai o enkarasha nanyokie o hisopo, neyieng emotonyi tiatua emoti oo nkulupuok te shumata enkare naruko, neitoki aya nena keek oltarakuai o hisopo oina arasha nanyokie tenebo ina motonyi naishu. Neitadoiki ninche atua ilo sarge le motonyi nateyieng'aki tiatua enkare naruko, neisuaki enkaji katitin naapishana. Neipok ina aji teilo sarge le motonyi, o te nkare naruko o teina motonyi naishu, o too nkeek oo ntarakua, o te hisopo oina arasha nanyokie. Neitoki taa aisho ina motonyi naishu meipang'a alo tiatua ina anasa alo ong'ota, neaku keitobir ninye olning'o lo sotua te nkaraki ina aji naa kesidanu ninye aaku meiduruk.” Ena ninye enkitanapata tialo pooki keeya oo lbolot, o to lpepedoi, te nkeeya oo lbolot natii enkila aashu atua aji, te wueji netejia aashu teneiwotiote aashu oltipoti pee etumi aaitodolu enkata naiduruk o enkata nemeiduruk. Ena ninye enkitanapata te nkaraki enkeeya oo lbolot. Nejoki Olaitoriani Musa o Aron, “Entiaki iltung'ana le Israel, teneeta ake ninye oltung'ani osupetai to sesen, ore erukoto eilo supetai lenye naa keiduruk. Naa ena ninye enkitanapata enkiduruk enye teilo supetai oruko: teneruko ilo supetai lenye aashu tenetudung'e, naa enkiduruk ake te ninye. Ore pooki dapash nairrag ilo tung'ani oata osupetai neiduruku ore pooki toki natonie ninye neiduruku. Ore pooki ng'ae oiseiyie endapash enye neituku ilkilani lenyena, neituku kewan te nkare, neaku ninye oloiduruk ometaa teipa. Ore pooki ng'ae otonie pooki toki natotonie ilo oata erukoto, neituku ilkilani lenyena neituku kewan te nkare, neaku ninye oloiduruk ometaa teipa. Ore pooki ng'ae oiseyie osesen leilo tung'ani oata osupetai neituku ilkilani lenyena neituku kewan te nkare neton eiduruk o metaa teipa. Naa tenenotaki ilo oata osupetai oltung'ani lemeiduruk, nelo ninye aituku ilkilani lenyena neituku kewan te nkare neton ninye eiduruk o metaa teipa. Ore pooki toki natonieki te mbarta tenetonie ilo oata osupetai neiduruku. Ore oloba anaa oloiseyie pooki toki natii abori ninye neiduruku o metaa teipa, ore ilo onap entoki neijo ina nelo aituku ilkilani lenyena neituku kewan te nkare neton ninye eiduruk ometaa teipa. Ore pooki ng'ae oiseyie ilo tung'ani oata osupetai eitu eng'as aisuj nkaik enyena te nkare nelo aituku ilkilani lenyena, neituku kewan te nkare, neton ninye eiduruk ometaa teipa. Ore ngirran naaitobiruaki too nkulupuok naaiseyie ilo oata osupetai nepuoi aabel; ore engirra pooki naguetuno te nchata neisuji te nkare. “Ore ilo oata osupetai teneitukui te nkaraki ilo supetai lenye, netum taa aikenaki kewan nkolong'i naapishana enkitukuoto, neituku ilkilani lenyena, nelo aituku osesen lenye te nkare naruko neaku taa olemeiduruk. Ore te nkolong e isiet neyau ninye nturkuluoni are aashu nturkuluoni are kutiti, nelotu dukuya Olaitoriani te kutukaji ilo ng'obor le ntumo, neisho ninche olapolosani; neishooyo olapolosani ninche, nabo te nkaraki olasar le ngoki o enkae te nkaraki olasar opejori; neitobir olapolosani olning'o lo sotua te nkaraki ninye te dukuya Olaitoriani te nkaraki ilo supetai lenye. “Naa teneitayu olee enkare e lewaisho to sesen lenye, nelo ninye aituku osesen lenye pooki te nkare neton ninye eiduruk ometaa teipa. Ore pooki kila o pooki shoni oitashala enkare e lewaisho neitukui te nkare, neton ninye eiduruk o metaa teipa. Teneboitare olee enkitok nepuku enkare e lewaisho, nepuo pokira aaituku ate te nkare, netoni ninche eiduruk ometaa teipa. “Teneitayu enkitok osarge, aa empukunoto e oshiaake to sesen lenye, neton ninye te nkiduruk enye nkolong'i naapishana ore oloba anaa oloiseyie ninye neiduruku ometaa teipa. Ore pooki toki napetaa ninye te nena olong'i enyena e nkiduruk neiduruku; ore sii pooki toki natonie ninye naa keiduruku. Ore oloba anaa oloiseyie endapash enye nelo aituku ilkilani lenyena, neituku kewan te nkare, neton ninye eiduruk ometaa teipa. Ore oloba anaa oloiseyie pooki toki natonie ninye neituku ilkilani lenyena, neituku kewan te nkare, neton eiduruk ometaa teipa; ore duoo ninye tenaa endapash aashu pooki toki natonie, teneiseyie neiduruku ninye ometaa teipa. Naa teneboitare oltung'ani ninye, nejing olduruk leina kitok ninye, neaku ninye oloiduruk nkolong'i naapishana; ore pooki dapash nairrag ninye neiduruku. “Teneitayu enkitok osarge too nkolong'i kumok, neme te nkata enye enkiduruk, teneeta erukoto naitogiroo inoshi olong'i e nkiduruk enye, neton ninye tiatua enkiduruk; anaa ake too nkolong'i enyena enkiduruk, keiduruku ninye. Ore endapash pooki nairrag ninye too nkolong'i pooki o sarge, netiu te ninye anaa endapash enkiduruk; ore pooki toki natonie ninye neiduruku, anaa ake tenkiduruk e nena olong'i enyena osarge. Ore oloba anaa oloiseyie kuna tokitin neiduruku ninye, neituku ilkilani lenyena, neituku kewan te nkare neton ninye eiduruk ometaa teipa. Kake teneitukui ninye te rukoto enye, neikenaki ninye kewan enye nkolong'i naapishana, ore tesiadi ina neaku ninye meiduruk. Ore te nkolong e isiet neyau ninye nturkuluoni are aashu nturkuluoni are kutiti, neyaki ninche olapolosani, te kutukaji e ilo ng'obor le ntumo. Neishooyo olapolosani nabo te nkaraki olasar le ngoki o enkae te nkaraki olasar opejori; neitobir olapolosani olning'o lo sotua te nkaraki ninye te dukuya Olaitoriani te nkaraki ilo sarge lenye le nkiduruk. “Nejia enkuna entooru iltung'ana le Israel metung'uai enkiduruk enye, pee meye ake tiatua enkiduruk enye neisarkionie olng'obor lai sinyati otii atua ninche.” Ena ninye enkitanapata eilo oata osupetai o ilo oitayu enkare e lewaisho to sesen lenye netum enkiduruk teina. O teina sii namuoi te nkiduruk enye; aa taa, te pooki ng'ae, olee aashu enkitok, naata osupetai, o to lee oboitare ina kitok naiduruk. Neirorie Olaitoriani Musa, eidipa lelo ayiok pokira oare le Aron aatuata, ina kata apa pee enyiku ninche aapuonu dukuya Olaitoriani neye; nejoki Olaitoriani Musa, “Tiaaki Aron ilo alashe lino pee melotu nkatitin pooki atua ine wueji sinyati tiatua ilo karasha, dukuya ilo orika lo lng'ur otii shumata osanduku, pee meye ake; amu kaliooyu nanu teina atampoi natii shumata ilo orika lo lng'ur. Kake nji eikununye Aron tenelotu atua ine wueji sinyati nelotu eata oloti oing'oni lo lasar le ngoki o lmeregesh lo lasar opejori. Neishop ninye ilo kila osinya le kitani, neishop ninye nkilani e atua e kitani to sesen lenye, nerretena te nkimeita e kitani, neishop enkopiyia e kitani, kuna ninche nkilani naasinya. Neituku ninye osesen lenye te nkare paa keishop taa. Neya ninye teilo turrur loo ltung'ana le Israel isitiman oare le kineji te nkaraki olasar le ngoki, o lmeregesh obo te nkaraki olasar opejori. “Neitayu Aron oloing'oni metaa olasar le ngoki te nkaraki kewan enye, neitobir olning'o lo sotua te nkaraki kewan enye o enkaji enye. Neitoki ninye aitayu nkineji are, nepik ninche dukuya Olaitoriani te kutukaji eilo ng'obor le ntumo; neoshoki Aron enkukuo nena kineji pokira are, aoshoki enkukuo te nkaraki Olaitoriani o te nkaraki Asasel. Neitarasaki Aron ina kine natadoikio enkukuo te nkaraki Olaitoriani, neishooyo ninye metaa olasar le ngoki; kake ore ina kine natooshokoki enkukuo te nkaraki Asasel nepuo aaitarasaki eishu te dukuya Olaitoriani pee eitobiri olning'o lo sotua te nkaraki ninye, pee etumi aaishoo meshomo adung ong'ata alo Asasel. “Neitarasaa Aron ilo oing'oni metaa olasar le ngoki te nkaraki kewan enye o enkaji enye; nelo ninye ayieng ilo oing'oni metaa olasar lenye makewan. Neitoki aya olmoti obore nkuk naaishu naaing'uaa olperere lo lasar te dukuya Olaitoriani, o mboreitin are enkaina enkorropil naidongoki aarrar; neyau ninye atua lelo karash lo lng'obor nepik ina orropil enkima te dukuya Olaitoriani, pee etum enkatampoi eina puruo aimulumula ilo orika lolng'ur otii enchumata e wueji enchakenisho pee meye ake; neya ninye embata o sarge leilo oing'oni, neisuaaya to lkimojino lenye te dukuya eilo orika lo lng'ur, otii dukuya e ilo orika lo lng'ur neisuaaki ninye ilo sarge to lkimojino lenye katitin naapishana. “Neitoki ninye ayieng ina kine o lasar le ngoki te nkaraki iltung'ana neyau osarge lenye atua lelo karash oodung'oro le wueji sinyati, neitaas ilo sarge anaa enaitaasa ilo sarge lo loing'oni, aisuaki enchumata eilo orika lo lng'ur o dukuya ilo orika lo lng'ur. Neiko ninye neijia aitobir olning'o lo sotua te nkaraki ine wueji sinyati, te nkaraki enkiduruk oo ltung'ana le Israel, o te nkaraki nkitapong'ot enye, o ngok enye pooki; neiko sii neijia te nkaraki ilo ng'obor le ntumo, otii tenebo ninche empolos oo lduruki lenye. Nemetii oltung'ani hoo obo atua ilo ng'obor le ntumo, ina kata ejing olapolosani atua alo aitobir olning'o lo sotua tiatua ine wueji sinyati ometaba anaa neipang'u ninye alotu boo neidipa aitobira olning'o lo sotua te nkaraki kewan enye o enkaji enye oeumata pooki oo Siraeli. Neitoki ninye aipang'u alo ilo perere lo lasar otii dukuya Olaitoriani neitobir olning'o lo sotua te nkaraki ninye, neya ninye embata eilo sarge lo loing'oni o ilo sarge le nkine, nepik nena mowuarak o lperere lo lasar aitaman. Neisuaaya embata o sarge te nchumata eye to lkimojino lenye katitin naapishana, neituku ninye neitisiny teina tioto oo ltung'ana le Israel. “Ore ake pee eidip aitobira olning'o lo sotua te nkaraki ine wueji sinyati o ilo ng'obor le ntumo o lperere lo lasar, neitarasaa ninye ina kine naishu; neiteleiki Aron nkaik enyena pokira are endukuya eina kine naishu, neibalunye te shumata ninye nkitarruorot pooki oo ltung'ana loo Siraeli, o nkitapong'ot enye pooki, ing'ok enye pooki; nepik ninye ninche enchumata e ndukuya eina kine, neisho ninye meshomo ong'ata te nkaina oltung'ani oidipaki aaibalie. Nenap ina kine nkitarruorot enye pooki alo enkop nememanya; neisho ninye ina kine meshomo ti ong'ota. “Neitoki Aron alotu atua ilo ng'obor le ntumo, neitayu ninye lelo kilani le kitani apa ooishopo ina kata pee elo ewueji sinyati, neing'uaa ninche teine; neituku ninye osesen lenye te nkare teine wueji sinyati, neitoki aishop lelo kilani lenyena, neipang'u alotu neishooyo ilo asar lenye opejori o ilo asar opejori te nkaraki iltung'ana, neitobir olning'o lo sotua te nkaraki kewan enye o te nkaraki iltung'ana. Ore ina kurriny o lasar le ngoki nepejoo ninye te nchumata olperere lo lasar. Ore elo alaaya ina kine meshomo Asasel neituku ilkilani lenyena neituku osesen lenye te nkare, ore te siadi ena neidim aeu atua enkang oo ng'oborri. Ore ilo oing'oni lo lasar le ngoki o ina kine o lasar le ngoki apa ooyawuaki o sargeta lenye pee eitainyeki olning'o lo sotua tiatua ine wueji sinyati, nenapi aaitupuku aayau auluo ilng'oborri; ore endapana olchoni o nkiri enye o moyok enye nepejori te nkima. Ore ilo opejoo ninche nelo aituku ilkilani lenyena neituku osesen lenye te nkare ore te siadi ena neidim ninye aeu atua ilng'oborri. “Naa keaku ena enkitanapata te intae ntarasi nchere ore to lapa liopishana, te nkolong e tomon o lapa nieniene ate aapukoo, nimiasiasa esiaai, aa oinoti aashu oldokunoti oewuo aton tiatua intae; amu tena olong epuoi aaitobiraki intae, olning'o lo sotua tialo ing'ok inyi pooki naa keitisinyi intae te dukuya Olaitoriani. Enkolong e sabato ina e nkiyeng'iyeng te intae, naa intanyamalala ate aaen ate aaitupukoo ate; enkitanapata ena ntarasi. Ore ilo apolosani otubukokoki eilata aaput neitisinyaki metaa olapolosani te rishata e papaai lenye nelo aitobir olning'o lo sotua eishopito lelo kilani oosinya le kitani; neitobir ninye olning'o lo sotua te nkaraki ina aji e Enkai, neitobir olning'o lo sotua te nkaraki olng'obor le ntumo o te nkaraki olperere lo lasar, neitobir ninye olning'o lo sotua te nkaraki ilapolosak o te nkaraki iltung'ana pooki leina umata. Naa keaku ena enkitanapata oo ntarasi te intae; nchere keidimi aitobiraki iltung'ana le Israel olning'o lo sotua kata nabo to lari te nkaraki ing'ok enye pooki.” Neas Musa anaa enaitanapa Olaitoriani ninye. Nejoki Olaitoriani Musa, “Tiaaki Aron o layiok lenyena, o iltung'ana pooki loo Siraeli, Ena bae eitanapishe Olaitoriani. Teneyieng ake ninye oltung'ani le nkaji e Israel olkiteng aashu olker aashu enkine tiatua enkang oo lng'oborri aashu eyieng tiauluo, nemeyau ninye kutukaji eilo ng'bor le ntumo, pee eishooyo anaa enkishooroto to Laitoriani te dukuya ilo ng'obor lo Laitoriani, neikenakini ilo tung'ani aajo eata entioto o sarge; eibukoyie ninye osarge; neyae ilo tung'ani aaiwuang'ie tiatua iltung'ana lenyena. Ore ena naa te nkaraki pee etum iltung'ana le Israel aayau lelo asarri lenye aayieng ti ong'ata, pee etum aayaki ninche Olaitoriani, ine netii olapolosani te kutukaji ilo ng'obor le ntumo, neyieng ninche anaa lasarri loo nkishorot e seriani to Laitoriani; nelo olapolosani aisuaki osarge enchumata o lperere lo lasar lo Laitoriani te kutukaji e ilo ng'obor le ntumo, nepejoo enkurriny metaa esong'ouna narropil to Laitoriani. Metaa meigil aekata ninche aayiang'aki ilasarri lenye loo loiriruani, laa ninye etololoitore. Keaku ena enkitanapata ntarasi te nkaraki ninche tiatua iishoreitin enye pooki. “Naa tiaaki iyie ninche, ore pooki tung'ani le nkaji e Israel aashu o le lelo tung'ana omon oo etuo aatoni tiatua ninche oishorua olasar opejori, nemeyau kutukaji olng'obor le ntumo, pee epolosaki ninye Olaitoriani; ore ilo tung'ani neiwuang'ieki tiatua iltung'ana lenyena. “Ore pooki tung'ani le nkaji e Israel aashu o le lelo tung'ana omon ootoni tiatua ninche, te nenya osarge, naing'orie nanu enkomom ai te ngoro ilo tung'ani oinosa osarge, naiwuang'ie ninye tiatua iltung'ana lenyena. Amu ore enkishui oo nkiri naa atua osarge etii, naishooyie nanu te nkaraki intae te nchumata olperere lo lasar pee eitobir olning'o lo sotua te nkaraki iltauja linyi; amu osarge oitobir olning'o lo sotua, te nkaraki e nkishui. Neaku atiaaka nanu iltung'ana le Israel, Meetae oltung'ani tiatua intae oinos osarge, nemeinos ilo tung'ani omoni oton tiatua intae osarge. Ore sii pooki tung'ani too ltung'ana le Israel aashu lelo omon ootii atua ninche olo arresh aibung eng'ues aashu emotonyi pee etumi aainosa neibukoo osarge lenye neitemoo too nkulukuok. “Amu ore enkishui e pooki toki naishu naa osarge lenye etii. Neaku atiaaka nanu iltung'ana le Israel, Eminos ake osarge li ae toki ake ninye pooki, amu ore enkishui e pooki toki naishu naa osarge lenye etii; ore pooki ng'ae oinos osarge neiwuang'ieki ninye. Ore pooki tung'ani oinos entoki natua openy aashu enataara louarak te ntim, aa oinoti aashu olomoni oidurrua, nelo ninye aituku ilkilani lenyena, neisuj osesen lenye te nkare, neton ninye eata olduruk o metaa teipa, netum taa atisidana. Kake tenemeituku ninye ilkilani lenyena anaa eituku ososen lenye nenap ninye entorroni enye.” Nejoki Olaitoriani Musa, “Tiaaki iltung'ana le Israel, Ara nanu Olaitoriani Enkai inyi. Miasiasa anaa enaasita ninche te nkop e Misiri, teine apa nemanya intae, nimiasiasa anaa enaasi te nkop e Kanaan teine nayaita nanu intae nimipuopuo intae too nkiguanat enye. Entaas intae nkiguanat aainei nimbung'ubung'u nkitanapat aainei nipuoyieyie ninche. Ara nanu Olaitoriani Enkai inyi. Embung'a naa nkitanapat aainei o nkiguanat aainei, naa teneas oltung'ani neton eishu: Ara nanu Olaitoriani. “Metii oltung'ani te intae onyikaki o likae lenye le sotua auru ilkilani aitalioo emasipaisho enye. Ara nanu Olaitoriani. Mioru ake papaai lino ilkilani aitaa olmasipai amu emasipaisho e ng'utunyi ina. Ng'utunyi ina nimilo naa aitalioo emasipaisho enye. Milo aitalioo emasipaisho e nkitok e papaai lino; amu emasipaisho e papaai lino ina. Mintalioo emasipaisho e nkanashe ino, ning'arie menye aashu ina tito e ng'utunyi aa einoti eang aashu enayawuaki. Nimintalioo emasipaisho entito o layioni lino aashu ene ntito e ntito ino amu ore emasipaisho enye naa emasipaisho ino makewan. Mintalioo emasipaisho e ntito ning'arie menye, ina naino te papaai lino, amu enkanashe ino ninye. Mintalioo emasipaisho e nkanashe e papaai lino amu eno lmarei le papaai lino ninye. Mintalioo emasipaisho enkanashe e ng'utunyi amu eno lmarei le yieyioo lino ninye. Mintalioo emasipaisho o lalashe papaai lino, aa taa minyikaki enkitok enye; amu nkapu ino ninye. Mintalioo emasipaisho e nkitok o layioni lino, amu entito ino ninye, mintalioo emasipaisho enye. Mintalioo emasipaisho e nkitok o lalashe lino, amu emasipaisho o lalashe lino. Mintalioo emasipaisho e nkitok tenebo entito enye, nimiya entito o layioni lenye aashu entito e ntioto enye aitalioo emasipaisho enye; nkanashera inono ninche, entorroni ina. Nimiya enkanashe enkitok ino ayam eton eishu enkanashe enye. “Milo enetii enkitok aboitare eton etii erishata enye o lapa. Nimiboitare enkitok olelatia ino apik kewan entioto te ninye. Minchooyo ae nabo oo nkera inono meitarasari to lasar le nkima aaisho enkitanyaanyukoto e nkai e Molek aisarkionie enkarna e Nkai ino; Ara nanu Olaitoriani. Miboitare ake olee aitaa enkitok; entaboi ina. Nimiboitare ake eng'ues pooki aisarkionie kewan te ninye, nemeisho enkitok kewan eng'ues metaboitare, entaboi ina. “Emisarkionie ate tiae nabo e kuna baa, amu te kuna pooki eisarkionie ate lelo oshon pooki laaraa nanu te dukuya intae. Neaku enkop enaisarkionieki, neaku aitamio nanu enkitarruorroto enye, nelopu enkop lelo oomanya. Kake embung'a intae nkitanapat aainei o nkiguanat aainei nimiasiasa ae nabo e kuna tabo, aa oinoti aashu ilo dokunoti oidurrua alotu atua intae. (Amu ore kuna baa o lminong pooki etaasa apa iltung'ana lena kop, lelo apa ootii dukuya intae, neaku eisarkionieki enkop); pee melopu ake intae enkop, tenisarkionienie, anaa apa enatolopua ilo osho otii dukuya intae. Amu ore oloba anaa oloas nabo e kuna baa olminong, ore lelo tung'ana oas neiwuang'ieki too ltung'ana lenye. Metaa embung'a enkitanapata ai nimiasiasa aikata ae nabo e kuna tabo oo lkuaki apa ootaasaki te dukuya intae, nimisarkionienie ate te ninche: ara nanu Olaitoriani Enkai inyi.” Nejoki Olaitoriani Musa, “Tiaaki olturrur pooki loo ltung'ana le Israel, iakuku intae sinyat; amu ore nanu Olaitoriani Enkai inyi naa kara sinyati. Nchoo eyanyit pooki ng'ae te intae ng'otonye o menye, nimbung'ubung'u sabatoni aainei: Ara nanu Olaitoriani Enkai inyi. Emimbelekenyakino nkitanyaanyukot aashu intobirakiki ate nkaitin oo ntokitin naasholuno: Ara nanu Olaitoriani Enkai inyi. “Tenintarasaa olasar loo nkishorot e seriani aaisho Olaitoriani, entarasai intae pee etumi aatang'amai intae. Neinosi ina olong ake nintarasaitie, aashu taisere, ore pooki toki naleku ometaa enkolong e uni nepuoi aapejoo te nkima. Teneinosi ninye penyo te nkolong e uni, naa olminong; meitokini aang'amaa, ore pooki ng'ae oinos nenap entorroni enye, enkaraki naisarkionie ninye entoki sinyati o Laitoriani; ore ilo tung'ani neiwuang'ieki too ltung'ana lenye. “Tenisampu enkurma nituturo te nkop ino, nimisampu aitabaiki ineebayie nimishuko alo agilu lelo ng'osil ootung'uayioki. Miishu ilng'anayio to sabibu lino, nimisotu lelo ootusulari to sabibu lino. Tung'uai ninche te nkaraki ilaisinak o tenkaraki olomoni. Ara nanu Olaitoriani Enkai ino. “Mipurrisho, nimiasisho te sunkureisho, nemilej oltung'ani olikae. Niminosinoso ilmuma te nkarna ai te sunkureisho, pee misarkionienie enkarna e Nkai inyi. Ara nanu Olaitoriani. “Mintorogony o lelatia ino aashu ipur ninye. Mincho olmushaara lo sinka lino eirrag te nkaji ino enkewarie pooki o mekenyu. Midek oltung'ani ming'ani nimipikaki oltung'ani modooni entoki narror, kake turia Enkai ino. Ara nanu Olaitoriani. “Mipik enyorrakinoto endung'oto enkiguana, mipik olkep olaisinani nimiureyu ilo kitok, kake te sipata tudung'oki enkiguana olelatia ino. Milo iyie idie o idie anaa olaitang'oroni tiatua iltung'ana linono, nimintashe iyie aitang'or enkishui o lelatia ino: Ara nanu Olaitoriani. “Mimbayu olalashe lino tiatua oltau lino kake entoning'oto pee minap ake eng'oki te nkaraki ninye. Mintalaku ake elap aashu iata enkiba tiatua oltau tialo ilayiok loo ltung'ana linyi, kake tonyorra olelatia ino anaa kewan ino. Ara nanu Olaitoriani. “Embung'a nkitanapat aainei, miputokiki nkishu inyi iloing'ok loo mpukunot naapaasha, nimiun tiatua enkurma ino mpukunot are oo lanterera niminchop olkila oripa too mpukunot are oo nkarash. “Teneboitare olee enkitok nara errindik natisira, likae lee neton eitu elakuni aashu eishoori ae toki, nejurri ina bae, neari ninche metuata, enkaraki naa errindik ina kitok. Kake keyau ilo lee enkishoroto o lasar le nkitarruorroto ayaki Olaitoriani, kutukaji eilo ng'obor le ntumo, neyau ninye olmeregesh metaa olasar le nkitarruoroto. Neitoki olapolosani aitobir olning'o lo sotua te nkaraki ninye teilo meregesh lo lasar le nkitarruorroto te dukuya Olaitoriani te nkaraki ina ng'oki nataasa ninye; ore ina ng'oki nataasa ninye nepalakini. “Tenipuopuo kenya aajing ina kop niunuunu mpukunot pooki oo lkeek te nkaraki endaa, niyiolouu lelo ng'anayio lenye aajo etomitikioki intae ilarin okuni, minosinoso ninche. Ore to lari liong'uan nesinyayu ilng'anayio lenye pooki, enkishoroto enkisisa to Laitoriani. Kake ore to lari le imiet nindimidimi aainosa ilng'anayio lenye, pee etum aaishoo intae emponaroto sapuk. Ara nanu Olaitoriani Enkai inyi. “Minosinoso pooki toki natii osarge atua. Emimbonishorere nimisiaishore ntaleng'o. Emintamanaa endung'oto oo lpapit loo lmowuarak loo lukuny inyi nimibarnibarna mbat oo lmunyo linyi. Eming'am iseseni linyi te nkaraki iloo tuata aashu imishiriri ate: Ara nanu Olaitoriani. “Misarkionie entito ino aisho metaa emulayoi, meiput ake enkop entorroni e nkiborra oo nkonyek neaku enkop enabore esuujisho. Embung'a sabatoni aainei niyanyititi enkaji ai Sinyati. Ara nanu Olaitoriani. “Emipuopuo aaikilikuanishore iltungana ooirorie loiriruani loo lootuata aashu lasakutok. Emipuopuo aaing'oru ninche, aaisarkionie ate te ninche: Ara nanu Olaitoriani Enkai inyi. “Tudumunye iyie te dukuya lelo ooibor lukuny, iyanyita oltung'ani moruo naa turia Enkai ino. Ara nanu Olaitoriani. “Teneidurru oltung'ani omoni alotu amany enkop ino mintaas ninye entorrono. Ore ilo omoni likindurraka naa keyooki atiu anaa oinoti tiatua intae, naa tonyorra naa ninye anaa kewan. Amu irara sii apa intae ilomon te nkop e Misiri: Ara nanu Olaitoriani Enkai inyi. “Mias entorrono te ndung'oto e nkiguana, te ntemata enkadoro aashu te nkineneng enkiroishi aashu te nkumoi. Ng'oru ntemeta nemetii elejare o entemata e nkiroishi nemetii elejare, o soito le nkiroishi leme le lejare efa nairirikino o hini nairirikino. Ara nanu Olaitoriani Enkai ino, oyawua intae aitupuku te nkop e Misiri. Embung'a naa nkiguanat aainei pooki o nkitanapat aainei pooki niasiasa ninche. Ara nanu Olaitoriani.” Nejoki Olaitoriani Musa, “Tiaaki iltung'ana le Israel ore pooki tung'ani loo ltung'ana le Israel aashu o le lelo omon ooidurrakita aamany atua Israel, oishooyo nabo oo nkera enyena aaisho Molek neari metua; ore iltung'ana lena kop near ninye too soito. Nanu kewan oibelekenyakino aipirakinore ilo tung'ani naiwuang'ie nanu ninye tiatua iltung'ana lenyena, enkaraki naishooyie nabo oo nkera enyena aisho Molek, nepik enkaji ai entioto neisarkionie enkarna ai sinyati. Naa teneisudoo iltung'ana leina kop ilo tung'ani ina kata eishooyo nabo oo nkera enyena aisho Molek, neany ear ninye metua, naibelekenyakino nanu aarare ilo tung'ani naarare olmarei lenye, naitayu nanu ninche aiwuang'ie tiatua iltung'ana lenye, ninye o lelo pooki oosujita ninye te nkiborra oo nkonyek e sujata e Molek. “Teneibelekenyakino oltung'ani ltung'ana oirorie iloiriruani o lasakutok, aiborrie onyek te ninche, naibelekenyakino nanu ilo tung'ani aarare naitayu nanu ninye aiwuang'ie tiatua iltung'ana lenye. Entisinya naa ate niakuku sinyat, amu ara nanu Olaitoriani Enkai inyi. Embung'a nkiguanat aainei, niasiasa ninche, Ara nanu Olaitoriani oitisiny intae. Amu ore pooki ng'ae odek menye aashu ng'otonye neari metua; etedia ninye menye aashu ng'otonye, neaku ore osarge lenye shumata ninye etii. “Teneloloito oltung'ani te nkitok o lelatia enye, ore pokira olee o enkitok natololoitare neari metuata. Ore ilo tung'ani oboitare te loloito enkitok e papaai lenye netaboluo nkilani e papaai lenye, ore ninche pokira are neari metuata, ore osarge lenye neaku shumata ninche etii. Ore olee oboitare enkitok o layioni lenye, neari pokira are metuata; etaasa ninche embae busus, ore osarge lenye neaku shumata ninche. Teneboitare olee olikae lee anaa enkitok, ore ninche pokira netaasa olminong, naa keari ninche metuata, ore osarge lenye neaku shumata ninche. Teneyam oltung'ani entito o ng'otonye tenebo, naa entorroni ina, naa kepejori ninche te nkima, ilo lee o nena kituaak, pee meitoki esuujisho atii atua intae. Teneboitare oltung'ani eng'ues aloloitore, neari ninye metua, ore ina ng'ues neari metua. Teneing'oru enkitok eng'ues aboitare te loloito neari ina kitok metua ore ina ng'ues neari ninye metua ore osarge lenye neaku shumata ninche etii. “Teneyam oltung'ani enkanashe enye, ina nang'arie menye, aashu enkanashe nangarie kina, nelo ninye aboitare nedol olee emasipaisho enye nedol entito emasipaisho olee naa embae e sulare ina, naa keiwuang'ieki ninche te dukuya nkera olorere lenye; etaboluo ninye nkilani enkanashe enye, naa kenap ninye entorroni enye. Teneboitare olee enkitok eata emuoyian enye, nebolu nkilani enyena, netusula ninye erukunoto enye, neitalioo ninye erukunoto osarge lenye; ore ninche pokira are naa keiwuang'ieki tiatua iltung'ana lenye. Mintalioo ake emasipaisho enkanashe yieyioo lino aashu ene nkanashe papaai lino, amu ore ina naa nkilani itooruo oltung'ani le sotua lo lmarei; naa kenap ninche entorroni enye. Teneboitare oltung'ani enkitok olenkapu lenye, naa kenap ninche eng'oki enye, neye eitu etum nkera. Teneya oltung'ani enkitok olalashe lenye naa embae nemesinya ina netaboluo ninye nkilani olalashe lenye nemetum ninche nkera. “Embung'a naa nkitanapat aainei pooki o nkiguanat aainei pooki, niasiasa ninche paa ore ina kop nariku nanu intae entamany nemelopu intae aitayu. Nimipuopuo aasujaa olkerreti leilo orere laaraa nanu te dukuya intae, amu etaasa apa ninche kuna baa pooki naibayie nanu ninche. Kake atiaaka nanu intae, ‘Ijung'ujung'u intae enkop enye, naa kaisho nanu intae metaa eninyi, ina kop naruko kule o naishi.’ Ara nanu Olaitoriani Enkai inyi, otirishua intae aitung'uaa loreren. Enoto naa entirishu eng'ues nasinyari o enemesinyari, o te motonyi nasinyari o enemesinyari, emindurukie naa ate te ng'ues aashu emotonyi aashu tiae toki naikurtutari te nkop, apa natorishie nanu intae nchere mesinyari. Entaa intae sinyat te nkaraki nanu; amu ore nanu Olaitoriani naa kara sinyati natirishua intae aitung'uaa iloreren, pee itumutumu aataa ilkulainei. “Ore olee aashu enkitok nairorie oltung'ani otua aashu esakutisho neari metua, neari ninche too soito, ore osarge lenye neaku shumata ninche etii.” Nejoki Olaitoriani Musa, “Irorie ilapolosak, lelo ayiok le Aron nijoki ninche meetae olenye oisarkionie kewan to ltung'ani otua tiatua iltung'ana lenye, meteleku ake to ltung'ani le sotua lo lmarei, aa ng'otonye, aa papaai lenye aa, olayioni lenye, aa entito enye, aa o lalashe lenye, aashu eselenkei nemeyiolo olee enye neitu eyami naa ninye enyikare amu meeta olmoruo; ore teina neidim ninye aisarkionie kewan. Nemepik kewan olduruk tenaa kitok tiatua iltung'ana lenyena, metaa keidurukie kewan. Nemipik nkurrot ilukuny enye nemebarn mbat oo lmunyo lenye aashu edung'udung iseseni lenye. Keaku ninche sinyat te nkaraki Enkai enye, nemeisarkionie enkarna e Nkai enye, keitarasaa ninche ilasarri te nkima aaitarasaki Olaitoriani, ina mukate e Nkai enye; metaa keaku ninche sinyat. Nemeyam ninche emulayoi, aashu enkitok naisarkionieki, aashu enkitok natung'uayie olmoruo lenye, amu ore olapolosani naa eisinyati te nkaraki Enkai enye. Intisinya ninye, amu keitarasaa ninye emukate e Nkai ino; keaku ninye sinyati te iyie, amu ore nanu Olaitoriani ilo likintisiny, ara sinyati. Ore entito e pooki apolosani teneisarkionie kewan neiborrie onyek naa papaai lenye eisarkionie nepejori ninye te nkima. “Ore olapolosani ora kitok tiatua ilalashera lenyena, otubukokoki endukuya enye eilata aaput neitisinyaki meishopo ilkilani nemeisho olpapita le ndukuya enye meisiong'ayu aashu epolos ilkilani lenyena. Nemelo ninye ayiaya osesen lo ltung'ani otua, aashu epik kewan entioto te papaai lenye aashu te ng'otonye; nemeipang ninye alo tiatua ewueji sinyati, aashu eisarkionie ewueji sinyati e Nkai enye; amu ore ina kitisinyata e mbukokinoto e ilata naputishoreki e Nkai enye netii shumata ninye: Ara nanu Olaitoriani. Naa keyam ninye eselenkei nemeyiolo olee aitaa enkitok. Ore enkoliai, aashu enatung'uayie olmoruo lenye aashu enaisarkionieki aashu emulayoi ore kuna meeyam ninye; kake nchoo ninye eyam eselenkei nemeyiolo olee o lorere lenye; pee meisarkionie ake eishoi tiatua olorere lenye; amu ara nanu Olaitoriani oitisiny ninye.” Neitoki Olaitoriani ajoki Musa, “Tiaaki Aron, meetae hoo obo tiatua eishoi ino too ishooritin enye pooki oata entioto oidim atinyiku aitarasai emukate e Enkai enye. Amu meetae oltung'ani oata entioto oidim atinyiku, oltung'ani modooni aashu olmaima o ltung'ani tarrush aashu olemelulung'a osesen. Aashu oltung'ani ogila enkeju aashu ologila enkaina, anaa oloruja enkoriong, anaa olkorriot lemebulu, anaa oloata oltialei anaa oloata ilpepedo, anaa oloata ilbolot to sesen lenye anaa oloidong'oki aaitaa osunash, meetae oltung'ani le ishoi e Aron ilo apolosani oata eleyiata oidim atinyiku aitarasai nkishorot o Laitoriani naapejori te nkima, ore amu keeta naa eleyiata menyiku ninye alotu aitarasaa emukate e Nkai enye. Ekeidim ninye ainosa emukate e Nkai enye eine wueji sinyati aisul o enoo ntokitin sinyat, kake melotu ninye ataaniki olkarasha lo lodung'oro le wueji sinyati aashu ataaniki olperere lo lasar, amu keata ninye eleyiata, pee melotu ninye aisarkionie iwuejitin aainei sinyat; amu ara nanu Olaitoriani oitisiny ninche.” Kuna etiaaka Musa Aron o layiok lenyena o ltung'ana pooki le Israel. Nejoki Olaitoriani Musa, “Tiaaki Aron o layiok lenyena metalama nena tokitin naasinya oo ltung'ana le Israel naaishoo ninche nanu, pee meisarkionie enkarna ai sinyati: Ara nanu Olaitoriani. Tiaaki ninche, ‘Ore pooki ng'ae tiatua iishoritin inyi pooki, too lporori linyi pooki, tenenyikaki nena tokitin sinyat, naaitisinyakitia iltung'ana le Israel Olaitoriani, eata kereek, ore ilo tung'ani neiwuang'ieki aaitung'uaa ine natii: Ara nanu Olaitoriani. Meetae hoo obo le ishoi e Aron oata enkeeya oo lbolot, aashu eruko nkimek oidim ainosa nena tokitin sinyat ometaba anaa neaku bioto. Ore pooki ng'ae oiseyie entoki nemesinya aibung empopok aashu oltung'ani opuku enkare e lewaisho, anaa oloba anaa oloiseyie entoki naikurtutari naidim aidurukie ninye, aashu oltung'ani oidim aitasuroki enkiduruk, naba ake duoo ninye anaa enaata, ore ilo tung'ani oiseyie mbaa naaikununo neijia neaku ninye oloiduruk ometaa teipa nemeinos nena tokitin sinyat meteleku ake teneituku osesen lenye te nkare. Ore ake pee edoyio enkolong nemeitoki ninye aiduruk; ore te siadi neidim ninye ainosa nena tokitin sinyat, amu kuna ninche ndaiki enyena. Ore entoki natua openy, aashu enainosa ng'uesi entim meinos ninye, apik kewan olduruk te ninche: Ara nanu Olaitoriani!’ Nchoo naa ninche eibung nkitanapat aainei, pee menap ing'ok te nkaraki ninye, neye ninche teine neisarkionie nkitanapat aainei: Ara nanu Olaitoriani oitisiny ninche. “Meinos olomoni ina toki sinyati, ore olomoni lo lapolosani aashu osinka lo lmushaara nemeinos ina toki sinyati. Kake teneinyang'u olapolosani orrindik too mpisai aitaa emasaai enye makewan, neidim ilo rrindik ainosa ina toki; ore lelo ootoiwuoki tiatua enkaji enye neidim aainosa ina daa enye. Teneyam oltung'ani leeiking'a entito o lapolosani nemeinos ina tito nena kishorot oo ntokitin sinyat. Kake tenaa enkoliai ina tito olapolosani aashu etung'uayie olmoruo lenye, nemeeta nkera, neshukunye alotu enkang e menye, anaa apake te keraisho, neidim ninye ainosa ina daa e menye; ore ake eyia meetae oltung'ani leeiking'a oidim ainosa ina daa. Naa teneinos oltung'ani ina toki sinyati meyiolo ajo endaa sinyati neponiki ninye ematua e imiet e tomon oo ntokitin enyena alak, neisho ina toki sinyati olapolosani. Meisarkionie ilapolosak nena tokitin sinyat oo ltung'ana le Israel, naaitarasaki ninche Olaitoriani, aaitarasaki ninche metanapa enkitarruoroto o enkitadiata, te nkinosata e nena tokitin enye sinyat, amu ara nanu Olaitoriani oitisiny ninche.” Neitoki Olaitoriani ajoki Musa, “Tiaaki Aron o layiok lenyena o ltung'ana pooki le Israel, Teneitayu ake oltung'ani le nkaji e Siraeli aashu oloeuo amanyisho tiatua Israel olasar lenye, tenaa entoki olmumai lenye aashu tenaa enkishorunoto to ltau lo lpela naitarasakini Olaitoriani anaa olasar opejori, pooki ake pee eng'amaroyu naa tenaa olbung'ae lemeeta entioto aa oloo nkishu aashu oo loo nkerra aashu o loo nkineji. Kake emipolos ake entoki naata entioto, amu meng'amaroyu ina tialo intae. Naa tenepolos ake ninye oltung'ani olasar le seriani apolosaki Olaitoriani, pee eitabaya olmumai aashu tenaa olasar lo lpela, oing'uaa eluaata oo nkishu aashu eluaata oo ntare, naa pooki ake pee eng'amaroyu naa tenaa bayaroti nemetii entioto atua ninye. Ore ng'uesi modook aashu ng'ojinia maiman, anaa nemelulung'a seseni anaa enaruko nkimek, anaa enaata olpepedoi, emipolosaki Olaitoriani nena ng'uesi aashu intaikinyenye ilasarri oopejokini te nkima Olaitoriani te nchumata olperere lo lasar. Ore oloing'oni aashu ositima le ker oata erubata osesen lenye naado aashu endorrop nindimidimi intae aitaa olasar lo lpela, kake ore to lasar le nkitabaroto olmumai menyorrarri. Ore pooki ng'ues natokurdaki ilterege lenyena aashu eidong'oki, aashu etopolosaki aashu etegelemaki mipolosakiki Olaitoriani aashu intaunyenye ilasarri tiatua enkop inyi; nimintobiriri anaa endaa e Nkai inyi pooki ake ninye ng'ues nayaua oltungani omoni. Amu keeta ninche ntiot tenkaraki melulunga ninche nemeng'amaroyu tialo intae.” Nejoki Olaitoriani Musa, “Teneini olbung'ae aashu ositima le ker aashu ole kine, neton ninye nkolong'i naapishana tenebo ng'otonye, ore te nkolong e isiet neaku keng'amaroyu anaa olasar opejokini te nkima Olaitoriani. Naa tenaa duoo enkiteng ng'otonye aashu enker nimiyieng ninye tenebo olashe o ngotonye aashu olkuo o ngotonye te nkolong nabo. Naa tenipolos olasar le nkishoroto e nashe apolosaki Olaitoriani nipolos naa pee etum ataa keng'amaroyu. Neinosi ninye teina olong ake, nimileku ae toki mekenyiki: Ara nanu Olaitoriani. “Metaa embung'a nkitanapat aainei niasiasa ninche: Ara nanu Olaitoriani. Nimisarkionienie ake enkarna ai sinyati, kake kaayanyituni nanu tiatua iltung'ana le Israel: Ara nanu Olaitoriani oitisiny intae, apa oyawua intae aitupuku te nkop e Misiri pee aaku Enkai inyi: Ara nanu Olaitoriani.” Nejoki Olaitoriani Musa, “Tiaaki iltung'ana le Israel ore lelo siruai gelunot lo Laitoriani, lilimunyenye aaibalunye nchere iumat sinyat lelo siruai laainei kulo ninche isiruai gelunot naa ninche kulo. Nkolong'i ile easi esiai; kake ore te nkolong e naapishana naa enkolong e sabato naitirring'ae aayeng'iyeng'a, eumata sinyati, miasiasa intae esiaai ina olong. Sabato ina to Laitoriani tiatua imanyishoreitin inyi pooki. Kulo ninche lelo siruai oogeluno to Laitoriani, nena umat naasinya, naa ninche ipuopuo aalimu aaibalunye too nkatitin enye naategelakaki ninche. “Ore to lapa le dukuya te nkolong e tomon oo ng'uan o lapa, teipa, naa pasaka o Laitoriani. Naa ore te nkolong e tomon o imiet eilo apa ake naa osirua loo mukateni neitu eisuishieki to Laitoriani, ninosinoso intae imukateni neitu eisuishieki nkolong'i naapishana. Ore te nkolong e dukuya nintayuyu eumata sinyati, nimiasiasa esiaai nagol. Kake intarasaa ilasarri te nkima aaitarasaki Olaitoriani nkolong'i naapishana; ore te nkolong e naapishana naa eumata sinyati, nimiasiasa esiaai nagol.” Nejoki Olaitoriani Musa, “Tiaaki iltung'ana le Israel tenipuonunu kenya atua ina kop naisho nanu intae nisampumpu ilng'anayio lenyena, eyaki intae irridat loo lng'anayio le dukuya le nkisampuare olapolosani; nelo ninye ayuk ilo rridati te dukuya Olaitoriani, pee itumutumu aanoto eng'amaroto, ore pee ekenyu etulusoyie sabato neyuk olapolosani ilo rridati. Naa ore ina olong niyukuyuku ilo rridati, nipolososo olkuo leker lo lari obo lemeeta entioto anaa olasar opejokini Olaitoriani. Ore ilo asar le ntapa opudakini naa rubat are e tomon e efa e ntapa napuyiapui naipurjaki te ilata, pee eitayunyeki olasar opejokini te nkima Olaitoriani, esong'ouna narropil o lasar le ntoki naoki tenebo ninye naa enaisho oo sabibu erubata e ong'uan etomon ninye. Niminosinoso intae imukateni aashu ilpaek ootoito aashu ilooshal ometabau ina olong, ometaba anaa niyauu ilasarri le Nkai inyi; enkitanapata ena oo ntarasi tiatua iishoritin inyi too manyishoritin inyi pooki. “Ninkenikene intae ebaiki ina akenya etulusoyie sabato, ebaiki ina akenya apa niyautua orridati lo lasar oyuki wikii naapishana naalulung'a, aaikenu nkolong'i onom ometabaiki ina akenya nasuju sabato e naapishana; nitumutumu taa aaitarasaki olasar leina tapa ng'ejuk Olaitoriani. Niyauu intae tiatua imanyishoritin inyi imukateni are pee eyuki, naaitobirunyeki irubat are tiatua e tomon e Efa, naa ine ntapa napuyiapui, naa kepeji ninche tenebo enkisuijoi, anaa ilng'anayio le dukuya ooishori Olaitoriani. Nintarasaa intae tenebo nena mukateni ilkuoo le kerra oopishana lo lari obo lemeeta ntioot, o loti oing'oni obo, olmeregeshi oare, neaku ninche olasar opejokini te nkima Olaitoriani tenebo olasar lenye le ntapa o lasarri lenye ooki, anaa olasar opejori, esong'ouna narropil to Laitoriani. Nipolososo ositima obo le kine metaa olasar le ng'oki, o lkuoo oare le kerra lo lari obo anaa lasarri le seriani. Neyuk olapolosani ninche tenebo ina mukate oo lng'anayio le dukuya anaa olasar oyuki te dukuya o Laitoriani, tenebo lelo kuoo oare le kerra; neaku ninche sinyat to Laitoriani tenkaraki olapolosani. Nilimu aibalunye ina olong nintayuyu eumata sinyati, nimiasiasa esiaai nagol enkitanapata ena ntarasi tiatua imanyishoreitin inyi pooki, tiatua iishoritin inyi. “Naa tenisampumpu intae nkurman inyi nimisampumpu aaitabaiki nkiting'ot, nimisotisoto ina kurma nitudung'o te nkisampuare entung'uai ninche te nkaraki olaisinani o lomoni: Ara nanu Olaitoriani Enkai inyi.” Nejoki Olaitoriani Musa, “Tiaaki iltung'ana le Israel, ore to lapa liopishana te nkolong e dukuya o lapa, nimbung'ubung'u enkolong naeng'ieng'ae aaitirring'a, endamunoto nalimuni aaibalunye te oshoto oo ntarumpetani, eumata sinyati. Nimiasiasa esiaai nagol nintarasakiki Olaitoriani olasar opejori te nkima.” Nejoki Olaitoriani Musa, “Ore te nkolong e tomon eilo apa liopishana naa enkolong o lning'o lo sotua naa keaku te intae enkata e umata sinyati, naa ieniene ate aaitupukoo nintarasakiki Olaitoriani olasar opejori tenkima. Nimiaasiasa esiaai teina olong; amu enkolong o lning'o lo sotua, pee eitobiri olning'o lo sotua te nkaraki intae te dukuya Olaitoriani Enkai inyi. Amu ore oltung'ani lemeen kewan aitupukoo teina olong neitayuni aaiwuang'ie too ltung'ana lenyena. Ore oloba anaa oloas esiaai teina olong, ore ilo tung'ani naidaikie aiwuang'ie tiatua iltung'ana lenyena. Miasiasa intae esiai: Keaku ina enkitanapata ntarasi tiatua iishoritin too manyishoritin inyi pooki. Keaku te intae enkolong naeng'ieng'ae aaitirring'a nieniene ate aaitupukoo. Ore te nkolong e naaudo o lapa eiteru teipa, eiteru te nteipa ometabaiki teipa imbung'ubung'u intae sabato inyi.” Nejoki Olaitoriani Musa, “Tiaaki iltung'ana le Israel, ore te nkolong e tomon o imiet ele apa liopishana o too nkolong'i naapishana naa osirua loo lng'oborri lo Laitoriani. Ore te nkolong e dukuya naa keaku eumata sinyati, miasiasa intae esiaai nagol. Nkolong'i naapishana intarasaa intae ilasarri oopejori te nkima aaisho Olaitoriani, ore te nkolong e isiet nimbung'ubung'u eumata sinyati nintarasakiki olasar opejori te nkima Olaitoriani, eumata e seremare ina. Miasiasa intae esiai nagol. “Kulo ninche isiruai oogeluno lo Laitoriani, laa ninche ilimumu aaibalunye anaa iumat naasinya naaitarasakinyeki Olaitoriani ilasarri te nkima, ilasarri ooki olasar ake te nkolong enye naishiaakino. Tenebo nena sabatoni o Laitoriani o tenebo nkishorot inyi o tenebo lelo muma linyi pooki o tenebo nena kishorot inyi pooki o lpela ninchosho intae Olaitoriani. “Ore te nkolong e tomon o imiet o lapa liopishana, indipa intae aaiturrurro ilng'anayio le nkop, nipuopuo intae aaibung osirua lo Laitoriani nkolong'i naapishana, neaku enkolong e naapishana enaeng'iyeng'ae aaitirring'a neaku sii enkolong e isiet enaeng'iyeng'ae aaitirring'a. Nintayuyu intae te nkolong e dukuya ilng'anayio le lelo keek sidain, o ilng'osil loo ltuka, o ilng'osil lo lchani olit, ning'idayuyu te dukuya Olaitoriani Enkai inyi nkolong'i naapishana. Nimbung'ubung'u intae anaa osirua lo Laitoriani nkolong'i naapishana tiatua olari; enkitanapata ena oo ntarasi tiatua iishoritin inyi pooki; mbung'ubung'u intae ina to lapa liopishana. Nitonini too lng'oborri nkolong'i naapishana; ore lelo pooki ooikino Israel netoni too lng'oborri, pee etum iishoritin inyi aatayiolo nchere aishoo nanu iltung'ana le Israel metotoni too lng'oborri ina kata apa ayau ninche aipang'unye te nkop e Misiri: Ara nanu Olaitoriani Enkai inyi.” Neiko neijia Musa aibalakinye iltung'ana le Israel isiruai oogeluno to Laitoriani. Nejoki Olaitoriani Musa, “Ntanapa iltung'ana le Israel pee kiyaki iyie eilata nasila oo loirienito te nkaraki oltaa, pee eton oltaa eyupuyup anaake. Ore tioriong ilo karasha le nchakenisho tiatua ilo ng'obor le ntumo, nepik Aron ine aitobiraki ebaiki teipa ometaa tadekenya dukuya Olaitoriani anaake; keaku ena enkitanapata ntarasi tiatua iishoritin inyi pooki. Kepik ninye iltaai aitobiraki aiteleiki lelo iketa loo ltaai le sahabu nasila te dukuya Olaitoriani anaake. “Niya iyie entapa napuyiapui nipej imukateni tomon oare eina tapa; naa irubat are e tomon e Efa ake emukate. Nirragie ninche aitatash maare, neaku ile etatashaki te nchumata eina misa e sahabu nasila. Nipik iyie olbani osila tenebo ake olkereri, pee etum atupudare ina mukate anaa erubata nadamuni napuoi aaisho Olaitoriani te nkima. Ore te pooki olong e sabato neirragie Aron aitobiraki te dukuya Olaitoriani anaake terishata oo ltung'ana le Israel anaa olning'o lo sotua ntarasi. Naa keaku te nkaraki Aron o layiok lenyena, neinos ninche tiatua ine wueji sinyati, amu ore te ninye naa erubata sinyati oleng naing'uaa nena kishorot naapejokini te nkima Olaitoriani, embae nadamuni anaake.” Ore apa olayioni le nkitok oo Siraeli laa o le Misiri menye, nelo ninye tenebo iltung'ana le Israel; ore ilo ayioni le nkitok e oo Siraeli o ltung'ani le Israel neitarrikino tiatua enkang oo lng'oborri. Ore ilo ayioni le nkitok oo Siraeli nemor ina Arna nedek. Neyau ninche ninye enetii Musa. Ore apa enkarna e ng'otonye naa Shelomit, entito e Dibri, oloshole Dan. Neikenoo ninche ninye ometaba anaa neibalakinyeki ninche yieuna o laitoriani. Nejoki Olaitoriani Musa, “Empang'unye tiatua enkang oo lng'oborri ilo otedekishe; naa nchoo lelo pooki ootoning'o ninye eiteleiki nkaik enye endukuya enye, naa nchoo eumata pooki ear ninye too soito. Naa entiaaki lelo tung'ana le Israel, ore ilo pooki odek Enkai enye nenap eng'oki enye. Ore ilo omor enkarna o Laitoriani neari metua. Near ninye olturrur pooki too soito, ilo omoni o ilo inoti. Tenemor ninye ina Arna neari metua. Ore ilo oar oltung'ani metua, neari metua. Ore ilo oar eng'ues metua, nelak enkishui ake o te nkishui. Tenepik oltung'ani ole latia enye olbae, ore anaa enataasa keitaasi sii ninye, engilata o loito te ng'ilata oloito, enkong'u te nkong'u, o lalae to lalae, anaa enaitaasa ninye olikae neija sii ninye eitaasi. Ore ilo oar eng'ues metua nelak ore ilo oar oltung'ani metua neari sii ninye metua. Embung'a intae enkitanapata nabo to lomoni o to inoti; amu ara nanu Olaitoriani Enkai inyi.” Neaku eirorie apa Musa iltung'ana le Israel, neyaki ninche ninye ilo otedekishe te nkang oo lng'oborri, nenang ninche ninye too soito. Neiko neijia iltung'ana le Israel anaa enaitanapa Olaitoriani Musa. Nejoki Olaitoriani Musa te nchumata oldoinyo le Sinai, “Tiaaki iltung'ana le Israel, tenipuonunu kenya ina kop naisho intae, neibung ina kop sabato te nkaraki Olaitoriani, ilarin ile intae iunuunu nkurman inyi, naa ilarin ile intobiriri ilng'anayio linyi, nisotisoto ilng'anayio lenye; kake ore to lari liopishana neaku sabato naeng'ieng'are ina meturo, sabato to Laitoriani; miunuunu intae nkurman inyi aashu intobiriri ilng'anayio linyi. Ore ina nabulu openy tiatua enkisampuare inyi nimintayuyu aaya, ore isabibu leilo shani leitu eitobiri nimisotisoto intae; keaku olari oengieng'ae aaitirring'a te nkaraki ina kop. Ore ina sabato ena kop naa keisho intae endaa intae maate, o rrindiki linyi loo lewa o loo ng'oruo o sinkan lo lmushaara oilo omoni oton tenebo iyie; o nkishu inono sii o nena ng'uesi naatii atua enkop ino, ore pooki naaiu enkop naa keaku endaa. “Naa einken iyie iwikii naapishana oo larin, katitin naapishana ilarin oopishana, peyie aa ore nena katitin naapishana o nena wikii naapishana oo larin neaku ilarin artam ooudo. Nintoki taa airriwaa oltung'ani meshomo enkop pooki aosh entarumpeta aitadar te nkolong e tomon o lari liopishana; ore teina olong o lning'o lo sotua niosh entarumpeta aitadar tiatua enkop ino pooki. Nintisinyinyi olari lionom nilimumu aaibalunye elakunoto tiatua ina kop pooki aaliki lelo pooki oomanya; naa keaku osirua te intae, ina kata errinyokino ake oltung'ani te ntae ntokitin enyena o lmarei lenye. Ore teilo ari lionom naa keaku osirua te intae, ore teina nimiunishosho aashu isampumpu ina nabulu openy, aashu isotutu ilng'anayio loo sabibu leitu eitobiri. Amu osirua naa; keaku sinyati te intae, ninosinoso intae nena naabulu too nkurman. “Ore tiatua ele ari lo sirua nerrinyo ake oltung'ani te intae alo enetii imasaa enyena. Naa tenimiraki ole latia ino aashu teninyang'u to le latia ino, niminyalakinono maate. Ore anaa eneba ilarin te siadi ilo sirua neijia eba enkinyiang'a teilo lelatia ino, naa terisioroto oo larin loo ndaiki kimiraki ninye. Tenaa kumok ilarin niponaa iyie enkinyang'a, naa tenaa kuti ilarin nintaa kiti enkinyiang'a, amu esiana oo larin ninye kimirakinye iyie. Eminyala intae maate kake entureita Enkai inyi; amu ara nanu Olaitoriani Enkai inyi. “Neaku embung'a intae nkitanapat aainei nimbung'ubung'u nkiguanat aainei niasiasa ninche; pee itonini tiatua ina kop te seriani. Keiu ina kop ilng'anayio lenyena, ninosinoso intae aaraposho nitonini tiatua ninye te seriani. Naa tenijojo intae, Kainyoo kinya teilo ari liopishana, tenimikiun aashu kinturrur enkurma ang?” Kairriwaki nanu emayianata ai shumata intae to lari le ile pee etum atoiu ilng'anayio too larin okuni. Ore iunishosho to lari le isiet ninosinoso endaa musana; ometabau olari lioudo olotunye endaa enye, inosinoso endaa musana. Memiri enkop te nkinyang'a e katukul, amu enaai enkop; amu irara intae ilomon ooidurrakita tenebo nanu. Naa ore tiatua ina pooki nitii entipik enkinyang'a e lakunoto. “Teneaku aisinani olalashe lino, nemir embata oo masaa enyena, ore ilo alashe onyikare nelotu akordu ina natimira olalashe lenye. Tenemeeta oltung'ani olikae okordu ina, kake neitoki ninye adupoyu netum ntokitin naakordunye, nchoo ninye eiken ilarin ebaiki ina kata apa pee emir neitoki ninye alak aitulus teilo tung'ani apa otimiraka, nerrinyokino taa ayau atua imasaa enyena. Kake tenemeeta ninye ntokitin naaidip naarrinyokinye kewan enye, neaku naa ore apa ina natimira neton too nkaik eilo apa oinyang'ua ometabau olari le Yubilii, ore te Yubilii nelaari ninye nerrinyokino ninye imasaa enyena. “Tenemir oltung'ani enkaji enye namanya, natii atua enkanasa nasheta, isunta neidim ninye aitalaku tiatua olari olulung'a eidipaki aatimir; to lari olulung'a elo ninye atum esipata nakordunye. Naa teneitu ekorduni tiaatua olari olulung'a, ore ina aji natii atua ina anasa nasheta sunta neitisipi katukul aajo enetii apa ilo oinyang'ua, tiatua iishoritin enyena pooki; nemepuoi aarriny tolari le Yubili. Kake ore nkajijik e nena ang'itie kutiti nemeeta isunta naamanita ninche neitanyaanyukieki inkurman enkop; keidimi aatokordu, naa kepuoi aarriny to lari le Yubilii. Ore ake eyia nena anas oo Lawi nena ajijik naatii atua nkanas enye keidim ile lawi aatokordu pooki kata. Naa tenetii obo Lawi lemeasishore esipata enye enkordunoto, ore apa ina aji natimiraki tiatua enkanasa enye nerrinyuni to lari le Yubilii; amu ore nena ajijik naatii atua nkanas oo Lawi naa imasaa enye tiatua ltung'ana le Israel. Kake ore nkurman e nena nemeidimi aatimir amu imasaa enye nena ntarasi. “Naa teneaku olalashe lino aisinani, neaku meidim ataretu kewan tenebo iyie, tareto iyie ninye, anaa olomoni anaa olamutanani likiewuo ashulare. Ming'orunye ninye dupoto aashu ing'orunye toki, kake turia Enkai ino; pee etum olalashe lino atotona te mbata iyie. Misilenoki iyie ninye mpisai inono te mponikinoto nimincho iyie ninye endaa ino aing'oru dupoto. Ara nanu Olaitoriani Enkai ino, ilo likiyawua iyie aitupuku te nkop e Misiri pee kincho iyie enkop e Kanaan; neaku ninye Enkai ino. “Naa teneaku olalashe lino aisinani te mbata iyie, nikimiraki iyie kewan enye, mincho iyie ninye mikisiaayia anaa orrindik. Keaku ninye tenebo iyie olaisiaayiani lolmushaara o anaa sii olomoni. Eikisiaai ninye iyie ometabau olari le Yubilii; nikitum taa ashomo atung'uai, ninye o nkera enyena naatii tenebo ninye, neshuko alo enetii olmarei lenye, neshuko alo enetii imasaa o loo menye. Amu isinkan lainei ninche, apa layaua nanu aitupuku te nkop e Misiri; mepuoi aamir ninche anaa rrindiki. Milo iyie aitore ninye te nkisikong'ata kake turia Enkai ino. Ore tialo ilewa aashu ing'oruo rrindiki linono ooba anaa iliaata indim iyie ainyiang'u ilewa aashu ing'oruo rrindiki tiatua lelo oshon likimanita iyie. Indim sii te lelo omon likindurrakita iyie o te lelo mareita lenye ootii tenebo iyie, te lelo ootoiwuoki tiatua enkop ino; neaku ninche imasaa inono. Ninguekiki ilayiok linyi te siadi intae, pee ejung aaitaa imasaa enye intarasi; ndimidimi intae aaitaa ninche irrindiki, kake ore te shumata ilalashera linyi lelo tung'ana le Israel mintorere, oltung'ani ake olikae tenkisikong'ata. “Tenelo neaku olomoni aashu ilo oidurrua karsis, ore olalashe lino otashare neaku aisinani nemiraki kewan ilo omoni aashu ilo oidurrua otii tenebo iyie, aashu obo lo lmarei leilo tung'ani omoni, ore eidipaki aatimir ninye neidimi aatokordu ninye; keidim obo loo lalashera lenyena atalaku ninye. Aashu olenkapu lenye aashu enkerai olenkapu lenye, neidim atalaku ninye, aashu oltung'ani le sotua onyikare oleng ora ololmarei lenye neidim atalaku ninye; aashu tenekarsisu neidim atalaku kewan. Neiken ninye tenebo ilo apa oyawua ninye ebaiki ilo ari apa otimirakinye kewan ninye ometabau olari le Yubilii, ore enkinyang'a e lakunoto enye neaku te risioroto oo larin. Ore apa enkata natii ninye tenebo ilo ora olopeny neikenari anaa enkata olaisiaayiani lolmushaara. Naa teneton etii ilarin kumok, ore te risioroto enye nerriny alak ninche teina kinyang'a apa natalaaki te nkaraki ninye, enkinyang'a e lakunoto enye. Naa teneng'or ilkuti arin pee ebau olari le Yubilii, neikenakino ninche, ore te risioroto oo larin le nkisiayiare oong'or te ninye nelak ninye mpisai te nkaraki elakunoto enye. Ore anaa osinka lo lmushaara to lari ake o to lari neijia ninye etiu tenebo ilo; nemeitore ninye ninye te nkisikong'ata te dukuya iyie. Naa teneitu elakuni ninye te kuna oitoi; nepuoi naa aalaaya ninye to lari le Yubilii, ninye o nkera enyena naatii tenebo ninye. Amu ore te nanu iltung'ana le Israel naa isinkan, isinkan laainei ninche layaua nanu aitupuku te nkop e Misiri: Ara nanu Olaitoriani Enkai ino. “Emintobirakiki intae ate nkitanyaanyukot oo nkaitin nimishetishete nkitanyaanyukot oo nkaitin naaguetuno aashu e ng'ape, nimintasheyieyie intae osoit le nkitanyaanyukoto tiatua enkop inyi, pee irrugokinono ninche; amu ara nanu Olaitoriani Enkai inyi. Embung'a intae isabatoni aainei niyanyititi emanyisho ai sinyati. Ara nanu Olaitoriani. “Tinipuopuo intae too nkiguanat aainei nimbung'ubung'u nkitanapat aainei, niaasiasa ninche, naisho nanu intae enchan inyi too rishat enye, netum enkop atoisho ore ilkeek le nkurma neiu ilng'anayio lenye. Ore esototo oo nkurman inyi nebik ometabau enkata nasotuni isabibu, nebik isabibu ometabau enkata e unore. Ninosinoso intae emukate inyi aaraposho nibikibiki tiatua enkop inyi te seriani. Naa kaishoru nanu eseriani tiatua ena kop; naa irurara intae nemeetae oltung'ani oiture intae; naiwuang'ie nanu ing'uesi torrok tena kop, nemeitoki olalem atii enkop inyi. Naa imirimiri intae ilmang'ati linyi, naa kebatata ninche te dukuya intae to lalem. Imiet linyi oopuo aamir iip, ore iip linyi nepuo aamir nkalifuni tomon; ore ilmang'ati linyi naa kepuo aabatata te dukuya intae to lalem. Naa kaing'or nanu intae naisho intae entoisho napon intae, naitadedeyie nanu osotua lai o intae. Naa inosinoso intae endaa musana apa nitushuma, nintokiki aaiwuang'ie ina musana pee itumutumu enipikipiki eng'ejuk. Naa kaitobir nanu emanyisho ai tiatua intae, nemeibelekenya oltau lai aibayu intae. Naa kalo nanu tiatua intae naaku Enkai inyi, niakuku intae iltung'ana laainei. Ara nanu Olaitoriani Enkai inyi, ilo apa oyawua intae aitupuku te nkop e Misiri, pee mintokiki aaku irrindiki lenye, natigila nanu isekenke e rrindikisho enye, naisho intae enchom ntorioriri. “Kake tenimikining'ining'i intae nanu, nimiasiasa kuna kitanapat pooki. Tenianyianya intae nkiguanat aainei, naa teneibeyu oltau linyi nkikoot aainei, metaa miasiasa intae nkitanapat aainei, pooki, kake igiligili intae osotua lai, naitaas nanu intae ena: Nayau nanu shumata intae entaboi naluam intae, enkeeya nemeishiuni, o lkirobi, oitarruo nkonyek neitemen enkishui inyi. Naa keaku tempesho iunuunu ilanterera linyi, amu keinos ninche ilmang'ati linyi, kaipirakinore nanu intae aarare, naa keari intae te dukuya ilmang'ati linyi, ore lekua ooiba intae naa kepuo aaitore intae, naa ilanyishosho intae meetae oltung'ani omirta intae. Naa ore etii kuna pooki nimikining'ining'i intae naitame intae aitulus katitin naapishana te nkaraki ing'ok inyi, nagil nanu olwuasa le ngolon inyi, naa kagil nanu olwuasa le ngolon inyi, naitaa nanu oloing'ang'e linyi metotiwuo anaa esekenkei naitotiu enkop inyi anaa osuyai. Neaku pesho enkisiaayiare e ngolon inyi, amu meitoki enkop inyi aiu entoki naponari, ore ilkeek leina kop nemeitoki aaiu ilng'anayio lenye. “Naa tenikipaasharere intae nanu, nimikining'ining'i nanu, nayau nanu shumata intae ilmeita kumok, aitulus katitin naapishana anaa enkumoi oo ng'ok inyi. Naisho nanu ing'uesi e ntim meetu atua intae, naa ninche naapuonu aapur intae aaya nkera inyi, neinyal nchoo inyi, neitaa intae kuti, pee eitoliyioi nkoitoi inyi. “Naa tenimikishukokinono intae nanu tena kitamioto, kake aikipuopuo aapaashare nanu, napaashare sii nanu intae, naosh nanu makewan intae aitulus katitin naapishana te nkaraki ing'ok inyi. Naa kayau nanu olalem shumata intae, pee atum aitalaku elap te nkaraki ilo sotua, naa teninturrurrorro intae tiatua inkanas inyi, naa kairriu nanu olmeitai atua intae naa keyai intae aapik atua nkaik oo lmang'ati linyi. Ore ina kata tenagil nanu ewueji inyi nepejunyeki imukateni, neaku tomon nkituaak naapeju imukateni inyi te wueji nebo, naa keyau ninche imukateni inyi te ntemata e nkiroishi, ninosinoso intae, nimiraposhosho. “Naa tenimikining'ining'i nanu etii kuna pooki, kake ipuopuo torrekie laapaashare nanu, nalo sii nanu apaashare ntae te ngoro napi, naitame nanu intae makewan katitin naapishana te nkaraki ing'ok inyi. Inosinoso intae inkiri oo layiok linyi, ninosinoso inkiri oo ntoyie inyi. Naa kaidaikie nanu iwuejitin inyi e shumata nasulaki e nkop ilperereni linyi loo lasarri le nkorropil, nanang'aki mpopoki inyi nchumat enena kitanyaanyukot inyi nemeishu; neibelekenya oltau lai aibayu intae. Naitaa nanu nkanas inyi ilmuateni naitomijoon nkajijik inyi sinyat, nemaitoki nanu aing'uaya isonkoyoni inyi naarropil. Naitoliyio nanu ina kop, pee etum lelo mang'ati linyi ootii atua aaing'asiakinoto. Naa kaidapashaki nanu intae iloshon, nashutu nanu olalem te siadi intae neaku enkop inyi ololiyiote, neaku nkanas inyi ilmuateni. “Neshipakino taa ina kop isabatoni enyena ina kata aa mijooni, ina kata iyie itii enkop oo lmang'ati linono; netum taa enkop ayeng'iyeng'ayu neshipakino isabatoni enyena. Ore teina rishata pooki nairrag ninye aa mijooni neyeng'iyeng'a ina kop, tenkiyeng'iyeng'ata apa nemeeta isabatoni inyi emanya intae ina kop. Ore lelo linyi ooleku napik enkuretisho atua iltauja lenye teina kop oo lmang'ati lenye; ore embeneyio nakutita osiuo neisikie ninche, naa keisik aailanyisho anaa ilooilany olalem, naa kepuo ninche memirta toki. Naa kerrorro ninche aarrorrokino ake oltung'ani olikae, anaa oltung'ani oilany olalem, hoo nememirta ninche toki, nemintoki aata engolon nintasheyie te dukuya ilmang'ati linono. Naa ilo iyie aidaaya tenebo iloreren ore ina kop oo lmang'ati linono nikinos iyie. Ore lelo linyi tiatua enkop oo lmang'ati linyi nengoroo enkishui enye te nkaraki ing'ok enye ore sii te nkaraki ing'ok oo loo menye nengoroo e nkishui enye anaa ninche. Kake teneirridu ninche ntorrok enye o ntorrok oo loo menye teina suujisho naaitaasa ninche nanu, o teina sii naashomo ninche aapaashare nanu omashomo nanu apaashare ninche nayau nanu ninche atua enkop oo lmang'ati lenye; teneitobor naa lelo tauja lenye lememurata neibelekenya teina torroni enye; natum naa atadamu osotua lai o Yakobo nadamu nanu osotua lai o Isaak o sotua lai o Abraham, nadamu nanu ina kop. Kake keing'ua ninche ina kop neshipakino ninye isabatoni enyena ina kata eirrag aa mijooni metii ninche; naa keibelekenya ninche teina torroni, enkaraki apa natemenaitie nkitanapat aainei, neibayu iltauja lenye nkiguanat aainei. Ore ake eyia te nena pooki, ina kata etii ninche atua enkop oo lmang'ati lenye nemamenaa nanu ninche, nemaibayu nanu ninche ometaa kaidaikie nanu ninche katukul nagil osotua o ninche, amu ara nanu Olaitoriani Enkai enye; kake ore te nkaraki ninche kadamu osotua o loo nkakuyiaa lenye apa layaua nanu ninche aitupuku te nkop e Misiri too nkonyek oo loshon, pee atum nanu ataa Enkai enye; Ara nanu Olaitoriani.” Kuna ninche nkiguanat o nkikoot o nkitanapat naaitobira Olaitoriani te rishata enye o ltung'ana le Israel te nchumata oldoinyo le Sinai aimunye Musa. Nejoki Olaitoriani Musa, “Tiaki iltung'ana le Israel, tenenya oltung'ani olmumai o ltung'ani te nkaraki Olaitoriani te ntemata ino, ore naa entemata e nkinyiang'a ino olee ebaiki ilarin tikitam omeitabaiki ilarin ntomoni ile naa keaku shekeli onom e nkosholai, te risioroto eina shekeli e wueji sinyati. Naa tenaa eng'oruoi ilo tung'ani neaku entemata ino shekeli tomoni uni. Naa tenaa ilarin imiet oltung'ani neilep o metabaiki ilarin tikitam, ore entemata ino to lee naa shekeli tikitam, ore te ng'oruoi naa shekeli tomon. Naa tenaa olapa obo embotoro oltung'ani neilep o metabaiki ilarin imiet ore entemata ino to lee naa keaku shekeli imiet e nkosholai, ore te ng'oruoi naa keaku shekeli uni e nkosholai. Naa tenaa ilarin ntomoni ile oltung'ani neilep neaku ore entemata e nkinyiang'a ino tialo olee naa keaku shekeli tomon o imiet, ore te ng'oruoi naa keaku shekeli tomon. Naa tenaa aisinani oltung'ani oleng meidim atalaa enkiririkinoto ino neyau ninye ilo tung'ani dukuya olapolosani netem olapolosani ninye; te risioroto eilo tung'ani apa oinosie olmumai. “Naa tenaa eng'ues naaku entoki napolosi, napolosakini Olaitoriani, ore pooki toki naikununo neijia napolosaki ake ninye oltung'ani Olaitoriani naa kesinya. Mewalie ninye ae toki aashu eibelekenyie ninye, esidai te ntorrono, aashu entorrono te sidai; naa teneitobir ninye ae kibelekenyata e ng'ues o eng'ues, neaku naa ore pokira ina o idia naibelekenyaki neaku sinyati. Naa tenaa eng'ues nemesinya anaa enemeishoori anaa olasar to Laitoriani neyau naa ilo tung'ani ina ng'ues dukuya olapolosani, nepik olapolosani ina ng'ues entemata e nkinyiang'a tenaa eisidai aashu tenaa torrono; anaa enitem iyie olapolosani ninye, neaku neijia etiu enkinyiang'a. Kake teneyieu ninye nekordu ninye neponaa e rubata e imiet e tomon entemata e nkinyiang'a. “Teneitayu oltung'ani enkaji enye metaa sinyati to Laitoriani, nelo olapolosani atem tenaa aisidai aashu torrono; ore anaa enatem olapolosani naa neijia etiu enkinyiang'a. Naa teneyieu ilo oishoo Olaitoriani ina aji nekordu enkaji enye, nelo ninye aponaa erubata e imiet e tomon entemata e nkinyiang'a too mpisai neaku taa enkaji enenye. “Naa teneiteng'elaki oltung'ani Olaitoriani ometua e nkurma enye naa enenye te njung'ore ore entemata ino e nkinyiang'a naa te risioroto e unoto enye. Ore omeri nabo (mpilbil ile kutiti) e shairi neaku shekeli onom oo ropiyiani, enkosholai. Naa teneiteng'el ninye aitisinyaki Olaitoriani enkurma enye ebaiki olari le Yubilii, neaku anaa ina temata ino e nkinyiang'a nalulung'a. Kake teneiteng'elaki ninye Olaitoriani enkurma enye te siadi Yubilii neikenaki taa olapolosani esiana oo mpisai te risioroto oo larin oong'or ometabau olari le Yubilii, neiwuang'ieki taa erubata teina kikenata ino. Naa teneyieu ilo oiteng'ela enkurma nekordu, neponaa naa erubata e imiet e tomon oo mpisai, neaku taa enenye. Kake tenemeyieu ninye nekordu ina kurma, aashu tenetimiraka ninye ina kurma likae tung'ani nemeitokini aaigil aakordu; kake ore ina kurma tenelakuni to lari le Yubilii, neaku sinyati to Laitoriani, ore anaa enkurma naishoruno, keaku olapolosani ninye olopeny. Teneiteng'elaki ninye Olaitoriani enkurma nainyiang'ua ina apa neme enenye natujung'o, netum naa olapolosani aikena entemata enye e nkinyiang'a ometabaiki olari le Yubilii, nelo taa ilo tung'ani aishooyo esiana e nkinyiang'a te ina olong anaa entoki sinyati to laitoriani. Ore to lari le Yubilii nerrinyokino ina kurma ilo apa oinyang'unyeki, aa enenye apa ina kop natujung'o. Ore pooki temata e nkinyiang'a naa te risioroto e shekeli e wueji sinyati, ore ngerrai tikitam naa shekeli nabo. Kake ore olkikaunot loo ng'uesi naa ilo Laitoriani, meetae oltung'ani oidim aiteng'ela; aa olkiteng aashu enker, ino Laitoriani. Naa tenaa eng'ues nemesinya, neinyiang'u naa ninye te ntemata ino e nkinyiang'a, neponiki erubata e imiet, naa teneitu ekorduni nemiri te ntemata ino e nkinyiang'a. “Kake meetae entoki naiteng'elaki, ina naiteng'elaki oltung'ani Olaitoriani, e pooki toki ake ninye naata, aa oltung'ani aashu eng'ues, aashu enkurma enye natujung'o, naidimi aatimir aashu aatokordu; ore pooki toki naiteng'elakaki naa eisinyati oleng to Laitoriani. Meetae hoo ng'ae oiteng'elaki, oidimi aaidaikie tukul tiatua iltung'ana oidimi aatokordu keari ake metua. “Ore pooki matua e tomon e nkop, aa lanterera le nkop aashu ilng'anayio loo lkeek naa ilo Laitoriani; kesinya ninche to Laitoriani. Teneyieu oltung'ani nekordu ae nabo e matua enye e tomon oo nkishorot enyena nelo naa ninye aponaa ematua e imiet e tomon. Ore ematua pooki e tomon oo nkishu aashu inoo nkerrai, ore eng'ues pooki e tomon e nena pooki naaim abori eng'udi olchekut, naa keaku sinyati to Laitoriani. Meikilikuanu oltung'ani tenaa eisidai aashu torrono, aashu ewalu ninye; tenelo newalu ninye, neaku ore pokira ina natawalunyeki o ina natawaluaki neaku sinyati, nemekorduni ninye.” Kuna ninche nkitanapat naaitanapa Olaitoriani Musa te nkaraki iltung'ana le Israel to ldoinyo le Sinai. Eirorie apa Olaitoriani Musa tiong'ata e Sinai, ti atua ilo ng'obor le ntumo, te nkolong e dukuya o lapa li are, to lari li are ina kata eidipa aaipang'u te nkop e Misiri nejoki, “Nkena esiana e umata pooki oo ltung'ana le Israel, anaa ilmareita, o anaa nkajijik oo loo menye, nkajijik te risioroto e siana oo nkarn, pooki lee, pooki lukunya o lee, ebaiki ilarin tikitam neilep, pooki ti atua Israel ooidim aashom enjore enkena intae o Aron ninche, anaa ilturrurri. Neaku te nebo intae oltung'ani ake te pooki osho ore ake ilo tung'ani naa ninye endukuya e nkaji oo loo menye. Naa kuna nkarn e lelo tung'ana oopuonu aaku te nebo intae. Neing'uaa olosho le Ruben Elisur olayioni le Shedeur; neing'uaa olosho le Simion Shelumiel olayioni le Shurishadi; neing'uaa olosho le Yuda Nahashon olayioni le Aminadab; neing'uaa olosho le Isaakar Natanel olayioni le Saur; neing'uaa olosho le Sebulon Eliab olayioni le Helon; ore too layiok le Yosef o te Efraim, naa Elishama olayioni le Amihud; neing'uaa olosho le Manase Gamaliel olayioni le Pedasur; neing'uaa olosho le Benchamen Abidan olayioni le Gideon; neing'uaa olosho le Dan Ahieser olayioni le Amishadai; neing'uaa olosho le Asheri, Pagiel olayioni le Oharan; neing'uaa olosho le Gad Eliasaf olayioni le Deuel; neing'uaa olosho le Naftali Ahira olayioni le Enan.” Kulo apa lelo ootegeluaki to lturrur, lelo arikok loo loshon lenye, aa ninche ilukuny oo loshon le Israel. Nerik Musa o Aron kulo tung'ana ootegeluaki; ore te nkolong e dukuya o lapa li are, neiturrur ninche eumata pooki te nebo, neiger ninche ate anaa ilmareita, anaa nkajijik oo loo menye, te risioroto oo nkarn ebaiki ilarin tikitam neilep, ilukuny pooki anaa enaitanapa Olaitoriani Musa. Neaku eikena apa ninye ninche ti ong'ata e Sinai. Ore iltung'ana le Ruben ilo kikau le Israel, iishoritin enye, too lmareita lenye, too nkajijik oo loo menye te risioroto e siana oo nkarn, o lukuny pooki, o pooki lee ebaiki ilarin tikitam neilep, lelo pooki ooidim aashom enjore: ore esiana o losho le Ruben naa nkalifuni artam o ile o iip imiet. Ore too ltung'ana le Simeon, iishoritin enye, too lmareita, lenye too nkajijik oo loo menye, lelo apa lenye ooikenaki, te risioroto e siana oo nkarn, ilukuny pooki, pooki lee ebaiki ilarin tikitam neilep, lelo pooki ooidim aashom enjore: nera apa esiana o losho le Simeon nkalifuni onom o oudo o iip uni. Ore too ltung'ana le Gad, iishoritin enye, too lmareita lenye, too nkajijik oo loo menye, te risioroto e siana oo nkarn ebaiki ilarin tikitam neilep, lelo pooki ooidim aashom enjore: nera esiana o losho le Gad nkalifuni artam o imiet o iip ile o onom. Ore too ltung'ana le Yuda, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep nera esiana o losho le Yuda nkalifuni ntomoni naapishana oo ong'uan o iip ile. Ore too ltung'ana le Isaakar, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep; pooki tung'ani oidim ashomo enjore: nera esiana o losho le Isaakar nkalifuni onom oong'uan o iip ong'uan. Ore too ltung'ana le Sebulon, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep, pooki tung'ani oidim ashomo enjore: nera esiana o losho le Sebulon nkalifuni onom o oopishana o iip ong'uan. Ore iltung'ana le Yosef aa taa iltung'ana le Efraim, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep, pooki tung'ani ake ninye oidim ashomo enjore: nera esiana o losho le Efraim nkalifuni artam o iip imiet. Ore too ltung'ana le Manase, iishoritin enye, too lmareita lenye, too nkajijik oo loo menye te risioroto e siana oo nkarn, ebaiki ilarin tikitam neilep, pooki tung'ani ake ninye oidim ashomo enjore: nera esiana o losho le Manase nkalifuni tomoni uni o are o iip are. Ore too ltung'ana le Benchamen, iishoritin enye, too lmareita lenye, too nkajijik oo loo menye, te risioroto e siana oo nkarn ebaiki ilarin tikitam neilep, pooki tung'ani oidim ashomo enjore: nera esiana o losho le Benchamen nkalifuni tomoni uni o imiet o iip ong'uan. Ore too ltung'ana le Dan, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep, pooki tung'ani oidim ashomo enjore: nera esiana o losho le Dan nkalifuni ntomoni ile o are o iip naapishana. Ore too ltung'ana le Asheri, iishoritin enye, too lmareita lenye, too nkajijik oo loo menye, te risioroto e siana oo nkarn ebaiki ilarin tikitam neilep, pooki tung'ani oidim ashomo enjore: nera esiana o losho le Asheri nkalifuni artam o obo o iip imiet. Ore too ltung'ana le Naftali, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep, pooki tung'ani oidim ashomo enjore: nera esiana o losho le Naftali nkalifuni onom o okuni o iip ong'uan. Kulo apa lelo laa ninche eikenaki, laa ninche eikena Musa o Aron te retoto oo lpayiani le Israel, iltung'ana tomon o are, ore ake oltung'ani netii te rishata e nkaji e papaai lenye. Neaku ore esiana pooki oo ltung'ana le Israel, too nkajijik oo loo menye, ebaiki ilarin tikitam neilep, pooki ng'ae ooidim ashomo enjore te Israel ore apa esiana enye pooki naa nkalifuni iip ile o okuni o iip imiet o onom. Kake eitu apa eikenari ile Lawi aaitusuj iloshon loo loomenye te nebo ninche. Amu etiaka Olaitoriani Musa, “Olosho le Lawi ake ninye minken, nimisir ninche aiken te nebo iltung'ana le Israel; kake tegelu ile Lawi meitasheiki olng'obor le nchakenisho neitasheiki nena masaa enyena, neitasheiki nena tokitin pooki eine; nenap ninche ilo ng'obor o ntokitin enyena, neisiai ninye, neitaman ilo ng'obor emanyisho. Naa ore te nkata naidurrieki ilo ng'obor, naa te nepuoi aaun, naa ile Lawi ooun. Naa tenenyiku likae tung'ani, neari ninye metua. Nchoo iltung'ana le Israel eun ilng'oborri lenye anaa ilturrurri, o ltung'ani ake to lng'obor lenye makewan, oltung'ani ake te rishata enye makewan; kake ore ile Lawi neitaman ilng'oborri lenye ilo ng'obor le nchakenisho, pee metumi ake embae naitagorisho ti alo eumata oo ltung'ana le Israel; naa ile Lawi ooitasheiki ilo ng'obor le nchakenisho.” Neijia apa eikuna iltung'ana le Israel; etaasa apa ninche te risioroto e nena pooki naaitanapa Olaitoriani Musa. Nejoki Olaitoriani Musa o Aron, “Nchoo iltung'ana le Israel emanyisho tembata e nanka enye, to lmonekie loo nkajijik oo loo menye, nchoo eun ilng'oborri aaipirie ilo ng'obor le ntumo te pooki shoto. Ore lelo oomanyisho te nkalo o loo saen - te nkalo e nkilepunoto e nkolong naa keaku enanka o lng'obor le Yuda too lturrurri lenye, aa ore olarikoni lo lturrur le Yuda naa Nahashon olayioni le Aminadab; ore esiana o lorora anaa enaikenaki naa nkalifuni ntomoni naapishana o ong'uan o iip ile. Ore lelo ooitoki aaun ilng'oborri aatashare ninye naa olosho le Isaakar, ore olarikoni loo ltung'ana le Isaakar naa Natanel olayioni le Suar, ore esiana o lorora lenye anaa enaikenaki naa nkalifuni onom o ong'uan o iip ong'uan. Nesuju olosho le Sebulon, naa Eliab olayioni le Helon olarikoni loo ltung'ana le Sebulon, ore esiana o lorora lenye anaa enaikenaki naa nkalifuni onom o opishana o iip ong'uan. Ore esiana nalulung'a e lelo ng'oborri le Yuda, too lturrurri lenye naa nkalifuni iip nabo o ntomoni isiet o ile o iip ong'uan. Ninche oong'as aapuo. “Ore te nkalo e kopikop naa enanka oo lng'oborri le Ruben too lturrurri lenye, ore olarikoni loo ltung'ana le Ruben naa Elisur olayioni le Shedeur, ore esiana o lorora lenye anaa enaikenaki naa nkalifuni artam o ile o iip imiet. Ore lelo ooun ilng'oborri aasujaki ninche naa olosho le Simeon, ore olarikoni loo ltung'ana le Simeon naa Shelumiel olayioni le Surishadai ore esiana o lorora lenye anaa enaikenaki naa nkalifuni onom o oudo o iip uni. Nesujaki olosho le Gad, ore olarikoni loo ltung'ana le Gad naa Elisaf olayioni le Reuel, ore esiana o lorora lenye anaa enaikenaki naa nkalifuni artam o imiet o iip ile o onom. Ore esiana pooki oo lng'oborri le Ruben, too lturrurri lenye naa nkalifuni iip o onom o obo o iip ong'uan o onom. Ninche oaku ili are. “Neitokini aaitusuj olng'obor le ntumo, nepiki ilo ng'obor loo Lawi empolos oo lng'oborri; ore anaa enamanyisho ninche nchoo eiko neijia, aapik ake olng'obor erishata enye, enanka ake o enanka. “Ore te nkalo o loo ntoluo naa enanka oo lng'oborri le Efraim, too lturrurri lenye, ore olarikoni loo ltung'ana le Efraim naa Elishama olayioni le Amihud, ore esiana o lorora lenye anaa enaikenaki naa nkalifuni artam o iip imiet. Ore olosujaki ninche naa olosho le Manase, ore olarikoni loo ltungana le Manase naa Gamaliel olayioni le Pedasur, ore esiana o lorora lenye anaa enaikenaki naa nkalifuni tomoni uni o are o iip are. Neitoki asuju olosho le Benchamen, ore olarikoni loo ltung'ana le Benchamen naa Abidan olayioni le Gideon, ore esiana o lorora lenye anaa enaikenaki naa nkalifuni tomoni uni o imiet o iip ong'uan. Ore esiana pooki oo lng'oborri le Efraim, too lturrurri lenye naa nkalifuni iip nabo o ntomoni isiet o iip nabo. Ninche oaku ili okuni. “Ore te nkalo e moikuape naa enkereri oo lng'oborri le Dan too lturrurri lenye, ore olarikoni loo ltung'ana le Dan naa Ahi-eser olayioni le Amishadai, ore esiana o lorora lenye anaa enaikenaki naa nkalifuni ntomoni ile o are o iip naapishana. Ore lelo oosujaki ninche too lng'oborri naa olosho le Asheri, ore olarikoni loo ltung'ana le Asheri naa Pagiel olayioni le Okran, ore esiana o lorora lenye naa nkalifuni artam o obo o iip imiet. Neitoki asuju olosho le Naftali, ore olarikoni loo ltung'ana le Naftali naa Ahira olayioni le Enan, ore esiana o lorora lenye anaa enaikenaki naa nkalifuni onom o okuni o iip ong'uan. Ore esiana pooki oo lng'oborri le Dan naa nkalifuni iip nabo o onom o opishana o iip ile. Ninche oobayie anaa too nankan.” Kulo ninche iltung'ana le Israel anaa enaikenaki too nkajijik oo loo menye; ore lelo pooki apa ootii ilng'oborri ooikenaki too lturrurri lenye naa nkalifuni iip ile o okuni o iip imiet o onom. Kake eitu apa eikeni ile Lawi te nebo iltung'ana le Israel, anaa apa enaitanapa Olaitoriani Musa. Neijia apa eikuna iltung'ana le Israel. Ore te risioroto e ina pooki naitanapa Olaitoriani Musa, neiko ninche neijia aaun ilng'oborri too nkererin, oltung'ani ake to lmarei lenye te risiorotoe nkaji e papaai lenye. Kuna ninche iishoritin e Aron o Musa teina kata pee eirorie Olaitoriani Musa to ldoinyo le Sinai. Kuna ninche nkarn oo layiok le Aron: Nadab olkikau, o Abihu, o Eleasar o Itamar; kuna ninche nkarn oo layiok le Aron, lelo apolosak ootubukokoki eilata aaput, laa ninche etegelua pee eisiaisho anaa lapolosak. Kake ore Nadab o Abihu netuata te dukuya Olaitoriani ina kata apa pee eishoru olasar le nkima nemesinya te dukuya Olaitoriani ti ong'ata e Sinai; nemeeta apa ninche nkera. Neaku Eliesa o Itamar apa ooisiaishote anaa lapolosak te nkata e nkishui e Aron papaai lenye. Neitoki Olaitoriani ajoki Musa, “Toriku olosho le Lawi ntinyiku, nipik ninche dukuya Aron ilo apolosani, pee etum ninche aaisiaayia ninye. Nchoo ninche eitabaya enkisiaayiare te ninye o to lturrur pooki te dukuya ilo ng'obor le ntumo, anaa enaisiaisho ninche ti atua olng'obor le Nkai; nchoo ninche eitaisheiki imasaa pooki e ilo ng'obor le ntumo, nejing enkisiaayiare te nkaraki iltung'ana le Israel anaa te neisiaaisho ninche to lng'obor. Ninchooyo iyie ile Lawi aisho Aron o layiok lenyena; eishooki ninche ninye tukul ti atua iltung'ana le Israel. Nigelu iyie Aron o layiok lenyena, nejing ninche esiai enye e mpolosare; kake te nelotu likae tung'ani anyiku neari metua.” Neitoki Olaitoriani ajoki Musa, “Ng'ura, aitayu nanu ile Lawi aitung'uaa atua iltung'ana le Israel te rishata e pooki kikau too ltung'ana le Israel. Keaku ore ile Lawi naa ilaainei, amu ore ilkikaunot pooki naa ilaainei; ore apa ina olong natara nanu metuata ilkikaunot pooki te nkop e Misiri, aitisinyaka nanu kewan ilkikaunot pooki tiatua Israel aa olayioni le tung'ani o le eng'ues; keaku ninche ilaainei: Ara nanu Olaitoriani.” Neitoki Olaitoriani ajoki Musa ti ong'ata e Sinai, “Nkena ilayiok le Lawi, anaa too nkajijik oo loo menye o too lmareita; ore pooki lee lo lapa obo neilep nkenai.” Neaku eikena apa Musa ninche te risioroto o rorei lo Laitoriani, anaa enaitanapaki. Naa kulo apa ilayiok le Lawi anaa too nkarn enye: Gershon o Kohat o Merari. Naa kuna ninche nkarn oo layiok le Gershon too lmareita lenye: Libni o Shimei. Ore ilayiok le Kohat anaa too lmareita lenye naa: Amram, o Ishar, o Hebron o Usiel. Ore ilayiok le Merari anaa too lmareita lenye naa; Mahili o Mushi. Kulo ninche ilmareita loo lawi anaa too nkajijik oo loo menye. Ore apa ile Gershon naa olmarei le Libni o lmarei le Shimei; kulo apa ilmareita loo le Gershon. Ore esiana enye te risioroto e nkikena oo lewa pooki ebaiki olapa obo neilep naa nkalifuni naapishana o iip imiet. Ore ilmareita loo le Gershon neun ilng'oborri ti oriong olng'obor le Nkai te nkalo o loo ntoluo, te nebo Eliasaaf, olayioni le Lael aa ninye endukuya e nkaji oo loo menye too le Gershon. Ore apa enkitanapata oo layiok le Gershon te ilo ng'obor le ntumo, naa pee eing'or ilo ng'obor le Nkai, olng'obor kewan o enkimulumulata enye o enkikenet e kutuk aji e ilo ng'obor le ntumo o neeikishoreki to lgoriet, o enkikenet o lgoriet, ilo omanita olng'obor le Nkai o lperere lo lasar, o nkeenta enyena, o enkisiaayiare pooki naipirta kuna. Ore too le Kohat naa olmarei loo le Amram, olmarei loo le Ishart, o lmarei loo le Hebron, o lmarei loo le Usiel; kulo ninche ilmareita loo le Kohat. Ore esiana oo lewa pooki ebaiki olapa obo neilep naa nkalifuni isiet o iip ile, lelo ooisiaisho te wueji sinyati. Ore ilmareita loo layiok le Kohat neun ilng'oborri lenye te nkalo e kopikop o lng'obor le Nkai, te nebo Elisafan olayioni le Usiel, aa ninye endukuya te nkaji oo loo menye too lmareita loo le Kohat. Ore enaitanapaki ninche naa pee eing'or osanduku, o emesa, o iketa oo iltaai o lpereren loo lasarri nena masaa e wueji sinyati naa ninche eisiaishore ilapolosak, o lkarasha lo lodung'oro o enkisiaayiare pooki naipirta kuna baa. Ore Eliesa olayioni le Aron ilo apolosani neaku ninye olkitok loo larikok loo Lawi neitasheiki lelo aitasheikinok le wueji sinyati. Ore too ile Merari naa olmarei loo le Mahili o lmarei loo le Mushi: kulo ninche ilmareita le Merari. Ore esiana enye te risioroto e nkikena oo lewa ebaiki olapa obo neilep naa nkalifuni ile o iip are. Ore endukuya e nkaji oo loo menye lo lmarei le Merari naa Suriel olayioni le Abihail; neun ninche ilng'oborri lenye te nkalo e moikuape o lng'obor le Nkai. Ore esiaai nategeluaki aaitanap ilayiok le Merari naa irubat oo sunta e ilo ng'obor le Nkai, inkeek, o ng'apeta, o nkitotoneta oo ng'apeta o ntokitin naaidikidikore; enkisiaayiare pooki naipirta kuna baa; te nebo sii nena ng'apeta o lgoriet naamanaa, o nkitotoneta enye, o ncheito enye o nkeenta. Ore ilooun olng'obor lenye te dukuya olng'obor le Nkai te nkalo o loo saen, te dukuya ilo ng'obor le ntumo te nkalo e nkilepunoto e nkolong naa Musa o Aron o layiok lenyena, eitaisheiki mbaa pooki e seremare teine wueji sinyati o pooki naasi, te nkarakii ltung'ana le Israel; naa ore ake oltung'ani onyiku neari metua. Ore lelo pooki apa ooikenaki too le Lawi, laa ninche apa eikena Musa o Aron te nkitanapata o Laitoriani, anaa too lmareita, ore ilewa pooki ebaiki olapa obo neilep naa nkalifuni tikitam o are. Neitoki Olaitoriani ajoki Musa, “Nkena lewa kikaunot pooki loo ltung'ana le Israel, ebaiki olapa obo neilep, niya esiana enye anaa too nkarn. Nincho ile Lawi metaa ilaainei - Ara nanu Olaitoriani, te rishata oo lkikaunot pooki loo ltung'ana le Israel, nkishu oo le Lawi te rishata oo lkikaunot pooki loo nkishu oo ltung'ana le Israel.” Neaku eikena apa Musa ilkikaunot pooki ti atua iltung'ana le Israel, anaa enaitanapa Olaitoriani ninye. Neiken ilkikaunot pooki lewa, te risioroto e siana oo nkarn, ore ebaiki olapa obo neilep anaa enaikenaki naa nkalifuni tikitam oare o iip are o ntomoni naapishana o okuni. Neitoki Olaitoriani ajoki Musa, “Iwa ile Lawi te rishata oo lkikaunot pooki ti atua iltung'ana le Israel, o nkishu oo le Lawi te rishata oo nkishu enye; neaku Ilawi ilaainei: Ara nanu Olaitoriani. Ore te nkordunoto e lelo kikaunot iip are o ntomoni naapishana o kuni le lelo kikaunot loo ltung'ana le Israel, ootulusoitie aagiroo esiana oo le Lawi, ntayu shekeli imiet ake te pooki tungani, neitorisiokini shekeli e wueji sinyati; ina shekeli gera tikitam nincho nena pisai e lelo ootuluso esiana enye, oolootalakuaki, nincho Aron o layiok lenyena.” Neaku ewa apa Musa nena pisai oo ltung'ana ootuluso, ootalakutua ile Lawi ootalakuaki. Ore too lkikaunot loo ltung'ana le Israel neya iropiyiani, shekeli enkalifu nabo o iip uni o ntomoni ile o imiet, naaitorisiokoki shekeli e wueji sinyati; neisho Musa nena pisai e lakunoto Aron o layiok lenyena te risioroto ororei lo Laitoriani, anaa enaitanapa Olaitoriani Musa. Nejoki Olaitoriani Musa o Aron, “Nkena esiana oo layiok le Kohat, tirishu ti atua ilayiok le Lawi, anaa too lmareita lenye o too nkajijik oo loo menye, ebaiki ilarin tomoni uni o metabaiki ilarin onom, lelo pooki ooidim aatijing enkisiaayiare, pee easisho ti atua ilo ng'obor le ntumo. Ena ninye enkisiaayiare oo layiok le Kohat ti atua ilo ng'obor le ntumo: nena tokitin naasinya oleng. Te nedotuni ilng'oborri, nejing Aron o layiok lenyena atua olng'obor aaitayu olkarasha lo lodung'oro, neimulumul ilo sanduku le nchakenisho te ninye; neitoki aapik shumata ninye enkimulumulet endapana e nkine, neisalaashaki shumata ina kila pus alak, neitokini aapik nkeek enyena. Ore enchumata e ina mesa o e mukate e nkitoduaroto neisalaashaki ninche enkila pus, neiteleiki shumata ninye, isaanini, o masaa e nkorropil, o ngirran, onoosi te nkaraki ilo asar ooki; ore sii nena mukateni e anaake netii shumata ina mesa; neitoki aaisalaashaki shumata ninche enkarasha sintet, neitoki aaimulumulaki shumata endapana e nkine, nepik nkeek enyena. Neitoki ninche aaya enkarasha pus, neimulumul ina kitashet o ltaa te nkaraki ewang'an, te nebo iltaai lenyena, o lkinoketa o ngirran enye, o masaa pooki e ilata naapikieki: nepik ninche te nebo imasaa enyena pooki neimulumuli te ndapana e nkine nepiki ninye shumata nkeek enyena naanapieki. Ore shumata ilo perere lo lasar oitobiruno te sahabu neisalaashaki enkarasha pus, neimulumul shumata ninye te ndapana e nkine, neitokini aapik nkeek enyena; neitoki ninche aaya nena masaa pooki e nkisiayiare naasishoreki ti atua ine wueji sinyati; nepik ninche atua enkila pus, neitoki aaimulumul ninche te ndapana e nkine, neiteleiki ninche nkeek enyena naanapieki. Neitoki ninche aaitayu nkuruon to lperere lo lasar, neisalaashaki ninche enkarasha sintet; neiteleiki shumata ninye nena masaa pooki o lperere lo lasar, naa ninche easishoreki te nkisiayiare te ine, o motioo e nkima o njipeta, o lkurteta, o ngirran, nena masaa pooki o lperere lo lasar; neisalaashaki shumata ninche nena endapana e nkine, neisuroki nkeek enyena. Naa ore ake pee eidip Aron o layiok lenyena aaimulumula ine wueji sinyati o nena masaa pooki e wueji sinyati, ina kata edumuni ilng'oborri, neitoki ilayiok le Kohat aapuonu aanap kuna, kake meibung ninche nena tokitin sinyat, pee meye ake. Kuna ninche intokitin e ilo ng'obor le ntumo naa ninche enap ilayiok le Kohat. “Ore Eliesa olayioni le Aron ilo apolosani neitasheiki eilata oo ltaai, o enkorropil, ilo asar le ntapa li anaake, o ina ilata naputishoreki o enkitasheikinoto pooki eilo ng'obor le Nkai o nena pooki naatii atua, o ine wueji sinyati o masaa enyena.” Nejoki Olaitoriani Musa o Aron, “Mincho olosho loo lmareita le Kohat eimisieki aaiwuang'ie too le Lawi; kake entaasa ninche ena pee etum ninche aatopok nemeye te nepuonu aanyikaki nena tokitin naasinya aaisul: nchoo elo Aron o layiok lenyena atua olng'obor negelaki ake oltung'ani esiai enye o lola lenye, kake mejing ninche atua aapuo aaing'or nena tokitin naasinya hoo te nkata ninye nabo, pee meye ake.” Nejoki Olaitoriani Musa, “Nkena sii esiana oo layiok le Gershon, too lmareita lenye o too nkajijik oo loo menye; ebaiki larin tomoni uni o metabaiki ilarin onom, nkena ninche, lelo pooki ooidim aatijing enkisiaayiare, pee easisho ti atua ilo ng'obor le ntumo. Ena ninye enkisiaayiare oo lmareita loo le Gershon, te nkisiayare o te napata oo lolan: kenap ninche ilkarash lo lng'obor le Nkai, o lng'obor le ntumo te nebo enkimulumulet enye, o enkimulumulet e ndapana e nkine natii shumata ninye, o enkikenet e kutuk aji e ilo ng'obor le ntumo, o nkisiong'at o lgoriet, o enkikenet e ine nejing'ieki olgos lo lgoriet omanita ine wueji sinyati o lperere lo lasar, o nkeenta enyena, o masaa pooki e nkisiayiare; naa keas ninche nena pooki naaishiakinore ninche neas. Ore esiaai pooki oo layiok loo le Gershon naa Aron o layiok lenyena ooitasheiki te ina pooki napuo ninche aanap. Ena ninye enkisiaayiare oo lmareita loo layiok le Gershon ti atua ilo ng'obor le ntumo, ore esiaai enye naa keaku abori enkitasheikinoto e Itamar olayioni le Aron ilo apolosani. “Ore ti alo ilayiok le Merari nkena ninche anaa too lmareita lenye, o too nkajijik oo loo menye; ebaiki ilarin tomoni uni neilep o metabaiki ilarin onom. Nkena ninche pooki ng'ae ake ninye oidim enkisiaayiare, pee eas esiaai ti atua ilo ng'obor le ntumo. Naa ena apa eitanapaki ninche metaasa, anaa esiaai enye pooki ti atua ilo ng'obor le ntumo; nena rubat oo sunta o lng'obor le Nkai, te nebo nkeek enyena, ing'apeta o nkitotoneta, o ng'apeta e ilo goriet omanita te nebo nkitotoneta, o ncheito, o nkeenta te nebo imasaa enyena pooki o ntelon enyena pooki. Nioriki aipotoki nena masaa naaishiakino ninche nenap. Ena ninye enkisiaayiare oolmareita loo layiok le Merari, ninye enkisiaayiare enye nalulung'a ti atua ilo ng'obor le ntumo ti abori enkitasheikinoto e Itamar olayioni le Aron ilo apolosani.” Neitoki Musa o Aron o larikok lo lturrur aaiken ilayiok le Kohat, anaa too lmareita lenye o too nkajijik oo loo menye, ebaiki ilarin tomoni uni, pooki ng'ae ake ninye oidima enkisiaayiare, pee eas esiaai ti atua ilo ng'obor le ntumo. Ore esiana enye anaa too lmareita lenye naa nkalifuni are o iip naapishana o onom. Ena apa ninye esiana oo lmareita loo le Kohat, lelo pooki ooisiaisho ti atua ilo ng'obor le ntumo, laa ninche eikena Musa o Aron te risioroto e nkitanapata naitanapa Olaitoriani Musa. Ore esiana oo layiok le Gershon, anaa too lmareita lenye, o too nkajijik oo loo menye, ebaiki ilarin tomoni uni o metabaiki ilarin onom, pooki ng'ae oidim atijing'a enkisiaayiare aisiaaisho ti atua ilo ng'obor le ntumo. Ore esiana enye anaa too lmareita lenye o too nkajijik oo loo menye naa nkalifuni are o iip ile o tomoni uni. Ena ninye esiana oo lmareita loo layiok le Gershon, lelo pooki apa ooisiaisho ti atua ilo ng'obor le ntumo, laa ninche eikena Musa o Aron te risioroto e nkitanapata o Laitoriani. Ore esiana oo lmareita loo layiok le Merari, anaa too lmareita lenye o too nkajijik oo loo menye, ebaiki ilarin tomoni uni o metabaiki ilarin onom, pooki ng'ae ake ninye oidim atijing'a enkisiaayiare, pee eas esiai ti atua ilo ng'obor le ntumo ore esiana enye anaa too lmareita naa nkalifuni uni o iip are. Kulo ninche lelo apa ooikenaki too lmareita loo layiok le Merari, ooikena Musa o Aron te risioroto e nkitanapata naitanapa Olaitoriani Musa. Ore lelo pooki ooikenaki too le Lawi, laa ninche eikena Musa o Aron o Larikok le Israel, anaa too lmareita lenye o too nkajijik oo loo menye, ebaiki ilarin tomoni uni neilep ometabaiki ilarin onom, pooki ng'ae ake ninye oidim atijing'a enkisiaayiare neasisho anap ilolan ti atua ilo ng'obor le ntumo, ore lelo lenye ooikenaki naa nkalifuni isiet o iip imiet o ntomoni isiet. Ore te risioroto e nkitanapata o Laitoriani naimua Musa negeluni ninche, oltung'ani ake te siaai enye e nkisiayiare aashu te napare; kaae neiken ninye ninche aiko neijia, anaa enaitanapa Olaitoriani Musa. Nejoki Olaitoriani Musa, “Ntanapa iltung'ana le Israel pee eipang'unye ti atua ilng'oborri pooki ng'ae ake ninye oata enkeeya oolbolot, o pooki ng'ae oata olbae loo nkimek, o pooki ng'ae lemesinya oiseyie oltung'ani otua; impang'ie pokira, olee o eng'oruoi. Tipika ninche auluo ilng'oborri, pee meisarkionie ilng'oborri lenye, laa empolos enye ninye emanyisho ai.” Neas ina iltung'ana le Israel, neipang'ie ninche too lng'oborri meshomo auluo; ore anaa enatiaka Olaitoriani Musa, ina etaasa iltung'ana le Israel. Neitoki Olaitoriani ajoki Musa, “Tiaki iltung'ana le Israel Te neas olee aashu enkitok pooki engoki ake ninye naas iltung'ana aagil enkirukoto to Laitoriani, neaku ilo tung'ani olarruoni nelimu ninye aibalunye ina ngoki nataasa, neitobir ninye elaata nalulung'a te ina kitarruoroto enye, aponaa erubata e imiet te ina, neisho ilo laa ninye einyala. Kake te nemeeta oltung'ani iltung'ana lenye ooidimi aatalaaki teina kitarruoroto, ore ina laakinoto neaku eno Laitoriani te nkaraki olapolosani neponikini ilo ker lo lningo lo sotua laa ninye eitobirakinyeki ninye olning'o lo sotua. Ore nkishorot pooki, o ntokitin pooki naasinya oo ltung'ana le Israel, nena naayaki ninche ilo apolosani neaku inenyena; o ntokitin naasinya e pooki tung'ani ake ninye neaku inolapolosani; ore pooki toki naba anaa enaisho oltung'ani olapolosani neaku eneye.” Neitoki Olaitoriani ajoki Musa, “Tiaki iltung'ana le Israel te nelo nepong'ori enkitok e likae moruo ake ninye, neas emarmalisho ti alo ninye, te nelo neboitare olee ninye, neisudori ina bae too nkonyek o lmoruo lenye, neaku mejurrunoyu hoo neinosie kewan olduruk, nemeetae olchakeni oishakenoki ninye, amu eitu eibung'akini ina bae; naa te nelotu oltau lo lom shumata ninye, netum olom ti alo ina kitok enye natipika kewan olduruk; aashu te nelotu oltau lo lom shumata ninye, netum ninye olom ti alo ina kitok enye hoo neitu ninye enosie kewan olduruk. Nchoo naa eriku ilo lee ina kitok enye enetii olapolosani, neyau enkishoroto naipirta ina kitok, erubata e tomon e efa e ntapa napuyiapui; nemebukoki ninye eilata shumata ina tapa nemepik enkorropil, amu olasar le ntapa lo lom ilo. Olasar le ntapa le ndamunoto, odamunyeki entorroni. “Neyau olapolosani ina kitok aitinyiku, nepik ninye dukuya Olaitoriani, neitoki olapolosani ayau enkare nasinya te moti oo nkulupuok, neya enkiti terit to ltiren le ina aji e Nkai nepik atua ina are. Nepik ilo apolosani ina kitok dukuya Olaitoriani, nelak ilpapit le ndukuya enye, nepik nkaik enyena ina tapa o lasar le ndamunoto, aa ninye o lasar le ntapa lo lom. Ore te nkaina enye neibung olapolosani ina are e nduaran naa ninye nayau oldeket. Neinosie taa olapolosani ina kitok olmumai, ejo, ‘Te nemeetae olee litaboitare, naa te neitu iyie imbelekenya aibelekenyakino olduruk, eton itii abori enkitoria o lmoruo lino, talakunoyu iyie tena are nadua nayau oldeket. Kake ti nitapong'ori iyie hoo nitii abori enkitoria o lmoruo lino, naa ti ninosie kewan olduruk neaku kitaboitare likae lee leme olmoruo lino,’ (nchoo naa olapolosani einosie ina kitok olmumai lo ldeket, nejoki ina kitok), ‘Kintaa iyie o Laitoriani oldeket o lmumai ti atua iltung'ana linono, ti nikincho Olaitoriani meibibiari enkupes ino neiteijia osesen lino; metaa ore ena are nayau enduaran, nchoo elo atua enkoshoke ino, neiteijia osesen lino neibibiaa enkupes ino.’ Nejo ina kitok, ‘Esai, Esai.’ “Neitoki olapolosani aiger kulo deketa ti atua embuku, nejut ninche te ina are e nduaran, neitook ninye ina kitok ina are e nduaran nayau oldeket ore ina are nayau oldeket nelo atua ninye nepik ninye emion kitok. Neitoki olapolosani aya ilo asar le ntapa otii enkaina e ina kitok, neyuk ilo asar le ntapa te dukuya Olaitoriani neitoki ayau enchumata o lperere lo lasar. Neitoki olapolosani aya emborei e nkaina e ilo asar le ntapa anaa erubata enye nadamuni, nepej ninye te nchumata o lperere lo lasar; ore te siadi neitoki aitook ina kitok enkare. Ore ake pee eidip aitooko ina kitok enkare, te nelo ninye neaku einosie kewan olduruk neas emarmalisho ti alo olmoruo lenye, ore ina are nayau oldeket nejing atua ninye nepik emion kitok, nejeyu osesen lenye neibibiari enkupes enye, neaku ina kitok oldeket ti atua iltung'ana lenyena. Kake te neitu einosie ina kitok kewan olduruk metaa meeta ninye entioto, nelakunoyu ninye naa keiu nkera. “Ena ninye enkitanapata too mbaa naatii olom, te nelo enkitok natii abori enkitoria o lmoruo lenye aimalimal neinosie kewan olduruk. Aashu te nelotu oltau lo lom shumata oltung'ani netum ninye olom ti alo enkitok enye; nepik ninye ina kitok dukuya Olaitoriani, nedungoki olapolosani enkiguana tena kitanapata pooki. Nchoo olee eton meeta entioto kake ore enkitok keitalaki entorroni enye.” Neitoki Olaitoriani ajoki Musa, “Tiaki iltung'ana le Israel, te nelo nenya oltung'ani olmumai, olee aashu enkitok, te dukuya Olaitoriani, pee eaku osinyati to Laitoriani, neiteng'elaki kewan o Laitoriani, nchoo eiteng'el kewan te naisho oo sabibu o te naisho napi, meok ninye ae toki naironyuaki too sabibu aashu enaisho napi; nemeinos isabibu ooshal aashu ilootoito. Ore te nena nkolong'i pooki e nkiteng'elata enye nemeinos ninye ae toki naitobiruaki too sabibu o metabaiki ninye ilanterera lenyena aashu nkabobok enyena. “Ore nkolong'i pooki e ilo mumai lenye le nkiteng'elata meiseyie olmurunya endukuya enye; o metaba anaa neishunye ina kata apa naiteng'elaka ninye kewan Olaitoriani. Keaku ninye sinyati; keisho ninye iyenat oo lpapit lenyena metoodorito. “Ore te nena olong'i pooki naaiteng'elaki ninye kewan Olaitoriani nemenyikaki olmeneng'ani. Aa olayioni le menye aashu olayioni le ng'otonye, aashu olo lalashe aashu enkanashe, te neye ninche. Kepik ninye kewan eleyiata; enkaraki natii enkiteng'elata naiteng'elaka kewan Olaitoriani shumata endukuya enye. Ore too nkolong'i pooki naaiteng'elaka ninye kewan Olaitoriani naa kesinya ninye to Laitoriani. “Naa te neye oltung'ani nabo kata etashare ninye, nepik eleyiata ina dukuya enye naiteng'elakaki Olaitoriani, nelo ninye abarn endukuya enye te nkolong e nkitukuo; te nkolong e naapishana elo ninye abarn. Ore te nkolong e isiet, neyau ninye nturkuluoni are aashu ntaritik are ayaki olapolosani te kutuk aji e ilo ng'obor le ntumo, nepolos olapolosani nabo te nkaraki olasar loo ngok, nepolos enkae te nkaraki olasar opejori, neitobir olning'o lo sotua te nkaraki ninye, enkaraki nataasa ninye engoki aiseyie ilo meneng'ani. Neitisiny ninye endukuya enye ina olong ake, neitengelaki kewan Olaitoriani too nkolong'i enyena e nkiteng'elata, neyau olkuo le ker sitima lo lari obo te nkaraki olasar le nkitarruoroto; kake ore enaduoo kata e dukuya neaku pesho, amu ore enkiteng'elata enye neidurukieki. “Naa ena enkitanapata e ilo lo lmumai, te nelulung'ayu enkata enye e nkiteng'elata: neyauni ninye kutuk aji e ilo ng'obor le ntumo. Neitarasaki ninye enkishoroto enye Olaitoriani, olkuo obo le ker sitima lemeeta entioto te nkaraki olasar opejori, o esupen nabo e ker o lari obo nemeeta entioto naaku olasar loo ngok, o lmeregesh obo lemeeta entioto oaku olasar le seriani, o enkikapu oo mukateni neitu eisuijieki, o mukateni e ntapa napuyiapui naipurjaki te ilata, o mukateni naapejo naaelieki eilata, o lasar lenye le ntapa o lasar lenye ooki. Neitarasaa olapolosani ninche te dukuya Olaitoriani, neitayu olasar lenye le ngoki o lasar lenye opejori. Neitayu ninye olmeregesh metaa olasar le seriani to Laitoriani, tenebo enkikapu oo mukateni neitu eisuijieki, neyau sii olapolosani olasar le ntapa o lasar ooki. Ore ilo lo lmumai nebarn ina dukuya enye naitisinyaki te kutuk aji e ilo ng'obor le ntumo, neya ninye lelo papit le ndukuya enye naitisinyaki nelo apik enkima ti abori ilo asar le seriani. Neitayu olapolosani orony le ilo meregesh eidipaki aaitokitokie, neitayu emukate nabo neitu eisuishieki ti atua enkikapu o emukate nabo napejo neitu eisuishieki nepik ninche aiteleiki nkaik e ilo lo lmumai. Ore ake pee eidip ninye atabarnoi ilpapit le nkitisinyata enye, neyuk olapolosani ninche metaa olasar oyuki te dukuya Olaitoriani, neaku kuna daiki erubata nasinya to lapolosani te nebo oloikulu oyoki o ina muro naishoruaki; ore te siadi ina neidim ilo lo lmumai atooko enaisho oo sabibu. “Ena ninye enkitanapata eilo oinos olmumai. Ore olasar lenye oishori Olaitoriani neitorisiokini olmumai lenye anaa oloinos olmumai te nebo pooki toki ake ninye naba anaa enaata ninye te risioroto e ilo mumai oinos ninye, neiko ninye nejia te risioroto e nkitanapata e nkiteng'elata enye olmumai eitisinyaki kewan Olaitoriani.” Nejoki Olaitoriani Musa, “Tiaki Aron o layiok lenyena, Nji enkuna ti nimayianana iltung'ana le Israel entejo, Mikitamayiana Olaitoriani nikigolie: Mikintawang'aki Olaitoriani enkomom enye, niking'urrie: Mikinchoo Olaitoriani omom, nikincho seriani. “Naa nchoo ninche metipika enkarna ai shumata lelo tung'ana le Israel pee amayian nanu ninche.” Ore apa te ina olong pee eidip Musa atuuno olng'obor le Nkai, nebukoki eilata neitisiny ninye te nebo imasaa enyena nebukoki eilata neitisiny olperere lo lasar, te nebo imasaa pooki, ore larikok le Israel, ilukuny oo nkajijik oo loo menye ilarikok loo loshon otii shumata lelo apa ooikenaki, neishoru neyau nkishorot enye dukuya Olaitoriani, ngarrin ile naaimulumula, o lmong'i tomon o are, ore ake engarri netii larikok oare ore ake olarikoni neeta olkiteng, nepolos ninche te dukuya ilo ng'obor le Nkai. Neitoki Olaitoriani ajoki Musa, “Tang'amai kuna naaing'uaa ninche, pee etumi aataasishore ninche, pee etumi aataasishore ninche te nkisiayiare e ilo ng'obor le ntumo, nincho ninche lelo le Lawi, oltung'ani ake te risioroto e nkisiayiare enye.” Neaku etang'amayie apa Musa nena garrin o lelo mong'i neisho ninye ile Lawi. Ore ngarrin are o lmong'i oong'uan neisho ilayiok le Gershon te risioroto e nkisiayiare enye. Ore ngarrin ong'uan o lmong'i isiet neisho ilayiok le Merari, te risioroto e nkisiayiare enye erikoo Itamar olayioni le Aron ilo apolosani. Kake ore too layiok le Kohat neitu eishori ninche toki, enkaraki naitanapaki apa ninche meing'ura nena tokitin naasinya naanapi too loilila. Ore larikok neishooyo lasarri te nkaraki enkitisinyata o lperere lo lasar te ina olong apa natubukokoki eilata aaitisiny, neishooyo lelo arikok ilasarri lenye te dukuya olperere lo lasar. Nejoki Olaitoriani Musa, “Keishori ninche ilasarri lenye, olarikoni ake te nkolong enye, te nkaraki enkitisinyata o lperere lo lasar.” Ore apa ilo otang'asa aitayu olasar lenye te nkolon e dukuya naa Nashon olayioni le Aminadab, lo losho le Yuda; ore olasar lenye naa esaani e nkosholai naa shekeli iip nabo o tomoni uni enkiroishi enye, o engirra nabo e nkosholai e shekeli ntomoni naapishana te risioroto e shekeli e nkaji e Nkai, ebore pokira are entapa napuyiapui naipurjaki te ilata aaitaa olasar le ntapa; o enkijiko nabo e sahabu e shekeli tomon nabore enkorropil, o loing'oni obo oti, o lmeregesh obo, o lkuo obo le ker sitima le ker lo lari obo te nkaraki olasar opejori; olkine obo oaku olasar loo ngok. Naa ore to lasar loo nkishorot le seriani, naa ilmong'i oare, o lmeregeshi imiet, o lkineji imiet o lkerra imiet lo lari obo. Ele apa olasar le Nashon olayioni le Aminadab. Ore te nkolong e are neitayu olasar Natanel olayioni le Suar, ilo arikoni le Isaakar; neitayu ninye to lasar lenye e saani nabo e nkosholai naa ore enkiroishi enye naa shekeli iip o tomoni uni, o engirra nabo e nkosholai e shekeli ntomoni naapishana, te risioroto e shekeli e nkaji e Nkai, nebore pokira entapa napuyiapui naipurja te ilata pee eaku olasar le ntapa. O enkijiko nabo e sahabu e shekeli nabore enkorropil; o loing'oni obo oti, o lmeregesh obo, o lker obo lo lari obo oaku olasar opejori; olkine obo oaku olasar loo ngok; ore to lasar le seriani naa ilmong'i oare, o lmeregeshi imiet, o lkineji imiet, o sitiman le kerra imiet lo lari obo. Ele ninye olasar le Natanel olayioni le Suar. Ore te nkolong e uni naa Eliabu olayioni le Helon, ilo arikoni loo ltung'ana le Sebulon: ore olasar lenye naa esaani nabo e nkosholai, naa shekeli iip nabo o tomoni uni e nkosholai, naa ore enkiroishi enye naa shekeli iip nabo o tomoni uni, o eng'irra nabo e nkosholai e shekeli ntomoni naapishana, te risioroto e shekeli e nkaji e Nkai nebore pokira are entapa napuyiapui naipurjaki te ilata metaa olasar le ntapa; o enkijiko nabo e sahabu e shekeli tomon nabore enkorropil; o loing'oni obo oti, o lmeregesh obo, ositima le ker lo lari obo, oaku olasar opejori, o sitima obo le kine oaku olasar le ngoki, naa ore to lasar le seriani naa ilmong'i oare, o lmeregeshi imiet, isitiman imiet le kineji o sitiman imiet le kerra lo lari obo. Ele apa ninye olasar le Eliab olayioni le Helon. Ore te nkolong e ong'uan naa Elisuri olayioni le Shedeur, olarikoni loo ltung'ana le Ruben. Ore olasar lenye naa esaani nabo enkosholai naa ore enkiroishi enye naa shekeli iip nabo o tomoni uni, o eng'irra nabo e nkosholai e shekeli ntomoni naapishana, te risioroto e shekeli e nkaji e Nkai nebore pokira entapa napuyiapui naipurjaki te ilata pee eaku olasar le ntapa; o enkijiko e sahabu e shekeli tomon, nabore nkorropil; o loti oing'oni obo, o lmeregesh obo, o sitima le ker lo lari obo oaku olasar opejori; o sitima obo le kine oaku olasar le ng'oki; ore to lasar le seriani, naa ilmong'i oare, o lmeregeshi imiet, o sitiman imiet le kineji, o sitiman imiet le kerra lo lari obo. Ele ninye olasar le Elisuri olayioni le Shedeur. Ore te nkolong e imiet naa Shelumiel olayioni le Surishadai, olarikoni loo ltung'ana le Simeon: ore olasar lenye naa esaani nabo enkosholai, naa ore enkiroishi enye naa shekeli iip nabo o tomoni uni, o eng'irra nabo e nkosholai e shekeli ntomoni naapishana, te risioroto e shekeli e nkaji e Nkai, nebore pokira are entapa napuyiapui naipurjaki te ilata pee eaku olasar le ntapa; o enkijiko nabo e sahabu e shekeli tomon, nabore enkorropil, o loti oing'oni obo, o lmeregesh obo, o sitima obo le ker lo lari obo te nkaraki olasar opejori; o sitima obo le kine te nkaraki olasar le ngoki; ore to lasar le seriani naa ilmong'i oare, o lmeregeshi imiet, o sitiman le kineji imiet, o sitiman imiet le kerra lo lari obo. Ele apa ninye olasar le Shelumiel olayioni le Surishadai. Ore te nkolong e ile naa Eliasaf olayioni le Deuel olarikoni loo ltung'ana le Gad: ore olasar lenye naa esaani nabo e nkosholai, ore enkiroishi enye naa shekeli iip nabo o tomoni uni, o engirra nabo e nkosholai e shekeli ntomoni naapishana, te risioroto e shekeli e nkaji e Nkai, nebore pokira entapa napuyiapui naipurjaki te ilata pee eaku olasar le ntapa; o enkijiko nabo e sahabu e shekeli tomon nabore enkorropil; o loti oing'oni obo o lmeregesh obo, o sitima obo le ker lo lari obo oaku olasar opejori; o sitima obo le kine oaku olasar le ngoki; ore olasar le seriani naa ilmong'i oare, o lmeregeshi imiet, o sitiman imiet le kineji, o sitiman imiet le kerra lo lari obo. Ele apa ninye olasar le Eliasaf olayioni le Deuel. Ore te nkolong e naapishana naa Elishama olayioni le Amihud ninye olarikoni loo ltung'ana le Efraim: ore olasar lenye naa esaani nabo e nkosholai naa ore enkiroishi enye naa shekeli iip nabo o tomoni uni; o eng'irra nabo e nkosholai e shekeli ntomoni naapishana, te risioroto e shekeli e nkaji e Nkai, nebore pokira are entapa napuyiapui naipurjaki te ilata pee eaku olasar le ntapa; o enkijiko nabo e sahabu e shekeli tomon nabore enkorropil; o loti oing'oni obo, o lmeregesh obo, o sitima obo le ker lo lari obo oaku olasar opejori; o sitima obo le kine oaku olasar le ngoki; ore olasar le seriani naa ilmong'i oare, o lmeregeshi imiet, o sitiman imiet le kineji, o sitiman imiet le kerra lo lari obo. Ele apa ninye olasar le Elishama olayioni le Amihud. Ore te nkolong e isiet naa Gamaliel olayioni le Pedasur, ninye olarikoni loo ltung'ana le Manase: ore olasar lenye naa esaani nabo e nkosholai, naa ore enkiroishi enye naa shekeli iip nabo o tomoni uni, o eng'irra nabo e shekeli ntomoni naapishana, te risioroto e shekeli e nkaji e Nkai, nebore pokira entapa napuyiapui naipurjaki te ilata pee eaku olasar le ntapa; o enkijiko nabo e sahabu e shekeli tomon, nabore enkorropil; o loti oing'oni obo, o lmeregesh obo, o sitima obo le ker lo lari obo, oaku olasar opejori; o sitima obo le kine oaku olasar le ngoki; ore olasar le seriani naa, ilmong'i oare, o lmeregeshi imiet, o sitiman imiet le kineji, o sitiman imiet le kerra lo lari obo. Ele apa ninye olasar le Gamaliel olayioni le Pedasur. Ore te nkolong e naaudo naa Abidan olayioni le Gideon olarikoni loo ltung'ana le Benchamen: ore olasar lenye naa esaani e nkosholai naa ore enkiroishi enye naa shekeli ntomoni naapishana, te risioroto e shekeli e nkaji e Nkai, nebore pokira entapa napuyiapui naipurjaki te ilata pee eaku olasar le ntapa; o enkijiko nabo e sahabu e shekeli tomon nabore enkorropil; o loti oing'oni obo, o lmeregesh obo, o sitima obo le ker lo lari obo, oaku olasar opejori; o sitima obo le kine oaku olasar le ngoki; ore olasar le seriani naa ilmong'i oare, o lmeregeshi imiet, o sitiman imiet le kineji, o sitiman imiet le kerra lo lari obo. Ele apa ninye olasar le Abidan olayioni le Gideon. Ore te nkolong e tomon naa Ahieser olayioni le Amishadai ninye olarikoni loo ltung'ana le Dan: ore olasar lenye, naa esaani nabo e nkosholai, naa ore enkiroishi enye naa shekeli iip o tomoni uni, o eng'irra e nkosholai e shekeli ntomoni naapishana, te risioroto e shekeli e nkaji e Nkai, nebore pokira entapa napuyiapui naipurja te ilata pee eaku olasar le ntapa; o enkijiko nabo e sahabu e shekeli tomon nabore enkorropil, o loti oing'oni obo, o lmeregesh obo, o sitima obo le ker lo lari obo, oaku olasar opejori, o sitima obo le kine oaku olasar loo ngok, ore olasar le seriani naa ilmong'i oare, o lmeregeshi imiet, o lkineji imiet le kerra lo lari obo. Ele apa ninye olasar le Ahieser olayioni le Amishadai. Ore te nkolong e tomon o obo naa Pagiel olayioni le Okran, ninye olarikoni loo ltung'ana le Asheri: ore olasar lenye naa esaani nabo e nkosholai, naa ore enkiroishi enye naa shekeli ntomoni naapishana te risioroto e shekeli e nkaji e Nkai, nebore pokira are entapa napuyiapui naipurjaki te ilata pee eaku olasar le ntapa; o enkijiko nabo e sahabu e shekeli tomon nabore enkorropil; o loti oing'oni obo, o lmeregesh obo, o sitima obo le ker lo lari obo, oaku olasar opejori; o sitima obo le kine oaku olasar le ngoki; ore olasar le seriani naa ilmong'i oare, o lmeregeshi imiet, o sitiman imiet le kineji, o sitiman imiet le kerra lo lari obo. Ele apa ninye olasar le Pagiel olayioni le Okran. Ore te nkolong e tomon o are naa Ahira olayioni le Enan, ninye olarikoni loo ltung'ana le Naftali: ore olasar lenye naa esaani nabo e nkosholai, naa ore enkiroishi enye naa shekeli iip o tomoni uni, o eng'irra nabo e nkosholai e shekeli ntomoni naapishana, te risioroto e shekeli e nkaji e Nkai, nebore pokira are entapa napuyiapui naipurja te ilata pee eaku olasar le ntapa; o enkijiko nabo e sahabu e shekeli tomon nabore enkorropil; o loti oing'oni obo, o lmeregesh obo, o sitima obo le ker lo lari obo oaku olasar opejori, o sitima obo le kine oaku olasar loo ngok; ore olasar le seriani naa, ilmong'i, oare, o lmeregeshi imiet, o sitiman imiet le kineji o sitiman imiet le kerra lo lari obo. Ele apa ninye olasar le Ahira olayioni le Enan. Ele apa olasar le nkitisinyata te nkaraki olperere lo lasar, te ina olong apa natubukokoki eilata aaitisiny, oing'uaa ilarikok le Israel: isaanini tomon o are e nkosholai, o ngirran tomon o are e nkosholai, o nkijikoni tomon o are e sahabu, ore ake esaani e nkosholai nabo te ninche naa shekeli ntomoni naapishana, ore enkosholai pooki e kuna masaa naa shekeli nkalifuni are o iip ong'uan te risioroto e shekeli e nkaji e Nkai, ore nena kijikoni tomon o are e sahabu naabore enkorropil, eeta ake nabo enkiroishi e shekeli tomon, te risioroto e shekeli e nkaji e Nkai ore sahabu pooki e nena kijikoni naa shekeli iip o tikitam. Ore nkishu pooki o lasar opejori naa iloingok tomon o are, o lmeregeshi tomon oare, o sitiman tomon o are le kerra lo lari obo te nebo olasar lenye le ntapa; o sitiman tomon o are le kineji lo lasar le ngoki. Ore nkishu pooki o lasar le seriani naa iloingok tikitam o ng'uan, o lmeregeshi ntomoni ile, o sitiman le kineji ntomoni ile, ore sitiman le kerra lo lari obo naa ntomoni ile. Ele apa ninye olasar le nkitisinyata lo lperere lo lasar eidipaki aatubukoki eilata aaitisinya. Ore apa pee elo Musa atua ilo ng'obor le ntumo airorie Olaitoriani, nening ninye oltoilo eirorie ninye eing'uaa shumata ilo orika lo lng'ur apa otii shumata osanduku le nchakenisho, eimu erishata e lelo kerubi pokira oare; neirorie ninye. Neitoki apa Olaitoriani ajoki Musa, “Tiaki Aron, ti nindip atipika iltaai nkitasheta, ore lelo taai oopishana neitawang'isho te dukuya ina kitashet oo ltaai.” Neiko neijia Aron; nepik ninye iltaai lenyena meitawang'a dukuya ina kitashet oo ltaai, anaa enaitanapa Olaitoriani Musa. Naa ena apa enkitobirunoto e ilo iket lo ltaa, naa sahabu naidongoki ebaiki entonata enye o metabaiki ntapuka enyena esiaai e nkidong'ore, te risioroto e ilo rrekie otuutaka Olaitoriani Musa. Neaku eitobirua ninye ilo iket. Neitoki Olaitoriani ajoki Musa, “Toriko ile Lawi intung'uai iltung'ana le Israel, nintuku ninche. Naa neijia nkuna ninche, ntukuo ninche, isuaaki ninche enkare enkitisinyata, nebarn ninche iseseni lenye, neituku nkilani enye, neitisiny ate. Nchoo ninche eya oloti oing'oni o lasar lenye le ntapa napuyiapui naipurjaki te ilata, nintoki aya likae oti oing'oni oaku olasar le ngoki. Niyau iyie lelo le Lawi meetu dukuya ilo ng'obor le ntumo, ninturrur ina umata pooki oo ltung'ana le Israel. Ore ake pee iyau lelo le Lawi dukuya Olaitoriani, ore iltung'ana le Israel, neiteleiki nkaik enye lelo le Lawi. Neishooyo Aron ile Lawi te dukuya Olaitoriani pee eaku olasar oyuki oing'uaa iltung'ana le Israel pee eaku enenye enkisiaayiare o Laitoriani. Neitoki lelo Lawi aaiteleiki nkaik enye ilukuny e lelo oing'ok; nipolos iyie obo pee eaku olasar le ngoki ore olikae neaku olasar opejori oishori Olaitoriani, pee eitobir osotua lo lning lo Laitoriani too le Lawi. Nchoo iyie ile Lawi meetu abori Aron o layiok lenyena, pee eishooyo ninche anaa olasar oyuki to Laitoriani. “Neijia nkuna nteng'ela ile Lawi ntung'uai atua iltung'ana le Israel, neaku ile Lawi ilaainei. Ore te siadi ine nepuo ile Lawi atua aaisiaisho ti atua ilo ng'obor le ntumo, te nindip iyie aitukuo ninche ninchooyo ninche anaa olasar oyuki. Amu aaishooki nanu ninche tukul iltung'ana le Israel; te rishata oo lkikaunot pooki le Israel, ore ilkikaunot pooki loo ltung'ana le Israel aawa nanu makewan ninche. Amu ore ilkikaunot pooki loo ltung'ana le Israel naa laainei, o lo ltung'ani o le ng'ues; ore apa teina olong nataara nanu metuata ilkikaunot pooki te nkop e Misiri aitisinyaka nanu ninche kewan, naawa nanu ile Lawi te rishata oo lkikaunot pooki ti atua iltung'ana le Israel. Naishooyie nanu ile Lawi anaa enkishoroto aisho Aron o layiok lenyena, aitung'uaa iltung'ana le Israel, pee eas enkisiaayiare te nkaraki iltung'ana le Israel ti atua ilo ng'obor le ntumo, neitobir osotua lo lningo te nkaraki iltung'ana le Israel, pee mejing ake olmeitai atua iltung'ana le Israel te nelo nenyikaki iltung'ana le Israel enkaji e Nkai.” Ina apa eitaasa Musa o Aron o lturrur pooki loo ltung'ana le Israel ile Lawi; ore te risioroto e ina pooki naitanapa Olaitoriani Musa too naaipirta ile Lawi neitaas ninche iltung'ana le Israel ina. Neitisiny ile Lawi ate aalam ingok, neituku nkilani enye; neishooyo Aron ninche anaa olasar oyuki te dukuya Olaitoriani, neitobir Aron osotua lo lningo te nkaraki ninche eituku ninche. Ore te siadi ina nepuo ile Lawi atua aas enkisiaayiare enye ti atua ilo ng'obor le ntumo, aasisho ti abori Aron o layiok lenyena. Ore anaa enaitanapa Olaitoriani Musa too naaipirta ile Lawi ina ninye eitaasa ninche. Neitoki Olaitoriani ajoki Musa, “Kuna baa naaishiakino too le Lawi: ore ebaiki ilarin tikitam o imiet neilep kepuo ninche aas enkisiaayiare ti atua ilo ng'obor le ntumo; naa ore ebaiki ilarin onom neing'uaa ninche enkisiaayiare nemeitoki aaisiaaisho, kake keisiaai ilalashera lenye tiatua olng'obor le ntumo, neibung iutarot, kake meisiaaisho ninche. Nji iyie ilo aaitaas ile Lawi arishaki isiaaitin enye. Neirorie Olaitoriani Musa tiong'ata e Sinai, to lapa le dukuya lo lari liare eidipa aatupuku te nkop e Misiri, ejo, tejo “Nchoo iltung'ana le Israel eibung Pasaka te rishata enye nategeluaki. Ore te nkolong e tomon oo ng'uan ele apa, teipa, nimbung'ubung'u te nkata enye nategeluaki te risioroto oo nkikoot pooki, o nkiguanat pooki ipuopuo intae aaibung.” Neaku etiaka Musa iltung'ana le Israel pee eibung pasaka. Neibung ninche pasaka to lapa le dukuya, te nkolong e tomon oo ng'uan o lapa, teipa, tiongota e Sinai; te risioroto e nena pooki naaitanapa Olaitoriani Musa, neas iltung'ana le Israel ina. Netii apa ilkuti tung'ana lemesinya ooiseyie osesen lo ltung'ani otua, neaku meidim ninche aaibung'a sabato teina olong; nepuonu ninche dukuya Musa o Aron teina olong. Nejoki lelo tung'ana ninche, “Kira iyiook ilo oiduruk amu kiseyie osesen lo ltung'ani otua; kainyoo pee etekepayioki iyiook eitu kinchooyo olasar lo Laitoriani te nkata nategeluaki tiatua iltung'ana le Israel?” Nejoki Musa ninche, “Entasho, pee atum atoning'o enaitanapisho Olaitoriani tialo intae.” Nejoki Olaitoriani Musa, Tiaaki iltung'ana le Israel, “Teneiduruk ake ninye oltung'ani tiatua intae, anaa olayioni le ishoi inyi, eiseyie oltung'ani otua, ana elakua te lototo enye apa nashomo, naa keibung ake pasaka. Ore to lapa liare, te nkolong e tomon oo ng'uan naa keibung; keinos ninche tenebo imukateni neitu eisuishieki, o mbenek naadua. Nemeleku ninche toki o mekenyu, nemegil oloito lenye; te risioroto oo nkikoot pooki e pasaka eibung ninche. Kake ore ilo tung'ani oiduruk nemetii elototo, kake nekepari aany eibung pasaka, ore ilo tung'ani neiwuang'ieki too ltung'ana lenyena amu eitu eishoru olasar lo Laitoriani te rishata enye nageluno; nenap ilo tung'ani engoki enye. Naa tenelotu oltung'ani omoni amanyisho tiatua intae, neibung pasaka to Laitoriani, te risioroto oo nkikoot e pasaka, nea naa ninye ina. Enkikoo nabo intae ipupuo aata, to lomoni o to inoti.” Ore apa ina olong natuunoki olng'obor le Nkai, neimulumul enkatampoi ilo ng'obor le Nkai, ilo ng'obor le nchakenisho; ore teipa netii ina atampoi shumata ilo ng'obor nelioo eikununo anaa enkima o mekenyu. Netiu neijia anaake, neimulumul enkatampoi ilo ng'obor dama, o elioto e nkima te nkewarie. Naa ore ake te neiwuang'ieki ina atampoi te nchumata e ilo ng'obor, ore te siadi ina nedumunye iltung'ana loo Siraeli aaidur; naa ore ake ewueji nedoiki ina atampoi neun iltung'ana loo Siraeli ilng'oborri teine. Naa te nkitanapata o Laitoriani edumunye iltung'ana loo Siraeli aaidur, naa te nkitanapata o Laitoriani sii eun ninche ilng'oborri; ore te nkata naba anaa enabik enkatampoi te nchumata ilo ng'obor le Nkai, nebik ninche too lng'oborri. Ore duoo ninye tenaa nkolong'i kumok ebik enkatampoi te nchumata e ilo ng'obor le Nkai, neibung iltung'ana loo Siraeli enkitanapata o Laitoriani, nemedumunye ninche aaidur. Ore apa kulie katitin na nkuti olong'i ake etii ina atampoi shumata ilo ng'obor le Nkai, naa ore te risioroto e nkitanapata o Laitoriani nebik ninche too lng'oborri ore ake te risioroto e nkitanapata o Laitoriani nedumunye ninche aaidur. Ore ake sii apa kulie katitin etotona enkatampoi ebaiki teipa o mekenyu; naa ore ake pee edumuni aailepie enkatampoi tadekenya, nedumunye ninche aaidur aashu te netobiko enkolong nabo o enkewarie, ore ake pee eiwuang'ieki ina atampoi nedumunye ninche aaidur. Tenaa nkolong'i are apa aashu olapa, aashu enkata naado, etobiko ina atampoi te nchumata ilo ng'obor le Nkai, neton te ine, nebik iltung'ana loo Siraeli too lng'oborri, nemedumunye aaidur kake te neyae aailepie, nedumunye ninche aaidur. Te nkitanapata o Laitoriani eun ninche ilng'oborri, naa te nkitanapata o Laitoriani edumunye ninche aapuo; eibung'a apa ninche enkitanapata o Laitoriani, ina kitanapata o Laitoriani naimu Musa. Nejoki Olaitoriani Musa, “Ntobira ntarumpetani are e nkosholai te nkarriyiano ndong'u ninche, neaku ninche impotunye eumata, naa ninche egilieki ilng'oborri. Naa te nekuti pokira are, neiturrurrunye eumata pooki aapuonu enitii te kutukaji ilo ng'obor le ntumo. Kake tenaa nabo ake etukutaki, naa ilarikok, nena lukuny oo loshon loo Siraeli, likinturrurrokino. Naa ti niosh abuaku ore lelo ng'oborri ootii enkalo o loo saen nedumunye, ore pee intoki aosh abuaku e niare, ore lelo ng'oborri ootii enkalo e kopikop nedumunye aaidur. Embuakunoto eoshi enkata naba anaa enadumunye ninche. Kake tenaa eumata eiturrurri te nebo, nikut, kake mipik embuakunoto. Ore lelo ayiok le Aron, lelo apolosak, nekut ntarumpetani. Ore eoshoto oo ntarumpetani naa keaku te intae enkitanapata e anaake tiatua iishoritin inyi pooki. Naa tenipuopuo enjore te nkop inyi aagilunore ilo mang'atinta linyi oibooki intae enkop, nitumokiki taa aaitadara ntarumpetani, pee edamuni intae te dukuya Olaitoriani Enkai inyi, neitajeuni intae too lmang'ati linyi. Ore sii too nkatitin e ng'ida - too siruai linyi lo lapa ng'ejuk o te kulikae siruai te sayiata e Nkai - tukuta nena tarumpetani ina kata intarasaa ilasarri linyi oopejori o lasarri linyi le seriani pee atum taa atareto intae: Ara nanu Olaitoriani Enkai ino.” Ore to lari li are, to lapa li are te nkolong e tikitam o lapa nedumuni enkatampoi aailepie aaitung'uaa shumata ilo ng'obor le Nkai le nchakenisho, nedumunye iltung'ana loo Siraeli anaa ntukusi aaidur aaing'uaa ongata e Sinai; nelo ina atampoi airrag tiongota e Paran. Nedumunye ninche aaidur te nkata e dukuya te nkitanapata o Laitoriani naimua Musa. Ilng'oborri loo ltung'ana le Yuda etang'asaki aaun too ntukusi enye, naa Nashon olayioni le Aminadab olarikoni lenye. Ore apa olarikoni lo losho loo ltung'ana le Isaakar naa Natanel olayioni le Suar. Ore apa olarikoni lo losho loo ltung'ana le Sebulon naa Eliab olayioni le Helon. Naa ore apa te nedotuni olng'obor le ntumo, naa ilayiok le Gershon o layiok le Merari laa ninche apa oonap ilo ng'obor le Nkai, nedumunye aaidur. Neitoki asuj olturrur loo lng'oborri le Ruben too ntukusi enye, ore olarikoni lenye naa Elisuri olayioni le Shedeur. Ore olarikoni lo losho loo ltung'ana le Simeon naa Shelumiel olayioni le Surishadai. Ore olarikoni lo losho loo ltung'ana le Gad naa Eliasaf olayioni le Deuel. Neitoki ile Kohat aadumunye aaidur, enapita nena tokitin naasinya, neitasheyie ilo ng'obor le Nkai eton eitu ebau ninche. Neitoki entukus oo lng'oborri loo ltung'ana le Efraim adumunye too lturrurri lenye; ore olarikoni lenye naa Elishama olayioni le Amihud. Ore olarikoni lo losho loo ltung'ana le Manase naa Gamaliel olayioni le Pedasur. Ore olarikoni lo losho loo ltung'ana le Benchamen naa Abidan olayioni le Gideon. Neitoki enkereri oo lng'oborri loo ltung'ana le Dan aa ninche ootii siadi ilng'oborri pooki, aadumunye too lturrurri lenye; ore olarikoni lo lorora lenye naa Ahieser olayioni le Amishadai. Ore olarikoni lo lorora loo ltung'ana lo losho le Asheri naa Pagiel olayioni le Okran. Ore olarikoni lo lorora loo ltung'ana le Naftali naa Ahira olayioni le Enan. Ena apa empukunoto e lototo oo ltung'ana loo Siraeli te risioroto oo lororani lenye, te nedumunye aaidur. Nejoki Musa Hobab olayioni le Ruel ilo Midiani, aputani le Musa, “Eikidumunye iyiook aapuo ine wueji natejo Olaitoriani, ‘Kaisho nanu intae’ wootu te nebo iyiook, amu eikintaas iyiook intae esidai; amu eisiligie Olaitoriani Isiraeli embae sidai.” Kake etiaka apa ninye, “Malo nanu; kaorori nanu alo enkop ai makewan o lorere lai.” Neitoki ninye ajoki, “Aatoomono, ming'uaa iyiook, amu iyiolo enikipuo aaiko kiun ilng'oborri ti ong'ata naa eilo iyie aaku nkonyek te iyiook. Naa ti nilo iyie te nebo iyiook, ore pooki toki sidai naba anaa enaitaas iyiook Olaitoriani, nikintaas iyiook iyie ina ake.” Neaku etudumunye apa ninche aapuo to ldoinyo le Nkai elototo oo nkolong'i uni; ore ilo sanduku lo sotua lo Laitoriani nelo te dukuya ninche te ina lototo oo nkolong'i uni, pee etum aing'uraki ninche ewueji nepuo aayeng'iyeng'are. Netii apa enkatampoi o Laitoriani shumata ninche dama enkata ake naba anaa enadumunye ninche aaidur too lng'oborri. Naa ore ake enkata naba anaa enadumuni ilo sanduku aaya, nejo Musa, “Tudumunye, iyie Olaitoriani, naa nchoo ilmang'ati linono eisardak naa nchoo lelo likimba iyie eilanyisho te dukuya iyie.” Naa ore ake pee eirragieki, nejo ninye, “Torrinyokinoyu iyie Olaitoriani nkalifuni iip tomon oo Siraeli.” Neing'unyung'unyaki iltung'ana Olaitoriani te nkaraki enyamali enye; ore ake pee ening Olaitoriani ina neyupuyup engoro enye, nepej engoro o Laitoriani atua ninche, neinos kulie wuejitin e lelo ng'oborri. Neitoki iltung'ana aaishiraki Musa, neomon Musa Olaitoriani neye ina kima. Neaku keji apa enkarna ene wueji Tabera enkaraki natapejo enkima o Laitoriani atua ninche. Ore apa iltung'ana loo loreren ootii atua ninche netum kuuru oleng, neitoki sii iltung'ana loo Siraeli aaishir nejo, “Oi napaji kitum nkiri nikinos! Eikidamu isinkir apa likinos te Misiri pesho, o nkaitubulu naaijo ilmalenken, o kitunkuu o mbenek naainosi, o kulie tokitin kumok; kake ore taata eishunye engolon ang, nemeetae hoo ae toki meteleku ake ena manna king'or.” Ore apa ina manna neikununo anaa ilanterera, kutiti; ore elioto enye naa eisikitok neibor. Nemanimanaa apa iltung'ana aapuo aasotu, neidong too soito ooyutuutishoreki aashu eidongito te nkidong'et neitokitokie too motioo, neitayunye imukateni; ore enkishamu enye neikununo anaa enoo mukateni naayiera te ilata. Te nedoiki enkoileelio ilng'oborri kewarie neitadou manna. Nening Musa iltung'ana eyietu aaishir too lmareita lenye, oltung'ani ake te kutukaji o lng'obor lenye; neyupuyup airowuaju engoro o Laitoriani oleng, neisinanuo Musa. Nejoki Musa Olaitoriani, “Kainyoo iye pee intaasa entorroni osinka lino? Naa kainyoo nanu pee eitu atum omon too nkonyek inono, neaku kinteleikia nanu olola le kulo tung'ana pooki? Katoiuo nanu te nutai kulo tung'ana pooki? Kai nanu otoiuo ninche, metaa eikijoki iyie nanu, ‘Tanapa to lgoo lino, anaa enanap enkaibung'ani enkerai nanakita, aya ina kop ninosie iyie olmumai pee incho loo menye?’ Kaji nanu atumie nkiri naisho kulo tung'ana pooki? Amu keyietu ninche aaishir te dukuya nanu nejo, ‘Nchoo iyiook nkiri, pee kitum aainosa.’ Maidim nanu atanapa kulo tung'ana openy, keiroishi ele ola oleng te nanu. Tenaa kena kintaas nanu taaraki matua nabo kata, te nanoto omom too nkonyek inono, pee madol nanu entorroni ai.” Nejoki Olaitoriani Musa, “Nturrurrokoki nanu iltung'ana ntomoni naapishana loo ilpayiani le Israel, lelo liyiolo iyie ajo ilpayiani lo lorere o larikok loo ltung'ana, nincho ninche meitasho te ine te nebo iyie. Naa kadou nanu alotu airorie intae te ine. Naa kaya nanu embata e ina kiyang'et natii shumata iyie napik shumata ninche; naa kenap ninche ilo ola le kulo tung'ana te nebo iyie, pee mintoki iyie anap openy. Nijoki iyie iltung'ana, ‘Entisinya ate taisere ninosinoso nkiri; amu nchira intae too nkiyiaa o Laitoriani, ijojo, “Kaing'ae naisho iyiook nkiri nikinya? Amu eikash apa kitii Misiri.” Ore naa keisho intae Olaitoriani nkiri, naa inosinoso intae. Minosinoso intae enkolong nabo, aashu nkolong'i are, aashu nkolong'i imiet, aashu nkolong'i tomon, aashu nkolong'i tikitam, kake olapa olulung'a, o metaba anaa neimu intae nkumeishin, nirikaka, enkaraki nitanyaita intae Olaitoriani otii te nebo intae, ninchirishiri te dukuya ninye, ijojo, Kainyoo iyiook pee kitupukutuo te nkop e Misiri?’” Kake etejo Musa, “Ore kulo tung'ana latii nanu atua oobaya nkalifuni iip ile oopuo too nkejek; eji nijo iyie, ‘Kaisho nanu nkiri, pee etum aainosa olapa olulung'a!’ Ke nkishu o nkerrai eyieng'i te nkaraki ninche, pee eitaraposhi ninche? Arashu keisinkir pooki le naiposha eiturrurruni te nkaraki ninche, pee eitaraposhi ninche?” Nejoki Olaitoriani Musa, “Keitodorropaki enkaina o Laitoriani? Ore taata idol iyie tenaa kesipayu ororei lai te iyie aashu mesipayu.” Neaku eipang'a apa Musa alo ajoki iltung'ana ilomon lo Laitoriani; neiturrur ninye iltung'ana ntomoni naapishana loo lpayiani loo ltung'ana, neitaman ninche olng'obor. Nelotu Olaitoriani te nkatampoi airorie ninye, neya embata e ina kiyang'et natii shumata ninye nepik shumata lelo payiani ntomoni naapishana; ore pee eirrag ina kiyang'et te shumata ninche, neibonisho ninche. Kake eitu eitoki aaiko neijia. Neing'uari apa iltung'ana oare too lng'oborri, neji obo Eldad ore o likae neji Medad, netonie enkiyang'et ninche; neaku ninche te nebo lelo ooigeroki kake eitu ninche eipang aapuo ilo ng'obor, neaku eibonishote ninche ti atua ilo ng'obor. Nekuet olbarnoti obo alo ajoki Musa, “Eibonisho Eldad o Medad to lng'obor.” Ore Yoshua olayioni le Nuni, ilo aisiaayiani le Musa, obo le lelo tung'ana oogeluno, nejo, “Olkitok lai Musa, tomitiki ninche.” Kake etiaka Musa ninye, “Iata iyie olom te nkaraki nanu? Oo napaji tenaa ore iltung'ana pooki lo Laitoriani, naa loibonok, naaji te nepik Olaitoriani enkiyang'et enye shumata ninche.” Nerrinyo Musa o lpayiani le Israel aapuo ilng'oborri. Nedumunye olkutati oing'uaa Olaitoriani, neyau nkurleen aitung'uaa enkalo e naiposha, neisho ninche edou te mbata oo lng'oborri, eneba anaa elototo e nkolong nabo tena shoto o elototo e nkolong nabo te nkae shoto, te manaroto oo lng'oborri, naa eneba anaa intemat are e nkaina eirrag ti oriong enkop. Nedumunye iltung'ana ina olong pooki, o enkewarie pooki, o ina olong pooki natusujua nesotu nkurleen, ore olotasotuo nkuti naa nkikapuni tomon, neisalaashaki ninche ate aaitaman ilng'oborri. Ore ina kata eton etii nena kiri irishat oo lala lenye eton eitu einos aamut, neyupuyupoki engoro o Laitoriani iltung'ana, near Olaitoriani olorere to lmeitai kitok. Neaku etejoki apa enkarna e ine wueji Kibrot-hatafa. Enkaraki naa te ine apa etunukayioki lelo tung'ana lo lorok. Nedumunye iltung'ana te Kibrot-hatafa nepuo Haserot nebik ninche te Haserot. Etukurra Miriam o Aron Musa te nkaraki ina kitok oo Lkushi nayama, amu entito oo Lkushi apa eyamua; nejo ninche, “Ke Musa aa ninye ake eirorie Olaitoriani? Keitu sii ninye eirorie iyiook?” Nening Olaitoriani ina. Ore apa ilo tung'ani oji Musa naa oltung'ani obor oleng alang iltung'ana pooki ootii oriong enkop. Ore nabo kata nejoki Olaitoriani Musa o Aron o Miriam, “Entupuku wootu, intae pokira uni atua ilo ng'obor le ntumo.” Neipang'u pokira uni aapuonu. Nedou Olaitoriani alotu kop te ng'ape neitashe te kutukaji o lng'obor, neipot Aron o Miriam, nepuonu pokira are dukuya. Nejoki ninye, “Entoning irorei laainei: Tenaa ketii oloiboni atua intae, ore nanu Olaitoriani makewan naitayiolo kewan ai ninye te nduata nairorie ninye te nkidetidet. Mme neijia to sinka lai Musa; ninye eishooki enkaji ai pooki. Ore ninye kairorie nanu kiwalikino too nkutukie, te nkibalakinoto, neme te nkiroroto misil; naa keing'or ninye eneikununo Olaitoriani. Kainyoo naa pee miurere intae aatukur ilo sinka lai Musa?” Neyupuyup engoro o Laitoriani ti alo ninche, nelo aing'uaa; ore ake pee eiwuang ina atampoi te shumata ilo ng'obor, ng'ura, nejing Miriam enkeeya oo lbolot naibor anaa enturoto. Neibelekenya Aron aing'or Miriam, naa ng'ura, etijing'a ninye enkeeya oo lbolot. Nejoki Aron Musa, “Oi lo kitok lai, mintame iyiook amu kitaasa iyiook te modai, nikitaasa eng'oki. Mincho ninye etiu anaa enatua, naidaa nkiri o sesen apa pee eiu ng'otonye.” Neishiraki Musa Olaitoriani, ejo, “Nchiunye ninye, Na Ai, aatasayia.” Kake etiaka Olaitoriani Musa, “Amaa naaji tenaa ketonotaka menye miriam enkomom enye, aimekurru ninye nkolong'i naapishana? Nchoo ninye eikenori ti auluo ilng'oborri nkolong'i naapishana, ore te siadi ina neidimi aanyaaki aaitijing'u.” Neaku eikenoyioki apa Miriam ti auluo ilng'oborri nkolong'i naapishana, neitu edumunye iltung'ana aapuo o metaba anaa neitokini aaitijing'u Miriam. Ore te siadi ina nedumunye iltung'ana aapuo te Haserot nepuo aaun ilng'oborri ti ong'ata e Paran. Nejoki Olaitoriani Musa, “Irriwai iltung'ana meshomo aaikitalan ina kop e Kanaan, naisho nanu iltung'ana loo Siraeli; ore ake te pooki osho loo loo menye irriwai oltung'ani, ore ake oltung'ani naa olarikoni ti atua ninche.” Neaku eirriwayie apa Musa ninche ti ong'ata e Paran, te risioroto e nkitanapata o Laitoriani, o lelo tung'ana pooki aa lukuny oo ltung'ana le Israel. Naa kuna apa nkarn enye: Ore to losho le Ruben naa Shamua olayioni le Sakuri; ore to losho le Simeon naa Shafat olayioni le Hor; ore to losho le Yuda, naa Kalebu olayioni le Yefune; ore to losho le Isaakar naa Igal olayioni le Yosef; ore to losho le Efraim naa Hoshea olayioni le Nuni; ore to losho le Benchamen, naa Palti olayioni le Rafu, ore to losho le Sebulon, naa Gadiel olayioni le Sodi; ore to losho le Yosef aa taa to losho olayioni le Manase, naa Gad olayioni le Susi; ore to losho le Dan naa Amiel olayioni le Gemali; ore to losho le Asheri naa Setur olayioni le Mikael; ore to losho le Naftali na Nahabi olayioni le Fopsi; ore to losho le Gad naa Geuel olayioni le Maki. Kuna apa nkarn e lelo tung'ana ooirriwayie Musa meshomo aaikitalan ina kop. Neisho apa Musa Hoshea olayioni le Nuni enkarna, nejo Yoshua. Neirriwaa apa Musa ninche meshomo aaikitalan ina kop e Kanaan, nejoki ninche, “Elepa enchom Negeb te idie, nilepilepe aapuo ina kop oo ldoinyo, nidolidolo aajo kaji eikununo ina kop, tenaa kegol iltung'ana oomanya aashu tenaa keshal, aashu tenaa ae kuti anaa aikumok o aashu sii tenaa eisidai ina kop namanya ninche anaa torrono, o aashu sii tenaa ore nena anas naamanya ninche naa ilng'oborri tenaa isempewueti, o nchere eikarsis enkop tenaa kaaisinani, ketii ilkeek anaa metii. Entagoluoto, niyauu embata oo lng'anayio le ina kop.” Ore apa ina kata naa erishata oo sabibu le dukuya ooto. Neaku etudumunye apa ninche aapuo aaikitalan enkop ebaiki ong'ata e Sin o metabaiki Rehob; embata e nejing'ieki Hamat; nepuo apa ninche Negeb, neitoki aapuonu Hebron; o Ahiman, o Sheshai, o Talmai, ore apa lelo le ishoi e Anak naa ine etii. (Eteshetaki apa Hebron ilarin oopishana te dukuya Soan te Misiri.) Neitoki ninche aapuonu oerata le Eshkol, nedung'u ninche te ine olng'osila otii enkimarrimarrati nabo oo sabibu, nenap iltung'ana oare te nchata; eyautua sii ilng'anayio ooji kukumanka o lng'abolo. Keji apa ine wueji oerata le Eshkol, te nkaraki ina kimarrimarrati natudung'utuo iltung'ana le Israel. Ore te siadi nkolong'i artam neshukunye ninche eing'uaa ina kitalanare e ina kop. Nepuonu ninche enetii Musa o Aron o ina umata pooki oo ltung'ana le Israel ti ong'ata e Paran, te Kadesh; neyaki ninche olomoni o ina umata pooki, neitodol ninche ilng'anayio le ina kop. Nejoki ninche ninye, “Kitabaitie iyiook ina kop apa nirriwayie iyiook; keruko kule o naishi, naa kulo ilng'anayio lenyena. Kake ore eyia kegol iltung'ana oomanya ina kop, naa kesheta nkanas enye nelala oleng; ore te nebo ina kitoduaa eishoi e Anak te ine. Ore Ilmaleki nemanya enkop e Negeb, ore ile Hiti o Iyebusi o le Amori nemanya ina kop oo ndoinyo, netii ile Kanaan embata e naiposha, olkeju le Yordan.” Kake eitigira apa Kalebu olorere te dukuya Musa, nejo ninye “Mailepa iyiook aapuo nabo kata, pee kipuo aamany, amu eikindim iyiook aaibung'a ina kop.” Ore apa lelo tung'ana ooshomo te nebo ninye nejo, “Mikindim iyiook aashom aairisha ilo orere; amu kegol ninche aalang iyiook.” Neaku eyakitia apa ninche iltung'ana le Israel olomoni torrono le ina kop nashomo aaikitalan, ejo, “Ore ina kop nikishomo iyiook aaikitalan naa enkop nainos lelo oomanya, ore lelo tung'ana pooki likitoduaa te ina kop naa adoru naa iltung'ana sapuki oleng. Ore teine nikitoduaa ile Nefilim, (lelo ayiok le Anak apa ooing'uaa Nefilim,) nikitiu iyiook anaa ntargeet, neijia iyiook kitotiutuo te ninche.” Neyietu ina umata pooki aishir, neishir iltung'ana ina kewarie. Ore iltung'ana pooki le Israel neing'unyung'unyaki Musa o Aron; nejoki ina umata pooki ninche, “Aimeikash apa tenaa ekituata te nkop e Misiri arashu tenaa eikituata tena ong'ata! Kainyoo pee eyaua iyiook Olaitoriani ena kop, pee kipuonu aabatata to lalem? Ore nkituaak ang o nkera ang naa keaku inaari metuata; aimeikash naaji te iyiook te nikirrinyo aapuo Misiri?” Nejokino ninche maate, “Mategelu iyiook olarikoni pee kirrinyo aapuo Misiri.” Neitoki Musa o Aron aabatata too nkomomi te dukuya ina umata e ilo turrur loo ltung'ana le Israel. Ore Yoshua olayioni le Nuni o Kalebu olayioni le Yefune apa ootii te nebo lelo ooshomo aaikitalan enkop, nepolos ilkilani lenye, nejoki ina umata pooki oo ltung'ana le Israel, “Ore ina kop nikishomo iyiook aaikitalan naa enkop sidai oleng. Tenaa keshipakino iyiook Olaitoriani, naa keyau iyiook atua ena kop neisho iyiook, ena kop naruko kule o naishi. Emigolong'aki ake duoo intae Olaitoriani; nimiureyuyu lelo tung'ana le ina kop, amu emukate ninche te iyiook; eiwuang'ie olchurie lenye aaitung'uaa ninche netii Olaitoriani te nebo iyiook; emiureyu ninche.” Kake etejo olturrur pooki pee enang ninche too soito. Nelioyu enkitoo o Laitoriani to lng'obor le ntumo too ltung'ana pooki le Israel. Nejoki Olaitoriani Musa, “Kaamenu akenya kulo tung'ana o anu? Ketoni ninche eitu aairuk nanu o anu, aasita kuna kitoduaat pooki nataasa nanu ti atua ninche? Kaosh nanu ninche to lmeitai nemaitujung ninche, naa kaitayu nanu te iyie olosho kitok naa magilani alang ninche.” Kake etiaka Musa Olaitoriani, “Ekening naa ile Misiri ina, amu intubulua iyie ele orere te ngolon ino aitung'uaa ile Misiri, naa kepuo ninche aaliki kulo oomanya ena kop. Etoning'o apa ninche nchere, ore iyie Olaitoriani itii atua ele orere; amu ore iyie Olaitoriani nitoduare ninche too nkonyek, neitashe enkatampoi ino te shumata ninche nilo iyie te dukuya ninche, te ng'ape e nkatampoi dama o te ng'ape e nkima kewarie. Ore taata te niar ele orere metuata anaa oltung'ani obo, ore apa lelo oshon ootoning'o enkaisisa ino nejo, ‘Enkaraki nemeidim Olaitoriani ayau ele orere atua ina kop nainosie olmumai pee eisho ninche, neaku etara ninche metuata ti ong'ata.’ Ore naa taata, aatoomono nanu, nchoo engolon o Laitoriani eaku kitok anaa apa enisiligie ninche, ijo, ‘Mesioki Olaitoriani agoro, neton ninye te nyorrata nauno, nepalaki iltung'ana te ntorroni o te ngolon e nkong'u, kake meeta ninye nchere pee eiwuang'ie eng'oki eitu eitabaiki entorroni oo loo menye shumata nkera enye, shumata e ishoi e uni o shumata eishoi e ong'uan.’ Tapalaki entorroni e tung'ana, aatoomono nanu iyie, te risioroto e nkitoo e nyorrata ino, o te risioroto e mpalikinoto ino nitapalaka iyie ele orere, ebaiki apa te Misiri o taata.” Neitoki Olaitoriani ajo, “Atapalaka nanu ninche te risioroto o rorei lino; kake esipa ore anaa enaishu nanu, o anaa sii enabore enkop pooki enkitoo enkisisa o Laitoriani, meetae obo le kulo tung'ana ootoduaa enkitoo enkisisa ai o nkitoduaat aainei nataasa te Misiri o tiongota ore ake sii atetema kuna katitin tomon, neitu ening oltoilo lai olo adol ina kop apa nainosie nanu olmumai pee aisho loo menye; nemeetae obo le lelo laatemenaitie nanu olo adol ina kop. Kake ore osinka lai Kalebu, enkaraki naata ninye oltau opaashaa naatusuja ninye nanu tukul, kayau nanu ninye atua ina kop apa nashomo, ore eishoi enye naa kepuo aaya ina kop. Ore taata amu emanya Ilmaleki o le Kanaan iyerat, tayooki mbelekenyayu shomo ong'ata aim enkoitoi Enaiposha Nanyokie.” Neitoki Olaitoriani ajoki Musa o Aron, “Kaaing'unyung'unyaki akenya ena umata torrono o anu? Atoning'o nanu enking'unyung'uny oo ltung'ana le Israel aaing'unyung'unyaki nanu. Tiaaki ninche, ore anaa enaishu Olaitoriani ojo, ‘Ore ina nitejo intae too nkiyiaa aainei kaitaas nanu intae. Ore mpopoki inyi kepuo aairragaa tena ong'ata, ore te siana inyi pooki ebaiki ilarin tikitam neilep, le lelo laaing'unyung'unyakitia nanu, meetae obo olo atua ina kop apa nainosie olmumai nchere kaisho intae entamany, meteleku ake Kalebu olayioni le Yefune o Yoshua olayioni le Nuni. Kake ore nena kera inyi apa nitejo kearari kaitijing nanu ina kop, naa kepuo ninche aayiolou ina kop apa nitemenaitie. Kake ore intae keiput mpopoki inyi ena ong'ata. Naa keaku nkera inyi ilchekuti loo ntare to lpurkel ilarin artam netum ninche osina te nkaraki nimisiligayuyu o metaba anaa neirrag mpopoki olobayie linyi tiongata. Te risioroto e siana oo nkolong'i apa nikinkitalana enkop, nkolong'i artam, te nkolong ake to lari, inapinapa intae entorroni inyi, ilarin artam, naa ipuopuo intae aayiolou engoro ai.’ Nanu, Olaitoriani oiroro; esipa ena nanu ayooki aitaas ele turrur torrono pooki laaiturrurrokine nanu: ore tena ongota naa kepuonu ninche enkiting'oto enye tukul, naa te ine epuo aaye.” Ore lelo tung'ana apa ooirriwayie Musa meikitalana ina kop, lelo apa ootushukunye neisho olturrur meing'unyung'unyaki ninye neyau olkilikuai torrono ina kop, lelo tung'ana apa ooyautua olkilikuai torrono le ina kop, neye ninche to lmeitai te dukuya o Laitoriani. Kake ore Yoshua olayioni le Nuni o Kalebu olayioni le Yefune neitu eye, te nebo lelo tung'ana apa ooshomo aaikitalan enkop. Nejoki Musa kulo rorei iltung'ana pooki le Israel neishir iltung'ana eisinanuo oleng. Neyooki ninche aainyototo tadekenya oleng nepuo eneika e ina kop oo ldoinyo ejo, “Ng'ura kitii iyiook ene, eikilep iyiook aapuo ine wueji apa neisiligie Olaitoriani iyiook; amu kitaasa iyiook eng'oki.” Kake etejo Musa, “Kainyoo naa taata pee igolong'akiki intae enkitanapata o Laitoriani, amu melo dukuya intae? Milepilepe intae aapuo, pee meari intae aairragie te dukuya ilmang'ati linyi, amu metii Olaitoriani te nebo intae. Amu ore te idie netii Ilmaleki o le Kanaan dukuya intae, naa ipuopuo intae aabatata to lalem, enkaraki nimbelekenyate intae aaing'uaa esujata o Laitoriani, meitoki Olaitoriani atii te nebo intae.” Kake eshomo ake duoo ninche eneika te ina kop oo ldoinyo, hoo neitu eipang osanduku lo sotua lo Laitoriani, o Musa aaing'uaa ilng'oborri. Neitoki Ilmaleki o Lkanaan apa oomanya ina kop oo ldoinyo aadou aapuonu, nemir ninche, nesujaa ninche, o metabaiki Horma. Nejoki Olaitoriani Musa, “Tiaki iltung'ana le Israel, Ti nipuonunu akenya ina kop nipuopuo aamany, ina naisho nanu intae, ninchosho Olaitoriani nkishorot naaing'uaa eluata oo nkishu, aashu enoo ntare, olasar le nkima aashu olasar opejori, aashu olasar ake duo, pee intabayaya ilo mumai aashu olasar lo lpela, aashu too lasarri linyi ootegeluaki pee intobirakiki esong'ouna narropil Olaitoriani, ore naa ilo oyau nkishorot enyena neisho sii Olaitoriani olasar le ntapa le matua e tomon e ntapa napuyiapui eipurjaki te rubata e ong'uan e ilata, o enaisho te nkaraki olasar ooki, ore erubata e ong'uan nintobir te nebo olasar opejori, aashu te nkaraki olasar, to lkuo ake le ker. Aashu ore to lmeregesh nintobir to lasar le ntapa intemat are e matua e tomon e efa e ntapa napuyiapui naipurja too mboreitin uni e ilata, naa ore to lasar ooki nintayu mboreitin uni e naisho pee eaku olng'usil orropil to Laitoriani. Naa ti nintobir oloing'oni pee eaku olasar opejori, aashu olasar, pee intabaya olmumai, aashu olasar le seriani to Laitoriani, neitayu ake oltung'ani te nebo ilo oing'oni olasar le ntapa loo mboreitin uni e matua e tomon e efa entapa napuyiapui, naipurjaki te ilata naitorit empirbil. Ninchooyo to lasar ooki empirbil naitorit e naisho oo sabibu pee eaku olasar le nkima, olng'usil orropil to Laitoriani. Neijia epuoi aaiko te pooki oing'oni aashu to lmeregesh, aashu te pooki sitima le ker aashu to le kine, ore te risioroto e ina siana nintobiriri, naa neijia enkuna te pooki ng'ae te risioroto e siana enye. Ore lelo pooki inot linyi nchoo eas kuna baa tena oitoi, aaishooyo olasar le nkima, esong'ouna narropil to Laitoriani. Naa te neewuo oltung'ani leiking'a amanyisho te nebo intae, aashu te netii likae tung'ani atua intae too ishoritin inyi, neyieu ninye neishoru olasar opejori, esong'ouna narropil to Laitoriani, nchoo ninye eas anaa eniasiasa. Amu ore te umata naa keaku enkitanapata nabo ake, te intae o to lomoni otii te nebo intae, enkitanapata nabikoo ti atua iishoritin inyi pooki, ore anaa enitiuu naa neijia etiu ilo omoni te dukuya o Laitoriani. Keaku enkitanapata nabo o enkikoo nabo te iyie o te ilo omoni omanyisho te nebo intae.” Nejoki Olaitoriani Musa, “Tiaki iltung'ana le Israel, te nipuonunu atua ina kop nayau nanu intae, naa ore ake pee inosinoso endaa e ina kop, nintarasakiki Olaitoriani enkishoroto. Ore ina tapa inyi e nkiterata ninchooyoyo emukate naaku olasar; ore anaa olasar oing'uaa osoit oituutishoreki, ninchooyoyo. Ore ilo asar linyi le ntapa enkiterata enchorie Olaitoriani olasar tiatua iishoritin inyi pooki. “Kake ti ntarruoo nimimbung'ubung'u kuna kitanapat naairoro Olaitoriani aimunye Musa, ebaiki ina olong apa naishorua Olaitoriani nkitanapat neito dukuya ti atua iishoritin inyi pooki, kake te neitadiaki te nkaraki meyiolo eumata neitayu naa ina umata pooki oloti oing'oni oaku olasar opejori, esong'ouna narropil to Laitoriani, te nebo olasar lenye le ntapa o lasar lenye ooki te risioroto e nkitanapata, o sitima obo le kine oaku olasar le ng'oki. Neitobir olapolosani olning'o lo sotua te nkaraki ina umata pooki oo ltung'ana le Israel, naa kepalakini ninye, amu enkitapong'oto apake, neyautua ninche olasar lenye, ilo asar le nkima oishori Olaitoriani, neyau ilo asar lenye le ng'oki dukuya Olaitoriani, te nkaraki ina kitarruoroto enye. Ore ina umata pooki oo ltung'ana le Israel naa kepalakini o ilo omoni otii te nebo ninche, amu etijing'a apa ilo orere pooki ina kitarruoroto. “Te neas oltung'ani eng'oki eitu eotiki, neitayu ninye esupen e kine o lari obo naaku olasar le ng'oki. Neitobir olopolosani osotua lo lning'o te dukuya o Laitoriani te nkaraki ilo tung'ani otaasa enkitarruoroto, teneas ninye eng'oki eitu eotiki, naa kepalakini ninye. Nchoo eaku enkitanapata nabo iata te ilo oas pooki toki eitu eotiki, o te ilo ora oinoti le Israel o te ilo omoni otamanyishe ti atua intae. Kake ore ilo tung'ani oas pooki toki te otikinoto, aa oinoti aasho olomoni neinyala Olaitoriani, ore ilo tung'ani naa keiwuang'ieki aaitung'uaa iltung'ana lenye. Enkaraki natemenayie ninye ororei lo Laitoriani, netigila enkitanapata enye, ore ilo tung'ani keiwuang'ieki tukul, ore eng'oki enye naa keaku shumata ninye.” Ore apa eton etii iltung'ana le Israel olpurkel netum ninche oltung'ani osotu ilkeek te nkolong' e sabato. Ore apa lelo oonoto ninye esotu ilkeek, neyau ninye enetii Musa o Aron, o ilo turrur pooki. Neikenori ninye, amu eitu apa eibalunyeki enaitaasi ninye. Nejoki Olaitoriani Musa, “Keari ilo tung'ani metua; naa kenang' ilo turrur pooki ninye too soito o metua ti auluo ilng'oborri.” Neyau ilo turrur pooki ninye auluo nenang' ninye o metua too soito, anaa enaitanapa Olaitoriani Musa. Nejoki Olaitoriani Musa, “Irorie iltung'ana le Israel nintanap ninche pee epik ilkisialisal ilcholo loo lkilani lenye ti atua iishoritin enye pooki ore ake olkisialisialati le pooki sholoi enkeene pus; naa keaku te iyie olkisialisialati oing'or nedamuni nkitanapat pooki o Laitoriani, pee easi ninche, mme pee isujaa oltau lino makewan o nkonyek inono makewan. Neaku entadamu niasiasa nkitanapat aainei pooki niakuku sinyat to Laitoriani Enkai inyi. Ara nanu Olaitoriani Enkai inyi, ilo apa likintayio iyie aitupuku te nkop e Misiri, pee aaku Enkai inyi. Ara nanu Olaitoriani Enkai inyi.” Ore apa Kora olayioni le Ishar, olayioni le Kohat olayioni le Lawi, o Datan o Abiram ilayiok le Eliabu, o Oni olayioni le Pelet, olayioni le Ruben, neya iltung'ana, nedumunye ninche te dukuya Musa, te nebo esiana oo ltung'ana le Israel iltung'ana iip are o onom arikok le ilo turrur ootegeluaki te ina umata, iltung'ana yiolot oleng; neiturrurro ninche maate te nebo aarare Musa o Aron, nejoki ninche, “Ishomo intae aalus! Amu ore ele turrur pooki kesinya, pooki ng'ae lenye, netii Olaitoriani atua ninche; kainyoo naa pee ilepiepie intae ate aaitulus te umata o Laitoriani?” Ore ake pee ening' Musa ena, nebatata ninye te nkomom enye; nejoki ninye Kora o ina sholiek enye pooki, “Ore tadekenya keyooki Olaitoriani aitodolu ajo kalo olenye, naa kalo osinya, neisho meeu anyikaki ninye, ore ilo olo ninye agelu naa keisho meeu anyikaki ninye. Taasa iyie ena, ewaita eng'irra e nkima, Kora o encholiek enye pooki, entipik enkima atua ninche nipikipiki enkorropil shumata ninche te dukuya Olaitoriani taisere, ore ilo tung'ani oyooki Olaitoriani agelu neaku ilo sinyati. Ishomo aaitulus ilayiok le Lawi!” Nejoki Musa Kora, “Entoning' taata, intae ilayiok le Lawi! Kentoki kiti ena te intae nchere etegelayie intae Enkai oo Siraeli aitung'uaa olturrur le Israel, pee eitataaniki intae kewan, pee iasiasa enkisiaayiare te ilo ng'obor lo Laitoriani, nintasheshe te dukuya olturrur aaisiaai ninche; amaa amu kiyaua ninye aitinyikaki kewan, o lalashera linono lelo ayiok le Lawi te nebo iyie, ing'oruru sii intae empolosare? Ore naa meitiship Olaitoriani ena nchere ore iyie o encholiek ino pooki inturrurrote te nebo; Kainyoo pee ing'unyung'unyakiki Aron?” Neirriwaa Musa olkilikuai aipotu Datan o Abiram lelo ayiok le Eliab; nejo ninche, “Mikipuonu iyiook. Kembae kiti ena nchere iyaua iyiook ailepunye te ina kop naruko kule o naishi pee ilotu aar iyiook matuata tiong'ota, pee itumoki sii aitaa kewan kitok te shumata iyiook? Ore ninye eitu iyie iyau iyiook ina kop naruko kule o naishi, neitu incho iyiook enjung'ore e nkop o nkurman oo lng'anayio. Ikurtu iyie nkonyek e kulo tung'ana? Mikipuonu iyiook.” Negoro apa Musa oleng', nejoki Olaitoriani, “Mishilaa iyie olasar lenye. Eitu ninye nanu aya osikiria lenye neitu ainyal obo lenye.” Nejoki Musa Kora, “Wou taisere dukuya Olaitoriani, iyie o encholiek ino, o Aron. Naa inchoo ake oltung'ani eya eng'irra enye oo nkuk o lasar, nepik enkorropil shumata ninye, neyau ake pooki ng'ae te intae dukuya Olaitoriani eng'irra enye, ngirran iip are o onom; ore sii iyie o Aron neyau ake oltung'ani eng'irra enye.” Neaku ewa apa oltung'ani ake eng'irra enye, nepik nkimaitie atua neiteleiki enkorropil shumata, neitashe te kutuk aji ilo ng'obor le ntumo te nebo Musa o Aron. Neitoki Kora aiturrur ilo turrur pooki aipirakinye ninche kutukaji e ilo ng'obor le ntumo. Neliooyu enkitoo enkisisa o Laitoriani teina umata pooki. Neitoki Olaitoriani ajoki Musa o Aron, “Entoor ate ewuang'a tena umata, pee atum nanu aidaikie ninche nabo kata.” Nebatata ninche too nkomomi enye, nejo, “Na Ai, na Ai ooltauja le pooki naishu, keas oltung'ani obo eng'oki nigorokino eumata pooki?” Nejoki Olaitoriani Musa, “Tiaki ena umata, ‘Ewuang'a tena manyisho e Kora o Datan o Abiram.’ ” Neitoki Musa adumunye alo enetii Datan o Abiram; nesujaa ilpayiani le Israel ninye. Nejoki ninye ina umata, “Ewuang'a, atoomono intae enchom, entung'uai ilng'oborri le kulo tung'ana arruok, nimimbung'ubung'u hoo ae toki enye pooki pee memuti ake intae tenebo nena ng'ok enye pooki.” Neaku eipang'a apa ninche aaing'uaa emanyisho e Kora, o Datan o Abiram; neipang'u Datan o Abiram nepuonu aaitashe te kutukaji oo lng'oborri lenye, te nebo nkituaak enye, o layiok lenye, o nkera enye kutiti. Nejo Musa “Tena taa iyiolouu nchere Olaitoriani laairriua mataasa kuna siaitin pooki neme te nkaraki kewan ai. Te neye kulo tung'ana enkeeya e oshiake oo ltung'ana pooki aashu te neinepu entaboi oo ltung'ana pooki, neaku naa eitu aairriu Olaitoriani. Kake te neitobiru Olaitoriani entoki ng'ejuk, nebol enkop enkutuk enye, neijoo ninche tenebo imasaa enye pooki aapuo enemeneng'a aishu, niyiolouu taa nchere Olaitoriani etemenaitie kulo tung'ana.” Ore enaidipie airoro kulo rorei pooki ore enkop ti abori ninche neiperra; nebol enkop enkutuk enye neijoo ninche, o lmareita lenye, o lelo tung'ana pooki le Kora o masaa enye. Neaku ore ninche o nena pooki naara nkunenye nedoyio eishu aapuo enemeneng'a neikeno enkop te shumata ninche, neidak ninche te mpolos e ina umata. Ore lelo Siraeli pooki oomanita ninche, neisik to lkiyioi lenye, amu etejo ninche, “Eji pee meijoo iyiook enkop.” Nedou enkima naing'uaa Olaitoriani, nemut lelo tung'ana iip are o onom apa oopejito enkorropil. Neitoki Olaitoriani ajoki Musa, “Tiaki Eliesa olayioni le Aron ilo apolosani, pee eitayu nena girran naapejieki enkorropil te nkima; neitalamaa enkima neidapashaa. Amu kesinya ninche. Ore nena girran e kulo tung'ana ootaasa eng'oki aainosie enkishui enye, nchoo ninche eidong'unyeki ngirran naaiteleikini olasar, amu eishorutua apa ninche te dukuya Olaitoriani; metaa kesinya ninche. Neaku kepuo ninche aaku enkitanyaanyukoto too ltung'ana le Israel.” Neaku ewa apa Eliesa ilo apolosani nena girran o suyai, apa naaishorutua lelo ootapejoyioki, neidong'i aaitaa entoki naimulumulieki olperere lo lasar, pee eaku enkitadamunoto too ltung'ana le Israel pee metii hoo obo leme olapolosani, leme olayioni le ishoi e Aron, onyiku alotu apej enkorropil te dukuya Olaitoriani, metiu ake anaa Kora o encholiek enye - anaa apa enatiaka Olaitoriani Eliesa aimunye Musa. Ore pee ekenyu neing'unyung'unyaki eumata pooki oo ltung'ana le Israel Musa o Aron, ejo, “Itaara intae metuata iltung'ana lo Laitoriani.” Ore ake pee eiturrurrokino ina umata Musa o Aron, neibelekenya ninche aaing'or olng'obor le ntumo; naa ng'ura, neimulumul enkatampoi ilo ng'obor, neliooyu enkitoo enkisisa o Laitoriani. Nelotu Musa o Aron dukuya ilo ng'obor le ntumo, nejoki Olaitoriani Musa, “Enchom entung'uai atua umata, pee atum nanu aidaikie ninche nabo kata.” Nerriaa ninche too nkomomi. Nejoki Musa Aron, “Ntayu engirra ino e nkorropil, nipik enkima atua naing'uaa olperere lo lasar, nipik enkorropil shumata ninye, ninap aitasioyo ine netii eumata, nintobir olning'o lo sotua te nkaraki ninche; amu etupukuo engoro naing'uaa Olaitoriani, neiterua alotu o olmeitai.” Kaae neyau Aron anaa enatiaka Musa nekuet alo empolos eumata naa ng'ura, eidipa aiteru olmeitai ti atua iltung'ana; neinok ninye enkorropil, neitobir olning'o lo sotua o ltung'ana. Neitashe ninye te rishata oo loo tuata o looishu; neishieki olmeitai. Ore apa lelo ootuata to lmeitai naa nkalifuni tomon oong'uan o iip naapishana, metii lekua ootuata te siaai e Kora. Nerrinyokino Aron Musa te kutuk aji e ilo ng'obor le ntumo, ina kata pee eish olmeitai. Neirorie Olaitoriani Musa nejoki, “Irorie iltung'ana le Israel, niyau te ninche ing'udisin, nabo ake te nkaji oo loo menye, niyau too larikok pooki te risioroto oo nkajijik oo loo menye, ing'udisin tomon oare. Ng'ero ake enkarna o ltung'ani te ng'udi enye ninger enkarna e Aron te ng'udi e Lawi. Amu keaku keetae eng'udi nabo te ndukuya e pooki aji oo loo menye. Shomo tipika ninche atua ilo ng'obor le ntumo, dukuya ina shakenisho, teine naalotu atumore. Ore eng'udi e ilo lagelu nejing nkaitubulu naisho taa meisha te nanu ina king'unyung'uny oo ltung'ana le Israel niking'unyung'unyaki ninche iyie.” Neirorie Musa iltung'ana le Israel neisho lelo arikok lenye pooki ninye ing'udisin, nabo ake to larikoni, ore te risioroto oo nkajijik oo loo menye, ng'udisin tomon oare, ore eng'udi e Aron naa nabo e nena ng'udisin enye. Nepik Musa nena ng'udisin dukuya Olaitoriani ti atua ilo ng'obor le nchakenisho. Ore pee ekenyu nelo Musa atua ilo ng'obor le nchakenisho; naa ng'ura, ore eng'udi e Aron te nkaji e Lawi etijing'a nkaitubulu nejing ilng'osil neitapuku, neiu ilng'anayio ooto. Neyau Musa nena ng'udisin pooki aitung'uaa dukuya Olaitoriani, ayau dukuya iltung'ana pooki le Israel; neing'or neya ake oltung'ani eng'udi enye. Nejoki Olaitoriani Musa, “Torrinyoki eng'udi e Aron dukuya enchakenisho, pee eshumi aitaa enkitoduata too loogolong'u, pee itum aishie ina king'unyung'uny enye naaing'unyung'unyaki ninche nanu, pee meye ake.” Ina etaasa Musa. Ore anaa enaitanapa Olaitoriani neas ninye ina. Nejoki iltung'ana le Israel Musa, “Ng'ura, eikindaaya iyiook, kiisha iyiook, kiisha iyiook pooki. Ore pooki ng'ae olotu anyikaki olng'obor lo Laitoriani neye. Eikindaaya iyiook pooki?” Nejoki Olaitoriani Aron, “Ore iyie o layiok linono, o enkaji e papaai lino te nebo iyie, iyaya intae entorroni ti alo ine wueji sinyati; ore iyie o layiok linono niyaya entorroni ti alo empolosare. Naa ore te nebo iyie toshoru sii ilalashera linono, ilo osho le Lawi, ilo osho le papaai lino, pee kitum ninche aatushulare, nikisiaai iyie ina kata itii iyie o layiok linono dukuya ilo ng'obor le nchakenisho. Eikisiaai ninche iyie neas enkisiaayiare pooki e ilo ng'obor; kake menyikaki ninche nena masaa e ine wueji sinyati aashu enyiku aapuonu olperere lo lasar, meye ake ninche aashu iye iyie. Nchoo kishulare ninche, nejing'u atua ilo ng'obor le ntumo, te ina kisiaayiare pooki e ilo ng'obor; nemeetae likae tung'ani hoo obo likilotu anyikaki. Nijing iyie enkisiaayiare e ine wueji sinyati o enkisiaayiare o lperere lo lasar pee meitoki alotu engoro shumata iltung'ana le Israel. Naa ng'ura, aawa nanu ilalashera linono lelo le Lawi aitung'uaa atua iltung'ana le Israel, enkishoroto ninche te iyie, naaishooki Olaitoriani, pee eas enkisiaayiare e ilo ng'obor le ntumo. Ore iyie o layiok linono te nebo iyie nijing'ijing'i empolosare te pooki naipirta olperere lo lasar o ina natii atua olodung'oro; nisiaisho iyie. Aaishoo nanu empolosare ino metaa enkishoroto, ore pooki ng'ae olotu anyiku neari metua.” Neitoki Olaitoriani ajoki Aron naa, “Ng'ura, aaishoo nanu iyie pooki toki naba anaa enatushumaki too nkishorot naaitakiaiki nanu, o nena tokitin pooki naaitisinyaki oo ltung'ana le Israel; aaisho nanu iyie ninche metaa erubata oo layiok linono metaa erubata enye e anaake. Keaku enino ina nasinya aisul naiteng'elaki neitu epejori te nkima; ore pooki kishoroto enye o lasar, o pooki asar lenye le ng'oki laaisho ninche nanu naa keaku kesinya oleng te iyie o too layiok linono. Te wueji nesinya oleng inosa iyie ina naa kesinya ina te iyie. Enino sii ena, ilo asar loo nkishorunot enye, ore lelo asarri pooki ooyuki loo ltung'ana le Israel; aaishoo nanu iyie ninche, o layiok linono o ntoyie inono te nebo iyie, metaa erubata ino e anaake. Ore pooki ng'ae le meeta entioto otii atua enkaji ino neidim ainosa. Ore ina ilata sidai aisul, o ina aisho pooki sidai o entapa, lelo ng'anayio le dukuya ooisho ninche Olaitoriani, aaishoo nanu iyie. Ore lelo ng'anayio oong'as ooku te pooki natii atua ina kop, ooyaki ninche Olaitoriani, naa keaku ilkulinyi; ore pooki ng'ae lemeeta entioto otii atua enkaji ino neidim ainosa. Ore pooki naiteng'elakaki Olaitoriani ti atua Siraeli naa keaku eninyi. Ore pooki kikau aa olayioni le tung'ani aashu olayioni le ng'ues, ilo oishori Olaitoriani naa keaku olinyi, ore ake eyia olkikau le tung'ani tokordu ainyiang'u, ore olkikau pooki le ng'ues lemesinya inyang'u tokordu. Ore enkinyiang'a e nkordunoto enye (aa te mbotoro o lapa obo ikordu ninche) tipika shekeli imiet e nkosholai, te risioroto e shekeli e ine wueji sinyati. Kake ore olkikau le nkiteng, aashu olkikau le nker aashu olkikau le nkine, mikordu ainyiang'u; kesinya ninche. Isuaaki osarge lenye shumata olperere lo lasar, nipejoo eilata enye metaa olasar opejori te nkima, esong'ouna narropil to Laitoriani; kake ore nkiri enye naa keaku nkuninyi, anaa ilo oikulu oyukoki o anaa ina muro enkalo e tatene naara ininono. Ore nena tokitin pooki naasinya naaisho iltung'ana le Israel Olaitoriani, aaishoo nanu iyie, o layiok linono o ntoyie inono naatii te nebo iyie, metaa erubata e anaake. O sotua le munyan ele ntarasi te dukuya Olaitoriani, te iyie o te ishoi ino natii te nebo iyie.” Neitoki Olaitoriani ajoki Aron, “Miata iyie enjung'ore ti atua enkop enye, nimiata erubata ti atua ninche; ara nanu erubata ino nara enjung'ore ino tiatua iltung'ana le Israel. “Ore ile Lawi aishoo nanu ninche pooki ematua e tomon ti atua Siraeli metaa enjung'ore enye, pee eaku ole rrinyore te ina kisiaayiare enye naisiaisho, ore ina kisiaayiare enye netii atua ilo ng'obor le ntumo. Ore naa ebaiki taata mepuonu iltung'ana le Israel aanyikaki ilo ng'obor le ntumo, menap ake ng'ok neye. Kake lelo le Lawi oas enkisiaayiare o ilo ng'obor le ntumo, naa kenap ninche ina ng'oki enye; keaku ena enkitanapata nadamuni ti atua iishoritin inyi pooki; ore ti atua iltung'ana le Israel meeta ninche enjung'ore. Amu ore ina rubata e tomon oo ltung'ana le Israel naitarasaki ninche Olaitoriani anaa olasar, aishoo nanu ile Lawi metaa enjung'ore; metaa atejo nanu ti alo ninche nchere metum enjung'ore ti atua iltung'ana loo siraeli.” Nejoki Olaitoriani Musa, “Ore ake sii, shomo tiaaki ile Lawi, ‘Ti niyaya too ltung'ana le Israel ina matua e tomon naishoo nanu intae te ninche pee eaku enjung'ore inyi nintokiki naa sii intae aaitayu olasar te ina aaisho Olaitoriani, ematua e tomon napukunye ematua e tomon. Naa keikenari ilo asar linyi anaa entapa o soit oituutishoreki aashu anaa enaisho naing'uaa enkironyet. Neaku intarasakiki sii intae Olaitoriani olasar oing'uaa nena matuan inyi e tomon, ning'amumu too ltung'ana le Israel. Naa ore te nena ninchosho ilo asar lo Laitoriani Aron ilo apolosani. Ore ti atua nena kishorot inyi pooki, entarasai pooki kishoroto naipirakinore Olaitoriani, ina naisul pooki, ninchooyoyo ina naisul pooki.’ Metaa tiaaki iyie ninche, ‘Ti nindipidipi aaishooi ilo asar, ina naisul, ore ina naleku neikenakini ile Lawi anaa entoki naing'uaa olkurroto oidong'ishoreki anaa entoki naingua enkironyet oo sabibu; nindim iyie ainosa te pooki wueji, iyie o enkaji ino, amu enkishoroto ino te nkaraki enkisiaayiare ino ti atua ilo ng'obor le ntumo. Niminap iyie eng'oki te nkinosata e ina, indipa iyie aishooi enaisul kake emisarkionie nena tokitin naasinya oo ltung'ana le Israel, pee miyeye ake.’ ” Nejoki Olaitoriani Musa o Aron, “Ena enkitanapata naitanapishe Olaitoriani. Tiaaki iltung'ana le Israel pee kiyaki enkashe nanyokie nemeeta eleyiata nemeeta entioto neitu ae kata eenikini enchata emurt. Nilo aisho ina ashe Eliesa olapolosani, neipang'ieki ninye aaya auluo nepuoi aayieng te dukuya ninye. Ore Eliesa olapolosani neya embata o sarge le ina ashe to lkimojino lenye, neisuaki embata e ilo sarge dukuya e ilo ng'obor le ntumo katitin naapishana. Ore ina ashe nepejori, te dukuya ninye, nepejori olchoni lenye, o nkiri enyena, o sarge lenye nepejori sii imoyok enyena; neya olapolosani nkeek o ltarakwai o mbenek e hisopo, o enkarasha nanyokie nenang'aki empolos eine nepejorieki ina ashe. Ore te siadi ina, neituku olapolosani ilkilani lenyena nebukoki kewan enkare, netum taa atijing'a ilng'oborri; kake keton ninye mesinya o metaa teipa. Ore ilo opejoo ina ashe neituku ilkilani lenyena te nkare neituku osesen lenye te nkare, neton ninye mesinya o metaa teipa. Ore oltung'ani osinya nesotu nkuruon e ina ashe nelo apik auluo ilngoborri e ewueji nemetii olduruk; neshumi ninche te nkaraki eumata oo ltung'ana le Israel te nkaraki enkare naitisinyishoreki, te nkitukuoroto oo ng'ok. Ore ilo oiturrur nkuruon e ina ashe neituku ilkarash lenyena neton ninye mesinya o metaa teipa. Naa keaku ena te nkaraki iltung'ana le Israel o te nkaraki ilo omoni otamanyishe ti atua ninche, enkitanapata ena oo nkatitin pooki. “Ore ilo oiseyie olmeneng'ani le likae tung'ani ake ninye, nesarkionu nkolong'i naapishana. Nchoo ninye eituku kewan te nkare te nkolong e uni o te nkolong e naapishana, pee etum taa atisinyayu; kake te nemeituku ninye kewan te nkolong e uni o te nkolong e naapishana, nemesinyayu ninye. Ore pooki ng'ae oiseyie olmeneng'ani, ilo sesen ake ninye lo ltung'ani otua, nemeituku kewan, neiduruku olng'obor lo Laitoriani, ore ilo tung'ani nedung'ori aaiwuang'ie ti atua Israel; enkaraki neitu eisuakini enkare enkitisinyata shumata ninye, keaku ninye mesinya eton olduruk lenye te shumata ninye. “Ena ninye enkitanapata te neye oltung'ani ti atua olng'obor: ore pooki ng'ae ojing'u atua olng'obor, o pooki ng'ae otii atua olng'obor neaku olemesinya nkolong'i naapishana. Ore pooki toki nang'a nemepising'a neiduruku. Ore pooki ng'ae ti ong'ata oiseyie ilo otasesekuanaki to lalem, aashu olmeneng'ani, aashu oloito lo ltung'ani, aashu enkurare neaku olemesinya nkolong'i naapishana. Ore te ilo lemesinya nchoo eyae embata oo nkuruon e ilo asar otapejoyioki loo ng'ok, o enkare naruko napiki empirbil; nelotu taa oltung'ani osinya aitayu mbenek e nchani naji hisopo, neitadoiki atua ina are, neisuaki shumata ilo ng'obor, o shumata imasaa pooki ilorikan o shumata lelo tung'ana ootii ine, o shumata ilo oiseyie oloito, aashu olotasesekuanaki, aashu olotua, aashu enkurare; ore ilo tung'ani osinya neisuaki ilo tung'ani lemesinya te nkolong e uni o te nkolong e naapishana, ore te nkolong e naapishana neitisiny ninye, neituku ninye ilkilani lenyena neituku kewan te nkare, ore pee eaku teipa nesinyayu ninye. “Kake ore ilo tung'ani lemesinya nemeituku kewan, nedung'ori ilo tung'ani aitung'uaa atua eumata, enkaraki naidurukie ewueji sinyati o Laitoriani; enkaraki neitu ebukokini enkare e enkitisinyata shumata ninye, mesinya ninye. Naa keaku enkitanapata oo nkatitin pooki te ninche. Ore ilo oisuaaya ina are naitisinyishoreki neituku ilkilani lenyena neaku mesinya o metaa teipa. Ore entoki pooki naba anaa enaiseyie oltung'ani lemesinya neaku enemesinya; ore pooki ng'ae oiseyie ina neaku oltung'ani le mesinya o metaa teipa.” Ore iltung'ana le Israel, ina umata pooki, nepuonu ina ong'ata e Sin, to lapa le dukuya, netoni lelo tung'ana te Kadesh; neye Miriam te ine, nenukari ninye te ine. Nemetii apa enkare naok ina umata; neiturrurro ninche maate aarare Musa nearare Aron. Neishankarrare lelo tung'ana Musa, nejoki, “Enaikash apa tenaa eikituata ina kata apa pee eye ilalashera lang te dukuya Olaitoriani. Kainyoo iyie pee iyaua ena umata o Laitoriani atua ena ongata, pee kipuonu aaye tene, iyiook o nkishu ang. Naa kainyoo pee ilepunye iyiook aitupuku te Misiri, ayau iyiook ene wueji torrono? Mme ewueji ene e nkurma, aashu ilng'abolo aashu isabibu aashu ilng'anayio ooji kukumanka; nemetii enkare naoki.” Nelo Musa o Aron aaing'uaa ine netii eumata aapuo kutukaji eilo ng'obor le ntumo, nebatata too nkomomi enye. Neliooyu enkitoo o Laitoriani te ninche, nejoki Olaitoriani Musa, “Iwa ina ng'udi, nilo aiturrur ina umata, iyie o Aron ilo alashe lino, nijoki ina dapidapoi te dukuya nkonyek enye meishoru enkare; neaku iyau iyie enkare naing'uaa atua endapidapoi te nkaraki ninche; nincho metooko ina umata o nkishu enye.” Neya Musa ina ng'udi te dukuya Olaitoriani, anaa enaitanapa Olaitoriani ninye. Neiturrur Musa o Aron ina umata te nebo te dukuya ina dapidapoi nejoki ninche, “Entoning taata, intae iloogolongu; Aikiyaki iyiook intae enkare naing'uaa ena dapidapoi?” Neilepie Musa enkaina enye aosh ina dapidapoi te ina ng'udi enye katitin are; nerukunye enkare te nkumoi, neok ina umata, o nkishu enye. Nejoki Olaitoriani Musa o Aron, “Ore enkaraki neitu intae kirukuruku nanu, pee kintisinyinyi nanu too nkonyek e kulo tung'ana le Israel, miyauu naa ena umata aaitijing atua ina kop naishoo ninche.” Nkariak e Meriba kuna, naa te ine eishankarrare iltung'ana le Israel Olaitoriani, neitodolu ninye esinyatisho enye te ninche. Eirriwayie apa Musa ilkiliku te Kadesh meshomo enetii olaiguanani le Edom, nejoki, “Nji ejo olalashe linyi Israel: iyiolo iyie enyamali pooki nikinoto iyiook: ena kata apa pee epuo loo papa Misiri nikibik iyiook te Misiri enkata naado; ore lelo le Misiri neitaas iyiook entorroni o loo papa; ore ake pee kinchiraki Olaitoriani, nening ninye oltoilo lang, neirriwaki iyiook olmalaika oilepunye iyiook aitupuku te Misiri, naa noolo iyiook ootii Kadesh, enkanasa natii olpolosie le nkop ino. Nchoo naa taata iyiook maima atua enkop ino. Mikiimaa iyiook inkurman aashu ilokerin loo sabibu, nimikiok enkare to lchorro; enkoitoi nalala o laiguanani kiim. Mikimbelekenya iyiook aaim enkalo e tatene aashu enkalo e kedienye, o metaba anaa nikimpang ti atua enkop ino.” Kake etiaka apa Edom ninye, “Miim iyie enkop ai, maalotu ake aarare to lalem.” Nejoki iltung'ana le Israel ninye, “Eikipuo iyiook aaim enkoitoi nalala; naa ti nikiok iyiook enkare ino, nanu o nkishu aainei, nalak nanu; nchooki ake duoo maimai too nkejek, metii ae toki.” Kake etejo apa ninye, “Mipuopuo intae aaim.” Nelotu Edom aarare ninche eeta iltung'ana kumok, o enjore nagol. Neaku etanya apa Edom eisho Isirael enkoitoi naaim te nkop enye, nerrinyo Isiraeli aaing'uaa ninye. Nepuo ninche aaing'uaa Kadesh, ore lelo tung'ana le Israel ina umata pooki, nepuonu oldoinyo le Hor. Nejoki Olaitoriani Musa o Aron to ldoinyo le Hor, to lpolosie le nkop e Edom, “Kelo Aron eneiturrurrore iltung'ana lenyena apa ootuata; amu mejing ninye atua ina kop naishoo nanu iltung'ana le Israel, amu etogolong'aka apa enkitanapata ai too nkariak e Meriba. Iwa Aron o Eliesa olayioni lenye niyau ninche enchumata oldoinyo le Hor; nioru Aron ikilani lenyena ninchopoki Eliesa olayioni lenye; nelo Aron eneiturrurrokino iltung'ana lenyena, naa keye ninye te ine.” Neas Musa anaa enaitanapa Olaitoriani, neilep ninche aapuo enchumata oldoinyo le Hor eing'orita ina umata pooki. Neitayu Musa lelo kilani le Aron, neishopoki Eliesa olayioni lenye; neye Aron te ine te nchumata o ldoinyo. Neitoki Musa o Eliesa aadou te ilo doinyo. Ore ake pee edol ina umata pooki aajo etua Aron neishiraki enkaji pooki e Israel Aron nkolong'i tomoni uni. Ore ake pee ening ilo Kanaani aiguanani le Arad apa omanya Negeb, nchere eletu Israel aaimu enkoitoi e Afarim, nearare ninye Israel, neibung kulikae lenye araya. Neinos Israel olmumai to Laitoriani, nejo, “Ti ninchoru iyie ele orere apik enkaina ai, nalo naa nanu aidaikie nkanas enye tukul.” Nening Olaitoriani oltoilo le Israel, neishooyo lelo le Kanaan; neidaikie Siraeli ninche o nkanas enye. Neaku keji ene wueji Horma. Nedumunye to ldoinyo le Hor neim enkoitoi Enaiposha Nanyokie, aapuo aamanaa te nkop e Edom; nesi iltung'ana te nkoitoi. Neiro ninche mbaa torrok ti alo Enkai o Musa. Neing'unyung'uny ninche ejo, “Kainyoo pee iyaua iyiook aitupuku te nkop e Misiri maetu aaye tene tiong'ota? Amu metii endaa nemetii enkare, neitirika iyiook ena daa nemeeta tipat.” Neirriu Olaitoriani ilasuriaa oopi atua iltung'ana, neony ninche iltung'ana, o metaa etuata iltung'ana kumok le Israel. Nepuonu iltung'ana enetii Musa, nejoki, “Kitaasa iyiook eng'oki, amu kiroro iyiook mbaa torrok ti alo Olaitoriani o tialo iyie; toomono Olaitoriani pee eiwuang'ie ninye ilasuriaa te iyiook.” Neaku etoomonoko Musa iltung'ana. Nejoki Olaitoriani Musa, “Ntobira olasurai opi nipik shumata eng'ape; ore ake pooki ng'ae oonyi, te neing'or ninye, nepok.” Neaku eitobirua Musa olasurai lo suyai nepik shumata e ng'ape; naa te nelo neony olasurai likae tung'ani, neing'or ninye ilo asurai lo suyai nepok. Nedumunye iltung'ana le Israel nepuo aaun ilng'oborri te Obot. Neitoki aadumunye te Obot nepuo aaun ilng'oborri te Iye-abarim, te ilo purkel oipirare Moab, te nkalo e nkilepunoto e nkolong. Nedumunye te ine aapuo, neun ilng'oborri to erata le Sared. Nedumunye te ine aapuo neun ilng'oborri te nkae shoto e Arnon, naa ninye natii ina ongata, olo abaiki olpolosie loo le Amori; amu ore apa Anon naa ninye olpolosie le Moab, te rishata e Moab o le Amori. Neaku etejoki apa te mbuku oo njorin o Laitoriani, “Waheb te Sufa, o erat le Arnon, o lelo ooshong'ishong le lelo erat oopuo aabaya entonata e Ari, nepuo o meikobo olpolosie le Moab.” Nepuo te ine o metabaiki Beeri, aa taa, olchorro apa laa ninye etiakinye Olaitoriani Musa, “Nturrurro iltung'ana te nebo, pee aisho nanu enkare.” Nerany apa Israel ele sinkolio: “Turukunye, na shorro! - Entaranyaki ninye - ena shorro apa natuturo ilkituaak, natoota ilooyanyiti loo ltung'ana, too rinkan lenye le nkitoo o too ng'udisin enye.” Neitoki aadumunye to lpurkel nepuo Matana. Nedumunye te Matana nepuo Nahaliel, nedumunye te Nahaliel nepuo Bamot, nedumunye te Bamot nepuo ilo erata otii enkop e Moab, enchumata e Pisga, ine nerumaki kop o lpurkel. Neitoki Israel airriwaki Sihon ilkiliku, ilo aiguanani le Amori, ejo, “Nchooki nanu maima atua enkop ino; mikimbelekenya iyiook aapuo olokeri aashu enkurma oo sabibu mikiok iyiook enkare enchorro; eikipuo iyiook aaim ina oitoi nalala o laiguanani, o metaba anaa nikimpang ti atua enkop ino.” Kake etanya Sihon eisho Israel meima atua enkop enye. Neiturrur ninye iltung'ana lenyena pooki te nebo, neipang alo aarare Israel to lpurkel, nebau Yahas, nearare Israel. Nesesekuan Israel ninye te nepi o lalem, neya enkop enye ebaiki Arnon o metabaiki Yabok, o meshomo abaiki ile Amori; amu Yaser apa olpolosie loo le Amori. Neya Israel nena anas pooki, nemany Israel nena anas pooki oo le Amori, te Heshbon, o nkang'itie enyena pooki kutiti. Amu Heshbon apa enkanasa e Sihon ilo aiguanani loo le Amori, laa ninye otaarare olaiguanani le dukuya le Moab, neya enkop pooki aitung'uaa ninye, o metabaiki Arnon. Neaku kejo ilaranyak loo nkatinin, “Wootu Heshbon, nchoo esheti ninye, nchoo enkanasa e Sihon metesheti aaitagol. Amu eipang'ua enkima te Heshbon, eipang'ua olng'ejep le nkima te nkanasa e Sihon, Eidaikie Ari e Moab, o lkituaak loo neeika e Arnon. Oi iyie, Moab! Ndaaitie lo tung'ana le Kemosh! Eitaa ninye ilayiok lenyena ilaisikak, neitaa ntoyie enyena iyararot, o laiguanani le Amori, oji Sihon. Eidaa eishoi enye te Heshbon, o metabaiki Dibon, kindaikie iyiook o metaba anaa nebaiki enkima Medeba.” Nemany apa Israel enkop oo le Amori. Neirriwaa Musa iltung'ana meshomo aaikitalan Yaser; neya ninche nkang'itie enye kutiti, neiwuang'ie lelo apa le Amori oomanya ine. Neitoki ninche aaibelekenya neilep aaim enkoitoi e Bashan; ore Oog olaiguanani le Bashan nelotu aarare ninche, ninye o ltung'ana lenyena pooki, pee epuo aaitayu olarrabal te Edrei. Kake etiaka Olaitoriani Musa, “Miureyu iyie ninye; amu aishorua nanu ninye apik atua nkaik inono, o ltung'ana lenyena pooki, o enkop enye; naa ilo iyie aitaas ninye anaa enintaasa Sihon olaiguanani le Amori, apa omanya Heshbon.” Neaku etasesekuana apa ninche ninye, o layiok lenyena, o ltung'ana lenyena pooki, o metaba anaa neaku meetae obo ataa olaishirani otelekua te ninye; neya ninche ina kop aaitaa enenye. Neitoki iltung'ana le Israel aadumunye, nepuo aaun ilng'oborri te ina kop naisiaja e Moab, te lido kekun le Yordan te mbata Yeriko. Netodua apa Balak olayioni le Sipor nena pooki naaitaasa Isiraeli ile Amori. Neirut oleng Moab te nkaraki iltung'ana, amu eikumok apa oleng; eidimua apa Moab enkuretisho eure iltung'ana le Israel. Nejoki Moab lelo payiani le Midian, “Kemeju taata ele orora pooki toki namanita iyiook, anaa enameju olkiteng nkujit e ong'ata.” Neaku ore apa Balak olayioni le Sipor, laa ninye apa olaiguanani le Moab te ina kata, neirriwaki Balak ilkiliku Balaam olayioni le Beor te Peter, apa aa ninye nataaniki Olkeju, ti atua enkop e Amawa pee eipotu ninye, ajoki, “Ng'ura, eileputua olorere te Misiri; oitoipo oriong olchoni le nkop, naaetuo aatalakinore te manyisho. Wou naa taata, tediaa kulo tung'ana enkaraki nanu, amu eimagil ninche te nanu; abaiki namir nanu ninche naidurrie nanu ninche tena kop; amu ayiolo nanu ajo ore ilo limayian iyie nemayiana ore ilo lidek netediaki.” Nepuo ilpayiani le Moab o lpayiani le Midian eibung'ita mpisai naalakieki enaibon too nkaik enye; nepuonu ninche enetii Balaam, neisho ninye olkilikuai le Balak. Nejoki ninye ninche, “Erraga ene ena kewarie, amu kayaki nanu intae olomoni anaa enaairorie nanu Olaitoriani;” neaku etotoni apa lelo kituaak le Moab te nebo Balaam. Nelotu Enkai enetii Balaam nejoki, “Kakua tung'ana kulo ootii te nebo iyie?” Nejoki Balaam Enkai, “Balak olayioni le Sipor, olaiguanani le Moab ninye laairriwaka ejo, ‘Ng'ura eileputua olorere te Misiri neiput oriong olchoni le nkop; wou naa taata tediaa te nkaraki nanu; abaiki naarare nanu ninche naidurrie ninche.’ ” Nejoki Enkai Balam, “Milo iyie te nebo ninche; midek iyie kulo tung'ana, amu kemayiana ninche.” Neinyototo Balam tadekenya, nejoki lelo kituaak le Balak, “Enchom enkop inyi, amu etanya Olaitoriani alo te nebo intae.” Neaku etudumunye lelo kituaak le Moab nepuo enetii Balak, nejoki. “Etanya Balaam elotu te nebo iyiook.” Neigil ake Balak airriwaa ilkituaak, iltung'ana kumok neyanyit alang lelo le dukuya. Nepuonu ninche enetii Balaam nejoki ninye, “Nji ejo Balak olayioni le Sipor: ‘Mincho kimbooyo ae toki eitu ilotu enatii; amu esipa kaaisho nanu iyie enkanyit kitok, ore entoki pooki naba anaa enikijoki iyie naa kaas; wou tediaa ele orere te nkaraki nanu.’ ” Kake etawala apa Balaam ajoki lelo sinkan le Balak, “Ore hoo naaji ninye tenaa kaaisho Balak enkaji enye ebore enkosholai o sahabu, maidim nanu ashomo atogiroi enkitanapata o Laitoriani Enkai ai, aitodorropu aasho aitulus. Atoomono naa intae, enyaaki erraga ene ena kewarie, pee atum atayiolo enaaitoki Olaitoriani ajoki nanu.” Nelotu Enkai enetii Balaam kewarie nejoki ninye, “Tenaa eikietuo lelo tung'ana aaipot iyie, inyo, shomo te nebo ninche; kake ina ake naajoki iyie, ninye taasa.” Neaku etudumunye apa Balaam tadekenya, neirot esikiria enye, nelo te nebo lelo kituaak le Moab. Kake eyupuyupo engoro e Nkai te nkaraki nashomo ninye; nelo olmalaika lo Laitoriani aitashe te nkoitoi anaa olmangatinta lenye. Nekedito apa Balaam osikiria, netii isinkan lenyena oare te nebo ninye. Nedol ilo sikiria olmalaika lo Laitoriani eitashe te nkoitoi eeta enchutati olalem te nkaina enye; neibelekenya ina sikiria apaash enkoitoi, nelo ong'ata; neosh Balaam ina sikiria aboiniki enkoitoi. Neitoki ilo malaika lo Laitoriani alo aitashe to lgos le nkoitoi napirik, terishata oo sabibu, netii ake esuntai pooki shoto. Ore ake pee edol ina sikiria ilo malaika lo Laitoriani, nelo arepaa esuntai, nepudaki enkeju e Balaam esuntai; neitoki ninye aosh. Neitoki ilo malaika lo Laitoriani aigut alo dukuya, nelo aitashe te wueji ronkai te nkoitoi, nemetii ewueji neibelekenyakino te nkalo e tatene aashu te nkalo e kedienye. Ore ake pee edol ina sikiria olmalaika lo Laitoriani, neirrag te nkop ti abori Balaam; neyupuyup engoro e Balaam, neosh ninye ina sikiria te ng'udi enye. Nebol Olaitoriani enkutuk e ina sikiria, nejoki ninye Balaam, “Kainyoo nanu aaitaasa iyie, pee kitoosho iyie nanu katitin uni?” Nejoki Balaam ina sikiria, “Enkaraki nikigira iyie aiguranie nanu. Enyor napaji naa kaata olalem, pee aatum atara iyie tua.” Nejoki ina sikiria Balaam, “Emara nanu esikiria ino, naa ninye intakedo te nkishui ino pooki o metabaiki ena olong? Katamoo nanu aaitaas iyie ena?” Nejoki Balaam, “A-a.” Nebol Olaitoriani nkonyek e Balaam, nedol ninye ilo malaika lo Laitoriani eitashe te nkoitoi eeta enchutati o lalem te nkaina enye; neirrug Balaam endukuya enye, nebatata te nkomom. Nejoki olmalaika lo Laitoriani ninye, “Kainyoo iyie pee itoosho esikiria ino kuna katitin uni? Ng'ura, aewuo nanu pee aaibooyo amu ore enkoitoi ino naa kepaashare enkoitoi ai; naatoduaa nanu ena sikiria, naaibelekenya apaash nanu kuna katitin pokira uni. Te neme kaaibelekenye ninye apaash, esipa, anaata aatara iyie tua napal ninye eishu.” Neitoki Balaam ajoki ilo malaika lo Laitoriani, “Ataasa nanu eng'oki, amu eitu nanu ayiolou ajo itii enkoitoi pee kimbooyo nanu. Ore naa taata, tenaa embae torrono ena too nkonyek inono, karrinyo nanu alo.” Nejoki ilo malaika lo Laitoriani Balaam, “Shomo iyie te nebo kulo tung'ana; kake ilo rorei ake laaliki ninye shomo iroro.” Neaku eshomo apa Balaam te nebo lelo kituaak le Balak. Ore ake pee ening Balak nchere eewuo Balaam, neipang ninye alo anang'are ninye te nkanasa e Moab, te ilo polosie oitayu olkeju te Arnon, te ilo polosie kewan. Nejoki Balak Balaam, “Keitu nanu airriu ilkiliku pee kimpoti iyie? Kainyoo pee eitu iyie ilotu enatii? Eimaaidim nanu ayanyita iyie?” Nejoki Balaam Balak, “Oi, aewuo nanu enitii? Keton nanu aata ae golon nairorie ai toki? Ilo rorei opik Enkai enkutuk ai, ninye nanu airo.” Nelo Balaam te nebo Balak, nepuonu Kariat-husot. Nepolos Balak ilmong'i o ntare, neyaki Balaam o lelo kituaak ootii te nebo ninye. Ore pee ekenyu nerik Balak Balaam o metabaiki Bamotbaal; ore te ine nedol ninye emurte nataaniki oo ltung'ana. Neitoki Balaam ajoki Balak, “Teshetakaki nanu ilperereni oopishana lo lasar tene, nikincho nanu iloing'ok oopishana o lmeregeshi oopishana.” Neas Balak anaa ina natejo Balaam; ore Balak o Balaam neishoru ake to lperere lo lasar oloing'oni o lmeregesh. Neitoki Balaam ajoki Balak, “Ntasho te mbata o lasar lino opejori, mashomo nanu, eidimayu naalotu nanu Olaitoriani atumore; naa ore pooki naba anaa enaaitodol nanu naaliki iyie.” Neilep ninye alo ewueji neisiaja neika. Netumore Enkai Balaam; nejoki Balaam ninye, “Aitobira ilperereni lo lasar oopishana, naishorua nanu te nchumata e pooki perere, oloing'oni o lmeregesh.” Nepik Olaitoriani ororei enkutuk e Balaam, nejoki ninye, “Torrinyoyu iyie shomo enetii Balak, naa nji shomo tiaki.” Nerrinyo ninye alo enetii ninye, naa ng'ura, eitashe ninye te nebo ilkituaak pooki le Moab te mbata e ilo asar lenye opejori. Neraposhoki Balaam ajo, “Te Aram aaipoto nanu Balak, ilo aiguanani le Moab oing'uaa ildoinyio lo loo saen: ‘Wou tediaa Yakobo enkaraki nanu, naa wou ilepilepaki Israel!’ Kaji nanu aiko te nadek ilo leitu edek Enkai? Kaji nanu aiko te nailepilepaki ilo leitu eilepilepaki Enkai? Amu ore too nchumat oo ldoinyo nadol nanu ninye, te nchumata oo ndoinyo aing'or nanu ninye; ng'ura, olorere ninche ootoni o openy, nemeitushulaki ninche ate kulikae oreren! Kaing'ae naidim aikena nkera e Yakobo naaba anaa enterit, aashu ematua e ong'uan e Israel? Ntasho matua nanu keeya o ltung'ani supat, naa nchoo enkiting'oto ai etiu anaa enenye!” Nejoki Balak Balaam, “Kainyoo ena nikintaasa iyie nanu? Aayawua iyie pee ilotu adek ilmang'ati laainei, naa ng'ura, meeta ae nitaasa eitamayiana ake.” Newal ninye ajo, “Eimaning nanu nairo ina natipika Olaitoriani atua enkutuk ai?” Nejoki Balak ninye, “Wou te nebo nanu maape dikai wueji, nindimie iyie atodolie ninche; idol iyie emurte nabayie te ninche, kake midol ninche pooki; pee itum iyie atediaa ninche enkaraki nanu te ine.” Nerik ninye ong'ata e Sifim, o meitabaiki enchumata e Pisga, neshet ilperereni oopishana lo lasar neishoru ake oloing'oni o lmeregesh to lperere ake pooki lo lasar. Nejoki Balaam Balak, “Ntasho tene te mbata o lasar lino opejori, mashomo atumore Olaitoriani te idie.” Netumore Olaitoriani Balaam, nepik ororei enkutuk enye, nejo ninye, “Torrinyokinoyu Balak, naa nji shomo tiaki.” Nelo enetii ninye, naa ng'ura, eitashe ninye te mbata o lasar lenye opejori, o lkituaak le Moab te nebo ninye. Nejoki Balak ninye, “Kainyoo etejo Olaitoriani?” Neitoki Balaam araposhoki, nejo, “Inyo, Balak, toning'o; toning'oki nanu ara Sipor: Mme oltung'ani Enkai, eji metaa kelejisho, aashu enkerai e tung'ani eji metaa keirridu. Amaa, keiro ninye nemeitabaya? Aashu kelimu ninye nemeas? Ng'ura, atang'amua nanu enkitanapata pee amayianisho; etamayianishe ninye, nemalak nanu. Eitu ninye eing'or olbuket le Yakobo; neitu ninye edol entorroni te Israel. Etii Olaitoriani Enkai enye te nebo ninche, ore embuakunoto o laiguanani netii te nebo ninche. Eyawua Enkai ninche aitung'uaa Misiri, netiu apa ninche anaa loata imouarak olosokuan. Meetae eushei ti alo Yakobo, metii esakut ti alo Israel; kepuoi taata aajo ti alo Yakobo o Israel, ‘Kaa etaasa Enkai!’ Ng'ura, ele orere! Eilepa anaa elipong o lng'atuny, edumunye anaa olng'atuny odumunye; nemeirrag ninye o metaba anaa neinos ina ng'ues narreshito, neok osarge le ina natasesekuanaki.” Nejoki Balak Balaam, “Midek ninche katukul, nimimayian ninche katukul.” Kake etawalikia Balaam Balak ajoki, “Keitu nanu aajoki iyie inchere, ‘Ore pooki naajoki Olaitoriani, naa ina ake aas?’ ” Nejoki Balak Balaam, “Wou taata maatoriko nanu dikai wueji; amu ebaiki neitiship ine Enkai pee idek iyie ninche te nkaraki nanu.” Nerik Balak Balaam enchumata o ldoinyo le Peor ine netalita olpurkel. Nejoki Balaam Balak, “Teshetakaki nanu tene ilperereni oopishana lo lasar, nikincho nanu tene iloing'ok oopishana o lmeregeshi oopishana.” Neas Balak anaa enatiaka Balaam, neishooyo ninye oloing'oni o lmeregesh te pooki perere lo lasar. Ore ake pee edol Balaam nchere keitiship Olaitoriani te nemayian ninye Israel, neitu ninye elo, anaa te kulie katitin, aing'oru ntaleng'o, kake eipirie ninye enkomom enye olpurkel. Neshumu Balaam nkonyek enyena, nedol Israel etii ilng'oborri, anaa loshon. Nelotu Enkiyang'et e Nkai shumata ninye, neraposhoki ninye, nejo, “Irorei le Balaam olayioni le Beor, irorei le ilo tung'ani otaboloki nkong'u enye, irorei le ilo oning irorei le Nkai, ilo odol enduata o Laidimani, otabatate, kake meimulumul nkonyek enyena: kebaa enkishiaa oo lng'oborri linono, iyie Yakobo, o emanyisho ino, iyie Israel! Eikununo anaa ierat oopuo eniado, anaa nkurman naatii embata e wuaso, enyaanyukie o sugoroi otuno Olaitoriani, eikununo anaa iltarakua ootii embata e nkare. Kedooyo enkare too ltooi lenyena, ore olantererai lenye neaku nkariak kumok etii, ore olaiguanani lenye naa ninye olusoo alang Agag, ore enkitoo enye naa kebul. Eyawua Enkai ninye aitupuku te Misiri; netiu ninye anaa oloata mouarak o losokuan, kelo ninye aijoo lelo oshon mang'ati lenyena, negil iloik lenye aitaa mbelibelat, neng'or ninche too mbaa enyena. Eirraga ninye anaa olng'atuny, naa amaa, amu eikununo anaa elipong o lng'atuny, aing'ae olo ainyeyie ninye? Emayiana pooki ng'ae likimayian iyie, nediaa pooki ng'ae likidek iyie.” Neyupuyup engoro e Balak ti alo Balaam, neosh ninye nkaik, neitoki Balak ajoki Balaam, “Aaipotuo nanu iyie pee ilotu adek ilmang'ati laainei, naa ng'ura, itamayiana iyie ninche kuna katitin pokira uni. Ore naa taata isika shomo ewueji ino; atejo apa nanu, ‘Kaanyanyit iyie,’ kake kimboo Olaitoriani amitiki enkanyit.” Nejoki Balaam Balak, “Keitu apa nanu ajoki lelo kiliku linono likirriwaka nanu, ‘Tenaa napaji ninye kaaisho Balak enkaji enye ebore enkosholai o sahabu, nemaidim ake ashomo atapaasha ororei lo Laitoriani, aas esidai aashu entorrono te yieunoto ai makewan, ore ina najo Olaitoriani naa ina nanu airo?’ “Ore naa, ng'ura, kalo nanu enetii iltung'ana laainei; wou, pee aaliki nanu enepuo kulo tung'ana aaitaas iltung'ana linyi, too nkolong'i e siadi.” Neitoki ninye araposhoki, nejo, “Irorei le Balaam olayioni le Beor, irorei lo ltung'ani otaboloki enkong'u enye, irorei le ilo oning irorei le Nkai, neyiolo eng'eno e Ilo otii shumata Aisul ilo odol enduata o Laidimani, ilo obatata, kake eitu eimulumul nkonyek enyena. Adolita nanu ninye, kake mme tena kata; adolita ninye, kake mme taana; eipang'ua olakira ti atua Yakobo, naa keilepu eng'udi enkitoo te Israel; kedany ninye olpura le nkomom le Moab. Negiligil ilayiok pooki le Sheti. Kepuoi aaya Edom, ore Seir, ilmang'ati lenyena naa kepuoi aaya, eitobirari ninye Israel aisulu, Te Yakobo easisho engolon e nkitoo, ore lelo aishirak too nkanas neidaikieki!” Neitoki ninye aing'or Amalek, neraposhoki ajo, “Amalek apa olayioni le dukuya loo loshon, kake ore te siadi naa keidaikieki.” Neitoki aing'or ile Kain, neraposhoki, nejo, “Kegol neserian ina manyisho ino, ore enkaji netipikaki enchumata endapidapoi; Kake ore ake eyia, keidaikieki Kain. Kenkata kenya nabaa kiyaita Ashur aaraya?” Neitoki araposhoki ajo, “Amaa, kaing'ae kenya elekuni te neas Enkai ena? Kake kepuonu imelin naaing'uaa Kitim, naa kepuonu aaisilisil Ashur o Eber; kake kelo ake sii ninye aidak.” Neitoki Balaam adumunye nelo ewueji enye; nelo sii Balak te nkoitoi enye. Ore apa ina kata emanya Israel Shitim neiteru iltung'ana aaiborrie onyek too ntoyie e Moab. Ore kuna ng'oruo neitoomon iltung'ana too lasarri loo nkaitin enye, neinos iltung'ana, neirrugokino inkaitin enye. Neaku eteenikia Israel kewan Baal e Peor. Neyupuyup engoro o Laitoriani ti alo Israel; nejoki Olaitoriani Musa, “Iwa lelo arikok pooki loo ltung'ana, ililio ninche to ldalati te dukuya Olaitoriani, pee etum ina goro napi o Laitoriani atapaasha Israel.” Nejoki Musa lelo arishak le Israel, “Nchoo ake pooki ng'ae te intae esesekuan oltung'ani lenye oteenikia kewan esinkaisho e Baal e Peor.” Ng'ura, ore oltung'ani obo loo ltung'ana le Israel, nelotu ayau enkitok e Midian atua olmarei lenye, too nkonyek e Musa o too nkonyek e ina umata pooki oo ltung'ana le Israel ina kata apa eishirita ninche te kutukaji e ilo ng'obor le ntumo. Ore ake pee edol Finehas olayioni le Eliesa, ilo ayioni le Aron olapolosani, nedumunye ninye alo aing'uaa ilo turrur, nedumu empere te nkaina enye nelo asujaa ilo tung'ani le Israel o meshomo olgilata li atua, nerem pokira are, ilo tung'ani le Israel o ina kitok, aipang'ie empere to sesen lenye. Ina taa pee eiwuang'ieki olmeitai too ltung'ana le Israel. Ore ake eyia, lelo apa ootuata to lmeitai naa nkalifuni tikitam o ong'uan. Neitoki Olaitoriani ajoki Musa, “Ore Finehas, olayioni le Eliesa, olayioni le Aron olapolosani, neiwuang'ie engoro ai too laiguanani nchere eeta ninye olom lai ti atua ninche, metaa eitu nanu amut iltung'ana le Israel to lom lai. Metaa tejo, ‘Ng'ura, kaisho nanu ninye osotua lai le seriani; naa keaku te ninye o te ishoi enye, te siadi ninye, ilo ning'o lo sotua le mpolosare e anaake, enkaraki naata ninye olom te nkaraki Enkai enye, neitobira olning'o lo sotua too ltung'ana le Israel!’ ” Ore apa enkarna e ilo tung'ani le Israel otasesekuanaki te nebo enkitok e Midian, naa Simri olayioni le Salu, laa endukuya enkaji oo loo menye le nkaji oo le Simeon. Ore apa enkarna e ina kitok e Midian natasesekuanaki naa Kosbi entito e Suri, naa ninye apa endukuya o lorere le nkaji oo loo e menye te Midian. Nejoki Olaitoriani Musa, “Ntanyamala ile Midian, niosh aar ninche; amu kintanyamala ninche iyie te nkeleekisho enye, amu ninye etelejie intae te ina bae e Peor, o te ina bae e Kosbi, ina tito o lkitok le Midian, ina anashe enye apa nataraki metua te nkolong o lmeitai te mbae e Peor.” Ore etulusoyie ilo meitai nejoki Olaitoriani Musa o Eliesa olayioni le Aron olapolosani, “Enkena ina umata pooki, oo ltung'ana le Israel, ebaiki ilarin tikitam neilep, too nkajijik oo loo menye, pooki ti atua Siraeli ooidim aashom enjore.” Ore Musa o Eliesa ilo apolosani neirorie ninche too nkisiajat e Moab te mbata o lkeju le Yordan te Yeriko, ejo, “Enkena iltung'ana, ebaiki ilarin tikitam neilep,” anaa enaitanapa Olaitoriani Musa. Ore lelo tung'ana le Israel ooetuo aaipang'u te nkop e Misiri, naa: Ruben ilo kikau le Israel; ilayiok le Ruben, ile Hanok, ilo marei loo le Hanok; le Palu, olmarei loo le Palu; ile Hesron, olmarei loo le Hesron; ile Karmi, olmarei loo le Karmi. Kulo ninche ilmareita loo le Ruben; ore esiana enye naa nkalifuni artam o okuni o iip naapishana o tomoni uni. Ore ilayiok le Palu naa: Eliab. Ore ilayiok le Eliab naa: Nemuel, Datan o Abiram. Kulo apa, Datan o Abiram etegeluaki te umata, ootekeshare Musa o Aron to lturrur le Kora, ina kata apa pee ekeshare ninche Olaitoriani, neng'a enkop enkutuk enye neijoo ninche te nebo Kora, ore ake eye ilo turrur, ore ake pee emut enkima iltung'ana iip are o onom, neaku ninche enkikoo. Ore ake etiu ina, eitu eye ilayiok le Kora. Ilayiok le Simeon te risioroto oo lmareita lenye: ile Nemuel, olmarei loo le Nemuel; ile Yamin, olmarei loo le Yamin, ile Yakin, olmarei loo le Yakin; ile Sera, olmarei loo le Sera; ile Shaul, olmarei loo le Shaul. Kulo ninche ilmareita loo le Simeon, nkalifuni tikitam o are o iip o are. Ilayiok le Gad to risioroto oo lmareita lenye: ile Sefon, oo lmarei loo le Sefon, ile Hagi, olmarei loo le Hagi, ile Shuni, olmarei loo le Shuni; ile Osini, olmarei loo le Osini, ile Eri, olmarei loo le Eri; ile Arod, olmarei loo le Arod; ile Areli, olmarei loo le Areli. Kulo ninche ilmareita loo layiok le Gad, te risioroto e siana enye, nkalifuni artam o iip imiet. Ore ilayiok le Yuda naa Eri o Onan; netuata apa Eri o Onan te nkop e Kanaan. Ore ilayiok le Yuda te risioroto oo lmareita lenye naa: ile Shela, olmarei loo le Shela; ile Peres, olmarei loo le Peres, ile Sera, olmarei loo le Sera. Ore ilayiok le Peres naa: ile Hesron, olmarei loo le Hesron; ile Hamul, olmarei loo le Hamul. Kulo apa ninche ilmareita le Yuda te risioroto e siana enye, nkalifuni ntomoni naapishana o ile o iip imiet. Ilayiok le Isaakar te risioroto oo lmareita lenye: ile Tola, olmarei loo le Tola; ile Puni, olmarei loo le Puni; ile Yashub, olmarei loo le Yashub; ile Shimron, olmarei loo le Shimron. Kulo apa ninche ilmareita le Isaakar te risioroto e siana enye, nkalifuni ntomoni ile o ong'uan o iip uni. Ilayiok le Sebulon te risioroto oo lmareita lenye: ile Sered, olmarei loo le Sered, ile Elon, olmarei loo le Elon; ile Yaleel, olmarei loo le Yaleel. Kulo ninche ilmareita loo le Sebulon te risioroto e siana enye, nkalifuni ntomoni ile o iip imiet. Ilayiok le Yosef te risioroto oo lmareita lenye: Manase o Efraim. Ilayiok le Manase: ile Makir, olmarei loo le Makir, naa Makir apa ninye menye le Gilead. Ile Gilead, olmarei loo le Gilead. Kulo ninche ilayiok le Gilead: Ileseri; ile Heler, olmarei loo le Heler, ile Helek o lmarei loo le Helek, ile Asiriel, olmarei loo le Asiriel; o le Shekem, olmarei loo le Shekem, o le Shemida, olmarei loo le Shemida; o le Heper, olmarei loo le Heper. Ore apa Selofehad olayioni le Heper meeta ilayiok, kake keeta ntoyie; ore nkarn oo ntoyie e Selofehad naa Mahala, o Noa, o Hogla, O Milka, o Tirsa. Kulo ninche ilmareita loo le Manase, ore esiana enye naa nkalifuni onom o oare o iip naapishana. Kulo ninche ilayiok le Efraim te risioroto oo lmareita lenye; ile Shutela, olmarei loo le Shutela; ile Bekeri, olmarei loo le Bekeri; ile Tahani; olmarei loo le Tahani. Naa kulo ninche ilayiok le Shutela; ile Erani, olmarei loo le Erani. Kulo ninche ilmareita loo layiok le Efraim te risioroto e siana enye, nkalifuni tomoni uni oare o iip imiet. Kulo ninche ilayiok le Yosef te risioroto oo lmareita lenye. Ilayiok le Benchamen te risioroto oo lmareita lenye: ile Bela; ile Ashebel, olmarei loo le Ashbel; ile Ahiram, olmareita loo le Ahiram; ile Shefufam, olmarei loo le Shefufam; ile Hufam, olmareita loo le Hufam. Ore apa ilayiok le Bela naa Ardi o Naaman: ile Ardi, olmareita loo le Ardi; ile Naaman, olmarei loo le Naaman. Kulo ninche ilayiok le Benchamen te risioroto oo lmareita lenye; ore esiana enye naa nkalifuni artam o imiet o iip ile. Kulo ninche ilayiok le Dan te risioroto oo lmareita lenye: ile Shuham, olmarei loo le Shuham. Kulo ninche ilmareita le Dan te risioroto oo lmareita lenye. Ore ilmareita pooki loo le Shuham, te risioroto e siana enye, naa nkalifuni ntomoni ile o ong'uan o iip ong'uan. Ilayiok le Asheri te risioroto oo lmareita lenye: ile Imna, olmarei loo le Imna; ile Ishfi; olmarei loo le Ishfi; ile Beria, olmarei loo le Beria. Ilayiok le Beria: ile Heberi, olmarei loo le Heberi; ile Malkiel, olmarei loo le Malkiel. Ore enkarna e ntito e Asheri naa Sera. Kulo ninche ilmareita loo layiok le Asheri te risioroto e siana enye nkalifuni onom o okuni o iip ong'uan. Ilayiok le Naftali te risioroto oo lmareita lenye: ile Yaseel, olmarei loo le Yaseel; ile Guni, olmarei loo le Guni; ile Yeser, olmarei loo le Yeser; ile Shilem, olmarei loo le Shilem. Kulo ninche ilmareita le Naftali te risioroto oo lmareita lenye; ore esiana enye naa nkalifuni artam o imiet o iip ong'uan. Ena apa esiana oo ltung'ana le Israel, nkalifuni iip ile o obo o iip naapishana o tomoni uni. Nejoki Olaitoriani Musa; “Keorikini kulo tung'ana enkop pee eaku enjung'ore, te risioroto e siana oo nkarn. Ore olosho sapuk nchoo enjung'ore sapuk, ore olosho oti nchoo enjung'ore kiti; ore pooki osho neishori ake enjung'ore enye te risioroto e siana enye. Kake keoshokini ina kop enkukuo; te risioroto oo nkarn oo loshon loo loo menye enjung ninche. Keori ina jung'ore enye te risioroto e nkukuo to losho sapuk o to loti.” Kulo ninche ile Lawi anaa enaikenaki te risioroto oo lmareita lenye: ile Gershon, olmarei loo le Gershon; ile Kohat, olmarei loo le Kohat; ile Merari, olmarei loo le Merari. Kulo ninche ilmareita le Lawi: olmarei loo le Libni, olmarei loo le Hebron, olmarei loo le Mala, olmarei loo le Mushi, olmarei loo le Kora. Naa Kohat apa menye le Amram. Ore apa enkitok e Amram naa keji Yokebed, entito e Lawi, apa natoikioki Lawi te Misiri; neiki ninye Amram Aron o Musa o Miriam enkanashe enye. Ore to lmarei le Aron neini Nadab, o Abihu, o Eliesa o Itamar. Kake etua apa Nadab o Abihu ina kata apa pee eitarasaki enkima nemesinya Olaitoriani. Ore apa lelo ooikenaki te ninche naa nkalifuni tikitam o okuni, pooki lee lo lari obo neilep; amu eitu apa eikeni ninche te nebo iltung'ana le Israel, amu meetae apa enjung'ore naishooki ninche te nebo iltung'ana le Israel. Kulo apa ninche lelo ooikena Musa o Eliesa ilo apolosani, laa ninche esiana oo ltung'ana le Israel too nkisiajat e Moab te mbata olkeju le Yordan te Yeriko. Kake ore ti atua kulo metii hoo oltung'ani oikena Musa aashu Aron ilo apolosani, apa oikena iltung'ana le Israel ti ong'ata e Sinai. Amu etiaka Olaitoriani ninche, “Kepuo ninche aaye tiong'ota.” Eitu apa eleku oltung'ani te ninche, Kaleb ake olayioni le Yefune o Yoshua olayioni le Nuni. Neitoki aanyiku nena toyie e Selofehad olayioni le Hefer, olayioni le Gilead, olayioni le Makir, olayioni le Manase, olayioni le Yosef. Ore apa nkarn e nena toyie enyena naa: Mahala, o Noa, o Hogla, o Milka, o Tirsa. Neitashe ninche te dukuya Musa o Eliesa ilo apolosani, o te dukuya lelo arikok o ina umata, te kutukaji e ilo ng'obor le ntumo, ejo, “Etua apa papa lang tiong'ota; metii apa ninye ina umata, e lelo ooiturrurrote aapaashare Olaitoriani te ncholuek e Kora, kake etua te nkaraki eng'oki enye makewan; nemeeta apa layiok. Kainyoo naa pee eiwuang'ieki enkarna e papa lang to lmarei lenye, enkaraki nemeeta olayioni? Nchoo iyiook erubata ti atua ilalashera le papa.” Neyau Musa ilo omoni lenye dukuya Olaitoriani. Nejoki Olaitoriani Musa, “Etisipa nena toyie e Selofehad; nchoo ninche erubata e njung'ore ti atua ilalashera le menye, nincho ina jung'ore e menye lenye meshomo aaku enenye, Nijoki iyie iltung'ana le Israel, ‘Te neye oltung'ani, nemeeta olayioni, nincho enjung'ore enye meshomo aaku ene ntito enye. Naa te nemeeta entito, nincho enjung'ore enye eaku enoo lalashera lenyena. Naa te nemeeta lalashera, nincho naa enjung'ore enye ilalashera le menye. Naa te nemeeta menye lalashera nincho naa enjung'ore enye oltung'ani lenye, laa ninye onyikare olmarei lenye, pee eya ninye. Naa keaku ena too ltung'ana le Israel enkitanapata o enkikoo, anaa enaitanapa Olaitoriani Musa.’ ” Nejoki Olaitoriani Musa, “Ilepa shomo enchumata ele doinyo le Abarim, pee idol ena kop naishoo nanu iltung'ana le Israel. Naa ore ake pee indip atoduaa ninye, nintoki sii iyie alo eneiturrure iltung'ana linono apa ootuata anaa apa enashomo olalashe lino Aron, enkaraki nitogolong'aka ororei lai ti ong'ata e Sin, ina kata apa eing'unyung'uny eumata maayanyit aaitisiny nanu te nena ariak apa naatii dukuya nkonyek enye. (Nkariak kuna e Meriba e Kadesh tiong'ata e Sin.) Nejoki Musa Olaitoriani, Nchoo Olaitoriani, Enkai oo nkiyang'eta e pooki naaishu, egelu oltung'ani oitasheiki ena umata, oipang alo dukuya ninche, nejing'u alotu te dukuya ninche, orikoo ninche aipang'ie neriku ninche aitijing'u; pee metiu eumata o Laitoriani anaa nkerra nemeeta olchekut.” Nejoki Olaitoriani Musa, “Iwa Yoshua olayioni le Nuni, ilo tung'ani otii enkiyang'et atua ninye, ninteleiki nkaik shumata ninye; nchoo ninye meitasho te dukuya Eliesa ilo apolosani o ina umata pooki, nintanap aisho enkitoo te dukuya ninche. Nchopoki ninye embata e nkitoria ino, pee etum eumata pooki oo ltung'ana le Israel aatoning. Naa keitashe ninye te dukuya Eliesa ilo apolosani, laa ninye oikilikuanisho te nkaraki ninye, te nkiguana e Urim te dukuya Olaitoriani; to rorei lenye eipang ninche aapuo naa to rorei lenye ninche ejin'u atua, ninye o ltung'ana pooki le Israel ootii te nebo ninye, ina umata pooki.” Neas Musa anaa enaitanapa Olaitoriani; neya ninye Yoshua neitasheyie ninye te dukuya Eliesa ilo apolosani, o ina umata pooki, neiteleiki ninye nkaik enyena shumata ninye, neitanap ninye aisho enkitoo anaa enatuutua Olaitoriani aimunye Musa. Nejoki Olaitoriani Musa, “Ntanapa iltung'ana le Israel, tiaaki ninche, ‘Ore olasar lai, endaa ai too lasarri laainei le nkima, esong'ouna ai narropil, embung'a pee kintarasakiki nanu te rishata enye.’ Naa tiaaki iyie ninche, Olasar le nkima ele linchosho intae Olaitoriani: isitiman oare le kerra lo lari obo, lemeeta entibili, anaake, pee eaku olasar loo nkolong'i pooki. Ore olkuo obo nipolososo tadekenya, ore olikae kuo nipolososo teipa; ore ematua e tomon e efa e ntapa napuyiapui nintayuyu pee eaku olasar le ntapa, naipurjaki te matua e ong'uan e hini e ilata naidong'oki. Olasar ele opejori anaake, apa oitanapishoteki to ldoinyo le Sinai, te nkaraki esong'ouna narropil, olasar le nkima oishori Olaitoriani. Ore olasar ooki naa erubata nabo e ong'uan e hini to sitima ake obo; te ine wueji sinyati shomo tipika ilo asar ooki oirrusha nchoo Olaitoriani. Ore olikae kuoo shomo topolosa teipa, anaa ilo asar le ntapa le tadekenya, o anaa ilo asar ooki, shomo nchooi anaa olasar le nkima, esong'ouna nerropil te nkaraki Olaitoriani. “Ore te nkolong e sabato naa isitiman oare le kerra lo lari obo lemeeta entioto, o ematua e are e tomon e Efa e ntapa napuyiapui pee eaku olasar le ntapa, eipurjaki te ilata o ilo asar lenye ooki: ele ninye olasar opejori le pooki olong e sabato, te nebo ilo asar opejori le anaake o ilo asar ooki. “Ore too nkiterunot oo lapaitin linyi ninchooyoyo olasar opejori aaisho Olaitoriani: iloing'ok oare ooti, o lmeregesh obo, o sitiman oopishana le kerra lo lari obo lemeeta entioto; o matuan uni e tomon e efa e ntapa napuyiapui pee eaku olasar le ntapa, naipurjaki te ilata, te pooki oing'oni, o matuan are e tomon e ntapa napuyiapui naipurja te ilata to lmeregesh obo; o ematua nabo e tomon e ntapa napuyiapui naipurjaki te ilata anaa olasar le ntapa to lkuoo ake obo le ker; pee eaku olasar opejori le song'ouna narropil; olasar le nkima oishori Olaitoriani. Ore olasar lenye ooki naa keaku olpisiai le hini le naisho oo sabibu to loing'oni ake obo o entemata e uni e hini to lmeregesh, naa entemata e uni e ong'uan e hini to lkuoo le ker; ele ninye olasar opejori te pooki apa too lapaitin pooki lo lari o sitima obo sii le kine te nkaraki olasar le ng'oki oishori Olaitoriani; keitayuni ninye te nebo ilo asar opejori le anaake o ilo asar lenye ooki. “Ore te nkolong e tomon o ong'uan olapa le dukuya naa pasaka o Laitoriani. Naa ore te nkolong e tomon o imiet ele apa naa o sirua; nkolong'i naapishana einosi imukateni neitu eisuishieki. Ore te nkolong e dukuya naa keaku eumata sinyati: mias esiaai e sinkaisho, kake enchooi olasar le nkima, olasar opejori te nkaraki Olaitoriani: iloing'ok oare ooti, olmeregesh obo, o sitiman oopishana le kerra lo lari obo; toduaa nchere meeta entioto; o lasarri sii lenye le ntapa napuyiapui naipurja te ilata; imatuan uni e efa te tomon nchooi to loingoni obo, o matuan are e tomon to lmeregesh; nchooi ematua nabo e tomon te pooki meregesh le lelo oopishana; o sitima obo le kine pee eaku olasar le ng'oki pee eitayunyeki olning'o lo sotua tenkaraki iyie. Nchooi iyie kuna te nebo olasar opejori le tadekenya, laa olasar le mpejoroto le anaake. Naa te ina oitoi ake inchooi anaake, too nkolong'i naapishana, ina daa o lasar opejori te nkima, esong'ouna narropil to Laitoriani; keitarasari ninye te nebo ilo asar le anaake o ilo asar lenye ooki. Naa ore te nkolong e naapishana nimbung'ubung'u eumata nasinya; nimiasiasa esiaai nagol. “Ore te nkolong oo lng'anayio le dukuya, ti ninchooyo iyie olasar le ntapa te nkaraki entapa ng'ejuk naishori Olaitoriani, te ilo sirua linyi loo wikii, ninturrurrorro aaibung eumata sinyati; nimiasiasa esiaai nagol, kake entarasai olasar opejori, esong'ouna narropil to Laitoriani: iloing'ok oare ooti, o lmeregesh obo, isitiman oopishana le kerra lo lari obo; o lasar le ntapa napuyiapui, naipurja te ilata, o matuan uni e tomon e efa to loing'oni ake obo, o matuan are e tomon e efa to lmeregesh, o ematua nabo e tomon te pooki ake ninye sitima le ker le lelo oopishana; te nebo o sitima obo le kine, pee eitobir osotua lo lning'o te nkaraki intae. Ore te nebo ilo asar opejori le anaake, o lasar lenye le ntapa, ntarasai iyie ninche te nebo o ilo asar lenye ooki. Todua nchere meeta ninche entioto. “Ore te nkolong e dukuya o lapa liopishana, enturrurroto embung'a eumata nasinya; miasiasa esiaai nagol. Enkolong ina te intae nioshiosho imouarak, ninchooyoyo olasar opejori, esong'ouna narropil to Laitoriani; oloing'oni obo oti, o lmeregesh obo, o sitiman oopishana le kerra lo lari obo lemeeta entioto; o lasar sii lenye le ntapa napuyiapui, naipurjaki te ilata, o ematua e uni e tomon e efa to loing'oni ake, ematua e are e tomon to lmeregesh, o ematua nabo e tomon to sitima ake le ker le lelo oopishana; te nebo ositima obo le kine oaku olasar le ng'oki, pee eitobir osotua lo lning'o te nkaraki intae; nepudare ilo asar opejori lo lapa ng'ejuk, olasar lenye le ntapa, o ilo asar opejori le anaake, o lasar lenye le ntapa, o lasar lenye ooki, te risioroto e ina kitanapa enye, esong'ouna narropil, olasar le nkima oishori Olaitoriani. “Ore te nkolong e tomon ele apa li opishana, ninturrurrorro intae aaibung eumata sinyati, nieniene ate, nimiasiasa esiai, kake entarasai olasar opejori aaisho Olaitoriani, esong'uona narropil: oloing'oni obo oti, olmeregesh obo, o sitiman oopishana le kerra lo lari obo; nchoo eaku meeta ntiot; o lasarri lenye le ntapa napuyiapui naipurja te ilata, o matuan uni e tomon e efa, to loing'oni obo, o matuan are e tomon to lmeregesh obo, e ematua nabo e tomon te pooki sitima le ker le lelo oopishana: o sitima obo le kine oaku olasar le ng'oki, te nebo ilo asar lenye le leilo sotua lo lning'o o ilo asar le anaake opejori, o ilo asar lenye le ntapa, o lasarri lenye ooki. “Ore te nkolong e tomon o imiet o lapa li opishana, ninturrurrorro aaibung eumata nasinya; miasiasa esiaai nagol embung'a osirua lo Laitoriani nkolong'i naapishana; ninchooyoyo olasar opejori, ilo asar le nkima, esong'ouna narropil to Laitoriani, iloing'ok tomon o okuni, o lmeregeshi oare, o sitiman tomon o ong'uan le kerra lo lari obo; naa lelo lemeeta ntiot; o lasari lenye le ntapa napuyiapui naipurja te ilata, o matuan uni e tomon e efa ti obo ake le lelo oing'ok tomon o okuni, o matuan are e tomon to lmeregesh ake obo te lelo pokira are, o ematua nabo e tomon te pooki sitima le lelo sitiman le kerra tomon o ong'uan; o sitima obo le kine oaku olasar le ng'oki, epudare ilo asar le anaake, o lasar lenye le ntapa o lasarri lenye ooki. “Ore te nkolong e are entopolos iloing'ok tomon o are ooti, o lmeregeshi oare, o sitiman tomon o ong'uan lo lari obo lemeeta ntiot, te nebo olasar le ntapa o lasar ooki te lelo oing'ok, o loo lmeregeshi, o loo sitiman le kerra, te nkikenata te risioroto e nkitanapata; o sitima obo le kine oaku olasar le ng'oki, epudare ilo asar opejori li anaake, o lasar lenye le ntapa, o lasarri lenye ooki. “Ore te nkolong e uni naa iloing'ok tomon o obo, o lmeregeshi oare, o sitiman le kerra tomon o ong'uan lo lari obo lemeeta ntiot, te nebo olasar le ntapa o lasarri ooki te lelo oing'ok, o loo lmeregeshi, o loo sitiman le kerra, te nkikenata te risioroto e nkitanapata. Te nebo sii ositima obo le kine to lasar le ng'oki, epudare ilo asar opejori le anaake o lasar lenye le ntapa o lasar lenye ooki. “Ore te nkolong e ong'uan naa iloing'ok tomon, o lmeregeshi oare, o sitiman tomon o ong'uan le kerra lo lari obo lemeeta entioto, te nebo ilo asar le ntapa o lasarri ooki, te lelo oing'ok, o lelo meregeshi, o te lelo sitiman le kerra, te nkikenata te risioroto e nkitanapata; te nebo ositima obo le kine oaku olasar le ng'oki, epudare ilo asar opejori le anaake, o lasar lenye le ntapa o lasar lenye ooki. “Ore te nkolong e imiet naa iloing'ok ooudo, o lmeregeshi oare, o sitiman le kerra tomon o ong'uan lo lari obo lemeeta entioto, te nebo ilo asar le ntapa o lelo asarri ooki te lelo oing'ok o te lelo meregeshi, o lelo sitiman le kerra, te nkikenata te risioroto e nkitanapata; te nebo sii ositima obo le kine to lasar le ng'oki; epudare ilo asar opejori le anaake o ilo asar lenye le ntapa o ilo asar lenye ooki. “Ore te nkolong e ile naa iloing'ok isiet, o lmeregeshi oare, o sitiman tomon o ong'uan le kerra lo lari obo lemeeta ntiot, te nebo ilo asar le ntapa o lasarri ooki te lelo oing'ok, o too lmeregeshi, o te lelo sitiman le kerra, te nkikenata te risioroto e nkitanapata; te nebo sii ositima obo le kine oaku olasar le ng'oki, epudare ilo asar opejori le anaake, ilo asar lenye le ntapa o lelo asarri lenye ooki. “Ore te nkolong e naapishana naa iloing'ok oopishana, o lmeregeshi oare, o sitiman tomon o ong'uan lo lari obo lemeeta ntiot, te nebo olasar le ntapa o lasar ooki, te lelo oing'ok o lelo meregeshi o lelo sitiman le kerra, te nkikenata te risioroto e nkitanapata; te nebo sii ositima obo le kine oaku olasar le ng'oki, epudare ilo asar opejori le anaake, ilo asar lenye le ntapa o ilo asar lenye ooki. “Ore te nkolong e isiet embung'a eumata nasinya: miasiasa esiaai nagol, kake enchooi olasar opejori, ilo asar le nkima, esong'ouna narropil to Laitoriani; aapolos oloing'oni obo, o lmeregesh obo, o sitiman oopishana le kerra lo lari obo lemeeta entioto, o lasar le ntapa o lasarri ooki, to loing'oni ake, o to lmeregesh, o te lelo sitiman le kerra, te nkikenare te risioroto e nkitanapata; te nebo sii ositima obo le kine oaku olasar le ng'oki, epudare ilo asar opejori le anaake o ilo asar lenye le ntapa o ilo asar lenye ooki. “Kuna ninche ntarasakiki Olaitoriani te lelo siruai linyi oogeluno, te nebo lelo asarri linosie olmumai, o lasarri linyi le yieunoto, te nkaraki lelo asarri linyi oopejori, o lasarri linyi le ntapa, o lasarri linyi ooki, o lasarri linyi le seriani.” Neliki Musa iltung'ana le Israel pooki toki anaa ake enaitanapa Olaitoriani ninye. Nejoki Musa ilukuny oo loshon loo ltung'ana loo Siraeli, “Ena ninye eitanapishe Olaitoriani. Te neinos oltung'ani olmumai te nkaraki Olaitoriani, aashu te neinos olmumai pee een kewan te mbae natejo, nchoo ninye eaku olemeitupuk olomoni lenye; nchoo ninye eas te risioroto e ina pooki naimua enkutuk enye. Aashu te neinos enkitok olmumai te nkaraki Olaitoriani, neen kewan enye te ina bae natejo, ina kata eton etii enkaji e papaai lenye, te kitisho enye, nening menye ilo mumai lenye, o ina natejo ninye, nateenie ninye kewan, nemejoki ninye ae, ore ilo mumai lenye pooki neunoyu. Ore pooki natejo ninye aen kewan neunoyu. Kake te neany menye enyorraa ilo mumai ina olong apa pee ening, nemeitoki atii olmumai te ninye, nemetii eenata e kewan nauno, naa kepalaki Olaitoriani ninye te nkaraki naa menye otomitikio ninye. Naa te neyama olmoruo, ina kata eton etii eenata eilo mumai lenye, aashu nena kirorot e nkutuk enye naateenie ninye kewan, nening olmoruo lenye ina, neitu ejoki ae ina kata pee ening, ore naa ilo mumai lenye naa keuno, ore nena baa enyena naateenie kewan naa keunoyu. Kake ore te ina olong apa natoning'o olmoruo lenye, neany ninye enyorraa, neitaa naa parmetii ilo mumai lenye apa oinosa, o nena kirorot e nkutuk enye, apa naa ninche eteenie kewan. Naa kepalaki Olaitoriani ninye. Kake ore pooki mumai le nkoliai, aashu le nkitok natung'uayie olmoruo lenye, ore ake ninye entoki nateenie kewan, naa keitalakuni te ninye. Naa te neinos ninye olmumai ti atua enkaji olpayian lenye e, aashu een kewan enye to lmumai, nening olpayian lenye ina, neitu ejoki ninye ae, neitu erishie ninye; ore ilo mumai lenye pooki naa keunoyu, ore enkiroroto ake pooki nateenie ninye kewan naa keunoyu. Kake te neitaa olmoruo lenye parmetii neitaa pesho ina olong apa pee ening, neaku naa, ore embae pooki naimu enkutuk enye naipirta olmumai lenye aashu naipirta ina enata e kewan nemelo aunoyu; eitaa olmoruo lenye pesho, naa kepalaki Olaitoriani ninye. Ore olmumai pooki, o enata olmumai nainosie oltung'ani kewan osina, keidim olmoruo lenye atuuno, aashu eidim aitaa parmetii. Kake te nemejoki olmoruo lenye ae te nkolong ake ninye, neitubulaa naa ilo mumai le nkitok enye, o nena pooki naatejo ninye aenie kewan, nena naatii shumata ninye; eitubula ninye ninche enkaraki neitu ejoki ae ina olong apa naning nena baa. Kake te neitaa nena baa pesho neitaa parmetii eidipa ninye atoning'o, nenap naa ninye eng'oki e nkitok enye.” Kuna ninche nkitanapat naaitanapa Olaitoriani Musa, naaipirta olee o enkitok enye, olpayian o entito enye, te lelero enye, eton etii enkaji e papaai lenye. Nejoki Olaitoriani Musa, “Ntalaku elap oo ltung'ana le Israel too ltungana le Midian; ore te siadi ina naa ilo iyie eneiturrorrore iltung'ana linono apa ootuata aye.” Nejoki Musa olorere, “Enterreten iltung'ana tiatua intae oopuo enjore pee etum aashom aataarare iltungana le Midian, pee eitalaku elap o Laitoriani te Midian. Irriwai enkalifu ake to losho pooki le Israel pee epuo enjore.” Neaku oishoruaki apa kulo, ooing'uaa lelo oora nkalifuni le Israel, oing'uaa ake enkalifu nabo olosho obo, nenapa lelo oora nkalifuni tomon o are aapuo enjore. Neirriwaa Musa ninche meshomo enjore eing'uaa ake enkalifu nabo olosho obo, te nebo Finehas olayioni le Eliesa ilo apolosani, tenebo nena masaa eine wueji sinyati, neeta te nkaina enye entarumpeta naosh. Nearare ninche iltung'ana le Midian anaa enaitanapa Olaitoriani Musa, near metua olee ake ninye pooki. Near metuata ilaiguanak le Midian te nebo lelo kulikae ootasesekuanaki, Efi, o Rekem, o Surian, o Hur, o Reba lelo aiguanak imiet te Midian neitoki sii aasesekuan Balaam olayioni le Beor to lalem. Ore lelo tung'ana le Israel neraya nena kituaak e Midian o nkera enye; neraya sii nkishu enye pooki, o nkerrai o ntokitin enye pooki. Ore nkanas enye pooki too wuejitin neemanya o lng'oborri lenye pooki, nepejoo te nkima, neya nena pooki naatarutua, aa iltung'ana o nkishu. Neyau lelo o yarunot o masaa naaruno enetii Musa, o Eliesa ilo apolosani, o ina umata oo ltung'ana le Israel, te lelo ng'oborri ootii enkisiajata e Moab te mbata o lkeju le Yordan te netaaniki Yeriko. Ore Musa o Eliesa ilo apolosani, o lelo arikok pooki le leina umata, neipung aapuo aanang'are ina jore ti auluo. Netagorokine apa Musa lelo kituaak le njore, lelo arikok loo nkalifuni o lelo arikok loo maa iip, ooetuo eing'ua enjore. Nejoki Musa ninche, “Itapala intae nkituaak pooki eishu? Ng'ura, kuna apa naaishoo iltung'ana le Israel, te nkiteng'enare e Balaam metogolong'aki Olaitoriani, te ina bae e Peor, neaku eewuo olmeitai atua eumata o Laitoriani. Ore naa taata entaar pooki lee ti atua nena kera kutiti metua, niariara pooki ng'oruoi nataboitare olee metua. Kake ore nena silan pooki kutiti neitu ai kata eboitare olee entapal eishu metaa nkuninyi. Nchoo etoni ti auluo nkolong'i naapishana; pooki ng'ae ake ninye linyi otasesekuana oltung'ani, o pooki ng'ae oiseyie olmeneng'ani, entisinya ate o lelo yarunot linyi te nkolong e uni o te nkolong e naapishana. Entisinya enkila ake pooki o pooki toki o lchoni, o pooki toki naitobiraki too lpapit loo nkineji, o pooki toki naguetuno te nchata.” Nejoki Eliesa ilo apolosani lelo tung'ana ooshomo enjore: “Ena ninye enkikoo e ina kitanapata naitanapa Olaitoriani Musa: sahabu ake o enkosholai o suyai o esekenkei o empirbil o ntokitin naaikununo neijia, Ore pooki toki nemeinos enkima, niimiemie atua enkima naa kesinyayu ninye asidanu. Ore ake etiu neijia, keitukui sii te nkare e nkitisinyata, ore pooki toki nemepikayu enkima, niimiemie atua enkima. Entukuo ilkilani linyi te nkolong e naapishana, niakuku taa sidain; ore te siadi ina nipuonunu taa atua ilng'oborri.” Nejoki Olaitoriani Musa, “Nkena nena tokitin naa taaruaki, aa iltung'ana o aa nchoo, iyie o Eliesa ilo apolosani o lukuny oo nkajijik oo loo menye e ina umata; nior nena naataaruaki katitin are, aoriki lelo morran apa ooshomo enjore o e umata pooki. Neitalaki iltungana le njore o Laitoriani kodi naing'uaa lelo tung'ana le njore ooshomo enjore, obo ake ti atua iip imiet, too ltung'ana o too lmong'i, o too sirkon, o too nkerrai; intayu olpisiai lenye nincho Eliesa ilo apolosani pee eaku olasar to Laitoriani. Ore to lpisiai loo Siraeli loo ltung'ana, le nena tokitin ntayu nabo ti atua onom ake ninye, too ltung'ana, o too lmong'i, o sirkon, o too nkerrai, o too nchoo pooki, ninchosho ninche ile Lawi laa ninche ooing'or olng'obor lo Laitoriani.” Neas Musa o Eliesa ilo apolosani anaa enaitanapa Olaitoriani Musa. Ore apa nena yarunot naatelekutua naawaita lelo tung'ana le njore naa nkerra nkalifuni iip ile o ntomoni naapishana o imiet, o nkishu nkalifuni ntomoni naapishana o are, isirkon nkalifuni ntomoni ile o obo, o ltung'ana nkalifuni tomoni uni o are, o nkituaak neitu ai kata eboitare olee. Ore ilo pisiai leina rubata e le lelo apa ooshomo enjore, ore esiana enye naa nkerra nkalifuni iip uni o tomoni uni o opishana o iip imiet, ore elaakinoto o Laitoriani naa nkerra iip ile o ntomoni naapishana o imiet. Ore nkishu naa nkalifuni tomoni uni oile, ore te kuna naa ntomoni naapishana oare elaakinoto o Laitoriani. Ore isirkon naa nkalifuni tomoni uni o iip imiet, ore te kuna naa ntomoni ile o obo elaakinoto o Laitoriani. Ore iltung'ana naa nkalifuni tomon o ile, ore erubat o Laitoriani naa iltung'ana tomoni uni o are. Neishooyo Musa ina laakinoto, naa ninye olasar to Laitoriani, neisho Eliesa ilo apolosani, anaa enaitanapa Olaitoriani Musa. Ore inaaing'uaa ilo pisiai te nkalo oo ltung'ana le Israel apa naategelayie Musa aitung'uaa ine lelo tung'ana apa ooshomo enjore ore apa olpisiai le nena teina umata naa nkerra nkalifuni iip uni o tomoni uni o opishana o iip imiet, o nkishu nkalifuni tomoni uni o ile, o sirkon nkalifuni tomoni uni o iip imiet, o ltung'ana nkalifuni tomon o ile. Ore inaaing'uaa ilo pisiai loo ltung'ana le Israel neya Musa nabo te pooki onom, aa too ltung'ana o too nchoo, neisho ninche lelo le Lawi ooing'or olng'obor lo Laitoriani; anaa enaitanapa Olaitoriani Musa. Neitoki lelo kituaak ooitasheiki nkalifuni e njore o lelo arikok loo nkalifuni o lairikok le lelo maa iip aapuonu aanyikaki Musa, nejoki ninche Musa, “Eikena isinkan linono lelo tung'ana le njore ootii abori erikore ang, nemetii oltung'ani oiwuang'a te yiook. Nikiyautua iyiook olasar lo Laitoriani, entoki ake ninye nanoto oltung'ani, ntokitin e sahabu, ilkataarri o mankek, o ilgiso, o sakankarri, o saen, pee kipuonu aaitobiraki ate osotua lo lning'o te dukuya Olaitoriani.” Ore Musa o Eliesa ilo apolosani neng'amaa te ninche ina sahabu pooki apa naitaaki imasaa. Ore ina sahabu pooki oo nkishorot naishoo ninche Olaitoriani, eing'uaa lelo arikok le lelo oora nkalifuni le njore, o lelo le maa iip naa shekeli nkalifuni tomon o ile o iip naapishana o onom. (Ore apa lelo tung'ana le njore newaita nena naatarutua ewa ake oltung'ani nkunenyena.) Ore Musa o Eliesa ilo apolosani neng'amaa ina sahabu te lelo arikok le njore loo nkalifuni, o loo maa iip neyau atua ilo ng'obor le ntumo, pee eaku entoki nadamuni too ltung'ana le Israel te dukuya Olaitoriani. Ore apa ilayiok le Ruben o layiok le Gad na keeta nkishu kumok oleng, nedol ninche enkop e Yaser o enkop e Gilead, naa ng'ura, kenyor apa ine wueji nkishu. Neaku eetuo apa lelo ayiok le Gad o lelo ayiok le Ruben aajoki Musa o Eliesa ilo apolosani o lelo arikok le umata, “Atorat, o Dibon, o Yaser, o Nimra, o Heshbon, o Eliele, o Sebam, o Nebo, o Beon, ore ena kop natara Olaitoriani te dukuya eumata e Israel, naa enkop nanyor nkishu, neeta isinkan linono nkishu.” Nejo ninche, “Tenaa eikinoto iyiook omon too nkonyek inono, nchoo naa isinkan linono meishori ena kop meitaa enenye; mintalang iyiook olkeju le Yordan.” Kake etiaka Musa lelo ayiok le Gad o lelo ayiok le Ruben, “Kepuo ilalashera linyi enjore itonini intae tene? Kainyoo pee intashalishala iltauja loo ltung'ana le Israel, aamitiki elang aapuo ina kop apa naishoo Olaitoriani ninche? Ina apa etaasa loo papaai linyi ina kata pee airriwaa nanu ninche te Kadesh-Barnea meshomo aadol ina kop. Amu ore apa pee epuo ninche oerata le Eshkol nepuo aadol ina kop, neitashal iltauja loo ltung'ana le Israel aamitiki epuo ina kop apa naishoo Olaitoriani ninche. Neyupuyup apa engoro o Laitoriani te ina olong, neinos ninye olmumai ejo, ‘Esipa meetae hoo obo le lelo tung'ana apa ooileputua aapuonu te Misiri, ebaiki ilarin tikitam neilep olo adol ina kop apa nainosie olmumai pee aisho Abraham, o Isaak o Yakobo, enkaraki neitu ninche aaunokino aasuj nanu; meteleku ake Kalebu olayioni le Yefune ilo loo Lkenise o Yoshua olayioni le Nuni amu etusuja ninche Olaitoriani katukul.’ Neyupuyup engoro o Laitoriani ti alo Siraeli, neisho ninche metilimanata ti ong'ata ilarin artam, o metaba anaa neishunye ilo porror apa pooki otaasa entorroni te dukuya Olaitoriani. Naa ng'ura, itubulua ajing erishata oo loo minyi, entipat oo ltung'ana aing'okok, pee iponaa oleng ina goro o Laitoriani napi ti alo Siraeli! Amu ti nimbelekenyanya aany isujusuju ninye, naa keigil ninye apalaa ninche ti ong'ata, nendaikiekie intae kulo tung'ana pooki.” Neitoki ninche aanyikaki ninye nejoki, “Eikishetu iyiook imuatat tene te nkaraki nkerrai ang, o nkanas te nkaraki nkera ang, kake eikidumu iyiook iruparen, nikinapa aapuo dukuya iltung'ana le Israel o metaba anaa nikintabau ninche ewueji enye; ore nkera ang kutiti netoni too nkanas naasheta sunta te nkaraki lelo oomanya ina kop. Mikirrinyunye iyiook aapuonu nkang'itie ang o metaba anaa nejung oltung'ani ake pooki le Israel enjung'ore enye. Amu mikijung iyiook te nebo ninche lido kekun le Yordan neito idia alo; amu ore enjung'ore ang neeuo ena shoto e Yordan neito enkalo oloosaen.” Neaku etiaaka apa Musa ninche, “Ti niasiasa intae ena, tenaa eidumumu intae iruparen aapuo enjore te dukuya Olaitoriani, ore ake pooki tung'ani linyi oata ruparen nelang olkeju le Yordan alo te dukuya Olaitoriani, o metaba anaa nearaa ilmang'ati lenyena aiwuang'ie te dukuya ninye, neisulieki ina kop te dukuya Olaitoriani; ore naa te siadi ina nindimidimi aatorrinyoto, nimintokiki aatakinore to Laitoriani o te Israel; ore ena kop naa keaku eninyi te dukuya Olaitoriani. Kake ti nimiasiasa ina, ng'ura, nitaasa naa eng'oki to Laitoriani; naa entayiolo nchere meeta nchere, esipa meinepu intae ina ng'oki inyi. Enteshetu nkanas te nkaraki nkera inyi kutiti, o muatat te nkaraki nkerrai inyi; niasiasa ina nisiligishore.” Ore ilayiok le Gad o lelo ayiok le Ruben nejoki Musa, “Keas isinkan linono anaa enaitanapisho olkitok lai. Ore nkera ang kutiti, o nkituaak ang, o ntare ang o nkishu ang pooki, kebik te idie too nkanas e Gilead; kake kegiroo isinkan linono aapuo, pooki tung'ani ake otanape alo enjore, nelo enjore te dukuya Olaitoriani, anaa enaitanapisho olkitok lai.” Neisho Musa enkitanapata naipirta ninche Eliesa ilo apolosani, o Yoshua olayioni le Nuni, o lukuny oo nkajijik oo loo menye, oo loshon loo ltung'ana le Israel. Nejoki Musa ninche, “Te nelang ile Gad o ile Ruben, pooki ng'ae otanape alo enjore te dukuya o Laitoriani, nelang te nebo intae olkeju le Yordan neisulieki ina kop to dukuya intae, ninchosho taa ninche enkop e Gilead metaa enenye; kake te nemelang ninche te nebo intae; etanapate, nepuo naa aatum enkop te nebo intae te nkop e Kanaan.” Newal lelo le Gad o lelo le Ruben aajo, “Ore anaa enatiaka Olaitoriani isinkan linono, ina kipuo aas. Eikilang iyiook olkeju le Yordan kitanapate te dukuya Olaitoriani aapuo enkop e Kanaan, ore ina jung'ore ang niking'uaa te lido kekun le Yordan.” Neisho Musa ninche, lelo le Gad o lelo ayiok le Ruben o lpisiai lo losho le Manase, olayioni le Yosef, enkitoria e Sihon olaiguanani le Amori, o enkitoria e Oog olaiguanani le Bashan, ina kop o nkanas enyena te nebo ilpolosien lenye, nkanas e ina kop ti atua enkop pooki. Neshet lelo le Gad Dibon, o Atorat, o Aroen o Atrot-shofan, o Yaser o Yogebeha, Bet-nimra o Bet-haran, nkanas naasheta sunta, o muatat oo nkerrai. Ore ile Ruben neshet Heshbon, o Eleale, o Kiriataim, o Nebo, o Baal-meon (eibelekenyaki nkarn enye), o Sibma, neisho ninche kulie arn nena anas naatesheta ninche. Ore ilayiok le Makir o layiok le Manase nepuo Gilead neya aaitaa enenye. Neisho Musa Makir olayioni le Manase Gilead, nemany ninye ine. Ore Yair olayioni le Manase nelo aya nkang'itie enye neisho ninche enkarna ajo Hafot-yair. Nelo Noba aya Kenat o nkang'itie enye neisho ninye enkarna ajo Noba, aipotie kewan. Kulo apa ilkirragarien loo ltung'ana le Israel, ina kata apa pee eipung aapuo aaing'uaa enkop e Misiri, too lororani lenye erikito Musa o Aron. Neiger Musa nkiterunot e lototo enye, anaa ilkirragarien pooki wueji ake ninye, anaa enaitanapa Olaitoriani; naa kulo apa ilkirragarien lenye te risioroto oo wuejitin neetang'asa aaimaa. Etudumunye ninche te Ramases to lapa le dukuya, te nkolong e tomon o imiet o lapa; te ina olong nasuju pasaka, neipung iltung'ana le Israel aapuo eishuro te dukuya ile Misiri pooki, ina kata enukaa ile Misiri ilkikaunot lenye pooki ootara Olaitoriani ti atua ninche; ore nkaitin enye nedung'oki Olaitoriani enkiguana. Neaku etudumunye apa iltung'ana le Israel te Ramases, nepuo aaun ilng'oborri te Sukot. Neitoki ninche aadumunye te Sukot nepuo aaun ilng'oborri te Efam, natii embata e ong'ota. Neitoki aadumunye te Etam neibelekenya aarrinyo Pi-ha-hirot, aa ninye natii enkalo oloo saen le Baal-sefon; nepuo ninche aaun ilng'oborri te netaaniki Migdol. Neitoki ninche aadumunye te neipirare Hahirot neim empolos e naiposha nepuo olpurkel, nepuo elototo oo nkolong'i uni tiongata e Etam, neun ilng'oborri te Mara. Neitoki ninche aadumunye te Mara nepuonu Elim; ore apa te Elim netii nchorroi tomon o are oo nkariak o ltuka ntomoni naapishana, neun ninche ilng'oborri te ine. Neitoki aadumunye te Elim noun ilng'oborri te mbata Enaiposha Nanyokie. Neitoki ninche aadumunye te mbata Enaiposha Nanyokie neun ilng'oborri tiongata e Sin. Neitoki aadumunye tiongata e Sin neun ilng'oborri te Dofka. Nedumunye ninche te Dofka nepuo aaun ilng'oborri te Alush. Neitoki ninche aadumunye te Alush nepuo aaun ilng'oborri te Refidim, te ine apa nemetii enkare naok iltung'ana. Neitoki ninche aadumunye te Refidim nepuo aaun ilng'oborri tiong'ata e Sinai. Neitoki ninche aadumunye tiongata e Sinai, nepuo aaun ilng'oborri te Kibrot-hatafa. Neitoki ninche aadumunye te Kibrot-hatafa nepuo aaun ilng'oborri te Heserot. Neitoki ninche aadumunye te Heserot, nepuo aaun ilng'oborri te Ritma. Neitoki ninche aadumunye te Ritma nepuo aaun ilng'oborri te Rimon-peres. Neitoki ninche aadumunye te Rimon-peres, nepuo aaun ilng'oborri te Libna. Neitoki ninche aadumunye te Libna nepuo aaun ilng'oborri te Risa. Neitoki ninche aadumunye te Risa nepuo aaun ilng'oborri te Kehelata. Neitoki ninche aadumunye te Kehelata nepuo aaun ilng'oborri to ldoinyo le Shefer. Neitoki ninche aadumunye to doinyo le Shefer nepuo aaun ilng'oborri te Harada. Neitoki ninche aadumunye te Harada nepuo aaun ilng'oborri te Makelot. Neitoki ninche aadumunye te Makelot nepuo aaun ilng'oborri te Tahat. Neitoki ninche aadumunye te Tahat nepuo aaun ilng'oborri te Tera. Neitoki ninche aadumunye te Tera nepuo aaun ilng'oborri te Mitka. Neitoki ninche aadumunye te Mitka nepuo aaun ilng'oborri te Hashmona Neitoki ninche aadumunye te Hashmona nepuo aaun ilng'oborri te Moserot. Neitoki ninche aadumunye te Moserot, nepuo aaun ilng'oborri te Bene-yakan. Neitoki ninche aadumunye te Bene-Yakan, nepuo aaun ilng'oborri te Hor-hagidgad. Neitoki ninche aadumunye te Hor-hagidgad, nepuo aaun ilng'oborri te Yotbata. Neitoki ninche aadumunye te Yotbata, nepuo aaun ilng'oborri te Abrona. Neitoki ninche aadumunye te Abrona nepuo aaun ilng'oborri te Esion-geber. Neitoki ninche aadumunye te Esion-geber nepuo aaun ilng'oborri tiong'ata e Sin (aa taa Kadesh ina). Neitoki ninche aadumunye te Kadesh nepuo aaun ilng'oborri to ldoinyo le Hor, to lkirene le nkop e Edom. Ore Aron ilo apolosani neilep alo enchumata o ldoinyo le Hor anaa enaitanapa Olaitoriani, nelo aye te ine, to lari li artam eidipa iltung'ana le Israel aatupuku te nkop e Misiri, te nkolong e dukuya o lapa le imiet. Naa oloo larin iip o tikitam o okuni apa Aron ina kata pee eye to ldoinyo le Hor. Ore ilo Kanaani, olaiguanani le Arad, apa omanya Negeb te nkop e Kanaan, nening ina lotunoto oo ltung'ana le Israel. Neitoki ninche aadumunye to ldoinyo le Hor nepuo aaun ilng'oborri te Salmona. Neitoki ninche aadumunye te Salmona, nepuo aaun ilng'oborri te Punon. Neitoki ninche aadumunye te Punon, nepuo aaun ilng'oborri te Obot. Neitoki ninche aadumunye te Obot nepuo aaun ilng'oborri te Iye-abarim te nkop oo le Moab. Neitoki ninche aadumunye te Iyim, nepuo aaun ilng'oborri te Dibon-gad. Neitoki ninche aadumunye te Dibon-gad nepuo aaun ilng'oborri te Almon-diblataim. Neitoki ninche aadumunye te Almon-diblataim nepuo aaun ilng'oborri too ldoinyo le Abarim, te nkipirakinoto e Nebo. Neitoki ninche aadumunye too ldoinyo le Abarim nepuo aaun ilng'oborri too nkisiajat e Moab te mbata e Yordan eipirare Yeriko. Neun ninche ilng'oborri te mbata e Yordan ebaiki Bet-Yeshimot o metabaiki Abel-shitim too nkisiajat e Moab. Nejoki Olaitoriani Musa te nena kisiajat e Moab te mbata e Yordan eipirare Yeriko, “Tiaki iltung'ana le Israel, Ti nilang'ilang'a Yordan aapuo enkop e Kanaan, nipuopuo naa aaraa lelo pooki oomanya ina kop aaiwuang'ie te dukuya intae nindaikiekie nena kitanyaanyukot enye oo soito, nindaikiekie nena kitanyaanyukot enye naaipurjuno, nigiligili nene wuejitin neeika naaitainyeki lasarri pooki; niyaya ina kop aaitaa eninyi nimanyimanya, amu aishoo nanu intae ina kop pee iyaya. Ijung'ujung'u intae ina kop te oshoto e nkukuo te risioroto oo lmareita linyi; ore olosho kitok neishori enjung'ore kitok, ore olosho oti neishori enjung'ore kiti; anaa ake enadoiki enkukuo oltung'ani, neaku ina enenye; nijung'ujung'u te risioroto oo loshon loo loo papaai linyi. Kake ti nimiaraa lelo oomaaya ina kop aaiwang'ie te dukuya intae ore lelo lilekuku netiu anaa iltidii too nkonyek inyi o lkiku too matuan inyi, naa kepuo ninche aaitanyamal intae te ina kop nipuopuo aamany. Naa kalo nanu aitaas intae ina duoo natadamua pee aitaas ninche.” Nejoki Olaitoriani Musa, “Ntanapa iltung'ana le Israel tiaaki ninche, Ti nipuopuo aajing enkop e Kanaan, (ena kop nalo aaku enjungore inyi, ina kop e Kanaan ebaiki e enebaiki), ore enkalo inyi e kopikop naa keaku ebaiki ongata e Sin amanaa tolkirine le Edom, naa ore olpolosie linyi te nkalo e kopikop naa ebaiki enkiting'oto Enaiposha e Munyan te nkalo o loosaen; nelo olpolosie linyi neirrugo aing'or kopikop e nkilepunoto tenkalo e Akrabim, nedung alo Sin, ore enkiting'oto enye naa keaku kopikop e Kadesh-Bar nea; neitoki adoyio alo o metabai Hasar-adari, negiroo alo Asmon; neitoki olpolosie aibelekenya te Asmon o meshomo Ereyiet e Misiri, ore enkitingoto enye naa te naiposha. “Ore to lpolosie lo loontoluo nchoo eaku Enaiposha Kitok o lo manaa lenye; ele ninye eaku olpolosie lino lo loontoluo. “Ele olo aaku olpolosie lino le moikuape: ore ebaiki Enaiposha Kitok, entipik olpolosie linyi o metabaiki oldoinyo le Hor; ore ebaiki oldoinyo le Hor entipik olpolosie o metabaiki enkutuk e Hamat, ore enkiting'oto e ilo polosie nelo aaku Sedad neitoki ilo polosie alo abaya Sifron, ore enkiting'oto enye nelo aaku Hasar-enan ele ninye; olo aaku olpolosie linyi le moikuape. “Entobira ilpolosien linyi lo loo saen ebaiki Hasar-enan o metabaiki Shefam; nedoyio ilo polosie alo ebaiki te Shefam o metabaiki Ribla te nkalo o loo saen le Aim; nedoyio ilo polosie alo o metabaiki olmanie le naiposha e Kineret te nkalo oloosaen; nedoyio ilo polosie alo olkeju le Yordan, ore enkiting'oto enye nelo aaku Enaiposha e Munyan. Ena ninye nalo aaku enkop inyi emanita ilpolosien pooki.” Neitanap Musa iltung'ana le Israel ejo, “Ena kop intae ipuopuo aajung te oshoto e nkukuo, naa ninye eitanapishe Olaitoriani pee eisho iloshon ooudo o lpisiai lo losho; amu ore olosho loo layiok le Ruben too nkajijik oo loo menye, o losho loo le Gad too nkajijik oo loo menye, netang'amutua enjung'ore enye, o lpisiai sii lo losho le Manase; ore lelo oshon pokira oare o ilo pisiai lo losho netang'amutua enjung'ore enye te lido kekun lo lkeju le Yordan, etalita Yeriko, te nkalo o loosaen, te neilepunye enkolong.” Nejoki Olaitoriani Musa, “Kuna ninche nkarn oo ltung'ana e lelo tung'ana oopuo aadung'oki intae enkop naaku enjung'ore inyi: Eliesa ilo apolosani o Yoshua olayioni le Nuni. Iwa ake olarikoni obo te pooki osho, pee epuo aaor enkop naaku enjung'ore. Kuna ninche nkarn e lelo tung'ana: ore olosho le Yuda, naa Kalebu olayioni le Yefune. Ore olo losho loo layiok le Simeon naa Shemuel olayioni le Amihud. Ore olo losho loo layiok le Benchamen naa Elida olayioni le Kislon. Ore olarikoni lo losho loo layiok le Dan naa Buki olayioni le Yogli. Ore oloo layiok le Yosef: lo losho lo layiok le Manase, ore olarikoni naa Haniel olayioni le Efod. Ore olarikoni lo losho loo layiok le Efraim, naa Kemuel olayioni le Shiftan. Ore olarikoni lo losho loo layiok le Sebulon, naa Elisafan olayioni le Parnak. Ore olarikoni lo losho loo layiok le Isaakar naa Paltiel olayioni le Asaan. Ore olarikoni lo losho loo layiok le Asheri naa Ahihud olayioni le Shelomi. Ore olarikoni lo losho loo layiok le Naftali naa Padehel olayioni le Amihud. Kulo ninche lelo lewa apa ooitanapa Olaitoriani metooriki ina jung'ore iltung'ana le Israel te nkop e Kanaan.” Nejoki Olaitoriani Musa too nkisiajat e Moab, te mbata o lkeyu le Yordan, etalita Yeriko, “Ntanapa iltung'ana le Israel, nchere pee eisho ile Lawi enjung'ore naaku enenye, nkanas naapuo aamany; nincho sii lelo le Lawi ndaat oo nchoo naamanita nena anas. Ore nena anas naa nkunenye naamany ore nena daat oo nchoo naa inoo nkishu enye o masaa enye o enoo ng'uesi enye. Ore nena daat oo nchoo e nena anas nipuopuo intae aaisho ile Lawi, nchoo ebaiki esuntai e nkanasa neito idia alo nelo iroruat iip ong'uan o onom too nkaloli pooki. Entetem auluo enkanasa, ore te nkalo o loo saen naa iroruat nkalifuni are, ore te nkalo e kopikop naa iroruat nkalifuni are, ore te nkalo o loo ntoluo naa iroruat nkalifuni are, ore enkalo e moikuape naa iroruat nkalifuni are, niaku ina anasa naitorit, keaku ena enenye, nairritishore too nkanas enye. Ore nena anas nilo iyie aisho ile Lawi naa nena anas naasaruni naa ninche nchosho oltung'ani oitayu loikop metasaru, ore te nebo nena ipuopuo intae aaishooyo nkanas artam o are. Ore nena anas pooki nipuopuo intae aaisho ile Lawi naa artam o isiet te nebo ndaat enye oo nchoo. Naa ore te nena anas nipuopuo intae aaishooyo naaing'uaa imasaa oo ltung'ana le Israel, ore to losho kitok niyaya nkumok, ore to losho oti niyaya nkuti; olosho ake te risioroto e njung'ore natujung'o ninye, neisho ake nkanas enyena ile Lawi.” Neitoki Olaitoriani ajoki Musa, “Tiaki iltung'ana le Israel, te nipuopuo aalang olkeju le Yordan aapuo enkop e Kanaan, nigelulu naa nkanas naaku nkanas naasaruni te nkaraki intae, pee etum pooki ng'ae oitayu loikop, oar oltung'ani metua eitu eotiki atasaru. Ore nena anas naa keaku te intae inaasaruni te nkaraki ilo oitalaku elap, pee meari ilo otasesekuanishe metua o metaba anaa neitashe te dukuya eumata omeiguanareki. Ore nena anas ninchooyoyo naa nena anas inyi ile naasaruni. Enchoru nkanas uni te lido kekun lo lkeju le Yordan, o nkanas uni te nkop e Kanaan naaku nkanas naasaruni. Ore kuna anas pokira ile naa keaku inaasaru iltung'ana le Israel, o ilo omoni o ilo otamanyishe ti atua ninche, pee etum pooki ng'ae oitayu loikop, oar oltung'ani metua te eitu eotiki atasaru. “Kake te neosh ninye olikae to sekenkei, neaku etua ilo, naa oloo loikop ninye; ore ilo oitayio loikop naa keari metua. Naa te nenang ninye olikae to soit oata te nkaina neaku etua ilo tung'ani, naa oloo loikop ninye; ore oltung'ani oitayu loikop naa keari metua. Aashu te neosh ninye olikae te nchata naibung'ita te nkaina, naidim ataara oltung'ani metua neaku etua ilo, netaa ninye oloo loikop; ore oltung'ani oitayu loikop neari ninye metua. Ore ilo oitalaku osarge ninye makewan oar ilo aitayio iloikop metua; te nenang'are ninye near ninye metua. Naa tenerem ninye tenkaraki enkiba, anaa eipony ninye, aashu etarresho ninye, neaku etua, aashu ore te mang'atisho neosh ninye te nkaina enye, neaku etua ilo, ore naa ilo otooshishe neari ninye metua; oloo loikop ninye; ore ilo oitalaku osarge near ilo oitayio loikop metua, te nenang'are ninye. “Kake tenetaremo ninye nabo kata to lbuket metii mang'atisho, aashu enang ninye ti ae toki eitu eresh aanyu, anaa easishore osoit oidim atara oltung'ani metua, neaku etua ilo tung'ani, hoo duoo neme olmang'atinta lenye, nemeyieuaki duoo entorroni, nerish naa ina umata ilo oitayio loikop o ilo oitalaku osarge te risioroto e kuna kikoot. Ore ina umata nekordu ilo oitayio loikop te nkaina e ilo oitalaku osarge, ore ina umata nepik ninye atua ina anasa enye nasaruni, naa ninye elo aisikaki, nelo ninye aton te ine o metaba anaa neye ilo apolosani kitok apa otubukokoki eilata nasinya aaput. Kake te nelo ilo tung'ani oitayio loikop, te nkata ake ninye pooki agiroo ilpolosien le ina anasa enye nasaruni, apa naa ninye eisikaka, ore ilo oitalaku osarge neinepu ninye ti oriong ilpolosien le ina anasa enye nasaruni, near ilo oitalaku osarge ilo oitayio loikop, nemeeta entioto o sarge. Amu meeta nchere meton ilo tung'ani ti atua ina anasa enye nasaruni o metabau keeya o lapolosani kitok; kake ore te siadi enkeeya o lapolosani kitok neidim ilo tung'ani atorrinyoyu ashomo enkop enye. “Ore kuna baa naa keaku enkitanapata o endung'oto e nkiguana te intae, too iishoritin inyi pooki o ti atua imanyishoreitin inyi pooki. Te near oltung'ani ake olikae metua, ore ilo oitayio loikop neari metua te nchakenisho oo lchakenini; kake meetae oltung'ani oari metua te nchakenisho olchakeni obo. Ore ake eyia, eming'amaa ntokitin e lakunoto e nkishui e ilo oitayio loikop, oata enkitarruoroto e keeya; kake keari ninye metua. Niming'amaa entoki e lakunoto e ilo oisikaka enkanasa enye nasaruni, pee etum ninye atorrinyoyu alo aton te ina kop te dukuya keeya o lapolosani kitok. Emisarkionie naa ena kop nitii; amu keisarkionie osarge enkop, nemeetae entoki naitobiri naidim aipoo, amu ore ilo sarge otubukokine enkop, meteleku ake osarge le ilo oibukoyie. Emisarkionie naa ena kop nimanyanya naa ninye sii nanu atii atua; amu ore nanu Olaitoriani namanya atua iltung'ana le Israel.” Ore lukuny oo nkajijik oo loo menye, oo lmareita loo layiok le Gilead, olayioni le Makir, olayioni le Manase o loo nkajijik oo loo menye oo layiok le Yosef, nepuonu aanyiku neiro te dukuya Musa o te dukuya larikok, nena lukuny oo nkajijik oo loo menye oo ltung'ana le Israel, nejo ninche, “Eitanapa apa Olaitoriani olkitok lai pee eishooyo enkop anaa enjung'ore te oshoto e nkukuo aisho iltung'ana le Israel, neitanapaki apa olkitok lai o Laitoriani pee eisho enjung'ore e Selofehad olalashe lang ntoyie enyena. Kake tenaa keyama ninche obo ake ninye loo layiok le kulie oshon loo ltung'ana le Israel ore naa enjung'ore enye neyae aaitung'uaa enjung'ore oo loo papa, neponikini ina jung'ore e ilo osho ora olenye; neaku keiwuang'ieki te oshoto enkukuo e ina jung'ore ang. Naa te nebau ilo sirua loo ltung'ana le Israel odamunyeki ilarin onom, neitokini aaponaa enjung'ore enye aaponiki ilo osho ora olenye; ore enjung'ore enye neyai aaitung'uaa enjung'ore olosho loo loopapa.” Neitanap Musa iltung'ana le Israel te risioroto o rorei lo Laitoriani, ejo, “Etisipa olosho loo layiok le Yosef. Ena ninye eitanapisho Olaitoriani ti alo nena toyie e Selofehad, ‘Nchoo ninche meyama oloba anaa oladol aajo sidai, kake nchoo ake duoo eyami ti atua ilmarei lo losho loo loo menye. Ore enjung'ore oo ltung'ana le Israel nemeibelekenyi to losho obo aaya olikae osho, amu ore pooki ng'ae too ltung'ana le Israel neibung'are enjung'ore o losho loo loo menye. Naa ore entito pooki ake naata enjung'ore te pooki ake ninye osho loo ltung'ana le Israel naa kelo aaku enkitok e obo lo losho lolmarei le menye, pee aa ore pooki ng'ae too ltung'ana le Israel netum anoto enjung'ore oo loomenye. Metaa meetae enjung'ore naibelekenyi aaitung'uaa olosho obo aaya olikae; amu ore ake pooki osho loo tung'ana le Israel neibung'are enjung'ore enye.’ ” Ore nena toyie e Selofehad neas anaa enaitanapa Olaitoriani Musa; amu ore Mahalal, o Tirsa, o Hogla, o Mika o Noa, nena toyie e Selofehad neyama layiok loo lalashera le menye. Eyamaki apa ninche too lmareita loo layiok le Manase olayioni le Yosef, ore enjung'ore enye neton to losho lo lmarei le papaai lenye. Kuna ninche nkitanapat o nkiguanat apa naaitanapa Olaitoriani Musa te nkaraki iltung'ana le Israel, too nkisiajat e Moab, te mbata olkeju le Yordan etalita Yeriko. Kulo ninche irorei apa ooirorie Musa iltung'ana le Israel pooki te lido kekun lo lkeju le Yordan ti ong'ata, te Araba te nkipirakinoto e Sufu, te rishata e Paran o Tofel, o Laban, o Heserot o Disahab. Nkolong'i tomon oobo elototo ebaiki Horeb te nkoitoi o ldoinyo le Seir o metabaiki Kadesh-Barnea, ore to lari le artam, te nkolong e dukuya olapa le tomon oobo, neirorie Musa iltung'ana le Israel te risioroto e nena pooki naaishoo ninye Olaitoriani aitanap ninche. Ina kata eidipa ninye atimira Sihon olaiguanani loo Lamori apa omanya Heshbon o Oog olaiguanani le Bashan apa omanya Ashtarot o Edrei. Ore te lido kekun lo lkeju le Yordan, te nkop e Moab, neinosu Musa ena kitanapata, ejo, “Etiaaka apa iyiook Olaitoriani Enkai ang te Horeb, ‘Itobiko intae oleng tele doinyo; embelekenyunye enteru elototo inyi, nipuopuo ina kop oo ldoinyo e Amori, ole latia enye pooki te Araba, teina kop oo ldoinyo o te nkop nashong'ishong, o Negeb, o lomanaa le naiposha, ina kop ooLkanaan, o Lebanon o metabaiki ilo keju kitok, ilo keju le Frati. Ng'ura airragie nanu enkop te dukuya intae. Enchom intae ewaita ina kop apa nainosie Olaitoriani olmumai too loo papaai linyi te Abraham, te Isaak o te Yakobo, pee eisho ninche o eishoi enye tesiadi ninche.’ “Ore apa teina kata atiaaka intae, ‘Maidim nanu openy atanapa intae, etopona intae Olaitoriani Enkai inyi, naa ng'ura, ibaba intae ena olong anaa ilakir le shumata te nkumoi. Meitaa intae Olaitoriani Enkai oo loo papaai linyi katitin enkalifu te nkumoi alang enibaba. Nemayian intae, anaa enaisiligie intae! Kaji nanu aiko openy te nanap enkiroishi o lola linyi, o loo larrabali linyi?’ Entegelu iltung'ana ng'eni, oodamisho neeta eyiolounoto, te risioroto oo loshon linyi, pee agelu nanu ninche metaa ilaitasheikinok linyi. Nikitawalikitia intae, aajo, ‘Ore ina bae nitejo naa eisidai te nikiaas iyiook.’ Neaku aawa apa nanu lelo arikok loo loshon linyi, lelo tung'ana ng'eni arriyiak, naitaa ninche ilarikok linyi, ilaitasheikinok loo nkalifuni o ilaitasheikinok loo maa iip, o ilaitasheikinok loo maa-onom, o laitasheikinok loo maa tomon ilkituaak tiatua iloshon linyi pooki. Naitanap apa nanu ilarishak linyi te ina kata, ajoki ‘Entoning nkiguanat oo lalashera linyi entirish ninche, nidung'udung'u enkiguana te sipata te rishata o ltung'ani o lalashe lenye, aashu ilo likae otii te nebo ninye. Nimiatata olkep te ndung'okinoto e nkiguana; entoning oltung'ani oti o lkitok, tenkitorisiokinoto; miureyu enkomom o ltung'ani amu ore endung'okinoto enkiguana naa ene Nkai, ore ilo rorei ogol te iyie niyau enatii nanu, naa kaning nanu,’ naitanapa apa nanu intae teina kata nena tokitin pooki naaishiakino niasiasa. “Kitudumunye apa iyiook te Horeb, nikipuo aaim ina ong'ata sapuk nagol nitoduaa, kiimita ina oitoi eina kop oo ldoinyo nalo Amori, anaa enaitanapa iyiook Olaitoriani Enkai ang; nikipuonu Kadesh-Barnea. Naitoki nanu ajoki intae, ‘Itabautua intae enkop oo ldoinyo e Amori, apa naishoo iyiook Olaitoriani Enkai ang. Ng'ura eirragie Olaitoriani Enkai inyi ena kop te dukuya intae; elepa enchom, ewaita anaa apa enatiaka intae Olaitoriani Enkai oo loo papaai linyi; miureishoyuyu niming'aing'aiyiayia.’ Nikipuonunu intae pooki aanyikaki nanu, nijojo, ‘Emairriwai iltung'ana meituruko te iyiook aajur enkop, neyaki iyiook olomoni le nkoitoi nikiim o nena anas nikipuo.’ Etalie apa ina bae aa sidai te nanu, nagelu nanu iltung'ana tomon oare te intae, oltung'ani obo ake to losho; neibelekenya ninche neilep aapuo ina kop oo ndoinyo, nebau oerata le Eshkol neikitalan. Neyau ninche too nkaik enye embata oo lng'anayio leina kop neitadou aayaki iyiook, neitoki aayaki iyiook olkilikuai, nejo, ‘Enkop sidai ina naishoo iyiook Olaitoriani Enkai ang.’ “Ore ake eyia eitu intae ipuopuo, kake itogolong'akita enkitanapata o Laitoriani Enkai inyi; Ning'unyung'unyunyu tiatua ilng'oborri linyi, nijojo ‘Enkaraki naiba iyiook Olaitoriani pee eitupukuo iyiook te nkop e Misiri, pee elotu apik iyiook atua nkaik oo Lamoni, pee eidaikie iyiook. Kainyoo iyiook kiilep aapuo aaing'oru? Eitalepoitie ilalashera lang iltauja lang, ejo, “Eisapuki lelo tung'ana naa adoru aalang iyiook; eikituaak nena anas naashetuno aabaiki shumata; ore sii kitoduaa ilayiok le Anakim teine.” Naitoki nanu ajoki intae, eming'aeng'ai aashu iureyuyu ninche. Ore Olaitoriani Enkai inyi oshi laa ninye orikoo intae, ninye makewan olo aarisho amitu intae, anaa apa enaitaasa ninye intae te Misiri te dukuya nkonyek inyi, o tiong'ata teine apa netodolie Olaitoriani Enkai inyi enap intae, anaa enanap oltung'ani enkerai enye teina oitoi apa pooki niima o metaba anaa nipuonunu ene wueji. Ore ake etii ele rorei eitu, intae irukuruku Olaitoriani Enkai inyi, laa ninye apa oshomo dukuya intae te nkoitoi pee eing'uraki intae ewueji niunienie ilng'oborri linyi, nerikoo intae te nkima kewarie, pee eitodol intae enkoitoi niimiimi, nerikoo intae te nkatampoi te ndama. “Nening Olaitoriani lelo rorei linyi, negoro, neinos ninye olmumai ejo, ‘Medol ninye oltung'ani obo le ilo porror torrono, ina kop apa nainosie olmumai nchere kaisho loo papaai linyi, meteleku ake Kaleb olayioni le Yefune; kelo ninye adol, ninye ake o nkera enyena alo nanu aisho ina kop metororua ninye too nkejek enyena, enkaraki nairukurukore ninye tukul Olaitoriani!’ Aatagorokine sii nanu, Olaitoriani te nkaraki intae, nejo, ‘Milo sii iyie ajing atua ine, Yoshua olayioni le Nuni, ilo oitashe te dukuya iyie, ninye olo ajing; ntagolo ninye oshoke, amu ninye olo aidimie Israel metujung'o ina kop. Ore nena kera inyi nitejo intae keidaikieki o nkera inono, nena nemeyiolo taata ninche esidai o entorrono, kepuo ninche atua ine, naa kaisho nanu ninche ina kop, naa keya ninche aaitaa enenye. Kake ore iyie, mbelekenyayu, shomo ong'ata mpira enkalo Enaiposha Nanyokie.’ “Nikintokiki intae aawalaki nanu nijojo, ‘Kitasa eng'oki to Laitoriani, eikilep iyiook aapuo olarrabal, anaa enaitanapa iyiook Olaitoriani Enkai ang.’ Nerretena ake pooki tung'ani too masaa enyena olarrabal, ejo tenaa kelelek eilepakini ina kop oo ndoinyo. Naajoki nanu Olaitoriani, ‘Tiaaki ninche, Emilep aapuo olarrabal amu matii nanu atua intae, pee memiri ake intae te dukuya ilmang'ati linyi.’ Neaku airorie nanu intae nianyianya intae ining'ining'i; kake itogolong'akita enkitanapata o Laitoriani, ore to lwuasa linyi nilepilepe aapuo ina kop oo ldoinyo. Ore lelo tung'ana le Amori oomanya ina kop oo ldoinyo nepuonu aarare intae, nemir intae anaa enamirisho ilotorok, near intae aairragie te Seir, o metabaiki Horma. Nirrinyunyenye intae aapuonu aaishir te dukuya Olaitoriani; kake eitu ening Olaitoriani oltoilo linyi neitu eisho intae enkiok. Neaku itobiko intae te Kadesh nkolong'i kumok, te nena olong'i apa nitobiko intae teine. “Nikintoki aaibelekenya nikipuo ong'ata, enkalo Enaiposha Nanyokie, anaa apa enaatiaka Olaitoriani; ore too nkolong'i kumok nikipuo aamanaa te Seir. Naaitoki Olaitoriani ajoki nanu, ‘Itamanaitie intae te le doinyo te nkata naado; embelekenyata enchom enkalo e moikuape. Naa ntanapa lelo tung'ana letaa ijojo pee iimiimi olpolosie loo lalashera linyi, lelo ayiok le Esau, oomanya Seir; keureishoyu ninche te nkaraki intae metaa eng'ura ate oleng; emiarare ninche, amu maisho nanu intae hoo enkop enye, a-a hoo ninye eneba endap e nkeju amu aishoo nanu Esau oldoinyo le Seir metaa olenye. Ipuopuo intae aainyiang'u endaa te ninche too mpisai, pee itumutumu aainosa, naa einyang'ung'u sii enkare te ninche too mpisai, pee itumutumu aatook. Amu etamayiana intae Olaitoriani Enkai inyi te siaai pooki oo nkaik inyi; eyiolo ninye enkiimata inyi ena ong'ata sapuk; ore te kulo arin artam etaa Olaitoriani Enkai inyi tenebo intae; eitu eng'oriki intae toki.’ Neaku kishomo apa iyiook, nikigiroo ilalashera lang lelo ayiok le Esau, oomanya Seir, nikigiroo enkoitoi e Araba ebaiki Elat o Esiong'eber. “Nikimbelekenya aaing'or enkalo olpurkel le Moab. Naajoki nanu Olaitoriani, ‘Mintanyamal iltung'ana le Moab aashu intayunye ninche olarrabal, amu maisho nanu intae erubata ninye nabo enkop enye metaa eninyi, amu aishoo nanu Ari ilayiok le Lutu meitaa enenye.’ Iltung'ana le Emim apa oomanya ine. Olosho kitok naa kumok naa adoru anaa iltung'ana le Anaki; neishooki sii ninche enkarna anaa ile Anak naji Refaim, kake keipot iltung'ana le Moab ninche aajo Emim. Emanya sii apa ile Hori Seir, kake etaraitie ilayiok le Esau ninche, neidaikie ninche te dukuya ninche, nemanyisho ninche te rishata enye; anaa apa enaikuna Israel teina kop enye, apa naishoo ninche Olaitoriani. Entudumunye naa taata, nipuopuo aalang olkeju le Seredi. Neaku kishomo iyiook aalang olkeju le Seredi. Ore enkata ebaiki pee kipuo iyiook te Kadesh-Barnea omatalang olkeju le Seredi naa ilarin tomoni uni o isiet, o metaba anaa neaku ore olporror pooki, aa taa lelo tung'ana lo larrabal neidaaya ninche too lng'oborri, anaa apa enainosie Olaitoriani ninche olmumai. Amu esipa enkaina o Laitoriani apa naarare ninche, pee eidaikie ninche te lelo ng'oborri, o metaba anaa neidak ninche. “Neaku ore ake pee eidak lelo tung'ana pooki to larrabal neye ninche tiatua olorere, naajoki nanu Olaitoriani, ‘Ore ena olong ilo iyie adung olpolosie le Moab te Ari; Ore ake pee itaaniki enkop oo layiok le Amon, nimintanyamal ninche aashu iarare ninche, amu maaisho nanu iyie erubata ninye nabo enkop oo layiok le Amon metaa enino, amu aishoo nanu layiok le Lutu meitaa enenye.’ (Ore sii ine naa keyioloi nchere enkop e Refaim; Refaim apa emanya ine, kake kejo ile Amoni ninche Samsumim, olorere kitok naa kumok, naa adoru anaa ile Anakim, kake eidakie Olaitoriani ninche te dukuya ninche, neoruni ninche ina kop nemanyi te rishata enye: anaa apa enaitaasa ninye ilayiok le Esau oomanya Seir ina kata apa pee eidaikie ninye ile Hori te dukuya ninche, neoruni enkop enye nemanyi te rishata enye o tene. Ore ile Afim, lelo oomanya nkang'itie kutiti ometabaiki Gasa, ore lelo le Kaftorim apa ooing'ua Kafta neidaikie ninche nemany enkop enye te rishata enye.) Entudumunye enteru elototo inyi, nipuopuo lido kekun o erata le Arnon, ng'ura, aishorua nanu apik atua enkaina ino Sihon ilo Amori, aiguanani le Heshbon, o enkop enye; nteru iwa niarare ninye to larrabal. Ore ena olong kaiteru nanu apik enkiputukuny olkirutoto te nkaraki iyie shumata kulo ootii abori pooki, pee epuo ninche aaning ilomon likimpirta iyie neikirikira neirut te nkaraki iyie. “Nairriwaa apa nanu ilkiliku teina ong'ata e Kedemot airriwaki Sihon olaiguanani le Heshbon, too rorei le seriani, ajoki, ‘Nchooki nanu maimai atua enkop ino; enkoitoi ake aim nanu, nemaiwuang nanu alo enkaina e tatene aashu ene kedienye. Eikimiraki iyie nanu endaa too mpisai, pee atum ainosa, nikincho nanu enkare too ropiyiani, pee atum atooko; nchooki ake duoo iyie enaimaa too nkejek, anaa apa enaitaasa nanu ilayiok le Esau oomanya Seir o Lmoabu oomanya Ari, o metaba anaa nalang alo lido kekun le Yordan ajing atua ina kop naishoo iyiook Olaitoriani Enkai ang.’ Kake eitu eisho iyiook Sihon olaiguanani le Heshbon matogiroi ninye, amu eitagolo Olaitoriani Enkai inyi oltau lenye pee etum ninye aishoru atipika enkaina inyi anaa ena olong. Naajoki nanu Olaitoriani, ‘Ng'ura, aiterua nanu aisho intae Sihon o enkop enye; enteru ewaita, pee itumutumu aatamany ena kop.’ Nelotu Sihon aarare iyiook, ninye o ltung'ana lenyena pooki, neitayu olarrabal te Yahas. Neishoru Olaitoriani Enkai ang ninye, nikimir iyiook ninye, o layiok lenyena, o ltung'ana lenyena pooki. Nikimbung iyiook nkanas enyena teina kata nikindaikie tukul pooki anasa, ilewa, o nkituaak, o nkera; meetae hoo obo otung'uayioki eishu. Nkishu kiwaita aaraya tenebo iyarunot e nena anas nikimbung'a. Ore ebaiki Aroer naa ninye natii embata o erata le Arnon, o ebaiki ina anasa natii oerata ometabaiki Gilead meetae enkanasa nalusoo te iyiook; eishorua Olaitoriani Enkai ang pooki apik atua nkaik ang. Ina kop pooki ake oo layiok le Amon eitu inyikakiki, aa taa, inkiyopat o lkeju le Yaboko o nkanas eina kop oo ldoinyo, o pooki wueji neitanapa iyiook Olaitoriani Enkai ang ajoki emipuo. “Nikintoki iyiook aaibelekenya nikipuo aaim enkoitoi e Bashan; neipang'u Oog ilo aiguanani le Bashan alotu aarare iyiook, ninye o ltung'ana lenyena pooki, nearare iyiook te Edrei. Kake aatiaka nanu Olaitoriani, ‘Miureyu ninye; amu aishorua nanu ninye, o ltung'ana lenyena pooki, o enkop enye apik atua enkaina ino, naa ilo iyie aitaas ninye anaa enintaasa Sihon ilo aiguanani le Amori, apa omanya Heshbon.’ Neaku eishorua sii Olaitoriani Enkai ang apik atua enkaina ang Oog, ilo aiguanani le Bashan, o ltung'ana lenyena pooki, nikiosh iyiook ninye o metaba anaa neaku meeta ninye olaishirani otelekakaki ninye. Nikiya iyiook nena anas enyena pooki teina kata meetae hoo enkanasa neitu iyiook kiya te ninche - nkanas ntomoni ile, enkop pooki e Argob, ina kitoria e Oog tiatua Bashan. Ore kuna pooki naa nkanas apa naasheta isunta adoru, o nchomito oo sekenke, ore tenebo nena netii nkang'itie kutiti kumok oleng nemesheta sunta. Nikindaikie iyiook ninche katukul anaa apa enikinkuna Sihon, ilo aiguanani le Heshbon, aaidaikie pooki anasa, ilewa, o nkituaak o nkera. Kake ore nkishu pooki o nena masaa naatii nkang'itie kiwaita aaraya. Neaku kiwaita iyiook ina kop teina kata too nkaik e lelo aiguanak oare le Amori ootii lido kekun le Yordan, ebaiki oerata le Arnon o metabaiki oldoinyo le Hermon. (Kejo apa lelo le Sidon oldoinyo le Hermon Sirioni, nejo ile Amori Senir). Ore nena anas pooki eina kop naiperere Gilead pooki o Bashan pooki, ebaiki Saleka o Adrei, nkanas e nkitoria e Oog tiatua Bashan. Amu Oog ake ilo aiguanani le Bashan etung'ueikiaki olpisiai le Refaim, ng'ura, ore endapash enye naa ene sekenkei; aimetii ninye atua Raba o lelo Amoni? Ore enkadoro enye naa ntemat naaudo ore endapasho naa ntemat ong'uan te ntemata e nkaina o ltung'ani. “Ore apa pee kiya iyiook ina kop teina kata, naisho nanu ile Ruben o le Gad ina kop eiteru te Aroer, natii olkirine lo oerata le Afnon, o lpisiai oitorit ina kop oo ldoinyo e Gilead tenebo nkanas enyena; ore ina ae kop pooki e Gilead o Bashan pooki, ina kitoria e Oog, aa taa, ina kop pooki e Argob aishoo nanu olpisiai oitorit Manase. Ore ina Bashan pooki naa keji enkop e Refaim. Ore Yair ilo le Manase neya ina kop pooki e Argob, aa taa Bashan, o metabaiki olpolosie loo Lgeshuri - oloo Lmakaati neipotie nena ang'itie kutiti kewan ajo, Hofot-Yair, anaa enatiu o taata. Ore Hakir naisho nanu Gilead, ore ile Ruben o le Gad naishoo nanu ina kop ebaiki Gilead o metabaiki oerata le Arnon, tenebo empolos o erata metaa olpolosie o metabaiki olkeju le Yabok, ilo polosie loo Lamori; o Araban sii tenebo Yordan pee eaku olpolosie, ebaiki Kineret o metabaiki enaiposha e Araba, ina aiposha naisukut, tiabori lelo jurumi le Pisga te nkalo o loo saen. “Naitanap apa nanu intae teina kata, ajoki, ‘Eishoo intae Olaitoriani Enkai inyi ena kop pee eaku eninyi; ore lelo lewa linyi ootanapate keeim ninche ene eeta ruparen te dukuya ilalashera linyi, lelo tung'ana le Israel. Kake ore nkituaak inyi, o nkera inyi kutiti, o nkishu inyi (ayiolo nanu ajo iatata nkishu kumok) netoni ninche te nena anas naishoo nanu intae, ometaba anaa neisho Olaitoriani enkiyeng'iyeng ilalashera linyi, anaa enaishoo intae, nemany sii ninche ina kop naisho Olaitoriani Enkai inyi ninche te lido kekun le Yordan; nitumutumu taa aatorrinyoto, oltung'ani ake, ashomo ine wueji enye naishoo nanu intae.’ Naitanapa apa nanu Yoshua ina kata ajoki, Etoduaa nkonyek inono nena pooki naataasa Olaitoriani Enkai ino te kulo aiguanak pokira oare; neijia elo aiko Olaitoriani too nkitoriat pooki nilo iyie aimaa, miureyu ninche amu Olaitoriani Enkai ino oarisho te nkaraki iyie.” “Nasai nanu Olaitoriani ina kata, ajoki, ‘Olaitoriani Enkai, nterua iyie aitodol osinka lino enkitoo ino o emagilanisho e nkaina ino; amu kaa ai naatae te keper aashu te nkop naaidim ataasa siaaitin naaijo kuna o nkiaasin magil naaijo ininono? Nchooki nanu matalang'a alo, aatoomono, pee alo adol ina kop sidai te lido kekun le Yordan, idia kop sidai oo ldoinyo, o Lebanon!’ Kake aatagorokine apa nanu Olaitoriani te nkaraki intae, neitu ninye aaning nanu; naajoki nanu Olaitoriani, ‘Tabaiki iyie ine; mikingil iyie airorie nanu tialo ena bae. Ilepa shomo enchumata e Pisga; nishumu inkonyek inono aing'or enkalo oloo ntoluo, naa ng'ura etii ina kop nkonyek inono, amu milo iyie alang ele keju le Yordan. Kake ntanapa Yoshua, nintagol ninye oshoke nintipij ninye, amu kelang ninye aimu te dukuya kulo tung'ana, naa kelo ninye aitujung ninche ina nilo iyie adol.’ Neaku kitobiko apa iyiook tiatua ilo erata otalakinore Betpeor. “Ore naa taata iyie, Israel, toning'o nkitanapat o kuna kikoot naiteng'en nanu intae, niasiasa ninche, pee itumutumu aatopok nipuopuo aaya ina kop naisho intae Olaitoriani Enkai oo loo papaai linyi. “Miponaa ororei teina kitanapata naishoo nanu intae, nimiwuang'ieng'ie; pee itumutumu aaibung'a nena kitanapat o Laitoriani Enkai inyi naitanapa nanu intae. Etoduaa nkonyek inyi ina nataasa Olaitoriani te Baal-peor; amu eidaikie Olaitoriani Enkai inyi aishie tiatua intae lelo tung'ana pooki ootusujaitie ina kitanyaanyukoto e nkai e Peor. Kake ore intae ooibung'a aakurraki nkitanapat o Laitoriani Enkai inyi, ninchushu pooki ena olong. Eng'ura, aiteng'ena nanu intae nkikoot, anaa enaaitanapa Olaitoriani Enkai ai, nchere pee ipuopuo aas teina kop nipuopuo aaya. Embung'a ninche niasiasa; amu kelo ina aaku eng'eno inyi o eyiolounoto inyi te dukuya iltung'ana, laa, tenening ninche kuna kikoot pooki, nejo, ‘Esipa ore ele osho kitok naa oloo ltung'ana ng'eni.’ Amu kalo osho kitok oata enkai nataaniki anaa enataana Olaitoriani Enkai ang te iyiook, enkata pooki naba anaa enikimpot ninye? Naa kalo likae osho kitok oata nkikoot o nkiguanat naasipa anaa ena kitanapata nairragie nanu te dukuya intae ena olong? “Tagolie ake kewan, ning'or oltau lino oleng, pee mikirikino ake nena tokitin naatoduaa nkonyek inono, pee milo alamari to ltau lino too nkolong'i pooki e nkishui ino; ntayiolo ninche nkera inono, o nkera oo nkera inono eninkuna apa ina olong pee intashe te dukuya Olaitoriani Enkai ino te Horeb, pee aajoki nanu Olaitoriani, ‘Inturrurrokoki nanu kulo tung'ana, pee aitoning nanu ninche irorei laainei, pee aayiolou ninche naaureyu nanu nkolong'i pooki naaishu ninche tioriong enkop, netum sii aaiteng'ena nkera enye nena baa.’ Nietuo apa intae aanyiku nintasheshe te ntonata o ldoinyo, ina kata eyupuyup ilo doinyo te nkima nebaiki olng'ejep keper, neimulumul enkatampoi kitok o empuruo. Neirorie intae Olaitoriani tiatua empolos eina kima; nining'ining'i oltoilo loo rorei lenyena, kake eitu idolidolo ilo oiro; oltoilo ake itoning'o. Neibalakinye ninye intae olning'o lenye lo sotua, ilo oitanapa intae pee iasiasa, aa taa, nena kitanapat tomon, neiger ninye ninche too mbelat oo soito naagueta. Naaitanap nanu Olaitoriani ina kata pee aiteng'en intae nena kikoot o nkiguanat, pee itumutumu aataas ninche teina kop nipuopuo aaya. “Ore enkaraki ina, entujurroto maate. Amu eitu apa idolidolo ilo oiroro teina olong nairorie intae Olaitoriani te Horeb te mpolos enkima, entodol ate minyalinyala ate aaitobiru nkitanyaanyukot naagueta, te nkaraki intae maate, te mpukunoto e ae toki, te mpukunoto olee aashu e ng'oruoi, te mpukunoto e ae ng'ues ake ninye natii oriong enkop, te mpukunoto e ae motonyi ake ninye nakuet to loing'ang'e, te mpukunoto e ae toki ake ninye naiserpepiari te nkop, te mpukunoto osinkirri ake ninye otii atua enkare tiabori enkop. Naa entodol ate mishumumu ake nkonyek inyi aaing'or shumata, ore ake pee idolidolo enkolong, o lapa o lakir, ilo orora pooki le shumata, neiyiatari intae nipuopuo aaserem ninche nisiayiayia ninche, nena tokitin naatoorikia Olaitoriani Enkai ino iltung'ana pooki ootii abori shumata pooki. Kake kintayio iyie Olaitoriani, nikintupuku aitung'uaa olkokuet le sekenkei oyupuyup, aitupuku te Misiri, pee iaku olorere lenye kewan, anaa enatiu taata. Ore etiu neijia, aatagorokine apa nanu Olaitoriani te nkaraki intae, neinos ninye olmumai nchere malang nanu Yordan, o nchere sii, malo nanu ajing ina kop sidai naisho intae Olaitoriani Enkai inyi pee ijung'ujung'u. Amu meeta nchere maye nanu tena kop, meeta nchere kashomo nanu lido kekun le Yordan kake ilang'ilang'a intae aapuo aaya ina kop sidai. Eng'ura ate, merikino ake intae olning'o lo sotua lo Laitoriani Enkai inyi, apa oitobira ninye tenebo intae, nimintobiruru enkitanyaanyukoto nagueta e ae ake ninye pukunoto natomitikio intae Olaitoriani Enkai inyi. Amu ore Olaitoriani Enkai inyi naa enkima nanyaisho, Enkai olom. “Te nitum nkera o nkera oo nkera inono, nimoruau teina kop, tenipong'ori aitobiru enkitanyaanyukoto nagueta te mpukunoto ake ninye ae toki, ore te asata eina bae torrono te dukuya Olaitoriani Enkai ino, aitagor ninye, kaipotu nanu keper o enkop pee kinchakenoki iyie ena olong, nchere ipuopuo nabo kata aaidaaya nipuopuo aaye te lido kekun le Yordan; mipuopuo intae aabik teina kop, kake keidaikieki intae. Naa kelo Olaitoriani aidapashaki intae iloreren, niakuku kuti tiatua lelo oshon ooreu intae Olaitoriani. Ore teine nipuopuo aaisiaai nkaitin oo nkeek o noo soito, ina siaai oo nkaik e tung'ana, ina nemedolisho, nemening'isho nemenya endaa, nemeing'uaya toki. Kake ore teine ning'oruru Olaitoriani Enkai inyi, naa eitumutumu intae ninye, tenililitutu aaing'oru ninye too ltauja linyi pooki o te nkishui inyi pooki. Tenijing'ijing'i intae atua osina, nepuonu kuna baa pooki shumata intae too nkolong'i e siadi, nirrinyokinono intae Olaitoriani Enkai inyi, nining'ining'i oltoilo lenye, amu ore Olaitoriani Enkai inyi naa Enkai olng'ur; meitiak ninye intae neidaikie intae nemerikino ninye ilo ning'o lo sotua loo loo papaai linyi apa oinosie olmumai tialo ninche ntarasi. “Nkilikuanisho taata tialo nena olong'i naatulusoitie, nena apa e dukuya te iyie, ebaiki ina olong apa naitayu Enkai oltung'ani apik oriong enkop, ninkilikuanisho ebaiki eluboto nabo e keper o metabaiki enkae, tenaa ketaase aekata embae kitok naikununo nji aashu tenaa ketoning'oki aekata. Ketii apa aekata iltung'ana oo toning'o oltoilo le Nkai eiro te mpolos enkima, anaa enitoning'o intae neton ake inchushu? Tenaa keetae aekata enkai nashomo ayaki kewan olosho aitung'uaa empolos e likae osho, too ntemat, o too nkitoduaat, o too mbaa enking'asia o to larrabal te nkaina magilani o te nkaina naitoriori, o too ntabo sapuki, te risioroto e nena pooki naataasa Olaitoriani Enkai inyi te nkaraki intae te Misiri te dukuya nkonyek inyi? Ore te intae, neitodoluaki apa, pee itumutumu aatayiolo nchere, Olaitoriani ninye Enkai, metii likae oponieki ninye, te shumata eishoo ninye intae entoning oltoilo lenye, pee etum aiteng'ena intae, ore te nkop neisho intae entodol ina kima enye kitok, nining'ining'i intae irorei lenyena epuku te mpolos eina kima. Ore enkaraki natonyorra apa ninye iloo papaai linyi negelu eishoi enye te siadi ninche, neitayu intae aitupuku te nkop e Misiri, te ngolon enye kitok, etii ninye tenebo intae. Nearaa ninche te dukuya intae iloshon kituaak naa magil aalanag intae maate pee etum aisho intae ina kop enye metaa enjung'ore inyi anaa enatiu taata; entayiolo naa taata, ena olong nipikipiki iltauja linyi nchere, Olaitoriani ninye Enkai te shumata o tiabori enkop; meetae likae. Metaa embung'a nkikoot enyena o nkitanapat enyena, nena naitanapa nanu intae ena olong, pee iserianunu intae o nkera inyi te siadi intae, nitumokiki aaitoodoro nkolong'i inyi teina kop naisho intae Olaitoriani Enkai inyi ntarasi.” Neiteng'el Musa nkanas uni te nkalo o loo saen lido kekun le Yordan, pee etum aisikaki oltung'ani oitayu loikop, ilo oar metua o lelatia enye te sesekuan, meatakinore mang'atisho too nkolong'i naatulusoitie, neaku tenesaru ninye nabo e kuna anas neidim aitajeu enkishui enye. Beser tiatua ina kop naitoriori too ltung'ana le Ruben, o Ramoti tiatua Gilead too ltung'ana le Gad, o Galan tiatua Bashan too ltung'ana le Manase. Ena enkitanapata nairragie Musa te dukuya nkera oo Siraeli; kuna ninche enchakenisho, o nkikoot o nkitanapat naa ninche eirorie Musa nkera oo Siraeli ina kata apa eipang'u aapuku te nkop e Misiri, te lido kekun le Yordan teilo erata oipirakinore Bet-peor, tiatua enkop e Sihon olaiguanani le Amori, apa omanya Heshbon laa ninye etimira Musa o nkera e Israel ina kata apa pee eipang'u ninche te Misiri. Neya ninche ina kop enye o enkop e Oog olaiguanani le Bashan, o lelo aiguanak oare le Amori, apa oomanya enkalo o loo saen te idia alo Yordan; ebaiki Aroer, aa ninye naigaraki oerata le Arnon ometabaiki oldoinyo le Sirion (aa taa Hermon) tenebo ina Araba pooki te nkalo o loo saen le Yordan o metabaiki enaiposha e Araba, tiabori nena kishong'ishong'at e Pisga. Neiturrurru Musa iltung'ana pooki le Israel, nejoki ninche, “Entoning intae Israel nkikoot o kuna kitanapat nairo nanu too nkiyiaa inyi ena olong, niyiolouu intae ning'oring'oro ate pee iasiasa. Eitobirua apa Olaitoriani Enkai ang olning'o lo sotua o iyiook te Horeb. Mme apa loo papa eitobirie Olaitoriani Enkai ang ele ning'o lo sotua, kake iyiook, kulo pooki ootii ene ooishu ena olong. Eirorie intae Olaitoriani nchororo nkomomi to ldoinyo, te mpolos eina kima, ina kata aitashe nanu te rishata Olaitoriani o intae teina kata, pee eibalakinye intae ororei lo Laitoriani; amu itureishote apa te nkaraki ina kima, neitu ilepilepe aapuo enchumata oldoinyo. Nejo ninye: “‘Ara nanu Olaitoriani Enkai ino, ilo likiyaua iyie aitupuku te nkop e Misiri, aitupuku te nkaji e sinkaisho. “‘Miata kulie aitin neme nanu. “‘Mintobiraki kewan enkitanyaanyukoto e nkai nagueta, aashu empukunoto e ae toki natii shumata aashu enatii abori enkop, aashu ina natii atua enkare tiabori enkop; mirrugokino ninche nimiserem ninche; amu ore nanu Olaitoriani Enkai ino naa kara Enkai olom, naitusuj nkera ing'ok oo loo menye o metabaiki eishoi e uni o eniong'uan e lelo laaiba nanu, kake kaitodolu enyorrata too nkalifuni e lelo laanyor neibung nkitanapat aainei. “ ‘Mimpot enkarna o Laitoriani Enkai ino te nkiguran: amu meikenaa Olaitoriani ajo eitu eitarruoo ilo oipot enkarna enye te nkiguran. “ ‘Mbung'a enkolong e Sabato, pee intisiny, anaa enikintanapa Olaitoriani Enkai ino. Too nkolong'i ile taasisho, nias esiai ino pooki; kake ore enkolong e naapishana naa sabato to Laitoriani Enkai ino; ore teina olong mias hoo ae siai, iyie aashu olayioni lino, aashu entito ino, aashu olaisiaayiani lino, aashu enkaisiaayiani ino, aashu olkiteng lino, aashu osikiria, lino aashu ae ake ninye nabo oo nkishu inono, aashu olomoni otii atua enkaji ino, pee etum aeng'iyeng'ayu olaisiaayiani lino lee o enkaisiaayiani ino tenebo iyie. Tadamu nchere ira apa osinka te nkop e Misiri, nikintupuku Olaitoriani Enkai ino teine te nkaina enye magilani naitoriori; metaa kintanapa iyie Olaitoriani Enkai ino pee imbung enkolong e Sabato. “ ‘Iyanyita papaai lino o ng'utunyi, anaa enaaitanapa nanu Olaitoriani Enkai ino, pee itum ataseriana, nitum atoponai nkolong'i inono, teina kop naaisho nanu iyie. “ ‘Miar metua “ ‘Miloloito, “ ‘Nimipurrisho. “ ‘Niminteeniki ilo le latia ino elejare. “ ‘Niming'uar enkitok eilo le latia ino; niming'uar enkaji eilo le latia ino, aashu enkurma enye, aashu olaisiaayiani lenye aashu enkaisiaayiani enye, aashu olkiteng lenye, aashu osikiria lenye, aashu pooki toki ake ninye eilo le latia ino.’ “Kulo rorei eirorie intae Olaitoriani te umata inyi pooki to ldoinyo eimunye empolos e nkima, o enkatampoi o enaimin kitok, to ltoilo kitok; neitu ninye eitoki aponaa toki. Neiger ninye kulo rorei too soito naagueta, naaisho ninye nanu. “Ore ake pee ining'ining'i ilo toilo epuku te mpolos eina aimin, ina kata eyupuyupito oldoinyo te nkima, nikipuonunu intae aanyikaki, ilukuny pooki oo loshon linyi, olpayiani linyi; nijojo intae, ‘Ng'ura, eitoduaa iyiook Olaitoriani Enkai ang enkisisa enye o enkitoo, nikitoning'o iyiook oltoilo lenye epuku te mpolos enkima; kitoduaa iyiook ena olong Enkai eirorie iltung'ana neton ake eishu lelo tung'ana. Amaa naa taata kainyoo iyiook pee kiye? Amu kemut iyiook ena kima kitok; tenikintoki iyiook aaning oltoilo lo Laitoriani Enkai ang, nikiye. Amu kaing'ae too looishu pooki oata osesen, otoning'o oltoilo le Nkai naishu eiro eimu empolos e nkima, anaa enikitoning'o iyiook, neton ake kinchu. Enchom entinyikakaki pee ining'ining'i nena pooki naajo Olaitoriani Enkai ang; nilikiki iyiook nena pooki naaliki intae Olaitoriani Enkai ang; amu eikining iyiook nikiaas.’ “Nening Olaitoriani irorei linyi ina kata apa pee kirorierie nanu; naajoki nanu Olaitoriani, ‘Atoning'o nanu irorei le kulo tung'ana likitiakitia ninche; eiroro ninche te sipata nena pooki naatejo. Oi oshi tenaa keeta ena damunoto anaa ena olong nkolong'i pooki, pee aaureyu nanu neibung nkitanapat aainei pooki, pee etum ninche aataseriana tenebo nkera enye ntarasi. Shomo tiaaki ninche, “Entorrinyokinoto ilng'oborri linyi.” Kake ore iyie, intasho tene te mbata nanu, pee aaliki nkitanapat pooki, o nkikoot o nkiguanat nilo aiteng'en ninche, pee epuo ninche aas teina kop nalo nanu aisho ninche.’ “Shomo naa toduaa kewan pee ias anaa enikintanapa Olaitoriani Enkai ino; nimimbelekenya alo enkalo e tatene aashu ene kedienye. Shomo teina oitoi pooki nikintanapa Olaitoriani Enkai ino, pee itum atopuaa, nitum sii ataseriana, nitumutumu aatobikoi tiatua ina kop naisho intae Olaitoriani.” Ena enkitanapata, o enkikoo o nkiguanat naaitanapa nanu Olaitoriani Enkai inyi pee aiteng'en intae, pee itumutumu aataas teina kop nipuopuo aaya; pee itum aturia Olaitoriani Enkai ino, iyie o layioni lino o layiok loo layiok linono, nimbung'ubung'u kuna kikoot pooki, o nkitanapat enyena, naitanap nanu intae, too nkolong'i pooki enkishui inyi; pee etumi aatoponai nkolong'i inyi. Toning'o naa, iyie Israel ning'or kewan pee iyau kuna kitanapat; pee itum ataseriana, nitum sii atoponari oleng, anaa apa enaisiligie intae Olaitoriani, Enkai oo loo papaai linyi tiatua ina kop naruko naishi o kule. “Toning'o iyie Israel: ore Olaitoriani Enkai ang naa Olaitoriani obo; tonyorra Olaitoriani Enkai ino to ltau lino pooki, o te nkishui ino pooki, o te nkidimata ino pooki. Ore kulo rorei laaitanap nanu iyie ena olong nchoo ejing oltau lino; nilo iyie aunoki aiteng'en nkera inono, niimaki kulo omon teniton tiatua enkaji ino, o tenilo te nkoitoi, o tenirrag, o tenidumunye. Niyeniki ninche enkaina ino metaa olmonekie, netiu ninche anaa nkishiliaa te rishata oo nkonyek inyi. Nisir ninche too mbokishi e kutukaji e nkaji ino o too ntaloishin e kishomi. “Ore kenya ake pee kiyau Olaitoriani Enkai ino atua ina kop apa nainosie olmumai too loo papaai linyi te Abraham, o te Isaak, o te Yakobo, pee eisho intae nkanas sapuki naa sidain neitu ishetishete, o nkajijik naabore ntokitin pooki sidain neitu intae mputuputu, o lchorroi ooturo leitu intae ituruturu, o nkurman oo sabibu o noo loirienito leitu intae iunuunu, naa tenidaa intae aaraposho, ning'oring'oro naa ate merikino ake intae Olaitoriani, ilo laa ninye oitupukuo intae aitung'uaa enkop e Misiri, aitung'uaa enkaji e sinkaisho. Shomo turia Olaitoriani Enkai ino; shomo isiayia ninye, ninos olmumai te nkarna enye. Milo ake asujaa kulie aitin, nena aitin e lelo tung'ana likimanita iyie. Amu ore Olaitoriani Enkai ino ilo otii empolos inyi naa Enkai olom; pee meyupuyup ake engoro Olaitoriani Enkai ino tialo yie, nikindaikie ninye aiwuang'ie tioriong enkop. “Nimitem Olaitoriani Enkai ino, anaa enitetema ninye te Masa. Mbung'a tukurraki nkitanapat o Laitoriani Enkai ino o shakenisho enye, o nkikoot enyena apa nikintanapa ninye. Naa ias iyie esidai naishiakino too nkonyek o Laitoriani, pee itum ataseriana, nitum sii ashomo aawa ina kop sidai apa nainosie Olaitoriani olmumai pee eisho iloo papaai linyi nchere kerrumoo ninye aipang'ie ilmang'ati linyi te dukuya intae, anaa enaisiligishore Olaitoriani. “Ore akenya tinikinkilikuan olayioni lino te nkata nalotu ajoki, ‘Kainyoo eutu ena shakenisho, o kuna kikoot o nkitanapat, o nkiguanat nikintanapa iyie Olaitoriani Enkai ang?’ Nitum taa atiaki olayioni lino, ‘Eikira apa irrindiki le Farao te Misiri; neyau iyiook Olaitoriani aitupuku te Misiri te nkaina magilani; neitodolu Olaitoriani nkitoduaat o mbaa enking'asia, mbaa sapuki naaitureisho tialo Misiri o tialo Farao o enkaji enye pooki, nikidol too nkonyek ang; neyau ninye iyiook aitupuku teine, pee etum aitijing'u iyiook neisho iyiook ina kop apa nainosie ninye olmumai pee eisho loo papa. Neitanapa iyiook Olaitoriani pee kiaas kuna kikoot pooki, pee kiureyu Olaitoriani Enkai ang, te nkaraki eseriani ang maate e anaake, pee etum ninye atagolie iyiook metaa eikinchu anaa enikitiu ena olong. Naa kelo ena aaku esipata te iyiook, teniking'or aabaraki pee kiaas ena kitanapata pooki te dukuya Olaitoriani Enkai ang anaa enaitanapa ninye iyiook.’ “Teneyau akenya intae Olaitoriani Enkai inyi atua ina kop nijing'itata aapuo aaya, neiwuang'ie ninye lelo oreren ootii dukuya intae, Ilhiti, o Ilgashi, o Ilamori, o Ilkanaani, o Ilperesi o Ilhafi, o Lyebusi, lelo oshon pokira oopishana kituaak naa magil aalang intae, naa teneishoru ninche Olaitoriani apik nkaik inyi, nimirimiri intae ninche, nitumutumu taa aaidaikie ninche katukul; emipuo ake aaitobir olning'o o ninche, nimintodolulu olng'ur te ninche. Nimiyamama intae o ninche aaisho intoyie inyi ilayiok lenye aashu aayamaki ntoyie enye ilayiok linyi. Amu keidim ninche aaibelekenya ilayiok linyi maaitoki aairukurukore nanu, pee eisiaai kulie aitin enye; netum engoro o Laitoriani ayupuyupo tialo intae, naa keidim ninye aidaikie intae nabo kata. Kake nji intae entaasa ninche: enchom entigil ilperereni lenye loo lasarri nintaa ing'apeta enye mbelibelat, nitururu aadotu ina kitanyaanyukoto enye e nkai naji Asherim aapejoo te nkima nena kitanyaanyukot enye oo nkaitin naaguetuno. “Amu irara intae olorere oitisinyakaki Olaitoriani Enkai inyi; etegelua intae Olaitoriani Enkai inyi pee iakuku olorere lenye makewan, negelu intae tiatua lelo oreren pooki ootii oriong enkop. Mme apa enkaraki nirara intae kumok aalang ilkulikae tung'ana pee etipika Olaitoriani enyorrata enye shumata intae negelu intae, amu intae apa kuti aalang iloreren pooki; kake enkaraki nanyor intae Olaitoriani; neibung'ita ninye ilo mumai apa oinosie loo papaai linyi, ina pee eyaua intae Olaitoriani aipang'unye te nkaina magilani, nekordu intae Olaitoriani aitupuku te nkaji e sinkaisho, aitung'uaa enkaina e Farao ilo aiguanani le Misiri. Tayiolo naa nchere, Olaitoriani Enkai ino ninye Enkai, ina Ai naisiligayu naibung olning'o o enyorrata nauno te lelo oonyor ninye neibung nkitanapat enyena, ometabaiki iishoritin enkalifu, neitalaku te lelo ooiba ninye, eidaikie ninche; meshololo te lelo ooiba ninye, keitalaku te ninye teine ake. Eng'ura naa pee iasiasa ina kitanapata, o nena kikoot, o nkiguanat naitanapa nanu intae ena olong. “Ore enkaraki nitoning'o intae kuna kiguanat, nimbung'ubung'u niasiasa ninche, keibung Olaitoriani Enkai inyi tenebo intae ilo ning'o oina nyorrata nauno apa nainosie olmumai too loo papaai linyi nchere keibung. Kenyorru ninye intae, nemayian intae, nepon intae, kemayian sii lelo ng'anayio lo sesen lino o lelo ng'anayio le nkop ino, enkurma ino, o enaisho oo sabibu ino, o eilata ino, nepon nkishu inono o ntare inono teina kop apa nainosie olmumai too loo papaai linyi pee eisho intae. Kemayian intae aaitulus too loreren pooki; meitokini aata olee aashu eng'oruoi olupi tiatua intae, aashu tiatua nchoo inyi. Naa kelo Olaitoriani aiwuang'ie tiatua intae emuoyian pooki nemeetae hoo nabo te nena muoyiaritin torrok e Misiri niyiololo, nalotu shumata intae kake keiteleiki ninye shumata lelo pooki ooiba intae. Naa ipuopuo intae aaidaikie lelo oreren pooki ooisho intae Olaitoriani Enkai inyi, melo hoo enkong'u inyi aing'urrie ninche, nimilo iyie aisiaai nkaitin enye, amu kelo ina aaku orreshet te intae. “Tenijo iyie to ltau lino, ‘Eikituaak kulo oshon aalang iyiook, kaji nanu aiko tenaiwuang'ie ninche?’ Milo iyie aureyu ninche, kake shomo tadamu ina apa naitaasa Olaitoriani Enkai ino Farao o Misiri pooki, nena baa sapuki nitoduaa iyie too nkonyek inono, nena kitoduaat o nena enking'asia, ina aina magilani, oina aina naitoriori naa ninye kintupukunye Olaitoriani Enkai ino; naa neijia elo Olaitoriani Enkai ino aiko te lelo oreren pooki liure. Keirriu sii Olaitoriani Enkai inyi olmeitai atua ninche, ometaba anaa ore ninye lelo ooleku eisudori eure intae neidak. Mimputukuny te nkaraki ninche; amu etii Olaitoriani Enkai inyi empolos inyi, ina Ai kitok naitureisho. Keiwuang'ie Olaitoriani Enkai inyi kulo oshon te dukuya iyie aa kutiti; mindaikie iyie ninche pooki nabo kata, pee mikirasaki ake ing'uesi entim. Kake eikintarasaki iyie Olaitoriani Enkai ino ninche, nepik ninche olmilo o metaba anaa neidak. Neishoru ninye ilaiguanak lenye apik nkaik inyi, nimisie iyie enkarna enye aiwuang'ie te nkop; meetae hoo oltung'ani obo likindim ashomo aipirakinore, o metaba anaa nindaikie ninche. Ore nena kitanyaanyukot enye naaguetuno oo nkaitin enye shomo tapejoi te nkima; ming'uar ina osholai anaa ina sahabu napetokino ninche, nimiyaya intae maate, mijing'ijing'i ake orreshet; amu oldeket ina to Laitoriani Enkai inyi. Nimiyauu nkajijik inyi ina toki nara olminong, miakuku ake oldeket anaa ninye, mbai tukul nilam amu entoki nadiaa. “Ore kuna kitanapat naitanapa nanu intae ena olong enchom entisipu entaas, pee itumutumu aatopok niponariri, nipuopuo aaya ina kop nainosie Olaitoriani olmumai pee eisho loo papaai linyi. Nidamumu ina oitoi pooki natorikunye intae Olaitoriani Enkai inyi te kulo arin artam tiong'ata, pee etum ninye aitoborro intae, netem intae, pee etum atayiolo ina natii iltauja linyi, tenaa imbung'ubung'u, neitobor ninye intae, neisho intae esumash, neitoti intae te Mana, apa nimiyiololo intae, nemeyiolo sii apa loo papaai linyi; pee etum ninye aitayiolo intae nchere, meishu oltung'ani te nkaraki endaa ake, kake keishu oltung'ani te nkaraki pooki toki naing'uaa enkutuk o Laitoriani. Eitu apa epolosa nkilani inyi, neitu ejeyu nkejek inyi, te kulo arin artam. Tayiolo naa to ltau lino nchere, ore anaa enaitame oltung'ani enkerai enye aikintame sii ninye iyie Olaitoriani Enkai ino. Metaa shomo mbung'a nkitanapat o Laitoriani Enkai ino, alo too nkoitoi enyena niureyu ninye. Amu eikiyau iyie Olaitoriani Enkai atua enkop sidai, enkop oo nong'ot naatii nkariak, neetii nchorroi oo nkonyek, naarukunye too erat o too ldoinyo, enkop e nkano o entapa, enkop oo sabibu o lng'abolo, o lng'anayio, enkop oo loirienito o enaisho, ina enkop nilo iyie aadaare nimintoki aekata aisumashu, nimilaunye toki, ina kop naa ore isoito lenyena naa sekenke, ore too ldoinyo linono nilo aturu osuyai. Nilo iyie adaa araposho, nisis Olaitoriani Enkai ino teina kop sidai nikinchoo ninye iyie. “Toduaa naa ake mikirikino Olaitoriani Enkai ino, nipal eitu imbung nena kitanapat enyena, o nkikoot enyena o nkiguanat enyena naaitanap nanu iyie ena olong. Pee tenilo nidaa araposho, nishet nkajijik sidain nimany, ore teneponari nkishu inono o ntare, neponari nkoshola inono o sahabu, ore nena pooki niata neponari, nedumunye taa oltau lino, nikirikino Olaitoriani Enkai ino, laa ninye likiyaua aitung'uaa enkop e Misiri, aitupuku te nkaji e sinkaisho, laa ninye likitorikoyie aimie ilo purkel kitok, ilo otii lasuriaa torrok o nkolupani oina kop natoyio nemetii enkare, laa ninye likiyaka iyie enkare aimunye e ndapidapoi nagol. Naa ninye likintotio iyie tiong'ata teina mana apa nemeyiolo loo papaai linyi; pee kitum aitoborro nikitem iyie, pee kitum ninye aitaasa esidai te siadi. Toduaa kewan, pee mijo ake to ltau lino, ‘Engolon ai o enkidimata e nkaina ai anotie nanu kuna masaa!’ Tadamu Olaitoriani Enkai ino, amu ninye likincho iyie engolon niakunye karsis; pee etum aitudupa ilo mumai apa oinosie loo papaai linyi, anaa enatiu ena olong. Naa tenikirikino Olaitoriani Enkai ino, nilo arubare kulie aitin nisiaai ninche niserem ninche, kaaunoki nanu aikok ena olong nchere ilo ake aidak. Anaa lelo oshon ooishoo Olaitoriani mediaa te dukuya nkonyek inono, enkaraki nimiyieu iyie nining oltoilo lo Laitoriani Enkai ino. “Toning'o iyie Israel, ilo taata iyie alang Yordan, pee ilo aiwuang'ie nimany lelo oshon kituaak naa magil te intae, nena anas naateshetaki aaitabaiki shumata, lelo tung'ana oogol naa adoru, lelo ayiok le Anakim, liyiololo intae, nitoning'o intae nijojo, ‘Kaing'ae naidim aitasheikinore ilayiok le Anak?’ Tayiolo naa ena olong nchere ore ilo oloito te dukuya intae anaa enkima nanyaisho naa Olaitoriani Enkai inyi; keidaikie ninche neishie ninche te dukuya intae; metaa ipuopuo intae aamiraa ninche, nimutumutu ninche nabo kata, anaa enaisiligie Olaitorianiintae. “Milo ake ajo to ltau lino, teneidip Olaitoriani aturrumoi ninche te dukuya intae, ‘Tenkaraki esupatisho ai peyie aayawua nanu Olaitoriani maawa ena kop,’ amu enkaraki entorroni e kulo oshon pee eturrumoyie Olaitoriani ninche te dukuya intae. Mme te nkaraki esupatisho ino aashu emborron oltau lino pee ilo iyie aya ina kop enye; kake te nkaraki entorroni e kulo oshon pee earaa Olaitoriani ninche aipang'ie te dukuya intae, pee etum ninye atudupa ilo rorei apa oinosie Olaitoriani olmumai too loopapaai linyi, Abraham, o Isaak o Yakobo. “Tayiolo naa nchere, mikinchorita iyie Olaitoriani Enkai ino ena kop sidai te nkaraki esupatisho; amu ira iyie olorere ogolong'u. Tadamu nimincho kirikino ina apa nintagoro Olaitoriani Enkai ino to lpurkel; ebaiki ina olong apa nitupukuo iyie te nkop e Misiri ometaba anaa nilotu ene wueji, igolong'aki oshiake Olaitoriani. Ore ninye apa to ldoinyo le Horeb nintagoro intae Olaitoriani, negorokino intae Olaitoriani oleng eyieu eidaikie intae. Ore apa nena soito naagueta, nena soito dapashi o lning'o lo sotua apa naaitobira Olaitoriani tenebo intae, natobiko nanu to ldoinyo nkolong'i artam o nkewarieitin artam; neitu nanu anya endaa anaa aok enkare. Naaisho nanu Olaitoriani nena soito are naagueta naaigeroki to lkimojino le Nkai, neigerokino ninche lelo rorei pooki apa ooirorie Olaitoriani intae to ldoinyo aimunye empolos enkima teina olong apa eumata. Ore te siadi nena olong'i artam o nkewarieitin artam naaisho nanu Olaitoriani nena soito pokira are naagueta, nena soito olning'o lo sotua. Naaitoki nanu Olaitoriani ajoki, ‘Tudumunye, shomo tadoi tasiooi tung'uai ene; amu ore iltung'ana linono apa liyaua aitung'uaa Misiri netaasa entorroni; eibelekenyate ninche aasioki aapaash ina oitoi apa naitanapa ninche; eitobirakitia ninche ate enkitanyaanyukoto naasholuno.’ “Naaitoki nanu Olaitoriani ajoki, ‘Atoduaa nanu kulo tung'ana, naa ng'ura iltung'ana oogolong'u ninche; tapalaki nanu, pee atumoki aidaikie, naiwuang'ie nanu enkarna enye te nkop, naitayu nanu te iyie olosho magilani naa kitok alang ninche.’ Neaku aibelekenye apa nanu nadou to ldoinyo, naa keyupuyup apa ilo doinyo te nkima; ore nena soito are naagueta olning'o lo sotua netii nkaik ainei. Naing'orisho nanu, naa ng'ura, itaasa intae eng'oki tialo Olaitoriani Enkai inyi; intobirakitia ate olashe osholuno; itasiokitio intae aaibelekenya aaing'uaa ina oitoi naitanapa intae Olaitoriani. Neaku aibung'a apa nanu nena soito pokira are naagueta, narrar nanu ninche te dukuya nkonyek inyi. Nairrabalakino nanu enkop te dukuya Olaitoriani anaa apake, nkolong'i artam o nkewarieitin artam; neitu ainos endaa aashu aok enkare, te nkaraki ina ng'oki pooki nitaasa, aas ina bae torrono too nkonyek o Laitoriani, aaitagor ninye. Amu kaure apa nanu engoro oina pijan apa naata Olaitoriani tialo intae, ometaa kejo aidaikie intae. Kake aatoning'o ake sii Olaitoriani ina kata. Netagorokine sii apa Olaitoriani Aron ometaa kejo aidaikie ninye; naomonoki sii apa ninye Aron ina kata. Naitoki nanu adumu ina ng'oki torrono, ilo ashe apa lintobira napejoo te nkima nabelibel ninye, ayutuyut ometotiuo anaa empunyua; nanang'aki nanu ina punyua enye ina reyiet nadou to ldoinyo. “Ore sii apa te Tabera, o te Masa o te Kibrotafa intagoro intae Olaitoriani, naa ore apa pee eirriwaa intae Olaitoriani Kadesh-Barnea, ejo, ‘Elepa enchom embung'a ina kop naishoo nanu intae’ nitogolong'akita intae enkitanapata o Laitoriani Enkai inyi, neitu intae irukuruku ninye aashu ining'ining'i oltoilo lenye. Itaa intae iloogolong'aki Olaitoriani ebaiki ina olong natayiolo intae. “Neaku airrabalakine nanu enkop te dukuya Olaitoriani te kuna olong'i artam e nkewarieitin artam, naatejo Olaitoriani keidaikie intae. Naomon nanu Olaitoriani najo, ‘Olaitoriani Enkai, Ooi mindaikie iltung'ana linono o enjung'ore ino, laa iyie otokordua te nkitoo ino, naa iyie oitupukuo te nkop e Misiri te nkaina magilani. Tadamu isinkan linono, Abraham o Isaak o Yakobo; mishilaa engolon enkong'u ele orere, aashu ntorrok enye, aashu eng'oki enye, mejo ake ina kop nintupukunye iyiook, “Enkaraki apa nemeidim Olaitoriani ayau ninche atua ina kop apa naisiligie ninche, naa ore enkaraki naibayie ninye ninche eitupukuo ninche pee elotu aar ninche tiong'ata.” Amu iltung'ana linono ninche naa enjung'ore ino ninche, laa iyie oitupukuo ninche te ngolon ino kitok o te nkaina ino naitoriori.’ “Ore apa teina kata naajoki nanu Olaitoriani, ‘Tagueta mbaoi are o soit naatiu anaa inapa e dukuya, nilepu alotu enatii to ldoinyo, nintobir osanduku loo nkeek. Naa kaiger nanu te nena soito dapashi irorei ootii nena soito e dukuya nitebela, nipik iyie ninche atua osanduku.’ Neaku aitobira apa nanu osanduku too nkeek, naguetu mbaoi are o soit naatiu anaa ine dukuya, nailep alo oldoinyo aata nena soito pokira te nkaina ai. Neiger ninye te nena soito, anaa apa ine dukuya, nena kitanapat tomon apa naairorie intae Olaitoriani to ldoinyo eimunye empolos enkima teina olong apa eumata; naaisho nanu Olaitoriani nena soito. Naibelekenya nanu nadou to ldoinyo, napik nena soito atua ilo sanduku laitobira; naa ine taata etii, anaa enaaitanapa nanu Olaitoriani.” Nepuo iltung'ana le Israel te Beerot Beneyaakan ometabaiki Mosera. Neye Aron teine naa teine etunukayioki; Neisiaisho olayioni lenye Eliesa anaa olapolosani te rishata enye. Nedumunye teine nepuo Gadugoda, nedumunye te Gadugoda nepuo Yotbata, enkop oo nchorroi oo nkariak. Ore apa teina kata neiteng'el Olaitoriani olosho le Lawi pee enap ilo sanduku lo lning'o lo sotua le Nkai, neitashe te dukuya Olaitoriani aaisiaai ninye nemayianisho te nkarna enye o taata. Metaa meeta Lawi erubata e njung'ore tiatua ilalashera lenyena; Olaitoriani ninye enjung'ore enye, anaa enatiaka Olaitoriani Enkai inyi ninye. “Naton nanu to ldoinyo anaa apa te nkata e dukuya, nkolong'i artam o nkewarieitin artam, naatoning'o sii apa Olaitoriani ina kata; neany Olaitoriani eidaikie intae. Naajoki nanu Olaitoriani, ‘Tudumunye, shomo te lototo ino tijing'a dukuya iltung'ana, pee etum ninche aashum aaibung'a ina kop, apa nainosie olmumai too loo menye pee aisho ninche.’ “Amaa taata Israel, kainyoo eyieu Olaitoriani Enkai ino te iyie, neme teniureyu Olaitoriani Enkai ino, nilo too nkoitoi enyena pooki, ninyorru ninye, nisiaai Olaitoriani Enkai ino to ltau lino pooki o te nkishui ino pooki. Nimbung nena kitanapat o nkiguanat o Laitoriani naaitanapa nanu iyie ena olong te nkaraki eseriani ino. Ng'ura eno Laitoriani keper nalakua aisul, o enkop o pooki toki natii atua; kake ore eyia, etonyorra Olaitoriani to ltau lenye loo papaai linyi negelu ninye eishoi enye te siadi ninche, aitulus too loreren pooki, anaa enatiu ena olong. Entumurat naa isuaten oo ltauja linyi, nimintokiki aagolong'u. Amu ore Olaitoriani Enkai ino naa Enkai oo nkaitin naa Olaitoriani loo laitoriak. Ina Ai kitok magilani naitureisho, nemeeta olkep nemeropayu. Keiguanare ninye te sipata olokishi o enkoliai, nenyor ninye ilo omoni, neisho ninye endaa o nkilani. Tonyorra naa ilo ora omoni; amu irara sii apa intae omon te nkop e Misiri. Shomo turia Olaitoriani Enkai ino, shomo isiayia ninye nimbung'are ninye, naa te nkarna enye inosinoso olmumai. Ninye enkisisa inyi, ninye Enkai inyi, ina nataasa kuna baa kituaak naaitureisho naatoduaa nkonyek inyi. Eshomo apa iloo papaai linyi Misiri aa iltung'ana ntomoni naapishana; ore taata neitotiuo intae Olaitoriani Enkai inyi anaa ilakir le shumata te nkumoi. “Shomo naa tonyorra Olaitoriani Enkai ino, nimbung enkitanapata enye, o nkikoot enyena o nkiguanat enyena, o nkitanapat enyena anaake. Naa entadamu ena olong (nchere, mme nkera inyi nanu airorie neitu eyiolou aashu edol) entadamu nkitamiot o Laitoriani Enkai inyi, enkitoo enye, o enkaina enye magilani o enkaina enye naitoriori. Nena kitoduaat enyena o nkiaasin enyena apa naaitaasa ninye te Misiri, Farao olaiguanani le Misiri; o enkop enye pooki, oina apa naitaasa ninye enjore e Misiri, nena bartan enye o nena garrin enye oo mbartan; ina naikuna ninye pee eitaya ninche enkare Enaiposha Nanyokie ina kata esujita ninche intae, ina naikuna Olaitoriani pee eidaikie ninche o taata; oina naitaasa intae ti ong'ata ometaba anaa nipuonunu ene wueji oina naitaasa ninye Datan o Abiram lelo ayiok le Aliab, olayioni le Ruben, ina natabolo enkop enkutuk neijoo ninche tenebo ilmareita lenye, o lng'oborri lenye, o pooki toki naishu apa nasujita ninche, te mpolos e Israel pooki; Amu etoduaa nkonyek inyi ina siaai pooki kitok o Laitoriani nataasa. “Enchom naa embung'a kuna kitanapat pooki naitanapa nanu intae ena olong, pee itumutumu aatagol, nipuopuo aaya ina kop nilang'akiki aapuo aaya, nibikoo sii teina kop nainosie Olaitoriani olmumai too loo papaai linyi pee eisho ninche o eishoi enye, ina kop naruko kule o enaisho. Amu ore ine nijing'itata aaya nemetiu anaa enkop e Misiri ning'uaa, ina kop nituunie intae ilanterera linyi nipikipiki enkare too nkejek inyi, anaa olchampa loo mpogai; kake ore ina kop nilang'itata aapuo aaya naa enkop oo ldoinyo o nong'ot ine neshaiki ninche enchan naing'uaa keper, enkop ina nagolie Olaitoriani te nkaraki intae; eing'orita nkonyek o Laitoriani Enkai ino shumata ninye anaake, ebaiki enkiterunoto o lari o metabaiki enkiting'oto o lari. “Naa tenimbung'ubung'u intae kuna kitanapat aainei naitanap nanu intae ena olong, aanyorru Olaitoriani Enkai inyi, nisiayiayia ninye too ltauja linyi pooki o te nkishui inyi pooki, naa keishoru ninye enchan te nkop inyi too nkatitin enyena, ina shan oltumurel naituruku oina shan oo nkokua, pee itumutumu aaiturrurro tiatua enkurma inyi o sabibu linyi o eilata inyi. Naa keishoru ninye nkujit te nkop inyi te nkaraki nkishu inyi, nidaa intae aaraposho. Entodol ate emileja too ltauja linyi, nimbelekenyanya aaisiaai kulie aitin niserememe ninche, ore engoro o Laitoriani neyupuyup tialo intae, neiken ninye shumata, ometaa meetae enchan, nemeiu enkop ilng'anayio, nindaayaya nabo kata aaishunye teina kop naisho intae Olaitoriani. “Entushum naa kulo rorei laainei too ltauja linyi, o te nkishui inyi; nieniene ninche metaa olmonekie too nkaik inyi, netiu ninche anaa enkishili too nkomomi inyi. Ninteng'ening'ene ninche nkera inyi, niimakiki ninche itonini too nkajijik inyi o ipuopuo te nkoitoi, o irurara o itonini. Ningerigere ninche too molinkaishi oo nkutukie oo nkajijik inyi o too nchomito inyi. Pee etumi aatopon inkolong'i inono o nkolong'i oo nkera inono teina kop apa nainosie Olaitoriani olmumai too loo papaai linyi pee eisho ninche, anaa enatii keper shumata enkop. Amu tenigolie kewan aas ena kitanapata naaitanap nanu iyie taasa, anyorru Olaitoriani Enkai ino, nilo too nkoitoi enyena pooki, nimbung'are ninye, nearaa Olaitoriani kulo oshon pooki ootii dukuya ino, niyaya iloshon kituaak naa magil aalang intae. Ore pooki wueji neroro nkejek inyi naa keaku eninyi; ore enkop inyi naa keiteru ebaiki ong'ata o Lebanon o ebaiki olkeju le Frati o metabaiki enaiposha enkalo oloo ntoluo. Meetae oltung'ani likiindim ashomo airisha; kelo Olaitoriani opik enkuretisho te nkaraki intae o loputukunyi te nkaraki intae shumata ina kop pooki niimiimi, anaa enaisiligie ninye intae. “Ng'ura kapik nanu dukuya intae ena olong emayianata o ldeket: emayianata tenimbung'ubung'u nena kitanapat o Laitoriani Enkai inyi, naitanapa apa nanu intae ena olong, oldeket, tenimibung'ubung'u intae nena kitanapat o Laitoriani Enkai inyi, nimbelekenyanya aaing'uaa ina oitoi naitanapa nanu intae ena olong, nipuopuo aasujaa kulie aitin apa neitu intae iyiolouu. Naa teneyau intae Olaitoriani Enkai inyi atua ina kop nijing'itata aapuo aaya, enchom entamayianisho to ldoinyo le Gerisim nidekishosho to ldoinyo le Ebal. Aimetii ninche lido kekun le Yordan, enkalo o loo ntoluo enkoitoi dapash endoyioroto enkolong, tiatua enkop oo Lkanaani apa laa ninche emanya Araba, eipirakinore Gilgal embata oo lkeek le More? Amu ipuopuo intae aalang Yordan, nipuopuo aaya ina kop naisho intae Olaitoriani; naa tenindipidipi aawaita nimanyimanya, enchom entodol ate entabaraki pee iasiasa nena kikoot pooki o nkiguanat naitanapa nanu intae ena olong. “Kuna ninche nkikoot o nkiguanat nilo iyie aing'or te ina kop nikichoo iyie Olaitoriani, Enkai oo loo papaai linyi pee iya, too nkolong'i pooki ninchu tioriong enkop. Shomo tukul indaikie nena wuejitin pooki apa neeisiayie nkaitin enye lelo oshon litimira nkaitin enye, too nchumat oo ldoinyo o too nchumat oo ndoinyo kutiti o tiabori pooki shani onyori; tusulai ilpereren lenye loo lasarri; nintaa irrarrat ing'apeta enye, nipejoo Asherim enye te nkima; nisulaki iyie enkop nena kitanyaanyukot enye naaitaa nkaitin, nindaikiekie enkarna enye aaishie teine wueji. Milo iyie aiko neijia to Laitoriani Enkai ino, kake ilo iyie aing'oru ine wueji negelu Olaitoriani Enkai ino tiatua iloshon linyi pooki pee ipikipiki enkarna enye nintaa ine emanyisho enye; neijia eikenari, naa neijia enkuna eyau ilasarri linyi oopejori o nkishorot inyi, e matua e tomon, o lasarri ooitarasari, o lasarri to lmumai, o nkishorot o lpela, o lkikaunot linyi loo nkishu o loo ntare; ore teine nipuopuo aadaa te dukuya Olaitoriani Enkai inyi, nipuopuo aang'ida, intae olmareita linyi, teina pooki nipuopuo aas aa te ninye emayian intae Olaitoriani Enkai inyi. Miasiasa intae terisioroto e kuna pooki nikiaasita iyiook tene taata, easita ake pooki tung'ani enaba anaa enaishiakino too nkonyek enyena makewan, amu eton intae eitu ipuonunu ina kiyeng'iyeng'ata oina jung'ore naisho intae Olaitoriani Enkai inyi. Kake tenilang'ilang'a intae aapuo lido kekun le Yordan, nitonini teina kop naisho intae Olaitoriani Enkai inyi entujung, naa teneisho ninye intae enkiyeng'iyeng te lelo mang'ati linyi pooki oomanita intae, metaa itonini te seriani, ore teine wueji nelo agelu Olaitoriani Enkai inyi, pee epik enkarna enye metobiko teine, ine eyau nena pooki naitanap intae; ilasarri linyi oopejori o nkishorot inyi, o ematua inyi e tomon o nena kishorot nintarasaa, o nena kishorot ninosie olmumai pee inchosho Olaitoriani. Ning'idayuyu intae te dukuya Olaitoriani Enkai inyi, o layiok linyi o ntoyie inyi o sinkan lewa, o sinkan inyi ng'oruo, o lawi ootii atua nkang'itie inyi, enkaraki nemeeta ninye erubata aashu enjung'ore tiatua intae. Toduaa naa pee mintayu olasar lino opejori te pooki wueji nidol; kake teine negelu Olaitoriani ti obo loo loshon, linyi, teine iyie shomo intayu ilasarri linyi oopejori naa teine shomo taasa kuna pooki, naaitanap iyie. “Ore tenebo nena, indimidimi aateyieng eng'ues ninosinoso tiatua nkang'itie inyi, anaa eniyieuu, te risioroto e mayianata o laitoriani Enkai inyi naishoo ninye intae; ore ilo osinyari, o lemesinyari keidim ainosa, anaa naaji enkoilii anaa empanas; osarge ake miinos; tubukoki ninye enkop anaa enkare. Mindimidimi aainosa tiatua nkang'itie ina rubata O Laitoriani e ntapa inyi aashu enoo sabibu aashu eneilata, aashu iloo ntare, aashu pooki ake ninye asar linchorutua te nkinosata olmumai, aashu lelo asarri linyi le nyorrata, aashu lelo asarri lintarasaa, kake indimidimi intae aainosa te dukuya Olaitoriani Enkai inyi, teine wueji nelo Olaitoriani Enkai ino agelu, ninos iyie o layioni lino o entito ino, o sinka lino lee o esinka ino ng'oruoi, oilo tung'ani loo Lawi otii atua nkang'itie inyi, nilo iyie ang'ida te dukuya Olaitoriani Enkai ino teina pooki nilo aas. Toduaa naa kewan minturraa ilo tung'ani loo Lawi otii atua te nkata pooki naba anaa enitii atua enkop ino. “Teneponaa Olaitoriani Enkai ino enkop ino, anaa enikisiligie ninye, nijo iyie, ‘Kainos nanu nkiri,’ amu itang'uarra nkiri, indim ainosa nkiri naaba anaa iniyieu. Tenaa kelakua ine wueji nategelua Olaitoriani Enkai ino pee epik enkarna enye nindim naa ateyiang'a enkiteng ino nabo aashu ina ker ino nabo nikinchoo iyie Olaitoriani Enkai ino, anaa enaaitanapa nanu iyie; nindim iyie ainosa tiatua nkang'itie inyi anaa eniyieu. Ore anaa enainosi enkoilii o empanas, neaku indim sii iyie ainosa; ore ilo osinyari olemesinyari neidim ainosa. Tayiolo ntisipa pee minos osarge, amu ore osarge naa enkishui, niminos iyie enkishui tenebo nkiri. Minos iyie osarge, naa tubukoki enkop anaa enkare. Minos iyie osarge pee eitobirari mbaa inono pooki o noo nkera inono itulusoyie. Tenias iyie esidai too nkonyek o Laitoriani. Kake ore nena tokitin sinyat naatabaitie te iyie, o lasarri linono, shomo iyie iwa, nilo ine wueji negelu Olaitoriani, nilo aitayu lelo asarri linono oopejori, nkiri o sarge, te nchumata olperere lo lasar lo Laitoriani Enkai ino; ore ilo sarge loo lasarri linono nepuoi aabukoki enchumata olperere lo lasar lo laitoriani Enkai ino, kake indim ainosa nkiri. Toduaa kewan pee imbung kulo rorei pooki laaitanapa nanu pee iserianu iyie o nkera inono itulusoyie ntarasi, te nias iyie ina sidai neishiakino too nkonyek o Laitoriani Enkai ino. “Tenelo akenya neiwuang'ie Olaitoriani Enkai inyi te dukuya intae lelo oshon lipuopuo intae aaya enkop enye, niwuang'ieng'ie intae ninche nimanyimanya enkop enye, entodol ate mijing'ijing'i ake orreshet aasujaa ninche, eidipaki aaidaikie ninche te dukuya nkonyek inyi, niminkilikuanunu nkaitin enye, ijojo, ‘Kaji apa eiko kulo oshon teneisiai nkaitin enye? - Pee aiko sii nanu neijia!’ Mias iyie ina to Laitoriani Enkai ino; amu ore pooki toki nara olminong naiba Olaitoriani eitaasa apa ninche nkaitin enye; amu kepejoo doi ninye ilayiok o ntoyie enye te nkima aapejoki nkaitin enye. “Ore ina toki ake ninye pooki naaitanapa nanu tisipu pee ias; miponiki iyie toki aashu intong'or toki. “Tenedumunye oloiboni tiatua intae, aashu olaidetidetani loo nkidetidetat, neisho intae enkitoduaata aashu embae e nking'asia, nelotu ina kitoduaata aashu ina bae e nking'asia natiaka ninye intae aaku, naa tenejo ninye, ‘Maape iyiook aasujaa kulie aitin apa neitu intae iyiolouu, naa maisiaayia iyiook ninche,’ nimining'ining'i intae lelo rorei leilo oiboni aashu ilo aidetidetani loo nkidetidetat; amu ketem, intae Olaitoriani Enkai inyi, pee eyiolou tenaa inyorrinyorro intae Olaitoriani Enkai inyi to ltauja linyi pooki o te nkishui inyi pooki shomo iyie tudumunye tusujai Olaitoriani Enkai ino niureyu ninye, nimbung nkitanapat enyena nining oltoilo lenye, nisiai ninye nimbung'are ninye. Kake ore ilo oiboni aashu ilo aidetidetani loo nkidetidetat neari metua, amu eiteng'enishe ninye engolong'akinoto tialo Olaitoriani Enkai ino, ilo laa ninye likiyaua iyie aitupuku tiatua enkop e Misiri, nikikordu ninye iyie aitung'uaa enkaji esinkaisho, pee kitum aitung'uai ina oitoi nikintanapa Olaitoriani Enkai ino pee iim. Neaku iwuang'ie iyie entorroni te mpolos inyi tenikiliki alej aitapong'oo olalashe lino ling'arie kina, aashu olayioni lino, aashu entito ino, aashu ina kitok ino ninyor, aashu ilo shore lino linyor anaa kewan ino, ejo, ‘Maape iyiook aaisiaai kulie aitin; neitu aekata iyiolouu intae aashu iloo papaai linyi,’ ore embata e nena aitin e lelo tung'ana oo manita intae, etaaniki intae aashu elamita intae, ebaiki eluboto nabo enkop o metabaiki enkae luboto, misujaa iyie ninye nimimbung ninye, nimincho meing'urrie ninye, nimipal iyie ninye nimimitu iyie ninye kake taara iyie ninye metua inchoo eaku enkaina ino naituruk near ninye metua, ore te siadi naa nkaik oo ltung'ana pooki. Tanang'a iyie ninye too soito metua, enkaraki niking'orua ninye aitapong'oo to Laitoriani Enkai ino, laa ninye likiyaua aitupuku te nkop e Misiri aitupuku tiatua enkaji e sinkaisho. Pee ening Iltung'ana pooki le Israel, neureishoyu, nemeigil aekata aas entorroni naikununo nji tiatua intae. “Tenining iyie te nabo e nena anas nikincho iyie Olaitoriani Enkai tobikie teine, nchere eshomo kulikae tung'ana le pesho tiatua intae neitapong'oitie lelo oomanya ina anasa, ejo, ‘Maape iyiook aaisiaai kulie aitin,’ neitu apa iyiolouu, nitumokiki taa aaikilikuanu nikililitu aaitirrishaki; naa ng'ura tenaa kesipa neibale nchere etaasaki ena toki nadiaa tiatua intae. Niariara naa aamut lelo oomanya ina anasa to lalem, nindaikiekie katukul lelo pooki ootii atua o nchoorei enyena, te nepi olalem. Nisotisoto nena masaa pooki aapik empolos e boo nipejoo ina anasa o nena yarunot enyena pooki te nkima, anaa olasar olulung'a opejokini Olaitoriani Enkai inyi, neaku osototi ntarasi, meigili aekata aashet ina anasa, mintinyikaki ake enkaina ino nena tokitin nemenyikakini pee etum Olaitoriani aibelekenyayu teina goro enye napi, neisho intae olng'ur neitanana oshoke tialo intae, anaa apa enainosie ninye olmumai too loo papaai linyi. Tenining'ining'i intae oltoilo lo Laitoriani Enkai inyi, aaibung nena kitanapat pooki naitanap nanu intae ena olong, niasiasa ina sidai naishiakino too nkonyek o Laitoriani Enkai inyi.” “Irara intae nkera o Laitoriani Enkai inyi; midung'udung'u ate nimibarnibarna nkomomi inyi teninchirakiki ilmeneng'a, ootuata. Amu irara intae iltung'ana oosinya to laitoriani Enkai inyi netegelua intae Olaitoriani pee iakuku olorere lenye makewan, agelu intae te lelo tung'ana pooki ootii oriong enkop. “Minosinoso intae pooki toki ake ninye nadiaa. Kuna ng'uesi indimidimi aainosa: olkiteng, enker o enkine, o empanas, o entarakuet, o olkondi, enkine oo soito, aashu osirua, o eng'ues nanyaanyukie olkibulekeny o enker-oo ldoinyo. Ore pooki ng'ues narisha loisotok anaa neiperra iloisotok kat are, neinyaku ng'amura tiatua ng'uesi indim ainosa. Ore ake eyia te nena naainyiaku ng'amura aashu nemerisha loisotok minos: entames, enkitejo, o e suni, amu keinyaku ninche ing'amura kake merisha loisotok, naa olminong ina te intae. Ore olbitir enkaraki narisha iloisotok kake meinyaku ng'amura, naa olminong te intae. Eminosinoso intae nkiri enye ore mpopong'i enye emiseyie. “Ore nena pooki naatii atua enkare indimidimi aainosa; ore mpukunot pooki oo sinkir indimidimi aainosa. Ore pooki toki naata naipuko neeta ilpala nindimidimi aainosa. Ore pooki nemeeta inaipuko anaa ilpala niminosinoso, mesinya nena te ntae. “Indimidimi aainosa imotonyi pooki sidain, kake mindimidimi ainosa kuna, olkurragos, olmotonyi loo lmurran o mpukunot oo sidan, olkurruk o olkupelia o mpukunot enye pooki; o lkurruk o mpukunot e pooki toki naata naipuko o mpukunot enyena pooki, o esidai o lmuntut o motonyi e naiposha, o lenkalem, o mpukunot enye pooki. O enkiti motonyi oo nkiyiaa, o emotonyi oo nkiyiaa sapuk, o emotoroki e nkare o enkakaya, osakeri, o lmagero, o entilagos, o empukunoto e motoroki o lanke, o enagor kewan. O ntokitin pooki naapuo too naipuko naa olminong te intae, meidimi aainosa ninche. Ore nena tokitin pooki naasinyari naapuo too naipuko indimidimi aainosa. “Minosinoso pooki toki ake ninye naye openy. Indimidimi intae aaishoo oltung'ani omoni ootii atua nkang'itie inyi, pee einos ninche, aashu indimidimi aatimiraki oltung'ani loo loreren; amu intae iltung'ana oosinya to Laitoriani Enkai inyi. “Miyierie olkuoo kule e ng'otonye. “Ntayu erubata e lelo anterera linono ooing'uaa enkurma to lari ake ninye pooki. Ore te dukuya Olaitoriani Enkai ino, teine wueji negelu ninye, pee eitamany enkarna enye, nilo iyie ainos ina rubata e nkurma ino; o enoo sabibu linono, o eneilata ino, o enoo lkikaunot loo nkishu inono o ntare; pee iyiolou iyie aturia OlaitorianiEnkai ino anaake. Naa tenaa keado enkoitoi te iyie, neaku mindim ayau ina rubata tenikimayian Olaitoriani Enkai ino te nkaraki kelakua oleng te iyie ine wueji negelu Olaitoriani Enkai ino pee epik enkarna enye ine, mbelekenya naa metaa mpisai, nieniki nena pisai enkaina ino, nilo ine wueji negelu Olaitoriani Enkai ino, ninyang'unye nena pisai entoki pooki naba anaa eniyieu, olkiteng aashu enker, enaisho oo sabibu aashu enaisho napi, entoki ake ninye naba anaa eniyieu; nilo iyie ainos teine te dukuya Olaitoriani Enkai ino ning'ida, iyie o lmarei lino. Niminturaa iyie ilo tung'ani loo Lawi otii atua nkang'itie inyi, amu meeta ninye erubata aashu enjung'ore tenebo iyie. “Ore te nkiting'oto, e pooki ari liokuni nkatitin pooki niyauu intae ematua ina rubata pooki e tomon enkisampuare inyi to lari obo, aairragie aashum too nkang'itie inyi; ore Olawi, enkaraki nemeeta ninye erubata aashu enjung'ore tenebo iyie, oilo omoni, o lokishi, o enkoliai natii atua nkang'itie inyi, nepuonu aainos neraposho; pee kitum Olaitoriani Enkai ino atamayiana teina siaai pooki oo nkaik inono nias. “Ore te nkiting'oto ake ninye oo larin oopishana nichooyoyo empalakino. Naa nji eikununo ina palakino; ore pooki tung'ani oisilenishe nepalaa ina naisilenoko ole latia enye; meitalaku ninye to le latia enye, o to lalashe lenye, enkaraki naibalunyeki empalakinoto o Laitoriani. Ore ilo leeiking'a indim iyie aitalaa; kake ore entoki ino naba anaa enaisilenoyie olalashe lino tapalaki. Kake mepuoi aata oltung'ani aisinani tiatua intae amu kelo Olaitoriani amayian intae teina kop naisho intae Olaitoriani Enkai inyi pee iyaya neaku enjung'ore inyi. Tenining'ining'i ake duoo intae oltoilo lo Laitoriani Enkai inyi, ning'oring'oro pee iasiasa ena kitanapata pooki naitanapa nanu intae ena olong. Amu kelo Olaitoriani amayian intae anaa enaisiligie intae, naa ipuopuo intae aaisilenoki iloshon kake misilenunu intae; naa eipuopuo aaitore iloshon kumok, kake meitore ninche intae. “Tenetii atua intae oltung'ani aisinani, obo loo lalashera linyi, atua ake ninye nabo oo nkang'itie inyi tiatua ina kop inyi naisho intae Olaitoriani Enkai inyi, milo iyie aitagol oltau lino aashu inunuk enkaina ino tialo ilo alashe lino aisinani. Kake talaa enkaina ino tialo ninye, nisilenoki ninye enaidip enkolat enye, te mpukunoto enye ake ninye pooki. Toduaa kewan mejing ake endamunoto e pesho oltau lino, nilo ajo, ‘Ore olari liopishana, olari le mpalakino netinyikua,’ neing'ode enkong'u ino ilo alashe lino aisinani, nimincho iyie ninye toki, neishiraki ninye Olaitoriani te nkaraki iyie, naa keaku eng'oki te iyie. Nchoo ninye katukul nimincho oltau lino enyamalu te nincho iyie ninye, amu ore enkaraki ena eikimayian iyie Olaitoriani Enkai ino te siaai ino pooki o teina pooki nias. Amu ore oltung'ani aisinani melai aekata te nkop; neaku aaitanapa iyie talaa enkaina ino to lalashe lino, teilo oata enkolat o teilo aisinani otii enkop inyi. “Tenikimirakini olalashe lino, loo Lhebrania, olee ashu enkitok oo Lhebrania, nchoo kisiai ninye iyie ilarin ile ore to lari liopishana, nchoo ninye meshomo. Naa tenincho ninye meshomo mincho ninye meshomo too nkaik naarook; ntanapa ninye tabaraki too ntare inono, te wueji neidong'ishoreki, o te neironyishoreki, ore anaa enikitamayiana Olaitoriani Enkai ino, nchoo iyie ninye. Tadamu iyie nchere ira apa orrindik te nkop e Misiri, nikinyang'u Olaitoriani Enkai ino alaku neaku, kaaitanap nanu iyie ena olong. Kake tenikijoki ninye, ‘Maalo nanu aing'uaa’, te nkaraki nikinyor ninye iyie o lmarei lino, amu eitumurrua te iyie, kaae niyau oltidu niud enkiok enye aipang'ie apudaki enkikenet e kutukaji, naa keaku ninye osinka lino ntarasi. Ore ina aisiaayiani ino ng'oruoi ninko neijia. Midol anaa entoki nagol tenilaaya ninye meshomo; amu to lpisiai le laakinoto olaisiaayiani kisiayia ninye ilarin ile. Neaku eikimayian iyie Olaitoriani Enkai ino teina pooki nias. “Ore lelo kikaunot pooki sitiman o lbung'aiko ooini too nkishu inono o too nkerrai, intisinyaki Olaitoriani Enkai ino; mintaas esiai lelo kikaunot loo nkishu inono nimibarn lelo kikaunot loo ntare inono. Inosa iyie o lmarei lino, te dukuya Olaitoriani Enkai ino to lari ake ninye pooki teine wueji negelu Olaitoriani Enkai ino. Kake teneeta entioto, tenaa maima aashu modooni aashu ae tioto torrono nimipolosaki Olaitoriani Enkai ino. Inosa iyie tiatua nkang'itie inyi; ore ilo osinyari olemesinyari neidim ainosa anaa ake duoo enainosi entarakuet aashu esuni. Osarge lenye ake minos; tubukoki enkop anaa enkare. “Mbung'a olapa le Abibu nimbung Sabato o Laitoriani Enkai ino; amu to lapa le Abibu apa kintayio Olaitoriani Enkai ino aitung'uaa enkop e Misiri kewarie. Nipolosaki iyie olasar le pasaka Olaitoriani Enkai ino, too ntare aashu too nkishu, teine wueji negelu Olaitoriani pee eitamany enkarna enye ine. Mipudaki iyie imukateni naaisuishieki, nkolong'i naapishana iyie inosa tenebo imukateni neitu eisuishieki ina mukate o sina - amu itupukutuo apa intae te nkop e Misiri te nkisikata e nkisarrisar - pee itumutumu aatayiolo too nkolong'i pooki enkishui inyi ina olong apa nitupukutuo aaing'uaa enkop e Misiri. Emincho edoli emukate naisuishieki tiatua enkop inyi too nkolong'i naapishana; niminchosho nena kiri o lasar le teipa teina olong e dukuya ekenyiki. Mindimidimi aatopolos olasar le pasaka tiatua pooki ake ninye ang inyi naisho intae Olaitoriani; kake teine wueji negelu Olaitoriani Enkai inyi pee eitamany enkarna enye ine, teine iyie shomo intayu olasar le pasaka, teipa edoyio enkolong, teina kata apa nitupukutuo aaing'uaa Misiri. Niyier aitokitokie ninos teine wueji negelu Olaitoriani Enkai ino; ore tadekenya nimbelekenyanya aapuo ilng'oborri linyi. Ore too nkolong'i ile ninosinoso imukateni neitu eisuishieki ore te nkolong e naapishana naa keaku eneumata o Laitoriani Enkai inyi; miasiasa esiai teina olong. “Nteru nkena iwikii naapishana; ntera nkenu nena wikii naapishana ebaiki ina kata nisampu ina kurma ina nauno. Nintoki aibung ina wiki oo wikii to Laitoriani Enkai, too nkishorot o lpela naaing'uaa enkaina ino, ninchooyo iyie anaa enikitamayiana Olaitoriani Enkai ino. Ning'ida iyie te dukuya Olaitoriani Enkai ino, o sinka lino lee o esinka ino ng'oruoi, oilo tung'ani loo Lawi otii atua nkang'itie inono, o lomoni, o lokishi, o enkoliai natii atua intae, teine wueji negelu Olaitoriani Enkai ino, pee eitamany enkarna enye ine. Tadamu nchere ira orrindik te Misiri ning'or pee imbung kuna kitanapat. “Imbung'a osirua loo lng'oborri nkolong'i naapishana, ina kata itasoto enkurma ino te wueji neidong'ishoreki o te wueji ino neironyishoreki; ning'ida iyie to sirua lino; iyie o layioni lino o entito ino, o sinka lino o esinka ino, o ilo tung'ani loo Lawi, o lomoni, o Lokishi, o enkoliai natii atua nkang'itie inyi. Too nkolong'i naapishana iyie mbung'a osirua lo Laitoriani Enkai ino, teine wueji negelu Olaitoriani Enkai ino; amu eikimayian Olaitoriani Enkai ino te pooki nintayu o te siaai pooki oo nkaik inono, pee itumoki ating'idayu tukul. “Katitin uni to lari nepuonu ilewa linyi pooki dukuya Olaitoriani Enkai inyi teine wueji negelu ninye; teilo sirua loo mukateni neitu eisuishieki, o to sirua loo wikii o to sirua loo lng'oborri. Mepuonu ninche dukuya Olaitoriani too nkaik naarook; nchoo ake oltung'ani pooki eishooyo anaa enaidim, te risioroto emayianata o Laitoriani Enkai ino nikinchoo ninye iyie. “Tegelu ilarishak o lkituaak too nkang'itie inyi pooki nikincho iyie Olaitoriani Enkai ino, te risioroto oo loshon linyi; neiguanaki ninche iltung'ana te sipata. Mimbelekeny iyie esipata, mintodolu iyie olkep, ming'amu ntokitin e ropare, amu keitamodok eropare nkonyek o ltung'ani ng'en. Neibelekeny olkuaak lo lasipani. Esipata ake, esipata ake tusuja, pee itum atopuaa nijing ina kop nikincho iyie Olaitoriani Enkai ino. “Miun ake ninye likae shani metaa enkitanyaanyukoto enkai naji Ashera te mbata olperere lo lasar lo Laitoriani Enkai ino nilo iyie aitobir. Mipikipiki intae eng'ape naiba Olaitoriani Enkai ino. “Mipolosaki Olaitoriani Enkai ino olkiteng aashu enker naata, entioto, aashu entibili ake ninye; amu olminong ilo to Laitoriani Enkai ino. “Tenetumi tiatua intae, tiatua ae nabo oo nkang'itie inyi naaishoo intae Olaitoriani Enkai ino olee aashu enkitok naas entorroni te dukuya Olaitoriani Enkai ino, agil olning'o lenye lo sotua, nelo ninye aisiaai kulie aitin neserem ninche, aashu enkolong aashu olapa aashu ae ake ninye o lorora le shumata, apa natanya nanu, nikilikini iyie, nining iyie; ninkilikuanu taa aitisip, naa tenesipa nchere etaasaki olminong oikununo nji te Israel, niyau auluo ino ilo lee aashu ina kitok nataasa ena bae torrono, ninang toosoito ilo lee aashu enkitok ometua. Te nchakenisho oo lchakenini oare aashu ilchakenini okuni eari ilo oye metua; meari oltung'ani metua te nchakenisho oltung'ani obo. Enkaina e lelo shakenini naiter aar ninye metua, ore adake near enkaina oo ltung'ana pooki. Metaa ewuang'ie entorroni tiatua intae. “Tenelotu enkiguana nayieu erishare tialo iloikop o loikop, imasaa o masaa, aashu eoshoto o eoshoto, o enkiguana ake ninye pooki nagolu nayieu erishare oleng te iyie tiatua nkang'itie inono, tudumunye shomo ine wueji negelu Olaitoriani Enkai ino, nintarasaki ilapolosak le Lawi, oilo arishani otii olorika nena olong'i nkilikuanishore ninche, amu eikimbalakinye ninche endung'oto enkiguana. Nilo taa aas anaa enikimbalakinye ninche teine wueji negelu Olaitoriani; ning'or pee ias nena pooki nikiutaki ninche; ore te risioroto eina dung'oto enkiguana nalimu ninche, nena shomo taasa; mimbelekenya teina dung'oto enkiguana nikimbalakinye ninche, alo enkalo e tatene aashu enkalo e kedienye. Ore ilo tung'ani oas to lwuasa, lemening olapolosani oitashe aisiaisho teine te dukuya Olaitoriani Enkai ino, aashu olarishani nchoo eari ilo tung'ani metua; pee itum aiwuang'ie entorroni tiatua Israel. Nening iltung'ana pooki neureishoyu nemeitoki aas to lwuasa. “Tenilotu akenya ina kop nikincho Olaitoriani Enkai ino, niya aitaa enino, nimany ninye, nintoki ajo, ‘Kapik olaiguanani shumata nanu, anaa kulo oshon pooki laamanita;’ indim iyie tukul atipika ilo aiguanani shumata iyie ogelu Olaitoriani Enkai ino. Obo loo lalashera linono indim ategelu metaa olaiguanani te shumata intae; mipikipiki oltung'ani loo loreren shumata intae leme olalashe linyi. Nchoo olaiguanani eaku meitaa mbartan enyena kumok, nemeisho iltung'ana metorrinyoto aapuo Misiri ejo pee etum atopona mbartan enyena, amu kitiaka iyie Olaitoriani, ‘Mingil aekata aim ina oitoi.’ Nemeponiki sii kewan nkituaak, pee meibelekenya ake oltau lenye; nemeponiki sii kewan oleng enkosholai o sahabu. “Naa teneton ninye to lorika lenye le nkitoo, neigeroki kewan tiatua embuku ena kitanapata, teina naitore ilapolosak le Lawi, neaku ina kitanapata tenebo ninye, neisum ninye nkolong'i pooki enkishui enye, pee eyiolou aturia Olaitoriani Enkai enye, te nkibung'ata oo rorei pooki lena kitanapata, o kuna kiguanat, neas ninche; pee medumunye oltau lenye arupayu alang ilalashera lenyena, nemeibelekenya apaash ena kitanapata, alo enkalo e tatene aashu enkalo e kedienye; pee etum ninye atobikoi te nkitoria enye, ninye onkera enyena tiatua Israel. “Ore lelo apolosak le Lawi, aa taa olosho pooki loo Lawi, meeta ninche erubata aashu enjung'ore tenebo Israel; lelo asarri oopejokini Olaitoriani te nkima einos ninche, o erubata enye. Meeta ninche enjung'ore tenebo ilalashera lenye; Olaitoriani ninye enjung'ore enye, anaa apa enaisiligie ninche. Naa keaku ena erubata oo lapolosak naing'uaa iltung'ana, neing'uaa nena kishorunot o lasar, aa olkiteng aashu enker, nchoo eisho ninche olapolosani orony o sederi pokira are o enkaya. O lng'anayio le dukuya le ntapa ino, o le naisho ino oo sabibu o le ilata ino, o lpapit le nkiterata oobarnuni te nker ino, nchoo ninye. Amu etegelua Olaitoriani Enkai ino ninye tiatua loshon linyi pooki, pee eitashe neisiaisho te nkarna o Laitoriani, ninye o layiok lenyena ntarasi. “Naa tenelotu oltung'ani loo Lawi nkang'itie inyi eing'uaa Israel pooki, ine nemanya, naa keidim ninye aeu teneyieu, ine wueji negelu Olaitoriani, netum taa aisiaaisho te nkarna o Laitoriani Enkai enye, anaa ilkulikae tung'ana loo Lawi ooitashe aaisiaisho teine te dukuya Olaitoriani. Nchoo eitorisi irubat enye naainos, neng'amu erubata naing'uaa olmarei lenye. “Tenilotu akenya ina kop nikincho Olaitoriani Enkai ino, milo ake aitamok kewan esujata e nena tabo o olminong le lelo oshon. Mincho ake etumi tiatua intae obo opejoo olayioni lenye aashu entito enye anaa olasar, o pooki ng'ae owosh isoito, anaa aibonisho, anaa amusoni, anaa olasakutoni, aashu oloo rasheta aashu olaenani, aashu olasakutoni, aashu oloirorie ilmeneng'a. Amu ore ilo oba anaa oloas kuna baa naa olminong to Laitoriani; naa ore enkaraki kuna baa olminong nearaa nena tabo Olaitoriani Enkai inyi aipang'ie te dukuya intae. Entaa ilemeeta entioto te dukuya Olaitoriani Enkai inyi. Amu ore kulo oshon letaa ilo aiwuang'ie naa kening lelo ooibonisho te ntorroni o oloomusu; kake ore iyie eitu kinyorraki Olaitoriani Enkai ino taasa ina. “Keputoki intae Olaitoriani Enkai inyi oloiboni leeijo nanu tiatua intae, tiatua ilalashera linyi, ilo intae entoning Anaa apa enitang'uarra to Laitoriani te Horeb teina olong e umata, ina kata apa pee ijo, ‘Mincho nanu aitoki aning oltoilo lo Laitoriani Enkai ai, aashu aigil adol ena kima kitok, maye ake.’ Naajoki nanu Olaitoriani, ‘Eiroro ninche aaitobiraki nena pooki naatejo ninche. Kaputoki nanu ninche oloiboni leeijo iyie tiatua ilalashera lenye; napik nanu irorei laainei atua enkutuk enye, neirorie ninye ninche nena pooki naitanap ninye. Ore ilo pooki lemening irorei laainei ooiroro ninye te nkarna ai, naitalaku nanu makewan te ninye. Kake ore ilo oiboni omusu airo irorei te nkarna ai leitu nanu aitanap ninye meiroro, aashu ilo oiro te nkarna e kulie aitin, ore ilo oiboni keye ake.’ Naa tenijo iyie to ltau lino, ‘Kaji iyiook kinko pee kiyiolou ororei leitu eiro Olaitoriani?’ Teneiro oloiboni te nkarna o Laitoriani, tenemelotu ilo rorei asipayu aashu aaku, ore ilo rorei mme Olaitoriani oiroro; oloiboni ake oiroro to lwuasa, nemiureyuyu intae ninye. “Teneiwuang'ie Olaitoriani Enkai ino lelo oreren likilo iyie Olaitoriani Enkai ino aisho enkop enye, niwuang'ie iyie ninche, nimany nkanas enye o nkajijik enye, nteng'ela iyie nkanas uni te nkaraki ntae teina kop nikincho iyie Olaitoriani Enkai ino metaa enino. Ntobira nkoitoi nior aitaa irubat uni ina kop nikinchoo iyie Olaitoriani Enkai ino metaa enino, pee etum pooki tung'ani oitayu loikop akuetiki. “Ena ninye naishoruno teilo oar olikae te sesekuan, tenesaru ninye ine neidim aitopuaa enkishui enye. Tenear oltung'ani olelatia enye eitu eotiki meatakinore anaa naaji tenelo oltung'ani entim tenebo olelatia enye adung'u ilkeek, neyuk te nkaina enye entolu adung'u olchata, neshurtunye endukuya e ntolu near ilo le latia enye metua, eidim ninye atasaru nabo e kuna anas neitajeu enkishui enye; meinepu ake ilo tung'ani oitalaku elap o sarge etagore near ninye, hoo nemeishiakino ilo tung'ani keeya, amu meatakinore duoo ilo le latia enye. Metaa kaaitanap iyie, nteng'ela nkanas uni. Naa tenikiponiki Olaitoriani Enkai ino enkop, anaa apa enainosa ninye olmumai too loo papaai linyi, neisho ninye intae ina kop pooki apa naisiligie loo papaai linyi tening'oru aibung nena kitanapat pooki, naaitanap nanu iyie ena olong, pee ing'oru Olaitoriani Enkai ino nilo anaake too nkoitoi enyena - niponaa naa kulie anas uni te kuna uni, meibukori ake osarge lemeeta entioto tiatua ina kop ino nikincho iyie Olaitoriani Enkai ino metaa enjung'ore ino, nelotu oldeket le ntorroni e nkibukoroto o sarge shumata ino. “Kake teneiba ake ninye oltung'ani olelatia enye, neirrag arreshu ninye, neibung ninye, nesesekuan ninye neaku etua, nekuetiki ilo tung'ani nabo e kuna anas, nchoo ilpayiani leina anasa eirriwaa olkilikuai meyauni ninye teine, neitarasakini ninye ilo oata e lap osarge, pee etum ninye atua. Mincho enkong'u ino meing'urrie ninye, kake iwuang'ie ena torroni e nkibukoroto osarge tiatua Israel, pee itum ataseriana. “Ore teina jung'ore nilo aibung teina kop nikincho Olaitoriani Enkai ino metaa enino, miwuang'ie olpolosie lo le latia ino, apa otipika iltung'ana le dukuya. “Meidip olchakeni obo to ltung'ani le ntorroni ake ninye pooki, aashu tiae ake ninye kitapong'oto naitapong'o ninye. Too lchakenini oare ake aashu okuni eidimi aaitisipa endung'oto enkiguana. Tenedumunye olchakeni le nkeleekisho aitang'or likae tung'ani te nkitarruoroto, nepuonu nena aloli naaitarrikinote dukuya Olaitoriani, dukuya ilapolosak o larishak laa ninche ootii lorikan te nena olong'i; neikilikuanishore ilarishak aabaraki naa tenaa olelejare ilo shakeni, neitang'oro olalashe lenye te lejare, nintaasiasa ninye ina duoo nayieu ninye neitaas olalashe lenye, pee itum aaibooi entorroni te mpolos inyi, Nening lelo kulikae, neureyu, nemeigil aekata entorroni natiu nji tiatua intae. Mincho enkong'u meing'urrie ninye; kelo aaku enkishui te nkishui, enkong'u te nkong'u, olalae to lalae, enkaina te nkaina, enkeju te nkeju. “Tenimpang iyie alo olarrabal aarare ilmang'ati linono, nidol mbartan o ngarrin oo mbartan o enjore kitok alang enino, miureyu iyie ninche; amu etii Olaitoriani Enkai ino tenebo iyie, ilo apa likintayuo iyie te nkop e Misiri. Naa tenilo iyie aigutaki olarrabal, nelotu olapolosani dukuya airorie iltung'ana, nejoki ninche, ‘Toning'o iyie Israel, tinyikai iyie ena olong ng'utaki olarrabal taarare ilmang'ati linono: mincho oltau lino elepori; miureishoyu niming'aeng'ae, aashu mputukuny te nkaraki ninche; amu Olaitoriani Enkai ino ilo olo te dukuya iyie, pee kilo amitu too lmang'ati linono, nikincho iyie timirisho.’ Neitoki lelo kituaak aairorie iltung'ana ejo, ‘Kalo tung'ani tene otesheta enkaji ng'ejuk neton eitu eitisiny? Nchoo ninye errinyo alo enkaji enye, melo ake aye to larrabal nelotu likae tung'ani aitisiny. Naa kalo tung'ani tene otuuno isabibu neton eitu eitumurru ilng'anayio lenyena? Nchoo ninye errinyo alo enkaji enye, melo ake aye to larrabal nelotu likae tung'ani aitumurru ilng'anayio lenyena. Naa kalo tung'ani tene otasayia entito neton eitu eyam? Nchoo ninye errinyo alo enkaji enye melo ake aye to larrabal neya likae tung'ani ina tito.’ Neitoki lelo kituaak aairorie iltung'ana nejoki kalo tung'ani tene otureishe netalepori? Nchoo ninye errinyo alo enkaji enye melepori ake iltauja loo ltung'ana lenyena anaa olenye? Ore ake pee eidip lelo kituaak aairorie iltung'ana, neitokini aagelu ilarikok le njore metijing'a dukuya iltung'ana. “Tenilotu iyie ataaniki enkanasa aarare, tang'asa nchoo ninche erishata eseriani. Naa tenaa eseriani ewalata enye, nikibolu ninye, ore lelo tung'ana pooki ootumi tiatua ninye neas esiai nagol nikisai iyie. Kake tenemeitobir ninche eseriani tenebo iyie, kake olarrabal kintayunye, nimuatu iyie ninye; naa ore teneishoru Olaitoriani Enkai ino apik atua enkaina ino niar ilewa lenyena pooki to lalem. Kake ore nkituaak o nkera kutiti o nkishu o pooki toki natii atua ina anasa nena masaa pooki naaibung'aki niyaya anaa entoki nitaraitie nishipakino iyie nena nitarayie too lmang'ati linono, naa Olaitoriani Enkai ino likinchoo iyie. Neijia shomo nkuna te nena anas pooki naalakua oleng te iyie, te nena neme nkanas e kulo oshon tene. Kake ore tiatua nkanas e kulo tung'ana nikincho iyie metaa enjung'ore ming'uaa hoo toki eishu. Kake shomo ndaikie ninche tukul, Ilhiti o Lamori, o Lkanaani, o Lperisi, olhafi, o Lyebusi, anaa enaitanapishe Olaitoriani Enkai ino; pee meiteng'en ake ninche intae entaas olminong lenye otaasa te nkisiayiare oo nkaitin enye, niasiasa eng'oki to Laitoriani Enkai inyi. “Teniman amuat iyie enkanasa te nkata naado. Nintayunye ninye olarrabal pee iya, mindaikie iyie ilkeek lenyena aiteleiki entolu shumata ninche; amu ndimidimi aainosa ninche kake midung'udung'u ninche aauroo. Ketaa ilkeek tiong'ata iltung'ana metaa imanimana intae aamuat? Lelo keek ake liyiololo aajo ilkeek leme le ndaa indimidimi aaidaikie nidung'udung'u aauroo pee itumutumu aateshetunyie isempewueti teina anasa naitayunye intae olarrabal, ometaba anaa nebatata. “Tenelo netumi teina kop naisho intae Olaitoriani Enkai inyi metaa eninyi, oltung'ani otaraki metua, eirrag tiong'ata, nemeyioloi aajo kaing'ae natara ninye, nepuonu naa ilpayiani linyi o larishak linyi, netem erishata e nena anas naamanita ilo otasesekuanaki neya enkashe neitu aekata eitaasi esiai, neitu aekata epiki enchata emurt. Neyau lelo payiani leina anasa ina ashe aaitadou oerata onang'ari enkare, leitu aekata eturi aashu euni, negili emurt eina ashe teine to erata. Ore lapolosak lelo ayiok le Lawi nepuonu dukuya, amu etegelua Olaitoriani Enkai inyi ninche pee eisiaai ninye nemayianisho te nkarna o Laitoriani, naa ore to rorei lenye ore pooki shankar o pooki oshoto neitobiri. Ore lelo payiani pooki leina anasa nataaniki ilo tung'ani otasesekuanaki neituku nkaik enye te nchumata eina ashe natigilaki emurt to erata; neishakenoki ninche aajo, ‘Eitu eibukoo nkaik ang ele sarge, neitu edol nkonyek ang ele sarge, neitu edol nkonyek ang eibukori. Tapalaki Olaitoriani iltung'ana linono Israel, linyang'ua iyie, nimipik entorroni o sarge lemeeta entioto atua iltung'ana linono Israel; kake nchoo ena torroni o sarge metapalakini ninche.’ Neaku inji nkuna teniwuang'ie entorroni o sarge tiatua intae, tenias enaishiakino too nkonyek o Laitoriani. “Tenilo iyie olarrabal aarare ilmang'ati linono, neishoru Olaitoriani Enkai ino ninche apik nkaik inono, nimbung iyie ninche araya, nidol tiatua ninche lelo yarunot enkitok sidai, ning'uar iyie ninye, niya iyie aitaa enkitok ino, niyau naa iyie ang arik enkaji ino, nebarn ninye endukuya nedung iloisotok. Neitoki ninye aitayu ilkilani lenyena ooishopito pee eyaruni neton tiatua enkaji ino neishiraki menye o ng'otonye olapa olulung'a; ore te siadi naa indim ashomo atayiolo ninye, niaku olpayian lenye neaku ninye enkitok ino. Naa teneitu ishipakino ninye, nincho meshomo eneyieu; kake mimir ninye too mpisai, minko ninye anaa errindik, amu indipa atayiolo ninye. “Teneeta oltung'ani nkituaak are, enkirotet o entinki, netoikitio ninche ninye nkera, ina kirotet o entinki; naa tenaa ore olkikau naa oleina tinki, ore kenya teina olong naor ninye imasaa enyena aitujung ilayiok lenyena nemeiko ninye olayioni le nkirotet anaa olkikau aitulus to layioni le ntinki, laa ninye olkikau, kake kelo ninye aitulus olkikau lenye ilo ayioni le ntinki, neisho ninye ninye erubata napuda te nena pooki naata ninye, amu ninye enkiterunoto engolon enye; enenye esipata e kikausho. “Teneeta oltung'ani olayioni ogolong'u marmali, lemening menye aashu ng'otonye, naa, ore hoo near ninche ninye, mening ninye ninche, nchoo eibung menye o ng'otonye neyaki ninye ilpayiani leina anasa te kishomi eine wueji nemanya ninye, nejoki ninche lelo payiani leina anasa enye, ‘Ore ele ayioni lang kegolong'u naa marmali, mening iyiook, olalotoni naa olamerani.’ Ore lelo tung'ana pooki leina anasa nenang ninye too soito ometua; pee itum aaipooi entorroni tiatua intae; nening Israel pooki neureishoyu. “Naa teneas oltung'ani embae torrono naishiakino neye, nepiki ninye olchani aailili. Nemeton osesen lenye enkewarie pooki te nchumata olchani; kake tunukai ninye ina olong ake, amu ore oltung'ani oililioki naa kediaa te Nkai; misarkionie ina kop ino nikinchoo Olaitoriani Enkaiino metaa enjung'ore. “Tiniduaaya olkiteng lo lalashe lino aashu enker enye elo aimin nimipal ake eitu ilo ashuku; terewaki ninche olalashe lino. Naa tenimitaaniki aashu tenimiyiolo iyie ninye, tereu enkang ino, ning'or ninche ometaba anaa nelotu olalashe lino aing'oru; nitumoki taa aishoo ninye. Naa neijia sii nkuna osikiria lenye; mincho elo naa neijia inkuna to lkila lenye; naa neijia sii inkuna te pooki toki naimin oo lalashera linono, naimin nitum iyie; mimbooyo eretoto ino. Midol osikiria lo lalashe lino aashu olkiteng etabatate te mbata enkoitoi nimbooyo eretoto ino te ninche; taretoki ninye metudumu ninche menyaaki aitashe. “Mepika enkitok enkishopo olee nemepika olee enkishopo e nkitok, amu ore oloba anaa oloas kuna baa naa olminong to Laitoriani Enkai ino. “Tenelo nitum enkaji e ntaritiki te pooki ake ninye shani aashu te nkop etii nkera aashu ilmosor, nepetita ng'otonye ninche, nena kera aashu lelo mosor, miya iyie ng'otonye tenebo nkera; nchoo ng'otonye elo kake indim aawa nkera; pee iserianu, nitum sii atobikoi. “Tenishet enkaji ng'ejuk tipika ntamanai iloom pee miyau ake entorroni osarge shumata enkaji ino, tenesulunye ake ninye oltung'ani. “Miun tiatua enkurma ino oo sabibu mpukunot are oo lanterera meiwuang'ieki ake ilng'anayio lenyena, lelo ng'anayio lituuno o lelo ootubulakitia. Miturishore iyie olkiteng o sikiria te nkata nabo. Minchop iyie enkila nashula ilpapit oopuyiapui o kitani. “Tiripaki kewan iltelelia too lcholo pokira oong'uan leilo kila lino linchop. “Teneyam oltung'ani enkitok nelo ayiolou neitoki asukeny ninye, neitagor ninye te nkoitoi e sulare, neyau enkarna torrono shumata ninye, ejo, ‘Aawa nanu ena kitok ore ake pee alo aboitare neitu atum te ninye olmonekie oitodolu ajo eselenkei’, ore menye ina kitok o ng'otonye neipang'unye aayau boo lelo monek le titoisho, enetii ilpayiani leina anasa tialuo, nejoki ninye menye leina kitok lelo payiani, ‘Aishoo nanu entito ai ele tung'ani meyama, neibayie ninye; naa ng'ura eitobira ninye enkitang'oroto e sulare tialo ninye, ejo, “Eitu nanu atum te ntito ino olmonekie oitodolu ajo eselenkei!” Naa noolo ilmonek le ntito ai le titoisho. Neisalaash nincheilo kila te dukuya lelo payiani leina anasa.’ Neibung lelo payiani leina anasa ilo lee nepuo aar aaitame, neitalaki ninye shekeli iip e nkosholai, neisho ninye menye ina kitok, enkaraki nayawua entorroni shumata ina tito nemeyama e Israel; naa keaku ninye enkitok enye; meidim ninye aiwuang'ie ina kitok too nkolong'i pooki enkishui enye. Kake tenesipa ina bae, nchere eitu etumi olmonek ooitodolu aajo mme eselenkei ina kitok, neipang'unyeki naa ina kitok aayau kutukaji enkaji e menye, ore lelo lewa leina anasa enye nenang ninye too soito o metua, enkaraki nayawua ninye esulare atua Israel aiborrie onyek tiatua enkaji e menye; neaku impooitie entorroni aaiwuang'ie tiatua Israel. “Teneinepuni olee eshomo enetii enkitok e likae lee neari pokira are metuata. Ilo lee oshomo enetii ina kitok o ina kitok, neaku impooitie entorroni tiatua ate. “Tenetii entito natisiraki nenang'are olee ninye tiatua enkanasa neyiolou ninye, iyau ninche pokira aipang'unye auluo ina anasa, ninang ninche too soito o metuata, ina kitok tenkaraki neitu eishir metomituni hoo netii atua enkanasa, o ilo lee enkaraki nainyala enkitok olelatia enye; neaku iwuang'ie entorroni tiatua intae. Kake teneinepu olee enkitok natasayiaki tiong'ata nemir ilo lee ninye neyiolou, naa ilo lee ake otayiolo oye. Kake ore ina kitok meitaasi ae; ore tialo ina kitok metii entorroni nairirikino keeya, amu ore ena kiguana nenyaanyukie enoltung'ani orasaki nesesekuan ilo lelatia enye. Ore enkaraki nainepua ninye ti ong'ota, naa ore hoo neishira ina kitok nasayia metomituni metii oltung'ani omitu ninye. “Teneinepu olee eselenkei nemesayia neibung ninye, neyiolou ninye neirrashi, ore ilo lee otayiolo ninye neisho menye ina tito shekeli onom e nkosholai, neyam ninye, enkaraki nainyala ninye; meidim ninye ataarai ninye too nkolong'i pooki enkishui enye. Meya oltung'ani enkitok e menye aashu obolu ilkilani leina nara enkitok e menye. “Ore ilo lee pooki oidongoki aashu ilo otudung'ori elewaisho nemejing atua eumata o Laitoriani. “Meetae olotaluno ojing atua eumata o Laitoriani; ometabaiki eishoi e tomon meetae obo leishoi enye olo ajing ina umata Olaitoriani. “Meetae oltung'ani Olamoni aashu ole Moab olo ajing eumata o Laitoriani ore ninye ebaiki eishoi e tomon meetae obo lenye olo ajing atua eumata o Laitoriani ntarasi; enkaraki neitu apa ninche kintanang'are iyie enkare o endaa te nkoitoi, ina kata apa pee ipuku aing'uaa Misiri, o enkaraki nayautua Baalam olayioni le Beor aaitung'uaa Petor e Mesopotamia meeu adek intae. Ore ake eyia mening Olaitoriani Enkai ino Balaam; kake eibelekenya Olaitoriani Enkai ino ilo deket metaa emayianata te iyie, amu eikinyor iyie Olaitoriani Enkai ino. Ming'orunye ninche eseriani aashu karsisisho too nkolong'i inono pooki intarasi. “Mimenaa ilo tung'ani le Edom amu olalashe lino; nimimenaa oltung'ani le Misiri amu ira apa iyie olomoni te nkop enye. Ore nena kera eishoi e uni naaikini ninche neidim aatijing eumata Olaitoriani. “Tenilo iyie aarare ilmang'ati linono nijing atua ilng'oborri lenye, nigolie naa kewan te pooki toki torrono. Tenetii atua intae oltung'ani lemesinya te nkaraki enataase te ninye kewarie, nchoo naa eipang ninye alo auluo, mejing'u ninye atua ilng'oborri; kake teneaku enteipa, neituku kewan te nkare, ore pee edoyio enkolong neidim ninye atijing'u atua ilng'oborri. “Ntobira ewueji tiauluo nepuoyieki ntonat, tanapa sii enchata napi tenebo iyie; peyie tenilo atonie enkop, niturunye engumoto, nintoki anukaa nena kik inono. Amu eloolo Olaitoriani Enkai ino te mpolos oo lng'oborri linyi, pee eitajeu intae neirragie ilmang'ati linyi te dukuya intae, metaa nchoo ilng'oborri linyi esinyayu pee medol ake ninye entoki suuji tiatua intae, neibelekenya aing'uaa intae. “Mincho ake olkitok ilo rrindik lenye apa oisika aing'uaa ninye nelotu enetii; nchoo ninye eton tenebo iyie, tiatua intae, teine wueji negelu ninye tiatua nabo oo nkang'itie inyi, teine neitiship ninye oleng; nimimbooki ninye enkop. “Meetae olayioni le Israel olo aiborrie onyek tiatua enkaji Enkai, nemeetae entito e Israel nalo aiborrie onyek tiatua enkaji Enkai. Miyau mpisai elaakinoto e mulayoi, anaa elaakinoto oldia atua enkaji o Laitoriani Enkai ino, alakie olmumai ake ninye pooki amu ore kuna pokira naa olminong to Laitoriani Enkai ino. “Misilenoki iyie te dupoto olalashe lino, te dupoto oo mpisai, aashu te dupoto e ndaa aashu te dupoto e pooki toki ake ninye. Ore to ltung'ani leiking'a indim iyie aisilenoki te dupoto kake ore to lalashe lino misilenoki te dupoto; pee kitum Olaitoriani Enkai ino atamayiana teina pooki nilo aas teina kop niloito aya. Teninos olmumai to Laitoriani Enkai ino, miyiata te laata, amu keikilikuanu tukul Olaitoriani Enkai ino te iyie, naa keaku eng'oki teyie. Kake tenilam enkinosata o lmumai, nemeitoki aaku eng'oki te iyie. Ing'ura pee intabaya ina naimua enkutuk ino, amu te yieuna ino inosie olmumai Olaitoriani Enkai ino teina nisiligishore te nkutuk ino. “Tenilo atua enkurma oo lng'anayio eilo tung'ani le latia ino, nindim ainosa ataraposhoyu ilng'anayio, ilooba anaa liyieu, kake mipik ake hoo obo olbene lino. Tenilo iyie atua enkurma eilo tung'ani le latia ino, indim atigilu e ntapa te nkaina ino, kake midung te nkalem ina kurma oltung'ani le latia ino naitashe. “Teneya oltung'ani enkitok ayam, nelo neaku eitu etum omom too nkonyek enyena te nkaraki natoduaa ninye embae suuji te ninye, neigeroki ilo moruo ninye empalai eoro nepik enkaina enye, nearaa ninye aitung'uaa enkaji enye, nelo ina kitok te nkaji enye, tenelo ninye aaku enkitok e likae moruo, ore ilo likae nemenu ninye neigeroki empalai eoro nepik enkaina enye nearaa ninye te nkaji enye, tenelo neye ilo moruo le siadi apa oowa ninye aitaa enkitok enye, ore ilo moruo apa le dukuya otaarayie ninye meshomo, nemeidim anyaaki aawa ninye ayama eidipaki aatipik olduruk. Amu olminong ilo te dukuya Olaitoriani, nemeishiakino teniyauu entorroni shumata ena kop naisho intae Olaitoriani Enkai inyi entujung. “Ore enayamishore oltung'ani, nemeishiakino ninye nelo enjore aashu ae siai; nchoo ninye eton tiang olari obo, pee eshipa tenebo oina kitok enye nayama. “Meetae oltung'ani oen osoit oidong'ishoreki liabori aashu le shumata; amu keaku enkishui e teena. “Teneibungi oltung'ani etupurroyie obo loo lalashera lenyena, lelo tung'ana le Israel, naa tenelo aiko ninye anaa orrindik aashu emir ninye, neari ilo apurroni metua; pee itum aiwuang'ie entorroni te mpolos inyi. “Ing'ura tenikijing enkeeya oo lbolot, toduaa pee, ias terisioroto e nena pooki nikiutaki lelo apolosak loo Lawi; anaa apa enaitanapa nanu ninche, ina taasa. Tadamu ina apa naitaasa Olaitoriani Miriam ina kata te nkoitoi ipuonunu aaing'uaa Misiri. “Tenisilenoki olelatia ino entoki ake ninye e ae pukunoto, milo iyie enkaji enye aya entoki nalak esile. Ntasho iyie tiaulou, ore ilo tung'ani lisilenoki, nikiyaki ninye entoki alak ina sile. Naa tenaa oltung'ani aisinani, nimirrag iyie iata ina toki enye nalakie esile. Tenedoyio enkolong nirrinyoki iyie ina toki enye nalakie esile, pee etum ninye airraga eeta olkila lenye nikimayian ninye iyie, naa keaku ina esupatisho te iyie te dukuya o Laitoriani Enkai ino. “Mimbooki enkop olaisiaayiani aisinani oigeroki aa obo loo lalashera linono aashu aa obo loo lomon ootii enkop inyi, atua nkang'itie inyi; nchoo ninye olmushaara lenye te nkolong naishiaakino, eton eitu edoyio enkolong amu oltung'ani aisinani ninye ina eisiliga oltau lenye; pee mikinchiraki ake to Laitoriani, neaku eng'oki te iyie. “Meari ilpayiani metuata te nkaraki nkera enye, nemeari nkera metuata te nkaraki iloo menye; oltung'ani ake neari metua te nkaraki eng'oki enye makewan. “Mimbelekeny esipata teilo tung'ani omoni, aashu teilo okishi aashu iya olkila le nkoliai te enata e sile; kake tadamu nchere ira apa iyie orrindik te Misiri nikikordu iyie Olaitoriani Enkai ino ainyiang'u teine; metaa kaaitanap nanu iyie taasa ena. “Teninturrur enkurma ino aisampu, nikirikino ilkuti ng'osil loo lukuny tiatua enkurma mirrinyo alo ayau; nchoo eaku oleilo tung'ani omoni, o lokishi, o enkoliai; pee kitum Olaitoriani Enkai ino atamayiana te siaai pooki oo nkaik inono. Tenirrarru ilng'anayio linono, ming'il arrarru aishu; nchoo eaku ileilo tung'ani omoni, o lokishi, o enkoliai. Tenisotu isabibu linono ming'il asotu nchoo eaku ileilo tung'ani omoni, o lokishi o enkoliai. Tadamu nchere ira apa iyie orrindik tiatua enkop e Misiri; metaa kaaitanap nanu iyie taasa ena. “Teneishankarra iltung'ana, nepuonu kotini, nedung ilarishak enkiguana te ninche, nepali ilo asipani neiguanareki ilo arruoni, tenelo neaku eoshoto naishiakino ilo tung'ani, neisho oladung'oni le nkiguana ilo tung'ani meirraga te nkop neari te dukuya ninye ioshot naairirikino enkitarruoroto enye. Amu eidimi aishoo ninye ioshot artam kake meitulusi; amu tenelo likae tung'ani aponiki ninye ioshot naalang kuna, netemenayioki naa ilo alashe lino too nkonyek inono. “Mien olkiteng enkutuk eidong'ito entapa. “Tenetoni ilalashera tenebo, neye obo lenye meeta olayioni, ore ina kitok eilo otua, meyami teboo ilo marei oltung'ani leeiking'a; ore olalashe olmoruo lenye nchoo elo ayiolou, neya ninye aitaa enkitok enye, neitaas ninye enaishiakino neitaas enkitok olalashe lenye. Ore olayioni ong'as aiu neya enkarna eilo alashe lenye otua, pee meiwuang'ieki enkarna enye tiatua Israel. Naa tenemeyieu ilo lee neyam enkitok o lalashe lenye, nelo ina kitok o lalashe lenye auluo enetii ilpayiani, nejoki, ‘Etanya olalashe lo lmoruo lai eun enkarna o lalashe lenye te Israel; meas ninye esiaai o lalashe lenye te nanu.’ Ore lelo payiani leina anasa enye, neipotu ninye, neirorie ninye: naa teneuno, ejo, ‘Mayieu nanu naya ninye’, nelo naa ina kitok o lalashe lenye enetii ninye teine netii lelo payiani, neitayu enamuke enye te nkeju enye, nenotaki enkomom enye; newaliki ajoki, ‘Ena emookini aaitaas olee le meshet enkaji o lalashe lenye.’ Ore enkarna enkaji enye kemookini aajo te Israel, enkaji e ilo oitayioki enamuke te nkeju enye. “Teneara ilewa maate, nelotu enkitok e obo amitu olmoruo teilo oarita ninye, neitorioo enkaina enye aibung elewaisho, tudung'oi enkaina enye; ming'urrie ninye. “Mipik olbene lino mpukunot are oo soito ootemieki enkiroishi, o sapuk o enkiti. Mipik enkaji ino mpukunot are e ntemeta enalala o enkiti. Entemet nabore nesipa ninye taasishore naa entemet nalulung'a ninye taasishore; pee etum nkolong'i inono aatoponari teina kop nikincho Olaitoriani Enkai ino. Amu ore lelo pooki oas mbaa naijo kuna, lelo pooki oasisho te lejare naa entoki olminong to Laitoriani Enkai ino. “Tadamu ina apa nikintaasa Amaleki te nkoitoi, ina kata ipuonunu aaing'uaa Misiri, ina kata apa pee kirasaki te nkoitoi inaure nitashala, nedung'oo to lkidong'oe linyi lelo pooki apa ooyietunye te siadi intae; neitu ninye eureyu Enkai. Metaa tenikincho Olaitoriani Enkai ino enkiyeng'iyeng too lmang'ati linono pooki likimanita, tiatua ina kop nikincho iyie Olaitoriani Enkai ino metaa enjung'ore ino niya; nilo aiwuang'ie Amaleki tioriong enkop; mincho ake kirikino. “Tenilotu akenya ina kop nikincho Olaitoriani Enkai ino tujung'o niya iyie ina kop, nimany, iwa embata e lelo ng'anayio le dukuya le nkop, lelo lisampua teina kop nikinchoo iyie Olaitoriani Enkai ino, nipik iyie ninche enkikapu, nilo iyie ine wueji negelu Olaitoriani Enkai ino, pee eitamany enkarna enye ine. Nilo iyie enetii ilo apolosani oasisho teina kata, nijoki ninye, ‘Aibalie nanu ena olong to Laitoriani nchere, atabaua atua ina kop apa nainosie Olaitoriani olmumai too loo papa pee eisho iyiook.’ Neya olapolosani enkikapu too nkaik inono neirragie te dukuya olperere lo lasar lo Laitoriani Enkai ino. “Niwalu iyie te dukuya Olaitoriani Enkai ino, ajo ‘Oltung'ani le Aramea alotoni apa papa, nedoyio ninye alo Misiri nebik teine, naa eikuti apa ninche, nebul teine neaku olosho, ogol, magilani naakitok. Neisorutuo apa iyiook iltung'ana le Misiri, neisomit iyiook, neiteleiki shumata iyiook rrindikisho nagol. Nikinchiraki iyiook Olaitoriani Enkai oo loo papa nening Olaitoriani oltoilo lang, nedol enkitamioto ang, o eyekenyata ang, o enkitorogonyata ang; eyaua iyiook Olaitoriani aitupuku te Misiri te nkaina magilani o te nkaina naitoriori, o te nkiputukuny kitok o too nkitoduaat o mbaa enking'asia neyau ninye iyiook atua ene wueji neisho iyiook ena kop, enkop naruko naishi o kule. Naa ng'ura, ayaua taata nanu ilng'anayio le dukuya lena kop, naa iyie Olaitoriani likinchoo nanu.’ Niragie te dukuya Olaitoriani Enkai ino; niserem te dukuya Olaitoriani Enkai ino; ning'idayu iyie te nena pooki supati nikinchoo iyie Olaitoriani Enkai ino o lmarei lino, iyie o Lawi o ilo tung'ani omoni otii atua intae. “Ore tenindip aitayu e matua pooki e tomon oo nkishorunot inono enkisampuare to lari liokuni, aa ninye olari oitayunyeki e matua e tomon eishori Olawi, o lomoni, o lokishi, o enkoliai pee etum ninche aainosa tiatua nkang'itie inyi neraposho, nitum taa atejo te dukuya Olaitoriani Enkai ino, ‘Aiwuang'ie nanu ina rubata nasinya tiatua enkaji ai, naidipa aishoo Olawi, o Lomoni, o Lokishi o enkoliai, te risioroto eina kitanapata pooki nikintanapa iyie nanu; eitu nanu agil nabo oo nkitanapat inono neitu aarikino nabo; eitu nanu ainos ae nabo e matua e tomon ina kata aishirita to sina; aashu aiwuang'ie nabo enye ina kata aata olminong, aashu aisho ae nabo ilootuata; atoning'o nanu oltoilo lo Laitoriani Enkaiai, ataasa nanu te risioroto e nena pooki nikintanapa nanu. Ng'ura itii emanyisho ino sinyati, itii shumata, nimayian iltung'ana linono Israel oena kop ninchoo iyie iyiook, anaa apa eninosie olmumai too loo papa, enkop naruko naishi o kule.’ “Ore ena olong kintanapa iyie Olaitoriani Enkai ino pee ias kuna kitanapat o nkikoot; toduaa naa pee ias ninche to ltau lino pooki o te nkishui ino pooki. Ndipa iyie aibalunye ena olong tialo Olaitoriani nchere ninye Enkai ino, naa ilo iyie too nkoitoi enyena, o nkitanapat enyena, o nkikoot enyena naa eilo aning oltoilo lenye; neibalunye Olaitoriani ena olong tialo iyie nchere ira olorere lenye makewan, anaa apa enaisiligie intae, naa imbung'ubung'u intae nkitanapat enyena, pee etum ninye ailepie intae te shumata lelo oshon pooki ooitobira, te nkisisa, o to lning'o o te nkanyit naa iakuku sii olorere osinya to Laitoriani Enkai inyi anaa enairoro ninye.” Ore Musa o lpayiani le Israel neitanap olorere ejo, “Embung'a kuna kitanapat pooki naitanap nanu intae ena olong, naa ore akenya ina olong nilang'ilang'a olkeju le Yordan aapuo ina kop naisho Olaitoriani Enkai inyi, intae, nintasheyieyie isoito sapuki nimurumuru ninche te nturoto; ninger te shumata ninche lelo rorei lena kitanapata, tenindip atalang'a ashomo ina kop, nikincho iyie Olaitoriani Enkai ino, ina kop naruko naishi o kule, anaa apa enaisiligie intae Olaitoriani, Enkai oo loo papaai linyi. Naa ore ake pee indipidipi aatalang olkeju le Yordan, nintasheyieyie kulo soito laa ninche nanu aitanapa intae ena olong te nchumata oldoinyo le Ebal, nimurumuru ninche te nturoto. Ore teine nishetu olperere lo lasar lo Laitoriani Enkai ino, olperere lo lasar loo soito, neminteleiki ninche esekenkei. Nishetu olperere lo lasar lo Laitoriani Enkai ino too soito le megueta; ninchooyo olasar opejori te nchumata enye, aitaiki Olaitoriani Enkai ino; nipolos olasar le seriani, ninos iyie teine, ning'ida te dukuya Olaitoriani Enkai ino. Ninger te nchumata e lelo soito lelo rorei pooki lena kitanapata meibalata.” Nejoki Musa o lelo apolosak le Lawi Israel pooki, “Entigirata entoning, intae Israel: ore ena Olong itaa intae olorere lo Laitoriani Enkai inyi. Toning'o naa oltoilo lo Laitoriani Enkai ino, mbung'a kuna kitanapat enyena o nkiguanat enyena naaitanapa nanu iyie ena olong.” neitoki Musa airorie ilo orere ina olong ake, ejo, “Tenindipidipi aatalang olkeju le Yordan nchoo kulo eitashe to ldoinyo le Gerisim, pee emayian olorere. Simion, o Lawi, o Yuda, o Isaakar, o Yosef, o Benchamen. Naa nchoo kulo eitashe te nchumata oldoinyo le Ebal teina siai: Ruben, o Gad, o Asheri, o Sebulon, o Dan, o Naftali. Neibalunye Ilawi too ltung'ana pooki le Israel to ltoilo sapuk aajo. “ ‘Etediaki iltung'ana ooitobiru enkitanyaanyukoto nagueta aashu enamuruni, olminong to Laitoriani, entoki naaitobiruni too nkaik o ltung'ani arriyia, neirragieki aaisudoo.’ Newal iltung'ana pooki aajo, ‘Esai.’ “ ‘Etediaki ilo lemeyanyit menye aashu ng'otonye.’ Newal iltung'ana pooki aajo, ‘Esai.’ “ ‘Etediaki ilo oiwuang'ie olpolosie leilo le latia enye.’ Newal iltung'ana pooki aajo ‘Esai.’ “ ‘Etediaki ilo oitapong'oo oltung'ani modooni te nkoitoi.’ Newal iltung'ana pooki aajo, ‘Esai.’ “ ‘Etediaki ilo oibelekeny esipata tialo oltung'ani omoni, o lokishi, o enkoliai.’ Newal iltung'ana pooki aajo, ‘Esai.’ “ ‘Etediaki ilo oboitare enkitok e menye enkaraki eiwuang'ie ninye ilkilani leina nara ene papaai lenye.’ Newal iltung'ana pooki aajo, ‘Esai.’ “ ‘Etediaki olololoitore empukunoto ake ninye eng'ues.’ Newal iltung'ana pooki aajo ‘Esai.’ “ ‘Etediaki ilo oboitare enkanashe enye, aa entito e menye aashu enang'arie kina.’ Newal iltung'ana pooki aajo, ‘Esai.’ “ ‘Etediaki ilo oboitare enkaputani.’ Newal iltung'ana pooki aajo ‘Esai.’ “ ‘Etediaki ilo oar metua olelatia enye.’ Newal iltung'ana pooki aajo ‘Esai.’ “ ‘Etediaki ilo oropi metaara metua oltung'ani lemeeta entioto.’ Newal iltung'ana pooki aajo ‘Esai.’ “ ‘Etediaki ilo le meitabaya irorei lena kitanapata aas ninche.’ Newal iltung'ana pooki aajo ‘Esai.’ “Naa tenining iyie oltoilo lo Laitoriani Enkai ino, aing'or pee ias nena kitanapat pooki naaitanapa nanu iyie ena olong, nikilepie ninye iyie Olaitoriani Enkai ino aitulusoo tenining iyie too loreren pooki le nkop. Ore kuna mayianat pooki naa kepuonu shumata iyie, nedooyo tenining oltoilo lo Laitoriani Enkai. “Eikimayian iyie tiatua enkanasa, nikimayiani iyie tiong'ata. “Kemayiani ilng'anayio lo sesen lino, o lng'anayio le nkop ino, o lng'anayio loo nkishu inono, oina ponunoto oo nkerrai inyi. “Kemayiani olbene lino oina tapa ino naipurjaki. “Eikimayiani iyie ijing'u o impang auluo. “Keisho Olaitoriani lelo mang'ati linono likidumakino, iyie metimirari ninche te dukuya iyie; eikipuonu ninche aadumakino eimu enkoitoi nabo neisik te dukuya iyie eim, nkoitoi naapishana. Keirriu Olaitoriani imayianat shumata ino tiatua ilchumat linono o leina pooki nias iyie; nikimayian iyie teina kop nikincho Olaitoriani Enkai ino. Keitubul intae Olaitoriani pee iakuku iltung'ana sinyat te nkaraki kewan enye, anaa apa enainosa olmumai te intae, tenimbung'ubung'u nkitanapat o Laitoriani Enkai inyi, nipuopuo too nkoitoi enyena. Ore iltung'ana le nkop pooki nedol nchere eipotoki intae te nkarna o Laitoriani; naa keureyu ninche intae. Naa eikincho iyie Olaitoriani tudupoyu te karsisisho o too lng'anayio lo sesen lino o too lng'anayio loo nkishu inono, o too lng'anayio le nkop ino tiatua ina kop nainosie Olaitoriani olmumai too loo papaai lino pee kincho iyie. Eikiboloki iyie Olaitoriani olchumati lenye le shumata, pee eishoru enchan tenkop ino too rishat enyena, nemayian esiai oo nkaik inono; neaku isilenoki iyie nkuapi kumok kake misilenu iyie. Naa eikintaa iyie Olaitoriani endukuya, mme olkidong'oe, naa eilepu ake alotu shumata, nimidoyio; tenimbung nena kitanapat o Laitoriani Enkai ino, naaitanap nanu iyie ena olong, ing'ura pee ias ninche, nimimbelekenya tiobo le kulo rorei laaitanap nanu iyie ena olong, alo enkalo e tatene aashu ene kedienye, alo asujaa kulie aitin aisiaai ninche. “Kake tenimining iyie oltoilo lo Laitoriani Enkai ino aashu teniming'or pee ias nkitanapat enyena pooki o nkikoot enyena naaitanap nanu iyie ena olong, ore kulo deketa pooki nepuonu shumata iyie. Kideki iyie te nkanasa nikideki tiong'ata. Etediaki enkikapu ino netediaki ina toki ino naipurjishoreki, Etediaki ilng'anayio lo sesen lino o lng'anayio le nkop ino, oina ponaroto oo nkishu inono, o lelelo loo ntare inono. Kitediaki iyie tenijing'u, nikitediaki tenimpung. “Kepik Olaitoriani shumata iyie ildeketa, o lmilo, osina tenena pooki nilo iyie aas, ometaba anaa nikindaikieki nindaaya asioki, te nkaraki entorroni oo nkiaasin inono, enkaraki nikitung'uayie iyie nanu. Keisho Olaitoriani olmeitai mikindikidikore ometaba anaa nikimut aishu teina kop niloito aya. Eikiosh iyie Olaitoriani te njipai o lgoo, o to lkirobi o te ng'ion o te nkiyupuyup enkima o to lameyu, o too oshot o too mpaldakani, nikisuj iyie kulo meita, o metaba anaa nindaaya. Ore te keper te shumata endukuya ino neaku osuyai ore enkop tiabori iyie neaku esekenkei. Keitaa Olaitoriani enchan eina kop ino empunyua o enterit, nikidoiki iyie te shumata ometaba anaa nikindaikieki. “Eikincho iyie Olaitoriani mikitimira ilmang'ati linono, nimimpang iyie alo aim enkoitoi nabo alo aarare ninche, nisikisiki aaim nkoitoi naapishana te dukuya ninche; naa ipuopuo intae aaku entaboi e nking'asia too nkitoriat pooki enkop. Ore mpopong'i inyi neaku endaa too ntaritik oloing'ang'e o too lowuarak lentim; nemeitokini aata hoo obo oiture ninche meshomo. Eikiosh iyie Olaitoriani too ltuduta le Misiri oo too mpaldakani o too lpepedo o te ng'ion nemeishiunoyu. Eikiosh iyie Olaitoriani to loirirua o te modoki o te miloi oo ndamunot; naa ilo iyie irrapirrapisho dama, anaa enairrapirrapisho oltung'ani modooni te naimin, nimidupoyu iyie too nkoitoi inono; naa keaku eikintorogonyi nikipurri anaake, nemetumi hoo obo likiretu iyie. Isai iyie enkitok, nelotu likae lee ayiolou; nishetu enkaji kake mimany, niun enkurma oo sabibu kake minos isabibu lenye. Keyieng'i olkiteng lino te dukuya inkonyek inono, niminos iyie nkiri enyena; ore osikiria neisimari aaya te dukuya enkomom ino, nimikirrinyokini iyie; ore nkerra inono neishori ilmang'ati linono, nemetii hoo obo likiretu iyie. Ore ilayiok linono o ntoyie inono naa keishori likae orere, eing'orita nkonyek inono, omeiliilai eyieu ninche endama pooki; nemetii engolon enkaina ino pee eibooyo ina. Ilo osho limiyiolo iyie olotu ainos lelo ng'anayio le nkop ino o le siaai ino pooki, naa iaku ake oloibookini enkop o loinyali anaake, ometaba anaa nikijing oloirirua teina nadol nkonyek inono. Eikiosh Olaitoriani nkung o lorroki too ltuduta torrok lemikindimi aaishiunye, ebaiki endap enkeju ino ometabaiki enerang'irang te ndukuya ino. “Eikiyaki iyie Olaitoriani, oilo aiguanani litipika shumata ino ilo osho leitu aekata iyiolou neitu eyiolou loo papaai linyi, ore teine nisiai kulie aitin oo nkeek o noo soito. Naa ilo iyie aaku entoki naimakini, endung'et e rashe, o entoki naimakini tiatua iloreren pooki teine nereu intae Olaitoriani. Iya iyie ilanterera kumok aun te nkurma, naa ilkuti ake ilo aisampu tiatua; amu kelotu olmaati nemut ninche. Iun iyie nkurman oo sabibu nintobir ninche, kake miok iyie enaisho enye, niminturrur ilng'anayio amu kelo ainos olkurto tiatua enkop inyi pooki. Ilo iyie atum iloirienito tiatua enkop ino pooki, kake miyelare eilata enye, amu kerrarrunye ilng'anayio lenye. Iiu iyie ilayiok o ntoyie, kake meaku ninche nkuninono, amu keyae ninche aaraya. Ore ilkeek linono pooki o lng'anayio le nkop ino naa keaku ilo lmaati. Ore ilo tung'ani omoni otii atua intae naa keilepieki meeu shumata iyie oleng nidou iyie alotu abori oleng. Eikisilenoki ninye kake misilenoki iyie ninye; keaku ninye endukuya niaku iyie olkidong'oe. Ore kulo deketa pooki naa kepuonu shumata iyie nikisuj nikigiroo iyie, ometaba anaa nikindaikieki, enkaraki neitu ining oltoilo lo Laitoriani Enkai ino, aibung nkitanapat enyena, o nkikoot enyena apa nikintanapa ninye iyie. Kepuonu ninche shumata iyie anaa enkitoduaata o enking'asia, o shumata eishoi ino ntarasi. “Ore enkaraki neitu iyie isiai Olaitoriani Enkai ino te ng'ida o te nchipai o ltau lino, te nkaraki enkumoi oo masaa, ore naa ilo iyie aisiaai lelo mang'ati linono likirriwaki Olaitoriani mikietu aar, te sumash o te nkure, te masipaisho o te yieunoto oo ntokitin pooki; naa kepik ninye enapet e sekenkei emurt ino ometaba anaa nikindaikie ninye. Eikirriwaki iyie Olaitoriani olosho likilotu aarare eing'uaa enelakua, eing'uaa eneiting'ie enkop, olosho oneneng anaa olmotonyi olo ti ai, ilo osho limiyiolo iyie enkutuk enye. Olosho ogogong le meshilaa likae tung'ani moruo nemeing'urrie oloti, naa kepuo aainos ilasho loo nkishu inono o lng'anayio le nkop ino, ometaba anaa nikindaikieki ilo osho sii limikilekaki iyie entapa aashu enaisho oo sabibu aashu eilata aashu emponaroto oo nkishu inono aashu ilkuoo loo ntare inono ometaba anaa nikindaikie ninche. Eikimuat ninche aaman too nkang'itie inono pooki, ometaba anaa neurori nena sunta inono adoru naagol apa nisiliga tiatua enkop ino pooki, nikimuat ninche aaman too nkang'itie inono pooki, tiatua enkop ino pooki apa nikinchoo Olaitoriani Enkai ino. Naa ilo iyie ainos eishoi o sesen lino makewan, nkiri oo layiok linono o ntoyie, nena nikinchoo Olaitoriani Enkai ino, teina nikimani aamuat, o to sina likipik ilmang'ati linono. Ore ilo lee bioto oitubuluaki te supatisho te ntae keroku oshoke tialo olalashe lenye, o te nkitok enye o teilo pisiai otelekua loo nkera enyena; ometaa meisho ninye nabo nena kiri oo nkera enyena naainosita ninye, amu meetae entoki natelekakaki ninye, teina namani aamuat o teilo sina oisomit intae ilmang'ati linyi tiatua nkang'itie inono pooki. Ore ina kitok bioto neitubuluaki te supatisho, neitu aekata eroro enkop eji amu eisikarre negogong'u ninye tialo olmoruo lenye, o te nkayioni enye o te ntito enye. Ore ina mudong naimua erishata oo nkejek enyena, o nkera enyena naatoiwuo ninye, neisudoo pee errinyokino ainos, amu kaa naa easi teina namani aamuat enkang o to sina likisomit iyie ilmang'ati linono too nkang'itie inono. “Teniming'or iyie pee ias kulo rorei pooki lena kitanapata ooigero tena buku pee itum aturia ena arna kitok naitureisho, o Laitoriani Enkai ino, nikirriwaki iyie Olaitoriani o eishoi ino ilmeita le nking'asia, ilmeita torrok oobik, o emuoyian torrono nabik. Naa eikintoki ninye airriwaki iyie imuoyiaritin pooki e Misiri, nena apa niure; naa eikisuj ninche. O pooki muoyian sii o pooki meitai le meigero tena buku oo nkitanapat, eikirriwaki iyie Olaitoriani ometaba anaa nindaaya. Ore hoo nibaba apa anaa osinyai le naiposha te nkumoi iakuku kuti; enkaraki neitu ining'ining'i oltoilo lo Laitoriani Enkai inyi. Naa ore apa anaa enikitonyorra Olaitoriani aitaas esidai nikintubul neijia eiko Olaitoriani eyau enkidaaroto o mutai shumata iyie; nikiwuang'ieki iyie teina kop nijing'ita alo aya. Neidapash intae Olaitoriani tiatua iloreren pooki ebaiki eluboto nabo enkop ometabaiki enkae. Ore teine nilo aisiaai kulie aitin, oo nkeek o noo soito apa neitu aekata iyiolou neitu eyiolou loo papaai linyi. Ore tiatua lelo oshon nimitum enkiyagata nimitum eneitasheyie nkejek inono, kake eikilo iyie aisho Olaitoriani teine oltau oikirikira, o nkonyek naailiilaa, o ltau olepori. Neisiong'a enkishui ino te dukuya iyie ore dama o kewarie iaku ole batisho nimiata osiligi le nkishui, nemeidim aitadedeyie osiligi le nkishui ino. Ore te dukuya tadekenya nijo iyie, ‘Oi naaji tenaa teipa!’ Ore teipa nijo iyie, ‘Oi naaji tenaa tadekenya’ te nkaraki ina batisho naure oltau lino, o nena baa naadol nkonyek inono. Naa eikirrinyu iyie Olaitoriani too melin ayau Misiri, elototo naisiligishoreki nchere ming'il aekata alo; ore teine ninyoraa aaishooyo ate meinyang'ai intae ilmang'ati linyi anaa rrindiki lewa o ng'oruo, kake meetae oltung'ani oinyang'u intae.” Kulo ninche irorei leilo ning'o lo sotua oitanapa Olaitoriani Musa pee eitobir oltung'ana le Israel te nkop e Moab, tenebo ilo ning'o lo sotua apa oitobira ninye tenebo ninche te nkop e Horeb. Neipotu Musa iltung'ana pooki le Israel nejoki ninche, “Itoduaa intae ina pooki nataasa Olaitoriani too nkonyek inyi te nkop e Misiri, ina naitaasa Farao o sinkan lenyena pooki o enkop enye pooki, nena temat sapuki nitoduaa too nkonyek inyi, nena kitoduaat o nena baa sapuki enking'asia; kake ore ebaiki ena olong eitu eisho intae Olaitoriani eng'eno niyiolounyenye, aashu nkonyek nidolielie aashu nkiyiaa nining'ieng'ie. Atorikoyie nanu intae ilarin artam tiong'ata neitu emuta ilkilani linyi linchopitoto neitu emutari inamuka too nkejek inyi, eitu intae inosinoso imukateni neitu intae iokioko enaisho aashu enaitemerisho; pee itumutumu aatayiolo nchere ara nanu Olaitoriani Enkai inyi. Ore apa pee ipuonunu intae ene wueji, neetuo aarare intae, Shilo olaiguanani le Heshbon o Oog ilo aiguanani le Bashan, kake kitimira iyiook ninche; nikiya iyiook enkop enye, nikincho metaa enjung'ore too ltung'ana le Reuben, o le Gad, o lpisiai loo ltung'ana le Manase. Metaa eng'ura naa pee imbung'ubung'u irorei lele ning'o lo sotua, pee itumutumu aatubul te nena pooki niasiasa. “Ntasheshe taata intae ena olong te dukuya Olaitoriani Enkai inyi, ilkituaak loo loshon linyi, o lpayiani linyi, o larikok linyi, o lewa pooki le Israel, o nkera inyi, o nkituaak inyi, o lomon ootii atua ilng'oborri linyi, oilo obarn ilpapit loo nkerra o ilo likiokoki enkare, pee itum atijing'a ilo ning'o le nkinosata o lmumai lo Laitoriani Enkai ino, oitobir Olaitoriani Enkai ino tenebo iyie ena olong; pee etum ninye aitubula intae ena olong anaa iltung'ana lenyena, pee etum sii ninye ataa Enkai inyi, anaa apa enaisiligie intae, anaa sii apa enainosa ninye olmumai too loo papaai linyi, te Abraham, o te Isaak o te Yakobo. Neme te intae ake aitobir ele ning'o lo lmumai, kake tenebo sii ilo lemetii ene tenebo iyiook ena olong tenebo ilo oitashe tenebo iyiook ena olong te dukuya Olaitoriani Enkai ang. “Iyiololo apa intae kimanya enkop e Misiri, oina kata kipuonu aaimu empolos e lelo oshon apa likitopolosutua; nitoduaa intae nena tokitin enye naaitagorisho, nena kitanyaanyukot enye oo nkaitin nkeek o noo soito, o nenkosholai o ne sahabu, apa naatii atua ninche. Entodol naa melo ake oltung'ani tiatua intae, olee aashu enkitok aashu olmarei aashu olosho, oibelekeny oltau lenye ena olong aing'uaa Olaitoriani Enkai ang alo aisiaai nkaitin e kulo oshon; mejing ake atua intae entonai naata esayiet o lng'anayio losotua oodua. Ilo tung'ani laa tenening kulo rorei lele ning'o lo lmumai, nemayian kewan to ltau, ejo, ‘Kaserianu nanu hoo tenaa kalo te ngolon oltau lai.’ Ore ena naa keidim ataa keyau enkidaata e ntoki nashal o enatoyio. Mepalaki ninye Olaitoriani, kake ore engoro o Laitoriani o lom lenye naa keidim atupuru teilo tung'ani, ore ildeketa ooigero tiatua ena buku netonie ninye, neiwuang'ie Olaitoriani enkarna enye tiabori keper. Nekepu Olaitoriani ninye tiatua iloshon pooki le Israel te ntorroni, te risioroto oo ldeketa pooki lele ning'o lo sotua ooigero tiatua ena buku oo nkitanapat. Ore too ishoritin naapuonu, ore nkera inyi naabulu te siadi intae, o ltung'ani olotu eing'uaa enkop nalakua, nejo, ina kata tenedol ioshot eina kop, o nena muoyiaritin naaitamuoyia Olaitoriani ina kop pooki naitaa Olaitoriani enkima o emunyan, o enkop natumuta enkima nemeunishoreki nemebulaki toki; ina kop nemebulaki nkujit, ewueji netaaraki aaiko anaa Sodom o Gomora, o Adam, o Seboim, nena apa naatanang'ayie Olaitoriani te ngoro enye napi. Ee keyooki iloshon pooki aajo, ‘Kainyoo pee eitaas Olaitoriani ena kop nji. Kainyoo eutu ena kirouaj e ngoro enye kitok?’ Neitoki iltung'ana aajo, ‘Enkaraki natung'uaitie ninche olning'o lo sotua lo Laitoriani, Enkai oo loo menye, apa oitobira ninye tenebo ninche ina kata apa pee eitupuku ninche te nkop e Misiri, nepuo ninche aaisiai kulie aitin neserem ninche, nkaitin apa neitu eyiolou ninche neitu egelaki Olaitoriani ninche; neaku einuakaki engoro o Laitoriani tenkaraki ena kop, neyau shumata ninye ildeketa pooki ooigero tena buku; nedotu Olaitoriani ninche aitung'uaa enkop enye te ngoro o te mpijan o te ngoro sapuk, nenang'aki ninche atua ae kop, anaa enatiu ena olong.’ “Ore nena tokitin naaisudoro naa ino Laitoriani Enkai ang; kake ore nena naaibalunyeki naa nkunaang o noo nkera ang ntarasi, pee kitum aataas irorei pooki lena kitanapata. “Naa tenepuonu kuna tokitin pooki shumata iyie, emayianata o ldeket, kuna nairragie nanu te dukuya iyie nidamu iyie ninche tiatua lelo oshon likiterewa Olaitoriani Enkai ino, nirrinyokino Olaitoriani Enkai ino, iyie o nkera inono, nining oltoilo lenye te kuna pooki naaitanap nanu iyie ena olong, to ltau lino pooki o te nkishui ino, iyie o nkera inono, nining oltoilo lenye te kuna pooki naaitanap nanu iyie ena olong, to ltau lino pooki o te nkishui ino pooki, nikitum naa Olaitoriani Enkai ino aing'urrie iyie, niking'il aiturrur iyie aitung'uaa lelo oreren pooki apa likindapashaka Olaitoriani Enkai ino. Tenaa duoo ninye shumata keper oleng apa kindapashakaki naa teine kirrinyu Olaitoriani Enkai ino, naa teine king'amu ninye iyie; nikiyau iyie Olaitoriani Enkai ino atua ina kop apa oo loo papaai linyi, pee itum aitaa enino; nikintubul ninye iyie niakuku kumok aalang iloo papaai linyi. Nemurat Olaitoriani Enkai ino oltau lino o ltau le ishoi ino, pee itum atonyorra Olaitoriani Enkai ino to ltau lino pooki o te nkishui ino pooki; pee itum atopuaa. Nepik Olaitoriani Enkai ino kulo deketa pooki shumata ilmang'ati linono o lelo apa likisilisilo. Ning'il iyie aning irorei lo Laitoriani nimbung nena kitanapat enyena pooki naaitanap nanu iyie ena olong. Eikincho iyie Olaitoriani Enkai ino tubula oleng, te siaai oo nkaik inono, o too lng'anayio lo sesen lino, o too lng'anayio loo nkishu inono, o too lng'anayio le nkop ino; amu keitoki Olaitoriani ashipakino pee kintubul iyie, anaa apa enatishipakine loo papaai lino. Tenining iyie oltoilo lo Laitoriani Enkai ino, aibung nkitanapat enyena o nkikoot enyena naaigero tena buku oo nkitanapat, tenirrinyokino iyie Olaitoriani Enkai ino to ltau lino pooki o te nkishui ino pooki. “Amu ore ena kitanapata naitanap nanu intae ena olong megol oleng te intae, nemelakua. Mme shumata etii, metaa ijo, ‘Kalo ailep alo shumata te nkaraki iyiook, pee eyaki iyiook, pee kitum iyiook aatoning nikiaas. Neme lido kekun le naiposha etii, metaa ijo iyie, kalo olo alang enaiposha te nkaraki iyiook, pee elo ayaki iyiook, pee kitum aatoning nikiaas?’ Kake eikitaaniki iyie ele rorei oleng; enkutuk ino etii o atua oltau lino, pee itum ataasa. “Ng'ura airragie nanu ena olong te dukuya iyie puaan o mbaa sidain, keeya o entorroni. Tenining iyie kuna kitanapat o Laitoriani Enkai ino naaitanap nanu ena olong, anyorru Olaitoriani Enkai ino, alo too nkoitoi enyena, nimbung nkitanapat enyena o nkikoot o nkiguanat nitum taa atopuaa nibul, nikimayian Olaitoriani Enkai ino tiatua ina kop nijing'ita alo aya. Kake teneibelekenya oltau lino niany ining, nikiyae shomo teserema kulie aitin nisiaai ninche, kaaibalakinye nanu iyie ena olong nchere, ilo aidaaya; milo abik tiatua ina kop nilang'aki to lkeju le Yordan alo aya. Kaipotu nanu keper o enkop nikinchakenoki iyie ena olong, nchere airragie nanu te dukuya iyie puaan o keeya, emayianata o ldeket, ore naa tegelu puaan, pee itum iyie o eishoi ino atobikoi, ninyorru Olaitoriani Enkai ino, nining oltoilo lenye, nisuj ninye; amu enkishui ina te iyie o emponaroto oo nkolong'i, pee itum atobiko tiatua ina kop apa nainosie Olaitoriani olmumai too loo papaai linyi, te Abraham, o te Isaak, o te Yakobo pee eisho ninche.” Nelo Musa dukuya airorie Israel pooki kulo rorei, Nejoki ninye ninche, “Ara taata nanu oloo larin iip o tikitam ena olong; meekure aidim aipang'a arashu atijing'u. Aatiaka nanu Olaitoriani, ‘Milo iyie alang ele keju le Yordan.’ Olaitoriani Enkai ino makewan likilo arikoo; kelo ninye aidaikie kulo oshon ootii dukuya iyie pee itum aiwuang'ie ninche, nelo Yoshua arikoo intae te dukuya, anaa enatejo Olaitoriani. Naa keitaas Olaitoriani ninche anaa enaitaasa Sihon o Oog, lelo aiguanak le Amori, o enkop enye, ina kata apa pee eidaikie ninche. Naa keishoru Olaitoriani ninche aisho intae, nipuopuo intae aaitaas ninche te risioroto ena kitanapata pooki naitanap nanu intae. Entagoluoto nintagololo oishuaa, miureishoyuyu nimimputukunyunyu te nkaraki ninche, amu Olaitoriani Enkai ino ilo olo te dukuya iyie; mikintiak ninye nimiking'uaa.” Neipotu Musa Yoshua, nejoki ninye te dukuya Israel pooki, “Tonyua nintagol oshoke; amu ilo iyie o ele orere atua ina kop apa nainosie Olaitoriani olmumai too loo menye pee eisho ninche; naa iyie olo aisho ninche. Olaitoriani ninye olo te dukuya iyie; keaku ninye tenebo iyie; mikintiak ninye aashu king'uaa; miureishoyu nimishalu.” Neiger Musa ena kitanapata neisho ilapolosak lelo ayiok le Lawi, apa ootanapa osanduku lo sotua lo Laitoriani, o lpayiani pooki le Israel. Neitanapa Musa ninche ejo, “Ore ake te nkiting'oto e pooki arin oopishana, teina kata nategeluaki pee epalakinoi isilen, to sirua loo lng'oborri, ina kata epuonu Israel pooki aalioyu te dukuya Olaitoriani Enkai ino, teine wueji negelu ninye, nilo aisum ena kitanapata te dukuya Israel pooki metoning'o. Nturrurro iltung'ana ilewa o nkituaak o elelero, oilo tung'ani omoni otii atua nkang'itie inyi, pee etum ninche aatayiolo neureyu Olaitoriani Enkai, neing'or pee eas lelo rorei pooki loo nkitanapat, paa ore nena kera enye nemeyiolo ena kitanapata, netum aatoning, neyiolou aatureita Olaitoriani Enkai, te nkata naba anaa eninchu teina kop nilo alang'aki te lido kekun le Yordan alo aya.” Nejoki Olaitoriani Musa, “Ng'ura etupunyutua nkolong'i pee iye iyie; mpotu Yoshua, nipuonunu atua ilo ng'obor le ntumo, pee atum aitanapa ninye.” Nelo Musa o Yoshua atua ilo ng'obor le ng'ape e nkatampoi, ore ina ng'ape e nkatampoi neitashe te mbata e kutukaji eilo ng'obor. Nejoki Olaitoriani Musa, “Ng'ura etataana enkata niye iyie, nirura tenebo iloo papaai linyi; naa kedumunye ele orere te nkibor oo nkonyek nesuj kulie aitin ng'ejuko ena kop napuo ninche aashulare ninche, naa kaapuo ninche aaing'uaa nanu negil ilo ning'o lai lo sotua apa laitobira o ninche. Netum taa engoro ai ayupuyupo tialo ninche teina olong, naing'uaa nanu ninche naisudoo enkomom ai teine, nemuti ninche; nepuonu ntorrok kumok o nyamalitin shumata ninche, ometaa kejo ninche teina olong, ‘Aimeetuo kuna torrok shumata iyiook enkaraki nemetii Enkai ang atua iyiook?’ Naa kaisudoo nanu enkomom ai katukul ina olong te nkaraki ina torroni nataasa ninche, amu eibelekenyakinote ninche kulie aitin. Ore naa taata ngero ele sinkolio, ninteng'en ninye iltung'ana le Israel; tipika ninye atua nkutukie enye, pee etum ele sinkolio ataa shakeni te nanu tialo iltung'ana le Israel. Amu ore aidipa nanu ayau ninche atua ina kop naruko naishi o kule, apa nainosie olmumai pee aisho loo menye, netadaate ninche neraposho nepiru, naa keibelekenyakino ninche kulie aitin neisiaai ninche, naamenaa ninche nanu negil olning'o lai. Naa tenelo akenya nepuonu ntorrok kumok o nyamalitin shumata ninche, nerany ninche ele sinkolio metaa shakeni (amu merikinisho ilo sinkolio too nkutukie oo nkera enye); amu ayiolo nanu nena kipirakinot naaitobirita ninche, apa eton eitu ayau ninche atua ina kop apa nainosie olmumai pee aisho ninche.” Neaku eigero apa Musa ilo sinkolio ina olong ake, neiteng'en ninye iltung'ana le Israel. Neitanap Olaitoriani Yoshua olayioni le Nuni nejoki, “Tonyuaa nintagol oshoke; amu eilo iyie ayau nkera e Israel atua ina kop apa nainosie olmumai pee aisho ninche. Kaaku nanu tenebo iyie.” Ore ake pee eidip Musa aigero irorei lena kitanapata tiatua embuku, omeitabaiki enkiting'oto, neitanap Musa lelo tung'ana loo Lawi apa oonap osanduku lo sotua lo Laitoriani ejoki, “Ewaita ena buku oo nkitanapat, nipikipiki embata eilo sanduku lo sotua lo Laitoriani Enkai inyi, pee etum ninye ataa teine shakenisho tialo intae. Amu ayiolo nanu enkiseroto o engolon enkong'u inyi; ng'ura, ena olong itogolong'akita intae Olaitoriani; kebaa naa kenya engolong'akinoto te siadi keeya ai! Enturrurrokoki nanu ilpayiani pooki loo loshon linyi, o larikok linyi pee atumoki airoro kulo rorei too nkiyiaa enye naipotu shumata o enkop meishakenoki ninche. Amu ayiolo nanu ajo ore te siadi keeya ai meeta nchere miasiasa entorroni, nimbelekenyanya aapaash ina oitoi apa naitanapa nanu intae; naa ore too nkolong'i naapuonu nejing intae entorroni, enkaraki naa eiyookiki intae aas entorroni te dukuya Olaitoriani, aaitagor ninye tialo esiai oo nkaik inyi.” Neitoki taa Musa airo irorei leilo sinkolio ometaba anaa neishakino nkiyiaa eina umata e Israel: “Toning'o iyie shumata, amu kairo nanu; nchoo enkop ening irorei le nkutuk ai. Metadou nkiteng'enat aainei edou anaa enchan, nchoo enkiroroto ai etiu anaa enkoileelio, anaa enchan nashaiki nkujit naanyori, o anaa enkirujuruj nashaiki mbenek. Amu kaibalunye nanu enkarna o Laitoriani. Enchoo enkitoo Enkai ang!” “Endapidapoi ninye, nelulung'a esiai enye amu kesipa nkoitoi pooki enyena. Enkai naisiligayu nemeeta entioto, Kesipa neitoriori ninye. Etaasa ninche entorroni tialo ninye, meekure ninche aa nkera enyena tenkaraki olminong lenye; eishoi ninche nagolong'u netapong'ori ninche. Kena intae ilaakiki Olaitoriani, loorere omoda lemedamisho? Aime papaai linyi, ninye ilo oitobira intae, laa ninye oitobirua intae neitubul intae? Tadamu nkolong'i e opa, tadamu ilarin loo ishoritin kumok; nkilikuana papaai lino, amu aikintodol, ninkilikuan ilpayiani linyi, amu aikiliki ninche iyie. Ore apa pee eisho ilo otii shumata aisul iloshon njung'oreitin enye, ore apa pee eorrior iltung'ana, nepik ninye ilpolosien loo loreren te risioroto esiana oo nkera e Nkai. Amu ore erubata o Laitoriani naa iltung'ana lenyena Yakobo ninye erubata enye najung.” “Enoto apa ninye to lpurkel ti ong'ata te nkop natoyio; neman ninye, neing'or ninye, negolie ninye anaa esoit enkong'u enye. Anaa olkurragos oitobir enkaji enye, negolie nkera enyena, nelak inaipuko enyena aibung ninche, too naipuko enyena. Olaitoriani apa otorikoyie ninye openy, nemeetae apa ae ai omoni tenebo ninye. Neisho Olaitoriani ninye meima iwuejitin neeika enkop, neinos ninche ilng'anayio le nkop neisho ninye meibibiu olkenkei te ndapidapoi, o eilata te ndapidapoi. Ing'orn oo nkishu o kule oo ntare, tenebo iila oo lkuo le kerra o lmeregeshi, iluat oo nchoo e Bashan o nkineji, o enkano sidai aisul ore to sarge loo sabibu niokioko enaisho.” “Kake etopiro Yeshurun, neroisho too nkejek; itopiro iyie nisapuku, nisipayu; neitoki ninye aing'uaa Enkai naa ninye naitobirua ninye, nesukeny endapidapoi e njeunoto enye. Nedumaki ninche ninye olom te kulie aitin; ore too mbaa bususi neitagor ninche ninye. Nepolosaki ninche iloiriruani, leme nkaitin, nena aitin neitu aekata eyiolou ninche nena aitin naaetuo det, neitu aekata ninye eidetidetu loo papaai linyi. Neitu ishilaa ina dapidapoi natoiuo intae nerikino intae ina Ai natoiuo intae.” “Etoduaa Olaitoriani ina neiturraa ninche, te nkaraki ina naitagoro ninye ilayiok lenyena o ntoyie enyena. Nejo ninye, ‘Kaisudoo nanu enkomom ai te ninche,’ pee adol enebaya ninche amu eishoi marmali ninche, nkera nemeisiligayu. Aatudumakitia ninche olom teina neme enkai aaitagoro ninche nanu too nkitanyaanyukot enye. Neaku kadumaki nanu ninche olom te lelo leme iltung'ana, kaitagor nanu ninche teilo osho omoda. Amu eyupuyupieki enkima te ngoro ai, naa keyupuyup ometabaiki enguton e nemeneng'a, nemut enkop o nena naabulu neinok too lbakunot loo ldoinyo.” “‘Nasotoki nanu intorrok shumata ninche nang'orie nanu ninche mbaa aainei o maishaki; kemenayu ninche to lameyu, nemut ninche enkolong napejisho, o nkeeyaitin torrok, nairriwaki nanu ninche ilala loo lowuarak meinosa ninche. Ore te wueji neisiaja near ninche olalem ore tiatua aji neaku neidaikie ilbarnot o selenken, enkerai nanakita tenebo olmoruo oibor elukunya. Anaata naaji atejo, Kaidapash ninche meshomo oleng, kaisho nanu ninche metaa meitokini aadamu tiatua iltung'ana. Teneme naaji ilmang'ati lenye medamu ake embae nemesipa pee melo ake nejo, Enkaina ang natimirishe, mme Olaitoriani oyaua ena pooki.’” “Amu olosho ninche lemeeta kiguana nemetii eyiolounoto atua ninche. Tenaa aing'eni apa ninche, anaata etayioloito ena, anaata etumusutuo enkiting'oto enye! Kaji eiko oltung'ani obo tenemir enkalifu, naa kaji eiko oare tenedumu nkalifuni tomon mekueta, teneme Endapidapoi enye natimira ninche, netapalayie ninche Olaitoriani? Amu metiu Endapidapoi enye anaa Endapidapoi ang, keishakenoki doi ninye ilmang'ati lang ina. Amu ore eishoi enye naa osabibu le Sodom epukunye, o nkurman e Gomora; ore isabibu lenye naa isabibu le sayiet, ore inkimarrimarrat enye naa kedua. Ore enaisho enye oo sabibu naa esayiet oo lasuriaa, esayiet torrono e nturbubua.” “Keitu eshumi kuna tenkaraki nanu, nemishirakini olchumati lai? Enaai elap naa kaitalaku, teneideketari enkeju enye amu etataana enkolong enkidaata enye; naa kelotu keeya enye asioki. Amu keilepunye Olaitoriani iltung'ana lenyena neing'urrie isinkan lenyena, tenedol ninye ajo eishunye engolon enye, neitu elakuni hoo obo, oloena aashu ololakuno. Paa keitoki taa ajo, ‘Koree nkaitin enye, ina dapidapoi nashomo ninche aasaru.’ Ina nainosa ineepir oo lasarri lenye neok enaisho oo lasarri lenye ooki? Nchoo ninche edumunye pee kiretu iyie, nchoo ninche mikitomitu iyie!” “‘Toduaa naa taata nchere, nanu, ee nanu, ninye ilo nemeetae ae ai napudare, kaar nanu matua naitopiu; kapik nanu olbae naishiunye; nemeetae hoo ng'ae oidim atokordu te nkaina ai. Amu kadumu nanu enkarna ai aitabaiki keper, nainos olmumai, anaa enaishu nanu ntarasi. Tenaii nanu olalem lai neibung enkaina ai enkiguana naitalaku nanu too lmang'ati laainei, naitalaku nanu te lelo laaiba nanu. Kaitemer nanu mbaa aainei te naisho nemut olalem lai ninche tenebo lelo ootaraki o loo ena, te nena lukuny oo lpapit adoru loo lmang'ati.’” “Esisa iltung'ana lenyena, lo oreren amu keitalaku ninye osarge loo sinkan lenyena, neitalaku elap too lmang'ati lenyena neitobir olkipoket te nkop oo ltung'ana lenyena.” Nelotu Musa airo kulo rorei pooki lele sinkolio aitoning iltung'ana, ninye o Yoshua olayioni le Nuni. Ore ake pee eidip Musa airoro kulo rorei pooki te Israel pooki, nejoki ninye ninche, “Embung'a too ltauja kulo rorei laliki intae ena olong, pee itumutumu aaitanapa ninche nkera inyi, pee etum ninche aaing'ura neas irorei pooki lena kitanapata. Amu mme rorei le pesho kulo te intae, kake enkishui inyi, ore enkaraki ina, ipuopuo aabikoo teina kop nilang'akiki te lido kekun le Yordan nipuopuo aaya.” Nejoki Olaitoriani Musa ina kata, “Takedo ele doinyo le Abarim, oldoinyo le Nebo, otii enkop e Moab, oipirakinore Yeriko; ning'or ina kop e Kanaan naisho nanu iltung'ana le Israel meitaa enenye; nilo iyie aye teilo doinyo liked enchumata, nikinturrurrokini iltung'ana linono, anaa apa enatua Aron olalashe lino to ldoinyo le Hori neiturrurrokini iltung'ana lenyena: enkaraki apa neitu intae kirukuruku nanu tiatua iltung'ana le Israel too nkariak e Moribat-Kardesh, to lpurkel le Sin; enkaraki neitu intae kiyanyitutu aaitaa sinyati te mpolos oo ltung'ana le Israel. Amu idol iyie ina kop te dukuya iyie kake milo iyie ine, atua ina kop naishoo nanu iltung'ana le Israel.” Ena ninye ina mayianata apa e Musa ilo tung'ani le Nkai natamayiana nkera e Israel eton eitu eye. Nejo ninye, “Eewuo Olaitoriani eing'uaa Sinai, neilepie iyiook anaa enkolong te Seir, newang'u to ldoinyo le Paran, nelotu ninye eing'uaa nkalifuni iip tomon oo sinyat, eeta enkima nayupuyup te nkaina enye. Ee kenyor ninye iltung'ana lenyena ore apa lelo pooki ooiteng'elakaki ninye netii atua enkaina enye; nesujaa ninche orrekie lenye, neng'amu eutaroto te iyie, ore apa pee eitanap iyiook Musa enkitanapata, metaa enjung'ore to lturrur le Yakobo. Neaku Olaitoriani olaiguanani le Yoshurun, ina kata apa pee etumo ilkituaak loo ltung'ana iloshon pooki le Israel tenebo. Nchoo Ruben eishu, mincho eye, nimincho iltung'ana lenyena eaku kuti.” Nejo ninye ena tialo Yuda, “Toning'o Olaitoriani, oltoilo le Yuda, niyau ninye aitijing'u enetii iltung'ana lenyena, tomitu iyie too nkaik inono, niaku eretoto too lmang'ati lenyena.” Ore too le Lawi nejo, “Nchoo Lawi Tumimu ino nincho Urimu ino ilo osinya ilo apa litetema te Masa ninchankarrare ninye too nkariak e Meriba; ilo apa otejo tialo menye o ng'otonye ‘Mashilaa nanu ninche’; eiturrayie ninye ilalashera lenyena, nepalaa nkera enyena, amu eibung'a ninche ororei lino neibung olning'o lino. Keiteng'en ninche Yakobo nkiguanat inono; neiteng'en Israel nkitanapat inono kepik ninche enkorropil dukuya iyie o lasar opejori enchumata olperere lino lo lasar. Olaitoriani, tamayiana imasaa enyena, ning'amaa esiai oo nkaik enyena; tarrarra mpolosi oo lmang'ati lenyena, e lelo ooiba ninye, pee meigil aadumunye. Ore te Benchamen nejo ninye, Olkirotet lo Laitoriani keton ninye te seriani te ninye; Keimulumul ninye endama pooki, neitaa ninye erishata oo ronyi lenyena emanyisho enye.” Ore tialo Yosef nejo ninye, “Metamayiana Olaitoriani enkop enye, too ntokitin enyena supati e shumata, o too naatii ineegut olodo le nkop, too lng'anayio sidain le nkolong o te nena kumok oo lapaitin, o te nena sidain naaimu lelo doinyo oina borei naing'uaa nena doinyo musan oo ntarasi tenebo nena kishorot sidain enkop o enkiputakinoto enye, o enyorrata eilo apa otii osanag, meetu kuna shumata endukuya e Yosef o enerang'irang te lukunya eilo ora olkitok tiatua ilalashera lenyena. Ore oloing'oni lenye kikau neeta engolon, ore mowuarak enyena naa imowuarak o larro, naa ninche errumorie iloreren, nerumoo pooki omeitabaiki ineeiting'ie enkop; ore lelo naa lelo oora nkalifuni iip tomon le Efraim, ore kulo naa lelo oara nkalifuni le Manase.” Ore tialo Sebulon nejo ninye, “Ting'idayu iyie Sebulon, te nimpang auluo, ning'idayu Isaakar tiatua ilng'obori linono. Keipotu ninche iloreren meetu ilo doinyo lenye; ore teine neitayu ilasarri lenye; sidain amu keaku ninche enkarsisisho oo naaiposha, o nena masaa naaisudoro o sinyai.” Ore tialo Gad nejo ninye, “Metamayiana ilo oitalala Gad! Etiu Gad anaa olng'atuny, kepolos ninye enkaina, o enerang'irang te ndukuya. Etegelaka ninye kewan ewueji neisul te nkop, amu teine apa eiteng'elaki erubata oloitoreisho; nelo ninye enetii ilkituaak loo ltung'ana, nedung'oki Israel enkiguana, o nena kiguanat naasipa o Laitoriani.” Ore tialo Dan nejo ninye, “Ore Dan naa enkerai o lng'atuny, ina naipidito te Bashan.” Ore tialo Naftali nejo ninye “Oo Naftali, ndipakine ntokitin supati, nikimputa esupatisho o Laitoriani iwa enaiposha o kopikop.” Ore tialo Asheri nejo ninye, “Metamayiani aaitulus too layiok, nchoo ninye etum omom too lalashera lenyena, naa nchoo eitadoiki enkeju enye eilata. Metaa nchomito inono ine sekenkei neponari engolon ino anaa nkolong'i inono. Meetae likae onyaanyukie Enkai, iyie, Yeshurun, ilo olo te keper pee kilotu aret, neimu nkatampo te nkitoo enye. Ina Ai oo ntarasi ninye emanyisho ino ore abori iyie netii nkaik oo ntarasi naa kerewaa ninye olmang'atinta te dukuya iyie, nejo, Ndaikie. Neaku etobiko apa Israel te seriani, te nchorro e Yakobo ake, teina kop e ntapa o enaisho oo sabibu ee, keper enye naitadou enkoileelio. Imayiana iyie Israel, Oo Israel! Kaing'ae likinyaanyukie, olorere oitajeu Olaitoriani, ina long'o e retoto inyi, o lalem le nkisulata inyi! Kepuonu ilmang'ati linyi aasai intae naa ipuopuo intae aaituny iwuejitin enye e shumata.” Neilep Musa teina kisiajata e Moab alo oldoinyo le Nebo, enchumata e Pisga, aa ninye naipirakinore Yeriko. Neitodol Olaitoriani ninye ina kop pooki, Gilead ometabaiki Dan, o Naftali pooki ina kop e Efraim, o Manase, o enkop pooki e Yuda ometabaiki enaiposha o loo ntoluo, e Negeb o enkisiajata, aa taa ilo erata le Yeriko ina anasa oo ltuka ometabaiki Soar. Neitoki Olaitoriani ajoki ninye, “Ena kop apa ina nainosie olmumai o Abraham, o Isaak o Yakobo, nchere, ‘Kalo nanu aisho eishoi enye!’ Aaishoo nanu iyie toduaa too nkonyek inono, kake milo iyie ine.” Neaku etua apa Musa osinka le Nkai teine te nkop e Moab, te risioroto o rorei lo Laitoriani, nenukaa Olaitoriani ninye to erata te nkop e Moab eipirakinore Bet-peor; kake meetae oltung'ani oyiolo enkurare enye otaata. Oloo larin iip o tikitam apa Musa pee eye; neitu eiliilaa nkonyek enyena aashu neitu engoroo engolon enye. Neishiraki iltung'ana le Israel Musa too nkisiajat e Moab nkolong'i e nkishirakinoto o sina tenkaraki Musa. Ore Yoshua olayioni le Nuni nebore oltau le ng'eno nagut, amu eiteleikia apa Musa nkaik enyena shumata ninye; neaku etoning'o iltung'ana le Israel ninye; neas ninche anaa enaitanapa Olaitoriani Musa. Neitu aekata edumunye te Israel oloiboni le Nkai laaijo Musa, laa keyiolore Olaitoriani too nkomomi, meetae likae laaijo ninye too nkitoduaat o too nenking'asia naaishoo Olaitoriani ninye metaasa te nkop e Misiri, te Farao o too sinkan lenyena pooki o te nkop enye pooki. O teina golon pooki magilani o nena kiaasin kituaak naaitureisho naataasa Musa te dukuya Israel pooki. Ore te siadi keeya e Musa ilo sinka lo Laitoriani, nejoki Olaitoriani Yoshua olayioni le Nuni ilo sinka le Musa, “Etua Musa osinka lai; ore naa taata tudumunye, shomo talang'a Yordan, iyie o kulo tung'ana pooki, enchom atua ina kop naishorita nanu ninche, iltung'ana le Israel. Ore pooki wueji neroro iroruat oo nkejek inyi aishoo nanu intae, anaa apa enaisiligie nanu Musa. Ebaiki olpurkel o ena Lebanon o metabaiki olkeju kitok, ilo keju le Frati, enkop pooki oo Lhiti o metabaiki enaiposha kitok te nkalo e ndoyioroto e nkolong, naa keaku enkop inyi. Meetae oltung'ani likindim aitasheikinore too nkolong'i pooki e nkishui ino. Ore apa anaa enatii nanu te nebo Musa, neijia aiko kaaku nanu te nebo iyie; maaitiak nanu iyie nemaaing'uaa nanu iyie. Tonyuaa nintagoluo amu iyie oidimie kulo metujung'o ina kop nainosie nanu olmumai too loo menye pee aisho ninche. Tonyuaa ake duoo iyie nintagoluo oleng, ning'or pee ias te risioroto e nena kitanapat pooki apa nikintanapa Musa osinka lai; mimbelekenya apaash alo enkaina e tatene aashu ene kedienye, pee itum aisula te pooki wueji neba anaa enilo. Ore ena buku oo nkitanapat mincho epuku te nkutuk ino, kake mbirribirra mbaa enyena dama o kewarie, pee itum atujurru ataasa te risioroto e nena pooki naaigero ti atua ninye; amu ina kata ake ebul enkoitoi ino, naa ina kata itum enkisulata sidai. Keitu nanu aaitanap iyie? Tonyuaa nintagoluo; miureishoyu, niming'aeng'ae, amu etii Olaitoriani Enkai ino te nebo iyie te pooki wueji nilo.” Neitoki Yoshua aitanap ilkituaak loo ltung'ana ejo, “Eima atua enkang oo lng'oborri, nintanapapa olorere, ‘Entobira ndaiki inyi; amu ore te rishata oo nkolong'i uni naa ilang'ilang'a intae Yordan, pee ipuopuo aaibung ina kop apa naishoo intae Olaitoriani Enkai inyi pee iyaya.’ ” Ore ti alo ile Ruben, o le Gad, o olpisiai lo losho le Manase nejoki Yoshua, “Entadamu ororei apa oitanapa intae Musa osinka lo Laitoriani, ejo, ‘Ore Olaitoriani Enkai inyi naa keisho intae ewueji e nkiyeng'iyeng, naa keisho ninye intae ena kop.’ Ore nkituaak inyi, o nkera inyi, o nkishu inyi naa ketoni ti atua ina kop apa naishoo intae Musa te lido kekun le Yordan; kake ore iltung'ana pooki oogol ti atua intae nepuo etanapate te dukuya ilalashera linyi neretu ninche, o metaba anaa neisho Olaitoriani enkiyeng'iyeng ilalashera linyi o intae sii, neya sii ninche ina kop naisho ninche Olaitoriani Enkai inyi; nitumutumu taa aatushukokinoto enkop inyi, niyaya ninye, ina kop apa naishoo intae Musa osinka lo Laitoriani te lido kekun Yordan te nkalo e nkilepunoto e nkolong.” Newaliki ninche Yoshua ejo, “Ore nena pooki nintanapa iyiook naa eikiaas, ore eneba anaa enirriwaa iyiook naa eikipuo. Ore apa anaa enikitoning'o Musa too mbaa pooki, neijia sii kinko aaning iyie; metaa ake duoo ninye Olaitoriani Enkai ino te nebo iyie, anaa apa enatii te nebo Musa! Ore oloba anaa olikipaash aany enkitanapata ino negolong'aki irorei linono, enaba anaa enintanap ninye naa keari metua. Tonyuaa ake duoo iyie nintagoluo.” Neirriwaa Yoshua olayioni le Nuni te nkisudoroto iltung'ana oare te Shitumu metaa ilaikitalak, ejo, “Enchom, eng'ura enkop, neisul Yeriko.” Nepuo ninche, nepuonu enkaji e mulayoi apa naji enkarna enye Rahabu, neirrag ninche ine. Netolikioki apa olaiguanani le Yeriko aajoki, “Ng'ura, etii kulikae tung'ana le Israel ooetuo ene duoo kewarie pee ejur enkop.” Neirriwaa ilo aiguanani le Yeriko iltung'ana enkaji e Rahabu, ejo, “Ntayu lelo tung'ana ooetuo enkaji ino, lelo ootijing'a enkaji ino; amu enkop pooki eetuo ninche aajur.” Kake ewa apa ina kitok lelo tung'ana pokira oare aisudoo; nejo ninye, “Esipa eetuo iltung'ana enatii nanu, kake mayiolo nanu ajo kaji eing'uaa ninche; ore ake pee eaku keikeni kishomi, etomisimiso, neipang lelo tung'ana aapuo, ore eneshomo lelo tung'ana mayiolo nanu; entasioki entusujai ninche amu inepupu.” Kake eyaua apa ninye ninche enchumata e nkaji, neisudoo ninche too ndupa apa naa ninche naaitobirare te nchumata e nkaji. Neaku etusujaitie iltung'ana ninche te nkoitoi nalo Yordan, o metabaiki ilang'at; nerisio ake eipang'a iltung'ana aapuo neikeni kishomi. Ore eton eitu eirura ninche, neilepu ninye alotu enetii ninche te nchumata e nkaji, nejoki ninche, “Ayiolo nanu nchere eishoo Olaitoriani intae ena kop, naa ore euriata nikiure intae etijing'a iyiook, naa ore iloomanya ena kop pooki nelepori te dukuya intae. Amu kitoning'oitie iyiook ina naitoyio Olaitoriani nkariak e Naiposha Nanyokie te dukuya intae ina kata pee impang'ung'u aapuku te Misiri, o ina nintaasa lelo aiguanak loo Lamori apa ootii lido kekun le Yordan, o Sihon o Oog, apa lindaikie ninche katukul. Ore ake pee kining ina, nikilepori, nemeetae empijan natelekua te likae lee hoo obo, te nkaraki intae; amu Olaitoriani Enkai inyi ninye ilo ora Enkai te shumata o ti abori te nkop. Ore naa taata, enosakaki olmumai to Laitoriani nchere ore anaa enaitaasa nanu intae te supatisho, naa eikintaasiasa sii intae te supatisho o enkaji e papa nikinchosho nanu olmonekie osipa, nintajeuu pee meye papa o yieyio, o lalashera laainei o nkanashera, o lelo pooki oora ilkulenye, nikordudu enkishui ang aaitung'uaa keeya.” Nejoki lelo tung'ana ninye, “Enkishui ang te rishata e nkishui inyi, te neaku eitu ilikio kuna baa ang, nikitum taa aaitaasa iyie te supatisho o te nkisiligata te neisho iyiook Olaitoriani ena kop.” Neitadoyio ninye ninche te nkeene aimie elusie, amu ore apa enkaji enye naa esuntai e nkanasa apa eshetakino. Nejoki ninye ninche, “Enchom ildoinyo, meinepu ake intae lelo oosujita intae; nisudoriri te ine nkolong'i uni, o metaba anaa neshukunye lelo oosujita intae, nitumutumu taa aashom aaima enkoitoi inyi.” Nejoki lelo tung'ana ninye, “Mikiyieu iyiook nikiaata eleyiata ti alo ele mumai linosie iyiook. Ng'ura, ti nikipuonu akenya aarasaki ena kop, teeniki enkarasha nanyokie ele dirisha liimie iyiook; nisot ti atua enkaji ino papaai lino o yieyioo lino, o lalashera linono o lelo pooki le nkaji e papaai lino. Te neipang oltung'ani boo aim kutuk aji e nkaji ino nelo enkoitoi, ore osarge lenye neaku shumata endukuya enye etii, nimikintoki iyiook aata eleyiata; kake te neiteleikini enkaina aar oltung'ani ake ninye otii te nebo iyie ti atua aji, neaku osarge lenye shumata lukuny ang etii. Kake ti nilikio kuna baa ang, nimikintoki iyiook aata eleyiata ti alo ele mumai linosie iyie iyiook.” Nejo ninye, “Anaa enitejo intae, nchoo etiu neijia.” Neisho ninche meshomo, nepuo ninche, neeniki ninye enkarasha nanyokie oldirisha. Nepuo ninche aajing ildoinyo, netoni te ine nkolong'i uni, o metaba anaa neshukunye lelo apa oosujita ninche; amu eing'orutua apa lelo oosujita ninche; te nkoitoi pooki neitu etum toki. Neitoki lelo tung'ana pokira oare aadou too ldoinyo, nelang olkeju, nepuo enetii Yoshua olayioni le Nuni; neliki ninye nena pooki naatupukokitio ninche. Nejoki ninche Yoshua, “Esipa eishorua Olaitoriani enkop pooki apik inkaik ang; netalepori sii lelo pooki oomanya ina kop te nkaraki iyiook.” Ore tadekenya enasirie nedumunye Yoshua nelo ninye Shitimu, te nebo iltung'ana pooki le Israel; nepuonu Yordan, neirrag ninche ine eton eitu elang. Ore te siadi nkolong'i uni neim ilkituaak atua ilng'oborri pooki neitanap iltung'ana aajo, “Ti nidolidolo intae osanduku lo sotua lo Laitoriani Enkai inyi enapita ilapolosak le Lawi, nipuopuo aaing'uaa iwuejitin inyi aasuj ninye, pee itumutumu aatayiolo enkoitoi niimiimi, amu eitu ae kata iimiimi ena oitoi. Kake enchoo ejing erishata intae o ilo sanduku, erishata naba anaa intemat e nkaina inkalifuni are; emipuonunu intae aanyikaki ninye.” Neitoki Yoshua ajoki iltung'ana, “Entisinya ate; amu ore taisere naa keas Olaitoriani inenking'asia ti atua intae.” Nejoki Yoshua ilapolosak, “Entudumu osanduku lo sotua enchom dukuya iltung'ana.” Nedumu ninche ilo sanduku lo sotua nepuo dukuya iltung'ana. Neitoki Olaitoriani ajoki Yoshua, “Ore ena olong kaang'as nanu ailepie iyie too nkonyek e Israel pooki, pee etum ninche aatayiolo nchere, ore apa anaa enatii nanu te nebo Musa, kaaku sii te nebo iyie. Naa intanapa iyie lelo apolosak oonapita osanduku lo sotua, nchere, ‘Ore pee ipuonunu aabaiki emurt e nkare e Yordan nintasheshe intae aaitirring'a te Yordan.’ ” Nejoki Yoshua iltung'ana le Israel, “Wootu ene, entoning irorei lo Laitoriani Enkai inyi.” Neitoki Yoshua ajo, “Tena intae iyiolouu nchere etii Enkai naishu atua intae, naa nchere meitadiak ninye eitu earaa te dukuya intae Ilkanaani, o Ilhiti, oIlhifi, o Ilperesi, o Ilgilgashi, o Lamori o Ilyebusi. Ng'ura, ore osanduku lo sotua lo Laitoriani le nkop pooki naa kegiroo intae alo Yordan. Ore naa taata ewaita iltung'ana tomon oare too loshon le Israel, to losho ake oltung'ani. Naa ore ake pee eroro ndapi oo nkejek e lelo apolosak oo napita osanduku lo sotua lo Laitoriani le nkop pooki nkariak e Yordan, neitasheyieki nkariak e Yordan meitoki aaruko, ore nena ariak naadou eing'uaa shumata neitashe aarupa to lturrur obo.” Neaku ore ake pee edumunye iltung'ana too lng'oborri lenye ejo pee elang Yordan to nebo lelo apolosak oonapita osanduku lo sotua te dukuya iltung'ana, ore ake pee epuonu lelo oonapita osanduku lo sotua Yordan, nedoiki nkejek e lelo apolosak oonapita osanduku atua enkare (naa kenang'ari apa Yordan aim ingilat te nkata pooki e nkisampuare), ore nkariak naadou eing'uaa shumata neitashe aaku orupati olo enelakua abaiki Adam, ina anasa apa natii embata e Saretani, ore nena ariak naanang'ari aadoyio aapuo enaiposha e Araba, ina Enaiposha e Munyan, nedung'o katukul; nelang iltung'ana aaim enkishaakinoto e Yeriko. Ore apa ina kata eimita Israel pooki enkop natoyio, ore lelo apolosak oonapita osanduku lo sotua lo Laitoriani neitashe te nkop natoyio te mpolos o lkeju le Yordan, o metaba anaa neidip olosho pooki atalang'a Yordan. Ore ake pee eidip olosho pooki atalang'a olkeju le Yordan, nejoki Olaitoriani Yoshua, “Ntayu iltung'ana tomon oare ti atua iltung'ana, ti atua ake olosho oltung'ani obo, nintanap ninche ajoki, ‘Entayu isoito tomon oare tene te mpolos olkeju le Yordan, te ine wueji neitasheyie nkejek oo lapolosak, ninapinapa aaya te nebo intae, nirragiegie ninche te wueji ade nirragirraga kewarie.’ ” Neitoki Yoshua aipotu iltung'ana tomon oare ti atua iltung'ana le Israel, laa ninche etegelua, oltung'ani ake to losho; nejoki Yoshua ninche, “Entogiroi osanduku lo Laitoriani Enkai inyi enchom empolos e Yordan, nidumu ake oltung'ani osoit anap to loililai lino, te risioroto e siana oo loshon le Israel, pee etum ena ataa olmonekie ti atua intae, ore akenya te neikilikuan intae inkera inyi te nkata nalotu aajoki, ‘Kainyoo tipat e kulo soito te intae?’ Nitumutumu taa aatiaki ninche nchere etudung'ote apa nkariak e Yordan te dukuya o sanduku lo sotua lo Laitoriani; ore apa pee elang'u Yordan, nedung'o nkariak e Yordan. Neaku keaku kulo soito too ltung'ana le Israel enkitadamunoto ntarasi.” Neas iltung'ana le Israel anaa enaitanapa Yoshua, nedumu isoito tomon o are te mpolos e Yordan, te risioroto e siana oo loshon loo ltung'ana le Israel, anaa enatiaka Olaitoriani Yoshua; nenap ninche aaya ine wueji apa neshomo aairrag, neirragie ninche te ine. Neirragie Yoshua isoito tomon o are aitobiraki te mpolos e Yordan, te ine wueji apa neitasheyie nkejek e lelo apolosak oonapita osanduku lo sotua; netii ninche ine ebaiki ena olong. Amu ore apa lelo apolosak oonapita osanduku neitasheito te mpolos e Yordan, o metaba anaa neidipayu pooki toki apa naitanapa Olaitoriani Yoshua metiaaki iltung'ana, te risioroto e nena apa pooki naaitanapa Musa Yoshua. Nelang iltung'ana ilo keju te nkisarrisar; ore ake pee eidip iltung'ana pooki aatalang, nelang ilo sanduku lo Laitoriani o lapolosak te dukuya lelo tung'ana. Ore ilayiok le Ruben o layiok le Gad o lpisiai lo losho le Manase nelang etanapate te dukuya iltung'ana le Israel, anaa apa enatiaka Musa ninche; iltung'ana oobaya nkalifuni artam ooterretenate te nkaraki olarrabal ootalang'a te dukuya Olaitoriani aapuo olarrabal, aapuo nkisiajat e Yeriko. Ore apa ina olong neilepie Olaitoriani Yoshua too nkonyek e Israel pooki; neyanyitu ninche ninye anaa apa enayanyit Musa, nkolong'i e nkishui enye pooki. Nejoki Olaitoriani Yoshua, “Ntanapa lelo apolosak oonapita osanduku ilo sanduku le nchakenisho meilepu aapuku te Yordan.” Neitanap taa Yoshua lelo apolosak ejo, “Elepu entupuku te Yordan.” Ore ake pee eilepu lelo apolosak apa oonapita osanduku lo Laitoriani ti atua empolos e Yordan, neroro nkejek e lelo apolosak enkop natoyio, nerrinyokino nkariak e Yordan erishata enye nenang'ari aaim ngilat o lkeju, anaa apake. Neilepu iltung'ana aapuku ti atua Yordan te nkolong e tomon o lapa le dukuya, neitayu ilng'oborri te Gilgal to lpolosie le nkalo e nkilepunoto e nkolong le Yeriko. Ore lelo soito tomon o are apa ooitayutuo ninche ti atua Yordan, neirragie Yoshua apik Gilgal. Nejoki ninye iltung'ana le Israel, “Te neikilikuan akenya nkera inyi iloo papaai lenye te nkata nalotu aajoki, ‘Kainyoo tipat e kulo soito?’ Nitumokiki taa aaitayiolo nkera inyi nchere, ‘Etalang'a apa Israel ele keju le Yordan aaim enkop natoyio.’ Amu eitoyio Olaitoriani Enkai inyi inkariak e Yordan te nkaraki intae o metaba anaa nilang'ilang'a, anaa apa enaikuna Olaitoriani Enkai inyi Enaiposha Nanyokie, apa naitoyio te nkaraki iyiook o metaba anaa nikilang, pee etum iloreren pooki le nkop aatayiolo nchere ore enkaina o Laitoriani naa aimagilani; pee itumutumu aatureita Olaitoriani ntarasi.” Ore ake pee ening ilaiguanak pooki loo Lamori apa ootii lido kekun Yordan enkalo o loo ntoluo, o laiguanak pooki loo Lkanaani apa ootii embata e naiposha, nchere eitoyio Olaitoriani nkariak e Yordan te nkaraki iltung'ana le Israel o metaba anaa nelang'u nelepori ninche, neitu eitokini aata hoo obo oata oltau te ninche, te nkaraki iltung'ana le Israel. Ore apa te ina kata nejoki Olaitoriani Yoshua, “Ntobira nkalema oo soito oogol pee intoki amurat iltung'ana le Israel enkata e are.” Neitayu Yoshua nkalema oo soito, nemurat iltung'ana le Israel te Gibeat-haaralot. Naa te nkaraki ena apa pee etumurata Yoshua ninche: ore apa ilayiok pooki loo ltung'ana ooetuo eing'ua Misiri, iltung'ana pooki lo larrabal, netuata ninche te nkoitoi to lpurkel pee eidip ake aatupuku aatung'uai Misiri. Ore hoo netumurataki apa iltung'ana pooki ooipang'utua aapuonu, kake ore eyia lelo tung'ana pooki apa ootoiuoki te nkoitoi to lpurkel eidipa ninche aatupuku te Misiri neton apa eitu emurati. Amu eshomo apa iltung'ana le Israel ilarin artam to lpurkel, o metaba anaa neishunye olosho pooki, lelo tung'ana lo larrabal apa ooipang'utua aapuku te Misiri, enkaraki neitu apa ening ninche oltoilo lo Laitoriani; ore ti alo ninche neinosa Olaitoriani olmumai nchere meisho ninche metoduaa ina kop nainosakinye Olaitoriani olmumai loo papaai lenye pee eisho iyiook, enkop naruko kule o naishi. Neaku nkera enye apa etudumua ninye te rishata enye, ninche etumurata Yoshua; amu memurata apa, enkaraki neitu apa emurati ninche te nkoitoi. Ore ake pee eidipayu emuratare o losho pooki, netoni ninche ti atua ilng'oborri o metaba anaa neishiu. Nejoki Olaitoriani Yoshua, “Ore ena olong aibeleleng'oyie nanu esulare e Misiri aitung'uaa intae.” Neaku ore enkarna e ine wueji naa keji Gilgal o metabaiki ena olong. Ore eton etii iltung'ana le Israel ilng'oborri te Gilgal nenya ninche Pasaka te nkolong e tomon o ong'uan o lapa teipa too nkisiajat e Yeriko. Ore pee ekenyu te siadi Pasaka, te ina olong, nenya ninche ilng'anayio le ina kop, imukateni neitu eisuijieki o entapa natapejoki. Neishunye mana pee ekenyu ina kata apa enya ilng'anayio le ina kop; neitu eitoki iltung'ana le Israel aatum mana, kake einosa ilng'anayio le nkop e Kanaan te ilo ari. Ore apa etii Yoshua embata e Yeriko, neshumu nkonyek enyena aing'orisho, naa ng'ura, eitashe oltung'ani te mbata ninye eeta olalem lenye oshutuno te nkaina enye; nelo Yoshua enetii ninye nejoki ninye, “Eira iyie ole nkalo ang, aashu oloo lmang'ati lang?” Nejo ninye, “A-a; kake aewuo nanu anaa olarikoni le njore o Laitoriani.” Nebatata Yoshua te nkomom enye o metabaiki enkop, neserem, nejoki ninye, “Kainyoo ejoki Olaitoriani lai osinka lenye?” Ore ilo arikoni le njore o Laitoriani nejoki Yoshua, “Ntayu inamuka inono too nkejek inono; amu ore ine wueji nintasheyie naa eisinyati.” Neas Yoshua ina. Naa keikeno apa Yeriko ti atua o ti oriong te nkaraki iltung'ana le Israel; meetae apa oltung'ani olo boo nemeetae olojing'u. Nejoki Olaitoriani Yoshua, “Toduaa, aishorua nanu apik nkaik inono Yeriko, te nebo olaiguanani lenye o ltung'ana magil lo larrabal. Tamana iyie ina anasa, ore iltung'ana pooki lo larrabal nepuo aaman enkanasa te nkata nabo. Ninkoko neijia too nkolong'i ile. Ore ilapolosak oopishana nenap imouarak naapishana oo lmeregeshi te dukuya ilo sanduku; ore te nkolong e naapishana, nimanimana enkanasa katitin naapishana, ekutita ilapolosak imouarak: Naa ore ake pee eitayu ninche eoshoto naado te nena mouarak oo lmeregeshi, ore ake pee ining'ining'i oltoilo le mouo, nebuaku iltung'ana pooki te mbuakunoto kitok; neurunye esuntai e nkanasa abaiki enkop, nepuo iltung'ana dukuya, oltung'ani ake neiulokino dukuya ninye.” Neipotu Yoshua olayioni le Nuni ilapolosak nejoki ninche, “Ewaita osanduku lo sotua, ninchosho ilapolosak oopishana enap imouarak naapishana oo lmeregeshi te dukuya ilo sanduku lo Laitoriani.” Nejoki ninye iltung'ana, “Enchom dukuya; entaman enkanasa, ninchosho lelo tung'ana oata imasaa o larrabal egiroo aapuo dukuya ilo sanduku lo Laitoriani.” Naa ore apa anaa enaitanapa Yoshua iltung'ana, ore lelo apolosak oopishana oonapita imouarak naapishana oo lmeregeshi te dukuya Olaitoriani nepuo dukuya, eoshito imouarak, esujita ninche ilo sanduku lo sotua lo Laitoriani. Ore lelo tung'ana apa oata imasaa o larrabal nepuo te dukuya lelo apolosak ooshito imouarak ore lelo ootii siadi nesuju ilo sanduku, eoshito imouarak. Kake eitanapa apa Yoshua iltung'ana ajoki, “Mibuakuku ake aashu inchosho oltoilo linyi ening'oyu, nemepuku hoo ororei obo aimu inkutukie inyi, o metabau ina olong najokinye intae entabuaku.” Neisho ninye ilo sanduku lo Laitoriani meitamani enkanasa, neman ninye nabo kata; nepuonu ninche ilng'oborri lenye, neirrag ninche ina kewarie ilng'oborri. Nedumunye Yoshua tadekenya enasirie, nedumu ilapolosak osanduku lo Laitoriani. Ore lelo apolosak apa oonapita nena mouarak naapishana oo lmeregeshi te dukuya ilo sanduku lo Laitoriani neituruk, eoshito mouarak aaigil; ore lelo tung'ana apa oata imasaa o larrabal nepuo tedukuya ninche, ore apa lelo ootii siadi nesuju osanduku lo Laitoriani, ina kata eoshitoi imouarak aaigil. Ore te nkolong e are neman ninche enkanasa kata nabo, neshukunye aapuonu ilng'oborri. Neiko ninche neijia too nkolong'i ile. Ore te nkolong e naapishana nedumunye ninche enasirie, neman enkanasa anaa oshiake katitin naapishana: naa ina olong ake apa etamana ninche enkanasa katitin naapishana. Ore te nkata e naapishana, eidipa ilapolosak aatoosh imouarak, nejoki Yoshua iltung'ana, “Entabuaku; amu eishoo intae Olaitoriani ena anasa. Ore ena anasa o pooki natii atua ninye neidaikieki tukul te nkaraki Olaitoriani; Rahabu ina mulayoi ake o lelo pooki ootii te nebo ninye ti atua enkaji enye naapok, enkaraki apa naisudoyie ninye lelo aikitalak likirriwaitie. Kake ore intae, entalama ate nena tokitin naaiteng'elakaki enkidaaroto, pee meaku ake ore inteng'ela intae ninche niyaya nabo e nena tokitin naaiteng'elaki nintaa ilng'oborri le Israel entoki e nkidaaroto, niyauu enyamali shumata ninye. Kake ore enkosholai pooki o sahabu, o masaa o suyai o esekenkei, naa eisinyat to Laitoriani keyae ninche atua olchumati lo Laitoriani.” Nebuaku iltung'ana neoshi imouarak. Erisio ake etoning'o iltung'ana oltoilo le mouo, neilepie iltung'ana embuakunoto kitok, neurori esuntai abaiki enkop, nejing iltung'ana atua ina anasa, neitoriokino ake oltung'ani dukuya enye, neya ninche ina anasa. Neitoki ninche aaidaikie tukul pooki natii atua ina anasa, ilewa o nkituaak, ilooti o lbotoro, o lmong'i o nkerra o sirkon te nepi o lalem. Nejoki Yoshua lelo tung'ana oare apa ooikitalana ina kop, “Enchom atua enkaji e ina mulayoi, nimpang'unyenye ti atua ninye ina kitok, o lelo pooki oora ilkulenye, anaa apa eninosakitia ninye olmumai.” Neaku ore lelo barnot apa oora ilaikitalak nepuo atua aji, neipang'unye Rahabu, o papaai lenye, o ng'otonye o lalashera o pooki oora ilkulenye; neyau ninche olmarei lenye pooki, nepik ninche auluo ilng'oborri le Israel. Nepejoo ninche ina anasa te nkima o pooki naatii atua ninche; enkosholai ake o sahabu, o masaa o suyai o nesekenkei, etipika ninche atua olchumati le nkaji o Laitoriani. Kake ore Rahabu ina mulayoi, o enkaji e papaai lenye o pooki oora ilkulenye, eitajeuo Yoshua metopua; neton ninye ti atua Israel o metabaiki ena olong, enkaraki apa natunuka ilaikitalak ooirriua Yoshua meikitalana Yeriko. Neirragakinye Yoshua ninche olmumai te ina kata, ejo “Ediaa te dukuya Olaitoriani ilo tung'ani odumunye neigil ashet ena anasa e Yeriko; te nkinyang'a o lkikau lenye epik ninye olkitamanyunoto lenye, naa te nkinyang'a o ldung'oret lenye epik ninye nchomito enyena.” Neaku etii apa Olaitoriani tenebo Yoshua; ore olning'o lenye neibulu enkop pooki. Kake etigila apa iltung'ana le Israel enkirukoto ti alo nena tokitin apa naaitengelaki; amu ore Akan olayioni le Karmi, olayioni le Sabdi, olayioni le Sera lo losho le Yuda, eewa embata e nena tokitin apa naaiteng'elaki; neyupuyup engoro o Laitoriani te nkaraki iltung'ana le Israel. Neirriwaa Yoshua iltung'ana te Yeriko meshomo enkang e Ai, apa nataaniki Bet-afen, enkalo e nkilepunoto e nkolong e Betel, nejoki ninche, “Elepa enchom enkitalana enkop.” Neilep iltung'ana aapuo aaikitalan Ai. Neshukunye ninche enetii Yoshua, nejoki ninye, “Mincho iltung'ana pooki eilep aapuo, kake nchoo iltung'ana oobaya nkalifuni are aashu nkalifuni uni eilep aapuo, aaibung Ai; mincho iltung'ana pooki epuo aanauru te ine amu ei kuti ninche.” Neaku iltung'ana oobaya nkalifuni uni ake ooilepa aapuo ti atua iltung'ana le Israel; nepuo aaisik te dukuya iltung'ana le Ai, nesesekuan iltung'ana le Ai iltung'ana oobaya tomoni uni o ile lenye, nemiraa ninche te kishomi o meitabaiki Shebarim, nesesekuan ninche to loshong'ishong'i nelepori iltauja loo ltung'ana netiu anaa enkare. Nepolos Yoshua nkilani enyena nebatatakino enkop te nkomom enye te dukuya ilo sanduku ometaba anaa neaku teipa, ninye te nebo ilpayiani le Israel; nepik enterit ilukuny enye. Nejo Yoshua, “Ee, Olaitoriani Enkai, kainyoo apa pee intasima aitalang'u kulo tung'ana Yordan, pee ilotu aishooyo iyiook apik atua nkaik oo Lamori, pee eidaikie iyiook? Enaikash apa ti nikitobiko te lido kekun le Yordan! Olaitoriani, kaa nanu eton ajo eibelekenyate Israel aaisho oriong ilmang'ati lenye! Amu ore Ilkanaani o lelo pooki oomanya ena kop naa keyooki aaning ena, nemuat iyiook aaman nedung'oo enkarna ang aaiwuang'ie te nkop; naa kaa iyie ias te nkaraki enkarna ino kitok?” Nejoki Olaitoriani Yoshua, “Tudumunye, kainyoo iyie pee itabatate aiko nji te nkomom ino? Etaasa Israel eng'oki; etigila ninche olning'o lai apa laitanapa nanu ninche, ewaita ninche embata oo ntokitin apa naaiteng'elaki, etupurrishote ninche nelejisho, nepik ninche atua imasaa enye. Neaku meidim iltung'ana le Israel aaitasheiki ilmang'ati lenye, eibelekenyate ninche aaisho oriong ilmang'ati lenye, enkaraki nataa ninche entoki e nkidaata. Maitoki ae kata nanu aaku te nebo iyie, aashu ake ti nindaikie nena tokitin apa naaiteng'elaki aitung'uaa atua intae. Tudumunye, ntisinya iltung'ana, nijoki, Entisinya ate te nkaraki taisere, amu nji ejo Olaitoriani, Enkai e Israel, Ntokitin apa naaiteng'elaki kuna naatii atua intae, Israel; mindim iyie aitasho te dukuya ilmang'ati, linono, o metaba anaa nintayu nena tokitin apa naaiteng'elaki aiwuang'ie ti atua iyie. Ore naa tadekenya keyauni intae aaitinyiku anaa too loshon linyi; ore ilo osho oya Olaitoriani nelotu anyiku anaa too lmareita; ore ilo marei oya Olaitoriani neyauni aaitinyiku anaa too nkajijik; ore ina aji naya Olaitoriani nelotu anyiku oltung'ani ake oltung'ani. Naa ore ilo oyai eeta nena tokitin apa naaiteng'elaki nepejori te nkima, ninye o ntokitin pooki naata ninye, enkaraki natigila ninye olning'o lo Laitoriani, o enkaraki nataasa ninye embae e sulare ti atua Israel. ” Neaku etudumunye apa Yoshua tadekenya enasirie, neyau Israel aitinyiku olosho o losho, neyae olosho le Yuda; neyau ninye aitinyiku ilmareita le Yuda, neyae olmarei loo Lsera; neyau ninye aitinyiku to lmarei loo Lsera oltung'ani o ltung'ani; neyae Sabdi; neyau ninye aitinyiku enkaji enye oltung'ani ake oltung'ani, neyae Akan, olayioni le Karmi, olayioni le Sabdi, olayioni le Sera lo losho le Yuda. Neitoki Yoshua ajoki Akan, “Enkerai ai, nchoo enkitoo Olaitoriani Enkai e Israel, nincho ninye enkisisa; naa tolikioki taata nanu enitaasa iyie; mikisudoriyie nanu.” Newaliki Akan Yoshua ajoki, “Esipa ataasa nanu eng'oki to Laitoriani Enkai e Israel, naa ena nanu ataasa: Ore ake pee adol ti atua nena naatarayioki olkila sidai oing'uaa Shinari o shekeli iip are e nkosholai o lbelati le sahabu oata shekeli onom te nkiroishi, nang'uar nanu ninche, naya ninche; naa ng'ura, enukaro ninche ti atua enkop ti atua olng'obor lai, etii enkosholai ti abori.” Neirriwaa Yoshua iltung'ana, neipirri ninche aapuo olng'obor; naa ng'ura, keturoro apa ti atua olng'obor lenye etii enkosholai abori. Neitayu ninche ti atua olng'obor neyau ninche enetii Yoshua o ltung'ana pooki le Israel; neirragie ninche te dukuya Olaitoriani. Ore Yoshua o Siraeli pooki ootii te nebo ninye neya Akan olayioni le Sera, o enkosholai, o lkila o ilo belati le sahabu, o layiok lenyena o ntoyie enyena, o lmong'i lenyena o sirkon lenyena o nkerra, o lng'obor lenye o pooki toki apa naata ninye; neyauni ninche oerata le Akori. Nejoki Yoshua, “Kainyoo iyie pee iyaka iyiook enyamali? Eikiyaki iyie Olaitoriani enyamali taata.” Nenang Israel pooki ninye too soito; nepejori ninche te nkima, nenang ninche too soito. Nesot ninche te shumata ninye enkurare kitok too soito leton etii o metabaiki ena olong neibelekenya taa Olaitoriani te ina goro enye nayupuyup. Neaku ore ebaiki ena olong ore enkarna e ine wueji naa keji oerata le Akori. Nejoki Olaitoriani Yoshua, “Miureishoyu niming'aing'ai; iwa lelo tung'ana pooki lo larrabal te nebo iyie, naa tudumunye, ilepa shomo Ai; toduaa ajo aishorua nanu apik atua enkaina ino olaiguanani le Ai, o ltung'ana lenyena, enkanasa enye o enkop enye. Naa intaasiasa intae Ai o laiguanani lenye anaa apa enintaasa Yeriko o laiguanani lenye; kake ewaita ntokitin enyena o nkishu entarai; entipik olnukata empirakinye enkanasa ti oriong.” Nedumunye Yoshua te nebo ltung'ana pooki lo larrabal, pee eilep aapuo Ai, negelu Yoshua iltung'ana nkalifuni tomoni uni magil oodupa, neirriwaa ninche kewarie. Neitanap ninye ninche ajoki, “Ng'ura, irragirraga intae aanuka aaishiaakinore enkanasa, aaimu ninye ti oriong; emipuopuo intae aalamari oleng te ina anasa, kake enterretenata pee irasakiki. Ore nanu, o ltung'ana pooki ootii te nebo nanu, nikipuo aanyikaki ina anasa. Naa ore te neipang'u ninche aapuonu aarare iyiook, anaa apa, nikimpirri aailanyisho te dukuya ninche; naa keipang'u ninche aapuonu aamir iyiook, o metaba anaa nikiya ninche enelakua te ina anasa; amu kejo ninche, ‘Eisika aailany iyiook, anaa apa.’ Neaku eikisik iyiook aailany ninche; nitumokiki taa aatudumunye aatupuku te ilo nukata nimbung'ubung'u ina anasa; amu keisho intae Olaitoriani Enkai inyi apik atua enkaina inyi. Naa ore te nindipidipi aawaita ina anasa, nipikipiki intae ina anasa enkima, niasiasa anaa enaitanapishe Olaitoriani; entodol nchere aitanapa nanu intae.” Neaku eirriwayie apa ninche Yoshua; nepuo ninche ewueji o lnukata, neirrag te rishata e Betel o Ai, enkalo e ndoyoroto e Ai; kake etotona apa Yoshua ina kewarie te nebo iltung'ana. Nedumunye Yoshua tadekenya enasirie neiturrur iltung'ana, neilep alo te nebo ilpayiani le Israel neituruk te dukuya iltung'ana alo Ai. Ore lelo tung'ana pooki apa lo larrabal ootii te nebo ninye neilep aapuo nenyikaa aataaniki ina anasa; nepik ilng'oborri enkalo e moikuape e Ai. Neya ninye arik iltung'ana oobaya nkalifuni imiet, nepik ninche atua olnukata te rishata e Betel o Ai, te nkalo o loo ntoluo le nkanasa. Neitobiraki ninche iltimito, etii oltim kitok enkalo e moikuape e ina anasa netii oriong enye enkalo o loo ntoluo e nkanasa. Kake eirraga apa Yoshua ina kewarie atua oerata. Ore ake pee edol olaiguanani le Ai ena, ninye o ltung'ana lenyena pooki, lelo tung'ana le ina anasa, neisarrisar neipang aapuo tadekenya aaishong'ishong, aaipirri enkalo e Araba pee enang'are Israel aarare; kake eitu apa eyiolou nchere etii olnukata oarare ninye otii oriong ina anasa. Ore Yoshua o Israel pooki neitaakuno ketaraki te dukuya ninche, neisik aapuo enkalo e ong'ata. Neaku ore iltung'ana pooki apa ootii atua enkanasa neipotuni te nebo pee esujaa ninche, naa ore esujita ninche Yoshua nerikori aaitalam ina anasa. Metii apa oltung'ani hoo obo otung'uayioki te Ai arashu te Betel, leitu eipang alo asujaa Israel; neing'uaa ninche enkanasa ebolo, nesujaa Israel. Nejoki Olaitoriani Yoshua, “Ntorioi ina pere natii enkaina ino ing'orie Ai, amu kaaisho nanu iyie apik atua enkaina ino.” Neitorioo Yoshua ina pere apa natii enkaina enye aing'orie ina anasa. Ore lelo apa ootii olnukata nedumunye nabo kata aapuku te ine wueji apa nenukare, nerisio ake eitorioyie ninye enkaina enye, nekuet ninche nejing atua ina anasa neya ninye; neisarrisar aapik atua ina anasa enkima. Neaku ore pee eing'or lelo tung'ana apa le Ai siadi, ng'ura, neilep empuruo e ina anasa alo shumata; nemeekure eeta engolon naisikakinye ena shoto aashu idia, amu ore lelo tung'ana apa ooisikakitia ong'ata neibelekenyakinote lelo apa oosujita. Ore ake pee edol Yoshua o Israel pooki nchere eibung'a lelo apa ootii olnukata enkanasa, neilepa empuruo e ina anasa alo shumata, neibelekenyunye aar metuata lelo tung'ana le Ai. Neipang'u ilkulikae ooing'uaa enkanasa aapuonu aarare ninche; nejing empolos e Israel, etii ilkulikae ena shoto netii ilkulikae idia shoto; nesesekuan Israel ninche, o metaba anaa neaku metii hoo obo otelekua aashu otuluayie. Kake ore olaiguanani le Ai neya ninche eishu, neyau ninye enetii Yoshua. Ore ake pee eidip Israel atara metuata lelo pooki apa oomanya Ai ti atua ina ong'ata naisiaja apa natusujakitia ninche ore ninche pooki o metabaiki olobayie lenye netabatatate te nepi o lalem, neshukunye Israel pooki aapuonu Ai neosh ninche te nepi o lalem. Ore lelo pooki apa ootabatatate ina olong, ilewa o nkituaak naa nkalifuni tomon o are, iltung'ana pooki le Ai. Amu eitu apa eshuk Yoshua enkaina enye, naa ninye apa eitorioriyie ina pere, o metaba anaa neidaikie tukul lelo pooki apa oomanya Ai. Nkishu ake o masaa e ina anasa apa ewaita Israel aaitaa ntokitin naataraitie, te risioroto e ilo rorei lo Laitoriani apa oitanapa Yoshua. Neaku etapejoyie Yoshua Ai, neitaa ninye intarasi osototi le nkidaata, anaa enatiu ena olong. Neilili ninye ilo aiguanani le Ai to lchani o metaa teipa; ore pee eaku kedoyio enkolong neitanapisho Yoshua, neitayu ninche aaitadou osesen lenye to lchani nenang'aki enejing'ieki kishomi e ina anasa nepik shumata ninye osototi kitok loo soito, leton eitashe te ine o taata. Neitoki Yoshua ashet olperere lo lasar to ldoinyo le Ebal, ashetaki Olaitoriani, Enkai e Israel, anaa apa enaitanapa Musa ilo sinka lo Laitoriani iltung'ana le Israel, anaa enaigero ti atua embuku oo nkitanapat e Musa, “Olperere lo lasar loo soito lemegueta, leitu ae kata eiteleiki oltung'ani enguetet e sekenkei;” neishooyo ninche te nchumata enye ilasarri oopejori aaisho Olaitoriani, nepolos ilasarri le seriani. Ore te ine, etii iltung'ana le Israel, neiger te nchumata oo soito enkigilata e nkitanapata e Musa, apa naigero ninye. Ore Israel pooki, oldokunoti o inoti, te nebo ilpayiani lenye o lkituaak o larishak lenye, neitashe too nkipirakinot e ilo sanduku te dukuya lapolosak le Lawi apa oonap ilo sanduku lo lning'o lo Laitoriani, etii olpisiai lenye dukuya oldoinyo le Geresim netii olpisiai lenye dukuya oldoinyo le Ebal, anaa apa enaitanapishe Musa ilo sinka lo Laitoriani te dukuya, nchere pee emayian ninche iltung'ana le Israel. Ore te siadi nena neisuma ninye irorei pooki le nkitanapata, emayianata o ldeket, te risioroto e nena pooki naaigeroki ti atua embuku oo nkitanapat. Meetae apa ororei hoo obo le nena pooki apa naaitanapishe Musa neitu eisuma Yoshua te dukuya ina umata pooki e Israel, o nkituaak o nkera kutiti, o ldokunot apa ootii atua ninche. Ore ake pee ening ilaiguanak pooki apa ootii lido kekun Yordan ina kop oo ldoinyo o ina kop nagum ilo omanaa pooki le naiposha kitok te nkalo e Lebanon, o Lhiti, o Lamori, o Lkanaani, o Lperisi, neiturrurro ninche te nebo pee earare Yoshua o Israel. Kake ore ake pee ening lelo apa oomanya Gibeon ina apa naitaasa Yoshua Yeriko o Ai, ore ninche te nkalo enye neas enkeleekisho neitobir ninche ndaiki, neyau ilkuniyiani ootopolosate nepik nkoriong'i oo sirkon lenye, o lbenia le naisho, oopolosa nepololo nerami, o namuka naatumutate too nkejek enye, o nkilani naapolosa; ore endaa enye pooki netoyio nebaa. Nepuo ninche enetii Yoshua too lng'oborri te Gilgal, nejoki ninye o ltung'ana le Israel, “Kietuo iyiook king'ua enkop nalakua; neaku ntobira taata iyie olning'o o iyiook.” Kake etiakitia iltung'ana le Israel lelo Hafi, “Ebaiki naa atua iyiook intae itii; kaji naa kinko iyiook ti nikintobir olning'o o intae?” Nejoki ninche Yoshua, “Eikira iyiook isinkan linono.” Nejoki Yoshua ninche, “Eirara intae akua? Naa kaji intae ing'uaa?” Nejoki ninche ninye, “Enkop nalakua eing'uaa isinkan linono te nkaraki enkarna o Laitoriani Enkai ino; amu kitoning'o iyiook ilomon lenyena, o nena pooki naataasa ninye te Misiri, o nena pooki naaitaasa ninye ilaiguanak loo Lamori apa otii lido kekun Yordan, Sihon ilo aiguanani le Heshbon, o Oog olaiguanani le Bashan ilo apa omanya Ashtarot. Ore ilpayiani lang o lelo pooki oomanya enkop ang netiakitia iyiook, Ewaita endaa too nkaik inyi te lototo, nipuopuo aanang'are ninche, nijokiki ninche, Kira iyiook isinkan linyi; wootu naa taata, entobira olning'o te nebo iyiook. Nena emukate ang; eton apa eirowua ina kata pee kintayu too nkajijik ang aaitaa endaa te nkoitoi ina olong apa nikitudumunye aapuonu enitii intae; kake ore taata, ng'ura, etoyio netabee, ore kulo benia le naisho naa aing'ejuko apa pee kimput iyiook ninche, naa ng'ura, etadanyate; ore kulo kilani o namuka ang netumutate tena lototo naado.” Neaku etang'amutua apa nena daiki enye, neitu eikilikuanu eutaroto to Laitoriani. Neitayu Yoshua eseriani te nebo ninche, neitayu olning'o te nebo ninche, pee eisho ninche epok; ore lelo kituaak apa lo lturrur neinosaki ninche olmumai. Ore te siadi nkolong'i uni eidipa ninche aaitobira olning'o te nebo ninche, nening ninche nchere ilelatia enye ninche, naa atua ninche oshi ake etii. Nedumunye iltung'ana le Israel aapuo nebaya nkanas enye te nkolong e uni. Ore apa nkanas enye naa Gibeon, Chefira, Be-erot, o Kiriat-yearim. Kake eitu ear iltung'ana le Israel ninche metuata, amu ore apa ilkituaak lo lturrur neinosa olmumai to Laitoriani, Enkai e Israel. Neing'unyung'uny olturrur pooki te nkaraki lelo arikok. Kake etiakitia lelo arikok pooki olturrur, “Kinosakitia iyiook ninche olmumai to Laitoriani, Enkai e Israel, ore taata mikindim iyiook aaiseyie ninche. Ena iyiook maitaasa ninche, nikincho ninche epok, mejing ake engoro shumata iyiook, te nkaraki ilo mumai apa likinosakitia ninche.” Nejoki lelo kituaak ninche, “Enchoo ninche epok.” Neaku ninche ilaiperrak loo lkeek neoku enkare te nkaraki olturrur pooki, anaa enatiakitia lelo kituaak ninche. Neipotu Yoshua ninche, nejoki ninye ninche, “Kainyoo intae pee iteleja iyiook, aajo, ‘Eikilakuaniki iyiook intae oleng;’ aa atua iyiook ake itii? Ore naa taata iakuku intae iloodiaa, ore ilkulikae te intae naa keaku irrindiki anaake, ilaiperrak loo lkeek o laokunok le nkare te nkaraki enkaji e Nkai ai.” Newaliki ninche Yoshua aajo, “Ore enkaraki natolikioki apa isinkan linono aaitisipaki nchere eitanapa Olaitoriani Enkai ino osinka lenye Musa pee eisho intae ena kop pooki, pee indaikiekie lelo pooki oomanya ena kop aaiwuang'ie te dukuya intae; neaku kitureishote iyiook oleng te nkaraki enkishui ang te dukuya intae; nikiaas ena bae. Naa ore taata, ng'ura, kitii iyiook atua enkaina ino: taasa anaa enidol ajo sidai neishaakino too nkonyek inono ti nintaas iyiook.” Neaku eitaasa ninye ninche, nekordu ninche aitayu ti atua enkaina oo ltung'ana le Israel; neitu ninche ear ninche metuata. Kake eitaa apa Yoshua ninche ina olong ilaiperrak o laokunok le nkare te nkaraki ilo turrur o te nkaraki olperere lo lasar lo Laitoriani, pee emooki ninche aas ina o metabaiki ena olong, te ine wueji netegelua ninye. Ore apa pee ening Adoni-sedek olaiguanani le Yerusalem eneikuna Yoshua pee eibung Ai, neidaikie ninye katukul, aitaas Ai o laiguanani lenye anaa apa enaitaasa Yeriko o laiguanani lenye, o ina naitobira lelo oomanya Gibeon eseriani o Israel netii atua ninche. Neureishoyu ninye oleng, amu enkanasa kitok apa Gibeon, anaa ake duoo ae anasa e nkitoo, o enkaraki naa eikitok apa alang Ai naa magil iltung'ana lenyena pooki. Ore enkaraki ina neirriwaki Adoni-sedek olaiguanani le Yerusalem Hoham olkilikuai ilo aiguanani le Hebron, o Piram olaiguanani le Yarmut, o Yafia olaiguanani le lakish, neirriwaki sii Debir olaiguanani le Eglon, ejoki, “Wootu enatii nanu, entaretuoki nanu, emataar iyiook Gibeon; amu eitobira ninye eseriani o Yoshua o te nebo iltung'ana le Israel.” Ore lelo aiguanak pokira imiet loo Lamori, o ilo aiguanani le Yerusalem, o ilo aiguanani le Hebron, o ilo aiguanani le Yarmut, o ilo aiguanani le Lakish, o laiguanani le Eglon neiturrur iltimito lenye, nepuo ninche te nebo njorin enye pooki neitayu ninche ilng'oborri aaipirakinore Gibeon, neitayunye ninye olarrabal. Neirriwaki lelo tung'ana le Gibeon Yoshua olkilikuai too lng'oborri te Gilgal, ejo, “Miyeng'iyeng'ie iyie enkaina te nkaraki isinkan linono; tasieku wou enikitii, pee intajeu iyiook, niretu iyiook, amu ore kulo aiguanak pooki loo Lamori oomanya enkop oo ldoinyo neiturrurrote te nkaraki iyiook.” Neaku eilepa apa Yoshua te Gilgal, ninye o ltung'ana pooki lo larrabal te nebo ninye, o ltung'ana pooki magil oodupa. Nejoki Olaitoriani Yoshua, “Miureyu ninche, amu aishooyie nanu ninche apik atua nkaik inono; meitashe hoo oltung'ani lenye te dukuya intae.” Neaku eewuo apa Yoshua enetii ninche aipang'aki te luamata, eewuo apa enkewarie pooki eing'uaa Gilgal. Nepik ninche Olaitoriani olkirutoto te dukuya Israel, laa ninche ootasesekuana ninche te sesekuanata kitok te Gibeon, nemiraa ninche aaimie enkoitoi nashong'ishong e Bet-horon near ninche metuata o metabaiki Aseka o Makeda. Naa ore eisikita ninche te dukuya Israel, epuoito ninche aadoyio to loshong'ishong'i le Bet-horon, nenang'u Olaitoriani aitadou isoito sapuki aitung'uaa shumata aitadoiki ninche ebaiki Aseka, neye ninche; ilkumok apa ootuata te nkaraki isoito le nchan aalang iltung'ana ootara Israel to lalem. Neitoki Yoshua airorie Olaitoriani te ina olong apa naishooyie Olaitoriani Ilamori aisho iltung'ana le Israel; nejo ninye too nkonyek e Israel, “Na olong, ntasho iyie ntirring'ayu te Gibeon, naa ore sii iyie Lo apa intasho to erata le Ajalon.” Neitashe enkolong aitirring'a, neuno olapa, o metaba anaa neitalaku ilo osho elap too lmang'ati lenye. Aimeigero ena ti atua embuku e Yashar? Eitasho enkolong te mpolos e shumata, neitu eitasim adoyio te ndama pooki. Eitu ae kata etumi enkolong naaijo ena too nkolong'i naatulusoitie o too naatusujutua, eji nening Enkai oltoilo lo ltung'ani; amu etijing'a apa Olaitoriani olarrabal te nkaraki Israel. Neitoki Yoshua ashukunye o Israel pooki te nebo ninye aapuonu ilng'oborri te Gilgal. Neisik apa kulo aiguanak pokira imiet, neisudoo ate ti atua enkapune te Makeda. Netolikioki apa Yoshua, “Ore lelo aiguanak pokira imiet nenotoki eisudori ti atua enkapune te Makeda.” Nejo Yoshua, “Emperiperaki isoito sapuki enkutuk e ina apune, nipikipiki iltung'ana embata enye pee errip ninche; kake emitonini intae te ine, entusujai ilmang'ati linyi, entadoiki ilo kidong'oe lenye, emincho ninche metijing'a nkanas enye; amu eishorua Olaitoriani Enkai inyi apik atua enkaina inyi.” Ore ake pee eidip Yoshua o ltung'ana le Israel aatasesekuan ninche te sesekuanata kitok, o metaba anaa nejutuni ninche, ore ake ilo pisiai, arashu ore ake ilo pisiai lenye otelekua pee ejing atua nena ang'itie naagol naasheta sunta, neshukunye iltung'ana pooki eserian aapuonu enetii Yoshua too lng'oborri te Makeda; nemetii ninye oltung'ani hoo obo otabolo enkutuk te ntorroni ti alo likae tung'ani ninye obo le Israel. Neitoki Yoshua ajo, “Entabol enkutuk e nkapune nimpang'unyenye lelo aiguanak pokira imiet te nkapune aayau enatii nanu.” Neiko ninche neijia, neyau lelo aiguanak pokira imiet aaitayu te nkapune aayaki ninye, olaiguanani le Yerusalem, o laiguanani le Hebron, o laiguanani le Yarmit, o laiguanani le Lakish, o laiguanani le Eglon. Ore ake pee eipang'unye ninche lelo aiguanak aayau enetii Yoshua, neipotu Yoshua iltung'ana pooki le Israel, nejoki lelo kituaak apa loo ltung'ana le njore ooshomo te nebo ninye, “Wootu entinyiku, entipik nkejek inyi enchumata oo murto e kulo aiguanak.” Nepuonu ninche aanyiku nepik nkejek enye nchumat oomurto e lelo aiguanak aaroro. Nejoki Yoshua ninche, “Emiureishoyu niming'aing'ayiayia; entagoluoto nipijuju; amu nji eiko Olaitoriani ilmang'ati linyi pooki laa ninche iararere.” Ore te siadi near Yoshua ninche metuata, neilili ninche too lkeek imiet. Neililio ninche te lelo keek o metaa teipa; kake ore te ndoyioroto e nkolong, neitanapisho Yoshua, neitayuni ninche aaitadou too lkeek, nenang'akini ninche atua ina apune apa naisudorie ate, nepik isoito sapuki enkutuk e ina apune, leton etii o metabaiki ena olong. Neya apa Yoshua Makeda ina olong, near ninye olaiguanani lenye te nepi o lalem; neidaikie ninye tukul pooki tung'ani otii atua, eitu ninye eleku oltung'ani; neitaas ilo aiguanani le Makeda anaa apa enaitaasa olaiguanani le Yeriko. Neitoki Yoshua alo agiroo Makeda, o Israel pooki te nebo ninye, nelo Libna, nearare Libna; neitoki sii Olaitoriani aishooyo ninye o laiguanani lenye apik atua enkaina e Israel; near Yoshua ninye te nepi o lalem, o pooki tung'ani otii atua ninye; eitu ninye eleku oltung'ani obo ti atua ninye eishu; neitaas olaiguanani lenye anaa apa enaitaasa olaiguanani le Yeriko. Nelo Yoshua agiroo Libna, o Israel pooki te nebo ninye, nelo Lakish, nemuat aaman ninye, neibung ninye: neishooyo Olaitoriani Lakish apik atua enkaina e Israel, neya ninye te nkolong e are, near ninye te nepi o lalem, o pooki tung'ani otii atua ninye, anaa apa enaitaasa ninye Libna. Neitoki Horam olaiguanani le Geser alotu aretu Lakish; near Yoshua ninye o ltung'ana lenyena, o metaba anaa neing'uaa ninye meishu hoo oltung'ani obo. Neitoki Yoshua te nebo Israel pooki aagiroo Lakish nepuo Eglon; neng'adu ninche ninye, neibung ninye; neya ninche ninye ina olong, near ninye te nepi o lalem; ore pooki tung'ani otii atua ninye neidaikie tukul ina olong, anaa apa enaitaasa Lakish. Neitoki Yoshua te nebo Israel pooki aagiroo Eglon nepuo Hebron; neibung ninche ninye, neya ninye, near ninye te nepi o lalem, olaiguanani lenye o nkang'itie enyena, o pooki tung'ani otii atua; eitu ninye eleku oltung'ani hoo obo oishu anaa apa enaitaasa Eglon, neidaikie ninye tukul te nebo pooki tung'ani otii atua ninye. Neitoki Yoshua, te nebo Israel pooki, aashukunye aapuonu Debir neibung ninye, neya ninye te nebo olaiguanani lenye o nkang'itie enyena pooki; near ninche te nepi o lalem, neidaikie tukul pooki tung'ani otii atua ninye, eitu ninye eleku oltung'ani obo eishu; ore anaa apa enataasa te Hebron o te Libna o laiguanani lenye neijia sii eikuna Debir o laiguanani lenye. Neaku eisula apa Yoshua enkop pooki, ina kop oo ldoinyo e Negeb, o ina kop nagum o neeshong'ishong, o laiguanak lenye pooki; eitu ninye eleku hoo oltung'ani oishu, kake eidaikie tukul pooki ng'ae oishu, anaa apa enaitanapishe Olaitoriani Enkai e Israel. Nemir apa Yoshua ninche ebaiki Kadesh-Barnea o metabaiki Gasa, o enkop pooki e Goshen ebaiki Gibeon. Neya apa Yoshua kulo aiguanak pooki o nkuapi enye te nkata nabo, amu etijing'a Olaitoriani Enkai e Israel olarrabal te nkaraki Israel. Neshukunye taa Yoshua, o Israel pooki te nebo ninye, aapuonu ilng'oborri te Gilgal. Ore ake pee ening Yabin olaiguanani le Hasor ena, neirriwaki olkilikuai Yobab olaiguanani le Madon, o laiguanani le Shimron, o laiguanani le Akshaf; o laiguanak apa ootii moikuape ina kop oo ldoinyo o atua Araba kopikop e Kineret, o atua ina kop nagum, o atua Nafat-dor te nkalo o loontoluo, Ilkanaani te nkalo o loo saen o to loontoluo, o Lamori, o Lhiti, o Lperisi, o Lyebusi, ti atua ina kop oo ldoinyo, o Lhifi ti abori Hermon ti atua enkop e Mispa. Neipang'u ninche aapuonu, te nebo iltimito lenye pooki, olorora kitok, eba esiana enye anaa osinyai le mbata e naiposha, neeta mbartan kumok oleng o ngarrin oo mbartan. Ore apa kulo aiguanak pooki neitutum njorin enye, nepuonu aaitayu ilng'oborri te nebo too nkariak e Merom, pee earare Israel. Nejoki Olaitoriani Yoshua, “Miureyu iyie ninche, amu ore taisere tena saa naa kaishoru nanu ninche pooki, etuata tesesekuana, aisho Israel, nidung'udung'u irrisheta mbartan enye, nipejoo ngarrin enye oo mbartan te nkima.” Neaku eewuo apa Yoshua aipang'aki ninche nabo kata te nebo iltung'ana lenyena pooki lo larrabal, te mbata oo nkariak e Merom, nedoiki ninche. Neishooyo Olaitoriani ninche apik atua enkaina e Israel, apa ootara ninche nemiraa ninche eneba anaa Sidon kitok o Mirsefot-maim, o enkalo o loo saen eneba anaa o erata le Mispe; nesesekuan ninche, o metaba anaa neing'ua ninche eitu ninye eleku oltung'ani oishu. Neitaas Yoshua ninche anaa enaitanapa Olaitoriani ninye; etudung'o rrisheta mbartan enye, nepejoo ngarrin enye oo mbartan te nkima. Neibelekenya apa Yoshua te ina kata, neya Hasor, nesesekuan olaiguanani lenye to lalem; amu ore Hasor li apa naa ninye endukuya e nena kitoriat pooki. Nepik ninche olalem lelo pooki apa ootii atua ninye, aaidaikie ninche tukul; eitu ninye eing'uari obo leton eiresa, nepejoo ninye Hasor te nkima. Ore apa nkanas pooki e lelo aiguanak, o laiguanak lenye pooki, neya Yoshua ninche near ninche te nepi o lalem, aidaikie ninche tukul, anaa apa enaitanapishe Musa osinka lo Laitoriani. Kake meetae apa enkanasa hoo nabo te nena apa naaitashe too ldoinyo natapejoitie Israel, meteleku ake Hasor, naa ninye etapejoyie Yoshua. Ore imasaa pooki e kuna anas o nkishu neya iltung'ana le Israel aaitaa intokitin naataraitie, kake ore pooki tung'ani nesesekuan ninche te nepi o lalem, o metaba anaa neidaikie ninche tukul, neitu ninye eleku obo eiresa. Anaa apa enaitanapa Olaitoriani Musa osinka lenye, neitanapa sii apa Musa Yoshua, netaasa apa Yoshua ina; eitu ninye eing'uaa ae toki measa te nena apa pooki naaitanapa Olaitoriani Musa. Neaku ewa apa Yoshua ina kop pooki, ina kop oo ldoinyo o Negeb pooki, o enkop e Goshen pooki o ina kop pooki nagum o Araba o ina kop oo ldoinyo e Israel o enkop nagum, ebaiki oldoinyo le Halak, ilo oshumunye aing'or Seir, o metabaiki Baalgad to erata le Lebanon ti abori oldoinyo le Hermon. Neya ninye ilaiguanak lenye pooki, nesesekuan ninche, near ninye ninche metuata. Neitayuo apa Yoshua olarrabal te nkata naado o lelo aiguanak pooki. Meetae apa ninye enkanasa nabo naitayio osotua o Israel, meteleku ake Ilhafi, lelo oomanya Gibeon; nerik apa ninche pooki olarrabal. Amu enkitobirata apa o Laitoriani pee eitagol iltauja lenye pee etum aaetu aataarare Israel to larrabal, pee etumi aaidaikie ninche katukul, nemeng'amu ninche olng'ur kake pee eishuni anaa apaenaitanapa Olaitoriani Musa. Nelotu apa Yoshua te ina kata, nejutu katukul aiwuang'ie Anakim te ina kop oo ldoinyo, neiwuang'ie to Hebron, neiwuang'ie te Debir, neiwuang'ie te Anab, neiwuang'ie sii te ina kop oo ldoinyo eYuda, neiwuang'ie sii te ina kop oo ldoinyo e Israel; neidaikie Yoshua ninche tukul te nebo nkanas enye. Meetae apa hoo obo le Anakim otelekua ti atua enkop oo ltung'ana le Israel; te Gasa ake, ti atua Gati, o ti atua Ashdod, etelekutua embata. Neaku ewa apa Yoshua enkop pooki te risioroto e nena pooki apa naatiaka Olaitoriani Musa, neishooyo Yoshua metaa enjung'ore te Israel te risioroto eorikinoto oo loshon lenye. Neitirring'a enkop to larrabal. Kulo apa ilaiguanak le ina kop, ootimira iltung'ana le Israel, neya ina kop enye te lido kekun Yordan te nkalo e nkilepunoto e nkolong ebaiki oerata le Arnon o metabaiki oldoinyo le Hermon, o Araba pooki te nkalo o loosaen: Sihon olaiguanani loo Lamori apa omanya Heshbon, naa ninye apa oitore ebaiki Aroer natii olomanaa lo erata le Arnon, o metabaiki empolos o erata o metabaiki olkeju le Yabok, ilo polosie loo Lamori, aa taa, olpisiai le Gilead, O Araba o metabaiki enaiposha e Kineret te nkalo o loo saen, o te nkalo e Bet-yeshimot, o metabaiki enaiposha e Araba, ina aiposha naisukut, enkalo e kopikop o metabaiki abori lelo jurumi le Pisga; o Oog olaiguanani le Bashan, obo apa lo lpisiai le Refaim, apa omanya Ashtarot o Edrei, naa ninye apa oitore oldoinyo le Hermon o Saleka o Bashan pooki o metabaiki olpolosie loo Lkishi o Lmaakati, o lpisiai le Gilead o metabaiki olpolosie le Sihon olaiguanani le Heshbon. Etimira apa ninche Musa osinka lo Laitoriani te nebo iltung'ana le Israel; neishooyo Musa ilo sinka lo Laitoriani enkop enye metaa enkop oo le Ruben, ole Gad olpisiai lo losho le Manase. Naa kulo apa ilaiguanak le ina kop ootimira Yoshua o ltung'ana le Israel te nkalo o loontoluo le Yordan, ebaiki Baal-gad ti atua oerata le Lebanon o metabaiki ilo doinyo le Halak, oshumunye aing'or Seir (neisho Yoshua ina kop enye iloshon le Israel meitaa enenye te risioroto enkiririkinoto enye, ti atua ina kop nagum, ti atua Araba, o tiatua nkishong'ishong'at, ti atua ong'ata ooti atua negeb, ina kop oo Lhiti, o Lamori, o Lkanaani, o Lperisi, o Lhafi o Lyebusi): olaiguanani le Yeriko; obo, olaiguanani le Ai aa ninye natashare Betel, obo: olaiguanani le Yerusalem, obo; olaiguanani le Hebron, obo; olaiguanani le Yarmut, obo; olaiguanani le Lakish, obo; olaiguanani le Eglon, obo; olaiguanani le Geser, obo; olaiguanani le Debir, obo; olaiguanani le Geder, obo; olaiguanani le Horma, obo; olaiguanani le Aradi, obo; olaiguanani le Libna, obo; olaiguanani le Adulam, obo; olaiguanani le Makeda, obo; olaiguanani le Betel, obo; olaiguanani le Tapua, obo; olaiguanani le Hafer; obo; olaiguanani le Afek, obo; olaiguanani le Lasharon, obo; olaiguanani le Maden, obo; olaiguanani le Hasor, obo; olaiguanani le Shimron-meron, obo; olaiguanani le Akshaf, obo; olaiguanani le Taanak, obo; olaiguanani le Megido, obo; olaiguanani le Kedesh, obo; olaiguanani le Yokneam ti atua Karmel, obo; olaiguanani le Dori te Nafat-dor, obo; olaiguanani le Goiim ti atua Galilaya, obo; olaiguanani le Tirsar, obo: ore pooki neaku tomoni uni o obo. Netamorua apa Yoshua neaku oloo larin kumok; nejoki Olaitoriani ninye, “Itamorua iyie nitaa oloo larin kumok, neton ake etii enkop sapuk oleng naji pee eyae. Ena kop ina neton eng'or: nkuapi pooki oo Lfilisti, o nekua pooki oo Lgerushi (ebaiki Shihor te nkalo e nkilepunoto e nkolong e Misiri, moikuape te nkalo o lpolosie le Ekron, eyioloi ninye aajo enoo Lkanaani; netii ilaitoriak imiet loo Lfilisti, lekua le Gasa, o Ashdod, o Ashkelon, Gati o Ekron), o lekua le Afiim, ore te nkalo e kopikop, naa enkop pooki oo Lkanaani, o Meara nara ninye enoo Lsidoni o metabaiki Afek, o metabaiki olpolosie loo Lamori, o enkop oo Lgibali o Lebanon pooki, te nkalo e nkilepunoto e nkolong, ebaiki Baalgad ti abori oldoinyo le Hermon o metabaiki enejing'ieki Hamat, ore lelo pooki oomanya ina kop oo ldoinyo ebaiki Lebanon o metabaiki Misrefot-maim, o metabaiki doi ninye Isidoni pooki. Kamiraa nanu makewan aipang'ie te dukuya iltung'ana le Israel; kake tooriki ake duoo iyie ina kop iltung'ana le Israel metaa enjung'ore enye, anaa apa enaaitanapa nanu iyie. Ore naa taata tooro ena kop metaa enjung'ore too loshon oopishana o lpisiai lo losho le Manase.” Ore olikae pisiai lo losho le Manase o le Ruben o le Gad neng'amu enjung'ore enye, apa naishoo ninche Musa, te lido kekun Yordan te nkalo o loosaen, anaa enaishoo ninche Musa osinka lo Laitoriani: ebaiki Aroer aa ninye apa natii olomanaa lo erata le Arnon, o ina anasa natii empolos o erata o ina kop naluaa e Medeba o metabaiki Dibon; o nkanas pooki e Sihon olaiguanani loo Lamori, apa laa ninye oitoreisho te Heshbon, o metabaiki olpolosie loo Lamoni; o Gilead o nkuapi oo Lgeshuri o Lmaakati, o ldoinyo le Hermon pooki, o Bashan pooki o metabaiki Saleka; enkitoria pooki e Oog te Bashan, laa ninye apa oitoreisho ti atua Ashtarot etii atua Edrei (ninye apake etelekuaki to lpisiai le Refaim); kulo apa etimira Musa nearaa aipang'ie. Ore eyia eitu apa earaa iltung'ana le Israel Ilgeshuri aashu Ilmaakati; kake etobiko apa Ilgeshuri o Lmaakati te mpolos e Israel o metabaiki ena olong. Olosho le Lawi ake eitu eisho Musa enjung'ore; nkishorot o lasar opejori te nkima eisho Olaitoriani Enkai e Israel ninche metaa enjung'ore enye anaa apa enatiaka ninye. Neishoo apa Musa enjung'ore olosho loo Leruben te risioroto oo lmareita lenye. Neaku ore apa enkop enye naa ebaiki Aroer, aa ninye apa olomanaa lo erata le Arnon, o ina anasa natii empolos oerata, o ina kop pooki naluaa te mbata e Medeba; te nebo Heshbon, o nena anas pooki naatii atua ina kop naluaa; Dibon o Bamot-baal, o Bet-baa-meon, o Yahas, o Kedemot o Mefaat, o Kiriataim o Sibma, o Seret-shahar te nchumata o ldoinyo le ilo erata, o Betpeor o ljurumi le Pisga, o Betjeshimot, aa taa nkanas pooki e ina kop naluaa, o enkitoria pooki e Sihon olaiguanani loo Lamori, apa laa ninye oitoreisho te Heshbon, laa ninye apa etimira Musa te nebo ilarikok le Midian, Efi o Rekem o Sur o Huri o Reba ilkituaak le Sihon, laa ninye apa omanya ina kop. Ore sii Balaam, olayioni le Beor, ilo asakutoni, near iltung'ana le Israel ninye metua to lalem te nebo lelo apa lenye ootasesekuanaki. Ore apa olpolosie loo ltung'ana le Ruben naa Yordan orish. Ena apa enjung'ore oo le Ruben, te risioroto oo lmareita lenye o nkanas o nkang'itie kutiti. Neitoki sii Musa aisho enjung'ore olosho le Gad, te risioroto oo lmareita lenye. Ore apa enkop enye naa Yaser o nkanas pooki e Gilead o lpisiai le nkop oo Lamori, o metabaiki Aroer, ina natii enkalo o loo saen le Raba, o ebaiki Heshbon o metabaiki Ramat-mispe o Betonim, o ebaiki Mahanaim o metabaiki enkop e Debir, o atua oerata le Bet-haram, o Bet-nimra, o Sukot, o Safon, o ina ae kitoria pooki e Sihon olaiguanani le Heshbon, aitaa Yordan olpolosie, o metabaiki enkalo e abori enaiposha e Kineret te nkalo o loo saen te lido kekun le Yordan. Ena ninye enjung'ore oo le Gad te risioroto oo lmareita lenye, o nkanas enye o nkang'itie enye kutiti. Neitoki Musa aisho enjung'ore olpisiai lo losho le Manase; etoorikiaki apa olpisiai lo losho le Manase te risioroto oo lmareita lenye. Nelo apa enkop enye abaiki Mahanaim, neim Bashan pooki, o atua enkitoria pooki e Oog, olaiguanani le Bashan o nkang'itie pooki e Yair, nena naatii atua Bashan, nkanas ntomoni ile, o lpisiai le Gilead, o Ashtarot, o Edrei, nena anas e nkitoria e Oog ti atua Bashan, etoorikiaki apa kuna iltung'ana le Makir olayioni le Manase aaisho olpisiai loo le Makir te risioroto oo lmareita lenye. Kuna apa njung'oreitin naaishooyie Musa too nkisiajat e Moab, te lido kekun le Yordan te nkalo o loo saen le Yeriko. Kake ore ti alo olosho le Lawi eitu eisho Musa enjung'ore; Olaitoriani Enkai e Israel ninye enjung'ore enye, anaa apa enatiaka ninye ninche. Naa kuna apa njung'oreitin naatang'amutua iltung'ana le Israel te nkop e Kanaan, apa naaishoo ninche Eliesa olapolosani o Yoshua olayioni le Nuni o lukuny oo lmareita loo loshon loo ltung'ana le Israel. Ore apa enjung'ore enye naa te nkukuo, anaa apa enaitanapa Olaitoriani Musa te lelo oshon ooudo o lpisiai loo loshon. Amu eishoo apa Musa enjung'ore iloshon oare o lpisiai obo loo loshon te lido kekun le Yordan; kake ore ti alo ile Lawi eitu ninye eishooyo enjung'ore ti atua ninche. Amu ore apa iltung'ana le Yosef naa iloshon oare, Manase o Efraim; nemeetae apa erubata naishooki ile Lawi te ina kop, nkanas ake eishooki naatonie, te nebo iwuejitin neeirritishore te nkaraki nchoo enye o neetumie ndaiki enye. Etaasa apa iltung'ana le Israel anaa enaitanapa Olaitoriani Musa; neor ninche enkop. Neitoki iltung'ana le Yuda aapuonu enetii Yoshua te Gilgal; ore Kaleb olayioni le Yefune ilo loo Lkeni nejoki ninye, “Iyiolo iyie apa enatiaka Olaitoriani Musa oltung'ani le Nkai te Kadesh-Barnea ti alo nanu o iyie. Ara apa nanu o loo larin artam ina kata apa pee aairriwaa nanu Musa osinka lo Laitoriani te Kadesh-Barnea mashomo aikitalan enkop; naitoki nanu arrinyoki ninye olomoni anaa apa enatiu ti atua oltau lai. Kake ore ilalashera laainei apa ooshomo te nebo nanu neitalepoo oltau loo ltung'ana, ore eyia naiting'ie nanu asuj Olaitoriani Enkai. Nenya Musa olmumai ina olong, ajo, ‘Esipa ore enkop natororua enkeju ino naa keaku enjung'ore te iyie o too nkera inono ntarasi enkaraki ninting'ie iyie asuj Olaitoriani Enkai ai.’ Naa ore taata, ng'ura, aaishoo nanu Olaitoriani aishu, anaa enatejo ninye, ore kulo arin artam o imiet ebaiki ina kata apa nairorie Olaitoriani Musa ele rorei, ina kata eloito Israel to lpurkel, ore taata ara nanu ena olong o loo larin ntomoni isiet o imiet. Eton ake agol ena olong anaa apa enatiu ina olong apa pee aairriwaa Musa, etiu engolon ai taata anaa engolon ai ina kata apa, to larrabal o te lototo o elotunoto. Neaku naa taata, nchooki nanu ena kop oo ldoinyo apa naa ninye eimaka Olaitoriani ina olong; amu itoning'o apa iyie ina olong eneikununo ile Anakim te ine, eeta nkang'itie naasheta kituaak; ebaiki netii Olaitoriani te nebo nanu, naa kamiraa nanu ninche aipang'ie anaa enatejo Olaitoriani.” Nemayian Yoshua ninye, neisho ninye Hebron Kaleb olayioni le Yefune metaa enjung'ore enye. Neaku etaa apa Hebron enjung'ore e Kaleb olayioni le Yefune loo Lkeni o metabaiki ena olong, enkaraki apa naiting'ie ninye asuj Olaitoriani, Enkai e Israel. Ore apa enkarna e Hebron naa keji Kiriat-arba, ore ele Arba naa ninye apa oltung'ani kitok oleng ti atua Anakim. Neitirring'a taa enkop to larrabal. Ore apa erubata oo ltung'ana lo losho le Yuda te risioroto oo lmareita lenye nelo abaiki enkalo e moikuape o metabaiki olpolosie le Edom, o metabaiki olpurkel le Sin te nelakua oleng te nkalo emoikuape. Ore olpolosie lenye le nkalo e moikuape nedumunye te nkiting'oto Enaiposha e Munyan ebaiki olkina le naiposha oing'or enkalo e moikuape: nelo aipir enkalo e moikuape enkilepakinoto e Akarabim, negiroo o meshomo Sin nelo o metabaiki moikuape e Kadesh-Barnea, aipirakinore Hesron, o metabaiki Adar, neboina o metabaiki Karka, negiroo o metabaiki Asmon, neipang alo o metabaiki enong'oto e Misiri, nelotu enkiting'oto enye te naiposha. Ele oaku olpolosie linyi te nkalo e moikuape. Ore olpolosie le nkalo o loo saen naa Enaiposha e Munyan naisukut, o metabaiki enkutuk o lkeju le Yordan. Ore olpolosie le nkalo e kopikop neiteru te mbata e naiposha te nkutuk o lkeju le Yordan; nelo ilo polosie o metabaiki Bet-hogla, nelo agiroo kopikop e Bet-araba; nelo ilo polosie o metabaiki osoit le Bohan olayioni le Ruben; nelo ilo polosie o metabaiki Debir ebaiki oerata le Akor o meshomo enkalo e kopikop neibelekenya aing'or Gilgal, aa ninye apa natalakinore enkilepakinoto e Adamin, aa ninye apa natii enkalo e moikuape e ilo erata; nelo ilo polosie o metabaiki nkariak e En-shemesh, nelo aiting te En-rogel; neitoki ilo polosie adumunye o meshomo embata oerata lo layioni le Hinom te murte moikuape oo Lyebusi (aa taa Yerusalem) nelo ilo polosie o metabaiki enchumata e ilo doinyo o talakinore oerata le Hinom, te nkalo o loo ntoluo te nkalo e moikuape te ine neiting'ie o erata le Refaim; neitoki ilo polosie ayiatari te nchumata e ilo doinyo o metabaiki enkong'u oo nkariak e Neftoa nedumunye teine o metabaiki nkanas o ldoinyo le Efron; neitoki ilo polosie aloja nemanaa nelo Baala (aa taa, Kiriat-yearim); neman ilo polosie enkalo oloontoluo le Baala o metabaiki oldoinyo le Seir, negiroo o meshomo oljurum lo ldoinyo le Yearim te nkalo e kopikop Kesalon nedoyio o meshomo Betshemesh, nelo agiroo Timna. Nelo ilo polosie o metabaiki oljurum lo ldoinyo te nkalo e kopikop e Ekron, neitoki ilo polosie aloja nemanaa o meshomo Shikeron, negiroo alo o metabaiki Yabneel; nelo ilo polosie o meiting'oki enaiposha. Ore apa olpolosie le nkalo o loo ntoluo naa ina aiposha kitok o ilo omanaa lenye. Ele ninye olpolosie omanita iltung'ana le Yuda te risioroto oo lmareita lenye. Ore te risioroto e nkitanapata o Laitoriani naitanapa Yoshua, eishoo ninye Kaleb olayioni le Yefune erubata ti atua iltung'ana le Yuda, Kiriat-arba, aa taa Hebron (Arba apa menye le Anak). Nearaa apa Kaleb te ine lelo ayiok pokira okuni le Anak, Sheshai o Ahiman o Talmai, lelo le ishoi e Anak. Neilep ninye teine alo aarare lelo oomanya Debir; ore apa enkarna e Debir ti apa naa keji Kiriat-seper. Nejo apa Kaleb, “Ore Oltung'ani oar Kiriat-seper, neya ninye, naisho nanu ninye Aksa entito ai meyama.” Neya Otniel olayioni le Kenas, olalashe le Kaleb, neisho Kaleb ninye Aksa entito ninye meyama, nejoki meikilikuana papaai lenye meishoo enkop, nedou ninye to sikiria lenye, nejoki Kaleb ninye, “Kainyoo iyie iyieu?” Nejoki ninye, “Nchooki nanu enkishoroto; ore kitipika nanu atua enkop e Negeb, nyaaki sii nchooki nanu nkonyek oo nkariak.” Neisho Kaleb ninye nkonyek oo nkariak e shumata o niabori. Ena ninye enjung'ore o losho loo ltung'ana le Yuda te risioroto oo lmareita lenye. Ore nkanas naara inolosho loo ltung'ana le Yuda te nkiting'oto e nkalo e moikuape ti alo olpolosie le Edom, naa Kabseel, o Eder, o Yagur, o Kina, o Dimona, o Adaba, o Kedesh, o Hasor, o Itnan, o Sifu, o Talemu, o Bealot, o Hasor-hadata, o Keriothesron, (aa taa Hasor), o Amam, o Shema, o Molada, o Hasar-gada, o Heshmon, o Bet-pelet, o Hasar-shual, o Beer-sheba, o Bisiotia, o Baala, o Iyumu, o Esem, o Eltolad, o Chesil, o Horma, o Siklag, o Madmana, o Sansana, o Lebaot, o Shilhim, o Ain, o Rimon; ore te umata naa nkanas tikitam o obo tenebo inkang'itie kutiti. Ore te ina kop nagum naa Eshtaol, o Sora, o Ashna, o Sanoa, o En-ganim, o Tapua, o Enam, o Yarmut, o Adulam, o Soko, o Aseka, o Sharaim, o Aditaim, o Gedera, o Gederotaim: nkanas tomon o ong'uan te nebo nkang'itie enye kutiti. O Senan, o Hadasha, o Migdal-gad, o Dilean, o Mispe, o Yokteel, o Lakish, o Boskat, o Eglon, o Kabon, o Laham, o Kitilish, o Gederat, o Bet-dagon, o Naama, o Makeda: nkanas tomon o ile te nebo nkang'itie enye kutiti. O Libna, o Eter, o Ashan, o Ifta, o Ashna, o Nesib, o Keila, o Aksib o Maresha: nkanas naaudo o nkang'itie enye kutiti. O Ekron, te nebo nkanas enyena o nkang'itie kutiti, ebaiki Ekron o metabaiki enaiposha ina apa pooki natii embata e Ashdod, te nebo nkang'itie enyena kutiti. Ashdod, inkang'itie enyena o nkang'itie enyena kutiti o metabaiki enong'oto e Misiri, o enaiposha kitok te nebo olomanaa lenye. Ore te ina kop oo ldoinyo, naa Shamir, Yatir, Soko, o Dana, o Kiriat-sana (aa taa Debir), o Anab, o Eshtemo, o Anim, o Goshen, o Holon, o Gilo: nkanas tomon o obo te nebo nkang'itie enyena kutiti. O Arabu, o Duma, o Eshan, o Yanim, o Bet-tapua, o Ajeka, o Humta, o Kiriat-araba (aa taa, Hebron), o Sior: nkanas naaudo o nkang'itie enye kutiti. O Maen, o Karmel, o Sifi, o Yuta, o Yesreel, o Yokdeam, o Sanoa, o Kain, o Gibea, o Timna: nkanas tomon te nebo nkang'itie enye kutiti. O Halhul, o Bet-sur, o Gedori, o Maarat, o Bet-anot, o Eltekon: nkanas ile te nebo nkang'itie enye kutiti. O Kiriat-baal (aa taa Kiriat-yearim) o Raba: nkanas are te nebo nkang'itie enye kutiti. Ore ti atua olpurkel, naa Bet-araba, o Midin, o Sekaka, Nibshan, o Enkanasa e Munyan, o En-gedi: nkanas ile te nebo nkang'itie kutiti. Kake ore Ilyebusi, lelo oomanya Yerusalem, eitu eidimu iltung'ana le Yuda aatarai ninche; neaku etobiko apa Ilyebusi te nebo iltung'ana le Yuda te Yerusalem o metabaiki ena olong. Ore apa eorikinoto e ishoi e Yosef nelo ebaiki Yordan agiroo Yeriko, o loo saen loo nkariak e Yeriko, o metabaiki atua olpurkel, eilep te Yeriko, o metabaiki atua olpurkel, eilep te Yeriko o metijing'a atua ina kop oo ldoinyo o metabaiki Betel. Neitoki alo te Betel o metabaiki Lusi, negiroo alo o metabaiki Atarot, ina kop oo Larkit; neitoki adoyio aing'or enkalo oloo ntoluo o metabaiki enkop oo Lyafelet o metabaiki ina kop e Bet-horon ti abori, neitoki alo Geser nelo aiting te naiposha. Ore iltung'ana le Yosef, o Manase o Efraim neng'amu enjung'ore enye. Ore apa enkop oo le Efraim too lmareita lenye netiu nji: ore olpolosie le njung'ore enye te nkalo o loo saen naa Atarotadar o metabaiki shumata Bet-horon, nelo ilo polosie o metabaiki enaiposha, te nkalo e kopikop Mikmetal; ore te nkalo o loo saen neloja olpolosie aing'or enkalo e Taanat-shilo, nelo agiroo aimu te nkalo o loo saen o metabaiki Yanoa, neitoki adoyio alo te Yanoa o metabaiki Atarot o Naara, nerepaa Yeriko, nelo aiting te Yordan. Ore ebaiki Tapua nelo olpolosie enkalo o loo ntoluo o metabaiki enong'oto e Kana, nelo aiting te naiposha. Ena ninye enjung'ore o losho loo le Efraim too lmareita lenye, te nebo nena ang'itie naaiteng'elakaki ile Efraim ti atua enjung'ore oo le Manase, nena ang'itie pooki o nkang'itie enyena kutiti. Neitu apa earaa ninche lelo Kanaani apa oomanya Geser: neaku etobiko apa Ilkanaani te mpolos e Efraim o metabaiki ena olong kake etaa rrindiki pee eas esiaai nagol. Neitokini aaisho erubata olosho le Manase, amu ninye apa olkikau le Yosef. O Makir olkikau le Manase, menye le Gilead, neorikini ninche Gilead o Bashan, amu oltung'ani apa lo larrabal. Neitokini aaoriki irubat lelo kulikae lo losho le Manase, too lmareita lenye, Abiesa, o Helek, o Asriel, o Shekem, o Hafer o Shenuda; kulo apa ilayiok ootoiuo Manase olayioni le Yosef, too lmareita lenye. Ore apa Selofehad olayioni le Hefer, olayioni le Gilead, olayioni le Makir, olayioni le Manase, nemeeta apa ilayiok, kake ntoyie apake eeta; naa kuna nkarn e nena toyie enyena: o Mahala, o Noa, o Hogla, o Milka, o Tinsa. Nepuonu ninche dukuya Eliesa olapolosani o Yoshua olayioni le Nuni o larikok, nejo, “Eitanapa apa Olaitoriani Musa pee eisho iyiook enjung'ore te nebo ilalashera lang.” Neaku ore te risioroto e nkitanapata o Laitoriani eishoo ninye ninche enjung'ore te nebo ilalashera le papaai lenye. Ina apa pee enoto Manase irubat tomon, metii enkop e Gilead o Bashan, apa naatii lido likae kekun le Yordan; enkaraki natang'amutua intoyie e Manase enjung'ore te nebo ilayiok lenyena. Ore enkop e Gilead neorikini lelo kulikae le ishoi e Manase. Ore enkop e Manase nelo abaiki Asheri o metabaiki Mikmetat apa naa enkalo o loo saen le Shekem; nelo olpolosie enkalo e moikuape o metabaiki lelo oomanya Entapua. Ore apa enkop e Tapua naa ene Manase, kake ore enkang e Tapua apa natii olpolosie le Manase naa enoo layiok le Efraim. Nelo ilo polosie adoyio o metabaiki enong'oto e Kana. Ore nkanas tene, te nkalo e moikuape e nong'oto ti atua nkanas e Manase, naa ine Efraim. Nelo apa olpolosie le Manase enkalo e kopikop e ina nong'oto nelo aiting te naiposha; ore enkop te nkalo e moikuape naa ene Efraim, ore te nkalo e kopikop naa ene Manase, nelo enaiposha aitayu olpolosie; ore te nkalo e kopikop nebaiki Isaakar. Ore ake sii ti atua Isaakar o ti atua Asheri neeta apa Manase Betshean o nkang'itie enyena, o Ibleam o nkang'itie enyena, o lelo oomanya Dori o nkang'itie enyena, o lelo oomanya Endor o nkang'itie enyena, o lelo oomanya Taanak o nkang'itie enyena, o lelo oomanya Megido o nkang'itie enyena, ore ene uni naa Nafat. Ore eyia eitu apa eidimu ilayiok le Manase aaibung'a nena anas; kake eting'iriakinote Ilkanaani aabik te ina kop. Kake ore apa pee eponari iltung'ana le Israel aagolu, nepik ninche Ilkanaani enkisiaayiare nagol, neitu earaa ninche tukul aaipang'ie. Neirorie olosho le Yosef Yoshua, ejo, “Kainyoo iyie pee kinchoo nanu erubata nabo o eoroti nabo metaa enjung'ore, hoo nara olosho loo ltung'ana kumok, naatamayiana nanu Olaitoriani aiko nji?” Nejoki Yoshua ninche, “Te nirara intae olosho loo ltung'ana kumok, elepa enchom entim, ore te ine, nisiajakinyenye ate enkop te ina kop oo Lperisi o ene Rafaim, amu ore ena kop oo ldoinyo e Efraim naa eironkai te intae.” Nejo olosho le Yosef, “Meidip iyiook ena kop oo ldoinyo; ore ake sii kulo Kanaani pooki oomanya enkop naisiaja naa keeta ngarrin oo mbartan oo sekenke, lekua ootii Betshean o nkang'itie enyena o lekua ootii oerata le Yesreel.” Neitoki Yoshua ajoki enkaji e Yosef o Efraim o Manase, “Irara intae olosho loo ltung'ana kumok, niatata enkidimata kitok; mintokiki intae aata erubata nabo ake, kake keaku eninyi ena kop oo ldoinyo, ore hoo naa entim, isiajayieyie intae niyaya ninye aaitabaiki ilpolosien lenyena oolakua; amu iyookiki intae aaraa aaipang'ie lelo Kanaani, hoo neeta ninche ngarrin oo mbartan oo sekenke, hoo naa kegol.” Neitoki olturrur pooki loo ltung'ana le Israel auma te Shilo nepik olng'obor le ntumo ine; neirrag apa ina kop naibung'aki te dukuya ninche. Netelekutua apa ti atua iltung'ana le Israel iloshon oopishana leton eitu eorikini enjung'ore enye. Nejoki Yoshua iltung'ana le Israel, “Eintashaluoluo akenya o anu mijing'ijing'i atua aapuo aaibung ena kop, apa naishoo intae Olaitoriani, Enkai oo loo papaai linyi? Enchoru iltung'ana okuni ake to losho, pee airriwaa nanu ninche meshomo aailep nedou te ina kop, nasirakino ninche anaa injung'oreitin enye, neitoki ninche aapuonu enatii nanu. Nepuo ninche aaor aaitaa irubat naapishana, nebik Yuda te nkop enye te nkalo e moikuape, nebik enkaji e Yosef te nkop enye te nkalo e kopikop. Naa entisir intae ina kop too orot naapishana niyauu lelo sirat ene natii nanu; amu kaosh nanu enkukuo te nkaraki intae tene te dukuya Olaitoriani Enkai ang. Meeta lelo le Lawi erubata ti atua intae, amu empolosare o Laitoriani ninye enjung'ore enye; ore Gad o Ruben o lpisiai lo losho le Manase netang'amutua enjung'ore enye te lido kekun Yordan te nkalo o loo saen, apa naishoo ninche Musa osinka lo Laitoriani.” Nedumunye apa lelo tung'ana aaiteru elototo enye; neitanap Yoshua lelo apa ooshomo aasir eoroto e nkop, ajoki, “Enchom elepa nidouu nisirisiri eoroto e nkop, nintokiki aashukunye aapuonu enatii; amu kaosh nanu enkukuo te nkaraki intae tene te dukuya Olaitoriani te Shilo.” Neaku eshomo apa lelo tung'ana neilep nedou ti atua ina kop nepik atua embuku eoroto enye anaa too nkang'itie ti atua iorot naapishana; neitoki ninche aapuonu enetii Yoshua too lng'oborri te Shilo, neosh Yoshua enkukuo te nkaraki ninche te Shilo te dukuya Olaitoriani; neoriki Yoshua enkop te ine iltung'ana le Israel, olosho ake erubata enye. Neitoki alotu erubata o losho le Benchamen te risioroto oo lmareita lenye, ore ina kop naishooki ninye nejing erishata o losho le Yuda o losho le Yosef. Ore te nkalo e moikuape neiteru olpolosie lenye te Yordan, neilep ilo polosie alo enkilepakinoto e Yeriko te nkalo e moikuape, neitoki ailep aim ina kop oo ldoinyo te nkalo o loo ntoluo; nelo aiting to lpurkel le Bet-hafen. Nedumunye olpolosie te ine aim enkalo e kopikop aipir Lusi, o metabaiki enkilepakinoto e Lusi (aa ninye Betel), neitoki ilo polosie adoyio alo Atarot-adar, te nchumata e ilo doinyo otii enkalo e kopikop tiabori Bet-horon. Neitoki ilo polosie alo aim enkae shoto, aibelekenya te nkalo o loo ntoluo aing'or moikuape te ilo doinyo otii enkalo e moikuape, eipirakinore Bet-horon, nelo aiting te Kiriat-baal (Kiriat-Yearim taa ena), enkanasa nara eno losho le Yuda. Ena naitayu enkalo o loo ntoluo. Ore te enkalo e kopikop neiteru too mbat e Kiriat-yearim; nelo olpolosie te ine o metabaiki Efron, o meshomo nkonyek oo nkariak e Neftoa; neitoki ilo polosie adoyio o meshomo olpolosie lo ldoinyo otalita oerata lo layioni le Hinom, otii enkalo e moikuape eneiting'ie oerata le Refaim; neitoki adoiki oerata le Hinom, enkalo e kopikop enkilepakinoto oo Lyebusi, nedoyio alo En-rogel; neitoki alo Gelilot, ina naipirakinore enkilepakinoto e Adumim; neitoki adoyio o meshomo osoit le Bohan olayioni le Ruben; negiroo alo o meshomo osegel le Bet-araba nedoyio o meshomo Araba; neitoki ilo polosie agiroo alo o meshomo moikuape o segel le Bet-hogla; nelo ilo polosie aiting te moikuape olomanaa le Enaiposha e Munyan, te kopikop e Yordan; ele ninye olpolosie le kopikop. Neitayu Yordan olpolosie lenye te nkalo o loo saen. Ena ninye enjung'ore o losho le Benchamen, te risioroto oo lmareita lenyena, olpolosie ake olpolosie emanaa. Ore apa nkanas o losho le Benchamen te risioroto oo lmareita lenye naa Yeriko, o Bet-hogla, o Emekesis, Bet-araba, o Semaraim, o Betel, Afiim, o Para, o Ofra, Kefarmoni, o Ofni, o Geba - nkanas tomon o are te nebo nkang'itie enyena kutiti: Gibeon, o Rama, o Beerot, o Mispe, o Kefira, o Mosa, Rekem, o Irpeel, o Tarala, o Sela, o Ha-elef, o Yebus (aa taa Yerusalem), o Gibea o Kiriat-yearim - nkanas tomon o ong'uan te nebo nkang'itie enye kutiti. Ena ninye enjung'ore o losho le Benchamen te risioroto oo lmareita lenyena. Neitoki e rubata eare alotu o losho le Simeon te risioroto oo lmareita lenyena; netii apa enjung'ore enye empolos e njung'ore o losho le Yuda. Neeta apa ninye aitaa enjung'ore enye Beer-sheba, o Sheba, o Molada, o Hasar-shual, o Bala, o Esem, o Eltolad, o Betul, o Horma, o Siklag, o Bet-markabot, o Hasar-susa, o Betlebaot, o Sharuhen - nkanas tomon o okuni te nebo nkang'itie enyena kutiti; o En-rimon, o Eter, o Ashan - nkanas ong'uan te nebo nkang'itie enyena kutiti; te nebo nena ang'itie pooki kutiti naamanita kuna anas o metabaiki Baalat-beer, o Rama e Negeb. Ena apa enjung'ore o losho le Simeon te risioroto oo lmareita lenyena. Ore apa enjung'ore o losho le Simeon neitayu ematua e nkop e Yuda; amu ore apa erubata o losho le Yuda; naa eidapash oleng te ninche, netum olosho le Simeon enjung'ore te mpolos e njung'ore enye. Nelotu erubata e uni te nkaraki olosho le Sebulon, te risioroto oo lmareita lenyena. Ore ina kop e njung'ore enye nelo abaya Sarid; neitoki ilo polosie alo enkalo o loo ntoluo, nelo abaya Mareal, nelo aikob Dabeshet, neitoki abaya enong'oto natii enkalo o loo saen le Yoknear; nedumunye te Sarid aipir enkae shoto enkalo o loo saen aing'or eneilepunye enkolong o metabaiki olpolosie le Kislot-tabor; nelo te ine o metabaiki Daberat, neitoki ailep alo Yafia; nedumunye neim enkalo o loo saen aing'or eneilepunye enkolong o metabaiki Gad-hefer, o metabaiki Et-kasin, nelo o metabaiki Rimon neloja aing'or Nea; neitoki alo te nkalo e moikuape aboina olpolosie aing'or Hanaton, nelo aiting to erata le Iftahel; o Katat, o Nahalal, o Shimron, o Idala, o Betlehem - nkanas tomon o are te nebo nkang'itie enye kutiti. Ena ninye enjung'ore o losho le Sebulon, te risioroto oo lmareita lenyena - kuna anas te nebo nkang'itie enyena kutiti. Nelotu erubata e ong'uan te nkaraki Isaakar, te nkaraki olosho le Isaakar te risioroto oo lmareita lenyena. Ore olpolosie lenye neitushulu Yesreel, o Kesulot, o Shunem, o Hafaraim, o Shion, o Anaharat, o Rabit, o Kishion, o Ebes, o Remet, o Enganim, o Enhadad, o Bet-pases; nelo sii ilo polosie aikop Tabor, o Shahasuma, o Bet-shemesh, nelo ilo polosie lenye aiting te Yordan - nkanas tomon o ile te nebo nkang'itie enyena kutiti. Ena ninye enjung'ore o losho le Isaakar te risioroto oo lmareita lenyena - nena anas te nebo nkang'itie enyena kutiti. Neitoki alotu erubata e imiet te nkaraki olosho le Asheri te risioroto oo lmareita lenye. Ore enkop enye neitushulu Helkat, o Hali, o Beton, o Aksaf, o Alamelek, o Amad, o Mishal; ore te nkalo o loo ntoluo nelo aikop Karmel o Shihor-libnat, neitoki aibelekenya aing'or enkalo o loo saen, nelo Bet-dagon, o meikobo Sebulon oerata le Iftahel te nkalo e moikuape o meshomo Bet-emek o Niel, neitoki alo te nkalo e moikuape o meshomo Kabul, o Ebron, o Rehobu, o Hamon, o Kana o metabaiki Sidon Kitok; neitoki ilo polosie aibelekenya aingor enkalo e Rama, ometabaiki enkanasa nasheta sunta e Turo; neitoki ilo polosie alo ometabaiki Hosa, nelo aiting te naiposha; Mahalab, o Aksib. O Uma, o Afek, o Rehob - nkanas tikitam o are te nebo nkang'itie enyena kutiti. Ena ninye enjung'ore o losho le Asheri te risioroto oo lmareita lenyena - kuna anas te nebo nkang'itie enyena kutiti. Neitoki alotu erubata e ile te nkaraki olosho le Naftali, te nkaraki olosho le Naftali, te risioroto oo lmareita lenye. Nedumunye olpolosie lenye te Helef o te Saananim o Adaminekok, o Yabneel, o meshomo Lakum; nelo aiting te Yordan; neitoki ilo polosie aboina aing'or enkalo o loo ntoluo o meshomo Asnot-tabor, nelo te ine o metabaiki Hukok, nelo aikob Sebulon te nkalo e kopikop, neikob, Asheri te nkalo o loo ntoluo; neikobYuda te nkalo o loo saen le Yordan. Ore apa nkanas naasheta sunta naa Sidim, o Seer, o Hamat, o Rakat, o Kineret, o Adama, o Rama, o Hasor, o Kedesh, o Edrei, o En-hasor, o Yironi, o Migdalel, o Horem, o Betanat o Bet-shemesh - nkanas tomon o oudo te nebo nkang'itie enye kutiti. Ena ninye enjung'ore o losho le Naftali te risioroto oo lmareita lenye - kuna anas te nebo nkang'itie enyena kutit. Neitoki alotu erubata e naapishana te nkaraki olosho le Dan, te risioroto oo lmareita lenye. Ore enkop e njung'ore enye neitushulu o Sora, o Eshtaol, o Ir-shemesh, o Sha-alabin, o Aijalon, o Itla, o Elon, o Timna, o Ekron, o Elteke, o Gibeton, o Baalat, o Yehud, o Bene-berak, o Bat-rimon, o Me-yarkon o Rakon o ina kop apa naipirakinore Yopa. Ore ake pee elau lelo le Dan enkop enye, nepuo lelo le Dan aarare Leshem, ore ake pee eidip aaibung'a ina kop nepik ninye olalem neya ninye nemany atua, neipot Leshem aajo, Dan; aaipotie enkarna e nkakuyiaa lenye. Ena ninye enjung'ore o losho le Dan, te risioroto oo lmareita lenyena - kuna anas te nebo nkang'itie enyena kutiti. Ore ake pee eidip ninche aatoor enkop aitaa injung'oreitin, neisho lelo tung'ana le Israel enjung'ore ti atua ninche Yoshua olayioni le Nuni. O teina kitanapata o Laitoriani neisho ninche ninye ina anasa natoomonuo, Timnat-sera te ina kop oo ldoinyo e Efraim; neitoki ninye ashetu ina anasa nemany atua. Kuna ninche njung'oreitin apa naatoorikitia Eliesa olapolosani, o Yoshua olayioni le Nuni, o lukuny oo nkajijik oo ltung'ana le Israel, iltung'ana te oshoto e nkukuo te Shilo, te dukuya Olaitoriani, te kutukaji o lng'obor le ntumo. Neaku eidipa apa ninche aatudung enkop. Neitoki Olaitoriani ajoki Yoshua, “Tiaki iltung'ana le Israel, ‘Entegelu nkanas naasaruni, apa naa ninche nanu atiaaka intae aimunye Musa, nchere, ore oltung'ani oar olikae metua eitu eotiki aashu eitu ebaraki neidim akuetiki ine; keaku ninche te intae enesaruni te nkaraki ilo oitalaku elap to sarge. Neisikaki ninye nabo e nena anas nelo aitashe te nejing'ieki kishomi e ina anasa, nelimu mbaa enyena ainosaki ilpayiani le ina anasa; netum taa ninche aawaita ninye aaitijing'a atua enkanasa; neisho ninye ewueji, neton ninye te nebo ninche. Naa ore ake te nesuju ilo oitalaku elap to sarge ninye, nemeishooyo ninche ilo otasesekuanishe aapik nkaik enyena, amu etasesekuana apa ninye ilo le latia enye eitu eotiki, meetayie apa ninye olomang'ati too nkolong'i naatulusoitie. Naa keton ninye ti atua ina anasa o metaba anaa neaku eitasho ninye te dukuya olturrur meiguanareki, o metaba anaa neye ilo ora olapolosani kitok te ina kata; neaku taa keidim ilo apa otasesekuanishe anyaaki ashomo enkang enye makewan o enkaji enye makewan, ina ang apa naa ninye eisikie.’ ” Neaku eiteng'ela apa ninche Kedesh te Galilaya ti atua ina kop oo ldoinyo e Naftali, o Shekem ti atua ina kop oo ldoinyo e Efraim, o Kiriat-arba, (aa taa Hebron) ti atua ina kop oo ldoinyo e Yuda. Ore te lido kekun Yordan te nkalo o loo saen le Yeriko, negelu ninche Beser ti atua ilo purkel le nkop naitoriori, enkop o losho le Ruben, o Ramot ti atua Gilead, enkop o losho le Gad; o Golan ti atua Bashan, enkop o losho le Manase. Kuna ninche nena anas apa naaiteng'elakaki iltung'ana pooki le Israel, olomoni omanya ina kop atua ninche, pee aa ore pooki ng'ae oar oltung'ani metua eitu eotiki neidim aisikaki ine pee melo ake aye te nkaina e ilo oitalaku elap to sarge o metaba anaa neitashe ninye te dukuya olturrur. Neitoki aapuonu ilukuny oo nkajijik oo le Lawi enetii Eliesa ilo apolosani o enetii Yoshua olayioni le Nuni o enetii ilukuny oo nkajijik oo loshon loo ltung'ana le Israel; nejoki ninche te Shilo ti atua enkop e Kanaan, “Eitanapishe apa Olaitoriani aimunye Musa nchere pee eishori iyiook nkanas nikimany te nebo ineeirritishoreki te nkaraki nkishu ang.” Neaku ore te nkaraki enkitanapata o Laitoriani neisho iltung'ana le Israel lelo le Lawi kuna anas o neeirritishoreki metaa enjung'ore enye. Nelotu erubata te nkaraki ilmareita loo Lkohat. Neaku ore lelo le Lawi apa oora ile ishoi e Aron olapolosani neng'amu te oshoto e nkukuo too loshon le Yuda, o Simeon, o Benchamen, nkanas tomon o okuni. Ore lelo kulikae loo Lkohat neng'amu te oshoto e nkukuo too lmareita lo losho le Efraim o to losho le Dan o to lpisiai lo losho le Manase nkanas tomon. Neng'amu ile Gershon te oshoto e nkukuo too lmareita to losho le Isaakar, o to losho le Asheri, o to losho le Naftali, o to lpisiai lo losho le Manase nkanas tomon o okuni. Ore ile Merari te risioroto oolmareita lenye neng'amu to losho le Ruben, o to losho le Gad o to losho le Sebulon, nkanas tomon o are. Kuna anas apa o neeirritishoreki eishoo iltung'ana le Israel te oshoto enkukuo ile Lawi, anaa apa enaitanapishe Olaitoriani aimunye Musa. Ore ti alo olosho le Yuda o losho le Simeon neishooyo ninche kuna anas naaipoto too nkarn, apa naataa ine lelo le ishoi e Aron, obo loo lmareita loo le Kohat apa loo le Lawi; amu ninche etadoikio enkukuo asioki. Neisho ninche Kiriat-arba (aa Arba taa menye le Anak) aa Hebron taa ina, ti atua ina kop oo ldoinyo e Yuda, te nebo nene wuejitin neeirritishoreki neemanita. Kake ore nkurman e nkanasa o nkang'itie enyena kutiti neishori Kaleb olayioni le Yefune metaa nkunenyena. Ore te lelo le ishoi e Aron ilo apolosani neishori Hebron, ina anasa nasaru olotasesekuanishe, te nebo iwuejitin enyena neeirritishoreki, Yatir te nebo iwuejitin enyena neeirritishoreki, Eshtemoa te nebo iwuejitin enyena neeirritishoreki, Holon te nebo iwuejitin enyena neeirritishoreki, Debir te nebo iwuejitin enyena neeirritishoreki, Ain te nebo iwuejitin enyena neeirritishoreki, Yuta te nebo iwuejitin enyena neeirritishoreki, Bet-shemesh te nebo iwuejitin enyena neeirritishoreki - nkanas naaudo naaing'uaa kulo oshon pokira oare; nepuku sii to losho le Benchamen Gibeon te nebo iwuejitin enyena neeirritishoreki, Geba te nebo iwuejitin enyena neeirritishoreki, Anatot te nebo iwuejitin enyena neeirritishoreki, o Almon te nebo iwuejitin enyena neeirritishoreki - nkanas naaudo. Ore apa nkanas e lelo le ishoi e Aron naa nkanas tomon o okuni te nebo iwuejitin enye neeirritishoreki. Ore lelo kulikae loo Lkohat oora iloo lmareita loo Lkohat loo Lawi, ore apa nkanas naatoorikiaki ninche naa olosho le Efraim eing'uaa. Ninche apa eishooki Shekem, ina anasa nasaru olotasesekuanishe, te nebo iwuejitin enyena neeirritishoreki te ina kop oo ldoinyo e Efraim, Geser te nebo iwuejitin enyena neeirritishoreki, Kibsa-im te nebo iwuejitin enyena neeirritishoreki, Bet-horon te nebo iwuejitin enyena neeirritishoreki - nkanas ong'uan; ore inaaing'uaa olosho le Dan naa El-teke te nebo iwuejitin enyena neeirritishoreki, Gibeton te nebo iwuejitin enyena neeirritishoreki, Aijalon te nebo iwuejitin enyena neeirritishoreki - nkanas ong'uan; ore inaaing'uaa olpisiai lo losho le Manase, naa Taanak te nebo iwuejitin enyena neeirritishoreki o Gat-rimon te nebo iwuejitin enyena neeirritishoreki - nkanas are. Ore apa nkanas e lelo kulikae tung'ana loo Lkohat naa tomon pooki te nebo iwuejitin enye neeirritishoreki. Ore te lelo le Gershon, lo olmarei obo loo lmareita le Lawi, neishori olpisiai le nkop e Manase, Golan te Bashan te nebo iwuejitin enyena neeirritishoreki - nkanas are; ore to losho le Isaakar neishori Kishion te nebo iwuejitin enyena neeirritishoreki, Daberat te nebo iwuejitin enyena neeirritishoreki, Yarmut te nebo iwuejitin enyena neeirritishoreki, En-ganim te nebo iwuejitin enyena neeirritishoreki - nkanas ong'uan; naa ore to losho le Asheri, neishori Mishal te nebo iwuejitin enyena neeirritishoreki, Abdon te nebo iwuejitin enyena neeirritishoreki, Helkat te nebo iwuejitin enyena neeirritishoreki, o Rehob te nebo iwuejitin enyena neeirritishoreki - nkanas ong'uan; naa ore to losho le Naftali, neishori Kedesh te Galilaya te nebo iwuejitin enyena neeirritishoreki, ina anasa e sarunoto te ilo otasesekuanishe, Hamot-dor te nebo iwuejitin enyena neeirritishoreki, o Kartan te nebo iwuejitin enyena neeirritishoreki - nkanas uni. Ore apa nkanas oo lmareita loo le Gershon naa tomon o okuni pooki te nebo iwuejitin enye neeirritishoreki. Ore lelo kulikae loo Lawi, lelo mareita loo Lmerari neishori ninche to losho le Sebulon, Yokne-am te nebo iwuejitin enyena neeirritishoreki, Karta te nebo iwuejitin enyena neeirritishoreki, Dimna te nebo iwuejitin enyena neeirritishoreki, Nahalal te nebo iwuejitin enyena neeirritishoreki - nkanas ong'uan; ore to losho le Ruben neishori Beser te nebo iwuejitin enyena neeirritishoreki, Yahas te nebo iwuejitin enyena neeirritishoreki, Kedemot te nebo iwuejitin enyena neeirritishoreki, o Mefaat te nebo iwuejitin enyena neeirritishoreki - nkanas ong'uan; ore to losho le Gad, neishori Ramot te Gilead te nebo iwuejitin enyena neeirritishoreki, ina anasa e sarunoto te ilo otasesekuanishe, Mahanaim te nebo iwuejitin enyena neeirritishoreki, Heshbon te nebo iwuejitin enyena neeirritishoreki, Yasar te nebo iwuejitin enyena neeirritishoreki - nkanas ong'uan te umata. Ore ti alo nkanas oo lmareita loo Lmerari, aa taa lelo ootelekutua too lmareita le Lawi, nena apa naatoorikiaki ninche, naa nkanas tomon o are pooki. Ore apa nkanas oo le Lawi ti atua ina kop oo ltung'ana le Israel naa nkanas artam o isiet pooki te nebo iwuejitin enye neeirritishoreki. Ore kuna anas neeta ake pooki anasa ewueji enye neirritishoreki namanita ninye; neijia apa etiu te kuna anas pooki. Neaku eishoo Olaitoriani Israel ina kop pooki apa nainosie ninye olmumai nchere keisho loo menye; ore ake eibung ina kop, nemany ninche ine. Neisho ninche Olaitoriani enkiyeng'iyeng te pooki shoto anaa apa enainosa ninye olmumai too loo menye; meetae hoo ninye obo loo lmang'ati lenye oidima aitasheikinore ninche, amu eishooyie apa Olaitoriani ilmang'ati lenye pooki apik atua nkaik enye. Meetae hoo enkisiligata nabo e nena kisiligat apa sidain naaisiligie Olaitoriani enkaji e Israel neitu ebaya; etabaitie pooki. neitoki Yoshua aipotu ile Ruben o le Gad, o lpisiai lo losho le Manase, nejoki ninche, “Embung'a intae nena pooki apa naaitanapa intae Musa osinka lo Laitoriani, nitoning'o intae oltoilo lai te nena pooki naitanapa nanu intae; eitu intae ipuopuo aaing'uaa ilalashera linyi te kuna olong'i pooki o metabaiki ena olong, kake itorripote intae pee imbung'ubung'u enkitanapata o Laitoriani Enkai inyi. Ore taata neishoo intae Olaitoriani Enkai inyi enkiyeng'iyeng too lalashera linyi, anaa apa enaitanapa ninche; ore naa embelekenyata enchom nkang'itie inyi ti atua ina kop inyi, apa naa ninye eishoo intae Musa osinka lo Laitoriani te lido kekun le Yordan. Entonyok eng'ura ina kitanapata naishoo intae Musa osinka lo Laitoriani, pee inyorrurru Olaitoriani Enkai inyi, nipuopuo too nkoitoi enyena, nimbung'arere ninye nisiaayiayia ninye to ltau linyi pooki o te nkishui inyi pooki.” Neaku etamayiana apa Yoshua ninche neisho ninche meshomo, nepuo ninche nkang'itie enye. Ore apa olpisiai obo lo losho le Manase neishoo Musa enkop te Bashan; kake ore olikae pisiai eishoo ninche Yoshua enkop te mbata oo lalashera lenye te nkop natii o loo ntoluo le Yordan. Ore ake pee eisho Yoshua ninche meshomo nkang'itie enye nemayian ninche, nejoki, “Entushukoto enchom nkang'itie inyi te karsisisho sapuk o te nebo nkishu kumok oleng, o enkosholai, o sahabu, o suyai, o esekenkei, o te nebo nkilani kumok; entooriki nena nitaarutua ilalashera linyi.” Neaku etushukote apa lelo le Ruben o le Gad o ilo pisiai lo losho le Manase aapuo nkang'itie, aaorore iltung'ana le Israel te Shilo, aa ninye apa natii enkop e Kanaan, aapuo enkop e Gilead, enkop enye maate apa naibung'a maate te nkitanapata o Laitoriani naimua Musa. Ore ake pee epuonu ninche enkop natii embata e Yordan ti tua enkop e Kanaan neshet ile Ruben o le Gad o lpisiai le Manase olperere lo lasar te ine te mbata e Yordan, olperere lo lasar kitok oleng. Nening iltung'ana le Israel eji, “Ng'ura etesheta ile Ruben ole Gad o ilo pisiai lo losho le Manase olperere lo lasar te dukuya enkop e Kanaan, ti atua ina kop nataaniki Yordan, te ina shoto apa nara enoo ltung'ana le Israel.” Ore ake pee ening iltung'ana le Israel ina, neiturrurro olturrur pooki loo ltung'ana le Israel te Shilo, pee earare ninche. Neirriwaki iltung'ana le Israel olkilikuai iltung'ana le Ruben o le Gad o ilo pisiai lo losho le Manase te nkop e Gilead, Finehas olayioni le Eliasa olapolosani, netii te nebo ninye ilaiguanak tomon, obo ake loo loshon loo lmareita le Israel. Nepuonu ninche enetii ile Ruben, o le Gad o ilo pisiai le Manase te nkop e Gilead, nejoki ninche, “Nji ejo olturrur lo Laitoriani, ‘Kaa taboi ena nitaasa intae ti alo Enkai e Israel aaibelekenya ena olong aaing'uaa esujata o Laitoriani, te ina niteshetakita ate ena olong olperere lo lasar te ngolong'akinoto o Laitoriani? Keitu iyiook kiaas eng'oki sapuk te Peor neton eitu o tene kintisiny ate, naa tenkaraki ninye pee eewuo olmeitai shumata olturrur lo Laitoriani, eji pee imbelekenyanya ena olong aaing'uaa Olaitoriani? Naa ti nigolong'akiki ena olong Olaitoriani naa kegorokino ninye olturrur pooki le Israel taisere. Kake ore taata, te nemesinya enkop inyi, entogiru wootu atua enkop o Laitoriani ine netii olng'obor lo Laitoriani, nimbung'akiki ate enkop ti atua iyiook; emigolong'akiki ake duoo intae Olaitoriani, aashu intaa iyiook iloogolong'u te nchetakinoto nishetakiki ate olperere lo lasar leme ilo perere lo lasar lo Laitoriani Enkai ang. Keitu apa eiturraa Akan olayioni le Sera enkirukoto ti alo nena baa naaiteng'elaki, nedoiki engoro olturrur pooki le Israel? Neme ninye ake oidaa te nkitarruoroto enye.’ ” Neitoki lelo le Ruben, o le Gad, o lpisiai le Manase aajo te walikinoto e nena lukuny oo lmareita le Israel, “Olmagilani, Enkai, Olaitoriani! Olmagilani, Enkai, Olaitoriani! Eyiolo ninye; naa nchoo sii Israel eyiolou makewan! Tenaa ei te ngolong'akinoto, anaa te anyata e nkirukoto ti alo Olaitoriani, mileku iyiook taata te nkaraki enchetata o lperere lo lasar pee kitum aaibelekenyata aatung'uai esujata o Laitoriani; aashu tenaa eikitaasa iyiook ina pee kitum aaishoru ilasarri oopejori aashu ilasarri le nkurma aashu ilasarri le seriani te nchumata enye, metaa Olaitoriani makewan oitalak iyiook. A-a, kake kitaasa iyiook te nkuretisho nchere ore te nkata nalotu neidim nkera inyi aatiaki nkera ang, ‘Kaa intae iporokiki Olaitoriani, Enkai e Israel? Amu eitaa Olaitoriani Yordan olpolosie lang o intae, ore intae ile Ruben o ile Gad; miatata intae erubata ti atua Olaitoriani.’ Neaku keidim nkera inyi aaitapala nkera ang eseremata o Laitoriani. Neaku kitejo apa, ‘Mateshetu iyiook olperere lo lasar, neme olopejorieki nkishorunot, neme ino lasar. Kake pee eaku shakeni te iyiook o te intae o ishoritin te siadi iyiook, inchere eikintayu iyiook olasar lo Laitoriani te dukuya ninye too nkishorot ang naapejori o lasarri o nkishorot e seriani; pee meyooki ake nkera inyi aajoki nkera ang te nkata nalotu, Miatata intae erubata ti atua Olaitoriani. Nikijo apa iyiook, te nelo nejokini iyiook ena aashu eishoi ang te nkata nalotu, nikindim iyiook aatejo, Eng'ura, enkitanyaanyukoto o lperere lo lasar lo Laitoriani, apa naitobira iloo papa, neme too nkishorot naapejori, neme too lasarri, kake pee eaku enchakenisho te iyiook o te intae.’ Kilome mikigolong'aki iyiook Olaitoriani aaibelekenya ena olong aaing'uaa esujata o Laitoriani te nchetata o lperere lo lasar te nkaraki nkishorot naapejori, o nkishorot e nkurma aashu olasar. Mikishet iyiook likae perere lo lasar meteleku ake ilo perere lo lasar lo Laitoriani Enkai ang oitashe te dukuya olng'obor lenye!” Ore ake pee ening Finehas ilo apolosani o lelo kituaak lo lturrur o nena lukuny oo lmareita le Israel apa naatii te nebo ninye, lelo rorei ootejo ile Ruben o le Gad o le Manase, neitiship ninche oleng. Nejoki Finehas ilo apolosani ayioni le Eliesa ile Ruben o le Gad, o le Manase, “Kiyiolo iyiook, ena olong aajo etii Olaitoriani atua iyiook, amu eitu intae iasiasa ena kitarruoroto to Laitoriani; ore taata intajeutuo intae iltung'ana le Israel te nkaina o Laitoriani.” Neitoki Finehas olayioni le Eliesa ilo apolosani, o lkituaak aashuko too le Ruben, o le Gad te nkop e Gilead aapuo enkop e Kanaan, enetii iltung'ana le Israel neyaki ilomon. Neitiship lelo omon lelo tung'ana le Israel, neisis iltung'ana le Israel Enkai, neitu eigil aaimaki olarrabal tialo ninche, pee eidaikie ina kop apa natamanya ile Ruben o le Gad. Nejo apa ile Ruben o le Gad enkarna e ilo perere lo lasar “Shakeni;” amu etejo ninche, “shakeni ninye te iyiook nchere Olaitoriani ninye Enkai.” Ore etulusoitie nkolong'i kumok, eidipa Olaitoriani aishoo Israel enkiyeng'iyeng ti alo ilmang'ati lenye oomanita ninche, netamorua Yoshua oleng neaku oloo larin kumok, neipotu Yoshua Israel pooki, ilpayiani lenye, o lukuny oo nkajijik, olarishak lenye o lkituaak, nejoki ninche, “Atamorua taata nanu nataa oloo larin kumok; nitoduaa intae nena pooki naaitaasa Olaitoriani Enkai inyi kuna kuapi pooki te nkaraki intae, amu Olaitoriani Enkai inyi ninye otijing'a olarrabal te nkaraki intae. Ng'ura, atoorikia nanu intae metaa enjung'ore too loshon linyi nena kuapi naang'or, te nebo nkuapi pooki naidipa nanu aiwuang'ie, ebaiki Yordan o metabaiki enaiposha kitok te nkalo o loo ntoluo. Kerrumoo ninche arriny siadi Olaitoriani Enkai inyi te dukuya intae nereu ninche aiwuang'ie too nkonyek inyi; naa iyaya intae enkop enye anaa apa enaisiligie intae Olaitoriani Enkai inyi. Metaa entuunoto embung'a niasiasa nena pooki naaigero ti atua embuku oo nkitanapat e Musa, nimimbelekenyanya aaing'uaa aapuo enkalo e tatene aashu enkalo e kedienye, pee mishularere ake kuna kuapi naatelekutua naatii atua intae, aashu impotipoto nkaitin enye, aashu inyanya olmumai te ninche, aashu isiayiayia ninche, aashu irrugokinono ninche, kake enteenikinoto Olaitoriani Enkai inyi anaa enitaasa intae o metabaiki ena olong. Amu etaarayie Olaitoriani te dukuya intae nkuapi kituaak naagol, ore tialo intae meetae oltung'ani oidima aitasheikinore intae o metabaiki ena olong. Oltung'ani obo te intae odumu enkalifu meisika, amu Olaitoriani Enkai inyi otii olarrabal te nkaraki intae, anaa apa enaisiligie intae. Entujurroto naa maate, pee inyorrurru Olaitoriani Enkai inyi. Amu ti nimbelekenyanya aaibung'are olpisiai le kuna kuapi naatelekutua tene ti atua intae niyamama o ninche, pee iyamiyama nkituaak enye neyam nkuninyi, entayiolo te sipata nchere meitoki Olaitoriani Enkai inyi areu kuna kuapi te dukuya intae; kake keaku ninche orreshet te intae, enchipishipi too sunta inyi o lkiku too nkonyek inyi, o metaba anaa nindaayaya aaishunye tena kop sidai naishoo intae Olaitoriani Enkai inyi. “Ore naa taata etaa nanu kalo anaa enapuo iltung'ana pooki, niyiololo intae too ltauja linyi o te nkishui inyi, intae pooki, nchere, meetae embae hoo nabo neitu ebaya te nena baa pooki sidain naaisiligishore Olaitoriani Enkai inyi ti alo intae, eetuo pooki aabaya te nkaraki intae, meetae hoo nabo neitu ebaya. Kake ore anaa enaitabayioki nena baa pooki sidain naaisiligishore Olaitoriani ti alo intae, neijia sii eiko Olaitoriani ayaki intae ntorrok pooki, o metaba anaa nemut intae aiwuang'ie tena kop sidai apa naishoo intae Olaitoriani Enkai, ti nigiligili olning'o lo sotua lo Laitoriani Enkai inyi, apa oitanapa ninye intae, nipuopuo aaisiai kulie aitin, nirrugokinono ninche. Netum taa engoro o Laitoriani ayupuyupo te nkaraki intae nindaayaya intae aaing'uaa ina kop sidai naishoo ninye intae.” Neitoki Yoshua aiturrur iloshon pooki le Israel te Shekem, neipotu ilpayiani, ilukuny oo nkajijik, o larishak o lkituaak le Israel, neyau ninche ate dukuya Enkai. Nejoki Yoshua lelo tung'ana pooki, “Nji ejo Olaitoriani, Enkai e Israel, ‘Etamanya apa loo papaai linyi lido kekun Frati, Tera menye le Abraham o Nahori; neisiaai ninche kulie aitin. Naya apa nanu papaai linyi Abraham aitayu te lido kekun olkeju narik nanu ninye ti atua enkop e Kanaan pooki; naitubul eishoi enye aitaa kumok. Aishoo nanu ninye Isaak; naisho Isaak Yakobo o Esau. Naisho nanu Esau ina kop oo ldoinyo e Seir meitaa enenye, kake eshomo Yakobo o nkera enyena Misiri. Nairriwaa nanu Musa o Aron, naar nanu enkop e Misiri te nena nataasa nanu ti atua ninche; ore te siadi naipang'unye nanu intae. Naipang'unye nanu loo papaai linyi aitung'uaa Misiri, nipuonunu enaiposha; nesuju apa Ilmisiri loo papaai linyi too ngarrin o too mbartan o meetu Enaiposha Nanyokie. Ore ake pee eishiraki ninche Olaitoriani nepik ninye enaimin erishata intae o lelo Misiri, naisho enaiposha meeu shumata ninche neitemoo ninche; netoduaa nkonyek inyi enaitaasa nanu Misiri; nitotoni intae to lpurkel enkata naado. Naitoki nanu ayau intae enkop oo Lamori, laa ninche apa ootii lido likae kekun le Yordan; nearare ninche intae, naishoru nanu ninche apik atua nkaik inyi, niyaya intae enkop enye aaitaa eninyi, naidaikie nanu ninche te dukuya intae. Neitoki adumunye Balak olayioni le Sipor, olaiguanani le Moab, nearare Israel; neirriwaa olkilikuai aitoomon Balaam olayioni le Beor meeu adek intae, kake eitu nanu aning Balaam; neaku etamayiana ninye intae; neaku atokordua nanu intae aitung'uaa enkaina enye. Nitalang'utua apa intae Yordan nipuonunu Yeriko, nearare intae iltung'ana le Yeriko, o Lamori sii, o Lperisi o Lkanaan, o Lhiti, o Lgigashi o Lhifi, o Lyebusi; naishoru nanu ninche apik atua nkaik inyi. Napik nanu enkuretisho dukuya intae naa enkaraki ena apa mme olalem linyi neme enkawuo inyi, natimirayie lelo aiguanak oare loo Lamori. Aishoo nanu intae enkop neitu iekarere, o nkanas neitu ishetishete, nibikitoto intae ti atua ninche ninyanya ilng'anayio le nkurma o sabibu leitu iunuunu.’ “Ore naa taata entureita Olaitoriani nisiayiayia ninye to ltau owang o te sipata (metii esunkureisho); ewuang'ie nena aitin apa naaisiaayia iloo papaai linyi te lido kekun Yordan; o te Misiri nisiayiayia Olaitoriani. Naa ti nimiyieuu intae nisiayiayia Olaitoriani, entegelu ena olong olisiayiayia tenaa ai nena aitin apa naaisiaayia iloo papaai linyi te lido kekun Yordan aashu tenaa ai nena aitin oo Lamori naa enkop enye itii; kake ore nanu o olmarei lai naa aikisiaai Olaitoriani.” Newal iltung'ana aajo, “Kilome miking'uaa iyiook Olaitoriani, aapuo aaisiai kulie aitin; amu Olaitoriani Enkai ang apa oyaua iyiook o loo papa aitung'uaa enkop e Misiri, aitupuku te nkaji e sinkaisho, naa ninye apa otaasa nena kitoduaat sapuki too nkonyek ang, negolie iyiook te ina oitoi pooki apa nikiima o ti atua iltung'ana pooki apa likiimaitie atua ninche; nearaa Olaitoriani te dukuya iyiook iloreren pooki, Ilamori apa laa ninche emanya ena kop; metaa eikisiai sii iyiook Olaitoriani, amu ninye Enkai ang.” Kake etiaka Yoshua iltung'ana, “Mindimidimi intae aaisiaayia Olaitoriani, amu Enkai sinyati ninye; Enkai o lom ninye; mepalaki ninye nkitarruorot inyi aashu ing'ok inyi. Tining'uaa intae Olaitoriani aapuo aaisiai nkaitin omon, naa keibelekenya sii ninye neitaas intae entorrono, nemut intae, eidipa aitaasa intae esidai.” Nejoki iltung'ana Yoshua, “A-a; eikisiai iyiook Olaitoriani.” Neitoki Yoshua ajoki iltung'ana, “Irara intae ilchakenini ti alo intae maate nchere itudutaitie Olaitoriani pee isiayiayia ninye.” Nejo ninche, “Kira iyiook ilchakenini.” Nejo ninye, “Ewuang'ie naa nena aitin omon naatii atua intae nimbelekenyakiki oltau linyi Olaitoriani, Enkai e Israel.” Nejoki lelo tung'ana Yoshua, “Olaitoriani Enkai ang iyiook kisiaai, naa oltoilo lenye iyiook kining.” Neitobir Yoshua olning'o o ltung'ana ina olong, neisho ninche nkitanapat o nkikoot te Shekem. Neiger Yoshua kulo rorei ti atua embuku oo nkitanapat e Nkai; neya osoit kitok neitasheyie te ine ti abori olchani te ine wueji o Laitoriani. Nejoki Yoshua lelo tung'ana pooki, “Ng'ura, ore ele soit naa keaku shakenisho ti alo iyiook; amu etoning'o ninye irorei pooki lo Laitoriani ootiaka ninye iyiook; metaa keaku shakeni ti alo intae, pee mintaasiasa ake entorroni Enkai inyi.” Neisho taa Yoshua iltung'ana meshomo, oltung'ani ake nelo enjung'ore enye. Ore te siadi kuna baa neye Yoshua olayioni le Nuni, osinka lo Laitoriani, aa oloo larin iip o tomon. Nenukaa ninche ninye ti atua enjung'ore enye te Timnat-sera, apa naa ninye natii ina kop oo ldoinyo e Efraim, moikuape o ldoinyo le Gaash. Neisiaai Israel Olaitoriani too nkolong'i pooki e Yoshua, o nkolong'i pooki e lelo payiani apa ootung'uayie Yoshua, apa ooyiolo esiaai pooki nataasa Olaitoriani te nkaraki Israel. Ore iloik le Yosef apa ooyautua iltung'ana le Israel te Misiri nenukari te Shekem, ti atua erubata e nkop apa nainyiang'ua Yakobo too layiok le Hamor menye Shekem too mpisai iip; netaa apa ine enjung'ore oo layiok le Yosef. Neye sii Eliesa olayioni le Aron nenukaa ninche ninye te Gibeya, te nkang e Finehas olayioni lenye, apa naishooki ninye ti atua ina kop oo ldoinyo e Efraim. Ore te siadi keeya e Yoshua neikilikuanishore iltung'ana le Israel Olaitoriani ejo, “Kaing'ae ong'as aituruk alo te nkaraki iyiook pee earare Ilkanaani?” Nejo Olaitoriani, “Yuda oilep alo; ng'ura aishooyie nanu enkop apik atua enkaina enye.” Nejoki Yuda Simion olalashe lenye, “Ilepu wou te nebo nanu tamanya atua ena kop naatoorikiaki nanu, pee kitum aataarare Ilkanaani; ore sii nanu naa kaiko neijia alo te nebo iyie atua ina kop nikitoorikiaki iyie.” Nelo Simion te nebo ninye. Neilep Yuda alo neishooyo Olaitoriani Ilkanaani o Lperesi apik atua enkaina enye, nemir apa ninche nkalifuni tomon enye te Besek. Nepuonu apa ninche aadoiki Adoni-besek te Besek, nearare ninye, neisulie Ilkanaani o Lperesi. Neisik Adoni-besek; kake etimira, neibung ninye, nedung'oo ninche ilmogirrani lenyena loo nkaik o loo nkejek. Nejo Adoni-besek, “Ore apa ilaiguanak ntomoni naapishana ootudung'oyioki ilmogirrani lenye loo nkaik o loo nkejek naa ti abori emesa ai esotu ndaiki naadoyio; anaa enataasa nanu, neaku aaitalakua nanu Enkai.” Neyau ninche ninye Yerusalem, neye ninye te ine. Nearare iltung'ana le Yuda Yerusalem, neibung, near te nepi o lalem nepik ina anasa enkima. Ore te siadi nena nepuo iltung'ana le Yuda aarare Ilkanaani apa oomanya enkop oo ldoinyo ti atua Negeb o te ina kop nagum. Nelo Yuda aarare lelo Kanaani apa oomanya Hebron, ore apa enkarna e Hebron naa keji Kiriat Arba; near neisulie ninche Sheshai o Ahiman o Talmai. Nedumunye te ine nepuo aarare lelo oomanya Debir. Ore apa enkarna e Debir naa keji Kiriat-sefer. Nejo Kaleb, “Ore ilo orasaki Kiriat-sefer neya ninye, naisho ninye Aksa entito ai meitaa enkitok enye.” Neya Otniel olayioni le Kenas, olalashe oti le Kaleb, neisho Kaleb ninye Aksa ina tito enye meitaa enkitok. Ore ake pee eyam ninye, neikilikuan Aksa ninye metoomono menye enkop; nedou ninye to sikiria lenye, nejoki Kaleb ninye, “Kainyoo iyieu?” Nejoki ninye, “Nchooki enkishoroto; ore amu kiterewa nanu mashomo enkop e Negeb, nchooki sii nkonyek e nkare.” Neisho Kaleb ninye nkonyek e nkare e shumata o ni abori. Ore lelo le ishoi e Keni, ilo aputani le Musa, neilep aapuo te nebo iltung'ana le Yuda te ina anasa oo ltuka nepuo ong'ata e Yuda apa natii Negeb embata e Aradi; nepuo ninche aatoni te nebo lelo tung'ana. Nelo Yuda te nebo Simion olalashe lenye, nemir ninche Ilkanaani apa oomanya Sefat, neidaikie tukul. Neaku keji apa enkarna e ina anasa Horma. Ewa sii apa Yuda Gasa te nebo enkop enye, o Ashkelon te nebo enkop enye, o Ekron te nebo enkop enye. Netii apa Olaitoriani te nebo Yuda neya ninye aitaa enenye ina kop oo ldoinyo, kake eitu apa eidimu ataarai aipang'ie lelo oomanya enkisiajata, amu eeta apa ninche ngarrin oo sekenke. Neishooyioki apa Hebron aaisho Kaleb anaa apa enatejo Musa; nearaa Kaleb aipang'ie ti atua ninye lelo ayiok pokira okuni le Anak. Kake eitu earaa iltung'ana le Benchamen Ilyebusi apa oomanya Yerusalem; neaku etobiko apa Ilyebusi te nebo iltung'ana le Benchamen te Yerusalem ometabaiki ena olong. Ore sii apa enkaji e Yosef neilep aapuo aarare Betel; netii Olaitoriani te nebo ninche. Neirriwaa enkaji e Yosef ilaikitalak meshomo aaikeern Betel. (Ore apa enkarna e ina anasa naa keji Lus). Nedol lelo aikitalak oltung'ani eipang'u te nkanasa, nejoki, “Tuutaki sii ake iyiook enkoitoi nalo atua enkanasa, pee kintaas iyie esidai.” Neitodol ninye ninche enkoitoi nalo atua ina anasa; near ninche ina anasa te nepi o lalem, kake eishoo ninche ilo tung'ani te nebo olmarei lenye meshomo. Nelo ilo tung'ani enkop oo Lhiti nelo ashet enkanasa nejo enkarna enye Lus; ina enkarna enye o metabaiki ena olong. Eitu apa earaa Manase aipang'ie lelo oomanya Betshean o nkang'itie enyena kutiti, aashu Taanak o nkang'itie enyena kutiti, aashu lelo oomanya Dori o nkang'itie enyena kutiti aashu lelo oomanya Ibleam o nkang'itie enyena kutiti, aashu lelo oomanya Megido o nkang'itie enyena kutiti; kake eting'iria Ilkanaani aabik ti atua ina kop. Ore ake pee egolu Israel, nepik ninche Ilkanaani enkisiaayiare nagol, kake eitu earaa ninche aaipang'ie tukul. Eitu apa earaa Efraim aipang'ie lelo Kanaani oomanya Geser; kake etobiko Ilkanaani ti atua Geser te nebo ninche. Eitu apa earaa Sebulon aipang'ie lelo oomanya Kitron, aashu lelo oomanya Nahalol; kake etobiko Ilkanaani ti atua ninche neaku ilenkisiaayiare nagol. Eitu apa earaa Asheri aipang'ie lelo oomanya Ako, aashu lelo oomanya Sidon, aashu ile Ahalab, aashu ile Aksib, aashu ile Helba, aashu ile Afik, aashu ile Rehob; kake etobiko apa ile Asheri ti atua Ilkanaani lelo oomanya ina kop; amu eitu earaa ninche aaipang'ie. Eitu apa earaa Naftali aaipang'ie lelo oomanya Bet-she-mesh, aashu lelo oomanya Bet-anat, kake etobiko ninche ti atua lelo Kanaani oomanya ina kop; ore ake eyia, ore lelo oomanya Bet-she-mesh, o le Bet-anat netaa ilenkisiaayiare nagol te ninche. Nerrumoki apa Ilamori ile Dan enkop oo ndoinyo, amu eitu apa eisho ninche meetu enkisiajata tiabori; neng'iri Ilamori aabik ti atua Har-heres, o ti atua Aiyalon, o ti atua Sha-albim, kake eturokine enkaina e nkaji e Yosef ninche te ngolon, neaku ile nkisiaayiare nagol. Ore olpolosie loo Lamori nelo te nkilepunoto e Akrabim ebaiki Sela neilep. Neilep apa olmalaika lo Laitoriani te Gilgal alo Bokim. Nejo ninye, “Ayaua apa nanu intae ailepunye te Misiri, nayau intae atua ina kop apa nainosa olmumai pee aisho loo papaai linyi. Atejo apa, ‘Magil ae kata olning'o lai o intae, nimintobiribiri sii intae olning'o o kulo oomanya ena kop; niaariara ilpereren lenye lo lasar’ kake eitu intae imbung'ubung'u enkitanapata ai. Kainyoo ena nitaasa intae? Neaku ajoki taata intae, maaraa ninche aipang'ie te dukuya intae; kake keaku ninche ilmang'ati te intae, naa keaku nkaitin enye orreshet te intae.” Ore ake pee eiro ilo malaika lo Laitoriani kulo rorei too ltung'ana pooki le Israel, neyietu iltung'ana aaishir. Neisho ninche ine wueji enkarna aajo Bokim; neitaiki Olaitoriani olasar te ine. Ore ake pee eisho Yoshua iltung'ana meshomo, nepuo lelo tung'ana le Israel oltung'ani ake enjung'ore enye, pee elo aya enkop. Neisiaai iltung'ana Olaitoriani nkolong'i pooki e Yoshua, o nkolong'i pooki e lelo payiani apa ootii te siadi Yoshua, apa ootoduaa ina siaai pooki kitok nataasa Olaitoriani te nkaraki Israel. Neye Yoshua olayioni le Nuni, ilo sinka lo Laitoriani, aa oloo larin iip o tomon. Nenukaa ninche ninye to lpolosie le njung'ore enye te Timat-heres, ti atua ina kop oo ldoinyo e Efraim, te moikuape oldoinyo le Gaash. Ore apa ina ishoi pooki neishunye sii ninche aaye; neitoki ailepu ae ishoi te siadi ninche, apa nemeyiolo ninye Olaitoriani aashu esiaai apa nataasa ninye te nkaraki Israel. Neas lelo tung'ana le Israel entorrono too nkonyek o Laitoriani neisiaai inkaitin e Baal; neing'uaa ninche Olaitoriani Enkai oo loo menye apa laa ninye nayaua ninche aitung'uaa enkop e Misiri; nepuo ninche aasujaa kulie aitin, ti atua nena aitin oo loreren apa oomanita ninche, neirrugokino ninche; neitagor ninche Olaitoriani. Neing'uaa ninche Olaitoriani, neisiaai inkaitin e Baal o Ashtarot. Neaku eyupuyupo apa engoro o Laitoriani ti alo Israel, neishooyo ninye ninche apik atua nkaik oo lmang'ati lenye nemiraki ninche engolon e lelo mangati oomanita ninche, o metaa meekure eidim aairisha ilmang'ati lenye. Kejo ake maape, negilunore ninche enkaina o Laitoriani te ntorroni anaa apa enatejo Olaitoriani, o anaa sii enainosa Olaitoriani olmumai ti alo ninche, neing'aing'ai ninche oleng. Neput Olaitoriani ilarishak, ooitajeu ninche aaitayu te ngolon e lelo apa ootaraitie ninche. Ore ake eyia eitu ninche ening ilarishak lenye, amu eiborrie onyek esujaa kulie aitin neirrugokino ninche; eibelekenyate apa nabo kata aapong ina oitoi naa ninye apa eima loo menye, lelo apa oibung'a nkitanapat o Laitoriani, neitu ninche eas ina. Ore ake anaa te neput Olaitoriani ilarishak te nkaraki ninche, netii Olaitoriani te nebo ilo arishani, neitajeu ninye ninche aitung'uaa enkaina oo lmang'ati lenye too nkolong'i pooki e ilo arishani; amu eing'urrie apa Olaitoriani ninche te nkaraki osina lenye te nkaraki lelo apa ooisomita ninche neinosie osina. Kake ore apa te neye olarishani, neibelekenya ninche neas ntorrok alang iloo menye, epuo aasujaa kulie aitin, neisiaai ninche neirrugokino ninche; eitu apa ninche epal ae nabo oo mbaa enye torrok aashu nena enye engolong'u. Neaku eyupuyupo apa engoro o Laitoriani te nkaraki Israel; nejo ninye, “Ore enkaraki natigila kulo tung'ana olning'o lai apa laitanapa nanu loo menye, neitu ening oltoilo lai, meekure nanu ebaiki taata aaraa aipang'ie te dukuya ninche hoo ninye olosho obo te lelo apa ootung'uayie Yoshua pee eye, paa ore te ninche natum nanu atetema Israel, tenaa keshilaa aapuo te nkoitoi e Nkai, anaa apa enataasa iloomenye aashu eneitu.” Neaku etapala apa Olaitoriani lelo oshon, eitu earaa ninche aipang'ie nabo kata, neitu ninye eishooyo ninche apik atua engolon e Yoshua. Kulo apa iloshon ootelekua Olaitoriani pee etemie ninche Israel, aa taa lelo pooki ti atua Israel leitu ae kata eyiolou likae arrabal obo te Kanaan; enkaraki ena apa pee etum iishoritin oo ltung'ana le Israel aatayioloito olarrabal, pee etum ninye aiteng'ena ninche olarrabal, amu eitu apa eyiolou. Kulo ninche lelo oreren: Ilkituaak imiet loo Lfilisti, o Lkanaani pooki, le Sidon, o Lhafi apa oomanya oldoinyo le Lebanon, ebaiki oldoinyo le Baalhermon ebaiki enejing'ieki Hamat. Ilootemieki Israel apa ninche, pee eyiolouni tenaa keidim Israel aibung'a nkitanapat o Laitoriani apa naaitanapa ninye loo menye te Musa. Neaku etobiko apa iltung'ana le Israel ti atua Ilkanaani, o Ilhiti, Ilamori, Ilperisi, Ilhifi o Lyebusi; neyam ninche ntoyie enye aaitaa nkituaak enye, ore ntoyie enye maate neisho ilayiok le lelo oreren, neisiaai nkaitin enye. Neas iltung'ana le Israel entorroni too nkonyek o Laitoriani, nerikino ninche Olaitoriani Enkai enye, neisiaai inkaitin e Baal o Asherot. Neaku eyupuyupo apa engoro o Laitoriani ti alo Israel nemir ninche metijing'a atua enkaina e Kushan-rishataim olaiguanani le Mesopotamia neisiaai iltung'ana le Israel Kushan-rishataim ilarin isiet. Kake ore ake pee eishiraki iltung'ana le Israel Olaitoriani, neisho Olaitoriani olakordunoni te nkaraki iltung'ana le Israel, laa ninye apa otokordua ninche Otiniel olayioni le Kenas, olalashe oti le Kaleb. Nelotu Enkiyang'et o Laitoriani shumata ninye, neaku ninye olarishani te Israel; neilep ninye alo olarrabal neishooyo Olaitoriani Kushan-rishataim, olaiguanani le Mesepotamia apik atua enkaina enye; neisulu enkaina enye Kushan-rishataim. Netum taa enkop enkiyeng'iyeng ilarin artam. Neye Otiniel olayioni le Kenas. Neitoki iltung'ana le Israel aaigil aas entorroni too nkonyek o Laitoriani; neitagol Olaitoriani Eglon olaiguanani le Moab metaarare Israel, enkaraki nataasa ninche entorroni too nkonyek o Loitoriani. Neiturrurroki ninye kewan Ilamori o Lmaleki nelo amir Israel neya ninche ina anasa oo ltuka aaitaa enenye. Neisiaai iltung'ana le Israel Eglon olaiguanani le Moab ilarin tomon o isiet. Kake ore ake pee eishiraki iltung'ana le Israel Olaitoriani neisho Olaitoriani ninche olakordunoni, Ehudi, olayioni le Gera, lolosho le Benchamen, oltung'ani kedienye. Neirriwaa iltung'ana le Israel ninye meyaki Eglon olaiguanani le Moab kodi. Neitobiraki Ehudi kewan olalem opi nkaloli pokira are laa entemet nabo e nkaina o lpisiai enkadoro, neeniki ninye enkupes enye e nkeju e tatene aitabolu nkilani enyena. Neitarasaa ninye ina kishoroto aisho Eglon olaiguanani le Moab, naa oltung'ani apa opir oleng. Ore ake pee eidip Ehudi aitarasai ina kodi, neisho lelo tung'ana meshomo apa ooyautua ina kodi. Kake eibelekenyunye ninye makewan ashukunye te nena kitanyaanyukot oo soito naaguetuno naatii embata e Gilgal, nejo, “Aata nanu olkilikuai laakurraki olaiguanani.” Nejo ninye, “Entigirata.” Ore apa lelo pooki ooisiaaita ninye neipang aapuo aaing'uaa ninye. Nelotu Ehudi enetii ninye, etonita openy ti atua olgilata lenye oirobi le shumata. Nejo Ehudi, “Aata olkilikuai oing'uaa Enkai te nkaraki iyie.” Nedumunye ninye to lorika lenye. Neitorioo Ehudi enkaina enye e kedienye, neshutu olalem te nkupes enye e tatene neisuroki atua enkoshoke enye; nejing pooki o olkidong'oi lenye, neibung enkurriny ilo alem, amu eitu apa eshutu ilo alem te nkoshoke enye; nebukunye enkorotik e nkoshoke. Neipang'u Ehudi boo, neiken nkutukie oo nkajijik e ilo gilata le shumata, neen. Ore eidipa ashomo, nepuonu ilaisiaayiak; ore pee edol aajo keikeno nkutukie e lelo gilat le shumata, nejo ninche, “Ebaiki naa kewan ebakita ti atua ilo gilata oirobi.” Neanyisho ninche o metaba anaa nepalari; kake ore ake eton eitu ebol ninye nkutukie e lelo gilat le shumata, neitayu ninche olbolet nebol; neirragita te ine olkitok lenye to ltiren etua. Neisika duoo Ehudi aluaya ina kata eanyisho ninche, nelo agiroo nena kitanyaanyukot naaguetuno too soito, neisik alo Se-ira. Ore ake pee ebaya neosh entarumpeta te ina kop oo ndoinyo e Efraim, nepuo iltung'ana le Israel te nebo ninye aadoyio te ina kop oo ndoinyo, etii ninye dukuya ninche. Nejoki ninye ninche, “Entusujuaki; amu eishorua Olaitoriani ilmang'ati linyi lelo Moabu apik atua enkaina inyi.” Neaku etadoitie apa ninche aasujaa ninye, neibung ilang'at olkeju le Yordan naaimu Ilmoabu, neitu ninche eisho hoo oltung'ani obo metalang'u. Near ninche ina olong iltung'ana oobaya nkalifuni tomon loo Lmoabu, oogol pooki, eitu ninye eimisho obo. Neaku etimiraki apa Moab ina olong nejing abori enkaina e Israel. Netum apa ina kop enkiyeng'iyeng too larin ntomoni isiet. Ore te siadi ninye naa Shamgar olayioni le Anat, apa laa ninye otara metuata iltung'ana iip ile loo Lfilisti te ng'udi nareyieki lmong'i, netokordua sii ninye Israel. Neigil ake iltung'ana le Israel aas entorrono too nkonyek o Laitoriani, ina kata eidipa Ehudi atua. Nemir Olaitoriani ninche metijing'a atua enkaina e Yabin olaiguanani le Kanaan, apa laa ninye oitoreisho te Hasor; ore apa olarikoni le njore enye naa Sisera, nemanya apa ninye Harosheta-goiim. Neitoki iltung'ana le Israel aaishiraki Olaitoriani metaretu; amu eeta apa ninye ngarrin iip naaudo oo sekenke, neisomita apa iltung'ana le Israel te nkisikong'ata too larin tikitam. Ore apa Debora enkoiboni e Nkai, ina kitok e Lapidot, naa ninye apa narishita Israel te ina kata. Neton apa ninye te ntonata o ltukai le Debora te rishata e Rama o Betel ti atua ina kop oo ndoinyo e Efraim; neilepu iltung'ana le Israel aapuonu enetii ninye te rishare. Neirriwaa ninye olkilikuai aipotu Barak olayioni le Abinoam te Kedesh ti atua Naftali, nejoki ninye, “Kintanapa iyie Olaitoriani, Enkai e Israel, ejo, ‘Shomo, nturrurro iltung'ana linono to ldoinyo le Tabor iwa iltung'ana nkalifuni tomon lo losho le Naftali o lo losho le Sebulon. Naa kayietu nanu Sisera, ilo kitok le njore e Yabin, pee kilotu atumore te mbata o lkeju le Kishon te nebo ngarrin enyena o ltimito lenyena; naa kaishoru nanu ninye apik atua enkaina ino.’ ” Nejoki Barak ninye, “Ti nilo iyie te nebo nanu, nalo, kake te nimilo iyie te nebo nanu, nemalo nanu.” Nejo ninye, “Ore te sipata kalo nanu te nebo iyie; ore eyia, ore ina oitoi niim iyie nemeyau enkisisa ino, amu kemir Olaitoriani Sisera apik atua enkaina e nkitok.” Nedumunye Debora alo te nebo Barak Kedesh. Neipotu Barak Sebulon o Naftali meetu Kedesh; neilep iltung'ana nkalifuni tomon aasujaa ninye, nelo sii Debora te nebo ninye. Netoorote apa Heberi ilo le Keni o Lkeni, lelo le ishoi e Hobabu olaputani le Musa, nelo aunoki olng'obor lenye olchani onyaanyukie olng'aboli te Sa-ananim, apa nataaniki Kedesh. Ore ake pee elikini Sisera nchere eshomo Barak olayioni le Abinoam oldoinyo le Tabor, neipotu Sisera ngarrin enyena pooki, ngarrin iip naaudo oo sekenke, o lelo tung'ana pooki apa ootii te nebo ninye, ebaiki Haroshet-hagoiim o metabaiki olkeju le Kishon. Nejoki Debora Barak, “Tudumunye! Amu ena olong eishooyie Olaitoriani Sisera apik atua enkaina ino. Aime Olaitoriani olo te dukuya iyie?” Nedoiyio Barak to ldoinyo le Tabor tenebo iltung'ana nkalifuni tomon oosujita ninye. Nemir Olaitoriani Sisera o ngarrin enyena pooki o enjore enye pooki te dukuya Barak nepik enepi olalem; nedou Sisera te ngarri enye neisik alo too nkejek. Nesujaa Barak nena garrin o mbartan o enjore o meshomo Haroshet-ha-goiim, ore ina jore pooki e Sisera nebatata te nepi olalem; eitu ninye eleku oltung'ani. Kake eisika apa Sisera too nkejek o meshomo olng'obor le Yael, enkitok e Heberi loo Lkeni, amu etii apa eseriani erishata e Yabin olaiguanani le Hasor o enkaji e Heberi ilo Keni. Neipang'u Yael alotu anang'are Sisera, nejoki ninye, “Wou, olkitok lai, wou enkaji ai, miureishoyu.” Neaku eibelekenyunye ninye ajing atua olng'obor lenye neimulumul ninye to lmukeka. Nejoki Sisera ninye, “Nchooki siaake enkiti are naok; amu kaata enkure.” Nebol ninye olbene lo lchoni le kule neisho ninye metooko neitoki aimulumul ninye. Nejoki ninye, “Ntasho te kutuk aji o lng'obor, naa ore pooki tung'ani likilotu aikilikuan ajoki, ‘Ketii oltung'ani ene?’ Tejo, ‘Metii.’ ” Kake eewa apa Yael ina kitok e Heberi encheitoi o Lng'obor, neya enyuntu te nkaina enye, nelo ninye aakutiti, neoshoki encheitoi eseder enye nepudaki enkop, kaae neye ninye te nauri. Naa ng'ura ore esujita Barak Sisera nelo Yael anang'are ninye, nejoki ninye, “Wou maaitoduaa ilo tung'ani ligira aing'oru.” Nelo ninye atua olng'obor lenye, neirrag Sisera te ine etua, etii encheitoi o lng'obor olpura le nkomom enye. Neaku ore apa ina olong etimira Enkai Yabin olaiguanani le Kanaan te dukuya iltung'ana le Israel. Netum enkaina oo ltung'ana le Israel engolon oleng ti alo Yabin ilo aiguanani le Kanaan, o metaba anaa neidaikie Yabin olaiguanani le Kanaan. Ore apa ina olong nerany Debora o Barak olayioni le Abinoam. “Ore enkaraki natijing'a ilkituaak dukuya te Israel, ore enkaraki naitayutuo iltung'ana ate te yieunoto, meisisi Olaitoriani! Entoning intae Laaiguanak, enchoru enkiok, lo kituaak; Olaitoriani nanu aranyaki, kaoshoki nanu olkerempe, Olaitoriani Enkai e Israel. Olaitoriani, ore ishomo iyie aaing'uaa Seir, nilo iyie te nkop e Edom, neikirikira enkop, neitong'u shumata, ee, neitong'u inkatambo enkare. Neikirikira ildoinyo te dukuya Olaitoriani, lido Sinai te dukuya Enkai e Israel. Ore apa too nkolong'i e Shamgar, olayioni le Anat, ore apa too nkolong'i e Yael, eishunye ilapuayak, ore lelo oopuaya neim embata oo nkoitoi. Eishunye iloing'ok te Israel, eishunye ninche o metaba anaa nilotu iyie Debora alotu anaa ng'otonye te Israel. Te negeluni apa kulie aitin, neaku nchomito etii olarrabal, Amaa, ketumi apa elong'o anaa empere ti atua nkalifuni artam te Israel? Eipirta oltau lai ilarikok le njore e Israel, lelo apa ooitayutuo ate te yieunoto ti alo iltung'ana. Meisisi Olaitoriani. Embalunye ninye, intae ilooked isirkon barrikon, intae ilootonie ilmukekani oogol enkinyiang'a, o intae iloopuo te nkoitoi. Ore too ltoiloishi loo laranyak, too wuejitin oo nkariak, ore te ine nelikioo aaigil nkisulat o Laitoriani, enkisulata oo loing'ok lenye ti atua Israel. Neruko aadoyio aaim nchomito iltung'ana lo Laitoriani. Inyo, Inyo, Debora! Inyo, inyo taranya osinkolio! Tudumunye, Barak, toriko lelo litarayie, La ayioni le Abinoam. Nedoyio aapuo ilo pisiai loo lkituaak; neruko aadoyio iltung'ana lo Laitoriani, te nkaraki ninye, aapuo aarare lelo magil. Ore ebaiki Efraim nepuonu ninche aaipang'u nejing oerata, kisujita iyie Benchamen tenebo iltung'ana linono; ore te Makir neruko ilkituaak aapuo, ore te Sebulon neruko aapuo lelo oonap esiare o larikoni. Eetuo ilkituaak le Isaakar te nebo Debora, o Isaakar oisiligayu te Barak; atua ilo erata ekuetikitia aasuj ninye. Ore ti atua ilgilat le Ruben netii apa eoro sapuk. Kainyoo iyie pee itotona too ntare ijo pee ining nkisulat oo ntare? Ore ti atua ilgilat le Ruben netii eoro sapuk eitu emut tenaa keidim aaetu. Etotona Gilead te lido kekun Yordan; oo Dan, kainyoo pee etotona ninye too melin? Etotona Asheri aitirring'a to lomanaa le naiposha, neton abik te nedounyeki. Ore Sebulon naa olorere otipika enkishui batisho o metabaiki keeya neijia sii etiu Naftali, too neerupa ti ong'ata. Eetuo ilaiguanak, neitayu olarrabal; nearare ilaiguanak le Kanaan, te Taanak, te mbata oo nkariak e Megido; neitu ninche etum iyarunot e nkosholai. Ore te shumata keper etarate ilakir, ore epuoito ninche nearare Sisera. Ore ilo keju le Kishon onang'ari neya ninche, ina are naisarrisar, olkeju le Kishon. Lo tau lai, shomo dukuya te ngolon. Neitayu oltoilo le ndarata nkejek oo mbartan, engorori, aang'orori mbartan o larrabal. Tediaa Meros, neijia ejo olmalaika lo Laitoriani, tediaa te nduaran lelo oo manya ninye, amu eitu ninche epuonu aaretu Olaitoriani, aapuonu aaretu Olaitoriani earare lelo magil. Emayiana Yael aisul too nkituaak, ina kitok e Heber loo Lkeni, emayiana aisul ti atua nena kituaak naamanya lng'oborri. Eikilikuanua ninye enkare neisho ninye kule, eyaka ninye kule naaoto te ngirra e nkitoo. Etipika ninye enkaina enye encheitoi o lng'obor, ore te enkaina enye e tatene neibung enyuntu o laisiaayiani, neosh ninye Sisera, nedany endukuya enye, neud eseder enye. Eirruge ninye nebatata, neirrag ninye too nkejek e Yael; too nkejek enyena eirruge neirrag, ore ine neirrugore neirrag etua. Te lusie ninye eturumishe, neishir ng'otonye e Sisera erumisho te lusie, ‘Kainyoo pee eimutie engarri enye oo mbartan eitu elotu? Kainyoo pee eimutie oltoilo loo nkejek oo ngarrin enyena oo mbartan?’ Ore nena kituaak enyena ng'eni newaliki, A-a, etawalikia ninye kewan, ‘Aimetumito neorita nena naataarutua, neya ake oltung'ani entito nabo aashu are; ore te Sisera naa inkilani oomuain kumok, inkilani naaikodo, mpukunot are oomuain naaikodo te murt ai anaa iyarunot?’ Meidaa aaiko neijia ilmang'ati linono Olaitoriani! Kake ore ilchoreta nchoo eilepu anaa enkolong eilepu te ngolon enye.” Netum apa enkop enkiyeng'iyeng ilarin artam. Etaasa apa iltung'ana le Israel entorrono too nkonyek o Laitoriani, neishooyo Olaitoriani ninche apik atua nkaik e Midian ilarin oopishana. Netum enkaina e Midian engolon alang Israel; ore te nkaraki Midian neitaiki iltung'ana le Israel ate ngumot too ldoinyo, o nkapuniaa o sempewueti. Amu ore ake enkata pooki naun Isiraeli ilanterera, nepuonu Ilmidian o Ilmaleki o iltung'ana lo loo saen aarasaki ninche; nepuonu ninche aaitayu ilng'oborri aarare ninche neinyal nena daiki naatuunoki, o metabaiki elatia enye Gasa, neing'uaa Israel metii endaa, nemetii enker aashu olkiteng aashu osikiria. Amu kepuonu apa ninche te nebo nkishu enye o lng'oborri lenye, nepuonu eba anaa olmaati te nkumoi; ore ninche o ntamesin enye meikenayu, neaku keinyal apa enkop te nepuonu. Neitadou apa Midian Israel oleng, neishiraki iltung'ana le Israel Olaitoriani te nkaraki Ilmidian, neirriwaki Olaitoriani iltung'ana le Israel oloiboni; nejoki ninche, “Nji ejo Olaitoriani, Enkai e Israel: Atorikoyie apa nanu intae ailepunye aitung'uaa Misiri, naipang'unye intae te nkaji esinkaisho; nakordu intae te nkaina oo Lmisiri o te nkaina e lelo pooki ooibooki intae enkop, naaraa ninche te dukuya intae, naisho intae enkop enye; najoki nanu intae, ‘Ara nanu Olaitoriani Enkai inyi; mintokiki intae aayanyitu inkaitin oo Lamori, laa atua enkop enye imanyanya!’ Kake eitu intae ining'ining'i oltoilo lai.” Nelotu apa olmalaika lo Laitoriani neton ti abori olchani te Ofra, apa laa ole Yoash Olabiesiri, ina kata apa eidong'ito olayioni lenye Gideon enkano te nkironyet oo sabibu, ejo pee eisudoo tenkaraki Ilmidian. Neipang'aki olmalaika lo Laitoriani ninye nejoki, “Etii Olaitoriani te nebo iyie, iyie oloing'oni magilani.” Nejoki Gideon ninye, “Aatoomono, olkitok, amaa tenaa ketii Olaitoriani te nebo iyiook, kainyoo naa pee etadoikitio kuna iyiook pooki? Naa koree nkiasin enyena pooki e nking'asia apa naainosakitia iyiook iloo papa, ejo, ‘Keitu ninye eilepunye iyiook Olaitoriani aitung'uaa Misiri?’ Kake ore taata eiturrayie iyiook Olaitoriani neishooyie iyiook apik atua nkaik oo Lmidian.” Neibelekenyakino Olaitoriani ninye nejoki, “Shomo tena magilanisho ino tokordu Israel te nkaina e Midian; aime nanu laairriwayie?” Nejoki ninye, “Aatoomono, Olaitoriani, kaji nanu aiko te nakordu Israel? Ng'ura, ajo ore olgilata lang naa ninye oloti te Manase, naa nanu oloti lo lmarei lang.” Nejoki Olaitoriani ninye, “Ee, kake atii nanu te nebo iyie, naa iosh iyie Ilmidian anaa oltung'ani obo.” Nejoki ninye, “Tenaa taata kanoto omom te iyie, ntoduaaki naa olmonekie inchere iyie doi ilo likirorie nanu. Milo iyie aing'uaa ene, aatoomono, o metaba anaa nalotu nanu enitii, pee ayau enkishoroto ai, nairragie te dukuya iyie.” Nejo ninye, “Katon nanu o metaba anaa nishukunye.” Neaku eshomo Gideon enkaji enye neyieng olkuoo, neitobir imukateni neitu eisuijieki e nkurma; nepik nkiri atua enkikapu, nepik imotori atua emoti, neyaki ninye ti abori olchani, neitarasaki ninche. Nejoki ilo malaika lo Laitoriani ninye, “Ntayu nena kiri o nena mukateni neitu eisuijieki tipika ninche enchumata ena dapidapoi nibukoki imotori shumata ninche.” Neiko ninye neijia. Neitoki ilo malaika lo Laitoriani aitorioo ina ng'udi apa natii enkaina enye, neiseyie nena kiri o nena mukateni apa neitu eisuijieki; neipang'u enkima teine te ndapidapoi neinos nena kiri o nena mukateni neitu eisuijieki; neimin ilo malaika lo Laitoriani too nkonyek enyena. Nemusu taa Gideon inchere olmalaika lo Laitoriani ninye; nejo Gideon, “Oi nanu, Olaitoriani Enkai! Amu atoduare nanu olmalaika lo Laitoriani king'ura too nkomomi.” Kake etiaka Olaitoriani ninye, “Metaa eseriani te nebo iyie, miureishoyu, miye iyie.” Neshetaki Gideon te ine Olaitoriani olperere lo lasar, nejo ninye, “Olaitoriani eseriani.” Ore ebaiki ena olong neton eitashe ilo perere te Ofra nara enoo Ilabiesi. Ore ina kewarie nejoki Olaitoriani ninye, “Iwa oloing'oni li are le papaai lino, ilo oing'oni le papaai lino loo larin oopishana, niuroki enkop ilo perere lo lasar le Baal oata papaai lino, nidung ina Ashera natii embata enye; nishet olperere lo lasar lo Laitoriani Enkai ino te nchumata o sempewuet tene, nirragie isoito aitobiraki, niyau ilo oing'oni li are nintaa olasar opejori te nena keek e ina Ashera nidung meirraga te nkop.” Neya Gideon iltung'ana tomon te lelo aisiaayiak lenyena, neas anaa enatiaka Olaitoriani ninye, kake ore amu keure apa aataas dama te nkaraki olmarei lenye, o lelo tung'ana le ina ang, etaasa apa ninye ina kewarie. Ore pee einyototo iltung'ana te ina ang tadekenya enasirie ng'ura etigilaki olperere lo lasar le Baal, ore ina Ashera apa natii embata enye netudung'oki meirraga te nkop, ore ilo oing'oni li are neitaaki olasar te nchumata e ilo perere lo lasar oteshetaki. Nejokino ninche maate, “Kaing'ae otaasa ena?” Ore ake pee eidip aatakekenu neikilikuanu, nejo ninche, “Gideon olayioni le Yoash otaasa ena.” Nejoki iltung'ana te ina ang Yoash, “Mpang'unye olayioni lino, pee etum atua, amu etusulua ninye olperere lo lasar le Baal, netudung'o ina Ashera natashare.” Nejoki Yoash lelo pooki apa ooing'orunore ninye, “Ai Baal ing'oring'oro intae? Arashu orrekie lenye igolielie? Ore oloba anaa oloing'or ninye neyookini aar metua tadekenya. Tenaa ke nkai ninye nchoo eing'or kewan amu etusulayioki aauroo olperere lenye lo lasar.” Neaku ore ebaiki ina olong etaa keji ninye Yerubaal, aa taa, “Nchoo Baal eng'or agilunore ninye” amu etusulayie ninye auroo olperere lenye lo lasar. Neitoki iltung'ana le Midian o le Amaleki o iltung'ana le nkalo o loo saen aaipotuno te nebo, nelang'u Yordan neshet ilng'oborri to oerata le Yesereel. Nelotu Enkiyang'et o Laitoriani shumata Gideon, neosh ninye entarumpeta neipotuni iltung'ana le Abiesiri metusujai ninye. Neirriwaa ninye ilkiliku meshomo atua Manase pooki, neipotuni sii ninche metusujai ninche. Neitoki airriwaa ilkiliku meshomo Asheri, o Sebulon, o Naftali neilep ninche aapuo aanang'are ninche. Neitoki Gideon ajoki Enkai, “Tenaa eikordu iyie Israel te nkaina ai anaa enitejo, ng'ura, kairragie nanu endapana enker te wueji neidong'ieki enkano; ore ake pee ejing enkoleelio endapana ake, netoyio enkae wueji pooki, nayiolou taa ajo ikordu iyie Israel te nkaina ai, anaa enitejo iyie.” Netiu neijia. Ore ake pee einyototo ninye tadekenya enasirie neirony ina dapana, neironyu enkoileelio naiputa olbakuli enkare. Neitoki Gideon ajoki Enkai, “Mincho iyie engoro ino eyupuyup ti alo nanu, kake nchooki nanu mairoro ena kata nabo ake, aatoomono, nchooki nanu manyaaki atem ena kata nabo endapana; aatoomono, nchoo endapana ake metoyio, ore enkae kop pooki nchoo ejing enkoileelio.” Neiko Enkai neijia ina kewarie; amu etoyio apa endapana ake, ore enkop pooki nejing enkoileelio. Neitoki Yerubaal (aa taa Gideon) o lelo tung'ana pooki apa ootii te nebo ninye aadumunye tadekenya nepuo aaitayu ilng'oborri te mbata enchorro e Harod; netii apa ilng'oborri le Midian moikuape enye, embata oldoinyo le More, ti atua oerata. Nejoki Olaitoriani Gideon, “Eikumok kulo tung'ana ootii te nebo iyie te nanu, te naishoru ile Midian apik atua nkaik enye, mewuasayu ake Israel ti alo nanu, ejo, ‘Enkaina ai makewan naatokordua nanu. Ore naa taata mbalunye too nkiyiaa oo ltung'ana, tejo, ore pooki ng'ae otureishe neikirikira, nchoo ninye eshuko alo ang.’ ” Netem Gideon ninche, neshuko iltung'ana nkalifuni tikitam oare, neleku iltung'ana tomon. Nejoki Olaitoriani Gideon, “Eton aa kumok kulo tung'ana oleng; toriko ninche metadoi aapuo enkare pee atem nanu ninche te ine; ore olaajoki nanu, ‘Kelo ele tung'ani te nebo iyie,’ nelo te nebo iyie, ore oloba anaa olaajoki, ‘Melo ele tung'ani te nebo iyie’, melo ninye.” Nerik ninye iltung'ana enkare; nejoki Olaitoriani Gideon, “Ore pooki oilab enkare to lng'ejep lenye, anaa enailab oldia, taaraki ninye enkalo nabo, neijia ake sii nkuna ilo ogil kung aok enkare.” Ore esiana e lelo ooilap enkare, epik nkaik enye nkutukie enye naa iltung'ana iip uni; kake ore ilkulikae tung'ana pooki negil kung aaok enkare. Neitoki Olaitoriani ajoki Gideon, “Ore te lelo tung'ana iip uni ooilap enkare naa kakordu nanu intae napik iltung'ana le Midian atua inkaik inyi; naa nchoo lelo kulikae tung'ana meshomo pooki tung'ani enkang enye.” Neya ninye iltooi le lelo tung'ana o ntarumpetani too nkaik enye, neisho ninye lelo kulikae pooki le Israel meshomo ake oltung'ani olng'obor lenye, kake eiboo lelo tung'ana apa iip uni; netii apa ilng'oborri loo ltung'ana le Midian abori ninye to erata. Ore apa ina kewarie nejoki Olaitoriani ninye, “Tudumunye shomo tadoi taara enkang oo lng'oborri, amu aishorua nanu apik enkaina ino. Kake ti niure iyie ashomo, tadoi shomo ina ang oo lng'oborri te nebo Pura, osinka lino; amu ilo iyie aning enejo ninche; ore te siadi ina nikigolu oshoke pee ilo arasaki lelo ng'oborri.” Nedoyio ninye alo te nebo Pura, ilo sinka lenye, nepuo enetii iltung'ana oobayie ooata imasaa olarrabal le lelo ng'oborri. Ore lelo tung'ana le Midian o le Maleki o ltung'ana pooki lo loo saen neirrag to erata eba anaa olmaati te nkumoi; ore ntamesin enye nemeikenayu, eba anaa osinyai le nkiyopata e naiposha te nkumoi. Ore ake pee elotu Gideon, ng'ura etii oltung'ani oinosaki ole ncholiek enye enkidetidet; nejoki, “Ng'ura aidetidetua nanu emukate natadoikio atua enkang oo lng'oborri le Midian, nelotu olng'obor obo, neosh neibelekeny airragie ti oriong, neaku tenkop eirrag ilo ng'obor.” Newaliki ilo oboitare ajoki, “Mme likae ele leme olalem le Gideon olayioni le Yoash, oltung'ani le Israel; atua enkaina enye etipika Enkai Midian o lorora lenye pooki.” Ore ake pee ening Gideon elimunoto e ina kidetidet o empukunoto enye, neserem; neshuko alo ilng'oborri le Israel, nejo, “Entudumunye, amu eishorua Olaitoriani ilo orora le Midian apik atua enkaina inyi.” Neor ninye lelo tung'ana iip uni aitaa ilturrurri okuni, nepik intarumpetani nkaik enye pooki, o iltooi lemetii enkare, nepik ilkilang'ilang'eta ti atua nena tooi. Nejoki ninye ninche, “Eng'uraki nanu, niasiasa enaas; te nalotu nanu auluo e nkang oo lng'oborri entaas anaa enaas nanu. Te naosh nanu entarumpeta, nanu o lelo pooki ootii te nebo nanu, entoosh sii intae intarumpetani te pooki shoto e nkang oo lng'oborri, nibuakuku aajo, ‘Te nkaraki Olaitoriani o te nkaraki Gideon.’ ” Nelotu Gideon o lelo tung'ana iip apa ootii te nebo ninye auluo e nkang oo lng'oborri te mpolos e nkewarie, ina kata ake pee eibelekenya ilarripok, nekut ninche intarumpetani, nedany lelo tooiapa ootii nkaik enye. Neosh lelo turrurri okuni intarumopetani nedany lelo tooi; neibung too nkaik enye e kedienye inkilang'ilang'eta; ore too nkaik enye e tatene neibung'ita intarumpetani pee eosh; nebuaku ninche aajo, “Olalem lo Laitoriani o Gideon!” Neitashe ninche oltung'ani ake te wueji enye emanita ina ang oo lng'oborri, nekuet ina jore pooki, neyietu aaishir, neisik. Ore ake pee eosh nena tarumpetani iip uni neiuloki Olaitoriani olalem ake lo ltung'ani olikae tung'ani o enjore pooki; neisik ina jore o meshomo Betshita enkalo e Serera, o metabaiki olpolosie le Abel-mehola, te mbata e Tabat. Neipotuni iltung'ana le Israel te Naftali o te Asheri o te Manase pooki metusujai aamir iltung'ana le Midian. Neirriwaki Gideon ilkiliku aibulunye ina kop pooki oo ldoinyo e Efraim, ejo, “Entadou wootu mataarare iltung'ana le Midian, nimbung'ubung'u nena ariak ebaiki Betbara o Yordan.” Neipotuni iltung'ana pooki le Efraim, neibung ninche nkariak ebaiki Betbara, o Yordan sii. Neya ninche lelo kituaak pokira oare le Midian, Oreb o Seeb; near ninche Oreb metua te ndapidapoi e Oreb, ore Seeb near metua te nkironyet oo sabibu e Seeb, ina kata esujita ninche iltung'ana le Midian; neyau ninche ilukuny e Oreb o Seeb enetii Gideon telido keku le Yordan. Nejoki iltung'ana le Efraim ninye, “Kainyoo ena nintaasa iyie iyiook, eitu impot iyiook te nilo aarare Midian?” Neilepilepaki ninye oleng. Nejoki ninye ninche, “Kaa nanu ataasa te naaitanyaanyukieki intae? Aimesidan ilekunot oo sabibu le Efraim alang enkisampuare e Abisi? Eishorua Enkai apik atua inkaik inyi lelo kituaak le Midian, Oreb o Seeb: kaa nanu aaidim ataasa te naaitanyaanyukieki intae?” Neyagaa taa engoro enye apa natagorokinote apa ninye, ina kata pee ejo neijia. Nelotu Gideon Yordan nelang alo lido kekun, ninye o lelo tung'ana iip uni apa ootii te nebo ninye, enaurate nesujita ake olmang'atinta. Neaku etiaka apa ninye lelo tung'ana le Sukot, “Atoomono intae, enchoo sii ake endaa kulo tung'ana laasujita nanu, amu etaa keiterre, nasujita nanu Seba o Salmuna, lelo aiguanak le Midian.” Nejo lelo kituaak le Sukot, “Keidipa Seba o Salmuna aatijing atua enkaina ino metaa eji eikincho iyiook endaa enjore ino?” Nejo Gideon, “Ore te nkaraki ena, ore akenya te nelo nepik Olaitoriani Seba o Salmuna enkaina ai nayiet nanu iseseni linyi too ikiku lo lpurkel o te ntamejoi.” Nedumunye te ine nelo Penuel, neirorie iltung'ana te ine te ina oitoi; newaliki iltung'ana le Penuel ninye anaa apa enatawalikitia iltung'ana le Sukot. Nejoki ninye iltung'ana le Penuel, “Ore te naitoki ashukunye te seriani nagil ele talet asulu.” Netii apa Seba o Salmuna Karkor te nebo enjore enye, iltung'ana oobaya nkalifuni tomon o imiet, lelo pooki apa ootelekuaki te njore pooki oo ltung'ana lo loosaen; amu etabatatate apa iltung'ana nkalifuni iip o tikitam ooata lalema. Neilep apa Gideon aim enkoitoi naim intamesin to loosaen le Neba o Yogbeha nerasaki ina jore; amu merripo apa ina jore. Neisik Seba o Salmuna; nemir ninye ninche neibung lelo aiguanak pokira oare le Midian, Seba o Salmuna, nepik ninye ina jore pooki olkirutoto. Neitoki Gideon olayioni le Yoash ashukunye to larrabal aimu embata e nkilepunoto e Heresi. Neibung olbarnoti le Sukot, neikilikuanishore ninye, neigeroki ilo barnoti ninye ilkituaak loo lpayiani le Sukot, iltung'ana ntomoni naapishana o opishana. Nelotu ninye enetii iltung'ana le Sukot, nejoki, “Eng'ura Seba o Salmuna, laa ninche apa kinkorojie nanu ijojo, ‘Keidipa Seba o Salmuna, aatijing atua enkaina ino pee kitum aaishoo endaa lelo tung'ana linono ooiterre?’ ” Neya ninye ilpayiani le ina anasa neya ilkiku lo lpurkel o entamejoi neiteng'enie ninche iltung'ana le Sukot. Negil ninye asulu oltapeet le Penuel, nesesekuan iltung'ana le ina anasa. Neitoki ninye ajoki Seba o Salmuna, “Koree apa iltung'ana litasesekuana te Tabor?” Newal ninche, “Anaa eninkununo iyie, neijia apa eikununo ninche, oltung'ani ake te ninche; kenyaanyukie apa ninche ilayiok lo laiguanani.” Nejo ninye, “Ilalashara laainei apa ninche, ilayiok le yieyio; ore anaa enaishu Olaitoriani, tenaa apa eintajeutuo ninche aaitopok, anaata nanu masesekuan intae.” Nejoki ninye Yeter olkikau lenye, “Tudumunye tasesekuana ninche.” Kake eitu apa eshutu ilo barnoti olalem lenye; amu eturia, enkaraki apa neton aa olbarnoti. Neitoki Seba o Salmuna aajo, “Tudumunye makewan tadoiki iyiook: amu ore anaa enatiu oltung'ani, naa neijia etiu engolon enye.” Nedumunye Gideon nesesekuan Seba o Salmuna, neya nena masaa apa naatii imurto o ntamesin enye. Neitoki iltung'ana le Israel aajoki Gideon, “Ntoria iyiook, iyie o layioni o layioni lo layioni lino, amu itokordua iyiook aitayu te nkaina e Midian.” Nejoki Gideon ninche, “Maitore nanu intae, nemeitore intae olayioni lai; Olaitoriani ninye oitore intae.” Neitoki Gideon ajoki ninche, “Enchooki nanu matoomono intae nabo toki; enchooki nanu pooki ng'ae te intae ilgiso loo nkiyiaa apa liwaita le lelo tung'ana litaara.” (Amu eeta apa ninche ilgiso loo nkiyaa le sahabu, enkaraki naa ile Ishmael.) Newal ninche aajo, “Eikinchoru iyiook te nyorrata.” Neisalaash ninche olkila, nenang'aki ine pooki tung'ani lelo giso loo nkiyiaa apa ooyaua. Ore enkiroishi e lelo giso loo nkiyiaa le sahabu apa ootoomonuo naa shekeli e sahabu enkalifu nabo o iip naapishana, te nebo imasaa o nkilani sinteti apa naaishopito lelo kituaak le Midian o lkataarri apa ootii imurto oo ntamesin enye. Neitayunye Gideon enkila dorrop nepik ninye enkanasa enye makewan, Ofra; neloloito Israel pooki te ninye, neaku orreshet te Gideon o to lmarei lenye. Neaku etimira apa iltung'ana le Israel Midian, neitu ae kata eigil aairish ninche. Netum apa enkop enkiyeng'iyeng ilarin artam too nkolong'i e Gideon. Nelo apa Yerubaal olayioni le Yoash aton te nkaji enye. Neeta apa Gideon ilayiok ntomoni naapishana, inot lenyena, amu keeta apa nkituaak kumok. Ore apa enkapiani enye natii Shekem neiu sii ninye olayioni, neji enkarna enye Abimelek. Neye apa Gideon olayioni le Yoash etaa moruo oleng, nenukari ninye te nkurare e Yoash papaai lenye, te Ofra oo Labiesi. Erisio ake etua Gideon, neibelekenya iltung'ana le Israel aaloloito aasujaa inkaitin e Baal, neitaa Baal-berit enkai enye. Neitu eitoki iltung'ana le Israel aadamu Olaitoriani Enkai enye, laa ninye apa otokordua ninche aitayu te nkaina oo lmang'ati lenye pooki te pooki shoto: neitu ninche eitaas isidain olmarei le Yerubaal (aa taa Gideon) te nkaraki nena pooki sidain naaitaasa ninye Israel. Nelo apa Abimelek olayioni le Yerubaal Shekem, enetii ilalashera ng'otonye nejoki ninche o lgilata pooki lo lmarei le ng'otonye, “Entejo too nkiyiaa e kulo oomanya Shekem, ‘Kaa naikash te intae, te neitore intae ilayiok pokira ntomoni naapishana anaa te neitore intae obo?’ Entadamu sii aajo ara nanu oloito linyi o erubata inyi.” Neiro ilalashera ng'otonye kulo rorei pooki te rishata enye too inkiyiaa oo ltung'ana pooki te Shekem: neng'amaa iltauja lenye pee esujaa Abimelek, amu etejo ninche, “Olalashe lang ninye.” Neisho ninche ninye mpisai e nkosholai ntomoni naapishana naaig'uaa enkaji e Baal-berit, naa ninche eigerie Abimelek iltung'ana le pesho arruok, apa ootusuja ninye. Nelo ninye enkaji e papaai lenye te Ofra nesesekuan ilalashera lenyena, lelo ayiok le Yerubaal, pokira ntomoni naapishana, te nchumata osoit obo; kake etelekuaki apa Yotam olayioni oti le Yerubaal, amu eisudoyie kewan. Neiturrurrunye lelo oomanya Shekem te nebo, o Bet-milo pooki, nepuo ninche neitaa Abimelek olaiguanani, te mbata o lchani onyaanyukie olng'aboli le ng'ape te Shekem. Ore ake pee elikini Yotam, nelo ninye aitashe te nchumata o ldoinyo le Gerisim, neyietu aishir nejoki ninche, “Entoning'oki nanu lo tung'ana le Shekem, pee etum Enkai atoning'o intae. Eshomo apa ilkeek aagelaki ate olaiguanani, nejoki ninche oltamiyoi, ‘Ntoria iyiook.’ Nejoki ilo tamiyioi ninche, ‘Kaing'uaa nanu eilata ai naa ninye eyanyitieki nkaitin o ltung'ana, nalo alimana ti atua ilkeek?’ Nejoki lelo keek olng'aboli, ‘Wou iyie ntoria iyiook.’ Nejoki ilo ng'aboli ninche, ‘Kalo nanu aing'uaa emeloni ai o lng'anayio ilai sidai nalo alimana too lkeek?’ Nejoki lelo keek osabibu, ‘Wou iyie ntoria iyiook.’ Nejoki ilo sabibu ninche, ‘Kalo nanu aing'uaa enaisho ai oo sabibu naa ninye naitiship nkaitin o ltung'ana alo alimana too lkeek?’ Nejoki ilkeek pooki olchani onyaanyukie olayakuji, ‘Wou iyie ntoria iyiook. Nejoki ilo shani onyaanyukie olayakuji lelokeek, Tinikibukokiki nanu eilata aaitaa olaiguanani maitoria intae, wootu naa entaseriana to loip lai; naa te neme neijia, nchoo meipang'u enkima te ilo shani loo lkiku nemut lelo tarakua le Lebanon.’ “Ore naa taata, tenaa eitaasa apa intae te nkirukoto sidai o te nkanyit ina kata apa pee intaa intae Abimelek olaiguanani, naa tenintaasa apa intae esidai Yerubaal o enkaji enye, nintaasa intae ninye anaa enaishiaakino nkiaasin enyena amu etarishe papa te nkaraki intae, nepik enkishui enye batisho, nekordu intae aitung'uaa enkaina e Midian; nitudumakinote intae enkaji e papa aarare ena olong, nitasesekuana intae ilayiok lenyena, iltung'ana ntomoni naapishana te nchumata osoit obo, nintaa Abimelek olayioni le nkapiani, olaiguanani oitore lelo oomanya Shekem, enkaraki naa olalashe linyi. Tenaa eitaasa apa te nkirukoto sidai o te nkanyit o Yerubaal o enkaji enye ena olong, enting'idakinoto naa Abimelek, naa nchoo sii ninye eng'idakino intae, kake te neme neijia, nchoo enkima epuku te Abimelek, nemut lelo oomanya Shekem o Bet-milo nemut Abimelek.” Nekuet Yotam aisik, nelo Beer-sheba nebik te ine, te nkaraki naure Abimelek olalashe lenye. Neitore Abimelek Israel ilarin okuni. Neirriu Enkai oltau torrono erishata e Abimelek o lelo tung'ana le Shekem; ore lelo tung'ana le Shekem neitaas Abimelek te nkeleekisho; nchere ore ina torroni apa naitaasaki lelo ayiok pokira ntomoni naapishana le Yerubaal naa kelotu osarge lenye shumata Abimelek olalashe lenye, laa ninye apa otasesekuana ninche, o shumata lelo tung'ana le Shekem laa ninche apa ooitagolo nkaik enyena metesesekuana ilalashera lenyena. Nepik lelo tung'ana le Shekem iltung'ana olnukata pee ear ninye te nchumata o ldoinyo, neoru ninche ntokitin lelo pooki apa ootogiroitie ninche te nkoitoi, nelikini Abimelek. Nelo apa Gaal olayioni le Ebed Shekem te nebo ilalashera lenyena, neisilig apa iltung'ana le Shekem ninye. Neipang ninche aapuo nkurman, nesotu ninche isabibu te nena kurman enye oo sabibu, neirony ninche, nenya osirua, nepuo atua enkaji e nkai enye, nedaa neokisho nedek Abimelek. Nejo Gaal olayioni le Ebed, “Kaing'ae Abimelek naa eikira iyiook nyoo ile Shekem, eji pee kisiaai ninye? Keitu eisiaai olayioni le Yerubaal o Sebul, olkitok lenye, iltung'ana le Hamori, menye le Shekem? Kainyoo naa pee kisiaai iyiook ninye? Tenaa naaji kaabori enkaina ai etii ele orere anaata aiwuang'ie Abimelek. Anaata ajoki Abimelek, ‘Toponai enjore ino, nimpang'u alotu.’ ” Ore ake pee ening Sebul ilo apa laa ninye oitore enkanasa irorei le Gaal olayioni le Ebed, neyupuyup engoro enye. Neirriwaa ninye ilkiliku enetii Abimelek te Aruma, ejo, “Ng'ura, ore Gaal olayioni le Ebed o lalashera lenyena eetuo Shekem, neingolingola ninche enkanasa pee kiarare iyie. Ore naa taata, shomo kewarie, iyie o lelo tung'ana ootii te nebo iyie nirragirraga aanyu ti ong'ata. Ore te nkakenya, ore ake pee eng'oru enkolong iltiil, nidumunyenye aayooki nikuetikiki ina anasa; ore ake pee kimpang'aki ninye o lelo tung'ana ootii te nebo ninye aapuonu aarare, entaasa ninche anaa enaishiaakino.” Nedumunye Abimelek o lelo tung'ana apa ootii te nebo ninye kewarie, neirrag aanyisho pee earare Shekem too lturrurri oong'uan. Neipang Gaal olayioni le Ebed alo aitashe te nejing'ieki kishomi e nkanasa; nedumunye Abimelek o lelo tung'ana apa ootii te nebo ninye to lnukata. Ore ake pee edol Gaal lelo tung'ana nejoki Sebul, “Ng'ura, edou iltung'ana aapuonu too nchumat oo ldoinyo!” Nejoki Sebul ninye, “Iloipi loo ldoinyo idol, nijo iltung'ana.” Neitoki Gaal airo nejo, “Ng'ura, edou iltung'ana aaing'uaa empolos e nkop, ore oltim obo nelotu aimu enkalo o lchani loo lamusok onyaanyukie olng'aboli.” Neitoki Sebul ajoki ninye, “Koree naa taata enkutuk ino, iyie apa otejo ‘Kainyoo ninye Abimelek eji metaa eikisiaai ninye?’ Aime kulo tung'ana apa itemena? Mpang'a taata shomo taarare ninche.” Neipang Gaal alo ajing dukuya iltung'ana le Shekem nearare Abimelek. Nemir Abimelek ninye, neisik ninye te dukuya Abimelek, nebatata ilkumok ootipikaki ilbaa, o metabaiki enejing'ieki kishomi. Nebik Abimelek te Aruma; nearaa Sebul Gaal o lalashera lenyena, pee meitoki ninche aatoni te Shekem. Ore taisere neipang lelo tung'ana aapuo ong'ata. Nelikini Abimelek. Nedung ninye iltung'ana lenyena metaa ilturrurri okuni, neirrag aanyisho ti ong'ata: neing'orisho ninye nedol iltung'ana eipang'u aapuku te nkanasa, nedumunye ninye, aar ninche nesesekuan ninche. Neisarrisar Abimelek o ilo tim apa otii te nebo ninye nepuo aaitashe te nejing'ieki kishomi e nkanasa, ina kata eisarisaraki lelo timito pokira oare o lelo tung'ana pooki apa ootii ong'ata nesesekuan ninche. Nearare Abimelek ina anasa ina olong pooki, neya ninye ina anasa near metuata lelo tung'ana apa ootii atua, nemut ina anasa nebukoki enkop e munyan. Ore ake pee ening lelo tung'ana pooki apa ootii oltalet le Shekem ina, nejing ninche osempewuet le nkaji e Elberit. Netolikioki apa Abimelek nchere eiturrurrote iltung'ana pooki to ltalet le Shekem te nebo. Neilep Abimelek alo oldoinyo le Salmon, ninye o lelo tung'ana pooki apa ootii te nebo ninye; nedumu Abimelek entolu te nkaina enye, nedung'u olng'osila lo lchani, nedumu aiteleiki oloililai lenye. Nejoki lelo tung'ana apa ootii te nebo ninye, “Ore ina nikitoduaa nanu aasita, esarisara entaas, anaa enataasa nanu.” Neaku etudung'uo pooki ng'ae te lelo tung'ana olng'osila lenye nesuj Abimelek neirishakini ilo sempewuet, nepik ilo sempewuet enkima te shumata ninche, neaku etuata apa sii ninche iltung'ana pooki to ltalet le Shekem, iltung'ana oobaya enkalifu ilewa o nkituaak. Neitoki Abimelek alo Tebes, nelo aitayu ilng'oborri aarare Tebes, neya ninye. Kake etii apa oltalet ogol atua ina anasa, ore iltung'ana pooki le nkanasa neisik aapuo ine, ilewa pooki o nkituaak, neikenoo ate ti atua ine; nepuo ninche enchumata o ltalet. Nelotu Abimelek ilo talet, nearare ninye, nenyiku alotu enkutuk e ilo talet pee epejoo ninye te nkima. Nenang'u enkitok nabo nenang'aki osoit le shumata oituutishoreki endukuya e Abimelek, nedany elukunya enye. Neipotu nabo kata ilo barnoti apa onapaki ruparen, nejoki ninye, “Tushutu olalem lino taaraki nanu matua, mejo ake ilewa ti alo nanu, ‘Enkitok natara ninye metua.’ ” Nerem ilo barnoti aipang'ie olalem, neye ninye. Ore ake pee edol iltung'ana le Israel nchere etua Abimelek, nepuo ninche oltung'ani ake enkang enye. Neijia eikuna Olaitoriani Enkai aitalaku entorroni e Abimelek apa nataasa ti alo papaai lenye pee ear ilalashera lenyena pokira ntomoni naapishana. Neisho sii Enkai entorroni pooki oo ltung'ana le Shekem metadoiki nchumat oo lukuny enye, nelotu shumata ninche ilo deket apa le Yotam olayioni le Yerubaal. Ore te siadi Abimelek nedumunye pee ekordu Israel Tola olayioni le Pua, olayioni le Dodo, oltung'ani le Isaakar, neton apa ninye te Shamir ti atua ina kop oo ldoinyo e Efraim. Neaku ninye olarishani le Israel ilarin tikitam ookuni. Neye ninye, nenukari te Shamir. Ore te siadi ninye nedumunye Yair, ilo le Gilead, laa ninye apa otaa olarishani le Israel ilarin tikitam oare. Neeta apa ninye ilayiok tomoni uni ooked isirkon tomoni uni; neeta apa ninche nkanas tomoni uni, naaji Hoyot-yair o metabaiki ena olong, apa naatii enkop e Gilead. Neye apa Yair nenukari te Kamon. Neitoki iltung'ana le Israel aas entorrono too nkonyek o Laitoriani, neisiaai inkaitin e Baal o Ashtarot, nena aitin e Siria, o nkaitin e Sidon, o nkaitin e Moab, o nkaitin oo Lamori, o nkaitin oo Lfilisti, neing'uaa ninche Olaitoriani, neitu eisiaai ninye. Neyupuyup engoro o Laitoriani tialo Israel, nemir ninye ninche metijing'a atua enkaina oo Lfilisti o atua enkaina oo Lamori, neisomit ninche neibooki enkop iltung'ana le Israel te ilo ari. Ore too larin tomon o isiet neibooki ninche enkop lelo tung'ana le Israel apa ootii lido kekun Yordan te nkop oo Lamori, apa natii Gilead. Nelang'u Ilamori Yordan aapuonu sii aarare Yuda earare Benchamen nearare enkaji e Efraim; neaku etudupa osina Israel oleng. Neishiraki iltung'ana le Israel Olaitoriani, ejo, “Kitaasa iyiook eng'oki ti alo iyie, enkaraki nikitung'uaitie Enkai ang nikisiaai inkaitin e Baal.” Nejoki Olaitoriani iltung'ana le Israel, “Keitu apa nanu akordu intae aitung'uaa Ilmisiri naitung'uaa Ilamori, naitung'uaa Ilamoni naitung'uaa Ilfilisti? Eibookito sii intae enkop iltung'ana le Sidon, o Lmaleki, o Lmaoni; nikinchirakiki intae nanu, nakordu nanu intae aitayu ti atua nkaik enye. Ore ake eyia kitung'uaitie intae nanu nipuopuo aaisiaai kulie aitin; neaku maitoki nanu akordu intae. Enchom enchiraki nena aitin nitudutaitie; nchoo ninche ekordu intae te nkata inyi o sina.” Nejoki iltung'ana le Israel Olaitoriani, “Kitaasa iyiook eng'oki; ntaasa iyiook anaa enidol eishiaakino te iyie; kake tokordu ake duoo iyie iyiook, kitoomono iyie ena olong.” Neiwuang'ie ninche nena aitin omon apa naatii atua ninche, neisiaai Olaitoriani, netum ninye emion oleng te nkaraki osina le Israel. Neipotuni apa iltung'ana le Amon metanapata, nepik ninche ilng'oborri lenye Gilead, neiturrurro sii ninche iltung'ana le Israel te nebo, nepik ilng'oborri lenye Mispa. Ore lelo tung'ana, lelo arikok le Gilead, nejokino maate, “Kalo tung'ani oiteru aarare ile Amon? Ninye oaku olkitok te lelo pooki oomanya Gilead.” Ore apa Yepta ilo le Gilead naa olmurrani magilani, kake olayioni apa le mulayoi ninye. Gilead apa menye le Yepta. Ore apa enkitok e Gilead neiki sii ninye ilayiok; ore ake pee ebulu lelo ayiok le ina kitok enye, nearaa ninche Yepta, nejoki ninye, “Mijung iyie enkaji e papa lang; amu ira iyie oliae kitok.” Neisik Yepta aing'uaa ilalashera lenyena, nelo abik te nkop e Tob; neiturrurrokino iltung'ana le pesho Yepta, nepuo aarisho te nebo ninye. Ore te nkiti rishata neitayunye iltung'ana le Amon olarrabal Israel. Ore ake pee eitayunye iltung'ana le Amon Israel olarrabal, nepuo ilpayiani le Gilead aariku Yepta te nkop e Tob; nejoki ninche Yepta, “Wou taa olarikoni lang, pee kitum iyiook aataarare Ilamoni.” Kake etiaka Yepta lelo payiani le Gilead, “Keitu apa intae kimbayuyu nanu, nikiaraa nanu aaipang'ie te nkaji e papa lai? Kainyoo taata pee ietuo enatii nanu iatata enyamali?” Nejoki lelo payiani le Gilead Yepta, “Ena pee kimbelekenyakinote taata iyiook iyie, pee itum ashomo te nebo iyiook niarare Ilamoni, niaku olarikoni lang te lelo pooki oomanya Gilead.” Nejoki Yepta lelo payiani le Gilead, “Ti nikintokiki nanu aaya ang mashomo aarare Ilamoni, ore ake pee aaisho Olaitoriani ninche, naaku nanu olarikoni linyi.” Nejoki lelo payiani le Gilead Yepta, “Olaitoriani olo aaku shakeni te rishata ang, esipa eikiaas iyiook anaa enitejo.” Nelo Yepta te nebo lelo payiani le Gilead, neitaa ninye iltung'ana endukuya o larikoni te shumata ninche; neiro irorei lenyena pooki te dukuya Olaitoriani te Mispa. Neitoki Yepta airriwaa ilkiliku enetii olaiguanani le Amon nejoki, “Kainyoo iyie kiatakinore nanu, pee iewuo enatii nanu, pee iarare enkop ai?” Newaliki ilo aiguanani le Amon lelo apa ooirriwayie Yepta ajoki, “Enkaraki naa ore apa Israel pee elotu te Misiri neya enkop ai, ebaiki Arnon o metabaiki Yabok nelo abaiki Yordan; ore naa taata torrinyu te seriani.” Neitoki Yepta airriwaki ilkiliku olaiguanani le Amon, nejoki ninye, “Nji ejo Yepta: Eitu eya Israel enkop e Moab aashu enkop e Amon, kake ore apa pee eilepu Israel te Misiri nepuo aaim olpurkel o metabaiki Enaiposha Nanyokie nepuonu Kadesh. Neirriwaki Israel ilkiliku olaiguanani le Edom, ejo, ‘Nchoo siaake iyiook maima enkop ino.’ Kake etanya olaiguanani le Edom ening. Neitoki sii airriwaki ilkiliku olaiguanani le Moab, kake eitu enyorraa. Neaku etobiko apa Israel te Kadesh. Neim ninche olpurkel pooki nepuo aamanaa te nkop e Edom o enkop e Moab, nepuo aaitayu ilng'oborri te nkae shoto e Arnon; kake eitu ninche ejing atua enkop e Moab, ore apa Arnon naa ninye olpolosie le Moab. Neitoki Israel aairriwaki ilkiliku Sihon loo Lamori, o laiguanani le Heshbon; nejoki Israel ninye, ‘Nchoo sii ake iyiook matulusoi kitasayia iyie, aaim enkop ino aapuo enkop ang.’ Kake eitu apa eisilig Sihon Israel meima enkop enye; neaku eiturrurro apa Sihon iltung'ana lenyena pooki te nebo, neitayu ilng'oborri te Yahas, nearare Israel. Neishoru Olaitoriani Enkai e Israel Sihon o ltung'ana lenyena pooki apik atua nkaik e Israel, nemir Israel ninche; neya taa Israel ina kop pooki oo Lamori, apa oomanya ina kop. Neya sii ina kop pooki oo Lamori ebaiki Arnon o metabaiki Yabok o ebaiki olpurkel o metabaiki Yordan. Neaku taa, Olaitoriani, Enkai e Israel, ninye otarayie aoru Ilamori te dukuya iltung'ana lenyena, Israel; naa amaa iya iyie ninche araya? Eimiya iyie ina nikincho Kemosh enkai ino? Ore ina pooki natarua Olaitoriani Enkai ang te dukuya iyiook nikiya iyiook. Eira iyie supat alang Balak olayioni le Sipor, olaiguanani le Moab? Ketekeshare ae kata ninye Israel anaa keshomo ae kata aarare ninche? Amaa apa ebikito Israel te Heshbon o too nkang'itie enye kutiti, o ti atua Aroer o nkang'itie enyena kutiti, o ti atua nena anas pooki apa naatii embata e Arnon, too larin iip uni, kainyoo apaiyie pee eitu iya nena kuapi te ina kata? Eitu naa nanu aas eng'oki ti alo iyie, nikintaasa iyie nanu entorrono aitayunye olarrabal; nchoo Olaitoriani, ilo Arishani eaku olarishani too ltung'ana le Israel o too ltung'ana le Amon.” Kake ore ilo aiguanani le Amon eitu eshilaa ilo kilikuai le Yepta apa oirriwaka ninye. Nelotu enkiyang'et o Laitoriani shumata Yepta, nelo agiroo Gilead o Manase, negiroo alo Mispa e Gilead, aim Gilead negiroo Mispa e Gilead alo enetii ile Amon. Nenya Yepta olmumai to Laitoriani, nejo, “Tenaa einchoru iyie ile Amon apik atua nkaik aainei, neaku ore pooki ng'ae oipang'u aimu nkutukie e nkaji ai, pee aalotu anang'are nanu, te narrinyo alotu aisula ile Amon, neaku olo Laitoriani, naishoru nanu ninye metaa olasar opejori.” Nelang Yepta alo enetii ile Amon aarare ninche neishooyo Olaitoriani ninche apik atua inkaik enyena. Near ninche ebaiki Aroer o metabaiki elatia e Minit, nkanas tikitam, o metabaiki Abel-keramim, te sesekuanata kitok oleng. Neaku etimiraki apa ile Amon te dukuya iltung'ana le Israel. Neitoki Yepta alotu enkang enye te Mispa, naa ng'ura, neipang'u entito enye alotu anang'are ninye eranyisho neosh entampuri, naa ninye apake enkerai naata, meeta apa ae tito aashu olayioni. Ore ake pee edol ninye, nepolos nkilani enyena, nejo, “Ee entito ai! Kintadouo iyie nanu oleng, nitaa iyie enkipirunoto e nyamali sapuk te nanu; amu ataboloko nanu Olaitoriani enkutuk ai nemaidim ainyaai olmumai lai.” Nejoki ina tito enye ninye, “Papa, ti nitaboloko iyie Olaitoriani enkutuk ino, ntaasaki nanu enaba anaa enaimua enkutuk ino, amu kitalaaka Olaitoriani too lmang'ati linono te lelo le Amon.” Nejoki ninye menye, “Nchoo maaitaasi ena bae; nchooki ake duoo iyie ilapaitin oare, pee alo nanu aisampash too ldoinyo aishiraki titoisho ai, nanu o esirit ai.” Nejoki menye, “Shomo.” Neisho ninye meshomo ilapaitin oare; nelo ninye ina tito, ninye o encholuek enye, nelo aishiraki titoisho enye too nchumat oo ldoinyo. Ore te nkiting'oto oo lapaitin oare, neshukunye ninye enetii papaai lenye, apa oitaasa ninye te risioroto e ilo mumai apa oinosa. Eitu ae kata eyiolou ina tito olee. Neaku apa olkerreti te Israel nchere kepuo ake ntoyie e Israel to lari aaishiraki entito e Yepta ilo le Gilead nkolong'i ong'uan to lari. Neipotuni apa iltung'ana le Efraim metanapata, nelang ninche aapuo Sapon nejoki Yepta, “Kainyoo iyie pee italang'a alo aarare Ilamoni, neitu impotu iyiook pee kipuo te nebo iyie? Eikipejoo iyiook enkaji ino itii atua te nkima.” Nejoki Yepta ninche, “Ore nanu o ltung'ana laainei nikitii olarrabal kitok te nebo Ilamoni; ore ake pee aipotu nanu intae, neitu kikordudu nanu te nkaina enye. Ore ake pee adol ajo mikikordudu intae nanu, naya nanu enkishui ai te nkaina ai, nalang alo aarare Ilamoni, neishoru Olaitoriani ninche apik nkaik aainei kainyoo naa taata pee ileputua intae aapuonu enatii ena olong, pee kipuonunu aarare nanu?” Neiturrur Yepta iltung'ana pooki le Gilead nearare Efraim, nesesekuan iltung'ana le Gilead Efraim, enkaraki natejo, “Irara intae ilaisikak le Efraim, intae ile Gilead, te mpolos e Efraim o Manase.” Neya lelo tung'ana le Gilead ilang'at e Yordan pee earare ile Efraim. Naa ore ake pee ejo oltung'ani le lelo apa ootimiraki le Efraim, “Ntasho nanu matalang'a alo,” nejoki ninye iltung'ana le Gilead, “Eira iyie ole Efraim?” Ore ake pee ejo ninye, “A-a,” nejoki ninche ninye, “Tejo naa Shibolet,” nejo ninye “Sibolet” amu meidim ninye atejo ina aitobiraki; neibung taa ninye near metua too lang'at e Yordan. Nebatata ina kata te ine ilung'ana le Efraim nkalifuni artam oare. Neaku Yepta olarishani le Israel ilarin ile. Neye Yepta nenukari te nkanasa enye e Gilead. Ore te siadi ninye naa Ibsan le Betlehem otaa olarishani le Israel. Eeta apa ninye ilayiok tomoni uni; o ntoyie tomoni uni, neishooyo meyami iltung'ana leme lo lgilata lenye neyau ntoyie e boo neme no lgilata lenye meyama ilayiok lenyena. Neaku ninye olarishani le Israel ilarin oopishana. Neaku etua Ibsan nenukari te Betlehem. Ore te siadi ninye naa Elon le Sebulon otaa olarishani le Israel, netaa apa ninye olarishani le Israel ilarin tomon. Neitoki sii Elon aye, ilo le Sebulon nenukari te Aiyalon te nkop e Sebulon. Ore te siadi ninye naa Abdon olayioni le Hilel le Piraton otaa olarishani le Israel. Eeta apa ninye ilayiok artam o lakuyiaani tomoni uni, apa ooked isirkon ntomoni naapishana; neaku ninye olarishani le Israel ilarin isiet. Neitoki aye Abdon ilo ayioni le Hilel le Piraton, nenukari te Piraton te nkop e Efraim, te ina kop oo ndoinyo oo Lmaleki. Neitoki iltung'ana le Israel aas entorroni too nkonyek o Laitoriani; neishooyo Olaitoriani ninche apik atua enkaina oo Lfilisti too larin artam. Netii apa oltung'ani obo le Sora, lo losho le Dan, oji enkarna enye Manoa; naa koolupi apa enkitok enye nemeeta nkera. Neipang'aki olmalaika lo Laitoriani ina kitok nejoki ninye, “Ng'ura, ira iyie olupi nimiaata nkera; kake inutayu iyie niiu olayioni. Metaa, ng'ura kewan, miok enaisho oo sabibu aashu enaisho napi, niminya entoki nemesinya, amu, ng'ura, inutayu iyie niiu olayioni. Nemeetae olmurunya olotu shumata endukuya enye, amu ore ina ayioni naa keaku Olnasarayoi te Nkai ebaiki einoto enye; naa keiteru ninye akordu Israel aitung'uaa enkaina oo Lfilisti.” Nelotu ina kitok ajoki olmoruo lenye, “Eewuo oltung'ani le Nkai enatii nanu, ore empukunoto enye nenyaanyukie empukunoto o lmalaika le Nkai, keitureisho oleng; eitu nanu aikilikuan ninye eneing'uaa neitu ninye aaliki enkarna enye; kake aatiaaka ninye nanu, ‘Ng'ura, inutayu iyie niiu enkayioni; metaa naa miok enaisho oo sabibu aashu ae aisho napi niminya entoki nemesinya, amu keaku ina ayioni Olnasarayoi te Nkai ebaiki einoto o metabaiki keeya enye.’ ” Neomon Manoa Olaitoriani, nejo, “Olaitoriani lai, aatoomono iyie, nchoo ilo tung'ani le Nkai lirriua menyaaki alotu enikitii iyiook, aiteng'en iyiook enikintaas ina ayioni naini.” Nening Enkai oltoilo le Manoa, neigil ilo malaika le Nkai alotu enetii ina kitok etonita te nkurma; kake metii apa Manoa olmoruo lenye te nebo ninye. Nekuet ina kitok te nkisarrisar alo ajoki olmoruo lenye, “Ng'ura ore olapa tung'ani oewuo enatii enapa olong aanyaaka aipang'aki.” Nedumunye Manoa nelo asuj enkitok enye, nelotu enetii ilo tung'ani nejoki ninye, “Kaiyie apa ilo tung'ani oirorie ena kitok?” Nejoki ninye, “Nanu ilo.” Nejo Manoa, “Amaa, akenya te nebaya irorei linono, kaji kenya etiu ina ayioni, naa kaa kenya eas?” Nejoki ilo malaika lo Laitoriani Manoa, “Ore nena pooki natiaaka ena kitok nchoo ninye eing'or. Menya ninye ae toki naing'uaa isabibu nemeok enaisho aashu ae toki nemesinya; ore nena pooki naitanapa ninye nchoo ninye eas.” Nejoki Manoa ilo malaika lo Laitoriani, “Aatoomono, nchoo iyiook maiboo iyie pee kintobiraki iyie olkuoo le kine.” Nejoki ilo malaika lo Laitoriani Manoa, “Tinikimbok iyie nanu, nemanya nanu endaa ino; kake ti nintobir olasar opejori, ntobiraki naa Olaitoriani.” (Amu eitu apa eyiolou Manoa nchere olmalaika lo Laitoriani ninye.) Nejoki Manoa ilo malaika lo Laitoriani, “Eikiji ng'ae enkarna, pee aa te nelo kenya nebaya irorei linono, nikitum aaishoo iyie enkanyit?” Nejoki ilo malaika lo Laitoriani ninye, “Kainyoo pee inkilikuanu enkarna ai, itoduaa ajo enenking'asia?” Neya Manoa olkuoo le kine te nebo enkishoroto e ntapa, neitaiki te nchumata endapidapoi Olaitoriani olasar, ilo laa ninye oas inenking'asia. Ore ake pee eilep olng'ejep le nkima alo shumata epuku te ilo asar, neilep ilo malaika te ilo ng'ejep le nkima lo lasar eing'orita Manoa o enkitok enye; nebatata aaitabaiki nkomomi enye enkop. Eitu ae kata eigil ilo malaika lo Laitoriani aipang'aki Manoa o enkitok enye. Neyiolou apa Manoa nchere olmalaika lo Laitoriani ninye. Nejoki Manoa enkitok enye, “Esipa eikiye iyiook, amu kitoduaa iyiook Enkai.” Kake etiaaka enkitok enye ninye, “Tenaa keyieu apa Olaitoriani near iyiook matuata, anaata eitu ninye eng'amu ilo asar opejori o lasar le ntapa too nkaik ang, aashu eitodol iyiook kuna baa pooki, aashu eliki iyiook mbaa naaijo kuna.” Neiu ina kitok olayioni, neisho enkarna enye ajo Samson; nebulu ina ayioni, nemayian Olaitoriani ninye. Neitera Enkiyang'et o Laitoriani aputu ninye ti atua Mahane-dan te rishata e Sora o Eshtaol. Nedoyio apa Samson alo Timna, ore te Timna nedol entito nabo oo Lfilisti. Neilepu ninye alotu, nejoki menye o ng'otonye, “Atoduaa nanu entito nabo oo Lfilisti te Timna; entorikokoki nanu metaa enkitok ai.” Kake etiaakitia menye o ng'otonye ninye, “Aimeetae enkitok ti atua ntoyie o lgilata linyi, aashu ti atua iltung'ana lang pooki, eji pee ilo ayamu enkitok too Lfilisti lememurata?” Kake etiaaka Samson menye, “Torikokoki nanu ninye; amu aaitiship ninye nanu oleng.” Meyiolo apa menye o ng'otonye nchere Olaitoriani eing'uaa ina; amu keing'oru apa ninye erishata naarie Ilfilisti. Ore apa ina kata naa Ilfilisti ooitore Israel. Nedoyio Samson o menye o ng'otonye aapuo Timna, nepuo enkurma oo lng'anayio e Timna. Naa ng'ura, neikurrukurroki ninye olkuoo lo lng'atuny; nelotu Enkiyang'et o Laitoriani shumata ninye te ngolon, nepolos ninye ilo ng'atuny anaa oltung'ani opolos olkuoo le kine; nemeeta apa ninye toki te nkaina enye. Kake eitu apa ninye eliki menye aashu ng'otonye enataasa ninye. Nedoyio ninye alo airorie ina kitok; neitiship ina kitok Samson oleng. Ore te nkiti rishata nerrinyo alo aya ninye; neibelekenya aing'or empopong o lng'atuny, naa ng'ura, etii olemaat loo lotorok ina popong o lng'atuny, o enaisho oo lotorok. Nebelu ninye neibung too nkaik enyena, nelo, ainosaa eloito; nelotu enetii menye o ng'otonye, neisho ninche embata, nenya ninche. Kake eitu ninye eliki ninche nchere te mpopong o lng'atuny eitayio ina aisho oo lotorok. Nedoyio menye alo enetii ina kitok, neitobir Samson osirua te ine, amu neijia apa eiko ilbarnot. Ore ake pee edol iltung'ana ninye, neyau ninche iltung'ana tomoni uni pee epuonu aaku te nebo ninye. Nejoki Samson ninche, “Kaisho nanu intae oloyiote, naa ti nikindimidimi aatoliki nanu eneikununo, ti atua kuna olong'i naapishana o sirua, niyiolouu aajo kainyoo, naisho nanu intae nkilani tomoni uni e kitani o kulie kilani tomoni uni sidain; kake ti nimikindimidimi aatoliki nanu nchere kainyoo, nikinchosho intae nanu nkilani tomoni uni e kitani, o nkilani sidain.” Nejoki ninche ninye, “Tolimu oloyiote lino matoning.” Nejoki ninye ninche, “Oyiote: Etupukuo enainosi tiatua ina nainosisho. Etupukuo entoki namelok aimu ina nagol.” Neitu ninche eidim aatayiolo ilo oyiote too nkolong'i uni. Ore te nkolong e ong'uan nejoki ninche ina kitok e Samson, “Ilejileja olmoruo lino metoliki iyiook nchere kainyoo ilo oyiote mikipejoo ake iyie o enkaji e papaai lino te nkima. Ntoomono apa iyiook pee itumutumu aawaita imasaa ang?” Ore ina kitok e Samson neishir te dukuya ninye, nejoki, “Eikimba iyie, mikinyor nanu; itipikaka iyie oloyiote iltung'ana lang, neitu ninye kiliki nanu ajoki kainyoo.” Nejoki ninye, “Ng'ura, eitu aliki papa aashu yieyio, paa eijo iyie aliki?” Neishir ninye te dukuya ninye nena olong'i naapishana apa osirua lenye; ore te nkolong e naapishana neliki ina kitok enye, amu eitirrishaka apa ninye oleng. Neliki ina kitok oloyiote lelo tung'ana lenye. Nejoki ilewa apa le ina anasa ninye te nkolong e naapishana eton eitu edoyio enkolong, “Kainyoo namelok alang enaisho oo lotorok? Kainyoo nagol alang olng'atuny?” Nejoki Samson ninche, “Teneme enkashe ai itukurrishore intae, anaata intae eitu itumutumu oloyiote lai.” Nelotu Enkiyang'et o Laitoriani te ngolon shumata ninye, nedoyio ninye alo Ashkelon near metuata iltung'ana tomoni uni le ina ang, neya ntokitin enye neisho nkilani lelo apa ootolimutuo oloyiote. Ore te ngoro napi neshuko alo enkaji e papaai lenye. Neishori ina kitok e Samson ilo apa oboitare ninye, aa ninye apa shepu-lkerra lenye. Ore etulusoyie enkiti rishata, te nkata naisampuni enkano, nelo Samson amutan enkitok enye, neyaki olkuoo le kine; nejo ninye, “Kalo nanu adol enkitok ai ti atua aji.” Kake eitu apa eisho menye meshomo atua aji. Nejoki menye le ina kitok, “Kajo apa eimba ninye oleng naisho ninye ilo apa liboitare. Aimesidai ina anashe enye kiti alang ninye? Aatoomono iwa ninye te rishata e nkae.” Nejoki Samson ninche, “Ore tena kata maaitokini nanu aailap ti alo Ilfilisti te naitaas ninche entorrono.” Nelo Samson neibung mbariak iip uni, neya ilkilang'ilang'eta neitutum ninche ilkidong'o, nepik ake enkilang'ilang'et erishata oo lkidong'o oare. Ore ake pee eitudup nena kilang'ilang'eta enkima neisho nena bariak meshomo aaim atua enkano oo Lfilisti nepejoo isotot o enkano nauno o nkurman oo loirienito. Nejo Ilfilisti, “Kang'ae otaasa ena?” Nejo ninche, “Samson, ilo aputani lo Ltimini, enkaraki nawa ninye enkitok enye neisho ilo apa oboitare ninye.” Neilepu Ilfilisti aaponu nepejoo ninye o papaai lenye te nkima. Nejoki Samson ninche, “Tenaa ena intae iasiasa, kanya nanu olmumai pee aitalak intae, ore te siadi ina nalo nanu.” Near ninye ninche oleng metuata te nkumoi; nedoyio alo aton ti atua enkapune natii endapidapoi e Etam. Nepuonu Ilfilisti nepik ilng'oborri Yuda, neibung enkang e Lehi. Nejo iltung'ana le Yuda, “Kainyoo intae pee ileputua aapuonu aarare iyiook?” Nejo ninche, “Kileputua iyiook aapuonu aaen Samson, aaitaas ninye anaa enaitaasa iyiook.” Nepuo iltung'ana nkalifuni uni le Yuda enchumata e ndapidapoi e Etam, nejoki Samson, “Eimiyiolo iyie nchere Ilfilisti ilaitoriak te shumata iyiook kainyoo naa ena nintaasa iyie iyiook?” Nejoki ninye ninche, “Anaa enaaitaasa ninche nanu, ina sii nanu aitaasa ninche.” Nejoki ninche ninye, “Kietuo iyiook aaen iyie, pee kitum aaishooi iyie ti atua nkaik oo Lfilisti.” Nejoki Samson ninche, “Enosa olmumai nchere mikiaariara intae maate.” Nejoki ninche ninye, “A-a; eikien ake iyiook iyie nikinchooyo iyie aapik atua nkaik enye; mikiaar iyiook iyie tua.” Neen ninche ninye too lgoso ng'ejuko oare, neyau aailepunye te ndapidapoi. Ore ake pee elotu ninye Lehi, nepuonu Lfilisti aanang'are ninye ebuaku; nelotu Enkiyang'et o Laitoriani shumata ninye te ngolon; ore lelo goso apa ootii nkaik enyena netiu anaa iusin naaibung'a enkima; ore ienat enyena neshola too nkaik enyena. Netum ninye oltagiligili oshal lo sikiria, neitorioo enkaina adumu, ore te ilo tagiligili nesesekuan iltung'ana enkalifu. Nejo Samson, “Ore to ltagiligili lo sikiria naa osototi te shumata osototi. To ltagiligili lo sikiria atasesekuana nanu iltung'ana enkalifu.” Ore ake pee eidip ninye airoro, nenang'aa ilo tagiligili lo sikiria te nkaina enye; neji apa enkarna e ine wueji Ramat-lehi. Netir apa ninye enkure oleng, neipot ninye Olaitoriani nejo, “Nchorua iyie enkordunoto kitok te nkaina o sinka lino; naa kaye nanu taata te nkure, nabatatakino atua nkaik oo lememurata?” Nebol Enkai engumoto te Lehi, nepuku enkare te ine, ore ake pee eok, neitoki apok, nepiu. Neaku ore enkarna enye etejoki apa En-hakore; etii ine Lehi o taata. Neaku ninye olarishani le Israel too nkolong'i oo Lfilisti ilarin tikitam. Nelo apa Samson Gasa, nedol ninye emulayoi te ine, nelo enetii ninye. Netiaakaki apa lelo le Gasa, “Eeuo Samson ene,” neman ninche ine wueji neirrag aanyu ninye enkewarie pooki te nkishomi e ina anasa. Negira ninche enkewarie pooki, ejo, “Mataanyu iyiook o mekenyu, pee kitum aataar ninye metua.” Kake eirure apa Samson o metaa empolos e nkewarie; ore te mpolos e nkewarie nedumunye neya nkikeneta e kishomi e ina anasa o ng'apeta pokira are, nedotu ninche, te nebo osekenkei o pooki toki, neiteleiki ninche oloililai nenap ninche enchumata e ina doinyo apa natii dukuya Hebron. Ore te siadi ena nenyorru enkitok apa natii oerata le Sorek, naji enkarna enye Delila. Nepuonu ilkituaak loo Lfilisti enetii ninye nejoki ninye, “Ilejileja ninye, pee idol enetii engolon enye kitok, naa tiaa oitoi kiindim aaitojoola ninye, pee kitum iyiook aateen ninye nikigilu ninye; nikisilisil; naa eikincho iyiook iyie oltung'ani ake mpisai enkalifu nabo o iip nabo e nkosholai.” Nejoki Delila Samson, “Tolikioki sii ake enetii ena golon ino kitok, naa kaji naaji kinkoni ti nikieni, pee kitum oltung'ani atigilu.” Nejoki Samson ninye, “Te naaeni nanu too mpi oo nkai ng'ejuko naapishana neton eitu etoyu, nashalu nanu, natiu anaa pooki tung'ani.” Neyaki ilkituaak loo Lfilisti ninye mpi oo nkai naapishana ng'ejuko neenie ninye. Neeta apa Delila iltung'ana ooisudori ti atua olgilata ti aji. Nejoki Delila Samson, “Kipuonu Lfilisti aaibung, Samson!” Nedung ninye nena pi anaa usin naaibung'a enkima. Neaku meyioloi apa enkisudoroto e ngolon enye. Neitoki Delila ajoki Samson, “Ng'ura, kitusukenya nanu, nikiteleja nanu; tolikioki sii ake enikinkoni pee kimbung'i.” Nejoki ninye, “Te naaeni nanu too lgoso ng'ejuko leitu ae kata eenishoreki, nashalu nanu natiu anaa pooki tung'ani.” Neyau Delila lelo goso ng'ejuko neen ninye te ninche, nejoki ninye, “Kipuonu Ilfilisti aaibung, Samson!” Ore apa iltung'ana ooisudori netii olgilata ti atua aji, nedung lelo goso too nkaik enyena anaa eusi. Neitoki Delila ajoki Samson, “Ore o tene kitusukenya nanu, nikilej nanu; tolikioki nanu enikinkoni ti nikimbung'i.” Nejoki Samson ninye, “Ti nishet kuna tukusi aainei naapishana e ndukuya ai te nkarasha nintirrish oleng te ncheitoi, nashalu nanu natiu anaa pooki tung'ani.” Neaku ore apa eirura Samson, neitayu Delila nena enat oolpapit pokira naapishana neshetaki enkarasha neitirrish ninche aunoki encheitoi, nejoki ninye, “Kipuonu Ilfilisti aaibung iyie Samson!” Neinyototo ninye too njo enyena nedotu encheitoi neshurta ina arasha nashetakino. Nejoki Delila ninye, “Kaji iyie inko ti nijo, ‘Kaanyor nanu iyie,’ te nemetii oltau lino te nebo nanu? Kitusunkenya iyie kuna katitin pokira uni, neitu iyie kiliki enetii engolon ino kitok.” Ore ake pee eitirrishaki Delila ninye too rorei lenyena anaake, neitagor ninye, nenauru oltau lenye oleng. Neliki ninye mbaa enyena pooki, nejoki Delila, “Eitu ae kata eim olmurunya endukuya ai; amu ataa apa nanu Olnasarayoi te Nkai atii enkoshoke e yieyio. Ore ake naaji pee aabarni, naaing'uaa nanu engolon ai, nashalu nanu natiu anaa pooki tung'ani.” Ore ake pee edol Delila ajo etolikio ninye mbaa enyena pooki, neirriwaa olkilikuai aipotu ilkituaak loo Lfilisti pooki, ejo, “Elepu wootu ena kata nabo, amu aatolikio mbaa enyena pooki.” Neilepu ilkituaak loo Lfilisti aapuonu enetii ninye, neyau mpisiai too nkaik enye. Neisho ninye meirurayu too nkejek enyena; neipotu ninye oltung'ani, neisho ninye metabarnu nena enat naapishana oo lpapit le ndukuya enye. Neiteru aitanyamal ninye, neing'ua engolon enye ninye. Nejo Delila, “Kimbung'ita iyie Ilfilisti, Samson!” Neinyototo ninye too njo, nejo, “Kaipang nanu alo boo anaa oshi ake nkulie katitin, narerio.” Neitu apa eyiolou ninye ajo etung'uayie Olaitoriani ninye. Neibung Ilfilisti ninye nekurtu nkonyek enyena neitadou ninye aayau Gasa, neen ninye too lpisia lo suyai; neidong apa ninye enkano etii atua korokoroni. Kake enyaakita apa ilpapit le ndukuya enye aabulu ina kata eidipaki aatabarn. Neiturrurro apa ilkituaak loo Lfilisti pee etum aaitaiki olasar kitok Dagon, enkai enye, neshipa sii, amu etejo apa ninche, “Eishorua enkai ang Samson ilo mang'atinta lang apik atua nkaik ang.” Ore ake pee edol iltung'ana ninye neisis enkai enye; amu etejo ninche, “Eishorua enkai ang olmang'atinta lang apik atua enkaina ang, laa ninye apa otumuta enkop ang, netasesekuana ilkumok lang.” Ore eting'idate iltauja lenye, nejo ninche, “Empoto Samson pee elotu aitiship iyiook.” Neipotu ninche ninye ti atua korokoroni, pee eitiship ninye ninche. Neisho ninche ninye meitasho te rishata oo ng'apeta are; nejoki Samson enkayioni apa naa ninye narik aibung enkaina, “Ntasho sii iyie mairrapirrapa ng'apeta naairishaa ena aji, pee atum aigarakinoyu ninche.” Nebore apa ina aji ilewa o nkituaak; netii apa ilkituaak pooki loo Lfilisti ine; ore enchumata enkaji netii apa iltung'ana oobaya nkalifuni uni ilewa o nkituaak, ooing'orisho ina kata eiguran Samson. Neipot Samson Olaitoriani ajo, “Olaitoriani Enkai, tadamuaki nanu, nikintagol nanu aatasayia ena kata nabo, Na Ai, pee atum aitalaku too Lfilisti nabo oo nkonyek aainei.” Neibung nena ng'apeta pokira are apa naatii empolos enkaji, naa ninche apa naairisha e nkaji, neirishakino te ngolon enye pooki shumata ninche, neibung te nkaina enye e tatene nabo ng'ape neibung tene kedienye enkae. Nejo Samson, “Ntasho nanu matua te nebo Ilfilisti.” Neirrugo ninye te ngolon enye pooki; neurokino ina aji lelo kituaak o lelo tung'ana pooki apa ootii atua. Neaku ore iltung'ana apa ootuata te keeya enye naa eikumok aalang lelo apa ootasesekuana ninye eton eishu. Nepuonu ilalashera lenyena o lmarei lenye pooki aaya ninye neilepunye ninye aapuonu aanukaa te rishata e Sora o Eshtaol te nkurare e Manoa papaai lenye. Etaa apa ninye olarishani le Israel ilarin tikitam. Etii apa oltung'ani le nkop oo ndoinyo e Efraim oji enkarna enye Mika. Nejoki ninye ng'otonye, “Ore inapa pisai enkalifu nabo o iip nabo e nkosholai apa nikitooruoki iyie, naa ninche itedekishore, nidekisho too nkiyiaa aainei, ng'ura, aata nanu nena oshola; nanu apa oowa.” Nejo ng'otonye, “Metamayiana Olaitoriani enkayioni ai.” Nerrinyu ninye nena oshola apa enkalifu nabo o iip nabo aisho ng'otonye; nejo ng'otonye, “Kaiteng'el nanu kuna oshola aisho Olaitoriani aiwuang'ie te nkaina ai te nkaraki olayioni lai, pee eitayunyeki enkitanyaanyukoto e Nkai naguetuni o enkitanyaanyukoto nasholuni; ore naa taata kaarrinyoki nanu iyie.” Neaku ore apa pee errinyoki ninye ng'otonye nena pisai, neya ng'otonye mpisai iip are e nkosholai, neisho ninche ilkunono oopej enkosholai laa ninye oitobira enkitanyaanyukoto naguetuni o enkitanyaanyukoto nasholuni; nepiki apa enkaji e Mika. Neeta apa ltung'ani oji Mika enkaji oo nkaitin. Neitobiru ninye nkitanyaanyukot o enkila o lgoo oo lapolosak; neput olayioni obo loo layiok lenyena aitaa olapolosani lenye. Ore apa te nena olong'i nemeetae olaiguanani te Israel; keas apa pooki ng'ae enaba anaa esidai too nkonyek enyena makewan. Etii apa oltung'ani le Betlehem ti atua Yuda, lo lmarei le Yuda, laa olawi apa ninye; neidurraki apa ninye ine. Nelo apa ilo tung'ani aing'uaa enkang e Betlehem te Yuda alo aton te wueji neidim anotie erishata; ore eidurrita ninye nelotu ina kop oo ldoinyo e Efraim enetii enkaji e Mika. Nejoki Mika ninye, “Kaji iyie ing'uaa?” Nejoki ninye, “Ara nanu Olawi le Betlehem ti atua Yuda, naa kalo amany ewueji naidim anotie erishata.” Nejoki Mika ninye, “Totona te nebo nanu pee iaku te nanu papa o lapolosani naaisho nanu mpisai tomon e nkosholai to lari o nkilani o endaa.” Nenyorraa ilo Lawi abik te nebo ilo tung'ani; netiu ilo barnoti te ninye anaa obo loo layiok lenyena. Neput Mika ilo Lawi, neaku ilo barnoti olapolosani lenye, netii apa ninye atua enkaji e Mika. Nejo apa Mika, “Ayiolo taata ajo kaaitopok Olaitoriani, amu aata Olawi aitaa olapolosani lai.” Ore apa te nena olong'i nemeetae olaiguanani te Israel. Ore apa te nena olong'i neing'oru olosho le Dan enjung'ore enye maate ewueji nemany; amu ore ebaiki ina kata meetae enjung'ore ti atua iloshon loo Siraeli nanoto ninche. Neirriu apa ile Dan iltung'ana imiet oodupa ti atua iltung'ana lo losho lenye pooki, eing'uaa Sora neing'uaa Eshtaol, pee epuonu aaikitalan enkop nejur; nejokini ninche, “Enchom entujur enkop.” Nepuonu apa ninche ina kop oo ndoinyo e Efraim, ine netii enkaji e Mika, neirrag ine. Ore apa etii ninche embata e nkaji e Mika, neyiolou ninche oltoilo le ilo barnoti le Lawi; neibelekenya ninche nejoki ninye, “Kaing'ae likiyaua iyie ine? Kainyoo iyie iasita tene wueji? Kainyoo esiaai ino tene?” Nejoki ninye ninche, “Nji o nji aaitaasa nanu Mika: aaigero nanu, naaitaa nanu olapolosani lenye.” Nejoki ninche ninye, “Nkilikuanishore Enkai, kitoomono iyie, pee kitum aatayiolo tenaa kerasaa ena lototo nikipuoito.” Nejoki ilo apolosani ninche, “Enchom te seriani. Ore ina lototo nipuopuo netii abori enkong'u o Laitoriani.” Nepuo lelo tung'ana pokira imiet, nepuonu Laish, nedol iltung'ana apa ootii ine, eneikununo oltonei lenye te seriani, te mpukunoto oo le Sidon, eitirring'a nememuso, meeta entoki nabo e nkop nang'or, neeta karsisisho, o eneba elakuaniki ile Sidon nemeeta enaporokinore likae tung'ani. Ore ake pee epuonu ninche enetii ilalashera lenye te Sora o Eshtaol, nejoki ilalashera lenye ninche, “Kainyoo intae ilimumu?” Nejo ninche, “Entudumunye, maape iyiook aarare ninche; amu kitoduaa iyiook ina kop, naa ng'ura, kepir oleng. Eimiatata intae eniaasiasa? Emiyieta intae te lototo, kake entijing atua ina kop embung'a. Ti nipuopuo intae, naa ipuopuo aainepu iltung'ana lememuso. Kelala ina kop; ee, eishorua Enkai apik atua nkaik inyi, ewueji nemeeta entoki hoo nabo ena kop nemetii.” Nedumunye iltung'ana iip ile lo losho le Dan, ootanapate too roparen o larrabal, nepuo eing'uaa Sora o Eshtaol, neilep aapuo neitayu ilng'oborri te Kiriat-Yearim ti atua Yuda. Ore te nkaraki ena naa keji ine wueji Mahanedan o taata; ng'ura, etii enkalo o loo ntoluo le Kiriat-yearim. Negiroo ninche ine nepuo ina kop oo ndoinyo e Efraim, nepuonu enkaji e Mika. Nejoki lelo tung'ana apa imiet ooshomo aaikitalan enkop e Laish lelo alashera lenye, “Iyiololo intae aajo ore atua kuna ajijik netii enkila o lgoo oo lapolosak, o Terafim e nkitanyaanyukoto naaguetuno o naasholuno? Ore naa taata entayiolo eniaasiasa.” Neibelekenyakino ninche ine, nepuonu enkaji e ilo barnoti le Lawi te nkang e Mika, neikilikuan ninye ilomon lenyena. Ore apa lelo tung'ana iip ile le Dan, ootanapate too roparen enye o larrabal, neitashe te nejing'ieki kishomi; ore lelo tung'ana imiet apa ooshomo aaikeern enkop neilep aapuo, nejing atua nepuo aaitayu ina kitanyaanyukoto naguetuno, ina kila o lgoo oolapolosak, o enkitanyaanyukoto o Terafim, o ina kitanyaanyukoto nasholuno, ina kata eitashe olapolosani te mbata ewueji nejing'ieki kishomi te nebo lelo tung'ana iip ile apa ootanapate too masaa enye o larrabal. Ore ake pee epuo kulo atua enkaji e Mika neya ina kitanyaanyukoto naguetuno, o enkila o lgoo oo lapolosak, o Terafim, o ina kitanyaanyukoto nasholuno, nejoki ilo apolosani ninche, “Kainyoo intae iasitata?” Nejoki ninche ninye, “Tigirayu, tipika enkaina ino enkutuk ino, nilotu te nebo iyiook, niaku te iyiook papa o lapolosani. Kenaikash iyie ti niaku olapolosani te nkaji o ltung'ani obo, anaa ei ti niaku olapolosani to losho to lmarei le Israel?” Neshipayu oltau le ilo apolosani; neitayu ninye ina kila o lgoo oo lapolosak, o Terafim ina kitanyaanyukoto naguetuno, nelo ninye te nebo lelo tung'ana. Neibelekenya ninche nepuo, nepik nkera kutiti o nchoo o masaa dukuya ninche. Ore eshomo ninche aalam enkang e Mika, neishiruni iltung'ana ootii nkajijik ootaaniki enkaji e Mika, nepuo ninche aainepu lelo tung'ana le Dan. Nebuaaki ninche lelo tung'ana le Dan, ooibelekenyunye nejoki Mika, “Kainyoo nikinosita anaijo itorikuo olorere kitok obanji?” Nejoki ninye, “Iwaita intae nkaitin aainei naitayio nanu, o lapolosani, nipuopuo, kainyoo naa aatung'ueikiaki? Kainyoo naa pee kijokiki intae nanu, ‘Eji kainyoo nikinosita?’ ” Nejoki lelo tung'ana le Dan ninye, “Mincho iyie oltoilo lino metoning'i ti atua iyiook, pee mikidoiki iltung'ana ootagorote, niminie enkishui ino o nena tokitin e nkaji ino.” Nepuo lelo tung'ana le Dan aaibung enkoitoi enye; ore ake pee edol Mika nchere kegol ninche oleng aalang ninye, neibelekenya neshuko alo enkang enye. Neyau ninche nena tokitin apa naaitobirua Mika, o ilo apolosani apa ora olenye, nepuonu lelo tung'ana le Dan Laish, enetii iltung'ana oobor lememuso, nesesekuan ninche te nepi o lalem, nepejoo ina anasa te nkima. Nemeetae apa olakordunoni amu kelakuaniki apa ninye Sidon, nemetii apa kulikae tung'ana ooata enabaikinore ninche. Etii atua oerata le Bet-rehob. Neitoki apa ninche aashet ina anasa nemany atua. Neisho apa ina anasa enkarna aajo Dan, aaipotie nkakuyiaa lenye, apa otoiuo Israel; amu keji apa enkarna e ina anasa te dukuya Laish. Neitasheikinye apa lelo tung'ana le Dan ate ina kitanyaanyukoto naguetuno; naa Yonasan ilo ayioni le Geshom, olayioni le Musa, o layiok lenyena apa ilapolosak lo losho le Dan o metabau ina olong apa natarayoki ilo osho. Neaku eitasheyie apa ninche ina kitanyaanyukoto e Mika naguetuno, naitayio ninye ina kata pooki apa natii enkaji e Nkai te Shilo. Ore apa te nena olong'i, eton meetae olaiguanani ti atua Israel, netii Olawi obo otii nena rishat naaliyio e ina kop oo ndoinyo e Efraim, apa oyaka kewan enkapiani e Betlehem ti atua Yuda. Ore ina apiani negorokino ninye, nelo enkaji e menye te Betlehem ti atua Yuda aing'uaa ilo Lawi, neton ninye te ine too lapaitin oong'uan. Nedumunye ilo moruo lenye nelo asujaa, pee elo ailejilej ninye neshuku ninye ayau. Netii apa te nebo ninye osinka lenye o sirkon aare. Nelotu apa ninye enkaji e papaai lenye; ore ake pee edolmenye ina tito ninye, nelotu te nchipai anang'are ninye. Neibok ninye olaputani, menye ina tito, neton ninye te nebo ninye nkolong'i uni; neaku etadaate ninche neokisho neirrag ine. Ore te nkolong e ong'uan nedumunye ninche tadekenya nenapa ninye pee elo; kake etiaaka menye ina tito olaputani lenye, “Ntagolo kewan inosa endaa, ore te siadi ina nitum taa ashomo.” Netoni lelo lewa pokira oare aadaa neokisho te nebo; nejoki menye ina tito ilo tung'ani, “Tobiko tishipayu niyeng'iyeng'a.” Ore ake pee edumunye ilo tung'ani ajo alo, neitirrishaki olaputani ninye, o menyaaki aigil aairrag ine. Ore te nkolong e imiet nedumunye ninye tadekenya enasirie pee elo; nejoki menye ina tito, “Ntagolo kewan, totona o metigilayu enkolong.” Nedaa ninche pokira oare. Ore ake pee edumunye ilo tung'ani o ina apiani enye o laisiaayiani lenye pee epuo, nejoki ninye olaputani lenye menye ina tito, “Ng'ura, etinyikaiyie endama aaku teipa; totona siaake kewarie pooki, ng'ura etinyikua endama; irraga ene nchoo oltau lino eng'ida; ore taisere nidumunye tadekenya enasirie te nkaraki elototo ino, pee ilo ang.” Kake etanya apa ilo tung'ani eirrag ina kewarie etudumunye ninye alo, nelo abaya enkipirakinoto e Yebus (aa taa Yerusalem). Neeta apa te nebo ninye isirkon oare ooitobiraki pee ekedi, netii apa ina apiani te nebo ninye. Ore ake pee etaaniki ninche Yebus, netinyikayie endama, nejoki olaisiaayiani olkitok lenye, “Wou taata maibelekenyakinoto iyiook ena anasa oo Lyebusi, pee kirrag ena kewarie.” Nejoki ilo kitok ninye, “Mikimbelekenya iyiook aajing atua enkanasa oo ltung'ana leeiking'a leme iltung'ana le Israel ninche; kake eikigiroo iyiook aapuo Gibea.” Neitoki ninye ajoki ilo sinka lenye, “Wou matataaniki iyiook nabo e kuna wuejitin pee kirrag ena kewarie Gibea aashu Rama.” Negiroo ninche nepuo aaibung enkoitoi enye; nedoyio enkolong etii ninche embata e Gibea, nara ninye ene Benchamen, neibelekenya ninche te ine, aapuo aairrag ina kewarie Gibea. Nelo ninye aton te nkoitoi kitok e ina anasa; amu meetae oltung'ani otoriko ninche atua enkaji enye meirraga ina kewarie. Ng'ura, nelotu apa olpayian kitok eing'uaa esiaai enye ti atua enkurma teipa; ore apa ilo tung'ani naa o leina kop oo ndoinyo e Efraim, neidurraka apa Gibea amany; ore apa iltung'ana le ine wueji naa ile Benchamen. Neshumu ninye nkonyek enyena nedol ilo tung'ani elotu to losinko leina anasa nejo ilo payian kitok, “Kaji iyie iloito? Naa kaji ing'uaa?” Nejoki ninye ilo payian kitok, “Kipuoito iyiook aagiroo Betlehem ti atua Yuda, aapuo nekua rishat naabayie e ina kop oo ndoinyo e Efraim, naa ninye aing'uaa nanu. Ashomo apa Betlehem ti atuaYuda, naloito taata enkang ai, nemetii hoo ng'ae laatoriko nanu atua enkaji enye. Kiaata iyiook endaa o lkujita loo sirkon lang, o mukateni o enaisho te nkaraki nanu o ena sinka ino, o ele barnoti otii te nebo isinkan linono; eitu eng'oriki iyiook toki.” Nejo ilo payian kitok, “Meeu eseriani enitii; kagolie nanu iyieunot inono pooki; kake mirrag ena kewarie to losinko.” Neaku etorikuo apa ninye atua enkaji enye, neisho lelo sirkon lenyena olkujita, neisuj ninche nkejek enye, nedaa ninche neokisho. Ore apa ina kata etishipate ninche iltauja lenye, ng'ura, ore iltung'ana le ina anasa, iltung'ana arruok neng'adu ina aji aaman, eosh kutuk e nkaji nejoki ninche ilo payian kitok, ilo openy e nkaji, “Mpang'unye ilo tung'ani duo oewuo atua enkaji ino, pee kitum iyiook aatayiolo ninye.” Ore ilo payian, olopeny ina aji, neipang'aki ninche nejoki ninche, “A-a, ilalashera laainei, emiaas intae ena torroni; itoduaa aajo eewuo ele tung'ani atua enkaji ai, emiaas intae ena bae suuji. Ng'ura, etii ene entito selenkei neitu eyiolou olee o enkapiani enye; ntasho maipang'unye nanu ninche. Embung'a ninche nintaasiasa ninche anaa enidolidolo eishiaakino te intae; kake ore ti alo ele tung'ani emintaas ena bae suuji.” Kake mening lelo tung'ana ninye. Neaku eibung'a apa ilo payian enkapiani enye neipung'ie ninye boo mewaita ninche; neyiolou ninche ninye, neinyal enkewarie pooki o mekenyu. Ore ake pee emanaa enkakenya neisho meshomo. Ore pee ekenyu, nelotu ina kitok nebatata te kutuk aji e nkaji e ilo payian apa naa ninye etii olkitok lenye, neirrag o metawang'a. Nedumunye olkitok lenye tadekenya; ore ake pee ebol kutuk aji e ina aji neipang alo, ng'ura, eirragita enkapiani enye te kutuk aji e ina aji, eibung'ita too nkaik enyena ntaloishin e kutukaji. Nejoki ninye, “Tudumunye maape.” Kake eitu ewalikini ninye. Nepik ilo tung'ani ninye enkoriong o sikiria lenye; nedumunye ilo lee nelo enkang enye. Ore ake pee ejing ninye enkaji enye, neyau enkalem, neibung ina apiani enye neorrior ninye erubata o erubata aitaa irubat tomon o are, neirriwaa ninye nkuapi pooki e Israel. Ore pooki ootoduaa ina nejo, “Eitu ae kata easayu embae neeijo ena aashu edoli ebaiki enkolong apa naileputua iltung'ana le Israel aapuku te nkop e Misiri o metabaiki ena olong; embirribirra enguanare niwaliwala.” Nepuonu iltung'ana pooki le Israel, ebaiki Dan o metabaiki Beer-sheba te nebo enkop e Gilead; ore ina umata neiturrurro anaa oltung'ani obo te dukuya Olaitoriani te Mispa. Ore laiguanak le lelo tung'ana pooki, too loshon pooki le Israel neyau ate atua ilo turrur loo ltung'ana le Nkai, naa nkalifuni iip ong'uan apa iltung'ana oopuo too nkejek ooata lalema. Nening apa iltung'ana le Benchamen nchere eilepa iltung'ana le Israel aapuo Mispa. Nejo iltung'ana le Israel, “Entoliki iyiook, kaji apa eikununye ena torroni?” Ore ilo Lawi, ilo moruo apa le ina kitok nataraki metua, newal ajo, “Aewuo apa nanu Gibea, ina nara ene Benchamen, nanu o enkapiani ai, pee kirrag ina kewarie. Naadumakino nanu ilewa le Gibea, neman aang'adu ina aji natii kewarie; keyieu apa ninche naar nanu matua, neikony enkapiani ai, netua ninye. Naya nanu ina apiani ai nadung nanu aitaa ndung'udung'ot, nairriwaa nanu ninye aibulunye enkop pooki enjung'ore e Israel, amu etaasa apa ninche embae torrono naa olminong sapuk entorroni ti atua Israel. Eng'ura, intae iltung'ana le Israel, intae pooki, enchoru enkikoo inyi o eutaroto inyi tene.” Nedumunye iltung'ana pooki le Israel anaa oltung'ani obo, ejo, “Mikipuo iyiook hoo obo lang olng'obor lenye, nemeetae olalang orrinyo alo enkaji enye. Kake ore taata ena iyiook kintaas Gibea: eikipuo iyiook aarare ninye te oshoto e nkukuo, nikiya iltung'ana tomon te iip ti atua iloshon pooki le Israel, o iip ti atua enkalifu, o enkalifu too nkalifuni tomon, pee eyaki iltung'ana ndaiki, paa te nepuonu ninche netum aaitalaa Gibea e Benchamen elap, te ina taboi pooki entorroni nataasa ninche ti atua Israel.” Neaku eiturrurrote apa iltung'ana le Israel aaipirakinore ina anasa etaa oltung'ani obo. Neirriwaa iloshon le Israel iltung'ana meshomo atua olosho pooki le Benchamen, ejo, “Kaa torroni ena nataase ti atua intae? Ore naa taata entayu lelo tung'ana, lelo arruok le Gibea, pee kitum iyiook aataar ninche metuata, nikiwuang'ie entorroni te Israel.” Kake mening Ibenchamen oltoilo loo lalashera lenye, lelo tung'ana le Israel. Neiturrurrunye ile Benchamen te nebo aaipang'u too nkanas aapuonu Gibea, pee epuo olarrabal aarare iltung'ana le Israel. Neiturrurro ile Benchamen ina olong too nkanas enye iltung'ana nkalifuni tikitam o ile ooata lalema, te nebo lelo oomanya Gibea ooiturrurro iltung'ana iip naapishana gelunot. Ore ti atua kulo pooki netii iltung'ana iip naapishana gelunot kedienyiaa; laa keidim ake pooki lenye atanang'a oleinyuaa to soit le nkopito nemediak. Ore iltung'ana le Israel metii Benchamen neiturrur iltung'ana nkalifuni iip ong'uan oata ilalema; ore kulo pooki naa iltung'ana lo larrabal. Nedumunye iltung'ana le Israel neilep aapuo Betel, neikilikuanishore Enkai, “Kalo lang oituruk alo aarare ile Benchamen?” Nejoki Olaitoriani, “Yuda ong'as alo.” Nedumunye iltung'ana le Israel tadekenya nepuo aaitayu ilng'oborri te nkipirakinoto e Gibea. Neilep iltung'ana le Israel aapuo olarrabal aarare Benchamen; neitoluakino iltung'ana le Israel ninche te Gibea. Neipang ile Benchamen te Gibea neirragieki te nkop ina olong iltung'ana nkalifuni tikitam o are oo le Israel. Kake ore lelo tung'ana, lelo lewa le Israel eitagoluote, neitoki aaluaakino olarrabal te ine wueji netoluare te nkolong e dukuya. Nepuo iltung'ana le Israel aaishir te dukuya Olaitoriani o metaa teipa; neikilikuanishore Olaitoriani, “Eikingil iyiook aaluakino olarrabal aarare ilalashera lang lelo le Benchamen?” Nejo Olaitoriani, “Elepa enchom entaarare ninche.” Neigutu iltung'ana le Israel aapuonu aarare lelo le Benchamen te nkolong e are. Nelo Benchamen aarare ninche te Gibea te nkolong e are, nebatata te nkop iltung'ana nkalifuni tomon o isiet oo ltung'ana le Israel; ore kulo pooki naa iltung'ana loo lalema. Neitoki iltung'ana pooki le Israel, enjore pooki, aailep aapuo Betel neishir; netoni ninche te ine te dukuya Olaitoriani, neen ate aaitupukoo ina olong o metaa teipa, neitayu ilasarri oopejori o lasarri le seriani te dukuya Olaitoriani. Neikilikuanishore iltung'ana le Israel Olaitoriani (amu ore apa osanduku lo sotua le Nkai naa ine apa etii te nena olong'i, ore Finehas olayioni le Eliesa, olayioni le Aron, neisiaaisho te dukuya ilo sanduku apa te nena olong'i), ejo, “Eikingil iyiook aapuo olarrabal aarare lelo alashera lang lelo le Benchamen, anaa eikintirring'a?” Nejo Olaitoriani, “Elepa enchom; amu ore taisere kaishoru nanu ninche apik atua nkaik inyi.” Neaku eirriwayie Isiraeli iltung'ana meshomo aajing ilnukat aaman Gibea. Nepuo iltung'ana loo Siraeli aarare ile Benchamen te nkolong e uni, neitobirakino olarrabal pee earare Gibea, anaa enaikuna too nkulie katitin. Neipang iltung'ana le Benchamen aapuo aarare lelo tung'ana nerrumori aaitalam enkanasa. Ore anaa oshi too nkulie katitin neiteru aaoshisho near embata oo ltung'ana metuata, too nkoitoi, aa ore enkoitoi nabo nalala naa enailep alo Betel, nelo enkae Gibea. Ore te ina kisiajata near iltung'ana oobaya tomoni uni o are loo Siraeli. Nejo lelo tung'ana le Benchamen, “Ekueta ninche te dukuya iyiook anaa apa te dukuya.” Kake etejo iltung'ana loo Siraeli, “Maisika iyiook nikintalamaa ninche te nkanasa aarik nkoitoi kituaak.” Nedumunye iltung'ana pooki loo Siraeli too wuejitin enye, neitobirakino olarrabal te Baal-tamar; ore lelo tung'ana loo Siraeli ootii olnukata neisarrisar too wuejitin enye aapuo enkalo o loo ntoluo le Geba. Nepuonu aaimu enkalo e Gibea iltung'ana nkalifuni tomon oogeluno ti atua Israel pooki. Negolu olarrabal oleng. Neitu apa eyiolou iltung'ana le Benchamen aajo etataanikia ninche enkidaata. Nemir Olaitoriani Benchamen te dukuya Isirael. Neidaikie iltung'ana le Israel iltung'ana nkalifuni tikitam o imiet o iip nabo oo ltung'ana le Benchamen te ina olong; ore kulo pooki naa iltung'ana loo lalema. Neaku etoduaa ile Benchamen ina olong aajo etimiraki. Ekueta apa iltung'ana le Israel aailany ile Benchamen, amu eisiliga apa ninche lelo tung'ana ootii olnukata, otii embata e Gibea. Nedumunye lelo tung'ana apa ootii olnukata, neisarisaru aakuetiki Gibea, nepuo lelo tung'ana ootii olnukata aar enkanasa tenepi o lalam. Ore apa olmonekie otoning'oteki te rishata oo ltung'ana le Israel o ltung'ana ootii olnukata, naa nchere, teneitayu enkatampoi sapuk e mpuruo naailep shumata, te nkanasa, neibelekenyakino iltung'ana le Israel olarrabal. Neiterua apa Benchamen aar metuata iltung'ana loo Siraeli oobaya tomoni uni nejo ninche, “Esipa etooshoki ninche aanang'ie enkop te dukuya iyiook, anaa apa to larrabal le dukuya.” Kake ore pee eiter ailepu ilo monekie te nkanasa, te mpuruo nairrusha, neing'or ile Benchamen siadi, naa ng'ura, etaa duoo enkanasa pooki empuruo naijukujuku alo keper. Neibelekenyuni taa iltung'ana loo Siraeli, neidang iltung'ana le Benchamen, amu etoduaa ninche aajo etataanikia ninche enkidaata. Ore enkaraki ina neibelekenya ninche te dukuya iltung'ana le Israel aaipirri ong'ata; kake einepuaki ninche ore lelo ooipang'u ti atua nkanas nemut ninche te rishata enye. Nedung'oo iltung'ana le Benchamen, nemir aasujaa ninche neitunyoo ninche ebaiki Noha o meitabaiki enkipirakinoto Gibea te nkalo o loosaen. Nebatata ile Benchamen nkalifuni tomon o isiet, ore pooki naa iltung'ana yiolot. Neibelekenya ninche neisikaki enkalo e ong'ata aapuo endapidapoi e Rimon; neari metuata iltung'ana nkalifuni imiet too nkoitoi kituaak, neitirrishakini aasujaa o meitabaikini Gibom, nesesekuani iltung'ana nkalifuni are te ine. Neaku ore lelo pooki le Benchamen ootabatate te ina olong naa nkalifuni tikitam o imiet le lelo ooenita ilalema, ore pooki naa iltung'ana yiolot. Kake eibelekenyate iltung'ana iip ile neisik aapuo ong'ata enkalo e ndapidapoi e Rimon, nebik ninche te ina dapidapoi e Rimon ilapaitin oong'uan. Neitoki iltung'ana le Israel aaibelekenyakino iltung'ana le Benchamen neshurt ninche te nepi olalem, iltung'ana o ng'uesi o pooki naanoto ninche. Ore nkanas enye apa pooki naaitobira nepejoo te nkima. Einosa apa iltung'ana le Israel olmumai te Mispa, nejo, “Meetae hoo obo te iyiook oisho entito enye meyama iltung'ana le Benchamen.” Nepuonu iltung'ana Betel netoni teine te dukuya Enkai ometaa teipa, neyietu aaishir te mion. Nejo ninche, “Olaitoriani Enkai e Israel, kainyoo pee eewuo ena atiu nji tiatua Israel, eji metaa keetae taata olosho obo lemeetae te Israel?” Ore taisere neyooki iltung'ana aadumunye enasirie, neshet olperere lo lasar teine, neitayu ilasarri oopejori o lasarri le seriani. Nejo iltung'ana le Israel, “Kalo osho too loshon le Israel leitu elotu ena umata o Laitoriani?” Amu einosa apa ninche olmumai kitok tenkaraki ilo osho leitu elotu eumata o Laitoriani te Mispa, ejo, “Keari ninye metua.” Eeta apa iltung'ana le Israel olng'ur te nkaraki Benchamen olalashe lenye, nejo ninche, “Eiwuang'ieki olosho obo aaitung'uaa Israel ena olong. Kaji kinko tenikincho nkituaak lelo ootelekutua, nikinosa apa olmumai to Laitoriani nchere, mikincho ninche hoo nabo oo ntoyie ang meyama.” Nejo ninche, “Kalo osho ilo too loshon le Israel leitu elotu enetii Olaitoriani te Mispa?” Naa ng'ura, meetae hoo obo ebaiki Yabesh-gilead oshomo ina umata. Amu ore ina kata eipotitoi iltung'ana nkarn, meetae hoo obo le lelo oomanya Yabesh-gilead oirukishe. Neaku eirriwayie apa ina umata iltung'ana nkalifuni tomon oare oopi, neitanap aajoki, “Enchom entaar metuata lelo oomanya Yabesh-gilead to lalem, o nkituaak o nkera. Ena intae enchom entaas. Ore pooki lee o pooki ngoruoi naatayiolounote endaikie ninche tukul.” Netum ninche tiatua lelo oomanya Yabesh-gilead iselenken iip ong'uan nemeyiolo olee, neriku ninche ilng'oborri te Shilo, naa enkop e Kanaan etii. Neitoki ina umata pooki aairriwaki olkilikuai ile Benchamen apa ooti endapidapoi e Rimon, neibalakinye ninche eseriani. Nerrinyunye Benchamen neisho ninche ile Benchamen nena kituaak apa neitu eari metuata te Yabesh-gilead, kake eitu eidip ninche. Neing'urrie apa iltung'ana Benchamen enkaraki natipika Olaitoriani elusie iloshon le Israel. Neitoki ilpayiani leina umata aajo, “Kaa iyiook kiaas tenkaraki nkituaak e lelo ootelekutua, neidaikieki apa ing'oruo aaishie te Benchamen?” Nejo ninche, “Meeta nchere metumi enjung'ore te lelo ootelekutua le Benchamen, pee meimin ake ilo osho te Israel. Ore ake eyia, mikindim iyiook aaishoo ninche ntoyie ang meyama.” Amu einosa olmumai iltung'ana le Israel nchere, “Etediaaki ilo oisho Benchamen enkitok.” Neaku etejo ninche, “Ng'ura eetae anaake to lari osirua lo Laitoriani te Shilo, aa taa moikuape e Betel, te nkalo o loo saen e nkoitoi kitok nalo te Betel ometabaiki Shekem, o kopikop e Lebona.” Neitanap ninche ile Benchamen ejo, “Enchom erraga to lnukata tiatua nkurman oo sabibu, ning'orishosho, naa tenepuonu ntoyie e Shilo aaranyisho to sinkolio, nimpang'ung'u tiatua enkurma oo sabibu, neibung ake pooki lee enkitok enye aya, te nena toyie e Shilo, nelo enkop e Benchamen. Naa tenepuonu loo menye anaa ilalashera lenye aailepilepaki iyiook, nikijoki iyiook ninche, ‘Enchoo iyiook mawaita ninche te mpiris, amu eitu iyiook kiya ninche aaitaa nkituaak ang to larrabal, neitu sii intae inchosho iyiook, anaa naa eaku eninyi entorroni.’ ” Neas ile Benchamen ina, neya nkituaak enye terisioroto esiana enye te nena toyie apa naaranyisho naaibung'a ninche aaya. Neitoki ninche aapuo aarrinyokino enjung'ore enye, neshet inkang'itie nemany. Neitoki iltung'ana le Israel aadumunye. Nelo ake oltung'ani olosho lenye, o lmarei lenye, neipang aapuo teine, nelo ake pooki ng'ae enjung'ore enye. Ore apa te nena olong'i nemeetae olaiguanani te Israel; etaasa ake pooki tung'ani enaishiaakino too nkonyek enyena. Ore apa te nena olong'i naaitoreisho ilarishak, netii olameyu enkop, ore oltung'ani obo le Betlehem ti atua enkop e Yuda nelo amany enkop e Moab. Eshomo ninye te nebo enkitok enye o layiok lenyena oare. Ore apa enkarna e ilo tung'ani naa Elimelek, ore enkarna e nkitok enye naa Naomi. Ore nkarn oo layiok lenyena pokira oare naa Mahalon o Kilion. Ile Frati apa ninche ooing'uaa Betlehem ti atua enkop e Yuda. Eshomo apa ninche enkop e Moab nepuo aabik te ine. Kake etua apa Elimelek ilo moruo le Naomi, neing'uari aa ninye ake o layiok lenyena pokira oare. Ore kulo pokira neyam ntoyie oo Lmoabu; ore apa enkarna e nabo naa Orpa ore enkarna e nkae naa Rusi. Etobiko apa ninche te ine ilarin oobaya tomon. Ore Mahalon o Kilion neye sii ninche, neaku ore ina kitok enoto olkiyioi lo lmoruo lenye o loo layiok lenyena. Nedumunye ninye o nena toyie oo layiok lenyena pee errinyo te ina kop e Moab, amu etoning'o apa ninye te ina kop e Moab nchere etumutana Olaitoriani iltung'ana lenyena neisho ninche endaa. Nedumunye teine aapuo teine wueji netii ninye te nebo ntoyie are oo layiok lenyena, neibung enkoitoi aapuo enkop e Yuda. Kake enyaaka Naomi ajoki nena toyie are oo layiok lenyena, “Enchom entorrinyoto, shomo ake oltung'ani enkaji e ngotonye. Naa meitaasa intae Olaitoriani isupati, anaa apa enintaasa intae ilootuata o nanu. Meidimie intae Olaitoriani enoto nkang'itie, oltung'ani ake te intae netum olmoruo!” Neitoki ang'utut ninche, neyietu ninche aaishir. Nejoki ninche ninye, “A-a, eikirrinyo iyiook te nebo aapuo enetii iltung'ana linono.” Kake etejo Naomi, “Entorrinyoto enchom ntoyie aainei, kainyoo pee kiriamariyieyie nanu? Keton nanu aata ilayiok te nkoshoke ai eji pee eyooki aayam intae? Entorrinyoto enchom, ntoyie aainei, shomo ake oltung'ani enkoitoi enye, amu atamorua nanu meekure atum olmoruo. Amaa naaji ninye te najo kaata osiligi, anaa napaji ninye tenaa katum olmoruo ena kewarie naiu ilayiok, iyanyunyu naa o metubulu? Eipalipala intae meyami intae. A-a, ntoyie aainei, amu keme oleng te nanu te nkaraki intae, nchere aatigilunore nanu enkaina o Laitoriani.” Neitoki ninche aayietu aaishir, neng'utut Orpa enkaputani enye kake etamuatakine Rusi ninye. Nejo ninye, “Ng'ura, esintani ino eshomo olorere lenye nelo enetii nkaitin enyena; torrinyoyu tusuja esintani ino.” Kake etejo Rusi, “Mikisai nanu maatung'uai iyie arashu pee arrinyo eitu aasuj iyie; amu ore ewueji nilo ninye nanu alo, ore ewueji nirrag naa ninye nanu airrag; ore iltung'ana linono naa keaku iltung'ana laainei, neaku Enkai ino Enkai ai; ore ewueji ninang ninye nanu anang, naa te ine aanukari nanu. Maaitaasa nanu Olaitoriani ena aitulus tenaa ninye kaarishie keeya iyie.” Ore ake pee edol Naomi ajo eteenikine asuj ninye, neitu eitoki ajo ae. Neaku eshomo ninche pokira are ometabai Betlehem. Ore ake pee ebau Betlehem neing'asia enkang pooki te nkaraki ninche; nejo nkituaak, “Ai Naomi ena?” Nejoki ninye ninche, “Emikimpot nanu aajo Naomi, entejoki nanu Mara, amu aaitaasa nanu Olmagilani mbaa e mion. Ashomo apa nanu abore, naatorrinyuo nanu Olaitoriani arok. Kainyoo pee kimpotipoto nanu aajo Naomi, aaisilisilo nanu Olaitoriani neyaua Olmagilani entaboi shumata nanu?” Neaku etorrinyunye Naomi o Rusi ina oo Lmoabu nara entito o layioni lenye. Etorrinyunye ninche eing'uaa enkop e Moab. Nepuonu ninche Betlehem te nkiterunoto e nkisampuare e shairi. Eeta apa Naomi oltung'ani le sotua lo lmarei lo lmoruo lenye, o ltung'ani karsis, lo lmarei le Elimelek, oji enkarna enye Boas. Ore Rusi ina oo Lmoabu nejoki Naomi, “Nchooki nanu mashomo enkurma ang'osilu ilng'osil le nkano te siadi ilo latumie nanu ninye omom.” Nejoki Naomi ninye, “Shomo entito ai.” Neaku etudumunye Rusi alo asotisho ti atua enkurma asuj lelo ooisampu, nelotu apa ninye ewueji enkurma e Boas laa olo lmarei le Elimelek. Naa ng'ura, eewuo Boas eing'uaa Betlehem, nejoki lelo ooisampu enkurma, “Metaa Olaitoriani te nebo intae!” Newal ninche aajo, “Mikitamayiana Olaitoriani.” Neitoki Boas ajoki ilo aisiaayiani lenye oitasheiki lelo ooisampu, “Keneng'ae ena sila?” Nejoki ilo sinka aitasheikinoni, “Entito oo Lmoabu apa nairiamunore Naomi te nkop e Moab. Netejo ninye, ‘Aatasayia nchooki nanu matasotu naiturrur tiatua irridat le shairi o le nkano te siadi ilooisampu.’ Neaku eewuo ninye, netasotishe ebaiki tadekenya o metabaiki ena kata, eitu ninye eyagie te nkiti rishata.” Neitoki Boas ajoki Rusi, “Ore taata, toning'o, entito ai, milo asotisho ti ai kurma, nimilo aing'uaa ena, kake tataaniki ntoyie aainei. Ing'ura iyie ewueji nepuo ninche aaisampishore, nilo iyie asujaa ninche. Keitu nanu aitanap ilbarnot pee mikintanyamal ninche iyie? Naa te niata enkure shomo enetii motioo tooko ina natookutuo ilbarnot.” Negilaki kung neirugokino enkop nejoki ninye, “Kainyoo nanu pee anoto omom too nkonyek inono, eji nikitishilayie hoo nara enkomoni?” Kake etawalikia Boas ninye ajoki, “Ore nena pooki nintaasa enkaputani ino ebaiki keeya o lmoruo lino aatolikioki nanu aaitobiraki, o ina apa nitung'uayie papaai lino o yieyioo lino o enkop inyi nilotu enkop oo ltung'ana apa limiyiolo. Mikitalaaki Olaitoriani ina apa nitaasa, nikincho Olaitoriani olerrinyore te nkiputakinoto Enkai oo Siraeli, naa abori inaipuko enyena iewuo asaru!” Neitoki Rusi ajo, “Kimpirisie iyie nanu, olkitok lai, amu kintagolo nanu oshoke nirorie esinka ino te supatisho, hoo ninye nemara nanu nabo oo nkaisiayiak inono.” Ore te nkata nainosi endaa nejoki Boas, “Wou ene, pee inos endaa nintadoiki oldung'oti lino engirra atua enaisho oo sabibu.” Neaku etotona ninye te nebo nena aisampuak, neitarasaki ninye emukate natapejoki; neinos ninye o metaraposhoyu, neleku. Ore pee edumunye ninye alo asotisho, neiguan Boas ilbarnot lenyena ajoki, “Enchoo ninye metasotisho ninye tiatua o metong'osilu irridat, nimibuakiki ninye. Ore sii entaiki ninye kulie naatii irridat, ning'ueikiki ninye metasotu, nimimbuakiki ninye.” Neaku etasotishe ninye ti atua enkurma o metaa teipa; neitoki aidong nena naatasotuo ninye, neaku efa nabo e ntapa naji shairi. Nedumu ninye aya nelo atua enkanasa; neitodol enkaputani enye entoki natasotuo ninye, neyaua sii aisho ninye endaa duoo natelekua ninye etaraposhe. Nejoki enkaputani enye ninye, “Kaji duo taata ishomo asotishore? Naa kaji itaasishore? Metamayiani ilo tung'ani likitisirua iyie.” Neaku etolikio ninye enkaputani oltung'ani duo oshomo aaisiaai, nejoki, “Ore enkarna e ilo tung'ani duo lashomo aaisiaai naa keji Boas.” Nejoki Naomi ina tito o layioni lenye, “Metamayiana Olaitoriani ilo leitu eing'uaa esupatisho enye ilo oishu aashu iloo tuata!” Neitoki sii Naomi ajoki ninye, “Olo lmarei lang ilo tung'ani, obo le ntaloishi ang.” Nejo Rusi, ina tito oo Lmoabu, “Ore te nebo nena, aatiaaka ninye, ‘Tataaniki ilaisiayiak laainei, o metaba anaa neidip enkisampuare.’ ” Neitoki Naomi ajoki Rusi, ina tito o layioni lenye, “Keishiaakino entito ai te nilo iyie te nebo nkaisiayiak enyena, pee mikintanyamali ake ti ae kurma.” Neaku etataanikia apa ninye nkaisiayiak e Boas, esotisho o metabau enkiting'oto e nkisampuare e shairi o enkano; neton ninye te nebo enkaputani. Neitoki Naomi enkaputani enye ajoki ninye, “Entito ai, aimaaing'uraki nanu iyie ang, pee itum aitirring'ayu? Amaa, Boas, aime olol lgilata lang, naa atua nkaisiayiak enyena itii? Ng'ura eitobir ade shairi kewarie te wueji neidong'ishoreki. Ntukuoyu naa niyela te ilata ninchop ilkilani sidain nidoyio alo ewueji neidong'ishoreki; kake mincho kidol ilo tung'ani o metaba anaa neidip ainosa endaa neokisho. Kake te nelo ninye airrag, tisipu ewueji neirragie ninye; nilo taa abolu nkejek enyena nirrag te ine; naa eikiliki ninye enias.” Newal ninye ajo, “Ore pooki nijo kalo nanu aas.” Neaku eshomo ninye ewueji neidong'ishoreki neas anaa enaitanapa enkaputani ninye. Ore eidipa Boas ainosa endaa neokisho netishipe oltau lenye nelo ninye airrag te bayie o sototi le nkurma. Nelotu Rusi akiti nebolu nkejek enyena, neirrag. Ore te mpolos e kewarie neipirriu ilo tung'ani, neibelekenya, naa ng'ura, eirragita enkitok too nkejek enyena! Nejo ninye, “Ira ng'ae?” Newal ninye ajo, “Ara nanu Rusi, enkaisiaayiani ino; isalaasha olkila lino ntoipo enkaisiaayiani ino amu iyie olo lgilata lang o taana.” Nejoki ninye, “Mikitamayiana Olaitoriani, entito ai; inyaaka aitasapuk ena supatisho aitulusoo tene dukuya, nchere eitu iyie ilo asujaa ilbarnot, aa karsisi o aa aisinak. Ore naa taata entito ai, miureishoyu, kaaitaas nanu nena pooki niomonu, amu eyiolo pooki lena ang nchere ira enkitok e tipat. Naa kesipa nchere ara nanu olo lgilata linyi linyikare, ore ake eyia etii olo lgilata linyikare alang nanu. Totona ena kewarie, ore tadekenya, ti nikintaas ninye te rishat o ltung'ani lo lgilata, naa sidai; nchoo ninye eas ina. Kake te nemeyieu ninye neas ina rishata o ltung'ani lo lgilata te iyie, ore anaa enaishu Olaitoriani, nalo nanu aas erishata o ltung'ani lo lgilata te iyie. Irraga mekenyu.” Neaku eirraga ninye too nkejek enyena o mekenyu, kake etudumunye ninye enasirie; nejoki Boas, “Mincho ake eyiolouni aajo eewuo enkitok ewueji neidong'ishoreki.” Nejo ninye, “Iyau ilo karasha linchopito toluaa.” Neaku etoluaa ninye, nepik ninye mboreitin ile e shairi neitanap ninye; nelo ninye atua enkanasa. Ore pee elo ninye enetii enkaputani, nejoki ninye, “Kaji eikunari mbaa, entito ai?” Neliki Rusi nena pooki naaitaasa ilo tung'ani, ejo, “Ore kuna boreitin ile e shairi ninye laaishoo, amu etejo ninye, ‘Milo too nkaik naarook enetii nkaputani ino.’ ” Newalu Naomi ajo, “Taanyisho entito ai o metaba anaa niyiolou enetiu ena bae, amu meitirring'a ilo tung'ani, kake kelo taata aitabaya ena bae.” Neilep Boas alo kishomi neton te ine; naa ng'ura ore oladuoo lo lgilata lenye onyikare oimaka Boas nelotu agiroo. Neaku etiaaka Boas, “Mbelekenyunye olchore, totona tene;” neibelekenyunye ninye neton. Neyau ninye ilpayiani tomon le ina anasa nejo, “Entotoni tene;” netoni ninche. Neitoki ninye ajoki lelo lo lgilata lenye, “Ore Naomi enoshi natorrinyunye te nkop e Moab, nemirita enkiti wueji e nkop apa o ltung'ani lo lgilata lang oji Elimelek. Neaku atejo nanu kaaliki iyie, naajoki, Inyang'u te dukuya kulo ootoni tene, o te dukuya kulo payiani lo lorere lang. Tenaa iyie inyang'u; kake te niminyang'u, tolikioki nanu, pee atum atayiolo, amu meetae likae likidutieki pee inyang'u, naa nanu laaitoki asuju.” Nejoki ninye, “Kainyang'u nanu.” Neitoki Boas ajoki, “Ore akenya enkolong ninyang'u enkurma te nkaina e Naomi, ninyang'u sii ninye Rusi, ina tito oo Lmoabu, ina oliai olapa lemeishu pee errinyokini enkarna e ilo lemeishu enjung'ore enye.” Neitoki ilo tung'ani lo lgilata lenye ajo, “Maidim nanu ainyang'u te nkaraki kewan ai, pee mainyal ake enjung'ore ai. Iwa iyie erishata ai metaa enino makewan, amu maidim nanu atalaku.” Ele apa olkerreti too le Israel too nkolong'i e apa, too mbaa naaipirta elakunoto o ewalunoto; ore pee eitisipi enkinyiang'a neitayu oltung'ani enamuke neisho olikae, naa ena pukunoto apa enkitabaroto too Siraeli. Neaku ore ake pee ejoki ilo tung'ani lo lgilata lenye Boas, “Inyang'u iyie,” nedotu ninye enamuke. Neitoki Boas ajoki lelo payiani o ltung'ana pooki, “Irara intae ilchakenini ena olong nchere ainyang'ua nanu te nkaina e Naomi nena pooki apa naara ine Elimelek, o pooki naara ine Kilion o Mahalon. O Rusi sii ina tito oo Lmoabu ina, oliai e Mahalon, ainyang'ua nanu ninye metaa enkitok ai, pee eitudupari enkarna e ilo otua te njung'ore enye, pee meiminieki enkarna e ilo lemeishu too lalashera lenyena, o te kishomi e wueji enye; irara intae ilchakenini ena olong.” Nejo lelo tung'ana pooki ootii kishomi, o lpayiani, “Kira iyiook ilchakenini. Meitotiuo Olaitoriani ina kitok nalotu atua enkaji ino anaa Raheli o Lea, naa ninche pokira naatesheta enkaji e Israel. Tubulu iyie te Efrata nining'oyu te Betlehem; naa metotiuo enkaji ino anaa enkaji e Peres, laa ninye etoikio Tamar Yuda, te nkaraki nkera nikincho iyie Olaitoriani tena siankiki.” Neaku eewa Boas Rusi neitaa enkitok enye; nelo aboitare ninye, neisho Olaitoriani metunutayu, neiu enkayioni. Nejoki inkituaak Naomi, “Meisisi Olaitoriani, laa ninye leitu kipalaa iyie ena olong miata oltung'ani lo lgilata, naa metoning'oyu enkarna enye te Israel! Keaku ina kerai olikirrinyoki enkishui nikintagol te moruao ino; amu ore ina tito o layioni lino nikinyor iyie, nelang ninye ilayiok oopishana, netoiuo ninye.” Kaae nedumu Naomi ina kerai neirragie to lgoo lenye, neaku ninye enkaing'urani enye. Nedung'oki nkituaak e latia e nkarna, ejo, “Etoikioki Naomi olayioni.” Neisho ninche ninye enkarna aajo Obed; ninye apa menye le Yese, menye le Daudi. Ena ninye eishoi e Peres: Peres apa menye le Hesron, neiu Hesron Raam, Neiu Raam Aminadab, Neiu Aminadab Nashon, neiu Nashon Salmon, neiu Salmon Boas, neiu Boas Obed, Neiu Obed Yese, neiu Yese Daudi. Etii apa oltung'ani obo le Ramataim, le ina kop oo ldoinyo e Efraim, oji enkarna enye Elkana olayioni le Yeroham, olayioni le Elihu, olayioni le Tohu, olayioni le Sufi ilo le Efraim. Neeta apa ninye nkituaak are; ore enkarna e ina e dukuya naa Hana, ore enkarna e nkae naa Penina. Neeta apa Penina nkera kake meeta apa Hana nkera. Naa keilep apa ele tung'ani to lari ake o to lari ailep te nkanasa enye alo aserem nepolosaki Olaitoriani loo lororani te Shilo, te ine apa nerayie ilayiok pokira oare le Eli, Hofni o Finehas ilapolosak lo Laitoriani. Ore apa te ina olong napolosisho Elkana, neisho ninye irubat Penina, enkitok enye o layiok lenyena pooki o ntoyie enyena; naa, ore hoo nenyor apa Hana neisho ninye erubata nabo ake, amu eikeno Olaitoriani enguset enye. Ore apa Penina naitayunore ninye naa keitagor ninye oleng neinosie osina, te nkaraki naikeno Olaitoriani enguset enye. Neikunari neijia to lari ake, o to lari. Ore anaake te nelo ninye enkaji o Laitoriani neitagor apa ina aini enye ninye. Ore enkaraki ina neishir Hana ometaa menya endaa. Ore Elkana ilo payian lenye, nejoki ninye, “Hana, kainyoo peyie inchir? Naa kainyoo pee minya endaa? Naa kainyoo pee eeta oltau lino osina? Aimalusoo too ilayiok tomon te iyie?” Ore pee eidip ninche aainosa endaa, neokisho te Shilo nedumunye Hana. Netonita apa ina kata Eli ilo apolosani to ltonet te mbata e ng'ape e kutukaji e ina aji o Laitoriani. Neeta apa ninye Hana emion sapuk to ltau neomon Olaitoriani, neishir te mion. Nenya ninye olmumai nejo, “Olaitoriani loo lororani, tenaa eing'or iyie te sipata osina le sinka ino, nikidamu nanu, nimincho kirikino esinka ino, kake nincho esinka ino olayioni, naisho nanuninye Olaitoriani inkolong'i pooki e nkishui enye, nemeetae olmurunya oiseyie endukuya enye.” Ore eomonito ninye te dukuya Olaitoriani, neing'or Eli enkutuk enye. Eirorita apa Hana to ltau lenye, nchonito enyena e nkutuk ake naaiseuseu nemening'o oltoilo lenye; ore enkaraki ina nejo Eli tenaa kenkitok natemere. Nejoki Eli ninye, “Imera ade o anu? Intalamai ina aisho ino.” Kake etawala Hana ajo, “A-a, Olkitok lai, ara nanu enkitok naata emion to ltau; eitu nanu aok enaisho naitemerisho, agira nanu abukoki Olaitoriani enyamali oltau lai. Minko naa esinka ino aitaa enkitok e pesho, amu ore ena rishata pooki kagira alikioo eyieunoto ai o sina lai.” Neitoki Eli awaliki, “Shomo te seriani, mikinchoo Enkai oo Siraeli nena nitasayua te dukuya ninye.” Nejo ninye, “Nchoo esinka ino menoto omom too nkonyek inono.” Nelo ina kitok te nkoitoi enye nenya endaa, neitu ninye eitoki aisinanuo. Neinyototo ninche aayooki tadekenya neserem Olaitoriani; neitoki aashuko aapuo enkang enye te Rama. Neyiolou Elkana Hana ina kitok enye, nedamu Olaitoriani ninye; ore pee ebaya enkata nenutayu Hana neiu ninye enkayioni, nejo ninye enkarna enye Samuel, amu etejo ninye, “Atoomonuo nanu ninye to Laitoriani.” Ore ilo tung'ani oji Elkana o enkaji enye pooki neilep aapuo aaitaiki Olaitoriani olasar te pooki ari, nelak ninye olmumai lenye. Kake eitu ninye eilep Hana alo, amu etiaaka ninye olpayian lenye, “Te neoruni enkerai lke, nayau nanu ninye, pee etum ataliooyu te dukuya Olaitoriani, neton te ine ntarasi.” Nejoki Elkana ilo payian lenye, “Taasa ina naa ninye sidai te iyie; totona ometaba anaa neoruni ninye lke; meibung'a ake duoo ninye Olaitoriani ororei lenye.” Neton ina kitok neing'or aitubulu olayioni lenye, ometaba anaa neere ninye. Ore ake pee eoruni ilke neya ninye ailepie te nebo ninye, oloing'oni loo larin okuni, o entemet nabo e nkurma o olbene lo lchoni le naisho oo sabibu, neyau ninye enkerai ina aji o Laitoriani natii Shilo; naa ei kiti ina kerai. Neyieng' ninche ilo oing'oni, neitoki ninche aayau ina kerai enetii Eli. Nejo ninye, “Olkitok lai! Ore anaa eninchu, Olkitok lai, ara nanu ina kitok apa naitashe tene te dukuya iyie, eomonito Olaitoriani. Atoomonuo naaishori ena kerai, naaishoo nanu Olaitoriani eomonunoto ai apa natoomono ninye. Metaa aishoo nanu ninye Olaitoriani. Ore anaa neishu ninye naa keaku olo Laitoriani.” Neserem ninche Olaitoriani te ine. Neitoki Hana aomon nejo, “Keshipakino oltau lai Olaitoriani; eitaaki kitok engolon ai to Laitoriani. Etaboloki enkutuk ai, matakueniki ilmang'ati laainei, amu kang'idakino nanu enjeunoto ino. Metii likae sinyati anaa Olaitoriani. Metii likae leme iyie, metii endapidapoi nanyaanyukie, Enkai ang. Emintoki aairo aabuaku to lwuasa, emincho enkitokoos eimu nkutukie inyi; amu ore Olaitoriani naa Enkai e ng'eno, naa te ninye eineneng'i iasat. Etigilate nkaik e lelo magil. Kake eitagoloki lelo ooshal. Ore lelo apa ooiputakinote neisilenoitie ate pee etum endaa, kake ore lelo apa ooisumash nemeekure eisumash. Etoiuo ina apa olupi nkera naapishana, kake ore ina apa naata nkera kumok nemeekure eeta. Olaitoriani oar metua naa ninye oitopiu. Eitadou ninye aya enemeneng'a neilepunye. Olaitoriani oitaa aisinani naa ninye oitaa karsis. Ninye oitadou, ninye sii oilepie. Ninye odumu olaisinani aitung'uaa enterit. Nedumu ilaisinak aitung'uaa olchala loo nkuruon. Neitoton ninche te nebo lelo kituaak nejung olorika le nkanyit. Amu ore ing'apeta e nkop naa ino Laitoriani naa shumata ninche eiteleikia enkop. Kerrip ninye nkejek e lelo ooisiligayu lenyena. Kake keiturrarri lelo arruok tiatua enaimin; amu mme te magilanisho eisulu oltung'ani. Ore lelo mang'ati lo Laitoriani naa kegiligili aaitaa mbelibelat, kegilunore ninche naa kedaraki ninche te keper. Kedung'oki Olaitoriani enkiguana ineeiting'ie enkop, neisho ninye engolon ilo aiguanani lenye, neilepie ninye engolon eilo lenye otubukokoki eilata aaput.” Nelo Elkana ang te Rama. Neisiaai ina ayioni Olaitoriani te ine netii Eli ilo apolosani. Ore apa lelo ayiok le Eli naa iltung'ana le pesho; meshilaa apa ninche Olaitoriani. Ore apa olkuaak loo lapolosak loo ltung'ana naa nchere te neitayu pooki ng'ae olasar, nelotu osinka lo lapolosani, eton eitokitok inkiri, eeta enkisuret oo lala okuni te nkaina enye, neisuroki ina kisuret atua entereet arashu ene eng'irra arashu emoti oo nkulukuok, arashu ae toki; ore ina pooki nayau ina kisuret neya olapolosani makewan. Neas ninche ina te Shilo too Siraeli apa ooetuo ine. Ore ake sii, eton eitu epeji eilata, nelotu osinka lo lapolosani nejoki ilo tung'ani oitayuto olasar, “Nchoru nkiri o lapolosani naapeji. Amu meng'amaa ninye nkiri naayiera te iyie, kake inaajon.” Naa te nejoki ilo tung'ani ninye, “Nchoo ninche eng'as apej eilata, pee intoki aya inaaba anaa iniyieu,” nejo ninye, “A-a, iyau tena kata; naa te neme neijia, naya nanu te ngolon.” Ei sapuk apa ina ng'oki e lelo barnot oleng te dukuya Olaitoriani amu eitu eyanyit lelo tung'ana olasar lo Laitoriani. Keisiaaisho apa Samuel te dukuya Olaitoriani, ina ayioni eishopito enkila sidai dorrop. Naa keripaki apa ng'otonye oloti kila neyaki ninye te pooki ari, te neilep alo te nebo olpayian lenye epuo aaitayu olasar lo lari. Nemayian Eli Elkana o enkitok enye, nejoki ninye, “Mikinchoo iyie Olaitoriani inkera tena kitok te ina sile apa naisilenoki ninye Olaitoriani,” neitoki ninche aashuko aapuo enkang enye. Neitoki Olaitoriani amutan Hana, nenutayu ninye neiu ilayiok okuni o ntoyie are. Nebulu ina ayioni Samuel te dukuya Olaitoriani. Etamorua apa Eli oleng ina kata, nening ninye nena pooki naaitaasita ilayiok lenyena Israel pooki, neboitare ninche nena kituaak naasisho te kutukaji e ilo ng'obor le ntumo. Nejoki ninye ninche, “Kainyoo pee iasiasa kuna baa? Amu atoning'o nanu iasat inyi torrok too ltung'ana pooki. A-a, ilayiok laainei, ime lomon supati lelo laning iltung'ana eidapashaa. Te neas oltung'ani eng'oki tialo oltung'ani neitobiraki Enkai osotua, kake amaa teneas oltung'ani eng'oki tialo Enkai, kaing'ae namitu ninye.” Kake mening ninche oltoilo le papaai lenye; amu eyieunoto apa o Laitoriani pee ear ninche metuata. Nebulu ina ayioni Samuel to sesen netum omom to Laitoriani o too ltung'ana. Nelotu oltung'ani le Nkai enetii Eli, nejoki ninye, “Inji ejo Olaitoriani, Aitodolua apa nanu kewan te nkaji e papaai lino apa etii ninche Misiri, eisiaaisho te nkaji e Farao. Nagelu nanu ninye ti atua iloshon pooki le Israel pee eaku olapolosani lai, pee eilep alo olperere lai lo lasar, apej enkorropil, neishop ina kila dorrop te dukuya nanu; naisho nanu enkaji e papaai lino ilasarri pooki le nkima ooing'uaa iltung'ana le Israel. Kainyoo naa pee ing'or too nkonyek olorok lelo asarri laainei o nkishorot aainei apa naitanapishe, niyanyitu ilayiok linono aitalang nanu, intopiripiri ate too rubat nigelulu te pooki kishoroto oo ltung'ana laainei Israel? Ore enkaraki ena eibalunye Olaitoriani Enkai oo Siraeli: ‘Aitisipa nanu nchere, ore enkaji ino o enkaji e papaai lino naa kejing atua neipang te dukuya nanu ntarasi’; kake eibalunye taata Olaitoriani; ‘Metalakuana ena te nanu; amu ore lelo laayanyit nanu nayanyit nanu,’ ore lelo laamen nanu neitololoikini. Ng'ura, kepuonu inkolong'i, pee adung' nanu engolon inyi o engolon e nkaji e papaai lino, metaa meitoki atii oltung'ani kitok atua enkaji ino. Ore to sina ning'or iyie te nkong'u o lom ina karsisisho pooki nayookini aaisho Israel; nemeitoki ae kata atii oltung'ani kitok atua enkaji ino ntarasi. Ore oltung'ani te intae leitu aiwuang'ie aitung'uaa olperere lai lo lasar nelekuni pee eishir nkonyek enyena neisinanuo oltau lenye; ore emponaroto pooki e nkaji ino neye to lalem loo ltung'ana. Naa ore ena nadoiki ilayiok linono pokira oare, Hofni o Finehas neaku olmonekie te iyie! Keye ninche pokira te nkolong nabo. Nadumaki nanu kewan olapolosani supat, oas ninye te risioroto e ina natii atua oltau lai o atua endamunoto ai; nashetaki nanu ninye enkaji nasipa, nejingu ninye neipang boo te dukuya ilo gelunoti lai intarasi. Ore pooki ng'ae oing'uari ti atua enkaji ino nelotu airrugo asai ninye te nkosholai nabo arashu emukate, naa kejo, ‘Tipikaki nanu aatoomono iyie, atua ewueji nabo oo lapolosak, pee atum ainosa embelati e mukate.’” Ore apa ina ayioni Samuel neisiaai Olaitoriani ti abori Eli. Nemeibala apa ororei lo Laitoriani nena olong'i. Meetae apa nduaat oleng. Ore apa ina kata Eli, eidipa nkonyek aailiilai, metaa meekure edolisho, neirura apa ninye te wueji enye makewan; Ore oltaa lo Laitoriani neton eitu enye, neirragita Samuel ti atua enkaji o Laitoriani, te ine apa netii osanduku le Nkai. Neipotisho Olaitoriani ajo, “Samuel! Samuel!” Nejo ninye, “Nele nanu!” Neipirri alo enetii Eli nejo, “Nele nanu, amu kimpoto iyie nanu.” Kake etejo ninye, “Eitu nanu aipot; nyaaki irraga.” Nelo ninye airura. Neitoki Olaitoriani aipotisho nejo, “Samuel!” Nedumunye Samuel nelo enetii Eli, nejo, “Nele nanu, amu kimpoto.” Kake etejo ninye, “Eitu nanu aipotisho, Enkayioni ai, nyaaki irraga. Neton apa eitu eyiolou Samuel Olaitoriani, neton eitu eibalunyeki ororei lo Laitoriani te ninye. Neitoki Olaitoriani aipot Samuel enkata e uni. Nedumunye ninye nelo enetii Eli, nejo, Nele nanu, amu kimpoto nanu.” Nemusu Eli ajo Olaitoriani oipotito enkayioni. Nejoki Eli Samuel, “Shomo, irraga; naa ti nikimpot ninye tejo, ‘Iroro, Olaitoriani, amu ening'ito osinka lino.’ ” Nelo Samuel airrag te wueji enye. Nelotu Olaitoriani aitashe te ine, aipotisho anaa too nkulie katitin, ejo “Samuel! Samuel!” Nejo Samuel, “Iroro, amu ening'ito osinka lino.” Nejoki Olaitoriani Samuel, “Ng'ura etaa nanu enaas entoki ti atua Israel, naa ore nkiyiaa pokira are e ilo oning neitang'e. Ore te ina olong naitabaya nanu ti alo Eli nena pooki natejo naaipirta enkaji enye, ebaiki enkiterunoto o metabaiki enkiting'oto. Najoki nanu ninye nchere etaa nanu kaitame enkaji enye ntarasi, te ina torroni apa nayiolo ninye, te nkaraki apa namor ilayiok lenyena Enkai, neitu ninye eibooyo ninche. Metaa kanya nanu olmumai te nkaji e Eli nchere ore ina torroni e nkaji e Eli meitayu ae kata olasar arashu enkishoroto ntarasi.” Neirrag Samuel o mekenyu, neitoki ninye abol nkutukie oo nkajijik e nkaji e Nkai. Neureyu Samuel eliki Eli ina duaata. Kake eipoto Eli Samuel nejoki, “Samuel, enkayioni ai.” Nejo ninye, “Nele nanu.” Nejo Eli, “Kainyoo kitiaaka ninye? Misudoo iyie te nanu. Metaasa Enkai ena te iyie aitulus, ti nimiki pooki toki e nena pooki nikitiaaka ninye.” Neliki Samuel ninye pooki toki nemeeta entoki naisudoyie te ninye. Nejo ninye, “Olaitoriani, nchoo ninye eas ina naishaakino te ninye.” Nebulu Samuel, netii apa Olaitoriani te nebo ninye, neitu eisho obo loo rorei lenyena edoiki enkop. Ore Israeli pooki ebaiki Dan o metabaiki Beersheba neyiolo nchere etudupe Samuel aaku oloiboni lo Laitoriani. Neitoki Olaitoriani alioyu te Shilo, amu eibalunye Olaitoriani kewan te Samuel te Shilo to rorei lo Laitoriani. Nelotu ororei le Samuel enetii Israeli pooki. Nepuo Isiraeli aarare Ilfilisti; neitayu ilng'oborri te Ebenesa; ore Ilfilisti neitayu ilng'oborri te Afek. Nenyiku Ilfilisti aaluaa pee earare Isiraeli; ore ake pee eibulaa olarrabal, nemir Ilfilisti Isiraeli nesesekuan iltung'ana oobaya nkalifuni ongu'an te ine wueji o larrabal. Ore ake pee epuonu iltimito ilo kirragarie nejo ilpayiani le Israel, “Kainyoo pee eishoo iyiook Olaitoriani metimira Ilfilisti? Mayautu iyiook osanduku lo sotua lo Laitoriani ene aaitung'uaa Shilo, pee etum ninye aeu te nebo iyiook aitajeu iyiook aitung'uaa engolon oo lmang'ati lang.” Neaku eirriwayioki iltung'ana Shilo, meyautu aaitung'uaa ine ilo sanduku lo Sotua lo Laitoriani loo lolorani, ilo otonita te nchumata oo Ikerubi; ore lelo ayiok pokira oare le Eli, Hofni o Finehas netii apa ine te nebo osanduku lo Sotua le Nkai. Ore ake pee elotu ilo sanduku lo sotua lo Laitoriani atua lelo ng'oborri nebuak Israeli pooki embuakunoto kitok, o meikirikirayu enkop. Ore pee ening Ilfilisti ilo toilo le mbuakunoto sapuk, nejo ninche, “Kainyoo ena buakunoto kitok too lng'oborri loo Lhebrania?” Ore ake pee eyiolou aajo eyauaki osanduku lo Laitoriani ilng'oborri neureishoyu Ilfilisti; amu etejo ninche, “Eewuo Enkai atua olg'obor.” Nejo ninche “Oi iyiook! Amu meetae ae kata entoki natotiuo nji. Oi iyiook! Kaing'ae okordu iyiook aitung'uaa engolon e kuna aitin magil? Kuna aitin apa naataara Ilmisiri te pooki meitai ti ong'ota. Entagolo oishua, niarishosho anaa lewa, intae Ilfilisti, miakuku ake irrindiki loo Lhebrania anaa apa enataa ninche te intae; entejo kiti! Anaa lewa entaarare ninche.” Neitayu Ilfilisti olarrabal, nemiri Isiraeli, neisik ninche, pooki tung'ani ake enkang enye; nesesekuani iltung'ana kumok oleng, amu etuata too Siraeli isikarini nkalifuni tomoni uni oopuo too nkejek. Neibung'i ilo sanduku le Nkai; neari metuata lelo ayiok pokira oare le Eli, Hofni o Finehas. Neipirri oltung'ani le Benchamen te ine nearareki, nelotu Shilo ina olong ake, epolosa nkilani enyena neeta enterit te ndukuya enye. Ore ake pee ebaya, etonita Eli to lorika lenye te mbata e nkoitoi nalala aing'orisho, amu eiputukunyo oltau lenye te nkaraki ilo sanduku le Nkai. Ore ake pee elotu ilo tung'ani atua ang nelimu ilomon, neyietu enkang pooki aishir. Ore ake pee ening Eli oltoilo lo lkiyioi, nejo ninye, “Kainyoo ena buakunoto?” Neitoki ilo tung'ani aisarisaru nelotu aliki Eli. Naa oloo larin ntomoni naaudo o isiet apa Eli, netiripate nkonyek enyena metaa meidim atodolisho. Nejoki ilo tung'ani Eli, “Ara nanu ilo oewuo aing'uaa olarrabal; aisikua nanu aing'uaa olarrabal duoo.” Nejoki ninye, “Kaji eikunari, enkerai ai?” Ore ilo oyaua lomon newalu ajo, “Eisika Isiraeli te dukuya Ilfilisti, netaaraki sii iltung'ana kumok metuata; etuata sii ilayiok linono pokira oare, Hofni o Finehas, neibung'aki aaya osanduku le Nkai.” Ore pee eimaki osanduku le Nkai, nebatata Eli ti oriong aurori to lorika lenye te mbata e kishomi; negila emurt enye neye, amu oltung'ani moruo apa ninye, neiroshi. Netirisha ninye Israeli ilarin artam. Ore entito enye, ina kitok e Finehas naa entuaa, etaa kejing aji. Ore ake pee ening lelo omon nchere eibung'aki osanduku lo Laitoriani, netua papaai lenye o lpayian lenye, neirrugo aisho; amu etijinga emion enye ninye. Ore ina kata eye ninye nejoki nena kituaak naaitoisho ninye, “Miureisho, amu itoiuo enkayioni.” Kake eitu ninye ewal arashu eshilaa. Neisho ninye ina kerai enkarna ajo Ikabod, ejo, “Eshomo enkitoo aing'uaa Israel!” Te nkaraki ilo sanduku le Nkai oibung'aki o te nkaraki papaai lenye o lpayian lenye. Nejo ninye, “Eshomo enkitoo aing'uaa Israel, amu eibung'aki osanduku le Nkai.” Ore ake pee eibung' Ilfilisti ilo sanduku le Nkai, nenap ebaiki Ebenesa o metabaiki Ashdod. Neya Ilfilisti ilo sanduku le Nkai nepik atua enkaji e Dagon neitatashaki Dagon. Ore ake pee eyooki aainyototo iltung'ana le Ashdod, ng'ura, etusulari Dagon te nkomom aosh enkop te dukuya ilo sanduku lo Laitoriani. Neya ninche Dagon neinyaaki ewueji enye. Kake ore ake pee einyototo aayooki ti ae olong, ng'ura, etusulari Dagon te nkomom aosh enkop te dukuya ilo sanduku lo Laitoriani; ore endukuya e Dagon o nkaik enyena pokira are neirragita maate te mbata e kutukaji; osesen ake le Dagon etung'uayioki. Enkaraki ena pee aa ore ilapolosak le Dagon o pooki oojing ina aji e Dagon nemeroro embata e kutukaji e Dagon te Ashdod o metabaiki ena olong. Keiroishi apa enkaina o Laitoriani te Shumata iltung'ana le Ashdod, neitame ninche, neisomit ninche too ltuduta, Ashdod o ina kop namanita. Ore ake pee edol iltung'ana le Ashdod eneikununo mbaa, nejo ninche, “Meton osanduku le Nkai oo Siraeli te nebo iyiook; amu keiroishi enkaina enye te shumata iyiook o te shumata Dagon, enkai ang.” Neirriwaa ninche ilkiliku neiturrur te nebo ilkituaak pooki loo Lfilisti, nejo, “Kaa kintaas osanduku le Nkai oo Siraeli?” Newal ninche, ejo “Nchoo osanduku le Nkai oo Siraeli eyauni aaitamanu Gas.” Neyau ninche osanduku le Nkai oo Siraeli ine. Kake ore ake pee eyau aaitamanu, near enkaina e Nkai ina anasa ayau enkuretisho sapuk, neitame ninye lelo tung'ana le ina ang, ilooti o lbotoro, o metaa eibulaitie iltuduta te ninche. Neirriwaa ninche ilo sanduku le Nkai Ekron. Kake ore ake pee elotu osanduku le Nkai Ekron, neyietu iltung'ana le Ekron aaishir ejo, “Eyautua ninche aaitaman iyiook osanduku le Nkai oo Siraeli pee ear iyiook matuata o iltung'ana lang.” Neirriwaa ninche ilkiliku neiturrur te nebo ilkituaak loo Lfilisti, nejo, “Ewaita ele sanduku le Nkai oo Siraeli, enchoo eshuko alo ewueji enye makewan, pee memut ake iyiook o ltung'ana lang.” Amu etii apa enkuretisho e keeya atua ina ang pooki. Keiroishiu apa enkaina e Nkai te ine oleng; ore iltung'ana leitu eye nejing iltuduta, ore olkiyioi le ina ang neilep alo shumata. Etii apa ilo sanduku le Nkai enkop oo Lfilisti ilapaitin oopishana. Neipotu Ilfilisti ilapolosak o lasakutok nejo, “Kaa kintaas ele sanduku lo Laitoriani? Toliki iyiook entoki nikiyayie ewueji enye.” Nejo ninche, “Ti niyaya intae aashuk ilo sanduku le Nkai oo Siraeli, emiyaya ake erok, kake entayiolo ake pee ishorikinyenye ninye olasar le nkitarruorroto pee eishiunyeki intae, neyiolouni te intae aajo kainyoo pee meiuang'ieki enkaina enye te intae.” Nejo ninche, “Kainyoo ilo asar le nkitarruorroto likishukoki iyiook ninye?” Newalu ninche aajo, “Iltuduta imiet le sahabu o ndero imiet e sahabu, anaa esiana oo lkituaak loo Lfilisti; amu etii apa shumata intae olmeitai otiu anaa ele o shumata ilkituaak linyi. Metaa meeta nchere mintayuyu nkitanyaanyukot oo ltuduta linyi o inkitanyaanyukot oo ndero inyi naainyal enkop, ninchosho enkitoo Enkai oo Siraeli; amu ebaiki neiteneneng' ninye aitung'uaa intae o nkaitin inyi o enkop inyi. Kainyoo pee ntagoligolo intae iltauja linyi anaa apa enaitagolo Ilmisiri o Farao iltauja lenye? Amaa pee eidip ninye atekeshare ninche, keitu ninche eisho iltung'ana meshomo, nedumunye ninche aapuo? Ore naa taata ewaita nintobiribiri engarri ng'ejuk o nkishu naalepo are neitu ae kata epiki nkeek imurto niyenikiki nena kishu engarri, kake ewaita ilasho lenye ang, aaitalamaa te ine netii ninche. Niyaya ilo sanduku le Nkai ninteleikiki ina garri, nepiki atua ilo sanduku enchoto enye nabo nena kitanyaanyukot e sahabu, naa ninche ishukoki ninye anaa olasar le nkitarruorroto. Nireureu ninye, nipalaa meshomo openy. Ning'oring'oro; te neilep ninye aibung' enkoitoi nalo enkop enye kewan, alo Bet-shemesh, naa ninye ilo oitaasa iyiook ena taboi; Kake te neme neijia, nikiyiolou iyiook nchere mme enkaina enye natoosho iyiook, ketotiuo ake duoo neijia te iyiook tolbuket.” Neiko neijia iltung'ana, neya nkishu are naalepo neeniki ninche ina garri, neikenoo ilasho lenye ti ang. Nepik ninche ilo sanduku le Nkai eng'arri, o ilo sanduku te nebo indero e sahabu o inkitanyaanyukot oo ltuduta lenye. Nepuo nena kishu aaitoriori enkalo e Bet-shemesh aaibung' enkoitoi naporo neru epoito; nemeibelekenya enkalo aapuo tatene arashu aapuo kedienye; ore ilkituaak loo Lfilisti nesujaa ninche o metabaiki olpolosie le Bet-shemesh. Ore ina kata neisamputua iltung'ana le Bet-shemesh enkano to erata; ore ake pee eshumu nkonyek enye nedol osanduku lo Laitoriani neng'idayu pee edol ninye. Nelotu ina garri atua enkurma e Yoshua le Bet-shemesh Neitashe te ine. Netii apa osoit sapuk ine, neiper apa ninche nkeek e ina garri neitayu nena kishu anaa olasar opejori to Laitoriani. Neitadou Ilawi ilo sanduku lo Laitoriani o ilo sanduku otashare, laa ninye etii atua nena kitanyaanyukot e sahabu, neirragie ninche te nchumata o soit sapuk; ore iltung'ana le Bet-shemesh neitayu ilasarri oopejori nepolosaki ilasarri Olaitoriani ina olong. Ore ake pee edol lelo kituaak loo Lfilisti ina, neshuko ninche ina olong aapuo Ekron. Kulo ninche lelo tuduta le sahabu ootushukutuo Ilfilisti anaa olasar le nkitarruorroto to Laitoriani: obo le Ashdod, obo le Gasa, obo le Ashkelon, obo le Gas, obo le Ekron; ore sii nena dero e sahabu, naa te risioroto oo nkang'itie oo Lfilisti e lelo kituaak pokira imiet, nkang'itie naasheta sunta o inkang'itie kutiti nemeeta sunta. Ore ilo soit sapuk, apa laa ninye eiteleikiaki ilo sanduku lo Laitoriani, naa shakenisho ebaiki ena olong ti atua enkurma e Yoshua olayioni le Bet-shemesh. Near ninye metuata embata oo ltung'ana le Bet-shemesh, enkaraki naing'ura ninche atua ilo sanduku lo Laitoriani; near ninye metuata iltung'ana ntomoni naapishana te ninche, neishir iltung'ana enkaraki naitayio Olaitoriani emutata kitok ti atua iltung'ana. Nejo iltung'ana le Bet-shemesh, “Kaingae oidim aitasho te dukuya Olaitoriani, ena Ai sinyati? Naa tenetii ng'ae ninye eilep alo aing'uaa iyiook?” Neirriwaki ninche ilkiliku lelo oomanya Kiriat-Yearim, ejo, “Etushukutuo Ilfilisti osanduku lo Laitoriani. Entadou wootu ewaita enitii.” Nepuonu iltung'ana le Kiriat-Yearim, neilepie ninche aaya ilo sanduku lo Laitoriani neyau ninye enkaji e Abindab te nchumata oldoinyo; neitisiny ninche olayioni lenye Eliesa, pee etum enkitasheikinoto e ilo sanduku lo Laitoriani. Ore ebaiki ina olong apa nairragieki osanduku lo Laitoriani te Kiriat-Yearim, netulusoyie enkata naado, enkata oo larin tikitam, ore enkaji pooki e Israel neishiraki Olaitoriani. Nejoki Samuel enkaji pooki e Israel, “Tenaa eishukunyenye aapuonu enetii Olaitoriani to ltau linyi pooki, ewuangie naa nena aitin oo loreren o ina Ashtarot entung'uai ate, nintoriokiki oltau linyi Olaitoriani, nisiaayiayia ninye ake, naa keitajeu ninye intae aitung'uaa enkaina oo Lfilisti.” Neiwuang'ie Isiraeli nkaitin naaji baal o Astorot, neisiaai ninche Olaitoriani ake. Neitoki Samuel ajo, “Enturrurro Isiraeli pooki te Mispa, pee aomon nanu Olaitoriani te nkaraki intae.” Neiturrurro ninche te Mispa, neoku enkare neibukoo ina are te dukuya o Laitoriani ina olong, nejo te ine, neen ate aaitupukoo teina olong. Nejo ninche kitaasa eng'oki to Laitoriani. Neiguanaki Samuel iltung'ana le Israel te Mispa. Ore ake pee ening Ilfilisti nchere eiturrurrote iltung'ana le Israel te Mispa, neilepu ilkituaak loo Lfilisti aapuo aarare Israel. Ore ake pee ening iltung'ana le Israel ina neureyu Ilfilisti oleng. Nejoki iltung'ana le Israel Samuel, “Miyagie ake eitu inchiraki Olaitoriani Enkai ang te nkaraki iyiook, pee etum ninye aitajeu iyiook aitung'uai enkaina oo Lfilisti.” Neya Samuel olkuoo oleporeki nepolos anaa olasar opejori pooki to Laitoriani; neishiraki Samuel Olaitoriani te nkaraki Isiraeli, newaliki Olaitoriani ninye. Ore eitayu Samuel olasar opejori, nenyiku Ilfilisti pee ear Israel: kake etadara Olaitoriani to ltoilo sapuk adaraki Ilfilisti nenang'aki ninche atua olmilo; neilanyisho aaisik te dukuya Israel. Neipang iltung'ana le Israel te Mispa nesujaa Ilfilisti, nemut ninche o metabaiki abori Bes-kar. Neitoki Samuel adumu osoit neirragie te rishata e Mispa o Yeshana, nejo enkarna enye Ebenesa; amu etejo ninye, “Ore otene etareto iyiook Olaitoriani.” Nemiri Ilfilisti neitu eigil aajing enkop oo Siraeli. Nearare enkaina o Laitoriani Ilfilisti too nkolong'i pooki e Samuel. Ore nkanas e Israel apa naawaita Ilfilisti neshukokini Israel, ebaiki Ekron o metabaiki Gas; nekordu Israeli enkop enye aaitung'ua enkaina oo Lfilisti. Netii apa eseriani erishata e Israel o Lamori. Neaku Samuel olarishani te Israel too nkolong'i pooki enkishui enye. Nelo ninye amanaa to lari o to lari alo Betel, o Gilgal, o Mispa; neiguanaki ninye Israel te kuna wuejitin pooki. Paa keshuko alo Rama, amu ine apa etii enkanasa enye, naa te ine sii apa eiguanaki Isiraeli (arish). Neshetaki ninye teine Olaitoriani olperere lo lasar. Ore ake pee emoruau Samuel neitaa ilayiok lenyena ilarishak te Israel. Ore enkarna e ilo ayioni lenye kikau naa Yoel, ore enkarna o liare, eji Abija; neiguana apa ninche te Beer-sheba. Ore eyia eitu apa eibung lelo ayiok lenyena nkoitoi enyena, kake eibelekenyate aasujaa dupoto; neya ninche ntokitin eropare neboin esipata. Neitoki ilpayiani pooki loo Siraeli aaiturrurro te nebo nepuonu enetii Samuel te Rama, nejoki ninye, “Ng'ura, ira iyie moruo, ore layiok linono nemepuo too nkoitoi inono; ore naa taata tegelaki iyiook olaiguanani pee eitore iyiook anaa nkuapi pooki.” Kake eitu eitiship ina bae Samuel ina kata pee ejo ninche, “Nchoo iyiook olaiguanani pee eitore iyiook.” Neomon Samuel Olaitoriani. Nejoki Olaitoriani Samuel, “Toning'o oltoilo loo ltung'ana te nena pooki nikijoki ninche iyie; amu eitu ninche kiany iyie, kake aatanyaita ninche nanu pee maitoki aaku olaiguanani te ninche. Ore te risioroto oo nkiaasin pooki naaitaasa ninche nanu, ebaiki ina olong apa nayaua ailepunye aitung'uaa Misiri o metabaiki ena olong, aaing'uaa nanu, neisiai kulie aitin, metaa easita sii ina te iyie. Ore naa taata, toning'o oltoilo lenye; nabo ake, nkoo ninche tuunoki, nintodol ninche nkoitoi e ilo aiguanani ooyooki aitore ninche.” Neliki Samuel irorei pooki lo Laitoriani lelo tung'ana ooikilikuanu olaiguanani te ninye. Nejo ninye, “Kuna naaku nkoitoi e ilo aiguanani oyooki aitore intae; keya ninye ilayiok linyi, negelaki ingarrin enyena neaku ilakedok loo mbartan enyena, neipirri ninche te dukuya ingarrin enyena; negelu te nkaraki kewan enye ilarikok loo nkalifuni o larikok loo moomon, o kulikae pee etur enkurma enye o kulikae pee eisampu enkurma enye, neitobir sii imasaa olarrabal o ntokitin oo ngarrin enyena. Neya ninye ntoyie inyi aitaa nkaitobirak oo sonkoyoni, o nkayiarak o nkapejok oo mukateni. Neya ninye eneisul too nkurman inyi, o too sabibu o nkurman oo loirienito neisho ninche isinkan lenyena. Neya ninye ematua e tomon oo ntapan inyi oe noo sabibu neisho ninche ilkituaak lenyena o isinkan lenyena. Neya ninye isinkan linyi lewa o nkaisiaayiak inyi, o nkishu inyi naaisul, o sirkon linyi, nepik ninche esiaai enye. Neya ninye ematua e tomon oo nkerra inyi, niakuku intae irrindiki lenyena. Ore akenya ina olong niyietutu aaishir te nkaraki olaiguanani linyi, laa ninye itegelakitia ate; kake meng'amaa kenya intae Olaitoriani te ina olong.” Kake etanyaita iltung'ana einining ilo toilo le Samuel; nejo ninche, “A-a! Kake eikitum ake iyiook olaiguanani oitore iyiook, pee kitum sii iyiook aatotiu anaa nkuapi pooki, netum sii olaiguanani lang aitoria iyiook, nerikoo ninye iyiook, nearisho ninye too larrabali lang.” Ore ake pee eidip Samuel atoning'o irorei pooki loo ltung'ana, nelimu ninche pooki too nkiyiaa o Laitoriani. Nejoki Olaitoriani Samuel, “Toning'o oltoilo lenye, nigelaki ninche olaiguanani.” Neitoki Samuel ajoki iltung'ana le Israel, “Shomo pooki tung'ani enkanasa enye.” Etii apa oltung'ani le Benchamen oji enkarna enye Kish, olayioni le Abiel, olayioni le Seror, olayioni le Bekoras, olayioni le Afia, Olbenchameni, oltung'ani karsis oleng. Neeta apa olayioni oji enkarna enye Saul, ilo barnoti oikishiaan. Metii apa oltung'ani ti atua iltung'ana pooki le Israel olang ninye te nkishaa; ebaiki ironyi lenyena neilep neado apa ninye alang pooki tung'ani. Neimin apa isirkon le Kish, menye Saul. Nejoki Kish Saul olayioni lenye, “Toriko obo loo sinkan te nebo iyie, nidumunye, shomo ing'oru isirkon.” Neim ninche enkop oo ldoinyo e Efraim neim enkop e Shalisha, kake eitu ninche etum. Neitoki ninche aaim enkop e Shaalim kake metii apa ine. Neitoki ninche aaim enkop e Benchamen, kake eitu etum ninche. Ore ake pee epuonu ninche enkop e Suf, nejoki Saulo ilo sinka lenye apa otii te nebo ninye, “Wou, maape aashuko mepal ake papaai lai enadamu isirkon neaku iyiook edamu.” Kake etiaaka, “Ng'ura, etii oltung'ani le Nkai ena ang, naa oltung'ani oyanyiti; ore ina pooki najo ninye nesipayu. Maape iyiook ine; ebaiki neliki ninye iyiook inaaipirta ena lototo nikitii.” Neitoki Saul ajoki ilo sinka lenye, “Kake amaa ti nikipuo, kainyoo iyiook kiyaki ilo tung'ani? Amu eishunye imukateni naatii atua ilbenia lang, nemetii enkishoroto nikiyaki ilo tung'ani le Nkai. Kainyoo kiata iyiook?” Neitoki ilo sinka awaliki Saul ajoki, “Ore tene, aata nanu ematua e ong'uan e shekel enkosholai; naa kaisho ilo tung'ani le Nkai, pee eliki iyiook enkoitoi ang.” Ore apa te Israel, te nelo oltung'ani aikilikuanisho ti alo inaaipirta Enkai, nejo ninye, “Wootu maapeiti enetii oladuani,” amu ore ilo taata oji oloiboni naa keji apa oladuani. Nejoki Saul osinka lenye, “Enkiroroto sidai, wou maape.” Nepuo ninche ina ang apa natii ilo tung'ani le Nkai. Ore eilepaki oldoinyo aapuo ina ang, nenang'are ninche iselenken aisiaayiak eipang'u aapuonu aaoku enkare, nejoki ninche, “Ketii oladuani ene?” Newalu ninche, “Etii, ng'ura, etii ninye dukuya intae. Esarisara; eewuo ninye tena kata ang, amu eeta taata iltung'ana olasar te wueji e shumata. Ore ina kata ake ti nijing'ijing'i enkanasa nitumutumu intae ninye, eton eitu elo eilep alo ine wueji neika anya endaa; amu menya iltung'ana endaa o metaba anaa nelotu, aa keng'as ninye amayian olasar; ore te siadi nenya endaa lelo ooitoomonoki. Elepa taata enchom, amu ipuopuo aainepu ninye aasioki.” Neilep ninche aapuo ina anasa. Ore ejing'ita ninche ang, nedol ninche Samuel eipang'u alotu anang'are ninche eloito ailep alo ine wueji e shumata. Ore apa eton eitu elotu Saul, netaboloko Olaitoriani Samuel: “Ore taisere enyikita ena saa naairriwaki nanu iyie oltung'ani oing'uaa enkop e Benchamen, naa ibukoki iyie ninye eilata aput pee eaku olkitok oitore iltung'ana laainei Isiraeli. Neitajeu ninye iltung'ana laainei aitung'uaa enkaina oo Lfilisti; amu atoduaa nanu osina loo ltung'ana laainei, amu eewuo olkiyioi lenye enatii nanu.” Ore ake pee edol Samuel Saul, nejoki Olaitoriani ninye, “Nele oltung'ani laa ninye aatolikio iyie! Ninye ilo olo aitore iltung'ana laainei.” Netaaniki Saul Samuel te kishomi, nejo, “Tolikioki nanu enetii enkaji o laduani.” Newaliki Samuel Saul, “Ara nanu oladuani; ilepa shomo te dukuya nanu ine wueji e shumata, amu ore taata ninya iyie endaa te nebo nanu, ore tadekenya naayooki aisho iyie shomo naaliki iyie nena pooki naatii ndamunot inono. Ore te lelo sirkon linono ooimina nkolong'i uni naatulusoitie, mintoki adamu ninche, amu eidipaki aanoto. Naa kaing'ae ilo oyieuni ti atua Israel pooki? Aime iyie o enkaji e papaai lino pooki?” Newalu Saul, “Eimara nanu Olbenchameni, ilo osho kiti oleng too loshon le Israel? Aime aiterani, olmarei lang alang ilmareita pooki lo losho le Benchamen? Kainyoo naa pee kirorie iyie nanu tena oitoi?” Nerik Samuel Saul o ilo sinka lenye neyau ninche atua aji* neisho ninche ewueji te dukuya lelo pooki ooitoomonoki, nebaya apa lelo tung'ana tomoni uni. Nejoki Samuel olayierani, “Iyau erubata duoo naaishoo, naa ninye aatiaaka iyie nteng'ela.” Neyau olayierani emuro o enkiring'o naibung'are neirragie ninche te dukuya Saul; nejo Samuel, “Toduaa ajo ore ina duoo natushumaki neirragieki te dukuya iyie. Inosa amu iyie duoo etushumakaki o metabau esaa natudung'uoki, pee itum ainosa te nebo ilomon.” Nedaa Saul te nebo Samuel ina olong. Ore ake pee edou ninche aaing'uaa ine wueji e shumata aapuonu ina anasa, eitobirakaki Saul endapash te nchumata enkaji neirrag ninye airura. Ore enasirie neipot Samuel Saul te nchumata e nkaji ajoki, “Inyo, pee aatum airriwai iyie te nkoitoi ino.” Neinyototo Saul, ore ninye o Samuel neipang aapuo enkoitoi. Ore epuoito ninche auluo ina ang, nejoki Samuel Saul, “Tiaaki ele sinka meituruko alo dukuya iyiook, ore eidipa aituruko, ntasho iyie tene te nkiti rishata, pee atum aibalunye te iyie ororei le Nkai.” Neitayu Samuel oltulet le ilata nebukoki endukuya e Saul eilata aput, neng'utut ninye nejo, “Keitu iyie kibukoki Olaitoriani eilata aput pee iaku olkitok oitore iltung'ana lenyena Isiraeli? Naa intore iyie iltung'ana lo Laitoriani, nintajeu iyie ninche aitung'uaa enkaina oo lmang'ati lenye oomanita. Neaku ele olmonekie te iyie nchere kitubukoko iyie Olaitoriani eilata aput pee iaku olkitok oitore enjung'ore enye. Tinikilo iyie aorore nanu taata nitum iltung'ana oare te mbata e nkurare e Raheli te nkop e Benchamen pee etumo o Selsa, nikijoki ninche iyie, Ore ilapa sirkon lishomo iyie aing'oru nenotoki; ore taata papaai lino etapala enadamu isirkon neaku intae edamu, ejo, ‘Kaji aiko to layioni lai?’ Nilo iyie dukuya o metabaiki olchani onyanyukie olng'aboli otii Tabor; nikinang'are iyie te ine iltung'ana okuni ooilep aapuo enetii Enkai te Betel, enapita obo ilkuoo okuni le kineji, nenapita olikae imukateni uni, ore olikae nenapita olbene lo lchoni le naisho oo sabibu. Nikiroroki ninche nikincho iyie imukateni are ning'amu iyie te nkaina enye. Ore te siadi ina nilotu iyie Gibeat-elohim, ine netii oltim loo Lfilisti; ore te ine, ilotu ina anasa, ninang'are entukus oo loibonok edou aapuonu eing'uaa ine wueji e shumata eeta enkawuo oo sinkolioitin o ntampurini o endule, o lwulul loo usin, te dukuya ninche, eibonisho. Nelotu enkiyang'et o Laitoriani te ngolon shumata iyie, naa imbonisho iyie te nebo ninche nikimbelekenyi iyie aaitaa likae tung'ani. Nchoo ake pee kinang'are iyie kulo monek, taasa enaba anaa enatum nkaik inono aataas, amu etii Enkai te nebo iyie. Nidoyio iyie alo Gilgal te dukuya nanu; naa ng'ura, kalotu nanu enitii aitayu olasar opejori napolos olasar le seriani. Too nkolong'i naapishana taanyisho, o metaba anaa nalotu pee aaitodol iyie eniaas.” Ore ake pee eibelekenya ninye aisho Samuel enkoriong enye, neisho Enkai ninye likae tau; nebaya lelo monek pooki ina olong. Ore ake pee epuonu ninche Gibea, ng'ura, nenang'are ninye entukus oo loibonok; nelotu enkiyang'et o Laitoriani te ngolon shumata ninye, neibonisho ninye ti atua ninche. Ore apa lelo pooki ooyiolo ninye pee edol eneiko eibonisho te nebo iloibonok, nejokino iltung'ana maate, “Kainyoo naewuo shumata olayioni le Kish? Ketii sii Saul atua iloibonok?” Newal oltung'ani le ine wueji ajo, “Naa kaing'ae papaai lenye?” Metaa etaa endung'et e rashe eji, “Ketii sii ninye Saul atua iloibonok?” Ore ake pee eidip aibonisho nelotu ine wueji e shumata. Nejoki olenkapu lenye Saul o ilo sinka lenye, “Kaji apa ishomo?” Nejo ninye, “Kishomo aaing'oru isirkon; ore ake pee kidol aajo metumi, nikipuo enetii Samuel.” Nejo ilo lenkapu le Saul, “Tolikioki siaake enikitiaaka Samuel.” Nejoki Saul olenkapu lenye, “Etiaaka ninye iyiook aibalakinye nchere enotoki lelo sirkon.” Kake ore ti alo ina bae e nkitoria natejo Samuel, eitu ninye eliki ai toki. Neipotu Samuel iltung'ana meiturrurrokinoto Olaitoriani te Mispa. Nejoki ninye iltung'ana le Israel, “Nji ejo Olaitoriani, Enkai oo Siraeli, ‘Ayaua nanu Israel ailepunye aitung'uaa Misiri, nalaku nanu intae aitung'uaa enkaina oo Lmisiri naitung'ua enkaina oo nkitoriat apa pooki naaisomita intae.’ Kake itanyaita intae ena olong Enkai inyi, ilo oitajeu intae ti atua isinaitin linyi pooki o loisilisili; nitejo intae, ‘A-a, kake tipika olaiguanani shumata iyiook.’ Ore naa taata eyautu ate dukuya Olaitoriani too loshon linyi o too nkalifuni inyi.” Neriku Samuel iloshon pooki le Israel enetaana, nedoiki enkukuo olosho le Benchamen. Neyau olosho le Benchamen enetaana too lmareita lenyena, nedoiki enkukuo olmarei le Matrit; ore te siadi neyau olmarei le Matri enetaana olee o lee, nedoiki enkukuo Saul ole Kish. Kake ore ake pee eing'oru ninche ninye, neitu etumi ninye. Neitoki ninche aaikilikuanu to Laitoriani, “Keewuo ele tung'ani ene?” Nejo Olaitoriani, “Ng'ura, eisudori ninye ti atua lolan.” Neipirri ninche aayau ninye te ine; ore pee eitashe ti atua iltung'ana, naa keado alang pooki tung'ani ebaiki ironyi lenyena neilep. Nejoki Samuel iltung'ana pooki, “Idolitata olaa ninye etegelua Olaitoriani? Metii likae laaijo ninye ti atua iltung'ana pooki.” Nebuaku iltung'ana pooki aajo, “Metobikoi olaiguanani!” Neliki Samuel iltung'ana enkitoo nairirikino olaiguanani isiaaitin enyena; neiger ti atua embuku neirragie te dukuya Olaitoriani. Neisho Samuel iltung'ana pooki meshomo, oltung'ani ake nelo enkang enye. Nelo sii ninye Saul enkanasa enye te Gibea, ore te nebo ninye nepuo ilpayiani oogol ooiseyie Olaitoriani iltauja lenye. Kake ore ilkulikae tung'ana le pesho, nejo, “Kaji eiko ele tung'ani te neitajeu iyiook?” Nemenaa ninche ninye, neitu ninche eyaki ninye nkishorot. Kake etigire ninye. Neitoki Nahash, ilo Amoni, ailep alo neman Yabesh-gilead; nejoki iltung'ana pooki le Yabesh Nahash, “Ntaiki iyiook olning'o pee kisiaai iyie.” Kake etiaaka ninye Nahash, ilo Amori, “Tena oitoi aitaiki intae olning'o nchere kakurtu nanu nkonyek inyi pooki e tatene, napik esulare Israel pooki.” Nejoki ilpayiani le Yabesh ninye, “Nchoo iyiook muro too nkolong'i naapishana pee kitum aairriwai ilkiliku enkop pooki e Israel. Ore ake pee metii hoo obo oitajeu iyiook, nikincho iyiook iyie ate.” Ore ake pee epuonu ilkiliku Gibea e Saul, nelikioo ninche olomoni too nkiyiaa oo ltung'ana; neishir iltung'ana pooki aayietu. Negira Saul alotu te nkurma te siadi ilmong'i; nejo Saul, “Kainyoo naishirie iltung'ana, pee eishirita?” Neliki ninche ilomon le lelo tung'ana le Yabesh. Nelotu enkiyang'et e Nkai te ngolon shumata Saul pee eidip atoning'o kulo omon, neyupuyup oleng engoro enye. Neya ninye ilmong'i oare ootii enchata emurt nabo, nedung'udung ninche aitaa ndung'ot, neirriwaa nena dung'ot enkop pooki e Israel, too nkaik e lelo kiliku ejo, “Ore pooki ng'ae lemeipang'u asuj Saul o Samuel, neikoni neijia ilmong'i lenyena!” Nejing iltung'ana euriata e Nkai, neipang'u ninche anaa oltung'ani obo. Ore ake pee eiturrur aiken ninche te Besek, nera iltung'ana le Israel nkalifuni iip uni, ore iltung'ana le Yuda naa nkalifuni tomoni uni. Nejoki ninche lelo ooetuo ooata olkilikuai, “Entiaaki iltung'ana le Yabesh-gilead inji, ‘Ore taisere, te neirouaju enkolong, nitumutumu intae enkordunoto.’ ” Ore pee epuonu lelo lo ilkilikuai neliki iltung'ana le Yabesh, neng'idayu ninche. Neaku etejo iltung'ana le Yabesh, “Ore taisere naa eikipalari iyiook te ntae, naa indimidimi aaitaasa iyiook enaba anaa enidolidolo aa sidai te ntae.” Ore pee ekenyu nepik Saul lelo tung'ana ilturrurri okuni; nepuonu ninche atua empolos oo lng'oborri tadekenya enasirie, nedung lelo Amoni o meipira enkolong; ore lelo ooimishote neidapasha, o metaba anaa neaku meetae ninye oare lenye ootoni te nebo. Nejoki iltung'ana Samuel, “Kaing'ae ilo apa otejo, ‘Eji keitore iyiook Saul?’ Entoriku lelo tung'ana pee kiar iyiook metuata.” Kake etejo Saul, “Meari ninye oltung'ani obo metua ena olong, amu ore taata neyaua Olaitoriani enkordunoto ti atua Israel.” Neitoki Samuel ajoki iltung'ana, “Wootu, maapeiti iyiook Gilgal paa te ine kintang'ejuk enkitoria.” Neaku eshomo iltung'ana pooki Gilgal, ore te ine neitaa ninche Saul olaiguanani te dukuya Olaitoriani te Gilgal. Ore te ine nepolos ninche ilasarri le seriani te dukuya Olaitoriani; ore te ine neshipa Saul o ltung'ana pooki le Israel oleng. Nejoki Samuel Isiraeli pooki, “Eng'ura, atoning'o nanu oltoilo linyi te nena pooki nikitiaakita intae nanu, natuputoko nanu intae olaiguanani. Ore taata, eng'ura, eloito olaiguanani te dukuya intae; nara nanu moruo naaiborra lukunya, naa eng'ura, etii layiok laainei te nebo intae; nashomo nanu te dukuya intae ebaiki kitisho ai o metabaiki ena olong. Nele nanu; enchakenokoki nanu te dukuya Olaitoriani o te dukuya ilo lenye otubukokoki eilata aaput. Kol kiteng le ng'ae nanu aawa? Arashu ko sikiria le ng'ae nanu aawa? Arashu kaing'ae nanu ainyala? Kaing'ae nanu ainosie osina? Arashu ai te nkaina e ng'ae nanu atang'amua eropare pee aitamodok nkonyek aainei te ninye? Enchakenokoki nanu, naa kashukoki nanu intae.” Nejo ninche, “Eitu iyie iinyal iyiook arashu ainosie osina, arashu aisimaa ae toki te nkaina o ltung'ani.” Nejoki ninye ninche, “Olaitoriani olchakeni te intae, naa ilo lenye otubukokoki eilata aaput olchakeni ena olong, nchere eitu intae itumutumu ae toki te nkaina ai.” Nejo ninche, “Ninye olchakeni.” Nejoki Samuel iltung'ana, “Olaitoriani olchakeni apa otegelua Musa o Aron neyau iloo papaai linyi ailepunye aitung'uaa enkop e Misiri. Ore naa taata entasho entirring'ata, pee atum atasayia intae te dukuya Olaitoriani ti alo nkiaasin pooki e njeunoto o Laitoriani naataasa ninye te nkaraki intae o te nkaraki iloo papaai linyi. Ore apa pee elo Yakobo Misiri neinosie ninye Ilmisirini osina, neishiraki iloo papaai linyi Olaitoriani neirriwaa Olaitoriani Musa O Aron, laa ninche ooyautua iloo papaai linyi aaitung'uaa Misiri, neisho ninche metobiko tene wueji. Kake etorikine ninche Olaitoriani Enkai enye; nemiraki ninye ninche atua enkaina e Sisera, olkitok le njore e Yabin, olaiguanani le Hasor, o atua enkaina oo lfilisti, o atua enkaina o laiguanani le Moab; nearare ninche lelo. Neishiraki ninche Olaitoriani, nejo, ‘Kitaasa iyiook eng'oki amu kitung'uaitie iyiook Olaitoriani, nikisiaayia iyiook Baal o Astarot; kake ore taata tokordu iyiook intung'uai atua enkaina oo lmang'ati lang, naa eikisiaai iyie.’ Neirriu Olaitoriani Yerubaal o Barak o Yepsa, o Samuel, nekordu ninche intae aaitung'uaa enkaina oo lmang'ati linyi te pooki shoto; nibikibiki intae te seriani. Ore pee idolidolo intae Nahash, olaiguanani loo Lamori eewuo aarare intae, nikijokiki intae nanu, ‘A-a, kake olaiguanani oitore iyiook,’ apa aa Olaitoriani Enkai inyi olaiguanani linyi. Ore naa taata eng'ura ilo aiguanani litegelutua, laa ninye inkilikuanutua intae; eng'ura, etipika Olaitoriani olaiguanani shumata intae. Ti niureyuyu intae Olaitoriani nisiaiaya ninye, nining'ining'i oltoilo lenye, nimipaashaa aarare enkitanapata o Laitoriani, naa ti nisujaa intae tenebo olaiguanani oitore intae, Olaitoriani Enkai inyi, nisidanunu kake te nimining'ining'i oltoilo lo Laitoriani, kake niayianya ina kitanapata o Laitoriani, nearare intae enkaina o Laitoriani, o ilo aiguanani linyi. Ore naa taata entasho entirring'ata pee idolidolo ena toki kitok, nayooki Olaitoriani aas te dukuya nkonyek inyi. Aime enkolong e nkisampuare e nkano ena olong? Ee, kaipot nanu Olaitoriani pee etum airriu endarata o enchan; niyiolouu nidolidolo aajo aikitok esuujisho inyi, apa nitaasa too nkonyek o Laitoriani, inkilikuanakiki ate olaiguanani.” Neaku neipot Samuel Olaitoriani, neirriu Olaitoriani endarata o enchan ina olong apa; neureyu iltung'ana pooki Olaitoriani o Samuel oleng. Nejoki iltung'ana pooki Samuel, “Toomonoki isinkan linono to Laitoriani Enkai ino, pee mikiye iyiook; amu kinkilikuanakita ate ing'ok o ena suujisho amu kitopona iyiook ing'ok ang tena torroni, kinkilikuanakita ate olaiguanani.” Nejoki Samuel iltung'ana, “Emiureishoyu; itaasa intae ena torroni pooki, ore eyia emimbelekenya intae aany isujusuju Olaitoriani, kake esiaiya Olaitoriani too ltauja linyi pooki; nimimbelekenyanya aasujaa ntokitin e pesho nemeretisho nemeitajeusho, amu ine pesho. Amu meiturraa Olaitoriani iltung'ana lenyena, te nkaraki enkarna enye kitok, amu eitisipa Olaitoriani pee eitaa intae iltung'ana lenyena. Ore ake anaa te nanu, metalakuana te nanu malo ake naas eng'oki to Laitoriani te mpalata napal aomonoki intae naa kaiteng'en nanu intae te nkoitoi sidai naitoriori. Entureita ake Olaitoriani nisiaayiayia te sipata to ltau linyi pooki; entadamu eneba mbaa sapuki naaitaasa ninye intae. Kake te neton iasiasa ine suujisho, nejutori, intae o laiguanani linyi.” Eeta apa Saul ilarin esiana pee eiteru aitoreisho; neitore ninye Israel ilarin ooata esiana. Negelu Saul iltung'ana nkalifuni uni le Israel; ore nkalifuni are netii te nebo Saul te Mikmash o ina kop oo ldoinyo e Betel, ore enkalifu nabo netii te nebo Yonatan te Gibea e Benchamen; ore ilkulikae tung'ana nerriny ang, pooki tung'ani ake nelo olng'obor lenye. Nemir Yonatan oltim loo Lfilisti apa otii Geba; nening Ilfilisti ina. Neosh Saul emowuo te nkop pooki; ejo, “Nchoo Lhebrania metoning'o.” Nening Isiraeli pooki eji nchere etimira Saul oltim loo Lfilisti, o sii etaa Israeli ilmang'ati too Lfilisti. Neipoti iltung'ana meetu aaibung'are Saul te Gilgal. Neiturrurro lfilisti pee eitayu olarrabal o Israel, ngarrin oo mbartan nkalifuni ntomoni uni, o lakedok loo mbartan nkalifuni ile, o sikerin ooba anaa osinyai le mbata enaiposha te nkumoi; nepuonu aailepu nepik ilng'oborri lenye Mikmash, natii enkalo oloo saen e Beshafen. Ore ake pee edol iltung'ana le Israel aajo etaa emiri (amu earitae apa iltung'ana oleng) neisudoo iltung'ana ate too nkapuniaa o too ngumot o too ndapidapo o too nkuraren o too lchorroi, arashu eim ilang'at e Yordan aapuo e nkop e Gad o Gilead. Neton apa etii Saul Gilgal, nesujaa iltung'ana pooki ninye eikirikira. Neanyisho ninye nkolong'i naapishana, enkata apa natudung'o Samuel; kake eitu elotu Samuel Gilgal, naa kegira iltung'ana aaidapasha aaing'uaa ninye. Neaku etejo Saul, “Eyautu ilo asar opejori ene natii, o ilo asar le seriani.” Neitayu ninye olasar opejori. Ore enaidipie enkitayunoto o lasar opejori, ng'ura, nelotu Samuel; neipang Saul alo anang'are ninye neng'asaki ninye. Nejo Samuel, “Kaa iyie itaasa?” Nejo Saul, “Ore ake pee adol nchere kaaidapashari iltung'ana aaing'uaa, neitu sii ilotu too nkolong'i nikitudung'okinote neiturrurrote sii Lfilisti te Mikmash, najo nanu, ‘Kaapuonu taata Ilfilisti aadoiki te Gilgal, neton eitu aing'oru omom to Laitoriani’; neaku ataaraka kewan, naitayu olasar opejori.” Nejoki Samuel Saul, “Itaasa te modai; eitu iyie imbung enkitanapata o Laitoriani Enkai ino, apa nikintanapa; amu ore taata anaata eitubulayie Olaitoriani enkitoria ino te Israel intarasi. Kake ore taata mebikoo enkitoria ino; eing'orua Olaitoriani oltung'ani onyor oltau lenye; netegelua ninye Olaitoriani pee eaku olkitok too ltung'ana lenyena, enkaraki neitu iyie imbung ina nikintanapa Olaitoriani.” Nedumunye Samuel, neilep te Gilgal alo Gibea e Benchamen. Neiken Saul iltung'ana apa ootii te nebo ninye, naa iltung'ana oobaya iip ile. Ore Saul o Yonatan, olayioni lenye, o lelo tung'ana apa ootii te nebo ninche netoni te Geba e Benchamen; kake etuuno Lfilisti ilng'oborri te Mikmash. Ore lelo oarisho neipang'u aaing'uaa ilng'oborri loo Lfilisti too lturrurri okuni; neibelekenya olturrur obo aing'or Ofra, alo enkop e Shual; ore olikae turrur neibelekenya aing'or enkalo e Bet-horon, ore olikae turrur neibelekenya aing'or ilo polosie oing'orita oerata le Sebuim te nkalo o lpurkel. Nemetumi apa olkunoni hoo obo te nkop pooki e Israel; amu etejo Ilfilisti, “Pee meitobiraki ate Ilhebrania ilalema arashu iremeta.” Kake ore pooki ng'ae loo Siraeli nedoyio alo enetii Ilfilisti pee eii enchempe enye, o osururu, o entolu enye, o empanka enye nariuo nadung'ieki enkano; ore apa elaata naa esenti nabo kiti te nkiiyioto oo nchempei o too munton, naa erubata e shekel te nkiiyioto oo ntoluo o te mpikata oo nkeek. Neaku te ina olong apa o larrabal nemetumi olalem arashu empere te nkaina e likae tung'ani obo le lelo tung'ana apa ootii te nebo Saul o Yonatan; kake eeta apa Saul o Yonatan, olayioni lenye. Neipang oltim loo Lfilisti aapuo empaash e Mikmash. Nejoki nabo olong Yonatan olayioni le Saul olbarnoti apa onap imasaa enyena o larrabal, “Wou, maape iyiook enetii oltim loo Lfilisti te lido kekun.” Kake eitu ninye eliki menye. Netonita apa Saul te netaaniki Gibea ti abori olchani otii Migron; ore iltung'ana apa ootii te nebo ninye nebaya iip ile, o Ahija olayioni le Ahitab, ilo alashe le Ikabod olayioni le Finehas, olayioni le Eli, ilo apolosani lo Laitoriani te Shilo eishop enkila dorrop. Neitu eyiolou iltung'ana aajo eshomo Yonatan. Ore te mpaash te ine apa neim Yonatan elo oltim loo Lfilisti netii apa emarti enchoto nabo o emarti te nkae shoto; neji nabo Boses neji enkae Sene. Ore emarti nabo neitashe te moikuape te dukuya Mikmash ore enkae te kopikop te dukuya Geba. Nejoki Yonatan ilo barnoti apa onapita imasaa enyena o larrabal, “Wou, maape iyiook enetii oltim le kulo lememurata; eidimayu pee eret Olaitoriani iyiook; amu meetae ae toki naidim aibooi Olaitoriani amitiki eitajeusho too lkumok arashu too lkuti.” Nejoki ilo onapita imasaa enyena olarrabal ninye, “Taasa anaa eniyieu niaas; ng'ura, atii nanu te nebo iyie, anaa enatiu ndamunot inono neijia etiu inaainei.” Nejo ninye Yonatan, “Ng'ura, eikilang iyiook aapuo enetii ilewa, nikintodol ate ninche. Ore pee ejoki iyiook, ‘Entaanyisho o maetu iyiook enitii intae;’ nikintashe iyiook aaitirring'a te wueji ang, nimikilep iyiook aapuo enetii ninche. Kake te nejo ninche, ‘Wootu elepu enikitii,’ nikilep iyiook aapuo; amu eishorua Olaitoriani ninche apik enkaina ang. Neaku ele olmonekie te iyiook.” Neitoduaaya pokira oare ate to ltim loo Lfilisti; nejo Ilfilisti, “Eng'ura, epuonu Ilhebrania aaipang'u too ngumot te nenen apa neisudorie ate.” Neipotu lelo tung'ana lo ltim, Yonatan o ilo anapani loo masaa enyena olarrabal nejo, “Elepu wootu enikitii, naa eikintodol intae entoki.” Nejoki Yonatan ilo anapani lenye, “Ilepu wou tusujuaki amu eishoo ninche Olaitoriani metijing'a atua enkaina e Israel.” Neked Yonatan ailep too nkaik enyena o too nkejek, nesuju olanapani lenye. Nebatata ninche te dukuya Yonatan near ilo anapani ninche metuata te siadi ninye. Ore lelo meneng'a le dukuya, ooitayutuo Yonatan o ilo anapani lenye, nebaya iltung'ana tikitam te rishata naba anaa olpisiai le eka. Nejing enkuretisho ilng'oborri, o ong'ata, o atua iltung'ana; ore oltim o lelo oarisho neikirikira; neikirikira enkop neaku olkirutoto kitok. Neing'or ilarripok le Saul te Gibea e Benchamen; naa ng'ura, eidapashari olorora idie o idie. Nejoki Saul lelo tung'ana ootii te nebo ninye, “Enkenisho eng'urai kaing'ae oshomo ti atua iyiook.” Ore ake pee eidip aaikenisho, ng'ura, metii Yonatan o lanapani lenye loo masaa olarrabal ine. Nejoki Saul Ahija, “Iyau ene ilo Sanduku le Nkai.” Amu kelo apa ilo Sanduku le Nkai ina kata te nebo iltung'ana le Israel. Ore egira Saul airorie olapolosani, neponari olodoo too lng'oborri loo Lfilisti oleng oleng; nejoki Saul ilo apolosani, “Tushuko enkaina ino.” Ore Saul o lelo tung'ana pooki apa ootii te nebo ninye neipirri aapuo olarrabal; naa ng'ura, ore ake olalem lo ltung'ani near olikae, netii apa olmilo kitok oleng. Ore ina kata Ilhebrania apa ootii te nebo Ilfilisti te dukuya ina kata, lelo ooshomo aailep atua ilng'oborri, eibelekenyate aaku te nebo Israeli apa ootii te nebo Saul o Yonatan. Neijia eikununo, ore iltung'ana pooki le Israel apa ooisudoitie ate te ina kop oo ldoinyo e Efraim nening nchere eisikita Ilfilisti; nesuju sii ninche te ngolon epuo enjore. Neaku etokordua Olaitoriani Israel ina olong; ore olarrabal negiroo te idiaalo Bes-afen. Nenyamalu iltung'ana le Israel ina olong; amu einosie Saul iltung'ana olmumai, ejo, “Ediaa ilo tung'ani onya endaa o metaba anaa neaku teipa aitalakua too lmang'ati laainei.” Neaku meetae obo too ltung'ana oishamishama endaa. Nepuonu iltung'ana pooki atua entim; netii apa enaisho enkop. Ore ake pee ejing iltung'ana entim, ng'ura, eitong'ita olkenkei le naisho, kake meetae oltung'ani otipika enkaina enkutuk; amu etureita iltung'ana ilo mumai. Kake eitu ening Yonatan eitanap papaai lenye iltung'ana ilo mumai; neaku eisuroko eng'udi apa natii enkaina, nepik atua lukuny oo naishi nepik enkaina enkutuk; newang'u nkonyek enyena. Nejo obo loo ltung'ana, “Eitanapa papaai lino iltung'ana akurraki to lmumai, ejo, ‘Ediaa ilo tung'ani onya endaa ena olong.’ ” Netanaurate iltung'ana. Nejo Yonatan, “Eitanyamala papaai enkop; ng'ura ajo etawang'ita nkonyek aainei enkaraki naishamishama enkiti ena aisho. Kebaa na eikash tenaa keinosa iltung'ana ena olong nena yarunot oo lmang'ati lenye naaineputua ninche. Amu ore taata earata olalem too Lfilisti neme kitok.” Near ninche Ilfilisti ina olong ebaiki Mikmash o metabaiki Aijalon. Neaku etanaurate iltung'ana, nekuetiki iltung'ana nena tokitin apa naataarutua, neya ninche nkerra o lmong'i o lasho, neyieng te nkop nenya iltung'ana ninche te nebo osarge. Nejoki ninche Saul, “Ng'ura, easita iltung'ana eng'oki to Laitoriani, aanya nkiri te nebo osarge.” Nejo ninye, “Itaasa te nkaldaroto; embeleleng'u osoit sapuk ene natii nanu.” Neitoki Saul ajo, “Endapashaki ate atua olorere, nijokiki ninche, ‘Nchoo pooki tung'ani meyau olkiteng lenye arashu enker enye, neyieng ninche tene, nenya; nimiasiasa eng'oki to Laitoriani aanya nkiri te nebo osarge.’ ” Neaku eyaua pooki tung'ani olkiteng lenye te nebo ninye ina kewarie apa, neyieng ninche te ine. Neshetu Saul olperere lo lasar lo Laitoriani; naa olperere lo lasar le dukuya oitera Saul ashetaki Olaitoriani. Neitoki Saul ajo, “Matadoi aapuo aasujaa Ilfilisti nikimbung, nikiya ntokitin enye nikiar kewarie ninche o mekenyu; miking'uaa iyiook oltung'ani obo te ninche.” Nejo ninche, “Taasa enaba anaa enidol aa sidai te iyie.” Kake etejo olapolosani, “Maigutu iyiook aanyikaki Olaitoriani tene.” Neikilikuanishore Saul Enkai, “Amaa, kalo nanu adoyio asujaa Ilfilisti? Amaa nchoru ninche apik atua enkaina e Israel?” Kake eitu ninye ewaliki ninye ina olong. Neitoki Saul ajo, “Wootu ene, intae ilarikok pooki loo ltung'ana; entayiolo nidolidolo eneikununye ena ng'oki taata. Amu ore anaa enaishu Olaitoriani, ilo oitajeu Israel, hoo tenaa atua Yonatan, olayioni lai etii meeta nchere meye ninye.” Kake metii apa oltung'ani ti atua iltung'ana pooki otawalikia ninye. Neitoki ninye ajoki Israel pooki, “Entijing intae enkalo nabo, ore nanu o Yonatan, olayioni lai, nikijing enkae shoto.” Nejoki iltung'ana Saul, “Taasa ina nidol aa sidai te iyie.” Neaku etejo Saul, “Olaitoriani Enkai oo Siraeli, kainyoo pee eitu iwaliki osinka lino ena olong? Tenaa atua nanu etii ena torroni arashu atua Yonatan, olayioni lai, Olaitoriani Enkai oo Siraeli, nchoru Urim; kake tenaa atua iltung'ana linono Israel etii ena torroni, nchoru Tummin.” Neyae Yonatan o Saul, nepok iltung'ana. Neitoki Saul ajo, “Entoosh enkukuo te rishata nanu o layioni lai Yonatan.” Neyae Yonatan. Nejoki Saul Yonatan, “Tolikioki nanu ina nitaasa.” Neliki Yonatan ninye, “Ainyorrinyorra nanu enkiti aisho te ndukuya e ng'udi apa natii enkaina ai; nele nanu, naa kaye.” Nejo Saul, “Metaasa Enkai ena te nanu neitulus; meeta nchere pee miye iyie, Yonatan.” Nejoki iltung'ana Saul, “Keye Yonatan laa ninye oisula te nkisulata sapuk e Israel? Ekelakua ina! Anaa enaishu Olaitoriani, meetae ninye olpapita le ndukuya enye odoiki enkop; amu etaasishe ninye te nebo Enkai ena olong.” Neaku eitopuaa iltung'ana Yonatan, metaa eitu eye. Neilep Saul alo aing'uaa emirata oo lfilisti; nepuo Ilfilisti ewueji enye. Ore apa pee eya Saul enkiguana te Israel, nearare ninye ilmang'ati lenyena pooki te pooki shoto, etaarare Moab, o Ilamoni, o Idom o laiguanak le Soba o Lfilisti; naa ore ake eneibelekenyakine neisulu ninye. Nearisho te mpijan nemir Ilmaleki, nekordu Israel aitung'uaa nkaik e lelo apa ooibung'a ninche. Ore apa ilayiok le Saul naa Yonatan, o Ishfi, o Malkishua; ore nkarn oo ntoyie enyena pokira are ninche kuna; eji ina kikau Merab, neji ina kiti Mikal; neji enkitok e Saul Ahinoam, entito e Ahimaas. Neji olkitok lenye le Njore Abna olayioni le Ner, olenkapu le Saul; Kish apa menye le Saul, ore Ner menye le Abna naa olayioni apa le Abiel. Eetae apa olarrabal ogol too Lfilisti too nkolong'i pooki e Saul, naa ore ake pee edol Saul oltung'ani ogol, arashu oltung'ani opi, neitinyikaki ninye kewan enye. Nejoki Samuel Saul, “Olaitoriani apa laairriwua nanu maatubukoki eilata aput pee iaku olaiguanani te shumata iltung'ana lenyena Isiraeli; ore naa taata toning'o irorei lo Laitoriani. Inji ejo Olaitoriani loo lororani, ‘Kaitame nanu ina naitaasa Ilamaleki Israel te ina naibooitie ninche te nkoitoi, apa eilepu aaing'uaa Misiri. Shomo taata taara Amalek, inyala tukul nena pooki naata ninche; mileku ninche, kake taara metua oltung'ani pooki olee o enkitok, enkerai kiti o enanakita, olkiteng o enker, entames o sikiria.’ ” Neaku eipoto Saul iltung'ana neiken ninche te Telaim, netii apa iltung'ana oopuo too nkejek nkalifuni iip are, o nkalifuni tomon oo ltung'ana le Yuda. Nelotu Saul enkanasa oo Lamaleki neirrag arresh to erata. Nejoki Saul Ilkeni, “Entudumunye, enchom entadoi enchom entung'uai Ilmaleki, mamut ake nanu intae te nebo ninche; amu intodolutua apa intae esupatisho too ltung'ana pooki le Israel apa pee epuonu aailepu aapuku aaing'uaa Misiri.” Neaku etudumunye Ilkeni aapuku ti atua Ilameleki. Nemir Saul lelo Amaleki ebaiki Hafila o meshomo aabaiki Shur, aa ninye oloo saen le Misiri. Neibung Agag ilo aiguanani loo Lamaleki eishu, nemut tukul iltung'ana pooki te nepi o lalem. Kake etelekutua Saul o iltung'ana Agag, o nkerra sidain oleng o lmong'i o lasho o lkuoo le kerra o pooki nara sidai, neitu eyieng ninche amut; ore ina pooki apa nameni naa pesho nemut ninche tukul. Nelotu ororei lo Laitoriani enetii Samuel ejo: “Airridua nanu nchere aitaa Saul olaiguanani; amu eibelekenye ninye ashuko aing'uaa esujata ai, neitu eas inkitanapat aainei.” Netagore apa Samuel neishiraki ninye Olaitoriani enkewarie pooki. Neinyototo Samuel ayooki pee enang'are Saul tadekenya; netiaakaki apa Samuel, “Eewuo Saul Karmel, naa ng'ura eshetaki kewan esoit nadamunyeki neitoki ashuko, nelo agiroo, nedoyio alo Gilgal.” Nelotu Samuel enetii Saul, nejoki Saul ninye, “Mikitamayiana Olaitoriani; ataasa nanu enaaitanapa Olaitoriani.” Neitoki Samuel ajo, “Kainyoo naa ena orui oo nkerra too nkiyiaa aainei, o nkipurrot oo lmong'i naning'ito nanu?” Nejo Saul, “Eyautua ninche too Lamaleki; amu etelekutua iltung'ana nkerra sidain o lmong'i, pee epolosaki Olaitoriani Enkai; ore nkulie nikitumuta iyiook tukul.” Neitoki Samuel ajoki Saul, “Tigirayu! Ekaaliki nanu enaatiaaka Olaitoriani ena kewarie.” Nejoki Saul ninye “Tolimu.” Nejo Samuel, “Ore hoo nira oti too nkonyek inono, aimira iyie endukuya oo loshon le Israel? Kitubukoko iyie Olaitoriani eilata aput aitaa olaiguanani le Israel. Nikirriwayie iyie Olaitoriani esiaai, nejo, ‘Shomo, indaikie lelo aing'okok, Ilamaleki, niarare ninche o metaba anaa neishunye.’ Kainyoo naa pee eitu ining oltoilo lo Laitoriani? Kainyoo pee ikuetikia nena tokitin nitaarutua, niaas embae torrono too nkonyek o Laitoriani.” Nejoki Saul Samuel, “Atoning'o oltoilo lo Laitoriani, ashomo nanu esiaai naa ninye aairriwayie Olaitoriani, ayaua Agag olaiguanani le Amalek, natumuta aidaikie Ilmaleki. Kake eyautua iltung'ana nena tokitin naataarutua, nkerra o lmong'i, nena tokitin sidain apa naatejoki keidaikieki pee epolosaki Olaitoriani Enkai ino te Gilgal.” Nejo Samuel, “Amaa keeta Olaitoriani enchipai sapuk too lasarri oopejori o nkishorot, anaa te nening'i oltoilo lo Laitoriani? Ng'ura eisidai ening'oto alang olasar, o enkinining'oto alang ilmeregeshi oopir. Amu etiu empaasharoto anaa esakutore, ore engolon e nkong'u naa esuujisho anaa eseremata oo ntokitin neme Enkai. Ore enkaraki nitanya ororei lo Laitoriani, kitanya sii ninye iyie pee miaku olaiguanani.” Nejoki Saul Samuel, “Ataasa nanu eng'oki; amu atigila nanu enkitanapata o Laitoriani o rorei linono, amu aturia nanu iltung'ana naning oltoilo lenye. Ore naa taata, aatoomono nanu, tapalakaki eng'oki ai, nirrinyo te nebo nanu, pee atum nanu ateserema Olaitoriani.” Nejoki Samuel Saul, “Marrinyo nanu te nebo iyie; amu itanya iyie ororei lo Laitoriani, nikitanya iyie Olaitoriani pee miaku olaiguanani te Israel.” Ore eshuko Samuel alo aing'uaa, neibung Saul olcholoi lo lkila lenye, nepolosa. Nejoki Samuel ninye, “Etopolosayie Olaitoriani enkitoria e Israel te iyie ena olong, neishoo ninye olelatia ino, laa ninye supat likilang iyie. Ore sii Ilo ora Enkitoo e Israel nemelejisho arashu eirridu; amu mme oltung'ani ninye, metaa keirridu.” Nejo ninye, “Ataasa nanu eng'oki; ore eyia; iyanyitaki taata te dukuya ilpayiani loo ltung'ana laainei o te dukuya Israel, nirrinyo te nebo nanu, pee atum nanu ateserema Olaitoriani Enkai ino.” Nerrinyo Samuel asuj Saul; neserem Saul Olaitoriani. Neitoki Samuel ajo, “Iyau ene natii nanu Agag, ilo aiguanani loo Lamaleki.” Nelotu Agag enetii ninye eshipa. Nejo Agag, “Esipa etulusoyie emion e keeya.” Nejo Samuel, “Ore anaa enatooruo olalem lino nkituaak inkera, keaku sii ninye taata ngutunyi enemeeta enkerai ti atua nkituaak.” Nedung Samuel Agag aitaa ndung'ot te dukuya Olaitoriani te Gilgal. Neitoki Samuel alo Rama; nelo Saul enkaji enye te Gibea e Saul. Neitu ae kata eitoki Samuel adol Saul o metabau enkolong e keeya enye, kake eishiraka Samuel Saul. Neirridu Olaitoriani nchere eitaa Saul olaiguanani le Israel. Nejoki Olaitoriani Samuel, “Nchiraki akenya Saul o anu, idolita ajo atanya nanu ninye pee meaku olaiguanani te Israel? Imputa ina mouo eilata nilo; kaairriwaa nanu iyie enetii Yese, ilo Betlehemi, amu aing'uraka nanu kewan ai olaiguanani ti atua ilayiok lenyena.” Nejo Samuel, “Kaji nanu aiko te nalo? Te nening Saul ina naar nanu matua.” Nejo Olaitoriani, “Iwa enkashe te nebo iyie nijo, ‘Aewuo pee apolosaki Olaitoriani olasar.’ Nintoomon Yese meeu olasar, naa kaaitadol eniaas; nibukoki iyie eilata aput ilo laaipotoki enkarna enye.” Neas Samuel ina naitanapa Olaitoriani, nelotu Betlehem. Nepuonu ilpayiani le nkanasa eikirikira aanang'are ninye nejo, “Ilotu iyie te seriani?” Nejo ninye, “Te seriani; aewuo nanu apolosaki Olaitoriani; entisinya ate, nipuonunu te nebo nanu olasar.” Neitisiny ninye Yese o layiok lenyena, neitoomon ninche to lasar. Ore pee ebau ninche, neing'or ninye Eliab, nedamu ajo, “Esipa etii ilo otubukoko Olaitoriani eilata aput dukuya.” Kake etiaaka Olaitoriani Samuel, “Ming'or enaikununo ninye arashu enkadoro enye o lkitashei lenye, amu atanya nanu ninye; amu meing'or Olaitoriani anaa enaing'or tung'ani; eing'or tung'ani enaikununo oriong, kake oltau eing'or Olaitoriani.” Neitoki Yese aipot Abinadab, neisho ninye metogiroi te dukuya Samuel. Nejo ninye, “Eitu sii egelu Olaitoriani ele.” Neitoki Yese aisho Shamas metogiroi. Nejo ninye, “Eitu sii egelu Olaitoriani ele.” Neisho Yese ilayiok lenyena pokira oopishana metogiroi te dukuya Samuel. Nejoki Samuel Yese, “Eitu egelu Olaitoriani kulo.” Nejoki Samuel Yese, “Ketii ilayiok linono pooki ene?” Nejo ninye, “Etiooyo ilo oti, kake ng'ura, etii ntare.” Nejoki Samuel Yese, “Irriwai olkilikuai metorikuni ninye; amu mikitoni iyiook o metaba anaa nelotu ninye ene.” Neirriwaa ninye olkilikuai, nerikuni ninye aaitijing'u. Naa kenyokie apa ninye newang nkonyek enyena, neikishiaan. Nejo Olaitoriani, “Tudumunye, tubukoki ninye eilata; amu ninye ele.” Neya Samuel emowuo e ilata nebukoki ninye eilata aput te mpolos oo lalashera lenyena; nelotu Enkiyang'et o Laitoriani te ngolon shumata Daudi ebaiki ina olong neito dukuya. Nedumunye Samuel nelo Rama. Nelo Enkiyang'et e Nkai aing'uaa Saul, nelotu enkiyang'et torrono naing'uaa Olaitoriani aitanyamal aisomit ninye. Nejoki Saul isinkan lenyena, “Ng'ura taata, kintanyamalita iyie enkiyang'et torrono naing'uaa Olaitoriani. Nchoo taata olkitok lang eitanap isinkan linono ootii dukuya iyie, pee eing'oru oltung'ani oyiolo atoosho enkawuo oo sinkolioitin; ore ake pee eitoki atii shumata iyie enkiyang'et torrono naing'uaa Enkai, nerany ninye te ina auo oo sinkolioitin, naa inchiu iyie.” Neaku etiaaka Saul isinkan lenyena, “Entorikokoki nanu oltung'ani oyiolo ataranya oleng, nirikuku ninye ene natii.” Newal obo loo lbarnot ajo, “Ng'ura, atoduaa nanu olayioni le Yese le Betlehem, laa kaarriyia te ranyare, oltung'ani opi, naa oltung'ani lo larrabal, arriyia te nkiroroto naa oltung'ani le nkishaa sidai; netii Olaitoriani te nebo ninye.” Neaku eirriwayie Saul ilkiliku enetii Yese nejo, “Irriwakaki nanu Daudi, olayioni lino, laa ninye otii ntare.” Neitayu Yese olkurrarruu onap imukateni, olbene lo lchoni le naisho, o lkuoo le kine, neirriwaa ninche te Daudi, olayioni lenye, airriwaki Saul. Nelotu Daudi enetii Saul, nejing enkisiaayiare enye. Nenyorru Saul ninye oleng; neaku ninye olanapani lenye loo masaa o larrabal. Neirriwaki Saul olkilikuai Yese, ejo, “Nchoo Daudi eton te nkisiaayiare ai, amu enoto ninye omom too nkonyek aainei.” Naa ore ake pee elotu enkiyang'et torrono naing'uaa Enkai shumata Saul, nedumu Daudi enkawuo oo sinkolioitin neosh te nkaina enye; neaku eitagoloki apa Saul, nesupatu, neing'uaa ninye ina kiyang'et torrono. Neiturrur apa Ilfilisti ilororani lenye le njore te nkaraki olarrabal. Neiturrurrote apa ninche te Soko, naa ene Yuda, nepik ilng'oborri erishata e Soko o Aseka, te Efes-damim. Ore Saul o iltung'ana le Israel neiturrurrote, nepik ilng'oborri oerata le Ela, neluaa too lkererin lo larrabal pee earare Ilfilisti. Neitashe Ilfilisti te nchumata oldoinyo te nkalo nabo, neitashe Isiraeli te nchumata oldoinyo te nkae shoto, etii oerata erishata ninche. Neipang'u apuku too lng'oborri loo Lfilisti oloing'oni oji Goliat, le Gas, laa ore enkadoro enye negiroo ntemat e nkaina ile, neeta apa ninye emaupe o suyai neishopito olkila lo lgoo lo suyai le shekeli nkalifuni imiet. Neeta apa nkitushureta o suyai too nkejek enyena. Ore eremet o suyai neika te rishata oo ronyi lenyena. Neba enchata e remet enye anaa enauner ore esipil e ina remet enye naa irratilini tomon o imiet; ore ilo onap elong'o enye nelo te dukuya ninye. Neitashe ninye nebuaaki enjore oo Siraeli ejo, “Kainyoo pee impang'utua intae aapuonu aataaniki olarrabal? Ae mara nanu Olfilisti, nirara intae isinkan le Saul? Entegelaki ate oltung'ani, ninchosho ninye edou alotu ene natii. Te naidim ninye ataarare nanu naar nanu matua, nikiaku iyiook isinkan linyi; kake te naisulu nanu te ninye naar ninye metua, niakuku intae isinkan lang, nisiaayiayia iyiook.” Nejo ilo Filisti, “Atamoro nanu iltimito le njore e Israel ena olong; enchooki nanu oltung'ani pee kitum aatarata te nebo.” Ore ake pee ening Saul o Siraeli pooki kulo omon lo Lfilisti neing'aeng'ae ninche neirut oleng. Naa olayioni lo Lframiti apa Daudi le Betlehem e Yuda, oji Yese, oata apa ilayiok isiet. Ore apa too nkolong'i e Saul netamorua ilo tung'ani oleng neaku oloo larin kumok. Ore lelo ayiok okuni botoro le Yese netusuja apa Saul aapuo enjore; ore nkarn e lelo ayiok lenyena ooshomo enjore naa Eliab ilo kikau, ore olosujita ninye naa Abinadab, ore oliokuni naa Shama. Daudi apa oloti te pooki; ore lelo okuni botoro netusuja Saul, kake eshomo apa, Daudi ailoiki enetii, o Betlehem alo airrita ntare e menye. Too nkolong'i artam apa eewuo ilo Filisti dukuya neitashe te nkitashoto enye, tadekenya o teipa. Nejoki Yese Daudi olayioni lenye, “Iyaki ilalashera linono ena efa enkano napejo, o kuna mukateni tomon, ninap aitasiooyo aya ilng'oborri enetii ilalashera linono; niyaki sii kulo belat tomon le ng'orno naitoyioki olkitok le nkalifu enye. Toduaa eneikununo ilalashera linono, nishoru iyie entoki naitodolu ajo itoduaa ninche naa eisupati.” Ore apa Saul, o ninche, o ltung'ana pooki le Israel, netii atua oerata le Ela, eara o lelo Filisti. Neinyototo Daudi ayooki tadekenya, neing'uaa nkerra te nebo olaing'urani, neya endaa, nelo anaa enaitanapa Yese ninye; nelotu lelo ng'oborri egira olorora alo dukuya too lkererin lo larrabal te wueji niarareki; ebuaku to lkiyioi lo larrabal. Ore Isiraeli o Lfilisti nenyikakino pee eara, enjore earare njore. Neing'ueiki Daudi intokitin olaing'urani loo lolan, neipirri alo enetii iltimito, nelo neiroroki ilalashera lenyena. Ore eirorie ninche, ng'ura, ore ilo oing'oni ilo Filisti le Gas, oji Goliat neilepu apuku ti atua iltimito loo Lfilisti; neiro lelo rorei anaa apa. Nening Daudi ninye. Ore iltung'ana pooki le Israel, pee edol ilo tung'ani, neipirri aailany ninye, neirut ninche oleng. Nejo iltung'ana le Israel, “Itoduaa iyie ele tung'ani oilepua? Esipa eewuo ninye ailepu pee emor Israel; ore oltung'ani oar ninye metua, neitaaa ninye olaiguanani karsis te nkarsisisho kitok, neisho ninye entito enye neitaa enkaji e papaai lenye metalakunoyu te Israel.” Nejoki Daudi lelo tung'ana apa ooitashe te mbata enye, “Kaa eitaasi oltung'ani oar ele Filisti metua, neitayu emoroto te Israel? Amu kaing'ae ninye ele Filisti lememurata, metaa keidim atamoro njoreitin e Nkai naishu?” Newaliki ninye iltung'ana neijia inchere, “Ina eitaasi oltung'ani oar ninye metua.” Nening Eliab, ilo alashe lenye botor, eirorie iltung'ana; neyupuyup engoro e Eliab te nkaraki Daudi, nejo ninye, “Kainyoo iyie pee itadouo ene? Naa kaing'ae itung'ueikia nekua kuti kerra naatii ong'ota? Ayiolo nanu enkitokoos ino, o entorroni o ltau lino; amu iewuo adou aing'or olarrabal.” Nejo Daudi, “Kaa taata ataasa? Aime ororei ake?” Neibelekenya aing'uaa ninye alo enetii olikae, neiro te ina oitoi; neitoki iltung'ana aawaliki ninye anaa duoo ake te dukuya. Ore ake pee ening'i lelo rorei ooiroro Daudi, neigil ninche aalimu te dukuya Saul; neirriwaa ninye olkilikuai aipotu ninye. Nejoki Daudi Saul, “Emincho oltung'ani hoo obo epalari te nkaraki ninye; kelo osinka lino aarare ele Filisti.” Nejoki Saul Daudi, “Mindim iyie ashomo ataarare ele Filisti; amu ira iyie olbarnoti ake, naa oltung'ani apa ninye lo larrabal ebaiki kitisho enye.” Kake etiaaka Daudi Saul, “Keing'or apa osinka lino nkerra e papaai lenye; naa tenelotu olng'atuny arashu olng'arurumi, neya olkuoo ti atua eluaata, nalo nanu asujaa naar ninye naitayu nanu olkuoo te nkutuk enye; naa te nelo naadumakino nanu, naibung olmunyei lenye naar metua. Etaara osinka lino metuata ilng'atunyo o lng'arurumi; ore ele Filisti lememurata naa ketiu anaa obo te ninche, amu etamoro injoreitin e Nkai naishu.” Nejo Daudi, “Ore ilo Aitoriani laaitajeuo nanu too loisotok lo lng'atuny o te nkaina o lng'arurumi naa kaaitajeu te nkaina ele Filisti.” Nejoki Saul Daudi, “Shomo, neaku Olaitoriani te nebo iyie.” Neishopoki Saul Daudi iruparen enyena e njore; nepik emaupe o suyai e ndukuya enye, neishopoki olkila lo lgoo lo larrabal. Nerreten Daudi olalem lenye ti oriong olkila lenye lo larrabal, nejo pesho ajo alo, amu eitu apa emoku ninche. Neitoki Daudi ajoki Saul, “Maidim nanu ashomo te kuna; amu eitu nanu amoku ninche.” Neitayu Daudi ninche airragie. Neya ninye eng'udi enye te nkaina, negelu isoito imiet oosipa to lkeju, nepik atua ilo bene lenye lo lairritani loo ntare, netii enkopito enye enkaina, nelo anyikaki ilo Filisti. Nelotu ilo Filisti anyikaki Daudi, etii ilo anapani le long'o enye dukuya ninye. Ore ake pee eing'or ilo Filisti, nedol Daudi; nemenaa ninye, amu olbarnoti apa ninye onyokie neikishiaan te nking'urata. Nejoki ilo Filisti Daudi, “Kara nanu oldia, pee ilotu enatii too ng'udisin?” Nedek ilo Filisti Daudi too nkaitin enyena. Nejoki ilo Filisti Daudi, “Wou enatii, naa kaisho nanu nkiri o sesen lino imotonyi o loing'ang'e o ng'uesi e ong'ata.” Neitoki Daudi ajoki ilo Filisti, “Ilotu iyie enatii to lalem o te mpere, o te nkae pere naado; kake alotu nanu enitii iyie te nkarna o Laitoriani loo lororani, ina Ai oo njoreitin e Israel, naa ninye iyie itamoro. Ore ena olong eikipik iyie Olaitoriani atua enkaina ai, naar abatat, nadung'oo endukuya ino, naisho nanu impopong'i oo lororani oo tuata loo Lfilisti ena olong imotonyi o loing'ang'e o ilowuarak le ntim pee etum enkop pooki atayiolo nchere etii Enkai atua israel, neyiolou sii ele turrur pooki nchere keitajeu Olaitoriani neme to lalem o te remet; amu olo Laitoriani ele arrabal naa eikinchoru ninye apik iyie atua enkaina ang.” Ore ake pee edumunye ilo Filisti nelotu pee enang'are Daudi, neipirri Daudi asiooyo alo ilo kereri lo larrabal anang'are ilo Filisti. Nepik Daudi enkaina atua olbene lenye neitayu osoit, nepik enkopito, neyuk ninye, nenang ilo Filisti olpura le nkomom enye; neimis ilo soit ti atua olpura le nkomom enye, nebatata ninye te nkomom enye aosh enkop. Neaku eisula Daudi ilo Filisti te nkopito o to soit, neosh ilo Filisti, near ninye metua; nemetii apa olalem enkaina e Daudi. Neipirri Daudi neitashe te nchumata e ilo Filisti, neya olalem lenye, neyietu ashurtu te nchashur enye, near ninye metua, nedung'orie endukuya enye. Ore ake pee edol Ilfilisti aajo etua oloing'oni lenye neisik. Ore iltung'ana le Israel o Yuda nedumunye te mbuakunoto nesuj Ilfilisti o metabai Gas o nchomito e Ekron neaku ore lelo Filisti loo lbaa nebatata ebaiki She-ara-im o metabaiki Gas o Ekron. Nepuonu Israeli aashukunye te mirata oo Lfilisti neya intokitin too lng'oborri lenye. Neyau Daudi endukuya eilo Filisti Yerusalem, kake etipika imasaa enyena o larrabal atua olngobor lenye. Ore ake pee edol Saul Daudi elo aarare ilo Filisti, nejoki ninye Abna, olkitok le njore, “Abna, kole ng'ae ele barnoti?” Nejo Abna, “Anaa enaishu oltau lino, olaiguanani, maaidim nanu atolimu.” Nejo olaiguanani, “Inkilikuanu kole ng'ae ele ayioni.” Ore eshukunye Daudi aing'uaa enkirragata e ilo Filisti, neya Abna ninye, neyau ninye dukuya Saul eeta elukunya e ilo Filisti te nkaina enye. Nejoki Saul ninye, “Ira iyie ole ng'ae, lo barnoti?” Newal Daudi ajo, “Ara nanu olo sinka lino Yese le Betlehem.” Ore ake pee eidip airorie Saul, neibung'a oltau le Yonatan oltau le Daudi, nenyorru Yonatan ninye anaa oltau lenye kewan. Nerik Saul ninye ina olong, nemeisho ninye metushukoyu alo enkang enye. Nenya Yonatan olmumai lo sotua te nebo Daudi, enkaraki apa nanyor ninye anaa oltau lenye kewan. Neitayu Yonatan olkila apa oishopito neisho Daudi, o masaa enyena, o lalem lenye o enkawuo o enkimeita enye. Naa ore ake te neipang Daudi alo eneba anaa eneirriwayie Saul nedupoyu; neaku etipika ninye Saul shumata iltung'ana le njore. Naa eisidai apa ina too nkonyek oo ltung'ana pooki o too nkonyek sii oo sinkan le Saul. Ore egira aapuonu ang, ina kata pee eshukunye Daudi eing'uaa esesekuanata e ilo Filisti, neipang'u nkituaak aapuonu too nkanas pooki e Israel, eranyisho neiguran pee enang'are olaiguanani Saul, too ntampurini, o too sinkolioitin le ng'ida, o too nkinantani oo sinkolioitin. Neranyakino nkituaak maate eraposhoki ejo, “Etasesekuana Saul nkalifuni enyena, nesesekuan Daudi nkalifuni tomon enyena.” Negoro Saul oleng, ore ena kiroroto neitu eitiship ninye; nejo ninye, “Eterrepakitia ninche Daudi nkalifuni tomon, ore nanu naaterrepakitia nkalifuni; kainyoo ae naitoki ninye aata meteleku enkitoria?” Neduaaki Saul Daudi olom ebaiki ina olong neito dukuya. Ore pee ekenyu nelotu enkiyang'et torrono naing'uaa Enkai nejing atua Saul, neiyiang'iyiang ninye ti atua enkaji enye, eoshito Daudi enkawuo oo sinkolioitin, anaa ake. Neeta apa Saul empere te nkaina enye; nengoroo Saul empere amu etejo ninye, “Apudaki nanu Daudi esuntai.” Kake etapaashare Daudi ninye katitin are. Keure apa Saul Daudi, amu etii Olaitoriani te nebo ninye kake etung'uayie Saul. Neaku eiwuang'ie Saul ninye te ine netii, neitaa ninye olkitok le nkalifu neipang alo nelo dukuya iltung'ana. Netum Daudi dupoto te nena pooki apa naataasa; amu etii Olaitoriani te nebo ninye. Ore ake pee edol Saul nchere enoto ninye dupoto sapuk, neureyu ninye. Kake ore Israel pooki o Yuda pooki naa kenyor apa Daudi amu eshomo apa ninye aipang nejing'u atua te dukuya ninche. Nejoki Saul Daudi, “Nena entito ai botor Merab; kaaisho nanu iyie pee intaa enkitok; kake tudupayu te nanu niarisho too larrabali lo Laitoriani.” Amu etejo Saul, “Mincho enkaina ai eaku shumata ninye, kake nchoo enkaina oo Lfilisti eaku shumata ninye.” Nejoki Daudi Saul, “Kara nanu ng'ae, naa kainyoo olmarei lai, olmarei le papaai te Israel, metaa kaaku nanu olaputani lo laiguanani?” Kake te nkata apa nataa keishori Merab, entito e Saul, Daudi, neishori ninye Adriel ilo Meholati meitaa enkitok. Nenyor apa entito e Saul, Mikal, Daudi; neliki ninche Saul, neitiship ina toki ninye. Nejo Saul, “Ntasho maishoo nanu ninye, pee etum ataa orreshet te ninye, pee etum sii enkaina oo Lfilisti ataarare ninye.” Metaa etiaaka Saul Daudi te nkata e are, “Iaku taata iyie olaputani lai.” Neitanap Saul isinkan lenyena ejo, “Erorie Daudi too nkurrat nijokiki, ‘Ng'ura, eikishipakino iyie olaiguanani, naa eikinyor isinkan lenyena pooki; ore naa taata taa olaputani lo laiguanani.’ ” Neiro isinkan le Saul lelo rorei too nkiyiaa e Daudi. Nejo Daudi, “Idolidolo intae aa entoki kiti te neaku oltung'ani olaputani lo laiguanani, idolitata aajo ara nanu oltung'ani aiterani lemening'o?” Nejoki ninye isinkan le Saul, “Inji o nji eiroro Daudi.” Neitoki Saul ajo, “Entoliki Daudi ijokiki, ‘Meyieu olaiguanani entoki e nkaputi meteleku isuaaten iip oo Lfilisti pee etum aitalaku elap too lmang'ati lo laiguanani.’ ” Naa kejo apa Saul pee eisho Daudi metua te nkaina oo Lfilisti. Ore ake eliki isinkan lenyena Daudi kulo rorei, neitiship Daudi ina neaku olaputani lo laiguanani. Ore eton eitu eishunye enkata, nedumunye Daudi nelo, te nebo iltung'ana lenyena, near metuata Ilfilisti iip are; neyau Daudi isuaaten enye, naaishooki apa te siana nalulung'a olaiguanani, pee etum ninye ataa olaputani lo laiguanani. Neisho Saul ninye ina tito enye Mikal meitaa enkitok. Kake ore ake pee edol Saul neyiolou ajo etii Olaitoriani te nebo Daudi, o nchere kenyor Isiraeli pooki ninye, neponari Saul aureyu Daudi oleng. Neaku etaa apa Saul olmang'atinta le Daudi anaake. Neitoki ilkituaak loo Lfilisti aaipang'u aapuonu olarrabal, naa ore ake anaa te nepuonu netum Daudi dupoto sapuk alang isinkan pooki le Saul; neaku ore apa enkarna enye naa kejukari oleng. Neirorie Saul Yonatan, olayioni lenye, o lelo sinkan lenyena pooki, nchere pee ear ninche Daudi metua. Kake ore Yonatan, olayioni le Saul, keshipakino apa Daudi oleng. Nejoki Yonatan Daudi, “Ore Saul, papaai lai, naa eiking'oru iyie aar tua; neaku tagolie kewan tadekenya, totona te wueji misil isudoi kewan; naa kalo nanu aipang aitashe atashare papaai lai te ine wueji nitii, nairorie nanu papaai lai mbaa inono; naa te nayiolou nanu pooki toki naaliki iyie.” Neiro Yonatan mbaa sidain ti alo Daudi te Saul, papaai lenye, nejoki ninye, “Mincho olaiguanani eas eng'oki ti alo osinka lenye Daudi; amu eitu ninye eas eng'oki tialo iyie, amu ore nkiaasin enyena naa ine nkisiaayiare sidain apa te iyie; amu etipika ninye enkishui enye nkaik enyena nesesekuan ninye ilo Filisti, neyaki Olaitoriani Israel pooki emirata kitok. Itoduaa apa iyie, ning'idayu; kainyoo naa pee ias eng'oki to sarge lemeeta entioto aar Daudi metua meeta emporeet?” Nening Saul oltoilo le Yonatan; nenya Saul olmumai ajo, “Anaa enaishu Olaitoriani, meari ninye metua.” Neipotu Yonatan Daudi, neitodol Yonatan ninye kuna baa pooki. Neriku Yonatan Daudi enetii Saul, netii apa ninye ine netii ninye anaa apa te dukuya. Neitoki olarrabal apuku; neipang Daudi alo nearare Ilfilisti, neitayu esesekuanare sapuk ti atua ninche, neaku eipirritio te dukuya ninye. Neitoki enkiyang'et torrono naing'uaa Olaitoriani alotu shumata Saul, etonita ti atua enkaji enye eeta empere enye te nkaina enye; neoshito Daudi enkawuo oo sinkolioitin. Nejo Saul apudaki Daudi esuntai te mpere; kake etapaashare Daudi Saul, neaku eibitaka empere esuntai. Neisik Daudi, neimisho. Ore ina kewarie neirriwaa Saul ilkiliku enkaji e Daudi metaleeno ninye, pee etum ataara ninye metua tadekenya. Kake etiaaka ninye Mikal, enkitok e Daudi, “Ti nimintajeu enkishui ino ena kewarie, ore taisere niye.” Neaku eitadoyie Mikal Daudi aimie elusie nelo ninye aisik neimisho. Neya Mikal enkitanyaanyukoto neirragie ninye te ndapash nepik entoki nairishunyeki endukuya oo lpapit loo ntare elukunya enye, neimulumul too nkarash. Ore ake pee eirriwaa Saul ilkiliku meshomo aaya Daudi, nejo ninye, “Kemuei ninye.” Neirriwaa Saul ilkiliku meshomo aadol Daudi, ejo, “Eyakaki nanu ti atua endapash, pee atum nanu ataara ninye metua.” Ore ake pee ejing'u lelo kipaareta, ng'ura, etii ina kitanyaanyukoto endapash, o ina toki nairishunyeki endukuya oo lpapit loo nkineji te ndukuya enye. Nejoki Saul Mikal “Kainyoo pee kiteleja aikonji, nincho olmang'atinta lai meshomo neaku etajeuo ninye?” Newaliki Mikal Saul, “Aatiaaka ninye nanu, ‘Ntasho mashomo; kainyoo pee aar nanu iyie tua?’ ” Neisik Daudi neimisho nelotu apa ninye enetii Samuel te Rama, neliki nena pooki naaitaasa Saul ninye. Ore ninye o Samuel nepuo aabik te Naios. Netiaakaki apa Saul, “Ng'ura, etii Daudi Naios te Rama.” Neitoki Saul airriwaa ilkiliku meyau Daudi; ore ake pee edol ninche olturrur loo loibonok le Nkai eibonisho, o Samuel aa olarikoni te shumata ninche, nelotu enkiyang'et e Nkai shumata lelo kipaareta le Saul, neibonisho sii ninche. Ore ake pee elikini Saul, neirriwaa ninye kulikae kipaareta, neibonisho sii ninche. Neitoki Saul airriwaa ilkiliku te nkata e uni, neibonisho ake sii ninche. Neitoki ninye makewan alo Rama, nelotu ilo shorro sapuk apa otii Seku; neikilikuanu ajo, “Kaji etii Samuel o Daudi?” Nejo obo, “Ng'ura, etii ninche Naios te Rama.” Nelo ninye teine Naios te Rama; nelotu enkiyang'et e Nkai shumata ninye, ore eloito neibonisho ninye, o metaba anaa nelotu ninye Naios e Rama. Neshurtu sii ninye nkilani enyena, neibonisho sii ninye te dukuya Samuel, neirrag meeta enkila ina olong pooki o ina kewarie pooki. Neaku etejoki, “Ketii sii ninye Saul atua iloibonok le Nkai?” Neitoki Daudi aisik aing'uaa Naios te Rama, nelotu ajoki Yonatan, “Kainyoo nanu ataasa? Kainyoo entorroni ai? Naa kainyoo eng'oki ai te dukuya papaai lino, metaa keing'oru ninye enkishui ai?” Nejoki Yonatan ninye, “Metalakuana ina! Miye iyie. Ng'ura, meas papaai toki aa kitok o aa kiti eitu aaimakinye nanu; naa kainyoo naa pee aamikinye nanu papaai ena? Mme neijia etiu.” Kake etawala Daudi ajo, “Eyiolo papaai lino oleng nchere anoto nanu omom too nkonyek inono; nejo ninye, ‘Mincho Yonatan eyiolou ena, pee megoro ake.’ Kake esipa, anaa enaishu Olaitoriani o anaa enaishu oltau lino, eroruata nabo ake natii erishata nanu o keeya.” Neitoki Yonatan ajoki Daudi, “Ore pooki nijo, naaitaas nanu iyie.” Nejoki Daudi Yonatan, “Ng'ura, olapa ng'ejuk taisere, nemajoyio nanu eitu aton te mesa te nebo olaiguanani, kake nchooki nanu mashomo, pee atum aisudoi kewan ti ong'ata o metabau enkolong e uni teipa. Te naalau nanu papaai lino tukul, nijoki, ‘Etasaishe Daudi aomonu pee ekuet alo Betlehem, enkanasa enye; amu etii ine olasar anaake to lari to lmarei pooki.’ Te nejo ninye, ‘Sidai!’ nesidanu to sinka lino; kake te negoro ninye, nitum atayiolo ajo eitobirita ninye entorroni. Neaku intaasa osinka lino te supatisho, amu iyaua osinka lino atua olmumai osinya lo sotua te nebo iyie. Kake te netii entorroni atua nanu, taaraki iyie nanu; amu kainyoo paa papaai lino kiyaki?” Nejo Yonatan, “Mikitalama kuna! Amaa naaji tenaa kayiolo nchere eitobirita papaai entorroni pee elotu shumata iyie, aimaaliki nanu iyie?” Neitoki Daudi ajoki Yonatan, “Kaing'ae laaliki nanu tenaa eikiwaliki papaai lino te nkisikong'ota?” Nejoki Yonatan Daudi, “Wou, maipang'a aapuo ong'ota.” Neaku eipang'a pokira oare aapuo ong'ota. Nejoki Yonatan Daudi, “Metaa Olaitoriani, Enkai oo Siraeli shakeni! Te naimakinye nanu papaai lai tena rishata taisere, arashu te nkolong e uni, ng'ura, tenaa esidai ninye ti alo iyie, aimairriu nanu olkilikuai pee aaitayiolo iyie. Kake te nelo neaku keitiship papaai lai pee kintaas iyie entorrono, metaasa sii Olaitoriani ina te Yonatan, neitulusoo sii te nemaaitayiolo nanu, areu iyie shomo, pee itum ashomo te seriani. Metaa Olaitoriani te nebo iyie, anaa enataa te nebo papaai lai. Te neton nanu aishu, ntoduaaki nanu enyorrata nemeibelekenya o Laitoriani, pee maye nanu; nimidung esupatisho ino aitung'uaa enkaji ai ntarasi. Te neiwuang'ie Olaitoriani adung'oo pooki ng'ae loo lmang'ati le Daudi aiwuang'ie ti oriong e nkop, mincho enkarna e Yonatan edung'ori aaitung'uaa enkaji e Daudi. Naa meitalaku Olaitoriani elap too lmang'ati le Daudi.” Neitoki Yonatan ainosie Daudi olmumai aigil ti alo enyorrata enye te ninye; amu kenyor apa ninye anaa enanyor oltau lenye. Neitoki Yonatan ajoki ninye, “Ore taisere naa olapa ng'ejuk; naa eikilai iyie, enkaraki nemetii toki olorika lino. Ore te nkolong e uni naa eikilai iyie oleng; neaku shomo ewueji apa nisudoriyie kewan aa torrok mbaa, niton te mbata oo soito oosoto. Naa kang'oroo nanu mbaa uni embata enye anaa duoo kaata entoki nang'orito. Naa ng'ura, kairriu nanu enkerai, ajoki, ‘Shomo, ing'oru mbaa.’ Ore ake pee ajoki enkerai, ‘Ng'ura ena shoto ino etii mbaa, iyau ninche’; nilotu iyie, amu, ore anaa enaishu Olaitoriani, keserian te iyie nemetii embatisho. Kake te najoki nanu ilo barnoti, ‘Ng'ura etii mbaa te idia alo iyie;’ shomo, amu Olaitoriani likirriwayie iyie shomo. Ore ti alo ina bae nikiimakitia nanu o iyie, ng'ura, etii Olaitoriani erishata iyie o nanu ntarasi.” Neaku eisudoyie Daudi kewan ti atua enkurma; ore ake pee elotu olapa ng'ejuk, neton olaiguanani anya endaa. Neton olaiguanani to lorika lenye, anaa too nkulie katitin, to lorika otii embata e suntai; neton Yonatan aipirakinore, neton Abna atashare Saul kake keisiu ewueji e Daudi. Ore eyia eitu ejo Saul ae ina olong; amu etejo ninye, “Eeta ake naanoto ninye; mesinya ninye, esipa mesinya ninye.” Kake ore te nkolong e are, taisere e tulusoyie olapa ng'ejuk, neisiu ake ewueji e Daudi. Nejoki Saul Yonatan, olayioni lenye, “Kainyoo pee eitu elotu olayioni le Yese anya endaa, ng'ole arashu taata?” Newaliki Yonatan Saul ajoki, “Aatasayia nanu Daudi aomonu pee elo Betlehem; etejo ninye, ‘Nchooki nanu mashomo; amu eeta olmarei lang olasar ti atua enkang, naaitanapa nanu olalashe lai pee atii ine. Neaku taata, te nanoto nanu omom too nkonyek inono, nchooki mashomo, pee adol ilalashera laainei.’ Te nkaraki ena eitu ninye elotu emesa o laiguanani.” Neyupuyup engoro e Saul tialo Yonatan, nejoki ninye Yonatan “Iyie olayioni le nkitok modai nemening'isho, aimayiolo nanu ajo itegelua iyie olayioni le Yese te nkurruna ino makewan, o te nkurruna e masipaisho e ng'utunyi? Amu ore anaa enaishu olayioni le Yese ti oriong kop, mibul iyie nemebul enkitoria ino. Metaa irriwai olkilikuai niyau ninye enatii, amu esipa eye ake.” Neitoki Yonatan awaliki Saul, papaai lenye ajoki, “Kainyoo pee eari ninye metua? Kainyoo etaasa ninye?” Kake etang'oroyie Saul empere enye ajo ang'or ninye; neaku etayiolo Yonatan nchere enyokita apa papaai lenye ajo aar Daudi metua. Nedumunye Yonatan aing'uaa emesa te ngoro napi neitu enya endaa te nkolong e are o lapa, amu eishirieki te nkaraki Daudi, te nkaraki naitukurrua papaai lenye ninye. Ore tadekenya neipang Yonatan alo atua enkurma ewueji netoning'okinote o Daudi, nelo te nebo ninye enkiti ayioni. Nejoki ninye enkerai enye, “Kueta ing'oru nena baa natang'oroyie nanu.” Ore ekuet enkayioni nengoroo embae te idia alo ninye. Ore ake elotu enkayioni ewueji netii ina bae natang'oroyie Yonatan, neipot Yonatan enkayioni nejoki, “Aimetii embae te idia alo iyie?” Neipot Yonatan enkayioni, “Tasiooi, isarisara, miton.” Neaku etasotuo enkayioni e Yonatan mbaa, nelotu enetii olkitok lenye. Kake meyiolo apa ina ayioni toki; Yonatan ake o Daudi ooyiolo ina bae. Neisho Yonatan imasaa enyena olarrabal ina ayioni nejoki ninye, “Shomo iwa ninche enkanasa.” Ore ake eshomo ina ayioni nedumunye Daudi te mbata oo soito oorupa, nebatata ninye te nkomom enye abaiki enkop, neirrugo katitin uni; neng'ututa maate, neishirakino maate, o metaba anaa neyagaa Daudi. Neitoki Yonatan ajoki Daudi, “Shomo te seriani, amu ore anaa enikinosa olmumai iyiook pokira te nkarna o Laitoriani, kijo, Olaitoriani otii erishata nanu o iyie, o erishata e ishoi ai o eshoi ino, intarasi.” Nedumunye ninye nelo; nelo Yonatan ajing enkanasa. Nelotu Daudi Nob enetii Ahimelek olapolosani; nelotu Ahimelek anang'are Daudi eikirikira, nejoki ninye, “Kainyoo paa iyie openy, nemetii hoo obo te nebo iyie?” Nejoki Daudi Ahimelek ilo apolosani, “Aairriwayie nanu olaiguanani te mbae naje, naajoki nanu, ‘Mincho ake hoo ng'ae eyiolou ae toki ena bae naa ninye aairriwarie, naa ninye aaitanapa iyie.’ Aata nanu ndung'eta oo lbarnot te wueji neje. Ore naa, kainyoo iata? Nchooki nanu imukateni imiet, arashu entoki naba anaa enatii ene.” Newaliki ilo apolosani Daudi ajo, “Maata nanu imukateni e oshi ake tene, kake etii imukateni naasinya, te neitalama ake duoo ninche ilbarnot ate nkituaak.” Newaliki Daudi ilo apolosani ajo, “Ore te sipata eitalamayioki apa nkituaak te iyiook anaa oshi ake te nalo te nkisiaayiare eisinyat imasaa oo lbarnot, hoo duoo ninye tenaa elototo e oshi ake; kebaa naa taata aa sinyat imasaa enye?” Neaku eishoo olapolosani ninye emukate nasinya, amu metii apa emukate ine meteleku ake ina mukate enkitoduaaroto, naa ninche eiwuang'ieki aaitung'uaa dukuya o Laitoriani, pee eitapaashikini imukateni naairowua ina olong naawaki. Netii apa oltung'ani oje loo sinkan le Saul ine ina olong, oikenoyioki te dukuya o Laitoriani; ore apa enkarna enye naa Doeg le Edom, olkitok loo lchekuti le Saul. Nejoki Daudi Ahimelek, “Amaa aimiaata iyie empere arashu olalem tene? Amu eitu duoo ayau olalem lai arashu empere ai te nebo nanu, enkaraki naa ore enkisiaayiare o laiguanani neyieu enkisarrisar.” Nejo olapolosani, “Ore olalem le Goliat ilo Filisti litara apa to oerata le Ela, ng'ura, etii ene eirina te nkarasha ti oriong enkila dorrop; tenaa iya ilo, iwa, amu metii likae kake ele ake.” Nejo Daudi, “Meetae likae laaijo ilo; nchooki nanu.” Nedumunye Daudi neisik ina olong ailany Saul, nelo enetii Akish olaiguanani le Gas. Nejoki ninye isinkan le Akish, “Aime Daudi ele olaiguanani le nkop? Keitu ninche eranyakino maate ti alo ninye too sinkolioitin ejo: ‘Etasesekuana Saul nkalifuni enyena, Ore Daudi naa nkalifuni tomon enyena?’ ” Neya Daudi kulo rorei to ltau, neureyu oleng Akish ilo aiguanani le Gas. Neaku eibelekenya ninye olkuaak lenye te dukuya ninche, neitaakuno koltung'ani omoda, too nkaik enyena, nekord mbaoi oo milankoni e kishomi, neisho nkamulak edou aapuo olmunyei lenye. Nejoki Akish isinkan lenyena, “Eng'ura aajo kemoda ele tung'ani; kainyoo naa pee iyautua intae enatii? Ai maata nanu iltung'ana oomoda, pee iyautua ele tung'ani metaasa emodaisho te dukuya nanu? Kelotu ele tung'ani atua enkaji ai?” Nedumunye Daudi te ine neisik alo enkapune e Adulam; ore ake pee ening ilalashera lenyena o enkaji e papaai lenye pooki, nedoyio aapuo enetii ninye. Ore pooki ng'ae oata osina, o pooki ng'ae oata esile, o pooki ng'ae leton emonira neiturrurrukino ninye, neaku ninye olarikoni lenye. Netii apa te nebo ninye iltung'ana oobaya iip ong'uan. Nelo Daudi teine Mispe e Moab; nejoki ninye olaiguanani le Moab, “Aatoomono nchoo sii ake papaai o yieyio etoni te nebo iyie, o metaba anaa nayiolou enaas Enkai te nanu.” Neing'uaa ninye ninche te nebo olaiguanani le Moab, netoni ninche te nebo ninye ina kata pooki etii Daudi enkapune. Nejoki oloiboni le Nkai Daudi, “Mintoki aton to lnukata, shomo enkop e Yuda.” Neaku etudumunye Daudi nelo atua entim e Heres. Nening apa Saul nchere enotoki Daudi, o lelo tung'ana apa ootii te nebo ninye. Netonita apa Saul te Gibea ti abori olchani oji olkuaju te wueji neika, eeta empere enye te nkaina enye neitashe isinkan lenyena pooki aaman ninye. Nejoki Saul lelo sinkan lenyena oomanita ninye, “Entoning taata, intae ile Benchamen; amaa keisho ole Yese pooki ng'ae te intae inkurman o nkurman oo sabibu, keitaa ninye intae pooki ilkituaak loo nkalifuni o ilkituaak le maaip, pee kitarresho intae pooki nanu? Meetae hoo obo laaliki nanu enkata naibung'are olayioni lai olayioni le Yese, meetae obo te intae laaing'urrie nanu arashu aaliki nanu nchere eisisa olayioni lai osinka lai maataara nanu, maatarresho, anaa enatiu ena olong.” Newal Doeg le Edom, apa oitasho te mbata oo sinkan le Saul ejo, “Ataduaa nanu olayioni le Yese elotu Nob, enetii Ahimelek, olayioni le Ahitab, neikilikuanishore ninye Olaitoriani te nkaraki ninye, neisho ninye ndaiki, neisho ninye olalem le Goliat ilo Filisti.” Neitoki olaiguanani airriwaa olkilikuai aipotu Ahimelek olapolosani, olayioni le Ahitab, o enkaji e papaai lenye pooki, lelo apolosak apa ootii Nob; nepuonu ninche pooki enetii olaiguanani. Nejo Saul, “Toning'o taata, olayioni le Ahitab.” Newalu ninye, “Nele nanu, olkitok lai.” Nejoki Saul ninye, “Kainyoo pee kitarresho nanu, iyie o layioni le Yese, te ina ninchoo ninye imukateni o olalem, ninkilikuanishore Enkai te nkaraki ninye, neaku aatudumakine ninye nanu naairrag arresh, anaa enatiu ena olong?” Newaliki Ahimelek olaiguanani ajo, “Naa kaing'ae ti atua isinkan linono pooki oisiligayu oleng alang Daudi, kaing'ae olaputani lo laiguanani, olkitok oitasheiki lelo likirrip iyie, neyanyiti ti atua enkaji ino? Ae taata enkata e dukuya naikilikuanishore nanu Enkai te nkaraki ninye? A-a! Mincho olaiguanani eomonu ae toki to sinka lenye arashu te nkaji pooki e papaai lai; amu eitu eyiolou osinka lino ae toki te kuna pooki, te sapuk arashu te nkiti.” Nejo olaiguanani, “Esipa, iye ake, Ahimelek, iyie o enkaji e papaai lino.” Nejoki olaiguanani lelo arripok oomanita ninye, “Embelekenyata entaar ilapolosak lo Laitoriani metuata; amu etii sii enkaina enye te nebo Daudi, neyiolo apa aajo eisika ninye, neitu ninche aaliki nanu.” Kake ore isinkan lo laiguanani nemeidim aatudumu enkaina enye aaiteleiki lelo apolosak lo Laitoriani. Neitoki olaiguanani ajoki Doeg, “Imbelekenyayu iyie tusulakinoyu ilapolosak.” Neibelekenya Doeg le Edom nedoiki lelo apolosak, near ninye ina olong iltung'ana ntomoni isiet o imiet ooishopito enkila dorrop sidai. Ore Nob ina ang oo lapolosak, near ninye to lalem; ilewa o nkituaak, nkera o naanakita, ilmong'i, isirkon o nkerra, near to lalem. Kake ore obo loo layiok le Ahimelek ole Ahitab, oji Abiata, neisudori neisik asujaa Daudi. Neliki Abiata Daudi nchere etaara Saul ilapolosak lo Laitoriani metuata. Nejoki Daudi Abiata, “Atayiolo apa te ina olong, etii Doeg ilo Edometi ine, inchere esipa keliki ninye Saul. Ayaua nanu ina keeya oo ltung'ana pooki le nkaji e papaai lino. Totona te nebo nanu, miureisho; amu ore ilo oing'oru enkishui ai neing'oru enkishui ino; ore te nebo nanu niton te wueji neserian.” Nejoki ninche Daudi, “Ng'ura, earita Ilfilisti Keila nepurrito nenen neeitobirieki enkurma.” Neaku eikilikuanishore Daudi Olaitoriani, “Kalo nanu aar kulo Filisti?” Nejoki Olaitoriani Daudi, “Shomo taara pee intajeu Keila.” Kake etiaakitia iltung'ana le Daudi ninye, “Ng'ura, eikiureisho iyiook tene te Yuda; kebaa naa naaji ti nikipuo Keila aarare injorin oo Lfilisti?” Neitoki ake Daudi aikilikuanishore Olaitoriani. Newaliki Olaitoriani ninye ajo, “Tudumunye, tadoi shomo Keila; amu kaishoru nanu Ilfilisti apik atua nkaik inono.” Nelo Daudi o ltung'ana lenyena Keila, nearare Ilfilisti, neyau nchoo enye, near iltung'ana kumok metuata tiatua ninche. Neaku etokordua Daudi lelo oomanya Keila. Ore apa pee eisik Abiata olayioni le Ahimelek alo enetii Daudi te Keila, nedou ninye alotu eeta enkila dorrop te nkaina enye. Netiaakaki apa Saul nchere eewuo Daudi Keila. Nejo Saul, “Eishorua Enkai ninye apik atua nkaik aainei amu eikenoyie ninye kewan ajing enkanasa naata nchomito oo sekenke.” Neipotu Saul iltung'ana pooki meetu olarrabal, metadoi aapuo Keila, pee eng'adu Daudi o ltung'ana lenyena. Neyiolou Daudi ajo eitobirita Saul entorroni te nkaraki ninye; nejoki ninye Abiata ilo apolosani, “Iyau ina kila dorrop ene.” Nejo Daudi, “Olaitoriani, Enkai e Israel, etoning'o osinka lino asipu nchere keing'oru Saul pee elotu Keila pee eidaikie enkang te nkaraki nanu. Amaa, kaaishooyo nanu iltung'ana le Keila aapik atua enkaina enye? Kedou Saul alotu, anaa enatoning'o osinka lino? Olaitoriani, Enkai e Israel, aatasayia iyie, toliki osinka lino.” Nejo Olaitoriani, “Kedou ninye alotu.” Neitoki Daudi ajo, “Amaa, kaishooyo nanu iltung'ana le Keila iltung'ana laainei aapik atua enkaina e Saul?” Nejo Olaitoriani, “Eikinchooyo ninche.” Nedumunye Daudi o ltung'ana lenyena, oobaya iip ile neing'uaa Keila, nepuo ninche eneba anaa eneidim aashom. Ore ake pee elikini Saul nchere eisika Daudi nepal elototo. Neton Daudi ti atua ilnukat ti ong'ota, te ina kop oo ldoinyo lo lpurkel le Sif. Neing'oru Saul ninye nkolong'i pooki, kake eitu epik ninye Enkai atua enkaina enye. Neiruto apa Daudi enkaraki naipang'u Saul alo aing'oru enkishui enye. Netii apa Daudi ong'ata e Sif te Horesh. Nedumunye Yonatan, olayioni le Saul, nelo enetii Daudi te Horesh, neitagol enkaina enye te Nkai. Nejoki, “Miureisho amu ore enkaina e Saul, papaai lai, mikitum iyie; iaku iyie olaiguanani te Israel, naaku nanu oliare te iyie; eyiolo sii Saul papaai lai ena.” Nenya pokira oare olmumai lo sotua te dukuya Olaitoriani; neton Daudi te Horesh, nelo Yonatan ang. Nepuo Ilsifi enetii Saul te Gibea, ejo, “Aimeisudori Daudi ti atua iyiook too lnukat te Horesh, ldoinyo le Hakila, le kopikop e Yesimon? Tadou naa wou, olaiguanani, te risioroto e yieunoto o ltau lino pooki pee idou alotu; ore erishata ang naa pee kinchoru ninye aapik atua enkaina o laiguanani.” Nejo Saul, “Metamayiana intae Olaitoriani; amu inotito intae olng'ur te nanu. Enchom, enyaaki entisipa oleng; entayiolo nidolidolo eneisudoriyie, naa kaing'ae otodua ninye te ine; amu aatiaakaki nchere eikalamas ninye oleng. Entodol naa, nijurrurru iwuejitin oshi neeisudoriyie, o neerreshishore, nishukunyenye enatii iatata olomoni osipa, pee alo nanu te nebo intae; naa te netii ninye ina kop, naing'oru nanu ninye ti atua nkalifuni pooki e Yuda.” Nedumunye ninche, nepuo Sif aaituruk te Saul. Netii apa Daudi o ltung'ana lenyena ong'ata e Maon, ti atua Araba te nkalo e kopikop e Yesimon. Nelo Saul o ltung'ana lenyena aaing'oru ninye. Nelikini Daudi; neaku etadoyie alo endapidapoi natii ong'ata e Moan. Ore ake pee ening Saul ina, nesujaa Daudi ti ong'ata e Moan. Nelo Saul enchoto nabo o ldoinyo, nelo Daudi o ltung'ana lenyena te nkai shoto o ldoinyo, neisarisarita apa Daudi pee eilany Saul, ore etinyikutua Saul o ltung'ana lenyena aapunyaki Daudi o ltung'ana lenyena pee eibung ninche, nelotu olkipaaret enetii Saul, ejo, “Isarisaru wou; amu etaara Ilfilisti enkop.” Neaku etushuke Saul eitu eitoki asujaa Daudi, nelo aarare Ilfilisti; neaku etejoki apa ine wueji Endapidapoi e nkisikata. Neilep Daudi alo te ine, nebik too lnukat le En-gedi. Ore pee eshukunye Saul eing'uaa esujata oo Lfilisti, nejokini, “Ng'ura, etii Daudi ong'ata e En-gedi.” Neya Saul iltung'ana nkalifuni uni oogeluno ti atua Israel pooki, nepuo aaing'oru Daudi o ltung'ana lenyena te dukuya ndapidapo oo nkineji oo soito. Nelotu ninye imuatat oo nkerra e mbata e nkoitoi, ine apa netii enkapune, nelo Saul atua pee eyeng'iyeng'ie kewan. Ore apa Daudi o ltung'ana lenyena netonita teneiting'ie enkapune ti atua. Nejoki iltung'ana le Daudi ninye, “Nena enkolong naa ninye kitiaaka iyie Olaitoriani, ‘Ng'ura, kapik nanu olmang'atinta lino atua enkaina ino, naa intaas ninye anaa enidol aa sidai.’ ” Neinyototo Daudi neiseleejari alo adung'oo olcholoi lo lkila le Saul. Ore te siadi neitanyamal Daudi oltau lenye, enkaraki natudung'oyie ninye olcholoi lo lkila le Saul. Nejoki ninye iltung'ana lenyena, “Maatomitiki nanu Olaitoriani pee maitaas nanu ena olkitok lai, ilo otubukoko Olaitoriani eilata aput aitorioo enkaina ai agilunore ninye adolita ajo olotuputo Olaitoriani ninye.” Neaku eilejileja Daudi iltung'ana lenyena te kulo rorei, neitu eisho ninche metarasaki Saul. Nedumunye Saul neing'uaa enkapune, nelo te nkoitoi enye. Ore te siadi nedumunye sii ninye Daudi, neipang'u ti atua enkapune, neipotu Saul, “Olkitok lai, olaiguanani!” Ore ake pee enang Saul silig, neirrugo Daudi o metabaiki enkop te nkomom enye, neserem ninye. Nejoki Daudi Saul, “Kainyoo iyie pee ining irorei loo ltung'ana oojo, ‘Ng'ura, eing'oru Daudi enkitamioto ino?’ Dol, ore ena olong etoduaa nkonyek inono aajo kitipika taata iyie Olaitoriani atua enkaina ai ti atua enkapune; naajoki nanu ilkulikae maataara iyie tua, kake aatapala nanu. Najo, ‘Maitorioo enkaina ai aar olkitok lai; amu olotubukokoki eilata aaput lo Laitoriani ninye!’ Toduaa, papaai lai, toduaa ajo etii olcholoi lo lkila lino enkaina ai; amu ore te sipata nchere atudung'oyie olcholoi lo lkila lino, neitu aar iyie tua, indim atayiolo nidol nchere metii entorroni e nkibelekenyata arashu enkitoria atua nkaik aainei. Eitu aas eng'oki ti alo iyie, hoo nirresh enkishui ai pee intayu. Metaa Olaitoriani orish erishata ai o iyie, maaitalaa nanu Olaitoriani te iyie; kake mikiarare iyie enkaina ai. Anaa enajo endung'et e rashe e apa moitie, ‘Atua ilo torrono epukunye entorroni.’ Kake mikiarare iyie enkaina ai. Kaing'ae eipang'u olaiguanani le Israel asujaa? Kaing'ae isujita iyie? Koldia otua isujita iyie! Kolpidilai isujita! Metaa naa Olaitoriani orish nedung'oki enkiguana te rishata ai o iyie, neingor ninye, naamitu nanu, naakordu nanu te nkaina ino.” Ore ake pee eidip Daudi airorie kulo rorei Saul, nejo Saul, “Koltoilo lino ele, enkerai ai Daudi?” Neyietu Saul aishir. Nejoki ninye Daudi, “Iyie asipani alang nanu, amu kitalaaka nanu esidai aa entorroni nanu aatalaaka. Nimbalunye iyie ena olong ina nikintaasa nanu esidai, te ina neitu kiar matua ina kata pee aapik nanu Olaitoriani atua nkaik inono. Amu amaa te netum oltung'ani olmang'atinta lenye, keisho ninye meshomo ninye eserian? Neaku mikitalaaki Olaitoriani te sidai te ina nikintaasa iyie nanu ena olong. Ore taata, ng'ura, ayiolo nanu ajo esipa iaku iyie olaiguanani, neitubulari enkitoria e Israel te nkaina ino. Inosieki olmumai to Laitoriani nchere midung'oo iyie eishoi ai te siadi nanu, o nchere mindaikie iyie enkarna ai aitayu te nkaji e papaai lai.” Nenya Daudi ele mumai te nkaraki Saul. Nelo Saul ang; kake eshomo Daudi o ltung'ana lenyena atua olnukata. Neye apa Samuel, neiturrurro Israel pooki aaishiraki ninye, nenukaa ninche ninye te nkaji enye te Rama. Nedumunye Daudi nedoyio alo ong'ata e Paran. Netii apa oltung'ani otii Maon, otii esiaai enye Karmel. Eikarsis apa ilo tung'ani oleng; eeta apa ninye nkerra nkalifuni uni o nkineji enkalifu nabo. Nebarnu apa ninye ilpapit loo nkerra enyena te Karmel. Ore apa enkarna e ilo tung'ani naa Nabal, ore enkarna e nkitok enye naa Abigail. Naa ng'en apa ina kitok neikishiaan kake kemoda apa olee naa torrono olkuaak; naa ole ntipat e Kaleb apa. Nening Daudi ti ong'ata nchere ebarnita Nabal nkerra enyena. Neaku eirriwayie Daudi ilbarnot tomon; nejoki Daudi lelo barnot, “Elepa enchom Karmel, nipuopuo enetii Nabal, nirorokiki ninye te nkarna ai. Naa nji enkuna te nirorokiki ninye: ‘Metaa enino eseriani, metaa eseriani ene nkaji ino, metaa eseriani ene lelo pooki liata iyie. Aning nanu nchere iata iyie ilabarnok; etii oshi ilchekuti linono te nebo iyiook, neitu iyiook kintaas ninche entorrono, neitu ninche elau toki, ina kata pooki etii Karmel. Nkilikuana ilbarnot linono, amu eikiliki ninche. Metaa nchoo ilbarnot laainei etum omom too nkonyek inono; amu kipuonu iyiook te nkolong o sirua. Kitoomono iyie, nchoo pooki toki niaata isinkan linono o olayioni lino Daudi.’ ” Ore ake pee epuonu ilbarnot le Daudi, nejoki ninche nena pooki Nabal te nkarna e Daudi; netoni aanyisho. Newaliki Nabal isinkan le Daudi nejo, “Kaing'ae Daudi? Kaing'ae olayioni le Yese? Etii oshi taata kuna olong'i isinkan kumok oopuo aaing'uaa ilkituaak lenye. Kaitayu nanu endaa ai o enkare ai o enkiring'o ai nateyieng'uo te nkaraki ilabarnok laainei, aisho iltung'ana ooing'uaa ewueji nemayiolo nanu ajo kaji eing'uaa?” Neaku eibelekenyate lelo barnot le Daudi aapuo, neshuko neliki ninye ina. Nejoki Daudi iltung'ana lenyena, “Teena pooki ng'ae olalem lenye!” Ore pooki ng'ae te ninche neen olalem lenye; neen sii ninye Daudi olalem lenye; nepuo iltung'ana oobaya iip ong'uan aasujaa Daudi, netoni iltung'ana iip are aarrip ilolan. Kake etiaaka obo loo lbarnot Abigail, enkitok e Nabal, “Ng'ura, Eirriwua Daudi ilkiliku ooing'uaa ong'ata meetu aairoroki olkitok lang, kake etamoro ninche. Ore eyia, eisupati apa lelo tung'ana te iyiook, neitu iyiook kitum entorroni, neitu iyiook kilau toki apa kitii ong'ota, te nkata naba anaa enikishomo te nebo ninche; esuntai apa ninche te iyiook te nkewarie o te ndama, te ina kata pooki apa nikitii iyiook te nebo ninche king'orita nkerra. Ore naa taata tayiolo ena nidamu eniaas; amu eitobirakitia olkitok lang entorroni o enkaji enye pooki, naa kegogong ninye oleng meetae oltung'ani oidim airorie ninye.” Kaae neisarrisar Abigail, neya imukateni iip are, o lbenia oare loo lonito le naisho oo sabibu o nkerra imiet naayieng'a, o ntemat imiet enkurma napejo o rridat iip loo sabibu, o mukateni iip are oo lng'abolo, neirragie ninche te nchumata oo sirkon. Nejoki ninye lelo barnot lenye, “Enchom enturuko te dukuya nanu; ng'ura, kalotu nanu asuju intae.” Kake eitu ninye eliki olpayian lenye Nabal. Ore eloito ninye ekedito osikiria nedou alotu abori olmelil lo ldoinyo, ng'ura, nelotu Daudi, o ltung'ana lenyena aadou aanang'are ninye; nenang'are ninye ninche. Netejo apa Daudi, “Esipa pesho apa nanu atorripo nena pooki naata ele tung'ani ti ong'ata neaku meetae entoki natalaki te nena pooki naara nkunenyena; naatushukoko ninye nanu entorroni te sidano. Metaasa Enkai ena te Daudi, neitulusoo sii, te natung'uayie nanu tadekenya obo lee le lelo pooki oora ilenyena.” Ore ake pee edol Abigail Daudi, neisarrisar ninye, nedou to sikiria, nebatata ninye te dukuya Daudi te nkomom enye, neirrugo abaiki enkop. Nebatata ninye too nkejek enyena nejo, “Shumata nanu ake, olkitok lai, nchoo elotu entorroni; aatoomono nchoo esinka ino eiro too nkiyiaa inono, nining irorei le sinka ino. Mincho olkitok lai eshilaa ele tung'ani le ntorroni, Nabal; amu ore anaa enatiu enkarna enye, neijia etiu ninye, Nabal enkarna enye, netii emodai te nebo ninye; kake ore nanu esinka ino eitu adol lelo barnot lo lkitok lai, laa ninche iyie irriwua, ore naa taata, olkitok lai, anaa enaishu Olaitoriani, o anaa enaishu oltau lino, idolita ajo kimbooyie iyie Olaitoriani aitung'uaa enkibukoroto o sarge, o enkitalakunoto e lap te nkaina ino makewan, ore naa taata nchoo ilmang'ati linono o lelo ooing'oru aaitaas entorroni olkitok lai etiu anaa Nabal. Ore taata ena kishoroto naa ninye eyaka esinka ino olkitok lai inchoo meishori lelo barnot oosuj olkitok lai. Aatoomono tapalakaki engolong'akinoto e sinka ino; amu esipa keitaa Olaitoriani olkitok lai enkaji nauno, amu ilarrabali lo Laitoriani etii olkitok lai; nemetumi entorroni te iyie anaa ninchu. Te nedumunye iltung'ana pee kisujaa iyie pee eing'oru enkishui ino, ore enkishui o lkitok lai naa keenari to rridata loo looishu te nking'urata o Laitoriani Enkai ino; ore enkishui oo lmang'ati linono nenang'aa ninye anaa osoit onang'ari te nkopito. Ore ake pee eidip Olaitoriani aitaasa olkitok lai te risioroto e nena pooki sidain naairoro ninye ti alo iyie, nikitegelua ninye taa olkitok te shumata Israel, metum olkitok lai enaitagor arashu enyamali o ltau, te nkibukoroto o sarge metii emporeet, arashu to lkitok lai eitalaku elap makewan. Ore ake pee kindip Olaitoriani aitaasa olkitok lai esidai, nidamu naa esinka ino.” Nejoki Daudi Abigail, “Meisisi Olaitoriani, Enkai e Israel, laa ninye nikirriua iyie ena olong pee kinang'are nanu! Metamayiani eng'eno ino, naa mikitamayiani iyie, aa iyie nikimbooyie nanu ena olong te nkibukoroto o sarge o te nkitalakunoto elap te nkaina ai makewan! Amu ore te sipata anaa enaishu Olaitoriani Enkai e Israel, laa ninye laaibooyie nanu eitu aaitame iyie, te neme eisarisarua iyie nikilotu anang'are nanu, esipa ore tadekenya anaata eitu ninye elekakini Nabal hoo ninye olee obo.” Neng'amu Daudi too nkaik eina kitok ina nayaka ninye ninye; nejoki ninye, “Ilepa shomo te seriani enkaji ino; ing'ura, atoning'o nanu oltoilo lino, naishorua nanu ina omonunoto ino.” Nelotu Abigail enetii Nabal; naa, ng'ura eeta apa ninye osirua ti atua enkaji enye, anaa osirua lo laiguanani. Neng'ida apa oltau le Nabal ti atua ninye, amu etemere apa oleng; neaku eitu eliki ninye toki tukul o metaba anaa nekenyu awang'u. Ore te nkakenya eishunye emerai te Nabal, neliki ninye enkitok enye kuna baa, neye oltau lenye ti atua ninye, netiu ninye anaa osoit. Ore too nkolong'i naabaya tomon te siadi neosh Olaitoriani Nabal; neye ninye. Ore pee ening Daudi nchere etua Nabal, nejo ninye, “Metamayiani Olaitoriani laa ninye oitalakua ina moroto apa natang'amua nanu te nkaina e Nabal, neibooyie ninye osinka lenye aitung'uaa entorroni; etushukoko Olaitoriani ina kiaas torrono enchumata endukuya enye makewan.” Neirriwaa Daudi iltung'ana pee esir Abigail aitaa ninye enkitok enye. Ore ake pee epuonu isinkan le Daudi enetii Abigail te Karmel, nejoki ninche ninye, “Eirriua Daudi iyiook enitii pee kintaa iyie te ninye anaa enkitok enye.” Nedumunye ninye neirrugo te nkomom enye o metabaiki enkop, nejo, “Ng'ura, ore esinka ino naa enkaisaayiani naituku nkejek oo sinkan lo lkitok lai.” Neisarrisar Abigail, nedumunye neked osikiria, neisiaai ninye nkaisiaayiak enyena imiet; nesujaa ninye lelo kiliku le Daudi, neaku enkitok enye. Neitoki sii Daudi aya Ahinoam e Yesreel; neaku ninche pokira are nkituaak enyena. Neishoo apa Saul Mikal, entito enye, ina kitok e Daudi, Palti olayioni le Laish, laa olayioni le Galim apa ninye. Nepuonu Ilsifi enetii Saul te Gibea, nejo, “Aimeisudori Daudi to ldoinyo le Hikila, otii enkalo o loo saen le Yeshimon?” Neaku etudumunye Saul nedoyio alo ong'ata e Sif, te nebo iltung'ana nkalifuni uni oogeluno le Israel, pee eing'oru Daudi ti ong'ata e Sif. Neitayu Saul olg'obor to ldoinyo le Hikila, otii embata enkoitoi nalala te nkalo o loo saen le Yesimon. Kake etotona Daudi to lpurkel; ore ake pee edol ajo eewuo Saul asuju ninye atua olpurkel, neirriwaa Daudi ilaikitalak, pee eyiolou aasipu nchere eewuo Saul. Nedumunye Daudi nelotu ine wueji apa netipika Saul olg'obor, nedol Daudi ine wueji neirragie Saul, te nebo Abna olayioni le Ner, olkitok le njore enye; neirragita apa Saul ti atua olng'obor nemanita enjore pooki ninye. Nejoki Daudi Ahimelek ilo Hitati; o lalashe le Yoab Abishai olayioni le Seruiya, “Kaing'ae odoyio alo te nebo nanu atua olng'obor enetii Saul?” Nejo Abishai, “Kadoyio nanu alo te nebo iyie.” Neaku eshomo Daudi o Abishai enetii ina jore kewarie; neirragita Saul te ine airura ti atua olng'obor, neunokino empere enye enkop te mbata e ndukuya enye; ore Abna o enjore neirrag aaman ninye. Nejoki Abishai Daudi, “Eishorua Enkai olmang'atinta lino apik atua enkaina ino ena olong; ore naa nchooki nanu matupudaki ninye enkop te remoto nabo e mpere, nemaitoki nanu arem ninye kat are.” Kake etiaaka Daudi Abishai, “Minyal ninye, amu kaing'ae oidim aitorioi enkaina enye metaarare ilo otubukoko Olaitoriani eilata aaput, neaku meeta entioto?” Nejo Daudi, “Anaa enaishu Olaitoriani, kear Olaitoriani ninye; arashu elotu enkolong enye pee eye; arashu elo ninye atua olarrabal neari metua. Metomito Olaitoriani nchere kadumu nanu enkaina ai aar ilo otubukoko Olaitoriani eilata aput; kake iwa taata ina pere natii embata endukuya enye, o ina moti e nkare, pee kipuo iyiook.” Neaku ewa Daudi empere o emoti e nkare aitung'uaa endukuya e Saul, nepuo ninche. Metii oltung'ani otoduaa ina, arashu otayiolo ina, arashu einyo hoo likae; amu keirura apa pooki, te nkaraki eetuo njo naairoishi naaing'uaa Olaitoriani shumata ninche. Neitoki Daudi alang alo lido kekun, neitashe te nelakua te nchumata o ldoinyo, etii erishata sapuk erishata enye. Neipot ina jore, o Abna olayioni le Ner, ejo, “Aimiwal iyie, Abna?” Newal Abna, “Ira ng'ae ilo oipot olaiguanani?” Nejoki Daudi Abna, “Aimira iyie olee? Kaing'ae likinyaanyukie iyie ti atua Israel? Kainyoo naa pee eitu iyie irrip olkitok lino olaiguanani? Amu eewuo obo loo ltung'ana atua pee eidaikie olaiguanani olkitok lino. Ore ena toki nitaasa iyie neme sidai. Anaa enaishu Olaitoriani, kinchiaakinore iyie niye, enkaraki neitu iyie irrip olkitok ilo otubukoko Olaitoriani eilata aput. Naa ore taata ing'ura enetii empere o laiguanani, o ina moti e nkare duoo natii embata endukuya enye.” Neyiolou Saul oltoilo le Daudi, nejo, “Koltoilo lino ele, enkerai ai, Daudi?” Nejo Daudi, “Oltoilo lai, olkitok lai, olaiguanani.” Nejo ninye, “Kainyoo pee esuj olkitok lai osinka lenye? Amu kainyoo nanu ataasa? Kaa torroni natii nkaik aainei? Ore naa taata nchoo olkitok lai olaiguanani ening irorei lo sinka lenye. Tenaa Olaitoriani likituputuo iyie taaraki nanu, metang'amu ninye olasar; kake tenaa iltung'ana, metaa kediaa ninche te dukuya Olaitoriani, amu aataaraitie ninche aaipang'ie ena olong pee matum nanu eng'arata e njung'ore o Laitoriani, ejo, ‘Shomo isiaayia kulie aitin.’ Ore naa, mincho osarge lai ebukokino enkop te nelakuaniki ine netii Olaitoriani; amu eipang'ua olaiguanani le Israel alotu aing'oru enkishui ai, anaa oltung'ani orresh enkurle too ldoinyo.” Neitoki Saul ajo, “Ataasa nanu entorrono; tushukunye, enkerai ai, Daudi, amu maaitoki nanu aitaas iyie entorrono, amu keeta enkishui ai tipat ena olong too nkonyek inono.” Neitoki Daudi awalu ajo, “Nena empere o laiguanani! Nchoo obo loo lbarnot elang'u alotu aya. Ekelaaki Olaitoriani pooki tung'ani te supatisho enye o te nkisiligata enye; amu kinchorua iyie Olaitoriani apik atua enkaina ai taata, nemadumu nanu enkaina ai aarare ilo otubukoko Olaitoriani eilata aaput. Ng'ura, anaa enaata enkishui ino tipat ena olong too nkonyek aainei, neaku metaa enkishui ai ene tipat too nkonyek o Laitoriani, naa maatokordu ninye aitayu ti atua isinaitin pooki.” Neitoki Saul ajoki Daudi, “Mikitamayiani iyie, enkerai ai, Daudi! Ias iyie mbaa kumok naa idupoyu te pooki.” Neaku eshomo Daudi enkoitoi enye neshuko Saul alo ewueji enye. Nejo Daudi to ltau lenye, “Kaye nanu nabo olong te nkaina e Saul; metii entoki sidai te nanu alang te naisikaki enkop oo Lfilisti; pee etum Saul atapalari aaing'oru nanu too lpolosien le Israel, naluaya nanu apuku te nkaina enye.” Neaku etudumunye Daudi nelang alo, ninye o lelo tung'ana iip ile apa ootii te nebo ninye, aapuo enetii Akish olayioni le Moak, olaiguanani le Gas. Nebik Daudi te nebo Akish te Gas, ninye o ltung'ana lenyena, pooki tung'ani te nebo enkaji enye o Daudi te nebo nkituaak enyena pokira are, Ahinoam e Yesreel, o Abigail e Karmel, enkoliai e Nabal. Ore ake pee ejokini Saul nchere eshomo Daudi Gas, neitu ninye eitoki aing'oru ninye. Neitoki Daudi ajoki Akish, “Tenaa kanoto nanu omom too nkonyek inono, nchoo maaishori nanu ewueji ti atua nabo oo nkang'itie ena kop pee atum nanu atobiko te ine; amu kainyoo pee eton osinka lino te nkanasa e nkitoo te nebo iyie?” Neaku eishoo Akish ninye ina olong Siklag; metaa etaa Siklag enoo laiguanak le Yuda o metabaiki ena olong. Ore esiana oo nkolong'i naatobiko Daudi te nkop oo Lfilisti naa olari o lapaitin oong'uan. Neilep Daudi o ltung'ana lenyena nerasaki Ilgeshuri, Ilgirsi, o Lamaleki; amu kulo apa emanya enkop ti apa, o Shuri, o metabaiki enkop e Misiri. Near Daudi enkop, neitu eing'uaa olee arashu enkitok eishu, kake eewa nkerra, o lmong'i, o isirkon, o intamesin, o nkilani, neshukunye alotu enetii Akish. Ore pee eikilikuan Akish ajo, “Kakua duoo taata itaara?” Nejo Daudi, “Ilnegeb le Yuda,” arashu, “Ilnegeb le Ijerame,” arashu, “Kitaarare Ilnegeb le Keni.” Neitu eing'uaa Daudi olee arashu enkitok eishu, pee etum ayau olomoni Gas, ejo, “Pee melikioo ake ninche iyiook, nejo, ‘Ena etaasa Daudi.’ ” Ele apa olkuaak lenye ina kata pooki apa ebikito te nkop oo Lfilisti. Neisilig apa Akish Daudi edamu ajo, “Eibaitie tukul iltung'ana lenyena Israeli; metaa keaku ninye osinka lai anaake.” Ore apa te nena olong'i neiturrur Ilfilisti njorin enye te nkaraki olarrabal, pee earare Israel. Nejoki Akish Daudi, “Tayiolo nchere ore iyie o ltung'ana linono naa impang'ipang'a aapuo te nebo nanu ti atua enjore.” Nejoki Daudi Akish, “Sidai oleng, iyiolou iyie enaidim osinka lino ataasa.” Nejoki Akish Daudi, “Sidai oleng, kaaitaa nanu iyie olarriponi lai te nkishui pooki.” Netua apa Samuel neidipa Israel pooki aaishiraki ninye nenukaa ninye te Rama, te nkanasa enye kewan. Netaarayie apa Saul lelo aisi le yiolounoto o lasakutok meshomo te ina kop. Neiturrurro Ilfilisti nepuonu aaitayu olng'obor te Shunem; neiturrur Saul Israel pooki, neitayu ninche olng'obor te Gilboa. Ore ake pee edol Saul enjore oo Lfilisti, neureishoyu neikirikira oltau lenye oleng. Ore pee eikilikuanishore Saul Olaitoriani, neitu ewaliki Olaitoriani ninye, aa te nkidetidet arashu te Urim, arashu too loibonok. Neitoki Saul ajoki isinkan lenyena, “Eng'urakaki nanu enkitok nadolisho te naibon, pee atum nanu ashomo enetii ninye naikilikuanishore ninye.” Nejoki isinkan lenyena ninye, “Etii enkaisi nadolisho te naibon Endor.” Neibelekeny Saul kewan nepika kulikae kilani, nelo, ninye o ltung'ana oare te nebo ninye; nepuonu ninche enetii ina kitok kewarie. Nejo ninye, “Mbonokoki nanu te nkiyang'et, nikilepakinye nanu oltung'ani abo laaipotoki enkarna enye.” Nejoki ina kitok ninye, “Esipa iyiolo ina nataasa Saul, ina naitaasa ninye iloibonok oodolisho, o lasakutok aipang'ie tena kop. Kainyoo naa pee kirragakinye nanu orreshet te nkaraki enkishui ai pee iyau keeya ai?” Kake einosaka Saul ninye olmumai to Laitoriani ejo, “Anaa enaishu Olaitoriani, melotu enkitamioto shumata iyie tena bae.” Neitoki ina kitok ajo, “Kaing'ae aayaki ailepakinye?” Nejo ninye, “Iyau ilepakinyeki nanu Samuel.” Ore ake pee edol ina kitok Samuel neyietu aishir to ltoilo sapuk; nejoki ina kitok Saul, “Kainyoo iyie pee kiteleja nanu? Ira iyie Saul.” Nejoki olaiguanani ninye, “Miureshoyu iyie; kainyoo iyie idolita?” Nejoki ina kitok Saul, “Adolita nanu enkai eilepu apuku te nkop.” Nejoki ninye ninye, “Kainyoo eliooto enye?” Nejo ninye, “Olpayian moruo oilepu alotu; neirina ninye to lkila.” Neyiolou Saul inchere Samuel ninye, neirrugo ninye te nkomom enye o metabaiki enkop, neserem. Nejoki Samuel Saul, “Kainyoo pee kintanyamal ailepunye nanu?” Newal Saul ajo, “Atii nanu atua osina sapuk, amu aaitirrishakitia nanu Ilfilisti aarare, naaibelekenye Enkai aing'uaa nemeekure aawaliki, aa too loibonok arashu te nkidetidet, neaku aaipoto iyie pee kiliki enaas.” Neitoki Samuel ajo, “Kainyoo naa pee kinkilikuan nanu, aa Olaitoriani likimbelekenye aing'uaa neaku ninye olmang'atinta lino? Kintaasa iyie Olaitoriani anaa apa enairoro te nanu; amu etopolosayie Olaitoriani enkitoria aitung'uaa enkaina ino, neisho ilo le latia ino Daudi. Enkaraki neitu iyie ining oltoilo lo Laitoriani, neitu intabaya ina goro enye napi aarare Amalek, neaku kintaasa iyie Olaitoriani ena bae ena olong. Ore ake sii keishooyo sii Olaitoriani Israel te nebo iyie apik atua enkaina oo Lfilisti; ore taisere iyie o layiok linono niakuku te nebo nanu; naa kelo aishoru Olaitoriani enjore e israel apik atua enkaina oo Lfilisti.” Nebatata Saul nabo kata te nkop aitorriori eiputa enkuretisho te nkaraki irorei le Samuel; nemeekure apa etii engolon atua ninye, amu eitu ninye enya toki endama pooki o enkewarie pooki. Nelotu ina kitok enetii Saul, ore ake pee edol ajo eiputukunyo, nejoki ninye, “Ng'ura, kitoning'o iyie esinka ino; aitayio nanu enkishui ai te nkaina ai natoning'o ina nikitiaaka iyie nanu. Ore naa taata, toning'o sii iyie esinka ino; nchooki nanu mairragie embelati e mukate te dukuya iyie; pee inya, pee itum engolon te nilo te nkoitoi ino.” Neany ninye nejo, “Manya nanu endaa.” Kake etasayia isinkan lenyena ninye te nebo ina kitok, nening irorei lenye. Neaku neinyototo ninye te nkop neton te rruat. Neeta apa ina kitok olashe opir ti aji, neyieng ninye asioki, neitayu enkurma, neipurjupurj nepeju imukateni neitu eisuijeki, nepik dukuya Saul o laisiaayiak lenyena; neya. Nedumunye ninche nepuo ina kewarie. Neiturrurro apa Ilfilisti injoreitin enye pooki te Afek; ore Israeli neitayutuo apa ninche ilng'oborri te mbata e nkong'u natii atua Yesreel. Ore ilkituaak loo Lfilisti nepuo te maa iip o too nkalifuni, ore Daudi o ltung'ana lenyena nepuo ninche te siadi te nebo Akish, nejo ilkituaak le njore loo Lfilisti, “Kainyoo easita kulo Hebrania tene?” Nejoki Akish lelo kituaak le njore loo Lfilisti, “Aime Daudi ele, osinka le Saul, olaiguanani le Israel, otaa ninye te nebo nanu too nkolong'i o too larin, naa ore anaa neing'uaa ninye alotu enatii nanu eitu atum entorroni ti atua ninye o metabaiki ena olong.” Kake etagorokinote ilkituaak le njore oo lfilisti ninye; nejoki ninye ilkituaak le njore oo lfilisti, “Tushuko ele tung'ani, pee etum atorrinyoyu ashomo ewueji apa nitiaaka ninye; medoyio ninye alo te nebo iyiook olarrabal, meaku ake to larrabal olmang'atinta te iyiook. Amu kaji eiko ele tung'ani te neitayu osotua o lkitok lenye. Aime too lukuny e kulo tung'ana tene? Aime ele Daudi, oshi ilo oranyakino maate too sinkolioitin ejo: ‘Etaara Saul inkalifuni enyena, near Daudi nkalifuni tomon enyena!’ ” Neipotu Akish Daudi nejoki ninye, “Anaa enaishu Olaitoriani, isiligayu oshi iyie, ore te nanu kadol aa sidai te nilo apuku nijing te nebo nanu to larrabal, amu eitu nanu atum entoki torrono ti atua iyie ebaiki enkolong apa elotunoto ino niewuo enatii o metabaiki ena olong. Ore ake eyia mikinyorraa ilkituaak. Neaku tushukoyu shomo taata, naa shomo te seriani, pee mintagor ake ilkituaak loo Lfilisti.” Nejoki Daudi Akish, “Kake kaa nanu ataasa? Kainyoo iyie inoto to sinka lino ebaiki enkolong apa natijing'a enkisiaayiare ino o taata, nchere malo nanu aarare ilmang'ati lo kitok lai olaiguanani?” Newaliki Akish Daudi ajoki, “Ayiolo ajo miata eleyiata too nkonyek aainei anaa olmalaika le Nkai; ore ake eyia, etejo ilkituaak le njore loo lfilisti, ‘Meilep ninye alo te nebo iyiook olarrabal.’ Ore naa tayooki tudumunye tadekenya te nebo isinkan lelo lo lkitok lino apa ooetuo te nebo iyie, nipuopuo anaa ake pee ewang'aki intae.” Neaku eshomo Daudi o ltung'ana lenyena aayooki tadekenya, aashuko aapuo enkop oo lfilisti. Kake eshomo Ilfilisti Yesreel. Ore apa ina kata pee elotu Daudi o ltung'ana lenyena Siklag te nkolong e uni, netaara Ilmaleki Negeb o Siklag. Eisulie ninche Siklag nepejoo te nkima. Neya nkituaak o pooki ootii atua, ilooti o lkituaak; eitu ear hoo ng'ae metua, kake etanapa ninche aaya, nepuo enkoitoi enye. Ore ake pee elotu Daudi o ltung'ana lenyena ina anasa, neinepu etapejoki te nkima, ore nkituaak enye o layiok lenye o ntoyie enye netaraayioki aaya. Ore Daudi o ltung'ana apa ootii te nebo ninye neyietu aaishir o metaba anaa neaku meeta engolon naishirie. Ore nkituaak pokira are e Daudi newaki sii ninche aaraya, Ahinoam e Yesreel o Abigail ina oliai apa e Nabal le Karmel. Nenyamalu Daudi oleng; amu ejo iltung'ana pee enang ninye too soito, enkaraki etamioto iltung'ana pooki too ltauja, oltung'ani ake too layiok lenyena o ntoyie enyena. Kake eitagolo Daudi kewan ti atua Olaitoriani Enkai enye. Nejoki Daudi Abiatar olapolosani, olayioni le Ahimelek, “Iyakaki nanu enkila dorrop.” Neaku eyaka Abiatar ina kila dorrop Daudi. Neikilikuanishore Daudi Olaitoriani, “Amaa, kasujaa nanu ele wuampa Kamir nanu ninche?” Newaliki ninye ninye, “Tusujai, amu esipa imir, nesipa imitu akordu.” Neaku eshomo Daudi o lelo tung'ana iip ile apa ootii te nebo ninye nepuonu ninche oreyiet te Besor, ina netonie lelo ooing'uari te siadi. Kake eshomo Daudi agiroo ine te sujaroto, ninye o ltung'ana iip ong'uan; netoni iltung'ana iip are te siadi, lelo apa oonaurate oleng leitu eidim aatalang oreyiet le Besor. Netum ninche Olmisiri te nkop naisiaja, neyau ninye enetii Daudi; neisho ninche emukate nenya ninye, neisho enkare naok, neisho ninche ninye embelati e mukate oo lng'abolo o nkimarrat are oo sabibu. Ore ake pee enya ninye, nepiu oltau lenye; amu eitu apa ninye enya endaa arashu eok enkare too nkolong'i uni o nkewaritin uni. Nejoki Daudi ninye, “Aira iyie oleng'ae? Naa kaji iyie ing'uaa?” Nejo ninye, “Ara nanu olbarnoti le Misiri, osinka lo Lamaleki; naatung'uayie nanu olkitok enkaraki natamueyia too nkolong'i uni naatulusoitie. Kitaara apa iyiook Negeb oo Lkerite o ina nara ene Yuda o Negeb e Kaleb; nikipejoo Siklag te nkima.” Nejoki Daudi ninye, “Eikirik enetii ilo wuampa?” Nejo ninye, “Inosakaki nanu olmumai te Nkai, nchere mikiar matua, arashu kiya nanu apik atua nkaik o lkitok lai, naa kaarik enetii ele wuampa.” Ore ake pee eaku etoriko ninye aitadoyio, ng'ura, eidapashate ninche te nkop pooki, edaa neokisho neranyisho, te nkaraki nena tokitin kumok naataarutua te nkop oo Lfilisti o te nkop e Yuda. Near Daudi ninche aiteru teipa o metabaiki enteipa e nkae olong. Neitu eisik hoo obo lenye, meteleku ilbarnot iip ong'uan apa ookedito ntamesin neisik. Nerrinyu Daudi nena pooki apa naataaraitie Ilmaleki; nekordu Daudi nkituaak enyena pokira are. Neitu eimin toki aa kiti o aa sapuk, ilayiok arashu ntoyie, imasaa arashu ae toki apa nawaki; eyaua Daudi ashuku pooki. Eibung'a sii apa Daudi nkerrai pooki o nchoo; nereu iltung'ana nena shoo te dukuya ninye, nejo, “Iyarunot e Daudi kuna.” Neitoki Daudi alotu enetii lelo tung'ana apa iip are oonaurate oleng neitu esuj Daudi, neing'uari apa ninche to erata le Besor; neipang ninche aapuo aanang'are Daudi nenang'are lelo tung'ana apa ootii te nebo ninye; ore pee elotu Daudi anyikaki iltung'ana neiroroki ninche. Ore lelo pooki arruok o ltung'ana oora pesho apa ooshomo te nebo Daudi nejo, “Ore enkaraki neitu ninche epuo te nebo iyiook, mikincho iyiook ninche toki e kuna yarunot nikitushukutuo, meteleku ake nchere keidim pooki ng'ae atoriko enkitok enye o nkera, nelo.” Kake etejo Daudi, “Minkoko neijia, ilalashera laainei, te ina naishoo iyiook Olaitoriani; etagolie ninye iyiook neishoru apik atua enkaina ang ilo wuampa apa oewuo aar iyiook. Kaing'ae oinining intae tena bae? Amu ore anaa enatiu erubata e ilo olo olarrabal, neijia sii etiu erubata e ilo oton too lolan keng'ar ninche aaitoris.” Ore ebaiki ina olong neito dukuya neitaa ina nkiguanat o nkitanapat te Israel o metabaiki ena olong. Ore apa elotu Daudi Siklag, neiteng'el embata oo yarunot pee eisho ilchoreta lenyena, ilpayiani le Yuda; ejo, “Nena enkishoroto te intae naing'uaa nena naaruno too lmang'ati lo Laitoriani;” ene lelo ootii Betel, o lootii Ramot e Negeb, te Yatir, ootii Aroer, o Sifmot, o Eshtemoa, otii Rakal atua inkanas oo Ljerahami, o nkanas oo Lkeni, ootii Horma, o Borashan, o Atak, ootii Hebron, too wuejitin pooki neeshomo Daudi o ltung'ana lenyena. Nearare apa Ilfilisti Israel; neipirri iltung'ana le Israel te dukuya Ilfilisti neidaikieki to Ldoinyo le Gilboa. Neinepu Ilfilisti Saul o layiok lenyena; near Ilfilisti Yonatan o Abinadab o Malikishua, lelo ayiok le Saul. Neitirrishaki olarrabal Saul oleng, netum ninye ilang'orok loo mbaa, netum olbae torrono te lelo ang'orok loo mbaa. Nejoki Saul ilo anapani lenye loo ruparen, “Intayu olalem lino taremoki meipanga te nanu, maapuonu ake kulo lememurata aa ng'ung'ur nanu, naaitaa nanu enkiguran.” Kake meidim ilo anapani lenye loo ruparen; amu eturia oleng. Neaku eitayio Saul olalem lenye makewan, nebatatakino. Ore ake pee edol ilo anapani lenye loo ruparen ajo etua Saul, nebatatakino sii ninye olalem lenye, neye te nebo ninye. Neaku etua Saul o layiok lenyena pokira okuni, o lanapani lenye loo ruparen, o ltung'ana lenyena pooki, te nkolong nabo te nebo. Ore ake pee edol iltung'ana le Israel apa ootii likae kekun o erata o lekua ootii te idia alo Yordan nchere eisika iltung'ana le Israel, netua Saul o layiok lenyena, neing'uaa ninche inkang'itie enye neisik; nepuonu Ilfilisti nebik ti atua ninche. Ore pee ekenyu, ore pee epuonu Ilfilisti aapur lelo ootaraki metuata, netum ninche Saul o layiok lenyena pokira okuni eirrag to Oldoinyo le Gilboa. Nedung'oo ninche endukuya enye, nelaku iruparen neirriwaa ilkiliku ti atua enkop pooki oo lfilisti, mewaita ilomon sidain aayaki inkaitin enye o ltung'ana. Nepik iruparen o larrabal enkaji e nkitanyaanyukoto e nkai naji Ashtarot; nesheiki osesen lenye esuntai e Bet-shan. Kake ore ake pee ening lelo oomanya Yabesh-Gilead ina naitaasa Ilfilisti Saul, nedumunye iltung'ana pooki oopi, nepuo enkewarie pooki, neitayu osesen le Saul o seseni loo layiok lenyena aaitung'uaa esuntai e Bet-shan; nepuonu ninche Yabesh nepejoo ninche te ine. Neya iloik lenye nenukaa ti abori olchani oji olkuaju te Yabesh, nepukoo ninche nkolong'i naapishana. Ore eidipa Saul atua eidipa Daudi atushukunye te mutata oo Lmaleki, neton Daudi nkolong'i are te Siklag; ore te nkolong e uni, ng'ura, nelotu oltung'ani oing'uaa ilng'oborri le Saul, epolosa nkilani enyena netii enterit endukuya enye. Ore ake pee elotu enetii Daudi, neirrugo abaiki enkop nesai ninye. Nejoki Daudi ninye, “Kaji iyie ing'uaa?” Nejoki, “Kaisikua nanu aing'uaa ilng'oborri le Israel.” Nejoki Daudi ninye, “Kaji eikunari mbaa? Tolikioki nanu.” Newalu ninye, nejo “Eisika iltung'ana aaing'uaa olarrabal, ore sii ilkumok loo ltung'ana neirragaa etuata ore Saul o olayioni lenye Yonatan etuata sii ninche.” Nejoki Daudi ilo barnoti otiaka ninye, “Kainyoo nikintayiolo iyie nchere etua Saul o Yonatan olayioni lenye?” Nejoki ilo barnoti apa otiaka ninye, “Aishiaakinore ake duoo atii enchumata oldoinyo le Gilboa; netii Saul airishakino empere enye, naa ng'ura, etinyikakitia ngarrin o lakedok loo mbartan emir ninye. Ore ake pee eingor siadi enye, naadol nanu, naaipot. Nairukisho nanu ajo, ‘Nele nanu.’ Naajoki ninye, ‘Ira iyie alo?’ Nawaliki, ‘Ara nanu Olmaleki.’ Naajoki ninye nanu, ‘Ntasho te mbata nanu tasesekuanaki; amu aanoto nanu osina, neton ake eishu enkishui ai ti atua nanu.’ Neaku aitasho nanu te mbata ninye, nasesekuan ninye, amu aitisipa ajo meidim anyaaki atopuaa eidipa atabatatayu; naya ilo marisian apa le nkitoo otii endukuya enye o lkataar apa otii enkaina enye, nayaua ninche ene netii olkitok lai.” Neibung Daudi nkilani enyena, nepolos, neiko sii neijia lelo tung'ana pooki apa ootii te nebo ninye; neishir ninche neitayu ilkiyio nepukoo o metaa teipa te nkaraki Saul o Yonatan olayioni lenye o te nkaraki iltung'ana lo Laitoriani o te nkaraki enkaji e Israel, enkaraki etabatatate ninche to lalem. Nejoki Daudi ilo barnoti apa otiaaka ninye, “Kaji iyie ing'uaa?” Newaliki, “Ara nanu olayioni leilo omoni lo Lmaleki.” Nejoki Daudi ninye, “Kainyoo iyie pee eitu iureyu idumu enkaina ino ainyal ilo otubukoko Olaitoriani eilata aput?” Neipotu Daudi obo loo lbarnot nejoki, “Shomo, taara ninye metua.” Neosh oltung'ani Olmaleki metua. Nejoki Daudi ninye, “Metaa osarge lino shumata endukuya ino; amu enkutuk ino kewan nikinchakenoko iyie, ejo, ‘Atasesekuana nanu ilo otubukoko Olaitoriani eilata aput.’ ” Nerany Daudi ele sinkolio le nkishirata, aishiraki Saul o Yonatan olayioni lenye. Nejo ninye keiteng'eni iltung'ana le Yuda; ng'ura kesira te mbuku e Yashar. Nejo: “Etua enkitoo ino, iyie Israel, etasesekuanaki te shumata iwuejitin inono neeika! Kaji eikunakinote embatatata lelo magil! Milikioo ena te Gas, emintubulaa ena too nkoitoi naalala e nkanasa e Askelon; meng'idayu ake intoyie oo Lfilisti, mewuasayu ake ntoyie e lelo lememurata. Intae ildoinyo le Gilboa, nchoo metaa metii empaso arashu enchan shumata intae arashu enkaitubului nabulu te nkop! Amu te ine eidurukieki elong'o e ilo magilani, elong'o e Saul, eitu eelieki eilata. To sarge le lelo oosesekuani, te ilata e lelo magil, eitu eshuko enkawuo e Yonatan, neitu eshukunye olalem le Saul erok. Saul o Yonatan oonyorri naa shaati! Ore te nkishui o te keeya merisha ninche; neneneng ninche aalang ilkurragoso, negol ninche aalang ilng'atunyo. Intae ntoyie oo Siraeli enchiraki Saul, oishopo intae too kilani naanyokioo, neikodo nkilani inyi te sahabu. Kaji eikunakinote embatatata lelo magil, te mpolos o larrabal! Eirrag Yonatan etasesekuanaki te nchumata oo wuejitin inono neeika Aisinanuo te nkaraki iye olalashe lai Yonatan; eikishipakino apa iyie nanu oleng; ore apa enyorrata ino te nanu naa enking'asia, kegiroo enyorrata oo nkituaak. Kaji eikunakinote embatatata lelo magil, ore imasaa o larrabal nerruoyo!” Ore te siadi ena neikilikuanishore Daudi Olaitoriani, “Kailep nanu alo atua ae nabo oo nkang'itie e Yuda?” Nejoki Olaitoriani ninye, “Ilepa shomo.” Nejo Daudi, “Kaa ailep alo?” Nejo ninye, “Shomo Hebron.” Neaku eilepa Daudi nelo ine, te nebo sii nkituaak enyena pokira are, Ahinoam e Yesreel o Abigail ina oliai apa e Nabal le Karmel. Neyau Daudi ailepunye lelo tung'ana lenyena apa ootii te nebo ninye, oltung'ani ake o enkaji enye; nebik ninche too nkang'itie e Hebron. Nepuonu iltungana le Yuda, nebukoki ninche Daudi eilata aaput teine aaitaa olaiguanani le nkaji e Yuda. Ore ake pee eliki ninche Daudi aajoki, “Iltung'ana le Yabesh Gilead apa ootunukaitie Saul,” neirriwaki Daudi ilkiliku lelo tung'ana le Yabesh gilead, nejoki ninche, “Entaa intae iloomayiana to Laitoriani, enkaraki nintodolutua intae ena anyit te Saul, olkitok linyi, ninukaa ninye! Meitodua intae Olaitoriani enyorrata nauno o enkisiligata! Naa kaitaas nanu intae esidai enkaraki nitaasa ena bae. Ore naa enchoo metagolo nkaik inyi, nipijuju; amu etua Saul olkitok linyi, naatubukokitio nanu enkaji e Yuda eilata aaput aaitaa olaiguanani te shumata ninche.” Ore apa Abna olayioni le Ner, olkitok le njore e Saul, neya Ishboshet olayioni le Saul, neyau ninye Mahanaim, neitaa Abna ninye olaiguanani te shumata Gilead o Ashuri o Yesreel o Efraim o Benchamen o Israel pooki. Ore apa Ishboshet, ilo ayioni le Saul, naa ilarin artam ina kata pee eiteru aitore Israel, neitore ninye ilarin oare. Kake etusujaitie enkaji e Yuda Daudi. Ore enkata apa nara Daudi olaiguanani te Hebron te shumata enkaji e Yuda naa ilarin oopishana o lapaitin ile. Ore Abna olayioni le Ner o sinkan le Ishboshet olayioni le Saul, neipang aapuo te Mahanaim nepuo Gibeon. Ore Yoab olayioni le Seruiya, o sinkan le Daudi, neipang aapuo nenang'are ninche te nchorro e Gibeon; netoni ninche, obo te nchoto nabo e nchorro o likae te nkae shoto e nchorro. Nejoki Abna Yoab, “Nchoo ilbarnot edumunye aarany te dukuya iyiook.” Nejo Yoab, “Nchoo edumunye ninche.” Kaae nedumunye ninche nepuo te siana enye, tomon oare ile Benchamen o Ishboshet ilo ayioni le Saul, o tomon oare loo sinkin le Daudi. Neibung ake oltung'ani ilo oarare endukuya nerrumoki olalem lenye eluboto e ilo oarare; neaku etabatatate te nebo. Neaku etejoki apa ine wueji Helkat-hasurim, naa Gibeon etii. Nerrishu olarrabal ina olong, nemiri Abna o ltung'ana loo Siraeli te dukuya isinkan le Daudi. Netii apa ine ilayiok pokira okuni le Seruiya, Yoab, Abishai o Asahel. Naa keneneng apa Asahel too nkejek anaa enkolii e ong'ata; nemir Asahel Abna, ore eloito nemeibelekenya aing'or enkaina e tatene arashu enkaina e kedienye esujaa Abna. Nenang Abna silig nejo, “Kaiyie Asahel?” Newalu ninye, nejo “Ee nanu.” Nejoki Abna ninye, “Shomo enkaina ino e tatene arashu ene kedienye, imbung'a obo loo lbarnot, pee iya nena naataarua ninye.” Kake meyieu Asahel neibelekenya te sujata enye. Neitoki Abna aigil ajoki Asahel, “Shomo mikintoki asuj kainyoo pee aar nanu iyie tua? Kaji naa aiko te nashumaki enkomom ai olalashe lino Yoab?” Kake etanya ninye elo aapaash neaku etaremo Abna ninye enkoshoke to lng'urrat le mpere enye, neaku eipang'ua empere te nkoriong enye, nebatata ninye te ine, neye te ine apa netii. Ore lelo apa pooki ooetuo ine wueji netabatatare Asahel neye, neitashe aaitirring'a. Kake etimira Yoab o Abishai Abna; ore edoyio enkolong nepuonu ninche oldoinyo le Ama, laa ninye otii dukuya Gia te nkoitoi nalo olpurkel le Gibeon. Neiturrurro tenebo iltung'ana le Benchamen te siadi Abna, neaku olwuampa obo, neitashe te ntopij o ldoinyo. Neipot Abna Yoab, nejoki, “Amaa, keaku kedaa olalem ntarasi? Aimiyiolo ajo keduaru enkiting'oto? Kebaa kenya enkata pee imbok iltung'ana linono metapala emirata oo lalashera lenye?” Nejo Yoab, “Anaa enaishu Enkai, te neme iroro, esipa anaata etapala iltung'ana esujata oo lalashera lenye tadekenya.” Neaku etoosho Yoab emowuo; neitashe iltung'ana pooki, neitu eitoki aasujaa Israel, arashu eitoki aara. Ore Abna o ltung'ana lenyena nepuo ina kewarie pooki nepuo aaim atua Araba; nelang ninche olkeju le Yordan, nepuo entadekenya pooki o meetu Mahanaim. Neshukunye Yoab te mirata e Abna; ore ake pee eidip aiturrurro iltung'ana pooki te nebo, nemetii isinkan le Daudi iltung'ana tomon ooudo metii Asahel. Kake etaara isinkan le Daudi iltung'ana iip uni o ntomoni ile metuata too ltung'ana le Abna lo losho le Benchamen. Neya Yoab o ltung'ana lenyena osesen le Asahel, nenukaa te nkurare e papaai lenye, apa natii Betlehem. Nelo Yoab o ltung'ana lenyena enkewarie pooki, neilepaki ninche enkolong te Hebron. Etii apa te nkata naado olarrabal te rishata enkaji e Saul o enkaji e Daudi; neponari Daudi agolu edoyio enkaji e Saul ashalu. Neikini Daudi ilayiok te Hebron: ore olkikau lenye naa Amnon, le Ahinoam e Yesreel; ore oliare, Kileab, le Abigail ina oliai apa e Nabal le Karmel; ore oliokuni, Absalom olayioni le Maaka ina tito e Talmai olaiguanani le Geshur; ore oliong'uan, Adonija olayioni le Hagis; ore oleimiet, Sefatia olayioni le Abital; ore olayioni le ile, Isrem, le Egla, enkitok e Daudi. Etoikioki kulo Daudi te Hebron. Ore etii olarrabal erishata e nkaji e Saul o enkaji e Daudi, neitagolito Abna kewan ti atua enkaji e Saul. Neeta apa Saul enkapiani naji enkarna Rispa, entito e Aia; nejoki Ishboshet Abna, “Kainyoo pee ishomo iyie ajing'aki enkapiani e papaai lai?” Negoro oleng Abna te lelo rorei le Ishboshet, nejo, “Kara nanu endukuya o ldia le Yuda? Ore ena olong eton ake aitodolu enkanyit te nkaji e Saul papaai lino, too lalashera lenyena, o too lchoreta lenyena, neton eitu aaishooyo iyie apik nkaik e Daudi; ore taata niking'uanare nanu te nkaraki enkitok. Metaasa sii Enkai ena te Abna, neitulusoo sii, te neitu nanu aitabaya te Daudi ina apa nainosakinye Olaitoriani ninye olmumai, aitarasaa enkitoria aitung'uaa enkaji e Saul, neitasheyie olorika le nkitoo le Daudi te shumata Israel o te shumata Yuda, ebaiki Dan o metabaiki Beer-sheba.” Neitu eitoki Ishboshet aidimu atawaliki Abna likae omoni, amu eturia ninye. Neirriwaa Abna ilkiliku enetii Daudi te Hebron, ejo, “Keneng'ae ena kop? Intobira olning'o lino o nanu, naa ng'ura keaku enkaina ai te nebo iyie pee ayau Israel pooki enitii iyie.” Nejo ninye, “Sidai; Kaitobir nanu olning'o o iyie; kake nabo toki nanu aayieunye iyie; nchere midol iyie enkomom ai, arashu ake te niyau Mikal, entito e Saul, te nikilotu adol enkomom ai.” Neirriwaki Daudi ilkiliku Ishboshet olayioni le Saul, ejoki, “Nchooki nanu enkitok ai Mikal, naa ninye apa atisira te nkinyang'a oo suaten iip oo Lfilisti.” Neirriwaa Ishboshet ilkiliku, neya ninye aitung'uaa olmoruo lenye Paltiel olayioni le Laish. Kake eshomo olmoruo lenye te nebo ninye, eishir asujaa ninye te nkoitoi pooki o metabai Bahurim. Nejoki Abna ninye, “Shomo, torrinyoyu;” nerrinyo ninye. Neiguanakini Abna te nebo ilpayiani le Israel, ejo, “Ore te nkata naje natulusoyie ning'oruru intae Daudi aaitaa olaiguanani te shumata intae. Ore naa taata entabai intae; amu eitanapa Olaitoriani Daudi, ejo, ‘Te nkaina o sinka lai Daudi aitajeu nanu iltung'ana laainei Israel aitung'uaa enkaina oo Lfilisti; naitung'uaa enkaina oo lmang'ati lenye pooki.’ ” Neirorie sii Abna Benchamen; neitoki Abna alo aliki Daudi te Hebron nena pooki naatodua Israel; pooki o enkaji e Benchamen pooki aajo sidain te neas. Ore pee elotu Abna te nebo iltung'ana tikitam enetii Daudi te Hebron, neitobiraki Daudi osirua Abna o lelo tung'ana apa ootii te nebo ninye. Nejoki Abna Daudi, “Kadumunye nanu alo, naa kaiturrurroki Israel pooki olkitok lai olaiguanani, pee etum ninche aaitobira olning'o o iyie, pee itum iyie aitoreisho te shumata nena pooki naayieu oltau lino.” Neaku eishoo Daudi Abna meshomo; nelo ninye te serian. Ore te ina kata nebau lelo sinkan le Daudi te nebo Yoab eing'uaa enjore, neyau iyarunot kumok te nebo ninche. Kake metii apa Abna te nebo Daudi te Hebron, amu eishoo ninye meshomo, nelo ninye te seriani. Ore ake pee ebau Yoab o ina jore pooki apa natii te nebo ninye, nejokini Yoab, “Eewuo Abna olayioni le Ner enetii olaiguanani, neishoo ninye meshomo, neshomo ninye te seriani.” Nelo Yoab enetii olaiguanani nejo, “Kaa iyie itaasa? Ng'ura eewuo Abna enitii, kainyoo pee inchoo ninye meshomo, neaku eshomo? Iyiolo iyie ajo kiewuo Abna ilo ayioni le Ner alej, neyiolou elototo ino e boo o elotunoto ino e atua, neyiolou nena pooki niasita.” Ore eipang'u Yoab aing'uaa ine aing'uaa ine netii Daudi, neirriwaa ninye ilkiliku metusujai Abna, nerik ninye aashuku teilo kesumet le Sira; kake eitu eyiolou Daudi ina. Ore ake pee errinyunye Abna Hebron, neya Yoab ninye enkilepata te mpolos e kishomi pee eiro te nebo ninye too nkurrat, ore te ine nerem ninye enkoshoke, neye ninye, te nkaraki ilo sarge le Asahel olalashe lenye. Ore te siadi, ina kata pee ening Daudi ina, nejo ninye, “Ore nanu o enkitoria ai mikiata entioto ntarasi te dukuya o Laitoriani te nkaraki osarge le Abna ilo ayioni le Ner. Metaa endukuya e Yoab edoiki o enchumata enkaji pooki e papaai lenye; naa nchoo metaa melai aekata te nkaji e Yoab oltung'ani oata nkimek arashu enkeeya oo lbolot arashu oloibung'i entirma arashu olosesekuani to lalem, arashu ololau endaa.” Kaae near metua Yoab o Abishai olalashe lenye Abna, enkaraki etara apa ninye metua olalashe lenye Asahel ti atua olarrabal te Gibeon. Neitoki Daudi ajoki Yoab o lelo tung'ana pooki apa ootii te nebo ninye, “Entopolos inkilani inyi, nirrotianana ilkuniyiani, ninchirishiri te dukuya Abna.” Nesujaa olaiguanani Daudi ilo sanduku otii osesen. Nenukaa ninche Abna te Hebron, neyietu olaiguanani aishir te nkurare e Abna; neishir iltung'ana pooki. Nerany olaiguanani osinkolio lo lkiyioi, ejo “Keye Abna anaa enaiko olmodai? Meena apa nkaik inono, nemeena apa nkejek inono; Ore anaa enabatata oltung'ani te dukuya lelo torrok itabatate iyie.” Neitoki iltung'ana pooki aaishiraki ninye. Nepuonu iltung'ana pooki aailejilej Daudi meinosa endaa eton aa dama; kake einosa Daudi olmumai, ejo, “Meikuna Enkai neijia te nanu, neitulusoo sii, te naishamisham endaa arashu ae toki eton eitu edoyio enkolong?” Nedol iltung'ana pooki ina, neitiship ina ninche, amu ore apa pooki toki naas olaiguanani neitiship iltung'ana. Neaku etayioloito iltung'ana pooki o Israel pooki ina olong nchere mme eyieunoto apa o laiguanani pee ear Abna olayioni le Ner. Nejoki olaiguanani isinkan lenyena, “Aimiyiololo intae aajo olayioni lo laiguanani naa oltung'ani oTurori ena olong te Israel? Nashal nanu ena olong, hoo naatubukokoki eilata aaput aaitaa olaiguanani; ore kulo tung'ana, ayiok le Seruiya naa kegolong'u oleng te nanu. Nchoo elaaki Olaitoriani olarruoni te risioroto enkarruoisho enye!” Ore ake pee ening Ishboshet, olayioni le Saul, nchere etua Abna te Hebron, neiropijaa empijan enye, ore Israel pooki neiputukuny. Neeta apa olayioni le Saul iltung'ana oare laa ilkituaak loo Ltimito le njore; ore enkarna e obo naa Baana, ore enkarna o likae naa Rekab, ilayiok le Rimon oltung'ani le Benchamen oing'uaa Be-erot (amu keyioloi sii apa ninye Be-erot aajo ematua e Benchamen; eisika apa Ilbeeroti aapuo Gitam netoni ninche te ine o metabaiki ena olong.) Neeta apa Yonatan olayioni le Saul olayioni maima tarrushi nkejek enyena. Naa oloo larin imiet apa ninye ina kata pee epuonu ilomon ooipirta Saul o Yonatan eing'uaa Yesreel; nedumu ninye enkaibung'ani enye, neisik, naa ore eisik te nkisarrisar enye, nebatata, neakunye ine olmaima. Ore apa enkarna enye naaMefiboshet. Ore apa ilayiok le Rimon ilo tung'ani le Be-erot naa Rekab o Baana, nepuo ninche, ore tenkata e nkipirata e nkolong nepuonu ninche enkaji e Ishboshet, etii ninye enkiyeng'iyeng enye a enaipiriee nkolong. Naa ng'ura, ore enkaing'urani e kutuk aji negelita enkano, kake eimugo ninye neirura; neaku etasaakinote Rekab o Baana olalashe lenye atua aji. Ore pee ejing'u ninche atua aji eirrag ninye te ndapash enye ti atua ilo gilata le ndapash, nerem ninye, near metua nedung'u endukuya enye. Neya ninche endukuya enye nepuo aaim enkoitoi e Araba enkewarie pooki, neyau ninche endukuya e Ishboshet, enetii Daudi te Hebron. Nejoki ninche olaiguanani, “Nena endukuya e Ishboshet, olayioni le Saul, olmang'atinta lino oing'orua apa enkishui ino; eitalaku Olaitoriani elap o lkitok lai olaiguanani ena olong te Saul te ishoi enye.” Kake etawalikia Daudi Rekab o Baana olalashe lenye, lelo ayiok le Rimon ilo le Be-erot ajoki, “Anaa enaishu Olaitoriani, otokordua enkishui ai aitayu ti atua embatisho pooki, ore apa pee aajoki oltung'ani obo nanu, ‘Ng'ura, etua Saul.’ Nejo ninye keyaua ilomon sidain, naibung ninye naar ninye metua te Siklag, aa ilo apa olerrinyore laishoo nanu ninye too lomon lenyena. Kebaa naa elusoo, te netaara iltung'ana torrok oltung'ani supat ti atua enkaji enye te nchumata e ndapash enye, aimaikilikuanu nanu osarge lenye te nkaina inyi, namut intae aiwuang'ie te nkop?” Neitanap Daudi ilbarnot lenyena, metaara ninche metuata, nedung'oo nkaik enye o nkejek, neilili ninche te mbata o lchorro te Hebron. Kake ewaita ninche endukuya e Ishboshet, nenukaa te nkurare e Abna te Hebron. Nepuonu iloshon pooki loo Siraeli enetii Daudi te Hebron, nejo, “Ng'ura, kira iyiook iloik linono o nkiri o sesen lino. Ore too nkolong'i naatulusoitie, apa aa Saul olaiguanani te shumata iyiook, iyie apa otorikoyie aipang'ie niriku aitijing'u Israel; nikijoki Olaitoriani iyie, ‘Iaku iyie olchekut loo ltung'ana laainei, Israel, niaku kitok te shumata Israel.’ ” Neaku eetuo ilpayiani pooki loo Siraeli enetii olaiguanani te Hebron; neitobir olaiguanani Daudi olning'o te nebo ninche te Hebron te dukuya o Laitoriani, nebukoki ninche Daudi eilata aaput aaitaa olaiguanani te shumata Israel. Naa oloo larin tomoni uni apa Daudi pee eiteru aitoreisho, neitoreisho ilarin artam. Ore te Hebron neitore ninye Yuda ilarin oopishana o lapaitin ile; ore te Yerusalem neitore Israel pooki o Yuda ilarin tomoni uni o okuni. Nelo olaiguanani o ltung'ana lenyena Yerusalem aarare Ilyebusi, lelo oomanya ina kop, apa ootiaakitia Daudi, “Milotu iyie ajing'u atua ene, kake eikimbooyo ninye ilmodook o lmaiman” - ejo, “Meidim ae kata Daudi aeu atua ine.” Ore eyia eibung'a Daudi eng'ape e Sion, aa taa, enkanasa e Daudi. Nejo Daudi te ina olong, “Ore pooki ng'ae olo aar Ilyebusi, nchoo eilep to lbaata le nkare pee erasaki lelo modook o lmaiman, apa ooiba oltau le Daudi.” Neaku etejoki, “Ore olmodooni o lmaima melotu atua aji.” Nebik Daudi ti atua ilo sempewuet nejo ninye enkanasa e Daudi. Neshet Daudi ina anasa aitamanaa ebaiki Milo neito atua. Neaku Daudi kitok oleng oleng, amu ore Olaitoriani, Enkai oo lororani, etii apa te nebo ninye. Ore Hiram olaiguanani le Turo neirriwaa ilkiliku enetii Daudi, neirriwaa sii iltarakua o laguetak loo nkeek o laguetak loo soito laa ninche ooteshetakitia Daudi enkaji. Neyiolou Daudi nchere eitasheyie Olaitoriani ninye aitaa olaiguanani le Israel, o nchere eilepunye ninye enkitoo enye te nkaraki iltung'ana lenyena Israel. Neya Daudi nkapiak kumok o nkituaak te Yerusalem, eidipa aeu eing'uaa Hebron; neikini Daudi ilayiok kumok o ntoyie. Naa kuna nkarn e lelo ootoikioki ninye te Yerusalem: o Shamua, o Shobab, o Natan, o Solomon, o Ibar, o Elishua, o Nefeg, o Yafia, o Elishama, o Eliada, o Elifelet. Ore ake pee ening Ilfilisti nchere etubukokoki Daudi eilata aaitaa olaiguanani te Israel, neilepu Ilfilisti pooki eing'oru Daudi; kake etoning'o Daudi ina nelo aisudori to sempewuet. Neaku eetuo apa Ilfilisti neidapashakino oerata le Rafadim. Neikilikuanishore Daudi Olaitoriani, ejo, “Amaa, kalo nanu aarare Ilfilisti? Inchoru iyie ninche apik atua enkaina ai?” Nejoki Olaitoriani Daudi, “Ilepa shomo; amu esipa kaishoru nanu Ilfilisti apik atua enkaina ino.” Nelotu Daudi Baalperasim, nemir Daudi ninche te ine; nejo ninye, “Etigila Olaitoriani ilmang'ati laainei te dukuya nanu, anaa olairrag le enkare teneosh enkuaas.” Neaku ore enkarna e ine wuejinaa keji Baalperasim. Neing'uaa Ilfilisti nkitanyaanyukot oo nkaitin enye te ine, nenap Daudi o ltung'ana lenyena ninche aaya. Neitoki ake Ilfilisti aaigil aailepu aapuonu, neidapashakino oerata le Refaim. Ore ake pee eikilikuanishore Daudi Olaitoriani, nejo ninye, “Milep alo; shomo tamanai iimu te siadi, nilotu enetii ninche te nkishiaakinoto oo lkeek adoru. Ore ake pee ining oltoilo le lototo te nchumata oo lkeek, ina kata tonyuaa amu etaa eipang Olaitoriani alo te dukuya ino aar enjore oo Lfilisti.” Neas Daudi anaa enaitanapa Olaitoriani ninye, near Ilfilisti ebaiki Geba o metabaiki Gesa. Neitoki Daudi aiturrur lelo tung'ana pooki gelunot te Israel, nkalifuni tomoni uni. Nedumunye Daudi nelo te nebo iltung'ana pooki apa ootii te nebo ninye ebaiki Baale-Yuda, pee eyau aailepunye aaitung'uaa ine osanduku le Nkai, laa ninye eipotieki enkarna o Laitoriani loo lororani oton ninye te nkitoo te nchumata oo lkerubi. Nenap ninche ilo sanduku le Nkai te ngarri ng'ejuk, neyau ninye aaipang'unye te nkaji e Abinadab apa natii enchumata e ndoinyo; ore Usa o Ahio lelo ayiok le Abinadab nereu ina garri ng'ejuk, te nebo ilo sanduku le Nkai; nelo Ahio dukuya ilo sanduku. Ore Daudi o enkaji pooki e Israel neiguranita apa te dukuya Olaitoriani te nkidimata enye, too sinkolioitin, too lwululi loo usin, o nkai oo sinkolioitin, o ntampurini o kule kinantani, o saanini naaitooshi aaranyishore. Ore ake pee epuonu ninche ilo kurroto oidong'ishoreki le Nakon neitorioki Usa enkaina enye ilo sanduku le Nkai, neibung amu etarrorrote lelo mong'i. Neyupuyup engoro e Nkai te nkaraki Usa, near Enkai ninye te ine te nkaraki naitorioyie enkaina enye aibung ilo sanduku; neye ninye te ine te mbata ilo sanduku le Nkai. Negoro apa Daudi enkaraki natara Olaitoriani Usa; ore ine wueji naa keji Peres-usa, o metabaiki ena olong. Neureyu apa Daudi Olaitoriani ina olong; nejo ninye, “Kaji eiko te nelotu osanduku lo Laitoriani enatii nanu?” Neaku meyieu apa Daudi neya ilo sanduku lo Laitoriani atua enkanasa e Daudi; kake eiteng'ela Daudi aya enkaji e Obed-e-dom ilo Giti. Neton ilo sanduku lo Laitoriani ti atua enkaji e Obed-e-dom ilo Giti ilapaitin okuni; nemayian Olaitoriani Obed-e-dom o enkaji enye pooki. Nelikini apa olaiguanani Daudi aajoki, “Etamayiana Olaitoriani enkaji e Obed-e-dom o pooki nara enenye, te nkaraki ilo sanduku le Nkai.” Neaku eshomo Daudi neyau ailepunye ilo sanduku le Nkai aitung'uaa e nkaji e Obed-e-dom aya enkanasa e Daudi eng'ida; ore ake pee epuo lelo oonapita ilo sanduku le Nkai iroruat ile, nepolos ninye olkiteng o lashe opir. Neiguran Daudi te dukuya Olaitoriani te nkidimata enye pooki; neterretene apa Daudi te nkarasha dorrop napuyiapui. Neaku eyaua apa Daudi o enkaji e Israel pooki osanduku le Nkai aailepunye te mbuakunoto o to ltoilo le mowuo. Ore elotu ilo sanduku lo Laitoriani atua ina anasa e Daudi, neing'orisho Mikal entito e Saul te lusie, nedol Olaiguanani Daudi eipid neiguran te dukuya Olaitoriani; nemenu ninye to ltau lenye. Neyau ninche atua ilo sanduku lo Laitoriani, neirragie ninye te wueji enye, ti atua olng'obor otuuno Daudi te nkaraki ninye; neishoru Daudi ilasarri oopejori o lasarri le seriani te dukuya Olaitoriani. Ore ake pee eidip Daudi aishooi ilasarri oopejori o lasarri le seriani, nemayian ninye iltung'ana te nkarna o Laitoriani loo lororani, neishooyo ti atua iltung'ana pooki ina siamo pooki e Israel, ilewa o nkituaak, o ltung'ani ake emukate napurupurana, o ldung'oti le nkiring'o o emukate oo lng'anayio ooitoyioki. Nepuo iltung'ana pooki le Israel, oltung'ani ake enkang enye. Neshuko Daudi alo amayian enkaji enye. Kake eipang'ua Mikal entito e Saul alotu anang'are Daudi, nejo, “Kebaa duoo taata enkanyit nayanyita olaiguanani le Israel kewan, aiturraa duoo taata nkilani te dukuya nkonyek oo nkaisiaayiak oo sinkan lenyena, anaa obo loo ltung'ana oomoda oiturraa nkilani medol enkurruna!” Nejoki Daudi Mikal, “Te dukuya Olaitoriani laa ninye apa laategelua te shumata papaai lino, o te shumata enkaji enye pooki naagelu nanu aitaa kitok te shumata Israel, iltung'ana lo Laitoriani - naa kashipa nanu te dukuya Olaitoriani. Naa kasul nanu kewan oleng aitalang ena, naaitadouni too nkonyek inono; kake ore te nena sinkan naa ninche iimaka, ore ninche naa kaayanyit nanu oleng.” Ore Mikal ina tito e Saul neitu ae kata etum enkerai o metua. Ore apa ebikito olaiguanani te nkaji enye, neishoo ninye Olaitoriani enkiyeng'iyeng too lmang'ati lenyena pooki oomanita, nejoki olaiguanani Natan ilo oiboni, “Ng'ura taata, abikito nanu te nkaji oo ltarakua, kake ore osanduku le Nkai netonita ti atua olng'obor.” Nejoki Natan olaiguanani, “Shomo, taasa ina pooki natii atua oltau lino; amu etii Olaitoriani te nebo iyie.” Kake ore ina kewarie ake nelotu ororei lo Laitoriani enetii Natan ajoki, “Shomo tiaaki osinka lai Daudi, ‘Nji ejo Olaitoriani: Amaa, eikishetaki iyie enkaji nabikie atua? Eitu ae kata nanu aton ti atua enkaji ebaiki enkolong apa nailepunye iltung'ana loo Siraeli aitung'uaa Misiri o metabaiki ena olong, kake to lng'obor oshi aloolo aitaa emanyisho ai. Ore ti atua iwuejitin pooki nashomo nanu te nebo iltung'ana pooki le Israel, eitu nanu airo ororei te likae hoo obo loo larishak loo Israeli laa ninche aitanapa meirrita iltung'ana laainei Israeli, ajoki Kainyoo pee eitu kishetakiki nanu enkaji oo ltarakua?’ Ore naa nji tiaaki osinka lai Daudi, Nji ejo Olaitoriani loo lororani, aawa apa nanu iyie aitung'uaa enkirritare, aitung'uaa esujata oo nkerra, pee itum ataa olkitok te shumata iltung'ana laainei Israel; natii nanu te nebo iyie te pooki wueji nishomo, naar ilmang'ati linono pooki aiwuang'ie te dukuya ino; naa kaaitobiraki nanu iyie enkarna kitok, anaa enkarna e lelo kituaak le nkop. Naa kagelu nanu ewueji te nkaraki iltung'ana laainei Israel, naun nanu ninche, pee etum aatobik te wueji enye maate, nemeitokini ae kata aaitanyamal; nemeitoki iltung'ana lo larrabal aaisilisil ninche, anaa apa, ebaiki ina kata apa nagelu ilarishak apik shumata iltung'ana laainei Israel; naa kaaisho nanu iyie enkiyeng'iyeng too lmang'ati linono pooki. Ore ake eibalunye Olaitoriani te iyie nchere, eikintaa iyie Olaitoriani enkaji. Ore te neiputayu nkolong'i inono nirrag iyie te nebo loo papaai lino, nadamu nanu eishoi ino te siadi iyie, ilo olotu aing'uaa osesen lino, naitubulaa nanu enkitoo enye. Keshet ninye enkaji te nkaraki enkarna ai, naa kaitasheyie nanu olorika le nkitoo enye ntarasi. Naaku nanu papaai lenye, neaku ninye olayioni lai. Te neas ninye entorroni, naitame nanu ninye te ng'udi e tung'ana, o too oshot e tung'ana; kake maiwuang'ie nanu enyorrata ai nauno aitung'uaa ninye, anaa apa enaiwuang'ie te Saul, ilo apa laiwuang'ie nanu te dukuya iyie. Ore enkaji ino o enkitoria naa keitisipi te dukuya nanu; ore olorika lino le nkitoo keitasheyieki ntarasi.” Ore te risioroto e kulo rorei, o te risioroto ena duata pooki, neirorie Natan Daudi. Nelo olaiguanani Daudi atua neton te dukuya Olaitoriani, nejo, “Kara nanu ng'ae, Ee Olaitoriani Enkai, naa kainyoo enkaji ai, metaa eikiyaua nanu eneba nji? Ore ake eyia naa entoki kiti apa ena too nkonyek inono, Olaitoriani Enkai; iroro sii iyie te nkaraki enkaji o sinka lino te nkata sapuk nalotu, nikintoduaa nanu iishoritin naapuonu, Olaitoriani Enkai! Naa kainyoo epon Daudi pee kijoki iyie? Amu iyiolo iyie osinka lino, Olaitoriani Enkai! Te nkaraki enkisiligata ino, naa te risioroto oltau lino, itaasa iyie ena enkitoo aidimie osinka lino metayiolo ina. Metaa ira iyie kitok, Ee Olaitoriani Enkai; amu metii likae oikununo anaa iyie, nemetii ae Ai neme iyie ake, te risioroto e nena pooki nikitoning'o too nkiyiaa ang. Kalo likae orere ti oriong e nkop oikununo anaa iltung'ana linono Israel, laa ninche eshomo Enkai akordu aitaa iltung'ana lenyena, aitobiraki kewan enkarna, neas te nkaraki ninche intokitin kituaak naaitureisho, te araroto te dukuya iltung'ana lenyena iloreren o nkaitin enye? Nintasheyie te nkaraki kewan ino iltung'ana linono Israel metaa iltung'ana linono ntarasi; ore iyie, Olaitoriani, niaku Enkai enye. Ore taata, Ee Olaitoriani Enkai, ntisipa ntarasi ilo rorei liroro iyie oipirta osinka lino neipirta enkaji enye, nias anaa eniroro; naa kerupi enkarna ino ntarasi, eji, ‘Olaitoriani loo lororani ninye Enkai oo Siraeli,’ ore enkaji o sinka lino Daudi neitubulari te dukuya iyie. Amu iyie, ee Olaitoriani loo lororani, Enkai e Israel, naitayio ena bolunoto aitodol osinka lino, ijo, ‘Kaashetaki iyie enkaji;’ neaku etagolo osinka lino oshoke pee kiomon iyie ena omono. Ore taata, iyie Olaitoriani Enkai, iyie Enkai, nesipa irorei linono, nisiligie ena toki sidai osinka lino; ore naa taata tishipayu iyie pee imayian enkaji osinka lino, pee etum ashomo dukuya ntarasi te dukuya iyie; amu ore iyie, ee Olaitoriani Enkai, niroro, naa te mayianata ino emayiani enkaji o sinka lino ntarasi.” Ore te siadi ena nemir Daudi Ilfilisti neitore ninche, neya Daudi Metegama aitung'uaa enkaina oo Lfilisti. Nemir ninye Moab, netem ninche to lgosoi lkereri, aisho ninche meirraga te nkop; ore ilkererin oare netemi pee eari metuata, ore olkereri obo olulung'a nepali. Neaku Ilmoabu isinkan le Daudi neyaki kodi. Neitoki sii Daudi amir Hadadesa olayioni le Rehob, olaiguanani le Soba, eloito arrinyu enkitoo enye to lkeju le Frati. Neya Daudi aitung'uaa ninye enkalifu o iip naapishana o sikarini ooked mbartan, oo sikarini nkalifuni tikitam oopuo too nkejek nedung Daudi irrisheta mbartan pooki oo ngarrin, kake etelekua inaaidip ngarrin iip oo mbartan. Ore ake pee epuonu Isiria le Dameski aaretu Hadadesa ilo aiguanani le Soba, near Daudi metuata iltung'ana nkalifuni tikitam oare loo Siria. Nepik Daudi iltimito atua Aram e Dameski; neaku Isiria isinkan le Daudi neyaki kodi. Neisho Olaitoriani Daudi metimirisho te pooki wueji neba anaa eneshomo. Neya Daudi ilong'oi e sahabu apa naanapita isinkan le Hadadesa, neyau ninche Yerusalem. Ore ebaiki Beta ometabaiki Berotai, nkanas e Hadadesa, neya olaiguanani Daudi isuyan kumok. Ore ake pee ening Toi olaiguanani le Hamat nchere etimira Daudi enjore pooki e Hadadesa, neirriwaa Toi olayioni lenye Yoram enetii olaiguanani Daudi, pee eisho ninye enchunet, o pee eisho ninye enchunet enkaraki nataarare Hadadesa nemir ninye; amu kesej apa eeta Hadadesa olarrabal o Toi. Neyau Yoram te nebo ninye ntokitin e nkosholai, o sahabu, o no suyai. Ore sii kuna neitisiny olaiguanani Daudi to Laitoriani, te nebo ina osholai o sahabu apa naaitisinya naaing'uaa iloreren pooki apa ootimira ninye, ebaiki Edom, o Moab, o Ilamoni, o Ilfilisti, o Amaleki, o naaing'uaa iyarunot e Hadadesa olayioni le Rehob, olaiguanani le Soba. Neishur enkarna e Daudi. Ore pee eshukunye ninye, nesesekuan Iltung'ana nkalifuni tomon o isiet ti atua Oerata le Munyan. Nepik ninye iltimito Edom; ore atua Edom pooki nepik iltimito, lelo le Edom pooki isinkan le Daudi. Neishoo Olaitoriani Daudi metimirisho te pooki wueji neba anaa eneshomo. Neaku eitoria apa Daudi Israel pooki; neisiaisho Daudi te sipata o te risioroto too ltung'ana lenyena pooki. Naa Yoab olayioni le Seruiya apa oitore enjore, naa Yehoshafat olayioni le Ahilud apa olaigeroni. Naa Sadok apa olayioni le Ahitab o Ahimelek olayioni le Abiata ninche ilapolosak; naa Seraia apa olasirani; naa Benaia olayioni le Yehoida apa otii shumata lelo Kereti o lelo le Peleti ore ilayiok le Daudi naa ilapolosak. Nejo Daudi, “Keton etii oltung'ani obo otelekua te nkaji e Saul, pee atum nanu aitoduaa ninye esupatisho te nkaraki Yonatan?” Netii apa osinka le nkaji e Saul oji Siba, neipotu ninche ninye enetii Daudi; nejoki olaiguanani ninye, “Ira iyie Siba?” Nejo ninye, “Ore osinka lino naa ninye ilo.” Nejo olaiguanani, “Aimeton etii likae obo le nkaji e Saul, pee atum nanu aitoduaa ninye esupatisho e Nkai?” Nejoki Siba olaiguanani, “Eton etii olayioni le Yonatan; olmaima ninye tarrushi nkejek enyena.” Nejoki olaiguanani ninye, “Koree ninye?” Nejoki Siba olaiguanani, “Etii atua enkaji e Makir olayioni le Amiel te Lo-debar.” Kaae neirriwaa olaiguanani meyauni ninye aaitung'uaa enkaji e Makir ole Amiel, te Lo-debar. Nelotu Mefiboshet, olayioni le Yonatan ole Saul enetii Daudi, nebatata te nkomom enye neserem. Nejo Daudi, “Mefiboshet!” Newal ninye, “Ng'ura, osinka lino.” Nejoki Daudi ninye, “Miureisho; amu kaaitodol nanu esupatisho te nkaraki papaai lino Yonatan, naa kaashukoki iyie enkop pooki e Saul papaai lino; nidaa iyie te mesa ai anaake.” Neserem ninye, nejo, “Kainyoo ninye osinka lino, metaa ing'or iyie oldia otua anaa nanu?” Neipotu olaiguanani Siba, ilo sinka le Saul, nejoki ninye, “Ore nena pooki apa naara ine Saul o ne nkaji enye pooki aishoo nanu olayioni lo lkitok lino. Ore iyie o layiok linono o sinkan linono niturokiki ninye enkurma niyauu atua nena nintayuyu, pee etum olayioni lo lkitok lino endaa nanya; kake ore Mefiboshet olayioni lo lkitok lino nedaa anaake te mesa ai.” Neeta apa Siba ilayiok tomon o imiet o sinkan tikitam. Nejoki Siba olaiguanani, “Ore te risioroto e nena pooki, naaitanap olkitok lai olaiguanani osinka lenye, neaku ina eas osinka lino.” Neaku etadee Mefiboshet te mesa e Daudi, anaa obo loo layiok lo laiguanani. Neeta apa mefiboshet olayioni oti oji enkarna Mika. Ore pooki ootobiko te nkaji e Siba neaku isinkan le Mefiboshet. Neaku etobiko Mefiboshet te Yerusalem; amu kedaa apa ninye anaake te mesa o laiguanani. Naa olmaima apa too nkejek enyena pokira are. Ore te siadi ena neye olaiguanani loo Lamoni neitoreisho Hanan olayioni lenye te rishata enye. Nejo Daudi, “Kaitodol nanu esupatisho Hanan olayioni le Nashash, anaa apa enaaitaasa papaai lenye nanu te supatisho.” Neaku eirriwayie Daudi isinkan lenyena pee eitigir ninye ti alo papaai lenye. Nepuonu isinkan le Daudi atua enkop oo Lamori. Kake etiaakitia lelo lkituaak loo Lamoni Hanan olkitok lenye, “Ijo iyie ore enkaraki nikirriwaka iyie Daudi iltung'ana likintagol naa keyanyitita papaai lino? Keitu ninye eirriu Daudi isinkan lenyena enitii iyie pee eing'or enkanasa, neikeern ninye, nenang'aa ninye?” Neaku eewa Hanan isinkan le Daudi, nebarn ake enchoto o lmunyei lo ltung'ani nedung nkilani enye too mpolosi enye neisho ninche meshomo. Ore ake pee elikini Daudi, neirriwaa iltung'ana metanang'are ninche, amu etukurrutua apa lelo tung'ana oleng. Nejo olaiguanani, “Entotoni te Yeriko o metaba anaa nebulu ilmunyo linyi, pee intokiki aashukunye.” Ore ake pee edol lelo tung'ana le Amoni aajo etaa ilmang'ati te Daudi, neirriwaa lelo tung'ana le Amoni ilkiliku aaisho esiaai Isiria le Beterehob, o Isiria le Soba, isikarini nkalifuni tikitam oopuo too nkejek, o laiguanani le Maaka te nebo iltung'ana enkalifu, o ltung'ana le Tob, iltung'ana nkalifuni tomon o are. Ore ake pee ening Daudi ina, neirriwaa Yoab o lorora pooki lo ltung'ana magil. Nepuonu Ilamoni aaipang'u neluaa to larrabal te kishomi; ore lelo Siria le Soba o le Rehob, o ltung'ana le Tob o Maaka netii ninche maate enkop naisiaja. Ore pee edol Yoab inchere eirragieki olarrabal aarare ninye te dukuya o te siadi, negelu ninye embata oo ltung'ana gelunot le Israel, neitobiraki ninche metaarare Isiria; ore ilkulikae pooki loo ltung'ana lenyena nepik ninye atua enkitoria e Abishai olalashe lenye, neitobiraki ninche metaarare Ilamoni. Nejo ninye, “Tenaa kegol oleng Isiria te nanu, naa eikiretu iyie nanu; kake tenaa kegol oleng Ilamoni te iyie naa kaalotu nanu aretu iyie. Ntagoluoyu, naa maikuna anaa lewa te nkaraki iltung'ana lang, o too nkanas e Nkai ang; naa nchoo metaasa Olaitoriani ina nadol aa sidai te ninye.” Neaku etupunyakitia Yoab o lelo tung'ana apa ootii te nebo ninye olarrabal aarare Isiria; neipirri aailanyisho ninche te dukuya ninye. Ore pee edol Ilamoni aajo eilanyishote Isiria, neiko sii ninche neijia aailanyisho te dukuya Abishai, nejing atua enkanasa. Kaae neshukunye Yoab aing'uaa olarrabal loo Lamoni, nelotu Yerusalem. Kake ore ake pee edol Isiria aajo etimira ninche Israel, neiturrurro maate te nebo. Neirriwaa Hadadesa olkilikuai, neyau aitupuku lelo Siria apa ootii te idia alo Frati; nepuonu ninche Helam, te nebo Shobak olkitok le njore e Hadadesa te dukuya ninche. Ore ake pee elikini Daudi, neiturrur ninye Israeli pooki te nebo, nelang Yordan, nepuonu Helam. Neitobira Isiria maate aarare Daudi, neitayu olarrabal te nebo ninye. Neipirri Isiria aailanyisho te dukuya Israel, near Daudi metuata too ltung'ana le Siria iip naapishana loo ngarrin, o lakedok loo mbartan nkalifuni artam, nepik olbae Shobak ilo kitok le njore enye, neaku etua ninye te ine. Ore pee edol lelo aiguanak pooki apa laa isinkan le Hadadesa ninche etimira Israel neitayu ninche osotua te nebo Israel, neaku isinkan te ninche. Neaku etureita Isiria eitoki aaretu Ilamoni. Ore te nkiterunoto o lari, ina kata apa napuoie ilaiguanak olarrabal, neirriwaa Daudi Yoab, o sinkan lenyena te nebo ninye, o Israel pooki, neitalaku ninche elap too ltung'ana le Amoni neman aamuat Raba. Kake etotona Daudi te Yerusalem. Ore nabo olong, etigile enkolong, ore pee edumunye Daudi te ndapash enye, neloolo ninye te nchumata oltapeet le nkaji o laiguanani, nedol ninye te nchumata olperere enkitok eitukuo; naa eisidai ina kitok oleng. Neirriwaa Daudi olkilikuai aikilikuanu ina kitok. Nejo obo, “Aime Betsheba ena, entito e Eliam, enkitok e Uria Olhiti?” Neaku eirriwayie Daudi ilkiliku, neya ninye; nelotu ninye enetii, neboitare ninye ninye. (Naa keitobira apa ninye kewan te nkiduruk enye.) Neitoki ashuko alo enkaji enye. Nenutayu ina kitok; neirriwaa ninye olkilikuai nejoki Daudi, “Atunute.” Neirriwaki Daudi Yoab olomoni, ejo, “Irriwakaki nanu Uria loo Lhiti.” Neirriwaa Yoab Uria enetii Daudi. Ore pee elotu Uria enetii ninye, neikilikuanu Daudi enaasita Yoab o eneikununo iltung'ana, o eneikunari olarrabal. Nejoki Daudi Uria, “Tadoi shomo enkaji ino, pee intuku nkejek inono.” Neipang Uria alo te nkaji o laiguanani, nesujaa ninye enkishooroto naing'uaa olaiguanani. Kake eirure Uria te kutukaji e nkaji o laiguanani te nebo isinkan pooki lo lkitok lenye, neitu elo enkaji enye. Ore ake pee ejoki ninche Daudi, “Eitu edoyio Uria alo enkaji enye,” nejoki Daudi Uria, “Keitu iyie ilotu aing'uaa enkop naado kainyoo pee eitu idoyio alo enkaji ino?” Nejoki Uria Daudi, “Ore osanduku le Nkai, e Israel o Yuda nebikito too lng'oborri; ore olkitok lai Yoab o sinkan lo lkitok lai netii ilng'oborri ti ong'ata naisiaja; kalo naa nanu enkaji ai, adaa naokisho, nairrag te nebo enkitok ai? Anaa eninchu, o anaa enaishu oltau lino, maas nanu ena bae.” Neitoki Daudi ajoki Uria, “Totona ake sii taata tene, ore taaisere naaisho iyie shomo.” Neaku etotona Uria te Yerusalem ina olong o pee ekenyu. Neitoomon Daudi ninye, nedaa ninye te dukuya ninye neokisho, neaku eitemera ninye; ore te nteipa neipang ninye alo airrag te ndapash enye te nebo isinkan lo lkitok lenye, kake eitu ninye edoyio alo enkaji enye. Ore tadekenya neigeroki Daudi Yoab empalai, neirriwaa te nkaina e Uria. Ore ti atua empalai neiger ajo, “Tipika Uria enkomom o larrabal ogol, paa intokiki aaitiakunye aaing'uaa ninye, pee etumi aatar metua. Ore emanita Yoab enkanasa neisho ninye Uria ewueji neyiolo ajo ketii iltung'ana oopi. Neipang'u iltung'ana le nkanasa aapuonu aarare Yoab, ore embata oo ltung'ana le Daudi ti atua iltung'ana neurori. Ore Uria ilo Hiti nesesekuani sii ninye. Neirriwaa Yoab olkilikuai aliki Daudi ilomon pooki lo larrabal. Neitanap ninye ilo kilikuai, ejo, Ore ake pee indip ainosaki ilomon pooki lo larrabal olaiguanani, ore ake pee eilep, engoro o laiguanani, ore ake pee kijoki iyie, ‘Kainyoo intae pee ishomo aataaniki enkang oleng to larrabal? Keitu intae iyiolouu aajo kengorisho te suntai. Kaing'ae apa natara Abimelek olayioni le Yerubeshet metua? Aime enkitok natanang'ua osoit oidong'ishoreki aitadoiki te suntai, neaku etua ninye te Tebes. Kainyoo intae pee ishomo oleng aanyikaki esuntai?’ Nijo iyie, ‘Ore sii osinka lino Uria Olhiti etua sii ninye.’ ” Kaae nelo ilo kilikuai, nelotu neliki Daudi nena pooki naairriwua Yoab ninye metoliki. Nejoki ilo tung'ani lo lkilikuai Daudi, “Enotokitio iyiook iltung'ana, neipang'u aapuonu aarare iyiook ti ong'ata; kake kiterewa aashukoki enejing'ieki kishomi. Neng'or iltung'ana loo mbaa isinkan linono te suntai; netuata embata oo sinkan lo laiguanani; ore osinka lino Uria Olhiti netua sii ninye.” Nejoki Daudi ilo kilikuai, “Nji iyie shomo tiaaki Yoab, ‘Mincho iyie ena bae kintanyamal, amu ear olalem obo taata near taata olikae; ntirrisha erasakinoto ino, enkanasa nimbung ninye.’ Nintagol ninye oshoke.” Ore pee ening enkitok e Uria nchere etua Uria olmoruo lenye, neishir ninye olkiyioi lo Sina enkaraki olmoruo lenye. Ore pee eishunye olkiyioi, neirriwaa Daudi olkilikuai neyau ninye enkaji enye, neaku ninye enkitok enye, neiki ninye olayioni. Kake ore ina bae nataasa Daudi neitu eitiship Olaitoriani. Neirriwaa Olaitoriani Natan enetii Daudi. Nelotu ninye enetii ninye nejoki ninye, “Etii apa iltung'ana oare enkang naje, naa karsis obo naa aisinani olikae. Ore ilo tung'ani karsis neeta nkerrai kumok o nchoo; kake ore ilo tung'ani aisinani nemeeta toki meteleku ake enkiti supen e ker, apa nainyiang'ua ninye. Neoroo ninye, nebulu ninye te nebo ninye o te nebo nkera enyena; naa keng'arie apa ninye endaa enye, neokisho te nkikompe enye, neirrag to lgoo lenye, netiu apa ninye anaa entito te ninye. Nelotu apa olalotoni enetii ilo tung'ani karsis, nemeyieu apa ninye neya too nkerrai enyena arashu too nchoo pee eitobiraki ilo otudung'uo enkop oewuo enetii ninye, kake eewa ninye olkuoo le ilo aisinani, neitobiraki ilo tung'ani apa oewuo enetii ninye.” Neyupuyup oleng engoro e Daudi te nkaraki ilo tung'ani; nejoki ninye Natan, “Ore anaa enaishu Olaitoriani, ore ilo tung'ani otaasa ena eishiaakino neye; nelak ilo kuoo katitin ong'uan, enkaraki ena bae, o enkaraki nemeeta olng'ur.” Nejoki Natan Daudi, “Iyie ilo tung'ani. Nji ejo Olaitoriani, Enkai e Israel, ‘Aatubukoko iyie eilata aput aitaa olaiguanani te shumata Israel naatokordua iyie aitayu te nkaina e Saul; naaisho nanu iyie enkaji o lkitok lino, o nkituaak o lkitok lino to lgoo lino, naaisho iyie enkaji e Israel o ene Yuda; naa tenaa ae kiti ena, naaponiki nanu iyie nkumok oleng. Kainyoo iyie pee itemenayie ororei lo Laitoriani, pee ias ina suuji too nkonyek enyena? Itasesekuana iyie Uria ilo Hiti to lalem, niya enkitok enye metaa enkitok ino, nitara ninye to lalem looLamori. Ore naa taata meiwuang'a ae kata olalem te nkaji ino amu kitemena nanu, niya enkitok e Uria ilo Hiti metaa enkitok ino.’ Nji ejo Olaitoriani, ‘Ng'ura, kadumu nanu entorroni nikiarare iyie ti atua enkaji ino makewan; naya nanu nkituaak inono te dukuya nkonyek inono, naisho nanu ninche olelatia ino, neirrag ninye te nebo inkituaak inono dama ena olong. Amu itaasa iyie too nkisudorot kake kaas nanu ena te dukuya Israel pooki, naas nanu dama.’ ” Nejoki Daudi Natan, “Ataasa nanu eng'oki to Laitoriani.” Nejoki Natan Daudi, “Eiwuang'ie sii ninye Olaitoriani eng'oki ino; miye iyie. Ore eyia, enkaraki ore tena yasata nintorioko iyie amor Olaitoriani, keye ina kerai nikitoikioki iyie.” Nelo Natan enkaji enye. Neosh Olaitoriani ina kerai apa natoikio enkitok e Uria Daudi, nemueyu ninye. Nesai Daudi Enkai te nkaraki ina kerai; nepukoo Daudi, nelo atua neirrag enkewarie te nkop. Ore ilpayiani le nkaji enye neitashe te mbata ninye, pee edumu ninye aaitung'uaa enkop; kake medumunye ninye, nemenya ninye endaa te nebo ninche. Ore te nkolong e naapishana neye ina kerai. Neureyu isinkan le Daudi eliki ninye nchere etua enkerai; amu etejo ninche, “Ng'ura ore apa eton eishu enkerai, nikirorie iyiook ninye, neitu ninye ening iyiook; kaji naa kinko ti nikijoki ninye inchere etua enkerai? Eidim ninye aitaasa kewan ae torrono.” Kake ore pee edol Daudi nchere keing'oming'omakino isinkan lenyena, nemuso Daudi nchere etua enkerai; nejoki Daudi isinkan lenyena, “Ketua enkerai?” Nejo ninche, “Etua ninye.” Kaae nedumunye Daudi te nkop, neitukuo, neel kewan te ilata, neibelekeny nkilani enyena nelo ninye atua enkaji o Laitoriani, neserem; neitoki ninye alo enkaji enye kewan; ore pee eikilikuanu, neirragieki endaa te dukuya ninye, nenya ninye. Nejoki isinkan lenyena, “Kainyoo ena bae nitaasa iyie? Itupukoyie ninchiraki eton eishu; kake ore ake pee eye enkerai nidumunye ninya endaa.” Nejo ninye, “Ore apa eton eishu enkerai, napukoo naishir; amu atejo nanu, ‘Kaing'ae oyiolo tenaa kaaing'urrie nanu Olaitoriani, pee epok enkerai?’ Kake ore taata etua; kainyoo naa pee apukoo nanu? Kaidim anyaaki atushuku ninye? Kalo nanu enetii ninye, kake meshukunye ninye enatii nanu.” Neilejilej Daudi enkitok enye, Bet-sheba, nelo enetii ninye, neirrag te nebo ninye, neiu ninye olayioni, nejo enkarna enye Solomon. Naa kenyor apa ninye Olaitoriani. Naa kenyor apa Olaitoriani ninye neirriwaa olkilikuai te Natan ilo oiboni, neaku etejo ninye enkarna enye Yedidia, te nkaraki Olaitoriani. Nearare Yoab Raba loo Lamoni, neya ina ang e nkitoo. Neirriwaa Yoab ilkiliku enetii Daudi, nejo, “Ataarare nanu Raba, ore sii, aawa nanu ina anasa oo nkariak. Ore naa taata, nturrurro tenebo ilkulikae tung'ana, nintayuyu ilng'oborri aaipirakinore enkanasa, niyaya ninye, pee maya ake nanu ina anasa, neaku te nkarna ai eipoti.” Neaku eiturrurro Daudi iltung'ana pooki tenebo nepuo Raba, nearare ninye neya ninye. Neya ninye olmarisian le nkitoo lo laiguanani lenye te lukunya enye, ore apa enkiroishi enye naa entalanta e sahabu, netii atua ninye osoit ogol e nkinyang'a; nepiki ninye endukuya e Daudi. Neya ninye nena yarunot e ina anasa ntokitin kumok oleng. Neyau ninye lelo tung'ana apa ootii atua enkanasa, nepik ninche enkisiaayiare too musumenoni, o sururuni o ntoluo, neisho ninche meteekenyata te mpejoto oo lmatofali naa nji eikuna ninye too nkanas pooki oo Lamoni. Kaae neitoki Daudi o ltung'ana pooki aashuko Yerusalem. Ore apa Absalom, olayioni le Daudi, neeta enkanashe sidai naji enkarna Tamar; ore pee elusoo enkata, nenyorru ninye Amnon, olayioni le Daudi. Neisomita oleng Amnon o metaba anaa nemueyu te nkaraki enkanashe enye Tamar; amu eselenkei apa nemeyiolo olee neaku etaliee ajo meidimayu te Amnon pee eitaas ninye ae. Kake eeta apa Amnon olchore, oji enkarna Yonadab, olayioni le Shimea, olalashe le Daudi; ore apa Yonadab naa oltung'ani kalamas oleng. Nejoki ninye ninye, “Olayioni lo laiguanani, kainyoo pee igira asasu anaake? Aimikiliki iyie nanu?” Nejoki Amnon ninye, “Kanyor nanu Tamar, enkanashe o lalashe lai Absalom.” Nejoki Yonadab ninye, “Irraga te ndapash ino, nintaakuno eimuei; ore ake pee kilotu papaai lino adol, tiaaki ninye, ‘Nchoo enkanashe ai Tamar aalotu aisho endaa nanya, neitobir endaa te dukuya nanu, pee atum nanu atoduaa ina daa, nanya nanu te nkaina enye.’ ” Neaku eirraga Amnon, neitaakuno kemuei; ore ake pee elotu olaiguanani adol ninye, nejoki Amnon olaiguanani, “Nchoo siaake enkanashe ai Tamar elotu aitobir inkuti mukateni te dukuya nanu, pee aatum ninye aishoo endaa.” Neirriwaa Daudi olkilikuai enetii Tamar ejoki, “Shomo enkaji olalashe lino Amnon, intobiraki ninye endaa.” Neaku eshomo Tamar enkaji o lalashe lenye Amnon, ine apa neirragie. Neya ninye enkurma, neipurj, neitobir imukateni too nkonyek enyena, nepej imukateni. Neitayu ninye enkarae oo mukateni neitayu imukateni aisho te dukuya ninye, kake etanya ninye enya. Nejo Amnon, “Taarai pooki tung'ani maashomo aaing'uaa nanu.” Neipang pooki ng'ae alo aing'uaa ninye. Nejoki Amnon Tamar, “Iyau endaa atua olgilata, pee atum nanu ainosa te nkaina ino.” Neya Tamar nena mukateni naaitobira, neyau ninche atua olgilata enetii Amnon olalashe lenye. Kake ore ake pee eyau ninche aitinyikaki ninye meinosa, neibung ninye, nejoki, “Wou, irraga te nebo nanu, enkanashe ai.” Newaliki ninye, “A-a, olalashe lai, mikiaraki nanu; amu measi ena te Israel; mias ena torroni emodai. Amaa te nanu, kaji aya enkurruna ai? Amaa te iyie, nitiu iyie anaa obo loo larruok oomoda too Siraeli. Ore naa taata, aatasayia iyie, irorie olaiguanani, amu maamitiki ninye iyie.” Kake eitu ening, naa ore amu ninye ogol alang ninye, nearaki ninye, neirag ninye te nebo ninye. Neitoki Amnon aibayu ninye te nkiba sapuk; neaku ore enkiba naiba ninye naa eisapuk alang enyorrata apa natonyorra ninye. Nejoki Amnon ninye, “Tudumunye, shomo.” Kake etiaka ninye, “A-a, olalashe lai, amu ore ena kitarruoroto nikiararie nanu naa eikitok alang ina ae nikintaasa nanu.” Kake meinining ninye ninye. Neipotu ninye olbarnoti apa oisiaaita ninye nejoki, “Iwuang'ie ena kitok tene natii nanu, ninken kutukaji te siadi ninye.” Neishopito apa ninye olkila oado adoru nkaik; amu nji apa eiko iselenken o laiguanani nemeyiolo olee te neishopo. Neaku eitayio osinka lenye ninye boo, neiken kutukaji te siadi ninye. Nepik Tamar nkuruon endukuya enye nepolos ilo kila oado apa oishopito; neiteleiki nkaik enyena endukuya enye, nelo, neyietu aishir eloito. Nejoki olalashe lenye Absalom ninye, “Ketii duoo Amnon olalashe lino te nebo iyie? Tigirayu naa taata, enkanashe ai; olalashe lino ninye; mipik ena oltau.” Nebik Tamar, anaa enkitok naliyio, ti atua enkaji o lalashe lenye Absalom. Ore pee ening Olaiguanani Daudi kuna baa pooki, negoro ninye oleng. Kake eitu eirorie Absalom Amnon aa esidai aa entorrono; amu eibayie apa Absalom Amnon, enkaraki naikonya enkanashe enye Tamar. Ore te siadi ilarin oare oolulung'a neeta apa Absalom ilabarnok loo nkerra te Baal-haso, naa ninye nataaniki Efraim, neitoomon Absalom ilayiok pooki lo laiguanani. Nelotu Absalom enetii olaiguanani, nejo, “Ng'ura, eeta osinka lino ilabarnok loo nkerra; aatasayia nchoo olaiguanani o sinkan lenyena epuo te nebo osinka lino.” Kake etiaka olaiguanani Absalom, “A-a, olayioni lai, mincho iyiook kipuo pooki, mikiaku ake iyiook olola te iyie.” Neitirrishaki ninye, kake meyieu ninye nelo kake eishoo ninye emayianata enye. Nejo Absalom, “Ti nimilo, aatoomono nchoo olalashe lai Amnon elo te nebo iyiook.” Nejoki olaiguanani ninye, “Kainyoo pee elo ninye te nebo intae?” Kake eitirrishaka Absalom ninye o metaba anaa neisho ninye Amnon o layiok pooki lo laiguanani meshomo te nebo ninye. Neitanap Absalom isinkan lenyena, ejo, “Entujurru ore ake pee emera Amnon te naisho oo sabibu, ore ake pee ajoki intae, ‘Entoosh Amnon,’ niariara intae ninye metua. Emiureisho; aime nanu oitanapa intae? Entipijuoto niarriyianunu.” Neaku eitaasa isinkan le Absalom Amnon anaa enaitanapishe Absalom. Nedumunye ilayiok lo laiguanani pooki, neked ake oltung'ani enyumpu enye neisik. Ore epuoito ninche te nkoitoi, nepuonu ilomon enetii Daudi, nejo “Etaara Absalom ilayiok lo laiguanani pooki, metuata neitu ninye eing'uari obo.” Nedumunye olaiguanani, nepolos ilkilani lenyena, neirrag te nkop; ore isinkan lenyena pooki apa ooitashe te mbata nepolos ilkilani lenye. Kake etejo Yonadab olayioni le Shimea, ilo alashe le Daudi, “Mincho olkitok lai ejo ketaara ninche metuata lelo barnot pooki, lelo ayiok lo laiguanani, amu Amnon ake otua, amu te nkitanapata e Absalom etaasaki ena ebaiki apa enkolong naikonya ninye enkanashe enye Tamar. Ore naa taata, mincho olkitok lai olaiguanani epik oltau adamu ajo etuata ilayiok pooki lo laiguanani; amu Amnon ake otua.” Kake eisika Absalom. Ore apa olbarnoti orripisho nedumu nkonyek enyena, neing'orisho, naa ng'ura, epuonu iltung'ana aaimu enkoitoi e Horonaim emurte o ldoinyo. Nejoki Yonadab olaiguanani, “Ng'ura, eetuo ilayiok lo laiguanani; anaa enatejo osinka lino, metaa etaa ina.” Ore ake enaidipie airoro, ng'ura, nepuonu ilayiok lo laiguanani, neilepie oltoilo neishir; ore olaiguanani o sinkan lenyena pooki neishir te mion oleng. Kake eisika Absalom, nelo enetii Talmai olayioni le Amihud, olaiguanani le Geshur. Neishir Daudi te nkaraki olayioni lenye anaake. Neaku eisika Absalom, nelo enetii Geshur, netii apa ine ilarin okuni. Neyieu oltau lo laiguanani nelo enetii Absalom; amu eitigiraki ti alo Amnon, etodua ajo etua ninye. Ore apa Yoab olayioni le Seruiya nemusu ajo Absalom edamu oltau lo laiguanani. Neirriwaa Yoab olkilikuai meshomo Tekoa, meyau te ine enkitok ng'en, nejoki ninye, “Ntaakunoyu ira enkaishirani, nipika ilkilani lo lkiyioi; nimiel kewan te ilata, kake taasa anaa enkitok naishirita too nkolong'i kumok te nkaraki o lotua; nilo enetii olaiguanani, niro aiko nji te ninye.” Neaku etipika Yoab irorei enkutuk enye. Ore pee elotu ina kitok e Tekoa enetii olaiguanani, nebatata te nkomom enye o metabaiki enkop, nesai, nejo, “Taretuoki, Olaiguanani.” Nejoki olaiguanani ninye, “Kainyoo enyamali ino?” Newal ninye ajo, “Ng'ura ara nanu enkoliai; etua olmoruo lai. Neeta esinka ino ilayiok oare, neitarrikino ninche maate ti ong'ata; nemetii apa oltung'ani orish ninche, neosh obo olikae near ninye metua. Ore taata netudumakine olmarei pooki esinka ino, nejo ninche, ‘Nchoru ilo tung'ani otara olalashe lenye, pee kitum iyiook aataar ninye metua te nkaraki olalashe lenye apa otasesekuana’; neaku keinyal sii ninye olajung'oni. Neiko neijia aar enkukuo ai natung'uayioki, nemeing'ueiki olmoruo lai enkarna arashu olpisiai ti oriong enkop.” Nejoki olaiguanani ina kitok, “Shomo enkaji ino, naa kaishoru nanu nkitanapat ti alo iyie.” Nejoki ina kitok e Tekoa olaiguanani, “Nchoo eaku shumata nanu etii enkitarruoroto, Olaitoriani lai olaiguanani, o shumata enkaji e papa lai; nchoo olaiguanani o lorika lenye le nkitoo eaku meeta entioto.” Nejo olaiguanani, “Ti nikijoki oltung'ani ae toki, iyau ninye enatii nanu, nimikingil ae kata ninye aibung.” Nejo ninye, “Aatoomono nchoo olaiguanani eipot Olaitoriani Enkai ino, paa ore ilo oitalaku elap to sarge nemeitoki ae kata asesekuanisho, ore olayioni lai nemeari metua.” Nejo ninye, “Anaaenaishu Olaitoriani, medoiki ninye olpapita obo lo layioni lino enkop.” Neitoki ina kitok ajo, “Aatasayia nchoo esinka ino eiro ororei to lkitok lai olaiguanani.” Nejo ninye, “Iroro.” Nejo ina kitok, “Kainyoo naa iyie pee intobira embae naaijo ena aarare iltung'ana le Nkai? Amu ore te nkishorunoto ena walata neen olaiguanani kewan, te ina nemeyau olaiguanani ilo lenye oararo nerrinyunye ang. Meeta nchere mikiye pooki, kitiu iyiook anaa enkare naisuaakaki enkop, nemeitoki asotunoyu; kake meitayu Enkai enkishui e ilo oing'oru nkoitoi pee mepal ilo lenye oararo metaa oloiturrayioki. Aewuo nanu ajo ena to lkitok lai olaiguanani amu aaitaa nanu iltung'ana kuret; nedamu apa esinka ino, ajo, ‘Kairorie nanu olaiguanani; eidimayu pee eas olaiguanani eomonunoto e sinka enye. Amu kening olaiguanani, nekordu esinka enye aitung'uaa enkaina o ltung'ani laaidim ainyala nanu o layioni lai te nebo aitung'uaa enjung'ore e Nkai.’ Nedamu esinka ino ajo, ‘Ore ororei lo lkitok lai olaiguanani naa kaayeng'iyeng'ie nanu’; amu ore olkitok lai olaiguanani netiu anaa olmalaika le Nkai te nerish esidai o entorrono. Metaa Olaitoriani Enkai ino te nebo iyie!” Neitoki olaiguanani awaliki ina kitok nejo, “Mikisudorie nanu pooki toki naba anaa enaaikilikuan iyie.” Nejo ina kitok, “Nchoo olkitok lai olaiguanani eiro.” Nejo olaiguanani, “Ketii enkaina e Yoab te nebo iyie te kuna pooki?” Newal ina kitok nejo, “Esipa ore anaa eninchu iyie, olkitok lai olaiguanani, meidim oltung'ani aibelekenyayu enkaina e tatene arashu enkaina e kedienye te pooki bae natejo olkitok lai olaiguanani. Osinka lino Yoab laaiguanaka nanu; ninye otipika kulo rorei pooki enkutuk e sinka ino. Etaasa osinka lino Yoab ena pee etum aibelekenya kuna baa. Kake ore olkitok lai neeta eng'eno anaa olmalaika le Nkai ayiolou mbaa pooki naatii enkop.” Nejoki olaiguanani Yoab, “Ng'ura taata, aishorua ena; shomo tushuku ilo barnoti Absalom.” Nebatata Yoab te nkomom enye abaiki enkop, nesai, nemayian olaiguanani, nejo Yoab, “Ore taata etayiolo osinka lino nchere anoto omom too nkonyek inono, olkitok lai olaiguanani, te ina naishorua olaiguanani eomonunoto osinka lenye.” Neaku etudumunye Yoab nelo Geshur, nelo ariku Absalom Yerusalem. Nejo olaiguanani, “Nchoo ninye eton openy ti atua enkaji enye makewan; melotu ninye enatii nanu.” Neaku etotona Absalom openy te enkaji enye makewan, neitu elotu enetii Olaiguanani. Ore apa ti atua Israel pooki nemetii oltung'ani orrepi te nkishaa enye anaa Absalom; ore ebaiki endap e nkeju enye o metabaiki endukuya enye nemeetae eleyiata te ninye. Naa te nedung ninye ilpapit le ndukuya enye (amu kedung apa te nkiting'oto e pooki ari; te neiroshiu oleng te ninye, nedung) neipim ninye ilpapit le ndukuya enye, naa shekeli iip are te ntemata o laiguanani. Netoikioki apa Absalom ilayiok okuni o entito nabo naji Tamar; naa enkitok sidai apa ninye. Neaku etobiko Absalom ilarin oare oolulung'a te Yerusalem, eitu elotu enetii olaiguanani. Neirriwaki Absalom ilkiliku Yoab pee eirriwaa ninye enetii olaiguanani; kake etanya elotu Yoab enetii ninye. Neirriwaa eniare, kake melotu Yoab. Nejoki ninye isinkan lenyena, “Eng'ura aajo ore enkurma e Yoab netashare enaai, neeta enkano te ine; enchom entipik enkima.” Neaku eshomo aapej enkurma. Nedumunye Yoab nelo enetii Absalom te nkaji enye, nejoki ninye, “Kainyoo pee etapejo isinkan linono enkurma ai?” Newaliki Absalom Yoab nejo, “Ng'ura aairriwaka iyie olomoni, ‘Wou ene, pee aatum airriwaki olaiguanani, pee aikilikuan ajoki, Kainyoo nanu pee aewuo aing'uaa Geshur? Enaikash te nanu te neton atii ine.’” Ore naa taata nchooki nanu alo enetii olaiguanani; “naa te naata enkitarruoroto, nchoo ninye maatara nanu matua.” Kaae nelo Yoab enetii olaiguanani, neliki ninye; neipotu ninye Absalom. Neaku eewuo ninye enetii olaiguanani, neirrug kewan te nkomom enye o metabaiki enkop te dukuya olaiguanani; neng'utut olaiguanani Absalom. Ore te siadi ena neing'uraki Absalom kewan engarri oo mbartan o ltung'ana onom ookuet te dukuya ninye. Naa keinyototo apa Absalom ayooki neitashe te mbata enkoitoi e kishomi; ore te neeta oltung'ani enkiguana nayau dukuya olaiguanani pee eiguanareki, neipotu Absalom ninye, nejo, “Kaa anasa ing'uaa iyie?” Ore ake pee ejo, “Ore osinka lino naa olosho oje te Israel,” nejoki Absalom ninye, “Ng'ura, kesipa neishiaakino ena niyieu; kake metii oltung'ani otegelua olaiguanani likining iyie.” Nepon Absalom ajo, “Oi naaji aa kara oladung'oni le nkiguana tena kop! Neaku ore pooki tung'ani oata enkiguana arashu enaikilikuanu neidim aeu enatii, naisho nanu ninye esipata.” Naa ore ake pee ejo oltung'ani anyiku alotu aserem ninye, neitorioo enkaina enye neibung ninye, neng'utut ninye. Neiko neijia Absalom too ltung'ana loo Israeli oopuonu enetii olaiguanani metundung'okini enkiguana; neaku etupurroyie Absalom iltauja loo ltung'ana le Israel. Ore te nkiting'oto oo larin oong'uan nejoki Absalom olaiguanani, “Aatasayia nchooki nanu mashomo alak olmumai apa lainosa to Laitoriani, te Hebron. Amu einosa apa osinka lino olmumai atii Geshur natii Aram, najo, ‘Esipa te naaitoki nanu Olaitoriani ashuku Yerusalem, naitayu nanu eseremata to Laitoriani.’ ” Nejoki olaiguanani ninye, “Shomo te seriani.” Neaku etudumunye ninye nelo Hebron. Kake eirriwayie Absalom ilkiliku te nkisudoroto atua Israel pooki, ejo, “Ore ake pee ining'ining'i oltoilo le mowuo, entejo, ‘Absalom olaiguanani te Hebron!’ ” Nepuo te nebo Absalom iltung'ana iip are ooing'uaa Yerusalem aa ilomon apa ooitoomonoki, nepuo ninche meeta ae too ltauja neitu eyiolou toki. Ore eitayu Absalom olasar, neirriwaki olkilikuai meipotuni Ahitofel ilo le Gilom olaikooni le Daudi meeu te nkanasa enye Gilo. Neponari enkarruoisho e Absalom ore iltung'ana ootii te nebo Absalom neponari. Nelotu olkilikuai enetii Daudi, ejo, “Eshomo iltauja loo ltung'ana le Israel aasujaa Absalom.” Nejoki Daudi iltung'ana lenyena pooki apa ootii te nebo ninye te Yerusalem, “Entudumunye, emaisika iyiook, arashu eaku mikiata iyiook enikisikaki aailany Absalom; enchom entasiooi meinepu akeninye iyiook asioki, neyau entorroni aitadoiki shumata iyiook, neshurt ena anasa te nepi o lalem.” Nejoki isinkan lo laiguanani olaiguanani, “Ng'ura, eanyita isinkan linono pee eas enaba anaa enadung'u olkitok lai olaiguanani.” Neaku eshomo olaiguanani, ore enkaji enye pooki nesujaa ninye. Neing'uaa olaiguanani nkapiak tomon pee eing'or enkaji. Nelo olaiguanani nesujaa iltung'ana pooki ninye; neitashe ninche te nkaji nabayie. Negiroo isinkan lenyena pooki ninye; o Lkereti pooki, o Lpeleti, o lelo iip ile le Giti apa ootusujaitie ninye ebaiki Gas, negiroo aaim dukuya olaiguanani. Nejoki olaiguanani Itai ilo le Giti, “Kainyoo sii pee ilo iyie te nebo iyiook? Tushukoyu shomo, pee ilo aton te nebo olaiguanani; amu ira iyie olomoni, nira sii oloisikua aing'uaa enkang ino. Ng'ole ake iewuo iyie, naa kaaisho nanu iyie taata tamanai te nebo iyiook, idolita aloito, nemayiolo enalo? Tushukoyu shomo, nirik ilalashera linono te nebo iyie; naa mikintoduaa iyie Olaitoriani enyorrata nauno o enkisiligata.” Kake etawalikia Itai olaiguanani ajoki, “Ore anaa enaishu Olaitoriani, naa ore enaishu olkitok lai olaiguanani, ore eneba enaa enetii olkitok lai olaiguanani, aa te keeya arashu te nkishui, ine sii ninye etii osinka lino.” Nejoki Daudi Itai, “Shomo naa, tulusoi.” Neaku eshomo Itai ilo le Giti agiroo, te nebo iltung'ana lenyena pooki o nena kutiti pooki apa naatii te nebo ninye. Neishir enkop pooki ayietu egiroo iltung'ana pooki, nelang olaiguanani oerata le Kidron, negiroo iltung'ana pooki aing'or enkalo o lpurkel. Neilepu Abiata, naa ng'ura, eewuo sii Sadok, te nebo Ilawi pooki, enapita osanduku lo sotua le Nkai; neirragie ninche ilo sanduku le Nkai, o metaba anaa negiroo iltung'ana pooki ti oriong enkanasa. Nejoki olaiguanani Sadok, “Entanap osanduku le Nkai entorriny tiaatua enkanasa. Te natum nanu kirotetisho too nkonyek o Laitoriani, naa kaashuku ninye naaisho ninye matodua ninye o emanyisho enye; kake te nejo ninye, ‘Maashipakino nanu iyie,’ ng'ura, nele nanu, nchoo ninye maaitaasa ina nadol aa sidai te ninye.” Neitoki ake sii olaiguanani ajoki Sadok olapolosani, “Ng'ura, tushukoyu shomo enkanasa te seriani, iyie o Abiata, te nebo ilayiok linyi pokira oare, Ahimasi olayioni lino, o Yonatan olayioni le Abiata. Ng'ura, kaanyu nanu iyie too lang'at o lpurkel, o metaba anaa nelotu olomoni oing'uaa enitii pee aaitayiolo nanu.” Neaku etanapa Sadok o Abiata osanduku le Nkai aashuk Yerusalem; nebik ninche te ine. Kake eilepa Daudi alo enchumata o ldoinyo loo loirienito, neishiraa eloito, meeta namuka neimulumula endukuya enye; ore lelo tung'ana pooki ootii te nebo ninye neimulumul ilukuny enye, neilep ninche aapuo, neishiraa epuoito. Nejokini apa Daudi, “Etii Ahitofel atua lelo arruok te nebo Absalom.” Nejo Daudi, “Olaitoriani, aatoomono nanu iyie, mbelekenya enkiguana e Ahitofel metaa emodai.” Ore ake pee elotu Daudi entopij o ldoinyo ine apa neseremieki Enkai, ng'ura, nelotu Hushai ilo Akiti anang'are ninye epolosa olkila lenye lioriong netii enterit endukuya enye. Nejoki Daudi ninye, “Ti nilo iyie te nebo nanu niaku iyie olola te nanu. Kake ti nishuko iyie alo enkanasa, nijoki Absalom, ‘Kaaku nanu osinka lino, iyie olaiguanani, naa ore apa anaa enara nanu osinka le papaai lino te nkata natulusoyie, neijia sii taata etiu kaaku nanu osinka lino,’ niaku intashal iyie te nkaraki nanu enkiguana e Ahitofel. Ai metii Sadok o Abiata ilapolosak te nebo iyie te idie? Metaa ore enaba anaa enining te nkaji o laiguanani, toliki Sadok o Abiata ilapolosak. Ng'ura etii ilayiok lenye pokira oare te nebo ninche te ine, Ahima-as, olayioni le Sadok, o Yonatan, olayioni le Abiata; naa te ninche kirriwaki nanu pooki toki nining.” Neaku eewuo Hushai, olchore le Daudi atua enkanasa, ina kata apa ejing'ita Absalom Yerusalem. Ore ake pee egiroo Daudi enchumata o ldoinyo peno, netumore ninye Siba osinka le Mofiboshet, o sirkon are naairotoki, enapita imukateni iip are, o rridat iip loo sabibu ooitoyioki, o rridat iip loo lng'anayio le nkolong, o lbene lo lchoni le naisho oo sabibu. Nejoki olaiguanani Siba, “Kainyoo iyie pee iyaua kuna?” Newal Siba ajo, “Ore kulo sirkon laa ile nkaji o laiguanani pee eked alotie, ore imukateni o lng'anayio naa inoo lbarnot naanya, ore enaisho oo sabibu naa ene lelo ooiterre to lpurkel pee eok.” Nejo olaiguanani, “Paa koree olayioni lo lkitok lino?” Nejoki Siba olaiguanani, “Ng'ura, etotona te Yerusalem; amu etejo ninye, ‘Taata aaisho nanu enkaji e Israel aashukoki enkitoria e papa lai.’ ” Neitoki olaiguanani ajoki Siba, “Ng'ura, ore nena apa pooki naara ine Mefiboshet naa nkuninono taata.” Nejo Siba, “Kaasai nanu; nchooki nanu manoto omom too nkonyek inono, olkitok lai olaiguanani.” Ore pee elotu Olaiguanani Daudi Bahurim, neipang'u te ine oltung'ani lo lmarei le nkaji e Saul, oji enkarna enye Shimei, olayioni le Gera; naa ore elotu neidikidik adekisho. Nenang Daudi too soito; nenang sii isinkan pooki lo laiguanani Daudi, o ltung'ana pooki, o ltung'ana pooki kituaak ootii enkaina enye e tatene o ene kedienye. Nejo Shimei ina kata edekisho, “Shomo, shomo, iyie oltung'ani lo sarge, iyie oltung'ani le pesho! Eitalakua Olaitoriani te iyie osarge pooki le nkaji e Saul, laa te wueji enye intoreishe; neishooyie Olaitoriani enkitoria apik atua enkaina o layioni Absalom. Toduaa ajo etii emutata ino shumata ino; amu ira oltung'ani lo sarge.” Neitoki Abishai olayioni le Seruiya ajoki olaiguanani, “Kainyoo pee edek ele dia otua olkitok lai olaiguanani? Nchooki nanu mashomo adungu endukuya enye.” Kake etejo olaiguanani, “Kaa nanu aabaikinore iyie, olayioni le Seruiya? Te nedekisho ninye te nkaraki natiaaka ninye Olaitoriani, ‘Tediaa Daudi,’ kaing'ae naa ojo, ‘Kainyoo pee itaasa iyie ena?’ ” Nejoki Daudi Abishai o sinkan lenyena pooki, “Ng'ura, olayioni lai kewan oing'oru enkishui ai; kebaa elusoo ele tung'ani le Benchamen! Tung'uai ninye, naa nchoo ninye edekisho; amu Olaitoriani oishoo ninye. Eidimayu pee eing'or Olaitoriani osina lai, naa kaalaaki nanu Olaitoriani too supati tele deket lena olong.” Neaku eshomo Daudi o ltung'ana lenyena te nkoitoi, ina kata eloito Shimei te murte o ldoinyo eipirakinore ninye, nedekisho eloito, nenang ninye too soito neisuaaki enterit. Ore olaiguanani, o ltung'ana pooki apa ootii te nebo ninye, nebau enaurate Yordan; neyeng'iyeng'a ninye te ine. Ore apa Absalom o ltung'ana pooki, ilewa le Israel nepuonu Yerusalem, o Ahitofel te nebo ninye. Ore ake pee elotu Hushai, lo losho le Akito ilo shore le Daudi, enetii Absalom, nejoki Hushai Absalom, “Tobikoi olaiguanani! Tobikoi olaiguanani!” Nejoki Absalom Hushai, “Kena enkanyit ino to lchore lino? Kainyoo pee eitu ilo te nebo olchore lino?” Nejoki Hushai Absalom, “A-a; amu ore ilo otegelua Olaitoriani o kulo tung'ana o lewa pooki le Israel, olenye aaku nanu, naa te nebo ninye nanu abik. Ore ake sii, kaing'ae nanu aisiaai? Aime ilo ayioni lenye? Ore apa anaa enaisiaayia papaai lino, kaaisiaai sii nanu iyie.” Nejoki Absalom Ahitofel, “Nchoru enkikoo ino; kaa iyiook kias?” Nejoki Ahitofel Absalom, “Shomo iyie atua enetii nkapiak e papaai lino, apa naatung'uayie ninye meing'ura enkaji; pee ening Israel pooki nchere intaa kewan olmang'atinta te papaai lino, ore inkaik e lelo pooki ootii te nebo iyie neitagoli.” Neaku etuunokito ninche Absalom olng'obor te nchumata enkaji; nelo Absalom atua enetii nkapiak e papaai lenye edolita Israel pooki. Ore apa te nena olong'i eutaroto naishoru Ahitofel neikununo ake duoo anaa ororei le Nkai eikilikuanishoreki; keyanyiti apa oleng enkikoo e Ahitofel, Daudi o Absalom, pokira are. Neponaa Ahitofel ajoki Absalom, “Nchooki nanu mategelu iltung'ana nkalifuni tomon o are, pee aipang nanu amir Daudi kewarie. Naa kalotu nanu enetii ninye etanaure netashala, nanang'aki ninye atua enkiputukuny; ore iltung'ana ootii te nebo ninye neisik. Naar nanu olaiguanani ake, naayaki nanu iltung'ana pooki enitii anaa esiankiki narikuni ang aarikoki olpayian lenye. Aing'oru iyie enkishui o ltung'ani obo ake, ore iltung'ana pooki neserianu.” Neitiship ina kikoo Absalom o lpayiani pooki le Israel. Neitoki Absalom ajo, “Empoto sii ninye Hushai ilo Alkiti, pee kining iyiook enajo ninye.” Ore pee elotu Hushai enetii Absalom, nejoki Absalom ninye, “Nji eiroro Ahitofel ajo; amaa aikias iyiook anaa enautu ninye? Tinimikias iroro naa iyie.” Nejoki Hushai Absalom, “Ore tena kata enkikoo naishorua Ahitofel neme sidai.” Nejo Hushai, “Ore ake, iyiolo nchere ore papaai lino o ltungana lenyena naa ltung'ana magil netarasutua sii, anaa olng'arurumi otooruoki nkera enyena ti ong'ata. Ore etii ina, kaarriyia papaai lino to larrabal; meirura ninye kewarie te nebo iltung'ana. Ng'ura, ore ninye taata eisudoyie ninye kewan te ngumoto nabo, arashu ti ae wueji. Naa ore ake pee ebatata embata oo ltung'ana te rasakinoto e dukuya, ore pooki ng'ae oning nejo, ‘Etii enkidaaroto atua lelo tung'ana oosujita Absalom.’ Neaku ore ninye oltung'ani opi, oikununo oltau anaa oltau lo lng'atuny, nelepori tukul te nkuretisho; amu eyiolo Israel pooki nchere ore papaai lino naa oltung'ani magilani, naa ore lekua ootii te nebo ninye naa iltung'ana oopi. Kake ore eutaroto ai naa nchere pee kinturrurrokino iyie Israel pooki, ebaiki Dan o metabaiki Beer-sheba, eba anaa osinyai le naiposha te nkumoi naa nchere, mirikoo iyie makewan olarrabal. Neaku eikipuonu iyiook shumata ninye ti atua ewueji neba anaa enetumieki ninye, paa eikidoiki iyiook ninye te wueji neba anaa enetumieki nikidoiki iyiook ninye anaa enadoiki enkoileelio enkop; ore te ninye o ltung'ana pooki ootii te nebo ninye meing'uari ninye obo. Naa tenelo ninye ajing atua enkanasa, neyau Isiraeli pooki nkeenta ina ang, nikinkurtutaa iyiook ina ang atua oerata o metaba anaa neaku metumi ninye osoit obo te ine.” Ore Absalom o ltung'ana pooki le Israel nejo, “Ore enkikoo e Hushai Olakiti naa eisidai alang enkikoo e Ahitofel.” Amu etegelua Olaitoriani pee emir enkikoo sidai e Ahitofel, pee etum Olaitoriani ayau entorroni shumata Absalom. Nejoki Hushai Sadok o Abiata lelo apolosak, “Nji o nji eikoo Ahitofel Absalom o lpayiani le Israel; naa nji o nji nanu aikoo. Ore naa taata erriwai ilkiliku entasioki entiaki Daudi, ‘Mirura taata iyie kewarie too lang'eta oo lkejek to lpurkel, kake togiroi tukul; meijori ake olaiguanani o ltung'ana pooki ootii te nebo ninye.’ ” Ore apa Yonatan o Ahima-aa neanyisho ninche te En-rogel; nelo apa enkaisiaayiani aliki ninche, nepuo ninche aaliki olaiguanani Daudi; amu meeta nchere pee etoduaki ninche ejing enkanasa. Kake etoduaa ninche enkayioni, neliki Absalom; neaku eshomo ninche pokira are aasiooyo, nepuonu enkaji o ltung'ani te Bahurim, apa oata enchorro ti oriong e nkaji enye; nedoiki ninche atua. Neya enkitok neimulumul enjing'et enchorro, neidapashaki enkano shumata enye; neaku meyiolounoyu toki. Ore pee epuonu isinkan le Absalom enetii ina kitok ti aji, nejo ninche, “Koree Ahima-as o Yonatan?” Nejoki ina kitok ninche, “Eshomo ninche aalang ereyiet.” Ore ake pee esujaa ninche neitu einepu ninche, neshukunye ninche aapuonu Yerusalem. Ore pee eidip ninche aatulusoi, neilepu lelo tung'ana te nchorro, nepuo aaliki Olaiguanani Daudi. Nejoki ninche Daudi, “Tudumunye, nilo asiooyo alang enkare; amu nji o nji eikoo Ahitofel te iyie.” Nedumunye Daudi, o ltung'ana pooki apa ootii te nebo ninye, nelang ninche Yordan; ore enasirie eitu eleku obo leitu elang Yordan. Ore ake pee edol Ahitofel ajo eitu esuji enkikoo enye, neirot osikiria lenye, nelo ninye ang enkanasa enye makewan. Neitobir mbaa e nkaji enye, negor kewan; neye ninye, nenukari te nkurare e papaai lenye. Neitoki Daudi alotu Mahanaim. Nelang Absalom Yordan te nebo iltung'ana pooki loo Siraeli. Netipika apa Absalom Amasa shumata enjore te rishata e Yoab. Ore apa Amasa naa olayioni lo ltung'ani oji Itra le Ishimail, apa oyama Abigail entito e Nahash, enkanashe e Seruiya, ng'otonye Yoab. Ore israel o Absalom neitayu ilng'oborri te nkop o Gilead. Ore pee elotu Daudi Mahanaim, ore Shobi olayioni le Nahash oing'uaa Raba oo lamori, o Makir olayioni le Amiel oing'uaa Lo-deba, o Barsilai o Lgiliadi ooing'uaa Rogelim, neyau ndapashi, o ngirran, o motioo oo nkulukuok, o enkano, o shairi, o enkurma, naidong'o, o mpoosho, o ndaiki oo mpukunot pooki, o enaisho, o engorno, o nkerra naaitung'uari eluaata te nkaraki Daudi o ltung'ana ootii te nebo ninye pee enya; amu etejo ninche, “Eeta iltung'ana esumash nenaura nenoto enkure ti ong'ata.” Neiturrur Daudi eiken iltung'ana pooki apa ootii te nebo ninye, nepik shumata ninche ilarikok loo nkalifuni o larikok loo maa iip. Neya Daudi enjore ematua nabo e uni ti abori erikore e Yoab, ematua nabo e uni ti abori erikore e Abishai olayioni le Seruiya, olalashe le Yoab, o ematua nabo e uni ti abori erikore e Itai Olgiladi. Nejoki olaiguanani lelo tung'ana, “Kalo sii nanu makewan aipang te nebo intae.” Kake etejo lelo lewa, “Mimpang iyie alo. Amu ti nikisik iyiook nemeshilaa ninche iyiook. Te neye olpisiai lang nemeshilaa ninche iyiook. Kake inyaanyukie iyie iip tomon katitin tomon lang. Metaa enaikash tinirriwaki iyie iyiook eretoto te nkanasa.” Nejoki olaiguanani ninche, “Ore enaba anaa enidolidolo aa sidai te intae naas nanu.” Neaku eitashe olaiguanani te mbata e kishomi, ina kata eruko enjore pooki aapuo too maa iip o too nkalifuni. Neitanap olaiguanani Yoab o Abishai o Itai, ajoki, “Emintaas entorrono te nkaraki nanu ilo barnoti Absalom.” Nening iltung'ana pooki eisho olaiguanani nkitanapat lelo arikok pooki le njore tiaalo Absalom. Neaku eipang'a enjore alo ong'ata aarare Israel; neitayuni olarrabal tiaatua entim e Efraim. Nemiri iltung'ana le Israel teine isinkan le Daudi nesapuku enkidaaroto teine ina olong, iltung'ana nkalifuni tikitam. Neidapashakino olarrabal oriong enkop pooki; neinos entim iltung'ana kumok ina olong alang olalem. Nediding Absalom isinkan le Daudi. Nekedito apa Absalom enyumpu enye, nelo enyumpu aim abori ilng'osil sapuki lo lchani neng'amari endukuya too lng'osil, neing'uari ninye eililio to lgam; ore ina nyumpu apa natii abori ninye nelo. Nedol oltung'ani obo, neliki Yoab, “Ng'ura, atoduaa nanu Absalom eisiong'a to lchani.” Nejoki Yoab ilo tung'ani otiaka ninye, “Kainyoo itoduaa iyie ninye! Kainyoo naa pee eitu iosh ninye teine asulaki enkop? Anaata naaji ashipa nanu naaisho iyie mpisai tomon e nkosholai o enkimeita.” Kake etiaka ilo tung'ani Yoab, “Ore naaji ninye hoo te naning nanu te nkaina ai enkiroishi oo mpisai nkalifuni tomon e nkosholai, maitorioo nanu enkaina ai aar olayioni lo laiguanani; amu ore te ning'oto ang nikintanapa iyie olaiguanani o Abishai o Itai, ejo, ‘Ore te nkaraki nanu entomitu ilo barnoti Absalom.’ Ore sii enkae, tenaa naaji kaitaasa nanu enkishui enye entorrono (nemetii entoki naisudoro to laiguanani) anaata indim iyie makewan atekepari.” Nejo Yoab, “Maitoki nanu aiturraa enkata aiko nji te nebo iyie.” Neyau ninye iremeta uni te nkaina enye neibitaki ninche oltau le Absalom, eton eishu to lchani. Ore ilbarnot tomon anapak loo masaa o larrabal e Yoab, neman ninche Absalom neosh ninye near ninye metua. Neosh Yoab emowuo nepuonu iltimito aashukunye te mirata oo Siraeli amu etomitikio Yoab ninche. Neitayu ninche Absalom, nenang'aki ninye atua engumoto sapuk ti atua entim, nesot te shumata ninye osototi sapuk loo soito, neisik Israel pooki, pooki ng'ae alo enkang enye. Ore apa Absalom eton eishu neitobiraka kewan eng'ape osoit natii atua oerata lo Laiguanani, amu etejo ninye, “Maata nanu olayioni oshum enkarna ai metadamuni.” Neipotie ina ng'ape kewan, naa keji enadamunyeki Absalom o metabaiki ena olong. Nejo Ahimaas olayioni le Sadok, “Nchooki nanu maipirrio, pee aya ilomon sidain enetii olaiguanani nchere etalakua Olaitoriani ninye aitung'uaa engolon oo lmang'ati lenyena.” Nejoki Yoab ninye, “Miya iyie ilomon taata; indim iyie aawa lomon ae olong, kake ore taata miya iyie lomon, amu etua olayioni lo laiguanani.” Neitoki Yoab ajoki ilo tung'ani le Kushi, “Shomo tiaaki olaiguanani ina nitoduaa.” Neirrugo Olkushi te dukuya Yoab, nekuet. Neitoki Ahimaas olayioni le Sadok ajoki Yoab, “Nchoo etiu enatiu, nchooki sii nanu maipirrio asujaa Olkushi.” Nejoki Yoab, “Kainyoo iyie pee impirri, olayioni lai, idolita ajo mitum iyie olerrinyore too lomon?” Nejo ninye, “Nchoo eaku enaaku, aipirri ake.” Neaku etiaka ninye, “Mpirrio.” Neipirri Ahimaas te nkoitoi e nkisiajata negiroo ilo Kushi. Netonita apa Daudi te rishata oo nchomito are; neilep olarriponi alo shumata enkishomi te mbata e suntai, ore ake pee eshumu nkonyek enyena neing'orisho, nedol oltung'ani oipirri openy. Neipotisho olarriponi neliki olaiguanani. Nejo olaiguanani, “Tenaa ninye ake, netii ilomon sidain enkutuk enye.” Nelotu ninye anyiku netaanu. Nedol olarriponi likae tung'ani ekuetu; neipotisho olarriponi te nkishomi nejo, “Ng'ura ekuetu likae tung'ani openy!” Nejo olaiguanani, “Ilomon sidain sii ninye eyau.” Nejo olarriponi, “Amen ajo ore enkuetata ole dukuya naa kenyaanyukie enkuetata e Ahimaas olayioni le Sadok.” Nejo olaiguanani, “Oltung'ani supat ninye naa kelotu ayau ilomon sidain.” Neishiraki Ahimaas olaiguanani ajo, “Eseriani.” Neirrugo ninye te dukuya olaiguanani nebaiki enkomom enye enkop, nejo, “Meisisi Olaitoriani Enkai ino, laa ninye oishooyie lelo tung'ana ootekepari aarare olkitok lai olaiguanani!” Nejo olaiguanani, “Eisidain mbaa ti alo ilo barnoti Absalom?” Newalu Ahimaas ejo, “Ore pee eirriwaa Yoab osinka lino, nadol enking'oling'ol sapuk, kake mayiolo nanu ajo kainyoo.” Nejo olaiguanani, “Mbelekenyau, ntasho tene.” Neaku eitasho ninye te mbata, neitashe aitirring'a. Naa ng'ura, nelotu Olkushiti; nejo ilo Kushiti, “Ilomon sidain to lkitok lai olaiguanani! Amu kitokordua iyie Olaitoriani ena olong aitung'uaa engolon e pooki apa likitudumakinote iyie.” Nejoki olaiguanani Olkushiti, “Eisidain mbaa ti alo ilo barnoti Absalom?” Newal ilo Kushiti ajo, “Metaa ilmang'ati lo lkitok lai olaiguanani, o pooki likidumakino aarare iyie te ntorroni, etiu anaa ilo barnoti.” Nenyamalu olaiguanani oleng, neilep alo olgilata otii shumata kishomi neishir; naa ore eloito, nejo ninye, “Oi olayioni lai Absalom, olayioni lai, olayioni lai Absalom! Enyor naa katua nanu te rishata ino, Absalom, olayioni lai, olayioni lai!” Netiaakaki apa Yoab, “Ng'ura, eishirita olaiguanani neisina te nkaraki Absalom.” Neaku eibelekenyaki enkishuroto e njore ina olong metaa olkiyioi too ltung'ana pooki; amu etoning'o iltung'ana ina olong, “Eisinanuo olaiguanani te nkaraki olayioni lenye.” Nepurrokino iltung'ana ina olong anaa enapurrokino iltung'ana atua ootukurrutua ekueta to larrabal. Neimulumul olaiguanani enkomom enye, neishir olaiguanani to ltoilo sapuk, “Oi olayioni lai Absalom, Oi Absalom, olayioni lai, olayioni lai.” Nelotu Yoab atua aji enetii olaiguanani, nejo, “Imulumula iyie taata te nkurruna nkomomi oo sinkan linono pooki, laa ninche ooitajeutuo ena olong enkishui ino, o enkishui oo layiok linono o ntoyie inono, o enkishui oo nkituaak inono o nkapiak inono, te nkaraki ninyor iyie lelo likimba iyie nimba lelo likinyor iyie. Amu imbalunye iyie taata nchere, ore larikok le njore o sinkan naa pesho te iyie; amu ore taata adol nanu ajo, tenaa naaji keishu Absalom nikituata iyiook pooki taata, anaata ishipa iyie. Ore naa taata tudumunye, shomo auluo irorie te supato isinkan linono; amu anya nanu olmumai to Laitoriani, ti nimilo iyie, meton ninye oltung'ani obo te nebo iyie ena kewarie; naa keaku ena torrono oleng te iyie alang entorroni apa naewuo shumata iyie ebaiki kitisho ino o metabaiki taata.” Nedumunye olaiguanani, netonie olorika lenye te kishomi. Nelikini iltung'ana pooki aajoki, “Ng'ura, etonita olaiguanani te kishomi”; nepuonu iltung'ana pooki dukuya olaiguanani. Ore apa Israel neisika pooki tung'ani alo enkang enye. Ore iltung'ana pooki neing'oling'ola ti atua iloshon pooki loo Siraeli ejo, “Etokordua iyiook olaiguanani aitung'uaa enkaina oo lmang'ati lang, neitajeuo iyiook aitung'uaa enkaina oo Lfilisti; ore taata neisika alo te nkop aing'uaa Absalom. Kake ore Absalom, laa ninye kitubukokitio eilata aaput meitoria iyiook, netua to larrabal. Ore naa taata kainyoo pee mijojo intae ae ti alo enchukunoto o laiguanani?” Neirriwaa olaiguanani Daudi olkilikuai lenye enetii Sadok o Abiata lelo apolosak nejo, “Entiaaki ilpayiani le Yuda, ‘Kainyoo pee iakuku ile bayie te nchukokinoto o laiguanani enkaji enye, eidipa ororei le Israel pooki aeu enetii olaiguanani? Irara intae iltung'ana laainei, irara intae o loito lai o sesen lai; kainyoo pee iakuku ile siadi te nchukunoto o laiguanani?’ Naa tiaaki Amasa, ‘Aimira iyie oltoilo lai o sesen lai? Nchoo eiko neijia Enkai te nanu, neitulusoo sii, ti nimira iyie olkitok le njore ai ebaiki taata te rishata e Yoab.’ ” Neibelekeny ninye oltau loo ltung'ana le Yuda netiu anaa oltung'ani obo; neaku eirriwaitie ninche ororei enetii olaiguanani ejo, “Tushukunye, o sinkan linono pooki.” Neaku etushukunye olaiguanani alotu Yordan; nelotu Yuda Gilgal anang'are olaiguanani neriku olaiguanani aaitalang'u Yordan. Ore Shimei olayioni le Gera, ilo lo losho le Benchamen, oing'uaa Bahurim, neisarisaru adou te nebo iltung'ana le Yuda pee enang'are olaiguanani Daudi; ore te nebo ninye netii iltung'ana enkalifu ooing'uaa Benchamen. Ore Siba osinka le nkaji e Saul, te nebo ilayiok lenyena tomon o imiet, o sinkan lenyena tikitam, nekuet aadoyio aapuo Yordan dukuya olaiguanani, nelang ninche te lang'ata aariku enkaji o laiguanani, neas ninche ina nayieu ninye. Ore Shimei olayioni le Gera nebatata te dukuya olaiguanani, etaa kejo ninye pee elang Yordan, nejoki olaiguanani, “Mincho olkitok lai aaibung nanu te ntorroni arashu edamu eneikuna osinka lino pee eas entorrono ina olong apa naing'uaa olkitok lai olaiguanani Yerusalem; mincho olaiguanani enap too ndamunot enyena. Amu eyiolo osinka lino nchere ataasa nanu eng'oki; metaa, ng'ura, aewuo nanu ena olong, ole dukuya te nkaji pooki e Yosef otadowuo alotu anang'are olkitok lai olaiguanani.” Newaliki Abishai olayioni le Seruiya ajoki, “Aimeari Shimei metua tena, enkaraki netediaa ninye ilo otubukoko Olaitoriani eilata?” Kake etejo Daudi, “Kaa nanu aaporoki intae, intae ilayiok le Seruiya, nchere itiuu intae ena olong anaa ilmang'ati te nanu? Keari pooki ng'ae metua te Israel ena olong? Amu aimayiolo nanu nchere ara nanu ena olong olaiguanani le Israel?” Nejoki olaiguanani Shimei, “Miye iyie.” Neisho olaiguanani ninye olmumai lenye. Ore Mefiboshet olayioni le Saul nedou alotu anang'are olaiguanani; neitu ninye eituku nkejek enyena, arashu eitobir olmunyei lenye, arashu eituku nkilani enyena, ebaiki enkolong apa nashomo olaiguanani o metabaiki enkolong naewuo ninye ashukunye te seriani. Ore pee elotu ninye aing'uaa Yerusalem anang'are olaiguanani, nejoki olaiguanani ninye, “Kainyoo pee eitu ilo te nebo nanu Mefiboshet?” Newal ninye ajo, “Olkitok lai, olaiguanani, aateleja apa nanu osinka lai; amu etiaka osinka lino ninye, ‘Irotokoki nanu osikiria, pee atum atakedo nalo te nebo olaiguanani.’ Amu olmaima osinka lino. Etakaldayie ninye osinka lino to lkitok lai olaiguanani. Kake ore olkitok lai olaiguanani netiu anaa olmalaika le Nkai; taasa naa ina nidol aa sidai te iyie. Amu ore enkaji pooki e papa lai netaa ninche iltung'ana ooishiaakino keeya te dukuya olkitok lai olaiguanani; kake itipika apa iyie osinka lino atua lelo oodaa te mesa ino. Kainyoo naa ai sipata naata nanu, naa, pee aishiraki olaiguanani?” Nejoki olaiguanani ninye, “Kainyoo pee iro oleng mbaa inono? Atudung'o nanu; ore iyie o Siba naa iorioro enkop.” Nejoki Mefiboshet olaiguanani, “Oi nchoo ninye eya pooki, etaa eewuo olkitok lai olaiguanani ang te seriani.” Ore apa Barsilai le Giliad netadowuo alotu aing'uaa Rogelim; nelo ninye te nebo olaiguanani Yordan, pee eitarioo ninye aitalang Yordan. Ore apa Barsilai naa oltung'ani otamorua oleng, ilarin ntomoni isiet; te moruao neishoo apa ninye olaiguanani endaa eton etonita te Mahanaim; amu oltung'ani apa karsis ninye. Nejoki olaiguanani Barsilai, “Wou talang'u te nebo nanu, naa kaagolie nanu iyie te nebo nanu te Yerusalem.” Kake etiaka Barsilai olaiguanani, “Kailarin aja nanu eton aishu, metaa kailep nanu alo te nebo olaiguanani Yerusalem? Ara nanu ena olong oloo larin ntomoni isiet; kaidim nanu atayiolo ajo kainyoo sidai naa kainyoo neme sidai? Keidim osinka lino aishamisham ina nanya ninye arashu enaok ninye? Keton nanu aidim ainining'o oltoilo loo lewa ooranyisho o nkituaak naaranyisho? Kainyoo naa pee eaku osinka lino olola oponari tolkitok lai olaiguanani? Kelo osinka lino enkiti wueji te nkoitoi te lido kekun Yordan te nebo olaiguanani. Kainyoo pee aalaaki nanu olaiguanani to lerrinyore oba nji? Aatasayia nchoo osinka lino eshuko, pee atum nanu atua ti atua enkanasa ai makewan, te netaaniki enkurare e papa lai o yieyio lai. Kake nele osinka lino Kimham; nchoo ninye elo te nebo olkitok lai olaiguanani; nintaas ninye enaba anaa enidol aa sidai te iyie.” Newaliki olaiguanani ajoki, “Kelo Kimham te nebo nanu, naa kaitaas nanu ninye enaba enaa enidol aa sidai te iyie; ore nena pooki niyieu iyie te nanu naaitaas nanu iyie.” Nepuo iltung'ana pooki aalang Yordan, nelo olaiguanani alang; neng'utut olaiguanani Barsilai nemayian ninye, neshuko ninye alo enkang enye kewan. Nelo olaiguanani dukuya o meshomo Gilgal, nelo Kimham te nebo ninye; ore iltung'ana pooki le Yuda o lpisiai sii loo ltung'ana loo Siraeli, neriku olaiguanani te nkoitoi enye. Nepuonu iltung'ana pooki loo Siraeli enetii olaiguanani, nejoki olaiguanani, “Kainyoo pee kitupurroitie iyie ilalashera lang iltung'ana le Yuda, neyau olaiguanani o enkaji enye aaitalang'u Yordan, o ltung'ana pooki le Daudi te nebo ninye?” Newaliki iltung'ana pooki le Yuda lelo tung'ana loo Siraeli ejo, “Enkaraki naa olo lgilata onyikita iyiook. Kainyoo naa pee igoro tena bae? Eikitadaate iyiook pooki te nkinyang'a olaiguanani? Anaa tenaa keishoo ninye iyiook ae enkishoroto?” Newaliki iltung'ana loo Siraeli iltung'ana le Yuda nejo, “Kiata iyiook irubat tomon to laiguanani, ore sii te Daudi nikiata iyiook nkumok aitulusoo intae. Kainyoo naa pee itemena intae iyiook? Aimikira iyiook ile dukuya ooiroro pee eshukuni olaiguanani?” Kake ore apa rorei loo ltung'ana le Yuda naa kepe alang irorei loo ltung'ana loo Siraeli. Ore apa, netumi oltung'ani lemeeta tipat, oji enkarna enye Sheba, olayioni le Bikiri, lo losho le Benchamen neosh ninye emowuo nejo, “Mikiata iyiook erubata te Daudi nimikiata iyiook enjung'ore to layioni le Yese; shomo pooki tung'ani olng'obor lino, iyie Israel!” Neaku etung'uaitie iltung'ana pooki loo Siraeli Daudi, nesuj Sheba olayioni le Bikiri; kake etusuja iltung'ana le Yuda olaiguanani lenye aakurraki ebaiki Yordan o metabaiki Yerusalem. Nelotu Daudi enkaji enye te Yerusalem; neya olaiguanani nkapiak tomon apa naatung'uayie meing'ura enkaji, nepik ninche atua enkaji narripitoi, neitoti ninche, kake eitu elo atua enetii ninche. Neaku eikenoyioki ninche o metabaiki enkolong e keeya enye, etoni anaa nkolia. Nejoki olaiguanani Amasa, “Mpoto iltung'ana le Yuda te nebo meetu enatii ti atua nkolong'i uni, nitii iyie ene makewan.” Neaku eshomo Amasa aipot Yuda; kake eimutie ninye aitogiroo enkata apa natudung'okoki apa nategelakaki ninye. Nejoki Daudi Abishai, “Ore taata keitaas iyiook Sheba olayioni le Bikiri entorrono alang Absalom; iwa isinkan lo lkitok lino tusujai ninye, meisho ake kewan nkanas naasheta isunta too soito nepik iyiook enyamali.” Neipang aapuo aasujaa Abishai, Yoab o lelo Sheriti o lelo Peleti, o lelo tung'ana pooki magil; neipang ninche aapuo aaing'uaa Yerusalem aasujaa Sheba olayioni le Bikiri. Ore etii ninche osoit sapuk otii Gibeon, nelotu Amasa anang'are ninche. Neishopito apa Yoab olkila lo ltung'ani le njore, ore ti oriong ninye netii enkimeita te nebo olalem ti atua enchashur eteenaki aakurraki te mpolos enye; ore eloito ninye dukuya nedoyio. Nejoki Yoab Amasa, “Iserian iyie, olalashe lai?” Neibung Yoab Amasa olmunyei lenye te nkaina enye e tatene pee eng'utut ninye. Kake eitu edol Amasa olalem otii enkaina e Yoab; neaku ninye etaremie Yoab ninye enkoshoke, nebuloki imonyit enyena enkop, neye ninye eitu eigilieki ai oshoto. Ore Yoab o Abishai olalashe lenye nesujaa Sheba olayioni le Bikiri. Ore obo loo ltungana le Yoab, neitashe te mbata e Amasa nejo, “Ore olonyor Yoab anaa ole nkalo e Daudi, nchoo ninye esujaa Yoab.” Ore Amasa neirrag akurro tiaatua o sarge lenye te mpolos enkoitoi. Ore pooki ng'ae ogiroo, nedol ninye, neitashe; ore pee edol ilo tung'ani ajo eitasheito iltung'ana pooki, nenap ninye Amasa aitung'uaa enkoitoi apik ong'ata, nenang'aki enkila shumata ninye. Ore ake pee eyae aaitung'uaa enkoitoi, nepuo iltung'ana pooki aasuj Yoab esujaa olayioni le Bikiri. Neim Sheba atua iloshon pooki loo Isiraeli o meshomo Abel e Bet-maka, ore lelo Bikiri pooki neiturrurro, nesujaa ninye atua. Ore lelo tung'ana pooki apa ootii te nebo Yoab nepuonu aang'adu ninye ti atua Abel e Bet-maka; neitayu ninche olkiu te mbata e nkang, neitashe ninye aipirakinore esuntai; neoshito apa ninche esuntai pee euroo. Neipotisho enkitok ang'eni ti atua enkanasa ejo, “Entoning! Entoning! Entiaaki Yoab, ‘Wou ene, pee aatum nanu airorie iyie.’ ” Nelotu ninye ataaniki ninye; nejo ina kitok, “Ira iyie Yoab?” Newaliki ninye, “Ara nanu.” Neitoki ajoki ninye, “Toning'o irorei le sinka ino.” Newaliki ninye, “Aning'ito nanu.” Neitoki ninye ajo, “Ore apa naa keji, ‘Nchoo ninche eikilikuanu enkoo te Abel’; neidip ninche olomoni. Ara nanu nabo e nekua nemeetayie olomang'ati neisiligayu too Siraeli amaa ing'oru iyie aidaikie enkanasa naa ninye ng'otonye ti atua Israel; kainyoo pee iijoo iyie ina jung'ore o Laitoriani?” Newal Yoab, “Kikoino maatalama ena nchere kaijoo nanu arashu aidaikie! Mesipa ina. Kake oltung'ani le nkop oo ldoinyo e Efraim, oji Sheba olayioni le Bikiri, oilepie enkaina enye aarare olaiguanani Daudi; enchoru ninye ake, naa kalo nanu aing'uaa enkanasa.” Nejoki ina kitok Yoab, “Ng'ura, eikinang'akini iyie endukuya enye aaitadooki te suntai.” Nelo ina kitok enetii iltung'ana pooki te ng'eno enye. Nedung'u ninche endukuya e Sheba olayioni le Bikiri nenang'u auluo enetii Yoab. Neosh ninye emowuo, neidapasha ninche aaing'uaa enkanasa, oltung'ani ake nelo enkang enye. Nerrinyo Yoab alo Yerusalem enetii olaiguanani. Naa Yoab apa olkitok le njore pooki e Israel; ore Benaia olayioni le Yehoida naa ninye olkitok loo Lkereti o Lpelesi; naa Adoram oitasheiki esiaai oo nkaik; naa Yehoshafat olayioni le Ahilud apa olaigeroni; naa Shefa olasirani; naa Sadok o Abiata apa ilapolosak; ore apa Ira ilo Yairiti naa olapolosani sii ninye le Daudi. Netii apa olameyu too nkolong'i e Daudi too larin okuni, to lari ake o to lari, neing'oru Daudi enkomom o Laitoriani. Nejo Olaitoriani, “Etii entorroni o sarge shumata Saul o shumata enkaji enye, enkaraki natara Ilgibioni metuata.” Neaku eipoto olaiguanani Ilgibioni. Ore apa Ilgibioni neme iloo ltung'ana le Israel, kake ilo lpisiai loo Lamori; hoo neinosa iltung'ana le Israel olmumai pee eleku ninche, etonyuaa Saul ear ninche metuata te ina nyuata enye te nkaraki iltung'ana le Israel o Yuda. Nejoki Daudi lelo Gibioni, “Kaa nanu aitaas intae? Naa kaji nanu aikunu enkipooto, pee itumutumu intae aatamayian enjung'ore o Laitoriani?” Nejoki ilgibioni ninye, “Mme mbae e nkosholai arashu sahabu erishata ang o Saul arashu enkaji enye; neme enaang pee kiar oltung'ani metua te Israel.” Nejo ninye, “Ijojo intae pee aitaas aa nanu intae?” Nejoki ninche olaiguanani, “Ore ilo tung'ani apa otumuta iyiook neitobir pee eidaikie iyiook, metaa mikitum iyiook ewueji ti atua enkop pooki oo Siraeli. Nchoo meishori ilayiok lenyena oopishana pee kisiong iyiook ninche te dukuya Olaitoriani te Gibeon to ldoinyo lo Laitoriani.” Nejo olaiguanani, “Kaishoru nanu ninche.” Kake etelekua olaiguanani Mefiboshet, olayioni lo layioni le Saul, Yonatan, te nkaraki olmumai lo Laitoriani apa otii erishata ninche, o erishata e Daudi, o Yonatan olayioni le Saul. Neya olaiguanani ilayiok oare le Rispa entito e Aia apa naa ninye etoikio Saul, Armon o Mefiboshet; o layiok imiet le Merab entito e Saul laa ninche etoikio Adriel olayioni le Barsilai ilo Meholati; neishooyo ninche apik atua nkaik oo Lgibioni; neilili ninche teilo doinyo te dukuya Olaitoriani, ore ninche pokira oopishana neidak te nebo. Neari ninche metuata too nkolong'i e dukuya e nkisampuare, te nkiterunoto e nkisampuare e shairi. Neitoki Rispa entito e Aia aya ilkuniyiani neisalaashaki te ndapidapoi ebaiki enkiterunoto e nkisampuare o metaba anaa neshaiki enchan ninche eing'uaa shumata; neitu ninye eisho imotonyi o loing'ang'e epuonu aadoiki ninche te ndama, arashu ing'uesi e ong'ata te nkewarie. Ore ake pee elikini Daudi enataasa Rispa entito e Aia ina apiani e Saul, nelo Daudi aitayu iloik le Saul o loik lo layioni lenye Yonatan ti atua iltung'ana le Yabesh-gilead, apa ootupurroitie ninche to lkurroto otumoreki te Bet-shan, te ine apa neililiyie Ilfilisti ninche, te ina olong apa nataara Ilfilisti Saul metua te Gilboa; neyau ninye ailepunye te ine iloik le Saul o loik lo layioni lenye Yonatan; neiturrur ninche iloik le lelo apa oo lilioki. Nenukaa ninche iloik le Saul o layioni lenye Yonatan te nkop e Benchamen te Sela, ti atua enkurare e Kish papaai lenye; neas ninche nena pooki naaitanapishe olaiguanani. Ore te siadi ina nening Enkai eomonokinoto te nkaraki enkop. Nenyaakitia apa Ilfilisti aata olarrabal o Israel, nedoyio Daudi alo te nebo isinkan lenyena nearare ninche Ilfilisti; neilepunye Daudi. Ore Ishbi-benob, obo apa le ishoi e lelo tung'ana sapuki laa shekeli iip o suyai enkirroishi e mpere enye, oenita olalem ng'ejuk, neing'oru pee ear Daudi metua. Kake eewuo Abishai olayioni le Seruiya aretu, nerasaki ilo Filisti near ninye metua. Neitirrishaki iltung'ana le Daudi ninye aajoki, “Mintoki aekata iyie aipang alo te nebo iyiook olarrabal, pee miar ake olkilang'ilang'et le Israel.” Ore te siadi ena neitoki atii olarrabal apa o Lfilisti te Gob; neari metua Sibekai ol Husati Saf, laa ninye apa obo le ishoi e lelo tung'ana sapuki. Neetae ake sii apa olarrabal o Lfilisti te Gob; neari Elhanan olayioni le Yaareoregim, le Betlehem near metua Goliat le Giti oba enchata e mpere enye anaa embokishi o lashetani. Neetae sii apa olarrabal te Gas, teine apa netii oltung'ani sapuk oado oata lkimojik ile te pooki aina, o nkimojik ile te pooki keju, tikitam o ong'uan esiana e pooki; naa ole ishoi sii apa ninye e lelo tung'ana sapuki. Ore ake pee edek ninye Israel near ninye metua Yonatan olayioni le Shimei, ilo alashe le Daudi. Ore kulo oong'uan naa ile ishoi e lelo tung'ana apa sapuki ootii Gas; near Daudi te nkaina enye o te nkaina oo sinkan lenyena metuata. Neirorie Daudi Olaitoriani irorei lele sinkolio ina olong natalakua ninye Olaitoriani aitung'uaa enkaina oo lmang'ati lenyena pooki, neitung'uaa enkaina e Saul. Nejo ninye, “Olaitoriani endapidapoi ai, naa osempewuet lai, Enkai ai, endapidapoi ai, laa ninye esarunoto ai elong'o ai o emowuo enjeunoto ai, oltim lai o enkisudoroto ai, Olaitajeunoni lai; kintajeu iyie nanu aitung'uaa entorroni. Aipoto nanu Olaitoriani, laa ninye eishiaakino nerrepi, naaitajeuoki nanu too lmang'ati laainei. Amu aamanita nanu ilopir le keeya, naapik nanu indoorot e ntorroni enkuretisho. Aarrueshita nanu nkeenta e nemeneng'a, naaluaakino nanu irresheta le keeya. Ore ti atua osina lai aipoto nanu Olaitoriani; Enkai ai nanu aipoto. Te nkaji enye etoning'o ninye oltoilo lai, nelotu enkishirata ai nkiyiaa enyena. Kaae neikirikira enkop neigirigiro; ore ilkitamanyunot le shumata, neigirigiro, enkaraki natagore ninye. Neilep empuruo alo keper eing'uaa nkumeishin enyena, nepuku enkima nanyaisho te nkutuk enye; nkuk naaishu naayupuyup epuku te ninye. Neirrugu ninye shumata, nelotu adou; netii emisimisi nairrusha abori nkejek enyena. Etakedo ninye enchumata olkerubi, nelo tiaai; etoduaaki ninye te nchumata oo naipuko osiwuo. Eishoo enaimin metamana ninye, neman ninye nkatampo naairrusha o nkariak naaiturrurro. Nepuku te ina wang'an natii dukuya ninye nkuk e nkima naayupuyup. Etadara Olaitoriani te shumata, ore ilo otii shumata oleng neitayu oltoilo lenye. Neirriwaa ninye mbaa, neidapash ninche; te nkiwuang'ata eterewa ninche. Nedoli kop e naiposha, neirragieki ilkitamanyunot le nkop meirraga aaibalayu, te nkisikong'ata o Laitoriani, te nkutata e nkiyang'et oo nkumeishin enyena. Neitoriou ninye te shumata naaya ninye nanu, naaitayu ti atua nkariak kumok. Aatokordua te nkaina o lmang'atinta lai ogol, aitung'uaa lelo apa laaiba nanu; amu kegol apa oleng te nanu. Eetuo ninche shumata nanu te nkolong ai e nyamali; kake etaa Olaitoriani enkigarakinoto ai. Aayaua ninye nanu atua ewueji nelala; aatokordua amu kaashipakino ninye nanu. Aaitaasa nanu Olaitoriani te risioroto e supatisho ai; te risioroto e ina nemeiduruk nkaik aainei aaitaasa ninye. Amu aibung'a nkoitoi o Laitoriani, neitu nanu te ntorroni aing'uaa Enkai ai. Amu ore nkitanapat enyena pooki netii dukuya nanu, ore too nkitanapat enyena neitu nanu aibelekenya. Maata apa nanu eleyiata te dukuya ninye, narrip nanu kewan te ntorroni. Metaa aaitaasa nanu Olaitoriani te risioroto e supatisho ai, te risioroto e ina nemaiduruk nanu too nkonyek enyena. Ore te ilo oisiligayu nintodol kewan ajo isiligayu; ore to ltung'ani le meeta eleyiata nintodol kewan ajo miata eleyiata; Ore te ilo shaat nintodol iyie kewan ajo ira sii iyie shaat, ore ilo lemeitoriori nintodol iyie ajo ira olo larrabal. Ikordu iyie iltung'ana oobor, kake etii nkonyek inono shumata iloowuasa pee intadou ninche. Ee, ira iyie oltaa lai, Olaitoriani, naa keitawang Enkai ai enaimin ai. Ee, te iyie aidim nanu aidaikie oltim, naa te Nkai ai nanu aidim aida esuntai. Ore ena Ai - kesipa enkoitoi enye; ore enkisiligata o Laitoriani naa keibalayu ajo kesipa; elong'o ninye te pooki ooing'oru enkisudoroto te ninye. Amu kaing'ae Enkai, neme Olaitoriani? Naa kaing'ae endapidapoi, neme Enkai ang? Ore ena Ai naa enkisudoroto ai nagol, netaseriana ninye enkoitoi ai. Neitagol ninye nkejek aainei anaa entarakuet, naagolie ninye mabatata too neeika. Neiteng'en ninye nkaik aainei to larrabal, metaa keriu nkaik aainei enkawuo osuyai. Kinchoo iyie nanu elong'o e njeunoto ino, naaitaa nanu eretoto ino kitok. Kinchoo iyie nanu ewueji nelala too roruat aainei ti abori nanu, neitu eideketari nkejek aainei; atusujayie nanu ilmang'ati laainei naidaikie ninche, neitu ashukunye o metaba anaa neishunye ninche. Aishua nanu ninche; ataremo nanu ninche aipang'ie, metaa eitu ninche edumunye; etabatatate ti abori nkejek aainei. Amu kiterretena nanu te ngolon te nkaraki olarrabal; nincho iyie ilmang'ati laainei meimiso ti abori nanu. Inchoo iyie ilmang'ati laainei maaibelekenyaki nkoriong'i enye, lelo laaiba nanu, naidaikie nanu ninche. Neing'orisho, kake metii hoo obo oitajeu ninche; eishirakitia ninche Olaitoriani, kake eitu ninye ewaliki ninche. Aidong'o nanu ninche naitunyoki ninche enkop anaa esarng'ab e nkoitoi. Kintajeuo iyie nanu te lelo tung'ana ootekepari aakeshisho; kitipika nanu mataa endukuya oo loreren; ore apa iltung'ana leitu nanu ayiolou naaisiaai nanu. Nepuonu iloo loreren naairr ugokino nanu; ore ake pee aaning'oo nanu, naairuk ninche nanu. Etapalari iloo loreren, nepuonu eikirikira aaipang'u too nkisudorot enye. Ekeishu Olaitoriani! Meisisi endapidapoi ai! Naa meitubulari enkitoo e Nkai ai, endapidapoi e njeunoto ai. Ina Ai naaitalaaka nanu elap neitadou iltung'ana apik abori nanu, laa ninye laaitayio nanu aitung'uaa ilmang'ati laainei; naailepie nanu te shumata ilmang'ati laainei, nikikordu iyie nanu aitung'uaa iltung'ana arruok. Ore tena kaaisis nanu iyie, Olaitoriani, ti atua iloreren, naa karanyaki irrepat e nkarna ino. Nkisulat sapuki eisho ninye olaiguanani lenye, neitodolu enyorrata nauno te ilo lenye obukokino eilata, Daudi o eishoi enye ntarasi.” Ore taata kulo ilomon le nkiting'oto le Daudi: Enkitanapata e Daudi, olayioni le Yese, enkitanapata e ilo tung'ani oilepieki aaya shumata, ilo obukokino eilata te Nkai e Yakobo, ilo oranyu isinkolioitin oomelok le Israel: “Eirorita enkiyang'et o Laitoriani te nanu, etii ororei lenye olng'ejep lai. Eiroro Enkai e Israel, aatiaka endapidapoi e Israel: Te neitore oltung'ani te sipata iltung'ana, neitore te uriata e Nkai, neitawang'aki ninche anaa ewang'an e nkakenya, anaa enkolong nawang'u tadekenya metii nkatampo, anaa enchan naisho nkujit metubulu te nkop. Ee, aimeitashe enkaji ai aiko neijia te Nkai? Amu eitobira ninye te nebo nanu osotua loo ntarasi, eishiaakino too ntokitin pooki netagolieki. Amu aimeidimie ninye metubula eretoto ai pooki o eyieunoto ai? Kake ore iltung'ana lemeeta Enkai, netiu pooki anaa ilkiku ootanang'ayioki; amu meidimi aawaita te nkaina; kake ore ilo tung'ani oibung ninche neeta esekenkei o enchata e mpere, nemuti ninche tukul te nkima.” Kuna nkarn oo ltung'ana magil apa oata Daudi: Yosheb-bashebet Oltakenoni; kitok apa ninye te lelo okuni, eilepie ninye empere enye aarare iltung'ana iip isiet ootasesekuana ninye te nkata nabo. Ore oliare te ninye ti atua iltung'ana okuni magil naa Eliesa olayioni le Dodo olayioni le Ahohi. Etii apa ninye te nebo Daudi ina kata pee eiturrurro Ilfilisti to larrabal, neshuko iltung'ana le Israel. Nedumunye ninye near Ilfilisti o meteekunye enkaina enye, neibung'are enkaina enye o lalem lenye; neyau Olaitoriani enkisulata kitok ina olong; nerrinyunye iltung'ana aasujaa ninye pee epur lelo ootasesekuanaki. Ore olosujita ninye naa Shama, olayioni le Agee Olharari. Eiturrurrote Ilfilisti te nebo te Lehi, te ine wueji apa nebore endaa nauno; neisik iltung'ana aailany Ilfilisti. Kake etune ninye aitashe te mpolos e ine, nengoroo ine, nesesekuan Ilfilisti; neyau Olaitoriani enkisulata kitok. Ore okuni loo ltung'ana tomoni uni gelunot nedoyio aapuo, nepuonu enetii Daudi etinyikua enkata e nkisampuare te nkapune e Adulam, ina kata apa etii oltim loo Lfilisti oerata le Refaim. Netii apa Daudi ina kata atua enkisudoroto; ore oltim loo Lfilisti netii Betlehem. Nejo te yieunoto, “Oi naaji aaisho nanu oltung'ani enkare naok naing'uaa olchorro le Betlehem otii embata kishomi!” Neim lelo tung'ana okuni magil atua ilng'oborri loo Lfilisti; neoku enkare te ilo shorro le Betlehem apa otii embata e kishomi, neyaki Daudi. Kake eitu eok; eibukoyie ninye abukoki Olaitoriani, nejo, “Metalakuana te nanu, Olaitoriani, tenaa kaas nanu ena. Kaok nanu osarge loo ltung'ana ooshomo te mbatisho e nkishui enye?” Neaku meok ninye. Kuna baa etaasa lelo tung'ana okuni magil. Ore apa Abishai, olalashe le Yoab, olayioni le Seruiya, naa ninye olarikoni le tomoni uni. Neilepie ninye enkaina enye aarare iltung'ana iip uni nesesekuan ninche, neisulie enkarna te lelo okuni. Ninye apa eyioloi oleng te lelo tomoni uni, neaku olarikoni lenye; kake eitu eaku te lelo okuni. Ore apa Benaia olayioni le Yohoida naa oltung'ani opi oleng le Kabseel, olaasani loo nkiasin sapuki; etara ntiamasini are e Moab. Eshomo sii apa adoyio near olng'atuny ti atua engumoto ina kata apa etadowuo empaso e nkirobi. Nesesekuan olmisiri, oltung'ani le nkishaa. Eeta apa ilo Misiri empere te nkaina enye; kake eshomo Benaia enetii ninye te ng'udi enye, newuapaa empere te nkaina o Lmisiri, nesesekuan ninye tempere enye kewan. Kuna baa etaasa Benaia olayioni le Yehoida, netum enkarna ti atua lelo tung'ana okuni magil. Keyioloi apa oleng ti atua lelo tomoni uni, kake eitu elusoo te pokira okuni. Nepik apa Daudi ninye meitasheiki ilarripok lenyena. Ore apa Asahel olalashe le Yoab naa obo le lelo tomoni uni; Elhanan olayioni le Dodo le Betlehem, Shama le Harod, Elika le Harod, Heles o Lpalti, Ira olayioni le Ikesh le Tekoa, Abiesa le Anatot, o Mebunai Olhushati, Salmon Olhohi, o Maharai le Netofa, o Heleb olayioni le Baana le Netofa, Itai olayioni le Ribai le Gibea loo Lbenchamen, Benaia le Piraton, Hidai loo nong'ot e Gaash, Abilabon le Lbati, Asmafet le Bahurim, Eliaba le Shaalbon, olayioni le Yashen, Yonatan, Shama Olharari, Ahiam olayioni le Sharar Olharari; Elifelet olayioni le Ahasbai le Maaka, Eliam olayioni le Ahitofel le Gilo, Hesro le Karmel, Paarai Olabi, Igal olayioni le Natan le Soba, Bani Olgadi, Selek Olamori; Naharai le Be-erot, olanapani loo masaa o larrabal le Yoab olayioni le Seruiya, Ira ilo Tiriti; Gareb ilo Tiriti; Uria ilo Hiti: tomoni uni o opishana pooki. Neitoki engoro o Laitoriani ayupuyup te nkaraki Israel, nepik Daudi endamunoto te nkaraki ninche, ejo, “Shomo nkena Israel o Yuda.” Neaku etiaka olaiguanani Yoab o lkituaak le njore, apa ootii te nebo ninye, “Enchom atua iloshon pooki le Israel, ebaiki Dan o metabaiki Beer-sheba, ninkenikene iltung'ana, pee atum atayiolo esiana oo ltung'ana.” Kake etiaka Yoab olaiguanani, “Metoponai Olaitoriani Enkai ino iltung'ana katitin iip aa kumok anaa enaba, eton edolita nkonyek o lkitok lai olaiguanani; kake kainyoo pee eshipakino olkitok lai olaiguanani ena bae?” Kake etune ororei lo laiguanani te Yoab o too lkituaak le njore. Neaku eshomo Yoab o lkituaak le njore te ine netii olaiguanani aapuo aaiken iltung'ana. Nelang ninche Yordan, neiteru abaiki Aroer, o ebaiki ina anasa natii atua empolos o erata, te nkalo e Gad nelo Yaser. Neitoki aapuonu Gilead, o Kadesh ti atua enkop oo Lhiti; nepuonu ninche Dan, nepuo te Dan nemanaa aapuo Sidon, nepuonu enkisudoroto e Turo o nkang'itie oo Lhafi o Lkanaani; neipang ninche aapuo Negeb e Yuda te Beer-sheba. Neaku ore ake pee eidip ninche aashom enkop pooki, nepuonu ninche Yerusalem te nkiting'oto oo lapaitin ooudo o nkolong'i tikitam. Neisho Yoab esiana e nkikenata oo ltung'ana olaiguanani: ore ti atua Israel netii nkalifuni iip isiet oopi oo tushututua ilalema, ore iltung'ana le Yuda naa nkalifuni iip imiet. Neitanyamal Daudi oltau lenye ena kata eidipa aikena iltung'ana. Nejoki Daudi Olaitoriani, “Ataasa nanu eng'oki sapuk tena nataasa. Kake ore taata, Olaitoriani, aatoomono nanu iyie, iwuang'ie entorroni to sinka lino; amu ataasa nanu te modai.” Ore ake pee einyototo Daudi tadekenya, nelotu ororei lo Laitoriani enetii oloiboni oji Gad, ilo aduani le Daudi, ejo, “Shomo tiaaki Daudi, ‘Nji ejo Olaitoriani, ntokitin uni nanu aaisho; tegelu nabo te ninche, pee aatum aitaasa iyie.’ ” Neaku eewuo Gad enetii Daudi neliki ninye, nejoki ninye, “Kailarin okuni lo lameyu oopuonu atua enkop ino. Arashu impirri iyie ilapaitin okuni te dukuya ilmang'ati linono kisujita ninche? Arashu te neaku nkolong'i uni ino lmeitai ti atua enkop ino? Nguanare taata, nidut ewalata nashukoki nanu ilo laairiwua.” Nejoki Daudi Gad, “Atii nanu atua osina sapuk; matabatatakinoto iyiook enkaina o Laitoriani, amu kitok olng'ur lenye, kake mikincho abatatakino enkaina e tungani.” Neaku eirriwaka Olaitoriani Israel olmeitai ebaiki tadekenya o metabaiki enkata apa natudung'uoki; neye te ine iltung'ana ebaiki Dan o metabaiki Beer-sheba nkalifuni ntomoni naapishana. Ore ake pee eitorioo olmalaika enkaina enye aing'orie Yerusalem pee eidaikie, neirridu Olaitoriani ina torroni, nejoki ilo malaika apa oasita ina mutata ti atua iltung'ana, “Eidipe; tushuko taata enkaina ino.” Netii apa ilo malaika lo Laitoriani embata ewueji neidong'ishoreki e Arauna Olyebusi. Neirorie Daudi Olaitoriani ina kata pee edol ilo malaika apa oarita iltung'ana, nejo, “Oi, ataasa nanu eng'oki, nataasa entorroni; kake amaa kuna kerra, kaa etaasa ninche? Nchoo enkaina ino, aatoomono, aar nanu near enkaji e papa.” Nelotu Gad ina olong enetii Daudi, nejoki ninye, “Shomo ilepa, tataaniki olperere lo lasar enetii Olaitoriani te ine wueji neidong'ishoreki e Arauna o Ljebusi.” Neaku eshomo Daudi ailep to rorei le Gad, anaa enaitanapishe olaiguanani. Ore ake eing'orisho Arauna airrugo, nedol olaiguanani o sinkan lenyena epuonu aayiaya ninye; nelo Arauna, neserem olaiguanani neitabaiki enkomom enye enkop. Nejo Arauna, “Kainyoo pee eewuo olkitok lai olaiguanani enetii osinka lenye?” Nejo Daudi, “Pee ainyiang'u ene wueji neidong'ishoreki te iyie pee atum ateshetaki olperere lo lasar lo Laitoriani, pee etumi aaiwuang'ie olmeitai too ltung'ana.” Nejoki Arauna Daudi, “Nchoo olkitok lai olaiguanani eya neishoru ina nadol aa sidai te ninye; noolo ilmong'i lo lasar opejori, ore ntokitin naaidong'ishoreki o nkeek oo lmong'i naa keaku ilkeek. Ore kuna pooki, olaiguanani, eishoo Arauna olaiguanani.” Nejoki Arauna olaiguanani, “Mikitang'amai iyie Olaitoriani Enkai ino.” Kake etiaka olaiguanani Arauna, “A-a, kake kainyiang'u nanu te iyie te nkinyang'a; maishoru nanu olasar opejori to Laitoriani eitu nanu ainosie toki.” Neaku einyiang'ua Daudi ine wueji neidong'ishoreki, o lmong'i te shekeli onom e nkosholai. Neshetaki Daudi te ine Olaitoriani olperere lo lasar, neishoru olasar opejori o lasar le seriani. Neaku etoning'o Olaitoriani eomonokinoto enkop, neiwuang'ieki olmeitai aaitung'uaa Israel. Etamorua apa olaiguanani Daudi neaku oloo larin kumok. Ore hoo ninye teneimulumuli too ilkilani nemeirouaju osesen. Ore enkaraki ina etiakita isinkan lenyena, “Nchoo eing'urakini enkiti siankiki olkitok lai olaiguanani, naa nchoo ninye eboitare olaiguanani, pee egolie ninye; nchoo ninye eirrag to lgoo lino pee etum olkitok lai olaiguanani airouaja.” Neaku eing'orutua ninche esiankiki sidai te nkishiaa tiatua enkop pooki e Israel, nepuo aatum Abishag e Shunam, neyaki ninye olaiguanani. Eisidai apa ina siankiki oleng te nkishiaa, neaku ninye enkaing'urani o laiguanani neisiaai ninye; kake eitu eboitare olaiguanani ninye. Ore apa Adonija olayioni le Hagit neitaa kewan kitok ejo, “Kaaku nanu olaiguanani.” Neitobiraki kewan ngarrin oo mbartan, o lakedok loo mbartan, o ltung'ana onom oo kuet te dukuya ninye. Neitu aekata eitagor menye ninye eikilikuan ajoki, “Kainyoo pee itaasa ena o ena?” Oltung'ani sii apa sidai ninye te nkishiaa, naa ninye etoiuoki eirukurukore Absalom. Eiroro ninche o Yoab olayioni le Seruyia tenebo Abiata olapolosani; nesujaa ninche Adonija neretu ninye. Kake ore Sadok ilo apolosani o Benaia olayioni le Yehoida, o Natan oloiboni le Nkai, o Shimei, o Rei o lelo tung'ana le Daudi magil nemetii ninche enkalo e Adonija. Nepolos Adonija ilkerra, o lmong'i o ntokitin naapir te ndapidapoi oo lasuriaa, te mbata e Norogel, neitoomon ninye ilalashera lenyena pooki, lelo ayiok lo laiguanani, o lelo tung'ana pooki kituaak le Yuda. Kake eitu ninye eitoomon Natan oloiboni le Nkai arashu Benaia arashu lelo tung'ana magil lo lalashe lenye Solomon. Neitoki Natan ajoki Betsheba ngotonye Solomon, “Keitu iyie ining ajo etaa Adonija olayioni le Hagit olaiguanani nemeyiolo Daudi olkitok lang? Ore naa taata wou maaishoo nanu eutaroto, pee itum aitajeu enkishui ino makewan o enkishui o layioni lino Solomon. Shomo nabo kata tijing'aki olaiguanani Daudi, nijoki ninye, ‘Keitu apa iyie olkitok lai olaiguanani, inos olmumai te sinka ino, ijo, Solomon olayioni lino oitoreisho te siadi nanu, naa ketonie ninye olorika lai le nkitoo? Kainyoo naa pee etaa Adonija olaiguanani?’” Ore eton irorie olaiguanani, “najing'u sii nanu te siadi iyie naitisip irorei linono.” Neaku eshomo Betsheba enetii olaiguanani tiatua enkaji enye, netamorua olaiguanani oleng, o Abishag ina e Shunam neisiaaita olaiguanani. Neirrugo Betsheba aisho olaiguanani enkanyit, nejoki olaiguanani, “Kainyoo iyieu?” Nejoki ninye, “Olkitok lai, inosie apa esinka ino olmumai, to Laitoriani Enkai ino, ijo, ‘Solomon olayioni lino oitoreisho tesiadi nanu, naa ketonie ninye olorika lai le nkitoo.’ Ore naa taata, ng'ura, Adonija ninye olaiguanani, hoo nimiyiolo ninye iyie olkitok lai olaiguanani. Etopolosa ninye ilmong'i, o ntokitin naapir o nkerra kumok, neitoomono ninye ilayiok pooki lo laiguanani, Abiata ilo apolosani o Yoab olarikoni le njore, kake ore Solomon osinka lino eitu eitoomon. Ore naa taata olkitok lai olaiguanani, iyie eing'orita nkonyek pooki oo ltung'ana loo Siraeli pee iliki ninche ololo atonie olorika le nkitoo lo lkitok lai olaiguanani tesiadi ninye. Amu eidimayu naa tenelo olkitok lai olaiguanani aaku tenebo loo menye naaikenari nanu o Solomon olayioni lai anaa ilaitarruorrok.” Ore eton ninye eirorie olaiguanani, nejing'u Natan oloiboni le Nkai. Nejoki ninche olaiguanani, “Nele Natan oloiboni le Nkai.” Ore pee ejing'u ninye alotu aitashe te dukuya olaiguanani, neirrugo ninye te dukuya olaiguanani, neitabaiki enkomom enye enkop. Nejo Natan, “Olkitok lai olaiguanani, itejo iyie, ‘Adonija oitoreisho te siadi nanu, naa kelo atonie olorika lai le nkitoo?’ Amu eshomo ninye ena olong apolos ilmong'i, o ntokitin naapir o nkerra kumok, neitoomono ilayiok pooki lo laiguanani, Yoab olarikoni le njore, o Abiatar olapolosani; naa ng'ura edaa ninche neokisho te dukuya ninye, nejo ‘Tobikoi olaiguanani Adonija!’ Kake ore nanu osinka lino, o Sadok olapolosani o Benaia, olayioni le Yehoida, o sinka lino Solomon, neitu ninye eitoomon. Kolkitok lang olaiguanani oyaua ena bae neitu iyie iliki isinkan linono nchere kalo otonie olorika le nkitoo lo lkitok lai te siadi ninye. Neitoki olaiguanani Daudi awalu nejo, Empotokoki Betsheba.” Neaku eewuo ninye enetii olaiguanani, neitashe te dukuya olaiguanani. Neinos olaiguanani olmumai, ejo, “Ore anaa enaishu Olaitoriani, laa ninye laatokordua oltau lai te pooki mang'atinta, anaa enainosa olmumai te iyie te nkarna o Laitoriani, e Nkai e Israel, ajo Solomon olayioni lino oitoreisho te siadi nanu, naa ketonie ninye olorika lai le nkitoo te rishata ai; neijia ake sii aiko ena olong.” Neirrugo Betsheba aitabaiki enkomom enye enkop, neisho olaiguanani enkanyit, nejo, “Metobikoi olkitok lai olaiguanani Daudi ntarasi!” Nejo olaiguanani Daudi, “Empotokoki Sadok olapolosani, o Natan oloiboni le Nkai o Benaia olayioni le Yehoiada.” Neaku eetuo ninche dukuya olaiguanani. Nejoki olaiguanani ninche, “Ewaita tenebo intae isinkan lo lkitok linyi, ninchosho Solomon olayioni lai metakedo enyumpu ai nintadou ninye te Gibon; ninchosho Sadok olapolosani o Natan oloiboni le Nkai metubukoki ninye eilata aaput metaa olaiguanani le Israel; nintokiki aaosh emowuo, nijojo, tobikoi olaiguanani Solomon! Nintokiki taa aailepu aasuju ninye, nelotu ninye atonie olorika lai le nkitoo, amu ninye oaku olaiguanani te rishata ai; nategelua nanu ninye meitoria Israel o Yuda.” Newaliki Benaia olayioni le Yehoida olaiguanani ajo “Esai! Meiruko Olaitoriani lai, Enkai anaa enatii Olaitoriani tenebo olkitok lai olaiguanani, metotiwuo neija. Ore anaa enatii Olaitoriani tenebo olkitok lai olaiguanani, metaa sii tenebo Solomon, neitaa kitok olorika lenye le nkitoo aitalang olorika le nkitoo lo lkitok lai Daudi!” Neaku eshomo Sadok olapolosani o Natan oloiboni le Nkai o Benaia olayioni le Yehoida o lkeresi o lpelesi aaitaked Solomon enyumpu o laiguanani Daudi neyau ninye Gibon. Ore teine neya Sadok olapolosani olmouo le ilata to lng'obor nebukoki Solomon aput. Neitoki ninche aaosh emowuo; nejo iltung'ana pooki tobikoi olaiguanani Solomon. Neilep iltung'ana pooki aasujaa ninye, ekutita ndulen, neng'ida te nchipai sapuk, ometaa keikirikirie ndarat enye enkop. Nening Adonija o lomon pooki ootii tenebo ninye ina shipai o osirua. Ore pee ening Yoab oltoilo le ntarumpeta nejo, “Kainyoo ele odoo te nkanasa?” Ore eton eirorita, ng'ura, nelotu Yonatan olayioni le Abiata; nejo Adonija, “Tijing'u, amu ira iyie oltung'ani le tipat oyau ilomon.” Newaliki Yonatan Adonija ajoki, “A-a amu eitaa olkitok lang olaiguanani Daudi Solomon olaiguanani; neirriwayie olaiguanani tenebo ninye Sadok olapolosani, o Natan oloiboni le Nkai, o Benaia olayioni le Yehoida o Lkeresi o lLpelesi, neishoo ninche ninye metakedo enyumpu o laiguanani. Netubukokitio Sadok olapolosani o Natan oloiboni le Nkai ninye eilata aaput aaitaa olaiguanani te Gihon, neilepa ninche aapuo teine eng'ida. Neaku enkanasa enkilepilep. Ena kilepilep ina nitoning'oitie. Etonita taata Solomon to lorika le nkitoo. Ore sii eetuo ilaisiaayiak lo laiguanani aaisho enashe olkitok lang Daudi ejo, ‘Eishoo Enkai ino enkarna e Solomon metoning'oyu alang enkarna ino, neitaa olorika lenye le nkitoo kitok alang olino.’ Neirrugo olaiguanani te ndapash. Neitoki sii olaiguanani ajo, ‘Meisisi Olaitoriani Enkai e Israel, laa ninye oishoo obo le ishoi ai metotonie olorika lai le nkitoo ena olong, adolita too nkonyek aainei.’ ” Neikirikira ilomon pooki le Adonija to lkirutoto, nedumunye, nelo ake oltung'ani aim enkoitoi enye makewan. Neureyu Adonija Solomon, nedumunye ninye, neibung imouarak olperere lo lasar. Nelikini Solomon aajoki, “Ng'ura keure Adonija olaiguanani Solomon; amu eji eibung'a ninye imouarak o lperere lo lasar, nejo, ‘Nchoo olaiguanani Solomon eng'as ainos olmumai nchere mesesekuan ninye osinka lenye to lalem.’ ” Nejo Solomon, “Teneitodolu ninye neitisip nchere oltung'ani le tipat, meiseyieki ninye olpapita hoo obo le ndukuya enye.” Neaku eirriwayie olaiguanani Solomon olkilikuai neyauni ninye aaitung'uaa olperere lo lasar. Nelotu ninye airrugokino Solomon aisho ninye enkanyit; nejoki Solomon ninye, “Shomo enkaji ino.” Ore ake pee eaku keye Daudi, neitanap Solomon olayioni lenye; ejo “Etataana enkata ai pee alo aye. Ntagoluoyu niaaku olee, nimbung nkitanapat o Laitoriani Enkai ino, aim inkoitoi enyena, nimbung nkiguanat enyena, o nkitanapat enyena, o nkikoot enyena, o enchakenisho enye, anaa enaigero too nkitanapat e Musa, pee itum atudupayu te pooki niaas o te pooki wueji niim; pee etum Olaitoriani aitabai ina apa nairoro tialo nanu ejo, ‘Teneing'or ilayiok linono nkoitoi enye, aapuo te dukuya nanu too sipat, too ltauja lenye pooki o te nkishui enye, melai aekata te iyie oltung'ani otonie olorika le nkitoo too Siraeli’. “Ore ake sii iyiolo enaaitaasa nanu Yoab olayioni le Seruyia, ina naitaasa ilkituaak oare le njore oo Siraeli, Abna olayioni le Neer o Amasa olayioni le Yeser, oo tasesekuana ninye. Eitalakua ninye te nkata e seriani, elap o sarge apa oibukoyioki to larrabal, nepik osarge lemeeta entioto enkimeita natii empolos ai, nepik inamuka naatii nkejek aainei. Entaasisho naa nabo kata te risioroto e ng'eno inyi, kake emincho ina lukunya enye naibor edoiki enemeneng'a te seriani. Kake ntoduaa esupatisho lelo ayiok le Barsilai le Gilead, nincho ninche eaku tenebo lelo oodaa te Misa ino; amu teina supatisho aatang'amutua ninche nanu apa pee aisik ailany Absalom olalashe lino. Netii sii tenebo iyie Shimei olayioni le Gera, le Benchamen oing'ua Bahurin, laa ninye apa laatediaa to ldeket torrono teina olong apa nashomo Mahanaim; kake ore ake pee aalotu anang'are nanu to lkeju le Yordan, nainosaki nanu ninye olmumai to Laitoriani, ajoki, ‘Maar nanu iyie tua to lalem.’ Ore naa taata eminkenaa ninye aajo meeta entioto, naa ore amu ira iyie oltung'ani ng'en; iyiolo iyie enilo aitaas, niyau iyie ina lukunya enye naibor enemeneng'a etii osarge.” Neirura Daudi anaa loo menye, aye, nenukari ninye te nkanasa e Daudi. Ore apa enkata naitoreisho Daudi te Israel naa ilarin artam eitoreishe ninye ilarin tomoni uni oo kuni te Yerusalem. Neaku etotona Solomon to lorika le nkitoo le Daudi papaai lenye ore enkitoo enye neitashe auno. Neitoki Adonija olayioni le Hagit alotu enetii Betsheba ngotonye Solomon. Nejoki ninye, “Aite seriani iewuo iyie?” Nejo ninye “Teseriani.” Neitoki ajo, “Aata embae naaliki iyie.” Nejoki ninye, “Tolimu.” Nejo ninye, “Iyiolo iyie ajo enaai apa enkitoria, naa nanu apa eisiligita Israel pooki pee aitore ninche; kake eibelekenye enkitoria neaku eno lalashe lai, amu enenye apake eing'uaa enetii Olaitoriani. Ore naa taata aata embae nabo naomonu te iyie, nimikianyaki iyie nanu.” Nejoki Betsheba ninye, “Tolimu.” Nejo ninye, “Aatoomono nkilikuana olaiguanani Solomon, amu mikianyaki ninye, pee aaisho nanu Abishag e Shunam maitaa enkitok ai.” Nejo Betsheba, “Eisidai; kairorie olaiguanani te rishata ino.” Neaku eshomo Betsheba enetii olaiguanani Solomon, pee eirorie ninye te rishata e Adonija. Nedumunye olaiguanani anang'are ninye, neirrugokino ninye, neitoki aton to lorika lenye le nkitoo, neitoki aipotu olorika meyakini ngotonye olaiguanani, neton ninye te nkaina enye e tatene. Neitoki ninye ajo, “Aata enkiti omonunoto nabo naaomon iyie, mikianyaki iyie nanu.” Nejoki olaiguanani ninye, “Tolimu eomonunoto ino yieyio lai, amu maanyaki nanu iyie.” Nejo ninye, “Nchoo Abishag e Shunam meishori Adonija olalashe lino meyama.” Nejoki olaiguanani Solomon ngotonye, “Paa kainyoo peyie aa Abishag e Shunam iomonu meishori Adonija? Toomonoki sii ninye enkitoria; amu olalashe lai botor ninye, ore too matuan enyena netii Abiatar olapolosani o Yoab olayioni le Seruyia.” Neitoki olaiguanani Solomon ainos olmumai to Laitoriani ejo, “Maaitaasa Olaitoriani ena naaitulus tenemeinosieki ele rorei enkishui e Adonija! Ore naa taata anaa enaishu Olaitoriani, laa ninye laaitasheyie nanu aitagol, naaitoton nanu to lorika le Daudi papaai lai, laa ninye laaitaa nanu olmarei, anaa apa enaisiligishore, keari Adonija metua ena olong.” Neaku eirriwayie olaiguanani Solomon Benaia olayioni le Yehoida; neosh ninye anang'ie enkop, neye ninye. Ore tialo Abiatar olapolosani, nejo olaiguanani, “Shomo Anasot, enkop inyi amu keeya nikiririkino iyie. Kake maar nanu iyie tua tena kata, amu itanapa apa osanduku lo Laitoriani te dukuya Daudi papaai lai, o enkaraki sii nitang'arie apa papa isinaitin lenyena pooki.” Neaku etaarayie Solomon Abiatar pee meitoki aaku olapolosani lo Laitoriani, neitabaya ororei lo Laitoriani apa oiroro ninye eipirta enkaji e Eli te Shilo. Ore ake pee ebaiki ilomon Yoab, amu etijing'a apa Yoab Adonija enkoriong, hoo neitu ejing Absalom, neisikaki Yoab olng'obor lo Laitoriani nelo aibung imouarak o lperere lo lasar. Ore ake pee elikini olaiguanani Solomon, nchere, “Eisika Yoab alo atua olng'obor lo Laitoriani, naa ng'ura, etii ninye embata olperere lo lasar.” Neirriwaa Solomon Benaia olayioni le Yehoida, ejo, “Shomo toosho ninye tanang'ie enkop.” Neaku eshomo Benaia atua ilo ng'obor lo Laitoriani nejoki ninye, “Eitanapishe olaiguanani ejo, ‘Tupuku’ ” kake etejo ninye, “A'a tene nanu aye.” Neitoki Benaia ayaki olaiguanani olomoni ajoki, “Nji ejo Yoab naa ena einosa olmumai ajo.” Newaliki olaiguanani ninye ajoki, “Taasa anaa enatejo ninye toosho ninye tanang'ie enkop, nilo anukaa; pee eiwuang'ieki te nanu o te nkaji e papaai lai entorroni o sarge lemeeta entioto oibukoyie Yoab. Neyau Olaitoriani arrinyu nkiasin enyena e nkibukoroto o sarge shumata endukuya enye makewan, amu ore apa meyiolo papa Daudi, etarasaka ninye nesesekuan to lalem iltung'ana oare supati naa iletipat aalang ninye, Abna olayioni le Neer, ilo kitok le njore oo Siraeli o Amasa olayioni le Yeter, olkitok le njore e Yuda. Neaku kerrinyunye isargeta lenye aapuonu shumata endukuya e Yoab o shumata oo lukuny eishoi enye, intarasi; kake ore tialo Daudi, o eishoi enye o enkaji enye o lorika lenye le nkitoo, naa keaku eseriani naing'uaa Olaitoriani ntarasi moitie.” Nedumunye Benaia olayioni le Yehoida alo neosh ninye anang'ie enkop, near ninye metua, nenukari ninye tiatua enkaji enye makewan tiong'ota. Nepik olaiguanani Benaia olayioni le Yehoida aitaa olkitok le njore te rishata e Yoab, nepik olaiguanani Sadok metaa olapolosani terishata e Abiatar. Neitoki olaiguanani airriwaa olkilikuai aipotu Shimei nejoki, ninye, “Teshetaki kewan enkaji te Yerusalem, nibik teine, nimilo iyie teine aidurraki dikae. Amu ore akenya enkolong nilo, alang enongoto e Kebron, tayiolo ntisipa nchere meeta nchere miye. Ore osarge lino nelotu shumata endukuya ino makewan.” Nejoki Shemei olaiguanani, “Ore ina nitejo iyie naa eisidai; ore anaa enatejo olkitok lai olaiguanani, ina elo osinka lino aas.” Neaku etobiko Shimei te Yerusalem nkolong'i kumok. Ore etulusoitie ilarin okuni, neisik irrindiki oare le Shimei aapuo enetii Akish olayioni le Maaka, olaiguanani le Gaat. Ore pee elikini Shimei aajoki, “Ng'ura etii irrindiki linono Gaat.” Nedumunye Shimei neirot osikiria nelo Gaat enetii Akish, aing'oru irrindiki lenyena; nelo Shimei arrinyu irrindiki lenyena te Gaat. Ore ake pee elikini Solomon aajoki eshomo Shimei te Yerusalem nelo Gaat neitoki arrinyunye, neirriwaa olaiguanani olkilikuai aipotu Shimei, nejoki ninye “Keitu apa nanu aainosie iyie olmumai to Laitoriani, naairorie oleng aikok ajoki, ‘Tayiolo ntisipa nchere ore akenya enkolong nilo ake ninye dikae wueji, niye iyie?’ Nikijoki iyie nanu, ‘Ore enitejo naa eisidai; kairuk nanu.’ Kainyoo naa peyie eitu iyie imbung olmumai to Laitoriani oina kitanapata naaitanapa nanu iyie?” Neitoki ake sii olaiguanani ajoki Shimei, “Iyiolo iyie to ltau lino ina torroni apa nintaasa Daudi papa lai; neaku kerrinyu Olaitoriani entorroni ino shumata endukuya ino. Kake kemayian Olaitoriani olaiguanani Solomon, ore olorika le nkitoo le Daudi neitasheyieki te dukuya Olaitoriani ntarasi.” Neitoki olaiguanani aitanap Benaia olayioni le Yehoida; neipang ninye alo aosh ninye anang'ie enkop, neye ninye. Neaku eitasheyieki apa enkitoo te nkitoria e Solomon. Eitobira apa Solomon osotua o Farao olaiguanani le Misiri; neyam ninye entito e Farao, neriku ninye atua enkanasa e Daudi, o metaba anaa neidip atesheta enkaji enye makewan o enkaji o Laitoriani o esuntai naman Yerusalem. Too wuejitin neeika apa epolosisho iltung'ana, amu meetae apa enkaji naidipaki aateshet naipotieki Olaitoriani. Enyor apa Solomon Olaitoriani, nelo too nkikoot e Daudi papaai lenye. Kake eitayu apa ninye ilasarri nepej enkorropil too wuejitin neeika. Nelo apa olaiguanani Gibeon alo apolosisho teine amu ine apa ewueji neika kitok; naa keishooyo apa Solomon ilasarri oopejori enkalifu tenchumata eilo perere lo lasar. Ore te Gibeon neipang'aki Olaitoriani Solomon te nkidetidet kewarie, nejo Enkai, “Toomonu entoki niyieu naaisho.” Nejo Solomon, “Ntodolua iyie enyorrata kitok nauno to sinka lino Daudi, papa lai, enkaraki nashomo ninye te dukuya iyie te supatisho, o too sipat o to ltau oitoriori tialo iyie, nimbung'a iyie te ninye ena nyorrata kitok nauno, ninchoo ninye olayioni otonie olorika lenye le nkitoo ena olong. Ore taata, Olaitoriani Enkai ai, intaa iyie osinka lino olaiguanani te rishata e Daudi papa lai, hoo ninye naa kara nanu enkerai; mayiolo nanu aipang'a nemayiolo atijing'u. Netii osinka lino atua iltung'ana linono litegelaka, olorere kitok, lemeidimi aaikena te nkumoi anaa aatayiolo esiana te nkumoi. Nchoo naa osinka lino endamunoto e ningunoto pee etum aitoria ltung'ana linono, pee atum atumusu atirishu mbaa sidain o ntorrok, amu kaing'ae oidim aitoria ele orere lino kitok?” Etishipakine apa Olaitoriani nchere ena bae etoomono Solomon. Nejoki Enkai ninye, “Ore enkaraki ninkilikuanua ena, neitu iomonu enkishui naado tenkaraki enkishui ino, anaa karsisisho, anaa enkishui oo lmang'ati linono, kake itoomonoko kewan pee kinchori eyiolounoto pee imusu esidai, ng'ura kaaitaas naa nanu taata te risioto o rorei lino. Ng'ura aaisho nanu iyie endamunoto e ng'eno nimusunye mbaa, metaa meetae olikinyaanyukie otulusoyie nemeetae oloyooki atiu anaa iyie tesiadi iyie. Aaisho sii nena neitu iomonu, karsisisho o enkanyit ometaa meetae likae aiguanani likintanyaanyukieki too nkolong'i inono pooki. Naa tenilo iyie too nkoitoi aainei, aibung nkitanapat aainei o nkikoot aainei, anaa apa enataasa papaai lino Daudi, naitoodor nkolong'i inono.” Neputunye Solomon, naa ng'ura, enkidetidet ake, Neitoki alotu Yerusalem, neitashe te dukuya osanduku lo sotua lo Laitoriani, neishooyo nkishorot o lasarri oopejori, o lasarri le seriani, neitobir osirua tenkaraki isinkan lenyena pooki. Neitoki nkituaak are naibor onyek aapuonu enetii olaiguanani neitashe te dukuya ninye. Nejo enkitok nabo e nena, “Oi olkitok lai, ore ena kitok o nanu naa enkaji nabo kimanya; naisho nanu eton kishula teina aji. Ore te nkolong e uni aidipa atoisho, neitoki sii ninye ena kitok aisho; naa iyiook ake, metii hoo likae tung'ani tenebo iyiook tiatua aji, iyiook ake pokira are naatii atua aji. Ore enkayioni ena kitok neye kewarie amu etepetayie ninye. Nedumunye ninye te mpolos e nkewarie neya enkayioni ai te mbata ai ina kata eirura esinka ino, neirragie ninye to lgoo lenye. Neirragie ina kerai enye natua to lgoo lai. Ore pee ainyototo tadekenya aaitanak enkerai ai, ng'ura etua; kake ore ake pee aaing'or nanu asipu tadekenya, ng'ura mme enapa kerai natoiuo.” Kake etejo ina ae kitok, “A'a enaai ena kerai naishu, naa enino ena natua.” Neitoki enaduoo e dukuya ajo, “A'a, enino ina natua, naa enaai ena kerai naishu.” Neijia eikuna eiro te dukuya olaiguanani. Neitoki olaiguanani ajo, “Ejo ake nabo, ‘Enaai ena kerai naishu, netua enkayioni ino’; nejo enkae; ‘A'a; amu enkayioni ino natua naa enkayioni ai ena naishu.’ ” Neitoki olaiguanani ajo, “Eyakaki nanu olalem.” Neaku eyauaki olalem dukuya olaiguanani. Nejo olaiguanani, “Entoor ina kerai naishu katitin are, nincho ematua nabo enkitok nabo ninchosho enkae rubata enkae kitok.” Ore ina kitok apa naishu enkayioni enye nejoki olaiguanani, enkaraki naata ninye enkirimo to ltau te nkaraki enkayioni enye. “Oi olkitok lai, nchoo ninye meewa ina kerai naishu, nimimper ninye.” Kake etejo ina ae kitok, “Nchoo eaku mme enaai neme enino, tasasha ninye matoor.” Neitoki olaiguanani awalu ajo, “Enchoo ena kerai naishu enkitok e dukuya, nimisajisasha ake, amu ninye ngotonye.” Nening Israel pooki enkiguana natudung'o olaiguanani; neing'asiakino ninche olaiguanani; amu etumusutuo aajo etii engeno e Nkai atua ninye pee inguana too sipat. Olaiguanani Solomon apa oiguanaki enkop e Israel pooki, naa kulo apa iltung'ana lenyena kituaak: Asaria olayioni le Sadok apa olapolosani; Elihoref o Ahija ilayiok le Shisha ninche apa ilaigerok; Yehoshefat olayioni le Ahilud apa olashumani loo mbaa; Benaia olayioni le Yehoida apa olkitok le njore; naa Sadok o Abiatar ninche apa ilapolosak; Asaira olayioni le Natan apa oitasheiki lelo kituaak, Sabud olayioni le Natan ninye apa olapolosani naa olchore lo laiguanani; Ahishar ninye apa olaitasheikinoni le nkaji e nkitoo; naa Adomiram olayioni le Abna ninye apa olaitasheikinoni le siai oo nkaik. Eeta apa Solomon iltung'ana tomon oare kituaak te Israel pooki, laa ninche ooisho olaiguanani endaa o lmarei lenye pooki; ore ake oltung'ani neishoru endaa to lapa obo to lari. Kuna ninche nkarn enye, Benhuri teina kop oo ldoinyio e Efraim, o Ben-deker te nkop e Makas, o Shaalbim o Betshemesh o Elenbet-hanan o Ben-hesed, te nkop e Arubot (enenye apa enkop e Soko o enkop pooki e Hefer) Ben-abin apa te nkop pooki e Nafat-do (eyama apa ninye Tafat entito e Solomon); Baana olayioni le Ahilud te nkop e Taanak, o Megido o Betshean pooki apa naa ninye natii embata e Saretan tiabori Yesreel, neitoki adumunye teine ometabaiki Abel-mehola, ometabaiki enkae shoto e Yokmeam; Benkeber, apa te nkop e Ramot-gilead (eeta apa ninye nkang'itie e Yair olayioni le Manase apa naatii Gilead; neeta sii olkerenket le Argob, otii enkalo e Argob, tiatua enkop e Basham, nkanas ntomoni ile kituaak naasheta sunta o nchomito o suyai); Ahinadab olayioni le Ido apa te nkop e Mahanaim; Ahinaas te nkop e Naftali (eyama apa ninye Basemat entito e Solomon); Baana olayioni le Hushai, te nkop e Asher o te Bealot; Yehoshefat olayioni le Parua te nkop e Isaakar; Shimei olayioni le Ela te nkop e Benchamen; Geber olayioni le Uri te nkop e Gilead, teina kop e Sihon olaiguanani le Amori o Oog olaiguanani le Bashan. Netii apa oltung'ani obo kitok enkop e Yuda. Ore apa iltung'ana le Yuda o Israel naa eikumok anaa osinyai le naiposha, nedaa apa ninche neokisho neshipayu. Eitoria apa Solomon nena kitoriat pooki ebaiki olkeju le Frati ometabaiki ina kop oo Lfilisti ometabaiki olpolosie le Misiri; neyau ninche kodi neisiaai Solomon too nkolong'i pooki e nkishui enye. Ore apa endaa e Solomon te nkolong nabo, naa mboreitin nkalifuni imiet e ntapa napuyiapui o mboreitin nkalifuni tomon e mpirbil e nkano; o lmong'i tomon oopir, o nkishu o lokeri tikitam naapir, o nkerra iip, ore tenebo nena, ng'uesi naanyanyukie nkoliin, o ronkon, o motonyi naapir. Amu eeta apa ninye enkitoria te nkop pooki o loo ntoluo to lkeju le Frati ebaiki Tipsa ometabaiki Gasa, te shumata ilaiguanak pooki le Frati; neeta ninye eseriani too nchot pooki naamanita ninye. Ore Yuda o Israel netoni te Seriani; ebaiki Dan o metabaiki Beer-sheba, eton ake oltung'ani tiabori osabibu lenye o tiabori olng'aboli lenye, too nkolong'i pooki e Solomon. Eeta sii apa Solomon ilaleta nkalifuni artam loo mbartan o ngarrin oo mbartan o lakedok loo mbartan nkalifuni tomon oare. Ore apa lelo tung'ana kituaak neisho ninche Solomon endaa o pooki oopuonu emisa o laiguanani Solomon, oltung'ani ake neishooyo endaa to lapa lenye; eitu ninche eisho metongoro hoo toki. Eyauaki sii shairi o lkujita loo mbartan aaitasioki te wueji neyieuni. Neyau ake oltung'ani te risioroto enkitanapata naitanapaki. Neisho Enkai Solomon engeno nagut o ening'unoto nemeimakinoyu, neiputaki engeno naba anaa osinyai le naiposha, neaku ore engeno nagut e Solomon kelusoo te engeno oo ltung'ana pooki to loosaen, o engeno pooki e Misiri. Amu aingen apa ninye alang iltung'ana pooki, ngen alang Etan le Esrahiti o Heman o Kalkol, o Darda lelo ayiok le Mahol; nelo olning'o lenye neibulaa lelo oreren pooki oo manita. Eiroro sii ndung'eta e rashe nkalifuni uni; ore isinkoliotin lenyena naa enkalifu nabo o imiet. Eimaka sii ilkeek, ebaiki lelo tarakua otii Lebanon ometabaiki ina hisopu nabulu too sunta neimaki sii ing'uesi, o ntaritik o ntokitin naaiserpepiari o sinkir. Nepuonu iltung'ana ooing'uaa iloreren pooki aainining engeno nagut e Solomon, o looing'uaa ilaiguanak pooki le nkop, ootoning'oitie engeno nagut e Solomon. Eirriwaka apa Hiram olaiguanani le Turo Solomon isinkan lenyena etoning'o nchere etuputoki aaitaa olaiguanani te rishata e papaai lenye, amu kenyor apa Hiram Daudi. Neirriwaki Solomon Hiram olkilikuai ajoki, “Iyiolo ajo eitu apa etumoki papaai lai Daudi atesheta enkaji te nkarna o Laitoriani Enkai te nkaraki olarrabal amu etang'adutua apa ilmang'ati lenyena ninye, ometaba anaa nepik Olaitoriani ninche abori nkejek enyena. Kake ore taata aaishoo nanu Olaitoriani Enkai ai enkiyeng'iyeng te pooki shoto. Metii olmang'atinta nemetii enyamali. Neaku atejo kashetu enkaji te nkarna o Laitoriani Enkai, anaa apa enatiaaka Olaitoriani Daudi papaai lai, ‘Ore olayioni lino laa ninye nanu apik olorika lino le nkitoo, te rishata ino, ninye oshetu enkaji tenkaraki enkarna ai.’ Ore naa taata ntanapisho pee aadung'okini ltarakua le Lebanon; ore ilaisiaayiak laainei, neibung'are ilaisiaayiak linono naa kalaaki nanu isinkan linono olekoisiaayio anaa enijo; amu iyiolo iyie ajo meetae likae oyiolo atuuroi iltarakua anaa iltung'ana le Sidon.” Ore ake pee ening Hiram lelo omon le Solomon neshipayu oleng, nejo ninye, “Meisisi Olaitoriani ena olong, oishoo Daudi olayioni ngen oitore ele orere kitok.” Neirriwaki Hiram Solomon olkilikuai ejoki, “Atoning'o nanu ilo kilikuai likirriwaka; naa kaas nanu nena pooki ninkilikuanua tialo mbaoi o ltarakua o no lchani onyaanyukie oltarakuai. Keitadou ilaisiaayiak laainei lelo keek te Lebanon neyau embata enaiposha, neen ninche tenebo naaitadoiki te naiposha meetu ewueji niyieu naisho ninche meiperi teine, ning'amaa iyie ninche; ore te nkalo ino naa kayieu nincho iltung'ana laainei endaa.” Neaku eishoo apa Hiram Solomon mbaoi pooki oltarakuai o lerai naaba anaa inaayieu, neisho Solomon Hiram mboreitin e mpirbil nkalifuni tikitam e nkano meitaa endaa enkaji enye, o mboreitin empirbil e ilata nkalifuni tikitam. Neisho Solomon Hiram kuna te pooki ari. Neisho Olaitoriani Solomon engeno, anaa apa enaisiligie ninye, neaku ketii apa eseriani erishata e Hiram o Solomon, ore lelo pokira neitobir olning'o. Neitayu olaiguanani Solomon iltung'ana oas esiaai te Israel pooki; ore lelo tung'ana naa nkalifuni tomoni uni. Neirriwaa ninche meshomo Lebanon, nepuo ake iltung'ana nkalifuni tomon te nkata nabo to lapa, netii ake iltung'ana Lebanon to lapa obo, netii ang ilapaitin oare. Adoniram apa olkitok le lelo tung'ana oasisho. Eeta sii apa Solomon iltung'ana nkalifuni ntomoni naapishana oonapisho o laguetak loo soito nkalifuni ntomoni isiet te nkop oo ldoinyo. Ore tenebo lelo etii sii iltung'ana kituaak le Solomon nkalifuni uni o iip uni ooitasheiki esiaai, ninche ooitasheiki lelo tung'ana oonapisho te siai. Ore te nkitanapata o laiguanani, nenap ninche isoito sapuki; oogol enkinyiang'a pee etum aatipik olkitamanyunoto le nkaji too soito oogueta. Neaku ore apa ilashetak le Solomon o lashetak le Hiraim, oltung'ana le Gebal neas esiaai e nguetare neitobir mbaoi o soito pee eshet enkaji. Ore te rishata oo larin iip ong'uan o ntomoni isiet eidipa iltung'ana loo Siraeli aatupuku te nkop e Misiri, to lari liong'uan eitore Solomon Israel, to lapa oji ole Sif, aa ninye olapa liare, neiteru ninye ashet enkaji o Laitoriani. Ore apa ina aji natesheta olaiguanani Solomon naa ntemat e nkaina ntomoni ile enkadoro, naa ntemat e nkaina tikitam endapasho naa ntemat e nkaina tomoni uni e nkadoro nailep. Naa ore olgoriet otii enkalo najing'ieki enkaji naa ntemat e nkaina tikitam, nerisioro endapasho e nkaji, naa ntemat tomon e nkaina eng'uton te dukuya ina aji. Nepik ninye ilusien naaitobiruaki te nkarriyiano Neitobir sii aitaman isunta eina aji nkajijik naakedo too nchot pooki. Ore enkaji eabori naa ntemat imiet e nkaina endapasho, ore enkaji e polos naa ntemat ile e nkaina endapasho, ore enkaji e uni te shumata naa ntemat e nkaina naapishana endapasho. Ore te manaroto eina aji neitodorropu isunta pee meibung ake nena rishinani isunta e ina aji. Ore apa pee esheti ina aji naa too soito ooitobiraki te wueji neguetishoreki; pee mening'i ake enyuntu anaa entolu anaa ae toki e sekenkei tiatua enkaji e Nkai, ina kata eshetitae. Ore enejing'ieki ilo gilata liabori naa enkalo e kopikop eina aji; naa nkedeta eimi pee epuoi olgilata le polos, nepuoyieki sii olgilata liokuni. Neaku etesheta ninye ina aji neidip; nepik enkitoipet e shumata too mbaoi o ltarakuai. Neitobir ninye lelo gilat meishiaakino ake olgilata ntemat imiet e nkaina enkadoro, neibung'ieki enkaji too mbaoi oltarakuai. Nelotu ororei lo Laitoriani enetii Solomon, nejo, “Ore ena aji nishetita iyie, tenilo iyie too nkikoot aainei nimbung nkitanapat aainei pooki nirubare ninche, natum taa atuuno ilo rorei te iyie, apa lairorie Daudi papaai lino. Naa kabik nanu tiatua nkera e Israel nemaing'uaa nanu iltung'ana laainei Isiraeli.” Neaku etesheta Solomon ina aji, neidip ninye. Neikod isunta eina aji tiatua too mbaoi oltarakuai, ore ebaiki oltiren le nkaji ometabaiki enkimulumulet e shumata, nepik nkeek; ore oltiren leina aji neimulumul too nkeek oltepesi. Etesheta ninye oriong ina aji apik mbaoi o lerai erishata oo ntemat e nkaina tikitam; etesheta ebaiki oltiren ometabaiki enchumata e suntai, neshet ine aiko anaa atua ina aji e Nkai, anaa ewueji sinyati aisul. Ore ilo gilata le wueji sinyati oleng naa ntemat tomon oisiet e nkaina enkadoro. Ore iltarakua ootii atua ina aji negueti aikunu anaa imalasin o ntapuka naalaa; naa iltarakua ake pooki, medoli ninye osoit. Ore atua ina aji e Nkai, neitobir ninye olgilata liatua tukul, pee etum atipika ine osanduku lo sotua lo Laitoriani. Ore apa ilo gilata liatua naa ntemat tikitam e nkaina enkadoro, naa ntemat e nkaina tikitam endapasho, naa ntemet e nkaina tikitam enkadoro nailep, nemura pooki wueji te sahabu nasila, nepik olpisiaai le sahabu metaleng'o dukuya ilo gilata liatua, nemur ninye te sahabu. Nemur Solomon atua ina aji te sahabu nasila, nepik ninye olpisiaai aitalang ine wueji sinyati, nemur te sahabu. Nemur ninye enkaji pooki te sahabu ometaba anaa neidipayu enkaji pooki. Ore sii ilo perere lo lasar liatua ewueji sinyati nemur te sahabu. Ore tiatua ine wueji sinyati neitobir ninye ilkerubi oare loo nkeek o loirien, ore ake obo, ntemat tomon e nkaina enkadoro. Ntemat imiet e nkaina enkadoro e naipukoi o lkerubi obo. Naa ntemat imiet ebaiki enkiting'oto e naipukoi nabo o metabaiki enkae aipukoi. Ore olikae kerubi naa ntemat tomon ake sii ninye. Entemata nabo lelo kerubi naa empukunoto nabo. Ore enkadoro olkerubi obo naa ntemat tomon e nkaina, naa neijia ake sii etiu ilo likae. Nepik ninye lelo kerubi ewueji e atua eina aji; ore inaipuko e lelo kerubi nelaki aaisalaash ometaa kebaiki enaipukoi e obo e suntai nebaiki enaipukoi o likae e suntai; ore nkulie aipuko enye nebaikino te mpolos e nkaji. Nemur ninye lelo kerubi te sahabu. Ore isunta eina aji neikodi aaguetaki ilkerubi oltuka o ntapuka naalaa, neikodi too lgilat o tioriong o too liatuani. Ore oltiren le nkaji nemur te sahabu tiatua o tioriong. Ore te wueji nejing'ieki ine wueji sinyati nepik nkikeneta o loirien; ore imolinkaishi neriwi aaitobiraki, nemur ninye. Neimulumul ninye aikod nena kikeneta e kutukaji pokira are oo loirienito too ntokitin naaguetuno anaa ilkerubi, o ltuka o ntapuka dapashi, nemur lelo kerubi te sahabu o lelo tuka. Neaku eitobira ninye teine nejing'ieki imolinkaishi e kutukaji o loirien, neisho metorisioto nkaloli pooki, o nkikenata are e kutukaji oltepesi, ore imatuan are e nkikenet nabo naa keshukunoyu eikeni o eboli naa neijia eitiu enkae matua e nkikenet. Ore nena kikeneta neikodi aapik olkerubi, o ltuka o ntapuka, nemur ninche te sahabu, anaa ina natipikaka nena tokitin naaguetuno. Neshetu ninye olodung'oro liatua too lkererin okuni loo soito ooguetuno o too ng'apeta oltarakuai. Ore to lari liong'uan nepiki ina aji o Laitoriani olkitamanyunoto, to lapa le Sif. Ore to lapa le tomon oobo, to lapa oji ole Buul, laa ninye olapa le imiet neidipayu ina aji too nkaloli pooki, terisioroto oo nkitobirat enyena pooki apa naaitobirakaki ninye. Ilarin oopishana etesheta ninye ina aji. Ilarin tomon ookuni apa etesheta Solomon enkaji enye, neidip ninye enchetata enkaji pooki. Etesheta ninye enkaji e ntim e Lebanon; ore enkadoro enye naa ntemat enkaina iip nabo ore endapasho naa ntemat e nkaina onom, ore enkadoro eilep naa ntemat e nkaina tomoni uni, neteshetaki apa too lkererin ooiriamari okuni too ng'apeta o ltarakuai, o rishinani oltarakuai te shumata ing'apeta. Neimulumuli apa shumata lelo gilat te lelo tarakua ootipikaki shumata nena ng'apeta artam oimiet, etii ake iltarakua tomon o imiet olkereri obo. Netii apa irubat oo lusien olkereri ake obo, netii apa ilusien aaipira too nkaloli pokira, katitin uni. Ore njing'eta pooki oo nkajijik o lusien naa kerisioro too nchot pooki. Ore ake elusie neipirakinore elusie katitin uni eiriamari maare. Neitobir ninye enkaji nalala oo ng'apeta; ore enkadoro enye naa ntemat onom e nkaina, ore endapasho enye naa ntemat tomoni uni e nkaina. Netii apa olodungoro dukuya enye oitobiruno too ng'apeta, netii enkitushuret dukuya ninye. Neitobir ninye enkaji nalala o lorika le nkitoo teine nedung'ie ninye enkiguana, aa taa enkaji e nkiguana, neitobiri too ltarakua ebaiki oltiren o metabaiki shumata enye. Ore enkaji enye makewan naa ninye, etonie, tiae dung'oroto te siadi ina aji nalala, naa neijia ake eikunuaki olchetei. Enyaaka ake sii Solomon aitobiru enkaji natiu anaa ena aji nalala tenkaraki entito e Farao apa nayama. Eitobiruaki kuna pooki too soito oogol enkinyiang'a, ootaguetaki te risioroto naba anaa enairirikino, neiriri te musumeno, oriong o atua, ebaiki olkitamanyunoto o metabaiki shumata. Ore ebaiki endung'oroto e nkaji o Laitoriani o metabaiki endung'oroto kitok. Ore apa olkitamanyunoto naa oloo soito oogol enkinyiang'a, isoito sapuki oleng, isoito loo ntemat isiet anaa ntemat tomon enkaina. Ore shumata naa isoito oogol enkinyiang'a, ooguetuno anaa enairirikino, tenebo iltarakua. Ore apa ina dung'oroto kitok neeta ilkererin okuni too soito oogueta oomanita o lkereri loo loom to ltarakuai, neeta sii nena ina dung'oroto e atua e nkaji o Laitoriani, o lodung'oro ojing'ieki enkaji. Neirriwaa olaiguanani Solomon meyauni Huram aaitung'uaa Turo. Olayioni apa ninye le nkoliai o losho le Naftali, ore menye naa oltung'ani le Turo, olaitobirani lo suyai; naa ngen apa ninye oleng, neeta engeno nagut sapuk o ening'unoto o enkarriyiano te nkitobirata e pooki siaai o suyai. Nelotu ninye enetii olaiguanani Solomon, neas esiaai enye pooki. Etipika apa ninye ing'apeta are o suyai. Ntemat tomon oisiet enkadoro e ng'ape nabo, naa enkopito ntemat tomon oare enkaina naaman ake eng'ape nabo negum nchumat enye. Ore apa enkirrushai enye naa ilkimojik oong'uan neijia apa eikununo ing'apeta pokira are. Neitoki sii aitobir ntokitin e shumata naaikununo anaa nkopiyiani enkitoo, to suyai otosholaki, pee epiki shumata e nena ng'apeta; ore apa enkadoro entoki nabo naa ntemat imiet e nkaina. Neitoki aitobiru ntokitin are naashetuno anaa ilmarisiani to lpisiai, nepik shumata nena ng'apeta, netii ake ina toki nashetuno anaa olmarisian shumata nabo ng'ape netii enkae shumata enkae ng'ape. Neitoki ake sii aitobiru ilgululu oopurupurana oonyaanyukie kukumanka ilkererin oare pee eitoip nena lukuny oo ng'apeta. Ore apa nena kikompeni naatii ilukuny e nena ng'apeta neitobiruaki anaa ntapuka, naa ntemat ong'uan e nkaina. Netii apa nena kikompeni ilukuny e nena ng'apeta are, o shumata ina natii embata ena ripata olmarisian, netii apa ilgululu iip are, emanaa too lkererin oare, naa neija eikununo enkae toki te nchumata enkae ng'ape. Neitasheyie ninye nena ng'apeta ntaloishin pokira are e wueji nejing'ieki enkaji e Nkai; nepik ninye eng'ape enkalo e kopikop nejo enkarna eine Yakini; neitoki, apik eng'ape enkalo e moikuape nejo enkarna enye Boas. Ore too nchumat oo ng'apeta netii ntokitin naaitobiruaki anaa ntapuka sidain. Neaku eidipe apa esiaai oo ng'apeta. Neitoki aitobir olmoti sapuk lo suyai otosholaki; naa kepurupurana ilo moti, naa ntemat tomon e nkaina ebaiki enchoto nabo e nkererema ometabaiki enkae shoto. Naa ntemat imiet e nkaina enkadoro ebaiki kop o metabaiki shumata. Naa ntemat tomoni uni emanaroto enye. Ore abori enkererema enye netii iltuleta oomanita, ore lelo tuleta naa ilkererin oare, neenikini ilo moti metaa entoki nabo. Neitakedi ilo moti shumata iloing'ok tomon oare lo suyai, neing'orita okuni lenye enkalo e moikuape, neing'orita okuni endoyioroto e nkolong, neing'orita okuni kopikop, neing'orita okuni enkalo o loo ntoluo; ore apa ilo moti naa shumata ninche eiteleikino. Ore enkalo enye pooki e siadi naa atua etii. Ore endapasho enye neba anaa endap e nkaina, ore enkererema enye neikununo anaa enkererema e nkikompe, eikunuaki anaa entapukai sidai. Naa iltooi ooitukuoreki nkalifuni are enkare natii ilo moti. Enyaaka sii aitobir nkejek tomon naatonie ilo moti. Ore ake enkitotonet nabo naa ntemat ong'uan e nkaina enkadoro, naa ntemat ong'uan e nkaina endapasho, naa ntemat uni e nkaina enkadoro nailep. Ele apa olchetunei loo nkitotoneta. Etipikaki nkeek meibung'a enkamanaa e oriong, ore nena keek naatipikaki enkamanaa e oriong naguetakino ilng'atunyo, o loing'ok, o lkerubi. Ore enchumata nena rubat te shumata o tiabori lelo ng'atunyo, o loing'ok, netii ilmarisiani le siaai naikoduno. Ore ake sii eeta ake enkitotonet nabo nkejek e ngarri o ng'uan o suyai o ltidii lo suyai, ore ilpijat pokira oong'uan naa ineeirisharieki ilo moti. Ore nena rishinani neikodoki too lmarisiani te pooki shoto. Ore enjing'et enye naa enchumata enye etii neilep enkadoro e ntemata nabo e nkaina, ore ina jing'et enye naa kepurupurana naa entemata nabo olpisiai enguton. Ore ina jing'et enye neeta imolinkaishi ore irubat enyena naa kerisioro nchot pooki, mepurupurana. Netii apa nena kejek pokira ong'uan nkeek e abori. Ore apa nkeek naaibung nkejek naa entoki nabo o nkitotoneta. Ore enkadoro enkeju naa entemet nabo e nkaina olpisiai. Neitobiraki apa nena kejek anaa nkejek oo ngarrin oo mbartan; ore nkeek enye o enkamanaa o ltidii o eneibungare, naa ino suyai. Neeta ake te pooki garri nkeek onguan naairishaa tiabori, naa nabo ninche o engarri. Ore te nchumata e nkitotonet netii entoki napurupurana aa olpisiai le ntemata e nkaina enkadoro nailep; ore enchumata eina kitotonet, irishinani enyena o nkeek enyena naa entoki nabo o ninye. Ore tioriong nena rishinani o tioriong nkeek neguetaki ilkerubi, o lng'atunyo, o iltuka, te risioroto e rishata e nabo ake enye, neitaman olmarisian. Ore tele rrekie neitobiru nkitotoneta tomon; neitobiruni pooki aaitanyaanyuk te risioroto o te mpukunoto. Neitobiru ninye ilmotioo tomon lo suyai; ore ake olmoti obo neeta mboreitin oo ltooi artam ooitukuoreki, ore ake olmoti obo naa ntemat ong'uan e nkaina, etii ake olmoti nkitotoneta tomon. Nepik ninye nena kitasheta imiet enkalo e kopikop eina aji, nepik imiet enkalo e moikuape enkaji, nepik ilo moti olpijata aaitorit kopikop o loo saen leina aji. Eitobira apa sii Hiram imotioo, o nchempei naata ilala, o ngirran. Neaku eidipa apa Hiram esiaai pooki nataasaka Solomon tialo ina aji Olaitoriani: nena ng'apeta pokira are, o lelo bakulini pokira oare apa otii nchumat e nena ng'apeta, o nena sosin pokira are naaimulumul ilbakulini ootii nchumat oo ng'apeta. O lelo gululu iip ong'uan le nena sosin pokira are, ilkererin oare loo lgululu ake te sos nabo, pee eimulumul lelo bakulini oare loo nchumat oo ng'apeta; o nena kitasheta tomon o lelo motioo tomon ootii shumata nkitasheta tomon, oilo moti obo, o lelo oing'ok tomon oare ootii abori ilo moti. Ore nena motioo, o nena kurteta, o ngirran, ore kuna masaa pooki naatii atua enkaji o Laitoriani, apa naaitobiraka Hiram olaiguanani Solomon, naa ino suyai otisikaki. Ore teina kisiajata e Yordan neiturraa olaiguanani ninche teina kop e nterit natii erishata e Sukot o Seretan. Neing'ua Solomon nena masaa pooki eitu etemi aaineneng enkaraki naa eikumok apa oleng. Ore enkiroishi o suyai neitu apa eyiolouni. Neaku eitobira apa Solomon ntokitin pooki naatii atua enkaji o Laitoriani: ilo perere lo lasar le sahabu, ina misa e sahabu tenkaraki emukate naitisinyaki o nkitasheta oo ltaai e sahabu nasila, imiet te nkalo e kopikop o imiet te nkalo e moikuape, eitu ebaiki ilo gilata liatua; o ntapuka, o ltaai, o ntokitin naarieki iltaai e sahabu: o nkikompeni o nkalema o ngirran, o ntokitin e nkorropil, o ngirran e nkima, e sahabu, tenkaraki nena kikeneta e kutukaji e atua ilo gilata liatua, ine wueji nesinya aisul, o nena kikeneta olgos le nkaji e Nkai. Neaku ina siaai pooki apa etaasa olaiguanani Solomon neidipayu ina aji o Laitoriani. Neitoki Solomon ayau nena tokitin apa naaitisinya Daudi papaai lenye, ina osholai, oina sahabu o nena masaa, neshum ninche te wueji neshumishoreki tiatua enkaji Olaitoriani. Neitoki Solomon aiturrur ilpayiani loo Siraeli o larikok pooki loo loshon, lelo arikok loo nkajijik oo loo menye, loo ltung'ana loo Siraeli, meetu dukuya olaiguanani Solomon te Yerusalem, pee eyau osanduku lo lning'o lo Laitoriani aaitung'uaa enkanasa e Daudi, aa taa Sion. Neiturrurrokino ilewa pooki loo Siraeli olaiguanani Solomon to sirua to lapa le Etamin, laa ninye olapa liopishana. Nepuonu ilpayiani pooki loo Siraeli, nedumu ilapolosak ilo sanduku. Neyau ninche ilo sanduku lo Laitoriani, oilo ng'obor, o nena tokitin pooki naasinya apa naatii atua ilo ng'obor, neyau ilapolosak o Lawi nena pooki. Ore olaiguanani Solomon o eumata pooki oo siraeli, apa naiturrurre te dukuya ninye, netii tenebo ninye te dukuya ilo sanduku, nepolos nkerra kumok oleng olmong'i lemeikenayu te nkumoi. Neitoki ilapolosak aayau ilo sanduku lo lning'o ewueji enye, tiatua ilo gilata liatua le nkaji, tiatua ine nesinya aisul. Tiabori inaipuko oo lkerubi. Amu kelak apa lelo kerubi inaipuko enye aaitushur ilo sanduku o nkeek enyena. Naa kaadoru apa nena keek oleng ometaa kelioo ineeiting'ie te wueji sinyati eton eitu ejing'i ine wueji sinyati e atua. Kake melioo te boo; netii ninche ine o taata. Metii apa toki atua ilo sanduku meteleku ake inapa soito are dapashi naatipika Musa ine te Horeb, teine apa neitobirie Olaitoriani olning'o o ltung'ana loo Siraeli, apa pee epuku aaing'uaa enkop e Misiri. Ore ake pee eipang'u ilapolosak aaing'uaa ine wueji sinyati, neiput enkatampoi enkaji Olaitoriani. Ore enkaraki ina neaku meidim ilapolosak aaitasho aaisiaaisho tenkaraki ina atampoi; amu eiputa enkitoo o laitoriani enkaji o Laitoriani. Neitoki Solomon ajo, “Etipika Olaitoriani enkolong keper, kake etejo ninye keton ninye te naimin namisimis. Aateshetaka nanu iyie ewueji e shumata. Ewueji nimany iyie ntarasi.” Neitoki olaiguanani aibelekenya aing'or olorere, nemayian ina umata pooki oo ltung'ana loo Siraeli. Neitashe ina kata eumata pooki oo ltung'ana loo Siraeli. Nejo ninye, “Meisisi Enkai, oo Siraeli, laa ninye oitabayie te nkaina enye ina apa naisiligie te nkutuk enye Daudi papaai lai, ejo, ‘Ore ebaiki enkolong nayaua iltung'ana laainei loo Siraeli aitung'uaa Misiri, eitu nanu agelu enkanasa too loshon pooki loo Siraeli naa ninye ashetie enkaji, pee etum enkarna ai ataa ketii ine; kake ategelua nanu Daudi pee eaku oloitore iltung'ana laainei Isiraeli.’ Etii apa atua oltau le Daudi papaai lai pee eshet enkaji tenkaraki enkarna Olaitoriani, Enkai oo Siraeli. Kake etiaka apa Olaitoriani Daudi papa, ‘Ore amu etii apa oltau lino pee ishet enkaji te nkaraki enkarna ai, itaasa iyie embae sidai amu etii apa ena atua oltau lino. Kake ore ake eyia mishet iyie ina aji, olayioni lino likiikini ninye olo ashet ina aji tenkaraki enkarna ai.’ Ore taata eitabayie Olaitoriani enkisiligata enye apa naisiligishore, amu atijing'a nanu erishata e Daudi papaai lai, naton to lorika le nkitoo le Israel, anaa apa enaisiligishore Olaitoriani, natesheta nanu enkaji te nkaraki enkarna Olaitoriani, Enkai e Israel. Ore teina naishorua nanu ewueji nepiki osanduku le Nkai, laa ninye etii atua olning'o lo Laitoriani, apa oitobira tenebo loo papa, apa pee eyau ninche aaitung'uaa enkop e Misiri.” Neitoki Solomon aitashe te dukuya olperere lo lasar lo Laitoriani te dukuya ina umata pooki oo Siraeli, neitorio nkaik enyena pokira are ailepie shumata; nejo ninye “Olaitoriani, Enkai e Israel, meetae Enkai nikinyaanyukie, te shumata te keper, arashu tiabori te nkop, imbung olning'o nintodolu enyorrata nauno too sinkan linono, oopuo te dukuya iyie too ltauja lenye pooki; iyie apa oibung'a te papaai Daudi ina nimbalunye te ninye; ee iroro iyie te nkutuk ino, te nkarna ino nintabaya ina ena olong. Ore naa taata Olaitoriani, Enkai, e Israel, mbung'a to sinka lino Daudi, te papaai lai; ina apa nisiligie ninye ijo, Melai aekata te iyie oltung'ani oitashe te dukuya nanu, pee etonie olorika le nkitoo le Israel, teneing'or ake duoo ninye ilayiok linono nkoitoi enye, nepuo te dukuya nanu anaa apa enishomo te dukuya nanu. Ore naa taata na Ai e Israel, nchoo ilo rorei lino meitabari apa lirorie osinka lino Daudi, papaai lai. “Kake amaa, kemany Enkai enkop? Ng'ura mikiishaa iyie shumata o keper nalakua; kebaa naa enkitisho ena aji natesheta nanu! Ore ake eyia itishilayie iyie enkomono o sinka lino o esayiata enye, Olaitoriani Enkai ai. Toning'o enkishirata o enkomono naomon osinka lino te dukuya iyie ena olong; pee etum nkonyek inono aataboloto dama o kewarie aaing'ura ena aji, ene wueji nitejo iyie, ‘keaku keton enkarna ai teine.’ Pee itum iyie atoning'o ena omono naomon osinka lino te nkaraki ene wueji. Nining iyie enkomono esayiata o sinka lino oltung'ana linono Isiraeli, teneomon ninche eing'or ene wueji; ee toning'o iyie itii keper ina manyisho ino; tenining, nipalaki iyiook. “Teneas oltung'ani eng'oki tialo olelatia enye neinosieki ninye olmumai, nelotu ninye ainos olmumai te dukuya olperere lino lo lasar tiatua ena aji, nining naa iyie te keper, niaas embae nguanare iyie isinkan linono, nidung'oki enkiguana ilo arruoni, ayau enkarruoisho enye shumata endukuya enye makewan, nimbalunye ilo asipani alaaki ninye te risioroto e supatisho enye. “Tenemir ilmang'ati iltung'ana linono le Israel, enkaraki nataasa eng'oki tialo iyie, tenikimbelekenyakino ninche, neibalunye enkarna ino, neomon aasaisho te dukuya iyie tiatua ena aji; nining iyie te keper, nipalaki ing'ok oo ltung'ana linono. Torrinyu ninche ina kop ninchoo loo menye. “Teneikeno keper neaku meetae enchan, enkaraki nataasa ninche eng'oki tialo iyie, teneomon ninche eing'or ene wueji, neibalunye enkarna ino, neibelekenya aaing'uaa ing'ok enye ina kata intamio iyie ninche, toning'o naa iyie te keper, nipalaki eng'oki oo sinkan linono, Isiraeli, te nintengen iyie ninche enkoitoi napuo aaim, nincho iyie ninche enchan, naa ninye inchoo iltung'ana linono metaa ninye enjungore. “Tenelotu olameyu enkop, anaa olmeitai, anaa enkidaata oo ndaiki, anaa olmaati arashu olkurto; teneman aamuat ninche ilmang'ati lenye tiae anasa nabo oo nkanas enye; to lmeitai ake ninye pooki, o te muoyian ake ninye naba anaa enatii; Teneomon te nkomono ake pooki, o te sayiata ake pooki nasaisho pooki tung'ani arashu iltung'ana linono loo Siraeli pooki, eyiolo ake oltung'ani emion oltau lenye makewan, neilepie nkaik enyena aipirie ena aji, nining naa iyie te keper teina manyisho ino, nipalaki ninche, niaas embae, nincho ake pooki tung'ani te risioroto oo nkoitoi enyena pooki, amu iyie ake, iyie ake, openy oyiolo iltauja too nkera pooki e tung'ani. Pee kitum ninche aatureita nkolongi pooki naaishu teina kop apa ninchoo iyie loo menye. “Ore tenebo nena, tenelotu oltung'ani loo loreren, leme o loo ltung'ana linono Isiraeli, oing'uaa enkop nalakua, nelotu tenkaraki enkarna ino, (amu kening'oo ninche enkarna ino kitok, o enkarna ino magilani, o enkaina ino naitoriori,) tenelotu ninye neomon eing'or ena aji, toning'o iyie te keper, teina manyisho ino, niaas te risioroto e nena naaomonu ilo tung'ani loo loreren te iyie; pee etum iloreren pooki le nkop aataiyiolo enkarna ino nikiureyu iyie, anaa enatiu iltung'ana linono loo Siraeli, netum sii aatayiolo nchere ore ena aji natesheta nanu naa enkarna ino eipotieki. “Teneipang iltung'ana linono aapuo olarrabal aagilunore ilmang'ati lenye, te nkoitoi ake ninye naba anaa enirriwayie ninche meima, neomon ninche Olaitoriani eing'or ina anasa nitegelua iyie oenkaji natesheta nanu te nkaraki enkarna ino, toning'o naa iyie itii keper enkomono o esayiata enye, nincho ninche meisula. “Teneas ninche eng'oki tialo iyie - amu meetae oltung'ani lemeas eng'oki, nigorokino iyie ninche, nincho iyie ninche ilmang'ati lenye, neaku ewaki ninche aaraya enkop oo lmang'ati lenye, elakua o etaana; Kake tenepik ninche iltauja lenye teina kop apa nataarayioki aaya, neirridu ninche, nikisai ninche iyie teina kop oo lmang'ati lenye apa ooibung'a ninche nejo, ‘Kitaasa iyiook eng'oki, kitogolong'utua nikitaasa entorroni’; teneirridu ninche too ndamunot enye pooki o too ltauja lenye pooki tiatua ina kop oo lmang'ati lenye, apa oowaita ninche aaraya, nikiomon ninche eing'orita enkop enye, apa ninchoo iyie loo menye, ina anasa nitegelua iyie, o ina aji natesheta nanu tenkaraki enkarna ino; toning'o naa iyie ninche te keper teina manyisho ino, enkomono enye o esayiata enye. Nchoo ninche meisula. Tapalaki lelo tung'ana linono ootaasa eng'oki tialo iyie, tapalaki nkitarruorrot enye pooki naataasa tialo iyie. Nchoo ninche olng'ur too nkonyek e lelo ooibung'a aaraya ninche pee etum aaing'urrie ninche. (Amu iltung'ana linono ninche, naa enjung'ore ino ninche apa niyaua iyie aitung'uaa Misiri, aitung'uaa atua olmoti le nkima loo senkenke). Nchoo nkonyek inono metoduaa esayiata o sinka lino o esayiata oo sinkan linono Isiraeli, nining ninche enkata naba anaa enikimpot iyie. Amu nteng'ela iyie ninche too loreren pooki le nkop, pee eaku enjung'ore ino, anaa apa enimbalunye te Musa, osinka lino, apa pee iyau loo papa aitung'uaa Misiri, Olaitoriani Enkai.” Ore ake pee eidip Solomon atejo ena omono pooki o esayiare to Laitoriani, neinyototo ninye aing'uaa dukuya olperere lo lasar lo Laitoriani, te wueji duoo netigilie kung neilepie nkaik enyena aing'orie keper. Neitashe ninye nemayian eumata pooki oo ltung'ana loo Siraeli to ltoilo kitok, ejo, “Meisisi Olaitoriani laa ninye oishoo enkiyeng'iyeng iltung'ana lenyena loo Siraeli, te risioroto e nena pooki apa naaisiligishore ninye. Meetae ninye ororei obo otong'oro too nkisiligat enyena sidain, naatolikio apa ninye Musa osinka lenye. Metaa Olaitoriani Enkai ang tenebo iyiook anaa apa enatii tenebo loo papa; metaa meing'uaa ninye iyiook nemeiturraa iyiook. Pee etum aitonyorra iltauja lang kewan enye pee kipuo too nkoitoi enyena pooki, nikimbung nkitanapat enyena, o nkikoot enyena, o nkiguanat enyena, apa naaitanapa ninye loo papa. Nchoo kulo rorei laainei, laa ninche atasaishore te dukuya Olaitoriani, etaaniki Olaitoriani Enkai ang dama o kewarie, naa nchoo ninye meisula osinka lenye, neisulu iltung'ana lenyena Isiraeli, anaa ake enaishiaakino te pooki olong. Pee etum iloreren pooki le nkop aatayiolo nchere Olaitoriani ninye Enkai. Meetae likae. Enchoo naa iltauja linyi eitoriori te dukuya Olaitoriani Enkai, nipuopuo too nkiguanat enyena, nimbung'ubung'u nkitanapat enyena anaa ena olong.” Neitoki olaiguanani, o Siraeli pooki ootii tenebo, aaitayu olasar te dukuya Olaitoriani. Neishooyo Solomon anaa ilasarri le seriani to Laitoriani ilmong'i nkalifuni tikitam oare o nkerra nkalifuni iip nabo o tikitam. Neaku eitisinya olaiguanani o iltung'ana pooki loo Siraeli enkaji Olaitoriani. Ore ake teina olong nemayian olaiguanani empolos e ndung'oroto apa natii dukuya enkaji o Laitoriani. Amu teine eitayio olasar opejori o lasar le ntapa o rubat naapir o lasar le seriani, amu ore apa ilo perere lo lasar lo suyai otii ine naa aikiti oleng, tenepiki olasar opejori o lasar le ntapa, o rubat naapir o lasar le seriani. Neaku eeta apa Solomon osirua teina kata, o Siraeli pooki tenebo ninye, eumata kitok nabaiki enejing'ieki Hamat o metabaiki oerata le Misiri, te dukuya Olaitoriani Enkai ang, nkolong'i naapishana. Ore te nkolong e isiet neisho iltung'ana meshomo, nemayian lelo tung'ana olaiguanani, nepuo taa nkang'itie enye eng'ida neshipa too ltauja tenkaraki esupatisho pooki naitoduaa Olaitoriani Daudi osinka lenye o Siraeli lelo tung'ana lenyena. Ore pee eidip Solomon atesheta ina aji o Laitoriani o enkaji o laiguanani o pooki apa naayieu Solomon neshet, neitoki Olaitoriani aipang'aki Solomon enkata eare, anaa apa enaipang'aka ninye te Gibeon. Nejoki Olaitoriani ninye, “Atoning'o enkomono ino o esayiata ino, nitoomono iyie te dukuya nanu. Aitisinya nanu ena aji nitesheta iyie, natipika enkarna ai ine ntarasi. Ore nkonyek aainei oltau lai keaku ine etii nkatitin pooki. Kake ore tialo iyie, tenaa eilo te dukuya nanu, anaa apa papaai lino Daudi, to ltau le mborron o esupatisho, aas te risioroto e nena pooki naaitanapa, nimbung nkiguanat aainei o nkikoot, naun aitubulaa olorika le nkitoria ino te Isirael ntarasi, anaa apa enaisiligie Daudi papaai lino, ajoki, ‘Melai aekata te iyie oltung'ani otonie olorika le nkitoo te Israel.’ Kake tenimbelekenya apaash esujata ai, iyie anaa nkera inono, nimimbung nkitanapat aainei, o nkiguanat aainei natipika nanu dukuya intae, nipuopuo aaisiaai kulie aitin niserememe ninche, naiwuang'ie naa nanu Isiraeli teina kop apa naishoo ninche; ore ina aji apa naitisinya nanu tenkaraki enkarna ai naiwuang'ie too nkonyek aainei, neaku Isirael endung'et e rashe o entoki naimakini too loreren. Neaku ena aji olchala le nkidaata, ore pooki ng'ae ogiroo neiputukuny, neisulisho, nejo ninche, ‘Kainyoo pee etaasa Olaitoriani ena tena kop o tena aji? Naa kepuo ninche aajo, Enkaraki natung'uaitie Olaitoriani Enkai enye, naa ninye apa nayaua loo menye aitung'uaa enkop e Misiri, neibung'are kulie aitin, neserem ninche neisiaai ninche. Ore enkaraki ina eyaua Olaitoriani ena torroni pooki shumata ninche.’ ” Ore etulusoitie ilarin tikitam, eidipa Solomon atesheta nena ajijik pokira are, enkaji o Laitoriani, o enkaji olaiguanani, neidipa Hiram olaiguanani le Turo aishoo Solomon iltarakua o mbaoi o sahabu, anaa enayieu. Eishoo sii ninye olaiguanani Solomon Hiram nkanas tikitam tiatua enkop e Galilaya. Kake ore ake pee elotu Hiram te Turo adol nena anas naaishoo Solomon ninye, neitu eitiship ninye. Neaku etejo ninye, “Kaji eikununo kuna anas nikinchoo iyie nanu olalashe lai? Neaku etejoki apa ninche, enkop Kabul o taata. Neirriwaka apa Hiram olaiguanani ntalantani iip o tikitam e sahabu.” Naa nji eikununo enkisiaayiare, apa nataasa olaiguanani Solomon eshet enkaji o Laitoriani o enkaji enye makewan, o Milo, o esuntai e Yerusalem, o Hasor, o Megido, o Geser. (Ore apa Farao olaiguanani le Misiri neshomo aibung Geser nepejoo ninye te nkima, netaara apa ninye Ilkanaani oomanya ina anasa metuata, neishooyo enkanasa anaa enkishooroto enkiyama te ntito enye, ina kitok e Solomon. Neaku enyaaka apa Solomon ashet Geser) o Bet-horon e abori o Baalat, o Tamar tiong'ota, tiatua enkop e Yuda, o nkanas pooki naashumishoreki apa naata Solomon, o nkanas oo ngarrin enyena oo mbartan o nkanas oo lakedok lenyena loo mbartan, o pooki toki apa nayieu Solomon neshet te Yerusalem, otiatua Lebanon, o tiatua enkop pooki enkitoria enye. Ore lelo tung'ana pooki apa ootelekutua Ilamori, o Ilhiti, Olperesi, o Lhifi, o Lyebusi, lelo apa leme ilo lorere loo Siraeli ore ina ishoi enye natelekuaki, teina kop, lelo apa leitu eidaikie iltung'ana loo Siraeli tukul - ore kulo neitaa Solomon irrindiki le nkisiaayiare enye, netiu ninche neija o metabaiki ena olong. Kake ore too ltung'ana loo Isiraeli eitu eitaa Solomon irrindiki. Isikarini apa ninche, iltung'ana lenyena kituaak apa ninche. Ilkituaak le njore, ilarikok le njore, o lkituaak loo ngarrin oo mbartan o lakedok loo mbartan. Ore kulo naa iltung'ana kituaak ooitasheiki esiaai e Solomon iip imiet ninche o onom, laa ninche ooitasheiki iltung'ana aasak le siaai. Kake eshomo ina tito e Farao teina anasa e Daudi nelo enkaji enye makewan apa nateshetaka Solomon ninye, neitoki ashetu Milo. Katitin uni apa to lari eitayu Solomon ilasarri oopejori o lasarri le seriani te nchumata ilo perere lo lasar apa oteshetaka Olaitoriani. Nepej enkorropil te dukuya Olaitoriani. Neaku eidipa apa ninye enkaji. Eitobira sii apa Solomon imelin kumok te Esiong'eber naa ninye nataaniki Eliton, to lomanaa le naiposha Nanyokie, te nkop e Edom. Neirriwaa Hiram tenebo nena melin kumok isinkan lenyena, iltung'ana oopuo too nkariak, ootamoo enaiposha, tenebo isinkan le Solomon. Nepuo ninche Ofir neyau sahabu teine naa ore esapuko enye ntalantani tikitam, neyaki ninche olaiguanani Solomon. Naa ore apa pee ening enkaiguanani e Sheba enkishoroto e Solomon tialo enkarna o Laitoriani, nelotu atem ninye too nkikilikuanat naagol. Nelotu apa ninye Yerusalem erikito iltung'ana kumok oleng, o ntamesin naanapita isonkoyoni, o sahabu kitok oleng, o soito oogol enkinyiang'a; ore ake pee elotu enetii Solomon, neliki ninye nena pooki naadamu naayieu neikilikuanu. Newal Solomon nkikilikuanat enyena pooki; meetae entoki neitu eliki olaiguanani ninye. Ore ake pee edol ina aiguanani e Sheba ina ng'eno nagut o laiguanani pooki, oina aji natesheta, o endaa natii emesa enye, oltonei loo lkituaak lenyena, o enkisiaayiare oo sinkan lenyena, nkilani enye, o lanapak lenyena loo nkikompeni o lasarri lenyena oopejori ooishooyo ninye tiatua enkaji Olaitoriani, eitu eitoki aidim atejo ae. Nejoki ninye olaiguanani, “Ekesipa ilomon apa latoning'o nanu te nkop ai makewan, ooipirta mbaa inono o engeno ino. Kake eitu apa nanu anyorraa lelo omon o maeu adol too nkonyek aainei makewan, naa ng'ura, eitu apa aalikini nanu mbaa pooki; ore engeno ino o karsisisho ino kelusoo te nena natoning'o nanu. Emunyak nkituaak inono, nemunyak isinkan linono, ootii dukuya iyie anaake nening engeno Meisisi Olaitoriani Enkai ino; amu kitishipakine ninye iyie, nikipik iyie olorika le nkitoo le Israel! Ore enkaraki natonyorra Olaitoriani Israel ntarasi, kintaaninye iyie olaiguanani, pee itum atudung'o enkiguana niaas isupati.” Neitoki ninye aisho olaiguanani ntalantani iip o tikitam e sahabu, o sonkoyoni kumok oleng o soito oogol enkinyiang'a. Eitu aekata eitokini aatum enkorropil naba anaa ina naishoo enkaiguanani e Sheba olaiguanani Solomon. Ore nena melin e Hiram apa naayautua sahabu te Efir neyau aaitung'uaa Ofir ilkeek kumok o soito oogol enkinyiang'a. Neitaa olaiguanani lelo keek irishinani enkaji o Laitoriani, o ne nkaji o laiguanani. O lwululi loo usin o nkai oo sinkolioitin tenkaraki ilaranyak. Eitu aekata eitokini aayau lelo keek, anaa aadol ometabaiki ena olong. Neisho Solomon ina aiguanani e Sheba nena pooki naayieu ninye. Entoki ake ninye natoomonuo metii nena naaishooki ninye tialo karsisisho o laiguanani Solomon. Neaku etorrinye apa ninye nelo enkop enye, tenebo isinkan lenyena. Naa ore apa enkiroishi e sahabu nayakaki Solomon to lari obo naa ntalantani iip ile o ntomoni ile o ile e sahabu, metii ina apa naing'uaa ilbiasharani o kodi oo lamirak o naaing'uaa ilaiguanak pooki le Arabia o lbalusuni leina kop. Neitobir olaiguanani Solomon ilong'oi iip are dapashi naaidong'uoki te sahabu; ore ake nabo naa shekeli iip ile e sahabu enkiroishi. Neitobiru ninye ilong'oi iip uni naaidong'uoki te sahabu, nepik ake elong'o nabo nkiloi are e sahabu. Nepik olaiguanani nena long'oi atua enkaji natii atua entim e Lebanon. Neitayu sii olaiguanani olorika le nkitoo kitok too lala loo lkanchaoni, nemur ninye te sahabu nasila. Eeta apa ilo orika le nkitoo nkedeta ile, ore tioriong olorika le nkitoo netii endukuya o lashe, ore ake enkalo nabo olorika netii ineeiteleikini nkaik, olng'atunyo oare ooitashe tembata oo neiteleikini nkaik, neitashe sii ilng'atunyo tomon oare teine, netii ake obo enkalo nabo e nkedet. Eitu aekata etumi embae nanyaanyukie ena te nkitoria ake ninye pooki. Ore apa ntokitin pooki naaokishoreki o laiguanani naa ine sahabu, ore imasaa pooki enkaji natii entim e Lebanon naa ine sahabu nasila. Meetae ine nkosholai, meshilari apa nena aaitaa toki toonkolong'i e Solomon. Amu eeta apa olaiguanani imelin e Tarshish te naiposha tenebo imelin e Hiram. Ore ake kata nabo te rishata oo larin okuni nepuonu imelin kumok naaing'uaa Tarshish enapita sahabu, o enkosholai, o lala loo lkanchaoni, olkuluoin, o motonyi sidain. Kaae nelusoo olaiguanani Solomon too laiguanak pooki le nkop, te karsisisho o te ng'eno. Neing'oru enkop pooki enetii Solomon pee epuonu aaning engeno enye, natipika Enkai atua endukuya enye. Neyau ake pooki tung'ani enkishooroto enye, ntokitin e nkosholai o ne sahabu, o lkarash, o manemane, o enkorropil, o mbartan, o nyumpui, neyau nkumok te pooki ari. Neitoki Solomon aiturrur tenebo ngarrin oo mbartan o lakedok loo mbartan; eeta apa ninye ngarrin oo mbartan enkalifu nabo o iip ong'uan, o lakedok loo mbartan nkalifuni tomon oare, apa ootipika ninye nena anas oo ngarrin oo mbartan tenebo sii olaiguanani te Yerusalem. Neitaa olaiguanani enkosholai entoki nalelek tumoto te Yerusalem, neitotiu anaa isoito, ore iltarakua nebayu anaa ilkeek lo lpurkel. Ore apa imbartan e Solomon naa Misiri eing'uaa o Kilikia. Ore lelo ooinyiang'u engarri oo mbartan te Misiri te shekeli iip uni e nkosholai, ore embarta naa te shekeli iip o onom; neaku ore tialo ilbiasharani lo laiguanani nemirakini mbartan ilaiguanak pooki loo Lhiti o laiguanak le Siria. Etonyorra apa Olaiguanani Solomon nkituaak kumok oo loreren; entito e Farao, o enoo Lmoabu, o enoo le Amon o enoo le Edom, o enoo le Sidon, o nkituaak oo Lhiti, nena e lelo oreren apa ootiaaka Olaitoriani iltung'ana loo Siraeli, “Emiyama ake o ninche, nemeyama ninche o ntae. Amu esipa kepuo ninche aaibelekeny iltauja linyi nisujaa nkaitin enye.” Neibung apa Solomon kuna te nyorrata. Eeta apa ninye nkituaak iip naapishana, o nkapiak iip uni, ore nena kituaak enyena neibelekenya oltau lenye. Ore anaa nemoruau Solomon eibelekenya nkituaak enyena oltau lenye metusujai nkaitin enye; neitu eibung'are oltau lenye oleng Olaitoriani Enkai enye, anaa enatiu apa oltau le Daudi papaai lenye. Amu etusujayie Solomon Ashtoret ina ai ng'oruoi e Sidon, nesujaa Milkom ilo minong loo le Amoni. Neaku etaasa apa Solomon entorrono too nkonyek o Laitoriani, neitu ninye, eunokino asujaa Olaitoriani anaa apa enataasa Daudi papaai lenye. Neitoki Solomon ashetu ewueji e shumata e Kermosh ilo minong le Moab o ene Molek oilo minong le Amon, to ldoinyo te nkalo e nkilepunoto e nkolong e Yerusalem. Neiko ninye neijia te nena kituaak enyena pooki oo loreren naapej enkorropil nepolosaki nkaitin enye. Negorokino apa Olaitoriani Solomon enkaraki naibelekenye oltau lenye aing'uaa Olaitoriani, Enkai e Israel, naipang'aka ninye katitin are neitanapa ninye tialo ena bae pee melo arubare kulie aitin; kake eitu ninye eibung ina naitanapa Olaitoriani. Ore enkaraki ina nejoki Olaitoriani Solomon, “Ore amu ena itadamua, neitu imbung olning'o lai lo sotua o nkiguanat aainei naaitanapa nanu iyie esipa, kadung'oo nanu enkitoria ino aiwuang'ie te iyie naisho osinka lino. Kake ore te nkaraki Daudi papaai lino, maas nanu ena too nkolong'i e nkishui ino, kake kalo nanu adung'oo enkitoria te nkaina o layioni lino. Ore ake eyia, madung'oo nanu enkitoria pooki; kake kaisho nanu olosho obo olayioni lino, tenkaraki Daudi osinka lai, o tenkaraki Yerusalem naa ninye ategelua.” Nedumu Olaitoriani olmang'atinta metigilunore Solomon, oji Hadad le Edom. Ole nkaji enkitoo apa ninye te Edom. Amu ore apa etii Daudi Edom, ore Yoab olarikoni le njore neilep alo anukaa ilootuata Near Hadad metuata ilewa pooki le Edom. (Amu etobiko apa Yoab o ltung'ana pooki loo Siraeli te Edom ilapaitin ile, ometaba anaa neishie pooki lee te Edom.) Kake eisikaka Hadad Misiri tenebo kulikae tung'ana le Edom loo sinkan le menye, neton apa aa enkerai kiti Hadad. Nedumunye ninche te Midian nepuonu Paran, neshoru kulikae te Paran nepuonu Misiri, enetii Farao olaiguanani le Misiri, laa ninye oishoo Enkaji, neikenaki ninye eorikinoto endaa, neisho ninye enkop. Netum Hadad omom oleng too nkonyek e Farao, neaku eishoo meyama enkanashe enkitok enye, enkanashe e Tafenes ina kitok o laiguanani. Ore ina anashe e Tefenes neiki ninye olayioni oji Genabat, laa te nkaji e Farao eoru Tafenes ninye ilki, netii apa Genebat enkaji e Farao aboitare ilayiok le Farao. Kake ore ake pee ening Hadad ajo eirure Daudi tenebo loo menye, netua sii Yoab olarikoni le njore, nejoki Hadad Farao, “Nchooki nanu mashomo enkop ang.” Kake etiaaka Farao ninye, “Kainyoo nikitong'orikia te nanu, eji metaa ing'oru arrinyo enkop inyi? Nejoki Hadad ninye, Nchooki ake duoo mashomo.” Neitoki Enkai adumu likae mang'atinta oji Rason olayioni Eliada, apa oisika aing'uaa olkitok lenye Hadadesa olaiguanani le Soba. Neiturrurroki ninye kewan iltung'ana neaku olarikoni loo larruok, ina kata apa eidipa Daudi atasesekuanisho; nepuo ninche Dameski nebik teine, neitaa ninche ninye olaiguanani le Dameski. Olmang'atinta apa le Israel ninye too nkolong'i pooki e Solomon, neas ntorrok anaa apa enataasa Hadad. Neaku olmang'atinta le Israel, neitore Siria. Ore apa Yeroboam olayioni le Nebat le Efraim e Sereda, ore osinka le Solomon, oji enkarna e ng'otonye Seruyia, naa enkoliai, neinyototokino sii ninye olaiguanani agilunore. Naa enkaraki ena apa pee etudumakine olaiguanani. Etesheta apa Solomon Milo, neram esuntai apa natigile te nkanasa e Daudi papaai lenye. Oltung'ani apa ogol oleng Yeroboam, naa ore ake pee edol Solomon ajo kaarriyia ilo barnoti, neisho meitasheiki esiaai pooki oo nkaik e nkaji e Yosef. Ore apa teina kata, pee eipang Yeroboam te Yerusalem, netumore oloiboni le Nkai oji Ahija le Shilo. Neishopito apa Ahija enkila ng'ejuk; netumo lelo pokira aa ninche ake te nkisiajata. Neitoki Ahija aibung enaduoo kila ng'ejuk naishopito nepolos aitayu ndung'ot tomon aare. Nejoki ninye Yeroboam, “Iwa iyie ndung'ot tomon, amu inji ejo Olaitoriani, Enkai oo Siraeli, ‘Ng'ura, etaa kajo pee adung'oo enkitoria te nkaina e Solomon, naa kaaisho iyie iloshon tomon, (kake ketum ninye olosho obo tenkaraki osinka lai Daudi o tenkaraki Yerusalem, ina anasa naa ninye ategelua too loshon loo Siraeli;) Ore enkaraki naatung'uayie nanu Solomon, nelo aserem Ashterot ina ai ng'oruoi oo le Sidon, o Kemosh ina ai e Moab, o Milkom ina ai oo Lamori, neitu eaas esidai too nkonyek aainei, neitu eibung nkikoot aainei, o nkiguanat aainei, anaa apa enataasa Daudi papaai lenye. Ore ake eyia maya nanu enkitoo pooki aitung'uaa enkaina enye; kake kaitaa nanu ninye olarikoni too nkolong'i pooki enkishui enye tenkaraki Daudi osinka lai, laa ninye ategelua, neibung'a ninye nkitanapat aainei o nkiguanat aainei; kake kaya nanu enkitoria aitung'uaa enkaina o layioni lenye naaisho nanu iyie iloshon tomon. Kake ore olayioni lenye kaisho nanu olosho obo, pee etum Daudi osinka lai ataa keeta oltaa te dukuya nanu anaake te Yerusalem, teina anasa nategelua nanu apik enkarna ai. Naa kaaya nanu iyie, nilo aitore nena pooki naang'uar oltau lino, nilo aaku olaiguanani te Israel. Naa tenining iyie nena pooki naaitanapa nanu iyie, nilo too nkoitoi aainei, niaas isupati too nkonyek aainei, aibung nkikoot aainei, anaa apa enataasa Daudi osinka lai, naaku nanu tenebo iyie, nashetu nanu enkaji ino aitubul, anaa apa enateshetaka Daudi, naaisho nanu iyie Israel. Naa ore tenkaraki ena kaitame nanu eishoi e Daudi, kake mme ntarasi.’ ” Neing'oru taa Solomon pee ear Yeroboam metua: kake etudumunye Yeroboam, neisikaki Misiri, nelo enetii Shishak olaiguanani le Misiri, neton ninye te Misiri ometabau keeya e Solomon. Ore apa teina kata nkiaasin pooki e Solomon, o nena pooki naataasa, o engeno enye nagut, neigeroki te mbuku oo nkiasin e Solomon. Ore apa enkata naitoria Solomon Yerusalem o Israel pooki naa ilarin artam. Neirura Solomon aye tenebo loo menye, nenukari te nkanasa e Daudi papaai lenye; neitoreisho Rehoboam olayioni lenye te rishata enye. Nelo Rehoboam Shekem, eshomo apa Isiraeli pooki Shekem aaitaa ninye olaiguanani. Ore ake pee ening Yeroboam olayioni le Nebat ina, (Amu eton apa etii Misiri, ine apa neisikaka ailany olaiguanani Solomon) neitoki Yeroboam ashukunye te Misiri. Neirriwaa ninche olkilikuai aaipotu ninye; ore Yeroboam o eumata oo Siraeli pooki nepuonu aajoki Rehoboam, “Eiroshiyie apa papaai lino enchata ang oo murto. Ore naa taata nteneneng'a ina kisiaayiare nagol e papaai lino, oina shata nairoishi oo murto natii shumata iyiook, naa aikisiaai iyiook iyie.” Nejoki ninye ninche, “Enchom entung'uayioki too nkolong'i uni, nintokiki aashukunye enatii.” Neaku eshomo iltung'ana. Neitoki olaiguanani Rehoboam aikilikuanishore ilpayiani kituaak apa laa ninche ooitashe te dukuya papaai lenye Solomon, apa eton eishu, nejoki, “Kaa kiutakiki matawaliki ele orere?” Nejoki ninche, “Tenaa iyaku iyie osinka le kulo tung'ana ena olong, nisiaai ninche, nirorie iyie ninche te supatisho tiniwaliki ninche, naa keaku ninche isinkan linono ntarasi.” Kake etanya ninye ina utaroto natuutakita lelo payiani kituaak, neing'oru eutaroto oolbarnot le sirit enye, neitasheyie te dukuya ninye. Nejoki ninye ninche, “Kaa intae iututu pee kiwaliki ele orere laatiaakitia nanu, ‘Nteneneng'a ina shata oo murto apa natipika papaai lino shumata iyiook?’ ” Nejoki lelo barnot le sirit enye, “Nji shomo tiaki ele orere likijoki ninche, ‘Eiroshiyie apa papaai lino enchata ang oo murto, kake inteneneng'aki iyie iyiook’; nji iyie shomo tiaaki ninche, ‘Ore enkilinta ai naa eisapuk alang empolos e papaai. Naa ore taata, teneiteleikia papaai intae olchata oiroishi le murt, kaponaa nanu ilo shata linyi loo murto. Eitamio intae papaai too lishien, kaitame nanu intae too nkulupani.’ ” Neaku eewuo Yeroboam tenebo iltung'ana pooki enetii Rehoboam te nkolong e uni, anaa enatejo olaiguanani nejoki olaiguanani ninche, “Enyaaki wootu enatii te nkolong e uni.” Newalaki olaiguanani iltung'ana te nkitarrikinoto, neany ina utaroto naishoo ilpayiani kituaak. Neirorie olorere anaa enatuutakitia ninye ilbarnot, ejoki, “Eiroshiyie apa papaai enchata inyi oo murto, naa kaponaa nanu ina shata inyi oo murto; eitamio apa intae papaai too lishien kake kaitame nanu intae too nkulupani.” Neaku eitu ening olaiguanani olorere, amu embae ena nayaua Olaitoriani pee etum aitabai ororei lenye, apa oiroro Olaitoriani aimunye Ahija le Shilon aliki Yeroboam olayioni le Nebat. Ore ake pee edol Isiraeli pooki aajo eitu ening olaiguanani ninche, newaliki olorere olaiguanani, aajoki, “Kaa rubata iyiook kiata te Daudi? Mikiata iyiook enjung'ore to layioni le Yese. Enchom ilng'oborri linyi intae Israel! Ng'ura naa taata enkaji ino makewan Daudi.” Neaku eshomo Isiraeli ilng'oborri lenye. Kake eitoria apa Rehoboam iltung'ana loo Siraeli oomanya atua nkanas e Yuda. Neitoki olaiguanani Rehoboam airriwaa Adoram, laa ninye apa olaitasheikinoni le siaai oo nkaik. Nenang iltung'ana pooki loo Siraeli ninye too soito ometua. Neisarisaraki olaiguanani Rehoboam aked engari enye oo mbartan, neisikaki Yerusalem. Neaku etekepari apa Isiraeli aagilunore enkaji e Daudi ometabaiki ena olong. Ore ake pee ening iltung'ana pooki loo siraeli nchere etorrinyunye Yeroboam, neirriwaa olkilikuai aaipotu ninye meeu eumata, neitaa ninye olaiguanani te shumata Isiraeli pooki. Meetae hoo obo otusujayie enkaji e Daudi, meteleku ake olosho le Yuda. Ore ake pee elotu Rehoboam Yerusalem, neiturrurru enkaji e Yuda pooki o losho le Benchamen, iltung'ana nkalifuni iip nabo o ntomoni isiet, gelunot ooked ngarrin oo mbartan, pee earare enkaji eIsrael, pee errinyoki enkitoria Rehoboam olayioni le Solomon. Kake eewuo ororei lo Laitoriani enetii Shemaia, ilo tung'ani le Nkai, ejo “Tiaki Rehoboam olayioni le Solomon, olaiguanani le Yuda, o ltung'ana pooki le nkaji e Yuda o e ne Benchamen, o kulikae tung'ana pooki, nji ejo Olaitoriani, milo iyie aarare ilalashera linono, lelo tung'ana le Israel. Torrinyoyu pooki ng'ae shomo enkang enye, amu ore ena bae naa nanu eing'uaa.” Neaku etoning'o ninche ororei lo Laitoriani, nerrinyo aapuo nkang'itie, te risioroto ororei lo Laitoriani. Neitoki Yeroboam ashet Shekem teina kop oo ldoinyo e Efraim, nelo abik teine, neitoki alo teine nelo ashet Penuel. Nejo Yeroboam to ltau lenye, “Kerrinyunye taata enkitoria alotu enkaji e Daudi, teneilep kulo tung'ana aapuo aaitayu ilasarri te nkaji e Nkai te Yerusalem. Neitoki iltauja le kulo tung'ana aaibelekenyakino olkitok lenye, Rehoboam olaiguanani le Yuda, naar ninche nanu matua nerrinyokino Rehoboam olaiguanani le Yuda.” Neaku eiguane olaiguanani, neitobir ilasho oare le sahabu. Nejoki olorere, “Ishomo intae Yerusalem enkata naado. Eng'ura nkaitin inyi intae Israel, naa ninche apa naaitayutuo intae te nkop e Misiri.” Neitasheyie ninye nabo te Betel nepik enkae Dan. Neaku ina bae eng'oki, amu eshomo iltung'ana aayiaya nabo te Betel, nepuo aayiaya enkae te Dan. Eitobira sii apa nkajijik too wuejitin e shumata, negelu ilapolosak tiatua olorere pooki, leme iloo Lawi. Negelu Yeroboam osirua te nkolong e tomon o imiet o lapa le isiet, anaa apa osirua oatae te Yuda, neitayu ninye ilasarri te nchumata olperere lo lasar; neaku etaasa ninye ina te Betel, apolosaki lelo asho ooitobira. Nepik ilapolosak Betel too wuejitin e shumata neeitobira ninye. Neilep ninye alo ilo perere lo lasar oitobira te Betel te nkolong e tomon o imiet, to lapa le isiet, teilo apa otegelua ninye to ltau lenye makewan; neitisiny ilo sirua tenkaraki iltung'ana loo Siraeli, neilep alo olperere lo lasar apej enkorropil. Ore te nkintanapata o Laitoriani, nelotu oltung'ani le Nkai eing'uaa Yuda nelotu Betel. Neitashe apa Yeroboam tembata o lperere lo lasar apej enkorropil. Neishiraki ilo tung'ani le Nkai olperere lo lasar to rorei lo Laitoriani ejo, “Lo perere lo lasar, lo perere, nji ejo Olaitriani: ‘Ng'ura, keikini enkaji e Daudi enkayioni, naa keji enkarna enye Yosia, naa kepolos ninye te shumata iyie lelo apolosak loo wuejitin e shumata, lelo oopej enkorropil te shumata iyie, naa kepuoi aapejoo iloik loo ltung'ana te shumata iyie.’ ” Neishoru ninye olmonekie teina olong ake, ejo, “Olmonekie ele oiroro Olaitoriani; ejo, ‘Ng'ura kegili ele perere lo lasar aasulaki enkop, ore nena kuruon naatii enchumata enye nebukokini enkop.’ ” Ore ake pee ening olaiguanani ina kiroroto o ltung'ani le Nkai, naishiraka ilo perere lo lasar te Betel, neitorio enkaina enye teilo perere lo lasar ajo, “Embung'a ninye.” Ore ina aina enye duoo naitorioyie aimbung'ie ninye, netoyu, ometaa meekure errinyo. Nedanya sii olperere lo lasar neibukori nkuruon teilo perere lo lasar, te risioroto eilo monekie oishorua ilo tung'ani le Nkai to rorei lo Laitoriani. Nejoki olaiguanani ilo tung'ani le Nkai, “Toomonokoki taata to Laitoriani Enkai ino, pee etum enkaina ai anyaaki atisidana.” Neomon ilo tung'ani le Nkai Olaitoriani, neitoki enkaina olaiguanani aishiu, netiu anaa duoo. Neitoki olaiguanani ajoki ilo tung'ani le Nkai, “Wou maape ang pee ilo ainos endaa, naaisho sii enkishoroto.” Nejoki ilo tung'ani le Nkai olaiguanani, “Tenikincho ninye olpisiaai le nkaji ino, maairiamariyie nanu iyie. Nemainos nanu endaa aashu aok enkare tene wueji; amu ina apa aaitanapa ororei lo Laitoriani, ejo, ‘Minos endaa nimiok enkare, nimilo aim enkoitoi duoo niimua.’ ” Neaku eshomo ninye aim ae oitoi, neitu eibelekenya aim enkoitoi duoo naimua elotu Betel. Netii apa oloiboni moruo Betel. Nepuonu ilayiok lenyena aaliki nena pooki naataasa oltung'ani le Nkai ina olong te Betel; o lelo rorei sii ootiaaka olaiguanani, neliki ninche papaai lenye. Nejoki papaai lenye ninche, “Kaa oitoi eima?” Neitodol ilayiok lenyena ninye ina oitoi naimua oltung'ani le Nkai oing'uaa Yuda. Nejoki ninye ilayiok lenyena, “Erotokoki osikiria,” Neirotoki ninche ninye osikiria, neked ninye. Nelo ninye asujaa ilo tung'ani le Nkai neinepu etonita te ntonata olchani, oji olmaloni; nejoki ninye, “Eiyie doi oltung'ani le Nkai oing'uaa Yuda?” Nejoki ninye, “Ee nanu.” Neitoki ajoki ninye, “Wou maape ang pee ilo ainos endaa.” Nejo ninye, “Marrinyo nanu alo tenebo iyie, anaa alo ajing atua aji tenebo iyie; nemainos nanu endaa anaa aok enkare tenebo iyie tene wueji; amu aatiaka nanu ororei lo Laitoriani, ‘Minos endaa nimiok enkare teine, nimirrinyo aim enkoitoi duoo niimua.’ ” Nejoki ninye ilo tung'ani le Nkai, “Ara sii nanu oloiboni le Nkai anaa iyie, naairorie nanu olmalaika to rorei lo Laitoriani, ejo, ‘Torrinyu ninye meeu tenebo iyie enkaji ino pee etum ainosa endaa neok enkare.’ ” Kake eteleja apa ninye ninye. Neaku eshomo tenebo ninye neinos endaa te nkaji enye neok enkare. Ore etonita ninche te mesa, nelotu ororei lo Laitoriani enetii ilo oiboni apa otorrinyuo ninye ariku; neishiraki ninye ilo tung'ani le Nkai apa oing'uaa Yuda, ejo, “Nji ejo Olaitoriani, ‘Ore enkaraki neitu imbung ororei lo Laitoriani, neitu imbung nkitanapat Olaitoriani Enkai, kake itorrinyunye, ninya endaa niok enkare tene wueji, nikitiaaka apa ninye iyie Minos endaa nimiok enkare. Mepuoi aanukaa osesen lino te nkurare oo loo papaai lino.’” Ore ake pee eidip ainosa endaa neokisho neirotoki osikiria ilo oiboni duoo otorrinyuo ariku. Ore eloito nenang'are olng'atuny ninye te nkoitoi near ninye metua. Nenang'akini osesen lenye enkoitoi, neitashe osikiria tembata enye; neitashe sii olng'atuny te mbata o sesen. Naa ng'ura! Etogiroitie iltung'ana nedol osesen otanang'akaki e nkoitoi, neitashe olng'atuny te mbata. Nepuonu aaimaki teina anasa apa namanya ilo oiboni moruo. Ore ake pee ening ilo oiboni apa otorrinyuo ninye te nkoitoi ina, nejo ninye, “Oltung'ani le Nkai ilo; leitu ening ororei lo Laitoriani; neaku eishooyie Olaitoriani meinosa olng'atuny, neinos olng'atuny ninye aar metua, terisioroto eilo rorei oirorie ninye.” Nejoki ninye ilayiok lenyena, “Erotokoki nanu esikiria” neaku eirotokoki ninye esikiria, Nelo ninye neinepu ninye eirrag te nkoitoi, neitashe osikiria o lng'atuny te mbata ilo sesen Neitu einos olng'atuny ilo sesen neitu eony ilo sikiria. Neya ilo oiboni osesen leilo tung'ani le Nkai neiteleiki osikiria, nerrinyu ayau enkanasa pee eishiraki nenukaa. Neirragie ilo sesen anukaa te nkurare enye makewan; neishiraki ninche ninye ejo, “Ee olalashe lai!” Ore ake pee eidip atunukai ninye, nejoki ilayiok lenyena, “Tenaye akenya, entunukayioki te nkurare natunukarieki oltung'ani le Nkai; erragie iloik laainei tembata oo loik lenyena. Amu ore ina kiroroto apa naishiraka to rorei lo Laitoriani olperere lo lasar te Betel, o nkajijik pooki oo wuejitin e shumata naati nkanas e Samaria, esipa, keyookini aaitabaya.” Ore te siadi ena eitu eibelekenya nkoitoi e Yeroboam torrok, kake enyaaka aitayu ilapolosak too wuejitin e shumata tiatua olorere pooki; te pooki ooyieu, neitisiny metaa ilapolosak too wuejitin e shumata. Neaku ena bae eng'oki te nkaji e Yeroboam, o metaa eiwuang'ieki neidaikieki aaishie te nkop. Ore apa teina kata nemuoyu olayioni oji Abija, olayioni le Yeroboam. Nejoki Yeroboam enkitok enye, “Tudumunye nimbelekenya, pee meyiolouni ake ajo ira enkitok e Yeroboam, nilo Shilo; ng'ura etii oloiboni oji Ahija ine laa ninye apa oibonuo tialo nanu nchere kaaku olaiguanani le kulo tung'ana. Toshoroi imukateni tomon, o embata oo mukateni naamelook o siang'au le naisho, nilo enetii ninye; pee kiliki ninye enatiu enkerai.” Neas enkitok e Yeroboam ina, nedumunye ninye nelo Shilo, nelo enkaji e Ahija. Nemeekure apa edolisho Ahija amu eiliilaitie nkonyek enyena te nkaraki emoruao. Nejoki Olaitoriani Ahija, “Ng'ura, kilotu enkitok e Yeroboam aikilikuanishore tenkaraki olayioni lenye; amu kemuoi ninye. Ena o ena tiaaki ninye.” Ore ake pee ebau neitaakuno kaae kitok. Kake ore ake pee ening Ahija oltoilo loo roruat enyena, ejing'u aimu kutukaji, nejoki “Tijing'u ena kitok e Yeroboam; kainyoo pee intaakuno eira likae tung'ani? Amu aaitanapaki ilomon ooiroishi tenkaraki iyie. Shomo tiaaki Yeroboam Nji ejo Olaitoriani Enkai oo Siraeli. ‘Ore amu aailepie iyie tiatua iltung'ana pooki, naaitaa iyie olarikoni te shumata iltung'ana laainei Isiraeli, natudung'oyie enkitoria aitung'uaa enkaji e Daudi, naaisho iyie; neitu ake sii itiu anaa osinka lai Daudi, apa oibung nkitanapat aainei naasuj ninye nanu to ltau lenye pooki, aas ake nena sidain too nkonyek aainei, kake ore iyie itaasa ntorrok aitalang nena pooki apa naatii dukuya iyie, nishomo dukuya aitobiraki kewan kulie aitin, o nkitanyaanyukot naasholuno, nikintagor nanu, nikincho nanu oriong. Ore naa ng'ura, kayau nanu entorroni shumata enkaji e Yeroboam, naiwuang'ie te Yeroboam pooki lee, aa oloena o lolakuno tiatua Israel pooki, namut nanu enkaji e Yeroboam tukul, anaa enapejoo oltung'ani olchala neishie. Ore pooki ng'ae lo lmarei le Yeroboam oye tena anasa neinos ildiain. Ore pooki ng'ae oye tiong'ata neinos intaritik oloing'ang'e; amu Olaitoriani oiroro ena.’” “Tudumunye naa taata shomo enkaji ino. Naa tenebaiki nkejek inono enkanasa, neye ina kerai. Naa keishiraki Isiraeli pooki ninye, nenukaa ninye; amu ore ilo laa ninye eeta Yeroboam naa kenukari te nkurare, amu atua ninye ake enotieki entoki naitiship Olaitoriani, Enkai oo Siraeli, tiatua enkaji e Yeroboam. Ore ake sii kedumu Olaitoriani tenkaraki kewan enye olaiguanani olotu shumata Isiraeli, laa ninye olo aiwuang'ie enkaji e Yeroboam. Naa keosh Olaitoriani Isirael neitotiu anaa oseyiai oikirikira tiatua enkare, naitayu isiraeli aiwuang'ie tena kop sidai apa naishoo loo menye, neidapashaki ninche teidia alo Frati, enkaraki naitobira ninche Asherim enye neitagor Olaitoriani. Naa kepalaa ninye Isiraeli tenkaraki ina ng'oki e Yeroboam, apa naataasa neitaas sii iltung'ana loo Siraeli.” Nerrinyo enkitok e Yeroboam alo Tirsa. Ore ake pee ebau embata enkaji enye, neye enkerai. Nenukaa Isiraeli pooki ninye neishiraki terisioroto o rorei lo Laitoriani, apa oiroro aimunye osinka lenye Ahija oloiboni le Nkai. Ore kulie kiaasin e Yeroboam, ilarrabali, o enkitoria enye, ng'ura, eigeroki ninche te mbuku oo ntepen oo laiguanak loo Siraeli. Ore enkata apa naitoreishe Yeroboam, naa ilarin tikitam oare, neirura aye anaa loo menye neitoreisho Nadab te rishata enye. Eitoria apa Rehoboam olayioni le Solomon Yuda. Ore apa pee eiteru Rehoboam aitoreisho naa oloo larin artam oobo. Eitoreisho ninye ilarin tomon oopishana te Yerusalem, teina anasa naa ninye etegelua Olaitoriani tiatua iloshon pooki loo Siraeli, pee etum atipika enkarna enye ine. Naa keji apa enkarna e ng'otonye Naama e Amon. Neas apa Yuda embae torrono too nkonyek o Laitoriani, neitagor ninche ninye nepik olom tenkaraki nena ng'ok enye naataasa. Amu eteshetakitia sii ninche ate iwuejitin e shumata, o ng'apeta o Asherim, te pooki wueji neika o tiabori pooki shani onyori neetae sii apa ilewa le nkisiaayiare e seremare enkibor oo nkonyek teina kop. Etaasa ninche te risioroto e nena pooki olminong te lelo oreren apa ootaarayie Olaitoriani te dukuya iltung'ana loo Siraeli. Ore to lari le imiet le nkitoria e Rehoboam neilepu Shishak olaiguanani le Misiri alotu agilunore Yerusalem; neya ninye ilchumat te nkaji o Laitoriani o lchumat te nkaji o laiguanani, neya ninye pooki toki. Neya sii nena long'oi pooki e sahabu apa naaitobira Solomon; neitobir olaiguanani Rehoboam ilong'oi o suyai apik erishata e nena, neisho ninche lelo kituaak le rripore, apa oorripito kutukaji e nkaji o laiguanani. Naa ore ake tenelo olaiguanani enkaji o Laitoriani, nenapu olarriponi nena long'oi ayau enkaji e rripore. Ore nkulie kiaasin e Rehoboam o pooki apa naataasa ninye, neigeroki tiatua embuku oo ntepen oo laiguanak le Yuda. Neeta apa Rehoboam o Yeroboam olarrabal anaake. Neirura Rehoboam, neye anaa loo menye nenukari too nkuraren oo loo menye te nkanasa e Daudi. Ore apa enkarna e ng'otonye naa keji Naama e Amon, neitoreisho Abijam olayioni lenye te rishata enye. Ore apa to lari le tomon o isiet le nkitoria o layioni le Nebat, neiteru Abijan aitoreisho te Yuda. Neitoreisho ninye ilarin okuni te Yerusalem. Ore apa enkarna e ng'otonye naa keji Maaka entito e Abishalom. Neas ninye ing'ok pooki apa naataasa menye te dukuya ninye, nemeitoriori oltau lenye tialo Olaitoriani Enkai enye, anaa apa oltau le Daudi papaai lenye. Ore ake eyia tenkaraki Daudi, neisho ninye Olaitoriani oltaa te Yerusalem, aisho olayioni lenye metijing'a erishata enye, neitasheyie Yerusalem; enkaraki apa nataasa Daudi mbaa supati too nkonyek o Laitoriani, neitu ninye eibelekenya te pooki toki naitanapa ninye Olaitoriani, too nkolong'i pooki enkishui enye, meteleku ake te mbae naipirta Uria ilo le Hiti. Neeta Rehoboam o Yeroboam olarrabal too nkolong'i e nkishui enye pooki. Ore nkulie kiaasin e Abijam, o nena pooki naataasa, neigeroki tiatua embuku oo ntepen oo laiguanak le Yuda. Neeta apa Abijan olarrabal o Yeroboam. Neirura Abijam neye anaa loo menye, nenukari ninye te nkanasa e Daudi, neitoreisho Asa olayioni lenye te rishata enye. Ore to lari le tikitam le nkitoria e Yeroboam olaiguanani loo Siraeli neiteru Asa aitoreisho te Yuda. Neitoreisho ilarin artam oobo te Yerusalem. Ore apa enkarna e ng'otonye naa keji Maaka entito e Abishalom. Neas Asa mbaa sidain too nkonyek o Laitoriani anaa apa enataasa Daudi papaai lenye. Neiwuang'ie lelo lewa le nkisiaayiare e seremare enkiborra oo nkonyek apa naitobira loo menye. Eiwuang'ieki sii Maaka ng'otonye meitoki aaku enkaiguanani enkaraki naata apa enkitanyaanyukoto olminong apa naitobirakaki Ashera, nesulaki Asa ina kitanyaanyukoto enkop nepejoo to erata le Kedron. Kake eitu apa eiwuang'ieki iwuejitin neeika. Ore ake eyia, keitoriori apa oltau le Asa tialo Olaitoriani katukul, nkolong'i pooki enkishiu enye. Neyau ninye atua enkaji o Laitoriani ntokitin apa naaitisinya menye o naaitisinya ninye makewan, enkosholai, o sahabu o masaa. Netii apa olarrabal erishata e Asa o Baasha olaiguanani loo Siraeli too nkolong'i enye pooki. Eshomo Baasha olaiguanani loo Siraeli agilunore Yuda, neshet Rama, pee etum aibooi pooki ng'ae olotu enetii Asa olaiguanani le Yuda. Neyau Asa enkosholai pooki oina sahabu apa natelekua to lchumati le nkaji Olaitoriani, o to lchumati le nkaji o Laitoriani, nepik nkaik oo sinkan lenyena. Neirriwaa olaiguanani Asa ninche meshomo enetii Benhadad olayioni le Tabrimon olayioni le Hesion, olaiguanani le Siria, laa Dameski apa namanya, nejoki, “Maibung'ata iyiook pokira anaa apa enatiu papaai o papaai lino: ng'ura aairriwaka nanu iyie enkishoroto e nkosholai o sahabu. Shomo ntobira osotua lino o Baasha olaiguanani loo Siraeli, pee aatum atung'uai nanu.” Nening Benhadad enatejo olaiguanani Asa, neirriwaa ilarikok lenyena le njore meshomo aagilunore nkanas oo Siraeli, nemir Ljion, o Dan, o Abelbet-Maaka o Kinerut pooki tenebo enkop pooki e Naftali. Ore ake pee ening olaiguanani Baasha ina, neitu eitoki ashet Rama, nelo ninye abik te Tirsa. Neitoki olaiguanani Asa alimu enkitanapata, tiatua Yuda pooki, pee meing'uari ninye oltung'ani obo, pee epuo aaya lelo soito apa le Rama o mbaoi enyena, apa naa ninche eshetishore Baasha, nelo olaiguanani Asa ashetie Geba e Benchamen o Mispa. Ore apa nkulie kiaasin e Asa, enkidimata enye pooki, o nena pooki naataasa ninye, o nkanas naatesheta ninye, neigero pooki tiatua embuku oo ntepen oo laiguanak loo Siraeli. Kake ore etamorua ninye netum emuoyian too nkejek enyena. Neirura Asa neye anaa loo menye, nenukari ninye te nkurare oo loo menye te nkanasa e Daudi papaai lenye. Neitoreisho Yehoshafat olayioni lenye te rishata enye. Neiteru Nadab olayioni le Yeroboam aitoreisho tiatua Isiraeli, to lari liare le Asa ilo aiguanani le Yuda. Neitoreishe ninye te Israel ilarin oare. Neas ninye ntorrok te dukuya nkonyek Olaitoriani, nelo aibung olkuaak, le menye. Neas ing'ok nerikoki Isiraeli metaasa ing'ok. Ore Baasha olayioni le Ahija lo losho le Isaakar, nerresh ninye. Near Baasha ninye metua te Gibeton nara enoo lfilisti, amu eirraga apa Nadab o Siraeli pooki aang'adu Gibeton. Neaku etaara Baasha ninye metua to lari liokuni le nkitoria e Asa olaiguanani le Yuda, neitoreisho ninye te rishata e Nadab. Ore ake pee eaku olaiguanani nesesekuan enkaji e Yeroboam pooki, eitu ninye eing'uaa olaishirani te nkaji e Yeroboam. Eidakie pooki te risioroto o rorei lo Laitoriani apa oiroro aimunye osinka lenye oji Ahija le Shilo. Naa tenkaraki nena ng'ok e Yeroboam apa naataasa, nerikoki Israel metaasa engoki, o enkaraki ina naitagoro ninye Olaitoriani Enkai e Israel. Ore apa nkulie kiaasin e Nadab, o nena pooki naataasa, neigeroki tiatua embuku oo ntepen oo laiguanak loo Siraeli. Neeta apa Asa olarrabal, o Baasha ilo aiguanani loo Siraeli too nkolong'i enye pooki. Ore to lari liokuni le nkitoria e Asa olaiguanani le Yuda, neiteru Baasha olayioni le Ahija aitore Israel pooki te Tisra, neitoreisho ilarin tikitam oong'uan. Neas ninye intorrok too nkonyek Olaitoriani, neibung orrekie le Yeroboam teina ng'oki natorikoko Israeli metaasa. Nelotu ororei lo Laitoriani aimu Yehu olayioni le Hanani tenkaraki Baasha, ejo, “Ore anaa naadumu ailepie iyie aitung'uaa nkulukuok, naaitaa iyie olarikoni loo ltung'ana laainei Isiraeli, nimbung'a iyie orrekie le Yeroboam, nitorikoko iltung'ana laainei Isiraeli metaasa ing'ok, kintagoro nanu tenkaraki ing'ok enye. Ng'ura kaiwuang'ie nanu katukul, Baasha o enkaji enye aishie, naitotiu enkaji ino anaa enkaji e Yeroboam olayioni le Nabat. Ore pooki ng'ae to lmarei le Baasha oye tiatua enkanasa, neinos ildiain. Ore pooki ng'ae oye tiong'ota neinos ilmotonyi lo loing'ang'e.” Ore apa nkiaasin e Baasha, o naataasa, o enkidimata enye, neigeroki tiatua embuku oo ntepen oo laiguanak loo Siraeli. Neirura Baasha neye anaa loo menye nenukari te Tirsa; neitoreisho Ela olayioni lenye te rishata enye. Neitoki ororei Lo Laitoriani alotu eimu Yehu oloiboni le Nkai, olayioni le Hanani. Baasha o enkaji enye apa eipirta ilo rorei, tenkaraki entorroni pooki apa nataasa too nkonyek Olaitoriani, neitagor ninye teina siaai oo nkaik enyena, neiko anaa apa Yeroboam, nenyaaka sii aidaikie. Ore to lari le tikitam o ile lo laiguanani Asa le Yuda, neitore Ela olayioni le Baasha Isiraeli te Tirsa, neitoreisho ilarin oare. Kake etarresho Simri, ilo kitok lo lpisiaai loo ngarrin oo mbartan ninye. Ore apa etii ninye Tirsa, eokisho nemera te nkaji e Arsa, laa ninye apa oitasheiki enkaji te Tirsa, nejing'u Simiri neosh ninye anang'ie enkop, near metua to lari le tikitam oopishana le nkitoria e Asa olaiguanani le Yuda, neitoreisho ninye te rishata enye. Ore ake pee eiteru aitoreisho, ore ake enatonie to lorika lenye le nkitoo, near enkaji e Baasha pooki metuata. Eitu ninye eing'uaa olee obo lo lmarei lenye anaa ilchoreta lenyena. Neidaikie Simri anaa enkaji e Baasha pooki, te risioroto o rorei lo Laitoriani apa oiroro tialo Baasha aimunye Yehu oloiboni le Nkai, tenkaraki ing'ok pooki e Baasha o ng'ok e Ela olayioni lenye apa naataasa ninche. Eitagoro ninche Olaitoriani Enkai oo siraeli too nkitanyaanyukot enye. Ore apa nkulie kiaasin e Ela o nena pooki naataasa ninye, neigeroki tiatua mbukui oo ntepen oo laiguanak loo Siraeli. Ore to lari le tikitam oo pishana le nkitoria e Asa olaiguanani le Yuda neitoreisho Simri nkolong'i naapishana te Tirsa. Netii apa iltimito ootuuno ilng'oborri egilunore Gibeton oo Lfilisti, ore lelo timito ootii ilng'oborri nening eji, “Etarresho Simri olaiguanani near metua.” Ore enkaraki ina neitaa Isiraeli pooki Omori ilo kitok le njore, metaa olaiguanani le Israel ina olong oo lng'oborri. Neaku eilepa Omori aing'uaa Gibeton o Siraeli pooki tenebo ninye. Nepuo aang'adu Tirsa. Ore ake pee edol Simiri nchere eibung'aki enkanasa, nelo ninye olgilata liatua le nkaji o laiguanani, nepejoo inaa aji o laiguanani etii atua, neye ninye. Etua tenkaraki e nena ng'ok enyena naataasa, neas ntorrok te dukuya Olaitoriani, neibung olkerreti le Yeroboam. O tenkaraki sii ng'ok naataasa erikoki Isiraeli ing'ok. Ore apa nkulie kiaasin e Simiri, oina natarreshishe, neigeroki tiatua mbukui oo ntepen oo laiguanak loo Siraeli. Etoorote apa iltung'ana loo Siraeli katitin are: etusujaitie olpisiaai loo ltung'ana Tibni olayioni le Ginat aaitaa olaiguanani. Etusujaitie olikae pisiaai Omori. Kake ore lelo tung'ana ootusujaitie Omori, nemir lelo ootusuja Tibni olayioni le Ginat. Neaku etua Tibni neaku Omori ninye olaiguanani. Ore to lari le tomoni uni oo kuni le nkitoria e Asa olaiguanani le Yuda, neiteru Omori aitore Israel, neitoreisho ilarin tomon oare. Too larin ile eitoria Tirsa. Einyiang'ua apa ninye endoinyo e Samaria te Shemer neinosie ntalantani are e nkosholai, neitobir apa ninye ina doinyo ashet, nejo enkarna eina anasa natesheta Samaria, eipotie enkarna e Shemer, olopeny ina doinyio. Neas Omori ntorrok too nkonyek o Laitoriani, neas ntorrok aitulus te lelo pooki ooituruko te dukuya ninye. Amu eibung'a ninye olkerreti le Yeroboam olayioni le Nebat. Ore too ng'ok naatorikoko ninye Israeli metaasa, neitagor Olaitoriani Enkai oo siraeli, tenkaraki nkitanyaanyukot enye. Ore apa nkulie kiaasin naataasa Omori, oina kidimata naitodolua, neigeroki tiatua embuku oo ntepen oo laiguanak loo Siraeli. Neirura Omori neye anaa loo menye, nenukari te Samaria. Neitoreisho Ahab olayioni lenye te rishata enye. Ore to lari le tomoni uni o isiet le nkitoria e Asa olaiguanani le Yuda, neiteru Ahab olayioni le Omori aitore Isiraeli te Samaria. Neitoreisho ilarin tikitam oong'uan. Neas Ahab olayioni le Omori ntorrok te dukuya Olaitoriani aitulus te lelo apa ooituruko te dukuya ninye. Ore edol anaa entoki nalelek te ninye teneibung olkerreti le Yeroboam olayioni le Nebat, neyau ninye Yesebel entito e Etabal olaiguanani le Sidon aitaa enkitok enye. Nelo ninye aisiai Baal neserem ninye. Neshetaki ninye Baal olperere lo lasar tiatua enkaji e Baal apa natesheta te Samaria. Neitobir Ahab ashera. Etaasa Ahab mbaa kumok aitagor Olaitoriani, Enkai oo Siraeli aitulus too laiguanak pooki loo Siraeli apa ootii te dukuya ninye. Ore too nkolong'i enyena neshet Hiel le Betel Yeriko. Etipika ninye olkitamanyunoto ainosie Abiram olkikau lenye, nepik nchomito ainosie Segub olayioni lenye oti, te risioroto o rorei lo Laitoriani, apa oiroro aimunye Yoshua olayioni le Nuni. Nejoki apa Eliya le Tishbi te Gilead, nejoki Ahab, “Ore anaa enaishu Olaitoriani Enkai oo Siraeli, laa te dukuya ninye aitashe, metumi enkinuku aashu enchan te kuna olong'i, meteleku ake to rorei lai.” Nelotu ororei lo Laitoriani enetii ninye, ejo, shomo tung'uai ine nimbelekenya alo enkalo o loosaen, nilo aisudori to erata le Kerit. Aa taa oloo saen lo lkeju le Yordan. Shomo tooko enkare eilo erata amu aitanapa nanu ilkurruki pee kintoti iyie teine. Neaku eshomo ninye te risioroto o rorei lo Laitoriani. Nelo ninye abik tembata eilo erata le Kerit tenkalo oloosaen to lkeju le Yordan. Neyaki ilkurruki ninye imukateni o nkiri tadekenya, neyaki sii teipa, neokisho teilo shorro. Ore te nkiti kata netoyu ilo shorro, amu meetae apa enchan teina kop. Neitoki ororei lo Laitoriani alotu enetii ninye, nejoki, “Tudumunye, shomo Serafat e Sidon, nilo abik teine. Ng'ura aitanapa nanu enkoliai teine pee kintoti iyie.” Neaku etudumunye ninye nelo Serafat. Ore ake pee ebaiki kishomi enkanasa, ng'ura etii enkoliai ine nasotu ilkeek, neipot ninye nejoki, “Iyakaki nanu enkiti are te nkikompe, pee aok.” Ore eloito ina oliai ayau enkare, neipotu ninye ajoki, “Iyakaki nanu embelati e mukate te nkaina ino.” Nejoki ina oliai ninye, “Ore anaa enaishu Olaitoriani Enkai ino, eitu nanu apej toki, emborei enkaina e ntapa ake aata te siang'au o enkiti ilata to ltulet. Naa ore taata, ilkuti keek nanu asotu pee alo ayier tenkaraki kewan ai o enkayioni ai, pee kitum aainosa nikiye.” Nejoki Eliya ninye, “Miureisho, shomo taasa anaa enitejo; kake tang'asa ntobirakaki enkiti mukate nikiyaki, ore tesiadi ina nintoki taa aitobiraki kewan o enkayioni ino. Amu nji ejo Olaitoriani Enkai oo Siraeli, ‘Ore ilo siang'au le ntapa metoyu aekata, ore ilo tulet le ilata nemeishunye aekata ometabau ina olong nairriwaki Olaitoriani enchan enkop.’ ” Nelo ninye aas anaa enatejo Eliya; ore ninye o Eliya olmarei lenye neinos endaa nkolong'i kumok. Ore ilo siang'au le ntapa neitu aekata etoyu, neitu aekata eishunye ilo tulet le ilata, terisioroto eilo rorei lo Laitoriani oirorie Eliya. Ore te siadi nena olong'i nemuoyu enkayioni eina oliai. Neitirrishaki emuoyian oleng o metaa meekure eyang. Nejoki ninye Eliya, “Kaa kiaatakinore iyie nanu, lo tung'ani le Nkai? Iewuo iyie enatii pee edamuni eng'oki ai, niyau keeya e nkayioni ai!” Nejoki Eliya ninye, “Inchooki sii iyie ina ayioni ino.” Neya ninye ina ayioni too nkaik e ngotonye, nenap ninye aya olgilata le shumata ine apa neirrag ninye, neirragie te ndapash enye makewan. Neishiraki ninye Olaitoriani ejo, “Olaitoriani Enkai ai, iyaka iyie entorroni shumata ena oliai apa naa ninye aewuo airragaa, aar enkayioni enye metua?” Neitoriori ninye te shumata ina ayioni katitin uni, neishiraki Olaitoriani, ejo, “Olaitoriani Enkai, nchoo enkishui ena kerai errinyokino.” Nening Olaitoriani olkiyioi le Eliya; nerrinyokino ina kerai enkishui enye aitoki, nepiu ninye. Neya Eliya ina kerai, neitadou aitung'uaa ilo gilata le shumata, neyau olgilata neitarasaki ngotonye; nejo Eliya, “Ng'ura eishu enkayioni ino.” Nejoki ina kitok Eliya, “Ayiolo taa taata ajo ira iyie oltung'ani le Nkai, nesipa ororei lo Laitoriani te nkutuk ino.” Ore te siadi nkolong'i kumok, nelotu ororei le Nkai enetii Eliya, to lari liokuni, ejo, “Shomo ntoduaai kewan te Ahab, amu kairriwaki nanu enchan enkop.” Kaae nelo Eliya aitoduaaya kewan te Ahab. Ore apa ina kata netirrisha olameyu te Samaria. Neipotu Ahab Obadiah laa ninye apa oitasheiki enkaji enye. Naa keyanyit apa Obadiah Olaitoriani oleng. Naa ore ake pee earaa Yesebel iloibonok lo Laitoriani, neya Obadia iloibonok le Nkai iip nelo aisudoo moo onom te nkapune, neitoti ninche too mukateni o te nkare. Neipotu Ahab Obadiah nejoki, “Shomo atua enkop pooki, o nchorroi pooki oo nkariak o erat pooki, amu ebaiki nikitum nkujit nikincho mbartan o nyumpui meye, pee mikintiany ake embata oo ng'uesi.” Neaku etooro apa ninche enkop pokira oare, pee etum aashom. Nelo Ahab enkae alo nelo Obadia enkae alo openy. Ore eloito Obadia te nkoitoi, ng'ura, nenang'are Eliya ninye; neyiolou Obadia ninye, nebatata te nkomom abaiki enkop, nejo, “Kaiyie ele olkitok lai Eliya?” Newaliki ninye ajoki, “Ee nanu. Shomo tiaaki olkitok lino, ‘Ng'ura ajo etii Eliya ene!’ ” Nejoki Obadia ninye, “Kaa ng'oki ataasa nanu, eji metaa nchooyo osinka lino apik enkaina e Ahab, maataara nanu matua? Ore anaa enaishu Olaitoriani Enkai ino, meetae olorere aashu enkitoria neitu eirriwaa olkitok lai ilkiliku king'oru iyie, naa tenejo ninche, ‘Metii ninye ene,’ neinosie olmumai ina kitoria aashu ilo orere, nchere eitu ninche kitum iyie. Eji ore taata nijo iyie, Shomo tiaaki olkitok lino, Ng'ura, etii Eliya ene. Naa tenaaorore nanu iyie nikiya iyie enkiyang'et o Laitoriani ewueji nemayiolo, niaaku tenalo nanu ajoki Ahab ina, nikilau ninye, naar nanu matua, hoo nayanyita nanu osinka lino Olaitoriani ebaiki telelero ai. Aimetolikioki apa olkitok lai enataasa ina kata apa ear Yesebel iloibonok lo Laitoriani, naisudoo nanu iloibonok iip lo Laitoriani, moonom tiatua enkapune, naitoti nanu ninche too mukateni o te nkare? Eji nijo taata iyie, Shomo tiaaki olkitok lino, ng'ura etii Eliya ene.” Pee aar nanu matua. Nejo Eliya, “Ore anaa enaishu Olaitoriani loo lororani, laa te dukuya ninye nanu aitashe, kalo ake aitoduaaya kewan ai te ninye taata.” Kaae nelo Obadia atumore Ahab, neliki ninye. Nelo Ahab atumore Eliya. Ore ake pee edol Ahab Eliya, nejoki ninye, “Kaa iyie doi ele, olaitanyamalani loo Siraeli?” Newaliki ninye ajoki, “Eitu nanu aitanyamal Isirael kake iyie oitanyamala, o enkaji e papaai lino, enkaraki nitalama nkitanapat o Laitoriani, nisujaa Baal. Ore naa taata shomo nturrurrokoki iltung'ana loo Siraeli to ldoinyo le Karmel, o lelo oibonok pokira iip ong'uan o onom le Baal. O lelo oibonok iip ong'uan le Ashera, oodaa te Mesa e Yesebel.” Neipotu Ahab iltung'ana pooki loo Siraeli, neiturrur iloibonok tenebo to ldoinyo le Karmel. Nelotu Eliya anyikaki iltung'ana pooki nejoki, “Ibukaashasha akenya o anu too ndamunot are? Tenaa Olaitoriani ninye Enkai, entusuj ninye; kake tenaa Baal nisujaa ninye.” Neitu ewaliki iltung'ana ororei hoo obo. Neitoki Eliya ajoki iltung'ana, “Nanu ake openy taata otelekua too loibonok lo Laitoriani; kake ore iloibonok le Baal naa iip ong'uan o onom. Nchoo meishori iyiook iloing'ok oare naa nchoo ninche metegelaki ate obo, nedung'udung neiteleiki ilkeek, kake emipik enkima ine. Naa kaitobir sii nanu olikae oing'oni naiteleiki ilkeek, nemapik enkima ine. Nimpotipoto enkarna e nkai inyi, naipot sii nanu enkarna Olaitoriani. Ore Enkai nawalu te nkima naa ninye Enkai.” Newalu iltung'ana pooki aajo, “Enkiroroto sidai.” Neitoki Eliya ajoki lelo oibonok le Baal “Entegelaki ate oloing'oni obo ning'asing'asa aaitobir, amu intae ilkumok. Nimpotipoto enkarna e nkai inyi, kake emipik enkima.” Neya ninche oloing'oni obo oishooki ninche, neitobir ninye, neipot enkarna e Baal ebaiki tadekenya ometaa dama, ejo, “Oo Baal tawaliki iyiook!” Kake eitu etumi oltoilo anaa oltung'ani otawala. Neitiam ninche aaman ilo perere lo lasar apa oitobira. Ore eipira enkolong neikoroj Eliya ninche, ejo “Entabuaku oleng amu enkai ninye, ebaiki negira adamisho oleng, aashu enyamalita, aashu eshomo nkang'itie. Aashu ebaiki neirura naa keishiaakino neinyeyieki.” Neishir ninche aabuaku, nedung'udung ate too lalema anaa enatiu olkerreti lenye, ometaba anaa nerukunye osarge too seseni lenye. Ore pee elusoo enkipirrata e nkolong, nelimana ninche aaibonisho ometabau erishata naishoori olasar. Kake meetae oltoilo otoning'oki, metii ewalata, nemetii oltung'ani otishilayie. Neitoki Eliya ajoki iltung'ana pooki, “Wootu entinyikakaki,” nepuonu iltung'ana pooki aanyikaki ninye. Neram ninye ilo perere lo lasar lo Laitoriani apa otigilaki. Neya Eliya isoito tomon oare te risioroto e siana oo layiok le Yakobo, laa ninche apa eewuo ororei lo Laitoriani enetii, “Ejo keaku eikiji enkarna ino Isiraeli.” Ore te lelo soito neshetu olperere lo lasar te nkarna Olaitoriani. Netur ninye engumoto aitaman emanaroto olperer lo lasar, oba tendapasho anaa ilanterera oare. Nepik ilkeek aitobiraki. Nedung'udung ilo oing'oni aitaa ndung'udung'ot neiteleiki shumata lelo keek. Neitoki ninye ajo, “Emputa iltooi oong'uan enkare, nibukokiki olasar opejori, tenchumata oo lkeek.” Neitoki ajo, “Engilie entubukoki” neigilie ninche eniare. “Neitoki ajo Engilie ene uni;” neigilie ninche ene uni. Neigilie ninche ene uni. Neruko enkare teilo perere lo lasar, neiput ine negum nemanaa to lperere lo lasar. Ore te nkata naishoori olasar le nkitukuo, nelotu oloiboni Eliya anyiku nejo, “Oi Olaitoriani, naa Ai e Abraham, o Isaak, o Israel, nchoo eyiolouni ena olong nchere iyie Enkai tiatua Israeli. Nara nanu osinka lino, naa tenkarna ino nanu ataasa kuna kitoduat pooki. Tawalikiaki nanu Olaitoriani, tawalikiaki pee eyiolou kulo tung'ana nchere, iyie Olaitoriani ora Enkai, naa iyie oibelekenya iltauja lenye.” Nedou enkima o Laitoriani, neinos ilo asar, olkeek o soito, o enterit neishu ina are apa natii ewueji negum nemanaa to lperere lo lasar. Ore ake pee edol iltung'ana pooki ina, nebatata aaitabaiki nkomomi enye enkop; nejo, “Olaitoriani ninye Enkai, Olaitoriani ninye Enkai.” Neitoki Eliya ajoki ninche, “Embung'a lelo oibonok le Baal; emincho ninye elo obo.” Neibung'i ninche, neyau Eliya ninche aitadou ayau olchorro le Kishon, near ninche metuata teine. Neitoki Eliya ajoki Ahab, “Ilepa shomo tadaayu niokisho; amu ening'o oltoilo le nchan eshaita.” Kaae nelo Ahab adaa neokisho. Neilep Eliya alo enchumata oldoinyo le Karmel, neirrugo abaiki enkop, nepik enkomom enye erishata oo nkung enyena. Nejoki ninye osinka lenye, “Ilepa taata shomo, ning'or enkalo e naiposha.” Neilep ninye alo neing'or, nejo, “Metii toki.” Neitoki ajoki, “Nyaaki shomo katitin naapishana.” Ore te nkata e naapishana nejo ninye, “Ng'ura etii enkiti atampoi naikununo anaa enkaina oltung'ani nailepu tiatua enaiposha.” Neitoki ajoki, “Ilepu shomo tiaaki Ahab, ‘Ntobira engarri ino oo mbartan nidoyio alo, pee mikimbok ake enchan.’ ” Ore te nkiti rishata neroku shumata too nkatampo o to siwuo, nelotu enchan kitok, neked Ahab engarri enye nelo Yesreel. Netii apa enkaina Olaitoriani shumata Eliya; nerreten ninye empolos enye nekuet aituruk te Ahab nelo enjing'et e Yesreel. Neliki Ahab Yesebel nena pooki naataasa Eliya. Oina sii natara metuata iloibonok pooki to lalem. Neitoki Yesebel airriwaki Eliya olkilikuai, ejo, “Maaitaasa nanu nkaitin ina, naaitulus sii, teneitu nanu aitotiu enkishui ino anaa enkishui e obo lenye tena saa taisere.” Neureishoyu ninye neinyototo aisik, nelo Beer-sheba e Yuda neing'uaa osinka lenye teine. Kake ore ninye makewan eshomo elototo enkolong nabo tiong'ota. Nelo aton te ntonata olchani oata oloip. Neomonu pee eye, ejo, “Eiririkine Olaitoriani, iwuang'ie enkishui ai, amu maikash nanu too loo papa.” Neirrag ninye airura to loip lo lchani, naa ng'ura neiseyie olmalaika ninye nejoki ninye, “Tudumunye inosa endaa.” Neing'orisho ninye, naa ng'ura etii embata e ndukuya enye emukate natapejoki too soito ooirowua, o esiang'au e nkare. Nedaa ninye neokisho, neitoki airrag. Neitoki olmalaika lo Laitoriani enkata e are, neiseyie ninye, nejoki, “Tudumunye inosa endaa, amu kegolu elototo te iyie.” Nedumunye ninye nedaa neokisho, nelo te ngolon eina daa nainosa too nkolong'i artam, o nkewarietin artam, omeshomo Horeb ilo doinyo le Nkai. Nebau ninye enkapune neirrag ine, naa ng'ura, eewuo ororei lo Laitoriani enetii ninye, nejoki ninye, “Kaa iasita tene, Eliya?” Nejo ninye, “Aata apa nanu olom to Laitoriani, Enkai oo lororani, amu etanyaita iltung'ana loo Siraeli olning'o lino, nesulaa ilpereren loo lasarri, near iloibonok linono metuata to lalem; metaa nanu ake, nanu ake openy otelekua; neing'oru ninche enkishui ai, pee eiwuang'ie.” Neitoki ajoki, “Shomo ntasho te nchumata o ldoinyo te dukuya Olaitoriani.” Naa ng'ura eloito Olaitoriani agiroo, nekut olkutati kitok ogol lelo doinyo, nebel ndapidapo aitaa mbelibelat te dukuya Olaitoriani, kake metii Olaitoriani atua olkutati. Ore te siadi olkutati nelotu enkikirikirata enkop, kake metii Olaitoriani atua enkikirikirata e Nkop. Ore te siadi enkikirikirata enkop nelotu enkima, kake metii Olaitoriani atua enkima. Ore te siadi enkima nelotu oloti toilo obor. Ore ake pee ening Eliya ina, neimulumul enkomom enye to lkila nelo aitashe te nkutuk e nkapune. Naa ng'ura nelotu oltoilo enetii ninye, nejoki, “Kaa iyie iasita tene, Eliya?” Nejo ninye, “Aata apa nanu olom te nkaraki Olaitoriani Enkai oo lororani amu etanyaita iltung'ana loo Siraeli olning'o lino, neuroo ilpereren linono loo lasarri, near iloibonok linono metuata tolalem, netaa nanu ake openy otelekua, neing'oru ninche enkishui ai peyie eiwuang'ie.” Nejoki Olaitoriani ninye, “Torrinyoyu shomo te nkoitoi ino enkalo e ong'ata e Dameski; ore ake pee ibaya, nilo abukoki eilata Hasael, aput metaa olaiguanani le Siria. Niput Yehu olayioni le Nimshi metaa olaiguanani loo Siraeli. Ore Elisha olayioni le Shefat le Abel-mehola, nibukoki eilata aput metaa oloiboni le Nkai te rishata ino. Ore ilo oilanya olalem le Hasael nelo Yehu aar metua. Ore ilo oilany olalem le Yehu nelo Elisha aar metua. Ore ake eyia kaleku nanu nkalifuni naapishana tiatua Isiraeli, lelo pooki leitu egilaki kung neitu eirrugokino Baal, o pooki leitu eng'utut Baal.” Kaae nelo Eliya teine, nelo atum Elisha olayioni le Shefat eturishore ilmong'i tomon oare. Netii apa ninye tenebo ilo kiteng le tomon oare. Negiroo Eliya ninye nenang'aki olkila lenye. Neing'ua Elisha lelo mong'i nekuet asujaa Eliya, nejoki ninye, “Nchooki nanu mashomo ang'utut papaai o yieyioo aisho ole sere, pee aatum atusuja iyie.” Nejoki Eliya ninye, “Torrinyoyu shomo; amu kaa nanu aaitaasa iyie?” Nerrinyo ninye te sujata enye, neitayu nena keek oo murto oo lmong'i neyieng ninche. Neyier nkiri enye tenebo nkeek oo murto oo lmong'i. Neisho iltung'ana meinosa, neinos ninche. Neitoki ninye adumunye alo asujaa Eliya nelo aisiaai ninye. Eiturrurro apa Benhadad iltung'ana lenyena tenebo. Netii ilaiguanak tomoni uni oare tenebo ninye, neeta mbartan o ngarrin oo mbartan. Nelo ninye aman Samaria neitayunye olarrabal. Neirriwaa ninye ilkiliku enkanasa e Ahab olaiguanani loo Siraeli, nejoki ninye, “Nji ejo Benhadad. ‘Ore enkosholai ino o sahabu ino naa nkunainei. Inaainei nkituaak inono o nkera inono.’ ” Newal olaiguanani loo Siraeli ajo, “Ore anaa enitejo olkitok lai, lo aiguanani, ara nanu olino, o nena pooki naata nanu.” Neitoki ilkiliku aapuonu ejo, “Nji ejo Benhadad: Aairriwaka nanu iyie ilkiliku ajo, Iyakaki nanu enkosholai ino, o sahabu ino, o nkituaak inono o nkera inono. Ore ake eyia kaairriwaki nanu isinkan laainei taisere tena saa, naa kepuonu aajur enkaji ino o nkajijik oo sinkan linono, neya pooki toki naitiship ninche.” Neitoki olaiguanani loo Siraeli aiturrur ilpayiani pooki leina kop, nejoki, “Entisipu taata nidolidolo aajo enyamali eing'oru ele tung'ani. Amu aairriwaka ninye nanu olkilikuai te nkaraki nkituaak aainei o nkera aainei, o tenkaraki enkosholai ai osahabu, nemaata nanu entoki natomito.” Ore lelo payiani pooki oltung'ana pooki, nejoki ninye, “Mining iyie ninye niminyorraa.” Kaae nejoki ninye lelo ooirriwua Benhadad, “Entiaaki olkitok lai olaiguanani, ‘Ore nena pooki e dukuya niyieu tialo osinka lino, kaas nanu, kake ore ena bae maidim nanu ataasa.’ ” Nerrinyo lelo ooirriwuaki neyaki ninye olkilikuai. Neirriwaki Benhadad ninye olkilikuai nejoki, “Maaitaasa nanu nkaitin ina naaitulus, tenaa kelekuni ninye enterit te Samaria naaiput nkaik ang.” Newal olaiguanani loo Siraeli ajo, “Entiaaki ninye, ‘Mincho ilo orreten imasaa enyena o larrabal ewuasa anaa ilo olaku.’ ” Ore ake pee ening Benhadad ilo kilikuai eokisho tenebo ilaiguanak too lng'oborri, nejoki ninye ltung'ana lenyena, “Entijing irrishat inyi to larrabal.” Nejing ninche irrishat enye aarasaki ina anasa. Naa ng'ura, nelotu oloiboni le Nkai anyikaki Ahab olaiguanani loo Siraeli nejoki, “Nji ejo Olaitoriani, Itoduaa iyie ele orora kitok pooki? Ng'ura kaishoru ninche apik nkaik inono ena olong; naa ilo iyie ayiolou nchere ara nanu Olaitoriani.” Neitoki Ahab ajo, “Aitialo ng'ae?” Nejoki ninye, “Nji ejo Olaitoriani, Tialo isinkan loo lbalusuni loo lkerenketi.” Neitoki Ahab ajo, “Kaing'ae oiteru olarrabal?” Newaliki ajo, “Iyie.” Neitoki ninye aipotu lelo sinkan loo lbalusuni loo lkerenketi, naa iip are ninche o tomoni uni oare, ore te siadi ninche neitoki aipotu iltung'ana loo Siraeli, nkalifuni naapishana. Neipang ninche aapuo te nkipirata enkolong, ina kata eokisho Benhadad too lng'oborri, ninye o lelo aiguanak tikitam oare apa ootareto ninye. Ore lelo sinkan loo lbalusuni loo lkerenketi neituruk aapuo. Neirriu Benhadad iltung'ana, nepuo aajoki ninye, “Eilepu iltung'ana aapuonu te Samaria.” Nejo ninye, “Tenaa eiteseriani eetuo ninche, eyau ninche eishu, naa tenaa eitolarrabal epuonu iyau ninche eishu.” Kaae neipang kulo aapuo te nkanasa, lelo sinkan loo lbalusuni too lkerenketi, oina jore natusujayie ninche. Near ake oltung'ani oltung'ani oipirare; neilanyisho iltung'ana le Siria, nesujaa Isiraeli ninche, kake eilanyishe Benhadad olaiguanani le Siria te mbarta tenebo ilakedok loo mbartan. Nelo olaiguanani loo Siraeli aibung mbartan o ngarrin oo mbartan, near iltung'ana le Siria oleng. Neitoki oloiboni le Nkai alotu anyikaki olaiguanani loo Siraeli, nejoki ninye, “Wou, ntagoluoyu, nidamu oleng enilo aas; amu ore telde ari, naa eikilotu olaiguanani le Siria agilunore.” Nejoki isinkan lo laiguanani le Siria ninye, “Ore nkaitin enye naa nkaitin oo ldoinyo, neaku kegol ninche aalang iyiook. Metaa maape iyiook aarare ninche te nkop naisiaja, nemeeta nchere pee eitu kimir ninche. Naa nji nkuna, iwuang'ie ilaiguanak too wuejitin enye, nipik ilarikok le njore irrishat enye; nimpotu enjore naikununo anaa enapa natimiraki. Aipirakinye embarta enkae barta o engarri oo mbartan enkae garri oo mbartan; nikipuo iyiook aarare ninche te nkop naisiaja nemeeta nchere pee eitu iyiook kigolu aalang ninche.” Nening ninye enatejo ninche, neas ina. Ore teina rishata o lari neipotu Benhadad aiturrur enjore e Siria, neilep aapuo Afek, pee earare Isiraeli. Neipotuni Iltung'ana loo Siraeli, neishori ninche imasaa o larrabal, nepuo aarare ninche. Neun iltung'ana loo Siraeli ilng'oborri te dukuya ninche netiu anaa iluaat are kutiti oo nkineji, kake eiputa iltung'ana le Siria enkop. Nelotu oltung'ani le Nkai anyiku nejoki olaiguanani loo Siraeli, “Nji ejo Olaitoriani, ‘Ore amu etejo iltung'ana le Siria eji, hore Olaitoriani naa enkai oo ldoinyo, kake mme enkai oo erat ninye, ore enkaraki ina, kaishoru nanu ele orora pooki apik nkaik inono, pee itum iyie atayiolo nchere ara nanu Olaitoriani.’ ” Neun ninche ilng'oborri aaipirakinore ninche nkolong'i naapishana. Ore te nkolong e naapishana neitutumi olarrabal. Neosh iltung'ana loo Siraeli iltung'ana le Siria, isikarini nkalifuni iip nabo oopuo too nkejek te nkolong nabo. Neisikaki ilkulikae enkanasa e Afek, neurokino esuntai iltung'ana nkalifuni tikitam e lelo ootelekutua. Neisik sii ninye Benhadad nelo ajing olgilata liatua le nkanasa. Nejoki isinkan lenyena ninye, “Ng'ura, kitoning'o iyiook nchere, ore ilaiguanak le nkaji e Israel, naa ilaiguanak oata olng'ur. Nchoo iyiook maishopo ilkuniyiani too mpolosi ang, nikipik nkeenta ilukuny ang, nikipuo enetii olaiguanani loo Siraeli; amu ebaiki nikipal iyie nchu.” Kaae nerrotian ninche ilkuniyiani too mpolosi enye, nepik nkeenta ilukuny enye, nepuo enetii olaiguanani loo Siraeli, nejoki, “Etejo osinka lino Benhadad, Aatoomono nchooki nanu aishu. ” Nejo ninye, “Keton ake eishu? Olalashe lai ninye.” Neanyita apa lelo tung'ana pee etum ororei supat, netum ninche nabo kata to laiguanani, nejo ninche, “Ee olalashe lino Benhadad.” Neitoki ninye ajo, “Enchom entoriku ninye.” Nelotu Benhadad enetii ninye, neisho ninye metijing'a engarri oo mbartan. Nejoki Benhadad ninye, “Ore nkanasa natooruo papaai, papaai lino kaarrinyoki nanu; nindim iyie atasheta iwuejitin neemirishoreki te Dameski, anaa apa enataasa papaai te Samaria.” Nejo Ahab, “Kaaisho nanu iyie shomo te kulo rorei.” Kaae neitobir olning'o o ninye neisho meshomo. Nejoki oltung'ani obo loo layiok loo loibonok olikae te nkitanapata Olaitoriani, “Tooshoki nanu, aatoomono” kake etanya ilo tung'ani eosh ninye. Neitoki ajoki ninye, “Ore amu itanya ining oltoilo lo Laitoriani, ng'ura, teneaku ishomo nikilo olng'atuny aar tua.” Ore pee elo aing'uaa nenang'are olng'atuny ninye near metua. Neitoki ninye atum likae tung'ani, nejoki, “Tooshoki nanu, aatoomono.” Neosh ilo tung'ani ninye nepik olbae. Kaae nelo ilo oiboni le Nkai nelo aanyu olaiguanani te mbata enkoitoi, eteena too nkarash ilo bae otii olpura le nkomom. Ore ejo olaiguanani agiroo, neishiraki ninye olaiguanani ejo, “Eshomo osinka lino empolos olarrabal, naa ng'ura, eibelekenye osikari neyau oltung'ani enatii, naajoki nanu, ‘Ng'ura ele tung'ani; naa tenelo neluaya, neinosieki enkishui ino enkishui enye, aashu ilak entalanta e nkosholai.’ Ore enyamalita osinka lino tene o teidie, neluaya ninye.” Nejoki olaiguanani loo Siraeli ninye, “Neija elo atiu endung'okinoto ino enkiguana; amu iyie makewan otudung'o ina.” Nesiokisioki aitayu ina arasha natii olpura le nkomom, neyiolou olaiguanani loo Siraeli ajo obo loo loibonok le Nkai. Nejoki ninye, “Nji ejo Olaitoriani, ‘Ore enkaraki ninchoo elo too nkaik inono, ilo tung'ani apa laiteng'elaka enkidaaroto, ore enkaraki ina, keinosieki enkishui ino enkishui enye. Neinosieki enkishui oo ltung'ana linono enkishui oo ltung'ana lenyena.’ ” Nelo olaiguanani loo Siraeli enkaji enye te Samaria eiruto neeta osina. Neeta apa Nabot le Yesreel enkurma oo lng'anayio te Yesreel, te mbata e nkaji e nkitoo e Ahab olaiguanani le Samaria. Ore tesiadi ena nejoki Ahab Nabot, “Nchooki nanu enkurma ino oo lng'anayio pee aitaa olchampa loo mbenek, amu ketaaniki enkaji ai. Naa kaaisho nanu enkurma sidai oo sabibu naa tenidol eishiaakino, naaisho elaakinoto enye too mpisai.” Kake etiaka Nabot Ahab, “Too loo papa nanu atujung'o ena kurma, oo lng'anayio. Metomito Olaitoriani tenaa kaaisho nanu iyie.” Nelo Ahab enkaji enye eeta osina netagore enkaraki ina natiaka Nabot le Yesreel ninye. Amu etejo ninye, “Maaisho nanu iyie enjung'ore oo loo papa.” Neirrag ninye te ndapash enye, neibelekeny ninye endukuya enye aing'or idia alo neany einos endaa. Kake eewuo enkitok enye Yesebel enetii ninye nejoki, “Kainyoo pee eeta oltau lino osina eji neaku minos endaa?” Nejoki ninye, ninye, “Enkaraki nairorie nanu Nabot le Yesreel, najoki nanu ninye, ‘Timirakaki nanu enkurma ino oo lng'anayio too ropiyiani, aashu tenidol eishiaakino, nawalu nanu tiae kurma oolng'anayio.’ Newalu ninye ajo, ‘Maaisho nanu enkurma ai oo lng'anayio.’ ” Nejoki Yesebel ina kitok enye ninye, “Keton aa iyie oitore Israel? Tudumunye inosa endaa, nincho metishipayu oltau lino; amu kaaisho nanu iyie ina kurma oo lng'anayio e Nabot le Yesreel.” Neiger ninye mpala te nkarna e Ahab, nemishir ninche to lmishire lenye, neirriwaki lelo payiani o ltung'ana kituaak ooboitare Nabot teina anasa enye. Neiger ninye te nena pala ajo, “Embalie enkolong naeni aapukoo, neishori Nabot enkitoo aaitulusoo too ltung'ana. Nipikipiki iltung'ana oare lemeeta tipat, meetu aaitang'or ninye. Naa nchoo ninche eishankarrarre ninye ejo, ‘Itediaa iyie Enkai o laiguanani!’ Nimbung'ubung'u taa ninye aaya auluo, ninang'inang'a too soito metua.” Ore iltung'ana leina anasa, ilpayiani, o lkituaak apa oomanya ina anasa, neas anaa enatolikio Yesebel ninche. Anaa enaigeroki te nena pala naaigeroko ninye ninche. Neibalunye ninche enkolong naeni aapukoo, neisho Nabot enkitoo aaitulusoo too ltung'ana. Ore ilooti tung'ana oare le pesho, nepuonu aaitang'or ninye, nepuonu lelo le pesho aaishankarrare Nabot te dukuya iltung'ana, ejo, “Etediaa Nabot Enkai o laiguanani.” Neya ninche ninye auluo enkanasa nenang ninye metua too soito. Neitoki ninche aairriwaki Yesebel olkilikuai ejo, “Etanang'aki Nabot too soito, etua ninye.” Ore ake ina kata pee ening Yesebel nchere etanang'aki Nabot ometua too soito, nejoki Yesebel Ahab, “Inyo tudumunye, inyo shomo iwa enkurma oo lng'anayio apa nikitomitikio Nabot too mpisai. Amu meekure eishu Nabot, etua ninye.” Ore ake ina kata pee ening Ahab ajo etua Nabot, nedumunye Ahab adoyio alo aya enkurma oo lng'anayio e Nabot le Yesreel, pee eitaa enenye. Neitoki ororei lo Laitoriani alotu enetii Elija le Tishibi ejo, “Tudumunye shomo tanang'are Ahab olaiguanani loo Siraeli, etii ninye Samaria. Ng'ura etii ninye atua enkurma oo lng'anayio e Nabot, neshomo ninye aya ine aitaa enenye. Shomo iyie tiaaki ninye, ‘Nji ejo Olaitoriani, Itara iyie oltung'ani metua niya ntokitin enyena?’ Nintoki ajoki ninye, Nji ejo Olaitoriani, ‘Ore ine wueji apa nemejie ildiain osarge le Nabot, teine epuo ildiain aamej osarge lino.’” Nejoki Ahab Elija, “Ekinepua nanu lo mang'atinta lai?” Newaliki ajoki, “Ee aainepua, amu itegelaka iyie kewan pee ias mbaa torrok te dukuya Olaitoriani. Ng'ura kayau nanu entorroni shumata iyie, kaaiwuang'ie nanu iyie aishie, naiwuang'ie nanu te Ahab pooki lee, tiatua Israel, oloena o lolakuno. Naa kaitotiu nanu enkaji ino anaa enkaji e Yeroboam olayioni le Nebat, o enkaji e Baasha olayioni le Ahija, tenkaraki ena goro nikintagoro nanu. O enkaraki sii nitorikoko Isiraeli metaasa ing'ok. Ore tialo Yesebel neitoki Olaitoriani ajo, ‘Keinos ildiain Yesebel too lpolosien le Yesreel.’ Ore pooki ng'ae lolmarei le Ahab oye tiatua enkanasa neinos ildiain; ore pooki ng'ae oye tiong'ata neinos ilmotonyi.” Meetae apa oltung'ani otegelaka kewan aas mbaa torrok te dukuya o Laitoriani anaa Ahab oisisayie ninye enkitok enye Yesebel. Etaasa ninye ntabo arubare nkitanyaanyukot. Etaasa ninye anaa apa Ilamori, laa ninche eiturrayie Olaitoriani te dukuya iltung'ana loo siraeli. Ore ake pee ening Ahab lelo rorei, nepolos nkilani enyena, neishopoki kewan ilkuniyiani, neen ninye apukoo neirrag too lkuniyiani, nelo ninye to sina. Neitoki ororei lo Laitoriani alotu enetii Elija le Tishibi, ejo, “Itoduaa ajo eitoborro Ahab kewan te dukuya nanu? Ore enkaraki naitoborro ninye kewan te dukuya nanu, mayau nanu entorroni too nkolong'i enyena. Too nkolong'i oo layiok lenyena nanu ayau entorroni shumata enkaji enye.” Ore apa too larin okuni netoni iltung'ana le Israel o le Siria te seriani. Kake ore to lari liokuni nelotu Yehoshafat olaiguanani le Yuda enetii olaiguanani le Israel. Nejoki ilo aiguanani loo Siraeli isinkan lenyena, “Iyiololo intae aajo enaang oshi Ramot-gilead, naa eikigira oshi iyiook, mikiyieu nikiya aaoru olaiguanani le Siria?” Nejoki Ahab Yehoshafat, “Eikiriamariyie iyie nanu pee kipuo olarrabal te Ramot-gilead.” Nejoki Yehoshafat ilo aiguanani loo Siraeli, “Atiu ake nanu enitiu, netiu iltung'ana laainei anaa enatiu iltung'ana linono, netiu mbartan aainei anaa nkuninono.” Nejoki Yehoshafat ilo aiguanani loo Siraeli, “Tang'asa naa nkilikuanu ororei oing'uaa Olaitoriani.” Neitoki ilo aiguanani loo Siraeli aiturrur iloibonok le Nkai tenebo, oobaya iip ong'uan, nejoki ninche, “kalo nanu olarrabal aarare Ramot-gilead anaa aimalo?” Nejo ninche, “Ilepa shomo amu keishoru Olaitoriani apik nkaik o laiguanani.” Kake enyaaka Yehoshafat ajo, “Aimeekure etii ene likae oiboni lo Laitoriani likinkilikuanishore?” Nejoki ilo aiguanani loo Siraeli Yehoshafat, “Eton etii oltung'ani obo likindim aaikilikuanishore tialo Olaitoriani. Mikaia olayioni le Imla, kake kaiba nanu ninye amu maaibonoki aekata ninye embae sidai, ntorrok ake aaibonoki.” Nejo Yehoshafat, “Mincho olaiguanani ejo neijia.” Neitoki ilo aiguanani loo Siraeli aipotu oltung'ani kitok nejoki, “Toriku ntasieku Mikaia olayioni le Imla.” Ore apa ina kata netonita olaiguanani loo Siraeli o Yehoshafat ilo aiguanani le Yuda too lorikan lenye le nkitoo, etukusote too lkilani lenye. Netoni ninche te wueji neidong'ishoreki tembata enkishomi e Samaria. Neibonisho apa iloibonok pooki te dukuya ninche. Ore Sedekia olayioni le Kenaana neitobiraki kewan imouarak e sekenkei, nejo, “Nji ejo Olaitoriani, ‘Te kuna ipuopuo intae aarrumoo iltung'ana le Siria ometaba anaa neidak.’ ” Neibonisho iloibonok pooki aaiko neijia, nejo ninche, “Ilepa shomo Ramot-gilead timirisho; amu keishoru Olaitoriani apik nkaik olaiguanani.” Ore ilo tung'ani apa oirriwayioki meshomo aipotu Mikaia nejoki ninye, “Ng'ura, ore irorei loo loibonok pooki naa eisidain tialo olaiguanani; nchoo irorei linono metotiwuo anaa irorei liobo lenye, niro mbaa sidain.” Kake etejo Mikaia, “Ore anaa enaishu Olaitoriani, ina naajoki nanu Olaitoriani ninye alo airo.” Ore ake pee elotu ninye enetii olaiguanani, neikilikuan olaiguanani ninye ajoki, “Mikaia eikipuo iyiook olarrabal te Ramot-Gilead anaa aimikipuo?” Newalu ninye ajo, “Shomo timirisho, amu keishoru Olaitoriani apik nkaik olaiguanani.” Kake etiaka olaiguanani ninye, “Ae katitin aja nanu aaikilikuan pee iro esipata ake te nkarna Olaitoriani?” Nejo ninye, “Atoduaa nanu Isiraeli pooki eidapashate too ldoinyo anaa ntare nemeeta olchekut; nejo Olaitoriani, ‘Meeta kulo olaitasheikinoni, nchoo ake errinyo pooki ng'ae enkang enye te seriani.’ ” Nejoki ilo aiguanani loo Siraeli Yehoshafat, “Keitu nanu aajoki iyie meibonu ninye embae sidai, kake entorrono eibonu?” Neitoki Mikaia ajo, “Entoning naa ororei lo Laitoriani: Atoduaa nanu Olaitoriani eton to lorika lenye le nkitoo. Ore olorora pooki le shumata neitashe te mbata enye te nkalo e tatene o te kedienye. Nejo Olaitoriani, ‘Kaing'ae ilo olo alej Ahab, meilepa ninye alo metaari metua te Ramot-gilead?’ Nejo ake oltung'ani embae nabo nejo olikae enkae bae. Nelotu enkiyang'et naishu aitashe te dukuya Olaitoriani, nejo, ‘Kalo nanu alej ninye.’ Nejoki Olaitoriani ninye, ‘Kaitiaa oitoi?’ Nejo ninye, ‘Kalo nanu aaku ololejisho too nkutukie oo loibonok pooki.’ Nejo ninye, ‘Ilo iyie alej ninye naa ilo aidimu ninye, shomo naa taasa ina.’ “Ore naa taata, ng'ura etipika Olaitoriani oltau le lejare kulo oibonok pooki; eimaka Olaitoriani embae torrono tialo iyie.” Nenyiku Sedekia olayioni le Kenaana neosh Mikaia eseder, nejoki, “Kaji eiko enkiyang'et o Laitoriani tenepuku te nanu nelotu airo te iyie?” Nejo Mikaia, “Ng'ura, ilo kenya adol teina olong nilo ajing'ie olgilata liaji isudori.” Nejo ilo aiguanani loo Siraeli, “Embung'a Mikaia eyaki Amon olbalusui le nkanasa, o Yoash olayioni lo laiguanani; nipuopuo aajo, Nji ejo olaiguanani, Entipik ena tung'ani atua korokoroni nintotiti ninye too mukateni o te nkare ake ometaba anaa narrinyunye te seriani.” Nejo Mikaia, “Tenirrinyunye iyie te seriani, neitu naa aairorie nanu Olaitoriani.” Neitoki ajo, “Entoning lo tung'ana pooki!” Kaae nelo apa olaiguanani loo Siraeli o Yehoshafat olaiguanani le Yuda Ramot-gilead. Nejoki olaiguanani loo Siraeli Yehoshafat, “Kalo nanu anapa pee alo olarrabal, kake nchopo iyie ilkilani linono le nkitoo.” Nelo olaiguanani loo Siraeli anapa nelo olarrabal. Neitanap apa olaiguanani le Siria lelo arikok le pokira tomoni uni oare loo ngarrin oo mbartan, ejo, “Emiaar oltung'ani kitok aashu oloti, kake olkitok loo Siraeli ake entaar.” Ore ake pee edol lelo akedok loo ngarrin oo mbartan Yehoshafat, nejo, “Esipa olaiguanani le Israel.” Kaae neibelekenya aarare ninye, neyietu Yehoshafat aishir. Ore ake pee edol lelo arikok loo ngarrin oo mbartan ajo mme olaiguanani loo Siraeli, neibelekenya aapuo te sujaroto enye. Kake eteyietuo oltung'ani obo enkawuo enye, neng'or olaiguanani loo Siraeli eripata e long'o enye, to lgoo. Ore enkaraki ina nejoki olaiguanani ilo arewani le ngarri enye oo mbartan, “Mbelekenyayu, iwaki matung'uai olarrabal, amu aatipikaki olbae.” Neirowuaju olarrabal ina olong, neigarakino olaiguanani engarri enye eing'or enkalo oo ltung'ana le Siria. Ore pee eaku teipa neye ninye, ore osarge leina ng'oroto neiput oltiren leina garri oo mbartan. Ore etaa kedoyio enkolong neibulu olkiyioi enkop pooki, eji, “Shomo pooki tung'ani enkanasa enye, nelo pooki tung'ani enkop enye!” Kaae neaku etua olaiguanani, neyauni ninye Samaria; nepuoi aanukaa ninye te Samaria. Nepuoi aaituku ina garri oo mbartan to lchorro le Samaria nemej ildiain ilo sarge lenye, ore nkituaak naaibor onyek neituku ate teilo sarge, te risioroto eilo rorei le Nkai apa oiroro ninye. Ore nkulie kiaasin e Ahab, o nena pooki naataasa ninye, o ina aji oo lala loo lkanchaoni apa natesheta ninye, o nena anas pooki apa naatesheta ninye, neigero tiatua embuku oo ntepen oo laiguanak loo Siraeli. Kaae neirura Ahab neye anaa loo menye, neitoreisho Ahasia te rishata enye. Neiteru Yehoshafat olayioni le Asa aitore Yuda to lari liong'uan le enkitoria e Ahab olaiguanani loo Siraeli. Oloo larin tomoni uni o imiet apa Yehoshafat pee eiteru aitoreisho, neitoreisho ninye ilarin tikitam o imiet te Yerusalem. Ore apa enkarna e ng'otonye naa Asuba entito e Shilhi. Nerubare ninye orrekie le Asa Papaai lenye, eitu ninye eibelekenya apaash easata oo mbaa sidain te dukuya Olaitoriani. Ore ake eyia eitu eyai iwuejitin neeika, ore iltung'ana neitayu ilasarri nepej enkorropil te nena wuejitin neeika. Eitobira sii apa Yehoshafat osotua o laiguanani loo Siraeli. Ore apa nkulie kiaasin e Yehoshafat, oina kidimata enye naitodolua, oina nashomo olarrabal, neigeroki tiatua embuku oo ntepen oo laiguanak le Yuda. Ore olpisiai le lelo ooibor onyek apa ootelekutua too nkolong'i e papaai lenye, neishie ninche teina kop. Meetae apa olaiguanani te Edom; olaiguanani oti ninye apa etegeluaki neitobir Yehoshafat imelin e Tarshish pee epuo Ofir aayau sahabu; kake eitu ninche epuo, amu eidaaitie nena melin te Esiong'eber. Neitoki Ahasia Olayioni le Ahab ajoki Yehoshafat, “Nchoo isinkan laainei epuo tenebo isinkan linono too melin.” Kake eitu enyorraa Yehoshafat. Neirrag Yehoshafat airura neye anaa loo menye, nenukari te nkurare oo loo menye te nkanasa e Daudi papaai lenye. Neitoreisho Yehoram olayioni lenye te rishata enye. Neiteru Ahasia olayioni le Ahab aitoreisho te Isirael te Samaria to lari le tomon oopishana le nkitoria e Yehoshafat olaiguanani le Yuda, neitoreisho ninye ilarin oare te Israel. Etaasa apa ninye embae torrono too nkonyek o Laitoriani, nerubare orrekie le papaai lenye, o rrekie le ng'otonye, o rrekie le Yeroboam olayioni le Nebat, laa ninye apa oitapong'oyie Isiraeli metaasa eng'oki. Eisiaayia apa ninye Baal neserem ninye, neitagor Olaitoriani, Enkai e Israel, te pooki oitoi apa nataasa menye. Ore eidipa Ahab atua, neiser Moab apaashare Israel. Nesulunye apa Ahasia to lkitara le nkaji e shumata, te Samaria, neirrag ninye etamuoyia. Neaku eirriwayie ninye ilkiliku ajoki olorere, “Enchom enkilikuanishore Baalsebub, ina ai e Ekron tenaa kaishiu nanu tena muoyian.” Kake etiaaka olmalaika le Nkai Eliya le Tishibit, “Tudumunye shomo tanang'are ilkiliku lo laiguanani le Samaria, nijoki ninche, ‘Kenkaraki nemeetae Enkai te Israeli pee ishomo aaikilikuanishore Baalsebub, ina ai e Ekron?’ Ore naa taata, nji ejo Olaitoriani, ‘Mipuku iyie teina dapash nitii, kake esipa iye iyie.’ ” Nelo Eliya. Nerrinyo lelo tung'ana lo lkilikuai aapuo enetii olaiguanani, nejoki ninye ninche, “Kainyoo intae pee itorrinyunye?” Nejoki ninche ninye, “Eewuo oltung'ani anang'are iyiook, nejoki iyiook, ‘Entorrinyoto enchom enetii ilo aiguanani oirriwua intae, nijokiki ninye, Nji ejo Olaitoriani, Kenkaraki nemeetae Enkai te Israel pee irriwayie ilkiliku meshomo aaikilikuanishore Baalsebub, ina ai e Ekron? Ore enkaraki ina midou iyie teina dapash nitii, kake iye iyie.’” Nejoki ninye ninche, “Kaa pukunoto o ltung'ani ilo tung'ani oewuo anang'are intae, nejoki intae kuna baa?” Newaliki ninche ninye aajoki, “Eishopito enkila oo lpapit neeta enkimeita o lchoni te mpolos enye.” Nejo ninye, “Eliya le Tishibit ilo.” Neitoki olaiguanani airriwaki ninye olkitok le njore loo ltung'ana onom. Neilep ninye alo enetii Eliya, etonita te nchumata e ndoinyo, nejoki ninye, “Lo tung'ani le Nkai, ejo olaiguanani, ‘Tadou wou.’ ” Kake etiaaka Eliya ilo arikoni le njore loo ltung'ana onom, “Tenaa kara nanu oltung'ani le Nkai, nchoo edou enkima naing'uaa shumata, nikinos iyie o lelo tung'ana linono onom.” Nedou enkima naing'uaa shumata neinos ilo tung'ani o lelo tung'ana lenyena onom. Neitoki olaiguanani airriwaki ninye o likae kitok le njore loo ltung'ana onom, tenebo iltung'ana lenyena pokira onom. Neilep ninye alo enetii nejoki ninye, “Lo tung'ani le Nkai, enkitanapata o laiguanani ena, ‘Tasioki tadou!’ ” Kake etawalikia Eliya ajoki ninche, “Tenaa kara nanu oltung'ani le Nkai, nchoo edou enkima naing'uaa shumata nikinos iyie o kulo tung'ana linono pokira onom.” Nedou enkima e Nkai naing'uaa shumata neinos ninye o lelo tung'ana lenyena pokira onom. Neitoki olaiguanani airriwaa olarikoni le ntukus e uni oo ltung'ana onom, tenebo iltung'ana lenyena onom. Ore ilo arikoni liokuni le njore loo ltung'ana onom, neilep alo. Nelotu agil kung te dukuya Eliya, nesai ninye ajoki, “Lo tung'ani le Nkai, aatoomono iyie, nchoo enkishui ai o enkishui e kulo sinkan linono menoto tipat too nkonyek inono. Ng'ura etadowuo enkima naing'uaa shumata neinos lelo arikok le njore loo ltung'ana maa onom, o lelo tung'ana lenye maa onom. Kake ore naa taata nchoo enkishui ai menoto tipat too nkonyek inono.” Neitoki olmalaika le Nkai ajoki Eliya, “Tadoi shomo tenebo ninye; miureyu iyie ninye.” Nedumunye ninye nedoyio alo tenebo ninye, enetii olaiguanani. Nejoki ninye, “Nji ejo Olaitoriani, ‘Ore enkaraki irriwayie ilkiliku meshomo aaikilikuanishore Baalsebub, ina ai e Ekron, kenkaraki nemeetae Enkai te Israel, pee inkilikuanishore too rorei lenyena? Ore enkaraki ina midou iyie teina dapash nishomo, ajing', kake meeta nchere pee miye iyie.’ ” Neaku etua ninye terisioroto o rorei lo Laitoriani oiroro Eliya. Neaku Yoram olalashe lenye olaiguanani terishata enye, to lari liare le Yehoram olayioni le Yehoshafat, olaiguanani le Yuda. Amu meeta apa Ahasia olayioni. Ore apa nkulie kiaasin pooki e Ahasia naataasa ninye, neigero tiatua embuku oo ntepen oo laiguanak le Israel. Ore etaa kejo pee eya Olaitoriani Eliya ailepie shumata, to lkutati, negira Eliya o Elisha aairiamari te nkoitoi eing'uaa Gilgal. Nejoki Eliya Elisha, “Totona tene aatoomono amu aairriwayie nanu Olaitoriani Betel.” Kake etejo Elisha, “Ore anaa enaishu Olaitoriani o anaa eninchu iyie makewan, maaing'uaaa nanu.” Nedoyio ninche aapuo Betel. Nepuonu ilayiok loo loibonok le Nkai nejoki Elisha, “Iyiolo iyie ajo keya taata Olaitoriani olkitok lino, nikintung'uaa iyie?” Nejo ninye, “Ee kayiolo, entirring'ata ake intae.” Neitoki Eliya ajoki ninye, “Elisha, totona tene, aatoomono amu aairriwayie nanu Olaitoriani Yeriko.” Kake etejo ninye, “Ore anaa enaishu Olaitoriani, o anaa eninchu iyie makewan, maaing'uaaa nanu iyie.” Nepuonu ninche Yeriko. Ore ilayiok loo loibonok le Nkai ootii Yeriko nepuonu aataaniki Elisha, nejoki ninye, “Iyiolo iyie ajo keya taata Olaitoriani olkitok lino nikintung'uaa iyie?” Newal ninye ajo, “Ee kayiolo, entirring'ata ake intae.” Neitoki Eliya ajoki ninye, “Totona tene, aatoomono, amu aairriwayie nanu Olaitoriani Yordan.” Kake etejo ninye, “Ore anaa enaishu Olaitoriani, o anaa eninchu iyie makewan maaing'uaaa nanu iyie.” Neaku eiriamari aapuo pokira oare. Nepuo iltung'ana onom le lelo ayiok loo loibonok le Nkai, neitashe tenelakuaniki ninche, neitashe ninche pokira oare tembata olkeju le Yordan. Neitayu Eliya olkila lenye nenunuk, neoshie enkare, neoro enkare neito ena shoto o enda shoto. Neim ninche pokira oare ine etaa enkop natoyio. Ore ake pee eidip aatalang', nejoki Eliya Elisha, “Tolimu embae niyieu naaitaas eton eitu aayae aaitung'uaa iyie.” Nejo Elisha, “Aatoomono, ntujung'oki nanu enkiyanget inokat are oltau lino.” Nejoki ninye, “Inkilikuanua iyie embae nagol, kake ore ake eyia, tenikiduaaya nanu aayaitae aaitung'uaa iyie, naa ketiu neijia te iyie, kake tenimikiduaaya iyie, nemetiu neijia.” Ore epuoito ninche einosaa lomon, ng'ura, nerish ninche pokira oare engarri oo mbartan e nkima. Nelo Eliya to lkutati shumata. Nedol Elisha ina bae, neishir ajo, “Papaai lai! Papaai lai! Ngarrin oo mbartan e Israel o lakedok lenyena loo mbartan!” Neitu ninye eitoki adol Eliya. Neitoki ninye aibung ilkilani lenyena, nepolos aitaa are. Nedumu ninye ilo kila apa oitadoikio ninye, nerrinyo ninye nelo aitashe tembata olkeju le Yordan. Neitoki ninye adumu olapa kila le Eliya oitadoikio ninye, neoshie enkare, ejo, “Koree Olaitoriani, Enkai e Eliya?” Ore ake pee eosh enkare, neoro enkare, nelo ena shoto o enda shoto; nelang Elisha alo. Ore ake pee edol lelo ayiok loo loibonok le Nkai apa ootii Yeriko ninye, nejo ninche, “Etii Enkiyang'et e Eliya Shumata Elisha.” Nepuonu ninche aanang'are ninye, neirrugo aaitabaiki nkomomi enkop te dukuya ninye. Nejoki ninche ninye, “Etii tenebo isinkan linono iltung'ana onom oogol; aatoomono nchoo ninche epuo aaing'oru olkitok lino, ebaiki neewa ninye Enkiyang'et o Laitoriani nelo anang'aki ninye likae doinyo, aashu epik atua oerata.” Nejo ninye, “Mirriwaa intae ninche.” Kake ore ake pee eitirrishaki ninye o metaba anaa nedol enkurruna, nejo ninye, “Erriwai.” Neirriwaa ninche iltung'ana onom; ore too nkolong'i uni, neing'oru ninye kake eitu etum ninye. Nerrinyunye ninche aapuonu enetii ninye etonita te Yeriko, nejoki ninye ninche, “Keitu nanu ajoki intae emipuopuo?” Nejoki apa iltung'ana le nkanasa Elisha, “Ng'ura, eisidai ena anasa, anaa enadolita olkitok lai; kake eitorrono enkare, nemeisho enkop.” Nejo ninye, “Eyakaki nanu olbakuli ng'ejuk, nipikipiki emunyan atua.” Neyaki ninche ninye. Nelo ninye enetii enchorro e nkare neisuaaki emunyan atua, nejo, “Nji ejo Olaitoriani aitamelono nanu ena are, ore ebaiki ena kata meitokini ae kata aatum keeya anaa olkibiroto tialo ena are.” Neaku eitamelonoki apa ina are ometabaiki ena olong', terisioroto eilo rorei apa oiroro Elisha. Nedumunye ninye teine nelo Betel; ore eloito ninye te nkoitoi, nepuonu nkuti ayiok aakueniyie ninye, ejo, “Ilepa shomo iyie olokurro lukunya! Ilepa shomo olokurro elukunya!” Neibelekenya ninye anang silig, ore ake pee edol ninche, nedek ninche te nkarna o Laitoriani. Neipang'u tiatua entim ilng'arurum oare le ntim nedung nena ayiok artam o are aaitaa ndung'udung'ot. Nedumunye teine nelo oldoinyo le Karmel neitoki arrinyo alo Samaria. Ore to lapa le tomon oo kuni le nkitoria e Yehoshafat olaiguanani le Yuda, etaa Yehoram olayioni le Ahab olaiguanani loo Siraeli te nkop e Samaria. Neitoreisho ninye ilarin tomon oare. Etaasa ninye entorroni too nkonyek o Laitoriani, hoo neitu etiu anaa menye o ng'otonye, amu eiwuang'ie ninye eng'ape e Baal apa naitobira papaai lenye. Ore ake eyia eibung'are ninye eng'oki e Yeroboam olayioni le Nebat, apa natorikoko Israel metaasa eng'oki. Eitu ninye eing'uaa ina ng'oki. Ore apa Mesha olaiguanani le Moab naa olaramatani loo nkerra. Naa ore ake to lari neisho olaiguanani le Israel ilkuoo le kerra nkalifuni iip nabo. O lpapit loo nkerra loo lmeregeshi nkalifuni iip nabo. Kake ore ake pee eye Ahab, neiser olaiguanani le Moab apaashare olaiguanani le Israel. Neaku eshomo apa teina kata olaiguanani Yehoram tiatua enkop e Samaria pooki, neiturrur Isiraeli pooki. Nelo ninye airriwaki olkilikuai Yehoshafat olaiguanani le Yuda, nejoki, “Eisero olaiguanani le Moab tialo nanu; aimikiriamariye nanu olarrabal le Moab?” Nejoki ninye, “Kalo nanu; atiu nanu anaa enitiu iyie, netiu iltung'ana linono anaa iltung'ana laaainei, netiu mbartan aainei anaa mbartan inono.” Neitoki ninye ajo, “Kaa oitoi iyiook kipuo aaim?” Newal Yehoram ajo, “Enkoitoi e ong'ata e Edom.” Neaku eshomo olaiguanani le Israel tenebo olaiguanani le Yuda o laiguanani le Edom. Ore ake pee eidip ninche aashom elototo oo nkolong'i naapishana, neishunye enkare naok enjore o enaok ng'uesi apa naasujita ninche. Neitoki olaiguanani le Israel ajo, “Wooi Ee! Eipotuo Olaitoriani kulo aiguanak pokira okuni pee elotu apik ninche nkaik e Moab.” Nejo Yehoshafat, “Aimeetae oloiboni le Nkai tene pee kitum iyiook aaikilikuanishore tialo Olaitoriani?” Neitoki obo osinka loo lelo sinkan lo laiguanani loo Siraeli awal ajo, “Etii Elisha olayioni le Shefat ene, laa ninye apa otubukoko enkare nkaik e Eliya.” Nejo Yehoshafat, “Etii ororei lo Laitoriani tenebo ninye.” Nedoyio olaiguanani loo Siraeli o Yehoshafat o laiguanani le Edom aapuo enetii ninye. Nejoki Elisha olaiguanani loo Siraeli, “Kainyoo nanu aatakinore iyie? Shomo enetii iloibonok le papaai lino o loibonok le yieyioo lino.” Kake etiaaka olaiguanani loo Siraeli ninye, “A-a; Olaitoriani oipotuo kulo aiguanak pokira okuni apik nkaik e Moab.” Nejo Elisha, “Ore anaa enaishu Olaitoriani loo lororani, laa ninye nanu aisiaai, teneme napaji Yehoshafat olaiguanani le Yuda, anaata maashilaa iyie nemaaing'or iyie. Kake ore naa taata entorikokoki olaranyani.” Ore ake pee eranyisho olaranyani, nelotu engolon o Laitoriani shumata ninye. Nejo ninye, “Nji ejo Olaitoriani, ‘Ore ele erata otoyio kaiput nanu enkare.’ Amu nji ejo Olaitoriani ‘Midolidolo intae olkutati anaa enchan, kake ore ele erata pooki naa keiputi enkare, pee itumutumu aatook, intae, o nkishu inyi, o ng'uesi inyi.’ Embae nalelek ena too nkonyek o Laitoriani; naa keishoru sii Ilmoabu apik atua nkaik inyi. Naa ipuopuo intae aaibung pooki anasa nasheta isunta, o pooki anasa yioloti, niuroo pooki shani sidai, nimbooyoyo nkonyek oo nkariak pooki, ninyalinyala pooki kop sidai too soito.” Ore te nkolong nasuju tadekenya, etaa enkata naishoori ilasarri, ng'ura, nelotu enkare naing'uaa enkalo e Edom, o metaba anaa neiput enkare enkop. Ore ake pee ening Ilmoabu nchere eetuo ilaiguanak aagilunore ninche, ore pooki ooidim aatanap imasaa o larrabal, eiteru to loti o metabaiki to lbotor, neipotuni nepuoi aaibok to lpolosie. Ore ake pee edumunye ninche tadekenya, nedal enkolong ina are, nedol Ilmoabu enkare te dukuya ninche enyokie anaa osarge. Nejo ninche, “Osarge ele; esipa etumutakinote ilaiguanak maate, netaarate maate. Ore naa taata, Moab nalo aya iyarunot.” Kake ore ake pee epuonu ninche, ilng'oborri le Israel, nedumunye Israeli nerasaki Ilmoabu, o metaba anaa neipirri aailanyisho te dukuya ninche. Nepuo ninche dukuya ear Ilmoabu too lalema epuoito. Neibung ninche nkanas, ore te pooki kop sidai, nenang'aki pooki tung'ana osoit, ometaba anaa neiput isoito. Neibooyo pooki ong'u naruko enkare, neuroo ilkeek pooki sidain, ometaba anaa niaaku isoito ake ootelekutua te Kiharet. Neng'adu ilang'orok loo soito te nkopito ine neisulie. Ore ake pee edol olaiguanani le Moab ajo etii olarrabal agilunore ninye, neshoroo iltung'ana oata ilalema, iip naapishana pee epuo aagiroo olaiguanani le Edom, kake eitu ninche eidim aashom. Neitoki ninye ayau olkikau lenye laa ninye ojing te rishata enye te nkitoria, neitayu ninye aitaa olasar opejori te nchumata e suntai. Nejing engoro napi Israel, nepuo ninche aaing'uaa ninye nerrinyo aapuo enkop enye. Ore enkitok e obo le lelo ayiok loo loibonok le Nkai, neishiraki Elisha ejo, “Etua osinka lino olmoruo lai; niyiolo iyie ajo keure apa osinka lino Olaitoriani. Kake eewuo ilo apa likiaata esile enye aya nkera aainei pokira are aitaa irrindiki lenyena.” Nejoki Elisha ninye, “Kaa iyieu naitaas nanu? Tolikioki nanu entoki niaata tiatua aji?” Nejoki ninye, “Meeta esinka ino toki tiaji meteleku esiang'au e ilata.” Neitoki ninye ajo, “Shomo enetii olelatia ino toomonu imasaa e aji to lelatia ino pooki, imasaa nemetii toki naa kumok. Nintoki alo atua aji ninkenoo kewan tiaji o layiok linono, nipik eilata nena masaa pooki, naa teneiput nabo, ninteng'el.” Neaku eshomo ninye aing'uaa Elisha, nelo aikenoo kewan o layiok lenyena. Ore ebukoki ninye eilata, neyau ilayiok lenyena nena kulie masaa aaitinyikaki ninye. Ore ake pee eiputayu nena masaa, nejoki ninye olayioni lenye, “Nyaaki iyakaki enkae.” Nejoki olayioni lenye ninye, “Meekure etii ae.” Neishunye erukunoto eina ilata. Neipang'u ninye nelotu aliki ilo tung'ani le Nkai, nejoki ninye, “Shomo timira ina ilata nilo alak isilen inono, ore iyie o layiok linono ninosinoso enkae ilata.” Ore nabo olong nelo Elisha Shunem, netii ine enkitok karsis natiaaka ninye pee einos endaa. Naa ore apa enkata pooki naim ine nelo ainos endaa te nkaji enye. Nejoki ina kitok olpayian lenye, “Ng'ura ore taata, kamusu nanu ajo, oltung'ani osinya le Nkai ele, oimita ena oitoi ang anaake. Maitobira iyiook enkiti aji naitushura netii isunta, nikipikaki ninye endapash, o emesa, o lorika, o ltaa, paa ore enkata ake pooki nalotu ninye enikitii, neidim ashomo ine.” Ore nabo olong nelotu ninye ine, nelo ninye ilo gilata neyeng'iyeng'a teine. Nejoki ninye Gehasi osinka lenye, “Mpotu ena kitok e shunam.” Ore ake pee eipotu ninye, neitashe ina kitok te dukuya ninye. Nejoki ilo sinka ninye, “Irorie iyie ninye, ng'ura ajo itanyamala iyie oleng te nkaraki iyiook, kaa iyieu nikintaasi iyie? Iyieu neirorieki terishata ino olaiguanani tenaa olkitok le njore?” Newalu ina kitok ajo, “Atua olorere lang nanu atii.” Neitoki ninye ajoki, “Kaa naa eitaasi ninye?” Newal Gehasi ajo, “Meeta ninye olayioni, netamorua olpayian lenye.” Nejoki ninye, “Mpotu ninye.” Ore ake pee eipotu ninye, nelotu ninye aitashe te kutukaji. Nejo Elisha, “Ore tena rishata tenemanu olari naa eitum iyie enkayioni.” Nejo ina kitok, “A-a olkitok lai, lo tung'ani le Nkai, milej iyie esinka ino.” Kake eiroshiwuo apa ina kitok, neiu enkayioni te rishata naaijo ina, te rishata o loirujuruj anaa apa enatiaaka Elisha ninye. Ore etubulua ina kerai nelo nabo olong enetii papaai lenye tiatua ilaisampuak. Nejoki ninye papaai lenye, “Oi endukuya ai, endukuya ai!” Nejoki papaai lenye osinka lenye, “Ewaita ninye enetii ng'otonye.” Ore ake pee edumu ilo sinka ninye, neyau enetii ng'otonye, neton ina kerai too nkejek e ng'otonye o meiulo enkolong', neye. Nedumu ninye nelo airragie te ndapash o ltung'ani le Nkai, neiken kutukaji, neipang alo. Neitoki aipot olpayian lenye, nejoki, “Irriwakaki obo loo laisiaayiak o esikiria nabo, pee atum nanu atasiooi ashomo enetii oltung'ani le Nkai, naitoki arrinyunye.” Nejo ninye, “Kainyoo iyie pee iyieu nilo enetii ninye taata? Mme olapa ng'ejuk neme sabato.” Nejo ina kitok, “Kesidanu mbaa.” Neirot ninye esikiria, nejoki osinka lenye, “Isiosionie osikiria, nimilo akiti ometaba anaa naajoki.” Neaku etudumunye ninye nelotu ine netii oltung'ani le Nkai, to ldoinyo le Karmel. Ore ake pee edol oltung'ani le Nkai ina kitok elotu, nejoki ninye Gehasi osinka lenye, ng'ura elotu enkitok e Shunam te idie. Kueta nabo kata shomo tanang'are ninye, nijoki ninye, Aisidan mbaa tialo iyie? Aisidan mbaa tialo eno lpayian lino? Aisidan mbaa tialo enkerai ino? Newal ninye ajo, “Aisidain.” Ore ake pee elotu ina kitok oldoinyo ine netii oltung'ani le Nkai, neibung ninye nkejek enyena, nelotu Gehasi aiwuang'ie ninye. Kake etejo ilo tung'ani le Nkai, “Tapala ninye, amu etii ninye atua osina ogol; neisudoyie Olaitoriani tialo nanu. Neitu aaliki nanu.” Neitoki ina kitok ajo, “Kaatoomono nanu olkitok lai olayioni? Keitu nanu ajo, mikilej nanu?” Nejoki ilo tung'ani le Nkai Gehasi, “Terretena empolos ino, ninap eng'udi ai te nkaina ino, nilo. Teninang'are oltung'ani nimiroroki ninye, naa tenikiroroki ninye niming'amaa, nilo aiteleiki ena ng'udi enkomom eina kerai.” Neitoki ng'otonye ina kerai ajo, “Ore anaa enaishu Olaitoriani o anaa eninchu iyie makewan maaing'uaaa nanu.” Neaku etudumunye ninye nesuj ninye. Neituruk Gehasi alo neiteleiki ina ng'udi enkomom eina kerai kake eitu etumi enkikashata anaa enkitoduaata e nkishui. Neaku etorrinye alo anang'are ninye, nejoki ninche, “Eitu einyototo ina kerai.” Ore ake pee ejing'u Elisha atua ina aji, nedol ina kerai eirrag etua te ndapash enye. Nelo ninye atua aji neiken kutukaji neaku ninche ake pokira are tiatua ina aji. Neomon Olaitoriani. Neilepaki ninye endapash neirrag te nchumata eina kerai, nepik enkutuk enye enkutuk eina kerai, nepik nkonyek enyena nkonyek eina kerai, neiteleiki nkaik enyena nkaik eina kerai, neitoriori ninye te nchumata ina kerai, neirowuaju osesen leina kerai. Neitoki ainyototo nelo nabo kata amanimanaa tiatua aji, neitoki ailepaki endapash eina kerai, nesing ina kerai katitin naapishana, nebol nkonyek enyena. Neitanap ninye Gehasi ajoki, “Mpotu ena kitok e Shunam.” Neipotu Gehasi ninye. Ore ake pee elotu ina kitok enetii Elisha, nejoki ninye, “Tudumu enkayioni ino.” Nelotu ninye nebatata too nkejek enyena, neirrugo abaiki enkop; neitoki adumu enkayioni enye neipang alo boo. Neitoki Elisha alotu Gilgal naa aisapuk olameyu teina kop. Ore etonita nkera oo loibonok le Nkai te dukuya ninye, nejoki ninye, osinka lenye, “Ntobira emoti sapuk pee iyier endaa te nkaraki ninche.” Nelo obo lenye ong'ata asotu ilkeek le ntim, netum olchani loo lng'anayio liong'ota, ore teilo shani neitayu ilng'anayio, nelotu adung'udung'oki emoti endaa, nemeyiolo ninye ajo kainyoo lelo. Nebukoki ninche lelo tung'ana meinosa. Kake ore einosita ninche ina daa, neishir aajo, “Lo tung'ani le Nkai, enkeeya natii atua ena moti!” Nelaikino ninche aainosa. Nejo ninye, “Eyau naa endaa.” Nenang'aki atua ina moti, nejo, “Entooriki iltung'ana, pee etum aainosa.” Neitu eitoki atii entoki torrono atua ina moti. Nelotu oltung'ani oing'uaa Baal-shalisha, neyaki oltung'ani le Nkai imukateni tikitam e shairi, o lng'osil ng'erng'er le ntapa ootii olbene lenye. Nejo Elisha, “Nchoo kuna iltung'ana pee etum aainosa.” Kake etejo osinka lenye, “Kaji nanu aiko te naisho kuna iltung'ana iip nabo?” Neigil Elisha ajo, “Nchoo ninche iltung'ana, pee etum aainosa, amu neijia ejo Olaitoriani, ‘Keinos ninche neleku.’ ” Neaku eirragie ninye ina daa te dukuya ninche, neinos ninche, neleku, te risioroto ororei lo Laitoriani. Ore apa Naaman olkitok le njore o laiguanani le Siria, naa oltung'ani kitok to lkitok lenye netum omom oleng', amu te nkaraki ninye apa eishoo Olaitoriani Siria enkisulata. Oltung'ani apa magilani yioloti, kake eeta enkeeya oo lbolot. Ore apa iltung'ana le Siria te njore enye nabo, neraya enkiti sila aisiaayiani te nkop oo Siraeli, naa enkitok e Naaman apa eisiaai. Nejoki ina sila ina kitok e Naaman, “Tenaa napaji ketumore olkitok lai oloiboni le Nkai otii Samaria anaata eishiunye ninye teina keeya enye oo lbolot.” Nelo Naaman atua aji nelo ajoki olkitok lenye, “Nji eiroro ajo ena aisiaayiani naing'uaa enkop oo Siraeli.” Nejo, olaiguanani le Siria, “Shomo taata, amu kairriwaki nanu empalai olaiguanani loo Siraeli.” Neaku eshomo ninye, neshoroo talanta tomon, o shekeli nkalifuni ile e sahabu, o ntukusi tomon oo nkilani. Neyaki ina palai olaiguanani loo Siraeli, neigero ajo, “Tenebau ena palai enitii, tayiolo nchere aairriwaka Naaman osinka lai, pee itum aishiunye ninye teina keeya enye oo lbolot.” Ore ake pee eisum olaiguanani loo Siraeli ina palai, nepolos nkilani enyena nejo, “Kara nanu Enkai, naar metua neitoki aitopiu, eji metaa kaairriwaki ele tung'ani olkilikuai pee aishiunye oltung'ani oata enkeeya oo lbolot? Tadamu pee idol ajo olarrabal eing'oru te nanu.” Ore ake pee ening Elisha, ilo tung'ani le Nkai ajo etopolosa olaiguanani loo Siraeli nkilani, neirriwaki olaiguanani olkilikuai, ejo, “Kainyoo iyie pee itopolosa nkilani inono? Nchoo ninye elotu enatii pee eyiolou ajo etii oloiboni le Nkai Israel.” Neaku eewuo Naaman too mbartan enyena, o ngarrin oo mbartan, neitashe te kutuk aji e Nkaji e Elisha. Neirriwaki Elisha ninye olkilikuai ejoki, “Shomo intukuoyu to lkeju le Yordan katitin naapishana, pee esidanu osesen lino nilaari aishiu.” Kake etagore apa Naaman oleng, nelo ejoito, “Ng'ura, kajo duoo nanu kelotu enatii, neitashe, neipot enkarna o Laitoriani Enkai enye, neyuk enkaina enye te shumata ene wueji naaya, neishiu enkeeya oo lbolot. Amaa Abana o Fabar, lelo kejek le Dameski, aimesidan ninche aalang nkariak pooki e Israel? Aimaidim nanu aitukuore nena naishiu?” Neaku eibelekenye ninye alo te ngoro. Kake eetuo isinkan lenyena aataaniki nejoki ninye, “Papa lai, amaa tenaa eikintanapa oloiboni le Nkai entoki sapuk, aime anaata itaasa? Kebaa naa elusoo tenetejo ninye, ‘Ntukuoyu pee isidanu?’ ” Nedoyio ninye nelo adoiki olkeju le Yordan katitin naapishana, te risioroto o rorei lo ltung'ani le Nkai, neishiu osesen lenye netiu anaa osesen le nkerai kiti nesidanu. Neitoki ninye arrinyunye alotu enetii oltung'ani le Nkai nejoki, ninye o encholuek enye pooki, nelotu aitashe te dukuya ninye, nejo ninye, “Ng'ura ayiolo nanu ajo meetae Enkai te nkop pooki meteleku te Israeli. Tang'amai naa taata enkishoroto naing'uaa osinka lino.” Kake etejo Elisha, “Ore anaa enaishu Olaitoriani, laa ninye nanu aisiaai, mang'amu nanu hoo toki.” Nesai ninye metang'amu kake etanya. Neitoki Naaman ajo, “Teniming'amaa, aatoomono naa, nchoo naa meishori osinka lino inyumpui are naanap ilolan, amu ore ebaiki ena olong', meigil osinka lino aitayu olasar opejori, anaa olasar liae ai meteleku ake Olaitoriani. Ore tena bae metapalaki Olaitoriani osinka lino: Tenelo olkitok lai atua enkaji e Rimion aserem teine, naigarakino nanu enkaina ai, nairrugo nanu tiatua enkaji e Rimon, metapalaki Olaitoriani osinka lenye tena bae.” Nejoki Elisha Naaman, “Shomo te seriani.” Kake ore eidipa Naaman ashomo atung'uai Elisha te nkiti rishata, ore Gehasi ilo sinka le Elisha, nejo, “Dol ajo etapala olkitok lai ele tung'ani oji Naaman le Siria, neitu eng'amaa te nkaina enye nena tokitin naayawua ninye. Ore anaa enaishu Olaitoriani, kasujaa nanu ninye pee atum toki te ninye.” Neaku etusujayie Gehasi Naaman. Ore ake pee edol Naaman oltung'ani okuetu osujaa ninye, nedou ninye te ngarri oo mbartan nenang'are ninye. Nejo, “Keseriani ake?” Nejo ninye “Eseriani ake.” Nejo Gehasi, “Aairriwua nanu olkitok lai pee ajoki, ‘Eetuo tena kata enatii nanu ilbarnot ooing'uaa enkop oo ldoinyo e Efraim, ilbarnot oare loo layiok loo loibonok le Nkai, aatoomono nchoo ninche entalanta e nkosholai, o ntukusi are oo nkilani.’ ” Nejo Naaman, “Tang'amu ntalantani are te nchipai.” Nesai ninye, neineneng nena talantani are e nkosholai too lbenia oare, tenebo ntukusi are oo nkilani, neiteleiki ninche isinkan lenyena oare. Neya ninche aanap te dukuya Gehasi. Ore ake pee elotu endoinyo, neya nena tokitin too nkaik enye, nepik ninche atua enkaji enye, neisho lelo tung'ana meshomo, nedumunye ninche aapuo. Nejing ninye atua aji nelo aitashe te dukuya olkitok lenye, nejoki Elisha ninye, “Kaji duoo ishomo Gehasi?” Nejo ninye, “Meeta eneshomo osinka lino.” Kake etiaaka ninye, “Keitu nanu alo tenebo iyie te nkiyang'et ina kata pee eibelekenya oltung'ani le ngarri enye embarta pee kinang'are? Kenkata ina nang'amarieki mpisai o nkilani o eilata oo loirienito o sabibu, o nkerra, o lmong'i, o sinkan o nkaisiaayiak? Ore naa enkeeya oo lbolot e Naaman naa eikimbung iyie, o eishoi ino ntarasi.” Nelo Gehasi teine netii ninye etaa ole nkeeya oo lbolot. Neibor anaa soito le nchan. Etiaakita apa nkera oo loibonok le Nkai Elisha, “Ng'ura ajo eikiti ene wueji nikitii tiabori eutaroto ino. Nchoo iyiook maape Yordan neyau ake pooki ng'ae te iyiook embokishi, pee kintobir ewueji nikibikie teine.” Newaliki ajo, “Enchom.” Neitoki obo lenye ajoki, “Tonyorrai shomo tenebo isinkan linono.” Newalu ninye ajo, “Kalo nanu.” Neaku eshomo ninye tenebo ninche. Ore ake pee epuonu ninche Yordan nedung ilkeek. Kake ore egira obo lenye auroo olchani nedoiki entolu enye atua enkare, neishir ninye ajo, “Oi olkitok lai! Katoomonuo apa ena tolu.” Neitoki ilo tung'ani le Nkai ajo, “Eitiaji etadoiyie.” Ore ake pee eitodol ninye ine wueji, nedung'u ninye enchata e ntolu nenang'aki ine, nepor ina dukuya e ntolu enkare. Nejoki ninye, “Intayu.” Neitorioo ninye enkaina enye neitayu. Ore apa earare olaiguanani le Siria Isiraeli, neiguana ninye o sinkan lenyena ejo, “Ore te wueji neje o eneje naun nanu ilng'oborri laainei.” Kake eirriwaka oltung'ani le Nkai olkilikuai olaiguanani loo Siraeli ejo, “Toduaa ake migiroo ene wueji, amu etadoitie iltung'ana le Siria aapuo ine.” Neirriwaa olaiguanani loo Siraeli oltung'ani meshomo ine netiaaka ninye oltung'ani le Nkai. Neaku ninye oikok ninye, neitajeuo ninye kewan katitin naagiroo nabo anaa are. Nenyamalu oltau lo laiguanani le Siria te nkaraki ena bae; neipotu isinkan lenyena nejoki ninche, “Aimikintodolidolo nanu nchere kalo tiatua iyiook otii enkalo o laiguanani loo Siraeli?” Nejoki obo loo sinkan lenyena, “Meetae, lo kitok lai, olaiguanani kake Elisha ilo oiboni le Nkai otii atua Israel, ninye ojoki olaiguanani loo Siraeli lelo rorei liro iyie tiatua olgilata lino le rruat.” Nejo ninye, “Enchom entodol enetii ninye, pee airriwaa nanu iltung'ana meshomo aayau ninye.” Nejokini ninye, “Ng'ura etii ninye Dotan.” Neirriwaa ninye mbartan meshomo ine, o ngarrin oo mbartan o enjore kitok nepuonu ninche kewarie, neman enkanasa aang'adu. Ore ake pee einyototo osinka loltung'ani le Nkai tadekenya, neipang alo boo, ng'ura etamana duoo enjore oo mbartan o ngarrin oo mbartan enkanasa. Nejo ilo sinka, “Oi lokitok lai! Kaa iyiook kiaas?” Nejoki ninye, “Miureisho, amu ore lelo ootii tenebo iyiook naa eikumok aalang lelo ootii tenebo ninche.” Neitoki Elisha aomon nejo, “Olaitoriani, aatoomono iyie tabolo nkonyek enyena pee etum atoduaa.” Nebol Olaitoriani nkonyek eilo barnoti, nedol ninye, naa ng'ura, ebore ilo doinyo mbartan o ngarrin oo mbartan e nkima naamanita Elisha. Ore pee epuonu iltung'ana le Siria aagilunore ninye, neomon Elisha Olaitoriani, nejo, “Toosho kulo tung'ana aatoomono, ntamodoo.” Neaku etoosho aitamodok ninche te risioroto e nkomono e Elisha. Nejoki Elisha ninche, “Mme enkoitoi ena, neme enkanasa ena; entusujaki nanu, pee arikoki nanu intae ilo tung'ani ling'oruru.” Nerik ninye ninche Samaria. Ore ake enabaunye ninche Samaria, nejo Elisha, “Olaitoriani, tabolo nkonyek e kulo tung'ana, pee etum aatodolisho.” Nebol Olaitoriani nkonyek enye, nedolishoyu ninche, ng'ura etii ninche empolos e Samaria. Ore ake pee edol olaiguanani loo Siraeli ninche, nejoki Elisha, “Papaai lai, aar ninche metuata?” Aar ninche metuata, “Newal ninche ajo miaar iyie ninche metuata lelo litaarua to lalem lino o too mbaa inono? Nchoo ninche endaa o enkare, pee etum ainosa neok, nepuo enetii olkitok lenye.” Neitobiraki ninye ninche osirua sapuk; ore ake pee eidip aainosa endaa neokisho, neisho ninche meshomo, nepuo ninche enetii olkitok lenye. Neitu aekata eitoki iltung'ana le Siria aapuonu aarasaki enkop e Israel. Ore etulusoitie nena neipotu Benhadad olaiguanani le Siria enjore enye pooki, neilep alo aman ang'adu Samaria. Netii apa olameyu kitok Samaria, ina kata pee eman ninche ninye. Etaa apa ore endukuya o sikiria naa shekeli ntomoni isiet e nkosholai emirieki, ore enkiti pirbil oo nkik e nturkuluo naa shekeli imiet e nkosholai. Ore apa eloito olaiguanani loo Siraeli te nchumata e suntai, neishiraki ninye enkitok, ejoki, “Taretuoki, olkitok lai olaiguanani!” Nejoki olaiguanani ninye, “Amaa teneitu kiret Olaitoriani kaji nanu aiko tenaaret? Te wueji neidong'ishoreki arashu te wueji neironyieki isabibu?” Neitoki olaiguanani aikilikuan ninye ajoki, “Kainyoo enyamali ino?” Newaliki ninye ajoki, “Aatiaaka nanu ena kitok, ‘Iyau enkerai ino pee kinos ninye taata, ore taisere nikinos enkerai ai.’ Nikiyier iyiook enkerai ai nikinos. Ore pee ekenyu najoki nanu ninye, ‘Iyau enkerai ino, pee kitum aainosa’; neisudoo ninye enkerai enye.” Ore ake pee ening olaiguanani irorei leina kitok, nepolos nkilani enyena ore ina kata negira ninye alo te nchumata e suntai nedol iltung'ana naa ng'ura, eishopito ninye ilkuniyiani tiatua nkilani enyena. Nejo ninye, “Maaitaasa nanu Olaitoriani ena neitulusoo, teneitu edung'ori endukuya e Elisha olayioni le Shefat ena olong.” Netonita apa Elisha te nkaji enye, netonita ilpayiani tenebo ninye. Neirriwayie apa olaiguanani oltung'ani, kake ore eton eitu ebaiki ilo kilikuai Elisha, nejoki Elisha lelo payiani, “Idolidolo aajo eirriwua ele oitayu iloikop oltung'ani laalotu adung'oo endukuya? Eng'orisho ore ake pee elotu ilo kilikuai ninkenikene kutukaji, nimbung'ubung'u enkikenet e kutukaji aaibooyo ninye. Aimening'o oltoilo loo nkejuk olkitok lenye te siadi ninye?” Ore eton eirorita ninye o lelo payiani, nedou olaiguanani alotu enetii ninye, nejoki, “Ore ena nyamali naa Olaitoriani eing'uaa! Kainyoo nanu pee aitoki aanyu Olaitoriani?” Nejoki Elisha toning'o ororei lo Laitoriani: Nji ejo Olaitoriani, ore taisere tena rishata, nemiri entemet empirbil entapa napuyiapui te shekeli nabo, ore mpirbili are e shairi te shekeli nabo, te kishomi e Samaria. Ore ilo kitok le njore laa ninye apa eigarakino o laiguanani, nejoki ilo tung'ani le Nkai, “Amaa napaji tenaa kebol Olaitoriani ilusien e keper, keitabari ena bae?” Nejoki ilo tung'ani le Nkai ninye, “Ilo iyie adol too nkonyek inono, kake minos iyie.” Netii apa iltung'ana oong'uan oata enkeeya oo lbolot ootii embata e kishomi; nejokino ninche maate, “Kainyoo iyiook pee kitoni tene o matuata? Tenikijo iyiook matijing atua enkanasa; netii olameyu atua enkanasa, naa eikipuo aaye teine. Naa tenekitoni tene nikiye ake sii. Maape naa taata ilng'oborri loo ltung'ana le Siria. Tenetapala ninche iyiook, nikinchu, naa tenetaara iyiook matuata, nikiye naa.” Nedumunye ninche, pee emirimiru enteipa aapuo ilng'oborri le Siria, kake ore ake pee ebau emanaroto oo lng'oborri loo ltung'ana le Siria, ng'ura, metii hoo toki ine. Amu eishoo apa Olaitoriani iltung'ana le Siria metoning'o oltoilo loo ngarrin oo mbartan, o loo mbartan, o ltoilo le njore kitok, neaku etiaakinote maate, “Ng'ura, eipotuo olaiguanani loo Siraeli, aiger o laiguanani le Hiti, o laiguanani le Misiri meetu aarare iyiook.” Neisik ninche ina teipa aailanyisho, neing'uaa ilng'oborri lenye, o mbartan enye, o sirkon lenye, neing'uaa ilng'oborri etiu anaa duoo ake. Neilanyisho aaitajeu enkishui enye. Ore ake pee epuonu kulo tung'ana le nkeeya oo lbolot emanaroto oo lng'oborri, nejing ninche atua olng'obor, nedaa neokisho, neya ninche enkosholai o sahabu o nkilani nepuo aaisudoo. Neitoki aapuonu nejing likae ng'obor, neya ntokitin tiatua ilo ng'obor, nepuo aaisudoo. Neitoki aajokino maate, “Mme embae sidai iyiook kiaasita. Ore ena olong naa enkolong oo lomon supati. Tenikigira iyiook o mekenyu, naa kebaiki iyiook enkitamioto. Ore naa taata, wootu maape aajoki enkaji o laiguanani.” Nepuonu ninche aaipot ilarripok loo nchomito e nkanasa, neliki ninche aajoki, “Kishomo iyiook ilng'oborri loo ltung'ana le Siria, ng'ura medoli nemening'i hoo oltung'ani obo teine, meteleku ake mbartan naaena o sirkon ooena, netiu lelo ng'oborri anaa apake.” Neipotisho lelo arripok le kishomi, nelimuni ina bae tiatua enkaji o laiguanani. Nedumunye olaiguanani kewarie, nejoki isinkan lenyena, “Kaliki nanu intae ina naitobira iltung'ana le Siria tialo iyiook. Eyiolo ninche aajo eikisumash; neaku eipang'a ninche too lng'oborri aapuo aaisudori te nkop naisiaja, ejo, ‘Teneipangu ninche te nkanasa, nikiya iyiook ninche, eishu meshomo eyararoto nikijing atua enkanasa.’ ” Nejo obo loo sinkan lenyena, “Nchoo ilkuti tung'ana eya nena bartan imiet apa naatelekutua, amu idolitata aajo, ore kulo ootelekutua netiu ake anaa ilo orora pooki le Israel oidaa. Mairriwuai ninche meshomo aadol.” Neyau ninche iltung'ana oare oo kedito mbartan, neirriwaa olaiguanani ninche meshomo aasujaa enjore e Siria, nejoki, “Enchom entodol.” Nepuo ninche aasujaa ninche ometabaiki olkeju le Yordan; naa ng'ura, ore te nkoitoi pooki, naa mpurdat oo nkilani o ntokitin naaiturraitie iltung'ana le Siria te nkisarrisar. Nerrinyunye lelo tung'ana ooirriwayioki, neliki olaiguanani. Neipang iltung'ana nepuo aar lelo ng'oborri loo ltung'ana le Siria. Neaku ore empirbil entapa napuyiapui nemiri te shekeli nabo, ore mpirbili are e shairi nemiri te shekeli nabo te risioroto o rorei lo Laitoriani. Netegelua apa olaiguanani olkitok le njore laa ninye eisilig, metaa olarriponi le kishomi. Neitunyoo iltung'ana ninye te kishomi o metua, anaa enatejo oltung'ani le Nkai, ina kata pee elotu olaiguanani aduaare ninye. Amu ore ina kata pee ejoki oltung'ani le Nkai olaiguanani, “Kemirieki mpirbili are e shairi te shekeli nabo, neinosieki empirbil e ntapa napuyiapui shekeli nabo, taisere, tena rishata, te kishomi e Samaria.” Etawalikia apa ilo kitok le njore oltung'ani le Nkai ajoki, “Amaa napaji tenaa kebol Olaitoriani ilusien te keper, keitabari ena bae?” Nejoki ilo tung'ani le Nkai ninye, “Ilo iyie adol too nkonyek inono, kake miinos iyie ina daa.” Neaku neijia ake etotiwuo te ninye, amu eitunyoitie iltung'ana ninye te kishomi neye. Etiaka apa Elisha ina kitok naitopiwuoki enkerai enye, “Inyo tenebo olmarei lino, shomo tamanya ewueji neba anaa enitamanya, amu eipotuo Olaitoriani olameyu, naa kelotu ajing ena kop too larin oopishana.” Nedumunye ina kitok alo te risioroto o rorei leilo tung'ani le Nkai. Nedumunye ninye o lmarei lenye nelo amany enkop oo Lfilisti ilarin oo pishana. Ore te nkiting'oto oo larin oopishana, eidipa ina kitok atushukunye te nkop oo Lfilisti, nelo asai olaiguanani te nkaraki enkaji enye. Negira apa olaiguanani airorie Gehasi osinka lo ltung'ani le Nkai, ajoki, “Tolikioki nanu kuna mbaa pooki sapuki naataasa Elisha.” Ore egira ninye aliki olaiguanani eneikuna Elisha pee eitopiu oltung'ani otua, ng'ura, ore ina kitok apa naitopiwuoki enkerai enye, nesai olaiguanani te nkaraki enkaji enye o enkurma enye. Nejo Gehasi, “Olkitok lai, lo aiguanani, nena ina kitok naa nena ina kerai enye apa naitopiwuoki.” Ore ake pee eikilikuan olaiguanani ina kitok, neliki ninye. Negelu olaiguanani oltung'ani kitok tenkaraki ina kitok, ejo, “Torrinyoki ninye entoki pooki nara enenye, tenebo endaa pooki naing'uaa enkurma enye, ebaiki enkolong apa nashomo tena kop o metabaiki taata.” Eshomo apa Elisha Dameski. Naa kemuoi Benhadad olaiguanani le Siria; ore pee elikini ninye, aajoki, “Etii oltung'ani le Nkai ene,” nejoki olaiguanani Hasael, “Toshoroi enkishoroto shomo notore oltung'ani le Nkai, ninkilikuanishore Olaitoriani tialo ninye ajoki, ‘Kaishiu nanu tena muoyian?’ ” Nelo Hasael anagare ninye, neshoroo enkishooroto, mpukunot pooki oo ntokitin sidain e Dameski, ilolan loo ntamesin onom, ore pee aitashe te dukuya ninye, nejoki, “Aairiwua nanu olayioni lino Benhadad, olaiguanani le Asiria maeu enitii ejo, ‘Kaishiu nanu tena muoyian?’ Nejoki Elisha ninye, Shomo tiaaki ninye, ‘Inchiu iyie’, kake aaitoduaa nanu Olaitoriani nchere meeta nchere pee miye.” Neshumu nkonyek enyena aing'or ninye, ometaba anaa nedol enkurruna. Neishir ilo tung'ani le Nkai. Nejo Hasael, “Kainyoo pee eishir olkitok lai?” Newaliki ajoki, “Enkaraki naiyolo entorroni nilo aitaas iltung'ana loo Siraeli; ilo iyie apejoo isempewueti lenye, nilo aar metuata ilbarnot lenye to lalem, nidung'udung' nkera enye aitaa ndung'udung'ot, niaar metuata nena kituaak enye naairoshiutuo.” Nejoki Hasael ninye, “Kainyoo ninye osinka lino, laa oldia ake, eji metaa keas ena bae sapuk?” Newaliki Elisha ajoki, “Aaitoduaa nanu Olaitoriani nchere ilo aaku olaiguanani le Siria.” Nelo ninye aing'uaa Elisha, nelo enetii olkitok lenye, nejoki ilo kitok lenye ninye, “Kaa iyie kitiaaka Elisha?” Newaliki ninye ajo, “Aatiaaka ninye inchiu iyie.” Kake ore pee ekenyu, nedumu ninye olkarasha le dapash, neitadoiki enkare neisalaashaki enkomom enye, ometua ninye. Neaku Hasael olaiguanani te rishata enye. Ore to lari le imiet le nkitoria e Yoram olayioni le Ahab, olaiguanani loo Siraeli, neiteru Yehoram olayioni le Yehoshafat ilo aiguanani le Yuda aitoreisho. Oloo larin tomoni uni oare apa ninye pee eiteru aaku olaiguanani, neitoreisho ninye ilarin isiet te Yerusalem. Neibung ninye orrekie loo laiguanak le Israel, anaa apa enataasa enkaji e Ahab, amu entito e Ahab apa enkitok enye. Neas ninye mbaa torrok too nkonyek o Laitoriani. Kake eitu ake eidaikie Olaitoriani Yuda, te nkaraki Daudi osinka lenye, amu eisiligie apa Olaitoriani pee eisho ninye oltaa, o layiok lenyena ntarasi. Ore too nkolong'i enyena, neorori Edom te nkitoria e Yuda, negelaki ate olaiguanani lenye maate. Nelo Yoram agiroo Saair tenebo ngarrin enyena pooki oo mbartan, nedumunye kewarie, ore ninye o lelo kituaak loo ngarrin e njore, near aamut lelo tung'ana pooki le Edom apa oo manita ninye. Kake eilanyishe enjore enye alo ang. Neaku etoorori apa Edom te nkitoria e Yuda ometabaiki ena olong. Neitoki ake sii Libna aorori teina kata. Ore apa nkulie kiaasin e Yoram, o nena pooki naataasa ninye neigeroki te mbuku oo ntepen oo laiguanak le Yuda. Neirura Yoram etua anaa apa loo menye, nenukari tenebo loo menye te nkanasa e Daudi, neitoreisho Ahasia olayioni lenye te rishata enye. Ore to lari le tomon oare le nkitoria e Yoram olayioni le Ahab, olaiguanani loo Siraeli, neitaae Ahasia olayioni le Yoram olaiguanani le Yuda, neiteru aitoreisho. Oloo larin tikitam oare apa Ahasia pee eiteru aitoreisho, neitoreisho ninye olari obo te Yerusalem. Ore apa enkarna e ng'otonye naa keji Atalia, naa nkakuyiaa lenye apa Omori olaiguanani loo Siraeli. Eibung'a sii apa ninye orrekie le nkaji e Ahab, neas mbaa torrok too nkonyek o Laitoriani, anaa apa enataasa enkaji e Ahab. Amu olaputani apa ninye lo lmarei le Ahab. Eshomo apa ninye tenebo Yoram olayioni le Ahab aarare Hasael olaiguanani le Siria te Ramot-Gilead nepuo iltung'ana le Siria aapik Yoram olbae teine. Nerrinyunye olaiguanani Yoram metabaki te Yesreel, lelo baa lenyena ootipika iltung'ana le Siria te Ramot, ina kata apa pee earare Hasael olaiguanani le Siria. Nedoyio Ahasia olayioni le Yehoram, olaiguanani le Yuda alo adol Yoram olayioni le Ahab te Yesreel, amu kemuoi apa ninye. Neitoki Elisha aipotu obo loo layiok loo loibonok le Nkai nejoki ninye, “Terretena empolos ino, niya ele tulet le ilata, nilo Ramot-Gilead. Ore ake pee ibaya, ning'oru Yehu olayioni le Yehoshafat olayioni le Nimshi; nijing'aki ninye, nirik ninye aitung'uaa ilchoreta lenyena, nirik ninye enkilepata to lgilata liatua. Nintoki adumu ilo tulet le ilata, nibukoki eilata endukuya enye, nijo, ‘Nji ejo Olaitoriani, aatubukoko nanu eilata aput aitaa olaiguanani le Israel.’ Nintoki abol kutukaji nisik, mintoki aton teine.” Neaku eshomo ilo barnoti oiboni Ramot-Gilead. Ore ake pee elotu ng'ura, etii ilarikok le njore enkiguana, nejo ninye, “Aata olkilikuai lino lo kitok le njore.” Nejoki, Yehu, “Kalo obo te iyiook pooki.” Nejoki ninye, “Iyie lo kitok.” Nedumunye ninye nelo atua aji, nelotu ilo barnoti abukoki eilata endukuya enye, nejoki ninye, “Nji ejo Olaitoriani Enkai oo Siraeli, aatubukoko nanu eilata aaput aitaa olaiguanani loo ltung'ana lo Laitoriani, Isiraeli. Naa ilo iyie aosh enkaji e Ahab olkitok lino, pee atum nanu aitalaku elap te Yesebel, ilo sarge loo sinkan laainei, lelo oibonok le Nkai, o sarge le lelo sinkan pooki lo Laitoriani. Amu ore ina aji pooki e Ahab naa keidaaya; naa kaiwuang'ie nanu olee pooki aishie, o rrindik o lolakuno tiatua Israel. Naa kaitotiu nanu enkaji e Ahab anaa enkaji e Yeroboam olayioni le Nabat, naitotiu anaa enkaji e Baasha olayioni le Ahija. Naa kepuo ildiain aainos Yesebel to lpolosie le Yesreel, nemeetae oltung'ani onukaa ninye.” Nebol ilo barnoti kutukaji neisik. Ore ake pee eipang'u Yehu alotu enetii isinkan lo lkitok lenye, nejoki ninche ninye, “Aisidain mbaa? Kainyoo pee eewuo ele tung'ani omoda enitii?” Nejoki ninye ninche, “Iyiololo intae ele tung'ani o enkiroroto enye.” Nejo ninche, “Mesipa ina; toliki iyiook.” Nejo ninye, “Nji o inji aatiaka ninye nanu, nejo, ‘Nji ejo Olaitoriani, Kaabukoki eilata aput aitaa olaiguanani loo Siraeli.’ ” Ore nabo kata neya pooki ng'ae nkilani enyena neirragie tiabori nkejek e Yehu, neosh ntarumpetani, neibalunye aajo, “Olaiguanani Yehu.” Etarresho apa Yehu olayioni le Yehoshafat olayioni le Nimshi pee ear Yoram metua. Ore apa Yoram o Siraeli pooki, nerripisho ninche te Ramot-Gilead te nkaraki Hasael olaiguanani le Siria; kake etorrinyunye apa olaiguanani Yoram metabaki te Yesreel te nkaraki ilbaa apa ootipika ninye iltung'ana le Siria, ina kata apa pee earare Hasael olaiguanani le Siria. Neaku etejo Yehu, “Tenaa ena endamunoto ino, mincho naa oltung'ani hoo obo eipang te nkanasa alo ainosaa ilomon te Yesreel.” Neirot Yehu ngarrin enyena oo mbartan, nelo Yesreel, amu teine apa eirragita Yoram. Neewuo apa Ahasia olaiguanani le Yuda amutan Yoram. Ore apa olarriponi negira aitashe to ltalet te Yesreel, neikeern encholuek e Yehu egira alotu, nejo, “Adolita olturrur,” Nejo Yoram, “Iwa olakedoni le mbarta pee elo anang'are ninche, naa nchoo ninye ejo, ‘Keseriani ake?’ ” Neaku eshomo oltung'ani okedito embarta anang'are ninye, nejoki, “Nji ejo olaiguanani, ‘Keseriani ake.’ ” Nejoki Yehu, “Kaa iyie intaasa eseriani? Mbelekenyayu tusujuaki.” Nelikioo olarriponi ina ejo, “Etabaikia olkilikuai ninche, kake merrinyunye ninye.” Neitoki Yoram airriwaa likae kilikuai oewuo ine netii ninche, nejoki, “Nji ejo olaiguanani, ‘Keseriani ake,’ ” neitoki Yehu ajoki, “Kenenyoo eseriani? Mbelekenyayu tusujuaki.” Neitoki ake olarriponi alikioo ajo, “Etabaikia ninye ninche, kake megira ninye arrinyunye. Ore elotunoto neikununo anaa elotunoto e Yehu olayioni le Nimshi amu kekuetu te ngolon oleng.” Nejo Yoram, “Entobira engarri ai oo mbartan.” Neipang'u Yoram olaiguanani loo Siraeli o Ahasia olaiguanani le Yuda, meetae ake olemetii engarri enye oo mbartan, nepuo aanang'are Yehu, nepuo aanang'aa te wueji e Nabot le Yesreel. Ore ake pee edol Yoram Yehu, nejoki ninye, “Ke seriani ake Yehu?” Newaliki ajoki, “Kaa seriani etumi, eba nji enkiborra oo nkonyek o esakutore e ng'utunyi Yesebel te nkumoi?” Neibelekenya Yoram ailanyisho, ejoki Ahasia “Olosek Ahasia!” Neyietu Yehu enkawuo enye te ngolon enye pooki, neng'or Yoram erishata oo ronyi, nelo embae ang'or oltau lenye, neimis ninye tiatua engarri oo mbartan. Nejoki Yehu Bidkar olaretoni lenye, “Ilepie ninye nilo aiturraa te wueji e Nabot le Yesreel. Amu idamu iyie enapa kata kiriamari kikedito mbartan te siadi Ahab papaai lenye, nchere eiroro Olaitoriani ena kitanapata tialo ninye: ‘Ore te sipata, anaa enatoduaa ngole osarge le Nabot, o sarge loo layiok lenyena Olaitoriani ojo kaitalaku nanu te iyie tene wueji.’ Ore naa taata iwa iyie ninye nilo anang'aa ninye teine wueji te risioroto o rorei lo Laitoriani.” Ore ake pee edol Ahasia olaiguanani le Yuda ena, neisik alo enkalo e Bet-hagan. Nesujaa sii Yehu ninye, nejo, “Entang'or sii ninye.” Neng'or ninche ninye etii atua engarri oo mbartan te nkilepata e Guur, te mbata e Iblem. Neisikaki ninye Megido nelo aye teine. Nenap isinkan lenyena te ngarri oo mbartan neya Yerusalem, nepuo aanukaa ninye te nkurare enye, tenebo loo menye tiatua enkanasa e Daudi. Ore to lari le tomon oobo le nkitoria e Yoram olayioni le Ahab neiteru Ahasia aitoreisho te Yuda. Ore apa pee elotu Yehu Yesreel, nening Yesebel ina; nesir nkonyek enyena, neitobir akus endukuya enye, nerumisho te lusie. Ore eimu Yehu kishomi, nejo ninye, “Keseriani ake iyie Simri, oloata iloikop lo lkitok lenye?” Neshumu Yehu nkonyek enyena aing'or elusie, nejo, “Kalo ilo otii embata ai? Kalo?” Ore iltung'ana oare okuni naa sunaishi oogelema neing'or ninye. Nejoki ninche, “Entusulaki ninye enkop.” Nesulaki ninche ninye enkop; ore embata o sarge lenye neisuakino esuntai, o mbartan, neitunyoo mbartan ninye. Neitoki ninye ajing atua aji nedaa neokisho; nejo, “Entodol ena kitok nadiaa, enchom entunukai ninye; amu entito o laiguanani ninye.” Kake ore ake pee epuo ninche aanukaa ninye, neitu edol toki meteleku ake endukuya o nkejek, o ndapi oo nkaik. Ore ake pee errinyunye ninche aaliki ninye, nejo ninye, “Ororei lo Laitoriani ele, apa oiroro aimunye osinka lenye Elisha le Tishbi, ejo, ‘Ore to lpolosie le Yesreel naa keinos ildiain nkiri o sesen le Yesebel; naa ketiu empopok e Yesebel anaa emodioi eirrag tioriong enkop, to lpolosie le Yesreel, ometaa meetae oltung'ani ojo, Yesebel ena.’ ” Eeta apa Ahab ilayiok ntomoni naapishana te Samaria. Neiger Yehu mpala airriwaa Samaria, airriwaki ilaitoriak le nkanasa, o lpayiani, o laing'urak loo layiok le Ahab, ejo, “Tenebau ena palai enitii, amu iatata ilayiok lo lkitok linyi tenebo intae, niaatata ngarrin oo mbartan, o mbartan, o nkanas naasheta sunta, o masaa o larrabal, entegelu oloisul ogol te lelo ayiok lo lkitok linyi, ninchosho ninye olorika le papaai lenye, nimitutu enkaji olkitok linyi.” Kake eiruto ninche oleng, nejo, “Ng'ura eitu eigaraa ilaiguanak oare ninye; kaji naa iyiook kinko tenikintasheikinore ninye?” Neaku ore ilo aitasheikinoni le nkaji e nkitoo, o laitasheikinoni le nkanasa, tenebo ilpayiani, o laing'urak, neirriwaki Yehu olkilikuai ejo, “Kira iyiook isinkan linono, naa eikiaas pooki nintanap iyiook. Mikintaa iyiook likae tung'ani, olaiguanani; taasa enaba anaa enidol aa sidai too nkonyek inono.” Neitoki ninye aigeroki ninche enkae palai e are, ajoki, “Tenaa enkalo ai itii, naa tenaa eikining'ining'i nanu, entudung'oi ilukuny oo layiok lo lkitok linyi, nipuopuo aapuonu enatii taisere te Yesreel tena rishata.” Ore apa lelo ayiok lo laiguanani pokira ntomoni naapishana, netii tenebo iltung'ana kituaak le nkanasa, laa ninche apa ooitubulu ninche. Ore ake pee ebau ina palai enetii ninche, neibung ninche lelo ayiok lo laiguanani, near metuata, iltung'ana ntomoni naapishana, nepik ilukuny enye nkikapuni, neyau ninche enetii Yehu te Yesreel. Ore ake pee elotu olkilikuai ajoki ninye, “Eyautua ninche ilukuny oo layiok lo laiguanani,” nejo ninye, “Erragie ninche too lturrurri oare tembata e kishomi o mekenyu.” Ore tadekenya pee eipang ninye alo boo, neitashe ajoki iltung'ana pooki, “Miatata intae entioto. Nanu apa otarresho olkitok lai, naar ninye metua; kake aing'ae natara metuata kulo pooki? Entayiolo naa nchere, menya enkop ororei lo Laitoriani, apa oiroro ninye oipirta olmarei le Ahab; amu etaasa Olaitoriani ina apa natejo ninye aimunye osinka lenye Eliya.” Near Yehu metuata lelo pooki apa ootelekutua te nkaji e Ahab te Yesreel, o ltung'ana lenyena kituaak, o lchoreta lenyena yiolot, o lapolosak lenyena, ometaba anaa neishu pooki. Neitoki ninye adumunye nelo Samaria. Ore te nkoitoi etii ninye Beteked ewueji oo lairritak loo ntare, nenang'are Yehu iltung'ana lo lmarei lenye lo laiguanani le Yuda oji Ahasia, nejoki ninche, “Irara akua?” Newaliki ninche aajoki, “Kira iyiook ilo lmarei le Ahasia, nikietuo iyiook aamutan iltung'ana le nkaji e nkitoo, o layiok le nkitok o laiguanani.” Nejo ninye, “Ewaita ninche eishu.” Neyae ninche eishu, nepuo ninche aar metuata te ngumoto e Beteked, iltung'ana artam oare neitu elekuni obo lenye. Ore pee edumunye ninye alo teine, nenang'are Yehonadab olayioni le Rekab elotu anang'are ninye; neiroroki ninye, nejoki, “Ketiu oltau lino te nanu anaa enatiu olalai te iyie?” Nejo Yehonadab, “Ee” Nejoki Yehu, “Tenaa neijia nchooki enkaina ino.” Neisho ninye Yehu enkaina. Neyiataa Yehu ninye apik engarri oo mbartan. Nejoki ninye, “Wou tusujaki pee idol enyuaata naata to Laitoriani.” Kae neked ninye tenebo ninye engarri enye oo mbartan. Ore ake pee elotu Samaria, near metua lelo pooki apa ootelekutua lo lmarei le Ahab ootii Samaria, ometaba anaa neishu pooki, te risioroto o rorei lo Laitoriani apa otiaka Eliya. Neitoki Yehu aiturrur iltung'ana pooki, nejoki ninche, “Eisiaayia apa Ahab Baal penyo; kake kelo Yehu aisiaai ninye oleng. Ore naa taata empotokoki nanu iloibonok pooki le Baal, o laseremak lenyena pooki o lapolosak lenyena pooki; emincho eaku metii ninye olemetii, amu aata olasar kitok laitaiki Baal. Ore oltung'ani lemelotu neari metua.” Etaasa apa Yehu ina te nkalamasisho ejo pee eidaikie ilapolosak le Baal. Neitanapisho Yehu ajo, “Entobira eumata kitok te nkaraki Baal.” Neaku eibalunye ninche. Neirriwaa Yehu ilkiliku meshomo Israel pooki, nepuonu ilaseremak pooki le Baal, neaku meetae oltung'ani leitu elotu. Nejing ninche atua enkaji e Baal, neiputayu ina aji e Baal ebaiki esuntai ometabaiki enkae suntai. Nejoki ilo laa ninye oitasheiki osanduku oshumishoreki, “Iyau masaa o ntokitin enkisiaayiare te nkaraki eseremare e Baal.” Neyau ninye nena masaa, nelo Yehu atua ina aji e Baal tenebo Yehonadab olayioni le Rekab; nejoki ilaseremak le Baal, “Entujurru entodol nchere metii osinka lo Laitoriani hoo obo atua intae. Kake ilaseremak le Baal ake.” Neitoki alo atua aji aishooyo inkishorot neitayu ilasarri oopejori. Netipika apa Yehu iltung'ana ntomoni isiet boo, nejoki, “Ore oltung'ani obo te lelo latipika nkaik inono metuluai neiturraa enkishui enye.” Ore ake pee eidip aishooi nkishorot o lasar opejori, nejoki Yehu olarriponi o lkituaak, “Entijing'aki entaar metuata; emincho oltung'ani obo eimisho.” Ore ake pee eidip aatar ninche too lalema, ore ilo arriponi o lkituaak nenang'aki ninche boo, nepuo olgilata li atua te nkaji e Baal. Neipang'unye ninche ina ng'ape apa natii enkaji e Baal, nepejoo. Neidaikie ninche ina ng'ape e Baal, neidaikie ina aji e Baal, neitaa enkaji narotokini ometabaiki ena olong. Neijia eikuna Yehu eishie Baal tiatua Israel. Kake eitu apa eibelekenya Yehu apaash ing'ok e Yeroboam olayioni le Nebat, naa te ninche apa aitapong'oyie Isiraeli, meteserema ilasho le sahabu te Betel o te Dan. Nejoki Olaitoriani Yehu, “Ore enkaraki nitaasa esidai too nkonyek aainei, nintaasa enkaji e Ahab te risioroto e nena pooki naatii oltau lai, ore ilayiok linono le ishoi e ong'uan, kepuo aatonie olorika le nkitoo too Siraeli.” Kake mme arriyia apa Yehu te nkibung'ata oo nkitanapat o Laitoriani. Enkai oo Siraeli, to ltau lenye pooki; eitu apa ninye epaash ing'ok e Yeroboam naa ninche eitapong'orie Isiraeli metaasa ing'ok. Ore apa te nena olong'i, neiteru Olaitoriani adung'oo kulie wuejitin e nkop oo Siraeli. Etimira apa Hasael ninche eisulie tialo ilpolosien le Israel pooki. Ebaiki olkeju le Yordan te nkalo o loo saen, o enkop pooki e Gilead, o ene Gad, o ene Ruben o ene Manase, ebaiki Aroa, te mbata o erata oji Arnon, aa taa Gilead o Bashan. Ore apa nkulie kiaasin pooki e Yehu, o nena pooki nataasa ninye o enkidimata enye pooki, neigeroki tiatua embuku oo ntepen oo laiguanak le Israel. Neirura Yehu etua anaa loo menye, nenukari ninye te Samaria. Neitoreisho Yehoahas olayioni lenye te rishata enye. Ore apa enkata naitoria Isiraeli te Samaria naa ilarin tikitam o isiet. Ore ake pee edol Atalaia ng'otonye Ahasia ajo etua olayioni lenye, nedumunye ninye aidaikie enkaji pooki e nkitoo. Kake ore Yehosheba, ina tito o laiguanani Yoram, enkanashe e Ahasia, neya Yoash olayioni le Ahasia, nepurroo ninye nelo aisudoo aitung'uaa lelo ayiok lo laiguanani apa ooji pee eari metuata, nepik ninye o enkaibung'ani enye atua olgilata oirragi. Neisudoo ninye te nkaraki Atalia, neaku eitu eari ninye metua. Neboitare Yoash ninye ilarin ile, eisudoo tiatua enkaji o Laitoriani, naa Atalia naitoreisho ina kata teina kop. Kake ore to lari liopishana neirriwaki olapolosani oji Yehoida olkilikuai lelo aitasheikinok loo larripok le nkaji e nkitoo, nejoki ninche pee epuonu enkaji e Nkai. Ore teine neinosie ninche olmumai pee ening'okino ina apa naitobira pee eas. Neitodol ninche olayioni lo laiguanani. Neitanap ninye ninche ajoki, “Ena bae intae enchom entaas: ore erubata inyi e uni, lelo ooipang'u aaing'uaa enkisiaayiare te nkolong e sabato, nerrip enkaji o laiguanani netii enkae rubata e uni kishomi e Suri, ore enkae rubata e uni nelo kishomi natii oriong ilarripok, nerrip lelo enkaji e nkitoo. Ore ntukusi inyi are naapuonu enkisiaayiare te nkolong e sabato, nerrip enkaji o Laitoriani, neman ninche aang'adu olaiguanani, oltung'ani ake eibung'ita imasaa enyena o larrabal te nkaina. Ore pooki ng'ae onyikaki lelo turrurri neari metua. Etaa tenebo o laiguanani teneipang auluo o tenejing'u.” Neas lelo kituaak le njore te risioroto e nena pooki naaitanapishe Yehoida olapolosani neriku ake pooki lenye oltung'ani lenye lemetii enkisiaayiare te nkolong e sabato, tenebo lelo oopuonu aajing enkisiaayiare te nkolong e sabato, nepuonu enetii Yehoida olapolosani. Neyaki ilo apolosani lelo kituaak le njore iremeta o long'oi apa naara ino laiguanani Daudi, naatii atua enkaji o laiguanani; neitashe lelo arripok neibung'ita ake pooki tung'ani imasaa enyena o larrabal too nkaik enyena, ebaiki enkalo e kopikop e nkaji o metabaiki enkalo e moikuape, neman olperere lo lasar oina aji. Neipang'unye ninye ilo ayioni lo laiguanani neishopoki enkopiyia e nkitoo, neisho ninye enchakenisho, neibalunyeki ninye aaitaa olaiguanani nebukokini eilata aaput. Neosh ninche nkaik ejo, “Metobikoi olaiguanani.” Ore ake pee eining'oo Atalia enkilepilep oo larripok tenebo iltung'ana, nelo ninye atua enkaji o Laitoriani ine netii iltung'ana; nejo aing'orisho, eitashe olaiguanani te mbata e ng'ape, anaa enatiu olkerreti lenye, ore ilarikok le njore o laoshok loo ntarumpetani ootashare olaiguanani o ltung'ana pooki leina kop, neshipa neosh ntarumpetani. Nepolos Atalia nkilani enyena neishir ajo, “Entorroni! Entorroni!” Neitanap olapolosani Yehoida ilarikok le njore laa ninche apa ooitasheiki esikari ajoki, “Eyau ninye eimunye erishata oo ltimito naa iariara pooki tung'ani osuj ninye to lalem.” Amu etejo apa ilo apolosani, “Mincho eari ninye metua tiatua enkaji o Laitoriani.” Neaku eibung'a ninche ninye; neim ninye erishata e kishomi oo mbartan nelo enkaji o laiguanani, nepuoi aar ninye metua teine. Neitobir Yehoida olning'o te rishata o Laitoriani o laiguanani o ltung'ana, nchere eaku ninche iltung'ana lo Laitoriani; neitobir sii olning'o te rishata o laiguanani o ltung'ana. Neitoki iltung'ana pooki leina kop aapuo enkaji e Baal neuroo ninye, o lperereni lenyena loo lasarri, ore nkitanyaanyukot enyena nebel aaitaa mbelibelat. Near Matan ilo apolosani le Baal metua te dukuya lelo pereren loo lasarri. Nepik ilo apolosani ilarripok ooing'or enkaji o Laitoriani. Neyau ninye lelo arikok le njore, o laitasheikinok le nkaji e nkitoo, o larripok, o ltung'ana pooki leina kop; neriku ninche pooki olaiguanani te nkaji o Laitoriani, nepuo aaim kishomi oo larripok, nepuo enkaji o laiguanani. Neton ninye to lorika le nkitoo lo laiguanani. Neshipayu iltung'ana pooki leina kop. Neitirring'a ina anasa ina kata eidipaki aatar Atalia metua to lalem te enkaji o laiguanani. Oloo larin oopishana apa Yehoash pee eiteru aitoreisho. Ore apa to lari liopishana le nkitoria e Yehu, neiteru Yehoash aitoreisho, neitoreisho ninye ilarin artam oare te Yerusalem. Ore apa enkarna e ng'otonye naa keji Sibia e Beer-sheba. Neas Yehoash mbaa sidain too nkonyek o Laitoriani too nkolong'i enyena pooki, amu eiteng'ena apa olapolosani Yehoida ninye. Ore ake eyia eitu apa eiwuang'ieki iwuejitin neeika, metaa eshomo iltung'ana dukuya epolosisho nepej enkorropil too wuejitin neeika. Nejoki Yehoash lelo apolosak, “Ore kuna pisai pooki oo ntokitin sinyat naayawuaki atua enkaji o Laitoriani, nena pisai naaikenakaki pooki ng'ae - nena pisai naaikenakaki iltung'ana pooki, o nena pisai naadumaki oltau oltung'ani meyau atua enkaji o Laitoriani, nchoo ilapolosak eya, eya ake oltung'ani te lelo ooyiolo. Naa nchoo ninche eitobir ina aji aaram te nkata ake naba anaa enadoli ewueji nerami. Kake ore to lari le tikitam ookuni le nkitoria o laiguanani Yehoash, neitu eram ilapolosak ina aji. Ore enkaraki ina, neipotu olaiguanani Yehoash Yehoida olapolosani o kulikae apolosak nejoki ninche, Kainyoo intae pee mintobiriri enkaji aaram? Ore naa taata mintokiki aaya mpesai te lelo liyiolorere, kake enchooi nena pisai pee eitobirieki enkaji.” Nenyorraa lelo apolosak pee meitoki aaya kulie pisai too ltung'ana, nemeitobir ninche aaram ina aji. Neitoki Yehoida ilo apolosani adumu osanduku, nepik enaudoto enkikenet enye, nepik ilo sanduku embata o lperere lo lasar, te nkalo e tatene, te wueji nejing'ieki enkaji o Laitoriani; ore lelo apolosak oorip kutukaji nepik atua ine nena pisai pooki naayawuaki atua enkaji o Laitoriani. Naa ore ake enkata nadoli aajo aikumok mpisai naatii atua ilo sanduku, nelotu olasirani lo laiguanani o lapolosani kitok, aaiken neenaa ninche too lbenia oo notoki tiatua enkaji o Laitoriani. Neisho ninche nena pisai naaidipaki aaikena lelo aasak le siaai ooitasheiki enkaji o Laitoriani; nelaaki ninche lelo aguetak loo nkeek, o lashetak ooshetita ina aji o Laitoriani. Neisho sii ilashetak loo soito o ladung'ok loo soito. Neinyiang'u sii mbaoi o soito ooitobirieki enkaji o Laitoriani aaram. Kake eitu eishoori te nkaraki enkaji o Laitoriani ntokitin naaitobirieki, ngirran e nkosholai, o ntokitin naarieki enkima, o lbakulini, o ntarumpetani, anaa kulie masaa e sahabu, arashu ine nkosholai, te nena pisai apa naayawuaki atua enkaji o Laitoriani. Amu eishooki apa nena pisai ilaitobirak le nkaji ooramita enkaji o Laitoriani. Neitu apa eikilikuani metolimu enkikenakinoto te lelo tung'ana ooishooitie nena pisai too nkaik enye, aalaaki lelo aisiaayiak, amu etaasishote apa ninche te nkoitoi naisiligayu. Ore mpisai o lasar le nkitarruorroto o no lasar le ng'oki, neitu eyauni atua enkaji o Laitoriani; inoo lapolosak nena. Ore apa teina kata nelo Hasael olaiguanani le Siria aarare Gaat, neya ninye. Kake ore ake pee eibelekenya Hasael aing'or Yerusalem, neya Yehoash ilo aiguanani le Yuda nena kishorot pooki apa naaitisinya, Yehoshafat o Yoram o Ahasia, lelo aiguanak apa le Yuda, oara iloo menye. O nena kishorot naaitisinya ninye makewan, o sahabu pooki apa natii atua ilchumat le nkaji o Laitoriani, o enkaji o laiguanani neirriwaki nena pooki Hasael olaiguanani le Siria. Nelo Hasael aing'uaa Yerusalem. Ore apa kulie kiaasin e Yoash, o nena pooki naataasa, neigeroki tiatua embuku oo ntepen oo laiguanak le Yuda. Nedumunye isinkan lenyena aarreshisho, near Yoash metua te nkaji e Milo teina oitoi nadoyio alo Sila. Isinkan lenyena apa, Yasakar olayioni le Shimet o Yehoshad olayioni le Shomer ootanang'ie ninye enkop, neaku etua ninye nenukari tenebo loo menye tiatua enkanasa e Daudi, neitoreisho Amasia olayioni lenye te rishata enye. Ore to lari le tikitam ookuni le nkitoria e Yoash olayioni le Ahasia, olaiguanani le Yuda, neiteru Yehoahas olayioni le Yehu aitoreisho te Israel o te Samaria, neitoreisho ninye ilarin tomon oopishana. Etaasa apa ninye mbaa torrok too nkonyek o Laitoriani nerubare ing'ok e Yeroboam olayioni le Nebat, naa ninche apa eitapong'orie Isiraeli. Eitu ninye eing'uaa nena ng'ok. Neyupuyup engoro o Laitoriani tialo Isiraeli, neishooyo ninche apik nkaik e Hasael olaiguanani le Siria, o nkaik e Benhadad olayioni le Hasael. Neitoki Yehoahas aishiraki Olaitoriani, nening Olaitoriani ninye; amu etoduaa ninye ina kibookinoto naibookoki Israel enkop, oina naibooko ninche olaiguanani le Siria enkop. Ore enkaraki ina eishoo Olaitoriani Isiraeli olaitajeunoni, neaku eitajeutuo ninche too nkaik oo ltung'ana le Siria. Nebik iltung'ana le Israel too nkang'itie enye anaa apa ake. Ore ake eyia eitu ninche eing'uaa ing'ok e nkaji e Yeroboam, naa ninche apa eitapong'orie Isiraeli. Kake eibung'a ninye orrekie lenye, neitobik Asher te Samaria. Amu eitu apa eing'ueikini Yehoahas enjore oo ltung'ana onom loo mbartan o ngarrin oo mbartan tomon o ltung'ana nkalifuni tomon oopuo too nkejek. Amu eidaikie apa olaiguanani le Siria ninche neitotiu ninche anaa enterit te wueji neidong'ishoreki. Ore apa nkulie kiaasin e Yehoahas o nena pooki naataasa neigeroki tiatua embuku oo ntepen oo laiguanak le Israel. Neaku eirure Yehoahas etua anaa apa loo menye, nenukaa ninche ninye te Samaria neitoreisho Yoash olayioni lenye te rishata enye. Ore to lari le tomoni uni oopishana le nkitoria e Yoash olaiguanani le Yuda neiteru Yehoas olayioni le Yehoahas aitore Isirael te Samaria, neitoreisho ninye ilarin tomon o ile. Etaasa apa sii ninye mbaa torrok too nkonyek o Laitoriani, eitu ninye epaash ing'ok pooki e Yeroboam olayioni le Nebat, naa ninche eitapong'orie Isiraeli metaasa ing'ok. Kake eibung'a ninye orrekie lenye aas ing'ok. Ore apa nkulie kiaasin pooki e Yoash, o nena pooki naataasa, oina magilanisho naa ninye etigilunore Amasia olaiguanani le Yuda, neigeroki tiatua embuku oo ntepen oo laiguanak le Israel? Neaku eirure Yoash etua anaa loo menye, netonie Yeroboam olorika lenye le nkitoo; nenukari Yoash te Samaria tenebo ilaiguanak le Israel. Ore apa pee ejing Elisha emuoyian naa ninye naawa, nelo Yoash olaiguanani le Israel enetii ninye neishir ninye te dukuya Elisha ejo, “Papaai lai, papaai lai! Ngarrin oo mbartan e Israel o lakedok lenyena loo mbartan” Nejoki Elisha ninye, “Iwa enkawuo o mbaa;” neya ninye enkawuo o mbaa. Neitoki ninye ajoki olaiguanani le Israel, “Teyietu enkawuo,” neyietu ninye, neiteleiki Elisha nkaik enyena endukuya o laiguanani. Neitoki ninye ajo, “Tabolo elusie te nkalo oloosaen,” nebol olaiguanani elusie. Neitoki Elisha ajoki ninye, “Tang'oroi embae,” nengoroo olaiguanani embae. Nejoki Elisha, “Embae o Laitoriani e nkisulata embae e nkisulata namirieki Siria! Amu ilo aarare Siria te Afek ometaba anaa niishie ninche.” Nejo ninye, “Iwa nena baa.” Neya olaiguanani nena baa. Nejoki ninye ilo aiguanani le Israel, “Tooshie nena baa enkop;” neoshie ninye enkop katitin uni, neitirring'a. Negorokino ilo tung'ani le Nkai ninye, nejoki, “Anaata napaji itooshie enkop katitin imiet anaa ile; naa anaata ilo aar Siria ometaba anaa niishie ninche, kake ore taata katitin uni ake ilo aosh Siria.” Neaku etua apa Elisha nenukari ninye. Ore ilooti wuampan loo Lmoabu naa kegira apa aarasaki ina kop te rishata o loirujuruj teilo ari. Ore ina kata enukari oltung'ani otua, ng'ura nedoli entukus eilo wuampa nenang'akini ilo tung'ani otua atua enkurare e Elisha; eji ore ake pee eiseyie ilo tung'ani iloik le Elisha, nepiu neitashe too nkejek enyena. Ore apa Hasael olaiguanani le Siria neibooko Isiraeli enkop too nkolong'i pooki e Yehoahas. Kake eing'urrie Olaitoriani ninche, neibelekenyakino ninche, te nkaraki osotua lenye o Abraham, o Isaak, o Yakobo, neaku meidaikie ninye ninche; nemearaa ninche aitung'uaa kewan ometabaiki taata. Ore ake pee eye Hasael olaiguanani le Siria, neaku Benhadad olayioni lenye olaiguanani te rishata enye. Neitoki Yehoash olayioni le Yehoahas aya te Benhadad olayioni le Hasael nena anas apa naatooruo ninye Yehoas papaai lenye to larrabal. Katitin uni etimira Yoash ninye nerrinyu nena anas oo Siraeli. Ore to lari liare le nkitoria e Yoash olayioni le Yoahas, olaiguanani le Israel, neiteru aitoreisho Amasia olayioni le Yoash, ilo aiguanani le Yuda. Oloo larin tikitam o imiet apa ninye pee eiteru aitoreisho, neitoreisho ninye ilarin tikitam ooudo te Yerusalem. Ore apa enkarna e ng'otonye naa keji Yeho-adin e Yerusalem. Neas ninye mbaa sidain too nkonyek o Laitoriani, kake mme sii anaa apa Daudi papaai lenye. Etaasa ninye too mbaa pooki anaa enataasa papaai lenye Yoash. Kake eitu eiwuang'ieki iwuejitin neeika, eton ake eitayu iltung'ana ilasarri nepej enkorropil too wuejitin neeika. Ore ake pee eidipi aaishoo enkitoo metaa ninye olaiguanani, near ninye isinkan lenyena metuata, laa ninche apa ootasesekuana menye. Kake eitu ninye ear nkera e lelo tung'ana oata iloikop, te risioroto e nena naaigeroki te mbuku oo nkitanapat e Musa. Teine apa neitanapishe Olaitoriani ajo, “Meari iloo menye metuata te nkaraki nkera, nemeari nkera metuata te nkaraki loo menye; kake keye ake pooki ng'ae te nkaraki eng'oki enye makewan.” Etaara apa ninye iltung'ana le Edom nkalifuni tomon metuata to erata le munyan, neya enkanasa e Sela to larrabal, neisho ninye enkarna ajo Yokteel, naa ninye enkarna enye o taata. Neitoki Amasia airriwaa ilkiliku meshomo enetii Yoash olayioni le Yehoahas, olayioni le Yehu, olaiguanani le Israel, ajoki, “Wou maing'urata iyiook too nkomomi.” Neitoki Yehoash olaiguanani le Israel airriwaki olkilikuai olaiguanani le Yuda, nejoki, “Etiaaka apa olkikuei lo doinyo le Lebanon oltarakuai, ‘nchoru entito ino meyama olayioni lai.’ Nelotu eng'ues entim e Lebanon aim ine neituny ilo kikuei. Esipa itoosho iyie Edom, nikinting'ida iyie oltau lino. Ndipakinoyu naa iyie te nkitoo ino nintirring'a tiang. Amu kainyoo iyie pee ing'oru enyamali ijo pee ibatata iyie tenebo Yuda.” Kake eitu ening Amasia ina. Neaku etudumunye Yehoash olaiguanani le Israel alo, ore ninye o Amasia olaiguanani le Yuda neipirakino to larrabal te Bet-shenesh, e Yuda. Nemir Israel Yuda neisik pooki tung'ani alo enkang enye. Neibung Yehoash olaiguanani le Israel Amasia ilo aiguanani le Yuda, olayioni le Yehoash, olayioni le Ahasia te Betshe-mesh, nelotu Yerusalem neuroo esuntai e Yerusalem erishata oo ntemat e nkaina iip ong'uan, ebaiki kishomi e Efraim ometabaiki kishomi o lpijata. Neya ninye sahabu pooki o enkosholai, o masaa pooki apa naainepuaki tiatua enkaji o Laitoriani, o tiatua ilchumat le nkaji o laiguanani, o ltung'ana apa ootarayioki, neyau ninche Samaria. Ore nkulie kiaasin e Yehoash apa naataasa ninye, o enkidimata enye oina nataarare Amasia olaiguanani le Yuda, neigeroki tiatua embuku oo ntepen oo laiguanak le Israel. Neirura Yehoash etua anaa loo menye, nenukari ninye te Samaria, tenebo ilaiguanak le Israel; neitoreisho Yeroboam olayioni lenye te rishata enye. Etobiko apa Amasia olayioni le Yoash, olaiguanani le Yuda, ilarin tomon o imiet, te siadi enkeeya e Yehoash olayioni le Yehoahas olaiguanani le Israel. Ore apa nkulie kiaasin e Amasia, neigeroki tiatua embuku oo ntepen oo laiguanak le Yuda. Nerresh ninche ninye te Yerusalem, neisikaki enkop e Lakish. Kake eirriwakita ninche iltung'ana le Lakish, nepuo ninche aar ninye metua teine. Nenapu ninche ninye too mbartan; nepuoi aanukaa ninye te Yerusalem tenebo loo menye te nkanasa e Daudi. Neya iltung'ana pooki le Yuda Asaria, laa oloo larin tomon o ile, neitaa ninye olaiguanani te rishata e papaai lenye Amasia. Etesheta apa ninye Elat nerrinyoki Yuda, ina kata eidipa olaiguanani atua tenebo loo menye. Ore to lari le tomon o imiet le nkitoria e Amasia olayioni le Yoash, olaiguanani le Yuda, neiteru Yeroboam olayioni le Yoash, olaiguanani le Israel aitoreisho te Samaria, neitoreisho ninye ilarin artam oobo. Neas ninye mbaa torrok too nkonyek o Laitoriani. Eitu ninye epaash ing'ok pooki e Yeroboam olayioni le Nebat, naa ninche apa eitapong'orie Isiraeli. Etorrinyuo ninye olpolosie pooki le Israel ebaiki enejing'ieki Hamatoo metabaiki enaiposha e Araba, te risioroto eilo rorei lo Laitoriani, Enkai oo Siraeli, apa oiroro aimunye osinka lenye Yona olayioni le Amitai, ilo oiboni le Nkai; oing'uaa Gat-hafer. Amu etoduaa apa Olaitoriani nchere ore ina kibookinoto e nkop oo Siraeli naa keme, amu meetae hoo obo otelekua, oloena anaa ololakuno, nemeetae oltung'ani oret Isiraeli. Kake eitu apa ejo Olaitoriani keiwuang'ie enkarna e Israel tiabori keper. Neaku eitajeuo ninye ninche aitung'uaa enkaina e Yeroboam olayioni le Yoash. Ore apa nkulie kiaasin e Yeroboam, o nena pooki naataasa ninye, o enkidimata enye, o larrabali lenyena, oina natorrinyoko Israel Dameski o Hamat, naa ene Yuda apa, neigeroki tiatua embuku oo ntepen oo laiguanak le Israel. Neirura Yeroboam etua anaa apa loo menye, lelo aiguanak le Israel. Neitoreisho Sakaria olayioni lenye te rishata enye. Ore to lari le tikitam oopishana le nkitoria e Yeroboam olaiguanani le Israel, neiteru Asaria olayioni le Amasia, ilo aiguanani le Yuda aitoreisho. Oloo larin tomon o ile apa ninye pee eiteru aitoreisho, neitoreisho ninye ilarin onom oare te Yerusalem. Ore apa enkarna e ng'otonye naa keji Yekolia e Yerusalem. Neas ninye mbaa sidain too nkonyek o Laitoriani, te risioroto e nena pooki apa naataasa Amasia papaai lenye. Kake ore eyia eitu eiwuang'ieki iwuejitin neeika; neton ake epej iltung'ana enkorropil too wuejitin neeika. Neosh Olaitoriani ilo aiguanani, neaku ninye olayioni le nkeeya oo lbolot ometabaiki ina olong apa natua ninye. Neton apa ninye te nkaji enye etekepayioki. Naa Yotam apa olayioni lo laiguanani oitasheiki enkaji e nkitoo, neitore iltung'ana leina kop. Ore apa nkulie kiaasin e Amasia, o nena pooki naataasa ninye, neigeroki tiatua embuku oo ntepen oo laiguanak le Yuda. Neirura Asaria etua anaa apa loo menye, nenukari ninye tenebo loo menye te nkanasa e Daudi, neitoreisho Yatam olayioni lenye te rishata enye. Ore to lari le tomoni uni o isiet le nkitoria e Asaria olaiguanani le Yuda, neiteru Sakaria olayioni le Yeroboam aitoreisho too Siraeli te nkop e Samaria, ilapaitin ile. Neas ninye mbaa torrok too nkonyek o Laitoriani, anaa apa enataasa papaai lenye. Eitu ninye epaash ing'ok e Yeroboam olayioni le Nebat, naa ninche eitapong'orie Isiraeli. Nerresh Shalum olayioni le Yabesh ninye, neosh ninye abatat te Ibleam, near ninye metua, neitoreisho te rishata enye. Ore nkulie kiaasin e Sekaria, ng'ura, eigeroki tiatua embuku oo ntepen oo laiguanak le Israel. (Ina apa enkisiligata naishoo Olaitoriani Yehu, ajoki, “Ketonie ilayiok linono olorika le nkitoo le Israel ometabaiki e ishoi e ong'uan,” nelotu aaku ina.) Eiterua apa Shalum olayioni le Yabesh aitoreisho to lari le tomoni uni o naaudo le nkitoria e Usia olaiguanani le Yuda, neitoreisho ninye olapa obo te Samaria. Neitoki Menaham olayioni le Gadi alotu eing'uaa Tirsa nelotu Samaria, neosh ninye Shalum olayioni le Yebesh te Samaria near ninye metua, neitoreisho ninye te rishata enye. Ore apa nkulie kiaasin e Shalum, ina rreshoto natarreshishe, ng'ura, eigeroki tiatua embuku oo ntepen oo laiguanak le Israel. Ore apa teina kata near Manahem Tipua o pooki ootii atua, o lpolosien lenyena ebaiki Tirsa neito idia alo. Etaara apa tenkaraki neitu ninche ebolu ninye, nedanyaa nkoishua nkituaak pooki naairoishi. Ore to lari le tomoni uni o naaudo le nkitoria e Asaria olaiguanani le Yuda neiteru Menahen olayioni le Gadi aitoreisho te Israel, neitoreisho ilarin tomon te Samaria. Neas ninye mbaa torrok too nkonyek o Laitoriani; eitu ninye epaash te nkishui enye pooki ing'ok e Yeroboam olayioni le Nebat, naa ninche eitapong'orie Isiraeli metaasa ing'ok. Nelotu Pul olaiguanani le Asiria aarare ina kop; neisho Menahem Pul ntalantani enkalifu nabo e nkosholai, pee etum ninye ataretu ninye, meitagolo enkitoria enye. Netasotuo apa Menahem nena pisai te Israel, aa taa, too ltung'ana pooki karsisi. Neitayu ake oltung'ani shekeli onom aisho olaiguanani le Asiria. Neaku etorrinye olaiguanani le Asiria, neitu eitoki aton teina kop. Ore apa nkulie kiaasin pooki e Manahem, nena pooki naataasa, neigeroki tiatua embuku oo ntepen oo laiguanak le Israel. Neirura Mehahem etua anaa apa loo menye, neitoreisho Pekalia olayioni lenye te rishata enye. Ore to lari le onom oare le nkitoria e Asaria olaiguanani le Yuda, neiteru Pekahia olayioni le Menahem aitore Isiraeli te Samaria, neitoreisho ninye ilarin tikitam. Neas ninye mbaa torrok too nkonyek o Laitoriani; eitu ninye epaash ing'ok e Yeroboam olayioni le Nebat naa ninche apa eitapong'orie Isiraeli. Ore Peka ilo kitok lenye le enjore, olayioni le Remalia, nerresh ninye tenebo iltung'ana onom le Gilead ilo aiguanani, near ninye metua te Samaria, too lgilat le nkaji e nkitoo. Neitoreisho ninye te rishata enye. Ore apa nkulie kiaasin e Pekahia, o nena pooki naataasa, ng'ura, eigeroki tiatua embuku oo ntepen oo laiguanak le Israel. Ore to lari le onom o are le nkitoria e Asaria olaiguanani le Yuda, neiteru Peka olayioni le Remalia aitore Isiraeli te Samaria, neitoreisho ninye ilarin tikitam. Neas ninye mbaa torrok too nkonyek o Laitoriani. Eitu ninye epaash ing'ok e Yeroboam olayioni le Nebat naa ninche apa eitapong'orie Isiraeli metaasa ing'ok. Ore too nkolong'i e Peka olaiguanani le Israel nelotu Tiglat-Pilesa olaiguanani le Asiria neibung nkanas e Ijon, o Abel-bet-maka, o Yanoa, o Kadesh, o Hasor, o Gilead o Galilaya, o enkop pooki e Naftali; neya iltung'ana eararoto te Asiria. Neitoki Hoshea, olayioni le Ela arresh Peka olayioni le Remalia, neosh ninye, near metua, neitoreisho ninye te rishata enye, to lari le tikitam le nkitoria e Yotam olayioni le Usia. Ore apa nkulie kiaasin pooki e Peka, o nena pooki naataasa ninye, ng'ura, eigeroki tiatua embuku oo ntepen oo laiguanak le Israel. Ore to lari liare le nkitoria e Peka olayioni le Remalia, olaiguanani le Israel, neiteru Yotam olayioni le Usia ilo aiguanani le Yuda aitoreisho. Oloo larin tikitam apa o imiet ninye pee eiteru aitoreisho, neitoreisho ilarin tomon o ile te Yerusalem. Ore apa enkarna e ng'otonye naa keji Yerusha entito e Sadok. Neas ninye mbaa sidain too nkonyek o Laitorian, te risioroto e nena pooki apa naataasa papaai lenye Usia. Ore ake eyia eitu apa eiwuang'ieki iwuejitin neeika. Eton ake epolosisho iltung'ana nepej enkorropil too wuejitin neeika. Etesheta apa ninye kishomi e shumata e nkaji o Laitoriani. Ore apa nkulie kiasin e Yoram, o nena pooki naataasa, neigeroki tiatua embuku oo ntepen oo laiguanak le Yuda. Ore apa te nena olong'i neiteru Olaitoriani airriwaa Resin olaiguanani le Siria o Peka olayioni le Remalia meshomo aagilunore Yuda. Neirura Yotan etua anaa loo menye, nenukari ninye tenebo loo menye, tiatua enkanasa e Daudi papaai lenye. Neitoreisho Ahas olayioni lenye te rishata enye. Ore to lari le tomon oopishana le nkitoria e Peka olayioni le Remalia neiteru Ahas olayioni le Yotan, olaiguanani le Yuda aitoreisho. Oloo larin tikitam apa Ahas pee eiteru aitoreisho, neitoreisho ninye ilarin tomon o ile te Yerusalem. Neitu ninye eas mbaa sidain too nkonyek o Laitoriani Enkai enye, anaa apa enataasa papaai lenye Daudi. Kake eibung'a ninye orrekie loo laiguanak le Israel. Etapejoyie ninye olayioni leye aitaa olasar, te risioroto e ilo minong loo loshon apa ootaarayie Olaitoriani te dukuya Isiraeli. Neitayu ninye ilasarri nepejoo enkorropil too wuejitin neeika; o too nchumat oo ldoinyo, o tiabori pooki shani onyori. Neitoki Resin olaiguanani le Siria o Peka olayioni le Remalia, olaiguanani le Israel aapuonu aaitayunye Yerusalem olarrabal, neman Ahas aang'adu kake eitu emir ninye. Ore apa teina kata nerrinyu olaiguanani le Edom enkanasa e Elat, metaa ene Edom, nearaa iltung'ana le Yuda aitung'uaa enkanasa e Elat; nepuonu iltung'ana le Edom Elat nebik ninche teine o taata. Neaku eirriwaka Ahas ilkiliku Tiglat-pilesa olaiguanani le Asiria, ejo, “Ara nanu osinka lino, nara olayioni lino. Wou tokorduaki nanu too nkaik o laiguanani le Siria o too nkaik o laiguanani le Israel, amu aatarasakitia ninche.” Neitoki sii Ahas adumu enkosholai o sahabu pooki natii enkaji o Laitoriani o atua ilchumat le nkaji o laiguanani, neirriwaa anaa enkishooroto aisho olaiguanani le Asiria. Nening olaiguanani le Asiria ninye. Nelo olaiguanani le Asiria agilunore Dameski, neya ninye, neya iltung'ana eararoto te Kiir, near Resin metua. Ore ake pee elo olaiguanani Ahas Dameski atumore Tiglat-pilesa olaiguanani le Asiria, nelo ninye olperere lo lasar otii Dameski. Neirriwaki olaiguanani olapolosani oji Uria empukunoto eilo perere lo lasar, o enkitobirunoto enye, o mbaa enyena pooki. Neshetu ilo apolosani oji Uria olperere lo lasar oikununo anaa ilo, te risioroto e nena pooki naairriwaka ninye olaiguanani Ahas te Dameski, neaku eitobira olapolosani Uria ina, eton eitu ebau olaiguanani Ahas te Dameski. Ore ake pee errinyunye olaiguanani te Dameski nelo aing'or ilo perere lo lasar. Neitoki olaiguanani anyikaki ilo perere lo lasar. Nelo aked shumata enye, nepejoo ilasarri lenyena o lasarri le ntapa, nebukoki olasar opikuni, neisuaki osarge lenye lo lasar le seriani enchumata eilo perere lo lasar le seriani. Ore ilo perere lo lasar lo suyai apa otii dukuya Olaitoriani, neiwuang'ie ninye te dukuya enkaji, teine wueji e rishata olperere lenye lo lasar o enkaji o Laitoriani, nelo apik enkalo e moikuape eilo perere lenye lo lasar. Neitanap olaiguanani Ahas Uria, ilo apolosani, ejo, “Ore te nchumata eilo perere kitok lo lasar, entapejoi olasar le nkakenya opejori, o lasar teipa le ntapa opejori, o lasar lo laiguanani opejori, o lasar lenye le ntapa, o lasar opejori loo ltung'ana pooki leina kop, o lasar lenye le ntapa, o lasar lenye ooki, nisuakiki shumata ninye osarge pooki lo lasar opejori, o sarge pooki lo lasar, kake ore ilo perere lo lasar lo suyai naa nanu ake olo aikilikuanishore.” Neas Uria ilo apolosani nena pooki anaa enaitanapa olaiguanani Ahas ninye. Nedung olaiguanani nena kitotoneta enkitashoto, neiwuang'ie ilo moti oitukuoreki aitung'uaa ninche, neiwuang'ie ilo moti le nkare aitung'uaa lelo mong'i ooitobiruno to suyai apa ootii tiabori, neiteleiki ninye isoito. Ore ine wueji apa neitobiraki te nkaraki sabato, tiatua enkaji o laiguanani, oina kishomi e auluo o laiguanani, neiwuang'ie ninye tiatua enkaji o Laitoriani, te nkaraki ilo aiguanani le Asiria. Ore apa nkulie kiaasin e Ahas naataasa eigeroki tiatua embuku oo ntepen oo laiguanak le Yuda. Neirura Ahas etua anaa apa loo menye, nenukari ninye tenebo loo menye tiatua enkanasa e Daudi; neitoreisho Hesekia olayioni lenye te rishata enye. Ore to lari le tomon oare le nkitoria e Ahas olaiguanani le Yuda, neiteru Hosea olayioni le Elan aitoreisho te Samaria, neitore ninye Isiraeli. Neitoreisho ninye ilarin ooudo. Neas ninye mbaa torrok too nkonyek o Laitoriani, kake eitu sii etiu anaa ilaiguanak le Israel apa ootii te dukuya ninye. Nelotu Shalmanesa olaiguanani le Asiria agilunore ninye. Neaku Hoshea osinka lenye, nelaaki ninye kodi. Kake enoto apa olaiguanani le Asiria enkitang'oroto te Hoshea; amu eirriwaka apa ninye ilkiliku Soo, olaiguanani le Misiri, neitu eitoki alaaki ninye kodi anaa apa enataasa too larin oo tulusoitie. Ore enkaraki ina neikenoo olaiguanani le Asiria ninye, neen tiatua korokoroni. Neitoki olaiguanani le Samaria aibung ina kop pooki, nelotu Samaria, ore too larin okuni, neman Samaria agadu. Ore to lari lioudo le nkitoria e Hoshea, neibung olaiguanani le Asiria Samaria, neya Isiraeli ootii Asiria nepik ninche enkanasa e Hala o embata olkeju le Habo, o olkeju le Gosan, o atua nkanas oo Lmedi. Netiu neijia, amu etaasa apa iltung'ana le Israel eng'oki tialo Olaitoriani Enkai enye, laa ninye oitayio ninche aitung'uaa enkop e Misiri, neitupuku te nkaina e Farao olaiguanani le Misiri. Eteserema ninche kulie aitin, neibung olkerreti le lelo oreren apa ootarayie Olaitoriani te dukuya iltung'ana le Israel, neibung lelo kerreti ooiteng'enishote ilaiguanak le Israel. Negolong'aki iltung'ana le Israel too nkisudorot mbaa torrok naaiba Olaitoriani Enkai enye, neas mbaa torrok. Eteshetakita ninche ate iwuejitin neeika too nkang'itie enye pooki, ebaiki oltalet ometabaiki enkanasa nasheta isunta. Etipikakitia ninche ate ing'apeta o Asherim te pooki doinyo naado, o tiabori pooki shani onyori. Ore teine nepuo aapejoo enkorropil too wuejitin pooki neeika anaa apa enataasa lelo oshon ooiwuang'ie Olaitoriani te dukuya ninche. Neas ninche mbaa torrok neitagor Olaitoriani. Neisiaai naa ninche nkitanyaanyukot naa ninche apa etiaakinye Olaitoriani ninche, “Emiaas intae ena.” Ore ake sii eikoo apa Olaitoriani Israel o Yuda te pooki oiboni le Nkai, o te pooki aduaani, ejo, “Embelekenyata entapaash nkoitoi inyi torrok, nimbung'ubung'u nkitanapat aainei, o nkikoot aainei, te risioroto e nena kitanapat apa naitanapa loo papaai linyi, o nena nairriwaka intae too sinkan laaainei, lelo oiboonok le Nkai.” Kake eitu ninche ening, kake etogolong'akita anaa apa loo menye, amu eitu apa eiruk Olaitoriani Enkai enye. Etemenaitie ninche nkikoot enyena, oilo sotua lenye apa oitobira o loo menye o nena kikoot naaishoo ninye ninche. Eshomo ninche aasujaa nkitanyaanyukot neme Enkai, neaku ilootapong'ori, neibung ninche olkerreti le lelo oshon oomanita ninche, laa ninche apa eitanapa Olaitoriani nchere pee metiu anaa ninche. Nepaash ninche nkitanapat pooki o Laitoriani Enkai enye, neitobiraki ate nkitanyaanyukot naasholuno oo lasho oare, neitobir Asherim, neserem olorora pooki le shumata, neisiaai Baal. Nepejoo ilayiok lenye o ntoyie enye anaa ilasarri, neasishore ninche enaibon o esakutore, nemir ate pee etum aataas entorroni too nkonyek o Laitoriani, neitagor ninye. Ore enkaraki ina etagorokine Olaitoriani Isiraeli oleng, neiwuang'ie ninche te dukuya ninche; eitu eing'uari toki meteleku olosho le Yuda ake. Eitu apa sii ninye eibung Yuda nkitanapat o Laitoriani Enkai enye, kake eibung'a ilo kerreti apa oiteng'en Isiraeli ninche. Neany Olaitoriani eishoi e Israel pooki, nepik ninche osina, nepik ninche atua nkaik oo lainyalak, ometaba anaa nenang'aa ninche aiwuang'ie te dukuya enye. Ore ake pee eidip aiwuang'ie Isiraeli te nkaji e Daudi, neitaa ninche Yeroboam olayioni le Nebat olaiguanani. Nerikoo Yeroboam Isiraeli aitapaash esujata o Laitoriani, nerikoki ninche metaasa eng'oki sapuk. Eturubare iltung'ana le Israel nena ng'ok pooki apa naataasa Yeroboam. Eitu ninche epaash nena ng'ok, ometaba anaa neiwuang'ie Olaitoriani Isiraeli too nkonyek enyena, anaa apa enairoro aimunye isinkan lenyena lelo oibonok le Nkai. Neaku eshomo Isiraeli eararoto, neing'uaa enkop enye maate nepuo Asiria, netoni teine ometabaiki ena olong. Neyau olaiguanani le Asiria iltung'ana ooing'uaa Babilon, Kuta, o Afa, o Hamat, o Shefafaim, nepik ninche nkanas e Samaria, terishata oo ltung'ana le Israel. Neya ninche Samaria nebik too nkanas enyena. Ore te nkiterunoto e manyisho enye teine, neitu ninche eureyu Olaitoriani ore enkaraki ina neirriwaki Olaitoriani ilng'atunyo atua ninche, neinos lelo ng'atunyo kulikae lenye. Nelikini olaiguanani le Asiria aajoki, “Ore lelo oshon apa liwa te araroto nilo apik nkanas e Asiria, meyiolo ninche nkitanapat e Nkai eina kop. Ore enkaraki ina eirriwayie ninye ilng'atunyo atua ninche, naa ng'ura, earita ninche iltung'ana metuata. Amu meyiolo ninche nkitanapata e Nkai eina kop.” Neitoki olaiguanani le Asiria aitanapisho ajo, “Erriwai ine obo loo lapolosak apa litaaraitie ninchosho ninye meshomo abik teine; pee eiteng'enisho nkitanapat e Nkai eina kop.” Neaku eewuo obo le lelo apolosak apa ootaarayioki te Samaria nelotu abik te Betel, neiteng'en ninche eneiko teneureyu Olaitoriani. Kake meetae apa olosho lemeitobir nkaitin enye maate, nepik ninche nkajijik oo wuejitin neeika apa naaitobira ltung'ana le Samaria, nepik ake olosho nena anas apa naabikie ninche. Ore iltung'ana le Babilon neitobir Sukot-be-not. Ore iltung'ana le Kut, neitobir Nergal, ore iltung'ana le Hamat, neitobir Ashima. Ore iltung'ana le Efrit neitayu Nibas o Tarka; ore iltung'ana le Sefafit nenukaa nkera enye tenkaraki Adramalek o Anamelek nena aitin e Shefafaim. Etureita sii apa ninche Olaitoriani, negelaki ate mpukunot pooki oo ltung'ana aaitaa ilapolosak loo wuejitin neeika, pee eitayu ilasarri too wuejitin neeika. Neaku etureita ninche Olaitoriani kake eisiaayia sii nkaitin enye maate, aasujaa orrekie le lelo oshon apa oo tarayioki aaya eararoto tenebo ninche. Ore ebaiki ena olong neas ninche ilo rrekie apake. Meure ninche Olaitoriani, nemerubare ninche nkikoot anaa nkiguanat, anaa nkitanapat apa naaitanapa Olaitoriani nkera e Yakobo laa ninye apa etejoki Israel. Eitobira apa Olaitoriani olning'o lo sotua o ninche, neitanap ninche ajoki, “Miureyuyu intae kulie aitin, nimirrugokinono ninche anaa isiaayiayia ninche, anaa ipolosakiki ninche. Kake Olaitoriani entureita laa ninye apa oyawua intae aitupuku te nkop e Misiri, te ngolon kitok, o te nkaina naitoriori. Ninye errugokinoto, naa ninye entopolosaki. Ore nena kikoot o nkiguenat, oina kitanapata apa naigeroki intae, entaas entobiraki. Miureyuyu intae kulie aitin. Niminchosho erikino intae osotua lai apa laitobiraka intae. Miureyuyu intae kulie aitin. Kake entureita Olaitoriani Enkai inyi, naa kekordu ninye intae aitupuku too nkaik oo lmang'ati linyi.” Ore ake eyia, mening'isho ninche, kake etaasa ninche te risioroto olkerreti lenye liopa. Neaku eteserema apa kulo oshon neisiaai sii nkaitin oo nkitanyaanyukot naaguetuno, neijia sii eikununo nkera enye, o nkera oo nkera enye. Ore apa enataasa loo menye, neas sii ninche ina ometabaiki ena olong. Ore to lari liokuni le nkitoria e Hoshea olayioni le Ela, ilo aiguanani le Israel, neiteru Hesekia olayioni le Ahas ilo aiguanani le Yuda aitoreisho. Oloo larin tikitam o imiet apa ninye pee eiteru aitoreisho. Neitoreisho ninye ilarin tikitam ooudo te Yerusalem. Ore apa enkarna e ng'otonye naa keji Abi entito e Sekaria. Neas ninye mbaa sidain too nkonyek o Laitoriani, te risioroto e nena pooki apa naataasa Daudi papaai lenye. Eiwuang'ie ninye iwuejitin neeika, neuroo ing'apeta, nedung Asherim. Nebel aitaa mbelibelat ilo asurai apa lo suyai oitobira Musa, amu ore ebaiki nena olong'i kepejoo apa iltung'ana le Israel enkorropil teine. Keji apa ine Nehushatan. Eisiliga apa ninye Olaitoriani Enkai oo Siraeli; neaku meetae oltung'ani oikununo anaa ninye too laiguanak pooki le Yuda te siadi ninye, anaa te lelo apa ootii te dukuya ninye. Eiruko apa ninye Olaitoriani, eitu epaash esujata enye, kake eibung'a nena kitanapat apa naaitanapa Olaitoriani Musa. Netii apa Olaitoriani tenebo ninye, ore pooki wueji neshomo, ninye nedupoyu. Etapong'ori ninye olaiguanani le Asiria neany eisiaai ninye. Etaara apa ninye Ilfilisti ebaiki Gasa o metabaiki ilpolosien lenyena, o ebaiki oltalet ometabaiki enkanasa nasheta isunta. Ore to lari liong'uan le nkitoria e Hesekia, laa ninye olari liopishana le nkitoria e Hosea olayioni le Ela, ilo aiguanani le Israel nelotu Shalamanesa olaiguanani le Asiria agilunore Samaria neman ninye ang'adu. Ore te nkiting'oto oo larin okuni neya ninye. Ore to lari le ile le nkitoria e Hesekia laa ninye olioudo le nkitoria e Hoshea, olaiguanani le Israel, neyai Samaria. Eewa apa olaiguanani le Asiria Isiraeli eararoto te Asiria, nelo apik ninche atua Hala, nepik embata olkeju le Gosam, o atua nkanas oo Lmedi, enkaraki neitu ninche ening oltoilo lo Laitoriani Enkai enye, kake etogolong'akita ilo sotua, o nena sii pooki apa naaitanapishe Musa osinka lo Laitoriani, neitu ening anaa eibung. Ore to lari le tomon oo ong'uan le nkitoria o laiguanani Hesekia, nelotu Senakerib olaiguanani le Asiria agilunore nkanas pooki naasheta isunta e Yuda, neya ninche. Neirriwaki Hesekia olaiguanani le Yuda olkilikuai olaiguanani le Asiria te Lakish, ejo, “Ataasa nanu entorroni; tapalaki nanu, naa ore pooki toki nikintelekiki nanu naa kanap.” Ore apa entoki nayieu olaiguanani le Asiria to laiguanani le Yuda naa talanta iip uni e nkosholai, o talanta tomoni uni e sahabu. Neisho Hesekia ninye enkosholai pooki apa nanotoki tiatua enkaji o Laitoriani, o tiatua ilchumat le nkaji o laiguanani. Ore apa teina kata nekinyu Hesekia sahabu pooki too nkutukie oo nkajijik e nkaji o Laitoriani, o ntaloishin oo nkutukie oo nkajijik apa naatumura Hesekia olaiguanani le Yuda, neisho olaiguanani le Asiria. Neirriwaa olaiguanani le Asiria Tatan le Rabsari, o Rabshake eeta enjore kitok, naing'uaa Lakish pee erasaki Hesekia te Yerusalem. Ore ake pee ebau nepuonu aaitashe tembata olchorro le shumata, otii enkoitoi oo laitobirak loo nkilani. Ore ake pee eipotu olaiguanani neipang'aki ninche Eliakim olayioni le Hilkia, laa ninye apa oitasheiki enkaji e nkitoo, o Shebna laa ninye apa olasirani, o Yoa olayioni le Asaf ilo aigeroni. Nejoki Rabshake ninche, “Entiaaki Hesekia, Nji ejo olaiguanani kitok, ilo aiguanani le Asiria: Kainyoo iyie ingarakino? Eijo doi kiaku irorei ake engolon to larrabal? Kaing'ae taata iyie ingarakino, peyie kitogolong'aka nanu? Ng'ura ajo Misiri iyie ingarakino, ilo peresi otigile, orem enkaina e pooki tung'ana ooingarakino. Neijia etiu Farao olaiguanani le Misiri te pooki tung'ani oigarakino ninye.” Kake tenikijoki iyie nanu, “Olaitoriani Enkai ang kingarakino iyiook aime ilo eiwuang'ie Hesekia iwuejitin enyena neeika, ejoki Yuda, o Yerusalem, Te dukuya ele perere lo lasar intae enteseremisho te Yerusalem? Wootu taata matoning'oto o lkitok lai olaiguanani le Asiria: Kaaisho nanu iyie mbartan iip are; tenindim iyie te nkalo ino atipika ilakedok shumata ninche. Kaji naa iyie inko tenintasheikinore obo ninye le lelo aisiaayiak ooti lo lkitok lai aa Misiri ingarakino too ngarrin oo mbartan o too mbartan? Amaa ake sii, aijo ke nkaraki nemetii Olaitoriani pee aewuo nanu agilunore ena kop naidaikie ninye? Aatiaaka nanu Olaitoriani, shomo tigilunore ene wueji, nindaikie.” Neitoki Eliakim olayioni le Hilkia, o Shebna o Yoa, aajoki Rabshake, “Kitoomono iyie, irorei isinkan linono te nkutuk e Aramea, amu ninye kiyiolo. Mintoki airorie iyiook te nkutuk e Yuda metoning'o iltung'ana ootii esuntai.” Kake etiaaka Rebshake ninche, “Aatiaaka olkitok lai pee aliki kulo rorei olkitok linyi, o ntae, neme lelo tung'ana ootii esuntai, ootaa ore tenebo intae, keinos nkik enye maate neok nkulak enye?” Neitoki Rabshake aitashe nebuaku to ltoilo sapuk, te nkutuk e Yuda, ajo, “Entoning irorei lo laiguanani kitok, olaiguanani le Asiria! Nji ejo olaiguanani: ‘Emincho Hesekia meteleja intae, amu meidim ninye aitajeu intae te nkaina ai. Emincho Hesekia ejoki intae eji pee ingarakinono Olaitoriani ejo, Ekesipa kekordu iyiook Olaitoriani, nemeishoori ena anasa aapik nkaik o laiguanani le Asiria.’ Emining intae Hesekia, amu nji ejo olaiguanani le Asiria; ‘Ntobira olning'o o nanu, nilotu enatii; ore pooki ng'ae te intae, neinos enkurma enye oo sabibu, neinos pooki ng'ae ilng'anayio lo lng'aboli lenye; neok pooki ng'ae enkare olchorro lenye; ometaba anaa narik entae enkop naikununo anaa enkop inyi, enkop e ntapa o enaisho oo sabibu, enkop oo mukateni o nkurman oo sabibu. Enkop oo loirienito o enaisho, pee ipuopuo aapok, nimiyeye.’ Nimining'ining'i Hesekia teneitapong'oo intae, ejo, ‘kekordu iyiook Olaitoriani.’ Keetae aekata enkai oo loreren naitajeuo enkop enye te nkaina o laiguanani le Asiria? Koree nkaitin e Hamat o Arpad? Koree nkaitin e Sefarfaim, Hena o Ifaa? Ketokordutua ninche Samaria aaitupuku tiae aina hoo nabo? Kaa tiatua nkaitin oo nkuapi, natokordua nkuapi enye aitupuku te nkaina ai, eji metaa kekordu Olaitoriani Yerusalem aitupuku te nkaina ai? ” Kake etigirate iltung'ana neitu ewaliki ninye olomoni hoo obo; amu ore apa enkitanapata o laiguanani naa, “Kejo emiwaliki ninye.” Ore Eliakim olayioni le Hilkia laa ninye apa oitasheiki enkaji e nkitoo, o Shebna, ilo aigeroko, o Yoa olayioni le Asaf ilo asirani, nepuonu enetii Hesekia etopolosa nkilani enye, neliki ninche ninye lelo rorei le Rabshake. Ore ake pee ening Hesekia ina, nepolos nkilani enyena neimulumul kewan too lkuniyiani nelo atua enkaji o Laitoriani. Neirriwaa ninye Eliakim, laa ninye apa oitasheiki enkaji e nkitoo, o Shebna ilo aigeroni, o lapolosak kituaak ooimulumula ate too kuniyiani, neirriwaki ninche Isaya olayioni le Amos. Nejoki ninche ninye, “Nji ejo Hesekia, Ore ena olong naa enkolong o sina, enkolong e nkisikong'ata naa enkolong e sulare, etoiwuoki nkera nemeeta ninche engolon nabulunye. Ebaiki netoning'o Olaitoriani Enkai ino lelo rorei pooki le Rabshake, laa ninye eirriwua olkitok lenye ilo aiguanani le Asiria meeu amor Enkai naishu. Keisikong Enkai ninye tenkaraki lelo rorei ootoning'o. Ore naa taata ilepie enkomono tenkaraki ilo pisiai otelekua.” Ore ake pee epuonu isinkan lo laiguanani Hesekia enetii Isaya, nejoki Isaya ninche, “Entiaaki olkitok linyi, ‘Nji ejo Olaitoriani: Miureishoyu tenkaraki lelo rorei litoning'o, laa ninche aatusukenyie nanu isinkan leilo aiguanani le Asiria. Ng'ura kapik nanu ninye oltau lo lkirutoto oitoning olkukui, nerrinyo alo enkop enye makewan, naisho nanu metabatatayu to lalem tiatua enkop enye makewan.’ ” Nerrinyo Rabshake neinepu olaiguanani le Asiria earare Libna; amu etoning'o ninye nchere etung'uayie olaiguanani Lakish. Ore ake pee ening olaiguanani nchere etudumunye Tihaka olaiguanani le Etiopia, alotu aarare ninche, neirriwaki ilkiliku arewaki Hesekia ejo, “Nji enchom entiaki Hesekia, olaiguanani le Yuda, ‘Mincho kilej ina Ai nisiligita tenikisiligie ninye iyie nchere meyae Yerusalem aapik nkaik o laiguanani le Asiria. Ng'ura itoning'o iyie enaitaasa ilaiguanak le Asiria nkuapi pooki, eidaike ninche katukul. Paa ijo iyie eikikorduni? Amaa nena aitin oo loreren ketokordutua ninche, lelo oshon apa ooidaikie loo papa, Gosan, o Haran, o Resef o ltung'ana le Eden apa ootii Telasa? Koree olaiguanani le Hamat, o laiguanani le Arpad, o laiguanani le nkanasa e Sefarfaim o laiguanani le Hena, anaa olaiguanani le Ifaa?’ ” Neng'amaa Hesekia ina palai too nkaik e lelo kiliku, neisuma; neilep Hesekia alo enkaji o Laitoriani, neisalaash ina palai te dukuya Olaitoriani. Neomon Hesekia te dukuya Olaitoriani, nejo, “Olaitoriani Enkai oo Siraeli, iton iyie to lorika le nkitoo te shumata ilkerubi. Ira iyie Enkai, naa iyie ake Enkai, tiatua nkitoriat pooki e nkop. Iyie oitobira keper o enkop. Irrugu enkiok ino Olaitoriani toning'o, tabolo nkonyek inono, Olaitoriani toduaa, nining kulo rorei le Senakerib, ooirriwua ninye pee elotu amor Enkai naishu. Esipata, Olaitoriani, nchere eitomijoono ilaiguanak le Asiria iloreren o nkuapi enye, nenang'aki nkaitin enye atua enkima; amu mme nkaitin apa ninche, kake esiaai oo nkaik e tung'ani oo nkeek o soito. Ore enkaraki ina eidaikieki ninche. Ore naa taata Olaitoriani Enkai ang, ntajeu iyiook, aatasayia, ntung'uai iyiook enkaina enye, pee etum nkitoriat pooki e nkop aatayiolo nchere, iyie Olaitoriani, iyie ake Enkai.” Neitoki Isaya olayioni le Amos airriwaki Hesekia olkilikuai ejo, “Nji ejo Olaitoriani Enkai oo Siraeli: ore ina omono nikitoomono te nkaraki Senakerib olaiguanani le Asiria, atoning'o nanu. Ele rorei eiroro Olaitoriani oipirta ninye: Kitemenayie ninye iyie, kitusurdaanya ninye iyie na tito e Sion; eipirripir endukuya enye te siadi iyie; na tito e Yerusalem. Kaing'ae doi ilo litamoro nisurdaany? Kaing'ae ilo lidumaki oltoilo lino, nishumaki nkonyek inono to lwuasa? Ilo osinya le Israel!” Ore te lelo kiliku linono nitamoro Olaitoriani, nitejo iyie, “Ore te nkumoi oo ngarrin aainei oo mbartan, ailepa nanu alo nchumat oo ldoinyo, o mashomo atua Lebanon, atuuroyie nanu iltarakua lenyena adoru aaisul, o lelo keek lenyena gelunot; atijing'a nanu atua nalo atua ina tim enye nagol. Atuturuo ilchorroi naok nkariak enkop eeiking'a, naaituny nanu too nkejek aainei nchorroi pooki neelepo e Misiri.” “Keitu aekata iyie ining ajo aitobira apa ina te musano? Aitobira apa nanu moitie ena taata nalo aitabaya, nchere ore nkanas naasheta isunta naa ilo aitaa osototi loo suut. Meeta apa lelo oomanya engolon, neiputukunyo neidang, etotiutuo ninche anaa nkaitubulu e ong'ota, o anaa nkujit naanana, etotiutuo anaa nkujit naabulu too nchumat oo nkajijik, te nekut olkutati eton eitu ebulu.” “Kake ayiolo nanu oltonei lino, o enkipang'ata ino o enjing'unoto ino, oina nikigilunore iyie nanu. Ore enkaraki nikitigilunore iyie nanu, netabaikia enkitokoos ino nkiyiaa aainei, kapik nanu olalae lai oololo enkume ino, napik olgisoi lai enkutuk ino, naarriny nanu iyie aing'orie ina oitoi niimua.” Naa ena nalo aaku olmonekie te intae: ore tele ari, ninosinoso intae nena naabulu oopeny, ore to lari liare ninosinoso nena ake ore to lari liokuni, niunuunu nisampumpu, niunuunu isabibu, ninosinoso ilng'anayio lenye. Ore ilo pisiai oleku le nkaji e Yuda neitoki aibung ntona, neiu ilng'anayio. Amu te Yerusalem epuku ilo pisiai, naa to ldoinyo le Sion epuku olturrur le lelo ooleku. Olom lo Laitoriani olo aas ena. “Ore enkaraki ina nji ejo Olaitoriani tialo olaiguanani le Asiria, melotu ninye ajing'u atua ena anasa, anaa engoroo embae teine, anaa elotu ataanikini ninye eeta elong'o, anaa elotu aman ang'adu. Ore ina oitoi apa naimua ninye, ina ake eitoki aim arrinyo, nemelotu ninye ena anasa, Olaitoriani ojo. Amu kamitu nanu ena anasa aitajeu tenkaraki kewan ai o tenkaraki o sinka lai Daudi.” Ore ina kewarie nelo olmalaika lo Laitoriani aar metuata iltung'ana nkalifuni iip nabo o ntomoni isiet o imiet too lng'oborri le Asiria: ore ake pee einyototo iltung'ana tadekenya, ng'ura etuata kulo pooki. Nedumunye taa Senakerib olaiguanani le Asiria alo ang, nelo abik te Ninawi. Ore eseremisho ninye tiatua enkaji e Nisrok, ina ai enye, near Adramelek o Sheresa, lelo ayiok lenyena ninye to lalem, neisik aapuo enkop e Ararat. Neitoreisho Esarhadon olayioni lenye te rishata enye. Ore apa te nena olong'i, etamuoyia Hesekia ometaa kejo pee eye. Nelotu Isaya, ilo oiboni le Nkai enetii ninye, nejoki ninye, “Nji ejo Olaitoriani, ‘Ntobira mbaa olmarei lino, amu iye iyie, minchiu iyie.’ ” Neibelekenya Hesekia aing'orie enkomom enye esuntai neomon Olaitoriani ejo, “Tadamu taata Olaitoriani, aatasayia iyie, ina nashomo nanu te dukuya iyie too sipat, o to ltau pooki, nataasa nanu mbaa sidain too nkonyek inono.” Neishir Hesekia te mion. Ore eton eitu elo Isaya aipang to lgoriet le polos, nelotu ororei lo Laitoriani enetii nejoki, “Torrinyoyu, nilo ajoki Hesekia, ilo kitok loo ltung'ana laainei, ‘Nji ejo Olaitoriani, Enkai e Daudi papaai lino: Atoning'o nanu enkomono ino. Atoduaa nanu ilkiyio linono; ng'ura kaaishiunye nanu iyie; ore te nkolong e uni, naa ilep iyie alo enkaji o Laitoriani. Naa kaponaa nanu ilarin tomon o imiet te nkishui ino. Kaakordu nanu iyie o ena anasa aitayu te nkaina o laiguanani le Asiria, naa kamitu nanu ena anasa te nkaraki kewan ai, o tenkaraki o sinka lai Daudi.’ ” Nejo Isaya, “Iyau emukate oo lng'abolo, naa o nchoo epuo ninche aaiteleiki oltudutai, pee etum ninye aishiu.” Nejoki Hesekia Isaya, “Kainyoo enkitodolunoto nchere kaaishiunye nanu Olaitoriani, naa kayooki nanu alo enkaji o Laitoriani te nkolong e uni?” Nejoki Isaya ninye, “Ele olmonekie te iyie oing'uaa Olaitoriani, nchere keas Olaitoriani ina toki naisiligishore ninye. Kelo oloip dukuya iroruat tomon anaa errinyo siadi iroruat tomon?” Newalu Hesekia ajo, “Kelelek pee eadoru oloip alo iroruat tomon alang tenerrinyo siadi iroruat tomon.” Neishiraki Isaya ilo oiboni le Nkai Olaitoriani, nerrinyunye oloip siadi iroruat tomon, nerrinyo enkolong aipirakinore enkoitoi o sagam le Ahas. Ore apa teina kata, neirriwaa Merodak-baladan olayioni le Bat-adam, ilo aiguanani le Babilon ilkiliku ooyautua mpala o enkishoroto enetii Hesekia, amu etoning'o apa ninye ajo etamuoyia Hesekia. Neitoomon Hesekia ninche, neitodol ninche ilchumat pooki le nkaji enye, ina osholai, o sahabu o enkorropil, o eilata nagol enkinyiang'a o ewueji enye oo masaa o larrabal, o nena pooki apa naatii nkajijik enyena naashumishoreki. Meetae apa entoki natii atua enkaji enye, anaa pooki toki e nkitoria enye neitu eitodol Hesekia ninche. Neitoki Isaya ilo oiboni le Nkai alotu enetii olaiguanani Hesekia nejoki ninye, “Kaa etejo kulo tung'ana? Naa kanu eetuo ninche enitii?” Nejo Hesekia, “Enkop nalakua eing'uaa ninche, Babilon eing'uaa ninche.” Neitoki ninye ajoki olaiguanani, “Kainyoo ninche etoduaa te nkaji ino?” Newalu Hesekia ajo, “Etoduaa ninche nena pooki naatii atua enkaji ai. Meetae entoki tiatua nena ajijik aainei naashumishoreki neitu nanu aitodol ninche.” Neitoki Isaya ajoki Hesekia, “Toning'o ororei lo Laitoriani: Ng'ura, kepuonu nkolong'i, ore nena pooki naatii atua enkaji ino, o nena apa naatushuma loo papaai lino o metabaiki ena olong, naa kenapi aaya Babilon; meing'uari toki, Olaitoriani ojo. Ore embata oo layiok linono makewan likitoikioki iyie, neyai sii ninche naa kepuo aaku isunaishi oogelema tiatua enkaji o laiguanani le Babilon.” Neitoki Hesekia ajoki Isaya, “Ore ilo rorei lo Laitoriani liroro naa aisidai. Neijia etiu, eetae eseriani o enkitirring'a too nkolong'i aainei.” Ore nkulie kiaasin e Hesekia o enkidimata enye pooki, o ilo shorro oitobira ninye, o ewueji neimieki enkare, neyau enkare atua enkanasa, neigeroki pooki tiatua embuku oo ntepen oo laiguanak le Yuda. Neirura Hesekia etua anaa apa loo menye; neitoreisho Manase olayioni lenye te rishata enye. Oloo larin tomon oare apa Manase pee eiteru aitoreisho, neitoreisho ninye ilarin onom o imiet te Yerusalem. Ore apa enkarna e ng'otonye naa keji Hefasiba. Etaasa apa ninye mbaa torrok too nkonyek o Laitoriani, te risioroto eilo minong apa oasita lelo oreren ootaarayie Olaitoriani te dukuya iloshon loo Siraeli. Amu enyaaka apa ninye ashet iwuejitin neeika apa naaidaikie papaai lenye Hesekia, neshetaki Baal ilpereren loo lasarri, neitobir ashera, anaa apa enataasa Ahab olaiguanani le Israel. Neserem ninye olorora pooki le keper neisiaai ninche. Neshetu ninye ilpereren loo lasarri tiatua enkaji o Laitoriani, laa ninche apa etejo Olaitoriani, “Atua Yerusalem nanu alo apik enkarna ai.” Neshetu ninye ilpereren loo lasarri ashetaki olorora pooki le keper, too lgorieti pokira oare le nkaji o Laitoriani. Nepejoo olayioni lenye anaa olasar, neas ninye mbaa e naibon o easata oo mbaa e nking'asia. Neasishore ninye ilaitumusumusok o lasakutok. Etaasa ninye mbaa kumok torrok too nkonyek o Laitoriani, neitagor ninye. Ore ina kitanyaanyukoto e Ashera apa naitobira ninye nepik ninye atua ina aji natiaaka Olaitoriani Daudi, o Solomon olayioni lenye, “Atua ena aji o atua Yerusalem naa ninche nanu ategelua too loshon pooki loo Siraeli, nchere kapik nanu enkarna ai ntarasi. Nemaitoki nanu aisho nkejek oo ltung'ana laainei loo Siraeli menyaaki aalimana, aapuku teina kop apa naishoo loo menye. Oi ake duoo ninche easisho te risioroto e nena pooki naitanapa ninche, o te risioroto eina kitanapata pooki naitanapa osinka lai Musa ninche.” Kake eitu ninche ening'isho nelejaki Manase ninche metaasa ntorrok aaitulus te lelo oreren apa ooidaikie Olaitoriani te dukuya iltung'ana loo Siraeli. Nejo Olaitoriani eimunye lelo sinkan lenyena, lelo oibonok le Nkai, “Ore enkaraki nataasa Manase, olaiguanani le Yuda, ele minong, netaasa mbaa torrok aitulus nena oo Lamori, apa laa ninche ootii te dukuya ninye, nerikoki Yuda metaasa eng'oki te nena kitanyaanyukot enyena; ore naa enkaraki ina, nji ejo Olaitoriani, Enkai e Israel, ng'ura, kayau nanu shumata Yerusalem o Yuda, entorroni naikununo neijia naa ore ake nkiyiaa pooki naaning neng'eyu. Naa kalo nanu aitorioo te shumata Yerusalem olkereri le ntemat le Samaria, o latemani lo nkitorioroto le nkaji e Ahab, naa kajut nanu Yerusalem anaa enajut oltung'ani engirra najutu ninche aiwuang'ie naibelekenyu atua aing'orie oriong, naa kaiturraa nanu ilo pisiai le njung'ore ai, naishooyo nanu apik ninche atua nkaik oo lmang'ati lenye, neaku ninche eararoto too lmang'ati lenye pooki. Enkaraki nataasa ninche mbaa torrok too nkonyek aainei naaitagoro ninche nanu, ebaiki ina olong apa naitupukutuo loo menye te Misiri o metabaiki ena olong.” Ore ake sii eibukoyie Manase osarge sapuk oleng lemeeta entioto, omeiputa Yerusalem ebaiki enchoto nabo ometabaiki enkae shoto. Eeta ake sii eng'oki eina apa natorikoko Yuda metaasa ing'ok, neaku etaasa mbaa torrok too nkonyek o Laitoriani. Ore nkulie kiaasin e Manase, o nena pooki naataasa, o ina ng'oki nataasa, neigeroki tiatua embuku oo ntepen oo laiguanak le Yuda. Neirura Manase etua tenebo apa loo menye, nenukari ninye te nkurma natii embata e nkaji enye. Tiatua e nkurma e Usa; neitoreisho Amon olayioni lenye te rishata enye. Oloo larin tikitam o are apa Amon pee eiteru aitoreisho, neitoreisho ninye ilarin oare te Yerusalem. Ore apa enkarna e ng'otonye naa keji Meshulemet entito e Harus le Yotba. Etaasa apa ninye mbaa torrok too nkonyek O laitoriani, anaa enataasa papaai lenye Manase. Eibung'a ninye orrekie le papaai lenye, neisiaai nena kitanyaanyukot apa naaisiaayia papaai lenye, neserem ninche. Etung'uayie ninye Olaitoriani, Enkai oo loo menye, neitu ninye eibung enkoitoi o Laitoriani. Nerresh isinkan le Amon ninye, near ilo aiguanani metua te nkaji enye. Kake etaara apa iltung'ana leina kop lelo tung'ana pooki metuata apa ootarresho olaiguanani Amon, neitaa lelo tung'ana leina kop Yosia ilo ayioni lenye olaiguanani le rishata enye. Ore apa nkulie kiaasin pooki e Amon apa naataasa, neigeroki tiatua mbukui oo ntepen oo laiguanak le Yuda. Nenukari ninye te nkurare enye tiatua enkurma e Usa; neitoreisho Yosia olayioni lenye te rishata enye. Oloo larin isiet apa Yosia pee eiteru aitoreisho, neitoreisho ninye ilarin tomoni uni oobo te Yerusalem. Ore apa enkarna e ng'otonye naa keji Yedida entito e Adaia le Boskat. Etaasa apa ninye mbaa sidain too nkonyek o Laitoriani, neibung orrekie le Daudi papaai lenye, neitu ninye eibelekenya alo enkaina e tatene anaa enkalo e kedienye. Ore to lari le tomon o isiet le nkitoria o laiguanani Yosia, neirriwaa olaiguanani Shafan olayioni le Asalia, olayioni le Meshulam, laa ninye olaigeroni le nkaji o Laitoriani, ejo, “Ilepa shomo enetii Hilkia ilo apolosani kitok, pee etum aigero esiana oo mpisai naayauaki enkaji o Laitoriani, nena naatang'amutua lelo arripok le kishomi too ltung'ana; naa nchoo eishori lelo aitasheikinok loo laisiaayiak le nkaji o Laitoriani. Nchoo ninche meishoo lelo aisiaayiak ootii enkaji o Laitoriani, aaram ina aji. Aa taa ilaguetak loo mbaoi, o lashetak, o lashetak loo soito, neinyiang'unyieki mbaoi neturuni soito pee eitobirieki aaram ina aji. Kake meikeni nena pisai tialo ninche amu keasisho ninche te nkoitoi naisiligayu. Nejoki Hilkia ilo apolosani kitok Shefat olaigeroni, Anoto nanu embuku oo nkitanapat tiatua enkaji o Laitoriani.” Neisho Hilkia ina buku Shafan, neisum ninye. Nelotu Shafan ilo aigeroni enetii olaiguanani, neliki olaiguanani ajoki, “Eitayutuo isinkan linono nena pisai naanotoki tiatua enkaji, newaita ninche aapik nkaik e lelo aisiaayiak ooitasheiki enkaji o Laitoriani.” Neitoki Shafan ilo aigeroni ajoki olaiguanani, “Aaishoo nanu Hilkia olapolosani embuku.” Neisum Shafan ina buku te dukuya olaiguanani. Ore ake pee ening olaiguanani irorei leina buku oo nkitanapat, nepolos nkilani enyena. Neitanap olaiguanani Hilkia ilo apolosani, o Ahikam olayioni le Shafan o Akobor olayioni le Mikaia, o Shafan olaigeroni, o Asaiya osinka lo laiguanani ejo, “Enchom enkilikuanishore Olaitoriani te nkaraki nanu, o te nkaraki olorere, o te nkaraki Yuda pooki, tialo rorei ootii ena buku nanotoki, amu aikitok engoro o Laitoriani nayupuyupo te nkaraki iyiook, enkaraki neitu eibung iloo papa irorei lena buku, pee eas nena pooki naaigeroki, naaipirta iyiook.” Nelo Hilkia ilo apolosani o Ahikam, o Akobor, o Shafan, o Asaya enetii Hulda ina oiboni. Ore apa ina oiboni naa enkitok e Shulam olayioni le Tikfa, olayioni le Harhas. Olaing'urani apa lo sanduku loo nkilani ilo payian le Huda, (naa Yerusalem apa namanya ninche), ina manyisho e are ina kata pee eirorie ninche. Nejoki ninye ninche, “Nji ejo Olaitoriani, Enkai oo Siraeli: ‘Tiaki ilo tung'ani likirriwua enatii, Nji ejo Olaitoriani, Ng'ura kayau nanu entorroni shumata ene wueji, o shumata lelo oomanya, lelo rorei pooki leina buku ooisuma olaiguanani le Yuda. Enkaraki naatung'uaitie ninche nanu, netapejo ninche enkorropil te nkaraki nkulie aitin, pee aatum ninche aaitagoro teina siaai pooki oo nkaik enye. Ore enkaraki ina keyupuyup engoro ai tenkaraki ene wueji, nemeyagaa. Kake ore te nkaraki olaiguanani le Yuda, laa ninye likirriwua pee inkilikuanishore Olaitoriani, nji iyie shomo tiaaki ninye, Nji ejo Olaitoriani Enkai e Israel: Ore tialo lelo rorei likitoning'o, ore enkaraki nairridua oltau lino, nintoborro kewan te dukuya Olaitoriani, ina kata pee ining ajo airoro inaaipirta ene wueji, o lelo oomanya, nchere keaku ninche olmuaate o ldeket, nitopolosa iye nkilani inono ninchir te dukuya nanu. Aatoning'o sii nanu iye, Olaitoriani ojo. Ore naa, ng'ura, kaaya nanu iyie aiturrurroki loo papaai lino apa oo tuata, nilo aiturrurro te nkurare ino te seriani, nemedol nkonyek inono ina torroni nayau nanu ene wueji.’ ” Neyaki ninche olaiguanani ilo rorei. Neitoki olaiguanani airriwaa olkilikuai, nepuonu ilpayiani pooki le Yuda o Yerusalem aaiturrurrokino. Neilep olaiguanani alo enkaji o Laitoriani, netii iltung'ana pooki le Yuda o lelo pooki oomanya Yerusalem, o lapolosak o loibonok le Nkai, o ltung'ana pooki, ilooti o lkituaak; neisum ninye ening'ito ninche irorei pooki leina buku o sotua apa nanotoki tiatua enkaji o Laitoriani. Neitashe olaiguanani te mbata oo ng'apeta neitobir olning'o te dukuya Olaitoriani, pee esuj orrekie lo Laitoriani neibung nkitanapat enyena, o enchakenisho enye o nkikoot enyena, to ltau lenye pooki, o te nkishui enye pooki, pee eas irorei leilo ning'o lo sotua ooigero tena buku; neibung'are ltung'ana pooki tenebo ninye teilo ning'o lo sotua. Neitanap olaiguanani Hilkia ilo apolosani kitok, o lapolosak oosujaki te nkitoo, o laing'urak le kishomi, pee eipang'unyeki tiatua enkaji o Laitoriani nena masaa pooki apa naaitobirakaki Baal, o Ashera, o lorora pooki le keper. Nepejoo ninye ninche tiauluo Yerusalem too nkong'at e Kedron, nenap nkuruon enye aaya Betel. Neiwuang'ie ninye lelo apolosak apa ootuputo ilaiguanak le Yuda pee epej enkorropil too wuejitin neeika too nkanas e Yuda naamanita Yerusalem; o kulie sii oopejoki Baal enkorropil, aapejoki enkolong o lapa, o lakir, o lorora pooki le keper. Neipang'unye ninye ashera aitung'uaa enkaji o Laitoriani, neya auluo Yerusalem, neya oerata le Kedron, nelo apejoo to erata le Kedron, neidong aitaa empunyua neisuaki ina punyua nkuraren oo ltung'ana le setia. Negil ninye nkajijik oo lewa le nkisiaayiare e seremare e nkiborra oo nkonyek, apa naatii atua enkaji o Laitoriani. Ine apa eripunye nkituaak nkisiong'at e Ashera. Neyau lelo apolosak lenye pooki aitupuku too nkanas e Yuda, neisarkionie ninye wuejitin neeika apa naapejie ilapolosak enkorropil, ebaiki Geba o metabaiki Beer-sheba; neitoki ninye agil auroo nena wuejitin neeika oo nchomito apa naatii enejing'ieki kishomi e Yoshua ilo balusui le nkanasa, apa naatii enkalo e Kedienye teina kishomi e nkanasa. Ore ake eyia, eitu epuonu lelo apolosak loo wuejitin neeika aapuonu olperere lo lasar lo Laitoriani te Yerusalem. Kake einosa ninche imukateni neitu eisuijieki tiatua ilalashera lenye. Neisarkionie ninye Tofet, ina natii oerata loo layiok le Hinom, pee meitoki atii hoo obo opejoo olayioni lenye anaa entito enye aitaa olasar oishori Molek. Neiwuang'ie ninye nena bartan naaitisinya ilaiguanak le Yuda te nkaraki eseremata enkolong, te nejing'ieki enkaji o laitoriani, te mbata e nkaji e Natan-Melek, laa ninye olkitok. Etapejoyie apa ninye nena garrin oo mbartan naaseremieki enkolong te nkima. Ore lelo pereren loo lasarri ootii enchumata enkaji e shumata e nkaji e Ahas, apa naaitobira ilaiguanak le Yuda, o lpereren apa ooitobira Manase too lgorieti pokira oare le nkaji o Laitoriani, nesulu ninche aitadou nebel aitaa mbelibelat, nenang'aki ina punyua enye atua oerata le Kedron. Neitoki olaiguanani aisarkionie iwuejitin neeika apa naatii enkalo oloo saen le Yerusalem, o metabaiki kopikop o ldoinyo le ntorroni, naateshetaka apa Solomon olaiguanani le Israeli Ashterot, ilo minong loo le Sidon, neitobiraki sii Kemosh ilo minong loo le Moab, o Milkoni ilo minong loo Lamoni. Negil ninye aitaa mbelibelat nena ng'apeta, neuroo asulaki enkop Asherim, neiput iwuejitin enye iloik loo ltung'ana. Ore ake sii ilo perere lo lasar apa otii Betel, ine wueji neika apa natesheta Yeroboam olayioni le Nebat, laa ninye otorikoko Isiraeli metaasa eng'oki, ore ilo perere lo lasar tenebo ewueji neika nesulu auroo nebel aitaa mbelibelat isoito lenyena, nerrar aitaa enterit; neitoki sii apejoo Ashera. Ore ejo Yosia eibelekenya, nedol nkuraren teine to ldoinyo, neirriwaa olkilikuai meyauni iloik aaitupuku too nkuraren, nepejoo ninche te nchumata olperere lo lasar, neisarkionie ninye, te risioroto eilo rorei lo Laitoriani apa otolimuo oltung'ani le Nkai, laa ninye apa otolimuo aibonu kuna baa. Neitoki ninye ajo, “Kainyoo idia kurare, nadolita nanu?” Nejoki iltung'ana leina anasa ninye, “Enkurare o ltung'ani le Nkai apa oing'uaa Yuda, nelotu aibonu kuna baa niyewuo iyie aas tialo olperere lo lasar te Betel.” Neitoki ninye ajo, “Metotiwuo ninye neijia; nchoo eaku meiwuang'ieki iloik lenyena.” Neaku etapala ninche iloik lenyena teine, tenebo iloik leilo oiboni le Nkai oing'uaa Samaria. Ore nena wuejitin apa oo lpereren naatii iwuejitin neeika too nkanas e Samaria, naaitobira ilaiguanak loo Siraeli, neitagor Olaitoriani, neiwuang'ie Yosia. Eitaasa ninye ninche anaa ina pooki nataasa te Betel. Near ninye metuata ilapolosak loo wuejitin neeika apa ootii ine, too nchumat oo lpereren loo lasarri, nepejoo iloik loo ltung'ana te shumata ninche. Nerrinyo ninye alo Yerusalem. Neitanap olaiguanani iltung'ana pooki ajoki, “Embung'a osirua le ngiroroto oji pasaka tenkaraki Olaitoriani Enkai inyi, anaa enaigeroki tiatua ena buku o sotua.” Amu meetae aekata osirua le ngiroroto oji Pasaka onyaakaki aaibung ebaiki nkolong'i oo larishak apa oorish Isiraeli, anaa too nkolong'i oo laiguanak loo Siraeli, anaa iloo laiguanak le Yuda; kake ore to lari le tomon o isiet le nkitoria o laiguanani Yosia, neibung'i ena pasaka te nkaraki Olaitoriani te Yerusalem. Enyaaka sii apa Yosia aiwuang'ie ilaitumusumusok o lasakutok, o nkitanyaanyukot oo nkaitin o ilo minong pooki otii ina kop e Yuda o Yerusalem, pee etumoki aitudupai irorei leina kitanapata ooigero tiatua ina buku apa nanoto Hilkia olapolosani tiatua enkaji o Laitoriani. Ore apa te dukuya ninye nemetii olaiguanani oikununo anaa ninye, oibelekenyakine Olaitoriani, to ltau lenye pooki, o te nkishui enye pooki, o te nkidimata enye pooki, te risioroto e nkitanapata e Musa pooki, neitu eitokini aatum likae laaijo ninye te siadi ninye. Neton ake eitu eibelekenya Olaitoriani teina goro enye napi, naa te ninye apa eyupuyupo egoro o Laitoriani tialo Yuda te nkaraki nena pooki naaitagorie Manase ninye. Nejo Olaitoriani, “Kaiwuang'ie sii Yuda too nkonyek aainei, anaa apa enaiwuang'ie Israel, nanang'aa nanu ena anasa apa nategelua, Yerusalem oina aji apa natejo nanu ninye etii enkarna ai.” Ore apa nkulie kiaasin e Yosia, o nena pooki naataasa ninye, neigeroki tiatua embuku oo ntepen oo laiguanak le Yuda. Ore apa too nkolong'i enyena, nelo Farao Neko, olaiguanani le Misiri enetii olaiguanani le Asiria, to lkeju le Frati. Nelo olaiguanani Yosia atumore ninye, near Farao Neko ninye metua te Megido, ina kata pee edol ninye. Nenap isinkan lenyena ninye etua te ngarri oo mbartan te Megido neyau ninye Yerusalem, nenukaa ninye te nkurare enye makewan. Neyau iltung'ana leina kop Yehoahas, olayioni le Yosia, nebukoki ninye eilata aaput, neitaa ninye olaiguanani te rishata enye. Oloo larin tikitam apa ookuni Yehoahas pee eiteru aitoreisho, neitoreisho ninye ilapaitin okuni te Yerusalem. Ore apa enkarna e ng'otonye naa keji Hamutal, entito e Yeremia olayioni le Libna. Neas ninye mbaa torrok too nkonyek o Laitoriani, te risioroto e nena pooki apa naataasa loo menye. Neen Farao Neko ninye te Ribla te nkop e Hamat, pee meitoki ninye aitoreisho te Yerusalem, nepik ninye ina kop kodi e talanta iip nabo e nkosholai o talanta nabo e sahabu. Neitaa Farao Neko Eliakim olayioni le Yosia, olaiguanani te rishata e Yosia papaai lenye. Neibelekeny ninye enkarna enye aitaa Yohoiakim. Kake eiwuang'ie ninye Yehoahas, nelotu ninye Misiri neye teine. Neishooyo Yehoiakim enkosholai o Sahabu aisho Farao, kake eitalaa ninye ina kop kodi pee eitayu mpisai te risioroto e nkitanapata e Farao. Eitalakua ninye enkosholai o sahabu too ltung'ana leina kop, te pooki tung'ani te risioroto e nkikena enye, pee eisho Farao Neko. Oloo larin tikitam apa oimiet Yehoiakim pee eiteru aitoreisho, neitoreisho ninye ilarin tomon oobo te Yerusalem. Ore apa enkarna e ng'otonye naa Sebida entito e Pedaia. Neas ninye mbaa torrok too nkonyek o Laitoriani te risioroto e nena pooki apa naataasa loo papaai lenye. Ore apa aa olaiguanani Yehoiakim, neilepu Nebukadnesa, alotu neaku Yehoiakin osinka lenye ilarin okuni. Neitoki ninye aibelekenya agilunore ninye. Neirriwaki Olaitoriani metigilunore ninye ilwuampan loo ltung'ana loo Lkaldayo o too ltung'ana le Moab o loo ltung'ana le Amori, neirriwaki ninche meshomo aarasaki Yuda neidaikie ninye, te risioroto o rorei lo Laitoriani, apa oiroro aimunye isinkan lenyena, lelo oibonok le Nkai. Eewuo ena bae shumata Yuda te nkitanapata o Laitoriani, pee eiwuang'ie ninche too nkonyek enyena, tenkaraki ing'ok e Manase, te risioroto e nena pooki apa naataasa ninye. O tenkaraki sii ilo sarge lemeeta entioto apa oibukoyie ninye, amu eiputa apa ninye Yerusalem, osarge lemeeta entioto, neaku meidim Olaitoriani ataapalaki ninye. Ore apa nkulie kiaasin e Yehoiakim, o nena pooki naataasa ninye, neigeroki tiatua embuku oo ntepen oo laiguanak le Yuda. Neaku eirure Yehoiakim etua anaa apa loo menye, neitoreisho Yehoiakim olayioni lenye te rishata enye. Eitu eitoki olaiguanani le Misiri aipang'u te nkop enye, amu eewa olaiguanani le Babilon nena pooki apa naara ino laiguanani le Misiri ebaiki oerata le Misiri o metabaiki olkeju le Frati. Oloo larin tomon o isiet apa Yehoiakin pee eiteru aitoreisho, neitoreisho ninye ilapaitin okuni te Yerusalem. Ore apa enkarna e ng'otonye naa keji Nabusta, entito e Elnatan. Neas ninye mbaa torrok too nkonyek o Laitoriani, te risioroto e nena pooki apa naataasa loo papaai lenye. Ore apa teina kata neilepu isinkan le Nebukadnesa olaiguanani le Babilon aapuonu Yerusalem, neibung'i ina anasa aang'adu. Ore Nebukadnesa, olaiguanani le Babilon nelotu ina anasa ina kata etang'adutua isinkan lenyena; ore Yehoiakin olaiguanani le Yuda, neitarasaki kewan olaiguanani le Babilon, kewan enye, o ng'otonye o sinkan lenyena, o lkituaak lenyena, o sinkan le nkaji enye e nkitoo. Neen olaiguanani le Babilon ninye, neya ninye, to lari le isiet le nkitoria enye. Nenap ninye aya lelo shumat pooki le nkaji o Laitoriani o lchumat le nkaji o laiguanani, nedung aitaa mbelibelat imasaa pooki e sahabu naatii atua enkaji o Laitoriani, apa naaitobira Solomon olaiguanani loo Siraeli, anaa apa enatolimuo Olaitoriani. Etanapa ninye aya Yerusalem pooki, o lkituaak pooki o ltung'ana pooki magil yiolot, iltung'ana nkalifuni tomon ooibung'aki, o ltung'ana pooki arriyiak te nguetare, o too sekenke. Meetae hoo obo otelekua, meteleku ake lelo tung'ana ake aisinak oleng leina kop. Neya ninye Yehoiakin Babilon; o ng'otonye olaiguanani, o nkituaak o laiguanani, o lkituaak lenyena o ltung'ana kituaak leina kop. Eewa ninye te araroto aitung'uaa Yerusalem nerik Babilon. Neyau olaiguanani le Babilon lelo yarunot Babilon, lelo tung'ana pooki yiolot, nkalifuni naapishana, o ltung'ana arriyiak te nguetare, o loo sekenke, iltung'ana enkalifu nabo, ore lelo pooki naa iltung'ana oogol neishiaakino to olarrabal. Neitoki olaiguanani le Babilon aitaa Matania olenkapu le Yehoiakin, olaiguanani te rishata enye, neibelekeny enkarna enye ajo Sedekia. Oloo larin tikitam oobo apa Sedekia ina kata pee eaku olaiguanani, neitoreisho ninye ilarin tomon o obo te Yerusalem. Ore apa enkarna e ng'otonye naa keji Hamutal, entito e Yeremia le Libna. Neas ninye mbaa torrok too nkonyek o Laitoriani, te risioroto e nena pooki naataasa Yehoiakin. Amu ore te nkaraki engoro o Laitoriani, etabawua e rishata te Yerusalem o te Yuda, naiturrayie ninye ninche aitalam kewan. Negolong'aki Sedekia olaiguanani le Babilon. Ore to lari lioudo le nkitoria enye, to lapa le tomon, te nkolong e tomon o lapa, nelotu Nebukadnesa olaiguanani le Babilon tenebo enjore enye pooki agilunore Yerusalem, neng'adu ninye aman, nepik ninche engumoto aaitaman enkanasa. Neaku etang'aduaki enkanasa ometaa olari le tomon oobo le nkitoria olaiguanani Sedekia. Ore te nkolong e naaudo o lapa liong'uan nerasu olameyu teina anasa, amu meekure eetae endaa too ltung'ana leina kop. Neitobiri elusie teina anasa; neisik olaiguanani kewarie o ltung'ana pooki le njore, aaim enkoitoi e kishomi natii erishata oo sunta, embata e nkurma o laiguanani, hoo netang'adutua apa Ilkaldayo ina anasa. Nepuo ninche aaim enkoitoi e Araba. Kake etusujaitie apa enjore oo Lkaldayo olaiguanani nepuo aainepu ninye too nkisiajat e Yeriko. Neidapasha enjore enye pooki aaing'uaa ninye. Neibung ninche olaiguanani neyau enetii olaiguanani le Babilon te Ribla, nedung'oki ninye enkiguana. Near ninche ilayiok le Sedekia metuata too nkonyek enyena neen ninye too lpisia, neya ninche ninye Babilon. Ore to lapa le imiet, te nkolong e naapishana o lapa aa ninye olari le tomon o oudo le nkitoria e Nebukadnesa, olaiguanani le Babilon, nelotu Nebusaradan ilo kitok loo larripok lo olaiguanani, osinka leilo aiguanani le Babilon, alotu Yerusalem. Nepejoo ninye enkaji o Laitoriani, o enkaji o laiguanani, o nkajijik pooki e Yerusalem. Ore pooki aji kitok, nepejoo ninye. Ore ina jore pooki oo lkaldayo, apa ootii tenebo ilo kitok le rripore, neuroo isunta pooki naamanita Yerusalem. Ore lelo kulikae tung'ana pooki apa ootung'uayioki tiatua enkanasa, o lelo ooisika, aaisikaki olaiguanani le Babilon, tenebo ilo orora pooki, neya Nebusaradan ilo kitok le rripore eyararoto. Kake etung'uayie apa ilo kitok le rripore embata oo ltung'ana aisinak oleng leina kop, pee eaku ilooitobir isabibu, o laturok. Ore nena ng'apeta o suyai apa naatii enkaji o Laitoriani, o nkitotoneta enyena o ilo moti lo suyai, apa naatii atua enkaji o Laitoriani, nebel ilkaldayo aaitaa mbelibelat, nenap ilo suyai aaya Babilon. Neya ninche imotioo, o nchempei, o nkuteta e nkima, o ntokitin e nkorropil, o masaa pooki o suyai apa naasishoreki te nkaji e Nkai o motioo, o lbakulini. Ore apa nena tokitin e sahabu neya ilo kitok le rripore anaa sahabu ore ina nara enkosholai neya anaa enkosholai. Ore tialo nena ng'apeta pokira are, o ilo moti, o nkitotoneta enyena, apa naaitobira Solomon te nkaraki enkaji o Laitoriani, ore enkiroishi eilo suyai pooki nemeimakinoyu te nkiroishi. Ore enkadoro e ng'ape nabo naa ntemat e nkaina tomon o isiet, ore enchumata enye netii osunyai. Ore enkadoro eina dukuya naa ntemat e nkaina uni. Neya ilo kitok le rripore Seria olapolosani kitok o Sefania ilo apolosani liare, o lelo arripok le kishomi pokira okuni; ore teina anasa neya ilo kitok apa oitasheiki iltung'ana le njore, o ltung'ana imiet lo lkiama lo laiguanani apa ooinepuaki te nkanasa; o laigeroni lo lkitok le njore laa ninye apa oipotuo iltung'ana leina kop, o ltung'ana ntomoni ile loo ltung'ana leina kop apa oonotoki teina anasa. Ore Nebusaradan ilo kitok le rripore neya ninche, neyau ninche enetii olaiguanani le Babilon te Ribla. Near olaiguanani le Babilon ninche, near metuata te Ribla, tiatua enkop e Hamat. Neaku eewaki apa Yuda eyararoto aaitung'uaa enkop enye. Ore te shumata lelo tung'ana oo telekutua te nkop e Yuda, lelo apa ootung'uayie Nebukadnesa olaiguanani le Babilon, negelu ninye Gedalia olayioni le Ahikan, olayioni le Shafan, aitaa olbalusui. Ore ake pee ening ilarikok pooki le njore, teina kop naisiaja nchere eitaaki tenebo iltung'ana lenye nchere eitaa olaiguanani le Babilon Gedalia o lbalusui, nepuonu ninche tenebo iltung'ana lenye enetii Gedalia te Mispa, aa taa Ishmael olayioni le Natania, o Yohanan olayioni le Karea, o Seriai olayioni le Tahumet le Netofat, o Yaasania olayioni le Maakat. Neinos Gedalia olmumai tialo ninche o ltung'ana lenye, ejo, “Emiureishoyu intae te nkaraki ilkituaak loo lkaldayo. Entobik intae tena kop, nisiaayiayia olaiguanani le Babilon, amu keserianu te intae.” Kake ore to lapa liopishana, nelotu Elishama, leilo marei le nkitoo, tenebo iltung'ana lenyena tomon, nerasaki Gedalia near metua, tenebo Ilyahudi o Lkaldayo apa ootii tenebo ninye te Mispa. Neitoki iltung'ana pooki, ilooti o lkituaak o larikok loo njorin, aadumunye nepuo Misiri, amu keure apa Ilkadayo. Ore to lari le tomoni uni oopishana le yararoto e Yehoiakin olaiguanani le Yuda, to lapa le tomon oare, te nkolong e tikitam oopishana o lapa, nelaaya Efil Merodak, ilo aiguanani le Babilon, teilo ari oitera aitoreisho, Yehoiakin olaiguanani le Yuda metupuku te jela. Neirorie ninye te supatisho, neisho ninye olorika olus too lorikan loo laiguanak apa ootii tenebo ninye te Babilon. Neaku eitayio Yehoiakin lelo kilani lenyena le jela, ore too nkolong'i pooki e nkishui enye neinos ninye endaa te mesa o laiguanani. Ore te retoto enye, eishooki apa ninye eretoto e anaake naishoo olaiguanani, ore ake te nkolong neng'amaa erubata, te nkishui enye pooki. Adam, Seti, Enosh, Kenan o Mahalael, Yared; Enok, o Metusela, o Lamek Noa, o Shem, o Ham o Yafet. Ore apa ilayiok le Yafet naa Gomer, o Magog, o Madai o Yafan, o Tubal o Meshek o Tiras. Ore ilayiok le Gomer naa Askenas, o Difat, o Togarma. Ore ilayiok le Yafan naa Elisha, o Tarshish o Kitim o Rodanim. Ore ilayiok le Ham naa Kushi o Misiri o Puti o Kanaan. Ore ilayiok le Kushi naa Seba, o Hafila, o Sabta o Raama o Sableka. Ore ilayiok le Raama naa Sheba o Dedan. Kushi apa menye le Nimrod, naa ninye otang'asa aaku oltung'ani magilani te nkop. Misiri apa menye le Ludim, o Anamim, o Lehabim, o Napatuhim, o Patusim o Kusluhim (aa ine taa eing'uaa Ilfilisti, o Kaftorim.) Kanaan apa menye le Sidon, ilo kikau lenye, o Heti, o Lyebusi o Lamori o Lgirgashi, o Lhifi ole Arki o Lsini, o Lafadi, o Lsamari, o Lhamati. Ore ilayiok le Shem naa Elam o Ashur o Arpakashad o Lud, o Aram o Usi o Huli o Feter, o Meshek, Apakashad apa menye le Shela; naa Shela menye le Eber. Etoikioki apa Eber ilayiok oare, ore enkarna e obo naa Peleg (amu too nkolong'i enyena apa etooroki enkop) ore enkarna o lalashe naa Yoktin. Yoktin apa menye le Almodad, o Shelaf o Hasamafet, o Yera. O Hadoram, o Usal, o Dikla, o Ebal o Abimael o Sheba, o Ofir, o Hafila o Yobab; ore kulo pooki naa ilayiok le Yoktan. O shem, o Arpakshad o Shela, o Eber o Peleg o Reu; o Serug o Nahor o Tera; o Abram aa taa Abraham. Ore ilayiok le Abraham naa Isaak o Ishmael. Kuna ninche iiishoritin enye. Ore olkikau le Ishmael naa Nebaiot; o Kedar, o Adbel Mibsan, o Mishma, o Duma, o Masa, o Hadad, o Tema, o Yetur o Nafish o Kedema. Kulo ninche ilayiok le Ishmael. Ore apa ilayiok le Ketura, ina apiani e Abraham, netoiuo Simra, o Yokshan o Medan o Midian o Ishbak o Shua. Ore ilayiok le Yokshan naa Sheba o Dedan. Kulo ninche ilayiok le Midian, Efa o Efer, o Hanok o Abida o Eldaa. Kulo pooki ninche eishoi e Ketura. Abraham apa menye le Isaak. Kulo ninche ilayiok le Isaak, Esau o Israel. Ore ilayiok le Esau naa Elfas, o Reul, o Yeush, Yalaam o Kora. Ore ilayiok le Elfas naa Teman, o Omar o Sefi o Satam o Kenas o Timna o Amaleki. Kulo ninche ilayiok le Ruel, Nahat, o Serak, o Shama o Miisa. Kulo ninche ilayiok le Seir: Lotan, o Shobal, o Sibeon, o Anak, o Dishon, o Eser o Dishan. Kulo ninche ilayiok le Lotan: Hori o Homan, ore apa enkanashe e Lotan naa Timna. Kulo ninche ilayiok le Shobai: Alian o Manahat o Ebai, o Shefi, o Onam. Ore ilayiok le Sibeon naa Aia o Anak. Kulo ninche ilayiok le Anak: Dishon ore ilayiok le Dishon naa Hamran o Eshban, o Itran o Keran. Kulo ninche ilayiok le Eser, Bilhan, o Saafan o Yaakan. Ore ilayiok le Dishon naa Usi o Aran. Kulo aiguanak apa ooitoreisho te enkop e Edom, eton eitu eitore hoo likae aiguanani Isiraeli: Bela ole Boer, laa ninye eipotieki enkanasa naji Dinhaba. Ore pee eye Bela neitoreisho Yohab ole Serak te rishata enye. Ore pee eye Yohab, neitoreisho Husam ole nkop oo Ltaman te rishata enye. Ore pee eye Husham ore Hadad ole Bedad laa ninye apa otimira Midian te nkop e Moab neitoreisho te rishata enye; ore enkarna enkanasa enye naa Afit. Ore pee eye Hadad, neitoreisho Samala le Masreka te rishata enye. Ore pee eye Samli, ore Shaul le Rehobot to lkeju le Frati neitoreisho te rishata enye. Ore pee eye Shaul neitoreisho Baalhanan ole Akbor te rishata enye. Ore pee eye Baalhanan neitoreisho Hadad te rishata enye, ore enkarna e nkanasa naa Pai, ore enkarna e nkitok enye naa Mahetabel, entito e Matred, entito e Mesaba. Neye Hadad. Ore ilaiguanak loo loshon le Edom naa; olaiguanani Timna, o Alka, Yetet, o Oholibama, o Ela, o Pinon o Kenas, o Teman, o Mibsar, o Magdiel, o Iram, kulo ninche ilaiguanak le Edom. Kulo ninche ilayiok le Israel, Ruben, o Simion o Lawi, o Yuda, o Isaakar, o Sebulon, o Dan, o Yosef, o Benchamen, o Naftali, o Gaad, o Asheri, kulo ninche ilayiok le Yuda. Eer, o Onan, o Shela, ore kulo pokira okuni apa etoikio Betshua oo Lkanaani ninye. Ore apa Eer ilo kikau le Yuda naa oltung'ani arruoni te dukuya Olaitoriani. Neaku etara Olaitoriani ninye metua. Ore ina tito apa nayama olayioni lenye naji Tamar, neiki ninye Peres o Serak. Eeta apa Yuda ilayiok imiet. Kulo ninche ilayiok le Peres: Hesron o Hamul. Ore ilayiok le Serak naa Simri, o Etan, o Hemian, o Kalkol o Dara, imiet pooki. Kulo ninche ilayiok le Kormi; Akar ilo aing'oling'olani loo Siraeli, laa ninye apa otigila nkitanapat too ntokitin naaitisinyakaki Enkai, ore olayioni le Etan naa Asaria. Kulo ayiok apa etoikioki Hesron: Yerameel, o Ram, o Kelubia. Ram apa menye le Aminadab, naa Aminadab apa menye le Nahashon, ilo kitok loo layiok le Yuda. Nahashon apa menye le Salma, Salma le Boas, Boas le Obed, Obed le Yese Yese apa menye le Eliab naa ninye olkikau. Aminadab oliare, o Shimea aa ninye oliokuni. Natanel oliong'uan, Radai ole imiet, Osem ole ile Daudi oliopishana, ore nkanashera enye naa Seruyia, o Abigail. Ore ilayiok le Seruyia naa Abishai, o Yoab, o Asahel. Lelo pokira okuni. Etoiuo apa Abigail Amasa, ore menye le Amasa naa Yeter le Ishmael. Eeta apa Kaleb olayioni le Hesron nkera naatoiuo enkitok enye naji Asuba, ore te Yeriot, naa kuna nkarn oo layiok lenyena, Yesher, o Shobab, o Adron. Ore pee eye Asuba, neyam Kaleb Efarat naa ninye natoiuo Huri. Huri apa menye le Uri naa Uri menye le Besalel. Ore te siadi nelo Hesron ayam entito e Makir, menye le Gilead. Neyamisho ninye aa oloo larin ntomoni ile, neiki ina tito ninye Segub. Naa Segub apa menye le Yair, laa ninye apa oata nkanas tikitam ookuni te nkop e Gilead. Kake etaaraitie apa Geshur o Aram nkanas e Hofotajir, o Kenat, o nkang'itie enyena kutiti, nkang'itie ntomoni ile. Ore kuna pooki naa inoo le ishoi oo le Makir, menye le Gilead. Ore tesiadi te keeya e Hesron, nelo Kaleb ayiolou Efarata, enkitok e Hesron papaai lenye. Neiki ina kitok ninye Ashuri, menye le Tekoa. Kulo ninche ilayiok le Yerameel ilo kikau le Hesron: Ram ilo kikau lenye, o Buna, o Oren o Osem o Ahija. Eeta sii apa Yerameel enkae kitok, naji enkarna enye Atara; naa ninye apa ngotonye e Onam. Kulo ninche ilayiok le Ram ilo kikau le Yerameel: Maas o Yamin o Eker. Kulo ninche ilayiok le Onam: Shamai o Yuda ore ilayiok le Shamai naa Nadab o Abishur. Ore apa enkarna enkitok e Abishur naa Abihail neiki Abishu Ababan o Molid. Ore ilayiok le Nadab naa; Seled o Apaim, neye Selad meeta enkerai. Ore ilayiok le Apaim naa Ishi, ore ilayiok le Ishi, naa Sheshan, ore ilayiok le Sheshan naa Ahalai. Naa kulo ilayiok le Yada, olalashe le Shamai, o Yeter o Yonatan. Etua apa Yeter meeta enkerai. Kulo ninche ilayiok le Yonatan: Pelet o Sasa. Ore kulo naa ile ishoi e Yerameel. Meeta apa Sheshem ilayiok, ntoyie ake eeta. Neeta apa Sheshem Olmisiri rrindik oji enkarna enye Yerha. Neishooyo Sheshan ina tito enye meyama Yerha, orrindik lenye. Neiu ina tito Atai, Atai apa menye le Natan, naa Natan menye le Sabad. Sabad apa menye le Efla naa Efla menye le Obed. Obed apa menye le Yehu, naa Yehu menye le Asaria. Asaria apa menye le Heles, naa Heles menye le Eleasa. Eleasa menye le Sismai naa Sismai menye le Shalum. Shalum menye le Yekemia naa Yekemia menye le Elishama. Kulo ninche ilayiok le Kaleb ilo alashe le Yerameel: Marehash ilo kikau lenye, laa ninye menye le Sif, ore ilayiok le Maresha olkikau lenye naa ilayiok le Hebron: Kora, Tapua, o Rekem o Shema, Shema apa menye le Raham, menye le Yorkeam; aa menye Shamai apa Rekem, kulo ninche ilayiok le Shamai: Maon: naa Maon apa menye le Betsar. Ore sii apa Efa ina apiani e Kaleb, neiu Haran, o Mosa o Geses, naa Haran apa menye le Geses. Ilayiok le Yehadai; Regem, o Yotam, o Gesham o Pelet o Efa, o Shaaf. Ore Maaka ina apiani e Kaleb neiu Sheber o Tirhana. Etoiuo sii Shaaf menye le Madmana, o Shefa menye le Makbena o menye le Gibea; ore apa entito e Kaleb naa keji Aksa. Kulo apa ileishoi e Kaleb. Ilayiok le Huri ilo kikau le Efrata: Shobal menye le Kiriat-yearim, Salma menye le Betlehem o Heref menye le Betgader. Eeta apa Shobal menye le Kiriat jearim kulikae ayiok; Haroe laa ninye olpisiai loo lmonubot. Ore ilmareita loo Lkiriat-yearim naa Iltiriti, o Iputi, o Ilchumati o Imishirati, naa kulo eing'uaa Ilsoriti o Ilshitoa. Ilayiok le Solma: Betlehem o Lnetofari o Arot-bet-Yoab, o lpisia loo Lmahahati, o Lsori. Ore sii ilmareita loo laigerok apa oomanya Yabes, naa Iltirati o Ichimeat o Lsukati. Ore kulo naa Ilkeni apa ooetuo aaing'uaa Hamat, menye lolmarei le Rekab. Kulo ninche ilayiok le Daudi apa ootoikioki ninye te Hebron: Ore olkikau naa Amon, otoiwuo Ahinoam oo Lyesreel; ore oliare naa Daniel, otoiwuo Abigail e Karmel. Ore oliokuni naa Absalom apa laa Maaka ng'otonye. Entito e Talmai olaiguanani le Geshur. Ore oliong'uan anaa Adonija, neji ng'otonye Hagit. Ore oleimiet naa Shefatia otoiwuo Abital; ore ole ile naa Itream otoiwuo enkitok enye Egla. Etoikioki apa ninye kulo pokira ile te Hebron, teine apa neitoreisho ilarin oopishana o lapaitin ile. Neitoreisho ninye te Yerusalem ilarin tomoni uni oo kuni. Kulo apa lelo ootoikioki ninye te Yerusalem: Shimei o Shobab, o Natan, o Solomon, lelo oong'uan etoiuo Betshua entito e Amiel. Neitokini aaiu Ibar, o Elishama, o Elifelet, o Noga, o Nefeg o Yafia, o Elishama, o Eliada, o Elifelet, ooudo, ilayiok le Daudi kulo pooki metii ilayiok loo nkapiak; naa Tamar enkanashe enye. Ore eishoi e Solomon naa: Rehoboam o Abija olayioni lenye, o Asa olayioni lenye, o Yehoshefat olayioni lenye, o Yoram olayioni lenye, o Ahasia olayioni lenye, o Yoash olayioni lenye, O Amasai olayioni lenye, o Asaria olayioni lenye o Yotan olayioni lenye, o Ahas olayioni lenye. O Hesekia olayioni lenye o Manase olayioni lenye, o Amon olayioni lenye, o Yosia olayioni lenye. Ore ilayiok le Yosia naa: Yohanan olkikau lenye, ore oliare naa Yehoiakim, ore oliokuni naa Sedekia, ore oliong'uan naa Shulum. Ore eishoi e Yehoiakim naa: Yekonia olayioni lenye o Sedekia olayioni lenye. Ore eishoi e Yehoiakin ilo apa oshomo eyararoto naa: Shealtiel olayioni lenye, o Malkiram, o Pedaia, o Shenasa, o Yekania, o Hoshama, o Nedabisha. Ore ilayiok le Pedaia naa Serubabel o Shimei; ore ilayiok le Serubabel naa Meshulam o Hanania naa Shelomit enkanashe enye, o Heshuba, o Obel, o Berekia, o Hasadia, o Yushabhesed, ninche pokira imiet. Ore ilayiok le Hanania, naa Peletia o Yeshaia, o layioni lenye Refaina, o layioni lenye Arnan, o layioni lenye Obadia, o layioni lenye Shekania. Ore ilayiok le Shekania naa Shemaia. Ore ilayiok le Shemaia naa Hatush, o Lgal, o Baria, o Neris o Shafat, kulo pokira ile. Ore ilayiok le Neara naa Elioenai, Hiskia, o Asrikam, kulo pokira okuni. Ore ilayiok le Elioenai naa: Hodafia, o Eliashib, o Pelaia, o Akub, o Yohanan, o Delaia, o Anani, kulo pokira oopishana. Ore ilayiok le Yuda naa, Peres, o Hesron, o Karmi, o Huri, o Shobal. Reaia ole Shobal apa menye le Yahat, naa Yahat menye le Ahumei o Lahad. Kulo apa ilmareita loo le Sorat. Kulo apa ilayiok le Etam: Yesreel, o Ishma o Ldbash; ore enkarna e nkanashe enye naa Haseloponi. Naa Panuel apa menye le Gedor, naa Eser menye le Hushash. Kulo ninche ilayiok le Huri, ilo kikau le Efrata, menye le Betlehem. Eeta apa Ashuhur, menye le Tekoa nkituaak are, Heba, o Naara; Neiki Naara ninye Ahusum, o Hefer, o Temeni, O Haashatari. Kulo ninche apa ilayiok le Naara. Kulo ilayiok le Hela: Seret, o Ishar, o Etanan. Koos apa menye le Anub, o Sebeba, o lmareita le Aharhel olayioni le Harum. Yabes apa oning'o oleng too lalashera lenyena; neisho apa ninye ng'otonye enkarna ajo Yabes, ejo, “Enkaraki natoiuo ninye te mion.” Neomon Yabes Enkai e Israel ejo, “Tamayianaki Na Ai, nikiponiki enkop, nchoo enkaina ino eaku tenebo nanu, naamitu nanu te mbatisho pooki pee maatum nanu!” Neisho Enkai ninye ina natoomonuo. Keleb ilo alashe le Shusha apa menye le Mekir, laa ninye menye le Eshton. Eshton apa menye le Betrafa, o Pasea, o Tihina menye le Irnabash. Kulo ninche iltung'ana le Reka. Ore ilayiok le Kenas naa: Otiniel, o Seraia. Ore ilayiok le Otimiel naa: Hanat o Meonotai. Meonotai apa menye le Ofra: naa Serai apa menye le Yoab menye Geharashim, neijia apa ejo ninche amu iltung'ana arriyiak. Ore ilayiok le Kaleb olayioni le Yefune naa: Iru, o Ela, o Naam; ore ilayiok le Ela naa Kenas. Ore ilayiok le Yehaledel naa: Sif o Sifa, o Tiria, o Asarel. Ore ilayiok le Esrahi naa: Yeter, o Mered, o Efer, o Yolon. Kulo ninche ilayiok le Bitia entito e Farao, apa nayama Mered, nenutayu ninye neiu Meriam o Shamai o Ishba menye le Eshtemoa. Ore ina kitok enye oo Lyahudi neiu Yared menye le Gedor, o Heber menye le Soko, o Yekutiel menye le Samoa. Ore ilayiok le nkitok e Hodia, ina anashe e Naham, naa iloomenye le Keila le Garmit o Eshtemoa le Maakuti. Ore ilayiok le Shimon naa: Amon, o Rina, o Benhanan, o Tilon. Ore ilayiok le Ishi naa Sohet, o Bensohet. Ore ilayiok le Shela ole Yuda naa: Eer menye le Leka, o Laada menye le Maresha, o lmareita le nkaji oo laitobirak oopuyiapui te Bet-ashbea. Ore Yokim oltung'ana le Koseba, o Yoash o Saraf apa laa ninye oitoreisho te Moab nerrinyo alo Lahem. (Ore apa kuna baa naa iniopa oleng.) Kulo apa lelo aitobirak loo ntokitin oo nkulupuok naa ninche oomanya Netaim o Gedera: Nebik ninche teine tenebo olaiguanani tenkaraki esiaai enye. Ore ilayiok le Simeon naa: Nemuel, o Yamin, o Yarib, o Serak o Shaul; Shalum apa olayioni lenye, o Mibsai olayioni lenye, o Mibsam olayioni lenye o Mishma olayioni lenye. Ore ilayiok le Mishma naa: Hamuel olayioni lenye, o Sakur olayioni lenye o Shimei olayioni lenye. Eeta apa Shimei ilayiok tomon o ile o ntoyie ile; kake meeta apa ilalashera lenyena nkera kumok, neitu eponari ilmareita lenye anaa iltung'ana le Yuda. Nebik apa ninche te Beersheba, o te Moloda, o te Hasar-shual, o te Bilha, o te Esem, o te Tolad, o te Betuel, o te Horma, o te Siklag, o te Betmarkobat, o te Harsarsusim, o te Betbiri, o te Sharraim. Kuna ninche nkanas enye o metabaiki enkitoria e Daudi. Ore nkang'itie enye naa Efan, o Ain, o Rimon, o Token o Ashan, nkanas imiet. Ore tenebo nena ang'itie enye pooki naamanita o kuna anas ometabaiki baal, kuna apa imanyiishoritin enye neigero iiishoritin enye. Meshohab, o Yamlek, o Yosha, apa ilayiok le Amasai. Yoel o Yehu apa ilayiok le Yoshibia olayioni le Seraia, olayioni le Asiel. Elioenai o Yaakoba o Yeshohaia, o Asaia, o Adiel, o Yesimeil o Benaia, o Sifa ole Shifi olayioni le Alon, o layioni le Yedaia, olayioni le Shimri, olayioni le Shemaia ore kulo ooipotoki nkarn ninche apa ilkituaak too lmareita lenye, ore nkajijik oo loo menye nebul oleng, Eshomo apa ninche enejing'ieki Gedor nepuo enkalo o loo saen lo erata, eing'oru ndaat oo nkerrai enye, nepuo aatum ndaat sidain teine, amu kelala ina kop, nebor oilole, neserian; ore apa iloomanya ine te dukuya naa ile Ham. Ore kulo ooigeroki nkarn ninche apa loo nkolong'i e Hesekia, olaiguanani le Yuda, neidaikie ilng'oborri lenye o Lmeunin apa oomanya ine, neishieki ninche teine o taata, nemany ninche ina kop enye enkaraki natii ine ndaat oo nkerrai enye. Ore ilkulikae lenye, iltung'ana oobaya iip imiet too le Simeon, nepuo oldoinyio le Seir, ore ilarikok lenye naa Pelatia, o Neara, o Refaia, o Usiel, ilayiok le Ishi. Neidaikie ninche ilo pisiai apa le Ameleki oisika nebik ninye teine o metabaiki ena olong. Kulo ile ishoi e Ruben ilo kikau le Israel, (ore enkaraki natijing'a enkaji e papaai lenye, meekure eikenari aajo olkikau. Ore erishata enye neishori ilayiok le Yosef olayioni le Israel. Amu eitu eigeri enkarna enye te mbuku oo iishoritin anaa olkikau. Ore hoo naa Yuda apa ogol alang ilalashera lenyena, naa ninye eimu ilo kitok, kake ene Yosef enjung'ore o lkikau.) Ore ilayiok le Ruben ilo kikau le Israel naa: Hanok, o Palu, o Hesron, o Karmi. Kulo ilayiok le Yoel: Shemia olayioni lenye, o Gog olayioni lenye, o Shimei olayioni lenye, o Mika olayioni lenye, o Reaia olayioni lenye, o Baal olayioni lenye, o Beara olayioni lenye, laa ninye apa eewa olaiguanani Tilgat Pilnesa le Asiria te yararoto. Ninye apa oltung'ani kitok too le Ruben. Ore iltung'ana lenye too lmareita lenye, ina kata pee eigeri iiishoritin enye naa: ore olkitok lenye naa Yerel, o Sakaria, o Bela olayioni le Asas, olayioni le Shema, olayioni le Yoel, apa omanya Aroer ometabaiki Nebo o Baalmeon. Etobiko sii apa te nkalo o loo saen ometabaiki olpolosie lo lpurkel tena shoto e Frati, amu etoponari apa nkishu enye te nkop e Gilead. Ore too nkolong'i e Saul neitayunye iltung'ana le Hagrit olarrabal, neibung ninche, nebik ninche too lng'oborri lenye te nkop pooki e Gilead te nkalo oloosaen. Etamanya apa ilayiok le Gad aatashare ninche te nkop e Bashan ometabaiki Saleka. Yoel apa olkitok nesujaki Shafan o Yanai o Shafat te Bashan. Ore olorere lenye te risioroto oo nkajijik oo loo menye naa: Mikael, o Meshulam, o Sheba, o Yorai, o Yakan, o Sia, o Eber, lelo pokira oopishana. Kulo apa ilayiok le Abihail olayioni le Huri olayioni le Yaroa, olayioni le Gilead, olayioni le Mikael, olayioni le Yeshishai, olayioni le Yohado, olayioni le Buus; Ahis olayioni le Abdiel, olayioni le Guni ninye apa olkitok te nkaji e menye; nebik apa ninye te Gilead, tiatua Bashan o too nkang'itie enyena, o teina kop pooki nairritishoreki e Sharon o meiting'ie. Eigeroki apa kuna baa pooki anaa iishoritin too nkolong'i e Yotam olaiguanani le Yuda o too nkolong'i e Yeroboam olaiguanani le Israel. Ore tiatua iloshon le Ruben ore Gad o lpisiaai lo losho le Manase, neeta iltung'ana magil, oata long'oi o lalema, neeta nkai, naa arriyiak to larrabal, naa nkalifuni artam oong'uan, o iip naapishana o ntomoni ile, neterretenate ninche te nkisiaayiare. Neitayu ninche olarrabal o Lhagri, olyetur, Olmafish, Olnadab; ore ake pee eng'amu ninche eretoto pee egilunore ninche, ore Ilhagri, o lelo pooki ootii tenebo ninche neishoori aapik nkaik oo le Ruben, amu Olaitoriani eishirakitia ninche to larrabal, neisho ninche Enkai eomonunoto enye enkaraki naisiliga ninche ninye. Neya ninche nkishu enye, o ntamesin enye nkalifuni onom, o nkerra nkalifuni iip are o onom, o sirkon nkalifuni are, o ltung'ana ooishu nkalifuni iip nabo. Amu eirragaitie ilkumok etuata, amu ore ilo arrabal naa ole Nkai. Nebik ninche te nkop enye ometabau eyararoto. Ore olpisiai loo ltung'ana le Manase nebik teina kop, neaku ninche kumok oleng te Bashan o metabaiki Baarhermon, o Senir, o ldoinyio le Hermon. Kulo apa ilukuny oo nkajijik oo loo menye: Efer, o Ishi, o Eliel, o Esriel, o Yeremia, o Hadafia, o Yadiel, lelo murran magil, ooning'o, laa lukuny oo nkajijik oo loo menye. Kake etogolong'okita ninche Enkai oo loomenye, neiborrie onyek aarubare nkaitin oo ltung'ana leina kop apa naaidaikie Enkai te dukuya ninche. Ore enkaraki ina neputu Enkai e Israel oltau le Puul, olaiguanani le Asiria, o ltau le Tilgal-Pilnesa, olaiguanani le Asiria, nearaa ninche meshomo, aa taa ile Ruben o le Gad, o lpisiaai loo ltung'ana le Manase, nereu ninche Hala, o Habor, o Hara, nereu sii olkeju le Gosan ometabaiki ena olong. Kulo ilayiok le Lawi: Gershom, o Kohat, o Merari. Ore ilayiok le Kohat naa: Amram, o Ishar, o Hebron o Usiel. Kuna nkera e Amram: Aron, o Musa, o Miriam. Kulo ilayiok le Aron: Nadab o Abihu, o Eliesa, o Itamar. Eliesa apa menye le Finehas, naa Finehas menye le Abishua Abishua menye le Buki, Buki menye le Usi, Usi menye le Serahia, Serahia menye le Meraiot, Meraiot menye le Amaria, Amaria menye le Ahitub, Ahitub menye le Sadok, Sadok menye le Ahimaas, Ahimaas menye le Asaria, Asaria menye le Yohanan, naa Yohanan menye le Asaria. (Ninye apa ilo oisiaaisho anaa olapolosani teina aji apa natesheta Solomon te Yerusalem) Asaria apa menye le Amaria, naa Amaria menye le Ahitub Ahitub menye le Sadok naa Sadok menye le Shalum, Shalum menye le Hilkia; Hilkia menye le Asaria, Asaria menye le Seraia, naa Seraia le Yehosadak; nelo apa Yohosadak eyararoto ina kata pee eirriwaa Olaitoriani Yuda o Yerusalem meshomo eyararoto te nkaina e Nebukadnesa. Ilayiok le Lawi: Gershom, o Kohat, o Merari. Naa kuna nkarn oo layiok le Gershom: Libni o Shimei. Ilayiok le Kohat: Amram, o Ishar, o Hebron o Usiel. Ilayiok le Merari: Mahali, o Mishi, kulo ninche ilmareita loo Lawi terisioroto oo loo menye. Ile Gershom: Libni, olayioni lenye, o Yohat olayioni lenye, o Sima olayioni lenye, o Yoash olayioni lenye, o Ido olayioni lenye, o Serak olayioni lenye, o Yeaterai olayioni lenye. Ilayiok le Kohat: Aminadab olayioni lenye, o Kora olayioni lenye, o Asir olayioni lenye. O Elkana olayioni lenye, o Ebiasaf olayioni lenye o Asir olayioni lenye o Tahat olayioni lenye, o Uriel olayioni lenye, o Usia olayioni lenye, o Shaul olayioni lenye. Ilayiok le Elkana: Amasai, o Ahimot o, Elkana olayioni lenye, o Sofai olayioni lenye, o Nahat olayioni lenye, o Eliab olayioni lenye o Yeroham olayioni lenye, o Elkana olayioni lenye. Ilayiok le Samuel: Yoel olkikau lenye, ore olosuju naa Abija. Ilayiok le Merari: Mahali, o Libni olayioni lenye, o Shimei olayioni lenye, o Usa olayioni lenye, o Shimea olayioni lenye, o Higia olayioni lenye o Asaia olayioni lenye. Kulo tung'ana apa etipika Daudi meitasheiki esiaai e Ranyare tiatua enkaji o Laitoriani, eidipaki aairragie osanduku lo sotua teine. Etaranyishote apa ninche te dukuya ilo ng'obor le wueji sinyati, ometaba anaa neshetu Solomon enkaji o Laitoriani te Yerusalem; neas ninche ina siaai enye anaa enaishiakino. Kulo tung'ana apa lelo tenebo ilayiok lenye. Ore too layiok le Kohat naa: Haman olaranyani ole Yoel, olayioni le Samuel, olayioni le Elkana, olayioni le Yehoram, olayioni le Eliel, olayioni le Toa, olayioni le Suf, olayioni le Elkana, olayioni le Mahat, olayioni le Amasai, olayioni le Elkana olayioni le Yoel, olayioni le Asaria, olayioni le Sefania, olayioni le Tahat, olayioni le Asir, olayioni le Ebiasaf, olayioni le Kora, olayioni le Ishar, olayioni le Kohat, olayioni le Lawi, olayioni le Israel; o lalashe lenye Asafu laa ninye apa oitashe te nkalo enye e tatene, aa taa Asafu ole Berekia, olayioni le Shimea, olayioni le Mikaeli olayioni le Baaseia, olayioni le Malkija, olayioni le Etni, olayioni le Serak, olayioni le Adaia, olayioni le Elan, olayioni le Sima, olayioni le Shimei o layioni le Yahat, olayioni le Gershom, olayioni le Lawi. Ore te nkalo e kedienye netii ilalashera lenye, lelo ayiok le Merari: Etam ole Kishi, olayioni le Abdi; olayioni le Maluk, olayioni le Hashabia, olayioni le Amasai, olayioni le Hilkia, olayioni le Amsi, olayioni le Beni, olayioni le Shemer, olayioni le Mahali, olayioni le Mushi, olayioni le Merari, olayioni le Lawi; ore ilalashera lenye Ilawi netegelakaki enkisiaayiare pooki e wueji sinyati tiatua enkaji Enkai. Kake ore apa Aron o layiok lenyena neitayu ilasarri te nchumata olperere loo lasarri oopejoro te nchumata olperere le nkorropil tenkaraki esiaai pooki eine wueji sinyati oleng. Neitobir sii olning'o lo sotua te nkaraki Israel, te risioroto e nena pooki naaitanapishe Musa osinka le Nkai. Kulo ninche ilayiok le Aron: Eliesa olayioni lenye, o Finehas olayioni lenye, o Abishua olayioni lenye, o Buki olayioni lenye, o Usi olayioni lenye, o Serahia olayioni lenye, o Meraiot olayioni lenye, o Amaria olayioni lenye o Ahitab olayioni lenye, o Sadok olayioni lenye, o Ahimaas olayioni lenye. Kuna ninche imanyishoritin enye terisioroto oo wuejitin neetamanya ninche too lpolosien lenye. Ore too layiok le Aron loo lmareita le Kohat, naa ena erubata enye. Eishooki ninche Hebron tiatua enkop e Yuda o nena daat oo nchoo naamanita, kake ore nkong'at embata e ina anasa o nkang'itie kutiti neishori Kalebu ole Yefune. Ore ilayiok le Aron neishori nena anas e sarunoto, Hebron o Libna, tenebo ndaat enye oo nchoo, Yatir o Eshtemoa tenebo ndaat enyena oo nchoo, o Hilen tenebo ndaat enyena oo nchoo, o Debir tenebo ndaat enyena, oo nchoo, o Ashan tenebo ndaat enyena oo nchoo, o Bet-shemesh tenebo ndaat enyena oo nchoo. Ore olosho le Benchamen neishori Geba tenebo ndaat enyena oo nchoo, o Alemet tenebo ndaat enyena oo nchoo, o Anatot tenebo ndaat enyena oo nchoo. Ore nkanas enye pooki too lmareita lenye naa tomon oo kuni. Ore lelo ootelekutua le Kohat, neishori te oshoto e nkukuo, anaa ilmareita leilo osho olpisiai lo losho le Manase, nkanas tomon. Ore ile Gershom te risioroto oo lmareita lenye neorikini nkanas tomon ookuni, o losho le Isaakar, o Asheri, o Naftali, o Manase te Bashan. Ore too le Merari te risioroto oo lmareita lenye neorikini Nkanas tomon oare to losho le Ruben, o Gad, o Sebulon. Kaae neisho iltung'ana le Israel ile Lawi nkanas tenebo ndaat enye oo nchoo. Neisho sii ninche te oshoto e nkukuo kuna anas naaipotoki tene oo loshon le Yuda, o Simeon o Benchamen. Ore kulikae mareita loo layiok le Kohat neeta nkanas natii enkop enye apa anaa inolosho le Efraim. Ninche apa eishooki nkanas e sarunoto. Shekem tenebo nena daat enyena oo nchoo, te nkop oo ldoinyio e Efraim. O Geser tenebo ndaat enyena oo nchoo. O Yokmeam tenebo ndaat enyena oo nchoo. O Bet-horon tenebo ndaat enyena oo nchoo, o Aijalon tenebo ndaat enyena oo nchoo, o Gatrimon tenebo ndaat enyena oo nchoo, ore to lpisiaai le nkop o losho le Manase neya Aner tenebo ndaat enyena oo nchoo, o Bileam tenebo ndaat enyena oo nchoo, te nkaraki lelo mareita loo le Kohat. Ore ile Gershom neishori olpisiaai le nkop e Manase: Golan te Bashan, tenebo nkanas enyena pooki o Ashtarot tenebo ndaat enyena oo nchoo, ore to losho le Isakar neyai Kadesh tenebo ndaat enyena oo nchoo, o Damerat tenebo nena ndaat enyena oo nchoo, o Ramot tenebo ndaat enyena oo nchoo, o Anem tenebo ndaat enyena oo nchoo. Ore to losho le Asheri neyai: Mashal tenebo ndaat enyena oo nchoo, o Abdon tenebo ndaat enyena oo nchoo, o Hukok tenebo ndaat enyena oo nchoo, o Rahob tenebo ndaat enyena oo nchoo. Ore to losho le Naftali neyai: Kadesh te Galilaya tenebo ndaat enyena oo nchoo, o Hamon tenebo ndaat enyena oo nchoo, o Kiriataim tenebo ndaat enyena oo nchoo. Ore lelo ootelekutua loo le Merari, neorikini ewueji olosho le Sebulon: Rimono tenebo ndaat enyena oo nchoo: o Tabor tenebo ndaat enyena oo nchoo, o te lido kekun lo lkeju le Yordan, te Yeriko, te nkalo oloo saen to lkeju le Yordan, ore to losho le Ruben neyai: Beser tiong'ota, tenebo ndaat enyena oo nchoo, o Yahasa tenebo ndaat enyena oo nchoo, o Kedemot tenebo ndaat enyena oo nchoo, o Mafaat tenebo ndaat enyena, oo nchoo. Ore to losho le Gad neyai, Ramot te Gilead tenebo ndaat enyena oo nchoo, o Mahanaim tenebo ndaat enyena oo nchoo o Hesbon tenebo ndaat enyena oo nchoo o Yaser tenebo ndaat enyena oo nchoo. Ilayiok le Isaakar; Tola, o Pua o Yashub, o Shimron, lelo pokira oong'uan. Ilayiok le Tola, Usi, o Refaia, o Yeriel, o Yahamai, o Ibsam, o Shemuel, ninche ilukuny oo nkajijik oo loo menye, aa taa Tola, Lmurran magil too lporori lenye. Ore esiana enye too nkolong'i e Daudi naa nkalifuni tikitam oare o iip ile. Ilayiok le Usi: Israhia. Ore ilayiok le Israma naa: Mikael, o Obadia, o Yoel, o Ishia, lelo pokira imiet, naa iltung'ana kituaak pooki. Ore tenebo ninche too iishoritin enye, terisioroto oo nkajijik oo loo menye, naa iltimito le njore, nkalifuni tomoni uni oile, amu eeta apa ninche nkituaak kumok o layiok. Ore iltung'ana lenye ootii ilmareita le Isaakar naa nkalifuni ntomoni isiet oopishana pooki, ilmurran magil, eigeroki nkarn enye anaa iishoritin. Ilayiok le Benchamen: Bela, o Besher, o Yediael, lelo pokira okuni. Ilayiok le Bela: Esron, o Usi, o Usiel o Yerimot o Iri, lelo pokira imiet, ilukuny oo nkajijik oo loo menye, ilmurran magil. Ore enkigeroto enye anaa too iishoritin enye naa nkalifuni tikitam oare o tomoni uni oong'uan. Ilayiok le Beker: Semira o Yoash, o Eliesa, o Elioenai, o Omori, o Yeremot, o Abija o Anatot o Alemet. Ore apa kulo pooki naa ilayiok le Beker. Ore enkigeroto oo nkarn enye te risioroto oo iishoritin enye, anaa lukuny oo nkajijik oo loo menye, lelo murran magil naa nkalifuni tikitam o iip are. Ilayiok le Yediel: Bilhan. Ore ilayiok le Bilhan naa Yeush o Benchamen, o Ehud, o Shenana, Sesan, o Tarshish o Ahishahar. Ilayiok le Yediel kulo pooki te risioroto oo lukuny oo nkajijik oo loomenye, ilmurran magil ninche. Nkalifuni tomon oopishana o iip are esiana enye, ilooterretenate to larrabal. Ore Shupim o Hupim naa ilayiok le Iri, ore Hushim naa obo loo layiok le Aher. Ilayiok le Naftali: Yahasiel, o Guni, o Yeser, o Shalum, ilo le ishoi e Bilhal. Ilayiok le Manase: Asriel laa ninye apa etoikio enkapiani enye e Aramean, etoiuo sii apa Makir menye le Gilead. Eyamaka sii apa Makir Hupim o Shupim. Ore enkarna e nkanashe enye naa Maaka. Ore enkarna e nkanashe enye e are naa Selofehad; neiu apa Selofehad ntoyie. Ore Maaka ina kitok e Makir neiu olayioni, neisho enkarna ajo Peres, ore enkarna o lalashe lenye naa Sheresh: Ore ilayiok lenyena naa Olam o Rakem. Ilayiok le Ulam: Bedan. Kulo apa ilayiok le Gilead ole Makir, olayioni le Manase. Ore enkanashe enye Hamoleket neiu Ishod, o Abiesa, o Mahala. Ore ilayiok le Shemida naa Ahian, o Shekem, o Likihi o Aniam. Ilayiok le Efraim: Shutela, o Bered, olayioni lenye, o Tahat olayioni lenye, o Eleada olayioni lenye, o Tahat olayioni lenye, o Sabad olayioni lenye, o Shutela olayioni lenye, o Eser o Elead laa ninche apa ootasesekuana iltung'ana le Gat apa ootoiwuoki teina kop, enkaraki naetuo ninche aaibung nkishu enye. Neishiraki ninche Efraim papaai lenye nkolong'i kumok nepuonu ilalashera lenye aaitagol ninche. Nelo Efraim ayiolou enkitok enye, nenutayu ninye neiu enkayioni, neisho ninye enkarna ajo, Beria, enkaraki natijing'a entorroni atua enkaji enye. Ore entito enye naa keji Sheera, naa ninye apa natesheta Betoron e abori o ene shumata o Usensheera. Rafan apa olayioni lenye, o Rashef olayioni lenye o Tela, olayioni lenye, o Ladan olayioni lenye o Amihud olayioni lenye, o Elishama, olayioni lenye o Nuni olayioni lenye o Yoshua olayioni lenye. Ore apa emanyisho enye o masaa enye naa Betel o nkang'itie enyena kutiti, o enkalo oloo saen le Naaran, o enkalo o loo ntoluo le Geser o nkang'itie enyena kutiti o Shekem o nkang'itie enyena kutiti, o Aya o nkang'itie enyena kutiti. Tenebo sii ilpolosien loo le Manase, o Betshean tenebo nkang'itie enyena kutiti, o Taanak o nkang'itie enyena kutiti, o Dor o nkang'itie enyena kutiti. Kunen apa neemanya ilayiok le Yosef ole Israel. Ilayiok le Asheri: Imna, o Ishfa o Ishfi, o Beria o enkanashe enye Sera. Ilayiok le Beria: Heber o Malkiel, laa ninche apa iloomenye le Birsait. Herber apa menye le Yafet, o Shomer, o Hatam, o enkanashe enye Shua. Ilayiok le Yafet: Pasak, o Bimhal, o Ashfat. Kulo ninche ilayiok le Yafet. Ilayiok le Shemer olalashe lenye: Roga, o Yehuba, o Aram. Ilayiok le Helem olalashe lenye: Sofa, o Imna, o Shelesh, o Amal. Ilayiok le Sofa: Sua, o Harnefen o Shual, o Beri, o Imra, o Beser, o Hod, Shama, o Shilsha, o Iltran, o Beera. Ilayiok le Yater: Yefune o Pispa o Ara. Ilayiok le Ula: Ara, o Hamiel, o Risia. Ore kulo pooki naa iltung'ana le Asheri, ilukuny oo nkajijik oo loo menye, ilootonyorrayioki naa ilmurran magil, ilarikok loo lkituaak. Ore esiana enye anaa too iishoritin enye tenkaraki enkisiaayiare o larrabal, naa iltung'ana nkalifuni tikitam o ile. Benchamen apa menye le Bela ilo kikau lenye, o Ashbel oliare, o Ahara oliokuni, o Noha oliong'uan, o Rafa ole imiet. Neeta apa Bela ilayiok: Adar, o Gera o Abihab, o Abishua, o Naaman, o Ahoa, o Gera, o Shefufan, o Huram. Kulo ninche ilayiok le Ehud (ninche apa ilukuny oo nkajijik oo loo menye le lelo oomanya Geba, neewaki apa ninche eyararoto nepuo Mahat.) Naaman o Ahija o Gera, aa taa Heglam, laa ninye apa menye le Usa o Ahihud. Neeta apa Shaharaim ilayiok te nkop e Moab ina kata eidipa ataarai nkituaak enyena, Hushim o Baara. Etoikio ninye enkitok enye Hodesh nkera: Yobab o Sibia, o Meshia, o Melkam, o Yeus, o Sakia, o Mimra. Kulo apa ilayiok lenyena, ilukuny oo nkajijik oo loo menye. Eeta sii apa ilayiok ootoiuo Hushim enkitok enye: Abitub o Elpaal. O Eber, o Misham, o Shemed laa ninye apa otesheta Ono o Lod o nkang'itie enyena kutiti. Ore Beria o Shema, (naa ninche apa ilukuny oo nkajijik oo loo menye, te lelo oomanya enkop e Yalon, lelo oomir iltung'ana le Gat). O Ahio o Shashak o Yeremot. Ore Sebediah, o Arad o Eder, o Mikael, o Ishpa o Yoha naa ilayiok le Beria. Ore Sebadia o Meshulam, o Hiski, o Heber, o Ishmerai, o Islia o Yobab naa ilayiok le Elpaal. Ore Yakim o Sikri, o Sabdi, o Elienai o Siletia o Eliel, o Adaia, o Beraia o Shiurat naa ilayiok le Shimei. Ore Ishpan, o Eber o Eliel, o Abdon, o Sikri, o Hanan, o Hanania, o Elam, o Antotija, o Ifdeia o Penuel, naa ilayiok le Shashak. Ore Shamsherai, o sheharia, o Atalia, o Yaareshia o Eliya o Sikri, naa ilayiok le Yeroham. Kulo apa ilukuny oo nkajijik oo loo menye, te risioroto oo iishoritin enye, iltung'ana kituaak ninche. Nebik kulo te Yerusalem. Ore Yaiel menye le Gibeon nebik te Gibeon, ore enkarna e nkitok enye naa Maaka. Ore olkikau lenye naa: Abdon, nesuju Suur, o Kish, o Baal, o Nadab, o Gedor, o Ahio, o Seker, o Miklot, (ninye apa menye le Shimea) Etamanyishote sii apa kulo aatashare ilalashera lenye te Yerusalem, tenebo iltung'ana lenye. Neer apa menye le Kish, Kish menye le Saul, naa Saul menye le Yonatan, o Malkishua o Abinadab o Eshbaal. Ore apa olayioni le Yonatan naa Meribaal; naa Meribaal apa menye le Mika. Ilayiok le Mika: Pison o Melek, o Tarea o Ahas. Ahas apa menye le Yehoada; naa Yehoada menye le Alemet, o Asmefet, o Simri. Simri apa menye le Mosa. Mosa apa menye le Binea; naa Rafa olayioni lenye, o Eliesa, o Asel olayioni lenye. Eeta apa Asel ilayiok ile, naa kuna nkarn enye Asikarni o Bokero, o Ishmael, o Shearia, o Obadia, o Hanan. Ore kulo pooki naa ilayiok le Asel. Ilayiok le Eshek olalashe lenye: Ulam olkikau lenye, o Yeush laa ninye oliare, o Elifelet laa ninye oliokuni. Ore apa ilayiok le Ulam naa ilmorran magil, oata nkai, neeta nkera kumok, o nkera oo nkera enye, iip nabo o onom. Ore kulo pooki naa ile Benchamen. Eigeroki apa nkarn oo ltung'ana pooki le Israel anaa too iishoritin enye, neigeroki pooki te mbuku oo laiguanak le Israel. Neewaki apa iltung'ana le Yuda eyararoto te Babilon tenkaraki nemeisiligayu ninche. Ore apa iltung'ana le dukuya ootang'asa aamany iwuejitin tiatua nkanas enye naa ile Israel, o lapolosak, o le Lawi o laisiaayiak le nkaji e Nkai. Ore kulikae tung'ana le Yuda, na Benchamen o Efraim, o Manase nebik te Yerusalem. Utai ole Amihud, olayioni le Omri, olayioni le Imri, olayioni le Bani, oing'uaa ilayiok le Peres olayioni le Yuda. Ore too le Shilo naa: Asaia ilo kikau, o layiok lenyena. Ore too layiok le Serak naa: Yeul o lalashera lenyena, iip ile o ntomoni naaudo. Ore loo le Benchamen naa: Salu olayioni le Meshulam ole Hodafia, olayioni le Hasenau, o Ibneaia olayioni le Yeroham, o Elak olayioni le Usi olayioni le Mikri, o Meshulam olayioni le Shefatia olayioni le Reul, olayioni le Ibnija, ore ilalashera lenyena te risioroto oo iiishoritin enye naa iip naaudo o onom o ile. Ore kulo pooki naa lukuny oo nkajijik oo loo menye te risioroto oo nkajijik oo loo menye. Ore too lapolosak naa Yedaia, o Yehoiarib o Yakin, o Asaria olayioni le Hilkia, olayioni le Meshulam, olayioni le Sadok, ilo aitasheikinoni kitok le nkaji e Nkai. O Pashur olayioni le Malkija o Maasai olayioni le Adiel, olayioni le Yehesera, olayioni le Meshulam, olayioni le Meshilamit, olayioni le Imer. Ore tenebo ilalashera lenye o lukuny oo nkajijik oo loo menye naa enkalifu nabo o iip naapishana o ntomoni ile. Iltung'ana oata enkidimata oleng ninche, tenkaraki e nkisiaayiare e nkaji e Nkai. Ore too Lawi apa naa Shemaia olayioni le Hashub, olayioni le Asrikam, olayioni le Hasabia, loo layiok le Merari; o Babakar, o Heresh, o Galal, o Matamia olayioni le Mika, olayioni le Mikiri, olayioni le Asaf. O Obadiah olayioni le Shemaia, olayioni le Galal, olayioni le Yedutum, o Berekia olayioni le Asa, olayioni le Elkana laa ninche apa oomanya nkang'itie kutiti oo Lnetofati. Ore apa ilarripok le kishomi naa, Shalum, o Akun, o Talmon o Ahinam o lalashera lenyena, (aa Shalum olkitok). Netipikaki lelo metorripo kishomi o laiguanani te nkalo o loosaen. Kulo apa ninche ilarripok le kishomi te nkang oo lng'oborri oo le Lawi. Ore Shalum olayioni le Kore, olayioni le Ebisaf, olayioni le Kora o lalashera lenyena, o enkaji e menye, lelo le Kora, naa ninche apa ooitasheiki esiaai e nkisampuare, ninche ilaing'urak le wueji nejing'ieki olng'obor anaa apa enaitasheiki iloo menye ilo ng'obor lo Laitoriani, nerrip kishomi. Naa Finehas olayioni le Eliesa ninye apa oitasheiki ninche too nkolong'i naatulusoitie; netii Olaitoriani tenebo ninye. Sekaria olayioni le Meshelemia apa olaing'urani le kishomi eilo ng'obor le ntumo. Ore kulo pooki ootegeluaki metaa larripok loo njing'eta olng'obor, naa iip are o tomon oare. Neigeroki ninche too iishoritin tiatua nkang'itie enye. Ore Daudi o Samuel ilo aduaani nepik ninche esiaai enye enkaraki naisiligayu ninche. Neaku ninche o layiok lenye ooitasheiki nchomito naajing'ieki enkaji o Laitoriani, o metabaiki ena olong, ina aji olng'obor, aaku ilarripok. Ore apa lelo arripok loo nchomito netii imatuan ong'uan, oloosaen, o loontoluo, o kopikop o moikuape; ore lelo alashera lenye apa ootii nkang'itie enye nepuonu apa too rishat oo nkolong'i naapishana anaake, pee eaku tenebo kulo, amu ore apa lelo aitasheikinok le kishomi ong'uan kituaak, laa ile Lawi, naa ninche ooitasheiki nkajijik o neeshumishoreki e nkaji e Nkai; netoni aaman enkaji e Nkai amu ninche ilaing'urak, naa ninche oobol nchomito tadekenya anaake. Ore kulikae lenye neitasheiki imasaa e nkisiaayiare, amu keyieuni apa neikeni ninche teneitijing'uni o teneipang'ieki aaya. Ore kulikae lenye negeluni meitasheiki ilorikan o masaa pooki naasinya, o ina tapa napuyiapui, o enaisho oo sabibu, o eilata o enkorropil o sonkoyoni. Ore kulikae le lelo ayiok loo lapolosak neitushul isonkoyoni, ore Matitia obo loo Lawi, ilo kikau le Shalum le Kora, naa ninye oitasheiki enkitobirata oo mukateni dapashi. Ore sii kulikae alashera lenye le Kohat neitasheiki emukate e nkitoduaaroto, pee eitobir te pooki sabato. Naa kulo apa ilaranyak, ilukuny oo nkajijik oo loo menye too le Lawi, oobikito too lgilat le nkaji e Nkai, lemetii ae kisiayiare, amu etii apa ninche esiaai enye dama o kewarie. Kulo apa ninche ilukuny oo nkajijik oo loo menye too le Lawi, te risioroto oo iishoritin enye, lelo arikok apa oomanya Yerusalem. Emanya apa Gibeon menye le Gibeon, oji Yeiel, ore enkarna e nkitok enye naa Maaka, ore olkikau lenye naa Abdon, nesuju Sur, o Kish o Baal, o Neer, o Nadab, o Gedor o Ahio, o Sakaria, o Miklot, naa Miklot apa menye le Shimeam, ore sii kulo nemanyisho aataaniki ilalashera lenye te Yerusalem, tenebo iltung'ana lenye. Neer apa menye le Kish naa Kish menye le Saul, naa Saul menye le Yonatan, o Malkishua, o Aminadab o Esbaal: ore olayioni le Yonatan naa Meribaal; naa Meribaal menye le Mika. Ore ilayiok le Mika naa Pison, o Melek, o Taharea, o Ahas, naa Ahas apa menye le Yara, naa Yara menye le Alemet, o Asmafet, o Simri; naa Simri menye le Mosa. Mosa apa menye le Binea naa Refaia olayioni lenye, naa Eliesa olayioni lenye o Asiel olayioni lenye. Eeta apa Asel ilayiok ile naa kuna nkarn enye: Askrikam, o Bokeru, o Ishmael, o Shearia, o Obadia, o Hanan; kulo apa ninche ilayiok le Asel. Etaarare apa Ilfilisti Isiraeli neilanyisho iltung'ana le Israel te dukuya Ilfilisti, neari ninche meirragai etuata to ldoinyio le Gilboa. Neinepu Ilfilisti Saul o layiok lenyena; nesesekuan Ilfilisti Yonatan o Aminadab o Malkishua, lelo ayiok le Saul. Neirowuaju olarrabal ina olong tialo Saul, neinepu iltung'ana loo mbaa ninye; neng'or iltung'ana loo mbaa ninye nepik olbae. Nejoki Saul ilo anapani lenye loo masaa o larrabal, “Tushutu olalem lino, taremieki nanu matua, pee maapuonu ake kulo tung'ana lememurata aasul.” Kake etanya ilo anapani loo masaa enyena o larrabal; amu etureishe ninye oleng. Ore enkaraki ina neshutu Saul olalem lenye makewan nebatatakino. Ore ake pee edol ilo anapani loo masaa enyena o larrabal ajo etua Saul, nebatatakino sii ninye olalem lenye, neye. Neaku etua apa Saul; ninye o layiok lenyena pokira okuni neidak enkaji enye pooki tenebo. Ore ake pee edol iltung'ana pooki le Israel apa ootii atua oerata aajo eilanyishe enjore, netua sii Saul o layiok lenyena, neing'uaa ninche nkang'itie enye, neisik; nepuonu Ilfilisti aamany ninche. Ore pee ekenyu, ina kata pee epuo Ilfilisti aapur lelo ootuata, netum ninche Saul o layiok lenyena eirrag to ldoinyio le Gilboa. Neitayu ninche imasaa enyena, neya endukuya enye o masaa enyena o larrabal, neiriwaa ilkiliku aaibulunye enkop pooki oo Lfilisti, pee eyae ilomon supati aayaki nkitanyaanyukot enye oo nkaitin, oltung'ana. Nepik ninche imasaa enyena o larrabal atua enkaji oo nkitanyaanyukot oo nkaitin enye, neeniki endukuya enye enkaji e nkai naji Dagon. Kake ore ake pee ening Yabesh-gilead pooki nena naaitaasa Ilfilisti Saul, nedumunye lelo lewa pooki magil, neya osesen le Saul o loo layiok lenyena neyau ninche Yabesh. Nenukaa ninche iloik lenye tentonata olchani onyaanyukie olng'aboli te Yabesh, neen ate aapukoo nkolong'i naapishana. Neaku etua apa Saul tenkaraki ina nemeisiligayu; meisilig apa ninye o Laitoriani amu eitu ninye eibung nkitanapat o Laitoriani nelo aikilikuanishore iloiriruani, eingoru eutaroto neitu ninye eing'oru eutaroto o Laitoriani. Ore enkaraki ina etara Olaitoriani ninye metua, neibelekenyaki enkitoo Daudi olayioni le Yese. Neitoki iltung'ana pooki le Israel aaiturrurro tenebo te netii Daudi te Hebron, nejo ninche, “Ng'ura, kira iyiook oloito lino o sesen lino. Ore too nkolong'i naatulusoitie, o enapa kata doi ninye aa olaiguanani Saul, iyie apa orikoo Israel aipang'ie nintijing'u; nikitiaaka iyie Olaitoriani Enkai ino, ‘Iyie oaku olairritani loo iltung'ana laainei Isiraeli, naa ilo aaku olkitok oitore iltung'ana laainei le Israel.’ ” Neaku eetuo ilpayiani pooki le Israel enetii olaiguanani te Hebron; neitobir Daudi olning'o o ninche te Hebron te dukuya Olaitoriani. Nebukoki ninche Daudi eilata aaput metaa olaiguanani le Israel, te risioroto o rorei lo Laitoriani oimunye Samuel. Ore Daudi, o ltung'ana pooki le Israel nepuo Yerusalem, aa taa Yebus, ine apa netii Ilyebusi lelo oomanya ina kop. Nejoki lelo oomanya Yebus Daudi, “Milotu iye ine.” Ore ake eyia neibung Daudi ina ang nagol e Sion, aa taa, enkanasa e Daudi. Nejo Daudi, “Ore oltung'ani oiter arasaki Ilyebusi naa keaku olkitok neaku olarikoni le njore.” Ore olayioni le Seroya, neituruk alo, neaku etaa ninye olkitok. Nebik Daudi tiatua ina ang nasheta sunta, neaku etejoki apa ine enkanasa e Daudi. Neshet ninye ina anasa aitamanaa ebaiki Milo neidip aitamanaa. Neitoki Yoab aram ineetebelate te nkanasa. Neponari Daudi aaku kitok oleng, amu etii apa Olaitoriani loo lororani tenebo ninye. Naa kulo apa ilkituaak le lelo tung'ana le Daudi magil, laa ninche ootijing'a ninye enkoriong te nkitoria enye, tenebo Israel pooki, pee eitaa ninche olaiguanani, te risioroto o rorei lo Laitoriani oipirta Israel. Kulo lelo tung'ana le Daudi magil; Yashabean le Hakomon, ilo arikoni le lelo okuni, etara ninye te mpere iltung'ana iip uni near pooki metuata te nkata nabo. Ore oliare ninye te lelo pokira okuni magil naa, Eliesa olayioni le Dodo, le Ahoti. Etii apa ninye tenebo Daudi te Pas-damim ina kata apa pee eiturrurro Ilfilisti teine to larrabal. Etii apa ine enkurma nabore shairi neisik iltung'ana aailany Ilfilisti. Kake eitasho ninye te mpolos eina kurma neisulie, nesesekuan Ilfilisti, neitajeu Olaitoriani ninche te nkisulata kitok. Ore lelo okuni le lelo tung'ana pokira tomoni uni kituaak nedoyio aapuo endapidapoi ine netii Daudi te nkapune e Adulam, ina kata etii enjore oo Lfilisti ilng'oborri to erata le Refaim. Netii apa Daudi ina kata atua osempewuet; netii oltim loo Ilfilisti ina kata Betlehem. Nejo Daudi eeta enkure, “Woi naaji tenatum oltung'ani laayaki enkare naok to lchorro le Betlehem otii embata e kishomi!” Ore lelo tung'ana okuni magil neim atua ilng'oborri loo Lfilisti; nepuo aaoku enkare teilo shorro le Betlehem otii embata e kishomi, neyaki Daudi. Kake eitu eok Daudi, etubukoko ninye Olaitoriani, nejo, “Maatalama nanu ena te dukuya Olaitoriani tenaa kaas ena. Kaok nanu osarge le nkishui le kulo lewa? Amu etipika ninche enkishui enye batisho pee eyau.” Kuna baa etaasa lelo tung'ana okuni magil. Ore apa Abishai, olalashe le Yoab laa olarikoni le tomoni uni. Near ninye te mpere iltung'ana iip uni metuata, nening'oyu enkarna enye tenebo lelo okuni. Ninye apa yioloti oleng te lelo tomoni uni, neaku olarikoni lenye, kake eitu etiu anaa lelo pokira okuni. Naa ore apa Benaia olayioni le Yehoida naa oltung'ani oning'o oleng te Kabseel olaasani loo mbaa sapuki; etara ninye iltung'ana oare yiolot le Moab metuata. Eshomo sii apa ajing'aki olng'atuny te ngumoto near metua teina olong apa naiputa enkirobi enkop. Etara sii apa metua Olmisiri, ilo tung'ani apa sapuk laa ntemat e nkaina imiet enkadoro, eeta ilo Misiri empere enye naba anaa embokishi; kake eshomo Benaia enetii ninye eeta eng'udi ake, newuapaa empere te nkaina e ilo Misiri near ninye metua te mpere enye makewan. Kuna baa etaasa Benaia olayioni le Yehoida, nening'oyu enkarna enye tenebo lelo tung'ana okuni magil. Ening'o apa ninye oleng te lelo tomoni uni, kake menyaanyukie lelo pokira okuni. Nepik Daudi ninye meitasheiki lelo arripok lenyena. Ore apa lelo tung'ana magil loo njorin naa Asahel, olalashe le Yoab, o Elhanan olayioni le Dodo le Betlehem, o Shumot le Harod, o Heles le Peloni, o Ira olayioni le Ilkedesh le Tekoa, o Abiesa le Anatot, o Sibekai, le Hushati, o Ilai le Ahoti, o Maharia le Netofa, o Heled olayioni le Baana le Netofam, o Itai olayioni le Ribai le Gibea loo le Benchamen, o Benaia le Piraton, o Hurai too nchorroi e Gash, o Abiel le Abati, o Asmafet le Baharum, o Eliaba le Shaalbon, o Hashem, le Gison, o Yonatan olayioni le Shagee le Harari, o Ahinoam olayioni le Sakar le Harari, o Elifat olayioni le Uri, o Hafer le Mecherat, o Ahija le Pelon o Hesso le Karmel, o Naarai olayioni le Esbai, o Yoel olalashe le Natan, o Mibar olayioni le Hagri, o Selek le Amon, o Naharai le Beerot, ilo anapani loo masaa olarrabal e Yoab olayioni le Seruya. O ira le Itiri, o Gareb le Itiri, o Uria le Hiti, o Sabad olayioni le Ahalai, o Adina olayioni le Shisa le Ruben, olarikoni loo le Ruben, tomoni uni ootii tenebo ninye, o Hanan olayioni le Maaka o Yoshafat le Mitini, o Usia le Asheri, o Shama o Yerel ilayiok le Hotam le Arori, o Yediel olayioni le Shiuri o Yoha olalashe lenye, le Tisi, o Eliel le Mahafi, o Yeribai o Yoshafia, ilayiok le Elnaan, o Itam, o Itma le Moab, o Eliel, o Obed, o Yaasiel le Moraba. Kulo tung'ana apa ooetuo enetii Daudi te Siklag, ina kata metumoki ashomo oleng tenkaraki Saul olayioni le Kish; netii apa ninche tenebo lelo tung'ana magil ootareto ninye to larrabal. Iltung'ana oong'oroo mbaa ninche, naa keidim ninche aatang'oroi mbaa nenang'aa isoito te nkopito, te nkaina e tatene aashu te kedienye. Ile Benchamen ninche, lo lgilata le Saul. Ore apa olkitok lenye naa Ahiesa, nesujaki Yoash, naa ilayiok le Shemaa pokira, le Gibea; o Yesiel sii o Pelet ilayiok le Asmafet; o Beraka, o Yehu le Anatot, o Ishmai le Gibeon, ilo tung'ani magilani te lelo tomoni uni naa olarikoni le lelo tomoni uni; o Yeremia o Yohasiel, o Yohanan, o Yosabad le Gedera, o Elusai, o Yerimot, o Bealia, o Shemaria, o Shefatia, le Harufi, o Elkana, o Ishia, o Asarel, o Yoeser, o Yashobeam, le Kora; o Yaela, o Sebadia, lelo ayiok le Yeroham le Gedor. Ore too le Gad nepuo enetii Daudi to sempewuet otii ong'ata ilmurran magil oogol, arriyiak too long'oi o remeta, ootiu nkomomi enye anaa iloo ng'atunyo, neneneng anaa ntarakueti too nchumat oo ldoinyio: Esa laa ninye olkitok, o Obadia aa ninye oliare, o Eliab aa ninye oliokuni, o Mishamana aa ninye oliong'uan, o Yeremia aa ninye olayioni le imiet, o Atai aa ninye olayioni le ile, o Eliel, aa ninye oliopishana, o Yohanan aa ninye olayioni le isiet, o Elasabad aa ninye olioudo, o Yeremia naa ninye olayioni le tomon, o Makabania aa ninye olayioni le tomon oobo. Kulo tung'ana apa le Gad ninche ilkituaak le njore. Ore ilkuti naa shumata e iip nabo, ore ilkumok naa shumata enkalifu nabo. Kulo tung'ana apa lelo ootalang'a olkeju le Yordan to lapa le dukuya, ina kata edooyo enkare aim mpoorri, neisikie lelo pooki ootii ierat, te nkalo o loo saen o to loo ntoluo. Ore kulikae tung'ana le Benchamen o Yuda nepuonu osempewuet enetii Daudi. Nelo Daudi anang'are ninche nejoki ninche, “Tenaa iyetuo intae enatii nanu to sotua, pee kiretutu nanu, naa keibung'are oltau lai intae; kake tenaa ietuo pee kikaldaa too lmang'ati laainei, hoo tenemaata entorroni nataasa nchoo naa edol Enkai oo loo papa neitalaku te intae.” Nelotu enkiyang'et o Laitoriani shumata Amasia, ilo kitok le tomoni uni, nejo ninye: “Kira iyiook ilkulinono iyie Daudi; kitii tenebo iyie ara Yese! Eseriani, eseriani te iyie naa eseriani too laretok linono! Amu kiretu iyie Enkai ino.” Neng'amu Daudi ninche, neitaa ninche ilkituaak loo ltimito lenyena le njore. Ore kulikae tung'ana le Manase neisik aapuo enetii Daudi ina kata pee epuonu Ilfilisti olarrabal aarare Saul. (Ore ake eyia eitu ninye eretu Lfilisti, amu eiguanate ilaitoriak lenye nearaa ninye, ejo, “Ilukuny ang edung'ori, teneing'uaa ninye iyiook nerrinyokino olkitok lenye Saul.”) Ore ake pee epuo Siklag nepuo kulo tung'ana le Manase enetii ninye: Adna, o Yodabad, o Yediel, o Mikael, o Yosabad, o Elihu o Siletai, o laiguanak le nkalifu te Manase. Etareto apa ninche Daudi tialo olturrur loo lapurrok, amu iltung'ana apa oopi ninche naa magil, naa ilarikok le njore. Amu ore apa too nkolong'i pooki naa kepuonu apa iltung'ana enetii Daudi, ometaba anaa neaku olorora kitok le njore, nebayu anaa enjore e Nkai. Ena ninye esiana e lelo timito le njore le Daudi, apa ooetuo enetii Daudi te Hebron, pee eibelekeny enkitoria e Saul aaibelekenyaki Daudi, te risioroto o rorei lo Laitoriani. Ore lelo tung'ana le Yuda oata ilong'oi o remeta naa nkalifuni ile o iip isiet ilturrurri ootanapate. Ore too le Simeon, iltung'ana magil arriyiak to larrabal, naa nkalifuni naapishana o iip nabo. Ore too le Lawi naa nkalifuni ong'uan o iip ile, ore ilo kitok oji Yehoida le nkaji e Aron, ore tenebo ninye netii iltung'ana nkalifuni uni o iip naapishana. Ore Sadok, ilo barnoti magilani nepi netii tenebo ilarikok le njore tikitam oare lolmarei lenye. Ore too le Benchamen, ilo le ntalipa oo Saul, netii iltung'ana nkalifuni uni, ore ilkumok lenye neibung'are enkaji e Saul. Ore too le Efraim naa iltung'ana nkalifuni tikitam o iip isiet, iltung'ana magil oopi, iltung'ana ooning'o too nkajijik oo loo menye. Ore olpisiai lo losho le Manase naa iltung'ana nkalifuni tomon oisiet, laa ninche apa etegeluaki pee epuonu aaitaa Daudi olaiguanani. Ore too le Isaakar, lelo tung'ana ang'eni ooyiolo nkatitin, ooyiolo enayieu Israel neas, naa iltung'ana kituaak iip are, tenebo lelo alashera lenye pooki ootii abori enkitoria enye. Ore too le Sebulon naa iltung'ana nkalifuni onom, ootanapate to larrabal neeta masaa pooki e njore o larrabal, pee eretu Daudi to ltau obo metii olng'ash. Ore too le Naftali naa ilkituaak le njore enkalifu nabo ootii tenebo iltung'ana nkalifuni tomoni uni oopishana oata ilong'oi o remeta. Ore too le Dan naa iltung'ana nkalifuni tikitam oisiet o iip ile iltung'ana ootanapate pee epuo olarrabal. Ore too le Asheri naa iltung'ana nkalifuni artam o iip ile arriyiak te pooki arrabal. Ore too le Ruben o le Gad o lpisiai lo losho le Manase ootii lido kekun olkeju le Yordan naa iltung'ana nkalifuni iip nabo o tikitam oota imasaa pooki olarrabal. Ore kulo tung'ana pooki lo larrabal, neishopo iruparen, nepuonu Hebron eeta eyieunoto pee eitaa Daudi olaiguanani le Israel pooki. Neijia sii apa etiu ilkulikae tung'ana le Israel, etumuta nabo pee eitaa Daudi olaiguanani. Netii apa ninche tenebo Daudi too nkolong'i uni, einos endaa neokisho, amu eitobirakitia apa ilalashera lenye ina. Ore sii lelo le latia enye ebaiki Isaakar o Sebulon o Naftali, nepuonu enapita ndaiki too sirkon, o too ntamesin o too nyumpui, o too lmong'i, neyau ndaiki kumok, o mukateni oo lng'abolo, o sabibu ooitoyioki, o enaisho oo sabibu o eilata, o lmong'i o lkerra, amu keetae apa enchipai te Israel. Neikilikuanishore apa Daudi ilarikok loo nkalifuni, o loo maa iip o pooki arikoni. Nejoki Daudi ina umata oo Siraeli, “Tenidolidolo intae eishiakino, naa tenaa eyieunoto o Olaitoriani Enkai ang, mairriwaki olkilikuai lelo alashera lang apa ootung'uaiyioki te nkop e Israel, o tenebo lelo apolosak ootii atua nena anas naata ndaat oo nchoo pee etum ninche aaetu tenebo enikitii. Naa manyaaki iyiook aayau osanduku le Nkai ene nikitii amu kitapalaitie apa too nkolong'i e Saul.” Nenyorraa ina umata pooki aas ina, amu eisidai apa ina bae too nkonyek o lorere. Neiturrur apa Daudi Israel pooki ebaiki Shihor e Misiri o meetu enejing'ieki Hamat, pee eyau osanduku le Nkai te Kiriat-Yearim. Ore Daudi o ltung'ana le Israel pooki neilep aapuo Baala, aa taa Kiriat-Yearim natii Yuda, pee epuo aayau teine osanduku le Nkai, laa ninye eipotieki Olaitoriani oton te nchumata oo Lkerubi. Nenap ninche ilo sanduku le Nkai te ngarri ng'ejuk, aaitung'uaa enkaji e Aminadab, naa Usa, o Ahio apa ooreu ina garri. Ore Daudi o Siraeli pooki neshipa te dukuya Enkai te nkidimata enye pooki, to sinkolio, o to lwulul loo usin, o too nkai oo sinkolioitin, o too ndulen o too nkinantani dapashi o too ntarumpetani. Ore ake pee ebau olkurroto oidong'ishoreki le Kidon, neiteleiki Usa enkaina enye ilo sanduku, amu etarrorre apa ilo kiteng, neyupuyup engoro o Laitoriani tialo Usa; neosh ninye tenkaraki naitorioyie enkaina enye aibung ilo sanduku; neye ninye teine te dukuya Enkai. Negoro Daudi enkaraki natarasaka Olaitoriani Usa; ore ine wueji neaku keji Peres Usa; o taata. Neureyu Daudi Olaitoriani oleng ina olong, nejo ninye, “Kaji nanu aiko tenayau osanduku le Nkai enkaji ai?” Neaku eitu eya Daudi ilo sanduku ang, atua enkanasa e Daudi, kake eibakibakie aya enkaji e Obed-edom le Giti. Neton ilo sanduku le Nkai te nkaji e Obed-edom ilapaitin okuni, nemayian Olaitoriani enkaji e Obed-edom o pooki toki naata. Eirriwayie apa Hiram olaiguanani le Turo olkilikuai enetii Daudi, o ltarakua, o laguetak loo soito sii o laguetak loo mbaoi, pee eshetaki enkaji. Nemusu Daudi ajo eitasheyie Olaitoriani ninye metaa olaiguanani le Israel, ore enkitoria enye neisisi oleng te nkaraki iltung'ana lenyena Israel. Neyam Daudi nkituaak kumok te Yerusalem, netum Daudi ilayiok kumok o ntoyie. Kuna ninche nkarn o nena kera naanoto ninye te Yerusalem: Shamua, o Shobab, o Natan, o Solomon, o Ibar, o Elishua, o Elpelet, o Noga, o Negef, o Yafia, o Elishama, o Bediada, o Elifelet. Ore ake pee ening Lfilisti etuputoki Daudi aaitaa olaiguanani te Israel pooki, nepuo Lfilisti pooki aaing'oru Daudi; nening Daudi ina nelo agilunore ninche. Neetuo apa Lfilisti nerasaki oerata le Refaim. Neikilikuanishore Daudi Olaitoriani ejo, “Kalo nanu aarare Lfilisti?” Nchoru iyie ninche apik atua enkaina ai? Newaliki Olaitoriani ninye ejo, “Ilepa shomo, amu kaishoru nanu ninche apik atua enkaina ino.” Neilep ninye alo Baalperasim, nemir Daudi ninche teine; nejo Daudi, “Etusulaka Enkai ilmang'ati laainei enkaina ai, anaa oloirrag le nkare.” Ore enkaraki ina naa keji enkarna eine wueji Baalperasim. Neing'uaa Lfilisti nkaitin enye teine neitanapisho Daudi pee epejori. Neigil ake Lfilisti aarasaki ilo erata. Ore ake pee eigil Daudi aikilikuanishore Enkai, nejoki Enkai ninye, “Milo iyie asujaa ninche; tamanai shomo pee ilo arasaki ninche te nkishaakinoto oo lkeek ooji Balsham. Ore ake pee ining oltoilo le nkiyukoto te nchumata oo lkeek le basasam, shomo taa tarasaki ninche; amu eshomo Enkai te dukuya iyie pee eosh enjore oo lfilisti.” Neas Daudi anaa enaitanapa Enkai, near ninche enjore oo Lfilisti ebaiki Gibeon ometabaiki Geser. Nelo olning'o le Daudi aibulaa too nkuapi pooki neyau Olaitoriani euriata enye shumata nkuapi pooki. Eteshetaka apa Daudi kewan nkajijik te nkanasa e Daudi; neitobir ewueji nepiki osanduku le Nkai, neunoki olng'obor shumata ninye. Nejo Daudi, “Meetae hoo oltung'ani obo meteleku Ilawi ake ooidim aatanap osanduku le Nkai, amu etegelua Olaitoriani ninche metanapa osanduku lo Laitoriani, neisiai ninye ntarasi.” Neiturrur Daudi Israel pooki te Yerusalem, pee etum aayau osanduku lo Laitoriani ewueji enye; ine apa neitobiraki. Neiturrur Daudi tenebo ilayiok le Aron o Lawi: loo layiok le Kora, o Uriel ilo kitok, tenebo lelo alashera lenyena iip o tikitam; ore too layiok le Merari, naa Asaia ilo kitok, tenebo ilalashera lenyena iip are o tikitam. Ore too layiok le Gershom, naa Yoel ilo kitok tenebo ilalashera lenyena iip o tomoni uni; ore too layiok le Elisafan, naa Shemaia ilo kitok, tenebo ilalashera lenyena iip are. Ore too layiok le Hebron naa Eliel ilo kitok, tenebo ilalashera lenyena ntomoni isiet. Ore too layiok le Usiel naa Aminadab ilo kitok tenebo ilalashera lenyena iip o tomon oare. Neitoki Daudi aipotu ilapolosak, Sadok o Abiata o Lawi, o Uriel, o Asaia, o Yoel, o Shemaia, o Eliel, o Aminadab, nejoki ninche, “Irara intae ilukuny oo nkajijik oo loo menye too Lawi, entisinya naa ate, intae o lalashera linyi, pee itumutumu aayau osanduku lo Laitoriani, Enkai oo Siraeli, ine wueji naitobiraka nanu ninye. Ore enkaraki neitu apa intae inapinapa te dukuya, etagorokine iyiook Olaitoriani Enkai ang, enkaraki neitu iyiook kishilaa teina oitoi, nategeluaki.” Kaae neitisiny ate ilapolosak o Lawi, pee etum aayau osanduku lo Laitoriani Enkai e Israel. Nenapu Ilawi ilo sanduku le Nkai too loilila lenye too mbokishi, anaa apa enaitanapishe Musa te risioroto o rorei lo laitoriani. Neitoki sii Daudi aitanap lelo kituaak loo Lawi, pee egelu ilalashera lenye pee eranyisho nebuaku te oshoto oo nkinantani, too nkai oo sinkoliotin, o lwululi loo usin o nkinantani, neilepie oltoilo le ng'ida. Neaku etegelutua apa Ilawi Heman olayioni le Yoel o lalashera lenyena, Asaf olayioni le Berekia; o layiok le Merari, o lalashera lenye, o Etam olayioni le Kushaia; ore tenebo ninche netii ilalashera lenye te ntukus e are e Sakaria o Yaasiel, o shemiramot, o Yehiel, o Uni, o Eliab o Benaia o Maaseia, o Matitia, o Elifele, o Mikneia, o larripok le kishomi, Obed-edom o Yaeil. Ore ilaranyak Heman o Asaf o Etan naa pee eosh aaitabuaku nkinantani dapashi o suyai, ore Sakaria, o Asiel, o Shemiramot, o Yehiel, o Uni, o Eliab o Maaseia, o Benaia, neosh ninche nkai oo sinkolioitin, te risioroto o ltoilo le Alamot; kake ore Matitia o Elifele, o Mikneia, o Obed-edom o Yerel, o Asasia, nerikoo eoshoto oo lwululi loo usin, terisioroto oltoilo le Shemnit, o Kenania olarikoni lo sinkolio too Lawi, ninye orikoo osinkolio, amu keyiolo apa. Ore Berekia o Elkana neaku ilarripok le kutukaji ine netii osanduku. Ore Shebania o Yoshefat, o Natanel, o Amasai, o Sakaria, o Benaia, o Eliesa, lelo apolosak, ninche oosh ntarumpetani te dukuya ilo sanduku le Nkai. Ore sii Obed-edom o Yehia naa ninche ilarripok le kutukaji eine netii osanduku. Neaku eshomo apa Daudi o lpayiani, o lkituaak loo nkalifuni, aayau osanduku lo sotua lo Laitoriani te nkaji e Obed-edom te ng'ida. Naa ore amu etareto apa Olaitoriani lelo Lawi oonapita osanduku lo sotua lo Laitoriani, etopolosa ninche iloing'ok oopishana, o ilmeregeshi oopishana. Neishopito apa Daudi olkila le kitani sidai napiyaya, naa neijia sii eikununo lelo Lawi pooki oonapita osanduku, o laranyak, o Kenania ilo arikoni lo sinkolio o laranyak; neishop Daudi enkila olgoo e Kitani. Neaku eyautua iltung'ana le Israel pooki osanduku le lning'o lo Laitoriani too mbuakunot, o to ltoilo le mouo, o ntarumpetani, o nkinantani dapashi, nebuaku aaranyisho too nkai oo sinkoliotin, o lwululi loo usin. Ore egira ilo sanduku lo sotua lo Laitoriani alotu enkanasa e Daudi, nerum Mikal entito e Saul Daudi te lusie, nedol olaiguanani Daudi eranyisho eipid aranyisho neng'ida; nemenaa ninye to ltau lenye. Neyau ninche aaitijing'u ilo sanduku le Nkai, nepik atua ilo ng'obor otuuno Daudi tenkaraki ninye; neitayu ninche olasar opejori, o lasar le seriani te dukuya Enkai. Ore ake pee eidip Daudi aitayu olasar oopejori o lasarri le seriani, nemayian olorere te nkarna Olaitoriani, neorioriki iltung'ana le Israel pooki, ilewa o ntomonok, neisho ake oltung'ani embelati e mukate, o ldung'oti le nkiring'o, o emukate oo lng'abolo. Neitoki sii agelu kulikae tung'ana loo Lawi pee eaku ilaisiaayiak te dukuya osanduku lo Laitoriani, pee edamu, neranyisho neisho enashe, neisis Olaitoriani Enkai e Israeli. Asaf apa olkitok lenye nesujaki Sakaria, o Yeiel, o Shemuramot, o Yehiel, o Matitia, o Eliab, o Benaia, o Obed-edom, o Yeiel, laa ninche oowosh nkai oo sinkoloitin, o lwululi loo usin; naa Asafowosh enkinanta oo saanini dapashi, ore Benaia o Yahasiel, lelo apolosak naa ninche oowosh ntarumpetani anaake te dukuya ilo sanduku lo sotua le Nkai. Ore apa teina olong, neng'as Daudi agelu metaranyi isinkolioitin le nkishooroto e nashe, nerany Asaf o lalashera lenyena. Enchoo Olaitoriani enashe, empoto enkarna enye, embalie nkiaasin enyena tiatua iloreren! Entaranyaki ninye, entaranyaki ninye enkisisa entolimu isiaaitin enyena pooki e nking'asia! Entaa enkarna enye kitok sinyati; nchoo iltauja le lelo ooing'oru Olaitoriani eng'ida! Eng'oru Olaitoriani o engolon enye, eng'oru ninye anaake! Entadamu nena siaaitin enking'asia naataasa ninye, o enkiguana natudung'o ninye. Na ishoi e Abraham, ilo sinka lenye, lo ayiok le Yakobo, oogeluno. Olaitoriani Enkai ang ninye, etii nkiguanat enyena enkop pooki. Eibung ninye osotua lenye ntarasi; teilo rorei apa otejo ninye too iishoritin enkalifu nabo. Ilo sotua apa oitobira ninye o Abraham, ina kisiligata o lmumai tenkaraki Isaak, naitasheyie ninye metaa enkitanapata te Yakobo, metaa olning'o lo sotua te Israel, ejo, “Iyie nanu aisho enkop e Kanaan, erubata ina naaku enjung'ore ino.” Ore apa aa kuti ninche nemedupa ninche, naa ilomon, elimana ninche to losho o to losho, te nkitoria nabo ometabaiki likae orere, eitu ninye eisho likae tung'ani meibooki ninche enkop; neisikong ninye ilaiguanak tenkaraki ninche, ejo “Miseyie lelo lainei ootubukokoki eilata aaput, miinyal ake iloibonok laainei!” Taranyaki Olaitoriani na kop pooki, mbalunye enjeunoto enye nkolong'i pooki. Mbalunye enkitoo e nkisisa enye too nkuapi pooki, o nena siaaitin enyena e nking'asia too loreren pooki! Amu aikitok Olaitoriani, naa keisisi ninye oleng, naa keyanyituni ninye aaitulusoo too nkaitin pooki. Amu ore nkaitin pooki oo loreren naa nkitanyaanyukot, kake Olaitoriani oitobira keper. Etii enkanyit o enkitoo dukuya ninye; netii engolon o eng'ida emanyisho enye. Enchoo Olaitoriani enkitoo too lmareita pooki loo loreren, enchoo Olaitoriani enkitoo o engolon! Enchoo Olaitoriani enkitoo naishiakino enkarna enye; eyau enkishoroto nipuonunu dukuya ninye! Enteserem Olaitoriani te seremata sinyati; nkirikirayu te dukuya ninye na kop pooki; ee, eitashe enkop pooki aitirring'a, nemeigusugusieki aekata. Nchoo eshipayu keper, neng'idayu enkop, naa nchoo ninche ejo tiatua iloshon, “Olaitoriani oitoreisho!” Nchoo eikurrukur enaiposha, o nena pooki naabore atua ninye, nchoo eosh enkop olkerempe o pooki toki natii atua. Neranyisho ilkeek le ntim te ng'ida, te dukuya Olaitoriani, amu kelotu ninye aiguanare enkop. Enchoo enashe Olaitoriani, amu aisupat ninye; amu ebikoo enyorrata enye nauno ntarasi! Tejo sii iyie: “Tokordu iyiook, Na Ai e njeunoto ang, ninturrurru iyiook nintajeu tiatua iloshon, pee kitum aaishoo enashe enkarna ino, niking'idare enkisisa ino. Meisisi Olaitoriani, Enkai e Israel, ebaiki ntarasi o ntarasi!” Kaae nejo iltung'ana pooki, “Esai”, naa meisisi Olaitoriani. Neaku etung'uayie apa Daudi Asaf o lalashera lenyena teine te dukuya osanduku lo sotua lo Laitoriani, pee eisiaisho anaake te dukuya ilo sanduku anaa enayieuni te pooki olong, o Obed-edom o lalashera lenyena ntomoni ile oisiet; ina kata aa ilarripok le kishomi Obed-edom, olayioni le Yehutum o Hosa naa larripok le kishomi. Neing'uaa sii Sadok ilo apolosani o lalashera lenyena lelo apolosak te dukuya ilo ng'obor lo Laitoriani, teine wueji neika te Gibeon. Pee eitaki Olaitoriani ilasarri oopejori anaake tadekenya o teipa, te risioroto e nena pooki naaigeroki te nkitanapata o Laitoriani naitanapa ninye Israel. Ore tenebo ninye netii Heman o Yedutum, o lelo kulikae ootegeluaki neipoti nkarn meishoo enashe o Laitoriani, amu ebik enyorrata enye nauno ntarasi. Neeta apa Heman o Yedutum ntarumpetani o nkinantani dapashi tenkaraki osinkolio, o ntokitin naaranyieki osinkolio osinya. Netegeluaki apa ilayiok le Yedutum meitasheiki kishomi. Neitoki iltung'ana pooki aarrinyo nelo ake oltung'ani enkaji enye nelo Daudi pee emayian olmarei lenye. Ore apa etobiko Daudi te nkaji enye, nejoki ninye Natan ilo oiboni le Nkai, “Ng'ura, abikito nanu tiatua enkaji oo ltarakua, kake ore osanduku lo sotua lo Laitoriani naa olng'obor etii.” Nejoki Natan Daudi, “Taasa ina pooki natii atua oltau lino, amu etii Olaitoriani tenebo iyie.” Kake ore ina kewarie ake, nelotu ororei lo Laitoriani enetii Natan, ejo, “Shomo tiaaki osinka lai Daudi, nji ejo Olaitoriani: ‘Mikishetaki iyie enkaji nabikie. Amu eitu aekata nanu abik te nkaji ebaiki apa ina olong natorikoyie Isirael ometabaiki ena olong, kake ashomo nanu arukoo ilng'oborri, naimaa emanyisho o emanyisho. Ore too wuejitin pooki nashomo nanu tenebo Isiraeli pooki, neitu airo ororei te pooki tung'ani le lelo arishak le Israel, apa laitanapa pee eirrita iltung'ana laainei, ajo, Kainyoo pee eitu intae kishetakiki enkaji oo ltarakua?’” “Ore naa taata nji shomo tiaaki osinka lai Daudi, Nji ejo Olaitoriani loo lororani, aaitayio apa nanu te nkirrita oo ntare, te sujata oo nkerra, pee itum ataa olkitok loo ltung'ana laainei Israel; natii nanu tenebo iyie te pooki wueji nishomo, naiwuang'ie nanu ilmang'ati linono te dukuya iyie naa kaaitobiraki nanu iyie enkarna naikununo anaa nkarn e lelo kituaak le nkop. Naa kagelu nanu ewueji tenkaraki iltung'ana laainei le Isirael, naun nanu ninche, pee etum ninche aatobik te wueji enye maate, nemeitokini aekata aaitanyamal; nemeitoki aekata ilarruok aaisilisil ninche anaa apa. Ebaiki ina kata apa nategelua ilarishak meitoria iltung'ana laainei le Isirael. Naa kamir nanu ilmang'ati linyi pooki. Ore ake si aaibalakinye nanu iyie nchere eikishetaki Olaitoriani enkaji. Teneiputayu inkolong'i inono pee irura aye anaa iloo papaai lino, naa kadumu nanu eishoi ino te siadi iyie, obo loo layiok linono inot, naitubulaa nanu enkitoria enye. Kaalo ninye ashetaki nanu enkaji, naa kaitubulaa nanu olorika lenye le nkitoo ntarasi. Kaaku nanu menye lenye neaku ninye enkerai ai. Maiwuang'ie nanu ina nyorrata ai nauno te ninye, anaa apa enaiwuang'ie teilo otii te dukuya iyie. Kake kaitasheyie nanu ninye tiatua enkaji o te nkitoria ai ntarasi ore olorika lenye le nkitoo enye neitubulari ntarasi. ” Ore te risioroto e kulo rorei pooki o te risioroto ena duata pooki, neirorie Natan Daudi. Neitoki olaiguanani Daudi alo atua aji, neton te dukuya Olaitoriani, nejo, “Kara nanu ng'ae iyie Olaitoriani Enkai, naa kainyoo enkaji ai, eji metaa kiyaua iyie naba nji? Naa embae kiti ena too nkonyek inono, iyie Enkai; niroro sii aimaki enkaji osinka lino te nkata sapuk nalotu, nikitoduaa iyie nanu iishoritin naapuonu, Olaitoriani Enkai! Naa kainyoo eitoki Daudi ajo tialo iyie inchoo meyanyituni osinka lino? Amu iyiolo iyie osinka lino. Ore tenkaraki osinka lino, iyie Olaitoriani, o terisioroto oltau lino makewan, iyaua iyie ena kitoo pooki, nchoo metayiolouni kuna baa pooki sapuki. Meetae likae laaijo iyie, iyie Olaitoriani, nemeetae ae Ai neme iyie, te risioroto e nena pooki nikitoning'o too nkiyiaa ang. Kalo likae osho te nkop onyaanyukie iltung'ana linono Israel, laa ninche eshomo Enkai akordu pee eaku iltung'ana lenyena, pee intobiraki kewan enkarna too mbaa sapuki naaitureisho, aaraa aipang'ie iloshon te dukuya iltung'ana linono, apa litokordua ninche aitayu te Misiri. Nintaa iyie iltung'ana linono te Israel metaa iltung'ana linono ntarasi, niaku iyie, iyie Olaitoriani Enkai enye. Ore naa taata iyie Olaitoriani nchoo ilo rorei liroro oipirta osinka lino, neipirta enkaji enye meitubulari ntarasi, niaas anaa eniroro; neitasheyieki enkarna ino neibalieki ntarasi, ejo, ‘Olaitoriani loo lororani Enkai e Israel, ninye Enkai oo Siraeli.’ Ore enkaji osinka lino Daudi naa keitasheyieki te dukuya iyie. Amu iyie, Enkai ai, naitalio to sinka lino nchere ishetaki ninye Enkaji, ore enkaraki ina etagolo osinka lino oshoke pee eomon te dukuya iyie. Ore naa taata iyie Olaitoriani, iyie Enkai, nisiligishore iyie ena bae sidai tialo osinka lino. Ore naa taata nchoo kintiship iyie pee imayian enkaji o sinka lino, pee elo ninye dukuya anaake ntarasi te dukuya iyie; amu ore entoki nitamayiana iyie Olaitoriani nemayiana ntarasi.” Ore tesiadi e nkiti rishata neitoki Daudi arasaki Ilfilisti nemir ninche. Ewa ninye aoru ninche enkanasa e Gaat o nkang'itie naataaniki kutiti neoru Ilfilisti. Etimira sii apa Ilmoabu ootaa isinkan lenyena nelak kodi. Neitoki Daudi arasaki olaiguanani Hadadesa le nkop e Siria naji Soba, natii embata enkop e Hamat, amu keyieu apa Hadadesa neing'oru pee eitore ina kop aimu te nkalo e shumata e Frati. Neibung Daudi ingarrin enyena oo mbartan enkalifu nabo, o lakedok loo mbartan nkalifuni naapishana, o sikarini nkalifuni tikitam oopuo too nkejek. Nemut Daudi mbartan pooki oo ngarrin, neing'uaa ake inaaidip ngarrin iip nabo. Ore ake pee eirriu Isiria le Dameski enjore nalotu aretu olaiguanani Hadadesa olaiguanani le Soba, neibung Daudi ina jore near metuata iltung'ana nkalifuni tikitam oare le Siria, neitoki airriwaa iltimito le njore ilpolosien lenye, neaku ile Siria isinkan le Daudi neitaiki ninye kodi. Neisho Olaitoriani Daudi meisula te pooki wueji. Neibung Daudi nena long'oi e sahabu apa naanapita ilkituaak le Hadadesa, neya ninche Yerusalem. Enyaaka sii aya osuyai kitok le Tibha o te Kun, nena anas apa naaitore Hadadesa (ilo suyai apa enyaaka Solomon aasishore te siadi aitayunye ilmotioo, o ng'apeta, o masaa o suyai.) Ore ake pee ening olaiguanani Toi le Hamat nchere etimira Daudi enjore pooki e Hadadesa, ilo aiguanani le Soba, neirriwaa olayioni lenye Hodoram meshomo enetii Daudi, pee eiroroki ninye, neisho ninye enchunet, enkaraki natimira Hadadesa; amu kesesh apa egilunore Hadadesa Toi to larrabal. Neirriwaki ninye mpukunot pooki oo masaa e sahabu, o enkosholai, ono suyai. Ore ake kuna pooki neitisinyaki Daudi Olaitoriani, tenebo ina osholai o sahabu apa nayaua too loshon, o te Edom, o Moab o too Lamoni, o too Lfilisti o too Lmaleki. Ore Abishai olayioni le Seruya near metuata nkalifuni tomon o isiet oo le Edom, to erata le munyan. Nepik ninye iltimito le njore Edom; neaku lelo pooki le Edom isinkan le Daudi. Neisho Olaitoriani Daudi enkisulata te pooki wueji neshomo. Neaku eitoreisho Daudi te Israel pooki, neitoreisho ninye too sipat o too nkiririkinot too ltung'ana lenyena pooki. Naa Yoab olayioni le Seruya apa olkitok le njore, naa Yehoshafat olayioni le Ahilud olasirani; naa Sadok olayioni le Ahitab o Ahimelek olayioni le Abiata ilapolosak; naa Shafsha olaigeroni; naa Benaia olayioni le Yehoiada oitasheiki Ilkeriti o lpeleti. Ore ilayiok le Daudi naa ninche ilkituaak te nkisiayiare o laiguanani. Ore apa tesiadi ena, neye Nahash olaiguanani loo Lamori, neitoreisho olayioni lenye te rishata enye. Nejo Daudi, “Kaitaas nanu ine supatisho Hanan olayioni le Nahash, amu aaitaasa apa menye ine supatisho.” Neaku eirriwayie Daudi ilkiliku pee epuoi aaitagol ninye tenkaraki keeya e menye. Nepuonu isinkan le Daudi enetii Hanan teina kop oo Lamori, pee eitagol ninye, kake etiaakitia lelo kituaak loo Lamori Hanan, “Ijo iyie eji ore amu kirriwaka Daudi ilarumak naa papaai lino eyanyit? Aime keetuo isinkan lenyena enitii pee ejurrisho, neibelekeny enkop aaikeern? Neaku etang'amua Hanan isinkan le Daudi, nebarn ninche, nedung'oo nkilani enye aitoritie too mpolosi, neisho ninche meshomo; nepuo ninche. Ore ake pee elikini Daudi kulo tung'ana, neirriwaa iltung'ana metanang'are ninche, amu etipikaki apa lelo tung'ana esulare oleng. Nejo olaiguanani, Entobik te Yeriko ometaba anaa nebulu ilmunyo linyi nintokiki aapuonu.” Ore ake pee edol Ilamori aajo eitagoro Daudi, neirriwaa Hanan ntalantani enkalifu nabo e nkosholai pee eisilenu ngarrin oo mbartan, o lakedok loo mbartan te Mesopotamia, tenetii Aramaaka, o te Soba. Neisilenu ninche ngarrin oo mbartan nkalifuni tomoni uni oare, o laiguanani le Maaka tenebo enjore enye, apa naewuo aun ilng'oborri te Madeba. Neipotuni Ilamori metupuku too nkanas aapuonu olarrabal. Ore ake pee ening Daudi ina, neirriwaa enjore pooki oo ltung'ana magil. Nepuonu Ilamori neluakino olarrabal etanapate te nejing'ieki enkanasa, ore lelo aiguanak apa ooetuo netii ninche iwuejitin enye maate te wueji neisiaja. Ore ake pee edol Yoab ajo eimua ninye olarrabal te dukuya o te siadi, negelu iltung'ana arriyiak le Israel, neitobiraki olarrabal too le Siria. Ore kulikae tung'ana lenyena nepik abori erikoto e Abishai olalashe lenye, neitoluakini ninche metaarare Ilamoni. Nejo ninye, “Tenaa kegol Siria oleng te nanu nikipuonunu aaretu nanu; naa te negol Ilamori oleng te intae, naa karetu intae. Entagoluoto naa mataa lewa to losho lang, o nkanas e Nkai ang; naa metaasa Olaitoriani ina naishiakino te ninye.” Nepuonu Yoab o lelo tung'ana apa ootii tenebo ninye aaigutaki ile Siria to larrabal; neilanyisho ninche te dukuya ninye. Ore ake pee edol Ilamoni aajo eilanyishote Isiria, neilanyisho sii ninche te dukuya Abishai, ilo alashe le Yoab, nepuo aajing atua enkanasa. Nelo Yoab Yerusalem. Kake ore ake pee edol Isiria aajo etimira Isiraeli ninche, neirriwaa ilkiliku meyauni lelo Siria apa ootii te idia alo olkeju le Frati, tenebo Shofak le njore e Hadadesa te dukuya ninche. Ore ake pee elikini Daudi, neiturrur Isiraeli pooki tenebo, nelang olkeju le Yordan, nepuonu enetii ninche, neitoloku iltimito lenyena aipirakinye ninche. Ore ake pee eitobir Daudi olarrabal tenkaraki Siria, nearare ninche ninye. Neilanyisho Isiria te dukuya Isiraeli, near Daudi to lalem iltung'ana le Siria nkalifuni naapishana e lelo ooreu ngarrin oo mbartan, o nkalifuni artam oo loopuo too nkejek near sii metua Shofak ilo kitok le njore. Ore ake pee edol isinkan le Hadadesa nchere etimira Isiraeli ninche, neitayu osotua o Daudi, neaku ilaisiaayiak lenyena. Neaku meyieu Isiria neigil aaretu Ilamoni. Ore te nkiterunoto eilo ari, ina kata napuoyie ilaiguanak olarrabal, nerikoo Yoab enjore, nerasaki enkop oo Lamori, nelotu amuatu Aman enkang e Raba, neibelekeny ina ang agil. Neitayu Daudi enkopiyia e nkitoo te ndukuya o laiguanani lenye; nedol ajo entalanta e sahabu enkiroishi enye; naa osoit ogol enkinyiang'a, nepiki endukuya e Daudi. Neitoki ninye aya nena yarunot eina anasa ntokitin kumok. Neitoki ayau iltung'ana apa ootii atua ina anasa, nepik ninche esiaai oo nkaik, too musumenoni o sekenke o ntoluo. Neiko Daudi neijia too nkanas pooki oo Lamori. Nerrinyo Daudi o ltung'ana pooki aapuo Yerusalem. Ore tesiadi ena nedumunye olarrabal o Lfilisti, te Gasa, near Sebekai le Hushati Sipai metua, laa oleina ishoi apa oo ltung'ana sapuki; nemiri Lfilisti. Neitoki apuku olarrabal loo Lfilisti; near Elhanan olalashe Yair Lahami metua olalashe le Goliat le Giti, ilo apa oba enchata enye empere anaa embokishi sapuk. Neitoki ake apuku olarrabal te Gat, teine netii oltung'ani sapuk oleng neado, neeta ilkimojik ile loo nkaik, o lkimojik ile loo nkejek te pooki aina o te pooki keju, neaku tikitam oong'uan ilkimojik lenyena pooki. Naa oleishoi sii ninye e lelo tung'ana sapuki. Ore ake pee emor Isiraeli, near Yonatan olayioni le Shimea, to lelem ninye metua. Olalashe le Daudi apa Shimea. Ile ishoi apa oo ltung'ana sapuki kulo tung'ana ootii Gat, nebatata ninche aaye te nkaina e Daudi o too nkaik oo sinkan, lenyena. Eitasho apa oloirirua agilunore Isirael, neputu Daudi meikena Isiraeli. Neaku etiaaka Daudi Yoab o larikok le njore, “Shomo nkena Isiraeli, ebaiki Beersheba o metabaiki Dan, nikiyaki nanu oratioti, pee atum atayiolo esiana enye.” Kake etiaaka Yoab, “Metoponai Olaitoriani iltung'ana lenyena te maaip terisioroto enkumoi enye. Amaa ninche pooki olkitok lai olaiguanani, aime isinkan linono pooki? Kainyoo naa pee eyieu olkitok lai ena? Kainyoo pee eyaki ninye ena kitarruorroto Israel? Kake etirrisha ororei lo laiguanani tialo Yoab, neaku eshomo Yoab atua Israel pooki, nerrinyunye Yerusalem. Neisho Yoab esiana oo ltung'ana Daudi. Ore tiatua Israel pooki netii iltung'ana milion nabo o nkalifuni iip nabo oata ilalema, Ore te Yuda naa nkalifuni iip ong'uan o ntomoni naapishana iltung'ana oata ilalema. Kake eitu eikenaki Lawi o Benchamen teina kikena, amu eitagoro apa irorei lo laiguanani Yoab. Kake eitu apa eitiship ena bae Olaitoriani, neosh ninye Israel. Nejoki Daudi Enkai, Ataasa nanu eng'oki oleng ataasa ena bae. Kake ore naa taata aatoomono nanu iyie, iwuang'ie entorroni o sinka lino; amu ataasa nanu ena te modai.” Neirorie Olaitoriani Gad, ilo aduani le Daudi ejo, “Shomo tiaaki Daudi, ‘Nji ejo Olaitoriani, mbaa uni aaisho nanu iyie; tegelu nabo te ninche, pee aatum nanu aishoo iyie.’ ” Nelotu Gad enetii Daudi nejoki ninye, “Nji ejo Olaitoriani, ‘Iwa ina niyieu: Ilarin okuni lo lameyu, aashu ilapaitin okuni likintanyamal ilmang'ati linono, nikinepu olalem loo lmang'ati linono; arashu nkolong'i uni o lalem lo Laitoriani, olmeitai le nkop, neidaikie olmalaika lo Laitoriani tiatua enkop e Israel pooki.’ Toduta ewalata nayaki ilo laairriwua.” Neitoki Daudi ajoki Gad, “Atii nanu atua osina sapuk; nchooki nanu matabatatakinoyu enkaina o Laitoriani, amu aisapuk olng'ur lenye oleng, kake mincho nanu abatatakino enkaina e tung'ani.” Neaku eirriwaka Olaitoriani olmeitai shumata Isiraeli; neye teine iltung'ana le Israel nkalifuni ntomoni naapishana. Neirriwaa olmalaika Yerusalem pee eidakie ninye; kake ore etaa keidaikie, neing'or Olaitoriani neirridu ina torroni; nejoki ninye ilo malaika le nkidaata, “Eidip ina; torrinyo taata enkaina ino.” Neitashe apa ilo malaika lo Laitoriani tembata e wuejineiutuutishoreki e Onan le Yebusi. Nedumu Daudi nkonyek enyena nedol olmalaika lo Laitoriani eitashe te rishata e nkop o shumata, neeta te nkaina enye olalem otushutuaki te nchashur neitoriokini shumata Yerusalem. Neishop Daudi olpayiani ilkuniyiani, nebatata too nkomomi enye. Nejoki Daudi Enkai, “Aime nanu doi oitanapishe meikeni olorere? Nanu otaasa eng'oki naas ena bae torrono. Kake amaa kuna kerra, kaa ninche etaasa? Nchoo naa enkaina ino Olaitoriani aatoomono, Olaitoriani Enkai ai, maatara nanu o enkaji e papaai lai; kake mincho olmeitai elotu shumata iltung'ana linono.” Neitoki ilo malaika le Nkai aitanap Gad metiaki Daudi nchere, pee elo aitobiraki olasar Olaitoriani te wueji neiutuutishoreki, e onan le Yebusi. Nelo Daudi teilo rorei le Gad oiroro te nkarna o Laitoriani. Neidong'ito apa Onan enkano; neibelekenya nedol olmalaika ore lelo ayiok lenyena pokira oong'uan neisudori. Ore elotu Daudi enetii Onan neing'orisho Onan nedol Daudi, nelo ninye teilo kurroto oiutuutishoreki neirrugo aitabaiki enkomom enye enkop, aisho Daudi enkanyit. Nejoki Daudi Onan, “Nchooki nanu olkurroto oiutuutishoreki pee ashetie olperere lo lasar lo Laitoriani timirakaki nanu te nkinyiang'a nalulung'a, pee etumi aaiwuang'ie olmeitai too ltung'ana.” Neitoki Onan ajoki Daudi, “Iwa iyie; naa nchoo olkitok lai olaiguanani eas ina naishiakino te ninye, ng'ura kaishoru nanu ilmong'i pee eitaae olasar opejori, ore kuna keek naaidong'ishoreki neaku ilkeek, neaku enkano olasar le ntapa. Kaishoru nanu pooki.” Kake etiaaka olaiguanani Daudi Onan, “A'a, kake kainyiang'u nanu te nkinyiang'a nalulung'a; mayaki nanu Olaitoriani entoki nara enino, anaa aitayu ilasarri oopejori leitu ainyiang'u.” Neaku etalaaka Daudi Onan shekeli iip ile e sahabu te nkiroishi, tenkaraki ine wueji. Neshetu Daudi teine olperere lo lasar, lo Laitoriani, neitarasaa olasar opejori, o lasar le seriani, neipot enkarna o Laitoriani, newaliki Olaitoriani ninye te nkima, naing'uaa keper naewuo shumata ilo perere lo lasar opejori. Neitanap Olaitoriani ilo malaika, nerrinyoki olalem atua enchashur. Ore teina kata, ore ake pee edol Daudi ajo etawalikia Olaitoriani ninye teilo kurroto oiutuutishoreki le Onan loo Lyebusi, neitobir ninye ilasarri lenyena teine. Amu ore apa ilo ng'obor le manyisho Olaitoriani, oitobira Musa tiong'ota, o ilo perere lo lasar opejori netii apa ina kata ewueji neika te Gibeon; kake meidim apa Daudi ashomo aitasho te dukuya ninye aikilikuanishore Enkai, amu keure apa olalem leilo malaika lo Laitoriani. Neitoki Daudi ajo, “Ene nelo aaku enkaji o Laitoriani Enkai, naa ene nelo aaku olperere lo lasar opejori te Israel.” Neitanapisho Daudi pee eiturrurri tenebo iltung'ana pooki omon ootii atua enkop e Israel, nepik iladung'ok loo soito, pee eitobir isoito oogueta ooshetieki enkaji e Nkai. Neishoru sii Daudi isekenke kumok naaitayunyeki ilmushumaani loo nkutukie oo nkajijik o nkikeneta, tenebo osuyai kitok oleng lemeimakinoyu enkiroishi. O mbaoi o oltarakuai nemeikenayu; amu eyautua iltung'ana le Sidon, o le Tiro mbaoi kumok o ltarakuai aayaki Daudi. Amu etejo apa Daudi, “Ore Solomon olayioni lai, naa koti, nemeyiolo toki, naa ore ena aji nashetakini Olaitoriani naa aisidai oleng, nening'o neeta enkitoo te nkop pooki; kaitobir nanu mbaa olchetei leina aji.” Neaku eishorua Daudi ntokitin kumok e nchetare eton eitu eye. Neitoki aipotu Solomon ilo ayioni lenye, neitanap metesheta enkaji Olaitoriani, Enkai e Israel. Nejoki Daudi Solomon, “Enkerai ai, aata apa to ltau lai pee ashetu enkaji te nkarna Olaitoriani Enkai, ai. Kake eewuo ororei lo Laitoriani enatii, ejo, ‘Mbukoyie iyie osarge sapuk nitijing'a ilarrabali kumok sapuki; mishetu iyie enkaji tenkaraki enkarna ai, amu imbukoyie iyie osarge sapuk te dukuya nanu o tioriong enkop. Ng'ura, eikiikini iyie enkayioni, naa keaku ninye oltung'ani le seriani. Kaisho nanu ninye eseriani too lmang'ati lenyena pooki oomanita; amu keaku keji enkarna enye Solomon, naa kaishoru nanu eseriani o enkitirring'a te Israel too nkolong'i enyena. Ninye olo ashet enkaji tenkaraki enkarna ai. Keaku ninye enkerai ai naaku nanu menye lenye, naa kaitasheyie nanu olorika lenye le nkitoo tiatua Israel ntarasi.’ Ore naa taata enkerai ai, metaa Olaitoriani tenebo iyie, pee itum atudupoyu te nchetata enkaji o Laitoriani Enkai ino, anaa apa enairoro ninye tialo iyie. Mikinchoo ake ninye Olaitoriani eng'eno o ening'unoto, peyie tinikincho ninye enkitanapata naipirta Isiraeli, nitum aibung'a enkitanapata o Laitoriani Enkai ino. Nitum taa atudupoyu, tenijurru, nimbung nena kikoot o nkiguanat naaitanapa Olaitoriani Musa tenkaraki Israeli. Ntagoluoyu, nintagol oshoke. Miureishoyu; mipalari. Ore te mion kitok oleng, naishorua nanu tenkaraki enkaji o Laitoriani ntalantani nkalifuni iip nabo e sahabu, o ntalantani milion nabo e nkosholai o suyai, o esekenkei nemetemayu, amu aikumok apa oleng. Aishorua sii mbaoi o soito. Ore te kuna nemeeta nchere pee miponaa. Iyata isinkan kumok oleng; iladung'ok loo soito, o lashetak loo soito, o laguetak loo mbaoi, o mpukunot pooki oo laisiaayiak arriyiak lemeikenayu. Iltung'ana arriyiak te siaai, e sahabu, o enkosholai, o suyai, o sekenke. Entudumunye entaasisho! Metaa Olaitoriani tenebo intae!” Eitanapa sii apa Daudi ilarikok pooki le Israel pee eretu Solomon, ilo ayioni lenye ejo, “Aimetii Olaitoriani Enkai inyi tenebo intae? Naa keitu ninye eisho intae eseriani te pooki shoto? Amu eyaua ninye lelo oomanya ena kop apik atua nkaik aainei; naa keaku enkop abori Olaitoriani etii o ltung'ana lenyena. Esiaayia naa taata Olaitoriani Enkai inyi too ltauja. Entudumunye enteshet ewueji sinyati o Laitoriani Enkai inyi, pee etumi aayau nena masaa sinyat atua ina aji nateshetaki tenkaraki enkarna o Laitoriani.” Ore ake pee emoruau Daudi, neitaa Solomon olayioni lenye metaa olaiguanani le Israel. Neiturrur Daudi ilarikok pooki le Israel, o lapolosak pooki loo Lawi. Ore too Lawi, neikeni pooki oata ilarin tomoni uni neilep, ore esiana enye naa iltung'ana nkalifuni tomoni uni oisiet. Nejo Daudi, “Ore nkalifuni tikitam oong'uan e kulo, ninche ooitasheiki esiaai e nkaji Olaitoriani, ore nkalifuni ile neaku ilkituaak o larishak. Ore ilarripok le kishomi naa nkalifuni ong'uan, naa nkalifuni oong'uan oisis Olaitoriani te nena kinantani naitobira nanu pee eisisieki.” Neitobir Daudi ninche aorrior aaitaa ilturrurri aitusuj ilayiok le Lawi: Gershom, o Kohat, o Merari. Ore apa ilayiok le Gershom naa Ladan, o Shimei. Ore ilayiok le Ladan naa: Yehiel aa ninye olkitok, o Setam, o Yoel, lelo pokira okuni. Ilayiok le Shimei naa Shelomot, o Hasiel, o Haran, lelo pokira okuni. Kulo apa ilukuny oo nkajijik oo loo menye too le Ladan. Ore ilayiok le Shimei naa: Yahat, o Sina o Yeush, o Beria. Ilayiok apa le Shimei kulo pokira oong'uan. Yohat apa ninye olkitok, naa Sisa o liare; kake meeta apa Yeush o Beria ilayiok kumok, neaku eitaaki ninche olmarei obo. Ore ilayiok le Kohat naa: Amram, o Ishar, o Hebron, o Usiel, lelo pokira oong'uan. Ore ilayiok le Amram naa: Aron o Musa. Eiteng'elaki apa Aron pee eitisiny nena tokitin naasinya oleng, pee etum ninye o layiok lenyena aataa iloopej enkorropil te dukuya Olaitoriani, neisiaaisho ninye, nemayianisho te nkarna enye ntarasi. Kake ore ilayiok le Musa ilo tung'ani le Nkai, neishooki nkarn oo ltung'ana le Lawi. Nkarn oo layiok le Musa: Gershom o Eliesa. Ore ilayiok le Gershom naa Shebuel aa ninye olkitok, ore ilayiok le Eliesa naa: Rehabia aa ninye olkitok, nemeeta apa Eliesa kulikae ayiok, kake aikumok apa ilayiok le Rehabia oleng. Ore ilayiok le Ishar naa, Shelomit aa ninye olkitok. Ore ilayiok le Hebron naa: Yeria aa ninye olkitok, o Amaria aa ninye oliare, o Yahasiel aa ninye oliokuni o Yekameam aa ninye oliong'uan. Ore ilayiok le Usiel naa: Mika aa ninye olkitok o Ishia aa ninye oliare. Ore ilayiok le Merari naa: Mahali o Mushi. Ore ilayiok le Mahali naa: Eliesa o Kish. Etua apa Eliesa meeta ilayiok, ntoyie ake eeta; ore iltung'ana lenye, lelo ayiok le Kish, neyam ninche. Ore ilayiok le Mushi naa: Mahali, o Eder, o Yeremot, lelo pokira okuni. Kulo apa ninche ilayiok le Lawi anaa too nkajijik oo loo menye, nena lukuny oo nkajijik oo loo menye, anaa enaigeroki ninche te risioroto e siana oo nkarn e pooki ng'ae ebaiki ilarin tikitam neilep, te lelo ooas esiaai e nkisiaayiare e nkaji Olaitoriani. Amu etejo apa Daudi, “Ore Olaitoriani Enkai e Israel, eishoo eseriani iltung'ana lenyena, nebik ninye te Yerusalem ntarasi. Metaa meekure eeta tipat nanapie Ilawi olng'obor le Nkai o kulie tokitin ake pooki e nkisiaayiare.” Amu ore too rorei oobayie le Daudi, naa ena esiana oo Lawi ebaiki ilarin tikitam neilep. “Kake ore esiaai enye naa pee eretu ilayiok le Aron te nkisiayiare e nkaji Olaitoriani aaing'or Ilgorieti o too lgilat le nkaji, neituku nena pooki sinyat, neas pooki siaai te nkisiaayiare e nkaji e Nkai; neretisho te nkisiaayiare e mukate e nkitoduaaroto, o entapa tenkaraki olasar le ntapa, naa ninye eitobirieki imukateni neitu eisuishieki, o lasar loo mukateni naatapejoki, o lasar oitushula te ilata, o ntemat pooki e nkumoi o esapuko. Naa keitashe ninche anaake tadekenya aaisho enashe neisis Olaitoriani, naa neijia sii etiu teipa. O enkata ake pooki naishori Olaitoriani olasar opejori te nkolong e sabato, o to lapa ng'ejuk, o too nkolong'i o Sirua, terisioroto e siana nayieuni te ninche, anaake te dukuya Olaitoriani. Neijia ninche eiko aaing'or olng'obor le ntumo o ewueji sinyati, negolie ninche ilayiok le Aron, lelo alashera lenye, te nkisiaayiare e nkaji Olaitoriani.” Ore ilturrurri loo layiok le Aron naa ninche kulo. Ore ilayiok le Aron naa: Nadab, o Abihu, o Eliesa, o Itamar, kake etasiokito apa Nadab o Abihu aaye te dukuya papaai lenye, nemeeta ninche nkera, neaku etaa Eliesa o Itamar ilapolosak. Ore te retoto e Sadok obo loo layiok le Eliesa, o Ahimelek obo loo layiok le Hamar, neitobir Daudi nkitobirat te risioroto e nkisiayiare enye. Ore amu enotoki apa iltung'ana kituaak tiatua ilayiok le Eliesa alang too layiok le Itamar, etipikaki ninche ilturrurri tomon o ile tiabori ilukuny oo nkajijik oo loo menye, too layiok le Eliesa, o isiet too layiok le Itamar. Eitobira ninche te oshoto e nkukuo, aaitanyaanyuk pooki, amu eetae apa ilkituaak anaake te wueji sinyati, o lkituaak le Nkai tiatua ilayiok le Eliesa o layiok le Itamar. Ore ilo aigeroni oji Shemaia olayioni le Nataniel, loo Lawi, neiger ninche pooki te dukuya olaiguanani, olkituaak, o Sadok olapolosani, o Ahimelek olayioni le Abiata, o lukuny oo nkajijik oo loo menye oo lapolosak o Lawi; negeluni enkaji nabo too le Eliesa negeluni nabo too le Itamar. Etadoikio enkukuo e dukuya Yehoirib, nedoiki eniare Yedaia, nedoiki ene uni Harim, nedoiki ene ong'uan Seorim, nedoiki ene imiet Malkija, nedoiki ene ile Mijamin, nedoiki ene naapishana Hakos, nedoiki ene isiet Abija, nedoiki ene naaudo Yeshua, nedoiki ene tomon Shekenia, nedoiki ene tomon oobo Eliashib, nedoiki ene tomon oare Yakim, nedoiki ene tomon ookuni Hupa, nedoiki ene tomon oong'uan Yeshebeab, nedoiki ene tomon o imiet Bilga, nedoiki ene tomon o ile Imer, nedoiki ene tomon oopishana Hesir, nedoiki ene tomon o isiet Hapiser, nedoiki ene tomon ooudo Petahia, nedoiki ene tikitam Yeheskel, nedoiki ene tikitam oobo Yakin, nedoiki ene tikitam oare Gamul, nedoiki ene tikitam oo kuni Delai, nedoiki ene tikitam oo ng'uan Maasia, egeluno apa kulo pooki te nkisiaayiare enye pee epuonu atua enkaji Olaitoriani terisioroto eilo kerreti apa oitasheyie Aron papaai lenye tenkaraki ninche, anaa enaitanapa ninye Olaitoriani Enkai e Israel. Naa kuna nkarn e kulikae ayiok le Lawi: ore too layiok le Amram naa, Shubael; ore too layiok le Shubael, naa Yehedia. Ore too layiok le Rahedia naa: Ishia aa ninye olkitok. Ore too le Isharit, naa Shelemot; ore too layiok le Shelemot naa Yahat. Ore too layiok le Hebron naa Yeria aa ninye olkitok, naa Amaria oliare, naa Yahasiel oliokuni, naa Yekameam oliong'uan. Ore ilayiok le Usiel naa Mika, ore too layiok le Mika naa Shamir. Ore olalashe le Mika naa Ishia; ore ilayiok le Ishia naa Sakaria. Ore ilayiok le Merari naa Mahali o Mushi. Ore ilayiok le Yaasia naa Beno. Ore ilayiok le Merari naa Yaasia, o Beno, o Shoham, o Sakur, o Ibri. Ore too layiok le Mahali naa: Eliesa ilo apa lemeeta ilayiok. Ore too layiok le Kish naa Yerameel. Ore ilayiok le Mushi naa Mahali, o Eder, o Yerimot. Kulo apa ilayiok loo Lawi te risioroto oo nkajijik oo loo menye. Ore sii kulo, ilukuny oo nkajijik oo loo menye, o lalashera lenye ooti, neosh sii ninche enkukuo, anaa ake ilalashera lenye, lelo ayiok le Aron, te dukuya olaiguanani Daudi, o Sadok o Ahimelek, o lukuny oo nkajijik oo loo menye e lelo apolosak le Lawi. Ore Daudi o lelo kituaak le nkisiayiare neiteng'el kulikae te nkaraki enkisiaayiare embata oo layiok le Asaf le Heman o le Yedutum, laa ninche apa ooibonisho too lwululi loo usin, o too nkai oosinkolioitin, o too nkinantani dapashi. Ore lelo ootaasa esiaai enkisiaayiare enye naa: Ore too layiok le Asaf, naa, Sekur, o Yosef, o Natania, o Aharela, lelo ayiok le Asaf te utaroto e Asaf, laa ninye apa oibonisho te utaroto o laiguanani. Ore too layiok le Yedutum naa Gedalia, o Seri, o Yeshaia, o Shemei, o Hashabia o Matitia, lelo pokira ile, tiabori eutaroto e papaai lenye Yedutum, laa ninye apa oibonisho to lwulul loo usin, eishooyo enashe neisis Olaitoriani. Ore too layiok le Heman naa: Bukia, o Matania, o Usiel o Shebuel, o Yerimot, o Hania, o Hanani, o Eliata, o Gidalti, o Romantieser, o Yoshbekasha, o Meloti, o Hotir, o Mahasiot. Ore kulo pooki naa ilayiok le Heman, oladuaani lo laiguanani le Seer, terisioroto enkisiligata e Nkai pee eitaa ninye kitok, amu eishoo apa Enkai Heman ilayiok tomon oong'uan o ntoyie uni. Etii apa ninche pooki abori eutaroto e papaai lenye to sinkolio le nkaji e Nkai, too nkinantani, o nkai oo sinkoliotin, o lwululi loo usin, tenkaraki enkisiaayiare e nkaji e Nkai. Ore Asaf, o Yedutum, o Heman netii abori enkitanapata o laiguanani. Ore esiana enye tenebo lelo alashera lenye, apa ooiteng'enaki te ranyakinoto o Laitoriani, lelo pooki arriyiak, naa iip are o ntomoni isiet. Neosh ninche enkukuo tenkaraki isiaaitin enye, kutiti o sapuki. Olaiteng'enani o loiteng'eni. Nedoiki enkukuo e dukuya Asaf lo lmarei le Yosef; nedoiki eniare Gedalia, ninye olalashera lenyena, o layiok lenyena pokira tomon oare; nedoiki ene uni Sakar o layiok lenyena o lalashera lenyena, pokira tomon oare, nedoiki eniong'uan Isri, o layiok lenyena, o lalashera lenyena, pokira tomon oare; nedoiki ene imiet Natania, o layiok lenyena, o lalashera lenyena, pokira tomon oare, nedoiki ene ile Bukia, o layiok lenyena, o lalashera lenyena pokira tomon oare, nedoiki ene naapishana Yesherela, o layiok lenyena, o lalashera lenyena pokira tomon oare, nedoiki ene isiet Yeshaia, o layiok lenyena, o lalashera lenyena pokira tomon oare, nedoiki ene naaudo Matania, o layiok lenyena, o lalashera lenyena pokira, tomon oare; nedoiki ene tomon Shimei, o layiok lenyena, o lalashera lenyena, pokira tomon oare; nedoiki ene tomon oobo Asarel, o layiok lenyena, o lalashera lenyena pokira tomon oare; nedoiki ene tomon oare Hashabia, o layiok lenyena, o lalashera lenyena, pokira tomon oare; nedoiki ene tomon ookuni Shubael, o layiok lenyena, o lalashera lenyena pokira tomon oare; ore ene tomon oo ng'uan nedoiki Matitia, o layiok lenyena, o lalashera lenyena, pokira tomon oare; ore ene tomon oimiet, nedoiki Yeremot, o layiok lenyena, o lalashera lenyena pokira tomon oare; ore ene tomon oile, nedoiki Hanania, o layiok lenyena, o lalashera lenyena pokira tomon oare; ore ene tomon oopishana, nedoiki Yashbekasha, o layiok lenyena, o lalashera lenyena pokira tomon oare; ore ene tomon oisiet, nedoiki Hanani, o layiok lenyena, o lalashera pokira tomon oare; ore ene tomon ooudo, nedoiki Malotu, o layiok lenyena, o lalashera lenyena, pokira tomon oare; ore ene tikitam nedoiki Eliata, o layiok lenyena, o lalashera lenyena pokira tomon oare; ore ene tikitam oobo, nedoiki Hatir, o layiok lenyena, o lalashera lenyena, pokira tomon oare; ore ene tikitam oare nedoiki Gatalti, o layiok lenyena o lalashera lenyena, pokira tomon oare; ore ene tikitam ookuni nedoiki Mahasiot, o layiok lenyena o lalashera lenyena pokira tomon oare; ore ene tikitam oong'uan, nedoiki Romatiesa, o layiok lenyena, o lalashera lenyena pokira tomon oare. Ore tialo eoroto oo larripok loo nchomito: ore too ltung'ana le Kora naa Meshelemia olayioni le Kore, obo loo layiok le Asaf. Neeta apa Meshelemia ilayiok: Sakaria aa ninye olkikau, naa Yediael oliare, naa Sebadia oliokuni, naa Yatiniel oliong'uan, naa Elam olayioni le imiet, naa Yehohanaan olayioni le ile, naa Eliehoenia oliopishana. Neeta sii apa Obed-edom ilayiok: naa Shemaia olkikau, naa Yehosabad oliare, naa Yoa oliokuni, naa Sakar oliong'uan, naa Netanel olayioni le imiet, naa Amiel olayioni le ile, naa Isaakar oliopishana, naa Peuletai olayioni le isiet; amu etamayiana apa Enkai ninye. Ore sii apa tialo olayioni lenye Shemaia, netoiuoki ilayiok laa ninche ootaa ilaitoriak loo nkajijik oo loo menye, amu iltung'ana apa oata enkidimata kitok oleng. Ore ilayiok le Shimeia, naa, Otini, o Refael, o Obed, o Elisabad, neeta apa ilalashera lenye enkidimata, Elihu o Shimeia. Ore kulo pooki naa ilo lmarei le Obed-edom, tenebo ilayiok lenye o lalashera lenye. Iltung'ana oata enkidimata ninche naa arriyiak te siai. Iltung'ana le Obed-edom ntomoni ile oare. Neeta sii apa Meshelemia ilayiok o lalashera iltung'ana oata enkidimata oora tomon o isiet. Ore Hosa loo layiok le Merari neeta ilayiok: Shimri aa ninye olkitok, (amu ore duoo ninye neme olkikau ninye, neitaa menye kitok). Naa Hikia osuju, naa Tebalia oliokuni naa Sekaria oliong'uan; ore ilayiok pooki o lalashera le Hosa naa tomon oo kuni. Ore kulo turrurri pooki loo larripok loo nchomito, negeluno ake aaipirare ltung'ana lenye kituaak, negelakino enkisiaayiare, anaa apa enataasa ilalashera lenye, eisiaaisho tiatua enkaji o Laitoriani. Neosh ninche enkukuo anaa too nkajijik oo loo menye, neitorisi nkutiti o sapuki, tenkaraki nchomito enye. Ore enkukuo enkalo oloo saen nedoiki Shelemia. Enyaakita sii aoshoki olayioni lenye Sekaria enkukuo, ilo autaroni ng'en nedoiki enkukuo enye enkalo e moikuape. Nelotu Obed-edom enkalo e kopikop ore ilayiok lenyena neishori enkaji nashumishoreki. Ore Shupim o Hosa nedoiki enkukuo enye enkalo o loo ntoluo, embata e nkishomi e Sheleket, teina oitoi kitok nalo ailep. Neipirakinore ake olarriponi olarriponi. Ore te nkalo oloo saen netii ilarripok ile anaake, ore te nkalo e moikuape netii ilarripok oong'uan anaake, ore te nkalo e kopikop netii ilarripok oong'uan anaake, tenebo ake sii kulikae maaremaare te nkaji nashumishoreki. Ore te nkalo o loo ntoluo netii ilarripok oong'uan enkoitoi kitok netii oare ine wueji neitobiraki aakus. Kulo ninche ilturrurri loo larripok loo nchomito tialo ile Kora o layiok le Merari. Ore too Lawi, naa Ahija apa oata enkitasheikinoto tenkaraki enchumare oo masaa e nkaji e Nkai, o lchumat loo nkishorot naaitisinyaki. Ore ilayiok le Ladan, lelo ayiok le Gershom ooara ile Ladan, nena lukuny oo nkajijik oo loo menye naa ile Ladan le Gershom: Yehiel. Ore ilayiok le Yehiel, naa Setam o Yoel olalashe lenye, naa ninche ooitasheiki ilchumat le nkaji o Laitoriani. Ore too le Amram, lelo le Isharit, o le Shebuel ilo ayioni le Gershom, olayioni le Musa, naa ninye olkitok oitasheiki ilchumat. Ore ilalashera lenyena, ebaiki Eliesa; naa olayioni lenye Rehabia o layioni lenye Yeshaia, olayioni lenye Yoram, olayioni lenye Sikri, naa olayioni lenye Shelomot. Ore Shelemot o lalashera lenyena naa ninche ooitasheiki ilchumat le nena kishorot apa naaitisinya olaiguanani Daudi, tenebo ilukuny oo nkajijik oo loo menye, o lkituaak loo nkalifuni, o loo maa iip loo larikok le njore naaitisinyaki. Ore ntokitin naataaruaki to larrabal, neitisiny ninche nena kishorot pee eitobirieki enkaji Olaitoriani. O nena sii pooki naaitisinya Samuel oladuaani, o Saul olayioni le Kish, o Abna olayioni le Neer, o Yoab olayioni le Seruya - ore nena kishorot pooki naaitisinyaki naa abori enking'urata e Shelemot etii o lalashera lenyena. Ore too Lharisit, naa Kenaia o layiok lenyena, negeluni tenkaraki isiaaitin e boo too Siraeli, metaa ilkituaak o larishak. Ore too le Hebron, naa Hashabia o lalashera lenyena, iltung'ana enkalifu nabo o iip naapishana oata enkidimata, ooing'or aagolie Isirael, te nkalo o loo ntoluo olkeju le Yordan, te siaai pookiOlaitoriani, o te nkisiayiare olaiguanani. Ore too le Hebron, naa Yeriya olkitok loo le Hebron te pooki iishoritin o too nkajijik oo loo menye. (Ore to lari liartam le nkitoria e Daudi, netujurroki iltung'ana netumi iltung'ana oata enkidimata tiatua ninche te Yaser tiatua Gilead.) Etegelua olaiguanani Daudi ninye o lalashera lenyena, iltung'ana nkalifuni are o iip naapishana oata enkidimata, nena lukuny oo nkajijik oo loo menye, pee eitasheiki ile Ruben, o le Gad, olpisiai lo losho le Manase te pooki bae naipirta Enkai o too mbaa o laiguanani. Kuna nkarn oo ltung'ana le Israel, nena lukuny oo nkajijik oo loo menye, lelo arikok le njore loo nkalifuni o loo maa iip, o lkituaak lenye ooisiaai olaiguanani too mbaa pooki naaipirta nena orot oo lturrurri, te pooki apa o to lari pooki, ore ake olturrur obo naa iltung'ana nkalifuni tikitam oong'uan. Yoshobeam olayioni le Sabdiel apa oitasheiki olturrur le dukuya, to lapa le dukuya; ore ilo turrur lenye naa iltung'ana nkalifuni tikitam oong'uan. Ole ishoi e Peres apa ninye, naa ninye olkitok too larikok pooki le njore to lapa le dukuya. Dodai le Ahohit apa oitasheiki olturrur lo lapa liare; ore olturrur lenye naa iltung'ana nkalifuni tikitam oong'uan. Ore olarikoni le njore liokuni, to lapa liokuni, naa Benaia olayioni le Yehoida ilo apolosani, aa ninye olkitok; ore olturrur lenye naa iltung'ana nkalifuni tikitam oong'uan. Olapa taa Benaia ele ora oltung'ani magilani tiatua lelo tomoni uni naa ninye olarikoni le tomoni uni; Amisabad olayioni lenye apa oitasheiki olturrur lenye. Asahel ilo alashe le Yoab ninye apa oliong'uan, to lapa liong'uan, naa olayioni lenye Sebadia osujaki ninye; ore olturrur lenye naa iltung'ana nkalifuni tikitam oong'uan. Ore olarikoni le njore le imiet, to lapa le imiet naa Shumhut, le Israhit; Ore olturrur lenye naa iltung'ana nkalifuni tikitam oong'uan. Ore olayioni le ile to lapa le ile naa Ira olayioni le Ikesh le Tekoa; ore olturrur lenye naa iltung'ana nkalifuni tikitam oong'uan. Ore oliopishana, to lapa liopishana, naa Heles le Peloni, loo layiok le Efraim; ore olturrur lenye naa iltung'ana nkalifuni tikitam oong'uan. Ore olayioni le isiet to lapa le isiet naa Sibekia le Hushat le Serahit, ore olturrur lenye naa iltung'ana nkalifuni tikitam oong'uan. Ore o lioudo to lapa lioudo naa Abiesa le Anatot, loo le Benchamen; ore olturrur lenye naa iltung'ana nkalifuni tikitam oong'uan. Ore olayioni le tomon, to lapa le tomon naa Maharai le Netofa, loo le Serahit, ore olturrur lenye naa iltung'ana nkalifuni tikitam oong'uan. Ore olayioni le tomon oobo to lapa le tomon oobo naa Benaia le Piraton, loo layiok le Efraim; ore olturrur lenye lenye naa iltung'ana nkalifuni tikitam oong'uan. Ore olayioni le tomon oare, to lapa le tomon oare naa Hildai le Netofat loo le Otiniel; ore olturrur lenye naa iltung'ana nkalifuni tikitam oong'uan. Ore tialo iloshon le Israel, ore too le Ruben, naa Eliesa olayioni le Sikri ninye olkitok; ore too le Simeon, naa Shefatia olayioni le Maaka; ore too Lawi naa Hashabia olayioni le Kemuel; ore too le Aron naa Sadok; ore too le Yuda naa Elihu, obo loo lalashera le Daudi; ore too le Isaakar, naa Umri olayioni le Mikael; ore too le Sebulon, naa Ishmaia olayioni le Obadia, ore too le Naftali, naa Yeremot olayioni le Asriel; ore too le Efraim, naa Hoshea olayioni le Asasia; ore to lpisiai lo losho le Manase, naa Yoel olayioni le Pedaia; ore to likae pisiai lo losho le Manase te Gilead naa, Ido olayioni le Sakaria, ore too le Benchamen, naa Yaasiel olayioni le Abna; ore too le Dan, naa Asarel olayioni le Yeroham, kulo apa lelo arikok loo loshon le Israel. Eitu apa eiken Daudi lelo ootii abori ilarin tikitam, amu eisiligishore apa Olaitoriani pee eitaa Isiraeli kumok anaa ilakir le shumata. Neiteru Yoab olayioni le Seroya aikenisho, kake eitu ninye eidip, neitoki engoro alotu shumata Israel tenkaraki ena, neitu epiki ina siana atua nkatinin o laiguanani Daudi. Ore apa olaitasheikinoni loo lchumat lo laiguanani naa Asmafet olayioni le Adiel. Naa ore olaitasheikinoni loo lchumat leina kop, tiatua nkanas, o tiatua nkang'itie kutiti, o too ltaleta, naaYonatan olayioni le Usia; ore oloitasheiki lelo oaasisho too nkurman, neturisho naa Esiri olayioni le Kelub; ore oloitasheiki inkurman oo lng'anayio naa Shimei le Rematil; ore oloitasheiki ilng'anayio ooitayuni te nkurma oo sabibu naa Sabdi le Shifamit. Ore oloitasheiki iloirienito o lkeek laaijo retet ootii atua Shefala naa Baalhanan le Gederi; ore oloitasheiki ineeshumieki iila naa Yoash. Ore oloitasheiki nchoo too ndaat te Sharon naa Shitrai le Sharon, ore oloitasheiki nchoo naadaa too erat naa Shefat olayioni le Adlai. Ore oloitasheiki ntamesin naa Obil le Ishmael; ore oloitasheiki isirkon lipong'a naa Yehedia le Meronot. Ore oloitasheiki Illuat oo nkerrai naa Yasis le Hagrit. Ore kulo pooki naa ilaitasheikinok loo masaa o laiguanani Daudi. Ore apa Yonatan olenkapu le Daudi, naa ninye olaikooni le Daudi, amu oltung'ani ninye oata ening'unoto naa olaig'eroni; ninye o Yehiel olayioni le Hakmoni apa oiteng'en ilayiok lo laiguanani. Ahitofel apa olaikooni lo laiguanani, naa Husai le Akit olchore lo laiguanani. Etijing'a apa Yehoida olayioni le Benaia tenebo Abiata erishata e Ahitofel. Naa Yoab apa olarikoni le njore olaiguanani. Eiturrurro apa Daudi te Yerusalem ilkituaak pooki le Israel, ilkituaak loo loshon, o larikok le lelo turrurri apa ooisiaai olaiguanani, o larikok le njore le nkalifu, o larikok le njore le maa iip, o laitashiekinok loo masaa pooki, o nkishu o laiguanani, o layiok lenyena, tenebo o lkituaak le nkaji o laiguanani, o lelo tung'ana magil, o lelo murran pooki yiolot. Nedumunye Daudi aitashe nejo, “Entoning'oki nanu, ilalashera lainei oltung'ana laainei. Atadamua apa to ltau lai pee ashetu enkaji nairragieki osanduku lo sotua lo Laitoriani, neaku eneitasheyie nkejek e Nkai ang: naitobira nanu mbaa naashetieki, kake aatiaka nanu Enkai, ‘Mindim iyie atesheta enkaji tenkaraki enkarna ai, amu ira iyie olmurrani nimbukoyie osarge sapuk.' Ore ake eyia aategelua nanu Olaitoriani Enkai e Israel te nkaji e papaai pooki pee aaku olaiguanani le Israel ntarasi, amu etegelua Yuda metaa olarikoni, naa ore te nkaji e Yuda, teina aji e papa, o tiatua ilayiok le papa neitishipa ninye pee aaitaa olaiguanani le Israel pooki. Naa ore too layiok laainei pooki (amu aaishoo Olaitoriani ilayiok kumok) netegelua Solomon olayioni lai, pee eton to lorika le nkitoo le nkitoria o Laitoriani te Israel. Aatiaka ninye nanu, Solomon olayioni lino olo ashet enkaji ai o lgorieti laainei, amu ategelua nanu ninye metaa enkerai ai, naa kaaku nanu menye lenye. Kaitasheyie nanu enkitoria enye ntarasi tenebik ninye aibung neitabaya nkitanapat aainei, o nkikoot aainei, anaa enatiu ninye taata.’ Ore naa taata te dukuya Isirael pooki, ena umata o Laitoriani o te ning'oto e Nkai ang, entujurru ning'oruru nkitanapat pooki o Laitoriani Enkai inyi; pee itumutumu aawaita ena kop sidai aaitaa eninyi, ningueikiki nkera inyi metaa enjung'ore enye ntarasi. “Naa ore iyie Solomon enkerai ai, tayiolo Enkai e papaai lino, nisiaai ninye to ltau pooki o te ndamunoto e yieunoto amu kejur Olaitoriani iltauja pooki, neyiolo pooki kitobirat o endamunoto. Tening'oru iyie ninye, naa eitum iyie ninye, kake tenilam ninye, naa eikinturraa ninye iyie ntarasi. Toning'o naa taata, amu kitegelua iyie Olaitoriani pee ishet enkaji naaku ewueji sinyati; ntagoluoyu taasa ina.” Neisho Daudi Solomon eutaroto enkitobirata eina aji Enkai pooki, o enoo nkajijik enyena, o neeshumishoreki, o lgilat lenyena le shumata, o lgilat lenyena liatua, o lgilat lo lorika lolng'ur, o nena kitobirat pooki naata to ltau, tenkaraki ilgorieti le nkaji o Laitoriani, o lgilat pooki oomanita, o wuejitin pooki neeshumishoreki e nkaji e Nkai, o eneshumieki nkishorot naaitisinyaki; tenkaraki lelo turrurri loo lapolosak o Lawi, o esiaai pooki enkisiaayiare tiatua enkaji o Laitoriani, o masaa pooki e nkisiaayiare tiatua enkaji o Laitoriani, o enkiroishi e sahabu tenkaraki imasaa e sahabu te pooki kisiaayiare, o enkiroishi oo masaa e nkosholai te pooki kisiayiare. O enkiroishi oo nkitasheta oo ltaai, lenye, o enkiroishi e pooki kitashet oltaa o ltaai lenyena, o enkiroishi enkosholai tenkaraki enkiteshet oltaa, o ltaai lenyena, te risioroto enkisiaayiarete pooki kitashet o ltaa. O enkiroishi e sahabu te pooki mesa, e mukate e nkitoduaaroto, o enkosholai tenkaraki imisai naaitobiri te nkosholai. O sahabu nasila naitobirieki nkijikoni oo lala, o mbesenini, o nkikompeni, o nena girran e sahabu, o enkiroishi e sahabu naitobirieki pooki o ngirran e nkosholai. O te nkaraki olperere lo lasar le nkorropil le sahabu nasila, o enkiroishi e sahabu naitobirieki. Neisho sii nkitobirat tenkaraki engarri oo lbartan e sahabu nanapieki lelo kerubi oolak inaipuko enye aaitoip ilo sanduku lo sotua le Nkai. Eibalunye ninye kuna baa pooki too lkigerot le nkaina o Laitoriani, ooipirta ena bae. Keasi ena siaai pooki aaiturubare ina kitobirata e utaroto. Neitoki Daudi ajoki Solomon ilo ayioni lenye, “Ntagoluoyu nintagol oshoke, niaas ina, miureishoyu, milepori nimishalu; amu ore Olaitoriani Enkai ai, ee Enkai ai, netii tenebo iyie, mikintiak ninye iyie nimikinguanare ometaba anaa neidipayu esiaai pooki e nkisiaayiare e nkaji Olaitoriani. Naa ng'ura, ore ilturrurri loo lapolosak; o loo Lawi, teina kisiaayiare pooki enkaji e Nkai, netii tenebo iyie, ometaba anaa neidipayu esiaai pooki e nkisiaayiare e nkaji Olaitoriani. Naa ng'ura, ore ilturrurri loo lapolosak, o loo Lawi, teina kisiaayiare pooki enkaji e Nkai netii tenebo iyie, neeta ake pooki tung'ani eyieunoto, neeta pooki ng'ae enkarriyiano te pooki kisiaayiare; ore sii ilkituaak o ltung'ana pooki naa kening aakurraki tenintanap ninche.” Nejoki olaiguanani Daudi ina umata pooki, “Ore Solomon enkerai ai laa ninye ake etegelua Enkai, naa oltung'ani oti lemeeta enkarriyiano, naa eikitok ena siaai, amu ore ena aji nemeaku ene tung'ani, kake eno Olaitoriani Enkai. Neaku aishoru nanu ntokitin naashetieki enkaji e Nkai, ai anaa enaidim. Aishorua sahabu tenkaraki ntokitin e sahabu, o enkosholai tenkaraki ntokitin e nkosholai, o suyai tenkaraki ntokitin o suyai, o esekenkei tenkaraki ntokitin e sekenkei o nkeek tenkaraki ntokitin oo nkeek, ore tenebo nena netii isoito kumok ooji oniks, o soito ooitasheyieki, o soito loo muain kumok, o mpukunot pooki oo soito oogol enkinyiang'a, o ltoto ooibor. Ore ake tenebo nena tokitin pooki naishorua nanu tenkaraki ina aji sinyati, naata nanu olchumati lai makewan le sahabu o enkosholai, naa ore tenkaraki enyorrata ai tenkaraki enkaji e Nkai ai, aishoo nanu enkaji e Nkai ai: ntalantani nkalifuni uni e sahabu, ina sahabu e Ofir, o ntalantani nkalifuni naapishana e nkosholai nasila, pee emurieki isunta eina aji, o tenkaraki ina siaai pooki naas lelo tung'ana arriyiak, o sahabu tenkaraki ntokitin e sahabu, o enkosholai tenkaraki ntokitin e nkosholai. Kaing'ae naa likae oishoru te yieunoto, neitisiny kewan ena olong, neitisinyaki kewan Olaitoriani?” Neitoki nena lukuny oo nkajijik o nkajijik oo loo menye aaishoru nena kishorot enye o lpela, anaa ake sii enataasa ilarikok loo loshon, o larikok le njore loo nkalifuni, o loo maa iip, o lelo kituaak ooitasheiki esiaai o laiguanani. Neishoru ninche tenkaraki enkisiaayiare e nkaji e Nkai ntalantani nkalifuni imiet e sahabu, o ntalantani nkalifuni tomon e nkosholai, o ntalantani nkalifuni tomon oisiet o suyai, o ntalantani nkalifuni iip nabo e sekenkei. Ore pooki ng'ae oata soito oogol enkinyiang'a, nepik ilo shumati le nkaji Olaitoriani, naa Yehiel le Gershon apa olaing'urani. Neng'idayu apa iltung'ana enkaraki eitayutuo kulo te nyorrata, amu to ltau pooki eishorutua ninche to lpela aaisho Olaitoriani; neng'idayu sii olaiguanani Daudi oleng. Neitoki Daudi aisis Olaitoriani te dukuya ina umata pooki; nejo Daudi: “Metaa iyie eisisi, iyie Olaitoriani, Enkai e Israel papa lang, ntarasi o ntarasi. Enino, iyie Olaitoriani enkitoo, o engolon, o enkitoria, o enkisulata, o enkishiaa; amu ore pooki natii shumata o enkop naa nkuninono; enino enkitoria, iyie Olaitoriani, naa iyie eilepieki aaitulusoo te pooki. Ore enkarsisisho o enkanyit naa iyie eing'uaa, naa iyie oitoreisho te shumata pooki. Enkaina ino etii engolon o enkidimata; naa enkaina ino; naitaa kitok neisho engolon pooki ng'ae. Ore taata nikincho iyie enashe, Enkai ang, nikisis Enkarna ino kitok. “Kake kara nanu ng'ae, naa kainyoo olorere lai, eji metaa eikindim aaishoru kuna te yieunoto. Amu iyie eing'uaa ntokitin pooki naa nkuninono kitorrinyokito iyie. Amu kira iyiook omon te dukuya iyie, nikira lapuayak anaa apa enatiu loo papa pooki; etiu nkolong'i ang te nkop anaa oloip, nemeetae enebikieki. Iyie Olaitoriani Enkai ang, ore ena kumoi e kuna tokitin nikintayutuo pee kishetakinye iyie enkaji tenkaraki enkarna ino sinyati, naa enkaina ino eing'uaa, naa nkuninono pooki. Ayiolo nanu, Enkai ai, nchere, ijur oltau, nishipakino enkishui sidai; ore te sidano oltau lino naishorua nanu kuna pooki te nyorrata, natoduaa nanu taata kulikae tung'ana linono, ootoni tene, neishoru te nyorrata o te ng'ida. Olaitoriani, Na Ai e Abraham o Isaak o Israel, loo papa, tipika ntarasi kuna yieunot o ndamunot atua iltauja loo ltung'ana linono, niutaa iltauja lenye meetu enitii. Nchoo Solomon enkerai ai meibung'a to ltau lenye nkitanapat inono, pooki o enchakenisho ino, o nkikoot inono, neitabaya pooki, neshet ninye ine wueji apa naitobira.” Neitoki Daudi ajoki ina umata, “Esisa Olaitoriani Enkai inyi.” Neisis ina umata pooki Olaitoriani, Enkai oo loo menye, neirrug ninche ilukuny enye, neserem Olaitoriani, neisho enkanyit aaitaa Olaiguanani. Neisho ninche Olaitoriani ilasarri, ore te nkolong nasuju, neishooyo ilasarri oopejori to Olaitoriani, iloing'ok enkalifu nabo, olmeregeshi enkalifu nabo, o lkuoo le kerra enkalifu nabo tenebo ilasarri lenye ooki, o lasaari kumok oleng te Israel pooki; neokisho ninche nedaa te dukuya Olaitoriani ina olong te ng'ida sapuk oleng. Neitaa ninche Solomon ilo ayioni le Daudi olaiguanani te nkata e are, nebukoki ninche ninye eilata aaput aaitaa olkitok te nkaraki Olaitoriani, neitaa Sadok olapolosani. Neton Solomon to lorika le nkitoo lo Laitoriani anaa olaiguanani te rishata e Daudi papaai lenye; nebul ninye, nening Israel pooki ninye. Ore ilarikok pooki o lelo tung'ana magil, o layiok sii le Daudi pooki, nelimu aaibalunye enkirukoto enye to laiguanani Solomon. Neisho Olaitoriani Solomon metoning'oyu oleng te dukuya Israeli pooki, nepik shumata ninye enkitoo neitu aekata eishori likae aiguanani too Siraeli. Neaku eitoreisho apa Daudi olayioni le Yese te Israel pooki. Ore apa enkata naitoria ninye Israel naa ilarin artam; eitoreishe ninye ilarin ile te Hebron, neitoreisho ilarin tomoni uni oo kuni te Yerusalem. Neye ninye aa oltung'ani moruo oleng, oiputakinote nkolong'i eeta enkarsisisho o enkanyit kitok; neitoreisho Solomon olayioni lenye te rishata enye. Ore apa nkiaasin o laiguanani Daudi, ebaiki enkiterunoto ometabaiki enkiting'oto, neigeroki te mbuku oo nkatinin e Samuel oladuaani, o too nkatinin e Natan ilo oiboni le Nkai, o too nkatinin eGad oladuaani, tenebo mbaa pooki e nkitoria enye, o mbaa pooki e nkitoria enye, o emagilanisho enye, o mbaa pooki naaetuo shumata ninye o shumata Israel, o shumata nkitoriat pooki oo nkuapi. Eitagolo apa Solomon olayioni le Daudi kewan te nkitoria, netii Olaitoriani Enkai enye tenebo ninye, neitaa ninye kitok oleng. Neirorie Solomon Isiraeli pooki, neirorie ilarikok le njore loo nkalifuni, o loo maaip, o larishak, o larikok pooki loo Siraeli, o lukuny oo nkajijik oo loo menye. Ore Solomon, oina umata pooki natii tenebo ninye, nepuo ine wueji e shumata natii Gibeon; amu ine apa etii olng'obor le Nkai oitobira Musa osinka lo Laitoriani. Kake eyaua apa Daudi ilo sanduku le Nkai te Kiriat-Yearim neya ine wueji apa neitobiraka, amu etuuno apa ninye olng'obor tenkaraki ninye te Yerusalem. Kake ore ilo perere lo lasar lo suyai oitobira Besalel olayioni le Uri, olayioni le Huri, netii dukuya ilo ng'obor lo Laitoriani. Nesai Solomon oina umata Olaitoriani. Neilep Solomon alo ine netii olperere lo lasar lo suyai te dukuya Olaitoriani. Atua ilo ng'obor le ntumo apa etii ilo perere lo lasar, neitayu Solomon ilasarri oopejori enkalifu nabo te nchumata enye. Ore teina kewarie neitalio Olaitoriani kewan te Solomon, nejoki ninye, “Toomonu entoki niyieu naaisho.” Nejoki Solomon Enkai, “Ntodolua iyie enyorrata kitok nauno te papaai lai Daudi, nikintaa nanu olaiguanani te rishata enye. Olaitoriani Enkai, nchoo ina kisiligata ino tialo Daudi papa lai meitabari taata, amu kintaa iyie nanu olaiguanani te shumata olorere kitok oba anaa enterit e nkop. Nchooki naa taata nanu eng'eno nagut o yiolounoto pee alo najing'u naitashe te dukuya kulo tung'ana, amu aing'ae oidim aitoria ele orere lino kitok?” Newaliki Enkai Solomon ajoki, “Ore enkaraki natii ena atua oltau lino, neitu iyie iomonu imasaa, o enkarsisisho, o enkanyit, anaa enkishui e lelo likimba iyie, neitu doi ninye iomonu enkishui naado, kake eng'eno o eyiolounoto te kewan ino, pee itum aitoria lelo tung'ana laainei laa te ninche nanu aaitaa olaiguanani, kinchooki iyie eng'eno nagut o eyiolounoto. Kaaisho sii karsisisho, o masaa, o enkanyit, neitu ae kata etum obo le lelo aiguanak apa ootii dukuya iyie, nemeeta te siadi iyie olotum mbaa naatiu anaa kuna.” Neitoki Solomon alotu teine wueji e shumata te Gibeon, te dukuya ilo ng'obor le ntumo, nelotu Yerusalem. Neitore ninye Israel. Neiturrur Solomon tenebo ngarrin oo mbartan o lakedok loo-mbartan nkalifuni tomon oare, laa ninche apa etipika nkanas, oo ngarrin oo mbartan tenebo olaiguanani te Yerusalem. Neitotiu olaiguanani enkosholai o sahabu anaa isoito te Yerusalem neiput iltarakua pooki wueji anaa iretet le Shefela. Neinyang'u Solomon mbartan naaing'uaa Misiri o enkop naji Kue, ore lelo biasharani lo laiguanani neng'amu ninche te Kue te nkinyang'a. Naa keinyang'u apa ninche engarri oo mbartan naing'uaa Misiri te shekeli iip ile e nkosholai, neinyang'u embarta te shekeli iip nabo o onom. Neikunaki sii apa neijia aamiraki ilaiguanak pooki le Hiti o laiguanak le Siria. Neitobir apa Solomon pee eshet enkaji e Nkai tenkaraki enkarna o Laitoriani, neitobiraki kewan enkaji e nkitoo. Neiteng'el Solomon iltung'ana nkalifuni ntomoni naapishana pee enap ilolan, neiteng'el iltung'ana nkalifuni ntomoni isiet pee eturu isoito teina kop oo ndonyio, neiteng'el iltung'ana nkalifuni uni o iip ile ooitasheiki ninche. Neirriwaki Solomon olkilikuai Huram olaiguanani le Turo: Nejoki, “Ore apa anaa enintaasa Daudi papa, nirriwaki ninye iltarakua ooshetie enkaji enye nabikie, ntaasaki sii nanu ina. “Ng'ura etaa nanu kajo pee ashet enkaji tenkaraki enkarna o Laitoriani Enkai ai, naitisinya nanu ninye apejoki enkorropil, o sonkoyoni naarropil te dukuya ninye. Naishoru nanu anaake emukate enkitoduaarato, naishoru nanu ilasarri oopejori tadekenya o teipa, too sabatoni o too lapaitin ng'ejuko, o too siruai gelunot lo Laitoriani Enkai ang, anaa apa enaiteng'elaki ntarasi te Israel. Ore ina aji nalo nanu ashet naa keaku kitok, amu ore Enkai ang naa aikitok alang nkaitin pooki. Kake aing'ae oidim ateshetaki ninye keper, aa ore keper nalakua oleng nemeishaa? Kara nanu ng'ae oshetaki ninye enkaji, aa ore meteleku ake ewueji nepejieki enkorropil te dukuya ninye? Ore naa taata irriwakaki nanu oltung'ani arriyia te siaai e sahabu, o enkosholai, o suyai, o sekenkei, o too muain pilei o naanyokie o nkilani pusi oltung'ani oiteng'enaki te nguetare, pee elo aaku tenebo lelo aisiaayiak arriyiak ootii tenebo nanu te Yuda o te Yerusalem, lelo apa ooishorua Daudi papa lai. Irriwakaki sii iltarakua o lkeek oonyaanyukie iltarakua, o mbaoi naaing'uaa Lebanon, amu ayiolo nanu ajo keyiolo isinkan linono aatudung mbaoi te Lebanon. Naa keaku isinkan laainei tenebo isinkan linono, pee aaitobiraki nanu mbaoi kumok, amu ore ina aji nalo nanu ashet naa keaku kitok naa enenking'asia. Naa kaishoru nanu tenkaraki isinkan linono, lelo oodung'u mbaoi, mpirbili nkalifuni tikitam e nkano naidong'o, o mpirbili nkalifuni tikitam e shairi, o mboreitin iip ong'uan oltulet le naisho oo sabibu, o eilata mboreitin iip ong'uan oltulet.” Neitoki Huram ilo aiguanani le Turo awal te mpalai naigeroko Solomon, nejo, “Ore enkaraki nanyor Olaitoriani iltung'ana lenyena, kintaa iyie olaiguanani lenye.” Neitoki Huram, ajo, “Meisisi Olaitoriani Enkai e Israel, ilo oitobira shumata o enkop, laa ninye oishoo olaiguanani Daudi olayioni ng'en, neiputaki enkarriyiano o eyiolounoto, laa ninye oshetaki Olaitoriani enkaji, neshetaki kewan enkaji e nkitoo. “Airriwua naa taata nanu oltung'ani arriyia, obore eyiolounoto Huramabi olayioni le ntito e Dan, ore apa menye naa oltung'ani le Turo. Eiteng'enaki ninye pee easishore sahabu, o enkosholai, o suyai, o esekenkei, o soito o nkeek, o muain pooki pilei o mpusi, o nkilani naanyokie o kitani napuyiapui. Neas mpukunot pooki e nguetare nedamu enkipirunoto ake ninye naishooki ninye meipiru. Keaku lelo tung'ana linono arriyiak tenebo iltung'ana arriyiak lo lkitok lai Daudi papaai lino. Ore naa taata ina ano o shairi, o eilata o enaisho oo sabibu, naa ninche eimaka olkitok lai, nchoo ninye meirriwaki isinkan linono; naa aikidung'u iyiook mbaoi naaba anaa iniyieu te Lebanon, nikiyaki iyie too rridat aaimunye enaiposha e Yopa, pee itum iyie aawa Yerusalem.” Neitoki Solomon aiken iltung'ana pooki dokunot apa ootii enkop e Israel, aiturubare ina kikenare apa naikenishe Daudi papaai lenye. Netumi iltung'ana nkalifuni iip nabo o onom o okuni o iip ile. Ore ntomoni naapishana negelu metanapa ilolan. Ore nkalifuni ntomoni isiet nepuo aaturu isoito teina kop oo ldoinyio, ore nkalifuni uni o iip ile neitaa ilaitasheikinok pee etum iltung'ana aataas esiaai. Neiteru Solomon ashetu enkaji o Laitoriani te Yerusalem, te nchumata o ldoinyo le Moria, teine wueji apa neibalunye Olaitoriani kewan te papaai lenye Daudi. Teine wueji apa netegelua Daudi, te nchumata ine apa neiutuutishoreki e Ornan ilo le Yebusi. Neiteru ninye ashet to lapa liare to lari liong'uan le nkitoria enye. Kuna apa ntemeta e Solomon te nchetata e nkaji e Nkai: ore enkadoro naa ntemat e nkaina tikitam oopishana, naa ntemat e nkaina naaudo endapasho. Ore ine wueji nejing'ieki neba anaa endapasho eina aji. Ore enkadoro oo sunta naa ntemat enkaina onom o ong'uan. Ore atua ina aji nemura te sahabu nasila. Ore ilo gilata sapuk neikodo too ltarakua nemura te sahabu nasila, neguetakino iltuka, o lpisia. Eikodo apa olaiguanani ina aji e Nkai too soito sidain oogol enkinyang'a, o te sahabu naing'uaa enkop e Paraim. Neaku etipika apa ninye sahabu atua ina aji, ing'apeta enyena, o loom lenyena o sunta enyena. Neitobir sii ine wueji nesinya aisul, nenyaanyuk enkadoro enye o endapasho eina aji, naa ntemat e nkaina naaudo ake enchoto nabo, nemur ninye te sahabu nasila oo ntalantani iip ile. Ore enkiroishi oo lmushumaani naa shekeli nabo ometabaiki shekeli onom e sahabu. Nemur ninye lelo gilat le shumata te sahabu. Ore teine wueji nesinya aisul nepik ilkerubi oare loo nkeek, nemur ninche te sahabu. Ore inaipuko e lelo kerubi pokira oare naa ntemat e nkaina are enkadoro. Ore enaipukoi olkerubi obo nelo atumore enaipukoi e likae kerubi te mpolos e nkaji. Ore inaipuko e kulo kerubi nebaya te nkadoro ntemat naaudo e nkaina, neitashe ake olkerubi too nkejek enyena eing'or olgos le kutukaji. Neitobir ilkarash liatua, pusi, o sinteti o loonyokie, o kitani napuyiapui neitobir ilkerubi. Ore te dukuya ina aji, neitobir ninye ing'apeta are naa ntemat e nkaina tomon o imiet o lpisiaai enkadoro, nepik inkopiyiani ilukuny naa ntemat imiet e nkaina enkadoro. Neitobir ninye olpisiai anaa osaei le murt nepik ninche enchumata e nena ng'apeta; neitobir ilgululu iip nabo neripaki ilo pisiaai. Etipika apa ninye nena ng'apeta dukuya ina aji e Nkai, nepik ake nabo enkalo e kopikop nepik enkae enkalo e moikuape; ore ina natii enkalo e kopikop nejo ninye Yakin, ore ina natii enkalo e moikuape nejo Boas. Eitobira ninye olperere lo lasar lo suyai, naa ntemat e nkaina naaudo enkadoro, naa neijia etiu endapasho, naa ntemat ong'uan olpisiai enkadoro nailep. Neitoki aitobir olmoti le sekenkei natosholaki, naa intemat are olpisiai enkaina endapasho, naa ntemat ong'uan olpisiai e nkaina endapasho naa ntemat tomon ookuni e nkaina enkamanaa enye. Naa kepurupurana apa. Ore tiabori ilo moti netii intokitin naaijo ilmong'i ooitashe emanita; naa ilkererin oare apa ninche. Neitashe ilo moti te nchumata lelo mong'i, neing'or okuni enkalo e moikuape, neing'or okuni enkalo o loontoluo, neing'or okuni enkalo e kopikop, neing'or okuni enkalo o loosaen, naa ninche apa eiteleikiaki ilo moti, ore nkaloli enye oo lkidong'o naa enkalo e atua etii. Ore endapasho enye neba anaa endap e nkaina, ore emanaroto enye neikununo anaa enkikompe, netiu anaa entapukai sidai; neeta mboreitin nkalifuni uni o ltulet enkare natii. Neitobir sii ilmotio tomon ooitukuoreki, nepik imiet enkalo e kopikop nepik imiet enkalo e moikuape. Kuna apa eitukuyieki irubat eng'ues naitaae olasar opejori, ore ilo moti naa oloo lapolosak pee eitukuore. Neitobir ninye nkitasheta oo ltaai anaa enatuutuaki nepik ninche atua ina aji e Nkai, nepik imiet enkalo e kopikop, nepik imiet enkalo e moikuape. Neitobir sii imesai tomon, nepik ninche atua ina aji e Nkai, nepik imiet enkalo e moikuape. Neitobir olgoriet loo lapolosak, o lgoriet kitok enejing'ieki olgoriet, nemur nena kutukie oo lgorieti to suyai; nepik ilo moti olpijata le nkalo e kopikop eina aji. Neitobir sii Huram imotioo, o nchempei oo lala, o ngirran. Neaku eidipa apa Huram esiaai pooki nataasaka olaiguanani Solomon te nkaji e Nkai: nena ng'apeta pokira are, o lbakulini, o nena opiyiani naaishopokino, oina siaai oo usin naaripunyeki nkarash are naaimulumulieki nena girran naatii nchumat e nena ng'apeta; o lgululu iip ong'uan ooikodieki ina siaai e ripare oo usin, te nkarasha ake nabo, pee eimulumul nena girran pokira are naatii nchumat e nena ng'apeta. Neitobir sii nkitasheta neiteleiki lelo motioo nena kitasheta. O ilo moti obo, o lelo mong'i pokira tomon oare ootii abori enye. O mbokishi o nchempei oo lala, o masaa pooki naaitobira Huram to suyai oidong'o, aitobiraki olaiguanani Solomon, tenkaraki enkaji o Laitoriani. Ore teina kisiajata e nkop e Yuda eipurjaki ninche, teina terit natii erishata e Sukot o Sereda. Neitobir Solomon kuna tokitin pooki te nkumoi sapuk oleng, o metaa meikenayu enkiroishi o suyai. Neaku eitobira Solomon ntokitin pooki apa naatii atua enkaji e Nkai: olperere lo lasar le sahabu, o misai tenkaraki emukate e nkitoduaaroto, o nkitasheta oo ltaai, o lelo taai lenye le sahabu nasila, pee eyupuyup te dukuya ilo gilata liatua osinya, anaa apa enatuutuaki. O ntapuka, oltaai, o nena tokitin naarieki iltaai e sahabu nasila; o ntokitin naaitobirieki iltaai, o mbeseni, o ntokitin e nkorropil, o ngirran e nkima, e sahabu nasila, o lgos le nkaji e Nkai ojing'ieki kutukaji o lgilata liatua o metabaiki ine wueji nesinya aisul, ore nkutukie eine nejing'ieki ina aji e Nkai naa ine sahabu. Neaku eidipe ina siaai pooki apa nataasa Solomon tenkaraki enkaji o Laitoriani. Neyau Solomon aitijing'u nena tokitin apa naaitisinya Daudi papaai lenye, neshum ina osholai, o sahabu, o masaa pooki teneshumishoreki e nkaji e Nkai. Neitoki Solomon aiturrur ilpayiani loo Siraeli, o lukuny pooki oo loshon, o lukuny oo nkajijik oo loo menye too ltung'ana loo Siraeli, te Yerusalem, pee epuo aailepunye osanduku lo lning'o lo sotua lo Laitoriani aaitupuku te nkanasa e Daudi, aa taa Sion. Neiturrurro iltung'ana pooki loo Siraeli te dukuya olaiguanani to sirua lo lapa liopishana. Nepuonu ilpayiani pooki loo Siraeli, nenap ilawi ilo sanduku, neyau ilo sanduku oilo ng'obor le ntumo, o nena masaa naasinya pooki naatii atua ilo ng'obor; neyau ilapolosak o Lawi ninche. Ore olaiguanani Solomon o lturrurr pooki le Israel apa oiturrurre te dukuya ninye, netii dukuya ilo sanduku, nepolos nkerra kumok o lmong'i lemeikenayu. Neaku eyautua ilapolosak ilo sanduku lo lning'o lo sotua lo Laitoriani ewueji enye, tiatua olgilata liatua leina aji, tiatua ine wueji nesinya aisul, tiabori inaipuko oo lkerubi. Amu kelak apa lelo kerubi inaipuko enye te shumata ilo sanduku lo lning'o lo sotua, neaku keitoip lelo kerubi ilo sanduku lo sotua, o mbokishi enyena. Naa kaadoru apa nena bokishi oleng, ometaa ore ineeiting'ie nelioyu teine wueji sinyati te dukuya olgilata liatua osinya. Kake melioo te boo. Netii ninche ine ometabaiki ena olong. Metii apa toki atua ilo sanduku meteleku ake nena baoi dapashi oo soito apa naatipika Musa te Horeb, teine apa naitobirie Olaitoriani olning'o lo sotua o ltung'ana loo Siraeli, apa pee eipang'u te nkop e Misiri. Ore apa pee eipang'u ilapolosak teine wueji sinyati (amu ore apa lelo apolosak pooki ootii ine neitisinya ate, meshilaa ilturrurri lenye; ore lelo aranyak pooki le Lawi, o Asaf, o Heman, o Yedutum, o layiok lenye o lalashera lenye, neishop ilkilani sidain, neeta inkinantani dapashi, o nkai oo sinkolioitin, o lwululi loo usin, neitashe te nkalo o loo saen lo lperere lo lasar, tenebo ilapolosak iip nabo o tikitam ookut ntarumpetani.) Naa esiaai apa oo lakutak loo ntarumpetani, o laranyak pee eitoning'oo ate te nkirukoto o sinkolio eisis neisho enashe Olaitoriani. Naa teneilepieki osinkolio too ntarumpetani o too nkinantani dapashi, o kulie ake kinantani naaranyishoreki eisisi Olaitoriani, aajo, “Eisupat ninye nebik enyorrata enye nauno ntarasi” ore ina aji, ina aji o Laitoriani neiput enkatampoi; amu keiput apa enkitoo o Laitoriani enkaji e Nkai. Neitoki Solomon ajo, “Etejo Olaitoriani kebik ninye te misimisi nagut. Aateshetaka nanu iyie enkaji e shumata, ewueji ino nibikie ntarasi.” Neitoki olaiguanani aibelekenya nemayian ina umata oo Siraeli, eitashe ina umata pooki oo Siraeli. Nejo ninye, “Meisisi Olaitoriani Enkai e Israel, amu eitabayie ninye te nkaina enye ina apa naisiligie te nkutuk enye Daudi papaai lai, ejo, ‘Ore ebaiki ina olong nayaua nanu iltung'ana laainei aitupuku te nkop e Misiri, eitu nanu agelu enkanasa tiatua Israel pooki, naa ninye eshetieki enkaji, pee etum enkarna ai ataa ine etii. Neitu nanu agelu oltung'ani aitaa kitok te shumata iltung'ana laainei loo Siraeli. Kake ategelua nanu Yerusalem pee etum enkarna ai ataa ine etii, nategelua nanu Daudi pee eitasheiki iltung'ana laainei le Israel.’ Eeta apa Daudi papaai lai to ltau lenye pee eshet enkaji tenkaraki enkarna o Laitoriani, Enkai e Israel. Kake etiaaka Olaitoriani Daudi papaai lai, ‘Ore hoo niata to ltau lino pee ishet enkaji tenkaraki enkarna ai, intobira amu iata ina to ltau lino; ore ake eyia, milo iyie ashet ina aji, kake olayioni lino likiikini iyie, ninye olo ashet enkaji tenkaraki enkarna ai.’ Eitabayie taata Olaitoriani ina kisiligata enye apa naisiligishore; amu aitasho nanu te rishata e Daudi, papaai lai, naton to lorika le nkitoo, le Israel, anaa apa enaisiligishore Olaitoriani natesheta nanu enkaji tenkaraki enkarna o Laitoriani, Enkai e Israel. Natipika ine osanduku laa ninye etii ilo sotua lo Laitoriani oitobira ninye tenebo iltung'ana loo Siraeli.” Neitashe Solomon te dukuya ilo perere lo lasar lo Laitoriani te dukuya ina umata pooki neilepie nkaik enyena aitorioo. Eitobira apa Solomon ewueji o suyai neika ntemat are e nkaina enkadoro o endapasho, naa entemata nabo enkadoro nailep, nepik apa ine wueji olgoriet. Neitashe te nchumata. Neitoki agil kung te nchumata ine te dukuya ina umata pooki oo Siraeli neitorioo nkaik enyena aing'orie shumata, nejo, “Olaitoriani Enkai e Israel, meetae Enkai natiu anaa iyie, te keper o te nkop, naibung osotua neitodolu enyorrata nauno too sinkan lenyena oopuo te dukuya iyie too ltauja lenye pooki. Mbung'a iyie tialo osinka lino Daudi, papaai lai ina apa nimbalakinye ninye; ee iroro iyie te nkutuk ino, nintabayie te nkaina ino nena ena olong. Ore naa taata, Olaitoriani Enkai e Israel, mbung'a to sinka lino Daudi, papaai lai, ina apa nisiligie ninye, ijo, Mikiany ae kata oltung'ani kisiaai iyie te dukuya nanu, pee etonie olorika le nkitoo le Israel, oi duoo tenaa kejurru ilayiok linono nkoitoi enye nepuo too nkitanapat aainei anaa enishomie iyie te dukuya nanu.” Ore naa taata Olaitoriani, Enkai e Israel, nchoo eunoyu ilo rorei lino, apa lirorie osinka lino Daudi. “Kake amaa, kesipa kebik Olaitoriani tenebo iltung'ana te nkop? Ng'ura, ore keper o keper nalakua nemikiishaa iyie; kebaa naa mikiishaa iyie ena aji natesheta nanu! Toning'o naa enkomono o sinka lino o esayiata enye, Olaitoriani Enkai ai. Toning'o enkishirata o enkomono nayau osinka lino dukuya iyie; pee etum nkonyek inono aaing'ura ena aji dama o kewarie, ene wueji apa nisiligishore pee ipik enkarna ino, pee itum atoning'o enkomono naomon osinka lino tene wueji. Toning'o iyie eomonokinoto o sinka lino o enoo ltung'ana linono le Israel, te neomon eing'or ene wueji, ee toning'o iyie itii emanyisho ino te keper, naa te nining nipalaki. “Teneas oltung'ani eng'oki tialo ole latia enye, neinosieki olmumai lenye te dukuya ele perere lo lasar tena aji, toning'o naa iyie itii keper, nias, ninguanare isinkan linono, aitalaku entorroni ayau entorroni enye shumata endukuya enye makewan, nimbalunye ilo supat alaaki ninye te risioroto e supatisho enye. “Tenemiri iltung'ana linono loo Siraeli te dukuya ilmang'ati, enkaraki nataasa ninche eng'oki te iyie, tenelo neibelekenya ninche aaibalie enkarna ino, neomon, nesaisho tiatua ena aji, toning'o ake iyie itii keper, nipalaki eng'oki oo ltung'ana linono loo Siraeli, nirrinyu ninche menyaaki aapuonu ina kop apa ninchoo ninche o loo menye. “Teneikeno keper, nelai enchan tenkaraki nataasa ninche eng'oki tialo iyie, teneomon ninche eing'or ene wueji, neibalie enkarna ino, neibelekenya aaing'uaa ing'ok enye, itoosho iyie ninche, toning'o naa iyie itii keper, nipalaki eng'oki oo sinkan linono, iltung'ana linono loo Siraeli, niutaki ninche enkoitoi sidai naa ninye epuoyie; nirriwaki enchan ena kop ino, naa ninye inchoo iltung'ana linono metaa enjung'ore. “Tenelotu olameyu enkop anaa olmeitai, anaa erruoyo ndaiki naatii nkurman, anaa tenelotu olmaati, anaa enkurto; teneng'adu ilmang'ati lenye ninche te nabo ake ninye oo nkanas enye; o pooki meitai anaa pooki muoyian; ore ake enkomono pooki o esayiata naomon oltung'ani obo anaa iltung'ana pooki loo Siraeli, eyiolo ake oltung'ani eoshoto enye o sina lenye, neitorioo nkaik aaing'orie ena aji; toning'o naa iyie te keper, teina manyisho ino, nipalaki, ore ake pooki tau liyiolo iyie nilaaki te risioroto oo nkoitoi enyena (Amu iyie ake openy oyiolo iltauja loo nkera e tung'ana); pee kitum ninche aatureita iyie, nepuo too nkoitoi inono, nkolong'i pooki naaishu teina kop apa ninchoo iloo menye. “Naa tenelotu oltung'ani loo loreren, ilo leme oloo ltung'ana linono loo Siraeli eing'uaa enelakua tenkaraki enkarna ino kitok, o enkarna ino magilani, tenelotu ninye aomon eing'or ena aji, toning'o iyie itii keper, ina manyisho ino, nias te risioroto e nena pooki nikimpotie ilo tung'ani loo loreren iyie; pee etum iloreren pooki le nkop aatayiolo enkarna ino, nikiureyu iyie, anaa enaasita iltung'ana linono loo Siraeli, netum aatayiolo nchere ore ena aji natesheta nanu te nkarna ino naa enkarna ino eipotieki. “Tenepuo iltung'ana linono olarrabal aagilunore ilmang'ati lenye, ore te pooki oitoi niimie iyie ninche; nikiomon ninche iyie eing'or ena anasa nitegelua, iyie o ena aji natesheta nanu te nkarna ino, toning'o iyie itii keper enkomono enye o esayiata enye, nintagol ninche. “Teneas ninche eng'oki te dukuya iyie, amu meetae oltung'ani lemias ing'ok, nigorokino iyie ninche, ninchooyo ninche too lmang'ati lenye nenapi ninche aaya eyararoto te nkop nalakua o enataana; kake tenedamu ninche too ltauja teina kop apa nawaki ninche, neirridu, nikisai ninche iyie teina kop e yararoto enye, ejo, ‘Kitaasa iyiook eng'oki, nikitaasa ntorrok’; teneirridu ninche too ndamunot enye pooki o too ltauja lenye pooki teina kop e yararoto enye, apa naawaki ninche, neomon eing'or ina kop enye apa ninchoo iyie loo menye, oina anasa nitegelua iyie, o ina aji natesheta nanu tenkaraki enkarna ino, toning'o iyie itii keper ina manyisho ino, enkomono enye o esayiata enye. Ntagolo ninche, nipalaki lelo tung'ana linono ootaasa eng'oki te iyie. Ore naa taata Enkai ai nchoo eing'or nkonyek inono nening nkiyiaa inono enkomono ene wueji. Naa tudumunye taata, Olaitoriani Enkai, shomo ewueji ino enkiyeng'iyeng, iyie oilo sanduku lino le magilanisho. Nchoo ilapolosak linono Olaitoriani Enkai meishopokini enjeunoto ino. Nchoo isinyat linono eshipakino esupatisho ino. Olaitoriani Enkai, mimbelekeny enkomom ino aitung'uaa ilo lino otubukokoki eilata aaput! Tadamu enyorrata ino nauno tenkaraki Daudi osinka lino.” Ore ake pee eidip Solomon enkomono enye nedou enkima naing'uaa shumata neinos ilo asar opejori o nkishorot neiput enkitoo o Laitoriani ina aji e Nkai. Neitu eidim ilapolosak aatijing atua ina aji o Laitoriani. Ore ake pee edol nkera pooki oo Siraeli ina kima edou, o enkitoo o Laitoriani te shumata ina aji e Nkai, neirrugo ninche aaitabaiki nkomomi enkop, te ndung'oroto, neserem neisho Olaitoriani enashe ejo, “Amu aisupat ninye, amu ebikoo enyorrata enye nauno ntarasi.” Neitoki olaiguanani o ltung'ana pooki aaishooyo ilasarri te dukuya o Laitoriani. Eishorua olaiguanani Solomon olasar ilmong'i nkalifuni tikitam oare, o nkerra nkalifuni iip o tikitam. Ore olaiguanani, o ltung'ana pooki neitisiny ina aji e Nkai. Neitashe ilapolosak too wuejitin enye. Neitashe sii Ilawi aaiko neijia, eeta nena kinantani oo sinkolioitin, apa naaitobira olaiguanani Daudi pee eishorieki Olaitoriani enashe - amu ebikoo enyorrata enye nauno ntarasi. Naa teneisis apa Daudi Olaitoriani te nkisiaayiare enye, ore te nda shoto neosh ilapolosak ntarumpetani; neitashe Israel pooki. Neitisiny Solomon empolos e ilo goriet apa otii dukuya enkaji o Laitoriani. Amu teine eitayio olasar opejori, o eilata o lasar le seriani. Amu ore apa ilo perere lo lasar lo suyai oitobira Solomon, nemeishaa olasar opejori, o lasar le ntapa, o eilata. Ore apa teina kata neibung Solomon osirua nkolong'i naapishana o Siraeli pooki tenebo ninye, eumata kitok oleng nabaiki enejingieki Hamat ometabaiki oerata le Misiri. Ore te nkolong e isiet neibung ninche eumata e nkitirring'a; amu eibung'a apa ninche enkitisinyata o lperere lo lasar nkolong'i naapishana, o sirua nkolong'i naapishana. Ore te nkolong e tikitam oo kuni o lapa liopishana neisho iltung'ana meshomo nkang'itie enye, eng'ida neeta enchipai too ltauja lenye tenkaraki ina supatisho naitoduaa Olaitoriani, Daudi, o Solomon o ltung'ana pooki loo Siraeli. Neidip Solomon ina aji o Laitoriani, o enkaji o laiguanani e nkitoo, o nena pooki apa naaitobira Solomon pee eas te nkaji enye makewan, neitabaya pooki aitobiraki. Neitoki Olaitoriani aitalioo kewan te Solomon kewarie nejoki ninye, “Atoning'o nanu enkomono ino, nategelua ene wueji te nkaraki kewan ai pee eaku enkaji o lasar. Tenaiken nanu keper ometaa meetae enchan, anaa aitanap olmaati pee emut enkop, anaa airriu olmeitai atua iltung'ana laainei, ore ake pee eitobir ate iltung'ana laainei, lelo laa enkarna ai eipotieki, neomon ninche neing'oru enkomom ai, neibelekenya aaing'uaa nkoitoi enye torrok, naa kaning nanu atii keper, napalaki eng'oki enye naishiunye enkop enye. Ore taa ina kata, nebolo nkonyek aainei neinining nkiyiaa aainei enkomono naomoni tene wueji. Amu ore taata ategelua nanu, naitisinya ena aji pee etum enkarna ai atobiko tene ntarasi; ore nkonyek aainei o ltau lai neaku ine etii nkatitin pooki. Naa ore tialo iyie, tenilo te dukuya nanu, anaa apa Daudi papaai lino, nias te risioroto e nena pooki naaitanapa nanu, nimbung nkikoot aainei, o nkiguanat aainei, naitasheyie nanu olorika lino le nkitoo; anaa apa anatoning'ore Daudi papaai lino, ajoki, ‘Melai aekata te iyie oltung'ani oitoreisho te Israel.’ “Kake tenimbelekenya iyie, ninturraa nkikoot aainei o nkitanapat aainei natipika nanu dukuya iyie; nilo aisiaai kulie aitin, niserem ninche, naadotu nanu teina kop apa naaishoo; ore ena aji naitisinya nanu tenkaraki enkarna ai, naiturraa aiwuang'ie too nkonyek aainei, naitaa nanu endung'et e rashe, o rorei ooimakini tiatua loreren. Naa ore tiatua ena aji, naailepieki oleng, ore pooki ng'ae ogiroo neing'asia, nejo, ‘Kainyoo pee etaasa Olaitoriani ena tena kop o tena aji?’ Naa kepuo ninche aajo Enkaraki natanyaita ninche Enkai oo loo menye, apa nayaua ninche aitupuku te nkop e Misiri, neigarakino ninche kulie aitin, neserem ninche, neisiaai ninche; ore enkaraki ina eyaua Enkai ena torroni pooki shumata ninche. ” Ore tesiadi ilarin tikitam laa ninche eteshetie Solomon enkaji o Laitoriani o enkaji enye makewan neitoki Solomon ashetu nena anas apa naaishoo Huram ninye, nepik iltung'ana loo Siraeli ine. Neitoki Solomon alo Hamatsoba, neisulie ninye. Neshet ninye Tadamor tiong'ata o nkanas pooki naashumishoreki apa naatesheta ninye te Hamat. Enyaaka sii ashet Bet-horon e shumata o Bet-horon e abori, nkanas naasheta isunta, o nchomito, naatii isekenke. O Baalat o nkanas naasheta too soito apa naara ine Solomon, o nkanas pooki oo ngarrin enyena oo mbartan, o nkanas oo lakedok lenyena loo mbartan, o pooki toki nayieu Solomon neshetu te Yerusalem, o te Lebanon, o teina kop pooki enkitoria enye. Ore lelo tung'ana pooki ootelekutua too Lhiti, o Lamori, o Lperisi, o Lhifi, o Lyebusi, lelo leme iloo Siraeli, ebaiki iishoritin enye, apa ootelekutua teina kop leitu eidaikie iltung'ana loo Siraeli - neitaa Solomon lelo ilenkisiaayiare nagol, naa neijia etiu o taata. Kake ore tialo iltung'ana loo Siraeli, eitu eitaa Solomom irrindiki le siaai enye. Isikarini apa ninche, o ltung'ana le nkitoo, o lkituaak le njore loo ngarrin oo mbartan, o lakedok loo mbartan. Naa kulo apa iltung'ana kituaak le Solomon, iip are o onom, laa ninche oata enkitoria tiatua olorere. Neyau Solomon entito e Farao aitung'uaa enkanasa e Daudi neriku ina aji apa nateshetaka ninye. Amu etejo ninye, “Meton enkitok ai te nkaji e Daudi olaiguanani loo Siraeli. Amu ore iwuejitin neeyauaki osanduku lo Laitoriani naa kesinya.” Neitaiki Solomon Olaitoriani olasar opejori te nchumata ilo perere lo lasar lo Laitoriani apa otesheta ninye te mbata e nkaji e Nkai. Ore anaa enayieuni te nkisiayiare e pooki olong'i, neitayuni ilasarri terisioroto enkitanapata e Musa too sabatoni, o too lapaitin ng'ejuko okuni to lari o sirua loo mukateni neitu eisuijieki, o sirua loo wikii, o sirua loo lng'oborri. Ore te risioroto e nkikoo e Daudi papaai lenye, etegelua ninye ilturrurri loo lapolosak tenkaraki enkisiaayiare enye, o Lawi tenkaraki isiaaitin enye e nkisisa o enkisiaayiare te dukuya ilapolosak metaasa esiaai te pooki olong nayieuni; o ilarripok loo nchomito loo lturrurri lenye too nchomito esiana naje; amu ina apa eitanapishe Daudi osinka le Nkai. Neitu ninche eibelekenya apaash ina naitanapa olaiguanani ilapolosak o Lawi tialo pooki bae o too lchumat. Neaku eidipe apa esiaai pooki e Solomon ebaiki ina olong apa napiki olkitamanyunoto le nkaji o Laitoriani. O meidipayu, neidipayu ina aji o Laitoriani. Neitoki Solomon alo Esiong'eber o Elot te mbata e naiposha, te nkop e Edom. Neirriwaki Huram ninye too sinkan lenyena imelin o sinkan ootamoo enaiposha, nepuo ninche Ofir tenebo isinkan le Solomon. Neyau teine ntalantani iip ong'uan o onom e sahabu nayaki olaiguanani Solomon. Ore ake pee ening'oo enkaiguanani e Sheba olnigo le Solomon, nelotu Yerusalem atem ninye too nkikilikuanat naagol. Nelotu ninye eeta ilaisiaayiak kumok o ntamesin naanapita isonkoyoni, o sahabu sapuk oleng, o soito oogol enkinyang'a. Ore ake pee elotu enetii Solomon, neliki ninye nena pooki apa naatii oltau lenye. Newal Solomon nkikilikuanat enyena pooki. Meetae entoki hoo nabo naisudoro to laiguanani Solomon neitu eibalakinye ninye. Ore ake pee edol ina aiguanani e sheba eng'eno e Solomon, oina aji natesheta ninye; o endaa natii emisa enye, o ltonei loo lkituaak lenyena, o enkisiaayiare oo sinkan lenyena, o nkilani enye, o lanapak loo nkikompeni enye o nkilani enye, o lasarri lenyena oo pejori ooitayio ninye te nkaji o Laitoriani, eitu eitoki ninye aidim atejo ae. Nejoki ninye olaiguanani, “Ekesipa olkilikuai apa latoning'o nanu te nkop ai makewan tialo mbaa inono o eng'eno ino. Kake eitu apa nanu anyorraa ilo kilikuai ometaba anaa nalotu adol too nkonyek aainei makewan, naa ng'ura, eitu apa nanu aalikini olpisiaai le ng'eno ino. Ilus iyie teilo kilikuai apa latoning'o nanu. Emunyak siaake nkituaak inono o sinkan linono ooitashe te dukuya iyie anaake nening eng'eno ino! Meisisi Olaitoriani Enkai ino amu kitishipakine ninye iyie nikipik iyie olorika lenye le nkitoo pee iyaku olaiguanani te rishata o Laitoriani Enkai ino! Ore amu kenyor Olaitoriani Enkai ino Israel naa keitasheyie ninche ntarasi, kintaa ninye iyie olaiguanani lenye, pee itum aiguanayu te sipata o te supatisho.” Neitoki ninye aisho olaiguanani shekeli iip o tikitam e sahabu, o sonkoyoni kumok, o soito oogol enkinyang'a: ooishoo enkaiguanani e Sheba olaiguanani Solomon. Ore lelo sinkan le Huram o sinkan le Solomon apa ooyautua sahabu naing'uaa Ofir neyau sii ilkeek ooji ilmusantali o soito oogol enkinyang'a. Neitayunye Solomon lelo keek nkedeta naajing'ieki enkaji e Nkai o enkaji o laiguanani, o wululi loo usin, o nkinantani oo usin, tenkaraki lelo aranyak. Eitu aikata edoli embae naaijo ena te nkop e Yuda. Neisho Solomon enkaiguanani e Sheba nena pooki naayieu ninye, pooki toki ake ninye natoomonuo metii ntokitin naayaka ninye olaiguanani. Nerrinyo ninye alo enkop enye tenebo ilaisiaayiak lenyena. Ore apa enkiroishi e sahabu nayauaki enetii olaiguanani Solomon naa ntalantani iip ile o ntomoni ile o ile. Ore nena naayautua ilainyang'ak o lamirak, eyautua sii ilaiguanak pooki le Arabia o lbalusuni leina kop sahabu o enkosholai aayaki Solomon. Neitobir olaiguanani ilong'oi iip are sapuki e sahabu naidong'oki, ore ake elong'o nabo naa shekeli iip ile e sahabu naidong'oki. Neitoki aitobir ilong'oi iip uni e sahabu naidong'oki; naa shekeli iip uni e sahabu naidong'oki ake elong'o nabo. Nepik olaiguanani nena long'oi atua ina aji o sero le Lebanon. Neitobir sii olaiguanani olorika le nkitoo kitok loo lala loo lkanchaoni, nemur te sahabu nasila. Neeta ilo orika le nkitoo nkedeta ile o ewueji neiteleikini o nkejek e sahabu, neitatashakini ilo orika le nkitoo, ore ake enkalo nabo eilo orika le nkitoo netii ineeiteleikini Nkaik, o lng'atunyo oare ooitashe too mbat nena wuejitin neeiteleikini nkaik. Neitashe ake ilng'atunyo tomon oare teine, neitashe ake obo te nkalo e bayie e pooki kedet enena kedeta pokira ile, eitu aekata edoli entoki naaijo ina te pooki kitoria. Ore ntokitin pooki naaokishoreki o laiguanani Solomon naa ine sahabu, ore imasaa pooki eina aji entim e Lebanon naa ine sahabu nasila. Meikenari apa enkosholai aajo toki too nkolong'i e Solomon. Amu kepuo apa imelin o laiguanani Tarshishi tenebo isinkan le Huram kata nabo te rishata oo larin okuni ore nena melin e Tarshish naa kepuonu apa enapita sahabu, o enkosholai, o lala loo lkanchaoni, o yekenyi o motonyi sidain naaijo ilukunkuni. Neisulu Solomon ilaiguanak pooki le nkop te karsisisho o te ng'eno. Neing'oru ilaiguanak pooki le nkop enetii Solomon ejo pee ening eng'eno enye natipika Enkai atua endamunoto enye. Neyau ake pooki lenye enkishoroto, ntokitin e nkosholai o ne sahabu, o lkilani, o emanoo, o sonkoyoni, o mbartan o nyumpui te pooki ari. Neeta apa Solomon ilaleta nkalifuni ong'uan loo mbartan, o ngarrin oo mbartan, o lakedok loo mbartan nkalifuni tomon o are, ootamanya nena anas oo ngarrin oo mbartan tenebo olaiguanani te Yerusalem. Neitore ninye ilaiguanak pooki ebaiki olkeju le Frati, ometabaiki enkop oo Lfilisti, o metabaiki olpolosie le Misiri. Neitotiu olaiguanani sahabu te Yerusalem anaa isoito nebayu iltarakua te nkumoi anaa ilng'abolo le Shefela. Neyakini Solomon mbartan naaing'uaa Misiri neing'uaa nkuapi pooki. Ore apa nkulie kiaasin e Solomon ebaiki enkiterunoto o metabaiki enkiting'oto neigeroki tiatua embuku oo nkatinin e Natan ilo oiboni le Nkai o tiatua e naibon e Ahija le Shilon, o too nduaat e Ido ilo aduaani, eipirta Yeroboam olayioni le Nebat. Eitoreishe apa Solomon te Yerusalem neitore Israel pooki ilarin artam. Neirrag Solomon etua anaa loo menye. Nenukari te nkanasa e Daudi papaai lenye. Neitoreisho Rehoboam olayioni lenye te rishata enye. Eshomo apa Rehoboam Shekem, amu eshomo apa iltung'ana pooki loo Siraeli Shekem aaitaa ninye olaiguanani. Ore ake pee ening Yeroboam olayioni le Nebat ina, (amu Misiri apa etii ninye, ine apa neisikaka ailany olaiguanani Solomon) neitoki Yeroboam arrinyunye te Misiri. Neirriwaa ninche olkilikuai meipotuni ninye. Ore Yeroboam o Siraeli pooki nepuonu aajoki Reroboam, “Eiroshiyie apa papaai lino enchata ang oo murto. Ore naa taata nteneneng'a ina kisiayiare nagol natii shumata iyiook, naa eikisiaai iyiook iyie.” Nejoki ninye ninche, “Enyaaki wootu enatii nanu te rishata oo nkolong'i uni.” Neaku etorrinyote iltung'ana aapuo. Neitoki olaiguanani Rehoboam aikilikuanishore ilpayiani, laa ninche apa ooitashe te dukuya olaiguanani Solomon papaai lenye, apa eton eishu, ejoki, “Kaa intae kiutakaki matiaaki kulo tung'ana?” Nejoki ninche ninye, “Tiniaku iyie supat tialo kulo tung'ana, nintiship ninche, niro irorei supati tialo ninche, naa keaku ninche isinkan linono ntarasi.” Kake etanya ninye ina kikoo oo lpayiani, neing'oru enkikoo oo lbarnot le risiori enye. Nejoki ninche, “Kaa intae iututu pee kiwaliki kulo tung'ana laatiaakita ninche nanu, Nteneneng'a enchata ang oo murto apa natipika papaai lino shumata iyiook? ” Nejoki lelo barnot le risiori enye ninye, “Nji iyie shomo tiaaki lelo tung'ana likitiaakitia, ‘Eiroshiyie apa papaai lino enchata ang oo murto, kake inteneneng'aki iyie iyiook;’ nji shomo tiaaki ninche, ‘Ore enkilinta ai naa ninye sapuk alang empolos e Papaai. Naa Ore naa taata, teneiteleikia apa papaai intae enchata oo murto nairoishi, naa kaponaa nanu enkiroishi eina shata inyi oo murto. Eitamio intae papaai too nkibokoni, kake kaitame nanu intae too nkulupani.’ ” Neitoki Yeroboam o ltung'ana pooki loo Siraeli aapuonu enetii Rehoboam te nkolong e uni, anaa enatejo olaiguanani, “Enyaaki wootu enatii nanu te nkolong e uni.” Newaliki olaiguanani ninche tenkisikong'ata, neany ina kikoo oo lpayiani. Neirorie olaiguanani ninche te risioroto enkikoo oo lbarnot, ejoki, “Eiroshiyie apa papaai enchata inyi oo murto, kake kaponaa nanu enkiroishi. Eitamio apa intae papaai too nkibokoni, kake kaitame nanu intae too nkulupani.” Neaku eitu ening olaiguanani iltung'ana amu embae ena nayaua Enkai, pee etum Olaitoriani aitabai ororei lenye, apa oiroro aimunye Ahija le Shilon metoliki Yeroboam olayioni le Nebat. Ore ake pee edol Isiraeli pooki aajo eitu ening olaiguanani ninche, newaliki iltung'ana olaiguanani aajoki, “Kaa rubata iyiook kiata te Daudi? Mikiata iyiook enjung'ore to layioni le Yese. Shomo pooki ng'ae olng'obor lino, intae Israel! Ing'ura taata enkaji ino makewan Daudi.” Nedumunye Isiraeli pooki aapuo ilng'oborri lenye. Kake eitoria apa Rehoboam iltung'ana pooki loo Siraeli ootii nkanas e Yuda. Neitoki olaiguanani Rehoboam airriwaa Hadoram laa ninye apa olaitasheikinoni le siaai nagol, nenang iltung'ana loo Siraeli ninye too soito metua. Neisarrisar olaiguanani Rehoboam alo airot ngarrin enyena oo mbartan, pee eisikaki Yerusalem. Neaku etekepari Isiraeli te nkaji e Daudi ometabaiki ena olong. Ore ake pee elotu Rehoboam Yerusalem, neiturrur enkaji e Yuda o ene Benchamen, iltung'ana nkalifuni iip o ntomoni isiet gelunot, pee earare Israel, pee errinyoki Rehoboam enkitoria. Kake eewuo ororei lo Laitoriani enetii Shemaia ilo tung'ani le Nkai, ejo, “Tiaaki Rehoboam olayioni le Solomon, olaiguanani le Yuda, o Siraeli pooki ootii Yuda, o Benchamen, Nji ejo Olaitoriani, Mipuopuo intae aarare ilalashera linyi. Torrinyoyu pooki tung'ani shomo enkang enye, amu ore ena bae naa nanu eing'uaa.” Neaku etoning'o ninche ororei lo Laitoriani, nerrinyo neitu epuo aarare Yeroboam. Etobiko apa Rehoboam te Yerusalem neshet nkanas naamitunye kewan tiatua Yuda, etesheta Betlehem, o Etam, o Tekoa, o Betsur, o Soko, o Adulam, o Gat, o Maresha, o Sif, o Adoraim, o Lakish, o Ashetak, o Sora, o Ahijalon, o Hebron, nkanas naasheta isunta naatii Yuda o Benchamen. Neitagol ninye isempewueti, nepik ilarikok le njore atua ninche, nepik ineeshumieki endaa o eilata o enaisho oo sabibu. Nepik sii iremeta o long'oi atua nena anas pooki, neitagol ninche oleng. Neaku eeta apa ninye Yuda o Benchamen. Ore ilapolosak o Lawi apa ootii atua Israel pooki, neing'uaa ninye too wuejitin pooki apa neetii ninche. Amu etung'uaitie Ilawi iwuejitin enye, o ntokitin enye nepuonu Yuda o Yerusalem enkaraki nataarayie Yeroboam ninche o layiok lenyena aaitung'uaa enkisiaayiare anaa lapolosak lo Laitoriani, negelu ilapolosak lenyena loo wuejitin neeika, o too wuejitin neeseremieki nkitanyaanyukot, o Nkaitin oo lasho naaitobira ninye. Ore lelo ootipika iltauja lenye pee eing'oru Olaitoriani Enkai e Israel nepuonu aasuju ninche eing'uaa iloshon pooki loo Siraeli o meetu Yerusalem, aapolosaki Olaitoriani Enkai oo loo menye. Neitagol ninche enkitoria e Yuda, ore too larin okuni neitaserian ninche Rehoboam olayioni le Solomon, amu eshomo ninche too larin okuni aaibung orrekie le Daudi o Solomon. Eewa apa Rehoboam aitaa enkitok enye Mahalat entito e Yerimot olayioni le Daudi, apa ole Abigail entito e Eliab olayioni le Yese. Neiki ninye ilayiok, Yeush, o Shemaria, o Saham. Ore tesiadi ina neitoki aya Maaka entito e Absalom, naa ninye natoikio ninye Abija, o Atai, o Sisa, o Shelomit. Kenyor apa Rehoboam Maaka ina tito e Absalom aitalang nena kituaak enyena pooki, o nkapiak. (Eyama apa ninye nkituaak tomon o isiet o nkapiak ntomoni ile neeta ilayiok tikitam o isiet, o ntoyie ntomoni ile.) Negelu Rehoboam Abija ilo ayioni le Maaka metaa ninye olkitok tiatua ilalashera lenyena, amu kejo apa pee eitaa ninye olaiguanani. Neas ninye ine ng'eno, neidapashaki kulikae ayiok lenyena aibulunye enkop e Yuda o Benchamen, eeta ndaiki kumok, neing'uraki ninche nkituaak. Ore ake pee eitashe enkitoria e Rehoboam negolu, neiturraa ninye enkitanapata o Laitoriani o Siraeli pooki tenebo ninye. Ore to lari le imiet le nkitoria o laiguanani Rehoboam, enkaraki nataa ninche ilemeisiligayu to Laitoriani, nelotu Shishak olaiguanani le Misiri arasaki Yerusalem. Neeta ngarrin oo mbartan enkalifu nabo o iip are, o lakedok loo mbartan nkalifuni ntomoni ile. Nemeikenayu esiana e lelo tung'ana oo etuo tenebo ninye ooing'uaa Misiri ile Libia o le Sukiim o le Etiopia. Neya ninye nena anas naasheta sunta e Yuda o meeu abaiki Yerusalem. Neitoki Shemaia oloiboni le Nkai alotu enetii Rehoboam o lkituaak le Yuda, apa ooiturrurro te Yerusalem tenkaraki Shishak, nejoki ninche, “Nji ejo Olaitoriani, ‘Kitung'uaitie intae nanu, atung'uayie naa sii nanu intae napik intae enkaina e Shishak.’ ” Ore lelo kituaak loo Siraeli o laiguanani neitobor ate nejo, “Olaitoriani olasipani.” Ore ake pee edol Olaitoriani ajo eitoborro ate, neitoki ororei lo Laitoriani alotu enetii Shemaia ejo, “Eitoborro ninche ate nemaidaikie nanu ninche, kake kaisho nanu ninche enkiti oitoi napokie, nemebukokini engoro ai shumata Yerusalem te Nkaina e Shishak. Ore ake eyia keaku ninche isinkan lenyena. Pee etum ninche aatayiolo enkisiaayiare ai o enkisiaayiare oo nkitoriat oo nkuapi.” Neaku eewuo Shishak olaiguanani le Misiri arasaki Yerusalem; neya ninye ilchumat le nkaji o laitoriani o lchumat le nkaji o laiguanani. Eewa ninye pooki toki. Eewa sii nena long'oi e sahabu apa naaitobira Solomon. Neitobir olaiguanani Rehoboam te rishata e nena long'oi ilong'oi o suyai, nepik ninche Nkaik o lelo kituaak le rripore, laa ninche ooing'or kishomi e nkaji o laiguanani. Naa ore ake tenelotu olaiguanani alo enkaji o Laitoriani nepuonu ilarripok aanap ninche, neyau atua ina aji e rripore. Ore ake pee eitobir ninye kewan neibelekenya engoro o Laitoriani apaash ninye, pee meidaikieki ninye tukul. Ore ake etiu neijia neme torrok apa mbaa te Yuda. Neaku eitagolo apa olaiguanani Rehoboam kewan te Yerusalem. Ilarin artam o obo apa Rehoboam pee eiteru aitoreisho. Eitoreishe ninye ilarin tomon o isiet te Yerusalem, teina anasa apa nategelua Olaitoriani tiatua iloshon pooki loo Siraeli pee epik enkarna enye ine. Ore apa enkarna e ng'otonye naa Naama, e Amoni. Neas ninye entorroni amu eitu ninye eing'oru Olaitoriani to ltau lenye. Ore apa nkiaasin e Rehoboam ebaiki enkiterunoto o metabaiki enkiting'oto, neigeroki too mbukui oo nkatinin e Shemaia oloiboni le Nkai o ne Ido oladuaani. Ilarrabali apa lemeish kulo te rishata e Rehoboam o Yeroboam. Neirura Rehoboam etua anaa loo menye, nenukari te nkanasa e Daudi; neitoreisho Abija olayioni lenye te rishata enye. Ore to lari le tomon o isiet le nkitoria o laiguanani Yeroboam, neiteru Abija aitoreisho te Yuda. Eitoreishe ninye ilarin okuni te Yerusalem. Ore apa enkarna e ng'otonye naa Mikaia, entito e Uriel le Gibea. Netii apa olarrabal erishata e Abija o Yeroboam. Neipang Abija alo olarrabal eeta enjore oo ltung'ana yiolot to larrabal, iltung'ana nkalifuni iip ong'uan oogeluno. Neitoloku Yeroboam iltung'ana lenyena to larrabal aitoluaaki ninye, naa iltung'ana nkalifuni iip isiet magil, gelunot. Neitashe Abija tenchumata oldoinyio le Semaraim otii ina kop oo ldoinyio e Efraim, nejo, “Entoning'oki nanu, iyie Yeroboam o Israel pooki! Aimeishiaakino teneyiolou nchere, eishoo o Laitoriani Enkai oo Siraeli, enkitoria oo Siraeli pooki Daudi ntarasi to lmumai le munyan? Ore Yeroboam olayioni le Nebat ilo sinka le Solomon olayioni le Daudi, nedumunye agilunore olkitok lenye. Ore ilkulikae tung'ana le pesho, nerrumoki ninche Rehoboam olayioni le Solomon, ilo leton aa oti nemeeta enkarriyiano, metaasa enkarruoisho. Nemeidimaa apa Rehoboam ninche. “Amaa taata, ijo iyie indim aitasheikinore enkitoria o Laitoriani too Nkaik oo layiok le Daudi, eji enkaraki nira iyie olorora, kitok, niata nkitanyaanyukot e Nkai oo lasho le sahabu, apa naaitobira Yeroboam aitaa nkaitin. Keitu iyie iaraa aipang'ie ilapolosak lo Laitoriani, ilayiok le Aron, o Lawi, nintobiraki kewan ilapolosak anaa iltung'ana le kulie kuapi? Ore pooki ng'ae olotu aitisiny kewan to loti oing'oni anaa too lmeregeshi oopishana neaku olapolosani le nena neme Nkaitin. Kake ore tialo iyiook, Olaitoriani ninye Enkai ang, neitu iyiook kipuo aaing'ua ninye. Kiata iyiook ilapolosak ooisiaaita Olaitoriani laa ilayiok le Aron, o Lawi te nkaraki enkisiaayiare enye. Kepolosaki ninche Olaitoriani anaake tadekenya o teipa ilasarri oopejori, o enkorropil o sonkoyoni naarropil, neirragie emukate e nkitoduaaroto te mesa e sahabu nasila, neing'or nena kitasheta oo ltaai e sahabu pee etum iltaai lenyena aayupuyupo anaake teipa. Amu eikimbung iyiook enkitanapata Olaitoriani Enkai ang, kake itanyaita intae ninye. Ng'ura etii Enkai tenebo iyiook, ninye orikito iyiook, tenebo ilapolosak eeta ntarumpetani enye o larrabal pee eosh tenikinteru olarrabal o intae. Nakera, e Israel emiarare intae Olaitoriani Enkai oo loo minyi, amu mimirishosho.” Neirriu apa Yeroboam iltung'ana olnukata aitaman ninche te siadi. Netii ilturrurri lenyena dukuya iltung'ana le Yuda. Netii lelo tung'ana oonuka siadi ninche. Ore pee eing'orisho Yuda, ng'ura etii olarrabal dukuya o siadi, neishiraki ninche Olaitoriani nekut ilapolosak ntarumpetani. Neitayu iltung'ana le Yuda embuakunoto o larrabal. Ore ake pee ebuaku iltung'ana le Yuda nemir Enkai Yeroboam o Siraeli pooki ootii dukuya Abija o Yuda. Neilanyisho iltung'ana loo Siraeli te dukuya iltung'ana le Yuda neishoru Enkai ninche apik atua Nkaik e Yuda. Nesesekuan Abija o ltung'ana lenyena iltung'ana kumok oleng; neaku etuata too Siraeli iltung'ana gelunot nkalifuni iip imiet. Neaku eidimuaki apa iltung'ana loo Siraeli ina kata, neisulu iltung'ana le Yuda, enkaraki naigarakinote ninche Olaitoriani, Enkai oo loo menye. Nesujaa Abija Yeroboam, neoru ninye nkanas, Betel o nkang'itie enyena kutiti o Yeshana tenebo nkang'itie enyena kutiti o Efron tenebo nkang'itie enyena kutiti. Neitu aekata eitoki Yeroboam arrinyu engolon enye too nkolong'i e Abija. Neosh Olaitoriani ninye neye ninye. Kake etaa Abija magilani, neyam ninye nkituaak tomon oo ng'uan, netum ilayiok tikitam oare, o ntoyie tomon o ile. Ore nkulie kiaasin pooki e Abija, nkoitoi enyena o nkirorot enyena, neigeroki too nkatinin o loiboni le Nkai oji Ido. Neaku eirure apa Abija etua anaa loo menye nenukari te nkanasa e Daudi; neitoreisho Asa olayioni lenye te rishata enye. Ore too nkolong'i enyena netum enkop enkiyeng'iyeng ilarin tomon. Neas Asa imbaa supati naa sidain too nkonyek o Laitoriani. Eiwuang'ie apa ilperereni loo lasarri loo loreren, o wuejitin neeika, neuroo ing'apeta nedung'oo Asherim aauroo. Neitanap Yuda pee eing'oru Olaitoriani, Enkai oo loo menye, neibung nkitanapat enyena. Eiwuang'ie sii too nkanas pooki e Yuda iwuejitin neeika lperereni oopejieki enkorropil. Netum enkitoria enkiyeng'iyeng too nkolong'i enyena. Etesheta ninye nkanas naata isunta te Yuda, amu enoto enkop enkiyeng'iyeng. Eitu ninye etum olarrabal te nena olong'i amu eishoo Olaitoriani ninye eseriani. Nejoki ninye Yuda, “Mateshet iyiook kuna anas, nikintaman isunta o ltaleta, nikipik nchomito oo sekenke; eton aa enaang ena kop, amu king'orutua iyiook Olaitoriani Enkai ang; king'orutua iyiook ninye, neishoo ninye iyiook eseriani too nkaloli pooki.” Neaku eteshetishote ninche nedupoyu. Neeta apa Asa enjore oo ltung'ana nkalifuni iip uni le Yuda, oata ilong'oi o remeta. O ltung'ana nkalifuni iip are o ntomoni isiet oo ltung'ana le Benchamen, oata ilong'oi o nkai; ore kulo pooki naa iltung'ana magil yiolot. Nelotu Serak le Etiopia agilunore ninche eeta enjore oo ltung'ana milion nabo, o ngarrin oo mbartan iip uni, nepuonu o metabau Maresha. Nelo Asa anang'are ninye, neitolok ilkererin lenye aaluakino olarrabal to erata le Sefata te Maresha. Neishiraki Asa Olaitoriani Enkai enye ejo, “Olaitoriani, meetae likae likinyaanyukie te retoto, te rishata o lmagilani o loshal. Taretu iyiook Olaitoriani Enkai ang, amu kingarakino iyiook iyie, naa te nkarna ino kiyetuo iyiook aagilunore ele orora. Olaitoriani, ira iyie Enkai ang; mincho eisulu likae tung'ani te iyie.” Neaku etimira Olaitoriani ile Etiopia te dukuya Asa o te dukuya Yuda, neilanyisho ile Etiopia. Ore Asa o lelo tung'ana apa ootii tenebo ninche, nesujaa ninche o meitabaiki Gerar. Nebatata ile Etiopia o metaa meetae obo otelekua eishu; amu etigilaki ninche te dukuya Olaitoriani o enjore enye. Nenap iltung'ana le Yuda intokitin kumok oleng naatarutua. Neitoki sii aagil nkanas naamanita Gerar, amu etijing'a euriata o Laitoriani shumata ninche, neya ninche imasaa kumok te nena anas. Near ilng'oborri le lelo apa oata nchoo, neya nkerrai te nkumoi, o ntemesin. Neitoki taa aarrinyo aapuo Yerusalem. Eewuo apa enkiyang'et o Laitoriani shumata Asaria olayioni le Oded, neipang ninye alo anang'are Asa. Nejoki ninye, “Toning'oki nanu Asa, o Yuda pooki o Benchamen: Etii Olaitoriani tenebo iyie, eton sii iyie itii tenebo ninye. Tening'oru iyie ninye nitum, kake tening'ua iyie ninye niking'uaa sii ninye iyie. Ore te nkata naado nemeeta Israel Enkai nasipa. Nemeeta olapolosani oiteng'enisho, nemeeta enkitanapata. Kake teneibelekenyakino ninche to sina lenye Olaitoriani, Enkai e Israel, neing'oru ninye nenoto ninche ninye. Ore apa te nena katitin nemeetae eseriani teilo oipang o teilo ojing'u amu etijing'aka enyamali sapuk lelo oomanya nkuapi. Eitaaki ninche ngiligilat. Negilunore olosho olosho, negilunore enkanasa enkanasa, amu eitanyamala Enkai ninche te pooki pukunoto o sina. Kake ntagoluoyu iyie! Mincho elepori nkaik inono, amu eikilaakini esiaai ino.” Ore ake pee ening Asa kulo rorei, ina aibon e Asaria olayioni le Aded, neitagoluo, neiwuang'ie nena kitanyaanyukot oo nkaitin naa ninche olminong teina kop e Yuda o ene Benchamen, o te nena anas naawa ninye teina kop oo ldoinyio e Efraim. Neitoki ninye aitobir olperere lo lasar lo Laitoriani apa otii dukuya olgoriet le nkaji o Laitoriani. Neiturrur ninye Yuda pooki o Benchamen, o lelo ooing'uaa Efraim, o Manase o Simion apa oobikito tenebo ninche, amu iltung'ana kumok ooisikakita ninye eing'ua Israel, ina kata pee edol aajo etii Olaitoriani Enkai enye tenebo ninye. Eiturrurrote apa ninche te Yerusalem to lapa liokuni lo lari le tomon o imiet le nkitoria e Asa. Nepolosaki ninche Olaitoriani olasar teina olong, te nena masaa apa naataarutua ninche ilmong'i iip naapishana, o nkerra nkalifuni naapishana. Neibung ninche olning'o lo sotua pee eing'oru Olaitoriani, Enkai oo loo menye, too ltauja lenye pooki o te nkishui enye pooki; naa ore pooki ng'ae lemeing'oru Olaitoriani Enkai e Israel, neari metua, aa oti o aa moruo, aa olee anaa enkitok. Einosie ninche Olaitoriani olmumai to ltoilo sapuk, o te mbuakunoto o too ntarumpetani, o te oshoto oo mowuarak. Neshipa Yuda pooki tenkaraki ilo mumai; amu einosa ninche too ltauja lenye pooki, neing'orutua ninche ninye te yieunoto enye pooki, nenoto ninche ninye, neishoo Olaitoriani ninche enkiyeng'iyeng too nkaloli pooki. Ore doi ninye Maaka, ng'otonye, eiwuang'ie olaiguanani Asa pee meitoki aata enkitoo enye enkaraki nataasa embae olminong, aitobir enkitanyaanyukoto e Ashera. Nedung Asa ina kitanyaanyukoto auroo, neidong aitaa irrarrat, nelo apejoo to erata le Kidron. Kake eitu apa eiwuang'ieki iwuejitin neeika e Israel. Ore ake etiu neijia nemeeta apa oltau le Asa eleyiata too nkolong'i e nkishui enye pooki. Neyau ninye atua enkaji e Nkai nena tokitin apa naaitisinya menye o nkishorot naaitisinya ninye makewan, enkosholai o sahabu o masaa, neitu aikata eitokini aata olarrabal o metabau olari le tomoni uni o imiet le nkitoria e Asa. Ore to lari le tomoni uni o ile le nkitoria e Asa, nelo Baasha olaiguanani loo Siraeli agilunore Yuda, neshet Rama, ejo pee meipang hoo oltung'ani obo anaa ejing'u alo enetii Asa olaiguanani le Yuda. Nedumu Asa enkosholai o sahabu te lelo shumat le nkaji o Laitoriani, o te nkaji o laiguanani, neirriwaki Benhadad olaiguanani le Siria, apa omanya Damaskas, nejoki, “Nchoo metijing'a olning'o erishata ai o iyie, anaa enatiu te papaai o te papaai lino. Ng'ura kaairriwaki nanu iyie enkosholai o sahabu; shomo tigila olning'o lino o Baasha olaiguanani loo Siraeli; pee aalo aing'uaa nanu.” Nening Benhadad olaiguanani Asa, neirriwaa ninye ilarikok le njore enye meshomo aagilunore nkanas oo Siraeli, neibung ninche aaisulie Iyon, o Dan, o Abelnaim o nkanas pooki naashumishoreki e Naftali. Ore ake pee ening Baasha ina neitu eitoki ashet Rama, neitasheyie esiaai enye. Neitoki olaiguanani Asa aya Yuda pooki, nenap ninche lelo soito le Rama o mbaoi enyena, apa naa ninche eshetishore olaiguanani Baasha, nelo ashetie ninche Geba o Mispa. Ore apa teina kata nelotu Hanani oladuaani enetii Asa olaiguanani le Yuda, nejoki ninye, “Ore enkaraki naa olaiguanani le Siria ingarakine, neitu ingarakino Olaitoriani Enkai ino, kitapaashare iyie enjore o laiguanani le Siria. Amaa enjore e Etiopia o ene Libia, aime enjore kitok naata ngarrin oo mbartan kumok oleng? Eji ore enkaraki ningarakine Olaitoriani neishoru ninche apik nkaik inono. Amu ekuet nkonyek o Laitoriani idie o ene tiatua enkop pooki, pee eitodolu enkidimata enye te rishata e lelo lemeeta ileyiat too ltauja lenye tialo ninye. Itaasa iyie ena te modai, amu ore ebaiki ena kata neito idia alo, itum ilarrabali.” Negorokino Asa ilo aduaani, neikenoo ninye te korokoroni, amu eibayie ninye te nkaraki ena. Neitoki Asa aitaas mbaa e ngogong'i kulikae teina kata. Ore nkiaasin e Asa ebaiki enkiterunoto o metabaiki enkiting'oto neigeroki te mbuku oo laiguanak le Yuda o Israel. Ore to lari le tomoni uni ooudo le nkitoria enye, netum Asa emuoyian too nkejek nerruoyo ina muoyian enye oleng; ore ake teina muoyian enye neitu ninye eing'oru Olaitoriani. Kake eing'orua eretoto too labaak. Neirrag Asa etua anaa loo menye, neye ninye to lari liartam oobo le nkitoria enye. Nenukaa ninche ninye te nkurare apa nataguetua ninye, aguetaki kewan te nkanasa e Daudi. Neirragie ninche ninye too sisineta naaiputa ninye ina gumoto naabore mpukunot pooki oo sonkoyoni naaitobiraki te nkarriyiano o laitobirani loo sonkoyoni; neitobir ninche enkima kitok te nkanyit enye. Yehoshafat olayioni le Asa oitoreishe te rishata enye, neitagol kewan agilunore Isiraeli. Nepik ninye iltimito nena anas pooki naasheta isunta e Yuda, nepik iltimito enkop e Yuda, o nkanas e Efraim apa naatarayie Asa papaai lenye. Etii apa Olaitoriani tenebo Yehoshafat, enkaraki nashomo ninye aibung olapa rrekie le menye; eitu ninye eing'oru Baal. Kake eing'orua Enkai e papaai lenye, nelo too nkitanapat enyena, neitu eibung irrekiei loo Siraeli. Ore enkaraki ina neitasheyie Olaitoriani enkitoria te nkaina enye, ore iltung'ana pooki le Yuda neyaki Yehoshafat nkishorot, netum ninye enkarsisisho sapuk o enkanyit. Keuno apa oltau lenye tialo nkoitoi o Laitoriani; neiwuang'ie sii iwuejitin neeika e Asherim te Yuda. Ore to lari liokuni le nkitoria enye neiriwaa ninye iltung'ana lenyena kituaak, Benhail, o Obadiah, o Sekaria, o Netanel, o Mikaia, pee epuo aaiteng'enisho too nkanas e Yuda. Ore tenebo ninche netii Ilawi, Shemaia o Netania, o Sebadia, o Asahel, o Shemiramot, o Yehonatan, o Adonija, o Tobija, o Tobadonija. Ore tenebo kulo Lawi netii ilapolosak, Elishama, o Yehoram. Neiteng'enisho ninche te Yuda, eeta embuku oo nkitanapat o Laitoriani tenebo ninche. Nepuo ninche aamanaa too nkanas pooki e Yuda aiteng'enisho tiatua olorere. Etipika apa Olaitoriani enkuretisho nena kitoriat pooki oo nkuapi naamanita Yuda, neitu ninche eitayunye Yehoshefat olarrabal. Ore ilkulikae Filisti neyaki Yehoshefat nkishorot. Neyaki nkishorot e nkosholai, neyau Ilmarabu ilmeregeshi enkalifu nabo o iip naapishana o loroi enkalifu nabo o iip naapishana. Neponari Yehoshefat agolu te nkitoria. Neshet ninye te Yuda isempewueti o nkanas naashumishoreki. Neeta apa ninye ineeshumishoreki sapuki too nkanas e Yuda. Neeta isikarini magil yiolot, te Yerusalem. Eiturrurroki apa kulo te risioroto oo nkajijik oo loo menye. Ore te Yuda netii ilarikok le njore loo nkalifuni; etii olarikoni le njore e iip oji Adna, tenebo iltung'ana nkalifuni iip uni magil yiolot. Ore oliare naa Yehohanan ilo arikoni le njore, tenebo iltung'ana nkalifuni iip are o ntomoni isiet, ore olosujaki naa Amasia olayioni le Sikri, ilo oishorua kewan te nkisiaayiare o Laitoriani, tenebo iltung'ana nkalifuni iip are magil yiolot. Ore too le Benchamen naa: Eliada, ilo tung'ani magilani yioloti, tenebo iltung'ana nkalifuni iip are oata mbaa o long'oi. Ore olosujaki naa Yehosabad tenebo iltung'ana nkalifuni iip o ntomoni isiet ootanapate pee epuo olarrabal. Kulo apa ootii enkisiaayiare o laiguanani, metii lelo apa ootipika olaiguanani nkanas naasheta sunta te Yuda pooki. Eeta Yehoshafat enkarsisisho sapuk o enkanyit neitobir olning'o tenkaraki enkiyama o ltung'ana le Ahab, ore te siadi ilkuti arin nedoyio alo enetii Ahab te Samaria. Neyiang'aki Ahab ninye nkerra kumok o lmong'i tenebo lelo tung'ana apa ootii tenebo ninye, neilejilej ninye pee epuo aagilunore Ramot-Gilead. Nejoki Ahab, ilo aiguanani loo Siraeli Yehoshafat olaiguanani le Yuda, “Eilo iyie tenebo nanu Ramot-gilead?” Newal ninye ajo, “Atiu nanu anaa enitiu iyie, netiu iltung'ana laainei anaa iltung'ana linono. Kiaku iyiook tenebo iyie to larrabal.” Neitoki Yehoshafat ajoki olaiguanani loo Siraeli, “Tang'asa nkilikuanishore ororei lo Laitoriani.” Neitoki olaiguanani loo Siraeli aiturrurr iloibonok le Nkai tenebo, iltung'ana iip ong'uan, nejoki ninche, “Aikipuo iyiook olarrabal aagilunore Ramot-Gilead, anaa aimikipuo?” Nejoki ninche, enchom, amu keishoru Enkai apik nkaik o laiguanani. Kake etejo ninye Yehoshafat, “Aimeetae likae oiboni le Nkai likinkilikuanishore?” Nejoki olaiguanani loo Siraeli Yehosafat, “Eton etii oltung'ani obo likindim iyiook aaikilikuanishore tialo Olaitoriani, Mikaia olayioni le Imala; kake manyor nanu ninye, amu meibonu aikata isupati tialo nanu, ntorrok ake eibonu.” Nejo Yehoshafat, mincho olaiguanani ejo neijia. Neitoki olaiguanani loo Siraeli aipotu olkitok obo, nejoki, “Iyau nabo kata Mikaia olayioni le Imala.” Ore ina kata netonita olaiguanani loo Siraeli o Yehoshafat, olaiguanani le Yuda too lorikan le nkitoo, neishopo ilkilani lenye, netonita ninche te wueji neituutishoreki, te mpolos e kishomi e Samaria; neibonisho iloibonok pooki te dukuya ninche. Ore Sedekia olayioni le Kenaana neitobiraki kewan imowuarak e sekenkei, nejo, “Nji ejo Olaitoriani, ‘Te kuna ilo iyie arrumoo ile Siria o metaba anaa neidak ninche.’ ” Ore iloibonok pooki neibonu ina, nejo, “Ilepa shomo Ramot-gilead pee ilo amirisho; aikincho iyie Olaitoriani apik enkaina o laiguanani.” Ore lelo kulikae apa ooshomo aaipotu Mikaia nejoki ninye, “Ng'ura ore irorei loo loibonok le Nkai pooki neimaki embae nabo supat tialo olaiguanani; nchoo orerei lino etiu anaa orerei le obo lenye, niro te supatisho.” Kake etejo Mikaia, “Ore anaa enaishu Olaitoriani, ore ina najo Enkai ai ina nanu airo.” Ore ake pee ebau enetii olaiguanani, nejoki olaiguanani ninye, “Mikaia, eikipuo iyiook Ramot-gilead, olarrabal anaa aikipal?” Newalu ninye ajo, “Ilepa shomo timirisho; kepiki ninche enkaina ino.” Kake etiaka olaiguanani ninye, “Aikatitin aja aasai nanu pee iro esipata ake te nkarna o Laitoriani?” Neitoki ninye ajo, “Atoduaa nanu Isiraeli pooki eidapashakinote ildoinyio anaa nkerra nemeeta olchekut; netejo Olaitoriani, ‘Meeta kulo olaitasheikinoni; nchoo pooki ng'ae errinyo alo enkang enye te seriani.’ ” Neitoki olaiguanani loo Siraeli ajoki Yehoshafat, “Keitu nanu aajoki iyie nchere meibonu ninye esidai tialo nanu, kake entorroni ake eibonu?” Nejo Mikaia, “Toning'o naa orerei lo Laitoriani: Atoduaa nanu Olaitoriani etonita to lorika lenye le nkitoo, ore olorora pooki le shumata, neitashe te nkaina enye e tatene, o te ne kedienye. Nejo Olaitoriani, ‘Aing'ae olo alej Ahab olaiguanani loo Siraeli, pee etum ninye ashomo atabatatayu te Ramot-gilead?’ Nejo obo embae nabo, nejo olikae enkae. Neitoki alotu enkiyang'et neitashe te dukuya Olaitoriani, ejo, ‘Kalo nanu alej ninye.’ Nejoki Olaitoriani, ‘Tia oitoi?’ Nejo ninye, ‘Kalo nanu, naaku oltau le lejare too nkutukie oo loibonok lenyena.’ Nejo ninye ilo iyie alej ninye, naa ndimu ninye, shomo naa taasa ina. Ore naa taata etipika Olaitoriani enkiyang'et e lejare nkutukie e kulo oibonok linono; eiroro entorroni tialo iyie.” Neitoki Sedekia olayioni le Kenaana anyiku neosh Mikaia eseder, nejoki, “Kaji eimua enkiyang'et o Laitoriani pee epuku te nanu nikilotu airorie iyie?” Nejo Mikaia, “Ng'ura, ilo iyie adol teina olong, tinilo iyie olgilata liatua aisudori.” Nejo ilo aiguanani loo Siraeli, “Embung'a Mikaia, nirrinyirrinyi ninye aaya enetii Amon ilo balusui le nkanasa, o enetii Yoash ilo ayioni lo laiguanani. Nilo ajo, ‘Nji ejo olaiguanani, Entipik ena tung'ani atua korokoroni, ninchosho ninye meinosa imukateni naatoito neok enkare, o metaba anaa nashukunye te seriani.’ ” Nejo Mikaia, “Tenitushukunye iyie te seriani, neitu nanu aairorie Olaitoriani”, neitoki ninye ajo, “Entoning intae lo orere pooki!” Neaku eshomo olaiguanani loo Siraeli; o Yehoshafat olaiguanani le Yuda Ramot-gilead. Nejoki olaiguanani loo Siraeli Yehoshafat, “Kaibelekeny nanu enkishopo ai nalo olarrabal, kake inchopo iyie ilkilani linono le nkitoo.” Neibelekeny olaiguanani loo Siraeli enkishopo enye nepuo ninche olarrabal. Neitanapa apa olaiguanani le Siria ilkituaak loo ngarrin enyena oo mbartan, ajoki, “Emiarare ake oloti anaa olkitok, kake olaiguanani loo Siraeli ake entaarare.” Ore ake pee edol lelo kituaak loo ngarrin oo mbartan Yehoshafat nejo ninche, “Olaiguanani loo Siraeli ilo.” Neibelekenya ninche aarare ninye; neyietu Yehoshafat abuaku, neretu Olaitoriani ninye. Neboinaa Enkai ninche aitung'uaa ninye. Amu etoduaa ake lelo kituaak loo ngarrin oo mbartan aajo mme olaiguanani loo Siraeli ilo nerrinyo te sujata enye. Kake eteyietuo oltung'ani obo enkawuo enye nengoroo embae, neng'or olaiguanani loo Siraeli eripata enkila enye esekenkei, to lgoo; ore enkaraki ina nejoki ninye olarewani lenye le ngarri e mbarta, “Mbelekenyayu ntung'uayioki nanu olarrabal, amu aatipikaki nanu olbae.” Neirowuaju oleng olarrabal ina olong, neigarakino olaiguanani loo Siraeli eng'arri enye embarta aing'or ile Siria o metaa teipa. Ore ake pee edoyio enkolong neye. Nerrinyunye te Seriani Yehoshafat olaiguanani le Yuda alotu enkaji enye te Yerusalem. Kake eshomo Yehu olayioni le Hanani, ilo aduaani anang'are ninye, nejoki ninye olaiguanani Yehoshafat, “Iretu iyie olarruoni ninyor lelo ooiba Olaitoriani? Ore enkaraki ena, eewuo engoro naing'ua Olaitoriani enkaraki iyie. Ore ake eyia enotoki kulie baa sidain te iyie, amu indaikie Ashera aishie tena kop, ning'oru Enkai to ltau lino.” Nebik Yehoshafat te Yerusalem; nelo ninye tiatua olorere, ebaiki Beer-sheba o metabaiki ina kop oo ndoinyio e Efraim, neyau ninche aarrinyoki Olaitoriani, Enkai oo loo menye. Negelu ninye ilarishak teina kop tiatua nkanas pooki naasheta isunta e Yuda. Te nkanasa ake o te nkanasa, nejoki ninye lelo arishak, “Entadamu eniasiasa, amu mme oltung'ani nguanarere, kake Olaitoriani; etii ninye tenebo intae idung'udung'u enkiguana. Ore naa taata nchoo euriata o Laitoriani eaku tenebo intae; entujurru eniasiasa; amu meetae enkibelekenyata e sipata to Laitoriani Enkai, anaa enyorrakinoto, anaa eng'amunoto oo ntokitin e ropare.” Ore ake sii te Yerusalem negelu Yehoshafat kulikae Lawi o lapolosak, o lukuny oo lmareita loo Siraeli, pee edung enkiguana tenkaraki Olaitoriani nedung enkiguana tenetii enchankar. Yerusalem apa etii entonata enye. Neitanap ninye ninche, ejo, “Nji intae enkuna te uriata o Laitoriani, o te nkisiligata, o to ltauja linyi pooki: Tenelo nelotu enkiguana naing'uaa ilalashera linyi ootii kulie anas, eipirta enkibukoroto o sarge, o enkitanapata, anaa nkikoot, o nkiguanat, ninteng'en iyie ninche, pee meas ake entorroni te dukuya Olaitoriani, melotu ake engoro napi shumata intae o lalashera linyi. Ena intae entaas nimbayuyu intae entorroni. Naa ng'ura Amaria ilo apolosani kitok otii te shumata intae tialo mbaa pooki o Laitoriani; naa Sebadia olayioni le Ishmael ninye olbalusui le nkaji e Yuda, too mbaa pooki naaipirta olaiguanani; naa Ilawi likisiai iyie anaa iltung'ana kituaak. Taasisho te mpijan naa nchoo eaku Olaitoriani tenebo ilo oitoriori mbaa enyena.” Ore te siadi ena nepuonu Ilmoabu, o le Amon o kulikae ooing'uaa Meani, nepuonu aarasaki Yehoshafat to larrabal. Nepuonu kulikae tung'ana aajoki Yehoshafat, “Etii olorora kitok oing'ua Edom likipuonu aarare, ooing'uaa lido kekun le naiposha; naa ng'ura, etii ninche Hasasotama” (aa taa Enkedi). Neureishoyu Yehoshafat, neing'oru Olaitoriani makewan, neitanapisho meteena iltung'ana ate aapukoo te Yuda pooki. Neiturrurro Yuda aaing'oru eretoto to Laitoriani; eing'uaa nkanas pooki e Yuda nepuonu aaing'oru Olaitoriani. Neitashe Yehoshafat tiatua eumata e Yuda o Yerusalem, tiatua enkaji o Laitoriani, te dukuya ilo goriet ng'ejuk, nejo ninye, “Olaitoriani, Enkai oo loo papa, aime iyie Enkai te keper? Aimintore iyie nkitoriat pooki oo loshon? Enkaina ino etii engolon o enkidimata, ore enkaraki ina meetae oltung'ani likindimaa iyie. Keitu iyie, Na Ai ang, iaraa lelo apa oomanya ena kop te dukuya iltung'ana linono loo Siraeli; ninchooyie ntarasi aisho eishoi e Abram ilo shore lino? Netamanya ninche atua, nikiteshetakita ninche ewueji sinyati, tenkaraki enkarna ino, ejo, ‘Tenelotu entorroni shumata iyiook, olalem, o enkiguana, anaa olmeitai, anaa olameyu, nikintashe iyiook te dukuya ena aji, o te dukuya iyie, amu etii enkarna ino atua ena aji, nikinchiraki iyie tosina lang, nining iyie, nintajeu iyiook.’ “Ore naa taata ng'ura kulo tung'ana le Amon o le Moab, o to ldoinyio le Seir, nimincho iyie Isiraeli metarasaki ninche, apa eing'uaa enkop e Misiri, netapaasha apa ninche neitu eidaikie. Ng'ura elaaki ninche iyiook epuonu aaraa iyiook aaipang'ie te nkop ino, apa ninchoo iyiook matujung. Na Ai ang aimidung'oki iyie ninche enkiguana? Amu mikiata iyiook engolon tialo ele orora kitok olotu agilunore iyiook. Mikiyiolo iyiook aajo kaa kias, kake iyie eimariri nkonyek ang.” Ore teina kata neitashe iltung'ana pooki le Yuda te dukuya Olaitoriani, tenebo nkera enye kutiti o nkituaak enye, o nkera enye. Nelotu enkiyang'et o Laitoriani shumata Yahasiel olayioni le Sekaria, olayioni le Yerel, olayioni le Matania, Olawi loo layiok le Asaf, te mpolos eina umata. Nejo ninye, “Entoning, Yuda pooki o loomanya Yerusalem, o laiguanani Yehoshafat: Nji ejoki intae Olaitoriani, ‘Emiureisho nimileporiri tenkaraki ele orora kitok; amu mme olinyi ele arrabal, kake olo Laitoriani. Ore taisere tadoi shomo tigilunore ninche; ng'ura keilepu ninche aaimu enkoitoi e Siis; ilo iyie ainepu ninche te nkiting'oto o erata, te nkalo o loo saen tiong'ota e Yeruel. Meeta tipat niarishore iyie tele arrabal; ntasho ake duoo, ntirring'ayu pee idol enkisulata o Laitoriani, te rishata ino. Iyie Yuda o Yerusalem.’ Miureishoyu nimilepori. Ore taisere tadoi shomo tigilunore ninche, naa keaku Olaitoriani tenebo intae.” Neirrugo Yehoshafat aitabaiki enkomom enye enkop, ore Yuda pooki, o lelo oo manya Yerusalem nebatata te dukuya Olaitoriani, neserem Olaitoriani. Ore ilawi le Kohat o Lkorati neitashe aaisis Olaitoriani Enkai e Israel to ltoilo sapuk oleng. Nedumunye ninche tadekenya enasirie, nepuo ong'ata e Tekoa; ore epuito ninche neitashe Yehoshafat nejo, “Entoning'oki nanu Yuda o intae iloomanya Yerusalem! Eruko Olaitoriani Enkai inyi, pee eitasheyieki intae; entoning iloibonok lenyena pee idupoyuyu.” Ore ake pee eidip aiguana iltung'ana, negelu lelo oopuo aaranyaki Olaitoriani neisis ninye eishopito ilkilani sinyat, nepuo ninche te dukuya enjore, nejo “Enchoo Olaitoriani enashe, amu ore enyorrata enye nauno nebikoo ntarasi.” Ore ake pee eiteru aaranyisho neisis Olaitoriani, nerasaki Olaitoriani iltung'ana le Amon, o Moab o lo ldoinyio le Seir, laa ninche apa ooetuo aagilunore Yuda, neaku eishieki ninche. Amu etudumakinote iltung'ana le Amon o le Moab iltung'ana lo ldoinyo le Seir, neidaikie ninche katukul, ore ake pee eishie iltung'ana le Seir, neitoki ninche aaidaakino maate. Ore pee epuonu Yuda oltalet liong'ota, neing'or ilo orora naa ng'ura! Mpopong'i ake naairragaa te nkop. Meetae oloilanyishe. Ore pee elotu Yehoshafat o ltung'ana lenyena aaya iyarunot enye, netum ninche nkishu kumok, o masaa, o nkilani, o ntokitin naagol enkinyang'a, naawaita ninche o metaba anaa neaku menapayu. Nkolong'i uni eyaita ninche nena yarunot, eikumok apa oleng. Ore te nkolong e ong'uan neiturrurro ninche to erata le Beraka, ore teine neisis Olaitoriani. Ore enkaraki ina naa keji enkarna eine wueji oerata le Bereka, o metabaiki ena olong. Neitoki aarrinyo, pooki tung'ani le Yuda o Yerusalem, netii Yehoshafat dukuya ninche, errinyo aapuo Yerusalem te nchipai, amu eishoo ninche Olaitoriani enchipai tialo ilmang'ati lenye. Nepuonu ninche Yerusalem eeta nkai oo sinkolioitin o lwululi loo usin, o ntarumpetani, nepuo enkaji o Laitoriani. Neiput enkuretisho e Nkai nena kitoriat pooki e nena kuapi ina kata pee ening nchere, etaarare Olaitoriani ilmang'ati loo Siraeli. Neaku eitirring'e Yehoshafat te seriani, amu eishoo ninye Enkai enkiyeng'iyeng too nkaloli pooki. Metaa neijia apa eikuna Yehoshafat te neitore Yuda. Oloo larin tomoni uni o imiet apa ninye pee eiteru aitoreisho, neitoreisho ilarin tikitam o imiet te Yerusalem. Ore apa enkarna e ng'otonye naa keji Asuba, entito e Shilhi. Neibung apa ninye orrekie le Asa papaai lenye, neitu eibelekenya apaash. Etaasa ninye isidain too nkonyek o Laitoriani. Ore apa iwuejitin neeika neitu eiwuang'ieki; eitu epik iltung'ana iltauja lenye nkaitin e kulikae tung'ana. Ore nkulie kiaasin e Yehoshafat, ebaiki enkiterunoto o metabaiki enkiting'oto, neigeroki too nkatinin e Yehu olayioni le Hanani, apa naatisiraki te mbuku oo laiguanak le Israel. Ore te siadi ena, neibung'are olaiguanani Yehoshafat Ahasia olaiguanani loo Siraeli, apa oas entorroni. Neibung'are ninye te nchetata oo melin naapuo Tarshish, neshetu ninche imelin te Esiong'eber. Neitoki Eliesa olayioni le Dodawahu le Maresha, aibonisho tialo Yehoshafat, ejo, “Ore enkaraki nimbung'are Ahasia, keidaikie Olaitoriani ina nitaasa.” Nemuta nena melin neitu ninche epuo Tarshish. Neirrag Yehoshafat etua anaa loo menye, nenukari tenebo loo menye tiatua enkanasa e Daudi, neitoreisho Yehoram olayioni lenye, te rishata enye. Eeta apa ninye ilalashera, lelo ayiok le Yehoshafat: Asaria, o Yehiel, o Sekaria, o Mikael, o Shefatia. Ore apa kulo pooki naa ilayiok le Yehoshafat olaiguanani le Yuda. Eishoo apa ninche menye nkishorot sapuki, e nkosholai o sahabu, o ntokitin e tipat, tenebo nkanas naasheta isunta e Yuda. Kake Yehoram eishoo enkitoria, amu ninye apa olkikau. Ore ake pee etonie Yehoram olorika le nkitoo le papaai lenye, nebul, near ilalashera lenyena pooki metuata to lalem, tenebo sii kulikae tung'ana kituaak le Israel. Oloo larin tomoni uni oare apa Yehoram pee eiteru aaku olaiguanani, neitoreisho ninye ilarin isiet te Yerusalem. Neibung ninye orrekie loo laiguanak le Israel anaa apa enataasa Ahab. Amu entito apa e Ahab enkitok enye. Neas ninye mbaa torrok too nkonyek o Laitoriani. Kake meidaikie ake Olaitoriani enkaji e Daudi, tenkaraki olning'o lo sotua apa oitobira ninye o Daudi, neisiligishore apa ninye pee eitoreisho eishoi enye, o layiok lenyena ntarasi. Ore too nkolong'i enkitoria enye, nekepari Edom aing'uaa enkitoria e Yuda, negelaki ninche ate olaiguanani. Nedumunye Yehoram tenebo ilarikok lenyena le njore, o ngarrin enyena oo mbartan pooki, nepuo kewarie aaidaikie iltung'ana le Edom apa oomanita ninye o lkituaak lenyena loo ngarrin oo mbartan. Neaku etekepari apa Edom aing'uaa enkitoria e Yuda o metabaiki ena olong. Ore apa teina kata nekepari sii ninye Libna aing'uaa enkitoria enye, enkaraki natanya ninye Olaitoriani, Enkai oo loo menye. Ore ake sii eshomo ninye aitobir iwuejitin neeika teina kop oo ldoinyio e Yuda, neitapong'oo lelo oo manya Yerusalem metapaasha Olaitoriani, neitapong'oo Yuda. Nelotu empalai enetii ninye naing'uaa oloiboni le Nkai oji Eliya, ejo, “Nji ejo o Laitoriani, Enkai e Daudi papaai lino, ‘Ore enkaraki neitu iyie imbung orrekie le Yehoshafat papaai lino, anaa orrekie le Asa olaiguanani le Yuda, kake orrekie loo laiguanak le Israel iturubare, nintapong'oyie Yuda o lelo oomanya Yerusalem metaasa ing'ok, anaa apa enaitapong'oyie enkaji e Ahab Israel metaasa ing'ok, nitaara sii ilalashera linono metuata, lelo le nkaji e papaai lino, laa ninche supati te iyie; ng'ura keyau Olaitoriani olmeitai kitok shumata iltung'ana linono, o nkera inono, o nkituaak inono, o ntokitin inono pooki. Ore iyie makewan nikijing enkeeya torrono, e nkoshoke, o metaba anaa nikipuku imonyit tenkaraki ina keeya.’ ” Neputu Olaitoriani engoro oo Lfilisti olmarabu tenkaraki Yehoram. Etaaniki apa lelo Filisti o lmarabu Etiopia. Nepuonu ninche aarasaki Yuda, neibung ninye, nenap ninche aaya ntokitin pooki naanoto te nkaji o laiguanani, neya sii ilayiok lenyena o nkituaak enyena, neaku meetae olayioni otung'eikiaki ninye, meteleku ake Yehoahas ilo ayioni lenye oti te pooki. Ore etulusoitie kuna pooki near Olaitoriani ninye teina keeya nemeishiunoyu enkoshoke enye. Ore te nkiti rishata etulusoitie ilarin oare, neipang'u imonyit enyena tenkaraki ina keeya. Neye ninye te mion sapuk. Neitu eitobir iltung'ana lenyena enkima, aasho ninye enkanyit anaa apa enaitobiraki enkima too loo menye. Oloo larin tomoni uni oare apa ninye pee eiteru aitoreisho, neitoreisho ninye ilarin isiet te Yerusalem. Eiwuang'a ninye meetae oltung'ani otishilayie. Etunukaitie ninche ninye te nkanasa e Daudi, kake mme too nkuraren oo laiguanak. Ore lelo oomanya Yerusalem neitaa Ahasia olayioni lenye oti olaiguanani terishata enye. Amu ore ilo wuampa apa loo ltung'ana ooetuo tenebo Ilmarabu atua ilng'oborri, netaara metuata lelo ayiok pooki botoro. Neaku Ahasia olayioni le Yehoram olaiguanani le Yuda ninye oitoreishe. Oloo larin artam oare apa Ahasia pee eiteru aitoreisho, neitoreisho ninye olari obo te Yerusalem. Ore apa enkarna e ng'otonye naa Atalia, enkakuyiaa e Omri. Eshomo sii apa aibung orrekie le nkaji e Ahab, amu ng'otonye apa naiguan metaasa entorroni. Etaasa apa ninye entorroni too nkonyek o Laitoriani, anaa enataasa enkaji e Ahab. Amu ore apa te siadi keeya e papaai lenye, ninche ooiguanaki ninche, neitasur ninye. Etusujayie ninye enkikoo enye, o meshomo ninye tenebo Yehoram olayioni le Ahab, ilo aiguanani le Israel, nepuo aaitayunye Hasael olaiguanani le Siria olarrabal te Ramot-gilead. Nepik iltung'ana le Siria Yoram olbae. Nerrinyo ninye alo metabaki te Yesreel tenkaraki lelo baa apa ootipikaki ninye te Rama, ina kata apa pee elo aarare Hasael olaiguanani le Siria. Nedoyio Ahasia olayioni le Yehoram, olaiguanani le Yuda alo arum Yoram olayioni le Ahab te Yesreel, amu kemuoi apa ninye. Kake etegelua apa Enkai pee eyau embatatata e Ahasia tena lototo nashomo ninye abaiki Yoram. Ore apa pee elotu ninye ine, neipang ninye alo anang'are Yehu olayioni le Nimshi, laa ninye apa etubukoko Olaitoriani eilata aput pee eidaikie enkaji e Ahab. Ore edung'ito Yehu enkiguana tenkaraki enkaji e Ahab, netumore ninye ilkituaak le Yuda o layiok loo lalashera le Ahasia, laa ninche apa ooing'orita Ahasia. Near ninche metuata. Neing'oru ninye Ahasia, neibung'i ninye eisudori tiatua Samaria, neyauni ninye enetii Yehu neari ninye metua. Nenukaa ninye amu etejo, “Nkakuyiaa lenye Yehosahafat, apa oing'oru Olaitoriani to ltau lenye pooki.” Ore te nkaji e Ahasia nemeetae oltung'ani oidim aitoreisho. Ore apa pee edol Atalia, ng'otonye Ahasia nchere etua olayioni lenye, nedumunye ninye, neidaikie lelo pooki le nkaji e nkitoo te Yuda. Kake eewa Yehoshabet ina tito o laiguanani Yoash olayioni le Ahasia nelo aisudoo ninye aitung'uaa ilkulikae ayiok lo laiguanani letaa keji pee eari metuata, nepik ninye tenebo enkaibung'ani enye olgilata oirragi. Neiko neijia Yehoshabet, ina tito o laiguanani Yehoram, ina kitok e Yehoida olapolosani. Ore enkaraki naa enkanashe apa ninye e Ahasia, eisudoyie ninye arishie Atalia, neaku eitu ear ninye metua. Nebik ninye tenebo ninche ilarin ile, eisudori tiatua enkaji e Nkai, ina kata eitore Atalia ina kop. Ore to lari liopishana, neitagoluo Yehoida, neibung'are ninye ilarikok le njore le maa iip. Asaria olayioni le Yeroham, o Ishmael olayioni le Obed, o Maaseia olayioni le Adaia, o Elishafat olayioni le Sikri. Nepuo ninche aamanaa te Yuda pooki neiturrurru Ilawi too nkanas pooki e Yuda, o lukuny oo nkajijik oo Siraeli, nepuonu ninche Yerusalem. Ore ina umata pooki neitobir olning'o tenebo olaiguanani tiatua enkaji e Nkai. Nejoki Yehoida ninche, “Eng'ura olayioni lo laiguanani! Nchoo ninye eitoreisho, anaa enairoro Olaitoriani tialo ilayiok le Daudi. Ena bae intae entaas, ore intae ilapolosak o Lawi oopuo aing'uaa esiaai te nkolong e Sabato, ore ematua inyi e uni neaku ilarripok loo nchomito. Ore ematua nabo e uni nepuo enkaji o laiguanani, ore ematua nabo e uni nepuo kishomi o lkitamanyunoto. Ore iltung'ana pooki nepuo olgoriet le nkaji e Nkai. Emincho ejing hoo ng'ae atua enkaji o Laitoriani meteleku ilapolosak o Lawi ooisiaaisho. Eidim ninche aatijing, amu eisinyat. Kake ore iltung'ana pooki neibung enkitanapata o Laitoriani. Ore Ilawi neman olaiguanani aang'adu, oltung'ani ake eeta imasaa enyena o larrabal te nkaina enye. Ore pooki ng'ae ojing e nkaji o Laitoriani neari metua. Entaa tenebo olaiguanani tenejing'u o teneipang.” Ore Ilawi o Yuda pooki neas te risioroto e nena pooki naaitanapa Yehoida olapolosani ninche. Eyaua ake pooki ng'ae iltung'ana lenyena, lelo lemetii esiaai te nkolong e sabato, amu eitu apa eisho Yehoida olapolosani iltung'ana meidapashari too lturrurri. Neitoki Yehoida olapolosani aisho ilarikok le njore iremeta o long'oi dapashi o nkutiti apa naara ino laiguanani Daudi, naa atua enkaji e Nkai etii. Nepik ninye iltung'ana pooki metaa ilarripok lo laiguanani, eeta ake pooki tung'ani masaa enyena o larrabal te nkaina, ebaiki enkalo e kopikop enkaji o metabaiki enkalo e moikuape e nkaji, neman olperere lo lasar o enkaji. Neitoki ninye ariku olayioni lo laiguanani, neishopoki ninye emaupe e nkitoo, neisho ninye enchakenisho nelimu ninche ninye aajo olaiguanani. Ore Yehoida o layiok lenyena nebukoki ninye eilata aaput, nejo ninche, “Metobikoi olaiguanani.” Ore ake pee ening Atalia enkilepilep oo ltung'ana ekuet neisis Olaiguanani, nelo ninye atua enkaji o Laitoriani, ine netii iltung'ana. Ore ake pee eing'orisho, nedol olaiguanani eitashe tembata e ng'ape te wueji nejing'ieki enkaji e Nkai, neitashe ilarikok le njore o laoshok loo ntarumpetani te mbata o laiguanani ore iltung'ana pooki leina kop neshipa neosh ntarumpetani. Ore ilaranyak neeta nkinantani enye oo sinkolioitin, erikoo osirua. Nepolos Atalia nkilani enyena, nebuaku ajo, “Enkarruoisho! Enkarruoisho.” Neitoki Yehoida olapolosani ayau lelo kituaak le njore apa oitasheiki enjore, ejoki ninche, “Iyau ninye mpang'unye erishata oo lturrurri. Ore pooki ng'ae osuju ninye neari to lalem metua.” Amu etejo apa ilo apolosani, “Emiar ninye metua tiatua enkaji o Laitoriani.” Neaku eibung'a ninche ninye, nelo ninye kishomi e mbarta natii enkaji o laiguanani, neari ninye metua teine. Neitobir Yehoida olning'o terishata enye o ltung'ana pooki o laiguanani nchere, pee eaku ninche iltung'ana lo Laitoriani. Nepuo iltung'ana pooki enkaji e Baal, nepuo aadung aauroki enkop; ore ilperereni lenyena loo lasarri, o nkitanyaanyukot enyena oo nkaitin nebel aaitaa mbelibelat, near ninche Matan ilo apolosani le Baal metua, te dukuya lelo pereren loo lasarri. Nepik Yehoida ilarripok le nkaji o Laitoriani, abori erikoroto oo lapolosak o Lawi, o lelo Lawi apa ootegelua Daudi pee eitasheiki enkaji o Laitoriani. Pee eitaiki Olaitoriani ilasarri oopejori, anaa apa enaigeroki too nkitanapat e Musa, te nchipai o te ranyare, te risioroto e nkitanapata e Daudi. Nepik ninye ilarripok loo nchomito, nchomito e nkaji o Laitoriani, pee mejing'u ake oltung'ani hoo obo oiduruk. Neitoki ninye aya ilkituaak le njore, o nkasisin, o lbalusuni loo ltung'ana o ltung'ana pooki le nkop; neriku ninche olaiguanani aaitadou te nkaji o Laitoriani, erukunye aagilaki te nkishomi e shumata o meetu enkaji o laiguanani. Neitoton ninche olaiguanani to lorika lenye le nkitoo. Neaku etishipate iltung'ana pooki leina kop; neitirring'a ina anasa, ina kata eidipaki aatar Atalia to lalem. Oloo larin oopishana apa Yoash pee eiteru aitoreisho, neitoreisho ninye ilarin artam te Yerusalem. Ore apa enkarna e ng'otonye naa Sibia e Beer-sheba. Neas Yoash mbaa sidain te dukuya Olaitoriani too nkolong'i pooki e Yehoida olapolosani. Neisho Yehoida ninye nkituaak are, netum ninye ilayiok o ntoyie. Ore tesiadi ena nemut Yoash pee eitobir e nkaji o Laitoriani. Neiturrur ninye ilapolosak, o Lawi, nejoki ninche, “Enchom nkanas e Yuda nisotutu too Siraeli pooki mpisai naaitobirieki enkaji e Nkai inyi, te pooki ake ari. Naa eng'ura pee isosionienie ina bae.” Kake eitu eisosion Ilawi. Neitoki olaiguanani aipotu olkitok oji Yehoida, nejoki ninye, “Kainyoo iyie pee eitu nkilikuanu too Lawi, meyauni te Yuda o te Yerusalem kodi apa natejo Musa, osinka lo Laitoriani, te umata oo Siraeli tenkaraki olng'obor le nchakenisho?” Amu etigila apa ilayiok le Atalia, ina kitok arruoni, enkaji e Nkai, netaasishore sii nena tokitin pooki apa naaitisinyaki e nkaji o Laitoriani tenkaraki Baal. Neaku eitanapishe olaiguanani, neitobir ninche osanduku nepik ninye boo ina kishomi e nkaji o Laitoriani. Neibalunyeki tiatua Yuda pooki o Yerusalem, pee eyakini Olaitoriani ina kodi apa natejo Musa osinka le Nkai pee eitayu Isiraeli tiong'ota. Ore ilkituaak pooki o ltung'ana pooki neshipa, neyau kodi enye aaitadoiki ilo sanduku o metaba anaa neidipayu. Naa ore apa teneyaki Ilawi ilo sanduku iltung'ana kituaak lo laiguanani, naa tenedol ninche aajo etii mpisai kumok, nelotu olaigeroni lo laiguanani o lkitok loo lapolosak aapiku teilo sanduku, nerriny osanduku ewueji duoo netii. Neas ninche ina anaake, nesotu mpisai kumok oleng. Neisho olaiguanani o Yehoida lelo apa ooitasheiki esiaai enkaji o Laitoriani, neiger ilaguetak loo soito, o laguetak loo nkeek pee eitobir ninche enkaji o Laitoriani. Tenebo sii ilaitobirak loo sekenke o suyai, pee eram ninche enkaji o Laitoriani. Neaku etaasishote apa lelo ootipikaki esiaai, ore enkitobirata e nkaji nelo dukuya too nkaik enye, neitobir ninche enkaji e Nkai netiu anaa apake, neitagol ninye. Ore ake pee eidip neyau nena pisai naatelekutua dukuya olaiguanani o Yehoida. Neitobiraki nena pisai imasaa e nkaji o Laitoriani, tenkaraki enkisiaayiare o lasarri oopejori, o ntokitin e nkorropil, o ntokitin e sahabu o enkosholai. Neitayu ninche ilasarri oopejori tiatua enkaji o Laitoriani anaake too nkolong'i pooki e Yehoida. Kake etamorua Yehoida, neye; naa oloo larin iip o tomoni uni apa ninye ina kata pee eye. Nenukaa ninche ninye te nkanasa e Daudi tenebo ilaiguanak, amu etaasa apa ninye mbaa sidain te Israel, o tialo Olaitoriani o enkaji enye. Ore etulusoyie keeya e Yehoida, nepuonu ilkituaak le Yuda aailejilej olaiguanani nening olaiguanani ninche. Neing'uaa ninche enkaji o Laitoriani Enkai oo loo menye, neisiaai Asherim o nkitanyaanyukot oo nkaitin. Nelotu engoro napi shumata Yuda o Yerusalem tenkaraki ena kitarruoroto enye. Ore ake eyia, neirriwua ninye iloibonok meetu aarrinyoki ninche Olaitoriani, neishakenoki kulo ninche, kake etanyaita ninche ening. Nejing enkiyang'et o Laitoriani Sakaria olayioni le Yehoida olapolosani; neitashe arumaki iltung'ana kop, nejoki ninche, “Nji ejo Olaitoriani, ‘Kainyoo pee igiligili intae nkitanapat o Laitoriani o metaa meekure ibulubulu? Ore enkaraki nitanyaita intae Olaitoriani, etanya sii ninye intae.’ ” Kake eing'orutua ninche pee ear ninye metua, ore te nkitanapata olaiguanani nenang ninye too soito to lgoriet le nkaji o Laitoriani. Neaku eitu apa edamu olaiguanani Yoash esupatisho apa naitoduaa Yehoida, menye le Sakaria ninye, kake etaara olayioni lenye metua. Ore eye ninye, nejo, “Metoduaa Olaitoriani neitalaku.” Ore etulusoyie olari nelotu enjore e Siria agilunore Yoash. Nepuonu ninche Yuda o Yerusalem, neidaikie ninche ilkituaak pooki loo ltung'ana, neishie tiatua olorere, neirriwaki ninche nena masaa pooki naawaita o laiguanani le Dameski. Ore hoo naa ilkuti tung'ana apa ina jore e Siria, eishooyie Olaitoriani apik nkaik enye enjore kitok, enkaraki natanyaita ninche Olaitoriani, Enkai oo loo menye. Neaku etudung'okito ninche enkiguana, Yoash. Ore pee epuo ninche aaing'uaa ninye, neing'uaaa ninye eeta olbae sapuk, neiguanare isinkan lenyena ninye pee ear metua, aaitalaku osarge lo layioni le Yehoida ilo apolosani, near ninche ninye metua te nchumata endapash enye. Neye ninye; nenukaa ninche ninye te nkanasa e Daudi, kake eitu ninche enukaa ninye too nkuraren oo laiguanak. Ore apa lelo ooiguanare ninye pee ear metua naa Sabad olayioni le Shimeat le Amon, o Yehoshafat olayioni le Shimrit le Moab. Ore mbaa oo layiok lenyena o mbaa kumok naaibarieki ninye, o ne nchetata e nkaji e Nkai neigeroki too limunot tiatua embuku oo laiguanak. Neitoreisho Amasia olayioni lenye te rishata enye. Oloo larin tikitam o imiet apa Amasia pee eiteru aitoreisho, neitoreisho ninye ilarin tikitam te Yerusalem. Ore enkarna e ng'otonye naa Yehodan e Yerusalem. Neas ninye mbaa sidain too nkonyek o Laitoriani, kake mme sidai ake oltau lenye. Ore ake pee eibung enkitoria akurraki too nkaik enyena, near metuata isinkan lenyena apa ootara menye ilo aiguanani. Kake eitu ninye ear nkera enye metuata terisioroto e nena naaigeroki too nkitanapat, tiatua embuku e Musa, teina apa naitanapishe Olaitoriani ajo, “Meari loo menye metuata tenkaraki nkera, anaa meari nkera metuata tenkaraki iloo menye. Kake keye ake pooki tung'ani te nkaraki eng'oki enye makewan.” Neitoki Amasia aiturrurr iltung'ana le Yuda, neitoton ninche anaa ilukuny oo nkajijik oo loo menye, tiabori ilarikok le njore loo nkalifuni o loo maa iip te Yuda pooki o te Benchamen. Nepik ninye lelo loo larin tikitam neilep. Ore esiana enye neaku iltung'ana nkalifuni iip uni gelunot, ooidim olarrabal, ooidim aatanap iremeta o long'oi. Neitoki sii aiger iltung'ana nkalifuni iip nabo magil ooing'uaa Isiraeli te shekeli iip nabo e nkosholai. Kake eewuo oltung'ani le Nkai enetii ninye nejoki, “Lo aiguanani, mincho enjore e Israel elo tenebo iyie, amu metii Olaitoriani tenebo Isiraeli, tenebo kulo pooki le Efraim. Kake tenaa ijo iyie tena oitoi ilo agolu to larrabal, naa aikilo anang'aa Enkai te dukuya ilmang'ati; amu eeta Enkai engolon naretishore o enanang'arie.” Nejoki Amasia ilo tung'ani le Nkai, “Kaa iyiook kias tenkaraki nena talantani iip nabo naishoo nanu enjore oo Siraeli?” Newalu ilo tung'ani le Nkai ajo, “Eikindim iyie Olaitoriani aishoo nkumok naalang kuna.” Neisho Amasia ina jore naing'uaa Efraim metorrinyoyu alo ang. Negorokino ninche Yuda oleng; nerrinyo aapuo ang te ngoro sapuk. Kake eitagoluo Amasia, nerikoo ninye iltung'ana lenyena, nepuo oerata le munyan, nesesekuan iltung'ana oogiroo nkalifuni tomon le Seir. Neibung iltung'ana le Yuda kulikae nkalifuni tomon eishu, neya ninche enchumata endapidapoi nesulaa ninche teine; nepurda pooki aaku mpurdat. Kake ore ilapa tung'ana le njore ootorrinyo Amasia, amitiki epuo olarrabal tenebo ninye, nedoiki nkanas e Yuda ebaiki Samaria o metabaiki Bet-horon, near iltung'ana nkalifuni uni tiatua ninche, neya iyarunot kumok oleng. Ore pee errinyunye Amasia eing'uaa-esesekuanata oo ltung'ana le Edom, neyau nkaitin oo ltung'ana le Seir, neitaa ninche nkaitin enyena, neserem ninche, neitaiki ninche ilasarri. Ore enkaraki ina negorokino Olaitoriani Amasia, neirriwaki ninye oloiboni le Nkai, otiaaka ninye, “kainyoo pee imbelekenyakine nkaitin oo ltung'ana neitu ninye ekordu iltung'ana lenye maate te nkaina ino?” Kake ore eton eirorita ninye nejoki olaiguanani ninye, “Eikintaa iyiook iyie olaikooni lang? Tigirayu! Eijo iyie pee kiari tua?” Neaku etigire ilo oiboni le Nkai, kake etejo, “Ayiolo nanu ajo eitobira Olaitoriani pee kindaikie iyie, enkaraki nitaasa ena neitu ining enkikoo ai.” Neitoki Amasia aikilikuanishore iltung'ana lenyena, neirriwaki Yoash olayioni le Yehoahas olkilikuai. Naa Yehu olaiguanani loo Siraeli apa nkakuyiaa lenye. Nejoki Amasia Yoash, “Wou maing'urata too nkomomi.” Neirriwaki Yoash ilo aiguanani loo Siraeli Amasia olkilikuai nejoki, “Eirriwaka enkiti aitubului e Lebanon olkilikuai oltarakuai, ajoki, ‘Nchoo entito ino meyama olayioni lai’; nelotu eng'ues e ntim e Lebanon aim ine neituny ina aitubului amut. Ijo taata iyie, ‘Ng'ura, aidaikie nanu Edom,’ nikitudumua iyie oltau lino to lwuasa. Kake ore taata totona iyie tiang; kainyoo iyie pee impiru enyamali pee itum atua, iyie tenebo Yuda?” Kake etanya Amasia ening, amu enkitobirata e Nkai apa ina, pee etum atipika ninye atua nkaik oo lmang'ati lenye, enkaraki nateserema ninche nkaitin e Edom. Neaku eshomo apa Yoash olaiguanani le Israel, netumo ninye o Amasia ilo aiguanani le Yuda, netumo to larrabal te Betshemesh, e Yuda. Nemir Israel Yuda neisik pooki tung'ani alo enkang enye. Neibung Yoash olaiguanani loo Siraeli Amasia ilo aiguanani le Yuda, olayioni le Yoash, olayioni le Ahasia te Betshemesh neyau ninye te Yerusalem, neuroo ninye esuntai e Yerusalem, erishata oo ntemat e nkaina iip ong'uan, ebaiki enkishomi e Efraim o metabaiki kishomi olpijata. Neya ninye sahabu pooki o enkosholai, o masaa pooki naatii atua enkaji e Nkai, netii Obed edom tenebo ninche. Neya sii ilchumat ootii enkaji o laiguanani, o ltung'ana ooibung'aki aaya, nerrinyo alo Samaria. Ore Amasia olayioni le Yoash olaiguanani le Yuda nebik ilarin tomon o imiet etulusoyie keeya e Yoash olayioni le Yehoahas, olaiguanani loo Siraeli. Ore apa nkulie kiaasin e Amasia, ebaiki enkiterunoto o metabaiki enkiting'oto, neigeroki too mbukui oo laiguanak le Yuda o Israel. Ore ebaiki ina kata apa naibelekenye ninye apaash Olaitoriani, neitobir ninche pee ear ninye metua te Yerusalem. Neisikaki ninye Lakish. Kake etusujakita ninche ninye Lakish, near ninye metua teine. Neyau ninche ninye too mbartan. Nenukari tenebo loo menye te nkanasa e Daudi. Ore iltung'ana pooki le Yuda, neibung Usia laa oloo larin tomon o ile, neitaa ninye olaiguanani terishata e papaai lenye Amasia. Etesheta apa ninye Elot nerrinyoki ninye Yuda, ina kata eidipa olaiguanani atua. Oloo larin tomon o ile apa Usia pee eiteru aitoreisho, neitoreisho ninye ilarin onom oare te Yerusalem. Ore apa enkarna e ng'otonye naa Yekolia e Yerusalem. Etaasa apa ninye mbaa sidain too nkonyek o Laitoriani te risioroto e nena pooki apa naataasa papaai lenye Amasia. Eing'orua apa ninye Olaitoriani, too nkolong'i e Sakaria, laa ninye oiteng'ena ninye te uriata o Laitoriani; naa ore anaa enaserem Olaitoriani neisho Enkai ninye metubula. Eshomo ninye aitayunye Ilfilisti olarrabal, neuroo esuntai e Gat o e suntai e Yabne, o esuntai e Ashdod; neshetu ninye nkanas too lpolosien le Ashdod, te kulie wuejitin tiatua Ilfilisti. Etaretuo Enkai ninye tialo Ilfilisti, o lelo Marabu apa oomanya Kurbal, o Lmeuni. Etalaa apa Ilamoni kodi aaisho Usia, ore olning'o lenye nelo o metabaiki ilpolosien le Misiri, amu etaa apa ninye oltung'ani ogol oleng. Ore ake sii eteshetua apa Usia iltaleta te Yerusalem te kishomi o lpijata, o te kishomi oerata, o to lkutoto, neshetu ninche aitagol. Neshetu ninye iltaleta tiong'ota, neturu ilchorroi kumok, amu eeta apa ninye nkishu kumok oleng too ldoinyio o te nkop naisiasha. Neeta apa ninye ilaramatak o laitobirak loo lng'anayio too ldoinyio o te wueji sidai enterit, amu kenyor apa ninye enturore e nkurma. Neeta sii apa Usia enjore oo sikarini, ooidim olarrabal, too lturrurri, terisioroto enkikena e Yeiel ilo aigeroni o Maaseia ilo kitok, tiabori erikoto e Hanania, obo apa loo larikok le njore lo laiguanani. Ore esiana pooki oo lukuny oo nkajijik oo loo menye, oo ltung'ana magil yiolot, naa nkalifuni are o iip ile. Ore ti abori erikoroto enye netii enjore oo ltung'ana nkalifuni iip uni o oopishana o iip imiet, ooidim aatigilunore engolon kitok, pee eretu olaiguanani tialo ilmang'ati lenyena. Neitobiraki Usia enjore pooki ilong'oi, o remeta, o maupen oo sekenke, o ruparen; o nkai o mbaa, o soito oo nang'ari le nkopito. Ore te Yerusalem neitobir iwuejitin neengororieki mbaa, too iltaleta, o too lpijat. Nengorori mbaa nenang'ari isoito sapuki. Nelo olning'o enelakua, amu etaretoki ninye oleng, o metaa oltung'ani ogol. Kake ore apa pee eaku olaiguanani Usia oltung'ani ogol, newuasayu ninye, ina pee eidak ninye. Amu eitarruoyie apa ninye to Laitoriani Enkai enye, nejing atua enkaji o Laitoriani alo apej enkorropil to lperere lo lasar le nkorropil. Kake eshomo apa Asaria olapolosani ajing'aki ninye, tenebo ilapolosak ntomoni isiet lo Laitoriani yiolot, nepuo ninche aaitasheiki olaiguanani Usia, nejoki ninye, “Mme esiaai ino Usia, pee ipejoki Olaitoriani enkorropil, kake esiaai oo lapolosak, lelo ayiok le Aron, laa ninche apa eiteng'elaki pee epej enkorropil. Tupuku mpang'a te wueji sinyati, amu itaasa embae torrono, amu mikiyaki ina enkanyit to Laitoriani, Enkai.” Negoro Usia. Neeta ninye te nkaina entoki napejieki enkorropil, ore ake pee egorokino lelo apolosak, nejing enkeeya oo lbolot enkomom enye, te dukuya lelo apolosak ootii atua enkaji o Laitoriani, ooitashe tembata olperere lo lasar le nkorropil. Ore Asaria ilo apolosani kitok, o lelo apolosak pooki neing'or ninye, naa ng'ura, etijing'a enkeeya oo lbolot enkomom enye! Neipang'ie ninye boo nabo kata, ore ninye makewan neisarrisar alo boo, amu etoosho Olaitoriani ninye. Neton olaiguanani Usia eeta enkeeya oo lbolot o metua. Naa ore anaa oltung'ani oata enkeeya oolbolot neton te nkaji enye makewan. Amu eiwuang'ieki ninye tiatua enkaji o Laitoriani. Naa Yotam olayioni lenye ninye apa oing'or ntokitin e nkaji o laiguanani, neitore iltung'ana leina kop. Naa ore apa nkiaasin pooki e Usia, ebaiki enkiterunoto o metabaiki enkiting'oto, neigero oloiboni le Nkai oji Isaya olayioni le Amos. Neirrag Usia etua anaa apa loo menye, nenukaa ninche ninye tenebo loo menye te wueji oo nkuraren oo laiguanak, amu etejo ninche, “Ole nkeeya oo lbolot ninye.” Neitoreisho Yotam olayioni lenye te rishata enye. Oloo larin tikitam o imiet apa Yotam pee eiteru aitoreisho, neitoreisho ninye ilarin tomon o ile te Yerusalem. Ore apa enkarna e ng'otonye naa Yerusha entito e Sadok. Neas ninye mbaa sidain too nkonyek o Laitoriani terisioroto enena pooki apa naataasa papaai lenye Usia, kake eitu ninye elo aibung ntokitin e nkaji o Laitoriani. Kake eton ake eas iltung'ana mbaa torrok. Etesheta ninye kishomi e shumata e nkaji o Laitoriani neshet oleng esuntai e Ofel. Etesheta sii nkanas teina kop oo ndonyio e Yuda, o sempewueti, o ltaleta te nena doinyio e ntim. Etaarare ninye olaiguanani le Amon nemir ninye. Neisho Ilamoni ninye teilo ari shekeli iip nabo e nkosholai, o lbenia nkalifuni tomon le nkano, o lbenia nkalifuni tomon le shairi. Neisho Ilamoni ninye nena tokitin too larin okuni. Neaku etaa Yotam oltung'ani magilani enkaraki naipirie ninye nkoitoi enyena dukuya Olaitoriani Enkai enye. Ore apa nkulie kiaasin e Yotam, o larrabali lenyena pooki, o nkoitoi enyena, ng'ura neigeroki tiatua embuku oo laiguanak loo Siraeli o Yuda. Oloo larin tikitam o imiet apa ninye pee eiteru aitoreisho, neitoreisho ninye ilarin tomon o ile te Yerusalem. Neirura Yotam etua anaa loo menye, nenukaa ninche ninye te nkanasa e Daudi; neitoreisho Ahas olayioni lenye te rishata enye. Oloo larin tikitam apa Ahas pee eiteru aitoreisho, neitoreisho ninye ilarin tomon o ile te Yerusalem. Neitu ninye eas mbaa sidain too nkonyek o Laitoriani, anaa apa papaai lenye Daudi. Kake eibung'a ninye irrekiei loo laiguanak le Israel. Eitobira doi ninye nkitanyaanyukot o ntokitin naatosholaki aaitobiraki Baal. Nepej enkorropil to erata lo layioni le Hinom; nepejoo ilayiok lenyena anaa olasar, te risioroto e nena tabo apa oo loshon ooterewa Olaitoriani aiwuang'ie te dukuya iltung'ana le Israel. Neitayu ninye olasar nepejoo enkorropil, too wuejitin e shumata o too ldoinyio, o tiabori pooki shani onyori. Ore enkaraki ina eishooyie Olaitoriani ninye apik nkaik o laiguanani le Siria. Nemir olaiguanani le Siria ninye, neibung iltung'ana lenyena kumok neya ninche Dameski. Eishooyioki sii apa aapik nkaik o laiguanani le Israel, ilo otimira ninye te sesekuanata sapuk. Amu ore olayioni le Remalia netasesekuana iltung'ana nkalifuni iip nabo o tikitam te Yuda te nkolong nabo. Ore lelo pooki naa iltung'ana yiolot, enkaraki natanyaita ninche Olaitoriani, Enkai oo loo menye. Ore Sikri ilo tung'ani magilani le Efraim, nesesekuan Maaseia, olayioni lo laiguanani, o Asikam ilo kitok le nkaji e nkitoo, o Elkana ilo osujaki te nkitoo o laiguanani. Ore iltung'ana le Israel neibung iltung'ana nkalifuni iip are e lelo tung'ana lenye, nkituaak o layiok o ntoyie. Ewaita sii iyarunot kumok te ninche neya Samaria. Kake etii apa oloiboni lo Laitoriani ine, oji enkarna enye Oded. Neipang ninye alo atumore ina jore naing'uaa Samaria, nejoki ninche, “Ng'ura, ore amu etagorokine apa Olaitoriani, Enkai oo loo papaai linyi Yuda, eishorua ninche apik nkaik inyi, kake itasesekuana intae ninche te ngoro naing'uaa shumata. Niyieuu taata intae nintaa irrindiki iltung'ana le Yuda o le Yerusalem, Ilewa o nkituaak. Aimiatata intae ing'ok inyi maate tialo Olaitoriani Enkai inyi? Entoning'oki naa taata nirrinyirrinyi lelo apa limbung'a aayau, amu etii engoro napi o Laitoriani shumata intae.” Ore apa kulikae tung'ana kituaak too ltung'ana le Efraim, Asaria olayioni le Yohanan, o Berekia olayioni le Meshilemot, o Yehikia olayioni le Shalum, o Amasa olayioni le Hadalai, neitashe aagilunore lelo apa ooing'uaa olarrabal. Nejoki ninche, “Miyauu intae lelo yarunot ene, amu ijojo intae pee iyauu shumata iyiook enkitarruroto to Laitoriani aaponiki ing'ok ang o nkitarrurot ang maate. Amu aikitok enkitarruoroto ang maate, netii engoro napi tenkaraki Israel.” Neaku etapala lelo tung'ana le njore lelo yarunot aaisho meshomo, tenebo nena masaa, te dukuya lelo kituaak o eumata pooki. Ore lelo tung'ana apa ooipotoki nkarn nedumunye aaya lelo yarunot, o masaa naatarayioki, neishopoki nkilani lelo lemeishopo. Neishopoki ninche nkilani, neisho ninche inamuka, neisho endaa o entoki naok, neyel ninche te ilata. Ore lelo lemeidimari nenapi too sirkon. Neyau ninche enkop enye maate, Yeriko enkanasa oo ltuka. Neitoki ninche aarrinyo aapuo Samaria. Ore apa teina kata neomonu olaiguanani Ahas eretoto to laiguanani le Asiria. Amu enyaakita iltung'ana le Edom aarasaki nemir Yuda, neya ninye nkanas e Betshemesh o Aijalon, o Gederot, o Soko tenebo nkang'itie enyena kutiti, neya Timna tenebo nkang'itie enyena kutiti, o Gumso tenebo nkang'itie enyena kutiti, nemanyisho ninche tenena wuejitin. Amu eitadouo apa Olaitoriani Yuda tenkaraki Ahas olaiguanani le Israel, amu etaasa apa ninye inenkarruoisho tiatua Yuda, netaa olemeisiligayu to Laitoriani. Neaku eewuo Tilgat-pilnesa, ilo aiguanani le Asiria agilunore ninye, ore terishata naitagol ninye neidop ninye. Amu eitayio apa Ahas te nkaji o Laitoriani, o te nkaji o laiguanani o too nkajijik oo lkituaak, ntokitin e kodi naaishoo olaiguanani le Asiria; kake eitu eretu nena tokitin ninye. Ore teina kata enye o sina neponari ninye aaku olemeisiligayu to Laitoriani. Ore ake sii ele aiguanani oji Ahas, amu etopolosaka ninye nkaitin e Dameski, naa ninche apa naatimira ninye, nejo ninye, “Ore enkaraki natareto nkaitin oo ltung'ana le Asiria ninche, kapolosaki nanu ninche pee aatum aataretu nanu.” Kake etaa ninche enkidaata te ninye o te Israel pooki. Neiturrur Ahab tenebo imasaa e nkaji nedung'udung nena masaa aitaa ndung'udung'ot, neiken ninye nkutukie oo nkajijik e nkaji o Laitoriani; neitobiraki kewan ilperereni loo lasarri te pooki pijata le Yerusalem. Ore tiatua pooki anasa e Yuda, neitobir ninye iwuejitin neeika neepejokinye enkorropil kulie aitin, neitagor Olaitoriani, Enkai oo loo menye. Ore apa nkulie kiaasin enyena o nkoitoi enyena pooki, ebaiki enkiterunoto o metabaiki enkiting'oto, ng'ura eigeroki te mbuku oo laiguanak le Yuda o Israel. Neirrag Ahas etua anaa loo menye, nenukaa ninche ninye te nkanasa, tiatua Yerusalem, amu eitu ninche eyau ninche nkuraren oo laiguanak le Israeli. Neitoreisho Hesekia olayioni lenye te rishata enye. Eiterua apa Hesekia aitoreisho aa o loo larin tikitam o imiet, neitoreisho ninye ilarin tikitam ooudo te Yerusalem. Ore apa enkarna e ng'otonye naa Abija entito e Sekaria. Neas mbaa sidain te dukuya Olaitoriani, te risioroto e nena pooki apa naataasa papaai lenye Daudi. Ore to lari le dukuya le nkitoria enye, to lapa le dukuya, nebol ninye nkutukie oo nkajijik e nkaji o Laitoriani, neram ninche. Neitijing'u ninye ilapolosak o Lawi, neiturrur ninche to lgoriet le nkalo oloo saen, nejoki ninye ninche, “Entoning'oki nanu lo Lawi! Entisinya ate, nintisinyinyi enkaji o Laitoriani, Enkai oo loo papaai linyi, niwuang'ieng'ie intae olduruk teine wueji sinyati. Amu etaa apa iloo papa ilemeisiligayu, netaasa ninche entorroni too nkonyek o Laitoriani Enkai ang; etung'uitie ninche ninye, neibelekenyate aapaash emanyisho o Laitoriani, neisho ninche ninye oriong. Neiken sii kutukaji eine wueji sinyati, near iltaai, neitu epejoki enkorropil anaa eishooyo ilasarri teine wueji sinyati, aaisho Enkai e Israel. Ore enkaraki ina, nelotu engoro o Laitoriani napi shumata e Yuda o Yerusalem, neitaa ninche entoki naitureisho, o enenking'asia, o entoki naimakini, anaa enidolidolo too nkonyek inyi. Amu ng'ura to lalem apa etabatatate loo papa o ilayiok lang, o ntoyie ang, ore nkituaak ang naatii netii atua eyararoto tenkaraki ena. Etii naa taata oltau lai pee aitobir osotua lo lning'o o Laitoriani, Enkai e Israel, pee etum ina goro enye napi aibelekenyayu te iyiook. Na kera aainei, emimenaa naa taata, amu etegelua intae Olaitoriani pee ipuopuo aaitashe te dukuya ninye, pee isiayiayia ninye, niakuku ilaisiaayiak lenyena nipejokiki ninye enkorropil.” Neitoki aadumunye kulikae Lawi, Mahat olayioni le Amasia, o Yoel olayioni le Asaria loo layiok le Kohat; ore too layiok le Merari naa Kish olayioni le Abdi, o Asaria olayioni le Yahalel; Ore too le Gershon, naa Yoa olayioni le Sima, o Eden olayioni le Yoa. Ore too layiok le Elisafan, naa Shimri o Yeul; ore too layiok le Asaf naa Sekaria o Matania; ore too layiok le Heman, naa Yehuel o Shimei; ore too layiok le Yedutum naa Shimeia o Usiel. Neiturrur ninche ilalashera lenye neitisiny ate, nejing ninche atua anaa enaitanapishe olaiguanani, too rorei lo Laitoriani, pee eitisinyi enkaji o Laitoriani. Nepuo ilapolosak olgilata liatua le nkaji o Laitoriani aaitisiny, neitayu ninche olduruk pooki, apa otii atua enkaji o Laitoriani aayau boo, ilo goriet le nkaji o Laitoriani, nedumu Ilawi aaya oerata le Kidron. Eiterutua apa ninche aaitisiny te nkolong e dukuya o lapa le dukuya, ore te nkolong e isiet o lapa nepuonu ninche olgoriet le kutukaji enkaji o Laitoriani; ore too nkolong'i isiet neitisiny ninche enkaji o Laitoriani ore te nkolong e tomon o ile o lapa le dukuya neidip ninche. Neitoki ninche aapuo enetii olaiguanani Hesekia nejoki ninye, “Kintisinya iyiook enkaji o Laitoriani pooki, ilo perere lo lasar opejori o masaa enyena pooki, o ina mesa e mukate e nkitoduaaroto o masaa enyena pooki. Ore imasaa pooki apa naawa olaiguanani Ahas te nkitoria enye apa meisiligayu, nikintobira iyiook, nikintisinya; naa ng'ura etii ninche dukuya olperere lo lasar lo Laitoriani.” Neitoki olaiguanani Hesekia adumunye tadekenya neiturrur iltung'ana kituaak le nkanasa, neilep alo enkaji o Laitoriani. Neyau ninche iloing'ok oopishana, o lmeregeshi oopishana o lkuoo le kerra oopishana, tenkaraki olasar loo ng'ok o tenkaraki enkitoria, o tenkaraki ewueji sinyati o tenkaraki Yuda. Neitoki ninye aitanap ilapolosak lelo ayiok le Aron pee eishooyo ninche anaa olasar te nchumata olperere lo lasar lo Laitoriani. Neyieng ninche lelo oing'ok, neng'amu ilapolosak osarge neisuaki olperere lo lasar; neyieng lelo meregeshi neisuaki osarge lenye olperere lo lasar; neyieng ilkuoo le kerra neisuaki osarge lenye olperere lo lasar. Neitokini aayau lelo kineji anaa olasar loo ng'ok, dukuya olaiguanani o eumata, neiteleiki ninche nkaik enye shumata ninche. Neyieng ilapolosak ninche neitobir olasar loo ng'ok to sarge le lelo kineji te nchumata olperere lo lasar, pee eitobir olning'o lo sotua tenkaraki Israel pooki. Amu eitanapishe olaiguanani nchere, ore olasar opejori, o lasar le ng'oki naa keitobiri tenkaraki Israel pooki. Nepik ninye Ilawi atua enkaji o Laitoriani, eeta nkinantani dapashi oo saanini, o Nkai oo sinkolioitin, o lwululi loo usin, te risioroto enkitanapata e Daudi, o ene Gad ilo aduaani lo laiguanani o Natan oloiboni le Nkai. Amu ore apa ina kitanapata naa Olaitoriani eing'uaa eimunye iloibonok lenyena. Neitashe Ilawi eeta nena kinantani e Daudi neitashe ilapolosak eeta ntarumpetani. Neitoki Hesekia aitanapisho pee eitobiri olasar opejori te nchumata olperere lo lasar. Ore ake pee eiteruni ilo perere lo lasar, neiteruni sii osinkolio oranyakini Olaitoriani, neitusuji eoshoto oo ntarumpetani, o nkinantani e Daudi ilo aiguanani le Israel. Neserem ina umata pooki, neranyisho ilaranyak, nebuaku ntarumpetani. Neranyisho nena pooki o metaba anaa neishunye ilo asar opejori. Ore ake pee eidipayu olasar, neirrugo olaiguanani o lelo pooki ootii tenebo ninye aaserem. Neitanap olaiguanani Hesekia o lapolosak, o ltung'ana kituaak ilapolosak, metaranyaki Olaitoriani enkisisa too rorei le Daudi, o Asaf ilo aduaani. Nerany ninche enkisisa o Laitoriani te nchipai, neirrugo ninche aaserem. Neitoki Hesekia ajo, “Intisinyakita taata intae ate Olaitoriani; entinyiku ene; niyauu ilasarri o nkishorot e nashe atua enkaji o Laitoriani.” Neyau ina umata ilasarri, o nkishorot e nashe, ore lelo pooki oota enyorrata too ltauja, neyau ilasarri oopejori. Ore esiana oo lasarri oopejori, ooyautua ina umata naa iloing'ok ntomoni naapishana, o lmeregeshi iip nabo, o lkuo le kerra iip are. Ore kulo pooki naa iloo lasarri oopejokini Olaitoriani. Ore olasar lenkitisinyata naa iloing'ok iip ile o nkerra nkalifuni uni. Kake aikuti apa ilapolosak oleng nemeidim aaitobira ilasarri oopejori pooki, neaku eitisinya apa ilapolosak ate, neretu ninche ilalashera lenye, o metaba anaa neidipayu esiaai. Amu kedupa apa Ilawi too ltauja aalang ilapolosak. Ore tenebo ilo asar opejori kitok, netii eilata o lasar le seriani, netii ilasarri oopikuni tenkaraki ilasarri oopejori. Neikoni neijia aarrinyu enkisiaayiare e nkaji o Laitoriani. Ore Hesekia o ltung'ana pooki neshipayu tenkaraki ina naitaasa Olaitoriani iltung'ana; amu eewuo ina bae nabo kata. Neirriwaa Hesekia olkilikuai te Israel pooki o Yuda, neigeroki sii Efraim impala, o Manase, pee epuonu ninche enkaji o Laitoriani te Yerusalem, pee epuonu aaibung pasaka o Laitoriani Enkai e Israel. Amu eibung'a olaiguanani, o ltung'ana pooki kituaak, o eumata pooki natii Yerusalem enkiguana, pee eibung pasaka to lapa liare. Amu metumoki apa ninche aaibung'a te rishata enye amu eitu eitisiny ilapolosak ate, te siana naishiaakino, neitu sii eiturrurro iltung'ana te Yerusalem. Nedol olaiguanani aa sidai ina kitobirata, nedol sii ina umata aajo aisidai. Nelikio ninche aaibalunye te Israel pooki ebaiki Beer-sheba o metabaiki Dan, nchere pee epuonu iltung'ana aaibung sabato tenkaraki Olaitoriani Enkai e Israel, te Yerusalem, amu eitu aikata eibung te nkumoi anaa apa enatolimuoki. Nepuo ilkipaareta enkop e Israel pooki o Yuda eeta mpala naaing'uaa olaiguanani o ltung'ana lenyena kituaak, anaa enaitanapishe olaiguanani, ejo, “Lo tung'ana le Israel, entorrinyokinoto Olaitoriani, Enkai e Abraham, o Isaak, o Israel, pee eitoki sii ninye arrinyokino ilo pisiai linyi, apa otelekua too nkaik oo laiguanak le Asiria. Emitiuu intae anaa loo papaai linyi anaa ilalashera linyi, apa lemeisiligayu to Laitoriani Enkai oo loo menye, ore enkaraki ina neitaaki ninche olmuate, anaa enidolitata. Emiaku naa taata iloosho murto anaa apa enatiu iloo papaai linyi, kake embelekenyakinoto Olaitoriani, nipuonunu ewueji enye sinyati, apa naitisinya ninye ntarasi, nisiayiayia Olaitoriani Enkai inyi, pee etum ina goro enye napi aibelekenyayu atapaasha intae. Amu tenimbelekenyakinono intae Olaitoriani, ore ilalashera linyi o nkera inyi netum olng'ur te lelo apa ootaraitie ninche, nerrinyunye ninche aapuonu ena kop. Amu ore Olaitoriani Enkai inyi naa kenana oshoke neeta olng'ur, nemeboin enkomom enye aitapaash intae, te nimbelekenyakinono ninye.” Nepuo lelo kipaareta aaimaa nkanas pooki, te nkop e Efraim pooki o Manase, nepuo o metabaiki Sebulon, kake etakueniyie iltung'ana ninche nesurdaany, neikordod ninche. Ilkuti tung'ana ake le Asheri o le Manase o le Sebulon ooitoborruote nepuonu Yerusalem. Etii sii apa enkaina o Laitoriani shumata Yuda, pee eisho ninche oltau obo oasie nena naaitanapishe olaiguanani o lkituaak lenyena, tialo ororei lo Laitoriani. Nepuonu iltung'ana kumok aaiturrurro tenebo aaibung osirua loo mukateni neitu eisuijieki; to lapa liare, eumata sapuk oleng. Neasisho ninche, neiwuang'ie ilperereni loo lasarri apa ootii Yerusalem, o lperereni loo lasarri oopejorieki enkorropil, neya ninche nepuo aanang'aki oerata le Kidron. Neyieng ninche ilkuoo le kerra le pasaka, te nkolong e tomon oo ng'uan o lapa liare. Ore ilapolosak o Lawi nekurru, nepuo ninche aaitisiny ate, neyau ilasarri oopejori atua enkaji o Laitoriani. Nejing ninche irishat enye terisioroto enkitanapata e Musa, ilo tung'ani le Nkai. Neisuaya ilapolosak ilo sarge otang'amutua too nkaik oo Lawi. Amu etii apa ilkumok teina umata leitu eitisiny ate. Ore enkaraki ina eteyiang'a Ilawi ilkuoo le kera te pooki ng'ae leitu eitisinyi, pee eitaae sinyati to Laitoriani. Ore teilo orora lo lorere naa Efraim eing'uaa ilkumok lenye, o Manase, o Isaakar, o Sebulon, neitu eitisiny ate, eji neinosa ake pasaka kake mme te nkoitoi natolimuoki. Amu etoomonoko Hesekia ninche ejo, “Metapalaki Olaitoriani supat pooki tung'ani, oing'oru to ltau lenye Enkai, Olaitoriani Enkai oo loo menye, hoo duoo teneme too nkitanapat e wueji sinyati e nkitukuore.” Nening Olaitoriani Hesekia, neishiunye iltung'ana. Ore iltung'ana le Israel apa ootii Yerusalem neibung osirua loo mukateni neitu eisuijieki nkolong'i naapishana, te nchipai sapuk oleng. Ore Ilawi o lapolosak neisis Olaitoriani anaake. Neranyaki te nkidimata enye pooki Olaitoriani. Neirorie Hesekia aitagol lelo Lawi apa ooitodolutua enkarriyiano te nkisiayiare o Laitoriani. Neinos iltung'ana ina daa o sirua nkolong'i naapishana. Neitayu ilasarri leseriani, neisho enashe Olaitoriani Enkai oo loo menye. Neitoki eumata pooki aaning'okino tenebo pee eibung osirua nkulie olong'i naapishana. Neaku eibung'a ninche nkulie olong'i naapishana, te nchipai. Amu eishoo apa Hesekia, ilo aiguanani le Yuda eumata ilmong'i enkalifu nabo, o nkerra nkalifuni naapishana tenkaraki olasar. Ore ilkituaak neisho ina umata ilmong'i enkalifu nabo o nkerra nkalifuni tomon. Ore ilapolosak neitisiny ate te nkumoi oleng. Ore ina umata pooki e Yuda, oina umata pooki naing'uaa enkop e Israel, o lelo oomanya Yuda, neshipayu. Neaku sapuk oleng enchipai te Yerusalem, amu ore ebaiki enkata e Solomon olayioni le Daudi olaiguanani le Israel, eitu aekata etumi entoki naaijo ena te Yerusalem. Neinyototo ilapolosak o Lawi aamayian olorere, nening'i oltoilo lenye, nelotu enkomono enye ine wueji enye sinyati te keper. Ore apa pee eidipayu nena pooki, ore lelo Siraeli pooki apa ootii ine, neipang aapuo nkanas e Yuda nebel aaitaa mbelibelat ing'apeta neuroki Asherim enkop, nesulaa iwuejitin neeika, o lperereni loo lasarri te Yuda pooki, o te Benchamen, o te Efraim o te Manase, ometaba anaa neidaikie pooki. Neitoki iltung'ana pooki le Israel aarrinyo aapuo nkanas enye, nelo ake oltung'ani ewueji enye. Negelu Hesekia ntukusi oo lapolosak o noo Lawi. Entukus ake o enkae tukus, negelu ake entukus te risioroto esiaai enye, ilapolosak o Lawi tenkaraki ilasarri oopejori o lasarri le seriani. Pee eisiaaisho too nchomito oo lng'oborri lo Laitoriani neishooyo enashe o enkisisa. Ore apa enkishorunoto o laiguanani naing'uaa imasaa enyena makewan, naa tenkaraki ilasarri oopejori. Ilasarri oopejori le tadekenya o le nteipa. O lasarri oopejori le sabato, o lapaitin ng'ejuko, o siruai oogeluno, anaa enaigeroki tiatua enkitanapata o Laitoriani. Neitanap ninye lelo tung'ana apa oomanya Yerusalem, pee eishooyo erubata oo lapolosak o Lawi, pee etum ninche aaishoo ate enkitanapata o Laitoriani. Ore ake ina kata pee eitubulari ina kitanapata, neishooyo iltung'ana le Israel te nkumoi, ilng'anayio lenye le dukuya le ntapa, o enaisho oo sabibu, o eilata, o enaisho oo lotorok o ntokitin pooki naanotoki te nkurma. Neyau ninche te leng'on erubata e tomon e pooki toki. Ore iltung'ana le Israel o le Yuda ootii nkanas e Yuda neyau sii ninche erubata e tomon oo nkishu o nkerra, o ntokitin apa naaitisinyaki neiteng'elakini Olaitoriani Enkai enye, neirragieki ninche aasot too lturrurri. Ore to lapa liokuni neiteru ninche aaiturrur lelo sotot neidip to lapa liopishana. Ore ake pee elotu Hesekia o lkituaak aadol lelo sotot, neisis Olaitoriani nemayian iltung'ana lenyena le Israel. Neikilikuanishore Hesekia ilapolosak o Lawi tenkaraki lelo sotot. Newaliki ninye Asaria ilo apolosani kitok le nkaji e Sadok, nejoki, “Ore anaa neiteru ninche aayau nkishorot atua enkaji o Laitoriani kitadaate iyiook, nikiraposho nikileku nkumok. Amu etamayiana Olaitoriani iltung'ana lenyena, neaku kinoto iyiook ele shumati pooki otelekua.” Neitoki Hesekia aitanap ninche meitobira ilgilat tiatua enkaji o Laitoriani, neitobir ninche. Neyau ninche nena kishorot, o ematua e tomon, o nena tokitin naaitisinyaki. Ore olaitasheikinoni kitok naa Konania olayioni le Lawi, tenebo Shimei olalashe lenye, aa ninye oliare. Naa Yehiel apa, o Asasia, o Natan, o Asahel, o Yerimot, o Yosabad, o Elieli, o Ismakia, o Mahat, o Benaia, ninche ilaitasheikinok ooretu Konania o Shimei olalashe lenye. Ninche etegelua olaiguanani Hesekia o Asaria ilo kitok oitasheiki enkaji e Nkai. Naa Kore olayioni le Imna, le Lawi, ninye olarriponi le nkishomi enkalo oloo saen, ninye oitasheiki nkishorot o lpela naaishori Enkai. Pee eiteng'el nkishorot naaiteng'elakaki Olaitoriani o nena kishorot naasinya oleng. Naa Eden, o Miniamin, o Yoshua ninche apa ootonyuaa aaretu ninche te nena anas oo lapolosak, pee eorioriki ilalashera lenye irubat enye, ilbotoro o looti, aaitorisioki, too ntukusi. Meteleku ake lelo ooigeroki anaa ilmareita, ilewa ebaiki ilarin okuni neilep. Lelo pooki oojing'u atua enkaji o Laitoriani, anaa enayieuni te pooki olong, te nkisiayiare enye terisioroto oo siaaitin enye, too lturrurri lenye. Ore apa enkigeroto oo lapolosak naa te risioroto oo nkajijik oo loo menye. Aa taa Ilawi ooitabaya ilarin tikitam o imiet neilep naa te risioroto oo siaaitin enye too lturrurri lenye. Ore apa ilapolosak neigeroki tenebo nkera enye pooki, o nkituaak enye o layiok lenye, o ntoyie enye, o eumata pooki. Amu keisiligayu apa ninche egolie ate aaitaa sinyat. Ore too layiok le Aron, lelo apolosak, lelo apa ootii enkop namanya pooki ng'ae, o nkanas enye netii iltung'ana ootii atua kulie anas ootegelakaki too nkarn, pee eoriki irubat pooki lee tiatua ilapolosak, o pooki tung'ani tiatua Ilawi apa ooigeroki enkarna enye. Neas Hesekia ina tiatua Yuda pooki, neas ninye mbaa sidain naaishiaakino te dukuya Olaitoriani Enkai enye. Ore pooki siaai nataasa ninye te nkisiayiare e nkaji e Nkai, o te risioroto e nkitanapata eing'orua Enkai enye, neas ninye ina to ltau lenye pooki. Nebul ninye. Ore etulusoitie kuna baa o kuna kiaasin, e nkisiligata, nelotu Senakerib arasaki Yuda neun ilng'oborri aipirakinye nena anas naasheta isunta, eji ejo ninye tenaa keisulie. Ore ake pee edol Hesekia ajo eewuo Senakerib, neyieu ninye niarare Yerusalem, neitobir tenebo ilkituaak lenyena o ltung'ana lenyena magil, pee eibooyo enkare e nena shorroi naatii auluo enkanasa. Neret ninche ninye. Neiturruro olorere kitok, neibooyo nkonyek oo nkariak pooki o erata apa naaruko teina kop, ejo, “Kainyoo pee epuonu ilaiguanak le Asiria aatum enkare sapuk?” Neasisho ninye etumuta nabo, neshet ninye nena sunta apa naaturori, nepik iltaleta shumata enye. Ore tioriong ninye neshetu enkae suntai. Neitagol sii Milo teina anasa e Daudi. Eitobira sii apa imasaa o larrabal o long'oi te nkumoi. Nepik ninye iltung'ana abori ilarikok le njore teina anasa. Neiturrurroki ninche kewan to lkurroto te mbata e kishomi, neirorie ninche aitagol ejo, “Entagoluoto. Emiureishoyu nimileporiri te dukuya olaiguanani le Asiria oina jore pooki natii tenebo ninye. Amu etii obo kitok tenebo iyiook olang ninye. Ore tenebo ninye naa enjore oo ltung'ana lo sesen kake ore tialo iyiook netii Olaitoriani Enkai ang, pee eretu iyiook nearisho too larrabali lang.” Negolu iltung'ana oishua te lelo rorei le Hesekia olaiguanani le Yuda. Ore tesiadi ena, neirriu Senakerib, olaiguanani le Asiria ilo apa otang'adua Lakish aman, tenebo enjore enye pooki, isinkan lenyena meetu Yerusalem enetii olaiguanani Hesekia olaiguanani le Yuda o ltung'ana. Oltung'ana pooki le Yuda apa ootii Yerusalem ejo, “Nji ejo Senakerib olaiguanani le Asiria, Ainyoo intae isiligitata, eji pee intasheshe intae itang'adutua aairin Yerusalem? Keitu eitapong'oo intae Hesekia pee eisho intae entuata to lameyu o te nkure, ejoki intae, ‘Kekordu iyiook Olaitoriani Enkai ang te nkaina o laiguanani le Asiria?’ Keitu ninye eiwang'ie Hesekia iwuejitin o lperereni loo lasarri neitanap Yuda o Yerusalem ejo, ‘To lperere obo lo lasar intae enteserem naa te nchumata enye intae entayutu ilasarri?’ Aimiyiololo intae enaitaasa nanu o loo papa iltung'ana le kulie kuapi? Keidim apa nkaitin e lelo oreren aatokordu iloshon lenye te nkaina ai? Kake kaa tiatua nkaitin pooki e lelo oshon apa ooidaikie papa lai tukul naidima atokordu iltung'ana lenyena te nkaina ai, eji metaa keidim Enkai inyi atokordu intae te nkaina ai? Ore naa taata emincho Hesekia meitapong'oi intae anaa elej intae, tena pukunoto enye, nimining'ining'i intae ninye. Amu meetae enkai e ae kop anaa enkitoria naidima atokordu iltung'ana lenyena te nkaina ai, anaa te nkaina oo loo papa. Kebaa naa meidim Enkai inyi atokordu intae te nkaina ai!” Neiro lelo sinkan lenyena mbaa kumok naaipirta Olaitoriani Enkai o sinka lenye Hesekia. Neiger ninye mpala amor Olaitoriani Enkai oo Siraeli neiro asukeny ninye ejo, “Anaa nkaitin oo loshon neitu eidim aatokordu iltung'ana lenye too nkaik aainei, neijia etiu Enkai e Hesekia, mekordu ninye iltung'ana te nkaina ai.” Nebuaku ninche aajo neijia te nkutuk e Yuda, aaitoning iltung'ana le Yerusalem apa ootii esuntai, ejo pee eiture neitashal, ejo pee etum aawaita enkanasa. Neiro ninche aaimaki Enkai e Yerusalem, anaa enaimaki nkaitin oo loreren le nkop, naa esiaai oo nkaik oo ltung'ana. Neomon Hesekia olaiguanani o Isaya oloiboni le Nkai, olayioni le Amos tenkaraki ena, neishiraki ninche keper. Neirriu Olaitoriani olmalaika otara metuata lelo morran pooki magil, o larikok le njore o lkituaak loo lng'oborri lo laiguanani le Asiria. Neaku etorrinye ninye te nkurruna e nkomom enye alo enkop enye makewan. Ore pee elotu atua enkaji e nkai enye, near kulikae ayiok lenyena ninye metua. Neitajeu Olaitoriani Hesekia, o lelo oomanya Yerusalem te nkaina e Senakerib, olaiguanani le Asiria, o te nkaina oo lmang'ati lenyena pooki. Neisho ninche enkiyeng'iyeng te pooki shoto. Neyau ilkumok nkishorot aaisho Olaitoriani te Yerusalem, neisho ntokitin e tipat Hesekia olaiguanani le Yuda, neaku keyanyiti ninye too loshon pooki, ebaiki ina kata neito idia alo. Ore apa te nena olong'i nemuoyu Hesekia neaku keye, neomon ninye Olaitoriani, newal Olaitoriani enkomono enye, neisho ninye olmonekie. Kake eitu eishoru Hesekia olerrinyore te risioroto eina supatisho naitaasaki ninye, amu etawuase to ltau lenye. Neaku eewuo engoro napi shumata ninye o Yuda o Yerusalem. Kake eitoborro Hesekia kewan teilo wuasa lo ltau lenye, ninye o lelo oomanya Yerusalem, neaku eitu eitoki engoro napi o Laitoriani alotu shumata ninche too nkolong'i pooki e Hesekia. Neeta apa Hesekia enkarsisisho sapuk o enkanyit, neitobiraki kewan ilchumat le nkosholai o le sahabu, o soito oogol enkinyang'a, o sonkoyoni, o long'oi o masaa pooki naagol enkinyang'a. Etesheta sii apa nkajijik naashumishoreki tenkaraki entapa, o enaisho oo sabibu, o eilata, o laleta tenkaraki mpukunot pooki oo nkishu, o muatat oo nkerra. Neitobiraki sii kewan nkanas, o luaat oo nkerra, o nkishu kumok, amu eishoo apa Olaitoriani ninye imasaa kumok. Eikeno sii apa Hesekia iwuejitin oo nkariak e shumata oo nkariak e Gishon, neboinaa ninche aipirie enkalo o loontoluo le nkanasa e Daudi. Nebul Hesekia too siaaitin pooki. Ore tialo ilbalusini le Babilon o lkituaak le Babilon, apa ooirriwakaki ninye meikilikuanishore tenkaraki ilo monekie otaasaki te nkop, nepalaa Enkai ninye, pee etum atetema ninye neyiolou nena pooki naatii oltau lenye. Ore apa nkulie kiaasin e Hesekia, o nkiaasin enyena sidain, ng'ura eigeroki te nduaata e Isaya ole Amos, ilo oiboni le Nkai, te mbuku oo laiguanak le Yuda o Israel. Neirura Hesekia etua anaa apa loo menye, nenukari ninye te wueji neika oo nkuraren oo layiok le Daudi. Ore Yuda pooki o lelo oomanya Yerusalem neisho ninye enkanyit te keeya enye. Neitoreisho olayioni lenye Manase te rishata enye. Oloo larin tomon oare apa Manase pee eiteru aitoreisho, neitoreisho ninye ilarin onom o imiet te Yerusalem. Etaasa ninye mbaa torrok too nkonyek o Laitoriani, te risioroto e nena baa olminong loo loreren apa ooiwuang'ie Enkai te dukuya iltung'ana le Israel. Amu enyaaka ninye ashet iwuejitin neeika apa neetigila papaai lenye Hesekia auroo. Neshetaki Baal ilperereni loo lasarri, neitobir Ashera, neserem olorora pooki le shumata, neisiaai ninche. Neshetu ilperereni loo lasarri tiatua enkaji o Laitoriani, laa ninche apa etejo Olaitoriani “Atua Yerusalem etonie enkarna ai ntarasi.” Neshetu ninye ilperereni loo lasarri tenkaraki olorora le shumata too lgorieti pokira oare le nkaji o Laitoriani. Nepejoo ilayiok lenyena anaa olasar to erata loo layiok le Hinom. Neas ninye mbaa oo nkitumusumusot, neas ne naibon, o esakutore neton tenebo iloo ntaleng'o o lkuyantik. Etaasa ninye entorroni sapuk te dukuya Olaitoriani, neitagor ninye. Ore ina kitanyaanyukoto e nkai naitobira ninye nepik atua enkaji e Nkai, naa ninye apa etiaka Enkai Daudi o Solomon olayioni lenye, “Ore tiatua ena aji, o te Yerusalem, naa ninye ategelua too loshon pooki le Israel, kapik enkarna ai ntarasi. Nemaigil nanu aiwuang'ie enkeju e Israel teina kop apa nategelaka loo papaai linono teneing'or ninche aaibung nena pooki naitanapa ninche, o nkitanapat pooki, o nkikoot o nkiguanat apa naaishoruaki aaimunye Musa.” Eteleja Manase Yuda o lelo oomanya Yerusalem, o metaasa ntorrok aaitulus te lelo oshon apa ooidaikie Olaitoriani te dukuya iltung'ana le Israel. Eirorie apa Olaitoriani aikok Manase o ltung'ana lenyena, kake eitu ninche ening. Ore enkaraki ina eyaka ninche Olaitoriani ilarikok le njore e Asiria, lelo ooibung'a Manase too lala oololo neen ninye too lpisia lo suyai, nenap ninche aaya Babilon. Ore etii ninye atua osina, neomonu omom to Laitoriani Enkai enye, neitobir kewan oleng, te dukuya Enkai oo loo menye. Neomon ninye, neng'amaa Enkai esayiata enye, o enkomono enye, neitoki Enkai arrinyoki ninye enkitoria enye tiatua Yerusalem. Neyiolou taa Manase ajo Olaitoriani ninye Enkai. Ore te siadi ina neshet esuntai e oriong e nkanasa e Daudi te nkalo oloo ntoluo le Gishon, to erata, tembata e wueji nejing'ieki enkishomi e dukuya, nelo aitamanaa te Ofel. Neilepie aitoodor oleng. Etipika sii ilarikok le njore nkanas pooki naasheta isunta e Yuda. Neiwuang'ie ninye nena aitin oo loreren, o nkitanyaanyukot oo nkaitin aitung'uaa enkaji o Laitoriani, o lelo pereren loo lasarri apa ootesheta to ldoinyio le nkaji o Laitoriani o te Yerusalem, nenang'aki ninche auluo enkanasa. Neshuku sii apa olperere lo lasar lo Laitoriani, neitayu te nchumata enye ilasarri le seriani o lasarri le nashe. Neitanap ninye Yuda meisiaayia Olaitoriani Enkai e Israel. Ore ake eyia neton ake eitayu iltung'ana ilasarri too wuejitin o neeika, kake Olaitoriani Enkai enye ake eitaiki. Ore apa nkulie kiaasin e Manase, o enkomono enye e Nkai enye, o rorei le lelo aduaak apa oirorie ninye te nkarna o Laitoriani Enkai e Israel, etii atua ntepen oo laiguanak le Israel. Ore ina omono enye, oina natang'amayie Enkai esayiata enye, o ng'ok enyena pooki, o enkisiligata enye, o wuejitin apa neeteshetie ilperereni loo lasarri, o eneitasheyie Asherim, o nkitanyaanyukot oo nkaitin, enapa kata eitu eitobor kewan, ng'ura eigeroki too ntepen oo laduaak. Neaku eirure Manase etua anaa apa loo menye, nenukaa ninche ninye tiatua enkaji enye; neitoreisho Amon olayioni lenye te rishata enye. Oloo larin tikitam o are apa Amon pee eiteru aitoreisho, neitoreisho ninye ilarin oare te Yerusalem. Etaasa apa ninye ntorrok te dukuya Olaitoriani, anaa apa enataasa papaai lenye Manase. Etopolosaka apa Amon nkitanyaanyukot pooki oo nkaitin naaitobira papaai lenye Manase, neisiaai ninche. Neitu ninye eitobor kewan te dukuya Olaitoriani, anaa apa enaitoborro papaai lenye Manase kewan, kake etoponayie Amon aas entorroni oleng. Nerresh ilaisiaayiak lenyena ninye near metua tiatua aji. Kake etara iltung'ana leina kop metuata lelo tung'ana pooki apa ootarresho olaiguanani Amon; ore iltung'ana leina kop neitaa Yosia olayioni lenye olaiguanani te rishata enye. Oloo larin isiet apa Yosia pee eiteru aitoreisho, neitoreisho ninye ilarin tomoni uni oobo te Yerusalem. Etaasa ninye mbaa sidain too nkonyek o Laitoriani, neibung orrekie le Daudi papaai lenye, neitu eibelekenya alo enkalo e tatene anaa ene kedienye. Amu ore to lari le isiet le nkitoria enye, eton aa oti, neiteru aing'oru Enkai e Daudi papaai lenye; ore to lari le tomon oare neiteru aituku Yuda o Yerusalem, aiwuang'ie iwuejitin neeika, o Asherim, nkitanyaanyukot oo nkaitin naaguetuno o naatosholuaki. Negil ninche ilperereni loo lasarri le Baal eitasheiki ninye. Neuroo ilperereni loo lasarri le nkorropil apa ootii shumata ninche. Nebel asherim aitaa mbelibelat, o nena kitanyaanyukot naaguetuno o naasholuno. Neitaa empunyua neisuaaki nkuraren e lelo apa ooitayu ilasarri too nchumat enye. Etapejoyie sii apa iloik le lelo apolosak too nchumat e lelo pereren lenye, neituku Yuda o Yerusalem. Ore tiatua nkanas e Manase o Efraim, o Simion o metabaiki Naftali, te nkidaata enye too nkaloli pooki, eturoyie ninye ilperereni loo lasarri, neidong Asherim, o nkitanyaanyukot aitaa empunyua, nesulaki enkop ilperereni pooki le nkorropil te nkop e Israel pooki. Neitoki ninye arrinyo alo Yerusalem. Ore apa to lari le tomon o isiet le nkitoria enye, eidipa aipoo ina kop o enkaji e Nkai, neirriwaki Shafan olayioni le Asalia olkilikuai, o Mesai ilo balusui le nkanasa o Yoa olayioni le Yoahas, ilo aigeroni, pee etum aaitobira enkaji o Laitoriani Enkai enye. Nepuonu ninche enetii Hilkia olapolosani kitok, neisho nena pisai apa naayawuaki enkaji e Nkai, apa naatasotutuo Ilawi, ebaiki Manase o Efraim o metabaiki ilo pisiai pooki le Israel o Yuda pooki, o Benchamen, o lelo pooki oomanya Yerusalem. Neisho ninche lelo aisiaayiak apa ooitasheiki enkaji o Laitoriani. Ore lelo aisiaayiak apa oasisho tiatua enkaji o Laitoriani; neishooyo te nkaraki eramata o enkitobirata eina aji. Neisho ninche ilaguetak loo nkeek, o lashetak, pee einyiang'u isoito, o nkeek, o loom, tenkaraki ina shetare apa naishoo ilaiguanak le Yuda erruoyo. Neas iltung'ana esiaai aaitobiraki. Ore apa oloitasheiki ninche naa Yohat o Obadia loo Lawi, loo layiok le Merari naa Sakaria o Meshulam, too layiok le Kohat. Naa Ilawi pooki, naa arriyiak too nkinantani o sinkolio. Ninche apa ooitasheiki ilanapak loo lolan, neutaa pooki oas pooki pukunoto e nkisiaayiare. Ore ilkulikae Lawi naa ilasirak, o lkituaak, o larripok le kishomi. Ore eitayu ninche nena pisai apa naayawuaki atua enkaji o Laitoriani, netum Hilkia olapolosani embuku oo nkitanapat o Laitoriani apa naaishoruaki aaimunye Musa. Nejoki Hilkia Shafan olaigeroni, “Anoto nanu embuku oo nkitanapat tiatua enkaji o Laitoriani.” Neisho Hilkia ina buku Shafan. Neyaki Shafan ina buku olaiguanani, neitoki aliki olaiguanani ajoki, “Ore nena pooki naaitanapaki isinkan linono, easita ninche. Eishutua ninche nena pisai apa naanotoki te nkaji o Laitoriani, netipika ninche nkaik o laigerok o laitasheikinok.” Neitoki Shafan olaigeroni ajoki olaiguanani “Aishoo nanu Hilkia olapolosani embuku.” Neisumaki Shafan olaiguanani. Ore ake pee ening olaiguanani irorei loo nkitanapat nepolos nkilani enyena. Neitanap olaiguanani Hilkia o Ahikam olayioni le Shafan, o Abdon olayioni le Mika, o Shafan olaigeroni, o Asaia ilo aisiaayiani lo laiguanani nejoki, “Enchom enkilikuanishore Olaitoriani tenkaraki nanu, o tenkaraki lelo ootelekutua te Israel, o te Yuda, tialo kulo rorei lena buku nanotoki. Amu eikitok engoro napi o Laitoriani natubukokoki shumata iyiook, enkaraki apa neitu eibung loo papa irorei lo Laitoriani, neas te risioroto e kuna pooki naaigeroki tena buku.” Nelo Hilkia o lelo pooki ooirriwayie olaiguanani enetii enkoiboni naji Hilda. Naa enkitok apa e Shalum olayioni le Takat, olayioni le Hasra, ilo aing'urani lo sanduku. (Naa Yerusalem apa namanya ninye) neirorie ninche ninye aaikilikuanishore. Nejoki ninye ninche, “Nji ejo Olaitoriani, Enkai e Israel, ‘Tiaaki ilo tung'ani likirriua enatii nanu, Nji ejo Olaitoriani, ng'ura kayau nanu entorroni shumata ene wueji, o shumata lelo oomanya o lelo deketa pooki ooigero teina buku naisumakaki olaiguanani le Yuda. Ore enkaraki naatanyaita ninche nanu, netapejokitio enkorropil kulie aitin, pee aatum ninche aaitagoro nanu te siaai oo nkaik enye, kebukokini naa engoro ai napi shumata ene wueji nemeibooroyu ina goro ai. Kake ore tialo ilo aiguanani le Yuda oirriwua intae pee ipuonunu aaikilikuanishore Olaitoriani, nji enchom entiaaki ninye, Nji ejo Olaitoriani Enkai oo Siraeli: Ore tialo lelo rorei litoning'o, enkaraki nairridua oltau lino nintoborro kewan te dukuya Enkai, ina kata pee ining irorei lenyena ooipirta ene wueji o lelo oomanya, nintoborro iyie kewan tialo nanu, nitopolosa iyie nkilani inono ninchir te dukuya nanu, aatoning'o sii nanu iyie, Olaitoriani ojo. Ng'ura kaaiturrurroki nanu iyie loo papaai lino, nikipiki iyie engumoto te seriani, nemedol nkonyek inono ina torroni nayau nanu shumata ene wueji, o lelo oomanya.’ ” Neyaki ninche olaiguanani olkilikuai. Neitoki olaiguanani airriwaa ilkiliku neiturrur ilpayiani pooki le Yuda o le Yerusalem. Neilep olaiguanani alo enkaji o Laitoriani, tenebo iltung'ana pooki le Yuda o lelo oomanya Yerusalem, o lapolosak o Lawi, o ltung'ana pooki kituaak o looti. Neisum ninye ening'ito pooki irorei pooki leina buku o sotua apa nanotoki tiatua enkaji o Laitoriani. Neitashe olaiguanani te wueji enye neitobir olning'o, te dukuya Olaitoriani pee elo ninye asuj Olaitoriani o nkitanapat enyena o enchakenisho enye, o nkiguanat enyena, to ltau lenye pooki o te nkishui enye pooki. Pee eas lelo rorei lo lning'o ooigero teina buku. Neisho ninye lelo pooki apa ootii Yerusalem o Benchamen meitasho aaibung ina. Ore lelo oomanya Yerusalem neas te risioroto o sotua le Nkai ina Ai oo loo menye. Neiwuang'ie Yosia ilo minong pooki otii enkop oo Siraeli, neisho lelo pooki ootii atua Israel meisiaayia Olaitoriani Enkai enye. Ore too nkolong'i enyena pooki neitu ninche eibelekenya te sujata o Laitoriani Enkai oo loo menye. Eibung'a apa Yosia osirua lo Laitoriani le pasaka te Yerusalem. Neyieng ninche olkuoo le pasaka te nkolong e tomon oong'uan o lapa le dukuya. Etegelua apa ninye ilapolosak tenkaraki enkisiaayiare neitagol ninche te nkisiaayiare e nkaji o Laitoriani. Nejoki ninye Ilawi pooki laa ninche apa ooiteng'en iltung'ana loo Siraeli, naa sinyat ninche to Laitoriani, “Entipik ilo sanduku sinyati atua ina aji apa natesheta Solomon olayioni le Daudi, olaiguanani le Israel. Meeta tipat pee intokiki aanap too loilila linyi. Esiayia naa taata Olaitoriani Enkai inyi o ltung'ana lenyena le Israel. Entobira ate te risioroto oo lmareita linyi, o lgilat linyi, nisujaa orrekie le Daudi olaiguanani loo Siraeli o rrekie le Solomon olayioni lenye. Nintasheshe teine wueji sinyati te risioroto oo nkajijik oo loo papaai linyi, o noo lalashera linyi. Naa nchoo ake metaa keeta pooki tung'ani erubata e nkaji e menye tiatua Ilawi. Niyieng'iyieng'e olkuoo le ker lo sirua le pasaka, nintisinyinyi ate. Nintobiriri ilalashera linyi pee easisho te risioroto o rorei lo Laitoriani oimunyeki Musa.” Neisho Yosia lelo apa tung'ana leme lapolosak, pooki ootii ine, ilkuoo le kerra o le kineji le luaata enye oobaya nkalifuni tomoni uni, o loing'ok nkalifuni uni. Ore kuna pooki naa imasaa o laiguanani eing'uaa. Ore ilkituaak lenyena neitayu nkishorot te nyorrata aaisho iltung'ana, o lapolosak, o Lawi. Ore Hilkia, o Sakaria o Yehiel lelo kituaak le nkaji e Nkai, neisho ilapolosak to sirua le pasaka anaa nkishorot oo lkuo le kerra, nkalifuni are o iip ile eshula o lkuoo le kineji. O loing'ok iip uni. Ore sii Konania, o Shemaia, o Natanel o lalashera lenyena, o Hashanbia o Yeiel o Yosabad, lelo kituaak loo Lawi, neisho nkishorot e pasaka ilkuoo le kerra o le kineji nkalifuni imiet o loing'ok iip imiet. Ore eidipaki aaitobira ilo sirua, neitashe ilapolosak te wueji enye, neitashe ilawi too ntukusi enye, te risioroto enkitanapata o laiguanani. Neyieng ninche olkuoo le pasaka neisuaaya ilapolosak ilo sarge otang'amutua too Lawi, ore Ilawi neibung ina nateyieng'aki aapolos. Neiteng'el ninche ilasarri oopejori pee etumi aatooriki iltung'ana terisioroto oo nkajijik oo loo menye, pee eishori Olaitoriani, anaa enaigeroki te mbuku e Musa. Neiko ninche neijia lelo oing'ok. Nepej ninche nkiri eilo kuo le pasaka te nkima terisioroto oo nkoon. Neyier lelo asarri oosinya too motio o too ng'irran, o too saanini dapashi, nenap ninche nabo kata aayaki olorere. Ore tesiadi ina neitobiraki iltung'ana ate endaa, o lapolosak amu ore apa lelo apolosak ayiok le Aron netanyamala, eitayu ilasarri oopejori, o nkiri naapir, o metaa kewarie. Neaku eitobirakita ate Ilawi o lapolosak lelo ayiok le Aron endaa. Ore apa ilaranyak lelo ayiok, le Asaf netii ewueji enye, terisioroto enkitanapata e Daudi o Asaf, o Heman, o Yedutum ilo aduaani lo laiguanani. Ore ilarripok le kishomi netii kishomi. Meeta apa ninche tipat naing'uarie esiaai enye amu ore ilalashera lenye, loo lawi neitobirakita ninche endaa. Neaku eitobiraki apa esiaai pooki o Laitoriani ina olong, pee eibung'i pasaka neitayuni olasar opejori, tenchumata olperere lo lasar lo Laitoriani, terisioroto enkitanapata o laiguanani Yosia. Ore apa iltung'ana le Israel ootii ine, neibung osirua le pasaka teina kata. Neibung osirua loo mukateni neitu eisuijieki nkolong'i naapishana. Eitu aekata etumi pasaka nanyaayukie ena te Israel ebaiki nkolong'i e Samuel oloiboni le Nkai. Meetae too laiguanak le Israel oloibung'a pasaka anaa enaibung'a Yosia, o ilapolosak o Lawi, o Yuda pooki o Siraeli ootii ine, o lelo oomanya Yerusalem. Ore to lari le isiet le nkitoria e Yosia neibung'aki ena pasaka. Ore etulusoitie kuna pooki eidipa Yosia aitobira enkaji e Nkai, nelo Neko olaiguanani le Misiri aarare Karkemish te Frati, nelo Yoash agilunore ninye. Kake eirriwaka ninye ilkiliku, ejoki, “Kainyoo iyiook kiporokino o iyie, olaiguanani le Yuda? Maatakinore nanu iyie ena olong, kake ina aji naatayie olarrabal ninye agilunore, naaitanapa nanu Enkai pee aisarrisar. Mintoki naa akeshare Enkai naa ninye natii tenebo nanu pee mikindaikie ake.” Kake ore ake eyia eitu eibelekenya Yosia alo aing'uaa, kake etonyuaa ajo aarare. Eitu ninye ening irorei le Neko, ooing'uaa enkutuk Enkai, kake etijing'a ninye olarrabal tiong'ata e Megido. Neng'or ilang'orok loo mbaa olaiguanani Yosia, nejoki olaiguanani isinkan lenyena, “Ewuang'ieki nanu tene, amu aatipikaki olbae torrono.” Neaku eitayutuo isinkan lenyena ninye te ngarri oo mbartan nenap ninche tenkae garri oo mbartan, neyau ninye Yerusalem. Neye ninye, nenukari ninye too nkuraren oo loo menye. Ore Yuda pooki o Yerusalem neishiraki Yosia. Eishiraka sii apa Yeremia Yosia, ore ilewa pooki o nkituaak pooki aranyak neranyu aalimu Yosia o metabaiki ena olong. Neitobir ninche enkitanapata te Israel, ng'ura eigero te mbuku oo nkishirat. Ore nkulie kiaasin e Yosia, o nkiaasin enyena sidain te risioroto e nena naaigeroki too nkitanapat o Laitoriani, o nkiaasin enyena e dukuya o kulie e siadi, ng'ura eigeroki ninche te mbuku oo laiguanak le Israel o le Yuda. Ewaita iltung'ana leina kop Yoahas olayioni le Yosia neitaa ninye olaiguanani terishata e papaai lenye te Yerusalem. Oloo larin tikitam ookuni apa Yoahas pee eiteru aitoreisho, neitoreisho ninye ilapaitin okuni te Yerusalem. Neitoki olaiguanani le Misiri aaraa ninye te Yerusalem, nepikaki iltung'ana leina kop kodi e talanta iip nabo e nkosholai o talanta e sahabu. Neitaa olaiguanani le Misiri Eliakim olalashe lenye olaiguanani te Yuda o te Yerusalem, neibelekeny enkarna enye ajo Yehoiakim. Kake eewa Neko olalashe lenye Yoahas Misiri. Oloo larin tikitam o imiet apa Yehoiakim pee eiteru aitoreisho neitoreisho ninye ilarin tomon oobo te Yerusalem. Neas ninye ntorrok too nkonyek o Laitoriani Enkai enye. Nelotu Nebukadnesa olaiguanani le Babilon agilunore ninye, neen ninye too lpisia neya ninye Babilon. Etanapa sii apa Nebukadnesa aya kulie tokitin e nkaji o Laitoriani Babilon, nepik ninche atua enkaji e nkitoo o laiguanani te Babilon. Ore apa nkulie kiaasin e Yehoiakim o nena tokitin o ilo minong otaasa ninye, o mbaa torrok naaipirta ninye, ng'ura eigeroki tiatua embuku oo laiguanak le Israel o le Yuda. Neitoreisho Yehoiakin olayioni lenye terishata enye. Oloo larin isiet apa Yehoiakin pee eiteru aitoreisho, neitoreisho ilapaitin okuni o nkolong'i tomon te Yerusalem. Neas ninye mbaa torrok too nkonyek o Laitoriani. Ore to lapa lo loirujuruj leilo ari, neirriu olaiguanani Nebukadnesa olkilikuai meyauni ninye Babilon, tenebo nena tokitin e tipat apa naati atua enkaji o Laitoriani neitaa olalashe lenye Sedekia olaiguanani le Yuda o Yerusalem. Oloo larin tikitam oobo apa Sedekia pee eiteru aitoreisho, neitoreisho ninye ilarin tomon oobo te Yerusalem. Etaasa ninye mbaa torrok too nkonyek o Laitoriani Enkai enye. Eitu ninye eitobor kewan te dukuya Yeremia oloiboni le Nkai, oiroro apa alimu ilomon lo Laitoriani. Eisero apa Sedekia apaashare olaiguanani Nebukadnesa, laa ninye apa oishoo ninye meinosa olmumai tialo Enkai; negolong'u ninye neitagol oltau lenye, neany eibelekenyakino Olaitoriani Enkai e Israel. Ore ilapolosak pooki kituaak, oltung'ana sii neponari aaku ilemeisiligayu, nesuj olminong le lelo oshon; neisarkionie enkaji o Laitoriani, apa naitisinya ninye te Yerusalem. Ore Olaitoriani Enkai oo loo menye, neirriwaki ninche ilkiliku aimunye isinkan lenyena, enkaraki naing'urrie ninye iltung'ana lenyena, o tenkaraki emanyisho enye. Kake etigirate ninche aamor lelo sinkan le Nkai, nemenaa irorei lenyena, nesurdaay iloibonok le Nkai, o metaba anaa nedumunye engoro o Laitoriani too iltung'ana lenyena, ometaba anaa neaku meetae olmairo. Ore enkaraki ina neyau aitaar ninche olaiguanani loo Lkaldayo ilo apa otasesekuana ilbarnot lenye metuata tiatua enkaji e Nkai, nemeetayie olng'ur olbarnoti anaa esila, anaa oltung'ani kitok aashu oltung'ani moruo. Neishooyo ninche apik atua enkaina enye. Ore nena masaa pooki e nkaji e Nkai nkutiti o sapuki, o lchumat pooki le nkaji o Laitoriani o lchumat lo laiguanani o lkituaak lenyena, neyai nena pooki Babilon. Nepejoo ninche enkaji e Nkai neuroo esuntai e Yerusalem, nepejoo nkajijik enyena pooki e nkitoo te nkima. Neinyal nena tokitin pooki e tipat. Eewa ninye eyararoto meshomo Babilon lelo apa ooilanya olalem, neaku isinkan lenyena, o metaba anaa neitasheyieki enkitoria e Parsia. Pee eitabari ororei lo Laitoriani oimua enkutuk e Yeremia, o metaba anaa neshipakino enkop sabato. Ore te nena olong'i pooki naitomijoonoki, neibung sabato neitabaya ilarin ntomoni naapishana. Ore apa to lari le dukuya le nkitoria olaiguanani Sairos le Parsia, pee etumi aaitabai ororei lo Laitoriani oimunyeki enkutuk e Yeremia, neputu Olaitoriani oltau le Sairos olaiguanani le Parsia, neaku etolimuo aibalunye te nkitoria enye pooki, neiger sii ajo, “Nji ejo Sairos olaiguanani le Parsia, ‘Ore Olaitoriani Enkai e keper, naaisho nanu nkitoriat pooki enkop, naaitanap ninye nanu pee ashetaki ninye enkaji te Yerusalem. Aa taa te Yuda. Ore pooki ng'ae tiatua intae, te kulo tung'ana pooki nchoo eaku Olaitoriani Enkai enye tenebo ninye, nchoo ninye eilep alo.’ ” Ore to lari le dukuya le nkitoria e Sairos olaiguanani le Parsia, pee etumi aaitabai ororei lo Laitoriani te nkutuk e Yeremia, neputu Olaitoriani oltau le Sairos olaiguanani le Parsia, pee eibalunye enkitanapata te nkitoria enye pooki, neiger sii aajo, “Nji ejo Sairos olaiguanani le Parsia; Aaishoo nanu Olaitoriani, Enkai e keper, nkitoriat pooki enkop, naaitanapa ninye nanu pee ashetaki ninye enkaji te Yerusalem, te nkop e Yuda. Ore pooki ng'ae tiatua intae iltung'ana lenyena pooki, metaa Enkai enye tenebo ninye, naa nchoo ninye eilep alo Yerusalem, te nkop e Yuda, nelo ashet enkaji o Laitoriani, Enkai oo Siraeli ninye ilo otii Yerusalem; naa nchoo pooki tung'ani otelekua, te pooki wueji nemanya ninye, eretu ninye iltung'ana le manyisho enye te nkosholai o te sahabu, o too masaa o too ng'uesi, tenebo nena kishorot o lpela tenkaraki ina aji e Nkai natii Yerusalem.” Nedumunye ilukuny oo nkajijik oo loo menye te Yuda o te Benchamen, o lapolosak o Lawi, o pooki ng'ae otuputuo Olaitoriani oltau lenye pee eilep alo ashet ina aji o Laitoriani natii Yerusalem. Ore lelo pooki oomanita ninche neretu ninche too masaa e nkosholai, o te sahabu, o too masaa, o too ng'uesi, o too ntokitin naagol enkinyiang'a tenebo nena pooki naaishoruaki to lpela. Neyau sii Sairos ilo aiguanani nena masaa enkaji o Laitoriani apa naawa Nebukadnesa te Yerusalem nelo apik atua enkaji oo nkaitin enyena. Neyau Sairos olaiguanani le Parsia nena pooki eitasheiki Mitrehat ilo ashumani, laa ninye oikenaka ninye pooki Sheshbasa ilo kitok le Yuda. Naa ena apa esiana enye: ngirran enkalifu nabo e sahabu, o ngirran enkalifu nabo e nkosholai, nkalema tikitam ooudo, ilbakulini tomoni uni le sahabu, o lbakulini nkalifuni are o iip ong'uan le nkosholai, o kulie masaa enkalifu nabo; ore imasaa pooki e sahabu o nenkosholai naa nkalifuni imiet o iip ong'uan o ntomoni ile o naaudo. Kuna pooki eyaua Sheshbasa ina kata pee eyauni ilootaarayioki metushukunye aaing'uaa Babilon nepuonu Yerusalem. Kulo apa lelo tung'ana leilo kerenket ooetuo te yararoto eing'uaa lelo apa ootarayie Nebukadnesa olaiguanani le Babilon arik eenata te Babilon. Etorrinyunye ninche aapuonu Yerusalem o Yuda nelo ake pooki tung'ani enkang enye makewan. Eetuo apa ninche tenebo Serubabel, o Yeshua, o Nehemia, o Seraia, o Reelaia, o Mordekai, o Balshan, o Mispar, o Bigfai, o Rehum, o Baana. Ena esiana oo ltung'ana loo Siraeli; ore ilayiok le Parosh era esiana enye nkalifuni are o iip nabo o ntomoni naapishana oare. Ore ilayiok le Shefatia, nera esiana enye, iip uni o ntomoni naapishana oare. Ore ilayiok le Ara, nera esiana enye iip naapishana o ntomoni naapishana o imiet. Ore ilayiok le Pahatmoab, aa taa ilayiok le Yeshua o Yoab, naa nkalifuni are o iip isiet o tomon oare. Ore ilayiok le Elam naa enkalifu nabo o iip are o onom o ong'uan. Ore ilayiok le Satu naa iip naaudo o artam o imiet. Ore ilayiok le Sakai, naa iip naapishana o ntomoni ile. Ore ilayiok le Bani naa iip ile o artam o are. Ore ilayiok le Bebai, naa iip ile o tikitam o okuni. Ore ilayiok le Asgad naa enkalifu nabo o iip are o tikitam oare. Ore ilayiok le Adonikam naa iip ile o ntomoni ile o ile. Ore ilayiok le Bigfai naa nkalifuni are o onom o ile. Ore ilayiok le Adin, naa iip ong'uan o onom o ong'uan. Ore ilayiok le Ater, aa taa ile Hesekia, naa ntomoni naaudo o isiet. Ore ilayiok le Besai naa iip uni o tikitam o okuni. Ore ilayiok le Yora naa, iip nabo o tomon oare. Ore ilayiok le Hashum naa, iip are o tikitam o okuni. Ore ilayiok le Gibar, naa ntomoni naaudo o imiet. Ore ilayiok le Betlehem naa iip nabo o tikitam o okuni. Ore iltung'ana le Netofia naa onom o ile. Ore iltung'ana le Anatot naa iip nabo o tikitam o isiet. Ore ilayiok le Asmafet naa artam oare. Ore ilayiok le Kiriataim, Kefira o Beerot naa iip naapishana o artam o okuni. Ore ilayiok le Rama o Geba, naa iip ile o tikitam o obo. Ore iltung'ana le Mikmas, naa iip nabo o tikitam oare. Ore iltung'ana le Betel o Ai naa iip are o tikitam o okuni. Ore ilayiok le Nebo, naa onom o are. Ore ilayiok le Makbish naa iip nabo o onom o ile. Ore ilayiok le likae le Elam naa enkalifu nabo o iip are o onom o ong'uan. Ore ilayiok le Harim, naa iip uni o tikitam. Ore ilayiok le Lod, o Hadid, o Ono, naa iip naapishana o tikitam o imiet. Ore ilayiok le Yeriko, naa iip uni o artam o imiet. Ore ilayiok le Seena naa nkalifuni uni o iip ile o tomoni uni. Ore ilapolosak lelo ayiok le Yedaia, le nkaji e Yeshua naa iip naaudo o ntomoni naapishana o okuni. Ore ilayiok le Imer naa, enkalifu nabo o onom oare. Ore ilayiok le Pashur, naa enkalifu nabo o iip are o artam oopishana. Ore ilayiok le Harim, naa enkalifu nabo o tomon oopishana. Ore Ilawi, lelo ayiok le Yeshua o Kadmiel, loo layiok le Hadafia, naa ntomoni naapishana o ong'uan. Ore ilaranyak: lelo ayiok le Asaf, naa iip nabo o tikitam o isiet. Ore lelo ayiok loo larripok loo nchomito; ilayiok le Shalum, o layiok le Ater, o layiok le Talmon o layiok le Akub, o layiok le Hatita, o layiok le Shobai, ore pooki tenebo, naa iip nabo o tomoni uni o oudo. Ore ilaisiaayiak le nkaji e Nkai, naa lelo aisiaayiak, o layiok le Siha, o layiok le Hafusa, o layiok le Taabaot, o layiok le Keros, o layiok le Siaha, o layiok le Padon, o layiok le Lebana, o layiok le Habaga, o layiok le Akub, o layiok le Hagab, o layiok le Shamlai, o layiok le Hanan, o layiok le Gidel, o layiok le Gahar, o layiok le Reaia, o layiok le Resin, o layiok le Nekoda, o layiok le Gasam, o layiok le Usa, o layiok le Pasea, o layiok le Besai, o layiok le Asna, o layiok le Meumin, o layiok le Nefisim, o layiok le Bakuk, o layiok le Hakufa, o layiok le Hahur, o layiok le Baslut, o layiok le Mehida, o layiok le Harsha, o layiok le Barkos, o layiok le Sisera, o layiok le Tema, o layiok le Nesia, o layiok le Hatifa. Ore too layiok loo sinkan le Solomon; naa ilayiok le Sotai, o layiok le Hosoferet, o layiok le Peruda, o layiok le Yaala, o layiok le Darkon, o layiok le Gidel, o layiok le Shefatia, o layiok le Hatil, o layiok le Pokeret-hasebaim, tenebo ilayiok le Ami. Ore ilaisiaayiak pooki le nkaji e Nkai o layiok loo sinkan le Solomon naa iip uni o ntomoni naaudo oare. Kulo apa lelo ooetuo eing'uaa Telmela, o Telhasha, o Kerub, o Adan, o Imer, hoo neitu apa ninche eidim aaibalie nkajijik oo loo menye anaa enetii ntipati enye, tenaa keitipat ninche Isirael: lelo ayiok le Delaia, o layiok le Tobia, o layiok le Nekoda, nera pooki iip ile o onom oare. Ore sii too layiok loo lapolosak, lelo ayiok le Barsilai, laa ninye apa oyama nabo oo ntoyie e Barsilai le Gilead, laa ninye apa eipotieki enkarna enye. Eing'orutua kulo enkigeroto enye tiatua lelo ooigeroki too iishoritin, kake eitu etumi ninche teine, neaku eiwuang'ieki ninche te mpolosare aajo mesinya; etiaaka ninche olbalusui nchere pee meinos ina daa sinyati oleng, meteleku ake tenaa ketii olapolosani oikilikuanishore Urim o Tumim. Ore apa ina umata pooki tenebo naa nkalifuni artam o are o iip uni o ntomoni ile, metii isinkan lenye o nkaisiaayiak enye, laa ore tenebo ninche naa, nkalifuni naapishana o iip uni o tomoni uni oopishana, neeta apa ninche ilaranyak loo lewa o ngoruo iip are. Ore mbartan enye naa iip naapishana o tomoni uni o ile, ore inyumpui enye naa iip are o artam o imiet, ore ntamesin enye naa iip ong'uan o tomoni uni o imiet, ore isirkon lenye naa nkalifuni ile o iip naapishana o tikitam. Ore erubata oo lukuny oo lmareita, ina kata pee epuonu enkaji o Laitoriani te Yerusalem, neishoru nkishorot olpela te nkaraki enkaji e Nkai, pee esheti ninye te wueji enye; te risioroto e nkidimata enye eishorutua ninche aapik olchumati le siaai nkiloi iip imiet e sahabu, o nkiloi nkalifuni are o ntomoni isiet e nkosholai, o lkilani iip nabo loo lapolosak. Ore ilapolosak o Lawi o embata oo ltung'ana nemany Yerusalem, o neemanita ninye, ore ilaranyak, o larripok loo nchomito, o laisiaayiak le nkaji e Nkai nebik too nkang'itie enye, ore Isiraeli pooki nebik too nkang'itie enye. Ore ake pee ebau olapa liopishana, netii iltung'ana loo Siraeli nkang'itie, neiturrurro iltung'ana aaku tenebo te Yerusalem. Neitoki adumunye Yeshua olayioni le Yohasadak, tenebo ilapolosak le ncholuek enye, o Serubabel olayioni le Shealtiel tenebo iltung'ana lenye le sotua, neshetu ninche olperere lo lasar le Nkai e Israel, pee etum aaitayu olasar opejori te nchumata enye, anaa enaigeroki too nkitanapat e Musa ilo tung'ani le Nkai. Eitasheyie apa ninche ilo perere lo lasar te ewueji enye, amu keureisho apa ninche, te nkaraki lelo tung'ana leina kop. Neitayu ninche ilasarri oopejori te nchumata enye aaitaiki Olaitoriani tadekenya o teipa. Neibung ninche osirua loo lng'oborri, anaa enaigeroki, neiken te risioroto oo nkitanapat, anaa ake anaishiaakino te nkolong. Ore te siadi ina neitayuni ilasarri oopejori lianaake, ilasarri lo lapa ng'ejuk too siruai pooki gelunot to Laitoriani, o lasarri le pooki ng'ae oitayu nkishorot o lpela aisho Olaitoriani. Ore ebaiki enkolong e dukuya o lapa liopishana neiteru ninche aaitayu olasar opejori aaisho Olaitoriani. Kake eton eitu eshetuni olkitamanyunoto le nkaji e Nkai. Metaa eishoo apa ninche mpisai ilaguetak loo soito, o laguetak loo mbaoi, o endaa, o enaoki o eilata aaisho ile Sidon o le Turo, pee eyau iltarakua te Lebanon, aaya enaiposha, neya Yopa, te risioroto e nkishoroto nanoto apa ninche te Sairos olaiguananile Parsia. Ore apa to lari liare oetunye ninche enkaji e Nkai te Yerusalem, to lapa liare, neitobir Serubabel olayioni le Shealtiel o Yeshua olayioni le Yosadak enkiterunoto, tenebo ilkulikae alashera lenye, lelo apolosak o Lawi o pooki ooetuo Yerusalem eing'ua eyararoto. Negelu ninche Ilawi ooitabaitie ilarin tikitam neilep, pee eitasheiki esiaai enkaji o Laitoriani. Ore Yeshua o layiok lenyena o ltung'ana lenye le sotua oonyikare o Kadmiel, o layiok lenyena, lelo ayiok le Yuda, neitasheiki pooki ilaisiaayiak tiatua enkaji e Nkai, tenebo ilayiok le Hanadad o Lawi, o layiok lenye, o ltung'ana lenye le sotua oonyikare. Ore ake pee eiteru ilashetak olkitamanyunoto le nkaji o Laitoriani, ore ilapolosak eishopo nkilani enye e siaai nepuonu dukuya eeta ntarumpetani, ore Ilawi lelo ayiok le Asaf neyau isaanini dapashi enye, pee eisis Olaitoriani, te risioroto eutaroto e Daudi; olaiguanani loo Siraeli; nerany ninche eirukokino, eisis neisho enashe Olaitoriani, ejo, “Amu aisupat ninye amu ebikoo enyorrata enye nauno ntarasi tialo Isiraeli.” Nebuaku iltung'ana pooki te mbuakunoto sapuk, ina kata eisis Olaitoriani enkaraki naiteruaki olkitamanyunoto le nkaji o Laitoriani. Kake ilapolosak kumok o Lawi o lukuny oo nkajijik oo loo menye, ilpayiani kituaak apa ootoduaa enkaji e dukuya neyietu aaishir ina kata pee edol olkitamanyunoto lena aji eshetuni, hoo netabuakutua ilkumok te nchipai; neaku meidim iltung'ana aaitirisha oltoilo le mbuakunoto e nchipai o ltoilo lo lkiyio loo ltung'ana; amu etabuakutua apa lelo tung'ana te mbuakunoto sapuk oleng, nening'ori ina buakunoto te nelakua. Ore apa pee ening ilmang'ati le Yuda o Benchamen nchere ore ilapa yararot oo torrinyunye neshetita enkaji o Laitoriani, Enkai oo Siraeli, nepuo ninche enetii Serubabel, o lukuny oo nkajijik oo loo menye nejoki ninche, “Nchoo iyiook mateshet tenebo ntae; amu kiserem sii iyiook Enkai inyi anaa eninkoko intae, naa aikipolosaki apa iyiook ninye ebaiki nkolong'i e Esarhadon olaiguanani le Asiria, laa ninye apa oyaua iyiook ene.” Kake etiaakita ninche Serubabel, o Yeshua o kulie lukuny oo nkajijik oo loo menye te Israel, “Miatata eniporokiki iyiook te nchetata e nkaji e Nkai ang; kake iyiook ake oopeny ooshetaki Olaitoriani, Enkai e Israel, anaa enaitanapa iyiook Olaiguanani Sairos, ilo aiguanani le Parsia.” Ore lelo tung'ana leina kop neitashal iltung'ana le Yuda, neitukuret ninche te nchetata, neiger ninche ilautarok oogilunore ninche pee eitashal ninche teina kiaas enye, too nkolong'i pooki e nkitoria e Sairos olaiguanani le Parsia, ometabaiki enkitoria e Darias olaiguanani le Parsia. Ore te nkitoria e Ahasero te nkiterunoto e nkitoria enye, neiger ninche enkitang'oroto te nkaraki lelo oo manya Yuda o Yerusalem. Ore apa too nkolong'i e Artaserses, o Bishlam o Mitredat, o Tabeel o lkulikae le ncholuek enye, neigeroki empalai Artaserser olaiguanani le Parsia. Eigeroki apa ina palai te nkutuk e Aramea neibelekenyi. Ore apa Rehum olkitok le njore o Shimshai ilo aigeroni neiger empalai te nkaraki Yerusalem aigeroki Artaserses ilo aiguanani nejo nji neitoki Rehum ilo kitok le njore aiger, o Shimshai ilo aigeroni, o lelo kulikae le ncholuek enye, o larishak, o lbalusuni, o lkituaak, o le Parsia, o ltung'ana le Erek, o le Babilon, o ltung'ana le Susa, aa taa ile Elam, tenebo ilkulikae oreren laa ninche etimirayie olkitok oji Osnapar nepuo aamany nkanas e Samaria, o kulie lo lkerenket otii idia alo olkeju, naa ore taata, ena entashati eina palai apa nairriwaitie ninche - “Enetii Artaserses olaiguanani: Ore isinkan linono, lelo tung'ana lo lkerenket otii teidia alo olkeju, kirriu enkirorokino. Ore taata, nchoo eyiolou olaiguanani nchere, ore ilapa Yahudi ooetuo eing'ua enitii, nepuonu enikitii neshomo Yerusalem. Enyaakita aashet enapa anasa kiserut e ntorroni; eidipa ninche isunta neramita ilkitamanyunot. Nchoo naa taata eyiolou olaiguanani nchere, teneigili aashet ena anasa neidipayu isunta, meitoki ninche aalak kodi; anaa mpisai olpolosie anaa ine nkoitoi, ore mpisai enkitoria nengoroo. Ore naa enkaraki naa iyie kingarakino, nemeishiaakino iyiook nikiduaaki olaiguanani esulare, enkaraki ena pee kirriwakita olaiguanani olkilikuai aaitayiolo, pee itum aing'oru enjurrunoto tiatua embuku oo mbaa oo loo papaai lino. Itum iyie tiatua embuku oo mbaa, niyiolou nchere ore ena anasa naa aikiserut, naa enkaitooshoni too laiguanak, o too lkerenketi, netipikaki apa ninye enking'oling'ol ebaiki moitie, enkaraki ena apa pee eitaaki ena anasa olmuaate. Kintayiolo iyiook olaiguanani nchere, teneigili aashet ena anasa neidipayu isunta enyena, nimintoki aata enipor ilo kerenket otii lido kekun olkeju.” Neirriwaa olaiguanani ewalata ejo: “Enetii Rehum ilo kitok le njore o Shimshai olaigeroni o lkulikae pooki le ncholuek enye ootii Samaria otii olkerenket teidia alo olkeju, airriu enkirorokino. Naa ore taata, enapa palai nirriwakita iyiook neisumaki aaibalie te dukuya nanu. Aitayio nanu enkitanapata neitobiraki enjurrunoto, nenotoki nchere ore ena anasa ebaiki apa moitie netudumakine ilaiguanak agilunore, netii enkiser o enkarruoisho atua ninye. Netii apa ilaiguanak magil Yerusalem, ooitoreishote to lkerenket pooki le lido kekun olkeju, laa ninche apa elaakini kodi o mpisai o lpolosie, o mpisai oo nkoitoi. Ore enkaraki ina entobira pee elikini kulo tung'ana metapala esiaai, nemeitoki aashet ena anasa, ometaba anaa naitobir enkitanapata. Naa entodol pee mintololong'ong'o ena bae; kainyoo pee eibulaa enkinyalata pee einyal ilaiguanak?” Ore ake pee eisumi entashati e mpalai o laiguanani Artaserser te dukuya Rehum o Shimshai olaigeroni o lelo le ncholuek enye, neisarrisar aapuo enetii Ilyahudi te Yerusalem ore te nkisikong'ata o te ngolon neitapal ninche esiaai. Ore ina siaai e nkaji e Nkai natii Yerusalem neitasheyieki; neitashe ometabau olapa liare le nkitoria e Darias olaiguanani le Parsia. Ore apa iloibonok le Nkai, Hagai o Sakaria olayioni le Ido, neibonoki Ilyahudi ootii Yuda o Yerusalem, te nkarna e Nkai e Israel natii shumata ninche. Neitoki Serubabel olayioni le Shealtiel o Yeshua olayioni le Yehosadak aadumunye neiteru aashet enkaji e Nkai natii Yerusalem; ore tenebo ninche netii iloibonok le Nkai, eretito ninche. Ore teina kata ake nelotu Tartenai, ilo balusui lo lkerenket otii teidia alo olkeju o Shetar-bosenai tenebo lelo le ncholuek enye neirorie aajoki nji, “Kaing'ae oishoo ntae enkitanapata nishetietie ena aji nindipidipi olchetei lenye?” Enyaakita sii aaikilikuan ninche ena, “Kakua nkarn e kulo tung'ana ooshetita ena aji?” Kake etii apa enkong'u e Nkai enye shumata lelo payiani loo Lyahudi, neitu ninche eibooyo ninche ometabaiki ilo omoni Darias nerrinyuni ewalata naipirta ina te palai. Ore entashati eina palai nairriwakita Tartanai, ilo balusui lo lpolosie otii teidia alo olkeju o Shotar-bosnai o lelo le ncholuek enye, lelo balusuni apa ootii olkerenket otii lido kekun olkeju, o Darias olaiguanani; neirriwaki ninche ninye olomoni, oigerore kuna baa: “Enetii Darias olaiguanani, eseriani te pooki. Nchoo metayiolouni to laiguanani nchere kishomo iyiook olkerenket le Yuda, enkaji e Nkai kitok. Eshetitae ninye too soito sapuki, netipikaki isunta enyena mbaoi, eloito ena siaai dukuya aponari easita nkaik enye. Nikintoki iyiook aaikilikuan lelo payiani nikirorie iyiook ninche aajoki nji, ‘Kaing'ae oishoo intae enkitanapata pee ishetishete ena aji, nindipidipi olchetei lenye?’ Kinyaakita sii aaikilikuan ninche nkarn enye, pee itum atayiolo, nikitum aaigero nkarn e lelo tung'ana too lukuny enye. Naa ena apa ninche etawalikitia iyiook, ‘Kira iyiook isinkan le Nkai e keper o enkop, naa eikingil iyiook aashet ena aji apa nateshetaki too larin kumok ootulusoitie, apa natesheta olaiguanani le Israel kitok neidip. Kake ore enkaraki apa naitagoro loo papa Enkai e keper, neishooyo ninye ninche apik enkaina e Nebukadnesa olaiguanani le Babilon, o Lkaldayo, laa ninche apa ooidaikie ena aji neya iltung'ana Babilon. Ore ake eyia neijia, to lari le dukuya le nkitoria e Sairos olaiguanani le Babilon, neitayu Sairos ilo aiguanani enkitanapata, nchere pee eitokini aashet ena aji e Nkai. Ore nena masaa e sahabu o ne nkosholai e nkaji e Nkai, apa naaitayio Nebukadnesa teina aji e Nkai natii Yerusalem, neyau ina aji e nkai e Babilon, eyaua Sairos olaiguanani kuna aitupuku te nkaji e nkai e Babilon nepiki enkaina e obo oji enkarna Sheshbasa, laa ninye apa eitaa olbalusui; nejoki olaiguanani ninye, Iwa kuna masaa, shomo tipika ninche atua enkaji e Nkai natii Yerusalem, naa nchoo enkaji e Nkai eitokini aashet te wueji enye. Neitoki alotu ilo oji Sheshbasa neshet olkitamanyunoto le nkaji e Nkai natii Yerusalem; ore ebaiki ina kata o taata etaa ina aji enateshete, neitu eidipayu.’” “Ore enkaraki ina te nelioo aa sidai to laiguanani, nchoo ejurruni to lchumati loo mbaa musan o laiguanani teidie te Babilon, pee edoli tenaa keitayio apa Sairos olaiguanani enkitanapata nashetieki ina aji e Nkai natii Yerusalem. Naa nchoo olaiguanani eirriwaki iyiook enaitiship ninye tialo ena bae.” Neitoki Darias olaiguanani aitayu enkitanapata, nejurruni te Babilon, te nkaji nashumieki mbaa musan, teine apa neshumieki mbaa naaigeroki. Ore te Ebatana, teina anasa kitok natii olkerenket le Media, netumi teine olpiyayati oigerore ena: “Embae nadamuni. Ore to lari le dukuya le nkitoria e Sairos olaiguanani, naitayu Sairos olaiguanani enkitanapata: Naipirta enkaji e Nkai te Yerusalem, ejo, nchoo metesheti ina aji, ine wueji apa neishoorieki ilasarri, neyauni ilasarri oopejori; ore enkadoro enye naa keaku ntemat e nkaina ntomoni ile ore endapasho naa ntemat e nkaina ntomoni ile, neeta nkererin uni oo soito sapuki, o enkereri nabo oo mbaoi; nchoo elaata e nchetata enye meitayuni to lchumati lo laiguanani. Ore sii nchoo inapa masaa e sahabu o ne nkosholai e nkaji e Nkai naawa Nebukadnesa te nkaji e Nkai natii Yerusalem, neya Babilon, errinyuni aayau atua ina aji e Nkai natii Yerusalem, neyauni ake pooki nabo ewueji enye, nipik ninche atua enkaji e Nkai.” “Neirriwaa Darias ena walata; ejo, Ore taata Tetanai, olbalusui lo lkerenket otii teidia alo olkeju, o Shetar-bosenai, o lelo le ncholuek ino, lelo balusuni ootii olkerenket otii teidia alo olkeju, entalamari; entalam esiaai ena aji e Nkai; enchoo olbalusui loo lyahudi, o lpayiani loo Lyahudi eitoki aashet ena aji e Nkai te wueji enye. Ore ake sii aitayio nanu enkitanapata naipirta enintaasiasa kulo payiani loo Lyahudi te nchetata ena aji e Nkai; kelaakini kulo tung'ana te nkiputakinoto to lchumati le nkitoo nemeimutieki te kodi naing'uaa olkerenket otii teidia alo olkeju. Ore entoki pooki nayieuni - ilooti oing'ok, ilmeregeshi, anaa nkerra tenkaraki ilasarri oopejokini Enkai e keper, o enkano, o emunyan, o enaisho oo sabibu, anaa eilata, anaa enayieu ilapolosak te Yerusalem, nchoo ninche ina anaake, nemepali, pee etum ninche aaishooi ilasarri ooitishipisho te Nkai e keper, neomonoki enkishui o laiguanani o layiok lenyena. Aitayio sii enkitanapata nchere teneibelekeny ake oltung'ani ena limunoto, neiwuang'ieki imbokishi te nkaji enye, nesheyieki ninye, neaku enkaji enye olkiu le modioi. Ore Enkai apa naitamanya enkarna enye ine wueji, metusulai pooki aiguanani o ltung'ana ooitorioo nkaik enye aaibelekeny ena, anaa einyal ena aji e Nkai natii Yerusalem. Nanu Darias oitayio ena kitanapata nchoo metaasi neibung'i aakurraki.” Ore te risioroto eilo rorei oirriwayie olaiguanani Sairos, neas Tatenai ilo balusui lo lkerenket otii teidia alo olkeju o Shetar-bosenai, o lelo le ncholuek enye, nena pooki naaitanapishe olaiguanani Darias. Ore ilpayiani loo Lyahudi neshetisho nebul, teina aibon apa e Hagai oloiboni le Nkai o Sakaria olayioni le Ido. Eidipa ninche ina aji enye te nkitanapata e Nkai oo Siraeli o te nkitanapata e Sairos o Darias o Artaseses olaiguanani le Parsia; neidipe apa ena aji te nkolong e uni o lapa le Adar, to lari le ile le nkitoria o laiguanani Darias. Ore iltung'ana loo Siraeli, ilapolosak o Lawi, o lelo kulikae apa ootorrinyunye te yararoto, neraposhoki enkitisinyata eina aji e Nkai te nchipai. Neishooyo ninche teina kitisinyata ena aji e Nkai iloing'ok iip nabo, o lmeregeshi iip are, o lkuo le kerra iip ong'uan, neitayu anaa olasar le ng'oki too Siraeli pooki ilkineji tomon oare, terisioroto e siana oo loshon loo Siraeli. Nepik ninche ilapolosak ilturrurri lenye nepik Ilawi irishat enye e siaai, tenkaraki enkisiaayiare e Nkai te Yerusalem anaa enaigeroki te mbuku e Musa. Ore te nkolong e tomon oo nguan o lapa le dukuya, neibung lelo apa ootorrinyunye te yararoto pasaka. Amu eitisinya apa ilapolosak o Lawi ate tenebo; etaa apa pooki ilemeiduruk. Neaku eteyiang'a ninche olkuoo lenye le pasaka tenkaraki lelo pooki ootorrinyunye te yararoto, te nkaraki lelo apolosak alashera lenye, o tenkaraki ninche maate, einosa apa ina pasaka iltung'ana loo Siraeli ootorrinyunye te yararoto, o pooki ng'ae oibung'are ninche, neitalam kewan olduruk loo ltung'ana leina kop, neserem Olaitoriani, Enkai e Israel. Neibung ninche osirua loo mukateni neitu eisuishieki nkolong'i naapishana te nchipai; amu eitishipa ninche Olaitoriani, neibelekenya oltau lo laiguanani le Asiria aibelekenyakino ninche, ometaa etareto ninye ninche te siaai e nkaji e Nkai, Enkai e Israel. Ore apa te siadi ena, te nkitoria e Artaseses olaiguanani le Parsia, ore Esra olayioni le Seraia, olayioni le Asaria, olayioni le Hilkia, olayioni le Shalum, olayioni le Sadok, olayioni le Ahitab, olayioni le Amaria, olayioni le Asaria, olayioni le Merariot, olayioni le Serahia, olayioni le Usii, olayioni le Buki, olayioni le Abishua, olayioni le Finehas, olayioni le Eliesa, olayioni le Aron ilo apolosani kitok - neilepu sii ilo Esra eing'uaa Babilon. Olaigeroni apa ninye arriyia too nkitanapat e Musa, apa naaishorua Olaitoriani Enkai e Israel, neisho olaiguanani ninye nena pooki naatoomonuo, amu etii apa enkaina o Laitoriani Enkai enye shumata ninye. Neilep sii apa aapuo Yerusalem to lapa liopishana le nkitoria e Artaseses olaiguanani, embata oo ltung'ana loo Siraeli, o embata oo lapolosak o Lawi, o laranyak o larripok loo nchomito, o laisiaayiak le nkaji e Nkai. Nelotu ninye Yerusalem to lapa le imiet, aa olari liopishana le nkitoria eilo aiguanani; amu ore te nkolong e dukuya o lapa le dukuya neiteru ninye alo te Babilon, ore te nkolong e dukuya o lapa le imiet nelotu ninye Yerusalem, amu etii enkaina supat e Nkai enye shumata ninye. Amu etipika Esra oltau lenye pee eiteng'enuo enkitanapata o Laitoriani, neas ninye, neitengenisho nkiguanat enyena, o nkikoo enyena tiatua Israel. Ena entashati e mpalai naishoo olaiguanani Artaseses Esra ilo apolosani, naa olaigeroni, ang'eni loo mbaa oo nkitanapat o Laitoriani o nkiguanat enyena tialo Isiraeli: “Artaseses olaiguanani loo laiguanak oirriwaki Esra olapolosani, ilo aigeroni loo nkitanapat e Nkai e keper. Ore taata, aitobira nanu enkitanapata ore pooki ng'ae too ltung'ana loo Siraeli anaa ilapolosak lenye anaa Ilawi tiatua enkitoria ai, onyorraa alo Yerusalem te yieunoto enye, neidim ashomo tenebo iyie. Amu kirriwayie iyie olaiguanani o lautarok lenyena oopishana, pee eikilikuan mbaa e Yuda o Yerusalem te risioroto eina kitanapata natii nkaik inono, e Nkai ino, nimbalunye sii enkosholai o sahabu apa naishoo olaiguanani tenebo ilautarok Enkai e Israel, natii emanyisho enye atua Yerusalem, tenebo enkosholai pooki o sahabu nilo iyie atum to lkerenket pooki le Babilon, tenebo nkishorot o lpela oo ltung'ana o noo lapolosak, naainosaki olmumai pee eishoruni tenkaraki enkaji e Nkai enye natii Yerusalem. Ore naa te kuna pisai ilo iyie ainyiang'u iloing'ok, o lmeregeshi, o lkuo le kerra, tenebo ilasarri lenye le ntapa, o lasarri lenye ooki, nilo aishooyo ninche te nchumata olperere lo lasar le nkaji e Nkai ino natii Yerusalem. Ore pooki naba anaa enidol aa sidai te iyie o lalashera linono neasi teina ae osholai o sahabu, nindimidimi aataas, te risioroto e yieunoto e Nkai ino. Ore inapa masaa nikinchooki tenkaraki enkisiaayiare e nkaji e Nkai ino, nilo aitayu te dukuya e Nkai e Yerusalem. Ore pooki naba anaa enayieuni te nkaraki enkaji e Nkai ino, niata erishata pee inchoru nindim aishoru te nena naatii olchumati lo laiguanani. “Ore nanu Artaseses olaiguanani, naitobira enkitanapata too lashumak pooki lo lkerenket otii teidia alo olkeju. Ore pooki nayieu Esra, ilo apolosani, aigeroni loo nkitanapat e Nkai e keper, nchoo easi aakurraki, neitabaikini ntalantani iip nabo e nkosholai, o rridat iip e nkano, o lbenia iip le nkano, o emunyan neitu eimakini eneba esapuko. Ore pooki naaitanapishe Enkai e keper, nchoo metaasi aaitabaya te nkaraki enkaji e Nkai e keper, pee melotu ake engoro enye adoiki olaiguanani o layiok lenyena. Kiliki sii iyie nchere meishiaakino pee eitalaki olapolosani kodi e arakinoto, anaa mpisai o lpolosie, anaa mpisai e nkoitoi, nemeitalaki Ilawi o laranyak, o laitasheikinok loo nkutukie oo nkajijik, o laisiaayiak le nkaji e Nkai, anaa kulikae aisiaayiak le nkaji e Nkai. “Naa ore iyie Esra te risioroto eina ng'eno nagut e Nkai ino niata te nkaina ino, tegelu ilooiguanare o larishak oorish iltung'ana to lkerenket pooki otii lido kekun olkeju, ore lelo pooki naa ilooyiolo nkitanapat Enkai ino: ore lelo lemeyiolo nkitanapat ninteng'en. Ore pooki ng'ae lemeiruk nkitanapat e Nkai ino o nkitanapat o laiguanani, nchoo edung'okini ninye enkiguana narrish, aa te keeya, anaa erewe eyararoto anaa, eoruni imasaa enyena, anaa eeni te korokoroni.” Meisisi Olaitoriani, Enkai oo loo papa, laa ninye otipika embae naikununo nji atua oltau lo laiguanani, pee eitisidan enkaji e Nkai natii Yerusalem, naa ninye laaitabaikia nanu enyorrata enye nauno te dukuya olaiguanani, o lautarok lenyena. O te dukuya iltung'ana pooki magil lo laiguanani. Naagolu nanu oshoke amu etii enkaina o Laitoriani Enkai ai shumata nanu, naiturrur nanu iltung'ana ooisul Isiraeli pee aapuo aairiamariyie. Kuna apa ilukuny oo nkajijik oo loo menye, naa kuna nkarn oo ishoritin e lelo apa ooshomo tenebo nanu eing'uaa Babilon, te nkitoria o laiguanani Artaseses. Ore too layiok le Finehas naa Gershom. Ore too layiok le Itamar, naa Daniel, ore too layiok le Daudi naa Hatush, ore too layiok le Shekania, o too layiok le Parosh, naa Sekaria, laa te ninye eigeroki ilewa iip o onom. Ore too layiok le Pahat-moab, naa Elieho-enai olayioni le Serahia, ore tenebo ninye netii ilewa iip are o onom. Ore too layiok le Satu, naa Shekania olayioni le Yehasiel, ore tenebo ninye netii ilewa iip uni. Ore too layiok le Adin, naa Ebed olayioni le Yonatan, ore tenebo ninye netii ilewa onom. Ore too layiok le Elam, naa Yeshaia olayioni le Atalia, ore tenebo ninye netii ilewa ntomoni naapishana. Ore too layiok le Shefatia, o Sebadia olayioni le Mikael, netii tenebo ninye Ilewa ntomoni isiet. Ore too layiok le Yoab, o Obadia olayioni le Yehiel, netii tenebo ninye ilewa iip are o tomon oisiet. Ore too layiok le Bani, o Shelomit olayioni le Yosifia, netii tenebo ninye ilewa iip o ntomoni ile. Ore too layiok le Bebai, Sekaria olayioni le Bebai, netii tenebo ninye ilewa tikitam o isiet. Ore too layiok le Asgat, Yohanan olayioni le Hakatan, netii tenebo ninye ilewa iip o tomon. Ore too layiok le Adonikam, lelo apa ooetuo te siadi, ore nkarn enye naa Elifalet, Yeuel, o Shemaia, netii tenebo ninche ilewa ntomoni ile. Ore too layiok le Bigfai, Utai o Sakur, netii tenebo ninche ilewa ntomoni naapishana. Aiturrurro apa nanu ninche te mbata olkeju orukokino Ahafa, ore teine nikibik too lng'oborri nkolong'i uni. Najo nanu ajur iltung'ana o lapolosak, nadol nchere metii Ilawi. Nairriwaa nanu olkilikuai meipoti Eliesa, o Ariel, o Shemaia o Elinatan, o Yarib, o Elnatan, o Natan, o Sekaria, o Meshulam, lelo arikok, neipotuni sii Yoiarib o Elnatan, laa iltung'ana apa oota engeno nagut neiriwarri ninche meshomo enetii Ido, ilo arikoni te wueji neji Kasifia, neliki ninche enapuo aajoki Ido o lalashera lenyena lelo sinkan le nkaji e Nkai, te wueji neji Kasifia, aa taa, pee eirriwakini iyiook ilaisiaayiak te nkaraki e nkaji e Nkai. Ore te nkaraki enkaina supat e Nkai ang, natii te shumata iyiook eyakita ninche iyiook oltung'ani oata enkidimata, too layiok le Mahali, olayioni le Lawi, olayioni le Israel, oji enkarna enye Sherabia, ore tenebo ilayiok lenyena o ltung'ana lo lgilata lenye naa tomon oisiet, tenebo sii Hashabia, ore tenebo ninye netii Yashabia, too layiok le Merari, ore ninche tenebo iltung'ana lo lgilata lenye, o layiok lenye naa tikitam. Ore tenebo lelo aisiaayiak le nkaji e Nkai iip are o tikitam, apa ooiteng'ela Daudi, pee etum aaisiaayia Ilawi, neipotoki kulo pooki too nkarn. Naitoki nanu aibalunye eenata e mpukoroto to lkeju le Ahafa, pee kitum iyiook aitoborro ate te dukuya Enkai ang, pee king'oru te ninye enkoitoi naitoriori te nkaraki iyiook maate, o nkera ang o masaa ang pooki. Amu atoduaa apa nanu enkurruna tenaomon olaiguanani meishoo iyiook ilkuti sikarini, o lakedok loo mbartan, pee emitu iyiook too lmang'ati te nkoitoi, amu kindipa iyiook aatiaaki olaiguanani, “Ore enkaina e Nkai ang naa pee eyaki eretoto lelo pooki ooing'oru ninye. Ore engolon e ng'oro enye napi naa pee egilunore lelo oopaashare ninye.” Nikiyen iyiook ate aaitupukoo, nikisai Enkai ang tena bae, nening ninye esayiata ang. Naiteng'el nanu ilapolosak tomon oare te lelo apolosak kituaak: Sherabia, o Hashabia, o kulikae tomon loo lgilat lenye tenebo ninche. Naineneng'aki nanu ninche enkiroishi e nkosholai o sahabu o masaa, o nena kishorot te nkaraki enkaji e Nkai ang apa naaishorua olaiguanani, o lautarok lenyena, o lkituaak lenyena, elulung'a Israel pooki; naineneng nanu too nkaik enye enkiroishi e shekeli iip naa ntalantani iip ile e nkosholai, o masaa e nkosholai naabaya enkinyiang'a enye shekeli iip nabo, o sahabu ntalantani iip nabo. O lbakulini tikitam le sahabu loo nkiloi isiet enkiroishi enye, o masaa are sidain o suyai naanyaanyukie te nkiroishi nena e sahabu. Najoki nanu ninche, “Irara intae sinyat to Laitoriani, naa sinyat kuna masaa, ore enkosholai o sahabu naa nkishorot o lpela naaishori Olaitoriani, Enkai oo loo papaai linyi. Entagolie ninche, ning'oring'oro ninche ometaba anaa nimpimipimi ninche te dukuya ilapolosak kituaak o Lawi o lukuny oo nkajijik oo loo menye te Israel te Yerusalem, tiatua ilgilat le nkaji o Laitoriani.” Metaa eibung'a ilapolosak o Lawi enkipimore e nkosholai o sahabu o masaa, neyau ninche Yerusalem atua ina aji e Nkai ang. Nikintoki iyiook aadumunye to lkeju le Ahafa te nkolong e tomon oare o lapa le dukuya, aapuo Yerusalem. Netii enkaina e Nkai ang shumata iyiook, nekordu ninye iyiook te nkaina o lmang'atinta lang o too rresheta te nkoitoi. Nikibau iyiook Yerusalem nikibik teine nkolong'i uni. Ore te nkolong e ong'uan tiatua enkaji e Nkai ang, neipimi enkosholai o sahabu o masaa aapik nkaik e Meremot olapolosani, olayioni le Uria, netii tenebo ninye Eliesa olayioni le Finehas, netii tenebo ninche Ilawi, Yosabad olayioni le Binui. Eikenayioki nena pooki aajo keipima, ore enkiroishi e pooki toki neigeri. Ore teina kata lelo apa ooetuo eing'uaa eyararoto, lelo yararot ootorrinyunye, neishoru ilasarri oopejori aaisho Enkai e Israel, iloing'ok tomon oare tenkaraki Isiraeli pooki o lmeregeshi ntomoni naaudo o ile, o lkuoo le kerra ntomoni naapishana, neitayuni anaa olasar le ng'oki ilkineji tomon oare: ore kuna pooki naa ilasarri oopejokini Olaitoriani. Eyautua sii apa empalai naishorua olaiguanani aayaki ilkituaak o lbalusuni lo lkerenket otii teidia alo olkeju; neretu ninche iltung'ana o enkaji e Nkai. Ore eidipaki aataas kuna baa, nepuonu lelo kituaak enatii nejo, “Ore iltung'ana loo Siraeli, o lapolosak o Lawi, neitu egelaa ate aarishu too ltung'ana le kuna kuapi oata olminong oing'uaa ileKanaan, o Lhiti, o Lperisi, O Ljebusi o Lamoni o Lmoabu, o Lmisiri o Lamori. Amu ewaita ninche embata oo ntoyie enye aayamaki ate o layiok lenye, metaa etushulare ilo osho osinya iltung'ana loo loreren. Ore te nkaraki ena nemeisiligayu ninche, eituruk lelo kituaak o laiguanak eitarruoitie.” Ore ake pee aning ena, napolos nanu ilkilani laainei, olkila lai oado, naputu olpapita te ndukuya ai o to lmunyei naton aiputukuny. Ore lelo pooki ooikirikirate too rorei le Nkai e Israel, tenkaraki nemeisiligayu lelo ootorrinyunye te yararoto, neiturrurro naaman nanu, ina kata aitashe aiputukuny ometabau olasar le nteipa. Ore to lasar le nteipa nadumunye nanu te enata ai e mpukoroto, aishopito lelo kilani laainei o lkila lai oado epolosa, nagil nanu kung naitorioo nkaik aainei aitorioki Olaitoriani Enkai ai, ajo, “Oi Enkai ai, aata enkurruna tenaashumaki nanu iyie enkomom ai, Enkai ai, amu eilepa entorroni ang shumata alang ilukuny ang, neilepa entorroni ang ebaiki keper. Ore ebaiki nkolong'i oo loo papa o metabaiki ena olong kitii iyiook atua enkitarrurroto sapuk. Naa too nkitarruorrot ang, ewaki iyiook, o laiguanak lang o lapolosak lang aapik nkaik oo laiguanak loo nkuapi, nepiki iyiook olalem, nepiki eyararoto, neoruni iyiook imasaa, nepiki iyiook esulare anaa enatiu ena olong. Kake ore taata te nkiti rishata, neishorua omom Olaitoriani Enkai ang, alekaki iyiook oloti pisiaai, neisho iyiook ewueji e seriani, tiatua ewueji enye sinyati. Pee etum Enkai ang aitawang'a nkonyek ang neisho iyiook enkiti piunoto te rrindikisho ang. Amu kira iyiook iltung'ana le rrindikisho; ore ake eyia eitu eiturraa iyiook Enkai ang te rrindikisho ang. Kake eitabaikia iyiook enyorrata enye nauno, te dukuya le Parsia pee eisho iyiook enkiti kiyagata maitasheyie enkaji e Nkai ang, nikiram iwuejitinneeidaaitie, neisho iyiook emitunoto te Yudea o te Yerusalem. “Naa ore taata iyie Enkai ang, kaa iyiook kipuo aajo te siadi ena? Amu kinturraitie iyiook nkitanapat inono, apa nintanapishe aimunye isinkan linono, iloibonok le Nkai, ijo, ‘Ore ina kop nipuopuo aajing, pee iyaya metaa eninyi, naa enkop nemesinya, naata olduruk loo loreren le kuna kuapi, tenebo ilo minong oiputa ninye, ebaiki enkiting'oto o metabaiki enkiting'oto teilo duruk lenye. Ore enkaraki ina emincho ntoyie inyi meyama ilayiok lenye, nimiyaya sii ntoyie enye aayamaki ilayiok linyi. Niming'oruru aekata osotua o ninche o karsisisho enye eji pee igolulu, nitumutumu aainosa endaa sidai eina kop nintaa enjung'ore oo nkera inyi ntarasi.’ Ore eidipa kuna pooki aatadoiki iyiook te nkaraki nkiaasin ang torrok o te nkitarruoroto ang kitok, nikidol aajo, iyie Enkai ang naitamio, aitodorropu too nkitarruorot ang, ninchoo iyiook olpisiai loo lekunot oba nji. Eikingil iyiook aagil nkitanapat inono nikiyama o ltung'ana oas kuna baa olminong? Aimigorokino iyie iyiook, nimut iyiook ometaa metumi ninye olpisiai loo lekunot, nemeimisho ninye obo? Olaitoriani Enkai e Israel, ira iyie asipani, amu etelekuaki iyiook olpisiaai oimishe, anaa enikitiu ena olong. Ng'ura kitii iyiook dukuya iyie te nkitarruorroto ang, amu meetae oloidim aitasho te dukuya iyie te nkaraki ena.” Ore eomonito Esra neirridu, neishir, nenang'ie kewan enkop te dukuya enkaji o Laitoriani, neiturrurrokino ninye eumata sapuk oo lewa, o nkituaak o nkera, eing'uaa Israel, amu eishira lelo tung'ana te mion. Ore Shekamia olayioni le Yehiel, loo layiok le Elam, neirorie Esra: ajoki, “Kinturraitie iyiook enkirukoto te Nkai nikiyama nkituaak oo loreren oo ltung'ana lena kop, kake ore ake o taata eetae osiligi too Siraeli hoo netii ena. Ore enkaraki ina, maitobira iyiook olning'o lo sotua o Enkai ang, aaiwuang'ie kuna kituaak pooki o nkera enye, te risioroto e nkikoo o lkitok lai, o ene lelo ooikirikira te nkaraki enkitanapata e Nkai ang: naa nchoo easi ina te risioroto e nkitanapata. Tudumunye amu esiaai ino ina, nikitii iyiook tenebo iyie. Ntagoluoyu nias ina.” Nedumunye Esra neinosie olmumai ilapolosak kituaak, o Lawi o Siraeli pooki, pee eas anaa enatejoki. Neinos ninche olmumai. Neitoki Esra alo te nkaji e Nkai nelo olgilata le Yehobadan olayioni le Eliaship, naa ine eshomo airrag. Neitu einos endaa anaa eok enkare; amu eishiraka apa ninye lelo ooshomo eyararoto lemeisiligayu. Neitayuni enkitanapata tiatua Yuda pooki o Yerusalem tenkaraki lelo yararot pooki ootorrinyunye, pee epuo ninche aaiturrurro te Yerusalem. Naa teneitu elotu oltung'ani ake ninye obo too nkolong'i uni, te nkitanapata oo lkituaak o lpayiani, ore imasaa enyena pooki, neyai, ore ninye makewan, neiwuang'ieki te umata o yararot ootorrinyunye. Ore iltung'ana pooki le Yuda o Benchamen, neiturrurro te Yerusalem too nkolong'i uni, naa olapa lioudo apa ilo e nkolong e tikitam o lapa. Netoni iltung'ana pooki to lkurroto otumoreki te dukuya enkaji e Nkai, eikirikira te nkaraki ena bae o tenkaraki enchan sapuk. Neitashe Esra ilo apolosani nejoki ninche, “Itigila intae inkitanapat niyama nkituaak oo loreren, nitoponaitie enkitarrurroto te Israel. Ore naa taata entobira enkirridunoto to Laitoriani Enkai oo loo papaai linyi, niasiasa eyieunoto enye. Entegelari maate entung'uai iltung'ana lena kop, ning'uaa nkituaak enye.” Newal eumata pooki to ltoilo sapuk aajo, “Neijia etiu, meeta nchere keitu iyiook kiaas anaa enitejo. Kake aikumok iltung'ana, naa erishata e nchan sapuk, mikindim iyiook aaitasho tena kisiajata. Ore sii ena siaai, neme ene nkolong nabo anaa nkolong'i are, amu kintarruoitie iyiook oleng tena bae. Nchoo ilkituaak lang eitashe te rishata e umata pooki, naa nchoo pooki tiatua nkanas ang apa oowaita nkituaak oo loreren epuonu too rishat naategeluaki, ore ilpayiani o larishak te pooki anasa neaku tenebo ninche, ometaba anaa neibelekenya engoro napi e Nkai ang aing'uaa iyiook.” Yonatan ake olayioni le Asahel o Yohaseia olayioni le Tikfa otanya ena, ore Meshulam o Shebetai, ilo le Lawi, neibung'are ninche. Neas lelo yarunot apa ootorrinyunye ina. Negelu Esra olapolosani iltung'ana, ilukuny oo nkajijik oo loo menye, te risioroto oo nkajijik oo loo menye, ore ake pooki ng'ae te ninche neigeri enkarna enye. Ore te nkolong e dukuya o lapa le tomon netoni ninche pee ejurru ina bae. Ore te nkolong e dukuya o lapa le dukuya nebau ninche eneiting'ie lelo lewa apa ooyama nkituaak oo loreren. Ore too layiok loo lapolosak apa ooyama nkituaak oo loreren, netumi, Maaseia, o Eliesa, o Yarib, o Gedaia, loo layiok le Yeshua olayioni le Yosadak, o lalashera lenyena. Etonyorraitie ninche maate pee eiwuang'ie nena kituaak enye oo loreren, ore apa olasar lenye le nkitarruorroto naa olmeregesh le luaata oo ntare te nkaraki enkitarrurroto enye. Ore too layiok le Imer netumi Hanani o Sebadia. Ore too layiok le Harim, netumi Maaseia, o Eliya, o Shemaia, o Yehiel o Usia. Ore too layiok le Pashur: netumi Elioenai, o Maaseia, o Ishmael, o Natanael o Yosabad, o Elasa. Ore too Lawi: netumi Yosabad o Shimei o Kelaia, (aa taa Kelita) o Petahia, o Yuda, O Eliesa. Ore too laranyak, netumi: Eliashib. Ore too larripok loo nchomito netumi: Shalum, o Telem, o Uri. Ore te Israel: too layiok le Parosh netumi: Ramia, o Isia, o Malkija, o Mijamin, o Eleasa, o Hashabia o Benaia. Ore too layiok le Elam netumi: Matania, o Sekaria, o Yehiel, o Abdi, o Yeremot o Eliya. Ore too layiok le Satu netumi: Elioenai, o Eliashib, o Matania, o Yeremot o Sabad, o Asisa. Ore too layiok le Bebai naa Yehohanan, o Hanania, o Sabai, o Atalia. Ore too layiok le Bani naa Meshulam, o Maluk, o Adaia, o Yashub, o Sheal, o Yeremot. Ore too layiok le Pahat-moab: netumi Adna, o Chelai, o Benania o Maaseia, o Matania, o Besalel, o Binui o Manase. Ore too layiok le Harim: naa Eliesa o Ishija, o Malkija, o Shemaia, o Shimeon, o Benchamen, o Maluk, o Shemaia. Ore too layiok le Hashum: naa Matenai, o Matata, o Sabad, o Elifelet, o Yeremai, o Manase o Shimei. Ore too layiok le Bani: naa Maadai, o Amram, o Uel, O Benania, o Bedeia, o Cheluki, o Fenia, o Meremot, o Eliashib, o Matania, o Matenai, o Yaasil. Ore too layiok le Binui: naa Shimei, o Shelania, o Natan, o Adaia, o Maknadebai, o Sheshai, o Sherai o Asarel o Shelemia, o Shemaia, o Shalum, o Amaria, o Yosef. Ore too layiok le Nebor: naa Yeil o Matitia, o Sabad, o Sebina, o Yadai, o Yoel, o Benaia. Eyama apa kulo pooki nkituaak oo loreren, neiwuang'ie ninche tenebo nkera enye. Irorei le Nehemia kulo olayioni le Hekalia. Ore apa to lapa oji ole Kislep, to lari le tikitam, atii nanu Susa ina ang kitok, nelotu Hananai obo loo lalashera laainei tenebo kulikae tung'ana eing'uaa Yuda. Naikilikuan nanu ninche mbaa naaipirta lelo Yahudi ootelekutua, lelo apa ooimishote te yararoto, naikilikuan sii mbaa naapirta Yerusalem. Naajoki ninche nanu, “Ore lelo lekunot ootii olkerenket, apa ooimishote te yararoto, neeta enyamali sapuk o enkurruna. Etuurori esuntai e Yerusalem, ore nchomito enyena netumuta enkima.” Ore ake pee aning kulo rorei naton aishir, naisinanuo nkolong'i kumok; nabik nanu apukoo naomon te dukuya Olaitoriani Enkai e shumata. Najo nanu, “Olaitoriani, Enkai e shumata, Enkai kitok naitureisho naibung osotua o enyorrata nauno, te lelo oonyor ninye, neibung nkitanapat enyena. Nchoo enkiok ino einining, nincho nkonyek inono eing'orisho, pee ining enkomono o sinka lino, naomon taata nanu te dukuya iyie, dama o kewarie, te nkaraki iltung'ana linono le Israel, isinkan linono, airridu ing'ok oo ltung'ana le Israel, nikitaasa iyiook tialo iyie. Ee ore nanu o enkaji e papaai lai nikitaasa eng'oki. Kitaasa iyiook entorroni oleng tialo iyie, neitu kimbung nkitanapat, o nkiguanat, o nkikoot apa nintanapa osinka lino Musa. Tadamu ilo rorei apa lintanapa osinka lino Musa, ijo, ‘Tenirara intae ilemeisiligayu, nalo nanu aidapash intae tiatua iloreren. Kake tenikirrinyokinono intae nanu nimbung'ubung'u nkitanapat aainei, niasiaasa ninche, ore hoo neba enkidapashari inyi anaa nkatampo te lakuani, kaiturur nanu ninche tene, nayau ninche ine wueji nategelua, pee aisho enkarna ai metobiko teine.’ Isinkan linono ninche naa iltung'ana linono, lelo litokordua iyie te ngolon ino kitok, o te nkaina ino nagol. Olaitoriani, nchoo enkiok ino metoning'o enkomono o sinka lino, o enkomono oo sinkan linono, ooshipakino euriata e nkarna ino. Nchoo enkishuroto osinka lino ena olong, nincho ninye olng'ur too nkonyek ele tung'ani.” Ara apa nanu olanapani le nkikompe o laiguanani. Ore apa to lapa le Nisan to lari le tomon oare le nkitoria o laiguanani Artaserses, ina kata apa etii enaisho dukuya ninye, naya nanu enaisho alo aisho olaiguanani. Neitu ae kata nanu aaku olemeshipa te dukuya Olaiguanani. Naajoki nanu olaiguanani, “Kainyoo pee eeta enkomom ino osina, nadolita ajo mimuoi? Meeta ae toki osina lo ltau ele.” Nairut nanu oleng. Najoki nanu olaiguanani, “Metobikoi olaiguanani ntarasi! Kainyoo pee meisinanuo enkomom ai, aa ore enkanasa, ine netii nkuraren oo loo papa, netaa olmuate, ore nchomito enyena, netumuta enkima?” Naaitoki nanu olaiguanani ajoki, “Naa kainyoo iyie iomonu?” Naomon nanu Enkai e keper. Najoki nanu olaiguanani, “Tenaa keitiship olaiguanani, naa tenenoto osinka lino omom too nkonyek inono, pee kirriwaa nanu mashomo Yuda, ina anasa natii nkuraren oo loo papa, pee alo ashet.” Naajoki nanu olaiguanani, etii enkitok o olaiguanani embata enye etonita, “Kenkata nabaa iyie ilo naa kanu ishukunye?” Tenaa taa keitiship olaiguanani pee aairriwaa nanu, naa kadung'oki ninye enkata. Najoki nanu olaiguanani, “Tenaa keitiship olaiguanani, nchoo nanu maaishori mpala nayaki ilbalusuni le lido kekun otii lido kerenket olkeju, pee aaisho ninche nanu maima ina kop o matabai Yuda; neishoruni sii imapala naayakini Asaf ilo aing'urani le ntim o laiguanani, pee aatum nanu aishoo mbaoi naitobirie iloom te nkaraki nena shomito o sempewuet le nkaji e Nkai, o esuntai pooki e nkanasa, o ina aji nalo nanu amany.” Naaisho nanu olaiguanani nena pooki naatoomonuo, amu etii apa enkaina supat o laitoriani shumata nanu. Naitoki nanu alotu ilo kerenket le lelo balusuni ootii lido kekun o lkeju, naisho ninche nena pala o laiguanani. Neirriwayie apa olaiguanani tenebo nanu ilkituaak le njore o lakedok loo mbartan. Kake ore ake pee ening' Sanbalat le Heroni ena, o Tobia ilo sinka, ilo le Amori, neitagor ninche oleng' pee ening nchere, eewuo oltung'ani obo aing'oru olmabarishoi loo nkera e Israel. Metaa aeuo apa nanu Yerusalem naton teine nkolong'i uni. Naitoki nanu adumunye kewarie, nanu o lkuti tung'ana apa ootii tenebo nanu; neitu nanu aliki oltung'ani hoo obo, ina natipika Enkai ai atua oltau lai, pee alo aitaas Yerusalem. Meetae apa eng'ues natii ine meteleku ake ina apa natakedo alotunye. Ashomo apa nanu auluo kewarie aim kishomi enkalo o Erata nalo olchorro loo mbariak, o kishomi e Modioi. Naing'or nanu asipu isunta e Yerusalem apa naaturori, tenebo o nchomito enyena apa naatumuta e nkima. Naitoki nanu alo kishomi e nkong'u enkare o lchorro lo laiguanani; kake meetae apa ewueji neeim ina ng'ues nakedito nanu teine. Naitoki nanu alo kewarie aim embata o erata, naing'or asipu ina suntai. Naitoki nanu aibelekenya najing kishomi natii enkalo o erata. Naitoki arrinyunye. Neitu apa eyiolou lelo tung'ana kituaak aajo kaji nanu ashomo anaa kaa aasita; neton apa nanu eitu aliki Ilyahudi, o lapolosak, o ltung'ana le nkaji e nkitoo, o lkulikae kituaak, o lelo kulikae laa ninche oas esiaai. Naitoki nanu ajoki ninche, “Idolitata ena nyamali nikitii iyiook atua, entodol aajo eirragita Yerusalem aa olmuate, netapejoki nchomito enyena. Wootu mateshet iyiook esuntai e Yerusalem, peemikingil aata esulare.” Naliki nanu ninche ina aina e Nkai ai oshi natii shumata nanu, naliki sii lelo rorei laairorie nanu olaiguanani. Nejo ninche, “Matudumunye iyiook aashet.” Neaku eitagolo ninche nkaik enye tenkaraki ina siaai sidai. Kake ore ake pee ening Sanbalat le Heroni o Tobia ilo sinka, le Amoni o Geshem ilo marabui ina, nekueniyie iyiook, nemenaa iyiook nejo, “Kainyoo ena toki niaasitata intae?” Aigolong'akiki intae olaiguanani? Naitoki nanu awaliki ninche ajoki, “Ore Enkai e shumata keisho iyiook matudupoto, naa ore iyiook isinkan lenyena aikidumunye aashetisho. Kake ore intae miaatata erubata, anaa esipata, anaa endamunoto te Yerusalem.” Nedumunye Eliashib ilo apolosani kitok, tenebo ilalashera lenyena, lelo apolosak, neshet ninche kishomi oo nkerra. Neitisiny ninche ina kishomi, nepik nkikeneta enyena. Neitisiny ninche ina kishomi o meitabaiki oltalet le iip nelo abaiki oltalet le Hananel. Ore enetashare ninye neshet Iltung'ana le Yeriko. Ore enetashare ninche neshet Sakar olayioni le Imri. Ore ilayiok le Hasena neshet kishomi oo sinkir; eitoluaa ninche iloom, nepik nkikeneta enyena o lmushumaani lenyena, o sekenke enyena. Ore enetashare ninche, neitobir aram Meremot olayioni le Uria, olayioni le Hakos. Ore enetashare ninche neitobir aram Meshulam olayioni le Berekia, olayioni le Meshesabel. Ore enetashare ninche neitobir aram Sadok olayioni le Baana. Ore enetashare ninche neitobir aaram iltung'ana le Tekoa, kake ore lelo kituaak lenye eitu ninche epik imurto ina siaai o Laitoriani lenye. Ore Yoida olayioni le Pasea o Mehulam olayioni le Besodia, neitobir aaram enkishomi musana. Nepik iloom lenyena o nkikeneta enyena, o lmushumaani lenyena; o sekenke enyena. Ore enetashare ninche, neitobir aram Melatia le Gebeon o Yadon le Meron, o ltung'ana le Gebeon o le Mispa, apa ootii abori enkitoria o lbalusui leilo kerenket te lido kekun o lkeju. Ore enetashare ninche neitobir aram Usiel olayioni le Harbaia, ilo kunoni. Ore enetashare ninye neitobir aram Hanania, ilo obo loo laitobirak loo sonkoyoni; Neshet ninche Yerusalem o meitabaiki e suntai dapash. Ore enetashare ninche, neitobir Aram Refaia olayioni le Huri, ilo aitoriani le nchoto e Yerusalem. Ore olotashare ninche neitobir aram Yedia olayioni le Harumap, ina kipirakinoto e nkaji enye. Ore enetashare ninye neitobir aram Hatush olayioni le Hashabneia. Ore Malkija olayioni le Harim o Hashub olayioni le Pahat Moab neitobir aaram enkae rishata tenebo oltalet lo lkokuet. Ore enetashare ninye neitobir aram Shalum olayioni le Halohesh, ilo aitoriani le nchoto nabo e Yerusalem, neshet ninye o ntoyie enyena. Ore Hanam o lelo oomanya Senoa, neitobir aaram enkishomi o erata; neshetu ninche ninye nepik nkikeneta enyena, o lmushumaani lenyena o sekenke enyena, neram ntemat e nkaina e nkalifu nabo e suntai, o meitabaiki kishomi e modioi. Ore Malkija olayioni le Rekab, ilo aitoriani lo lkerenket le Bethashekem, neitobir aram enkishomi e modioi, neitoki ashet ninye nepik nkikeneta enyena, o lmushumaani lenyena, o sekenke enyena. Ore Shalum olayioni le Galhose, ilo aitoriani lo lkerenket le Mispa neram aitobir, enkishomi e nkong'u enkare. Etesheta ninye neimulumul nepik nkikeneta enyena, o lmushumaani lenyena, o sekenke enyena. Neshet ninye esuntai o lchorro le Shela, le nkurma o laiguanani, omeitabaiki nkedeta naadoyio aapuo enkanasa e Daudi. Ore te siadi ninye, neitobir aram Nehemia olayioni le Asbak, ilo aitoriani le nchoto nabo o lkerenket le Betsar o meitabaiki enkipirakinoto oo nkuraren e Daudi, o meitabaiki olchorro oitobiruaki, o meitabaiki enkaji oo ltung'ana magil. Ore te siadi ninye neitobir Ilawi aaram: Reham olayioni le Bani; ore te siadi ninye naa Shashabia, ilo aitoriani lo lpisiaai lo lkerenket le Keila, neram aitobir olkerenket lenye. Ore te siadi ninye neitobir aaram ilalashera lenye; Bafai olayioni le Hanadad, ilo aitoriani le nchoto nabo o lkerenket le Keila; ore olosujaki ninye naa Eser olayioni le Yoshua, ilo aitoriani le Mispa, neitobir aram enkae rishata, enkipirakinoto e wueji neshumieki imasaa o larrabal teine nelojare e suntai. Ore te siadi ninye neitobir aram Baruk enkae rishata ebaiki elojata e suntai o meitabaiki kutukaji e nkaji e Eliaship ilo apolosani kitok. Ore te siadi ninye naa Meremot olayioni le Uria, olayioni le Hakos oitobira enkae rishata, ebaiki kutukaji e nkaji e Eliab o metabaiki enkiting'oto, e nkaji e Eliaship. Ore te siadi ninye naa ilapolosak, lelo tung'ana le nkisiajata, ooitobira aaram. Ore te siadi ninche neitobir aaram Benchamen o Hashab enkipirakinoto e nkaji enye. Ore te siadi ninche neitobir aram Asaria olayioni le Maaseia, olayioni le Anania embata e nkaji enye makewan. Ore te siadi ninye naa Benui olayioni le Hanadad oitobira aram enkae rishata, ebaiki enkaji e Asaria ometabaiki elojata e suntai. Nelo abaiki olpijata. Ore Palal olayioni le Usai neitobir aram enkipirakinoto elojata o ilo talet oipang'u te nkaji e shumata o laiguanani to lgoriet le rripore. Ore te siadi ninye neitobir aaram Pedaia olayioni le Parosh, tenebo ilaisiaayiak le nkaji e Nkai ootii Ofel ewueji neipirakinore kishomi e nkare, te nkalo o loo saen oilo talet oilep shumata. Ore te siadi ninye neitobir iltung'ana le Tekoa enkae rishata te nkipirakinoto eilo talet oilep shumata, o metabaiki esuntai e Ofel. Ore shumata enkishomi oo mbartan neitobir ilapolosak aaram, oltung'ani ake enkipirakinoto e nkaji enye makewan. Ore te siadi ninche neitobir aram Sadok olayioni le Imer enkipirakinoto e nkaji enye. Ore te siadi ninye neram Shemaia olayioni le Shekemia, ilo arriponi le kishomi e nkalo o loosaen. Ore te siadi ninye neitobir aram Hanania olayioni le Shelemia, o Hanam ilo ayioni le ile le Selap neitobir aram enkae rishata. Ore te siadi ninye neitobir aram Meshalam olayioni le Berekia enkipirakinoto e nkaji enye. Ore te siadi ninye, neshet aram Malkija obo loo lkunono omeitabaiki enkaji oo laisiaayiak le nkaji e Nkai, o ewueji oo lamirak enkipirakinoto e kishomi e rripore, o meitabaiki enkaji e shumata natii olpijata. Ore ebaiki olgilata le shumata o metabaiki kishomi oo nkerra, neitobir aaram ilkunono le sahabu. Ore apa pee ening Sanbalat nchere kishetita iyiook esuntai negoro oleng, neim engoro enye oleng. Nesurdaany ninye Ilyahudi. Nejo ninye te dukuya ilalashera lenyena, o te dukuya enjore e Samaria, “Kainyoo easita kulo Yahudi tashala? Keigil ninche aaitobir ntokitin? Keigil ninche aapolosisho? Keidip ninche te nkolong nabo? Keigil ninche aaiturrur isoito, aaitayu teilo sototi loo suut naapejore. Netii apa Tobia olayioni le Amori embata enye, nejo ninye, Ee, ore ina nashetita ninche, tenelo embarie shumata ninye, neuroo ina suntai enye oo soito!” Naomon nanu najo, “Toning'o na Ai ang, amu etemenaki iyiook; mbelekenya iyie esurdaanyata enye meeu shumata ilukuny enye maate, naa nchoo ninche meitoroki teina kop enye e yararoto. Mintemoo iyie enkitarruorroto enye, nimincho metujuti eng'oki enye metujuti aaiwuang'ie too nkonyek inono. Amu kintagoro ninche iyie te dukuya ilashetak.” Ina pee kishet iyiook esuntai; neiruburuba esuntai pooki tenebo, to lpisiaai le nkadoro enye. Amu eeta apa lelo tung'ana endamunoto pee eas esiaai. Kake ore ake pee ening Sanbalat, o Tobia, o Lmarabu, o Lamori le Ashdod nchere eloito dukuya e ramata e suntai e Yerusalem, netunukaki ilusien enyena, negoro ninche oleng. Neitobir ninche tenebo pee erasaki Yerusalem neyau olmilo atua ninye. Nikiomon iyiook Enkai ang, nikipik ilarripok ooibooyo ninche, dama o kewarie. Kake etejo apa Yuda, “Eishunye engolon oo lanapak loo lolan, naa kumok isuut, mikindim iyiook aateshet esuntai.” Nejo ilmang'ati lang, “Meyiolou ninche toki, anaa edolisho, ometaba anaa nikipuonu empolos enye, nikiaar ninche metuata, nikintasheyie esiaai.” Ore ake pee epuonu lelo Yahudi apa ootashare ninche, nejoki ninche iyiook katitin tomon, ore too wuejitin pooki neemanya ninche, nepuonu ninche aagilunore iyiook. Neaku ore too wuejitin neegum oorishat e oriong e suntai, too loingengen, atipika nanu iltung'ana te risioroto oo lmareita lenye, eeta ilalema, o remeta enye o nkai enye. Naing'orisho nanu, nadumunye, najoki lelo kituaak, o larikok, o lkulikae tung'ana, “Emiureyu ninche. Entadamu Olaitoriani, laa ninye olkitok neitureisho, naa ninye omitu ilalashera linyi, o layiok linyi, o ntoyie inyi, o nkituaak inyi, o nkang'itie inyi.” Ore ake pee ening ilmang'ati lang nchere kitayioloito nena kitobirat enye, neibooyie Olaitoriani, nikirrinyokino pooki esuntai, nelo ake oltung'ani esiaai enye. Ore ebaiki ina olong neito idia alo, ore olpisiaai loo laisiaayiak laainei neas esiaai e nchetare, neibung likae pisiaai iremeta, o long'oi o nkai, o nkilani oo lgooitie, neitashe ilarikok tioriong enkaji pooki e Yuda, laa ninche apa ooshetita esuntai. Ore lelo oonap ilolan, neitanapi te nkaina nabo ilolan ore te nkae aina neibung imasaa o larrabal. Ore ake obo loo lashetak, neenita olalem te mpolos enye eshetisho. Ore ilo tung'ani apa oosh entarumpeta naatashare nanu. Najoki nanu lelo kituaak, o larikok, o lkulikae tung'ana pooki, “Aisapuk esiaai, netalala oleng, neidapasha iyiook esuntai, kitalamate maate. Ore te wueji nining'ieng'ie oltoilo le ntarumpeta, enkuetu ene nikitii. Kearisho Enkai ang te rishata ang.” Neaku kitaasishote iyiook teina siaai, ore olpisiaai loo ltung'ana, neibung iremeta ebaiki tadekenya o metaliooto ilakir teipa. Atiaaka sii apa iltung'ana, “Nchoo pooki tung'ani o sinka lenye eirrag Yerusalem, pee etum aatorrip iyiook kewarie, neidim aataasisho dama.” Metaa mme nanu, neme lalashera laainei, neme isinkan laainei, neme larripok laasujita nanu, meetae hoo obo oitayio nkilani enyena; neibung'ita ake oltung'ani imasaa enyena o larrabal te nkainaenye. Nedumunye apa olkiyioi kitok loo ltung'ana o nkituaak enye, te nkaraki Ilyahudi alashera lenye. Amu etii apa lelo oojo, “Ore iyiook tenebo ilayiok lang o ntoyie ang naa eikira kumok, maing'oru iyiook entapa pee kitum aainosa nikinchu.” Eetae sii apa lelo oojo, “Kiteena te sile nkurman ang, o nkurman ang oo sabibu o nkajijik ang, pee kitum entapa te nkaraki olameyu.” Netii sii lelo oojo, “Kisilenoitie mpisai te kodi o laiguanani te nkaraki nkurman ang o nkurman ang oo sabibu. Etotiutuo taata iseseni lang anaa iseseni loo lalashera lang; netotiutuo nkera ang anaa nkera enye; eji neton ake kirrumoki ilayiok lang o ntoyie ang metaa rrindiki; ore kulie oo ntoyie ang neidipaki aaitaa rrindiki; amu mikiaata engolon nikiretunye. Amu ewaita kulikae tung'ana nkurman ang o nkurman ang o sabibu.” Atagore apa oleng pee aning olkiyioi lenye o kulo rorei. Aiguane nanu makewan, nadung'oki enkiguana lelo kituaak o larikok. Najoki nanu ninche, “Ntulusoitie elaakinoto e dupoto o ltung'ani ake olalashe lenye.” Naibung ina umata kitok agilunore ninche, najoki ninche, “Ore iyiook anaa enikindim nikinyiang'utua aarrinyu ilyahudi alashera lang apa ootimirakaki iloreren; kake eji imir iyie ilalashera linono eji pee etumi aatimiraki iyiook!” Etigirate ninche neitu etum ororei owalu. Kaae najo nanu, “Ore ina bae niaasitata intae neme sidai. Aimeishiaakino intae nipuopuo te uriata e Nkai ang, pee imbooyoyo nkinyalat e lelo oshon mang'ati lang? Ore ake sii nanu o lalashera laainei nikisilenoki ninche mpisai o entapa. Matung'uai iyiook ena dupoto. Entorrinyoki ninche ena olong taata nkurman enye, o nkurman enye oo sabibu, o nkurman enye oo loirienito, o nkajijik enye, o maaip oo ropiyiani enye, o entapa, o enaisho oo sabibu o ina ilata apa niwaita aaitung'uaa ninche.” Neitoki ninche aajo, “Eikirrinyu iyiook kuna nimikinkilikuanu toki te ninche. Eikiaas iyiook anaa enijo.” Naipotu nanu ilapolosak nainosie ninche olmumai pee eas anaa enaisiligishore. Naitoki sii aipirripir enkila ai, najo, “Meikuna neijia Enkai aipiripiroo pooki tung'ani te nkaji enye, o te siaai enye tenemeitabaya ena kisiligata. Meipiripiri ninye neitoroki.” Nejo eumata pooki, “Esai” Neisis Olaitoriani. Neas lelo tung'ana aanaa enaisiligishore ninche. Ore ake sii ebaiki ina kata apa naageluni mataa olbalusui te nkop e Yuda, ebaiki olari le tikitam o metabaiki olari le tomoni uni o are le nkitoria e Arteserses ilo aiguanani, ilarin tomon o are, eitu nanu o lalashera laainei aainos ina daa o lbalusui. Ore lelo balusuni apa le dukuya ootii te dukuya nanu neitanap iltung'ana ilolan ooiroishi, neoru ninche endaa o enaisho oo sabibu, metii shekeli artam e nkosholai. Neitore sii isinkan lenye olorere. Kake eitu nanu aas ina, te nkaraki euriata e Nkai. Aibung'a sii apa enchetata ena suntai, neitu aing'oru enkop. Ore isinkan laainei pooki neiturrurro teine tenkaraki esiaai. Ore ake sii etii apa emisa ai iltung'ana iip nabo o onom, Ilyahudi o lkituaak metii lelo apa ooetuo enikitii eing'uaa lelo oreren oomanita iyiook. Ore apa endaa naitobiri te nkolong nabo naa olkiteng obo o nkerra ile gelunot; eitobiraki sii apa ilukunkuni te nkaraki nanu. Ore ake too nkolong'i tomon netii ilbenia le naisho oo sabibu te nkumoi; ore ake etii kuna pooki eitu nanu aikilikuanu endaa naipirare olbalusui, amu keiroishi apa esinkaisho te kulo tung'ana. Tadamu te nkaraki esupatisho tialo nanu na Ai ai, nena pooki nataasa te nkaraki kulo tung'ana. Ore apa pee elikini Sanbalat o Tobia le Geshem ilo Marabui o kulikae mang'ati lang nchere atesheta nanu ina esuntai nemeekure etii olong'eng'e, hoo naa ore ebaiki ina kata eton eitu apik nkikeneta e kishomi, naairriwaki Sanbalat o Geshem olkilikuai ejo, “Wou manototo tenebo te nkang nabo e nkisiajata e Ono.” Kake keyieu apa ninche naaitaas entorrono. Airriwaka nanu ninche ilkiliku ajoki, “Aasita esiaai kitok nemaidim aeu. Kainyoo pee eitashe esiaai eji pee alotu enitii?” Naairriwaki ninche nanu ilkiliku katitin ong'uan aaiko nji, nawaliki ninche aiko nji. Ore ake teina oitoi neirriu Sanbalat olkilikuai lenye te nkata e imiet, nereu olaisiaayiani lenye eeta empalai nabolo te nkaina enye. Ore tiatua ina palai neigero, ajo, “Etolimuoki tiatua iloshon, netejo sii Geshem neijia, nchere ore iyie o Lyahudi nintobiritata pee iseriser ina pee ishetitata esuntai, naa ijo pee iyaku olaiguanani lenye te risioroto eina limunoto. Itegelua sii iloibonok pee eibalie aalimu mbaa naaipirta Yerusalem, ‘Etii olaiguanani Yuda.’ Ore naa taata kelikini olaiguanani te risioroto e kulo rorei. Ore naa taata wou matoning'oto.” Nairriwaki nanu olkilikuai ajoki, “A-a, ore nena baa nijoito netaasate, amu iyie oipirua ninche too ndamunot inono.” Amu keyieu apa pooki neiture iyiook, edamu aajo, “Keidim nkaik enye aatalepori neitiak esiaai, nemeitokini aas” kake ore iyie na Ai ntagolo iyie nkaik aainei. Ore apa pee alo enkaji e Shemaia olayioni le Delaia, olayioni le Mehatabel, apa oikenoyioki, nejo ninye, “Manototo iyiook tenebo tiatua enkaji e Nkai, tiatua ewueji sinyati, nikinken nkikeneta e nkaji e Nkai; amu aikipuonu ninche aar iyie tua, kewarie kipuonu ninche aar iyie tua.” Kake atiaaka nanu ninye, “Kaisik ailanyisho toltung'ani laaijo nanu? Ijo iyie kaitajeu enkishui ai tenalo aisudori tiatua enkaji e Nkai. Maas nanu ina.” Nayiolou nanu aitisip, nadol ajo eitu eirriu Enkai ninche, kake eibalunye ninye enaibon pee aagilunore nanu, enkaraki naigero Tobia o Sanbalat ninye. Tenkaraki ena bae apa eigeroki ninye pee aitukureti mataasa eng'oki tena oitoi, naatumoki ninche aaishoo enkarna torrono ejo pee aaitongu. Tadamu Tobia o Sanbalat, na Ai ai te risioroto e kuna baa naataasa ninche, o enkoiboni sii naji No-adia o lelo kulikae oibonok laayieu naaitukuret. Eidipe apa ina suntai te nkolong e tikitam o imiet o lapa oji le Israel Elul, too nkolong'i onom oare. Ore pee ening ilmang'ati lang pooki ina, neirut iloshon pooki oomanita iyiook, neibung oloputukunyi kitok amu etumusutuo aajo etaasaki ena siaai te retoto e Nkai ang. Ore ake sii apa te nena olong'i, eirriwaitie ilkituaak le Yuda mpala aairriwaki Tobia, neirriwaki sii ninye Tobia ninche mpala. Amu ore apa iltung'ana kumok te Yuda neinosakinote olmumai o ninye, amu olaputani apa ninye le Shekania olayioni le Ara: naa olayioni lenye Yehohanan apa oyama entito e Meshulam, olayioni le Berekia. Eimakita sii apa nkiaasin sidain te dukuya nanu, nepuo aaliki ninye irorei latejo. Naairriwaki Tobia mpala ejo pee aaiture. Ore apa pee eidipayu esuntai naidipa nkikeneta oo nchomito, neidipaki aategelu ilarripok loo nchomito, o laranyak, o Lawi, naisho nanu, olalashe lai Hanani o Hanania meitasheiki Yerusalem. Amu oltung'ani apa oisiligayu neure Enkai alang ilkumok. Najoki nanu ninche, “Emincho ake nchomito e Yerusalem eboli ometaba anaa neilepu enkolong; naa ore eton eitashe aarripisho nchoo ninche eiken nepik isekenke ooikenieki nchomito. Entegelu ilarripok tiatua lelo oomanya Yerusalem, neitashe ake pooki ng'ae te rishata enye, neipirare ake oltung'ani enkaji enye.” Aisapuk apa ina anasa nelala, kake ore iltung'ana ootii atua naa kuti nemetii nkajijik naaidipaki aateshet. Nepik apa Enkai ndamunot aainei pee aiturrur ilkituaak, o larikok, o ltung'ana pee eiger pooki anaa ntipati oo lmareita, lelo apa ootangasa aapuonu, natum nanu eigeroki aaiko nji: Iltung'ana lo lkerenket kulo apa ooetuo eing'uaa eyararoto e lelo apa ootarayie Nebukadnesa olaiguanani le Babilon nenap aya, etorrinyunye ninche Yerusalem o Yuda nelo ake pooki ng'ae enkang enye. Eetuo apa ninche tenebo Serubabel, o Yoshua, o Nehemia, o Asaria, o Raamia o Nahamani, o Mordekai, o Bilshan o Misparet o Bigfai, o Nehum o Baana. Ore esiana oo ltung'ana le Israel: lelo ayiok le Perosh, naa nkalifuni are o iip nabo o ntomoni naapishana oare. Ore ilayiok le Shefatia naa iip uni o ntomoni naapishana oare. Ore ilayiok le Ara, naa iip ile o onomm oare. Ore ilayiok le Pahatmoab, aa taa ilayiok le Yoshua o Yoab, naa nkalifuni are o iip isiet o tomon o isiet. Ore ilayiok le Elam naa enkalifu nabo o iip are o onom o ong'uan. Ore ilayiok le Setu naa iip isiet o artam o imiet. Ore ilayiok le Sakai, naa iip naapishana o ntomoni ile. Ore ilayiok le Binui, naa iip ile o artam o isiet. Ore ilayiok le Bebai naa iip ile o tikitam o isiet. Ore ilayiok le Asgad, naa nkalifuni are o iip uni o tikitam o are. Ore ilayiok le Adonikan naa iip ile ontomoni ile oopishana. Ore ilayiok le Bigfai naa nkalifuni are o ntomoni naapishana. Ore ilayiok le Adin naa iip ile o onomm o imiet. Ore ilayiok le Ater, a taa ile Hesekia naa ntomoni naaudo o isiet. Ore ilayiok le Hashum naa iip uni o tikitam o isiet. Ore ilayiok le Besai, naa iip uni o tikitam o ong'uan. Ore ilayiok le Harif naa iip o tomon oare. Ore ilayiok le Gibeon naa ntomoni naaudo o imiet. Ore iltung'ana le Betlehem o Netofa naa iip ontomoni isiet o isiet. Ore iltung'ana le Anatot naa iip o tikitam o isiet. Ore iltung'ana le Bet-asmapet naa artam oare. Ore iltung'ana le Kiriat-yearim, Kepira o Beerot, naa iip naapishana o artam o kuni. Ore iltung'ana le Rama o Geb, naa iip ile o tikitam o obo. Ore iltung'ana le Mikmas naa iip o tikitam o are. Ore iltung'ana le Betel o Ai, naa iip o tikitam okuni. Ore iltung'ana le nkae Nebo naa onomm o are. Ore ilayiok le likae oji Elam naa enkalifu nabo o iip are o onomm o ong'uan. Ore ilayiok le Harim, naa iip uni o tikitam. Ore ilayiok le Yeriko naa iip uni o artam o imiet. Ore ilayiok le Lod, Hadid o Ono, naa iip naapishana o tikitam o obo. Ore ilayiok le Senaa naa nkalifuni naapishana o iip naaudo o tomoni uni. Ore ilapolosak: lelo ayiok le Yedaia aa taa enkaji e Yoshua, naa iip naaudo o ntomoni naapishana o okuni. Ore ilayiok le Imer, naa enkalifu nabo o onomm o are. Ore ilayiok le Pashur, naa enkalifu nabo o iip are o artam o oopishana. Ore ilayiok le Harim naa enkalifu nabo o tomon oopishana. Ore Ilawi: lelo ayiok le Yoshua, aa taa ile Kadmiel loo layiok le Hedefa, naa ntomoni naapishana o ong'uan. Ore ilaranyak lelo ayiok le Asaf, naa iip nabo o artam o isiet. Ore ilarripok loo nchomito: lelo ayiok le Shalum, ilayiok le Ater, lelo ayiok le Talmon, lelo ayiok le Akub, lelo ayiok le Hatita, lelo ayiok le Shobai, naa iip nabo o tomoni uni o isiet. Ore lelo aisiaayiak le nkaji e Nkai, lelo ayiok le Siha, lelo ayiok le Hasufa, lelo ayiok le Taabaot, lelo ayiok le Keros, lelo ayiok le Sia, lelo ayiok le Padon lelo ayiok le Lebana, lelo ayiok le Hagaba lelo ayiok le Shalmai, lelo ayiok le Hanan, lelo ayiok le Gidel, lelo ayiok le Gahar, lelo ayiok le Reia, lelo ayiok le Resin, lelo ayiok le Nekoda, lelo ayiok le Gesam, lelo ayiok le Usa, lelo ayiok le Pasea, lelo ayiok le Besai, lelo ayiok le Meunim, lelo ayiok le Nefushesim, lelo ayiok le Bakbuk, lelo ayiok le Hakufa, lelo ayiok le Hashur, lelo ayiok le Bashit, lelo ayiok le Mehida, lelo ayiok le Harsha, lelo ayiok le Barkos lelo ayiok le Sisera, lelo ayiok le Tema, lelo ayiok le Nesia, lelo ayiok le Hatifa. Ore ilayiok loo sinkan le Solomon, ilayiok le Sotai, ilayiok le Soferet, ilayiok le Persida, ilayiok le Yaala, ilayiok le Darkon, ilayiok le Gidel, ilayiok le Shefatia, ilayiok le, Hatil, ilayiok le Pokeret-Lasebaim, lelo ayiok le Amon. Ore isinkan pooki le nkaji e Nkai, o sinkan loo layiok le Solomon pooki naa iip uni o ntomoni naaudo oare. Kulo oodukino apa lelo ooetuo eing'uaa Telmela, Telhasha, Keurub, Adon, o Imer, kake meidim apa ninche aaibalie ilmareita loo loo menye aashu ineeikino ninche, tenaa ke ltung'ana le Israel ninche. Ilayiok le Delaia, ilayiok le Tobia, ilayiok le Nekoda, naa iip ile o artam oare. Ore sii ilapolosak: lelo ayiok le Hobaia, lelo ayiok le Hakos, ilayiok le Barsilai, (laa ninye apa oyama entito nabo too ntoyie e Barsilai le Gilead neaku ninche eipotieki). Eing'orutua kulo enkigeroto oo nkarn enye tenebo lelo ooigeroki too lmareita, kake eitu etumi teine, neaku etundung'oyioki too lapolosak aajo keiduruk; etiaaka olbalusui ninche pee mejing ninche enkinosata eina daa sinyati aisul, ometaba anaa nedumunye olapolosani oata Urim o Tummim. Ore apa eumata pooki tenebo naa nkalifuni artam oare o iip uni o ntomoni ile metii isinkan lenye lewa o sinkan enye ng'oruo, nera apa ninche nkalifuni naapishana o iip uni o ntomoni ile o opishana; neeta apa ninche ilaranyak iip are o artam o imiet, ilewa o ng'oruo. Ore mbartan enye naa iip naapishana o tomoni uni o ile. Ore inyumpui enye naa iip are o artam o imiet. Ore ntamesin enye naa iip ong'uan o tomoni uni o imiet. Ore isirkon lenye naa nkalifuni ile o iip naapishana o tikitam. Ore apa ilukuny oo nkajijik oo loo menye neishooyo nkishorot tenkaraki esiaai. Eishooyie olbalusui apik olchumati nkiloi isiet e sahabu, o ngirran onomm, o lkilani loo lapolosak iip imiet o tomoni uni. Ore ilkulikae oora ilukuny oo nkajijik oo loo menye neishooyo aapik olchumati le siaai sahabu nkiloi iip o ntomoni ile, o imiet, o enkosholai nkiloi enkalifu nabo o iip are o onomm. Ore ilkulikae tung'ana neishooyo sahabu nkiloi iip nabo o ntomoni ile o isiet, o nkiloi iip nabo o artam e nkosholai, o lkilani ntomoni ile oopishana loo lapolosak. Neaku ore ilapolosak, lelo le Lawi, o larripok loo nchomito, o laranyak, o embata oo ltung'ana, o embata oo sinkan le nkaji e Nkai, o Siraeli pooki; netoni too nkang'itie enye. Ore pee ebau olapa liopishana, netii nkera e Israel nkang'itie enye maate. Neiturrurro iltung'ana pooki aatiu anaa oltung'ani obo to lkurroto ooipirakinore enkishomi e Nkare. Nejoki ninche Esra ilo aigeroni pee eyau embuku oo nkitanapat e Musa, apa naishoo Olaitoriani Israel. Ore Esra ilo apolosani neyau nena kitanapat dukuya ina umata, oo lewa o ng'oruo, o lelo pooki ooidim aatoning neyiolou, te nkolong e dukuya o lapa liopishana. Neisum ninye ina kitanapata eing'orita olkurroto eipirare kishomi e Nkare eiteru tadekenya enasirie o metabaiki dama eipire enkolong, te dukuya iltung'ana lelo lewa o ng'oruo o ltung'ana pooki ooidim aatoning'u nening'u lelo tung'ana too nkiyiaa enye ina buku oo nkitanapat. Neitashe Esra ilo aigeroni te nchumata ewueji oo nkeek neikarere neitobira iltung'ana te nkaraki ina siaai; ore te mbata enye neitashe Matitia o Shema, o Anaia, o Uria, o Hilkia o Maaseia te nkaina enye e tatene. Neitashe Pedaia o Mishael o Malkija, o Hashum o Hashbadana, o Sakaria, o Meshulam te nkaina enye e kedienye. Nebol Esra ina buku te dukuya iltung'ana pooki, amu etii apa ninye shumata iltung'ana pooki. Ore ake pee ebol ina buku neitashe iltung'ana pooki. Neisis Esra Olaitoriani, ina Ai kitok, newal iltung'ana pooki aajo, “Esai, Esai,” eilepie nkaik enye; neirrug ninche ilukuny enye neserem Olaitoriani eitabaiki nkomomi enye enkop. Ore sii Yoshua o Bani o Sherebia o Yamin, o Akub, o Shabetai, o Hodia, o Maaseia, o Kelita, o Asariaf, o Yosabad, o Hanan, o Pelaia lelo apolosak neretu iltung'ana aaitoning'u nkitanapat, ina kata etii iltung'ana iwuejitin enye. Neisum ninche ina buku, natii nkitanapat e Nkai, aaibalie, neitobiraki neaku etoning'utuo iltung'ana enkisumata. Ore Nehemia laa ninye apa olbalusui, o Esra ilo apolosani naa olaigeroni, o Lawi laa ninche ooiteng'en iltung'ana, nejoki iltung'ana pooki, “Ore ena olong naa aisinyati to Laitoriani Enkai inyi; emisinanuo niminchirishiri.” Amu eishira apa iltung'ana pooki ina kata pee ening irorei loo nkitanapat. Neitoki ninye ajoki ninche, “Enchom iwuejitin, enosa ntokitin naapir, niokioko enaisho oo sabibu namelok nirriwakiki erubata ilo leitu eitobirakini toki, amu ore ena olong naa aisinyati to laitoriani, nimisinanuonuo ntae, amu enchipai o Laitoriani ninye engolon inyi.” Kaae neitigir Ilawi iltung'ana pooki, ejo, “Entigirata, amu ore ena olong naa aisinyati; emisinanuo.” Nepuo iltung'ana pooki iwuejitin enye aadaa neokisho, neirriwaa irubat, neitobir osirua kitok le nchipai, amu etoning'utuo ninche lelo rorei ooibalakinyeki ninche. Ore te nkolong e are, ore ilukuny oo nkajijik oo loo menye, too ltung'ana pooki, tenebo ilapolosak o Lawi, nepuonu tenebo enetii Esra ilo aigeroni pee etum aaiteng'enuoto irorei loo nkitanapat. Netum ninche eigeroki tiatua nkitanapat nchere, eitanapa apa Olaitoriani Musa pee etoni iltung'ana too lng'oborri to sirua to lapa liopishana, neji pee elimuni aaibalie too nkang'itie enye pooki o te Yerusalem, entejo, “Empang'a enchom ndoinyo niyauu ilng'osil lo loirien, oloirien le ntim olng'osil o ltuka, okulikae keek eeta mbenek pee eitainyeki ilng'oborri, anaa enaingeroki.” Neaku eshomo iltung'ana neyau ninche, neitobiraki ate ilng'oborri ore ake oltung'ani neitushur olng'obor lenye, o lgoriet lenye, o lgorieti le nkaji e Nkai, o lkurroto otii kishomi e Nkare, o lkurroto otii kishomi e Efraim. Ore ina umata pooki e lelo apa ootorrinyunye te yararoto neitobir ilng'oborri nebik too lng'oborri amu ore ebaiki nkolong'i e Yoshua olayioni le Nuni ometabaiki ina olong eitu aekata eas iltung'ana le Israel ina. Netii apa enchipai sapuk. Ore too nkolong'i pooki, ebaiki enkolong e dukuya o metabaiki enkolong nabayie, neisum ninye ina buku oo nkitanapat e Nkai. Neibung ninche osirua nkolong'i naapishana; ore te nkolong e isiet neibung'i eumata nasinya, terisioroto eina kiguana. Ore apa te nkolong e tikitam o ong'uan ele apa, neiturrurro iltung'ana le Israel te eenata empukoroto neishop ilkuniyiani, nepik enterit ilukuny enye. Nekepu ate iltung'ana le Israel aalam iltung'ana leeiking'a, neitashe aaibalie ing'ok enye o entorroni oo loo menye. Neitashe ninche te wueji enye neisum embuku oo nkitanapat o Laitoriani Enkai enye te nkolong e ong'uan: ore tiae rishata e ong'uan nelimu ninche aaibalie ing'ok enye, neserem Olaitoriani Enkai enye. Ore too nkedeta oo Lawi neitashe Yeshua o Bani, o Kadmeil, o Shebania o Buni, o Sherebia, o Bani, o Kenani; nebuaku ninche aaishiraki Olaitoriani Enkai enye. Neitoki Ilawi, o Yeshua, o Kadmiek, o Bani, o Hashabneia, o Sherebia, o Hodia, o Shebania, o Petahia aajo, “Entasho esisa Olaitoriani Enkai inyi, ntarasi o ntarasi. Meisisi enkarna ino kitok neyanyiti oleng too mayianat o te nkisisa.” Nejo Esra: “Iyie Olaitoriani, iyie ake openy; iyie oitayio keper, o lororani pooki le keper, enkop o pooki naatii oriong enkop; naaiposha o pooki naatii atua ninche, igolie iyie ninche pooki; naa iyie eserem olorora pooki le shumata. Iyie Olaitoriani, ina Ai nategelua Abraham niyau ninye aitupuku te Uri, oo Lkaldayo ninchoo ninye enkarna ajo Abraham; nidol iyie ajo keisiligayu oltau lenye te dukuya iyie, nintobir iyie o ninye osotua lo lning'o pee incho eishoi enye enkop oo Lkanaan; o enoo Ihiti, o ene Amori, o enoo Lperisi, o enoo Lyebusi, o enoo Lgirshi, nintabayie iyie ina kisiligata ino, amu ira iyie asipani. Nitoduaa apa iyie osina loo loo papa lang te Misiri nining enkomono enye te Enaiposha Nanyokie. Niaas iyie nkitoduaat o mbaa e nking'asia agilunore Farao o sinkan lenyena pooki o ltung'ana pooki le nkop enye. Amu iyiolo iyie ajo etaasa apa ninche mbaa e nkinyala too loo papa, nintobiraki iyie kewan enkarna, anaa enatiu taata. Ni tirisha iyie enaiposha te dukuya ninche, neaku eshomo ninche aaim empolos e naiposha te nkop natoyio; ninturraa iyie lelo oomirta ninche anang'aki enguton, anaa osoit onang'akini enkare, kitok. Ore te ng'ape e nkatampoi nirikoo iyie ninche dama, ore te ng'ape e nkima nirikoo ninche te nkewarie, pee ilang'ilang'aki ninche ina oitoi naaim. Itadowuo apa iyie alotu enchumata o ldoinyo le Sinai, nirorie ninche itii keper nincho ninche nkikoot sidain o nkitanapat naasipa, o nkiguanat supati. Nintayiolo iyie ninche sabato ino sinyati nintanap ninche nkitanapat o nkikoot o enkitanapata aimunye Musa osinka lino. Nchoo iyie ninche imukateni naaing'uaa keper tenkaraki esumash enye, niyaki ninche enkare naing'uaa endapidapoi te nkaraki enkure enye. Nijoki iyie ninche meshomo aaya ina kop apa ninosie olmumai pee incho ninche. Kake ore ninche o loo papa netaasa mbaa olwuasa neitagol ilukuny enye, neitu eiruk nkitanapat. Etanyaita ninche ening, neitu eshilaa nena baa e nking'asia apa nitaasa tiatua ninche. Kake eitagolo ninche ilukuny enye negelu olarikoni pee errinyo aapuo esinkaisho enye te Misiri. Kake ira iyie Enkai nasioki apalaki, osupat, neeta olng'ur, nemesioki agoro nebik te nyorrata nauno neitu iyie inturaa ninche. Ore doi ninye apa pee eitobiraki ate olashe le sahabu nashola nejo, ‘Ena ninye Enkai inyi apa nayaua intae ailepunye te Misiri,’ neas mbaa kituaak e morore. Ore iyie to lng'ur lino kitok, neitu inturraa ninche tiong'ota. Ore ina ng'ape e nkatampoi apa natorikoyie ninche te nkoitoi, neitu elo aing'uaa ninche te ndama, neitu elo eng'ape e nkima aing'uaa ninche te nkewarie, pee eitawang enkoitoi enye napuo aaim ninche. Nchoo iyie Enkiyang'et supat meiteng'ena ninche, neitu iyie mbooyo mana ino amitiki ninche einos. Nincho ninche enkare te nkaraki enkure enye. Ilarin artam iyie ntotio ninche tiong'ota, neitu elau toki neitu emuta nkilani enye neitu ejeyu nkejek enye. Ninchoo iyie ninche nkitoriat oo loreren nioriki iyie ninche pooki shoto. Neaku ewaita ninche ina kop e Sihon olaiguanani le Heshbon o enkop e Oog olaiguanani le Bashan, Itoponayie iyie eishoi enye aitaba anaa ilakir le keper, nitorikuo ninche atua ina kop apa nitolikio loo menye pee ejing aamany. Metaa eshomo ina ishoi enye aaya ina kop, nipik iyie lelo oomanya ina kop abori enkitoria enye, lelo Kanaani, ninchooyo ninche apik nkaik enye, tenebo ilaiguanak lenye o ltung'ana leina kop. Pee etum aaitaasa ninche anaa enayieu. Neibung ninche nena anas enye naasheta sunta o enkop sidai. Neya nkajijik naabore ntokitin sidain, o lchorroi ooturo, o nkurman oo sabibu, o loirienito o lkeek loo lng'anayio kumok, neinos ninche neraposho nepiru neshipayu ninche te supatisho ino. Ore ake eyia eisero ninche nikigolong'aki iyie, nenang'aa nkitanapat inono aainyaaya oriong, near iloibonok linono metuata. Laa ninche apa ooikoo ejo pee errinyu ninche enitii, neas ninche mbaa sapuki e morore. Ore enkaraki ina inchooyie iyie ninche apik nkaik oo lmang'ati lenye, ooisilisilo ninche, ore teina kata enye o sina, kinchirakitia ninche iyie, nining iyie ninche itii keper. Ore te risioroto o lng'ur lino kitok ninchoo iyie ninche olaitajeunoni oitajeu ninche aitayu te nkaina oo lmang'ati lenye. Kake ore eidipa ninche aayagie neitoki ninche aas entorroni too nkonyek inono, nintoki iyie aiturraa ninche apik nkaik oo lmang'ati lenye, pee atum aaitoria ninche. Kake ore ake eyia teneibelekenya ninche nikinchiraki iyie, nining iyie ninche itii shumata, naa katitin kumok itokordua iyie ninche te risioroto olng'ur lino. Inkoo apa iyie ninche ijo pee itum atorrinyoki ninche nkitanapat inono. Kake etawuasate apa ninche, neitu eibung nkitanapat inono, kake etaasa ninche eng'oki too nkiguanat inono, naa ninche eishuyie oltung'ani teneibung, neisho ninche oriong, neitagol ilukuny enye, neany ening. Too larin kumok iting'iriakine iyie ninche, ninkok ninche te Nkiyang'et ino, iimunye iloibonok linono; ore ake eyia eitu ninche ening. Ore enkaraki ina inchooyie iyie ninche apik nkaik oo loreren. Ore ake eyia te nkaraki olng'ur lino kitok eitu iyie iishie ninche anaa inturraa ninche; amu ira Enkai supat naata olng'ur. Ore naa taata na Ai ang, Enkai kitok magilani naitureisho, naibung o sotua o enyorrata nauno, mincho kuna golikinot naaetuo shumata iyiook elioyu aa kutiti te iyie o shumata ilaiguanak lang, o lkituaak lang, o lapolosak lang, o loibonok lang, o loo papa, o shumata iltung'ana linono pooki ebaiki enkata oo laiguanak le Siria, o metabaiki ena olong eaku entoki kiti te iyie. Ore ake eyia itaa iyie asipani te nena pooki naaetuo shumata iyiook, amu itaasishe iyie te sipata nikitaasishote iyiook te ntorroni. Ore ilaiguanak lang, o lkituaak lang, o lapolosak lang, o loo papa, neitu eibung nkitanapat inono, o nkikoot inono ninchoo iyie ninche. Eitu ninche kisiaai iyie te nkitoria enye, naa ore te supatisho ino kitok ninchoo iyie ninche, o te nkop sidai nalala nitipika iyie dukuya ninche, neitu ninche errinyunye aaing'uaa isiaaitin enye torrok. Ng'ura kira iyiook irrindiki ena olong; tiatua ena kop apa ninchoo loo papa pee eshipakino ilng'anayio lenyena o nkishorot enyena sidain, ng'ura, kira iyiook irrindiki. Ore ilng'anayio lenyena neinos lelo aiguanak apa litipika shumata iyiook tenkaraki ingok ang; eeta ake sii lelo aiguanak engolon naitoreyie iseseni lang, o nkishu ang, pee eitaas anaa enayieu, nikitii iyiook osina kitok.” Ore enkaraki kuna pooki, aikintobir iyiook olning'o lo sotua niking'er. Ore ilkituaak lang, o lawi lang, o lapolosak lang, nepik ilmishiren lenye. Ore apa lelo ootipika olmishire lenye naa Nehemia ilo balusui, olayioni le Hekalia, o Sedekia, o Seraia, o Asaria o Yeremia, o Pashur, o Amaria o Malkija, o Hatush, o Shebania, o Maluk, o Harim, o Meremot, o Obadia, o Daniel, o Gineton, o Baruk, o Meshulam, o Abijia, o Mijomin, o Maasia, o Bilgai, o Shemaia. Kulo apa ninche ilapolosak. Ore Ilawi naa: Yoshua olayioni le Asania, o Binui loo layiok le Henadad, o Kadimiel, o lalashera lenye, o Shebania, o Hodia, o Kelita, o Pelaia, o Hanan, o Mika, o Rehob, o Hashabia, o Sakur, o Sherebia o Shebania, o Hodia, o Bani, o Bininu. Ore ilaiguanak loo iltung'ana naa Parosh, o Pahatmoab, o Elam, o Satu, o Bani, o Buni, o Asgad, o Bebai, o Adonija, o Bigfai, o Adin, o Ater, o Hesekia, o Asur, o Hodia, o Hashum, o Besai, o Harif, o Anatot, o Nebai, o Magpiash, o Meshulam, o Hesir, o Meshesapel o Sadok, o Yadua o Pelatia, o Hanan, o Hanaia, o Hoshea, o Hanania, o Hashub, o Halohesh, o Pilha, o Shobek, o Rehum, o Hashabana, o Maaseia, o Ahia, o Hanan, o Anan, o Maluk, o Harim o Baana. Ore ilkulikae tung'ana, ilapolosak, o Lawi, o larripok le kishomi, o laranyak, o laisiaayiak le nkaji e Nkai, o lelo pooki ooitekeputua ate aaitalam iloreren le nena kuapi, aaibelekenyakino nkitanapat e Nkai, tenebo inkituaak enye, o layiok lenye, o ntoyie enye, lelo pooki oata engeno o eyiolounoto, neibung'are ilalashera lenye, o lkituaak lenye, nejing ninche oldeket, o lmumai pee eibung nkitanapat e Nkai apa naaishoruaki aaimunye Musa osinka le Nkai. Pee esipu neas nkitanapat pooki o Laitoriani, Olaitoriani lang, o nkikoot enyena o nkiguanat enyena. Mikincho iyiook ntoyie ang meyama iltung'ana lena kop, nimikiyamaki iyook ilayiok lang ntoyie enye: naa teneyau iltung'ana lena kop ntokitin naamiri o entapa e pooki pukunoto te nkolong e sabato pee emir, nimikinyiang'u iyiook te ninche, te nkolong e sabato anaa te nkolong sinyati; nimikitur iyiook nkurman to lari liopishana, nikipalaa pooki sile. Kinteleikitia sii ate olola pee kintalak ate te pooki ari erubata e uni e shekeli te nkaraki enkisiaayiare e nkaji e Nkai. Te nkaraki emukate e nkitoduaaroto, o lasar le ntapa le anaake, o lasar opejori le anaake, o sabatoni, o lapaitin ng'ejuko, o siruai gelunot, o ntokitin sinyat, o lasarri le ng'oki ooitobirieki olning'o lo sotua te nkaraki Isirael, o te nkaraki esiaai pooki e Nkai ang. Kitoosho sii enkukuo, ilapolosak, o Lawi, o ltung'ana, te nkaraki nkiri olasar loo lkeek, pee eyauni atua enkaji e Nkai ang, te risioroto oo nkajijik oo loo papa, too nkatitin naategeluaki, te pooki ari. Pee einoki te nchumata o lperere lo lasar lo Laitoriani Enkai ang anaa enaigero too nkitanapat. Kitudung'okitio iyiook ate, pee kiyau ilng'anayio le dukuya te nkop ang, o lng'anayio le dukuya le pooki shani, te pooki ake ari, enkaji o Laitoriani. Nikiyau sii atua enkaji e Nkai ang, aayaki lelo apolosak ooisiaaisho tiatua enkaji e Nkai ang, ilkikaunot lang o lkikaunot loo nkishu ang, anaa enaigero too nkitanapat, o lkikaunot loo nkishu ang o loo ntare ang. Nikiyaki sii ilapolosak ina tapa ang e dukuya e nkisampuare, o nkishorot ang, o lng'anayio le pooki shani o enaisho oo sabibu o eilata nikiya ilgilat le nkaji e Nkai ang, nikiyaki Ilawi ematua e tomon naing'uaa nkurman ang, amu Ilawi oosotu imatuan e tomon, too nkang'itie ang pooki. Ore olapolosani olayioni le Aron, naa keetii tenebo Ilawi ina kata nang'amu imatuan e tomon neyau Ilawi ematua e tomon oo matuan e tomon e nkaji e Nkai ang nepik ilgilat o mpechen. Amu keyau iltung'ana le Israel o layiok le Lawi nkishorot e ntapa, o enaisho oo sabibu, o eilata atua lelo gilat, ine netii imasaa e wueji sinyati, o lapolosak ooisiaaisho o larripok le kishomi o laranyak. Mikipalaa iyiook enkaji e Nkai ang. Ore apa ilarikok loo ltung'ana netoni te Yerusalem; ore ilkulikae tung'ana, neosh enkukuo, pee eyau oltung'ani obo te tomon meeu amany Yerusalem ina anasa sinyati, nebik lelo ooudo te kulie ang'itie. Nemayian apa iltung'ana lelo pooki ootonyorraitie aatoni te Yerusalem. Kulo apa ilkituaak loo lkerenketi ootamanya Yerusalem; kake ore too nkang'itie e Yuda, etii ake pooki ng'ae enkang enye neton tiatua imasaa enyena: ile Israel, o lapolosak, o Lawi, o laisiaayiak le nkaji e Nkai, o le ishoi o laisiaayiak le Solomon. Netii apa Yerusalem embata oo layiok le Yuda o layiok le Benchamen. Ore too layiok le Yuda naa Ataia olayioni le Usia, olayioni le Sekaria, olayioni le Amaria, olayioni le Shefatia, olayioni le Mahalalel, loo layiok le Peres: o Maaseia olayioni le Baruk olayioni le Kolhose olayioni le Hasaia, olayioni le Aidaya, olayioni le Yairib, olayioni le Sakaria, olayioni le Shilonit. Ore ilayiok pooki le Peres apa oomanya Yerusalem naa iip ong'uan o ntomoni ile o isiet, iltung'ana yiolot oopi. Naa kulo ilayiok le Benchamen: Salu olayioni le Meshulam, olayioni le Yoed, olayioni le Pedaia, olayioni le Kolaia, olayioni le Maaseia, olayioni le Itiel, olayioni le Yeshai. Nesujaki ninye Gebai, o Saalai, iltung'ana iip naaudo o tikitam o isiet. Yoel olayioni le Sikri apa olaitasheikinoni lenye, naa Yuda olayioni le Hasenua oliare te nkitoria ena anasa. Ore too lapolosak naa: Yedaia olayioni le Yairib, o Yakin, o Seraia olayioni le Hilkia, olayioni le Meshulam, olayioni le Sadok, olayioni le Merairiot, olayioni le Ahitab, olaitasheikinoni le nkaji e Nkai, ore ilalashera lenye oaas esiaai eina aji naa, iip isiet o tikitam o are; ore Adai olayioni le Yeroham, olayioni le Pelalia, olayioni le Amsi, olayioni le Sekaria, olayioni le Pashur, olayioni le Malkija, o lalashera lenyena, nena lukuny oo nkajijik oo loo menye naa iip are o artam o are; o Amashai, olayioni le Asarel, olayioni le Asai, olayioni le Meshilemot, olayioni le Imer, o lalashera lenye, lelo tung'ana magil yiolot, iip o tikitam o isiet; ore olaitasheikinoni lenye naa Sibdiel olayioni le Hagedolin. Ore too Lawi: naa Shemaia olayioni le Hashub, olayioni le Asrikam, olayioni le Hashabia, olayioni le Buni; o Shabetai o Yasabad, loo lkituaak loo lawi laa ninche apa ooitasheiki esiaai e oriong e nkaji e Nkai; o Matania olayioni le Mika olayioni le Sabdi, olayioni le Asaf, laa ninye oiterua enkishoroto e nashe te nkomono, o Bakukia laa ninye oliare too lalashera lenyena; o Abda olayioni le Shamaua, olayioni le Falal, olayioni le Yedutum. Ore Ilawi pooki teina anasa sinyati naa iip are o ntomoni isiet o ong'uan. Ore ilarripok le kishomi naa: Akub, o Talmon o lalashera lenye, laa ninche apa oorrip nchomito, naa iip nabo o ntomoni napishana o are. Ore ilkulikae Siraeli, o lapolosak o Lawi netii nkang'itie e Yuda, etii ake oltung'ani enjung'ore enye. Kake ore ilaisiaayiak le Nkaji e Nkai nemanya Ofel; naa Siha, o Gispa apa ooitasheiki ilaisiaayiak le nkaji e Nkai. Ore apa olaitasheikinoni loo Lawi te Yerusalem naa Usi olayioni le Bani, Olayioni le Hashabia, olayioni le Matania, olayioni le Mika loo layiok le Asaf, lelo aranyak, ooitasheiki esiaai e nkaji e Nkai. Amu etii apa enkitanapata naing'uaa olaiguanani naipirta ninche, o enkitobirata oo laranyak anaa enaiyieuni te pooki olong. Naa Petahia olayioni le Meshesabel, loo layiok le Sera olayioni le Yuda, ninye apa olaretoni lo laiguanani too mbaa pooki naaipirta iltung'ana. Ore tialo nkang'itie, etamanya apa embata oo ltung'ana le Yuda Kiriat-arba, o nkang'itie enyena, o Dibon o nkang'itie enyena o Yekabseel o nkang'itie enyena, o Yeshua, o Molada, o Betber Betpeler, o Harshulal, o Beer-sheba o nkang'itie enyena, o Siklag, o Mekona, o nkang'itie enyena, o Enrimon o Sora o Yemut, o Sanoa, o Adulam nkang'itie enyena, o Lakish o nkong'at enyena, a Aseka o nkong'at enyena. Neaku etipika apa ninche ilng'oborri ebaiki Beer-sheba o metabaiki oerata le Hinom. Ore sii ninche iltung'ana le Benchamen nemany ebaiki Geba neito idia alo, te mbata e Mikmash, o Aija, o Betel o nkang'itie enyena, o Anotot, o Noab, o Anania, o Hasor, o Rama, o Gitaim, o Hadid, o Seboim, o Nebalot, o Lod, o Ono, ilo erata loo laguatak. Ore ilkulikae turrurri loo Lawi te Yuda neshulare Benchamen. Kulo ninche ilapolosak o Lawi apa ooetuo tenebo Serubabel olayioni le Shealtiel, o Yeshua: o Seraia o Yeremia o Esra, o Amaria, o Maluk, o Hatush, o Shekemia, o Rehum, o Meremot, o Ido, o Ginetoi, o Abija, o Mijamin, o Maadia, o Bilga, o Shemia, o Yoiarib, o Yedaia, o Sulu, o Amok, o Hilkia o Yedaia. Kulo ninche apa ilkituaak loo lapolosak o lalashera lenye too nkolong'i e Yeshua. Ore too Lawi; naa Yeshua o Binui o Kadmiel, o Sherebia, o Yuda, o Matania, laa ore tenebo ilalashera lenyena, naa ninye oitasheiki isinkolioitin le nkishooroto e nashe. O Bakbukia, o Uno, neitashe ilalashera lenye aaipirakinore ninche te nkisiaayiare. Naa Yeshua apa menye le Yoiakim, naa Yoiakim menye le Eliashib naa Elishiab menye le Yoiada, naa Yoiada menye le Yonatan, naa Yonatan menye le Yadua. Ore apa too nkolong'i e Yoiakim, netii ilapolosak oora lukuny oo nkajijik oo loo menye: te Seraia, o te Meraia, o te Yeremia, o te Hanania; ore te Esra naa Meshulam; ore te Amaria naa Yehohanan; ore te Maluki naa Yonatan; ore te Shebania naa Yosef: ore te Harm naa Adna; ore te Merariot naa Helkai; ore te Ido naa Sekaria; ore te Gineton naa Meshulam; ore te Abija naa Sikri; ore te Miniamin o te Moadia naa Piltai; ore te Bilga, naa Shamua; ore te Shemaia naa Yehonatan, ore Yoiarib naa Matenai; ore te Yedaia naa Usi, ore te Salai naa Kalai; ore te Amok naa Eber, ore te Hilkia naa Hashabia; ore te Yedaia, naa Natanel. Ore too Lawi, apa too nkolong'i e Eliashib, o Yoiada o Yohanan o Yadua, kulo apa eigeroki metaa lukuny oo nkajijik oo loo menye; naa lapolosak sii o metabaiki enkitoria e Darias le Parsia. Ore ilayiok le Lawi, ilukuny oo nkajijik oo loo menye, neigeroki te mbuku oo ntepen, o metabaiki nkolong'i e Yohanan olayioni le Eliashib. Ore ilkituaak loo Lawi naa: Hashabia, o Sherabia, o Yeshua olayioni le Kadmiel tenebo ilalashera lenye ooipirakinore ninche, pee eisis Enkai neishooyo enashe, te risioroto e nkitanapata e Daudi ilo tung'ani le Nkai pee easi aairukokino. Matahia apa, o Bakbukia, o Obadia, o Meshulam, o Talmon, o Akub ninche ilarripok le kishomi ooitashe aarrip nkajijik naashumishoreki o nchomito. Ore apa kuna baa naa too nkolong'i e Yoaikim olayioni le Yeshua olayioni le Yosadak, o too nkolong'i e Nehemia ilo balusui o Esra ilo apolosani naa olasirani. Ore teina kitisinyata e suntai e Yerusalem, neyauni Ilawi too wuejitin pooki meetu Yerusalem aaraposhoki ina kitisinyata te nchipai, o te nkishooroto e nashe o te ranyata e oshoto oo nkinantani, o enkawuo oo sinkolioitin, o lwululi loo usin. Ore nkera e lelo aranyak, neiturrurro too manyishoritin enye naamanita Yerusalem, o too nkang'itie e Netofati; neiturrurro sii te Bet-gilgal o te nkop e Geba o Asmafet; amu eteshetakita apa ate ilaranyak nkang'itie aaitaman Yerusalem. Ore ilapolosak o Lawi neitisiny ate; neitisiny olorere, o nchomito o esuntai. Naitoki nanu aiturrurru ilkituaak le Yuda te nchumata eina suntai, nagelu ilturrurri oare sapuki ooishooyo enashe nepuo ninche too lkererin. Nelo olturrur obo enkalo e tatene teina suntai ometabaiki kishomi e modioi; nesuju ninche Hoshaia, o lpisiaai le lelo kituaak le Yuda, o Asaria, o Esra, o Meshulam, o Yuda, o Benchamen, o Shemaia, o Yeremia, o kulikae ayiok loo lapolosak oata ntarumpetani: Sekaria olayioni le Yonatan, olayioni le Shemaia, olayioni le Matamia, olayioni le Mikaia, olayioni le Sakur, olayioni le Asaf; o ltung'ana lenye, Shemaia, o Asarel, o Milalai, o Gilalai, o Maai, o Natanel, o Yuda, o Hanani, eeta nkinantani oo sinkolioitin e Daudi ilo tung'ani le Nkai. Ore Esra ilo aigeroni nelo te dukuya ninche. Ore te kishomi e nchorro, neitoriori ninche aapuo te dukuya ninche aaim nkedeta e nkanasa e Daudi, te wueji neilepakinyeki esuntai, te shumata enkaji e Daudi; aapuo enkishomi e Nkare te nkalo o loosaen. Ore olikae turrur le lelo ooishooyo enashe, nepuo enkalo e kedienye, nasujaa nanu ninche tenebo olpisiaai le lelo tung'ana ootii enchumata e suntai, te nchumata o ltalet le wueji nepejishoreki, o metabaiki esuntai nalala, o metabaiki kishomi e Efraim, o embata e kishomi musana, o embata e kishomi o sinkirri o ltalet le Hananel, o ltalet le iip o metabaiki kishomi oo nkerra. Nepuonu ninche aaitashe te kishomi oo larripok. Metaa ore lelo turrurri pokira oare le lelo ooishooyo enashe neitashe tiatua enkaji e Nkai; ore nanu o lpisiaai loo nkituaak tenebo nanu; o lapolosak, Eliakim o Maaseia, o Miniamin, o Makaia, o Elioenai, o Sekaria, o Hanania, eeta ntarumpetani; o Maaseia, o Shemaia, o Eleasa, o Eusi, o Yehoahanan, o Malkija, o Elam, o Eser. Neranyisho ilaranyak erikoo Yesrahia. Neitayu ninche ilasarri sapuki ina olong, neshipayu amu Enkai naitishipa ninche te ng'ida sapuk; neshipa sii nkituaak o nkera. Nening'ori enchipai e Yerusalem tenelakua oleng. Ore apa teina olong negeluni iltung'ana ooitasheiki ilgilat ooshumishoreki, oopiki nkishorunot, o lelo ng'anayio le dukuya, o matuan e tomon, pee eiturrurri tiatua nena ajijik nena rubat pooki naaishiaakino too nkitanapat te nkaraki ilapolosak o Lawi, te risioroto oo nkurman e nena ang'itie; amu etishipe apa Yuda te nkaraki lelo apolosak o Lawi oisiaaishote. Etaasa apa ninche esiaai e Nkai enye o esiaa nkitisinyata anaa enataasa ilaranyak o larripok le kishomi, te risioroto e nkitanapata e Daudi o layioni lenye Solomon. Amu ore apa too nkolong'i e Daudi o Asaf, tiapa, neetae olkitok loo laranyak, neetae isinkolioitin le nkisisa o enkishooroto e nashe te Nkai. Ore Israel pooki too nkolong'i e Serubabel o too nkolong'i e Nehemia, neisho erubata e anaake lelo aranyak, o larripok le kishomi; neiteng'el ninche ina rubata oo Lawi; neiteng'el ile Lawi ina rubata oo layiok le Aron. Ore apa teina olong neisuma ninche embuku e Musa aaitoning olorere; netumi eigero teina buku nchere meetae Olamori aashu Olmoabui ojing ae kata eumata e Nkai; amu eitu apa ninche enang'are nkera e Israel aaisho endaa o enkare, kake eishoo ninche Balaam mpisai metigilunore ninche nedek ninche - ore ake eyia eibelekenya Olaitoriani oldeket aitaa emayianata. Ore ake pee ening' iltung'ana ina kitanapata, nekepaa ninche aaitung'uaa Israel lelo pooki loo loreren. Ore apa eng'or ena, ore Eliashib olapolosani laa ninye etegeluaki meitasheiki ilgilat le nkaji e Nkai ang, laa ninye sii apa oyiolore Tobia, neitobiraki ninye Tobia olgilata olala teine apa netang'asa ninche aapik nkishorot e ntapa, oina orropil, o masaa, o matuan e tomon e ntapa, o enaisho oo sabibu, o eilata, naa ninche apa eishoruaki te nkitanapata meishori Ilawi, o laranyak, o larripok le kishomi, o nkishorot oo lapolosak. Ore apa easayu kuna, nematii nanu Yerusalem, amu ore to lari le tomoni uni oare le nkitoria e Artaserses olaiguanani le Babilon, nashomo nanu enetii olaiguanani. Ore etulusoyie enkiti rishata naomon nanu olaiguanani maaisho mashomo, nalotu nanu Yerusalem, nairrash nanu ina torroni naitaasa Eliashib Tobia, aitobiraki ninye olgilata too lgorieti le nkaji e Nkai. Atagore apa nanu oleng nanang'aa imasaa enkaji e Tobia aitupuku boo. Naitoki nanu aitanapisho neitisinyi ina aji, naitoki nanu arrinyu nena masaa e nkaji e Nkai, tenebo olasar le ntapa o enkorropil. Atayiolo sii ajo eitu eishori Ilawi irubat enye; metaa ore Ilawi o laranyak apa oasisho, neisika ake pooki ng'ae alo enkurma enye. Neaku aisikong'a nanu lelo kituaak najoki, “Kainyoo pee etung'uayioki enkaji e Nkai?” Naiturrur nanu ninche tenebo napik iwuejitin enye. Neya Yuda imatuan e tomon e ntapa, o enaisho oo sabibu, o eilata aaya nena ajijik naashumishoreki. Nagelu nanu metaa ilashumak ooitasheiki nena ajijik naashumishoreki, Shelemia ilo apolosani, o Sadok olaigeroni, o Pedaia loo Lawi, ore olaretoni lenye naa Hanan olayioni le Sakur, olayioni le Matamia, amu ninche apa eisiligaki. Ore apa esiaai enye naa pee eoriki ilalashera lenye ntokitin. Tadamuaki nanu, Enkai, ai, tialo ena, nimijut iyie aiwuang'ie nena kiasin aainei sidain nataasa nanu te nkaraki enkaji e Nkai ai o te nkaraki enkisiaayiare enye. Ore apa te nena olong'i, atoduaa nanu lelo tung'ana te Yuda eironyu enaisho oo sabibu too nkironyata te nkolong e sabato, neyau isotot le ntapa neirotoki ninche isirkon; neyau sii enaisho oo sabibu, o lng'anayio loo sabibu, o lng'abolo, o lolan loo mpukunot pooki ooyautua ninche atua Yerusalem te nkolong e Sabato. Aikoo apa nanu ninche teina olong natimira endaa. Ore sii iltung'ana le Turo apa ootii ina anasa, neya isinkir o ntokitin oo mpukunot pooki naamiri, nemiraki ninche te nkolong e Sabato iltung'ana le Yuda te Yerusalem. Naisikong nanu lelo kituaak le Yuda najoki ninche, “Kainyoo ena bae torrono niaasitata, aaisarkionie enkolong e Sabato? Ketaasa apa iloo papaai linyi ena, naa keitu eyau Enkai ang ena torroni pooki shumata iyiook o shumata ena anasa? Ore ake eyia, iyauu intae engoro kitok shumata Israel, aaisarkionie Sabato.” Ore ake pee eiteru amisimisu too nchomito e Yerusalem eng'or Sabato, naitanapisho nanu pee eikeni nkutukie oo nkajijik nemeboli ometulusoi Sabato. Napik nanu embata oo sinkan laainei meitasheiki nchomito, pee meetae olola oitijing'uni te nkolong e sabato. Ore lelo ainyiang'ak o lamirak loo mpukunot pooki neirrag auluo Yerusalem enkolong nabo anaa nkolong'i are. Kake aikoo nanu ninche najoki ninche, “Kainyoo intae pee irragirraga tioriong e suntai? Teningiligili aaiko neijia, naibung nanu intae.” Ore ebaiki ina olong neito idia alo eitu ninche eigil aapuonu te nkolong e Sabato. Naitanap nanu Ilawi pee eitisiny ate nepuonu aarrip nchomito, neitaa enkolong e Sabato Sinyati. Tadamuaki sii ena te nkaraki nanu, na Ai ai, nikileku nanu te risioroto e nkitoo e nyorrata ino. Ore sii apa te nena olong'i, atoduaa nanu Ilyahudi ooyama nkituaak e Ashdod, o Amon, o Moab; ore olpisiaai loo nkera enye neiro enkutuk e Ashdod, nemeidim ninche aairoro enkutuk e Yuda, kake keidim aairoro nkutukie e lelo tung'ana. Nailepilepaki nanu ninche, nadek ninche, naidong kulikae lenye nayiet ilpapit lenye, nainosie ninche olmumai te nkarna e Nkai, ajoki, “Mincho iyie ntoyie inono ilayiok lenye, nimiyaki ilayiok linono ntoyie enye, nimiyamiyama intae maate. Keitu apa eas olaiguanani Solomon eng'oki tenkaraki kuna kituaak? Ore tiatua iloshon kumok meetae olaiguanani otiu anaa ninye, naa kirotet te Nkai enye, neitaa Enkai ninye olaiguanani te shumata Israel pooki; ore ake eyia, etorikokitio nkituaak oo loreren ninye metaasa ing'ok. Eikining naa iyiook intae nikias ena torroni sapuk aagolong'aki Enkai ang, aayam nkituaak oo loreren?” Ore apa obo loo layiok le Yehoiada olayioni le Eliashib, ilo apolosani kitok, naa olaputani le Sanbalat le Horoni; ore enkaraki ina aterewa nanu ninye aitalam kewan. Tadamu ninche, Enkai ai, Amu eisarkionie ninche empolosare o lning'o lo sotua le mpolosare oo lawi. Naitisiny nanu ninche te pooki toki oo loreren, naitobir mbaa naaipirta, isiaaitin oo lapolosak o Lawi, o ltung'ani ake te siaai enye; naishoru nanu ilkeek oopejorieki olasar, too rishat enye naageluno, o too rishat oo lng'anayio le dukuya. Tadamuaki nanu Enkai ai, te mbae supat. Ore apa too nkolong'i e Serser, Serser laa ninye apa oitore ebaiki India ometabaiki Etiopia, ilkerenketi oobaya iip o tikitam oopishana. Ore te nena olong'i ina kata pee eton olaiguanani Serser to lorika lenye le nkitoo te Susa, naa ninye enkang kitok. Ore to lari liokuni le nkitoria enye neitobiraki osirua ilkituaak lenyena, o sinkan, Netii sii ilkituaak le njore le Parsia o Media o larikok o laiguanak loo lkerenketi dukuya ninye, ina kata eitoduaya enkarsisisho e nkitoo enye e nkisisa, o enkishiaa e nkitoo enye too nkolong'i kumok. Inkolong'i iip o ntomoni isiet. Ore ake pee ebaya nena olong'i, neisho olaiguanani lelo tung'ana pooki ootii Susa, ina ang kitok, ilkituaak o looti osirua too nkolong'i naapishana, ti atua enkaji e ntumo natii atua olgoriet le nkurma e ina manyisho o laiguanani. Netii ilkarash ooibor o lpusi ooika eisiong'are iusin sidain naanyokie olgiso le nkosholai o ng'apeta naashetuno too soito oowang, netii sii ilorikan dapashi le sahabu o enkosholai shumata oleng'oti loo soito oonyokie o loonyori, netii isoito oogol enkinyang'a. Neisho ninche metookisho too nkikompeni e sahabu oo mpukunot kumok, naa eisapuk oleng enaisho oo sabibu anaa enaikununo enkaminino o laiguanani. Ore eokore naa anaa enaitanapishoteki, mearakini hoo ng'ae, amu eitanapishe olaiguanani too lkituaak lenyena pooki ootii enkaji enye e nkitoo nchere nchoo metaasa pooki tung'ani enayieu. Neisho sii Fashiti ina kitok o laiguanani inkituaak o sirua te ina aji e nkitoo o laiguanani Serser. Ore te nkolong' e naapishana, etishipe oltau lo laiguanani te nkaraki enaisho oo sabibu, neitanap ninye Mehuman, o Bista, o Harbona, o Bigta, o Abaguta o Setar o Karkas, lelo sunaishi oogelema oopishana ooisiaisho te dukuya olaiguanani Serser, pee eyau Fashiti dukuya olaiguanani eishopito emaupe enye e nkitoo pee eitodol iltung'ana pooki o lkituaak pooki e nkishiaa enye, amu eisidai apa oleng te nking'urata. Kake etanya apa Fashiti ina kitok o laiguanani, elotu te ina kitanapata o laiguanani anaa enatolimutuo lelo sunaishi oogelema. Neitagor ina olaiguanani oleng, netiu engoro enye anaa enkima nayupuyup ti atua ninye. Nejoki olaiguanani ilang'eni ooyiolo nkatitin, amu ilo apa olkerreti lo laiguanani ti alo lelo pooki arriyiak too nkitanapat o te nkiguana. Ore apa iltung'ana ootashare ninye naa Karshena o Shetar, o Admata, o Tarshish, o Meres, o Marsena, o Memukan, lelo kituaak oopishana le Parsia o Media, ootoduaa enkomom o laiguanani, naa ninche ootang'asa aatoni te nkitoo enye. Nejoki, “Amaa te risioroto oo nkitanapat kaa eitaasi Fashiti amu eitu eas enaitanapa olaiguanani Serser natolikitio lelo sunaishi oogelema?” Nejoki Memukan te dukuya olaiguanani o lelo kituaak, “Mme ake olaiguanani eitaasa Fashiti entorrono, kake eitaasa sii ilkituaak pooki o ltung'ana pooki ootii iloshon pooki lo laiguanani Serser. Amu ore ena yasata e ina kitok o laiguanani naa keyiolou nkituaak pooki, nemenu ilpayiani lenye, te neimakini aajo eitanapishe olaiguanani Serser ajo meyauni Fashiti dukuya enye, neany elotu. Ore ninye taata ena olong ntomonok e Parsia o Media naaidipa aatoning olkuak le nkitok o laiguanani naa keliki ilkituaak pooki lo laiguanani, neaku sapuk olmena o engoro. Tenaa keitiship ena olaiguanani, nchoo epukunye ninye enkitanapata, neigeri too nkitanapat oo Lpasia o Lmedia pee meibelekenyi, nchere meitoki ae kata Fashiti alotu dukuya Serser, naa nchoo eisho olaiguanani erishata enye e nkitoo esupat alang ninye. Ore ake pee einosuni aaibalunye ina kitanapata o laiguanani ti atua enkitoo enye pooki, aa sapuk anaa enatiu, pee eisho nkituaak enkanyit ilpayiani lenye, lkituaak o looti.” Neitiship ena utaroto olaiguanani, o lkituaak, neas olaiguanani anaa enatolimuo Memukan. Neirriwaa mpala iloshon pooki le nkitoria enye, olosho ake too lkigeroto lenye o te nkutuk enkiroroto enye, nchere pee eaku olee ake ninye pooki olaitoriani le nkaji enye, neiro te risioroto enkutuk o lorere lenye. Ore te siadi kuna baa, ina kata pee eyagaa engoro o laiguanani Serser, nedamu Fashiti ina nataasa o ina naidipaki aatejo enkaraki ninye. Nejoki isinkan lo laiguanani ooisiaita ninye, “Nchoo meing'orakini olaiguanani ntoyie sidain. Negelu olaiguanani ilaitasheikinok too loshon pooki le nkitoria enye, pee eiturrurru ntoyie pooki sidain meshomo enkaji oo nkituaak te Susa te ina ang kitok netoni ti abori enkirrita e Hegai ilo sunash ogelema lo laiguanani laa ninye olaing'urani loo nkituaak; nchoo meishori ninche iila enye. Ore entito naitiship olaiguanani nchoo eaku ninye enkitok enye te rishata e Fashiti.” Neitiship ina olaiguanani, neiko neijia. Netii apa Olyahudi otii Susa ina ang kitok oji enkarna enye Mordekai, olayioni le Yair, olayioni le Shimei olayioni le Kish Olbenchamini, otarayioki apa te Yerusalem te nebo lelo ootarayioki te nebo Yekonia olaiguanani le Yuda, otaarayie Nebukadnesa olaiguanani le Babilon. Neitubulu Hadasa, aa taa Esta, entito o lenkapu lenye amu meeta apa menye aashu ng'otonye. Entito apa ninye sidai naa supat, ore ake pee eye menye o ng'otonye, neya Mordekai netiu anaa enkerai enye keon. Ore ake pee eibulaa enkitanapata o laiguanani, neiturrurri ntoyie kumok te Susa te ina aji naitasheiki Hegai, neyae sii ninye Esta atua enkaji o laiguanani nepiki abori enkirrita e Hegai laa ninye olaing'urani loo nkituaak. Neitiship ina tito ninye nenyorru ninye neisho ninye asioki ntokitin naakusore, o eoroti enye e ndaa, o sinkan naapishana gelunot naaing'ua enkaji o laiguanani, neisho ninye o nena sinkan enyena ewueji sidai te nkaji oo nkituaak. Eitu ninye elimu Esta iltung'ana lenye o lorere lenye amu eitanapa Mordekai pee melimu. Naa ore nkolong'i pooki nelo Mordekai te dukuya ina aji oo nkituaak pee eiyiolou Esta eneikununo, tenaa keserian. Ore ake pee elotu enkata pee elo ake pooki tito enetii Serser, te siadi ilapaitin tomon ti abori nkitanapat oo nkituaak, aa taa ena apa enkata enye naisikarrare, ilapaitin ile te ilata o manemane, o lapaitin ile loo sonkoyoni naarropil oo nkituaak. Ore ake pee elo entito atua ine netii olaiguanani tena oitoi, neishori pooki toki naba anaa enayieu neya eing'uaa enkaji oo nkituaak o meshomo enkaji o laiguanani. Elo ninye teipa, ore tadekenya neshukunye alo olgilata li are te nkaji e Sha-ashgas ilo apa sunash ogelema lo laiguanani oing'or nkapiak; eitu eitoki alo enetii olaiguanani, meteleku te netishipe olaiguanani te ninye naa keipoti te nkarna. Ore pee ebau erishata e Esta entito e Abihail nkapu e Mordekai, oowa apa ninye aitaa entito enye, pee elo atua ine netii olaiguanani, eitu eikilikuanu toki meteleku ake ina natiaaka Hegai, ilo sunash ogelema lo laiguanani laa ninye oitasheiki nkituaak. Neitiship Esta nkonyek e lelo pooki ootodua ninye. Ore ake pee eyae Esta enetii olaiguanani Serser, ti atua enkaji enye e nkitoo to lapa le tomon, laa ninye olapa le Tebes to lari li opishana le nkitoria enye, nenyorru olaiguanani Esta aitalang nkituaak pooki, neitiship Esta nkonyek enyena alang nkulie toyie pooki, neaku etipika emaupe e nkitoria endukuya enye nepik ninye erishata e Fashiti. Neitoki olaiguanani aisho osiriua sapuk ilkituaak lenyena pooki o sinkan; osirua le Esta. Neitoki sii aishoru empalakinoto e kodi too lkerenketi neishori nkishorot te risioroto e nkarsisisho e nkitoria. Ore pee eitokini aiturrur nena toyie eniare, etonita Mordekai te nkishomi o laiguanani. Neitu elimu Esta olmarei lenye arashu iltung'ana lenye, anaa enaitanapa Mordekai; amu kening apa Esta Mordekai ebaiki apa pee eitubulu ninye. Naa ore nena olong'i, anaa enatonita Mordekai te kishomi o laiguanani, negoro oare le lelo sunaishi oogelema lo laiguanani Bigsan o Teres neing'oru eneiko pee epik nkaik enye olaiguanani Serser. Neyiolou Mordekai ina bae, neliki ninye Esta enkitok o laiguanani, neliki Esta olaiguanani te nkarna e Mordekai. Ore ake pee ejurruni ina bae nenyorrikini aajo neijia etiu, neilili lelo tung'ana pokira oare te nchumata olchani. Neigeri nena baa te mbuku oo nkatitin te dukuya olaiguanani. Ore te siadi kuna baa, neilepie olaiguanani Serser Haman le Agag, olayioni le Hamedata, neisho ninye enkitoo nepik olorika lenye shumata ile lelo kituaak ooboitare ninye. Ore laisiaayiak pooki lo laiguanani ootii kishomi neirrugo aaisho Haman enkanyit; amu neijia apa eitanapishe olaiguanani ajo. Kake eitu eirrugo Mordekai arashu aitodolu enkanyit. Nejoki lelo aisiaayiak lo laiguanani ootii kishomi Mordekai, “Kainyoo pee igil enkitanapata o laiguanani?” Ore pee eirorie ninche ninye anaake neany ening ninche, neliki ninche Haman, ejo pee edol tenaa kepal Mordekai nena, amu etiaaka ninye ninche nchere Olyahudi ninye. Ore pee edol Haman ajo eitu eirrugo Mordekai arashu eitodolu enkanyit negoro oleng. Kake eitu ejo aar Mordekai aa ninye ake. Amu eitayioloki ninye iltung'ana pooki le Mordekai, neing'oru Haman pee ear Ilyahudi pooki, iltung'ana le Mordekai, te nkitoria pooki e Serser. Ore to lapa le dukuya, laa ninye olapa le Nisan, to lari le tomon oare lo laiguanani Serser, neosh ninche Pura nchere enkukuo te dukuya Haman nkolong'i pooki; neosh too lapaitin pooki o metabaiki olapa le tomon oare, laa ninye olapa le Adar. Neitoki Haman ajoki olaiguanani Serser, “Etii iltung'ana moobo ooisardakari aaorikino atua iltung'ana loo loshon pooki le nkitoria ino; ore nkitanapat enye nepaashare inoo lkulikae tung'ana pooki, nemeibung nkitanapat o laiguanani, metaa metumie olaiguanani dupoto te nepalaa ninche. Te neishiaakino to laiguanani nchoo meigeri enkitanapata pee emuti ninche, naa kalak nanu ntalantani nkalifuni tomon oo mpisai apik nkaik e lelo ooitasheiki esiaai o laiguanani pee eyau aapik atua masaa o laiguanani.” Neitayu olaiguanani olgisoi ashurtu te nkaina enye neisho Haman le Agag ole Hamedata, olmang'atinta loo Lyahudi. Nejoki olaiguanani Haman, “Kinchooki mpisai, o ltung'ana sii, pee intaas ninche anaa enaishiaakino te iyie.” Neipoti ilaigerok lo laiguanani te nkolong e tomon ookuni o lapa le dukuya, neigeri anaa enaitanapishe Haman neigerokini lelo ang'eni o lelo kituaak ooitasheiki iloshon, o laitasheikinok pooki loo ltung'ana, olosho ake to rorei lenye o ltung'ana te nkutuk enye; neigeroki apa te nkarna e Serser nepiki olmishire te ilo gisoi lo laiguanani. Neirriwari mpala too nkaik e lelo ooirriwari meshomo ilkerenketi pooki lo laiguanani, pee eidaikie, neari metuata, neiwuang'ieki Ilyahudi pooki ooti o lbotoro, inkituaak o nkera, te nkolong nabo, te nkolong e tomon ookuni o lapa le tomon oare, laa ninye olapa le Adar, neya imasaa enye. Naa keirriwari empalai e ilo kigeroto iloshon pooki pee eitanapi metolikini iltung'ana pooki meterretenata te ina olong. Nepuo lelo ooirriwari aaya mpala te nkisarrisar te nkitanapata o laiguanani, neitayuni ina kitanapata te Susa teina ang kitok. Netoni olaiguanani o Haman aaokisho, kake ore ina ang anasa e Susa neaku enking'asia. Ore pee eyiolou Mordekai nena pooki naataasaki, nepolos Mordekai nkilani enyena neishop ilkuniyiani neelare nkuruon, neipang alo empolos e nkanasa, eyietu to ltoilo sapuk o te mion aishir; nelo ninye o metabaiki dukuya e nkishomi o laiguanani, amu meetae hoo abo oidim atijing'a enkishomi o laiguanani eishopito ilkuniyiani. Ore pooki kerenket otabaikia enkitanapata o laiguanani o nkiguanat enyena, naa eisapuk olkiyioi loo Lyahudi, neen ate aaitupukuo, neyietu aaishir, nepetaa ilkumok lenye ilkuniyiani o nkuruon. Ore ake pee epuo nkaisiaayiak e Esta o lelo sunaishi oogelema aainosaki, neisina oleng ina kitok o laiguanani: Neirriwaa nkilani aishop Mordekai, pee etum aitayu ilkuniyiani, kake menyorraa ang'amaa nena kilani. Neitoki Esta aipot Hatak, obo le lelo sunaishi oogelema lo laiguanani, laa ninye etegeluaki pee eisiaai ninye, neirriwaa ninye meshomo enetii Mordekai pee eyiolou ajo kaa ena naa ae tenkaraki nyoo pee etotiuo neijia. Neipang Hatak alo enetii Mordekai teilo kurroto otumoreki le nkanasa te dukuya enkishomi o laiguanani. Neliki Mordekai nena pooki naataasate, o esiana oo mpisai naatonyorrayie Haman alak apik olchumati lo laiguanani te mutata oo Lyahudi. Neitoki Mordekai aisho emboitati e mpalai e ina kitanapata naitayioki te Susa te nkaraki emutata enye, pee elo aitodol Esta, neinosaki ninye ilomon, neitanap meshomo enetii olaiguanani pee eomon nesai te nkaraki iltung'ana lenyena. Nelo Hatak aliki Esta ina natejo Mordekai. Neitoki Esta airorie Hatak neisho ninye olkilikuai oyaki Mordekai ejo, “Ore laisiaayiak pooki lo laiguanani o ltung'ana loo lkerenketi pooki lo laiguanani neyiolo aajo te nelo olee arashu enkitok ajing'aki olaiguanani ti atua ine netonie eitu eipoti, naa enkitanapata nabo ake natii, ore pooki te risioroto naa keari metuata meteleku ilo oitorioki olaiguanani eng'udi enye e sahabu pee epok. Naa eitu nanu aaipoti maeu atua enetii olaiguanani kuna olong'i tomoni uni.” Neliki ninche Mordekai ina natejo Esta. Neitoki Mordekai ajoki ninche metushuku ewalata enetii Esta, “Mijo taa ore ti atua enkaji o laiguanani niserian alang ilkulikae Yahudi pooki. Amu te nigira te nkata natiu anaa ena, naa kelotu eretoto o enjeunoto ti ae oitoi, kake ore iyie o enkaji e papaai lino nindaayaya. Naa eing'ae oyiolo tenaa ieuo ena kitoo te nkaraki enkata anaa ena?” Neitoki Esta ajoki ninche metawaliki Mordekai, “Shomo, inturrurro Ilyahudi pooki ootii Susa nieniene ate aaitupukoo te rishata ai niminyanya endaa arashu iokioko too nkolong'i uni dama o kewarie. Ore nanu o nkaisiaayiak aainei nikien sii iyiook ate aaitupukoo anaa intae. Alo enetii olaiguanani, hoo tenaa kengilata oo nkitanapat ina naa tenaa kaye nanu naye.” Nelo Mordekai neas pooki toki anaa enaitanapa Esta ninye. Ore te nkolong e uni neishop Esta nkilani enyena e nkitoo neitashe ti atua olgoriet le nkaji o laiguanani, oipirakinore ina aji o laiguanani. Neton olaiguanani to lorika lenye le nkitoo ti atua enkaji e nkitoo aipirakinore kutukaji e nkaji e nkitoo, Ore ake pee edol olaiguanani Esta eitashe to lgoriet, netum ninye Esta omom too nkonyek enyena neitarasaki ninye Esta ina ng'udi e sahabu apa naata te nkaina enye. Nelotu Esta ayiaya neibung endukuya e ina ng'udi. Nejoki olaiguanani ninye, “Kainyoo Esta? Kainyoo eomonunoto ino? Eikinchori iyie, o metabaiki olpisiai le nkitoria ai.” Nejo Esta, “Tenaa keishiaakino to laiguanani, nchoo olaiguanani o Haman epuonu osirua taata laitobiraka nanu olaiguanani. Nejo olaiguanani, Eyau Haman entasieku, pee kitum aataas anaa enayieu Esta.” Nelotu olaiguanani o Haman ilo sirua oitobira Esta. Ore eokito enaisho oo sabibu, nejoki olaiguanani Esta, “Kainyoo olkiyioi lino? Eikinchori iyie. Naa kainyoo eomonunoto ino? Tenaa duoo ninye kolpisiai le nkitoria ai, naa keitabari ake.” Kake etejo Esta, “Ore enkolat ai o eomonunoto ai naa; tenaa kanoto nanu omom too nkonyek o laiguanani, naa tenaa keitiship olaiguanani meishoru enkolat neitabaya eomonunoto ai, nchoo olaiguanani o Haman epuonu taisere osirua layooki aitobiraki ninche, ore taisere naas anaa enatejo olaiguanani.” Neipang Haman ina olong alo eng'ida neshipa to ltau. Kake ore ake pee edol Haman Mordekai te nkishomi o laiguanani, nchere eitu eitashe neitu eikirikira te dukuya ninye neiput engoro te nkaraki Mordekai. Ore ake eyia eibooyie Haman keon, nelo ang, neirriwaa meipoti ilchoreta lenyena o enkitok enye Seresh. Neinosaki Haman ninche esikar o enkarsisisho enye, esiana oo layiok lenyena o enkitoo pooki naishoo ninye olaiguanani o ina nailepieki ninye aaitalang ilkituaak o laisiaayiak lo laiguanani. Neitoki Haman aponaa ajo, “Ore ninye Esta enkitok o laiguanani eitu eisho hoo ng'ae meeu te nebo olaiguanani ilo sirua oitobira ninye meteleku nanu ake. Naa ore sii taisere aaitoomono ninye te nebo olaiguanani. Ore eyia, maaitiship kuna pooki te nadol Mordekai ilo Yahudi eton te nkishomi o laiguanani.” Nejoki enkitok enye Seresh o lchoreta lenyena pooki, “Nchoo eitayuni olchani ogorishoreki intemat onom enkadoro ore taisere tadekenya niliki olaiguanani pee eiki Mordekai te nchumata e ilo shani. Nijing, iyie osirua lo laiguanani te ng'ida.” Neitiship ina walata Haman, neisho meitobiri olchani ogorishoreki. Ore te ina kewarie neitu eirura olaiguanani; neitanapisho ninye pee eyauni embuku natii mbaa naadamuni, neisumi te dukuya olaiguanani. Netumi eigero ajo etolimuo Mordekai Bigtana o Teres, lelo oare ti atua isunaishi oogelema lo laiguanani, apa oorripito kutuk aji, neyieu sii apa nepik nkaik enye olaiguanani Serser. Nejo olaiguanani, “Amaa kaa anyit anaa kaa kitoo eishooki Mordekai tena bae?” Nejoki ilaisiaayiak lo laiguanani ooisiaita ninye, “Meetae enaitaasaki.” Nejo olaiguanani, “Aing'ae otii olodung'oro, naa enalotunye Haman atua ilo odung'oro li oriong enkaji o laiguanani, pee etum airorie olaiguanani pee eiki Mordekai te nchumata ilo shani ogorishoreki oitobiraka. Neliki ilaisiaayiak lo laiguanani ninye, ejo, Etii Haman idie, eitashe to lodung'oro.” Nejo olaiguanani, “Enchoo elotu atua aji.” Nejing'u Haman atua aji, nejoki olaiguanani ninye, “Kaa eitaasi oltung'ani oshipakino olaiguanani pee eyanyit.” Nejo Haman to ltau lenye, Kaing'ae pasa oitishipa olaiguanani pee eyanyit aitalang nanu? Neitoki Haman ajoki olaiguanani, “Ore oltung'ani oshipakino olaiguanani pee eyanyit inchoo eyauni nkilani e nkitoo naaidipa olaiguanani aishopo, o ina barta naidipa olaiguanani atakedo, neishopokoki olmarisian le nkitoo endukuya enye; neishori nena kilani o ina barta eitarasakini obo loo laitasheikinok lo laiguanani oata enkitoo; nchoo ninye eishopoki ilo tung'ani oshipakino olaiguanani pee eyanyit, nerikoo ninye ekedito embarta te nkoitoi sapuk e ina ang, eitayiolo aibalunye te dukuya ninye nchere, neijia eikoni ilo tung'ani oshipakinoolaiguanani pee eyanyit.” Neitoki olaiguanani ajoki Haman, “Isarisara intayu nena kilani o ina barta, ore anaa enitejo, nintaas ina Mordekai ilo Yahudi otonita te nkishomi o laiguanani. Mintong'or ake nabo te nena duoo nitejo.” Neitayu Haman inkilani o embarta neishopoki Mordekai neisho ninye metakedo embarta nerikoo ninye aimie ilo kurroto otumoreki le nkanasa eibalunye ajo, “Inji eikoni oltung'ani oshipakino olaiguanani pee eyanyit.” Neitoki Mordekai ashuko alo kishomi o laiguanani. Kake eisarisara Haman alo enkaji enye eishirita neimulumula elukunya enye. Neliki Haman enkitok enye Seresh o lchoreta lenyena pooki nena baa pooki naanoto ninye. Nejoki ninye ilang'eni lenyena o enkitok enye Seresh, “Tenaa ko Lyahudi Mordekai ilo apa litang'asa adumakino mindim naa iyie ninye kake meeta nchere mibatata iyie te dukuya ninye.” Ore eton eirorie ninche ninye, nebau lelo sunaishi oogelema lo laiguanani eisosion pee eya Haman ilo sirua oitobira Esta. Nelo olaiguanani o Haman ilo sirua te nebo Esta enkitok o laiguanani. Ore te nkolong e are, ina kata eokito enaisho oo sabibu, neitoki olaiguanani ajoki Esta, “Kainyoo eomonunoto ino Esta? Eikinchori iyie. Ainyoo eyieunoto ino? Tenaa ninye kolpisiai le nkitoo ai, naa keitabari.” Newaliki Esta ajoki, “Tenaa kanoto omom, too nkonyek inono, olaiguanani, naa te neitiship olaiguanani, nchoo maaishori enkishui ai te yieunoto ai, o ltung'ana laainei te nkomono ai. Amu etimiraki iyiook, nanu o ltung'ana laainei, pee emuti iyiook neari matuata neimisieki iyiook. Tenaa naaji ketimiraki iyiook aaitaa irindiki, ilewa o nkituaak, anaata atigire, amu meitanyaanyukieki osina lang enkitarruorroto to laiguanani.” Nejoki olaiguanani Serser Esta, “Kaing'ae ilo, naa kaji etii, ilo oitieu ataasa ena?” Nejoki Esta, “Olaarani naa olmang'atinta ninye; ele arruoni Haman!” Neureishoyu Haman te dukuya olaiguanani o enkitok o laiguanani. Neinyototo olaiguanani te ilo sirua te ngoro nelo enkurma e ina aji e nkitoo; neton Haman aomonu enkishui enye te Esta enkitok o laiguanani, amu etoduaa ajo eitobirita olaiguanani entorroni naarie ninye. Neshukunye olaiguanani eing'uaa ina kurma e nkaji e nkitoo elotu ewueji duoo neokie enaisho oo sabibu, ore Haman ina kata ebatata aomonu olng'ur, nebatatakino ina rruat natii Esta; nejo olaiguanani, “Keyieu neikony enkitok o laiguanani te dukuya nanu ti atua enkaji ai, Ore pee epuku ilo rorei te nkutuk o laiguanani neimulumuli enkomom e Haman. Nejo Harbona obo loo sunaishi oogelema ooisiaai olaiguanani, Ore ninye ilo shata ogorishoreki ooitobiraka Haman Mordekai, laa ororei lenye oitajeuo olaiguanani, neitasheyieki te nkaji e Haman naa intemat onom enkadoro.” Nejo olaiguanani, “Entiik elilio ninye te ilo shata.” Neilili Haman te ilo shata ogorishoreki apa oitobiraka Mordekai neyagaa engoro o laiguanani. Ore teina olong neisho olaiguanani Esta enkaji e Haman, ilo mang'atinta loo lyahudi. Nelotu Mordekai dukuya olaiguanani amu etolikio Esta enabaikinore ninye; neshurtu olaiguanani olgisoi lenye otooruo Haman neisho Mordekai. Neisho Esta Mordekai enkaji e Haman meitoria. Neitoki Esta airorie olaiguanani, nebatata too nkejek enyena nesai ninye too lkiyio pee eiwuang'ie entorroni apa naitobira Haman Olagagi o nena naaiguanua te nkaraki Ilyahudi. Neutie olaiguanani Esta eng'udi e sahabu, Neinyototo Esta aitashe te dukuya olaiguanani Nejo, “Tenaa keitiship olaiguanani, naa tenaa kanoto omom too nkonyek inono, naa tenaa keishiaakino ena bae te dukuya olaiguanani te naishiaakino nanu te dukuya nkonyek enyena, nchoo meigeri enkitanapata naibelekenyieki mpala e nena apa naaipirua Haman Olagagi, olayioni le Hamedata, apa naaigero pee emut Ilyahudi ootii iloshon pooki lo laiguanani. Amu kaji aiko te nangiri aing'or ina torroni nalotu atua iltung'ana laainei? Arashu kaji aiko te nangiri te nadol ina mutata o lorere lai.” Nejoki olaiguanani Serser Esta o Mordekai ilo Yahudi, “Eng'ura, aishoo Esta enkaji e Haman, neililio ninche ninye to lchani ogorishoreki, amu eitorioko ninye nkaik Ilyahudi. Naa indimidimi aaigero anaa eniyieuu, anaa enaishiaakino Ilyahudi, te nkarna o laiguanani, nipikipiki olmishire lo lgisoi lo laiguanani, amu ore ilkigerot ooigeroki te nkarna o laiguanani, nepiki olmishire lo lgisoi lo laiguanani meetae oltung'ani oidim aibelekenya.” Neipoti ilaigerok lo laiguanani te ina kata to lapa li okuni, aa olapa le Sifan te nkolong e tikitam o okuni; neigeri enkitanapata anaa enaitanapishe Mordekai meyakini Ilyahudi pooki, o lkituaak pooki, o lbalusuni o laitasheikinok loo lkerenketi ebaiki India o metabaiki Etiopia naa iloshon iip o tikitam o opishana, pooki osho ake to lkigeroto lenye, o pooki tung'ani te nkutuk enye, o lo Lyahudi sii to lkigeroto lenye o enkutuk enye. Ore lelo kigerot naa te nkarna o laiguanani Serser nemishira to lmishire lo lgisoi lenye, neyae nena pala iltung'ana ooirriwari ookedito mbartan naaten oleng apa naasishoreki te nkisiayiare o laiguanani, naaitubuluaki ti atua boo o laiguanani. Ore te kuna nenyorraa olaiguanani Ilyahudi ootii nkanas pooki meiturrurroto pee emitu ate, nemut near metuata, neidaikie pooki jore e pooki tung'ani o pooki osho oidim atarasaki ninche, o nkera enye o nkituaak, neya masaa enye, nabo olong too loshon pooki lo laiguanani Serser te nkolong e tomon o okuni to lapa le tomon o are, laa olapa le Adar. Ore empalai e nena naaigeroki naa keishoori anaa enkitanapata te pooki osho, o te nkitayioloto oo ltung'ana pooki, nerretena Ilyahudi pee eitalaku elap enye te lelo mang'ati lenye. Neked lelo ooirriwari imbartan enye naaten apa naasishoreki te nkisiayiare o laiguanani, neipang aapuo te nkisarrisar, eitirrishakita enkitanapata o laiguanani, neitayuni enkitanapata te Susa te ina ang kitok. Neitoki Mordekai apuku alo te ine netii olaiguanani eishopito inkilani e nkitoo pusi o naaibor o lmarisian sapuk le nkitoo le sahabu, olkila sidai sintet, ina kata ebuaku enkang e Susa neng'ida. Netum Ilyahudi ewang'an, o enchipai, o eng'ida o enkanyit. Ore te pooki osho, o te pooki ang, eneba anaa enetabaikia enkitanapata o lkilikuai lo laiguanani, netii enchipai o eng'ida atua Ilyahudi; o sirua o enkisampash. Ore ilkumok te lelo tung'ana le ina kop neibalunye ate aaitaa ate Ilyahudi amu eiputa enkuretisho oo Lyahudi atua ninche. Ore to lapa le tomon o are laa olapa le Adar, te nkolong e tomon o okuni e ilo apa ina kata etinyikutua inkitanapat o laiguanani o lkilikuai lenye pee eitabari, te ina olong apa ejo ilmang'ati loo Lyahudi ketum engolon te ninche, kake eibelekenye ina, aaku enkolong natumie Ilyahudi engolon too lmang'ati lenye, neiturrurro Ilyahudi too nkanas enye ti atua loshon pooki lo laiguanani Ahasero pee epik nkaik lelo oshi ooyieu near ninche. Nemetii oltung'ani oidim airisha ninche, amu eiputa iltung'ana pooki enkuretisho eure ninche. Ore ilkituaak pooki loo loshon o laitasheikinok, o lbalusuni o lelo pooki oata enkitoo neretu sii ninche Ilyahudi, amu etijing'a ninche enkuretisho eure Mordekai. Amu eikitok apa Mordekai ti atua enkaji o laiguanani, ore ening'oi enye neidapashakino iloshon pooki; amu ore ilo tung'ani oji Mordekai netoponari oleng agolu. Near Ilyahudi lelo mang'ati lenye pooki to lalem, nemut, neidaikie ninche, neas anaa enayieu te lelo pooki apa ooiba ninche. Ore te Susa te ina ang kitok ake near Ilyahudi metuata neidaikie ilewa iip imiet, near sii Par-shandata o Dalfon o Aspata o Parata o Adalia o Aridata o Parmasta o Arisai o Aridai o Faisata, ilayiok pokira tomon le Haman ole Hamedata, olmang'atinta loo Lyahudi; Kake eitu epik nkaik enye nena naataarutua. Ore ina olong ake nelikini olaiguanani esiana e lelo ootaaraki te Susa te ina ang kitok. Nejoki olaiguanani Esta enkitok o laiguanani, “Ore te Susa te ina ang kitok etaara Ilyahudi ilewa iip imiet o layiok tomon le Haman, Kainyoo naa sii yie etaasa te lelo kerenketi le laiguanani ootelekutua! Kainyoo naa taata eyieuna ino? Eikinchori iyie. Naa kainyoo intoki aomonu? Amu keitabari.” Nejo Esta, “Tenaa keitiship olaiguanani, nchoo Ilyahudi ootii Susa menyaakini aanyorraki taisere metaasa anaa ena kitanapata ena olong. Naa nchoo layiok le Haman meilili to lchani ogorishorek.” Neitanapisho olaiguanani ina metaasi; neitayuni enkitanapata te Susa, neilili ilayiok pokira tomon le Haman. Neitoki Ilyahudi ootii Susa aaiturrurro te nkolong e tomon o ong'uan o lapa le Adar near metuata iltung'ana iip uni te Susa; kake eitu epik nkaik enye nena naataarutua. Ore lelo kulikae Yahudi ootii atua lelo oshon lo laiguanani neiturrurro sii ninche pee emitu ate, netum ninche enkiyagata ti alo ilmang'ati lenye. Neitoki aar inkalifuni ntomoni naapishana o imiet e lelo apa ooiba ninche; kake eitu epik nkaik enye nena naataarutua. Te nkolong e tomon o ong'uan neeng'iyeng'a neitaa ina olong osirua o enchipai. Kake ore Ilyahudi ootii Susa neiturrurro te nkolong e tomon o okuni o te nkolong e tomon o ong'uan, neeng'iyeng'a te nkolong e tomon o imiet, aaitaa ina olong osirua o enchipai. Metaa ore Ilyahudi loo nkang'itie kutiti, ootoni too nkang'itie nemeeta isunta, neitaa enkolong e tomon o ong'uan olapa le Adar enkolong e nchipai, osirua o enkiyeng'iyeng, enkolong naa ninye eishorore nkishorot. Neiger Mordekai kuna baa, neitoki airriwaki mpala Ilyahudi pooki ootii iloshon lo laiguanani Serser, ilootaana o loolakua, aikok ninche pee edamu, enkolong e tomon oong'uan o lapa le Adar o enkolong sii e tomon o imiet to lari o to lari, aa inkolong'i naa ninche enotie Ilyahudi enkiyagata too lmang'ati lenye, naa olapa sii oibelekenyaki te ninche metaa kepuku to sina aajing enchipai nepuku to lkiyioi aajing enkiyeng'iyeng, pee etum aaitaa ninche inkolong'i o sirua o enchipai, inkolong'i naaishorore nkishorot maate neisho nkishorot ilaisinak. Neiruk lelo Yahudi aas anaa ina naiterutua aas, anaa sii ina naigeroko Mordekai ninche. Amu ore Haman ilo Agag olayioni le Hamedata, olmang'atinta loo Lyahudi pooki, eitobira pee ear Ilyahudi; neidaikie ninche, netoosho Pur aa nchere enkukuo pee eparripar neidaikie ninche. Kake ore ake pee elotu Esta dukuya olaiguanani, neishooyo inkitanapat too lkigerot nchere ore ina kitobirata enye torrono naitobira pee emuti Ilyahudi enyor nelotu shumata endukuya enye, ore ake sii neilili ninye o layiok lenyena to lchani ogorishoreki. Neaku kejo ninche kuna olong'i Purim, aaitusuj ilo rorei oji Pur. Metaa ore te nkaraki nena pooki naaigeroki tena palai, o nena naatadua tena bae, o te nena naaetuo atua ninche. Neitayu Ilyahudi enkitanapata neibung ninche maate o nkera enye o pooki ooibung'are ninche, nchere keibung kuna olong'i pokira are eitu eitadiak te risioroto e nena apa naaigeroki o te nkata naba anaa enageluni te pooki ari nchere keishiaakino nedamuni kuna olong'i neibung'i ti atua iishoritin pooki ishoi, te pooki marei, o losho o enkang, naa ore kuna olong'i e Purim nemeishori aekata eimin ti atua Ilyahudi, nemepali sii enkitadamunoto ti atua ishoritin pooki. Neitoki Esta, ina kitok o laiguanani, entito e Abihail o Mordekai ilo Yahudi, aaiger enkitanapata nalulung'a te nkitoria, aaitadedeyie ena palai e are naipirta Purim. Neigerokini mpala Ilyahudi pooki, ootii lelo oshon tikitam o opishana lo laiguanani Serser, too rorei le seriani o esipata, nchere ore kuna olong'i e Purim neishiaakino neibung'i too nkatitin naatudung'okoki, anaa enaitanapa Mordekai ilo Yahudi o Esta enkitok o laiguanani Ilyahudi, o ina sii nairuko aaibung ninche maate o nkera enye mbaa naaipirta eenata o enkishirata enye. Neitagol enkitanapata e Esta nena baa e Purim, neigeri te mbuku. Neitalaku olaiguanani Serser kodi te ina kop o to loomanaa loo naaiposha. Ore iasat enyena pooki o engolon o enkidimata, o lomon pooki le nkitoo e Mordekai, naishoo olaiguanani ninye, aimeigero kuna te mbuku oo nkoon oo laiguanak le Media o Parsia? Amu Mordekai ilo Yahudi naa ninye apa osujita te nkitoo olaiguanani Serser, naa aikitok too Lyahudi nening'o to lorora loo lalashera lenyena, amu eing'orua olmabarishoi loo ltung'ana lenyena neiro eseriani too ltung'ana lenyena pooki. Eetae apa oltung'ani omanya enkop e Us, oji enkarna enye Yoab. Naa ore apa ilo tung'ani nemeeta entioto naa oltung'ani oitashe too sipat, neure ninye Enkai oleng, neorunye aing'uaa intorrok. Eeta apa ninye ilayiok oopishana o ntoyie uni. Neeta apa ninye intare nkalifuni naapishana, o ntamesin inkalifuni uni, o lmong'i iip imiet ooyietaa enchata emurt, o sirkon lipong'a iip imiet, o sinkan kumok oleng, naa ore apa ele tung'ani meetae olkarsis olang too ltung'ana pooki lo loosaen. Ore apa ilayiok lenyena naa kepuo aaitayu isiruai too lmareita lenye, meeta ake olemeeta enkolong enye. Neipotu inkanashera enye pokira uni meetu aadaa te nebo neokisho te nebo. Ore ake pee elusoo inkolong'i o sirua, neinyototo Yoab alo aitisiny ninche te dukuya Enkai. Naa keyooki tadekenya alo aitayu olasar opejori terishata oo layiok lenyena pooki; amu ejo apa Yoab, “Ebaiki netaasa ilayiok laainei ing'ok, nedek Enkai too ltauja lenye.” Neas Yoab ina anaake. Eetae apa enkolong naetuo ilayiok le Nkai aaitayu ate te dukuya Olaitoriani, nelotu sii ninye Shetani te nebo ni nche. Nejoki Olaitoriani Shetani, “Kaji ing'uaa iyie?” Newaliki Shetani Olaitoriani ajoki, “Aing'uaa ene o idie ti oriong e nkop, naing'uaa sii elototo ai e shumata o abori te shumata ninye.” Nejoki Olaitoriani Shetani, “Itoduaa osinka lai Yoab, olaa meetae likae laaijo ninye te enkop, oltung'ani lemeeta entioto neitashe too sipat, neure Enkai neorunye aing'uaa intorrok?” Ina pee ewaliki Shetani Olaitoriani ejo, “Keure Yoab Enkai te mpesho? Aa keitu doi intaman ninye enkikarrata tenebo enkaji enye o pooki toki naata too nkaloli pooki? Itamayiana esiai oo nkaik enyena, netoponari imasaa enyena aaiput ena kop. Kake intorioi sii iyie enkaina ino tenakata iseyie nena pooki naata, naa aikidek ninye aitoriokino enkomom ino.” Nejoki Olaitoriani Shetani, “Ng'ura, ore pooki naata ninye etii atua engolon ino; ninye ake enkorrok enye mintorioki enkaina ino.” Neaku eshomo Shetani aing'uaa ine netii Olaitoriani. Eetae apa enkolong natotona ilayiok le Yoab o ntoyie enyena aadaa neok enaisho oo lsabibu te nkaji olalashe lenye botor; nelotu olkilikuai enetii Yoab nejoki, “Ore duoo eturito ilmong'i enkurma nedaa isirkon tembata enye; nedoiki iltung'ana le Sabea, nereu ninche pooki, near isinkan ootii te nepi olalem; neaku nanu ake oisikua peyie aalotu aliki.” Ore eton eiro eitu eishu, nelotu likae nejo, “Etadowuo enkima Enkai te shumata nepejoo intare te nebo isinkan, neidakie ninche; neaku nanu ake oisikua peyie aalotu aliki.” Ore eton eirorita ilo, nejing'u likae nejo, “Eitayutuo Ilkaldayo iltimito okuni, nepuonu aarare iyiook aaikonyaa intamesin nereu, near isinkan te nepi olalem; metaa nanu ake oisikua peyie aalotu aliki.” Ore eton eirorita ilo, nelotu likae nejoki, “Ore layiok linono o ntoyie edaa duoo neok enaisho oo sabibu tenebo te nkaji olalashe lenye botor; naa ng'ura; eewuo osiwuo sapuk odung'u olpurkel, neosh ilpijat pokira oong'uan leina aji, nesulakino lelo tung'ana lelerue, netuata pooki, metaa nanu ake openy oisikua peyie aalotu aliki.” Ina pee edumunye Yoab, nepolos olkila lenye, nebarn elukunya enye, nebatatakino enkop aserem. Nejo ninye, atupukuo apa te ng'uset e yieyio maishopo naa karrinyo alo maishopo. Olaitoriani oishorua naa ninye onyaaka aya. Meisisi enkarna o Laitoriani. Ore te kuna pooki neitu eas Yoab eng'oki arashu eipotoki Enkai entorroni. Neitokini ake aata ae olong naetuo ilayiok le Nkai aaitoduaaya ate te dukuya Olaitoriani, nelotu sii ninye Shetani te nebo ninche aitoduaaya kewan te dukuya Olaitoriani. Nejoki Olaitoriani Shetani, “Kaji doi iyie ing'uaa?” Newaliki Shetani Olaitoriani ajoki, “Aing'uaa idie o idie te nkop, nalilita te shumata o tiabori.” Nejoki Olaitoriani Shetani, “Itoduaa osinka lai Yoab, olaa meetae olonyaanyukie ninye te nkop, o lemeeta entioto naa oltung'ani oitashe too sipat, oltung'ani oure Enkai neibelekenye aing'uaa intorrok? Eton ake eibung'ita enkirukoto enye anaa apake, hoo nikiewuo arrumoki ninye mataarare, meeta ninye enataasa.” Ina pee ewaliki Shetani Olaitoriani ajoki, “Olchoni to lchoni eitayu oltung'ani pooki naata te nkaraki enkishui enye. Kake intorioi sii iyie enkaina ino tenakata, iseyie sii iyie oloito lenye o sesen lenye, naa aikimor ninye aitoriokino enkomom ino.” Nejoki Olaitoriani Shetani, “Ng'ura, etii ninye nkaik inono enkishui enye ake miseyie.” Metaa eshomo Shetani aing'uaa enetii Olaitoriani, nelo aisilisil Yoab apik impaldakani torrok naang'u eiteru too ndapi oo nkejek enyena o metabaiki elukunya enye. Neya Yoab embelati e moti oo nkulukuok, nelo aton to lchala loo suut aoj kewan. Ina pee ejoki enkitok enye, “Keton ake imbung akurraki enkirukoto? Ainyoo pee midek Enkai pee itum atua.” Kake etiaka Yoab ninye, “Iro iyie anaa nabo oo nkituaak naamoda. Aiking'amu esidai te nkaina Enkai, nimiking'amu intorrok?” Ore te kuna pooki eitu eas Yoab eng'oki te nkutuk enye. Ore ina kata pee ening ilchoreta le Yoab okuni ina torroni natijing'aka Yoab, nepuonu pooki ng'ae eing'uaa wuejitin enye, Elifas le Teman, o Bildad le Shushi o Sofar le Naamat. Negelu pooki olkekun opuonu tenebo aaitobor neitagol sii. Ore ake pee edol ninche ninye eton elakuaniki, eitu ninche eyiolou ninye; neyietu aaishir nepolos ilkilani lenye neisuaaki enterit ilukuny eing'or keper. Netoni te nebo ninye te nkop inkolong'i ile o nkewaritin enye; nemeetae hoo obo otaboloko ninye enkutuk airorie, amu etoduaa ninche aajo ore osomit lenye naa kitok oleng. Ore te siadi ena, etabolo Yoab enkutuk enye adek enapa olong natoinyeki. Nejo Yoab: “Inchoo ina olong apa naatoinyieki eidak, te nebo ina kewarie apa natejoki, ‘Kenutae enkayioni!’ Inchoo ina olong eaku enaimin! Inchoo Enkai e shumata epal eitu eing'oru ninye, nemeetae ewang'an naitawang'aki ninye. Inchoo eaku enkolong torrono o enaimin nagut te shumata enye. Tunuka ninye too nkatampo niwuang'ie enkolong te ninye. Ore ina kewarie, inchoo enaimin narok ong'u eibung ninye! Mincho ninye eshipa tiatua nena olong'i o lari. Mincho ninye elotu ajing esiana oo lapaitin. Ee inchoo ina kewarie eaku olupi; emincho oltoilo le nchipai ening'i tiatua. Inchoo lelo oodekisho metediaa ina olong, lelo arriyiak oodumu Lefiatan. Inchoo ilakir lenyena le nkakenya emisimisu nchoo ninye eisiligu ewang'an nemetum nemedol osirua enkakenya tenewang'u. Ore amu eitu een ina olong eng'uset e yieyio, neitu eisudoo enyamali too nkonyek aainei. Ainyoo apa pee eitu aye te nkata e inoto, anaa pee apuku ake te ng'uset naye. Aainyoo pee aaibung'a yieyio too nkejek enyena? Anaa pee aaitanaa ilke lenyena? Amu anaata apa airraga nagira; anaata airure; naa anaata ayeng'iyeng'e. Tenebo ilaiguanak o laitoriak le nkop lelo apa ooteshetakita ate inkidaarot. Arashu ilkituaak oota sahabu, lelo ooiput inkajijik enye enkosholai. Ainyoo apa pee eitu aaisudori anaa olkibiroto anaa nkiyiotin neitu ae kata edol ewang'an? Teine eishu ilarruok te nyamali, naa teine eyeng'iyeng'ieki iloonaurate. Teine eyeng'iyeng'a ilooena tenebo; mening ninche ilo toilo lo loitasheiki esiai. Etii ine ilooti netii sii ilkituaak, nelakuno osinka to loitore ninye. Ainyoo pee eishori ewang'an ilo otii engolikinoto, neishori enkishui ilo oata emion to ltau. Ilo otayiewua to ltau keeya, nemelotu ninye, neturu ninye ninye oleng alang entoki nagol enkinyang'a naiteng'ela. Lelo ooshipa te nchipai sapuk oleng, neshipa tenetum ninche enkurare? Ainyoo peyie eishori ewang'an oltung'ani laa ore enkoitoi enye neisudoro, ilo oitamana Enkai olpaashe ninye. Amu elotu enkiyang'ata anaa emukate ai, ore inkishirat aainei nebukunye anaa enkare. Amu ore ina toki naure nanu nelotu shumata nanu, naadoiki nanu ina naitureisho. Maata esidano te nkewan ai, nemaata sii engira, maata enkiyeng'iyeng; kake enyamali nalotu.” Ina pee ewal Elifas le Teman ajo: “Amaa tenikishirraki oltung'ani airorie, igoro Naa kaing'ae oidim atigirayu eitu eiro. Ing'ura ituutayie lkumok, nintagolo inkaik nemeeta engolon. Ore irorei linono neitasheyie ilo orrorro nitipika engolon inkung naashal. Kake ore taata kitabaikia iyie, nimindim ating'iria; kimbung'a iyie nimimputukuny. Amaa euriata ino Olaitoriani aime ninye empijan ino naa enkitashoto sidai oo nkoitoi inono ninye osiligi lino? Tadamisho sii iyie, kalo ae kata ilo loo supati oidaayie? Anaa aitiaji ae kata etudung'oyioki, lelo ooitashe too sipat? Ore anaa enatoduaa, ore lelo ooun entorroni; neun enyamali naa ninye ejung. Ore te nkiyang'et e Nkai naa keidak, ore te ndarata e ng'oro enye neijori ninche. Ore ina kikurrukur o lng'atuny, o ilo toilo lo lng'atuny pushati, o lelo ala le lelo ng'atunyo ooti negili. Ore ilo ng'atuny ogol neish te nkaraki natala entoki nanya, ore inkera e ng'atuny neidapashari. Aayakaki olomoni aakurraki, neng'amu enkiok ai ina king'oming'omakinoto. Tiatua indamunot naaing'uaa induaat enkewarie, ina kata etijing'a injo naairoishi iltung'ana. Nelotu shumata nanu enkuretisho sapuk olokirikiri ina naikirikirie iloik laainei pooki. Nekut enkiyang'et enkomom ai, ore ilpapit lo sesen lai neitashe. Neitashe aauno kake eitu nanu amusu eneikununo. Etii apa enkitanyaanyukoto dukuya nkonyek aainei; netii engira, ina pee aning oltoilo: ‘Keidim oltung'ani oye ataa sinyati te dukuya Enkai? Keidim oltung'ani ataa sinyati te dukuya Olaitobirani lenye? Ore doi ninye too laisiaayiak lenyena mepik ninye osiligi, ore ilmalaika lenyena neikenaki enkitadiata. Kebaa elus lelo oomanya inkajijik esarng'ab laa ore olkitamanyunoto lenye netii atua enterit, lelo oorrarri anaa olasai. Ore teneitoriti entadekenya o enteipa nemuti; neish ninche intarasi meeta hoo oloyiolo. Nemuti aaya olng'obor lenye aimemuta ninche aaye, neton ake meeta engeno nagut?’” “Impotisho taata, ketii hoo obo liking'amaa iyie? Kalo obo loo sinyat imbelekenyakino iyie? Esipa ore enkuretisho nalus naa kear olmodai ore olom near ilo lemeeta engeno. Atoduaa ilo modai enoto ntona, kake atasioko nanu adek emanyisho enye. Ore ilayiok lenyena nelakuaniki eseriani, etumutaki ninche aaidaikie te kishomi, nemetii hoo obo oitajeu ninche. Ore enkisampuare enye nenya lelo oota esumash, naa keya doi ninye aitayu tiatua ilkiku; ore iloota enkure neipang'ipang eing'oru enkarsisisho enye. Amu ore olosilisili neme enterit epukunye, ore enyamali neme te nkop ebulu. Kake etoikioki oltung'ani enyamali anaa enailep iltiil le nkima shumata. Ore nanu, naa kaing'oru Enkai, naa Enkai apik nanu enkoitoi ai. Ilo oas isiaitin sapuki enking'asia nemejurrunoyu te nguton, intokitin kumok enking'asia nemeikenayu; eisho ninye enchan metashaiki oriong enkop, neirriwaa inkariak metijing'a nkurman. Nedumu ailepie lelo oobor ore lelo ooishir nedumuni aailepakinye eneserian. Neitaa pesho nkitobirat e lelo loo losekin, metaa metum inkaik enye hoo dupoto. Eya ninye lelo ng'eni to losek lenye maate, ore inkitobirat e lelo lo losek neiting'ie asioki. Etum ninche enaimin te ndama, neirrapirrapisho enaipirie enkolong, anaa lootii atua enkewarie. Kake keitajeu lelo okishin too nkutukie enye; ore iloomena neitajeu te nkaina eilo magilani. Metaa keeta ilo aisinani osiligi, ore imbaa nemetii isipat nenuk enkutuk enye. Ing'ura, eshipa ilo tung'ani oisikong Enkai; metaa mimenaa ina kisikong'ata o eilo magilani. Amu kepik ninye olbae, neitoki aen, neoshisho ninye kake aikinchiunye enkaina enye. Aikintajeu ninye iyie too nyamalaritin ile, ore tenaapishana nemeeta entorroni nikintoki aiseyie. Ore to lameyu naa aikilaku iyie te keeya, ore to larrabal sapuk nikilaku aitung'uaa engolon eilo alem. Aikisudori iyie teina kirowuaj e ilo ng'ejep, nimiureyu enkidaaroto tenebau. Ore te mutata o to lameyu nikueni iyie, nimiureyu nena ng'uesi e nkop. Amu mikintanyamal isoito te wueji nitur, nimikintanyamal ing'uesi entim. Iyiolou iyie ina kata ajo keserian olng'obor lino, naa ijur intare inono netii pooki elulung'a. Iyiolou sii ajo ore iishoritin inono naa keaku kumok, naa neijia etiu inkera eishoi ino, ebayu anaa inkujit enkop. Ilo akenya enkurare ino itaa olpayian kitok, anaa enkano naku nabaiki ewueji neidong'ieki te nkata enye. Ng'ura, king'orutua kuna aajurru, naa kesipa. Toning'o, naa tayiolo ninye te nkaraki esidano nikiyaki.” Neitoki Yoab awal ajo, “Oi duoo tenaa kepiki entemet nainenengishoreki isinaitin laainei! Te nebo enyamali ai pooki aaineneng. Amu ina kata eaku keiroishi alang osinyai le naiposha; metaa, ekuetieki irorei laainei. Amu etii imbaa e ilo magilani atua nanu; neok oltau lai e sayiet enye; ore nena naaitureisho e Nkai neitoluaaki te dukuya nanu maataare. Keru osikiria le ntim eeta olkujita, anaa olkiteng einosita olkujita. Amaa ina nemeeta entoki naishamu, keinosayu metii emunyan. Maata esumash endaa naaijo ina, naa ore pooki toki nanya naaitamuoi. Oi duoo tenaa katum entoki natoomonuo, naaisho Enkai eyieunoto ai, peyie eshipakino Enkai aapurd nanu, pee eitorioo enkaina enye, pee aadung'oo nanu aiwuang'ie. Ena naaku enkitagoloto ai; ekaipid doi ninye te nchipai hoo naata emion, amu eitu amiki lelo rorei Leilo Sinyati. Ainyoo engolon ai metaa katon aanyu? Naa kainyoo enkiting'oto ai metaa katon ang'iri? Amaa engolon ai keng'olon oo soito, arashu amaa osesen lai kolo suyai? Ore te sipata maata nanu eretoto te kewan, naa ore pooki wueji natumie eretoto neterewaki aaitung'uaa enatii. Ore ilo oibooyo esupatisho aitung'uaa olchore, naa keing'uaa euriata e ilo magilani. Ore lalashera laainei, neeta entorroni anaa nena ariak naatoyu neish. Nena naamisimis too soito le nchan, oine neisudoriyie isoito le nchan ate. Ore te nkata enkirowuaj neimin. Ore teneirowuaju, neish te wueji enye. Ore lelo apuayak neing'uaa inkoitoi enye, nepuo ninche olpurkel, neidak. Ore lapuayak le Tema neing'oru ore lelo apuayak le Sheba neisiligu. Neidang ninche amu eeta apa osiligi sapuk. Epuonu ninche ine neidang. Neijia iyie itotiuo tena kata te nanu; idolita osina lai, niureishoyu. Katejo doi, ‘Entaikiaki nanu enkishooroto?’ Anaa, ‘Entaikiaki nanu te karsisisho inyi entoki nikiropiepie?’ Aashu, ‘Tokorduaki nanu te nkaina e ilo mang'atinda lai?’ Arashu, ‘Talakuaki nanu te nkaina e ilo laaironyita?’ Nteng'enaki nanu naa kagira nanu; intayioloki nanu matoning'u enaikuna peyie apong'ori. Kebaa enkiroishi oo rorei oosipa! Kake amaa doi ainyoo eutu eutaroto ino? Idamu naaji ajo indim aiturrai irorei, aa ore ina kiroroto oltung'ani oiting'o osiligi naa enkijape? Indim doi ninye atoosho enkukuo te lelo okishin nimipenyare ilamirak amir olchore lino. Kake ore taata, tishipakinoyioki niking'or nanu; amu malej enkomom ino. Imbelekenyunye, aatasayia, mincho entorrono easayu, imbelekenyunye tena kata amu eiting'o osiligi lai. Ketii olng'ejep lai emonkoi ake ninye pooki? Amaa enkishamisham aimemusu enyamali? Keitu etum oltung'ani esiaai nagol tioriong enkop, naa amaa inkolong'i enyena, aimetiu anaa inkolong'i oltung'ani oigero? Anaa orrindik oyieu oleng oloip, anaa etiu anaa oltung'ani oigero oing'oru olekoisiayio lenye? Metaa ore too lapaitin pooki maata toki; naaishooki nanu inkewarieitin o sina. Ore tenairrag najo, ‘Kanu doi ade adumunye?’ Kake ekeado enkewarie, naibelibelekenya omekenyu. Ore osesen lai naairuja ilkuru o loirerio, negolu olchoni lo sesen lai, neitoki adanya. Elang inkolong'i aainei erisioroto oo naipuko olkurragos, nepuonu aaiting meeta osiligi. Tadamu ajo ore enkishui ai naa enkiyang'et, medol ae kata enkong'u ai esidano. Ore ina ong'u e ilo laadol maitoki adol ae kata; ore etii inkonyek inono shumata nanu, naa kaish. Anaa enaisardaka enkatampoi neish, neijia etiu ilo olo enemeneng'a meitoki ailepu; meigil ae kata ninye ashukokino enkaji enye nemeitoki ewueji enye ayiolo ninye ae kata. Metaa maitigir nanu enkutuk ai; ekairo te nkaraki emion oltau lai. Ekailepilep te nduaran oltau lai. Kara nanu enaiposha arashu enkukuu e naiposha, metaa intobira iyie olarriponi te shumata nanu? Ore tenajo, ‘Ekaaitagol endapash ai, ekeitololong olorika lai enkilepilep ai’; ina pee kinture nanu too nkidetidetat, nikinture nanu too nduaat. Metaa kagelu engoroto o keeya aitalang iloik laainei. Meekure eeta enkishui ai tipat, meekure abikoo intarasi. Entung'uayioki nanu amu ore inkolong'i aainei naa enkiyang'et. Ainyoo doi oltung'ani metaa ing'orunye ninye toki, nipik endamunoto ino aitorioki ninye; niparan ninye anaake tadekenya, nitem ninye pooki kata? Kerishata naba aa miwuang'ie enkomom ino te nanu, anaa kipal nanu matoijoi nkamulak. Amaa tenaas eng'oki, kaa aaitaas iyie, iyie olaing'urani loo ltung'ana? Ainyoo peyie kitisirua nanu? Ainyoo peyie ataa olola te iyie? Ainyoo peyie mikipalaki inkitarruorrot aainei niya aitalamaa intorrok aainei? Amu ore tena kata naa kairrag tiatua enkop; aiking'oru iyie nanu nematii.” Neitoki Bildad le Shushi awal ajo: “Kerishata naba aa ijo kuna baa, ore irorei le nkutuk ino netiu anaa osiwuo kitok? Amaa, kemerregel Enkai esipata? Amaa kemerregel Olmagilani enasipa. Amaa tenetaasa inkera inono eng'oki aaitaas ninye, eitarasayie ninye ninche apik engolon oo ntorrok enye. Tening'oru iyie Enkai, nisai iyie ilo Magilani; tenaa aira sinyati nintashe too sipat, nesipa katukul inchere ekedumunye ninye te nkaraki iyie; nikilaaki ninye iyie te wueji neishaakino tinimany. Neaku ore hoo duoo naa kiti apa enkiterunoto ino, keaku inkolong'i inono naapuonu sapuki oleng. Amu inkilikuanu, aatoomono too lporori ooshomo, nijurru ayiolou nena naanoto iloo papa; amu ore iyiook nikira ile ng'ole, nimikiyiolo pito, amu ore inkolong'i ang tioriong enkop naa oloip. Aimikinteng'en ninche iyie, nikiliki iyie, nelimu irorei tening'unoto enye? Keidim enarau atubulu te wueji nemetii olkishakual? Keidim oseyiai atubulu tewueji nemetii enkare? Ore eton aa entapukai eitu edung'i, netoyu ninche engor ae aitubului ake. Neijia etiu inkoitoi e lelo pooki oorikino Enkai amu ore osiligi le lelo tung'ana lemeeta Enkai naa keidak. Ore enkirukoto osiligi lenye negila ina kata naa neijia etiu osiligi lenye le nkaji olkedi. Eirishakino ninye enkaji enye nemeitashe ina aji; eibung ninye ina aji enye, kake meitashe. Ebulu iltung'ana torrok anaa entiati natii ewueji netii enkolong, neibulaa ilukuny aaidapashakino enkurma enye. Ore intona enye neman aaen isoito, neton ninye tiatua lelo soito akurrakino. Naa teneari aamut ninye te wueji enye, naa kemiki ninye, ejoki ‘Eitu ae kata aadol.’ Ing'ura, ena enchipai enkoitoi enye; nepuku tiatua enkop kulie aabulu. Ing'ura, meany Enkai oltung'ani lemeeta entioto, nemeng'amaa enkaina oo laasak loo ntorrok. Aikintoki ninye aigil aiput enkutuk ino enkuenia nepik enkutuk ino embuakunoto. Ore lelo likimba iyie naa keishopokini ninche enkurruna, ore ilo ng'obor loo ltorrok, nemeitokini aata.” Neitoki Yoab awal ajo: “Esipa kayiolo ajo neijia etiu: Kake kaji eiko oltung'ani teneaku supat te dukuya Enkai? Amaa teneyieu obo nekeshare ninye, meeta obo oidim atawaliki ninye kata nabo too nkatitin enkalifu nabo. Aing'en ninye to ltau, naa magilani te ngolon, aing'ae oidima aitagolo kewan ataarare ninye, nemir ninye? Ilo odotu ildoinyo, nemeyiolo ninche ina, tenenang'aa ninye ninche te ng'oro enye, ilo oigusugusie enkop aitung'uaa ewueji enye, neikirikirie ing'apeta enyena ilo oitanap enkolong, meitoki ailepu; ilo oitoip ilakir, ilo laa ninye ake openy oisalaash keper, neroruaa apurd ilopir le naiposha; ilo oitobirua entukus oo lakir naji olng'arurumi, o enaji orion, o enaji Pledes, o entukus oo lakir le kopikop. Ilo oas isiaitin sapuki nena naagiroo ening'unoto, o ntokitin enking'asia nemeeta esiana. Ing'ura eim embata ai, nemadol ninye; eloolo dukuya, nemaning'u ninye. Ng'ura, ewuapaa ninye aiwuang'ie, aing'ae oidim aibooi ninye, Aing'ae ojoki ninye, ‘Ainyoo iyasita iyie?’ Meshuk Enkai siadi engoro enye; ore tiabori ninye eirrugo ilaretok le Rahab. Kaji naa aiko tenawaliki ninye, agelu irorei laainei te nebo ninye? Ore hoo nemaata entorroni, mawaliki ninye; ekaomonu olng'ur to Laitang'oroni lai. Tenairorie ninye naawaliki nanu, mairuk ajo keinining'ito ninye oltoilo lai. Amu kaar nanu to lkutati ogol neponaa ilbaa laainei meeta emporeet. Maaisho ninye nanu mayagie, kake kaaiput ninye nanu emion. Ore tenaa kenkesha engolon, ng'ura ninye! Naa tenaa kembae naipirta esipata aing'ae oidim aterewa ninye meshomo? Ore hoo nemaata entioto, naa keiguanareki enkutuk ai; ore hoo nemaata entioto, naa kaaitaa nanu olopaashari. Maata nanu entioto; mang'or nanu kewan; meekure aatayie enkishui ai tipat. Etaa pooki nabo; metaa atejo, emut ninye ilo lemeeta entioto o lelo torrok. Tenelo neyau olbuket keeya aitasieku, nekueniyie engolikinoto e ilo lemeeta entioto. Eishooki enkop enkaina e ilo torrono; eimulumul inkomomi oo laiguanak lenyena. Amaa teneme ninye, aing'ae naa ninye? Eten inkolong'i aainei aalang oltung'ani oipirri; eisik aailanyisho, medol ninche esidano. Eish enkishui ai anaa emeli nakuet oleng, anaa olkurragos odoiki aibung entoki nainos. Tenajo, ‘Madamu nanu enking'unyung'uny ai, ekaiwuang'ie esototo enkomom ai, naaku oloota enchipai’; naureishoyu oleng te nkaraki inyamalaritin aainei, amu ayiolo ajo, mikintaa iyie nanu olemeeta entioto. Ekaaku oloiguanareki; kainyoo naa peyie aasisho te mpesho? Tenaituku kewan te ntoki naibor anaa enturoto, naituku inkaik aainei to sabuni ogol. Naa aikinang'aki ake iyie nanu engumoto, ore ninye inkilani aainei naaibayu nanu. Amu ime oltung'ani ninye anaa nanu, metaa kaidim atawaliki ninye, metaa aikipuonu metetemi iyiook te nebo. Metii olarishani erishata ang, oidim aiteleiki enkaina enye shumata iyiook. Inchoo ninye eiwuang'ie eng'udi enye te shumata nanu, nimincho engoro enye aaiture nanu. Ina peyie aaitieu airoro imbaa enyena maata enkuretisho amu ime neijia atiu tiatua enkewan ai. Aibayie enkishui ai tukul; ekaisho enkiroroto e pesho enking'unyung'uny ai; ekairo tiatua emion oltau lai. Ekajoki nanu Enkai, mikidung'oki nanu enkiguana; intayioloki nanu nchere ainyoo peyie kiarare nanu. Idol aa sidai te iyie tinikimbooki enkop, pee imenaa esiaai oo nkaik inono, nincho omom inkitobirat e lelo torrok? Iyata iyie inkonyek o sesen? Idol iyie anaa enadol tung'ani. Amaa inkolong'i inono ketiu anaa inkolong'i e tung'ani arashu ilarin linono ketiu anaa ilarin le tung'ani? Metaa ing'oru aturu ingok aainei, nijurru ingok aainei. Ore hoo duoo nayiolo ajo iyiolo ajo maata entioto, nemeetae hoo obo oidim aitajeu too nkaik inono? Enkaina ino naaitobirua nanu; nikinyaaka taata aibelekenyakino nanu aaidaikie. Tadamu ajo kintobirua apa nanu te nterit, naa aikintoki aigil arrinyoki nanu enterit? Keitu iyie kibuku nanu anaa kule nikimposhu nanu anaa eng'orno? Kinchopo nanu to lchoni o to sesen nikirip nanu aitutum iloik omorlooishi. Kinchoo nanu enkishui o enyorrata nauno; ore erripoto ino netorripo oltau lai. Naa ore nena tokitin nisudoyie tiatua oltau lino; ayiolo ajo ena apa eyieuna ino. Tenaas eng'oki, nikiut nanu, nimikipalaki nanu entorroni ai. Na tenara oltorrono, oi kewan ai. Naa tenara osupat, nemashumu elukunya ai, amu aabore enkurruna, naing'or olosilisil lai. Naa tenadumu kewan ailepie, niking'oru nanu anaa olng'atuny ore ake sii nias inenking'asia enkaraki nanu; intang'ejuk shakenisho ino tenkaraki nanu, niponaa engoro ino aitubulu tenkaraki nanu, niyau ilororani ng'ejuko maatigilunore nanu. Ainyoo peyie kiyaua nanu aitupuku te ng'uset? Enaikash apa tenatua eitu aadol toki, natiu anaa aimaatae apa aekata. Aatanapaki te ng'uset aaya enkurare. Aimekuti inkolong'i enkishui ai? Tapalaki nanu, pee atum anoto enkiti kiyagata. Eton eitu alo ine nemashukunore ina kop engoro natii enaimin nagut, enkop engoro o longolingoli naa ore ewang'an netiu anaa enaimin.” Neitoki Sofa le Naamat awal, ajo: “Keishori irorei kumok meshomo eitu ewali, neishori oltung'ani oiro oleng esipata? Ijo doi keitigir enkiratirat ino iltung'ana, naa tininya kutuk ajo miata entioto, aimeeta obo likintukurru iyie? Amu ijoito, ‘Ore enkiteng'enare ai naa kesila, nara sinyati te dukuya nkonyek e Nkai.’ Kake ore duoo tenaa keiro Enkai, nikiboloki ninye enkutuk enye, naa aikiliki ninye iyie inkisudorot eng'eno nagut! Amu kitok ening'unoto enye. Tayiolo nchere aikiririki Enkai nkuti nemeba anaa nkitarruorot inono. Indim atayiolo intokitin naagut naaipirta Enkai? Indim atayiolo ineebaiki Olmagilani? Ekeilep oleng aalang keper, kainyoo indim ataasa? Egut alang enemeneng'a, kainyoo indim atayiolo? Ore entemet enye neado alang enkop, nelala alang enaiposha. Amaa teneimaa ninye enkop, neenaa olorere, neipotu adung'oki enkiguana aing'ae oidim aibooi ninye? Amu eyiolo Enkai lelo tung'ana lemeeta tipat; amaa tenedol ninye entorroni, aimeshilaa ninye? Kake ore oltung'ani omoda naa ketum ening'unoto; oo teneini olkurrarru le ntim aa tung'ani. Tenintorioki oltau lino esipata, nilak nkaik inono aitorioki ninye. Tenetii entorroni enkaina ino, iwuang'ie intalamai, nimincho intorrok emany atua ilng'oborri linono. Nesipayu katukul ina kata nchere idumu enkomom ino metii entioto; iyaku oloserian, nimiureishoyu. Naa aikirikino osina lino; idamu ninye anaa inkariak naatulusoitie. Ore enkishon ino newang'u alang enaiwulie enkolong; ore enaimin enye netiu anaa entadekenya. Naa aitum empijan amu etii osiligi; naa aikirripi nilo ayeng'iyeng'a te seriani. Irraga airura, nemeeta likae likipik enkuretisho; eomonu ilkumok omom ino. Kake ore inkonyek oltorrono nemeitoki aadolisho. Ore enkoitoi pooki naaisikie naa keimin te ninche, ore osiligi lenye neyang enabayie.” Neitoki Yoab awal ajo, “Meeta inchere irara iltung'ana, naa keish eng'eno nagut te intae tiniyeye. Kake kaata ening'unoto anaa intae; madou sii doi nanu te ntae. Aing'ae lemeyiolo intokitin naaijo kuna? Ara nanu entoki nakueniyieki too ilchoreta laainei, nanu, ilo oipoto Enkai naawaliki ninye nanu, oltung'ani supat lemeeta entioto, ataa entoki nakueniyieki. Ore tiatua ndamunot oo ltung'ana lemeeta enyamali olmena te lelo ootijing'a olbuket ioshiosho oltung'ani letaa kejo pee ebatata openy. Ore ilng'oborri loo laikonyak neeta eseriani, ore lelo ooitagor Enkai neserian, lelo ooen Enkai enye aapik enkaina enye. Kake inkilikuana ing'uesi, naa aikinteng'en ninche iyie, ore nena motonyi o loing'ang'e, naa aikiliki ninche iyie; arashu inkaitubulu e nkop, naa aikinteng'en iyie; ore lelo sinkir le naiposha naa aikimbalakinye iyie. Kaa te kuna pooki nemeyiolo ajo, enkaina Olaitoriani nataasa ena. Etii atua enkaina enye enkishui e pooki toki naishu, netii enkiyang'et e pooki tung'ani. Aimetem enkiok irorei, anaa enatem enoret endaa? Etii eng'eno nagut atua emoruo, ore ening'unoto netii atua enkadori oo nkolong'i. Atua Enkai etii eng'eno nagut o emagilanisho; eeta eutaroto o ening'unoto. Tenesulaki enkop, nemeetae oloidim atesheta; teneikenoo oltung'ani tiatua, meetae oloidim atabolo. Teneibooyo inkariak, netoyu pooki; teneirriwaa aipang'ie, nenum enkop. Atua ninye etii engolon o eng'eno nagut; ore ilo oleji o lolejisho naa ilenyena. Eiwuang'ie ilautarok meeta toki, neitaa ilarishak ilmoda. Eitadoyio ilaiguanak, neitaa ninche ilooena, neeniki impolosi enye enkimeita. Etorikoyie ilapolosak meeta toki nenang'aa lelo magil. Emitiki enkiroroto lelo oisiligayu neya aoru emusunoto lelo tung'ana kituaak. Ebukoki enkurruna lelo kituaak, neitololong ina kimeita e ilo ogol. Eibalunye nena naagut e naimin, neyau enaimin nagut apik ewang'an. Eitaa ninye iloreren kituaak, neitoki aidakie ninche, eitasapuk iloreren, nerikoo aiwuang'ie. Eya aiwuang'ie ening'unoto too laiguanak le nkop, neisho ninche metilimanata to lpurkel lemetii enkoitoi. Eirrapirrapisho ninche te naimin metii ewang'an neesiesari anaa olamerani. Ing'ura, etoduaa enkong'u ai kuna pooki, etoning'o enkiok ai nening'u ninye. Ore ina niyiolo nayiolo sii nanu, maaure iyie tukul. Kake ekairorie Olmagilani, nayieu naishankarra embae ai te Nkai. Ore iyie, nikitumuraki te nturoto e lejare irara intae pooki ilabaak le pesho. Oi duoo tenaa intirring'a agira, naa keaku ina eng'eno ino nagut! Inining'u tena kata embae najo, nining'u olkiyioi oing'uaa enkutuk ai. Indim airoro emonkoi aipirie Enkai niro to losek tenkaraki ninye? Indim aitodolu olkep te ninye indim atoomonu ororei te ninye? Kesipa aisidai te iyie tenikituru ninye iyie aing'oru? Arashu aindim ateleja ninye, anaa enalej oltung'ani olikae? Aikisikong ninye iyie katukul tenaa intodolu olkep too nkisudorot. Amaa enkitoo enye aimikinture iyie, o engoro enye tinikibatatakino iyie? Ore indung'eta inono e rashe kumok netiu anaa inkuruon, ore enchankar ino netiu anaa enterit. Nchooki nanu matigirayu, naitoki airo, naa inchoo aatum pooki naaba enaa enaatum. Ekapik enkishui ai batisho, nchoo aiwuang'ie enkishui ai. Ng'ura ajo kaar ninye matua, aaiting'o osiligi kake kamitu inkoitoi aainei te dukuya enkomom enye. Ena naaku enjeunoto ai, inchere melotu oltung'ani lemeeta Enkai dukuya ninye. Inining'u tukurraki irorei laainei, nincho embae nalimu aibalie ejing'u inkiyiaa inono. Ng'ura, aitobira enkiguana ai; ayiolo ajo aata esipata. Aing'ae ilo laalotu akeshare nanu? Amu ina kata agira nanu naye. Intokitin are ake inchooki nanu, nemaitoki aisudoo kewan te nkomom ino: iwuang'ie enkaina ino intalamai te nanu, nimincho olkirutoto lino aaiture nanu. Nimpotisho iyie, naawaliki nanu, oi inchooki nanu mairoro, nikiwaliki iyie nanu. Kaja esiana oo ntorrok aainei o ng'ok aainei? Intayioloki nanu intorrok aainei o eng'oki ai. Ainyoo peyie isudoo enkomom ino, nikinkenaa nanu anaa olmang'atinta lino? Isujaa iyie embeneyio nayaita osiwuo, nimir errarrati natoyio? Amu ingero iyie mbaa e mion te nkaraki nanu, nikintijing nanu entorroni e kitisho ai. Itipika nkejek aainei ilpisia, ningor inkoitoi aainei pooki, itipika ienat ndapi oo nkejek aainei. Eidaaya tung'ani anaa entoki natong'ua anaa enkila nainosa oriri. Ore tung'ani otoiwuo enkitok naa oloo nkolong'i kuti, nebore enyamali. Epuku abulu anaa entapukai, netoyu; nelo anaa oloip, nemeitoki alo. Naa aibol inkonyek inono aboloki olaaijo ilo, niyau ninye atua enkiguana ino. Aing'ae oidim ayau entoki naiduruk tiatua enemeiduruk? Ore amu etuutuaki aaibalie inkolong'i enyena, ore esiana oo lapaitin lenyena niata iyie, nituutua ineebaiki metaa meidim aima. Mintoki aing'or ninye, tapala ninye inchoo ninye eshipakino enkishui enye nagol, tenaa keidim. Eeta olchani otudung'oki osiligi, tenedung'i, naa keitoki abulu, nemetoyu intapuka enyena. Ore hoo tenemusanu intona enyena tiatua enkop, netoyu aye olchani lenye tiatua enkop. Kake ore ake peyie etum enkiti are nepok; nepuku ilng'osil anaa enkiti aitubului. Kake keye oltung'ani, neirragieki aaitadoyio tiabori; eyang oltung'ani enabayie, naa koree ninye? Ore anaa enasulunye inkariak te naiposha, neish oreyiet netoyu. Neijia etiu oltung'ani eirrag nemeitoki adumunye; o metaa meetae keper, meitoki adumunye, arashu edumuni aaitung'uaa injo enyena. Oi naaji tenaa aikisudoo nanu te nemeneng'a, nikisudoo nanu ometogiroi engoro ino, metaa aikigelaki nanu erishata niyiolo, nikidamu nanu! Amaa teneye oltung'ani keitoki apiu aigil? Ore inkolong'i aainei pooki esiaai ai naa kaanyu. Ometabau elakunoto ai. Impotisho iyie naa kaairuk nanu iyie, iyieu oleng esiaai oo nkaik inono. Amu ina kata inken iroruat aainei, nimintoki aing'or ingok aainei; ore intorrok aainei neripari aaikenoo to lbene, naa aintemoo aimulumulaa ingok aainei. Kake esulunye ildoinyo nerrarra aaishunye, neitayuni indapidapo too wuejitin enye. Neoroo inkariak isoito, neoroo olairrag le nkare enterit, metaa iishie iyie osiligi le tung'ani. Itimira oltung'ani nitii shumata ninye ntarasi. Itumuguta enkomom enye nireu ninye aitalamaa. Epuonu ilayiok lenyena aayanyit, nemeyiolo ninye; eyawuaki ninche abori, neitu emusu aayiolou. Emion ake osesen lenye ening'ito, naa kewan ake eishiraki.” Neitoki Elifas le Tema awal ajo: “Amaa oltung'ani ng'en, keishaakino newal te ng'eno e nkijape, neiput kewan te nkijape oloosaen? Keishankarra ninye te nkiroroto nemeeta tipat, arashu too rorei lemeidim aitaasa ae sidai? Kake igira aitalamaa ina uriata e Nkai, nimbooyo enkibirribirrata te dukuya Enkai. Amu ingok inono naaiteng'en enkutuk ino, nigelu olng'ejep le lejare. Enkutuk ino makewan nikidung'oki iyie enkiguana, mme nanu, nikinchakenoki iyie enkutuk ino makewan. Aiyie doi apa oltung'ani le dukuya otoiwuoki? Arashu aikiyawuaki apa eton meetae ildoinyo? Inining'ishe iyie tiatua enkiguana Enkai? Naa amaa eng'eno nagut intodorrop aiririki enkorrok ino ake? Ainyoo doi iyiolo iyie nimikiyiolo iyiook? Ainyoo doi ining'u iyie nemeibala te iyiook? Eboitare iyiook lelo ooibor lukuny, tenebo lelo kituaak te iyiook. Ilaa kituaak ninche te papaai lino: Amaa nkilejilej e Nkai a kutiti te iyie, oo ilo rorei likirorie iyie te mborron? Ainyoo peyie incho oltau lino mikitanapa aitalamaa, naa ainyoo peyie incho inkonyek inono eirriap? Nimbelekeny oltau lino aarare Enkai, nincho irorei ootiu neijia epuku te nkutuk ino? Ainyoo doi oltung'ani metaa keidim ataa olemeiduruk? Arashu ilo otoiwuo enkitok, metaa keidim ataa supat? Ing'ura, mepik Enkai osiligi isinyat lenyena, nemesinya keper too nkonyek enyena; kebaa engoroto e ilo lo lminong, naa arruoni, oltung'ani ook intorrok anaa enkare! Ekaaitodol nanu iyie ininingoki nanu; ore ina natoduaa naa kaibalunye. (Ina natolimutuo iltung'ana le ngeno nagut, neitu eisudoo iloomenye, ilo laa ninye ake eishooki ina kop, nemeetae olomoni oimayie ninche.) Etoyu oltung'ani torrono te mion enye too nkolong'i enyena pooki, tiatua lelo arin pooki ooirragieki, te nkaraki ilo lemeeta olng'ur. Etii inkiyiaa enyena iltoiloishi ooitureisho; ore etudupe, nelotu oloidaikie shumata ninye. Meiruk ninye ajo keitoki arrinyo aing'uaa enaimin. Naa olalem elo ninye aitingoki. Elimana ninye te nkop pooki eing'oru endaa ejo, ‘Kaji etii?’ Eyiolo ajo etabawua enkolong enaimin, etabaikia ninye; ore osina o emion neiture ninye; nebaiki ninye anaa olaiguanani otanape pee elo olarrabal. Amu eitorioyie ninye enkaina enye aarare Enkai, neyaki esarkionisho ilo Magilani. Ekuetiki ninye te ngolong'akinoto aarare ninye, eibung elong'o enye nairrusha o lwuasa. Amu eteijia enkomom enye te mpiron neirrag enkurriny too lairakuj lenyena. Netamanya inkanas mijoonto, atua nkajijik nememanya, apa naatudung'okoki enkiguana metaa osototi loo suut; meaku ninye karsis, nemebikoo karsisisho enye nemetum intona tiatua enkop. Meilany ninye enaimin, ore olang'at le nkima neitoi imbenek enyena ore enkipilipil enye naa kekutaa osiwuo. Mincho ninye epik osiligi lenye entoki nemeetae, alej kewan; amu ore entoki nemeetae naa keaku elaakinoto enye. Ekelaki te lulung'ata eng'or enkata enye, ore olng'osila lenye nemenyoriju. Keipiripiroo ninye lelo sabibu lenyena leitu eku, anaa ilo shani lenye, neiturraa adung'oo esidano enye anaa oloirien. Amu ore encholiek e lelo lemeeta Enkai naa koolupi. Naa keidaikie enkima ilo ng'obor lo loropisho. Enutayu ninche too ntorrok, neiu ingok ore oltau lenye neitobiru elejare.” Ina peyie ewal Yoab ejo: “Atoning'o nanu intokitin kumok naatiu neija; irara pooki ilaitagolok te nkata o sina. Amaa irorei le nkijape keeta enkiting'oto? Arashu ainyoo doi nikintagoro peyie iwalu? Ekaidim sii nanu airoro anaa iyie, tenaa naaji itii erishata ai anaata aitulus irorei tenebo pee aagilunore naigusugusie elukunya ai te iyie. Ekaaitagol iyie te nkutuk ai, ore enkitagoloto e nkiroroto ai neiwuang'ie emion ino. Tenairo nemeish emion ai, naa amaa tenangiri, kebaa emion naaing'uaa nanu? Esipa taata aatalepuo Enkai tukul; eitomijoono ninye encholiek ai pooki. Kimbung'a iyie nanu akurraki; ira iyie olmang'atinta lai. Ara nanu endapana o loik neibung'a iltung'ana ina pee eishakenoki entorroni ai. Aatopolosa ninye te ng'oro enye, naaibayu nanu; etoonyo ninye ilala te nkaraki nanu. Ore olmang'atinta lai naakurraki inkonyek enyena. Aatusurdaanya iltung'ana nanu too nkutukie enye, aatoosho ninche nanu eseder, eiturrurrote pooki peyie aarare nanu. Aaishooyie nanu Enkai aitarasaki lelo lemeure Enkai, naanang'aki nanu nkaik e lelo arruok. Atonita apa te seriani, kake aaibung'a ninye nanu olgos, naadung'udung aitaa ndung'ot. Aaitasheyie ninye nanu aitaa oloitoriokino lenye. Aamanita nanu imbaa enyena naatang'oruo te pooki shoto, etangoro apolol ilairakuj laainei, nemepal nebukoki olodua lai enkop. Aarasaki ninye naapik ilbaa katitin kumok naakuetiki ninye nanu anaa olmurrani. Atiripaka ilkuniyiani osesen lai, neirragie engolon ai tiatua enterit. Etodoro enkomom ai te nkishirata, netiu inkonito aainei o nkonyek anaa enaimin nagut; ore hoo nemetii olarrabal inkaik aainei, naa kesila enkomono ai. Na kop, minukaa osarge lai, nimincho enkishirata ai etum eneeng'iyeng'are. Ore doi ninye tena kata ng'ura, etii olchakeni lai keper, peyie eitashe terishata ai. Kaasurdaany ilchoreta laainei; ore inkonyek aainei nebukoki Enkai ilkiyio. Metaa ekeitasheyie esipata e tung'ani o e Nkai, anaa ina oltung'ani tenebo ole latia enye. Amu ore eetuo ilkuti arin, ekalo aim enkoitoi nemaitoki ashukunye. Etigile oltau lai, eishunye inkolong'i aainei, etataana enkurare te nanu. Esipa etii tenebo nanu ilasukenyak, ore inkonyek aainei netii esurdaany enye. Irragie elakunoto ai te kewan ino; kalo likae om aishoru elakunoto te nkaraki nanu. Ore amu inkeno indamunot enye peyie mening'u, mincho naa ninche meisula. Ore ilo okaldaa ilchoreta lenyena too mpisai, pee etum erubata oo masaa enye, naa kemodoku nkera enyena. Aaitaa ninye nanu entoki naimakini too loreren; nara obo le lelo oonotaki iltung'ana. Eiliilaitie inkonyek aainei te nkaraki olkiyioi lo sina, ore irubat o sesen lai netiu anaa oloip. Ore lelo ooitashe too sipat neing'asia tena, ore ilo lemeeta entioto neitagor kewan te lelo lemeure Enkai. Kake ore isupati nekurraki enkoitoi enye, ore ilo oota inkaik nemeiduruk nebulaa agolu. Kake ore intae enyaaki wootu intae pooki, nematum nanu oltung'ani ng'en te ntae pooki. Etulusoitie inkolong'i aainei, ore nkitobirat aainei netudung'oyioki aaituraa, o nena yieunot oltau lai. Eitaa ninche enaimin endama; ‘Ore ewang'an, anaa enajo ninche, netaaniki enaimin.’ Tenaing'oru enemeneng'a aitaa enkaji ai, tenaisalaash olorika lai te naimin, Tenajoki enkurare, ‘Ira iyie papa lai’ najoki ilo kurto, ‘Ira yeiyio lai’; arashu ‘Enkanashe ai,’ koree naa teine osiligi lai? Aing'ae odol osiligi lai? Kelo ninye atua ine netii iloom le nemeneng'a? Amaa aikidoyio pokira aapuo atua enterit. Neitoki Bildad le Shuhit awal, ejo: Kenkata nabaa iyie ing'oru irorei? Tujurru, ina peyie kiro. Ainyoo peyie eikenari iyiook anaa nkishu? Ainyoo peyie kira iyiook lmoda te dukuya iyie? Iyie ilo opolos kewan te ngoro ino, keing'uari enkop te nkaraki iyie, arashu eiwuang'ieki endapidapoi aaitung'uaa ewueji enye? Ee, ore ewang'an oo ltorrok netaaraki. Ore olang'at le nkima enye nemeitoki awang. Ore ewang'an naa kemisimis to lng'obor lenye, ore oltaa otii shumata enye neari. Ore iroruat enyena naagol neitodorropi, ore inkoitoi enyena nenang'aa ninye. Amu etanang'akaki atua orreshet too nkejek enyena, nelo te nkoitoi nebatatakino. Eibung orreshet entutunyo enye, neirrag orreshet oibung ninye. Eisudoro olgosoi lenye tiatua enkop, orreshet otii enkoitoi enye. Emanita ninye inaaitureisho te pooki alole, nemir ninye too nkejek enyena. Ore engolon enye apa, netaa taata olameyu te ninye, netinyikaka ninye engolikinoto pee error. Ore te nkaraki emuoyian netumute osesen lenye ore olkikau le keeya netumuta irubat o sesen lenye. Etopolosaki ninye teilo lng'obor apa oisilig neyauni ninye aayaki ilo aiguanani oitureisho. Netii olng'obor lenye ina neme enenye; ebore enkima aidapashakino emanyisho enye pooki. Etoito intona enyena tiabori netoyu imbenek enyena too lukuny. Neish endamunoto enye te nkop, nemeeta enkarna too nkoitoi naalala. Eturrumoyioki ninye te wang'an aanang'aki enaimin, nerewi aaitung'uaa enkop. Meeta ninye eishoi arashu iishoritin tiatua olorere, nemeetae oloishu teine apa nemanya. Ore lelo oomanya oloontoluo, neing'asiate teina olong enye, neibung ninche olkirutoto lo loosaen. Esipa imanyishoritin kuna e lelo lemeure Enkai, ewueji ene eilo lemeyiolo Enkai.” Neitoki Yoab awal ajo: “Kenkata nabaa kisilisil iyie nanu, nikigiligil aitaa ndung'ot too rorei? Kindipa atipika nanu enkurruna kuna katitin tomon, aimidol iyie enkurruna tenikinyal nanu? Naa tenaa kesipa doi inchere aitarruoyie, etii enkinyala ai atua enkorrok ai. Tenesipa tukul ajo intasapuk kewan kiarare nanu, nintaa emborron ai, enchankar nikiarare nanu; tayiolo naa ajo aatipika Enkai nanu atua entorroni, naaitamana nanu orreshet lenye. Ng'ura, aishira abuaku ajo ‘Olarrabal!’ kake eitu aawalikini; aipotishe to ltoilo sapuk, kake metii esipata. Etipika esuntai enkoitoi ai, metaa maidim aima, netipika enaimin inkoitoi aainei. Aatooruo ninye nanu enkitoo ai, neya te nanu enkopiyia enkitoo te ndukuya ai. Aagiligil nanu too nkaloli pooki, netaa aisha, neitayio ninye osiligi lenye anaa olchani. Einuaa ninye engoro enye napi peyie aarare, naaikenaa nanu aitaa olmang'atinta lenye. Eirriwua ninye iltimito lenyena maataarare netur ninche iloong'elu, naarresh ninche eman olng'obor lai. Eitalamayie ninye iltung'ana maatung'uai ataa olomoni te lelo pooki laayiolo nanu. Aatung'uaitie iltung'ana laainei le sotua tenebo ilchoreta laainei. Ore ilomon ootii enkaji ai nemaadamu ninche nanu; ore inkaisiaayiak aainei naaikenaa anaa olomoni; ataa nanu olomoni too nkonyek enye. Aipoto nanu osinka lai, kake eitu ninye aawaliki; meeta nchere masai nanu ninye te nkutuk ai. Ataa kereek te nkitok ai, naatonyimo ilayiok lang'arie kina. Ore ninye nkera kutiti naatemenaitie nanu, ore tenainyototo neimaki imbaa olmena te nanu. Ore ilchoreta laainei likinyorra oleng naaing'or ninche to lmena, ore lelo apa lanyor naaibelekenyakinote aarare. Ore iloik laainei netaremo olchoni lai o sesen lai, naa te mpesho nanu ailanya keeya aimisho. Eng'urrieki nanu, eng'urrieki nanu, intae lo shoreta laainei, amu aatoshoroyie nanu enkaina Enkai! Kainyoo iyie pee kisujaa nanu anaa Enkai? Kainyoo iyie pee mikindip enkisilisiloto o sesen lai? Oi naaji tenaa keigeroki te mbuku! Nedamuni pooki aiger te mbuku. Naa tenaa keigeroki te nkalamu e sekenkei naata esipil! Pee eguetakini endapidapoi ntarasi! Amu ayiolo ajo eishu olalakunoni lai, naa ore te siadi neitashe ti oriong enkop; neaku ore eidipaki aatumut osesen lai, naitoki ake adol Enkai to sesen lai, ilo ladol etii enkalo ai, naa kadol too nkonyek aainei; neme too ne likae. Eiterre oltau lai tiatua nanu! Naa tinijo, ‘Kaji kinko tinikisuj ninye!’ Naa ‘Ore esipata embae netumi ti atua ninye’; turia ilo alem, amu eyau engoro napi enkitamioto to lalem, peyie itum atayiolo inchere eetae endung'okinoto enkiguana.” Neitoki Sofa le Naamat awal ajo, “Metaa aatawalikitia indamunot aainei nanu, tenkaraki nakuetiki imbaa te nkewan ai. Aning'ito elap aasukenyita nanu, ore te ning'unoto ai naawaliki nanu enkiyang'et. Keitu apa iyiolou ena temusano, anaa apa peyie epiki tung'ani oriong e nkop. Inchere ore enkisulata eilo torrono naa dorrop, ore enchipai e ilo lemeeta Enkai naa enkiti kata? Ore hoo duoo neilep aaku ildoinyo aabaiki keper enkadori enye, nebaiki elukunya enye inkatampo; keish ninye intarasi anaa inkik enyena; ore lelo ootoduaa ninye naa kejo, ‘Koree doi ninye?’ Ekeipid ninye alo too naipuko anaa enkidetidet, nemetumoyu; kearari ninye aitalamaa anaa enduaata e nkewarie. Ore nena onyek apa naatoduaa ninye, nemeitoki aekata aaigil aadol, nemeigil aekata ewueji enye adol ninye. Ore nkera enyena neing'oru omom teilo aisinani, ore inkaik enyena nerriny aaishooyo enkarsisisho enye. Ore iloik lenyena nebore engolon e kitisho, kake keirrag ninche tenebo ninye tiatua enterit. Ore hoo duoo nemelok intorrok te nkutuk enye, ore hoo duoo neisudoo ninye tiabori olng'ejep lenye, ore hoo nemeyieu ninye nepal, nemuk ninye te nkutuk enye, kake eibelekenyi ake aaitaduar endaa enye te nkoshoke, edua naleng anaa enduaran e pooki sayiet. Eijoo ninye enkarsisisho neitoki alopu; eitayu Enkai ninche anang'aa te nkoshoke enye. Eibibi ninye esayiet, olng'ejep le nturbubua olo aar ninye. Melo ninye aing'or lelo kejek, nena shorroi naaruko inaishi o kule. Kerriny ninye aaishooyo ilng'anayio le siaai enye, nemeitoki aekata ninye aijoo aitadoyio; ore dupoto e biashara enye nemetum ninye murruna. Amu etupurda ninye neing'uaa lelo aisinak, eibung'a ninye aikonyaa enkaji neitu eshet. Ore amu meeta olorok lenye enkiyagata, meleku ninye ae toki hoo nabo nashipakino. Meetae entoki natelekua eidipa ninye atadaayu; ore enkaraki ina mebikoo karsisisho enye. Ore enkiputakinoto e raposhoi enye, naa osina, kelotu engolon pooki o sina shumata ninye. Neiput enkoshoke enye aitaraposh, keirriu Enkai engoro enye napi shumata ninye neitashaiki shumata ninye anaa endaa. Keisik ninye aing'uaa emasaai o larrabal e sekenkei nengor ninye embae o suyai neipang. Etushutuaki ina bae nepuku to sesen lenye, ore ine wueji neimerlel neipang'u to lodua lenye, neibung ninye enkuretisho. Ore ilchumat lenyena pooki nepuo aajing enaimin nagut, enkima neitu einoki nalo amut ninye, ore ina natelekua to lng'obor lenye nemuti. Neibalunye keper ing'ok enyena pooki, nedumakino enkop aarare ninye. Ore imasaa enkaji enye nenapi aaya neingirtitori aaya teina olong e ngoro napi e Nkai. Ena erubata oltung'ani torrono naing'uaa Enkai, enjung'ore naibalakinye ninye Enkai.” Neitoki Yoab awal ajo: Inining'o tisipu irorei laainei, nincho ina eaku enkitagoloto ino. Ting'iria nchooki nanu mairoro, ore peyie aidip airoro, nisurdaany. Amaa nanu, ke iltung'ana aing'unyung'unyaki? Ainyoo peyie maidim ating'iria? Ing'uraki nanu, nimimputukuny, nipik enkaina ino enkutuk ino. Ore tenelo nadamu naing'asia oleng, neibung olokirikiri osesen lai. Ainyoo peyie eishu lelo ooas intorrok, nebaiki moruao, nebul aaku magil te ng'olon? Etubula inkera enye te dukuya ninche, netodua ninche iishoritin enye too nkonyek enye. Ore inkajijik enye neserian metii enkuretisho, nemeetae eng'udi Enkai natii shumata ninche. Edumu iloing'ok lenye nkishu nemedung; eisho nkishu enye, nemeiturraa ilasho. Eiguran nkera enye anaa lkuoo le kerra, neiguran nkera enye aaipid. Eranyisho ninche neosh entampuri, olwulul loo usin, neshipa tenening oltoilo le ndule. Etoni te nkishui oo nkolong'i enye eeta enkarsisisho nalulung'a, nedoyio aapuo enemeneng'a te seriani. Ejoki ninche Enkai, Shomo tung'uai iyiook! Miking'uar ina ng'eno oo nkoitoi inono. Aing'ae doi ilo Magilani, netaa aikisiaiai ninye? Naa kainyoo kitum tinikiomon ninye? Ng'ura, aimetii inkaik enye ina dupoto? Ore enkiguana oo larruok naalakuaniki nanu. “Keari aekata oltaa le ilo torrono? Pee edoiki entaboi enye ninche? Neitame Enkai ninche te ngoro enye. Eikununo ninche anaa olkujita otoyio to lkutati, netiu anaa isuut naakutaa osiwuo? Ijo iyie, Etushuma Enkai ing'ok enye aitaany ilayiok lenyena. Inchoo ninye elaaki ninche peyie etum aatayiolo. Inchoo inkonyek enye metoduaa enkidaata enye, naa nchoo ninche metooko ina goro e ilo Magilani. Amu kainyoo eshilaa ninche too nkajijik enye etulusoitie ninche eidipaki aaitodorropa esiana oo lapaitin lenye. Ketii obo oidim aiteng'ena Enkai engeno, idol ajo eiguanare ninye lelo ootii shumata? Eye obo eeta enkarsisisho nalulung'a, eidipakine neserian. Nebore osesen lenye empiron neruko entolit loo loik lenyena. Neye likae te mion oltau, eitu aikata eishamisham esidano. Neirrag ninche enyaanyuk tiatua enterit, neiruj ninche olkurto. Ng'ura, ayiolo nanu indamunot inono, nkitobirat nikinyalie nanu. Amu ijo iyie, ‘Koree enkaji olkitok? Koree ilo ng'obor otonie ilo torrono?’ Keitu iyie inkilikuan lelo oopuo too nkoitoi naalala, naa keitu iyie ing'amaa enchakenisho enye, inchere etelekuaki ilo tung'ani torrono teina olong e nyamali, inchere eitajeuoki ninye teina olong engoro napi? Aing'ae oidim aibalakinye ninye enkoitoi enye? Naa aing'ae oitalaku te ninye teina nataasa. Ore tenenapi ninye aaya enkurare, neing'ori aarrip enkurare enye. Esujaa ilkumok osesen lenye epuoi aanukaa, ore enterit e nkop neirrag aitirring'a aitemoo osesen lenye. Kaji naa inko iyie tinikintagol nanu te mpesho narok? Meetae toki natelekua too walat inono neme elejare ake.” Neitoki Elifas le Teman awal ajo: “Keidim oltung'ani ataa oloota tipat te Nkai? Esipa ore ilo ng'en neeta tipat te kewan enye. Ke sikar to Lmagilani tenira asipani anaa ke dupoto te ninye tenira olemeeta eleyiata too nkoitoi inono. Kenkaraki euriata niure iyie ninye peyie kisikong'a ninye, niking'uanare ninye iyie? Aime sapuk enkarruoisho ino? Meeta intorrok inono enkiting'oto. Intagolikio ilalashera linono te sile nitoning'okinote nioru ninye nkilani meshomo meishopo. Eitu iyie incho enkare ilo onaure, nitomitikio endaa ilo oota esumash. Ore ilo tung'ani ogol naa ninye oya enkop, ore ilo tung'ani onyorri nemany. Inchoo nkolia epuo too nkaik naarook, ore inkaik e lelo okishin nigil. Ore enkaraki ina kintamanaki irresheta, nikijing aluam olkirutoto. Eitomisimisoki ewang'an ino pee midolisho, nikimulumula iyie olairrag le nkare. Aimetii Enkai shumata keper? Neing'or ilakir tiabori hoo naa shumata etii. Metaa itejo iyie kainyoo eyiolo Enkai? Keidim ninye aiguanare enaimin narok ongu? Eimulumulayie ninye enkatampoi nairrusha, metaa meidim atoduaa ninye nelo ninye te rishata e keper o enkop. Iton aibung ina oitoi musana, naa ninye apa eima ilarruok? Etawuapayioki ninche aaiwuang'ie eng'or enkata enye; etooroyioki aaiwuang'ie olkitamanyunoto lenye. Etiakita ninche Enkai, ‘Shomo tung'uai iyiook’ naa ‘Kaa eidim ilo Magilani aitaasa iyiook?’ Ore ake etiu neijia eiput ninye nkajijik enye ntokitin sidain, kake ore eutaroto e lelo torrok naalakuaniki nanu. Edol lelo supati neshipa; nekueni ilemeeta entioto tenedol ilarruok eitamei; ejo, esipa etudung'oyioki aaiwuang'ie ilmang'ati lang, ore ilekunot netumuta enkima. Toning'ore Enkai, pee itum eseriani, pee epuonu isupati enitii. Tang'amai enkiteng'enare te nkutuk enye, nishum ororei lenye tiatua oltau lino. Tinishukokino ilo Magilani nintobor kewan, tiniwuang'ie ntorrok pooki aitalam olng'obor lino, tinirragie sahabu te nterit, aashu inang'aa sahabu naisul too lturot ootoito naa teneaku ilo Magilani ninye sahabu ino, naa ninye enkosholai ino naata tipat; nitum taa atishipakinoyu ilo Magilani, nidumu enkomom ino ashumaki Enkai. Niomon iyie ninye naa aikining ninye iyie; nilak iyie ilmuma linono. Keaku idung iyie embae alimu, netiu neija, naa kewang'u ewang'an too nkoitoi inono. Amu keitadou Enkai lelo oowuasa, neitajeu lelo oobor. Eitajeu ninye ilo tung'ani lemeeta entioto; aikintajeuni iyie te nkaraki nkaik inono nemeiduruk.” Neitoki Yoab awal ajo, “Ore sii taata ena olong naa keme enking'unyung'uny ai, ekeiroshi enkaina enye hoo naigorito nanu. Ore naaji tenaa kayiolo ewueji natumie ninye, pee elotu doi ninye olorika lenye! Nairragie enkiguana ai te dukuya ninye, naiput enkutuk ai inchankarri. Nayiolou ina naawaliki ninye nanu, naning'u ina naajoki ninye nanu. Kaagilunore ninye nanu te nkitoo engolon enye? A-a, ekaaning ninye nanu. Ore oltung'ani oitashe too sipat neirorie ninye, naalaku olarishani lai intarasi. Ng'ura, alotito dukuya, kake metii ninye ine; nashuko siadi, kake mamusu nanu ninye; ore te nkaina e kedienye naing'oru ninye kake madol ninye; naibelekenyakino enkalo e tatene, kake madol nanu ninye. Kake eyiolo ninye enkoitoi nalo aim; ore peyie aaidip atetema nanu, nalotu apuku atotiuo anaa sahabu. Etuunokinote nkejek aainei iroruat enyena; aibung'a enkoitoi enye neitu apaash. Eitu aing'uaa nkitanapat e nkutuk enye; atushuma tiatua oltau lai irorei le nkutuk enye. Kake meibelekenya ninye, naa aing'ae oidim aibelekenya ninye? Ore ina nayieu ninye naa ina eas. Amu keitabaya ninye ina naategelaka nanu; ore intokitin kumok naaijo nena netii endamunoto. Netii atua endamunoto enye mbaa neeijo nena. Metaa airuto nanu te dukuya ninye, ore peyie adamu, naa kaure ninye. Eiterreyie Enkai oltau lai; aaituria Olmagilani nanu; amu aatiripakine enaimin, neitemoyie enaimin nairrusha enkomom ai. Ainyoo pee meiteng'el Olmagilani nkolong'i e nkiguana, naa kainyoo paa ore lelo ooyiolo ninye nemedol aekata inkolong'i enyena? Eiwuang'ie iltung'ana ilpolosien; neibung iluaat oo ntare aapurroo nepuo aaramat. Eya ninche osikiria le ilo okishi; neya olkiteng le nkoliai alakie esile enye. Errumoo ninche ilo aisinani aaiwuang'ie te nkoitoi ore ilaisinak pooki le nkop neisudoo ate. Ng'ura etiu ninche anaa isirkon le ntim to lpurkel epuo te nkisiayiare enye nagol eing'oru eng'ues naibung tiong'ota, pee enya inkera enye. Eiturrurru ninche endaa enye tiong'ota, nesot isabibu too nkurman oo larruok. Eirrag ninche enkewarie pooki meeta nkilani, nemeeta entoki naitoipore te nkijape. Keshal ninche te nchan oo ldoinyio, nepetikino endapidapoi eyieu eneshurie. Etii lelo oowuapaa enkerai okishi aaoru ilki, neya pee elakie esile enye enkerai o laisinani. Emanimanaa ninche meishopo, meeta nkilani neisumash enap irridat le nkano. Tiatua intukusi oo loirienito easisho ninche; eironyu enaisho too sabibu, neton ake eeta enkure. Tiauluo enkanasa eigor ilo oye neishiru oltau le ilo otipikaki olbae eretoto. Ore ake eyia, meshilaa Enkai ina omono. Etii lelo ooiser eiba ewang'an, lelo leitu emoku inkoitoi enyena, nemetoni too nkoitoi enyena. Edumunye ilarruok te naimin, pee etum aataarr metua ilo aisinani o ilo oata osina; ore kewarie netiu anaa olapurroni. Eanyu sii enkong'u e ilo ololoito metomisimiso, ejo, ‘meeta enkong'u naadol nanu’; neimulumul enkomom enye. Ore te naimin netur inkajijik; ore dama neikenoo ate, nemeyiolo ninche ewang'an. Amu enaimin nagut entadekenya enye pooki; amu ilchoreta ninche lo lkirutoto le naimin nagut. Itejo, ‘Eitasiooyioki ninche aaya shumata nkariak; etediaaki erubata enye te nkop; meetae ololo nkurman enye oo sabibu. Eshol olameyu o enkirouaj neishu aitoi enkare nataa osoit le nkirobi neijia sii eiko enemeneng'a lelo ooas ing'ok. Medamuni ninche too lkurrot ootumoreki le nkanasa, meekure edamuni nkarn enye, neaku etigilaki entorroni anaa olchani.’ Edaa ninche too nkajijik oo nkituaak olupin, nemeitaas inkolia mbaa supati. Ore ake eyia, eitoodor Enkai nkolong'i e ilo Magilani te ngolon enye. Edumunye ninche etapalari te nkishui. Eisho ninche erripoto neretuni sii; ore nkonyek enyena neing'or nkoitoi enye. Eilepieki ninche te nkiti kata, neitoki aaish; etoyu ninche neish anaa endiati pooki edung'ori ninche anaa ilukuny entapa. Naa tenemenejia etiu, aing'ae ooidim aitisipa nchere kara olalejani, neitodolu ajo meetae esipata te pooki natejo nanu?” Neitoki Bildad le Shusi awal ajo, “Ene Nkai enkitoria o euriata, eitobir ninye eseriani te shumata enye e keper. Keeta enjore enye esiana? Aing'ae meilepaki ewang'an enye? Kaji naa eiko oltung'ani teneaku sinyati te dukuya Enkai? Kaji eiko ilo otoiwuo enkitok teneton meiduruk. Ng'ura mewang doi ninye olapa nemewang'an aasila ilakir te dukuya ninye. Oo naa duoo tung'ani, laa oloti kurto, o enkerai e tung'ani laa enkurto!” Neitoki Yoab awal ajo: “Kebaa eretoto nitareto ilo lemeeta engolon. Intajewuo ina aina nemeeta engolon! Inkoo ilo lemeeta engeno nagut, nincho ninye te lengon engeno sapuk. Aiteretoto e ng'ae iyie iroro irorei naa ae te nkiyang'et e ng'ae etupukutuo te iyie? Eikirikira iloipi liabori, o nkariak o lelo oomanya. Meishopo enemeneng'a te dukuya Enkai, nemeeta Abadon entoki naitoipieki. Eisalaash moikuape aisalaashaki olngam neik enkop aililioki olngam. Een inkariak too nkatampo naairrusha, nemepolosa inkatampo tiabori ninche. Eitoip ninye olapa neisalaashaki ninye enkatampoi enye. Etuutua olokelel tioriong nkariak, to lpolosie le rishata ewang'an o enaimin. Eikirikira ing'apeta e keper, neirut aaiputukuny te nkisikong'ata enye. Eitigir enaiposha te ngolon enye; te ng'eno enye etoosho Rahab. To lkutati lenye eitisidanaki keper; nerem enkaina enye olasurai oilanyisho. Ngura, ore kuna naa nkuti ake oo nkoitoi naa kebaa enkitisho enking'oming'om oo mbaa enyena nikitoning'o! Naa amaa endarata engolon enye, aing'ae oidim atoning'u?” Neitoki ake Yoab airo nejo: “Ore anaa enaishu Enkai, ilo laaitung'uayie esipata ai, o ilo Magilani, ilo otipika oltau lai emion; ore ake ninye aishu, netii enkiyang'et Enkai nkumeishin aainei, mairo te nkutuk ai mbaa e lejare, nemeibalie olng'ejep lai enemesipa. Metalakuana te nanu elimunoto nchere, itisipa intae ore omatua, nemaiwuang'ie aekata enkitashoto ai e sipata. Ekaibung akurraki esinyatisho ai, nemaitiak, maaitukurru oltau lai too nkolong'i aainei pooki. Inchoo olmang'atinta lai eaku oltorrono, nincho ilo laadumakino aarare eaku olarruoni. Amaa kainyoo osiligi le ilo lemeure Enkai teneiwuang'ie Enkai ninye, teneiwuang'ie Enkai enkishui enye? Kening Enkai enkishirata enye, tenebaiki ninye enyamali? Keshipakino ninye ilo Magilani? Keipot ninye Enkai pooki kata? Ekaaiteng'en nanu iyie enkipirta enkaina e Enkai; ore pooki natii atua Olmagilani nemaisudoo. Ng'ura, indipa pooki aatodol maate; kainyoo naa pee itaa pooki ilooiro mbaa e pesho? Ena erubata oltung'ani torrono te Nkai, naa ina enjung'ore nang'amu ilooitorogonyisho te ilo Magilani: Teneponari inkera enyena, naa kemut olalem, ore eishoi enye nemetum endaa naraposh. Ore lelo ootelekutua neye to lmeitai ore nkolia enye nemeidim aaishira. Ore hoo neiturrurr enkosholai anaa enterit, nerup inkilani anaa esarng'ab; eidim aiturrurro, kake lelo supati ooishop, ore lelo lemeeta entioto neor enkosholai. Ore enkaji nashet ninye netiu anaa enkaji o lkedi, anaa olng'obor oitobiru olarriponi. Elo ninye endapash aa karsis, neyooki ainyototo eisha karsisisho enye ebol inkonyek enyena, nenyorriki eshomo enkarsisisho enye. Eipang'aki ninye oloputukunyi anaa olairrag le nkare; ore kewarie nenap ninye osiwuo sapuk. Edumu ninye olkutati lo loo saen neya; eoroo ninye aitung'uaa ewueji enye. Ekekut olkutati ninye meeta olng'ur ina kata etem ninye ailany engolon enye. Keoshoki olkutati ninye nkaik, neiture ninye aitupuku te wueji enye. Esipa etii ewueji neturunyeki enkosholai, netii ewueji nesilieki sahabu. Eitayuni esekenkei te nkop, nesholuni osuyai te nterit enye. Eishie iltung'ana enaimin, nelimana aaing'oru olpolosie olakua ina terit natii emisimisi te naim nagut. Etur ineeimi too nong'ot nemetaaniki iltung'ana; meekure edamu ninche lelo apuayak. Eililio ninche too neelakuaniki iltung'ana neyuko inkaloli pooki. Enkop ninye epukunye endaa; kake ore tiabori eatua neibelekenyi aitaa enkima. Ore isoito lenyena neeta ewueji oo soito sidain, neeta enterit e sahabu. Ore ina oitoi nemetii olmotonyi oinos nkiri oyiolo, neitu edol enkong'u o lmotonyi odolisho oleng. Ore ng'uesi naawuasa, eitu eitunyoo ine; neitu eim olng'atuny shumata enye. Etur iltung'ana osoit ogol oleng, neibeleleng'oo ildoinyo too ntona enye. Eturu ineimi too ndapidapo, nedol enkong'u enye pooki toki sidai. Een ninye inchorroi pooki pee meitoki aitong, ore entoki naisudoro neyau atua ewang'an. Kake aitiaji etumi engeno nagut? Naa koree ewueji ening'unoto? Meyiolo oltung'ani enkoitoi nalo ine, nemetumi ninye te nkop oo looishu. Ejo enguton, ‘ime nanu etii’; nejo enaiposha ime nanu etii. Metumi ninye te sahabu, nemeineneng'i enkosholai metaa elaata enye. Metemieki ninye e sahabu e Ofir, nemetemieki enkosholai sidai. Ore sahabu o enkosholai nemerisiore ninye, nemewalunyeki isoito le sahabu nasila. Meitasimi aatemaki isoito oogol enkinyiang'a, ore enkinyiang'a e ng'eno nagut nelang isoito oogol enkinyiang'a. Ore isoito oogol enkinyiang'a ooji Topas le Etiopia, nemeitanyaanyukieki ninye, nemeitanyaanyukieki ninye sahabu nasila. Kaji naa doi eing'uaa engeno nagut? Naa koree ewueji ening'unoto? Eisudoyioki too nkonyek e pooki toki naishu; nenukari pee medol imotonyi oloing'ang'e. Ejo Abadon o keeya, ‘Kitoning'o iyook olmarenke too nkiyiaa ang.’ Eyiolo Enkai enkoitoi nalo ine, neyiolo ewueji enye. Amu eing'or ninye inkiting'ot e nkop, nedol pooki toki natii abori keper. Ore pee eisho enkijape enkiroishi enye, neyiolou eneba endapasho enaiposha. Neitobiru too rorei enchan, neitobiru enkoitoi enkiwuang'ata e ndarata; nedol ninye neibalie ninye; neitasheyie ninye, neing'oru ninye. Nejoki ninye tung'ani, ‘Ng'ura, euriata Olaitoriani naa ninye engeno nagut, naa tining'uaa ntorrok naa ninye ening'unoto.’ ” Neitoki ake Yoab airo nejo: “Oi naaji tenaa katii ilapaitin liapa, anaa too nkolong'i apa naatorripo Enkai nanu; ina kata apa eitawang'aki oltaa lenye endukuya ai, ore te wang'an enye nalo aim enaimin. Anaa apa enatiu too nkolong'i e nkiputakinoto ai, ina kata etii shoruetisho e Nkai shumata olng'obor lai. Ina kata eton etii Olmagilani tenebo nanu ina kata aamanita nkera aainei nanu. Ina kata eisuji iroruat aainei te kule, naabukoki ina dapidapoi inchorroi eilata! Tenaipang nanu alo auluo enkishomi e nkanasa, ina kata naitobir nanu olorika lai to lkurroto otumoreki. Naadol lelo barnot neilanyisho, neinyototo ilpayiani kituaak neitashe; negira lelo kituaak eitu eitoki aairo, nepik inkaik enye nkutukie enye aaibung, negira oltoilo le lelo yiolot nerep ilng'ejepa lenye inoreti enye. Ore te nening enkiok naaipot nanu ajo olomayiana, ore peyie edol enkong'u nenyorra ninye; amu aitajewuo nanu ilo aisinani oishira o ilo okishi lemeeta hoo obo oretu ninye. Ore emayianata e ilo letaa keidak nelotu shumata nanu, naretu nkolia menoto eseriani. Aishopoko kewan esupatisho, naaitoip ninye nanu. Ore esipata ai netiu anaa olkila o enkarasha e lukunya. Ara apa nanu nkonyek tialo olmodooni, nara nkejek to lmaima. Ara apa nanu menye ilo aisinani, naturu aing'oru aretu ilo lemaayiolo. Atigila ilala le ilo oas ing'ok, naitiakie ninye ina nainosita too lala lenyena. Ina peyie adamu ajo, kaye nanu tiatua enkaji ai, naa kaponaa inkolong'i aainei aitaba anaa osinyai. Epuo intona aainei aaidapashakino inkariak, netii enkoilielio enkewarie pooki ilng'osil laainei. Ore enkisisa ai naa ng'ejuk te nanu, ore enkawuo ai naa ng'ejuk anaake te nkaina ai. Aainining'o nanu iltung'ana naanyu, negira einining enkikoo ai. Ore peyie aidip airoro, eitu eitoki ninche aairo, nebaiki ororei lai ninche. Aataanyutua ninche nanu anaa enaanyu enchan; nebol inkutukie enye anaa enchan oloirujuruj. Aatakweniyie nanu ninche ina kata meeta enkitieunoto; ore ina wang'an enkomom ai neitagol ninche. Ategelua nanu enkoitoi enye, naton anaa olautaroni, naton anaa olaiguanani tiatua oltim lenye, natiu anaa ilo oitagol lelo ooishir. Kake aakueniyie taata ninche nanu, iltung'ana ooti te nanu, laa ore apa loo menye, naa iltung'ana le pesho, ilaa maidim ninye aitaboitaki ildiein laainei oorrip intare. Ainyoo nanu aidim anoto te ngolon oo nkaik enye, iltung'ana ooisha engolon enye? Ore to sina o te sumash nagol, naa kenyaal intona naatoito. Edung'u ninche mbenek e ntim, o ntona olpurkel aaitaa endaa. Etaarayioki ninche aaitung'uaa iltung'ana, nebuaku iltung'ana emirta ninche anaa iloosujaa olapurroni. Ilbaat loo ndapidapo epuo ninche aamany, ingumot enkop o olkutot loo ndapidapo. Eru ninche anaa ng'uesi tiatua ntimi, neiturrurro tenebo too loipi. Ilmoda ninche, le ishoi oo larruok, etaarayioki ninche aaipang'ie te nkop. Nataa taata osinkolio lenye meekure aata tipat te ninche. Aaibaitie nanu naatalama nanu; meingash ninche aanotaki tenaadol. Ore enkaraki natalaa Enkai enkeene ai naaitobor nanu, aaibelekenyakinote ninche nanu te ngoro enye pooki. Ore te nkaina ai e tatene einyeito ilmang'ati, naareu ninche nanu aarrumoo, naapikaki nanu aarare inkoitoi enye e nkidaaroto. Einyal ninche enkoitoi ai, neitubulaa ninche engolikinoto ai, metii hoo obo omitiki ninche. Epuonu ninche anaa iloim elusie nalala naapuonu aasulakino nanu aapurd. Aaibelekenyakaki nanu olkirutoto ore enkisisa ai nemirareki anaa enamirta enkijape ore karsisisho ai neisha anaa enkatampoi. Ore taata neiting'ieki enkishui ai te nanu; aaineputua nanu inkolong'i osina aaibung. Ore enkewarie pooki neme iloik laainei, ore emion naaitame nanu nemeyagaa. Ore to larrabal neibung ninye olkila lai, naaen nanu anunuk anaa enkila. Aatanang'aka nanu Enkai atua esarng'ab, natotiwuo anaa enterit o nkuruon. Aaishiraka nanu iyie neitu kiwaliki nanu, aitasho nanu nimikining iyie nanu. Kimbelekenyakine nanu agorokino; te nkidimata enkaina ino kitaarare iyie nanu. Kidumu iyie nanu aya shumata enkijape, nikincho iyie matakedo ninye nikimposhiposh iyie nanu te nkikurrukur olkutati. Ee, ayiolo nanu ajo aikipik iyie atua keeya, o atua ina aji nategelakaki lelo pooki oishu. Naa amaa obo to lturrur le nkidaata aimeitorioo enkaina enye, ore te mutata enye neishiru eretoto. Keitu nanu aishiraki ilo laa ore enkolong enye netagolikio, keitu eishir oltau lai to sina te nkaraki lelo aisinak? Kake tenaing'oru nanu esidano, nepuonu ntorrok; naa tenaanyu ewang'an, nelotu enaimin. Etii oltau lai osomit, nemeitirring'a aekata, naatabaikitia inkolong'i o loisilisili nanu. Aloolo aaitorokaki neme te nkolong; aitashe tiatua olturrur naishiru eretoto. Ataa nanu olalashe loo mbariak nataa olecholiek oo sidain. Eibelekenye olchoni lai aroku naaitoki aing'uaa, ore iloik laainei neyupuyup te nkirouaj. Eibelekenyaki olwulul lai loo usin, metaa enkishirata o sina ore oltoilo le ndule ai neibelekenyaki metotiwuo anaa oltoilo le lelo ooishir. Aitobirua olning'o too nkonyek aainei; kaji naa aiko tenaitoki aing'or eselenkei? Kainyoo erubata ai naing'uaa Enkai natii shumata, naa ainyoo enjung'ore ai te ilo Magilani le shumata? Aimedoiki ingolikinot lelo torrok, netum emutata lelo aasak loo ntorrok? Aimedol ninye inkoitoi aainei, neiken iroruat aainei pooki? Amaa tenaa kashomo nanu tenebo iloolejisho, neisarisara enkeju ai alo alejisho. (Inchoo maineneng'i te ntemet naineneng'ishoreki nemeeta emonkoi naa inchoo Enkai eyiolou enkitashoto ai!) Tenaa keibelekenye eroruata apaash enkoitoi neshomo oltau lai arubare nkonyek aainei, naa teneibung'a oltipoto ake ninye pooki inkaik aainei; nchoo naa aaku oloun, neinos likae; naa inchoo ina nabulu aaku enaai eturuni aaitayu. Tenetang'uarra oltau lai enkitok ole latia ai, nairraga aanyisho te kutukaji ole latia ai, inchoo enkitok ai eyieraki likae lee, naa inchoo ilkulikae eirrugokino ninye. Amu keaku ina embae torrono oleng, neaku entorroni naiguanare neitame ilarishak. Amu keaku ina enkima namut pooki toki, nepejoo too ntona pooki toki ai natum. Tenatanya nanu aning enyamali olaisiaayiani lai arashu enkaisiaayiani ai, ore peyie eyau olong'unyung'unyi te nkaraki nanu, Kaa naa alo aas teneinyototo Enkai? Amaa teneikilikuanisho, kaa nanu awaliki ninye? Amaa ilo laaitobirua nanu te ng'uset aimeninye oitobirua ninye? Naa aime ilo obo oitobirua iyiook te ng'uset. Tenatomito nanu ae toki nayieu olaisinani, arashu tenaishirie nanu enkoliai, arashu tenainosa nanu endaa ai openy eitu ang'arie likae, neitu ang'arie ilo okishi (amu ore eiteru te nkitisho enye naitubulua nanu ninye anaa menye ore epuku aing'uaa enguset e ng'otonye atuutayie nanu ninye); tenatoduaa nanu obo lenye eidaa, te nkaraki meeta inkilani o sesen, arashu oltung'ani aisinani lemeitoipo, teneitu ninye aamayian nanu, naa teneitu eirowuajieki too lpapit loo ntare aainei, tenatudumua enkaina ai aarare lelo okishin amu atoduaa eretoto te kishomi; neaku inchoo inkaik aainei epuku aing'uaa oloililai lai, naa inchoo enkaina ai eorunye terubata enye. Amu ara apa oloure enyamali naing'uaa Enkai nemaitieu aibelekenyakinoyu aing'ura enkitoo enye. Tenaitaa nanu sahabu osiligi lai, arashu tenetaa sahabu nasila aigarakino; tenatishipe nanu enkaraki naa sapuk enkarsisisho ai, arashu enkaraki nanoto enkaina ai imasaa kumok; tenaing'ura nanu enkolong ewang oleng, arashu olapa elo te sidano enye, neeni oltau lai too nkisudorot mayiolo, netung'ututa enkutuk ai enkaina ai; ore sii ninye ena naa eng'oki naitame ilarishak amu ataa olalejani te Nkai e shumata. Tenatishipakine nanu enkidaata e ilo laaiba, arashu ashipa ina kata peyie eidimu ninye entorroni. (Eitu nanu aisho enkutuk ai eas eng'oki, pee aomonu enkishui enye to ldeket); teneitu ejo iltung'ana lolng'obor lai, ‘Kalo otii ine leitu etum aiputakinoyu te ndaa enye?’ (Ore ilo omoni eitu eirrag enkoitoi nalala e nkanas; ataboloko nchomito aainei lelo apuayak); tenaisudoyie aitemoo enkarruoisho ai too ltung'ana anuk intorrok aainei to lgoo lai, amu aitasho nanu te nkuretisho sapuk aure olturrur, naaiture nanu enkiba oo lmareita, metaa atigire neitu aipang aim inchomito. Oi naaji duoo tenaa kaata obo laaning nanu! (Nena entukunyata olkimojino lai! Inchoo Olmagilani aawaliki nanu!) Oi naaji tenaa kataa enesirare imbaa aainei naaigero ilo mang'atinta lai! Esipa anaata nanu anap to loililai lai; anaata aeniki kewan anaa emaupe e nkitoo; ekaisho nanu ninye imbaa aainei pooki oo roruat aainei; ekalo nanu enetii ninye te nkanyit naishori oltung'ani kitok. Teneishira enkop ai, te nkaraki nanu, naa teneishira ineeturo enkurma tenebo; tenainosa ilng'anayio lenyena eitu alak, nayau keeya oo loopeny; inchoo ilkiku ebulu te rishata enkano, o endiati te rishata e shairi.” Neishunye irorei le Yoab Metaa eitu eitoki kulo tung'ana pokira okuni aawaliki Yoab amu aisupat ninye too nkonyek enyena makewan. Neitoki Elihu olayioni le Berakel le Busi lo lmarei le Ram agoro. Etagorokine ninye Yoab amu eitaa kewan olemeeta entioto neaku Enkai eiteleiki entorroni. Etagorokine sii lelo shoreta le Yoab pokira okuni amu eitu eitoki aatum ewalata nawaliki Yoab, hoo neibalie aajo etapong'ori Yoab. Etaanyua apa Elihu peyie eirorie Yoab amu aibotoro apa ninche te ninye. Ore peyie edol Elihu ajo meekure eetae ewalata te lelo lewa pokira okuni, negoro. Newal Elihu olayioni le Barakel le Busi ajo, “Ara nanu oti too larin, nitamorua iyie metaa kaata duoo nanu enkuretisho aibalunye enduaata ai te iyie Atejo nanu, ‘Nchoo eiro nkolong'i ore ilarin kumok neiteng'enisho eng'eno nagut.’ Kake ina kiyang'et natii tung'ani, enkiyang'et e ilo Magilani, ninye naidimie ninye metoning'u. Ime lelo moruak oata engeno nagut, neme ilkituaak ooning'u esipata. Metaa ajo nanu, ‘Toning'oki; nchooki sii nanu maibalie enduaata ai.’ Ng'ura ataanyua nanu irorei linono, atoning'o nanu nkirorot inono eng'eno nagut, ina kata ing'oru enijo. Aaishoo iyie enkiok ai, nemetii hoo nabo neitu ewalu Yoab, arashu olotawalua irorei lenyena te ntae. Eng'ura ake ate pee mijojo ‘Kinoto eng'eno nagut; Enkai ake naidim atawalaki Yoab amu italaikinote.’ Eitu ninye aaitorioki irorei lenyena agilunore nanu, nemawaliki nanu ninye too nkirorot inono. Etunumate ninche, meekure eeta enawalu; meekure ninche eeta ororei ojo. Naa katon nanu aanyisho, eji amu meiro ninche, amu eitashe ninche te ine nemeekure ewalu? Ekaishoru sii nanu ewalata ai; naa kaibalie sii nanu enduaata ai. Amu kaabore nanu irorei naarrumito oltau lai mairoro. Ng'ura etiu oltau lai anaa enaisho oo sabibu napising'a, etiu anaa olbene le naisho oo sabibu ng'ejuk, netaa kedanya. Ekairo nanu peyie atum ayagie, ekabol enkutuk ai awalu. Maitodolu nanu oloshomitore te likae, arashu asukeny likae tung'ani, amu mayiolo nanu atusukenyisho, pee maapik ake Olaitobirani lai enkiting'oto. Kake ore naa taata toning'o enkiroroto ai iyie Yoab, nining'u irorei laainei pooki. Ng'ura, atabolo enkutuk ai; eirorita olng'ejep le nkutuk ai. Eibalunye irorei laainei esupatisho oltau lai, ore nena naayiolo enkutuk ai neiro te sipata. Aaitobirua nanu enkiyang'et Enkai naaisho nanu enkiyang'et e ilo Magilani enkishui. Tawalikiaki nanu tinindim; intobiru irorei linono te dukuya nanu; inyo mbalie enkitashoto ino. Ng'ura ajo aitoriokine sii nanu Enkai anaa iyie; aaitobiruaki sii apa nanu te nterit. Ing'ura, mincho enkuretisho ai kinture iyie mesapuku enkitirrishakinoto ai te iyie. Esipa, iroro iyie aning'ito, natoning'o nanu oltoilo loo rorei linono. Itejo, iyie ‘Kara nanu sinyati, maata enaitapong'o, maata eleyiata nemetii entorroni atua nanu. Ng'ura ajo etum ninye inkitolonyat naaisikong'ie nanu, naaikenaa nanu aitaa olmang'atinta lenye; etipika nkejek aainei ilpisia aen neing'or inkoitoi aainei pooki.’ Ng'ura ajo ore tena nimira asipani. Ekaawaliki nanu iyie, aikitok Enkai alang oltung'ani. Ainyoo iyie pee ikeshare ninye; ijo, ‘Mewalu ninye hoo obo loo rorei laainei?’ Amu eiro Enkai te nkoitoi nabo, o tiare hoo nememusu tung'ani ninye. Te nkidetidet o nduaat e kewarie, ina kata najing injo nairoishi iltung'ana ina kata eimugito too ndapashi enye, nebol ninye inkiyiaa oo ltung'ana, neiture ninche too nkikoot. Peyie etum ninye atoboina tung'ani aitung'uai nkoitoi enyena, neiwuang'ie olwuasa te tung'ani; negolie oltau lenye aibooyo mejing engumoto o enkishui enye pee meidak to lalem. Eutari sii oltung'ani te nkitamioto emuoyian te ndapash enye, neponaa emion too loik lenyena. Metaa meitoki enkishui enye ang'uar endaa ore enkoshoke enye nemeitoki aayieu endaa. Neibibiari osesen lenye ometaa meekure elioo; ore iloik apa lemelioo nepuku aibalayu. Nenyikaki oltau lenye enemeneng'a, nenyikaki enkishui enye lelo ooyau keeya. Tenetii olmalaika tenebo ninye, Olaitutumoni obo te nkalifu, pee eibalakinye tung'ani enasipa te ninye; neeta olng'ur te ninye ejoki, ‘Intajeu ninye mincho edoyio enemeneng'a, anoto elakunoto; inchoo osesen lenye esika nejing kitisho inchoo ninye errinyokino inapa olong'i e ngolon e kitisho;’ eomon oltung'ani Enkai, neng'amu Enkai ninye, elotu ninye enetii Enkai te nchipai. Neliki iltung'ana enjeunoto enye, neranyisho te dukuya iltung'ana ejo: ‘Ataasa eng'oki, natokordilo ina apa nasipa, neitu apa aaitalaki nanu. Etalakua ninye oltau lai, pee medoyio alo atua enemeneng'a, naa kedol enkishui ai ewang'an.’ Ng'ura ajo Enkai naas kuna pooki, kat are, kat uni tenebo tung'ani. Pee eyau arrinyu oltau lenye aitung'uaa enemeneng'a, pee etum ninye atoduaa ewang'an e nkishui. Irrugu enkiok, iyie Yoab, toning'oki; tigirayu peyie atum airoro. Tiniata embae niyieu nijo, tawalikiaki; iroro amu kayieu oleng naaisho iyie esipata. Naa tenemeneijia, toning'oki nanu; tigirayu, amu kaaiteng'en iyie eng'eno nagut.” Neitoki Elihu ajo: “Entoning irorei laainei, intae iltung'ana ng'eni, nikirrugokiki enkiok, intae ooyiolo; amu etem enkiok irorei, anaa enkutuk te ndaa. Emategelu iyiook ina nasipa; ematujurru tiatua ate ina sidai. Amu etejo Yoab, ‘Maata nanu entioto, neewa Enkai esipata ai; Ore hoo naata esipata aaikenayioki aajo olaimonkoni; meishiunoyou olbae lai, hoo nemaata entorroni.’ Kalo tung'ani onyaanyukie Yoab ook esurdaanyata anaa enkare, ilo olo te ncholiek oo laasak loo ntorrok, neiriamariyie iltung'ana arruok? Amu etejo ninye, ‘Meeta toki natum oltung'ani teneshipakino Enkai.’ Metaa, entoning'oki, intae iltung'ana oota ening'unoto, metalamari ina te Nkai, tenaa keas ninye enkarruoisho, metalamari to Lmagilani tenaa keas ninye entorroni. Amu ore te risioroto e siaai e tung'ani keitalakuni te ninye, naa ore te risioroto oo nkoitoi enyena nelaaki ninye. Ore te sipata meas Enkai entorroni, nemeboin Olmagilani esipata. Aing'ae oishoo ninye metaa olaitasheikinoni le nkop? Naa aing'ae otipika ninye meitasheiki enkop pooki? Tenerriny ninye enkiyang'et enye makewan, neiturrurroki kewan enkiyang'et enye, neidak iseseni pooki tenebo nerrinyo tung'ani atua enterit. Tiniata eyiolounoto, toning'u ena; toning'o ina najo nanu. Amaa ilo lemenyor esipata, keitoreisho? Idung'oki iyie enkiguana ilo asipani naa magilani ilo ajoki olaiguanani, ‘Miata tipat’ nejoki ilkituaak, ‘Oltung'ani torrono;’ ilo lemeitodolu oloshomitore too lkituaak, nemeshilaa ilo karsis aitalang ilo aisinani, amu ore ninche pooki naa esiaai oo nkaik enyena? Ore tenkiti kata neye ninche; ore te mpolos enkewarie neari metuata ore lelo magil neyae ninche neme too nkaik e tung'ani. Amu etii nkonyek enyena shumata nkoitoi e tung'ani, nedol ninye iroruat enyena pooki. Metii osina arashu enaimin nagut, ine neisudoriyie ilaasak loo ntorrok ate. Amu eitu eutu enkata te pooki tung'ani pee elo dukuya Enkai te nkiguana. Eiwuang'ie ninye lelo magil eitu eng'as ajurru, nepik kulikae iwuejitin enye. Ore amu eyiolo ninye isinaitin lenye, eibeleleng'oo ninche te nkewarie, nepurdi ninche. Eosh ninye ninche te nkaraki enkarruoisho enye edolita pooki tung'ani. Amu eibelekenyate ninche aany esuj ninye nemeikenaa hoo enkoitoi enye nabo, pee etum aaishoo olkiyioi le ilo aisinani elotu enetii, netoning'o ninye enkishirata e ilo oota enyamali. Amaa tenegira, aing'ae oidim aiguanare? Amaa teneisudoo enkomom enye, aing'ae oidim atoduaa ninye, aa olorere anaa tung'ani? Meitoreisho iltung'ana lemeure Enkai, pee mepik iltung'ana orreshet. Ketii olotiaaka Enkai, ‘Anoto enkitamioto oleng,’ maitoki aekata aitadiak. Inteng'enaki nanu ina nemadolita; tenataasa nanu entorroni, nemaitoki aekata aigil aas? Keitobir ninye ina ninyorraa iyie, amu itanya iyie ninye? Amu meeta nchere pee meyie ogelu; neme nanu ogelu metaa imbalie ina niyiolo. Ekaajoki nanu iltung'ana lening'unoto, ore lelo tung'ana ng'eni laainining'ito nanu nejo, ‘Ekeiro Yoab meeta eng'eno, ore irorei lenyena nemetii eng'eno nagut.’ Enaikash tenetemi Yoab o meiting'o, amu kewal ninye anaa iltung'ana torrok. Amu eponiki ninye enkiseroto ing'ok enyena, eosh inkaik enyena tiatua iyiook, neponaa irorei lenyena akeshare Enkai.” Neitoki Elihu ajo, “Idamu iyie ena nijo kesipata? Ijo iyie, ‘Esipata ai ena te dukuya Enkai,’ amu inkilikuanu ajo, ‘ainyoo tipat naata nanu? Kaa sipata nanu aata alang tenataasa eng'oki?’ Ekaawaliki nanu iyie tenebo ilchoreta linono likiboitare. Ing'ura keper pee idol, naa ng'ura nena atampo, naatii shumata oleng shumata iyie. Amaa tinitaasa eng'oki, kainyoo indim ataasa atigilunore ninye? Naa amaa tenetoponari intorrok inono, kaa iyie intaas ninye? Amaa tinira iyie asipani ainyoo inchoo ninye; arashu ainyoo doi eng'amu ninye te nkaina ino? Ore intorrok inono naa oltung'ani laaijo iyie eipirta ore esupatisho ino naa enkerai e tung'ani. Ore enkaraki nena kibookinot kumok e nkop e tung'ani neishir iltung'ana; eipotu ninche eretoto te nkaraki enkaina e ilo Magilani. Kake metii olojo, ‘Koree Enkai Olaitobirani lai, ilo oishoru isinkolioitin te nkewarie; ilo oiteng'en iyiook alang nena ng'uesi enkop neiteng'en iyiook aitalang imotonyi oloing'ang'e?’ Eishir ninche teidie, mewaliki ninye ninche, te nkaraki ilo wuasa loo ltung'ana torrok. Esipa tukul mening Enkai enkishirata e pesho, nemeshilaa ilo Magilani ninye. Kebaa naa elus tenijo midolita ninye, inchere etii enkiguana dukuya ninye, naa ninye iyie iyanyu! Neaku ore naa taata amu meitameisho engoro enye, nemeinining'u ninye oleng intorrok. Ebol Yoab enkutuk enye tenkiroroto e pesho, eponaa irorei lemeeta eng'eno.” Neitoki Elihu alo dukuya nejo: “Nyaaki ting'iria penyo peyie aatum aitoduaa, amu eton ake aata enajo terishata Enkai. Ekayau nanu eng'eno ai tenelakua, naisho esipata Olaitobirani lai. Amu esipa tukul ore irorei laainei neme elejare; ore ilo oiputakine eng'eno netii tenebo iyie. Ng'ura, Aimagilani Enkai, nemeeta ninye olomenaa, magilani ninye te ngolon eyiolounoto. Meisho ninye lelo torrok ebikoo, kake eisho lelo ooitanyamali esipata enye. Meiwuang'ie ninye inkonyek te lelo supati, kake ore too laiguanak te nkitoo enye, eitasheyie ninche intarasi, nejukari ninche. Naa teneeni ninche too lpisia neibung'i too lgoso le nkisilisiloto e mion, neibalakinye ninye ninche esiaai enye, tenebo enkarruoisho enye, inchere easita ninche mbaa o lwuasa. Ebol ninche inkiyiaa enye aaning enkiteng'enare, neitanapisho ajo metung'uai ninche intorrok enye. Tenening ninche ninye neisiaai ninye, neishu ninche inkolong'i enye te dupoto, ore ilarin lenye nebore enchipai. Kake tenemening ninche, naa keidak to lalem neye meeta eng'eno. Ore ilo lemeeta Enkai to ltau, nenyor engoro; meishiru ninche eretoto teneen ninye ninche. Keye ninche eton aa ooti, neiting enkishui enye te nkurruna. Eitajeu ninye lelo ooitamei aitung'uaa nyamaliritin enye, nebol inkiyiaa enye too ngolikinot. Aikilaku sii ninye iyie too sinaitin, nikipik ewueji nelala nemetii batisho, ore ina natipikaki emisa ino nebore olkar. Kake kibore iyie enkiguana e ilo torrono, kimbung'a akurraki enkiguana o esipata. Todua ake mikien engoro aeniki esurdaanyare; nimincho ina sapuko elakunoto kimbelekeny. Amaa enkishirata ino aikindim aitayu tiatua osina, arashu engolon enkidimata ino pooki? Mianyu iyie enkewarie, ina kata nadung'ori iltung'ana aaiwuang'ie te wueji enye. Todua kewan mimbelekenyakino intorrok amu ena ninye itegelua eitu igelu olosilisili. Ng'ura, Eisisaki Enkai te ngolon enye; aing'ae olaiteng'enani onyaanyukie ninye. Aing'ae otisiraka ninye enkoitoi enye, arashu aing'ae oidim atejo, ‘itaasa iyie entorrono?’ Tadamu ilepie esiaai enye, ina nataranyakita iltung'ana. Eing'ura iltung'ana pooki ninye; neing'or oltung'ani ninye te nelakua. Ng'ura, aikitok Enkai, nimikiyiolo iyiook ninye; mejurrunoyu esiana oolarin lenyena. Amu eitadou ninye ilkitong'at le nchan, neirriu ninye enkinuku te nkata e nchan. Ina nabukunye enchan te shumata, neshaiki iltung'ana te nkumoi. Keidim likae atayiolo enkisalaashata oo nkatampo, o endarata e keper enye? Ng'ura, eidapash ninye enkiwuangata enye aitaman kewan, nenuk nkonyek oo naaiposha. Amu te kuna eiguanare ninye iloreren; neishooyo endaa te lengon. Eimulumul ninye inkaik enyena te nkiwang'ata, neitanap ninye metoosho ine neyieu. Elimu endarata elotunoto enye, Ilo oata olom o engoro eiba entorroni. Ore ake sii tena neikirikira oltau lai, nepuku aing'uaa ewueji enye. Toning'o endarata oltoilo lenye o endarata napuku te nkutuk enye. Abori keper pooki eimie ninye ina darata, ore enkiwuang'ata enye, neisho meshomo ilpijat pooki le nkop. Ore pee elusoo neikurrukurr oltoilo lenye; nedaru ninye to ltoilo lenye le nkitoo nemeibooyo ninye inkiwuang'at tenening'i oltoilo lenye. Edaru Enkai te nking'asia to ltoilo lenye; eas ninye imbaa sapuki nimikindim aatoning'u. Amu ejoki ninye enkare nataa osoit te nkirobi, ‘tadoiki enkop;’ nejoki enkirujuruj tenebo enchan, ‘Entagol.’ Enuk ninye inkaik e pooki tung'ani pee etum iltung'ana pooki aatayiolo esiaai enye. Ina pee epuo ing'uesi entim irrumati lenye, neitirring'a too lkutot lenye. Nepuku olkutati te wueji enye, o enkijape to lkutati le nkidapash. Te nkiyang'et Enkai eishoruni isoito le nchan, ore nkariak naalala neitaa enkare osoit. Eirotoki ninye enkatampoi nairrusha enkare; ore nkatampo neidapash enkiwuang'ata enye. Eipila ninche aamanaa te utaroto enye, pee etum aaitabai nena pooki naaitanapa ninche, tioriong eina kop namanyayu. Enkai nairriu enchan metashaiki enkop, eidim airriu meitamio iltung'ana, anaa eitodol ninche omon enye. Toning'o ena iyie Yoab; intasho ineneng'a nena siaaitin enking'asia e Nkai. Iyiolo iyie eneikunaki Enkai enkitanapata enye ntokitin, neisho ina kiwuang'ata enkatampoi enye metawang'a? Iyiolo iyie enkiroishi oo nkatampo, nena baa enking'asia e ilo oota eng'eno nalulung'a. Iyie laa ore nkilani enyena keirowua ina kata eitirring'e enkop, te nkaraki olkutati le kopikop? Indim iyie anaa ninye aisalaasha keper, aitagolo anaa enking'uret nasholuno? Inteng'ena iyiook enikipuo aajoki ninye, mikindim iyiook aayau ororei lang te nkaraki enaimin. Kejokini ninye nchere ekairo nanu? Ketang'uarra ae kata oltung'ani ajo eishaakino neijori ninye? Ore taata meidim iltung'ana aaing'ura ewang'an, ina kata aa sapuk ewang'an te keper ina kata eidipa olkutati aimai neor. Elotu te moikuape esikar e sahabu; eishopokino Enkai enkitoo enking'asia. Ore ilo Magilani, mikiindim aanoto ninye, kitok ninye te ngolon o too sipat ore esupatisho natimitunye mepal ninye. Ore enkaraki ina keure iltung'ana ninye; meshilaa hoo lelo oojo aing'eni te lejare enye maate.” Neitoki Olaitoriani awaliki Yoab to lkutati: “Aing'ae ele oitomisimis enkikoo too rorei lemetii eng'eno? Intasho anaa olee, kaaikilikuanishore nanu iyie, naa aikimbalakinye iyie nanu. Kaji apa itii iyie ina kata napik olkitamanyunoto le nkop? Tolikioki, tiniata eyiolounoto. Aing'ae oibalie ntemat enyena - esipa iyiolo iyie! Arashu aing'ae oyietaa ilo gosoi aitaman ninye? Ainyoo naitasheyie ng'apeta enyena, arashu aing'ae oitasheyie osoit lenye lolmairroto, ina kata eranyisho ilakir le ntadekenya tenebo, nebuaku inkera pooki e Nkai te nchipai? Arashu aing'ae oiken ina aiposha too nkikeneta, ina kata nadanya aing'uaa eng'uset; tenaitaa nanu nkatampo olkila lenye, naitaa enaimin enkimulumulet enye, nautaki ninye ilpolosien, napik iloom ooikenieki nchomito, najo, ‘Ene taa ilotu abaiki, nimigiroo, naa ene ebaiki olwuasa loo lopir linono’? Intanapa ae olong entadekenya anaa ninteru nkolong'i inono, nincho entadekenya metayiolo ewueji enye. Peyie etum aibung'a ineeiting'ie enkop, neipiripirori iltorrok aaitung'uaa ninye? Eibelekenyi ninye anaa enterit natii abori olmishire, neibelekenye emua enye anaa enkila. Ore too ltorrok eibooki ewang'an enye, ore enkaina enye natudumuaki aailepie negili. Itijing'a oshi aikata atua nkonyek enaiposha arashu ilo tiatua enegut enaiposha too nkejek? Aikintoduaki iyie inchomito e keeya, anaa itodua iyie nchomito enaimin nagut? Itoning'uo iyie asipu endapasho enkop? Imbalunye tiniyiolo kuna pooki. Koree doi ina oitoi nalo emanyisho e wang'an, naa koree emanyisho e enaimin, peyie itum aitabaiki ninye olpolosie lenye, peyie itum atumusu atayiolo nena oitoi naapuo enkang enye? Iyiolo iyie amu kitoiwuoki apa ina kata, ore esiana oo nkolong'i inono naa kumok! Itijing'a iyie impechen naashumieki enkare nataa osoit le nkirobi, anaa itodua iyie nena ajijik naashumishoreki oo soito le nchan, lelo apa laiteng'ela nanu te nkaraki enkata enyamali, te nkolong olarrabal o enjore? Koree enkoitoi nalo ine wueji neidapashieki ewang'an arashu ewueji neidapashieki olkutati lo loo saen tioriong enkop? Aing'ae otuturo olbaata oim enkare enchan, neitobir enkoitoi te nkaraki endarata. Pee eyau enchan enkop ine nemetii tung'ani, ilo purkel lememanya tung'ani. Pee eitaraposh ina kop mijooni nememanya, neisho enkop metubulaki nkujit? Keeta enchan papaai lenye, naa aing'ae ilo oitobirua ilkitong'at le nkoileelio? Ke ng'uset eng'ae etupukunye isoito le nchan, naa aing'ae otoiwuo isoito le nchan le shumata? Etoyu nkariak negolu anaa soito, ore oriong eng'uton netoyu agolu te nkirobi. Indim iyie ateena ilpisia loo lakir, anaa intololong ieneta e orion? Indim iyie atuutai ilakir too nkatitin enye, arashu indim iyie atorikoi olgarurumi tenebo ilkuoo lenyena? Iyiolo iyie nkiguanat e keper? Indim iyie aitasheyie enkitoria enye te nkop? Indim iyie atudumu oltoilo lino aitabaiki nkatampo, pee kitum olairrag loo nkariak aaitoipoi iyie? Indim iyie airriwai inkiwuang'at pee etum aashom, nikijoki ninche iyie, ‘Noona iyiook?’ Aing'ae otipika eng'eno nagut atua nkatampo, arashu aing'ae naishoo eyioulounoto enkinuku? Aing'ae oidim aikena nkatampo te ng'eno nagut? Anaa aing'ae oidim atipika ilbenia le nkare. Ina kata eibung'a enterit aaku esarng'ab, neibung'a pooki aaku nabo? Indim iyie atarreshoki olng'atuny entoki nanya, arashu intaraposho enkoshoke oo nkiyioitin olng'atuny, ina kata eisudori too nkapuniaa enye, arashu eirrag aanyisho too rrumati lenye? Aing'ae oitoti ilkurruki, ina kata eishiraki inkiyioitin enye Enkai, nemanimanaa eitu etum endaa? Iyiolo iyie enkata naisho nkineji oo ldoinyio? Itodua iyie enkolii eisho? Indim iyie aikena ilapaitin ooitabaya ninche, niyiolou enkata napuo aaisho? Iyiolo iyie enkata nairrugo neiu nkera enye? Ore nkera enye neiteru aagolu nebulu too nkisiajat; nepuaya nemeitoki aarrinyokino ninche. Aing'ae oishoo iloitikoishi meidapashari aapuaya? Aing'ae otalaa ieneta enkurrarru naten. Aishoo ninche olpurkel metaa emanyisho enye, ore enkop emunyan neaku emanyisho enye. Elam ninche inkanas naabore enkilepilep, nemeetae oltung'ani oidim aitoborro ninche, neisiaaishore ninche. Nchumat oo ldoinyo ninche ndaat enyena, nelimana aaing'oru pooki toki nanyori. Keyieu olkiteng le ntim nikisiaai iyie? Keirrag ninye ilo ale lino? Indim iyie aibung'a ninye te nkeene mikituturoki enkurma, arashu incho ninye mikitaaraki ilboro te nkurma ino? Indim iyie aisiliga ninye te nkaraki naa sapuk engolon enye, naa aing'ueiki iyie ninye esiaai ino? Isilig iyie ninye ajo keshukunye, neyau entapa ino olkurroto oidong'ishoreki? Eyuko inaipuko e sidai to lwuasa; kake amaa, keeta ninche olng'ur? Amu eing'uaa ninye ilmosor lenyena te nkop, neisho ninche eirowuajieki te nkop, nerikino ajo eidim enkeju atadanya ninche, ore ng'uesi entim neitunyoo ninche. Meing'urrie ninye nkera enyena, meitaas ninche anaa nkera enyena; ore hoo tenaa enepesho esiaai enye, meureisho ninye; amu eishoo Enkai ninye metorikinoyu eng'eno nagut, neitu eoriki ninye erubata ening'unoto. Ore tenedumunye ninye aisik, nekueniyie embarta olokedito ninye. Incho embarta engolon enye? Ieniki emurt enye engolon? Incho ninye eipid alo anaa olmaati? Ore enkitoo enye o ltoilo oitayu neitureisho. Etur ninye atua nong'ot, neng'idare engolon enye, neipang ninye alo ong'ata anang'are te ngolon olarrabal. Ekueniyie ninye enkuretisho, nemeirut ninye; nemeibelekenya ninye apaashare olalem. Eikirikirie emootian to loililai lenye neeta empere naimerlel. Ore te mpijan o te ngoro sapuk neijoo ninye enkop; meidim ninye aitasho aitirring'ayu te nkorui e ntarumpeta. Ore teneru entarumpeta, nejo ninye ‘Aha!’ Eing'uaya ninye olarrabal tenelakua endarata e lelo kituaak le njore, o nena buakunot. Aiteng'eno ino nagut eyiolou lenkalem ailepa shumata oleng, nelak inaipuko enyena aipirie kopikop? Aitenkitanapata ino edumunye olkurragos alo ashet enkaji enye te shumata? Te ndapidapoi eton aitobiraki kewan enkang, neitaa ineepi oo soito osempewuet lenye. Eikeernu ninye entoki nainos, nedol inkonyek enyena ninye tenelakua. Ore nkiyioitin enyena neibibiu osarge; ore ewueji pooki neteyieng'ishoreki ine etii ninye.” Neitoki Olaitoriani ajoki Yoab: “Keidim oloing'oru entorroni atekeshare ilo Magilani? Ore ilo oishankarrare Enkai, inchoo ninye ewal ina.” Neitoki Yoab awaliki Olaitoriani, ejo: “Ng'ura ajo mara toki naikenaroyu; ainyoo nanu aawaliki iyie? Atipika nanu enkaina ai anuk enkutuk ai aiken. Airoro apa te nkata nabo, nemaitoki awal; kat are, nemaitoki alo dukuya.” Newaliki Olaitoriani Yoab to lkutati ejo: “Terretena empolos ino anaa olee; kaaikilikuanishore nanu iyie, nikimbalakinye nanu. Aikipik sii nanu enkitapong'oto? Aikidung'oki iyie nanu enkiguana peyie itum aitaa kewan olasipani? Iyata iyie enkaina natiu anaa ene Nkai? Naa indim iyie atadara to ltoilo laaijo olenye? Tukusoyu te nkitoo o te nkanyit. Inchopoki kewan enkitoo o esikar. Tubuku intayu ina goro ino nadooyo, ning'or pooki ngae owuasa, nintadoyio ninye. Ing'ura pooki ng'ae owuasa, nintadou ninye, nintunyoki enkop lelo torrok te pooki neitasheyie. Isudoi ninche pooki tenebo tiatua enterit, nkenoi inkomomi enye te nkop e abori. Naalotu sii nanu anyorraa, nchere enkaina ino e tatene makewan nayau enkisulata. Ing'ura sii iyie ina kukuu naji Behemot ina naitobirua nanu anaa pee aaitobirua iyie; enya ninye olkujita anaa olkiteng. Naa ng'ura, empolos enye etii engolon enye, netii engolon enye nkirnyany e nkoshoke enye. Neitagol ninye olkidong'oe lenye anaa oltarakuai; ore isinigi loo nkejek enyena neibung'a tenebo. Ore iloik lenyena netiu anaa indulen o suyai; netiu inkejek enyena anaa ing'apeta e sekenkei. Ninye ene nkiterata too siatin pooki Enkai; inchoo ilo oitobirua ninye eitinyiku olalem lenye! Amu too ldoinyio epuku endaa enye, teine neiguranie ng'uesi pooki entim. Eirrag ninye tiabori entim oo lkiku, tiatua ine netii iseyia to lbalbal. Amu tiabori lelo oipi loo lkiku elo ninye ashur; neman ninye nchorroi oo nkariak. Ing'ura, tenenang'unye oreyiet nemeiture ninye; meeta enkuretisho hoo tenenang'unye olkeju le Yordan. Keetae oloidim aawa ninye too ntokitin naibung'ieki isinkir? Arashu een enkume enye torreshet? Indim iyie aibung'a aitupuku Lefiatan to rreshet loo sinkir? Arashu ikurraki olng'ejep lenye nkeene? Indim iyie atipika olgosoi enkume enye: arashu iremoki olboony lenye orreshet oo lolo? Aikiyaki ninye esayiata sapuk aikirorie ninye iyie te mborron? Aikining'ore ninye iyie? Pee iya ninye metaa olaisiaayiani lino ntarasi? Inguranie iyie ninye anaa eninguranie emotonyi arashu intaa entoki naiguranie inkaisiaayiak inono? Keimaki ilainyangak enkinyang'a enye? Keorrioor ninche ninye aaoriki ilainyangak? Indim aiputa olchoni lenye iltidii loo sinkir; arashu ipik elukunya enye entoki naibung'ieki isinkir? Imbung'a sii iyie ninye; tadamu sii olarrabal, mintoki aigil aas! Ng'ura ore osiligi le tung'ani naa pesho; eitadouoki ninye teina duaata enye. Meetae hoo olopi oleng oidim atuputu ninye aing'ae naa doi ilo oidim aitasho te dukuya nanu? Aing'ae laishoo nanu, metaa kalaaki nanu ninye? Ore pooki toki natii abori e keper naa enaai. Magirakino nanu eitu alimu irubat oo nkejek enyena, arashu engolon enye, arashu ilo ning'o lenye. Aing'ae oidim aitayu olkila lenye lioriong? Aing'ae oidim ataremo ina kila enye nagol. Aing'ae oidim atabolo iltagiligil lenyena? Emanita ninye ilala lenyena ooitureisho. Ore enkoriong enye neitobiruaki too long'oi naaripakino, neripakino oleng anaa inaamishirakino. Etiripaki ninche aaitinyik oleng, ometaa meim enkijape erishata enye. Eibung'ieki aitutum tenebo; eibungieki metaa meekure erishayu. Ore pee esing ninye neidapashaa ewang'an, ore nkonyek enyena netiu anaa entadekenya nawang'u. Epuku te nkutuk enye ilkilang'ilang'eta le wang'an neng'orunye iltiil le nkima teine. Nepuku too nkumeishin enyena empuruo, naikununo anaa empuruo oo suut naayupuyup tiabori emoti. Ore enkiyang'et enye neinok inkuk enkima, nepuku olang'at le nkima te nkutuk enye. Etii emurt enye engolon, eiture ninye pooki odol ninye. Ore ngilat o lchoni lo sesen lenye neibung'a tenebo, ekurrakino pooki ninye metaa meigusugus. Egol oltau lenye anaa osoit, agol anaa osoit oturuno to lodo le nkop. Ore tenedumu kewan ailepie neirut lelo magil; ore te nkaraki enkuretisho enye, nemilo. Ore hoo nebaiki ninye olalem nemedung ninye; arashu eremet, o embae o empere naado, naji mataarie naaijo eremet. Edol ninye esekenkei etiu anaa olkujita, ore osuyai netiu anaa oltiapurusi. Meiture ninye embae meilanyisho; amu ore isoito oonang'ieki ninye netiu anaa ng'uetat. Ore irinkan te ninye netiu anaa olkujita, ekueniyie ninye engororoto e mpere. Ore ilpala lenyena le nkoshoke netiu anaa mbelibelat e moti oo nkulukuok, ekur ninye enkop neitaa esarng'ab. Eitokitokie ninye eng'uton anaa emoti; neitotiu enaiposha anaa emoti e ilata. Ore etulusoyie ninye neing'uaa ewang'an te nkoitoi, neibelekeny enaiposha aiborrie anaa olaburra. Ore tioriong enkop meeta ninye enanyaanyukie, ore ninye naa entoki nemeeta enkuretisho. Eing'or ninye pooki toki natii shumata; naa ninye olaiguanani oitore nkera pooki olwuasa.” Neitoki Yoab awaliki Olaitoriani ejo, “Ayiolo nanu ajo indim ataasa pooki toki, nayiolo ajo meeta eyieunoto ino nemeitabari. ‘Aing'ae ele oisudoo enkikoo meeta eng'eno?’ Ore enkaraki ina atejo imbaa neitu aning'u, intokitin enking'asia te nanu, neitu apa aidip atayiolo. ‘Toning'o amu kairo nanu; kaaikilikuanishore nanu iyie, nikimbalakinye iyie nanu?’ Aatoning'oyie nanu iyie te ning'oto e nkiok, kake ore tena kata naadolita too nkonyek aainei. Ore enkaraki ina atemenayie nanu kewan tukul, nairridu te nterit o too nkuruon.” Ore pee eidip Olaitoriani airorie Yoab te kulo rorei, nejoki Olaitoriani Elifas le Teman: “Eyupuyupieki engoro ai te nkaraki iyie tenebo lelo shoreta linono pokira aare; amu eitu iroro intae tialo nanu imbaa naasipa anaa enairoro osinka lai Yoab. Ore naa taata iwa iloing'ok oopishana olmeregeshi oopishana, nilo enetii osinka lai Yoab, nilo aitayu teine te nkaraki kewan ino olasar opejori; pee kiomonoki osinka lai Yoab, amu kang'amaa enkomono enye nemaaitaas nanu iyie terisioroto emodai ino; amu eitu iro te nanu ina nasipa anaa enairoro osinka lai Yoab.” Metaa eshomo Elifas le Tema tenebo Bildad le Shuhi tenebo Sofa le Naaman aas ina natiaaka Olaitoriani ninche, neng'amaa Olaitoriani enkomono e Yoab. Neitoki Olaitoriani arrinyoki Yoab imasaa enyena, ina kata eomonoki ilchoreta lenyena. Neisho Olaitoriani Yoab katitin are oo ntokitin apa pooki naata te dukuya. Neitoki aapuonu enetii ninye ilalashera lenyena pooki o nkanashera o lelo pooki apa ooyiolo ninye te dukuya, nenya ninche endaa tenebo ninye te nkaji enye; neing'urrie ninche ninye neitagol too ntorrok pooki apa naayaka Olaitoriani ninye; ore pooki lenye neisho ninye mpisai tenebo olpisiai le sahabu. Nemayian Olaitoriani nkolong'i e siadi e Yoab oleng alang ine dukuya; neeta apa ninye intare nkalifuni tomon oong'uan, o ntamesin nkalifuni ile, o lmong'i ooturishore enkalifu nabo, osirkon enkalifu nabo. Eeta sii ninye apa ilayiok oopishana o ntoyie uni. Nedung'oki enkarna enkikau enye ajo Yemima; ore eniare neipot ajo enkarna enye Kesia, ore eneuni nedung'oki enkarna ajo Karen Happuk. Naa ore teina kop pooki, meetae apa ntoyie naainepu intoyie e Yoab te sidano; neitujung menye pooki tenebo lalashera lenye. Ore pee eidipayu ena, enyaaka Yoab abik ilarin iip o artam, nedol ilayiok lenyena, o layiok loo layiok lenyena, iishoritin ong'uan. Neirura Yoab, etaa olpayian kitok netobikoyie nkolong'i kumok oleng. Emayiana ilo tung'ani lemelo enkiguana oo ltung'ana torrok, nemeitashe te nkoitoi oo laing'okok, nemeton to lturrur le lelo loo lderrat torrok; kake ore eng'ida enye naa enkitanapata o Laitoriani, naa enkitanapata eibirribir ninye dama o kewarie. Eikununo ninye anaa olchani otuunoki te mbata e nkare e nchorro, oiu ilng'anayio lenyena te rishata enye, nemetoyu mbenek enyena. Ore te nena pooki naas ninye, nedupoyu. Mme neijia etiu lelo torrok, kake eikununo anaa suut naakutaa osiuo. Ore enkaraki ina etudung'okoki enkiguana lelo torrok, negeluni aaitalam olturrur le lelo supati amu eyiolo Olaitoriani enkoitoi e lelo supati, kake ore enkoitoi e lelo torrok naa keidak. Kainyoo pee eitobirita iloshon enkarruoisho, kainyoo pee eitobir iloreren nkitobirat enye e ntorroni e pesho? Eiturrurrote ilaiguanak le nkop, neiguana lelo ooitoreisho te nebo, aagilunore Olaitoriani o ilo lenye otubukokoki eilata aaput, ejo, “Matalak ienat enye nabo kata, nikinturraa nkeenta enye aaitalam ate.” Ore ilo oton te shumata nekueni; neikordod nena kitobirat enye e pesho. Naa keitoki ninye airorie ninche te ngoro enye napi, neiture ninche te ngoro namutisho, ejo, “Atipika nanu olaiguanani lai shumata Sion, ilo doinyo lai sinyati.” Kalikioo nanu ina natejo Olaitoriani: Aatiaaka ninye nanu, “Ira iyie enkerai ai, ore ena olong, aatoiuo nanu iyie. Toomonoki nanu, naa kaitaa nanu lelo oshon enjung'ore ino, naitaa ineeiting'ie enkop iwuejitin inono. Nigil iyie ninche te ng'udi e sekenkei, nintaa ninche mbelibelat anaa emoti oo nkulupuok.” Ore naa taata, lo aiguanak, entaa ng'eni; nchoo eikok intae lo aitoriak le nkop. Esiaayia Olaitoriani te nkuretisho, te nkikirikirata, entung'utut nkejek enyena, megoro ake, nindaayaya te nkoitoi; amu keyupuyup engoro enye asioki. Emayiana lelo pooki oosaru ninye. Iyie Olaitoriani, meikenayu ilmang'ati laainei! Aatudumakinote nanu ilkumok aagilunore; ejoito ilkumok ti alo nanu, metii eretoto naing'uaa Enkai te nkaraki ninye. Kake ore iyie Olaitoriani, ira elong'o naamanita nanu, iyie enkitoo ai, naa iyie likishumu endukuya. Atabuakua nanu aishiraki Olaitoriani, naawaliki ninye nanu te ilo doinyo lenye sinyati. Airraga nanu nairura; naitoki ainyototo, amu Olaitoriani laarripito. Maure nanu iltung'ana nkalifuni tomon, lelo laatudumakinote nanu aarare naamuat. Inyo, iyie Olaitoriani! Tokorduaki nanu na Ai ai! Amu itoosho iyie ilmang'ati laainei pooki eseder, itigila iyie ilala le lelo arruok. Eno Laitoriani enkordunoto meetu mayianat inono shumata iltung'ana linono. Tawalikiaki nanu te naipot, iyie na Ai e sipata ai! Kinchoo iyie nanu erishata ina kata atii atua osina. Ing'urrieki nanu, nining enkomono ai. Lo tung'ana, eikintukurrurru akenya o anu? Inyorrurru intae irorei le pesho o anu, nirubarere elejare? Kake tayiolo nchere, etegelaka Olaitoriani kewan ilo oure ninye; kening Olaitoriani te naipot nanu ninye. Entagoroto kake emiaas ingok enguanata too ltauja linyi too ndapashi inyi, nigirara. Ntayu ilasarri oosipa nipik osiligi lino atua Olaitoriani. Etii ilkumok oojo, “Oi naaji tenaa eikidol iyiook embae sidai. Ntorioki iyiook ewang'an e nkomom ino, Olaitoriani!” Itipika iyie eng'ida kitok oltau lai nalang eng'ida naata ninche teneponari entapa enye o enaisho oo sabibu. Te seriani nanu airrag airura, amu iyie ake Olaitoriani likincho matobiko te seriani. Toning'o irorei laainei, iyie Olaitoriani; toduaa ndamunot aainei o ltau. Toning'o oltoilo le nkishirata ai, Olaiguanani lai naa Enkai ai, amu iyie aomon nanu. Iyie Olaitoriani, ining iyie oltoilo lai tadekenya; ore tadekenya naaitobiraki nanu iyie olasar, naton aanyisho. Amu mira iyie Enkai nashipakino entorroni; meton entorroni te nebo iyie. Meidim ilo oitokoos aitasho te dukuya nkonyek inono; imba iyie ilaasak loo ntorrok pooki. Indaikie iyie lelo ooiro elejare; neitame Olaitoriani lelo oata enkure o sarge o ltung'ana. Kake ore nanu te nkaraki ina nyorrata ino sapuk nauno, naa kajing atua enkaji ino; kaseremisho nanu aipirare ina aji ino sinyati te uriata ino. Torikoyioki nanu Olaitoriani te supatisho ino, te nkaraki ilmang'ati laainei; ntorioi enkoitoi ino te dukuya nanu. Amu metii esipata nkutukie enye; ore iltauja lenye naa enkidaata, ore olgos lenye naa enkurare nang'a, neikordodisho to lng'ejep lenye. Nchoo ninche enap enkitarruorroto enye, iyie Enkai; nchoo ninche ebatata too nkiguanat enye maate; ore te nkaraki nkitarruorot enye kumok taarai ninche mpang'ie, amu kitogolong'akita ninche iyie. Kake nchoo lelo pooki likisaru iyie meting'idata, nchoo ninche metaranyisho anaake te ng'ida; naa tomitu iyie ninche, paa ore lelo pooki oonyor enkarna ino niking'idakino iyie. Amu imayian iyie ilo asipani, iyie Olaitoriani; nintushur iyie ninye enyorrata ino anaa elong'o. Iyie Olaitoriani, mikisikong nanu te ngoro ino, nimikintame nanu te ngoro ino napi. Ing'urrieki nanu iyie Olaitoriani, amu ataa oloishunye nanu: Olaitoriani, nchiunyeki, amu etororonyate iloik laainei. Netanyamala sii oltau lai. Kake amaa iyie Olaitoriani, o anu kenya? Mbelekenyayu Olaitoriani, ntajeu enkishui ai; tokorduaki nanu te nkaraki ina nyorrata ino nauno. Amu ore ti atua keeya nimikintokini aadamu iyie; amaa, ti atua enemeneng'a kaing'ae likisis iyie? Atalepori nanu te nkishirata ai; ore pooki kewarie neibalibala ilkiyio laainei te ndapash, neilibilib endapash ai too lkiyio. Eiliilaitie nkonyek aainei te nkaraki osina, eimisiloitie te nkaraki ilmang'ati laainei. Enchom entung'uayioki, intae pooki aasak loo ntorrok; amu etoning'o Olaitoriani oltoilo le nkishirata ai. Etoning'o Olaitoriani enkomono ai, etang'amayie Olaitoriani enkomono ai. Keitukurruni ilmang'ati laainei pooki, neitanyamali, keibelekenya ninche aarrinyo, neitukurruni te nkata nabo. Iyie Olaitoriani Enkai ai, iyie nanu asaru; ntajeuoki nanu te lelo pooki laasujita, nikikordu nanu, maaibung ake anaa olng'atuny, naaing'irtitoo aanya, metii hoo obo laamitu. Iyie Olaitoriani Enkai ai, te nataasa nanu ena, te netii entorroni nkaik aainei, tenaa katalaaka nanu olchore lai te ntorroni, tenaa kaitajeuo nanu ilo mang'atinta lai pesho, nchoo ninye ilo mang'tinta lai aasuj naainepu nanu, naa nchoo ninye eitunyoki enkishui ai enkop, neipurrupur oltau lai. Tudumunye Olaitoriani te ngoro ino, ntaisheikinore tigilunore ina pushuna oo lmang'ati laainei; inyo na Ai ai; amu itudung'uo iyie enkiguana. Nchoo eumata oo ltung'ana kinturrurrokino iyie, aaman; ore te shumata tipika olorika lino. Olaitoriani oiguanare loreren; nguanareki nanu iyie Olaitoriani, te risioroto oo sipat aainei, o te risioroto e ina biotisho e supatisho ai nchoo eiting entorroni e lelo torrok, kake ntubulai ilo supat, iyie ilo otem ndamunot o ltauja, iyie Enkai oo sipat. Enkai ninye elong'o ai, ninye oitajeu ilo supat to ltau. Enkai olaiguanani loo sipat, naa Enkai naata engoro nkolong'i pooki. Te nemeirridu oltung'ani, neii Enkai olalem lenye, eteyietuo ninye enkawuo enye; neitobira ninye nena masaa enyena o larrabal torrok, nepik mbaa enyena esayiet napi. Ng'ura ore ilo tung'ani torrono nedamu entorroni, nenuta ninche ntabo, neiu elejare. Neitobiru ninye engumoto aturu, nedoiki atua ina gumoto natuturuo. Ore ina taboi enye nerrinyokino enkorrok enye makewan, naa endukuya enye makewan edoiki entaboi enye. Kaisho nanu Olaitoriani enashe nairirikino esupatisho enye, naranyaki nanu te nkisisa enkarna o Laitoriani, Ilo otii shumata Aisul. Iyie Olaitoriani, Olaitoriani lang, kebaa enkitoo e nkarna ino te nkop pooki! Ore enkisisa e nkitoo ino nebaiki keper too nkutukie oo nkera kutiti o naanakita, intobira iyie olkitamanyunoto le negol, te nkaraki ilmang'ati linono, pee imbooyo ilo mang'atinta o ilo oitalaku elap. Te naing'or nanu keper ino, ina siaai oo lkimojik linono, olapa o lakir litipika iyie; kainyoo oltung'ani lilo iyie ashilaa, o enkerai e tung'ani ligolie iyie ninye? Nintaa iyie ninye kiti penyo te Enkai, ninchopoko iyie ninye enkitoo o enkanyit. Nchoo iyie ninye enkitoria te shumata isiaaitin oo nkaik inono; itipika iyie ntokitin pooki abori nkejek enyena, ore nkerra pooki o lmong'i, ng'uesi sii e ong'ata. Imotonyi o loing'ang'e, o sinkir le naiposha, pooki toki ake ninye nalo ti atua enaiposha. Iyie Olaitoriani, Olaitoriani lang, kebaa enkitoo e nkarna ino ti atua enkop pooki! Kaisho nanu Olaitoriani enashe to ltau lai pooki; kalikioo nena kiaasin inono e nking'asia. Kang'ida nanu naa kaaranyaki iyie, karanyisho nanu te nkisisa e nkarna ino, iyie Olotii Shumata Aisul. Te neibelekenya ilmang'ati laainei, kerrorro neidak te dukuya iyie. Amu ntasheyie iyie esipata ai; itotona iyie to lorika le nkitoo ninguana te sipata. Isikong'a iyie iloshon, ndaikie iyie lelo torrok; aitujutoyie iyie aiwuang'ie enkarna enye ntarasi o ntarasi. Eisha ilmang'ati te nkidaata oo ntarasi; nitadotuo iyie nkanas enye; ore endamunoto enye neisha. Kake eton Olaitoriani to lorika le nkitoo ntarasi, neitasheyie olorika lenye le nkitoo pee etum atudung'o enkiguana; nedung'oki ninye enkop enkiguana te sipata, nedung'oki loreren enkiguana too nkiririkinot. Olaitoriani ninye osempewuet le ilo oitorogonyi, osempewuet too nkatitin e nyamali. Ore lelo ooyiolo enkarna ino nepik osiligi lenye atua iyie, amu ore iyie Olaitoriani, neitu inturraa lelo likisilig iyie. Entaranyaki enkisisa Olaitoriani, ilo oton te Sion! Entolikioi ti atua loreren nkiaasin enyena! Amu ore ilo oitalaku elap o sarge, nedamu ninche; merikino ninye olkiyioi le ilo oata osina. Ing'urrieki nanu Olaitoriani! Toduaa enyamali naata te nkaraki lelo laaiba, Iyie ilo laadumu nanu aitung'uaa nchomito e keeya, pee atum atolimu enkisisa ino, paa ore too nchomito e ina tito e Sion, nang'idakino nanu enkordunoto ino. Eimiso iloshon tiatua ina gumoto natuturo ninche; ore te ilo rreshet oisudoitie ninche nerruesh nkejek enye maate. Eibalunye Olaitoriani kewan, etudung'o ninye enkiguana; etijing'a lelo torrok orreshet ti atua esiaai oo nkaik enye maate. Kepuo lelo torrok aajing enemeneng'a, lelo oshon pooki lemedamu Enkai. Ore ilaisinak nemeitokini aapalaa anaake ore osiligi loo laisinak nemerrarri ntarasi. Tudumunye Olaitoriani! Mincho oltung'ani meisula; nchoo iloreren eiguanareki te dukuya iyie! Tipika ninche atua enkuretisho, Olaitoriani! Nchoo iloreren eyiolou aajo iltung'ana ake ninche! Kainyoo pee intashe alamari, iyie Olaitoriani? Kainyoo iyie pee isudoo kewan too nkatitin oo ng'olikinot. To lwuasa emir lelo torrok ilaisinak; nchoo meibung'a ninche lelo rresheta ooitobira. Amu keitokoos ilo torrono too yieunot o ltau lenye, ore ilo tung'ani oata olorok loo masaa nemenaa Enkai. Ore to lwuasa le nkomom enye nemeing'oru ninye Enkai; ore too ndamunot enyena pooki naa, “Meetae Enkai.” Nebul too nkoitoi enyena nkatitin pooki; ore nkiguanat inono netii shumata, mebaiki ninye; ore ilmang'ati lenyena pooki neikordod ninche. Nedamu ninye to ltau lenye ajo, “Maaigusugusieki nanu; ore ti atua iishoritin pooki matum nanu batisho.” Ebore enkutuk enye ildeketa o elejare o enkitorogonyare; ore abori olng'ejep lenye netii ntabo o entorroni. Neton ninye to lnukata too nkang'itie, ore ti atua iwuejitin neeisudoriyie nesesekuan lelo supati. Neikeern lelo ooshal, neirrag ninye to lnukata lenye anaa olng'atuny; neirrag ninye pee etum aibunga ilo aisinani, neibung ninye ilo aisinani te nemiraki ninye atua orreshet lenye. Nerrarri ilo oshal, neimisieki te nkop, nebatata te ngolon enye. Nejo to ltau lenye, “Etorikine Enkai, eisudoyie ninye enkomom enye, medol ae kata ina.” Tudumunye, iyie Olaitoriani, iyie Enkai, tudumu enkaina ino; mincho kirikino ilo oata osina. Kainyoo pee eany ilo torrono Enkai, nejo to ltau lenye, “Maaitamie ninye nanu.” Idol iyie; ee, itoduaa iyie enyamali o sina, pee itum iyie aiwuang'ie too nkaik inono; ore ilo oshal naa iyie eigarakino; iyie otaa olaretoni loo lokishin. Tigila iyie enkaina e ilo torrono o eno larruoni; tusuja entorroni enye o metaba anaa neishunye. Olaitoriani ninye olaiguanani ntarasi o ntarasi; keidak iloshon te nkaina enye. Iyie Olaitoriani, ining iyie eyieunoto eilo obor; nintagol iyie ninye oshoke nirrugoki enkiok ino pee inguenare te sipata ilo okishi o ilo oibookoki enkop, paa ore ilo tung'ani le nkop nemeigil ae kata aitureisho. Atua Olaitoriani nanu asaru; kaji iyie inko pee kijoki nanu, “Isika anaa emotonyi shomo ildoinyo; amu ng'ura, eteyietutuo lelo torrok enkawuo enye, etipika ninche embae enye empito, pee etum aatang'or te naimin ilo supat to ltau; amaa te neidaikieki ilkitamanyunot kaa eas ilo supat?” Etii Olaitoriani atua enkaji enye sinyati, etii olorika le nkitoo lo Laitoriani keper; neing'orisho too nkonyek enyena, netem too nkonyek enyena, nkera e tung'ana. Ketem Olaitoriani ilo supat o ltorrono, neiba to ltau lenye olarruoni. Ore te lelo torrok, naa keitashaiki nkuk e nkima o enchan oo soito; o lkutati opejisho olo aaku erubata e nkikompe enye. Amu aisupat Olaitoriani, nenyor ninye nkiaasin supati; ilo oata oltau sidai odol enkomon enye. Taretu iyiook, Olaitoriani: amu meekure eetae hoo obo oata euriata e Nkai; amu eishunye ilooisiligayu tiatua nkera e tung'ana. Eiro pooki ng'ae elejare tialo ole latia enye; to lkoroj o te nkilelemare eiro ninche. Metudung'oi Olaitoriani nkutukie pooki naaikorojisho lelo ng'ejepa le nkitokoos kitok, lelo oojo, “Ore olng'ejep lang nikisulie, kiaata nkutukie ang, kaing'ae naitore iyiook.” “Ore enkaraki naitorogonyaki olaisinani, oe nkaraki naigorito ilo oata osina kadumunye taata nanu,” Olaitoriani ojo; “Kapik nanu ninye atua ina seriani naa ninye eng'uar.” Ore nkisiligat o Laitoriani naa nkisiligat naasila, naaikununo anaa enkosholai natisilaki to lkokuet te nkop, nesili katitin naapishana. Torripo iyie iyiook Olaitoriani, torripo iyiook anaake tena ishoi. Ore too nkaloli pooki, nemanimanaa anaa olng'atuny lelo torrok anaa enatudumuye entorroni aponari ti atua nkera e tung'ana. Ke nkata nabaa iyie Olaitoriani? Mikidamu iyie nanu? Kenkata nabaa isudoo iyie enkomom ino te nanu. Kanap nanu emion to ltau lai o anu, naisinanuo to ltau lai endama pooki? Keitokoos akenya olmang'atinta lai ti alo nanu o anu? Ing'uraki nanu, nikiwaliki, iyie Olaitoriani, Enkai ai; ntawang'a nkonyek aainei, pee mairura ake too njo e keeya; pee mejo ake olmang'atinta lai, “Aisula nanu te ninye”; pee meng'ida ake ilo mang'atinta lai tenkaraki embatata ai. Kake aisiliga nanu ina nyorrata ino nauno; naa keng'ida oltau lai te nkaraki enjeunoto ino. Karanyaki nanu Olaitoriani, amu aaitaasa ninye nanu ine supatisho te nkumoi. Ejo ilo modai to ltau lenye, “Meetae Enkai.” Etarruoitie ninche, neas mbaa o lminong, meetae hoo obo oas mbaa sidain. Eing'or Olaitoriani kop etii keper, neing'or nkera e tung'ana, pee edol tenaa ketii iloasisho te ng'eno, lelo ooing'oru Enkai. Eshomo ninche pooki aapong'ori, enyaanyuk pooki; meetae hoo obo oas isupati, meetae, metii hoo obo. Aimeeta ninche eng'eno, kulo aasak loo ntorrok pooki, ooinos iltung'ana laainei, anaa enainos ninche endaa, nemeserem ninche Olaitoriani? Ore te ine kepuo ninche aajing olkirutoto sapuk, amu etii Enkai te nebo ina ishoi e lelo supati. Inyalinyala intae nena kitobirat e ilo aisinani, kake Olaitoriani esarunoto enye. Oi siaake elotu enkordunoto e Israel eing'uaa Sion! Te neitopok Olaitoriani iltung'ana lenyena, naa keng'ida Yakobo, neshipayu Israel. Iyie Olaitoriani, kaing'ae olo aton to lng'obor lino? Kaing'ae olo amany ilo doinyo lino sinyati. Ilo olo meeta entioto, neas isupati, neiro esipata to ltau lenye; nemeiro mbaa e nkiteenikino to lng'ejep lenye, nemeitaas entorroni olchore lenye, nemekur aitubulaa olmarenke teilo le latia enye; laa ore too nkonyek enyena nemenaa looiba Enkai, neyanyit lelo ooure Enkai, ilo oinos olmumai nemeibelekenya; nemeitayu mpisai enyena te nkaraki dupoto, nemeng'amaa ninye entoki e ropare pee einyal esipata. Ore ilo oas kuna baa nemeigusugusieki ae kata. Tagolieki nanu Olaitoriani, amu iyie nanu asaru. Atiaaka nanu Olaitoriani, “Ira iyie Olaitoriani lai; ore pooki toki sidai naata naa iyie eing'uaa.” Ore ti alo lelo sinyat ootii enkop, naa ile tipat ninche, laa ninche nanu ashipakino. Ore lelo oogelu ae kitanyaanyukoto oo nkaitin neponaa isinaitin lenye; ore lelo asarri lenye lo sarge nemaibukoo nanu, nemaipot nkarn e nena kitanyaanyukoto te nkutuk ai. Olaitoriani ninye erubata ai nageluno naa enkikompe ai, mbung'ita iyie enkishui ai. Kebaa enking'asia oo nkishorot inono te nanu, kebaa esidano enye! Kaisis nanu Olaitoriani laa ninye laaikok, ore sii te nkewarie naaiteng'en oltau lai. Kapik nanu anaake Olaitoriani dukuya ai; amu etii ninye enkaina ai e tatene, maaigusugusieki nanu. Ore enkaraki ina keng'ida oltau lai, neshipa enkishui ai; neton sii osesen lai te seriani. Amu eitu iyie kipalaa mashomo atua enemeneng'a, neitu ncho ilo oure Enkai edoiki engumoto. Kintodol iyie nanu enkoitoi e nkishui; ore enitii iyie, netii eng'ida nabore, ore enkaina ino e tatene netii ntokitin sidain ntarasi o ntarasi. Toning'o esipata, iyie Olaitoriani; toning'o enkishirata ai! Nchoo enkiok ino enkomono ai naing'uaa enkutuk nemetii elejare! Nchoo eaku iyie eing'uaa esipata ai! Nchoo nkonyek inono edol esipata! Ti nitem iyie oltau lai, ti nikimutan iyie nanu kewarie, ti nikijur iyie nanu, nimitum iyie entorroni ti atua nanu; eitu apong'ori too nkirorot aainei. Ore ti alo isiaaitin e tung'ana, ore to rorei lino, natapaasha nanu nkoitoi oo larruok. Ore roruat aainei neibung'a nkoitoi inono, eitu eideketari nkejek aainei. Aaipoto nanu iyie, amu eikiwaliki iyie, Olaitoriani; irrugokoki enkiok ino, toning'o irorei laainei. Ntodolu enyorrata ino nauno te mpukunoto e nking'asia, iyie Laaitajeunoni le lelo likisaru, too lmang'ati lenye te nkaina ino e tatene. Tagolieki nanu anaa enerok e nkong'u; isudoyioki nanu to loip loo naipuko inono, te nkaraki ilo torrono laainyal nanu, lelo mang'ati laainei laamanita nanu. Neitagol ninche iltauja lenye; pee meitoki aata olng'ur, ore too nkutukie enye neiro te nkitokoos. Naasuj ninche nanu; naatamana taata ninche; naaing'or nanu pee aatum aatanang'ie enkop. Eikununo ninche anaa olng'atuny oibung eng'ues, etiu anaa olkuoo lo lng'atuny erreshito eng'ues. Tudumunye, Olaitoriani! Intoriokinoyu ninche taarare, tanang'ai ninche! Tokordu enkishui ai ti alo ilo torrono to lalem lino, tokorduaki too ltung'ana te nkaina ino, iyie Olaitoriani, tialo lelo tung'ana laa ore erubata enye te nkishui naa ena kop. Ntamio ninche teilo sina litushumaka ninche, menoto nkera enye osina olang ilo, metelekakini ilo sina nkera oo nkera enye. Ore nanu, naa kaing'or enkomom ino te supatisho, te nainyototo, naraposho te nduaata ino. Kaanyor nanu iyie, iyie Olaitoriani, iyie engolon ai. Olaitoriani ninye endapidapoi ai, o sempewuaet lai, naa olakordunoni, Enkai ai, endapidapoi ai naa ninye asaru, elong'o ai, naa emowuo e njeunoto ai, naa ninye osempewuet lai. Aipoto nanu Olaitoriani, laa ninye eishiaakino neisisi, naaitajeuo nanu too lmang'ati laainei. Aatamana nanu nkeenta e keeya, naaiputukunyie nanu olairrag le nkare e ntorroni. Aatamana nanu nkeenta e nemeneng'a, naaipirakinore nanu irresheta le keeya. Ore ti atua osina lai naipoto Olaitoriani; Enkai ai nanu aishiraka maataretu. Ore etii enkaji enye sinyati nening oltoilo lai, ore ina kishirata naishiraka ninye nelo abaiki nkiyiaa enyena. Neikirikira taa enkop neigirigiro; ore sii ilkitamanyunot loo ldoinyo neikirikira, nejing enkop olokirikiri te nkaraki natagore ninye. Nepuku empuruo too nkumeishin enyena, nepuku enkima nanyaisho te nkutuk enye, o nkuk naaishu naapuku te ninye. Neirrugu ninye shumata, nedou alotu kop; netii emisimisi kitok abori nkejek enye. Neked ninye enchumata olkerubi, nelo tiaai, nelo too naipuko o siwuo. Neitaa ninye enaimin enkimulumulet ore enkitushuret enye naa nkatampo naairrusha naabore enkare. Ore te ina wang'an e nkiwuang'ata natii dukuya ninye, nepuku isoito sapuki le nchan o nkuk e nkima. Etadara sii Olaitoriani to loing'ang'e, ore Ilo otii Shumata Aisul neitayu oltoilo lenye, neitayu enchan oo soito o nkuk naaishu. Neirriwaa ninye mbaa enyena, neidapash ninche; neyau nkiwuang'at o enkimerlel, neidapash ninche. Nelioyu nkoitoi e nkare tiatua enaiposha, ore ilkitamanyunot le nkop neibalayu aalioyu, te mbuakunoto ino, Olaitoriani, te nkutata e nkiyang'et oo nkumeishin inono. Naabaiki ninye atii enkop, naaya nanu, naaitayu ninye nanu ti atua nkariak kumok. Naakordu ninye nanu te ilo mang'atinta lai ogol, o te lelo laaiba nanu; amu kegol ninche oleng te nanu. Eetuo ninche shumata nanu te ina olong o sina lai, kake Olaitoriani ninye entonata ai. Aayaua ninye ewueji nelala; aatokordua ninye nanu amu aatishipakine nanu. Aatalaaka nanu Olaitoriani te risioroto oo sipat aainei; te risioroto e sinyatisho oo nkaik aainei aatalaaka ninye nanu. Amu aibung'a nanu nkoitoi o Laitoriani, neitu nanu alo aing'uaa Olaitoriani Enkai ai te ntorroni. Amu ore nkiguanat enyena pooki netii dukuya nanu, ore nkikoot enyena neitu nanu aiwuang'ie aitalam kewan. Maata apa nanu eleyiata te dukuya ninye, naitalam nanu kewan nkitadiaat. Ore nkaraki ina, aatalaaka nanu Olaitoriani te risioroto e supatisho ai, te risioroto e sinyatisho oo nkaik aainei, te dukuya ninye. Ore te lelo supati nintodolu esupatisho ino, ore to ltung'ani lemeeta entioto nintodol esinyatisho ino. Ore te ilo lemeiduruk nintodol ajo minduruk iyie; ore te ilo otolo nintodol entoloi ino. Amu ikordu iyie lelo oobor; kake ore lelo oowuasa nerup ate nintadou. Ee, inok iyie oltaa lai; Olaitoriani Enkai ai oitawang enaimin ai. Ee, ore te nkaraki iyie namir oltim loo lmang'ati; ore te nkaraki Enkai ai naidim aida esuntai. Ore ena Ai, nesipa enkoitoi enye; ore enkisiligata o Laitoriani neuno asipayu; elong'o ninye te lelo pooki oosaru ninye. Amu kaing'ae Enkai leme Olaitoriani? Naa, kaing'ae endapidapoi neme Enkai ang? Ina Ai naaterretena nanu te ngolon, neitaserian enkoitoi ai. Neiteneneng nkejek aainei anaa entarakuet, naaitaserian ninye nanu too neeika. Neitaarriyian ninye nkaik aainei to larrabal, neaku keidim nkaik aatoriuo enkawuo o suyai. Kinchoo iyie nanu elong'o e njeunoto ino, ore enkaina ino e tatene naaitagol nanu, ore eretoto ino naaitaa nanu kitok. Kinchoo iyie nanu ewueji nelala te nkaraki nkejek aainei, neitu eideketari nkejek aainei. Atimira nanu ilmang'ati laainei nainepu ninche; neitu nanu arrinyo o metaba anaa neidak ninche. Atoosho ninche anang'ie enkop nemeigil ninche aadumunye nebatata ti abori nkejek aainei. Amu kiterretena iyie nanu te ngolon, te nkaraki olarrabal; ninchoo ilmang'ati laainei meimiso tiabori nanu. Iyie oishoo ilmang'ati laainei meibelekenyata aailanyisho, ore lelo apa laaiba naidaikie nanu ninche. Eishira ninche eing'oru eretoto, kake meetae oloitajeu ninche, eishirakitia ninche Olaitoriani kake eitu ninye ewaliki ninche. Aidong'o nanu ninche metotiwuo anaa enterit te dukuya; atanang'ayie nanu ninche anaa esarng'ab oo nkoitoi naalala e nkanasa. Kitokordua iyie nanu aitung'uaa enkesha oo ltung'ana, kintaa iyie nanu endukuya oo loshon; ore iloreren apa lemayiolo naaisiaai nanu. Ore ake pee aaning ninche nanu naairuk ninche; ore iltung'ana omon naayanyitu nanu. Etalepori iltung'ana omon, nepuonu ninche eikirikira eing'uaa isempewueti lenye. Keishu Olaitoriani; meisisi ina dapidapoi ai, meitaae kitok Enkai e njeunoto ai, ina Ai naitalaku elap nepik iloreren abori nanu; ilo laakordu nanu too lmang'ati laainei; ee, eikilepunye iyie aitulusoo too lmang'ati laainei; kitokordua iyie nanu too ltung'ana lo larrabal. Ore te nkaraki ena kaarrep nanu iyie, Olaitoriani ti atua iloreren, narany arrep enkarna ino. Eishoo ninye enkisulata kitok ilo aiguanani lenye, neitodolu enyorrata nauno te ilo lenye otubukoki eilata aaput, Daudi o eishoi enye ntarasi. Eitodolu keper enkitoo o Laitoriani; ore oloing'ang'e neitodolu esiaai oo nkaik enyena. Ore enkolong o enkolong neinosakino lomon, ore enkewarie o enkewarie neibalunye eng'eno. Meetae enkiroroto, nemeetae irorei; mening'o iltoiloishi lenye; ore ake eyia, nelo oltoilo lenye aim enkop pooki, ore rorei lenye nebaiki ineeiting'ie enkop. Ore atua ninche netipika olng'obor le nkolong, ina olong nailepu anaa oloyamisho eipang'u te nkaji enye, o anaa oltung'ani ogol okuet ailanyisho te ng'ida. Ore enkilepunoto enye naa ineeiting'ie keper eing'uaa, ore manarot enyena nelo ineeiting'ie ninche, nemeetae entoki naisudoyioki te nkirowuaj enye. Ore enkitanapata o Laitoriani naa keikishiaan, neitopiu oltau; ore enchakenisho o Laitoriani naa kedede, neiteng'en olmodai; ore nkikoot o Laitoriani naa sidain, neiting'id oltau; ore nkitanapat o Laitoriani naa kesila, nepik nkonyek ewang'an; ore euriata o Laitoriani nemeiduruk, nebikoo ntarasi, ore nkiguanat o Laitoriani nesipa naa supati pooki. Neng'uarrayu ninche oleng aalang sahabu, aalang ninye sahabu sidai, nemelok sii aalang enaisho nelang olkenkei le mulug. Naa ninche eikokieki osinka lino; ore te nkibung'ata enye netii olerrinyore kitok. Kake kaing'ae omusu nkitarruorot enyena? Ntisinyaki iyie nanu too nkitarruorot naaisudoro. Imbooi iyie osinka lino too ng'ok o lwuasa, mincho ninche etum engolon ti atua nanu! Pee atum ataa maata entioto nasinyayu too nkitarruorot sapuki. Nchoo irorei le nkutuk ai, o nkibirribirrat o ltau lai, eng'amaroyu too nkonyek inono, iyie Olaitoriani, endapidapoi ai, naa olakordunoni lai. Mikitawaliki Olaitoriani iyie te nkolong e nyamali! Mikitorripo enkarna e Nkai e Yakobo! Mikirriwaki ninye iyie eretoto naing'uaa enkaji enye sinyati, nikintagolo ninye iyie te ina golon naing'uaa Sion! Metadamu ninye ilasarri linono pooki, neing'or te nyorrarota ilasarri linono oopejori! Mikinchoo ninye iyie iyieunot o ltau lino, neitabaya nkitobirat inyi pooki! Nchoo iyiook matabuaku te ng'ida te nkaraki enkisulata ino, ore te nkarna e Nkai ang nikiun iyiook inankan ang! Meitabai Olaitoriani iomonunot inyi pooki. Ayiolo taata nanu ajo keretu Olaitoriani ilo lenye otubukokoki eilata aaput, kewaliki ninye te ine wueji sinyati te shumata, eeta nkisulat sapuki naaisula te nkaina enye. Eng'idare kulikae ngarrin oo mbartan, neng'idare kulikae mbartan; kake king'idare iyiook enkarna o Laitoriani Enkai ang. Keurori ninche aabatata; kake kidumunye iyiook nikintashe aaitoriori. Nchoo olaiguanani meisula, Olaitoriani; tawaliki iyiook ti nikimpot iyie. Te ngolon ino eng'ida olaiguanani iyie, Olaitoriani; naa te retoto ino eisulie ninye oleng. Inchoo iyie ninye eyieunoto oltau lenye neitu iyie mbooyo eomonunoto e nkutuk enye. Amu inang'are iyie ninye too mayianat sidain, ninchopoki ninye enkopiyia e nkitoo e sahabu nasila endukuya enye. Neomonu ninye enkishui te iyie, nincho iyie ninye, nkolong'i kumok ntarasi o ntarasi. Eisapuk enkitoo enye te nkaraki eretoto ino; nchopoko iyie ninye enkikodo o enkitoo. Ee, ntaa iyie ninye olomayiana oleng ntarasi, ninting'id iyie ninye te dukuya enkomom ino. Amu Olaitoriani eisilig olaiguanani; naa ore te nkaraki ina nyorrata nauno e Ilo otii Shumata Aisul, nemeigusugusuieki ninye. Ore enkaina ino ninye nalo aing'oru ilmang'ati linono pooki; neing'oru enkaina ino e tatene lelo pooki likimba. Nintotiu iyie ninche anaa olang'at le nkima te liooto ino. Keijoo Olaitoriani ninche te ngoro enye; neinos ninche enkima. Nindaikie iyie eishoi enye te nkop, niwuang'ie nkera enye aishie ti atua ltung'ana. Ti nikintobiraki ninche iyie entorroni, te neiguenu entaboi nemerasaa ninche. Amu ncho iyie ninche mekueta aailanyisho, niimul iyie nkomomi enye too mbaa inono. Nchoo kisisi iyie Olaitoriani, te nkaraki engolon ino! Eikiranyisho iyiook nikisis engolon ino. Enkai ai, Enkai ai, kainyoo pee kitung'uayie? Kainyoo pee kitalama nanu eitu kiret, nilam irorei laainei le nkigoroto? Iyie na Ai ai, aaishiraka nanu dama kake eitu iyie kiwaliki; naaishiraki kewarie, kake eitu nanu atum enkiyeng'iyeng. Kake ira iyie sinyati, niton iyie te nkitoo e nkisisa e Israel. Iyie apa eisiliga loo papa; kisiliga apa ninche, nitokordua iyie ninche. Iyie apa eishirakita ninche, neitajeuni; iyie apa eisiliga ninche, neitu eitukurruni. Kake ara nanu olkurto, mara oltung'ani; naaikordod iltung'ana, naailap iloreren. Ore pooki laaing'or nanu naakueniyie, naadasaki nkineji, neipirripir ilukuny; nejo, “Eisiliga ninye Olaitoriani; nchoo eitajeu ninye, nchoo ekordu ninye, amu ninye eshipakino!” Ore ake sii, iyie apa likintayio te nguset e yieyio lai; kintaseriana iyie nanu atii ilki le yieyio. Shumata iyie apa aatanang'akaki ebaiki pee aaini, ore anaa naaiu yieyio lai ira iyie Enkai ai. Mikilam iyie nanu, amu etataana enyamali nemeeta likae laaretu. Aatang'adutua nanu iloing'ok kumok, aatamana nanu iloing'ok oogol le Bashan; naang'aki nanu nkutukie enye, netiu anaa olng'atuny oikurrukur. Aaibukoyioki nanu anaa enkare, netirishate iloik laainei pooki too rubat; netotiwuo oltau lai anaa enkapoi, etoshole oltau lai ti atua olgoo lai; etoyio engolon ai anaa oleleo le moti, neterepa olng'jep lai ntakul aainei; nikirragie iyie nanu te nterit e keeya. Ee, aamanita nanu ildiein; aatang'adua nanu olturrur loo laasak loo ntorrok, etaremo ninche ndapi oo nkaik aainei o nkejek - kaidim nanu aikena loik laainei pooki - aaing'orita ninche naashil; neorikino ninche ilkilani laainei maate, ore to lkila lai neosh ninche enkukuo. Kake, ore iyie Olaitoriani, mikilakuaniki! Iyie la aretoni lai, tasieku taretoki! Tokordu oltau lai to lalem, nikordu enkishui ai aitung'uaa engolon e ilo dia. Ntajeuoki nanu te nkutuk o lng'atuny, ntajeu ele tau lai oaata osina too mowuarak o olosokuan! Kaibalunye nanu enkarna ino too lalashera laainei, naaisis iyie te mpolos e umata: Esisa Olaitoriani intae ilooure ninye! Ore intae ilayiok pooki le Yakobo, entaa ninye kitok, nintasheshe te uriata enye, intae ilayiok pooki le Israel! Amu eitu ninye emenu aashu eiteeng lelo oaata osina; neitu ninye eisudoo enkomom enye te ninye, kake etoning'o ninye ina kata pee eishiraki ninye te nkaraki eretoto. Iyie eing'uaa enkisisa ai ti atua eumata kitok; naa kalak nanu olmumai lai te dukuya lelo ooure ninye. Kedaa ilo oata osina neraposho, ore lelo ooing'oru ninye neisis Olaitoriani! Metaa keishu iltauja linyi ntarasi! Kepuo aadamu ineieting'ie enkop pooki, neibelekenyakino Olaitoriani; neserem ilmareita pooki loo loshon te dukuya ninye. Amu eno Laitoriani enkitoria, neitore ninye iloshon. Ee, ninye epuo aairrugokino lelo pooki oowuasa lena kop; te dukuya ninye epuo aairrugo lelo pooki oopuo enkop, o ilo lemeidim aitopiu oltau lenye. Naa kelo eishoi enye aisiaai ninye, nepuo iltung'ana aaimaki Olaitoriani too ishoritin naapuonu, neibalunye enkordunoto enye too ltung'ana leton meino, nchere ninye otaasa ina. Olaitoriani ninye olchekut lai, maang'oriki nanu toki; aairragie ninye nanu too nkujit naanyori, naarikoo ninye nanu te nkiopata oo nkariak naaitirring'a neitagol ninye oltau lai. Naarikoo ninye nanu te nkoitoi oo sipat te nkaraki enkarna enye. Tenaa napaji ninye kalo aim oerata lo loip le keeya, nemaure entorroni; amu itii iyie te nebo nanu; eng'udi ino o rinka lino ninche naaitagol nanu. Ntobira iyie emisa te dukuya nanu, teine netii ilmang'ati laainei; nibukoki endukuya ai eilata, nipik enkikompe ai metaa kedooyo. Esipa aasuju esidano o lng'ur inkolong'i pooki e nkishui ai, naa kabik nanu ti atua enkaji o Laitoriani ntarasi. Eno Laitoriani enkop o ntokitin pooki naabore, enkop o lelo oomanya; amu ninye oitamanyua too naaiposha, neitasheyie too lkejek. Kaing'ae olo aked ilo doinyo lo Laitoriani? Naa kaing'ae olo aitashe te wueji enye sinyati? Ilo osinya nkaik neeta oltau owang, ilo lemedumaki oltau lenye entorroni, nemeinos olmumai le lejare. Keng'amu ninye emayianata naing'uaa Olaitoriani, neng'amu esupatisho naing'uaa Enkai e njeunoto enye. Ore ileeijo kulo, naa eishoi e lelo ooing'oru ninye, lelo ooing'oru enkomom e Nkai e Yakobo. Entudumu lukuny inyi na shomito! Nidumunyenye intae na shomito musan! Pee etum Olaiguanani le nkitoo atijing'u. Kaing'ae Olaiguanani le nkitoo? Olaitoriani ogol magilani, Olaitoriani magilani to larrabal! Entudumu lukuny inyi na shomito! Nidumunyenye intae, na shomito musan! Pee etum Olaiguanani le nkitoo atijing'u. Kaing'ae Olaiguanani le nkitoo? Olaitoriani loo lororani, ninye Olaiguanani le nkitoo! Iyie nanu Olaitoriani adumaki oltau lai. Na Ai ai, iyie nanu aisilig, mincho nanu aaitukurruni; mincho ilmang'ati laainei eng'ida te nkaraki nanu. Ee, mincho hoo obo likingarakino iyie meitukurruni; nchoo meitukurruni lelo aitang'orok le pesho. Ntayioloki nanu nkoitoi inono, Olaitoriani; nteng'enaki nanu inkoitoi inono. Torikoki nanu ti atua esipata ino, nikinteng'en nanu, amu ira iyie Enkai e njeunoto ai; amu iyie nanu aanyita endama pooki. Tadamuaki nanu to lng'ur lino, Olaitoriani, o te nyorrata ino nauno, amu eetae apa ninche ebaiki moitie. Midamu iyie ing'ok e kitisho ai, anaa nkitarruorot aainei; ore te risioroto e nyorrata nauno, tadamuaki nanu, te nkaraki esupatisho ino Olaitoriani! Eisupat naa asipani Olaitoriani; ore enkaraki ina neiteng'en ninye ilaing'okok te nkoitoi. Nerikoo ninye lelo oobor te nkoitoi sidai, neiteng'en lelo oobor te nkoitoi enye. Ore nkoitoi pooki o Laitoriani naa enyorrata nauno o esupatisho, te lelo ooibung olning'o lenye lo sotua o enchakenisho enye. Ore te nkaraki enkarna ino, Olaitoriani, tapalakaki entorroni ai, amu ai sapuk. Kalo tung'ani oure Olaitoriani? Ore ilo tung'ani eiteng'en ninye te nkoitoi nagelu. Ore ninye makewan neton te nkiputakinoto, ore nkera enyena nejung enkop. Ore shoruetisho o Laitoriani naa ene lelo ooure ninye, neitayiolo ninye ninche olning'o lenye lo sotua. Etii nkonyek aainei dukuya Olaitoriani anaake, amu keitayu ninye nkejek aainei to rreshet. Torrinyokinoyioki Olaitoriani, niking'urrie nanu, amu kaliyio naata osina. Nchooki enkiyagata te nyamali oltau lai, nikintupuku nanu ti atua isinaitin laainei. Ing'ura osina lai o enyamali ai, nikipalaki ing'ok aainei pooki. Ng'ura eneba ilmang'ati laainei, o eneba enkiba naaiba ninche nanu te ntoloi. Torripo siaake enkishui ai, nikikordu nanu; mikincho nanu aaitukurruni, amu iyie nanu asaru. Nchoo aagolie nanu esupatisho o emborron, amu iyie nanu aanyu. Talaku Israel, Iyie Enkai, ti atua inyamalaritin enyena pooki. Nguanareki nanu, iyie Olaitoriani, amu ashomo nanu te supatisho ai, naaisiliga nanu iyie Olaitoriani metii enking'aing'ai. Tujurroki nanu Olaitoriani nikitem; tetema oltau lai o ndamunot aainei. Amu etii ina nyorrata ino nauno dukuya nkonyek aainei, nalotu nanu te sipata enitii. Maton nanu te nebo iltung'ana torrok, nemashulare nanu isunkuro. Kaiba nanu encholiek o laasak loo ntorrok, nematon nanu te nebo ilarruok. Naa kaituku nkaik aainei ajo maata entioto, nalo aman olasar lino, iyie Olaitoriani, abuaku aranyita osinkolio le nashe, nalimu nkiaasin inono e nking'asia. Olaitoriani, kanyor nanu emanyisho e nkaji ino, o ewueji netii enkitoo ino. Mikioroo nanu aiwuang'ie te nebo laing'okok, teleku enkishui ai te lelo oota enkure o sarge iltung'ana laa ore nkaik enye nebore osarge, ore nkaik enye oo ntateniaa nebore ntokitin e ropare. Kake ore nanu naa te supatisho ino alo; talakuaki nanu niking'urrie nanu. Eitashe nkejek aainei te wueji neitoriori; ore ti atua eumata kitok naisis nanu Olaitoriani. Olaitoriani ewang'an ai naa enjeunoto ai; kaing'ae nanu aure? Olaitoriani osempewuet le nkishui ai; kaing'ae naa aure? Te nepuonu ilarruok shumata nanu, aainos nkiri osesen lai, lelo mang'ati laainei o larak, nerrorro ninche nebatata. Ore ninye te naamuat olorora aaman nemeureishoyu oltau lai; te naadumakino ninye nanu enjore, ore ake etiu neijia naisiliga nanu Olaitoriani. Entoki nabo nanu atoomono Olaitoriani naa ninye nanu aing'oru; nchere pee abik nanu ti atua enkaji o Laitoriani, nkolong'i pooki e nkishui ai, pee aaing'or enkishiaa o Laitoriani, naikilikuanisho ti atua enkaji enye sinyati. Amu kaaitushur ninye nanu ti atua olng'obor lenye, te nkolong e nyamali; naaikenoo ninye nanu ti abori o lng'obor lenye, naailepie ninye nanu apik shumata endapidapoi. Naa keshumuni endukuya ai aailepie neitulusori te lelo mang'ati laainei laamanita, naa kalo nanu aishooyo ti atua olng'obor lenye, ilasarri te mbuakunoto o te ng'ida; naa karanyisho nanu narrep Olaitoriani. Toning'oki iyie Olaitoriani, te nabuaku nanu aishir, ing'urrieki nanu nikiwaliki nanu! Itejo iyie, “Ing'oru iyie enkomom ai.” Nikijoki oltau lai iyie, “Enkomom ino, Olaitoriani, ninye nanu aing'oru.” Mikisudorie nanu enkomom ino. Mirriny iyie osinka lino te ngoro, iyie apa otaa eretoto ai. Mikinturraa nanu, miking'uaa nanu, Na Ai e njeunoto ai! Amu aatung'uaitie nanu papa o yieyio, kake kaadumu nanu Olaitoriani. Nteng'enaki nanu enkoitoi ino, iyie Olaitoriani; nikirikoo nanu te neserian, te nkaraki ilmang'ati laainei. Mikinchooyo nanu too lmang'ati laainei, amu aatudumakinote nanu ilchakenini le lejare, neipang'ipang ninche te ntorroni. Kairuk nanu ajo kadol esupatisho o Laitoriani, te ina kop oo looishu! Taanyu Olaitoriani; ntagoluoyu, nintagol oltau lino, ee, taanyu Olaitoriani! Iyie nanu aipoto Olaitoriani; endapidapoi ai, mikigirare nanu, amu ti nikigirare iyie nanu natiu anaa lelo oopuo aadoiki Engumoto. Toning'o oltoilo le sayiata ai, enkata naaishiraki nanu iyie te nkaraki eretoto, ina kata ailepie nanu nkaik aainei, aing'orie ewueji ino sinyati aisul. Mikiya iyie nanu te nebo larruok, te nebo lelo aasak loo ntorrok, ooiro eseriani te nebo lelo le latia enye, ore too ltauja lenye neeta entorroni. Ntalaa ninche te risioroto e siaai enye, o te risioroto oo nkiaasin e ntorroni enye, ntalaa ninche te risioroto e siaai oo nkaik enye, nchoo ninche olerrinyore oiririkino. Ore enkaraki meshilaa ninche isiaitin o Laitoriani, anaa esiaai oo nkaik enyena, kegil ninye ninche nemeigil ae kata ashetu ninche. Meisisi Olaitoriani, amu etoning'o ninye oltoilo le nkomono ai. Olaitoriani ninye engolon ai naa elong'o ai; ninye eisilig oltau lai; naataretuo ninye nanu, ore enkaraki ina neting'ide oltau lai, naa kaisho nanu ninye enashe to sinkolio lai. Olaitoriani ninye engolon oo ltung'ana lenyena, iyie enjeunoto nasaru ilo lenye otubukoki eilata aaput. Ntajeu iltung'ana linono, nimayian enjeunoto ino; laa iyie olchekut lenye ninap ninche ntarasi. Enchoo Olaitoriani enkisisa intae ntokitin pooki e shumata, enchoo Olaitoriani enkitoo o engolon. Enchoo Olaitoriani enkitoo e nkarna enye; enteserem Olaitoriani te nkishiaa e sinyatisho enye. Etii oltoilo lo Laitoriani shumata nkariak; etadara Enkai e nkitoo, Olaitoriani te shumata nkariak kumok. Kegol oltoilo lo Laitoriani, ebore oltoilo lo Laitoriani enkitoo. Egil oltoilo lo Laitoriani iltarakua egil Olaitoriani iltarakua le Lebanon. Keisho ninye Lebanon meipido anaa olashe, neipidie oldoinyo le Hormon anaa oloti oing'oni. Eeta oltoilo lo Laitoriani enkimerlel olng'ejep le nkima. Eikirikirie oltoilo lo Laitoriani olpurkel, eikirikirie Olaitoriani olpurkel le Kadesh. Oltoilo lo Laitoriani oibirunye ing'uesi, near entim aisiajayie, naa ti atua enkaji enye sinyati eishir pooki aajo, “Enkitoo!” Etonita Olaitoriani to lorika lenya le nkitoo te shumata nkariak; etonita Olaitoriani to lorika le nkitoo aaku olaiguanani ntarasi. Meishoo Olaitoriani engolon iltung'ana lenyena! Metamayiana Olaitoriani kulo tung'ana lenyena aisho eseriani! Kaaisis nanu iyie, iyie Olaitoriani, amu kitudumua iyie nanu ailepunye, neitu ncho ilmang'ati laainei aang'idakino. Iyie Olaitoriani Enkai ai, iyie nanu aishiraka pee kiretu, nikinchiunye iyie nanu. Olaitoriani, ilepunye iyie oltau lai aitupuku te nemeneng'a, nikirrinyoki nanu enkishui ti atua lelo ooshomo aadoiki Engumoto. Entaranyaki Olaitoriani enkisisa, intae isinyat lenyena, ninchosho enkisisa enkarna enye sinyati. Amu ore engoro enye naa enkata kiti, ore omom enye naa ene nkishui pooki. Eruko ilkiyio te nkewarie, kake ore tadekenya nelotu eng'ida. Ore nanu, atejo apa te nkitumurrunoto ai, “Maaiwuang'ieki ae kata nanu.” Ore enkaraki nanoto nanu omom te iyie, Olaitoriani, nikintagolo iyie nanu anaa oldoinyo; kisudorie iyie nanu enkomom ino, natum osina. Iyie nanu Olaitoriani aishiraka, naa Olaitoriani ayaka enkomono ai; “Kaa retoto eeta keeya ai, te nadoyio ajing Engumoto? Eikisis iyie enterit? Kelimu ninye esupatisho ino? Toning'oki, Olaitoriani, niking'urrie nanu! Olaitoriani, taa iyie Olaretoni lai!” Mbelekenya iyie enkishirata ai aitaa osinkolio le ng'ida; italaayie iyie ilkuniyiani laainei nikinchopoki nanu eng'ida, pee kitum oltau lai aisisa iyie nemegira. Olaitoriani Enkai ai, kaaisho nanu iyie enashe ntarasi. Ti atua iyie nanu Olaitoriani aing'oru esarunoto; mikincho iyie nanu maaitukurruni ae kata; ore te supatisho ino tokorduaki nanu! Irrugokoki nanu enkiok ino, tasaruaki nanu tasioki! Taa iyie endapidapoi nasaru nanu, osempewuet lajeunye nanu. Ee, ira iyie endapidapoi o sempewuet lai; ore te nkaraki enkarna ino torikoyioki nanu nikiutaa nanu, ntayioki nanu ti atua orreshet oisudoyioki te nkaraki nanu, amu ira iyie esarunoto ai. Nkaik inono nanu apik enkishui ai, kintajeuo iyie nanu Olaitoriani, na Ai oo sipat. Mba iyie lelo ooserem nkitanyaanyukot oo nkaitin, kake Olaitoriani nanu aisilig. Kang'ida nanu nashipa te nkaraki enyorrata ino nauno, amu itoduaa iyie osina lai, itoduaa iyie ilmang'ati laainei, neitu iyie kinchooyo nanu apik nkaik olmang'atinta; itipika iyie nkejek aainei ewueji nelala. Ing'urrieki nanu Olaitoriani amu atii atua osina; etimitari nkonyek aainei te nkaraki osina, o ltau lai o sesen lai sii. Amu eisha enkishui ai to sina, neishunye enkishui ai te nkishirata, eishunye engolon ai te nkaraki osina lai, netororonyate iloik laainei. Ataa nanu entoki nailapi too lmang'ati laainei, ataa enkitureisho too le latia ai, entoki naitureisho too lchoreta laainei; ore lelo laadol nanu te nkoitoi naaipirri aailany. Aiwuang'a nanu too ndamunot anaa oltung'ani otua; atotiuo nanu anaa entoki natebele. Ee, aning'ito nanu enking'oming'om oo lkumok - etii enkuretisho pooki shoto - aaiguanare ninche nanu pee eitayu enkishui ai. Kake iyie nanu aisiliga, Olaitoriani, atejo nanu, “Ira iyie Enkai ai.” Etii nkatitin aainei nkaik inono, tokorduaki nanu too nkaik oo lmang'ati laainei o lelo laaisilisil nanu! Nchoo enkomom ino meitawang'aki osinka lino; ntajeuoki iyie nanu te ina nyorrata ino nauno! Mikincho nanu aaitukurruni, amu iyie Olaitoriani nanu aipoto; nchoo ilo arruoni meitukurruni, nchoo ninche edoyio aapuo enemenenga. Nchoo nena kutukie e lejare metunukata, amu ninche naairo te ntorroni tialo ilo asipani, to lwuasa o te ng'ogong'i. Oi kebaa esapuko e supatisho ino, nirragakinye lelo likiure iyie, nintaas iyie lelo likipuonu aasaru, te dukuya nkera e tung'ana! Naa eisudoo iyie ninche te seriani e ine nitii, intaserian iyie ninche tiabori olchurie lino, te nkaraki nena kirorot torrok. Meisisi Olaitoriani, amu eitodolua ninye te nking'asia ina nyorrata enye nauno ti alo nanu, ina kata apa pee aaibung'i anaa enkanasa natang'aduaki aaman. Atejo nanu to lkirutoto lai, “Aaterewaki nanu aaitalamaa too nkonyek inono.” Kake itoning'o iyie esayiata ai, ina kata pee aaishiraki nanu te nkaraki eretoto. Entonyor Olaitoriani intae isinyat lenyena! Kegolie Olaitoriani lelo ooisiligayu, kake kelaaki te nkumoi lelo oas to lwuasa. Entagoluoto niminchosho iltauja linyi epalari, intae pooki oanyu Olaitoriani! Emayiana ilo otapalakaki ing'ok enyena, ilo oimulumulayioki ing'ok enyena. Emayiana ilo lemeikenaki Olaitoriani entorroni, laa ore atua enkishui enye metii elejare. Te neitu nanu alimu eng'oki ai aibalunye, neibiitiari osesen lai te nkaraki enkishirata ai e mion endama pooki. Amu ore te ndama o te nkewarie naa keiroishi enkaina ino te nanu; netoyu engolon ai anaa enainosa enkolong te nkata e nkirowuaj. Aaibalakinyie nanu iyie eng'oki ai te iyie neitu nanu aisudoo entorroni ai; atejo nanu, “Kairridu nkitarruorot aainei to Laitoriani;” nikitapalaka iyie esuujisho e ng'oki ai. Ore enkaraki ina, nchoo pooki ng'ae lo rrekie le Nkai, kiomon iyie. Ore te nkata o sina, o enang'unoto oo nkariak kituaak, nemebaiki ninye. Ira iyie ewueji enkisudoroto te nanu, eikigolie iyie nanu te ng'olikinoto nikintaman nanu enkordunoto. Kaaitaarriyian nanu iyie naaiteng'en enkoitoi niim. Kaaiguan nanu iyie etii nkonyek aainei shumata iyie. Mitiu iyie anaa embarta anaa enyumpu nemeeta ndamunot e ning'unoto, naa keeni te nkeene nepiki olgisoi pee eitoborri, naa te nemeikoni neijia nimikirukorukore ninye iyie. Eikumok nkitamiot naatum lelo torrok kake ore enyorrata nauno nemanita ilo oisilig Olaitoriani. Enting'idata ti atua Olaitoriani, nishipapa intae lelo supati, nibuakuku te ng'ida, intae pooki lelo sidain iltauja! Enting'idata ti atua Olaitoriani, intae lelo supati! Eishiaakino enkisisa lelo sidain ltauja. Esisa Olaitoriani to lwulul loo usin enterrep ninye to lkerempe te nkawuo oo sinkolioitin naata iusin tomon! Entaranyaki ninye osinkolio ng'ejuk, entoosh iusin enkinanta te nkarriyiano, too mbuakunot kituaak. Amu keitoriori ororei lo laitoriani; ore siaitin enyena pooki neasi te nkitoriori. Kenyor ninye esupatisho o esipata; ebore enkop pooki enyorrata nauno o Laitoriani. Ore to rorei lo Laitoriani neitobiruaki apa keper, o lorora lenye pooki te nkiyang'et e nkutuk enye. Neiturrur ninye nkariak e naiposha anaa enkare natii atua oltulet; nepik ninye enguton atua ilaleta oo shumishoreki. Nchoo enkop pooki eureyu Olaitoriani, nchoo lelo pooki oomanya enkop meitasho te nkanyit te dukuya ninye! Amu eiroro apa ninye, netabayie ina natejo; neitanapishe ninye, netuune ina. Eitaa Olaitoriani nkiguanat oo loshon pesho; neitukurru ninye nkitobirat oo loreren. Ore enkiguana o Laitoriani neitashe ntarasi, ore ndamunot o ltau lenye nebaiki iishoritin pooki. Emayiana ilo osho laa Enkai Olaitoriani lenye, ilo orere otegelua ninye aitaa enjung'ore enye! Eing'or Olaitoriani kop etii keper, nedol ninye nkera e tung'ana; ore etii ninye ine wueji e nkitoo neing'orisho, neing'or lelo pooki oomanya enkop, ninye ilo oitobirua iltauja lenye pooki, nejurru nkiaasin enye pooki. Meitajeuni olaiguanani te nkaraki enjore enye kitok; mejeu olmurrani te nkaraki engolon enye kitok. Pesho osiligi le mbarta o larrabal te nkisulata, ore te ngolon enye kitok nemeitajeusho. Ng'ura, etii enkong'u o Laitoriani shumata lelo ooure ninye, shumata lelo ooisilig enyorrata enye nauno, naa keidim ninye atokordu enkishui enye te keeya, nemeisho ninche eye te nkata o lameyu. Olaitoriani eanyu enkishui ai; ninye eretoto ang naa elong'o. Ee, keng'ida enkishui ang ti atua ninye, enkaraki nikisiliga iyiook enkarna enye sinyati. Nchoo ina nyorrata ino nauno, Olaitoriani, meeu shumata iyiook, anaa enikisilig iyiook iyie. Kaisis nanu Olaitoriani nkatitin pooki; etii enkisisa enye enkutuk ai anaake. Olaitoriani ninye eng'idare oltau lai, nchoo ilo oata osina ening neng'ida. Embalunye enkitoo o Laitoriani te nebo nanu, nikirrep enkarna enye te nebo! Aing'orua nanu Olaitoriani naawaliki ninye, naakordu ninye nanu te nkuretisho ai pooki. Eng'ura ninye pee iwang'ung'u; nemeitoki ae kata enkurruna atii nkomomi inyi. Eishira ele tung'ani aisinani, nening Olaitoriani ninye, neitajeu Olaitoriani ninye aitung'uaa ingolikinot enyena pooki. Keman olmalaika le Nkai aitushur lelo pooki ooure ninye, nekordu ninche. Wootu enchamishama pee idolidolo aajo eisupat Olaitoriani! Emayiana ilo tung'ani osaru ninye! Entureita Olaitoriani intae isinyat lenyena, amu ore lelo ooure ninye nemeng'oriki toki! Keng'oriki nkiyioitin olng'atuny netum esumash, kake ore lelo ooing'oru Olaitoriani nemelau ntokitin sidain. Wootu, na kera, entoning'oki nanu, kaiteng'en nanu intae euriata o Laitoriani. Kalo tung'ani te kuldo oyieu enkishui, neng'uar nkolong'i kumok pee etum atishipakinoyu isupati? Ntalama olng'ejep lino entorroni, nimincho enkutuk ino eiro elejare. Talama entorroni nias isupati, ing'oru eseriani, nisuj ninye. Eing'orita nkonyek o Laitoriani lelo supati, neinining'ito nkiyiaa enyena enkishirata enye. Keiba enkomom o Laitoriani lelo oas ntorrok, neiwuang'ie ninche meitokini aadamu te nkop. Te neishir oltung'ani supat te nkaraki eretoto, nening Olaitoriani, nekordu ninye ninche aitayu ti atua enyamali enye pooki. Ketaaniki Olaitoriani lelo ootigilate ltauja, neitajeu ninye lelo ooisha osiligi. Eikumok isinaitin le ilo supat, kake kekordu Olaitoriani ninye aitung'uaa te pooki. Negolie iloik lenyena pooki; meisho ninye metigilayu obo. Kear entorroni ilo arruoni; ore lelo ooiba o supat nedung'okini enkiguana. Kekordu Olaitoriani enkishui oo sinkan lenyena, meetae obo le lelo oosaru ninye otum oldeket. Olaitoriani tigilunore, lelo laagilunore nanu; taarare lelo laarare nanu! Tudumu elong'o ino o emasaai ino o larrabal, taretuoki nanu! Ntayu empere ino taarare lelo laasujita! Tiaaki oltau lai, “Ara nanu ilo likikordu!” Nchoo meitukurruni neitadouni lelo ooing'oru enkishui ai! Nchoo meibelekenyata ninche nekurru lelo ooiguanu entorroni te nkaraki nanu! Ntotiwuo ninche anaa suut naakutita osiwuo, ereuta olmalaika lo Laitoriani ninche! Nchoo emisimisu enkoitoi enye neideketu, esujita olmalaika lo Laitoriani ninche! Amu ore metii emporeet neisudoo ninche irresheta lenye te nkaraki nanu; ore metii emporeet netuturo ninche engumoto te nkaraki enkishui ai. Nchoo ninche metaluama enkidaata! Naa nchoo ilo rreshet oisudoitie ninche meibung'a ninche; nchoo ninche metadoiki enkidaata! Keng'idakino oltau lai Olaitoriani, neshipakino enjeunoto enye. Nejo iloik laainei pooki, “Iyie Olaitoriani, kaing'ae likinyaanyukie, iyie okordu ilo omena aitajeu aitung'uaa ilo ogol oleng alang ninye, nintajeu ilo oshal naa aisinani aitung'uaa ilo oitorogony ninye?” Etudumunye ilchakenini le lejare; naaikilikuan ninche mbaa nemayiolo nanu. Naalaaki ninche ntorrok too supati naitaasa ninche, etalepori oltau lai. Kake ore nanu, enkata namuei ninche - naishop ilkuniyiani, naitame kewan te enata e mpukoroto naomon nanu eirruge elukunya ai abaiki olgoo natiu anaa oltung'ani oishiraki olchore anaa olalashe; namanimanaa anaa oltung'ani oishiraki ng'otonye, nairrugo te nkishirata o sina. Kake ore te rrorroto ai neiturrurro ninche aashipa, naaiturrurrokino aagilunore ilmaiman lemayiolo, naasukeny ninche metii enkiyagata; neinosisho ninche too nkala pee etum aatakuenia too siruai, neony ninche ilala lenye te nkaraki nanu. Kenkata nabaa Olaitoriani iton iyie aing'or? Tokorduaki nanu te rasakinoto enye, tokordu enkishui ai te lelo ng'atunyo! Naa kaaisho nanu iyie enashe ti atua eumata kitok; ore ti atua olorora kitok naaisis iyie. Mincho lelo mang'ati laainei eng'ida te nkaraki nanu, nimincho lelo ooimul nkonyek laaiba nanu pesho. Amu meiro ninche ine seriani, kake lelo oobor te nkop egilunore neipiru ninche irorei le lejare. Naaboloki ninche nkutukie enye aagilunore; nejo ninche, “Aha, Aha! Etoduaa nkonyek ang!” Olaitoriani, itoduaa iyie, migira! Olaitoriani, mikilam iyie nanu! Tuputunye, tudumunye te nkaraki esipata ai, te nkaraki ewalata ai, Enkai ai naa Olaitoriani lai! Nguanareki nanu, Olaitoriani, Enkai ai, te risioroto e supatisho ino; nimincho ninche eng'ida te nkaraki nanu! Mincho ninche ejokino maate, “Aha, kinoto iyiook eyieunoto oo ltauja lang!” Mincho ninche ejo, “Kitoijoitie iyiook ninye.” Nchoo ninche meitukurruni nepiki olmilo te nebo, lelo oong'ida te nkaraki enyamali ai! Nchoo ninche meishopokini enkurruna o esulare lelo oojukaa ate laaitainore! Nchoo lelo oong'uar esupatisho ai metabuaku te ng'ida, neshipa, nejo ntarasi moitie, “Eikitok Olaitoriani, neshipakino ninye eseriani o sinka lenye!” Netum taa olng'ejep lai atolimu esupatisho ino o enkisisa ino endama pooki. Ore enkarruoisho neiro ti atua ilo arruoni, te nguton o ltau lenye; metii euriata e Nkai dukuya nkonyek enyena. Amu keikoroj ninye kewan nchere meyiolouni entorroni enye neibayuni. Ore rorei le nkutuk enye naa ntorrok o lejare; meekure ninye easisho te ng'eno neas isupati. Ntorrok edamu ninye te ndapash enye; nepik ninye kewan enkoitoi neme sidai; nemeiturraa entorroni. Ore ina nyorrata ino nauno, Olaitoriani, nelo abaiki shumata, ore esupatisho ino nelo abaiki nkatampo. Etiu esupatisho ino anaa ildoinyo le Nkai, eikununo nkiguanat inono anaa enguton kitok; Olaitoriani, iyie oitajeu oltung'ani o eng'ues. Kebaa esidano e nyorrata ino nauno, iyie Enkai! Oloip loo naipuko inono esaru nkera e tung'ana. Nedaa ninche te nena naabore enkaji ino, nincho iyie ninche entoki naok te ilo keju lino le ng'ida. Amu iyie etii enkong'u e nkishui; te wang'an ino iyiook kidol ewang'an. Nchoo ebikoo ina nyorrata ino nauno te lelo likiyiolo iyie, nebikoo enjeunoto ino te lelo loo ltauja sidain! Mincho enkeju e lelo oowuasa meeu shumata nanu, nimincho enkaina e ilo torrono aarrumoo nanu. Eirrabalakinote lelo arruok e nkop, etanang'ieki enkop nemeigil aadumunye. Ming'aing'ai te nkaraki ilo torrono, niming'uar lelo aasak loo ntorrok. Amu kesioki ninche aaishunye anaa nkujit, netiu anaa mbenek naatoito. Isiliga Olaitoriani nias esidai; pee itum atobiko tena kop, nitum eseriani. Tishipakinoyu Olaitoriani, naa aikincho ninye iyieunot o ltau lino. Tipika nkoitoi inono Olaitoriani; isiliga ninye, amu eikintaas ninye. Amu keibalunye ninye esipata ino anaa ewang'an, o enchunet ino aitotiu anaa dama. Ntirring'ayu te dukuya Olaitoriani, nianyu ninye te ng'iriata; ming'aing'ai te nkaraki ilo odupoyu te nkoitoi enye, te nkaraki ilo tung'ani olo too nkoitoi enyena oo nkitobirat torrok! Talama engoro ninturraa eserserisho! Mintanyamal kewan, amu entorroni ake eyau ina. Amu ore ilo torrono naa kedung'ori; ore lelo oanyu Olaitoriani naa kejung ina kop. Kake ore te nkiti rishata, nemeitoki ilo torrono atii; ore ninye te ning'oru oleng te wueji enye, metii ninye ine. Kake ilo obor olo ajung enkop, neshipakino ninche ina kumoi e dupoto. Kepik ilo torrono orreshet ilo supat, neony ilala te nkaraki ninye; kake kekueniye Olaitoriani te nkaraki ilo torrono, amu edolita ninye nchere kelotu enkolong enye. Etushututua ilarruok ilalema lenye neyietu nkai enye, pee ear metuata lelo aisinak oomena; kejing ilalema lenye atua iltuaja lenye maate, ore nkai enye naa kegila. Eikash enkiti toki naata oltung'ani supat alang nkumok o ltung'ani torrono. Amu kegili nkaik e ilo torrono; kake egolie Olaitoriani ilo supat. Eyiolo Olaitoriani nkolong'i e ilo lemeeta entioto; ore enjung'ore enye nebikoo ntarasi; meitukurruni ninche too nkatitin e ntorroni, ore too nkatitin o lameyu neeta ninche enkiputakinoto. Kake keidak ilo torrono; ore lelo mang'ati lo Laitoriani neikununo anaa olari loo nkujit, keish ninche - ore anaa empuruo keishari ninche. Keisilenisho oltung'ani torrono, nemelak ninye esile, kake keleng ilo supat neishooyo; amu ore lelo ootamayiana Olaitoriani naa kejung enkop, ore lelo ootediaa ninye naa keiwuang'ieki. Olaitoriani eing'uaa iroruat e tung'ana naa keitubul ilo oitiship enkoitoi enye; ore ninye te nebatata nemepetikino enkop amu Olaitoriani oibung enkaina enye. Ara apa nanu oti, nara taata moruo; ore ake eyia, eitu nanu adol oltung'ani supat eiturrayioki anaa eomonu nkera enyena endaa. Keeta ninye olng'ur anaake neishooyo te sile, ore nkera enyena neaku emayianata. Talama entorroni, nias esidai; pee itum atobikoi ntarasi. Amu kenyor Olaitoriani esupatisho; meiturraa ninye lelo sinyat lenyena. Kegolieki ilo supat ntarasi, kake ore nkera e ilo torrono naa keiwuang'ieki. Ilo supat olo ajung enkop, nemany ina kop ntarasi. Ore enkutuk e ilo supat neiro ine ng'eno, neiro olng'ejep lenye isipat. Netii enkitanapata e Nkai enye atua oltau lenye; nemeideketari too roruat enyena. Ore ilo torrono nejurru ilo supat, neing'oru eneiko pee ear ninye metua. Mepalaa Olaitoriani aisho meshomo ajing engolon enye, aashu eisho metudung'oki ninye enkiguana te neyauni aaiguanare. Taanyu Olaitoriani nimbung nkoitoi enyena, amu eikincho ninye esipata nilo ajungie enkop; naa ilo iyie aing'or enkidaata e ilo torrono. Atoduaa nanu oltung'ani torrono te ntorroni enye, nebul netiu ninye anaa oltarakuai le Lebanon. Najo nanu agiroo, ng'ura meekure etii; ore hoo natejo nanu aing'oru, meekure etumi. Tisipu tujurru ilo tung'ani supat, ning'or ilo oitoriori nkoitoi enyena, amu ore enkiting'oto e ilo tung'ani naa eseriani. Kake ore lelo agilak loo nkitanapat naa keidaikieki pooki te nebo; ore ilnganayio le ilo torrono naa kedung'ori. Ore enjeunoto e ilo supat naa Olaitoriani eing'uaa; ninye esarunoto enye te nkata e engolikinoto. Olaitoriani oretu ninche nekordu ninche; nekordu ninche te ilo torrono, neitajeu ninche; enkaraki natasarutua ninche ninye. Iyie Olaitoriani, mikisikong nanu te ngoro ino, nimikintame nanu te mpijan e ngoro ino! Amu aaibitakinote nanu mbaa inono, naatadoikio nanu enkaina ino. Metii embiotisho atua osesen lai, te nkaraki engoro ino; metii embiotisho iloik laainei te nkaraki eng'oki ai. Amu eshomo ntorrok aainei aalus te ndukuya ai; olola oiroishi oleng ninche te nanu. Eirrokirrok ilbaa laainei netong'ueita aasioki, te nkaraki emodai ai, airruge nanu oleng abaiki enkop; nalo nanu aishirita endama pooki. Amu eiputa empolos ai emion, nemetii embiotisho osesen lai. Aidaayie nanu natarrarre, nayietu aishir te nkaraki emion o ltau lai. Olaitoriani, iyiolo iyie eyieunoto ai pooki, nemeisudoro emion ai te dukuya iyie. Keitiko oltau lai, neishunye engolon ai; ore ewang'an oo nkonyek aainei - neishunye sii te nanu. Ore ilchoreta laainei o encholuek ai, naaitashe aalam to lmeitai lai, ore iltung'ana lang le mudung neitashe te nelakua. Ore lelo ooing'oru enkishui ai neirragie aaitolok irresheta lenye, ore lelo ooing'oru enkitamioto ai neiro ine nkidaata, neibirribir ninche elejare endama pooki. Kake atiu nanu anaa oltung'ani ming'ani, maning'isho nanu, atiu anaa oltung'ani otoonye olng'ejep lemeidim airoro. Ee, aikununo nanu anaa oltung'ani ming'ani lemetii enkutuk enye ilomon torrok. Amu iyie Olaitoriani nanu aanyita; iyie Olaitoriani Enkai ai likiwaliki. Amu aatoomono, “Mincho ninche meting'idata te nkaraki nanu, lelo ooitokoos ti atua nanu te neideketari enkeju ai!” Amu etaa nanu kabatata, neton ake aata emion ai. Aibalunye nanu entorroni, aainosua nanu eng'oki ai. Ore lelo mang'ati laaiba nanu metii emporeet, naa eimagil, naa ilkumok laaiba nanu too mbaa nemesipa. Ore lelo laalaaki nanu too ntorrok aitaasa nanu ninche isupati, naa ilmang'ati laainei te nkaraki nasujita isupati. Miking'uaa nanu iyie Olaitoriani! Iyie Na Ai, mikilam nanu! Taretuoki nanu tasioki, iyie Olaitoriani, enjeunoto ai! Atejo nanu, “Kagolie nkoitoi aainei, pee maas eng'oki to lng'ejep lai; kaen nanu enkutuk ai, enkata naba anaa enatii iltorrok ewueji natii nanu.” Atunuke nanu agira, naitirring'a nanu eitu ajo ae, neponari emion ai, neirowuaju oltau lai ti atua nanu. Ore anaa enadamisho, neyupuyup enkima; nairo nanu to lng'ejep lai: “Olaitoriani, ntayioloki nanu enkiting'oto ai, o eneikununo enkikenata oo nkolong'i aainei; ntayioloki nanu enkisarrisar e nkishui ai! Ng'ura, ntaba iyie nkolong'i aainei anaa nkuti temat e ndap e nkaina, ore nkolong'i e nkishui ai naa pesho too nkonyek inono. Esipa keitashe pooki tung'ani aa enkijape ake! Esipa, kemanimanaa oltung'ani aa oloip ake! Esipa, enepesho ake enkuretisho enye; eiturrurrisho tung'ani nemeyiolo ololo asotu! Naa amaa, taata, Olaitoriani, Kainyoo nanu aanyu? Atua iyie etii osiligi lai. Tokorduaki nanu matung'uai nkitarruorot aainei pooki. Mikintaa nanu olorojareki te lelo oomoda! Atigire nanu, mabol enkutuk ai; amu iyie otaasa ina. Iwuang'ie eoshoto ino te nanu; aisha nanu te oshoto e nkaina ino. Ti nintame iyie oltung'ani te nkisikong'ata oo ng'ok, nintotiu anaa entoki nainosa oriri ina kirotet te ninye; esipa ore pooki tung'ani naa enkiyang'et ake! Toning'o enkomono ai, Olaitoriani, nining olkiyioi lai migirare ilkiyio laainei! Amu ara nanu olomoni lino olo, nara olalotoni anaa loo papa pooki. Miking'ode nanu, pee atum atayiolo enchipai, eton eitu alo nemaitoki atii.” Ataanyua nanu Olaitoriani te ngiriata; naairrugokino ninye nening enkomono ai. Aaitayio ninye nanu ti atua engumoto e ntorroni, ti atua oloonyionyi le sarng'ab, neitasheyie nkejek aainei te nchumata e ndapidapoi, neitaserian nkejek aainei. Nepik osinkolio ng'ejuk enkutuk ai, osinkolio le nkisisa te Nkai ang. Kepuo ilkumok aadol neureishoyu, nepik osiligi lenye Olaitoriani. Emayiana oltung'ani oitaa Olaitoriani osiligi lenye, ilo tung'ani lemeibelekenyakino lelo oowuasa, alo enetii lelo oopong'ori esujaa nkaitin oo nkitanyaanyukot! Itoponayie iyie, Olaitoriani Enkai ai, nkiaasin inono e nking'asia o ndamunot inono ti alo iyiook; meetae olikinyaanyukie iyie! Tenaa napaji kaibalunye alimu ninche, naa eikumok oleng meikenayu. Ming'uar iyie ilasarri o nkishorot; kake kinchoo iyie enkiok naning'isho Ore lasarri oopejori o lasar loo ng'ok eitu iyie ing'uar. Najo nanu, “Ng'ura aeuo; ore to lpiyayati le mbuku nesira inaaipirare nanu: Kang'ida nanu aas eyieunoto ino, Na Ai; etii enkitanapata ino atua oltau lai.” Atolikioyie nanu ilomon supati le nkordunoto ti atua eumata sapuk; ng'ura, eitu nanu agira, anaa eniyiolo iyie, Olaitoriani. Eitu nanu aisudoo ina retoto ino naitajeusho ti atua oltau lai, atolimuo nanu esupatisho ino o enjeunoto ino; eitu nanu anuk ina nyorrata ino nauno o esupatisho ino, aaibalakinyie nanu te umata sapuk. Mimbooyo iyie Olaitoriani olng'ur lino ti alo nanu, nchoo ina nyorrata ino nauno o esupatisho ino aagolie nanu anaake! Amu aatamuata nanu ntorrok nemeikenayu; aaidimutua nanu ntorrok aainei, o metaba anaa neaku meekure aidim atodolisho; eikumok ntorrok aainei aalang ilpapit te ndukuya ai, netalepori oltau lai. Tonyorrai, Olaitoriani, tokorduaki nanu! Olaitoriani, taretuoki nanu tasioki! Nchoo ninche meitukurruni nipik olmilo te nebo, lelo ooing'oru pee eiwuang'ie enkishui ai; nchoo ninche meibelekenyi neitadouni lelo ooing'oru pee aainyal! Nchoo meirriang'ieki ninche te nkaraki enkurruna enye, lelo laajoki nanu, “Aha, Aha.” Kake ore lelo pooki liking'oru iyie nchoo eng'idayu neshipa ti atua iyie; nchoo lelo pooki oonyor enjeunoto ino emooki aajo, “Eikitok Olaitoriani!” Ore nanu, kara aisinani namena, kake Olaitoriani laagolie. Ira iyie eretoto ai olakordunoni lai; mimutie iyie, na Ai ai! Emayiana ilo oiken olaisinani! Kekordu Olaitoriani ninye te nkolong e nyamali; kemitu Olaitoriani ninye neitopok; keji olomayiana te nkop; minchooyo iyie ninye apik eyieunoto oo lmang'ati lenyena. Keitagol Olaitoriani ninye te ndapash enye; ore te muoyian enye ninchiunye iyie pooki leyiata. Ore ti alo nanu, atejo, “Olaitoriani, ing'urrieki nanu; nchiunyeki nanu, amu ataasa nanu eng'oki ti alo iyie!” Eiro ilmang'ati laainei entorroni tialo nanu, ejo, “Kanu kenya eye ninye, pee eish enkarna enye!” Naa te naalotu oltung'ani aduaare neiro ninye irorei le pesho, nesot ntorrok to ltau lenye; ore pee eipang alo neidapashaki enkop pooki. Ore lelo pooki laaiba nanu neing'oming'om te nebo aaimaki nanu; nemusu ninche ntorrok ti alo nanu. Nejo ninche, “Etijing'a ninye entaboi; meekure ae kata edumunye te ine neirragie.” Ore ninye olchore lai lo ltau apa laisiliga nanu, oshi ooinos endaa ai, naatudumakine ninye nanu. Kake ing'urrieki iyie, Olaitoriani, tudumuaki nanu, pee atum aitalaku elap te ninye! Tena nanu ayiolou nchere, eikishipakino iyie nanu, nchere eitu eisulu olmang'atinta lai te nanu. Kimbung'a iyie nanu te nkaraki naas isupati, nikipik nanu dukuya ino ntarasi. Meisisi Olaitoriani, Enkai e Israel, ntarasi o ntarasi! Esai o Esai. Ore anaa enayieu enkoilii enkare naruko neijia etiu oltau lai, kiyieu iyie, Enkai. Eeta oltau lai enkure te nkaraki Enkai, Enkai naishu. Kanu kenya alotu aing'or enkomom e Nkai? Etaa ilkiyio laainei ninche endaa ai dama o kewarie, aajoki nanu iltung'ana anaake, “Koree Enkai ino?” Te nadamu nanu kuna baa nelepori oltau lai ti atua nanu, amu ashomo nanu arikoo olorora nikipuo e nkaji e Nkai, too mbuakunot e nchipai o sinkolioitin le nashe, neitobir ilo orora osirua. Kainyoo pee itapalari iyie, lo tau lai, naa kainyoo pee itanyamala iyie ti atua nanu? Isiliga Enkai; amu kaitoki ake aisis ninye, ninye eretoto ai naa Enkai ai. Etalepori oltau lai ti atua nanu, ore enkaraki ina kaadamu nanu iyie, ebaiki enkop e Yordan o ene Hermon, ebaiki oldoinyo le Misar. Eishiraka enguton e nguton te mbuakunoto oo nkariak inono; ore ndoorot oo nkariak o lopir le nkare naaitemoitie nanu. Ore tendama neitanap Olaitoriani enyorrata enye nauno, ore te nkewarie netii osinkolio lenye te nebo nanu, enkomono e Nkai e nkishui ai. Atiaaka nanu Enkai, endapidapoi ai, “Kainyoo pee mikidamu nanu? Kainyoo nanu pee alo aishirita, te nkaraki enkitorogonyata naaitorogony olmang'atinta?” Etotiutuo anaa ilbaa torrok to sesen lai, imorot oo lmang'ati laainei, aajoki ninche anaake, “Koree e Nkai ino?” Kainyoo iyie pee itapalari, lo tau lai, naa kainyoo iyie pee itigire ti atua nanu? Isiliga Enkai, amu kaitoki ake aisis ninye, eretoto ai naa Enkai ai. Mbalie na Ai nchere maata entorroni nikimitu nanu. Ttokorduaki nanu too lalejak o te lelo lemeitoriori! Amu ira iyie Enkai naa ninye nanu asaru; Kainyoo iyie pee kinturrayie nanu? Kainyoo nanu pee alo aishirita, te nkaraki enkitorogonyata o lmang'atinta lai? Oi irriu ewang'an ino o esipata ino; nchoo ninche maatorikoi nanu, nchoo ninche maatoriku nanu ilo doinyo lino sinyati o emanyisho ino! Pee atum nanu ashomo olperere lo lasar le Nkai, alo enetii Enkai naa ninye eng'ida ai nadooyo; naa kaalo nanu arrep iyie te nkinanta na Ai, Enkai ai. Kainyoo iyie pee itapalari lo tau lai, naa kainyoo iyie pee itanyamala ti atua nanu? Isiliga Enkai, amu kaitoki ake aisis ninye, eretoto ai naa Enkai ai. Kitoning'o iyiook too nkiyiaa ang, iyie Enkai, etolikitio iyiook iloo papa, nena kiaasin apa nitaasa iyie too nkolong'i enye, apa moitie: iyie makewan oturrumoyie iloshon te nkaina ino, kake ntubula olorere lino; nipik iloreren osina, kake nchoo olorere lino etoni te seriani; amu mme to lalem lenye apa eisulie ninche ena kop, neme enkaina enye maate naishoo ninche metimirisho; kake enkaina ino e tatene, ee enkaina ino, o ewang'an e nkomom ino; amu itishipakine iyie ninche. Ira iyie Olaiguanani lai o Enkai ai, naa iyie oisho Yakobo metimirisho. Te iyie iyiook kisulie ilmang'ati lang; te nkarna ino iyiook kintunyoo lelo oogilunore iyiook. Amu mme enkawuo ai nanu aisilig, nemaaidim olalem lai aitajeu. Kake ntajeuo iyie iyiook too lmang'ati lang, nitipika olmilo lelo ooiba iyiook. Enkai kiting'idare iyiook anaake, naa eikinchooyo enashe te nkaraki enkarna ino ntarasi. Ore ake eyia, nturrayie iyie iyiook nintadou iyiook, neitu iyie ilo airiamariyie njorin ang. Nchoo iyie iyiook maibelekenyata aailany ilmang'ati lang; ore lelo mang'ati lang neibung aaraya masaa ang. Ntotiuo iyie iyiook anaa ntare naayieng'i, nindapashaka iyiook iloreren. Itimira iltung'ana linono neitu inosie toki, eitu iyie ing'oru enkinyang'a nagol te nkaraki ninche. Itipika iyie iyiook elap too lmang'ati lang, neikoroj neyiet iyiook lelo oomanita iyiook. Ntaa iyie iyiook endung'et e rashe ti atua iloreren, entoki nakueniyieki ti atua iloshon. Ore endama pooki netii esulare ai dukuya nanu, neimulumula enkurruna enkomom ai, te nkaraki irorei le ilo oikordodisho nemorisho, te nkaraki ilo mang'atinta o ilo oitalaku elap. Eetuo kuna pooki shumata iyiook, hoo neitu kipal mikidamu iyie, neitu kipong'ori to lning'o lino. Eitu eibelekenya iltauja lang, neitu elam iroruat ang enkoitoi ino, nitigiligila iyiook ti atua ewueji oo mbariak, nimulumul iyiook te naimin namisimis. Amaa naaji te naa ketorikine iyiook enkarna e Nkai ang, anaa eikintoriokitio nkaik ang enkai omoni, aimeirrash Enkai ena? Amu eyiolo ninye nkisudorot o ltau. Ee, te nkaraki enkorrok ino pee eari iyiook endama pooki, neikoni iyiook anaa nkerra naayieng'i. Tuputunye! Minturraa iyiook ntarasi Kainyoo pee irura, iyie Olaitoriani? Tudumunye, minturraa iyiook anangaki enelakua. Kainyoo iyie pee isudoo enkomom ino? Kainyoo iyie pee kitorikine osina lang o enkitorogonyata ang? Eirrugote iltauja lang aabaiki enkop; eirragita iseseni lang te nkop. Tudumunye, wou taretu iyiook! Tokordu iyiook te nkaraki ina nyorrata ino nauno! Eiputa aadooyo to ltau lai ilomon supati; naliki nanu olaiguanani irorei lo sinkolio lai; eikununo olng'ejep lai aanaa enkalamu o lasirani arriyia. Ira iyie sidai too nkera e tung'ana; etubukokoki empiris enkutuk ino; ore enkaraki ina, kitamayiana Enkai ntarasi. Teena olalem lino to mpolos ino, iyie ele magilani, ti atua enkitoo ino o enkishiaa! Ore te nkishiaa ino shomo isula te nkaraki esipata nimitu ilo asipani; nchoo enkaina ino e tatene mikinteng'ena nkiaasin naaitureisho! Kepi mbaa inono, netii atua iltauja loo lmang'ati lo laiguanani, nebatata iloreren ti abori iyie. Ore ilo orika lino le nkitoo, Enkai, nebikoo ntarasi o ntarasi. Ore ina ng'udi ino e nkitoria naa eng'udi oo sipat; inyor iyie esupatisho nimba enkarruoisho. Metaa ore Enkai, ina Ai ino kitubukoko eilata aput teina ilata e ng'ida nikintulusoo too lchoreta linono ore ilkilani linono neitorropili te nkorropil o too sonkoyoni, o erropili o sinantei ore ti atua nena ajijik e nkitoo oo lala loo lkanchaoni, netii nkinantani oo usin nikintishipieki iyie; ore ntoyie oo laiguanak netii te nebo nena kituaak inono naayanyiti; ore te nkaina ino e tatene neitashe enkaiguanani eishopito sahabu naing'uaa Ofir. Toning'o, iyie na tito, tadamu, nirrugu enkiok ino; nchoo kirikino olorere linyi o enkaji e papaai lino, pee etum olaiguanani atishipakinoyu enkishiaa ino. Ore amu olkitok lino ninye, irrugokinoyu ninye; ore iltung'ana le nkop e Turo neyau nkishorot, lelo karsisi aalang iltung'ana pooki, eeta enkarsisisho oo mpukunot pooki. Eikodoki entito o laiguanani to lgilata lenye te nkaji e nkitoo, too ilkilani lenyena ooripuno too usin e sahabu; ore etukuse too lkilani loo muain kumok, nerikokini olaiguanani, te nebo nena selenken naairukurukore ninye. Nerikuni ninche te nchipai o te ng'ida, ina kata ejing atua ina aji e nkitoo o laiguanani. Ore te rishata oo loo papaai linyi naa keaku ilayiok linono; naa ilo iyie aitaa ninche kituaak te nkop pooki. Kaisho nanu enkarna ino metoning'oyu too ishoritin pooki, metaa eikisis iyie iloreren ntarasi o ntarasi. Enkai osempewuet lang naa engolon ang, eretoto nataana ninye te nkata e nyamali. Ore enkaraki ina mikiureisho hoo duoo ninye tenaa keibelekenya enkop, hoo duoo ninye tenaa keikirikira ildoinyo te mpolos e naiposha; hoo tenaa keikurrukur nkariak e naiposha neitayu labur, hoo tenaa keikirikira ildoinyo te nkaraki olarrabal. Etii olkeju oitiship nchorroi enyena enkanasa o Laitoriani, ina manyisho sinyati e ilo Otii Shumata Aisul. Etii Enkai atua ina anasa, nemeigusugusieki ninye; keretu Enkai ninye tadekenya. Etagorote iloshon, neikirikirate nkitoriat; neiro ninye to ltoilo lenye, neshola enkop. Etii Olaitoriani loo lororani te nebo iyiook; Enkai e Yakobo ninye esarunoto ang. Wootu eng'ura isiaaitin o laitoriani, eneikuna ninye pee eitomijoon e nkop. Ninye oishie ilarrabali o metabaiki ineeiting'ie enkop; ninye ogil enkawuo nedot empere, nepejoo ngarrin oo mbartan te nkima! “Ntirring'ayu, niyiolou nchere nanu Enkai. Ara nanu kitok ti atua iloshon, aaitaaki nanu kitok te nkop!” Etii Olaitoriani loo lororani te nebo iyiook; Enkai e Yakobo ninye esarunoto ang. Entoosh nkaik, te ng'ida lo oreren pooki! Esisa Enkai too mbuakunot oo sinkolioitin. Amu ore Olaitoriani, ilo Otii Shumata Aisul, naa keitureisho, ninye olaiguanani kitok te nkop pooki. Ninye oyau iloshon apik abori iyiook, nepik iloreren abori nkejek ang. Ninye otegelaka iyiook enjung'ore ang, ina kishiaa e Yakobo otonyorra ninye. Eilepa Enkai shumata te mbuakunoto, etii Olaitoriani te mbuakunoto e ntarumpeta. Entaranyaki Enkai enkisisa, entarany enkisisa! Entaranyaki Olaiguanani lang entarany enkisisa! Amu Enkai olaiguanani le nkop pooki; entarany enkisisa to lkerempe! Enkai naitoreisho loo loreren; etonita Enkai to lorika lenye le nkitoo sinyati. Eiturrurrote ilkituaak loo loreren anaa iltung'ana le Nkai e Abraham. Amu ine Nkai ilong'oi pooki e nkop; neishori ninye enkitoo sapuk! Eikitok Olaitoriani naa keisisi ninye oleng ti atua enkanasa e Nkai ang! Te ilo doinyo lenye sinyati sidai te nkadoro enye, naa ninye eng'ida e nkop pooki. Etii oldoinyo le Sion enelakua te moikuape, ina anasa o laiguanani kitok. Ore ti atua nkajijik enyena neitodolua Enkai kewan nchere ninye omitu. Amu ng'ura, eiturrurrote laiguanak, nepuonu te nebo. Ore ake pee edol ninche ina, neing'asia, neirut ninche, nedumunye aaisik; neibung ninche olokirrikir te ine, o emion neeijo ene nkitok nasaisai. Ore to siwuo le nkilepunoto e nkolong nigil imelin e Tarshishi. Ore anaa enikitoning'o, ina kitoduaa iyiook ti atua enkanasa o Laitoriani loo lororani, ti atua ina anasa e Nkai ang, apa naitasheyie Enkai ntarasi. Kitadamutua iyiook te ina nyorrata ino kitok, Olaitoriani, te mpolos e nkaji ino. Ore anaa enatiu enkarna ino, na Ai, neijia etiu enkisisa ino, elo abaiki ineeiting'ie enkop. Neeta enkaina ino e tatene enkisulata; nchoo oldoinyo le Sion eng'idayu! Nchoo nena toyie e Yuda eng'idayu te nkaraki nkiguanat inono! Shomo tamanai te Sion, shomo tamana ninye, nkena iltaleta lenyena, entadamu entisipu isunta enyena o nkajijik enyena, pee itumutumu aatiaaki eishoi nasuju, nchere Enkai ena, ninye Enkai ang ntarasi o ntarasi. Ninye oaku olarikoni lang ntarasi. Entoning ena lo oreren! Enchoru nkiyiaa, intae pooki oomanya enkop, o liabori o le shumata, o lkarsis o laisinani te nebo! Keiro enkutuk ai ine ng'eno nagut; ore nkibirribirrat o ltau lai naa keaku eyiolounoto. Kairrugoki nanu enkiok ai endung'et e rashe; nawalu nanu oloyiote lai te oshoto e nkinanta. Kainyoo nanu pee aureisho te nkata e nyamali, te naaman nanu entorroni oo laisilisilok laainei, lelo tung'ana ooisilig karsisisho enye, neitokoos te nkaraki enkumoi oo masaa enye? Esipa meetae oltung'ani okordu kewan, anaa oloisho Enkai enkinyiang'a e nkishui enye, amu ore enkordunoto e nkishui enye naa kegol, nemeidimi ae kata aainyiang'u, pee etum oltung'ani ataa keishu ntarasi, nemejing ae kata Engumoto. Ee, kedol ninye nchere, ekeye sii ninye ilo ng'en, ore ilo modai o lkiminchali naa keidak te nebo neing'ueiki ina arsisisho enye ilkulikae. Nkuraren enye ninche nkang'itie enye ntarasi, ninche imanyishoritin enye ti atua iishoritin pooki, hoo neipot ninche nkuapi aajo nkunenye. Mebikoo oltung'ani te nkitoo enye, eikununo ninye anaa eng'ues naidaaya. Ena enkoitoi e lelo oomoda, enkiting'oto e lelo ooshipakino erubata enye. Etiu ninche anaa ntare naayae enemeneng'a, neaku keeya olchekut lenye; neitoriori ninche aadoiki Engumoto, ore esidano e nkitobirunoto enye neidaaya aish; neaku enemeneng'a enkang enye. Kake kekordu Enkai enkishui ai aitung'uaa engolon e Nemeneng'a, amu kaang'amu ninye nanu. Mirut iyie te neaku oltung'ani karsis, te neponari enkitoo enkaji enye. Amu te neye ninye nemenap toki, melo enkitoo enye asujaa ninye. Ore hoo neikenaa kewan ajo keshipa eton eishu, anaa hoo netum oltung'ani enkisisa te neitaas kewan esidai, keyooki ake alo enetii ilporori loo loo menye, lelo lemeigil ai kata aadol ewang'an. Mebikoo oltung'ani ti atua enkitoo enye, etiu ninye anaa eng'ues naidaaya. Ilo magilani, Olaitoriani Enkai, ninye oiro neipotu enkop ebaiki enkilepunoto e nkolong metabaiki endoyioroto. Ore te Sion, te ine neiting'ie e nkishiaa, Enkai naitawang. Kelotu Enkai ang, nemegira ninye, ore te dukuya ninye naa enkima nanyaisho, ore oriong ine namanita ninye naa osiwuo kitok. Neipot shumata e keper o abori kop, pee etum ninye aiguanare iltung'ana lenyena: “Enturrurrokoki nanu lelo ooisiligayu laainei; lelo ooitobira olning'o lo sotua o nanu to lasar!” Eibalunye shumata esupatisho enye, amu Enkai kewan nadung enkiguana. “Entoning lo tung'ana laainei, amu kairo nanu, iyie Israel, kaaishakenoki nanu iyie. Ara nanu enkai, Enkai ino. Eitu nanu aaisikong iyie te nkaraki ilasarri linono; ore lelo asarri linono oopejori netii anaake dukuya nanu. Mang'amaa o lasar loo loing'ok oing'uaa enkaji ino, nemang'amaa olkine oing'uaa eluaata ino. Amu ore pooki ng'ues ti atua entim naa enaai, o nena kishu naatii ndoinyo inkalifuni. Ayiolo nanu imotonyi pooki o loing'ang'e, ore pooki toki nalo ti oriong enkop naa enaai. Tenaa naaji esumash aata, nemaaliki iyie; amu enaai enkop o pooki toki natii. Kainos nanu nkiri oo loing'ok, anaa aok osarge loo nkineji? Nchoo iyie Enkai olasar le nashe, nilaaki ninye nkishorot inono ilo otii Shumata Aisul; nikimpot nanu te nkata e nyamali; kaakordu nanu iyie, nikiisis iyie nanu.” Kake ore te ilo arruoni, ejo Enkai: “Kaa sipata iyie iata nilimunye nkitanapat aainei, anaa iya olning'o lai lo sotua te nkutuk ino? Amu mba iyie eutaroto, ninang'aa irorei laainei aidie kewan. Te nidol iyie olapurroni, niaku olchore lenye, nira o le ncholiek oo loo loloito. Nipalaa enkutuk ino too nkirorot torrok, neitobiru olng'ejep lino elejare. Iton iyie airo entorroni tialo olalashe lino, ninteeniki enkerai ning'arie kina. Kuna baa oshi iasita natigirakine nanu; itejo apa iyie kara obo otiu anaa iyie, kake kaaisikong taata nanu iyie, naibalunye mbaa te dukuya iyie. Entisipu naa ena, intae ilemedamu Enkai, pee mayooki ake apolos intae, nemetumi hoo obo oitajeu! Ore ilo oyau olasar le nashe ninye laayanyit nanu; ore ilo oitorioo nkoitoi enyena, naa kaitodol nanu enjeunoto e Nkai!” Ing'urrieki nanu iyie Enkai, te risioroto e nyorrata ino nauno; ore te risioroto o lng'ur lino kitok, tujutoi nkitarruorot aainei. Ntukuoki nanu tukul meishunye entorroni ai, nikintisiny too ng'ok aainei! Amu ayiolo nanu nkitarruorot aainei, netii ing'ok aainei anaake dukuya nanu. Tialo iyie ake ataasa nanu eng'oki, naas ina torrono too nkonyek inono, metaa ira iyie asipani te nkiguana ino, nimiaata entioto te nkiguana ino. Ng'ura, ti atua ntorrok nanu aatoiuoki, naa ti atua ing'ok aatoiuo yieyio. Ng'ura, esipata e atua oltau iyieu iyie; ore enkaraki ina inteng'enaki nanu eng'eno nagut ti atua enkisudoroto o ltau lai. Mpooki nanu te hisopo, pee asinyayu; ntukuoki, pee awang'u alang enturoto. Mputaki nanu eng'ida o enchipai, nchoo lelo oik apa litigila iyie meting'idata. Isudoi enkomom ino too ng'ok aainei, nijutoo ntorrok aainei pooki. Ntobiru ti atua nanu oltau sidai, iyie Enkai, nipik enkishui ng'ejuk sidai atua nanu. Mikinturraa nanu aitung'uaa ine nitii, nimiwuang'ie ina kiyang'et ino sinyati ti atua nanu. Torrinyokoki nanu eng'ida e njeunoto ino, nikimbung nanu to ltau le yieunoto ino. Pee atum aiteng'ena ilaitarruorrok nkoitoi inono, nikirrinyokino ilaing'okok aapuonu enitii. Iyie Enkai, tokorduaki nanu te lelo loo sargeta, iyie, Enkai e njeunoto ai, naa kerany olng'ejep lai te mbuakunoto e nkordunoto ino. Olaitoriani, tabolo iyie enkutuk ai pee eibalunye enkutuk ai enkisisa ino. Amu mishipakino iyie ilasarri; te naitayu ninye olasar opejori nimikintiship iyie. Ore olasar ong'amaroyu te Nkai naa oltau obor; ore oltau obor neitadou kewan, mimenaa iyie Olaitoriani. Ntaasa Sion esidai te supatisho ino; teshetu isunta e Yerusalem. Pee itum taa atishipakinoyu ilasarri oodede, o lasarri oopejori, o lasarri oolulung'a oopejori; nitum taa aitayu ilasarri loo loing'ok, to lperere lino lo lasar. Kainyoo iyie pee intokoos, lo tung'ani magilani, te nkaraki entorroni naitaasaki ilo tung'ani le Nkai? Ore endama pooki, ntobirita iyie enkidaata. Eikununo olng'ejep lino anaa olmurunya opi, iyie olaitobirani le nkeleekisho. Inyor iyie entorroni aitalang esupatisho, o elejare alang esipata. Inyor iyie irorei oomutisho, iyie o lolng'ejep olejisho kake eikigiligil iyie Enkai ntarasi; nikimbung ninye iyie nikipolos ti atua olng'obor lino; Nikidotu ninye iyie aitung'uaa enkop oo looishu. Ore lelo supati naa kedol, neureishoyu, nekueniyie ninche ninye, ejo, “Eng'ura oltung'ani lemeitaa Enkai esarunoto enye, laa enkumoi oo masaa enyena eisiliga, nelo ninye aing'oru enesaru ti atua imasaa enyena!” Kake aikununo nanu anaa oloirien onyori mbenek ti atua enkaji e Nkai. Aisiliga nanu ina nyorrata nauno e Nkai ntarasi o ntarasi. Kaaisho nanu iyie enashe ntarasi, amu itaasa iyie ena. Kaibalunye nanu enkarna ino amu eisidai, to dukuya lelo ooure Enkai. Ejo olmodai to ltau lenye, “Metii Enkai.” Etarruoitie ninche, neas olminong torrono, meetae ninye obo oas isidain. Neing'or Enkai kop etii shumata, aing'or nkera e tung'ana pee edol tenaa ketii obo ng'en oing'oru Enkai. Etorrinyote pooki aapuo siadi etarruoitie pooki; meetae hoo obo oas esidai, a-a, metii hoo obo. Aimeeta kulo ooas ntorrok indamunot, kulo ooinos iltung'ana laainei anaa endaa, nemeipotu ninche Enkai? Etijing'a ninche olkirutoto kitok, olkirutoto leitu ae kata etumi! Amu keidapash Enkai iloik le lelo lemeure Enkai, keitukurruni ninche, amu etanya Enkai ninche. Oi elotu enkordunoto e Israel eing'uaa Sion! Ina kata errinyu Enkai iltung'ana lenyena, neng'idayu Yakobo neshipayu Israel. Ntajeuoki nanu, iyie Enkai, te nkarna ino, ng'uanareki nanu te nkidimata ino. Toning'o enkomono ai, iyie Enkai; tipika enkiok ino kulo rorei le nkutuk ai. Amu aatudumakinote nanu iltung'ana omon aagilunore, eing'oru iltung'ana lemeeta olng'ur enkishui ai, nemeiturukie ninche Enkai too mbaa enye. Ng'ura, Enkai ninye olaretoni lai; Olaitoriani ninye olaibung'ani le nkishui ai. Keitalaku ninye entorroni too lmang'ati laainei; ore te supatisho ino nting'ie ninche. Ore too lasarri lo lpela kaapolosaki nanu iyie; kaisho nanu enkarna ino enashe, iyie Olaitoriani, amu aisidai ninye. Amu kitokordua iyie nanu aitung'uaa pooki nyamali, netoduaa nkonyek aainei enkisulata ino too lmang'ati laainei. Toning'o te nkiok ino enkomono ai, na Ai; nimisudoo kewan te nkomono ai! Toning'oki nanu, nikiwaliki; aaidimua nanu eng'olikinoto ai atalepunye nanu, te nkaraki ilo toilo lo lmang'atinta, te nkaraki ilo kibookinoto enkop eilo torrono amu keyau ninche enyamali shumata nanu; ore te ngoro neitobir ninche mang'atisho ti alo nanu. Etamio oltau lai ti atua nanu, neewuo olkirutoto le keeya shumata nanu. Eewuo olkirutoto o lokirrikir shumata nanu, naaibulua nanu enkiputukuny. Najo nanu, “Oi naaji tenaa kaata inaipuko anaa enturkulu, anaata aipirri enelakua ayeng'iyeng'a; ee, anaata alo enelakua, nalo nanu airrag ong'ata, anaata aipirri alo aing'oru olng'obor aing'ataa olemua o lkutati kitok.” Ndaikie iyie nkitobirat enye, Olaitoriani, nipik olmilo ilng'ejepa lenye amu adolita nanu olarrabal o enchankar ti atua enkanasa. Ore dama o kewarie, nemanaa ninche too sunta enyena; netii enkaruoisho o enyamali atua ninye. Etii enkidaata empolos enye, nemepuku enkibookinoto e nkop o esunkureisho te wueji enye nemirishoreki. Mme olmang'atinta laatusukenya nanu, amu anaata nanu airisha; ime ilo laaiba oitokoos ti alo nanu - amu anaata nanu ashomo aisudori. Kake iyie, ele, larisiore, iyie ole ncholuek ai, ele shore lai latamoo. Eikiaata apa iyiook nkirorot naamurru te nebo; ore ti atua enkaji e Nkai nikipuo apa iyiook te nchula. Meeu keeya shumata ninche, metadoi ninche aapuo enemeneng'a eishu, meshomo ninche to lkirutoto aajing atua nkuraren enye. Kake kaipot nanu Olaitoriani; naa kaaitajeu nanu Olaitoriani. Ore teipa o tadekenya o te ndama nairo nanu enyamali ai naisinanuo, naa kening ninye oltoilo lai. Kekordu ninye oltau lai te seriani te ilo arrabal laatoluaakine, amu ilkumok laakeshare nanu. Kening Enkai, neitobor ninche, ilo apa ototonie olorika le nkitoo ebaiki moitie, enkaraki nemeibung ninche nkitanapat, nemeure ninche Enkai. Eitorioyie ilo le ncholuek ai enkaina enye agilunore ilchoreta lenyena, etigila ninye olning'o lenye. Kenana enkiroroto enye anaa eng'orno, kake eeta olarrabal to ltau lenye; nenana irorei lenyena anaa eilata, kake eikununo ninche anaa lalema ootushutuaki. Nteleiki Olaitoriani olola lino, naa aikintagol ninye iyie; menyorraa ae kata ninye meiwuang'ieki ilo asipani. Kake, ore iyie, Enkai, inang'aa ninche aitadou meetu abori tiatua engumoto nagut. Ore lelo tung'ana lo sarge o enkeleekisho metaa mebikoo ninche eishu to lpisiai le nkishui enye kake kaaisilig nanu iyie. Ing'urrieki nanu, iyie Enkai, amu aaitunyokito iltung'ana enkop; ore endama pooki naaisilisil nanu iltung'ana; aaitunyokito ilmang'ati laainei enkop endama pooki, amu ilkumok laarare nanu te nkitokoos. Te naureishoyu nanu napik osiligi lai atua iyie. Atua ina Ai naisisita nanu ororei lenye, Enkai naisiligita metii enkuretisho. Kaa nanu aaidim tung'ani aitaasa? Ore endama pooki neing'oru ninche pee eibelekeny irorei laainei; ore ndamunot enye pooki naa nanu egilunore te ntorroni. Neiturrurro ninche te nebo, neisudori, neing'oru iroruat aainei. Anaa enataanyutua ninche enkishui ai, ntalaa ninche te nkaraki enkarruoisho enye; ore te ngoro ino, iyie Enkai, tusulaki ninche enkop! Nkena iyie enkirrang'irrang ai; tipika iyie ilkiyio laainei oltulet lino! Aimetii ninche atua embuku ino? Naa kerrinyi ilmang'ati laainei siadi te ina kata naaishiraki nanu iyie. Ayiolo nanu ena, nchere etii Enkai enchoto ai. Atua ina Ai naisisita nanu ororei lenye, Olaitoriani laisisita nanu irorei lenyena, Enkai naisiliga nanu metii enkuretisho. Kaa nanu aaidim tung'ani aitaasa? Ore lelo muma laainei te iyie naa kaitabaya, kaishoru nanu olasar le nashe te iyie. Amu itokordua iyie enkishui ai te keeya, ee, nintajeu nkejek aainei te mbatatata, pee atum nanu ashomo te dukuya Enkai ti atua ewang'an e nkishui ai. Ing'urrieki nanu iyie Enkai, ing'urrieki nanu, amu iyie esaru oltau lai; oloip loo naipuko inono nanu asaru, o metaba anaa nelusoo ilo kutati te nkidaata. Aishiraka nanu Enkai natii shumata aisul, Enkai naitabaya eyieunoto enyena te nanu. Ninye oirriu olkilikuai te keper naaitajeu nanu; keitukurru ninye lelo laaitunyoki nanu enkop. Keirriu Enkai ina nyorrata enye nauno o esupatisho enye! Airraga nanu te mpolos oo lng'atunyo ooinos te nkowuarisho inkera e tung'ana iremeta o mbaa ilala lenye, naa ilalema oopi ilng'ejepa lenye. Mikisisi iyie Enkai, aaitulusoo te keper! Nchoo meibulu enkitoo ino enkop pooki! Etipika ninche orreshet nkejek aainei; neirrugi oltau lai aaing'orie enkop. Etuturutuo ninche engumoto te nkoitoi ai, kake etusulakinote ninche maate. Iyie Enkai, eitashe oltau lai auno, euno oltau lai! Karany nanu naosh olkerempe! Tudumunye lo tau lai! Tudumunye na awuo oo sinkolioitin o lwulul loo usin! Kainyeyie nanu entadekenya! Ekaaisho nanu iyie enashe, iyie Olaitoriani, ti atua iloshon; kaaranyaki nanu iyie enkisisa ti atua iloreren. Amu ore ina nyorrata ino nauno naa eikitok o metabaiki keper, nebaiki esupatisho ino nkatampo. Nchoo mikisisi iyie, Iyie Enkai aaitulusoo te shumata nkatampo! Nchoo enkitoo ino eibulu enkop pooki! Kesipa, lokituaak, idung'udung'u intae enkiguana te sipata? Inguanarere intae nkera e tung'ana too sipat? A-a, ore ti atua iltauja linyi nidamumu ntorrok; niasiasa ntorrok too nkaik inyi te nkop. Ore lelo torrok netapong'ori apa ake ebaiki etii eng'uset, etapong'ori apa ebaiki pee eini neiro elejare. Eeta ninche esayiet neeijo eno lasurai, eikununo ninche anaa enturbubua ming'ani nemening'isho, nemening oltoilo loo lasakutok anaa oltoilo loo laitobirak loo ntaleng'o ng'eni hoo neibonisho ninche te nkarriyiano. Iyie Enkai tigila ilala lenye too nkutukie enye; Olaitariani, tadotu iltagiligil loo lkuoo loo lng'atunyo! Nchoo meishunye ninche anaa nkare; nchoo meitunyokini ninche enkop anaa nkujit naatoito. Nchoo ninche metotiwuo anaa olosiki otoshole, nchoo metaa olkibiroto leitu ae kata edol enkolong. Ore eton eitu ening imotioo inyi enkima oo lkiku, naa kaitayu nanu ninche to siwuo akutaa, oloshal o lotoyio! Kelo ilo supat ang'idayu te nedol enkitalakunoto e lap, nelo ninye aituku nkejek enyena to sarge le lelo arruok. Naa kejo iltung'ana, “Esipa keetae elaakinoto teilo supat, esipa keetae Enkai nadung'oki enkop enkiguana.” Tokorduaki nanu too lmang'ati laainei, iyie Enkai, Tomituoki nanu te lelo laadumakino aagilunore, tokorduaki nanu te lelo ooitobir entorroni, nikintajeu nanu too ltung'ana oata enkure o sarge. Amu, ng'ura, keirrag ninche pee aarresh nanu aar matua, neiturrurro lelo pushunot te nebo pee aar nanu. Neme te nkaraki enkitarruorroto ai anaa eng'oki ai, Olaitoriani, ore ninye maata enataasa, nekuet ninche aapuo aanapa. Tudumunye, wou taretoki nanu, ning'orisho! Iyie, Olaitoriani, Enkai oo lororani, iyie Enkai e Israel. Tudumunye ntamio iloshon pooki; mileku ninye obo le lelo ooipiru entorroni. Ore too nteipan nerrinyunye ninche, nebuak anaa ildiein neman enkanasa. Ng'ura ninche, eimujumuj nkutukie enye, netiu nkutukie enye anaa lalema - nejo ninche, “Kaing'ae oning iyiook?” Kake ore iyie, Olaitoriani, ikueniyie ninche; ninkoroj iyie iloreren pooki. Na golon ai, kaaranyaki nanu isinkolioitin le nkisisa; amu ore, iyie Enkai, iyie osempewuet lai. Ore Enkai te ina nyorrata enye nauno naa kelotu enatii; kaaisho nanu Enkai ai matoduaa enkishuroto too lmang'ati laainei. Miar ninche metuata, merikino ake iltung'ana laainei; ndapasha ninche te ngolon ino, nintadou ninche, Olaitoriani, iyie elong'o ang! Ore te nkaraki eng'oki oo nkutukie enye, lelo rorei lenye, nchoo ninche metijing'a orreshet lo lwuasa lenye. Te nkaraki ildeketa o elejare naitayu ninche, tumuta ninche te ngoro ino, tumuta ninche o metaba anaa neishunye, pee etum iltung'ana aatayioloito nchere Enkai naitoreisho ti atua Yakobo o metabaiki ineeiting'ie enkop. Ore too nteipan nerrinyunye ninche, nebuak anaa ildiein neman enkanasa. Nemanimanaa ninche aaing'oru endaa, neing'unyung'uny enkewarie pooki te neitu eraposho. Kake karanyaki nanu emagilanisho ino karany nanu abuaku isinkolioitin le nyorrata ino tadekenya. Amu itaa iyie osempewuet te nanu, itaa esarunoto ai te nkolong o sina lai. Na golon ai, kaaranyaki nanu iyie isinkolioitin le nkisisa, amu iyie, iyie Enkai, osempewuet lai, iyie Enkai naaitodol nanu enyorrata nauno. Iyie Enkai, nturrayie iyie iyiook, nitigila iltimito; itagore iyie, tokordu siaake iyiook. Iyie oikirikirie enkop, iyie oiperra abol; tarama ine netabee, amu keikirikira. Itipika iyie iltungana linono, osina kitok inchoo iyie iyiook enaisho oo sabibu naitemera, Ituuno iyie enanka te nkaraki lelo likiure, pee etumi aaitoduaai te nkaraki esipata. Pee etumi atokordu ilo lino linyor, nchoru enkisulata te nkaina ino e tatene, niwaliki iyiook! Eiroro Enkai ti atua enkaji enye sinyati: “Naa kaor nanu Shekem te ng'ida kitok, narishu ierat le Sukot. Enaai Gilead; enaai Manase; ore Efraim naa enkopiyia ai o larrabal; ore Yuda naa eng'udi ai e nkitoo. Ore Moab naa engirra ai naitukuore; shumata Edom nanu aiteleiki ina amuke ai; naa te shumata Filistia nanu abuaku te nkisulata.” Kaing'ae laayau nanu atua ina anasa nasheta? Kaing'ae laarik nanu Edom? Keitu iyie inturraa iyiook, iyie Enkai? Miloito iyie, iyie Enkai, tenebo njorin ang. Nchoo iyiook engolon te nkaraki ilmang'ati lang, amu pesho eretoto e tung'ani! Ore te retoto e Nkai nikiaas iyiook mbaa sapuki, amu ninye olo aitunyoo ilmang'ati lang. Toning'o enkishirata, iyie Enkai, inining'o enkomono ai; ore too neeiting'ie enkop naaipot nanu iyie, elepori oltau lai. Torikoyioki iyie nanu mashomo ina dapidapoi naado alang nanu; amu iyie enkisudoroto ai, iyie ewueji negol nasaru too lmang'ati laainei, oltalet ogol lagilunore ilmang'ati laainei. Nchooki nanu matobiko ti atua olng'obor lino ntarasi! Ee, pee atum ataseriana tiabori inaipuko inono! Amu itoning'o, Enkai, ilmuma laainei, kinchoo iyie nanu enjung'ore e lelo ooure enkarna ino. Ntobikoi olaiguanani; metabaiki ilarin lenyena iishoritin pooki! Meitotonieki ninye olorika le nkitoo ntarasi te dukuya Enkai; irriu enyorrata nauno o esupatisho metorripo ninye! Naa karany enkisisa e nkarna ino anaake. Enkai ake eanyu oltau lai te nkitirring'ata; ninye eing'uaa enjeunoto ai. Ninye ake openy endapidapoi ai naa enjeunoto ai, ninye osempewuet lai, nemaaigusugusieki. Kenkata nabaa akenya mbung'ubung'u oltung'ani pee itumutumu aataar pooki te nebo, nitiuu anaa esuntai netaa keurori, anaa olpaashe letaa keurori? Neitobir ninche pee esulaa ninye aaitadou to lorika lenye. Neshipakino ninche entorroni. Nemayian too nkutukie enye, ore ti atua iltauja lenye nedekisho. Amu Enkai ake eanyita oltau lai te nkitirring'ata, amu atua ninye etii osiligi lai. Ninye ake endapidapoi ai naa enjeunoto ai, ninye osempewuet lai, maaigusugusieki nanu. Enkai etii enkordunoto ai o enkitoo ai; ninye endapidapoi ai, Enkai esarunoto ai. Esiliga ninye nkatitin pooki lo tung'ana; entabol iltauja linyi te dukuya ninye; Enkai ninye esarunoto te iyiook. Ore iltung'ana li abori naa enkijape ake, ore iltung'ana le nkitoo naa elejare; te nejing ninche orrantili ore ninche pooki naa keneneng aalang enkijape. Misilig enkitorogonyare nimipik osiligi empurrorre; te neponari karsisisho, mipik oltau lino ine. Eiroro apa Enkai; atoning'o nanu ena katitin are, nchere Enkai eing'uaa engolon, naa iyie sii, Olaitoriani, ina nyorrata nauno. Amu ilaaki iyie oltung'ani te risioroto e siaai enye. Ira iyie Enkai, iyie Enkai ai, iyie nanu aing'oru, iyie eetayie oltau lai enkure; kaiterre nanu te yieunoto ino, atiu anaa oltung'ani te nkop natoyio nemetii enkare. Neaku, aaing'orua nanu iyie ti atua ine wueji ino sinyati, naing'or engolon ino o enkitoo ino. Amu ore ina nyorrata ino nauno, naa eisidai alang enkishui, kaaisis nanu iyie te nkutuk ai. Naa kaaisis nanu iyie anaa naishu; kailepie nanu nkaik aainei naipot enkarna ino. Etaraposhe oltau lai te mpiron o te ilata, nikisis enkutuk ai te ng'ida, te naadamu nanu iyie te ndapash ai, naibirribir mbaa inono airragita kewarie; amu itaa apa iyie eretoto ai, naa ti abori oloip loo naipuko inono nanu aranyisho te ng'ida. Iyie eigarakino oltau lai, enkaina ino e tatene naairishu nanu. Kake ore lelo ooing'oru pee eidaikie enkishui ai, naa kedoyio aapuo olodo le nkop; keishoori ninche aapik engolon o lalem, keaku ninche endaa oo mbariak. Kake keng'idakino olaiguanani Enkai; ore lelo ooinos olmumai te ninye neaku kituaak; amu ore nkutukie e lelo alejak naa keitigiri. Toning'o oltoilo lai, le nkilepilep ai, iyie Enkai, tagolie enkishui ai te mbatisho e ilo mang'atinta, isudoyioki nanu ntung'uayioki ilnukat le ilo torrono, ntung'uayioki mpuot oo laasak loo ntorrok, lelo ooitotiu ilng'ejepa lenye anaa lalema, lelo ooing'oru irorei oopi anaa mbaa, neng'or etii atua ilnukat ilo asipani, neng'or ninye aaluam metii enkuretisho. Neibung ninche aakurraki nena kitobirat enye torrok, neimaki ninche pee eirragie irresheta loo nkisudorot, edamu aajo, “Aing'ae oidim atoduaa iyiook? Kaing'ae oidim aing'oru nkitarruorot ang? Kitadamutua iyiook nikintobir olnukata te ng'eno.” Amu ore endamunoto e atua o ltau le tung'ani naa kegut! Kake keng'or Enkai ninche te mbae enye, nepiki ninche ilbaa nabo kata. Ore enkaraki nkirorot enye, kelo ninye aidaikie ninche; ore pooki oodol ninche neipirripir ilukuny enye. Netum taa iltung'ana pooki aatureita; nelimu ninche ina nataasa Enkai, nedamu ina nataasa ninye. Nchoo ilo asipani eng'ida ti atua Olaitoriani, nisaru ninye! Nchoo lelo pooki sidain iltauja menoto enchipai sapuk. Kinchiaakino enkisisa te Sion, iyie Enkai; naa iyie einosieki ilmuma, iyie ele oning enkomono! Enitii elotu pooki toki naishu, te nkaraki ing'ok enye. Te neidimu iyiook nkitarruorot ang, nipalaki iyie iyiook. Emayiana ilo litegelua iyie niyau aitinyiku, pee eton ti atua indung'orot inono! Eikindipakino iyiook te supatisho e nkaji ino, ina aji ino sinyati! Ore too nkiaasin naaitureisho niwaliki iyie iyiook te nkordunoto, iyie, iyie Enkai Ai e njeunoto ang, iyie osiligi loo wuejitin pooki neeiting'ie enkop, o inaaiposha naalakua; laa te ngolon ino intasheyie ildoinyo, irretenita enkidimata ino; iyie oitirring'ie enkikurrukur oo naaiposha, ina kikurrukur oo lopir lenye, ilo oilepilepi loo ltung'ana; neaku etureishote lelo oomanya ineelakua te nkop, te nkaraki nkitoduaat inono; nchoo iyie ineelusorie enkakenya o enteipa metabuaku te ng'ida. Iyie omutan enkop nibukoki enkare, iyie oitubulu oleng; ebore ilo keju le Nkai enkare; iyie oisho ninche enkurma enye, amu neijia iyie ntobira aiko. Iyie opik ierat lenyena enkare, nintobir anuk ilbaat pooki, nintanana enterit te nkirujuruj, nebulu emayianata. Nchopoko iyie olari esupatisho ino, ore rrekiei le ngarri ino neitong eilata. Ore ndaat oo nchoo ti ong'ata neitong, ore ildoinyo nemanita eng'ida, ore nkong'at naaisiaja neiput nkerrai, neiput enkurma ierat, nebuaku ninche te nebo aarany te ng'ida. Tabuaku taranyaki Enkai te ng'ida, na kop pooki; entaranyaki enkitoo e nkarna enye; enchoo ninye enkisisa e nkitoo! Entiaaki Enkai, “Kebaa eitureisho nkiaasin inono! Naa kitok engolon ino, o metaa kepuonu ilmang'ati linono aaborru te dukuya iyie. Iyie eserem enkop pooki; nikiranyaki iyie isinkolioitin le nkisisa, nerany enkisisa te nkaraki enkarna ino.” Wootu entodol inaataasa Enkai: keitureisho nkiaasin enyena ti atua iltung'ana. Keibelekeny ninye enaiposha aitaa enkop natoyio; nepuo iltung'ana aaim olkeju too nkejek. Te ine iyiook kiting'idakinote ninye, ilo oitoreisho te nkidimata enye ntarasi, ilo laa nkonyek enyena naaing'or iloshon - mincho lelo ooisero eisis ate. Esisa Enkai ang, lo oreren, nchoo metoning'ori oltoilo le nkisisa enye, ilo apa otagolie iyiook te nebo ilooishu, neitu eisho nkejek ang metarrorroto. Amu itetema iyie iyiook, Enkai, itetema iyie iyiook anaa enkosholai, anaa enkosholai natemi. Itipika iyie iyiook orreshet; nieniki mpolosi ang olola oiroishi; nchoo iyie iltung'ana meitunyoi ilukuny ang; kishomo iyiook aaim atua enkima o atua enkare; kake iyaua ake iyie iyiook enkop nalala. Kalotu nanu atua enkaji ino aata ilasarri oopejori; kaalaaki nanu iyie ilmuma laainei, apa lairoro nanu te nkutuk ai, naisiligishore apa nanu te nkutuk ai atii enyamali. Kaaitaiki nanu iyie olasar opejori loo ntokitin naapir, te nebo empuruo o lasar loo lkerra; kaitobir nanu olasar loo loing'ok o nkineji. Wootu entoning intae pooki ooure Enkai, naa kalimu nanu ina naaitaasa ninye. Aishiraka nanu ninye abuaku, neisis olng'ejep lai ninye. Tenaa kaata apa nanu entorroni to ltau lai, anaata maaning nanu Olaitoriani. Kake esipa aatoning'o nanu Olaitoriani, etoning'o ninye oltoilo le nkomono ai. Meisisi Olaitoriani, amu eitu ninye eany enkomono ai, neitu eiwuang'ie ina nyorrata enye nauno te nanu. Meing'urrie iyiook Enkai nemayian iyiook neitawang'aki iyiook te nkomom enye, pee etumi aatayiolo enkoitoi ino te nkop pooki, neyiolouni ina golon ino naitajeusho too loshon pooki. Nchoo mikisisa iyie iltung'ana, na Ai; nchoo loreren pooki mikisisa iyie! Nchoo meting'idata loshon nerany te ng'ida, amu nguanare iyie te nkaraki entorroni nirikoo iloshon ootii oriong enkop. Nchoo loreren mikisisa iyie, na Ai, nchoo loreren pooki mikisisa iyie! Etoponayie enkop ilng'anayio lenyena; Ore Enkai, Enkai ang etamayiana iyiook. Etamayiana iyiook Enkai; nchoo ineeiting'ie enkop pooki metureita ninye! Nchoo Enkai metudumunye, nchoo meidapashata ilmang'ati lenyena; nchoo lelo ooiba ninye meisika te dukuya ninye. Ore anaa enakutari empuruo tukutai ninche nkuna neijia; anaa enashola enkapoi te nkima nchoo ilarruok meidaai te dukuya Enkai. Kake nchoo lelo supati meting'idata; nchoo ninche meting'idata te dukuya Enkai; nchoo ninche metishipata oleng! Entaranyaki Olaitoriani, entarany enkisisa e nkarna enye; elepie osinkolio entaranyaki ninye, ilo olo te shumata nkatampo; ore enkarna enye naa Olaitoriani, enting'idata te dukuya ninye! Menye le lelo okishin, naa olamitunoni loo nkolia, Enkai te ine wueji enye sinyati. Enkai naisho ilo lemeeta ang ewueji nemany, nerikoo lelo ooena metudupoto; kake ore lelo maisero netoni te nkop natoyio. Iyie Enkai, ore apa pee ilo arikoo iltungana linono, ore apa pee ilo iyie aim olpurkel, neikirikira enkop, neshau shumata enkare, te ine netii Enkai; eikirikire oldoinyo le Sinai te dukuya Enkai, ina Ai e Israel. Irriwua iyie enchan kitok, Enkai, nintagol enjung'ore ino enaurate; netum nkerra inono emanyisho ti atua ninye; te supatisho ino, na Ai, intoti iyie ilaisinak. Eishorua Olaitoriani enkitanapata; eikitok olorora le lelo oonap ilomon supati: “Ore laiguanak loo njorin, neilanyisho aaisik!” Ore nkituaak naaing'uari ti ang neor nena yarunot ore hoo neirrag ninche ti atua imuatat, eikununo inaipuko enye anaa ine nturkulu naamura te nkosholai, ore nkopir enye neiyia anaa sahabu nanyori. Ore te neidapash olmagilani lelo aiguanak, nedoiki empaso Salmon. Lo doinyo le Nkai, lo doinyo le Bashan; lo doinyo loo mowuarak kumok, lo doinyo le Bashan! Kainyoo iyie pee ing'or to lom, lo doinyo loo rruka kumok, ilo doinyo oyieu Enkai neitaa emanyisho enye, ee, ine nelo Olaitoriani abikie ntarasi? Too ngarrin oo mbartan magil, nkalifuni tomon katitin are, nkalifuni o nkalifuni, apa eeunye Olaitoriani eing'uaa Sinai, nelotu atua ine wueji sinyati. Ilepa iyie alo shumata oleng, nirik lelo yarunot araya, ning'amaa nkishorot too ltung'ana, ning'amaa sii ine lelo torrok, pee etum Olaitoriani Enkai atobiko te ine. Meisisi Olaitoriani, laa ninye onap iyiook anaake; Enkai ninye enjeunoto ang. Enkai ang ninye Enkai e njeunoto; naa eno Laitoriani, Enkai, enkordunoto te keeya. Kepurd Enkai ilukuny oo lmang'ati lenyena, o enkopiyia naju e nkitoo e ilo olo too nkoitoi enyena torrok. Etejo Olaitoriani, “Karrinyu nanu ninche aitung'uaa Bashan, Karrinyu nanu ninche aitung'uaa ineegut e naiposha, pee itum iyie aitukuo nkejek inono to sarge, ore ilng'ejepa loo ldiein linono netum erubata enye te lelo mang'ati.” Edolitae ilotot inono, iyie Enkai, nena gilakinot e Nkai ai, Olaiguanani lai, elo atua ewueji sinyati - etii ilaranyak dukuya, netii ilaoshok loo ntampurini siadi, ore erishata enye netii ntoyie naakut ndulen: “Meisisi Olaitoriani ti atua eumata kitok, ee, iyie, Olaitoriani, amu iyie entalipa e Israel!” Etii Benchamen, ilo oti te ninye, dukuya, netii lelo kituaak le Yuda iwuejitin enye, o lelo kituaak le Sebulon o lelo le Naftali. Iyie Enkai, mpotu enkidimata ino; ntodolu engolon ino, iyie Enkai, amu iyie apa oitaasa iyiook ene nking'asia. Te nkaraki enkaji e Nkai te Yerusalem, te ine kiyaki iyie ilaiguanak nkishorot. Tabuaaki iyie nena ng'uesi naatii atua enarau, o ina luaata oo loing'ok natii te nebo ilasho le tung'ana. Nkirikirie tiabori nkejek inono lelo oong'uar kodi; ndapasha lelo oreren ooshipakino olarrabal. Nchoo meyauni osuyai te Misiri; nchoo Etiopia metasioki aitorioki Enkai nkaik enyena. Entaranyaki Enkai na kitoriat pooki e nkop; entaranyaki Olaitoriani enkisisa, ninye ilo okedito nkatampo te keper, ina keper e apa moitie; ng'ura, neirriu ninye oltoilo lenye, ilo toilo lenye magilani. Embalunye engolon e Nkai, ilo otii enkidimata enye shumata Israel, netii engolon enye atua nkatampo. Keitureisho Enkai ti atua ine wueji enye sinyati, ina Ai e Israel, neisho ninye engolon o enkidimata iltung'ana lenyena. Ntajeuoki nanu, iyie Enkai! Amu aatabaikitia nkariak emurt. Aimiso nanu ti atua esarng'ab te ine nemetii ewueji napik enkeju; atijing'a nanu nkariak naagut, naaya nanu olairrag le nkare. Anaure nanu te nkishirata ai; aatirridate ilgoso. Neiliilaitie nkonyek aainei, aanyita Enkai ai. Eikumok aalang ilpapit le ndukuya ai lelo laaiba nanu pesho metii emporeet; eimagil lelo laaidim nanu aaidaikie, lelo laarasaki nanu te lejare. Amaa, ina neitu nanu apurroo, kaaitalaki nanu matorrinyo taata? Iyie Enkai, iyiolo iyie emodai ai; ore ntorrok nataasa, meisudoro te iyie. Mincho lelo likisilig iyie meitukurruni te nkaraki nanu, Olaitoriani, Enkai oo lororani; mincho lelo liking'oru iyie etum enkurruna te nkaraki nanu, iyie Enkai e Israel. Amu te nkaraki iyie pee anoto esulare, neiputa enkurruna enkomom ai. Atotiwuo nanu anaa oltung'ani omoni too lalashera laainei, naaku ole boo too nkera e yieyio. Amu aainosa nanu olom te nkaraki enkaji ino, ore nena sukenyat e lelo likisukeny iyie, naatadoikitio nanu. Te naitobor nanu oltau lai te mpukoroto, neaku ina enkurruna. Te naitaa nanu ilkuniyiani nkilani aainei, naaku nanu entoki naimakini te ninche. Etaa nanu ederrie lelo ootoni te kishomi, netaa nanu eokore ilamerak. Kake ore nanu, naa iyie airriwaki enkomono ai, Olaitoriani. Ore te nkata nang'amaroyu, iyie Enkai, tang'amayioki nanu te ina nyorrata ino nauno. Te ina retoto ino naisiligunoyu tokorduaki nanu maimis ti atua esarng'ab; nchooki nanu manoto enkordunoto too lmang'ati laainei, o too nkariak naagut. Mikincho nanu maawa oloirrag le nkare, anaa aaijoo nanu ina guton, anaa aagamaa engumoto. Tawalikiaki nanu, Olaitoriani, amu ore ina nyorrata ino nauno naa eisidai; ore te risioroto o lng'ur lino, mbelekenyunye enatii nanu. Misudoo enkomom ino to sinka lino; amu atii nanu atua osina, tasioki tawalikiaki nanu. Tataanikiaki nanu, tokorduaki nanu, talakuaki nanu, te nkaraki ilmang'ati laainei! Iyiolo iyie esulare ai, o esulare ai o enkurruna ai; iyiolo iyie ilmang'ati laainei pooki. Etigila imorot oltau lai, neaku atapalari nanu, naing'oru olaaing'urrie, kake metii obo; naing'oru olaaitagol oshoke, kake eito nanu atum obo. Aaishoo ninche esayiet aaitaa endaa, ore aata enkure naaisho ninche siki. Nchoo emesa enye te dukuya ninche metaa orreshet; nchoo lelo siruai lenye loo lasarri metaa entoki narruesh ninche. Nchoo meitamodoki nkonyek enye pee medolisho; neikirikira mpolosi enye anaake. Tubukoki engoro ino shumata ninche, nincho ina goro ino nayupuyup metumurutu ninche. Metomijoono enkang enye, metaa metumi ae kata olojing ilng'oborri lenye. Amu keisilisil ninche ilo litoosho, o ilo litipika iyie olbae, neponiki ninche ninye emion oleng. Toponiki ninche nkitamiot te shumata nkitamiot; metaa metum ae kata ninche elaaroto te iyie. Nchoo metujuti nkarn enye aaiwuang'ie ti atua embuku oo looishu; nchoo metaa meigeri ninche te nebo lelo supati. Kake aata nanu osina naata emion; nchoo enjeunoto ino, iyie Enkai maatudumu nanu ailepunye! Kaisis nanu enkarna e Nkai to sinkolio; narrep nanu ninye te nkishoroto e nashe. Keitiship ena Olaitoriani alang olkiteng anaa oloing'oni loo mowuarak neeta loisotok. Nchoo ilo oitorogonyaki metoduaa ena neng'idayu, ore intae lelo ooing'oru Enkai, enchoo epiu iltauja linyi. Amu kening Olaitoriani ilo oata enyamali nemerikino lelo lenyena ooena. Nchoo shumata o enkop meisisa ninye, o enaiposha o pooki toki naatii atua. Amu keitajeu Enkai Sion, neigil ashetu nkanas e Yuda; nepuo isinkan lenyena aamany ine, neya ine; ore nena kera oo sinkan lenyena naa kejung ine, ore lelo oonyor enkarna enye nepuo aamany ine. Tonyorrai iyie Enkai, tokorduaki nanu! Olaitoriani, tasioki taretuoki nanu! Nchoo metukurru nemilo lelo ooing'oru enkishui ai! Nchoo meibelekenyi ninche nesuli, lelo ooyieu naainyal! Nchoo meing'asiata ninche te nkaraki enkurruna enye, lelo oojo, “Alda, Alda!” Nchoo lelo pooki liking'oru iyie meting'idata neshipa ti atua iyie! Nchoo lelo pooki oonyor enjeunoto ino metejo ntarasi, “Eikitok Enkai!” Kake ara nanu aisinani namena; Tasieku enatii, iyie Enkai! Iyie eretoto ai naa iyie likikordu; Olaitoriani, mimutie! Iyie nanu asaru, Olaitoriani; mikincho ae kata nanu maaitukurruni! Ore te supatisho ino tokorduaki nanu nikintajeu; irrugokoki enkiok ino, nikintajeu nanu! Taa iyie te nanu endapidapoi e sarunoto, osempewuet ogol laaitajeu nanu, amu ira iyie endapidapoi ai nira osempewuet lai. Tokorduaki nanu na Enkai ai te nkaina e ilo torrono, te nkibung'ata e ilo ogogong. Amu ore iyie Olaitoriani, ira osiligi lai, iyie enkisiligata ai, Olaitoriani, ebaiki kitisho ai. Iyie nanu aigarakine ebaiki apa pee aaini, iyie apa likintayio nanu te nkoshoke e yieyio. Iyie nanu aaisis anaake. Atotiuo nanu anaa enking'asia too lkumok, kake ira iyie esarunoto ai nagol. Eiputa enkutuk ai enkisisa ino, o enkitoo ino endama pooki. Mikinturraa nanu te nkata e moruao; mikinturaa nanu te neishunye engolon ai. Amu nanu eimaki ilmang'ati laainei, ore lelo ooing'oru enkishui ai neiguana te nebo, nejo ninche, “Eiturrayie Enkai ninye; enepu embung'a ninye, amu meetae olokordu ninye.” Iyie Enkai, mikilam iyie nanu; iyie Enkai, tasioki taretuoki nanu! Nchoo meitukurruni lelo aitang'orok laainei nemuti; meitoipo ninche enkurruna o esulare, lelo ooing'oru pee aainyal. Kake kaaisilig nanu iyie anaake, naa kaaisis akenya o akenya. Neibalunye enkutuk ai nena kiaasin inono supati, nena kiaasin inono e njeunoto endama pooki, amu etogiroitie esiana enye eng'eno ai. Too nkiasin magil o Laitoriani nanu alotu, naa kaaisis nanu esupatisho ino, esupatisho ino ake. Na Ai, ore ebaiki kitisho ai kinteng'ena iyie nanu, neton ake aibalunye nkiasin inono e nking'asia. Neaku, ore ninye te moruao o te naaiborru endukuya, na Ai, mikintorraa nanu, o metaba anaa naibalunye enkidimata ino, too ishoritin pooki naapuonu. Ore engolon ino o esupatisho ino, na Ai, nebaiki keper oleng. Iyie otaasa mbaa sapuki, na Ai, kaing'ae likinyaanyukie? Iyie likintoduaa nanu isinaitin kumok, iyie likintopiu nanu; ore te nguton e nkop naa eikilepunye iyie. Iponaa iyie enkanyit ai, nikintoki nanu aitagol oshoke. Kaaigil nanu aisis iyie te nkauo oo sinkolioitin te nkaraki esupatisho ino, na Ai ai, kaaranyaki nanu arrep to lwulul loo usin, iyie Lo Sinyati le Israel. Kabuaku te nkutuk ai te ng'ida, te naaranyaki nanu isinkolioitin le nkisisa, neng'idayu sii oltau lai, ilo apa litokordua. Neimaki olng'ejep lai ina retoto ino e supatisho, endama pooki, amu eitukurruaki ninche nesuli, lelo apa ooing'oru pee aainyal. Nchoo olaiguanani esipata ino, na Ai, nincho esupatisho ino ilo le nkaji e nkitoo! Nchoo ninye meiguanaki iltung'ana linono te supatisho, neiguanaki lelo aisinak te sipata! Nchoo enkop meitumurru dupoto, neyau ndoinyo esupatisho! Metomitu ninye ewalata e lelo aisinak le tung'ana, nchoo enkordunoto lelo oomena, nirrar ilo oitorogonyisho! Metobikoi ninye anaa enkolong, metobikoi ninye nkolong'i nabaa anaa ino lapa, ti atua iishoritin pooki. Metotiuo ninye anaa enchan nashaiki nkujit naatudung'oki, netiu anaa enkoirujuruji naitipitipaki enkop. Meibulai esupatisho too nkolong'i enyena, metuunoyu eseriani nkolong'i naabaa anaa inaabik olapa. Meitoria ninye ebaiki enaiposha o metabaiki enkae aiposha, neitoreisho ebaiki Olkeju le Farite o metabaiki ineeiting'ie enkop! Meirrugoto ilmang'ati lenyena te dukuya ninye, metamejo ilmang'ati lenyena enterit! Meitaiki ilaiguanak le Tarshishi o lelo loo lepolosi ninye nkishorot, nchoo meyau ilaiguanak le Sheba o Seba nkishorot! Metabatatata ilaiguanak pooki te dukuya ninye, nchoo meisiaaiyia iloshon pooki ninye. Amu kekordu ninye ilo onyamal te neishiraki, neretu ilo aisinani o ilo lemeeta olaretoni. Keing'urrie ninye ilo oshal nemena, neitajeu enkishui e lelo oonyamal. Kekordu ninye ninche aitung'uaa enkitorogonyata o entorroni; naa eikirotet osarge lenye too nkonyek enyena. Metobikoi ninye eishu, nchoo meyakini ninye sahabu e Sheba! Nchoo metoomonokini ninye anaake, meetu imayianat shumata ninye nkatitin pooki! Meiputa endaa enkop; nchoo meipiripiro ninye te nchumata oldoinyo; metotiutu ilng'anayio lenyena anaa Lebanon; naa nchoo ebul iltung'ana too nkanas aabayu anaa nkujit e ong'ata. Metobikoi enkarna enye ntarasi, metaa ning'oti enkarna enye anaa enkolong! Nchoo metamayiana iltung'ana ate te ninye, neipot iloshon pooki ninye aajo olomayiana! Meisisi Olaitoriani, Enkai e Israel, laa ninye ake oas mbaa e nking'asia. Meisisi ina arna enye nabore olng'ur ntarasi; meiputa enkitoo enye enkop pooki! Esai, Esai! Enkiting'oto e nkomono e Daudi, olayioni le Yese. Esipa eisupat Enkai te ilo oitoriori nkoitoi enyena, te lelo sidain iltauja. Kake ore ti alo nanu eyieu errorro nkejek aainei, eyieu eideketari nkejek aainei. Amu aata nanu olom te lelo ooitokoos, ina kata pee adol nanu dupoto e lelo arruok. Amu meeta ninche emion, negol naa sidain iseseni lenye. Meeta ninche enyamali anaa enaata iltung'ana, nemeitamei ninche anaa ilkulikae tung'ana. Ore enkaraki ina, olwuasa ninye osaei lenye le murt, olarrabal oimulumul ninche anaa olkila. Etejieita nkonyek enye te mpiron, netulusoitie mbaa enye aalang iltauja lenye. Neikordodisho ninche, neiro mbaa torrok; ore te nkitokoos neiro mbaa naaitorogonyie ilkulikae. Nebol ninche nkutukie enye aaing'orie shumata, neidapashaki ilng'ejepa lenye enkop. Ore enkaraki ina neibelekenya iltung'ana aaisis ninche; nemetumie ninche entioto. Nejo ninche, “Kaji eiko Enkai te neyiolou? Keeta eng'eno Ilo otii Shumata Aisul?” Ng'ura, iltung'ana torrok kulo; neisikarra ninche anaake, neponari ninche te karsisisho. Pesho ake nanu aitisinya oltau lai, naituku nkaik aainei te sinyatisho. Amu ore endama pooki naatooshoki nanu, naaitamei nkakeny pooki. Naa te najo nanu, “Kalimu kuna,” anaata maaku asipani te ishoi oo nkera aainei. Naa te nadamu nanu ajo ayiolou kuna, naa enyamali te nanu. Ore ake pee alo atua ewueji sinyati e Nkai, namusu taa enkiting'oto enye. Esipa itipika iyie ninche iwuejitin neeideket; nchoo iyie ninche metabatatata aaidak. Kaji eikunakaki ninche enkidaaroto nabo kata, eishieki ninche tukul te nkiputukuny. Etiu ninche anaa enkidetidet te neinyototo oltung'ani, te nidumunye iyie, Olaitoriani, niwuang'ie ina golon enye. Te netum oltau lai emion, te neitagori oltau lai, naa kamoda apa nanu mayiolo toki, natiu apa nanu anaa eng'ues ti alo iyie. Ore ake eyia natii nanu te nebo iyie; kimbung'a iyie enkaina ai e tatene. Iyie likitorikoyie nanu te nkiguana ino, ore te siadi niking'amaa nanu te nkitoo ino. Kaing'ae nanu aata te keper leme iyie? Nemetii ai toki natii oriong enkop nang'uar nanu naadutie. Keidim inkiri osesen lai o ltau lai aaishunye, kake Enkai e ngolon oltau lai naa erubata ai ntarasi. Amu ng'ura, ore lelo likilamita iyie naa keidak; inting'ie iyie lelo arruok ti alo iyie. Kake ore nanu eisidai te nataaniki Enkai; aitaa nanu Olaitoriani Enkai esarunoto ai, pee atum atolimu isiaaitin inono pooki. Na Ai, kainyoo iyie pee nturraa iyiook ntarasi? Kainyoo pee epuru engoro ino too ntare e luaata ino? Tadamu olturrur lino apa litegelaka kewan moitie, ilo apa litokordua pee eaku enjung'ore ino! Tadamu oldoinyo le Sion apa litobikie. Ntorioki iroruat inono iwuejitin neeidaa; einyala olmang'atinta pooki toki te wueji ino sinyati! Eikurrukurro ilmang'ati linono te mpolos e ine wueji sinyati; neun ninche inankan enye pee eaku olmonekie lenye le nkisulata. Ore te njing'et e shumata nedung'udung ninche nkeenta too ntoluo. Ore nena keek naagueta negiligil too nyuntui. Nepejoo ninche ine wueji ino sinyati, nepik olduruk ine wueji ino sinyati o metabaiki enkop. Nejo ninche maate, “Eikimut iyiook ninche katukul;” etapejoitie ninche iwuejitin pooki e Nkai neetumoreki ti atua ena kop. Meekure iyiook kiaata ilmonek lang, meekure eetae oloiboni hoo obo, nemeetae hoo obo ti atua iyiook oyiolo ajo kenkata nabaa. Ke nkata nabaa, Olaitoriani, eikoroj iyiook olmang'atinta? Kesukeny olmang'atinta enkarna ino ntarasi? Kainyoo iyie pee inunuk enkaina ino, kainyoo iyie pee ipik enkaina ino olgoo? Ore eyia, Enkai, Olaitoriani lai naa oliapa, neitobir ninye enjeunoto te mpolos e nkop. Iyie otooro enaiposha te nkidimata ino; itadanya iyie endukuya o lasurai ti atua nkariak. Itupurda iyie ilukuny e Lefitan, nincho iyie ninye ing'uesi e ntim meitaa endaa. Iyie oipirua nkonyek oo nkariak o erat; iyie oitoyio nkonyek oo nkariak naaruko. Enino endama naa enino enkewarie; iyie oitobira ewang'an o enkolong. Iyie otipika ilpolosien pooki le nkop; iyie oitobira enkata e nkirowuaj o enkata e nkirobi. Tadamu ena, Olaitoriani, ng'ura olmang'atinta eikorojisho, ore iltung'ana oomoda nesukeny enkarna ino. Minchooyo oltau le ina turkuluo ino aisho ing'uesi e ntim; mincho kirikino enkishui e ilo tung'ani lino aisinani ntarasi. Tishilai olning'o lino; amu ore iwuejitin neemisimis e nkop nebore imanyishoritin e nkarruoisho. Mincho ilo oitorogonyaki meitukurruni, nchoo ilo aisinani omena meisisa enkarna ino. Tudumunye, Na Ai, tomitu kewan; tadamu ena nikinkordod ilo omoda endama pooki! Mincho kirikino oltoilo loo lmang'ati linono, ilo odoo loo nchankarri oilep anaake. Kincho iyiook iyie enashe, Enkai, kinchoru enashe; kimpot iyiook enkarna ino nikinken nkiaasin inono e nking'asia. Ore te ina kata nategeluaki, naa kaiguana nanu too sipat. Te neikirikira enkop o lelo pooki oomanya, nanu ilo oitasheyie ing'apeta enyena. Atiaaka nanu ilo owasa, “Mintoki awuasa,” najoki ilo torrono, “Midumu emowuo; mishum iyie emowuo ino ailepunye, anaa iro imolesh emurt.” Amu mme oloo saen, neme oloo ntoluo, neme ong'ata enkilepata; kake Enkai naiguana te sipata; neitadou obo neilepunye olikae. Amu enkaina o Laitoriani etii enkikompe, etii enaisho naitokitok naing'oling'olaki aaitobiraki, nepiku ninye, neok lelo aarruok pooki. Kake kang'ida nanu ntarasi, karanyaki enkisisa e Nkai e Yakobo. Ore nena mowuarak pooki e ilo torrono naa kedung'oo ninye, ore mowuarak e ilo supat naa keilepieki. Keyioloi Enkai ti atua Yuda, eikitok enkarna enye ti atua Israel. Neteshetaki emanyisho enye te Salem, ewueji enye nebikie te Sion. Te ine wueji etigila ninye mbaa, o elong'o, o lalem, o masaa o larrabal. Ira iyie kitok, niata enkishiaa, alang lelo doinyo loo ntarasi. Ore lelo lenye oogol tauja, netooruoki pooki naata, neirragaitie ninche aaye; ore lelo tung'ana pooki lo larrabal, meidim aataasishore nkaik enye. Ore te nkisikong'ata ino, Na Ai e Yakobo, neirrag aaye pokira, olakedoni o embarta. Kake, ore iyie, naa intoreisho, kaing'ae oidim aitasho te dukuya iyie te nedumunye ngoro ino nabo kata. Ore itii keper nidung enkiguana ino, neureishoyu enkop neitirring'a, ena kata edumunye Enkai aitobir enkiguana, pee eitajeu lelo pooki ooitorogonyaki te nkop. Esipa eikisis iyie engoro e tung'ani; ore ilo pisiai le ngoro nien anaa enkimeita. Entobira ilmuma linyi to Laitoriani Enkai inyi, nintabayaya ninche; nchoo lelo pooki oomanita ninche meyau nkishorot aayaki ilo ourei, naa kedung ninye iltauja le lelo kituaak, ilo laa ninye eure ilaiguanak pooki le nkop. Aishiraka nanu Olaitoriani te mbuakunoto nabuaki Enkai pee aatum atoning'o nanu. Ore te nkolong e ng'olikinoto ai, naing'oru nanu Olaitoriani; ore te ina kewarie neitoriori enkaina ai menauru, neany oltau lai eitigiri. Kadamu nanu Enkai, naisina; naibirribir neiterre oltau lai. Iyie obol nkonyek aainei pee meikeno; atanyamala nanu neaku maidim airoro. Atadamua nanu nkolong'i e apa, nadamu ilarin liapa moitie. Naibirribir to ltau lai kewarie: nalimana adamisho to ltau lai. “Amaa, keiturraa iyiook Olaitoriani ntarasi, nemeitoki aata esupatisho katukul? Keishunye enyorrata enye nauno ntarasi? Keeuo enkiting'oto oo nkisiligat enyena nkatitin pooki? Ketorikine Olaitoriani olng'ur? Keibooyie ninye olng'ur lenye te ngoro enye?” Najo nanu, “Osina lai ele, ore enkaina e tatene e Ilo otii Shumata Aisul neibelekenye.” Kapik nanu ndamunot aainei nena kiaasin e nking'asia o Laitoriani; ee, kadamu nanu nena apa e nking'asia nitaasa. Kadamu nanu isiaaitin inono pooki, naing'asia te nena kiasin magil. Kesinya enkoitoi ino, Olaitoriani, kaa ai kitok anaa Enkai ang? Iyie Enkai naas ine nking'asia, naa iyie oibalunye emagilanisho ino ti atua iloreren. Iyie otokordua iltung'ana te nkaina ino, lelo ayiok le Yakobo o Yosef. Ore ake pee kidol iyie nkariak, Olaitoriani, ore ake pee kidol iyie nkariak, neureishoyu ninche, ee, neikirikira enguton. Nebuku nkatampo enkare; neitayu oloing'ang'e enkikurrukur; neimerlel mbaa inono te pooki shoto. Etii oltoilo le ndarata ino atua oleimua; ore nkiwuang'at inono neitawang enkop; neikirikira enkop, neigirigiro. Netii apa enkoitoi ino atua enaiposha, neim enkoitoi ino atua inkariak kumok; nemelioo sii iroruat inono. Iyie otorikoyie iltung'ana linono anaa eluaata oo ntare, te nkaina e Musa o Aron. Enchoru nkiyiaa lo tung'ana laainei te nkiteng'enare ai; errugu nkiyiaa inyi too rorei le nkutuk ai! Kabol nanu enkutuk ai te nkitanyaanyukoto, nalimu nkirorot musan e apa, ntokitin apa nikitoning'o nikiyiolou, nena apa naatolikitio iyiook loo papa. Mikisudorie iyiook nkera enye, kake eikiliki iishoritin naapuonu, nena kiasin kituaak o Laitoriani o enkidimata enye, o nena e nking'asia apa naataasa ninye. Eteshetua ninye shakenisho ti atua Yakobo, negelu enkitanapata ti atua Israel, ina apa naitanapa loo papa pee eiteng'en nkera enye; pee etum eishoi nasuju aaitayiolo ninche nena kera neton meino, nedumunye ninche aaliki nkera enye, pee etum ninche aatipik osiligi lenye Enkai, nemerikino isiaaitin e Nkai, kake pee eibung nkitanapat enyena; nemetiu sii anaa loo menye, ilo porror apa ogolong'u torrono, ilo porror apa lemeuno iltauja lenye, ore enkishui enye meisiligayu te Nkai. Ore lelo le Efraim ootanapate too nkai, neibelekenya te nkolong o larrabal. Eitu ninche eibung olning'o le Nkai, kake etanyaita epuo te risioroto e nkitanapata enye. Nerikino ninche ina nataasa ninye, o ina apa e nking'asia naitoduaa ninye ninche. Ore apa too nkonyek oo loo menye neas ninye enenking'asia, tiatua enkop e Misiri, ti ong'ata e Sion. Etooro ninye enaiposha neisho ninche meima atua, neisho enkare meturupayu anaa olkiu. Ore dama nerikoo ninye ninche te nkatampoi, naa ore kewarie pooki nerikoo ninche te wang'an kitok. Neiper ninye ndapidapo to lpurkel, neisho ninche metooko enkare sapuk naba anaa eno lchorro. Neisho ninye nchorroi oo nkariak metupuku te ndapidapoi, neisho enkare meturukoyu anaa olkeju. Ore ake eyia, netaasa ninche ing'ok oleng ti alo ninye, negolong'aki apa ninche Ilo otii Shumata Aisul to lpurkel. Netem ninche Enkai too ltauja lenye, eikilikuanu endaa too ng'uarrat enye. Neiro ninche entorroni ti alo Enkai, ejo, “Keidim Enkai aisalaashaki iyiook emesa tene tiong'ota. Etoosho ninye endapidapoi nerukunye enkare, neruko ilkejek aadooyo. Keidim sii ninye aishoru imukateni, anaa eisho iltung'ana lenyena nkiri?” Ore enkaraki etoning'o ake Olaitoriani ina neiput engoro; neyupuyupieki engoro metigilunore Yakobo, neitashe engoro enye te shumata Israel; enkaraki nemeeta ninche enkirukoto te Nkai, neitu eisilig ina golon enye naitajeusho. Ore ake eyia eitanapa ninye nkatampo te shumata, nebol ildirishani le keper; neitashaiki ninye ninche mana pee einos, neisho ninche enkurma e shumata. Neinos tung'ani endaa oo lmalaika, neirriwaki Enkai ninche endaa te nkumoi. Eishoo ninye olkutati lo loo saen metukutu te keper, ore te ngolong enye nerikoo osiwuo le kopikop; neshau nkiri te shumata ninche anaa enterit, ntaritik naata naipuko naaba anaa osinyai loo naiposha; neisho ninye ninche metadoiki empolos oo lng'oborri lenye, te manaroto pooki e manyisho enye. Neinos ninche neraposho oleng, amu eishoo ninye ninche ina natang'uarra. Kake ore eton eitu eisho ninche ing'uarrat enye, eton etii ina daa nkutukie enye, nedumakino engoro o Laitoriani ninche, near ninye metuata lelo lenye oogol aaisul, neirragarie lelo gelunot le Israel. Ore ake etii kuna pooki neton ake eas ninche ing'ok; ore hoo netii nena baa enyena e nking'asia eitu ninche eiruk. Ore enkaraki ina neishie ninye nkolong'i enye anaa enkiyang'et, neishie ilarin lenye te nkuretisho. Ore ake pee ear ninye ninche metuata, neing'oru ninche ninye; neirridu ninche neing'oru Enkai oleng. Nedamu ninche aajo Enkai endapidapoi enye Enkai natii shumata aisul olalakunoni lenye. Kake eikoroja ninche ninye too nkutukie enye, nelej ninche ninye too lng'ejepa lenye. Meuno iltauja lenye te ninye, medede ninche to lning'o lenye. Kake ore eyia te nkaraki olng'ur lenye, etapalaka nkitarruorot enye, neitu ninye eidaikie ninche; neibooyo ninye engoro enye nkatitin pooki, neitu ninye eputu engoro enye pooki. Nedamu ninye ajo iseseni ake ninche, enkijape naloito nemeigil arrinyunye. Ae katitin aja apa etogolong'akita ninche ninye ti ong'ata, neitagor ninye to lpurkel! Etetema ninche ninye aaigiligil, neitagor ninche ilo Sinyati le Israel. Eitu ninche epik ndamunot enye engolon enye, neitu edamu ina olong apa naitajeuo ninye ninche too lmang'ati lenye; ina kata apa pee eas ninye nkitoduaat enyena te Misiri, o mbaa enyena e nking'asia naataasa ti ong'ata e Sion. Eibelekenya ninye ilkejek lenye aitaa osarge, pee meitoki ninche aaok nena Shorroi enye. Neirriwaki ninye ninche emus oo lojong'a ooinosa ninche, o ntuaan naa ninche naaidaikie ninche. Eishoo ninye endaa enye meinosa olkurto, neisho ilng'anayio le siaai enye meinosa olmaati. Neinyal ninye isabibu lenye te nchan oo soito, near iretet lenye te nkirobi. Neisho nkishu enye metaara enchan oo soito, near nkerrai enye endarata. Neitadoiki ninye ninche ina pijan e ngoro enye, o engoro, o empushuna, o sina, te nebo entukus oo lmalaika ooidaikie ninche. Neitobir ninye enkoitoi te nkaraki engoro enye; eitu ninye emitiki ninche metuata, kake eishoo ninye enkishui enye olmeitai. Near ninye metuata lelo kikaunot pooki le Misiri, lelo ng'anayio lenye le dukuya ti atua olng'obor le Haam. Neitoki arikoo iltung'ana lenyena anaa nkerra, nerikoo ninche ti ong'ata anaa eluaata oo ntare. Nerikoo ninye ninche te seriani, pee meureishoyu; kake eimisie enaiposha ilmang'ati lenye. Neriku ninye ninche atua ina kop sinyati, enetii ilo doinyo oisulie ninye te nkaina enye e tatene. Nearaa ninye iloshon te dukuya ninche, neoriki ina kop enye iltung'ana lenyena neitamany iloshon le Israel ilng'oborri lenye. Kake ore eyia, etetemishote ninche, negolong'aki ilo otii Shumata Aisul, neitu eshilaa shakenisho enye, kake eibelekenyate ninche neas mbususi anaa apa loo menye; nemerregela ninche anaa enkawuo torrono. Amu eitagoro ninche ninye te nena wuejitin enye neeika; nepik ninche ninye olom te nena kitanyaanyukot enye naaguetuno. Ore ake pee ening Enkai ina, neiput ninye engoro, neany ninye tukul Israel. Neing'uaa ninye emanyisho enye te Shilo, ilo ng'obor apa otii ninye ti atua iltung'ana, neya ninye engolon enye atua eyararoto, neya enkitoo enye atua enkop oo lmang'ati. Neishooyo ninye iltung'ana lenyena metaari to lalem, nepik ninye engoro enye shumata ina jung'ore enye. Neinos enkima ilbarnot lenye, ore ntoyie enye, nelau kiyama. Ore lapolosak lenye nebatata too lalema, ore nena olia enye nemeishir. Neitoki Olaitoriani adumunye anaa oltung'ani oirora, anaa oltung'ani ogol te nebuaku etemere. Neosh ilmang'ati lenyena arriny siadi; nepik ninche enkurruna oo ntarasi. Etanya ninye olng'obor le Yosef, eitu ninye egelu olosho le Efraim; kake etegelua olosho le Yuda, o ilo doinyo le Sion otonyorra ninye. Neshet ninye ina aji enye sinyati anaa keper, neitotiu anaa ewueji neitobiraki ntarasi. Etegelua ninye Daudi osinka lenye, neya ninye aitung'uaa eluaata oo ntare; neitung'uaa ninye eramatata e lelo kuoo apa oonakita ooyakaki ninye, pee atum ataa olchekut le Yakobo lelo tung'ana lenyena, o Israel ina jung'ore enye. Ore te mborron o ltau lenye neramat ninye ninche, nerikoo ninche te nkaina e nkarriyiano. Na Ai, eetuo lelo limikiyiolo aajing atua enjung'ore ino; etipika ninche olminong atua enkaji ino sinyati; eitaa ninche Yerusalem olmuaate. Eishoo ninche mpopoki oo seseni loo sinkan linono, ilmotoni lo loing'ang'e meitaa endaa, ore lelo sinyat linono neinos ing'uesi e nkop nkiri oo seseni lenye. Eibukoitie isargeta lenye anaa enkare te manaroto pooki e Yerusalem, nemeetae hoo obo onukaa ninche. Kitaa iyiook entoki nailapi te lelo le latia ang, nesukenyi neikuyukuyaki lelo oomanita iyiook. Kenkata nabaa Olaitoriani? Igoro iyie ntarasi? Keyupuyup ina goro o lom lino anaa enkima? Tubukoki engoro ino lelo oshon limikiyiolo iyie, o shumata nena kitoriat nemeipot enkarna ino! Amu eidaikie ninche Yakobo, neitomijoon emanyisho enye. Midamu te iyiook entorroni oo loo papa; nchoo olng'ur lino metasieku anang'are iyiook, amu eitadouoki iyiook oleng. Taretu iyiook, Na Ai e njeunoto ang, te nkaraki enkitoo e nkarna ino; tokordu iyiook, nipalaki iyiook ing'ok ang, te nkaraki enkarna ino! Kainyoo pee ejo iloshon, “Koree Enkai enye?” Nchoo ina lap, apa enkibukoroto o sarge loo sinkan linono metayiolouni too loshon pooki te dukuya nkonyek ang! Nchoo ilo kiyioi le lelo ooena meeu dukuya iyie; ore te risioroto e ngolon ino kitok tagolie lelo ootudung'okoki keeya! Ntalaa katitin naapishana lelo le latia ang too lgooitie lenye nena kilapat apa nikilapa ninche iyie, Olaitoriani! Ore taa iyiook iltung'ana linono, ina luaata e nkirrita ino, nikincho iyie enashe ntarasi; ore ebaiki iishoritin o ishoritin, nikilimu enkisisa ino. Nchoru enkiok Lo Airritani le Israel, iyie ilo orikoo Yosef anaa eluaata oo ntare! Iyie ilo otii olorika le nkitoo te nchumata oo lkerubi, nintawang'isho te dukuya Efraim o Benchamen o Manase, tuputu enkidimata ino, nilotu aitajeu iyiook! Torrinyu iyiook, Na Ai; nchoo enkomom ino ewang'u, pee etumi aaitajeu iyiook! Olaitoriani Enkai oo lororani, kenkata nabaa iyie igorokino enkomono oo ltung'ana linono? Nintotio iyie ninche te mukate oo lkiyio, nincho ninche metooko ilkiyio te nkumoi. Nintaa iyiook ilmang'ati too le latia ang; ore ilmang'ati lang nekueni maate. Torrinyu iyiook, Na Ai oo lororani; nchoo enkomom ino metawang'a, pee etumi aaitajeu iyiook! Iyie oyaua isabibu aitung'uaa enkop e Misiri; iyie otarayie iloshon niun ilo sabibu. Iyie oitukut enkop te nkaraki ninye; neibung ntona naapuo atua enkop neiput enkop. Neitoip oloip lenye ildoinyo, neitoip ilng'osil lenyena iltarakua sapuki; nereu ilng'osil lenyena aitabaiki enaiposha, neitabaiki ntona enyena olkeju. Kainyoo naa iyie pee itigila enkikarrata enye, neaku ore pooki oogiroo aaim enkoitoi, neng'osilu ilng'anayio lenyena? Neinyala ilbitiro le ntim ninye, ore nena pooki naapuo ti ong'ata neinos ninye. Nyaaki mbelekenyunye, Na Ai oo lororani! Ing'ura kop itii shumata, nidol, tishilai ele sabibu, ilo shani lituuno iyie te nkaina ino e tatene. Etapejoitie ninche ninye te nkurma, netudung'o ninche aauroo; meidaa ninche te nkisikong'ata e nkomom ino! Kake nchoo enkaina ino elotu shumata ilo le nkaina ino e tatene, ina kerai e tung'ani nintagolo iyie te nkaraki kewan ino! Nemikingil ae kata iyiook aaibelekenya aaing'uaa iyie; nchoo iyiook enkishui, pee kitum aaipoto enkarna ino! Torrinyu iyiook Olaitoriani Enkai oo lororani! Nchoo enkomom ino metawang'a, pee etumi aaitajeu iyiook! Entabuaku entaranyaki Enkai engolon ang; entabuaaki te ng'ida Enkai e Yakobo! Elepie osinkolio, nioshiosho enkinanta, ina kinanta e nkopito sidai enkorui o endule. Entoosh entarumpeta te nduaata o lapa, te nepurupuranayu olapa, te ina olong ang o sirua. Amu enkitanapata ina te Israel, elimunoto e Nkai e Yakobo. Eibalunye apa ninye te Yosef, ina kata apa pee eipang ninye alo te nkop e Misiri. Aning'ito nanu oltoilo leitu ayiolou: “Aiwuang'ie nanu olola to loililai lino; eyeng'iyeng'ate nkaik inono te napata e nkikapu. Ore te nkata o sina kimpoto iyie nanu, naatokordua nanu; aatawalikia nanu iyie te ine wueji e nkisudoroto e ndarata; aatetema nanu iyie too nkariak e Meriba. Entoning, lo tung'ana laainei, te naikok nanu intae! Oo Israel, oi siaake tenaa eikining nanu! Mejing enkai omoni atua intae; emirrugo aaserem enkai omoni. Ara nanu Olaitoriani Enkai ino, ilo apa likiyaua aitung'uaa enkop e Misiri. Tang'a enkutuk ino pe aiput nanu. Kake eitu ening iltung'ana laainei oltoilo lai; nemaayieu nanu Israel. Neaku aishooyie nanu te ina golon oo ltauja lenye, metusuja nkiguanat enye. Oi napaji tenaa kaaning iltung'ana laainei, pee etum Israel ashomo too nkoitoi aainei! Etaa nanu kasioki amir ilmang'ati lenye, naibelekenyaki nanu enkaina ai ilmang'ati lenye. Ore lelo ooiba Olaitoriani nepuonu aaitoborruo te dukuya ninye, ore ina kitamioto enye nebik ntarasi. Kaaitoti nanu iyie te nkano sidai aisul, ore te ina aisho naing'uaa endapidapoi naaitaraposh iyie.” Etii Enkai ewueji enye ti atua eumata enye; ore te mpolos oo nkaitin neiguana ninye: “Kenkata nabaa iyie inguana too ntorrok, nintodolu oloshomitore te ilo torrono? Nguanaki te sipata ilo omena o ilo okishi; mbung'a esipata e ilo oata osina o ilo okishi. Tokordu ilo oshal o ilo aisinani; tokordu ninche ntung'uai enkaina e ilo torrono.” Meeta ninche eng'eno nemedamisho, nepuo ninche aamanimanaa te naimin; eikirikirate ilkitamanyunot pooki le nkop. Najo nanu, “Irara intae nkaitin, nkera e ilo Otii Shumata Aisul, intae pooki; ore ake eyia, iyeye intae anaa iltung'ana, nibatatata anaa pooki tung'ani kitok.” Tudumunye, iyie Enkai, nguanare enkop; amu ilkulinono iloreren pooki! Iyie Enkai, mintoki iyie agira; migira nemintirring'a, Iyie Enkai! Amu ng'ura, ebuakita ilmang'ati linono; neilepie lukuny lelo likimba iyie. Neitobir nkitobirat torrok too ltung'ana linono, neiguanakino te nebo pee ear lelo litomituo iyie. Nejo ninche, “Wootu, matujutu ninche aaishie anaa olosho, nchoo enkarna e Israel eaku meigili ae kata aadamu!” Ee, neiguanakino ninche to ltau obo; neitobir ninche olning'o pee kitum aataarare iyie - o lelo ng'oborri le Edom o le Ishmael, o le Moab o le Hagari, o Gebal, o Amon o Amaleki, o Filistia te nebo lelo oomanya Turo; eibung'are sii Asiria ninche; ninche engolon oo nkera e Lutu. Intaasa ninche enapa nintaasa Midian, o Sisera o Yabin to lkeju le Kishon, lelo apa ooidaikieki te Endor, lelo otaa nkik te nkop. Intotiwuo lelo kituaak lenye anaa Orebu o Seebu, nintotiu ilkituaak lenye pooki anaa Seba o Salmuna, lelo apa ootejo, “Mawaita ena kop e Nkai aaitaa enaang.” Iyie Enkai ai, ntaa ninche olemua, nchoo etiu anaa suut naakutaa osiwuo. Ore anaa enaaibung enkima entim, o anaa enalo olng'ejep le nkima enchumata o ldoinyo, neijia nkuna, tusujai ninche to lkutati lino, nturia ninche to lemua lino! Mputa nkomomi enye enkurruna, pee etum ninche aaing'oru enkarna ino, iyie Olaitoriani. Nchoo ninche meitukurruni, neidang ntarasi; nchoo ninche meidaa te sulare. Nchoo ninche metayiolo nchere iyie ake openy eji enkarna Olaitoriani, iyie Otii Shumata Aisul te nkop pooki. Kebaa esidano e nkaji ino, Olaitoriani loo lororani! Keyieu oltau lai, ee, naa keiterriakino enkaji o Laitoriani; neranyaki te ng'ida oltau lai o sesen lai Enkai naishu. Enoto sii ninye entiitiit ewueji, netum enkomerei enkaji, ewueji neirragakinyie nkera enyena, too lpereren linono loo lasarri, iyie Olaitoriani loo lororani, Olaitoriani lai naa Enkai ai. Emayiana iloobik ti atua enkaji ino, nebik aarany enkisisa ino! Emayiana lelo tung'ana laa atua iyie etii engolon enye, lelo oata too ltauja lenye, nena oitoi kituaak naapuo Sion. Ore epuoito ninche aaim oerata le Baka, neitotiu ninche ine anaa nkonyek oo nkariak; ore ilkisirat le dukuya le nchan neiput ine ilchorroi. Nepuo ninche eponari engolon enye ore ina Ai oo nkaitin nepuoi aadol te Sion. Iyie Olaitoriani Enkai, iyie Enkai oo lororani, toning'o enkomono ai; irrugu enkiok, iyie Enkai e Yakobo! Toduaa iyie Enkai, na long'o ang, ing'ura enkomom e ilo lino litubukoko eilata aput! Amu enkolong nabo ti atua enkaji ino naikash alang nkolong'i enkalifu nabo te dikae. Enaikash nanu te naaku olarriponi te kutuk aji e nkaji e Nkai ai, alang te nabik too lng'oborri le nkarruoisho. Amu ore Olaitoriani Enkai naa enkolong naa elong'o; naa keishoru ninye omom o enkitoo. Meetae entoki sidai namit Olaitoriani te lelo oopuo too ltauja sidain. Olaitoriani loo lororani, emayiana ilo tung'ani likisilig iyie. Olaitoriani, ira apa iyie supat te nkop ino; itorrinyuo iyie olpisiai le Yakobo. Itapalaka iyie entorroni oo ltung'ana linono, nipalaki iyie ing'ok enye pooki. Itorrinyo iyie engoro ino pooki; nimbelekenya iyie aing'uaa ina goro ino napi. Ngila torrinyu iyiook, Iyie Enkai e njeunoto ang, niwuang'ie engoro ino te iyiook! Eigorokino iyie iyiook ntarasi? Eintoodor iyie engoro ino aitabaiki iishoritin pooki? Eimingil iyie aitopiu iyiook, pee etum iltung'ana linono aating'idata te iyie? Ntoduaa iyiook enyorrata ino nauno, Olaitoriani, nincho iyiook enjeunoto ino. Nchooki nanu matoning'o enajo Olaitoriani Enkai, amu keiro ninye eseriani too ltung'ana lenyena, too sinyat lenyena o te lelo ooibelekenyakino ninye too ltauja lenye. Esipa ketaana enjeunoto enye te lelo ooure ninye, pee etum enkitoo atobiko te nkop ang. Ketumo enyorrata nauno o esupatisho, neng'ututa esupatisho o eseriani te nebo. Nebulu ailepu te nkop esupatisho, neirrugo esupatisho te shumata aing'or enkop. Ee, keishoru Olaitoriani ina sidai, ore enkop ang neiu ilng'anayio kumok. Kelo esupatisho te dukuya ninye, neitaa iroruat enyena enkoitoi. Irrugu enkiok ino, iyie Olaitoriani, nikiwaliki nanu, amu kara nanu aisinani namena. Tagolie enkishui ai, amu ara nanu olaseremani le Nkai; ntajeu osinka lino likisilig iyie. Ira iyie Enkai ai; ing'urrieki nanu, Olaitoriani, amu iyie nanu aishiraki endama pooki. Ntishipa oltau lo sinka lino, amu iyie nanu, Olaitoriani, ailepakinye oltau lai. Amu iyie, iyie Olaitoriani osupat, nipalaki ing'ok, nibik te nyorrata nauno te lelo pooki likimpot iyie. Toning'o, Olaitoriani, enkomono ai; toning'o enkomono ai e sayiata. Ore te nkolong ai oo ng'olikinot, aaipoto nanu iyie, amu eikiwaliki iyie nanu. Meetae likae likinyaanyukie iyie ti atua nkaitin, Olaitoriani, nemeetae kulie siaitin naanyaanyukie nkuninono. Ore lelo oreren pooki lintobira iyie naa kepuonu, neirrugo te dukuya iyie, Olaitoriani, naa keisis ninche enkarna ino. Amu ira iyie kitok nias mbaa e nking'asia, iyie ake openy Enkai. Nteng'enaki nanu enkoitoi ino, Olaitoriani, pee atum nanu ashomo te sipata ino; nchoo oltau lai meturia enkarna ino. Kaaisho nanu iyie enashe, Olaitoriani, Enkai ai, to ltau lai pooki, naa kaisis nanu enkarna ino ntarasi. Amu eikitok ina nyorrata ino nauno ti alo nanu, itokordua iyie enkishui ai aitung'uaa enguton e nemeneng'a. Iyie Enkai, aatudumakinote nanu iltung'ana oouasa aarare; eing'oru entukus oo ltung'ana oouasa enkishui ai, nimikishilaa ninche iyie. Kake ore iyie Olaitoriani, ira Enkai o lng'ur niata osotua, nimisioki agoro, nibik te nyorrata nauno, nira oloisiligayu. Mbelekenyayu ng'uraki nanu, niking'urrie nanu; nchoo osinka lino engolon ino, nintajeu ina kerai e sinka ino. Ntoduaaki nanu olmonekie le omom ino, paa ore lelo laaiba nanu nedol nekurru, amu iyie, Olaitoriani, likitareto nanu nikintagol nanu. Enchumata eilo doinyo sinyati etii ina anasa nateshetua ninye; kenyor Olaitoriani nchomito e Sion, aitalang imanyishoritin pooki e Yakobo. Mbaa e nkitoo eimakini ti alo iyie, na anasa e Nkai. Ore te lelo laayiolo nanu, aimaki Rahabu o Babilon; ng'ura, etii Filistia, o Turo o Etiopia - nejo ninche, “Etoiuoki ele teine.” Naa ore ti alo Sion naa keji, “Ore elde o elde netoiuoki ti atua ninye”; amu Ilo otii Shumata Aisul olo aitasheyie ninye. Keiken Olaitoriani nesir iltung'ana, “Ore ele netoiuoki apa teine.” Ore lelo aranyak o looiguran, nejo, “Ore nchorroi aainei pooki naa atua iyie etii.” Iyie Olaitoriani, Enkai ai, iyie nanu aipot taretuoki dama; naishir nanu kewarie te dukuya iyie. Nchoo enkomono ai meeu dukuya iyie, irrugu enkiok ino toning'o enkishirata ai! Amu eiputa oltau lai enyamali; netataanikia enkishui ai enemeneng'a! Aaikenakaki nanu lelo oodoiki engumoto; ara nanu oltung'ani lemeeta engolon, atotiuo anaa oltung'ani oiturrayioki ti atua ilootuata, anaa oltung'ani otaraki metua neirragieki te ngumoto, anaa ltung'ana lemeekure edamuni, amu eiwuang'ieki ninche te nkaina ino. Kitipika iyie nanu atua enguton e ngumoto, iwuejitin neemisimis negut. Eirragita engoro ino nairoishi te shumata nanu, nikindaikie nanu too lopir lo siwuo lino. Nchoo iyie lelo le ncholuek ai maaitiaa nanu, kintaa iyie nanu entoki naitureisho te ninche. Aaikenoyioki nanu metaa maidim atuluai, eiliilaitie nkonyek aainei te nkaraki osina. Ore nkolong'i pooki naipot nanu iyie Olaitoriani, Nailepie aitorioo nkaik aainei te nkomono. Ias iyie mbaa e nking'asia too lootuata? Eikinyototo iloipi aaisis iyie? Keibalunyeki ina nyorrata ino nauno ti atua enkurare, anaa esupatisho ino te Abadon? Keyioloi mbaa inono e nking'asia ti atua enaimin, anaa ina retoto ino naitajeusho te nkop nemedamuni? Kake ore nanu, Olaitoriani, iyie aishiraka; ore tadekenya nelotu enkomono ai dukuya iyie. Olaitoriani, kainyoo pee kinturrayie nanu, kainyoo iyie pee kisudorie nanu enkomom ino? Aainosa nanu osina neyieu aye apa ebaiki kitisho ai, aisilisile nanu too nkituriat inono; ataa nanu pesho. Aaisiasha nanu engoro ino; aaidaikie nanu ioshot inono. Aatamana ninche anaa olairrag le nkare endama pooki; naaman ninche aang'adu te nebo. Nchoo iyie ilchoreta laainei laning'ore maaitiaa nanu, netaa iltung'ana enaimin ake aisiritore. Karany nanu osinkolio le ina nyorrata ino nauno, Olaitoriani, ntarasi; ore te nkutuk ai, naa kalimu nanu esupatisho ino ti atua iishoritin pooki. Amu ore ina nyorrata ino nauno neitasheyieki ntarasi, ore esupatisho ino nemeigusugusieki, etiu anaa keper. Itejo iyie, “Aitobira nanu olning'o lai te nebo ilo lai gelunoti, ainosie nanu Daudi osinka lai olmumai: ‘Kaitubul nanu eishoi ino ntarasi, nashetu olorika lino le nkitoo too ishoritin pooki.’ ” Nchoo keper meisisa mbaa inono e nking'asia, iyie Olaitoriani, o esupatisho ino ti atua eumata e lelo sinyat! Amu kaing'ae to loing'ang'e eidimi aaitanyaanyukie Olaitoriani? Kaing'ae ti atua lelo le keper onyaanyukie Olaitoriani. Iyie Enkai naurei ti atua enkiguana e lelo sinyat, kitok neitureisho, nelusoo ninye te lelo pooki oomanita ninye? Iyie Olaitoriani Enkai oo lororani, kalo olmagilani anaa iyie, Olaitoriani, nikimanita iyie esupatisho ino? Iyie oitore engolon e naiposha, naa te nedumunye ilopir lenyena, nintirring'ie ninche. Iyie otarrarra Rahabu anaa empopong, iyie oidapasha ilmang'ati linono te nkaina ino. Enino keper naa enino enkop; o enkop o pooki toki natii atua, iyie oitobirua ninche. Ore moikuape o kopikop iyie oitobirua ninche; ore Tabori o Hermon neisis enkarna ino te ng'ida. Iata iyie enkaina magilani; kegol enkaina ino, neado enkaina ino e tatene. Esupatisho o esipata ninche olkitamanyunoto lo lorika lino le nkitoo; nelo esupatisho o enyorrata nauno te dukuya iyie. Emayiana lelo tung'ana ooyiolo embuakunoto o sinkolio lo sirua, lelo, Olaitoriani, oopuo te wang'an e nkomom ino, lelo oong'ida te nkaraki enkarna ino endama pooki, neisis ninche esupatisho ino. Amu iyie enkisisa e ngolon enye; ore te nkaraki omom ino neishur iyiook emouo. Amu ore elong'o ang naa eno laitoriani, ore olaiguanani lang naa oleilo sinyati le Israel. Ore tiapa, nirorie iyie te nduaata, ilo lino oisiligayu nijo, “Atipika nanu enkopiyia e nkitoo endukuya e obo magilani, aishoo nanu enkitoo ilo otegelutua iltung'ana. Anoto nanu Daudi osinka lai; atubukoko nanu ninye eilaata sinyati aput; pee etum enkaina ai ataa te nebo ninye, neitagol sii enkaina ai ninye. Memir ae kata ilmang'ati ninye, nemelo ilo torrono aitore ninye. Karrar nanu ilmang'ati lenyena te dukuya ninye, naosh anang'ie enkop lelo ooiba ninye. Ore esupatisho ai o enyorrata ai nauno naa keaku te nebo ninye, ore te nkarna ai neishur emowuo enye. Kalo nanu apik enkaina enye enchumata e naiposha, napik enkaina enye e tatene shumata ilkejek. Kaaishiraki ninye nanu, ejo, ‘Ira iyie Papa, Enkai ai o endapidapoi e njeunoto ai.’ Naa kaitaa nanu ninye olkikau lai, ole shumata too laiguanak le nkop. Kaibung nanu ti alo ninye ina nyorrata ai nauno ntarasi, ore olning'o lai nemeigusugus ti alo ninye. Kaitubul nanu eishoi enye ntarasi, nebikoo olorika lenye le nkitoo anaa inkolong'i e keper. Te neany nkera enyena enkitanapata ai, nemepuo te risioroto oo nkikoot aainei, te nepaashare ninche nkikoot aainei, nemeibung nkitanapat aainei, naa kaitame nanu nena kitarruorot enye te ng'udi; naitame entorroni enye te nkitamioto nairoua; kake maiwuang'ie nanu te ninye ina nyorrata ai nauno, aashu ariat esupatisho ai. Magil nanu olning'o lai lo sotua, anaa aibelekeny ilo rorei otupukuo te nkutuk ai. Atimitunye nanu ainos olmumai te sinyatisho ai; malej nanu Daudi. Kebikoo eishoi enye ntarasi, nebikoo olorika lenye le nkitoo anaa enkolong te dukuya nanu. Ketiu anaa olapa, keitasheyieki ntarasi; keitashe ninye auno anaa enabik oloing'ang'e.” Kake ore taata inturrayie iyie nimbayie, kimputa iyie engoro te nkaraki ilo lino litubukoko eilata aput. Itanya iyie olning'o te nebo osinka lino, nimpurupuro iyie enkopiyia enye e nkitoo te nterit. Ituroyie iyie isunta enyena pooki; intomijoono iyie lelo sempewueti lenyena. Ore lelo pooki oogiroo nepur ninye, etaa ninye entoki nakueniyie ile latia enye. Ntagolo iyie enkaina oo lmang'ati lenye; ntishipa iyie ilmang'ati lenyena pooki. Mbelekenya iyie empijan o lalem lenye, neitu ncho ninye meitasho to larrabal. Iwuang'ie iyie eng'udi e nkitoria te nkaina enye, ninang'aki olorika lenye le nkitoo enkop. Ntodorropa iyie nkolong'i enyena e kitisho, nimulumula ninye te nkurruna. Kenkata nabaa, Olaitoriani, isudoo iyie kewan, ae ntarasi? Kenkata nabaa eyupuyup engoro ino anaa enkima? Tadamu Olaitoriani eneba entemata e nkishui, ae te nyoo iyie intobira nkera pooki e tung'ana! Kalo tung'ani oishu nemedol ae kata keeya? Kalo oidim atokordu oltau lenye aitung'uaa engolon e nemeneng'a? Olaitoriani, koree enapa nyorrata ino nauno, enapa ninosie iyie olmumai o Daudi te nkaraki esupatisho ino? Tadamu, Olaitoriani, ina nakueniyie osinka lino; anapita nanu to lgoo lai imorot e tung'ana, nena naamor ilmang'ati, linono Olaitoriani, nena naamorie iroruat e ilo lino otubukokoki eilata aaput. Meisisi Olaitoriani ntarasi! Esai, Esai. Olaitoriani, iyie emanyisho ang, ti atua iishoritin pooki. Ore apa eton eitu eitobiruni ildoinyo, aashu enkop pooki, ebaiki ntarasi o ntarasi, iyie Enkai. Irrinyoki iyie tung'ani meshomo enterit, nijo, “Entorrinyoto, na kera e tung'ana!” Amu ore ilarin enkalifu nabo too nkonyek inono netiu anaa ng'ole te nelusoo, aashu anaa erripore e nkewarie. Ioroo iyie iltung'ana aiwuang'ie; netiu ninche anaa enkidetidet, netiu anaa nkujit naaipilipil tadekenya; ore tadekenya neitapuku neipilipil, ore teipa nemuguta netoyu. Amu eidaikie iyiook engoro ino; ore te nkaraki engoro ino nikiruto iyiook. Itipika iyie nkitarruorot ang dukuya iyie, ore nena ng'ok ang naaisudoro netii dukuya nkonyek inono. Amu etulusoitie nkolong'i ang pooki tiabori engoro ino, naa keiting ilarin lang anaa enkiyang'ata. Ore larin te nkishui ang naa ntomoni naapishana, naa ntomoni isiet te nikigol; ore to lelo arin naa enkisiaayiare ake o sina; nalusoo aasiooyo, nikipuo sii iyiook aish. Aing'ae oiguanare engolon e ngoro ino, o empushuna ino te risioroto e uriata ino? Nteng'ena naa iyiook enkikenata oo nkolong'i ang, pee kitum aanoto oltau le ng'eno nagut. Torrinyunye, Olaitoriani, O anu akenya? Ing'urrie isinkan linono! Ntaraposho iyiook anaake tadekenya te ina nyorrata ino nauno, pee kitum aating'idata nikishipa too nkolong'i ang pooki. Nting'ida iyiook too nkolong'i kumok naaba anaa ininosie iyiook osina, too larin ooba anaa ilikitodolie entorroni. Nchoo meibalunyeki esiaai ino too sinkan linono, neibalunyeki ina golon ino kitok too nkera enye. Nchoo esupatisho o Laitoriani Enkai ang elotu shumata iyiook, nintagol iyie esiaai oo nkaik ang te shumata iyiook, ee, ntagolo iyie esiaai oo nkaik ang. Ore ilo obik to lng'obor le ilo otii Shumata aisul; ilo obik ti atua oloip lo lmagilani, kelo ajoki Olaitoriani, “Esarunoto ai naa osempewuet lai; Enkai ai naa ninye aisilig.” Amu eikikordu ninye iyie aitayu te ilo rreshet lo larreshoni, o too lmeita torrok; eikimulumul ninye too naipuko enyena, ore ti abori inaipuko enyena nitum esarunoto; ore esupatisho enye naa elong'o o emitunoto. Mitum iyie enkuretisho kewarie, nimikitum embae nang'oruni dama, anaa olmeitai olo ti atua enaimin, anaa te nkidaata namutisho te ndama. Keidim aatabatata iltung'ana enkalifu nabo te mbata ino, nebatata nkalifuni tomon te nkalo ino e tatene, kake mikinyikaki iyie. Eing'or ake too nkonyek inono, nidol elaakinoto oo larruok. Ore enkaraki nintaa Olaitoriani esarunoto ino, nintaa Ilo Otii Shumata Aisul emanyisho ino, meetae entorroni nalotu enitii, meetae olmeitai onyikaki olng'obor lino. Amu keisho ninye olmalaika lenye mikitagolie iyie, nikirrip too nkoitoi inono pooki. Nikinap ninche too nkaik enye, pee minkob ake osoit te nkeju ino. Ilo iyie aroro olng'atuny o enturbubua, intuny iyie olng'atuny o lasurai too nkejek inono. Ejo Olaitoriani, “Ore enkaraki naatonyorra ninye nanu, kakordu nanu ninye; kamitu nanu ninye, enkaraki nayiolo ninye enkarna ai. Te naaipot ninye nanu nawaliki nanu ninye; kaaku nanu te nebo ninye te nkata e nyamali, kamitu nanu ninye nayanyitu ninye. Naitaraposh ninye te nkishui naado, naitodol ninye enjeunoto ai. Eisidai te neishori Olaitoriani enashe, pee eranyi enkisisa e nkarna ino, iyie Olotii shumata Aisul; pee eibalunyeki ina nyorrata ino nauno tadekenya, o esupatisho ino te nkewarie, to sinkolio le nkinanta o usin, o enkawuo oo sinkolioitin o to lkerempe lo lwulul loo usin. Amu iyie, Olaitoriani, likintishipa nanu te siaai ino; ore too siaitin oo nkaik inono narany nanu te ng'ida. Kebaa enkitoo oo siaitin inono, Olaitoriani! Kegut oleng ndamunot inono! Meyiolou oltung'ani omoda, meyiolou olkiminchali kuna baa: nchere, ore hoo nebul ilarruok anaa olkujita, nedupoyu ilarruok pooki, enkidaata ninche epuo ntarasi, kake ore iyie, Olaitoriani, itii shumata ntarasi. Amu ng'ura, ilmang'ati linono, Olaitoriani, ng'ura, keidak ilmang'ati linono, ore lelo arruok naa keisardakieki. Amu itudumua iyie emowuo ai anaa emowuo olosokuan; nikitubukoko nanu eilata ng'ejuk. Etoduaa nkonyek aainei embatatata oo lmang'ati laainei, etoning'o nkiyiaa aainei entorroni e lelo mang'ati laainei. Kebul ilo supat anaa oltukai, nebulu anaa oltarakuai te Lebanon. Etuunoki ninche ti atua enkaji o Laitoriani, nebul ninche too lgorieti le Nkai ang. Neton ake eiu ninche ilng'anayio te moruao enye, nebulu ninche aalitu nenyori anaake, pee eitodolu nchere eisupat Olaitoriani; ninye endapidapoi ai, nemetii entorroni atua ninye. Olaitoriani oitoreisho; eishope ninye te nkitoo; eishope Olaitoriani, neterretene ninye aishop engolon. Ee, eitasheyieki enkop, nemeigusugusieki ae kata; eitasheyieki olorika lino le nkitoo apa moitie; itii iyie ebaiki apa ntarasi. Etudumutua inaaiposha iltoiloishi lenye, iyie Olaitoriani nedumu ninche oltoilo lenye o enkikurrukur. Magilani ninye alang indarat oo nkariak kumok, kitok alang ilopir le naiposha, Ore Olaitoriani otii shumata naa magilani. Esipa nkitanapat inono eishiaakino esinyatisho enkaji ino iyie Olaitoriani, ntarasi. Olaitoriani, ira iyie Enkai e lap, Iyie Enkai e lap, tawang'a! Tudumunye, lo adung'oni le nkiguana le nkop, nchoo lelo oouasa inaairirikino ninche! Iyie Olaitoriani, o anu kenya kulo torrok, o anu kenya eisulie kulo torrok. Neruku ninche irorei lenye le pesho, neitokoos ninche te ntorroni pooki. Nerratany ninche iltungana linono, Olaitoriani, neisilisil enjung'ore ino. Near ninche metua enkoliai o ilo tung'ani omoni, nesesekuan ilo okishi; nejo ninche, Medol Olaitoriani; memusu Enkai e Yakobo.” Tayiolo, ele omoda aisul! Lo moda, kanu akenya ingenunu? Amaa, ilo oitobira enkiok, ae mening'isho ninye? Amaa, ilo oitibira enkong'u, ae medolisho ninye? Amaa, ilo oitame iloshon, ae meitameisho ninye? Ilo oiteng'en iltung'ana te ng'eno, eyiolo Olaitoriani ndamunot oo ltung'ana nchere enkijape ake. Emayiana ilo tung'ani lintame iyie, Olaitoriani, ilo linteng'en iyie too nkitanapat inono pee incho ninye enkiyeng'iyeng'ata te nkata e nyamali, o metaba anaa neturokini ilo torrono engumoto. Amu meituraa Olaitoriani iltung'ana lenyena; meing'uaa ninye enjung'ore enye; amu kelotu esipata enetii lelo supati, ore lelo pooki sidain iltauja, nesuj. Kalo odumunye te nkaraki nanu agilunore ilo torrono? Kalo oitashe te rishata ai agilunore ilaasak loo ntorrok? Te neme Olaitoriani otaa eretoto ai, anaata etobiko enkishui ai te nkop e ngira. Te nadamisho nanu, “Neideketari enkeju ai,” enyorrata ino nauno, Olaitoriani, ninye naaibung'ita. Ore te nkumoi oo ndamunot aainei, naa enkitagoloto ino naaitagol oshoke. Keidim ilarikok arruok aaibung'ata o iyie, lelo ooitobiru ntabo te nkoitoi oo nkitanapat? Keiturrurro ninche te nebo aagilunore ilo supat, nedung'oki ilo asipani enkiguana e keeya. Kake etaa Olaitoriani osempewuet lai, etaa Enkai ai endapidapoi e sarunoto ai. Kerrinyoki ninye ninche ntorrok enye, nejut ninche aiwuang'ie te nkaraki enkarrueisho enye; kejutoo Olaitoriani Enkai ang ninche aiwuang'ie. Wootu mataranyaki Olaitoriani matishipakinoto endapidapoi e njeunoto ang! Wootu maape dukuya enkomom enye kiaata enashe; mataranyaki iyiook ninye kiata eng'ida, too sinkolioitin le nkisisa! Amu ore Olaitoriani naa ninye Enkai kitok, naa Olaiguanani kitok te shumata nkaitin pooki. Etii nkaik enyena enguton e nkop, naa enenye sii enkadoro oo ldoinyo. Enenye enaiposha amu ninye oitobira, naa nkaik enyena naaitobira enkop natoyio. Wootu mateserem nikirrugokino, matigil kung te dukuya Olaitoriani oitobira iyiook! Amu ninye Enkai ang, nikira iyiook iltung'ana le nkirrita enye, o nkerra e nkaina enye. Te nining'ining'i taata oltoilo lenye! Emintagol iltauja linyi, anaa apa te Meriba, anaa apa te nkolong e Masa ti ong'ata, ina kata apa pee aatem iloo papaai linyi, naaineneng ninche nanu, hoo netoduaa ninche esiaai ai. Too larin artam nanu aaitagoro ina ishoi najo nanu, “Iltung'ana ootapaashaitie iltauja, nemeshilaa ninche nkoitoi aainei.” Neaku, ainosa nanu olmumai te ngoro ai, pee mejing ninche enkiyeng'iyeng'ata ai. Entaranyaki Olaitoriani osinkolio ng'ejuk; entaranyaki Olaitoriani na kop pooki! Entaranyaki Olaitoriani, esisa enkarna enye; entolimu enjeunoto enye nkolong'i pooki. Embalunye enkitoo enye ti atua loshon, embalunye isiaaitin enyena e nking'asia ti atua iloreren! Eikitok Olaitoriani, naa keisisi ninye oleng; keureyuni ninye aaitulusoo too nkaitin pooki. Amu ore nkaitin pooki oo loreren naa nkitanyaanyukot; kake Olaitoriani oitobira keper. Etii enkanyit o enkitoo dukuya ninye; etii engolon o enkishiaa atua ewueji enye sinyati. Enchoo Olaitoriani enkitoo, intae ilmareita loo ltung'ana, enchoo Olaitoriani enkitoo o engolon! Enchoo Olaitoriani enkitoo nairirikino enkarna enye; eyau enkishooroto, nipuonunu atua ilgorieti lenyena! Enteserem Olaitoriani te sinyatisho e nkishiaa enye, inkirikirayu te dukuya ninye, na kop pooki! Tejo tiatua iloshon, “Olaitoriani oitoreisho! Ee, eitasheyieki enkop, nemeigusugusieki ae kata; kelo ninye aiguanare iloshon te sipata.” Nchoo metishipayu keper, naa nchoo nkop meting'idayu; nchoo enaiposha meikurrukurro o nena pooki naabore atua; nchoo metishipayu enkop, o pooki toki natii atua! Neranyisho taa ilkeek pooki le ntim te ng'ida te dukuya Olaitoriani, amu elotu ninye, amu elotu ninye pee eiguanare enkop. Keiguanare ninye enkop te supatisho, neiguanare iloreren te sipata enye. Olaitoriani oitoreisho; nchoo metishipayu enkop; nchoo metishipata iloomanaa le naiposha! Emanita nkatampo o emisimisi nagut ninye; esupatisho o esipata ninche olkitamanyunoto lo lorika lenye le nkitoo. Nelo enkima te dukuya ninye, nepejoo lelo mang'ati oomanita ninye. Nkiwuang'at enyena naaitawang enkop; nedol enkop neikirikira. Etosholate ildoinyo netiu anaa nkapo te dukuya Olaitoriani, te dukuya Olaitoriani le nkop pooki. Eibalunye keper esupatisho enye; neing'or iloreren pooki enkitoo enye. Eitukurruaki lelo aseremak pooki loo nkitanyaanyukot, lelo oowuasare nkitanyaanyukot e pesho; neirrugo nkaitin pooki te dukuya ninye. Nening Sion neshipa, neng'ida nena toyie e Yuda, te nkaraki nena kiguanat inono, Enkai. Amu ore iyie, Olaitoriani, itii shumata aisul te nkop pooki; nikilepieki aaitulusoo too nkaitin pooki. Enyor Olaitoriani lelo ooiba enkarruoisho, negolie ninye enkishui oo sinyat lenyena; nekordu ninye ninche aitung'uaa enkaina e ilo arruoni. Ewang'an naitawang ilo asipani, netum enchipai ilo oata oltau sidai. Ting'idayu ti atua Olaitoriani, iyie ilo ora asipani, nincho enashe enkarna enye sinyati. Entaranyaki Olaitoriani osinkolio ng'ejuk, amu etaasa ninye mbaa e nking'asia! Ore ina aina enye e tatene, o ina aina enye sinyati, netimirishe. Eibalunye Olaitoriani enkisulata enye, eibalunye ninye enkitoo te dukuya iloreren pooki. Etadamua ninye ina nyorrata enye nauno o esupatisho enye te nkaji e Israel. Ore nkiting'ot e nkop pooki netoduaa enkisulata e Nkai ang. Entaranyaki Olaitoriani te ng'ida, na kop pooki; entabuaku to sinkolio le nchipai entarany te nkisisa! Entaranyaki enkisisa Olaitoriani to lwulul loo usin, to lwulul loo usin o to ltoilo lo sinkolio! Too ntarumpetani o to ltoilo le mouo entayu oltoilo le nchipai te dukuya Olaiguanani, laa ninye Olaitoriani! Nchoo eikurrukur enaiposha o pooki toki natii atua; o enkop o pooki oomanya! Ilugoyu enaiposha te nchipai; nchoo eranyisho ildoinyo te ng'ida te nebo, te dukuya Olaitoriani, amu kelotu ninye aiguanare enkop. Keiguanare ninye enkop te supatisho neiguanare iloreren too sipat. Olaitoriani oitoreisho; nchoo meikirikirata loreren! Etonita ninye to lorika le nkitoo too lkerubi; nchoo meikirikirayu enkop! Eikitok Olaitoriani te Sion; etii ninye shumata iloreren pooki. Nchoo meisisa loreren ina arna ino kitok naitureisho! Ninye osinyati! Olaiguanani magilani, onyor isipat; intasheyie iyie esipata; ninguana iyie te sipata o te supatisho ti atua Yakobo. Esisa Olaitoriani Enkai ang; enteseremisho too nkejek enyena! Ninye osinyati! Musa o Aron apa ilapolosak lenyena, etii sii apa Samuel lelo ooipot enkarna enye. Eishirakita ninche Olaitoriani, newaliki ninye ninche. Eirorie ninye ninche te ng'ape e nkatampoi; neimbung ninche enchakenisho enye, o nena kiguanat apa naaishoo ninche. Olaitoriani Enkai ang, itawalikia iyie ninche; ira iyie Enkai napalaki ninche, hoo sii nira oloitalaku ntorrok enye. Esisa Olaitoriani Enkai ang, niserememe to ldoinyo lenye sinyati; amu kesinya Olaitoriani Enkai ang! Entaranyaki Olaitoriani te ng'ida, na kuapi pooki! Esiaayia Olaitoriani te nchipai! Wootu dukuya ninye to sinkolio! Entayiolo nchere Olaitoriani ninye Enkai! Ninye oitobira iyiook, nikira iyiook ilenyena; kira iyiook iltung'ana lenyena, o nkerra e nkirrita enye. Eimutu nchomito enyena nchooyoyo enashe, entijing ilgorieti lenyena te nkisisa! Enchoo ninye enashe, nisisisisi enkarna enye! Amu eisupat Olaitoriani; nebik enyorrata enye nauno ntarasi, nebikoo esupatisho enye too ishoritin pooki. Karanyisho nanu te nkaraki enkirukoto o esipata; iyie Olaitoriani nanu aranyaki. Kaibung nanu ina oitoi oo nkitoriorot. Oi kanu akenya ilotu enatii? Mapik nanu dukuya nkonyek aainei entoki ake pooki torrono. Kaiba nanu esiaai e lelo ooibelekenyate aaing'uaa Enkai; manyikaki nanu. Nchoo elamari oltau lo lwuasa te nanu; maata nanu enaporoki enkarruoisho. Ore ilo okur aitong'u ole latia enye too nkisudorot naa kaidaikie ninye. Ore ilo tung'ani oitokoos newuasa to ltau lenye, magirakino nanu. Kaisho nanu omom lelo ooisiligayu te nkop, pee etum ninche aatobik te nebo nanu; ore ilo olo te nkoitoi nemetii entioto ninye laaisiaai nanu. Meetae oltung'ani oas esunkureisho obik ti atua enkaji ai; meetae oltung'ani oiro elejare oton te dukuya nanu. Ore too nkakeny pooki naa kaidaikie nanu lelo pooki torrok te nkop, aiwuang'ie lelo pooki torrok te nkop aitung'uaa enkanasa o Laitoriani. toning'o enkomono ai, Olaitoriani; nchoo enkishirata ai meeu enitii! Mikisudorie iyie nanu enkomom ino te nkolong o sina lai! Irrugokoki enkiok ino tawalikiaki nanu tasioki teina olong naipotisho! Amu kelusoo nkolong'i aainei anaa empuruo, neyupuyup iloik laainei anaa olkokuet. Etooshoki oltau lai aapurd anaa olkujita netoyu, naarikino enkinosata e ndaa ai. Ore enkaraki embuakunoto e nkishirata ai, neibiitiari osesen lai. Atotiwuo nanu anaa olkurragos li ong'ata onyaisho, anaa kokesena oo wuejitin neeliyio, kairrag nanu nemaapuku njo, atiu nanu anaa emotonyi naliyio te nchumata e nkaji. Ore endama pooki naainyal nanu ilmang'ati laainei, ore lelo laasukeny nanu neitaa enkarna ai oldeket. Amu nkuruon nanu ainos aitaa endaa, naitushulaki ilkiyio laainei ina naok, ore enkaraki empushuna ino o engoro ino; amu kitudumua nanu nikinang'aa. Etotiuo nkolong'i aainei anaa oloip le nteipa; atoyio nanu atiu anaa nkujit. Kake ore iyie Olaitoriani, itii olorika le nkitoo ntarasi; nebaiki enkarna ino iishoritin pooki. Idumunye iyie aing'urrie Sion; etabaua enkata pee ncho ninye omom, etabaua enkata apa nategaluaki. Amu iletipat isoito lenyena too sinkan linono, neing'urrie ninche enterit enye. Kepuo iloshon aaureyu enkarna o Laitoriani, neureyu ilaiguanak pooki enkitoo ino. Amu kelo Olaitoriani ashet Sion, neliooyu ninye te nkitoo enye; neshilaa ninye enkomono e ilo aisinani, nememenaa ninye enkomono enye. Nchoo meigeri kuna too ishoritin naapuonu, pee etum lelo tung'ana lemeino aaisisa Olaitoriani: nchere eing'ura ninye kop te ine wueji e shumata nesinya, te keper eing'ura Olaitoriani enkop, pee etum atoning'o olkiyioi loo looena, pee etum atalaai lelo ooigerokoki keeya; pee etum iltung'ana te Sion aaibalunyie enkarna o Laitoriani, neibalunyie enkisisa enye te Yerusalem, te neiturrurro iloreren te nebo, o nkitoriat, pee eserem Olaitoriani. Etigila ninye engolon ai te mpolos; eitodorropu ninye nkolong'i aainei. “Iyie Enkai,” atejo nanu, “Mikiya nanu tene, te mpolos oo nkolong'i aainei, iyie olobikoo ilarin lenyena ti atua iishoritin pooki!” Apa moitie iyie itipika olkitamanyunoto le nkop, ore keper naa esiaai oo nkaik inono. Neidak ninche, kake ibikoo iyie; keidaaya ninche pooki anaa ilkilani. Mbelekeny iyie ninche anaa nkilani neishari ninche. Kake mimbelekenya iyie, nemeeta ilarin linono enkiting'oto. Ketoni nkera oo sinkan linono te seriani, ore eishoi enye naa keitasheyieki te dukuya iyie. Isisa Olaitoriani, iyie lo tau lai, o pooki natii atua nanu, isisa enkarna enye sinyati! Isisa Olaitoriani, iyie lo tau lai, nimincho kirikino nkitaasat enyena pooki, ninye likipalaki nkitarruorrot inono pooki, ninye likinchiunye imueyiaritin inono pooki, ninye okordu enkishui ino aitung'uaa engumoto, ninye likinchopoki enyorrata enye nauno o lng'ur, ninye likintaraposh iyie too supati enkata naba anaa eninchu, metaa keitang'ejuki kitisho ino nitiu anaa olkurragos. Olaitoriani oas isupati neisho isipat lelo ooitorogonyi. Ninye oitayiolo Musa nkoitoi enyena, neitayiolo iasat enyena iltung'ana le Israel. Keeta Olaitoriani olng'ur naa aipirisioni, mesioki agoro neeta enyorrata nauno. Meisikong'isho ninye anaake, nemeibung engoro enye ntarasi. Meitaas ninye iyiook te risioroto oo ng'ok ang, nemeosh ninye iyiook te risioroto oo nkitarruorrot ang. Amu ore eneba anaa enalakuaniki keper enkop, neijia eba enkitoo e nyorrata enye nauno te lelo ooure ninye; ore anaa enalakuaniki oloo saen oloontoluo, neijia eiko ninye aitalamaa nkitarruorrot ang te iyiook. Ore anaa enaing'urrie olpayian nkera enyena, neijia eiko Olaitoriani eing'urrie lelo ooure ninye. Amu eyiolo ninye enkitobirunoto ang, edamu ninye ajo kira iyiook enterit. Ore ti alo tung'ani, etiu nkolong'i enyena anaa nkujit; kebul ninye anaa entapukai e ong'ata; amu kekutaa osiwuo nedung'ori alo, ore ewueji enye nemeitoki ayiolou. Kake ore ina nyorrata nauno o Laitoriani naa enoo ntarasi o ntarasi te lelo ooure ninye, neton esupatisho enye too nkera oo nkera enye, te lelo ooibung olning'o lenye nedamu aaibung nkitanapat enyena. Etipika Olaitoriani olorika lenye le nkitoo keper, naa enkitoria enye naitoreisho te pooki. Esisa Olaitoriani intae lo mailaika lenyena, intae kulo magil oas ororei lenye, entoning oltoilo lo rorei lenye! Esisa Olaitoriani, o lororani lenyena pooki lelo aisiaayiak lenyena oas eyieunoto enye! Esisa Olaitoriani, nasiaitin enyena pooki, too wuejitin enyena pooki e nkitoria enye, isisa Olaitoriani lo tau lai! Isisa Olaitoriani lo tau lai! Olaitoriani Enkai ai, ira iyie kitok! Kinchopokoki iyie enkanyit o enkitoo, iyie oishopoki kewan ewang'an anaa olkila, iyie oisalaasha keper anaa olng'obor, iyie otipika ing'apeta e nkaji ino shumata nkariak, nintaa nkatampo engarri ino oo mbartan, niked inaipuko o siwuo, nintaa osiwuo ilkiliku linono, nintaa olang'at le nkima ilaisiaayiak linono. Iyie otipika enkop ilkitamanyunot lenyena, pee meigusugus ae kata. Nimulumul te nguton anaa olkila; neitashe nkariak too nchumat oo ldoinyo. Ore te mbuakunoto ino neilanyisho ninche, ore to ltoilo le ndarata ino neilanyisho ninche. Neilepu ildoinyo, nedoyio ierat aagutu nepuo iwuejitin nitegelaka ninche. Itipika iyie ilpolosien lemegiroo ninche, pee meigil ninche aaiput enkop. Nchoo iyie nkonyek oo nkariak meturukunye too erat; nenang'ari aaim irishat oo ldoinyo, neitook pooki ng'ues e ong'ata; neishu iloitikoishi enkure. Embata enye etipika ntaritik emanyisho enye; neranyisho ninche ti atua ilng'osil lenyena. Ore te wueji ino neika nintook ildoinyo enkare; netaraposhe enkop too lng'anayio le siaai ino. Iyie oitubulu nkujit te nkaraki nkishu, o nkaitubulu te nkaraki iltung'ana, pee etum ninye aitayu endaa te nkop, o enaisho oo sabibu pee eitiship oltau le tung'ani, o eilata pee eitawang enkomom enye, o endaa pee eitagol enkishui e tung'ani. Etipikaki ilkeek lo Laitoriani enkare aaitaraposh, lelo tarakua le Lebanon apa ootuuno ninye. Te ninche eshetu ntaritik nkajijik; neeta ntilagosi nkajijik too lkeek sapuki oonyori. Netii nkineji oo soito ildoinyo aadoru, netii nkijijuri ndapidapo. Intobira iyie olapa pee eutu irishat; eyiolo enkolong erishata enye nadoyiorie. Ntobir iyie enaimin neaku kewarie, ina kata eikurtutari ing'uesi entim aapuo. Neipur ilkuoo loo lng'atunyo erreshisho, eing'oru endaa enye naing'uaa Enkai. Ore ake pee eilepu enkolong nepuo ninche, neirrag ninche too rrumati lenye. Nelo tung'ani esiaai enye neas esinkaisho enye o memuto. Olaitoriani, kebaa enkumoi oo siaitin inono! Te ng'eno iyie intobira pooki; ebore enkop seuseu oo ntokitin inono. Idie etii enaiposha, naa kitok nelala, neuma ntokitin ti atua nemeikenayu ntokitin naaishu sapuki o nkutiti. Nepuo imelin te ine, o enkukuu naji Lefiatam nintobira iyie pee eiguran teine. Iyie eing'or kuna pooki, pee incho ninche endaa enye too rishat enye. Ore te nincho iyie ninche, neiturrur ninche, te nilak iyie enkaina ino neiput ninche ntokitin sidain. Te nisudoo iyie enkomom ino, neidang ninche, ti niya enkiyang'et enye, neye ninche nerrinyokino enterit enye. Ti nirriu iyie Enkiyang'et lino, neitobiri ninche; nintang'ejuk iyie oriong enkop. Metobikoi enkitoo o Laitoriani ntarasi, metishipayu Olaitoriani too siaitin enyena, ilo laa te neing'or enkop neikirikira, ilo laa te neiseyie ildoinyo neitupuru! Karanyaki nanu Olaitoriani anaa naishu; arany nanu enkisisa e Nkai eton aata enkishui. Inchoo mikintishipa inkibirribirrat aainei amu Olaitoriani nanu ang'idakino. Nchoo ilaing'okok metumuti te nkop, naa inchoo ilarruok eishieki! Isisa Olaitoriani lo tau lai! Meisisi Olaitoriani! Enchoo Olaitoriani enashe, empoto enkarna enye, embalunye nkiaasin enyena ti atua iloreren! Entaranyaki ninye, entaranyaki ninye enkisisa, embalunye nkiaasin enyena pooki e nking'asia. Enting'idata tiatua enkarna enye sinyati; nchoo iltauja le lelo ooing'oru Olaitoriani meting'idata. Eng'orutu Olaitoriani o engolon enye, eng'orutu entasho te dukuya ninye anaake! Entadamu isiaaitin e nking'asia naataasa ninye, mbaa enyena e nking'asia, o nkiguanat naairoro ninye. Na ishoi e Abraham osinka lenye, lo ayiok le Yakobo, lo gelunot lenyena! Ninye Olaitoriani Enkai ang; etii nkiguanat enyena enkop pooki. Keibung ninye olning'o lenye ntarasi, te ilo rorei apa oitanapishe, too ishoritin naabaya enkalifu nabo, ilo ning'o apa oitobira ninye o Abraham, ilo mumai apa oinosa te nkaraki Isaak, ilo apa oitudupayie te Yakobo pee eaku enkikoo, te Israel neaku olning'o loo ntarasi, ejo, “Kaaisho iyie enkop e Kanaan metaa erubata e njung'ore ino.” Apa aa kuti ninche oleng, neme toki, naa ilomon te ina kop, nelimana ninche too loshon pooki, nepuo te nkitoria o metabaiki likae orere, eitu ninye eisho oltung'ani meitorogonya ninche, eisikong'a ninye ilaiguanak te nkaraki ninche, ejo, “Miseyie ele lai ootubukokoki eilata aaput, minyal iloibonok laainei!” Te neipotu ninye olameyu meeu enkop, neiwuang'ie endaa pooki, neirriwayie ninye oltung'ani dukuya ninche, Yosef, ilo apa otimiraki aaitaa orrindik. Einyala ilpisia le enata nkejek enyena, nepiki emurt enye engotoo e sekenkei; ore anaa nebaya ina apa natejo ninye eitisipa ororei lo Laitoriani ninye. Eirriwayie olaiguanani olkilikuai metalakuni ninye, ore ilo oitore iloreren neisho ninye meshomo; eitaa ninye olkitok le nkaji enye, o Laitoriani loo masaa enyena pooki, pee eiteng'en ilkituaak lenyena anaa enayieu, neiteng'en ilpayiani lenye eng'eno. Nelotu sii Israel Misiri; nemany Yakobo enkop e Ham. Neitubul Olaitoriani iltung'ana lenyena, neitagol ninche aitalang ilmang'ati lenye. Neibelekeny ninye iltauja lenye meibai iltung'ana lenyena, nepik isinkan lenyena olosek te nkeleekisho. Eirriwayie Musa osinka lenye o Aron laa ninye etegelua. Neyau nkitoduaat enyena atua iltung'ana, neyau inenking'asia atua enkop e Ham. Neirriu ninye enaimin neitomisimis enkop, negolong'u ninche aany irorei lenyena. Neibelekeny ninye inkariak enye aitaa osarge, near isinkir lenye metuata. Neiput enkop enye ntuaan e nkare, o metijing'a nkajijik oo laiguanak lenye. Eiroro ninye nelotu emus oo lojong'a, o lashe enkop enye pooki. Eirriwaka ninye ninche enchan oo soito o enkimerlel e nkima ti atua enkop enye pooki. Etoosho ninye isabibu o lng'abolo near ilkeek le nkop enye. Eiroro ninye nelotu olmaati, o nkiyioitin o lmaati nemeikenayu; naa ninche naaidaikie pooki toki nanyori te nkop, neinos ilng'anayio le nkop enye. Etoosho ninye ilkikaunot pooki le nkop enye, ilo ng'anayioi le dukuya le ngolon enye. Neitoki ninye arikoo Israel te nkosholai o te sahabu, nemeetae obo te lelo loo loshon lenyena otarrorre. Neng'idayu Misiri ina kata pee edumunye ninche aapuo, amu etijing'a enkuretisho te nkaraki ninche. Neirriu ninye enkatampoi meitushura ninche, o enkima naitawang'aki ninche te nkewarie. Eikilikuanutua olorere endaa neirriwaki ninche nkurleen, neisho ninche imukateni naaing'uaa keper te nkumoi. Etabolo ninye endapidapoi nengorunye enkare; neruko aim olpurkel anaa olkeju. Amu edamu ninye enkisilgata enye sinyati, o Abraham osinka lenye. Neaku etorikoyie ninye iltung'ana lenyena te ng'ida, nerikoo lelo gelunot lenyena to sinkolio. Neisho ninye ninche nkuapi oo loreren; neya ninche aajung ilng'anayio le siaai oo ltung'ana, pee etum ninche aaibung'a nkiguanat enyena, nejurru nkitanapat enyena. Meisisi Olaitoriani! Enchoo Olaitoriani enashe, amu eisupat ninye; amu ore enyorrata enye nauno nebikoo ntarasi! Kaing'ae oidim aimaki mbaa e nking'asia o Laitoriani, arashu aitodolu enkisisa enye pooki? Emayiana lelo ooing'oru isipat, lelo ooing'oru isipat nkatitin pooki! Tadamuaki nanu, Olaitoriani, tinintodolu omom too ltung'ana linono; taretoki nanu ti nikordu ninche; pee atum atoduaa dupoto e lelo gelunot linono, pee atum ating'idayu te nchipai o losho lino, pee atum ating'idare enjung'ore ino. Ore iyiook o loo papa kitaasa eng'oki; kitaasa entorroni, kintarruoitie iyiook. Ore apa etii loo papa enkop e Misiri, neitu eshilaa isiaaitin inono e nking'asia; eitu ninche edamu eneba enyorrata ino nauno, kake etogolong'akita ninche Ilo otii Shumata Aisul te Enaiposha Nanyokie. Kake eitajeuo ninye ninche te nkaraki enkarna enye, pee etum aibalunye engolon enye magilani. Eisikong'a ninye Enaiposha Nanyokie, netoyu; nerikoo ninye ninche aimie enguton etotiuo anaa olpurkel. Neaku eitajeuo ninye ninche te nkaina o lmang'atinta lenye, nekordu ninye ninche aitung'uaa engolon o lmang'atinta. Neimulumul nkariak ilmang'ati lenye; eitu ninye elo obo. Neiruk taa ina kata irorei lenyena; nerany enkisisa enye. Kake etorikine ninche nabo kata isiaaitin enyena; neitu ninche eanyu enkiguana enye. Kake etijing'a ninche inguarrat torrok ti ong'ata, nepuo aatem Enkai to lpurkel; eishoo ninye ninche nena naatoomonutuo, kake eirriwaka ninche emueyian e saso. Ore ina kata too lng'oborri pee etum iltung'ana olom te nkaraki Musa o Aron, ilo sinyati lo Laitoriani, neng'a enkop enkutuk neijoo Datan, neimisie encholuek e Abiran. Eipang'aka sii enkima ina sholuek; nepejoo olang'at le nkima ilarruok. Eitobirutua ninche olashe te Horeb, neserem ina kitanyaanyukoto nasholuno. Eibelekenya ninche enkitoo e Nkai aaitaa enkitanyaanyukoto o lkiteng oinos nkujit. Eitu ninche edamu Enkai Olaitajeunoni lenye, laa ninye apa otaasa mbaa sapuki te Misiri, o isiaaitin e nking'asia ti atua enkop e Ham, o mbaa naaitureisho te mbata Enaiposha Nanyokie. Neaku etejo ninye, keidaikie ninche - keitu ninye eitashe Musa, ilo gelunoti lenye, te dukuya ninye, pee eibelekeny ina goro enye napi pee meidaikie ninche. Nemenaa ninche ina kop sidai, nemeeta ninche enkirukoto too nkisiligat enyena. Neing'unyung'uny ninche too lng'oborri lenye, neitu ening oltoilo lo Laitoriani. Ore enkaraki ina eilepie ninye enkaina enye neiro olmumai ti alo ninche nchere keisho ninche metabatatata ti ong'ata, neisardaikie sii eishoi enye ti atua loreren, aidapashaki ninche nkuapi. Neitoki ninche aaibung'are Baal e Peor, neinos nkishorot naatopolosakaki iloo tuata; neitagor ninche Olaitoriani too nkiaasin enye, nedoiki olmeitai ninche. Neitashe Finehas asaisho, neiwuang'ieki olmeitai. Neikenakini ninye ina aajo esipata too ishoritin pooki ntarasi. Neitagor ninche ninye too nkariak e Meriba, netum Musa enyamali te nkaraki ninche; amu etipika ninche enkishui enye emion, neiro ninye irorei le ngoro. Neitu ninche eidaikie iltung'ana, anaa enaitanapa Olaitoriani ninche, kake etushulare ninche nkuapi neitamok ate easata anaa enataasa ninche. Neisiai ninche nena kitanyaanyukot enye, naa ninche naataa orreshet te ninche. Neyieng aapolos ilayiok lenye, o ntoyie enye aapolosaki iloiriruani; neibukoo ninche osarge lemeeta eleyiata, ilo sarge loo layiok lenye o ntoyie enye, apa naatopolosakitia nkitanyaanyukot e Kanaan, neisarkionieki ina kop te nkaraki ilo sarge. Neaku etaa enemesinya te nkaraki nena kiasin enye, neiborrie ninche onyek too nkiasin enye. Neirowuaju engoro o Laitoriani te nkaraki iltung'ana lenyena, neibayu ninye enjung'ore enye; neishooyo ninye ninche apik nkaik oo loreren, pee etum ilapa ooiba ninche aaitoria ninche. Neibooki ilmang'ati lenye ninche enkop, neyauni ninche aapik abori engolon enye. Ore nkatitin kumok netokordua ninye ninche, kake etogolong'utua ninche too otikinot enye, neitadouni ninche te nkaraki ntorrok enye. Ore ake eyia etishilayie ninye osina lenye, ina kata pee eishir ninche. Etadamua ninye te nkaraki ninche osotua lenye, neirridu ninye te risioroto e nyorrata enye nauno. Eishoo ninche meing'urrieki, lelo pooki apa ooibung'a ninche. Ntajeu iyiook, Olaitoriani Enkai, ninturrurru iyiook aaitayu too loreren, pee kitum aaishoo enashe enkarna ino sinyati niking'idare enkisisa ino. Meisisi Olaitoriani, Enkai e Israel, ebaiki ntarasi o ntarasi! Naa nchoo ejo iltung'ana pooki, “Esai!” Meisisi Olaitoriani! Enchoo Olaitoriani enashe, amu eisupat ninye; amu ore enyorrata enye nauno nebikoo ntarasi! Nchoo lelo ootokordua Olaitoriani metejo neijia, lelo ootokordua ninye aitayu ti atua enyamali neiturrur aitung'uaa nkuapi, aitung'uaa oloo saen o loo ntoluo, neitung'uaa moikuape o kopikop. Etilimanate embata aairrang'irrang to lpurkel, neitu etum enkoitoi nalo enkanasa nayeng'iyeng'areki; ore te nkaraki esumash o enkure, neiterre iltauja lenye ti atua ninche. Neishiraki ninche Olaitoriani ti atua enyamali enye, nekordu ninye ninche aitung'uaa osina lenye; etorikoyie ninye ninche aimie enkoitoi naitoriori, o metabaiki enkanasa napuo aamany. Nchoo eisho ninche Olaitoriani enashe, te nkaraki enyorrata enye nauno, te nkaraki isiaaitin enyena e nking'asia too nkera e tung'ana! Amu keitaraposh ninye ilo oata enkure, ore ilo oisumash neiputaki ntokitin sidain. Etotona embata ti atua enaimin o ti atua oloip le keeya, neikenori ti atua isinaitin too sekenke, amu etogolong'akitia ninche irorei le Nkai, nemenaa nkitanapat e Ilo otii Shumata Aisul. Neisinanuo iltauja lenye te nkaraki enkisiaayiare nagol; nebatata ninche, nemeetae oloret ninche. Neitoki ninche aaishiraki Olaitoriani te nyamali enye, nekordu ninye ninche aitayu ti atua isinaitin lenye; eyaua ninye ninche aitupuku ti atua enaimin o loip le keeya, negil iyenat enye tukul. Nchoo eisho ninche Olaitoriani enashe te nyorrata enye nauno, te nkaraki isiaaitin enyena e nking'asia too nkera e tung'ana! Amu etigila ninye nchomito o suyai nedung aitaa are eng'udi e sekenkei. Etamueyia embata te nkaraki ing'ok enye, o te nkaraki entorroni enye netum isinaitin; neibayu iltauja lenye empukunoto pooki e ndaa, nenyikaki ninche kishomi e keeya. Neitoki ninche aaishiraki Olaitoriani te nyamali enye, nekordu ninye ninche aitung'uaa osina lenye; neirriu ninye ororei lenye, neishiunye ninche, nekordu ninche aitung'uaa enkidaata. Nchoo eisho ninche Olaitoriani enashe te nkaraki enyorrata enye nauno, te nkaraki isiaaitin enyena e nking'asia too nkera e tung'ana! Naa nchoo ninche eishooyo ilasarri le nashe, nelimu nkiasin enyena too sinkolioitin le ng'ida! Eshomo embata enaiposha too melin, aas biashara ti oriong nkariak kumok; nedol ninche nkiaasin o Laitoriani, isiaaitin enyena e nking'asia ti atua enguton. Amu eitanapa ninye, neinyeyie olkutati ogol, otudumua ilopir le naiposha. Neilep ninche shumata, nedoyio aapuo enguton; nelepori iltauja lenye te nkaraki osina; nepuo ninche tenkiesies neiterriarri anaa lamerak, neiting eng'eno enye. Neitoki ninche aaishiraki Olaitoriani te nyamali enye, nekordu ninye ninche to sina lenye; neitigir ninye olkutati, neitirring'ieki ilopir le naiposha. Neng'idayu ninche enkaraki naitirring'ieki, neyau ninye ninche ewueji enye neyieu. Nchoo eisho ninche Olaitoriani enashe te nkaraki enyorrata enye nauno, te nkaraki isiaaitin enyena e nking'asia too nkera e tung'ana! Nchoo eisis ninche ninye te umata oo ltung'ana, neisis ninye ti atua eumata oo lpayiani. Eibelekeny ninye ilkejek aitaa olpurkel, neibelekeny nchorroi aitaa enkop oo lbaat, neibelekeny enkop sidai aitaa ewueji e munyan nemebulu toki, te nkaraki enkarruoisho oo loomanya. Neibelekeny ninye olpurkel aitaa nchorroi oo nkariak, neibelekeny enkop natoyio oolbaat aitaa nchorroi oo nkariak. Neitamany ninye ine ilo oaata esumash, neshetu ninche enkanasa nabikie; etuuno ninche nkurman, neun nkurman oo sabibu netum enkisampuare kitok. Ore te mayianata enye nebul ninche oleng; nemeisho ninche nkishu enye engoroo. Naa te neitoki aang'oroo nedou esiana, te nkaraki enkibookinoto e nkop, o enyamali o osina, nebukoki ninye olmena lelo kituaak, neisho ninche metilimanata too nkoitoi misili; kake kedumu ninye aitasheyie olomena aitayu ti atua osina, neitaba ilmareita lenye anaa iluaat oo ntare. Ore lelo supati nedol neshipayu; ore lelo torrok neidang. Ore pooki ng'ae ng'en, nchoo ening'u kuna baa; nchoo iltung'ana edamu enyorrata o Laitoriani nauno. Etuune oltau lai, Iyie Enkai, etuune oltau lai! Karanyisho nanu, naosh olkerempe! Tuputunye lo tau lai! Tuputunye na auo oo sinkolioitin o endule! Kainyototo nanu enasirie! Kaaisho nanu iyie enashe Olaitoriani, ti atua olorere, kaaranyaki nanu iyie enkisisa ti atua nkuapi. Amu ore enyorrata ino nauno naa eikitok te keper, nebaiki isipat inono keper. Nchoo kirrepi iyie, Iyie Enkai, te keper! Nchoo enkitoo ino meeu shumata enkop pooki! Pee etumi aatokordu ilo kirotet lino, nchoru eretoto te nkaina ino e tatene, tawalikiaki nanu! Eisiligishore Enkai te wueji enye sinyati: ejo, “Ore te nkisisa kaor nanu Shekem, naorrior o yerata le Sukot. Enaai Gilead; enaai Manase; enkopiyia ai nagol e lukunya Efraim; eng'udi ai e nkitoria Yuda. Embesen ai naitukuoreki Moab; shumata Edom nanu aiteleiki nkejek aainei; te Filistia nanu abuaku te nkisulata.” Kaing'ae laariku nanu enetii enkanasa nasheta? Kaing'ae laarik nanu Edom? Keitu iyie iyany iyiook Iyie Enkai? Milo iyie, Olaitoriani, te nebo ilmang'ati lang. Nchoo siaake iyiook eretoto te nkaraki ilmang'ati lang, amu ene pesho eretoto e tung'ani! Ore etii Olaitoriani te nebo iyiook naa eikiaas mbaa sapuki; Olaitoriani ninye oitunyoki enkop ilmang'ati lang. Migira, iyie Enkai e nkisisa ai! Amu etaboloki nkutukie torrok e lejere te nkaraki nanu, pee eiro ti alo nanu mbaa e lejare. Naaitag'or ninche too rorei le nkiba, naarasaki ninche pesho. Enkitang'oroto ninche aalaakinye enyorrata ai, hoo duoo ninye te naomonoki ninche. Neaku aatalaakitia ninche enkiba te nyorrata, o mang'atisho te nyorrata ai. Tegelu oltung'ani torrono metigilunore ninye, nchoo eiguanare ninye olaitang'oroni. Te neiguanareki ninye nchoo etumieki ninye enkitadiaata; nchoo enkomono enye eikenari aajo eng'oki! Metaa kuti nkolong'i enyena; metaa likae oya imasaa enyena! Metaa okishin nkera enyena, neaku enkoliai enkitok enye! Metaa iloorook kutukie nkera enyena; metaarari ninche aaipang'ie to lmuaate omanya! Meibung'a oloisileno apa ninye ntokitin enyena pooki, meidaikie ilomon ilng'anayio le nkinyinyiret enye! Metaa meetae hoo obo otumie ninye omom, anaa obo ninye oing'urrie nena kera enyena okishin! Meishieki eishoi enye; meimisieki enkarna enye te ishoi e are! Metadamuni entorroni oo loo menye te dukuya Olaitoriani, naa nchoo eaku meiwuang'ieki eng'oki e ngotonye aajutoo. Nchoo ninche eaku ketii dukuya Olaitoriani anaake; nchoo eiwuang'ieki endamunoto enye te nkop! Amu eitu apa ninye edamu aitodolu esupatisho, kake etusujayie ninye olaisinani o ilo omena, o ilo otalepori oltau aar metuata. Enyor apa ninye atedekisho; nchoo ldeketa epuonu shumata ninye! Menyor apa ninye imayianat; metalama ninche ninye! Eishopoko ninye kewan ildeketa anaa olkila lenye, meibulu ninche osesen lenye anaa enkare, meima iloik lenyena anaa eilata! Metotiwuo anaa olkila oimulumulare ninye, metotiwuo anaa enkimeita naa ninye erretenare anaake! Metaa ena elaakinoto oo laitang'orok laainei naing'uaa Olaitoriani, te lelo ooiro ntorrok ti alo enkishui ai! Kake ore iyie, Olaitoriani Enkai ai, taasisho te rishata ai te nkaraki enkarna ino; amu eisupat enyorrata ino nauno, tokorduaki nanu! Amu ara nanu aisinani namena, netalepori oltau lai ti atua nanu. Aisha nanu anaa oloip le nteipa; aaipiripiroyioki nanu anaa olmaati. Etashala nkung aainei te nkaraki eenata empukoroto e kewan; netasasa osesen lai aaku iloik ake. Ataa naa enkikordo te lelo laaitang'or; te naadol ninche nanu neipirripir ilukuny enye. Taretoki, Olaitoriani Enkai ai! Ntajeuoki te risioroto e nyorrata ino nauno! Nchoo ninche metayiolo nchere enkaina ino ena; iyie, Olaitoriani otaasa ena! Nchoo ninche edekisho, kake tamayianisho iyie! Nchoo lelo ainyalak laainei meitukurruni; metishipayu osinka lino. Meishopokini ilaitang'orok laainei esulare; meimulumula ninche enkurruna enye anaa olkila. Ore te nkutuk ai kaisho Olaitoriani enashe sapuk; kaisis nanu ninye ti atua eumata. Amu eitashe ninye te nkaina e tatene e ilo omena, pee eitajeu ninye te lelo oiguanare pee ear metua. Etiaaka Olaitoriani olkitok lai: “Totona te nkaina ai e tatene, o metaba anaa napik ilmang'ati linono, abori nkejek inono.” Eirriwua Olaitoriani eing'uaa Sion eng'udi ino e nkitoria, nintoreisho te mpolos oo lmang'ati linono! Ore iltung'ana linono neishoru ate te nyorrata te ina olong nirikoo olorora lino te ilo doinyo sinyati. Ebaiki tadekenya enasirie ore anaa enkoileelio kelotu kitisho ino aikununye neijia. Einosa Olaitoriani olmumai, nemeibelekenya ninye, “Ira iyie olapolosani ntarasi, to lkerreti le Melkisedek.” Etii Olaitoriani enkaina ino e tatene; near ninye ilaiguanak te nkolong e ngoro enye. Kedung'oki ninye nkuapi enkiguana, neiput nkuapi mpopoki; near ninye ilaiguanak te ina kop nalala. Keokisho ninye too nchorroi naatii embata e nkoitoi; ore enkaraki ina keraposhu ninye endukuya enye. Meisisi Olaitoriani. Kaisho nanu Olaitoriani enashe to ltau lai pooki, ti atua eumata oo supati, ti atua olturrur. Eikituaak isiaaitin o Laitoriani, neiteng'ena pooki ooshipakino. Ebore enkanyit o enkitoo isiaaitin enyena, nebikoo esupatisho enye ntarasi. Eishoo ninye metadamuni isiaaitin enyena; aipirisioni Olaitoriani neeta olng'ur. Neisho ninye endaa lelo ooure ninye; merikino ae kata ninye osotua lenye. Eitoduaa ninye iltung'ana lenyena isiaaitin enyena, aisho ninche enjung'ore oo nkuapi. Ore esiaai oo nkaik enyena naa isipat o supati; ore nkiguanat enyena naa keirukoyu, eitasheyieki ntarasi o ntarasi, pee easi te sipata o te supatisho. Eirriwaka ninye enjeunoto iltung'ana lenyena; neitanapisho ninye to sotua lenye ntarasi. Eisinyati neitureisho enkarna enye! Ore euriata o Laitoriani enkiterunoto e ng'eno nagut; eeta eyiolounoto lelo pooki oasishore. Ebikoo enkisisa enye ntarasi! Meisisi Olaitoriani. Emayiana ilo tung'ani oure Olaitoriani, ilo oshipakino oleng nkitanapat enyena! Keaku eishoi enye magilani te nkop; ore eishoi e lelo supati naa kemayiani. Etii dupoto o karsisisho atua enkaji enye; ore esupatisho nebikoo ntarasi. Keilepaki ewang'an ti atua enaimin ilo supat; aipirisioni Olaitoriani, neeta olng'ur naa asipani. Eisupat ilo tung'ani oasisho te leng'on neishooyo te sile, ilo oas mbaa enyena too sipat. Amu meiwuang'ieki ae kata olasipani; kedamuni ninye ntarasi. Meure ninye elimunoto oo lomon torrok; keitashe oltau lenye auno, aisilig Olaitoriani. Keitirring'a oltau lenye, meureisho ninye, o metaba anaa nedol eyieunoto enye too lmang'ati lenyena. Eishooyie ninye pesho, eishoo ninye ilo aisinani; kebikoo esipata enye ntarasi; keishur emowuo enye te nkisisa. Nedol oltung'ani torrono ina negoro; neony ilala nelepori; ore eyieunoto oltung'ani torrono naa keish. Meisisi Olaitoriani! Esisa, intae, isinyat lo Laitoriani, esisa enkarna o Laitoriani! Meisisi enkarna o Laitoriani ebaiki ena kata o ntarasi! Ebaiki enkilepunoto e nkolong o metabaiki endoyioroto, keisisi enkarna o Laitoriani! Olaitoriani otii shumata alus too nkuapi pooki, nelusoo enkitoo enye te keper! Kaing'ae onyaanyukie Olaitoriani Enkai ang, natonita te shumata, neing'or ninye enkop elakuaniki ore etii keper neing'or enkop. Ninye odumu olaisinani too nkulukuok, nedumu olomena aitung'uaa olchala loo nkuruon, pee eisho ninche metotona te nebo ilkituaak, te nebo ilkituaak loo ltung'ana lenyena. Neisho ninye enkitok olupi ang, neitaa ninye entomononi nashipa naata nkera. Meisisi Olaitoriani! Ore apa pee epuo Isiraeli aaing'uaa Misiri, nelo enkaji e Yakobo aing'uaa olorere oiro enkutuk neme enenye, etaa Yuda ewueji enye sinyati, neaku Israel enkitoria enye. Neing'or enaiposha neilanyisho, nerrinyo olkeju le Yordan alo siadi. Neitigiran ildoinyo anaa ilmeregeshi, neitigiran ndoinyo anaa ilkuoo le kerra. Kainyoo nikinosita iyie, enaiposha, pee isikita? O iyie, Yordan, eji pee itorrinye siadi? O intae, ildoinyo, pee ntigiranana anaa ilmeregeshi? O intae, ndoinyo, pee intigiranana anaa ilkuoo le kerra? Nkirikirayu na kop, te dukuya Olaitoriani, te dukuya e Nkai e Yakobo, laa ninye oibelekeny endapidapoi aitaa enchorro e nkare, neitaa oltotoi ogol enkong'u e nkare. Mme iyiook, Olaitoriani, mme iyiook, kake enkarna ino nchoo enkisisa, te nkaraki enyorrata ino nauno o sipat inono! Kainyoo pee ejo loshon, “Koree Enkai enye?” Etii Enkai ang keper, neas ninye anaa enayieu. Ore nkitanyaanyukot enye naa enkosholai o sahabu, esiaai oo nkaik e tung'ana. Neeta nkutukie kake meiro; neeta nkonyek kake medolisho. Neeta nkiyaa kake mening'isho; neeta nkumeishin kake meing'uaisho. Neeta nkaik kake meirrapirrapisho, o nkejek, kake meyiolo aashom; nemeitayu oltoilo too lng'ejepa lenye. Ore lelo ooitobira nenyaanyukie ninche; naa neijia etiu lelo pooki ooisilig ninche. Iyie Israel, isiliga Olaitoriani! Ninye eretoto enye naa ninye elong'o enye. Na aji e Aron, tipika osiligi lino Olaitoriani! Ninye eretoto enye naa ninye elong'o enye. Ntae kulo ooure Olaitoriani, esiliga Olaitoriani! Ninye eretoto enye naa elong'o enye. Etadamua Olaitoriani iyiook; kemayian ninye iyiook; kemayian ninye enkaji e Israel; kemayian ninye enkaji e Aron; kemayian ninye lelo ooure Olaitoriani, ilooti o lkituaak. Metopona intae Olaitoriani, intae o nkera inyi! Metamayiana intae Olaitoriani, laa ninye oitobira keper o enkop! Ore keper naa eno Laitoriani, kake ore enkop neishoo ninye nkera e tung'ana. Meisis ilootuata Olaitoriani, nemeisis hoo obo le lelo oodoyio aapuo engira. Kake eikisis iyiook Olaitoriani ebaiki ena kata taata o ntarasi. Meisisi Olaitoriani! Anyor nanu Olaitoriani amu etoning'o ninye oltoilo lai o enkomono ai. Amu aairrugoko ninye nanu enkiok enye, ore enkaraki ina kaipot nanu ninye nkolong'i naaba anaa inaishu. Aatang'adutua nanu irresheta le keeya; aaibung'a nanu nkeenta emion kitok e nemeneng'a; natum nanu osina o emion. Naitoki nanu aipot enkarna o Laitoriani: “Olaitoriani, aatasayia nanu, ntajeu enkishui ai!” Aipirisioni Olaitoriani, naa asipani; eeta Enkai ang olng'ur. Kegolie Olaitoriani olobor; ore pee aaibookini enkop, naaitajeu ninye. Torrinyokinoyu lo tau lai enkiyeng'iyeng ino; amu kimpirisie iyie Olaitoriani. Amu itokordua iyie enkishui ai te keeya, o nkonyek aainei too lkiyio, o nkejek aainei te rrorroto. Alo nanu te dukuya Olaitoriani ti atua enkop oo looishu. Aibung'a nanu enkirukoto ai, hoo ninye te natejo, “Aaisilisiloki nanu oleng”; natejo nanu te siokinoto ai, “Ilepesho iltung'ana pooki.” Kainyoo nanu aisho Olaitoriani too nkishorot enyena pooki naaishoo nanu? Kang'amaa nanu enkikompe e njeunoto, naipot enkarna o Laitoriani, nalaaki Olaitoriani olmumai lai te dukuya iltung'ana lenyena pooki. Ene tipat te dukuya Olaitoriani keeya oo sinyat lenyena. Olaitoriani, ara nanu osinka lino, ara osinka lino, olayioni le nkaisiaayiani ino. Iyie otalaa ienat aainei. Kaaisho nanu iyie olasar le nashe naipot enkarna o Laitoriani. Kalak nanu ilmuma laainei to Laitoriani te dukuya iltung'ana lenyena pooki, too lgorieti le nkaji o Laitoriani, te mpolos ino, iyie Yerusalem. Meisisi Olaitoriani! Esisa Olaitoriani iloreren pooki! Esisa ninye intae iltung'ana pooki! Amu eikitok enyorrata enye nauno ti alo iyiook; ore esipata o Laitoriani mebikoo ntarasi. Meisisi Olaitoriani! Enchoo Olaitoriani enashe, amu eisupat ninye; ebikoo enyorrata enye nauno ntarasi! Nchoo Israel ejo, “Ebikoo enyorrata enye nauno ntarasi.” Nchoo nkaji e Aron ejo, “Ebikoo enyorrata enye nauno ntarasi.” Nchoo lelo ooure Olaitoriani ejo, “Ebikoo enyorrata enye nauno ntarasi.” Ti atua osina lai nanu aipoto Olaitoriani; naawaliki nanu Olaitoriani naalaku nanu. Ore etii Olaitoriani enkalo ai maureisho nanu. Kaa nanu aaidim oltung'ani aitaasa? Etii Olaitoriani enkalo ai pee aaretu nanu, kaing'or nanu te nkisulata lelo laaiba nanu. Enaikash te nesaruni Olaitoriani alang te neisiligi iltung'ana. Enaikash te nesaruni Olaitoriani alang te neisiligi ilkituaak. Aatamana aamuat nanu iloreren pooki; ore te nkarna o Laitoriani namir nanu ninche! Aatamana aamuat ninche nanu, naaimu too nchot pooki; ore te nkarna o Laitoriani namir nanu ninche! Aatamana ninche anaa lotorok, neyupuyup anaa enkima oo lkiku; ore te nkarna o Laitoriani namir nanu ninche! Aaturrumoyioki nanu oleng, eyieu arriaa, kake aatareto Olaitoriani. Olaitoriani engolon ai naa osinkolio lai; etaa ninye enjeunoto ai. Enining'o isinkolioitin sidain le nkisulata ti atua ilng'oborri le lelo sinyat: “Te nkaina enye e tatene eas Olaitoriani e nking'asia, eilepieki enkaina e tatene o Laitoriani, te nkaina enye e tatene eas Olaitoriani inenking'asia!” Maye nanu, kake kalo aishu, naiken nkiasin o Laitoriani. Aaitamio nanu Olaitoriani oleng, kake eitu ninye aapalaa matua. Tabolokoki nanu nchomito oo sipat, pee atum nanu aima ninche nalo aisho Olaitoriani enashe. Ena ninye kishomi o Laitoriani; ninye eimu ilo asipani. Kaaisho nanu iyie enashe amu kitawalikia nitaa iyie enjeunoto ai. Ore ilo soit otanyaita ilashetak netaa ole ndukuya olmairroto. Enkiaas o Laitoriani ena; enking'asia too nkonyek ang. Enkolong ena naitobira Olaitoriani; matishipakinoto niking'ida te ninye. Ntajeu iyiook, kitasayia iyie, Olaitoriani! Olaitoriani, kitasayia iyie, nchoo iyiook dupoto! Emayiana ilo olotu te nkarna o Laitoriani! Kimayian iyie too mayianat naaing'uaa enkaji o Laitoriani. Olaitoriani ninye Enkai, neishoo ninye iyiook ewang'an. Embung'a ilng'osil too lkererin ipuopuo, o entabaiki imouarak o lperere lo lasar! Ira iyie Enkai ai, kaaisho nanu iyie enashe; ira iyie Enkai ai, naa kaarrep nanu iyie. Oi enchoo Olaitoriani enashe amu eisupat ninye; amu obikoo enyorrata enye nauno ntarasi. Emayiana lelo lemeeta ileyiat too nkoitoi enye, lelo oopuo too nkitanapat o Laitoriani! Emayiana lelo ooibung enchakenisho enye, lelo ooing'oru ninye too ltauja lenye pooki, lelo lemeas entorroni, kake nkoitoi enyena epuoyie! Ntanapishe iyie too nkitanapat inono pee eibung'i ninche aakurraki. Oi naaji te neitashe nkoitoi aainei te nkibung'ata oo nkitanapat inono! Nemaaitukurruni naa nanu, amu aipirakinye nkoitoi aainei nkitanapat inono. Kaaisis nanu iyie to ltau sidai te nayiolou nkiguanat inono naasipa. Kasuj nanu nkitanapat inono; mikinturraa nanu tukul! Kaji eiko olbarnoti pee eitisidan nkoitoi enyena? Tenegolie ninye te risioroto o rorei lino. To ltau lai pooki nanu aaing'oru iyie; mikincho nanu matalamari aing'uaa nkitanapat inono! Atushuma nanu ororei lino to ltau lai, pee maas ake eng'oki ti alo iyie. Mikisisi iyie Olaitoriani; nteng'enaki nanu nkitanapat inono! Te nkutuk ai nanu aibalunye nkiguanat pooki naaing'uaa enkutuk ino. Too nkoitoi e nchakenisho ino nanu ashipa anaa te neshipakinoi karsisisho sapuk. Kaibirribir nanu nkiguanat inono, naipirakinye nkonyek aainei nkoitoi inono. Kashipakino nanu nkitanapat inono; maarikino nanu ororei lino. Ntaasa mbaa supati osinka lino, pee atum nanu ataa kaishu, nasuj ororei lino. Taboloki nkonyek aainei pee atum atoduaa mbaa e nking'asia naaing'uaa enkitanapata ino. Ara nanu olomoni te nkop, mikisudoriyie nanu nkitanapat inono. Etalepori oltau lai te yieunoto oo nkiguanat inono nkatitin pooki. Iyie oisikong'a iloowuasa, lelo oodiaa, lelo oolimana aaing'uaa nkitanapat inono; iwuang'ie te nanu elap enye o lmena lenye, amu aibung'a nanu enchakenisho ino. Ore sii eirragita ilkituaak aarreshito nanu, nkiguanat inono ninche eibirribir osinka lino. Enchakenisho ino naaitiship nanu, ninche naaiguen nanu aautaa. Eirruge oltau lai abaiki enkop; ntopiuoki nanu te risioroto o rorei lino! Te nairo nanu aimaki nkoitoi aainei, nikiwaliki iyie nanu; nteng'enaki nanu nkiteng'enat inono! Nchooki nanu matayiolo asipu nkitanapat inono, naa kaibirribir nanu isiaaitin inono e nking'asia. Etalepori oltau lai te nkaraki osina; ntagoloki nanu te risioroto o rorei lino! Ntalamaki nanu nkoitoi e lejare; ore te mpiris ino nteng'enaki nanu nkitanapat inono! Ategelua nanu enkoitoi oo sipat, atipika nanu nkiguanat inono dukuya nanu. Aigarakine nanu shakenisho ino, Olaitoriani; mikincho nanu maaitukurruni! Kalo nanu aipirri te nkoitoi oo nkitanapat inono ti nikintalalaki nanu eyiolounoto ai! Nteng'enaki nanu, Olaitoriani, enkoitoi oo nkitanapat inono; naa kaibung nanu o metabaiki enkiting'oto. Nchooki nanu eyiolounoto, pee atum aibung'a enkitanapata ino, nasipu to ltau lai pooki. Torikoyioki nanu te nkoitoi oo nkitanapat inono, amu ninye ashipakino. Ntonyorra oltau lai enchakenisho ino, nimintonyor dupoto. Mbelekenya nkonyek aainei pee meing'or mbaa e pesho, nikincho nanu enkishui too nkoitoi inono. Ntudupa to sinka lino enkisiligata ino, naa ninye ene lelo likiure iyie. Mbelekenya ntung'uayioki ina sulare naure, amu eisupati nkitanapat inono. Ng'ura, nkitanapat inono nanu aanyita; ore te supatisho ino nchooki nanu enkishui! Nchoo ina nyorrata ino nauno elotu enatii nanu, Olaitoriani, nchoo enjeunoto ino elotu te risioroto e nkisiligata ino; pee atum taa enawalata te lelo laaikordod, amu ororei lino nanu aisilig. Nimiwuang'ie ororei le sipata te nkutuk ai, amu ore osiligi lai netii atua nkiguanat inono. Kaibung nanu nkitanapat inono anaake, ntarasi o ntarasi; naa kalo nanu te lakunoto, amu aing'orua nanu nkitanapat inono. Kalo sii airo enchakenisho ino te dukuya ilaiguanak, nemaaitukurruni nanu; amu too nkitanapat inono nanu atum enchipai, amu ninche nanu anyor. Kayanyit nanu nkitanapat inono, amu ninche anyor, naa kaibirribir nanu nkitanapat inono. Tadamu ororei lino to sinka lino, laa ninye nanu kinchoo maisiliga. Ena ninye enkitagoloto ai te nkata o sina, nchere kaaisho nanu enkisiligata ino enkishui. Aasukenyita nanu oleng lelo lemeure Enkai, kake maibelekenya nanu aing'uaa enkitanapata ino. Te nadamu nanu nkiguanat inono ebaiki apa moitie, naitagoluo nanu, Olaitoriani. Aaibung'a nanu emion oleng te nkaraki lelo arruok, lelo ootanyaita nkitanapat inono. Nkitanapat inono naataa isinkolioitin laainei ti atua enkaji ai e omonisho. Adamu nanu enkarna ino kewarie, Olaitoriani, naibung nkitanapat inono. Aatadoikio nanu ena mayianata, nchere aibung'a nanu nkitanapat inono. Olaitoriani ninye erubata ai; atonyorrayie nanu nchere kaibung nkitanapat inono. Ore to ltau lai pooki atonyuaa nanu aing'oru omom ino; ng'urrieki nanu te risioroto e nkisiligata ino. Te nadamu nanu inkoitoi inono, naibelekeny nkejek aainei aipirie enchakenisho ino; naisarrisar nanu eitu aimutie aibung nkitanapat inono. Ore ninye te naarresh nkeenta e ilo torrono, maarikino nanu enkitanapata ino. Ore te mpolos e nkewarie naainyototo nanu aisis iyie, te nkaraki inkitanapat inono naasipa. Ara nanu ole ncholuek e lelo likiure iyie, ole lelo ooibung nkitanapat inono. Ore enkop pooki, Olaitoriani, ebore enyorrata ino nauno; nteng'enaki nanu nkikuanat inono! Ntaasa iyie osinka lino isupati, Olaitoriani, te risioroto o rorei lino. Nteng'enaki nanu enkiguana sidai o eng'eno, amu airuko nanu nkitanapat inono. Ore apa eton eitu aaitamei natapong'ori nanu; kake aibung'a taata ororei lino. Ira iyie supat nias isupati, nteng'enaki nanu nkoitoi inono. Ore lelo lemeure Enkai naaiteenikitia ninche elejare, kake aibung'a nanu to ltau lai pooki nkitanapat inono; meeta kulo tung'ana ening'unoto kake ashipakino nanu nkitanapat inono. Eisidai apa te naaitamioki nanu, pee atum atayiolo nkitanapat inono. Ore enkitanapata naing'uaa enkutuk ino naa eisidai alang nkalifuni e sahabu o enkosholai. Nkaik inono naaitayutuo nanu naaitobiru; nchooki nanu eyiolounoto pee atum aiteng'enuo too nkitanapat inono. Ore lelo likiure iyie naadol nanu neng'idayu, enkaraki naisiliga nanu ororei lino. Ayiolo nanu, Olaitoriani, nchere nkiguanat inono naasipa, nayiolo nchere te sipata iyie kintamio nanu. Nchoo enyorrata ino nauno etaanu pee aaitagol nanu, te risioroto e nkisiligata nisiligie osinka lino. Nchoo olng'ur lino elotu enatii, pee atum nanu ataa kaishu, amu nkitanapat inono naaitiship nanu. Nchoo meitukurruni lelo lemeure Enkai, amu aaiteenikitia ninche elejare; ore nanu, naa nkitanapat inono ninche aibirribir. Nchoo lelo likiure iyie aaibelekenyakino nanu, pee etum aatayiolo enchakenisho ino. Metaa meeta oltau lai entioto too nkitanapat inono, pee maaitukurruni nanu. Etalepori oltau lai eyieu enjeunoto ino; ororei lino nanu aisiligita. Eiliilaitie nkonyek aainei aanyita enkisiligata ino; naikilikuanu ajo, “Kanu kenya kintagol nanu?” Atotiuo nanu anaa olbene le naisho oo sabibu otii atua empuruo, kake eitu ake aarikino nkitanapat inono. Kenkata nabaa engiri eanyisho osinka lino? Kanu iyie inguanare lelo laaisilisil nanu? Aatuturokitio lelo lemeure Enkai ngumot, lelo tung'ana lemeibung nkitanapat inono. Ore nkitanapat inono pooki naa kesipa, naaisilisil nanu iltung'ana te lejare; taretuoki nanu! Enkiti wueji pee eitu aaishie nanu te nkop; kake eitu nanu aiturraa nkitanapat inono. Ore te ina nyorrata ino nauno telekuaki nanu pee atum aibung'a enchakenisho e nkutuk ino. Ebikoo ororei lino, Olaitoriani, ntarasi te keper. Ore esupatisho ino nebaiki iishoritin pooki; iyie oitayio enkop nintasheyie ninye. Ore te nkitanapata ino neitashe ntokitin pooki o metabaiki ena olong; amu ore ntokitin pooki naa iyie eisiaai. Te neme apa nkitanapat inono naaitiship nanu, anaata nanu aidaaiyie te nkitamioto ai. Maarikino ae kata nanu nkitanapat inono; amu te ninche nanu kinchoo iyie enkishui. Ara nanu olino, ntajeuoki; amu aing'orua nanu nkiteng'enat inono. Eirragita ilarruok pee aaidaikie nanu; kake atadamua nanu shakenisho ino. Atoduaa nanu engorikinoto oo ntokitin pooki sidain, kake meeta inkitanapat inono eng'orikinoto. Ebaa enyorrata nanyor nanu nkitanapat inono! Ninye nanu aibirribir endama pooki. Enkiteng'enata ino naaiteng'en nanu matalang'a ilmang'ati laainei, amu etii te nebo nanu nkatitin pooki. Aata nanu eyiolounoto alang ilaiteng'enak laainei pooki, amu enchakenisho ino ninye nanu aibirribir. Ayiolo nanu mbaa oleng alang oltung'ani moruo, amu aibung'ita nanu nkitanapat inono. Narishie nanu nkejek aainei pooki oitoi torrono, pee atum aibung'a ororei lino. Maibelekenya nanu apaash nkitanapat inono, amu kinteng'ena iyie nanu. Kemelok oleng irorei linono te nainyorrinyor, kemelok aalang enaisho te nkutuk ai! Ore too nkitanapat inono natum nanu eyiolounoto; ore enkaraki ina kaiba nanu pooki oitoi torrono. Ore ororei lino naa oltaa loo nkejek aainei naa ewang'an te nkoitoi ai. Ainosa nanu olmumai naitadedeyie pee atum atisipu inkitanapat inono naasipa. Anoto nanu osina kitok; nchooki nanu enkishui, Olaitoriani, te risioroto o rorei lino! Tang'amu nkishorot aainei e nkisisa, Olaitoriani, nikinteng'en nanu inkitanapat inono. Aibung'ita nanu enkishui ai te nkaina ai anaake, kake eitu nanu aarikino nkitanapat inono. Aatipikaka nanu oltorrono orreshet, kake mapaashari nanu alam nkitanapat inono. Enchakenisho ino ninye enjung'ore ai ntarasi; ee, ninche eng'ida o ltau lai. Aibelekenya nanu oltau lai aipirie nkitanapat inono, ntarasi o metabaiki enkiting'oto. Aiba nanu iltung'ana ooing'ashing'ash, kake anyor nanu nkitanapat inono. Ira iyie enkisudoroto ai o elong'o ai; ororei lino nanu aisiliga. Entalamaki nanu intae ilarruok, pee atum aibung'a nkitanapat e Nkai ai. Mbung'aki nanu te risioroto e nkisiligata ino, pee aton aishu, nimikincho nanu manoto enkurruna to siligi lai! Mbung'aki nanu ilepieki, pee atum ataseriana, natum atishilai nkitanapat inono nkolong'i pooki! Itanya iyie lelo oopaash nkitanapat inono; ee, ore enkeleekisho enye naa pesho. Ore ilarruok pooki le nkop niwuang'ie anaa isuut; ore enkaraki ina anyor nanu shakenisho ino. Eikirikira osesen lai kiure iyie, naure nanu nkiguanat inono. Ataasa nanu embae nasipa naishiaakino; mikipalaki nanu ilaitorogonyak laainei. Taa iyie olaitaishekinoni lo sinka lino te nkaraki isupati; mincho lelo lemeure Enkai aaibooki enkop. Eiliilaitie nkonyek aainei aing'orita enjeunoto ino, naing'or enkitabaroto enkisiligata ino supat. Ntaasa osinka lino te risioroto e nyorrata ino nauno, nikinteng'en nanu inkitanapat inono. Ara nanu osinka lino; nchooki nanu eyiolounoto, pee atum atayiolo shakenisho ino! Etaa enkata naasisho Olaitoriani, amu etigilaki inkitanapat inono. Anyor nanu inkitanapat inono, aitalang sahabu, aitalang sahabu nasila. Ore enkaraki ina aiturubare nanu iroruat aainei nkiguanat inono pooki; aiba nanu pooki oitoi torrono. Ene nking'asia enchakenisho ino; ore enkaraki ina neibung oltau lai ninche. Ore embolokinoto o rorei lino neyau ewang'an, neitaarriyian ilo lemeeta eng'eno. Aipang'ipang nanu ang'aita enkutuk, amu aanyita inkitanapat inono. Mbelekenyayu ing'uraki, niking'urrie nanu, anaa oshi ake enintaas lelo oonyor enkarna ino. Ntirring'ie iroruat aainei te risioroto e nkisiligata ino, nimincho entorroni maaitoria nanu. Talakuaki nanu too ltung'ana laaibooki enkop, pee atum aibung'a nkitanapat inono. Nchoo meitawang'aki enkomom ino osinka lino, nikinteng'en nanu nkitanapat inono. Eturukote nchorroi oo lkiyio too nkonyek aainei, enkaraki nemeibung iltung'ana enkitanapata. Ira iyie asipani, Olaitoriani, nesipa nkiguanat inono. Itegelua iyie enchakenisho ino too sipat o te supatisho pooki. Aainosita nanu olom, enkaraki narikino ilmang'ati laainei irorei linono. Ore enkisiligata ino netetemaki oleng, nenyor osinka lino ninye. Ara nanu oti naatemenaki, kake maarikino nanu inkitanapat inono. Ore esipata ino nesipa ntarasi, ore inkitanapat inono nesipa. Eeuo enyamali o sina shumata nanu, kake inkitanapat inono naaitiship nanu. Esipa enchakenisho ino ntarasi; nchooki nanu eyiolounoto pee aton aishu. Aishirita nanu to ltau lai pooki; tawalikiaki nanu Olaitoriani! Kaibung nanu inkitanapat inono. Aaishiraka nanu iyie; ntajeuoki nanu; pee atum atisipu enchakenisho ino. Adumunye nanu aishir enamanarie enkakenya, naishir te nkaraki eretoto; naisilig nanu irorei linono. Maiken nanu nkonyek enkewarie pooki, pee atum aibirribirra enkisiligata ino. Toning'o oltoilo lai te nkaraki enyorrata ino nauno; Olaitoriani, ore te nkaraki isipat inono tagolie enkishui ai. Etinyikutua lelo laaisilisil nanu too ntorrok; elakuaniki ninche nkitanapat inono. Kake itaana iyie, Olaitoriani, nesipa nkitanapat inono pooki. Atayiolo apa nanu moitie te nchakenisho ino nchere ntobira apa ninche ntarasi. Ing'ura iyie osina lai, nikikordu nanu, amu maarikino nanu enkitanapata ino. Taa iyie liking'or nikilaku nanu; nchooki nanu enkishui te risioroto e nkisiligata ino! Elakuaniki enjeunoto ilarruok, amu meing'oru ninche inkiguanat inono. Eikitok olng'ur lino, Olaitoriani; nchooki nanu enkishui te risioroto oo sipat inono. Kumok ilaisilisilok laainei o lmang'ati laainei; kake malimana nanu apaash enchakenisho ino. Aaing'or nanu lelo lemeisiligayu te ngoro, amu meibung ninche inkitanapat inono. Toduaa eneba enyorrata nanyor nanu inkiguanat inono! Tagolie enkishui ai te risioroto e nyorrata ino nauno. Ore esiana o rorei lino naa esipata, ore pooki ng'ae loo sipat oo inkiguanat inono nebikoo ntarasi. Aaisilisil nanu ilkituaak metii emporeet, kake eitashe oltau lai eanyit irorei linono. Ashipakino nanu ororei lino, anaa oltung'ani otum imasaa kumok. Aiba nanu namen entorroni, kake anyor inkitanapat inono. Katitin naapishana nanu aaisis iyie te nkolong te nkaraki inkiguanat inono naasipa. Eeta eseriani kitok lelo oonyor enkitanapata ino; meetae entoki narror ninye. Aisiligita nanu enjeunoto ino, Olaitoriani, naas nanu inkitanapat inono. Eibung oltau lai enchakenisho ino; nanyor nanu enchakenisho ino oleng. Aibung nanu inkiguanat inono o enchakenisho ino, amu etii nkoitoi aainei pooki dukuya iyie. Nchoo enkishirata ai elotu dukuya iyie, Olaitoriani; nchooki nanu ening'unoto te risioroto o rorei lino. Nchoo enkomono ai elotu dukuya iyie; tokorduaki nanu te risioroto o rorei lino. Elimu enkutuk ai enkisisa ino amu kinteng'en nanu nkiteng'enat inono. Erany olng'ejep lai irorei linono, amu ore inkitanapat inono pooki nesipa. Nchoo enkaina ino etaanu pee aaret nanu, amu ategelua nanu nkiguanat inono. Aanyita nanu enjeunoto ino, Olaitoriani, naa nkitanapat inono naaitiship. Nchooki nanu aishu, pee aatum aisisa, naa nchoo nkiguanat inono aaret nanu. Ashomo nanu apong'ori anaa enker naimina; ing'oru osinka lino, amu maarikino nanu inkitanapat inono. Ore to sina lai aishiraka nanu Olaitoriani, pee aatum atawaliki nanu. “Tokorduaki nanu, Olaitoriani, too ltung'ana le lejare, te ilo ng'ejep olejisho.” Kainyoo kenya kinchori iyie? Naa kainyoo kenya kintokini aaitaas, iyie lo lng'ejep le lejare? Mbaa naapi o lang'oroni, naaitagoloki too nkuk naaishu o lchani! Oi nanu, olomanya atua Meshek, obikito too lng'oborri le Kedar! Atobiko te nkata naado ti atua lelo ooiba eseriani. Anyor nanu eseriani; kake te nairo naa lo larrabal ninche Araposhu nanu nkonyek aainei aing'or ildoinyo. Kaji eing'uaa eretoto ai? Olaitoriani eing'uaa eretoto ai, laa ninye oitobira keper o enkop. Nemeisho ninye meigusugusieki enkeju ino, ore ilo likirrip iyie nemeimug. Ng'ura, ore ilo orrip Israel nemeimug nemeirura. Olaitoriani ninye olarriponi lino; Olaitoriani ninye oloip lino te nkalo enkaina ino e tatene. Nimikiosh iyie enkolong te ndama, anaa olapa te nkewarie. Olaitoriani likirrip iyie too ntorrok pooki; naa kerrip ninye enkishui ino. Kerrip Olaitoriani enkipang'ata ino o enjing'unoto ino, ebaiki ena kata o ntarasi. Atishipe pee aajoki ninche, “Maape enkaji o Laitoriani!” Eitasheito nkejek ang too nchomito inono, iyie Yerusalem! Yerusalem, nateshetaki anaa enkanasa, nateshetuaki meibung'ayu te nebo, naa ninye eilep iloshon aapuo, lelo oshon lo Laitoriani, anaa apa enaitanapaki Israel, pee eisho enkarna o Laitoriani enashe. Eirragieki ilorikan le nkiguana te ine, lelo orikan le nkitoo le nkaji e Daudi. Entoomon te nkaraki eseriani e Yerusalem! “Metubula lelo likinyor iyie! Meeu eseriani isunta inono, nelotu erripoto atua iltaleta inono!” Ore too lalashera laainei o le ncholuek ai, ajo nanu, “Metijing'a eseriani atua iyie!” Ore te nkaraki enkaji o Laitoriani Enkai ang, ekaing'oru nanu esupatisho ino. Iyie nanu araposhoki nkonyek aainei, iyie olotonita to lorika le nkitoo te keper! Ng'ura, ore anaa enaing'or nkonyek oo sinkan olkitok lenye, anaa enaing'or nkonyek enkaisiaayiani enkaina e eina naitore ninye, neijia etiu nkonyek ang eing'or Olaitoriani Enkai ang, o metaba anaa neing'urrie ninye iyiook. Ing'urrie iyiook, Olaitoriani, ing'urrie iyiook, amu kinoto iyiook nkisilisilot naalus. Te nkata naado eeta iltauja lang isukenyat e lelo ooisikarra, isukenyat e lelo oowuasa. Te neme apa Olaitoriani otii enkalo ang nchoo taa Israel ejo tena kata te neme taa apa Olaitoriani otii enkalo ang, ina kata pee edumakino iyiook iltung'ana aagilunore, anaata etoijoitie ninche iyiook kinchu, ina kata pee eyupuyup engoro enye ti alo iyiook; naa anaata etooroyie iyiook oloirrag le nkare, anaata eimisie iyiook enkare; anaata eima ilopir le nkare shumata iyiook. Meisisi Olaitoriani, amu eitu ninye eishooyo iyiook matotiu anaa eng'ues natarreshoki te rishata oo lala lenye. Kilanyishote iyiook anaa emotonyi te ilo rreshet lo larreshoni etigile orreshet, nikilanyishote iyiook. Etii eretoto ang atua enkarna o Laitoriani, laa ninye oitobira keper o enkop. Ore lelo ooisilig Olaitoriani netiu anaa oldoinyo le Sion, lemeidimi aaigusugusie, kake ebik ninye ntarasi. Ore anaa enamanita ildoinyo Yerusalem, neijia etiu Olaitoriani emanita iltungana lenyena, ebaiki ena kata o intarasi. Amu melotu eng'udi e nkitoria e lelo arruok shumata ina kop natudung'okoki isupati pee meitorioo ake isupati nkaik enye aas entorroni. Ntaasa isupati, Olaitoriani, lelo oonyor isupati, o lelo supati too ltauja lenye! Kake ore lelo ooibelekenya aapuo aaim nkoitoi enye naalojiloja, nelo Olaitoriani arikoo ninche te nebo lelo torrok! Meeu eseriani Israel! Ore apa pee errinyu Olaitoriani lelo ootaarayioki le Sion, nikitiu iyiook anaa ilooidetidet. Neitoki enkuenia aiput nkutukie ang, neiput ilng'ejepa lang mbuakunot e ng'ida; nejo ninche ti atua nkuapi, “Etaasa Olaitoriani mbaa sapuki te nkaraki ninche.” Etaasa Olaitoriani mbaa sapuki te nkaraki iyiook; kitishipate iyiook. Torrinyu lelo lang apa ootaarayioki, Olaitoriani, meikununye anaa nchorroi e Negeb! Nchoo lelo oounisho too lkiyio eisampu too mbuakunot e ng'ida! Ore ilo olo eishirita, enapita olantererai olo aun, nelotu ang too mbuakunot e ng'ida, enapita enkisampuare enye. Te neitu eshet Olaitoriani enkaji, ore lelo ooshet pesho eekenya. Te neitu errip Olaitoriani enkanasa, ore lelo oorrip pesho eshololo. Te mpesho inyototo intae tadekenya, nimutietie eitu ipuopuo aairura, ninosinoso endaa osina; amu eisho ninye ilo onyor lenye njo. Ng'ura, nkera ninche enjung'ore naing'uaa Olaitoriani, ore nkera naa nkishorot naaing'uaa ninye. Ore nkera naatum oltung'ani te kitisho, netiu anaa mbaa te nkaina olmurrani Emayiana ilo tung'ani oiputa emootian enye mbaa! Medol ninye enkurruna te neirorie ilmang'ati lenyena te kishomi. Emayiana pooki ng'ae oure Olaitoriani, ilo olo too nkoitoi enyena! Amu inos iyie ilng'anayio le nkisiayiare oo nkaik inono; ishipayu iyie neaku sidain mbaa ti alo iyie. Naa ketiu enkitok ino anaa olchani loo lng'anayio ti atua enkaji ino; netiu nkera inono anaa nkaitubulu oo loirienito emanita emesa ino. Ng'ura, neijia eikunakini emayianata eilo tung'ani oure Olaitoriani. Mikitamayiana Olaitoriani etii Sion, toduaa iyie dupoto e Yerusalem, too nkolong'i pooki e nkishui ino! Tobikoi toduaa nkera oo nkera inono! Meeu eseriani Israel! “Aaisilisilo ninche nkatitin kumok ebaiki kitisho ai,” nchoo Israel ejo - “Aaisilisilo ninche nkatitin kumok ebaiki kitisho ai, kake eitu aaisulu ninche. Ore ilaturok netuturo ninche enkoriong ai, neitoodor ninche ilbaat lenye.” Ore Olaitoriani naa olasipani; etudung'o ninye nkeenta e ilo arruoni. Ore lelo pooki ooiba Sion, nchoo meitukurruni nerrinyi siadi! Metotiuo ninye anaa olkujita otii shumata e nkaji, ilo otoyu eton eitu ebulu, ilo lemeiput enkaina o ladung'oni, lemeaku erridata te ilo oenisho. Ore lelo oogiroo nemejo ninche, “Meeu emayianata o Laitoriani shumata iyie! Kimayian intae te nkarna o Laitoriani!” Ti atua enguton aaishiraka nanu, Olaitoriani! Olaitoriani, toning'o oltoilo lai! Nchoo nkiyiaa inono meinining'o oltoilo le sayiata ai! Amaa, tenaa isir intorrok ang, Olaitoriani, kanaata aa ng'ae oidim aitasho? Kake iata iyie empalikinoto pee kitumi aatureita. Aanyita nanu Olaitoriani, ninye eanyu oltau lai naa ororei lenye nanu aisiliga. Eanyita oltau lai Olaitoriani alang eanyunoto naanyu ilarripok enkakenya, elusoo te anyunoto naanyu ilarripok enkakenya. Iyie Israel, isiliga Olaitoriani! Amu Olaitoriani etii enyorrata nauno, naa ninye etii enkordunoto kitok. Naa kekordu ninye Israel too ntorrok enye pooki. Olaitoriani, eitu epashipashu oltau lai, neitu eshumunye nkonyek aainei aaing'or shumata; maitanyamal nanu kewan too mbaa kituaak o too mbaa e nking'asia te nanu. Kake aitirring'ie nanu naitobir oltau lai, anaa enkerai naitigiraki to lkina le ng'otonye; etotiuo oltau lai anaa enkerai naitigiraki. Iyie Israel, isiliga Olaitoriani ebaiki ena olong o ntarasi. Tadamu, Olaitoriani, te nkaraki Daudi, ilo sina pooki apa onoto ninye; einosa ninye olmumai to Laitoriani, neinos ninye olmumai te ilo magilani le Yakobo, “Majing nanu atua enkaji ai nemajing endapash ai; maiken nanu nkonyek aainei airura nemaimug aimul nkonyek aainei, o metaba anaa naing'uraki Olaitoriani ewueji, ewueji nebikie ilo magilani le Yakobo.” Ng'ura kitoning'o iyiook te Efrata, nikitum iyiook too nkong'at e Yaar. “Maape iyiook emanyisho enye; mateserem iyiook ti abori nkejek enyena!” Tudumunye, Olaitoriani, shomo ewueji ino e nkiyeng'iyeng'ata, iyie o sanduku lino le nkidimata. Nchoo meishopokini ilapolosak linono esupatisho, naa nchoo isinyat linono metabuaku te ng'ida. Ore te nkaraki osinka lino Daudi mimbelekeny enkomom e ilo lino otubukokoki eilata aaput. Einosa Olaitoriani ti alo Daudi olmumai le dede, nemeitoki ninye aibelekenya te ilo mumai: “Ore obo loo layiok lo sesen lino naa kaitotonie nanu olorika lino le nkitoo. Te neibung ilayiok linono olning'o lai o enchakenisho ai nalo nanu aiteng'en ninche, ore sii ilayiok lenye ntarasi nepuo aatonie olorika lino le nkitoo.” Amu etegelua Olaitoriani Sion; etonyorra ninye aitaa emanyisho enye: “Ewueji ai nayeng'iyeng'are ena ntarasi; ene nanu abikie amu atonyorra nanu ene. Naa kamayian nanu ndaiki enyena oleng; naitaraposh lelo aisinak lenyena too ndaiki. Ore ilapolosak lenyena naishopoki enjeunoto, ore isinyat lenyena naisho mbuakunot e ng'ida. Ore te ine naisho nanu emowuo e Daudi meishuro; aitobira nanu oltaa te nkaraki ilo otubukokoki eilata aaput. Ore ilmang'ati lenyena naishopoki enkurruna, kake ore te dukuya enye neishopokini enkopiyia e nkitoo naikishiaan.” Ng'ura, kebaa esidano o enchipai te netoni ilalashera to lning'o! Etiu anaa eilata nagol enkinyang'a te ndukuya, eruko ajing olmunyei, ajing olmunyei le Aron, eruko adoiki emurt olkila lenye! Etiu anaa enkoileelio e Hermon, nadoiki ildoinyo le Sion! Amu te ine eitanapishe Olaitoriani imayianat, enkishui ntarasi. Wootu, maisisa Olaitoriani, intae isinkan pooki lo Laitoriani, lelo ooitashe kewarie ti atua enkaji o Laitoriani! Elepie nkaik inyi te ine wueji sinyati, esisa Olaitoriani! Mikitamayiana Olaitoriani etii Sion, ilo oitobira keper o enkop! Meisisi Olaitoriani. Meisisi enkarna o Laitoriani, enchoru enkisisa intae isinkan lo Laitoriani, intae lelo ooitashe ti atua enkaji o Laitoriani, too lgorieti le nkaji e Nkai ang! Esisa Olaitoriani, amu aisupat Olaitoriani; enterrep enkarna enye, amu ninye aipirisioni! Amu etegelaka Olaitoriani kewan Yakobo, etegelua Israel aitaa olenye. Amu ayiolo nanu ajo eikitok Olaitoriani, nayiolo nchere etii Olaitoriani lang te shumata nkaitin pooki. Ore enaba anaa enayieu Olaitoriani neas ninye te keper o te nkop, ti atua inaaiposha o too neegut pooki. Ninye oishoo nkatampo meilepa too neeiting'ie enkop, ninye oitobira nkiwuang'at te nkata e nchan neyau olkutati aitung'uaa nkajijik enyena naashumishoreki. Ninye apa otara ilkikaunot le Misiri metuata, o lenkiteng o le ng'ues; laa ore ti atua empolos ino, iyie Misiri, neirriu nkitoduaat e nking'asia, agilunore Farao o sinkan lenyena pooki, Ninye apa ilo otoosho nkuapi kumok nesesekuan ilaiguanak magil, Sihon, olaiguanani le Amori, o Oog, olaiguanani le Bashan, o nkitoriat pooki e Kanaan, neishooyo enkop enye aitaa enjung'ore, enjung'ore too ltung'ana lenye loo siraeli. Ebikoo enkarna ino, Olaitoriani, ntarasi o ntarasi, ira iyie ning'oti ti atua iishoritin pooki. Amu keitasheyie Olaitoriani iltung'ana lenyena too sipat, neing'urrie isinkan lenyena. Ore nena kitanyaanyukot oo nkaitin oo nkuapi naa enkosholai o sahabu, isiaaitin oo nkaik e tung'ana. Eeta ninche nkutukie, kake meiro, eeta nkonyek kake medolisho, Eeta nkiyiaa kake mening'isho, nemeeta enkiyang'et too nkutukie enye. Metotiwuo anaa ninche lelo ooitobiru ninche! Ee metotiwuo neijia pooki ng'ae oisilig ninche! Na aji e Israel, esisa Olaitoriani! Na aji e Aron, esisa Olaitoriani! Na aji e Lawi, isisa Olaitoriani! Intae kulo ooure Olaitoriani, esisa Olaitoriani! Esisa Olaitoriani te Sion, ilo obikito le Yerusalem! Meisisi Olaitoriani! Enchoo Olaitoriani enashe amu eisupat ninye, amu ebikoo enyorrata enye nauno ntarasi. Enchoo enashe Enkai oo nkaitin, amu ebikoo enyorrata enye nauno ntarasi. Enchoo enashe Olaitoriani loo laitoriak, amu ebikoo enyorrata enye nauno ntarasi; ilo laa ninye ake oas ine nking'asia sapuki, amu ebikoo enyorrata enye nauno ntarasi; ilo oitobira keper te nkarriyiano, amu ebikoo enyorrata enye nauno ntarasi; ilo oisalaasha enkop natoyio te shumata nkariak, amu ebikoo enyorrata enye nauno ntarasi; ilo oitobira iwang'aritin sapuki, amu ebikoo enyorrata enye nauno ntarasi; neitobir enkolong meitoria endama, amu ebikoo enyorrata enye nauno ntarasi; neitobir olapa o lakir meitoria enkewarie, amu ebikoo enyorrata enye nauno ntarasi; ilo apa otara metuata ilkikaunot le Misiri, amu ebikoo enyorrata enye nauno ntarasi; neipang'unye Isiraeli aitung'uaa atua ninche, amu ebikoo enyorrata enye nauno ntarasi; te nkaina nagol naitoriori, amu ebikoo enyorrata enye nauno ntarasi; ilo oiperra Enaiposha Nanyokie aitaa are, amu ebikoo enyorrata enye nauno ntarasi; neisho Isiraeli meima atua ninye, amu ebikoo enyorrata enye nauno ntarasi; kake etusulayie Farao o lorora lenye ti atua Enaiposha Nanyokie, amu ebikoo enyorrata enye nauno ntarasi; Ilo otorikoyie iltung'ana lenyena ti ong'ata, amu ebikoo enyorrata enye nauno ntarasi; ilo otasesekuana ilaiguanak kituaak, amu ebikoo enyorrata enye nauno ntarasi; near to lalem ilaiguanak ning'ot, amu ebikoo enyorrata enye nauno ntarasi; Sihon, olaiguanani le Amori, amu ebikoo enyorrata enye nauno ntarasi; o Oog, olaiguanani le Bashan, amu ebikoo enyorrata enye nauno ntarasi; neishooyo enkop enye metaa enjung'ore, amu ebikoo enyorrata enye nauno ntarasi; enjung'ore to sinka lenye Israel, amu ebikoo enyorrata enye nauno ntarasi. Ninye otadamua iyiook apa kishal, amu ebikoo enyorrata enye nauno ntarasi; nekordu iyiook aitung'uaa ilmang'ati lang, amu ebikoo enyorrata enye nauno ntarasi; ninye oisho endaa ntokitin pooki naaishu, amu ebikoo enyorrata enye nauno ntarasi. Enchoo enashe Enkai e keper, amu ebikoo enyorrata enye nauno ntarasi. Too mbat oo lkejek le Babilon iyiook kitotoni, te ine iyiook kinchira kidamu Sion. Too lkeek ootaaniki ine kitiika iyiook nkinantani ang. Amu ore apa te ine, ore lelo ootaaraitie iyiook, neyieu nikiranyaki ninche osinkolio, ore lelo ooisilisil iyiook, nejo, “Entaranyaki iyiook obo loo sinkolioitin le Sion!” Kaji iyiook kinko te nikirany osinkolio le Nkai te nkop eiking'a? Te naarikino nanu iyie, Yerusalem, nchoo enkaina ai e tatene etoyu! Meibung'a olng'ejep lai enoret e nkutuk ai, te nemaadamu nanu iyie, te nemapik nanu Yerusalem aitulus te nchipai ai pooki! Tadamu, Olaitoriani, ti alo iltung'ana le Edom, ina batatata apa e Yerusalem, etejo apa ninche, “Endaikie ninye, endaikie ninye! Entigil o metabaiki olkitamanyunoto!” Na tito e Babilon, iyie naainyalani! Emayiana ilo oing'oru te iyie ina apa nintaasa iyiook! Emayiana ilo oitayu nkera inono kutiti nenang'ie ninche endapidapoi! Kaaisho nanu iyie enashe, Olaitoriani, to ltau lai pooki; ore te dukuya nkaitin narany nanu enkisisa ino; airrugo nanu aing'or enkaji ino sinyati naisho enashe enkarna ino te nkaraki enyorrata ino nauno o esupatisho ino; amu ilepie aitulus te pooki enkarna ino o rorei lino. Ore te nkolong naaipoto nanu, nikitawalikia, ore engolon ai oltau nikitoponikia. Ore laiguanak pooki le nkop naa eikisis iyie, Olaitoriani, amu etoning'o ninche irorei le nkutuk ino; naa kepuo ninche aarany isinkolioitin loo nkoitoi o Laitoriani, amu aikitok enkitoo o Laitoriani. Amu ore hoo netii Olaitoriani shumata, keing'or ninye, keing'or ninye ilo obor; ore ilo owuasa neyiolo ninye elakua. Ore ninye te nalo aim empolos e nyamali, igolie ake enkishui ai; intorioo iyie enkaina ino aibooyo engoro napi oo lmang'ati laainei, naa enkaina e tatene naakordu nanu. Keitabaya Olaitoriani enyorrata enye te nanu; ore enyorrata ino nauno, Olaitoriani, ebikoo ntarasi. Minturraa iyie esiaai oo nkaik inono. Olaitoriani, kitujurro iyie nanu nikitayiolo nanu! Iyiolo iyie enkata naton o enkata nadumunye; imusu iyie ndamunot aainei ilakua. Ijurru iyie enkoitoi ai o enkirragata ai, niyiolo iyie oleng nkoitoi aainei pooki. Ore ninye eitu elotu ororei ajing olng'ejep lai, ng'ura, Olaitoriani, iyiolo iyie pooki. Kitamana nanu te siadi o te dukuya, ninteleikia enkaina ino shumata nanu. Ore ena ng'eno naa eikitok oleng te nanu; etii shumata, maidim nanu aibung'a. Kaji nanu alo pee ailany Enkiyang'et ino? Anaa kaji nanu alo pee aailany iyie? Te nailep nanu alo shumata, itii iyie ine! Te naitobir nanu endapash ai te nemeneng'a itii iyie ine! Te nalo nanu too naipuko e nkakenya, nalo amany enaiposha ore sii te ine naa enkaina ino naarikoo, naa enkaina ino e tatene naaibung nanu. Te najo nanu, “Ncho maaitemoi nanu enaimin, ore ewang'an naamanita nanu neaku enkewarie,” ore ninye enaimin nememisimis te iyie, kewang enkewarie anaa endama; amu etiu enaimin anaa ewang'an te iyie. Iyie oitobira osesen lai ti atua, iyie likiruburuba nanu ti atua enkoshoke e yieyio. Aaisis nanu iyie amu iyie eurei naa iyie olenking'asia. Inenking'asia isiaaitin inono! Kiyiolo iyie nanu oleng; meisudoro enkidikidikoto o sesen lai te iyie, ina kata pee aaitobiruni nanu te nkisudoroto, ina kata aaitubuluni nanu te nguton e nkop. Naaing'or nanu nkonyek inono eton eitu aaku toki; neigero te mbuku ino inkarn e pooki, nena olong'i pooki naategeluaki eton eitu ebau. Kebaa tipat oo ndamunot inono te nanu, iyie Enkai! Kebaa enkumoi enye! Te naiken nanu ninche, nelang osinyai. Te nainyototo nanu, natii ake te nebo iyie. Oi naaji te naa isesekuan olarruoni, Iyie Enkai, pee aatum nanu iltung'ana lo sarge aatalam, lelo tung'ana torrok likikeshare iyie, lelo ooilepie ate te ntorroni likigilunore te ntorroni! Aimaiba nanu lelo likimba iyie, Olaitoriani? Aimamen nanu lelo likigilunore iyie? Kaiba nanu ninche oleng, aitaa nanu ninche ilmang'ati laainei. Tujurroki nanu, iyie Enkai, niyiolou oltau lai! Ineneng'aki nanu niyiolou ndamunot aainei! Nidol tenaa ketii enkoitoi torrono atua nanu, nikirikoo nanu te nkoitoi ntarasi! Tokorduaki nanu, Olaitoriani, too ltung'ana torrok, tagolieki nanu too ltung'ana lo larrabal, te lelo ooitobir nkitobirat torrok too ltauja lenye, nedumu ninche olarrabal anaake. Eitipij ninche ilng'ejepa lenye anaa ilasuriaa, ore nkutukie enye netii esayiet oo nturbubuani. Torripoki nanu, Olaitoriani, too nkaik e ilo torrono; tagolieki nanu too ltung'ana lo larrabal, te lelo ooitobira pee eitapong'oo nkejek aainei. Eisudoitie lelo oowuasa oreshet te nkaraki nanu, neitoluaa ninche too nkeenta orreshet, ore te mbata e nkoitoi aatipikakita ninche orreshet. Atiaaka nanu Olaitoriani, ira iyie Enkai ai; toning'o oltoilo le nkomono ai, Olaitoriani! Olaitoriani, Olaitoriani lai, olakordunoni lai ogol, intoipo iyie endukuya ai te nkolong o larrabal. Minchooyo iyie, Olaitoriani, iyieunot e ilo torrono; mintabaya ina yieunoto enye e ntorroni! Ore lelo laamanita nanu neshumu ilukuny enye, nchoo ina torroni oo nkutukie enye meibung'a ninche! Nchoo metusulakinoto ninche nkuk naairowua! Nchoo ninche metusulakini ngumot, nemeigil ae kata aailepu! Nchoo ilo oiro mbaa torrok eaku megolu ae kata te nkop; nchoo entorroni metanang'ie enkop oltung'ani lo larrabal! Ayiolo nanu ajo keitobir Olaitoriani mbaa e ilo oata osina, nedung enkiguana e ilo omena. Esipa keisho ilo supat enkarna ino enashe; ore ilo supat nebik ninye te dukuya iyie. Aaipoto nanu iyie, Olaitoriani, tasioku enatii nanu! Toning'o oltoilo lai, te naaipot nanu iyie! Nchoo enkomono ai meikenari anaa enkorropil te dukuya iyie, ore enkilepata oo nkaik aainei neikenari anaa olasar le nteipa! Tipika olarriponi enkutuk ai, Olaitoriani, torripo enkutuk ai, Olaitoriani! Mincho oltau lai metonyorra entorroni, pee aitanyamal kewan too nkiasin torrok te ncholuek oo ltung'ana oas ntorrok; nimikincho nanu mainosa ndaiki enye e sikar! Nchoo oltung'ani supat maatoosho, naaisikong te supatisho, kake mincho ae kata eilata e ilo torrono metipiki endukuya ai, amu ore enkomono ai e anaake negilunore nkiasin enye torrok. Ore te neishoori ninche aaitarasaki lelo oodung'oki enkiguana, nepuo taa aayiolou nchere kesipa ororei lo Laitoriani. Ore anaa osoit oidong'ishoreki te neiper enkop, neijia etiu iloik lenye eidapasha te nkutuk e nemeneng'a. Kake iyie eing'or nkonyek aainei, Olaitoriani Enkai; te iyie nanu aing'oru esarunoto; miking'uaa nanu maata olaamitu! Ntalamaki nanu ilo rreshet laairragakinye ninche nanu, o too rresheta loo laasak loo ntorrok! Nchoo ilarruok metadoiki pooki rresheta lenye maate, napuku nanu ailanyisho. Aaishiraka nanu to ltoilo lai, Olaitoriani, ore to ltoilo lai naomon Olaitoriani. Atubukuo nanu osina lai te dukuya ninye, nalimu nanu enyamali ai te dukuya ninye. Te neiterre oltau lai, niyiolo iyie enkoitoi ai! Ore te ina oitoi naaim nanu eisudoitie ninche orreshet te nkaraki nanu. Aing'ura nanu enkalo e tatene, naing'orisho, kake metii hoo obo laaing'or nanu, meetae esarunoto te nanu, meetae oltung'ani laashilaa nanu. Aaishiraka nanu iyie, Olaitoriani; najo, Ira iyie esarunoto ai, ira erubata ai te nkop oo looishu. Toning'o enkishirata ai; amu aaitadoyioki nanu oleng! Tokorduaki nanu te lelo laaisilisil; amu egol ninche oleng te nanu! Ntupukuoki nanu ti atua korokoroni, pee atum aishoru enashe te nkaraki enkarna ino! Naaman nanu lelo supati; amu kintaasa iyie isupati o ne lengon. Toning'o enkomono ai, Olaitoriani; nchoo metoning'o nkiyiaa inono eomonokinoto ai! Ore te nkaraki isipat inono tawalikiaki nanu ti atua esupatisho ino! Minguenare iyie osinka lino, amu meetae oltung'ani hoo obo oishu oata esipata te dukuya iyie. Amu aatimira nanu olmang'atinta; negiligil enkishui ai aoshie enkop; naaisho ninye matotona te naimin anaa lootuata. Ore enkaraki ina neiterre oltau lai ti atua nanu; ore oltau lai ti atua nanu neiputukunyo. Adamu nanu nkolong'i e apa, naibirribir nanu nena apa nitaasa; naing'asia te siaai oo nkaik inono. Naaitorioki nanu nkaik aainei; nikiatayie oltau lai enkure anaa enkop natoyio. Tasioki tawalikiaki nanu, Olaitoriani! Amu eiterria oltau lai! Mikisudorie nanu enkomom ino, matiu ake anaa lelo oopuo aajing engumoto. Nchooki nanu matoning'o tadekenya ina nyorrata ino nauno, amu iyie nanu atipika osiligi lai. Nteng'enaki nanu enkoitoi naaim, amu iyie nanu ailepakinye oltau lai. Tokorduaki nanu, Olaitoriani, too lmang'ati laainei! Iyie nanu akuetikia asaru! Nteng'enaki nanu mataasa eyieunoto ino, amu ira iyie Enkai ai! Nchoo oltau lino supat maatorikoi nanu te nkoitoi naitoriori! Ore te nkaraki enkarna ino, Olaitoriani, tagolie enkishui ai! Ore te supatisho ino ntayioki nanu ti atua enyamali! Naa ore te nyorrata ino nauno iwuang'ie ilmang'ati laainei, nindaikie ilmang'ati laainei pooki, amu ara nanu osinka lino. meisisi Olaitoriani, endapidapoi ai, laa ninye oitaarriyian nkaik aainei to larrabal, neitayiolo ilkimojik laainei olarrabal; endapidapoi ai naa osempewuet lai, enkisudoroto ai naa olakordunoni lai, elong'o ai naa ninye ilo lasaru nanu, laa ninye opik iloreren abori ninye. Olaitoriani, kainyoo tung'ani lishilaa ninye, anaa enkerai e tung'ani eji nidamu ninye? Etiu oltung'ani anaa enkiyang'et, etiu nkolong'i enyena anaa oloip oloito. Irrugu keper ino, Olaitoriani, nilotu adou! Iseyie ildoinyo pee epuru! Imerlelie nkiwang'at nindapashaa ninche, ning'oru mbaa inono aitanyamal ninche! Ntorioi enkaina ino te keper, tokorduaki nanu nikintayu nanu ti atua nkariak kumok, ntung'uayioki nkaik oo leeiking'a, lelo ooiro elejare too nkutukie enye, laa ore enkaina enye e tatene, naa enkaina e tatene e lejare. Naa kaaranyaki nanu iyie osinkolio ng'ejuk, Iyie Enkai; te nkauo oo sinkolioitin naata iusin tomon nanu aaranyaki iyie, iyie oisho ilaiguanak meisula, iyie otokordua Daudi osinka lino. Tokorduaki nanu te ilo alem torrono, nikikordu nanu aitung'uaa enkaina e lelo leeiking'a, lelo ooiro elejare too nkutukie enye, laa ore enkaina enye e tatene naa enkaina e tatene e lejare. Metotiwuo ilayiok lang te lelero enye anaa nkaitubulu naatubulutua aabaya, metotiutu ntoyie ang anaa ing'apeta oo lmairrot, naatudung'uoki pee eshetieki enkaji e nkitoo o laiguanani; metaboreita nkajijik ang naashumishoreki meiputa mpukunot pooki oo ntokitin; metubula nkerrai ang, aaku nkalifuni o nkalifuni tomon too ndaat; menoto nkishu ang oloing'oni, nemetum olkibiroto anaa ae torroni; metaa metumi olkiyioi lo sina too nkoitoi ang! Emayiana lelo tung'ana ootum ena mayianata! Emayiana iltung'ana laa Enkai ninye Olaitoriani lenye! Kaarrep nanu iyie, Enkai ai, Olaiguanani, naisis enkarna ino ntarasi o ntarasi. Ore nkolong'i pooki naaisis nanu iyie, naisis enkarna ino ntarasi o ntarasi. Kitok Olaitoriani, naa kitok enkisisa enye, ore enkitoo enye nemelimunoyu. Neinosakino iishoritin o lajijik isiaaitin inono, neibalunye ninche nkiasin inono sapuki. Enkishiaa e nkitoo ino, enking'asia oo siaitin inono ninche nanu aibirribir. Neibalunye iltung'ana enkidimata oo nkiasin inono, naibalunye nanu enkitoo ino. Nebuku ninche ening'oi e supatisho ino, nerany ninche aabuaku isinkolioitin le supatisho oo sipat inono. Aipirisioni Olaitoriani neeta olng'ur, mesioki agoro nebore enyorrata nauno. Eisupat Olaitoriani te pooki, ore olng'ur lenye netii shumata nena pooki naaitobira ninye. Ore isiaaitin inono pooki naa eikincho iyie enashe, Olaitoriani, ore isinyat pooki nikiisis iyie! Neiro ninche aaimaki enkitoo e nkitoria ino, nelimu engolon ino, neitayiolo nkera e tung'ana nkiasin inono e ngolon, o enkishiaa kitok e nkitoria ino. Ore enkitoria ino naa enoo ntarasi, nebikoo enkitoo e nkitoria ino too ishoritin pooki. Asipani Olaitoriani too rorei lenyena pooki, naa aipirisioni too nkiasin enyena pooki. Eibung Olaitoriani airishu lelo pooki oobatata, nedumu ailepunye lelo pooki oolepokino enkop. Iyie eing'or nkonyek e pooki, nincho iyie ninche endaa too rishat enye. Ilak iyie enkaina ino, nintaraposh pooki toki naishu. Asipani Olaitoriani too nkoitoi enyena pooki, naa supat too iasat enyena pooki. Etaana Olaitoriani te pooki ooipot ninye, te pooki ooipot ninye te sipata. Eitabaya ninye iyieunot e pooki ooure ninye, nening sii olkiyioi lenye, neitajeu ninche. Egolie Olaitoriani lelo pooki oonyor ninye, kake ore iltorrok pooki naa keidaikie ninye. Keiro enkutuk ai enkisisa o Laitoriani, nchoo pooki naaishu eisis enkarna enye sinyati ntarasi o ntarasi. meisisi Olaitoriani! Isisa Olaitoriani lo tau lai! Kaisis nanu Olaitoriani nkolong'i naaba anaa naishu; arany nanu enkisisa e Nkai ai eton aishu. Mipik osiligi lino ilkituaak, mipik atua tung'ani lemetii eretoto atua ninye. Te nepuku enkiyang'et enye nerrinyokino ninye enkop; ore te ina olong neish nkitobirat enyena. Emayianaa ilo laa Enkai e Yakobo ninye eretoto enye, laa Olaitoriani Enkai osiligi lenye, ilo oitobira keper o enkop, o enaiposha o pooki naatii atua; ilo ooibung enkirukoto ntarasi; ilo oiguanare too sipat oloitorogonyaki; ilo laa ninye oitoti olooisumash. Olaitoriani olaaya ilooena; Olaitoriani obol ilmodook nkonyek. Olaitoriani odumu ailepunye ilootalepokinote enkop; enyor Olaitoriani ilo asipani. Errip Olaitoriani ilo omoni, neibung ninye enkoliai o ilo lemeeta menye, kake ore enkoitoi e ilo torrono neyau ninye enkidaata. Olaitoriani olo aitoreisho ntarasi, Enkai ino, iyie Sion, too ishoritin pooki. Meisisi Olaitoriani! Meisisi Olaitoriani! Amu eisidai te neranyakini enkisisa e Nkai ang; amu kaaipirisioni, naa keishiaakino osinkolio le nkisisa. Olaitoriani oshet Yerusalem; neiturrurru ilooidapashari apa le Israel. Neishiunye ilootigilate iltauja, neen ilbaa lenye. Neiken ninye neyiolou esiana oo lakir, neisho ninche pooki nkarn enye. Kitok Olaitoriani lang naa kitok engolon enye; ore eng'eno enye nemeimakinoyu. Edumu Olaitoriani oloitunyokoki enkop, nenang'ie olarruoni enkop. Entaranyaki Olaitoriani ninchosho enashe; entaranyaki Olaitoriani to lwulul loo usin kumok! Eimulumul ninye keper too nkatampo, neitobir ninye enchan pee eshaiki enkop, neitubulu ninye nkujit too ldoinyo. Ninye oisho ing'uesi e ntim ndaiki enye, neisho nkiyoitin oo motonyi naaishir endaa. Ore enchipai enye neme engolon e mbarta, neme nkejek e tung'ana eng'idare; kake lelo ooure ninye eshipakino Olaitoriani, lelo ooisilig enyorrata enye nauno. Isisa Olaitoriani, iyie Yerusalem! Isisa Enkai ino, iyie Sion! Amu ninye oitagol isenkenke loo nchomito inono; ninye omayian ilayiok linono ootii atua iyie. Ninye oitaserian ilpolosien linono; ninye oiputaki intae enkano sidai. Ninye oirriwaki enkop inkitanapat enyena; nelo ororei lenye asiooyo. Neishoru empaso naikununo anaa enturoto; neisalaashaki enkinuku enkop anaa nkuruon. Neyau ninye isoito le nchan anaa ilbelibelat, kalo oidim aitasheiki enkirobi enye? Ninye oirriu ororei lenye, neshol lelo soito; neisho osiuo lenye metukutunye, neruko nkariak. Eibalakinyie ninye Yakobo ororei lenye, eibalakinye inkiguanat o nkitanapat enyena Israel. Eitu ninye eas ena te likae osho, meyiolo ninche nkitanapat enyena. Meisisi Olaitoriani! Meisisi Olaitoriani! Meisisi Olaitoriani te keper, meisisi ninye te wueji e shumata! Esisa ninye ilmalaika lenyena pooki, esisa ninye ilororani lenyena pooki! Esisa ninye enkolong o lapa, esisa ninye intae ilakir pooki oowang! Isisa ninye iyie keper nalakua, o intae nkariak naatii shumata keper! Nchoo ninche eisis enkarna o Laitoriani! Amu ninye apa oitanapishe, neitobir ninche. Naa ninye oitasheyie ninche ntarasi o ntarasi, naa ninye oitayio enkitanapata enye nemeibelekenya. Meisisi Olaitoriani te nkop, o iyie enaiposha o ntokitin pooki naatii atua, enkima o enchan oo soito, o empaso, o lkutati lo siwuo oitabaya enkitanapata enye! Ildoinyo o ndoinyo pooki, ilkeek loo lng'anayio o ltarakua! Ing'uesi o nkishu pooki, ntokitin naaiserpepiari te nkop o motonyi naapuo tiaai! Ilaiguanak le nkop o ltung'ana pooki, ilkituaak o laitoriak le nkop pooki! Ilbarnot o selenken te nebo, iltung'ana moruak o nkera te nebo! Nchoo ninche eisis enkarna o Laitoriani amu enkarna enye ake kitok; etii enkitoo enye shumata keper o enkop. Eishoo ninye meishuro emowuo oo ltung'ana lenyena, esisa te nkaraki isinyat lenyena pooki, te nkaraki iltung'ana loo Siraeli ootaaniki ninye. Meisisi Olaitoriani! Meisisi Olaitoriani! Entaranyaki Olaitoriani osinkolio ng'ejuk, entarany enkisisa enye te umata oo supati! Nchoo Israel eshipakino ilo oitobira ninye, nchoo ilayiok le Sion eshipakino Olaiguanani lenye! Nchoo ninye eisis enkarna enye neinoe, neranyaki ninye te ntampuri o to lwulul loo usin kumok. Amu keshipakino Olaitoriani iltung'ana lenyena; neikod ninye olobor te nkisulata. Nchoo lelo supati metishipata te nkitoo; nchoo ninche eranyisho te ng'ida too ndapashi enye. Nchoo enkisisa kitok e Nkai ejing iltoiloishi lenye, nejing ilalema oopi nkaloli pokira nkaik enye, pee eitalaku elap too loshon neitame lelo lemeure Enkai, pee een ilaiguanak lenye too lpisia neen lelo kituaak lenye too sekenke, pee edung'oki ninche enkiguana naigero! Enkitoo ena te lelo pooki lenyena supati. Meisisi Olaitoriani! Meisisi Olaitoriani! Meisisi Enkai ti atua ewueji enye sinyati; meisisi ninye to loing'ang'e lenye kitok! Meisisi ninye too nkiasin enyena sapuki; meisisi ninye te risioroto e nkitoo enye sapuk! Meisisi ninye to ltoilo le ntarumpeta; meisisi ninye te ndule o te nkawuo oo sinkolioitin! Meisisi ninye te ntampuri o te nkinoyata o sinkolio; meisisi ninye too usin o te nkinanta nakuti! Meisisi ninye te nkinanta naru oleng; meisisi ninye te ndarata e nkinanta! Nchoo pooki toki naata enkiyang'et eisis Olaitoriani! Meisisi Olaitoriani! Indung'eta e rashe kuna e Solomon, olayioni le Daudi, olaiguanani le Israel. Etisiraki kuna dung'eta e rashe pee etum iltung'ana aatayiolo eng'eno o enkiteng'enare, nening'u irorei oogut le ng'eno, neng'amu enkiteng'enare te ng'eno naretisho, neng'amu esipata, o enkiguana nasipa, o emborron. Pee etumi aishoo eng'eno sidai olmodai netum ilbarnot eng'eno naiyiolounye eneikunari te nkishon. Ore sii ninye oltung'ani ng'en nening neponaa eyiolounoto, ore oltung'ani oota ening'unoto, netum anoto enkarriyiano sapuk. Pee itum atoning'u endung'et e rashe, o enkipirta enye, o lelo rorei loo lang'eni o loyietiaa lenye. Ore euriata o Laitoriani naa ninye enkiterunoto e ng'eno; eany ilmoda eng'eno o utarot. Toning'o enkerai ai enkikoo e papaai lino, nimiany enkiteng'enare e yieyioo lino; amu keaku nena utarot enkishili te ndukuya ino, neaku olpisiai te murt ino. Olayioni lai, tinikilejaa ake ilaasak loo ng'ok, minyorraa mikitelejari. Naa tinikijoki ninche, “Wou tenebo iyiook mairraga aanyu osarge likimbukoo. Matarresh kisudori aaluam ilo le meeta entioto; anaa enemeneng'a matoijoi ninche eishu, nelulung'a, anaa lelo oopuo aadoiki eng'umoto; aikitum imasaa pooki e tipat, nikimput inkajijik ang intokitin nikitaarutua; tipika sii iyie erubata ino atua iyiook neaku olbene obo kiata.” Enkerai ai, miim ina oitoi tenebo ninche, imboo enkeju ino pee meim inkoitoi enye; amu ekuetiki inkejek enye aas intorrok, nesiooyo aaibukoo osarge. Amu te mpesho isalaash orreshet, te dukuya emotonyi ake pooki edolita. Kake ore lelo tung'ana eirrag aanyisho naa osarge lenye erreshoo, enkishui enye ninye erreshoo. Neijia etiu inkoitoi e lelo pooki ootum dupoto te nkikonya; eitayu enkishui aaitung'uaa iloopeny. Eishir eng'eno abuaku te nkoitoi dapash e nkanasa, neitayu oltoilo lenye too wuejitin neemirishoreki. Ore te nchumata oo sunta eishira abuaku; neiro too nchomito enkanasa ejo: “Kerishata nabaa, intae iloo moda inyorraa aaku ilmoda? Kerishata nabaaa enyor iloo lderrat torrok aimaki ilderrat torrok. Neiba ilmoda eng'eno? Embung'a intae enking'odiata ai o eutaroto; eng'ura, kabukoki intae iutarot oo ndamunot aainei naa kaitayiolo intae irorei laainei. Amu aipotishe nianyianya kining'ining'i, aitorioyie enkaina ai nemetii hoo obo otishilayie, neitu ishilaa enkikoo ai pooki, neitu ishilaa enking'odia ai o utarot aainei pooki. Ekakueniyie sii nanu intae te nkata engolikinoto inyi, naa kasurdaany intae te neosh intae olkirutoto, teneosh intae olkirutoto anaa olkutati, nelotu engolikinoto inyi anaa osiwuo torrono te nelotu osina o emion shumata intae. Neaku kaapuonu ninche aaipot nanu, nemawaliki nanu ninche; naa kaaing'oru ninche nanu oleng nemaatum nanu. Amu keiba ninche eng'eno, neitu egelu euriata o Laitoriani. Meyieu enkikoo ai hoo nabo, netemenaitie enkisikong'ata o eutaroto ai pooki. Metaa kenya ninche ilng'anayio le nkoitoi enye, neitarruoo inkoitoi enye maate. Amu etaara engogong'i enye ilmoda metuata, ore enkiyagata oo lmoda neidaikie ninche; kake ore ilo laaning nanu naa kebik eserian, naa keyeng'iyeng'a eton, meeta enkuretisho o entorroni.” Enkerai ai, tining'amaa irorei laainei, nishum aiteng'el inkitanapat aainei tenebo iyie, nincho inkiyiaa inono einining aasipu eng'eno, nirrugu oltau lino aaku oloyiolou; ee tininchiru aomonu ening'unoto oo rorei oogut, nidumu oltoilo lino aaku oloning'u. Tining'oru ninye anaa enkosholai, nijurru aing'oru ninye oleng anaa enoshi toki e tipat naisudoro. Neaku iyiolou iyie euriata o Laitoriani, nitum eng'eno e Nkai. Amu Olaitoriani ninye oishoru eng'eno; enkutuk enye epukunye eng'eno o eyiolounoto. Eiteng'ela ninye eng'eno sidai te lelo ooitashe too sipat; ninye elong'o e lelo oopuo te mborron. Errip inkoitoi oo sipat negolie enkoitoi oo sinyat lenyena. Ina pee indimidimi aatayiolo esipata o enkiguana e sipata o emborron, o pooki oitoi sidai. Amu kelotu eng'eno atua oltau lino, ore eyiolounoto neaku aisidai tiatua oltau lino. Aikirrita iyie eyiolounoto; nikirrip eyiolounoto iyie. Nikintajeu iyie aitung'uaa enkoitoi oo ntorrok, aitung'uaa iltung'ana ooiro nkirorot torrok, lelo oing'uaa inkoitoi e nkitashoto sidai aaim inkoitoi e naimin. Neshipa te neas intorrok, neshipakino ina kiminata e ntorroni, iltung'ana laa ore inkoitoi enye naa keriwuo naa inaapaashaa neimin ninche tiatua inkoitoi enye. Aikintajeuni iyie te ina kitok naibor onyek, ina kitok nairo te nkutuk enye irorei oo melook. Ina kitok apa natung'uayie olpayian lenye le lelero, nerikino ninye osotua le Nkai enye. Amu ore enkaji enye naa keimis adoiki keeya, ore inkoitoi enyena nepuo enetii ilootuata. Meeta ololo enetii ninye oitoki ashukunye nemeitoki aatum inkoitoi empuaan. Metaa ilo iyie te nkoitoi oo ltung'ana supati, nimbung nena oitoi oo lasipak. Amu lelo ooitashe too sipat oomany ena kop, ore iltung'ana oobor naa kebikoo tiatua, kake kedung'ori ilarruok te ina kop, ore ilaitang'orok nedotuni too ntona. Enkerai ai, mincho kirikino inkiteng'enat aainei kake inchoo oltau lino eibung inkitanapat aainei. Amu keaku inkolong'i kumok o larin le nkishui ino, nikincho enkiputakinoto e enkishon. Mincho esujata oo sipat o enkirukoto kiorore; teeniki ninche emurt ino, tisira ninche te mbao o ltau lino. Metaa itum omom o enkisisa sidai te dukuya Enkai o tung'ani. Isiliga Olaitoriani to ltau lino pooki, nimipik osiligi le ng'eno ino metaa ninye nikirik. Ore too nkoitoi inono pooki imbalie ninye naa keitorioo ninye inkoitoi inono pooki. Miaku oloota eng'eno too nkonyek inono makewan, turia Olaitoriani, nimbelekenya aing'uaa ntorrok. Keaku enkishiunoto to sesen lino, neaku olchani too loik linono. Iyanyita Olaitoriani too ntokitin inono, o too lng'anayio le dukuya le nkurma ino. Neaku ebore impechen inono enkumoi, neiput imalasin inono enaisho oo sabibu nedooyo. Enkerai ai, mimenaa enkitamioto e utaroto nikiosh Olaitoriani; arashu inauru te rerioroto nikirere, amu kererioo Olaitoriani ilo onyor anaa olpayian orerioo enkerai enye nanyor. Emayiana oltung'ani otum eng'eno nagut, oltung'ani otum eyiolounoto. Amu ore dupoto enye nelang dupoto e nkosholai ore sii dupoto enye nelang sahabu. Eeta ninye tipat alang isoito oogol enkinyang'a, nemeeta entoki niyieu nindim aitanyaanyukie ninye. Etii enkishui naado atua enkaina enye e tatene, ore atua enkaina enye e kedienye netii enkarsisisho o enkanyit. Ore inkoitoi enyena naa inaaitishipisho, ore nkoitoi enyena pooki naa eseriani. Ore ninye naa olchani le mpuaan te lelo ooibung ninye; ore lelo oibung aakurraki naa keji ilooshipa. Eitobira Olaitoriani enkop te ng'eno nagut, ore te yiolounoto eitasheyie keper o ntokitin naatii. Te ng'eno enye eitayio ineegut, ore inkatampo neitadou enkoileelio. Enkerai ai, imbung'a eng'eno sidai o eyiolounoto; mincho ninche kisik aaing'uaa, naa keaku enkishui to ltau lino, naa emasaai sidai e murt ino. Neaku ilo te nkoitoi ino iserian, nemerrorro enkeju ino. Tinilo niton, nimiata enkuretisho; tinirrag airura, naa kemelok injo inono. Miure olkirutoto likiluam, arashu emutata oo larruok te nelotu. Amu keaku Olaitoriani osiligi le nkitashoto ino, naa kerrip enkeju ino pee meibung'i. Mimitiki isidain ilooishaakino ina kata aa iyie oota enkidimata pee ias. Mijoki olelatia lino, “Shomo pee intoki ashukunye, ekaaisho metabaiki” – ti niata ina kata ina toki. Mintobiraki ole latia ino entorroni ainyal, lelo ootoni kisilig tembata ino. Miarare oltung'ani metii esipata, eitu kintaas iyie entorroni. Migilaki ong'u oltung'ani onyor olarrabal, nimigelu hoo nabo oo nkoitoi enyena. Amu ore oltung'ani ogolong'u naa olminong to Laitoriani, kake ore lelo ooitashe too sipat netii atua enkisiligata enye. Etii oldeket le Nkai shumata enkaji oo larruok, kake kemayian ninye emanyisho oo supati. Ore lelo oomenisho naa kemanaa ninye, kake ore iloobor neisho omom. Ore oltung'ani ng'en naa kejung enkanyit, kake ore ilmoda netum enkurruna. Entoning nkiteng'enat e papaai linyi nkera aainei, nining'ining'i aasipu itumutumu aanoto eng'eno nagut. Amu kaaisho iyie iutarot sidain; miorore enkiteng'enata ai. Ore apa ara enkiti kerai nanana atii tenebo papa lai, naa nanu ake eeta yieyio. Naaiteng'ena ninye nanu, naajoki, “Inchoo oltau lino eibung akurraki irorei laainei tushuma inkitanapat aainei pee iton inchu. Mincho kirikino, nimimbelekenya aing'uaa irorei le nkutuk ai. Noto eng'eno nagut, noto sii ening'unoto. Mimenaa ninye, naa aikirrip ninye iyie; tonyora ninye naa aikirrip ninye iyie. Ore enkiterunoto e ng'eno naa ena; noto eng'eno nagut, naa ore pooki nitum, noto sii ening'unoto; intagolo enkinyang'a enye oleng, naa aikintaa ninye iyie kitok; aikianyitu ninye iyie tininbung'are ninye. Kepik ninye endukuya ino enkishili e nkisisa nikipik sii emaupe sidai e nkitoo.” Toning'o enkerai ai, ning'amaa irorei laainei, pee etum ilarin le nkishui ino aataa kumok. Aaiteng'ena nanu iyie nkoitoi e ng'eno; aatoriko iyie too nkoitoi naaitoriori. Ore pee ilo iyie, nemetum enkeju ino olkob, naa tinikuet nimirrorro. Imbung'a tukurraki iutarot, mincho kipuo aing'uaa; torripo ninche, amu ninye enkishui ino. Mijing enkoitoi oo larruok nimiim ina oitoi e lelo tung'ana torrok. Tapaasha ninye, milo aim ninye; imbelekenyunye tung'uai milo agiroo. Amu meidim ninche aairurata o metaasa entorrono; meeta ninche injo ometaba anaa nerrorr obo metabatatayu. Amu einos ninche endaa enkarruoisho, neok enaisho oo sabibu naikonyuno te ng'olon. Kake ore enkoitoi oo supati netiu anaa ewang'an e nkakenya ina naponari awang'u newang'u o metaa dama. Ore enkoitoi oo ltorrok netiu anaa enaimin nagut; meyiolo ninche aajo aitenyoo etarrorrote. Enkerai ai inining'u tukurraki irorei laainei, irrugu enkiok ino inining'u inkikoot aainei. Mincho ninche kilany aaing'uaa enkomom ino; tushuma ninche tiatua oltau lino. Amu enkishui ninche teilo otum ninche naa olmairo lo sesen lenye pooki. Ing'ura oleng tagolie oltau lino, amu ninye epukunye inchorroi e nkishui. Intalama kewan nkirorot torrok, nishurtu inkirorot torrok te iyie. Inchoo inkonyek inono eing'or aaitoriokino dukuya; neaku enking'urata ino enaitoriori te dukuya iyie. Ing'ura tagolie enkoitoi oo nkejek inono, pee eunoyu inkoitoi inono pooki. Nimiwuang alo tatene arashu kedienye; tushuku enkeju ino intung'uai e ntorroni. Enkerai ai inining'u tukurraki eng'eno ai, irrugu enkiok ino inining'u eng'eno ai. Pee itum atorripo te yiolounoto naiguana, ore enkutuk ino nerrip e ng'eno. Amu ore enkutuk e nkitok naibor onyek neitong'u enaisho, ore ilomon lenyena nepuiyiapui aalang eilata; kake ore te nkiting'oto nedua anaa esayiet nepi anaa olalem opi imbat pokira. Ore inkejek enyena nepuo aadoiki keeya; nesujaa iroruat enyena enkoitoi e nemeneng'a; meinining'u ninye enkoitoi e puaan, eirrang'irrang inkoitoi enyena, nemeyiolo ninye. Neaku ore naa te ina kata inkera aainei, entoning'oki nanu nimipuopuo aaing'uaa irorei le nkutuk ai. Intalama enkoitoi ino enenye nimilo anyikaki kutuk aji e nkaji enye; pee mincho ake enkisisa ino ilkulikae, nimincho ilarin linono lelo le meeta olng'ur, pee meiput ate ilomon te ngolon ino ore isiaitin inono nepuo enkaji o lomoni. Ore te nkiting'oto e nkishui ino ninchir, etumutaki inkiri o sesen lino, naa ijo, “Ekaiba apa enkitamioto naautarieki netanya oltau lai ererioroto! Eitu apa ainining'u oltoilo loo laiteng'enak laainei arashu airrugoki enkiok ai ilautarok laainei, atinyikaka apa nanu embata enkidaaroto tiatua eumuta olorere!” Tooko enkare naing'uaa enchorro ino makewan, ina are narukunye aing'uaa enchorro ino. Keidapasha inkonyek inono oo nkariak tiong'ota, inchorroi enkare too nkoitoi dapashi? Inchoo ninche eaku ininono aa iyie ake, neme pee eaku enino olomon likiboitare. Inchoo enchorro ino emayiani, nishipakino enkitok e lelero ino, ololii oikishiaan anaa enkolii nadeenyari. Inchoo enyorrata enye kimput iyie, inkatitin pooki te nchipai, inchoo enyorrata enye kidumu anaake. Aainyo enkerai ai pee incho enyorrata enkitok naibor onyek kidumu? Nimbung olgoo le ntang'oroi? Amu ore inkoitoi oltung'ani netii dukuya Olaitoriani, naa keing'orita ninye irrekiei lenyena pooki. Ore enkarruoisho oo larruok naa kerresh ninye, neibung'i ninye te siaai oo ng'ok enyena. Neye ninye meeta enkitamioto e utaroto, ore enkaraki emodai enye sapuk neimina ninye. Enkerai ai, tinitonyorrayie te nkutuk ino aitasheiki ole latia ino te sile enye, ninosa olmumai te nkaraki olomoni; tinitarresho kewan to rorei lintayio te nkutuk ino, tinikimbung'a ororei le nkutuk ino, neaku taasa naa ena, enkerai ai pee intajeu kewan, amu itijing'a inkaik ole latia ino; shomo tasioi tasayia ninye pee kilaku. Mincho inkonyek inono meirurata, nimincho nkonyek inono meimugo; intajeu kewan anaa enkolii nailanya olang'oroni, anaa emotonyi natunuta olotarresho. Shomo enetii enkalaoni, iyie lo tashalai; ing'ura inkoitoi enyena, nitum eng'eno. Inemeeta olaiguanani lenye, o laitasheikinoni arashu oloitore, eshum ninche endaa enye te nkata enkirowuaj neiturrurru endaa enye te nkata enkisampuare. Kenkata nabaa iton iyie airrag te ine? Kanu kenya inyototo too njo inono? “Ekaitoki airura penyo, kaimug penyo,” ejo ninye “Ekashuk inkaik aainei ayeng'iyeng'a penyo.” Ore eirura nebaiki ninye aisinanisho anaa olkirikoi, o esumash anaa oltung'ani otanape. Ore oltung'ani le meeta tipat naa oltung'ani arruoni, neloolo einosaa ilomon le lejare. Nerojisho too nkonyek enyena, neirorie oltung'ani too nkejek, neutisho too lkimojik lenyena. Ore to lwuasa lo ltau lenye neun intorrok, eunito anaake ninye empeu emang'atisho. Neaku kepulusokino ninye eng'olikinoto aluam; ore te nkiti kata naa kegila enemeishiunoyu. Etii intokitin ile naaiba Olaitoriani, mbaa naapishana naa olminong te ninye: Inkonyek olwuasa, o olng'ejep olejisho, o inkaik naaibukoo osarge le meeta entioto, oltau oipiru indamunot torrok, inkejek naasioyo aakuetiki enetii entorroni. Olchakeni le lejare olimu te nkutuk elejare, oltung'ani oun empeu engogong'i tiatua ilalashera. Enkerai ai, imbung'a inkitanapat e papaai lino, niming'uaa enkiteng'enare e yieyioo lino. Teeniki ninche oltau anaake; teeniki ninche emurt ino. Ore tinilo te nkoitoi, naa aikirikoo ninche iyie; naa tinirrag airura, naa aikirrip ninche iyie, ore tininyototo neiro ninche tenebo iyie. Amu ore enkitanapata naa oltaa ore iutarot naa ewang'an, naa ore inkitamiot oo utarot naa ninche enkoitoi e nkishui. Pee kirrip te ina kitok torrono, teilo ng'ejep opuyiapui le ina tang'oroi. Ming'uar enkishiaa enye to ltau lino, nimincho ninye kimbung too nkonyek enyena. Amu eidimi ainyiang'u enkitok naibor onyek te mukate nabo, kake eishu enkitok naloloito entonata e nkishui o lee. Keidim olee atanapa enkima to lgoo lenye, nemepejoo inkilani enyena? Anaa keidim oltung'ani ashomo aitunyoi inkuk naaishu, aimenya indapi enyena enkima? Metaa neijia sii etiu ilo olo aloloitore enkitok olelatia enye meetae hoo obo oibung ninye olo eitu eitamei. Aimeiba iltung'ana olapurroni te nepurrisho, pee eitaraposh enkoshoke enye eeta esumash? Naa te neibung'i, kelak katitin naapishana; ekeishooyo imasaa pooki e nkaji enye. Ore ilo ololoito nemeeta elukunya sidai; ore ilo oas ina neidaikie kewan. Etum ilbaa torrok netum sii enkarna torrono nemejutoyu enkurruna enye tukul. Amu eitaa olom oltung'ani oloarisho, nemepalaki te nelo neitalakisho elap. Meng'amaa ninye elaata ake ninye pooki; meetae enkumoi oo nkishorot naidim aitoborro ninye. Enkerai ai, imbung'a irorei laainei, ninteng'el inkitanapat aainei tiatua iyie. Imbung'a inkitanapat aainei pee inchu, tagolie nkiteng'enat aainei anaa enerok enkong'u ino. Teeniki ninche ilkimojik linono, ingero ninche te mbao o ltau lino. Tiaaki eng'eno, “Ira iyie enkanashe ai” nimpot eng'eno nagut ajo olchore lai oleng; pee kitum atagolie te ina kitok naibor onyek, te ina aitang'oroni napuyiapui irorei. Amu ore te lusie e nkaji ai, aturumishe aing'or boo te lusie ai, nadol tiatua ilmoda, namusu olbarnoti obo tiatua ilbarnot, oloti barnoti lemedamisho. Eim enkoitoi dapash e nkanasa embata enkaji e ina kitok, eibung enkoitoi alo enkaji enye pee mirimiru e nteipa, te nkata enkewarie o enkata enaimin. Naa ng'ura, nenang'are ninye enkitok, neishope anaa emulayoi, neeta enareuta. Neiro ninye meeta enkuretisho, metoni inkejek enyena tiang; etii te ina kata enkoitoi dapash e nkanasa netii tena kata enemirishoreki, ore te pooki lojata oo nkoitoi neton ninye aanyisho. Neibung ninye ang'utut, ore inkonyek enyena nekurraki ninye: nejoki ninye, “Aidipa atalaa ilasarri, neaku ore ena olong atalaa ilmuma laainei. Metaa ore taata aaewuo atumore, aaing'orua iyie oleng, neaku aanoto. Aitobira endapash ai too lkarash oo puyiapui le katani naing'uaa Misiri. Aitorropilo endapash ai te manoo o esonkoyo o sinantei. Wou, maiputa ate enchipai ang omekenyu; matishipakinoto ate te nyorrata. Amu metii olpayian lai ang'; eshomo enelakua. Newa olbene loo ropiyiani nelo naa keshukunye kenya ang te mpolos o lapa.” Ore too rorei kumok le mpakasata, nearaki ninye; ore too rorei lenyena oo puyiapui neidimu ninye. Ore ina kata ake, nesuj ninye ninye, anaa olkiteng opuoi aayieng arashu enkolii najing atua orreshet. Ometaba anaa neng'or embae oltau lenye. Anaa emotonyi nakuetiki ajing atua orreshet; meyiolo duoo ajo keinosie enkishui enye. Ore naa taata, nakera aainei, entoning'oki nanu niakuku ilooning'u lelo rorei le nkutuk ai. Mincho oltau lino eibelekenya asuj inkoitoi enyena, mipong'okino inkoitoi enyena; amu eitayio ninye ilmeneng'a kumok lemeikenayu. Ee, ore ilmeneng'a lenyena naa olorora kitok. Ore enkaji enye naa enkoitoi nalo enemeneng'a, nedoyio alo ilgilat le keeya. Aimeipotisho eng'eno, aimedumu eyiolounoto oltoilo lenye? Ore too neerupa oo mbat enkoitoi, ore too nkoitoi neitashe ninye. Ore tembata oo nkishomin te dukuya enkanasa, o te kishomi neipotisho ninye ejo: “Intae taa doi iltung'ana aipotito, naa ore enkishirata ai naa intae inkera e tung'ana eipirta. Lo moda kulo entamoo ate eng'eno; intae iltung'ana oo moda, enining'o enajo. Entoning amu kaimaki imbaa e tipat, naapuku te nkutuk ai imbaa naasipa. Amu eibalunye enkutuk ai esipata; ore intorrok naa olminong te nkutuk ai. Ore irorei pooki le nkutuk ai naa esupatisho; metii entoki nabo namonira anaa enariwuo te ninche. Keitoriori teilo oyiolo, naa keitoriori te lelo oonoto eng'eno. Imbung'a iutarot aainei aitalang enkosholai, o eng'eno alang sahabu gelunoti. Amu aisidai eng'eno nagut alang isoito oogol enkinyiang'a ore pooki naaba anaa ining'uar, meidimi aaitanyaanyukie ninye. Ore nanu eng'eno nagut, natii atua enkidimata e ning'unoto e ng'eno, naa katum eng'eno o eyiolounoto. Ore euriata o Laitoriani, naa enkibayunoto e ntorroni. Ore olwuasa o enkitokoos o enkoitoi e ntorroni, o nkirorot naapaashaa naa kaiba. Aata enkikoo o eng'eno sidai, naata eng'eno nagut, naata engolon. Te nanu eitoreisho ilaiguanak, neibalunye ilooitoreisho ina nasipa. Te nanu eitoreisho ilkituaak, ore ilaitoriak neitore enkop. Kanyor lelo laanyor nanu, ore lelo laaing'oru nanu te nyuaata naa kaatum. Etii enkarsisisho o enkanyit tenebo nanu, imasaa naabikoo o puaan. Ore olng'anayioi lai nelang sahabu, o sahabu ninye nasila. Ore ntumot aainei nelang enkosholai gelunoti. Alo nanu te nkoitoi e supatisho, too nkoitoi oo sipat enkiguana. Naitujung karsisisho lelo laanyor nanu, neiput ilchumat lenye masaa. Aaitobira Olaitoriani nanu, te nkiterunoto e siaai enye, esiaai e dukuya enye te pooki musana. Ore too lporori ootulusoitie aaitasheyieki, te nkiterunoto eng'or enkiterunoto e nkop. Ore eton meetae ineegut aaitobiruaki nanu, ore eton meetae inchorroi naatii enkare. Ore eton eitu eitamanyuni ildoinyio, ore eton meetae indoinyo naaitobiruaki nanu. Ore eton eitu eitobiru ninye enkop tenebo nkong'at enyena arashu enterit e dukuya e nkop. Ore pee eitasheyie ninye keper, atii nanu ine Atii apa ina kata pee eitasheyie ninye keper. Ore pee eigeru olokelel tioriong e nguton e nkop. Ina kata pee eitasheyie oloing'ang'e le shumata, ina kata pee eitayu nchorroi e ng'uton. Ina kata pee epik enaiposha olpolosie metaa megil inkariak enkitanapata enye. Ina kata pee epik olkitamanyunoto le nkop. Natii apa tenebo ninye anaa olaitobirani arriyia; nara anaake enchipai enye, ashipa te dukuya ninye anaake. Ashipakino enkop enye namanyi, nashipakino inkera oo ltung'ana. Ore naa taata nakera aainei, entoning'oki nanu; emayiana lelo ooimbung inkoitoi aainei. Toning'o enkikoo pee ing'enu, nimiorore ninye. Eshipa oltung'ani laaning nanu, oing'or anaake nchomito aainei, laanyu too mbat oo nkutukie oo nkajijik aainei. Amu ore ilaatum nanu netum enkishui; netum omom to Laitoriani. Kake ore ilo laapong nanu, nepik kewan olbae; ore lelo laaiba nanu nenyor keeya.” Etesheta eng'eno enkaji enye, eitasheyie ing'apeta enyena pokira naapishana. Neteyieng'a nkishu enyena, eitushula enaisho enye oo sabibu, neitobira sii emisa enye. Eirriwayie ninye nkaisiaayiak enyena meipotisho, toowuejitin neeika e nkanasa ejo, “Ore ilo pooki omoda, inchoo eibelekenyunye alotu ene.” Oilo le meeta ndamunot, ejo ninye, “Wou, inosa endaa ai, niok ina aisho oo sabibu naitushula. Tung'uai emodai pee inchu. Nilo te nkoitoi e ng'eno nagut.” Ore ilo orerioo olasukenyani netum ninye emoroto, naa ore oloisikong oltung'ani torrono netum olbae. Minkok olasukenyani arashu kimbayu iyie; inkoo oltung'ani ng'en naa aikinyorru ninye iyie. Inchoo enkiteng'ena oltung'ani ng'en, naa keponaa eng'eno oleng, inteng'ena oltung'ani supat naa keponaa eng'eno enye. Ore euriata o Laitoriani naa ninye enkiterunoto e ng'eno, naa ore eng'eno e ilo Sinyati naa eng'eno nagut. Amu te nanu eponari inkolong'i inono, aikiponikini iyie ilarin le nkishui. Tenaa ira iyie ng'en, naa aira ng'en te nkorrok ino; naa tinisukenyisho, naa iyie ake openy onap. Ore enkitok namoda neilepilep; nemeutaroyu, nemeeta enkurruna nayiolo. Eton te nkutuk enkaji enye, neton too wuejitin neerupa enkanasa. Eipotu lelo oogiroo ine, lelo oopuo inkoitoi enye maate, ore pooki ng'ae omoda, inchoo eibelekenyunye alotu ene ore pooki ng'ae le meeta endamunoto ejoki, “Ore enkare napurruno naa kemelok, ore emukate nainosi too nkisudorot naa aisidai.” Kake meyiolo ninye ajo etii keeya ine, inchere ore lomon lenyena netii ineegut e nemeneng'a. Ore enkerai ng'en neitiship menye, kake ore enkerai namoda naa osomit te ng'otonye. Ore imasaa naatumi te nkoitoi torrono nemeeta dupoto kake aikilaku esupatisho aitung'uaa keeya. Meisho Olaitoriani isupati epuo eisumash, kake ore iyieunot e lelo torrok neitalamaa. Ore enkaina nashal neyau aisinanisho kake ore enkaina olarriyia neyau enkarsisisho. Ore enkerai nasotisho te nkata enkirowuaj naa aing'en, kake ore enkerai nairura te nkata enkisampuare neyau enkurruna. Etii imayianat endukuya e ilo supat kake ore enkutuk eilo torrono nemuk enapiak. Ore indamunot oo supati naa emayianata; kake ore enkarna o ltorrono naa keng'uoyu. Ore eng'eno oltau naa kening'u inkitanapat, kake ore olmodai loo rorei kumok naa keidaaya. Ore ilo olo te nkoitoi naitoriori nelo te seriani, kake ore ilo oibelekeny inkoitoi enyena naa ketumi. Ore ilo orojisho te nkong'u enye aitunyoo esipata neyau enyamali, kake ore ilo oibalie te mpijan esipata neyau eseriani. Ore enkutuk o supat naa enchorro e nkishui, kake ore enkutuk oltorrono nenuk entorroni. Eyau enkiba enchankar sapuk, kake ore enyorrata neimulumul nkitarruorrot pooki. Etumi te nkutuk eilo oota ening'unoto eng'eno, kake ore eng'udi neishaakino enkoriong e ilo le meeta endamunoto sidai. Ore iltung'ana ng'eni neshum eng'eno, kake ore enkilepilep olmodai neitinyiku enkidaaroto. Ore imasaa o ltung'ani karsis naa ninche enkanasa enye nagol, ore emenai oo laisinak naa ninye enkidaaroto enye. Ore elaakinoto o supat naa ketum enkishui, ore intumot oo ltorrok naa ing'ok. Ore ilo oning'u enkikoo netii enkoitoi enkishui; kake ore ilo oany enkikoo nelo apong'ori. Ore ilo onuk enkiba neeta enkutuk e lejare, ore ilo oiro irorei le nkiteenikinoto naa olmodai. Ore te neaku irorei kumok, nemelai inkitadiat, kake ore ilo onuk enkutuk enye naa aing'en. Ore olng'ejep le ilo asipani naa enkosholai sidai gelunoti, ore endamunoto olaasani loo ng'ok nemeeta tipat. Ore enkutuk e ilo supat neitoti ilkumok, kake ore ilmoda nemut emodai. Ore emayianata o Laitoriani neitaa karsis, nemeponaa osina te nebo ninye. Etiu ana enkiguran to lmodai eas entorroni, kake ore olkuaak le ng'eno naa enchipai to ltungani oota ening'unoto. Ore nena naaure ilo torrono neipang'aki ninye; kake ore iyieunot oo supati naa keishori. Ore pee eish osiwuo, nemeitoki ilo torrono atii, kake eitasheyieki osupat intarasi. Anaa enatiu enaisho naisuisho oo sabibu too lala, anaa empuruo too nkonyek, nejia sii etiu oltashalai te lelo ooirriwaa ninye. Ore euriata o Laitoriani neitoodor enkishui, kake ore ilarin loo larruok neitodorropi. Ore osiligi loo supati neiting te nchipai, kake ore enkisiligunoto oo ltorrok nemeaku toki. Ore Olaitoriani naa ninye osempewuet leilo asipani, kake enkidaaroto too laasak loo ng'ok. Meiwuang'ieki aekata isupati kake ore iltorrok nemebik te enkop. Ore enkutuk o supat neyau eng'eno nagut, kake ore olng'ejep olejisho naa keiwuang'ieki. Ore enkutuk o lasipani neyiolo ina nang'amaroyu, kake ore enkutuk oltorrono, neyiolo ina napaashari. Ore entemet natii olejet naa olminong to Laitoriani, kake ore entemet nemetii olejet naa ninye eng'ida enye. Ore pee elotu olwuasa, nelotu sii enkurruna; kake eboitare eng'eno lelo oobor. Ore enkitabaroto e lelo ooitashe too sipat naa kerik ninche. Kake ore enkarruoisho e lelo airrikinok ninye naidaikie ninche. Meeta enkarsisisho dupoto te ina olong e ngoro, kake elaku esipata aitung'uaa keeya. Ore esupatisho e lelo le meeta entioto neitaa enkoitoi enye enaitoriori, kake ore oltorrono nerrek intorrok enyena. Ore esupatisho e lelo loo sipat naa kelaku ninche. Kake ore ilairrikinok naa keibung ing'uarrat enye. Ore te neye oltung'ani torrono, neish osiligi lenye, ore enkisiligata e lelo lemeyieu Enkai neaku ene pesho. Ore osupat naa kelakuni te nyamali enye, ore oltorrono netum ina nyamali. Emut oltung'ani lemeure Enkai te nkutuk enye ole latia lenye. Kake te ng'eno elakuni lelo supati. Ore teneitobirari mbaa too supati, neshipa enkanasa, ore pee eish iltorrok nening'i mbuakunot e nchipai. Te mayianata oo supati eisisi nerrepi enkanasa, kake kemuti too nkutukie oo ltorrok. Ore ilo omenaa olelatia enye nemeeta endamunoto sidai, kake ore oltung'ani oota ening'unoto neton agira. Ore ilo oloolo ainosaa imbaa olmarenke nebolu imbaa naaisudoro, kake ore ilo oisiligayu to ltau neshum embae aisudoo. Ore enemetii erikore, naa kebatata olorere; kake ore enetii ilaikook kumok netii eseriani. Ore ilo onyorraa te nkutuk ajo kelaaki olomoni esile, naa kelotu anyamalu te siadi, kake ore ilo oany enyorraa neserian. Ore enkitok nabor netum enkanyit; ore iltung'ana ooisimisho netum enkarsisisho. Ore oltung'ani supat neret kewan, kake ore oltung'ani otolo naa kewan eitame. Ore oltung'ani torrono netum olekoisiaayio lelejare, kake ore ilo oun esupatisho netum olerrinyore osipa. Ore ilo oitashe too sipat nebik eishu. Kake ore ilo osuj intorrok naa keye. Ore iltung'ana oota indamunot naapaashaa naa olminong to Laitoriani, kake ore lelo le meeta entioto too nkoitoi enye naa enchipai te ninye. Tayiolo miata olng'ash ajo, melo oltung'ani torrono eitu eitamei, kake ore lelo supati naa kelakuni. Anaa enaikununo olgisoi le sahabu te nkume embitir, nejia etiu enkitok sidai nemeeta eng'eno naret. Ore eyieunoto eilo supat neiting'oki esidano; ore enkisiligata oo ltorrok neiting'oki e ngoro. Eishooyo oltung'ani obo pesho, ore ake sii neitoki aponaa e enkarsisisho; ore olikae neibok ina naishiakino neishooyo, nenyamalu oleng te yieunoto sapuk. Ore oltung'ani oleng naa keitaae ninye karsis, ore ilo opiku enkare, naa kepikakini sii ninye enkare. Edek iltung'ana ilo omit entapa kake eeta emayianata ilo omir. Ore ilo oing'oru isupati te nyuaata neing'oru omom, kake ejing'aki intorrok ilo olo aing'oru. Ore ilo oisilig enkarsisisho enye naa ketoyu, kake ore ilo supat naa keipilipil anaa embeneyioi nanyori. Ore ilo oitanyamal enkaji enye naa kejung enkijape, ore olmodai naa keaku osinka leilo ng'en. Ore olng'anayioi leilo supat naa olchani le nkishui, ore enemetii euriata oo nkitanapat neiwuang'ie enkishui oo lkumok. Amaa taa tenelaakini ilo supat tena kop, kebaa elang elaakinoto eilo torrono o laing'okoni! Ore pooki ng'ae onyor enkitamioto e utaroto, naa kenyor eng'eno, kake ore ilo oiba enkisikong'ata naa olmodai. Ore oltung'ani supat netum omom to Laitoriani, kake ore oltung'ani oipiru intorrok naa kedung'okini enkiguana. Meitasheyie oltung'ani intorrok, kake ore intona eilo supat nemeigutieki aekata. Ore enkitok supat naa enkopiyia enkitoo to lpayian lenye; kake ore ina nayau enkurruna netiu anaa eng'uan too loik lenyena. Ore indamunot oo supati naa esipata, ore inkikoot oo ltorrok naa enkirrikino. Ore irorei leilo torrono neirrag eanyu osarge, kake ore enkutuk eilo supat nelaku iltung'ana. Ore iltorrok naa kenang'ari nemeitokini aata, kake ore enkaji o supat naa keitashe. Eisisi oltung'ani anaa enatiu endamunoto enye sidai, kake ore ilo opaashaa endamunoto naa kemenuni. Eikash oltung'ani oitashe te mborron neasaki kewan esiai, alang ilo orup kewan nemeeta endaa nanya. Ore oltung'ani supat negolie enkishui enkiteng enye, kake ore olng'ur lo ltorrono naa entoloi. Ore ilo otur enkop enye naa ketum endaa sapuk kake ore ilo osuj imbaa e pesho nemeeta endamunoto. Ore oltalet ogol loo ltorrok naa kelotu amuta, kake ore intona oo supati neitashe aauno. Ore oltung'ani torrono nejing orreshet too ntorrok enkutuk enye, kake keilany ilo supat entorroni. Ore too lng'anayio loo rorei lenyena, neitaraposhi oltung'ani too supati, ore esiaai oo nkaik oltung'ani nerrinyokino ninye. Ore enkoitoi olmodai nelioo aa sidai too nkonyek enyena makewan, kake ore oltung'ani ng'en nening enkikoo. Ore engoro o lmodai neibala asioki, kake ore oltung'ani ng'en nemeshilaa emoroto. Ore ilo oiro esipata neishoru enduaata nasipa, kake ore olchakeni olejisho, nelimu elejare. Etii obo laa ore irorei oitasieku netiu anaa enang'unoto olalem. Kake ore olng'ejep lo lng'en neyau enkishiunoto. Ore enkutuk nairo isipat nebik intarasi, kake ore olng'ejep le lejare naa ole nkiti kata. Etii elejare atua iltauja le lelo ooipiru intorrok, kake ore lelo ooun isupati neeta enchipai. Medoiki entorroni isupati kake ebore iltorrok enyamali. Ore inkutukie naalejisho naa olminong to Laitoriani. Kake ore lelo oisiligayu naa ninche enchipai enye. Ore oltung'ani ng'en, neisudoo eng'eno enye, kake ore ilmoda neibalie emodai enye. Ore enkaina eilo onyok eyooki aitoreisho, ore oltashalai naa kepiki aaisikong'aki esiaai nagol. Ore enkiroishi eyieunoto oltau lo ltung'ani naa kepetaa ninye, kake ore ororei sidai neitiship ninye. Ore oltung'ani supat, neibelekenya aing'uaa intorrok, kake ore inkoitoi oo ltorrok nerik ninche aitapong'oo. Ore oltung'ani oshal nemeibung toki naing'oru, kake ore oltung'ani onyok aing'oru, ninye otum imasaa naagol enkinyiang'a. Ore atua enkoitoi oo sipat ninye etii enkishui, kake ore enkoitoi enkiminata nelo keeya. Ore enkerai ng'en nening'u enkiteng'enare e menye kake ore elde asukenyani nemening'u enkisikong'ata. Etum oltung'ani supat mbaa supati too lng'anayio le nkutuk enye, kake ore iyieunot oo lairrikinok naa olarrabal. Ore ilo orrip enkutuk enye neitobikoo enkishui enye; ore ilo obol enkutuk enye oleng neidaaya. Ore oltau lo ltashalai naa keng'uarrisho, nemetum hoo pito, ore oltau leilo onyok naa keishori ninye te nkumoi. Ore oltung'ani loo sipat neiba elejare, kake ore oltorrono neas inenkurruna one sulare. Erikoo esipata ilo laa ore enkoitoi enye naa esipata, kake ore eng'oki nenang'aa ilo torrono. Eitaakuno oltung'ani obo aikarsis, nemeeta hoo pito, ore likae neitaakuno olaisinani, neeta imasaa kumok. Ore elakunoto e nkishui o ltung'ani naa karsisisho enye, kake meeta olaisinani enakordunye kewan. Ore ewang'an oo loo sipat neshipa, kake ore oltaa loo ltorrok naa keari. Ore to lwuasa neishankarra lelo lemening'isho, kake ore lelo ooibung enkikoo netum eng'eno nagut. Ore imasaa naanotoki aasioki naa kengoroo, kake ore ilo osotu aakutiti naa keponaa. Ore osiligi oimutieki neitamuoi oltau, kake ore eyieunoto naidipaki naa olchani le nkishui. Ore ilo omenaa ororei le nkikoo neyaki kewan enkidaata, kake ore ilo oyanyit enkitanapata naa ketum olerrinyore. Ore inkitamoot eilo ng'en naa enchorro enkishui, pee eidim oltung'ani atapaasha irresheta le keeya. Ore endamunoto sidai netum omom, kake ore enkoitoi e lelo le meeta enkirukoto naa enkidaaroto enye. Eas oltung'ani ng'en pooki bae naas te ng'eno, kake ore olmodai neitoduaaya emodai enye. Ore olkilikuai torrono nesulaki iltung'ana kumok enyamali, kake ore olkilikuai oisiligayu neyau enkishiunoto. Ejing'aki aisinanisho o esulare ilo lemeitaa toki iutarot, kake ore ilo oning'u inkisikong'at naa keanyituni. Ore eyieunoto naitabayioki naa kemelok to ltau; kake ore empaashata oo ntorrok naa olminong too lmoda. Ore ilo oiriamariyie iltung'ana ng'eni, naa keaku ng'en, kake ore ole ncholiek oo lmoda naa ketum enkitamioto. Kesuj ilbuketa ilaing'okok, kake elaaki karsisisho lelo supati. Ore oltung'ani supat neing'ueki enjung'ore inkera oo nkera enyena, kake ore enkarsisisho olaing'okoni netushumakaki lelo supati. Ore enkurma natang'asaki aapal meturo, neiu endaa sapuk kake etawuapayioki metii esipata. Ore ilo oirragie eng'udi naa keiba enkerai enye, kake ore ilo onyor ninye nenyok aitame arerioo ninye oleng. Eeta ilo supat enaitigir esumash enye, kake ore enkoshoke oltorrono neisumash. Eshet eng'eno e nkitok ng'en enkaji enye, kake ore emodai near enkaji enye too nkaik enyena. Ore ilo olo too sipat naa keure Olaitoriani, ore ilo lemelo too sipat too nkoitoi enyena nemenaa ninye. Ore enkiroroto o lmodai naa eng'udi te nkoriong enye, kake ore inkutukie oo lng'eni naa kerrip ninche. Ore enemetii ilmong'i, nemetii sii entapa; kake elotu enkumoi, oo ndaiki te ngolon olkiteng. Ore olchakeni osipa nemelejisho, kake ore olchakeni lemesipa neitayu entooma e lejare. Eing'oru olomenisho eng'eno nagut te mpesho, kake elelek eng'eno to ltung'ani oota ening'unoto. Tung'uai ine netii olmodai, amu ore teine minepu irorei le ng'eno. Ore eng'eno oltung'ani ng'en naa pee emusu enkoitoi enye, kake ore emodai oo lmoda naa elejare. Keisikong' Enkai lelo torrok, ore lelo supati neshipakino omom enye. Eyiolo oltau enduaran enye, meeta olomoni ong'arie enchipai enye. Ore enkaji eilo torrono naa keidakieki kake ore olng'obor leilo supat naa kebul. Etii enkoitoi nalioo to ltung'ani aa sidai, kake ore enkiting'oto enye naa keeya. Ore ake sii te nkuenia neeta oltau osina, ore enkiting'oto e nchipai naa osina. Ore oltung'ani opaashari inkoitoi enyena, naa keiputakini ninye ilng'anayio loo nkoitoi enyena, ore oltung'ani supat naa keiputakini ninye ilng'anayio loo nkiasin enyena. Ore ilo omoda neiruk pooki toki, kake ore olng'en neing'or enkoitoi enye. Ore oltung'ani ng'en naa kerripo neibelekenya aing'uaa intorrok, kake ore olmodai nemerrip kewan eas intorrok. Ore oltung'ani oirowua elukunya neas inkumok te modai kake ore oloota eng'eno naa keng'iri. Ore olmodai netum inemodai, kake ore ilng'eni neishopokini eng'eno anaa emaupe e nkitoo. Eirrugokino oltorrono ilo supat, ore ilo torrono nesaisho too nchomito e lelo supati. Ore oltung'ani aisinani naa keiba olelatia enye, kake ore olkarsis neeta ilchoreta kumok. Ore ilo omenaa olelatia enye naa olaing'okoni, kake eshipa ilo oitanana oshoke too laisinak. Aimepong'ori lelo ooun intorrok? Ore lelo ooun isupati einepu enkanyit o enkisiligata. Ore te pooki siaai netii dupoto kake ore too nkirorot e pesho neyau osina. Ore emaupe e nkitoo oo lng'eni naa eng'eno enye nagut, kake ore emodai naa enkishili oo lmoda. Ore olchakeni osipa neitajeu enkishui oo lkumok, kake ore ilo oiro elejare naa olakaldaroni. Tiatua euriata o Laitoriani etum oltung'ani osiligi oitashe, ore inkera enyena netum osempewuet. Ore euriata o Laitoriani naa enchorro e nkishui, pee etum oltung'ani atapaasha irreshata le keeya. Atua esiamo oo ltung'ana etii enkitoo olaiguanani, kake te nemeetae iltung'ana neidaaya olkitok. Ore ilo lemesioki agoro neeta eng'eno sapuk, kake ore ilo osioki agoro neitasapuk emodai. Ore enchipai o ltau, neitaa osesen bioto, kake ore eng'uarrata neitong'u apurd iloik. Ore ilo oitorogony oltung'ani aisinani, naa ilo oitobirua Ninye etamoro, kake ore ilo supat te lelo oomena naa keanyit ninye. Enang'ari oltorrono te nena baa enyena torrok, kake etum isupati osempewuet tiatua esupatisho enye. Eton eng'eno nagut te ina damunoto oltung'ani oota ening'unoto, kake meyioloi tiatua iltauja loo lmoda. Esipata naisho olosho meisisi, kake ore eng'oki naa enkurruna te pooki orere. Ore osinka oasisho te ng'eno netum omom to laiguanani, kake ore engoro enye nedoiki ilo oas inenkurruna. Ore ewalata e mborron nerriny engoro napi, kake ore ororei le nkisikong' neinyeyie engoro. Ore olng'ejep lo lng'en neitubulaa eng'eno, kake ore inkutukie oo lmoda nebuku ine modai. Etii inkonyek o Laitoriani pooki wueji, eing'orita lelo torrok o lelo supati. Ore irorei le mborron naa olchani le nkishui, kake ore irorei le ntorroni negil oltau. Emenaa olmodai enkiteng'enata e menye, kake ore ilo oinining'u iutarot naa ng'en. Etii enkaji olasipani olchumati kitok, kake edoiki enyamali tumoto eilo torrono. Ore enkutuk oltung'ani ng'en neitubulaa eng'eno, nemeneija etiu indamunot oo lmoda. Ore olasar leilo torrono naa olminong to Laitoriani, kake ore enkomono eilo oitashe too sipat naa enchipai enye. Ore enkoitoi eilo torrono naa olminong to Laitoriani, kake enyor ninye ilo osuj aing'oru esupatisho. Etii enkitamioto eutaroto name ilo otapalayie ina oitoi; ore ilo oiba iutarot naa keye. Ore enemeneng'a o Abadon neibala te dukuya Olaitoriani, kebaa eibala oleng iltauja loo ltung'ana! Abadon: Etii ewueji oo rorei lemeibala. Meyieu olasukenyani neutari aaitorioo, melo enetii ilo ng'en. Ore oltau ong'ida, nepik enkomom enchipai, kake tosina lo ltau egila oltau. Ore oltau leilo oota endamunoto e ning'unoto neing'oru eng'eno, kake ore inkutukie oo lmoda neitoti ate too nemodai. Ore inkolong'i pooki e lelo ooisilisili naa torrok, kake ore oltau oshipa neeta osirua anaake. Eikash ina kiti etii euriata o Laitoriani alang olchumati kitok otii enyamali atua. Eikash endaa oo mbenek naanyori etii enyorrata atua, alang olkiteng opir otii enkiba atua. Ore oltung'ani oirowua elukunya naa keyau enchankar, kake ore ilo lemesioki agoro neitigir enchankar. Ore enkoitoi olturuai netubulakita ilkiku, kake ore enkoitoi eilo oitashe too sipat naa enkoitoi nalala naitoriori. Ore enkerai ng'en neitiship menye kake ore oltung'ani omoda nemen ng'otonye. Ore emodai naa enchipai teilo le meeta endamunoto, kake ore ilo oota ening'unoto nelo aitoriori. Ore enemetii eutaroto nerruoyo nkitobirat naaji mataas; kake ore etii ilaikook kumok naa kedupayu. Ore ewalata nairirikino naa enchipai to ltung'ani, kebaa esidano ororei te nkata naishiaakino! Ore enkoitoi oltung'ani ng'en neilepie arik enkishui, pee etum atapaasha enemeneng'a tiabori. Kepolol Olaitoriani auroo enkaji eilo owuasa, kake keitashayie lelo polosien le nkoliai. Ore indamunot oo ltorrok naa olminong to Laitoriani, ore irorei leilo le meeta entioto naa keitiship ninye. Ore ilo oota olorok too masaa naatumi te nkoitoi torrono neyaki enyamali enkaji enye, kake ore ilo oiba eropare nebikoo. Ore endamunoto o lasipani nejurru enejo te newal, kake ore enkutuk eilo torrono nebuku intokitin torrok. Elakuaniki Olaitoriani lelo torrok, kake ening ina omono oo supati. Ore ewang'an oo nkonyek neitiship oltau, naa ore ilomon sidain neitagol iloik. Ore ilo oirrugu enkiok enye aning'u enkikoo, nebik te nebo ilang'eni. Ore ilo oitaa parmetii enkikoo naa kewan emen, kake ore ilo oning'u enkikoo netum ening'unoto. Ore euriata o Laitoriani naa enkiteng'enare tiatua eng'eno nagut, ore emborron nelo te dukuya enkanyit. Ore inkitobirat endamunoto naa ene tung'ani, kake ore ewalata olng'ejep naa Olaitoriani eing'uaa. Ore inkoitoi pooki oltung'ani naa sidain too nkonyek enyena, kake Olaitoriani ninye oineneng' oltau. Inteleiki esiaai ino Olaitoriani, naa keitasheyieki inkitobirat inono. Eitobirua Olaitoriani pooki toki te nkipirta enye, neija sii etiu ilarruok teina olong e nyamali. Ore pooki ng'ae oota olwuasa le nkitokoos naa olminong' to Laitoriani; tayiolo miata olng'ash, esipa tayiolo, melo ninye eitu eitamei. Te nkanyit o te nkisiligata epalakini ing'ok, naa te uriata o Laitoriani epaash oltung'ani intorrok. Ore te neitiship inkoitoi o ltung'ani Olaitoriani, neitainye ilmang'ati lenyena ooboitare osotua. Enaikash enkiti etii esupatisho alang imasaa kumok nemetii esipata. Eitobir indamunot o ltung'ani enkoitoi enye, kake Olaitoriani ninye outaa iroruat enyena. Etii enkutuk olaiguanani iwalat naatipikaki engolon: nemeitadiak enkutuk enye te nkiguana. Ore enkineneng'ata o entemet nadede naa ino Laitoriani, ore isoito ooineneng'ishoreki otii olbene naa esiai enye. Olminong torrono too laiguanak te neas ing'ok, amu ore olorika le nkitoo neitasheyieki too sipat. Ore inkutukie naairo isipat naa ninche enchipai olaiguanani, nenyor ninye ilo oiro ina nasipa. Ore engoro napi o laiguanani netiu anaa olkilikuai le keeya, kake ore oltung'ani ng'en naa keitiship ninye. Ore te newang' enkomom o laiguanani neetai enkishui ore omom enye netiu anaa inkatampo naayau enchan oloirujuruj. Tinitum eng'eno, neikash alang sahabu, tinitum ening'unoto naa keisul alang enkosholai. Ore enkoitoi nalala eilo oitashe too sipat nepaash entorroni; ore ilo orrip enkoitoi enye, negolie enkishui enye. Eng'asunye olwuasa nesuju enkidaaroto, naa neijia etiu oltau oisis kewan eng'asunye nesuju embatatata. Enaikash ti niata oltau obor te nebo ilaisinak alang tiniorioro iyarunot te nebo iloowuasa. Ore ilo oning'u ororei naa kebulaa, neshipa oleng ilo oisilig Olaitoriani. Ore ilo ng'en to ltau naa keji oltung'ani odolu mbaa, naa ore ilomon ooitishipisho neponaa enkarriyiano. Ore eng'eno naa enkong'u enchorro e nkishui teilo oota, kake ore emodai naa enkitamioto oo lmoda. Ore endamunoto olng'en eitaa ilomon lenyena le nkiguana, neponaa enkarriyiano te nkutuk enye. Ore irorei ooitishipisho netiu anaa olkenkei le naisho, emeloni tiatua oltau naa embiotisho tiatua osesen. Etii enkoitoi nalioo to ltung'ani aa sidai, kake ore enkiting'oto enye naa enkoitoi e keeya. Errumoki esumash olaisiaayiani metaasisho oleng, ore ina sumash enye nerrumoki ninye metaasisho. Ore oltung'ani lemeeta tipat neitobiru enkarruoisho, ore ilomon lenyena netiu anaa enkima nadalisho. Ore oltung'ani loo ntorrok eidapashaa olomang'ati, naa ore oltung'ani lo lmarenke eor ilchoreta ooning'o oleng. Ore oltung'ani otolo eitapong'oo olelatia enye, nerikoki ninye enkoitoi neme sidai. Ore ilo orojisho too nkonyek enyena nenyor ataasa nkitobirat naapaashaa, ekurraki enkutuk enye ayau imbaa torrok. Ore ilpapit ooibor te ndukuya naa enkopiyia e nkitoo, etumi ninche te nkishui naitoriori. Ore ilo lemesioki agoro neikash alang ilo ogol, ore ilo oitore oltau lenye elang ilo oya enkanasa. Eosh iltung'ana enkukuo aaing'oru enayieu, kake ore ewalata naa Olaitoriani oishoru pooki. Enaikash tininya enkiti mukate natoyio iata eseriani, alang ti niata emasho sapuk tiatua enkaji nabore enchankar. Ore osinka oas ineng'eno naa keitore olayioni inoti oas inenkurruna, naa ketum sii ninye ematua e njung'ore anaa obo le lelo alashera. Etemi enkosholai te moti, netemi sahabu to lkokuet, naa Olaitoriani otem iltauja. Ore olaasani loo ntorrok nening nkirorot torrok; ore olalejani neinining olng'ejep arruoni. Ore pooki ng'ae osukeny ilo aisinani, naa olaitobirani lenye etusukenya; ore ilo oshipa te ng'olikinoto nemelo eitu eitamei. Ore inkera oo nkera naa ninche enkopiyia enkitoo, ore enkisisa oo layiok naa loo menye. Ore ilomon sidain nemeishaakino olmodai, nemeiro ilomon le lejare olayioni lo laiguanani. Etiu eropet anaa osoit le ntasim too nkonyek eilo oropisho; ore pooki wueji neibelekenyakino nebul. Ore ilo opalaki enkitarruorroto neing'oru enyorrata, kake ore ilo oigil embae tiae kata, neorore olchore oning'ore. Ore enkisikong'ata nejing'aa oleng oltung'ani ooata ening'unoto, alang ioshot iip naaoshi olmodai. Ore oltung'ani torrono neing'oru ake inenkarruoisho, keirriwakini ninye olkilikuai otolo metigilunore ninye. Enaikash tininang'are olng'arurumi otooruoki inkiyoitin enyena, alang tininang'are olmodai oreuta emodai enye. Tenerrinyu oltung'ani entorroni te sidai, nemeigut intorrok te nkaji enye. Ore enkiterunoto e nchankar netiu anaa oltung'ani opolol olong'elu le nkare; metaa shomo tung'uai eton eitu ebau olarrabal. Ore ilo onyorraki lelo torrok e sipata, oilo oiguanare lelo supati, ore pokira naa olminong to Laitoriani. Ainyoo pee eeta olmodai enkinyang'a te nkaina enye nainosie eng'eno nagut, nemeeta ninye endamunoto? Ore olchore nenyorrisho te pooki kata, ore olalashe netoiwuoki tenkaraki ing'olikinot. Ore oltung'ani le meeta endamunoto, neitayu enkisiligata, neaku ninye oitasheiki esile olelatia enye. Ore ilo onyor inkitadiat nenyor enchankar; ore ilo oilepie kutuk aji enye oleng, neing'oru enkidaaroto. Ore oltung'ani lemeisiriri ndamunoto nemebulaa, ore sii ilo oota olng'ejep opaashaa ebatatakino atua engolikinoto. Ore olayioni omoda naa osomit te menye; ore menye ilo modai nemeeta enchipai. Ore oltau oshipa naa olmairo sidai, kake ore oltau otigile neitoi iloik. Ore oltung'ani torrono enap eropet to lgoo lenye, pee etum aiminie inkoitoi esipata. Ore oltung'ani oota ening'unoto neitorioki enkomom enye eng'eno, kake ore inkonyek olmodai netii nkiting'ot enkop. Ore olayioni omoda naa osomit te menye, naa emion nadua te ina kitok natoiwuo ninye. Imesidai tiniaraki oltung'ani supat metalaa entoki nemesipa, aitorrono te neitamei nkasisin. Ore ilo oibooyo irorei lenyena eeta eng'eno, ore ilo oota oltau obor naa oltung'ani oota ening'unoto. Ore doi ninye olmodai ogira meiro neji aing'en; ore pee eiken enkutuk enye nedoli ajo aing'en. Ore ilo okepari makewan naa iyieunot enyena eing'oru, pee etum atoorunye te pooki kiguana nasipa. Meshipakino olmodai embae naning'unoyu meteleku embae enye ake eibalie. Tenelotu entorroni nelotu sii enkurruna ore te nebo enkurruna netii sii esulare. Ore irorei le nkutuk oltung'ani naa nkariak naagut; ore enkong'u e ng'eno naa enchorro naitokitoku enkare. Meishaakino tinijing' enkoriong oltung'ani arruoni, arashu imitiki oltung'ani supat esipata. Ore enkutuk olmodai neyau enchankar, ore enkutuk enye neipotu ioshot. Ore enkutuk o lmodai naa enkidaaroto enye, ore enkutuk enye naa orreshet te ninye. Ore irorei le nking'oming'om netiu anaa embelati e mukate namelok, nejing'aa atua osesen lenye. Ore ilo oshal te siaai enye, naa olalashe le ilo oidaikie. Ore enkarna o Laitoriani naa oltalet ogol, ekuetiki oltung'ani supat neserianu. Ore imasaa o lkarsis naa enkanasa enye nagol, netiu anaa esuntai naado namitu ninye. Eisis oltau lo ltung'ani kewan eton ebau emutata, kake eng'asunye emborron eitu nesuju enkanyit. Teneishooyo oltung'ani ewalata eton eitu ening'u, naa emodai enye o enkurruna. Eng'iri oltau lo ltung'ani emuoyian; paa amaa oltau otigile aing'ae oidim ating'iria? Ore endamunoto oltung'ani ng'en netum eng'eno, ore enkiok oltung'ani ng'en neing'oru eng'eno. Iyieu nitumore oltung'ani kitok? Iyaki ninye enkishooroto naa kelelek itum ninye. Ore ilo ong'as airo te dukuya nelioo aa kesipa enkiroroto enye o metaba anaa nelotu likae ajur ninye. Ore eoshoto enkukuo neiting'ie enchankar nerishu autu iloogol ooishankarra. Ore olalashe otaretoki netiu anaa enkanasa nagol, kake ore enchankar, netiu anaa iasheta oo sekenke o sempewuet. Eraposho oltung'ani too lng'anayio le nkutuk enye, eitaraposhi too naing'uaa enkutuk enye. Etii keeya o enkishui atua engolon olng'ejep, ore lelo oonyor ninye naa keinos ilng'anayio lenyena. Ore ilo otum enkitok nenoto entoki sidai, nenoto omom to Laitoriani. Ore te neiro oltung'ani aisinani, naa keomonisho to sayia, kake ore olkarsis newal te ng'olon. Etii ilchoreta oitaakuno ilchoreta, kake etii olchore likimbung'are anyikaki alang olalashe. Enaikash oltung'ani aisinani olo too sipat enyena alang ilo oitadiak too nkirorot enyena naa olmodai sii. Meishaakino oltung'ani te nemeeta eng'eno, naa ore ilo oitasiooyo nkejek enyena, nepong enkoitoi enye. Ore te nerikoki emodai oltung'ani enkoitoi enkidaaroto, negorokino oltau lenye Olaitoriani. Eyau enkarsisisho ilchoreta kumok ng'ejuko, kake ore oltung'ani aisinani nepuo aaing'uaa ilchoreta lenyena. Ore olchakeni lemesipa nemelo eitu eitamei, naa ore ilo oiro elejare nemeilanyisho aisik. Eing'oru ilkumok omom o ltung'ani aminin, ore pooki tung'ani naa olchore le ilo tung'ani oishooyo inkishorot. Ore ilalashera pooki lo laisinani naa keibayu ninye, kebaa pasa elakuani nepuo ilchoreta lenyena aalam ninye! Esuj ninye ninche too rorei, nemetum ninye ninche. Ore ilo oata eng'eno nagut naa kenyor kewan; ore ilo oiteng'el ening'unoto naa kebul. Ore olchakeni lemesipa melo eitu eitamei, ore ilo oiro inelejare naa keimin. Meishaakino olmodai teneton tiatua olkar, naa neija sii etiu orrindik meitore ilaiguanak. Ore endamunoto sidai nemeitasieku engoro oltung'ani, naa enkisisa te ninye te neitunyoo entorroni. Ore engoro napi o laiguanani netiu anaa enkikurrukur olng'atuny, kake ore omom enye netiu anaa enkoileelio natii inkujit. Ore olayioni omoda naa enkidaaroto te menye, ore enkitok enchankar netiu anaa enkirujuruj e nchan. Ore enkaji o enkarsisisho naa enjung'o naing'uaa iloopapa, kake ore enkitok ng'en naa Olaitoriani eing'uaa. Epik enchalan oltung'ani injo naairoishi, ore oltung'ani oshal naa ketum esumash. Ore ilo oibung inkitanapat nerrip enkishui enye; ore ilo omenaa ororei naa keye. Ore ilo oitanana oshoke too laisinak naa Olaitoriani eisilenoko, naa kelaaki olaitoriani ninye enkias enye. Intamio tuutai enkerai ino eton eetae osiligi; mincho oltau lino ejing errorroto enye. Ore oltung'ani le ngoro napi naa kelak enkitamioto enye; amu tinilaku ninye taata, naa iyooki ake aigil alaku. Toning'u enkikoo ning'amaa enkiteng'enare, pee itum anoto eng'eno too nkolong'i naapuonu. Etii nkitobirat kumok endukuya e tung'ani, kake ina nayieu Olaitoriani ninye ake naitashe aaku. Ore entoki nayieuni te tung'ani naa enkanyit, naa olaisinani oikash alang o lalejani. Ore euriata o Laitoriani naa aikirikoki enkishui; naa ore ilo oota neyeng'iyeng'a etaraposhe, melotu entorroni enetii ninye. Ore oltashalai, nenukaa enkaina enye tiatua engira, nemeitoki hoo ninye ayau apik enkutuk enye. Toosho ilo asurdaanyani, ore ilo modai neyiolou ine ng'eno; intodua elde oota ening'unoto, naa ketum eng'eno. Ore ilo oorare menye, nearaa ng'otonye tiang, naa olayioni oyau esulare neyau sii esulare. Ore tinipal enkerai ai inining'u nkiteng'enat aainei, nipong'ori alo apaash irorei le ng'eno. Ore olchakeni le meeta tipat te likae nekueniyie enkiguana nasipa, ore enkutuk oltorrono naa keijoo intorrok. Eidipaki endung'okinoto enkiguana te lelo oosukeny isipat, o oshot too nkoriong'i oo lmoda. Enkasukenyani enaisho oo sabibu naa embuaaroto enaisho napi, naa ore pooki ng'ae oitapong'oyie ninye nemeng'en. Ore engoro naitureisho o laiguanani, netiu anaa enkikurrukur olng'atuny. Ore ilo oitagor ninye neiturraa enkishui enye. Enkanyit telde tung'ani oibooyo kewan aitalam enchankar; kake ore pooki modai nenyor enchankar. Metur oltashalai enkurma enye te nkata e nkirobi, keing'oru te nkata enkisampuare nemetum hoo pito. Ore enkiguana natii atua endamunoto e tung'ani netiu anaa enkare nagut, kake ore ilo oota ening'unoto naa kebuku ninye aipang'unye. Elimu pooki tung'ani aisis kewan aibalie esupatisho o enkisiligata enye, kake tetema sii iyie tujurro ilo tung'ani enaikununo! Emayiana nkera naata menye supat, naas nena naasipa. Ore ilo aiguanani oton to lorika le nkiguana, negel asilu ntorrok pooki te nedol too nkonyek. Aing'ae oidim atejo, “Aitukuo nanu oltau lai; ara nanu sinyati maata eng'oki?” Ore ntemeta enkiroishi naapaashipaasha o ntemeta naapaasha nenyaanyuk pokira, olminong' to Laitoriani. Ore doi ninye enkerai neyiolouni too yasat enyena, tenaa ore ina naas naa sinyati nesipa. Ore enkiok naning'isho te nebo enkong'u nadololisho, Olaitoriani ninye oitobirua pokira. Minyorru injo, arashu ijing atua osina; tabolo inkonyek inono naa itum endaa sapuk. “Aitorrono, aitorrono,” ejo ilo oinyang'isho, kake te nelo aing'uaa, neaku oloisis kewan. Etii sahabu o soito kumok oogol enkinyang'a, kake ore enkutuk naata eng'eno naa osoit ogol enkinyang'a. Iwa enkila eilo tung'ani otonyorrayie aitasheiki esile olomoni, nimbung ninye tena nyorrata natonyorrayie aitasheiki esile oo lomon. Ore endaa nanotoki te lejare naa kemelok te tung'ani, kake ore te siadi, neiput enkutuk enye osinyai. Ore nkitobirat pooki neitasheyieki te nkiguana; terikore natii eng'eno atua epuoi olarrabal. Ore ilo oloolo ainosaa olmarenke, neibalie imbaa naaisudoro, metaa mintaa encholiek ilo oiro te modai. Ore ilo odek menye arashu ng'otonye, netiu enkishui enye anaa oltaa otaaraki. Ore enjung'ore nanotoki aasioki te nkiterunoto, neaku te siadi ene memayiana. Mijo ake, “Ekaitalaku intorrok,” taanyu Olaitoriani naa aikiretu ninye. Ore isoito ooineneng'ishoreki oopaashaa naa olminong' to Laitoriani, ore intemeta e nkiroishi e lejare nemesidain. Ore iroruat oltung'ani naa Olaitoriani oitore; kaji naa eiko oltung'ani te nening'u enkoitoi enye? Orreshet to ltung'ani te nesioki ajo, “Aisinyati Olasar”, neitoki ake asipu eidipa ainosa olmumai lenye. Ore olaiguanani ng'en nesilu iltorrok nereu enkeju e ngarri aitunyoo ninche. Ore enkiyang'et e tung'ani naa oltaa lo Laitoriani, ojur oleng pooki toki e atua enye. Olning'o o enkanyit naasho olaiguanani metobikoi, ore enkitoria enye neitasheyieki te sipata. Ore enkisisa oo lbarnot naa engolon enye, kake ore enkishiaa oo lpayiani kituaak naa ilpapit lenye ooibor. Ore ioshot naadotisho, naa keitukuo intorrok, ore ioshot kumok e ng'udi neisuj nenen wuejitin e atua. Ore oltau lo laiguanani naa ereyiet e nkare tiatua enkaina o Laitoriani. Neibelekenyaki ninye pooki wueji neyieu. Ore pooki oitoi te tung'ani naa sidai too nkonyek enyena, kake Olaitoriani ninye oineneng' oltau. Easata oo supati o esipata, ninye nang'amaroyu too nkonyek o Laitoriani alang enkitayunoto o lasar. Ore nkonyek olwuasa tenebo oltau o wuasa, oltaa loo ltorrok naa ing'ok. Ore nkitobirat e ilo oota enyuata osipa erikoki ninye puaan te nkumoi, kake ore pooki osioki neiting ake te yieunoto. Ore olchumati litum tolng'ejep olejisho, netiu anaa enkinuku nasiooyo aish naa orreshet le keeya. Ore enkinyala oo ltorrok naa keoroo ninche aishu, amu etanyaita eas ina nasipa. Ore enkoitoi eilo torrono naa kekordilo, kake ore olkuaak leilo supat naa aisidai. Enaikash tinimany olpijata le nchumata enkaji, alang tinitii enkaji e nkitok naata ororei. Ore oltau leilo torrono neyieu intorrok, metum olelatia enye olng'ur too nkonyek enyena. Ore te neitamei oloikordodisho, neng'enu olmodai ore te neutari oltung'ani ng'en, netum eng'eno. Ore isupati neing'or enkaji eilo torrono; enang'akini iltorrok enkidaaroto. Ore ilo oiken enkiok enye pee mening enkishirata e lelo aisinak, naa keishir sii ninye nemeetae oloning ninye. Ore enkishooroto naishoruni too nkisudorot naa keshuk engoro; ore eropare oo nkishorot neitigir engoro sapuk. Ore teneasi esipata, naa enchipai too supati, naa enking'asia too laasak loo ntorrok. Ore oltung'ani olo aing'uaa enkoitoi e ning'unoto netum eneeng'iyeng'are to lturrur loo loo tuata. Ore ilo tung'ani onyor esikar naa keaku oltung'ani aisinani ore ilo onyor enaisho o ila nemeaku karsis. Ore ilo torrono naa elakunoto eilo supat, ore olemeisiligayu naa elakunoto oloitashe too sipat. Enaikash tiniton te nkop olpurkel natoyio, alang tiniboitare enkitok naata enchankar o lkwenyi. Ore imasaa naagol enkinyang'a naa kebik te nkaji eilo oota eng'eno, kake ore olmodai naa keijoo. Ore ilo osuj isipat o enanai e oshoke naa ketum enkishui o enkanyit. Ore oltung'ani ng'en, neyiolo enaikunakino enkanasa o logol, negil isunta naaisilig ninche. Ore ilo oiken enkutuk enye neibooyo olng'ejep lenye, neitapaash kewan enyamali. Ore olasurdaanyani, ninye enkarna o ltung'ani owuasa neitokoos, ilo oas imbaa to lwuasa le nkitokoos enye. Ore eyieunoto oltashalai naa kear ninye, metua amu keany inkaik enyena eitayu esiai. Eng'uarrisho iltorrok endama pooki, kake ore isupati keishooyo nememit. Ore olasar leilo torrono naa olminong, kebaa elusoo eitayio to ltau torrono? Ore olchakeni lemesipa naa keimin, kake ore ororei le ilo oning'isho naa kebikoo. Ore oltung'ani torrono neitodolu enkomom empijan, kake ore oltung'ani oitashe too sipat neing'or inkoitoi enyena. Ore enemetii eng'eno nagut, nemetii ening'unoto nemetii enkikoo, keidim ayau eanyata Olaitoriani. Eitaanyuni embarta ina olong e njore, kake ore enkisulata naa eno Laitoriani. Enaikash te negeluni enkarna sidai, alang enkarsisisho sapuk, naa ore omom nelang enkosholai o sahabu. Ore olkarsis o ilo aisinani naa ketumo te nebo, Olaitoriani ninye olaitobirani le pooki. Ore oltung'ani ng'en naa kedolu batisho neisudoo kewan; kake ore olmodai naa kelo dukuya netum enkitamioto. Ore olerrinyore le mborron o euriata o Laitoriani, naa enkarsisisho o enkanyit o enkishui. Etii ilkiku o rresheta enkoitoi eilo otapong'ori; ore ilo orrip kewan naa kelam ninche. Tuutaki intamoo enkerai enkoitoi naim, ore pee eaku moruo nemeing'uaa ina oitoi. Ore olkarsis naa ninye oitore ilo aisinani, ore ilo oisilenu naa osinka le ilo oisilenoko. Ore ilo oun inemesipa naa keisampu eng'olikinoto, ore eng'udi e ngoro enye napi naa keish. Ore ilo tung'ani aminin naa kemayiani, amu keng'arie endaa enye ilaisinak. Intupuku impang'ie ilo oimaki intorrok, naa aikipuku enchankar aing'uaa, ore olarrabal o emorore naa keish. Ore ilo onyor esinyatisho o ltau, neeta ilomon oo melook naa keaku olchore lo laiguanani. Etii nkonyek o Laitoriani shumata eng'eno, kake kenang'aa ninye lelo rorei le lelo le meeta enkirukoto. Ejo olturuai, “Etii doi olng'atuny auluo: kaari matua too nkoitoi naalala e nkanasa!” Ore enkutuk enkitok naibor onyek naa engumoto nagut; ore ilo otagorokine Olaitoriani naa kesulakino atua ninye. Eenaro emodai tiatua oltau le nkerai, kake ore eng'udi enkitamioto nearaa ninye aitalamaa. Ore oloibooki enkop olaisinani pee eponaa enkarsisisho enye, arashu eisho lelo karsisi ake, naa kelotu ake sii ninye aaku olaisinani. Irrugu enkiok ino inining'u irorei lo lang'eni, nintorioki indamunot inono eng'eno ai; amu keaku esidano tinishum ninche tiatua iyie, te netii pooki atua enkutuk ino. Pee etum osiligi lino ataa Olaitoriani etii, aaitayiolo iyie ninche taata ena olong, aa iyie taa. Keitu aasiraki iyie inkirorot tomoni uni, imbaa enkikoo o ine ng'eno, peyie aaitodol iyie embae naitoriori nesipa, pee itum aishoo ewalata naitoriori nesipa lelo likirriwaa iyie? Misim olaisinani eji amu kaaisinani, arashu irony oloota osina te kishomi; amu keng'or Olaitoriani ninche, neinyal enkishui e lelo ooinyal ninche. Mintaa olchore oltung'ani oman nang'u, aashu iriamariyie oltung'ani osioki agoro. Pee miyiolou inkoitoi enyena, nipik kewan atua orreshet. Miaku obo le lelo ooisiligie ilkulikae imbaa, ilo oaku oloitasheiki esile. Tinimiata entoki nilakie, ainyoo doi pee inyorraa meewai endapash ino? Midotu ake entoki naitodolu olpolosie musana ina apa natipika iloo papaai lino. Idol oltung'ani arriyia te siaai enye? Keitashe te dukuya ilaiguanak; meitashe te dukuya iltung'ana misili. Tenelo niton anya endaa te nebo oloitoreisho, ing'ura tisipu oleng ina natii dukuya iyie; naa tenaa ira oltung'ani le nkului, nipik enkalem olgos lino. Ming'uar intokitin enyena naamelook, amu endaa ina nikipikieki olosek. Teng'ena miar kewan amutakino ing'oru enkarsisisho, teng'ena pee imbooyo. Ore pee ikurraki inkonyek inono ninye, neimin; amu ketum ninye asioki inaipuko, neilep anaa olkurragos olo te keper. Minya endaa oltung'ani opiak, ming'uar indaiki enyena sidain. Amu ore ninye netiu anaa ilo limikiyeu to ltau kijoki ninye, “Inosa doi niok!” Kake metii oltau lenye te nebo iyie. Irrugumu nena belat pooki oo mukateni nindipa ainosa, neimin lelo rorei linono oo melook. Miro ake te wueji nening'ie olmodai amu kemenaa irorei le ng'eno o rorei linono. Mintayu ake ina toki musana natii olpolosie, arashu ijing nkurman e lelo lemeeta iloomenye; amu ore olalakunoni lenye naa kegol; naa keikilikuanu ninye te iyie. Intorioki endamunoto ino enkiteng'enare, nipik enkiok ino irorei le ng'eno. Mimbooyo enkitamioto ererioroto te nkerai; amu tinindong ninye te ng'udi nemeye. Tinindong ninye te ng'udi, naa intajeu enkishui enye te nemeneng'a. Enkerai ai, tenaa aing'en oltau lino, naa keshipa sii ninye oltau lai; naa te neiro enkutuk ino inaasipa, naa keshipa oltau lai. Mincho oltau lino eng'uar ilaing'okok kake shomo inkolong'i pooki tiatua euriata o Laitoriani. Esipa katukul etii imbaa sidain dukuya iyie, nemedung'ori osiligi lino katukul. Toning'o enkerai ai niaku ng'en, nintorioki endamunoto ino ina oitoi. Miaku ilencholiek oo laokok le naisho, arashu ole encholiek olooisepe tenkinosata oo nkiri. Amu ore olamerani oloisepe naa keaku aisinak, neaku ore elepori e merai neishopoki oltung'ani mpurdat. Toning'o papaai lino ilo apa likitoiwuo, nimimenaa yieyio lino te neaku moruo. Inyang'u esipata nimimir ake, inyang'u eng'eno nagut, e nkiteng'enare; o ening'unoto. Ore menye ilo supat naa keshipa oleng; ore ilo otoiwuo olayioni ng'en naa keshipakino ninye. Inchoo papaai lino o yieyioo lino eshipa, inchoo ina nikitoiwuo eshipa. Enkerai ai nchooki nanu oltau lino, naa inchoo inkonyek inono eing'or inkoitoi aainei. Amu ore enkitok naibor onyek naa engumoto nagut; ore ina tang'oroi naa enchorro napirik. Neirrag ninye aanyisho anaa olaisimani, neponaa ilewa kumok aitaa ilemeisiligayu. Aing'ae ilo oishir ajo wooi? Aing'ae ilo oota osomit? Aing'ae ilo oota olarrabal? Aing'ae ilo oing'unyug'uny? Kalo ilo oota ilbaa nemeeta eneyopakaki? Kalo ilo oota endoron to onkonyek enyena? Lelo le meirura eok enaisho, lelo oopuaya aatem enaisho naitushula. Ming'or enaisho te nyokieni, ina kata eitokitoku te nkikompe, nedoyio aitobirari too lgoso. Ore te siadi nikiony anaa olasurai, niking'or anaa enturbubua. Ore inkonyek inono nedol intokitin neitu aekata edol, ore indamunot inono neimaki intokitin naaitapong'oo. Nitiu anaa oltung'ani oirragita te mpolos e naiposha, anaa ilo oirragita te nchumata e ng'ape e meli. Ilo iyie ajo, “Aatoosho ninche nanu, kake eitu aning emion; aaidong'o nanu, neitu aning emion. Kanu doi ade ainyototo? Pee alo aing'oru ae aisho naok.” Ming'uar lelo tung'ana torrok, niming'uar aitaa ninche encholiek. Amu ore indamunot enye neipiru olarrabal neiro too nkutukie enye imbaa enkarruoisho. Te ng'eno eshetuni enkaji naa te ning'unoto eitasheyieki. Te ng'eno eiputi ilgilat pooki, too ntokitin pooki sidain naagol enkinyang'a Ore oltung'ani ng'en naa kegol alang oltung'ani ogol, naa neijia etiu ilo oota eng'eno elang ilo oota eng'olon. Amu te rikoto e ng'eno indim aipiru enjore, naa tiatua enkumoi oo lautarok etumi enkishuroto. Ore eng'eno nagut naa kelakuaniki oleng olmodai, mebol ninye enkutuk enye te kishomi. Ore ilo oitobiru pee eas ine nkarruoisho, naa keipoti aajo oloitobir enkarruoisho. Ore enkipirunoto e modai naa eng'oki, naa ore ilo asukenyani naa olminong too ltung'ana. Ore tininterre te nkolong e nyamali, naa aikiti eng'olon ino. Intajeu lelo ooyae meshomo keeya; imbooi lelo oorrorrokino keeya. Tinijo “Ng'ura, eitu duoo iyiook kiyiolou ena,” keitu emusu ilo oineneng oltau ina? Amaa ilo likirrip oltau aimeyiolo ninye? Naa aimelaaki ninye pooki tung'ani anaa enaikununo esiaai enye? Enkerai ai, inosa enaisho amu aisidai, ore ilkitong'at lo lkenkei naa kemelook tininchamisham; tayiolo naa ajo neijia etiu eng'eno nagut tiatua oltau lino; tinitum ninye naa itum eseriani too nkolong'i naapuonu, nemedung'ori osiligi lino katukul. Mirrag arreshisho anaa oltung'ani torrono aarare emanyisho oosupati; miarare enkang enye, amu ebatata oltung'ani supat kat naapishana, neitoki ake adumunye; kake kemut oltorrono eng'olikinoto. Mishipa te nebatata o lmang'atinta lino, nimincho oltau lino eshipa te nebatata ninye; pee medol ake Olaitoriani nemeshipa, negoro, neiwuang'ie engoro aitung'uaa ninye. Mintanyamal kewan tenkaraki ilaasak loo ntorrok, niming'uar ilarruok. Amu meeta oltung'ani torrono esidano oo nkolong'i naapuonu; amu keari oltaa loo ltorrok. Enkerai ai turia Olaitoriani o laiguanani, nimigolong'aki hoo obo lenye. Amu kedumunye emutata te ninche asieku, naa aing'ae oyiolo emutata nalotu eing'uaa pokira? Ore sii kuna naa nkirorot o lang'eni: ore olkep te nkiguana nemesidai. Ore ilo ojoki oltung'ani torrono inchere, “Miata iyie entioto,” naa kedek iloreren ninye, neibayu iloshon ninye. Kake ore ilo oisikong oltorrono naa ketum enchipai, naa kelotu emayianata sidai shumata ninye. Ore ilo oishoru ewalata nasipa, neng'utut inkonito enkutuk. Intobira esiaai ino tiauluo niyau pooki toki niyieu enkurma ore pee indip ina nitum taa aitesheta enkaji. Miaku olchakeni oarare olelatia ino miata eniporoki, nimilejisho te nkutuk ino. Mijo taa ake, “Ekaitaas ninye ina naaitaasa nanu, Ekalaaki ilo tung'ani ina naaitaasa.” Ashomo nanu agiroo olokeri lo ltashalai, embata enkurma oo sabibu oltung'ani lemeeta endamunoto. Naa ng'ura, etubulakita ninye ilkiku; ore enkop nebore entamejoi; ore esuntai enye o soit neturori. Ina pee aing'or natemaa ayiolou; aing'ura nang'amu enkiteng'enare. Kang'as airura penyo, kang'as aimug penyo. Kang'as anunuk inkaik penyo ayeng'iyeng'a. Nikijing'aki osina iyie o esumash anaa olaisimani, nikijing'aki osina anaa oltung'ani otanape. Ore sii kuna naa indung'eta e rashe e Solomon naatisira iltung'ana le Hesekia olaiguanani le Yuda. Enkitoo enkisisa te Nkai te neisudoo ninye imbaa, kake enkitoo too laiguanak, te nejurru imbaa aaibalie. Ore anaa eneba elakuani e keper, o eneba enguton e nkop neija etiu indamunot oo laiguanak mejurrunoyu. Iwuang'ie endoron ti oriong e nkosholai, netum olkunoni entoki naitainyie entoki sidai. Iwuang'ie lelo torrok te dukuya olaiguanani naa keitasheyieki olorika lenye le nkitoo te sipata. Mipik kewan dukuya ine netii olaiguanani arashu doi intashe te ine wueji olkitok. Amu enaikash tinikijokini, “wou ilepu ene” alang tinikintadoyiori te netii olaiguanani. Ore ina natoduaa inkonyek inono, misioki aisosion ayau atua enkiguana; anaa kaa ias te siadi; tinikilo ole latia ino aitukurru? Iimaki olomoni liyieu te nebo olelatia makewan, nimilo aboloo imbaa naaisudoro e likae; meyau ake ilo oning enkurruna shumata iyie, nitum enkurruna nemeeta enkiting'oto. Ore ororei otolimuoki aaitobiru netiu anaa olng'anayioi le sahabu oikodokino enkosholai. Anaa enatiu olgisoi le sahabu arashu e masaai e sahabu neija etiu ilo ng'en oisikong enkiok naning'isho. Ore olkilikuai oisiligayu, neitagol ilo oirriwaa ninye, etiu anaa enkare nairobi, te nkirouaj enkata e nkisampuare. Anaa enatiu inkatampo o lkutati lemeeta enchan, neija etiu ilo owuasare enkishooroto nemeyieu neishooyo. Te ng'iriata eidimi aailejileja olaiguanani le nkop, naa ore olng'ejep omelok naa kegil oloito. Tinitum enaisho inosa ake enikiririkino iyie, amu indim ainosa e sapuk nintoki alopu. Mimoku enkaji o lelatia ino, pee miyek ake, nikiyooki aibayu. Ore ilo oishakenu embae nemesipa te nkaraki ole latia enye, netiu anaa orinka lo larrabal arashu olalem, arashu embae napi. Ore enkisiligata oltung'ani lemeisiligayu te nkata enyamali, netiu anaa olalae oigusugus arashu enkeju naishirtitari. Ore ilo oranyaki osinkolio oltau oata osina, netiu anaa oltung'ani ooru kewan enkila te nkolong nairobi; netiu sii anaa tinipik enaisho naisuijo ewueji netii olbae. Teneeta olmang'atinta lino esumash, inchoo ninye endaa nanya, naa te neeta enkure, inchoo ninye enkare naok. Amu inturrurroki ninye inkuk naishu shumata endukuya enye, naa aikilaaki iyie Olaitoriani. Ore olkutati oing'uaa moikuape naa keyau enchan; ore olng'ejep okurrisho neyau engoro. Enaikash tinimany olpijata le nchumata enkaji, alang tiniboitare te e nkaji enkitok naata enchankar. Anaa enatiu enkare nairobi to ltau oota enkure, neija etiu ilomon supati ooing'uaa enkop nalakua. Anaa enatiu enchorro natii esarng'ab, arashu enkong'u enkare naing'ola, neijia etiu oltung'ani supat oisho kewan oltung'ani torrono. Mme sidai tininya enaisho sapuk, metaa mitem aing'oru enkisisa sapuk. Ore oltung'ani le meeta enkibooroto e kewan, netiu anaa enkanasa natigilaki neing'uari meeta isunta. Anaa enatiu isoito le nkirobi te nkata enkirowuaj arashu enchan te nkata enkisampuare, neijia etiu enkanyit meishaakino olmodai. Mikimbung ildeketa iyie arashu te naa iyata enikiporoki, etiu anaa motonyi naapuo to loing'ang'e nemedou aekata aaitirringa. Eoshieki elishie embarta, ore olgisoi nepiki enkume o sikiria, ore eng'udi naa ene nkoriong oo lmoda. Miwaliki olmodai te risioroto e modai enye, arashu iyaku sii iyie olonyaanyukie. Tawaliki olmodai te risioroto enaikununo emodai enye, pee meng'enu ake too nkonyek enyena makewan. Ore ilo oirriwaa olkilikuai te nkaina olmodai, nedung'oo nkejek enyena makewan, neok enapiak. Anaa enatiu inkejek olmaima eililio pesho, neijia etiu endung'et e rashe te nkutuk olmodai. Anaa enatiu oltung'ani oeniki osoit enkopito, neija etiu ilo oisho olmodai enkanyit. Anaa enatiu olkikuei ojing atua enkaina olamerani, neija etiu endung'et e rashe natii atua inkutukie oo lmoda. Anaa enaikununo olang'oroni le nkawuo opik ilbaa pooki ng'ae, neijia etiu ilo oisho olmodai ogiroo esiaai arashu olamerani. Anaa oldia orrinyokino irrugumat enyena, neijia etiu olmodai oigil emodai enye. Itoduaa oltung'ani ng'en too nkonyek enyena makewan, eeta olmodai osiligi sapuk alang ninye. Ejo oltashalai, “Etii olng'atuny ina oitoi! Etii olng'atuny nena oitoi naalala enkanasa!” Anaa kutuk aji nabolo too enat enyena, neijia sii etiu oltashalai te ndapash enye. Enukaa oltashalai inkaik enyena tiatua esaani; neinaur ninye te neshuku arrinyoki enkutuk enye. Aing'en oltashalai too nkonyek enyena makewan, alang iltung'ana oopishana ooidim aatawal te nkarriyiano. Ore ilo ojing'aki olarrabal lemenyikita, netiu anaa ilo olo aibung inkiyiaa o ldia ogiroo. Anaa enaikununo oltung'ani lo loirirua onang'aa ilkeek le nkima ooyupuyup, o mbaa o keeya, neijia etiu oltung'ani olej olelatia enye, nejo, “Ekaiguran taa ake!” Ore pee elai ilkeek neye enkima; naa ore enemetii olaing'oming'omani neish enchankar. Anaa enatiu inkuk tiatua olang'at le nkima o lkeek te nkima, neijia etiu oltung'ani le nchankar einuaaya enchankar aitudupaa. Ore irorei le nking'oming'om naa kemelook, anaa mbelat e mukate, nedoyio aapuo atua ilkutot lo sesen. Anaa enatiu enkimerlel natumurieki emoti e nterit, neija etiu irorei sidain ooirori neme sidai oltau lo loiro. Ore ilo oisunkur te nkiba neiro to yieta irorei, kake eisudoo aibok elejare to ltau lenye; te neiro too rorei le mpiris miruk ninye, amu etii oltau lenye olminong katitin naapishana ore hoo netem aitoipoo enkiba enye te nkeleekisho, ekeibalunyeki intorrok enyena to lturrur. Ore ilo otur engumoto naa kesulakino naa keibeleleng'okino osoit shumata ilo oitera aibeleleng'oo. Ore olng'ejep olejisho neiba ilmang'ati lenyena te lejare. Ore enkutuk olkordo neyau ine nkidaata. Miwuasa te nkaraki ine taisere, amu miyiolo inaayooki ina olong ayau. Inchoo likae kisis iyie kake imme enkutuk ino makewan, olomoni, neme enkutuk ino. Ore osoit naa keiroishi, ore sii osinyai neiroshi, kake ore engoro olmodai neiroshi alang pokira. Egogong engoro napi, ore engoro nemutisho, kake aing'ae oidim aitasho te dukuya olom. Enaikash enkisikong'ata nikinchori naibala alang enyorrata naisudoro. Eisiligayu ilbaa likipik olchore, naa kumok ing'ututat olmang'atinta. Ore ilo oiputakine naa keany enaisho, kake ore te ilo oota esumash, edol ninye ina pooki nadua anaa kemelok. Anaa emotonyi nalo aing'uaa enkaji enye, neijia etiu oltung'ani olo aing'uaa enkang enye. Ore eilata o esonkoyo neitiship oltau, kake kepolos enyamali oltau. Ming'uaa olchore lino o olchore le papaai lino, nimilo enkaji olalashe lino te nkolong e ng'olikinoto ino. Enaikash olelatia lino otaana, alang olalashe lino olakua. Teng'ena enkerai ai nintiship oltau lai pee atum atawalaki ilo laaing'oru nanu aitukurru. Ore oltung'ani ng'en nedolu batisho neisudoo kewan; kake ore ilo omoda nelo adoiki netum enkitamioto. Iwa enkila oltung'ani te neitayio ajo kelak esile olomoni, nimbung ninye to rorei le nkutuk enye nchere keitasheiki olomoni te sile. Ore ilo omayian ole latia enye to ltoilo sapuk, einyototo ayooki enasirie, naa keikenari aajo oldeket. Etiu enkitok e nchankar anaa enkare naitipitipu te nkolong nasha. Ore tinimbok ninye netiu anaa tinimbok osiwuo arashu imbung emborei e ilata, te nkaina enye e tatene. Eii esekenkei aitipij esekenkei, neitipij oltung'ani o likae tung'ani. Ore pooki ng'ae oramat olng'aboli naa keinos ilng'anayio lenyena, naa ore ilo orrip olkitok lenye naa keyanyituni. Anaa enaibalunye enkare enkomom ino tining'or, neija etiu endamunoto oltung'ani eutu ilo tung'ani enatiu. Ore enemeneng'a o Abadon nemeraposho aekata, nemeraposho aekata inkonyek e tung'ani. Etemi enkosholai te moti, netemi sahabu to lkokuet, netemi oltung'ani te nkisisa enye. Ore hoo tinipurd te ntoki naidong'ishoreki olmodai, nindong ninye tenebo enkurma naidong'i, melo hoo emodai enye aing'uaa ninye. Tayiolo katukul enaikununo intare inono, niramat nena kishu inono oleng. Amu mebikoo taa enkarsisisho intarasi, naa kebikoo sii enkopiyia e nkitoo too ishoritin pooki? Ore teneishunye nkujit nebulu kulie, nesotuni nkaitubulu oo ldoinyo, nitum inkilani too lkuoo linono le kerra, nitumie nena kineji enkurma. Ketumi kule nikibaiki too nkineji inono, neaku endaa olmarei lino pooki, o enintotiyie nkaisiaayiak inono. Eilanyisho lelo torrok meeta oltung'ani omirita, kake ore isupati naa kepi ninche anaa olng'atuny. Ore teneas enkop ng'ok, neeta ilaitoriak kumok, kake ore iltung'ana oota ening'unoto o eng'eno, naa keitasheyie ninche ninye te nkata naado. Ore oltung'ani aisinani oibooki enkop ilo aisinani, netiu anaa enchan naar endaa nemeleku. Ore lelo oomenaa inkitanapat neisis lelo torrok, kake ore lelo ooibung inkitanapat nearare ninche. Ore iltung'ana torrok nemening'u esipata, kake ore lelo ooing'oru Olaitoriani naa kening'u katukul. Enaikash oltung'ani aisinani olo te ng'eno enye, alang oltung'ani karsis laa torrok inkoitoi enyena. Ore ilo oibung ena kitanapata naa enkerai ng'en, kake ore ololo aisiritore oltung'ani olubo naa keitukurru menye. Teniaku karsis intalaku dupoto too ltung'ana, nelo karsisisho ino aaku, eno ltung'ani onana oshoke too laisinak. Tenelo neitoming'an oltung'ani enkiok enye pee mening ina kitanapata, neaku ore ninye enkomono enye naa olminong to Laitoriani. Ore ilo oitapong'oo ilo supat autaki atua enkoitoi torrono, naa kesulakino engumoto enye makewan, kake ore ilo le meeta entioto naa ketum enjung'ore sidai. Ore oltung'ani karsis naa aing'en too nkonyek enyena makewan, kake ore oltung'ani aisinani oota endamunoto naa kejur ninye oleng. Ore te nemirisho isupati, naa ketumi enkisisa sapuk, kake te neinyototo iltorrok, neisudoo iltung'ana ate. Ore ilo oisudoo ing'ok enyena nemebul, kake ore ilo oibalie neing'uaa ninche naa ketum olng'ur. Emayiana ilo tung'ani oure Olaitoriani anaake; kake ore ilo oitagol oltau lenye naa kebatatakino atua ing'olikinot. Anaa enatiu enkikurrukur o lng'atuny, arashu olng'arurumi okuetu, neijia etiu oloitoreisho torrono too ltung'ana aisinak. Ore oloitoreisho le meeta ening'unoto naa olaironyani ogogong; kake ore ilo oiba imasaa naapurruno naa keitoodor inkolong'i enyena. Teneitanyamal oltung'ani osarge le ilo tung'ani apa otara, inchoo ninye elimana o metua naa inchoo melo ake oltung'ani hoo obo aretu ninye. Ore ilo olo te sipata naa keitajeuni, kake ore ilo opong'ori too monko too nkoitoi enyena naa kesulakino eng'umoto. Ore ilo otur enkurma enye naa ketum endaa sapuk, kake ore ilo osuj imbaa nemeeta tipat naa ketum aisinanisho sapuk. Ore oltung'ani oisiligayu naa ketum imayianat kumok. Kake ore ilo osioki aaku olkarsis nemelo eitu eitamei. Tinintodolu olkep neme sidai; kake eas oltung'ani ntorrok te neishori enkiti daa. Ore oltung'ani lo lorok neing'oru enkarsisisho nasieku, nemeyiolo ajo kelotu osina enetii ninye. Ore ilo oisikong oltung'ani, ore te siadi naa keitoki atum omom, alang ilo opakas ninye too rorei lo lng'ejep lenye oopuyiapuy. Ore pooki ng'ae opur menye arashu ng'otonye nejo, “Imme enkitarruorroto ina katukul,” naa olencholiek e ilo tung'ani amutani. Ore oltung'ani lo lorok neinyeyie olarrabal, kake ore ilo oisilig Olaitoriani naa keitaae karsis. Ore ilo oisilig endamunoto enye naa olmodai, kake ore ilo olo te ng'eno nagut naa kekorduni. Ore ilo oleng too laisinak, nemeng'oriki toki, kake ore ilo oisudoo inkonyek enyena netum ildeketa kumok. Ore te nedumunye iltorrok, neisudoo iltung'ana ate, kake te neidaaya neponari iltung'ana supati. Tenikirerei anaake nintagol elukunya ino, niyooki nabo olong agila, nimintoki aishiu. Ore te netii isupati enkitoria, naa keshipa iltung'ana, kake te neitoreisho iltorrok naa keigoroo olorere. Ore ilo onyor eng'eno nagut naa keitiship menye, kake ore ilo oitaa inkituaak naaibor onyek encholiek naa keishang'itie imasaa enyena. Te sipata eisho olaiguanani enkop enkitashoto, kake ore ilo oisimaa nkishorot neidaikie enkop enye. Ore oltung'ani opakas ole latia enye, naa inkejek enyena eisalaashaka orreshet. Ore oltung'ani torrono naa keibung'i too ntorrok enyena, kake ore oltung'ani supat eranyisho neshipa sii. Ore oltung'ani supat neyiolo sipat eilo aisinani; ore oltung'ani torrono nemening'u ine ng'eno. Ore lelo asurdaanyak naa keinuaaki enkanasa enkima, kake kerriny iltung'ana ng'eni engoro napi. Tenelo neishankarra oltung'ani ng'en o lmodai, naa kegoro ake olmodai neitoki akueni nemegira. Ore iltung'ana oota enkure o sarge naa keiba ilo lemeeta entioto neingoru lelo torrok enkishui enye. Ore olmodai naa keiro alimu engoro enye pooki, kake ore oltung'ani ng'en neitirring'a aibooyo. Ore te neinining olarikoni le nkop imbaa e lejare, naa keaku ilooitoreisho lenyena pooki torrok. Etumo olaisinani o ilo aironyani lenye tenebo; neisho Olaitoriani ninche pokira nkonyek enye ewang'an. Teneiguanare olaiguanani ilo aisinani te sipata, naa keitasheyieki enkitoria enye ntarasi. Ore eng'udi tenebo enkisikong'a e nkikoo naa keyau eng'eno nagut, kake ore enkerai natapalayioki naa keyaki ng'otonye enkurruna. Ore te nejing iltorrok enkitoria, naa keponari ntorrok, kake keanyu lelo supati aadolu embatatata enye. Toosho tarerioi enkerai ino tuutai naa aikincho ninye enkiyeng'iyeng; naa keisho enchipai oltau lino. Ore ine nemetii enaibon e Nkai nebatata iltung'ana amu meeta enasujita. Kake emayiana ilo oibung enkitanapata. Merere olaisiaayiani irorei ake le nkutuk, ore hoo duo nening'u, menyorraa aibung asuj. Itodua oltung'ani okuetiki aimaki irorei lenyena? Eeta olmodai osiligi sapuk alang ninye. Ore tinincho osinka lino pooki toki nayieu te keraisho, niyiooki amaniki etaa olajung'oni lino. Ore oltung'ani le ng'oro napi naa kedumu olarrabal, naa ore oltung'ani oota engoro naa keyau ntorrok kumok. Keitadoyio olwuasa lo ltung'ani oltung'ani, kake ore ilo obor to ltau naa ketum enkanyit. Ore ilo oitaa olapurroni encholiek naa keiba enkishui enye makewan; ening ilo deket, nemeeta entoki naibalie. Ore euriata e tung'ani neyau orreshet. Kake ore ilo oisilig Olaitoriani neserian. Eing'oru ilkumok omom oloitoreisho, kake to Laitoriani etum oltung'ani esipata. Ore oltung'ani leme asipani naa olminong te lelo supati, kake ore ilo oitoriori enkoitoi enye naa olminong' te lelo torrok. Irorei kulo le Aga olayioni le Yake le Masa, etiaaka ilo tung'ani Itiel, Itiel tenebo Ukai. Esipa tukul kamoda oleng mara tung'ani. Maata ening'unoto e tung'ani. Eitu aitamok kewan eng'eno nagut, arashu doi ninye aata eng'eno eilo sinyati. Aing'ae oilepa alo keper neitoki adou abori? Aing'ae ilo oiturrurro osiwuo too nkaik enyena? Aing'ae ilo otununuko inkariak tiatua enkila? Aing'ae ilo oitasheyie inkiting'ot ena kop? Keji ng'ae enkarna enye, naa keji enkarna enkerai enye ng'ae? Esipa iyiolo iyie! Ore pooki rorei le Nkai neibala ajo kesipa; ninye elong'o e lelo oosaru ninye. Mipon ake ororei lenyena anaa kisikong iyie, nikiyookini aatum aajo ira olalejani. Intokitin are aaikilikuan iyie mikimitiki ake ninche nanu eton eitu aye: Intayu te nanu intalamai mbaa e ntorroni o elejare; mikincho nanu aisinanisho arashu enkarsisisho. Intotioki te ina daa naishiaakino naata. Pee maraposho ake naayooki aany iyie, najo, “Aing'ae doi ilo aitoriani?” Anaa aaku aisinani, naaku olopurrisho, naisarkionie ina arna e Nkai ai. Milo aitang'or osinka te dukuya olkitok lenye, anaa kiyooki adek iyie, niaku oloota entorroni. Etii lelo oodek iloomenye, nememayian sii noo ng'otonye. Etii lelo oodol aajo meeta ntiot too nkonyek enye maate, neitu eisujari ilduruki lenye. Etii lelo oodamu aajo aisidain ninche oleng, ee, eji kejo ninche aisidain oleng'! Etii lelo laa ore ilala lenye naa ilalema, ore ilala lenye naa inkalema, pee etum aainosa ilaisinak aaitung'uai ena kop, o ilo omena tiatua iltung'ana. Eeta olchutai intoyie are, naaishir aajo: “Nchooki, nchooki.” Eetae intokitin uni nemeitaraposhoyu aekata, ong'uan nemejo aekata, “Ataraposhe.” Enemeneng'a, ina kitok olupi, enkop naata anaake enkure eyieu enkare, o enkima nemejo aekata “Ataraposhe.” Ore enkong'u e ilo omen menye neany eyanyit ng'otonye, naa kedumu ilkurruki lo yerata, neinos ilkurragoso. Etii intokitin uni naa enking'asia te nanu; ong'uan nemaning'u. Enkoitoi olkurragos to loing'ang'e, enkoitoi olasurai te ndapidapoi, enkoitoi emeli te mpolos oo naaiposha, o enkoitoi e tung'ani eboitare eselenkei. Nena enkoitoi eina naloloito: Enya ake, nejut enkutuk enye, nejo, “Eitu aas entorrono.” Ore tiabori intokitin uni eikirikira enkop; ore tiabori ong'uan nemeidim ating'iria: osinka te neaku olaiguanani, olmodai oota pooki nanya naraposh; o ina kitok naibae te netum olpayian, o enkaisiaayiani najung ewueji e ina kitok naitore ninye. Etii intokitin ong'uan enkop naa aikutiti, kake kelus oleng eng'eno enye: inkalao: naa imme iltung'ana oogol, neitaiki ake ate endaa neshum te nkata enkirowuaj; ore inkijujurri: neme iltung'ana oogol ninche, kake eitobir inkang'itie enye tiatua isoito; olmaati: le meeta olaiguanani, kake epuo pooki aairiamari to lturrur obo; olmokua: laa imbung too nkaik inono, kake etii ninye atua iwuejitin enkitoo oo laiguanak. Etii intokitin ong'uan naadeenyari tenepuo olotei sidai. Olng'atuny: ogol te pooki ng'ues, nemerrinyo siadi tiae toki; olukunku, o loro, olaiguanani ele te dukuya iltung'ana lenyena. Tinitomode aaku oloisis kewan, arashu tinitaa oloun intorrok, tipika enkaina ino enkutuk ino. Amu tinimposh kule naa itum eng'orno, naa tiniosh enkume e likae nepuku osarge, naa tinironyu engoro neiu enchankar o lomang'ati. Irorei kulo le Lemuel olaiguanani le Masa, ooiteng'ena ng'otonye ninye: Ira iyie enkerai ai enkerai e ng'uset ai, ewalet enkomono ai, ainyoo enkerai ai? Mincho engolon ino, inkituaak, o nkoitoi inono nena naainyal ilaiguanak. Imme enoo laiguanak, iyie Lemuel, imme enoo laiguanak eokoto enaisho, arashu too laitoriak pee eyieu enaisho napi. Meokisho ake nerikino ninche nkitanapat, nemeitoki aasuj esipata e lelo oinyalaki. Inchoo enaisho napi ilo oye, o lelo ootii emion sapuk atua iltauja. Inchoo ninche metooko pee erikino osina lenye, nemeitoki aadamu osina lenye. Inchoo enkutuk ino eiro te rishata e lelo lemeyiolo aairoro, niro esipata e lelo pooki ootung'uayioki oopeny. Inchoo enkutuk ino eiguana anaa olarishani osipa, torripo isipat e lelo aisinak o lelo oomena. Aing'ae oidim anoto enkitok nadupa naishiaakino enkanyit? Amu eeta ninye tipat oleng alang isoito oogol enkinyang'a. Keisilig oltau lo lpayian lenye ninye, nemelau aekata ninye dupoto. Keitaas ninye olpayian lenye isupati neme entorrono, too nkolong'i pooki e nkishui enye. Neing'oru ninye aitobiru inkilani too lpapit loo ntare tenebo o enkatani neasisho too nkaik to ltau le nyorrata. Etiu ninye anaa melin o lamirani, eyau ninye endaa enye te nelakua. Einyototo ninye eton aa kewarie, neitobiraki enkaji enye pooki endaa nanya, neing'uraki inkaisiaayiak enyena esiaai naas. Eing'oru ninye enkurma neinyang'u; ore too lng'anayio loo nkaik enyena neun enkurma oo sabibu. Erreten ninye empolos enye te ngolon, neitagol nkaik enyena. Edol ajo ore pooki toki naitobiru amir neeta dupoto; nemeye oltaa lenye kewarie. Epik inkaik enyena ina toki naitobiru o lpiyayoi, neibung too nkaik enyena ina garri naripunyeki inkilani. Eitorioki ilaisinak nkaik enyena enyena, neitoti too nkaik enyena ilaisinak. Meure ninye enkata enkirobi tenebau amu ore enkaji enye pooki, neeta nkilani naairowua. Eitobiraki enkaji enye ilkarash le rruat; ore inkilani enyena naa ine kitani napuiyiapuy pilei. Eyioloi olpayian lenye too nkishomin neyioloi te neton tiatua lelo payiani le ina kop. Eitobir ninye nkilani naapuyiapuy e kitani nemir ninche; eisho ilamirak inkimeitani meinyang'u. Ore inkilani enyena naa engolon o enkanyit, nekueni too nkolong'i naapuonu e dukuya. Ebol ninye enkutuk enye te ng'eno, ore enkiteng'enata o esupatisho netii olng'ejep lenye. Eing'or ninye aramat imbaa pooki o lmarei lenye, nemenya ninye endaa neitu eisiayu. Einyototo inkera enyena neipot ninye aajo enamaiyiana; neija sii ejo olpayian lenye, eisis ninye ejo: “Etaasa inkituaak kumok imbaa sidain oleng: kake ore iyie ilang ninche pooki.” Ore enkaja naa kelejisho, ore enkishiaa naa enepesho, kake ore enkitok naure Olaitoriani naa ninye natum enkisisa. Inchoo ninye olng'anayioi loo nkaik enyena, nincho esiaai enye eisis ninye te nena shomito. Irorei kulo lo laikooni, olayioni le Daudi, olaiguanani te Yerusalem. Ine pesho, ine pesho, ejo olaikooni, ine pesho ine pesho. Ine pesho pooki. Ainyoo etum oltung'ani te siaai enye pooki natanaurikia, ina natanaurikia tiabori enkolong? Kelusoo eishoi, nelotu ae ishoi, kake ebik ake enkop intarasi. Eilepu enkolong neitoki adoyio, nesiooyo alo ine neilepunye. Ekutari olkutati alo Kopikop, nemanaa alo enkalo e moikuape; Neiulo aiulo osiwuo elo, ore teina kiuloto enye nerrinyokino eneing'uaa. Erukokino inchorroi pooki enaiposha, kake meboreyu ae kata enaiposha. Ometabaiki ine nerukunore nchorroi, nenena naaruko ake aaigil. Ebore intokitin pooki enauri, meidim tung'ani aimaki ninye; meraposho enkong'u eing'orisho, nemeiput sii enkiok mbaa naaning. Ore ina natii apa naa ninye naitoki atii, naa ore ina naataasaki naa ninye eitokini aas; nemeetae ae toki ng'ejuk tiabori enkolong. Ketii entoki natejoki, “Ing'ura, aing'ejuk ena?” Etii apake too nkatitin e moitie e dukuya ang. Meetae endamunoto oo ntokitin naatulusoitie, nemeitokini ae kata aata enadamunyeki, ntokitin neton etii dukuya naasayu, te lelo oopuonu te siadi. Ore nanu ele aikooni nataa apa olaiguanani oitasheiki Isiraeli te Yerusalem. Napik endamunoto ai aing'oru aturu eng'eno e nena pooki naasi tiabori keper; esiaai nemetii enchipai apa eishoo Enkai nkera oo ltung'ana metanyamaliki. Atoduaa pooki toki naasitae tiabori enkolong; nanyorriki ajo ore pooki naa ine pesho, naa enkijape ake emirareki. Ore ina natokordile nemeidimi aaitorioi, ore ina nemeetae nemeikenayu. Najoki nanu kewan, “Aing'orua nanu eng'eno sapuk nagut, nalang lelo apa pooki ooitasheikito Yerusalem te dukuya nanu; neeta endamunoto ai enkarriyiano eng'eno nagut eng'eno oo mbaa nataasa, o eyiolounoto.” Napik endamunoto ai ayiolou eng'eno nagut nayiolou olkuenyi o emodai. Nanyorriki ajo ore sii ninye ena naa enkijape ake emirareki. Amu ore eng'eno nagut sapuk, nepik inyamalaritin kumok oltau naa ore ilo oponaa eyiolounoto neponaa sii emion o sina. Najoki nanu kewan, “Wou taata, ekatem esidano o lkar; ntumurru, ndipakinoyu.” Kake ng'ura, ore sii ninye apa ena naa ene pesho. Atejo sii enkuenia “Ene modai”, ore olkar nemeeta enikintaas sidai. Aing'orua oleng te ndamunoto ai enaiko te naitiship osesen lai te naisho oo sabibu neton ake aarikito endamunoto ai arikoo te ng'eno nagut, o enaiko te natum aibung emodai o metaba anaa nadol ina apa naji aisidai too nkera oo ltung'ana neas tiabori keper te nena kuti olong'i e nkishui enye. Ataasa isiaaitin sapuki; atesheta nkajijik, naunoki kewan inkurman oo sabibu naitobiraki kewan inkurman o wuejitin neeyeng'iyeng'areki, naun te ninche impukunot pooki oo lkeek loo lng'anayio. Naitobiraki kewan ilturot lapikie ina tim oo lkeek nabulu enkare. Nainyiang'ua irrindiki ilewa, o ng'oruo, naata apa irrindiki ootoiuoki te nkaji ai; naata sii apa iluaat kumok oo nkishu o ntare, alang pooki ng'ae apa otii dukuya nanu te Yerusalem. Atushumaka sii kewan enkosholai o sahabu o lchumati pooki loo laiguanak, loo lkirinen; anoto sii ilaranyak, ilewa o ng'oruo o nkapiak kumok oleng, inkituaak kumok naayieu olee neeta. Metaa ataa apa kitok oleng nagiroo pooki apa laatii te dukuya nanu te Yerusalem; naata ake sii eng'eno nagut tiatua nanu. Ore pooki nang'uar inkonyek aainei neitu alau ninche; atipika oltau lai atua esikar, amu ore oltau lai nenoto esikar te ekenyata ai pooki, naa ore apa olekoisiaayio le nauri ai pooki. Nalotu asipu nena apa pooki naataasa nkaik aainei o eekenyata nanoto aasita ina, naa ng'ura, ore pooki naa ine pesho naa enkijape ake amirare, nemeetae hoo toki naata dupoto tiabori enkolong. Metaa aibelekenyakine aineneng eng'eno nagut o olkuenyi; kainyoo eas oltung'ani olotu te siadi olaiguanani? Ina ake naidipa ataasa ninye. Metaa atoduaa ina ng'eno nagut ajo kelus te sidano emodai anaa enalus ewang'an te sidano te naimin. Eeta oltung'ani oota eng'eno nagut nkonyek enyena tiatua elukunya enye, kake ore olmodai nelo te naimin; nayiolou ake ajo etum pooki olbuket obo. Ina peyie ajoki kewan, “Ore ina natum olmodai, naa katum sii nanu; ainyoo naa peyie ataa nanu olang'eni oleng?” Najoki kewan ore sii ninye ena naa empesho. Meetae oltung'ani odamu ilo ng'en, nemeetae olodamu olmodai, amu ore too nkolong'i naapuonu nerikinisho pooki. Eye ake ilo ng'en anaa ilo modai! Metaa aibayie apa enkishui amu ore nena naasi tiabori enkolong naa torrok te nanu; amu ine pesho pooki naa enkijape ake emirareki. Ekaiba apa eekenyata ai pooki nateekenye tiabori enkolong, adol ajo kaing'ueki ninche ilo tung'ani olotu te siadi nanu, naa aing'ae oyiolo te naa keaku oltung'ani ng'en arashu olmodai. Naa keaku ake oloitore nena pooki natanyamalaka aasishore eng'eno ai nagut tiabori enkolong. Ore sii ninye ena naa enepesho. Metaa aibelekenye aisho oltau lai meiting'o osiligi too siaitin pooki aainei nataasa tiabori enkolong. Amu ore tiae kata ore oltung'ani otaasishe te ng'eno nagut o te yiolounoto o te nkarriyiano neing'uaa pooki metishipakinoyu ilo leitu enyamaliki ninye. Ore sii ninye ena naa empesho naa eng'oki sapuk. Ainyoo eeta oltung'ani too siaitin o enauri natum easisho tiabori enkolong? Amu ore nkolong'i enyena pooki nebore emion, ore esiaai enye pooki naa oltau eiroshiyie; neijia ninye etiu kewarie meeng'iyeng'a indamunot enyena. Ore sii ninye ena naa ene pesho. Meetae entoki naikash te tung'ani alang te nenya neok netum enchipai te ekenyata enye. Atoduaa sii ena ajo nkaik Enkai eing'uaa; amu teneme ninye aeng'ae oidim ainosa arashu aing'ae oidim atishipakinoyu? Ore ilo tung'ani oitiship ninye neisho Enkai ninye eng'eno nagut o eyioulounoto o eng'ida; kake ore olaing'okoni, neisho ninye ina siaai esotore neiturrur peyie eisho ilo oitiship Enkai. Ore sii ninye ena naa empesho naa enkijape ake emirareki. Ore te pooki toki neetae enkata enye, neetae enkata e pooki toki tiabori keper: Eetae enkata naini, neetae enkata naye, neetae enkata eunore, neetae enkata nadotuni ina natuunoki; neetae enkata naari metua, neetae enkata naishiunyeki; neetae enkata nagili neetae enkata nasheti; neetae enkata naishiri, neetae enkata nakueni; neetae enkata e nkishirata o sina, neetae enkata o sinkolio neetae enkata nanang'ari isoito, neetae enkata naiturrurri isoito tenebo; neetae enkata naibung'i aaitamuat nkaik, neetae enkata nemeibung'i aaitamuat nkaik neetae enkata naing'oruni, neetae enkata naiminieki, neetae enkata nashumi, neetae enkata naiturrarri; neetae enkata napolosi, neetae enkata naripi neetae enkata nagirae, neetae enkata nairori neetae enkata e nyorrata, neetae enkata e nkiba; neetae enkata o larrabal, neetae enkata e seriani. Kainyoo dupoto natum olaisiaayiani te ekenyata enye? Atoduaa ina siaai naishorua Enkai aisho nena kera e tung'ana metanyamaliki ninye. Eitaa ninye pooki toki sidai te nkata enye; ore ake sii netipika ninye e ndamunoto e tung'ani endamunoto oo ntarasi, ore etiu neija nemeidim ninye atayiolo ina nataasa Enkai te nkiterunoto o metabaiki enkiting'oto. Ayiolo ajo meetae ae toki sidai te ninche alang teneitiship ate neng'ida too nkolong'i pooki naaishu ninche; enkishooroto sii e Nkai to ltung'ani nchere ore pooki ng'ae neinos, neok, neisikarra te ekenyata enye pooki. Ayiolo ajo ore pooki naas Enkai neitashe ntarasi; meetae ae toki naponikini ninye; nemeetae toki naiwuang'ieki te ninye; eitaa Enkai metotiwuo neija, peyie etum iltung'ana aatureita ninye. Ore ina natii, netii apake, ore ina naitoki atii, netii apake, neing'oru Enkai ina naterewaki aaitalamaa. Ore tenebo ina atoduaa ake sii tiabori enkolong teine wueji neutarieki esipata ajo etii ake sii ninye ine enkarrueisho, ore ine wueji e supatisho, netii ake sii ninye enkarrueisho. Najo tiatua oltau lai, ekeiguanare Enkai lelo supati neiguanare lelo torrok, amu etegelua ninye enkata tenkaraki pooki toki, o pooki siai. Najo to ltau lai tenena naaipirta nkera oo ltung'ana inchere Enkai natemita ninche pee eitodol ninche nchere ing'uesi ninche. Amu ore eneiting'oki iltung'ana naa ninye sii eiting'oki ng'uesi; ore anaa enaye nabo neye ake sii ninye enkae. Eeta pooki enkiyang'et nabo nenyanyuk, nemeeta oltung'ani enelang'ie nena ng'uesi; amu ore pooki naa empesho. Epuo pooki ewueji nebo; amu enterit eing'uaa pooki nerrinyokino pooki enterit aaigil. Aing'ae oyiolo tenaa ore enkiyang'et oltung'ani neilep alo shumata ore enkiyang'et eng'ues nelo abori atua enkop? Metaa atoduaa ajo metii toki naikash alang teneshipakino oltung'ani esiaai enye, amu ina doi esiaai enye; aing'ae oidim ayau ninye metoduaa imbaa naasuju ninye eidipa atua? Atoduaa ake sii nena baa pooki e nkitorogonyata naasitae tiabori enkolong. Naa ng'ura, ore lelo kiyio le lelo ooitorogonyitai, nemeetae hoo obo lenye oilejilej ninche! Ore te nkalo e lelo ooitorogony ninche; netii apa engolon, nemeetae hoo obo oilejilej ninche. Nadamu ajo ore lelo ooidipa aatuata nemunyak ninche oleng, aalang lelo leton eishu; neikash oleng te pokira ilo leton eitu eini neitu edol nena baa torrok naasi tiabori enkolong. Nadol ajo ore eekenyata pooki o enkarriyiano pooki esiai nelotu aimu olom oata oltung'ani to le latia enye. Ore ake sii ninye ena naa empesho naa enkijape ake emirareki. Emuat olmodai inkaik enyena, neisho kewan meinosa esumash. Enaikash emborei enkaina nabo etii emborron atua alang inkaik are naabore eekenyata emirata e nkijape. Ore ake sii natodua empesho tiabori enkolong; ore oltung'ani lemeeta obo, aa taa olayioni arashu olalashe, nemeeta ake enkiting'oto iekenyat enyena pooki nemeraposho aekata nkonyek enyena te nkarsisisho, metaa meikilikuanu aekata ajo, “Aing'ae doi aekenyaki pee amitiki kewan enchipai.” Ore sii ninye ena naa empesho naa esiaai nemetii enchipai. Enaikash aare alang obo, amu eeta olerrinyore sidai tenkaraki eekenyata enye. Amu tenelo nebatata pokira, naa kedumu obo o likae; kake oi iyie ilo laa ninye ake tenelo nebatata nemeeta likae odumu ninye aitasheyie. Ore ake sii, teneirrag aare tenebo, naa keirowuaju; kake kaji eiko obo teineirowuaju aa ninye ake? Ore hoo neidim oltung'ani atigilu olikae laa ninye ake, eidim aare aairisha ninye. Ore enkopito natasha uni, nemelelek edung'i. Enaikash olbarnoti aisinani ng'en alang olaiguanani moruo omoda, lemeekure eyieu enkikoo ore hoo neshomo aing'uaa korokoroni ajing olorika le nkitoo arashu etoiwuoki te nkitoria enye aa olaisinani. Atoduaa nena pooki naaishu naapuo tiabori enkolong, tenebo ilo barnoti ilo apa olotu aitashe te wueji enye; nemeetae apa enkiting'oto oo ltung'ana pooki; etii apa ninye shumata e pooki. Kake ore lelo oopuonu te siadi nemeshipakino ninye. Esipa ore sii ninye ena naa empesho naa enkijape emirareki. Irrita iroruat inono ina kata iloito enkaji Enkai, enaikash tininyikaki ainining alang tinintayu ilo asar loo lmoda; amu meyiolo ninche aajo entorrono easita. Mikuetiki airo te nkutuk ino, nimincho oltau lino ekuetiki airo irorei te dukuya Enkai, amu etii Enkai keper, nitii iyie oriong enkop; metaa inchoo irorei linono eaku kuti. Amu elotu enkidetidet too siaitin kumok, ore oltoilo lo lmodai too rorei kumok. Teninos olmumai te Nkai ijo intayu toki, mimutie ake eitu ilak; amu meeta ninye enchipai too lmoda. Talaa ina ninosa olmumai. Enaikash tiniminos olmumai alang tininos nimilak. Mincho enkutuk ino kintadoiki atua eng'oki, nimijo ake te dukuya olkilikuai eji enkitadiata ake duo, ainyoo peyie egoro Enkai te nkaraki oltoilo lino; neinyal esiaai oo nkaik inono? Amu teneponari enkidetidet, neaku irorei kumok lemeeta tipat: kake turia iyie Enkai? Tinidol to lkerenket lelo aisinak eitorogonyi neoruni esipata naishaakino te ng'olon, ming'asia ake teina bae; amu ore ilo kitok neing'orita likae kitok alang ninye, neetae ake sii kulikae ooilep te ninche. Kake ore te pooki, ore olaiguanani neisilig sii ninye inkurman naaturi. Ore ilo onyor iropiyiani nemeraposho ae kata too ropiyiani; neijia sii etiu ilo onyor enkarsisisho e dupoto; ore sii ninye ena naa empesho. Ore teneponari intokitin neponari sii lelo ooinos ninche; naa kainyoo dupoto to lopeny aime pee edol ninche too nkonyek enyena? Emelok injo olaisiaayiani, oi teneinosa enkiti arashu esapuk; kake ore enkuretisho e ilo karsis nemeisho eirura. Etii entaboi torrono natoduaa nanu tiabori enkolong; ore karsisisho nashum oltung'ani naa kewan ake eshumaki batisho. Neimin pooki to lbuket, nemeleku toki naisho nkera enyena. Ore anaa enatupukuo te ng'uset e ng'otonye neijia ake eitoki aiko elo, meishopo anaa apa pee elotu, nemeeta toki e siaai enye naya ninye anap too nkaik enyena. Ore sii ena naa entaboi torrono anaa apa pee elotu, neijia ake sii eikunari; neaku ainyoo dupoto nanoto ilo oekenyare enkijape. Neton te nkishui enye pooki tiatua enaimin, o sina sapuk, te nyamali sapuk o ltau, te moyian o te nkiba. Ng'ura ajo ore enatodua aa sidai neiririkino naa pee idaa niokisho ning'oru enchipai te ekenyata pooki naekenya oltung'ani tiabori enkolong te nena kuti olong'i enyena e nkishui enye naaishoo Enkai ninye, amu ninye erubata enye. Ore pooki tung'ani oishoo Enkai masaa o enkarsisisho o engolon pee eshipakino ninche, neng'amaa erubata enye netum enchipai tesiai enye. Ore ena naa enkishoroto e Nkai. Amu medamu oleng nena olong'i e nkishui enye amu eishoo Enkai ninye enchipai tiatua oltau lenye. Etii entorroni natoduaa nanu tiabori enkolong, neteeka oleng iltung'ana. Ore oltung'ani oisho Enkai enkarsisisho o masaa, o enkanyit, metaa meeta toki nalau e pooki ake naba anaa enayieu, nemeisho ake sii Enkai ninye engolon metishipakinoyu ninche, kake olomoni olotu ashipakino ninche; ore sii ena naa empesho; naa olosilisil sapuk. Teneiu oltung'ani nkera iip nabo, nebikoo ilarin kumok oleng, metaa ore inkolong'i oo larin lenyena naa kumok oleng, kake meshipakino ntokitin sidain e nkishui, nemetum sii enukaroto, ajo nanu enaikash olkibiroto alang ninye. Amu elotu atua empesho nerrinyo alo atua enaimin, neitoipori enkaina enye te naimin; ore ake sii, eitu doi ninye edol enkolong arashu eyiolou toki; netum ake enkiyeng'iyeng alang ninye. Ore hoo tenaa kebikoo ninye ilarin enkalifu aigil are, neitu ake eshipakino toki aime ewueji nebo epuo ninche pooki. Ore eekenyata pooki o ltung'ani naa tenkaraki enkoshoke ake, nemeraposho ake te sumash enye. Kainyoo elang'ie ilo ng'en olmodai? Anaa ainyoo eeta ilo tung'ani ng'en nalang'ie olaisinani otayiolo eneikunaa kewan te dukuya lelo ooishu? Enaikash ina duaata oo nkonyek alang ina yieunoto nemeuno; ore sii ninye naa empesho enkijape ake emirareki. Ore pooki naewuo aaku neidipaki apa aipoto, neyioloi enatiu tung'ani, neyioloi aajo meidim ataarare obo ogol alang ninye. Ore teneaku irorei kumok, neaku empesho sapuk, naa ainyoo eikashie oltung'ani? Anaa aing'ae oyiolo ajo ainyoo esidai te tung'ani eton eishu tenena kuti olong'i naaishu ninye te nkishui enye e pesho, nena naagiroo ninye anaa oloip? Anaa aing'ae oidim atoliki oltung'ani imbaa naaku te siadi ninye tiabori enkolong? Enaikash enkarna sidai alang eilata nagol enkinyang'a; neikash enkolong nitua alang enkolong apa nikitoiwoki. Enaikash tinilo ina aji nabore olkiyioi, alang tinilo ina aji o sirua, amu ena enkiting'oto e pooki tung'ani. Neshum lelo ooishu ina too ltauja. Enaikash osina alang enkuenia, amu to sina o enkiroishi oltau eitishipi oltung'ani. Ore oltau le ilo ng'en, netii atua ina aji, olkiyioi; kake ore ilo tau loo lmoda netii ina aji enkuenia. Enaikash oltung'ani oning enkisikong'ata eilo ng'en, alang tenening osinkolio loo lmoda. Ore anaa enadar ilkiku einosita enkima tiabori e moti, neijia etiu enkuenia e lelo moda; ore sii ninye ena naa empesho. Esipa ore enkitorogonyata neitomod oltung'ani ng'en, naa keinyal eropare oltung'ani e ndamunoto. Enaikash enkiting'oto entoki alang enkiterunoto enye; neikash ilo ongiri to ltau alang ilo owuasa to ltau. Migoro asioki, amu ore engoro neirrag to lgoo loo lmoda. Mijo ake, “Ainyoo apa pee eikash inkolong'i naatulusoitie te kuna?” Amu ime te ng'eno inkilikuanu ena. Eisidai eng'eno tenebo enjung'ore naa dupoto, te lelo oodol enkolong. Amu ore erripoto e ng'eno nagut netiu anaa erripoto oo mpisai; naa ore dupoto e yiolounoto naa ina ng'eno nagut nagolie ina kishui eilo oata. Tadamu esiaai e Nkai: aing'ae oidim aitorioi ina naidipa atoriwuo? Ore teina olong ninoto masaa, ting'idayu; ore teina olong e nyamali nidamu; Enkai naitobira obo anaa olikae, metaa metum oltung'ani ae toki nalotu asuju ninye. Ore te nkishui ai e pesho, natoduaa pooki toki; eetae oltung'ani supat orrorri te sipata enye, neetae oltung'ani torrono oitoodor enkishui enye te yasata enye torrono. Miaku supat aitulus, nimintaa sii kewan ololus te ng'eno, ainyoo peyie imut kewan ainyal? Miaku sii olarruoni aitulus, nimiaku sii olmodai; ainyoo pee iye iyie eng'or enkata ino? Enaikash tinimbung ena akurraki, ore te ina nimimuat enkaina ino; amu ore ilo oure Enkai nepuku tenena pooki. Eisho eng'eno engolon ilo tung'ani ng'en alang ilaiguanak tomon ootii atua enkanasa. Esipa meetae te nkop oltung'ani supat oas isupati nemeas aekata ng'ok. Mishilaa nena baa pooki naajo iltung'ana, pee meya ake nining osinka lino kidekita iyie; eyiolo oltau lino ajo ore too nkatitin kumok nitedia sii iyie ilkulikae. Atetema kuna pooki te ng'eno nagut; najo, “Ekaaku ng'en”, kake ekaalakuaniki apa nanu. Ore ina natii, naa kelakua oleng negut, egut oleng; aing'ae oidim anoto? Naibelekeny endamunoto ai ayiolou naing'oru aturu naing'oru eng'eno nagut o esiana oo ntokitin, nayiolou nena torrok e modai o ina modai aa ninye olkuenyi. Natum enduaran oleng alang keeya eina kitok naa ore oltau lenye naa orreshet oibung'isho, naa ore inkaik naa entoki naibung'isho; ore ilo oitiship Enkai neilany ninye, kake ore olaing'okoni neya ina kitok ninye. Ng'ura, ena nanu anoto, ejo olaikooni, intushulaki entoki enkae peyie itum esiana enye, naa ninye eing'orua endamunoto ai aigil neton ake eitu atum. Oltung'ani obo anoto tiatua enkalifu kake eitu atum enkitok te pooki. Ng'ura, ena ake aewuo atum, inchere eitayu Enkai oltung'ani meitasho te nkitashoto sidai, kake eing'orutua inkoitoi kumok nemesipa. Aing'ae otiu anaa oltung'ani ng'en? Naa aing'ae oyiolo ina kibelekenyata entoki pooki? Ore eng'eno nagut e tung'ani neitawang enkomom enye, ore ina golon enkomom enye neibelekenya. Imbung'a enkitanapata o laiguanani, naa ore enkaraki olmumai sinyati miureishoyu; shomo tung'uai enkomom enye; mimutie eton mesidai esiaai amu eas ninye ina nayieu pooki. Amu ore ilo rorei lo laiguanani naa sapuk, naa aing'ae oidim atiaki ninye, “Kaa doi iasita iyie?” Ore ilo oyanyit enkitanapata nemetum enkitamioto, naa ore ina damunoto oltung'ani ng'en neyiolo e nkata neyiolo enkoitoi. Amu ore pooki bae neeta erishata enye o enkoitoi enye, hoo naa ore enyamali oltung'ani naa keyek ninye. Amu meyiolo ninye ina nayooki aaku, anaa aing'ae oidim atoliki ninye enayooki aaku? Meetae oltung'ani oota engolon naibokie enkiyang'et, arashu eeta engolon naitoreyie ina olong e keeya; olarrabal ilo limikiilany, nemeitajeu intorrok lelo oishooki ninye. Atoduaa kuna pooki ina kata apikita endamunoto ai nena pooki naasi tiabori enkolong, enkop naata kulikae engolon, neitorogony ilkulikae ootii abori ninche. Nadol lelo tung'ana torrok enukari; lelo apa oojing nepuku aaing'uaa ewueji sinyati, neisisi tiatua enkanasa teine netaasie imbaa naaijo nena. Ore sii ninye ena naa empesho. Amu medung'okini ina torroni enkiguana aasioki, ore oltau le nena kera oo ltung'ana netudung'o pee eas entorroni. Ore hoo neas olaing'okoni entorroni katitin iip nabo neitoodor enkishui enye, kake ayiolo ake ajo kesidanu oleng te lelo ooure Enkai, amu keureisho te dukuya ninye; Kake mesidanu te lelo arruok, nemeitoodor inkolong'i enyena anaa oloip, amu meeta enkuretisho te dukuya Enkai. Etii empesho naasi te nkop, etii iltung'ana supati laa ninche eitaasi nena siaitin naaipiru lelo torrok, netii iltung'ana torrok laa ninche eipang'aki iyasat naas lelo supati. Atejo sii ore ena naa empesho sii ninye. Nanyorraa nanu enkitumurrunoto, amu meeta tung'ani toki sidai tiabori enkolong kake pee edaa, neokisho neshipakino kewan, amu eiriamariyie ena eekenyata enye tiatua nena olong'i e nkishui naisho Enkai ninye tiabori enkolong. Ore pee apik endamunoto ai aitayiolo kewan eng'eno nagut, nadol esiaai naasitae tioriong enkop, nadol ajo metum oltung'ani injo dama arashu kewarie; nadol teine isiaaitin pooki e Nkai, inchere meyiolou oltung'ani ina siaai naasi tiabori enkolong. O tenaa keturu oleng oltung'ani aekenya eing'oru, metum hoo ninye pito; hoo nenya kutuk oltung'ani ng'en ajo eyiolo. Metum hoo ninye pito. Kake atushuma nanu kuna pooki to ltau, najur aineneng pooki, enetiu lelo supati o lelo ng'eni o siaitin enye etii pooki enkaina e Nkai; tenaa kenyorrata arashu enkiba meyiolo tung'ani. Ore pooki toki natii dukuya enye naa empesho, amu ebatatakino pooki enyamali nabo aa lelo supati o lelo torrok; lelo lemeeta oloirerio o lelo ooiduruk, ilo oitayu olasar o ilo lemeitayu olasar. Anaa enatiu to ltung'ani supat, neijia etiu olaing'okoni; anaa enatiu te ilo onya olmumai etiu anaa ilo lemenya olmumai. Entorroni ena te pooki naasi tiabori enkolong, nchere nebo eitingoki pooki, ore isii iltauja loo ltung'ana pooki nebore enkarruoisho, netii olkuenyi iltauja lenye eton eishu ninche. Ore te siadi ina nepuo enemeneng'a. Kake ore ilo oitutumokoki o lelo pooki ooishu neeta osiligi, amu enaikash oldia oishu alang olng'atuny otua. Amu eyiolo lelo ooishu inchere keyooki aaye, kake meyiolo ilootuata ae toki, nemeeta ae laakinoto; kake ore endamunoto enye neimin. Ore enyorrata enye o enkiba enye o olom lenye neidipa pooki aisha, nemeekure eetaae ntarasi erubata e pooki naasi tiabori enkolong. Shomo inosa endaa ino te nchipai, niok enaisho ino oo sabibu te nchipai oltau; amu eidipa Enkai atonyorrai pooki nias. Inchoo ilkilani linono eiborru anaake; nimincho eilata elai te ndukuya ino. Tishipakinoyu enkishui tenebo enkitok ninyor, too nkolong'i pooki e nkishui ino e pesho nikinchoo ninye iyie tiabori enkolong, amu ninye erubata ino tena kishui te ekenyata niekenya tiabori enkolong. Ore pooki naibung enkaina ino aas, taasa ninye te ngolon ino pooki; amu metii esiaai anaa endamunoto, anaa eng'eno anaa eng'eno nagut atua enemeneng'a naa ninye ilo. Atoduaa ake sii tiabori enkolong ajo ore ina kesha neme ene lelo ake ooten, neme ene lelo ake oogol to larrabal, neme enoo lang'eni ake e ndaa, neme enoo lkarsisi ake eng'eno, neme ene leloake arriyiak too siaitin omon; kake eipang'aki ake erishata e munyani ninche pooki. Amu meyiolo oltung'ani enkata enye. Anaa isinkir ooibung'aki to rreshet torrono, anaa imotonyi naaibung'aki tiatua orreshet neija etiu nkera oo ltung'ana eibung'i to rreshet te nkata torrono, ina kata napulusokino adoiki ninche. Atoduaa sii ena kitanyaanyukoto e ng'eno nagut tiabori enkolong, nelioo aa sapuk te nanu. Eetae apa enkiti anasa natii ilkuti tung'ana atua, nelotu olaiguanani kitok aarare ninye neman aibung, nepik iltimito aitaman agilunore ninye. Kake enotoki tiatua ina anasa oltung'ani aisinani ng'en, neitajeu ilo tung'ani te ng'eno enye enkanasa. Nemeetae hoo obo otadamua ilo tung'ani aisinani; kake ajo ake enaikash eng'eno nagut alang engolon hoo netemenaiyioki eng'eno nagut eilo aisinani neitu eshilari irorei lenyena. Eikash irorei lo ltung'ani ng'en ooning'i te mborron alang imbuakunot oloitoreisho tiatua ilmoda. Eikash eng'eno nagut alang imasaa o larrabal, kake ore olaing'okoni obo nemut intokitin sidain kumok. Ore ilojong'a ootuata neidim aitong'ua eilata narropil. Naa ore enkiti modai neidimu eng'eno nagut o enkanyit. Ore oltau lo ltung'ani ng'en neboiniki ninye meitoriokinoyu esipata, kake ore oltau lo lmodai neboiniki entorroni. Ore doi ninye olmodai tenelo te nkoitoi, nemeeta endamunoto, neliki pooki ng'ae ajo olmodai. Tenelo ake nikidumakino engoro e ilo oitoreisho, milo ake aing'uaa ewueji ino e siai, amu ore nena torrok kindimi aatapalaki tinigira aitirring'a. Etii enkarrueisho natoduaa tiabori enkolong, anaa duoo enkitarruoroto napuku aing'uaa ilo oitoreisho. Eishori iltung'ana oomoda ilorikan le shumata; netoni lelo karsisi too wuejitin e abori. Atoduaa irrindiki ekedito mbartan nadol iltung'ana kituaak epuo too nkejek anaa irrindiki. Ore ilo otur engumoto nedoiki ninye; naa keony olasurai ilo otur elusie te suntai. Ore ilo oturu isoito naa kear isoito ninye; naa ore ilo oiper ileng'ot nepik kewan bata. Tenaa ming'ani entolu ino, neitu iii ninye, neishaakino niponaa engolon oleng; kake eng'eno nagut naretu oltung'ani meisula. Teneonyisho olasurai eton eitu esiri te ntaleng'oi naa keaku pesho tenesiri eidipa atoonyisho. Ore irorei le nkutuk eilo ng'en, neisho ninye omom, kake ore enkutuk olmodai nemut ninye. Ore enkiterunoto oo rorei le nkutuk enye naa emodai, naa ore enkiting'oto e nkiroroto enye naa olkuenyi torrono. Eponaa olmodai irorei oleng, hoo nemeeta oltung'ani oyiolo ajo ainyoo naaku, naa aing'ae oidim atoliki ninye ina naaku te siadi ninye? Ore eekenyata o lmodai neitanaur ninye, metaa meyiolo ninye ina oitoi nalo enkanasa. Oi iyie na kop, tenaa ore olaiguanani lino naa enkerai, ore ilkituaak linono nenya osirua lenye tadekenya! Ishipa iyie na kop, tenaa ore olaiguanani lino naa olayioni loltung'ani olakuno, ore ilkituaak linono nenya osirua te nkata naishaakino, te nkaraki eng'olon, neme tenkaraki emerai! Ore te nkaraki enturuaisho neurunye shumata enkaji, ore tenkaraki enchalan newo enkaji. Ore endaa neitobiraki te nkaraki enkuenia, ore enaisho oo sabibu neitiship enkishui, newal impisai pooki toki. Midek ake olaiguanani, too ndamunot inono, nimidek to lgilata lirrag ilo karsis, amu ore imotonyi oloing'ang'e neya oltoilo lino, arashu eboloo kulie nyaun oo naipuko ina bae. Nteng'ela imasaa inono too nkuapi, ore tenkata nalotu nitum dupoto. Tooro olchumati lino kat naapishana arashu isiet, amu miyiolo ajo kaa torroni napukoki enkop. Tenebore nkatampo enkare, neshaiki enkop; naa teneurokino olchani kopikop arashu moikuape, ore ine nesulakino olchani neirrag te ine. Ore ilo ojurru enkijape nemeunisho; naa ore ilo oisilig inkatampo nemeisampu. Ore anaa enimiyiolo eneikunakino enkiyang'et iloik tiatua eng'uset e nkitok nairoishi, neaku miyiolo esiaai e Nkai naitobir pooki toki. Tuuno tadekenya ilanterera linono, ore teipa niun ake aitoki; amu miyiolo ajo kakua oobulu, kulo ashu kuldo, arashu eidim pokira aatisidana. Emelok ewang'an, naa keitiship inkonyek tining'or enkolong. Amu tenebikoo oltung'ani ilarin kumok, inchoo ninye eshipakino pooki; kake inchoo edamu ninye ajo ore nkolong'i e naimin naa keaku kumok. Ore ina pooki nalotu naa empesho. Tishipayu iyie lo barnoti, tiatua kitisho ino, nincho oltau lino kinting'id iyie too nkolong'i pooki e kitisho ino; shomo too nkoitoi oltau lino o too nduaat oo nkonyek inono. Kake tayiolo ajo ore te kuna baa pooki naa aikiyau iyie Enkai atua enkiguana. Iwuang'ie enkuretisho too ndamunot inono, niwuang'ie aitalamaa emion to sesen lino; amu ore kitisho o enkakenya enkishui naa empesho. Tadamu naa ilo likintobirua too nkolong'i e kitisho ino, eton eitu epuonu inkolong'i torrok, nenyikaa ilarin oleng, ina kata nilotu ajo, “Maatayie ninche enchipai;” eton eitu eitomisimisi enkolong, o lapa, o lakir eton eitu esoto nkatampo aayau enchan, ina olong naikirikira ilarripok leina aji ore iltung'ana oogol neirrugo, neitirring'a lelo ooidong'isho amu etaa kuti, ore lelo oing'orisho too lusien neiliilaa nkonyek enye. Ore nkutukie oo nkajijik too nkoitoi neikeni, neyagaa oltoilo lenkidong'ore, nedumunye obo to ltoilo loo motonyi, ore ntoyie pooki o sinkolio neitadouni; naa keureisho sii ninche teine neika, netii enkuretisho enkoitoi; neitapuka aipilipil olchani oji olmolosi, onyaanyukie oseki, nekedoo entargeeti elo; neish eyieuna enye; amu elo oltung'ani ewueji enye nebikie intarasi, ore lelo aishirak nepuaya too nkoitoi naalala e nkanasa, eton eitu eitir ina opito e nkosholai arashu ebela olbakuli le sahabu ore emoti naokunyeki enkare nebela te nkong'u enkare arashu egila ina keju engarri te nchoto naokunyeki enkare nerrinyo enterit alo atua enkop anaa enatiu apa tedukuya, nerrinyokino enkiyang'et Enkai ina apa naishorua ninye. Empesho oo mpeshoritin ejo olalikioroni; ore pooki naa empesho. Ore ake sii aa ng'en olaikooni netuutaka iltung'ana eng'eno, eineneng neisum neiturrurru iloyietiaa te nkarriyiano sapuk. Etetema olaikooni aing'oru irorei ooitishipisho; neiger aitobiraki irorei oosipa. Ore nkirorot e ilo ang'eni netiu anaa iltuleta neikununo anaa ilmushumaani ootooshokoki aaitagol naa ore inkirorot naatasotuoki netiu anaa olchekut obo. Enkerai ai, tujurru oleng pooki toki nalus te kuna. Ore enkigeroto oo mbukui kumok nemeeta eneiting'ie, naa ore enkisoma sapuk naa osesen lino eek. Ore enabayie tena bae, nena pooki nitoning'o. Turia Enkai, nimbung inkitanapat enyena, amu ena elulung'ata e siaai pooki e tung'ani. Amu eyau Enkai pooki siaai atua enkiguana, o pooki toki oo nkisudorot, aa sidai arashu torrono. Osinkolio loo sinkolioitin laa ole Solomon, Oi duoo tenaa aiking'utut too ng'ututat enkutuk ino! Amu ore enyorrata ino nelang enaisho oo sabibu. Ore iila inono naaputishoreki naa kerropil oleng, ore enkarna ino naa eilata nabukuno; metaa aikinyor iyie intoyie. Iwaki nanu tenebo iyie matasiooi aaipirri, Aayawua nanu Olaiguanani atua ilgilat lenyena, aikishipa niking'ida tenebo, nikishipakino enyorrata ino aaitalang enaisho oo sabibu, ina pee kinyor ninche pooki! Ara oltung'ani orok oleng, nara sii sidai, na toyie e Yerusalem, atiu anaa lelo ng'oborri le Kedar, anaa lkarash le Solomon. Mayieu niking'or nanu to lmena enkaraki emua ai, amu aainosa enkolong. Ore ilayiok le yieyio naatagorokinote nanu, aaitaa ninche nanu olaramatani loo sabibu; kake ore osabibu lai makewan neitu aramat! Tolikioki iyie nanu, iyie ilo onyor oltau lai, Ine nirritayie imasaa inono, Ine nincho meirraga enaipirie enkolong; ainyoo peyie atiu anaa obo oloolo lemeeta enetii te mbata oo nkerrai e kulikae shekuti? Tinimiyiolo iyie ira sidai tiatua nkituaak, Tusuja irrekiei le nena kerrai, nilo airrita ilkuoo linono, te mbata oo lng'oborri loo lchekuti. Aaitanyaanyukie nanu iyie enyorrata ai, embarta oo ngarrin e Farao. Aisidain ilpapit linono edou aagiroo ntakul, naa sidai emurt ino ebore imasaa. Aikintobiraki iyiook iyie imasaa e sahabu, naaripakino enkosholai. Ore apa ina kata eirrag olaiguanani to lorika lenye dapash, neitorropil esonkoyo ai ine. Ore olanyor lai netiu anaa embene e nkorropil te nanu, ina nairrag te mpolos oo lki laainei. Ore olanyor lai netiu te nanu anaa entukus oo ntapuka, tiatua enkurma oo sabibu e En-gedi. Ng'ura ajo ira iyie sidai enyorrata ai, ng'ura ajo ira sidai; ore nkonyek inono netiu anaa ine nturkulu. Ng'ura, inkishiaan iyie, olanyor lai, esipa ira sidai. Ore olorika lang dapash naa kenyori. Ore mbokishi e nkaji ang naa iltarakua, ore irishinani naa olchani onyaanyukie oltarakuai. Ara nanu entapukai e Sharon, entapukai oo erat. Anaa entapukai natii atua ilkiku, neija etiu enyorrata ai too ntoyie. Anaa enatiu olchani loo lng'anayio tiatua entim, neija etiu olanyor lai tiatua iltung'ana ooti. Atotona te nchipai sapuk tiatua oloip lenye, nemelok olng'anayioi lenye te nkutuk ai. Aatorikuo ninye nanu enkaji o sirua, naadumaki ninye nanu aitaman oltaa le nyorrata. Intasheyie eng'olon ai te ndaa oo lng'anayio, nikintagol too lng'anayio; amu aata nanu emuoyian e nyorrata. Oi duoo tenetii enkaina enye e kedienye abori elukunya ai, ore enkaina enye e tatene naaibung! Esiligieki intae natoyie e Yerusalem, enosa olmumai too ntarakueti naaten inchere mipututu enyorrata ang. Aning'ito oltoilo lo lanyor lai, ng'ura elotu, edoku too ildoinyo, elang'u indoinyo. Etiu olanyor lai anaa enkolii, arashu oloing'oni le nkolii. Ng'ura, nelido oitashe tioriong esuntai ang, eing'or atua enkaji te lusie, eing'orisho too lusien. Airorie nanu olanyor lai naajoki ninye, “Inyo enyorrata ai, ina nanyor aisul, naa wou tung'uai; Amu ng'ura, ore ina kirobi neisha eishunye enchan neshomo alusoo. Etubulutua ntapuka tioriong enkop, netabawua enkata eranyare, netoning'oki oltoilo loo nturkuluni te nkop ang. Ore olng'aboli neitayio ilng'abolo, ore osabibu neitapuka eitayu olng'usil orropil. Inyo, enyorrata ai, enaikishiaan ai wou tupuku. Oi iyie enturkulu ai natii atua olbaata le ndapidapoi, natii olbaata le marti, inchooki matoduaa enkomom ino, inchooki matoning'o oltoilo lino, amu ore oltoilo lino naa kemelok, naa sidai enkomom ino. Imbung'aki iyiook mbariak, nena bariak kutiti, nena naainyal inkurman ang oo sabibu, amu ore inkurman ang oo sabibuni neitapuka.” Ore olanyor lai naa olalai nara nanu enenye, eirrita ninye ntare enyena tiatua ntapuka. O metaba anaa nemanaa, nelusoo enkewarie imbelekenyunye olanyor lai, totiwuo anaa enkoilii arashu itiu anaa oloing'oni le nkolii te nchumata oldoinyo osur. Ore te nchumata erruat ai kewarie, aing'orua ilo onyor oltau lai, aing'orua nanu ninye oleng neitu atum ninye; aipotuo ninye, kake eitu aaisho ninye nanu ewalata. “Kadumunye alo aman enkanasa, atua inkoitoi naalala e nkanasa o lkurrot oo tumoreki, ekaing'oru nanu ilo onyor oltau lai.” Aing'orua ninye, kake eitu nanu atum ninye. Aanotito nanu ilarripok, ina kata emanimanaa te nkanasa. “Itoduaa intae ilo onyor oltau lai?” Ore aa enagirorie ninche, natum ilo apa onyor oltau lai. Naibung ninye, nemaisho ninye elo, o metaba anaa nayau ninye enkaji e yeiyio, o maitijing'a ninye ilo gilata apa le ina naatoiwuo nanu. Enosa olmumai intae natoyie e Yerusalem, enosa olmumai too ntarakueti o naaten, inchere mipututu enyorrata ang, ometaba anaa nenyorru openy. Ainyoo ina nailepu to lpurkel, natiu anaa empuruo naitorropiloki te manoo o te nkorropil, te rropili pooki e nena sonkoyoni oo lbiasharani? Ng'ura, enapitae Solomon to lorika lenye le nkitoo, nemanita ninye iltung'ana magil ntomoni ile magil te Israel. Neenita pooki ilalema, naa arriyiak to larrabal, meeta hoo obo lenye lemeenita olalem, nerripisho te nkewarie. Etanapaki olaiguanani Solomon to lorika le nkitoo, ilo oitobirunyeki inkeek e Lebanon. Eitobirua ing'apeta enyena te nkosholai, ore oriong enye naa ene sahabu, ore olorika lenye naa morijoi; neripuno atua te nkarriyiano, intoyie e Yerusalem naatiriputua te nkarriyiano. Enchom intae na toyie e Sion, pee ingoringoro Olaiguanani Solomon, eeta emaupe e nkitoo apa naishopoko ng'otonye. Teina olong apa enkiyama enye, teina olong enchipai oltau lenye. Ng'ura ajo ira iyie sidai enanyor ai, ng'ura ira iyie sidai! Ore nkonyek inono netiu anaa ine nturkulu, eiwariwaru te nkarasha naitoipieki enkomom. Ore ilpapit linono netiu anaa eluaata oo nkineji, edou abori to loshong'ishong'i le Gilead. Ore ilala linono neibor anaa isupeni e kerra naabarno, nena naaetuo eing'uaa enkisujata, neeta pooki ilmao, nemeetae hoo nabo natua olkuoo. Ore nkonito e nkutuk ino netiu anaa eusi nanyokie, naa sidai enkutuk ino. Ore ntakul inono netiu anaa indung'ot are olng'anayioi oji kukumanka, eiwariwaru te nkarasha naitoipieki enkomom. Etiu emurt ino anaa oltalet le Daudi, napurupurana nepuyiapui, nebore imankek naaikununo anaa ilong'oi oo lmurran enkalifu. Ore ilki linono pokira netiu anaa nkoliin, ilmao le nkolii oodaa too ntapuka. Ometamanai enkakenya nelusoo enkewarie, o te ilo doinyo oti le nkorropil. Ira iyie sidai oleng enanyor ai, miaata iyie oleyiata. Wou tenebo nanu tung'uai Lebanon, esiankiki ai; wou tenebo nanu tung'uai Lebanon. Wou tung'uai entopij oldoinyo le Aman, tung'uai entopij e Senir o Hamon, tung'uai inkapuniaa oo lng'atunyo, tung'uai lelo doinyo loo lowuarak kerin. Iwa iyie oltau lai te ngolon, enkanashe ai esiankiki ai, iwa iyie oltau lai te nking'urata oo nkonyek inono, to soit obo ogol enkinyang'a le murt ino. Kebaa emeloni enyorrata ino, enkanashe ai, esiankiki ai! Kebaa eikash enyorrata ino alang enaisho oo sabibu ore ina rropili oo ila inono alang kulie naarropil? Eitong'u too inkonito e nkutuk ino enaisho namelok, esiankiki ai; etii enaisho olkenkei o kule abori olng'ejep lino; Ore olng'usil loo nkilani inono netiu anaa olng'usil le Lebanon. Ore enkurma naikenoro naa enkanashe ai, esiankiki ai, enkurma naikenoro enchorro naripa. Ore nkaitubulu inono netiu anaa enkurma olng'anayio ooji kukumanka, eeta ilng'anayio pooki gelunot, hena o nardo. Eeta ninye Nardo o Saparani o sinantei, o lkeek pooki oo rropil, o emanoo o sonkoyoni tenebo isonkoyoni pooki naaisul. Olchorro le nkurma, enchorro e nkare naishu, o nchorroi naarukunye e Lebanon. Inyo iyie lo kutati le moikuape! Nilotu iyie, lo kutati le kopikop. Tukuta enkurma ai, inchoo erropili enye eibulaa. Inchoo olanyor lai elotu enkurma enye, nenya ilng'anayio lenyena gelunot. Aewuo nanu enkurma ai, enkanashe ai, esiankiki ai, aiturrurruo nanu emanoo ai tenebo esonkoyo ai, ainosa nanu olchankaroi apudaki olkenkei le naisho, naok enaisho oo sabibu o kule. Enosa lo shoreta niokioko; entookisho oleng intae iloonyorra! Airure nanu kake eitu eirura oltau lai. Toning'o! Eoshioshito olanyor lai kutuk aji “Taboluoki, enkanashe ai, enanyor ai, enturkulu ai, enemeeta oleyiata ai; Amu keshal elukunya ai, te nkoilielio, ore ilpapit laainei neshal te nkoilielio e nkewarie.” Aitayio nanu nkilani, naa kaji aiko tenaitoki aishop? Aisuja nkejek aainei, kaji aiko tenaitoki apik enterit? Nepik olanyor lai enkaina enye enkikenet e kutuk aji, neng'idayu oltau lai tiatua nanu. Nainyototo abolu olanyor lai, nebore inkaik aainei emanoo, neitong ilkimojik laainei teina manoo naruko, aibung inkikeneta e kutuk aji. Nabolu olanyor lai, kake eibelekenye olanyor lai nelo, neisinanuo oltau lai pee eiro ninye. Naing'oru ninye neitu atum ninye; aipotuo ninye, kake eitu aawalaki nanu. Naatum ilarripok nanu, ina kata emanaa te nkanasa; naar nanu, naapik nanu olbae, naaoru nanu enkila ai, lelo arripok le nena sunta. Enosa olmumai intae na ntoyie e Yerusalem, tinitumutumu ake olanyor lai, nilikiki ninye aajoki ekamuoi te nyorrata. Ainyoo elang'ie ina ninyor ino enkae ninyor? Oi ina sidai tiatua inkituaak? Kainyoo elang'ie ilo linyor lino olikae linyor eji pee intanapa iyiook ena? Ore olanyor lai naa aisidai oleng negol, keibala too nkalifuni tomon. Ore endukuya enye naa Sahabu nasila; ore lpapit lenyena naa sidain, kerook anaa olkurruk. Netiu nkonyek enyena anaa ine nturkulu, te mbata oo nchorroi enkare, naaisujaki te kule, naaitobirakino entonata. Naa sidain intakul enyena anaa ineeitobirieki isonkoyoni neitayu olng'usil oorropil, ore nkonito enkutuk enye netiu anaa ntapuka, naitong'u emanoo naruko narropil. Ore nkaik enyena netiu anaa sahabu nairina, naikodoki too soito oogol enkinyang'a. Ore osesen lenye anaa ilaa ooitobiraki loo lkanchaoni, netii ninye iila naarropil oleng. Ore nkejek enyena netiu anaa ing'apeta e Alabata naaikodoki te sahabu. Ore teningor ninye netiu anaa iltarakua le Lebanon. Ore enkiroroto enye naa kemelok oleng, naa ore ninye pooki naa keng'uarrayu, olanyor lai ele naa olchore lai ele, natoyie e Yerusalem. Kaji eshomo ilo lino linyor, iyie enaisul inkituaak? Kaji eibelekenyakine olinyor lino alo, pee kitum iyiook aaing'oru ninye tenebo iyie? Etadoyie olanyor lai alo enkurma enye, ine neitobirieki isonkoyoni, alo airrita iluaat oo ntare enyena too nkurman, nesotu ntapuka. Ara nanu eno lanyor lai, ore olanyor lai naa olalai; eirritita ntare enyena too neetii intapuka. Ira iyie sidai anaa Tirsah, olanyor lai ira sidai anaa Yerusalem, keitureisho anaa enjore naata inankan. Imbelekenya inkonyek inono intung'uayioki, amu kaaitanyamal ninche nanu, ore ilpapit linono netiu anaa iluaat oo nkineji, naadou to loshong'ishong'i le Gilead. Etiu ilala linono anaa iluaat oo supeni e kerra, nena naetuo ailepu te nkisujata, neeta pooki ilmao, meetae nabo natua olkuoo. Ore ntakul inono netiu anaa isashat olng'anayioi oji kukumanka, tiatua ina arasha naimulumulieki enkomom. Eetae nkaiguanak ntomoni ile, neetae nkapiak intomoni isiet, o nkaisiaayiak nemeikenayu. Na turkulu ai, enemeeta eleyiata ai, naa nabo ake, ina nanyor ng'otonye enye, ina kirotet te ng'otonye. Etoduaa ninye nkaisiayiak neipot ninye aajo enashipa; ore nkaiguanak o nkapiak neisis sii ninche ninye. “Aing'ae ele otiu enduaata enye anaa entadekenya, newang anaa olapa, anaa enkolong, neitureisho anaa enjore naata inankan. Atadoyie alo ine netii enkurma oo lng'anayio aing'or nena tapuka naatii oerata, aing'uraa tenaa keimarrimar ilkeek loo sabibu, tenaa keitapuka ilng'anayio ooji kukumanka. Ore apa eton mayiolo naayau oltau lai, tiatua engarri oo mbartan tembata olkitok lai.” Tushukunye, tushukunye iyie lo Shulami, tushukunye tushukunye pee kitum aing'ura iyie. Ainyoo peyie ing'or iyie ilo Shulami, anaa oloipidipid aiguran te dukuya injorin are? Kebaa enare inamuka inkejek inono? Iyie natiu anaa esiankiki o laiguanani! Nepurupurana nkupesir inono anaa isoito oogol enkinyiang'a, esiaai oo nkaik o laitobirani arriyia. Ore osororua lino netiu anaa olcharaa, ilo lemelau aekata enaisho oo sabibu naitushula, ore enkoshoke ino netiu anaa osototi le nkano omanita intapuka. Etiu ilki linono pokira anaa ilmao le nkolii. Netiu emurt ino anaa oltalet lo lalae lo lkanchaoi, ore nkonyek inono netiu anaa lturot ootii Heshbon, te mbata enkishomi e Batrabbin. Etiu enkume ino anaa oltalet le Lebanon, ilo oing'or Dameski. Ore endukuya ino neitashe aitobiraki anaa oldoinyo le Karmel, ore nena enat inono oo lpapit naaisiong'a netiu anaa nkilani pilei, netil olaiguanani tiatua ina sidano. Kebaa enkishiaa o esidano niaata iyie, iyie enanyor ai, kebaa elulung'a enyorrata ino. Isiriri iyie anaa oltukai netiu ilki linono, anaa nkimarrat enyena. Atejo nanu kaked ilo tukai, naitayu ilng'anayio lenyena nchoo ilki linono metotiwuo anaa nkimarrat o sabibu, ore olng'usil le nkiyang'et ino netiu anaa olng'usil loo lng'anayio oonyaanyukie ilama. Ore ng'ututat inono netiu anaa enaisho sidai oo sabibu. Ina nalo adoyio aitobirari, naisotuni te nkutuk neim rishat oo lala. Ara nanu eno lanyor lai, naa ore eyieunoto enye naa te nkaraki nanu. Wou, olanyor lai, maape nkong'at, nikirrag nena ang'itie; matayooki apuo nena kurman oo sabibu, nikipuo aaing'uraa tenaa keitapuka isabibu, tenaa ketabolote intapuka oo sabibu neitapukita sii ninche kukumanka. Ore te ine naa kaaisho nanu enyorrata ai. Ore enkaitubului nanyaanyukie enchiliwa neitayio olng'usil orropil ore ilng'anayio pooki sidain netii embata e kutukaji, ilng'ejuko tenebo ilmusan, lelo laatushumaka nanu iyie, iyie olanyor lai. Oi napaji tenaa iaku olalashe lai, ilo otanaa ilki le yieyio! Tenaainepu nanu iyie te boo, naa kaang'utut, nemeetae hoo obo laamenaa nanu. Ekaarik nanu iyie o maaitijing'a enkaji e yieyio, olgilata le ina apa naatoiwuo nanu, Naaisho nanu iyie enaisho oo sabibu natii enkorropil tooko, ina are oo lng'anayio le kukumanka. Oi naaji tenaa ketii enkaina enye e kedienye abori endukuya ai, naamuataki enkaina enye e tatene! Enosa olmumai intae na toyie e Yerusalem, inchere mipututu enyorrata ai, o metaba anaa nenyorru openy. Aing'ae lido olotu to lpurkel, eirishakino olanyor lenye? Tiabori olchani onyaanyukie olamai aatuputuo iyie. Te ine apa earita ng'utunyi enkop kiini iyie, te ine apa earita enkop ina nikitoiwuo. Intaaki nanu matotiwuo anaa olmishire tiatua oltau lino, anaa olmishire otii enkaina ino; amu ore enyorrata naa kegol anaa keeya, ore olom netolo anaa enkurare. Ore inkiwuang'at enyena naa nkiwuang'at e nkima, enkima napejisho oleng to lang'at. Mear inkariak kumok enyorrata nemeidim olairrag le nkare aawa ninye. Teneitayu oltung'ani enyorrata, too masaa pooki e nkaji enye, naa kemenari tukul. Kiaata enkiti anashe, nemeeta ninye ilki. Kaa kintaas enkanashe ang, teina olong nasai ninye? Tenaa kesuntai ninye, naa aikishetaki te shumata ninye oltalet le nkosholai, kake tenaa aikutukaji ninye, nikiripaa ninye too mbaoi o ltarakuai. Ara apa nanu esuntai, netiu apa ilki laainei anaa iltaleta; neaku atii atua nkonyek enyena, anaa ilo oyau eseriani. Eeta apa Solomon enkurma oo sabibu te Baalhamon; neishooyo enkurma oo sabibu aisilenoki ilaramatak; ore ake pooki lenye te lelo ng'anayio mpisai enkalifu nabo enkosholai. Ore enkurma ai oo sabibu, ina naa enaai ake, naa enaai makewan, ore iyie Solomon indim aawa ina alifu nabo, ore ilaramatak loo lng'anayioi netum iip are. Oi intae oomanya atua nena kurman, einining'ito ilencholuek ai oltoilo lino; nchooki matoning'o ninye. Tasioki isarisara olanyor lai, totiuo anaa enkolii arashu oloti oing'oni le nkolii, otii oldoinyo loo sonkoyoni. Enduaata e Isaya olayioni le Amos, apa natoduaa, naipirta Yuda o Yerusalem, too nkolong'i e Usia, o Yotam, o Ahas, o Hesekia, aiguanak le Yuda. Toning'o, iyie keper, ninchoru enkiok na kop; amu eiroro Olaitoriani: “Aitotio nanu nkera naitubulu, naatogolong'akitia ninche. Eyiolo olkiteng olopeny, neyiolo osikiria ewueji neitotiyieki kake meyiolo ninye Israel, mening ninche iltung'ana laainei.” Ee, olosho loo laing'okok, olorere onapita enkarruoisho, eishoi oo larruok, ilayiok oas inemeitoriori! Etung'uatie ninche Olaitoriani, etemenaitie ninche ilo sinyati le Israel, etapong'ori ninche tukul. Kainyoo pee iyieuu neoshi intae, eji metaa ipuopuo dukuya aagolong'u? Kemuei endukuya pooki, neiterre oltau pooki. Ore ebaiki entutunyo e nkeju o metabaiki endukuya, metii embiotisho, kake ilbaa, o ltuduta, o ngoldonyot naaruko nkimek; neitu eironyuni, aashu eeni, neitu eelieki eilata. Eirragita enkop inyi aa mijooni, netapejoyioki nkanas inyi te nkima; te dukuya intae idolitata einosa iltung'ana leeiking'a enkop inyi; netomijoono ninye, anaa ina nainyala iltung'ana leeiking'a. Etung'uayioki ina tito e Sion anaa olng'obor ti atua enkurma oo sabibu, anaa olkirragarie ti atua enkurma e entoki naaijo nkaimalasia anaa enkanasa natang'aduaki. Te neme Olaitoriani loo lororani otelekaka iyiook oloti pisiai, anaata kitotiutuo anaa Sodom, nikitiu anaa Gomora. Entoning ororei lo Laitoriani, intae ilaitoriak le Sodom! Enchoo enkiok enkiteng'enare e Nkai ang intae iltung'ana le Gomora! “Kainyoo te nanu enkumoi oo lasarri linyi? Olaitoriani ojo; Ataraposhe nanu ilasarri oopejori loo lmerregeshi o eilata e lelo kerra linyi oopir; mashipakino nanu osarge loo loing'ok, aashu loo lkerra aashu o loo lkineji. Amu ore oshi ti nipuonunu aaitalioo ate te dukuya nanu, aing'ae naikilikuan intae nipuonunu aaituny ndung'orot aainei. Mintokiki aayau ilasarri le pesho; olminong enkorropil te nanu. Ore olapa ng'ejuk o sabato o enkipototo e umata - maidim nanu aing'ura ena torroni o eumata. Ore lelo apaitin linyi ng'ejuko o lelo siruai linyi oogeluno, keiba oltau lai; netaa ninche olola te nanu, atanaure anapita ninche. Ti nintorioo nkaik inyi, naisudoo nkonyek aainei te ntae; ore hoo niomonono katitin kumok, mainining nanu; ebore nkaik inyi osarge. Entukuo ate, entobira ate; ewuang'ie entorroni oo nkiaasin inyi, te dukuya nkonyek aainei; entapal entorroni, entamoo ate easata oo mbaa sidain; eng'oru esipata, entobira enkibookinoto e nkop, entomitu ilo okishi, entasaru ina nara enkoliai. Wou naa matoning'oto te nebo, Olaitoriani ojo; ore hoo neyia ing'ok inono anaa enkarasha nanyokie, keyooki aaiboru netiu anaa enkatampoi naibor oleng ore hoo nedo anaa osarge, keyooki aaiborru anaa ilpapit loo ntare naaibor. Ti ninyoraa nirukuruku, ninosinoso olkar le nkop; kake ti niaanyianya nigolong'ung'u, nemuti intae to lalem; amu enkutuk o Laitoriani nairoro.” Kaji eikuna ina anasa naisiligayu, pee etaa enaibor onyek, ore apa ina nabore esipata! Naa enkiguana nasipa naton ti atua ninye, kake ore taata netaa ilarak. Etaa enkosholai ino isuut, netushulare enaisho ino enkare. Ore ilkituaak linono netogolong'utua, naa ile ncholiek oo lapurrok. Nenyor ake pooki te ninche eropare nekuet aasujaa nkishorot. Memitu ninche ilo okishi, nemeshilaa ninche enyamali oo nkolia. Ore enkaraki ina, Olaitoriani ojo, Olaitoriani loo lororani, ilo magilani le Israel: “Ee kaitalaku nanu engoro ai too lmang'ati laainei, kaitalaku nanu makewan te lelo laaiba. Kaaipirakinye nanu enkaina ai Naasil anaa enasil olkunoni esekenkei naiwuang'ie nanu oloirerio lino pooki. Naa kaitasheyie nanu ilarishak linyi anaa apake, o lelo arikok linyi anaa apake te nkiterunoto. Ore te siadi ina neaku eikiji, enkanasa e supatisho, ina anasa naisiligayu.” Kekorduni Sion te sipata, ore lelo ootii atua nekorduni te supatisho. Kake ore lelo oogolong'u o laing'okok, neidaikieki te nebo, ore lelo ootanyaita Olaitoriani nemuti. Amu iyookiki aakurru te nkaraki lelo keek apa laaijo ilng'abolo lishipakinono, neitukurruni intae te nena kurman apa nitegelutua. Amu iyookiki intae aatiu anaa olchani onyaanyukie olng'aboli otoyu mbenek enyena, aashu anaa nkurman nemetii enkare. Ore ilo tung'ani ogol netiu anaa suut, ore esiaai enye netiu anaa suut naapiki enkima neyupuyup te nebo, nemeetae oltung'ani oidim aibooi ina kima. Ele rorei etoduaa Isaya olayioni le Amos eipirta Yuda o Yerusalem. Keyooki alotu too nkolong'i e siadi, paa ore ilo doinyo le nkaji o Laitoriani neitasheyieki aaitoodor too ldoinyo, neilepieki aaitogiroo too ldoinyo, ore loshon pooki nerukokino ninye, naa kepuonu iltung'ana kumok aajo: “Wootu, maape oldoinyo lo Laitoriani, maape enkaji e Nkai e Yakobo; pee etum ninye aiteng'ena iyiook nkoitoi enyena, nikitum iyiook aashom too nkoitoi enyena.” Amu Sion ninye epukunye enkitanapata, nelotu ororei lo Laitoriani eing'uaa Yerusalem. Kelo ninye aiguanare iloreren, naa kemut ninye nabo ti alo loshon kumok, naa keitaa ninche lalema lenye nchempei, neitaa remeta enye ilalema le nkisampuare, nemeitoki olosho adumakino olikae osho to lalem, nemeitoki ae kata ninche aata olarrabal. Iyie na aji e Yakobo, wou, maape iyiook ti atua ewang'an o Laitoriani. Amu itung'uayie iyie iltung'ana linono, ina aji e Yakobo, enkaraki nabore ninche lasakutok ooing'uaa oloosaen, o lelo aitumusumusok anaa iltung'ana loo Lfilisti, neoshore ninche nkaik iltung'ana leeiking'a. Eiputa enkop enye enkosholai o sahabu, nemeeta ilchumat lenye eneiting'ie; neiputa nkop enye mbartan, nemeeta eneiting'ie ngarrin enye oo mbartan te nkumoi. Eiputa enkop enye nkitanyaanyukot oo nkaitin, neirrugokino ninche ina siaai oo nkaik enye, ina naitobira ilkimojik lenye. Keitoborri iltung'ana, neitadouni iltung'ana - mipalaki ninche! Tijing'a atua endapidapoi, nilo aisudori ti atua enterit ailany ina kituriata o Laitoriani, nilany ina kitoo e nkisisa enye. Ore ina kitokoos oo ltung'ana naa keitadouni, ore ilo wuasa loo ltung'ana naa keitoborri; neaku Olaitoriani ake eitaae kitok te ina olong. Amu eeta Olaitoriani loo lororani enkolong nagilunore ilo pooki owuasa neitokoos, agilunore ina pooki nailepieki aadumu; agilunore lelo tarakua pooki le Lebanon, lelo adoru ooilepieki shumata, negilunore lelo keek oogol le Bashan; negilunore lelo doinyo adoru pooki, negilunore nena doinyo naaitokoos pooki; negilunore pooki wueji neika, o pooki suntai nasheta; negilunore imelin pooki e Tarshishi negilunore pooki toki e nkarriyiano. Ore enkitokoos oo ltung'ana neitadouni, ore ilo wuasa loo ltung'ana neitadouni abori; neaku Olaitoriani ake eitaae kitok te ina olong. Ore nena kitanyaanyukot oo nkaitin neishieki tukul. Nejing iltung'ana nkapuniaa oo ndapidapo, o ngumot e nkop, aailany ina kituriata o Laitoriani, neilany ina kitoo e nkisisa enye, te nedumunye aiture enkop. Ore akenya te ina olong nenang'aa iltung'ana aaiturraa nena kitanyaanyukot enye e nkosholai o nena kitanyaanyukot enye oo nkaitin e sahabu, apa naaitobirakita ate pee eserem, nenang'aki ilkirrumun o sarampalani, pee etum aatijing ilbaat loo ndapidapo o nkapuniaa oo soito sapuki aailany ina kituriata o Laitoriani o ina kitoo e nkisisa enye, te nedumunye ninye aiture enkop. Mbelekenyayu tung'uai tung'ani laa ore nkumeishin enyena netii enkiyang'et, Amaa kole tipat ninye? Ng'ura, ore Olaitoriani, Olaitoriani loo lororani, naa keiwuang'ie te Yerusalem o te Yuda, ina naisiligi o ina naishuyieki, eneisiligi te ndaa o nkare; ilo tung'ani magilani o sikari, o larishani o loiboni le Nkai, o laitumusumusoni o lpayian, ilo arikoni le njore e onom o ilo tung'ani oata enkitoo, ilo arikoni o ilo arriyia too nkitoduaat, o ilo arriyia te naibon. Naa kaitaa nanu ilayiok ilkituaak lenye, naa nkera naapuo aaitore ninche. Naa kepuo iltung'ana aaibookino enkop maate, neitorogony ake oltung'ani olikae oltung'ani ake ole latia enye; neitokoos olbarnoti te dukuya olpayian, neitokoos oltung'ani li abori te dukuya ilo kitok. Kelotu enkata naibung oltung'ani olalashe lenye ti atua enkaji e menye, ejo, “Iata iyie olkila; iyie olo aaku olarikoni lang, ore ele sototi pooki le nkidaata naa keaku abori enkitoria ino;” ore te ina olong naa keiro ninye ajo, “Maaku nanu olabaani, ore atua enkaji ai metii endaa nemetii olkila; mikintaa intae nanu olarikoni loo ltung'ana.” Amu etarrorre Yerusalem, netabatate Yuda; enkaraki naa ore nkirorot enye o nkiaasin enye negilunore Olaitoriani, nemor dukuya nkonyek enyena. Ilo kep lenye oishakenoki ninche; keibalunye ninche ing'ok enye anaa Sodom, meisudoo ninche. Woi ninche Amu eyautua entorroni shumata ate. Tiaaki lelo asipak nchere aisidain mbaa ti alo ninche, amu keinos ninche ilng'anayio loo nkiaasin enye. Woi ilo tung'ani torrono! Kerruoyo mbaa te ninye, amu ore enaba anaa enataasa nkaik enyena, ina eyookini aaitaas ninye. Ore too ltung'ana laainei, nkera naaitorogony ninche, naa nkituaak naaitore ninche. Lo tung'ana laainei, eitapong'oitie intae ilarikok linyi, nemil enkoitoi inyi. Eitasho Olaitoriani pee eishankarra, eitasho pee eiguanare iltung'ana lenyena. Etijing'a Olaitoriani enkiguana aiguanare ilpayiani o lkituaak loo ltung'ana lenyena: “Intae apa ooinosa enkurma oo lng'anayio, ore nena nitoorutuo intae ilaisinak netii atua nkajijik inyi. Kainyoo intodolulu pee intorogonyonyo iltung'ana laainei, nindong'idong'o aarepeny nkomomi e lelo aisinak?” Olaitoriani loo lororani ojo. Etejo Olaitoriani: Ore enkaraki naitokoos ntoyie e Sion nepuo te nkitaragirag neing'orisho to lwuasa, neyagiyag epuoito eipidie nkejek enye; keosh Olaitoriani to lpepedoi nena lukuny oo ntoyie e Sion, naa keibalunye Olaitoriani emasipaisho enye. Ore kenya te ina olong naa keiwuang'ie Olaitoriani nena masaa naang'idare, o lmiintoni, o lkataarri o nkarash oo murto; o nkarash oo lukuny, o sekenke oo nkaik, o ntoren, o ltuleta le sonkoyo, o ntaleng'o o lelo giso oomishira o lgiso loo nkumeishin; o lelo kilani loo siruai, lelo karash li oriong, o lelo kilani, o lbenia loo nkaik; o lelo kilani oobebek, o lelo kilani oo puyiapui, o nkarash oo lukuny, o lelo karash oo imulumulieki nkonyek. Ore te rishata e rropili naa eng'uan; ore te rishata e nkimeita naa olgosoi; naa ore te rishata oo lpapit ooitobiraki, naa enkurroto; naa ore te rishata o olkila sidai naa enkishopo oo lkuniyiani; naa ore te rishata e nkikishaan naa enkurruna. Ore ilewa linyi naa kebatat olalem nemuta lelo lewa linyi magil to larrabal. Ore nchomito enyena neyietu aaishir; neirrag ninye te nkop meishopo. Naa keibung kenya nkituaak naapishana olee obo te ina olong ejo, “Eikinya iyiook endaa ang maate nikinchop nkilani ang maate, nchoo ake duoo eipotieki iyiook enkarna ino, iwuang'ie enkurruna ang.” Ore kenya te ina olong kesidanu olng'osila lo Laitoriani, ore lng'anayio le ina kop naa keaku esikar o enkitoo e ilo pisiai otelekua loo Siraeli. Naa ore ilo otelekua te Sion neton te Yerusalem, neipoti aajo sinyati, pooki ng'ae ake ninye oigeroki enkarna enye te nkaraki puaan te Yerusalem, ina kata eidipa Olaitoriani aitukuo olduruk too ntoyie e Sion neitukuo iltipot lo sarge le Yerusalem, aiwuangie te mpolos enye, to ltau le nkiguana o to ltau le mpejoroto. Netum taa Olaitoriani aitobira te shumata o ldoinyo pooki le Sion o te shumata ilturrurri lenyena pooki enkatampoi te ndama, o empuruo o enkimerlel e nkima te nkewarie, amu ore te shumata naa kelo atii enkitushurata o lng'obor. Keaku ninye oloip te ndama te nkaraki enkirowuaj, o te nkaraki sii enesaruni o enelutori te nkaraki olkutati o enchan. Ntasho mataranyaki nanu olanyor lai osinkolio le nyorrata oipirta enkurma enye oo sabibu: eeta apa ilo lanyor enkurma oo sabibu te ndoinyo sidai enterit. Etuturo ninye neiwuang'ie soito, neun isabibu ooshiluno; neshetu oltalet orripishoreki te mpolos e nkurma, neitobiru eneironyishoreki te ine; neton aanyu metoiu enkurma isabibu, kake isabibu le ntim etoiuo. Ore naa, intae iloomanya Yerusalem o ltung'ana le Yuda, atoomono intae, enguanareki nanu o ina kurma ai oo sabibu. Kainyoo nanu aitong'oro eitu aas te nkurma ai oo sabibu? Ore pee aanyu nanu metoiu ilng'anayio, kaainyo pee aa isabibu le ntim etoiuo? Ore naa taata kaaliki nanu enalo aitaas enkurma ai oo sabibu Kaiwuang'ie nanu enkikarrata enye, pee eidaikieki; naa kagil nanu isunta enyena pee eitunyori. Kaitaa nanu ninye mijooni; meisampuni ae kata te ninye nemeturi naa kebulunye endiati o lkiku; naa kaitanap sii nkatampo pee meshaiki enchan ninye. Amu ore ina kurma oo sabibu o Laitoriani loo lororani naa enkaji e Israel, ore lelo tung'ana le Yuda ninche enkurma natuunoki naitiship ninye; neing'oru ninye esipata, kake ng'ura, enkibukooroto osarge natii; neing'orua esupatisho, naa ng'ura, olkiyioi otii! Wooi ninche lelo ooruk nkajijik, lelo ooponiki ate ilchampai, o metaba anaa neishunye pooki wueji, nikintaae iyie oloton openy te mpolos e nkop. Einosa Olaitoriani loo lororani olmumai aning'ito too nkiyiaa aainei: “Esipa kemijoonu nkajijik kumok, nena ajijik sidain sapuki nememanya. Amu ore iyekai tomon oo lng'anayio naa iltuleta isiet ake eitayu le naisho oo sabibu ore enkikapu nabo oo lanterera naa emborei nabo empirbil ake entapa.” Woi ninche lelo ooinyototo aayooki tadekenya, pee etum aakuet aatusujai inaishi naapi, lelo ootoni oleng o metaa kewarie o metaba anaa neidimu ninche enaisho! Neeta ninche nkinantani o nkai oo sinkolioitin, o ndulen, o naishi too siruai lenye; kake meshilaa ninche nkiaasin o Laitoriani, anaa edol ina siaai oo nkaik enyena. Ore enkaraki ina kepuo iltung'ana laainei eyararoto te nkaraki emodai enye; kemut olameyu ilkituaak lenye, nemuta olorere lenye pooki te nkure. Neaku eibung'a enemeneng'a esumash, netang'a enkutuk enye aitulus, ore enkitoo e Yerusalem o ilo orora lenye, naa kepuo aadoyio, olorora lenye, o ilo ong'idare. Eirrugoki tung'ani aaing'orie enkop, neitadowuoki iltung'ana aayau kop, ore nkonyek e ilo oitokoos neitoborraki. Kake ore Olaitoriani loo lororani, neitaaki kitok te sipata, ore Enkai Sinyati neitodolu kewan te sinyatisho te sipata. Ore ilkuoo le kerra, nedaa anaa ilootii endaata enye, ore ilkuoo le kineji nedaa to lmuaate. Woi ninche lelo ooyietu enkarruoisho too nkeenta e lejare, lelo ooyietu ng'ok anaa too nkeenta e ngarri, lelo oojo: “Nchoo ninche eisarrisar, nchoo ninche eitasiooyo esiaai enye pee kitum iyiook aatodol; nchoo eyiolounoto e ilo Sinyati le Israel etaanu, naa nchoo ninye elotu, pee kitum iyiook aatayiolo!” Woi ninche lelo oojo entorroni eisidai nejo esidano entorroni, nepik enaimin erishata e wang'an, nepik ewang'an erishata e naimin, lelo oopik enduaran erishata e meloni nepik emeloni erishata e nduaran! Woi ninche lelo ooiteng'enuo too nkonyek enye maate, lelo ooitaa ate kalamasi! Woi ninche lelo oorup ate te neokieki enaisho, lelo arriyiak te nkitushulata oo naishi naapi, lelo oo laaya olarruoni te nkaraki eropata, neoru ilo asipani esipata enye! Neaku, ore anaa enamut olng'ejep le nkima isuut, o anaa enaibung nkujit naatoito o lng'ejep le nkima, neijia etiu ntona enye, ketiu anaa entoki natong'ua apurda, ore te rishata naitapuku, netiu anaa enterit; enkaraki natanyaita ninche enkitanapata Olaitoriani loo lororani, netemenaitie ninche ororei le Ilo Sinyati le Israel. Ore enkaraki ina eyupuyupo engoro o Laitoriani ti alo iltung'ana lenyena, neitorioyie ninye enkaina enye, aarare ninche neosh ninche, neikirikira oldoinyo; netiu mpopoki enye anaa suut too nkoitoi naalala e nkanasa. Amu ore te kuna pooki meibooroyu engoro enye, neton ake eitoriori enkaina enye. Neyuku ninye olosho olakua, neisulu ninye aipotu meetu aaing'uaa ineeiting'ie enkop; naa ng'ura, nekuetu te ngolon oleng! Meetae obo lenye onauru, meetae obo lenye orrorro, meetae oloimug neirura, meetae olololong'u enkimeita, nemedung'o enkeene e namuke enye; naa kepi mbaa enye, neteyietuoki nkai enye, negol iloisotok loo mbartan enye anaa soito, ore nkejek oo ng'arrin enye epuo anaa osiwuo. Neikununo enkikurrukur enye anaa eno lng'atuny, neikurrukur ninche anaa ilkuoo loo lng'atunyo; keikurrukur ninche neibung'isho, neripaa ninche ina ng'ues naaibung'a, nemeetae ololo arrinyu. Ore kenya te ina olong naa keikurrukurroki ninche nena naaibung'a, te nkikurrukur naaijo ene naiposha. Naa te neingor oltung'ani enkop, ng'ura, enaimin ake o osina; ore ewang'an neitomisimis nkatampo enyena. Ore te ilo ari apa otuayie olaiguanani oji Usia, atoduaa nanu Olaitoriani etonita to lorika le nkitoo. Neilepieki ninye oleng. Ore olkila lenye neiput enkaji e Nkai. Ore te shumata ninye neitashe iserafi. Neeta ake obo inaipuko ile. Ore are neimulumulie enkomom enye, ore are neimulumulie nkejek enyena, ore are nelotie tiaai. Neipoto ake maate ejo: “Sinyati, Sinyati, Sinyati Olaitoriani loo lororani; eiputa enkop pooki enkitoo enye.” Neikirikira olkitamanyunoto le Nkaji e Nkai te nkaraki ina buakunoto, neiput ina aji empuruo. Najo nanu: “Woi kewan ai! Amu aimina nanu; amu ara nanu oltung'ani loo nkirorot torrok; naton tiatua iltung'ana loo nkirorot torrok; amu etoduaa nkonyek aainei Olaiguanani, ilo Aitoriani loo lororani!” Nelotu obo le lelo serafi enatii, neibung'ita te nkaina enye enkukuo naishu, nayaua to lperere lo lasar. Neiseyie enkutuk ai, nejo, “Ng'ura, eiseyie ena enkutuk ino; eiwuang'ieki entorroni ino, nikitapalakaki ing'ok inono.” Naning nanu oltoilo lo Laitoriani ejo, “Kaing'ae nanu airriwaa, naa kaing'ae olo te nkaraki iyiook?” Najo nanu, “Nele nanu! Irriwayioki.” Nejo ninye, “Shomo, tiaaki ele orere: ‘Ining'ining'i, kake miyiolouu; Idolidolo kake mimususu.’ Iroshiyie iltauja le kulo tung'ana, nintiming'ana nkiyiaa enye, ninkeno nkonyek enye; pee medolisho too nkonyek enye, nemening'isho too nkiyiaa enye, neyiolou too ltauja lenye, neibelekenya pee eishiunyeki.” Naitoki nanu ajo, “Oi anu, Olaitoriani?” Nejo ninye: “O metaba anaa nemijoonu nkanas memanya toki, o nkajijik metii iltung'ana, ore enkop neliyioyu tukul, neiwuang'ie Olaitoriani iltung'ana aitalamaa oleng, neaku ilmuaateni kumok te mpolos e nkop. Ore hoo duoo ninye te neleku ematua nabo e tomon, keitokini aapejoo, ketiu ninye anaa enkobei o lchani onyaanyukie olng'aboli naing'uari eitashe, eidipaki aatuuroi.” Ilo antererai sinyati ninye ina obei. Ore apa too nkolong'i e Ahas olayioni le Yotam, olayioni le Usia, olaiguanani le Yuda, nelotu Resin olaiguanani le Siria o Peka olyioni le Remalia, ilo aiguanani le Israel, Yerusalem pee eitainye olarrabal. Kake eitu ninche emir ninye. Ore ake pee elikini enkaji e Daudi nchere, “Eibung'ate Siria o Efraim,” neikirikira oltau lenye o iltauja loo ltung'ana lenyena anaa ilkeek le ntim ookutita osiwuo. Nejoki Olaitoriani Isaya, “Shomo tanang'are Ahas, iyie o Shearyashub olayioni lino, amu inang'arere ninye, te nkiting'oto o lkiperrata le nkare o lchorro le shumata, te wueji oo laitobirak loonkilani, nijoki ninye, Terretenayu, ntirring'ayu, nimiureishoyu, nemishalu te nkaraki nena oben are e nkima netaa keimisiloo, te nkaraki engoro e Resin o Siria o layioni le Remalia. Ore enkaraki naipirutua Siria, te nebo Efraim entorroni te nebo olayioni le Remalia, ejo, ‘Maape iyiook aaitayunye Yuda olarrabal, nikinture ninye, nikisulie iyiook aaya, nikipik iyiook olayioni le Tabel metaa olaiguanani ti atua ninye,’ nji ejo Olaitoriani Enkai: Meitashe ina, nemeaku ae kata. Amu ore entonata e Siria naa Dameski, ore entonata e Dameski naa Resin. (Ore te rishata oo larin ntomoni ile o imiet naa keitaae Efraim mpurdat o metaa meitoki aaku olorere.) Ore endukuya e Efraim naa Samaria, ore endukuya e Samaria naa olayioni le Remalia.” “Ti nimirukuruku, intae, meeta nchere pee ntasheito. ” Neitoki Olaitoriani airorie Ahas, nejoki, “Ing'oru olmonekie to Laitoriani Enkai ino; nchoo egutu anaa enemeneng'a aashu eado abaiki keper.” Kake etejo Ahas, “Maikilikuanu nanu, nematem nanu Olaitoriani.” Neitoki Isaya ajo, “Toning'o naa, na aji e Daudi! Kentoki nalelek ena pee intanaururu intae iltung'ana, nintokiki sii aaitanaur Enkai ai? Ore naa Olaitoriani makewan oisho intae olmonekie. Ng'ura, kenutayu eselenkei neiu enkayioni naa keisho ninye enkarna aajo Emanuel. Naa keaku ninye neinos eng'orno o enaisho, te neyiolou atirisha intorrok o supati. Amu ore eton eitu eyiolou ina kerai atanya entorroni negelu ina sidai, ore ina kop e lelo aiguanak pookira oare ooiture intae, naa kepuoi aaing'uaa. Keyau Olaitoriani shumata iyie, o shumata iltung'ana linyi, o shumata e nkaji e papaai lino nkolong'i neitu ae kata etumi ina olong apa nalo Efraim te Yuda - ilo aiguanani le Asiria.” Ore kenya te ina olong naa keipotu Olaitoriani te nkisulata lelo oopuonu anaa lojong'a ooing'uaa nchorroi e Misiri o ilo olotu anaa olotoroki oing'uaa enkop e Asiria. Naa kepuonu ninche pooki nemany ineegum oo erat, o nkapuniaa oo ndapidapo, o sanagi pooki loo lkiku, o wuejitin pooki neenyori. Ore kenya te ina olong naa kelo Olaitoriani abarnisho to lmurunya oisilenuoki te lido kekun o lkeju - to laiguanani le Asiria. Nebarn endukuya o lpapit loo nkejek enye, nebarn sii olmunyei tukul. Ore akenya te ina olong naa keramat oltung'ani enkashe o nkerra are; naa ore enkaraki enkumoi e kule naata ninche, keinos ninye eng'orno; amu ore pooki ng'ae otelekua te ina kop naa keinos eng'orno o enaisho. Ore kenya te ina olong pooki wueji netii apa isabibu enkalifu nabo oata enkinyang'a e shekeli enkalifu nabo enkosholai, naa keaku entim oo lkiku. Kepuonu iltung'ana ine eeta nkai o mbaa amu keaku enkop pooki entim oo lkiku; ore nena doinyo apa naaturi too nchempei nimintokiki intae aapuonu ine iurere entim oo lkiku; kake keaku nene wuejitin ineeidapashakino nkishu o nkerra. Naaitoki Olaitoriani ajoki nanu, “Iwa embao dapash ngero too sirat sapuki, ‘Ene Maher-shalal-hash-bas.’ ” Natum nanu olchakeni osipa, Uria ilo apolosani o Sakaria olayioni le Yeberekia, pee aaishakenoki. Nalo nanu aboitare enkitok ai, nenutayu ninye neiu enkayioni. Naaitoki nanu Olaitoriani ajoki, “Tejo enkarna e ina ayioni Maher-shalal-hash-bas; amu ore eton eitu eyiolou ina kerai atejo ‘Mpapa’ aashu ‘Nini’, ore ina arsisisho e Dameski o nena apa naatarutua Samaria naa keyae eduaaya olaiguanani le Asiria.” Naaitoki nanu Olaitoriani airorie, naajoki, “Ore enkaraki natanyaita ele orere nkariak e Shiloa naaruko akiti, netalepori ninche eure Resin olayioni le Remalia; ore enkaraki ina kerewaki Olaitoriani aitaar ninche nkariak o Lkeju, kumok negol, ilo aiguanani le Asiria o enkitoo enye pooki; naa kenang'ari ninche aaimu imartin nepuo aaim mbat o lkeju. Naa keor nena ariak Yuda, nenang'ari neruko aapuo, neitabaiki olorere murto. Naa te nelak inaipuko enyena neibulu enkop ino pooki, iyie Emanuel.” Entigilata intae oreren niureishoyuyu; entoning intae na kuapi naalakua; enterreten ate niruturutu. Enguanata te nebo, kake meaku ina toki; eimaki ororei kake melo auno, amu etii Enkai te nebo iyiook. Amu nji eiroro Olaitoriani ajoki, eiteleikia ina aina enye nagol shumata nanu, naaikok pee maibung orrekie le kulo tung'ana, ajoki: “Mijo iyie nena kitobirat torrok, nena pooki naajo kulo tung'ana nkitobirat torrok, nimiureyu iyie ina naure ninche, nimimputukuny. Kake ore Olaitoriani loo lororani, ninye ake intaa sinyati, nchoo eaku ninye iure, nchoo eaku ninye oloputukunyi lino. Naa keaku ninye ewueji sinyati, neaku osoit oluaa, neaku endapidapoi e rrorroto too nkajijik pokira e Israel. Neaku eloket o rreshet te lelo oomanya Yerusalem. Naa kerrorrokino ilkumok enchumata enye, nebatata negila, nerreshi ninche neyae.” Teena ina shakenisho, entimishir ina kiteng'enare ti atua ilooiteng'eni laainei. Kaanyu nanu Olaitoriani, laa ninye oisudoo enkomom enye aitung'uaa enkaji e Yakobo, naa kaisilig ninye. Ng'ura, ore nanu o kuna kera naaishoo Olaitoriani nikira iyiook olmonekie o embae e nking'asia ti atua Israel, eing'uaa Olaitoriani loo lororani obik te nchumata oldoinyo le Sion. Naa tenejoki ninche intae, “Enkilikuanishore ilaitumusumusok o lasakutok ooing'oming'om neyietu,” aimeikilikuanishore iltung'ana Enkai enye? Ke lootuata ninche eikilikuanishore te rishata oo looishu? Tawaliki ninche, tiaki, “Entoning ina naiteng'en intae Olaitoriani! Emining ilaitumusumusok - ore enajoki ninche intae nemeret intae.” Naa kepuo ninche aadung enkop, eeta osina kitok o esumash; naa ore te neisumashu, negoro nedek olaiguanani lenye o Enkai enye, nedumu nkomomi enye aaing'orie shumata; neitoki aaing'or enkop, kake ng'ura, osina ake o enaimin, ina misimisi o sina. Naa kenang'akini ninche atua enaimin narok ong'u. Kake meetae osina te ina apa naata emion. Ore too nkatitin e dukuya neishoo ninye metemenare enkop e Sebulon o enkop e Naftali, kake ore too nkolong'i e siadi naa keisho ninye meitaai kitok ina oitoi e naiposha, ina kop natii lido kekun le Yordan, Galilaya oo loreren. Ore lelo tung'ana apa oopuo te naimin netoduaa ewang'an kitok; ore apa lelo oomanya enegut e misimisi, neitawang'aka ninche ewang'an. Itoponayie iyie olorere itoponikia iyie eng'ida enye; neng'ida ninche te dukuya iyie te ng'ida neeijo ene nkisampuare, neikununo anaa tene ng'ida lewa eor nena naataarutua. Amu ore ina shata e murt e ilo ola lenye, o ina shata o loililai lenye, ina ng'udi e ilo aitorogonyani, nitigila iyie anaa te nkata e Midian. Amu ore enamuke ake pooki e ilo otii enjore naa kemut enkima, ore pooki kila oata oltipoti lo sarge naa kepejori anaa ilkeek le nkima. Amu etoikioki iyiook enkerai, eishooki iyiook enkayioni, naa keaku oloililai lenye etii enkitoria, naa kepuoi aajo enkarna enye, “Olaiguanani le Nking'asia, Enkai Magilani, Papa loo Ntarasi, Olkitok le Seriani.” Ore emponaroto e nkitoria enye o eseriani, nemeeta enkiting'oto, to lorika le nkitoo le Daudi, o te shumata enkitoo enye, pee eitubulaa, neitasheyie te sipata o te supatisho, ebaiki ena kata taata oo ntarasi moitie. Olokiyo lo Laitoriani loo lororani oitabaya ena. Eirriwayie Olaitoriani olkilikuai lo larrabal te nkaraki Yakobo, naa kelo aitawang'aki Israel. Naa kepuo iltung'ana pooki aayiolou, aa taa, Efraim o lelo oomanya Samaria, lelo oojo to lwuasa o te nkitokoos oo ltauja: “Etusulari isoito kake eikishet iyiook too soito oogueta; eturoyioki oreteti aadung, kake eikipik iyiook iltarakua erishata enye.” Neaku kedumaki ninche Olaitoriani ilmang'ati, neputu ilmang'ati lenye. Ore lelo le Siria ootii enkalo o loo saen o lelo le Filisti ootii enkalo o loo ntoluo, kepuo aamut te nkutuk nang'a. Amu ore te kuna pooki eitu eiwuang'ieki engoro enye neitorioyioki enkaina enye. Eitu eibelekenyakino iltung'ana ilo otoosho ninche, neitu eing'oru Olaitoriani loo lororani. Ore enkaraki ina etudung'oyie Olaitoriani te Israel endukuya o lkidong'oi; nedung ilng'osil loo ltuka o seyia te nkolong nabo - lelo payiani kituaak ooyanyit ninche endukuya, ore ilo oiboni oibonisho te lejare ninye olkidong'oe; amu ore lelo oorikoo ele orere naa keitapong'oo ninche, ore lelo oorikori naa keijori. Ore enkaraki ina meshipakino Olaitoriani elelero enye, nemeetayie olng'ur lelo okishin o nkolia; amu ore pooki ng'ae lenye nepaashare orrekie le Nkai naa laasak loo ntorrok, ore pooki kutuk neiro ine modai. Ore te kuna pooki neitu eiwuang'ieki engoro enye neitorioki enkaina enye. Amu eyupuyupito entorroni anaa enkima, neinos isuut o lkiku; neinos isanagi le ntim, neilep ninche shumata te mpuruo kitok. Ti atua engoro o Laitoriani loo lororani etapejoki enkop, netotiutuo iltung'ana anaa ilkeek le nkima; meetae oltung'ani oing'urrie olalashe lenye. Ewuapaa ninche too ntateniaa, neton ake eisumash, nedaa ninche too nkedienyaa, kake eitu eraposho; neinos ake oltung'ani nkiri e ilo le latia enye. Neinos Manase Efraim, neinos Efraim Manase, ore ninche pokira nedumakino Yuda. Ore te kuna pooki neitu eiwuang'ieki engoro enye, Neitorioki enkaina enye. Woi ninche lelo ooiguana nkiguanat torrok, o lelo ooiger enkitorogonyare, neibelekeny ilo omena aaitapaash esipata neoru ilo aisinani loo ltung'ana laainei esipata enye, neitaa ninche nkolia entoki nataarutua, netum aaibung'a nena okishin aawaita! Kaa kenya intae iasiasa te ina olong e nkitamioto, te ilo kutati olotu eing'uaa enelakua? Kaing'ae iyie isaru mikitaretu, naa kaing'ae iyie ing'ueiki karsisisho ino? Meleku toki, meteleku ake pee isukudo te nebo lelo ooena, aashu ibatata te nebo lelo ootasesekuanaki. Amu ore te kuna pooki eitu eiwuang'ieki engoro enye neton ake etudumuaki enkaina enye pee eoshisho. Ee, Asiria, ninye eng'udi e ngoro ai, ninye orinka le mpijan e ngoro ai! Airriua nanu metaarare ilo osho lemeure Enkai, naitanapa nanu ninye te nkaraki ilo orere laaitagoro, pee eibung aaraya ntokitin enye, neitunyoki enkop anaa esarng'ab e nkoitoi. Kake mme ina eyieu ninye, neme ina edamu ninye; kake ore ndamunot enyena naa pee einyalisho, nedung'oo iloshon leme kuti; amu ejo ninye: “Aime ilaiguanak pooki ilarikok laainei? Aimetiu kulo anaa Karkemish? Aimetiu Hamat anaa Arpad? Aimetiu Samaria anaa Dameski? Amaa anaa enatabaikia enkaina ai nkitoriat oo nkitanyaanyukot oo nkaitin, naa ore nkitanyaanyukot enye naaguetuno naa eikituaak aalang nena naatii Yerusalem o Samaria, aimaitaas nanu Yerusalem o nkitanyaanyukot oo nkaitin enyena anaa enaitaasa Samaria o nkitanyaanyukot oo nkaitin enyena.” Ore ake pee eidip Olaitoriani esiaai enye pooki to ldoinyo le Sion o te Yerusalem, naa keitame ilo owuasa o ina kitokoos o laiguanani le Siria o ina kitaragirag enye. Amu ejo Ninye: “Te ngolon e nkaina ai ataasa nanu ena, o te ng'eno ai, amu kara nanu ng'en; naiwuang'ie nanu lpolosien loo loreren, natarayie nanu ilchumat lenye; ore anaa oloing'oni atusulua nanu lelo ootoni too lorikan le nkitoo. Eibung'a enkaina anaa enkaji e motonyi karsisisho oo loreren; naa ore anaa enasotu iltung'ana ilmosor ootung'uayioki, neijia aikuna asotu enkop pooki; nemeetae hoo obo oiwuang'ie enaipukoi, aashu obol enkutuk, aashu eyietu.” Keaku entolu kitok alang ilo oasishore, arashu keisis emusumeno kewan te ilo odung'ishore? Eji netiu anaa eng'udi nadumu oltung'ani! Anaa netiu anaa eng'udi nadumu ilo leme enchata. Ore enkaraki ina, ore Olaitoriani, ilo Aitoriani loo lororani, kelo airriwaki esaso lelo morran lenyena oopir, ore ti abori enkitoo enye neinoki enkiyupuyup, neeijo enkiyupuyup e nkima. Ore ina wang'an e Israel naa keaku enkima, ore ilo lenye sinyati neaku olng'ejep le nkima, naa keinos ninye nemut lelo kiku lenyena o suut pooki te nkolong nabo. Ore ina kishiaa e ntim enye o ene ina kop enye nalepo, naa keidakie Olaitoriani, osesen o enkishui, netiu anaa oltung'ani omuei te nemenayu. Ore olpisiai le lelo keek lenyena ooleku naa keaku kuti, o metaa ninye keidim enkerai aikena. Ore kenya te ina olong ilo pisiai le Israel o lelo oolekuni le nkaji e Yakobo, nemeitoki aairishakino ilo apa otaara ninche, kake Olaitoriani eirishakino ninche. Ilo sinyati le Israel eirishakino te sipata. Olpisiai olo arrinyunye, ilo pisiai le Yakobo orrinyokino Enkai magilani. Amu ore hoo neba iltung'ana linono le Israel anaa osinyai le naiposha olpisiai ake lenye orrinyunye. Etudung'okoki enkiguana e nkidaata te sipata. Amu ore Olaitoriani loo lororani naa kelo aiting'ie anaa enatudung'oki ti atua enkop pooki. Ore enkaraki ina nji ejo Olaitoriani, ilo Aitoriani loo lororani: “Lo tung'ana laainei, kulo oomanya Sion, emiureyu ile Asiria te neoshisho te ng'udi aashu te nedumu orinka lenye aar intae anaa apa enaikuna ile Misiri. Amu ore te nkiti rishata naa keish engoro ai, neibelekenyakino engoro ai enkidaata enye. Nedumu Olaitoriani loo lororani eng'udi agilunore ninche anaa apa pee eosh Midian te ndapidapoi e Oreb. Ore eng'udi enye kelo shumata enaiposha, naa kedumu ninye anaa apa enaikuna te Misiri. Ore te ina te neiwuang'a ilo ola lenye to loililai lino, negili ina shata enye emurt nanapishoreki te murt ino.” Eilepa ninye alo Rimon, eewuo ninye Aiat; etudung'o ninye enkop e Migron, ore te Mikmash neshum ninye olola lenye; etalang'a ninche te lang'ata, neirrag Geba enkewarie nabo, neikirikira Rama, ore Gibea e Saul neilanyisho. Teyietu nchira, na tito e Galim! Entoning lo tung'ana le Laisha! Tawaliki ninye, iyie, Anatot! Eisikita Madmena, ore lelo oomanya Gebin neilanyishote aaing'oru enesaru. Ore ena olong kelo ninye aitashe te Nobu, nelo aikirikirie enkaina enye te ilo doinyo le nkidaata le Sion, te ilo doinyo le Yerusalem. Ng'ura ore Olaitoriani, ilo Aitoriani loo lororani, kedung lelo ng'osil te ngolon naitureisho; ore ilo magilani oado naa kedung'i, ore lelo oorup ate neitadouni. Kedung ninye ina asuri e ntim te ntolu, ore Lebanon o lelo keek lenyena sidain neurori. Kepuku enkaitubului te nkobei e Yese, nebulu olng'osila te nena tona enyena. Naa ketonie Enkiyang'et o Laitoriani shumata ninye, enkiyang'et e ng'eno o enkarriyiano, enkiyang'et e utaroto o enkidimata, enkiyang'et e ng'eno o euriata o Laitoriani. Ore enchipai enye naa euriata o Laitoriani. Nemedung ninye enkiguana too naadol nkonyek enyena, aashu edung too naaning too nkiyiaa enyena; kake too sipat ninye eiguanare laisinak, neikok ninye te mborron lelo oobor ootii enkop; naa kear ninye enkop te ng'udi e nkutuk enye, near ilo arruoni metua te nkiyang'et e nkutuk enye. Esipata ninye naaku enkimeita e mpolos enye, naa ina kisiligata naisiligayu ninye naaku enkeene narreten ninye. Neton osuyiani te nebo olkuoo le ker, neirrag olowuaru keri te nebo olkuoo le kine, ore olashe o lng'atuny neirrag te nebo nerikoo enkiti kerai ninche. Ore enkiteng olng'arurumi ng'iro nedaa te nebo; ore lasho lenye neirrag te nebo, ore olng'atuny neaku nkujit einos anaa olkiteng. Neiguran enkerai nanakita te nkutuk e ngumoto o lasurai, nepik enkerai kiti enkaina enye enkutuk e engumoto e nturbubua. Meiko ninche ae nemeinyal ti atua ilo doinyo lai pooki sinyati; amu keiput enkop eyiolounoto o Laitoriani, anaa enaiputa nkariak enaiposha. Ore kenya te ina olong naa keitashe entonai e Yese anaa enkitoduaaroto too loreren; keaku ninye eing'oru loreren, ore emanyisho enye neaku ewueji e nkitoo. Ore kenya te ina naa keitorioo Olaitoriani enkaina enye aigil eni are, pee errinyu ilo pisiai apa otelekua loo ltung'ana lenyena, aitung'uaa Asiria, o Misiri, o Patros, o Etiopia, o Elam, o Shina, o Hamat, neitung'uaa sii olomanaa le naiposha. Naa kedumaki ninye nkuapi olmonekie pee eiturrurru lelo apa ooidapashari le Israel, neiturrur lelo ooidapashari le Yuda meetu aaing'uaa ilubot pokira oong'uan e nkop. Keiwuang ilo lom le Efraim, ore lelo ooiture Yuda neiwuang'ieki; meigil Efraim aatayie olom Yuda, nemeigil Yuda aiture Efraim. Naa keor ninche ebaiki oloililai loo filisti te nkalo o loo ntoluo, neibung'a ninche te nebo aaidaikie iltung'ana lo loosaen. Nepik ninche nkaik enye enkop e Edom o Moab, ore ile Amon neiruk ninche. Naa keishie Olaitoriani katukul olkina le naiposha e Misiri; naa keyuk ninye enkaina enye te shumata olkeju, te ilo kutati lenye opejisho, naa keosh ninye aitaa inong'ot naapishana pee eim iltung'ana anaa enkop natoyio. Naa keaku keetae enkoitoi kitok naing'uaa Asiria, te nkaraki ilo pisiai otelekuaki loo ltung'ana lenyena, ina kata apa pee epuonu ninche eing'uaa enkop e Misiri. Eilo kenya iyie ajo te ina olong: “Kaaisho nanu iyie enashe, Olaitoriani, amu ore hoo nikitagorokine iyie nanu, neibelekenye engoro ino, nikintagolo iyie nanu. Ng'ura, Olaitoriani ninye enjeunoto ai; kaisilig nanu ninye, nemaureishoyu; amu Olaitoriani Enkai ninye engolon ai o sinkolio lai, netaa ninye enjeunoto ai.” Ore te ng'ida nilo iyie aoku enkare naig'uaa lelo shorroi le njeunoto. Nilo iyie ajo te ina olong: “Enchoo Olaitoriani enashe, empoto enkarna enye, embalunye nkiaasin enyena too loreren, embalunye nchere eikitok enkarna enye. Entaranyaki Olaitoriani te nkisisa, amu etaasa ninye ine nkitoo; nchoo eyiolouni kuna ti atua enkop pooki. Entabuaku entarany te ng'ida, intae iloomanya Sion, amu eikitok ilo otii atua intae, Ilo Osinya le Israel.” Olkilikuai oipirta Babilon apa otabolokoki Isaya olayioni le Amos. Ore te nchumata e ndoinyo naisiaja tudumu olmonekie tabuaku nchiraki ninche; iyuku ninche te nkaina metijing'u nena shomito oo lkituaak. Aitanapa nanu makewan lelo gelunot laainei, aipotuo nanu lelo tung'ana laainei magil, pee eitalaku engoro ai, te lelo latagorokine. Toning'o, embuakunoto too ldoinyo eba anaa eno lorora kitok! Toning'o, embuakunoto oo nkitoriat, e lelo oshon oosoto te nebo! Olaitoriani loo lororani oitobirita olarrabal. Kepuonu ninche eing'uaa enkop nalakua, eing'uaa enkiting'oto e keper, nelotu Olaitoriani eeta iruparen enyena pee eidaikie enkop pooki. Enteyietu enchira amu etataana enkolong o Laitoriani; pee elotu ina kidaata naing'uaa olmagilani! Ore enkaraki ina kelepori nkaik pooki, neiropijaa empijan e pooki tung'ani. Naa keiputukuny ninche. Nejing ninche emion naikununo anaa ene nkitok nasaisai. Neing'ura ninche maate to lkirutoto; neiput enkurruna nkomomi enye. Ng'ura, kelotu enkolong o Laitoriani, ina olong torrono engoro, o empijan e mpushuna, pee eitaa enkop olmuaate neidaikie lelo aing'okok lenyena aishie. Amu ore ilakir le keper, nemeitoki aaishoru ewang'an enye; nemisimisu enkolong eilepu nemeitoki olapa aitawang'isho te wang'an enye. Kaitame nanu enkop te nkaraki eng'oki enye, naitame lelo arruok te nkaraki enkarruoisho enye; kaiting'ie nanu ilo wuasa le lelo ooitokoos, naitadou nanu olwuasa le lelo ooing'ola. Kaitaa nanu iltung'ana iloodoorieki anaa sahabu nasila netiu iltung'ana anaa sahabu e Ofir. Ore enkaraki ina kaikirikirie nanu keper, neigusugusieki enkop te ine wueji enye, te ina goro o Laitoriani loo lororani te ina olong e ngoro enye napi. Ore anaa entarakuet narreshitoi, aashu anaa nkerra nemeetae oltung'ani oiturrur, keibelekenyakino ake oltung'ani olorere lenye, neisik ake oltung'ani alo enkop enye. Ore oloba anaa oloinepuni neari metua; ore oloba anaa oloibung'i nebatata to lalem. Ore nkera enye kutiti naa kedung'udung'i te dukuya nkonyek enye, keibung'i nkajijik enye, ore nkituaak enye neikonyi. Ng'ura, kaputu nanu lelo le Amedi metarasaki ninche, lelo lemeshilaa enkosholai; nemeshipakino sahabu. Nkai enye naar ilbarnot metuata; nemeing'urrie ninche ina natii enkoshoke e ng'otonye; ore nkonyek enye nemeeta olng'ur too nkera kutiti. Ore Babilon, ina kitoo oo nkitoriat, ina kishiaa nawuasare Ilkaldayo, nelo atiu anaa Sodom o Gomora ina kata te nenang'aa Enkai ninche. Meigili ae kata aamany ninye aashu aatoni ti atua ninye too ishoritin pooki; meetae Olmarabui oigil aun olng'obor lenye te ine; nemeetae ilairritak loo ntare ooigil aairragie nkerrai enye te ine. Kake ing'uesi e ntim naapuo aairrag te ine, ore inkajijik enye neiput nkeenta enkop; nemany isidan ine, neitigiran ntarakueti te ine. Nekueni ilng'ojiniaa too ltaleta lenyena, nebuaku mbariak too nkajijik sidain e nkitoo; etataana ina kata enye, nemeimutieki nena olong'i enyena. Keing'urrie Olaitoriani Yakobo naa keitoki ninye agelu Israel, nepik ninche atua enkop enye. Naa kepuonu iltung'ana loo loreren aashulare ninche neidikidikore enkaji e Yakobo. Naa kepuonu iltung'ana aaya ninche neriku ninche ewueji enye. Ore ina aji e Israel neng'amaa ninche te nkaina o Laitoriani aa rrindiki lewa o ng'oruo. Neya ninche aaraya lelo apa ootaaraitie ninche, neitore ninche lelo apa ooibooki ninche enkop. Ore kenya te ina kata nikilo Olaitoriani aisho enkiyagata te ina mion o to sina lino, o te ina kisiaayiare nikitipikaki isiaaisho, teyietai olaiguanani le Babilon. Tejo: “Eng'ura eiting'ieki ilo apa aitorogonyani, eng'ura eiting'ieki enkisikong'are! Etigila Olaitoriani eng'udi eilo torrono, ina ng'udi e nkitoo oo looitoreisho, ilo apa otoosho iltung'ana te ngoro te nena oshot nemeish, ilo apa oitoria iloshon te ngoro o to losilisili metii olng'ur. Eitirring'e enkop pooki neyagaa; neranyisho ninche. Kiting'idakinote iyie ilkeek laaijo iltarakua ore lelo tarakua le Lebanon, nejo, ‘Ore ebaiki ina kata apa nikirragieki aaitadou, meetae oladung'oni loo lkeek olotu adung.’ Etudumunye enemeneng'a to lodo le nkop pee kinang'are te nilotu, etudumua ninye iloipi pee kiroroki iyie, ee, lelo pooki oora ilarikok le nkop; etudumunye too lorikan lenye le nkitoo le lelo apa oora ilaiguanak loo loshon. Eikirorie ninche pooki iyie aajoki, ‘Itashala sii iyie anaa iyiook! Itanyaanyukie sii iyie iyiook!’ Eitadoyioki enkishiaa ino aaya enemeneng'a, ina orui oo nkinantani inono; eisalaashaki aatadoyio abori iyie, ore ilkuru nikimulumul iyie. “Kaji iyie inkuna pee itusulunye te keper iyie lo Akira le Nkakenya, enkerai Enkakenya! Ng'ura ajo kitudung'oki aapudaki enkop, iyie olapa oitadowuo iloreren kop! Itejo apa iyie to ltau lino, ‘Kailep alo keper; te idia alo ilakir le Nkai kapik olorika lai le nkitoo shumata oleng; katon nanu to ldoinyo le umata te nelakua te nkalo e moikuape; kailep nanu alo te idia alo nkatampo, kaitotiu nanu kewan anaa Ilo Otii Shumata aisul.’ Kake kintadouoki aayau enemeneng'a, nenen neegut e nemenenga eululu. Ore lelo likidol iyie nikishumaki nkonyek, nikiimaki iyie, ejo: ‘Kele tung'ani apa oikirikirie enkop, neigusugusie nkitoriat, oitaa enkop olpurkel neibelekeny nkanas enyena, neitu eisho lelo ooena meshomo ang?’ Ore lelo aiguanak pooki loo loreren neirrag te nkitoo, olaiguanani ake ti atua enkurare enye. Kake kitanang'ayioki iyie aaiturraa, aaitalam enkurare ino, anaa enkaitubului nemeyieuni, neitemori too mpopoki e lelo ootuata, te lelo ootaaraki to lalem, lelo oosulakino isoito le ululu, anaa empopok naitunyi too nkejek. Mikinukari iyie aaitaboitaki ninche enkaraki nindaikie enkop ino, itara iyie iltung'ana linono metuata. Ore eishoi e lelo aasak loo ntorrok, nchoo eaku meigili ai kata aaipot!. Entobira esesekuanata oo layiok lenyena te nkaraki entorroni oo loo menye, pee mebul ake neibung enkop, neiput oriong enkop nkanas.” “Kadumunye nanu aitayunye ninche olarrabal,” Olaitoriani loo lororani ojo, “naa kaiwuang'ie nanu te Babilon enkarna o lpisiai, olmarei, Olaitoriani ojo. Naa kaitaa nanu ina kop emanyisho oo lkirrumun, naitaa ilturot le nkare, naa kaor nanu te oret e nkidaata, Olaitoriani loo lororani ojo.” Einosa Olaitoriani loo lororani olmumai: “Ore anaa enaitobira nanu, neijia elo atiu, naa ore anaa enatudung'o, neijia etiu keunoyu, nchere kalo nanu agil ilo le Asiria ti atua enkop ai, ore te shumata lelo doinyo laainei naitunyoki nanu ninye enkop too nkejek; ore ina shata enye oo murto neiwuang'a te ninche, o ilo ola lenye otii oloililai.” Ena ninye ina yieunoto natuutuaki eipirta enkop pooki; naa ena ninye ina aina naitorioyioki te shumata iloshon pooki. Amu etuutua Olaitoriani loo lororani, naa aing'ae oiwuang'ie ina? Eitorioyioki enkaina enye, naa aing'ae oshuk? Ore apa te ilo ari otanang'a olaiguanani Ahas, nelotu ele kilikuai ojo, “Ming'ida iyie Filistia, o intae pooki, eji nchere, etigile ina ng'udi apa natoosho intae; amu te eishoi o lasurai epuku olasurai torrono aisul, ore olng'anayioi lenye naa olasurai olo tiaai. Ore ilo kikau lo laisinani nedaa, ore ilo oata osina neirrag te seriani; kake kamut nanu entonai eishoi ino to lameyu, ore ilo pisiai lino naar nanu to lalem. Teyietu, na kishomi; nchira, na anasa; talepori to lkirutoto, iyie Filistia, intae pooki! Amu kelotu empuruo eimu moikuape, nemeetae oloisiadu to ltim lenye.” Kainyoo ewaliki oltung'ani olkilikuai loo loshon? “Olaitoriani oitobirua Sion, naa ore ti atua ninye netum lelo tung'ana lenyena apa ooisilisiloki esarunoto.” Olkilikuai oipirta Moab. Enkaraki naitomijoonoki enkanasa e Aar te ina kewarie apa naishieki Moab; o enkaraki naitomijoonoki enkanasa e Kir, te ina kewarie apa, naishieki Moab. Eshomo ina tito e Dibon iwuejitin neeika aishir; aishiraki Nebo neishiraki Medeba, eishirita Moab. Etabarnoki lukuny enye o lmunyo lenye, ore too nkoitoi neishopo ilkuniyiani; ore too nchumat oo nkajijik o too nkisiajat eishirita pooki ng'ae netashala too lkiyio. Eishirita Heshbon o Eleale, etoning'e oltoilo le nkishirata enye te Yahas; ore enkaraki ina keishir lelo lewa le Moab oata ruparen aabuaku; Eikirikire oltau lenye. Eishirita oltau lai te nkaraki Moab; ekuetikitia lelo aisikak lenyena Soar, eshomo Eglat-shelishia. Amu ore eilepaki Luhit, nepuo ninche eishir, ore eimita ina oitoi nalo Horonaim neyietu enkishirata e nkidaaroto; etoito nchorroi e Nimrim; netoito nkujit nemeetae inaabulu, meekure eetae nkaitubulu. Ore enkaraki ina, ore nena tokitin kumok apa naanoto ninche, o nena apa naatushuma ninche, keyae ninche aaitalang nchorroi o seyiai. Amu eshomo olkiyioi, aibulu enkop e Moab; etabaikia enkishirata Eglaim, etabaikia enkishirata Beerelim. Amu eiputa nkariak e Dibon osarge, ore ake eyia, kaitoki nanu ayau shumata Dibon aitulusoo, kesuj olng'atuny lelo ooisik le Moab, o ilo pisiai oleku le ina kop. Eirriwakitia ninche ilkuoo le kerra ilo oitore enkop, eing'uaa Sela eimunye ina oitoi o lpurkel, aayau ilo doinyo le ntito e Sion. Etotiutuo nena toyie e Moab anaa ntaritik naaidapashari tiaai, anaa nkajijik oo motonyi naaidapasha too mpoorri o lkeju le Arnon. “Nchoru eutaroto, tudung'o enkiguana te sipata; ntotiwuo oloip lino anaa enkewarie te nkata e nkipirata e nkolong; isudoi lelo oo tarayioki aaipang'ie, mincho meibung'i lelo aisikak. Nchoo lelo le Moab ootaarayioki aaisikie metamanyisho te nebo iyie, taa enkisudoroto te ninche te lelo ooidaikie ninche. Te neishieki kenya ilo aitorogonyani neish enkidaata, ore te neiwuang'ieki ilo oibooki ninche enkop te ina kop, netumi taa aaitotona olorika le nkitoo te nyorrata nauno, ore te shumata e ilo orika neton ninye te sipata ti atua ilo ng'obor le Daudi, ilo obo oiguana te sipata amu keneneng ninye pee eas esipata.” Kitoning'oitie iyiook ilo wuasa le Moab, enetiu apa olwuasa lenye; ore enkilashilash enye, o lwuasa lenye o ina goro enye - ore enkitokoos enye naa elejare. Ore enkaraki ina nchoo Moab eyietu aishir, nchoo pooki ng'ae eyietu aishiraki Moab. Enchira to sina kitok te nkaraki nena mukateni oo sabibu e Kir-Hareseti. Amu etoito nena ong'at e Heshbon, o lelo sabibu le Sibma; ore lelo kituaak loo loshon netudung'o ilng'osil lenyena, lelo apa oopuo aabaiki Yaser, neidapashaki olpurkel; ore lelo ngosil lenyenanepuo aaidapashari nelang enaiposha. Ore enkaraki ina, kaishir nanu te nkishirata e Yaser te nkaraki ilo sabibu le Sibma; kaaitashaiki nanu ilkiyio laainei, iyie Heshbon o Eleale; amu ore shumata ilng'anayio linono o enkisampuare ino netadoikio embuaakinoto o larrabal. Neiwuang'ieki eng'ida o enchipai te ina kop sidai; ore te nkurma oo sabibu nemetii osinkolio oranyi, meetae mbuakunot naabuakuni; meetae olaironyani oirony isabibu te nkironyet; eitigiraki inabuakunoto e nkisampuare. Ore enkaraki ina keishir oltau lai anaa olwulul loo usin aishiraki Moab, neishiraki oltau lai Kir-heres. Naa te nelotu Moab aibalunye kewan, naa te neitanaur kewan too wuejitin neeika, te nelotu ninye atua ine wueji enye sinyati pee eomon, meret ninye ina. Ororei ele oing'uaa Olaitoriani oipirta Moab too nkolong'i naatulusoitie. Kake ore taata ejo Olaitoriani, “Too larin okuni, anaa larin le nkigeroto o ltung'ani, keitaae ina kitoo e Moab pesho, hoo duoo naa olorora kitok ninche. Ore lelo ooleku naa lkuti oleng leme toki.” Olkilikuai oipirta Dameski. Ng'ura, meitoki Dameski aaku enkanasa, naa keaku ninye osototi loo suut. Kepuoi aaing'uaa nkanas enyena o akenya; neaku ninche ndaat oo nkerrai, neirragie ninche ine nemeetae entoki naiture. Keiwuang'a ina ang nagol aitung'uaa Efraim, neiwuang'a enkitoo aitung'uaa Dameski; ore ilo pisiai oleku le Siria netiu anaa enkitoo oo nkera e Israel, Olaitoriani loo lororani ojo. Ore kenya te ina olong neitadouni enkitoo e Yakobo aaitabaiki enkop, ore ina piron o sesen lenye nesasu. Naa ketiu ninye anaa te neisampisho olaisampuani, negilu ilng'osil le nkurma, netiu anaa ina kurma naitashe te nesuli ilng'osil lenyena netiu anaa oerata le Refaim. Ina natung'uayie olaisampuani ake naleku, anaa te neisampu olaisampuani ilng'anayio neing'uaa oare anaa okuni ootii shumata oleng, aashu oong'uan anaa imiet too lng'osil lo lchani loo lng'anayio, Olaitoriani Enkai e Israel ojo. Ore kenya te ina olong neaku keshilaa iltung'ana Ilo oitobira ninche, ore too nkonyek enye neing'or Ilo Sinyati le Israel; meitoki ninche aaisilig ilperereni loo lasarri, ina siai oo nkaik lenye, nemeitoki ninche aaing'or ina naitobira ilkimojik lenye, aa Asherim aashu ilperereni le nkorropil. Ore kenya te ina olong nena anas enye naagol, nepuo aatiu anaa nene wuejitin neeisikieki oo le Hafi o le Amori, nenen apa neeisikie ninche te nkaraki nkera oo Siraeli. Nepuo aaku ilmuaateni. Enkaraki nikitorikine iyie Enkai e njeunoto ino, neitu iyie idamu ina dapidapoi e sarunoto ino; enkaraki ina pee ituno iyie nkaitubulu sidain, nipik iyie ntokitin oo nkaitin omon, ore hoo nintubulu iyie ninche ina olong ake nituuno ninche, nincho ninche meitapuka pee ekenyu ake, ore ake eyia, kelo aimin enkisampuare, te ina olong o sina o ina mion nemeishiuni. Kuaak, ening'o oltoilo loo ltung'ana kumok, eikurrukur ninche anaa enkikurrukur e naiposha! Kuak, enkikurrukur oo loreren kumok eikurrukur ninche anaa e nkikurrukur oo nkariak kumok! Keikurrukur iloshon anaa enkikurrukur oo nkariak kumok, kake kelo ninye aisikong ninche, neilanyisho ninche aaisik, nepuo ninche anaa suut too ldoinyio netiu anaa enterit nakutita olkutati. Ore teipa, ng'ura, nelotu olkirutoto! Ore eitu eaku tadekenya meekure eetae ninche! Ena ninye erubata e lelo ooibung iyiook aaraya, elaakinoto e lelo ooisim iyiook. Kuaak, enkop oo naipuko naaikurrukur natii lido kekun ilkejek le Etiopia; ina nairriwaa ilbalusuni lenyena aimie olkeju le Nail, too mpeuti naaitobiraki te narau oo nkujit naapor nkariak! Enchom intae, intae olkilikuai oneneng ina kop e lelo adoru oosipa seseni, enetii ilo orere ourei te netaana o te nelakua, ilo osho magilani otimirishe, odung ilkejek enkop enye. Ore intae kulo ootii enkop pooki, intae lelo oomanya enkop, te nedumuni olmonekie too ldoinyo, eng'ura! Te neoshi emowuo, entoning! Amu nji nanu aatiaaka Olaitoriani: “Kaitirring'a nanu aing'orisho te manyisho ai, aing'or asipu anaa te ndama eirowuaja, anaa enkatampoi e nkoiliolio te nkata e nkisampuare eirowuaju.” Amu ore eng'or enkisampuare, eidipa enkurma aitapuka, neibelekenya ntapuka aaku ilng'anayio, nedung'oo ninye lelo ng'osil to lalem odung'ishoreki, ore lelo ng'osil oo luaari nedung'oo. Neing'uari ninche pooki, meinosa nena taritik e ong'ata naatoni too ldoinyo, neing'ueikini ing'uesi e ntim. Neked ilmotonyi shumata ninche te nkata e nkirowuaj, netonie ing'uesi e ntim ninche te nkata e nkirobi. Ore kenya te ina kata neyauni nkishorot aaisho Olaitoriani loo lororani, naaing'uaa lelo tung'ana adoru nesipa seseni, lelo tung'ana oourei te netaana o te nelakua, ilo osho magilani omirisho, odung ilkejek enkop enye, o metabaiki oldoinyo le Sion, ine wueji e nkarna o Laitoriani loo lororani. Olkilikuai oipirta Misiri. Ng'ura, ekedito Olaitoriani enkatampoi nakuet, naa Misiri elotu; naa keikirikira nena kitanyaanyukot e Misiri oo nkaitin te dukuya ninye, nelepori iltauja loo ltung'ana le Misiri ti atua ninche. Naa kaputu nanu ile Misiri metudumakinoto maate, nearare ninche oltung'ani ake o lalashe lenye, nearare oltung'ani olayioni le latia enye, nearare enkanasa enkanasa, nearare enkitoo enkitoo; ore olokiyo loo le Misiri ti atua ninche, neishieki katukul, nainyal nanu nkitobirat enye; naa kepuo ninche aaikilikuanishore nena kitanyaanyukot oolaitumusumusok, o loosh nkidong'i o lasakutok; naa kaishooyo nanu ile Misiri apik nkaik o laitasheikinoni ogogong, naa olaiguanani otolo olo aitore ninche, Olaitoriani loo lororani ojo. Ore nkariak e ilo keju le Nail neitoi, ore ilo keju netoyu; ore nena nong'ot neing'usilu, ore ilkejek ooibung'are ilo keju le Nail le Misiri nemitari aatoyu, ore oseyiai o lkujita netoyu. Keaku iorro mbat o lkeju le Nail, ore nena tokitin apa naatuunoki te mbata olkeju netoyu, nekutaa osiwuo. Ore lelo arreshok loo sinkir neishir te mion o sina, lelo pooki oonang'aki irresheta lenye olkeju le Nail, neyietu ninche aaishir, lelo pooki ooisalaashaki irresheta lenye shumata enkare. Ore lelo aitobirak loo nkilani naapuyiapui nepalari, o lelo ooitobir nkilani naaibor. Ore lelo laa ninche ing'apeta enkop nerratanyi, ore lelo oas esiaai ooropiyiani netum osina. Ore ilkituaak le Soan naa ilmoda; ore lelo ang'eni aikook le Farao neishooyo enkikoo e modai. Kaji iyie inko pee ijoki Farao, “Ara nanu olayioni lo lang'eni, olayioni lo laiguanani li apa moiti?” Koree naa lelo ang'eni linono? Nchoo ninche mikitoliki neisho metayiolouni, ina naiguanua Olaitoriani loo lororani pee egilunore Misiri. Ore lelo kituaak le Soan netaa lmoda, ore lelo kituaak le Memfis neteleja ate; ore lelo apa laa ninche eitasheyie iloshon lenye, neitapong'oitie Misiri. Eishoo Olaitoriani ninche olmilo; neisho Ilmisiri meyukuyukori too nkiaasin enyena pooki, anaa enayukuyukori olamerani elopisho. Nemeitoki ae bae nabo atii Misiri aa endukuya aashu olkidong'oe, olng'osila lo ltukai aashu oseyiai nadimi aataas. Ore kenya te ina olong, naa ketiu ile Misiri anaa ng'oroyiok, neikirikira te dukuya ina aina naikirikirie Olaitoriani loo lororani ninche. Ore ina kop e Yuda naa keaku entoki naiture ile Misiri; ore pooki tung'ani oba anaa ololikini neureishoyu, enkaraki ina naiguanua Olaitoriani pee egilunore ninche. Ore kenya te ina olong naa keaku keetae nkanas imiet ti atua enkop e Misiri, naairo enkutuk e Kanaan. Neinos olmumai pee eiruk Olaitoriani loo lororani. Ore nabo e kuna naa kepuoi aajo Enkanasa e Nkolong. Ore kenya te ina olong naa keaku keetae olperere lo lasar lo Laitoriani te mpolos e nkop e Misiri, o eng'ape o Laitoriani to lpolosie lenye. Naa keaku ina olmonekie o enchakenisho o Laitoriani loo lororani ti atua enkop e Misiri; ina kata te neishiraki ninche Olaitoriani te nkaraki lelo ooibooki ninche enkop, neirriwaki Olaitoriani ninche olaitajeunoni. Nemitu, nekordu ninye ninche. Neisho Olaitoriani metayiolouni ninye too le Misiri. Neyiolou lelo le Misiri Olaitoriani te ina olong, neserem ninye to lasar o too nkishorot o lasar opejori. Neinos ninche olmumai te nkaraki Olaitoriani, neitabaya. Naa kelo Olaitoriani aosh Misiri, neosh neitoki ashukunye, naa kerrinyokino ninche Olaitoriani, nening ninye esayiata enye neishiunye ninche. Ore kenya te ina olong naa keaku keetae enkoitoi kitok nadumunye te Misiri alo Asiria. Nepuonunye ile Misiri Asiria, nepuo ile Misiri aaseremisho te nebo ile Asiria. Ore kenya te ina olong naa keaku Israel ene uni te nebo Misiri o Asiria, neaku ninche emayianata te mpolos e nkop. Naa ninche emayian Olaitoriani loo lororani ejo, “Emayiana Misiri, olorere lai o Asiria ina siaai oo nkaik aainei, o Israel enjung'ore ai.” Ore apa te ilo ari oewunye ilo kitok le njore, oirriwua Sargon ilo aiguanani le Asiria meeu Ashdod, neitainye olarrabal neya ninye ore te ina kata neirorie Olaitoriani Isaya olayioni le Amos, ejo, “Shomo, talaku ilo kuniyia lirrotianita te mpolos nidotu inamuka too nkejek inono,” netaasa apa ninye ina alo meishopo nemeeta namuka. Nejo Olaitoriani, “Ore anaa enashomo osinka lai Isaya meishopo nemeeta namuka too larin okuni anaa olmonekie le ngolon ogilunore Misiri, o Etiopia, nejia naa elo atiu olaiguanani le Asiria erikoo lelo le Misiri ootarayioki o le Etiopia epuo eyararoto. Ore ndung'ot pokira ilooti o lkituaak nepuo meishopo nemeeta namuka. Nemeeta toki too ltuli neaku enkurruna e Misiri. Naa keitukurruni ninche te nkaraki Etiopia naisiligie osiligi lenye Misiri natawuasare. Ore lelo oomanya olomanaa le naiposha nepuo kenya aajo te ina olong, ‘Ng'ura, ena nataase te kuldo laa ninche apa kisiliga, naa ninche kisikakitia aaing'oru, eretoto pee ekordu iyiook aitung'uaa ilo aiguanani le Asiria! Naa amaa, iyiook, kaji kinko pee kiimisho?’ ” Olkilikuai oipirta Babilon. Ore anaa enadumunye olkutati te Negeb neor enkop, olpurkel eing'uaa, ina kop torrono oleng. Aatolikioki nanu te nduaata entoki torrono; keisimisho olaisimani, neinyalisho o lainyalani. Ilepa shomo, iyie Elam, irraga kitang'aduaki, iyie Media; ore lelo sinaitin pooki ooyaua ninye kaishie nanu. Ore enkaraki ina aaiputa nanu olkirutoto; aaibung'a nanu emion naikununo anaa enenkitok nasaisai; atashala nanu o metaa meekure aning'isho, airuto nanu o metaa meekure adolisho. Aaisurito endukuya, aaiputa nanu olkirutoto, ore enteipa duoo naanyita neibelekenye aaku enkiputukuny. Eitobira ninche emesa, eisalaasha ninche ilkarash oopiki oltiren, nedaa ninche neokisho. Entudumunye intae, lo kituaak, eelie long'oi eilata! Amu nji nanu aatiaaka Olaitoriani: “Shomo ngero olarriponi, nchoo ninye elimu aibalunye ina nadol. Te nedol ninye ilakedok, lelo akedok loo mbartan epuo maare, o lakedok loo sirkon, o lakedok loo ntamesin, nchoo ninye einining'isho asipu, nchoo esipu oleng.” Ore ilo otoduaa neyietu ajo: “Te nchumata oltalet orripishoreki nanu aitashe, anaake te ndama iyie o Laitoriani. Ore te siaai ai natii nanu nkewaritin pooki. Naa ng'ura, nadol epuonu ilakedok, nadol ilakedok loo mbartan epuonu maare!” Newal ninye ajo, “Etabatate, etabatate Babilon, ore nena kitanyaanyukot enyena oo nkaitin, netarrarrakinote enkop.” Lo tung'ana laainei, kulo ooidong'oki neipiripiri, ore ina natoning'o nanu to Laitoriani loo lororani, ina Ai e Israel, atolikio nanu intae. Olkilikuai ele oipirta Edom. Etii obo oipotisho te Seir, nejo, “Lo arriponi, kejaa enkewarie? Lo arriponi, kejaa enkewarie?” Nejo ilo arriponi: “Kelotu enkakenya nelotu sii enkewarie. Te naa e ilo aikilikuanisho, nkilikuanisho; nyaaki torrinyunye.” Olkilikuai oipirta Arabia. Too sanagi le Arabia intae ipuopuo aairrag, na tamesin oo le Dedan. Eyaki enkare ilo oata enkure, entanang'are lelo aisikak endaa, intae kulo oomanya enkop e Tema. Amu eisika ninche aaing'uaa ilalema, aailany ina shutati o lalem, neilany ina awuo nakurruno, neilany ilo arrabal otirrisha. Amu inji nanu aatiaaka Olaitoriani, “Ore te rishata olari obo, te risioroto oo larin le nkigeroto, ore ina kitoo pooki e Kedar naa keiting; ore lelo ooleku, le lelo tung'ana magil oongoroo mbaa Kedar naa keaku kuti; amu Olaitoriani, Enkai e Israel, nairoro.” Olkilikuai oipirta oerata le nduaata. Kainyoo ena, eji ishomo intae shumata, ishomo pooki nchumat oo nkajijik, iyie enabore enkilepilep, na anasa ena nailugo, na ang ena nabore eng'ida? Ore lelo tung'ana linono ootaraki neme to lalem, neme to larrabal etuata. Eisika ilaitoriak linono pooki te nebo, eibung'aki eitu ninye engoroo embae. Ore intae pooki ooinepuaki neibung'aki, hoo neisika ninche aapuo enelakua. Ore enkaraki ina atejo nanu: “Mbelekenyayu miking'or nanu, nchooki nanu maishira olkiyioi le mion; mintanaur kewan kintigir nanu, te nkaraki enkidaata e ina tito o lorere lang.” Amu Olaitoriani Enkai oo lororani neeta enkata e nkiputukuny o enkitunyoto o enkinyalata ti atua ilo erata le nduaata, nena naauroo isunta e nkanasa, nebaiki embuaakinoto ldoinyo. Ore Elam nenap imootiani ekedito ngarrin oo mbartan, ore Kir nebolu long'oi. Ore lelo erat linono sidain neiput ngarrin oo mbartan, ore lakedok loo mbartan netumoki nkitashot too nchomito. Eiwuang'ie ninye elong'o e Yuda. Ore apa te ina olong ning'oru iyie iruparen te nkaji e ntim. Nidol ajo eikumok ilusien e nkanasa e Daudi, nioku enkare too lchorroi li abori, ninken nkajijik e Yerusalem, nigil nkajijik pee ishet esuntai aitagol. Nintobir olchumati le nkare te rishata e nena sunta pokira are. Kake eitu ing'or ilo apa oitobira ilo shorro, neitu ishilaa ilo oipirua kuna pooki apa moitie, laa ninye oishoo metaa. Ore apa te ina olong neipotu Olaitoriani loo lororani olkiyioi o enkishirata, nebarni iltung'ana te nkaraki osina neishop ilkuniyiani; naa ng'ura, eng'ida o enchipai, o eyieng'ata oo lmong'i o lkerra, enkinosata oo nkiri o eokoto e naisho oo sabibu. Ijojo: “Matadaata iyiook nikiokisho, amu ore taisere nikiye.” Eibalunye Olaitoriani loo lororani kewan too nkiyiaa aainei: “Esipa ore ena kitarruorroto mikipalakini iyie, o metaba anaa niye.” Olaitoriani loo lororani ojo. Nji ejo Olaitoriani Enkai oo lororani, “Wou, shomo enetii ele aitasheikinoni, shomo enetii Shebna laa ninye oitasheiki enkaji, nijoki ninye: Kainyoo iasita tene naa kaing'ae iata iyie tene, eji o itaguetaka iyie kewan enkurare. Ee, iyie, ilo oturu enkurare te wueji e Shumata, niguetu enimany te ndapidapoi? Ng'ura, eikinang'aa iyie Olaitoriani aiturraa, lo tung'ani ele ogol. Eikimbung ninye akurraki, nikiyuk ninye aitamanaa anaa empira anang'aki enelakua; nilo aye te ine. Naa ine epuo aatii nena garrin inono oo mbartan, iyie ilo ora enkurruna e nkaji o lkitok lino. Kaanang'aa nanu iyie te ine niaasishore, nikintadouni te ilo orika le shumata.” Ore kenya te ina olong naa kaipotu nanu osinka lai Eliakim olayioni le Hilkia, naishopoki nanu ninye olkila lino, narreten nanu ninye te nkimeita ino, ore enkitoria ino naitarasaki nanu ninye. Naa keaku ninye papa te lelo oomanya Yerusalem o te nkaji e Yuda. Naiteleiki nanu oloililai lenye olbolet le nkaji e Daudi; nebol ninye nemeetae oloiken. Neiken nemeetae olobol. Naa kaitasheyie nanu ninye netiu anaa encheitoi nauno oleng, neaku ninye olorika le nkitoo te nkaji e papaai lenye. Neitanapi ninye olola le nkaji e papaai lenye pooki, eishoi pooki o nkera, ebaiki nkikompeni o metabaiki nkukurto e nkare. Ore kenya te ina olong, Olaitoriani loo lororani ojo, ore ina sheitoi apa natuunoki oleng nelolong'u, nedotunye asulunye; ore ilo ola apa oikare nesulunye adou, amu Olaitoriani oiroro. Olkilikuai ele oipirta Turo. Enteyietu enchira, na melin e Tarshishi, amu eitomijoonoki Turo neaku metii enkaji aashu ewueji neitasheyieki! Ore ebaiki enkop e Kupro eibalakinyeki ninche. Entirring'ata intae kulo oomanya olomanaa le naiposha, lo ainyiang'ak le Sidon, etalang'a apa lelo lirriwaitie intae enkare nepuo ninche aaim nkariak kumok; ore ropiyiani inyi naa ina tapa e Shihor, ina kisampuare o lkeju le Nail; iyie apa olbiasharai loo loreren. Tukurru iyie Sidon, amu eiroro enaiposha, ine nerripieki enaiposha ejo, “Eitu nanu atum emion e saisai neitu aisho, neitu nanu aitubulu layiok aashu ntoyie.” Te nelotu ilo omoni Misiri, nejing ninche osina tenkaraki ilo omoni oipirta Turo. Entulusoi enchom Tarshishi, enteyietu enchira, intae lelo oomanya olomanaa le naiposha. Kena ninye enkanasa ino e ng'ida, naa ore enkiterunoto enye naa apa moitie, ore nkejek enyena netanapa ninye meshomo amanyisho te nkop nalakua? Kaing'ae oipirua ena, agilunore Turo, naa ninye naishooyo maupen e nkitoo. Ore apa lelo ainyiang'ak lenyena naa eikituaak, ore lelo amirak lenyena naa ilooyanyiti te nkop? Eipirua Olaitoriani loo lororani ina, pee einyal ilo wuasa ena kitoo pooki, nesul ilo pooki oyanyiti te nkop. Mputa ntadooi te nkop ino anaa olkeju le Nail, na tito e Tarshishi; meekure eetae entoki nikimbooyo. Eitorioyie ninye enkaina enye aitalang enaiposha, eigirigirie ninye nkitoriat; eishorua Olaitoriani enkitanapata naipirta Kanaan, pee eidaikie lelo sempewueti lenyena. Nejo ninye: “Mingil ae kata iyie ang'ida na tito ena natusulaki e Sidon; tudumunye shomo Kupro, ore ake sii te ine milo atum enkiyeng'iyeng.” Ng'ura ina kop oo Lkaldayo! Ilo orere apa, mme ile Asiria, oopuo aaishooyo Turo metaa enoo lowuarak le ntim. Neirrag ninche aang'adu ninye, nerasaki nena ajijik enyena e nkitoo, neing'uaa ina anasa etaa enkidaata. Teyietu nchira iyie Tarshishi, amu ore osempewuet lino neitomijoonoki. Ore kenya te ina olong, nemeitokini aadamu Turo too larin ntomoni naapishana, naaba anaa nkolong'i o laiguanani obo. Ore te siadi lelo arin ntomoni naapishana netiu te Turo anaa enatiu te ilosinkolio le mulayoi: “Tudumu enkawuo oo sinkoliotin, tamanimanai te nkanasa, na mulayoi ena nemedamuni! Taranyisho to ltoilo sidai, taranya isinkolioitin kumok, pee kitumi aatadamu.” Ore te siadi ilarin ntomoni naapishana naa emutan Olaitoriani Turo. Naa kerrinyokino ninye olekoisiaayio lenye, nelo aiborrie onyek te nena kitoriat e nkop naatii oriong e nkop. Ore ina biashara enye o lekoisiaayio lenye neiteng'elakini Olaitoriani; meshumi ninye nemeirragieki aaisudoo, kake ore ina biashara enye kelo ainyiang'u endaa sapuk o nkilani sidain ainyang'aki lelo ootoni te dukuya Olaitoriani. Ng'ura, kelo Olaitoriani aitomijoon enkop neitaa mitil, naa kelo aibelekeny neidapash lelo oomanya. Naa ore ina nalo atiu too ltung'ana, naa neijia etiu to lapolosani; ore enatiu to rrindik, neijia etiu to lkitok lenye; ore enatiu te nkaisiaayiani, neijia etiu te ina naigero ninye; ore enatiu te ilo oinyang'isho, neijia etiu te ilo omirisho; ore enatiu te ilo oisilenisho neijia etiu te ilo oisilenokini; ore enatiu te ilo oishooyo esile, neijia etiu te ilo oisilenokini. Keitomijooni enkop katukul neitarruorri oleng; amu eiroro Olaitoriani ele ororei. Eishirita enkop neisha, etemene enkop nalulung'a neisha, etemene shumata amitari te nebo enkop. Etaa enkop olminong, ti abori lelo oomanya; amu etigila ninche nkitanapat, negolong'aki nena kikoot, negil ilo ning'o loo ntarasi. Ore enkaraki ina keinos oldeket enkop, ore lelo oomanya kemeyu te nkaraki enkitarruorroto enye; ore naa kepejori lelo oomanya enkop, naa ilkuti ake elekuni. Eishirita enaisho oo sabibu, ore olchani loo osabibu netasara, ore lelo apa oong'ida nejing osina. Ore oltoilo le nkinanta netigire, ore ilo toilo le nchipai netigire, ore oltoilo lolwulul loo usin neitigiraki. Meigil ae kata aaok enaisho oo sabibu eranyisho; keduaru ina aisho napi te lelo ook. Ore ina anasa naing'oling'ole neturori ninye, eikenoki pooki aji metaa meetae olojing. Etasapuka olkiyioi too nkoitoi naalala e nkanasa eiting'o enaisho oo sabibu; neishieki eng'ida pooki; neishieki enchipai pooki e nkop. Eitomijoonoki enkanasa, etigilaki nchomito aainyal. Amu ena nalo aaku te mpolos e nkop, ti atua loshon, ore anaa enaigusugusieki oloirien, o anaa enasotuni ilng'anayio to sabibu. Neilepie ninche iltoiloishi lenye, neranyisho te ng'ida; ore te nkitoo o Laitoriani kebuaku ninche te nkalo o loo ntoluo. Ore naa te nkalo o loo saen nchoo Olaitoriani enkitoo; ore to lomanaa le naiposha nchoo Olaitoriani enkitoo, Enkai e Israel. Ore too neeiting'ie enkop nikining'oo isinkolioitin le nkisisa, le nkitoo te ilo Obo Osipa. Kake atejo nanu, “Aibiitiari nanu, aibiitiari nanu. Woi keon ai! Amu ore lelo aitang'orok netarasutua, etarasutua ilaitang'orok oleng.” Olkirutoto o engumoto, o rreshet shumata iyie, shumata iyie ilo omanya enkop! Ore ilo oilanyisho to ltoilo lo lkirutoto, naa kelo adoiki engumoto; naa ore ilo oilepu te ngumoto neibung orreshet. Amu etaboloki ilusien e shumata, ore olkitamanyunot le nkop neikirikira. Etigiligilaki enkop tukul, etabee neaku mbelibelat, eikirikirieki enkop oleng. Eyukuyukori enkop anaa olamerani, etotiuo anaa enkaji nakutita osiuo; etii nkitarruorot enyena shumata ninye, naa kenang'aa ninye nemeigil adumunye. Ore kenya te ina olong naa kelo Olaitoriani aitame olorora le shumata te keper, nelo aitame ilaiguanak le nkop teina kop. Neiturrurri ninche te nebo anaa ilooena te ngumoto; neikenori ninche te korokoroni, ore te siadi nkolong'i kumok neitamei ninche. Neitomisimisi olapa nemeitoki enkolong awang'u; amu Olaitoriani loo lororani olo aitoreisho to ldoinyo le Sion o te Yerusalem, naa ore te dukuya ilpayiani lenyena nelo ninye aibalunye enkitoo enye. Iyie Olaitoriani, ira iyie Enkai ai; kaarrep nanu iyie, kaisis nanu enkarna ino; amu itaasa iyie mbaa e nking'asia, ntabayie te sipata nena kitobirat inono e apa moitie. Amu intaa iyie ina anasa osototi le nkidaata ore ina anasa nagol nintaa olmuaate; ore apa ina aji e nkitoo oo ltung'ana leeikinga meigili ae kata aashet. Ore enkaraki ina eikisis iyie iloreren oogol; ore nkanas e lelo oshon lemeeta olng'ur naa eikiureyu iyie. Amu itaa iyie osempewuet le ilo aisinani, aitaa osempewuet le ilo onyamal te nyamali enye; olchurie to lkutati naa oloip te nkirowuaj, amu ore eoshoto e ilo lemeeta olng'ur neikununo anaa olkutati oipony esuntai eikununo anaa enkirowuaj te wueji netoyio Intigira iyie oltoilo loo lmang'ati lang; anaa enkirouaj ti abori oloip le nkatampoi, neaku eishieki osinkolio le ilo lemeeta olng'ur. Ore te le doinyo, kelo Olaitoriani loo lororani aitobiraki olorere pooki osirua loo ntokitin naapir, osirua le naisho oo sabibu, osirua loo ntokitin naabore eilata, o enaisho oo sabibu, osirua loo ntokitin naabore eilata, o enaisho oo sabibu nasila oleng. Naa kelo ninye aidaikie tele doinyo ina kimulumulet apa natanang'akaki shumata iloreren pooki, ilo karasha apa oidapashakaki shumata iloshon pooki. Neijoo ninye keeya ntarasi, nejutoo Olaitoriani Enkai ilkiyio too nkomomi pooki, ore ina sulare oo ltung'ana lenyena neiwuang'ie ninye te nkop pooki; amu Olaitoriani oiroro. Kepuoi kenya aajo te ina olong, “Ng'ura, Enkai ang ena; kitaanyutua apa iyiook ninye, pee elotu aitajeu iyiook. Olaitoriani ele, kitaanyutua iyiook ninye, mating'idata iyiook nikishipakino enjeunoto enye.” Amu kemitu enkaina Olaitoriani oldoinyo le Sion, naa kepuoi aaitunyoki Moab enkop te wueji enye, anaa enaitunyi olkujita te wueji olokidong'oi. Naa kelo ninye aitorioo nkaik enyena te neitorit ninye, anaa enaitorioo nkaik o ltung'ani oisompira te nkare, kake kelo Olaitoriani airragie ilo wuasa lenye te nebo ina arriyiano oo nkaik enyena. Ore nena sunta adoru e nkang enye nesulu ninye, neitadou, nenang'aki enkop, neitabaiki enterit. Ore kenya te ina olong nepuoi aarany ele sinkolio te nkop e Yuda: “Kiata iyiook enkanasa nagol; eishoo ninye iyiook enjeunoto naikununo anaa sunta enkang nagol Entabol nchomito, pee etum ilo osho loo sipat oibung enkirukoto aimu. Nchoo iyie meitiring'ayu te seriani, ilo laa iyie edamu enkaraki nikisiliga ninye iyie. Isiliga Olaitoriani ntarasi, amu ore Olaitoriani Enkai, naa endapidapoi oo ntarasi. Amu eitadouo ninye lelo ooilepie ate ina anasa naitokoos. Eitadouo ninye, etanang'aka ninye enkop, nenang'aki enterit. Eitunyito nkejek ninye, nkejek e lelo aisinak, iroruat e lelo oomena.” Keitoriori enkoitoi e ilo asipani; itooro iyie enkoitoi e ilo asipani. Ina oitoi oo nkiguanat inono, kiaanyunyie iyiook, iyie Olaitoriani; ina arna nikidamunye iyie, ninye eyieunoto oo ltauja lang. Iyie eng'uar oltau lai kewarie, ore enkishui ai ti atua nanu naa iyie elilitu. Ore enkata natii nkiguanat inono enkop, neiteng'enuo lelo oomanya enkop te sipata. Tenaa keitoduaaki ilo torrono olng'ur, meyiolou ae kata ninye esipata; ore ti atua enkop oo sipat, neas ake ntorrok, nemedol enkitoo o Laitoriani. Iyie Olaitoriani, eilepieki enkaina ino, kake medol ninche. Nchoo ninche metoduaa olom too ltung'ana linono, nekurru ninche. Nchoo ina kima te nkaraki ilmang'ati linono einos ninche. Iyie Olaitoriani, intobiraki iyie iyiook eseriani, iyie oishoo iyiook nena siaitin ang pooki. Iyie Olaitoriani Enkai ang, eitoreita apa iyiook kulikae aitoriak leme iyie, kake enkarna ino ake kewan kiyiolo iyiook. Etuata ninche, nemeitoki aapiu, etaa ninche loipi, nemeigil ninche aaitashe; ore te ina, nitumutana iyie ninche aishie, niwuang'ie ninche pee meigili ai kata aadamu. Kake itoponayie iyie ilo orere, aitoriani, itoponayie iyie ele orere; kintaaki iyie kitok; intalala iyie ilpolosien lena kop. Iyie Olaitoriani, ore to sina niking'oru ninche iyie, nebuku ninche enkomono, ina kata etii enkitamioto shumata ninche. Ore anaa entuaa natashala, neyietu aishir te mion e saisai, neijia iyiook kitiu te nkaraki iyie, Olaitoriani; kitunutate apa iyiook, kitasaisayia, kitotiutuo anaa eikitoiutuo enkijape. Mikiaata enkordunoto nikiyautua enkop, ore lelo oomanya enkop neitu ebatata. Ore lelo linono ootuata naa kepiu kedumunye aaitashe iseseni lenye. Lo tung'ana kulo oomanya atua enterit, enyeito entaranyisho te ng'ida! Amu ore ina oileelio ino naa enkoileelio e wang'an, ore te ina kop e nemeneng'a naa ilo iyie aitopiu ninche. Wootu lo tung'ana laainei, entijing ilgilat linyi, ninkenikene nkutukie oo nkajijik, esudori intae maate te nkiti rishata, o metaba anaa nelusoo ina goro. Amu, ng'ura, kelotu Olaitoriani aipang'u te wueji enye pee elotu aitame lelo oomanya enkop te nkaraki enkarruoisho enye. Ore enkop nelo aibalunye ilo sarge apa oibukoyioki ti oriong ninye, nemeigil ae kata aitemoo lelo apa ootaraki metuata. Ore kenya te ina olong eibung'ita Olaitoriani ilo alem lenye kitok ogol, nelo ninye aitame Lefiatan, ilo asurai oisikita, ilo asurai ojo lefiatan omerregela, near ninye metua ina kukuu natii atua enaiposha. Ore te ina olong: “Neranyaki enkurma sidai oo sabibu ninye! Nanu Olaitoriani olaing'urani lenye; kabukoki nanu enkare pooki kata. Melotu ake likae tung'ani ainyal, karrip nanu kewarie o dama. Maata nanu engoro. Tenaa naaji kaata nanu ilkiku o entiaati pee airragakinye ninche, anaata apejoo ninche pooki. Anaa nchoo ninche eibung esarunoto ai, nchoo ninche eitobir osotua o nanu, nchoo ninche eitobir osotua o nanu.” Ore too nkolong'i naapuonu neibung Yakobo ntona, neitapuku Israel neiu ntilitan neiput enkop pooki ilng'anayio lenyena. Ketoosho ninye ninche anaa apa enatoosho lelo mang'ati lenye? Anaa ketasesekuana ninye ninche anaa apa enatasesekuanaki lelo asesesekuanak? Te nkiririkinoto iyie intamio ninche, airreu ninche meshomo eyararoto; iwuang'ie ninche te ngoro ino napi, te ina olong o lkutati lo loo saen. Ore te nkaraki ina naa kepalakini enkitarruorroto e Yakobo naa kelo ena aaku olng'anayioi olulung'a le nkitayunoto e ng'oki enye: te nelo ninye aitobir isoito pooki loo lperereni loo lasarri, nerrorro anaa ilboro le nturoto, meitoki atii Asherim anaa lasarri le nkorropil ooitoki aaitashe. Amu ore ina anasa nasheta netomijoono emanyisho apa naidurrieki nepuoi aaing'uaa, etotiuo anaa ong'ata, te ine edaa lasho, neirrag te ine negil ilng'osil lenyena. Ore kenya te netoyu lelo ng'osil lenyena, negili; nepuonu nkituaak aaitayunye enkima. Amu olorere ele lememuso; ore enkaraki ina, ore ilo oitobira ninche meduaaki ninche olng'ur, ore ilo oitobirua ninche meisho ninche omom. Ore kenya te ina olong, ebaiki olkeju le Frati o metabaiki oerata le Misiri, naa keiturrur Olaitoriani iltung'ana lenyena moobo, anaa oltung'ani osilu isuut te nkano. Naa ore akenya te ina olong kepuoi aaosh entarumpeta kitok, ore lelo apa ooimina te nkop e Asiria, o lelo oopuonu ootarayioki Misiri nepuonu aaserem Olaitoriani te nchumata ele doinyo sinyati te Yerusalem. Woi ninye ilo owuasa oata emaupe e nkitoo oo lamerak le Efraim, o ina tapukai natoyio oshi nara enkishiaa enye; naa ninye natii endukuya e ilo erata oleng le lelo ooidimua enaisho! Ng'ura, eeta Olaitoriani ilo obo magilani negol; ore anaa olkutati le nchan oo soito otiu anaa olkutati le nkidaata netiu anaa enkare nagol nadooyo kelo ninye anang'aki enkop te ngoro. Ore ilo oata emaupe e nkitoo loo lamerak le Efraim, naa kepuoi aaitunyoki enkop too nkejek. Ore ina tapukai natoyio enkishiaa enye, natii endukuya e ilo erata oleng, naa ketiu anaa ilng'abolo le dukuya ooton eng'or te nkata e nkirowuaj: te nedol oltung'ani ilo ng'anayioi neinos nabo kata anaa ake pee eibung te nkaina. Ore kenya te ina olong naa Olaitoriani loo lororani olo aaku emaupe enkitoo, neaku enkishili e nkishiaa te ilo pisiai loo ltung'ana lenyena; o ltau le sipata te ilo oton te nkiguana, o engolon te ilo oibelekeny olarrabal te kishomi. Etarruoitie sii lekua te naisho, neyukuyukori te merai e naisho napi, ore olapolosani o laiboni netarruoitie te naisho; etomilote ninche te naisho neyukuyukori ninche te merai e naisho napi, etapaashari ninche te nduaata, nerrorro ninche edung enkiguana. Amu eiputa lopat imesai pooki, meetae ewueji nemetii olduruk. “Kaing'ae ninye elo aiteng'en aitaarriyian, naa kaing'ae elo ninye ainosaki ilo kilikuai? Lelo ooereki, lelo lemeekure enakita? Amu enkiteng'enata te shumata nkiteng'enat, enkitanapata te shumata enkitanapata, olkereri te shumata olkereri, olkereri te shumata olkereri, etii enkiti ene netii enkiti idie.” A-a, kake too ltung'ana ooiro nkutukie nemeyioloi, neiro too lng'ejepa loo loreren, kelo Olaitoriani airorie iltung'ana lenyena, laa ninche apa etiaaka, “Ena enkiyeng'iyeng inyi, enchoo eyeng'iyeng'a ilo onaure, naa ena enkiyagata inyi”; kake ore eyia mening'isho ninche. Ore enkaraki ina kelo ororei lo Laitoriani aaku te ninche, enkiteng'enata te shumata nkiteng'enat, enkiteng'enata te shumata enkiteng'enata, olkereri te shumata olkereri, olkereri te shumata olkereri, enkiti tene, o enkiti te idie; pee etum ninche aashom, nebatatakino siadi, negila, nerreshi, neibung'i aaya. Ore enkaraki ina, entoning naa ororei lo Laitoriani intae iloo menisho, intae lelo ooitore kulo tung'ana le Yerusalem! Amu itejo apa intae, “Kintobira iyiook olning'o o keeya, ore enemeneng'a nikitoning'ote; te nelotu enkidaata nemeeta eneiko iyiook; amu kintaa iyiook elejare esarunoto ang, naa lomon lemesipa kilutoo iyiook”; ore naa, nji ejo Olaitoriani Enkai, “Kairragie nanu te Sion osoit oaku olkitamanyunoto, osoit otujurruoki aatem, osoit ogol e nkinyiang'a lo lmairroto: ‘Ore ilo oiruk ninye nemeisarrisar.’ Naa kaitaa nanu esipata olgiita naitaa esupatisho ina temet e nkitorioroto; naa keoroo enchan oo soito ina lejare o mbaa nemesipa, neya enkare ilo ng'obor olutori.” Ore ilo ning'o linyi o keeya neaku parmetii, ore ina nitoning'okinote o enemeneng'a nemeitoki auno; te nelotu enkidaata, naa eikiosh iyie. Naa ore ake enkata naba anaa enalotu nikiya iyie, amu kelotu ninye anaake tadekenya, o endama o enkewarie; ore eyiolounoto e ilo kilikuai naa olkirutoto ake. Amu kedorropu endapash te neitorioo oltung'ani nkejek, naa ronkai olkarasha te nejo oltung'ani aitoipore. Amu kedumunye Olaitoriani anaa apa to ldoinyio le Perasim, naa kegoro ninye anaa apa to erata le Gibeon; pee atum ataasa enkiaas enye, napaashaa, neas esiaai enye, ina siaai enye nemeyioloi! Ore naa taata emimenaa, pee meitirrishi ake ienat inyi, amu atoning'oyie nanu endung'okinoto e nkiguana e mutai, eing'uaa Olaitoriani Enkai oo lororani, eipirta enkop pooki. Nchoru enkiok, toning'o oltoilo lai; toning'isho, naa toning'o enajo. Amaa ilo oturisho pee eunisho keturisho anaake? Ketur ninye enkop enye neitupuyiapui enterit anaake? Amaa te neidip ninye aitobira enterit, emeisuaaki ninye enkop ilanterera lenyena loo mpukunot pooki, neun enkano too lkererin nepik shairi ewueji enye, neitobiraki enerishare? Amu eiteng'enaki ninye aaitobiraki; Enkai enye naiteng'en ninye. Amu meidong'i ilmomo to soit oituutishoreki, nemeimieki ilanterera leijo lelo enkeju e ngarri; amu ore ilmomo o lanterera leijo lelo naa te ng'udi eidong'i. Keidong'i entapa oo mukateni? A-a, meidong'i o akenya; te nereu oltung'ani enkeju e ngarri enye te shumata e nkano eyiataa embarta, nemeidong ninye nagut. Olaitoriani loo lororani sii eing'uaa ena; ole nking'asia ninye too nkikoot, naa arriyia aisul te ng'eno. Woi ninye Ariel, Ariel, ina anasa apa natamanya Daudi Toponai ake to lari to lari; nchoo siruai emanikino. Kapik nanu Ariel osina, nelo aaku olkiyioi o enkishirata, nelo ninye atiu te nanu anaa Ariel. Naa kaalo nanu aman ang'adu too nkaloli pooki, naang'adu nanu too ltaleta naaitaman nanu iyie enkang. Neaku te negut te nkop ilo iyie airo, abori enterit eimu irorei linono; enkop eimu oltoilo lino anaa oltoilo, neing'oming'om oltoilo lino eimu enterit. Nebayu ilmang'ati linono anaa enterit napuyiapui, ore olorora loo larruok nebayu anaa suut. Naa keluamisho ninche too nkaitin, eikimutan iyie Olaitoriani loo lororani te ndarata, o te nkikirikirata e nkop, o to ltoilo kitok, o to siuo o to lkutati o te nkima nanyaisho. Ore ilo orora loo loshon pooki, oitayunye Ariel olarrabal, lelo pooki oarare ninye o wuejitin enyena neesheta, nepik ninye osina, nepuo aatiu anaa enkidetidet, enduaata e kewarie. Anaa te neidetidetu oltung'ani oata esumash einosita endaa, neinyototo te sumash enye eitu eraposho, aashu anaa te neidetidetu oltung'ani oata enkure eokito enkare neinyototo ninye te nkure enye eitu eok enkare, neaku neijia epuo aatiu ilororani loo loshon, lelo oarare oldoinyo le Sion. Entaa ate ilmoda, ninyanya kutukie, entaa ate ilemedolisho nimodokuku! Entaa lamerak, neme te naisho; eyukuyukori neme enaisho napi itooko! Amu etubukoko intae Olaitoriani oltau loo njio naairoishi, neikeno ninye nkonyek inyi intae iloibonok, neikeno lukuny inyi lelo aduaak. Ore enduaata ena pooki netotiwuo te iyie anaa irorei le mbuku natimishiraki aaiken neishooyo oltung'ani meisuma ilo oyiolo aisuma, ejo, “Isuma ena,” nejo ninye, “Maidim nanu, amu etimishiraki aaiken.” Naa te neisho ninche embuku oltung'ani lemeyiolo aisuma nejo, “Isuma ena,” nejo ninye, “Mayiolo aisumayu.” Neitoki Olaitoriani ajo, “Ore enkaraki naanyikaki naanyor nanu kulo tung'ana too nkutukie naayanyit ninche nanu too nkutukie, aalamita iltauja lenye, ore euriata enye te nanu naa enkitanapata oo ltung'ana nayiolo ake too lukuny; Ore enkaraki ina, ng'ura kaigil nanu aitaas mbaa e nking'asia kulo tung'ana, mbaa e nking'asia sapuki; ore ina ng'eno oo lang'eni lenye neish, ore ina musunoto e lelo amusok lenye neishieki.” Woi ninche lelo ooturoki enkop aaisudoriyie Olaitoriani mbaa enye, lelo ootii mbaa enye enaimin, lelo oojo, “Kaing'ae nadol iyiook? Kaing'ae nayiolo iyiook?” Imbelekenyenye intae mbaa e atua aayau oriong! Amaa olaitobirani loo motioo oo nkulukuok, keitanyaanyukieki nkulukuok; eji metaa kejoki entoki naitayioki ilo oitayu, “Eitu ninye aitayu nanu,” aashu ejoki entoki naitobiraki ilo oitobira, “Meeta ninye ening'unoto”? Aime enkiti rishata nang'or pee eitaa Lebanon enkurma naleng, ore ina kurma naleng neibelekenyi aaitaa entim? Ore kenya te ina olong naa kelo ilo ming'ani aning irorei le mbuku, ore te misimisi o enaimin nedolishoyu nkonyek e ilo modooni. Ore ilo obor neng'amu ninye eng'ida ng'ejuk naing'uaa Olaitoriani, ore olaisinani aisul iltung'ana nelo ashipakino ilo sinyati le Israel. Amu, ore ilo le meeta olng'ur naa keishieki neiting'ieki ilo oitokoos, ore lelo pooki ooing'or pee eas entorroni nedung'ori aaiwuang'ie, lelo ooitapong'oo iltung'ana too rorei aaitasur, nepikaki orreshet ilo oisikong'isho te kishomi, ore to sayia le pesho neibelekeny arriny ilo asipani. Ore naa nji ejo Olaitoriani, laa ninye apa otokordua Abraham ti alo enkaji e Yakobo: “Meigil ae kata Yakobo adol enkurruna, nemeigil ae kata enkomom enye aipusu. Amu te neing'or ninye nkera enyena, ina siaai oo nkaik aainei ti atua ninye, neitisiny ninche enkarna ai; neitisiny ninche ilo Osinya le Israel. Ore lelo oopong'ori too ltauja nepuonu aayiolou, ore lelo ooing'unyung'uny neng'amaa nkitanapat.” “Woi ninche nena kera kiseruti,” Olaitoriani ojo, “lelo ooitobir enkitobirata neme enaai; lelo ooitayu mbaa enye nemetii oltau lai, pee etum ninche aatoponai eng'oki te shumata eng'oki; lelo oonapa pee edoyio aapuo Misiri nemaaikilikuanishore ninche, pee epuo aasaru emitunoto e Farao, nepuo aaing'oru eneigara to loip le Misiri! Ore enkaraki ina keibelekenya ina mitunoto e Farao aaku enkurruna, ore ine ning'arara to loip le Misiri, neibelekenya aaku osina linyi. Amu ore hoo netii ilkituaak lenyena Soan nepuo ilbalusuni lenyena aabaiki Hanes, kepuonu ake aakurru pooki ti alo ilo orere lemeidim aataret ninche, nemeyau eretoto aashu dupoto, kake enkurruna ake o esulare.” Olkilikuai oipirta ing'uesi naatii Negeb, ina kop pooki natii enyamali o sina, ine nepukunye elipong olng'atuny o lng'atuny, entara o enturbubua, nenap ninche karsisisho enye too nkoriong'i nenap ilchumat lenye too ntamesin aayaki ilo orere lemeret ninche. Amu ore eretoto e Misiri naa pesho, ina pee atejo nanu ninye, “Rahabu ina naton aitirring'a.” Ore naa taata, shomo ngero ina te dukuya ninche too soito dapashi oogueta nintoki asiraki ninye embuku, pee etum ataa te nkata nalotu enchakenisho ntarasi. Amu olorere kiseruti ninche nkera naalejisho, nkera nemening ninche enkiteng'enare o Laitoriani; lelo oojoki iladuaak, “Emidolisho” nejoki iloibonok, “Emimbonoki iyiook esipata; entoliki iyiook mbaa nemeitureisho, embonu mbaa o lng'am, tung'uai enkoitoi, mbelekenyayu tapaasha enkoitoi, mincho king'il iyiook aaning mbaa e ilo Osinya le Israel.” Ore naa nji ejo Ilo Osinya le Israel, “Ore enkaraki nitemenaitie intae ele rorei, nisiligigi olwuasa o enkiser, ningarakino ninche, ore enkaraki ina, kelo ena ng'oki atiu te ntae anaa olbaata le suntai naado netaa kejo pee eurori, naa ore euroroto enye naa nabo kata; ore embelata nalo abela netiu anaa emoti oo nkulukuok naitiaaki aaotiki ore mbelat enyena nemeitoki asotunoyu, meitokini ninye aatum embelati nayayieki enkima aashu naokunyeki enkare to lchorro.” Amu nji ejo Olaitoriani Enkai, Ilo Osinya le Israel, “Ti nishukunye ayeng'iyeng'a nikintajeuni; te nkitirring'ata o te nkisiligata elotu engolon ino.” Nimiyieuu intae. Kake itejo, “A-a! Eikikuet iyiook too mbartan,” ore enkaraki ina, ikuetikuete aapuo, “Ore iyiook nikikuetie mbartan aakuet oleng,” neaku keten oleng lelo oosuj intae. Keisik aailanyisho ilkulinyi oora enkalifu te nebuak oltung'ani obo, ore te mbuakunoto oo ltung'ana imiet nikuet ailanyisho o mikitung'uari, nitiu anaa enchata naunieki enanka te nchumata oldoinyo. Ore naa kiaanyita iyie Olaitoriani pee king'urrie; neaku keisisi ninye, pee etum aing'urrie intae. Amu ore Olaitoriani naa Enkai oo sipat; emayiana lelo pooki ooanyu ninye. Ee, lo tung'ana le Sion kulo oomanya Yerusalem; mingiligili ae kata aaishir. Esipa keing'urrie ninye intae te ina kishirakinoto inyi; te nening ninye ilo kiyioi linyi, naa kewaliki intae. Naa ore hoo neisho intae Olaitoriani endaa e nyamali o enkare o sina, meigil Olaiteng'enani linyi aisudoo kewan, kake kedol nkonyek inyi Olaiteng'enani linyi. Ore nkiyiaa inyi te siadi intae, nening oltoilo ojo, “Nena enkoitoi, eima intae ine,” ti nimbelekenyanya intae aapuo enkalo e tatene aashu enkalo e kidienye. Nipikipiki intae olduruk nena kitanyaanyukot naapising'a te nkosholai, o nena naasholuno e sahabu. Nindapashaa intae ninche anaa ntokitin nemesinya; nijokiki intae ninche, “Enchom nimiitutu!” Naa keirriwaki intae Olaitoriani enchan te nkaraki lelo anterera lituuno o ina kurma nabulu te nkop, nalo aisho te nkumoi. Ore kenya te ina olong naa kepuo nchoo inyi aadaa too ndaat naalala. Ore ilmong'i o sirkon ooturisho neinos olkujita otudung'oki oisukutieki. Ore te pooki doinyo oado, o pooki doinyo naikarere, naa kejing nkonyek oo nkariak ina olong kenya eyiang'are kitok te neurori iltaleta. Ore ake sii naa kelo ewang'an o lapa atiu anaa ewang'an e nkolong. Ore ewang'an e nkolong neaku katitin naapishana, anaa ewang'an oo nkolong'i naapishana, te ina olong kenya nalo Olaitoriani aen olbae too ltung'ana lenyena, neishiunye lelo baa apa le oshoto enye. Ng'ura kelotu enkarna o Laitoriani eing'uaa enelakua, neyupuyup engoro enye netii empuruo kitok; ore enkutuk enye nebore engoro, ore olng'ejep lenye neikununo anaa enkima nanyaisho; ore enkiyang'et enye neikununo anaa enchorro naruko adooyo neilepu enkare o metaa keitabaiki oltung'ani olgos; pee esil ina are lelo oshon te silet e nkidaata entorroni, nepiki nkutukie oo loreren nkeenta naaitapong'orieki. Ipuopuo intae aatiu anaa iloata osirua osinya kewarie iranyishosho. Nitumutumu eng'ida o ltau nitiuu anaa te neoshi enkinanta pee epuoi oldoinyo lo Laitoriani, ina dapidapoi e Israel. Naa keisho Olaitoriani ilo toilo lenye le nkitoo metoning'o pooki ng'ae, ore ina oshoto e nkaina enye nedou metodoli te ngoro napi o te nkima namutisho, te nebo olkutati o enchan oo soito. Ore lelo le Asiria naa keiput enkiputukuny o lkirutoto te nening ilo toilo lo Laitoriani, ina kata eoshisho ninye te ng'udi enye. Ore eosh Olaitoriani, ninche aigil, netoni iltung'ana lenyena aaranyisho too lwululi o too nkai oo sinkolioitin Enkai makewan naarare ile Asiria. Amu eidipaki apa aaitobira ewueji neyupuyup; ee te nkaraki ilo aiguanani, eitobiraki endapasho o enguton, netii ilkeek kumok o enkima kitok. Naa enkiyang'et o Laitoriani naikununo anaa enkima nakutu isoito. Woi ninche lelo oodoyio aapuo Misiri aaing'oru eretoto, neisilig mbartan, lelo oong'idare ngarrin oo mbartan eji amu aikumok, o lelo akedok loo mbartan eji amu kegol ninche oleng, kake meing'orninche Ilo Sinyati le Israel, aashu eikilikuanishore ninye! Naa ng'en ake sii ninye neyau enkidaata, merrinyokino ninye irorei lenyena, kake kedumakino ninye ina aji oo larruok, nedumakino lelo aretok le lelo oas entorroni. Ore lelo le Misiri naa iltung'ana, mme Enkai; ore nena bartan enye naa nkiri, mme nkiyang'eta. Te neitorioo Olaitoriani enkaina enye, neikirikira ilo oretisho, ore ilo oretitoi nebatata, neidak pooki te nebo. Amu nji nanu aatiaaka Olaitoriani, “Ore anaa enaikurrukur olng'atuny anaa olkuoo lo lng'atuny te ina ng'ues natara, naa te neipotuni olturrur loo lairritak meetu aarare ninye, nemeiture ninye nena buakunot enye aashu eirutie enkilepilep enye, neijia eikununye Olaitoriani te nedou alotu aitayu olarrabal te nchumata oldoinyo le Sion, o te shumata endoinyo enye. Ore anaa enaitoip e motonyi, nkera enyena neijia eiko Olaitoriani loo lororani emitu Yerusalem; kerrip neitajeu ninye, kemitu nekordu ninye.” Embelekenyakinoto ilo apa litogolong'akitia oleng, lo tung'ana loo Siraeli. Amu ore kenya te ina olong, naa kenang'aa pooki ng'ae nena kitanyaanyukot enyena oo nkaitin e nkosholai, o nkitanyaanyukot e sahabu, apa naaitobirutua nkaik inyi too ng'ok, te nkaraki intae. “Naa kebatata ile Asiria to lalem, leme olayioni le tung'ani; ore ilo alem leme olayioni le tung'ani neinos ninye; naa kelo ninye ailany ilo alem, ore elelero enye nepuoi aapik esinkaisho. Ore ilo oitaa ninye endapidapoi neisik to lkirutoto, ore lelo kituaak lenyena neilanyisho aaing'uaa inankan enye te nkiputukuny,” neijia ejo Olaitoriani otii enkima enye Sion netii olkokuet lenye atua Yerusalem. Ng'ura kelo olaiguanani aitoreisho too sipat, nepuo ilkituaak aaitoreisho too nkiguanat naasipa. Kelo ake atiu te pooki lenye anaa eneigarae te nkaraki olkutati, olchurie te nkaraki olkutati, netiu anaa nchorroi oo nkariak te nkop natoyio, netiu anaa oloip le ndapidapoi kitok te nkop e nauri. Ore nkonyek e lelo oodol nemeitokini aaiken, ore nkiyiaa e lelo ooning nening. Ore oltau le ilo opuny netum mbarakinot, ore olng'ejep le ilo oiramiram neiro aitorioki. Nemeigili aajo oltung'ani omoda kedupa, nemeji lelo aisimak eji keleng. Amu mbaa e modai eiro olmodai nedamu mbaa entorroni to ltau lenye; pee etum ataasa ntorrok, neiro mbaa naapaashaa ti alo Olaitoriani, neing'uaa lelo ooisumash meeta toki, nemitiki ilo oata enkure enkare. Ore enkeleekisho e ilo kiminchali naa entorroni, entorroni eipiru ninye pee einyal ilo omena too rorei le lejare, hoo duoo ninye tenaa kesipa ewalata e ilo omena. Kake ore ilo supat neiro mbaa e supatisho, ore too mbaa e supatisho neitashe ninye. Enyeito intae kuna kituaak naaisikarra, entoning oltoilo lai; natoyie kuna nemeshilaa toki, entoning enkiroroto ai. Ore te nkiti rishata naba anaa olari obo, nipuopuo intae aatum enyamali, intae kuna naaishiliga; amu meitoki aatii ilng'anayio, meitoki atii enkisampuare oo lng'anayio. Enkirikirata intae nakituaak kuna naaisikarra, entayu nkilani metaa minchopopo, nirretenene ilkuniyiani. Entooshiosh ilgooitie linyi te nkaraki nena kurman sidain, te nkaraki nena kurman oo sabibu naatoishete oleng. Ore te ina kurma oo ltung'ana laainei nebulu ilkiku o endiati ee too nkajijik e nchipai te ina anasa e ng'ida. Amu kepuoi aaing'uaa ina aji e nkitoo, neing'uari ina anasa naning'o; ore endoinyo o ine nerripishoreki nepuo aaku iwuejitin oo ng'uesi ntarasi, ewueji neitigiranie loitikoishi, neaku ndaat oo nkerrai; ometaba anaa nebukokini iyiook Enkiyang'et naing'uaa shumata, neaku ong'ata ewueji neisho oleng, ore ine neisho neiu ilng'anayio kumok. Netum taa esupatisho atamanya ina ong'ata, nemany eseriani atua ina kurma naisho. Ore esupatisho neiu eseriani, ore esupatisho neyau enkitirring'ata o nkirukoto ntarasi. Kepuo iltung'ana laainei aabik te manyisho e seriani ntarasi, ti atua ewueji e nkirrita oo wuejitin neeitirring'areki aayeng'iyeng'are. Ore entim neurori katukul, neurori katukul ina anasa. Imayianana intae lelo oounisho te mbata oo nkariak pooki, lelo ooisho ilmong'i o sirkon eidapashari aapuo. Woi iyie ora olainyalani, leton eitu kinyali iyie, niaata enkeleekisho, neitu iyie kintaasi embae e nkeleekisho! Ore ake pee indip ainyalisho nikinyali sii ninye iyie; ore pee indip mbaa inono e nkeleekisho nikintaasi iyie inenkeleekisho. Olaitoriani ing'urrie iyiook, iyie iyiook kiaanyita. Taa enkaina ang anaake tadekenya, neaku enjeunoto ang te nkata e nyamali. Ore to ltoilo le ndarata neisik iltung'ana, ore ti nidumunye iyie neidapasha loreren. Naa kearari intokitin inono neishunye anaa enaishu oimaat enkop; anaa enaitiam olmaati te nkop, neitiam iltung'ana te nkop. Keisisi Olaitoriani, amu etii ninye shumata oleng; keiput ninye Sion esipata o esupatisho. Naa ninye olo aaku enkitashoto too nkatitin inyi, neaku kitok enjeunoto, o eng'eno o eyiolounoto; naa euriata o Laitoriani ninye olchumati lenye. Ng'ura lelo oing'ok, eishirita ninche ti auluo; ore lelo balusuni le seriani, neishirita te mion. Etoliyiote nkoitoi sapuki meekure eetae olalotoni. Etigile olning'o, netemenayioki ilchakenini, meetae oltung'ani oshilaa olikae. Eishirita enkop netalepori to sina; etumute Lebanon netoyio; etotiuo Sharon anaa olpurkel; ore Bashan o Karmel neipiripiroitie mbenek enye. “Kadumunye nanu taata,” Olaitoriani ojo, “Ore taata kaitashe nanu; naa kaayiolouni nanu taata. Ntobiribiri intae mbaa naaijo suut, nipuopuo aayau mbaa e pesho; ore enkiyang'et inyi naa enkima namut intae. Netiu olorere anaa ilootapejoyioki aaitaa enkuruoni, netiu anaa ilkiku ootudung'oki nepejori te nkima.” Entoning intae lelo oolakua, ina nataasa nanu; ore intae kulo oolakua, entayiolo enkidimata ai. Ore lelo aing'okok ootii Sion neiruto; eibung'a olokirikiri lelo lemeyiolo Enkai: “Kalo ti atua iyiook oidim atotona te nkima nanyaisho? Kalo ti atua iyiook oidim atobiko te nkima oo ntarasi?” Ore ilo olo too nkoitoi naaitoriori neiro sipat, ilo omenaa tumoto e nkitorogonyare, ilo oipirripir nkaik enyena meibung ntokitin e ropare, ilo oiken nkiyiaa enyena pee mening enkibukoroto o sarge; neiken nkonyek enyena pee meing'or entorroni. Ilo ninye olo aton too wuejiitin e shumata; ore ewueji e nkirrita naa isempewueti too soito; nepuoi aaisho ninye endaa o enkare. Keyooki nkonyek inono aaing'or olaiguanani te nkishiaa enye; neing'or ninche aaing'or ina kop dapash oleng. Nepuo indamunot inyi aaing'asia te ilo kirutoto, nijojo, “Koree ninye ilo apa oikenisho, Koree ninye ilo apa oineneng atem kodi? Koree ninye ilo apa oiken iltaleta?” Mingiligili ae kata aadol lelo tung'ana leeiking'a, lelo tung'ana limiyiololo intae enkutuk enye nimindimidimi aatoning'u ooiramiram te nkutuk nimining'ung'u. Eng'ura Sion, ina anasa gelunoti nikipolosishore iyiook! Kepuo nkonyek inono aadol Yerusalem, ina manyisho naitirring'a, ilo ng'obor lemeigusugus, lemedotunye ae kata nena sheito naaunore, nemedung'o nena keenta naaenare. Ore te ine nelo Olaitoriani te nkitoo aaku te nebo iyiook ewueji ine netii ilkejek dapashi o erat, nemeim ine imelin e enkitoo. Amu Olaitoriani ninye olarishani lang Olaitoriani ninye olo aitore iyiook, Olaitoriani ninye olaiguanani lang; keitajeu ninye iyiook. Eitololong'ita nkeenta e meli; meitirrishayu ninche. Ore nena masaa kumok neori keyae o mewaita ilmaiman. Nemeetae obo omanya ina kop ojo, “Kamuei nanu”; ore lelo tung'ana oomanya ine naa kepalakini ing'ok enye. Entinyiku intae looreren, pee ining'ining'i, entoning intae lo tung'ana! Nchoo metoning'o enkop o nena pooki naatii atua Nchoo metoning'o enkop o nena pooki naapuku tiatua enkop. Amu etagorokine Olaitoriani iloshon pooki netagorokine ilmang'ati lenye, eiturrayie ninye ninche, eishooyie ninche aisho lelo oomut ninche. Kenang'ari mpopoki neye, nerupa mpopoki enye eidapashakino enkop, neruko osarge lenye aim nchumat oo ldoinyo. Ore olorora le keper nerrarra aaku enterit. Ore oloing'ang'e pooki nepiyaya anaa endapana ore ilo orora pooki nerrarrunye anaa enasulunye mbenek o lng'aboli, anaa enasulunye ilng'abolo ooto to lchani. Amu etudumunye olalem lai netaraposhe te shumata; ng'ura kesulakino ninye Edom te nkiguana, eumata lelo tung'ana latudung'oko nanu enkiguana. Eeta Olaitoriani olalem oiputa osarge, neimulumulita eilata, te nebo osarge loo lkerra o lkineji, te nebo enkurriny oo lairakuj oo lkerra, amu kelo Olaitoriani aibung olasar te Bosara, kelo ninye aitayu esesekuanare kitok te Edom. Naa kedoiki ilosokuani ninche, te nebo ilmong'i o loing'ok magil. Ore ina kop enye neiput osarge, ore ina kop enye nenyilu te ilata. Amu eeta Olaitoriani enkolong e lap, ina olong nalo aitalaku elap te nkaraki Sion. Ore ilkejek le Edom neibelekenya aatiu anaa enkoronko, neaku enkulukuoni enye enkima nakutu isoito neaku ina kop enkoronko nayupuyup. Ore dama o kewarie nemeye ina kima; neilep empuruo enye alo shumata ntarasi. Ore too ishoritin pooki neaku ina kop mijooni; nemeitoki oltung'ani aim ntarasi o ntarasi. Kake kelo aaku le nkalem o yiyai otii ina kop ore emotonyi oo nkiyiaa o lkurruk nemany ine. Neitorioki Olaitoriani olmilo ina kop nedoiki enyamali lelo kituaak lenyena. Neipoti ine aajo, “Enemetii enkitoria”, ore lelo kituaak lenyena pooki neaku pesho. Nebulaki ilkiku lelo sempewueti lenyena nebulaki olkurushashi o suut lelo sempewueti lenyena o nkang'itie enyena naagol. Nelo ine aaku emanyisho oo mbariak ewueji nemany isidan. Nepuo mbariak aashulare ilng'ojiniaa, neipotu oloirirua le ntim olikae, nejokino, ee, eisidai enkewarie tene, neing'uraki kewan ewueji neyeng'iyeng'are. Te ine elo entaritiki aitobir enkaji enye, nepik inkiyioitin enyena abori oloip lenye; ee te ine epuo aaiturrurro ilkurragoso epuo maare. Ing'oru isuma te mbuku o Laitoriani; meetae hoo nabo e kuna nemelo aaku; nemeetae ake enemelotu eboitare enkae. Amu enkutuk o Laitoriani naitanapishe, naa Enkiyang'et enye naiturrurro pooki. Etooshoko ninye ninche enkukuo, enkaina enye natoorikia ninche rubat enye too lkererin; kepuo ninche aaya ina kop ntarasi, ore too ishoritin naa kepuo ninche aamany ina kop. Keng'idayu olpurkel o enkop natoyio, neng'idayu ilo purkel neleng'u oleng; neiput ntapuka keleng'u ninye oleng, neranyisho te ng'ida. Ore ina kitoo e Lebanon neishori ninye, ore ina kitoo o enkishiaa e Karmel o Sharon. Nedol enkitoo o Laitoriani, ina kitoo e Nkai ang. Ntagolo nena aik naatalepori, ntasheyie ilo oikirikira te nkuretisho. Tiaaki lelo ootureishote, “Entagoluoto, emiureishoyu! Eng'ura Enkai inyi elotu te lap, eeta olerrinyore le Nkai, Kelotu ninye aitajeu intae.” Ore ilo modooni neboli nkonyek enyena, neitoning'ishoi ilo ming'ani; neipid olmaima anaa enkoilii, neranyisho olng'ejep lo lemeyiolo airoro te ng'ida. Amu keijirrijirru nkariak to lpurkel, neiput nkonyek oo nkariak enkop natoyio. Ore ilo sinyai oirowua naa kelo aaku olchorro, ore ina kop oo lbaat neijirrijirru enkare, ore ina manyisho oo mbariak nelo aaku engilata naleng, netiu nena kujit anaa oseyiai o enarau. Nejing enkoitoi kitok ine, naji Enkoitoi Sinyati; nemepuo aaim ine iltung'ana lemesinya, ore ilmoda nemepong'okino ine. Nemejing olng'atuny ine, nemelotu ae ng'ues ake ninye torrono; mepuoi aatum ninche te ine, kake lelo ootokorduaki ake oopuo aaim ine. Naa lelo ooinyiang'ua Olaitoriani ake oopuo aarrinyunye, nepuonu Sion eranyisho; nejing eng'ida oo ntarasi shumata ninche; nepuo ninche aatum enchipai o eng'ida, ore osina o emion neilanyisho aapuo. Ore to lari le tomon oong'uan le nkitoria e Hesekia, nelotu Senakerib ilo aiguanani le Asiria nena anas pooki naasheta e Yuda, neibung ninche. Ore ilo aiguanani le Asiria neirriwaa olkitok obo le nkitoria enye te Lakish meshomo enetii olaiguanani Hesekia te Yerusalem eeta enjore kitok. Nelo ninye aitashe te mbata olchorro le shumata, te ina oitoi natii olaitobirani loo nkilani. Nelotu Eliakim olayioni le Hilkia enetii ninye laa ninye apa oitaisheiki ina aji e nkitoo. Nelotu sii Shebna ilo aigeroni, o Yoa olayioni le Asafu laa ninye oikenisho. Nejoki ilo kitok le njore ninche, “Entiaaki Hesekia, Nji ejo ilo aiguanani kitok, ilo aiguanani le Asiria: Kainyoo iyie ing'idare? Eijo iyie keaku rorei ake duoo enkoitoi nagol napuoyieki olarrabal? Kaing'ae taata iyie ingarakino, eji peyie kimpirakinore nanu? Ng'ura, Misiri iyie ingarakino, naikununo anaa eng'udi o ltiyani natigile, nerem enkaina e pooki ng'ae otirman ninye.” Kake ti nikijoki, “Olaitoriani Enkai ang iyiook kingarakino, aime ilo otii ilperereni lenyena loo lasarri shumata, eiwuangie Hesekia lelo perereni, ejoki Yuda o Yerusalem, Ipuopuo intae aaserem te dukuya ele perere lo lasar? Wou naa taata, toning'ore olkitok lai, ilo aiguanani le Asiria, amu kaaisho nanu mbartan nkalifuni are, tenaa indim iyie te nkalo ino anoto ilakedok pee eked ninche. Kaji naa iyie inko pee intukurru ilo arikoni obo le njore ti atua lelo kulikae aisiaayiak ti abori, eji isiligita Misiri, mikirriwaki mbartan oo ngarrin o lakedok lenye. Amaa, ijo kaewuo nanu ena kop metii Olaitoriani aidaikie nainyal? Aatiaaka nanu Olaitoriani, Shomo taarare ena kop, ninyal ninye.” Neitoki Eliakim o Shebna o Yoa aajoki ilo kitok le njore, “Kitoomono iyie, irorie isinkan linono ti ae kutuk nikiyiolo, mirorie iyiook te nkutuk e Yuda metoning'o iltung'ana ootii esuntai.” Kake etejo ilo kitok le njore, “Kaairriwua nanu olkitok lai maeu airorie olkitok linyi, o intae, nemairorie lelo ootoni te suntai, laa ore ninche te nebo nipuopuo aainos nkik inyi niokioko nkulak inyi?” Neitoki ilo kitok le njore aitashe nebuaku to ltoilo kitok te nkutuk oo ltung'ana le Yuda, ajo, “Entoning irorei lo laiguanani kitok, ilo aiguanani le Asiria! Nji ejo olaiguanani, Emincho Hesekia meteleja intae, amu meidim ninye atokordu intae. Emincho Hesekia ejoki intae eji maigarakinoto Olaitoriani, eji ejo, Kelo Olaitoriani akordu iyiook; ore ena anasa nemelo ninye ajing nkaik o laiguanani le Asiria. Emining intae Hesekia, amu nji ejo olaiguanani le Asiria. Entobira intae osotua o nanu nipuonunu enatii nanu, pee etum pooki ng'ae te intae ainosa isabibu lenyena, o lng'abolo lenyena, neok pooki ng'ae te intae enkare o lchorro lenye; o metaba anaa nalotu nanu aya intae ina kop nanyaanyukie enkop inyi, ina kop e ntapa o sabibu, ina kop natii endaa o lng'anayio. Enteng'enuoto melej ake intae Hesekia ejo, Kelo Olaitoriani akordu iyiook. Keetae ae kata enkai oo loshon natokordua enkop aitung'uaa enkaina o laiguanani le Asiria? Koree nena aitin e Hamat o Arpadi? Koree nena aitin e Serfarfaim? Ketokordutua ninche Samaria aaitayu te nkaina ai? Kaa too nkaitin pooki e kuna kuapi natokordua enkop enye aitayu te nkaina ai, eji metaa kelo Olaitoriani akordu Yerusalem te nkaina ai?” Kake etigirate apa ninche neitu ewaliki olomoni hoo obo, amu ore apa enkitanapata o laiguanani naa, “Eming'amaa intae ninye.” Neitoki Eliakim olayioni le Hilkia laa ninye olaitasheikinoni le nkaji e nkitoo, o Shebna, laa ninye olaigeroni, o Yoa olayioni le Asafu, ilo aikenani, aapuonu enetii Hesekia etopolosa ilkilani lenye. Neinosaki ninye irorei le ilo kitok le njore. Ore ake pee ening olaiguanani Hesekia ina, nepolos ilkilani lenyena, neimulumul kewan too ilkuniyani, nelo ajing atua enkaji o Laitoriani. Neirriwaa Eliakim laa ninye apa oitasheki ina aji e nkitoo, o Shebna ilo aigeroni, o lelo apolosak kituaak, eishopo ilkuniyani, meshomo enetii oloiboni le Nkai Isaya, olayioni le Amos. Nejoki ninche ninye, “Nji etejo Hesekia, ‘Ore ena olong naa enkolong o sina, enkolong e moroto, o esulare; etaa keini nkera nemeetae engolon naiunyeki. Ebaiki netoning'o Olaitoriani Enkai ino irorei le ilo kitok le njore, oirriwua olkitok lenye, ilo aiguanani le Asiria meeu asukeny Enkai naishu, nesurdaanyisho te lelo rorei ootoning'o Olaitoriani Enkai ino; ore enkaraki ina ilepie enkomono ino te nkaraki ilo pisiai otelekua.’ ” Ore ake pee epuonu ilaisiaayiak lo laiguanani Hesekia enetii Isaya, nejoki Isaya ninche, “Entiaaki olkitok linyi, ‘Nji ejo Olaitoriani: Emiureishoyu te nkaraki lelo rorei litoning'o, laa ninche aaisikong'ie osinka lo laiguanani le Asiria. Ng'ura, kapik nanu ninye enkiyang'et nelo aning olmarenke, nerrinyokino ninye enkop enye makewan, naa kaisho nanu ninye metua to lalem oibung'ita ninye te nkaina enye makewan.’ ” Nerrinyo ilo kitok le njore, nelo ainepu olaiguanani le Asiria earare Libna; amu etoning'o apa ninche ajo eshomo olaiguanani te Lakish. Nening ilo aiguanani mbaa naaipirta Tihaka olaiguanani le Etiopia nchere, “Kirriwaka ninye olkilikuai pee kilotu aarare.” Ore ake pee ening ninye ina neirriwaki ilkiliku Hesekia, ejo, “Nji enchom entiaaki Hesekia ilo aiguanani le Yuda, ‘Mincho kilej ina Ai ino naa ninye isiligita, ejo esiligie olorere ajo meishoori Yerusalem aapik atua nkaik o laiguanani le Asiria. Ng'ura, itoning'o enaitaasa ilaiguanak le Asiria nkuapi pooki, neinyal ninche aaidaikie katukul. Eikipuoi doi aakordu iyie? Ketokordutua nena aitin oo loshon ninche, lelo oshon apa ooidaikie loo papa, Gosan, o Haran, o Resef o lelo tung'ana le Eden apa ootii Telasar? Koree taata olaiguanani le Hamat, o laiguanani le Arpad, o laiguanani le nkanasa naji Sefana o laiguanani le Hena aashu olaiguanani le Efaa?’ ” Neng'amaa olaiguanani Hesekia ina palai te lelo ooirriwuaki, neisum ninye, Neilep Hesekia alo enkaji o Laitoriani, nelo aisalaash ina palai te dukuya Olaitoriani. Neomon Hesekia Olaitoriani, nejo, “Olaitoriani loo lororani, na Ai e Israel, niton to lorika lino le nkitoo te shumata ilkerubi, naa iyie Enkai, iyie ake, ore too nkitoriat pooki e nkop nintobira iyie shumata o enkop. Irrugu enkiok ino, Olaitoriani, toning'o, nibol nkonyek inono Olaitoriani aing'or; nining kulo rorei pooki le Senakerib, ooirriua ninye pee emor Enkai naishu. Ore te sipata Olaitoriani, eitomijoono laiguanak le Asiria iloshon pooki o nkuapi pooki. Netanang'akitia nkaitin enye atua enkima; amu mme nkaitin apa ninche, kake esiaai oo nkaik e tung'ana, nkeek o soito; neaku eidaikieki apa ninche. Ore naa taata Olaitoriani Enkai ang, ntajeu iyiook te nkaina enye, pee etum nkitoriat pooki enkop aatayiolo nchere iyie ake Olaitoriani.” Neitoki Isaya olayioni le Amos airriwaki Hesekia olkilikuai ejo, “Nji ejo Olaitoriani Enkai e Israel: Ore enkaraki nikitoomono iyie nanu te nkaraki Senakerub olaiguanani le Asiria, ele ninye ilo rorei oiroro Olaitoriani eipirta ninye: ‘Eikimen ninye iyie, eikisukeny ninye iyie - ena tito e Sion; neipirripir endukuya enye te siadi iyie - na tito e Yerusalem. Kaing'ae doi ilo litamoro nisurdaany? Kaing'ae ilo litabuaka nishumaki nkonyek inono to lmena? Aime Ilo Osinya le Israel! Ore ti alo isinkan linono nitamoro Olaitoriani, nitejo iyie, ore too ngarrin aainei kumok or mbartan, nashomo nanu ailep enchumata oo ldoinyo, o atua Lebanon; naturoyie nanu ltarakua lenyena adoru, lelo keek lenyena sidain; ashomo nanu abaya shumata aisul, ina tim enye nasur. Atuturuo nanu ilchorroi naok nena ariak, natunuka too ndapi oo nkejek aainei nena onyek oo nkariak pooki e Misiri. Keitu iyie ining nchere aitobira apa nanu moitie? Ina taata nalotu aas, eji nipuopuo intae aaitaa nkanas naasheta osototi loo mauti. Ore apa meeta lelo oomanya ine engolon, neiruto neiputukuny, netiu ninche anaa nkaitubulu e ong'ata, netiu anaa nkujit naanana netiu anaa nkujit naatii shumata e nkaji, naaidaikieki eitu ebulu. Ayiolo nanu olwuanet lino o eninkunari te nimpang o ti nijing'u, o ina nikigorokino nanu. Ore enkaraki nikitagorokine iyie nanu neewuo ilo wuasa lino abau nkiyiaa aainei, kapik nanu olororoi lai nkumeishin inono napik esekenkei enkutuk ino, abaaya naaibelekeny iyie aipirie ewueji duoo ning'uaa.’ “Naa kelo ena aaku olmonekie te iyie: ore tele ari inosa pooki toki nabulu openy. Ore to lari li are inosa ina nabulu aikununye neijia; ore to lari li okuni tuunisho, nisampisho, niun isabibu, ninos ilng'anayio lenye. Ore ilo pisiai oleku le nkaji e Yuda, neitoki aaibung ntona ti abori, neiu ilng'anayio te shumata. Amu te Yerusalem eipang'u ilo pisiai naa oldoinyo le Sion eimu ina tukus e lelo ooleku. Amu Olaitoriani loo lororani olo aitabaya ena. “Ore enkaraki ina, nji ejo Olaitoriani ti alo ilo aiguanani le Asiria. Melotu ninye ajing'u atua ena anasa, anaa engoroo embae te ine, aashu elotu anyikaki eeta elong'o aashu eng'adu ninye. Ina oitoi naimu ninye eigil aim errinyo, nemelotu ninye ajing'u atua ena anasa, Olaitoriani ojo. Amu kamitu nanu ena anasa aitajeu, te nkaraki kewan ai o te nkaraki osinka lai Daudi.” Nelo olmalaika lo Laitoriani, nelo aar metuata iltung'ana nkalifuni iip o ntomoni isiet o imiet te lelo ng'oborri loo ltung'ana le Asiria. Ore ake pee einyototo iltung'ana tadekenya ng'ura, etaa duoo kulo pooki mpopoki. Neitoki Senakerib ilo aiguanani le Asiria arrinyo nelo aton te nkang enye te Ninawi. Ore eseremisho ninye te nkaji e Nisrok, ina ai enye, nepuonu Adramalek o Shereser, lelo ayiok lenyena, aasesekuan ninye to lalem, neisik aapuo oldoinyo le Ararat. Neitoreisho olayioni Esar-hadon te rishata enye. Ore apa te nena olong'i etamueyia Hesekia eyieu eye. Nelo ilo oiboni le Nkai Isaya olayioni le Amos enetii ninye, nejoki ninye, “Nji ejo Olaitoriani; Ntobira enkaji ino, amu iye iyie, minchiu.” Neibelekenyakino Hesekia esuntai neomon Olaitoriani ejo, “Tadamu taata Olaitoriani, aatasayia inchere ashomo nanu te dukuya iyie te nkisiligata pooki o to ltau pooki nataasa nanu ina sidai too nkonyek inono.” Neishir Hesekia oleng. Neitoki ororei lo Laitoriani alotu enetii Isaya, nejo, “Shomo tiaaki Hesekia, Nji ejo Olaitoriani Enkai e Daudi papaai lino: Atoning'o nanu enkomono ino, natoduaa nanu ilkiyio linono; ng'ura kaponiki nanu enkishui ino ilarin tomon o imiet. Kaakordu nanu iyie o ena anasa aitung'uaa nkaik o laiguanani le Asiria, namitu ena anasa. “Ele olmonekie te iyie oing'uaa Olaitoriani, nchere kelo Olaitoriani aas ena naisiligishore: Ng'ura, karrinyu nanu oloip iroruat tomon, te ine netabaikia te wueji nekedi e Ahas.” Neaku etorrinye apa enkolong siadi iroruat tomon te wueji duoo netabaikia. Ilkigerot kulo le Hesekia olaiguanani le Yuda, ina kata apa etamueyia ninye nenyaaka aishiu: Atejo nanu eitoritote nkolong'i aainei etaa kalo; aipirakinore nanu kishomi enemeneng'a, too larin pooki le nkishui ai. Najo nanu, madol Olaitoriani te ina kop oo looishu; maigil ae kata nanu adol iltung'ana ti atua lelo oomanya enkop. Etadotuoki emanyisho ai neiwuang'ieki te nanu, eikunaki anaa olng'obor lo lchekut; atununuko nanu enkishui ai anaa endapana, aaikuna nanu anaa enkila naitobiri te wueji neripishoreki; ore dama o kewarie nikiyau iyie nanu enkiting'oto. Aishira nanu o mekenyu aing'oru eretoto; negiligil ninye iloik laainei pooki anaa olng'atuny; ore dama o kewarie nikiyau iyie nanu enkiting'oto. Abuaku nanu anaa emotonyi aishirita anaa enturkulu, enaurate nkonyek aainei aimariri shumata. Iyie Olaitoriani, aaisoruoki nanu, taa iyie esarunoto ai! Kake kaa nanu ajo? Amu aairorie ninye nanu, netaasa ninye makewan ina. Eidurra njo aainei pooki te nkaraki ina mion o ltau lai. Iyie Olaitoriani, te kuna baa eishu iltung'ana, ore enkishui o ltau lai netii atua kuna pooki. Ooi, torrinyokoki nanu embiotisho nikincho manyaaki aishu! Ng'ura, te nkaraki eseriani ai apa pee anoto emion sapuk kake mbooyie iyie enkishui ai arishie ina gumoto e nkidaata, amu itanang'aka iyie ng'ok aainei oriong ino. Amu mikindim iyie enemeneng'a aishoo enashe, mikindim keeya aterrepa iyie; ore lelo oopuo aadoiki engumoto nemeidim aaisiligisho, te nkaraki ina supatisho ino. Ore ilo oishu, ilo oishu, ninye likincho enashe, anaa enaasita nanu ena olong; neitayiolo menye nkera enyena esupatisho ino. Kaaitajeu nanu Olaitoriani, naa eikipuo aaranyisho too nkinantani oo usin too nkolong'i pooki e nkishui ang te nkaji o Laitoriani. Netejo apa Isaya, “Nchoo ninche eya emukate oo lng'abolo neelie ninche ilo tudutai pee etum ninye aishiu.” Netejo sii ninye Hesekia, “Kainyoo olmonekie nchere kalo nanu Enkaji o Laitoriani?” Ore apa te ina kata neirriu Merodek-baladan olayioni le ilo aiguanani le Babilon olkilikuai eeta mpala o enkishoroto nayaki Hesekia, amu etoning'o apa ninye nchere etamueyia nenyaaka aishiu. Neitoomon Hesekia ninche; neitodol ninche ina aji enye nashumishoreki; neitodol enkosholai, o sahabu, o eilata nagol enkinyang'a, o kulie tokitin te nebo imasaa o iruparen o nena pooki apa naatii atua ina aji enye nashumishoreki. Meetae apa entoki hoo nabo natii atua enkaji enye aashu ina ang enye pooki neitu eitodol ninche. Neitoki ilo oiboni Isaya alotu enetii olaiguanani Hesekia nejoki ninye, “Kainyoo etejo kulo tung'ana? Naa kaji eing'uaa pee epuonu enitii?” Nejo Hesekia, “Eetuo ninche eing'uaa enkop nalakua, Babilon eing'uaa.” Nejo ninye, “Kainyoo ninche etoduaa te nkaji ino?” Newal Hesekia ajo, “Etodua ninche nena pooki naatii atua enkaji ai; meetae entoki natii atua enkaji ai neitu nanu aitodol ninche.” Neitoki Isaya ajoki Hesekia, “Toning'o ororei lo Laitoriani loo lororani: Ng'ura, kepuonu nkolong'i, ore nena pooki naatii atua enkaji ino, o nena pooki apa naatushuma loo papaai linyi o metabaiki ena olong, naa kenapi aaya Babilon, meetae entoki naleku, Olaitoriani ojo. Ore embata e lelo ayiok linono likitoikioki naa keyai sii ninche. Naa kepuo aaku sunaishi oogelema ti atua enkaji o laiguanani le Babilon.” Neitoki Hesekia ajoki Isaya, “Ore ilo rorei lo Laitoriani liroro iyie naa eisidai.” Amu etejo apa ninye, “Kelo atii eseriani too nkolong'i aainei.” Ntagolo iltung'ana laainei, ntagolo ltung'ana laainei, Olaitoriani ojo. Irorie Yerusalem te mborron, ninchiraki ninye tiaaki eisha olarrabal lenye, netapalakaki ninye ing'ok enyena, amu etang'amua apa ninye te nkaina o Laitoriani enkitalakunoto oo ng'ok enyena katitin are. Ening'o oltoilo oishirita: “Ore ti ong'ata ntobira enkoitoi o Laitoriani, Ntorioi to lpurkel enkoitoi tenkaraki Enkai ang. Ore pooki nong'oto negum neilepunyeki, ore pooki doinyo o ewueji nerupa neitadouni; ore ewueji nemeitoriori neitoriori, ore ewueji nemeisiaja neisiajayieki. Amu kepuoi aaibalunye enkitoo o Laitoriani, nedol iltung'ana pooki te nebo, amu enkutuk o Laitoriani nairoro kuna.” Ejo ilo toilo, “Nchira!” Najo nanu, “Kaaishir ajo aa?” Ore pooki naata osesen netiu anaa nkujit, ore ina kishiaa enye pooki etiu anaa entapukai e ong'ata. Etoyu nkujit, nerrarrarri ntapuka, te nekut enkiyang'et o Laitoriani ninye; esipa etiu iltung'ana anaa nkujit. Etoyu nkujit nerrarrarri ntapuka; kake ore ororei lo Laitoriani Enkai ang neuno ntarasi. Ilepa iyie shomo enchumata o ldoinyo oado, Iyie Sion, ntadarai lelo omon supati; ilepunye oltoilo lino te ngolon, Oo Yerusalem, ntadarai lelo omon supati, ilepie oleng, miureshoyu; tiaaki nena anas e Yuda, “Eng'ura Enkai inyi!” Ng'ura, kelotu Olaitoriani te ngolon, naa enkaina enye nalotu aitoreisho; ng'ura netii enkishooroto enye te nebo ninye, netii nchuneti enyena dukuya ninye. Keirrita ninye eluaata enye anaa olchekut, neibung ninye ilkuoo too nkaik enyena, nenap ninche to lgoo lenye, nerikoo maakutiti nena oijoo. Kalo otetema enkare te ndap e nkaina enye netem shumata te nkitorioroto e nkaina enye, neishaki enterit e nkop pooki te ntemet neineneng ildoinyo o ndoinyo to orrantili kalo otuutayie Enkiyang'et o Laitoriani, aashu anaa olaikooni lenye neiteng'en ninye? Kaing'ae eikilikuanishore ninye pee etum ataarriyiana, naa aing'ae oiteng'ena ninye te ina neitodol ninye enkoitoi e Yiolounoto? Ng'ura, etiu iloshon anaa olkitong'ati le enkare naitong to ltoo, eikununo nkuapi anaa enkinyi terit napuyiapui; ng'ura, kedumu ninye lemankale pooki anaa enkini terit napuyiapui. Meidip ilkeek le Lebanon enkima, nemeidip ing'uesi e enyena pooki olasar opejori. Etiu iloshon pooki anaa pesho te dukuya ninye, eikenayie ninye ninche anaa pesho, aashu olng'am. Kaing'ae naa kintanyaanyukie Enkai, aashu ainyoo narisiore ninye? Kenkitanyaanyukoto e Nkai! Ina naitobirua oltung'ani, ina namur olkunoni te sahabu, nepik ninye ilpisia le nkosholai. Ore ilo omena lemeidim ainyiang'u olasar, negelu olchata lemeitiapurus; neing'uraki kewan olaguetani arriyia, ounoki enkitanyaanyukoto nemeigusugus. Keitu iyie iyiolou? Keitu iyie ining? Keitu apa kilikini iyie te nkiterunoto? Keitu apa iyiolou iyie ebaiki olkitamanyunoto le nkop? Ninye ilo oton te shumata enkop, ore lelo oomanya enkop neikununo anaa ntargeet; kaing'ae ilo oisalaash shumata anaa olkarasha, nelak anaa olng'obor olo amany; ninye ilo oitadou ilkituaak, aitaa pesho ore lelo aitoriak le nkop neitaa pesho. Penyo netunoki ninche, penyo neibung'a ntona, narumishoyu te nkop, penyo neibung'a ntona enye enkop, te nekut ninye ninche netoyu, neya osiwuo ninche anaa suut. Kaing'ae naa intae kintanyaanyukiekie nanu, eji pee atiu nanu anaa ninye? Ilo Sinyati Obo ojo. Tushumu nkonyek inono toduaa shumata; kaing'ae oitobirua kuna pooki? Ilo oyau ilo orora lenye te nkumoi, neipotu ninche pooki too nkarn enye, te ina kitoo e nkidimata enye, naa ore enkaraki nagol ninye oleng meimin ninye nabo. Kainyoo pee ijo iyie Yakobo, niro iyie Israel ajo, “Eisudoyie Olaitoriani enkoitoi ai, ore esipata ai neitu eshilaa Enkai ai?” Keitu iyie iyiolou? Keitu iyie ining? Ore Olaitoriani naa Enkai oo ntarasi, ninye oitobira ineeiting'ie enkop. Menauru ninye nemelepori, ore eyiolounoto enye nemejurrunoyu. Keisho ninye engolon ilo oiterria, ore ilo lemeeta enkidimata neponiki engolon. Keiterre doi ninye elelero nenauru nebatata iltung'ana ooti te nauri; kake ore lelo oanyu Olaitoriani naa keitang'ejuk engolon enye, keilep ninche too naipuko anaa lkurragoso, nepuo aakuet nemenauru, nepuo ninche kake meiterre te nauri. Entirring'ata entoning'oki nanu na kuapi, kuna o lmanie le naiposha; nchoo iltung'ana eitang'ejuk engolon enye; nchoo ninche enyiku, netum taa aairoro; maigutu pooki te nebo aanyikaki enkiguana. Kaing'ae otuputuo ilo obo oing'uaa enkalo o loosaen, laa ore ake enelo neisulu? Nepalaa ninye iloreren te dukuya ninye, pee etum ninye aitunyoi ilaiguanak atupudaki enkop; neitotiu ninye ninche anaa enterit to lalem lenye, netiu anaa isuut naatang'oroyioki te nkawuo enye. Nesujaa ninye ninche nelo agiroo te seriani, te ina oitoi neitu ae kata eroro nkejek enyena. Kalo ilo otaasa ena bae, aipotu iishoritin ebaiki enkiterunoto? Nanu, Olaitoriani, ilo le dukuya, nara ole siadi; Nanu ilo. Etoduaa olomanaa le naiposha neureishoyu, eikirikirate ineeiting'ie enkop; eetuo ninche aanyiku. Etaretuo ake oltung'ani ole latia enye, nejoki olalashe lenye, “Ntagoluoyu!” Neitagol olaguetani loo nkeek olkunoni oshoke, ore oloyutuutisho neitagol oshoke ilo oidong'isho; ore te nkiruburubare nejo ninche, “Eisidai,” neitirrish ninye too lmushomaani pee meing'unung'un. Kake ore iyie Israel, osinka lai, Yakobo lategelua nanu, ina ishoi e Abraham, olchore lai; iyie apa layaua nanu aitung'uaa ineeiting'ie enkop, naaipotu too neelakua oleng, aajoki nanu iyie, “Ira iyie osinka lai, aategelua nanu iyie, nemaanang'aa nanu aiturraa;” miureishoyu, amu atii nanu te nebo iyie, ming'aeng'ae, amu ara nanu Enkai ino; kaaitagol nanu iyie, kaaretu nanu iyie, kaaibung nanu iyie te nkaina ai e tatene naata engolon. Ng'ura, ore lelo pooki likitagorokinote naa keitukurruni nemiri; ore lelo oo ekenya te nkaraki iyie naa kepuo aaku pesho, neidak. Ilo iyie aing'oru lelo likikeshare, kake midol ninche; ore lelo likintayunye olarrabal naa kepuo aaku pesho. Amu nanu Olaitoriani Enkai ino, likimbung enkaina e tatene; nanu ilo likijoki iyie, “Miureisho, kaaretu nanu.” Miureishoyu Yakobo, hoo niba anaa olkurto, lo tung'ana le Israel! Karetu nanu intae, Olaitoriani ojo; ilo Osinya le Israel ninye okordu intae. Ng'ura, kaaitaa nanu iyie entoki nadung'ishoreki, ng'ejuk, nepi, neeta lala; naa eilo iyie adung ildoinyo niuroo ninche, nintotiu iyie oldoinyo anaa suut. Naa ilo iyie aipirripir ninche neya osiwuo, neidapash olkutati ninche. Nilo iyie ang'ida ti atua Olaitoriani; ti atua ilo Obo Osinya le Israel ilo iyie ang'ida. Te neing'oru lelo aisinak enkare nelau, netoyu ilng'ejepa lenye te nkure, nawaliki nanu Olaitoriani ninche, ore nanu, Enkai e Israel nemaiturraa ninche. Kabolu nanu lkejek le nkare too ldoinyo, o nkonyek oo nkariak ti atua ierat; kaisho nanu ong'ata metaa olchorro le nkare, ore enkop natoyio neruko nkariak. Kaun nanu to lpurkel iltarakua, o ltepes, o oloirienito kaitubulu nanu te nkop natoyio, ilkeek kumok lo supuko, pee etum iltung'ana aatodol neyiolou, nedamu neyiolou te nebo, nchere enkaina o Laitoriani nataasa ina, ilo Obo Osinya le Israel oitobira ina. Iyau lomon linono, Olaitoriani ojo; iyau shakenisho ino, Olaiguanani le Yakobo ojo. Nchoo ninye meyau, neliki iyiook ina nalotu aaku, entoliki iyiook mbaa e apa eneikununo pee kitum iyiook aaiguanare ninche, pee kitum iyiook aatayioloito enepukoki ninche, aashu eibalakinye iyiook mbaa naayooki aapuonu. Entoliki iyiook mbaa naayooki aapuonu, pee kiyiolou iyiook nchere irara nkaitin; entaas esidai anaa entorroni pee kimputukuny iyiook nikiureishoyu. Ng'ura, mira iyie toki, naa pesho esiaai ino; naa olminong nikitegelua iyie. Atuputuo nanu ilo obo te nkalo e moikuape, neewuo ninye, eewuo ninye eing'uaa enkilepunoto e nkolong, naa kelotu ninye aipot enkarna ai; naa kelotu ninye aituny lelo aitoriak anaa esarng'ab, anaa enaipurj olaitobirani loo motioo oo nkulupuok e sarng'ab. Kaing'ae apa oibalunye te dukuya, pee kitum iyiook aatayiolo, nelimu eng'or enkata, pee kitum iyiook aatejo, “Etisipa ninye”? Metii apa hoo obo oibalunye ina meetae olotolimuo, meetae olotoning'o irorei linono. Atang'asa apa nanu aibalakinye Sion, naisho nanu Yerusalem olkilikuai loo lomon supati. Kake te naing'orisho nanu metii hoo obo, ore atua kulo metii olaikooni, laa te naikilikuanisho newalu. Ng'ura, pesho kuna pooki, naa pesho esiaai enye; ore nena kitanyaanyukot enye oo nkaitin naatosholuaki naa enkijape e pesho. Ng'ura osinka lai laitagol nanu, ilo gelunoti lai, oshipakino oltau lai; atipika nanu enkiyang'et ai shumata ninye, naa kelo ninye aiguanaki iloshon too sipat. Meishir ninye nemebuaku, aashu ening'i ninye too nkoitoi. Megil ninye entiyani naiperre nemekut aar oltaa oiliilayie; keyau ninye aitobiru enkiguana nasipa. Melaikino ninye ae toki nemepalari o metaba anaa neibulunye esipata enkop; ore loo manaa le naiposha neanyu enkitanapata enye. Nji ejo Enkai, Olaitoriani, ilo oitayio shumata neisalaash, ilo olak enkop aitorioo o pooki naimu ninye, ilo oisho enkiyang'et lelo tung'ana ootii oriong enkop, neisho enkishui lelo oopuo ti oriong enkop. “Ara nanu Olaitoriani, aaipoto nanu iyie te supatisho, aaibung'a nanu iyie enkaina naagolie; aaishorua nanu iyie taa olning'o too loreren, ore te iyie naa kayaki nanu ewang'an iloshon, ilo aitodolisho ilmodook, nilo alaaya lelo ooena te naimin, nintayu ilooena aitung'uaa olgilata liatua korokoroni nintayu te korokoroni lelo ootoni tiatua enaimin. Ara nanu Olaitoriani, ina enkarna ai, ore enkitoo ai nemaisho nanu likae, nemaisho enkisisa ai nkitanyaanyukot oo nkaitin naaguetuno. Ng'ura, etulusoitie ntokitin e apa, naa kaibalunye taata nanu ntokitin ng'ejuko; ore eton eitu eipang'u aaliooyu naa kaaliki nanu ninche.” Entaranyaki Olaitoriani osinkolio ng'ejuk, nchoo enkisisa enye eimu ilubot e nkop! Nchoo eikurrukur enaiposha, o nena naabore atua, o loo manaa le naiposha o lelo oomanya ninche. Nchoo nkop natoyio o nkanas enye eilepunye iltoiloishi lenye, o nena ang'itie naamanya Kedar; nchoo lelo oomanya Sela eranyisho te ng'ida, nchoo ninche ebuaku too nchumat oo ldoinyo. Nchoo ninche eisho Olaitoriani enkitoo, neibalunye enkisisa enye too loomanaa le naiposha. Kelo Olaitoriani anaa oltung'ani magilani, nepush anaa oltung'ani lo larrabal; neyietu aishir, nebuaku, neitoduaaya kewan ajo ai magilani alang ilmang'ati lenyena. Ore te nkata naado natigire nanu, aitirring'e nanu naibooyo kewan, ore taata kaishir nanu anaa enkitok nasaisai, kaipang'ipang nanu naiyiogiyiog. Kaitomijoon nanu ildoinyo o ndoinyo, naitoi nanu nkujit o lkeek; naitaa nanu ilkejek enkop natoyio, naitoi ilchorroi. Nalo nanu arikoo lelo modook te ina oitoi apa neitu eyiolou ninche, aimie atua ina oitoi nemeyiolo ninche karikoo nanu ninche. Kaibelekeny nanu ina aimin natii dukuya ninche aitaa ewang'an, naisiajayie iwuejitin neesur. Kuna baa nanu aas, nemalo nanu aing'uaa ninche. Kerrinyuni ninche neitukurruni katukul, lelo ooisilig nkitanyaanyukot oo nkaitin naaguetuni, lelo oojoki nkitanyaanyukot naasholuni, “Irara intae nkaitin ang.” Entoning intae ilming'anta, ning'oring'oro intae ilmodook, pee itumutumu aatodolisho! Kalo modooni leme ilo sinka lai, aashu kalo ming'ani anaa ol kipaaret lairriwaa nanu? Kedol ninye ntokitin kumok kake mesipu; nebolo nkiyiaa enyena kake mening'isho ninye. Eitiship apa Olaitoriani, te nkaraki esupatisho enye makewan, pee eibalunye enkitanapata enye neitaa kitok. Kake iltung'ana kulo ootupurroyioki nerayae, etarreshoki ninche pooki too ngumot neisudori ti atua korokoroni; meeta ninche oltung'ani okordu ninche, nemeetae ololo arrinyu ninche? Kalo te intae olo aning ena, nelo ajing ine ainining'isho te nkaraki ina kata nayooki alotu. Kaing'ae apa oishooyie Yakobo meibung'i aaya, neisho Israel ilapurrok? Aime Olaitoriani, laa te ninye kitaasa iyiook eng'oki, laa nkoitoi enyena etanyaita ninche, ore nkitanapat enyena neitu ninche eiruk? Neaku etubukoko shumata ninye engoro enye, o larrabal kitok; nepik ninye enkima aitaman kake eitu ninye emuso ayiolou; nepej ina kima ninye, kake eitu edamu to ltau lenye. Kake ore taata nji ejo Olaitoriani, ilo likintayio iyie Yakobo, ilo likintobirua Israel: Miureishoyu amu aatokordua nanu iyie, Aaipotuo nanu iyie te nkarna ai, ira iyie olalai. Tinilo iyie aim atua nkariak, naaku nanu te nebo iyie; naa ti nilang ilkejek nimikiya ninche; naa ti nilo iyie aim atua enkima nimikipej iyie, nimikinos iyie olng'ejep le nkima Amu ara nanu Olaitoriani Enkai ino, Ilo Sinyati le Israel, Olaitajeunoni lino. Aishorua nanu Misiri pee kinyang'unyeki iyie, naishooyo Etiopia o Seba pee aawalunye iyie. Ore enkaraki nira iyie kirotet too nkonyek aainei, nikiyanyitaki, naatonyorra nanu, aishooyie nanu iloreren pee aawalunye iyie, aishooyie ilororen awalu enkishui ino. Miureishoyu, amu atii nanu te nebo iyie; kayau nanu eishoi ino aitung'uaa enkilepunoto e nkolong, nalo aiturrur intae te nkalo o loo ntoluo. Kalo nanu ajoki ina kop e moikuape, nchoru, najoki kopikop, mimbooyo iyie; ilayiok laainei ooing'uaa enelakua o nena toyie aainei naaing'uaa ineeiting'ie enkop, Ore pooki ng'ae ake ninye oipotieki enkarna ai, ilo oitayioki te nkaraki enkitoo ai, ilo laitobirua nanu naitaa. Iyau lelo tung'ana modook hoo neeta nkonyek, lelo ming'an hoo neta nkiyiaa! Nchoo loreren pooki eiturrurro te nebo, naa iloreren euma te nebo. Kalo tiatua ninche oidim aibalunye ena, neitodol iyiook mbaa e apa? Nchoo ninche eyau enchakenisho enye pee eitisip kuna, naa nchoo ninche ening nejo, Ee ekesipa. “Irara intae ilchakenini laainei,” Olaitoriani ojo, “Nirara ilo sinka lai lategelua nanu, pee kitumutumu aatayiolo nikirukuruku nanu, niyiolouu nchere nanu ilo. Ore apa te dukuya nanu meetae ae ai naitobiruaki, nemeetae enaitokini aata te siadi nanu. Ara nanu Olaitoriani, nemeetae likae Aitajeunoni leme nanu. Aibalie apa nanu, naitajeu, nalimu, ina kata metii Enkai omoni atua intae, nirara intae ilchakenini laainei,” Olaitoriani ojo. “Ara nanu Enkai, naa neijia etiu o akenya Nanu ilo; Meetae oloidim atokordu te nkaina ai; kaasisho nanu, naa kaing'ae oidim aibooi ina siai?” Nji ejo Olaitoriani, ilo okordu intae, ilo Sinyati le Israel, “Ore te nkaraki intae, kairriwaa nanu olkilikuai Babilon, meshomo agil nchomito pooki, ore ina buakunoto oo Lkaldayo, neibelekenyi aaitaa enkishirata. Ara nanu Olaitoriani, ilo Sinyati linyi, ilo Aitobirani le Israel, Aiguanani linyi.” Nji ejo Olaitoriani, ilo oitobir enkoitoi ti atua enaiposha, nepik enkoitoi atua nkariak kumok, ilo oyau ngarrin o mbartan, o lakedok o enjore; neirragie te nkop, nemeitoki aadumunye, neiliilaa ninche anaa oltaa: “Mintoki adamu mbaa e apa, niminguanare mbaa musan. Ng'ura, aasita nanu embae ng'ejuk, egira taata ninye ailepu, aimimusu iyie? Kaitobir nanu enkoitoi ti ong'ata, napik ilkejek olpurkel. Ore ng'uesi e ntim naayanyitu ninche nanu, mbariak o sidan; enkaraki naisho nanu ninche enkare ti ong'ata, napik ilkejek olpurkel, pee aisho nanu lelo gelunot laainei eneokishore, lelo tung'ana apa laitobiraka kewan, pee etum ninche aaibalunye enkisisa ai. “Ore ake eyia, eitu iyie kimpot nanu Yakobo; kake inaure iyie ti alo nanu, Israel! Eitu iyie kiyaki nkerra inono o lasar opejori, neitu kiyanyitu nanu too lasarri linono. Eitu nanu aaek too lasarri, anaa aaitanaur te nkorropil. Eitu iyie kinyang'aki nanu enkorropil too mpisai, neitu kintaraposh eilata oo lasarri linono. Kake kiteeka iyie too ng'ok inono, kintanaura iyie nanu te nkarruoisho ino. Nanu ilo ojutoo nkitarruorot inono, te nkaraki kewan ai, nemaitoki nanu adamu ng'ok inono. Tipikaki nanu ndamunot, maishankarrata iyiook te nebo; iyau enkiguana ino, pee kitumi aaitisipa nchere iata esipata. Etaasa apa papaai lino le dukuya eng'oki, ore lelo aitutumok linono naatapaashare nanu. Ore enkaraki ina, aisarkionie nanu lelo kituaak le wueji sinyati, ayaua nanu Yakobo enkidaata naitaa Israel oldeket. Kake ore taata toning'o, iyie Yakobo lo sinka lai, Israel laa iyie ategelua! Nji ejo Olaitoriani ilo likintobira, ilo likintobirua te nkoshoke e ng'utunyi naa ninye likilo aret. Miureishoyu iyie, Yakobo lo sinka lai, Yeshurun laa iyie ategelua. Amu kabukoki nanu enkare ina kop e nkure, napik nkonyek oo nkariak ina kop natoyio; kabukoki nanu Enkiyang'et ai shumata eishoi inyi, nabukoki imayianat aainei eishoi inyi. Kebulu ninche anaa nkujit naatii atua enkare, anaa iseyia oobulu too reyieta naaruko Nejo ake oltung'ani, ‘Ara nanu olo Laitoriani,’ ore olikae neipotie kewan enkarna e Yakobo, ore olikae neiger te nkaina enye ajo, ‘Olo Laitoriani,’ nedung'oki kewan enkarna metaa keji Israel.” Nji ejo Olaitoriani, ilo aiguanani le Israel naa ninye Olakordunoni lenye, Olaitoriani loo lororani: “Ara nanu ole dukuya nara ole nkiting'oto, meetae ae Ai neme nanu. Kalo otiu anaa nanu? Nchoo ninye elimu aibalunye, nchoo ninye meibalunye neitodolu te dukuya nanu. Kaing'ae apa otolimuo aibalunye mbaa naapuonu? Nchoo ninche eliki iyiook mbaa naayooki aapuonu. Miureishoyu nimimputukuny; keitu apa nanu aliki intae aibalakinye? Nirara intae ilchakenini laainei! Keetae ae ai neme nanu? Meetae likae ora endapidapoi; mayiolo nanu likae.” Pesho lelo pooki apa ooitobira nkitanyaanyukot, ore nena tokitin naang'idare ninche nemeret ninche. Ore ilchakenini lenye nemedolisho nemeyiolo, pee etumi aaitukurru ninche. Aing'ae oitobiru nkaitin oo nkitanyaanyukot nemeret hoo toki? Ng'ura ore lelo tung'ana lenyena pooki naa keitukurruni. Ore lelo aguetak arriyiak naa iltung'ana ake; nchoo ninche pooki esoto, nchoo ninche eitashe, kepuo ninche pooki aairut, kepuoi aaitukurru ninche te nebo. Eidong'u olkunoni ninye neitobiru te nchumata oo nkuk, neitobiru too sekenke oo idong'ishoreki, neriu ninye te ina aina enye nagol; netir ninye esumash neishunye engolon enye, naa te nelau enkare naok neiterre. Eitorioo olaguetani olkereri, nesir te nkalamu; neitobiru ina naguetu too ntokitin naaguetishoreki, nesir te ntoki naipimishoreki neitobiru entoki naikununo anaa oltung'ani, nepik enkishiaa e tung'ani, pee etum atipika enkaji enye. Nedung ninye iltarakua; anaa egelu ilkulikae keek, neisho ninche metubulu ti atua ilkeek le ntim, neun ninye iltarakua neitubulu enchan. Neitoki aaku ilkeek le enkima, neya oltung'ani embata nelo aij, neinok ninye ina kima nepej emukate, neitoki sii aitobiru enkai te ilo shata neserem ninye. Neitobiru ninye enkitanyaanyukoto enkai neserem ninye, neitobiru ninye enkitanyaanyukoto e nkainagueta nebatata te dukuya ninye. Ore olpisiai lenye nepejoo ninye te nkima, ore to likae pisiai neinosie ninche nkiri. Nepej nkiri neraposho; neij sii enkima neitoki ajo, “Ee, airowuaja nanu, atoduaa nanu enkima!” Ore enkae rubata pooki neitobirunye ninye enkae, ina kitanyaanyukoto enye, nebatatakino ninye ina kitanyaanyukoto aserem. Neomon ninye ina kitanyaanyukoto ejo, “Tokorduaki nanu, amu ira iyie enkai ai!” Meyiolo ninche nememuso; amu eikeno Olaitoriani nkonyek enye, pee medolisho ninche, o ndamunot enye pee meyiolou ninche. Meetae hoo obo oshilaa, aashu olojurru ayiolou nemusu ajo, “Etapejoki olpisiai lenye te nkima, atapejo sii imukateni too nkuk enyena, natapejie nanu nkiri nainosa ninche. Paa amaa lelo ootelekutua, kaitaa nanu entoki olminong? Kabatata nanu te dukuya osototi loo lkeek? Nkuruon einos ninye; ore ina ng'eno enye nemelulung'a neitapong'oyie ninye, nemeidim ninye aitayu kewan anaa atejo, Ae metii elejare enkaina ai e tatene?” Tadamu kuna tokitin, iyie Yakobo, o Israel, amu ira iyie osinka lai; aaitobira iyie, ira iyie osinka lai Oo Israel, maarikino aikata nanu iyie. Atikinyayie nanu nkitarruorot inono anaa enkatampoi, aishie ing'ok inono anaa enkinuku; torrinyunye wou enatii nanu, amu aatokordua nanu iyie. Taranyisho, iyie shumata, amu etaasa Olaitoriani ina; Entabuaku intae ineegut e nkop; entang'amai entaranyisho intae ildoinyo, o iyie natim o pooki shani otii atua! Amu etokordua Olaitoriani Yakobo, naa kepuoi aaitaa ninye kitok te Israel. Nji ejo Olaitoriani, ilo likikordu iyie, laa ninye apa likintobirua te nkoshoke e yieyioo lino: “Ara nanu Olaitoriani, ilo oitobira ntokitin pooki, ilo apa oisalaasha keper openy, ilo oisalaasha enkop - Kaing'ae apa otii te nebo nanu? Ilo oibooyo enaibon oo laimonkok, neitaa iloibonok le lejare; ilo oibelekenyu ilang'eni arrinyu, neitaa ina ng'eno enye emodai; ilo oun ororei lo sinka lenye, neitabaya enkiguana oo lkipaareta lenyena; ilo ojo ti alo Yerusalem, ‘Kepuoi aamany ninye,’ nejo ti alo nkanas e Yuda, ‘Kepuoi aashet ninche, naitasheyie nanu ineeturori apa’; ilo ojoki ewueji negut, ‘Toyio, kaitoi nanu ilkejek linono’; ilo ojoki Sairos, ‘Olchekut lai ninye, naa keitabaya ninye eyieunoto ai’; ejo ti alo Yerusalem, ‘Kepuoi aashet,’ ore ti alo ina aji e Nkai, nejo, ‘Kepuoi aaitamanyu olkitamanyunoto lino.’” Nji etiaka Olaitoriani ilo otubukoko eilata, aput, ilo oji Sairos, ilo laibung'a nanu enkaina enye e tatene, pee elo ninye aitore iloreren te dukuya ninye neoru ilaiguanak imasaa enye, nebol nkutukie oo nkajijik te dukuya ninye pee meitoki nkutukie oo nkajijik aaikeno: “Kalo nanu te dukuya iyie naitorioo ildoinyio, kagiligil nanu nena shomito o suyai nagiligil nena shomito e sekenkei, kaalo nanu aisho iyie ilo shumati le naimin o nena naaisudoro, pee itum iyie atayiolo nchere, ee nanu Olaitoriani, ina Ai e Israel, nikimpotuo iyie te nkarna ino. Ore te nkaraki osinka lai Yakobo o Israel ilo gelunoti lai, aaipotu nanu te nkarna ino aaipotu nanu enkarna ino hoo nimikiyiolo iyie. Ara nanu Olaitoriani, nemeetae likae, meetae ae Ai neme nanu; aarripito nanu hoo nimikiyiolo iyie nanu, pee etum lelo tung'ana le nkilepunoto e nkolong, o lo loo ntoluo aatayiolo nchere meetae ae Ai neme nanu; nanu Olaitoriani nemeetae likae. Aitobirua nanu ewang'an naitayu enaimin, nanu oyau emayianata o enkidaata, nanu Olaitoriani oas kuna baa pooki. Tasha iyie shumata, te keper, naa nchoo shumata eshau esupatisho; naa nchoo enkop eng'amaa, pee etum enjeunoto aibulai, naa nchoo eitubulu esupatisho; nanu Olaitoriani oitobirua ina. Woi ninye ilo okeshare oloitayio ninye, keishankarrare emoti oo nkulupuok ilo oitobira! Keikilikuan enterit ilo oitobir ajoki, Kainyoo iyie intobirita? Aashu ejoki, Meeta ena toki ino ineeibung'i? Woi ninye ilo ojoki menye, Kainyoo iyie iiu? Aashu ilo ojoki enkitok, Kainyoo iyie nikintasaisai? ” Nji ejo Olaitoriani, ilo Osinya le Israel, ilo oitayio ninye: “Eikinkilikuanishore nanu ti alo nkera aainei, anaa eikisikong nanu ti alo esiaai oo nkaik aainei? Aitobira nanu enkop, naitayu oltung'ani apik oriong enkop; nkaik aainei apa naaisalaasha shumata, naitaisheiki nanu lelo ororani lenye pooki. Ailepunye nanu ninye te sipata, naa kaitorioo nanu nkoitoi enyena pooki; kelo ninye ashet enkanasa ai ore lelo tung'ana laainei ooena nelaaya meshomo, neme te nkaraki enkishoroto anaa olerrinyore,” Olaitoriani loo lororani ojo. Nji ejo Olaitoriani: “Ore ina arsisisho e Misiri o ina kinyang'a e Etiopia, o lelo tung'ana le Sabean adoru, naa kepuonu enitii neaku linono, nikipuo ninche aasujaa iyie; kepuonu ninche enitii eena too lpisia nikipuonu aairrugokino iyie. Eikipuo ninche aasai iyie ejo, ‘Etii Enkai te nebo iyie ake, meetae ae Ai neme ninye ake.’ ” Esipa ira iyie Enkai naisudoo kewan, iyie na Ai e Israel, Olaitajeunoni. Eitukurruaki ninche pooki netusulaki, ore lelo aitobirak loo nkitanyaanyukot oo nkaitin nepuo to lmilo te nebo. Kake eitajeuo Olaitoriani Israel, te njeunoto oo ntarasi; mikintukurruni iyie nimikisuli o akenya. Amu nji ejo Olaitoriani, ilo oitobira shumata (ninye Enkai!), Ilo oitobirua enkop neitayu (ninye oitotona; eitu ninye eitobir olmuate, eitayio ninye pee emanyi!): “Ara nanu Olaitoriani nemeetae likae. Eitu apa nanu airo too nkurrat, ti atua ewueji e misimisi; eitu apa nanu ajoki eishoi e Yakobo, ‘Eng'oruaki to lmuate.’ Airo nanu Olaitoriani esipata, naibalunye ina nasipa. Enturrurrunye nipuonunu, entinyiku wootu te nebo, intae lo pisai loo loshon! Meyiolo ninche toki lelo oonap nkitanyaanyukot oo nkaitin enye oo nkeek, netoni aaomon ina ai nemeidim aitajeusho. Iyau lomon linono nimbalunye; nchoo ninche eiguana te nebo! Kaing'ae apa otolimuo ena te musano? Kaing'ae apa oibalunye? Aime nanu Olaitoriani? Nemeetae ae Ai neme nanu, Enkai nairo too sipat naa Olaitajeunoni; meetae ae Ai neme nanu. Embelekenyata wootu enatii pee eitajeuni intae; intae ilubot pooki e nkop! Amu ara nanu Enkai, nemeetae ae. Ainosa nanu olmumai te kewan ai, eimua enkutuk ai te sipata ilo rorei lemaaitoki arrinyokino: ‘Ore nanu kaagilakini pooki kung'u, neinos pooki ng'ejep olmumai.’ Tiatua Olaitoriani ake, epuoi aajo tialo nanu, isipat o eng'olon. Ore lelo laaiba neitukurruni ninche. Ore ti atua Olaitoriani kelo ina ishoi pooki e Israel amirisho netum enkitoo.” Etusulari Beli, neijulujule Nebo, etii nkitanyaanyukot enye shumata ng'uesi o nkishu; ore kuna tokitin ninapinapa naa keiroishi anaa lolan ooek ing'uesi. Neijulujula ninche, nesulunye te nebo, meidim ninche aataretu ilo ola, kake ore ninye nkorroki enye kepuo eyararoto. “Toning'oki nanu, na aji e Yakobo, o ele pisiai pooki le nkaji e Israel, apa laatoikioki nanu ebaiki pee eini intae, oowaki apa ebaiki itii nguseti; ore ninye o te moruao inyi Nanu ake Ilo, ore eiborrita intae lukuny naa kanap intae. Aitobira nanu naa kanap; kaya nanu naa kalo agolie. Kaing'ae intae kintanyaanyukiekie nikintorisiokiki, nikidutietie intae pee kinyaanyuku? Ore lelo oobuku sahabu too lbenia, neineneng enkosholai too ntemet e nkiroishi naa keiger olkunoni, neitayunye nena enkai; paa keitoki aabatata aaserem! Nedumu ninche ina kitanyaanyukoto aaiteleiki iloilila lenye, nenap ninye, nepuo aapik ewueji enye, neitasheyie te ine, nemeidim ninye ashomo te ine. Naa te neishiraki oltung'ani ninye, nemeidim atawaliki, aashu eitajeu ninye te nyamali enye. Tadamu ena ninguanare, tadamu nkitarruorot inono, tadamu inapa baa e apa musan; amu ara Olaitoriani nemeetae likae; ara nanu Olaitoriani nemeetae likae laanyaanyukie, naibalunye nanu mbaa e nkiting'oto te nkiterunoto o ebaiki apa moitie naibalunye nena neton eitu eaku, ajo, ‘Kelo enkiguana ai aitashe, naa kalo nanu aitabaya iyieunot aainei pooki.’ Aipotu ilo motonyi oinosisho te nkalo o loosaen, o ilo tung'ani le nkiguana ai meeu te nkop nalakua. Airoro nanu naa kaitabaya; aiguana nanu naa kaas ina. Entoning'oki nanu intae iloogol onyek, intae kulo oo lakuaniki enkordunoto. Aitataanua nanu enkordunoto ai, meekure elakua, nemeekure eimutie enjeunoto ai; naa kapik nanu enjeunoto atua Sion, te nkaraki Israel ina kitoo ai.” Tadou iyie totona te nterit na selenkei to e Babilon; totona te nkop metii olorika le nkitoo, naatito oo Lkaldayo! Amu meekure ae kata kingili aajo, enasipa osesen naisikarra Iwa lelo soito ooyutuutishoreki, ndong'u entapa, iwuang'ie ilo karasha limulumulare, intayu ilo kila lino, ting'ishai too nkejek inono, iima atua lkejek talang'a. Kepuoi aaibalunye ina masipaisho ino, nepuoi aadol enkurruna ino. Kaitalaku nanu elap, nemaleku oltung'ani. Ore Ilo okordu iyiook - naa Olaitoriani loo lororani, ninye enkarna enye - ninye Ilo Osinya le Israel. Totona ntirring'ayu, nilo atua enaimin, na tito oo Lkaldayo; amu mikingili ae kata aajo enkaiguanani oo nkitoriat Atagorokine apa nanu iltung'ana laainei, aisarkionie nanu enjung'ore ai; aaishorua nanu apik atua nkaik inono, neitu iyie ing'urrie ninche; ore lelo moruak ntanapa iyie olola oiroishi oleng. Itejo apa iyie, “Kaaku nanu enkaiguanani ntarasi,” ore enkaraki ina eitu iyie ipik kuna baa atua oltau lino, aashu idamu nkiting'ot enye. Ore naa taata toning'o ena, iyie ena aisikarrani, ena naton eidipakine, ina najo to ltau lino, “Atii nanu, nemetii ae neiijo nanu; maton nanu anaa enkoliai nemeye nkera aainei.” Eikitum iyie kuna baa pokira, te nkata nabo, te nkolong nabo; ore keeya oo nkera inono o enkoliasho naa eikitum iyie te nkiputakinoto hoo niata iloibonok kumok o engolon kitok oo lasakutok. Ndipakine apa iyie ti atua entorroni ino, nijo, “maadolita nanu oltung'ani; ” ore eng'eno ino o enkarriyiano ino nikintapong'oyie, nijo iyie to ltau lino, “Atii nanu, nemetii likae.” Kake kelotu entorroni shumata iyie, nemiindim iyie aibooi; kelotu enkidaata shumata iyie, nimindim iyie aitukuoi; nelotu enkidaata enitii nabo kata, neitu aekata idamu. Ntasho tuunoyu ti atua esakutore ino o lelo oibonok linono kumok, laa ninche itanyamalikia ebaiki kitisho ino; eidimayu pee imirisho, eidimayu pee intureisho. Inaure iyie te nena kiguanat inyi kumok, nchoo naa ninche eitashe pee kintajeu, lelo oor shumata, ootoni aing'or ilakir, laa ore te nedoli olapa neibonu ina nayooki alotu. Ng'ura, eikununo ninche anaa suut, neinos enkima ninche; meidim ninche aaitajeu ate te ina golon o lng'ejep le nkima. Mme inoshi kuk kuna naaiji, neme enkima nanyikakinoyu! Neijia etiu te iyie ti alo nena baa apa nitanyamalikia, laa ninche apa iyie imbung'are ti atua enkishui ino pooki; kelo ake oltung'ani aim enkoitoi enye; meetae hoo obo likilo aitajeu iyie. Toning'o ena, na aji e Yakobo, intae ilooipotieki e nkarna e Israel, lelo oora ile ishoi e Yuda; ooinos olmumai te nkarna o Laitoriani, nelimu aaibalunye Enkai e Israel, kake mme te sipata neme te nkitorioroto. Amu ina anasa sinyati ninche eipotie ate, neisiligie ate ina Ai e Israel; Olaitoriani loo lororani ninye enkarna enye. “Ore ntokitin e apa naibalunye apa nanu te musano, neipang'u nena aaimu enkutuk ai naisho nanu metayiolouni; naitoki taa nabo kata aas naitabaya. Amu ayiolo apa nanu ajo igolong'u iyie, nikigol emurt anaa esekenkei netiu enkomom ino anaa osuyai, atolimuo apa nanu aibalunye te musano, ore eton eitu ebaya, naaitoning'o iyie aibalakinye, pee milo ake ajo, ‘Enkitanyaanyukoto ai nataasa kuna, ina kitanyaanyukoto ai naguetuni, o ina naipurjuno nayaua kuna.’ Itoning'o apa iyie; toduaa naa taata kuna pooki; ai milo naa iyie aibalunye? Ore ebaiki ena kata neito idia alo kaaitoning nanu iyie mbaa ng'ejuko, mbaa naaisudoro neitu ae kata iyiolou. Taata eitobiraki ninche, mme apa; ore apa neitu ae kata iyie ining ninche, pee milo ake ajo, ‘Ng'ura, atayiolo apa nanu.’ Eitu ae kata ining, eitu ae kata iyiolou, ore ebaiki apa eitu ae kata ebolokini enkiok ino. Amu atayiolo apa nanu ajo iasisho iyie te nkeleekisho, naa ore ebaiki pee kiini nira iyie oloipotokoki enkiseroto. Ore te nkaraki enkarna ai aibooyie engoro ai, ore te nkaraki enkisisa ai aiwuang'ie nanu te iyie, pee maaiwuang'ie nanu iyie. Ng'ura, aatisila nanu iyie, kake mme anaa enkosholai; aatetema nanu iyie to lkokuet loo nkisilisilot. Te nkaraki kewan ai, te nkaraki kewan ai ake, ataasa nanu ina, amu kaji eiko pee eisarkionieki enkarna ai? Ore enkitoo ai maisho nanu likae. Toning'oki nanu, iyie Yakobo, o Israel, apa laipoto nanu iyie! Nanu ilo, nanu ole dukuya, naa nanu ole siadi. Enkaina ai nairragie olkitamanyunoto le nkop, naa enkaina ai e tatene naisalaasha oloing'ang'e te naipot nanu ninche, neitashe pooki te nebo. Enturrurroto intae pooki pee ining'ining'i! Kalo ti atua ninche apa oibalunye kuna baa? Enyor Olaitoriani ninye; naa kelo ninye aas eyieunoto o Laitoriani te Babilon, nelo agilunore lelo Kaldayo. Nanu, ee, nanu oiroro naipotu ninye, ayaua nanu ninye naa kelo ninye adupoyu te nkoitoi enye. Entinyikakaki nanu, entoning ena: ore ebaiki apa te nkiterunoto eitu nanu airo too nkisudorot, ore ebaiki ina kata apa naeuo ina aaku, atii apa nanu ine.” Ore taata naairriua nanu Olaitoriani Enkai te nebo Enkiyang'et enye. Nji ejo Olaitoriani, Ilo likikordu iyie, Ilo Osinya le Israel: “Ara nanu Olaitoriani Enkai ino, ilo likinteng'en iyie tudupoyu, ilo likinkoo iyie te nkoitoi nilo aim. Oi apa tenaa itoning'o nkitanapat aainei, amu anaata etotiuo eseriani ino anaa olkeju, netiu esupatisho ino anaa lopir le naiposha; anaata etaba eishoi ino anaa osinyai, ore lelo litoiuo iyie nebayu anaa soito lo sinyai; ore enkarna enye nemeiwuang'ieki ae kata arashu eishieki te dukuya nanu.” Shomo tung'uai Babilon, isika ilanya Ilkaldayo, mbalunye ena te mbuakunoto e ng'ida, embalunye ena, nchoo elo abaya ina enkiting'oto e nkop; tejo, “Etokordua Olaitoriani osinka lenye Yakobo!” Eitu apa ninche etum enkure ina kata erikito ninche aimie ilpurkeli; eishoo enkare meturukunye te nkaraki ninche eing'uaa endapidapoi; etoosho ninye endapidapoi nerukunye enkare. “Meetae eseriani too ltorrok,” Olaitoriani ojo. Entoning'oki nanu, intae ilmanien le naiposha, nining'ining'i intae iloreren oo lakua. Aaipotuo apa nanu Olaitoriani atii enkoshoke, ore atii enkoshoke e yieyio neipot ninye enkarna ai. Eitotiuo ninye enkutuk ai anaa olalem opi, naaisudoo ninye nanu to loip le nkaina enye; aaitaa ninye nanu embae nayopiroki, naapik atua emootian enye aisudoo. Naajoki ninye nanu, “ira iyie osinka lai, Israel, laa te ninye aitaae nanu kitok.” Kake atejo nanu, “Aisiaishe pesho, ataasishore nanu engolon ai te pesho o to lng'am; kake ore ake eyia, etii esipata ai te nebo o Laitoriani, ore ole koisiayio lai neeta Enkai ai. Ore taata nejo Olaitoriani, ilo apa laaitobirua nanu te nkoshoke pee aaku osinka lenye, pee ayau Yakobo arrinyoki ninye, netumi sii aaiturrurroki Israel ninye, amu aayanyitaki nanu too nkonyek o Laitoriani, netaa Enkai ai engolon ai - ejo ninye, Kentoki nalelek oleng ena nchere iaku iyie osinka lai, pee idumu iloshon le Yakobo nirrinyu lelo ootelekutua le Israel; kaaisho nanu iyie taa ewang'an too loreren, pee etum enjeunoto ai atabaiki ineeiting'ie enkop.” Nji ejo Olaitoriani, ilo okordu Israel naa Ilo Sinyati, ajoki ilo otemenayioki oleng too ltung'ana, ilo oiba oleng iloshon, ilo sinka loo laitoriak: “Kepuo ilaiguanak aadol nedumunye; ore larikok o ninche nepuo aaserem maate, te nkaraki Olaitoriani oisiligayu ninye, Ilo Sinyati obo le Israel, laa ninye likitegelua iyie.” Nji ejo Olaitoriani: “Ore te nkata e omom aatang'amayie nanu iyie, ore te nkolong e njeunoto aatareto nanu iyie; aatorripo nanu iyie naaishooyo aaitaa olning'o too ltung'ana, pee idumu ena kop, pee ioriki enjung'ore lelo ooliyio; ijoki lelo ooena, ‘Wootu ene,’ nijoki lelo ootii enaimin, ‘Entalioto.’ Nepuo ninche aadaa too mbat oo nkoitoi, ore nkisiajat pooki naaika neaku endaata enye. Mepuo ninche aatum esumash o enkure, nemeitoki olkutati anaa enkolong napi aar ninche, amu ore ilo oing'urrie ninche naa ninye olo arikoo ninche, naa too nchorroi oo nkariak erikoo ninche. Naitaa nanu ildoinyo laainei pooki enkoitoi, ore nena oitoi aainei kituaak naa keilepieki shumata. Ng'ura, kepuonu kulo eing'uaa enelakua, naa ng'ura, eing'uaa kulo moikuape, neing'uaa oloo ntoluo, neing'uaa kulo enkop e Sirini.” Taranyisho te ng'ida, iyie shumata, nishipayu na kop; entaranyisho intae lo doinyo! Amu eitagolo Olaitoriani iltung'ana lenyena, naa kelo aing'urrie lelo apa ooisilisiloki. Kake etejo Sion, “Aaiturrayie nanu Olaitoriani, meekure aadamu Olaitoriani lai.” “Kerikino enkitok enkerai enye nanakita, eji meitoki aing'urrie ina kerai e nkoshoke enye?” Ee keidim atorikinoyu, kake maarikino nanu iyie. Ng'ura, aatisira nanu too ndapi oo nkaik aainei, etii isunta inono anaake dukuya nkonyek aainei. Etumuruto ilashetak linono lelo apa likitigila, ore apa lelo likitomijoon nikipuo aaing'uaa iyie. Tushumu nkonyek inono ntamanai ing'orisho; eiturrurrote pooki, nepuonu ninche enitii. Ore anaa enaishu nanu, Olaitoriani ojo, ilo iyie aishop ninche pooki anaa emasaai, nienikino ninche anaa enaenikino esiankiki narikori imasaa enyena. “Esipa ore ilmuateni linyi o wuejitin apa neetomijono, o ina kop inyi apa nainyalaki - naa kepuo aapiriku te lelo oomany; ore apa lelo oo toijoitie intae naa kelamari oleng. Ore nena kera apa naatoiwuoki te nkata o sina, nepuo sii ninche aajo ining'itoto, ‘Kepirik ene wueji te nanu; ing'urakaki ewueji namany.’ Nilo ajo to ltau lino: ‘Kaing'ae laatoikio nanu kuna? Aatung'uayioki apa aa nanu ake nara olupi, nashomo eyararoto naayae enelakua, kake aing'ae naitubulua kuna? Ng'ura, aatung'uayioki apa aa nanu ake; Kaji naa eimutua kuna?’ ” Nji ejo Olaitoriani Enkai: “Ng'ura, kailepakinye nanu iloshon enkaina ai, nailepakinye olmonekie lai iloreren; neyau ninche ilayiok linyi too lgooitie lenye, ore ntoyie inyi nepuoi aanap too leilila lenye. Kepuo laiguanak aaku loo papaai linyi ooitubulu intae, ore nkaiguanak enye neaku ninche naaing'or intae aaitoti. Neitabaiki ninche nkomomi enye enkop eirrugokino intae, nemej ina terit oo nkejek inyi. Nilo taa ayiolou nchere ara nanu Olaitoriani; ore lelo laanyu nanu nemeitukurruni.” Keidimi aawaita entoki naibung'ita ilo ogol, anaa keidimi aawaita ilo oibung'aki otii nkaik e ilo torrono? Esipa, Olaitoriani ojo: “Ekeidimi ninye aawaita lelo ooena le ilo ogol, neidimi aatokordu ina naibung'ita ologol, amu kagilunore nanu lelo oogilunore intae; naa kaitajeu nanu nkera inyi. Kaisho nanu lelo ooitorogony intae meinosa nkiri enye maate, nemera eok isargeta lenye anaa ilootooko enaisho oo sabibu. Netum taa pooki toki naishu atayiolo nchere ara nanu Olaitoriani, Olaitajeunoni linyi, nara ilo Okordu intae, Ilo Magilani le Yakobo.” “Nji ejo Olaitoriani: Koree empalai naarieki enkiyama e ng'utunyi amu ataarayie apa nanu ninye? Anaa kalo te lelo laatakinore esile apa atimiraka intae? Ng'ura, te nkaraki ntorrok inono apa pee kitimiraki iyie, naa te nkaraki engilata ino oo nkitanapat apa pee etaarayioki ng'utunyi. Kainyoo naa, amaa apa pee alotu, keitu ninye ainepu oltung'ani obo? Amaa, pee aipotisho, aimeetae ninye oltung'ani oirukisho? Keitodorropaki enkaina ai eji metaa meidim atokordu likae? Anaa aimaata nanu engolon naitajeunye? Ng'ura, ore te nkisikong'are ai, naitoi nanu enaiposha, naitaa nanu ilkejek e nkop natoyio; neng'ueyu isinkir lenye etalaita enkare, neye te nkure. Kaishop nanu oloing'ang'e te misimisi, naitotiu anaa enaishopokoki ilkuniyiani.” Aaishoo nanu Olaitoriani Enkai olng'ejep te nkaraki lelo ooiteng'eni, pee atum nanu aitagolo to rorei ilo otalepori. Ore anaake tadekenya, naaputu ninye matoning'o te nkiok ai, matoning'o anaa lelo ooiteng'eni. Etabolo Olaitoriani Enkai enkiok ai, neitu nanu agolong'aki; eitu nanu arrinyo siadi. Aisho nanu enkoriong lelo ooshisho, naisho isederi lelo laayiet olmunyei; eitu nanu aisudoo enkomom ai pee maasuli anaa aanotakini. Amu Olaitoriani Enkai laaret nanu; ore enkaraki ina eitu nanu aing'aeng'ae neaku aitirring'e nanu, nayiolo nanu ajo maaitukurruni nanu; ore ilo laailepie nanu naa ketaana. Kalo laagilunore nanu? Maitasheikinoto te nebo. Kalo olmang'atinta lai? Nchoo ninye aalotu anyikaki. Ng'ura, Olaitoriani Enkai laaret nanu; kalo laadung'oki nanu enkiguana? Ng'ura, keishunye ninche pooki anaa enkila: keinos ninche olasai. Kalo ti alo intae oure Olaitoriani neiruk oltoilo lo sinka lenye, lelo oopuonu te naimin metii ewang'an, kake ore eyia, neisilig enkarna o Laitoriani neigarakino Enkai enye? Ng'ura, ore intae pooki ooinok enkima, lelo ooinok ilkilang'ilang'eta! Ipuopuo te wang'an e nkima inyi, o te lelo kilang'ilang'eta linuaa intae! Ipuopuo intae aatum ena te nkaina ai: ipuopuo intae aairrag to sina le mion. “Entoning'oki nanu intae ilooing'oru enkordunoto, intae kulo oolilitu Olaitoriani; eng'ura intae ina dapidapoi apa naa ninye etaguetunyeki intae, o ina gumoto oo soito apa natuturunyeki intae. Eng'ura Abraham papaai linyi o Sara apa natoiuo intae; amu ore apa eton aa nabo aipotuo nanu ninye, namayian nanu ninye naitaa kumok. Amu kelo Olaitoriani aitagol Sion; nelo aitagol nene wuejitin pooki apa neeinyalaki, neitotiu ilo purkel lenye anaa Eden, netiu ilo purkel anaa enkurma o Laitoriani; keaku eng'ida o enchipai etumi ti atua ninye, o enkishooroto e nashe o ltoilo lo sinkolio. Entoning'oki lo tung'ana laainei, nikinchosho nanu enkiok, lo orere lai; amu kelotu enkitanapata naing'uaa enatii, o esupatisho naaku ewang'an too ltung'ana. Kenyiku enkordunoto ai asioku, eeuo enjeunoto ai, naa kelo enkaina ai aitore iloreren, nanu eanyita lelo ootii ilmanien le naiposha, naa enkaina ai eisiligita ninche. Entudumu nkonyek inyi eng'ura shumata, nirrugogo aaing'or enkop ti abori; amu keish shumata anaa empuruo, neish enkop anaa olkila, ore lelo oomanya ninye naa keye anaa lojong'a; kake keaku enjeunoto ai enoo ntarasi, ore ina kordunoto ai nemeish ae kata. Entoning'oki nanu intae ilooyiolo esipata, kulo tung'ana ootii enkitanapata ai iltauja lenye; emiureyu imorot oo ltung'ana, niming'aeng'ae te neinyal intae nesukeny. Amu keinos ninche olasai anaa nkilani, neinos ninche olkurto anaa ilpapit loo nkerra; kake ore enkordunoto ai naa enoo ntarasi, ore enjeunoto ai naa enoo ishoritin pooki.” Tudumunye, tudumunye, ntagoluoyu, Na aina o Laitoriani; tudumunye anaa apa, te nena ishoritin e apa moitie. Aime iyie apa otudung'udung'o Rahab aitaa ndung'ot, aime iyie apa otaremo enkukuu? Aime iyie apa oitoyio enaiposha, nena ariak e ine wueji kitok negut; aime iyie apa oitaa enguton e naiposha enkoitoi, pee etum lelo ootokorduaki aaima? Naa keshukunye lelo ooinyang'ua Olaitoriani aapuonu Sion eranyisho; kelo eng'ida nemeeta enkiting'oto shumata lukuny enye; kepuo ninche aang'amu eng'ida o enchipai, ore osina o somit nepuo aailanyisho. “Nanu, nanu ilo oitagol intae ira iyie ng'ae eji metaa iure oltung'ani laa keye, ina kerai e tung'ani naitayioki anaa nkujit, nikirikino Olaitoriani, Ilo likintobirua, Ilo laa ninye oisalaasha oloing'ang'e nepik olkitamanyunoto le nkop, niureishoyu endama pooki te nkaraki ina engoro napi e ilo oitorogonyisho, ina kata te nelotu ninye amutisho? Koree naa ina goro napi e ilo oitorogonyisho? Ore ilo oibookoki enkop naa kelaari nabo kata; meye ninye nedou alo atua engumoto, nemeishunye ae kata endaa enye. Amu ara nanu Olaitoriani Enkai ino, ilo oputu enaiposha o metaa keikurrukur ilopir lenyena - Olaitoriani loo lororani ninye enkarna enye. Natipika nanu irorei laainei enkutuk ino, naaisudoo iyie ti atua oloip le nkaina ai, neisalaash oloing'ang'e naitobir olkitamanyunoto le nkop, najoki Sion, ‘Irara intae iltung'ana laainei.’ ” Tushumunye, tushumunye, ntasho, iyie Yerusalem, iyie anaa ina natookishe te nkaina o Laitoriani te ina kikompe e ngoro enye, iyie enatookishe to lbakuli amera, niyukuyukori Meetae hoo obo orikoo ninye ti atua lelo ayiok pooki ooitoiuo; meetae oltung'ani oibung enkaina ti atua lelo ayiok pooki ooitubulua. Kitijing'a kuna tabo pokira are - kaing'ae likintigir iyie? - eliyio, o enkidaata, o lameyu o lalem; kaing'ae likintagol iyie? Eiterritia ilayiok linono, eirragaa te dukuya pooki eitoi anaa entarakuet natijing'a orreshet; ebore ninche engoro o Laitoriani, ina kisikong'ata e Nkai ino Ore enkaraki ina, entoning ena, intae kulo ooinosa osina, kulo ootemerate neme te naisho: Nji ejo Olaitoriani, Olaitoriani Enkai ino Ilo ogol le ltung'ana lenyena: “Ng'ura, aiwuang'ie nanu te nkaina ino ina kikompe e merai nikiyukuyukie; ina girra e ngoro ai mingil ae kata iyie aok; naa kalo nanu apik nkaik e lelo aisilisilok linono, lelo apa likitiakita, ‘Irrugoyu pee kitum iyiook aashom’; nintotiu iyie enkoriong ino anaa enkop netiu anaa enkoitoi naaim ninche.” Tuputunye, tuputunye, ntagoluoyu iyie Sion; nchopo lelo kilani linono sidain, iyie Yerusalem, na anasa sinyati, amu meigil ae kata alotu enitii ilo lememurata o ilo oiduruk. Mpiripiroi ina terit natii osesen lino, tuputunye; iyie ena naena, Yerusalem; ntololong'a nena keenta naatii emurt ino, iyie ena tito naena e Sion. Amu nji ejo Olaitoriani: “Etimiraki apa intae pesho, naa kepuoi sii aakordu intae metii enkinyang'a. Amu nji ejo Olaitoriani Enkai: Etang'asa apa iltung'ana laainei aadoyio aapuo Misiri aamany ine, neisomit lelo le Asiria ninche pesho. Amaa, naa taata kainyoo nanu aata te ine, Olaitoriani ojo, idolita ajo eewaki iltung'ana laainei pesho? Kedar lelo aitoriak lenye, Olaitoriani ojo, ore endama pooki anaake nemenaa ninche enkarna ai. Ore enkaraki ina kepuo iltung'ana laainei aayiolou enkarna ai; ore enkaraki ina akenya te ina olong naapuo ninche aayiolou nanu ilo oirorita; nele nanu.” Kebaa esidano too nchumat oo ldoinyo nkejek e lelo ooyau ilomon supati, lelo oolimu aaibalunye eseriani, lelo ooyau ilomon supati le seriani, lelo oolimu aaibalunye enjeunoto, lelo oojoki Sion, “Enkai ino naitoreisho.” Entoning, ilarripok linyi eilepie iltoiloishi lenye, eranyisho ninche te nebo te ng'ida; amu etoduaa ninche too nkonyek ina rrinyunoto o Laitoriani elotu Sion. Entijing pooki osinkolio te nebo, intae iwuejitin apa neeinyalaki e Yerusalem; amu eitagolo Olaitoriani iltung'ana lenyena, etokordua ninye Yerusalem. Etudumua Olaitoriani enkaina enye sinyati te dukuya nkonyek oo loshon pooki; naa kedol ineeiting'ie enkop pooki enjeunoto e Nkai ang. Enchom, enchom, empang'a enchom idie, eminyikaki ake entoki nemesinya; empang'a entung'uai ninye, entisinya ate, intae lelo oonapita imasaa o Laitoriani. Amu mipuopuo intae te nkisarrisar, nimipuopuo te nkisikata, amu Olaitoriani olo te dukuya intae, naa Enkai e Israel naing'or intae te siadi. Ng'ura, kelo osinka lai adupoyu, keitaae ninye kitok neilepieki, naa kelo ninye shumata oleng. Ore anaa enaing'asiate ilkumok te nkaraki ninye - ore elioto enye, neibelekenya, meekure enyaanyukie enkomom o ltung'ani, ore empukunoto neibelekenya arruoyo alang ene tung'ani. Neaku keing'asiayie ninye iloshon kumok; nenuka ilaiguanak nkutukie te nkaraki ninye; amu ore ina neitu elikini ninche naa kepuo aadol, ore ina neitu ae kata ening nepuo aayiolou. Kaing'ae otonyorrayie ina nikitoning'o? Naa ae te ng'ae etabolokoki enkaina o Laitoriani? Amu etubulua ninye te dukuya Olaitoriani anaa enkaitubului kiti, o anaa entonai te nkop natoyio; meeta ninye enkishiaa anaa eneing'ori, eji metaa eiking'or iyiook ninye, nemeeta esidano eji metaa eiking'uar. Etanyaita apa nemenaa iltung'ana ninye, oltung'ani loo sinaitin ninye netamoo osina; ore anaa obo lemeyieu iltung'ana neing'or, netemenayioki, neitu iyiook kishilaa ninye. Esipa etanapa ninye emion ang nenap isinaitin lang; ore ake eyia nikidol ninye etooshoki, etoosho ninye Enkai, neisilisil. Kake etipikaki ninye olbae te nkaraki nkitarruorot ang, eitamorroojoki ninye tenkaraki ntorrok ang. Shumata ninye etii enkitamioto naa ninye naishiunye iyiook, naa too oshot enyena eishiunyeki iyiook. Kitiu iyiook pooki anaa nkerra naaimina, kishomo aaidapashari; kimbelekenyakinote oltung'ani ake enkoitoi enye; neiteleikia Olaitoriani shumata ninye entorroni ang pooki. Eitorogonyaki apa ninye neisilisili, kake eitu ebol enkutuk enye; ore anaa olkuo le ker opuoi aayieng, o anaa enker natii dukuya lelo oodung ilpapit lenyena, mebol enkutuk, neijia sii apa eikuna ninye, eitu ebol enkutuk. Ore te nkitorogonyata e ndung'okinoto e nkiguana, newaki ninye; naa ore to lporror lenye aing'ae otishilayie, nchere eiwuang'ieki ninye te ina kop e lelo ooishu, etooshoki te nkitarruoroto oo ltung'ana laainei? Neitobir ninche enkurare enye te nebo lelo arruok etunukayioki ninye te nebo olkarsis, hoo duoo ninye nemeeta entorroni nataasa, neitu ae kata ejo elejare te nkutuk enye. Kake eyieunoto apa Olaitoriani pee epik ninye olbae; etipika Olaitoriani ninye osina; neitaa ninye kewan olasar loo ng'ok, nelo adol eishoi enye, neitoodori nkolong'i enyena; kelo eyieunoto o Laitoriani adupoyu te nkaina enye; kelo ninye adol ilng'anayio le mion o ltau lenye neshipayu; ore te yiolounoto enye ilo osipa, ilo sinka lai, keisho ilkumok meikenakini isipat; naa kenap ninye nkitarruorot enye. Ore enkaraki ina kaoriki ninye erubata te nebo lelo kituaak, neor ninye nena naataaruaki te nebo lelo oogol; enkaraki natubukoko ninye enkishui enye keeya, neikenakini lelo arruok; ore enkaraki ina netanapa ng'ok oo lkumok, neaku oloomonoki lelo aitarruorok. “Taranyisho iyie na olupi, ina neitu eisho; tabuaku taranyisho to ltoilo sapuk, iyie ina neitu ae kata esaisayu! Amu ore nkera e ina apa naiturrayioki naa eikumok aalang ine ina nayama, Olaitoriani ojo. Ntalala ewueji o lng'obor lino, nincho lelo karash le manyisho ino elaari; minunuk, ntoodoro nkeenta inono nintagol ncheito inono Amu eilo iyie aisuaa te tatene o te kedienye, naa kelo eishoi ino aya iloreren nepuo aamany nena anas apa naatung'uayioki. Miureishoyu amu mikipuoi aaitukurru; ming'aing'ai amu mikintukurruni; amu mingil ae kata adamu enkurruna e kitisho ino, ore ilo sina lino apa ira enkoliai nimingil ae kata adamu. Amu Ilo Likintobira iyie ninye olpayian lino, Olaitoriani loo lororani ninye enkarna enye; naa Ilo Sinyati le Israel Olakordunoni lino, naa keji ninye Enkai e nkop pooki. Amu kimpoto iyie Olaitoriani, itiu anaa enkitok nataarayioki netum osina to ltau, anaa esiankiki naiturrayioki, Enkai ino najo. Te rishata dorrop apa aaiturrayie nanu, kake to lng'ur kitok aaiturrur nanu. Te ngoro nadooyo nanu aisudoyie enkomom ai te iyie, te nkiti rishata, kake te nyorrata oo ntarasi nanu aaing'urrie iyie, Olaitoriani ojo, Ilo akordunoni lino. Amu kelo ena atiu anaa nkolong'i e Noa te nanu: ore anaa apa enainosa olmumai nchere meigil nkariak e Noa aapuonu enkop, ainosa sii olmumai nchere maaigil ae kata agorokino, nemaigil ae kata aisikong. Amu eidim aaidurra ildoinyo, neidimi aaiwuang'ie ildoinyo, kake melo ae kata ina nyorrata ai nauno aing'uaa intae, ore ilo sotua lai le seriani nemeiwuang'ieki, Olaitoriani ojo, ilo oata olng'ur tialo iyie. Iyie ena nainosa osina, ena natara olkutati neitu eitagoli, ng'ura, kairragie nanu isoito linono aitobiraki, naitobir ilkitamanyunot linono too ltoto oogol enkinyang'a ooji safira. Naitobir nanu iltaleta linono too soito oji agate, naitobir nchomito inyi too ltoto ooji almasi, naitobir isunta inono pooki too soito oogol e nkiyang'a. Ore layiok linono pooki naa Olaitoriani olo aiteng'en, naa kepuo lelo ayiok linono aadupoyu oleng. Naa kepuoi aaitubul intae te sipata; nipuopuo aalakuaniki olosilisili, amu mintokiki intae aaureishoyu; ore too ntabo, nemenyikaki ninche intae. Te nedumakino intae likae tung'ani neme nanu eing'uaa ina; ore ilo oba anaa olodumakino intae nebatata te nkaraki intae. Ng'ura, aitobira nanu olkunoni laa ninye okut enkima oo nkuk, neitobiru imasaa o larrabal pee easishoreki. Aitobira sii ilo oitalaku elap pee eidaikie; meetae iruparen naitobiraki pee earieki intae naapuo aaku, ore pooki ng'ejep odumakino intae te nkiguana, nintukurrurru. Ena ninye enjung'ore oo sinkan lo Laitoriani naa kailepie nanu ninche, Olaitoriani ojo.” “Wou pooki ng'ae oata enkure, wootu entook nkariak; wou, iyie ilo lemeeta mpisai inyang'u endaa inosa! Wou, inyang'u enaisho o kule, wou, miata ropiyiani nemetii enkinyang'a. Kaainyo pee inchang'itie iropiyiani te ina neme endaa? Kaainyo pee inchang'itie ole koisiayio te ina nemeraposhisho? Toning'oki nanu nias ina naajoki, pee itum ina daa sidai aisul, nishipakino nena naapir. Irrugokoki nanu enkiok nilotu enatii; toning'o pee etum oltau lino atopuaa; pee aitobir nanu te nebo iyie osotua loo ntarasi, ilo sotua lai ouno te nkaraki Daudi. Ng'ura, aitaa apa nanu ninye shakeni too loreren, pee eaku olarikoni o Laitoreisho too loreren. Ng'ura, ipuopuo intae aaipuotu lelo oreren limiyiololo intae, ore lelo oreren lemeyiolo intae nekuetiki intae, te nkaraki Olaitoriani Enkai inyi, o Ilo Osinya le Israel, amu eitaa ninye intae olosho kitok. Eng'oru Olaitoriani eton etumoyu, empoto ninye eton etaana; nchoo ilo torrono epaash nkoitoi enyena torrok, ore ilo lemeas isipat nepal ndamunot enyena; nchoo ninye errinyokino Olaitoriani, pee etum Olaitoriani aing'urrie ninye, nchoo errinyokino Enkai ang, amu kepalaki ninye oleng. Amu ore ndamunot aainei neme ndamunot inyi, ore nkoitoi aainei neme nkoitoi inyi, Olaitoriani ojo. Amu ore anaa enalakuaniki keper enkop, neijia etiu nkoitoi aainei elakuaniki nkuninyi, o ndamunot aainei elakuaniki ndamunot inyi. Amu ore anaa enadou enchan o enkinuku eing'uaa keper, nemerrinyo kake kepuo aaitashal enkop, neitubulu nkaitubulu, neisho ilanterera lelo oounisho neisho endaa ilo oinos, neijia sii etiu ilo rorei lai oimu enkutuk ai; maarrinyokino nanu erok, kake kelo aitabaya inaipirie, nelo aitubul ina toki apa nairriwaka. Amu mpang'ipang'a intae aapuo te ng'ida, nerikori intae te seriani; ore lelo doinyio o ndoinyio naatii dukuya intae, nebuaku aaranyisho, ore lelo keek pooki li ong'ata neosh nkaik. Ore erishata nabulu ilkiku naa iltarakua oobulu, ore erishata nabulu endiati naa olchani onyaanyukie olarrashi ore ena to Laitoriani naa kelo aaku entoki nadamuni, olmonekie loo ntarasi lemeiwuang'ieki ae kata.” Nji ejo Olaitoriani: “Embung'a esipata niasiasa nena sidain, amu kelotu enjeunoto ai asieku, ore enkordunoto ai neibalunyeki. Emayiana ilo tung'ani oas ena, o enkerai e tung'ani naibung akurraki, ilo oibung sabato, nemeisarkionie, neibooyo enkaina enye pee meas entorroni ake pooki.” Nchoo ilo leeiking'a oeuo aibung'are Olaitoriani ejo, “Esipa kaakepu nanu Olaitoriani too ltung'ana lenyena.” Naa nchoo ake mejo ilo sunash ogelema, “Ng'ura, ara nanu olchani otoyio.” Amu nji ejo Olaitoriani: “Ore lelo sunaishi oogelema ooibung sabato ai, lelo oogelu mbaa naaitiship nanu neibung aakurraki olning'o lai lo sotua, naa kalo nanu aisho ti atua enkaji ai o ti atua isunta e nkaji ai, entoki nadamunyeki sidai nalang ilayiok o ntoyie; kaisho nanu ninche enkarna oo ntarasi nemeiwuang'ieki ae kata. “Ore lelo tung'ana leeiking'a oopuonu aaibung'are Olaitoriani, pee esiaai ninye, pee enyorru enkarna o Laitoriani, pee eaku isinkan lenyena, ore pooki ng'ae ooibung sabato, nemeisarkionie ninye, neibung olning'o lai lo sotua akurraki ore kulo nariku nanu ilo doinyio lai sinyati naisho nanu ninche meting'idata ti atua ina aji ai e nkomono; ore lelo asarri lenye oopejori o nkishorunot enye, naa kepuoi aang'amaa te nchumata ilo perere lai lo lasar; amu kepuoi aajo enkaji ai enkaji enkomono too loreren pooki. “Nji ejo Olaitoriani Enkai, ilo oiturrur lelo apa ooiturrayioki le Israel, kaigil nanu aiturrur kulikae te nebo lelo ooidipaki aaiturruro.” Na ng'uesi kuna pooki e ong'ata wootu enosa - o intae na ng'uesi e ntim pooki. “Aimodook ilarripok lenyena naa ilmoda pooki; ildiein oomoda ninche pooki, meidim aatabuak, ooidetidet eirrag oonyor aaimugo. Eeta lelo diein enkuli kitok, meraposho ae kata ninche. Ore sii lelo shekuti naa kemoda; eibelekenyakinote pooki nkoitoi enye maate, oltung'ani enkoitoi enye nadupore, neijia eikuna pooki. Nejo ninche, ‘Wootu’, maatook enaisho, maitaraposho ate enaisho napi; ore taisere naa ketiu anaa ena olong, keaku kitok alus.” keidak iltung'ana supati nemeetae oltung'ani oshilaa; eiwuang'ieki lelo tung'ana le Nkai aaya, nemetii oltung'ani oyiolo, amu ewaki ilo tung'ani supat aaitung'uaa entorroni, nejing ninye atua eseriani; neeng'iyeng'a ninche too rruatin enye, lelo oopuo te supatisho. Kake ore intae, entinyiku wootu ene, intae ilayiok loo lasakutok, eishoi oo looibor onyek o mulayoni. Kaing'ae ilo linguranienie intae? Kaing'ae ilo libolokiki nkutukie aakueniki, nintarasusu ilng'ejepa? Aimirara intae nkera e nkitarruoroto, eishoi e lejare, intae lelo oata enkiyupuyup o lng'uarra ti atua lkeek, ti abori pooki shani onyori; intae lelo ooyieng nkera enye too erat, ti abori ndapidapo sapuki? Atua lelo soito oopuyiapui lo earata ninye erubata ino; ninche, eluata ino; amu ninche iyie itubukoko olasar ooki, iyaua iyie olasar le ntapa. Kaaitiship nanu kuna tokitin? Shumata oldoinyo oado etii erruat ino, naa ine iyie ilepa alo aitayu olasar. Ore te njoolata e kutuk aji o ng'apeta e kutuk aji nitipika iyie nkitanyaanyukot inono; amu ore kitung'uaitie, niwuang'ie ilkarash loo ndapashi inyi, nikedikede intae nena rruatin dapashi; nipuopuo intae aainyang'a maate o ninche, nitonyorra intae ina dapash enye, ning'ura intae ina masipaisho. Itudumunye iyie alo Molek iata eilata niponaa iyie enkorropil ino, nirriwaa iyie olkilikuai lino enelakua, nirriwaa enelakua omeshomo enemeneng'a. Iteekenye iyie te nkadoro e lototo ino, kake eitu iyie ijo, “Metii osiligi”; inoto iyie enkishui ng'ejuk nikinyaaka aitagol, neaku eitu iyie nterre. Kaing'ae apa ilo liurere, neaku itelejishe, neitu kidamu nanu, eitu ninye kipik ndamunot? Keitu nanu ang'iri ena kata pooki, neitu ake kiureyu nanu? Kalikioo isipat inono o yasat inono, kake mikiret. Ti ninchir iyie, nchoo ilo sototi lino loo nkitanyaanyukot mikitokordu! Kenap ninche osiuo aya, keya ninche enkiyang'et. Kake ore oloisudori ti atua nanu naa kelo aya ina kop, nelo ajung ilodoinyo lai sinyati. Naa kepuoi kenya aajo, “Teshetu, teshetu, ntobira enkoitoi, iwuang'ie pooki toki naikobisho te nkoitoi oo ltung'ana laainei.” Amu nji ejo ilo otii shumata osinya, enye Sinyati: “Aamanya nanu ewueji e shumata sinyati te nebo ilo oata oltau supat obor, pee etum aitopiu enkiyang'et e ilo obor, neitopiu oltau le ilo supat nebor. Amu magilunore nanu ninche ntarasi, nemagorokino nanu ninche anaake; amu nanu eimu enkiyang'et, naitobira nanu ina kiyang'et e nkishui. Te nkaraki eng'oki enye o lorok apa atagore nanu, atoosho nanu ninye, naisudoo enkomom ai nagoro, kake eshomo ninye siadi aitalaaya too nkoitoi o ltau lenye makewan. Atoduaa nanu nkoitoi enyena, kake kaishiunye nanu ninye; karikoo nanu ninye naitagol ninye, naitigir lelo ooishir. Eseriani to lolakua o to lotaana, Olaitoriani ojo; naa kaishiunye nanu ninye. Kake etiu ilo torrono anaa enaiposha nailugo, ore enkare enye neilugu isuut o esarng'ab. Meetae eseriani too larruok, Olaitoriani ojo.” “Teyietu nchira, nimigira, tabuaku ilepunye oltoilo lino anaa entarumpeta; mbalakinye iltung'ana laainei nkitarruorot enye, mbalakinye enkaji e Yakobo ing'ok enye. “Ore eyia, kaaing'oru ninche anaake, neng'ida ninche te neyiolou nkoitoi aainei, eji netiu anaa olosho oas isupati, leitu epuo aaing'uaa nkiguanat e Nkai enye; kaaikilikuan ninche nkiguanat naasipa, neng'ida ninche etaaniki Enkai. “Kainyoo pee kiteena iyiook ate, aaitupukoo? Nimidol iyie. Kainyoo pee kintoborro iyiook ate, neitu iyie ishilaa ina? Ng'ura, ore te nkolong e enata ino, ning'oru iyie murruna ino makewan, nintorogony ilaisiaayiak linono pooki. Ng'ura, iyeniyene intae ate pee itumokiki aailepilepa nintayuyu olarrabal. Ore eenata neeijo ena inyi ena olong, nemeisho iltoiloishi linyi metoning'i te shumata. Kena enata empukuroto ategelua nanu, ina olong naitobor oltung'ani kewan? Ke nkolong nairrug oltung'ani endukuya enye anaa enkujita, neisalaash ilkuniyiani o nkuruon ti abori ninye? Ilo iyie ajo ena eenata e mpukuroto, naa enkolong nang'amaroyu to Laitoriani? Aime ena eenata empukoroto nategelua nanu: pee elaari ienat e ntorroni, neitololong'i nkeenta e nchata too murto, ore ilo oitorogonyaki nelaari meshomo, negili pooki shata oo murto? Aime pee ing'arie endaa ino ilo oisumash, neyau ilo aisinani le meeta ang atua enkaji ino; ore pee idol ilo lemeishopo ninchop, neme pee isudoo kewan te lelo tung'ana leeijo iyie? Netum taa ewang'an ino atotiuo anaa enkakenya, ore enkishiunoto ino nelotu asieku; ore esupatisho ino nelo te dukuya ino, ore enkitoo o Laitoriani neaku ninye nikirrip te siadi. Nimpotisho iyie, nikiwaliki Olaitoriani; ore pee nchir iyie, nejo ninye, Nele nanu. Tiniwuang'ieng'ie ti atua ate ina shata e murt, o ina utata o lkimojino, o enkiroroto torrono, ti nipukokiki intae maate lelo ooisumash, nintaraposhosho eyieunoto e ilo oata osina, netum taa ewang'an inyi ailepu te naimin ore emisimisi inyi netiu anaa enkipirata e nkolong. Nikirikoo iyie Olaitoriani anaake, nikintaraposh Olaitoriani iyieunot inono too mbaa sidain, neitagol iloik linono, nitiu iyie anaa enkurma natubukokoki enkare, nitiu anaa enchorro e nkare, nemeishunye ae kata. “Ore wuejitin inono apa naaidaikieki nesheti; naa ilo iyie adumu olkitamanyunoto loo ishoritin kumok; nikipuoi aajo olaramani too lusien olaitobirani loo nkoitoi naalala enkanasa. “Ti nimbelekeny iroruat inono apaash sabato, nipaash isiaitin inono te nkolong ai sinyati, nintaa iyie sabato enkolong e nchipai o enkolong sinyati o Laitoriani nayanyiti; ti niyanyitu iyie ina olong, nimilo too nkoitoi inono makewan, anaa ing'oru enchipai ino makewan, anaa iro mbaa e pesho; nitumoki taa atishipakinoyu ina olong o Laitoriani, naaisho nanu iyie shomo too wuejitin e shumata e nkop; naaitoti nanu iyie te ina jung'ore e Yakobo papaai lino, amu enkutuk o Laitoriani nairoro kuna.” Ng'ura, eitu edorropu enkaina o Laitoriani, eji metaa meekure meidim aitajeu, anaa eitoming'anaki enkiok enye, eji metaa meekure ening'isho; kake entorroni inyi nayaua eoro, te rishata intae o Enkai inyi, naa ng'ok inyi naaisudoitie enkomom enye te intae, o metaa meekure ening intae. Amu eisarkionieki nkaik inyi to sarge neisarkionieki ilkimojik linyi te ntorroni; eiroro nkutukie inyi elejare, neitobiru ilng'ejepa linyi entorroni. Meetae hoo obo olo enkiguana te sipata, meetae ololo aiguana te sipata, osayia le pesho eng'idare ninche, neiro elejare, neipiru ninche esuujisho neyau entorroni. Neiu ninche ilmosor le nturbubua neitobiru ninche orreshet te nkaji e surusuri; ore ilo oinos lelo mosor neye, ore ilo mosori odanyi nedanyuni olasurai. Ore lelo rresheta ooshetu ninche nemeaku inkilani, meimulumul iltung'ana ate te nena naaitobiru ninche. Ore esiai enye naa esiaai e ntorroni, netii nkiasin o larrabal nkaik enye. Nekuetiki nkejek enye enkarrueisho, neisarisaraki aaibukoo osarge lemeeta entioto; ore ndamunot enye naa ndamunot e nkarruoisho, eliyio o enkidaata naatii nkoitoi enye. Meyiolo ninche nkoitoi e seriani, nemetii esipata nkoitoi enye; meetae oloim nena oitoi oyiolo eseriani. Ore enkaraki ina kelakuaniki iyiook esipata, nemeinepu ae kata iyiook esupatisho; king'oru iyiook ewang'an, naa ng'ura, enaimin kitum, king'oru ewang'an kake te misimisi kipuo. Nikirrapirrapu iyiook esuntai kipuo anaa iltung'ana modook, nikirrapirrapisho anaa iltung'ana lemeeta nkonyek; nikirroro dama nikitiu anaa iloopuoito te nkinuku, ore ti atua lelo tung'ana oogol kitotiutuo anaa iltung'ana ootuata. Kinkurrukur pooki anaa lng'arurum le ntim nikinchir aayietu anaa nturkuluni; niking'oru esipata, kake meetae, niking'oru enjeunoto, kake kelakuaniki iyiook. Amu etoponari nkitarruorot ang te dukuya iyie, ore ing'ok ang neishakenoki iyiook; ore nena kitarruorot ang netii te nebo iyiook, nikiyiolo iyiook ntorrok ang: kitigila nkitanapat nikiany Olaitoriani, nikimbelekenyate aaing'uaa esujata Enkai ang, kiimaki enkitorogonyare o engolon e nkong'u, nikidamu too ltauja nikiro ilomon le lejare. Eibelekenyaki esipata, ore esupatisho netalakuana; amu eimina esipata too umat oo ltung'ana, ore enkitoriori nemetumi. Metii esipata, ore ilo oiwuang'a te ntorroni nepik kewan batisho. Etoduaa Olaitoriani ina, neitu eitiship ninye nchere eji meetae esipata. Etoduaa ninye ajo metii oltung'ani, neing'asia pee edol ajo meetae oltung'ani omitu ilo oitorogonyitae, neaku enkaina enye kewan nayaka ninye enkisulata, ore esipata enye neitasheyie ninye. Eishopo ninye esipata anaa enkila o lgoo, neishop emaupe e njeunoto ten dukuya enye; neishop ninye ilkilani le lap, neimulumul kewan te mpushuna napi. Te risioroto oo nkiasin enye elo ninye aitalak ninche, neitalak te ngoro lelo mang'ati lenyena; ore lelo ootii olmanie le naiposha neitalaku te ninche. Naa kepuo ninche aaureyu enkarna o Laitoriani tenkalo o loo ntoluo, neimin enkitoo enye enkilepunoto e nkolong, amu kelotu ninye anaa enkare olkeju nanang'unye “Naa kelotu ninye Sion anaa olalakunoni too lelo le nkaji e Yakobo ooibelekenya aaing'uaa enkitarruoroto, Olaitoriani ojo. “Naa ore ti alo nanu, ele olning'o lai lo sotua o ninche, Olaitoriani ojo. Ore ina kiyang'et ai natii shumata iyie, o lelo rorei laainei latipika nanu enkutuk ino, nemepuku ninche te nkutuk ino, aashu too nkutukie oo nkera inono, Olaitoriani ojo, ebaiki ena kata neito idia alo o ntarasi.” Tudumunye, tawang'a, amu eeuo ewang'an ino, netudumunye enkitoo o Laitoriani te shumata iyie Amu ng'ura, kelotu enaimin aiput enkop, neiput enaimin kitok olorere; kake kedumunye Olaitoriani ti alo intae, nedoli enkitoo enye te shumata intae. Naa kepuonu iloshon ina wang'an inyi, nepuonu ilaiguanak ina kitawang'ata e nkilepunoto inyi. Tushumu iyie nkonyek inono ntamanai, toduaa; eiturrurrote ninche pooki te nebo, nepuonu enitii; kepuonu ilayiok linono eing'uaa enelakua, naa kenapi ntoyie inono too nkaik. Ore pee idol iyie ina ning'idayu, neiput oltau lino enchipai, amu ore ina kumoi e naiposha naa eikimbelekenyakini iyie, kelotu ina arsisisho oo loshon enitii. Keiput intae o lorora loo ntamesin, nena tamesin kutiti e Midian o Efa; kepuonu nekua pooki naaing'uaa Sheba. Keyau ninche sahabu o enkorropil, neibalunye ninche enkisisa o Laitoriani. Ore nena luat pooki oo ntare e Kedar, nikinturrurrokini iyie, ore lelo meregeshi le Neba-iot nikipuo aaisiai iyie; kepuonu ninche eng'amaroyu to lperere lai lo lasar, ore ina aji ai e nkitoo naitaa kitok. Kakua kulo oopuo tiaai anaa enkatampoi, netiu anaa nturkuluni eim ilusien enye? Amu kaanyu nanu ilmanien loo naaiposha, ore nena melin e Tarshish neng'as aayau lelo ayiok linyi ooing'uaa enelakua, neyau enkosholai enye o sahabu enye te nebo ninche, te nkaraki Olaitoriani Enkai ino, o te nkaraki Ilo Osinya le Israel, amu kintaa ninye iyie kitok. Kepuonu iltung'ana leeiking'a aashet isunta inono, nikipuonu ilaiguanak lenye aaisiai iyie; amu ore apa te ngoro ai naatoosho nanu iyie, kake ore te nyorrata ai naaing'urrie nanu iyie. Keaku kebolo nchomito inono anaake, ore dama o kewarie nemeikeni ninche; pee kitum iltung'ana aayaki iyie ina arsisho oo loshon, eriku ilaiguanak lenye erukunye aapuonu. Amu ore ilo osho o enkitoria nimikisiai iyie neidak; ore lelo oshon naa keidaikieki katukul. Kelotu ina kitoo e Lebanon enitii, o lelo keek pooki sidain, pee epuonu aapik enkishiaa ene wueji e nkaji ai; ore ene wueji neitasheyie nkejek aainei naitaa kitok. Ore layiok le lelo apa ooitorogony intae naa kepuonu enitii eirrugo; ore lelo pooki apa oomen intae nepuonu aairrugo too nkejek inyi; naa keipot ninche intae aajo Na anasa o Laitoriani, Sion e Ilo Sinyati le Israel. Ore kinturrayioki apa nikimbayuni, nemeetae obo oim atua iyie, kaaitaa nanu iyie kitok te nkishiaa ntarasi, eng'ida oo ishoritin pooki. Ilo iyie anaku kule oo loshon, nilo iyie anak ilki loo laiguanak, naa ilo ayiolou nchere, nanu, Olaitoriani, Olaitajeunoni lino, naa nanu Olalakunoni, Ilo Magilani le Yakobo. Ore te rishata o suyai naa kayau nanu sahabu, ore te rishata e sekenkei naa kayau nanu enkosholai; ore te rishata e nchata nayau osuyai, ore te rishata oo soito naa esekenkei. Kaitaa nanu lelo aitasheikinok linono eseriani, naitaa lelo likintore te ngolon esupatisho. Meigili ae kata aaning olarrabal te nkop ino, nemening'i eliyio aashu enkinyala too lpolosien linyi; impotipoto intae isunta inyi aajo Enjeunoto, nijojo nchomito inyi Enkisisa. Meigil ae kata enkolong aaku ewang'an inyi te dama, anaa eaku ewang'an o lapa itum kewarie; kake Olaitoriani olo aaku ewang'an ino oo ntarasi, naa Enkai ino naaku enkitoo ino. Meigil ae kata enkolong adoyio te iyie, nemeigil olapa aaku enaimin, amu Olaitoriani ole aaku ewang'an ino oo ntarasi, ore nkolong'i inono e nkishirata neishieki. Ore iltung'ana linono naa keaku pooki supati; naa keya ninche ena kop aaitaa enenye ntarasi, ina aitubului natuuno nanu, ina siaai oo nkaik aainei, pee aatumi aaitaa kitok. Ore ilo oti te ninche naa kelo aaku olmarei kitok, ore ilo oti aisul neaku olosho magilani; ara nanu Olaitoriani; ore te nkata enye naa kaitasieku nanu ina. Etii Enkiyang'et o Laitoriani shumata nanu, amu aatubukoko nanu Olaitoriani eilata aput pee ayaki lomon supati lelo aisinak aairriwayie ninye nanu pee alo aruburub lelo ootigilate iltauja, pee aibalunye elakunoto te lelo ooena, o emboloroto te lelo ooikenoro te korokoroni. Pee aibalunye ajo etabawua olari lo Laitoriani, o enkolong e lap e Nkai ang; pee aitagol lelo pooki ooishir; pee aisho lelo ooishir ti atua Sion - olmarisian te rishata oo nkuruon, o ina ilata e ng'ida te rishata osina, o olkila le nkisisa te rishata e lepori o ltau; pee etumi aatejo ninche ilkeek le supatisho, ina unore o Laitoriani, pee etumi aaitaa ninye kitok. Naa kepuo ninche aaigil aashet iwuejitin apa neeidaaitie neshetu ninche nene wuejitin apa neetomijoonito, neram ninche nena anas apa naaidaitie, ina mijoonisho oo ishoritin kumok. Naa keitashe iltung'ana leeiking'a aairrita nkerrai inyi, naa iltung'ana loo loreren oopuo aaku ilaturok linyi o laitobirak loo sabibu; kake keipoti intae aajo ilapolosak lo Laitoriani, keimaki intae iltung'ana aajo ilaisiaayiak le Nkai ang; ipuopuo intae aainos olkar loo loshon, ore enkarsisisho enye nipuopuo intae aaisikarrare. Ore te rishata e nkurruna inyi naa itumutumu intae erubata katitin are, ore te rishata e sulare nipuopuo intae aang'idakino ewueji enye; metaa ore ti atua ina kop inyi naa ipuopuo aatum erubata katitin are, nitumutumu eng'ida oo ntarasi. Amu ore nanu Olaitoriani naa esipata ayieu, kaiba empurrore o enkitarruoroto; kalo nanu aisho ninche elaakinoto nasipa, nalo aitobir osotua loo ntarasi o ninche. Ore eishoi enye naa kepuo aayiolou ti atua loshon, neyiolouni nkera enye ti atua iloreren; ore pooki oodol ninche neyiolou ninche. Nchere olorere ele otamayiana Olaitoriani. Kang'ida nanu oleng ti atua Olaitoriani, keshipa oltau lai ti atua Enkai ai; amu aaishopo ninye nanu to lkila le njeunoto, aaimulumula ninye nanu to lkila le supatisho, anaa oloyamisho te nekus kewan too mporro anaa esiankiki narikori te neikod kewan too masaa enyena sidain. Amu ore anaa enaiu enkop nkaitubulu enyena, aashu anaa enaiu enkop nkaitubulu enyena neijia eiko Olaitoriani, Enkai; keitubulu esupatisho o enkisisa, te dukuya iloshon pooki. Ore te nkaraki Sion magira nanu, naa ore te nkaraki Yerusalem mayeng'iyeng'a nanu, o metaba anaa neibalayu esipata enye anaa ewang'an, netiu enjeunoto enye anaa oltaa oilang'isho oleng. Kepuo iloshon aadol ina kilepunoto e sipata, nedol ilaiguanak pooki enkitoo ino, naa eikipuoi aaisho iyie ina arna ng'ejuk, naa enkutuk o Laitoriani naishoru. Ilo iyie aaku emaupe e nkishiaa te nkaina o Laitoriani, niaku enkishili e nkitoo te nkaina e Nkai ino. Miking'ili aekata aajo Enaiturrayioki, nemeigili ae kata aajo enkop ino Olmuate; kake keaku eikiji iyie Enatii eng'ida ai atua ninye, naa keji enkop inyi Nayamaki; enkaraki nashipakino Olaitoriani intae, ore enkop inyi neaku keyama. Ore anaa enaayam olmurrani eselenkei, neijia eiko ilayiok linyi keyam intae, ore anaa enang'idakino oloyamisho esiankiki enye, neijia eiko Olaitoriani eng'idakino intae. Ore shumata sunta inono iyie Yerusalem, atipika nanu ilarripok; endama pooki o enkewarie pooki, nemegira ae kata ninche. Ore intae lelo oodamu Olaitoriani nemiyeng'iyeng'ang'a, Neminchosho ninye enkiyagata o metaba anaa neitasheyie Yerusalem, neitaa ninye enkisisa te nkop. Einosa Olaitoriani olmumai te nkaina enye e tatene o te nkaina enye magilani, ejo, “Maaigil nanu aishooyo entapa inyi metaa endaa oo lmang'ati linyi, nemeok iltung'ana leeiking'a ina aisho inyi oo sabibu naa ninye itanaurikitia; kake ore lelo ooisampu ninche ooinos neisis Enkai, ore lelo oosotu ilng'anayio ninche ook ti atua ilgorien le nkaji ai.” Shomo iima, shomo iima nchomito, ntobiraki iltung'ana enkoitoi; ntobira, ntobira enkoitoi kitok, iwuang'ie isoito, tudumu olmonekie metoduaa iloreren. Ng'ura, eibalunye Olaitoriani aitabaiki ineeiting'ie enkop: Tiaaki ina tito e Sion, “Ng'ura, eewuo enjeunoto ino; ng'ura, eeta ninye olerrinyore lenye te nebo ninye neeta olekoisiayio lenye te dukuya ninye.” Naa keipoti ninche aajo Iltung'ana sinyat, Ilookorduno lo Laitoriani; naa kepuoi aajo intae Ilooing'oruaki enkanasa neitu eing'uari. Kalo ele olotu eing'uaa Edom, oishopito ilkilani oonyokie ooing'uaa Bosara, kalo ilo olotu eishopo ilkilani le nkitoo, olotu te nkitoo o te ngolon? “Nanu ilo oibalunye esipata, Olmagilani oitajeusho.” Kainyoo pee enyokioo ilkilani linono, neikununo ilkilani linono anaa ile, ilo olo aim eneironyieki isabibu? “Aitunyo nanu enkironyet oo sabibu openy, ore too ltung'ana nemetii hoo obo otaa te nebo nanu; naitunyoo nanu ninche te ngoro ai naitame nanu ninche te mpushuna ai; ore ilo sarge lenye neisuakino ilkilani laainei, naidurukie nanu ilkilani laainei pooki. Amu etii apa ina olong e lap atua oltau lai, ore ilo ari lai le nkordunoto netabaua. Aing'ura nanu, kake meetae hoo obo laaretu, naing'asia amu meetae hoo obo laatijing'a enkoriong, neaku te nkaina ai ake anoto enkishuroto, naaitasheyie nanu empushuna ai. Aitunyoyie nanu olorere te ngoro ai, naitemer nanu ninche te ngoro ai napi, nabukoki nanu osarge lenye enkop.” kalimu nanu ina nyorrata o Laitoriani nauno, ina kisisa o Laitoriani, te risioroto e nena pooki naaishoo iyiook Olaitoriani, o ina supatisho kitok te nkaji e Israel, apa naishoo ninye ninche terisioroto o lng'ur lenye, te risioroto e ina kitoo e nyorrataenye. Amu etejo ninye, Esipa iltung'ana laainei ninche, nkera aainei nemeeta elejare; netaa ninye Olaitajeunoni lenye. Ore to losilisili lenye pooki, neisilisiloki ninye, naa ilo malaika otii te nebo ninye oitajeuo ninche; te nyorrata enye o to lng'ur lenye eitajeuo ninye ninche; etudumua ninye ninche nenap ninche nkolong'i pooki ti apa. Kake etogolong'utua ninche nepik osina Enkiyang'et enye sinyati; neaku eibelekenye ninye aaku olmang'atinta lenye, ore ninye openy negilunore ninche. Neitoki ninye adamu nkolong'i e apa moitie, e Musa ilo sinka lenye. Koree ilo apa oyaua ailepunye te naiposha lelo shekuti loo nkerrai enyena? Koree ilo opik atua ninche enkiyang'et enye sinyati, ilo oisho ina aina enye e nkitoo meshomo te nkaina e tatene e Musa, ilo apa otooro nkariak te dukuya ninche, pee eitobiraki kewan enkarna oo ntarasi, kaing'ae otorikoyie ninche aimie ine negut? Anaa embarta naimita olpurkel, eitu apa ninche errorro. Anaa nkishu naadoyio aapuo oerata, eishoo ninche Enkiyang'et o Laitoriani enkiyeng'iyeng'ata. Neaku itorikoyie apa iyie iltung'ana linono, pee intobiraki kewan enkarna e nkitoo. ng'ura kop te shumata toduaa, te ine wueji ino e nkitoo nesinya. Koree olokiyo lino o enkidimata ino? Ore eyieunoto ino o lng'ur lino neiboori te nanu. Amu ira iyie Papa lang, hoo nemeyiolo iyiook Abraham nemelimu iyiook Israel; ore iyie, Lo Aitoriani, ira Papa lang, ore enkarna ino, Olokordu iyiook ebaiki apa moitie. Olaitoriani, kainyoo iyie pee ncho iyiook matapaash nkoitoi inono nintagol iltauja lang metaa mikiure iyie? Torrinyunye te nkaraki isinkan linono, lelo oshon le njung'ore ino. Ore lelo tung'ana linono sinyat netujung'o enkaji ino sinyati te nkiti rishata; neitunyo ilmang'ati lang ina aji ino sinyati. Kitotiutuo iyiook anaa iltung'ana leitu ae kata ing'as aitore, kitotiutuo anaa iltung'ana lemeipotieki enkarna ino. Oi naaji tenaa eipolos oloing'ang'e alotu enkop, pee etum ildoinyo aaikirikirata te dukuya iyie - neikirikira anaa emoti naitokitok pee eibalieki enkarna ino too lmang'ati linono, netum iloreren aikirikirata te dukuya iyie! Ore apa pee ias iyie mbaa naaitureisho neitu iyiook king'oru, nidou alotu enkop, neikirikira ildoinyo te dukuya iyie. Ore ebaiki apa moitie meetae oltung'ani otoning'o, aashu olotumusuo te nkiok, nemeetae olotoduaa te nkong'u Enkai nikinyaanyukie, naasisho te nkaraki lelo ooisilig ninye. Intoomon iyie ilo oshipakino easata oo supati, lelo likidamu ninche too nkoitoi inono. Ng'ura, itagore apa iyie, nikitaasa iyiook eng'oki; kitobiko iyiook ti atua ng'ok ang te nkata naado, naaamaa, keitajeuni iyiook? Kitotiutuo iyiook pooki anaa oltung'ani oiduruk, ore esupatisho ang pooki netotiuo anaa olkila loo lkereu. Kitoito pooki anaa embeneyoi netiu entorroni ang anaa osiuo, nekutaa iyiook aya enelakua. Ore enkaraki ina meetae hoo obo oipot enkarna ino, meetae oliking'oru aibung'are, amu isudoyie iyie enkomom ino te iyiook, nitanapua iyie iyiook apik enkaina oo nkitarruorot ang. Kake ore ake eyia, Olaitoriani ira iyie Papa lang, kira iyiook nkulupuok, nira iyie olaitobirani; kira iyiook pooki esiai oo nkaik inono. Migorokino iyie iyiook oleng, Olaitoriani, nimidamu nkitarruorot ang ntarasi. Ng'ura, tadamu nchere kira iyiook pooki iltung'ana linono. Etotiutuo nena anas inono sinyat anaa ong'ata, etotiuo Sion anaa ong'ata, etaa Yerusalem olmuate. Ore ina aji ang sinyati naa sidai, naa atua ninye apa kisisie loo papa, netapejoioki te nkima, ore nene wuejitin ang pooki sidain neidaa. Eimbooyo iyie kewan te kuna baa, Olaitoriani? Eigira iyie nintame iyiook aitulus? Aanyita nanu maaing'oru lelo apa leitu aaikilikuanu nanu, aanyita nanu maanoto lelo apa leitu aaing'oru nanu, atejo nanu, “Nele nanu, nele nanu,” teilo osho apa leitu eipot enkarna ai. Aitorioko nanu nkaik aainei endama pooki aipotu olorere kiserut, lelo oopuo te nkoitoi nemesidai, esujaa mbaa enye maate; iltung'ana laaitagor ninche oas mbususi anaake te dukuya nkonyek aainei, epolosisho ti atua nkurman neinok enkorropil te shumata isoito; ilootoni ninche too nkuraren, netoni te nkewarie too lnukat lenye; lelo ooinos nkiri oo lbitiro, ore motori o lminong netii iltooi lenye; nejo ninche, “Talamari minyiku, mikinyikaki nanu, amu aaiteng'elaki nanu aaitalam iyie.” Empuruo naimu nkumeishin aainei ena, enkima nayupuyup endama pooki. Ng'ura, eigeroki te dukuya nanu aajo, “Magira nanu, kake kaitalaku nanu, ee, kaitalaku nanu too lgooitie lenye, te nena kitarruorot enye o too nkitarruorot oo loo menye te nebo, Olaitoriani ojo; enkaraki apa natapejo ninche enkorropil too nchumat oo ndoinyo, naasukeny ninche nanu te nchumata oo ldoinyo, katemaki nanu ilgooitie lenye elaakinoto oo nkitarruorotenye e apa.” Nji ejo Olaitoriani: “Ore anaa enatiu enaisho oo sabibu te nkimarrimarrati nejo ninche, Minyal ninye, amu etii emayianata atua ninye, neijia alo aas te nkaraki osinka lai, nemaidaikie ninche pooki. Kayau nanu ina ishoi e Yakobo, o ene Yuda, lelo ajung'ok lo ldoinyo lai; lelo gelunot laainei oopuo aajung ine, nepuo lelo sinkan laainei aabik te ine. Kelo Sharon aaku endaata oo nkerra, ore Oerata le Akor neaku ewueji neirragie nchoo, e lelo tung'ana laainei laaing'oru nanu. Kake ore intae iloany Olaitoriani, lelo lemedamu oldoinyo lai sinyati, lelo ooirragie emesa oo mbaa oo nkitumusumusot, nimputuputu nkikompeni e naisho naitushula. Karewaki nanu intae olalem, nipuopuo intae pooki aairrugokino ilo oar intae entuata; amu ore apa pee aipotisho, neitu irukishosho, ore pee airo, neitu ining'ining'i, kake itaasa intae ina torrono too nkonyek aainei, nitegelutua ina nemaaitiship.” Ore enkaraki ina nji ejo Olaitoriani Enkai, “Ng'ura, kepuo isinkan laainei aadaa, kake ilo iyie aisumashu; ng'ura, kepuo isinkan laainei aaokisho, kake ketir intae enkure; ng'ura, kepuo isinkan laainei aang'idayu, kake kepuoi aaitukurru intae; ng'ura, kepuo isinkan laainei aaranyisho te ng'ida o ltau, kake ipuopuo intae aaishir te mion o ltau, niyietutu aaishir te nkaraki emion o ltau. Ning'ueikiki intae enkarna inyi lelo gelunot laainei meitaa oldeket, naa kear intae Olaitoriani Enkai entuata; kake ore lelo sinkan lenyena naa keipot ninye ti ae arna. Neaku ore ilo omayian kewan tena kop, nemayian kewan te Nkai e sipata, ore ilo oinos olmumai te nkop, neinos te Nkai e dede; amu meekure edamuni inyamalitin e apa, neisudoyioki ninche too nkonyek aainei. “Amu ng'ura, kaitobiru nanu oloing'ang'e ng'ejuk o enkop ng'ejuk; nemeitokini aadamu ntokitin e apa musan, nemeitoki aajing ilukuny. Kake tishipayu ning'idayu ntarasi te nkaraki ina naitobiru; amu ng'ura, kaitobiru nanu Yerusalem natii eng'ida, ore lelo tung'ana lenyena neiput enchipai. Kang'idakino nanu Yerusalem, nashipakino iltung'ana laainei; meigili ae kata aaning ti atua ninye oltoilo le nkishirata, anaa olkiyioi lo sina. Meigil ae kata nkera kutiti aaye ti atua ninye, nemeitokini aata iltung'ana kituaak lemebikoo, amu keaku keye enkerai etaa enoo larin iip, ore olaing'okoni loo larin iip netum oldeket. Keaku keshet ninche nkajijik nemany ninche; neun ilkeek loo lng'anayio neinos ilng'anayio lenye. Meigil ninche aashetisho nepuonu kulikae aamany; nemeigil ninche aaunisho nepuonu ilkulikae aainos; amu ketiu nkolong'i oo ltung'ana laainei anaa nkolong'i o lchani, naa kepuo lelo gelunot laainei aashipakino te nkata naado ina siai oo nkaik enye. Mepuo ninche aanauru pesho anaa eiu nkera to sina; amu keaku ninche eishoi e ilo omayiana to Laitoriani, o nkera enye te nebo ninche. Ore eton eitu eipotisho ninche nawaliki nanu ninche, ore eton eirorita ninche naning nanu. Naa kelo olkuoo le ker o osuyiani aadaa te nebo, neinos olng'atuny nkujit anaa olkiteng; neaku enterit endaa o lasurai. Nemeitoki ninche aata batisho anaa einyalisho te ilo doinyo lai sinyati, Olaitoriani ojo.” Nji ejo Olaitoriani: “Olorika lai le nkitoo keper naa ewueji oo nkejek aainei enkop; kaji eikununo enkaji nikindim ateshetaki nanu kaji eikununo ewueji ai naeng'ieng'are.? Ore kuna tokitin pooki naa enkaina ai naitobira, metaa nkunaainei kuna tokitin pooki, Olaitoriani ojo. Kake ele tung'ani nanu aing'oru, ilo obor neirridu to ltau lenye, neikirikira eure ororei lai. Ore ilo oyieng olkiteng nenyaanyukie ilo osesekuan oltung'ani; ore ilo apolos olkuo le ker nenyaanyukie ilo ogil oldia emurt; ore ilo oitarasu olasar le ntapa, nenyaanyukie ilo oitarasu osarge le mbitir; ore ilo oitobir olasar le ndamunoto le nkorropil, nenyaanyukie ilo omayian enkitanyaanyukoto oo nkaitin. Etegelutua kulo nkoitoi enye maate, ore iltauja lenye neshipakino nena baa olminong; kagelaki sii nanu ninche enkitamioto metadoiki ninche, nayau enkuretisho shumata ninche; amu ore apa pee aipotisho, nemeetae hoo obo oirukishe, ore pee airo nanu nemeetae hoo obo laainining'o, kake etaasa ninche ina torrono too nkonyek aainei, negelu ninche nena nemaaitiship nanu.” Entoning ororei lo Laitoriani, intae lelo ooikirikira te nening ororei lenye: “Etejo lelo alashera linyi ooiba intae, nenang'aki intae auluo te nkaraki enkarna ai, ‘Enchoo meisisi Olaitoriani pee kitum iyiook aatodol eng'ida ino’; kake ninche epuoi aaitukurru. Toning'o ina kilepilep te nkanasa! Ilo toilo oing'uaa enkaji e Nkai! Ilo toilo lo Laitoriani, eitalaku elap too lmang'ati lenyena! Ore eton eitu esaisayu ninye, neisho; ore eton eitu ebaiki emion ninye neiu ninye enkayioni. Kaing'ae ae kata otoning'o entoki naikununo nji? Kaing'ae ae kata otodua ntokitin naikununo nji? Keidimi aatoiu olosho te nkolong nabo? Keidim olosho ataa te nkata nabo? Amu etasaisayia ake Sion nabo kata neiu ilayiok lenyena. Kaisho nanu ninche metoini nemaretu? Olaitoriani ojo, Amaa, nanu ilo oretu kaiken eng'uset? Enkai ino najo. Ting'idayu te nebo Yerusalem, nishipa te nkaraki ninye, intae pooki oonyor ninye; tishipayu te nebo ninye te ng'ida, intae lelo pooki ooishiraki ninye; pee itumutumu aatanak niraposhosho, lelo ki lenyena ooitigirisho; pee itumutumu aatook ishipakinono ina kumoi enkitoo enye.” Amu nji ejo Olaitoriani: “Ng'ura, kaiputaki nanu ninye enkarsisisho anaa olkeju, naiputaki enkarsisisho oo loshon anaa olkeju odooyo enkare; nipuopuo intae aanak, nenapi intae te nkoriong enye, neipoipoi intae too nkejek enyena Ore anaa enkerai nailejilej ng'otonye, kaailejilej nanu iyie aiko neijia; eikipuoi aaitigir iyie te Yerusalem. Ipuopuo intae aadol neng'idayu iltauja linyi; nebulu iloik linyi anaa nkujit; naa kepuoi aayiolou nchere etii enkaina o Laitoriani te nebo isinkan lenyena, ore engoro enye negilunore ilmang'ati lenyena.” Amu ng'ura, kelotu Olaitoriani te nkima, ore ngarrin enyena nepuonu anaa olkutati, pee eitalaku engoro enye te mpijan, neisikong'isho too lng'ejepa le nkima. Amu te nkima edung Olaitoriani enkiguana, naa to lalem edung'oki enkiguana pooki tung'ani; ore lelo oar Olaitoriani to lalem naa keaku kumok. “Ore lelo ooitukuo neitisiny ate pee etum aashom atua enkurma esujaa ilo otii empolos enye, neinos nkiri oo lbitiro, neinos olming, neinos ilkirrumun, kelotu enkiting'oto enye nabo kata, Olaitoriani ojo. “Amu ayiolo nanu isiaitin enye o ndamunot enye, naa kalotu nanu aiturrur iloshon pooki o lng'ejepa; naa kepuonu ninche nedol enkitoo ai, naa kapik nanu olmonekie atua ninche. Naa ore te ninche naa kairriwaa nanu ilo pisiai oleku meshomo iloreren, meshomo Tarshish o Puti, o Ludi, lelo tung'ana oyietu nkai, nepuo Tubal o Yafan, nepuo iloomanaa le naiposha oolakua, lelo leitu ening enkisisa ai o enkitoo ai ti atua iloshon. Naa kepuo ninche aayau lelo alashera linyi pooki ooing'uaa loshon pee eaku olasar lo Laitoriani, nepuonu too mbartan, o too ngarrin oo mbartan, o too ngarrin naaimulumula, o nyumpui, o ntamesin ilo doinyo lai sinyati, Yerusalem, Olaitoriani ojo, aaikununye anaa ake duoo Israeli te neyau olasar lenye le ntapa too ngirran nemeiduruk atua enkaji o Laitoriani. Ore sii ilkulikae lenye, naya aitaa ilapolosak o Lawi, Olaitoriani ojo. “Amu ore anaa ina keper ng'ejuk o enkop ng'ejuk nalo nanu aitobiru, nelo atii dukuya nanu, Olaitoriani ojo, neijia elo atiu iishoritin ino, o enkarna ino, kepuo aabikoo. Ebaiki olapa ng'ejuk o metabaiki olikae apa, o ebaiki sabato o metabaiki enkae sabato, kaapuonu iltung'ana pooki aaserem, Olaitoriani ojo. “Naa kepuo ninche aaing'oru mpopoki oo ltung'ana apa laatogolong'akita, amu meye aekata olkurui lenye, nemeyagaa enkima enye, naa keaku ninche entoki naitureisho too ltung'ana pooki.” Irorei le Yeremia, olayioni le Hilkia, loo lapolosak apa ootii Anatot tiatua enkop e Benchamen, laa ninye eewuo ororei lo Laitoriani enetii too nkolong'i e Yosia olayioni le Amon, olaiguanani le Yuda, to lari le tomon ookuni le nkitoria enye. Eewuo sii too nkolong'i e Yehoiakim olayioni le Yosia, olaiguanani le Yuda, ometabaiki enkiting'oto o lari le tomon oobo le Sedekia, olayioni le Yosia olaiguanani le Yuda, ometabaiki ina kata apa naibung'i Yerusalem to lapa le imiet. Nelotu apa ororei lo Laitoriani enatii nanu ejo, “Ore apa eton eitu aaitobiru iyie te ng'uset e yieyioo lino aatayiolo nanu iyie naa ore apa eton eitu kiini naaitisinya nanu iyie; “aategelua nanu iyie aitaa oloiboni le Nkai too loreren.” Najo nanu, “Ee Olaitoriani Enkai! Ng'ura, mayiolo nanu airoro amu kara ake olbarnoti.” Kake aatiaka nanu Olaitoriani, “Mijo iyie, ‘Kara ake olbarnoti’; amu ore lelo pooki laairriwaki iyie naa ilo. Ore pooki naba anaa enaaitanap iyie naa ilo airo. Miureyu iyie ninche, amu atii nanu tenebo iyie pee aakordu iyie, Olaitoriani ojo.” Neitorioo Olaitoriani enkaina enye neiseyie enkutuk ai; naajoki nanu Olaitoriani, “Ng'ura atipika nanu irorei laainei atua enkutuk ino. Toduaa ajo, aatipika nanu iyie ena olong shumata iloreren o shumata nkitoriat, pee idotu nisulaa, pee inyal nimbelekeny pee ishet niun.” Nelotu ororei lo Laitoriani enatii ejo, “Yeremia, kainyoo idolita?” Najoki nanu, “Adolita olng'osila lo lchani laaijo oseki.” Naaitoki Olaitoriani ajoki, “Itoduaa iyie aitobiraki, amu arripito nanu ororei lai pee aitabaya ninye.” Nelotu ororei lo Laitoriani, enatii nanu tenkata e are ejo, “Kainyoo idolita?” Najo nanu, “Adolita emoti naitokitok, eing'orita enkalo e moikuape.” Naajoki nanu Olaitoriani, “Moikuape eipang'unye entorroni alotu shumata lelo pooki oomanya enkop. Amu, ng'ura kaipotu nanu iloshon pooki loo nkitoriat e moikuape, ejo Olaitoriani, naa kepuonu ninche ore ake pooki te ninche nepik olorika lenye le nkitoo tenejing'ieki nchomito e Yerusalem, aaigaraki isunta enyena pooki naamanita neman sii nkanas pooki e Yuda. Naa kairo nanu endung'okinoto ai enkiguana tialo ninche, teina torroni enye pooki aatung'uaitie nanu; etapejokito ninche enkorropil kulie aitin, neserem esiaai oo nkaik enye maate. Kake ore iyie, terretena empolos ino; tudumunye tiaaki ninche pooki toki naba anaa enaaitanap iyie. Mincho kinture ninche maaiture ake nanu iyie te dukuya ninche. Ore nanu, ng'ura, kaaitaa nanu iyie ena olong enkanasa nasheta sunta, eng'ape e sekenkei, o sunta o suyai, pee igilunore enkop pooki, o ilaiguanak le Yuda, o ilkituaak lenyena, o lapolosak lenyena o lelo tung'ana leina kop. Eikiarare ninche iyie; kake mikimir ninche iyie, amu atii nanu tenebo iyie, ejo Olaitoriani, peyie aakordu iyie.” Eewuo ororei lo Laitoriani enatii ejo, “Shomo inosai tening'oto e Yerusalem ena natejo Olaitoriani, adamu nanu eseremata e kitisho ino, enyorrata ino anaa esiankiki narikori, ina kata kisujita nanu tiong'ota, tiatua ina kop neitu eunishoreki. Eisinyati apa Israel to Laitoriani, ilng'anayio le dukuya le nkisampuare enye. Ore pooki ooinosa netum enkitarruorroto; eewuo entorroni shumata ninche, Olaitoriani ojo.” Toning'o ororei lo Laitoriani iyie enkaji e Yakobo, olmareita pooki le nkaji e Israel. Inji ejo Olaitoriani: “Kaa torroni enotito loo papaai linyi te nanu pee aashomo aalam nanu, nepuo aasujaa empesho, neaku pesho? Eitu ninche ejo, ‘Koree Olaitoriani laa ninye oilepunye iyiook aitung'uaa enkop e Misiri. Laa ninye otorikoyie iyiook tiong'ota, tiatua enkop olpurkel o ngumot, tiatua ina kop olameyu o enaimin nagut, tiatua enkop nemedung hoo ng'ae, nemetii hoo oltung'ani omanya.’ Nayau nanu intae atua enkop sidai, pee ishipakinono ilng'anayio lenyena o ntokitin enyena sidain. Kake ore pee ipuonunu atua ninturujuju enkop ai, nintaa enjung'ore ai olminong. Eitu ejo ilapolosak, ‘Koree Olaitoriani?’ Ore kuldo loo nkitanapat neitu aayiolou nanu; aatogolong'akitia nanu ilaitoriak; ore ilo oibonisho neibonisho te Baal, nepuo aasujaa nena tokitin nemeretisho. Metaa eton aatakinore iyie, Olaitoriani ojo, ore nkera oo nkera inono naatakinore. Tudung'o shomo olomanaa le Kupro toduaa, arashu irriwaa olkilikuai Kedar metujurru asipu; toduaa tenaa kenotoki ae kata entoki naikununo nji. Keibelekenya olosho nkaitin enyena, hoo duoo ninye neme nkaitin? Kake eibelekenya iltung'ana laainei enkitoo enye, teina nemeretisho. Mputukunyo iyie shumata, tena iruto, ingasiayu tukul, Olaitoriani ojo. Amu etaasa iltung'ana laainei ntorrok are: aatung'uaitie nanu, ina ong'u oo nkariak naaishu, neguetaki ate ilmotioo, ilmotioo oodanya lemeidim aatushum enkare. Ko rrindik Israel? Kosinka oino liang? Kainyoo naa pee etaa ninye olorreshitoi? Eipurrokito ilng'atunyo ninye, eipurrokito aabuaku. Neitaa ninche enkop enye mitil; neidaaitie nkanas enyena, metii iloomanya. Ore sii etadanya iltung'ana le Memfis o Tafnhel olmarisian le nkitoo le ndukuya ino. Aime kewan iyie iyaka ena te nking'uaroto o Laitoriani Enkai ino, ina kata pee kirikoo ninye te nkoitoi? Amaa taata kainyoo dupoto nitum tenilo Misiri, aok nkariak e Nail? Arashu kainyoo dupoto nitum tenilo Asiria, aok nkariak e Farite? Entorroni ino nikintame iyie, naa ina kibelekenyata nimbelekenye niking'uanare iyie. Tayiolo nidol nchere entorroni naa kedua te iyie tening'uaa Olatoriani Enkai ino; metii euriata ai atua iyie, Olaitoriani Enkai oo lororani ojo. Apa moitie itigila iyie enchata ino emurt nilak ienat inono, nijo iyie ‘Maisiaaisho nanu.’ Ee, te nchumata oldoinyo oado oleng o tiabori olchani onyori oleng irruge iyie anaa emulayoi. Ore iyia naatuuno nanu anaa osabibu gelunoti, entipat nadupa tukul kaji naa iyie nkuna pee mbelekenye niaku osabibu liong'ata? Ore hoo nintukito kewan te munyan niaasishore osabuni sapuk, ore olduruki le ntorroni ino neton etii dukuya nanu, Olaitoriani Enkai ojo. Kaji iyie inko pee ijo ‘Eitu aaisarkionieki nanu, eitu nanu alo asujaa noo Baal?’ Ng'ura enkoitoi ino to eyarata; tayiolo ina nitaasa itiu iyie anaa entames lipong, naipirri nkaloli pooki, esikiria e ong'ata natamoo olpurkel, ore pee eyieu oloing'oni neisugaa osiwuo! Kaing'ae oidim aibooi eng'uarrata enye? Meetae ilooyieu ninye ooinaur ate, ore too lapaitin lenyena neinepu ninye. Torripo nkejek inono milo ake miata namuka, olgos lino pee mikitir enkure. Kake itejo iyie, ‘Meetae osiligi, amu atonyorra nanu ilomon, naa ninche nanu asujaa.’ “Anaa enakurru olapurroni teneibung'i, neijia etiu sii enkaji e Israel keitukurruni: ninche, o laiguanak lenye, o lkituaak lenye o lapolosak lenye, o loibonok lenye. Ninche ootiaakita olchani, Ira iyie papa lai, nejoki osoit, ‘Kitoiwuo iyie nanu’. Amu aaibelekenyakita ninche enkoriong enye, neitu aaibelekenyaki enkomom. Kake ore tenkata enyamali enye nejo ninche, ‘Tudumunye ntajeu iyiook!’ Kake koree nkaitin inono nena nintaikia kewan? Nchoo ninche edumunye, tenaa eikindim ninche aaitajeu iyie, tenkata ino enyamali; amu ore eneba nkang'itie inono neijia eba nkaitin inono, iyie Yuda. “Kainyoo pee kilepilepaka iyie nanu? Kitogolong'akitia intae pooki, Olaitoriani ojo. Pesho nanu ataara nkera inono, eitu ninche eitoriori, olalem lino kewan oinosa iloibonok linono anaa olng'atuny otupusha. Naa ore iyie, naishoi ena, toning'o ororei lo Laitoriani. Kataa nanu olpurkel te Israel, arashu enkop e misimisi kitok? Kainyoo naa pee ejo iltung'ana laainei, ‘Kilakuno iyiook, meekure iyiook kingil aapounu enitii?’ Kerikino entito imasaa enyena, arashu esiankiki narikori ilkilani lenyena? Kake maadamu nanu iltung'ana laainei too nkolong'i nemeikenayu. Iyiolo oleng aitobira nkoitoi inono aing'oru sanchan! Neaku ore ninye nkituaak arruok ninteng'en inkoitoi inono. Ore olkila lino netii osarge le nkishui e lelo aisinak lemeeta entioto; eitu iyie inepu ninche egilita nkajijik, kake ore etii kuna tokitin pooki ijo iyie, ‘Maata nanu entioto; esipa eibelekenye engoro enye te nanu.’ Ng'ura, kaayau nanu iyie enkiguana teina nitejo, ‘Eitu nanu aas eng'oki.’ Kebaa eleleki nilotie iyie, mbelekeny enkoitoi ino! Eikipik iyie Misiri enkurruna anaa apa enikitipika Asiria enkurruna. Ninye iyie ilotu aing'uaa etii nkaik inono shumata endukuya ino, amu etanya Olaitoriani lelo laa ninche iyie isilig, nimidupoyu iyie te ninche. “Amaa tenearaa olee enkitok enye nelo ninye aing'uaa ninye neaku enkitok e likae lee, keitoki ilo apa lee ashukokino ninye? Aimeitarruoo ina enkop oleng? Itaa iyie emulayoi too sanchan kumok naa eikintoki arrinyokino nanu? Olaitoriani ojo. Taraposhu nkonyek inono ingura nena kisiajat naaika eitiaaji eitu kiboitareki iyie? Ore too mbat oo nkoitoi niton aanyu isanchan, anaa e marabui tiong'ota. Intarruoyie enkop ino teina mulayaisho ino. Ore enkaraki ina eibooki oloirujuruj ore enchan oo nkokua neitu elotu, kake ore eyia eton ake inkununo anaa e mulayioi itanya iyie ikurru. “Keitu iyie taata kimpot nanu ajo Papa lai, ira iyie olchore le leleroisho ai kegoro ninye ntarasi, keibung ninye engoro o akenya? Ng'ura iroro iyie, kake itaasa iyie entorroni pooki naba anaa enindim.” Aatiaka nanu Olaitoriani too nkolong'i o laiguanani Yosia, “Itoduaa iyie ina nataasa ninye, ina nemeisiligayu Israel, ina nashomo ailep shumata endoinyo pooki naika o abori pooki shani onyori, ore teine neas anaa emulayoi? Najo apa nanu, ‘Ore pee eidip ataasa kuna pooki naashukokino nanu kake eitu ninye eshukunye,’ ore ina anashe enye nemeisiligayu Yuda nedol ina. Etodua nchere ore te nkiborra enye enkong'u nemeeta enkirukoto, Israel, nadung'oki nanu enkiguana eyararoto, ore eyia ore ina anashe enye Yuda nemeisiligayu neitu eureyu, kake eshomo sii ninye aaku emulayoi. Ore enkaraki naa kelelek enkiborra enkong'u te ninye, neitarruoyie ninye enkop, aloloito to soit o to lchani. Ore eyia te kuna pooki, ore ina anashe enye nemeisiligayu, Yuda, neitu eshukunye enatii nanu to ltau lenye pooki, kake te nkitaakuno, Olaitoriani ojo.” Naajoki nanu Olaitoriani, “Ore Israel nemeisiligayu neitodolua kewan ajo aikiti enkitarruorroto enye alang Yuda nemeisiligayu. Shomo, ntudupai kulo rorei te nkalo e moikuape, ijo, ‘Tushukunye Israel nemeisiligayu, Olaitoriani ojo. Maaing'or nanu iyie te ngoro, amu kara ololng'ur, Olaitoriani ojo; magoro nanu ntarasi. Tonyorrai ake duoo iyie enkitarruoroto ino, nchere itogolong'aka Olaitoriani Enkai ino nindapashaa enyorrata ino tiatua ilomon tiabori pooki shani onyori, oina neitu ining oltoilo lai, Olaitoriani ojo.’ ” “Entushukunye, intae nkera nemeeta enkirukoto, Olaitoriani ojo; amu ara nanu olkitok linyi; kaya nanu intae, obo aitung'uaa enkanasa oare aitung'uaa olmarei, nayau nanu intae Sion. Naa kaisho nanu intae ilchekuti laaitiship oltau lai, ooitoti intae te ng'eno o te yiolounoto. Ore ake pee iponariri niakuku kumok teina kop, te nena olong'i, Olaitoriani ojo, nemeitoki ninche aajo, Osanduku lo sotua lo Laitoriani.” Melotu ina damunoto arashu edamuni, arashu eetayieki tipat meitokini aaigil aaitayu. Ore teina kata Yerusalem neaku keji olorika le nkitoo lo Laitoriani, neitururrokino nkuapi pooki ninye, ine netii Olaitoriani te Yerusalem, nemeitoki ae kata aasuj te ngolong'u enye o ltau lenye torrono. Ore te nena olong'i neibung'are enkaji e Yuda enkaji e Israel, ore tenebo nepounu ninche aaing'uaa enkop e Moikuape aapuonu ina kop apa naishoo nanu loo papaai linyi metujung'o. “ ‘Atejo apa nanu kebaa ayieu nanu naapik atua ilaiyiok laainei, naaisho iyie enkop sidai, ina jung'ore nalang nkuapi pooki. Najo nanu eikijo iyie papa lai, nimimbelekenyanya te sujata ai. Esipa ore anaa enaing'uaa enkitok nemeisiligayu olmoruo lenye, neijia sii iyie itotiwuo aaku misiligayu te nanu, iyie na aji e Israel, Olaitoriani ojo.’ ” Etoning'oki oltoilo le nena kisiajat naaika, lelo ayiok ooishirita nesaisho le Israel, enkaraki natapong'o ninche enkoitoi enye etorikine ninche Olaitoriani enkai enye. Entushukunye intae ilayiok lemeisiligayu kaishiunye nanu ina nimisiligayuyu intae ng'ura kiyetuo iyiook enitii iyie, amu ira iyie Olaitoriani Enkai ang. Metii eretoto eseremata too nchumat oo ldoinyo esipa atua Olaitoriani enkai ang etii enjeunoto e Israel. “Kake ore ebaiki leleroisho ang neidaikie ina toki e nkurruna nena pooki naaisiaayutua loo papa, nkerrai enye o nchoo enye, ilayiok lenye o ntoyie enye. “Mairraga iyiook tiatua enkurruna ang nchoo esulare ang eitoip iyiook, amu kitaasa iyiook eng'oki to Laitoriani Enkai ang, iyiook o loo papa, ebaiki kitisho ang ometabaiki ena olong; neitu iyiook kining oltoilo lo Laitoriani Enkai ang.” “Tinirrinyunye iyie, Israel, Olaitoriani ojo, naa nanu irrinyokino. Tiniwuang'ie iyie ilo minong lino, aitung'uaa enatii, nimintoki aing'aing'ai, Naa tininya iyie olmumai, ‘Anaa enaishu Olaitoriani,’ tiatua esipata, tiatua enkitorisiokinoto, o tiatua enkitorioroto, naa kemayian nkuapi ate te ninye, naa te ninye ewuasa ninche.” Amu nji ejoki Olaitoriani iltung'ana le Yuda o lelo oomanya Yerusalem: “Entutur nena kurman inyi nemeturo nimiunishosho tiatua ilkiku. Entumurataki ate Olaitoriani ewuang'ie isuaaten oo ltauja linyi, intae iltung'ana le Yuda o lelo oomanya Yerusalem; mepuku ake engoro ai anaa enkima, neyupuyup nemeeta hoo ng'ae oar, tenkaraki entorroni oo nkiaasin inyi.” Embalie tiatua Yuda, nintudupaa tiatua Yerusalem, nijojo, “Toosho entarumpeta tiatua enkop pooki; nchira tabuaku nijo, ‘Enturrurroto, maape iyiook atua nena ang'itie naasheta sunta!’ Tuuno enanka ing'orie enkalo e Sion. Isika ing'oru eseriani, miton ake amu kayau nanu entorroni aitung'uaa enkalo e moikuape o enkidaata kitok. Eilepa olng'atuny alo to sanag lenye, etii ilo oidakie nkuapi enkoitoi enye eshomo ninye teine wueji enye pee eitaa enkop ino mitil; neidaikieki inkanas inyi metaa meetae olomanya. Neaku terretena kewan too lkuniyiani tenkaraki osina nchira niyietu; amu ina goro napi o Laitoriani neitu eibelekenya aing'uaa iyiook.” “Ore akenya teina olong, Olaitoriani ojo, naa keing'uaa empijan olaiguanani o lkituaak; neiputukuny ilapolosak neing'asia iloibonok.” Naitoki nanu ajo, “Ee Olaitoriani Enkai, esipa iteleja apa iyie kulo tung'ana o Yerusalem, ijo, ‘Ekesidanu te intae,’ aa olalem otabaikia enkishui enye katukul.” Ore akenya teina kata nejokini kulo tung'ana o Yerusalem, “Osiwuo oirowua oing'uaa inkisiajat naaika to lpurkel eing'or enkalo entito oo ltung'ana laainei neme pee ekut arashu esil. Ore ilo siwuo olotu te nkitanapata ai naa kegol oleng te nanu. Naa Nanu ilo oiro tendung'okinoto e nkiguana enye.” Ng'ura, elotu ninye ailepu anaa nkatampo, neikununo ngarrin enyena oo mbartan anaa olkutati, neneneng mbartan enyena aalang ilkurragoso - oi iyiook, amu kindaaitie! Iyie Yerusalem, ntukuoi entorroni to ltau lino, pee kitumi aaitajeu keton akenya endamunoto ino torrono tiatua iyie o anu? Amu eibalunye oltoilo oing'uaa Dan neitudupaa entorroni ebaiki oldoinyo le Efraim. Enkoo iloreren nchere kelotu ninye; embalunye te Yerusalem nchere kepuonu lelo oomuat aaman enkang te nkop nalakua, nebuaaki ninche nkanas e Yuda. Neman ninche Yerusalem anaa larripok le nkurma enkaraki naatanya Yerusalem nanu, Olaitoriani ojo. Ore nkoitoi inono o nkiaasin inono nikintadoikitio iyie ena, entorroni ino makewan ena, naa kedua, etabaikia atua oltau lino kewan. Emion ai, emion ai! Aainosita emion! Oi mbat oltau lai keng'oring'oro oltau lai oleng; maidim nanu atigirayu; amu aning'ito oltoilo le ntarumpeta, oltoilo lo larrabal. Esujita enkidaata enkidaata ore enkop pooki neirragita metii toki nabo kata einyalaki ilng'oborri laainei ilkarash laainei tenkata nabo. Kaing'or nanu enanka o anu naning oltoilo le ntarumpeta? “Amu kemoda iltung'ana laainei, nemaayiolo ninche nanu; nkera naakilo ninche, meeta ninche ening'unoto. Arriyiak ninche te asata oo ntorrok, kake ore eneiko teneas esidai meyiolo ninche.” Aing'ura nanu oriong enkop, naa ng'ura keliyio naa mitil; o shumata, nemeeta ninche ewang'an. Aing'ura nanu shumata ildoinyo, naa ng'ura, keikirikira ninche, ore ndoinyo pooki nepuo idie o idie. Aing'orishe nanu, naa ng'ura, metii apa hoo oltung'ani, ore ntaritik pooki oloing'ang'e neisika. Aing'orishe nanu, naa ng'ura, ore ina kop oo lng'anayio etaa olpurkel, ore nkanas enyena pooki neirragaa eidaa, te dukuya Olaitoriani, te dukuya ina goro enye napi. Amu nji ejo Olaitoriani, “Keaku enkop pooki mitil; ore eyia maitaa nanu enkiting'oto. Amu keishir ena kop, ore shumata neroku; amu airoro nanu, atootikio nanu eitu nanu aainosu nemashuko siadi.” To ltoilo lo lakedoni le mbarta oltung'ani le nkawuo eilany nkanas pooki olarrabal, nejing ninche ntimi; neked nchumat oo ndapidapo; etung'uayioki nkanas pooki nemetii oltung'ani oton tiatua ninche. Naa ore iyie, ena nara mijooni, kainyoo intodolu nchere, eji nchopo iyie too nkilani sinteti, nchere inkod iyie kewan too masaa e sahabu, nchere isir iyie nkonyek inono? Te mpesho iyie ikus kewan kimen iyie isanchan linono; eing'oru ninche enkishui ino. Amu atoning'o nanu enkishirata naaijo ene nkitok nasaisai, naishirita te mion anaa enaiu enkerai enye e dukuya, enkishirata eina tito oo ltung'ana le Sion eng'a enkutuk pee etum enkijape, neitorioo nkaik enyena, “Woi nanu!; Ekaiterre nanu te dukuya lelo ooitayu loikop.” Kueta nikuetu too nkoitoi naalala e Yerusalem, ing'orisho niyiolou! Tujurru olkurroto lenye otumoreki toduaa tenaa indim iyie anoto oltung'ani obo, obo oas te nkitorioroto neing'oru esipata pee atum nanu atapalaki ninye. Ore hoo nejo ninche, “Anaa enaishu Olaitoriani,” kake ore eyia, enya ninche olmumai te lejare. Olaitoriani, aime esipata eing'oru nkonyek inono? Itoosho iyie ninche, kake eitu ninche emeyu; indaikie iyie ninche, kake etanyaita ninche engamaa ererioroto. Eitagolito ninche nkomomi enye aaitulus te endapidapoi; etanyaita ninche eirridu. Najo nanu, “Ore kulo naa laisinak ake, meeta ninche endamunoto; amu meyiolo ninche enkoitoi o Laitoriani, enkitanapata e Nkai enye. Alo nanu enetii lelo kituaak, pee airorie ninche; enkitanapata e Nkai enye.” Kake enyaanyuk pooki etigila enchata oo murto, etalaa ninche ilidat oo enat. Metaa kear ninche olng'atuny oing'uaa entim metuata, keidaikie ninche osuyiani oing'uaa olpurkel. Erreshito olkinyalasho nkanas enye, ore pooki ng'ae ooipang tiatua ninche nepolosi aaitaa ndung'udung'ot; amu eikumok nkitarruorrot enye, ore nchukot enye errinyo siadi naa aikumok. “Kaji nanu aiko tenaapalaki iyie? Aatung'uaitie nanu nkera inono neinosa olmumai te nena neme nkaitin ore aidipa nanu aitotio ninche aitaraposho, neloloito ninche neiturrurrokino nkajijik oo mulayioni. Eikununo ninche anaa lamuyeishi pushunot ootaraposhote meetae ake olemeishir eyieu enkitok olelatia enye. Aimaitame nanu ninche te kuna baa? Olaitoriani ojo; naa aimaitalaku nanu to losho laaijo ele? Elepa enchom atua ilkererin lenye loo sabibu enyiala kake minyialinyala katukul; entong'osilu ilng'osil lenye, amu mme ilo Laitoriani ninche. Amu ore enkaji e Israel o enkaji e Yuda neitu ninche tukul ening'isho tialo nanu, Olaitoriani ojo. “Amu eiroro ninche te lejare tialo Olaitoriani, nejo ninche, ‘Meeta ninye enaas; meetae entorroni nalotu shumata iyiook, nimikidol olalem arashu olameyu. Netiu iloibonok anaa enkijape; metii ororei atua ninche. Neijia eitaasi ninche!’ ” Metaa nji ejo Olaitoriani Enkai oo lororani: “Ore enkaraki nairoro ninche ele rorei, ng'ura, kaitaa nanu irorei laainei tiatua enkutuk ino enkima, ore kulo tung'ana neaku ilkeek, nenya enkima ninche. Ng'ura, kayau nanu shumata iyie, iyie na aji e Israel, olorere oing'uaa enelakua, Olaitoriani ojo. Olorere ogol ninche olorere li apa ninye olorere laa ore enkutuk enye miyiolo iyie nimiyiolou enajo ninche. Netiu emootian enye anaa enkurare nabolo iltung'ana magil ninche pooki. Kenya ninche enkisampuare ino o endaa ino, neinos ninche ilayiok linyi o ntoyie inyi; nenya ninche nkerrai inyi o nchoo inyi nenya ninche isabibu linyi o lng'abolo linyi; ore nkang'itie inyi naasheta isunta naa ninche isiligigi naa keidaikie ninche.” “Kake ore ake sii te nena olong'i, Olaitoriani ojo, maamut nanu iyie katukul. Ore pee ejo iltung'ana linono, kainyoo pee eitaasa Olaitoriani Enkai iyiook kuna baa pooki? Nijokiki intae ninche, ‘Anaa enikitung'uaitie intae nanu nisiayiayia nkaitin oo loreren tiatua enkop inyi, neaku ipuopuo aisiaai iltung'ana leeiking'a teinakop neme eninyi.’ ” Mbalunye ena tiatua enkaji e Yakobo, ntudupai tiatua Yuda. “Entoning ena intae iltung'ana oomoda lemedamisho, lelo oata nkonyek kake medolisho lelo oata nkiyiaa, kake mening'isho. Aimikiurere intae nanu? Olaitoriani ojo; Aiminkirikirara intae te dukuya nanu? Atipika nanu osinyai aitaa olpolosie le naiposha, olpolosie loo nkolong'i pooki lemeidim ninye atogiroi; ore hooneilugo lopir le naiposha, meidim ninche aaima, ore hoo neikurrukur meidim aaima shumata enye. Kake eeta kulo tung'ana oltau ogol le ngolong'u; eibelekenyate ninche aapuo. Mejo ninche too ltauja lenye, ‘Matureita iyiook Olaitoriani Enkai ang, laa ninye oishoru enchan terishata enye, enchan oo nkokua o enchan oltumuret, nepikaki iyiook nkatitin naageluno enkisampuare.’ Eibelekenya entorroni inyi kuna aiwuang'ie, neitalamaitie ing'ok inyi mbaa supati aitung'uaa intae. Amu etii iltung'ana torrok atua iltung'ana laainei; nerreshisho anaa larreshok ooirrag aarreshisho neitayu ninche orreshet; neibung ninche iltung'ana. Ore anaa enabore ntaritik orreshet ebore nkajijik enye enkeleekisho; neaku etaa ninche kituaak nekarsisu, etopiro ninche nesipayu netuluso too inkiaasin enye e torroni meiguanare ninche te sipata ororei leilo lemeeta menye, pee eitaa ninye karsis, nememitu ninche isipat e ilo omena. Aimaitame nanu ninche te kuna tokitin? Olaitoriani ojo, naa aimaitalaaki nanu kewan to lorere leeijo ele?” Entaboi torrono oleng nataase tiatua ena kop; eibonisho iloibonok te lejare neitoreisho ilapolosak te nena naayieu ninche; ina enyor iltung'ana laainei, kake kaa iyie ias tenebau enkiting'oto. Enkuet eng'oru eseriani, intae iltung'ana le Benchamen, entung'uai empolos e Yerusalem! Entoosh entarumpeta te Tekoa, nidumumu olmonekie te Bet-hakerem; amu edakunye entorroni aipang'u te nkalo e moikuape, o enkidaata kitok. Ore ina sidai naata enkishaa kaidaikie nanu ina tito e Sion, ore lchekuti tenebo nkerrai enye nepuonu aarare ninye neun ninche ilng'oborri lenye aaitaman ninye, neirritisho ninche, oltung'ani ake te wueji enye. “Ntobira olarrabal taarare ninye; matudumunye, pee kirasaki te nkipirata enkolong! Woi iyiook, amu etinyikayie enkolong, amu etoodorita iloipi le nteipa!” “Matudumunye, matarasaki kewarie, nikindaikie inkajijik enyena e nkitoo!” Amu nji ejo Olaitoriani loo lororani, “Entudung ilkeek lenyena; nimuatimuata aaman Yerusalem. Enkanasa ena nemeeta nchere pee meitamei; metii ae toki neme enkibookinoto enkop atua ninye. Ore anaa enashum olchorro enkare enye neijia sii ninye eiko ashum entorroni enye; emarmalisho o enkidaata naning'o tiatua ninye; etii emuoyian o lbaa dukuya nanu anaake. Nkooyu, iyie Yerusalem, pee maaorieki ake iyie; pee maaitaa ake olmuaate enkop, nememanya.” Nji ejo Olaitoriani loo lororani, “Kesotuni anaa isabibu olpisiai le Israel, anaa olasotunoni loo lng'anayio nyaaki ntogiroi enkaina ino shumata ilng'osil.” Kaing'ae nanu airorie naikok, pee etum ninche aatoning ng'ura eikeno nkiyiaa enye meidim ninche aatoning'isho; ng'ura, ore ororei lo Laitoriani te ninche netiu anaa emoroto, meshipakino ninche ninye. Neaku aabore nanu engoro napi o Laitoriani; anaure aibookino. “Tubukoki ninye shumata nkera te nkoitoi nalala enkanasa, o shumata sii iumat oo lbarnot; neyae olmoruo o enkitok, lelo moruak olelo kituaak lenye. Ore nkajijik enye neibelekenyakini ilkulikae, inkurman enye o nkituaak enye tenebo; amu kaitorioo nanu enkaina ai aarare lelo omanya ena kop.” Olaitoriani ojo. “Amu ore ebaiki oloti o metabaiki olkitok lenye, meetae ake olemeng'uar dupoto e lejare; ore ebaiki oloiboni ometabaiki olapolosani, meetae ake olemeas inelejare. Eishiunye ninche olbae loo ltung'ana laainei te nkitaakunoto, ejo, ‘Eseriani, eseriani’ nemetii eseriani. Ketukurrutua apa ninche ina kata apa pee eas mbaa olminong? Aa, eitu ninche ekurru tukul; menya ninche orere. Neaku kebatata ninche tenebo lelo oobatata; ore teina kata naitame nanu ninche, kenang'ari ninche,” Olaitoriani ojo. Nji ejo Olaitoriani, “Entasheito too nkoitoi naalaa ning'orishosho, ninkilikuanunu nkoitoi e opa, ine apa netii nkoitoi sidain, niimiimi intae atua nitumutumu enkiyeng'iyeng too ltauja linyi. Kake etejo ninche, ‘Mikiim iyiook atua ninye.’ Atipika nanu ilarripok shumata intae, ejo, ‘Entoning oltoilo le ntarumpeta’ Kake etejo ninche, ‘Mikinining iyiook.’ Metaa entoning, intae iloshon, niyiolouu, intae ilturrurri, ina nayooki atiu te ninche. Toning'o iyie enkop; ng'ura kayau nanu entorroni shumata kulo tung'ana, ilng'anayio loo mbaa enye torrok, enkaraki neitu ninche ening irorei laainei; ore tialo enkitanapata ai, etanyaita ninche. Aitenkaraki nyoo naa nanu aayakini enkorropil naing'uaa sheba, arashu esonkoyo naarropil naing'uaa enkop nalakua? Ore lasarri linono oopejori meng'amaroyu, nemaaitiship nanu nkishorunot inono. Neaku nji ejo Olaitoriani: ‘Ng'ura, kairragakinye nanu kulo tung'ana iloketa naa ninche errorrore ninche; iloomenye o layiok tenebo, ore olelatia olchore neidak.’ ” Nji ejo Olaitoriani: “Ng'ura, epuonu iltung'ana ooing'uaa enkop e moikuape, eilepu olosho kitok eing'uaa enelakua oleng te nkop. Eirraga ninche eibung'ita enkawuo o empere kegogong ninche nemeeta olng'ur, ore oltoilo lenye neikununo anaa enaiposha naikurrukur; neked ninche mbartan, nenapa ninche anaa oltung'ani le njore, pee kiarare iyie, ena tito e Sion!” Kitoning'o iyiook olomoni lenye, nelepori inkaik ang; neibung iyiook osina o emion anaa enkitok nasaisai. Emimpang aapuo ong'ata, arashu ipuopuo te nkoitoi; amu eeta olmang'atinta olalem, etii olkirutoto pooki shoto. Iyie na tito oo ltung'ana laainei, terretenayu too lkuniyiani, nimperipera too nkuruon; nchira anaa enatua olayioni obo oata, to lkiyioi le mion oleng, amu nabo kata nelotu olamutani shumata iyiook. Aaitaa nanu iyie entemet o esilet tiatua iltung'ana laainei, pee itum atayiolo nitem nkoitoi enye. Kegolong'u ninche pooki, nepuoopuo too nkiteenikinot; osuyai ninche o esekenkei, eas ninche pooki ine ntorroni. Eyupuyup olkokuet oleng nenya enkima olduruk lioriong ore ilo osholishol sekenkei pesho ake esholishol amu eitu eiwuang'ieki entorroni. Enkosholai nemeeta tipat ninche, amu etanya Olaitoriani ninche. Ele ororei oewuo enetii Yeremia eing'uaa Olaitoriani ejo: “Ntasho te kishomi enkaji o Laitoriani, nilikio teine ele rorei, nijo, Entoning ororei lo laitoriani, intae iltung'ana pooki le Yuda ooimu kuna shomito aaserem Olaitoriani. Nji ejo Olaitoriani loo lororani, Enkai e Israel, embelekenya nkoitoi inyi o nkiaasin inyi, naa kaisho nanu intae ibikibiki teine wueji. Emisilig kulo rorei le lejare: ‘Enkaji Olaitoriani ena, enkaji Olaitoriani, enkaji o Laitoriani.’ “Amu tenimbelekenyanya intae te dede aaing'uaa nkoitoi inyi o nkiaasin inyi, tinimbung'ubung'u te dede esipata o ltung'ani ake olikae, tenimimbookiki enkop ilo omoni, ilo lemeeta menye arashu enkoliai arashu imbukoo osarge leilo lemeeta entioto tene wueji, nimintokiki aasujaa kulie aitin te nkitamioto inyi, naa kaisho nanu intae entobik tene wueji, tiatua ena kop apa naishoo nanu loo papaai linyi ntarasi. “Ng'ura, isiligigi intae irorei le lejare lemeeta eretoto. Ipurisho iyie, nintayu loikop, niloloito, ninya olmumai te lejare, nipejoki Baal enkorropil, nirubare kulie aitin neitu iyiolou, paa intokiki aapuonu aitashe te dukuya nanu tena aji, naa ninye eipotieki enkarna ai, nijojo, ‘Etokorduaki iyiook!’ Nipuopuo dukuya iasiasa kuna pooki olminong? Ketaa ena aji, naa ninye eipotieki enkarna ai, enkapune oo lapurrok too nkonyek inyi? Ng'ura, atoduaa nanu enkorrok ai ina, Olaitoriani ojo. Enchom taata ine wueji ai apa netii shilo, naa ine aishoo enkarna ai metobikie te dukuya; pee idolidolo enaitaasa ninye te ntorroni oo ltung'ana laainei Israel. Ore taata, enkaraki nitaasa intae kuna baa pooki, Olaitoriani ojo, ore pee airorie intae aitirrishaki neitu ining'ining'i, ore pee aipot intae neitu irukishosho, ore pee aaipot intae neitu irukishosho, neaku kaitaas nanu ina aji naa ninye eipotieki enkarna ai, naa ninye isiligigi, oine wueji apa naishoo nanu intae o loo papaai linyi anaa enaitaasa Shilo. Naa kanang'aa nanu intae too nkonyek aainei, anaa enatanang'ayie nanu ilalashera linyi, o eishoi pooki e Efraim. “Ore iyie miomonoki kulo tung'ana, arashu ilepiepie olkiyioi arashu enkomono te nkaraki ninche nimiomonoki te nanu, amu maaning nanu iyie. Aimidol iyie inaasita ninche too nkanas e Yuda o too nkoitoi naalala e Yerusalem? Esotu nkera ilkeek, neinok loo menye enkima, neipurj nkituaak enkurma, pee eitobiraki imukateni enkaiguanani e shumata; nebukoki ninche ilasarri ooki kulie aitin, pee aaitagor nanu. Kainanu ninche eitagor? Olaitoriani ojo. Aime ate, to lmilo lenye. Neaku inji ejo Olaitoriani Enkai: Ng'ura keibukori engoro ai o engoro ai napi tene wueji, te shumata oltung'ani o eng'ues, shumata ilkeek liong'ota olng'anayio le nkop: keyupuyup ninye nemearayu.” Nji ejo Olaitoriani loo lororani Enkai e Israel: “Entoponai nkishorot inyi oo lasarri oopejori, ninyanya nkiri. Amu ore apa teina olong nayawua nanu ninche aitung'uaa enkop e Misiri, eitu nanu airorie loo papaai linyi arashu aaraki ninche tialo nkishorunot naapejori o lasarri. Kake ena kitanapata nanu aishoo ninche; ‘Entoning oltoilo lai, naa kaaku nanu Enkai inyi, niakuku intae iltung'ana laainei; nipuopuo teina oitoi pooki naitanapa nanu intae, pee etum atisidana te intae.’ Kake eitu ninche ening arashu eishoru enkiok enye, kake eshomo ninche too ndamunot enye o engolon oo ltauja lenye torrok, nepuo siadi neitu epuo dukuya. Ore ebaiki ina olong apa napuonu loo papaai linyi aaing'uaa enkop e Misiri ometabaiki ena olong, aitirrishaka nanu airriwaa isinkan laainei pooki lelo oibonok le Nkai enetii ninche te nkolong ake o te nkolong, ore eyia neitu ninche aainining nanu, arashu eishoru enkiok enye, kake eitagolo lukuny enye. Etaasa ninche ntorrok aalang loo papaai lenye. “Neaku iliki iyie ninche kulo rorei pooki, kake mikining ninche iyie. Impot iyie ninche kake mikiruk ninche iyie. Naa ilo iyie ajoki ninche, ‘Olosho ele leitu ening oltoilo lo Laitoriani Enkai enye, neitu eng'amu enkitamito e rerioroto; eidaayie esipata; eiwuang'ieki too nkutukie enye.’ “Entudung'oi ilpapit linyi ninturraa; to sina elepie olkiyioi too nkisiajat naaika; amu etanya Olaitoriani netung'uayie ina ishoi e ngoro enye napi. “Amu etaasa ilaiyiok le Yuda entorroni too nkonyek aainei, Olaitoriani ojo; etipika ninche ilo minong lenye atua enkaji naa ninye eipotieki enkarna ai, pee eisarkionie ninye. Netesheta ninche olperere lo lasar te wueji neika neji Tofel, ina natii oyarata lo layioni le Hinom, pee etum aatapejoi ilayiok lenye o ntoyie enye tiatua ina kima neitu nanu aitanap ninche neitu elotu atua ndamunot aainei. Metaa, ng'ura, kepuonu nkolong'i, Olaitoriani ojo, nemeitokini aajo Tofel, arashu oyarata lo layioni le Hinom, kake oyarata le sesekuanare amu te Tofel ninche enukaa ilootuata, enkaraki metii erishata dikae. Ore mpopoki e kulo tung'ana neaku endaa too motonyi o loing'ang'e, o too ng'uesi enkop; nemeetae oloiture ninche meshomo. Naa kaitobir nanu meishunye too nkanas e Yuda o too nkoitoi naalala e Yerusalem oltoilo le nkuenia o ltoilo le nchipai, o ltoilo lo loyamisho oltoilo le nayami; amu keaku enkop mijooni.” “Ore kenya teina kata, Olaitoriani ojo, ore iloik loo laiguanak le Yuda, o loik loo lkituaak lenyena, o loik loo lapolosak, o loik loo loibonok le Nkai o loik le lelo oomanya Yerusalem neyauni aitung'uaa nkuraren enye; neidapashi ninche te dukuya enkolong o lapa, o lorora pooki le keper, naa ninche apa etonyorra ninche neisiaai, aa ninche apa etusujaitie, aa ninche eing'orutua neserem; nemeiturrurri ninche arashu enukari; netiu ninche anaa modiok ti oriong enkop. Kenyorrarri kenya keeya aaitudutie enkishui ilo pisiai oleku lele marei torrono too wuejitin pooki naterewa nanu ninche, Olaitoriani loo lororani ojo.” “Ijoki iyie ninche, nji ejo Olaitoriani, Amaa tenebatata oltung'ani aimeitoki ninye adumunye? Amaa teneibelekenya oltung'ani alo, aimeitoki ninye ashukunye? Kainyoo naa pee eibelekenyate kulo tung'ana aapuo aashuko siadi anaake? Neibung ninche aakurraki elejare, neany ninche eshukunye. Ainining'ishe nanu, kake eitu ninche eiro aaitorioki; meetae oltung'ani oirridu te ntorroni enye, ejo ‘Kainyoo nanu ataasa?’ Eibelekenyakino ake pooki ng'ae nkoitoi enyena, anaa embarta nakuetiki olarrabal. Ekeyiolo ninye entilagos te shumata nkatitin enyena; ore enturkuluo o emotoroki, o enkaileeri neibung nkatitin enye naapuonunye; kake meyiolo iltung'ana laainei nkitanapat Olaitoriani.” “Kaji intae inkoko tenijojo, ‘Kira iyiook ng'eni, ore enkitanapata O Laitoriani netii tenebo iyiook?’ Kake, ng'ura, ina alamu elejare oo lasirak ajo eitaa ninye emonkoi. Ore lelo tung'ana ng'eni naa keitukurruni, keidang'ieki ninche neyae; Oi, etanyaita ninche ororei lo Laitoriani, naa kaa ng'eno natii atua ninche? Neaku kaisho nanu nkituaak enye ilkulikae naisho nkurman enye lelo ooisulu, enkaraki naa ore ebaiki oloti ometabaiki olkitok eeta pooki ng'ae olorok le dupoto te nkoitoi elejare. Eiteru to loiboni le Nkai o metabaiki olapolosani ometabaiki olapolosani meetae ake ole measisho te lejare. Eishiunye ninche olbae loo ltung'ana laainei te nkitaakunoto ejo, ‘Eseriani, eseriani’, nemetii eseriani. Ketukurrutua ninche ina kata pee eas olminong A-a, eitu ninche ekurru tukul; menya ninche orere. Neaku kebatata ninche tiatua lelo ootabatatate; ore ake pee aitame nanu ninche, nenang'ari ninche, Olaitoriani ojo.” “Ore tenajo aiturrur ninche; Olaitoriani ojo, nemetii ilng'anayio o sabibu arashu ilng'abolo olng'aboli etoito ninye mbenek, ore apa ina naishoo nanu ninche netulusoyie alo aing'uaa ninche.” Kainyoo pee kitoni iyiook aaitirring'a enturrurroto tenebo, maape iyiook atua nena anas naasheta, pee kindak teine; amu etudung'oko iyiook Olaitoriani Enkai ang enkidaata, neishoo iyiook enkare natii esayiet matook, enkaraki nikitaasa iyiook eng'oki to Laitoriani. Kisiligu iyiook eseriani kake meetae esidai naewuo, enkata enkishiunoto, kake ng'ura, enkuretisho. “Ore enkikurrukur oo mbartan enye nening'o te wueji neji Dan. Ore to ltoilo loo mbartan enye e njore neikirikira enkop pooki. Kepuonu ninche aaidaikie enkop o pooki toki nabore, enkanasa o lelo oomanya atua. Amu ng'ura, kairriu nanu tiatua intae ilasuriaa o nturbubuani naata esayiet nemeibooyo intalengo, naa keony ninche intae.” Olaitoriani ojo. Meishiunoyu osina lai? Kemuoi oltau lai. Toning'o olkiyioi le ntito oo ltung'ana laainei eing'uaa enkadoro o endapasho enkop. “Aimetii Olaitoriani atua Sion? Aimetii olaiguanani lenye atua ninye?” Kainyoo pee aaitagoro ninche too nkitanyaanyukot enye naaguetuno, o too nkitanyaanyukot enye omon? “Etulusoyie enkisampuare; eishunye enkata enkirowuaj, neitu eitajeuni iyiook.” Amu ore ilo bae leina tito oo ltung'ana laainei naa oltau lai etipikaki olbae, aishir nanu, naaiputa nanu enking'asia. Aimetii olchani atua Gilead? Aimetii olabaani ine? Kainyoo naa pee eitu eshukuni embiotisho eina tito oo ltung'ana laainei? Oi naaji aa nkariak ake endukuya ai, naa nkonyek oo lkiyio nkonyek ainei, pee atum nanu aishira dama o kewarie te sesekuanata eina tito oo ltung'ana laainei! Oi naaji aa kaata to lpurkel ewueji neirragari pee atum nanu atung'uai iltung'ana laainei nalo enelakua aing'uaa ninche! Amu ile loloito ninche pooki, olturrur loo ltung'ana le nkaldoroto neriu ilng'ejepa lenye anaa enkawuo; elejare neme esipata natubulayie tiatua ena kop; amu kepuo ninche dukuya te ntorroni o te ntorroni, nemaayiolo ninche nanu, Olaitoriani ojo. Enchoo pooki ng'ae erripo to lelatia enye nemepik osiligi atua likae alashe; amu ore pooki alashe naa olairrikinoni amu ore pooki lelatia enye neloolo ainosaa olmarenke. Kelej pooki ng'ae olelatia enye, nemeetae oloiro esipata; eitamoo ninche ilng'ejepa lenye meiroro elejare neas ninche ntorrok neshal oleng te nkirridunoto. Nesot enkibookinoto e nkop te shumata enkibookinoto enkop, o elejare te shumata e lejare, neany ninche aayiolou nanu, Olaitoriani ojo. Neaku nji ejo Olaitoriani loo lororani: “Ng'ura kashol nanu ninche natem ninche, amu kaa ae naas nanu, te nkaraki iltung'ana laainei?” Embae e sayiet olng'ejep lenye; keiro ninye te lejare; ore te nkutuk enye meetae ake olemeirorie olelatia enye te seriani, kake ore tiatua oltau lenye neitobiraki ninye orreshet. Aimaitame nanu ninche te kuna baa, Olaitoriani ojo; naa aimaitalaaki nanu kewan to lorere laaijo ele. Teyietu nchiraki ldoinyo ninchiraki to sina ndaat e ongata enkaraki naitaaki mitil neaku meetae oltung'ani oim atua, ore enkorui oo nkishu nemening'o ore ntaritik o loing'ang'e o ng'uesi neisika nepuo. Kaitaa nanu Yerusalem osototi loo suut, olmuaate emanyisho oo mbariak naitaa nanu nkanas e Yuda mijoonto, meetae olomanya. Kaing'ae ilo tung'ani ng'en oleng oidim atayiolo ena: laa ninye eirorie enkutuk o Laitoriani, pee etum ninye aibalunye? Kainyoo pee einyalaki enkop aaidaikie anaa ong'ota, metaa meetae hoo obo ooim atua? Nejo Olaitoriani: “Enkaraki natung'uaitie ninche enkitanapata ai apa natipika nanu dukuya ninche, neitu ening oltoilo lai, arashu epuo te risioroto enye, kake te ngolong'akinoto etusujaitie iltauja lenye maate neshomo aasujaa nena Baali, anaa enaiteng'ena loo menye ninche. Metaa nji ejo Olaitoriani loo lororani, Enkai e Israel: Ng'ura, kaitoti nanu kulo tung'ana te sayiet, naisho ninche enkare natii esayiet metooko. Kaidapashaki nanu ninche iloshon leitu apa eyiolou ninche arashu loo menye; naitoki nanu airriwaa olalem aitusuj ninche ometaba anaa namut nanu ninche.” Nji ejo Olaitoriani loo lororani: “Entadamu, nimpotutu nena kituaak naaishir meetu; erriu nena kituaak arriyiak meetu. Nchoo ninche eisarisaru neilepakinye iyiook olkiyioi pee etum nkonyek ang aaturukoto too lkiyio, neshalu nchonito oo nkonyek te nkare. Amu etoning'oki oltoilo lo lkiyioi te Sion. ‘Eneikunakaki iyiook enkidaata! Eitukurruaki iyiook oleng, enkaraki nikitung'uaitie iyiook ina kop, enkaraki naturoitie ninche imanyishoritin ang.’ ” Entoning, intae na kituaak, ororei lo laitoriani, ninchosho nkiyia inyi eng'amu ororei le nkutuk enye; enteng'ena ntoyie inyi enkishirata, oltung'ani ake neiteng'en enelatia enye olkiyioi linchirishiri. Amu eilepua keeya alotu atua ilusien ang, etijing'ua ninye iwuejitin ang enkitoo edung'oo metuata nkera too nkoitoi naalala enkanasa, o lbarnot too lkurrot ootumoreki. Eroro, “Inji ejo Olaitoriani: ‘Ore mpopoki oo ltung'ana naa keirragaa anaa modiok te nkisiajata, anaa suut enkano te siadi olaisampuani nemeetae oloiturrur ninche.’ ” Nji ejo Olaitoriani, “Minchosho ilo tung'ani ng'en eng'idare eng'eno enye, minchosho ilo tung'ani magilani eng'idare emagilanisho enye, minchosho ilo tung'ani karsis eng'idare karsisisho enye; kake enchoo ilo ong'ida eng'idare ena, nchere kaayiolo nanu, nchere ara Olaitoriani ilo oibung enyorrata nauno, esipata, o enkitorioroto tiatua enkop; amu te kuna tokitin ashipa nanu, Olaitoriani ojo.” “Ng'ura, kepuonu nkolong'i, Olaitoriani ojo, pee aitame nanu lelo pooki oomurata kake memurata sii Misiri, o Yuda, o Edom, lelo ayiok le Amon, o Moab o lelo pooki, oomanya olpurkel oiriri ilpapit lenye! Amu ore kulo oshon pooki nememurata, ore enkaji pooki e Israel nememurata iltauja.” Entoning ilo rorei oirorie intae Olaitoriani, intae enkaji e Israel. Nji ejo Olaitoriani: “Emisuj nkoitoi oo loreren niming'asiasia ake too nkitoduaat e shumata amu eing'asiate loreren te ninche, amu ore ilkuaaki loo ltung'ana naa eitorrok. Keurori olchani te ntim, neitayuni enchata entolu too nkaik oltung'ani arriyia. Neikod iltung'ana te nkosholai o te sahabu; neitirrishi ninye te nyuntu o too lmushumaani, pee mepuku ashurtunye. Ore nkitanyaanyukot enye oo nkaitin neikununo anaa nkitanyaanyukot oo ltung'ana naaitasheyieki metorripo nkurman, nemeidim aairoro; kenapi ninche, amu meidim aashom. Miureyu iyie ninche, amu meidim aataas entorrono, nemetii atua ninche easata e sidai.” Metii likae likinyaanyukie iyie Olaitoriani; ira iyie kitok, naa kitok enkarna ino te magilanisho. Kaing'ae limikiureyu iyie, Iyie Olaiguanani loo loreren? Amu erishata ino ena; amu ore tiatua lelo pooki ng'eni loo loreren otiatua nkitoriat enye pooki meetae likae likinyaanyukie. Ilkilo pooki nemoda; ore enkiteng'enare enye oo nkitanyaanyukot naa nkeek ake! Eyauaki enkosholai naidong'i aaitung'uaa Tarshish, neyauni sahabu aaitung'uaa Ufas. Esiaai oltung'ani arriyia ninche o enoo nkaik olaitobirani le sahabu; ore nkilani enye naa pilei o sinteti; esiaai oo ltung'ana arriyiak pooki. Kake ore Olaitoriani naa Enkai nasipa; ninye Enkai naishu olaiguanani loo ntarasi naa tengoro enye eikirikira enkop, nemeidimu iloshon engoro enye. Nji iyie tiaaki ninche, “Ore nena aitin neitu eitayu shumata o enkop naa keidak te nkop o tiabori enkop.” Olaitoriani ninye oitobira enkop te ngolon enye, ninye oitasheyie enkop pooki te ng'eno enye nagut, naa te yiolounoto enye eitorioyie shumata. Teneitayu ninye oltoilo lenye netii enkikurrukur oo nkariak shumata neisho ninye enkinuku metunukunye too neeitingie e nkop. Neitayu ninye nkiwuang'at e nchan, neyau ninye osiwuo aitung'uaa nkajijik enyena naashumishoreki. Kekilo pooki tung'ani nemeeta eng'eno, eitukurruaki pooki aitobirani le sahabu too nkitanyaanyukot enyena oo nkaitin; amu ore nkitanyaanyukot enyena naa ine lejare, nemetii enkiyang'et atua ninche. Ine pesho ninche, esiaai e lejare, ore te nkata enkitamioto enye naa keidak ninche. Metiu ninye inji ilo ora erubata e Yakobo amu ninye oitamanyua intokitin pooki, ore Israel naa olosho le njung'ore enye; Olaitoriani loo lororani ninye enkarna enye. Nturrurro orridati lino te nkop, iyie ele obikito tiabori emanata! Amu nji ejo Olaitoriani: “Ng'ura kanang'aa nanu boo lelo oomanya ena kop tena kata, nayau nanu osina shumata ninche, pee etum ninche aatayiolo.” Oi nanu tenkaraki enkitamioto ai! Ore olbae lai naa olosina, kake ore nanu atejo, “Esipa olosilisili ele lemeeta nchere pee mangiriakino nanu.” Eidaikieki olng'obor lai, ore nkeenta aainei pooki netudung'ote; naashomo aaing'uaa nkera ainei metii ninche; metii hoo obo oigil akas olng'obor lai, nepik ilkarash laainei. Amu kemoda ilchekuti loo ntare nemeikilikuanishore Olaitoriani; neaku eitu edupo ninche, ore luaat enye pooki neidapashate. Inining'o, olmarenke! Ng'ura elotu! Embuakunoto sapuk naipang'u te nkop e moikuape, pee eitaa nkanas e Yuda ilmuateni, emanyisho oo mbariak. Ayiolo nanu, Olaitoriani, nchere ore nkoitoi e tung'ani nemetii atua ninye kewan, nchere mme atua tung'ani etii pee elo neutaa iroruat enyena. Ntorioyoki nanu, Olaitoriani kake te sipata; neme te ngoro ino, pee mikintaa ake nanu olemetii. Tubukoki engoro ino napi shumata lelo oreren limikiyiolo ninche, o shumata lelo tung'ana lemeipot enkarna ino; amu einosa ninche Yakobo; einosa ninche ninye nemut ninye, neitomijoono ninche emanyisho enye. Nelotu ororei enetii Yeremia eing'uaa Olaitoriani ejo: “Toning'o irorei lele ning'o lo sotua, nirorie iltung'ana le Yuda o lelo oomanya Yerusalem. Tiaaki iyie ninche, nji ejo Olaitoriani, Enkai e Israel: ediaa ilo tung'ani lemening irorei lele ning'o lo sotua. Ilo laitanapa apa iloo papaai linyi pee ayau nanu ninche aitupuku te nkop e Misiri, aitung'uaa ilo kokuet le sekenkei, ajo, Entoning oltoilo lai, niasiasa nena pooki naitanap nanu intae. Pee iyakuku intae iltung'ana laainei, naaku nanu Enkai inyi, pee atum ataasa olmumai lai apa lainosa nanu too loo papaai linyi, pee aisho nanu ninche enkop naruko kule o naishi, anaa enatiu ena olong.” Nawal nanu ajo, “Metotiwuo neijia Olaitoriani.” Naajoki nanu Olaitoriani, “Ntudupai kulo rorei pooki tiatua nkanas e Yuda, o too nkoitoi naalala e Yerusalem. Entoning irorei lele ning'o lo sotua niasiasa. Amu aikoo nanu loo papaai linyi akurraki ina kata apa pee ayau nanu ninche ailepunye aitung'uaa enkop e Misiri, naikok aitirrishaki, o tena olong, ajo, entoning oltoilo lai. Ore eyia eitu ninche ening kake eshomo ake pooki ng'ae te ngolon oltau lenye torrono. Neaku ayawua nanu shumata ninche irorei pooki lele ning'o lo sotua apa laitanapa nanu ninche metaasa, kake eitu ninche eas.” Naaigil nanu Olaitoriani ajoki, “Etii enkiseroto atua iltung'ana le Yuda o lelo oomanya Yerusalem. Eibelekenyate ninche aashukokino ntorrok oo loo nkakuyiaa lenye, apa ootanyaita ening irorei laainei; eshomo ninche aasujaa kulie aitin pee eisiaai ninche; etudung'o enkaji e Israel o enkaji e Yuda osotua lai apa laitobira nanu tenebo loo papaai lenye. Neaku, nji ejo Olaitoriani, ng'ura kayau nanu entorroni shumata ninche nemeidim aatapaashare; ore hoo naaishiraki ninche nanu, maning nanu ninche. Nepuo nkanas e Yuda o lelo oomanya Yerusalem aaishiraki nena aitin naapejoki ninche enkorropil, kake meidim ninche aaitajeu ninche te nkata e nyamali enye. Amu etaa kumok nkaitin inyi anaa nkanas inyi, iyie Yuda; naa kumok anaa nkoitoi naalala e Yerusalem lperereni loo lasarri nintobira pee intukurrurru ate te lelo perereni loo lasarri oopejokinyeki Baal enkorropil. “Metaa miomonoki iyie kulo tung'ana, arashu ilepie enkishirata arashu enkomono te rishata enye, amu mainining nanu tenaaipot ninche nanu tenkata enye enyamali. Kaa sipata eeta ina nanyor nanu tiatua enkop ai, eidipa ataasa nkiaasin torrok? Keidim ilmuma o nkiri naaitaikiaki olasar aaiwuang'ie enkidaata ino? Eikintiship naa iyie ina? Kimpoto apa iyie Olaitoriani ajo, Oloirien onyori, obore ilng'anayio sidain; kake te nkikurrukur e ndarata sapuk epik ninye atua enkima, ore ilng'osil lenyena nemut enkima. Ore Olaitoriani loo lororani, laa ninye apa likituuno iyie, kitudung'oko iyie entorrono, te nkaraki ina torrono nataasa enkaji e Israel o enkaji e Yuda, naaitagor nanu aapejoki Baal enkorropil.” Naaitayiolo nanu Olaitoriani nayiolou nanu; nikintoki iyie aitodol nanu nkiaasin enye torrok. Kake atiu apa nanu anaa olkuoo le ker obor oriki aapuo aayieng. Eitu apa nanu ayiolou ajo nanu eitobiraki ninche entorroni ejo, “Mainyala iyiook olchani tenebo ilng'anayio lenyena, matudung iyiook aaiwuang'ie te nkop oo looishu, pee meitokini ae kata aadamu enkarna enye.” Kake ore, iyie Olaitoriani loo lororani, oiguana te sipata, ilo otem oltau o ndamunot nchooki nanu matoduaa elap ino te shumata ninche, amu iyie nanu aigarakine too mbaa aainei. Neaku nji ejo Olaitoriani tialo lelo tung'ana le Anatot, lelo ooing'oru enkishui ino nejo, “Mimbonisho te nkarna Olaitoriani, arashu iye te nkaina ang” neaku nji ejo Olaitoriani loo lororani: “Ng'ura, kaitame nanu ninche; keye lelo barnot to lalem; ore layiok lenye o ntoyie enye neye to lameyu; nemeetae obo lenye oleku. Amu kayau nanu entorroni shumata iltung'ana le Anatot, teilo ari le nkitamioto enye.” Ira iyie asipani, Olaitoriani, tenaaishankarrare nanu iyie; ore eyia kaitirrish nanu ororei lai te dukuya iyie. Kainyoo pee edupoyu enkoitoi oo larruok? Kainyoo pee edupoyu iltung'ana le nkeleekisho? Iun iyie ninche, neibung ninche ntona; nebulu ninche neiu ilng'anayio; nitaana iyie too nkutukie enye nilakua too ltauja lenye. Kake ore iyie, Olaitoriani, kiyiolo nanu kidolita iyie nanu, nikitem endamunoto ai tialo iyie. Teyietai ninche mpang'ie anaa nkerra naapuoi aayieng, nirragie ninche aiteng'el aitaany ina olong e yiang'are. Keishir akenya enkop o anu, netoyu nkujit e pooki ong'ata? Tenkaraki entorroni e lelo oomanya atua ore ng'uesi o ntaritik nejutori aaishie enkaraki natejo iltung'ana, “Medol ninye ae kiting'oto ang.” “Amaa tenikueta akeshare ninche too nkejek, nikintanaura ninche kaji naa inko tenikeshare mbartan? Naa amaa tenibatata te nkop naserian kaji naa inko tiatua osero lo lkeju le Yordan? Amu ore ninye ilalashera linono o enkaji e papaai lino, eji kitakaldaitie sii ninche; niruk ninche, hoo neiro irorei supati te iyie.” Aiturrayie nanu enkaji ai, aitaa nanu enjung'ore ai aishooyie nanu ina nanyor to ltau lai, apik atua nkaik oo lmang'ati lenyena. Etotiwuo enjung'ore ai te nanu anaa olng'atuny tiatua entim, eilepunye ninye oltoilo lenye aarare nanu; neaku kaiba nanu ninye. Ketotiwuo enjung'ore ai anaa emotonyi narreshitoi, kemanita ninye motonyi naareshito too nkaloli pooki? Shomo inturrurro ing'uesi pooki e ntim iyau ninche meetu aapolol aainos. Einyala ilairritak kumok loo ntare enkurma ai oo sabibu eitunyokitio ninche enkop erubata ai, eitaa ninche ewueji ai sidai e ong'ata mitil. Eitaa ninche ninye mitil; naaishiraki nanu ina nataa mitil eitaaki enkop pooki mitil kake meetae oltung'ani oshilaa. Ore nena kisiajat pooki naaika to lpurkel neetuo lelo ooidaikie; amu keinos olalem lo Laitoriani enchoto nabo enkop o metabaiki enkae; meetae o loata eseriani. Etuuno ninche enkano neisampu ilkiku, eitanaurita ninche ate kake eitu edupore toki. Keitukurruni ninche te nkisampuaare enye tenkaraki engoro O Laitoriani napi. Nji ejo Olaitoriani tialo, kulo le latia ai pooki torrok ooinyal ina jung'ore naishoo nanu iltung'ana laainei Israel metujung'o: “Ng'ura, kadotu nanu ninche aitung'uaa enkop enye, naa kadotu enkaji e Yuda aitung'uaa ninche. Ore peyie aidip nanu atadotu ninche, naitoki nanu aing'urrie ninche, naitoki nanu ayau ninche pooki ng'ae enjung'ore enye o pooki ng'ae enkop pooki. Naa kelotu aaku teneibung ninche aakurraki nkoitoi oo ltung'ana laainei, pee enya olmumai te nkarna ai, ‘Anaa enaishu Olaitoriani,’ anaa sii apa enaiteng'ena ninche iltung'ana laainei meinosa olmumai te Baal, naa keshetuni ninche tiatua iltung'ana laainei. Kake tenetii olosho lemening'isho, naa kadotu nanu tukul naidaikie ninye, Olaitoriani ojo.” Nji aatiaaka nanu Olaitoriani, “Shomo inyiang'u enkarasha e kitani, nipik empolos ino nimintadoiki ake atua enkare.” Neaku ainyiang'ua enkarasha empolos te risioroto o rorei lo Laitoriani napik empolos ai. Neitoki ororei lo Laitoriani alotu enatii nanu te nkata e are ejo, “Iwa ina arasha e mpolos ninyang'ua ina natii empolos ino, nidumunye, shomo olkeju le Farite, isudoi ninye teine to lbaata le ndapidapoi.” Nalo nanu, naisudoo te Farite, anaa enaaitanapa nanu Olaitoriani. Ore etulusoite nkolong'i kumok naajoki nanu Olaitoriani, “Tudumunye, shomo Farite, ntayu teine enkarasha empolos apa naaitanapa iyie isudoi teine.” Nalo nanu Farite, naturu, naitayu ina karasha teine wueji apa naisudorie ninye. Naa ng'ura etarruoyie apa ina arasha e mpolos; meekure apa eeta tipat. Neitoki ororei lo Laitoriani alotu enatii ejo: “Nji ejo Olaitoriani: Neijia aiko ainyal olwuasa le Yuda o ilo owuasa kitok le Yerusalem. Ore kulo tung'ana torrok, oany ening irorei laainei, oosuj te ngolon enkong'u iltauja lenye maate neshomo aasujaa kulie aitin pee eisiaai ninche neserem ninche ketiu anaa ena arasha empolos naidaaie, nemeeta tipat. Amu ore anaa enaenikino enkarasha empolos o ltung'ani, neijia aikuna enkaji pooki e Israel o enkaji pooki e Yuda maateenikinoto ninche nanu, Olaitoriani ojo, pee etum ninche aataa te nanu iltung'ana, o enkarna, o enkisisa o enkitoo te nanu, kake mening'isho ninche.” “Irorie iyie ninche ele rorei ijoki, ‘Nji ejo Olaitoriani Enkai e Israel, “Keiputi pooki siang'au e naisho oo lsabibu.” Naa eikijoki ninche iyie, Eimikiyiolo iyiook aaitisip aajo keiputi pooki siang'au e naisho oo lsabibu?’ Nitum iyie atiaki ninche, Nji ejo Olaitoriani: Ng'ura kaiput nanu emerai lelo pooki oomanya ena kop: lelo aiguanak ootonie olorika le Daudi le nkitoo, o lapolosak, o loibonok o lelo pooki oomanya Yerusalem. Naitaar nanu ninche oltung'ani ake o likae, iloo menye o layiok lenye tenebo, Olaitoriani ojo. Maing'urrie nanu arashu aleku, arashu aitananaki enkoshoke pee mainyal nanu ninche.” Entoning ninchoruru enkiok; emiwuasa, amu eiroro Olaitoriani. Enchoo enkitoo Olaitoriani Enkai inyi, eton eitu eyau ninye enaimin eton eitu errorro nkejek inyi te nchumata ildoinyo ooitomisimisoki, ore ing'oru iyie ewang'an neibelekeny ninye aitaa emisimisi neitaa ninye enaimin nagut. Kake tenimining iyie, neishir oltau lai te nkisudoroto tenkaraki olwuasa lino; neishir nkonyek aainei te mion nerukunye ilkiyio, enkaraki nataraiyioki eluaata Olaitoriani. Tiaaki Olaiguanani o ng'otonye enkitok olaiguanani “Ewaita olorika liabori, amu etadowuo enkopiyia ino e nkitoo sidai aing'uaa endukuya ino.” Eikenoki nkanas e Negeb, nemeetae olobol ninche. Ewaki Yuda pooki eyararoto, etarayioki tukul. Tushumu nkonyek inono toduaa lelo oopuonu ooing'uaa moikuape. Koree ina luaata apa nikinchooki iyie, ina luaata ino sidai? Kaa iyie ijo tenepik ninche ate shumata iyie lelo apa laa iyie makewan oiteng'ena? Pee eaku ilchoreta te iyie? Eimikimbung iyie emion, anaa emion enkitok nasaisai? Naa tenijo iyie to ltau lino, kainyoo pee eetuo kuna baa shumata nanu? Tenkaraki esapuko e ntorroni ino pee engishari ilkilani linono, nikisomiti iyie. Keidim ilo le Etiopia aibelekenya olchoni lo sesen lenye arashu olowuaru keri aibelekenya iltipot lenyena? Indimidimi naa aataas esidai intae ilootamoo eas entorroni. Kaaidapash nanu iyie anaa suut, naayaita olkutati oing'uaa olpurkel. Erubata ino ena, erubata naategelaka nanu iyie, Olaitoriani ojo, amu meekure kidamu iyie nanu nisiliga elejare. Kangishaa nanu makewan olokesena lino apik shumata enkomom ino, naa kedoli enkurruna ino. Atoduaa nanu olminong lino, o eloloito ino o enkisijore ino, o lduruk le loloito ino too nchumat oo ldoinyo o too nkong'at. Oi iyie, Yerusalem! Keaku akenya o anu, eton eitu kintaai sinyati. Ele rorei lo Laitoriani oewuo enetii Yeremia eipirta olameyu: “Eishirita Yuda netameito nchomito enyena; neishir iltung'ana lenyena etoni te nkop neilep olkiyioi le Yerusalem alo shumata. Ore lelo kituaak lenyena neirriwaa isinkan lenye meyau enkare; nepuonu ninche nchorroi nelau ninche enkare, nerrinyo ninche too imotioo naarook, etukurrutua ninche neidang'a neimulumul ilukuny enye. Ore enkaraki enkop natabee, enkaraki neitu eshaiki enchan enkop netukurrutua ilaramatak, neimulumul ilukuny enye. Keituraa ninye enkolii enkuo enye amu meetae nkujit. Neitashe isirkon ti ong'ata too nkisiajat naaika, neipang'ipang aaok enkijape anaa mbariak neiliilaa nkonyek enye, amu meetae nkujit. Ore hoo neishakenoki iyiook entorroni ang, taasa, iyie Olaitoriani tenkaraki enkarna ino, amu eikumok nchukot ang e siadi, kitaasa iyiook ing'ok tialo iyie. Iyie losiligi le Israel, Olaitajeunoni lenye te nkata e nyamali kainyoo iyie pee itiu anaa olomoni te nkop, anaa olalotoni oun olng'obor lenye te nkaraki enkewarie. Kainyoo iyie pee itiu anaa iltung'ana oidang'a? Anaa oltung'ani ogol lemeidim aitajeusho? Ore eyia, iyie Olaitoriani, itii empolos ang, neipotoki iyiook te nkarna ino; ming'uaa iyiook.” Nji ejo Olaitoriani tiaalo kulo tung'ana: “Etonyorra ninche aaidapashari aaiko nji, eitu ninche eibooyo nkejek enye; neaku meng'amu ninche Olaitoriani, kedamu ninye entorroni enye neitame ing'ok enye.” Naajoki nanu Olaitoriani, “Miomon tenkaraki olmabarishoi le kulo tung'ana. Ore hoo neen ate aaitupukoo, maning nanu olkiyioi lenye, naa ore hoo neishoru ninche ilasarri oopejori o lasar le ntapa, mang'amu nanu ninche; kake kamut nanu ninche to lalem, o to lameyu o tolmeitai.” Najo nanu; “Oi Olaitoriani Enkai, ng'ura, ejoki iloibonok ninche, ‘Midolidolo intae olalem arashu itumutumu olameyu, kake kaisho nanu intae eseriani nadede tiatua ene wueji.’ ” Naajoki nanu Olaitoriani: “Elejare eibonu lelo oibonok tenkarna ai: eitu nanu airriwaa ninche, neitu nanu aitanap ninche arashu airorie ninche. Kimbonokito ninche iyie enduaata e lejare, o enaibon e pesho, o elejare oo ndamunot enye. Metaa nji ejo Olaitoriani tialo lelo oibonok ooibonisho te nkarna ai hoo neitu nanu airriwaa ninche, o lelo oojo melotu olalem arashu olameyu ena kop: to lalem o to lameyu emuti lelo oibonok. Ore lelo tung'ana laa ninche eibonoki nenang'ari boo tiatua nkoitoi e Yerusalem, pee ear ninche olameyu o lalem, metii hoo obo onukaa ninche o nkituaak enye, o layiok lenye o ntoyie enye. Amu kabukoki nanu entorroni enye shumata ninche. Tiaaki iyie ninche ele rorei: ‘Nchoo nkonyek aainei enang'ari too lkiyio kewarie o ndama, naa nchoo ninche eaku medung'o ae kata, amu ore ina selenkei oo ltung'ana laainei netooshoki aapik olbae sapuk te oshoto sapuk oleng. Tenaipang nanu alo ong'ata, ng'ura, lekua ootaraki to lalem! Tenajing nanu enkang, ng'ura ilootara olameyu! Amu ore pooki oloiboni o lapolosani neas biashara enye te nkop pooki, nemeeta eng'eno.’ ” Itanya iyie Yuda katukul? Ketonyimo oltau lino Sion? Kainyoo iyie pee itoosho iyiook, ometaa meetae olchani te iyiook? King'oru iyiook eseriani, kake meetae esidai naewuo; kisiligu enkata enkishiunoto, naa ng'ura oloputukunyi. Kimbalie iyiook entorroni ang, iyie Olaitoriani, o entorroni oo loo papa lang, amu kitaasa iyiook eng'oki tialo iyie. Ore te nkaraki enkarna ino, minturaa iyiook. Mintadou olorika lino le nkitoo; tadamu nimigil olning'o lino lo sotua tenebo iyiook. Ketii kulie tiatua nena aitin e lejare oo loreren naaidim aayau enchan? Arashu tenaa keidim shumata aishoru enkirujuruj? Aimira iyie ninye, Olaitoriani Enkai ang? Kipik iyiook osiligi lang iyie, amu ias iyie kuna baa pooki. Naaitoki Olaitoriani ajoki nanu, “Ore naaji ninye teneitashe Musa o Samuel te dukuya nanu, meibelekenya oltau lai aing'or kulo tung'ana. Taarai ninche meshomo too nkonyek aainei, naa nchoo ninche meshomo! Ore ake pee kinkilikuan ninche iyie, aajoki, ‘Kaji iyiook kipuo?’ Nijoki iyie ninche, Nji ejo Olaitoriani:” “Ore lelo lo lmeitai nepuo olmeitai, ore lelo laa ilo lalem nepuo enetii olalem ore lelo; laa ilo lameyu, nepuo enetii olameyu, ore lelo laa ile yararoto nepuo eyararoto.” “Kagelaki nanu shumata ninche mpukunot ong'uan oo looidaikie, Olaitoriani ojo: olalem oar, ildien oopolos, olmotonyi lo loing'ang'e o ng'uesi enkop pee emut ninche aaidaikie. Naa kaitaa nanu ninche entoki naitureisho too nkitoriat pooki enkop tenkaraki ina nataasa Manase olayioni le Hesekia, olaiguanani le Yuda tiatua Yerusalem. Kaing'ae liking'urrie iyie oo Yerusalem, arashu kaing'ae likinchiraki iyie? Kaing'ae oibelekenya aikilikuanu olmabarishoi lino? Kitanya iyie nanu, Olaitoriani ojo, iton arrinyo siadi; neaku aaitorioki nanu enkaina ai pee aagilunore naaidaikie iyie, anaure nanu tenkibooroto engoro ai. Atisila nanu ninche te silet nasilishoreki, too nkang'itie pooki eina kop; aishirie nanu ninche, aidaikie nanu iltung'ana kumok; neitu ninche eibelekenya aaing'uaa nkoitoi enye. Aitaa nanu esiana oo nkolia enye kumok alang osinyai loo naaiposha; ayaka nanu noo ng'otonye ilmurran ooti olainyalani te nkipirata enkolong; aishoo nanu emion o lkirutoto metadoiki ninche aluam. Ore ina natoiwuo nkera naapishana neiterre; etadoyie enkolong enye eton aa dama; eitukurruaki netusulaki. Ore inkera naatelekutua, naisho metaari to lalem te dukuya ilmang'ati lenye, Olaitoriani ojo.” Woi nanu, yieyio lai, amu kitoiwuo nanu, oltung'ani o ekenya okeshare enkop pooki, neitu aisilenisho, kake aadekita ninche pooki. Metaa nchoo etiu neijia, Olaitoriani, teneitu nanu aaisiaai aitobiraki teneitu nanu aasai iyie terishata oo lmang'ati laainei etii ninche atua enyamali o sina. Ketii obo oidim atigila esekenkei naing'uaa moikuape o suyai? “Ore karsisisho ino o lchumati lino naa kaisho metarari, metii enkinyang'a, tenkaraki ing'ok inono pooki, tiatua enkop ino pooki. Kaaisho nanu iyie isiaayia ilmang'ati linono tiatua enkop nimiyiolo, amu ore te engoro ai neinuaaki enkima nayupuyup ntarasi.” Olaitoriani iyiolo iyie; tadamuaki nanu nikimutan nanu, nintalaku elap tiaalo nanu too laisilisilok laainei. Ore te ng'iriata ino mikiya nanu; tayiolo ajo tenkaraki iyie pee anap imorot. Enotoki rorei linono, nanya nanu ninche, neaku irorei linono te nanu eng'ida o enchipai oltau lai; amu te nkarna ino aaipotoki nanu, Olaitoriani, Enkai oo lororani. Eitu nanu aton to lturrur loo looshipa, ang'ida; atotona nanu openy, amu etii apa enkaina ino shumata nanu, amu kimputa nanu engoro. Kainyoo pee meish emion ai. Nemeishiunoyu olbae lai ketanya eishiunyeki? Itiu iyie te nanu anaa ereyiet nalejisho, anaa nkariak naaishiunye? Neaku nji ejo Olaitoriani: “Tenishukunye, naang'amu nanu, naa intashe iyie te dukuya nanu. Teniro iyie ina sidai, neme ina nara pesho, nitiu iyie anaa enkutuk ai. Naa kaaitaa nanu iyie te kulo tung'ana esuntai nasheta osuyai; nikiarare ninche iyie, kake mikimir ninche iyie, Olaitoriani ojo. Kaakordu nanu iyie aitung'uaa enkaina eilo torrono, naalaku iyie aitung'uaa enkibung'ata eilo lemeeta olng'ur.” Eewuo ororei lo Laitoriani enatii ejo: “Miyamisho aashu iiu ilayiok aashu ntoyie tene wueji. Amu nji ejo Olaitoriani tialo ilayiok o ntoyie naaini tene wueji, o tiaalo ntomonok naatoiwutuo ninche o lpayian ooiu ninche tiatua ena kop: keye ninche too nkeyaitin torrok. Meishirakini ninche, aashu enukari; ketiu ninche anaa emodiei ti oriong enkop, keidak ninche to lalem o to lameyu, ore mpopoki enye neaku endaa too lmotonyi lo loing'ang'e, o too lowuarak le ntim. “Amu nji ejo Olaitoriani: Mijing enkaji naishirieki, aashu ilo aishir, aashu aishiraki ninche, amu aiwuang'ie nanu eseriani ai te kulo tung'ana, Olaitoriani ojo, enyorrata ai nauno o lng'ur. Ore pooki, lkituaak o looti naa kepuo aaye tiatua ena kop; nemenukari ninche, nemeetae hoo obo oishiraki ninche aashu edung'udung kewan aashu ebarn kewan tenkaraki ninche. Nemeetae hoo obo onya emukate eilo oishir, pee eitigir teilo otua; aashu eetae hoo oloisho ninye enkikompe enkitagoloto metooko tenkaraki menye lenye aashu ng'otonye. Milo iyie atua enkaji osirua aton tenebo ninche; adaa niokisho. Amu nji ejo Olaitoriani loo lororani, Enkai e Israel: ng'ura kaisho nanu meishunye tene wueji, te dukuya nkonyek inyi o too nkolong'i inyi, oltoilo le ng'ida, oltoilo le nchipai, oltoilo lo loyamisho oltoilo le nayami. “Naa tiniliki iyie kulo tung'ana kulo omon, nikijoki ninche iyie, ‘Kainyoo pee etudung'oko iyiook Olaitoriani ena torroni kitok? Kainyoo entorroni ang? Kainyoo eng'oki nikitaasa iyiook to laitoriani Enkai ang?’ Nijoki iyie ninche: ‘Enkaraki naatung'uaitie iloo papaai linyi nanu Olaitoriani ojo, nepuo aasujaa kulie aitin neisiayia neserem ninche, naaing'uaa nanu neitu eibung enkitanapata ai, naa ore enkaraki nitaasa intae entorroni nalang enoo loo papaai linyi, amu ng'ura, etusuja ake pooki ng'ae te intae engolong'u enye torrono, eany aaning nanu; metaa kanangaa nanu intae aitung'uaa ena kop apik atua enkop nimiyiololo nemeyiolo apa loo papaai linyi, ore teine nitum taa aisiaayia kulie aitin dama o kewarie, amu maaisho nanu iyie omom!’” “Metaa, ng'ura, kepuonu nkolong'i Olaitoriani ojo, nemeitokini aajo, ‘Anaa enaishu Olaitoriani laa ninye oyaua ailepunye iltung'ana le Israel aitung'uaa enkop e Misiri.’ Kake ‘Anaa enaishu Olaitoriani laa ninye oyawua iltung'ana loo Siraeli aitung'uaa enkop e moikuape o nkuapi apa pooki naaterewa ninche.’ Amu kayau nanu ninche ashuku meetu enkop enye ate apa naishoo loo papaai lenye. “Ng'ura kairriwu nanu ilarreshok kumok loo sinkir, Olaitoriani ojo naa kerresh ninche; ore te siadi nairriu ilang'orok kumok loo ng'uesi, naa keng'or ninche te pooki doinyo o te pooki oigululu, o too nchumat oo ndapidapo. Amu etii nkonyek aainei shumata nkoitoi enye pooki, meisudoo ninche te nanu, nemeisudoro entorroni enye too nkonyek aainei. Naa kaitalaku nanu katitin are entorroni enye o eng'oki enye enkaraki naituruja enkop ai too mpopoki oo nkitaanyaanyukot, neiputa ninche enjung'ore ai nena o lminong lenye.” Olaitoriani, engolon ai naa osempewuet, naa esarunoto ai te nkolong e nyamali enitii iyie epuonu iloreren. Eing'uaa ineeiting'ie enkop nepuonu aajo: “Eitu ejung loo papaai toki neme elejare, o ntokitin e pesho nemeeta dupoto. Keidim oltung'ani aitobiraki kewan nkaitin? Ore kuna mme nkaitin!” “Metaa, ng'ura, kaisho nanu ninche metayiolo, ore ena kata nabo kaisho ninche metayioloito engolon ai o enkidimata ai, naa keyiolou ninche aajo ore enkarna ai naa Olaitoriani.” “Eigeroki eng'oki e Yuda te nkalamu e sekenkei, ore te ntopij e almasi, etisiraki te mbao oltau lenye, o too mowuarak oo lperereni lenye loo lasarri. Ina kata edamu nkera enye ilperereni lenye loo lasarri o enkai enye naji Asherim, te mbata e pooki shani onyori, o te nchumata e pooki doinyo adoru, too nchumat oo ldoinyo te nkop naisiaja. Ore karsisisho ino o lchumat linono pooki kaisho metaari anaa enkinyang'a eng'oki ino, tiatua enkop ino pooki. Iorore iyie enjung'ore ino apa naaishoo, naa kaaisho nanu iyie isiaayia ilmang'ati linono tiatua enkop nimiyiolo, amu ore te ngoro ai, neinuaaki enkima nayupuyup ntarasi.” Nji ejo Olaitoriani: “Ediaa oltung'ani oisilig iltung'ana neitaa osesen le tung'ani emasaai o larrabal. Ilo oibelekeny oltau lenye aitung'uaa Olaitoriani. Etiu ninye anaa enkiti shani nabulu olpurkel, nemedol ninye ae sidai elotu. Keton ninye too worro tiong'ota, te nkop naisukut nememanya. Emayiana ilo tung'ani oisilig Olaitoriani, otii osiligi lenye atua Olaitoriani. Etiu ninye anaa olchani otunoki te mbata enkare, oreu ntona enyena embata olkeju, nemeureishoyu tenelotu enkirowuaj, amu ketoni ake mbenek enyena enyori, nemesi ninye te nkata olameyu, amu mepal ae kata ninye meiu ilng'anayio.” Olalejani oltau alang ntokitin pooki, naa torrono oleng. Kaing'ae oidim atayiolo ninye? “Kajur nanu Olaitoriani ndamunot natem oltau, pee aisho pooki tung'ani te risioroto oo nkoitoi enyena te risioroto oo lng'anayio loo nkiaasin enyena.” Anaa enkurlee naiturrur nkera neitu edanyu, neijia eikununo ilo otum karsisisho kake mme te sipata; ore te mpolos oo nkolong'i enyena neing'uaa ninche ninye, ore te nkiting'oto enye neaku olmodai. Olorika le nkitoo le nkisisa otipikaki apa shumata ebaiki enkiterunoto, ninye ewueji ang sinyati. Iyie Olaitoriani osiligi le Israel, ore pooki liking'uaa iyie netum enkurruna; ore lelo likimbelekenya aaing'uaa iyie, neigeri tiatua enkop, too kulukuok amu etanyaita ninche Olaitoriani, ina ong'u enkare naishu. Nchiunyeki nanu Olaitoriani, naa kaishiu; ntajeuoki naa kajeu; amu ira iyie enkisisa ai. Ng'ura kaajoki ninche nanu, “Koree ororei oing'uaa Olaitoriani? Nchoo elotu!” Eitu nanu aaitirrishaki iyie pee irriu entorroni, neitu nanu ang'uar enkolong e mutai, iyiolo iyie; ore ina napuku tiatua enkutuk ai netii dukuya enkomom ino. Meaku olkirutoto te nanu; ira iyie esarunoto ai te nkolong entorroni. Nchoo metukurru lelo laaisilisil nanu, kake mikincho nanu aaitukurruni. Nchoo ninche eirut, kake mikincho nanu airut! Intadoiki ninche enkolong entorroni; ingilie ninche kat are enkidaata. Nji aatiaaka nanu Olaitoriani: “Shomo ntasho te nkishomi e Benchamen, naa ninye ejing'unye ilaiguanak le Yuda naa ninye eipang'ie, o too nchomito pooki e Yerusalem, nijo, ‘Entoning ororei lo laitoriani intae ilaiguanak le Yuda, o Yuda pooki, o lelo pooki oomanya Yerusalem, oojing'u te kuna shomito. Nji ejo Olaitoriani: entorripoto tenkaraki enkishui inyi, niminapinapa olola te nkolong e sabato aashu iimunyenye nchomito e Yerusalem. Niminapinapa olola aaitayu too nkajijik inyi te nkolong e sabato aashu iasiasa ae siaai, kake entaa enkolong e sabato sinyati, anaa apa enaitanapa loo papaai linyi. Ore eyia eitu apa ninche ening'isho neitu eishoru enkiok enye, kake etogolong'utua, pee mening nemeng'amu inkiteng'enat. “ ‘Kake tenikining'ining'i intae nanu, Olaitoriani ojo, nimintijing'ung'u olola too nchomito ena anasa te nkolong e sabato, kake nintaa enkolong e sabato sinyati nimiasishosho teina olong, netum aaimu nchomito ena anasa ilaiguanak ootonie olorika le nkitoo le Daudi, ekedito ngarrin oo mbartan o mbartan, ninche o lkituaak lenye, lelo tung'ana le Yuda o lelo oomanya Yerusalem; nemanyi ena anasa ntarasi. Nepuonu iltung'ana ooing'uaa nkang'itie e Yuda o wuejitin neemanita Yerusalem, eing'uaa enkop e Benchamen, eing'uaa Shefela, eing'uaa ina kop oo ldoinyo, o looing'ua negeb, eyau ilasarri oopejori o nkishorot, nkishorot e nkurma o lbani, neyau nkishorot e nashe enkaji Olaitoriani. Kake tenimikining'ining'i intae nanu, aaitaa enkolong e sabato sinyati, niminapinapa olola niimumu nchomito e Yerusalem te nkolong e sabato, nainok nanu enkima too nchomito enyena, naa kemut nkajijik e nkitoo e Yerusalem nemeari ae kata.’ ” Ele rorei ninye oewuo enetii Yeremia eing'uaa Olaitoriani ejo: “Tudumunye tadoi shomo enkaji o laitobirani loo ntokitin oo nkulupuok ore tene naaisho nanu iyie toning'o irorei laainei.” Nadoyio nanu alo enkaji o laitobirani loo ntokitin oo nkulupuok, ore teine neasisho ninye te nkeju enye engarri. Ore apa ina masaai naitobirita ninye te nkulukuoni nerruoyo te nkaina o laitobirani loo ntokitin oo nkulupuok, neitoki aitobir aitayunye enkae masaai, anaa enadol o laitobirani too ntokitin oo nkulupuok enaa enadol aa sidai te neas. Neitoki ororei lo Laitoriani alotu enatii ejo: “Na aji e Israel, aimaidim nanu aikuna te intae anaa enaikuna ele aitobirani loo ntokitin oo nkulupuok? Olaitoriani ojo: ng'ura, ore anaa esarng'ab te nkaina o laitobirani loo ntokitin oo nkulupuok neijia itiuu intae te nkaina ai, na aji e Israel. Ore te pooki kata tenaibalunye tialo olosho aashu enkitoria, nchere kadotu nagil nainyal, naa ore ilo osho, laa tialo ninye airoro, teneibelekenya aing'uaa entorroni enye, nairridu ina torroni apa natejo kaitaas ninye. Naa ore te pooki kata tenaibalunye nanu tialo olosho aashu enkitoria nchere kashet naun ninye, naa teneas entorroni too nkonyek aainei, mening oltoilo lai, nairridu nanu teina sidai natejo pee aitaas ninye. Ore naa, tiaaki iltung'ana le Yuda o lelo oomanya Yerusalem: ‘Nji ejo Olaitoriani, ng'ura, aitobirita entorroni tialo iyie naipiru enkitobirata tialo intae. Tushukunye, pooki ng'ae aing'uaa enkoitoi enye torrono, nintobiriri nkoitoi inyi o nkiaasin inyi.’ “Kake ejo ninche, ‘Pesho ina! Kisuj iyiook nkitobirat ang maate, neas pooki ng'ae te risioroto engolon oltau lenye torrono.’ Neaku nji ejo Olaitoriani: Nkilikuanu tiatua iloreren, kaing'ae otoning'o enanyaanyukie ena? Etaasa ina tito selenkei e Israel embae suuji oleng. Kepal enturoto e Lebanon endapidapoi e Sirion? Ketoyu nena ariak o ldoinyo naaimu lelo yerat ooirobi? Kake maadamu nanu iltung'ana laainei, epejoki ninche enkorropil nkaitin e lejare; netarrorrote ninche tiatua nkoitoi enye, too ilbaribarani musan, neshomo aaim nkoitoi naangel mme enkoitoi kitok, eitaa enkop enye enaitureisho, entoki naing'asiakinie intarasi. Ore pooki ng'ae oim embata neiputukuny neipirripir elukunya enye. Anaa osiwuo ogol le nkilepunoto enkolong kaidapash nanu ninche te dukuya olmang'atinta. Kaisho nanu ninche oriong ai, mme omom ai, te nkolong enye o sina.” Nejo ninche, “Wootu, maitaikiti iyiook Yeremia irresheta, amu merruoyo enkitanapata to lapolosani, aashu enkiguana to lang'eni, aashu ororei to loiboni. Wootu, matar ninye to lng'ejep, nimikining iyiook hoo obo loo rorei lenyena.” Ng'uraki nanu Olaitoriani, nining olkiyioi lai. Kentorroni elakieki esidai? Ore eyia etuturutuo ninche engumoto tenkaraki enkishui ai. Tadamu ina naitasho te dukuya iyie pee airo esidai tenkaraki ninche, pee aibelekeny aiwuang'ie aitung'uaa ninche. Neaku iwa nkera enye meshomo aatum olameyu; nchooi ninche meshomo engolon empijan olalem, nchoo nkituaak enye eaku olupeno o nkolia. Metanang'are ilewa lenye keeya to lmeitai, metaari eleleroenye to lalem to larrabal. Metoning'ori olkiyioi eing'uaa nkajijik enye, tiniyau iyie lelo ooarr ninche metuata te luamata! Amu etuturutuo ninche engumoto pee aaya nanu, neirragakinye nkejek aainei irresheta. Ore eyia, iyiolo iyie Olaitoriani ilnukat lenye laarieki nanu matua. Mipalaki ninche entorroni enye, nimijut eng'oki enye too nkonyek inono. Nchoo ninche metanang'ari te dukuya iyie; ntaasa ninche te nkata engoro ino. Nji etejo Olaitoriani, “Shomo, inyiang'u endukuny o laitobirani loo nkulupuok, niya embata oo lpayiani loo ltung'ana o embata oo lapolosak kituaak, nimpang alo oyarata lo layioni le Hinom tenejing'ieki enkishomi e Poshed, nimbalunye teine lelo rorei laaliki nanu. Nijo iyie, ‘Entoning ororei lo Laitoriani, intae ilaiguanak le Yuda oloomanya Yerusalem. Nji ejo Olaitoriani loo lororani, Enkai e Israel, ng'ura kayau nanu entorroni shumata ene wueji ometaa ore nkiyiaa e pooki ng'ae oning ena neng'eyu. Enkaraki naatung'uaitie nanu iltung'ana, neisarkione ninche ene wueji etapejokito enkorropil tiatua ine kulie aitin neitu eyiolou ninche arashu iloomenye arashu ilaiguanak le Yuda; o enkaraki naiputa ninche ene wueji osarge le lelo lemeeta ntiot, netesheta iwuejitin neeika e Baal pee epejie ilayiok lenye te nkima anaa ilasarri oopejori te Baal, lelo leitu nanu aitanapisho aashu alimu, neitu ejing atua endamunoto ai, ng'ura, kepuonu nkolong'i, Olaitoriani ojo, nemeitokini aajo ene wueji Tofet, aashu oyarata lo layioni le Hinom, kake oyarata le sesekuanare o lalem. Naa ore tiatua ene wueji kainyal nanu nkitobirat e Yuda o Yerusalem, naisho ene metabatatayu to lalem te dukuya ilmang'ati lenye, o te nkaina e lelo ooing'oru enkishui enye kaisho nanu mpopoki enye metaa endaa oo motonyi oloing'ang'e o ng'uesi enkop. Naitaa nanu ena anasa entoki naitureisho, entoki naing'asiakinoi; ore pooki ng'ae ogiroo ninye neiputukuny neing'asia tenkaraki enkidaaroto enye pooki. Naisho nanu meinosa ninche nkiri oo layiok lenye o noo ntoyie enye, nenya pooki ng'ae nkiri e ilo lelatia enye emanitae ninche o to sina, opik ninche ilmang'ati lenye, o lelo ooing'oru enkishui enye neisomit ninche.’ “Nibel iyie ina dukuny te dukuya lelo tung'ana oopuo tenebo iyie! Nijoki iyie ninche, ‘Nji ejo Olaitoriani loo lororani: Neaku kadanyidany nanu kulo tung'ana o ena anasa anaa enadany oltung'ani entoki oo nkulupuok, o metaa meigili ae kata aaram. Nenukaa iltung'ana ninye te Tofet amu meitokini aata ewueji nenukarieki. Nji nanu aitaas ene wueji, Olaitoriani ojo, o lelo oomanya, aitotiu ena anasa anaa Tofet. Ore nkajijik e Yerusalem o nkajijik oo laiguanak le Yuda nena ajijik pooki naatapejorieki enkorropil inchumat enye tenkaraki olorora pooki le shumata neibukorieki ilasarri ooki tenkaraki nkulie aitin naa keisarkionieki anaa ewueji e Tofet.’ ” Neitoki Yeremia alotu eing'uaa Tofet, ine apa neirriwayie Olaitoriani ninye meshomo aibonisho, neitashe ninye to lgoriet le nkaji e Nkai, nejoki ninye iltung'ana pooki: “Nji ejo Olaitoriani loo lororani, Enkai e Israel, ng'ura kayaki nanu shumata ena anasa o shumata nkang'itie enyena ina torroni, pooki natejo kaitaas ninye, enkaraki naitagolo ninche lukuny enye, eany ening irorei laainei.” Nening apa Pashur olapolosani, olayioni le Imer, laa ninye apa olkitok tiatua enkaji Olaitoriani, Yeremia eibonisho te kuna baa. Near Pashur Yeremia, oloiboni le Nkai, neeniki ninye lelo pisia apa ootii shumata kishomi e Benchamen te nkaji o Laitoriani. Ore taisere, ina kata elaku Pashur Yeremia aitayu too lpisia, nejoki Yeremia ninye, “Mikintoki iyie Olaitoriani ajo enkarna ino Pashur, kake enkuretisho te pooki shoto. Amu nji ejo Olaitoriani: Ng'ura, kaaitaa nanu enkuretisho te kewan ino o too lchoreta linono pooki. Kebatata ninche to lalem loo lmang'ati lenye ing'orita iyie. Naa kaishooyo Yuda pooki apik atua enkaina o laiguanani le Babilon; neya ninye ninche eyararoto te Babilon near ninche to lalem. Ore sii, kaishooyo nanu karsisisho pooki ena anasa, dupoto enye pooki, nena masaa enyena pooki naagol enkinyang'a, o nena masaa pooki naashuma o laiguanak le Yuda apik atua nkaik oo lmang'ati lenye, pee eya ninche pooki nenap aaya Babilon. Ore iyie, Pashur, o lelo pooki ootoni tiatua enkaji ino nipuopuo eyararoto; Babilon intae ipuopuo; naa teine ipuopuo aaye, naa teine kipuoi aanukaa, iyie o lchoreta linono pooki, apa limbonoko te lejare.” Iyie, Olaitoriani, kiteleja iyie nanu; nateleje nanu; igol iyie alang nanu, isula iyie. Ataa nanu entoki nakueniyieki endama pooki; naamor nanu pooki ng'ae. Amu ore ake anaa enairo nanu, naishir, nabuaku ajo, “Olarrabal o enkidaaroto!” Amu etotiwuo ororei lo laitoriani te nanu anaa emoroto o enkitang'oroto! Endama pooki. Tenajo nanu, “Maitoki aimaki ninye, arashu aigil airo te nkarna enye.” Nejing atua oltau lai anaa enatiu enkima nayupuyup naikenoro tiatua iloik laainei, nanaure nanu ajo aibookino, nemaidim nanu. Amu aning'ito nanu ing'omakinot kumok. Etii enkuretisho pooki shoto! “Intang'oro ninye! Maitang'oro iyiook ninye!” Tejo ore ilchoreta laainei latamoore, neanyita embatatata ai. “Ekeidimi aatelej ninye, nikisulie iyiook ninye, nikintalaku iyiook elap te ninye.” Kake etii Olaitoriani tenebo nanu anaa olmurrani opi, neaku keikirikira lelo laaisilisil nanu, maaidimu ninche nanu. Keitukurruni ninche oleng, amu medupayu ninche, ore ina nemeyanyitisho ninche nemerikinishoi ae kata. Olaitoriani loo lororani, laa iyie otem olasipani kaing'ae odol oltau o ndamunot, nchooki nanu matoduaa elap ino te shumata ninche, amu iyie nanu atipika mbaa aainei. Entaranyaki Olaitoriani; esisa Olaitoriani! Amu eitajewuo enkishui eilo omena, aitung'uaa nkaik oo laasak loo ntorrok. Metedeki ina olong apa naatoiwuoki! Ina olong apa naatoiwuo yieyio nanu. Nchoo metaa memayiana! Metedeki ilo tung'ani, apa oyaka papaai lai ilomon ajoki, “Kitoikioki olayioni” aitiship ninye oleng. Nchoo ilo tung'ani metotiwuo anaa nkanas naaibelekenya Olaitoriani metii olng'ur; nchoo ninye ening olkiyioi tadekenya oltoilo le batisho dama, amu eitu apa aar ninye nanu matua te nguset; neaku anaata apa etaa yieyioo enkurare ai, nebik enguset aa kitok intarasi. Kainyoo apa pee atupukuo te nguset alotu adol enyamali o sina, naton nkolong'i aainei te nkurruna? Ele rorei oewuo enetii Yeremia eing'uaa Olaitoriani, ina kata apa pee eirriwaki ninye olaiguanani Sedekia Pashur olayioni le Malkia o Sefania olapolosani, Maasia, ejo, “Inkilikuanishore Olaitoriani tialo iyiook, amu eitobirita Nebukadresa olaiguanani le Babilon olarrabal pee earare iyiook; eidim Olaitoriani aitaasa iyiook te risioroto oo nkiaasin enyena e nking'asia, neisho ninye metorrinyoyu aing'uaa iyiook.” Neitoki Yeremia ajoki ninche: “Nji intae entiaaki Sedekia, ‘Nji ejo Olaitoriani, Enkai e Israel: Ng'ura, Kashuku nanu nena masaa o larrabal naatii atua nkaik inyi naa te ninche iararere olaiguanani le Babilon niaararere Ilkaldayo oomanita intae tioriong isunta; naa kayau nanu ninche tenebo atua empolos ena anasa. Nanu enkorrok ai oarare intae te nkaina naitoriori o enkaina nagol, te ngoro, o te mpushuna, o te ngoro kitok. Naa kaosh nanu lelo oomanya ena anasa, oltung'ani o eng'ues, keye ninche to lmeitai kitok nepi. Ore te siadi, Olaitoriani ojo, naisho nanu Sedekia olaiguanani le Yuda, o sinkan lenyena, o ltung'ana ootii ena anasa, ooleku lmeitai to olalem, o lameyu, naisho nanu metaarai enkaina e Nebukadresa olaiguanani le Babilon o te nkaina oo lmang'ati lenye, atua enkaina e lelo ooing'oru enkishui enye. Keosh ninyeninche te nepi o lalem, meing'urrie ninye ninche, aashu epal ninche, aashu eeta olng'ur.’ “Ore tialo kulo tung'ana tiaaki iyie: ‘Nji ejo Olaitoriani: Ng'ura, Kapik nanu dukuya iyie enkoitoi enkishui o enkoitoi e keeya. Ore ilo oton tiatua ena anasa neye to lalem, o to lameyu, o to lmeitai; kake ore ilo oipang alo neisho kewan lelo kaldayo oo manita intae nepok netiu enkishui enye anaa enkishoroto olarrabal. Amu eitu nanu aarare ena anasa aarare te ntorroni neme te sidai, Olaitoriani ojo; keishoori ninye aapik atua enkaina olaiguanani le Babilon, naa kepejoo ninye te nkima.’ “Ore tialo enkaji o laiguanani le Yuda tejo, ‘Entoning ororei lo Laitoriani, na aji e Daudi! Nji ejo Olaitoriani: Tudung'o enkiguana te sipata tadekenya, niyau aitung'uaa enkaina e ilo oitorogonyisho ilo oitorongonyaki mepuku ake engoro ai anaa enkima, neyupuyup nemeetae oltung'ani oidim atara, tenkaraki nkiaasin inyi torrok. Ng'ura, kaarare nanu intae, iloomanya oyarata, iyie nadapidapoi enkisiajata, Olaitoriani ojo; intae oojo, Kaing'ae oidim atadou ataarare iyiook, aashu kaing'ae oidim atijing'a emanyisho ang?’ Kaitame nanu intae te risioroto oo lng'anayio loo nkiaasin inyi, Olaitoriani ojo kainok nanu enkima tiatua entim enye, naa kemut ninye ina pooki namanita ninye.” Nji ejo Olaitoriani: “Tadoi shomo enkaji o laiguanani le Yuda, niro teine ele rorei, nijo, Toning'o ororei lo Laitoriani la aiguanani le Yuda, ilo otonita to lorika le nkitoo le Daudi; iyie o sinkan linono, o ltung'ana linono ooimu kuna shomito. Nji ejo Olaitoriani: Taasa esipata o esupatisho, intayu te nkaina e ilo oitorogonyisho ilo oitorogonyaki. Niminyalinyala aashu iariara olomoni, o lokishi, o enkoliai, aashu imbukoo osarge lemetii entioto tene wueji. Amu esipa tinimbung ele rorei, neimu ilgorieti lena aji ilaiguanak ootonie olorika le nkitoo le Daudi, ekedito ngarrin oo mbartan o mbartan, ninche o sinkan lenye, o ltung'ana lenye. Kake tinimining kulo rorei, ainosa olmumai te kewan ai, Olaitoriani ojo, nchere ore ena aji naa keaku mijooni. “Amu nji ejo Olaitoriani tialo enkaji o laiguanani le Yuda: Ira iyie sidai anaa Gilead te nanu, itiu iyie anaa endukuya e oldoinyo le Lebanon kake esipa kaaitaa nanu iyie olpurkel o enkanasa neme manya. Kairriu nanu ilainyalak likiarare iyie, oltung'ani ake o masaa enyena o larrabal naa kedung ninche iltarakua inono gelunot nenang'aki ninche atua enkima. “Naa kegiroo iloreren kumok ena anasa, nejoki ake pooki ng'ae olelatia enye, Kainyoo pee etaasa Olaitoriani ena tena anasa kitok?” Naa kewaliki ninche aajo, “Enkaraki natung'uaitie ninche osotua lo Laitoriani Enkai enye, neserem kulie aitin neisiaai ninche.” Minchirakiki ninye ilo otua aashu isinanuo tenkaraki ninye kake nchirakiki te mion ilo olo, amu meitoki ninye ashukunye adol enkop enye. Amu nji ejo Olaitoriani tialo Shalom olayioni le Yosia, olaiguanani le Yuda, laa ninye oitoreisho te rishata e Yosia papaai lenye. Naa ninye oshomo aing'uaa ewueji enye: “Meitoki aekata ninye ashukunye ene, kake tiatua ine wueji netanapaki ninye aaya eyararoto, teine eye ninye, nemeitoki ae kata ninye aigil adol ena kop.” “Woi ninye ilo oshet enkaji enye te ntorroni, o nkajijik enyena e shumata te lejare ilo oisho olelatia enye meisiaayia ninye te mpesho, nemeisho ninye olmushaara lenye; ilo ojo, ‘Kashetaki nanu kewan enkaji sapuk tenebo inkajijik e shumata naalala’ naguetaki ilusien ninye neikod ninye too ltarakua, nael toranki onyokie. Ijo iyie ira olaiguanani enkaraki nishet inkajijik oo ltarakua? Keitu apa edaa papaai lino neokisho neas esipata o esupatisho? Neaku etaa sidai te ninye. Eiguanare ninye mbaa olaisinani ono lomena; neaku sidai. Aime nanu eyiolo tena? Olaitoriani ojo. Kake iata iyie inkonyek o oltau, tenkaraki ake, dupoto o e lejare o te nkibukoroto o sarge lemeeta entioto, o easata enkitorogonyare o larrabal.” Neaku nji ejo Olaitoriani tialo Yehoiakim olayioni le Yosia, olaiguanani le Yuda: “Meishiraki ninche ninye ejo, oi olalashe lai! Aashu ejo oi enkanashe ai! Meishiraki ninche ninye ejo, oi olkitok, anaa ejo oi oloyanyiti! Kenukari ninye anaa osikiria, eing'irtitori nenang'ari aaitogiroo nchomito e Yerusalem.” “Ilepa shomo Lebanon, niyietu aishir, ailepunye oltoilo lino tiatua Bashan; nchira te Abarim, amu ore lelo sanchan linono pooki neidaikieki. Aairorie nanu iyie tiatua karsisisho ino, kake itejo iyie, ‘Mainining nanu.’ Ena apa nataa enkoitoi ino ebaiki lelero ino, nchere eitu iyie ining oltoilo lai. Keirrita olkutati ilchekuti linono pooki, ore isanchan linono pooki nepuo eyararoto; nitum taa atukurru nindang te nkaraki entorroni ino pooki. Iyie olomanya Lebanon oton tiatua iltarakua kebaa sii iyie enkigoroto tenelotu emion shumata iyie, emion naikununo anaa ene nkitok nasaisai!” “Ore anaa enaishu Olaitoriani ojo, hoo naa ore Konia olayioni le Yehoiakim olaiguanani le Yuda, naa olgisoi omishirakino enkarna ai te nkaina ai e tatene, ore ake eyia, aidim nanu atopolosai naaishooyo iyie apik atua enkaina e lelo ooing'oru enkishui ino, lelo liure iyie naapik atua enkaina e Nebukadresa olaiguanani le Babilon o atua nkaik oo Lkaldayo. Kaanang'aa nanu iyie o ina ng'utunyi nikitoiwuo iyie anang'aki atua ae kop, ine neitu apa kiinieki, naa teine ilo iyie aye. Kake ore ina kop nang'uar ninche pee eshukokino, meshukokino ninche.” Amaa ele tung'ani oji Konia kemoti natemenayioki natadanye, entoki nemeshilaa hoo ng'ae? Kainyoo paa ore ninye o nkera enyena netanang'ayioki aaiturraa tiatua enkop nemeyiolo ninche? Iyie na kop, na kop, na kop, toning'o ororei lo Laitoriani. Nji ejo Olaitoriani: “Ngero ele tung'ani ajo meeta nkera, ele tung'ani lemedupoyu too nkolong'i enyena; amu meetae hoo obo tiatua eishoi enye odupoyu atonie olorika le nkitoo le Daudi, neitoki aitoreisho te Yuda.” “Oi kulo shekuti ooidaikie neidapash ntare enkirrita ai?” Olaitoriani ojo. Neaku nji ejo Olaitoriani, Enkai e Israel, tialo lelo shekuti ooing'or iltung'ana laainei: “Indapasha intae eluaata ai, nitaaraitie ninche meshomo, neitu intae ing'oring'oro ninche. Ng'ura, kaitame nanu intae te nkaraki nkiaasin inyi torrok, Olaitoriani ojo. Naitoki taa aiturrur olpisiai le luaata ai aitung'uaa nena kuapi apa naterewa ninche naa kepuo neponari. Naa kapik nanu ilchekuti shumata ninche laa ninche ooing'or ninche, nemeitoki aikata aaureisho, arashu aaiputukuny, nemeitoki hoo nabo aimin, Olaitoriani ojo. “Ng'ura, kepuonu nkolong'i, Olaitoriani ojo, pee atum ailepakinye Daudi olng'osila le supatisho, naa keitoreisho anaa olaiguanani neasisho te ng'eno, nedung enkiguana te sipata o te supatisho te nkop. Ore tiatua nkolong'i enyena neitajeuni Yuda, nebik Israel te seriani. Naa ena enkarna naa ninye eipotieki ninye, ‘Olaitoriani esupatisho ang.’ “Neaku, ng'ura kepounu nkolong'i, Olaitoriani ojo, nemeitoki iltung'ana aajo, ‘Anaa enaishu Olaitoriani oitayio iltung'ana le Israel ailepunye te nkop e Misiri,’ kake, ‘Anaa enaishu Olaitoriani oitayio nerikoo eishoi e nkaji e Israel aitung'uaa enkop e moikuape oatua nkuapi apa naaterewa ninye ninche.’ Netum taa aatobik tiatua enkop enye maate.” Ore tiatua iloibonok: Aatigile oltau lai tiatua nanu, keikirikira iloik laainei pooki; atiu nanu anaa oltung'ani otemere, anaa oltung'ani oidimua enaisho, te nkaraki Olaitoriani o te nkaraki irorei lenyena sinyat. Amu ebore enkop iloololoito; ore te nkaraki oldeket neishir enkop, ore nkujit naanyori e ong'ata neitoi. Ore olkuaak lenye naa entorroni, ore engolon enye neme sidai. “Ore pokira oloiboni o lapolosani neme ilorrekie le Nkai; ore ninye tiatua enkaji ai nanoto entorroni enye, Olaitoriani ojo. Neaku ketiu enkoitoi enye te ninche anaa enkoitoi naideket te naimin, atua ninye emirakini ninche nebatata amu kayau nanu entorroni shumata ninche tiatua ilo ari le nkitamioto enye, Olaitoriani ojo. Ore tiatua iloibonok le Samaria atoduaa nanu entoki e modai eibonishote ninche te Baal nerik iltung'ana laainei Israeli aaitapong'oo. Kake ore tiatua iloibonok le Yerusalem atoduaa nanu entoki suuji: eas ninche eloloito nepuo te lejare; eitagol ninche inkaik oo laasak loo ntorrok, metaa meetae hoo obo oibelekenya aing'uaa nkiaasin enyena torrok; etotiutuo ninche pooki anaa Sodom te nanu, neikununo anaa lelo oomanya Gomora.” Neaku nji ejo Olaitoriani loo lororani tialo iloibonok: “Ng'ura kaitoti nanu ninche te sayiet, naisho ninche enkare natipikaki esayiet metooko; amu iloibonok le Yerusalem etupukunye orrekie leme ole Nkai alo enkop pooki.” Nji ejo Olaitoriani loo lororani: “Mining iyie, irorei leilo oiboni likimbonoki iyie nikimput iyie inkisilagat e pesho; eiro ninche induaat oo ndamunot enye, mme naaing'uaa enkutuk o Laitoriani. Ejoki ninche anaake lelo lemeshilaa ororei lo laitoriani, ‘Ekesidanu te intae’ nejoki pooki ng'ae ogolung'u osuj oltau lenye ake, ‘Metii entorroni nalotu shumata iyie.’ ” Amu kaing'ae tiatua ninche oitasho tiatua enkiguana o Laitoriani pee emusu nening ororei lenye aashu aing'ae oibung'a ororei lenye neinining? Ng'ura, osiwuo lo Laitoriani! Eipang'ua engoro napi enye o lkutati ogol kedanyakino ninye elukunya e ilo torrono. Meshuko engoro o Laitoriani ometaba anaa nedung ninye enkiguana neitabaya iyieunot endamunoto enye. Ore too nkolong'i e siadi naa iyiolou iyie aibalie. “Eitu nanu airriwaa iloibonok, kake ekueta ninche, eitu nanu airorie ninche, kake eibonishote ninche. Kake tenaa naaji keitasheito ninche te nkiguana ai, anaata etolimutuo irorei laainei too ltung'ana laainei, naa anaata aibelekenya ninche metung'uai nkoitoi enye torrok, o entorroni oo nkiaasin enye. “Ara nanu Enkai nataana, Olaitoriani ojo, neme Enkai nalakua? Keidim oltung'ani aisudoi kewan too wuejitin oo nkisudorot pee madol nanu ninye? Olaitoriani ojo. Eimaborei nanu shumata o enkop? Olaitoriani ojo. Atoning'o nanu enatejo lelo oibonok ooibonisho te lejare te nkarna ai, ejo, ‘Aidetideta nanu, aidetideta nanu!’ Keaku kenya elejare o nanu tiatua oltau le lelo oibonok ooibonu elejare oltau lenye maate, lelo oojo maishoo iltung'ana laainei erikino enkarna ai te nena kidetidetat enye naa ninche ejokino maate, anaa apa enatorikine loo menye enkarna ai tenkaraki Baal? Nchoo ilo oiboni oata enkidetidet elimu enkidetidet, kake nchoo ilo oata ororei lai elimu ororei lai te sipata. Kainyoo ebaikino mbenek o enkano? Olaitoriani ojo. Aimetiu ororei lai anaa enkima, Olaitoriani ojo, netiu anaa enyuntu nabelibel endapidapoi? Neaku, ng'ura, kagilunore nanu iloibonok, Olaitoriani ojo, lelo oopurro to rorei laainei te ninche maate. Ng'ura kaarare nanu lelo oibonok, Olaitoriani ojo, oasishore ilng'ejepa lenye nejo, ‘Olaitoriani ojo.’ Kaarare nanu lelo ooibonu enkidetidetat e lejare, Olaitoriani ojo, laa ninche oojoki ninche nerikoo iltung'ana laainei aaitapong'oo te lejare enye o te nkitokoos enye, eitu nanu airriwaa ninche aashu aitanap ninche; metaa meret ninche ele orere katukul, olaitoriani ojo.” “Tinikinkilikuan iyie oltung'ani obo te kulo aashu oloiboni, aashu olapolosani, ajoki, ‘Kainyoo olola lo Laitoriani?’ Tiaaki iyie ninche, ‘Ntae ilo ola, naa kanang'aa intae aiturraa, Olaitoriani ojo.’ Naa ore tialo oloiboni, olapolosani aashu obo loo ltung'ana ojo, ‘Olola lo Laitoriani’ naitame nanu ilo tung'ani o enkaji enye. Nji iyie tejo, ore pooki ng'ae to lelatia enye o pooki ng'ae to lalashe lenye, ‘Kainyoo etawalua olaitoriani ajo?’ aashu ‘Kainyoo eiroro Olaitoriani?’ Kake ore ‘Olola lo Laitoriani’ mingil aekata aimaki, amu ore ilo ola naa ororei le pooki ng'ae makewan, nimbelekenyenye irorei le Nkai naishu, Olaitoriani loo lororani, Enkai ang. Neaku tiaaki iyie oloiboni, ‘Kainyoo kitawalikia Olaitoriani ajoki?’ Aashu ‘Kainyoo eiroro Olaitoriani?’ Kake te nijo iyie, ‘Olola lo Laitoriani’ nji ejo Olaitoriani, Ore enkaraki nitejo kulo rorei, Olola lo Laitoriani, ina kata apa pee aairriwaki iyie olkilikuai, ajoito, Mijo ake, ‘Olola lo Laitoriani.’ Metaa, ng'ura, edede kaadumu nanu iyie aing'atie enkop naanang'aa aitung'uaa enaatii nanu, iyie o ina anasa apa naaishoo nanu iyie o loo papaai lino. Naa kayau nanu shumata iyie esulare oo ntarasi o enkurruna e anaake, ina nemerikinishoi ae kata.” Ore pee eidip Nebukadresa olaiguanani le Babilon ataarai aitung'uaa Yerusalem Yekonia olayioni le Yehoiakin, olaiguanani le Yuda, tenebo ilkituaak le Yuda, o lelo arriyiak o lkunono, neyau ninche Babilon, naaitodol nanu Olaitoriani ena duaata: ng'ura nkikapuni are naabore ilng'abolo eirragieki te dukuya enkaji o Laitoriani. Ore enkikapu nabo neeta ilng'abolo sidain oleng, laa ninche ooitera aaku, kake ore enkae kikapu neeta ilng'abolo torrok oleng lemeinosayu. Naajoki nanu Olaitoriani, “Kainyoo iyie idolita, Yeremia?” Najo nanu ilng'abolo, “Ilng'abolo, sidain sidain oleng, o lng'abalo torrok torrok oleng, torrok, oleng lemeinosayu.” Neitoki ororei lo Laitoriani alotu enatii nanu ejo: “Nji ejo Olaitoriani, Enkai e Israel: Anaa enatiu kulo ng'abolo sidain neijia adol aa sidain lelo yararot ooing'uaa Yuda, apa lairriwayie nanu meshomo aaing'uaa ene wueji aapuo enkop oo Lkaldayo. Kapik nanu nkonyek aainei shumata ninche te sidai, naa kayau nanu ninche arrinyu meetu ena kop. Kashetu nanu ninche, nemadung'udung'oki ninche enkop; kaun nanu ninche, nemadotu ninche. Kaisho nanu ninche oltau oyiolounye ninche nchere ara nanu Olaitoriani; naa keaku ninche iltung'ana laainei naaku nanu Enkai enye, amu kaashukokino ninche nanu to ltau lenye pooki. “Kake nji ejo Olaitoriani: Ore anaa lelo ng'abolo torrok oleng lemeinosayu neijia nanu aiko Sedekia olaiguanani le le Yuda, o ilkituaak lenyena, ilo pisiai le Yerusalem otelekua tiatua ena kop, o lelo ootonita tiatua enkop e Misiri. Kaitaa nanu ninche olkirutoto too nkitoriat pooki e nkop neaku enkurruna, enaileti o enkitakuenisho, o oldeket tiatua iwuejitin pooki nareu nanu ninche. Naa kairriwaa nanu olalem, o lameyu o lmeitai shumata ninche, o metaba anaa neidaikieki tukul teina kop apa naishoo nanu ninche o loo menye.” Eewuo ele rorei enetii Yeremia oipirta iltung'ana pooki le Yuda, tiatua olari liong'uan le Yehoiakim olayioni le Yosia, olaiguanani le Yuda (ilo apa olari le dukuya le Nebukadnesa olaiguanani le Babilon), laa ninye etolikio Yeremia oloiboni le Nkai iltung'ana pooki le Yuda o lelo pooki oomanya Yerusalem: “Too larin tikitam oo kuni, ebaiki olari le tomon ookuni le Yosia olayioni le Amon, olaiguanani le Yuda, ometabaiki ena olong, eewuo ororei lo Laitoriani enatii nanu, nairorie nanu intae akurraki, kake eitu intae ining'ining'i. Eitu ninye ining'ining'i neitu irugugu nkiyiaa inyi aaning, hoo neirriwaka intae Olaitoriani akurraki sinkan lenyena iloibonok, ejo ‘Embelekenyata taata, pooki ng'ae te intae, aing'uaa enkoitoi enye torrono o nkiaasin torrok, nibikibiki ti oriong ina kop apa naishoo Olaitoriani intae ebaiki apa o ntarasi; emipuo aasujaa kulie aitin aaisiaai niserememe ninche, aashu kintagorigoro nanu te siaai oo nkaik inyi. Nemaitaas nanu intae entorrono.’ Kake ore eyia eitu intae kining'ining'i nanu, Olaitoriani ojo, pee kitumutumu intae aaitagoro nanu teina siaai oo nkaik inyi naar intae. “Neaku nji ejo Olaitoriani loo lororani: Ore enkaraki neitu ining'ining'i irorei laainei, ng'ura, kairriu nanu lelo oshon pooki le moikuape, Olaitoriani ojo, o Nebukadnesa olaiguanani le Babilon, osinka lai, naa kayau nanu ninche metaarare ena kop o lelo oomanya, o lelo oreren pookioomanita, kaidaikie nanu ninche katukul, naitaa ninche olkirutoto, o enkiputukuny, o enkurruna oo ntarasi. Ore ake sii, kaiwuang'ie te ninche oltoilo le nkuenia o ltoilo le ng'ida, oltoilo lo loyamisho o ltoilo le nayami, enkiyutuyutore oo soito oo yutuyutishoreki o ewang'an o ltaa. Ore ena kop pooki keaku emutata o enkidaata, naa keisiaai kuna kuapi olaiguanani le Babilon ilarin ntomoni naapishana. Ore pee elusoo ilarin ntomon naapishana, naitame nanu olaiguanani le Babilon o ina kop oo Kaldayo, tenkaraki entorroni enye, Olaitoriani ojo, aitaa ina kop mitil intarasi. Kayau nanu shumata ina kop lelo rorei laainei pooki apa latejo nanu tialo ninche pooki toki naigero tiatua ena buku apa naibonoko Yeremia oloiboni le Nkai nkuapi pooki. Amu ore doi ninye nkuapi kumok o laiguanank kituaak naa keitayu rrindiki te ninche; naa kalaaki nanu ninche te risioroto oo nkiaasin enye o siaatin oo nkaik enye.” Nji ejo Olaitoriani, Enkai e Israel: “Aatiaka ninye nanu, Iwa iyie te nkaina ai ena kikompe e naisho e ngoro, nincho nena kuapi pooki naairriwaki iyie metooko. Keok ninche nemera nerruoyo lukuny tenkaraki ilo alem lairriwaki nanu atua ninche.” Naya nanu ina kikompe te nkaina o Laitoriani, naisho nanu lelo oreren pooki laairriwaka Olaitoriani metooko: Yerusalem o nkanas e Yuda, ilaiguanak lenyena o lkituaak lenyena, pee eitaa ninche olmuaate o neitaa mitil o enkiputukuny o ldeket, anaa enatiu ena olong; Farao olaiguanani le Misiri, o isinkan lenyena, o lkituaak lenyena, o ltung'ana lenyena pooki, o lelo pooki omon ootii atua ninche; laiguanak pooki le nkop e Usi o laiguanak pooki le nkop e Filisti (Ashkelon, o Gasa, o Ekron o ilo pisiai le Ashdod), Edom, o Moab o layiok le Amon; o ilaiguanak pooki le Turo, o laiguanak pooki le Sidon, o laiguanak lo lomanaa le naiposha; o Dedan, Tema, o Busi, o pooki oo dung ilpijat loo lpapit lenye; o ilaiguanak pooki le Arabia o laiguanak pooki loo loshon ooshula oomanya olpurkel; o ilaiguanak pooki le Simri, ilaiguanak pooki le Elam, o ilaiguanak pooki le Amedi; ilaiguanak pooki le moikuape oolakua o lootaana, obo te siadi o likae, o nena kitoriat pooki enkop naatii oriong enkop. Naa ore te siadi ninche neok olaiguanani le Babilon. “Nintoki iyie ajoki ninche, ‘Nji ejo Olaitoriani loo lororani, Enkai e Israel: Tooko, temerayu nilopisho, tabatatayu niming'il ae kata adumunye, tenkaraki ilo alem lairriu nanu atua intae.’ “Naa teneany ninche eng'amu ina kikompe te nkaina ino aaok, nijoki iyie ninche, ‘Nji ejo Olaitoriani, loo lororani: Meeta nchere pee miokioko! Amu ng'ura, kaiteru nanu aas entorroni too nkanas naaipotieki enkarna ai, naa eilo iyie mintamio? Milo iyie mintamio, amu aipotoko nanu olalem lelo pooki oomanya enkop, Olaitoriani loo lororani ojo.’ “Ore naa iyie, shomo imbonisho tigilunore ninche te kulo rorei pooki, nijoki ninche, ‘Keikurrukur Olaitoriani te shumata, tiatua ina manyisho sinyati neitayu oltoilo lenye; keikurrukur ninye te ngolon aarare iltung'ana lenyena, nebuaku, anaa iltung'ana ooitunyoo isabibu, tenkaraki lelo pooki oomanya enkop. Elo enkorui e nkikurrukur ineeiting'ie enkop. Amu kegilunore Olaitoriani nkuapi; kejing ninye atua enkiguana tenebo pooki tung'ani ore ilo torrono nepik ninye enetii ilo alem, Olaitoriani ojo.’ Nji ejo Olaitoriani loo lororani: ng'ura, kelotu entorroni aipang'u to lorere o to lorere, neyuko osiuo sapuk oing'uaa imatuan naalakua e nkop. “Ore lelo ootara Olaitoriani teina olong neponari ebaiki enkiting'oto nabo enkop ometabaiki enkae. Meishirakini ninche, aashu eiturrurrokinoi, aashu enukari; keaku ninche emodiei ti oriong enkop. Enteyietu, intae ilairritak loo ntare, ninchirishiri, nimperiperara too nkurruon intae ilaitoriak loo ntare, amu ore nkolong'i eyiang'are inyi o sina linyi neetuo, naa ibatatata intae anaa ilmeregeshi gelunot. Meetae esarunoto naitokini aata too luaat oo ntare, aashu eneisudoriyie ilaitoriak loo ntare. Entoning, olkiyioi loo lairritak, o eyiolounoto oo laitoriak lo lturrur! Amu einyalita Olaitoriani eneirritishoreki enye, ore ilo turrur le seriani neitigiraki tenkaraki ina goro napi o Laitoriani. Etung'uayie ninye orrumat linyi anaa olng'atuny, amu etaa enkop enye mitil tenkaraki ilo alem leilo oitorogonyisho, o tenkaraki engoro enye napi.” Ore te nkiterunoto e nkitoria e Yohoiakim olayioni le Yosia, olaiguanani le Yuda, ele rorei oewuo eing'uaa Olaitoriani ejo: “Nji ejo Olaitoriani: Ntasho to lgoriet le nkaji o Laitoriani nirorie nena anas pooki e Yuda naapuonu aaserem tiatua enkaji o Laitoriani kulo rorei pooki laaitanap nanu iyie tiaaki ninche; mimbooyo ake ororei, eidimayu nening ninche; neibelekenya pooki ng'ae aing'uaa enkoitoi enye torrono, pee atum nanu aibelekenyayu teina torroni apa natonyorra ajo kaitaas ninche tenkaraki nkiaasin enye torrok. Tiaaki iyie ninche, ‘Nji ejo Olaitoriani: Tinimikining'ning'i intae nanu, pee ipuopuo te nkitanapata ai nairragie nanu te dukuya intae, nining'ining'i irorei loo sinkan laainei lelo oibonok le Nkai lairriwaka nanu intae te siokinoto, hoo neitu intae ining'ining'i, naitotiu nanu ena aji anaa Shilo, naa kaitaa sii ena anasa oldeket too loreren pooki le nkop.’ ” Etoning'o ilapolosak o loibonok o ltung'ana pooki Yeremia eirorita kulo rorei tiatua enkaji o Laitoriani. Ore ake pee eidip Yeremia airoro ina pooki naitanapa Olaitoriani ninye pee eirorie iltung'ana pooki, neibung ilapolosak ninye, o loibonok, iltung'ana pooki ejoito, ejo, “Iye iyie! Kainyoo iyie pee imbonishe te nkarna o Laitoriani, ijo, ‘Keyooki ena aji atiu anaa Shilo ore ena anasa neaku olmuaate memanya toki’?” Ore iltung'ana pooki neiturrurrokino Yeremia tiatua enkaji o Laitoriani. Ore pee ening ilkituaak le Yuda kuna baa, nepuonu te nkaji o laiguanani enkaji o Laitoriani netonie olorika lenye tenejing'ieki kishomi ng'ejuk eina aji o Laitoriani. Nejoki ilapolosak o loibonok lelo kituaak o lelo tung'ana pooki, “Eishaakino ele endung'okinoto e nkiguana e keeya, enkaraki naibonoko te ntorroni ena anasa, anaa enitoning'o too nkiyiaa inyi.” Neitoki Yeremia airorie lelo kituaak pooki o ltung'ana pooki ejo, “Olaitoriani, laairriwua maibonoki entorroni ena aji o ena anasa lelo rorei pooki litoning'o. Ore naa taata entobira nkoitoi inyi o nkiaasin inyi, nining'ining'i oltoilo lo Laitoriani Enkai inyi, naa keirridu Olaitoriani te ina torrono natudung'ie enkiguana tialo intae. Kake ore nanu, ng'ura atii atua nkaik inyi. Entaasaki nanu anaa enidolidolo aa sidai neishiaakino te intae. Entayiolo ake duoo intae te nkitisipata nchere tenikiariara nanu matua, niyauu osarge lemeeta eleyiata shumata intae maate o shumata ena anasa o lelo oomanya, amu ore te sipata o Laitoriani laairriwua nanu enitii pee airo kulo rorei pooki ootii nkiyiaa inyi.” Nejoki lelo kituaak o ltung'ana pooki lelo apolosak o loibonok, “Meishiaakino ele tung'ani endung'okinoto e nkiguana e keeya, amu eirorie ninye iyiook te nkarna o Laitoriani Enkai ang.” Neinyototo embata oo lpayiani leina kop neirorie ina umata pooki oo ltung'ana ejo, “Ore apa Mika le Moreshet neibonishe too nkolong'i e Hesekia olaiguanani le Yuda, nejoki iltung'ana pooki le Yuda: ‘Nji ejo Olaitoriani loo lororani, keturi sion anaa enkurma neaku Yerusalem osototi loo suut ore enkaji e Nkai neaku entim oo lkeek.’ Ketaara ninye metua Sedekia olaiguanani le Yuda o Yuda pooki? Keitu ninye eureyu Olaitoriani nesayu esupatisho o Laitoriani, naa keitu ninye eirridu Olaitoriani te ina torroni apa natudung'oko ninche? Kake etaa iyiook enikijo pee kiyau entorroni shumata ate.” Etii sii likae tung'ani oibonishe te nkarna o Laitoriani, Uria olayioni le Shemia eing'uaa Kiriat-Yearim. Eibonuo entorroni tialo ena anasa o ena kop too rorei ooikununo anaa kuldo le Yeremia. Ore ake pee ening olaiguanani Yehoiakim, tenebo enjore enye pooki o lkituaak pooki, irorei lenyena, neing'oru olaiguanani ajo aar ninye metua; kake ore ake pee ening Uria ina, neureisho neisikalo aisudori te Misiri. Neirriwaa olaiguanani Yehoiakim kulikae tung'ana meshomo Misiri, Elnatan olayioni le Akbo o kulikae tenebo ninye, neyau ninche Uria aaitung'uaa Misiri neyaki ninye olaiguanani Yehoiakim, laa ninye otaara ninye to lalem nenang'aki empopok enye atua ewueji e nkurare oo ltung'ana pooki. Kake etii apa enkaina e Ahikam olayioni le Shafan tenebo Yeremia neaku eitu apa eishori iltung'ana metaara metua. Ore te nkiterunoto e nkitoria e Sedekia olayioni le Yosia olaiguanani le Yuda, ele rorei oewuo enetii Yeremia eing'uaa enetii Olaitoriani ejo. Nji aatiaka nanu Olaitoriani: “Ntobiraki kewan nkeenta o enchata oo lmong'i, nipik ninche emurt ino. Irriwaki olkilikuai olaiguanani le Edom, o laiguanani le Moab, o laiguanani le lelo ayiok le Amon, o laiguanani le Turo, o laiguanani le Sidon too nkaik elelo kiliku ooetuo Yerusalem enetii Sedekia olaiguanani le Yuda. Nchoo ninche ena kitanapata too lkituaak lenye: ‘Nji ejo Olaitoriani loo lororani, Enkai e Israel: ena intae ipupuo aajoki ilkituaak linyi: “Nanu ilo laa ore te ngolon ai sapuk o te nkaina ai naitoriori oitayio enkop, tenebo iltung'ana o ng'uesi naatii oriong enkop naa kaisho nanu ilo pooki ladol eishiaakino te nanu. Aishooyie taata nanu kuna kuapi pooki apik nkaik e Nebukadnesa, olaiguanani le Babilon, osinka lai, naishoo sii ninye ing'uesi e ong'ata meisiayia ninye. Keisiaai ninye iloreren pooki o layioni lenye o layioni lo layioni lenye ometaba anaa nelotu enkata enkop enye makewan; netum taa nkuapi kumok o laiguanak kituaak aaitaa ninye orrindik.” “ ‘Kake tenetii ake ninye enkop aashu enkitoria nemeisiaai Nebukadnesa ele aiguanani le Babilon, nepik emurt enye abori enchata olaiguanani le Babilon, naa kaitame nanu ina kop to lalem, o to lameyu o to lmeitai, Olaitoriani ojo, ometaba anaa namut nanu ninye te nkaina enye. Metaa emining iloibonok linyi, o ilaitumusumusok linyi, o ilaidetidetak linyi, o lalimunok linyi arashu ilasakutok linyi, lelo oojoki intae, Misiaayiayia olaiguanani le Babilon.’ Amu elejare ina naibonoki ninche intae, aa ore intae naa keyae enelakua aaitung'uaa enkop inyi, naa kaaraa nanu intae aipang'ie, naa eindaayaya. Kake ore ake pooki orere oyau emurt enye apik abori enchata olaiguanani le Babilon aisiaai ninye, napalaki ninche enkop enye, pee etur ninye nebik teine, Olaitoriani ojo.” Sedekia olaiguanani le Yuda airorie tena oitoi: “Eyautu imurto inyi abori olchata lo laiguanani le Babilon, nisiaayiayia ninye o ltung'ana lenyena pee ipokipoko. Kainyoo iyie o ltung'ana linono pee iyeye to lalem, o to lameyu o to lmeitai, anaa enairoro Olaitoriani tialo pooki orere lemeisiaai olaiguanani le Babilon? Emining ororei le lelo oibonok oojoki intae, ‘Misiayiayia olaiguanani le Babilon,’ amu elejare ina naibonoki ninche intae. Eitu nanu airriu ninche, Olaitoriani ojo, kake keibonisho ninche te lejare te nkarna ai, eji ejo kaaraa nanu intae naa eindaayaya, intae o loibonok o lelo oibonok ooibonoki intae.” Naitoki nanu airorie ilapolosak o ltung'ana pooki, ajoki, “Nji ejo Olaitoriani: Emining irorei le lelo oibonok ooibonoki intae, ejo, ‘Ng'ura, keshukuni nena masaa enkaji o Laitoriani aaitasieku aaitung'uaa Babilon,’ amu elejare ina naibonoki ninche intae. Emining intae ninche; esiaayia olaiguanani le Babilon pee ipokipoko. Kainyoo pee eitaae ena anasa olmuaate. Tenaa eloibonok ninche, naa tenaa ketii ororei lo Laitoriani tenebo ninche, nchoo naa ninche esaisho to Laitoriani loo lororani, paa ore nena masaa naatung'uayioki tiatua enkaji o Laitoriani, tiatua enkaji o laiguanani le Yuda, o tiatua Yerusalem nemepuo Babilon. Amu nji ejo Olaitoriani loo lororani tialo ng'apeta, o lmoti le nkare, o nkitasheyieta o kulie masaa pooki naatung'uayioki tiatua ena anasa, neitu eya Nebukadnesa olaiguanani le Babilon, ina kata apa pee eya te yararoto aitung'uaa Yerusalem aya Babilon Yekonia olayioni le Yehoiakim, olaiguanani le Yuda, o lkituaak pooki le Yuda o Yerusalem. Nji ejo Olaitoriani loo lororani, Enkai e Israel, tialo nena masaa naatung'uayioki tiatua enkaji o Laitoriani o tiatua enkaji o laiguanani le Yuda, o tiatua Yerusalem: kenapi ninche aaya Babilon netoni teine ometabau ina olong naing'or nanu ninche ashukoki ene wueji.” Ore ake teilo ari, te nkiterunoto e nkitoria e Sedekia olaiguanani le Yuda, to lapa le imiet lo lari liong'uan naairorie nanu Hanania olayioni le Asuri, ilo oiboni oing'uaa Gibeon, tiatua enkaji o Laitoriani, te dukuya ilapolosak o ltung'ana pooki, ejo, “Nji ejo Olaitoriani loo lororani, Enkai e Israel: Atigila nanu ina shata e murt o laiguanani le Babilon. Ore te rishata oo larin oare naa kashuku nanu ayau ene wueji nena masaa pooki e nkaji o Laitoriani, apa naatanapa Nebukadnesa olaiguanani le Babilon aitung'uaa ene wueji neya Babilon. Kayau sii ashuku ene wueji Yekonia olayioni le Yehoiakim, olaiguanani le Yuda, o lelo yararot pooki ooing'uaa Yuda apa ooshomo Babilon, Olaitoriani ojo, amu kagil nanu enchata e murt o laiguanani le Babilon.” Neitoki oloiboni le Nkai oji Yeremia airorie Hanania ilo oiboni te dukuya ilapolosak o ltung'ana pooki apa ooitashe tiatua enkaji o Laitoriani; nejo oloiboni le Nkai oji Yeremia, “Esai! Metaasa Olaitoriani neijia; meitobira Olaitoriani lelo rorei limbonuo iyie metisipata, neshuku ayau ene wueji aitung'uaa Babilon nena masaa e nkaji oLaitoriani, o lelo yararot pooki. Ore eyia toning'o taata ele rorei lairo nanu ining'ito iyie nening'ito iltung'aa pooki. Ore apa iloibonok ooiturukutuo te dukuya iyie o nanu ebaiki apa neibonutuo olarrabal, o lameyu o lmeitai tialo nkuapi kumok o nkitoriak kituaak. Ore oloiboni oibonu eseriani, ore ake pee ebaya ororei leilo oiboni, neyioulouni taa aajo esipa Olaitoriani oiriwua ilo oiboni.” Neya ilo oiboni oji Hanania nena keek naatii emurt e Yeremia ilo oiboni le Nkai, negil ninche, neiro Hanania te dukuya iltung'ana pooki, ejo, “Nji ejo Olaitoriani, kaiko nanu neijia agil enchata e murt e Nebukadnesa olaiguanani le Babilon aitayu te murt oo nkuapi pooki te rishata oo larin oare.” Kake eshomo Yeremia oloiboni le Nkai enkoitoi enye. Ore te nkiti rishata eidipa oloiboni Hanania atigila nkeek aitayu te murt e Yeremia ilo oiboni le Nkai, nelotu ororei lo Laitoriani enetii Yeremia ejo: “Shomo, tiaaki Hanania, nji ejo Olaitoriani: itigila iyie nkeek, kake akaitobir nanu te rishata enye isekenke. Amu nji ejo Olaitoriani loo lororani, Enkai e Israel: Atipika nanu shumata emurt e kuna kuapi pooki esekenkei e sinkaisho te Nebukadnesa olaiguanani le Babilon, naa keisiaai ninche ninye, amu aishoo nanu ninye ebaiki ing'uesi e ong'ata.” Nejoki Yeremia ilo oiboni le Nkai ilo oiboni oji Hanania, “Toning'o Hanania: eitu iyie kirriu Olaitoriani ninchoo iyie kulo tung'ana meisiliga elejare. Neaku nji ejo Olaitoriani: ‘Ng'ura, kaaiwuang'ie nanu iyie ti oriong e nkop. Ore tele ari ake niye iyie, enkaraki niroro inenkiser tialo Olaitoriani.’ ” Ore teilo ari ake, to lapa li opishana, neye oloiboni oji Hanania. Kulo ninche irorei leina palai nairriwayie ilo oiboni le Nkai oji Yeremia etii Yerusalem airriwaki lelo payiani apa le yararoto, o lapolosak, o loibonok, o ltung'ana pooki apa, ootarayie Nebukadnesa aitung'uaa Yerusalem nepuo Babilon. Ina kata apa eidipa olaiguanani Yekonia, o ng'otonye enkitok olaiguanani, o lelo sunaishi oogelema, o lkituaak le Yuda o Yerusalem, o lelo arriyiak tenguetare o lkunono, aatudumunye aatung'uai Yerusalem. Eirriwayioki apa ina palai te nkaina e Elesa olayioni le Shafan o Gemaria olayioni le Hilkia, laa ninche eirriwayie Sedekia olaiguanani le Yuda Babilon enetii Nebukadnesa olaiguanani le Babilon. Nejo apa ina palai, “Nji ejo Olaitoriani loo lororani, Enkai e Israel, te lelo pooki le yararoto apa natarayie nanu meshomo eyararoto aaing'uaa Yerusalem nepuo Babilon: Enteshet nkajijik nitonini tiatua ninche; entuun nkurman ninyanya enkisampuare enye. Eyamisho niiuu ilayiok o ntoyie; eyamaki ilayiok linyi, ninchosho ntoyie inyi meyami, pee etum aatoiu ilayiok o ntoyie; entoponari teine, nimiakuku kuti. Kake engoru olmabarishoi leina anasa apa naterewa intae te yararoto, niomonono Olaitoriani te rishata enye, tialo ninye amu ore tiatua olmabarishoi lenye nitumutumu intae olmabarishoi linyi. Amu nji ejo Olaitoriani loo lororani, Enkai e Israel: Emincho iloibonok linyi o laitumusumusok linyi otii atua intae elej intae, nimining'ining'i nena kidetidetat naidetidetu, amu ore ina naa elejare naibonoki ninche intae te nkarna ai, eitu nanu airriu ninche, Olaitoriani ojo. “Amu nji ejo Olaitoriani: Teneishunye ilarin ntomoni naapishana te Babilon, namutan nanu intae, naa kaitabaya nanu te intae enkisiligata ai narrinyu intae ayau ene wueji. Amu ayiolo nanu nkitobirat naata te intae, Olaitoriani ojo, nkitobirat olmabarishoi neme ine ntorroni, pee eisho intae osiligi too nkolong'i naapuonu. Naa eikimpotipoto intae nanu nikipoununu aaomon nanu, naa kaning nanu intae. Eiking'oruru intae nanu nikitumutumu; teniking'oruru to ltauja linyi pooki, nikitumutumu nanu, Olaitoriani ojo, naa kaitopok nanu intae naiturrur intae aitung'uaa iloshon pooki o wuejitin pooki apa naterewa intae, Olaitoriani ojo, narrinyu nanu intae ayau ine wueji apa naterewa intae enchom eyararoto. “Ore enkaraki nitejo intae, ‘Etudumaka iyiook Olaitoriani iloibonok tiatua Babilon,’ nji ejo Olaitoriani tialo ilo aiguanani otonita to lorika le nkitoo le Daudi, o tialo lelo tung'ana pooki oomanya atua ena anasa, lelo alashera linyi leitu apa eipang aapuo tenebo intae tiatuaeyararoto. ‘Nji ejo Olaitoriani loo lororani, ng'ura, kairriwaki nanu ninche olalem, o lameyu, o lmeitai, naa kaitotiu nanu ninche anaa ilng'abolo ootarruoitie lemeinosayu. Nasujaa nanu ninche to lalem, to lameyu o to lmeitai, naitaa ninche enkuretisho too nkitoriat pooki e nkop, pee eaku oldeket, o enkuretisho, o enkiputukuny o esulare tiatua iloreren pooki laterewa nanu ninche, amu eitu ninche ening ilomon laainei, Olaitoriani ojo, lelo laitirrishaka nanu airriwaki intae too sinkan laainei lelo oibonok, kake mining'ining'i intae, Olaitoriani ojo!’ Entoning ororei lo Laitoriani, intae pooki le yararoto apa laterewa nanu aitung'uaa Yerusalem nareu Babilon: Nji ejo Olaitoriani loo lororani, Enkai e Israel, tialo Ahab olayioni le Kalaya o Sedekia olayioni le Ma-asea, lelo ooibonu elejare te intae te nkarna ai: Ng'ura, kayau nanu ninche apik atuaenkaina e Nebukadnesa olaiguanani le Babilon, naa kear ninye ninche metuata te dukuya nkonyek inyi. Ore tenkaraki ninche ketumi aadekishore ele deket lelo pooki le yararoto ooing'uaa Yuda ootii atua Babilon: ‘Mikintotiwuo Olaitoriani anaa Sedekia o Ahab, ootapejo olaiguanani le Babilon te nkima.’ Ore enkaraki nataasa entaboi tiatua Israel, etololoitote too nkituaak oo lelatia enye, neiroro ninche, te nkarna ai irorei le lejare leitu nanu aitanap ninche. Nanu ilo oyiolo naa nanu olchakeni, Olaitoriani ojo.” Tiaaki Shemaia le Nehelam: “Nji ejo Olaitoriani loo lororani, Enkai e Israel: Irriwaka iyie mpala te nkarna ino iltung'ana pooki le Yerusalem, o Sefania olayioni le Maaseia ilo apolosani, o lapolosak pooki, ijo, Kintaa iyie Olaitoriani olapolosani te rishata e Yehoida ilo apolosani, pee intore enkaji o Laitoriani te pooki ng'ae oata oloirirua oibonisho, apik ninye olpisiai emurt. Kainyoo naa pee eitu isikong abuaaki Yeremia le Anatot likimbonoki iyie? Amu eirriwaka ninye iyiook olkilikuai te Babilon, ejo, Keadoru eyararoto inyi; enteshet nkajijik nimanyimanya, niununu nkurman ninyanya enkisampuare enye.” Eisuma Sefania olapolosani ena palai metoning'o Yeremia oloiboni le Nkai. Neitoki ororei lo Laitoriani alotu enetii Yeremia ejo: “Irriwaki olkilikuai lelo pooki le yararoto ijo, ‘Nji ejo Olaitoriani tialo Shemaya le Nehalam: Enkaraki naibonoko Shemaya intae eitu nanu airriwu ninye, neisho intae esiliga elejare, metaa nji ejo Olaitoriani: Ng'ura, kaitame nanu Shemaya le Nehelam o eishoi enye; metum ninye hoo ng'ae oishu tiatua kulo tung'ana oaku olenye odol ina sidai naitaas nanu iltung'ana laainei, Olaitoriani ojo, amu eiroro ninye enapaashari tialo Olaitoriani.’ ” Ororei oewuo enetii Yeremia eing'uaa Olaitoriani ejo: “Nji ejo Olaitoriani, Enkai e Israel: Ngero tiatua embuku lelo rorei pooki laatiaaka iyie. Amu ng'ura, kepounu nkolong'i Olaitoriani ojo, pee arrinyu aitopok iltung'ana laainei, Israel o Yuda, Olaitoriani ojo, nayau nanu ninche ashuku meetu enkop apa naishoo loo menye, naa keya ninche ninye.” Kulo rorei ninche eiroro Olaitoriani tialo Israel o Yudas: “Nji ejo Olaitoriani, kitoning'o iyiook enkishirata o enkirutoto enkuretisho, neme eseriani. Nkilikuanu taata pee idol, keidim olee anoto enutai enkerai? Kainyoo naa pee adol pooki lee etii nkaik enyena enkoshoke anaa enkitok nasaisai? Kainyoo pee eipusa pooki ng'ae? Kelotu enkolong torrono oleng; meetae ae olong naitanyaanyukieki enkata o sina too ltung'ana kumok kake kekorduni ninye aaitayu teine. “Naa kelotu ina olong, Olaitoriani loo lororani ojo, nchere kagil nanu enchata emurt aitung'uaa imurto enye nalak nanu ienat enye, nemeigil ae kata ilomon aaitaa ninche isinkan. Kake keisiaai ninche Olaitoriani Enkai enye o Daudi olaiguanani lenye laa ninye nanu aput tenkaraki ninche. Miureishoyu naa, iyie Yakobo osinka lai, Olaitoriani ojo, aashu ing'aing'ai iyie Israel, amu itayiolo ajo kaaitajeu nanu iyie aitung'uaa enelakua naitajeu eishoi ino aitung'uaa enkop enye eyararoto. Keshukunye Yakobo netum enkitirring'ata o enkiyeng'iyeng, nemeitoki hoo ng'ae aiture ninye. Amu atii nanu tenebo iyie pee aaitajeu iyie, Olaitoriani ojo: Kaiting'ie nanu iloshon pooki apa laidapashaka nanu intae, kake ore iyie maaiting'ie nanu iyie. Kaaitame nanu iyie te nkiririkinoto, nemaaing'uaa nanu hoo tiae oitoi mintamio. Amu nji ejo Olaitoriani: Meishiunoyu olbae lino netarruoyie empaldaka ino. Metii hoo obo likinyor iyie meetae olchani to lbae lino meetae enkishuinoto te iyie. Aaikidamu lelo sanchan pooki linono; mikishilaa ninche iyie amu aaikuna nanu anaa olmang'atinta enkitamioto o lmang'atinta lemeeta, olng'ur, amu eikitok enkitarruoroto ino enkaraki natoponari ing'ok inono. Kainyoo iyie pee nchir te mion meishiunoyu emion ino. Amu eikitok entorroni ino, ore enkaraki natoponari ing'ok inono, aaitaasa nanu iyie kuna baa. Neaku ore pooki likinya iyie naa keinosi ninche, ore ilmang'ati linono pooki, pooki ng'ae te ninche naa kelo eyararoto; ore lelo pooki oorresh naitobiraki ninche orreshet. Amu kaarrinyoki nanu embiotisho, ore ilbaa linono naishiunye, Olaitoriani ojo, enkaraki nikitejo ninche iyie, ‘Oloiturrayioki, Sion ina, nemeetae oloshilaa!’ Nji ejo Olaitoriani: ng'ura, karriny nanu lelo ootarayioki too lng'oborri le Yakobo, naing'urrie imanyishoritin enyena. Neitokini aashet nkanas too wuejitin apa neetelekutua neitashe enkaji enkitoo te wueji apake neitasheyie. Atua ninche epukunye isinkolioitin le nkishoroto e nashe o ltoiloishi le lelo ooshipa. Kaponaa nanu ninche nemeitoki ninche aaku kuti; kaisho nanu ninche meyanyituni nemeitoki aaku ooti. Netiu inkera enye anaa enatiu apake ore irumat enye neitasheyieki te dukuya nanu, naa kaitame nanu lelo pooki ooibooki ninche enkop. Ore olkitok lenye naa keaku obo lenye maate, ore olarikoni lenye naa kepuku tiatua ninche; kaisho nanu ninye metinyiku nayiaya ninye, amu kaing'ae laaitasim te kewan enye ayiaya nanu? Olaitoriani ojo. Na iakuku intae iltung'ana laainei naaku nanu Enkai inyi.” Ng'ura olkutati lo Laitoriani! Eipang'ua engoro enye napi, olkutati ogol kedanyakino ninye endukuya eilo torrono. Merrinyo ina goro napi o Laitoriani, ometaba anaa nedung'oki enkiguana neitabaya iyieunot oltau lenye. Ore too nkolong'i e siadi naa ilo ayiolou ena. “Ore kenya teina kata, Olaitoriani ojo, naa kaaku nanu Enkai oo lmareita pooki le Israel, neaku ninche ilaainei.” Nji ejo Olaitoriani: “Ore lelo tung'ana apa ootelekutua to lalem nenoto empiris ti ong'ota; ina kata apa eing'oru Israel enkiyeng'yeng. Eipang'aka Olaitoriani ninye tenelakua ajoki. Aatonyorra nanu iyie te nyorrata oo ntarasi. Neaku atobiko nanu aisiligayu te intae, ore ake sii kaashet iyie, naa eishetayu, na selenkei e Israel! Ore ake sii einkod iyie kewan too ntarumpetani naa e ilo dukuya to sinkolio le lelo ooshipa. Ore ake sii naa eiun inkurman oo sabibu too nchumat oo ldoinyo le Samaria neunisho ilaunok neitumurru ilng'anayio. Amu kelotu kenya enkolong naipotisho ilarripok tiatua ina kop oo ldoinyo o Efraim. Tudumunye maape Sion enetii Olaitoriani Enkai ang.” Amu nji ejo Olaitoriani: “Entarany entabuaku te ng'ida tenkaraki Yakobo, niliepiepie mbuakunot too laiguanak loo loshon; embalie, ninchosho enkisisa, nijojo, ‘Eitajeuo Olaitoriani iltung'ana lenyena, ilo pisiai le Israel!’ Ng'ura kayau nanu ninche aitung'uaa enkop e moikuape. Naiturrur ninche aitung'uaa ilubot enkop naalakua, ore tiatua ninche netii olmodooni o lmaima, o enkitok nairoshiwuo o enasaisai, tenebo; olturrur kitok, keshukunye ninche ene. Te nkishirata epuonu ninche naa tenkitigirata ariku nanu ninche ashuku, naisho nanu ninche meshomo too nchorroi oo nkariak, tiatua enkoitoi naitoriori nemerrorrore ninche. Amu ara nanu papaai te Israel, naa olkikau lai Efraim. Entoning ororei lo Laitoriani intae iloreren nimbalunyenye ninye too loomanaa le naiposha oo lakua; entejo, ‘Ore ilo oidapasha Israel naa keiturrur ninye, naa keing'or ninye anaa enaing'or olairritani eluaata enye oo nkerra.’ Amu etalakua Olaitoriani Yakobo, nelaku ninye aitung'uaa nkaik naagol oleng te ninye. Kepuonu ninche aabuaku aaranyisho te nchumata oldoinyo le Sion, naa keaku keng'ida ninche teina supatisho o Laitoriani te nkurma, te naisho oo sabibu te ilata, o to lkuo le luaata oo ntare o lashe loo nkishu; ketiu enkishui enye anaa enkurma natipikaki enkare, nemeitoki ae kata aatum osina. Neranyisho taa ntoyie te ng'ida. Ore ilbarnot loo ltung'ana kituaak neshipayu kaibelekeny nanu enkishirata enye metaa eng'ida, kaitagol nanu ninche, naisho ninche eng'ida to sina. Kaisho osirua iltauja loo lapolosak tenkiputakinoto, neidipakino iltung'ana laainei te supatisho ai, Olaitoriani ojo.” Nji ejo Olaitoriani: “Etoning'oki oltoilo tiatua Rama, olkiyioi, o enkishirata e mion. Eishirita Rahel tenkaraki nkera enyena, etanya ninye eitagoli too nkera enyena, amu meekure eetae.” Nji ejo Olaitoriani: “Torripo oltoilo lino pee minchir, o nkonyek inono too lkiyioi; amu kelaki esiaai ino, Olaitoriani ojo, naa keshukunye ninche aaing'uaa ina kop olmang'atinta. Etii osiligi too nkolong'i inono e dukuya, Olaitoriani ojo, naa keshukunye nkera inono aapuonu enkop enye maate. Atoning'o nanu Israel eishiraki kewan, ‘Kintamio apa nanu, nameyu nanu, anaa olashe lemeyiolo eenata; torrinyuoki nanu pee aatumi aaitopuaa, amu ira iyie Olaitoriani Enkai ai. Amu ore aidipa aibelekenyayu atapaashai nairridu ore aaidipaki aataarriyiana naosh enkupes ai, atukurrua nanu naanya sura enkaraki nanapita esulare e kitisho ai.’ Kolayioni lai kirotet Efraim? Kenkerai ai ninye nanyor? Amu ore anaake te nairo aarare ninye naa kadamu ake ninye. Neaku keng'uar oltau lai ninye; meeta nchere pee maing'urrie ninye, Olaitoriani ojo. Tipikaki kewan enkoitoi ilmonek, ntobiraki kewan ilmonek likiutaa tadamu oleng ina oitoi kitok, ina oitoi apa naa ninye iima. Tushukunye, na selenkei e Israel tushukunye wou kuna anas inono. Ing'aeng'ae akenya o anu iyie na selenkei nemeisiligayu? Amu eitayio Olaitoriani entoki ng'ejuk te nkop; enkitok namitu olee.” Nji ejo Olaitoriani loo lororani, Enkai e Israel: “Keigil ake ninche aasishore kulo rorei tiatua enkop e Yuda o tiatua nkanas enyena tenarriny nanu ninche enkop enye. ‘Mikitamayiana iyie Olaitoriani, iyie namanyisho e supatisho, iyie to ldoinyo sinyati!’ Nebik Yuda o nkanas enyena teine tenebo, o laramatak o lelo oopuopuo tenebo nkerrai enye. Amu kaitaraposh nanu ilo tau oshal ore pooki tau otashala naitagol.” Naitoki nanu aputunye, naing'orisho naa eisidain njo aainei te nanu. “Ng'ura, kepuonu nkolong'i Olaitoriani ojo, pee aun nanu enkaji e Israel o enkaji e Yuda tenebo olantererai le tung'ani o lantererai le ng'ues aitubul. Naa kelotu enkata, ore anaa enaing'ura nanu ninche, pee adotu nanang'aa, nainyal nayau entorroni, neijia sii aiko aing'oru ninche pee ashet naun, Olaitoriani ojo. Ore akenya te nena olong'i nemeigil ae kata ninche aajo: ‘Einosa iloomenye ilng'anayio ooisuisho, nesirayu ilala loo nkera too mbat.’ Kake keye pooki ng'ae te ng'oki enye makewan; ore pooki lee onya isabibu ooisuijo nesirayu ilala lenyena too mbat.” “Ng'ura, kepounu nkolong'i, Olaitoriani ojo, pee aitobir nanu olning'o ng'ejuk tenebo enkaji e Israel o enkaji e Yuda, nemeikununo anaa ilo apa ning'o lo sotua apa laitobira tenebo iloomenye ina kata apa pee aibung ninche enkaina aitayu ninche aitung'uaa enkop e Misiri, ilo ning'o lo sotua lai apa otigila hoo nara apa nanu olmoruo lenye, Olaitoriani ojo. Kake ore ele sotua laitobiru nanu tenebo enkaji e Israel te siadi nena olong'i, Olaitoriani ojo, kapik nanu e nkitanapata ai atua ninche nasir nanu too ltauja lenye; naa kaaku nanu Enkai enye neaku sii ninche iltung'ana laainei. Nemeigil ae kata oltung'ani aiteng'en olelatia enye o pooki ng'ae olalashe lenye, ejo, Tayiolo Olaitoriani; amu kaayiolou ninche pooki nanu, ebaiki oloti lenye ometabaiki olkitok, Olaitoriani ojo: amu kapalaki nanu entorroni enye, nemaitoki aekata nanu adamu eng'oki enye.” Nji ejo Olaitoriani, ilo oishoru enkolong dama meitawang'isho o nkatitin olapa naaishiaakino o lakir ooitawang'isho te nkewarie, laa ninye oing'oling'ol enaiposha neaku keikurrukur ilopir lenyena Olaitoriani loo lororani ninye enkarna enye. “Teneiwuang'a ena kitobirata apa naitoriokoki alo te dukuya nanu, Olaitoriani ojo, netum taa iishoritin e Israel aaishunye, meitoki aaku olosho te dukuya nanu ntarasi.” Nji ejo Olaitoriani: “Tenaa keidimi napaji aatetem shumata keper, neyiolouni ilkitamanyunot le nkop tiabori, natum taa aiturrai iishoritin pooki e Israel te nena pooki naataasa, Olaitoriani ojo.” “Ng'ura kepuonu nkolong'i, Olaitoriani ojo, pee eshetakini Olaitoriani enkanasa aaigil ebaiki oltalet le Hananel o metabaiki kishomi olpijata. Ore olkereri otemieki neipang alo auluo oleng, neitoriori abaya oldoinyo le Gareb, neitoki taa arrinyo alo Goa. Ore oyarata pooki loo lmeneng'a o nkuruon, o nkong'at pooki naalakua aabaya ereyiet e Kidron, ometabaiki olpijata le nkishomi oo mbartan te nkalo enkilepunoto enkolong naa keiteng'elakini Olaitoriani. Meigili ae kata aadotu aashu eibelekenyi aanang'aa ntarasi.” Ororei oewuo enetii Yeremia eing'uaa Olaitoriani to lari le tomon le Sedekia olaiguanani le Yuda, laa ninye apa olari le tomon o isiet le nkitoria e Nebukadresa. Ore apa ina kata nemanita enjore o laiguanani le Babilon Yerusalem, ore Yeremia oloiboni le Nkai neikenoro apa to lgoriet le rripore otii enkaji enkitoo o laiguanani le Yuda. Amu etipika apa Yuda Sedekia olaiguanani le Yuda ninye korokoroni, ejo, “Kainyoo iyie pee imbonisho nijo, ‘Nji ejo Olaitoriani: Ng'ura kaishooyo nanu ena anasa apik nkaik o laiguanani le Babilon, naa keya ninye. Meimisho tukul Sedekia olaiguanani le Yuda too nkaik oo Lkaldayo kake kepiki enkaina o laiguanani le Babilon, naa keiro ninye tenebo ninye eing'ura too nkomomi; naa keya ninye Sedekia Babilon, nebik ninye teine ometaba anaa namutan nanu ninye, Olaitoriani ojo. Ore hoo niaarare iyie Ilkaldayo mimirisho iyie.’ ” Nejo Yeremia, “Eewuo ororei lo Laitoriani enatii nanu ejo: Ng'ura, kelotu Hanamel olayioni le Shalom olenkapu lino enitii nejo, ‘Inyiang'u enkurma ai natii Anatot, amu iyie eishiaakino tenikordu ainyiang'u.’ Nelotu Hanamel olenkapu lai enatii tiatua olgoriet le rripore, terisioroto o rorei lo Laitoriani, naajoki nanu, ‘Inyiang'u enkurma ai natii Anatot tiatua enkop e Benchamen, amu iyie eishiaakino te niya ainyiang'u; inyiang'aki iyie kewan.’ Nayiolou taa nchere ororei lo Laitoriani.” Nainyiang'u nanu ina kurma natii Anatot te Hanamel olayioni lo lenkapu lai, naipimoki ninye mpisai naaji shekeli tomon oopishana enkosholai. Naiger te nkarna ai teina palai enkurma, nemisir neyau ilchakenini, neipim mpisai to rratili. Naitoki nanu aitayu ina palai namishira e nkinyiang'unoto, natii olning'o o ndung'eta o ina boitati enye; naisho nanu ina palai e nkinyiang'unoto Barak olayioni le Neria olayioni le Mahasia, te dukuya Hanamel olenkapu lai, te dukuya ilchakenini ootimishira ina palai e nkinyang'unoto, o te dukuya Ilyahudi pooki apa ootonita to lgoriet le rripore. Naitanap nanu Barak te dukuya ninche olchakenini ajoki, Nji ejo Olaitoriani loo lororani, Enkai e Israel: Iwa kuna pala pokira, ena namishira e nkinyang'unoto o ena tashati enye nememishira, nipik ninche atua emoti oo nkulukuok, pee etum aatobik te nkata naado. Amu nji ejo Olaitoriani loo lororani, Enkai e Israel keitokini aainyiang'u nkajijik o nkurman. “Ore aidipa aishoo ina palai e nkinyang'unoto Barak olayioni le Neria, naomon nanu Olaitoriani ajo, Ee Olaitoriani Enkai! Iyie oitobira shumata o enkop te ngolon ino kitok o te nkaina ino naitoriori! Meetae entoki nagol te iyie, oitoduaya enyorrata nauno too nkalifuni, kake intalaku entorroni oo loo menye too nkera enye te siadi ninche, Iyie Enkai olmagilani oji enkarna enye Olaitoriani loo lororani, kitok too nkiguanat naa magilani te yasata; obolo nkonyek enyena too nkoitoi pooki oo ltung'ana, nilaaki pooki tung'ani te risioroto oo nkoitoi enyena o terisioroto oo lng'anayio loo nkiaasin enyena; oitodolua ilmonek o nenking'asia te nkop e Misiri, ometabaiki ena olong tiatua Israel o too loreren pooki, nintobiraki kewan enkarna, anaa enatiu ena olong. Iyaua apa iyie iltung'ana linono Israel aitung'uaa enkop e Misiri too lmonek o too nenking'asia, te nkaina nagol naitoriori, o to lkirutoto sapuk; nincho ninche ena kop, apa ninosie iyie olmumai tenebo loo menye pee incho ninche, enkop naruko inaishi o kule; nejing ninche atua neya aaitaa enenye. Kake eitu ninche ening oltoilo lino aashu epuo te nkitanapata ino; eitu ninche eas hoo toki te nena pooki apa nintanapa iyie ninche metaasa. Neaku nchoo iyie ena torroni pooki meeu shumata ninche. “Ng'ura enjore namanita amuat enkanasa pee eya, naa ore te nkaraki olalem o lameyu olmeitai eishooyioki enkanasa aapik nkaik oo Lkaldayo, laa ninche oarare ninye. Ore apa ina niroro iyie netabayie, naa ng'ura, idolita iyie. Ore ake eyia Olaitoriani, kitiaaka nanu, Inyiang'u enkurma too mpisai ning'oru ilchakenini - hoo neishooyioki enkanasa aapik nkaik oo Lkaldayo. ” Eewuo ororei lo Laitoriani enetii Yeremia ejo: “Ng'ura ara nanu Olaitoriani, Enkai e pooki naishu; keetae hoo toki nagol te nanu? Neaku nji ejo Olaitoriani: Ng'ura kaishooyo nanu ena anasa apik nkaik oo Lkaldayo o atua nkaik e Nebukadresa olaiguanani le Babilon; naa keya ninye. Ore lelo Kaldayo oarare ena anasa naa kepuonu aapik ena anasa enkima, nepejoo ninye, tenebo nkajijik naa ore nchumat enye netapejokinyeki Baal enkorropil neibukorieki inaishi enkishoroto e nashe aabukoki kulie aitin, pee aaitagor nanu. Amu ore ilayiok le Israel o layiok le Yuda meeta ae nataasa neme entorroni too nkonyek aainei ebaiki kitisho enye; meeta ilayiok le Israel ae nataasa neme kaaitagoro nanu te siaai oo nkaik enye, Olaitoriani ojo. Etuputuo ena anasa engoro ai o engoro ai napi ebaiki enkolong apa nateshetaki ometabaiki ena olong, neaku kaiwuang'ie nanu ninye too nkonyek aainei. Tenkaraki entorroni pooki oo ilayiok le Israel o layiok le Yuda apa nataasa pee aaitagor ilaiguanak lenye o lkituaak lenye, ilapolosak lenye o loibonok lenye, iltung'ana le Yuda o lelo oomanyaYerusalem. Aaibelekenyakita ninche nanu enkoriong enye, neitu aaitorioki inkomomi enye; naa ore hoo naiteng'ena nanu ninche aitirrishaki eitu ninche ening'isho aang'amu nkiteng'enat. Etipika ninche olminong atua ina aji naipotieki enkarna ai, pee eisarkionie ninye. Etesheta ninche iwuejitin e shumata e Baal to yarata lo layioni le Hinom, pee etum aaitayunye ilayiok lenye o ntoyie olasar oishori Molek, hoo neitu nanu aitanap ninche, neitu ninye ejing aata e ndamunoto ai, nchere pee eas ena olminong napik Yuda ing'ok. “Nji naa taata ejo Olaitoriani, Enkai e Israel, tialo ena anasa nijojo intae, ‘Eishooyioki aapik atua enkaina o laiguanani le Babilon to lalem, o to lameyu, o to lmeitai’: Ng'ura, kaiturrur nanu ninche aitung'uaa nkuapi pooki apa naterewa ninche te ngoro ai o te ngoro ai napi te mpushuna kitok; kashuku nanu ninche meetu ene wueji, naisho nanu ninche metobiko te seriani. Naa keaku ninche iltung'ana laainei, naaku nanu Enkai enye. Kaisho nanu ninche oltau obo o enkoitoi nabo pee aatum ninche aatureita nanu ntarasi tenkaraki ninche maate o nkera enye te siadi ninche. Kaitobir nanu tenebo ninche osotua loo ntarasi, nchere maibelekenya nanu eitu aitaas ninche esidai; naa kapik nanu olturiaki lai atua oltau lenye, pee maaitoki ninche aaibelekenya aaing'uaa. Kang'ida nanu tenaitaas ninche esidai, naa kaun nanu ninche tiatua ena kop naitubulu to ltau lai pooki o te nkishui ai pooki. “Amu nji ejo Olaitoriani: ore anaa enayaua nanu ena torroni kitok shumata kulo tung'ana, neijia sii aiko, kayau nanu shumata ninche ina pooki sidai apa naisiligie ninche. Keinyiang'uni nkurman tena kop nijoitoto intae, olmuaate, metii oltung'ani aashu eng'ues; eishooyioki aapik atua nkaik oo Lkadayo. Keinyiang'uni nkurman too mpesai neigerokini mpala nkarn nemishiri neikeni, tiatua enkop e Benchamen, tiatua iwuejitin naamanita Yerusalem, o tiatua nkanas e Yuda, tiatua nkanas e nkop oo ldoinyo, tiatua nkanas e Shefela, o tiatua nkanas e Negeb; amu kashuku nanu ilooena lenye, Olaitoriani ojo.” Eewuo ororei lo Laitoriani enetii Yeremia enkata e are, eton eikenoro to lgoriet le rripore ejo: “Nji ejo Olaitoriani laa ninye oitobira enkop, Olaitoriani oipirua ninye neitobiru ninye, Olaitoriani enkarna enye: Mpotoki nanu naa kaairuk iyie; naa kaaliki iyie ntokitin sapuki naaisudoro neitu iyie iyiolou. Amu nji ejo Olaitoriani Enkai e Israel, tialo nkajijik ena anasa o nkajijik oo laiguanak le Yuda apa naatuuroyioki aasulaki enkop pee eitobirieki isempewueti o te nkaraki o lalem loo lmang'ati. Kepuonu Ilkaldayo aagilunore intae neiput ninche mpopoki oo ltung'ana laar nanu te ngoro ai o te ngoro ai napi, amu aisudoyie nanu enkomom ai pee maing'or ena anasa tenkaraki entorroni enye pooki. Ng'ura, kayau nanu atua ninye embiotisho e nkishiunoto, naa kaishiunye nanu ninche naboloki ninche enkiputakinoto e dupoto o eseriani. Naa kashuku nanu lelo ootaarayioki le Yuda o loo taarayioki le Israel, naitoki ashetu ninche metotiwuo anaa enatiu apake te dukuya. Naa kaitisiny nanu ninche te ntorroni pooki oo ng'ok enye o engolong'akinoto naatogolong'akitia nanu. Naa keaku ena anasa te nanu enkarna e ng'ida, enkisisa o enkitoo te dukuya iloreren pooki le nkop ooning nena kenya pooki sidain naitaas nanu ninche; keureshoyu ninche neikirikira tenkaraki inapooki sidai o karsisisho pooki naisho nanu ninye. “Nji ejo Olaitoriani: Ore tiatua ene wueji nijojo intae, ‘Olmuaate metii oltung'ani aashu eng'ues;’ ore tiatua nkanas e Yuda o too nkoitoi e Yerusalem naatomijoonito, metii oltung'ani aashu olomanya aashu eng'ues, keitokini aaning oltoilo le ng'ida o enchipai, oltoilo lo loyamisho o ltoilo le nayami, oltoilo le lelo ooranyisho eyau nkishorunot e nashe enkaji e Nkai. ‘Enchoo enashe Olaitoriani loo lororani, amu eisupat Olaitoriani amu ore ina nyorrata enye nauno ebik intarasi!’ Amu kashuku nanu lelo apa ootarayioki tena kop metotiwuo anaa apake te dukuya, Olaitoriani ojo. “Nji ejo Olaitoriani loo lororani: Ore taata ene wueji naa olmuaate, metii oltung'ani aashu eng'ues, o tiatua nkanas enyena pooki keitoki aaigil aajing imanyishoritin oo lairritak loo ntare eing'or nkerrai enye. Ore tiatua nkanas eina kop oo ldoinyo, tiatua nkanas e Shefala, o tiatua nkanas e Negeb tiatua enkop e Benchamen, nene wuejitin neemanita Yerusalem, o tiatua nkanas e Yuda, keitoki nkerrai aaim abori nkaik eilo oiken ninche; Olaitoriani ojo. “Ng'ura, kepuonu nkolong'i, Olaitoriani ojo, pee aitabaya nanu nkisiligat apa naitayio nanu te nkaji e Israel o te nakaji e Yuda. Ore akenya te nena olong'i o teina kata naisho nanu olng'osila osinya metubulu te Daudi, naa kedung ninye enkiguana te sipata o te supatisho te nkop. Ore akenya te nena olong'i neitajeuni Yuda nebik Yerusalem te seriani. Naa ena arna kenya eipotieki: ‘Olaitoriani esupatisho ang.’ “Amu nji ejo Olaitoriani: Melau ae kata Daudi oltung'ani otonie olorika le nkitoo le nkaji e Israel, ore lelo apolosak le Lawi nemelau ae kata oltung'ani te dukuya nanu oitayu ilasarri oopejori, nepejoo entapa o lasar, neitayu ilasarri ntarasi.” Eewuo ororei lo Laitoriani enetii Yeremia ejo: “Nji ejo Olaitoriani: Tenaa indim iyie atigila olning'o lai o enkolong olning'o lai o enkewarie, metaa meekure elotu endama o enkewarie nkatitin naategelakaki, naa keidim sii olning'o lai o Daudi osinka lai atigilayu, metaa metum ninye olayioni oitoreisho to lorika lenye le nkitoo, o lning'o lai lo sotua o lapolosak le Lawi lelo aisiaayiak laainei. Ore anaa enemeikenayu olorora le shumata o anaa enemetemayu osinyai le naiposha, neijia aiko aponaa eishoi e Daudi osinka lai, o lelo apolosak le Lawi laisiaai nanu.” Eewuo ororei lo Laitoriani enetii Yeremia ejo, “Keitu iyie iyiolou enajeito kulo tung'ana, ‘Etanya Olaitoriani ilmareita oare apa ootegelua?’ Nji eikuna aamenu iltung'ana laainei ometaa meekure ninche aa olosho te dukuya ninche. Nji ejo Olaitoriani teneitu nanu aun aitagol olning'o lai lo sotua te ndama o te nkewarie o too nkitanapat e shumata o enkop, anaata naa aany iishoritin e Yakobo o Daudi osinka lai nemagelu hoo obo le ishoi enye meitoria eishoi e Abraham, Isaak o Yakobo. Amu kashuku nanu lelo lenye ootarayioki, naa kaing'urrie nanu ninche.” Ele rorei oewuo enetii Yeremia eing'uaa Olaitoriani, teina kata apa egilunore Nebukadresa olaiguanani le Babilon o enjore enye pooki o nkitoriat pooki e nkop naatii abori enkitoria enye o ltung'ana pooki le Yerusalem o nkanas enyena pooki ejo: “Nji ejo Olaitoriani, Enkai e Israel: Shomo irorie Sedekia olaiguanani le Yuda nijoki ninye, ‘Nji ejo Olaitoriani, ng'ura kaishooyo nanu ena anasa apik atua nkaik o laiguanani le Babilon, naa kepejoo ninye te nkima. Mijeu iyie te nkaina enye, kake meeta nchere mikimbung'i nikiyauni aapik atua enkaina enye; ingurara intae too nkonyek o le Babilon nirorie ninye inchororo nkomomi, naa ilo iyie Babilon.’ Ore ake eyia toning'o ororei lo Laitoriani, Iyie Sedekia olaiguanani le Yuda! Nji ejo Olaitoriani tialo iyie: ‘Miye iyie to lalem. Te seriani iyie ilo aye.’ Naa ore apa anaa enatapejoki enkorropil too loo papaai lino, lelo aiguanak apa ootii te dukuya iyie, neijia kipuoi aaiko aapejoki enkorropil, nikinchiraki iyie, ejo, Aha, Olaitoriani!” Amu airoro nanu, Olaitoriani ojo. Neitoki Yeremia oloiboni le Nkai aliki kulo rorei pooki Sedekia olaiguanani le Yuda, tiatua Yerusalem ejo, ina kata apa earare enjore o laiguanani le Babilon Yerusalem o nena anas pooki e Yuda naatelekutua, Lakish o Aseka amu kuna apake nkanas e Yuda naasheta isunta naatelekutua sunta. Ele rorei oewuo enetii Yeremia eing'uaa Olaitoriani, eidipa olaiguanani Sedekia aitobira olning'o tenebo iltung'ana pooki tiatua Yerusalem pee eibalie elakunoto te ninche, nchere pee elaku pooki ng'ae Ilhebrania rrindik lenyena olee o eng'oruoi, metaa metii hoo obo oitaa Olyahudi olalashe lenye orrindik. Nening ninche, lelo kituaak pooki o ltung'ana pooki ooibung'akinote olning'o nchere pee elaaya pooki ng'ae orrindik lenye olee aashu eng'oruoi meitokini aaigil aairrindikishore; neiruk ninche nelaaya ninche. Kake ore te siadi neibelekenya ninche neitoki aarriny ilewa o nkituaak rrindiki apa ootang'asa aalaaya, neitoki aasishore ninche anaa rrindiki. Eewuo ororei lo Laitoriani enetii Yeremia eing'uaa Olaitoriani ejo: “Nji ejo Olaitoriani Enkai e Israel: Aitobira apa nanu olning'o tenebo loo papaai linyi ina kata apa pee aitupuku nanu ninche aitung'uaa enkop e Misiri, aitung'uaa enkaji e sinkaisho, ajo, ‘Ore te siadi oo larin ile nelaaya ake pooki ng'ae te ntae o Iheburaniai alashe lenye apa likitimirakaki iyie nikisiaaia ninye ilarin ile; meeta nchere pee milaaya ninye aaitung'uaa enkisiaayiare ino;’ kake eitu apa aainining loo papaai lino aashu aaisho nanu nkiyiaa enye. Irridutua oshi det niasiasa esidai too nkonyek aainei te nkibalunoto e lakunoto, oltung'ani ake o to le latia enye, nintayuyu intae olning'o te dukuya nanu tiatua ina aji naipotieki enkarna ai; kake inyaakita intae aaibelekenya nisarkionienie enkarna ai ina kata apa erriny pooki ng'ae irrindiki lenyena olee o eng'oruoi, apa nitalaaitie te risioroto e yieunoto enye, niyauwu ninche aaisiaaishore anaa irrindik linyi. Neaku, nji ejo Olaitoriani: Eitu nanu kining'ining'i teina kibalunoto o elakunoto, pooki ng'ae to lalashe lenye o to lelatia enye; ng'ura, aibalunye nanu te ntae elakunoto to lalem o to lmeitai o to lameyu Olaitoriani ojo. Kaitaa nanu intae enkuretisho too nkitoriat pooki enkop. Ore lelo tung'ana ootigila olning'o lai lo sotua leitu eibung nkitanapat olning'o lai lo sotua oitobira ninche te dukuya nanu, kaitaas nanu ninche anaa oloshi ashe odung'i aaiper kat are neimi erishata nena rubat. Ilkituaak le Yuda, o ilkituaak le Yerusalem o sunaishi oogelema, o ilapolosak o ltung'ana pooki leina kop ooima erishata oo matuan eilo ashe naa kaishooyo nanu ninche apik atua enkaina oo lmang'ati lenye o atua enkaina e lelo ooing'oru enkishui enye. Ore mpopoki enye naa keaku endaa too motonyi o loing'ang'e o ng'uesi enkop. Ore Sedekia olaiguanani le Yuda, olkituaak lenyena kaishooyo nanu ninche apik atua enkaina oo lmang'ati lenye o atua enkaina oo lmang'ati ooing'oru enkishui enye, atua ena jore o laiguanani leBabilon nikitorrinye aaing'uaa iyie. Ng'ura kaitanap nanu, Olaitoriani ojo, nashuku nanu ninche meetu ena anasa, nepuonu aagilunore ninye; neya ninye, nepejoo ninye te nkima, kaitaa nanu nkanas e Yuda olmuaate lememanya toki. Ele ororei oewuo enetii Yeremia eing'uaa Olaitoriani too nkolong'i e Yehoiakim olayioni le Yosia, olaiguanani le Yuda ejo: “Shomo ina aji oo Lkabii nirorie ninche, niyau ninche atua enkaji o Laitoriani, atua olgilata obo, nincho enaisho oo sabibu metooko.” Naya nanu Yaa-asama olayioni le Yeremia, o layioni le Habasania, o lalashera lenyena, o layiok lenyena pooki, o enkaji pooki e Rekabi. Ayaua nanu ninche enkaji o Laitoriani atua olgilata loo layiok le Hanan olayioni le Igdalia, ilo tung'ani le Nkai, apa otii embata olgilata loo lkituaak, shumata olgilata le Maaseia olayioni le Shalum, olarriponi le kutukaji. Nairragie nanu te dukuya ilkabi imotioo naabore enaisho oo sabibu, o nkikompeni, najoki nanu ninche, “Entook enaisho oo sabibu.” Kake etawalutua ninche ejo, “Mikiok iyiook enaisho, amu ore Yonadabu olayioni le Aekab, papaai lang neitanapa iyiook ajo, ‘Emiok ake enaisho oo sabibu, intae aashu ilayiok linyi ntarasi; mishetishete intae enkaji; misampumpu intae olantererai, miunuunu intae aashu itumutumu enkurma oo sabibu; kake itonini intae too lng'oborri too nkolong'i inyi pooki, pee itumutumu aatobikoi nkolong'i kumok teina kop nimanyimanya.’ Kiruko iyiook oltoilo le Yonadabu olayioni le Rekab, papa lang, te nena pooki naaitanapa ninye iyiook, pee mikiok enaisho oo sabibu too nkolong'i ang pooki, maate, nkituaak ang, ilayiok lang, aashu ntoyie ang, nimikishetu inkajijik nikimany atua. Mikiata iyiook isabibu, aashu enkurma aashu olantererai, kake kitobiko iyiook too lng'oborri nikitoning'o nikias nena pooki naaitaanapa iyiook Yonadabu papa lang. Kake ore apa pee elotu Nebukadresa olaiguanani le Babilon aarare enkop, nikijo iyiook, ‘Wootu maape Yerusalem te nkuretisho nikiure enjore oo Lkadayo o enjore oo le Siria.’ Neaku kitii iyiook Yerusalem.” Neitoki ororei lo Laitoriani alotu enetii Yeremia ejo: “Nji ejo Olaitoriani loo lororani, Enkai e Israel: Shomo tiaaki iltung'ana le Yuda o lelo oomanya Yerusalem, aiming'amumu intae enkiteng'enare nimining'ining'i irorei laainei? Olaitoriani ojo. Ore apa ina kitanapata naishoo Yonadabu olayioni le Rekab ilayiok lenyena, pee meok enaisho oo sabibu, neibung'aki, nemeok aaitasim ometabaiki ena olong, amu eibung'a ninche enkitanapata e papaai lenye. Airorie nanu intae aitirrishaki kake eitu intae kining'ining'i nanu. Airriwaka nanu intae isinkan laainei pooki iloibonok, airriu ninche aitirrishaki, ajoito, ‘Mbelekenyayu taata pooki ng'ae te intae aing'uaa enkoitoi enye torrono, nintobir nkiaasin inono, nimilo asujaa kulie aitin pee isiaai ninche, pee itum taa atobiko tiatua ina kop apa naaishoo iyie o loo papaai linono!’ Kake eitu iyie kincho nanu enkiok. Ore ilayiok le Yonadabu olayioni le Rekab neibung'a ninche ina kitanapata naishoo ninche papaai lenye, kake eitu nanu aairuk kulo tung'ana. Neaku nji ejo Olaitoriani, Enkai e Israel: Ng'ura, kayaki nanu shumata Yuda o lelo pooki oomanya Yerusalem nena natudung'oko nanu ninche; enkaraki nairorie nanu ninche neitu ninche ening, aipoto nanu ninche neitu ninche eirukisho.” Kake ore tialo enkaji o Lrekab nejo Yeremia, “Nji ejo Olaitoriani loo lororani, Enkai e Israel: Ore enkaraki nimbung'a enkitanapata e Yonadabu papaai linyi nintabaitie pooki, nitaasa nena pooki naaitanapa ninye intae, nji naa ejo Olaitoriani loo lororani, Enkai e Israel: Melau ae kata Yonadabu olayioni le Rekab oltung'ani oitashe te dukuya nanu.” Ore to lari liong'uan le nkitoria e Yehoiakim olayioni le Yosia, olaiguanani le Yuda, eewuo ele rorei enetii Yeremia eing'uaa Olaitoriani ejo: “Iwa olpiyayati ninger tiatua ninye lelo rorei pooki laairorie iyie tialo Israel o Yuda o loreren pooki, ebaiki apa enkolong naairorie nanu iyie ebaiki nkolong'i e Yosia ometabaiki taata. Ekeidimayu nchere kening enkaji e Yuda ina torroni pooki naitobirita pee aitaas nanu ninche, pee etum pooki ng'ae aibelekenyayu atung'uai enkoitoi enye torrono, natumoki nanu atapalaki entorroni enye o eng'oki enye.” Neitoki Yeremia aipot Baruk olayioni le Neria, nesir Baruk tiatua olpiyayati nena naalimu Yeremia, lelo rorei pooki lo Laitoriani oirorie Yeremia ninye. Neitanapa Yeremia Baruk, nejoki, “Aateenaki nanu pee malo enkaji Enkai; metaa ilo iyie, ore te nkolong e dukuya ening'ito iltung'ana pooki tiatua enkaji e Nkai nisuma iyie irorei lo Laitoriani teilo piyayati lingero le limunoto ai. Nilo sii aisum ninche metoning'olelo tung'ana pooki le Yuda ootupukutuo aaing'uaa nkanas enye. Ekeidimayu pee elotu esayiare enye dukuya o laitoriani, neibelekenya pooki ng'ae aing'uaa enkoitoi enye torrono, amu eikitok engoro o engoro napi natudung'oko Olaitoriani kulo tung'ana.” Neaku etaasa Baruk olayioni le Neria nena pooki naaitanapa ninye oloiboni Yeremia nchere pee eisum to lpiyayati irorei lo Laitoriani tiatua enkaji o laitoriani. Ore to lari le imiet le nkitoria e Yehoiakim olayioni le Yosia, olaiguanani le Yuda, to lapa lioudo, ore iltung'ana pooki ooing'uaa nkanas e Yuda nepuonu Yerusalem neibalunye eenata aaitupukoo ate te dukuya Olaitoriani. Ore ina kata ening'ito iltung'ana pooki, neisum Baruk irorei le Yeremia to lpiyayati, tiatua enkaji e Nkai, tiatua olgilata le Gemaria olayioni le Shefan ilo aigeroni, apa otii olgoriet le shumata, teine nejing'ieki enkishomi ng'ejuk e nkaji o Laitoriani. Ore ake pee ening Mikaia olayioni le Gemaria, olayioni le Shefan lelo rorei pooki lo Laitoriani eing'uaa olpiyayati, nedoyio ninye alo enkaji o laiguanani, atua olgilata lo laigeroni netonita apa lkituaak pooki teine. Elishama ilo aigeroni, o Delaia olayioni le Shemaia, o Enatan olayioni le Akber, o Gemaria olayioni le Shafan, o Sedekia olayioni le Hanania, olkituaak pooki. Neliki Mikaia ninche lelo rorei pooki ootoning'o ninye, ina kata pee eisum Baruk olpiyayati ening'ito iltung'ana. Neitoki lelo kituaak pooki aairriwaa Yehudi olayioni le Netania, olayioni le Shelemia, olayioni le kushi, metiaki Baruk, “Tudumu te nkaina ino ilo piyayati lisuma ening'ito iltung'ana nilotu.” Nedumu Baruk olayioni le Neria olpiyayati te nkaina enyenelotu enetii ninche. Nejoki ninche ninye, “Totona isuma.” Neisumaki Baruk ninche. Ore pee ening ninche irorei pooki, neibelekenyakino maate te nkuretisho; nejoki ninche Baruk, “Meeta nchere mikiliki olaiguanani kulo rorei pooki.” Neitoki ninche aaikilikuan Baruk ejo, “Toliki iyiook, kaji iyie nkunaka enkigeroto e kulo rorei pooki? Aitelimunoto apa e Yeremia?” Newaliki Baruk ninche, “Aatolikio ninye nanu kulo rorei pooki, ina kata apa aigerito nanu ninche to ranki to lpiyayati.” Neitoki lelo kituaak aajoki Baruk, “Shomo isudori, iyie o Yeremia niminchosho ake oltung'ani eyiolou enitii.” Nepuo ninche atua olgoriet enetii. Eidipa aairragie ilo piyayati to lgilata le Elishama ilo aigeroni; neinosaki olaiguanani mbaa pooki. Neirriwaa olaiguanani Yehudi meyau olpiyayati, neya ninye aitung'uaa olgilata le Elishama ilo aigeroni; neisumaki Yehudi olaiguanani o lelo kituaak pooki apa ooitashe aatashare olaiguanani. Olapa lioudo apa ina rishata, netonita apa olaiguanani tiatua enkaji enye enkirobi netii enkima nayupuyupito dukuya ninye. Ore ake pee eisum Yehudi imatuan uni aashu ong'uan, nedung olaiguanani te nkalem nenang'aki atua ina kima nayupuyup ometaba anaa nemut enkima nayupuyup ilo piyayati. Ore eyia eitu eirut olaiguanani aashu lelo sinkan lenyena ootoning'o kulo rorei neitu epolos nkilani enye. Ore ninye Elnatan o Delaia o Gemaria pee esai olaiguanani pee mepej olpiyayati, mening duoo ninye ninche. Neitanap olaiguanani Yerameel olayioni lo laiguanani o Seraia olayioni le Asriel o Shelemia olayioni le Abdeel pee epuo aaibung Baruk ilo aigeroni o Yeremia oloiboni, kake eisudoyie Olaitoriani ninche. Ore te siadi, eidipa olaiguanani atapejo olpiyayati tenebo lelo rorei ooigero Baruk te limunoto e Yeremia ejo: “Iwa olikae piyayati ning'er ninye lelo rorei apa pooki ootii olpiyayati le dukuya, otapejo Yehoiakim olaiguanani le Yuda. Naa ore tialo Yehoiakim olaiguanani le Yuda tejo, Nji ejo Olaitoriani, itapejo iyie ele piyayati, ijo, Kainyoo iyie pee ingero tiatua ninye nchere esipa kelotu olaiguanani le Babilon neinyal ena kop neishie tiatua ninye tung'ani o eng'ues? Neaku nji ejo Olaitoriani tiaalo Yehoiakim olaiguanani le Yuda, metum ninye hoo obo otonie olorika le nkitoo le Daudi, ore empopok enye naa kenang'ari nepej oldalati dama neinosie endeem kewarie. Naa kaitame nanu ninye o eishoi enye o sinkan lenyena tenkaraki entorroni enye; kayau nanu shumata ninche, o shumata lelo oomanya Yerusalem, o shumata ilewa le Yuda, ina torroni pooki natudung'oko nanu ninche, kake mening ninche.” Neitoki Yeremia adumu likae piyayati neisho Baruk ilo aigeroni, ayioni le Neria, laa ninye oigero te limunoto e Yeremia lelo rorei pooki lo lpiyayati otapejo Yehoiakim olaiguanani le Yuda te nkima; neponiki kulikae rorei laaijo lelo. Ore Sedekia olayioni le Yosia, laa ninye eitaa Nebukadresa olaiguanani le Yuda, neitoreisho te rishata e Konia olayioni le Yehoiakim. Kake eitu ninye aashu isinkan lenyena aashu iltung'ana leina kop ening lelo rorei lo Laitoriani ooiroro aimunye Yeremia oloiboni le Nkai. Neirriwaa olaiguanani Sedekia Yehukal olayioni le Shelemia o Sefania olapolosani, olayioni le Maaseia meshomo enetii Yeremia oloiboni le Nkai, ejo, “Toomonoki iyiook to Laitoriani Enkai ang.” Neton apa elo Yeremia aipang nejing'u tiatua iltung'ana, amu eton apa eitu epiki ninye korokoroni. Neipang'ua apa enjore e Farao tiatua Misiri, ore ake pee ening lelo Kaldayo apa oomanita Yerusalem ilomon lenye, nepuo aaing'uaa Yerusalem. Neitoki ororei lo Laitoriani alotu enetii Yeremia oloiboni: “Nji ejo Olaitoriani, Enkai e Israel: Nji iyie tiaaki ilo aiguanani le Yuda likirriwua iyie enatii nanu pee kinkilikuanishore nanu, Ng'ura, ore enjore e Farao duoo nikiyewuo aretu iyie netaa keshuko alo Misiri, enkop enye makewan. Naa keshukunye Ilkaldayo aapuonu aarare ena anasa; keya ninche ninye nepejoo ninye te nkima. Nji ejo Olaitoriani, Emileja maate, ijojo, Kepuo Ilkaldayo aaing'uaa iyiook, amu mepuo ninche aaing'uaa iyiook. Amu ore naaji ninye te nimirimiri enjore pooki oo Lkaldayo oarare intae, neing'uari te ninche iltung'ana oata ilbaa ake, oltung'ani ake to lng'obor lenye, naa kedumunye ake ninche nepejoo ena anasa te nkima.” Ore ina kata pee eshuko enjore oo Lkaldayo aing'uaa Yerusalem etataana enjore e Farao, nelo Yeremia te Yerusalem alo enkop e Benchamen pee eng'amu erubata enye teine tiatua iltung'ana. Ore apa etii ninye enkishomi e Benchamen netii olkitok loo larripok oji Irija olayioni le Shelemia, olayioni le Hanania otimira aibung Yeremia oloiboni, ejo, “Isikaka iyie enkalo oo Lkaldayo.” Nejo Yeremia, “Elejare ina: maisik nanu alo enkalo oo Lkaldayo.” Kake mening Irija ninye, neibung Yeremia neyau ninye enetii ilkituaak. Netagorokinote apa oleng lelo kituaak Yeremia neidong ninche ninye neikenoo ninye tiatua enkaji e Yonatan olaigeroni, amu eitaaki apa korokoroni. Ore apa ina kata pee elo Yeremia nena ajijik eenata naatii atua enkop, nebik teine nkolong'i kumok, neirriwaa olaiguanani Sedekia olkilikuai meyauni ninye, neng'amu ninye. Neikilikuanishore olaiguanani ninye too nkurrat tiatua enkaji enye, nejo, “Ketii ororei oing'uaa Olaitoriani?” Nejo Yeremia “Etii” Neitoki ajo, “Eikiyauni iyie aapik atua nkaik olaiguanani le Babilon.” Neitoki sii Yeremia ajoki olaiguanani Sedekia, “Kaa torroni ataasa te iyie aashu too sinkan linono aashu te kulo tung'ana pee kitipika nanu korokoroni? Koree lelo oibonok linono apa likimbonokito iyie, ejo, ‘Mikilotu olaiguanani le Babilon agilunore iyie nearare ena kop?’ Toning'o taata, aatoomono iyie, olkitok lai olaiguanani nchoo esayiata ai enkanyit elotu dukuya iyie, nimikingil nanu areu enkaji e Yonatan olaigeroni, maye ake nanu teine.” Neishooyo Sedekia nkitanapat, nepik ninche Yeremia enkaji erripore; neishori ninye emukate anaake eing'uaa enepejunyeki te nkoitoi, ometaba anaa neishunye imukateni eina anasa. Neaku etobiko apa Yeremia tiatua enkaji e rripore. Ore apa Shefatia olayioni le Matan, o Gedalia olayioni le Pashur olayioni le Malkia, o Yukal olayioni le Shelemia nening lelo rorei apa oojoki Yeremia iltung'ana pooki, “Nji ejo Olaitoriani, ore ilo oton tena anasa neye to lalem, o to lameyu o to lmeitai; kake ore ilo oipang alo Ilkaldayo nepok, netum ninye enkishui enye anaa enkishoroto to larrabal, nepok. Nji ejo Olaitoriani, Esipa keishoori ena anasa aapik atua enkaina e njore o laiguanani le Babilon neyai ninye.” Neitoki lelo kituaak aajoki olaiguanani, “Nchoo ele tung'ani metaari metua, amu eitashalita ninye nkaik e lelo sikarini oo tung'uayioki tiatua ena anasa, o nkaik oo ltung'ana pooki, tena kiroroto nairorie ninye ninche kulo rorei. Amu ore ele tung'ani mme olmabarishoi le kulo tung'ana eing'oru, kake enkitamioto enye.” Nejo olaiguanani Sedekia, “Ng'ura, etii ninye atua nkaik inyi; amu meidim olaiguanani ataasa ae toki napaashare intae.” Neaku etudumutua ninche Yeremia nesulaki ninye atua olchorro le Malkia olayioni lo laiguanani, apa otii atua olgoriet le rripore, eitadoyio Yeremia abori too lgoso. Nemetii apa enkare atua ilo shorro, kake esarng'ab ake, neimis Yeremia tiatua ina sarng'ab. Ore ake pee ening Ebed Melek ilo apa le Etiopia, ilo apa sunash ogelema kitok otii atua enkaji o laiguanani, nchere etipika ninche Yeremia atua olchorro. Netonita apa olaiguanani tiatua enkishomi e Benchamen. Nelo Ebedmelek te nkaji o laiguanani nejoki olaiguanani, “Olkitok lai olaiguanani, etaasa kulo tung'ana entorroni teina pooki naitaasa ninche Yeremia oloiboni le Nkai tesulakinoto natusulakitia ninye atua olchorro: naa keye ninye te sumash, amu meetae emukate natelekua tiatua ena anasa.” Neitoki olaiguanani aitanap Ebedmelek ilo apa le Etiopia ajoki, “Iwa iltung'ana okuni tene nipuopuo aailepunye Yeremia oloiboni le Nkai aaitayu tiatua olchorro eton eitu eye.” Nerik Ebedmelek iltung'ana tenebo ninye enkaji o laiguanani, enetii osanduku loo nkilani teneshumishoreki, neitayu ninye teine mpurdat o nkilani naatopolosate, apa naaitadoikio ninye Yeremia tiatua olchorro too lgoso. Nejoki Ebedmelek ilo le Etiopia Yeremia, “Tipika nena purdat oo nkilani nkitikit inono o lgoso.” Neiko neijia Yeremia. Neitayu ninche Yeremia aailepunye too lgoso neilepunye ninye aaitayu tiatua ilo shorro. Nebik Yeremia to lgoriet le rripore. Neirriwaa Sedekia olkilikuai meyauni Yeremia oloiboni le Nkai neng'amu ninye te nejing'ieki e uni e nkaji o Laitoriani. Nejoki olaiguanani Yeremia, “Kaaikilikuan nanu iyie enkikilikuanata; misudoo toki te nanu.” Nejoki Yeremia Sedekia, “Amaa tenaaliki nanu, aimintisip iyie pee kiar nanu matua? Naa tenaaisho iyie enkikoo nimikining iyie nanu.” Nenya olaiguanani Sedekia olmumai te nkisudoroto te Yeremia, “Anaa enaishu Olaitoriani, laa ninye oitayio iltauja lang, maar nanu iyie tua aashu aapik atua nkaik e kulo tung'ana ooing'oru enkishui ino.” Nejoki Yeremia Sedekia, “Nji ejo Olaitoriani, Enkai oo lororani, Enkai e Israel, tenintayu iyie kewan aishooyo too lkituaak lo laiguanani le Babilon, neitajeuni enkishui ino, nemepejori ena anasa te nkima, ore iyie o enkaji ino nipokipoko. Kake tenimintayu iyie kewan aishooyo too ilkituaak ooya lo laiguanani le Babilon, neishoori ena anasa aapik atua enkaina oo Lkaldayo, naa kepejoo ninche ninye te nkima, nimisik iyie apuku te nkaina enye.” Nejoki olaiguanani Sedekia Yeremia, “Kaure nanu lelo Yahudi apa ooshomo aajing atua Ilkaldayo, maapuoi ake aaitarasaki ninche naamor ninche.” Nejoki Yeremia ninye, “Mikipuoi aishooyo te ninche, toning'o taata oltoilo lo Laitoriani teina naajoki nanu iyie, amu kelo asidanu te iyie, neitajeuni enkishui ino. Kake tiniany iyie intayu kewan aishooyo, ena duaata nanu aaitoduaa Olaitoriani: Ng'ura, ore nkituaak apa pooki naatung'uayioki tiatua enkaji o laiguanani le Yuda netorikokoki ilkituaak lo laiguanani le Babilon nejoito ninche, ‘Ore ilchoreta linono apa lisilig nikiteleja iyie nikisulaa ninche iyie; ore taata eimiso nkejek inono tiatua esarng'ab kimbelekenyate ninche aing'uaa iyie.’ Ore nkituaak inono pooki o layiok linono naa keyookini aaipang'ie aarikoki ilkaldayo, ore iyie enkorrok ino nimijeu te nkaina enye, kake eikimbung olaiguanani le Babilon; ore ena anasa nepejori te nkima.” Nejoki Sedekia Yeremia, “Mincho hoo oltung'ani eyiolou kulo rorei aashu iye iyie. Tenening ilkituaak nchere aairorie nanu iyie nepuonu enitii nikijoki iyie, ‘Toliki iyiook ina nitiaaka olaiguanani naa kaa kitiaka olaiguanani, misudoo hoo toki te iyiook amu mikiar iyiook iyie tua.’ Tiaaki iyie ninche, ‘Atasayia nanu olaiguanani te nkanyit pee maaigil ake areu enkaji e Yonatan mashomo aye teine.’ ” Nepuonu ilkituaak pooki enetii Yeremia neikilikuan ninye, newaliki ninche anaa enatiaka ninye olaiguanani. Nepuo ninche aaing'uaa ninye, amu ore ina kiroroto neitu apa ening'i. Nebik Yeremia te nkaji e rripore o metabau ina olong apa naawaki Yerusalem. Ore to lari lioudo le nkitoria e Sedekia, olaiguanani le Yuda, to lapa le tomon, nelotu Nebukadresa olaiguanani le Babilon o enjore enye pooki aarare Yerusalem nemuat aman ninye, ore to lari le tomon oobo le nkitoria e Sedekia, to lapa liong'uan, te nkolong e naaudo o lapa, negili isunta e nkang. Ore apa ina kata pee eyae Yerusalem, ore ilkituaak pooki lo laiguanani le Babilon nepuonu aatoni te nkishomi empolos: Negal-Sharesa, o Samgarebo, o Sarsekim ilo apa kitok, tenebo lelo kulikae kituaak apa lo laiguanani le Babilon. Ore pee edol Sedekia olaiguanani le Yuda o sikarini pooki ninche, neisik ninche, nepuo auluo enkanasa te nkewarie aaim enkoitoi o enkurma o laiguanani aaim ina kishomi natii erishata oo sunta pokira are; nepuo ninche aaipir enkalo e Araba. Kake etusujaitie ninche enjore oo Lkaldayo, neinepu Sedekia too nkisiajat e Yeriko ore ake pee eibung ninche ninye, neyau ninche ninye enetii olaiguanani Nebukadnesa le Babilon, te Ribla, te nkop e Hamat; nedung'okini ninye enkiguana. Near olaiguanani le Babilon ilayiok le Sedekia te Ribla; metuata te dukuya nkonyek enyena; near olaiguanani le Babilon ilkituaak pooki le Yuda metuata. Naitayu ninye nkonyek e Sedekia, neyau ninye too lpisia pee eya ninye Babilon. Nepejoo Ilkaldayo enkaji o laiguanani o enkaji oo ltung'ana, neurori isunta e Yerusalem. Neitoki Nebusaradan, olkitok le rripore aya te yararoto meshomo Babilon lelo kulikae tung'ana ootelekutua tiatua ina anasa, lelo apa ooshomo enetii ninye, o lelo tung'ana otung'uayioki. Neing'uaa Nebusaradan olkitok le rripore tiatua enkop e Yuda o embata oo ltung'ana aisinak lemeeta toki, neisho ninche nkurman oo sabibu o nkurman teina kata ake. Neishooyo Nebukadresa olaiguanani le Babilon enkitanapata tialo Yeremia eimaa Nebusaradan, ilo kitok le rripore ejo, “Ewaita ninye eng'ura ninye oleng nimintaasiasa ake entorrono, kake entaasa ninye anaa enajoki intae.” Ore Nebusaradan ilo kitok le rripore, neirriwaa olkilikuai, o Nebusaradan, o Rabsaris, o Negal Saresa, o Rabmag, o lkituaak pooki lo laiguanani le Babilon. Neirriwaa ninche olkilikuai, neitayu Yeremia tiatua olgoriet le rripore. Neisho ninche ninye Gedalia olayioni le Ahikam, olayioni le Shefan, nchere pee erik ninye ang. Neaku etotona ninye tiatua iltung'ana. Eewuo apa ororei lo Laitoriani enetii Yeremia ina kata apa eikenoro to lgoriet le rripore ejo. “Shomo naa tiaaki Ebedmelek ilo le Etiopia, ‘Nji ejo Olaitoriani loo lororani, Enkai e Israel: ng'ura kaitabaya nanu irorei laainei tialo ena anasa te ntorroni neme te sidai, naa keitabari kenya te dukuya iyie teina olong. Kake kaakordu kenya nanu iyie teina olong, Olaitoriani ojo, nimikinchoori iyie aapik atua enkaina e lelo tung'ana liure. Amu esipa kaaitajeu nanu iyie, nimibatata iyie to lalem, kake itum iyie enkishui ino anaa enkishoroto o larrabal, enkaraki nitipika osiligi lino atua nanu, Olaitoriani ojo.’ ” Ele rorei oewuo enetii Yeremia eing'uaa Olaitoriani eidipa Nebusaradan olkitok le rripore aishoo ninye meshomo aing'uaa Rama, ina kata apa pee eya ninye eena too lpisia tenebo lelo pooki apa leYerusalem o Yuda ootarayioki meshomo Babilon. Neya ilo kitok le rripore Yeremia nejoki ninye, “Olaitoriani Enkai ino otudung'oko ene wueji entorroni: eyaua Olaitoriani, netaasa ninye anaa enatejo. Enkaraki nitaasa iyie eng'oki tialo Olaitoriani, neitu ining oltoilo lenye, pee eewuo ena toki shumata iyie, ng'ura ore taata, kaalaku nanu aitung'uaa lelo pisia ootii nkaik inono. Tenidol eishiaakino te iyie pee ilo tenebo nanu Babilon, wou, anaa kaalo nanu agolie; kake tenidol ajo meishiaakino nilotu tenebo nanu Babilon, nimilotu. Ng'ura ajo etii enkop pooki dukuya iyie; shomo eneba anaa enidol ajo sidai neishiaakino nilo. Tinitobiko iyie, torrinyoyu naa shomo enetii Gedalia olayioni le Ahikam olayioni le Shafan, laa ninye apa etegelua olaiguanani le Babilon aitaa olbalusui too nkanas e Yuda nibik tenebo ninye tiatua iltung'ana; aashu ilo eneba anaa enidol ajo sidai tinilo.” Neisho ilo kitok le rripore ninye endaa o enkishoroto, neisho ninye meshomo. Nelo ninye Yeremia enetii Gedalia olayioni le Ahikam, te Mispa nebik tenebo ninye tiatua iltung'ana apa ootung'uayioki teina kop. Ore ake pee ening ilkituaak pooki loo njorin e Yuda teina kop naisiaja o ltung'ana lenye nchere etegelua olaiguanani le Babilon Gedalia olayioni le Ahikam aitaa olbalusui teina kop, neishoo ninye meitoria ilewa o nkituaak, o nkera, lelo apa aisinak oleng leitu eyae Babilon te yararoto, eshomo apa ninche enetii Gedalia te Mispa Ore Ishmael olayioni le Netania, Yohanan olayioni le Karea, o Seraia olayioni le Tanhumet, ilayiok le Efai olnetofiti, Yetania olayioni le Maakasite, ninche o ltung'ana lenye. Ore Gedalia olayioni le Ahikam, olayioni le Shafan, nenya olmumai tenkaraki ninche o ltung'ana lenye, ejo, “Emiureishoyu tinisiaayiayia Ilkaldayo. Entobik tiatua ena kop, nisiaayiayia olaiguanani le Babilon, amu kesidanu te intae. Ore nanu, kabik te Mispa, pee aitashe te nkaraki intae te dukuya Ilkaldayo oopuonu enikitii iyiook; kake ore intae, enturrurro enaisho oo sabibu o lng'anayio le nkata enkirowuaj o eilata, nishumushumu ninche too ntokitin inyi naashumishoreki nibikibiki tiatua nkanas inyi apa nitegelutua.” Neijia eikununo, ore apa pee ening Ilyahudi pooki ootii Moab o atua Ilamoni o atua Edom o atua kulie kuapi nchere etelekua olaiguanani le Babilon olpisiai tiatua Yuda netegelua Gedalia olayioni le Ahikam, olayioni le Shafan aitaa olbalusui te shumata ninche. Neitoki Ilyahudi pooki ashukunye eing'uaa iwuejitin apa naaterewaki ninche nepuonu enkop e Yuda, enetii Gedalia te Mispa; neiturrur ninche enaisho oo sabibu o lng'anayio le nkata enkirowuaj tenkumoi sapuk. Nelotu apa Yohanan olayioni le Karea o larikok pooki loo njorin teina kop naisiaja aapuo enetii Gedalia te Mispa. Nejoki ninye, “Iyiolo iyie nchere eirriwua olaiguanani loo Lamoni Ishmael olayioni le Netania pee elotu aiwuang'ie enkishui ino?” Kake menyorraa Gedalia olayioni le Ahikam ninche. Neitoki Yohanan olayioni le Karea airorie Gedalia too nkurrat te Mispa ejo, “Nchooki nanu mashomo asesekuan Ishmael olayioni le Netania, nemeetae oltung'ani oyiolou. Kainyoo ninye pee eyieu neiwuang'ie enkishui ino, neaku ore Ilyahudi pooki likinturrurrokinote iyie neidapasha, ore ilo pisiai le Yuda neidak?” Kake etiaaka Gedalia olayioni le Ahikam Yohanan olayioni le Karea, “Miaas iyie ena bae, amu irorita iyie te lejare tialo Ishamel.” Ore to lapa liopishana, nelotu Ishmael ilo ayioni le Netania, olayioni le Elishama, leilo marei le nkitoria, laa ninye obo loo lkituaak lo laiguanani, tenebo iltung'ana tomon enetii Gedalia olayioni le Ahikam, te Mispa. Ore enyaita ninche endaa tenebo teine te Mispa, nedumunye Ishmael o lelo tung'ana tomon apa ootii tenebo ninye nedung to lalem Gedalia ilo ayioni le Ahikam olayioni le Shafan, near ninye metua, naa ninye apa etegelua olaiguanani le Babilon metaa olbalusui teina kop. Nesesekuan sii Ishmael Ilyahudi pooki apa ootii tenebo Gedalia te Mispa, o sikarini loo Lkaldayo apa otii ine. Ore apa teina olong te siadi esesekuanata e Gedalia, eton eitu eyiolou hoo ng'ae, nebau iltung'ana ntomoni isiet ooing'uaa Shekem o Shilo o Samaria ebarno ilmunyo lenye nepolosa nkilani enye, nedung'udung'o iseseni lenye, eyau nkishoorot e nkurma o enkorropil pee eishooyo te nkaji o Laitoriani. Nelotu Ishmael olayioni le Netania te Mispa anang'are ninche, eishirita elotu. Ore enang'are ninche, nejoki ninche “Entijing'u wootu enetii Gedalia olayioni le Ahikam.” Ore pee epuonu ninche atua enkanasa, nesesekuan ninche Ishmael olayioni le Netania o lelo tung'ana ootii tenebo ninye, nenang'akini ninche atua engumoto. Kake etii apa iltung'ana tomon atua ninche ootiaakitia Ishmael, “Miar iyie iyiook matuatua, amu kiata ilchumat le nkano, o eilata, o enaisho oo lotorok eisudoro ti ong'ata.” Neaku etoning'o ninye neitu ear ninche metuata tenebo lelo apa le ncholuek enye. Ore apa ina gumoto natanang'aka Ishmael impopoki e lelo tung'ana ootasesekuana naa engumoto sapuk apa naitobira olaiguanani Asa arripore ina kata egilunore olaiguanani oji Baasha le Israel; neigany Ishmael olayioni le Netania impopoki oo lootuata. Neitoki Ishmael araya lelo kulikae tung'ana apa ootii Mispa, ntoyie o laiguanani o ltung'ana pooki apa ootung'uayioki te Mispa ootung'ueikia Nebusaradan, olkitok le rripore Gedalia olayioni leAhikam. Neraya ninche Ishmael olayioni le Netania neboin ninche metalang'aki Ilamori. Kake ore ake pee ening Yohanan olayioni le Karea o larikok pooki loo njorin tenebo ninye ina torroni pooki naataasa Ishmael olayioni le Netania. Nerik ninche ilewa lenye pooki nepuo aarare Ishmael olayioni le Netania, nepuonu ninche aainepu ninye to lchorro apa otii Gibeon. Neriku ninche iltung'ana lenye pooki nepuo aarare Ishmael olayioni le Natania. Nerik ninche ilewa lenye pooki nepuo aarare Ishmael olayioni le Natania. Neinepu ninye to lchorro sapuk otii Gibeon. Ore ake pee edol iltung'ana pooki apa ootii tenebo Ishmael Yohanan olayioni le Karea o larikok pooki loo njorin tenebo ninye, neng'idayu ninche. Neaku ore iltung'ana pooki apa ootaarayie Ishmael aitung'uaa Mispa neibelekenya aashukunye, nepuo enetii Yohanan olayioni le Karea. Kake etuluayie Ishmael olayioni le Netania ailany Yohanan tenebo iltung'ana isiet, nelo atua Ilamoni. Neya Yohanan olayioni le Karea o larikok pooki loo njorin apa ootii tenebo ninye lelo tung'ana pooki apa ootarayie Ishmael olayioni le Netania aitung'uaa Mispa ina kata pee eidip atasesekuana Gedalia olayioni le Ahikam o sikarini, o nkituaak, o nkera, o sunaishi oo gelema apa ooyaua Yohanan ashuku te Gibeon. Nepuo ninche, aatoni te Geruut Chimham te mbata e Betlehem, ejo pee epuo Misiri, tenkaraki Ilkaldayo; amu keure apa ninche, enkaraki netasesekuana apa Ishmael olayioni le Netania Gedalia olayioni le Ahikam, laa ninye eitaa olaiguanani le Babilon olbalusui oitore ina kop. Ore ilarikok pooki loo njorin, o Yohanan olayioni le Karea o Asaria olayioni le Hoshaia, o ltung'ana pooki ebaiki oloti ometabaiki olkitok, nepuonu aanyiku. Nejoki ninche Yeremia ilo oiboni le Nkai, “Nchoo esayiata ang elotu dukuya iyie, niomon Olaitoriani Enkai ino tenkaraki iyiook, tenkaraki ele pisiai pooki, (amu etelekuaki iyiook ilkuti too lkumok, anaa enidolita iyiook.) Pee etum Olaitoriani Enkai ino aitoduaa iyiook enkoitoi nikiim, o embae nikias.” Nejoki Yeremia oloiboni le Nkai ninche, “Atoning'o nanu intae, ng'ura, kaomon nanu Olaitoriani Enkai inyi te risioroto eomonunoto inyi, ore eneba anaa enawaliki intae Olaitoriani naa kaliki nanu intae; maisudoo nanu hoo toki te intae.” Nejoki ninche Yeremia, “Metaa Olaitoriani olchakeni osipa tiaalo iyiook tenikiaas iyiook terisioroto eilo rorei likirriwakinye Olaitoriani Enkai ino iyiook. Tenaa sidai aashu torrono, eikiruk iyiook ororei lo Laitoriani Enkai naa ninye kirriwaa iyie enetii, pee etum atisidana te iyiook tinikiruk oltoilo lo Laitoriani Enkai ang.” Ore te siadi nkolong'i tomon nelotu ororei lo Laitoriani enetii Yeremia. Neitoki ninye aipotu Yohanan olayioni le Karea o Larikok pooki loo njorin apa ootii tenebo ninye, o ltung'ana pooki ebaiki oloti ometabaiki olkitok, nejoki ninche, “Nji ejo Olaitoriani, Enkai e Israel, naa ninye kirriwakita nanu mayaki enkomono inyi dukuya ninye: tinibikibiki intae tiatua ena kop nashetu nanu intae nemauroo nanu intae; naun nanu intae, nemadotu nanu intae; amu airridua nanu ina torroni apa naitaasa nanu intae. Emiureyu olaiguanani le Babilon, laa ninye iurere intae; emiureyu intae ninye, Olaitoriani ojo, amu atii nanu tenebo intae, pee aitajeu intae nakordu intae aitung'uaa enkaina enye. Kaisho nanu intae olng'ur, pee etum ninye aing'urrie intae neisho intae itonini te nkop inyi maate. Kake tenijojo intae, ‘Mikitoni iyiook tiatua ena kop,’ aagolong'aki oltoilo lo Laitoriani Enkai inyi; nijojo, ‘A-a, eikipuo iyiook enkop e Misiri, ine nimikidolie iyiook olarrabal, aashu kining oltoilo le mowuo, aashu kiata esumash oo mukateni, naa eikipuo iyiook aabik teine,’ toning'o naa ororei lo Laitoriani, lopisiai le Yuda. Nji ejo Olaitoriani loo lororani, Enkai e Israel: Tenipuopuo intae Misiri nimingiligili aashukunye, ore ilo alem liurere nelo ainepu intae teine tiatua enkop e Misiri; ore ilo ameyu liurere nesuj intae te ngolon indipa aashom Misiri; nipuopuo aaye teine. Ore lelo tung'ana pooki ooipirie nkomomi enye aapuo Misiri aatoni teine naa kepuo aaye to lalem, o to lameyu o to lmeitai; metum ninche olpisiai aashu ololeku teina torroni nayooki nanu ayau shumata ninche. “Amu nji ejo Olaitoriani loo lororani, Enkai e Israel: Ore anaa enapa natubukoko engoro ai o engoro ai napi lelo oomanya Yerusalem, neijia eikoni aabukoki engoro ai napi intae tenipuopuo Misiri. Naa iakuku intae entaboi, o olkirutoto o ldeket o esulare. Mingiligili ae kata aadol ene wueji. Etiaaka intae Olaitoriani, lo pisiai le Yuda, ‘Milo Misiri tayiolo te sipata nchere aaikoo nanu iyie ena olong, nchere ishomo intae aaimin tenkinyiang'a enkishui inyi. Amu kirriwaitie intae enetii Olaitoriani Enkai inyi, ijojo, Toomonoki iyiook to Laitoriani Enkai ang, ore enaba anaa enajo Olaitoriani Enkai ang mbalakinye iyiook amu eikiaas iyiook.’ Naibalakinye nanu ena olong intae, kake eitu irukuruku oltoilo lo Laitoriani Enkai inyi te pooki toki naairriua nanu matoliki intae. Ore naa taata entayiolo entisipa nchere iyeye intae to lalem, o to lameyu o to lmeitai tiatua ine wueji nitang'uarra intae aapuo aatonie.” Ore pee eidip Yeremia airorie iltung'ana pooki kulo rorei pooki lo Laitoriani Enkai enye, laa ninche eirriwayie Olaitoriani Enkai enye meshomo enetii ninche, ore Asaria olayioni le Hoshaiai o Yohanan olayioni le Karea o ltung'ana pooki oowuasa nejoki Yeremia, “Elejare iyie ijoito. Eitu iyie kirriu Olaitoriani Enkai ang tejo, ‘Emipuo intae Misiri aatoni teine.’ Kake Barak olayioni le Neria ninye likimbayunye iyiook, pee iyau iyiook matuata aashu eya iyiook te yararoto Babilon.” Neaku ore Yohanan olayioni le Karea o larikok pooki loo njorin o ltung'ana pooki neitu eiruk oltoilo lo Laitoriani, pee ebik tiatua enkop e Yuda. Kake ore Yohanan olayioni le Karea o lkituaak pooki loo njorin neya olpisiai pooki le Yuda apa otushukunye alotu aton tiatua enkop e Yuda eing'uaa iloshon pooki apa oowaki ilewa, o nkituaak, o nkera, o ilkituaak o pooki tung'ani apa otung'ueikia Nebusaradan ilo kitok le rripore e Gedalia olayioni le Ahikam, olayioni le Shafan; o Yeremia ilo oiboni le Nkai o Barak olayioni le Neria. Nepuonu ninche atua enkop e Misiri, amu eitu apa eiruk oltoilo lo Laitoriani. Nebau ninche Tefahes. Neitoki ororei lo Laitoriani alotu enetii Yeremia tiatua Tafahes ejo: “Iwa too nkaik inono isoito sapuki, nisudoo ninche te nkop teine nejing'ieki enkaji enkitoo e Farao tiatua Tafehes, te dukuya iltung'ana le Yuda, nijoki ninche, ‘Nji ejo Olaitoriani loo lororani, Enkai e Israel: Ng'ura, kairriu nanu nayau Nebukadresa ilo aiguanani le Babilon, osinka lai, naa kepik ninye olorika lenye le nkitoo shumata kulo soito laisudoiyie nanu, naa keisalaashaki ninye olng'obor lenye le nkitoo shumata ninche. Kelotu ninye aar enkop e Misiri, aisho lelo apake lo lmeitai enya olmeitai, ore lelo apake ooigerokino eyararoto nepuo eyararoto, nepuo olalem lelo apake oigerokino olalem. Neinok ninye enkima tiatua nkajijik oo nkaitin e Misiri; naa kepejoo ninye ninche nenap ninche aya eyararoto; naa keituku ninye enkop e Misiri, anaa enaituku olairritani loo ntare olkila lenye meshomo lashe; naa kelo ninye aing'uaa ine te seriani. Naa kegil ninye nena ng'apeta naasinya e Heliopolis naatii atua enkop e Misiri; ore nkajijik oo nkaitin e Misiri nepejoo te nkima.’ ” Ele rorei oewuo enetii Yeremia eipirta lelo Yahudi pooki apa oomanya enkop e Misiri, te Migdol, te Tafahes, te Memfis, o tiatua enkop e Patros ejo, “Nji ejo Olaitoriani loo lororani, Enkai e Israel: Itoduaa intae ina torroni pooki nayaua nanu shumata Yerusalem o shumata nkanas pooki e Yuda. Ng'ura, ore ena olong olmuaate ninche, nemetii hoo ng'ae omanya atua ninche, enkaraki ina torroni nataasa ninche, naaitagor nanu, teina nashomo ninche aapej enkorropil neisiaai kulie aitin apa neitu eyiolou ninche, ninche aashu o intae aashu loo papaai linyi. Ore ake eyia aitirrishaka nanu airriwaki intae isinkan laainei pooki lelo oibonok le Nkai, ajo, ‘Ee, miaas ena taboi naiba nanu!’ Kake eitu ninche ening aashu eishoru enkiok enye, pee eibelekenya aaing'uaa entorroni enye nemeitoki aapejoki enkorropil kulie aitin. Neaku ore emion o engoro ai napi netubukuoki neyupuyupieki tiatua nkanas e Yuda o tiatua nkoitoi e Yerusalem; neaku ninche mijoonito o lmuaateni, anaa enatiu tena olong. Ore naa taata nji ejo Olaitoriani Enkai oo lororani, Enkai e Israel: Kainyoo intae pee iasiasa ena torroni sapuk tialo intae maate, aadung'oo aaiwuangie tiatua intae olee o enkitok, elooyo o enkerai, aaitung'uaa empolos e Yuda, nemeing'uiekini intae olpisiai? Kainyoo pee kintagorigoro nanu te siaai oo nkaik inyi, ipejokiki enkorropil kulie aitin tiatua enkop e Misiri teine apa nietuo aatonie, pee etumi aaiwuang'ie intae niakuku oldeket o enkurruna tiatua iloreren pooki le nkop? Ketorikine intae esuujisho oo loo papaai linyi, entorroni o laiguanani le Yuda, o entorroni oo kituaak enye, o entorroni inyi maate, o entorroni oo nkituaak inyi apa nataasa ninche tiatua enkope Yuda o too nkoitoi naalala e Yerusalem? Eitu ninche eitobor ate ometabaiki ninye ena olong, aashu eureishoyu, aashu epuo te nkitanapata ai o nkiguanat aainei apa natipika dukuya intae o dukuya loo papaai linyi. “Ore naa nji ejo Olaitoriani loo lororani, Enkai e Israel: Ng'ura kaing'orie nanu enkomom ai intae te ntorroni, pee aiwuang'ie Yuda pooki. Kaya nanu ilo pisiai le Yuda ooibelekenya inkomomi enye pee epuonu enkop e Misiri aatonie naa keidaikieki ninche pooki; tiatua enkop e Misiri epuo ninche aabatata to lalem, o to lameyu eidaikieki ninche; ebaiki oloti ometabaiki olkitok, keye nincheto lalem o to lameyu; naa keaku ninche enking'asia o enkuretisho o ldeket o enkurruna. Kaitame nanu lelo oobikito tiatua enkop e Misiri anaa enaidipa aitamio Yerusalem, to lalem to lameyu o to lmeitai, keaku meetae hoo obo teilo pisiai le Yuda apa oewuo aton tiatua enkop e Misiri, ojeu aashu epok aashu eshuko alo enkop e Yuda, naa ninye apa etang'uarra pee eshuko aapuo aabik teine, amu merrinyo ninche meteleku ake ilkuti aisikak.” Ore apa lelo lewa pooki ooyiolo aajo eishoo nkituaak enye enkorropil kulie aitin, o nkituaak pooki naaitasheto te mbata, o lturrur kitok, ore iltung'ana pooki oomanya Patros tiatua enkop e Misiri, newaliki Yeremia ejo: “Ore tialo ele rorei litolikio iyiook te nkarna o Laitoriani, mikining iyiook iyie. Kake eikiaas iyiook pooki toki naba anaa enikinosakita olmumai, aapejoki enkorropil enkaiguanani e shumata nikibukoki ninye ilasarri ooki, anaa apa enikitaasa iyiook o loo papa, o laiguanak lang o lkituaak lang, tiatua inkanas e Yuda o too nkoitoi naalala e Yerusalem; amu ore apa ina kata nikiata endaa sapuk nikidupoyu, neitu kidol entorroni. Ore anaa nikipal iyiook eitu kipejoki enkorropil enkainguanani e shumata o embukokinoto o lasar ooki, nikitalaita iyiook pooki toki neidaikieki iyiook to lalem o to lameyu.” Nejo nkituaak, “Amaa apa pee kipejoki enkorropil enkaiguanani e shumata nikibukoki ninye olasar ooki, aimeyiolo apa ilmoruak lang pee kintayu imukateni naata enkitanyaanyukoto enye nikibukokininye ilasarri ooki?” Neitoki Yeremia ajoki iltung'ana pooki, ilewa o nkituaak, o lelo tung'ana pooki ooishoo ninye ena walata: “Amaa tialo ina orropil apa nitapejo intae tiatua inkanas e Yuda, o too nkoitoi e Yerusalem, intae o loo papaai linyi, o laiguanak linyi olkituaak linyi, oltung'ana lena kop, keitu edamu Olaitoriani? Keitu elotu ena damunoto enye? Meekure eidim Olaitoriani ating'iriakinoyu entorroni oo nkiaasin inyi o nena o lminong nitaasa intae, neaku etaa enkop inyi olmuaate ewueji mitil oldeket meetae olomanya, anaa enatiu ena olong. Enkaraki nitapejo intae enkorropil o enkaraki nitaasa intae eng'oki to Laitoriani aashu ipuopuo te nkitanapata enye o too nkiguanat enyena o te nchakenisho enye, pee etadoikio intae ena torroni, anaa enatiu ena olong.” Nejoki Yeremia iltung'ana pooki o nkituaak pooki, “Entoning ororei lo Laitoriani, intae pooki le Yuda ootii atua enkop e Misiri, nji ejo Olaitoriani loo lororani, Enkai e Israel: Ore intae o nkituaak inyi nimbalie too nkutukie inyi, nintabaitie too nkaik inyi, ijojo, ‘Esipa eikiaas iyiook nena nikinosakita olmumai likintobira aapejoki enkorropil enkaiguanani e shumata nikibukoki ninye olasar ooki.’ Entudup naa ilmuma linyi niasiasa nena! Ore naa entoning ororei lo Laitoriani, intae pooki le Yuda oobikito tiatua enkop e Misiri: ng'ura, ainosa nanu olmumai te nkarna ai kitok, Olaitoriani ojo, nchere ore enkarna ai meitokini ae kata aaipot te nkutuk e pooki tung'ani le Yuda tiatua enkop pooki e Misiri, ejo, ‘Anaa enaishu Olaitoriani.’ Ng'ura, aing'orita nanu ninche te ntorroni neme te sidai, ore iltung'ana pooki le Yuda ootii atua enkop e Yuda naa keidaikieki to lalem o to lameyu, ometabau enkiting'oto enye. Ore lelo ooimisho to lalem naa keshuko aaing'uaa enkop e Misiri aapuo enkop e Yuda, naa kuti esiana; ore ilo pisiai pooki le Yuda, apa oewuo enkop e Misiri aton, neyiolou aajo kalo rorei ouno, kolalai aashu olenye. Ele olo aaku olmonekie te intae, Olaitoriani ojo, nchere kaitame nanu intae tene wueji, pee itumutumu aatayiolo nchere esipa keitashe ororei lai tialo intae te ntorroni: Nji ejo Olaitoriani, ng'ura, kaishooyo nanu Farao, aisho Hofra ilo aiguanani le Misiri apik atua enkaina oo lmang'ati lenyena o atua enkaina e lelo ooing'oru enkishui enye, anaa apa enaishooyie Sedekia olaiguanani le Yuda apik atua enkaina e Nebukadnesa olaiguanani le Babilon olaa olmang'atinta lenye apa neing'oru enkishui enye.” Ele rorei eirorie Yeremia oloiboni le Nkai Barak olayioni le Neria, ina kata apa pee eiger ninye kulo rorei tiatua embuku te limunoto e Yeremia, to lari liong'uan le Yehoiakim olayioni le Yosia, olaiguanani le Yuda ejo: “Nji ejo Olaitoriani, Enkai e Israel tialo iyie Barak: Itejo iyie, ‘Woi kewan ai, amu etoponayie Olaitoriani osina le mion ai, atalepori nanu too nkigorot aainei, nematum enkiyeng'iyeng.’ Nji iyie tiaaki ninye, nji ejo Olaitoriani: Ng'ura ina natesheta nanu naa kasulaa, ore ina natuuno nanu naa kadotu taa enkop pooki. Ing'oru doi iyie ntokitin pooki sapuki tialo kewan ino? Ming'oru iyie ninche; amu ng'ura, kayau nanu entorroni shumata pooki toki naishu naata osesen Olaitoriani ojo: kake ekaaisho nanu iyie enkishooroto o larrabal tiatua iwuejitin pooki neeba anaa nilo.” Ele rorei lo Laitoriani oewuo enetii Yeremia ilo oiboni le Nkai eipirta iloreren ejo. Ena naipirta Misiri, tenkaraki ina jore e Farao Neko, olaiguanani le Misiri, apa natii embata o lkeju le Farite te Karkemish naa ninye apa etimira Nebukadnesa olaiguanani le Babilon to lari liong'uan le Yehoiakim olayioni le Yosia, olaiguanani le Yuda: “Entobira ilong'oi kutiti o long'oi sapuki pee ingutakiki olarrabal! Entobira mbartan; entaked, intae ilakedok loo mbartan! Entoluaata iatata iruparen inyi, entisik iremeta inyi, enchopo nkilani inyi oo lgooitie! Kainyoo nanu pee atoduaa ina? Etureishote ninche neibelekenyate aashuko. Earitae ilmuran lenye aaiting'ie, neipirritio aaisik te nkisarrisar; menang ninche silig enkuretisho te pooki shoto! Olaitoriani ojo. Meidim ilo oten ailanyisho, nemeidim olmurrani aimisho te moikuape te mbata olkeju le Farite etarrorrote ninche nebatata. Kaing'ae ele, oilepu anaa olkeju le Nail, anaa ilkejek ooilugo nkariak? Eilepua Misiri anaa olkeju le Nail, anaa ilkejek ooilugo nkariak. Etejo ninye, kailepu nanu, kaiput nanu enkop, kainyal nanu nkanas o lelo oomanya. Enchom oleng nabartan, nikuetikuete, na garrin oo mbartan enchoo ilmurran epuo lelo tung'ana le Etiopia o Puti ooyiolo long'oi, o lelo tung'ana le Ludi arriyiak tenkibung'ata e nkauo. Ore idia olong naa enkolong o Laitoriani loo lororani, enkolong e lap, pee eitalaaki kewan too lmang'ati lenyena. Keinos olalem ometaraposhoyu, neok osarge ometirikayu. Amu Olaitoriani Enkai oo lororani oibung'ita olasar, teina kop e moikuape te mbata olkeju le Farite. Ilepa shomo Gilead niyau olchani, na selenkei e Misiri! Itooko iyie ilkeek kumok pesho; meetae enkishiunoto te iyie. Etoning'o iloreren nkuapi kumok enkurruna ino, neiputa enkop pooki olkiyioi linyi; amu etabatatakine olmurrani olikae murrani etabatatate tenebo.” Ele rorei eirorie Olaitoriani Yeremia oloiboni le Nkai oipirta elotunoto e Nebukadresa olaiguanani le Babilon pee eosh enkop e Misiri: “Mbalie tiatua Misiri, nintoning'oo tiatua Migdol; ntoning'oi tiatua Memfis o Tayahes; Tejo, ‘Ntasho tashololoyu nirretena, nirretena amu keman olalem amuat embata ino.’ Kainyoo pee eisika Enkai inyi napi Apis kainyoo pee eitu eitashe oloing'oni linyi? Enkaraki natanang'aka Olaitoriani ninye enkop: Etarrorre esiamo inyi nebatata, nejokino ninche oltung'ani o likae, ‘Tudumunye, ematushukoto iyiook aapuo enetii iltung'ana lang maate. O enkop apa natoinyeki iyiook, tenkaraki ilo alem leilo oibooki iyiook enkop.’ Mpoto enkarna e Farao olaiguanani le Misiri, ‘Olailepilepani oiturraa enkata.’ Ore anaa enaishu nanu, Olaiguanani ojo, laa ore enkarna enye naa Olaitoriani loo lororani, ore anaa Tabor tiatua ildoinyo, o anaa Karmel te mbata enaiposha, neijia etiu ilo olotu. Entobira ilolan linyi pee isikisiki, intae iloomanya Misiri! Amu keaku Memfis olmuaate o enkidaata, meetae olomanya. Enkashe sidai Misiri, kake eewuo olojong'ani torrono ooing'uaa moikuape shumata ninye. Ore ninye lelo sikarini lenyena ooigeroki ootii atua ninye netiu anaa ilasho ooitopiroki, ee, eibelekenyate ninche neisik tenebo, eitu ninche eitashe; amu eewuo enkolong enkidaata enye shumata ninche, enkata enkitamioto enye. Eitayu ninye oltoilo leijo olasurai elotu te ngolon; amu eisarisarutua ilmang'ati lenyena te ngolon, nepuonu aarare ninye too ntoluo, anaa loshi oouroo ilkeek. Kepuonu ninche aadung entim enye, Olaitoriani ojo. Hoo nemeikenayu amu eikumok ninche aalang olmaati; meeta ninche esiana. Ore ina tito e Misiri naa keitukurruni, keyauni ninye aapik atua enkaina oo ltung'ana ooing'uaa moikuape.” Etejo Olaitoriani loo lororani, Enkai e Israel, “Ng'ura kayau nanu enkitamioto shumata Amon le Sebes, o Farao, o Misiri, o nkaitin enyena o laiguanak lenyena, shumata Farao o lelo ooisilig ninye. Kayau nanu ninche apik atua enkaina e lelo ooing'oru enkishui enye, atua enkaina e Nebukadresa olaiguanani le Babilon o lkituaak lenyena. Ore te siadi nemanyi Misiri anaa apake, Olaitoriani ojo. Kake miureishoyu, iyie Yakobo osinka lai, aashu ing'aing'ai iyie Israel; amu ng'ura, kaaitajeu nanu aitung'uaa enelakua, ore eishoi ino naitung'uaa ina kop enye eyararoto. Keshukunye Yakobo netum enkitirring'a o enkiyeng'iyeng, nemeetae oloitore ninye. Miureishoyu, iyie Yakobo osinka lai, Olaitoriani ojo, amu atii nanu tenebo iyie. Kaiting'ie nanu katukul iloshon pooki lelo apa laaterewa nanu iyie. Kake ore iyie maaiting'ie tukul kaaitame nanu iyie te nkiririkinoto nasipa, nemeeta nanu nchere pee aatung'uayie mintamio.” Ele ororei lo Laitoriani apa oewuo enetii Yeremia oloiboni le Nkai eipirta Ilfilisti, eton eitu ear Farao Gasa ejo, “Nji ejo Olaitoriani: Ng'ura, keilepu nkariak naaing'uaa moikuape, naa keaku olkeju onang'ari; naa keiput enkop pooki o pooki nabore, enkanasa o lelo oomanya atua. Neyietu ilewa aaishir, ore pooki ng'ae omanya ina kop neyietu aishir to ltoilo loo loisotok loo mbartan enyena te nkuetata oo ngarrin enyena oo mbartan te manaroto oo nkejek oo ngarrin, ore iloomenye nkera nemeitoki aaibelekenya aaing'or nkera enye, etalepori nkaik enye. Tenkaraki ina olong nalotu aidaikie Ilfilisti pooki aiwuang'ie te Turo o Sidon pooki aretoni oing'uari amu emutita Olaitoriani Ilfilisti, ilo pisiai lo lmanie le nkare le Kafto. Eewuo osina kitok shumata Gasa, eidaa Ashkelon. Lopisiai o telekua le Anakim, eidung'udung'u akenya kewan to sina o anu? La alem lo Laitoriani! Kanu kenya intirring'a? Tipika kewan atua enchashur ino, iyeng'iyeng'ayu nintirring'a! Kaji eiko ninye teneitirring'a teneisho ninye Olaitoriani enkitanapata? Metaarare Ashkelon nearare olomanaa lenaiposha amu ine etegelua ninye.” Ena naipirta Moab. Nji ejo Olaitoriani loo lororani, Enkai e Israel: “Woi Nebo, amu eitomijoonoki Eitukurruaki Kiriataim, ewaki ninye; eitukurruaki osempewuet negili ninye; meekure ening'o Moab. Tiatua Heshbon eitobira ninche entorroni tenkaraki ninye: ‘Wou, maiwuang'ie iyiook ninye meitoki aaku olosho!’ Ore sii intae, lo tung'ana oomoda, keitigiri intae; kesujaa intae olalem. Etoning'e olkiyioi te Horonaim ‘Eyararoto o enkidaata sapuk!’ Eidaikieki Moab; ening'itoi olkiyioi tenelakua anaa Soar. Amu ore eilepaki iltung'ana Luhit neilepaki eishirita; amu ore edoiki Horonaim netoning'o ninche olkiyioi le nkidaata. Eisika! Entajeu ate! Kueta anaa oloitiko to lpurkel! Amu, ore enkaraki nisiliga intae engolon inyi o lchumat linyi, keyae sii ninche intae; naa kelo Kemosh atua eyararoto, tenebo ilapolosak lenyena o lkituaak lenyena. Kelotu olainyalani shumata pooki anasa, nemeetae enkanasa naimisho keidak oyarata, ore enkisiajiata neidaikieki anaa enairoro Olaitoriani. Enchoo Moab inaipuko, amu kelotu ninye tiaai, keaku nkanas enyena ilmuateni meetae olomanya atua ninche. Etediaki ilo oas esiaai Olaitoriani emereriana; netediaaki ilo oibooyo olalem lenye meibukoo osarge. “Eitirring'a apa Moab ebaiki kitisho enye eitirring'e ninye te mumit enye eitu epikuni te mpirbil aapik ae pirbil, neitu ninye elo atua eyararoto; neaku etii olnyorrie lenye atua ninye, neitu eibelekenya olng'usil lenye. “Neaku, ng'ura, kepuonu nkolong'i, Olaitoriani ojo, nairriwaki nanu ninye lelo oopiku pee epikuni ninye, neitoroki empirbil enye nebelibel mpirbili enyena aaitaa mbelibelat. Nekurru Moab tenkaraki kemosh, anaa apa enatukurrua enkaji e Israel tenkaraki Betel, osiligi lenye. Kaji intae inkoko pee ijojo, ‘Kira iyiook iloing'ok, iltung'ana ooidipa olarrabal?’ Ore olainyalani le Moab o nkanas enyena neilepua alotu, ore ilbarnot lenyena gelunot nedoyio aapuo enkidaaroto Olaiguanani ojo laa ore enkarna enye naa Olaitoriani loo lororani. Ore olkiyioi le Moab netataana ore osina lenye nekuetu. Enchiraki ninye, intae pooki oomanita ninye, o pooki ooyiolo enkarna enye; entejo, ‘Eng'ura etigile eng'udi nagol, ina ng'udi enkitoo.’ Wou tadou tung'uai enkitoo ino, niton te nkop e nkure iyie olomanya Dibon! Amu eewuo oloidaikie Moab pee kigilunore, neidaikie ninye isempewueti linono. Ntasho te mbata e nkoitoi ing'ura, iyie olomanya Areor! Nkilikuana ilo oisik oina naluaya; tejo, ‘Kaa nataase?’ Eitukurruaki Moab, amu etigilaki; teyietu ninchir! Tolikioi te mbata olkeju le Aron, nchere eirragita Moab aa olmuaate. “Eewuo enkiguana shumata ina kop naitoriori, shumata Holon, o Yahasa, o Mefaat, o Dibon, o Nebo, o Bet-diplataini, o Kiriataim, o Betagam, o Betmeon, o Keriot, o Bosra, o nkanas pooki enkop e Moab, naalakua o naataana. Etudung'oyioki esesekuan e Moab, ore enkaina enye netigilaki, Olaitoriani ojo. “Ntemera ninye, enkaraki nailepie ninye kewan aitorisioki Olaitoriani; neaku kelo Moab aiperipera tiatua irrugumat enyena, naa keaku sii entoki nakueniyieki. Aime entoki apa nakueniyieki Israel te iyie? Keinepuaki apa ninye tiatua ilapurrok, eji peyie aa ore ake pee iimaki nimipirripir elukunya? “Entung'uai nkanas nimanyimanya ndapidapo intae iloomanya Moab! Entotiu anaa nturkuluoni naaitobir nkajijik too mbat enkutuk e ngumoto. Kitoning'oitie iyiook olwuasa le Moab kewuasa ninye oleng tenkilashilash enye, olwuasa lenye, enkitokoos enye, o emusunoto oltau lenye. Ayiolo nanu enkilashilash enye, Olaitoriani ojo: ore enkitoo enye naa elejare, ore nkiaasin enyena naa elejare. Neaku kayietu nanu te nkaraki Moab; kaishir nanu te nkaraki Moab pooki; ore te nkaraki iltung'ana le Kiheres naishir nanu. Kaaishiraki nanu iyie oleng oleng alang enaishiraki Yaser, lo sabibu le Sibma! Elang ilng'osil linono enaiposha, nepuo aabaya Yaser, ore shumata ilng'anayio linono te nkata enkirowuaj etadoikio olainyalani oidaikie. Ewaki enchipai o eng'ida aaitung'uaa ina kop naisho oleng e Moab; aishoo nanu enaisho oo sabibu meishunye too nkironyeta; meetae hoo ng'ae oirony ninche too mbuakunot eng'ida; ore ina buakunoto neme embuakunoto e ng'ida. “Ening'itoi oltoilo le nkishirata e Heshbon o Eleale te Yahas, eitayutuo iltoiloishi lenye eing'uaa Saor ometabaiki Horonaim o Eglat-shelishia. Amu etomijoono sii nkariak e Nimrim. Naa kayau nanu meiting'o te Moab, Olaitoriani ojo, ilo oitayu olasar tiatua ewueji e shumata nepejoki enkorropil enkai enye. Neaku keishiraki oltau lai Moab anaa endule, neishir oltau lai anaa endule te nkaraki iltung'ana le Kiheres; neaku ore enkarsisisho apa nanoto ninche neidaayie. “Amu etabarnoki pooki lukunya nedung'i pooki munyei; netii nkaik pooki indung'ot ore mpolosi neishopokino ilkuniyiani to sina. Ore nchumat oo nkajijik e Moab o tiatua nkoitoi dapashi metii ae toki neme enkishirata, amu atigila nanu Moab anaa emasaai nemeetae oltung'ani oshilaa, Olaitoriani ojo. Eng'ura etigile! Eng'ura eyietu! Eibelekenye Moab te nkurruna! Neaku etaa Moab entoki nakueniyieki o enkuretisho te lelo pooki oomanita ninye.” Amu nji ejo Olaitoriani: “Ng'ura kelo obo tiaai aipirri anaa olkurragos, neisalaashaki inaipuko enyena shumata Moab; keyae nena anas neibung'i lelo sempewueti. Ore oltau loo loing'ok le Moab teina olong netiu anaa oltau le nkitok nasaisai; keidaikieki Moab nemeitoki aatii iltung'ana, enkaraki nailepie ninye kewan aitorisioki Olaitoriani. Etii enkuretisho, o engumoto o rreshet dukuya intae, iloomanya Moab! Olaitoriani ojo. Ore ilo oisik aing'uaa enkuretisho nedoiki atua engumoto, ore eked engumoto ailepu neibung orreshet. Amu kayau nanu kuna baa shumata Moab teilo ari le nkitamioto enye, Olaitoriani ojo. Tiatua oloip le Heshbon eitashe ilaisikak meeta engolon; amu eipang'a enkima alo eing'uaa Heshbon, enkiyupuyup naing'uaa enkaji e Sihon: einyala ninye enkomom e Moab, emaupe enkitoo o ruparen e lelo ayiok oonyor olarrabal. Oi iyie Moab! Eishieki iltung'ana le Kemosh; amu ewaki ilayiok linyi aaraya ore ntoyie inyi neyae atua eyararoto. Ore eyia kashuku nanu dupoto e Moab too nkolong'i naapuonu, Olaitoriani ojo.” Nji eikununo endung'okinoto e nkiguana e Moab. Ena ejo Olaitoriani tialo Ammon: “Aimeeta Israel ilayiok? Aimeeta ninye oloyooki ajung? Kainyoo naa pee ewa Milkom Gad, ore iltung'ana lenyena netamanya nkanas enyena? Neaku, ng'ura, kepuonu nkolong'i, Olaitoriani ojo, pee aisho nanu olkiyioi lo larrabal metoning'oyu te nkaraki Raba oo Lamoni; naa keaku olmuaate mijooni, ore nkang'itie enyena nepejori te nkima; netum taa Israel aawa lelo apa oowaita ninye, Olaitorianiojo. “Teyietu, iyie Heshbon, amu eitomijoonoki enkang e Ai! Nchira iyie, natito e Raba! Nchopoki kewan ilkuniyiani, nchira, nikuet alimana tiatua nkang'itie! Amu kelo Milko atua eyararoto, tenebo ilapolosak lenyena o lkituaak lenyena. Kainyoo iyie pee intokoos too yarat linono naselenkei nemeisiligayu, apa naisiliga olchumati lenye, ejo, ‘Kaing'ae laalo aarare nanu?’ Ng'ura kayau nanu enkuretisho shumata iyie, Olaitoriani loo lororani ojo, aitung'uaa lelo pooki likimanita iyie, naa kearari intae aaipang'ie, neilanyisho pooki ng'ae, nemeetae hoo ng'ae oiturrur lelo ooimin. “Kake ore te siadi nashuku nanu lelo tung'ana loo Lamoni apa ootarayioki, Olaitoriani ojo.” Ena bae etejo Olaitoriani naipirta Edom: “Aimeekure etii eng'eno atua Teman? Keidaayie enkiguana te lelo ang'eni? Keimisiloyie eng'eno enye? Elanyisho entushukoto, entotoni tiatua ewueji negut, intae iloomanya Dedan! Amu kayau nanu entaboi e Esau shumata ninye, teina kata naitameyie nanu ninye. Amaa tenepuonu ilaiturrurrok loo sabibu enitii aimeleku ninche kulikae ng'anayio? Amaa tenepuonu ilapurrok kewarie, aime ina ake nairirikino ninche einyal? Kake atooruo nanu Esau nkilani, metaa olmasipai, ataboluo nanu iwuejitin enyena neeisudoriyie, nemeekure eidim aisudori. Eidaikieki nkera enyena, o lalashera lenyena o lelatia enye; nemeekureeetae ninye. Tapala nena kera inono nemeeta menye, kaitopok nanu; nchoo maaisiliga inyi nkolia nanu.” Amu nji ejo Olaitoriani, “Amaa teneok, lelo lemeishiaakino teneok enkikompe enye enkitamioto ijo iyie ilo mintamio? Milo iyie mintamio, kake meeta nchere pee miok iyie. Amu ainosa nanu olmumai te kewan ai, Olaitoriani ojo, nchere keaku Basara, entoki naitureisho, enkurruna, olmuaate oldeket, ore nkanas enyena pooki neaku ilmuaateni anaake.” Atoning'o nanu ilomon supati ooing'uaa Olaitoriani, neirriwakaki olkilikuai atua nkuapi pooki: “Enturrurroto maate tenebo, nipuonunu aarare ninye, nidumakinono olarrabal!” Amu ng'ura, kaaitaa nanu iyie kiti tiatua iloreren, nikimenuni tiatua iltung'ana. Ore nena baa naaitureishore nikiteleja iyie, oilo wuasa lo ltau lino, iyie oton too lbaat le ndapidapoi oibung entopij oldoinyo. Ore hoo nipik enkaji ino shumata oleng anaa olkurragos, kaaitadou nanu iyie aitung'uaa ine, Olaitoriani ojo. “Keaku Edom entoki naitureisho; ore pooki ng'ae oim embata enye neiputukuny, te nkaraki ina nataraki ninye. Ore anaa enapa natanang'ayioki Sodom o Gomora, o nkanas naatashare, Olaitoriani ojo, meetae oltung'ani oitoki alo aton teine, meetae oltung'ani omany atua ninye. Ng'ura, ore anaa olng'atuny oilepu alotu aing'uaa entim e Yordan ajing'aki emuatata nagol oo nkerra, kaisho nanu ninche mekueta nabo kata aapuo aaing'uaa ninye, nagelaki nanu shumata ninye oloba anaa olagelu. Amu kaing'ae laanyaanyukie nanu? Kaing'ae laaipotu nanu? Kalo shekut loo ntare oidim aitasho te dukuya nanu? Neaku toning'o enkitobirata naitobira Olaitoriani tialo Edom o eyieunoto naipirakinye ninye lelo oomanya Teman: Keing'irtitori ninye lelo ooti le luaata aaya; ore iluaat enye neiputukuny teina. Ore to ltoilo le mbatatata enye neigirigiro enkop; ore oltoilo le nkishirata enye nening'i te naiposha nanyokie. Ng'ura kekedisho obo nekuet tiai anaa olkurragos, nelak inaipuko enyena agilunore Basara, ore oltau loo lmurran le Edom netiu akenya ina olong anaa oltau le nkitok te saisai enye.” Ena ejo Olaitoriani tialo Dameski: “Eitukurruaki Hamad o Arpad, amu etoning'o ninche mbaa torrok, etalepori ninche te nkuretisho, neilugo anaa enaiposha nemeidim aitirring'ayu. Etemene Dameski, eibelekenye ninye aisik, neterewa ninye olkirutoto; neibung ninye emion o sinaitin, laaijo ilenkitok nasaisai. Anaaijo ketung'uayioki enkanasa ning'oti, ina anasa e ng'ida! Neaku kepuo ilbarnot lenyena aabatata too lkurrot ootumoreki le nkanasa, ore isikarini lenyena pooki nemuti teina olong, Olaitoriani loo lororani ojo. Anaa kainok nanu enkima tiatua olpaashe, naa keidaikie lelo sempewueti le Benhadad.” Ena ejo Olaitoriani tialo Kedar o enkitoria te Hasar apa natesesekuana Nebukadnesa olaiguanani le Babilon: “Entudumunye, enchom entaarare Kedar! Endaikie iltung'ana le nkilepunoto enkirowuaj! Keyae akenya ilng'oborri lenye o luaat enye oo nkerrai, o ilkarash lenye o masaa enye pooki; nerei ntamesin enye aaitung'uaa ninche neishiraki iltung'ana ninche: ‘Enkuretisho te pooki shoto!’ Esika endapashari te nelakua, entobik tiatua enguton, intae iloomanya Hasor! Olaitoriani ojo. Amu ore Nebukadresa olaiguanani le Babilon, neitobira enkitobirata tialo intae neipirua ina nayieu tialo intae. Tudumunye, shomo taarare ina kop te leleki, etonita te seriani Olaitoriani ojo, ina nemeeta nchomito aashu isekenke, ina nabikito openy. Kerayae akenya ntamesin enye ore luaat enye oo nchoo neaku iyararot. Naidapashaki nanu pooki siuo lelo oodung ilpijat loo lpapit lenye nayau nanu osina lenye aimunye pooki shoto enye, Olaitoriani ojo. Keaku Hasor emanyisho oo mbariak, olmuaate loo ntarasi. Meetae oltung'ani olo aton tiatua ninye.” Ele rorei lo Laitoriani oewuo enetii Yeremia oloiboni le Nkai eipirta Elam, te nkiterunoto enkitoria e Sedekia olaiguanani le Yuda ejo: Nji ejo Olaitoriani loo lororani, “Ng'ura kagil nanu enkawuo e Elam, ine netii engolon e magilanisho enye; naa kayau nanu shumata Elam ilkutat pokira oong'uan eing'uaa imatuan ong'uan e shumata naa kaidapashaki nanu ninche lelo kutat pooki, nemeitoki atii olorere lemepuonu lelo ooterewa olkutati te Elam. Kaiture nanu Elam te dukuya ilmang'ati lenye, o te dukuya lelo ooing'oru enkishui enye; kayau nanu entorroni shumata ninche, o engoro ai napi, Olaitoriani ojo. Kairriwaa nanu olalem metusujaininche, ometaba anaa namut nanu ninche; naa kapik nanu olorika lai le nkitoo Elam, naidaikie olaiguanani lenye o lkituaak, Olaitoriani ojo. Kake ore too nkolong'i e siadi nashuku nanu lelo ooena le Elam, Olaitoriani ojo.” Ele rorei eiroro Olaitoriani neipirta Babilon eipirta enkop oo Lkaldayo eimunye Yeremia ilo oiboni le Nkai ejo: “Mbalie tiatua loreren nintudupaa, entipik enanka nintudupaa, emisudoo, naa entejo: ‘Ewaki Babilon neitukurruni enkai enye naji Bel, Etapalari Merodak eitukurruaki nkitanyaanyukot enyena ore nena kitanyaanyukot neme enkai neitapalari.’ “Amu moikuape eing'uaa enkop nalotu aarare ninye, naa ninye nalotu aitaa enkop enye mitil, nemeitoki hoo ng'ae amanya; keisik oltung'ani o eng'ues aailanyisho. “Ore kenya te nena olong'i o teina kata, Olaitoriani ojo, ore iltung'ana le Israel o ltung'ana le Yuda, nepuonu tenebo, neishir ninche epuonu neing'oru Olaitoriani Enkai enye. Neikilikuanu ninche enkoitoi nalo Sion, eibelekenya nkomomi enye aaing'or ina alo, ejo, ‘Wootu, matushulare iyiook Olaitoriani tiatua osotua loo ntarasi lemerikinishoi ae kata.’ “Etaa apa iltung'ana laainei ntare naaimina, etorikoitie ninche ilairritak lenye aaitapong'oo, aaibelekeny ninche too ldoinyo nepuo ninche oldoinyo o endoinyo, etorikine ninche eluaata enye. Ore pooki oonoto ninche neinosa ninche, netejo ilmang'ati lenye, Eitu iyiook kintarruoo; amu etaasa ninche eng'oki tialo Olaitoriani, laa ninye emanyisho enye nadede, Olaitoriani osiligi loo loo papaai lenye. “Esika entung'uai empolos e Babilon, nipuopuo aaipang te nkop oo Lkaldayo, nitiuu anaa iloroi te dukuya iluaat oo ntare. Amu ng'ura, kadumu nanu nayau metaarare Babilon olorora kitok loo loreren oogol, ooing'uaa enkop e moikuape; naa keitobirakino ninche olarrabal pee earare ninche; ore teine neyae ninye. Eikununo mbaa enye anaa olmurrani arriyia lemeshukunye ninye too nkaik naarook. Keaku kepuo Ikaldayo eyararoto; ore lelo pooki ooraya ninye netum pooki toki, Olaitoriani ojo. “Ore hoo ning'ida, ore hoo nirup kewan, intae ilararok le njung'ore ai, ore hoo nintigiran anaa enkashe too nkujit, ninchirishiri anaa oloing'oni le mbarta, keitukurruni ng'utunyi katukul, ore apa ina natoiwuo intae nesuli. Ee, keaku ninye e nesiadi too loreren, ong'ata natoyio naa olpurkel. Ore te nkaraki engoro o Laitoriani memanyi ninye, kake keaku olmuaate mijooni; ore pooki ng'ae ogiroo Babilon neiputukuny, neing'asia te nkaraki ilbaa lenyena pooki. “Entobirakinoto pee iararere Babilon aaman aamuat te pooki shoto, intae pooki ooriu enkawuo, entang'or ninye, mileku mbaa, amu etaasa ninye eng'oki tialo Olaitoriani. Tabuaaki ninye te pooki shoto, ekueta ninye etuurori nkang'itie enyena, etusulari isunta enyena, amu elap Olaitoriani ena; intalaku elap te ninye, ntaasa ninye anaa apa enataasa. Iwuang'ie te Babilon olaunoni, o ilo oibung olalem le nkisampuare te nkata enkisampuare; ore te nkaraki ilo alem lo loitorogonyani, keibelekenyakino pooki ng'ae iltung'ana lenye maate, neisikaki pooki ng'ae enkop enye makewan. “Enker narreshitoi Israel namirta ilng'atunyo etang'asa olaiguanani te Asiria ainos ninye, ore taata te siadi neguenyita Nebukadresa olaiguanani le Babilon iloik lenyena. Neaku, nji ejo Olaitoriani loo lororani, Enkai e Israel: Ng'ura, kayau nanu enkitamioto shumata olaiguanani o enkop enye, anaa apa enaitame nanu olaiguanani le Asiria. Kashukoki nanu Israel ewueji enye nedaare, naa kedaa ninye te nchumata e Karmel o tiatua Bashan, neiputakini ninye eyieunoto enye te nchumata oldoinyo le Efraim o tiatua Gilead. Ore akenya te nena olong'i o teina kata, Olaitoriani ojo, neing'oruni entorroni te Israel, nelai, neing'oruni ng'ok tiatua Yuda, nemetumi hoo nabo; amu kapalaki nanu lelo laleku metaa olpisiai. “Ilepa shomo taarare enkop e Merasaim, nilo aarare lelo oomanya Pekod, taara metuata, tusujai indaikie ninche katukul. Olaitoriani ojo, naa taasa nena pooki naaitanapa nanu iyie. Etii oltoilo lo Larrabal atua enkop, o enkidaata kitok! Kaji eikuna olnyuntu le nkop pooki pee etudung'oki aagil! Kaji eikuna pee etaa Babilon entoki naitureisho tiatua iloreren! Airragie apa nanu orreshet te nkaraki iyie, nikimbung'aki iyie Babilon, neitu apa iyie iyiolou; kinotoki apa iyie nikimbung'i, enkaraki nitekeshere iyie Olaitoriani. Etabolo Olaitoriani ewueji enye neshumieki imasaa o larrabal, neitayu imasaa o larrabal engoro enye napi, amu eeta Olaitoriani Enkai oo lororani esiaai naas tiatua enkop oo Lkaldayo. Tarasaki ninye te pooki shoto; tabolo ilchumat lenyena le ndaa; tasoto ninye anaa isotot le nkano, nindaikie ninye tukul; mincho eleku toki te ninye. Taara metuata ilmurran lenyena pooki oingok nchoo ninche edoyio aapuo ewueji neyieng'ishoreki. Oi ninche, amu eewuo enkolong enye, enkata enkitamioto enye. “Enining'o oltoilo lenye eisik te nkop e Babilon, pee eibalunye tiatua Sion elap o Laitoriani Enkai ang, elap te nkaraki enkaji enye. “Mpotu lelo oong'oroo mbaa meetu aarare Babilon lelo pooki ooriu enkawuo. Entamuat entaman ninye; emincho eluaya hoo obo. Entalaa ninye te risioroto oo nkiaasin enyena, entaasa ninye te risioroto e nena pooki naataasa ninye; amu eisarkionie ninye to lwuasa lenye Olaitoriani, ilo sinyati le Israel. Neaku kebatata ilbarnot lenyena too lkurrot ootumoreki le nkanasa, enye, ore isikarini lenye pooki neidaikieki teina olong, Olaitoriani ojo. “Ng'ura, kaarare nanu iyie, lo tawuasai, Olaitoriani Enkai oo lororani ojo; amu eetuo nkolong'i inono, e nkata naaitameyie nanu iyie. Kerrorro ilo wuasa nebatata, nemeetae olodumu ninye aitasheyie, naa kainok nanu enkima too nkanas enye naa kemut pooki toki namanita ninye. “Nji ejo Olaitoriani loo lororani: Eibookoki iltung'ana le Israel enkop o ltung'ana le Yuda tenebo ninche, ore lelo pooki apa ootaraitie ninche neibung'a ninche aakurraki, etanyaita ninche eisho ninche meshomo. Ore ilo olaku ninche naa kegol; Olaitoriani ninye enkarna enye. Kemitu ninye ninche tukul, pee etum aishoo enkop enkiyeng'iyeng, kake enyamali te lelo oomanya Babilon. Etii olalem shumata Lkaldayo, Olaitoriani ojo, o shumata lelo oomanya Babilon o shumata lkituaak lenyena o lang'eni lenyena! Etii olalem shumata lelo aitumusumusok, pee etum aataa ilmoda! Pee etumi aaidaikie ninche! Etii olalem shumata mbartan enyena o shumata ngarrin enyena oo mbartan o shumata lelo timito omon ootii atua ninye, pee etum aata ing'oruo! Etii olalem shumata ilchumat lenyena, pee etumi aawaita. Etii entoi shumata nkariak enyena pee etumi aaitoyio. Amu enkop oo nkitanyaanyukot oo nkaitin ninye netomodate ninche too nkitanyaanyukot neme inkaitin. “Neaku kemany ilouarak le ntim o lng'ojinia Babilon, nebik isidan tiatua ninye; meitoki aatii iltung'ana atua ninye ntarasi, nememanyi too lporori pooki. Amu ore apa enatotiuo pee enang'aa Enkai Sodom o Gomora o nkang'itie naatashare, Olaitoriani ojo, neijia etiu meitokini aata oltung'ani omanya ine nemeitokini aata oltung'ani obik teine. “Ng'ura, epuonu iltung'ana ooing'uaa enkalo e moikuape; erretena olosho magilani o laiguanak kumok too wuejitin neelakua enkop. Eibung'ita ninche enkawuo o empere; kegogong ninche nemeeta olng'ur. Ore oltoilo le lototo enye etiu anaa enaiposha nailugo; neked ninche mbartan, neishopo anaa oltung'ani lo larrabal pee kiarare iyie, natito e Babilon! Etoning'o Olaiguanani le Babilon oratioti lenye, neilepunye nkaik enyena; neiput ninye emion, emion naaijo ene nkitok nasaisai. “Ng'ura, ore anaa olng'atuny olotu te ntim e Yordan ajing'aki eluaata oo ntare, kaluam nanu ninche mekueta aaing'uaa Babilon; nagelu nanu meitoria ninye oloba anaa olagelu. Amu kaing'ae laanyaanyukie nanu? Kaing'ae laakesh nanu? Kalo shekut loo ntare oidim aitasho te dukuya nanu? Neaku toning'o enkitobirata naitobira Olaitoriani agilunore Babilon, o yieunot naaipirua ninye agilunore enkop oo Lkaldayo. Esipa ore lelo ooti le luaata enye naa keingirtitori aaya; esipa ore eluaata enye naa keiputukuny. Ore to ltoilo le yararoto e Babilon neigirigiro enkop, ore enkishirata enye nening'ori tiatua iloreren.” Nji ejo Olaitoriani: “Ng'ura, kaputu nanu enkiyang'et enkidaaroto metigilunore Babilon, negilunore lelo oomanya Kaldea; naa kairriwa Babilon ilasilak naa kepuo aasil ninye, naa keitorok ninche enkop enye, tenepuonu aarare ninye te pooki shoto teina olong e nyamali. Mincho ilo ong'orisho te nkauo eyietu enkawuo enye, nimincho ninye meitasho eeta imasaa enyena o larrabal mileku ilbarnot lenyena; indaikie tukul ilororani lenyena pooki. Kebatata ninche etaraki metuata te nkop oo Lkaldayo, netipikaki ilbaa too nkoitoi enyena naalala. Amu eitu eing'ua Israel o Yuda Enkai enye, Olaitoriani loo lororani; kake ore enkop oo Lkaldayo nebore enkitarruoroto tialo ilo Sinyati le Israel. “Esika entung'uai empolos e Babilon, enchoo pooki tung'ani eitajeu enkishui enye! Emincho edung'ori intae te nkitamioto enye amu enkata e lap o Laitoriani ena, enkitalakunoto naitalak ninye. Etiu apa Babilon anaa enkikompe e sahabu te nkaina o laitoriani, eitemer enkop pooki; etemerate iloreren te naisho enye oo sabibu, neaku eshomo nkuapi etarruoitie ilukuny. Etabatate nabo kata Babilon negila; teyietu nchiraki ninye! Ewaita olchani te nkaraki emion enye. Eidimayu pee eishiunyeki ninye. Anaata iyiook kinchiunye Babilon, kake eitu ninye eishiu tung'uai ninye, maape iyiook oltung'ani ake enkop enye makewan; amu ore endung'okinoto enye e nkiguana netabaikia shumata netudumuaki aailepie omeitabaikini nkatampo.” Etabawua enkata pee eilepie iyiook Olaitoriani enkilepioto ang, wou, maibalunye iyiook tiatua Sion esiaai o Laitoriani Enkai ang. “Eiyio nena baa! Entudumu ilong'oi! Etuputuo Olaitoriani oltau loo laiguanak le Amedi, amu ore eyieunoto enye tialo Babilon naa pee eidakie ninye, amu ina elap o laitoriani, elap te nkaraki enkaji enye. Entipik ilmonek isunta e Babilon; Entagolo ilarripok. Entipik ilarripok; Entobira ilnukat. Amu eitobira Olaitoriani neitabayie ina apa nairoro tialo lelo oomanya Babilon. Oi iyie oton too nkariak kumok, karsis too lchumat etabawua enkiting'oto ino, etudung'oki o lpiyayoil le nkishui ino. Einosa Olaitoriani loo lororani olmumai te kewan enye: Esipa kaaiput nanu iyie iltung'ana ooba anaa ilmaat, naa keilepie ninche embuakunoto e nkisulata nikisulie ninche iyie. Ilo ninye oitayio enkop te ngolon enye, laa ninye oitobira enkop te ng'eno enye nagut, ore te yiolounoto enye neitorioo shumata. Teneitayu oltoilo lenye netii enkikurrukur oo nkariak shumata, neisho ninye enkinuku metudumunye too nkiting'ot enkop. Eitayu ninye nkiwuang'at e nchan, neisho osiwuo metupuku aing'uaa ineeshumishoreki enyena. Kemoda pooki tung'ani nemeeta eng'eno; eitukurruaki pooki kunoni too nkitanyaanyukot enyena; amu ore nkitanyaanyukot enyena naa elejare, nemetii enkiyang'et atua ninche. Inepesho ninche, esiaai nemeeta tipat; ore te nkata enkitamioto enye nerruoyo ninche. Mitiu iyie anaa kulo, ilo laa erubata e Yakobo, amu ninye oipirua ntokitin pooki, ore Israel naa olosho le njung'ore enye; Olaitoriani loo lororani enkarna enye. Ira iyie enyuntu ai o emasaai o larrabal: te iyie nanu agil iloreren aitaa ingiligilat. Te iyie nanu aidaikie nkitoriat, negiligili imbartan o lakedok, negiligili ingarrin oo mbartan o larewak lenye. Near metuata ilewa o ngoruo nesesekuan iltung'ana moruak o looti; near metuata nkayiok o ntoyie. Nesesekuan ilairritak loo ntare o nkerrai enye, nesesekuan ilaturok loo nkurman o mbartan enye, nepurd ilaitoriak o lelo oota enkitoo. “Kalaaki nanu o lelo pooki oomanya atua Ilkaldayo te dukuya nkonyek inono teina torroni apa pooki nataasa ninche te Sion, Olaitoriani ojo. “Ng'ura kaarare nanu iyie ele otiu anaa oldoinyo oinyalisho, Olaitoriani ojo, ilo oidaikie enkop pooki; kaitorioo nanu enkaina ai pee aarare iyie, naa kaibeleleng'oo nanu too ndapidapo naaitaa nanu iyie oldoinyo otapejoki. Nemeitayuni te iyie osoit oitaae o lo lmairroto, nemeitayuni osoit lo lkitamyunoto, kake iaku iyie mijooni anaake Olaitoriani ojo. “Tuuno iyie enanka te nkop, toosho entarumpeta tiatua iloreren, ntobiraki nkuapi olarrabal tialo ninye, mpotoki ninye nkitoriat meetu aarare ninye, Ararat, o Mini, o Askenas; Entegelu olarikonile njore oarare ninye. Eyautu mbartan naaba anaa olmaati. Ntobiraki nkuapi olarrabal pee earare ninye lelo aiguanak le Mede, tenebo ilbalusuni lenye, o laretok lenye, o pooki kop natii abori enkitoria enye. Eikirikira enkop te mion, amu eitashe nkitobirat o Laitoriani ear Babilon, pee eitaa enkop e Babilon mitil, nememanya tung'ani. Etapala ilmurran le Babilon olarrabal, ebikito ninche too sempewueti lenye eishunye engolon enye etaa ninche nkituaak eibung'ita enkima imanyishoritin enye. Etigilate ntaloishin oo nchomito enye. Eipirri oltung'ani anang'are olikae nenang'are olkilikuai olikae pee eliki olaiguanani le Babilon nchere eibung'aki enkanasa enye te pooki shoto. Eibung'aki iwuejitin neelang'ieki too lkejek netapejoki iwuejitin neeisudoriyieki te nkima neiputukunyo isikarini lo larrabal. Amu nji ejo Olaitoriani loo lororani, Enkai e Israel: Etotiwuo entito e Babilon anaa osoit oiutuutishoreki tenakata naitunyoki, ore ake eyia naa tenkiti kata naa kelotu enkata e nkisampuare enye.” “Nebukadresa ilo aiguanani le Babilon laatumuta nanu, aatupurda ninye nanu, aaitaa ninye empirbil narok aatoijoie ninye anaa enkukuu. Eiputa ninye enkoshoke enye intokitin ainei e sikar, aaiturrayie ninye anotu. Metijing'a shumata Babilon ina kinyalata naainyalaki nanu o ltung'ana laainei.” Nchoo ilo omanya Sion ejo, “Metijing'a osarge lai shumata lelo oomanya Kaldayo. Nchoo Yerusalem ejo.” Neaku nji ejo Olaitoriani, “Ng'ura, kaamitu nanu naitalaku elap te nkaraki iyie. Kaitoi nanu enaiposha enye naitoi enkong'u enye e nkare, naa keaku Babilon osototi loo suut neaku emanyisho oo mbariak ewueji olkirutoto o enking'asia nememanya tung'ani. Keikurrukur ninche tenebo anaa ilng'atunyo; neishir anaa ilkuoon lo lng'atuny. Ore te nkure enye naitobiraki nanu ninche, naitemer nanu ninche o metishipata neirura ninche nkolong'i pooki nemeigil aainyototo, Olaitoriani ojo. Kaitadou nanu ninche anaa ilkuoon le kerra oopuoi aayieng, anaa ilmeregeshi o loroi. “Eng'ura eneikunayioki Babilon, ewaki ina naikasie enkop pooki eng'ura aajo etaa Babilon entoki naitureisho too loreren! Eilepaka enaiposha Babilon, eitemoyioki ninye te lelo apir le naiposha kumok. Etaa nkanas enyena entoki naitureisho enkop natoiwuo olpurkel, enkop nememanya hoo ng'ae nemeim hoo oltung'ani atua ninye. Naa kaitame nanu ina ai e Babilon naji Bel, naitayu tiatua enkutuk enye ina toki natoijoyie meitoki nkuapi aarukokino ninye etusulari esuntai e Babilon. “Empang'a enchom te mpolos enye, lo tung'ana laainei! Nchoo pooki tung'ani eitajeu enkishui enye teina goro napi o Laitoriani! Emimputukunyunyu nimiruturutu teilo marenke oning'o te nkop tenelotu olomoni to lari obo. Neitoki ake olomoni alotu to likae ari netii olarrabal enkop nearare oloitoreisho likae oitoreisho. “Neaku, ng'ura, kepuonu nkolong'i pee aitame nanu nkitanyaanyukot oo nkaitin e Babilon; neitukurruni enkop enye pooki, ore lelo tung'ana lenyena pooki ootaraki metuata te mpolos enye. Netum taa shumata o enkop, o pooki natii atua ninche, aatarany te ng'ida tenkaraki Babilon amu kelotu oloidaikie aarare ninche oing'uaa moikuape, Olaitoriani ojo. Meeta nchere mebatata Babilon tenkaraki lelo ootuata le Israel, amu tenkaraki Babilon etabatatate lelo loo nkuapi pooki ootuata. “Ore intae oo imishote to lalem, enchom, emintashe aaitirring'a! Entadamu Olaitoriani tenelakua enchoo Yerusalem elotu ndamunot inyi: ‘Eitukurruaki iyiook, amu kitoning'o embuaakinoto eimulumulayie esulare inkomomi ang amu eetuo iltung'ana loo loreren atua iwuejitin sinyat e nkaji o Laitoriani!’ “Neaku, ng'ura kepuonu nkolong'i Olaitoriani ojo, pee adung'oki nanu enkiguana nena kitanyaanyukot enyena naa ore tiatua enkop enye pooki neishir te mion lelo oata ilbaa. Ore hoo nerupa Babilon abaiki shumata ore hoo naa keitagol ailepie ine neshurie, ore ake eyia naa kepuonu ilainyalak ooidaikie ooing'uaa enatii nanu aapuonu enetii ninye, Olaitoriani ojo. Enining'o! Enkishirata naing'uaa Babilon! Oltoilo le nkidaata kitok eing'uaa enkop oo Lkaldayo! Amu emutita Olaitoriani Babilon neimisie ilo toilo lenye kitok. Ore ilopir lenye neikurrukur anaa ilopir loo nkariak kumok, ore embuakunoto oo ltoiloishi lenye neitabuakuni; amu eewuo olainyalani shumata ninye, shumata Babilon; ewaki ilmurran lenyena etigilaki nkai enyena aaitaa ngiligilat amu ore Olaitoriani naa Enkai e lap, esipa keitalaku ninye. Kaitemer nanu ilkituaak lenyena o lang'eni lenyena, ilbalusuni lenyena, ilarikok lenyena le njore, o lmurran lenyena; keirura ninche anaake nemeigil aainyototo, olaiguanani ojo, oji enkarna enye Olaitoriani loo lororani. Nji ejo Olaitoriani loo lororani: Ore ina suntai dapash e Babilon naa keitorisiokini enkop aaitadou, ore nena shomito enyena adoru naa kepeji te nkima. Eisiaaisho iltung'ana te mpesho ore nkuapi pooki naa te nkima ake eitanaur ate.” Ele rorei apa eitanapa Yeremia oloiboni le Nkai Seraia olayioni le Neria, olayioni le Mahaseia ina kata apa pee elo tenebo Sedekia olaiguanani le Yuda Babilon, to lari liong'uan le nkitoria enye. Olaitasheikinoni apa Seraia. Neiger apa Yeremia tiatua embuku ina torroni pooki nalotu shumata Babilon, kulo rorei pooki apa eigeroki ooipirta Babilon. Nejoki Yeremia Seraia: “Tinilotu kenya Babilon, toduaa nchere isuma iyie kulo rorei pooki, nijo iyie Olaitoriani, itejo inaaipirta ene wueji nchere iwuang'ie iyie ninye, pee meitoki amanya toki atua ninye, aa tung'ani aashu eng'ues, naa keaku olmuaate ntarasi. “Ore pee indip aisuma ena buku, teeniki ninye isoito ninang'aki empolos olkeju le Frati, nijo, ‘Nji eikoni Babilon aaimisie, pee meigil ae kata adumunye, tenkaraki ina torroni nayau nanu shumata ninye.’ ” Ene ebaiki irorei le Yeremia. Ilarin tikitam oo obo apa eeta Sedekia pee eiteru aitoreisho; neitoreisho ninye ilarin tomon oobo te Yerusalem. Ore apa enkarna e ng'otonye naa keji Hamutal entito e Yeremia le Libna. Neas apa ninye entorroni te dukuya Olaitoriani, te risioroto eina pooki nataasa Yehoiakim. Esipa ore tenkaraki engoro o Laitoriani eetuo mbaa aaikunakino neijia Yerusalem o Yuda neaku etanang'ayie ninye ninche aitung'uaa kewan. Netogolong'ua Sedekia apong'ore olaiguanani le Babilon. Ore to lari lioudo le nkitoria enye, to lapa le tomon, te nkolong e tomon olapa, nelotu Nebukadresa olaiguanani le Babilon tenebo enjore enye pooki agilunore Yerusalem, nemuat aman ninye neshetu esuntai tiauluo aaitaman enkang. Neaku etamuataki apa aaman ina anasa ometabaiki olari le tomon oobo le nkitoria o laiguanani Sedekia. Ore te nkolong e naaudo o lapa liong'uan nerasu olameyu tiatua ina anasa, nchere meetae apa endaa too ltung'ana leina kop. Neitayuni elusie te suntai eina anasa kewarie, ore iltung'ana pooki lo larrabal neipang aaisik teina anasa kewarie, aaim enkoitoi natii erishata oo sunta are te mbata enkurma o laiguanani. Ore ina kata nemanita ilkaldayo enkanasa. Neim lelo tung'ana le Sedekia enkalo e Araba. Kake etusujaitie enjore oo Lkaldayo olaiguanani, neinepu ninche Sedekia te nkisiajata e Yeriko; ore enjore enye pooki neidapasha aaing'uaa ninye. Neibung ninche olaiguanani, neyau ninye enetii olaiguanani le Babilon te Ribla tiatua enkop e Hamat, nedung'oki ilo aiguanani le Babilon ninye enkiguana. Near olaiguanani le Babilon ilayiok le Sedekia metuata te dukuya ninye neitoki sii aar metuata ilkituaak pooki le Yuda te Ribla. Nekurtu ninye nkonyek e Sedekia neen ninye too lpisia, neya olaiguanani le Babilon ninye Babilon, nepik ninye korokoroni ometabaiki enkolong enkeeya enye. Ore to lapa le imiet, te nkolong e tomon o lapa aa olari apa le tomon ooudo le nkitoria o laiguanani Nebukadresa olaiguanani le Babilon ore Nebusaradan ilo kitok le rripore apa oisiaai olaiguanani le Babilon, nejing Yerusalem. Nepejoo ninye enkaji o Laitoriani, o enkaji o laiguanani, o nkajijik pooki e Yerusalem; ore pooki aji kitok nepejoo ninye. Ore ina jore pooki oo Lkaldayo apa natii tenebo ilo kitok le rripore negil isunta pooki naamanita Yerusalem. Neya Nebusaradan ilo kitok le rripore araya embata oo ltung'ana aisinak o kulikae tung'ana pooki apa ootung'uayioki teina anasa o lelo apa ooisikakitia olaiguanani le Babilon, tenebo lelo aisiaayiak arriyiak. Kake etung'uayie apa Nebusaradan ilo kitok le rripore embata oo ltung'ana aisinak oleng pee eing'or isabibu neturisho. Ore apa ing'apeta o suyai naatii atua enkaji o Laitoriani o nkitotoneta e ilo moti le nkare lo suyai apa otii atua enkaji o Laitoriani, nebel Ilkaldayo aaitaa mbelibelat, nenap osuyai pooki aaya Babilon. Neya ninche imotioo, o nchempei o ntokitin o ltaa o ngirran, o masaa naapejieki enkorropil o masaa pooki osuyai apa naasishoreki te nkisiaayiare e nkaji e Nkai. Ewaki sii ngirran kutiti, o ntokitin nainokieki enkima, o ngirran sapuki o motio, o iketa oo ltaai o ntokitin naapejieki enkorropil o lbakulini ooitukuoreki. Ore apa ina nara sahabu neya ilo kitok le rripore anaa sahabu, ore enapa nara enkosholai, neya anaa enkosholai. Ore apa nena ng'apeta are, o ilo moti obo le nkare o lelo oing'ok tomon oare lo suyai apa otii abori ilo moti le nkare, o nena kitasheta apa naaitobira Solomon olaiguanani tenkaraki enkaji o Laitoriani, ore osuyai le kuna tokitin pooki nemeipimoyu te nkiroishi. Ore ing'apeta enkadoro eng'ape nabo naa ntemat tomon o isiet e nkaina ore ne emanaroto enye naa ntemat tomon oare, ore enkirrushai enye naa ntemat oo lkimojik oong'uan naa keudo empolos. Ore enchumata enye netii osuyai, ore enkadori e nchumata nabo naa ntemat imiet e nkaina, neikodo too lgululu oopurupurana, naa ilo suyai pooki netii enchumata enye aaman. Ore enkae ng'ape naaneijia eikununo, eeta ilgululu oopurupurana. Etii apa ilgululu oopurupurana ntomoni naaudo o ile mbat enye, ore lelo gululu oopurupurana naa iip nabo neikodokino te manarato. Neya ilo kitok le rripore Seraia ilo apolosani kitok, o Sefania ilo apolosani osujita ninye te nkitoo, o lelo arripok kituaak okuni le kishomi; ore te nkanasa neya olkitok apa laa ninye oitasheiki enjore, o ltung'ana oopishana le nkiguana o laiguanani, ooinepuaki tiatua enkanasa, o laigeroni lo lkitok le njore laa ninye apa oiger iltung'ana leina kop, o ltung'ana ntomoni ile loo ltung'ana leina kop ooinepuaki te mpolos eina anasa. Neya ninche Nebusaradan ilo kitok le rripore ayaki olaiguanani le Babilon te Ribla. Near olaiguanani le Babilon ninche metuata te Ribla tiatua enkop e Hamat. Neaku eibung'aki Yuda aaraya neitung'uari enkop enye. Ena esiana oo ltung'ana oowa Nebukadresa eyararoto: ore to lari liopishana, naa Ilyahudi nkalifuni uni o tikitam oo kuni. Ore to lari le tomon oisiet le Nebukadresa neya ninye araya aitung'uaa Yerusalem iltung'ana iip isiet o tomoni uni o are. Ore to lari le tikitam oo kuni le Nebukadresa, neya Nebusaradan ilo kitok le rripore araya Ilyahudi iip naapishana o artam o imiet; era esiana oo ltung'ana pooki nkalifuni ong'uan o iip ile. Naa ore to lari le tomoni uni oopishana le yararoto e Yohoiakim olaiguanani le Yuda, to lapa le tomon o are, te nkolong e tikitam o imiet o lapa, ore teilo ari otaarayie Efi-Merodak olaiguanani le Babilon, neitopok ninye Yehoiakim ilo aiguanani le Yuda, neitayu ninye aitung'uaa korokoroni; neirorie ninye te supatisho, neisho ninye olorika olang ilorikan loo laiguanak apa ootii tenebo ninye te Babilon. Neitayu Yehoiakim nena kilani enyena apa e korokoroni. Ore nkolong'i pooki te nkishui enye nedaa ninye anaake te misa o laiguanani; ore tialo nkolati enyena, keisho apa ninye olaiguanani enkishooroto anaake te risioroto eyieunoto enye, ometabaiki enkolong e keeya enye, anaa ake duoo neishu. Ebaa ena liyio natii enkanasa e Yerusalem, nabore apa iltung'ana! Ina apa naa ninye enkitok alang nkuapi! Ina apa naata enkitoo too loreren, netotiwuo taata anaa enkoliai. Eishir ninye te mion kewarie, etii ilkiyio ntakul enyena; ore tiatua lelo sanchan lenyena pooki meetae hoo obo oitagol ninye eibelekenyate ilchoreta lenyena pooki etaa ninche ilmang'ati lenyena. Eshomo Yuda eyararoto te nkaraki osina. O te nkaraki enkisiaayiare nagol; ebikito taata ninye tiatua iloreren; kake eitu etum ewueji neyeng'iyeng'are. Ore lelo oomirita ninye neineputua ninye tiatua ilo sina lenye. Ore nkoitoi naapuo Sion, naa olkiyioi, amu meetae oltung'ani olotu lelo siruai oogeluno, etoliyiote nchomito enyena pooki eig'orita ilapolosak lenyena te mion; neteyietayioki intoyie enyena aaya; ore ninye makewan neeta olosilisili te mion sapuk. Etaa ilmang'ati lenyena ooitoreisho. Etubula ilmang'ati lenyena enkaraki naishoo ninye Olaitoriani menoto osina, te nkaraki enkumoi oo nkitarruorrot eshomo nkera enyena eyararoto, ereuta ilmang'ati lenyena. Ore ina tito e Sion etung'uayie enkitoo pooki. Etotiutuo ilkituaak lenyena, anaa eng'ues natala enedaare. Eilanyisho ninche neeta engolon te dukuya ilo omirta ninye. Edamu Yerusalem nkolong'i enyena olosilisili o emion, mbaa pooki naatulusoitie, apa naa nkunenyena ebaiki moitie. Ina kata apa pee ejing iltung'ana lenyena, enkaina olmang'atinta, nemeetae hoo obo oretu ninye. Neikordod olmang'atinta ninye, nesurdaany teina batatata enye. Etaasa Yerusalem eng'oki torrono ore enkaraki ina etaa ninye olminong; ore apa pooki ooyanyit ninye netemena, amu etoduaa ninye emasipaisho enye; ee eishirita ninye makewan te mion, neibelekeny enkomom enye aing'or idia alo. Etii olduruk lenye olkila lenye eitu ninye edamu enkidaata enye ore enkaraki ina aikitok embatatata enye. Meeta ninye oltung'ani oitagol ninye. Olaitoriani, ing'ura osina lai, amu eisula olmang'atinta. Etalaa olmang'atinta nkaik enyena, aisalaashaki ntokitin enyena pooki e tipat ee, etoduaa ninye iloreren eibung ewueji enye sinyati, lelo apa litomitioko iyie ejing atua eumata ino. Eigorito iltung'ana lenyena pooki, eing'oru endaa, newalunye ntokitin enye e tipat endaa, ejo pee eitoki aagolu. “Ng'ura Olaitoriani, naa toduaa, amu aatemenaki nanu.” “Aime toki te intae pooki, lelo oogiroo? Eng'ura nidolidolo, tenaa keetae osina onyaanyukie osina lai oyawuaki shumata nanu, ilo laatipika Olaitoriani teina olong e ngoro enye napi. Eitadowuo ninye enkima te shumata; nereu apik iloik laainei neisalaashaki nkejek aainei orreshet; naaibelekeny ninye nanu, aatung'uayie ninye aidang'ita naiterre endama pooki. Eteenikiaki nkitarruorot aainei pooki enchata oo murto; te nkaina enye eteenaki aakurraki tenebo; nepiki ninche emurt ai, neisho ninye engolon ai meishunye; aaishooyie Olaitoriani apik nkaik e lelo lemaidim aitasheikinore. Eitaa Olaitoriani pesho iltung'ana laainei pooki magil, tiatua empolos ai; eipotuo ninye olturrur maatigilunore nanu. Pee epurdipurdi ilbarnot laainei; eitunyo Olaitoriani anaa enkironyet ina selenkei e Yuda. Ore te nkaraki kuna baa naishir nanu; neruko ilkiyio too nkonyek aainei, amu elakua olaaitagol nanu, ilo laaputu manyaaki apiju; eliyio nkera aainei, amu etimirishe olmang'atinta.” Etaalaa Sion nkaik enyena, aitorioo, kake meetae oloitagol ninye, eitanapishe Olaitoriani tialo Yakobo, nchere ore ilelatia enye pooki naa keaku ilmang'ati lenyena; etaa Yerusalem entoki naiduruk olminong tiatua ninche. “Olaitoriani ninye olasipani; amu atogolong'ua nanu apaash ororei lenye; kake entoning intae iloreren nidolidolo isinaitin laainei; ore ntoyie aainei o lbarnot laainei eshomo eyararoto. Aipotuo nanu isanchan laainei, kake aateleja ninche, ore ilapolosak laainei o lpayiani neidaa tiatua enkanasa ina kata eing'oru ninche endaa pee eitang'ejuk engolon enye. Ng'ura, Olaitoriani, amu atii nanu atua osina. Etii oltau lai atua enyamali, eibelekenye oltau lai tiatua nanu enkaraki nara apa nanu oltung'ani kiserut oleng, ore te nkoitoi nalala enkanasa neitayu olalem nkera okishin, ore tiatua aji netiu anaa keeya. Toning'o enkigoroto ai metii hoo obo laaitagol nanu etoning'o ilmang'ati laainei pooki enyamali ai etishipate nchere itaasa iyie ina. Iyau iyie ina olong apa nitolimuo, nincho ninche etiu anaa nanu. Nchoo nkiaasin enye pooki torrok epuonu dukuya iyie nintaas ninche anaa enikintaasa nanu te nkaraki nkitarruorot aainei pooki amu kumok nkishirat aainei e mion neiterria oltau lai.” Kebaa engoro Olaitoriani natipikie ninye ina tito e Sion abori enkatampoi! Etanang'ua ninye te keper anang'ie e nkop, ina sikar e Israel, eitu ninye edamu olorika loo nkejek enyena teina olong e ngoro enye. Eidaikie Olaitoriani metii olng'ur, emanyisho pooki e Yakobo ore te ngoro enye netigila ninye isempewueti pooki leina tito e Yuda. Etuuroko ninye ninche enkop asul enkitoria o laitoriak lenye. Etusulaka enkop te ngoro napi emagilanisho pooki e Israel; eiwuang'ie te ninche enkaina enye e tatene, te dukuya ilmang'ati lenye. Eyupuyupo ninye anaa olang'at le nkima tiatua Yakobo, ainos pooki wueji. Eteyietuo ninye enkawuo enye anaa olmang'atinta, ore te nkaina enye e tatene nesesekuanisho anaa olmang'atinta, netasesekuana ninye ntokitin pooki niking'idare, tiatua ilo ng'obor le ntito e Sion; etubukuo ninye engoro enye napi anaa enkima. Etotiwuo Olaitoriani anaa olmang'atinta, eidaikie ninye Israel, eidaikie ninye wuejitin enyena pooki enkitoo neitomijoon isempewueti lenyena netopona ninye tiatua ina tito e Yuda osina o enkishirata. Etigila ninye olpaashe lenye anaa olpaashe le nkurma, neitomijoon ewueji oo siruai oogeluno; eishie Olaitoriani tiatua Sion isiruai oogeluno o sabato ore te ngoro enye napi netemenayie ilaiguanak o lapolosak. Eiturrayie Olaitoriani olperere lo lasar lenye, etanya ewueji enye sinyati; etipika ninye nkaik oo lmang'ati isunta oo wuejitin enkitoo; nejing embuakunoto atua enkaji Olaitoriani, anaa te nkolong o sirua otegeluaki. Etootikio Olaitoriani aitomijoon isunta e ina tito e Sion; etudung'uo olpolosie lenye apik olkereri eitu ninye eibooyo enkaina enye pee meidaikie; eyawua ninye oloputukunyi o enkishirata nena sunta, neishunye engolon enye nabo kata. Eimiso nchomito enyena te nkop eidaikie ninye negil isekenke enyena; eshomo olaiguanani lenye o lkituaak lenyena atua iloreren; meekure etii enkitanapata, ore iloibonok lenyena eitu eitoki aatum enduaata naing'uaa Olaitoriani. Ore ilpayiani leina tito e Sion, netoni te nkop aagira; etipika ninche enterit ilukuny enye neishop ilkuniyiani; ore nena toyie e Yerusalem neirrug ilukuny enye aaitabaiki enkop. Etanaurate nkonyek aainei te nkishirata eeta oltau lai emion o sina, eiputa oltau lai emion te nkaraki enkidaata e ntito oo ltung'ana laainei enkaraki naiterre nkera o looyoni, tiatua nkoitoi naalala e nkanasa. Eishiraki ninche noo ng'otonye ejo, “Koree endaa enaisho oo sabibu?” Eiterriaa anaa iltung'ana oata ilbaa, too nkoitoi naalala e nkanasa, eishunye enkishui enye too lgooitie loo noo ng'otonye. Kaa nanu ajo tialo iyie, kainyoo aaitanyaanyukie iyie, na tito e Yerusalem? Kainyoo nanu aaitanyaanyukie te iyie pee aatum aitagolo, na tito e Sion? Amu elala anaa enaiposha enkidaata ino; kaing'ae likinchiunye iyie? Etoduaakita intae iloibonok linyi elejare o nduaat naapong'ori; eitu ninche eitodolu entorroni inyi pee errinyu intae te araroto, kake etodua te nkaraki intae olkilikuai le lejare opong'ori. Ore pooki ooim enkoitoi neosh nkaik te nkaraki intae; neing'asia neipirripir ilukuny enye te nkaraki entito e Yerusalem; nejo, “Kena anasa apa eji enaiting'ie esidano, eng'ida e nkop pooki?” Ore ilmang'ati linono neng'a nkutukie te nkaraki iyie neing'asia neony ilala, neishir aajo, kindaikie iyiook ninye! Ee, ena olong apa kitaanyutua iyiook; kinotito taata, kidolita taata! Etaasa Olaitoriani ina apa nayieu, eitabayie ena yieunoto enye; anaa apake enategelua te moitie, etigila metii olng'ur, eishoo ninye ilmang'ati meting'idata te nkaraki iyie, neitulusoo emagilanisho oo lmang'ati linyi. Tabuaku nchiraki Olaitoriani! Na tito e Sion! Nchoo ilkiyio linono eruko anaa olkeju dama o kewarie, miyeng'iyeng'a, miyeng'iyeng'ie nkonyek inono! Tuputunye nchira kewarie, te nkiterunoto e pooki kata e rripore! Mbukoi oltau lino anaa enkare te dukuya Olaitoriani! Ilepie nkaik inono te dukuya ninye, te nkaraki enkishui oo nkera inono, naaiterre to lameyu te nkiterunoto e pooki oitoi nalala e nkanasa. Ing'ura Olaitoriani nidol! Kaing'ae iyie intaasa ina? Keaku keinos nkituaak nkera enye naatoiutuo nena kera enye naamana naatii nkaik enye? Keaku keyieng'i olapolosani o loiboni tiatua ewueji sinyati o Laitoriani? Eirragaa too nkoitoi naalala e nkanasa ilooti o lbotoro; ore ntoyie aainei o lbarnot laainei netabatate to lalem; ore teina olong e ngoro ino nitasesekuana iyie ninche, nisesekuan metii olng'ur. Impotuo iyie ninche anaa iloopuonu osirua otegeluaki, neimu olkirutoto lai pooki shoto; naa ore teina olong e ngoro o Laitoriani meetae oloimishe arashu oloshomo eishu. Ore lelo apa latanapa naitubulu eidaikie olmang'atinta lai. Ara nanu oltung'ani otoduaa osina tiabori eng'udi e ngoro enye napi; aaterewa ninye naayau nanu enaimin metii hoo ewang'an; esipa nanu egilunore enkaina enye nkatitin pooki endama pooki. Aaitasasa nanu nemugut olchoni lo sesen lai negil iloik laainei; aatamuata ninye nanu naaimulumul te mion o sina. Aaishoo ninye nanu matobiko tiatua enaimin anaa olotua apa moitie. Aaitamana nanu esuntai pee maisik; naapik nanu olpisiai oiroishi. Ore hoo naipotishe naishiru eretoto neikeno ninye enkomon ai. Etunuka ninye inkoitoi aainei too soito, nelojiloj ninye inkoitoi aainei aboiboin. Etiu ninye te nanu anaa olng'arurumi orreshisho, etiu anaa olng'atuny oisudori airrag. Aaitapaasha ninye enkoitoi ai naaitaa nanu mpurdat aaitoliyio ninye nanu; eteyietuo ninye enkawuo enye naiul nanu aarie osuyiet too mbaa enyena. Eishaka ninye atua oltau lai mbaa e mootian enye. Ataa nanu entoki nakueniyieki too ltung'ana pooki, ataa osinkolio lenye endama pooki. Aaiputa ninye nanu emion naairuji nanu olkurto. Etarrarra ninye ilala laainei to sinyai naaimulumul nanu too nkuruon. Eitalamayioki oltau lai aarishie eseriani, aatorikinote nanu mbaa e nchipai. Neaku ajo nanu, “Eshomo enkitoo ai neshomo enkisiligunoto ai naing'uaa Olaitoriani.” Tadamu osina lai o emion ai o lkurto o lodua. Edamu oltau lai kuna anaake neirrugo oltau lai tiatua nanu. Kake tenadamu nanu kuna, natum osiligi. Meish ae kata enyorrata o Laitoriani nauno, meish ae kata olng'ur lenye. Ng'ejuko ninche anaake tadekenya, aikitok esupatisho enye. “Olaitoriani ninye erubata ai” neijia ejo oltau lai, “Ore enkaraki ina kaisilig nanu ninye.” Aisupat Olaitoriani te lelo oanyu ninye, te lelo ooing'oru ninye. Eisidai teneitirring'a oltung'ani aanyu enjeunoto o Laitoriani. Eisidai tenenap oltung'ani enchata e murt nanapishoreki te kitisho enye. Nchoo ninye egira aitirring'a openy teneiteleikini ninye; nchoo ninye eitabaiki enkutuk enye enterit, amu ebaiki netii osiligi. Nchoo ninye meishoo eseder enye ilo ooshisho; neiputi ninye imorot. Amu meiturraa Olaitoriani ninye ntarasi. Kake ore hoo neyau osina, ketum ninye olng'ur, te risioroto e sapuko e nyorrata enye nauno; amu meotiki ninye aitameisho arashu epik osina nkera e tung'ana. Apurdaki enkop too nkejek, lelo pooki ooena te nkop. Pee eibelekeny esipata oltung'ani te dukuya ilo otii shumata aisul, neibelekeny esipata too nkiguanat, menyorraa Olaitoriani nena. Kaing'ae oiro embae nebaya aaku, teneme Olaitoriani otonyorrayie? Kainyoo pee eilepilep iltung'ana ooishu, kainyoo pee eilepilep oltung'ani te nkitamioto oo ng'ok enyena? Maineneng'a nikijurru nkoitoi ang, nikirrinyokino Olaitoriani! Mailepie iltauja lang o nkaik ang, aailepakinye Enkai natii keper: “Kitapong'ori iyiook nikitogolong'utua, neitu iyie ipalaki iyiook. Kimputa iyie engoro oleng nimir iyiook nisesekuan metii olng'ur; imulumula iyie kewan te nkatampoi neaku meetae enkomono, naimu abau enitii. Ntaa iyie iyiook isuut o ntokitin e pesho, tiatua iltung'ana. Ore ilmang'ati lang pooki neng'a nkutukie te nkaraki iyiook. Eewuo olkirutoto o esulakinoto e ngumoto shumata iyiook, eliyio o enkidaata. Eruko ilkejek loo lkiyio too nkonyek aainei, te nkaraki enkidaata e ntito oo ltung'ana laainei. Keruko ilkiyio too nkonyek aainei nemeish, nemegem ae kata, ometaba anaa neing'or Olaitoriani te keper nedol asipu; aatipika nanu nkonyek aainei osina te nkaraki nena silan e nkanasa ai. Aatarreshoki nanu anaa emotonyi, lelo mang'ati laainei metii emporeet. Aasulaki ninche engumoto naanang too soito; naaimisie enkare endukuya ai; najo, ‘Aimina nanu.’ Aipoto nanu enkarna ino iyie Olaitoriani atii enguton e ngumoto. Ining iyie esayiata ai, ‘Minken iyie enkiok ino, te nkishirata ai te nkaraki eretoto!’ Itinyikua iyie ina kata peyie aaipot nanu iyie, itejo iyie, ‘Miureishoyu!’ Kitomituo iyie nanu Olaitoriani, itokordua iyie enkishui ai. Itoduaa iyie entorrono naaitaasaki nanu, Olaitoriani, tudung'okoki iyie nanu enkiguana. Itoduaa iyie elap enye pooki nena kitobirat enye pooki te nkaraki nanu. Itoning'o iyie imorot enye, Olaitoriani nena kitobirat enye pooki te nkaraki nanu. Ore nkirorot o ndamunot oo lmang'ati laainei, naa nanu egilunore endama pooki. Ng'ura ore etoni o eitashe, naa nanu ake eimaki eranyisho. Ntalaku iyie te ninche Olaitoriani, te risioroto e siaai oo nkaik enye. Ipik iyie iltauja lenye emodai; nelotu oldeket lino shumata ninche. Nisujaa iyie ninche te ngoro nindaikie ninche; aiwuang'ie tiabori keper ino, Olaitoriani.” Kainyoo pee meekure ewang sahabu. Kainyoo pee eibelekenye sahabu nasila! Ore lelo soito oosinya neirragaa aaidapasha te nkiterunoto e pooki oitoi nalala e nkanasa. Ore ilayiok le Sion le tipat anaa sahabu sidan nesila, kainyoo pee etotiutuo anaa motioo oo nkulupuok, esiaai oo nkaik o laitobirani! Ore ninye mbariak keisho ilki neitanak nkera kake ore entito oo ltung'ana laainei netagogong'o, etotiuo anaa isidan tiong'ota. Ore olng'ejep le nkerai nanakita, neibung enoret te nkure; neomonu nkera endaa, kake meetae oloisho ninche. Ore lelo oodaa te sikar, neidak too nkoitoi naalala e nkanasa; ore lelo apa ootamoo eishop nkilani pilei neirrag too lchalai loo nkuruon. Ore enkitamioto entito oo ltung'ana laainei naa eikitok, alang enkitamioto e sodom, apa natusulayioki nabo kata, nemeetae enkaina naiteleikiaki ninye. Ore apa ilkituaak lenyena newang aalang enturoto, neibor aalang kule; ore iseseni lenye nenyokioo aalang intoto sidain, ore enkishiaa enye newang anaa oltotoi oji safire. Netorokita taata nkomomi enye aalang nkuk, meekure eyiolounoyu too nkoitoi naalala e nkanasa; neibibiari iseseni lenye aarep iloik te saso netoito anaa nkeek. Enaikash apa lelo ootaraki to lalem, alang lelo ooya olameyu lelo oo temenate, ootomitiokoki ilng'anayio le nkop. Ore nkaik e nena kituaak naata olng'ur neitokitokie nkera enye maate; neitaa ninche endaa enye, teina kidaata e ntito oo ltung'ana laainei. Eitabayie Olaitoriani engoro enye etubukuo ninye engoro enye nairowua; neiyupuyup anaa enkima te Sion, nemut ilkitamanyunot lenyena. Eitu apa enyorraa ilaiguanak le nkop anaa hoo obo le lelo oomanya enkop, nchere keidim olmang'atinta atijing'u nchomito e Yerusalem. Ore ena naa te nkaraki ing'ok oo loibonok le Nkai o ntorrok oo lapolosak lenyena lelo ooibukoo te mpolos enye osarge le lelo lemeeta entioto. Nelimana ninche too nkoitoi naalala e nkanasa medolisho, eeta olduruk lo sarge. Nemeetae ninye oltung'ani oiseyie ilkilani lenye. Nejoki iltung'ana ninche, “Entalamari ilooiduruk Entalamari, Entalamari! Emiseyie!” Neaku etaa ninche ilaisikak oloolimana; nejo iltung'ana too nkuapi, “Meigil ae kata aatoni tenebo iyiook.” Olaitoriani makewan oidapasha ninche meigil ae kata ninye ashilaa ninche nemeigili aayanyitu ilapolosak nemeikiroteti ilpayiani. Eiliilaitie nkonyek ang eisiligu eretoto nemetii, ore te rripore ang, nikiaanyu olorere lemeidim aaitajeusho. Nerreshu iltung'ana iroruat ang, ometaa meekure kipuo aaim nkoitoi ang naalala, nenyiku enkiting'oto ang, neaku kuti nkolong'i ang, amu etabawua enkiting'oto ang. Keneneng lelo oomirita iyiook aalang ilmotonyi oopuo tiaai nemir ninche iyiook too ldoinyo neirrag ninche aarresh iyiook tiong'ota. Ore enkiyang'et oo nkumeishin ang, ilo otubukoko Olaitoriani eilata aput, neyae too nkumeishin enye ilo apa likitejo iyiook, “Tiabori oloip lenye kipuo aatoni tiatua iloreren.” Ting'idayu nishipa na tito e Edom, ina namanya enkop e Usi, ore sii iyie eikiimarieki enkikompe; ilo iyie amera ninturraa ilkilani niaaku enemeishopo. Ore enkitamioto e ng'oki ino, na tito e Sion neitabayioki, meekure ninye kingil aibok te eyararoto ae kata, kake ore eng'oki ino naa tito e Edom, ninye eitamei, kebolu ninye ing'ok inono. Tadamu Olaitoriani ena bae natadoikio iyiook; ing'ura nidol enkurruna ang. Ore enjung'ore ang neibelekenyakaki iltung'ana leeiking'a, ore nkang'itie ang neaku inoo ltung'ana leeiking'a. Kitaa iyiook okishin, lemeeta loomenye etiu noo yieyio anaa nkolia. Meeta nchere mikilak enkare nikiok ore ilkeek likitum aainok keinyiang'uni. Eturrumoyioki iyiook kiaata enchata oo murto nanapishoreki too murto. Kinaurate iyiook neitu eishori iyiook enkiyeng'iyeng. Kisiaayia iyiook Misiri o Asiria, pee kitum endaa naraposh iyiook. Etaasa apa loopapa eng'oki, nemeekure eetae; kinapita iyiook entorroni enye. Eitoreita iyiook irrindiki; nemeetae olokordu iyiook aitayu too nkaik enye. Kipik iyiook enkishui ang batisho pee kitum endaa, te nkaraki ilo alem tiong'ota. Eirowuaja iseseni lang anaa olkokuet, te nkaraki enkolong napejisho o lameyu. Ebatata nkituaak te Sion, o selenken too nkang'itie e Yuda. Neiki ilkituaak aaisiong too nkaik enye; nemeyanyiti ilpayiani kituaak. Nearakini ilbarnot meidong'isho te wueji neidong'ishoreki neitaari inkayiok ilolan loo lkeek. Eisha ntonat oo lpayiani too leng'ot neisha eranyata o sinkolio too lbarnot. Eisha eng'ida oo ltauja lang, neibelekenye eranyata ang osinkolio aaku enkishirata. Eiwuang'ieki enkopiyia e nkitoo te ndukuya ang; oi iyiook, amu kitaasa iyiook eng'oki! Enkaraki ena pee etamuoita iltauja lang, enkaraki ena pee eiliilaitie nkonyek ang, amu ore ilo doinyo le Sion otoliyie netamanya mbariak. Kake ore iyie, Olaitoriani, ntoreisho ntarasi; ebikoo olorika lino le nkitoo too ishoritin pooki. Kainyoo iyie pee midamu iyiook ntarasi, kainyoo iyie pee inturraa iyiook te nkata naado? Torrinyoki iyiook kewan ino Olaitoriani, pee kitum aatorrinyunye! Ntang'ejuko nkolong'i ang metotiwuo anaa apa! Anaa itanya iyiook tukul. Itagorokine doi iyiook tukul? Ore to lari le tomoni uni, to lapa liong'uan, te nkolong e miet, o lapa, ina kata atii tenebo yarunot te mbata olkeju le Keba, nebolo keper nadol induaat e Nkai. Ore te nkolong e imiet olapa (naa olari le imiet le yararoto olaiguanani Yehoiakin), nelotu ororei lo Laitoriani enetii Esekiel ilo apolosani, olayioni le Busi teina kop oo Ilkaldayo te mbata olkeju le Keba; netii apa enkaina o Laitoriani shumata enye teine. Ore aing'orisho, ng'ura, nadol osiwuo le nchan olotu aing'uaa enkalo e moikuape, o enkatampoi sapuk, o enkimerlel namanita ninye, olng'ejepa le nkima ooidikidiko, ore te mpolos enkima, netiu anaa entoki enkimerlel o suyai. Ore te mpolos enye nepuku enkitanyaanyukoto oo ng'uesi ong'uan naaishu. Naa nji apa eikununo eliooto enye: eeta apa pooki enyaanyukie e tung'ana, nemeeta ake nabo nemeeta nkomomi ong'uan, neeta ake nabo te ninche inaipuko ong'uan. Ore inkejek enye naa keitoriori, ore ndapi oo nkejek enye netiu anaa loisotok le nkeju olashe neitintil ninche anaa osuyiai otisikaki oleng. Ore tiabori oo naipuko enye too matuan enye pokira ong'uan neeta nkaik oo ltung'ana. Neeta pokira nena ong'uan inkomomi enye o naipuko enye eikununo nji: Eibung'a nena aipuko, nepuo pooki dukuya, meibelekenya epuo. Ore enyaanyukie oo nkomomi enye, eeta ake nabo te ninche enkomom o ltung'ani te dukuya; ore pokira ong'uan neeta enkomom olng'atuny te matua e tatene, ore pokira ong'uan neeta enkomom olkitengte nkalo e kedienye, neeta pokira ong'uan enkomom olkurragos tesiadi. Neijia apa etiu nkomomi enye. Ore inaipuko enye nelak aaitorioo meeta ake eng'ues nemeeta inaipuko are, nemeeta ake enemeibung'ita enaipukoi enkae, nenunua are too seseni lenye. Nelo ake pooki aitoriori dukuya, ore pooki wueji nelo enkiyang'et, nepuo sii ninche, nemeibelekenya epuo. Ore te mpolos e nena ng'uesi naaishu netii apa entoki natiu anaa nkuk naaishu enkima, netiu anaa iltaai oopuoopuo tiatua nena ng'uesi naaishu; naa kewang apa enkima oleng, nepuku tiatua ina kima enkiwuang'ata. Ore nena ng'uesi naaishu neipirri dukuya netiu, anaa enkiwuang'ata. Ore peyie aing'or nena ng'uesi naaishu, nadol enkeju e ng'arri te nkoriong enkop te mbata e nena ng'uesi naaishu, meeta ake eng'ues nemeitoriokino enkeju nabo te pokira ong'uan. Ore anaa enatiu empukunoto e nena kejek o enkitobirata enye: etiu empukunoto enye anaa enkitiil osoit barrikoi oji Krisolit; neeta pokira oong'uan empukunoto nabo; ore enkitobirata enye netiu apa anaa enkeju eng'arri natii atua enkae keju eng'arri. Ore ina kata napuo, neim ake enkalo pooki te nena aloli enye pokira ong'uan eitu eibelekenya epuo. Ore nena kejek eng'arri pokira ong'uan neeta inkimanaa neeta enchata iltidii ooibung enkeju eng'arri inkejek, nebore enkamanaa oo nkejek eng'arri nkonyek naamanita too nkaloli pooki. Ore pee epuo nena ng'uesi naaishu, neiriamariyie nkejek ninche aashep; ore pee edumunye ng'uesi naaishu te nkop, nedumunye sii nena kejek. Ore pooki wueji nelo enkiyang'et nepuo sii ninche, nedumunye nena kejek tenebo ninche eshepita, amu etii enkiyang'et e nena ng'uesi naaishu nena kejek. Ore pee epuo nena nepuo sii kuna; ore pee eitashe nekua, neitashe sii kuna; ore pee edumunye nekua aing'uaa enkop, nedumunye nena kejek te nebo ninche; amu etii apa enkiyang'et e nena ng'uesi naaishu atua nena kejek oo ng'arrin. Ore te shumata e nena lukuny e nena ng'uesi naaishu netii entoki nanyaanyukie oloing'ang'e le keper, newang oleng anaa soito oibor oleng, neisalaashakino shumata ilukuny enye. Ore tiabori oloing'ang'e neitoriori inaipuko enye aitoriokino dukuya, neipirare enkae enkae; nemeeta ake eng'ues nemeeta inaipuko are naitoipito osesen. Ore epuoito naning oltoilo loo naipuko enye, netiu anaa oltoilo loo nkariak kumok, netiu anaa endarata Olmagilani, oltoilo lo larrabal anaa oltoilo lo lorora; ore ake peyie eitashe inaipuko enye; nelotu oltoilo oing'uaa oloing'ang'e le keper, oimua shumata lukuny enye; ore pee eitashe aaitirring'a neshuk inaipuko enye. Ore te shumata oloing'ang'e te nchumata oo lukuny enye netii enkitanyaanyukoto olorika le nkitoo, nenyaanyukie osoit pus oji Safi; ore entopij enye netonie enkitanyaanyukoto olorika le nkitoo netii enkitanyaanyukoto naa ijo oltung'ani. Ore ebaiki empolos enye neilep, nadol enkimerlel naikununo anaa osuyai otisikaki, netiu anaa enkima naikenoro te pooki alole; ore ebaiki empolos enye nedoyio nadol etiu anaa enkitanyaanyukoto enkima netii ewang'an namanita ninye. Etiu anaa eliooto olokirrai too nkatampo teina olong enchan neijia apa etiu eliooto e wang'an sapuk namanita ninye. Neijia apa etiu elioto enkitanyaanyukoto enkitoo o Laitoriani. Ore peyie adol ninye, nabatata te nkomom ai naning oltoilo le ilo oirorita. Naajoki ninye nanu, “Enkerai e tung'ani, inyo ntasho too nkejek inono, amu kaairorie nanu iyie.” Ore peyie aairorie nanu, naajing Enkiyang'et Sinyati atua nanu naaitasheyie maitasho; naning ninye aairorie nanu. Naajoki ninye nanu, “Enkerai e tung'ani, ekaairriwaa iyie airriwaki iltung'ana loo Siraeli, ilo orere ogolong'u; laatogolong'akita nanu; ore ninche o loo menye netaasa eng'oki te nanu o ena olong. Ore sii kulo tung'ana nemeeta enkanyit negolong'u sii: Ekaairriwaa iyie shomo enetii ninche; nijoki ninche, ‘Inji ejo Olaitoriani Enkai.’ Naa tenaa keinining'u arashu eany ening (amu enkaji kiserut ninche) ekeyiolou aajo etii oshi oloiboni atua ninche. “Ore iyie, enkerai e tung'ani, miureyu ninche, nimiureyu irorei lenye, hoo netii ilaimerrerruak o lkiku tenebo iyie nitonie nkulupani, miureyu irorei lenye, arashu kinture enking'odia enye, amu enkaji kiserut ninche. Naa ilo iyie airo irorei laainei airorie ninche, o tenaa keinining'u arashu eany einining amu enkaji ninche nataa kiserut. “Kake ore iyie, enkerai e tung'ani, ininingu enaajoki iyie; miaku iyie kiserut anaa ina aji kiserut tabolo enkutuk ino inosa ina naaisho iyie.” Ore peyie aing'or, ng'ura, aaitoriokoki nanu enkaina, naa ng'ura, etii olpiyayati le mbuku oigero ina aina; neisalaash ninye te dukuya nanu; nesira inkaloli pokira e ilo piyayati le mbuku, nesira teine irorei le nkishirata o emion o nkigorot. Naajoki ninye nanu, “Enkerai e tung'ani, inosa ina nikinchooki iyie; inosa ele piyayati le mbuku, nilo airorie enkaji e Israel.” Metaa atabolo nanu enkutuk ai, naaisho ninye nanu olpiyayati le mbuku mainosa. Naajoki ninye nanu, “Enkerai e tung'ani, inosa ele piyayati le mbuku laaisho iyie nimput enkoshoke ino ninye.” Metaa ainosa ninye; naa ore etii enkutuk nemelok anaa olkenkei le naisho. Naajoki ninye nanu, “Enkerai e tung'ani, shomo, tabaiki enkaji e Israel, niro too rorei laainei airorie ninche. Amu eitu kirriwari iyie aairriwaki iltung'ana le likae ng'ejep o enkutuk nagol enkiroroto, kake enkaji e Israel neme iloreren kumok loo lng'ejepa oopaashaa o enkutuk nagol, ilaa mining'u irorei lenye. Esipa tenaairriwaki iyie kulo, naa aikindim aatoning'u iyie. Kake ore enkaji e Israel nimikinining iyie; amu meyieu ninche naaning nanu amu ore enkaji pooki e Israel naa inoo logol lukuny negolong'u iltauja. Ing'ura ajo aitaa elukunya ino enagol anaa ilukuny enye, naitagol elukunya ino anaa ilukuny enye. Anaa enagol osoit oji almasi alang isoito aitaa elukunya ino neijia; miureyu ninche tukul, nimimputukuny too nking'urat enye, amu enkaji kiserut ninche.” Aanyaaka ake sii ajoki nanu, “Enkerai e tung'ani, ore irorei laainei pooki lelo laaliki iyie tang'amai toltau lino nining'u too nkiyiaa inono. Nilo enetii iltung'ana linono ootii eararoto nijoki ninche, inji ejo Olaitoriani Enkai; toliki ninche ening o meyieu nening.” Ina peyie aadumu enkiyang'et nanu ailepie, ore edumunye enkitoo o Laitoriani te wueji enye, naning te siadi nanu oltoilo sapuk le nkirikirata enkop. Naa oltoilo loo naipuko e nena ng'uesi naaishu eibung'a maate, naning sii nena kejek oo ngarrin naashepita te mbata enye, nening'oyu anaa olokirikiri sapuk le nkop. Naadumu ina Kiyang'et nanu ailepie naaya, nalo te mion enkirowuaj oltau lai, eiroishi ina aina te shumata nanu; nalotu enetii lelo yarunot te Telabib, lelo ootii enkiyopata olkeju le Keba. Naton teine atunume tenebo ninche nkolong'i naapishana. Ore peyie eishunye inkolong'i naapishana, nelotu ororei lo Laitoriani enatii nejo: “Enkerai e tung'ani, aaitaa iyie olarriponi te nkaji e Israel; ore ake pooki kata nining ororei eing'uaa enkutuk ai, nincho ninche enkikoo naing'uaa enatii. Tenajoki ilo torrono, ‘Meeta nchere aimiye,’ neitu inkok ninye aliki, neitu iro aikok ilo torrono metung'uai enkoitoi enye torrono, peyie etum aitajeu enkishui enye, keye oltung'ani torrono too ntorrok enyena; kake ore osarge lenye naa kaing'oru te nkaina ino. Kake tininkok ilo torrono, nemeibelekenya ninye aing'uaa ntorrok enyena, arashu too nkoitoi enyena, naa keye ninye too ng'ok enyena; kake intajewuo iyie enkishui ino. “Ore ake sii, teneibelekenya oltung'ani supat aing'uaa esupatisho enye neas intorrok, napik entoki narror dukuya enye, naa keye ninye; amu eitu inkok iyie ninye, keye ninye too ng'ok enyena, ore isiaaitin enyena sidain nena naataasa nemeitokini aadamu; kake ore osarge lenye nayieu too nkaik inono. Kake ore ake eyia, tininkok ilo tung'ani supat peyie meas eng'oki, neitu eas eng'oki, nemeeta nchere meton eishu, amu etang'amayie ninye enkikoo; nintajeu iyie enkishui ino.” Netii apa enkaina Olaitoriani shumata nanu; naajoki nanu, “Tudumunye shomo enkisiajata peyie aatum airorie teine.” Metaa atudumunye nalo enkisiajata; naa ng'ura, neitashe enkitoo o Laitoriani teine, neikununo anaa enkitoo apa natoduaa te nkiyopata olkeju le Keba; nabatata te nkomom ai. Kake aatijing'a Enkiyang'et nanu, naadumu aitasheyie too nkejek; naairorie nanu naajoki, “Shomo inkenoi kewan tiatua enkaji ino. Ore iyie nakerai e tung'ani, ing'ura eikipiki iyie inkeenta, naa aikienieki iyie metaa mintoki alo tenebo iltung'ana; naa kaiterep olng'ejep lino enoret ino, metaa iaku olemeidim airoro aikoo ninche; amu enkaji kiserut ninche. Kake tenaairorie iyie, naabol iyie enkutuk, naa aijoki iyie ninche, ‘Inji ejo Olaitoriani Enkai;’ ore ilo oning, inchoo ening; ore ilo oany ening, inchoo eany amu enkaji kiserut ninche. “Ore iyie, Nakerai e tung'ani, iwa osoit nirragie te dukuya iyie, nisir ilkererin te ilo soit oitodolu enkanasa e Yerusalem; nipik emanata amuat Yerusalem, nishetu esuntai aitaman, nituru olong'elu aitaman ninye, intasheyie sii ilng'oborri te mbata, niun ilkedeta aitaman ninye. Niya esaani e sekenkei nipik ninye aitaa esuntai e sekenkei te rishata ino o enkanasa; nintorioki enkomom ino ninye, nincho metaa enatii ewueji osempewuet, nirrumoki osempewuet ninye. Keaku ena olmonekie le nkaji e Israel. “Nirrag iyie te nkalo ino e kedienye, naa kairragie enkitamioto enkaji e Israel te shumata ino; amu ore esiana oo nkolong'i nirrag apetaa, naa inapaki ninche enkitamioto enye. Amu kaaisho nanu iyie nkolong'i esiana oo nkolong'i iip uni o ntomoni naaudo, naarisiore esiana oo larin lenkitamioto enye; metaa erishata naba neijia imbung ina kitamioto enkaji e Israel. Ore peyie indip ena, nintoki airrag eniare, kake ore te nkalo ino e tatene, ninap enkitamioto enkaji e Yuda; inkolong'i artam aatipika ena, enkolong ake to lari pooki. “Naa intorioki enkomom ino ina manata namuati Yerusalem, metii toki enkaina ino; nimbonoki ina anasa. Naa ng'ura, ekaapik iyie inkeenta, metaa mimbelekenyakino ae alo, ometaba anaa niishu nkolong'i inono nimanie ina anasa. “Ore iyie, iwa enkano o shairi, mpoosho o lpompo, o loikempe, o enkurma napuyiapui nipik nena pooki eng'irra nabo, nintobiru emukate te ninche. Ore te siadi e nena olong'i nirrag te murte ino; inkolong'i iip uni o ntomoni naaudo ina mukate. Naa ore endaa ninya naa keineneng'i, inchekelini tikitam te nkolong; ninya enkata nabo te nkolong. Neaku iok enkare te ntemata ematua e ile e hini; niok kata nabo te nkolong. Naa inya ninye anaa emukate e shairi, naa ipeju ninye te nkima nainokieki nkik oo ltung'ana edolita pooki ng'ae.” Nejo Olaitoriani, “Neija eiko iltung'ana loo Siraeli tenenya emukate enye eeta oloirerio, tiatua iloreren laitarasaki ninche.” Ina peyie ajo, “Aha, Olaitoriani Enkai! Eitu aekata aisarkionie kewan; ina kata eton ara olbarnoti o matubulu taata eitu aekata anya entoki natua openy arashu enataara ing'uesi e ntim, arashu etijing'a enkutuk ai endaa torrono.” Ina peyie aajoki ninye nanu, “Ing'ura ekaaisho iyie ilboro le modiei e nkiteng te rishata oonkik o ltung'ani, neaku ninye ipejunye emukate ino.” Aanyaaka ake sii ajoki, “Enkerai e tung'ani ing'ura ajo kadung'oo ine neimu emukate e Yerusalem; ee kenya ninche imukateni naaineneng'i te ntemet naineneng'ishoreki te nkuretisho; naa keok enkare naturuni tenking'ashing'ash sapuk. Ekaas ena peyie meitoki aatum emukate o enkare, neing'ura maate te nkidang'ata sapuk, neibiitiari tiatua enkitamioto enye. “Ore iyie, enkerai e tung'ani, iwa olalem opi; intaa olmurunya libarnie kewan, nibarnie elukunya ino tenebo olmunyei lino; niya intemeta naaineneng'ishoreki nior lelo papit. Ore ematua e nabo te uni nipejoo te nkima te mpolos e nkanasa, ore peyie eishunye inkolong'i emanata e nkanasa; ore e matua e nabo te uni niya adung'udung to lalem aitaman enkanasa; ore ematua nabo te uni nindapashaki enkijape, naa kashurtu olalem asujaa ninche. Niya te kulo enkiti siana oo lpapit aeniki olcholoi lo lkila lino. Nintoki aitayu ilkuti te kulo, nipik ninche enkima, nipejoo ninche te nkima; ore te ine nelotu enkima adoiki atua ina aji pooki e Israel.” Inji ejo Olaitoriani Enkai: Ore ena Yerusalem; aitasheyie ninye te mpolos oo loreren, netii nkuapi naamanita ninye. Neewuo ninye te ntorroni enkiseroto agilunore inkitanapat aainei alang iloreren, negilunore ninye inkitanapat aainei alang nkuapi naamanita ninye, te anyata natanyaita inkitanapat aainei neitu epuoyie nkikoot aainei. Metaa inji ejo Olaitoriani Enkai: Ore amu itarruoitie aalang iloreren oomanita intae neitu ipuopuo too nkiguanat aainei, anaa imbung'ubung'u nkikoot aainei, niasiasa enaas nkitanapat ooloreren oomanita intae; neaku inji ejo Olaitoriani Enkai: Ing'ura nanu ilo oarare intae; naa kayau inkiguanat erishata inyi edolita iloshon pooki. Naa ore tenkaraki olminong linyi pooki, kaitaas intae eneitu aekata aitaas intae, anaa enanyaanyukie enemaitoki aikata aas aigil. Metaa kenya iloomenye ilayiok lenye tiatua intae, nenya ilayiok iloomenye, naa kadung'oki intae enkiguana, ore pooki ng'ae linyi oleku naidapashaki inkaloli pooki enkijape. Neaku ore naa anaa enaishu nanu, ejo Olaitoriani Enkai, esipa tukul, ore amu isarkionie ewueji ai sinyati too ntokitin pooki torrok o siaaitin inyi pooki torrok, neaku kadung'oo intae, meleku enkong'u ai nemaata nanu olng'ur. Ore ematua inyi nabo e uni naa keye to lmeitai neijori to lameyu tiatua intae; ore ematua nabo e uni naa kebatatakino olalem te rishata namanita intae; ore ematua nabo e uni naa kaidapashaki ilubot pooki enkop, nashurtu olalem asuj ninche. “Neaku neijia eikununye engoro ai napi tenelotu naa kainuaaki engoro ai ninche naitaraposh kewan; netum ninche aatayiolo aajo ore nanu Olaitoriani airoro to lom lai, ina kata naitorioki engoro ai napi shumata ninche. Ore ake sii naa kaitomijoon intae, niakuku entoki enkurruna tiatua lelo oshon oomanita intae, o te dukuya lelo pooki oodol intae egiroo. Iyakuku enkurruna o entoki namenari, enkisikong'a oloputukunyi, te nena kuapi naamanita intae, ina kata nayau inkiguanat ayaki intae te ngoro, o te ngoro napi, o too oshot engoro enkitamioto, nanu Olaitoriani oiroro. Ina kata nalaku agilunore intae too imbaa aainei esayiet olameyu, imbaa emutata, nena nalaku meidaikie intae; ina kata naitasapuk olameyu oleng te intae, nadung'oo ineeimu indaiki inyi. Ekairriwaki intae olameyu ong'uesi entim metigilunore intae, naa keoru intae inkera inyi, neim olmeitai o sarge atua intae naa kayau olalem shumata intae. Nanu Olaitoriani oiroro.” Eewuo ororei lo Laitoriani enatii; naajoki: “Enkerai e tung'ani, intorioki enkomom ino enkalo oo ldoinyio le Israel, nimbonoki agilunore ninche, nijo: intae lo doinyio le Israel, entoning ororei lo Laitoriani Enkai! Inji ejoki Olaitoriani Enkai ildoinyio o ndoinyo, o lashepak o nong'ot: ing'ura, ore nanu enkewan ai naa kayau olalem shumata intae, naar ainyal iwuejitin inyi neeika. Ore ilpereren linyi naa keaku mijoonto ore ilpereren le nkorropil inyi naa kegili; ore lelo linyi ootaraki metuata nanang'aa ninche te dukuya inkitanyaanyukot inyi oo nkaitin. Naa kairragie lelo seseni ootuata loo ltung'ana le Israel te dukuya inkitanyaanyukot enye oo nkaitin nemeishu; naidapash iloik linyi aitaman ilpereren linyi loo lasarri. Ore pooki nimanyimanya naa keaku nkanas inyi mijoonto nemuti iwuejitin inyi neeika, metaa ore ilpereren linyi loo lasarri neaku ile pesho netumutaki, negili aabelibel inkitanyaanyukot oo nkaitin inyi nemeishu, nedung'i ilpereren linyi le nkorropil aauroo, nejutori isiaaitin inyi. Nebatatakino ilkumok ootuata atua intae, niyiolouu aajo ara nanu Olaitoriani. “Naa kaleku ilkuti linyi eishu. Neaku iatata too loshon ilekunot ooilanya ilo alem, naa teneidapashi intae too nkuapi, neaku ore lelo linyi ooilanyishote naadamu nanu te lelo oshon oowaita ninche aitaa iyarunot, ina kata atigila iltauja lenye lemaairuk naaing'uaa nanu, naitamodok inkonyek enye nena naaibelekenyakinote to lng'uarra nena kitanyaanyukot enye oo nkaitin; naa keibayu te nduaata enye maate nena torrok naataasa, o lminong lenye pooki. Naa keyiolou ina kata aajo ara nanu Olaitoriani; eitu airo te mpesho inchere kaitaas ena torrono ninche.” Inji ejo Olaitoriani Enkai: “Entoosh inkaik inyi, nioshieshie nkejek inyi enkop nijojo, Aha! Ore enkaraki ina bae olminong le nkaji e Israel; amu kebatata ninche to lalem, o lameyu, o lmeitai. Ore ilo olakua oleng naa keye to lmeitai; ore ilo otaana nebatatakino olalem; ore ilo otelekua neitajeuoki naa keye to lameyu. Neaku neijia aikunaki engoro ai napi ninche. Niyiolouu aajo ara nanu Olaitoriani, ina kata eirragaa impopoki enye tiatua inkitanyaanyukot oo nkaitin enye nemeishu emanita ilpereren lenye, te shumata pooki doinyo oodo, o too nchumat pooki oo ldoinyo, o tiabori olchani pooki onyori, o tiabori pooki shani dapashi mbenek, o te pooki wueji ake neitainye esong'uana narropil aaitaiki inkitanyaanyukot oo nkaitin enye nemeishu. Naa kaitorioo enkaina ai agilunore ninche, naitaa enkop mitil naitomijoon, too manyishoritin enye pooki, eiteru to lpurkel o meshomo Ribla. Ina kata eyiolou ninche aajo ara nanu Olaitoriani.” Nelotu ororei lo Laitoriani enatii naajoki: “Ore iyie nakerai e tung'ani, inji ejo Olaitoriani Enkai ajoki enkop e Israel: Enkiting'oto! Eewuo enkiting'oto shumata ilpijat pokira oong'uan le nkop. Etabawua taata enkiting'oto shumata iyie, naa kabolu engoro ai meeu shumata iyie naa kaaiguanare iyie anaa enaikununo inkoitoi inono; naa kaaitame iyie to lminong lino pooki. Nimikileku iyie enkong'u ai, nemaata olng'ur; kake kaaitame iyie tenkaraki nkoitoi inono, ina kata etii olminong lino atua iyie. Ina peyie iyiolouu aajo ara nanu Olaitoriani. “Inji ejo Olaitoriani Enkai: ‘Emutata nasuju emutata!’ Ing'ura, neina nalotu. Etabawua enkiting'oto, eewuo enkiting'oto; kitudumakine ninye iyie agilunore. Ing'ura elotu. Eewuo emutata enitii iyie, oi intae oomanya ina kop; etabawua enkata, etinyikua ina olong enkolong enkishirata neme enkolong nabuakuni too nchumat e lelo doinyo. Ekayau aitasieku engoro ai shumata intae, nayaki intae engoro ai napi, agilunore intae, naiguanare intae te risioroto oo nkoitoi inyi; naa kaitame intae too lminong' linyi pooki. Nemeleku enkong'u ai, nemaata nanu olng'ur, ekaitame intae te risioroto oo inkoitoi inyi, ina kata etii olminong linyi pooki atua intae. Ina pee iyiolouu aajo ara Olaitoriani ooshisho. “Ing'ura, ina olong! Ing'ura elotu ninye! Eewuo emutata inyi, eitapuka imbaa enkikonya, etubulutua ilukuny olwuasa. Etubulua enkikonya aaku eng'udi oo ntorrok; meetae obo lenye oleku, arashu ninye enkumoi enye, arashu enkarsisisho enye; nemeitokini aata te ninche oloituruku. Etabawua enkata, etinyikua enkolong. Mincho ilo oinyang'isho eshipa, arashu olamirani eishir, amu etii engoro napi atua olorora lenye pooki. Amu merrinyunye olamirani arrinyokino ina natimira, eton eishu ninche. Amu etii engoro napi sapuk shumata olorora lenye pooki; nemerrinyo siadi; naa ore te nkaraki ing'ok enyena, meeta oloidim aitasheiki enkishui enye. “Etoosho ninche entarumpeta nerretena pooki; nemeeta obo lenye olo olarrabal, amu etii engoro ai napi shumata olorora lenye pooki. “Etii olalem auluo, netii olmeitai o lameyu atua boo. Ore pooki ng'ae otii atua enkurma neye to lalem, ore pooki ng'ae otii atua enkanasa nemuat olameyu o lmeitai. Naa teneilanyisho ake ninye obo loo lekunot, naa kepuo ildoinyo, anaa nturkuluoni oo nong'ot, eishir pooki, eishiraki pooki ng'ae intorrok enyena. Ekelepori nkaik e pooki ng'ae, neshalu nkung enye anaa enkare. Neishopoki ate ilkuniyiani, neitoipoo ate to lkirutoto; netii enkurruna inkomomi enye pooki, nemetii ilpapit ilukuny enye pooki. Naa kenang'aa enkosholai enye too nkoitoi naalala e nkanasa, ore sahabu enye netiu anaa entoki naiduruk; ore enkosholai enye o sahabu nemeidim aaitajeu ninche te ina olong engoro napi o Laitoriani; meitaraposh ninche esumash enye arashu eiput inkoshuaa enye te ninye. Amu endapidapoi apa ina narror ing'ok enye. Ore imasaa enye sidain naaishopo te nkisisa e pesho, neitobiru inkitanyaanyukot oo loipi lo lminong o ntokitin enye pooki torrok metaa kaitaa entoki naiduruk te ninche. “Naa kapik ninye inkaik oo ltung'ana leeiking'a metarresho ninche aaibung naisho ilarruok mewaita ninche; naa kepuo aaisarkionie ninye. Akaiwuang'ie enkomom ai aitung'uaa ninche, peyie etum ninche aaisarkionie ewueji ai e tipat; ejing ilaikonyak atua neisarkionie ninye, neitaa olmuaate. “Ore amu ebore enkop esesekuanare osarge; nebore enkanasa enkikonya, naa kayau nena kuapi torrok oleng meibung'a aaya inkajijik enye; ekaiting'ie ilo wuasa lenye le ngolon, ore wuejitin enye sinyat neisarkionieki. Ore tenebau emion, naa keing'oru ninche eseriani, nemetum ninye. Elotu emutata nasuju ae mutata, nelotu olkilikuai leme sidai asuju olikae, neing'oru ninche enduaata to loiboni le Nkai, kake eisha enkitanapata to lapolosani, neisha enkikoo too lpayiani. Neishir olaiguanani neiting'o osiligi lo ltung'ani kitok, ore nkaik oo ltung'ana oopeny enkop neikirikira tenkuretisho sapuk. Ekaitaas ninche te risioroto oo nkoitoi enye, o terisioroto oo nkiguanat enye ekaiguanare ninche, naa keyiolou aajo ara nanu Olaitoriani.” Ore to lari le ile, to lapa le ile, te nkolong e miet o lapa, ore atonita te nkaji ai, tenebo ilpayiani le Yuda etoni te dukuya nanu, ore enkaina o Laitoriani Enkai naaiteleikino nanu. Ina peyie adol naa ng'ura, enkitanyaanyukoto natiu anaa eno ltung'ani; ore tiabori enye ine netiu anaa empolos enye naa enkima, ore te shumata empolos enye netiu anaa enkitanyaanyukoto naitiil oleng, anaa osuyai oitiil otisikaki. Neitorioo enkitanyaanyukoto neeijo enkaina, naaya nanu adumu aibung ilpapit le ndukuya ai; naadumu nanu Enkiyang'et ailepie aya erishata e nkop o keper, naayau nanu too nduaat Enkai Yerusalem, naapik kishomi najing'ieki endung'oroto e atua ina naipirare moikuape, ine apa netii olorika le nkitanyaanyukoto o lom, ina naipiru aaku olom. Naa ng'ura, etii enkitoo e Nkai e Israel ine anaa apa enduaata natoduaa te nkisiajata. Naajoki ninye nanu, “Enkerai e tung'ani, taraposhu nkonyek inono shumata ing'ura enkalo e moikuape.” Metaa ataraposhuo nkonyek aainei aitorioki moikuape, naa ng'ura, ore te moikuape e kishomi olperere lo lasar, teine nejing'ieki, netii apa enkitanyaanyukoto olom. Naajoki ninye nanu, “Enkerai e tung'ani, idolita enaasita ninche, olminong kitok oasita enkaji e Israel tene, aaraa nanu aitalam ewueji ai sinyati? Kake eton ake intoki adol likae minong sapuk.” Naayau nanu kutuk aji e ilo odung'oro; ore peyie aing'or, ng'ura etii enaudoto natii esuntai. Naajoki ninye nanu, “Enkerai e tung'ani, tuturo atua esuntai”, ore peyie atur esuntai, ng'ura netii kutuk aji. Naajoki ninye nanu, “Shomo atua, nidol intabo olminong naasita ninche tene.” Metaa nalo atua nadol; ore teine, etisiraki te suntai aaitaman ing'uesi pooki naaiserpepiari, o ng'uesi pooki torrok o nkitanyaanyukot oo nkaitin pooki nemeishu enkaji e Israel. Neitashe te dukuya ninche iltung'ana ntomoni naapishana loo lpayiani le nkaji e Israel, tenebo Yaasania olayioni le Shafan eitashe tenebo ninche. Neeta ake pooki ng'ae lenye entoki napejieki enkorropil te nkaina enye, neilep empuruo enkorropil shumata. Ina pee aajoki ninye nanu, “Enkerai e tung'ani, itodua enaasita ilpayiani le nkaji e Israel tenaimin, pooki tung'ani ake tiatua olgilata lenye too mpishai? Amu ejo ninche, ‘Medol iyiook Olaitoriani, eibayie Olaitoriani enkop.’ ” Naaitoki ake ajoki nanu, “Intoki ake adol kulie tabo olminong naasita ninche.” Ina peyie aariku nanu kishomi enkalo e moikuape enkaji o Laitoriani; naa ng'ura, etoni inkituaak teine naaishiraki enkai enye naji Tammus. Ina pee aajoki ninye nanu, “Itodua iyie ena, iyie nakerai e tung'ani? Intoki ake adol intabo olminong sapuki naalang kuna.” Naayau ninye nanu olgilata liatua le nkaji o Laitoriani: naa ng'ura ore te kutukaji e nkaji o Laitoriani, enerish eneimi olgoriet o lperere, netii iltung'ana oobaya tikitam o imiet, eisho nkoriong'i enye ina aji Olaitoriani, neing'orita nkomomi enye enkalo o loosaen, eomon enkolong te nkalo oloosaen. Ina pee aajoki ninye nanu, “Itoduaa iyie ena, Nakerai e tung'ani? Kentoki nalelek te nkaji e Yuda pee eas intabo olminong naasita tene, eji metaa keiput enkop pooki enkikonya naainuaaki nanu oleng matagoroyu? Ng'ura, epik olng'osila lenye inkumeishin enye. Metaa kaitame te ngoro napi; meitoki enkong'u ai aleku, nemaitoki aata nanu olng'ur; ore hoo neishir too nkiyiaa aainei to ltoilo sapuk, mainining'u ninche.” Neishir ninye to ltoilo sapuk too nkiyiaa aainei ejo, “Entinyiku, intae oopuo aar enkanasa pooki ng'ae ake te ntoki nalo amutishore te nkaina enye.” Naa ng'ura, eetuo iltung'ana ile te nkalo enkishomi e shumata, natii enkalo e moikuape pooki tung'ani ake eeta entoki enye namutishore te nkaina enye, netii tenebo ninche oltung'ani oishopito enkila napuyiapui, tenebo entoki naguetishoreki te matua enye. Nepuo atua neitashe te mbata olperere lo suyiai. Ore ina kata neshomo enkitoo e Nkai e Israel aing'uaa lelo kerubi laa ninche etotonie teine nejing'ieki ina aji, neipot ilo tung'ani oishopito enkila napuyiapui, ilo oota entoki naigerishoreki te matua enye. Nejoki Olaitoriani ninye, “Shomo topolosa enkanasa turuko Yerusalem, nipik olmishire shumata oo nkomomi e lelo tung'ana pooki ootanyamala te nkishirata osina te nkaraki olminong otaasaki tiatua.” Nejoki ilkulikae aning'ito, “Topolosa ina anasa isujaa ninye, niar mincho enkong'u ino eleku, nimintodolu hoo olng'ur; iishu iltung'ana pooki kituaak teine, ilbarnot o ntoyie, nkera kutiti o nkituaak, kake mishoroo ake pooki ng'ae oota olmishire. Naa interu te wueji ai sinyati.” Neitoki ajoki ninche, “Esarkionie ina aji, nimputuputu iloodung'oro ilmeneng'a. Enchom dukuya.” Metaa eshomo dukuya, nearisho tiatua ina anasa. Ore ina kata earisho, naatung'uayioki aa nanu ake, nabatata te nkomom ai aishir, “Aha Olaitoriani Enkai! Indaikie iyie ilekunot pooki le Israel tembukunoto engoro ino napi te Yerusalem?” Naajoki ninye nanu, “Ore entorroni enkaji e Israel o Yuda netuluso aaku sapuk oleng; eiputa enkop pooki osarge, neiputa enkanasa imbaa nemesipa; amu ejo ninche, ‘Eibayie Olaitoriani enkop, nemedol Olaitoriani.’ Ore te nanu meleku enkong'u ai, nemaata olng'ur, kake kaitalaku ninche anaa enatiu isiaaitin te shumata ilukuny enye.” Naa ng'ura, oltung'ani oishopito inkilani naapuiyapui, tenebo entoki naigerishoreki te matua enye nayau olkilikuai ojo: “Ataasa anaa inikintanapa.” Naing'orisho nanu, naa ng'ura, ore oloing'ange ilo otii shumata nena lukuny e lelo kerubi etii enchumata enye entoki neeijo olorika le nkitoo oitobiruno to soit pus oji Safire*g*. Nejoki ilo tung'ani oishopito nkilani naapuyiapui, “Shomo atua nena kejek e ngarri naapuo to loing'ang'e naatii abori lelo kerubi; imputa nkaik inono inkuk naaishu te rishata lelo kerubi, nindapashaki ninche ina anasa.” Naduaaya ninye elo, ore ina kata neitashe ilkerubi te nkalo e kopikop eina aji, ore peyie ejing oltung'ani atua; neiput enkatampoi olodung'oro liatua. Neilep enkitoo o Laitoriani aing'uaa olkerubi o metabaiki enejing'ieki enkaji; neiput ina aji enkatampoi, ore olodung'oro neiput ewang'an enkitoo o Laitoriani. Nening'i oltoilo loo naipuko oo lkerubi to lodung'oro liong'ota, etiu anaa oltoilo le Nkai Magilani teneiro. Ore peyie eitanap ilo tung'ani oishopito nkilani naapuyiapui ajoki, “Iwa enkima te mpolos e nena kejek eng'arri naapuo to loing'ang'e, te rishata oo lkerubi”, nelo ninye atua neitashe te mbata enkeju e ng'arri. Neitorioo olkerubi enkaina enye te rishata oo lkerubi aitorioki enkima natii empolos oo lkerubi, neya embata enye, nepik atua nena aik e ilo tung'ani oishopito nkilani naapuyiapui, neya ninye, neipang boo. Etiu ilo kerubi anaa oloota enkaina oltung'ani tiabori naipuko enye. Naing'orisho, naa ng'ura, etii nkejek eng'arri ong'uan naashepita ilo kerubi, eshepita ake nabo olkerubi, ore emua oo nkejek engarri netiu anaa osoit oimerlel oji Krisolit*g*. Ore empukunoto enye, eeta nena ong'uan emua nabo, anaa enkeju eng'arri natii atua enkeju eng'arri. Ore peyie epuo ninche, neim enkalo ake nabo te nena ong'uan eitu eibelekenya epuoito, kake ore ake pooki alo neibelekenyakino enkeju engarri e dukuya nesuju nkulie pooki, eitu eibelekenya epuo. Ore nkaamanaa oo nkejek enye, o ltidii loo nkejek enye, o nkejek oo ngarrin nebore nkonyek naamanita. Ore nena kejek oo ng'arrin, neipoti aning'ito aajo nkejek osiwuo oloing'ang'e. Ore pooki ng'ae te ninche neeta nkomomi ong'uan: Ore enkomom e dukuya naa enkomom olkerubi, ore enkomom e are naa enkomom oltung'ani ore enkomom e uni naa enkomom olng'atuny, ore enkomom e ong'uan naa enkomom olkurragos. Nedumunye ilo kerubi ailep alo shumata. Ore kulo naa nena ng'uesi apa naaishu natoduaa te nkiyopata olkeju le Keba. Ore peyie epuo lelo kerubi nemanaa aapuo nena kejek e ng'arri; ore pee edumu lelo kerubi inaipuko enye aadumunye aaing'at enkop, neitu eibelekenya nena kejek aaing'uaa meshep ninche. Ore pee eitashe, neitashe sii kuna, ore pee edumunye aailep, neilep sii ninche tenebo, amu etii apa atua ninche enkiyang'et e nena ng'uesi naaishu. Nepuku enkitoo Olaitoriani aing'uaa kutuk aji e ina aji, neitashe te nchumata e ilo kerubi. Nedumu ilkerubi inaipuko enye aailep aapuo to loing'ang'e aaing'uaa enkop adolita epuo, ore epuo, etii nkejek emurte enye; neitashe te kutuk aji enkishomi enkalo oloosaen enkaji Olaitoriani; netii shumata enye enkitoo Enkai e Israel. Ore kuna naa ing'uesi naaishu nena natoduaa tiabori ina Ai e Israel te nkiyopata olkeju le Keba; nayiolou ajo ilkerubi apa ninche. Neeta ake pooki obo te ninche nkomomi ong'uan, neeta ake pooki inaipuko maa ong'uan, ore tiabori inaipuko enye nenyaanyukie nkaik oo ltung'ana. Ore empukunoto oo nkomomi enye, netiu anaa inapa omomi natoduaa te nkiyopata olkeju le Kebar. Nepuo pooki dukuya aaitoriori. Naadumu nanu Enkiyang'et shumata, naayau nanu kishomi oloosaen e nkaji o Laitoriani, ina naipirare oloosaen. Naa Ng'ura, ore te kutuk aji e ina kishomi netii iltung'ana tikitam o imiet; nadol tiatua ninche Yaasania olayioni le Asuri, o Peletia olayioni le Benaia o lkituaak loo ltung'ana. Naajoki ninye nanu, “Enkerai e tung'ani, iltung'ana kulo laa ninche ooipiru enkarruoisho laa ninche ooishoru nkikoot torrok tena anasa; ninche oojo, ‘Eton eitu enyiku enkata nikishetie nkajijik; ore ena anasa naa emoti nayierishoreki ake nikira iyiook nkiri.’ Metaa imbonoki ninche, tigilunore ninche imbonoki iyie enkerai e tung'ani.” Naadoiki nanu Enkiyang'et o Laitoriani naajoki ninye nanu, “Tejo, Inji ejo Olaitoriani: Metaa idamu, iyie na aji e Israel; amu kayiolo nena baa pooki naajing endamunoto ino. Intaa kumok oleng ilmeneng'a linono tena anasa nimputa inkoitoi naalala enkanasa ilmeneng'a. Metaa inji ejo Olaitoriani Enkai: Ore ilmeneng'a linono lirragie ti atua ninye, naa nkiri ake, naa emoti nayierishoreki ena anasa, kake aikintaini iyie tiatua ninye. Ituria iyie olalem; naa kayau shumata iyie olalem, ejo Olaitoriani Enkai. Naa kaaitupuku nanu iyie tiatua ninye, naapik iyie nkaik oo ltung'ana leeiking'a, naadung'oki iyie enkiguana. Kibatati iyie to lalem, ekaaiguanare iyie to lpolosie le Israel: niyiolou iyie ajo ara Olaitoriani. Meaku ena anasa emoti ino nayierishoreki nimiaku iyie nkiri tiatua ninye; ekaaiguanare iyie to lpolosie le Israel; niyiolou ajo ara nanu Olaitoriani; amu eitu imbung alotie nkitanapat aainei, arashu isujaa nkiguanat aainei, kake itaasa anaa enatiu nkitanapat oo loshon lelo likimanita iyie.” Ore pee ebau ina kata, aibonisho nanu, neye Peletia olayioni le Benaia. Nabatata te nkomom ai, naishir to ltoilo sapuk najo, “Aha Olaitoriani Enkai! Inting'ie aishu lelo lekunot le Israel?” Nelotu ororei lo Laitoriani enatii nanu ejo: “Enkerai e tung'ani, ore iltung'ana linono, aa lelo alashera, lelo yarunot linono, ina aji pooki e Israel, ninche pooki, naa ninche lelo ootejo iloomanya Yerusalem inchere, ‘Eshomo ninche aalam Olaitoriani; eishooki iyiook ena kop metaa enaang.’ Metaa tejo, ‘Inji ejo Olaitoriani Enkai: Ore hoo naitayio ninche aitalamaa too loshon naa ore hoo naidapashayie ninche tiatua nkuapi, nataa nanu enkaji Enkai te ninche te nkiti kata tenena kuapi, naashomo.’ Metaa tejo, ‘Inji ejo Olaitoriani Enkai: Ekaiturrurru intae too loreren, naiturrurru ntae aitung'uaa nena kuapi naaidapashakaki ntae, naa kaisho ntae ina kop e Israel.’ Naa tenepuonu ninche ine, neitayu tiatua ninye intokitin pooki torrok o pooki toki olminong. Naa kaisho ninche oltau obo, napik enkiyang'et ng'ejuk atua ninche; naitayu tiatua ninche ilo tau lo soit aitung'uaa iseseni lenye naisho ninche oltau le nkiring'o, peyie etum aashomie nkitanapat aainei, neibung inkitanapat aainei neyanyit ninche; naa keaku ninche iltung'ana laainei, naaku nanu Enkai enye. Kake ore lelo oopuo aasuj too ltauja lenye intokitin torrok o mbaa olminong, ekayieu isiaaitin enye too lukuny enye, ejo Olaitoriani Enkai.” Ina peyie edumu lelo kerubi inaipuko enye, eeta nkejek oo ngarrin too mbat enye; ore enkitoo Enkai e Israel neitoipito ninche. Nepuku enkitoo Olaitoriani aing'uaa atua ina anasa, neitashe te nchumata oldoinyio otii enkalo oloo saen eina anasa. Naadumu nanu Enkiyang'et ailepie shumata naayau nanu te nduaata Enkiyang'et e Nkai atua Ilkaldayo, enetii lelo yarunot. Ore ina duaata natoduaa naalo aing'uaa nanu. Naliki lelo yarunot imbaa pooki naaitodua Olaitoriani nanu. Nelotu ororei lo Laitoriani enatii naajoki: “Enkerai e tung'ani, imanya atua enkaji kiserut, lelo oota nkonyek naadolishore, nemedolisho, lelo oota nkiyiaa naaning'ishore, nemening'isho amu enkaji kiserut ninche. Metaa, enkerai e tung'ani, intobiraki kewan olola le yararoto, nilo eyararoto dama kiduaaya ninche; ilo anaa oloaruno aing'uaa ewueji ino alo dikae wueji kiduaaya ninche. Ebaiki neidim ninche aatoning'u hoo naa enkaji natogolong'ua ninche. Intupuku iyie olola lino dama kidolita ninche anaa olola le yararoto; naa ipuopuo intae teipa edolita ninche ntae, anaa enaas iltung'ana lelo oopuo e yararoto. Entutur intae esuntai edolita ninche niimiimi ina lusie. Ore edolita ninche intae nidumumu olola aaiteleiki iloilila linyi, ninapinapa aaipang'ie te naimin, nintoipipi nkomomi inyi, peyie midolidolo ina kop; amu aaitaa iyie olmonekie te nkaraki enkaji e Israel.” Naataasa ina anaa enaaitanapaki. Ayaua olola lai te ndama, anaa olola le yarunoto, ore teipa, natur esuntai too nkaik aainei, nalo te naimin, anapita pooki toki ai to loililai lai edolita ninche. Ore tadekenya nelotu ororei lo Laitoriani enatii naajoki, “Enkerai e tung'ani, amaa enkaji e Israel, ena aji kiserut keitu kijoki iyie, ‘Kaa doi iasita iyie?’ Tiaaki ninche, ‘Inji ejo Olaitoriani Enkai: Ore ele kilikuai oiroishi neipirta ilo kitok otii Yerusalem oina aji pooki e Israel natii atua ninye.’ Tejo, ‘Ara nanu olmonekie te iyie: anaa enataasa, neaku ina eitaasi ninche ekepuo ninche eyararoto aaku ilooena.’ Ore ilo kitok otii tenebo ninche nedumu olola lenye aiteleiki oloililae lenye te naimin, neipang alo; ketur esuntai aaim; naa keimulumul enkomom enye, peyie medol ina kop too nkonyek enyena. Naa kaisalaash orreshet lai aitoipoki ninye, naa keyae ninye tiatua orreshet lai; naa kayau ninye Babilon ina natii enkop oo Lkaldayo, nemedol ake sii ninye; naa keye ninye te ine. Naa kaidapashaki aing'orie pooki kijape lelo pooki oomanita ninye, ilaretok lenyena tenebo iltimito lenyena pooki; naa kashurt kashutu olalem asujaa ninche. Naa keyiolou ninche aajo ara nanu Olaitoriani, ina kata naidapashaki ninche iloshon naidapashaa ninche too nkuapi. Kake kaisho ilkuti lenye eilanyisho aailany ilo alem, aaing'uaa olameyu o lmeitai torrono, peyie etum aaisirayia olminong lenye pooki tiatua lelo oshon oojing atua, netum aatayiolo aajo ara nanu Olaitoriani.” Enyaaka ake sii ororei lo Laitoriani alotu enatii nanu ejo, “Enkerai e tung'ani inosa endaa ino to lkirutoto, niok enkare to lokirikiri o te nkuretisho; nijo te nkaraki lelo tung'ana leina kop, Inji ejo Olaitoriani Enkai te nkaraki lelo oomanya Yerusalem teina kop e Israel: Kenya ninche endaa enye te nkuretisho, neok enkare te nking'asia, amu keitayuni te nkop ina pooki natii, tenkaraki ina kikonya e lelo pooki oomanya atua ninye. Ore nena anas neitomijooni, neaku ina kop enememanyae; niyiolouu aajo ara nanu Olaitoriani.” Nelotu ororei lo Laitoriani enatii nanu ejo: “Enkerai e tung'ani, kaa dung'et e rashe ena niata naipirta ena kop e Israel, ijo, ‘Etoodoro inkolong'i, ore pooki duaata nelotu aaku enemeetae.’ Tiaaki naa ninche, ‘Inji ejo Olaitoriani Enkai: Ekaiting'ie ena dung'et e rashe, nemeitoki aekata aasishore anaa endung'et e rashe te Israel.’ Kake tiaaki ninche, etinyikutua nena olong'i, oo nkitabarot e pooki duaata. Amu meitokini aata aekata enduaata nemesipa arashu enduaata elejare te nkaji e Israel. Kake ore nanu Olaitoriani naa kairo ororei ilo lairo, naa keasi. Meekure eitokini aekata aaitumutiki, kake ore too nkolong'i inyi iyie na aji kiserut ekairo nanu ororei naas ina, ejo Olaitoriani Enkai.” Ore ake sii eewuo ororei lo Laitoriani enatii naajoki: “Enkerai e tung'ani, ing'ura, ore lelo le nkaji e Israel ejo, ‘Ore ina duaata enye naa enoo nkolong'i kumok e dukuya, nelimu nduaat oo nkolong'i naatii dukuya oleng.’ Neaku tiaaki ninche, Inji ejo Olaitoriani Enkai: Meetae ororei lai hoo obo oitokini aitumutiki, kake ore ilo rorei lairo naa keasi, ejo Olaitoriani Enkai.” Nelotu ororei lo Laitoriani enatii ejo: “Enkerai e tung'ani, imbonisho tigilunore iloibonok le Israel, imbonisho nijoki lelo ooibonisho too ndamunot enye maate: ‘Entoning ilo rorei lo Laitoriani!’” Inji ejo Olaitoriani Enkai, “Ekake ayia intae lelo oibonok oomoda lelo oosuj enkiyang'et enye maate, nemeeta toki natoduaa! Etotiwuo iloibonok linyi anaa mbariak tiatua ilmuaateni, iyie Israel. Eitu ilepaki ajing atua ilusien, arashu ishet esuntai te nkaraki enkaji e Israel, pee etum aitasho to larrabal te ina olong o Laitoriani. Eiroro ninche elejare neibonu elejare; nejo ninche, ‘Ejo Olaitoriani’ eitu eirriwaa Olaitoriani ninche, neisilig ninche meitabai irorei lenye. Keitu idol iyie enduaata namilisho, nimbalie te nkutuk ino enaibon e lejare, te pooki kata nitejo, ‘Ejo Olaitoriani, hoo neitu nanu airo?’ ” Metaa inji ejo Olaitoriani Enkai: “Ore amu imbalie te nkutuk ino inemesipa nitoduaa elejare, neaku ng'ura, kaagilunore iyie, ejo Olaitoriani Enkai. Ekegilunore enkaina ai lelo oibonok lelo oota nduaat olmilo neitayu nduaat elejare; mejing ninche atua olturrur loo ltung'ana laainei, arashu eigeri ninche te mbuku oo nkarn e nkaji e Israel, arashu ejing ninche ina kop e Israel; niyiolouu aajo ara nanu Olaitoriani Enkai. “Ore enkaraki, ee enkaraki naitapong'oitie iltung'ana laainei, ejo, ‘Eseriani,’ ina kata meetae eseriani; te nkaraki, ina kata nashet iltung'ana esuntai, nepuonu iloibonok aamur te nturoto; tiaaki lelo oibonok oomur te nturoto kesulari ninye! Ekelotu olairrag le nchan, o isoito le nchan oodou nelotu olkutati kitok oleng; ore peyie esulari esuntai, aimejokini intae, ‘Koree apa emurata nitumurie ninye?’ Metaa nji ejo Olaitoriani Enkai: Ekaitaa olkutati kitok opuku losiwuo metigila te ngoro ai; naa ketumi oloirrag le nchan te ngoro ai, o enchan sapuk te ngoro napi naidaikie ninye. Naa kagil auroo ina suntai nitumurakita enturoto nauroo ninye te nkop, metaa ore olkitamanyunoto lenye neirrag metii toki; ore tenesulari, terishata enye; niyiolouu aajo ara nanu Olaitoriani. Neaku neijia aiko tenaitayu engoro ai te ina suntai, o te lelo ootumura ninye te nturoto; naa kaajoki iyie, meekure eetae ina suntai, arashu lelo ootumura ninye, ore lelo oibonok le Israel lelo ooibonoki Yerusalem nedol induaat eseriani te nkaraki ninye, ina kata meetae eseriani ejo Olaitoriani Enkai. “Ore iyie nakerai e tung'ani, intorioki enkomom ino tigilunore nena toyie oo ltung'ana linono, nena naaibonisho too ndamunot enye maate; imbonoki tigilunore ninche tiaki, inji ejo Olaitoriani Enkai: Ekake ayia nena kituaak naeniki nkaik enye pooki intasimi, naaitobiraki entoki naitoipie ilukuny iltung'ana pooki, irreshoo iltauja! Irreshoo iltauja loo ltung'ana laainei, ninchosho ilkulikae tauja etoni aaisho tenkaraki dupoto inyi. Kisarkionie nanu tiatua olorere lai te mborei e nkaina e shairi o te mbelati emukate, iariara metuata iltung'ana lemeishaakino neye ninchosho iltung'ana lemeishaakino neishu etoni eishu, te lejare inyi ilejileje iltung'ana laainei, lelo ooinining'u elejare. “Neaku nji ejo Olaitoriani Enkai: Ing'ura kagilunore nena tasimi inyi nirreshieshie iltauja, naa kapolosu aiwuang'ie too nkaik inyi; naa kaisho lelo tauja litarresho epuo etalaayioki anaa imotonyi. Ore sii nena nintoipiepie ate naa kapolos aiwuang'ie, naitajeu iltung'ana laainei aitung'uaa nkaik inyi, nemeitoki aekata aatii nkaik inyi anaa eng'ues naibung'aki aanya; niyiolouu ina kata aajo ara nanu Olaitoriani. Amu itaara iltauja loo supati te monkoi, hoo neitu nanu aar ninye oltau, nintagolo ilo torrono, nemeibelekenya ninye aing'uaa enkoitoi enye e ntorroni pee eitajeu enkishui enye; neaku meekure aekata intokiki aadol induaat olmilo anaa iasishorere ntasimi; ekaitajeu iltung'ana laainei aitung'uaa nkaik inyi. Niyiolouu ina kata aajo ara nanu Olaitoriani.” Nepuonu kulikae payiani le Israel enatii, netoni te dukuya nanu. Nelotu ororei lo Laitoriani enatii, aajoki: “Enkerai e tung'ani ewaita kulo tung'ana inkitanyaanyukot oo inkaitin nemeishu aapik iltauja lenye, nepik entoki narrueshisho oo ntorrok enye dukuya nkomomi enye; kaisho kewan maikilikuanishore tukul ninche? Neaku irorie ninche, nijoki ninche, inji ejo Olaitoriani Enkai: Ore pooki tung'ani le nkaji e Israel opik inkitanyaanyukot oo nkaitin enyena nemeishu oltau, nepik entoki narror oo ntorrok dukuya enkomom enye, neitoki ake alotu enetii ilo oiboni le Nkai, kawaliki nanu ninye makewan ara Olaitoriani, te nkaraki olorora loo nkitanyaanyukot oo nkaitin enyena nemeishu, peyie atum aibung'a lelo tauja leina aji e Israel, lelo pooki ootapong'ori te nanu too nkitayaanyukot oo nkaitin enye nemeishu. “Metaa tiaaki enkaji e Israel, inji ejo Olaitoriani Enkai: Erridutu nimbelekenyunyenye aaing'uaa nkitanyaanyukot oo nkaitin inyi nemeishu; nimbelekenyunyu inkomomi inyi to lminong linyi pooki. Amu ore ake ninye pooki ng'ae le nkaji e Israel, arashu olomoni ake pooki tiatua Israel ooroo kewan te nanu, nepik nkitanyaanyukot oo inkaitin nemeishu oltau lenye nepik entoki narror oo ntorrok enyena dukuya enkomom enye, eji neitoki ake alotu enetii oloiboni le Nkai pee elotu aikilikuanu imbaa enyena te nanu, ore nanu makewan Olaitoriani naa kawaliki ninye nanu enkorrok ai; naa kaitorioki enkomom ai ilo tung'ani agilunore ninye, ekaitaa ninye olmonekie naitaa olo menuni nadung'oo ninye tiatua iltung'ana laainei; niyiolouu aajo ara nanu Olaitoriani. “Naa teneleji oloiboni lai neiro ororei, ore nanu, Olaitoriani oteleja ilo oiboni, naa kaitorioo enkaina ai agilunore ninye naidaikie ninye tiatua iltung'ana laainei Isiraeli. Naa kenap ninche enkitamioto enye enkitamioto oloiboni naa ketiu neijia enkitamioto e ilo oikilikuanu, peyie meitoki aekata enkaji e Israel aapuo aapong'ori aaing'uaa nanu, nemeitoki aaigil aaisarkionie ate too ng'ok enye pooki, kake pee etum aataa iltung'ana laainei, natum ataa nanu Enkai enye, ejo Olaitoriani Enkai.” Nelotu ororei lo Laitoriani enatii ejo: “Enkerai e tung'ani teneas enkop ing'ok aa nanu egilunore eas ine metii enkirukoto, naitorioki enkaina ai agilunore ninye, nagil ine netumie endaa nairriwaki ninye olameyu, nadung'oo te ninye tung'ani o eng'ues, ore ninye naaji te kulo tung'ana okuni, Noa, o Daniel o Yakobo te netii atua, naa keitajeu ake enkishui enye maate te supatisho enye maate,” ejo Olaitoriani Enkai. “Tenaisho ing'uesi entim meima atua ina kop, neinyal ninye metaa mitil, metaa meetae oltung'ani oidim aima atua te nkaraki nena ng'uesi; o tenaa ketii duoo ninye lelo tung'ana pokira okuni atua, ore anaa enaishu, ejo Olaitoriani Enkai meitajeu hoo nkayiok arashu intoyie, ninche ake enkorrok enye eitajeuni, kake keaku enkop mitil. Arashu tenayau olalem shumata e ina kop, najo, inchoo olalem eim atua ina kop; nadung'oo te ninye tung'ani o eng'ues, ore hoo netii apa kulo tung'ana pokira okuni atua, ore anaa enaishu, ejo Olaitoriani Enkai, meitajeu hoo nkayiok arashu intoyie, kake ninche ake inkorroki enye eitajeuni. Arashu tenairriu olmeitai atua ina kop, nabuku engoro ai napi abukoki shumata ninye tenebo osarge, pee adung'oo te ninye tung'ani o eng'ues; enyor duoo naa Noa otii, o Daniel o Yob atua ninye, ore anaa enaishu, ejo Olaitoriani Enkai, meitajueu hoo nkayiok arashu intoyie, enkishui enye ake eitajeu te supatisho enye. “Amu neijia ejo Olaitoriani Enkai: Kebaa elang tenairriwaki Yerusalem nena kitamiot aainei ong'uan enkiguana, olalem, olameyu, ing'uesi torrok o lmeitai, pee adung'oo tung'ani o eng'ues tiatua! Ore ake eyia, tenelo neing'uari tiatua ilooleku pee erik aaipang'ie ilayiok o ntoyie, tenepuo nepuonu enitii nidol inkoitoi enye o yasat enye, naa aikintagoli iyie teina torrono nayau shumata e Yerusalem, te nena pooki nayaua shumata ninye. Naa keitagol ninche intae, tinidolidolo inkoitoi enye o yasat enye; niyiolouu aajo eitu aas ina meeta enataasie pooki nataasa te ninye, ejo Olaitoriani Enkai.” Nelotu ororei lo Laitoriani enatii ejo: “Enkerai e tung'ani, kaji eiko enchata olchani loo sabibu tenegiroo te nkadori likae shani ake pooki, olng'osila lo sabibu otii atua ilkeek le ntim? Keyae enchata te ninye aaitobirie ae toki? Keya iltung'ana enchata te ninye aililiyie ake pooki girra? Ng'ura, epiki ninye enkima metaa eilata enye; ore peyie emut enkima ineeiting'ie enyena pokira, ore empolos enye netumute, keitoki aata tipat tiae toki? Ing'ura, ore apa eton elulung'a ninye, nemeeta ae naitaasi; kebaa meeta tipat etumuta enkima ninye, keitoki aata tipat tiae toki. Neaku inji ejo Olaitoriani Enkai: anaa enatiu ilkeek to olchani loo sabibu tiatua entim, ilo latipika enkima meitaa eilata, neaku neijia alo ake lelo oomanya Yerusalem. Naa kaitorioki ninye enkomom ai agilunore ninche; hoo neilanyisho ninche aing'uaa enkima, kenya ina kima ninche amut; niyiolouu aajo ara nanu Olaitoriani tenaitorioki ninche enkomom ai agilunore. Naa kaitaa enkop mitil, amu etaa ninche ilemeeta enkirukoto, ejo Olaitoriani Enkai.” Neitoki ake ororei lo Laitoriani alotu enatii, ejo: “Enkerai e tung'ani, intayiolo Yerusalem olminong lenye, nijoki, inji ejo Olaitoriani Enkai ajoki Yerusalem: Ore entipat ino o einoto ino netii enkop oo Lkanaan; ore apa papaai lino naa Olamori, ore yieyio lino naa e Hiti. Ore te nkipirta e inoto ino, teina olong eitu edung'i osotua lino, neton eitu kisuji iyie te nkare neton eitu kiutuutieki emunyan, arashu kirridi too nkarash. Meetae obo liking'urrie iyie, pee eas embae nabo e kuna to lng'ur te nkaraki iyie; kake kitanang'akaki iyie ong'ata naisiasha, amu kinturrayioki, ina olong apa nikitoiwuoki iyie. “Ore peyie aim ine nitii iyie, naadol iyie ishuma tiatua osarge lino, naajoki iye tiatua osarge lino, taa oloishu, nibulu anaa enkaitubului e ong'ata nibulu niadoru abaiki enkiputakinoto enkaisiaayiani; netubulutua ilki linono, netubulutua ilpapit linono; nira ake emasipai nemeishopo. “Ore ina kata naim embata ine nitii naaing'or iyie, ing'ura, itaa apa olerisiori le nyorrata; naaisalaashaki iyie enkila ai, naitoipoo emasipaisho ino: ee naaliki ajoki ainosa olmumai te iyie nikintayu olning'o o iyie, ejo Olaitoriani Enkai, niaku iyie olalai. Naaitadoiki iyie enkare naisujaa osarge ilo liata, naael iyie te ilata. Aaishopo ake sii too nkilani naaikodo naishopoki iyie inamuka, naaishopoki iyie inkilani naapuyiapuy e katani naaitoip iyie te nkila napuyiapui. Naakus iyie too masaa, naishopoki iyie ilgiso inkaik inono, o olpisiai emurt ino. Naapik olgisoi enkume ino, naapik imuna nkiyiaa inono, napik emaupe enkitoo sidai endukuya ino. Neaku neijia apa kinkunaki aakus te sahabu o te nkosholai, ore inkilani inono naa kitani napuyiapui sidai o enkila napuyiapui o enkila naikodo; ninos enkurma sidai tenebo enaisho o eilata. Nibulu asidanu oleng, nilotu abau enetii olkitok. Ore iyie niaku ningoti ti atua iloshon kumok te nkaraki enkishiaa ino, amu aisidai apa oleng eibulayie iloshon te nkaraki ina kishiaa naisul naaishopoko nanu iyie, ejo Olaitoriani Enkai. “Kake isiliga iyie enkishiaa ino, nias ine nkiborra oo nkonyek te nkaraki nitoninge, nintubulaa enkiborra ino oo nkonyek te lelo likiimaa epuo. Iwaita embata oo nkilani inyi, nintobirakiki ate iwuejitin neeika, niasiasa inenkiborra oo nkonyek te nchumata enye; eitu aikata etumi inaanyaanyukie, nemeitokini aikata aatum. Iwaita sii kulikae soito le tipat laainei le sahabu o le nkosholai ai, lelo laaishoo iyie, nintobirakinye kewan inkitanyaanyukot oo nkaitin nemeishu oo ltung'ana, niasie ninche ine nkiborra oonkonyek; niya inkilani inono naaikodo aitoipie ninche, nirragie eilata ai o enkorropil ai te dukuya ninche. O emukate ai sii, aaishoo iyie, aitotio iyie te nkurma napuyiapui o eilata o enaisho irragie te dukuya ninche metaa olgusil orropil, ejo Olaitoriani Enkai. Niya ilayiok linono o ntoyie inono, nena nikitoikio nanu, nintainye ninche olasar peyie emuti. Amaa isiaitin inono enkiborra oo nkonyek kenkiti toki apa eji metaa iteyieng'a nkera aainei nintarasaa ninche anaa olasar te nkima aitaiki ninche? Ore to olminong lino pooki o te nkiborra ino oo nkonyek eitu idamu nena olong'i inono e kitisho, ina kata minchopo nira emasipai, itii atua osarge lino. “Ore pee eish intorrok inono pooki (Woi, woi iyie! Ejo Olaitoriani Enkai) iteshetaka kewan enkaji sidai, nintobiraki kewan ewueji neika too wuejitin pooki enkanasa, neesotoreki. Ore te dukuya e pooki oitoi nalala e nkanasa nishetu ewueji nimborrie onyek esidano ino, nincho kewan pooki ng'ae ogiroo, niponaa esiaai ino enkiborra oo nkonyek. Itaasa sii iyie esiaai enkiborra oo nkonyek too Lmisiri, tenebo lelo litashare oobore eng'uarrata, niponaa enkiborra oo nkonyek nikintagor nanu. Ing'ura, metaa aitorioyie enkaina ai pee aagilunore iyie, naitong'oroo ina rubata nikinchooki iyie, naaitarasaki iyie ilo olubo loo lmang'ati linono, nena toyie oo Lfilisti, nena naatukurrutuate nkaraki olkuaak lino torrono. Itaasa sii inenkiborra oo nkonyek tenebo ile Asiria, amu ira apa olemeraposho; ee nias inenkiborra oo nkonyek tenebo ninche, neton ake eitu iraposho. Intaa kumok isiaaitin inono enkiborra oo nkonyek tenebo ina kop e biashara enkop oo Ilkaldayo; ore ake sii tena neitu ake iraposho. “Kebaa emoyian enyorrata oltau lino, ejo Olaitoriani Enkai, idol ajo itaasa kuna baa pooki isiaaitin naaijo osuyai enkiborra oo nkonyek; nishetu inkajijik te dukuya pooki oitoi nalala enkanasa, nintobiru iwuejitin inono neeika too wuejitin pooki neetumoreki. Niminyaanyukie ake enkitok naibor onyek, amu itanya ing'amaa elaakinoto ole koisiaayio. Enkitok naibor onyek nang'amu ilomon terishata olpayian lenye! Eisho ilewa nkishorot ing'oruo pooki naibor onyek; kake inchoo iyie inkishorot inono lelo pooki linyor, irop ninche meetu ine nitii too nkaloli pooki te nkaraki isiaitin enkiborra oo nkonyek inono. Metaa inyaanyukie apa iyie kulie kituaak te siaai ino enkiborra oo nkonyek, meeta olikitaaraka iyie taa enaibor onyek; nincho olekoisiaayio, eitu kinchori iyie olekoisiaayio; metaa ira iyie enapaashaa. “Neaku naa, iyie naibor onyek, toning'o ororei lo Laitoriani. Inji ejo Olaitoriani Enkai, ore amu eibalunyeki enkurruna ino, neboluni emasipaisho ino ti atua enkiborra ino oo nkonyek tenebo isintan linono, o te nkaraki nena aitin inono pooki nemeishu, o te nkaraki ilo sarge loo nkera inono nena ninchoo ninche, neaku, ing'ura ekaiturrurru isintan linono pooki, lelo litishipakine lelo pooki linyor o lelo limbayie; ekaiturrurru ninche mikitaarare iyie too nkaloli pooki, naboloo emasipaisho ino eboloki ninche, pee etum aatodol emasipaisho ino pooki. Naa kaaiguanare iyie anaa nkituaak naagil olning'o le nkiama neiguanareki ilooibukoo osarge, neyau shumata iyie ilo sarge lengoro napi o lom. Naa kaishooyo iyie apik inkaik oo sintan linono naa kasulaa ilgilat linono negil aauroo iwuejitin inono neeika, naa aikioru ninche iyie inkilani inono neya imasaa inono sidain, niking'uaa iyieira emasipai minchopo. Naa keyau ninche olorora likigilunore iyie, naa aikinang ninche iyie too soito nikidung ninche iyie aitaa ndung'udung'ot too lalema lenye. Naa kepejoo nkajijik inyi neyau enkiguana shumata iyie te dukuya nkituaak kumok; naamitiki iyie pee mias esiai enkiborra oo nkonyek, nimintoki aikata aishoru olekoisiaayio. Metaa kaitaraposh engoro ai te iyie, neiwuang olom lai te iyie; kaaku nanu olobor, nemaitoki aigil agoro. Ore amu eitu idamu nena olong'i e kitisho ino, kake kintagoro nanu oleng te kuna tokitin pooki; neaku ng'ura, kaitalaku sii nanu inkiaasin inono te shumata endukuya ino, ejo Olaitoriani Enkai. Keitu doi ias eloloito aitushulaki olminong lino pooki? “Ing'ura ajo ore pooki ng'ae oasishore endung'et e rashe naa keasishore ena dung'et e rashe te nkaraki iyie, anaa enatiu ng'otonye, ‘Anaa enatiu entito.’ Ira iyie entito e yieyio lino, ina naiba olpayian lenye o nkera enyena; nira enkanashe oo nkanashera inono, nena naaiba ilpayiani lenye oo nkera enye, ore apa yieyio lino naa e Hiti ore papaailino naa Olamori. Ore enkanashe ino botor naa Samaria, ina naboitare intoyie enyena te nkalo ino e moikuape; ore enkanashe ino kiti, ina namanya enkalo ino e kopikop naa Sodom tenebo intoyie enyena. Neitu ake kindip enkiimata oo nkoitoi enye arashu ias enatiu olminong lenye; ore te nkata kiti oleng nitarruoyie alang ninche too nkoitoi inono pooki. Ore anaa enaishu nanu, ejo Olaitoriani Enkai, ore enkanashe ino Sodom o ntoyie enyena eitu eas ninche anaa ina nitaasa iyie o intoyie inono. Ing'ura, ena apa entorroni naata enkanashe ino Sodom: ore ninye tenebo ntoyie enyena neeta olwuasa, o endaa sapuk, o embularoto metii engoloto, kake eitu eretu lelo aisinak o lemeeta toki. Ekewuasa apa ninche, netaasa imbaa olminong te dukuya nanu; neaku aiwuang'ie nanu ninche, ina kata nadol ninye. Eitu eas Samaria olpisiai loo ng'ok inono; itaasa intae imbaa kumok olminong aalang ninche, nintaa nkanashera inyi inaalioo aa supati ti atua nena baa pooki olminong nitaasa. Tanapa esulare ino, iyie sii, amu iyopiruo enkiguana sidai too nkanashera inono; te nkaraki ing'ok inono nena nitaasa te ntorroni oleng alang ninche, etisipa ninche aalang iyie. Metaa tukurru, iyie sii, ninap esulare ino makewan, amu intaa nkanashera inono inemeeta entioto. “Ekashuku aiturrurru emunyani enye, emunyani e Sodom tenebo ntoyie enyena, o emunyani e Samaria tenebo ntoyie enyena, naa kashuku emunyani inyi ti atua ninche, peyie itumutumu aatanap esulare inyi nikurrurru te pooki nitaasa, niyakuku enkilejilej te ninche. Ore too nkanashera inono, Sodom tenebo intoyie enyena naa kerrinyokino eneikununo apa te dukuya, ore Samaria o ntoyie enyena nerrinyo eneikununo apa te dukuya; ore iyie tenebo ntoyie inono naa irrinyokino eninkununo apa. Amaa apa enkanashe ino Sodom keitu eipoti tenkutuk ino teina olong apa olwuasa lino, eton eitu eboluni intorrok inono? Indipa taata atotiu anaa ninye entoki nadol esulare too ntoyie e Edom o lelatia enye pooki, o too ntoyie oo Lfilisti, lelo pooki likimanita likimenaa iyie. Inap iyie enkitamioto eloloito ino, tenebo olminong lino, ejo Olaitoriani. “Ee, inji ejo Olaitoriani Enkai: Ekaitaas iyie anaa ina nitaasa, ilo otemenayie ilo mumai agil ilo ning'o lo sotua. Kake kadamu osotua lai tenebo iyie too nkolong'i e kitisho ino, naa kaitasheyie te iyie olning'o lai lo sotua loo ntarasi. Ina peyie ilotu adamu inkoitoi inono nikurru tenaya nkanashera inono, nkanashera inono botoro o nkutiti, naaisho ninche iyie anaa ntoyie, kake mme te nkaraki ilo sotua tenebo iyie. Ekaitasheyie osotua lai tenebo iyie, naa iyiolou ajo ara nanu Olaitoriani, peyie itum atadamu nimputukuny, nimintoki aekata abol enkutuk ino te nkaraki enkurruna ino, tenaapalaki iyie nena pooki nitaasa, ejo Olaitoriani Enkai.” Nelotu ororei lo Laitoriani enatii nanu ejo: “Enkerai e tung'ani, tolimu oloyiote niro enkitanyaanyukoto airorie enkaji e Israel; tiaaki inji ejo Olaitoriani Enkai, Eewuo olkurragos sapuk oota naipuko sapuki o nkopir naado too naipuko, nebore esidano oomuain kumok, nelotu Lebanon negil ilukuny ooltarakua; negilu ilukuny oo ltarakua nena lukuny enye naaipilipil aya ninche enkop namirishoreki, nepik enkanasa oo lbiasharani. Neitoki aya lelo anterera leina kop neun ninche te nterit napir; nepik ninye embata oo nkariak sapuki; Neitasheyie ninye anaa Enkaitubului nabulu, nebulu ninye neaku osabibu oti oisalaashari, nerrinyokino ninye ilng'osil lenyena, ore ntona enyena nebik teine neitasheyie ninye. Metaa etaa ninye olchani lo sabibu, neiu ninye ilng'osil kumok neitayu ntapuka. “Kake etii apa likae kurragos sapuk oata inaipuko sapuki naa sidai oleng emua; naa ng'ura, idol ilo shani lo sabibu neitorioki ntona enyena ninye peyie etum ninye atipika enkare ninye. Ore teine apa netuunieki ninye, neitoki ninye aun ninye te nterit sidai natii inkariak sapuki, peyie etum atoiu ilng'osil neiu ilng'anayio, neaku olchani lo sabibu le nkitoo. Tejo, Inji ejo Olaitoriani Enkai: kebulaa ninye? Aimedotu ninye ntona enyena nedung'oo ilng'osil lenyena, neaku ore nena pilipil enyena ng'ejuko oo mbenek netoyu? Meya enkaina nagol oo ltung'ana kumok peyie edotuni ninye too ntona enyena. Ng'ura, ore teneitokini aaun kebulaa ninye? Aimetoyu katukul teneosh enkijape oo loo saen ninye, netoyu teine netuunieki ninye?” Neitoki ororei lo Laitoriani alotu enatii ejo, “Tiaki taata ina aji kiserut, Aimiyiolo enautu kuna baa? Toliki ninche tiaki, ng'ura, eewuo olaiguanani le Babilon Yerusalem, neya laiguanak lenyena tenebo ilkituaak lenyena neyaki ninche ninye te Babilon. Neya olantererai obo le nkitoo neitayunye olning'o o ninye, nepik ninye abori olmumai. (Ore iltung'ana kituaak leina kop oowa ninye aitung'uaa enkop, peyie etumi aaitoborro ina kitoo nemeitoki ailepie kewan shumata, neaku teneibung olning'o lenye neidim aitasho.) Kake eisero ninye eirriwaki ilbalusuni le Misiri, peyie etum ninche ninche aaishoo mbartan o enjore kitok. Keidim ninye aisula? Keidim oltung'ani ailanyisho oas nena baa? Keidim atigila olning'o neitoki ake ailanyisho? Anaa enaishu nanu, ejo Olaitoriani Enkai, esipa ore teine wueji nemanya olaiguanani ilo oitaaki ninye olaiguanani, ilo otanya olmumai lenye, ilo otigila osotua lenye tenebo ninye, te Babilon elo eninye aye. Ore Farao tenebo enjore enye kitok tenebo enkumoi enye meidim aataretu ninye to larrabal, ina kata nanang'ari inkang'itie nemani aamuat isunta naateshetaki peyie edung'oo enkishui oo lkumok. Ore amu etemenayie ninye ilo mumai, negil olning'o, neishoo enkaina enye metaasa ake kuna baa pooki, meimisho ninye. Metaa inji ejo Olaitoriani Enkai: ore anaa enaishu nanu, esipa katukul ajo ore olmumai lai otemenayie ninye, osotua lai otigila ninye, ekaikilikuanu ninye te lukunya enye. Ekaisalaashaki ninye orreshet lai, naa keyae ninye Babilon najing atua enkiguana tenebo ninye teine te nkaraki ina taboi nataasa aagilunore nanu. Ore lelo arikok le njore enye, nebatata to lalem, ore lelo ooleku neidapashakini pooki shoto naimu enkijape; naayiolou ajo nanu Olaitoriani oiroro.” Inji ejo Olaitoriani Enkai: Ore nanu enkorrok ai naa kaitayu elukunya oltarakuai oodo, naitayu ninye aipang'ie; nagilu te ntopij, elukunya enye elukunya embeneyioi, naa idol nanu naa kaun ninye te nchumata entopij eine neeika aisul oldoinyio; ore te nchumata oldoinyio le Israel naa kaun ninye peyie etum atoiu ilng'osil neiu ilng'anayio, neaku oltarakuai kitok; ore tiabori enye nemany impukunot pooki oo ng'uesi; ore to loip loo lng'osil lenyena ore impukunot pooki oo motonyi neponari aaisho. Neyiolou ilkeek pooki liong'ota aajo nanu Olaitoriani oitadoyio lelo keek adoru, naitubulu aitoodor lelo keek dorropu, naitoi lelo keek oonyori, naitonyorij lelo keek ootoito. Nanu Olaitoriani oiroro naa kaas ina. Neitoki ororei lo Laitoriani aigil alotu enatii ejo: “Ainyoo eutu ena ningil ena dung'et e rashe te nkop e Israel, ‘Einosa iloopapa isabibu ooisuijo, ore ilala loo nkera nenoto enkisuijo?’ Ore anaa enaishu, ejo Olaitoriani Enkai, ore ena dung'et e rashe mintokiki aikata aasishore te Israel. Ing'ura, ore iltauja pooki naa ilaainei; o ltau sii le papa anaa enatiu oltau le nkerai olalai sii ninye: ore oltau pooki oas ing'ok naa keye. “Tenaa supat oltung'ani neas ina supat naishiaakino tenemedaa too ldoinyo arashu edumu inkonyek enyena aing'or nena aitin nemeishu enkaji e Israel, nemeisarkionie enkitok olelatia enye arashu elo enetii enkitok te nkata enye oloirerio, nemeirony hoo likae tung'ani, kake elaaki ilo oota esile elaata enye, nemeas inenkikonya, neisho emukate enye lelo oota esumash neitoip olemeeta enkila te nkila, nemeisilenoo eponaa arashu eya pooki ponaroto, neibooyo enkaina enye aitung'uaa ntorrok, nedung enkiguana nasipa terishata oltung'ani o likae nelo too nkitanapat aainei neing'or oleng agolie nkitanapat aainei, naa supat ninye, eketon ninye eishu, ejo Olaitoriani Enkai. “Teneiu ninye olayioni laa olaikonyani, olaibukoroni lo sarge, ilo lemeas nabo e kuna siaitin, kake edaa te kulo doinyo, neisarkionie enkitok olelatia enye, neirony lelo aisinak o lelo oota enyamali, neas ine nkikonya, nemeiteng'el ilo mumai, nedumu nkonyek enyena adumaki inkaitin nemeishu, neas imbususi, neisilenoo te mponaroto neya emponaroto; keitoki pasa aton eishu? Meitoki ninye aton eishu. Etaasa ninye kuna baa pooki olminong, meeta nchere aimeye, naa ore osarge lenye neaku shumata enyeetii. “Kake teneiu ele tung'ani enkayioni nadol nena ng'ok pooki naataasa papaai lenye, neureishoyu, nemeas nena naataasa nemedaa too nchumat oo ldoinyo arashu edumu inkonyek enyena adumaki nkaitin nemeishu enkaji e Israel, nemeisarkionie enkitok olelatia enye nemeinyal likae tung'ani, neshuku ina nainosie olmumai elulung'a nemeas inenkikonya, kake eisho endaa enye lelo oota esumash neishopoki lelo lemeishopo enkila, neibooyo enkaina pee meas intorrok, nemeya ina naponari arashu eponaa, neing'or ajurru irrekiei laainei, nelo ti atua nkitanapat aainei; nemeye ninye too ng'ok e papaai lenye; meeta nchere peemeton eishu. Ore enkaraki papaai lenye, amu eitamoo kewan imbaa enkiba, neikony olalashe lenye, neas ina neme sidai ti atua iltung'ana lenyena, ing'ura, keye ninye te nkaraki ing'ok enye. “Nijo ake, ‘Ainyoo peyie menyamalu ilo ayioni too ng'ok e menye?’ Teneas olayioni ina naishiaakino nesipa, netujurruo oleng inkitanapat aainei, metaa nchere pee meton eishu. Ore oltau oas eng'oki naa keye. Menyamalu olayioni te nkaraki ing'ok e menye, arashu enyamalu menye te nkaraki ing'ok o layioni lenye; ore esupatisho osupat neton te shumata e ilo oota, ore entorroni e ilo torrono netonie shumata ninye. “Kake teneibelekenyunye ilo torrono too ntorrok enyena pooki naataasa neibung inkitanapat aainei neas ina naishiaakino nesipa, meeta nchere pee meton eishu; nemee ninye. Meetae entorroni enye nabo naataasa naitokini aadamu te nkaraki ninye; ore tesupatisho nataasa nemeeta nchere, meton eishu. Kaatayie nanu enchipai keeya e ilo torrono, ejo Olaitoriani Enkai, neme nchere pee eibelekenya ninye te nkoitoi enye neton eishu? Kake teneibelekenya oltung'ani supat aing'uaa ina supatisho enye neas ing'ok neas nena bususi olminong pooki naasita ilo tung'ani torrono, keidim atotona eishu ninye? Meetae nabo oo siaitin naataasa supati naitokini aadamu; amu ore te nkitapong'oto nataayie ninye olarruoni o te ngoki nataasa ninye, naa kee. “Nijo ake, ‘Ore ina oitoi Olaitoriani nemesipa!’ Inining'o tena kata, iyie naaji e Israeli: Amaa enkoitoi ai aimesipa? Aime inkoitoi inyi nemesipa? Ore teneibelekenya oltung'ani supat aing'uaa esupatisho enye, neas ing'ok, naa keye te nkaraki ina; keye te nkaraki ina ng'oki nataasa. Ake sii, ore teneibelekenyunye oltung'ani aing'uaa nena torrok naataasa neas ina naishiaakino nesipa, naa keitajeu enkishui enye. Amu etujurruo neibelekenyunye aing'uaa ntorrok pooki naataasa, meeta nchere peyie meton eishu, meye ninye. Nejoito ake enkaji e Israel, ‘Ore enkoitoi o Laitoriani nemesipa!’ Iyie na aji e Israel, amaa nkoitoi aainei aimesipa? Aime nkoitoi inono nemesipa? “Metaa ekaaiguanare iyie, iyie na aji e Israel, pooki ng'ae te risioroto oo inkoitoi enyena, ejo Olaitoriani Enkai. Irridu nimbelekenya aing'uaa intorrok inono pooki, arashu eyaku ing'ok inono enkidaaroto ino. Taarai intung'uai kewan intorrok pooki nena nitaasa kigilunore nanu, nitumokiki ate oltau ng'ejuk o enkiyang'et ng'ejuk! Ainyoo peyie iye naaji e Israel? Amu maata enchipai e keeya e pooki ng'ae ejo Olaitoriani Enkai; metaa imbelekenyunye pee inchu.” Ore iyie tudumu enkishirata adumaki ilkituaak le Israel, nijo: Kaa lipong apa olng'atuny ng'utunyi ti atua ilng'atunyo! Eitubulua ing'atunyo kutiti ti atua ilng'atunyo. Eitubulua nabo oo ng'atunyo enyena, neaku oloti ng'atuny, neitamok kewan eneiko teneibung ing'uesi, neinos ninye iltung'ana. Ore iloreren nening'oo ninche, nerreshi ninye te ngumoto enye neyau ninche ninye too lala oogamishoreki, aayau enkop e Misiri. Ore pee edol ng'otonye ajo eisulieki, netaa eiting'o osiligi lenye, neya ninye likae kuoo, too lkuoo lenyena, neitaa oloti ng'atuny. Neloolo ninye ti atua ilng'atunyo, neaku oloti ng'atuny; neitayiolo kewan eneiko teneibung ing'uesi; neinos iltung'ana. Nemut aidaikie isempewueti lenye, neitomijooni inkanas enye; ore enkop neiputukuny o lelo pooki oomanya ninye, to ltoilo lenkikurrukur enye. Ina peyie edumakino ninye iloreren aarare ninye, nepik irresheta pooki alo; neisalaashaki orreshet lenye shumata enye; neyae ninye atua engumoto enye. Ore too lala oololo nepiki ninye osanduku, oibung'ieki nenapieki ing'uesi neyakini ninye olaiguanani le Babilon; nenapi ninye atua ewueji neikenorieki, peyie meitokini aekata aaning oltoilo lenye, te shumata lelo doinyo le Israel. Etiu apa ng'utunyi anaa osabibu le nkurma, otuunokoki embata enkare, oiu ilng'anayio nebore sii ilng'osil, te nkaraki enkare sapuk. Ore enchata enye empolos neaku eng'udi olaiguanani; etubulua ninye alus pooki, ti atua nenen neesur oo lng'osil; nedoli enkadori enye, ti atua enkumoi oo lng'osil lenyena. Kake etadotuoki olchani lo sabibu te ngoro napi, aanang'aki enkop, ore olkutati loo loo saen neitoi ninye; ore ilng'anayio lenyena nedung'ori, ore entonata o lchani ogol neitoi, nemut ninye enkima aidaikie. Enyaakaki taata aaun to lpurkel, te nkop natoyio neeta enkure. Neshomo enkima aing'uaa entonata enye, nemut ilng'osil lenyena olng'anayio, metaa metii enetelekua te ninye teina tonata nagol, nemeetae eng'udi o laiguanani. Ore ena naa enkishirata, netaa enkishirata. Ore to lari le naapishana, to lapa le imiet te nkolong e tomon o lapa, nepuonu embata oo lpayiani le Israel aaikilikuanu mbaa to Laitoriani, netoni te dukuya nanu. Nelotu ororei lo Laitoriani enatii naajoki: “Enkerai e tung'ani, irorie ilpayiani le Israel nijoki ninche, inji ejo Olaitoriani Enkai, Ainanu ipuonunu aaikilikuanishore pee ietuo? Ore anaa enaishu nanu, ejo Olaitoriani Enkai, mikinkilikuanishorere nanu. Aiminguanare iyie ninche, enkerai e tung'ani, aiminguanare iyie ninche? Ina pee inchosho ninche metayiolo olminong loo loo menye lenye, nijoki ninche, inji ejo Olaitoriani Enkai: Ore teina olong apa nategelua Israel, nanya olmumai teina ishoi e nkaji e Yakobo, naitayiolo kewan ninche te ina kop e Misiri, ainosa apa olmumai teninche ajo, Ara nanu Olaitoriani Enkai inyi. Ore teina olong nainosa olmumai te nkaraki ninche inchere kayau ninche aitupuku te ina kop e Misiri aya ninche ina kop naing'uraka ninche, enkop naruko kule o enaisho, enkop sidai aisul too nkuapi pooki. Najoki nanu ninche, entayu enturrai intokitin torrok naadaare nkonyek inyi, pooki ng'ae te intae, nimintokiki aaisarkionie ate too nkitanyaanyukot oo nkaitin nemeishu e Misiri; Ara nanu Olaitoriani Enkai inyi. Kake etaa ninche kiseruti te nanu nemaaning nanu; eitu eitayu aipang'ie ong'ata pooki tung'ani intokitin torrok naaingor nkonyek enye neitu eiturraa nena kitanyaanyukot oo nkaitin nemeishu e Misiri. “Amu atadamua nanu ajo kabukoki engoro ai napi shumata ninche, naishoru engoro ai aarare ninche ti atua enkop e Misiri. Kake ataasa enataasa te nkaraki enkarna ai, peyie meisarkionieki te dukuya iloreren lelo oomanya atua, lelo laibalakinye kewan edolita aitupuku ninche teina kop e Misiri. Metaa atorikoyie ninche aitung'uaa enkop e Misiri nayau ninche atua olpurkel. Naisho ninche nkiguanat aainei naitodol ninche nkitanapat aainei, laa ore pooki tung'ani ogolie asuj ninche, neton eishu. Ore ake sii aishoo ninche isabatoni aainei, anaa olmonekie te rishata ai o ninche, peyie etum aatayiolo aajo nanu Olaitoriani oitisiny ninche. Kake ore enkaji e Israel netaa kiseruti te nanu to lpurkel, eitu ninche epuoyie nkiguanat aainei kake etanyaita nkitanapat aainei, naa tenesuj oltung'ani ninche neton eishu; ore isabatoni aainei neisarkionie oleng. “Ina peyie adamu ajo kabuku engoro ai abukoki shumata ninche to lpurkel peyie atum aishie ninche tukul. Kake ataasishe te nkaraki enkarna ai, peyie meisarkionieki ninye te dukuya iloreren, laa ninche aitupukunye ninche edolita. Ore ake sii nainosa olmumai te nkaraki ninche to lpurkel inchere mayau ninche ina kop naishoo ninche, enkop naruko kule o enaisho, enkop naisul te sidano, ore amu etanyaita ninche nkiguanat aainei neitu epuoyie ninche nkitanapat aainei, neisarkionie isabatoni aainei; amu etusuja iltauja lenye nena kitanyaanyukot oo nkaitin enye nemeishu. Ore ake eyia, eing'urrie enkong'u ai ninche, neaku eitu amut ninche aidaikie arashu aiting'ie ninche tiong'ota. “Najoki nanu nkera enye tiong'ota, emipuoyie nena kitanapat o loo papaai linyi, arashu isujusuju inkiguanat enye, arashu indurukiekie ate too nkitanyaanyukot oo nkaitin enye nemeishu. Ara nanu Olaitoriani Enkai inyi; enchomie nkitanapat aainei ning'oring'oro oleng aajurru nkiguanat aainei, niyanyititi isabatoni aainei peyie etum aataa olmonekie te rishata ai o intae, peyie iyiolouu aajo ara nanu Olaitoriani Enkai inyi. Kake ore nena kera kiseruti te nanu; eitu ninche epuoyie nkiguanat aainei, neitu ejurru aaing'or inkiguanat aainei, naa te njurrunoto najurruni eishu oltung'ani; eisarkionie ninche isabatoni aainei. “Ina peyie adamu ajo kairriu engoro ai napi shumata ninche naitorioki engoro ai agilunore ninche ti ong'ota. Kake aibooyie nanu enkaina ai, naasisho te nkaraki enkarna ai, peyie meisarkionieki ninye te dukuya iloreren, laa too nkonyek enye eipang'unye nanu ninche. Ore ake sii ainosie ninche olmumai tiong'ata inchere ekaisardakie ninche ti atua iloreren naidapashaa ninche too nkuapi, amu eitu eas ninche nkiguanat aainei, kake etanyaita nkitanapat aainei neisarkionie isabatoni aainei, ore nkonyek enye neitoriokino nkitanyaanyukot oo nkaitin nemeishu oo loo menye. Ore ake eyia naishoo ninche nkitanapat nena nemesidain o nkiguanat naa te ninche meidim aanoto enkishui; naisarkionie nanu ninche te nena kishorot enye, aisho ninche meishooi to lasar le nkima lelo ilkikaunot lenye, pee atum aituria ninche; ataasa nanu ina pee etum ninche aatayiolo nchere ara nanu Olaitoriani. “Metaa, enkerai e tung'ani, irorie enkaji e Israel nijoki ninche, Inji ejo Olaitoriani Enkai: Ore ake sii, nena ae toki naatamorie iloo papaai linyi, amu eitarruoitie ninche te dukuya nanu. Ore apa peyie ariku ninche ina kop apa nainosie olmumai ajo kaisho ninche, neaku ore pooki doinyo oodo odol arashu olchani ake ninye pooki oota mbenek, neishooyo ninche teine ilasarri lenye, neitarasaa ninche teine iolasar le ngoro; neirriwaa teine olasar le ngoro ooki. (Najoki nanu ninche, koree ine wueji neika nipuopuo? Neaku keji enkarna e ine Bama o metabaiki ena olong.) Neaku naa tiaaki enkaji e Israel, Inji ejo Olaitoriani Enkai: Indurukiekie ate anaa enaikuna iloo papaai linyi nipong'oriri aasuj nena tokitin enye naaiduruk? Ore tinintayuyu inkishorot inyi nintayuyu inkera inyi too lasarri le nkima, nindurukiekie ate too nkitanyaanyukot oo nkaitin inyi nemeishu pooki o ena olong. Naa aikindimidimi intae aaikilikuanishore nanu, na aji e Israel? Ore anaa enaishu nanu, ejo Olaitoriani Enkai, mikinkilikuanishorere intae nanu. “Ore ina natii indamunot inyi nemeaku ae kata ina damunoto, ‘Matotiu anaa iloreren anaa iloshon loo nkuapi, nikiserem inkeek o soito.’ “Ore anaa enaishu nanu, ejo Olaitoriani Enkai, esipa te nkaina magilani o te nkaina naitoriori, o te ngoro natubukuoki, kaaku nanu Olaiguanani te shumata iyie. Ekaaitayu iyie aitupuku tiatua iloreren naiturrurru intae aitung'uaa nkuapi nena nindapashakinote, te nkaina magilani o te nkaina naitoriori, o te ngoro nabukuni, naa kayau nanu intae ongota too loshon, najing te ine enkiguana tenebo intae king'ura too nkomomi. Anaa enatijinga enkiguana tenebo iloo papaai linyi tiong'ota enkop e Misiri, naa kajing enkiguana tenebo intae, ejo Olaitoriani Enkai. Ekaimie intae abori eng'udi, naisho intae entijing atua te nkikena. Ekaisujaa lelo kiseruti tiatua intae, o lelo ooas intorrok aagilunore nanu; ekaitupuku ninche te ina kop nashomo kake mejing ninche enkop e Israel. Ina peyie iyiolouu aajo ara nanu Olaitoriani. “Ore te iyie, iyie naaji e Israel, inji ejo Olaitoriani Enkai: Shomo pooki ng'ae isiayia inkaitin oo nkitanyaanyukot inono nemeishu, tenakata o te siadi ena, tinimikining'ining'i nanu; kake ore enkarna ai sinyati mintokiki aikata aaisarkionie too nkishorot inyi oo nkitanyaanyukot oo nkaitin nemeishu. “Amu ore te shumata oldoinyo lai sinyati, too nchumat oo ldonyo le Israel, ejo Olaitoriani Enkai, teine aaisiai enkaji pooki e Israel pooki ng'ae, akaaisiaiai nanu teina kop; naa kang'amaa nanu ninche te ine, naa teine aikilikuanu inkishorot inyi o ntokitin sidain oo nkishorot inyi, tenebo lasarri linyi oosinya. Anaa esong'uana narropil ekang'amaa intae, ina kata naitupuku intae too loreren, naiturrurru intae aitung'uaa nena kuapi pooki naaidapashakaki intae; naa kaibalunye esinyatisho ai tiatua intae edolita iloreren pooki. Niyiolouu aajo ara nanu Olaitoriani, ina kata nayau intae enkop e Israel, ina kop apa nainosie iloo papaai linyi olmumai ajo kaisho ninche ore teine naa idamumu inkoitoi inyi o pooki nitaasa te nena nindurukie ate, naa igorokinono ate te pooki torrono nitaasa. Naa iyiolouu inchere ara nanu Olaitoriani, ina kata naitaas intae ina te nkaraki enkarna ai, neme te nkaraki inkoitoi inyi torrok neme te nkaraki isiaaitin inyi torrok, iyie naaji e Israel, ejo Olaitoriani Enkai.” Nelotu ororei lo Laitoriani enatii naajoki: “Enkerai e tung'ani, intorioki enkomom ino enkalo e kopikop tolikioi ororei tigilunore kopikop, nimbonoki agilunore entim e nkop e Negeb ijoki: entim e Negeb toning'o ororei lo Laitoriani, inji ejo Olaitoriani Enkai, Ing'ura ekaainuaaki iyie enkima, naa kemut pooki shani onyori otii atuaiyie o pooki shani otoyio; ore olang'a le nkima nemearaiyu, ore inkomomi pooki eiteru te kopikop o metabaiki moikuape naa keilang ninye. Ore iseseni pooki naa kedol aajo nanu Olaitoriani oinuaa ninye nemeari ninye.” Ina peyie ajo, “Aha Olaitoriani Enkai! Aajoki ninche nanu, ‘Aime Olaitoriani ele loo nkitanyaanyukot too nkatinin?’ ” Nelotu ororei lo Laitoriani enatii aajoki: “Enkerai e tung'ani, intorioki enkomom ino enkalo e Yerusalem niliki ororei aarare nena wuejitin sinyat; imbonoki tigilunore enkop e Israel nijoki ina kop e Israel, Inji ejo Olaitoriani: Ing'ura ekaarare iyie, naa kaaitorioki iyie olalem lashutu te nchashur enye, nadung'oo tiatua iyie lelo supati o ltorrok. Ore amu kadung'oo te iyie lelo supati o lelo torrok, neaku kepuku olalem lai aing'uaa enchashur enye aarare iltung'ana pooki eiteru te kopikop o meshomo moikuape; neyiolou iltung'ana pooki aajo ara nanu Olaitoriani otushutua olalem lai te nchashur; nemeitokini aaigil aashukoki olalem enchashur. Iyagie naa, enkerai e tung'ani; iyagie oltau omu eeta osina to ltau le mion te dukuya nkonyek enye. Naa tinikinkilikuan ninche aajoki, ‘Ainyoo peyie iyagie?’ Naa ijoki, ‘Te nkaraki lelo kiliku oopuonu. Ore peyie ebau, naa kelepori pooki tau ore nkaik pooki naa keshalu, ore pooki tau neiterre neshalu nkung pooki anaa enkare. Ing'ura, ajo elotu naa keitabari ninye.’ ” Ejo Olaitoriani Enkai. Nelotu ororei lo Laitoriani enatii naajoki, “Enkerai e tung'ani, imbonisho nijo, Ena ejo Olaitoriani: Olalem, eiyioki olalem, neiutuutoki aasik, aaii tenkaraki eyieng'are, netisikaki meimerlela anaa enkiwuang'ata! Arashu aikintobiru enkuenia? Itemenayie eng'udi, enkerai ai, o pooki toki e nchata. Metaa eishooyioki olalem metisiki, peyie etumi aaibung'a neiyioki nesiki, peyie etumi aatipik ina aina oloyieng'isho. Inchira niyietu nakerai e tung'ani, amu kegilunore ninye iltung'ana laainei; kegilunore ninye iltung'ana pooki kituaak le Israel; etipikaki ninche pooki olalem tenebo iltung'ana laainei. Toosho naa enkupes ino. Amu meaku ninye entemata kaa eas ninye tinimenaa iyie engudi?” ejo Olaitoriani Enkai. “Imbonisho naa, enkerai e tung'ani, toosho inkaik inono nincho olalem meeu adou katitin are, ee kat uni, ilo alem le lelo ooari metuata; olalem leyieng'are kitok, laa ninye oman ninche, peyie etum iltauja lenye aatalepori, nebatata ilkumok too nkishomin enye. Aishorua ilo alem oimerlel; Aha! Eitobiruno ninye anaa enkiwuang'ata, netisikaki peyie etum ateyiengisho. Tudung'o oleng tatene o kedienye ine wueji netuutakaki enepi olalem. Ekaosh sii nanu nkaik aainei, naa kaitaraposh engoro ai; nanu Olaitoriani oiroro.” Neitoki ororei lo Laitoriani alotu enatii naajoki: “Enkerai e tung'ani, tuutu inkoitoi are tenkaraki ilo alem le ilo aiguanani le Babilon olotu; epuonu pokira are teina kop. Nintobiriri embao nautu eneimi, nipik ninye dukuya ina oitoi nalo enkanasa; tuutu enkoitoi naim ilo alem alo Raba oo Lamoni o meshomo Yuda o meshomo Yerusalem ina ang nasheta isunta. Amu eitasho olaiguanani le Babilon teine neorore inkoitoi te rishata e nena oitoi are, easishore enaibon; neikirikirie mbaa, neikilikuanishore enkitanyaanyukoto e nkai naji Terafi, neing'or emonyua eina ngues naibonishore. Ore atua enkaina enye e tatene nepuku enkukuo e Yerusalem pee ebol enkutuk enye te nkishirata, peyie eilepie oltoilo te mbuaata, pee eitorioki isekenke naagilieki nkishomin neitasheyie nenen neesheta te ng'olon neshetu iltaleta ooibung'ishore. Kake ore te ninche, netiu anaa enaibon elejare; einosa ninche ilmuma oogol; kake eyau ninye eng'oki enye metadamuni, peyie etumi aaibung'a. “Metaa inji ejo Olaitoriani Enkai: Ore amu intaa ing'ok inono inaadamuni, te ina nemeekure eisudoroyu intorrok inono, neaku ore too siaaitin inono pooki naa keibalayu ing'ok inono; amu ieuo iyie adamu; naa aikiya ninche iyie. Ore iyie, intae iltung'ana torrok lemesinya, olkitok le Israel, ilo oewuo enkolong enye, erishata enkitamioto ino nabayie, inji ejo Olaitoriani Enkai: Intayu enkarasha endukuya, nintayu ina maupe enkitoo; meitoki intokitin aatiu anaa enaikununo; isisa ina nidol etii abori, nintadou ina natii shumata. Enkidaata, enkidaata, kaitobiru nanu enkidaata; metumi ninye eneima ninye o meeu ninye aa enenye esipata; naa ninye aisho nanu. “Ore iyie, nakerai e tung'ani, imbonisho nijo: Inji ejo Olaitoriani Enkai tialo Ilamoni, neipirta sii enkurruna enye; tejo, Olalem, olalem etushurtuaki peyie eyieng'ishoi, netisikaki meimerlela anaa enkiwuang'ata, ore edol ninche te ntae induaat elejare ina kata eibonoki ninche intae elejare, peyie eeniki imurto e lelo tung'ana lemesinya torrok, lelo ootabaikia ninche enkolong enye enkata enkitamioto enye nabayie. Tushukoki olalem enchashur enye. Teine wueji nikintobirieki iyie, teina kop apa ning'uaa ekaaiguanare nanu iyie. Naa kabukoki shumata intae engoro ai; nakutaki intae enkima engoro ai; na kapik intae inkaik oo ltung'ana arruok meidaikie. Iakuku intae ilkeek le nkima; ore osarge linyi nejing empolos e ina kop; meitokini aekata aadamu intae; amu nanu Olaitoriani oiroro.” Ore ake sii eewuo ororei lo Laitoriani ine natii naajoki: “Ore iyie enkerai e tung'ani, aiminguanare iyie, aiminguanare iyie enkanasa osarge? Nimbalakinye ninye nena baa pooki olminong enyena. Naa ijoki, inji ejo Olaitoriani Enkai: Ore enkanasa naibukoyie osarge te rishata enye; peyie etum enkata enye aeu, neitobiru nkitanyaanyukot oo nkaitin nemeishu aidurukie kewan! Itaa iyie torrono tenkaraki osarge limbukoitie; ninduruko te nena kitanyaanyukot oo nkaitin nemeishu nintobirutua, niyautua aaitinyiku enkolong inyi etabawua ina kata nageluno oo larin linyi. Neaku aaitaa iyie enkurruna too loreren, nikisurdaanyi iyie too nkuapi pooki. Ore lelo ootaana o lelo oo lakua te iyie naa aikisurdaany iyie, iyie leme toki, obore enkingolingol. “Ng'ura, ore lelo kituaak le Israel netii atua iyie, pooki ng'ae te ngolon enye, netemerregelaki to sarge oibukori. Ore papa o yieyio neitaasaki inolmena tiatua iyie; ore olomoni otii atua iyie neisimaki te rishata ino; ore nkokishin o nkolia tiatua iyie neinyalaki. Itemenayie iyie intokitin aainei sinyat, nisarkionienie isabatoni aainei. Etii iltung'ana ootii atua iyie ooiro imbaa enkarruoisho pee eibukori osarge, oltung'ana tiatua iyie oodaa too nchumat oo ildonyio; iltung'ana ooas enkarruoisho tiatua intae. Ore tiatua iyie neoru iltung'ana iloo menye ilkilani, ore tiatua iyie neibung inkituaak te rishata enye enkiduruk. Eas obo olminong te nkitok ole latia enye; ore likae neotiki te nkoitoi torrono ainyal enkitok olayioni lenye; ore likae tiatua iyie neinyal enkanashe enye, entito e papaai lenye. Ore ake tiatua iyie neya iltung'ana eropare peyie eibukoo o sarge; niyaya ilaat emponaroto e dupoto inyi too lelatia linyi ironyironyo; nemeekure kidamumu nanu, ejo Olaitoriani Enkai. “Ing'ura, ore naa, atoosho inkaik aainei tenebo te ina dupoto e lejare nintobirua o te ilo sarge otii arishata ino. Keidim engolon ino e oshoke atobikoi, arashu keidim inkaik inyi aatagol, te nena olong'i naalotu aarare iyie? Nanu Olaitoriani oiroro, naa kaas ina. Ekaaidapash iyie tiatua iloreren naisardakie iyie too nkuapi, namut ilduruki linono te iyie. Naa kaaisarkionieki nanu te dukuya iyie tiatua iloreren; niyiolou ajo ara nanu Olaitoriani.” Nelotu ororei lo Laitoriani enatii naajoki: “Enkerai e tung'ani, ore enkaji e Israel netupuruko oleng te nanu, ninche pooki, ore enkosholai o suyiai o empirbil o esekenkei o risasi otii atua olkokuet, netupuruko pooki. Neaku inji ejo Olaitoriani Enkai: Ore amu itupuruko pooki, neaku ing'ura ekaiturrur intae terishata e Yerusalem. Anaa enaiturrurru iltung'ana enkosholai o suyai o esekenkei o risasi o empirbil nepik atua olkokuet peyie ekutaki ninche enkima shumata ninye peyie etum aatoshol ninye; neaku kaiturrurru intaete ngoro ai o te ngoro ai napi, napik intae atua ashol intae. Ekaiturrur intae nakutaki intae enkima engoro ai napi, naa kesholi intae te rishata enye. Anaa enasholi enkosholai to lkokuet, naa kesholi intae te rishata enye; naa iyiolouu ajo nanu Olaitoriani otubukoko engoro ai shumata inyi.” Nelotu ororei lo Laitoriani enatii naajoki: “Enkerai e tung'ani tiaaki ninye, ira iyie enkop nemesinya, arashu natashaikia te ina olong e ng'oro. Ore ilkituaak ootii atua ninye netiu anaa olng'atuny oikurrukur opolos engues, etumuta enkishui oo ltung'ana; ewaita ninche ilchumat o ntokitin naagol enkingang'a; eitaa ninche inkituaak kumok inkolia. Ore ilapolosak lenye netaasa ine nkikonya too nkitanapat aainei neisarkionie intokitin aainei sinyat; eitu ninche erishu intokitin sinyat o ntokitin e pooki ng'ae, neitu eitamok olorere enepaashare entoki naiduruk o esidai, netemenaitie ninche isabatoni aainei, metaa aaisarkionieki nanu tiatua ninche. Ore ilkituaak ootii erishata enye netiu anaa isuyian oopolos inkiri engues naibung'a, neibukoo osarge, neishu enkishui peyie etum nena kishorot nemesipa. Ekairriu enchan sapuk oleng, isoito sapuki le nchan, nelotu olkutati kitok oleng. Ore iloibonok lenye netumura te nturoto e monkoi, nedol induaat nemesipa, neibonoki ninche elejare ejoki: ‘Inji ejo Olaitoriani Enkai’, eitu ninye eiro Olaitoriani. Etaasa iltung'ana lena nkop entorrono, netaasa inenkikonya; eironya ninche ilaisinak o lomena, netaasa ine mesipa too ldokunot eitu ejurru enyamali enye. Naing'oru oltung'ani tiatua ninche olo ashet ina suntai neitashe teina lusie e suntai te dukuya nanu tenkaraki ina kop, peyie matum aidaikie ninye; kake eitu atum hoo obo. Metaa atubukuo nanu engoro ai shumata ninche; atumuta nanu ninche te nkima engoro ai napi; ore enkoitoi enye eitalakua too lukuny enye, ejo Olaitoriani Enkai.” Nelotu ororei lo Laitoriani enatii naajoki; “Enkerai e tung'ani, etii apa inkituaak are naa intoyie enkitok nabo; neiborrie apa onyek te Misiri; neas inenkiborra oo nkonyek tekitisho ore teine, neirragi too lki lenye neirrapirrapi ilgooitie lenye. Keji apa enkarna eina botor Ohola neji enkarna enkanashe enye Oholiba. Neaku ninche inaainei, neiu ninche ilayiok o ntoyie. Ore too nkarn enye ore Ohola naa Samaria ore Oholiba naa Yerusalem. “Eiborrie ongu Ohola aa enaai ninye, netonyarra ninye isintan lenyena, le Asiria, ilmurran ooishopo inkilani naata emua morijoi, ilaitoriak o laitasheikinok, laa ore pooki naa ilbarnot oo ng'uarri oleng, nekedito ninche imbartan. Eishoo ninye kewan ninche anaa emulayoi lelo gelunot pooki le Asiria; neidurukie kewan too nkitanyaanyukot oo nkaitin e pooki ng'ae otaasie ine nkiborra oo nkonyek. Eitu ninye epal esiaai enye enkiborra oo nkonyek ina apa nataasa eiteru too nkolong'i naatiiyie Misiri; amu ore apa te nkitisho enye netaboitare ilewa ninye neibung'a olgoo netaboitare ninye etonaa eselenkei te mulayaisho nebukoki ninye enkiborra enye oo nkonyek. Metaa atanang'aka nanu ninye atua inkaik oo sintan lenyena, inkaik oo le Asiria lelo apa ootonyorra te nkiborra oo nkonyek. Nebolu lelo emasipaisho enye; neibung ilayiok lenyena o ntoyie enyena; ore tenebo ninye nedung to lalem; neaku ninye entoki naimakini tiatua inkituaak ina kata nadung'okini ninye enkiguana. “Ore enkanashe enye Oholiba netoduaa ena naa torrono apa ninye oleng alang ninye te nkiborra oo nkonyek, naa torrrono apa ninye alang enkanashe enye. Eiborrie ninye onyek too le Asiria, ilkituaak o larikok, ilmurran ooishopo too masaa olarrabal, ilookedito imbartan, laa ore pooki naa ilbarnot oo ng'uarrayu. Nadol apa ajo eidurukieki ninye; neim pokira orrekie obo. Kake etanapa ninye enkiborra enye oo nkonyek aitulus; etoduaa ninye ilewa, ootaguetakaki inkitanyaanyukot enye isunta nena kitanyaanyukoto oo Ilkaldayo oo yela to ranki onyokie, nerretena impolosi enye too nkimeitani o nkarash natii ilukuny enye netiu pooki anaa ilkituaak, empisha oo Babilon, laa ore enkop enye naa Ilkaldayo. Ore peyie edol ninye ninche neiborrie onyek te ninche neirriwaki ilkiliku ninche te Ilkaldayo. Nejing'aki Ilbabilon ninye tiatua endapash enye enyorrata, neidurukie ninye to lng'uarra lenye; ore peyie eidip ninche aaisarkionie ninye, nelo ninye aing'uaa ninche te ngoro. Ore teneas ninye inenkiborra oo nkonyek meeta enkuretisho neboloo emasipaisho enye aaibelekenya te ngoro aing'uaa ninye, anaa peyie aibelekenya aing'uaa enkanashe enye. Kake etoponayie ake ninye enkiborra oo nkonyek, edamu inkolong'i enyena e kitisho, ina kata eiborrie onyek te nkop e Misiri neiborrie ninye onyek te lelo sanchan lenyena ooba irubat oo seseni lenye anaa inoo sirkon neeta esingate oo lamuyeishi loo mbartan, oonyaanyukie isirkon, neikununo eneing'uaa anaa enetiu eneing'uaa mbartan. Neaku neijia etiu eyieunoto entorroni oo lbarnot linono ina kata kimbung Ilmisiri olgoo lino neirony ilki linono kutiti.” Metaa, oi iyie Oholiba, inji ejo Olaitoriani Enkai: “Ing'ura ajo kadumakino isanchan linono limbelekenyakine te ngoro mikitigilunore iyie eing'uaa nkaloli pooki. Ore ile Babilon tenebo Ilkaldayo pooki, o Pekod, o Shoa, o Koa, tenebo ile Asiria pooki tenebo ninche, o ltung'ana pooki ooti sidain, ilaiguanak o laitoriak pooki tenebo, ilarikok o lmurran, ekedito pooki imbartan. Naa aikipuonu aarare iyie eing'uaa enkalo e moikuape too ngarrin oo imbartan, o ngarrin o lorora kitok lo lorere; keiturrurro ninche peyie kiarare too nkaloli pooki eeta ilong'oi kutiti o sapuki, o nkopiyiani o larrabal, naa kapik enkiguana atua ninche, naa keiguanare intae anaa enatiu enkiguana enye. Naa kaibelekenyaki intae engoro ai aarare intae, peyie atum ataarare intae te ngoro napi. Kedung'oo ninche inkumeishin inyi o nkiyiaa inyi, ore ilekunot linyi nebatatakino olalem. Naa keibung aaya ilayiok linyi o ntoyie inyi, ore ilekunot linyi nemutite nkima. Keoru sii intae inkilani inyi neya te intae isoito linyi gelunot. Neaku neijia aiko tenaiting'ie enkiborra inyi oo nkonyek ina niyautua te nkop e Misiri; metaa mintokiki aaraposhoki nkonyek inyi Ilmisiri arashu intokiki aadamu ninche. Amu inji ejo Olaitoriani Enkai: Ing'ura ajo kapik intae atua nkaik e lelo limbaba, atua inkaik e lelo limbelekenyanya aaing'uaa te ngoro; naa kearare ninche intae te nkiba, neya ninche aaitung'uaa intae ilng'anayio pooki le siaai inyi, neing'uaa intae irara imasipa nemeishopo, ore emasipaisho inyi enkiborra oonkonyek inyi neboluni. Ore olng'uarra lino tenebo enkiborra ino oo nkonyek ninye nayaua ena shumata iyie, amu itaasa enkiborra oo nkonyek tenebo iloreren, nindurukie ate too nkitanyaanyukot enye oo nkaitin. Itusuja iyie ina oitoi enkanashe ino; metaa kapik enkikompe enye enkaina ino. Inji ejo Olaitoriani Enkai: Iok iyie enkikompe enkanashe ino, ina nagut naa sapuk; aikikuneiyieki iyie nikimenuni, amu keeta ninye esapuk; aikimputi iyie emerei o sina Enkikompe enkuretisho sapuk o emutata, ina kikompe enkanashe ino Samaria; iok iyie ninye nimitu pooki aishu, nidotu kewan ilpapit, nidung ilki linono; amu airoro nanu, ejo Olaitoriani Enkai.” Metaa inji ejo Olaitoriani Enkai: “Ore amu intorikino kewan nanu, nikinyaaya oriong ino, neaku tanapa naa enyamali ino olng'uarra lino o enkiborra ino oo nkonyek.” Naajoki nanu Olaitoriani: “Enkerai e tung'ani, ainguanare iyie Ohola o Oholiba? Neaku imbalakinye naa ninche imbaa enye olminong. Amu etaasa ninche inenkiborra oo nkonyek, netii osarge atua inkaik enye; ore too nkitanyaanyukot oo nkaitin enye nemeishu netaasa eloloito; neishoo doi ninye endaa lelo ayiok laa nanu etoikitio. Ore ake sii eyia aaitaasa ninche nanu ena: eisarkionie ninche ewueji ai sinyati teina olong ake neisarkionie isabatoni aainei. Amu ore peyie eidip aateyieng inkera enye te mpolosare too nkitanyaanyukot oo nkaitin enye nemeishu, ore teina olong ake neetuo ninche atua ewueji ai sinyati aaisarkionie ninye. Naa ing'ura ena etaasa ninche te nkaji ai. Eipotutuo doi ninye iltung'ana meetu tenelakua, ilo oirriwakaki olkilikuai, naa ng'ura eetuo ninche. Amu tiatua ninche isuja iyie kewan, niyel inkonyek inono, nikus kewan too masaa; nitonini intae te shumata olorika sidai, niata emisa natipikaki dukuya iyie naa ninye itipika iyie enkorropil ai tenebo eilata ai. Netii atua ninye oltoilo loo lororani lemeshilaa toki; tenebo ilewa ookishore tenebo ootorikuoki tiong'ota, nepik ninche ilkataarri nkaik e nena kituaak, o maupen enkitoo sidain too ilukuny enye. “Ina peyie ajo, aimeasita tena kata ilewa eloloito teneas enkiborra oo nkonyek tenebo ninye? Amu etijing'akita ninche ninye, anaa enajing'aki ilewa enkitok naibor onyek. Neaku neijia eikunakinote ninche Ohila o Oholiba peyie eas inenkiborra oo nkonyek. Kake ore iltung'ana supati naa kedung'oki ninche enkiguana edung'oki ninche enkiguana enkiborra enye oo nkonyek, tenebo enkiguana oo nkituaak naaibukoitie osarge; amu inaaibor onyek ninche, netii osarge inkaik enye.” Neaku inji ejo Olaitoriani Enkai: “Iyau olorora taarare ninche, nintaa ninche entoki naitureisho naaruno. Naa kenang olorora ninche too soito neiwuang'ie ninche too lalema lenye; naa keyieng ninche ilayiok lenye o ntoyie enye nepejoo inkajijik enye. Neaku neijia aiko tenaiting'ie enkiborra enye oo nkonyek te nkop peyie etum ing'oruo pooki aaibung'ie ina inkiyiaa nemeitoki aas inenkiborra oo nkonyek anaa enitaasa iyie. Ore enkiborra inyi oo nkonyek naa keitalakuni te intae, ninapinapa elaakinoto tenkaraki eng'oki oo inkitanyaanyukot inyi oo nkaitin nemeishu; niyiolouu aajo ara nanu Olaitoriani Enkai.” Ore to lari le naaudo to lapa le tomon, te nkolong e tomon o lapa, nelotu ororei lo Laitoriani enatii aajoki: “Enkerai e tung'ani ingero enkarna ena olong, etamuata olaiguanani le Babilon Yerusalem. Niro endung'et e rashe te nkaraki ina aji kiserut nijoki ninche, inji ejo Olaitoriani Enkai: Intasheyie ina moti, intasheyie ninye, tubukoki ninye enkare; tipika ninye indung'ot oo nkiri, nena dung'ot pooki sidain, enkupes o orony; nimput ninye too loik sidain gelunot. Iwa enker naisul eluaata, nipik ilkeek le nkima abori enye; nintokitokie indung'ot enyena, nintokitokie sii iloik lenyena tiatua. “Metaa inji ejo Olaitoriani Enkai: Woi iyie ina anasa osarge, ina nanyaanyukie emoti nainosa enkop, neton ake eitu eing'uaa ninye oloirerio lenye! Intayu te ninye indung'ot iitu, miata enigelu te nkukuo. Amu ore osarge oibukoyie ninye neton ake etii atua erishata enye; eiteleiki ninye enchumata endapidapoi nasipa eitu ninye ebukoki pee eitoipoo enterit. Peyie edumu engoro ai napi, peyie aitalaku, atipika ninye shumata endapidapoi nasipa ilo sarge oibukoyie ninye peyie meitoipori ake. Neaku inji ejo Olaitoriani Enkai: Wooi iyie ina anasa osarge! Kaitaa sii nanu olchala osototi. Turupa ilkeek ninok enkima, nintokitokie oleng nena kiri nibuku nena tokitin naapiki ndaiki, nincho iloik epejori. Nintasheyie ninye metii toki te shumata nkuk, peyie etum airowuaja, ore osuyai lenye nepeji peyie aa ore oloirerio lenye nesholi tiatua ninye, nemuti kuti lenye. Te mpesho aitanaura nanu kewan ore ina kutu enye nairrusha nemeim enkima. Ore ina kutu enye naa olduruk le nkiborra ino oo nkonyek. Amu anaata apa aaitukuo iyie neitu eitukuori olduruk lino. Mikintokini aaituku iyie aaigil o metaba anaa naidip aishu engoro ai te iyie. Nanu Olaitoriani oiroro; naa kelotu aasayu ina, ekaas nanu; marrinyo nanu siadi, maaleku nanu, mairridu nanu; ore terisioroto oo inkoitoi inono o siaaitin inono ekaaiguanare nanu iyie ejo Olaitoriani Enkai.” Ore ake sii eewuo ororei lo Laitoriani enatii naajoki, “Enkerai e tung'ani, ng'ura ajo etaa kaya enchipai oo nkonyek inono peyie aaitung'uaa iyie te oshoto, niminchir hoo arashu isinanuo nemedou ilkiyio linono. Iyang'a kake mibuaku; minchiraki ake lelo meneng'a. Teena enkarasha ino elukunya, nipik inkejek inono inamuka; niminuk ake enkutuk ino, arashu inos endaa e lelo ooishir.” Neaku airorie nanu lelo tung'ana tadekenya, ore teipa neye enkitok ai, ore enkolong entadekenya nasuju naas ina naaitanapaki. Naajoki nanu iltung'ana, “Aimiliki iyiook enautu kuna baa te iyiook, paa ninche iasita?” Ina peyie ajoki ninche, “Eewuo ororei lo Laitoriani enatii naajoki: ‘Tiaki ina aji e Israel, Inji ejo Olaitoriani Enkai: ng'ura ajo kaisarkionie ewueji ai sinyati, o lwuasa le ng'olon ino o enchipai oo nkonyek inono, o eyieunoto oltau lino; ore ilayiok linono tenebo ntoyie inono nena nitung'uayie te siadi naa kebatata to lalem. Naa ias iyie anaa ina nataasa; minuk iyie enkutuk ino, arashu inos endaa e lelo ooishir. Ore inkarash inono e lukunya naa ketii ilukuny inyi netii inamuka nkejek inyi; nimisinanuonuo arashu inchirishiri, kake iishunyenye aamuta te nkaraki ing'ok inyi ning'orokinono maate. Neaku neijia etiu Esekiel te iyie aaku olmonekie; terisioroto e nena pooki naataasa ias sii iyie. Ore peyie elotu ena naa iyiolouu taa aajo ara nanu Olaitoriani Enkai!’ “Ore iyie nakerai e tung'ani, ore te ina olong naya aitung'uaa ninche isempewueti lenye, enchipai enye, o enkitoo enye, o enchipai oo nkonyek enye o iyieunot oo ltauja lenye, tenebo sii ilayiok lenye o ntoyie enye, ore teina olong naa keisiku olaishirani ayaki intae lelo omon. Ore teina olong naa ibolokiki ilo aishirani nkutukie inyi neaku iroro nimintokiki aaku ilemeidim aairoro. Neaku iakuku intae olmonekie te ninche; neyiolou ninche aajo ara nanu Olaitoriani.” Nelotu ororei lo Laitoriani enatii aajoki, “Enkerai e tung'ani, intorrioki enkomom ino enkalo oo Lamoni, imbonisho tigilunore ninche. Tiaaki Ilamoni: Entoning ororei lo Laitoriani Enkai: Ore amu itejo ‘Aha!’ Te nkaraki ewueji ai sinyati ina kata peyie eisarkionieki ninye, o te nkaraki ina kop e Israel ina kata peyie eitaa ninye mitil, o te nkaraki ina aji e Yuda ina kata peyie elo eyararoto; neaku kaaitarasaa iyie aitarasaki iltung'ana le nkalo o loosaen peyie iaku entoki enye, naa keitasheyie ninche ilng'oborri lenye tiatua intae neitobiru imanyat enye tiatua intae; naa kenya ninche ilng'anayio linyi, neok ninche kule inyi. Ekaitaa Raba olokeri loo ntamesin ore nkanas oo Lamori emuatata oo ntare. Niyiolouu taa aajo ara nanu Olaitoriani. Amu inji ejo Olaitoriani Enkai: ore amu itoosho inkaik inyi nioshieshie inkejek inyi enkop nishipapa te nkaraki intorrok pooki naatii atua intae te nkaraki enkop e Israel, metaa, eng'ura, aitorioyie nanu enkaina ai aagilunore iyie naa kaaitarasaa iyie anaa iyarunot aitarasaki iloreren; naa kaadung'oo iyie aaitung'uaa loreren; naaisho iyie indaai too nkuapi; ekaaidaikie iyie. Pee itum iyie atayiolo ajo ara nanu Olaitoriani Enkai. “Inji ejo Olaitoriani Enkai: Ore amu etejo Yuda, ing'ura ajo ore ina aji e Moab netiu anaa ilkulikae oreren pooki, neaku kaboloo inkanas oo lpolosien le Moab eiteru too nkanas naatii ilpolosien lenyena, o ina kop e Beteshimot o Baalmeon o Kiriatai. Ekaishooyo ninye tenebo ile Amoni o metabaiki iltung'ana le nkalo o loo saen metaa enjung'ore, metaa meitokini aekata aadamu too loreren. Naa kadung'oki Moab enkiguana; ina peyie etum aatayiolo nchere ara nanu Olaitoriani. “Inji ejo Olaitoriani Enkai: Ore amu etaasa Edom entorrono aarare enkaji e Yuda, naaitagoro ninye aitalaku elap te ninche. Metaa nji ejo Olaitoriani Enkai, ekaitorioo enkaina ai aarare Edom, nadung'oo tiatua ninye tung'ani o eng'ues; naa kaitaa ninye mitil; eiteru te Teman o metabaiki Dedan naa kebatata ninche to lalem. Naa kapik elap ai shumata Edom te nkaina oo ltung'ana laainei Isiraeli; naa keas ninche te Edom anaa enatiu engoro ai anaa enatiu engoro ai napi; naa keyiolou ninche elap ai, ejo Olaitoriani Enkai. “Inji ejo Olaitoriani Enkai: ore amu eitalakutua Ilfilisti elap neya ina to lwuasa lo ltau pee eidaikie teilo omang'ati lemeish; neaku inji ejo Olaitoriani Enkai: Ing'ura ajo kaitorioo enkaina ai agilunore Ilfilisti, naa kadung'oo ile Kereti, namut iloomanaa le naiposha. Ekairriu elap sapuk shumata ninche tengoro sapuk e nkitamioto. Ina pee eyiolou ninche aajo ara nanu Olaitoriani, ina kata naiteleiki elap ai shumata ninche.” Ore to lari le tomon oobo, te nkolong e dukuya o lapa, nelotu ororei lo Laitoriani enatii aajoki: “Enkerai e tung'ani, ore amu etejo Turo embae naipirta Yerusalem ejo, ‘Aha, ore ina kishomi oo loreren netigilaki, etabole tukul aisiu te nkaraki nanu; ekaaitasheyieki nanu, ore naa amu eitomijoonoki,’ neaku inji ejo Olaitoriani Enkai: Ing'ura ajo kaarare iyie, iyie Turo, naa kayau iloshon kumok mikitaarare iyie, anaa enayau enaiposha ilopir lenyena. Kemut ninche isunta e Turo, negil auroo iltaleta lenyena; naa keoroo enterit aitung'uaa ninye neitaa ninye endapidapoi nasipa. Keaku ketii ninye empolos e naiposha ewueji neisalaashieki irresheta; amu airoro nanu ejo Olaitoriani Enkai; naa keaku ninye entoki naaruno too loreren; ore intoyie enyena naatii enkop natoyio naa keyieng'i to lalem. Ina peyie eyiolou aajo ara nanu Olaitoriani Enkai. “Amu inji ejo Olaitoriani Enkai: Ing'ura ajo ekayau shumata e Turo eiteru te moikuape Nebukadresa olaiguanani le Babilon, olaiguanani loo laiguanak, eeta imbartan oo ng'arrin enye tenebo ilakedok loo mbartan tenebo olorora loo sikarini kumok. Kear ninye to lalem intoyie inyi naatii enkop natoyio; naa kemuat aaman ninche esuntai nagol nikiarare, nashetaki intae oltim aagilunore intae, neitasheyie ilchureta o long'oi aarare intae. Ekeitorioki ninye intae entoki oo sekenke agilunore isunta inyi ore too ntoluo enyena naa keuroo iltaleta linyi. Keaku kumok oleng imbartan enyena metaa ore enterit enye neitoipoo intae; ore isunta inyi naa keigusugus te ilo toilo le lelo akedok loo mbartan tenebo ngarrin oo mbartan, tenejing atua inchomito inyi anaa oltung'ani ojing enkanasa natumutaki naata ilusien too sunta. Ore too loisotok loo mbartan enyena naa keituny inkoitoi dapashi e nkanasa inyi naa kear iltung'ana linyi to lalem; ore ing'apeta inyi kituaak naa kesulakini enkop. Keitaa ninche iyarunot e karsisisho inyi imasaa enye; anaa eng'ues entim imasaa inyi e biashara naa kesulaa ninche isunta inyi neinyal inkajijik inyi sidain; ore isoito linyi o mbaoi o enterit naa kenang'akini empolos oo nkariak. Naa kaitasheyie eranyare oo sinkolioitin linyi, ore oltoilo loo wululi loo usin inyi nemeitokini aekata aaning. Ekaitaa intae endapidapoi nasipa nemetii toki; iakuku intae ewueji neisalaashieki irresheta; nemeitokini aekata aashet intae; amu nanu Olaitoriani oiroro, ejo Olaitoriani Enkai. “Inji ejo Olaitoriani Enkai ajoki Turo: amaa olmanie le naiposha aimeikirikira tenening embuaata e mbatatata ino, ina kata naigor ilo otipikaki olbae, ina kata etii lelo ootipikaki ilbaa atua erishata inyi? Neaku ore lelo kituaak leina aiposha tenedou aaing'uaa ilorikan lenye le nkitoo, neitayu ilkilani lenye, nekinyaa nena kilani enye naaikodo; naa keishopoki ate enkuretisho; Eketoni ninche te nkop neikirikira anaa adake, neureyu intae oleng. Naa kedumu enkishirata aaishiraki intae, nejoki intae ‘Kaji inkuna peyie iisha too naaiposha, iyie na anasa yioloti, ina apa magilani teina aiposha, iyie o lelo likimanya, lelo ooikonyu olkirutoto lino, tiatua enkop natoyio! Eikirikira ile mankale teina olong ino embatatata; ee, lelo loo lemankale ootii enaiposha neing'asia ina kata niishunye!’ “Amu nji ejo Olaitoriani Enkai. Ore ake peyie aitaa enkanasa ino, anaa inkanas nememanya, ore peyie ayau ailepunye enegut peyie aaitoip iyie nikintoip iyie nkariak sapuki, neaku kaanang'aa iyie abori tenebo lelo oodoyio aapuo engumoto, ine netii iltung'ana liopa, naaitaa iyie olobik to lodo le nkop, tenebo lelo apa ooidaaitie te dukuya tenebo lelo oopuo abori ina gumoto, metaa mikintokini aamanya arashu iatata ewueji te nkop oo looishu. Kaayau iyie apik enkiting'oto torrono, nimintoki aekata atii; hoo naa aiking'oruni iyie, kake mikintokini ae kata aatum aaigil, ejo Olaitoriani, Enkai.” Nelotu ororei lo Laitoriani enatii naajoki: “Ore tena kata nakerai e tung'ani tudumu enkishirata nchiraki Turo nijoki ninye, nijoki Turo, ina naton namanya enejingieki enaiposha, olbiasharai le lelo tung'ana to loomanaa loo naaiposha, inji ejo Olaitoriani Enkai: ‘Oi Turo, itejo iyie, atimitunye nanu te nkishiaa.’ Ore ilpolosien linono netii empolos oo naaiposha; ore ilashetak linono netimitunye kinkishiaanie iyie. Eitobirutua ninche imbaoi inyi pooki too lkeek ooing'uaa Semir; neyau iltarakua aaitung'uaa Lebanon nikintobiraki iyie eng'ape naado. Ore too lkeek oonyaanyukie ilng'abolo le Bashan, nintobiru ilkurteta le meli; neitobiru ewueji ino neitasheyieki too nkeek olchani oing'uaa olomanaa le naiposha e Kupro, nepik ine ilala loo lkanchaoni. Tenebo enkitani sidai naikodo naing'uaa Misiri, naa ninye apa olkarasha oreu emeli, naa ninye naitashe anaa enanka ino; enkarasha pus o emorijoi naing'uaa olomanaa le naiposha e Elisha, naa ninye apa enchuret ino. Ore lelo oomanya Sidon o Arfad naa ninche ilarewak linono loo melin, ore iltung'ana linyi arriyiak le Semer netii apa atua intae, ninche apa ilarewak linyi loo melin. Ore lelo ashetak lemeli, le Gebal o ltung'ana arriyiak netii atua iyie, kinukaki ilbaat loo melin inono. Ore nena melin pooki e naiposha tenebo isikarini le naiposha netii atua iyie, eitawalaa imasaa inono e biashara. “Ore apa Parsia o Lud o Put netii atua enjore inyi anaa iltung'ana linyi lo larrabal; neik ninche nena long'oi enye tenebo imaupen tiatua iyie; neisho ninche intae esidano enye. Ore lelo tung'ana le Arfad o Helek netii apa isunta inyi aamanita, ore iltung'ana le Gamad netii sii ninche iltaleta linono; neik ninche ilong'oi enye too isunta inono aaitaman; neitisidan aitaa bayarot enkishiaa inyi. “Ore Tarshish nikitoning'ore te siaai e biashara enye amu iata imasaa kumok e pooki pukunoto; enkosholai o esekenkei, empirbil o risasini. Eitawalunye ninche imasaa inyi e biashara. Ore Yafan o Tubal o Meshek netimirishote tenebo iyie; eitawalunye ninche iltung'ana nena masaa o suyai aawalunye imasaa inyi. Ore Betogarma newalunye imasaa inyi mbartan olarrabal o nyumpui. “Ore lelo tung'ana le Rode netaasa biashara tenebo intae; iloomanaa loo naaiposha iwuejitin inyi nimirishorere, eyakita intae te laata ilala loo lkanchaoni o nkeek oltiasika. Ore Edom nikitoning'ore te siaai e biashara, te nkaraki enkumoi oo masaa inono; eitawalunye ninche imasaa inyi isoito oonyori o nkilani morijo, intokitin naaikodo, kitani naapuyiapui, o sikira le naiposha o soit oji agate. Ore Yuda o ina kop e Israel netimirishote tenebo iyie; einyang'utua imasaa inyi emirare te nkano, too loirienito o lng'abolo le dukuya, o inaishi o ila, o lchani oji Seri. Ore Dameski netijing'a esiaai e biashara tenebo iyie te nkaraki enkumoi oo masaa inono, te nkaraki enkumoi ino oo masaa e pooki pukunoto; enaisho oo sabibu e Helbon, o ilpapit ooibor loo ntare, o enaisho oo sabibu naing'uaa Usal newalunye ninche too ntokitin inyi; isekenke naasika, o enkaitubului naji mdalasini, o enkaitubului naji mchai naatii apa atua imasaa inono e biashara. Ore Dedan netaasa esiaai e biashara tenebo iyie too nkilani naarewueki imbartan. Ore Arabia tenebo ilkituaak pooki le Kedar naa ilamirak linono linyor too ilkuoo linono le kerra, o lmeregeshi tenebo inkineji; neaku te nena apa etaasa biashara tenebo iyie. Ore ilbiasharani le Sheba o Rama netaasa biashara tenebo iyie; newalunye ninche imasaa inyi e nkorropil oo mpukunot pooki naaisul te sidano o soito pooki oogol enkinyang'a, o sahabu. Ore Haran, o Kane, o Eden o Ashur tenebo Kilmad netaasa esiaai e biashara tenebo iyie. Etaasa ninche biashara too nkilani sidain, te nena kilani pusi o nkilani naaikodo, o too ilkarash ooisalaashi tiatua iltirenito loo muain kumok neteenaki too lgoso aaitirrish; naa te kuna apa etaasie ninche biashara tenebo iyie. Ore imelin e Tarshish nepuo te nkaraki intae enapita imasaa inyi nimirimiri. Metaa kimputaki apa iyie nikiroishiyieki oleng tiatua ineegut oo naaiposha. Ore ilarewak linono loo melin nikintupukutuo iyie aapik inaaiposha naado. Ore olkutati lo loosaen nikitoosho amut te mpolos oo naaiposha. Ore enkarsisisho ino, o masaa inono, o ntokitin inono e biashara, o sikarini linono le naiposha o lelo arewak le meli, lelo aripak linono le meli o lbiasharani linono, o ltung'ana linono pooki lo larrabal otii atua iyie, tenebo olorora lino pooki, lelo ootii atua erishata ino. Nedoiki pooki empolos oo naaiposha, teina olong ino enkidaaroto. Ore to ltoilo le nkishirata lo lkiyioi loo larewak linono le meli ore nkuapi naamanita neikirikira, ore tiabori imelin enye, mepuonu lelo pooki aaing'uaa. Ore lelo sikarini le naiposha tenebo pooki ootii atua emeli o larewak loo melin, neitashe pooki te nkop natoyio nikinchiraki ninche iyie to ltoilo sapuk, neishir too lkiyio le mion. Nepik enterit ilukuny enye neiperipera too nkuruon; nebarn ninche ilukuny enye te nkaraki iyie, neen ate too lkuniyiani neishiraki intae oleng te mion sapuk oltau, te nkishirata sapuk e mion. Ore to lkiyioi lenye, nikidumaki iyie enkishirata, nikinchiraki iyie ejo; ‘Aing'ae ae kata eidaikieki anaa Turo, te mpolos e naiposha? Ore tenepuku imasaa inyi too naaiposha, nintaraposh iyie iltung'ana kumok; te nkumoi ino oo masaa e biashara ino, inkarsisiyie lelo aiguanak le nkop. Ore taata nikitumutaki aaidaikie too naaiposha, too neegut e nena ariak; ore imasaa inono pooki nimirta tenebo iltung'ana linono pooki liaata neimiso pooki tenebo iyie.’ “Ore lelo pooki oomanya olomanaa le naiposha, neing'asiate te nkaraki iyie; ore ilaiguanak lenye neiruto oleng, ore inkomomi enye netanyamala. Ore lelo biasharani otii atua iltung'ana neisulisho te nkaraki iyie; ieuo iyie enkiting'oto torrono oleng' nimikintokini ae kata aata intarasi. ” Nelotu ororei lo Laitoriani enatii naajoki: “Enkerai e tung'ani,” tiaaki ilo kitok le Turo, inji ejo Olaitoriani Enkai: “Ore amu kewuasa oltau lino, nitejo iyie, Ara nanu Enkai. Aton nanu te ilo orika loo nkaitin, te mpolos oo naaiposha; nira ake sii tung'ani, nimira Enkai, hoo naa idol kewan anaa ira ng'en anaa Enkai, neaku esipa ira iyie ng'en alang Daniel; metii entoki naisudoro te iyie; teng'eno ino o tening'unoto ino inotoko kewan imasaa, ninturrurruo sahabu o enkosholai apik atua arsisisho ino; teng'eno ino nagut e biashara itoponayie imasaa inono, netawuase oltau lino too masaa inono, neaku inji ejo Olaitoriani Enkai: Ore amu idol kewan anaa olotiu anaa Enkai te ng'eno, neaku, ing'ura, ekayau nanu ilomon atua iyie lelo ooitureisho oleng loo loreren, naa keshutu ninche ilalema lenye aarare esidano eng'eno ino nagut neisarkionie esikar ino. Naa kenang'aki ninche intae engumoto niyeye intae enkeeya e lelo ooyieng'i tempolos oo naaiposha. Eton ake ijo, Ara nanu Enkai! Te dukuya lelo likiyieng iyie, hoo nira tung'ani neme Enkai, tiatua inkaik e lelo likipik iyie ilbaa? Iye iyie aya enkeeya e ilo lememurata te nkaina oo ltung'ani leeiking'a, ilo omoni, amu airoro nanu ejo Olaitoriani Enkai. ” Ore ake sii eewuo orerei lo Laitoriani enatii naajoki: “Enkerai e tung'ani, teyietu olkiyioi intorioki olaiguanani le Turo, nijoki ninye, Inji ejo Olaitoriani Enkai: Ira apa iyie enkitanyaanyukoto bayaroti, kibore apa eng'eno nagut, nitimitunye te nkishiaa. Itii apa iyie Eden, ina kurma e Nkai; ore apa pooki soit ogol enkinyang'a naa ninye intoipore, isoito ooji Karnelian o Topas o Yaspa o Krisolit o Beril, o Oniks, o Safire, o Karbunkol, o emerald; ore sahabu nasiluno naa ninche apa ininono, ninche apa isoito liguetiguete, ore teina olong apa nikintobiruaki iyie ina kata eitobiruaki sii ninche. “Aaitaboitaka iyie olmalaika likirrip. Itii apa iyie enchumata oldoinyio sinyati le Nkai, nishomo aimaa isoito le nkima. Miata apa iyie entioto too nkoitoi inono, eiteru teina olong apa nikintobiruaki, o menoti ing'ok tiatua iyie. Ore te nkumoi e biashara ino nikibore apa iyie olarrabal, nias iyie eng'oki; neaku aatanang'ayie iyie anaa entoki naisarkionieki aaitung'uaa oldoinyo le Nkai, ore ilo kerubi arriponi nikiaraa iyie aipungie ong'ata aitung'uaa empolos e lelo soito ooimerlel. Ore apa oltau lino naa kewuasa te nkaraki enkishiaa ino; inyala iyie eng'eno ino nagut te sikar ino. Aatanang'aka iyie enkop; aataboloyie iyie te dukuya ilaiguanak meitaraposho nkonyek enye te iyie. Ore te nkumoi oo ing'ok inyi, teina nemetii esipata biashara inyi nisarkionie iwuejitin inono sinyat, neaku ayaua atua iyie enkima aitung'uaa erishata ino; nikinya ninye iyie amut, naaibelekeny iyie aitaa nkuruon tioriong enkop, te dukuya lelo pooki likitoduaa iyie. Ore lelo pooki likiyiolo iyie too loreren neing'asia te iyie, itabaikia iyie enkiting'oto torrono, nimintoki atii intarasi.” Nelotu ororei lo Laitoriani enatii naajoki: “Enkerai e tung'ani, intorioki enkomom ino enkalo e Sidon, nimbonoki aarare ninye nijo inji ejo Olaitoriani Enkai: Ing'ura ajo kaarare iyie, oi iyie Sidon, naa kaibalie enkitoo ai tiatua iyie, naa keyiolou ninche aajo ara nanu Olaitoriani, ina kata nayau inkiguanat shumata ninye, naibalunye esinyatisho ai tiatua ninye; amu kairriu olmeitai atua ninye, nairriwaki osarge inkoitoi enyena naalala enkanasa; ore lelo oari to lalem nebatata tiatuaninye, te ilo alem oarare ninye too nkaloli pooki. Ina pee eyiolou ninche aajo ara nanu Olaitoriani. “Ore teina aji e Israel nemeitokini aata ilkiku oorem arashu eitame lelo oomanita ootaarare ninche. Ina pee eyiolou ninche aajo ara nanu Olaitoriani Enkai. “Inji ejo Olaitoriani Enkai: Ore tenaiturrur ina aji e Israel tiatua lelo oreren ooidapashakaki ninche, naibalie esinyatisho ai tiatua ninche te dukuya lelo oreren pooki, neaku kepuo aatoni te nkop enye maate ina naishoo apa osinka lai Yakobo. Naa ketoni tiatua ninye te seriani naa keshet ninche inkajijik neun inkurman oo sabibu. Naa ketoni tiatua te seriani, ina kata nayau adung'oki enkiguana shumata lelo le latia enye lelo ootarare ninye te ng'oro sapuk. Ina peyie eyiolou aajo ara nanu Olaitoriani Enkai enye.” Ore to lari le tomon, lo lapa le tomon, te nkolong e tomon aare o lapa, nelotu ororei lo Laitoriani enatii nanu naajoki: “Enkerai e tung'ani, impirare taarare Farao olaiguanani le Misiri, nimbonoki aarare ninye niarare sii Misiri pooki; irorie nijo, inji ejo Olaitoriani Enkai: Ing'ura ajo kaarare iyie, Farao olaiguanani le Misiri, ilo asurai kitok olejisho, te mpolos oo nchorroi enyena, ina najo, ‘Ore olkeju le Nail naa olalai ake; nanu oitobirua ninye.’ Ekaapik ilala oololo iltagiligil linono, naisho lelo sinkir loonchorroi inyi mikimbung'a iyie akurraki, naa kaaitayu iyie aitupuku tempolos oo inchorroi inono, nena nikimbung iyie. Naa kaanang'aki iyie ong'ota, iyie tenebo lelo sinkir pooki loo nchorroni inono; isulakinono enkoriong e ong'ota naisiasha, nemeiturrurri intae aapuo aanukaa. Meinosa intae ing'uesi e ina kop o montonyi o loing'ang'e aaishooyie iyie taa endaa enye. “Ina peyie eyilou lelo pooki oomanya Misiri aajo ara nanu Olaitoriani. Amu itaa apa iyie eng'udi entiyani te nkaji e Israel. Ore tinikimbung ninche iyie te nkaina, nigiligili, nipolososo iloilila lenye pooki; naa tenepetaa ninche intae, nigiligili, ninchosho impolosi enye pooki meikirikirata; metaa inji ejo Olaitoriani Enkai: Ing'ura ajo, ekayau olalem shumata iyie, naa kadung'oo te iyie oltung'ani o eng'ues; ore ina kop e Misiri neaku mitil nemeeta toki natii. Ina peyie eyiolou ninche aajo ara Olaitoriani. “Ore amu itejo iyie ore olkeju le Nail naa olalai, nanu oitobira, neaku ing'ura ajo kaarare iyie; naarare inchorroi inono, naa kaitaa enkop e Misiri enkop mitil nemetii toki, eiteru te Migdol ometabaiki Siene, o meshomo abaiki olpolosie le Etiopia. Meetae enkeju e tung'ani naim atua ninye, nemeetae enkeju e ng'ues naim atua ninye; keaku ninye mitil ilarin artam. Naa kaitaa enkop e Misiri enkop mitil tiatua nkuapi mitili; ore inkanas enyena neaku mijoonto ilarin artam tiatua nena anas naaidaikieki. Ekaidapashaki Ilmisiri iloreren, naidapash ninche toonkuapi. “Amu nji ejo Olaitoriani Enkai: Ore tenkiting'oto oo larin artam naa kaiturrurru Ilmisiri too loreren lelo pooki ooidapashakaki ninche; naa kashukoki Misiri entonata enye e apake, nashukoki ninche ina kop e Patros, ina kop naa ninye apa eing'uaa; neaku ninye teine enkitoria nashal. Keaku ninye enkitoria nashal too nkitoriat pooki nemeitoki ae kata aigil ailepie kewan too loreren; naa kaitaa ninche kiti oleng metaa meitoki ae kata aaitore iloreren. Nemeitoki ae kata aaku osiligi leina aji e Israel, edamu ing'ok enye, ina kata eibelekenyakino ninche eing'oru eretoto enye. Ina peyie eyiolou aajo ara nanu Olaitoriani Enkai.” Ore to lari le tikitam o naapishana to lapa le dukuya, te nkolong e dukuya olapa, nelotu ororei lo Laitoriani enatii naajoki: “Enkerai e tung'ani, ore Nebukadresa olaiguanani le Babilon neishoo enjore enye metaasisho oleng earare Turo, ore pooki dukuya netabarnoki ore pooki oililai netujutoki aasip; ore ake eyia eitu hoo etum ninye arashu enjore enye ae toki naing'uaa Turopeyie elak ina siaai nataasa earare ninye. Neaku inji ejo Olaitoriani Enkai: Ing'ura ajo kaisho ina kop e Misiri Nebukadresa olaiguanani le Babilon; naa kenap ninye arsisisho enye neitaa ninye enaaruno neidaikie ninye; naa keaku elaata enjore enye. Aishoo ninye ina kop e misiri metaa olerrinyore teina naisiayua, amu nanu eisiaayia ninche, ejo Olaitoriani Enkai. “Ore teina olong naa kaitubulu emowuo ti atua enkaji e Israel, naa kabol inkutukie inyi tiatua ninche. Ina peyie eyilou ninche aajo ara nanu Olaitoriani.” Nelotu ororei lo Laitoriani enatii; naajoki: “Enkerai e tung'ani,” imbonisho nijo, “Inji ejo Olaitoriani Enkai: Teyietu nchira, ‘Woi ina olong!’ Amu etinyikua ina olong! Etinyikua ina olong o Laitoriani; keaku enkolong oo nkatampo enkata enkidaaroto too loreren. Kelotu olalem shumata Misiri, nejing oloputukunyi sapuk Etiopia, ina kata nabatata lelo oo yieng'i te Misiri, nenapi arsisisho enye aaya, ore ilkitamanyunot nepolosi aauroo. “Ore Etiopia, o Put, o Lud o Arabia pooki, o Libya o iltung'ana pooki le nkop ooibung'are, naa kebatata te nebo to lalem.” “Inji ejo Olaitoriani: Ore lelo oretu Misiri naa kebatata, ore olwuasa lenye le ngolon enye nedou; eiteru te Migdol o meshomo Siene kebatatakino ninye to lalem, ejo Olaitoriani Enkai. Neaku ninye mitil tiatua nena kuapi mitili, ore inkanas enyena nejing empolos e nena anas naaitomijoonoki. Ina peyie eyiolou ninche aajo ara nanu Olaitoriani, ina kata nainuaaki enkima Misiri, ore ilaretok lenye pooki negili. “Ore teina olong nepuo lelo kiliku ooisarrisar ooing'uaa enatii, aaiture lelo le Etiopia meiteiki. Nejing ninche emion o sina teina olong e nkidaata e Misiri, amu, ng'ura, etabawua!” “Inji ejo Olaitoriani Enkai: Ekaiting'ie karsisisho e Misiri, teina aina e Nebukadresa olaiguanani le Babilon. Ninye tenebo iltung'ana lenyena, inkuapi torrok oleng too loreren, eyauni ninche meidaikie ina kop; naa keshurtu ninche ilalema lenye aarare Misiri, neiput ina kop lelo meneng'a. Naa kaitoi nanu olkeju le Nail, namiraki ina kop inkaik oo ltung'ana torrok; Kayau ina kop aitaa mitil o pooki toki natii atua ninye te ina aina oo ltung'ana leeiking'a nanu Olaitoriani oiroro.” “Inji ejo Olaitoriani Enkai: Ekaidaikie nena kitanyaanyukot oo nkaitin nemeishu, naiting'ie nena kitanyaanyukot oo nkaitin naatii Memfis; meitoki atii ae kata olkitok ina kop e Misiri; neaku kapik enkuretisho ina kop e Misiri. Ekaitaa Patros mitil, naisuroki enkima Soan nayau inkiaasin enkiguana shumata Tebes. Naa kabukoki engoro ai shumata Pelusium ilo sempewuet le Misiri, nadung'oo olorora le Tebes. Naa kaisuroki enkima Misiri; ore Pelusium neigor enkigoroto kitok; ore Tebes nepiki ilusien, ore isunta enyena neurori aasulaki enkop. Ore ilbarnot le On o Pibeset, nebatatakino ilo alem; ore inkituaak nepuo e araroto. Ore te Tehafnehes keaku ina olong enaimin, ina kata nagil teine enkitoria e Misiri, ore ina golon enye olwuasa nebaiki enkiting'oto; keitoipi ninye te nkatampoi, ore ntoyie enyena nepuo eararoto. Neaku neijia aikunaki endung'okinoto enkiguana shumata e Misiri, Ina peyie eyiolou aajo ara nanu Olaitoriani.” Ore to lari le tomon oobo, to lapa le dukuya, te nkolong e naapishana o lapa, nelotu ororei lo Laitoriani enatii naajoki: “Enkerai e tung'ani, atigila ina aina e Farao olaiguanani le Misiri, naa ing'ura, eton eitu erubi ninye, peyie eishiunyeki ninye teenata enkarasha, peyie metum ninye atagolo peyie meidimu ayuko olalem. Metaa inji ejo Olaitoriani Enkai: Ing'ura ajo, kaarare nanu Farao olaiguanani le Misiri, naa kagil inkaik enyena, pokira are, aa ina nagol o ina natigile; naa kaisho olalem lenye epuku te nkaina enye. Ekaidapashaa Ilmisiri tiatua iloreren, naidapashaa ninche tiatua iloreren tiatua inkuapi. Naa kaitagol enkaina e ilo aiguanani le Babilon, napik enkaina enye olalem lai; kake kagil nena aik e Farao naa keigor te dukuya ninye anaa oltung'ani otipikaki olbae aaidop. Ekaitagol nena aik o laiguanani le Babilon, kake ore nena aik e Farao naa kebatata; naa keyiolou ninche aajo ara nanu Olaitoriani. Ore ina kata napik olalem lai nkaik olaiguanani le Babilon, naa keitorioo ninye aarare ina kop e Misiri; naa kaidapashaki Ilmisiri atua iloreren, naidapashaa meshomo too nkuapi pooki. Ina peyie eyiolou ninche aajo ara nanu Olaitoriani.” Ore to lari le tomon oobo, to lapa li okuni, te nkolong e dukuya olapa, nelotu ororei lo Laitoriani enatii naajoki: “Enkerai e tung'ani, tiaaki Farao olaiguanani le Misiri o lororani lenyena inchere: Aing'ae doi inyaanyukie iyie te sapuko ino? Ing'ura, ekaaitanyaanyukie iyie oltarakuai otii Lebanon, oota ilng'osil sidain, neeta oloip le ntim, naa keado oleng, ore enkadori enye netii nkatampo. Ore inkariak neitoti ninye, ore eng'uton enye neisho ninye metaadoro neitaa lelo kejek lenyena ilooruko, neitaman ine wueji netuunieki, neidapashaa inchorroi enyena, aidapashaki lelo keek pooki le ntim. Metaa eilepa ninye oleng alus ilkeek pooki le ntim, ore ilng'osil lenyena sapuki nebul aasapuku; neado ilng'osil lenyena, te nkaraki enkare sapuk too ntona enyena. Ore imotonyi pooki o loing'ang'e, neitobira isinkin enye too lng'osil lenyena sapuki; ore abori ilng'osil lenyena netii ing'uesi pooki e ong'ata, neisho teina aaiu nkera enye; ore abori oloip lenye, netii iloreren kituaak. Aisidai apa oleng te sapuko enye; o te nkadori oo lng'osil lenyena; amu eshomo intona enyena abori, ine netii inkariak kumok. Ore iltarakua ootii enkurma e Nkai nemekeshare ninye, nemeirisiore lelo keek oo nyori ilng'osil lenyena; ore lelo keek oorisiore naa pesho, tinintanyaanyukie ilng'osil lenyena; meetae olchani te nkurma Enkai o nyaanyukie ninye te sidano. Aitobira ninye aikishiaan, tenkumoi oolng'osil lenyena, ore lelo keek pooki le Eden neng'uar ninye, lelo ootii apa enkurma e Nkai. “Metaa inji ejo Olaitoriani Enkai: Ore amu etubulua ninye ajing atua inkatampo, ore oltau lenye newuasa te nkaraki enkadori enye, ekapik ninye atua enkaina e ilo magilani loo loreren naa kearare ninye anaa enatiu ing'ok enyena, atanang'ayie ninye ong'ota. Ore ilomon lelo torrok oleng loo loreren, naa kedung ninye aauroo neing'uaa. Edoiki inchumat oo ldoinyo o nong'ot pooki ilng'osil lenyena, ore lelo ng'osil lenyena sapuki neirrag too wuejitin pooki neeim inchorroi eina kop; ore iloreren pooki le nkop nepuo aaing'uaa oloip lenye aaing'uaa ninye. Ore teina kidaaroto enye netonie imotonyi pooki oloing'ang'e, ore atua ilng'osil lenyena, netonie ing'uesi pooki oo nkong'at. Ore kuna pooki naa inchere peyie meeta ilkeek le mbata enkare oobulu aaika oleng teshumata arashu epik ilukuny enye inkatampo, nemeetae likae shani ook enkare ebaiki shumata ninche te nkadori; amu eishooki ninche pooki metuata, teina kop oo lmeneng'a natii tung'ani oye, tenebo lelo oopuo olodo le nkop. “Inji ejo Olaitoriani Enkai: Ore peyie elo abori enemeneng'a, naa kaitaa enegut pee eishir te nkaraki ninye, naibok lelo kejek lenyena pooki, ore inkariak kumok nedung'i; naishopoki Lebanon osina te nkaraki ninye, ore ilkeek pooki liong'ota netoito te nkaraki ninye. Ekaisho iloreren meikirikirata to ltoilo lembatata enye, ina kata nanang'aki ninye abori enemeneng'a tenebo lelo oopuo tenebo engumoto; ore lelo keek pooki le Eden, lelo ooisul gelunot sidain le Lebanon, lelo pooki ook enkare, neitagoli to lodo le nkop. Ekepuo sii ninche abori enemeneng'a tenebo ninye, ine netii lelo ootaraki to lalem; ee, lelo ootoni tiabori oloip too loreren naa keish. Ira naa iyie ng'ae onyaanyuke te nkisisa o te nkitoo tiatua lelo kejek le Eden? Aikintadoiyiori iyie tenebo lelo keek le Eden aaya olodo le nkop; nirrag iyie tenebo lelo lememurata, tenebo lelo ootaraki to lalem. “Ore ele naa Farao tenebo olorora lenye pooki, ejo Olaitoriani Enkai.” Ore to lari le tomon aare, to alapa le tomon aare, te nkolong e dukuya o lapa, nelotu ororei lo Laitoriani enatii naajoki: “Enkerai e tung'ani, teyietu inchiraki Farao olaiguanani le Misiri nijoki ninye: “Itadamua iyie aitaa kewan olng'atuny tiatua iloreren, kake itiu iyie anaa olasurai otii inaaiposha; idanya iyie apuku too lkejek linono, nintanyamal inkariak too nkejek inono, nindurukie ilkejek lenye. Inji ejo Olaitoriani Enkai: ekanang'aki orreshet lai shumata iyie; tenebo olorora sapuk loo ltung'ana; naa kaaikurtutaa iyie tiatua orreshet lai. Naa kaanang'ie iyie enkop, ore te nkong'ata naisiaja naayieng iyie naisho ilmotonyi pooki lo loing'ang'e mikitadoiki iyie, naitaraposh ng'uesi enkop te iyie. Naidapashaki inkiri inyi inchumat oo ldoinyo, naiput inong'ot too mpopoki inono. Naa kaitadooyo osarge lino te nkop o too ldoinyo; nimput iyie lelo shorroi. Ore peyie aajutoo iyie, naa kaitoip keper o loing'ang'e lenye, naitomisimis ilakir lenye; naa kaitoip enkolong te nkatampoi, nemeitoki olapa aitayu ewang'an enye. Ore ilkilang'ilang'eta pooki le shumata na kaitomisimis te shumata iyie, napik enaimin shumata enkop ino ejo Olaitoriani Enkai. “Ekaitanyamal sii iltauja loo ltung'ana kumok, ina kata naaya iyie eyarunoto tiatua iloreren, naapik iyie inkuapi neitu iyiolou. Ekaisho iltung'ana kumok meing'asiata te nkaraki iyie, ore ilaiguanak lenye neilanyisho te nkaraki iyie, ina kata naiwul olalem lai te dukuya ninche; naa keikirikira pooki kata, pooki ng'ae te nkaraki enkishui enye, teina olong' embatatata ino. Amu inji ejo Olaitoriani Enkai: Ore ilo alem lo laiguanani le Babilon naa kelotu shumata iyie. Ekaitaa olorora linyi metabatatata too lalema loo lmagil, ninche pooki lelo torrok oleng too loreren. “Naa kayau aitaa olemeetae ilo wuasa le Misiri, ore ilororani lenyena pooki naa keish. Kaidaikie nanu ing'uesi enyena pooki, too nkiyopat oo nkariak kumok; nemeetae enkeju e tung'ani naitoki aitanyamal ninche aigil, nemeitoki lelo oisotok loo ng'uesi aaitanyamal ninche. Ina peyie aitaa nkariak enye inaasila, naisho ilkejek lenye meturukoto anaa eilata, ejo Olaitoriani Enkai. Ore ina kata naitaa enkop e Misiri mitil, o ina kata nakinyi enkop te pooki nabore, o ina kata naosh lelo pooki ootii atua ninye, naa keyiolou ninche aajo ara nanu Olaitoriani. Ore ele naa osinkolio lo lkiyioi opuoi aarany; ore nena toyie oo loshon nepuo aaranyaki; Misiri tenebo lelo pooki ororani lenyena, kepuo ninche aarany ilo sinkolio ejo Olaitoriani Enkai.” Ore to lari le tomon o are, to lapa le dukuya, te nkolong e tomon o imiet o lapa, nelotu ororei lo Laitoriani enatii naajoki: “Enkerai e tung'ani, inchiraki ilo orora le Misiri nirriwaa ninche abori, ninye tenebo nena toyie kituaak oo loreren, ine olodo le nkop, enetii lelo ooshomo abori enemeneng'a ijoki ninye: ‘Aing'ae doi italang'a iyie te nkishiaa? Shomo abori, nikirragieki iyie tenebo ilememurata.’ “Kebatatakino ninche erishata e lelo ootaraki to lalem, ore tenebo ninye neirrag olorora pooki lenye. Ore ilaiguanak magil naa keimaki imbaa naaipirta ninche, tenebo ilaretok lenye, tiatua empolos e nemeneng'a ejo: ‘Etadoutuo ninche abori, neirrag aaitirring'a, lelo lememurata, ootaraki to lalem.’ “Etii sii Asiria ine, tenebo olorora lenye pooki, nemanita ninye inkuraren enye, lelo pooki ootaraki, ootumutaki to lalem; lelo ootipikaki nkuraren enye nenen wuejitin neeg'ut oleng e nemeneng'a nemanita olturrur lo lorora enkurare enye, etaraki pooki aabatat to lalem, ilo oidapashaa olkirutoto tiatua ina kop oo loishu. “Eti sii Elam ine, nemanita ninye olorora lenye pooki enkurare enye; netaraki pooki, aabatat to lalem, lelo lememurata ooshomo atua olodo le nkop, lelo oidapashaa olkirutoto teina kop oo loishu, neya enkurruna enye tenebo lelo oopuo abori eng'umoto. Eitobirakita ninye endapash tenebo lelo ootaraki to lalem tenebo olorara nemanita ninye inkuraren enyena, lelo pooki lememurata lelo ootaraki to lalem; amu eidapashakaki olkirutoto lenye ninche ina kop oo looishu, nenap ninche enkurruna enye tenebo lelo oopuo adoyio aapuo eitaboitakaki ninche lelo ootaraki to lalem. “Etii sii ine Meshek, o Tubal, tenebo olorora lenye pooki, emanita inkuraren enye ninche, lelo pooki lememurata, ootaraki to lalem; amu eidapasha ninche olkirutoto teina kop oo loishu. Nemeirrag ninche tenebo lelo ootabatatate magil liopa lelo ooshomo abori enemeneng'a tenebo imasaa enye olarrabal, lelo ooiteleikiaki ilalema lenye abori ilukuny enye, ore ilong'oi enye neiteleikino iloik lenye; amu ore olkirutoto le lelo tung'ana magil netii enkop e lelo ooishu. Metaa aikigili iyie nikirragieki tenebo lelo lememurata, tenebo lelo ootaraki to lalem. “Etii sii Edom ine, o ilaiguanak lenyena tenebo ilkituaak lenye pooki, laa ore te ngolon enye pooki neirragieki tenebo lelo ootaraki to lalem; neirrag ninche tenebo lelo lememurata, tenebo lelo oopuo abori enemeneng'a. “Etii sii ilkituaak le moikuape ine ninche pooki tenebo ile Sidon pooki lelo ooshomo abori te nkurruna tenebo lelo ootaraki, tenebo ina kirutoto pooki nayautua te nkaraki olkirutoto lenye eirragie ninche memurata tenebo lelo ootaraki to lalem, nenap enkurruna enye tenebo lelo oodoyio aapuo enemeneng'a engumoto. “Ore peyie edol Farao ninche, neilejilej kewan to lorora lenye pooki, ore Farao tenebo enjore enye pooki, naaraa to lalem ejo Olaitoriani Enkai. Amu eidapashayie olkirutoto te nkop oo loishu; metaa keirragieki ninye tenebo lelo lememurata, tenebo lelo ootaraki to lalem, Farao tenebo olorora lenye pooki, ejo Olaitoriani Enkai.” Nelotu ororei lo Laitoriani enatii naajoki: “Enkerai e tung'ani, irorie iltung'ana linono nijoki ninche, tenelo nayau olalem shumata enkop, negelu iltung'ana oltung'ani obo tiatua ate, neitaa ninye olarriponi lenye; naa tenedol ninye olalem elotu shumata enkop neosh entarumpeta aitayiolo iltung'ana; neaku ore pooki ng'ae otoning'o ilo toilo leina tarumpeta neitaa parmetii, nelotu olalem aar ninye, ore osarge lenye naa shumata endukuya enye eaku etii. Etoning'o ninye ilo toilo leina tarumpeta, neitu esuj ina naitayioloki ninye; ekeaku etii osarge lenye shumata enkorrok enye. Kake tenetusuja ina naitayioloki, anaata eitajeuo enkishui enye. Kake te nedolu olarriponi olalem elotu nemeosh ninye ina tarumpeta, metaa eitu eitayioloi iltung'ana, nelotu olalem, neya ake ninye obo lenye; ore ilo tung'ani newaki too ng'ok enyena, kake ore osarge lenye naa kaikilikuanu too nkaik e ilo arriponi. “Metaa ore iyie enkerai e tung'ani, aaitaa iyie olarriponi te nkaraki enkaji e Israel; ore pooki kata nining ororei oing'uaa enkutuk ai, naa intayiolo ninche olkilikuai oing'uaa enatii. Tenelo najoki ilo torrono, Oi iyie ele tung'ani torrono, meeta inchere pee miye neitu iyie irorie ilo torrono aitayiolo meibelekenyunye aing'uaa enkoitoi enye, ore ilo tung'ani torrono naa keye tiatua ing'ok enyena, kake ore osarge lenye naikilikuanu too nkaik inono. Kake tinintayiolo ilo torrono pee eibelekenyunye te nkoitoi enye, neitu eibelekenyunye ninye te nkoitoi enye; naa keye ninye too ng'ok enyena, kake intajeuo iyie enkishui ino. “Ore iyie nakerai e tung'ani, tiaaki ina aji e Israel, Inji itejo iyie: ‘Ore inkitarruorot ang tenebo ing'ok ang netii shumata iyiook, nikiishunye iyiook pesho te nkaraki ninche, kaji naa kinko tinikinchu?’ Tiaaki ninche, ore anaa enaishu nanu, ejo Olaitoriani Enkai, maata nanu enchipai te keeya e ilo torrono, kake peyie eibelekenya ilo torrono te nkoitoi enye peyie eishu; imbelekenyunye, imbelekenyunye too nkoitoi inono torrok; ainyoo doi peyie iye iyie, oi naaji e Israel? Ore iyie, nakerai e tung'ani, tiaaki iltung'ana linono, ore esipata e ilo supat nemeitajeu ninye teneas entorroni; naa ore teina torroni e ilo torrono nemebatata te ninye teneibelekenyunye te nkitarruorroto enye; ore ilo supat nemeitoki aidim atotona te supatisho enye teneas eng'oki. Ore hoo natiaaka ilo supat meeta inchere peyie meton ninye eishu, kake ore ake peyie eisilig ninye esipata enye neas intorrok, meetae hoo nabo oosiatin enyena esupatisho naaitokini aadamu; kake ekeye ninye tiatua ina ng'oki nataasa. Ore ake sii, hoo natiaaka ilo torrono, ‘Meeta inchere aimiye,’ kake ilo teneibelekenyunye too ng'ok enyena, neas ina nasipa naishaakino, tenelo neshuku ilo torrono ina nainosie apa olmumai, neshuku ina apa nawa te nkikonya, nelo too nkoitoi enkishon, nemeitoki aas enkarruoisho; naa kesipa keton katukul eishu, nemeye ninye. Meetae hoo eng'oki nabo oo naataasa apa ninye naitokini aadamu te nkaraki ninye; etaasa ninye ina naishaakino nesipa, nemeeta inchere pee meton ninye eishu. “Kake ejoito ake sii iltung'ana linono inchere, ‘Ore enkoitoi o Laitoriani nemetii esipata;’ naa inkoitoi enye maate metii esipata. Ore teneibelekenya osupat aing'uaa esipata enye makewan, neas enkarruoisho, naa keye ninye te nkaraki ina. Naa teneibelekenya ilo torrono aing'uaa entorroni enye, neas ina naishaakino neas nasipa, neton eishu teina. Nijojo ake sii, ‘Ore ina oitoi o Laitoriani nemesipa’; iyie na aji e Israel, ekaiguanare pooki ng'ae linyi terisioroto oo nkoitoi enyena.” Ore to lari le tomon aare le araroto ang, to lapa le tomon, te nkolong e imiet o lapa nelotu oltung'ani oisikua aing'uaa Yerusalem enatii nanu naajoki: “Etabatate enkanasa.” Etii apa enkaina o Laitoriani shumata nanu ina teipa eng'or elotunoto e ilo oisikua; netabolo ninye enkutuk ai te ina kata naewuo ilo tung'ani enatii tadekenya; metaa etaboloki apa enkutuk ai, nemeekure ara olemeiro. Nelotu ororei lo Laitoriani enatii naajoki: “Enkerai e tung'ani, ore lelo oomanya kunen neetumutaki te nkop e Israel, nejoito; ore apa Abraham naa oltung'ani obo ake, kake enoto ninye aitaa ina kop enenye, nikira iyiook kumok, esipa tukul eishooki iyiook enkop maitaa enaang.” Neaku, tiaaki ninche, inji ejo Olaitoriani Enkai: Inyanya intae inkiri tenebo osarge, nidumakiki inkonyek inyi inkitanyaanyukot oo inkaitin inyi nemeishu, nimbukoo osarge; intokiki ake aaku iloopeny ena kop? Ipikipiki ilo alem aaitaa osiligi linyi, niasiasa inolminong ore pooki ng'ae linyi neidurukie enkitok ole latia enye; ijojo iakuku iloopeny ena kop? Tiaaki ena ninche, inji ejo Olaitoriani Enkai: Ore anaa enaishu nanu, esipa tukul ajo ore lelo ootii iwuejitin neidaaitie naa kebatata to lalem; ore ilo otii enkong'ata naisiaja naa kaisho ninye ing'uesi entim meinosa, ore lelo ootii isempewueti o lootii nkapuniaa naa keye to lmeitai. Naa kaitaa ina kop mitil naidaayie, ore ina golon enye nawuasare nebaiki enkiting'oto; ore lelo doinyo le Israel neaku mitili oleng metaa meetae hoo oloim empolos enye. Ina pee eyilou aajo ara nanu Olaitoriani ina kata naitaa ina kop enkop mitil naitomijoon naa ene pesho te nkaraki nena baa olminong lenye pooki naataasa ninche. “Ore te iyie, enkerai e tung'ani, ore iltung'ana linyi ooiro tenebo tenkaraki iyie too sunta, o too nkutukie oo nkajijik, ejokino ninche maate, pooki ng'ae ejoki olalashe lenye, ‘Wou sii iyietoning'o ajo kalo rorei ilo olotu aing'uaa Olaitoriani.’ Nepuonu enitii anaa enapuonu iltung'ana enitii, netoni te dukuya intae anaa iltung'ana laainei; neinining ina nijo iyie kake meas ninche ina amu eibalunye oleng too nkutukie enye enyorrata sapuk, kake ore iltauja lenye netii atua dupoto enye. Naa, ing'ura, itiu iyie te ninche anaa ilo oranyaki isinkolioitin le nyorrata, to ltoilo sidai oleng neosh te nkarriyiano e nkinanda, amu ening ninche ina nijo, kake meas ninche ina. Ore peyie elotu ena, naa kelotu ninye, ina peyie eyiolou aajo etii apa oloiboni atua ninche.” Nelotu ororei lo Laitoriani enatii, naajoki: “Enkerai e tung'ani, imbonoki taarare lelo airritak le Israel, imbonoki tiaaki ninche, o metabaiki lelo airritak inchere: Inji ejo Olaitoriani Enkai: Oi ilairritak le Israel lelo ooitotito ate! Amaa ilairritak aimeitoti intare? Inyanya intae nena naapir, ninchopokiki ate inkilani oo lpapit loo ntare, niyieng'iyieng'e nena naaisul te mpiron; kake mintotiti intae nena tare. Ore nena naashal neitu intagoligolo, ore nena naamuoi neitu inchiunyenye, ore nena ng'ojiniaa neitu iruburubu, ore nena naatapong'ori neitu irrinyunyu, ore inaaimina neitu ing'oruru, neaku te ngolon o te nking'odia intoria ninche. Metaa eidapashate ninche, amu metii apa olairritani; neaku ninche endaa oo ng'uesi pooki e ntim. Eidapashaki apa intare aainei, nepuaya ninche too ldoinyo pooki, o te pooki doinyo naado; ore intare aainei neidapashi te nkoriong enkop pooki, meetae obo oikilikuanua arashu oing'oru ninche. “Metaa, entoning intae lo airritak ororei lo Laitoriani ejo: Ore anaa enaishu nanu, ejo Olaitoriani Enkai, ore amu etaa intare aainei entoki nainosi, netaa intare aainei endaa nanya ing'uesi pooki entim, anaa ae metii olairritani; neaku ore amu eitu eing'oru ilairritak laainei intare aainei, kake eitotito ate ilairritak, neitu eitoti intare aainei; neaku entoning intae ilairritak ororei lo Laitoriani: Inji ejo Olaitoriani Enkai, ing'ura ajo kaarare lelo airritak; naa kayieu nanu intare aainei too nkaik enye, naiting'ie te ninche ina kitotio enye oo ntare; meigil ae kata ilairritak aaitoti ate. Ekaitajeu nanu intare aainei too nkutukie enye, peyie meitoki aaku endaa te ninche. “Amu inji ejo Olaitoriani Enkai: Ing'ura, nanu, nanu kewan oing'oru intare aainei, nalilitu ninche. Anaa enaing'oru olchekut intare enyena ina kata naidapashate kulie tare enyena too neelakua, neaku kaing'oru sii nanu ntare aainei; naa kaitajeu ninche too wuejitin pooki neeidapashakaki teina olong natii inkatampo netii sii enaimin narok ong'u. Naa kaitupuku ninche too loreren, naiturrurru ninche too nkuapi naa kayau ninche enkop enye maate; naa kaitoti ninche too ldoinyo le Israel, too nkiyopat e nena shorroi, o too wuejitin pooki neemanyae eina kop. Kaitoti ninche too wuejitin neeleng, o too nchumat oo ldoinyo le Israel, keaku ninche ndaat enye; ore teine neiperipera ninche te ine te neleng sidai, o too wuejitin neebore olkujita ekedaa ninche too ldoinyo le Israel. Ore nanu enkewan ai naa kaaku olchekut loo ntare aainei, naa kaisho ninche meirraga, ejo Olaitoriani Enkai. Ekaing'oru ina naimina, naa karrinyu ina natapong'ori, naa karub ina ng'ojine, naa kaitagol ina natashala, ore ina napir oina nagol naa kaing'or; naa kaitoti ninche te sipata. “Ore intae intare aainei, inji ejo Olaitoriani Enkai: Ing'ura, ekaiguanare enker o enker, naiguanare ilmeregeshi o loroi. Aimebaiki intae entadaata too neeleng sidain eji metaa intunyoo ake too nkejek inyi olokeri pooki; niokioko enkare nasila, peyie intunyoo inkulie too nkejek inyi? Naa kenya intare aainei nena nintunyoitie too nkejek inyi, neok ina are ning'ola too nkejek inyi? “Metaa, inji ejo Olaitoriani Enkai ajoki ninche; ing'ura, ore nanu, nanu enkewan ai ekapik enkiguana erishata oo nkerra naapir o nkerra sasin. Amu irrumoo te murte o too ronyi, nimponyaa nena pooki naashal too mowuarak inyi, o metaba anaa nindapashakiki ninche pooki wueji, ekaitajeu nanu intare aainei, meitoki ae kata aaku inaainos ing'uesi; naa kaiguanare erishata e nker o enker. Naa kaitasheyie olchekut obo oitasheiki ninche, osinka lai Daudi, naa keitoti ninye ninche: ekeitoti ninye ninche neaku ninye olchekut lenye. Ore nanu, Olaitoriani, naa kaaku Enkai enye, ore osinka lai Daudi neaku olkitok tiatua ninche; nanu Olaitoriani oiroro. “Ekaitobir tenebo ninche osotua le seriani, naishu ing'uesi pooki entim teina kop, peyie etum aatobik ninche te seriani ti ong'ata neirrag atua entim. Naa kaitaa ninche o nenen wuejitin pooki neemanita ildoinyo laainei e mayianata; naa kairriu aitadou enchan terishata enye; naa ninye enkoirujuruji e emayianata. Ore lelo keek liong'ota neiu ilng'anayio lenye, ore enkop neiu ilng'anayio lenyena, naa keaku ninche ilooserian te nkop enye; neyiolou ninche aajo ara nanu Olaitoriani, ina kata nagil iloom le nchata enye oo murto, nalaku ninche aitung'uaa inkaik e lelo ooitaa ninche isinkan. Meitoki aaigil ae kata aaku eng'ues nainosi iloreren, nemeitoki ilowuarak le ina kop aapolol ninche; eketoni ninche te seriani, nemeeta entoki naitoki aiture ninche. Naa kaisho ninche embularoto oo ndaiki metaa meitoki amut ninche esumash teina kop, nemeitoki aatum enyamali enkurruna oo loreren. Naa keyiolou aajo ara nanu Olaitoriani Enkai enye, atii nanu tenebo ninche, naa ore ninche, ina aji e Israel naa iltung'ana laainei, ejo Olaitoriani Enkai. Nirara intae intare, intare o lokeri lai, nara nanu Enkai inyi, ejo Olaitoriani Enkai.” Nelotu ororei lo Laitoriani enatii aajoki: “Enkerai e tung'ani, impirare oldoinyo le Seir, nimbonoki aarare ninye nijoki ninye, Inji ejo Olaitoriani Enkai: Ing'ura ajo, kaarare iyie oldoinyo le Seir, naa kaaitorioki enkaina ai aarare iyie, naa kaaidapash iyie naaidaikie naitaa ene pesho. Ekaidaikie inkanas inono niaku iyie mitil; ina pee iyiolou ajo ara nanu Olaitoriani. Amu inyor iyie emang'atisho e anaake, ninchoo lelo tung'ana le Israel engolon o lalem te nkata e ngolikinoto enye, te nkata e mutata enye nabayie; metaa, ore anaa enaishu nanu ejo Olaitoriani Enkai, ekarreten intae te nkaraki osarge naa kesuj intae osarge; amu irara intae arruok te nkaraki osarge, metaa kesuj intae osarge. Ekaitaa oldoinyo le Seir olemetii toki, naitaa mitil; naa kadung'oo te ninye lelo pooki oopuonu atua aaparan nepuo. Naa kaiput ildoinyo linyi lmpopoki; o too ndoinyo inyi o too nong'ot inyi o iyarat o lashepak linyi pooki kebatata nena pooki to lalem. Naa kaitaa intae mitili anaake, ore inkanas inono nemeitokini aamany. Ina peyie iyiolou ajo ara nanu ilo Aitoriani. “Ore amu itejo, ‘Ore kulo oshon pokira o kuna kuapi pokira naa keaku inaainei, naa aikintaa ninche inkunaang,’ ore hoo netii apa Olaitoriani ine, neaku, ore anaa enaishu nanu, ejo Olaitoriani Enkai, ekaitaas intae anaa enatiu engoro o enkiba nintodolua te nkaraki enkiba aarare ninche; naa kaitayiolo nanu kewan tiatua intae, ina kata naiguanare intae. Naa iyiolouu aajo nanu, Olaitoriani otoning'o nena baa pooki torrok nitejo iararere lelo doinyo le Israel, ijojo, ‘Eitaaki ninche mitili, eishooki iyiook maidakie.’ Nirupurupu intae ate oleng kiararere nanu too nkutukie inyi, niponaa irorei aitaa kumok kiararere nanu; natoning'o nanu ina. Inji ejo Olaitoriani Enkai: Ore tenkaraki enchipai enkop pooki ekaaitaa iyie mitil. Ore anaa enitishipakine ina jung'o enkaji e Israel, amu aimitil apa ninye, neaku kaarare sii nanu iyie; iaku sii iyie mitil, oldoinyo le Seir, o Edom pooki, pooki elulung'a. Ina peyie eyiolou ninche aajo ara nanu Olaitoriani. “Ore iyie enkerai e tung'ani imbonoki lelo doinyo le Israel, nijoki, intae ildoinyo le Israel, entoning ororei lo Laitoriani. Inji ejo Olaitoriani Enkai; ore amu etejo ilo mang'atinda te iyie ‘Aha! Ore iwuejitin e apa neeika netaa enaang,’ neaku imbonoki nijoki, Inji ejo Olaitoriani Enkai: Ore enkaraki, ee, ore enkaraki naitaa ninche intae mitili nepurd intae too nkaloli pooki, metaa itaa intae entoki e kulie kuapi, nitaa intae enkiroroto o entorroni olmarenke loo ltung'ana; metaa, oi intae ildoinyo le Israel, entoning ororei lo Laitoriani Enkai: Inji ejoki Olaitoriani Enkai lelo doinyo o ndoinyo, o lashepak o nenen neeidurrieki o nkanas naaidurraki aaing'uaa, nena naataa entoki nainos pooki toki netaa enameni iloreren pooki oomanita; metaa inji ejo Olaitoriani Enkai: Ekairo nanu to lom lai oirowua aarare ilkulikae oreren, naarare Edom pooki, lelo ooishoo enkop ai ate metaa enenye te nchipai oltau neimaki inolmena, pee etum aawaita ninye te ngolon. Metaa imbonoki ina kop e Israel, nijoki lelo doinyo o nena doinyo, lelo ashepak o yarat, tiaki: Inji ejo Olaitoriani Enkai, Ing'ura ajo, ekairo nanu to lom le ngoro ai, amu itaa intae iloonoto enkurruna too loshon; metaa inji ejo Olaitoriani Enkai, ainos olmumai ajo ore iloshon oomanita intae naa ketum ninche enkurruna. “Kake ore intae ildoinyo le Israel, naa keitubulu ninche ilng'osil lenye, neiki ilng'anayio linyi iltung'ana laainei Israel; amu kepuonu ninche aasieku ang. Amu, ing'ura, ara nanu olinyi, naa kaaibelekenyakino iyie naa aikituri nikiuni; naa kaponaa iltung'ana te iyie, enkaji pooki e Israel, ninye pooki; ore nena anas naa kemanyi ore iwuejitin mijoonto nesheti; naa kaponaa te iyie iltung'ana o ng'uesi; naa keponari ninche neisho oleng; naa kaaitaa iyie enamanyae anaa apa inkolong'i naatulusoitie, naa kaaitaas iyie esidai eneitu apa ae kata aaitaas. Ina peyie iyiolouu aajo ara nanu Olaitoriani. Ee, ekaisho iltung'ana meshomo tiatua iyie, o ltung'ana laainei Israel; naa keya ninche intae, iyakuku intae enjung'ore enye, nemeitoki ae kata inkera ang aatum osina. Inji ejo Olaitoriani Enkai: Ore amu ejoki intae iltung'ana, ‘Inyanya intae iltung'ana, nioruru olosho linyi inkera,’ neaku mintokiki ae kata aanya iltung'ana nimintokiki aaoru olosho linyi inkera, ejo Olaitoriani Enkai; nimintokiki intae aainining ae kata enkurruna e lelo oreren, nimintokiki ae kata aanap esulare oo ltung'ana nimintoki aaisho olorere linyi metorrorroto, ejo Olaitoriani Enkai.” Nelotu ororei lo Laitoriani enatii naajoki: “Enkerai e tung'ani, ore peyie emany enkaji e Israel enkop enye, neisarkionie ninye too nkoitoi enye o too nkiaasin enye; ore olkuaak lenye te dukuya nanu netiu anaa oloirerio le nkitok te nkata enkiduruk enye. Metaa atubukoko nanu engoro ai shumata ninche te nkaraki osarge oibukoitie ninche te nkop, te nkaraki nena aitin nemeishu naisarkionie ninche. Aidapasha ninche tiatua iloreren, neidapashari ninche tiatua inkuapi, te risioroto oo lkuaaki lenye ore too siaitin enye naiguanare nanu ninche. Kake tenepuonu ninche iloreren ore pooki wueji neetuo ninche, neisarkionie ninche enkarna ai sinyati, ore teina nejo iltung'ana tenkaraki ninche, ‘Ore kulo tung'ana naa iltung'ana lo Laitoriani, naa kepuku ake aapuo aing'uaa enkop enye.’ Kake kaata endamunoto te nkaraki enkarna ai sinyati, ina naitaa enkaji e Israel enaisarkionieki tiatua iloreren laa ninche eing'uaa. “Metaa tiaaki ina aji e Israel, Inji ejo Olaitoriani Enkai: Ime te nkaraki intae, na aji e Israel, peyie ataa kaas embae, kake te nkaraki enkarna ai sinyati ina nisarkionie intae tiatua lelo oshon lietuo. Naa kaibalie esinyatisho enkarna ai kitok, ina apa naisarkionieki tiatua iloreren, naa intae oo isarkionie intae tiatua ninche; neyiolou iloreren ina kata aajo ara nanu Olaitoriani, ejo Olaitoriani Enkai ina kata naibalie esinyatisho ai aimaa intae te dukuya nkonyek enye. Amu kaitupuku nanu intae aitung'uaa iloreren, naiturrurru intae too nkuapi pooki nayau intae atua enkop inyi maate. Kaisuaaki nanu intae enkare nasila niakuku sidain too ntorrok inyi pooki, o too nkitanyaanyukot oo nkaitin inyi pooki ekaisuj nanu intae. Naisho nanu intae oltau ng'ejuk, naisho intae enkiyang'et ng'ejuk napik atua intae; naitayu aitung'uaa iseseni linyi ilo tau lo soit, naisho intae oltau le nkirring'o, naa kapik enkiyang'et ai atua intae, naitaa intae iloopuo too nkiguanat aainei nijurrurru oleng aaing'or nkikoot aainei. Imanyimanya ina kop naishoo iloo papaai linyi; niakuku intae iltung'ana laainei, naaku nanu Enkai inyi. Naa kaitajeu intae too loirerioni linyi pooki; naitanap entapa naitaa sapuk nemaitoki aiteleiki intae olameyu. Naa kaponaa ilng'anayio naitubul enkurma ino peyie mintokiki ae kata aatum enkurruna o lameyu tiatua iloreren. Ina peyie idamumu inkoitoi inyi torrok; o siatin inyi neme sidain; nimbayuyu ate te nkaraki ing'ok inyi, o lminong linyi litaasa. Ime tenkaraki iyie peyie aas ina, ejo Olaitoriani Enkai; inchoo ina eyiolounoyu te iyie. Tukurru nimilo too nkoitoi inono, iyie na aji e Israel. “Inji ejo Olaitoriani Enkai: Ore teina olong naaituku iyie too ntorrok inono pooki, naa kaisho inkanas inono metamanyi, ore iwuejitin nememanya nesheti. Ore ina kop apa nememanyae neturi, alang enaitoki aaku mitil te lelo pooki oogiroo ninye. Naa kejo ninche, ‘Ore apa ena kop mitil netotiwuo anaa ina kurma e Eden; ore nenen mijoonto naa mitil nememanya o nkanas naaidaitie, nemanya taata nesheta osempewuet.’ Ore ina kata dol lelo oreren ootung'uayioki oomanita iyie neyiolou aajo nanu, Olaitoriani, otesheta nenen wuejitin apa neeidaitie, naun ine apa netung'uayioki aa olmuaate; Nanu, Olaitoriani oiroro, naa kaas ina. “Inji ejo Olaitoriani Enkai: Ore sii ena naa kaisho ina aji e Israel maaikilikuana nanu maitaasa ninche; peyie aponaa ilewa lenye anaa inkerrai. Anaa inkerrai naaitainyieki ilasarri anaa nena kerrai e Yerusalem te lelo siruai lenye gelunot, metaa keaku keiputayu nena anas apa mijoonto too ntukusi oo ltung'ana. Ina peyie eyiolou aajo ara nanu Olaitoriani.” Etii apa enkaina O Laitoriani shumata nanu naaitupuku nanu te Nkiyang'et o Laitoriani, naaitoton nanu te neitorit e nong'oto; naa kebore apa ninye iloik. Naarik nanu aitaman ninche; naa ing'ura, etii apa iloik kumok oleng ina nong'oto; naa ing'ura etoito ninche oleng. Naajoki ninye nanu “Enkerai e tung'ani, keidim kulo oik aatopiu?” Nawalaii ajoki, “Iyie Olaitoriani Enkai, iyiolo iyie.” Naaitoki ake ajoki nanu, “Imbonoki kulo oik, nijoki ninche, intae kulo oik ootoito, entoning ororei lo Laitoriani. Inji ejo Olaitoriani Enkai ajoki kulo oik: eng'ura, ajo kapik intae enkiyang'et najing atua intae, nipiuu. Naa kapik intae imorlooishi, naisho nkiri metijing'a intae, neitoip intae tolchoni lo sesen, napik intae enkiyang'et, nipiuu; niyiolouu aajo ara nanu Olaitoriani.” Metaa aibonoko anaa enaaitanapaki; ore ina kata aibonisho, nelotu oltoilo naa ng'ura, nadol enkop eikirikira; nepuonu lelo oik aaibung'a maate, oloito ake o loito lenye. Ore aingorisho netii ninche imorlooishi, neetuo nkiri osesen aaibung'are ninche, neitoip olchoni ninche; kake metii apa enkiyang'et atua ninche. Ina peyie aajoki ninye nanu, “Imbonoki enkiyang'et, imbonoki, enkerai e tung'ani, nijoki enkiyang'et, inji ejo Olaitoriani Enkai: Wou too nkaloli pokira ong'uan enkijape, iyie na kijape, niyang'aki kulo ootuata, peyie etum ninche aatopiu.” Metaa aibonoko ninche anaa enaaitanapa ninye nanu, nelotu enkiyang'et atua ninche, nepiu ninche neitashe too nkejek enye, olorora kitok oleng. Naajoki ninye nanu, “Enkerai e tung'ani, ore kulo oik naa enkaji pooki e Israel. Ing'ura ajo ejo ninche ‘Etoito iloik lang, neiting'o iyiook osiligi; etudung'oyioki iyiook katukul.’ Metaa imbonoki ninche nijoki, inji ejo Olaitoriani Enkai: Ing'ura ajo kabol inkuraren inyi, naitopiu intae too nkuraren inyi, intae lo tung'ana laainei; naa kayau intae ang atua ina kop e Israel. Niyiolouu aajo ara nanu Olaitoriani, ina kata nabol inkuraren inyi, naitopiu intae too nkuraren inyi, intae iltung'ana laainei. Naa kapik nanu atua intae enkiyang'et ai, nipiuu intae, napik intae enkop inyi maate; ina peyie iyiolouu inchere Nanu ilo Aitoriani, oiroro, nataasa ina, ejo Olaitoriani.” Nelotu ororei lo laitoriani enatii naajoki: “Enkerai e tung'ani iwa eng'udi nisir ninye ajo, ‘Ene Yuda o nkera e Israel ooboita o ninye;’ nintoki aya ae ng'udi nisir ninye te dukuya enye, ‘Te nkaraki Yosef (ina ng'udi e Efraim) o enkaji pooki e Israel ooboita o ninye;’ nintutum ninche te nebo aitaa eng'udi nabo, peyie etum aataa nabo te nkaina ino. Ore peyie kijoki iltung'ana linono, ‘Aimintodol iyie iyiook enautu ena?’ Tiaaki ninche, Inji ejo Olaitoriani Enkai: Ing'ura, etinyikua peyie aya ina ng'udi e Yosef (ina natii ina aina e Efraim) o iloshon le Israel ooboitare ninye; naitutumoki ninye ina ng'udi e Yuda, naitaa ninche eng'udi nabo peyie etum aataa ninche nabo te nkaina ai. Ore nena keek nisirishore naatii enkaina ino te dukuya inkonyek enye, ina peyie ijoki ninche, Inji ejo Olaitoriani Enkai: Ing'ura ajo, kaya iltung'ana le Israel aitupuku te lelo oshon apa ooshomo lelo ootijing'a ninche, naiturrurru ninche too nkaloli pooki, nayau ninche enkop enye maate; naa kaitaa ninche olorere obo te nkop, o too nchumat lelo doinyo le Israel, naa olaiguanani obo oitasheiki ninche pooki; nemeitoki aaku ninche iloshon aare, nemeitoki aaoro aaku inkitoriat are. Nemeitoki aaisarkionie ate aaigil too nkitanyaanyukot oo nkaitin enye o ntokitin enye torrok, arashu te pooki ake ninye ng'oki enye nabo; kake kaitajeu ninche te pooki rrinyoto enye narrinyo siadi teina ng'oki nataasa ninche, naa kaituku ninche; naa keaku ninche iltung'ana laainei, naaku nanu Enkai enye. “Naa keaku osinka lai Daudi olaiguanani lenye oitore ninche; naa keaku ninche ololchekut obo. Naa kesuj ninche inkitanapat aainei, neing'or oleng aasuj inkiguanat aainei. Ekebik ninche te nkop apa natotonie iloo papaai linyi ina apa naishoo osinka lai Yakobo; ninche te nebo nkera enye o nkera oo nkera enye etoni ninche te ine ntarasi; ore Daudi osinka lai neaku olkitok lenye intarasi. Ekaitobiru olning'o le seriani tenebo ninche; naa keaku ninche olning'o lo sotua intarasi tenebo ninche; naa kamayian ninche naitaa ninche kumok, naitasheyie tiatua ninche enkaji ai sinyati intarasi o ntarasi. Ore emanyisho ai neaku tenebo ninche; naa kaaku nanu Enkai enye, neaku ninche iltung'ana laainei. Ore iloreren neyiolou aajo ara nanu Olaitoriani oitisiny Isiraeli, ina kata etii ewueji ai sinyati atua ninche intarasi pooki.” Nelotu ororei lo Laitoriani enatii naajoki: “Enkerai e tung'ani,” impirare Gog, “leina kop e Magog, ilo arikoni kitok le Meshek o Tubal, nimbonoki agilunore ninye ijoki ninye, Inji ejo Olaitoriani Enkai: Ing'ura, ekaarare iyie, iyie Gog, olarikoni kitok le Meshek o Tubal, naa kaaboin iyie arriny apik ilala oololo intakul inono; naa kaitupuku intae, tenebo enjore inyi pooki, imbartan o lakedok loo mbartan eishopo pooki imasaa o larrabal kitok oleng ninche pooki, eeta pooki ilong'oi kutiti, ilong'oi sapuki, o lalema, etii iltung'ana le Parsia o Kus o Put tenebo ninche, neeta pooki ilong'oi o nkopiyiani oo sekenke; etii gomer tenebo ilturrurri lenyena pooki; o Bet-togaiman eing'uaa enkalo nalakua oleng e moikuape tenebo ilturrurri lenyena pooki o ltung'ana kumok tenebo iyie. “Terretenayu niton irretena, iyie tenebo lelo ororani pooki ooiturrurro tenebo iyie, niaku olarriponi te nkaraki ninche. Ore eishunye inkolong'i kumok naa aikipuonunui aabaiki iyie, ore too larin le siadi nilo agilunore enkop ina kop nanyaaka aaku olosho eishunye olarrabal, ina kop naiturrurrore olorere oing'uaa kulikae oreren too ldoinyo le Israel, nataa tenkata naado mitil; ore iltung'ana lenyena neyauni aaitupuku too loreren, netoni taata ninche pooki te seriani. Inyikakiki ninche anaa olkutati nitiu anaa enkatampoi naitoipito enkop, iyie tenebo ilturrurri linono pooki, tenebo iloreren kumok tenebo iyie.” “Inji ejo Olaitoriani Enkai: Ore teina olong naa kepuonu atua iyie indamunot atua endamunoto ino, naa intobiruru endamunoto torrono. Nijojo, ‘Ekalo ailepaki aarare ina kop nemetii isunta inkang'itie; naa kabatatakino shumata lelo tung'ana ooitirring'a te seriani lelo oomanya enemetii isunta nemeeta isekenke arashu inchomito;’ peyie aibung iyarunot nanap nena naibung'aki; naim nenen pooki nemeekure emanyae tenebo lelo tung'ana ooing'uaa iloreren lelo oata inkishu o masaa, lelo oomanya empolos enkop. Ore Sheba, o Dedan o lbiasharani le Tarshish tenebo inkang'itie enye pooki naa kejoki intae, ‘Iyetuo intae aaibung iyarunot? Inturrurro ilororani linono peyie enap aaya iyarunot, peyie enap aaya enkosholai tenebo sahabu, neya nkishu tenebo imasaa, nenap iyarunot kumok?’ “Metaa, enkerai e tung'ani, imbonoki Gog tiaki, Inji ejo Olaitoriani Enkai: Ore teina olong etoni iltung'ana laainei Isiraeli te seriani, aimiyiolouu intae? Idumumu ate nipuonunu aaing'uaa ewueji inyi aaing'uaa nenen wuejitin neelakua e moikuape, ntae tenebo olorora loo ltung'ana kumok tenebo iyie, ekedito ninche pooki mbartan enye, o lorora kitok, enjore sapuk; ipuonunu aailepu aagilunore aarare iltung'ana laainei Isirael, nimilumululu enkop anaa enkatampoi. Ore too nkolong'i naasuju naa kayau intae entaarare enkop ai, peyie aatum iloreren aatayiolo nanu, aa te iyie Gog aitoduaaya nanu esinyatisho ai te dukuya ninche. “Inji ejo Olaitoriani Enkai: ai iyie ilo apa laimaka too nkolong'i naatulusoitie to sinkan laainei lelo aidetidetak le Israel, laa ore te nena olong'i eibonishe te ninche too larin ejo kaayau iyie taarare ninche?” Kake ore te ina olong, “ina kata nalotu Gog aarare ina kop e Israel, ejo Olaitoriani Enkai, naa kedumuni engoro ai. Amu to lom lai o te ngoro ai napejisho aibalie, ore kenya te ina olong naa ketumi olokirikiri sapuk tiatua enkop e Israel; ore isinkir le naiposha, o motonyi o loing'ang'e o nguesi e ong'ota, o ntokitin pooki naaiserpepiari tioriong e nkop, o ltung'ana pooki ootii oriong enkop, naa keilanyisho pooki te dukuya nanu, ore ildoinyo naa kenang'uni abori, ore imartin nesulari, ore pooki suntai naa keurokino enkop. Kaipotu olkirutoto pooki metaarare Gog, ejo Olaitoriani Enkai; ore pooki alem lo ltung'ani nearare olalashe lenye. Tolmeitai o te nkibukoroto o sarge ajing'aki ninye enkiguana, naa kashaiki shumata ninye te nebo ilororani lenyena o tenebo iltung'ana kumok ootii tenebo ninye, enchan sapuk tenebo isoito le nchan, enkima o enkibiriti nayupuyup. Metaa kaitodolu nanu enkitoo ai tenebo esinyatisho ai, naitayiolo kewan te dukuya inkonyek oo loreren kumok. Ina peyie eyilou ninche aajo ara nanu Olaitoriani.” “Ore iyie, nakerai e tung'ani, imbonoki tigilunore Gog, nijoki: Inji ejo Olaitoriani Enkai: Ing'ura, ekaarare iyie, iyie Gog, ilo arikoni kitok le Meshek o Tubal; naa kaaibelekeny iyie naareu iyie dukuya, naayau iyie shumata aitung'uaa inkiting'ot pooki e moikuape, naarik iyie taarare lelo doinyo le Israel; naa kaaosh enkawuo ino te nkalo e nkaina ino e kedienye naisho imbaa inono metadoiki enkop te nkaina ino e tatene. Ibatatakino iyie enchumata oo ldoinyo le Israel, iyie tenebo ilturrurri linono pooki tenebo iltung'ana pooki likiboitare iyie; ekaaisho iyie lelo motonyi oonya nkiri le pooki pukunoto tenebo nena ng'uesi e ong'ata peyie kinos. Ibatata iyie te nkong'ata naisiaj; amu airoro nanu ejo Olaitoriani Enkai. Ekairriwaki enkima Magog, tenebo lelo ootoni te seriani to lomanaa le nkiyopat e naiposha; naa keyiolou ninche aajo ara nanu Olaitoriani. “Ore enkarna ai Sinyati naa kaibalie ninye te rishata oo ltung'ana laainei Isiraeli; nemaitoki aisho enkarna ai sinyati eitokini aaisarkionie; neyiolou iloreren aajo ara nanu Olaitoriani, ilo Sinyati te Israel, Ing'ura, elotu ninye, naa keyauni aaitabau, ejo Olaitoriani Enkai. Ina olong ina naimaka. “Neaku ore lelo oomanya nena anas e Israel naa kepuo dukuya neitobiru inkimaitie too masaa olarrabal nepejoo ninche, ilong'oi sapuki o long'oi kutiti, o inkai o mbaa, irinkan o mperria. Naa keitobiru inkimaitie te ninche too larin oopishana; metaa meitoki ninche aayieu neya ilkeek le nkima aaitung'uaa olokeri arashu edung'u too ntimi, amu keitobiru enkima enye too masaa enye olarrabal; ekeinyal ninche lelo ooinyal ninche, nemut lelo oomut ninche ejo Olaitoriani Enkai. “Ore teina olong naa kaisho Gog ewueji nanukarieki te Israel, ina nong'oto oo lapuayak te nkalo o loo saen le naiposha; keibooyo ninye ilapuayak, amu keaku teine eturori Gog o lorora lenye pooki naa keipoti ninye aajo o yarata le Hamon-gog. Amu ore too lapaitin oopishana, eaku keturoo ina aji e Israel ninche peyie etum aaipoo ina kop. Ore iltung'ana pooki leina kop naa keturoo ninche; naa keyanyiti ninche teina olong naitodolu enkitoo ai, ejo Olaitoriani Enkai. Keitasheyie ninche iltung'ana ooim atua ina kop inkatitin pooki peyie epuo aanukaa lelo ootelekutua ti oriong e nkop, peyie etum aaipoo ninye; ore te nkiting'oto o lapaitin oopishana neitoki aaingoru impopoki aajurru. Naa dol teneim kulo atua ina kop nedol ake obo oloito lo ltung'ani, naa kepik ninye olmonekie enye, o metaba anaa neturoo lelo aturorok ninye teina nong'oto e Hamon-gog. (Etii sii enkanasa e Hamona netii sii ninye ine). Neaku neijia eiko teneipok ina kop. “Ore te iyie, nakerai e tung'ani, inji ejo Olaitoriani Enkai: Irorie imotonyi e pooki pukunoto o pooki pukunoto eng'ues e ong'ata, ‘Enturrurrunye wootu, enturrurroto too nkaloli pooki enturrurrokinoto ina masho o lasar ilo laitobiraki intae, e masho kitok oleng o lasar te nchumata e lelo doinyo le Israel, naa inosinoso inkiri niokioko osarge. Inosinoso nena kiri e lelo magil niokioko osarge loo lkituaak le nkop, o loo lmeregeshi, o loo lkuoo le kerra, o loo lkineji o loo loing'ok, lelo pooki oopir le Bashan. Naa inosinoso nena pooki naapir o entaraposhoto, niokioko osarge o entemerata, teina masho olasar naitobiraki intae. Naa iraposhosho intae te misa ai te nena bartan o lakedok lenye, tenebo iltung'ana magil o ilmurran loo mpukunot pooki; ejo Olaitoriani Enkai.’ “Naa kaitasheyie enkitoo ai tiatua iloreren; naa kedol iloreren pooki enkiguana ai ina nayaua, o enkaina ai ina naiteleikia ninche. Ore enkaji e Israel naa keyiolou aajo ara nanu Olaitoriani Enkai enye, eiteru ina olong nelo dukuya. Naa keyiolou iloreren aajo eshomo apa enkaji e Israel e araroto te nkaraki ing'ok enye, amu etaasa ninche ine nkarrueisho oleng te nanu metaa aisudoyie nanu enkomom ai aitung'uaa ninche naisho ninche metijing'a inkaik oo lmang'ati lenye, nebatata ninche pooki to lalem. Aaitaasa ninche terisioroto olduruk o nkitarruorrot enye, naisudoo enkomom ai aitung'uaa ninche. “Metaa inji ejo Olaitoriani Enkai: Ore tena kata naa kashukoki Yakobo imayianat enyena, natum olng'ur te nkaji pooki e Israel; naaku oloota olom te nkaraki enkarna ai sinyati. Kerikino ninche enkurruna enye, o mbaa pooki torrok naataasa ninche aagilunore nanu, ina kata etoni te seriani te nkop enye meeta likae oiture ninche, ina kata nayau ninche ashuku too loreren naiturrurru ninche aitung'uaa ilmang'ati le nkop enye, naa tiatua ninche aibalie esinyatisho ai edolita iloreren kumok. Ina peyie eyiolou aajo ara nanu Olaitoriani Enkai enye amu aterewa ninche eararoto tiatua iloreren, naitoki aiturrurroki ninche enkop enye maate. Maing'uaa hoo obo lenye eton tiatua iloreren aitoki; nemaitoki aikata aisudoo enkomom ai aigil te ninche, ina kata nabuku Enkiyang'et abukoki ina aji Israel, ejo Olaitoriani Enkai.” Ore to lari le tikitam o imiet le yararoto ang, te nkiterunoto o lari te nkolong e tomon o lapa, to lari le tomon oong'uan eidipaki aaibung'a enkanasa, teina olong; netii apa enkaina o Laitoriani shumata nanu. Naayau nanu too nduaat Enkai atua enkop e Israel naaitoton ninye nanu te nchumata oldoinyo oodo oleng, netii shumata enye olchetei laaijo enkanasa naipirare nanu. Ore peyie aayau ninye ine, ng'ura, etii apa oltung'ani, laa ore empukunoto enye netiu anaa osuyai, neeta te nkaina enye enkopito natemishoreki o entiyani natemishoreki te nkaina enye; neitashe ninye te wueji e kishomi. Naajoki nanu ilo tung'ani, “Enkerai e tung'ani ing'ura, too nkonyek inono, nining too nkiyiaa inono, nipik indamunot inono nena pooki naaitodol iyie, amu kitorikuoki ene peyie aatum aitoduaa iyie ninye; imbalakinye nena pooki nidol enkaji e Israel.” Naa ng'ura, etii apa esuntai namanita ine wueji e oriong netii enkaji e Nkai, ore enkadori e ina tiyani natemishoreki natii enkaina e ilo tung'ani naa intemat ile enkaina enkadori, ore pooki nabo enye naa entemata enkaina nabo o endap te nkadori; metaa etetema ina kirrushai eina suntai, naa entiyani nabo. Neitoki ninye alo ina kishomi naipirare oloosaen, eilep too nkedeta enyena, neipim entonata eina kishomi, entiyani nabo eng'uton; o lgilat oomanita, entiyani nabo enkadori, ore ilgilat loo mbaat naa entiyani nabo enkadoro ore erishata e lelo gilat loo mbaat naa intemat emiet e nkaina; ore ine neitasheyie ina kishomi te mbata o lgoriet tenejing'ieki kishomi naa entiyani nabo. Neitoki ninye atem olgoriet le kishomi, intemat enkaina isiet; tenebo ineeitasheyie enyena, intemat are enkaina; ore olgoriet le kishomi netii enkalo enkiting'oto e atua e kishomi. Netii ilgilat pokira okuni loo mbaat inkaloli pokira e kishomi oloosaen; ore nena pokira uni nerisio pooki; ore ing'apeta oo nkaloli pokira nerisioro. Ina peyie etem endapasho eine nebolieki kishomi, intemat tomon; o endapasho e ina kishomi, intemat tomon oo kuni. Netii apa enerisha dukuya lelo gilat okuni loo mbat naa entemata nabo enkaina te pooki shoto. Ina peyie atem ina kishomi tioriong enkalo olgilata obo ometabaiki oriong olikae, neeta endapasho o ntemat imiet o ntemat tikitam eiteru te kutuk aji ometabaiki enkae kutuk aji. Neitoki ake sii atem olgoriet, intemat tikitam enkaina; ore ine emanaroto e ilo goriet netii olodung'oro. Ore te dukuya ina kishomi teine nejing'ieki o metabaiki ine enkiting'oto olgoriet liatua leina kishomi naa intemat onom. Ore ine wueji nejing'ieki kishomi neeta ilusien naamanita naapirik ijing atua nena ng'apeta enye tiatua lelo gilat loo mbat, neeta ake sii ilo goriet ilusien naamanita tiatua, ore too ng'apetae kutuk aji netii iltuka. Naariku nanu atua endung'oroto e oriong; naa ng'ura, etii ilgilat olgos o manaa teilo odung'oro; ilgilat tomoni uni ootii dukuya ilo gos. Neim ilo gos embata nena shomito, eipirare ina adori e nena shomito; ele apa olgos le abori. Neitoki ninye atem enkadori eiteru tiatua tenkalo e dukuya enkalo e atua eina kishomi e abori o metabaiki oriong tenkalo e dukuya ea atua olgoriet, intemat iip nabo enkaina. Neituruk ninye te dukuya nanu alo enkalo e moikuape, naa ng'ura etii apa enkishomi naing'orita enkalo e moikuape, enaa ene nkalo olodung'oro lioriong. Netem enkadori enye o endapasho enye. O lgilat lenyena loo mbat, okuni ake te pooki matua, o ng'apeta enyena tenebo olgorieti lenye laa erisiori o nekua e kishomi e dukuya; ore enkadori naa intemat enkaina onom o imiet. Ore ilusien enyena, o lgorieti enyena, tenebo iltuka lenyena naa erisiori nabo anaa lelo leina kishomi ina naing'orita enkalo oloosaen; naa inkedeta naapishana ninche naailepaki ine; netii olgoriet atua ine. Ore tenkae alo naipirare kishomi tenkalo e moikuape, anaa enatiu tenkalo o loo ntoluo netii enkishomi natii atua olgoriet; netem eiteru te kishomi o metabaiki kishomi, intemat e nkaina iip nabo. Naarik ninye nanu enkalo e kopikop, naa ng'ura, etii apa enkishomi enkalo e kopikop; netem ninye ing'apeta enyena tenebo ilgilat lenyena; neeta apa pooki erisiori nabo anaa ilkulikae. Netii apa ilusien naamanita tiatua olgoriet lenye, anaa ilusien e kulie; ore enkadori enye naa intemat e nkaina onom, ore endapasho enye naa intemat tikitam o imiet. Netii apa inkedeta naapishana naailepaki ninye, ore olgoriet lenye netii enkalo e atua; neeta apa iltuka too ng'apeta enye, obo ake tenkalo e atua; neeta apa ilkeek loo ltuka too ng'apeta enye, obo ake tenkalo nabo too nkaloli pooki. Netii apa enkishomi tenkalo e kopikop te nkalo e atua olodung'oro; netem ninye eiteru te kishomi o meshomo kishomi tenkalo e kopikop, intemat e nkaina iip nabo. Ina peyie aariku nanu atua olodung'oro li atua te nkalo e kishomi e kopikop, netem ninye ina kishomi e kopikop; naa erisio apa o nkulie. Ore ilgilat lenyena loo mbat, o ing'apeta enyena, olgorieti lenye naa erisio o nena kulie; netii apa ilusien naamanita tiatua tenebo olgilata lenye; ore enkadori naa intemat enkaina tikitam o imiet. Netii ilgorieti oomanita, intemat e nkaina tikitam o imiet enkadori naa intemat imiet endapasho. Ore olgoriet lenye neipirare olodung'oro li oriong netii iltuka ing'apeta enyena, ore enekedieki enye neeta inkedeta isiet. Ina peyie aariku nanu oliatua lo lodung'oro tenkalo oloosaen, netem ninye ina kishomi; nerisiore nena kulie. Ore ilgilat lenyena loo mbat, o ing'apeta enyena tenebo ilgorieti lenyena naa erisiori o lkulikae; netii atua ilusien naamanita tiatua tenebo olgoriet lenye ore enkadori enye naa intemat enkaina onom, ore endapasho enye naa intemat e nkaina tikitam o imiet. Ore olgoriet lenye neipirare ilo odung'oro li oriong, neeta apa iltuka too ng'apeta enyena, obo ake te pooki shoto; ore enekedieki enye neeta inkedeta isiet. Ina peyie aariku nanu enkalo e kishomi e moikuape, netem ninye; naa kerisioro o nkulie. Ore ilgilat lenyena loo mbat, o ng'apeta enyena, tenebo ilgorieti lenyena nerisioro o lkulikae; neeta ilusien naamanita, ore enkadori enye naa intemat e nkaina tikitam o imiet. Ore olgoriet lenye neipirare olodung'oro lioriong, neeta iltuka too ng'apeta enyena, obo ake te pooki shoto; ore enekedieki enye neeta inkedeta isiet. Netii apa olgilata sapuk oota kutuk aji enye to lgoriet le kishomi, naa teine apa eisuji ilo asar opejori. Ore tiatua ilo goriet le kishomi netii enkishomi natii imisai are too nkaloli pokira, naa ninche eyieng'ieki ilasarri oopejori, o lasarri le ngoki, o lasarri le nkitarruorroto. Ore tioriong ilo goriet tenkalo najing'ieki e kishomi moikuape, netii imisai are, ore te nkae alo eilo goriet eina kishomi netii imisai are. Netii apa imisai are atua, netii imisai ong'uan oriong, te nchoto e ina kishomi, imisai isiet, naa te nchumata enye eyieng'ieki ilasarri. Netii sii apa imisai ong'uan oo soito oogueta te nkaraki olasar opejori entemata enkaina nabo, o lpisiai enkadori, naa entemata nabo olpisiai endapasho, naa entemata nabo enkaina enkilepata, laa ninye eiteleikini intokitin pooki naayieng'ishoreki laa teine eteyieng'ieki olasar opejori. Ore ilala oololo, naa ore enkadori enye naa endap e nkaina, neenikino atua ninye tiatua. Ore tenchumata e nena misai naa ine eiteleikini nena kiri naaitaini olasar. Ina peyie aariku nanu tiauluo aitijing'u atua olodung'oro liatua, naa ing'ura, etii apa ilgilat aare sapuki otii atua olodung'oro liatua, ore obo naa ole nkishomi e moikuape naipirare kopikop, ore enkae neipirare enkalo e kishomi naing'orita moikuape. Naajoki ninye nanu, ore ele gilata oipirare enkalo e kopikop naa enelelo apolosak ooitasheiki enkaji e Nkai, ore olgilata oipirare moikuape olgilata loo lapolosak ooing'or olperere lo lasar; naa kulo ninche ilayiok le Sadok, laa ninye openy tiatua ilayiok le Lawi eishoro enyikaki Olaitoriani aaisiyiai ninye. Netem ninye ina dung'oroto, intemat e nkaina iip nabo enkadori, o ntemat iip nabo endapasho, nerisio inkaloli pokira ong'uan; netii olperere dukuya ina aji Enkai. Ina peyie aariku nanu olgoriet le nkaji e nkai, netem ing'apeta olgoriet, naa intemat imiet enkaina too nkaloli pokira; ore endapasho eina kishomi naa intemat e nkaina tomon oo ng'uan ore isunta enchoto naa intemat e nkaina uni te pooki shoto. Ore enkadori o lgoriet naa intemat e nkaina tikitam ore endapasho naa intemat e nkaina tomon aare naa inkedeta tomon naailepaki; netii apa inkitotoneta embata oo ng'apata too nkaloli pooki. Naariku nanu atua olgilata le polos, netem ninye ing'apeta enyena, ore ake te nchoto nabo naa intemat enkaina ile apa endapasho oo ntoneta eng'ape. Ore endapasho e ine nejing'ieki naa intemat e nkaina tomon; ore isunta e ine nejing'ieki naa intemat imiet too nkaloli pokira; netem ninye enkadori e ilo gilata, intemat e nkaina artam, o endapasho enye, intemat e nkaina tikitam. Ina peyie ejing atua olgilata liatua netem ing'apeta e kutuk aji, intemat are; o endapasho eina kutuk aji, intemat ile; o suntai natii embata e kutuk aji intemat naapishana. Netem enkadori e ilo gilata, intemat e nkaina tikitam, o endapasho enye, intemat e nkaina tikitam, tinigiroo olgilata le mpolos. Naajoki ninye nanu, ore ene naa ewueji sinyati aisul. Ina peyie etem ina suntai enkaji e Nkai, intemat ile enkirrushai; ore endapasho oo lgilat le nchoto, naa intemat e nkaina ong'uan, eman ina aji e Nkai. Ore ilgilat le nchoto neidikidikokino inkajijik uni te shumata, neipirare ake obo likae, tomoni uni ake te nkaji nabo natii shumata enkae. Netii ineeipiku naamanita ina suntai e nkaji e Nkai aa ninche naairishaa nena ajijik too nchot pooki kake meshetakino. Ore lelo gilat mbat nepuo alalau te nkaji e shumata o enkae e shumata, eipirare ine neirishakino te nkaji ake e shumata o te nkae te manaroto pooki enkaji e Nkai; Ore te matua enkaji e Nkai netii inkedeta naailep shumata, neaku neija eikunari oltung'ani teneilep eiteru te nkaji e abori o metabaiki enkaji e shumata eimaa enkaji e polos. Atoduaa sii ajo ore enkaji e Nkai neeta eneika namanita; ore ilkitamanyunot loo lgilat le nchoto naa entiyani nalulung'a oo ntemat ile naalulung'a enkadori. Ore enkirrushai eina suntai e oriong to lgilata le nchoto naa intemat e nkaina imiet. Ore enchoto e ine neika nemetii toki, naa intemat enkaina imiet, ore te rishata e ine neika e ina aji e Nkai, o lgilat lo lodung'oro naa endapasho oo ntemat tikitam eman ina aji e Nkai te pooki shoto. Ore inkutukie oo nkajijik e lelo gilat le nchoto oobolo embata eine neika netung'uayioki metii toki te kutuk aji e nkalo e moikuape, ore enkae kutuk aji netii e nkalo e kopikop; ore endapasho eine wueji natung'uayioki metii toki naa intemat imiet emanita. Ore ina aji apa naipirare olodung'oro lena aji e Nkai te nkalo oloontoluo naa intemat intomoni naapishana e lalai; ore ina suntai eina aji naa intemat imiet te nkirrushai emanita, ore enkadoro naa intemat intomoni naaudo. Netem ninye ina aji e Nkai, intemat enkaina iip nabo enkadori; o lodung'oro tenebo ina aji o sunta enyena, intemat iip nabo enkadori; tenebo endapasho te nkalo oloontoluo te dukuya enkaji e Nkai, tenebo olodung'oro intemat enkaina iip nabo. Netem enkadori eina aji eipirare ilo odung'oro otii enkalo oloontoluo o sunta enyena too nkaloli pooki, intemat e nkaina iip nabo. Ore ilo gilata olala leina aji e Nkai, o lgilata liatua oilo lioriong neeta ineerupa ore emanaroto e pokira okuni neeta ilusien o ng'apeta. Ore te ntonata naipirare enetonie enkaji e Nkai nerupa too nkeek emanita, eiteru toltiren o meilepaki ilusien (ore ilusien naa kemura), o metabaiki ine nemetii toki te shumata kutuk aji, o tenebo ilo gilata liatua, o tenkalo e oriong; Ore too sunta pooki naamanita tiatua olgilata liatua o ilo gilata sapuk liatua neguetuno te nkitanyaanyukoto o lkerubi, o lchani loo ltuka, netii ake oltukai erishata o lkerubi o lkerubi. Neeta ake olkerubi obo inkomomi are: enkomom o ltung'ani oipirare oltukai te nkalo nabo, o enkomom oloti ng'atuny eipirare oltukai te nkae alo. Neguetakino ninche enkaji pooki e Nkai temanaroto; ore eiteru toltiren o meshomo shumata e kutuk aji naguetakino olkerubi oltuka ina suntai. Ore nena molinkaishi e kutuk aji e ilo gilata nerisioro pooki aloli. Ore te dukuya ine wueji sinyati netii entoki nanyaanyukie olperere loo nkeek, intemat e nkaina uni enkadoro enkilepata, intemat are enkadori, intemat are endapasho; ore ilpijat lenyena entonata enye, o sunta enyena naa inoo nkeek. Naajoki ninye nanu, “Nena ina mesa natii dukuya Olaitoriani.” Ore ilo gilata liatua tenebo ine wueji sinyati neeta ake nabo kikenet naidikidiko katitin are. Neeta nena kikeneta imatuan are imatuan are naamanaa too yeneta te pooki kikenet. Ore te nena kikeneta e ilo gilata neguetakino ilkerubi o ltuka, anaa lelo ooguetakino nena sunta; netii ilkeek kumok oonukita ilo gilata lioriong. Netii ilusien enchoto e ilo gilata too nkaloli pokira, neikodoki nena sunta too lkeek loltukai. Ina peyie aariki nanu atua olgoriet liatua le nkalo e moikuape, naariku nanu atua ilgilat ooipirare enkalo olodungoro le nkaji e Nkai netii sii enkae alo eina aji natii moikuape. Ore enkadori eina aji natii enkalo e moikuape naa intemat iip nabo, ore endapasho enye naa intemat onom. Neibung'are intemat e nkaina tikitam naatii atua olodung'oro liatua, neipirare enkiyopata naimi enkaji e oriong olodung'oro. Oltapeet le nkaji oipirare olikae too nkajijik uni naakedo aaidikidiko. Ore eitu ijing lelo gilat netii enkoitoi najing atua, intemat enkaina tomon endapasho o ntemat e nkaina iip te nkadori netii inkutukie oo nkajijik enye enkalo e moikuape. Ore ilgilat le shumata naa aironkeni, amu ewaita iltapeeti le shumata erishata sapuk aalang ilgilat liabori o le mpolos le nkaji. Amu inkajijik apa uni naakedo, nemeeta apa ing'apeta anaa ing'apeta ololodung'oro liauluo; metaa ore ilgilat le shumata neingat enkop aalang ile abori o le polos. Netii apa esuntai boo naipirare lelo gilat te nkalo olodung'oro lioriong; eipirare lelo gilat, intemat enkaina onom enkadori. Ore ilgilat lolodung'oro lioriong naa intemat onom te nkadori, ore lelo ootii enkae alo enkaji e Nkai naa intemat iip nabo enkadoro. Ore tiabori lelo gialat netii kutuk aji te nkalo oloosaen, ejing iltung'ana ninche eing'uaa oriong endung'oroto, ine neiterunye esuntai e oriong. Ore sii te nkalo e kopikop, eipirare olodung'oro o eipirare sii ina aji; etii ilgilat oota enejing'ieki te dukuya ninche; nenyaanyukie ninche lelo gilat ootii enkalo e kopikop, nabo enkadoro o endapasho, neeta ewueji nebo neipang'ieki, naa nabo o nkutukie oo nkajijik. Ore tiabori ilgilat le kopikop netii enejing'ieki te nkalo oloosaen, teine nejing'ieki ina oitoi, ore te nkalo e kurum netii esuntai narish esuntai. Ina peyie aajoki ninye nanu, “Ore ilgilat le nkalo e moikuape o lgilat le kopikop lelo ooipirare ilo odung'oro naa lgilat Sinyat, laa teine epuo lelo apolosak oopuonu enetii Olaitoriani aanyalelo asarri sinyat oleng ilo asar le ntapa, ilo asar le ng'oki, o ilo asar le nkitarruoroto, amu ore ine wueji naa aisinyati. Ore tenejing ilapolosak ine wueji sinyati, nemeipang auluo teine aapuo ina dung'oroto e auluo eitu eitayu te ine nena kilani enye a enkisiaayiare, amu aisinyat kuna; neishop ninche kulie kilani eton eitu epuo aanyikaki ina oo nara ine tung'ana.” Ore peyie eidip atetema atua ine wueji e nkaji e Nkai, naarik nanu aipang'ie teina kishomi naipirare enkalo oloosaen, netem ewueji e nkaji e Nkai aman. Netem enkalo oloo saen te ntiyani natemishoreki intemat enkaina iip imiet te ntiyani natemishoreki. Neitoki aibelekenya netem enkalo e moikuape, intemat enkaina iip imiet te ntiyiani natemishoreki. Neitoki aibelekenya netem enkalo e kopikop, intemat iip imiet e nkaina teina tiyani natemishoreki. Neitoki aibelekenyakino enkalo oloontoluo, netem, intemat iip imiet e nkaina teina tiyani natemishoreki. Etetema ninye too inkaloli pokira ong'uan. Neeta apa esuntai namanita ninye, intemat enkaina iip imiet te nkadori, o ntemat iip imiet e nkaina endapasho, pee etum atirishu ewueji sinyati o ene pooki ng'ae. Ore te siadi naayau ninye nanu kishomi, ina kishomi naipirare enkalo oloosaen. Naa ng'ura, eeuo enkitoo e Nkai e Israel eing'uaa enkalo oloosaen; ore oltoilo le lotunoto enye netiu anaa oltoilo loo nkariak kumok; newang'u enkop te nkitoo enye. Ore ina duaata natoduaa, netiu anaa enduaata apa natoduaa apa ina kata nalotu aidaikie ina anasa, netiu anaa enduaata apa natoduaa te mbata o lkeju le kebar; nabatata te nkomom ai. Ore ejing'ita enkitoo e Nkai atua ina aji e Nkai eimu ina kishomi natii enkalo o loosaen, naadumu nanu Enkiyang'et ailepie, naayau atua olgoriet liatua; naa ng'ura, eiputa enkitoo o Laitoriani ina aji e Nkai. Ore eitashe ilo tung'ani te mbata nanu, naning obo laairorie nanu tiatua enkaji e Nkai; naajoki ninye nanu, “Enkerai e tung'ani, ore ene wueji naa ewueji olorika lai le nkitoo, naa ewueji oo ndapi oo nkejek aainei, ewueji namany tiatua iltung'ana le Israel intarasi. Nemeitoki ae kata enkaji e Israel aaisarkionie enkarna ai Sinyati, nemeitoki ninche, arashu ilaiguanak lenye, teina kiborra enye oo nkonyek, o too mpopoki oo laiguanak lenye ootuata eitasheyie ineeidong'ishoreki enye te wueji ai neidong'ishoreki, o ntaloishin e kutuk aji enye tembata oo ntaloishin e kutuk aji aainei, metaa esuntai ake natii erishata e nanu o ninche. Eisarkionie ninche enkarna ai sinyati teilo minong otaasa ninche, metaa atumuta nanu ninche te ng'oro ai. Inchoo taata eitalamaa ninche enkiborra enye oo nkonyek o mpopoki oo laiguanak lenye ootuata aaitalamaa te nanu, naa kamany nanu atua ninche intarasi. “Ore iyie, nakerai e tung'ani, toliki ina aji e Israel enkaji e Nkai o enaikununo o enaikunuuni, peyie etum aatukurru too ntorrok enye. Naa tenaa kekurru te pooki nataasa ninche, imbalie enkaji e Nkai, enkitobirata enye neeipang'ieki, o ineejing'ieki enyena o pooki kitamanyunoto enye nintayiolo ninche pooki nkiguanat enye o nkitanapat enyena pooki; ninger ninche edolita, peyie etum aatujurru neibung inkitanapat pooki tenebo nkiguanat pooki. Ena ninye enkitanapata e Nkaji e Nkai: ina kop pooki namanita te shumata e ilo doinyo keaku enasinya oleng. Ing'ura ajo ena ninye enkitanapata e nkaji e Nkai. “Kuna ninche ntemat olperere lo lasar too ntemat (entemata enkaina nalulung'a o ndapasho enkaina.) Ore entonata enye naa keaku entemata enkaina nabo eilep naa entemata enkaina nabo endapasho, tenebo enkamanaa nabo namanita osegel lenye. Naa ena ninye naaku enkadori olperere lo lasar. Ore eiteru te ntonata enkop o metabaiki enkedet enye e abori, naa intemat are enkaina, neeta endapasho entemata enkaina nabo; ore eiteru te nkedet kiti o metabaiki enkedet sapuk, naa intemet ong'uan e nkaina, neeta endapasho entemet enkaina nabo; ore ewueji enkima olperere lo lasar, naa intemat ong'uan enkaina; ore epuku te wueji enkima olperere lo lasar eilep shumata naa imowuarak ong'uan entemata nabo enkaina eilep. Ore ine wueji enkima olperere lo lasar naa keaku kerisioro pooki intemat tomon aare enkaina enkadoro, naa intemat tomon oare enkaina endapasho. Ore sii ninye enkedet naa kerisioro te pooki aloli, intemat enkaina tomon oong'uan enkadoro, naa intemat enkaina tomon oong'uan endapasho, neeta enkamanaa namanita ninye olpisiai le ntemata e nkaina endapasho, ore entonata enye naa entemata nabo e nkaina emanita. Ore inkedeta e ilo perere lo lasar neipirare enkalo o loosaen.” Naajoki ninye nanu, “Enkerai e tung'ani, inji ejo Olaitoriani Enkai: Kuna ninche inkitanapat naaipirta olperere lo lasar: Ore teina olong naitasheyieki ninye peyie eitaini olasar opejori teshumata ninye o pee ebukokini osarge shumata ninye, incho ilo apolosani loo Lawi lolmarei le Sadok, ilo laanyikaki nanu aisiai, ejo Olaitoriani Enkai oloing'oni meitainyie olasar le ng'oki. Naa iya iyie embata osarge lenye, nipik ninye nena mowuarak ong'uan o lperere lo lasar, nipik ilpijat oong'uan le nkedet, nipik ina amanaa aitaman neaku neijia inko tinimpok olperere lo lasar aitisiny, nintayu olning'o lo sotua te ninye. Iya sii ilo oing'oni lo lasar le ng'oki, nepeji ninye te ine wueji negeluno e nkaji e Nkai, tiauluo ine wueji nesinya. Ore te nkolong e are nintayu oloro lemeeta entioto te nkaraki olasar le ng'oki; naa keipoki olperere lo lasar, anaa apa peyie eipoki te ilo oing'oni. Ore peyie indip aipoo ninye, nintayu oloing'oni lemeeta entioto olmeregesh oing'uaa intare nemeeta entioto. Ninchooyo ninche te dukuya Olaitoiriani, naa keisuaaki ilapolosak emunyan shumata ninche neitayu ninche anaa olasar opejori aitaiki Olaitoriani. Ore too nkolong'i naapishana, naa intayu anaake enkine te nkaraki olasar le ng'oki, tenebo oloing'oni tenebo olmeregesh oing'uaa intare, lemeeta entioto, ninye eitaini. Neitayu ninche olasar lo lning'o lo sotua too nkolong'i naapishana te nkaraki olperere lo lasar aipok ninye aitisiny, neiteng'elakini ninye. Ore peyie eishu kuna olong'i, neaku ore te nkolong e isiet nelo dukuya neitayu ilapolosak to lperere lo lasar lelo asarri linyi oopejori tenebo ilasarri linyi le seriani, naa kang'amaa intae, ejo Olaitoriani Enkai.” Naaitoki ariku nanu ina kishomi e auluo e ine wueji sinyati, naipirare enkalo oloosaen, naa keikeno apa. Naajoki ninye nanu, “Keton ena kishomi eikeno; meboli ninye, nemeeta oltung'ani ojing'u aimu ina kishomi; amu ore Olaitoriani Enkai e Israel, naa ine etijing'unye, neaku keton ninye eikeno. Olkitok ake oton tiatua ninye peyie etum ainosa emukate te dukuya Olaitoriani; naa kejing ninye atua te nkoitoi olgilata le kishomi, neitoki ake aipang teina oitoi.” Naariku ninye nanu aimunye enkalo e kishomi e moikuape omatabaiki enkalo e dukuya e nkaji e Nkai, naing'or naa ng'ura, eiputa enkitoo Olaitoriani e nkaji o Olaitoriani; nabatata te nkomom ai. Naajoki Olaitoriani nanu, “Enkerai e tung'ani, tujurru oleng, toduaa too nkonyek inono, nining too nkiyiaa inono nena pooki naaliki iyie naaipirta inkitanapat pooki e nkaji o Laitoriani tenebo nkitanapat enyena pooki; nijurru oleng ayiolou lelo pooki ooishori metijing'a enkaji e Nkai o lelo pooki oodung'ori tewueji sinyati. Nijoki ina aji kiserut, ina aji e Israel, Inji ejo Olaitoriani Enkai: Naaji e Israel, incho eish ilo minong lino pooki, teine ning'amaa ilomon ile memurata too ltauja o seseni, peyie ejing ewueji ai sinyati, neisarkionie ninye, ina kata nikinchosho nanu endaa ai, nena naapir o ilo sarge. Itigila intae olning'o lai lo sotua, tenebo ilo minong linyi pooki. Neitu iramatata intokitin aainei sinyat; kake itipika ilomon meing'ura atua ewueji ai sinyati. “Metaa inji ejo Olaitoriani Enkai: Meetae olomoni olememurata oltau o sesen lenye, o pooki omoni lelo ootii atua iltung'ana le Israel, oojing ewueji ai sinyati. “Kake ore lelo le Lawi laashomo aalam nanu, ootapong'ori te nanu aasuj nena kitanyaanyukot enye oo nkaitin ina kata peyie epong'ori Israel, naa kenap enkitamioto enye maate. Keaku ninche ilaisiaayiak te wueji ai sinyati, neitasheiki too nkishomin e nkaji e Nkai, neisiaaisho te nkaji e Nkai; naa keyieng ninche olasar opejori te nkaraki iltung'ana, naa keramat ninche olorere, eisiaai ninche. Amu eisiaayia ninche te dukuya inkaitin enye oo nkitanyaanyukot neaku ninche ilooibooyo ng'ok te nkaji e Israel, neaku ainosa olmumai te ninche, ejo Olaitoriani Enkai, inchere kenap ninche maate enkitamioto enye. Maapuonu ninche aanyikaki nanu aaisiai nanu anaa ilapolosak, arashu epuonu aanyikaki intokitin aainei sinyat o ntokitin naa sinyat oleng; kake kenap ninche enkurruna enye, te nkaraki ilo minong otaasa ninche. Ore ake sii naa kagelu ninche meitasheiki ina aji e Nkai, peyie atum aas esiaai pooki naasi tiatua ninye. “Kake ore ilapolosak loo Lawi, lelo ayiok le Sadok, lelo oogolie ewueji ai sinyati, ina kata nashomo iltung'ana le Israel aapong'ori aaing'uaa nanu, kepuonu ninche enatii aanyiku peyie aasiai nanu, naa kaaisiaai nanu aaitaiki nanu nena naapir tenebo ilo sarge, ejo Olaitoriani Enkai; naa kejing ninche ewueji ai Sinyati, naa kejing ninche emisa ai, peyie aaisiai nanu, naa keibung ninche enkitanapata ai. Ore peyie ejing ninche atua inchomito o lgoriet liatua, naa keishop ninche inkilani e kitani naapuyiapui; meishop hoo ninche toki naitobiruno too lpapit loo ntare, ina kata aaisiaai too nchomito o lgoriet tiatua aji. Naa keishop ninche inkarash e kitani too lukuny enye o surualini e kitani too mpolosi enye; merrotian ninche ae toki naitaar ninche enkima. Naa tenebo eipang aapuo olodung'oro lioriong enetii iltung'ana, naa keitayu nena kilani nena apa naaisiaaishore, neirragie ninche too lgilat sinyat; neishop ninche kulie kilani, pee mepik ake esinyatisho iltung'ana too nkilani enye. Nemebarn ninche ilukuny enye aarashu eisho ilpapit lenye ebulu aadoru, keisor ake ninche ilpapit lenye loo lukuny enye. Meetae olapolosani ook enaisho oo sabibu, ina kata ejing olgoriet liatua. Meyam ninche enkoliai, arashu enkitok natung'uayie o lpayian lenye, kake eselenkei ake o lorere le nkaji e Israel, arashu enkoliai naa enkoliai o lapolosani. Keiteng'en ninche iltung'ana laainei enepaashare ina nasinya o ina nemesinya, neitodol ninche eneiko teneirishu ina naiduruk o enemeiduruk. Ore tembae pooki natii enchankar, neaku ninche ilarishak te risioroto oo nkiguanat aainei. Keibung ninche inkitanapat aainei tenebo inkiguanat too siruai laainei pooki gelunot, neitisiny isabatoni aainei. Meisarkionie ninche ate aapuo aanyikaki olmeneng'ani; ore ake eyia, te papaai arashu yieyioo to layioni arashu te ntito, to lalashe arashu teina anashe nemeyama keidim aaisarkionie ate. Ore peyie eidip aiduruko, neikenaki kewan nkolong'i naapishana neaku ninye olemeeta olduruk. Ore teina olong nalo ninye ine wueji sinyati, atua olgoriet liaatua, peyie aaisiai tiatua ewueji sinyati, naa keitayu ninye olasar lenye le ng'oki ejo, Olaitoriani Enkai, “Meitoki ninche aata enjung'ore; nanu enjung'ore enye; nimincho ninche toki naitaa enenye tiatua Israel; ara nanu entoki enye. Kenya ninche olasar le ntapa, olasar le ng'oki tenebo olasar le ntorroni; ore pooki toki te Israel naiteng'elaki neaku enenye. Ore pooki nganayio le dukuya le pooki pukunoto o pooki kishoroto e pooki pukunoto too nkishorot inono pooki, naa keaku inoo lapolosak; nincho sii ninche lelo apolosak olng'anayioi lino le dukuya le mukate, peyie etum emayianata atotona te nkaji ino. Menya ilapolosak pooki toki, aa emotonyi arashu eng'ues, ina natua makewan arashu enataara nkulie. “Ore tenelo niorikinono enkop aaya, entooriki Olaitoriani erubata teina kop metaa enkop sinyati. Intemat enkaina inkalifuni tikitam o imiet enkadoro; o ntemat enkaina inkalifuni tikitam endapasho, naa keaku sinyati te pooki nebaiki pooki. Ore teina kurma nedung'uni ewueji nerisioro inkaloli pooki oo ntemat enkaina iip imiet naaku ine wueji sinyati neeta intemat onom enkaina e wueji nemetii toki namanita ninye. Ore teina kop sinyati nirishu aoru erubata intemat nkalifuni tikitam o imiet te nkadoro o ntemat enkaina inkalifuni tomon te ndapasho, naa ninche ejing ina aji sinyati, ewueji sinyati oleng. Keaku ninye esashati sinyati teina kop; naa keaku enelelo apolosak ooasisho tiatua ine wueji sinyati; nejing ine wueji sinyati aaisiai Olaitoriani; naa keaku ninye ewueji oo nkajijik enye, naa ewueji Sinyati te nkaraki ine wueji sinyati. Ore enkae sashati, intemat e nkaina nkalifuni tikitam o imiet tenkadoro naa ntemat e nkaina nkalifuni tomon endapasho, naa keaku enoo le Lawi lelo ooisiaisho te nkaji e Nkai, pee eaku ewueji oo nkanas enye naamany. “Ore ake sii teina sashati natudung'uoki aitaa enkop nasinya, nidung'u aitaa ewueji e nkanasa, enkop oo ntemat nkalifuni imiet te ndapasho naa ntemat enkaina inkalifuni imiet te nkadoro neaku ene nkaji pooki e Israel. “Naa keaku eno lkitok enkop pooki natii nkaloli pokira ina kop sinyati o ine wueji e nkanasa, emanita ine wueji sinyati o ine wueji enkanasa, te nkalo oloontoluo o te nkalo o loosaen, eipirarete nkadoro nabo sashati olorere, nenyikaa eiteru te nkalo o loontoluo o meshomo oloo saen lo lpolosie leina kop. Keaku ina enkop enye te Israel. Ore ilkituaak laainei nemeitoki ae kata airony iltung'ana laainei; kake keisho ina aji e Israel menoto ina kop te risioroto oo loshon lenye. “Inji ejo Olaitoriani Enkai: itaasa ingok, lo kituaak le Israel! Ewuang'ie enkikonya o enkitorogonyare, nimbalilie esipata o esinyatisho; entapal eyararoto oo ltung'ana laainei, ejo Olaitoriani Enkai. “Entaa iloota intemat naasipa naaineneng'ishoreki, efa nemetii emonkoi, o bati nemetii emonkoi. Ore efa tenebo e bati naa erisiori nabo, ore bati neeta ematua nabo e tomon e Homa, ore efa ematua nabo e tomon e Homa; neaku ore Homa ninye erikorieki enkiroishi pooki. Ore shekeli naa keaku ing'erai tikitam; ore shekeli imiet neaku shekeli imiet, ore shekeli tomon neaku shekeli tomon, ore mina ino neaku shekeli onom. “Ena ninye enkishooroto naa ninye intayu; ore ematua nabo e ile e efa te pooki homa e nkano e ematua nabo e ile e pooki homa e shairi, o erubata nauno e ilata, ematua nabo e tomon bati te pooki Kori (ore kori netiu anaa homa, eeta bati tomon); ore enker nabo te luaata oo nkerrai iip are, too lmarei pooki le Israel. Ena ninye enkishooroto te nkaraki olasar le ntapa, olasar opejori, o lasar le seriani, peyie itum aitobira olasar lo lning'o lo sotua te nkaraki ninche, ejo Olaitoriani Enkai. Ore iltung'ana pooki leina kop, neisho ena kishooroto ilo kitok otii atua Israel. Keaku esiaai o lkitok peyie eitobir ilasarri oopejori, ilasarri le ntapa, o lasarri ooki, te lelo siruai, teina rishata nadoli olapa too sabatoni, o te lelo siruai pooki gelunot le nkaji e Israel: keitayu ninye ilasarri le ng'oki, o lasarri le ntapa, o lasarri oopejoro, o lasarri le seriani, peyie etum aitaiki olning'o lo sotua ina aji e Israel. “Inji ejo Olaitoriani Enkai: ore to lapa le dukuya, te nkolong e dukuya o lapa, niyaya oloti oing'oni lemeeta entioto, nimpok ine wueji sinyati. Naa keya olapolosani oloti sarge lo lasar le ng'oki nepik ninye intaloishin e kutuk aji eina aji e Nkai, nepik sii inkedeta pokira ong'uan o lperere lo lasar, o ng'apeta e kishomi e ine wueji olgoriet liatua. Niasiasa ina te nkolong e naapishana o lapa te pooki ng'ae otaasa eng'oki te ntorroni arashu te modai; metaa intayuyu olning'o lo sotua te nkaraki enkaji e Nkai. “Ore to lapa le dukuya, te nkolong e tomon oong'uan o lapa, naa ishipakinono ilo sirua le ngiroroto oji Pasaka ore too nkolong'i naapishana naa kenyae emukate neitu eisiujieki. Ore teina olong naa keitayu olkitok te nkaraki enkewan enye tenebo iltung'ana pooki leina kop oloti oing'oni te nkaraki olasar le ng'oki. Ore te nena olong'i naapishana e ilo sirua, naa keitaiki anaa olasar opejokini Olaitoriani iloing'ok ooti oopishana o lmeregeshi oopishana lemeeta entioto, te pooki olong e nena naapishana; o loro pooki olong te nkaraki olasar le ng'oki. Naa keitayu anaa olasar le ntapa e efa te pooki oing'oni, e efa te pooki meregesh, o hini e ilata te pooki efa. Ore to lapa le naapishana, te nkolong e tomon o imiet olapa o too nkolong'i naapishana e ilo sirua, naa keitobiri ina kishorunoto tenkaraki olasar loo ng'ok ilasarri oopejori, o lasarri le ntapa, o te ilata. “Inji ejo Olaitoriani Enkai: Ore kishomi o lodung'oro liatua oipirare oloo saen naa keikeni te nena olong'i ile naasishoi; kake ore teina olong e sabato naa keboli o enkolong nadoli olapa. Kejing olkitok eimu olgoriet leina kishomi eing'uaa auluo, neitashe ninye te mbata entaloishi e kishomi. Neitayu ilapolosak ilasarri lenye oopejori, ilasarri lenyena le seriani, neseremisho tempolos e kishomi, neipung alo auluo, kake meikeni kishomi o metaa teipa. Ore iltung'ana leina kop neseremisho te nejing'ieki ina kishomi te dukuya Olaitoriani too sabatoni te nedoli olapa. Ore ilo asar opejori oitayio ilo kitok aitaiki Olaitoriani te ina olong e sabato naa keaku ilkuoo le kerra ile lemeeta entioto, o lmeregesh lemeeta entioto; o lasar le ntapa te nebo olmeregesh neaku e efa, te nebo olasar le ntapa tenebo ilkuoo keaku ake duoo anaa enaidim, tenebo eilata te pooki efa. “Ore teina olong nadoli olapa naa keitayu ninye oloti oing'oni lemeeta entioto, olkuoo le kerra o lmeregesh, lemeeta entioto; anaa olasar le ntapa neitayu e efa tenebo oloing'oni tenebo e efa tenebo olmeregesh, tenebo olkuoo le kerra anaa enaidim aitayu, tenebo hini e ilata te pooki efa. Ore peyie ejing olkitok, nejing'u atua eimu ilo goriet le kishomi, naa ina oitoi ake naimua eitoki aim. “Ore peyie epuonu iltung'ana leina kop dukuya o Laitoriani te lelo siruai oogeluno, ore ilo ojing'u te kishomi e moikuape aseremisho neipang alo te kishomi e kopikop; ore ilo ojing'u te kishomi e kopikop neipang auluo te kishomi e moikuape; meetae oltung'ani oshuko aipang eimaa kishomi natijing'ie, kake keipang ake pooki ng'ae aitoriori alo dukuya. Ore peyie ejing ninche atua naa kejing olkitok atua tenebo ninche; naa teneipang ninche boo neipang sii ninye boo. “Ore te lelo siruai o nena rishat naageluno, ore olasar le ntapa tenebo oloti oing'oni naa keaku efa nabo, ore tenebo olkuoo le ker naa efa, ore tenebo ilkuoo le kerra anaa ake duoo enaidim oltung'ani aishoru, tenebo hini e ilata te efa. Teneitayu olkitok enkishooroto to lpela aa olasar opejori arashu olasar le seriani anaa enkishooroto o lpela to Laitoriani, ore ina kishomi naipirare oloo saen naa kebolokini ninye; naa keitayu ninye olasar lenye opejori arashu olasar lenye le seriani anaa enaas ninye te nkolong e sabato. Naa keipang ninye auluo, ore peyie eipang ninye auluo, neikeni kishomi. “Naa keitayu ninye olkuoo le ker lo lari obo lemeeta entioto metaa olasar opejori to Laitoriani anaake; tadekenya eitayu ninye. Neitayu tenebo ninye olasar le ntapa tenebo ninye anaake tadekenya, ematua nabo e ile e efa, o ematua nabo e uni e hini e eilata peyie eitashal ina tapa, anaa olasar le ntapa lo Laitoriani; ena ninye enkitanapata naipirta ilo asar opejori le anaake. Neaku neijia eikununi ilo kuoo le ker tenebo olasar le ndaa tenebo eilata eitaini, anaake tadekenya metaa olasar ouno anaake. “Inji ejo Olaitoriani Enkai: Tenelo neitayu olkitok enkishooroto aitaiki obo loo layiok lenyena tiatua enjung'ore enye, naa keaku enoo layiok lenyena, entoki nara enenye te njung'ore. Kake tenelo neitayu enkishooroto aitaiki obo loo sinkan lenyena neaku enenye o metabaiki ilo ari le lakunoto; nerrinyokino aaku enolkitok; keaku ilayiok lenyena ake ooidim aatushum enkishooroto te njung'ore enye. Meya olkitok enjung'ore hoo nabo oo ltung'ana nemerrumoo ninche te wueji enye; keisho ninye ilayiok lenyena enjung'ore enye teine wueji enye makewan, metaa meetae hoo obo loo ltung'ana laainei ooruni entoki enye.” Ina peyie aaitijing'u nanu te wueji najing'ieki, ina apa naatii embata eina kishomi, te nkalo e moikuape oo lgilat sinyat tenkaraki ilapolosak; ore teine nadol ewueji te bayie o loontoluo te nkiting'oto enye. Naajoki ninye nanu, “Nena ewueji nepejie ilapolosak enkishooroto o lasar le nkitarruorroto tenebo enkishooroto o lasar le ngoki naa teine sii epej olasar le ntapa peyie metum ninche aayau ninche aaitupuku ine wueji olgoriet le boo, neitabaiki esinyatisho olorere. “Naariku nanu dukuya atua ilo goriet lioriong naarik nanu ilpijat pokira oong'uan lo lgoriet; ore te pooki pijata lo lgoriet netii olgoriet ore tiatua nena matuan pokira ong'uan o lgoriet netii gorieti dung'orot, intemat enkaina artam te nkadoro o ntemat enkaina tomoni uni endapasho; ore nena pokira ong'uan nerisioro. Ore tiatua, ine nemanita lelo gorieti pokira oong'uan, netii isoito oo gueta netii ewueji neinokieki enkima namanita. Ina peyie aajoki ninye nanu, Ore kuna naa iwuejitin neeyierie lelo oasisho te nkaji e Nkai ilasarri ooishorutua iltung'ana.” Naariku nanu arrinyu oriong e kutuk aji e nkaji e Nkai; naa ng'ura epuku enkare tiabori ine neitasheyie enkaji e Nkai te nkalo oloo saen (amu ore enkaji e Nkai neipirare oloosaen); neruko enkare abori naing'uaa kopikop o eneitasheyie ina aji e Nkai, kopikop olperere lo lasar. Naaipang'unye ninye nanu te nkalo e kishomi e kopikop, naarik nanu aitaman oriong ina kishomi e oriong, ina naipirare enkalo oloosaen; nepuku enkare te nkalo e kopikop. Ore eloito enkalo o loo saen eeta enkopito te nkaina enye, netem ilo tung'ani intemat enkaina enkalifu nabo, naarik nanu aimie atua ina are; naa oloure kokoyo ebaiki eng'uton enye. Neitoki atem intemat enkaina enkalifu, naarik nanu aimie atua enkare; naa enkung'u ebaiki eng'uton, neitoki atem intemat enkalifu, naarik nanu aimie atua enkare; nebaiki empolos ai ina are. Neitoki atem intemat enkaina enkalifu, naa olkeju lemaidim aima atalang'a, amu eilepua enkare; ekegut apa oleng enaa indim aisompirayu tiatua olkeju lemelang'ayu. Naajoki ninye nanu, “Enkerai e tung'ani, itoduaa iyie ena?” Naarriny nanu aimie enkiyopata o lkeju. Ore arrinyo, nadol te nkiyopata olkeju ilkeek kumok te nchoto nabo o te nkae. Naajoki ninye nanu, “Ore ena are nerukokino enkalo enkop oloosaen, nelo arukokino atua Araba; ore peyie ejing atua nkariak nemeruko e naiposha, nesilayu ina are. Ore pooki wueji nelo ilokeju ore pooki toki naishu nalo tiatua neton eishu, naa keaku ketii isinkir kumok; amu ine wueji elo ina are, peyie etum nena ariak enaiposha aatisilata; metaa etii pooki toki ine nelo ilo keju. Ore lelo arreshok loo sinkir neitashe te nkiyopata enaiposha; eiteru te En-gedi, ometabaiki Eneglaim, keaku ewueji neidapashieki irresheta; ore isinkir lenyena naa keaku iloompukunot kumok, anaa isinkir le naiposha kitok. Kake ore olng'arua o lkishankual lenye; nemesila asidanu ekeing'uaa ninche metaa emunyan. Ore too nkiyopat o lkeju too lkekuno pokira lo lkeju, naa kebulu impukunot kumok oo lkeek aaku endaa. Metoyu mbenek enye arashu elau ilng'anayio lenye, kake keiu ilng'anayio sidain te pooki apa, amu ore ina are enye nerukunye aing'uaa ine wueji sinyati. Ore ilng'anayio lenye naa keaku ile ndaa ore imbenek enye neaku olmairo oishiunye olorere. “Inji ejo Olaitoriani Enkai: Kulo ninche ilpolosien laa ninche iorie enkop te njung'ore tiatua lelo oshon loo Siraeli tomon aare. Ore Yosef naa ketum irubat are. Naa ior iyie ninye aitoris; ainosa apa olmumai ajo kaisho ninye iloo papaai linyi, naa keaku ena kop te intae enjung'ore. “Keaku ena olpolosie leina kop: ore te nkalo e moikuape, eiteru te Naiposha kitok te nkalo enkoitoi e Hetlon, o metabaiki ine nejing'ieki e Hamat, o te nkalo e Sedad, o Berota, o Sibraim (ina natii olpolosie orish Dameski o Hamat) o metabaiki Haseratikon, ina natii olpolosie le Hauran. Metaa kepuku olpolosie le naiposha e Hasarenon, ina natii moikuape olpolosie le Dameski, tenebo olpolosie le Hamat o meshomo moikuape. Keaku ena enkalo e moikuape. “Ore te nkalo oloosaen, naa kepuku olpolosie te Hasarenom te rishata Hauran o Dameski; eimaa Yordan te rishata e Gilead o enkop e Israel; o meshomo enkalo oloosaen enaiposha o metabaiki Tamau. Keaku ina enkalo oloosaen. “Ore te nkalo e kopikop, naa kepuku te Tamar o metabaiki nena ariak e Meribatkadesh, o meshomo lelo motioo le Misiri, o metabaiki enaiposha kitok. Keaku ina enkalo e kopikop. “Ore te nkalo o loontoluo, ore ina aiposha kitok neaku ninye olpolosie o metabaiki ewueji enkae alo ine nejing'ieki Hamat. Keaku ina enkalo oloontoluo. “Neaku iorioro ena kop tiatua intae te risioroto oo loshon le Israel. Idung'okiki ate metaa enjung'ore te ntae o tenebo ilomon oomanya atua intae netoiutuo nkera tiatua intae. Keaku ninche te intae olayioni oino loo layiok le Israel; ore tenebo intae naa keishori enjung'ore tiatua iloshon le Israel. “Ore te pooki ake ninye osho omanya ilo omoni, neaku teine idung'okiki ninye enjung'ore enye, ejo Olaitoriani Enkai. “Kuna ninche inkarn oo loshon: Eiteru to lpolosie le moikuape, eiteru te naiposha te nkalo enkoitoi e Hetlon o meshomo enejing'ieki Hamat, o metabaiki Hasarenon (ina natii olpolosie le moikuape e Dameski o metabaiki Hamat), nepuku te nkalo oloo saen o metabaiki oloontoluo, Dan erubata nabo. Ore eiteru to lpolosie le nkop e Dan, eiteru te nkalo oloosaen o metabaiki Asheri, naa erubata nabo. Ore epuku to lpolosie le nkop e Asheri, te nkalo oloosaen o metabaiki oloontoluo, naa Naftali, naa erubata nabo. Ore eiteru to lpolosie le nkop e Naftali, eiteru tenkalo oloo saen o metabaiki oloontoluo naa Manase, erubata nabo. Ore eiteru to lpolosie le nkop e Manase, eiteru te nkalo oloo saen o metabaiki enkalo oloontoluo, naa Efraim, erubata nabo. Ore eiteru to lpolosie le Efraim, eiteru te nkalo oloosaen o metabaiki oloontoluo naa Ruben, erubata nabo. Ore eiteru to lpolosie le nkop e Ruben, eiteru tenkalo oloosaen o metabaiki oloontoluo naa Yuda, erubata nabo. “Ore eiteru to lpolosie le nkop e Yuda, eiteru te nkalo o loosaen, o metabaiki oloontoluo, naa keaku erubata naitaini aaiteng'el, intemat enkaina inkalifuni tikitam o imiet e ndapasho, ore tenkadori nerisiore eneba nabo e nena rubat olosho, eiteru tenkalo oloo saen o metabaiki oloontoluo, etii ewueji sinyati empolos enye. Ore ina rubata ninteng'elakiki Olaitoriani, naa keaku intemat enkaina inkalifuni tikitam o imiet te nkadori, o ntemat enkaina inkalifuni tikitam tendapasho. Kuna ninche naaku iorot ewueji sinyati, naa keishori ilapolosak eoroto nabaiki intemat enkaina inkalifuni tikitam o imiet te nkalo e moikuape, intemat enkaina inkalifuni tomon te ndapasho te nkalo oloontoluo, intemat enkaina inkalifuni tomon te nkalo oloo saen o ntemat enkaina inkalifuni tikitam o imiet te nkadoro te nkalo e kopikop, netii ewueji sinyati o Laitoriani eneitorit. Keaku ena enoo lapolosak ooitisinyaki lelo ayiok le Sadok, lelo ooibung'a enkitanapata ai, lelo leitu epuo aapong'ori ina kata napuo iltung'ana le Israel aapong'ori, anaa enataasa ile Lawi. Naa keaku enenye anaa erubata e tipat naing'uaa ine wueji sinyati eina kop, e wueji neisul te sinyatisho eiteru to lpolosie le Lawi. Ore tembata ina kop oo lapolosak keaku keeta Ilawi ewueji oo ntemat enkaina inkalifuni tikitam o imiet te nkadori naa intemat enkaina inkalifuni tomon endapasho. Ore enkadori enye pooki naa keaku intemat e nkaina inkalifuni tikitam o imiet ore endapasho naa intemat enkaina inkalifuni tikitam. Nememir arashu ewalaa ina rubata enkop ake pooki, amu aisinyati ninye to Laitoriani. “Ore ina naleku, intemat enkaina inkalifuni imiet te ndapasho, o ntemat enkaina inkalifuni tikitam o imiet te nkadori, naa keaku ene pooki siaai teina anasa eiana anasa, ee nemanyi oe wueji nemetii toki. Ore te mpolos enye netii enkanasa; naa kuna ninche intemet enyena: ore enkalo e moikuape naa intemat enkaina inkalifuni ong'uan o iip imiet, ore enkalo e kopikop intemat enkaina inkalifuni ong'uan o iip imiet, ore te nkalo oloontoluo naa intemat enkaina inkalifuni ong'uan o iip imiet. Naa keeta enkanasa enkop nalala: ore te nkalo e moikuape intemat e nkaina iip are oo onom, ore te nkalo e kopikop naa intemat enkaina iip are o onom, ore tenkalo o loontoluo naa intemat enkaina iip are o onom. Ore ina adori natelekua ina natashare ine wueji sinyati naa keaku intemat enkaina inkalifuni tomon te nkalo oloosaen, naa intemat enkaina inkalifuni tomon te nkalo o loontoluo, naa keaku enatashare ina rubata sinyati. Ore ina naiu ninye naa keaku endaa e lelo aisiaayiak lenkanasa. Ore ilaisiaayiak le nkanasa, too loreren pooki le Israel, naa ketur ninye. Ore ine wueji pooki ninteng'el naa keaku intemat e nkaina nkalifuni tikitam o imiet erisioro nkaloli pooki, aa taa, ina rubata nasinya tenebo nena tokitin naara ineina anasa. “Ore enaleku te pooki alo eina rubata sinyati o ina nara ene nkanasa naa keaku ino lkitok. Eiteru too ntemat enkaina inkalifuni tikitam o imiet eina rubata nasinya o meshomo olpolosie lo loosaen, neito oloontoluo eiteru too ntemat enkaina inkalifunitikitam o imiet o meshomo olpolosie lo loontoluo, ine neshepita isashat oo loshon, naa keaku eneilo kitok. Ore inewueji sinyati tenebo ina aji sinyati Enkai natii empolos enye, tenebo ina nara enoo le Lawi, tenebo ina nara ene nkanasa, naa keaku enatii empolos eina nara enoo lkitok. Ore erubata eilo kitok naa keaku enatii ilo polosie le Yuda olpolosie le Benchamen. “Ore tenkaraki ilkulikae oshon: Eiteru te nkalo oloosaen o meshomo oloo ntoluo, naa Benchamen, erubata nabo. Ore eiteru to lpolosie le nkop e Benchamen, eiteru te nkalo oloo saen o meshomo oloontoluo, naa Simion, erubata nabo. Ore eiteru to lpolosie le nkop e Simion, eiteru te nkalo oloo saen o meshomo oloontoluo, naa Isaakar, erubata nabo. Ore eiteru to lpolosie le nkop e Isaakar, eiteru te nkalo oloo saen o meshomo oloo ntoluo naa Sebulon, erubata nabo. Ore eiteru to lpolosie le nkop e Sebulon, eiteru tenkalo oloo saen o meshomo oloo ntoluo naa Gad, erubata nabo. Ore eiteru to lpolosie le nkop e Gad o meshomo kopikop, naa kepuku olpolosie te Tamar o meshomo nkariak e Meribatkadesh, aa keim enkiyopata ina shorro e Misiri o metijing'a enaiposha kitok. Ore ena naa enkop nidung'oki metaa enjung'o tiatua iloshon le Israel, naa kuna ninche irubat enye ejo Olaitoriani Enkai. “Keaku keetae ineepukunyeki enkanasa: Ore te nkalo e moikuape ina naaku intemat enkaina inkalifuni tikitam o ong'uan o iip imiet te ntemet, inchomito uni, e nkishomi e Ruben, e nkishomi e Yuda, o enkishomi e Lawi, ore nchomito enkanasa naa keipotieki iloshon le Israel. Ore te nkalo oloosaen, ina naaku intemat enkaina inkalifuni oong'uan o iip imiet, naa inchomito uni, kishomi e Yosef, kishomi e Benchamen, o kishomi e Dan. Ore te nkalo e kopikop, ina naaku intemat enkaina inkalifuni ong'uan o iip imiet te ntemet, naa inchomito uni, kishomi e Simion, kishomi e Isaakar, o kishomi e Sebulon. Ore te nkalo oloo ntoluo ina naaku intemat enkaina inkalifuni ong'uan o iip imiet naa nchomito uni, kishomi e Gad, o kishomi e Asheri, o kishomi e Naftali. Ore emanaroto e nkanasa naa keaku intemat enkaina inkalifuni tomon o isiet. Ore enkarna e nkanasa eiteru teina kata nelo dukuya naa keji, Etii Olaitoriani ine!” Ore to lari li okuni le nkitoria e Yohoiakim olaiguanani le Yuda, nelotu Nebukadnesa olaiguanani le Babilon, Yerusalem nemuat ninye near. Neishooyo Olaitoriani Yohoiakim olaiguanani le Yuda apik atua inkaik enyena, te nebo embata oo masaa e nkaji e Nkai, neyau ninye ninche enkop e Shinari atua enkaji e Nkai enye, nepik nena masaa e wueji neshumieki ntokitin e tipat e nkai enye. Neitoki olaiguanani aitanap Ashpenas, ilo aitasheikinoni lenye kitok sunash ogelema, pee eyau embata oo ltung'ana le Israel, lelo le nkaji e nkitoo o lelo kituaak, ilbarnot lemeeta leyiat, shaati naa arriyiak te ng'eno pooki nagut, ooishoro eyiolounoto, o enkibung'ata e nkiteng'enata, oodupa te nkisiayiare e nkaji o laiguanani, pee eiteng'eni ninche isirat o enkutuk oo Lkaldayo. Nedung'oki olaiguanani ninche erubata e anaa ake e ndaa sidai naa ninye apa einos olaiguanani, o ene naisho oo sabibu naa ninye eok. Naa kepuoi apa aaiteng'en ninche ilarin okuni, ore te siadi ina kata nepuo ninche aaitashe te dukuya olaiguanani. Ore te kulo naa Daniel, o Hanania, o Mishael, o Asaria lo losho le Yuda. Ore ilo kitok loo laitasheikinok loo sunaishi oogelema nedung'oki ninche nkarn: nejo Daniel Belteshasa, ore Hanania nejo Shadrak, ore Mishael nejo Meshak, ore Asaria nejo Abednego. Kake etumuta Daniel nchere meyieu neisarkionie kewan te ndaa o laiguanani aashu te ina aisho oo sabibu apa naok ninye; neaku eikilikuana apa ninye ilo kitok loo laitasheikinok loo sunaishi oogelema pee enyorraa ninye, pee meisarkionie kewan. Neisho Olaitoriani Daniel omom o lng'ur too nkonyek e ilo kitok loo laitasheikinok loo sunaishi oogelema; nejoki ilo kitok loo laitasheikinok sunash ogelema Daniel, “Kaureisho nanu, medol ake olkitok lai olaiguanani, laa ninye likitegelaka endaa ino o entoki niok, ajo ira menati alang lelo barnot lerisiori ino. Neaku ipik iyie enkishui ai batisho ti alo olaiguanani.” Neitoki Daniel ajoki ilo aitasheikinoni laa ninye apa etegelua ilo kitok loo laitasheikinok sunash ogelema meing'ura Daniel, o Hanania, o Mishael o Asaria; “Tujurro isinkan linono too nkolong'i tomon; nchoo eishori iyiook mbenek mainosa o enkare nikiok. Nitum taa aing'ura empukunoto ang o ene lelo barnot ooinos endaa sidai o laiguanani, naa ore te risioroto e mbae naba anaa enidol neijia ntaasa isinkan linono.” Neaku etoning'o apa ninye ninche tena bae, nejur ninche nkolong'i tomon. Ore te siadi nkolong'i tomon nedoli aajo ninche oopir naa biot aalang lelo barnot pooki ooinos endaa sidai o laiguanani. Neaku eiwuang'ie ilo aitasheikinoni ina daa enye sidai o ina aisho oo sabibu apa naji pee eok ninche, neisho ninche mbenek. Ore kulo barnot pokira oong'uan, neisho Enkai ninche enkiteng'enata o enkarriyiano too sirat pooki o te ng'eno; neeta apa Daniel eyiolounoto too nduaat pooki o te ng'eno nagut. Ore te siadi ina kata, eidipa olaiguanani aitanapisho nchere meitijing'uni ninche atua aji, neyau ilo kitok loo laitasheikinok sunaishi oogelema ninche atua aji dukuya Nebukadnesa. Neirorie olaiguanani ninche, ore te ninche pooki meetae hoo obo onotoki onyaanyukie Daniel, o Hanania, o Mishael o Asaria; neaku eitasheito ninche te dukuya olaiguanani. Naa ore te pooki bae e ng'eno o eyiolounoto naipirta enaikilikuana olaiguanani ninche, nedol ajo kelang ninche katitin tomon ilkuyantik pooki o lasakutok ootii atua enkitoria enye pooki. Neton Daniel o metabau olari le dukuya lo laiguanani Sairos. Ore to lari li are le nkitoria e Nebukadnesa, neidetidet Nebukadnesa nenyamalu oltau lenye, neimin ninye njo. Neitanapisho ilo aiguanani nchere ore ilkuyantik, o lasakutok o loas inenking'asia o Lkaldayo neiturrurruni te nebo pee etum aatoliki olaiguanani enkidetidet enye. Nejing'u ninche nepuonu aaitashe te dukuya olaiguanani. Nejoki olaiguanani ninche, “Aidetideta duoo, netanyamala oltau lai eyieu neyiolou ina kidetidet.” Nejoki Ilkaldayo olaiguanani, “Lo aiguanani, tobiko ntarasi! Toliki isinkan linono enkidetidet, pee kintodol iyie enkibalakinoto enye.” Newaliki olaiguanani Ilkaldayo ajoki, “Ore ilo rorei opuku ti atua nanu naa kedede; te nimikintayiololo intae nanu enkidetidet o empukunoto enye, nedung'udung'i intae aaitaa ndung'udung'ot, neidaikieki nkajijik inyi. Kake te nintodolulu intae ina kidetidet o empukunoto enye, niyookiki aang'amu te nanu nkishorot, o nchuneti o enkanyit kitok. Metaa entoduaaki nanu ina kidetidet o enkibalakinoto enye.” Newalu ninche aaigil eni are, “Nchoo olaiguanani eliki isinkan lenyena enkidetidet, pee kintodolu iyiook enkibalakinoto enye.” Newalu olaiguanani ajo, “Ayiolo aitisip nchere, erishata intae ing'oruru, enkaraki nitoduaa intae aajo aauno nanu olomoni, nchere ti nimimbalunyenye intae ina kidetidet te nanu, naa ena nabo ake endung'okinoto inyi e nkiguana. Itoning'okinote intae pee iroro elejare o lemeitoriori te dukuya nanu o meibelekenyata nkatitin. Metaa entolikioki nanu enkidetidet pee ayiolou nchere eikindimidimi aatoliki enkibalakinoto enye.” Newaliki Ilkaldayo olaiguanani aajoki, “Meetae hoo oltung'ani te nkop oidim aitabai ena yieunoto o laiguanani; amu meetae aekata olaiguanani kitok aashu ogol oikilikuanua embae naaijo ena too loibonok pooki o too lasakutok, o too Lkaldayo. Ore ena bae naikilikuanu olaiguanani naa kegol, nemeetae likae oidim aitoduaa ninye olaiguanani meteleku ake nkaitin, naa ore emanyisho enye neme te nebo iloata seseni loo nkiri.” Ore enkaraki ena negoro olaiguanani nerasu oleng te ngoro neitanapisho nchere ore lelo tung'ana pooki ang'eni le Babilon neidaikieki. Neaku eibulayie ina kitanapata nchere ore lelo tung'ana ang'eni naa keari metuata, neing'oru ninche Daniel o lelo le ncholiek enye, pee ear ninche metuata. Newaliki Daniel Ariok, ilo kitok le rripore o laiguanani, to losek o tenkarriyiano, laa ninye apa oshomo aar metuata iltung'ana ang'eni le Babilon; nejoki ninye Ariok, ilo kitok le rripore o laiguanani, “Kainyoo pee errish oleng ena kitanapata o laiguanani?” Neitayiolo taa Ariok Daniel ina bae. Nelo Daniel atua aji nesai olaiguanani meishoo ninye enkata pee etum aitoduaa olaiguanani enkibalakinoto. Neitoki Daniel alo atua enkaji enye, neitayiolo ina bae Hanania, o Mishael o Asaria, lelo le ncholiek enye, nejoki ninche meing'oru olng'ur le Nkai e shumata ti alo ena kisudoroto, pee meidaaya ake Daniel o lelo le ncholiek enye te nebo lelo ang'eni le Babilon. Neboluni taa ina kisudoroto aaitodol Daniel te nduaata e kewarie. Neisis Daniel Enkai e shumata. Nejo Daniel: “Meisisi enkarna e Nkai ntarasi o ntarasi, amu enenye eng'eno o enkidimata. Eibelekeny ninye nkatitin o rishat; eiwuang'ie ninye ilaiguanak neput ilaiguanak; neisho ninye eng'eno nagut lelo ng'eni o eyiolounoto; eitodolu ninye mbaa naagut oo nkisudorot; neyiolo ninye ina natii atua enaimin, naa ninye ebikie ewang'an. Iyie, Enkai o loo papa, aaisho nanu enashe o enkisisa, amu kinchoo nanu eng'eno o engolon, nikintayiolo nanu nena nikinkilikuanutua te iyie, amu ntayiolo iyie iyiook ina bae naipirta olaiguanani.” Nelo taa Daniel atua ine netii Ariok, laa ninye etegelua olaiguanani meidaikie lelo tung'ana ang'eni le Babilon, nelo ajoki ninye nji, “Mindaikie iyie lelo tung'ana ang'eni le Babilon; torikoki nanu mashomo dukuya olaiguanani, pee alo aitodol olaiguanani ina kibalakinoto.” Neriku Ariok Daniel aitasieku aitijing'u meitasho te dukuya olaiguanani nelo ajoki ninye nji: “Anoto nanu ti atua lelo yarunoto ooing'uaa Yuda oltung'ani oidim aitayiolo olaiguanani ina kibalakinoto.” Nejoki olaiguanani Daniel, laa keji apa enkarna enye Belteshasa, “Eikindim iyie aitayiolo nanu ina kidetidet natoduaa o enkibalakinoto enye?” Newaliki Daniel olaiguanani ajoki, “Meetae iltung'ana ang'eni, anaa iloontaleng'o, anaa ilkuyantik, aashu laaing'urak loo lakir ooidim aaitoduaa olaiguanani ina kisudoroto naikilikuanua, kake etii Enkai e shumata naa ninye nabolu nkisudorot neitayiolo ninye olaiguanani Nebukadnesa ina nayooki aaku too nkolong'i e siadi. Ore ina kidetidet ino o nena duaat e lukunya ino ina kata irragita te ndapash naa ninche kuna: Ore te iyie, lo aiguanani, ina kata irrag te ndapash, nepuonu ndamunot oo naaidim aataa te siadi; naa ore ilo oibalunye nkisudorot nikintayiolo iyie ina nayooki aaku. Kake ore te nanu, mme te nkaraki eng'eno ai naata alang pooki ooishu pee eibalunyeki ena kisudoroto te nanu, kake pee etumi aaitayiolo olaiguanani enkibalakinoto enye, pee itum atayiolo indamunot o ltau lino. “Itoduaa iyie, lo aiguanani, naa ng'ura, enkitanyaanyukoto kitok. Ore ena kitanyaanyukoto kitok oleng neeta ewang'an nawang oleng, neitashe te dukuya iyie, naa tenidol keitureisho. Ore endukuya ena kitanyaanyukoto naa ene sahabu nasila, ore olgoo lenye o nkaik naa ine nkosholai, ore enkoshoke enye o nkupesir naa ino suyai, ore nkejek enyena naa ine sekenkei, ore ndapi enyena oo nkejek naa olkuroti oshula esekenkei o enterit. Ore anaa enitoduaa etebeluaki osoit neme te nkaina e tung'ani nesulakino aosh ina kitanyaanyukoto nena kejek enyena naashula esekenkei o esarng'ab nebel ninche aitaa mbelibelat. Neaku ore ina sekenkei, o ina sarng'ab o ilo suyai, o ina osholai o ina sahabu nerrarra pooki aaku mbelibelat netiu anaa suut ewueji neidong'ieki enkurma te nkata e nkirowuaj, neya ninche olkutati o metaa medoli ninye enkiti enye. Kake ore ilo soit otoosho ina kitanyaanyukoto neaku oldoinyo sapuk neiput enkop pooki. “Ena apa ina kidetidet; naa eikiliki naa taata iyiook olaiguanani enkibalakinoto enye. Ore iyie, Laaiguanani, nira olaiguanani loo laiguanak, laa iyie eishoo Enkai e shumata enkitoria, o engolon, o enkidimata, o enkitoo; naa atua nkaik inono etipika ninye, eneba anaa enemanya tung'ani, o ng'uesi e ong'ata, o ntaritik o loing'ang'e, nikintaa iyie olaitoriani te shumata ninche pooki - iyie ina dukuya e sahabu. Ore te siadi iyie nedumunye ae kitoria nemegol anaa enino, o enkae e uni o suyai naa kelo aitore enkop pooki. Naa kelotu enkitoria e ong'uan, nagol anaa esekenkei, amu kebel esekenkei ntokitin pooki neitaa empunyua; naa ore anaa esekenkei napurdisho kebel nepurd kuna pooki. Naa ore anaa enitoduaa ndapi enyena oo nkejek o lkimojik aa esarng'ab, o laitobirani eshula o esekenkei keaku enkitoria naoro; kake ore embata ndapai e sekenkei keaku ketii atua ninye, anaa ake enitoduaa esekenkei eshula o enterit. Naa ore anaa enitoduaa lelo kimojik loo nkejek aa esekenkei nashula o enterit neijia etiu ina kitoria kegol ti ae alo neshal ti ae alo. Ore anaa enitoduaa iyie esekenkei eshula o esarng'ab neijia etiu eshula maate aayama, kake meibung'a maate aaku nabo, anaa ake enemeibung'a esekenkei o enterit. Ore ti atua nkolong'i e lelo aiguanak neun Enkai e shumata enkitoria merruoyo ae kata, ore enkitoria enye meya ae kata kulikae tung'ana, naa kerrar ninye nkitoriat pooki neiting'ie ninche, neitashe ninye ntarasi; anaa ake enitoduaa nchere etebeluaki osoit to ldoinyo neme te nkaina e tung'ani nerrar ina sekendei, o suyai, o enterit, o enkosholai o ina sahabu. Enkai kitok naitayiolo olaiguanani ina nayooki atiu te siadi. Kedede ina kidetidet nesipa enkibalakinoto enye.” Nebatata olaiguanani Nebukadnesa te nkomom enye, neserem ninye Daniel, neitanapisho pee ei taikini ninye olasar nepejokini enkorropil. Nejoki olaiguanani Daniel, “Esipa ore Enkai ino naa Enkai oo nkaitin naa Olaitoriani loo laiguanak, naa olaitodolunoni loo nkisudorot, amu indima iyie atabolu ena kisudoroto.” Neisho ilo aiguanani Daniel enkitoo e shumata o nkishorot kumok sapuki neisho ninye meitoria olosho e nkop e Babilon pooki, neitaa sii ninye olkitok loo lang'eni pooki le Babilon. Neikilikuanu Daniel to laiguanani, negelu ninye Shadrak, o Meshak o Abednego metaa ninche ooing'or mbaa e nkop e Babilon; kake etobiko ninye Daniel to lgoriet te nkaji o laiguanani. Neitobir olaiguanani Nebukadnesa enkitanyaanyukoto e sahabu, naa ore enkadoro enye naa ntemat e nkaina ntomoni ile naa ntemat e nkaina ile neitasheiyie ninye enkong'ata e Dura, to lkerenket e Babilon. Neitoki Nebukadnesa airriwaa ilkiliku meiturrurruni ilkituaak o laitasheikinok sunash ogelema o lbalusuni o ilaiguanak o ilashumak loo mpisai o ilkituaak loo nkitanapat o lkituaak pooki loo loshon pee epuonu enkitisinyata ina kitanyaanyukoto natesheta olaiguanani Nebukadnesa. Neiturrurro lelo kituaak, o laitasheikinok sunash ogelema, o lbalusuni, o lautarok o lashumak loo mpisai, o ilkituaak loo nkitanapat, o iladung'ok loo nkiguanat o lelo kituaak loo lkerenket, tenkaraki enkitisinyata e ina kitanyaanyukoto natesheta olaiguanani Nebukadnesa; neitashe ninche te dukuya ina kitanyaanyukoto natesheta Nebukadnesa. Ore ilo kilikuai, neibalunye to ltoilo sapuk ajo, “Eitanapaki intae, loo rere, nakuapi, o lng'ejepa, nchere ore ti nining'ining'i oltoilo le mowuo, o endule, o lwulul loo usin, o enkinanta nanyaanyukie olwulul, o enkawuo oo sinkolioitin, o lbene olkuti te ndule, o pooki pukunoto o sinkolio, nirrugogo aabaiki enkop, aaserem ina kitanyaanyukoto e sahabu naitasheyie olaiguanani Nebukadnesa. Naa ore pooki ng'ae lemebatata aserem nepuoi nabo kata aanang'aki atua olkokuet le nkima oyupuyup.” Neaku ore ake pee ening iloreren ilo toilo le mowuo o lwulul loo usin, o enkinanta nanyaanyukie olwulul, o enkawuo oo sinkolioitin, o lbene okuti te ndule, o pooki pukunoto o sinkolio, ore iltung'ana pooki, o loreren o lng'ejepa nebatata pooki te dukuya ina kitanyaanyukoto e sahabu naitasheyie olaiguanani Nebukadnesa. Neaku ore apa teina kata nepuonu kulikae Kaldayo dukuya neitang'or lelo Yahudi. Nejoki ninche olaiguanani Nebukadnesa, “Laaiguanani, tobiko ntarasi! Ore iyie, laaiguanani, intobira enkitanapata, nchere ore pooki tung'ani oning oltoilo le mowuo, o endule, o lwulul loo usin, o enkinanta nanyaanyukie olwulul, o enkawuo oo sinkolioitin, o lbene okuti te ndule, o pooki pukunoto o sinkolio naa kebatata aserem ina kitanyaanyukoto e sahabu; ore oloba anaa olemebatata aserem nenang'akini atua olkokuet le nkima oyupuyup. Etii kulikae Yahudi litegelua iyie meitasheiki mbaa olkerenket le Babilon: Shadrak, o Meshek o Abednego. Eji ore kulo tung'ana, laaiguanani, mikishilaa ninche iyie; meisiaai ninche nkaitin inono aashu eserem ina kitanyaanyukoto e sahabu nintasheyie.” Neitanapisho Nebukadnesa te ngoro napi meyauni Shadrak o Meshak o Abednego. Neyauni kulo tung'ana dukuya olaiguanani. Nejoki Nebukadnesa ninche, “Kesipa doi, Shadrak o Meshak o Abednego, nchere misiaayiayia intae nkaitin aainei aashu iserememe ina kitanyaanyukoto e sahabu naitasheyie nanu? Ore naa taata ti niterretenate, ti nining'ining'i oltoilo le mowuo o le ndule o lwulul loo usin o enkinanta nanyaanyukie olwulul, o enkawuo oo sinkolioitin o lbene okuti te ndule, o pooki pukunoto o sinkolio, naa nibatatata aaserem ina kitanyaanyukoto e sahabu naitobira nanu, naa aisidai ina. Kake tinimiserememe intae, nenang'akini intae nabo kata atua olkokuet oyupuyup; naa kaa ai ina naidim atokordu intae aitayu too nkaik aainei?” Newaliki Shadrak o Meshak o Abednego olaiguanani nejoki, “Oo Nebukadnesa, mikiaata iyiook tipat pee kiwaliki iyie tena bae. Naa tenaa neijia, ore Enkai ang naa ninye kisiaai naa keidim atokordu iyiook aitayu ti atua ilo kokuet oyupuyup; naa kekordu ninye iyiook aitung'uaa enkaina ino, laaiguanani. Kake te neitu, tayiolo iyie, laaiguanani nchere, mikisiaai iyiook nkaitin inono aashu kiserem ina kitanyaanyukoto e sahabu nintasheyie iyie.” Neiput Nebukadnesa engoro napi, ore enkomom enye neibelekenya arruoyo ti alo Shadrak o Meshak o Abednego. Neitanapisho ninye meinoki ilo kokuet le nkima aaitulusoo katitin naapishana tena duoo kijukujuk e kiyupuyup. Neitanap kulikae tung'ana magil le njore enye meteena Shadrak o Meshek o Abednego, nenang'aki ninche atua ilo kokuet oyupuyup le nkima. Neeni kulo tung'ana eishopito nkilani enye e atua o nioriong, o nkopiyiani enye o kulikae kilani lenye, nenang'akini ninche atua olkokuet le nkima oyupuyup. Ore enkaraki narrish apa ina kitanapata o laiguanani neirowua oleng ilo kokuet le nkima, etang'amayie olng'ejep le nkima anya lelo tung'ana ootudumutua Shadrak o Meshek o Abednego. Ore kulo tung'ana okuni, Shadrak o Meshak o Abednego, nesulakini eena atua ilo kokuet le nkima oyupuyup. Neing'asia olaiguanani Nebukadnesa nedumunye nabo kata. Nejoki ninye ilarikok lenyena, “Keitu iyiook kinang'aki iltung'ana okuni eena atua enkima?” Newaliki ninche olaiguanani ejo, “Esipa, Laaiguanani.” Newaliki ninye ajo, “Kake adolita nanu iltung'ana oong'uan lemeena oopuoito te mpolos e nkima, neitu eiseyieki; ore eliooto e ilo li ong'uan nenyaanyukie enkerai oo nkaitin.” Nelotu Nebukadnesa anyiku enkutuk e ilo kokuet le nkima nayupuyup nejo, “Shadrak o Meshak o Abednego, isinkan le Nkai natii shumata aisul, wootu elepu, naa wootu ene!” Neipang'u Shadrak o Meshek o Abednego ti atua enkima. Ore lelo kituaak, o laitasheikinok sunaishi oogelema o lbalusuni o laikook lo laiguanani neiturrurro te nebo nedol aajo eitu etum enkima ai golon too seseni le lelo tung'ana; ore ilpapit loo lukuny enye eitu ninye eisui, ore nkilani enye neitu eikoni ae, nemetii olng'usil le nkima ninche. Nejo Nebukadnesa, “Meisisi Enkai e Shadrak o Meshek o Abednego, nairriwua ninye olmalaika lenye netokordua isinkan lenyena, lelo ooisiliga ninye, neitu eitaa toki enkitanapata o laiguanani, neitayu iseseni lenye alang te neisiaai neserem ae neme ina Ai enye maate. Ore naa kaitayu enkitanapata: Ore pooki orere, o pooki kop, o pooki ng'ejep oiro inaapaashare Enkai e Shadrak o Meshek o Abednego nedung'i aaitaa ndung'udung'ot, ore nkajijik enye neidaikieki; amu meetae ae Ai naidim atokordu tena pukunoto.” Neilepie olaiguanani aisho enkitoo Shadrak o Meshek o Abednego to lkerenket le Babilon. Olaiguanani Nebukadnesa oigeroki iltung'ana pooki, o loreren, o lng'ejepa oomanya enkop pooki: Metoponikini intae eseriani! Atoduaa nanu ajo eisidai te naitodolu ilmonek o nenking'asia naataasaka Enkai natii shumata aisul tialo nanu. Kebaa esapuko oo lmonek lenyena le nking'asia, kebaa enkidimata oo mbaa enyena e nking'asia! Ore enkitoria enye naa enkitoria oo ntarasi, ore enkitoo enye nebaiki iishoritin o ishoritin. Ore nanu Nebukadnesa kaisikarra apa ti atua enkaji ai natudupe ti atua enkaji ai natudupe ti atua enkaji ai e nkitoo. Anoto apa nanu enkidetidet naaituria; ore airragita te ndapash naaitanyamal ndamunot o nduaat e ndukuya ai. Neaku aitanapishe nanu meyauni lelo tung'ana pooki ang'eni le Babilon meyauni dukuya nanu, pee aatum ninche aaitayiolo nanu enkibalakinoto eina kidetidet. Nepuonu ilkuyantik o loo ntaleng'o o Lkaldayo, o laing'urak loo lakir atua ine natii; naliki nanu ninche ina kidetidet, kake maaidim ninche aatoliki nanu enkibalakinoto enye. Ore te siadi nelotu Daniel dukuya nanu - ilo apa oji enkarna Belteshasa aaipotie enkai ai, naa atua ninye etii enkiyang'et oo nkaitin sinyat naliki nanu ninye ina kidetidet, ajoki, “Iyie Belteshasa, olkitok loo lkuyantik, ore enkaraki nayiolo nanu ajo etii enkiyang'et oo nkaitin sinyat atua iyie nemeetae enkisudoroto nagol te iyie, ena kidetidet nanu atoduaa; tolikioki nanu enkibalakinoto enye. Ore nena duaat e ndukuya ai ina kata airragita te ndapash naa kuna: Atoduaa nanu, naa ng'ura, olchani te mpolos e nkop; ore enkadoro enye naa eikitok. Nebulu ilo shani negolu ore enchumata enye nebaiki keper, naa kelioo te neiting'ie enkop pooki. Ore mbenek enyena naa eisidain naa kumok ilng'anayio lenyena, ore ilo shani netii endaa e pooki toki. Netum ing'uesi e ong'ata oloip ti abori ninye ore ntaritik o loing'ang'e nemany ilng'osil lenyena, ore pooki toki naishu neitoti te ilo shani. “Atoduaa nanu te nena duaat e ndukuya ai ina kata airragita te ndapash, naa ng'ura, olarriponi, ilo osinya, nelotu adou eing'uaa shumata. Neyietu aishir nejo nji, ‘Entudung ilo shani meturori, nisulaa ilng'osil lenyena, nidung'oo mbenek enyena nisardakiekie ilng'anayio lenyena; nchoo ng'uesi eisik aapuo te ntonata enye neisik ntaritik too lng'osil lenyena. Kake entung'uai enkobei o ntona enyena te nkop, eena te sekenkei o to suyai te mpolos oo nkujit naanana e ong'ata. Nchoo ninye eshalu te nkoliolio e shumata; nchoo erishata enye eaku te nebong'uesi ti atua nkujit e nkop; nchoo eibelekenya endamunoto enye e tung'ani naa nchoo eishori ninye endamunoto e ng'ues naa nchoo nkatitin naapishana egiroo ninye. Ore ina dung'okinoto e nkiguana ene lelo arripok, embae natudung'oki to rorei le lelo sinyat, pee eyiolou ilooishu pooki nchere ore ilo otii shumata aisul ninye oitore enkitoria oo ltung'ana, neisho ninye ilo oyieu, nepik shumata ninye ilo oshal.’ Ore ena kidetidet, nanu olaiguanani Nebukadnesa, otadua. Naa ore iyie Belteshasa, mbalunye enkibalakinoto, enkaraki ore lelo tung'ana pooki ang'eni le nkitoria ai maaidim aaitayiolo nanu enkibalakinoto, kake indim iyie, amu etii enkiyang'et oo nkaitin sinyat atua iyie.” Neitoki Daniel, apa oji enkarna enye Belteshesa, aing'asia te nkiti rishata neitanyamal ndamunot enyena ninye. Nejo olaiguanani, “Belteshesa, mincho kintanyamal ina kidetidet aashu enkibalakinoto.” Newalu Belteshasa ajo, “Olkitok lai, metaa ina kidetidet ene lelo likimba iyie ore enkibalakinoto enye neaku enoo lmang'ati linono! Ore ilo shani litodua iyie, otubulua negolu, o metabaiki enchumata enye keper, naa dapash ninye abaiki enkop pooki; laa eisidan mbenek enyena naa kumok ilng'anayio lenyena, naa ninye etii endaa e pooki toki; naa abori ninye etumie ng'uesi e ong'ata oloip, naa ilng'osil lenyena emanya ntaritik o loing'ang'e iyie, ilo laaiguanani, itubula nigolu. Etubulua enkitoo ino o metabaiki shumata ore enkitoria ino netabaikia lubot e nkop. Ore ina natoduaa olaiguanani olarriponi, ilo sinyati, edou eing'uaa shumata ejo, ‘Entudung entuuroi olchani ninyalinyala ninye, kake entung'uai enkobei o ntona enyena te nkop, eena te sekenkei o to suyai, too nkujit naanana e ong'ata; naa nchoo erubata enye eaku te nebo ng'uesi e ong'ata, o metaba anaa negiroo ninye nkatitin naapishana;’ ena ninye enkibalakinoto enye, laaiguanani: Enkitanapata e ilo otii shumata aisul, ninye shumata olkitok lai olaiguanani, nchere eikipuoi aaraa iyie aaitung'uaa iltung'ana, ore emanyisho ino naa keaku te nebo ing'uesi e ong'ata; eikinchori iyie inosa nkujit anaa olkiteng, naa eishalu iyie te nkoileelio e shumata, naa eikigiroo iyie nkatitin naapishana o metaba anaa niyiolounchere ilo otii shumata aisul oitore enkitoo e tung'ana, neisho ninye ilo oyieu. Naa ore anaa enaitanapishoteki pee eing'uari enkobei o ntona e ilo shani, naa kelo enkitoria ino adedeyu obaiki ina kata niyiolounye nchere keper naitoreisho. “Metaa naa laaiguanani nchoo enkikoo ai eng'amaroyu te iyie; nturrai ing'ok inono te asata e sipata, o ntorrok inono te nkitodolunoto o lng'ur too looitorogonyaki, pee ebaiki neponari nkolong'iinono e seriani.” Eeuo ena pooki shumata olaiguanani Nebukadnesa. Ore te siadi ilapaitin tomon o are neloito ninye te nchumata e nkaji e nkitoo e Babilon, nejo olaiguanani, “Aimekitok ena Babilon natesheta nanu te ngolon ai kitok metaa enkaji e nkitoo nairragie o te nkitoo e nkitoria ai.” Ore eton epuku kulo rorei te nkutuk o laiguanani, nedou oltoilo oing'uaa shumata, “Olaiguanani Nebukadnesa, kirorieki iyie: Kishomo enkitoria aing'uaa iyie, naa aikiarari iyie aaitung'uaa iltung'ana, ore emanyisho ino naa keaku te nebo ing'uesi e ntim; naa keaku inos iyie nkujit anaa olkiteng; naa eikigiroo iyie ilarin naapishana, o metaba anaa niyiolou nchere ilo otii shumata aisul oitore enkitoo etung'ana, neisho ninye ilo oyieu.” Ore ina kata ake neitabari ilo rorei to laiguanani Nebukadnesa. Nearari ninye aaitung'uaa iltung'ana, neinos nkujit anaa olkiteng, neshalu osesen lenye, te nkoileelio e shumata o metubulu ilpapit lenyena te nkadoro anaa nkopir o lkurragos, netiu iloisotok lenyena anaa loo lmotonyi. Ore te siadi nena olong'i, nashumu nanu Nebukadnesa nkonyek aainei aing'or shumata, naarrinyokino nanu ndamunot aainei, naisis nanu ilo otii shumata aisul, naisis nayanyitu ilo oishu ntarasi; amu ore enkitoria enye naa enkitoria oo ntarasi, ore enkitoo enye nebikoo too ishoritin o ishoritin ore lelo pooki oomanya enkop neikenaki aajo pesho; neas ninye te risioroto e yieunoto enye to lorora le shumata o ti atua lelo oomanya enkop; nemeetae oloidimaa enkaina enye, aashu ejoki ninye, “Kaa iasita iyie?” Ore te ina kata ake naarrinyokino nanu endamunoto ai; ore te nkaraki enkitoo e nkitoria ai naarrinyokini enkisisa o enkishiaa. Naaing'oru ilaikook o lkituaak laainei, naapiki nanu atua enkitoria ai, naaponikini nanu enkitoo sapuk. Ore nanu Nebukadnesa naisis naserem nayanyitu ilo Aiguanani le shumata; amu ore isiaaitin enyena pooki naa neitoriori. Ore nkoitoi enyena nesipa. Naa ore lelo oopuo to lwuasa eidim ninye aitadou. Neitobir apa olaiguanani Belshasa osirua kitok te nkaraki ilkituaak lenyena enkalifu nabo, neok ninye enaisho oo sabibu te dukuya lelo enkalifu nabo. Ore ake pee eishamisham Belshasa enaisho, neitanapisho nchere ore nena masaa e sahabu o nenkosholai apa naaitayio Nebukadnesa papaai lenye ti atua enkaji e Nkai te Yerusalem meyauni, pee etum olaiguanani o lkituaak lenyena o nkituaak enyena o nkapiak enyena aatookishore ninche. Neyau ninche nena masaa e sahabu o nenkosholai apa naaitayioki ti atua enkaji e Nkai, te ina aji e Nkai te Yerusalem. Neokishore olaiguanani ninche, o lkituaak lenyena, o nkituaak enyena o nkapiak enyena. Neok ninche enaisho oo sabibu, nerrep nkaitin nena aitin e sahabu, o nenkosholai, o nosuyai, o nesekenkei, o enosoit. Ore nabo kata neliooyu ilkimojik le nkaina e tung'ani neiger enturoto naelare esuntai e nkaji o laiguanani enkipirakinoto oiket lo ltaa; nedol olaiguanani ina aina eigerisho. Neibelekenya emua o laiguanani, neitanyamal ninye ndamunot enyena, nelepori irubat osesen lenye neikirikira nkung aaosho. Neyietu olaiguanani abuaku pee eyakini iloibonok, o Lkaldayo o laduaak. Nejoki olaiguanani lelo tung'ana ang'eni le Babilon, “Ore oloba anaa oloisoma ele sirata nelimu enajo ninye, naaitodol nanu enkibalakinoto enye neishopokini olkila sintet nepiki olpisiai le sahabu aaitaman emurt enye, nelo ninye aaku oloitoreisho liokuni te nkitoria.” Nejing'u lelo ang'eni pooki lo laiguanani, kake meidim ninche aaisoma ilo sirata aashu eitayiolo olaiguanani enkibalakinoto. Nenyamalu oleng ilo aiguanani Belshasa neibelekenya emua enye, neiputukuny lelo kituaak lenyena. Ore enkitok o laiguanani, te nkaraki irorei lo laiguanani o lelo kituaak lenyena, nelotu olgilata oitoomonishoreki, nejo ina kitok olaiguanani, “La aiguanani, tobiko ntarasi! Mincho ndamunotinono kintanyamal aashu emua ino eibelekenya. Etii atua enkitoria ino oltung'ani otii atua ninye enkiyang'et oo nkaitin sinyat. Ore apa too nkolong'i e papaai lino, nenotoki ti atua ninye ewang'an, o eyiolounoto o eng'eno natiu anaa eng'eno oo nkaitin, ore apa olaiguanani Nebukadnesa, papaai lino, neitaa ninye olkitok loo lkuyantik, oloo ntalengo, Ilkaldayo o laing'urak loo lakir, enkaraki naa ore oltau sidai, o eng'eno, o ening'unoto nalimunye enkibalakinoto oo nkidetidetat oo iloyiotiaa neiwuang'ie inyamalitin nenotoki tele tung'ani oji Daniel, apa oishoo olaiguanani enkarna ajo Belteshasa. Nchoo naa Daniel eipotuni pee eitodolu ninye enkibalakinoto ele sirata.” Neitijing'uni Daniel meeu dukuya olaiguanani. Nejoki olaiguanani Daniel, “Ira iyie lido Daniel, apa ora obo loo yarunot le Yuda, apa oyaua olaiguanani papa lai te Yuda. Atoning'o ilomon linono nchere etii enkiyang'et oo nkaitin sinyat atua iyie nenotoki sii ewang'an, o eyiolounoto o eng'eno nagut ti atua iyie. Etorikuoki taata ilang'eni o loo ntalengo meetu dukuya nanu pee eisom ele kigeroto naaitayiolo nanu enkibalakinoto enye; kake meidim ninche aaitodolu enkibalakinoto ena bae. Kake atoning'o nanu nchere indim iyie atolimu nkibalakinot niwuang'ie enyamali. Ore naa taata ti nindim iyie aisoma ele kigeroto nikintayiolo nanu enkibalakinoto, nikinchopokini olkila sintet, nikipiki olpisiai le sahabu aaitaman emurt ino, niaaku oliokuni oitoreisho te nkitoria.” Newal Daniel te dukuya olaiguanani ajo, “Nchoo nkishorot inono eaku nkuninono, naa nchoo nena kishorot inono likae; ore ake eyia kaisomaki nanu olaiguanani ilo kigeroto naitayiolo ninye enkibalakinoto e ilo kigeroto. La aiguanani, eishoo Enkai kitok oleng Nebukadnesa, papaai lino enkitoria o enkisisa o esikar; naa ore enkaraki ina kitoo naishoo Enkai ninye eikirikirate iltung'ana pooki, o loreren, o lng'ejepa neureishoyu te dukuya ninye; ore oloyieu near metua near metua; ore oloyieu neitopok neitopok; ore ilo oyieu neilepie, neilepie, ore oloyieu neitadou neitadou. Kake ore ake pee eilepunye oltau lenye neitagol oltau metaa keasisho to lwuasa neiwuang'ieki ninye te ilo orika lenye le nkitoo, neyae enkitoo enye aaitung'uaa ninye; nerei ninye aitung'uaa iltung'ana, neitotiuni ndamunot enyena anaa ineng'ues, ore emanyisho enye neaku te nebo isirkon le ntim; neitoti ninye too nkujit anaa olkiteng, neshalu osesen lenye te nkoliolio e shumata, o metaba anaa neyiolou ninye nchere Ina Ai natii shumata aisul naitore enkitoria e tung'ana, nepik shumata ninye ilo oyieu ninye. Naa ore iyie, olayioni lenye, Belshasa, eitu intobor oltau lino hoo niyiolo kuna pooki, kake ilepunye kewan nigilunore Olaitoriani le shumata; ore nena masaa e nkaji enye neitijing'uaki aayau dukuya iyie, ore iyie o lkituaak linono, o nkituaak inono o nkapiak inono nitookie ninche enaisho oo sabibu, nirrepirrepe intae nena aitin e nkosholai o nesahabu o nosuyai, o nesekenkei, o nenchata, o nosoit, nena nemedolisho aashu ening'isho aashu eyiolo, kake ore ina Ai naa enkaina enye etii enkiyang'et ino netii inkoitoi inono pooki neitu iyie iyanyit. “Neaku te ine netii ninye eirriwuaki ina aina, nesiri ele kigeroto. Naa ele kigeroto otisiraki: MENE, MENE, TEKEL, o PARSIN. Ena enkibalakinoto ena bae: MENE, eikena Enkai nkolong'i e nkitoria ino neyau ninye enkiting'oto; TEKEL, kineneng'aki iyie te ntemet naineneng'ishoreki nedoli aajo ing'or. PERES, etooroki enkitoria ino neishori ile Mede o le Parsia.” Neitoki Belshasa aitanapisho neishopokini Daniel olkila sintet o lpisiai le sahabu oitamanaki emurt enye, nelimuni aaibalunye naaipirta ninye, nchere keaku ninye o liokuni oitoreisho te nkitoria. Ore ina kewarie ake neari Belshasa ilo aiguanani loo Lkaldayo metua. Neng'amu Darius le Mede enkitoria, aa oloo larin oobaya ntomoni ile oare. Eitishipa apa Darias pee epik ilbalusuni iip o tikitam meitoreisho ti atua enkitoria enye pooki; ore shumata ninche naa ilkituaak okuni, laa Daniel apa obo, aa ninye eyaki kulo balusuni ilomon, pee metum ake olaiguanani eng'orikinoto. Ore apa ilo Daniel nening'oyu oleng alang lelo kituaak pooki o lbalusuni, amu etii apa enkiyang'et sidai atua ninye. Neitobir olaiguanani pee epik ninye shumata enkitoria pooki. Ore lelo kituaak o lbalusuni neing'oru enaitang'orie Daniel ti alo enkitoria; kake eitu ninche etum enaitang'orie aashu eleyiata, amu keisiligayu apa ninye, nemeetae enkitadiaata aashu eleyiata nanotoki te ninye. Neitoki kulo tung'ana aajo, “Mikitum ae kitang'oroto aashu eniking'unyung'unyakinye ele Daniel meteleku ake ti niking'oru ti alo nkitanapat e Nkai enye.” Nening'okino kulo kituaak o lbalusuni embae nayaki olaiguanani, nepuonu aajoki ninye, “Olaiguanani Darias, tobikoi ntarasi. Ore iyiook pooki oosiaisho te nkitoria ino - ilaitasheikinok, o lbalusuni, o laitasheikinok loo lkerenketi, o lkulikae arikok, nikitoning'okinote nchere pee eitobir olaiguanani enkitanapata, neitirrishi oleng, nchere ore pooki ng'ae oserem ae ai aashu tung'ani too nkolong'i tomon uni, metelekuake iyie lo aiguanani nenang'akini ninye eululu oo lng'atunyo. Ore naa taata, la aiguanani, intobira ina kitanapata nipik olmishire ina natoning'okinoteki pee meidimi aaibelekenya, anaa enatiu nkitanapat oo Lmedi o Lparsian, nena nemeidimi aaibelekenya.” Neaku etipika apa olaiguanani Darias olmishire ina palai neimie. Ore ake pee eyiolou Daniel nchere etipikaki olmishire ina naimieki nelo ninye enkaji enye ebolo ildirishani le nkaji e shumata eing'orita Yerusalem; negil ninye kung katitin uni te nkolong neomon neishooyo enashe te dukuya Enkai enye, anaa apake enataasa. Neitoki kulo tung'ana aapuonu te ning'okinoto neinepu Daniel esaisho neomon te dukuya Enkai enye. Neitoki ninche aapuonu aanyiku nejo te dukuya olaiguanani, “Amaa, ti alo enkitanapata, la aiguanani! Keitu iyie ipik olmishire ina natoning'okinoteki; nchere ore pooki tung'ani osaisho tiae ai aashu te tung'ani ti atua nkolong'i tomoni uni meteleku ake te iyie, la aiguanani, nenang'akini atua eululu oo lng'atunyo?” Newal olaiguanani ajo, “Keuno ina bae, anaa enatiu enkitanapata oo Lmedi o enoo Lpasi, nena nemeidimi aaibelekenya.” Neitoki ninche aawal te dukuya olaiguanani ejo, “Ore lido Daniel ora obo loo yarunot ooitung'uari Yuda, mikishilaa ninye iyie, laaiguanani, aashu ina naimieki nitipika olmishire, kake keomon ninye asaisho katitin uni te nkolong.” Ore ake pee ening olaiguanani kulo rorei, neing'oru eneiko pee ekordu Daniel; nenyamalu o metadoi enkolong pee ekordu ninye. Neitoki kulo tung'ana aapuonu te nkiguanakinoto enetii olaiguanani, nejoki olaiguanani, “Tayiolo, laaiguanani, nchere enkitanapata ena oo Lmede o Lpasi naa nchere meetae enatudung'o olaiguanani aashu enkitanapata naidimi aaibelekenya.” Neitoki olaiguanani aitanapisho, neyauni Daniel nenang'akini atua eululu oo lng'atunyo. Nejoki olaiguanani Daniel, “Inchoo Enkai ino, ina nisiaaita anaake kikordu iyie!” Neyauni osoit aairragie te nkutuk e ina ululu nemishir olaiguanani to lmishire lenye o to lmishire loo lkituaak lenyena, nchere meetae embae naidimi aaibelekenya ti alo Daniel. Nelo olaiguanani enkaji enye e nkitoo, neen kewan ina kewarie pee menya endaa, nemeetae nkinantani naayakaki ninye, nelau ninye njo. Ore enamanarie enkakenya nedumunye olaiguanani neisarrisar alo eululu oo lng'atunyo. Ore pee elotu ninye ataaniki ina ululu natii Daniel neyietu aishir to ltoilo lo sina nejoki Daniel, “Oo Daniel, osinka le Nkai naishu, eikindima duoo Enkai ino ina nisiaai anaake atokordu too lng'atunyo?” Nejoki Daniel olaiguanani, “La aiguanani, tobiko ntarasi! Eirriwua Enkai ai olmalaika neiken nkutukie oo lng'atunyo, neitu ninche aainyal, amu aatoduaki aajo maata entioto te dukuya ninye, o te dukuya iyie sii, laaiguanani, eitu aas entorrono.” Neng'idayu ilo aiguanani oleng, neitanapisho meitayuni Daniel ti atua eululu. Neaku eitayioki apa Daniel ti atua eululu nemetii hoo olkordata le nkinyalata onotoki te ninye, enkaraki apa naisiliga ninye Enkai enye. Neitanapisho olaiguanani, ore lelo tung'ana apa ooitang'oro Daniel neyauni, nenang'akini atua eululu oo lng'atunyo, ninche, o nkera enye o nkituaak enye; naa ore eitu ninche ebaiki abori ina ululu neng'amaa ilng'atunyo ninche negiligil iloik lenye. Neitoki olaiguanani Darias aigeroki iloreren pooki, o nkuapi pooki o nkutukie pooki naatii enkop pooki ajo: “Metoponikini intae eseriani. Aitobira nanu enkitanapata nchere ore ti atua enkitoria ai pooki neikirikira iltung'ana te nkuretisho te dukuya Enkai e Daniel, Amu Enkai naishu ninye, nebik ntarasi; meidak ae kata enkitoria enye, naa enoontarasi enkitoo enye. Kekordu ninye nesaru, neas ninye nkitoduaat e nking'asia te shumata o te nkop, ilo laa ninye oitajeuo Daniel aitung'uaa engolon oo lng'atunyo.” Neaku etubula apa ele Daniel te nkata e nkitoria e Darias o enkitoria e Sairos ilo le Parsian. Ore to lari le dukuya le Belshasa, olaiguanani le Babilon, netum Daniel enkidetidet o nduaat e ndukuya enye ina kata apa eirragita te ndapash enye. Neiger ninye ina kidetidet, nelimu esiana e ina bae. Nejo Daniel, “Atoduaa nanu te nduaata ai kewarie, naa ng'ura, ore lelo kutat oong'uan le shumata nekut te ngolon enaiposha kitok. Neipang'u ing'uesi ong'uan aapuku ti atua enaiposha, nemeetae ake enemepaashare enkae. Ore ene dukuya nenyaanyukie olng'atuny neeta inaipuko o lkurragos. Ore aing'orita nanu nedotuni inaipuko enyena, neilepieki ninye te nkop neishori ninye meitasho too nkejek are anaa oltung'ani, neishori ninye endamunoto e tung'ani. Naa ng'ura, enkae ng'ues e are, naikununo anaa olng'arurumi. Neilepieki ninye te nkalo nabo; neeta ninye ilaras okuni te nkutuk enye, too rishat oo lala lenyena; netiaakaki apa ninye, ‘Tudumunye inosa nkiri oleng.’ Ore te siadi ena naing'orisho nanu, naa ng'ura, enkae, nanyaanyukie olowuaru keri, neeta inaipuko ong'uan e motonyi te nkoriong enye; neeta ina ng'ues ilukuny ong'uan neishori ninye enkitoria. Ore te siadi ena nadol nanu too nduaat e nkewarie, naa ng'ura eng'ues e ong'uan, torrono neitureisho negol oleng; neeta ilala sapuki le sekenkei; kenyaisho ninye negiligilisho, neituny ilekunottoo nkejek enyena. Nepaashare ninye nena ng'uesi pooki apa naatii dukuya ninye, neeta mowuarak tomon. Atisipua nanu nena mowuarak, naa ng'ura etupukuo ti atua ninche enkae mouo, enkiti, naa te dukuya ninye etadotuoki imowuarak uni oo naduoo e dukuya, naa ng'ura ena mouo netii nkonyek naanyaanyukie nkonyek o ltung'ani o enkutuk nairo mbaa sapuki. “Ore aing'orisho nanu, neirragieki ilorikan le nkitoo ore obo otobikoyie ilarin kumok netonie olorika lenye; ore ikilani lenyena neibor anaa soito le nchan, ore ilpapit le ndukuya enye neikununoanaa ilpapit loo nkerra; ore ilo orika lenye le nkitoo naailng'ejepa le nkima ooyupuyup, ore nkejek oo ngarrin enyenanaa enkima nayupuyup. Nepuku olkeju le nkima nelo aim dukuya ninye; neisiai ninye nkalifuni o nkalifuni, ore te dukuya ninye neitashe nkalifuni tomon katitin nkalifuni tomon; neton enkiguana eiguanare, neboli mbukui. “Naing'orisho taa nanu te nkaraki ilo toilo le lelo rorei sapuki ooiroro ina mouo. Naa ore aing'orita, neyieng'i ina ng'ues, neinyali osesen lenye neishoori metapeji te nkima. Ore nena kulie ng'uesi neoruni enkitoria enye, kake ore enkishui enye neitoodoroki te rishata o te nkata. Atoduaa to nduaata e kewarie, naa ng'ura, ore too nkatampo e shumata nelotu obo onyaanyukie enkerai e tung'ani, nelotu enetii Ilo otobikoyie ilarin kumok neitarasari te dukuya ninye. Neishori ninye enkitoria o enkitoo o enkitoria, pee etum iltung'ana pooki, o nkuapi, o lng'ejepa aaisiaayia ninye. Ore enkitoria enye naa enkitoria oo ntarasi nemeish aekata, Ore enkitoo enye naa enkitoo oo ntarasi, nemeish aekata, naa nabo enkitoria enye nemeidimi aaidaikie. “Ore ti alo nanu, Daniel, nelimana oltau lai ti atua nanu ore nena duaat e ndukuya ai naaitanyamal. Atataanikia nanu obo le lelo ooitashe te ine naikilikuan esipata naipirta kuna pooki, neaku aatolikio ninye, naaibalakinye nanu enkibalakinoto e kuna tokitin. ‘Ore kuna ng'uesi pokira ong'uan kituaak naa ilaiguanak oong'uan ooyooki aaipang'u te nkop. Kake ore lelo sinyat le ilo Otii Shumata Aisul naa keng'amu enkitoria, neaku enkitoria enenye ntarasi, o ntarasi o ntarasi.’ “Naitoki ayieu nayiolou esipata naipirta ina ng'ues e ong'uan napaashari ninye too nkulie, naitureisho oleng, neeta ilala lenyena le sekenkei o loisotok lo suyai; nenyaisho negiligilisho neituny ilekunot too nkejek enyena; o naaipirta nena mourak tomon naatii endukuya enye, o ina ae mouo naa te dukuya ninye etigilari uni enye, ina mouo naata nkonyek o enkutuk nairo mbaa sapuki neeijo ninye kitok te nena naaboitare. Ore aing'orisho nanu neitayunye ena mouo olarrabal lelo sinyat, nemir ninche, o metaba anaa nelotu Ilo Otobikoyie, neiguanareki lelo sinyat le Ilo Otii Shumata aisul, nebau ina kata pee eishori lelo sinyat enkitoria. “Nji etejo ninye, ‘Ore ti alo ina ng'ues e ong'uan, kelotu enkitoria e ong'uan enkop, naa kepaashari ninye too nkitoriat pooki, naa kemut ninye enkop, pooki, neituny, negiligil. Ore nena mowuarak tomon, ore ti atua ena kitoria neipang'u ilaiguanak tomon, naa kedumunye likae te siadi ninche; naa kepaashari ninye te kuldo le ndukuya, naa keiwuang'ie ninye ilaiguanak okuni. Keiro ninye mbaa naapaashare Ilo Otii Shumata Aisul, naa kelo ninye aitanaur lelo sinyat le Ilo Otii Shumata Aisul, nedamu pee eibelekeny nkatitin o nkitanapat; naa keishoori ninche aapik atuaenkaina enye te nkiti kata, nkatitin are o lpisiai le nkata. Kake keton enkiguana aiguana, ore enkitoo enye naa keyae aaitung'uaa ninye, pee eishieki neinyali aaiting'ie. Ore enkitoria o enkitoo o engolon oo nkitoriat naatii abori shumata pooki, neishori iltung'ana loo sinyat le Ilo Otii Shumata Aisul; ore enkitoria enye naa keaku enkitoria oo ntarasi, ore enkitoo pooki neisiai nening ninche.’ “Ene enkiting'oto e ina bae. Ore tialo nanu Daniel, aaitanyamala ndamunot aainei oleng, neibelekenya emua o sesen lai; kake atushuma ina bae too ndamunot aainei.” Ore to lari li okuni le nkitoria o laiguanani Belshasa nadol nanu enduaata eare. Nadol nanu te ina duaata; naa ore apa pee adol, natii Susa ina anasa kitok, natii olkerenket le Elam; nadol apa nanu te nduaata, atii embata olkeju le Ulai. Naraposhu nkonyek aainei nadol, naa ng'ura, olmeregesh oitashe te ngilata o lkeju. Neeta imowuarak are; ore nena mowuarak pokira are naa kaadoru oleng, kake keado nabo alang enkae, ore ina naado neilep oleng, nelotu ina naado te siadi enkae. Nadol nanu ilo meregesh eipusho te nkalo o loo ntoluo, o moikuape o kopikop; nemeetae eng'ues naidim aitasho te dukuya ninye; nemeetae hoo obo oidim atokordu enatii abori engolon enye; etaasa anaa enayieu makewan nerup kewan aitaa sidai. Ore aibirribirrita, ng'ura, nelotu oloro eing'uaa enkalo o loo ntoluo eimu oriong enkop pooki eitu eibung enkop; neeta ilo oro emowuo e nking'asia te rishata oo nkonyek enyena. Nelotu ninye enetii ilo meregesh oata imowuarak are, ilo duoo latoduaa nanu eitashe te ngilata o lkeju, nekuetiki ninye te ngoro enye kitok. Nadol ninye eeuo anyikaki ilo meregesh neiponyare ninye, neosh ilo meregesh negil nena mowuarak enyena pokira are; neitu eitoki ilo meregesh aata engolon naitasheyie te dukuya ninye, kake etanang'ie ilo oro ninye enkop neituny ninye; nemeetae hoo obo oidim atokordu ilo meregesh aitung'uai engolon enye. Neisis ilo oro kewan oleng, kake ore ina kata egol ninye, negila ina mouo enye kitok, ore te rishata enye, nepuonu imowuarak ong'uan e nking'asia naaing'uaa ilkutat pokira ong'uan le shumata. Etubulua emowuo nabo teina kiti mouo, natubulua oleng aipir enkalo e kopikop, neipir enkalo o loo saen neipir ina kop kitok. Nebulu ninye oleng o metabaiki olorora le shumata, ore embata o lorora loo lakir nesulaki ninye enkop, neituny ninche. Nerup ninye kewan o te ilo kitok lo lorora; ore olasar opejori anaake neiwuang'ieki te ninye, ore ewueji e manyisho enye nenang'ari. Neishori ninye ilo orora te nebo ilo asar opejori anaake te ngilata oo nkitanapat; ore esipata nenang'akini enkop, neas ina mouo anaa enayieu nedupoyu. Naitoki nanu aning osinyati eiro; ore likae sinyati nejoki ilo oiroro, “Ae te nkata nabaa eetae ina duaata naipirta ilo osar opejori anaake, o ina gilata oo nkitanapat naitaa olmuaate, o ina naishooyioki emanyisho enye, o lorora meitunyi too nkejek?” Nejoki ninye, “Too nkalifuni are o iip uni oo nteipai o nkakeny; nerrinyokini taa ine wueji sinyati enapake wueji enye.” Ore nanu, Daniel, pee aidip atoduaa ina duaata, nanyok ajo ayiolou, naa ng'ura, eitashe te ine te dukuya nanu obo oata empukunoto o ltung'ani. Naning nanu oltoilo lo ltung'ani te rishata oo ngilat o lkeju le Ulai, neipotisho ilo toilo ajo, “Gabriel, nchoo ele tung'ani ening'u neyiolou enduaata.” Neaku etinyikua ninye alotu ine apa naitasheyie nanu; ore pee elotu nairut nabatata te nkomom. Kake aatiaaka ninye nanu, “Toning'o iyie nakerai nchere ore ena duaata naa te nkaraki enkata e nkiting'oto.” Ore aairorie ninye nanu, naaibung njo oleng nairrag aitabaiki enkomom enkop; kake aaiseyie ninye naadumu nanu maitasho too nkejek aainei. Nejo ninye, “Ng'ura, kaaitayiolo nanu iyie ina nayooki aaku te nkata e siadi e ngoro, amu ina kata apa nageluno e nkiting'oto eipirta. Ore ilo meregesh litoduaa oata imowuarak are, ore nena mowuarak are naa ilaiguanak le Media o Parsia. Ore ilo oro naa olaiguanani loo Lyunani; ore ina mouo kitok natii erishata oo nkonyek enyena naa ilo aiguanani oituruku. Ore ina mouo apa natigile te ine netubulunye kulie ong'uan naa keyooki aadumunye nkitoriat ong'uan te nkop enye, kake mme te ngolon enye. Ore te nkata e siadi e nkitoria enye, eidipa ilaitarruorrok aatimitunye, nelotu olaiguanani ogogong netolo oyiolo oleng ndung'eta e rashe. Naa kesapuku engolon enye, naa keyau enkidaata naitureisho naa keisul ninye te naba anaa enaas, naa keidaikie ninye iltung'ana magil o ltung'ana le lelo sinyat. Ore te nkalamasisho enye naa keponaa aitubul elejare te nkaina enye ore too ndamunot enyena makewan nerup kewan. Keidaikie ilkumok metii enkikoo naa kedumakino doi ninye o metabaiki Olkitok loo lkituaak, kake kepuoi aagil ninye metii enkaina e tung'ani. Ore ina duaata oo nteipai o nkakeny duoo natolimuoki naa kesipa; kake tunuka ina duaata, amu enoo nkolong'i naapuonu.” Ore nanu, Daniel, naaidimuni naairrag nkuti olong'i atamuoyia; naitoki nanu adumunye nalo enkisiaayiare o laiguanani; kake aiputukunyo nanu te ina duaata aningu ayiolou. Ore to lari le dukuya le Darias olayioni le Ahaseuro, laa ore te inoto naa Olmedei, ilo otaa olaiguanani le nkitoria oo Lkaldayo ore to lari le dukuya le nkitoria enye, namusu nanu Daniel ti atua mbukui esiana oo larin, laa ore te risioroto ororei lo Laitoriani otolikioki Yeremia ilo oiboni meeta nchere pee mebaya te dukuya enkiting'oto e nkidaata e Yerusalem, naa ilarin ntomoni naapishana. Naitoki aibelekenyakino Olaitoriani Enkai, aing'oru ninye te nkomono o te sayiata te enata e kewan o te nkishopoto oo lkuniyiani o nkuruon. Atoomono nanu Olaitoriani Enkai ai nairridu ajo, “Olaitoriani Na ai kitok magilani, oibung ninye olning'o lo sotua o enyorrata nauno te lelo oonyor ninye neibung nkitanapat enyena, kitaasa iyiook eng'oki nikintarruoitie nikiaasisho te suujisho nikigolong'u, kimbelekenyate aaing'uaa nkitanapat inono o nkiguanat inono; eitu iyiook kining isinkan linono lelo oibonok le Nkai, apa ooirorie ninche te nkarna ino ilaiguanak lang, o ilkituaak lang o loo papa, o ltung'ana pooki lena kop. Enino Olaitoriani esipita, kake kiaata iyiook enkurruna anaa enikitiu ena olong too ltung'ana le Yuda, te lelo oomanya Yerusalem, o Israel pooki, lelo ootaana o lelo oolakua pooki, ti atua nenakuapi pooki apa niterewa iyie ninche. Te nkaraki ina taboi nataasa ninche ti alo iyie. Enaang, Olaitoriani, enkurruna, o laiguanak lang, o lkituaak lang, o loo papa enkaraki nikitaasa iyiook eng'oki. Eno Laitoriani Enkai ang olng'ur o empalakino amu kitogolong'akitia iyiook ninye, neitu iyiook kining oltoilo lo Laitoriani Enkai ang aasuj nkitanapat enyena, apa naatipika ninye dukuya iyiook too sinkan lenyena lelo oibonok le Nkai. Etigila Israel pooki enkitanapata ino neibelekenye, neany ening oltoilo lino. Ore ilo deket o lmumai naaigeroki ti atua nkitanapat e Musa ilo sinka le Nkai netubukokoki iyiook, enkaraki nikitaasa iyiook eng'oki ti alo ninye. Eitabayie ninye irorei lenyena, lelo apa ooiroro ninye ti alo iyiook o ti alo lelo kituaak ooitore iyiook, ayau shumata iyiook enkitamioto sapuk; amu ore ti abori shumata pooki eitu ae kata etumi embae nanyaanyukie enaitaasaki Yerusalem. Ore anaa enaigeroki ti atua nkitanapat e Musa, eeuo ena kitamioto pooki shumata iyiook, neitu ake kiomonu omom o Laitoriani Enkai ang, aaibelekenya aaing'uaa ntorrok ang nikining ina sipata. Neaku eitobira Olaitoriani ina kitamioto neyaua ninye shumata iyiook; amu ore Olaitoriani Enkai ang naa asipani too siaitin pooki naataasa ninye, neitu iyiook kining oltoilo lenye. Naa ore taata, Olaitoriani Enkai ang, laa iyie oyaua iltung'ana linono aitupuku ti atua enkop e Misiri te nkaina magilani, nintobiraki kewan enkarna, anaa enatiu ena olong, kitaasa iyiook eng'oki, kitaasishote te ntorroni. Iyie Olaitoriani, ore te risioroto oo nkiaasin inono naasipa, nchoo engoro ino o empijan ino eibelekenya apaash ena anasa ino Yerusalem, ena doinyo ino sinyati; amu te nkaraki ing'ok ang o entorroni oo loo papa pee eimakini Yerusalem o ltung'ana linono ti atua kulo tung'ana pooki oomanita iyiook. Ore naa Olaitoriani, na Ai ang, toning'o enkomono o sinka lino o esayiata enye, naa ore te nkaraki kewan ino Olaitoriani, nchoo enkomom ino meitawang'aki ewueji ino sinyati ina nataa olmuaate. Na Ai ai, irrugu enkiok ino toning'o; tabolo nkonyek inono toduaa emijoonisho ang o ina anasa naipotieki enkarna ino; amu mikintarasu dukuya iyie isayiat ang te nkaraki esipata ang, kake te nkaraki olng'ur lino kitok. Olaitoriani, toning'o; Olaitoriani tapalaki iyiook; Olaitoriani toning'o iyiook niasisho; mimutie, te nkaraki kewan ino, na Ai ai, ore te nkaraki ena anasa ino o ltung'ana linono naa enkarna ino eipotieki.” Ore ina kata airorita nanu naomonito, airridu ing'ok aainei o ng'ok oo ltung'ana laainei Israel, naitarasaa esayiata ai te dukuya Olaitoriani Enkai te nkaraki ina doinyo sinyati e Nkai ai; ore ina kata airorita nanu aomon, ore ilo tung'ani oji Gabriel, duoo latoduaa te nduaata e dukuya, nelotu ine natii nanu akuetu oleng te ina kata o lasar le teipa. Nelotu ninye naajoki nanu, “Oo Daniel, aewuo taata pee aaisho iyie eng'eno nagut o eyiolounoto. Ore te nkiterata e sayiata ino eewuo ororei abau, naewuo nanu pee aaliki iyie, amu eikinyorri iyie oleng; metaa tadamu ilo rorei niyiolou ina duaata. “Etudung'oki iwikii ntomoni naapishana oo larin te nkaraki iltung'ana linono o ina anasa ino sinyati, pee eiting'ieki enkitarruorroto, pee eishieki easata oo ng'ok, pee eitaikinyeki osotua ilaing'okok, pee eyauni esupatisho oo ntarasi, nemishiri enduaata o loiboni, nebukokini eilata ine wueji sinyati aisul. Toning'o niyiolou naa nisipu nchere ore ebaiki elototo e ilo rorei pee eitobiri neitokini aashet Yerusalem o metabau elotunoto e ilo otubukokoki eilata aaput, ilo kitok, naa keaku iwikii naapishana. Ore too wikii ntomoni ile oare naa keaku keigili aashet too lkurrat oo tumoreki o wuejitin neegol, kake te nkata e nyamali. Ore te siadi nena wikii ntomoni ile o are neiwuang'ieki ilo otubukokoki eilata aaput, ilo kitok nemeitoki aata toki, ore lelo tung'ana le ilo kitok olotu neidaikie ina anasa o ewueji sinyati. Kelotu enkiting'oto enye anaa to loirrag le nkarenetii olarrabal o metabaiki enkiting'oto; neibalunyekiemijoonisho. Naa keitobir ninye olning'o ogol te wiki nabo; ore to lpisiai le wiki naa keisho ninye ilasarri o nkishorot meishunye; ore te ina rishata nepiki olkirutoto torrono entopij e nkaji e Nkai, naa keton ninye teine, ometaba anaa neitabaya ilo otipika ine ina naitobiraka Enkai.” Ore to lari li okuni le Sairos olaiguanani le Parsia nebolokini ororei Daniel, ilo oji enkarna Belteshasa. Naa kesipa apa ilo rorei, naa olarrabal kitok. Nesipu ninye ilo rorei netum eyiolounoto e ina duaata. Ore apa te nena olong'i, naishirita nanu Daniel too wikii uni. Eitu nanu ainos ndaiki sidain, neitu ejing nkiri aashu enaisho oo sabibu enkutuk ai, neitu nanu aitasim aela te ilata te nena wikii uni naalulung'a. Ore te nkolong e tikitam oong'uan olapa le dukuya aitashe nanu te ngilata e ilo keju kitok, aa taa, Tigris, naraposhu nanu nkonyek aainei aing'orisho, naa ng'ura, oltung'ani oishopo too nkilani naapuyiapui, laa keena empolos enye te sahabu e Ufas. Neikununo osesen lenye anaa osoit oji beril, neikununo enkomom enye anaa enkiwuang'ata, neikununo nkonyek enyena anaa ilkilang'eta ooyupuyup, neikununo nkaik enyena o nkejek enyena anaa enkitiil o suyai osika, ore oltoilo loo rorei lenyena neikununo anaa oltoilo lo lorora. Ore nanu Daniel aa nanu ake, nadol ina duaata, amu ore lelo tung'ana apa ootii te nebo nanu eitu edol ina duaata. Neaku aatung'uayioki aa nanu ake nadol ina duaata kitok, nemeetae engolon natelekua ti atua nanu; ore emua o sesen lai neibelekenya oleng, nashalu oleng. Naitoki nanu aning oltoilo loo rorei lenyena; ore ake pee aning oltoilo loo rorei lenyena, nabatata nanu te nkomom too njo kumok naitabaiki nanu enkomom ai enkop. Naa ng'ura, aaibung'a nanu enkaina naaikirikirie nanu nkaik aainei o nkung. Naajoki ninye nanu, “Oo Daniel lo tung'ani onyorri oleng, toning'o kulo rorei laajoki nanu, nintashe too nkejek amu ore taata aairriwuaki nanu enitii.” Ore ina kata aaliki ninye ele rorei, naitashe nanu aikirikira. Naaitoki ninye ajoki nanu, “Miureisho iyie Daniel, amu ore ebaiki ina olong apa e dukuya nitipika ndamunot inono ijo pee ining'u nintobor kewan te dukuya Enkai ino, etoning'oki irorei linono, naewuo nanu te nkaraki e lelo rorei linono. Ore olkitok le nkitoria e Parsia aaibooyie nanu nkolong'i tikitam o obo; kake aaweuo Mikael aretu, ilo obo kitok loo lkituaak, neaku atung'uayie nanu ninye te ine te nebo ilo kitok le nkitoriae Parsia, naaewuo nanu aitayiolo ina nayooki adoiki iltung'ana linono too nkolong'i e siadi. Amu ore ina duaata naa enoo nkolong'i e siadi.” Ore pee aaidip ninye airorie nanu te risioroto e kulo rorei, naibelekenya nanu aing'orie enkomom ai enkop neaku mairo. Naa ng'ura, ore obo onyaanyukie nkerai e tung'ana naaiseyie enkutuk ai, nabol enkutuk ai airo. Najoki nanu ilo oitasho te dukuya nanu, “Olaitoriani lai, ore te nkaraki ina duaata aatijing'a nanu emion, nemeekure aata engolon. Kaji eiko osinka lo Laitoriani lai te neirorie Olaitoriani lai? Amu meekure taata aata engolon nemetii enkiyang'et atua nanu.” Naaitoki aiseyie nanu obo oata empukunoto e tung'ani naaitagol nanu. Nejo ninye, “Lotung'ani ele onyorri oleng, miureishoyu, metaa eseriani te nebo iyie; tagolo nintagol oshoke.” Ore ake pee aairorie nanu nagolu najo, “Nchoo Olaitoriani lai eiro, amu kintagolo iyie nanu.” Neitoki ninye ajo, “Amaa, iyiolo iyie ajo kainyoo pee aewuo enitii? Kake karrinyo taata nanu alo aarare ilo kitok le nkitoria e Parsia; ore pee aidip ataarare ninye, neeitu olkitok loo Lyunani. Kake kaaliki nanu iyie ina natisiraki ti atua ina buku oosipat; meetae likae laaretu nanu aarare kulo meteleku Mikael ake ilo kitok linyi.” Ore ti alo nanu te ilo ari le dukuya le Darias loo Lmede, aitasho aitisip ninye napik engolon. “Naa ore taata kaaitodol nanu esipata. Ng'ura keitoki aailepu laiguanak okuni te Parsia; ore oliong'uan eikarsis alang ninche pooki; ore ake pee egolu te nkaraki karsisisho enye neisisaki ninye ninche pooki metaarare enkitoo oo Lyunani. Neitoki adumunye olaiguanani magilani laa kelotu aitoreisho te nkitoria kitok neasisho te risioroto e yieuna enye. Ore eidipa ninye atudumunye negila enkitoria enye neoro aipir isiwuon okuni le shumata, kake mme taa te nkaraki dupoto enye, neme te nkaraki ina kitoria naitore ninye; amu kedotuni ina kitoria enye neishori ilkulikae leme ninye. “Negolu ilo aiguanani le kopikop, kake ore obo loo lkituaak lenyena naa kegolu alang ninye ore enkitoria enye naa keaku enkitoria kitok. Ore te siadi ilarin oata esiana, neitobir ninche enchula, ore ina tito o laiguanani le kopikop nelotu enetii olaiguanani le moikuape aitayu osotua; kake mebikie engolon enkaina enye, ore ninye o eishoi enye nemebik; kake keishieki ninye, te nebo lelo ooisiai ninye, o enkerai enye o ilo ora olkitok lenye. “Ore akenya te nena katitin naa kedumunye olng'osila le ntonai enye te rishata enye; kelotu ninye aarare enjore nelo ajing osempewuet lo laiguanani le moikuape, neitainye ninche olarrabal nemirisho. Kelo sii anap aya Misiri nkaitin enye te nebo nkitanyaanyukot naaipurjuno te sarng'ab te nebo imasaa e tipat e nkosholai o ne sahabu; naa ore too larin oora esiana nepal ninye eitu eitainye olarrabal olaiguanani le moikuape. Neitoki ilo aiguanani alotu atua enkitoria e kopikop kake kerrinyo alo atua enkop enye makewan. “Keipiru ilayiok lenyena olarrabal neiturrur olorora kitok le njore laa keilepu alotu neimisie neim atua, nereu ninye olarrabal o metabaiki osempewuet lenye. Ore ilo aiguanani le kopikop etagore oleng keipang'u alotu aarare ilo aiguanani le moikuape; naa kedumu ninye olorora kitok, kake keishoori ilo orora aapik atua enkaina o lmang'atinta lenye. Ore pee eyae ilo orora, neng'idayu oltau lenye newuasayu, nenang'ie ninye enkop iltung'ana nkalifuni maa tomon, kake melo ninye amirisho. Amu keitoki ilo aiguanani le moikuape adumu olorora, kitok alang ola duoo le dukuya; ore te siadi ilarin oata esiana naa kelotu ninye te nebo enjore kitok o masaa kumok. “Ore akenya te nena katitin naa kedumunye ilkumok aarare ilo aiguanani le kopikop; ore lelo tung'ana lo larrabal ti atua iltung'ana linono naa kerup ate pee etum aaitabai ina apa natolimuoki kake kepuo ninche aabatata. Kelotu ilo aiguanani le moikuape ayau eng'adunoto, neya ina ang nasheta isunta. Ore nena jorin e kopikop nemeitashe, aashu ilo orora lenye ogeluno, amu metumi engolon naitasheyie. Kake ore ilo olotu aarare ninye naa keas anaa enayieu ninye makewan, nemeetae oloidim aitasho te dukuya ninye; naa kelo ninye aitashe te ina kop e nkishiaa, ore pooki e ina kop naa keaku atua enkitoria enye etii. Naa keipirakinore ninye te nkomom enye pee elotu atua enkitoria enye pooki, naa keyau ninye olning'o lo sotua neas ninche. Naa keisho ninye entito e nkitok meidaikie enkitoria, kake meitashe ninye nemetum dupoto. Ore te siadi neibelekenya ninye aing'or olemankale, naa kelo aya ilkumok lenye; kake kelotu likae kitok aishie ilo wuasa lenye le sulare. Ee kerrinyokino ninye ilo wuasa lenye le sulare alotushumata ninye. Neitoki ninye aibelekenya alo lelo sempewueti le nkop enye, kake kelo ninye arrorro nebatata, nemeitokini aatum. “Neitoki adumunye te rishata enye likae oirriu iladung'ok le kodi pee eirony iltung'ana te nkaraki enkitoria enye; kake too nkuti olong'i ake negila ninye, neme te ngoro aashu to larrabal. “Ore te rishata enye neitoki adumunye olomeni leitu eishori enkanyit anaa olaiguanani; kelotu ninye aluamisho neya enkitoria to losek. Keiwuang'ieki njorin aaishie tukul te dukuya ninye, te nebo ilo kitok lo sotua. Ore te ina kata naning'oi o ninye neasisho ninye te lejare; nelo ninye agolu eeta ilkuti tung'ana. Ore eluamisho nelotu ninye atua nene wuejitin sidain e ina kop; nelo ninye aas ina neitu ae kata eas iloomenye anaa iloo nkakuyiaa lenye, eidapash ti atua ninche imasaa o nena naataarua ninye te njore. Keipiru ninye nkiguanat pee ear isempewueti, kake te nkiti kata ake. Naa keputu ninye engolon enye o empijan enye pee elo aitayunye olarrabal o laiguanani le kopikop eeta enjore kitok; ore ilo aiguanani le kopikop nelo olarrabal te nebo enjore kitok oleng magilani; kake melo ninye aitashe, amu keitobirakini ninye ilnukat. Ore ninye lelo oinos endaa enye sidai ninche oar ninye. Ore enjore enye neishieki, nebatata ilkumok etaraki too lalema. Ore ti alo lelo aiguanak oare neibelekenyakino ndamunot enye entorroni, neiro ninche elejare te mesa nabo, kake metum toki; amu ore enkiting'oto naa te nkata natudung'uoki. Naa keshukunye ninye alotu enkop enye eeta masaa kumok; kake ore oltau lenye eibelekenye aibayu ilo sotua sinyati. Naa keas ninye anaa enayieu, nerrinyo alo enkop enye makewan. “Ore akenya te ina kata nategeluaki nerrinyo ninye alo enkalo e kopikop; kake melo atiu te ina kata anaa enatiu apa. Amu kepuonu imelin e Kitim aaitainye ninye olarrabal, naa keureishoyu ninye nerrinyo nelo aigorokino ilo sotua sinyati. Kerrinyo ninye aning lelo ooany ilo sotua sinyati. Nelotu enjore naing'uaa ninye neisarkionie ina aji e Nkai o sempewuet neya ilo asar opejori le anaake. Neitasheiyie ninche olminong aaitaa ine olmuaate. Neitapong'oo te nkilelemare lelo ooany ilo sotua. Kake ore lelo tung'ana ooyiolo Enkai enye neitashe aauno neas enkiaas. Ore lelo ti atua olorere oora ng'eni neidimie ilkumok metayiolo hoo naa kepuo ninche aabatata to lalem o to lng'ejep le nkima, o te yararoto o te enata, too nkuti olong'i. Ore te nebatata ninche naa ketum enkiti retoto. Naa keibung'a ilkumok maate to lkoroj. Ore embata e lelo oora ng'eni nebatata, pee esil neitisiny ninche neiborrie ninche, o metabau enkata e nkiting'oto, amu eton ina aa ene nkata apa nategeluaki. “Naa keas olaiguanani anaa enayieu; kerup ninye kewan neilepie kewan aitulus te pooki ai, naa keiro ninye mbaa esulare ti alo Enkai oo nkaitin. Kedupayu ninye o metaba anaa neitabari engoro; amu ore ina apa natudung'oki kepuoi aas. Mening ninye nkaitin oo loo menye, aashu ina nanyor nkituaak; meshilaa ninye hoo ae ai, amu keilepie ninye kewan aitulus te pooki. Keyanyitu ninye enkai oo sempewueti te rishata e kuna; ina ai neitu ae kata eyiolou loo menye eyanyit ninye te sahabu o te nkosholai, too soito oogol enkinyiang'a o too nkishorot naagol enkinyiang'a. Naa kear ninye osempewuet ogol oleng te retoto e nkai omoni. Ore lelo oonyorraa ninye nerup ninye ninche aisho enkanyit. Neitaa ninche ilkituaak te shumata ilkumok naa keor ninye enkop te nkinyiang'a. “Ore te nkata e nkiting'oto kelotu ilo aiguanani le kopikop arasaki ninye; kake ore ilo aiguanani le moikuape agilunore ninye anaa olemua, eeta ngarrin oo mbartan, o lakedok loo mbartan, te nebo imelin kumok; naa kelotu nena kuapi, neiput aaibulu enkop pooki. Naa kelotu ninye atua ina kop e nkishiaa. Ore nkalifuni maa iip tomon nebatata, kake ore kulo kekorduni aaitayu te nkaina enye: Edom o Moab o erubata kitok oo Lamori. Keitorioo enkaina enye aarare nkuapi, ore ina kop e Misiri nemeimisho. Neaku ninye oitore ilchumat le sahabu ole nkosholai, ore nena tokitin pooki e tipat e Misiri; o ne Libia o ne Etiopia neirukurukore iroruat enyena. Kake keitanyamal ninye ilomon ooing'uaa oloo saen o moikuape, naa kelo ninye te ngoro kitok napi pee einyal neidaikie ilkumok. Naa kelo ninye aunoki lelo ng'oborri lenyena le nkitoo erishata e naiposha e ilo doinyo kitok sinyati; ore eyia kelotu ake enkiting'oto enye, nemetii hoo obo oret ninye. “Ore akenya te ina kata naa kedumunye Mikael, ilo kitok oitore iltung'ana linono. Naa kelotu enkata e nyamali, neitu ae kata etumi ebaiki apa meetae olorere o metabaiki ina kata; kake ore inakata naa kepuoi aakordu iltung'ana linono, pooki ng'ae otumi enkarna enye eigero ti atua embuku. Ore ilkumok le lelo ooirurate ti atua enterit e nkop neinyototo, ore kulikae nedumakino enkishui nemeiting, ore ilkulikae naa enkurruna o esulare oo ntarasi. Ore lelo ng'eni newang'u anaa ewang'an e shumata; ore lelo ooboiniki ilkumok enkoitoi oosipat newang'u anaa ilakir ntarasi o ntarasi. Kake ore iyie Daniel, tunuka lelo rorei; nimishir aiken ina buku, o metabau enkata e nkiting'oto Keyooki ilkumok aakuet nekuetu, naa keponari eng'eno.” Ore nanu Daniel naing'orisho, naa ng'ura, eitashe kulikae oare, obo tele kekun e olkeju o likae te lido kekun o lkeju. Najoki nanu ilo tung'ani oishopo too nkilani naapuyiapui, ilo otii shumata eilo keju, “Kenkata nabaa pee ebau enkiting'oto e kuna baa e nking'asia?” Ore ilo tung'ani oishopo too nkilani naapuyiapui, ilo otii shumata nena ariak e olkeju nedumu enkaina enye e tatene o enkaina enye e kedienye aipirie shumata; naning nanu ninye einos olmumai teilo oishu ntarasi nchere te nkata, o inkatitin are, o lpisiai le nkata; naa te neidip ninche aatigil engolon e lelo tung'ana sinyat aaiting'ie ore kuna baa pooki neaku eitabayioki. Atoning'o nanu kake eitu aning'u ayiolou. Najo nanu, “Olaitoriani lai, kainyoo akenya epuo kuna baa aaku.” Nejo ninye, “Shomo enkoitoi ino Daniel, amu eikenoyioki lelo rorei nemishiri o metabau enkata e nkiting'oto. Keipok ilkumok ate, neiborrie ate, nesilayu; kake ore lelo arruok neasisho te nkarruisho; nemeetae obo le lelo arruok olo aning'u; kake ore lelo ng'eni naa kepuo aaning'u. Naa ore ebaiki ina kata neiwuang'ieki ilo asar opejori anaake aaitasheyie ilo minong le mijoonisho, naa keaku nkolong'i enkalifu nabo, o iip are o ntomoni naaudo. Emayiana ilo oanyisho nelotu nena olong'i enkalifu, iip uni o tomoni uni. Kake shomo enkoitoi ino o metabau enkiting'oto; amu ilo ayeng'iyeng'a, nilo aitashe te wueji ino negeluno te nkiting'oto e nena olong'i.” Ele rorei apa lo Laitoriani oewuo enetii Hosea olayioni le Beeri, too nkolong'i, e Usia, o Yotam, o Ahas, o Hesekia ilaiguanak le Yuda, o too nkolong'i e Yeroboam olayioni le Yoash, olaiguanani le Israel. Ore apa pee eng'as Olaitoriani airo eimunye enkiroroto enye Hosea, nejoki Olaitoriani Hosea, “Shomo, iyamaki kewan enkitok naibor onyek niiu nkera e nkibor oo nkonyek, amu eiborrie ena kop onyek oleng ainguaa Olaitoriani.” Nelo ninye ayam Gomer ina tito e Diblaim, neiroshiu ninye neiki ninye olayioni. Nejoki Olaitoriani ninye, “Tejo enkarna enye Yesreel; amu enkiti kata ake nang'or, pee aitame nanu enkaji e Yehu te nkaraki osarge le Yesreel, naa kaishie nanu enkitoria e nkaji e Israel. Ore akenya te ina olong, nagil nanu enkawuo e Israel to erata le Yesreel.” Neitoki ina kitok anutayu neiu entito. Nejoki Olaitoriani Hosea, “Tejo enkarna enye Enemeing'urrieki, amu maigil nanu aing'urrie enkaji e Israel, mapalaki ninche katukul. Kake kaing'urrie nanu enkaji e Yuda naa kakordu ninche to Laitoriani e Nkai enye; makordu nanu ninche te nkauo aashu to lalem, nemakordu to larrabal, aashu too mbartan aashu too lakedok loo mbartan.” Ore pee eoru Gomer ilki, “Enemeing'urrieki,” nenutayu neiu olayioni. Nejo Olaitoriani, “Tejo enkarna enye Mme iltung'ana laainei, amu mirara intae iltung'ana laainei nemara nanu Enkai inyi.” Kake ore esiana oo ltung'ana le Israel naa kebayu anaa osinyai le naiposha, lemeidimi aatetem anaa aaikena, naa ore to ine wueji apa netiakinyeki ninche, “Mirara iltung'ana laainei,” keaku keji ninche, “Nkera e Nkai naishu.” Ore iltung'ana le Yuda o ltung'ana le Israel nepuo aaiturrurr te nebo negelaki ate o lkitok obo; naa keilep ninche aapuo te ina kop, amu eikitok kenya ina olong e Yesreel. Tejo olalashe lino, “Iltung'ana laainei,” nijo enkanashe ino, “Enanoto olng'ur.” “Tasayia ng'utunyi, tasayia amu mme enkitok ai ninye, nemara nanu olpayian lenye pee etum aiwuang'ie enkibor oo nkonyek te nkomom enye, neiwuang'ie eloloito enye to lki lenyena; pee masul ake aoru ilkilani naitotiu ninye anaa ina olong apa naini, naitotiu ninye anaa ong'ata, naitotiu ninye anaa enkop natoyio, naar ninye te nkure. Ore sii ti alo nkera enyena maing'urrie nanu amu inkera e nkibor oo nkonyek ninche. Amu eiborrie ng'otonye onyek; ore ina natunute ninche netaasa embae enkurruna. Amu etejo ninye, ‘Kalo arubare isintan laainei, laa ninche laaisho nanu emukate ai o enkare ai, o enkila ai napuyiapui, o kitani ai, o eilata ai o enaisho.’ “Tenkaraki ina kanuk nanu enkoitoi enye too lkiku; nashetaki nanu esuntai, pee metum ninye eneim. Kemir ninye isintan lenyena, kake meinepu; neing'oru ninche, kake metum ninche. Neitoki ninye ajo, ‘Kalo nanu narrinyokino olapa moruo lai le dukuya, amu keikash apa ina kata te nanu alang taata.’ Neitu eyiolou ninye inchere nanu apa ilo oishoo ninye entapa, o enaisho oo sabibu o eilata, naiputaki ninye enkosholai o sahabu naa ninche etaasishore te Baal. “Ore enkaraki ina ekarriny ilpaek laainei te nkata enye, o enaisho ai oo sabibu te rishata enye, narriny nanu ina kila ai napuyiapui o kitani, naa ninche apa naaitemoo emasipaisho enye. “Ore taata naa kasul nanu ninye aoru nkilani te dukuya isintan lenyena, nemeetae olokordu ninye aitayu te nkaina ai. Naa kaishie nanu isiruai lenyena pooki, o mashoi, o lapaitin lenyena ng'ejuk o sabatoni enyena, o siruai lenyena pooki gelunot. Nainyal nanu isabibu lenyena o lkeek loo lng'anayio, laa ninche ejo ninye, ‘Elaakinoto ai kulo, laa ninche aaishoo isanchan laainei.’ Kaitaa nanu ninche entim, naa keinos ninche ing'uesi e ntim. Naa kaitame nanu ninye te nkaraki nena olong'i o sirua le Baal ina kata apa pee epejoki enkorropil ninche, nekuso ninye too lgiso o too masaa, nelo asujaa isintan lenyena, nemaadamu ninye nanu, Olaitoriani ojo. “Ore enkaraki ina, ng'ura, kalejaa, narik ninye ong'ata, nairorie ninye te mborron. Ore te ine naisho enkurma enye oo sabibu, naitaa ilo erata le Akor elusie o siligi. Ore te ine newal ninye anaa apa too nkolong'i e kitisho enye, anaa apa pee eipang'u aing'uaa enkop e Misiri. “Naa ore kenya te ina olong, Olaitoriani ojo, nikimpot iyie nanu ijo, ‘Olpayian lai,’ nimikingil iyie ajo, ‘Baal ai.’ Amu kaiwuang'ie nanu nkarn e Baal te nkutuk enye, nemeigili ae kata aaipot ninche katukul. Naa kaaitobiraki nanu iyie osotua te ina olong te nebo ing'uesi e ntim, o ntaritik o loing'ang'e o ng'uesi naaiserpepiari te nkop; naiwuang'ie nanu enkawuo, o lalem, o larrabal tena kop; naaisho nanu iyie irraga te seriani. Naa kaasiraki nanu iyie kewan ntarasi; kaasiraki nanu iyie kewan ai te supatisho o te sipata, te nyorrata nauno o to lng'ur. Kaasiraki nanu iyie kewan ai te nkitisipata; naa eyiolou iyie Olaitoriani. Naa ore kenya te ina olong, Olaitoriani ojo, kawaliki nanu keper newaliki sii ninche enkop; newaliki sii ninye enkop ilpaek o sabibu o eilata, naa kewaliki sii ninche Yesreel; naa kaun nanu ninye, aunoki kewan ti atua ena kop. Naa kaing'urrie nanu ilo leitu eing'urrieki, naa kajoki nanu lelo leme iltung'ana laainei, ‘Irara intae iltung'ana laainei,’ nejo ninye, ‘Ira iyie Enkai ai.’ ” Naajoki nanu Olaitoriani, “Nyaaki shomo tonyorra ina kitok nanyor osintani lenye, naa enaibor onyek, tonyorra anaa enanyor Olaitoriani iltung'ana le Israel, hoo neibelekenyakino ninche kulie aitin nenyorru imukateni o sabibu naatoito.” Neaku ainyang'ua nanu ninye te shekeli tomon o imiet e nkosholai o ntemet nabo e shairi olpisiai lo ntemet e shairi. Najoki nanu ninye, “Meeta nchere pee mibik ira enaai too nkolong'i kumok; mintoki aiborrie onyek, aashu iaku ene likae lee; neijia sii nanu atiu te iyie.” Amu kebik nkera oo Israeli nkolong'i kumok meeta olaiguanani aashu olkitok, meeta olasar aashu eng'ape, meeta enkila o lgoo aashu enkitanyaanyukoto. Ore te siadi nerrinyunye nkera e Israel neing'oru Olaitoriani Enkai enye, o Daudi olaiguanani lenye; naa kepuonu ninche te nkuretisho enetii Olaitoriani o esupatisho enye too nkolong'i e siadi. Entoning ororei lo Laitoriani lo tung'ana le Israel; amu eeta Olaitoriani olarrabal too ltung'ana lena kop. Metii esipata aashu esupatisho, nemetii eyiolounoto e Nkai ena kop. Etii enkinosata o lmumai, o elejare, o esesekuanare, o empurrorre, o eloloito; elang'u ninche ilpolosien pooki neitusuj iloikop iloikop. Ore enkaraki ina neishir enkop, ore pooki ootii atua neye, o ng'uesi e ong'ata sii, o ntaritik o loing'ang'e ore sii isinkir le naiposha neiwuang'ieki. Ore ake eyia mincho hoo ng'ae ekesha, nimincho hoo ng'ae eitang'orisho amu iyie etii enkesha ai, lo apolosak. Irrorrorro intae dama, nerrorro sii oloiboni te nebo intae kewarie, naa kaar nanu ng'utunyi. Eidaikieki iltung'ana laainei te nkaraki emodai nemeeta eng'eno enkaraki nitanyaita intae eng'eno, aatanya nanu iyie pee miaku olapolosani te nanu. Naa ore anaa enikitorikine enkitanapata e Nkai ino madamu sii nanu inkera inono. Ore anaa enatoponari, neponari aas ing'ok ti alo nanu; kaibelekeny nanu enkisisa enye metaa enkurruna. Eitoti ninche ate too ng'ok oo ltung'ana laainei; neeta ninche olorok too ntorrok enye. Naa ketiu ake anaa enatiu too ltung'ana, to lapolosani, kaitame nanu ninche te nkaraki nkoitoi enye, naitalaku te ninche nkiaasin enye. Kedaa ninche nemeraposho; neiborrie ninche onyek, kake meponari; amu etung'uaitie ninche Olaitoriani ejo pee eitumurru eloloito. Ore enaisho musana o eng'ejuk, neoru iltung'ana ndamunot. Entoki e nchani eikilikuanishore iltung'ana laainei, neisho eng'udi oo nkitanapat. Amu eitapong'oyie ninche oltau le nkiborra oo nkonyek, neitung'uaitie ninche Enkai enye aapuo aaiborrie onyek. Eitayu ninche ilassarri too nchumat oo ldoinyo, neitobir nkishorot too nchumat oo ldoinyo ti abori ilkeek sapuki amu eisidan iloipi lenye. Neaku keibor onyek ntoyie inono, ore siankikin inono naayama neloloito. Maitame nanu ntoyie inyi te nkiborra enye oo nkonyek, aashu nena siankikin inono naayama te neloloito; amu ore lelo lewa maate nepudariyie nkituaak naaibor onyek neitayu ilasarri te nebo nkituaak naibor onyek naa kepuonu olorere le meeta eyiolounoto aaidak. Ore hoo nikimbor onyek, iyie Israel, mincho Yuda etiu neijia. Mijing atua Gilgal, nimilep alo Bet-afen, niminya olmumai ajo, “Anaa enaishu Olaitoriani.” Ore anaa enkashe nape, kepe Siraeli; keidim taata Olaitoriani aitotio ninche anaa olkuo le ker to lokeri o lala? Eibung'are Efraim inkitanyaanyukot, talama ninye. Olturur loo lamerak, eishooitie ate te nkiborra oo nkonyek; kenyor ninche enkurruna alang enanyor enkitoo enye. Etununukoyie ninye osiwuo too naipuko enyena, naa kekurru ninche te nkaraki ilperereni lenye loo lasarri. Entoning ena, intae ilapolosak! Enchoru enkiok, na aji e Israel! Toning'o na aji o laiguanani! Amu intae eipirta ena kiguana; amu itaa intae orreshet te Mispa o orreshet ooisalaashakaki Tabor. Neituguto ninche engumoto e Shitim, kake kaitame nanu ninche pooki. Ayiolo nanu Efraim, neitu eisudori Israel te nanu, amu ore taata Efraim, nimborrie iyie onyek, neidurukie Israel. Meisho ninche nkiasin enye errinyokino Enkai enye. Amu etii oltau le nkibor oo nkonyek atua ninche, nemeyiolo ninche Olaitoriani. Ore olwuasa le Israel neishakenu enkomom enye; kelo Efraim arrorro te ntorroni enye; kerrorro sii Yuda te nebo ninche. Kepuo ninche te nebo iluaat enye oo nchoo o noo nkerrai, aaing'oru Olaitoriani, kake metum ninye, etung'uayie ninye ninche. Eitaasa ninche te nkeleekisho Olaitoriani; amu etoiutuo ninche nkera oo naataluno. Ore taata ele apa ng'ejuk kemut ninche te nebo o nkurman enye. Toosho emouo ti atua Gibea, toosho esekekua ti atua Rama, te Bet-afen; nkirikirayu iyie Benchamen! Keaku Efraim olmuate te ina olong e nkitamioto; ti atua lelo oshon le Israel aibalunye nanu ina nasipa. Etotiutuo ilkituaak le Yuda anaa iltung'ana ooiwuang'ie ilpolosien; ore shumata ninche, kabukoki nanu ninche engoro ai anaa enkare. Eibookoki Efraim enkop, neidimuaki te nkiguana, enkaraki nateenikine ninye asujaa entoki nemeetae olng'am. Ore enkaraki ina, atotiuo nanu anaa olasai to Efraim natiu anaa oltiapurusi te nkaji e Yuda. Ore pee edol Efraim emueyian enye nedol Yuda olbae lenye, neitoki Efraim alo Asiria, neirriwaki olkilikuai ilo aiguanani kitok; kake mikindim ninye atabaa iyie aashu aishiunye olbae lino. Amu katiu nanu anaa olng'atuny te Efraim, natiu anaa olng'atuny oti te nkaji e Yuda. Amu nanu, ee nanu, opolos nalo aing'uaa nanu aya, nemeetae olokordu. Naa kaitoki nanu arrinyokino ewueji ai, o metaba anaa neirridu entorroni enye neing'oru enkomom ai, naa ore ti atua osina lenye naaing'oru ninche nanu, ejo, “Wootu, matorrinyokinoto Olaitoriani; amu etopolosa pee etum aishiunye iyiook; etoosho ninye naa kelo aen iyiook. Ore te siadi nkolong'i are neitopiu ninye iyiook; ore te nkolong e uni nedumu ninye iyiook maitasheito, pee kitum aataa aikinchu te dukuya ninye. Matayiolo iyiook, matonyok aapuo dukuya, aayiolou Olaitoriani; Ore elotunoto enye, esipa kelotu ninye anaa enkakenya anaa enchan o loirujuruj naitashal enkop.” Kaa nanu aaitaas iyie Efraim? Kaa nanu aaitaas iyie Yuda? Etiu enyorrata ino anaa enkatampoi o sina, anaa enkoileelio nasiooyo aishunye. Ore enkaraki ina atudung'udung'o nanu ninche too loibonok laainei, atara nanu ninche metuata too rorei le nkutuk ai, naa keipang'aki ninche enkiguana ai anaa ewang'an. Amu enyorrata nauno nanu ayieu, mme olasar, eyiolounoto e Nkai alang nkishorunot. Kake ore te Adam netigila ninche olning'o; ore teine naaitaasa ninche nanu te nkeleekisho. Ore Gilead naa enkanasa oo larruok, naitunyokino osarge. Ore anaa enairrag ilapurrok aanyu oltung'ani, neijia eikununo ilapolosak eibung'ate te nebo; neitayu iloikop te nkoitoi e Shekem, ee, neas mbaa torrok oleng. Ore ti atua enkaji e Israel atoduaa nanu embae busus oleng; ine etii eloloito e Efraim, neidurukie Israeli. Ore sii ti alo iyie Yuda, kitegelakaki enkisampuare Ina kata te narrinyu nanu lelo tung'ana laainei te sinkaisho. Te najo nanu aishiunye Israel, neibalunyeki entorroni e Efraim, o nkiasin torrok e Samaria; amu te ntorroni easisho ninche, egil olapurroni inkajijik, ore laisimak neisimisho ti ong'ata. Kake mejo ninche nchere kadamu nanu esiaai enye pooki torrono. Etang'adutua nkiasin enye ninche, etii dukuya enkomom ai. Ore te ntorroni enye neiting'ie olaiguanani, o lkitok le lejare enye. Keibor onyek ninche pooki; eikununo ninche anaa ewueji nepejieki imukateni nainuaaki, ore ilo oasishore nepal eitu ekut ebaiki ina kata naipurji o metabaiki ina kata naisuijieki. Ore teina olong o laiguanani lang etamueita lelo kituaak te mpijan e naisho; neitorioo ninye enkaina enye te nebo lelo torrok. Amu ore anaa enatiu ewueji nepejieki imukateni, neijia eikununo iltauja lenye eyupuyup erreshisho; ore kewarie pooki etiu engoro enye anaa olang'at ore tadekenya neyupuyup anaa ilng'ejepa le nkima. Ore ninche pooki naa keirowua anaa olkokuet, nemut ninche ilaitoriak lenye. Ore ilaiguanak lenye pooki netabatatate nemeetae hoo obo lenye laaipot nanu. Eitushulaka Efraim kewan iloreren; ore Efraim naa emukate neitu eibelekenyi. Einosa iltung'ana loo loreren eng'olon enye, nemeyiolo ninye; eisuaaki ilpapit ooibor shumata ninye, nemeyiolo ninye. Ore olwuasa le Israel neishakenoki te dukuya ninye; ore eyia merrinyokino ninche Olaitoriani Enkai enye, are ake eing'oru ninye te kuna pooki. Eikununo Efraim anaa enturkulu namoda nemeeta endamunoto naipotu Misiri, neloito Asiria. Naitadou ninche anaa ntaritik o loing'ang'e naitame ninche too nkiasin enye torrok. Woi ninche, amu aashomo aaing'uaa nanu! Enkidaata te ninche, amu aatogolong'akitia ninche! Anaata naaji akordu ninche, kake kelejisho ninche tiaalo nanu. Maaishiraki ninche nanu too ltauja, kake keyietu ninche aaishir too ndapashi enye; ore te nkaraki enkurma o enaisho nedung ate, naagolong'aki ninche aapaashare nanu. Ore hoo naitaarriyiana naitagol nanu inkaik enye, entorroni aaipiraki ninche nanu. Eibelekenyakinote ninche Baal; etotiutuo ninche anaa enkawuo nemeisiligayu, ore lelo kituaak lenye, naa kepuo aabatata to lalem te nkaraki ina keilasilas ilng'ejepa lenye. Keaku te ninche ena embae e nakueniyieki te nkop e Misiri. Tipika entarumpeta enkutuk ino pee iosh, amu eewuo olkurragos shumata enkaji o Laitoriani, enkaraki natigila ninche olmumai lai, negil nkitanapat aainei. Nanu eishiraki ninche aajo, Enkai ai, kiyiolo iyiook Israel iyie. Etanya Israel ina sidai; kelo olmang'atinta asujaa ninche. Kegelu ninche laiguanak, kake mme nanu eikilikuan. Negelu iltung'ana kituaak, kake metii eyiolounoto ai. Ore te nkosholai enye o sahabu neitobir ninche nkitanyaanyukot te nkidaata enye maate. Atanya nanu ilo ashe lino, iyie Samaria. Eyupuyup engoro ai tiaalo ninche. Ketoni kenya o anu, pee esinyayu ninche ti alo Israel? Olaitobirani oitayio, mme Enkai. Ore ilo ashe le Samaria, kepuoi aabel metaa imbelibelat. Amu etuuno ninche enkijape, naa kepuo ninche aaisampu olkutati. Etoijoyioki Israel, eidipa aatotiu ti atua iloreren anaa emasaai nemeeta. Amu eilepa ninche aapuo Asiria eikununo anaa osikiria li ong'ata olimana openy; einyang'ua Efraim isintan. Ore hoo neinyang'ua ninche iltung'ana leeiking'a ti atua iloreren, kaiturrur nanu ninche asioki. Naa keitirring'a ninche te nkiti kata eitu eitoki aaput olaiguanani o ilkituaak. Enkaraki natoponayie Efraim ilperereni lo lasarri le asata oo ng'ok, etaa lelo asarri ing'ok te ninye. Tenaa naaji ninye kaigeroki nanu ninye nkitanapat aainei naa nkalifuni tomon, keitaae ake entoki ng'ejuk nemeyioloi. Kenyor ninche olasar; neitayu ninche olasar loo nkiri neinos; kake meshipakino Olaitoriani ninche. Ore taata kedamu ninye entorroni enye neitame ing'ok enye; kerrinyo ninche aapuo Misiri. Amu etorikine Israel ilo oitobira ninye neshet inkajijik e nkitoo; netoponayie Yuda inkang'itie naagol; kake kairriwaa nanu enkima shumata nena anas enyena. Nemut isempewueti lenyena pooki. Ming'ida iyie Israel! Nimishipa te ng'ida anaa loreren; amu imborrie iyie onyek, ning'uaa Enkai ino. Itonyorra iyie olekoisiaayio le nkiborra oo nkonyek too wuejitin pooki neeiutuutishoreki. Ore eneituutishoreki o eneironyieki ilng'anayio meitoti ninche. Nebatat ninche enaisho ng'ejuk. Nebik ninche tiaatua ina kop o Laitoriani; kake kerrinyo Efraim alo Misiri, nepuo ninche aainos endaa nemesinya te Asiria. Meigil ninche aabukoki Olaitoriani ilasarri ooki le naisho oo sabibu; nemeitiship ninye too lasarri lenye. Ore imukateni enye naa ketiu anaa imukateni o lkiyioi; ore naa pooki oinos ninche neisarkioneki amu ore imukateni enye naa keaku inesumash enye ake; meyauni atua enkaji o Laitoriani. Kaa kenya iasiasa teina olong o sirua, o teina olong o sirua lo Laitoriani? Amu ng'ura kepuo Asiria; keiturrur Misiri ninche; nenukaa Memfis ninche. Nebulaki endiati nena masaa enye sidain e nkosholai; nejing ilkiku atua ilng'oborri lenye. Eetuo nkolong'i enkitamioto, eetuo nkolong'i e nkitalaata; naa keyiolou Israel ina. Kemoda ilo oiboni, ore ilo tung'ani le nkiyang'et neeta oloirirua, te nkaraki ina arruoisho ino kitok o enkiba kitok. Ore ilo oiboni, naa olarriponi le Efraim, lelo tung'ana le Nkai ai, ore eyia netii orreshet laaijo olo larreshoni loo ntaritik inkoitoi enyena pooki, netii enkiba atua enkaji e Nkai enye. Neisarkionie ninche ate oleng anaa too nkolong'i e Gibea: keyooki ninye adamu entorroni enye nelo aitame ingok enye. Anoto apa Israel eikununo anaa isabibu ti ong'ata. Nadol iloo papaai linyi eikununo anaa ilng'anayio lo lng'aboli le nkiterata. Kake eetuo apa ninche enetii Baal-peor, neitisinyaki ate Baal, neaku ninche enkitagoroto anaa nena tokitin naatonyorra ninche. Ore ina kitoo e Efraim naa kelo aaing'uaa ninye anaa entaritiki meitoki atii eishoi, nemetii enutai, nemetii enkibung'aroto. Ore ninye te neitubulu ninche nkera, naoru nanu ninche o metaba anaa metii enaleku. Woi ninche te nalo nanu aing'uaa ninche! Ore ilayiok le Efraim anaa enatoduaa nanu, nepuoito enkidaata; meeta nchere merik Efraim ilayiok lenyena enepuoi aar metuata. Nchoo ninche iyie Olaitoriani, kainyoo incho iyie? Nchoo ninche olkibiroto le ng'uset o lki oo toito. Ore pooki arruoisho enye netii Gilgal; teine apa nanu atang'asa aibayu ninche. Ore te nkaraki entorroni oo nkiasin enye aaraa ninche aaitung'uaa enkaji ai. Maigil nanu anyorru ninche; ore lelo kituaak lenye pooki naa larruok. Etooshoki Efraim, etoito ntona enye, meitoki aaiu ilng'anayio. Ore hoo duoo ninye neisho ninche, kaar nanu metuata nena kera enye kiroteti. Keiturraa Enkai ai ninche, ore enkaraki neitu ening ninche ninye; keaku ninche ilapuayak ti atua iloreren. Olchani loo sabibu Israel oiu ilng'anayio lenyena. Ore anaa enaponari ilng'anayio lenyena neponaa ashet ilperereni loo lasarri kumok; ore anaa enaponari enkop enye asidanu, neponaa ing'apeta enyena. Etelejishote iltauja lenye; meeta taata nchere meitalaki entorroni enye. Kegil Olaitoriani lelo perereni lenye loo lasarri, neparripar nena ng'apeta enye. Amu kepuo taata ninche aajo: “Mikiaata iyiook olaiguanani, amu mikiure iyiook Olaitoriani, amaa olaiguanani, kaa eidim ninye aitaasa iyiook?” Eiro ninche irorei le pesho; ore too lmuma le lejare keitayu osotua; nebulu nkiguanat enye anaa sayieti naabulu too nkong'at e nkurma. Keikirikira lelo oomanya Samaria te nkuretisho, te nkaraki ilo ashe le Babel. Keishiraki iltung'ana lenyena ninye, ore lelo apolosak lenyena ooserem nkitanyaanyukot neyietu aaishiraki ninye, teina kitoo enye nashomo aing'uaa ninye. Ee kenapi ina toki kewan aaya Asiria, pee eaku enkishooroto te ilo aiguanani kitok. Keitukurruni Efraim, nekurru sii Israel te nkaraki enkitanyaanyukoto enye. Ore ilo aiguanani le Samaria naa kelo aidaaya, anaa olaburra ti oriong enkare. Ore nena wuejitin e shumata e Afen, ina ng'oki e Israel, naa keidaikieki. Kebulu ilkiku o laimerrerruani te nchumata lelo perereni lenye loo lasarri; naa kepuo ninche aajoki ildoinyo, Entemoi iyiook, nejoki indoinyo, enturokinoto iyiook. Ore apa ebaiki nkolong'i e Gibea itaasa eng'oki, iyie Israel; ore teine neshomo ninche aas ing'ok. Ae meinepu ninche olarrabal te Gibea? Kalotu nanu aarare kulo tung'ana aing'okok pee aitame ninche, naa keiturrurro iloshon aarare ninche, neitame ninche te nkaraki ina ng'oki enye natatashe. Ore Efraim enkashe apa naitamooki, nanyor aidong'o entapa. Naitajeuo apa nanu ina murt enye sidai, kake kalo nanu apik Efraim enchata emurt meeta nchere pee meturisho Yuda, meeta nchere meitupuyiapui Yakobo enkulukuoni makewan. Entuunoki ate esupatisho, nisampumpu ilng'anayio le nyorrata nauno; entutur ina kulukuoni inyi nayeng'iyeng'ieki amu etabaua enkata naing'orunyeki Olaitoriani, pee etum ninye aeu aitashaiki enjeunoto shumata intae. Ituuno apa intae entorroni, nisampupu enkarruoisho, inosa intae ilng'anayio le lejare. Amu isiliga apa intae ngarrin inyi o larrabal o ina siamo oo lmurran linyi. Ore enkaraki ina kejing olarrabal atua iltung'ana linono, ore lelo sempewueti linono neidaikieki, anaa apa enaidaikie Shalaman Bet-arbelon teina olong o larrabal; nedung'udung'i nkera o noo ng'otonye. Ena ninye eyookini aaitaas intae, iyie na aji e Israel, te nkaraki ina torroni ino kitok. Ore enasirie neishieki ilo aiguanani le Israel katukul. Ore apa aa enkerai Israel atonyorra nanu ninye, ore te Misiri naipotuo nanu enkerai ai. Ore anaa enaipotu nanu ninche, naapuo ninche aaing'uaa nanu; netotoni ninche epolosaki Baal, nepejoki nkitanyaanyukot enkorropil. Ore eyia nanu apa oitamoo Efraim meshomo, atudumua nanu ninche too nkaik aainei; Kake eitu ninche eyiolou nchere aishiunye nanu ninche. Atorikoyie nanu ninche too nkeenta o lng'ur, too enat e nyorrata, natiu nanu te ninche anaa ilo oitololong enchata too iltagiligil lenye too murto enye, nairrugokino nanu ninche naitoti ninche. Kerrinyo ninche aapuo enkop e Misiri, naa kelo Asiria aaku olaiguanani lenye, enkaraki natanyaita ninche aarrinyokino nanu. Olalem olo ashurt nena anas enye, neidaikie ninche tiatua nena wuejitin enye neegol. Eteenikinote iltung'ana laainei enkibelekenyakinoto pee aapuo aaing'uaa nanu; neaku etegelakaki ninche enchata e murt nemeetae ololaku. Kaji nanu aiko te naitarasaa intae; iyie Efraim? Kaji nanu aiko te naitarasaa intae; iyie Israel! Kaji nanu aiko te naitanyaanyukie intae Adama! Kaji nanu aiko te naitaas intae anaa Seboim! Eibelekenye oltau lai ti atua nanu, eirowuaja olng'ur lai neborru. Maasishore nanu engoro ai napi, maigil nanu aidaikie Efraim amu ara nanu Enkai mara oltung'ani Ilo Sinyati otii atua intae, nemalotu nanu aidaikie. Kepuo ninche aasujaa Olaitoriani, naa keikurrukur ninye anaa olng'atuny, ee keikurrukur, ore layiok lenyena nepuonu eikirikira eing'uaa enkalo o loo ntoluo. Nepuonu ninche eikirikira anaa ntaritik naaing'uaa Misiri, o anaa nturkuluni eing'uaa enkop e Asiria; naa karriny nanu ninche meshomo inkang'itie enye, Olaitoriani ojo. Aatang'adua nanu Efraim te lejare, naang'adu enkaji e Israel too monko; kake eton eyioloi Yuda te Nkai, naa keisiligayu ninye te ilo Osinya. Osiwuo eirrita Efraim, nemirare ninye olkutati lo loosaen endama pooki; neponaa ninche elejare o larrabal; nening'ore ninche te nkinyang'a enkop e Asiria, nenapi eilata aaya Misiri. Eeta Olaitoriani enaikilikuanu tiaalo Yuda, naa kelo aitame Yakobo te risioroto oo iasat enyena, neitalak ninye te risioroto oo nkiaasin enyena. Ore ti atua enkoshoke e ng'otonye neibung ninye olalashe lenye entutunyo, o e etaa oltung'ani kitok nekeshare Enkai. Etekeshare ninye olmalaika neisulu, eishira ninye neing'oru omom enye. Enotore ninye Enkai te Betel, neirorie ninye Enkai teine. Olaitoriani Enkai oo lororani, Olaitoriani ninye enkarna enye: “Neaku ore iyie te retoto e Nkai ino, tushukunye, mbung'a enyorrata o esipata tukurraki nibik aanyu Enkai ino.” Olbiasharai oata entemet e lejare te nkaina enye. Eji etejo Efraim, “Ee kara nanu karsis, anotoko kewan imasaa.” Kake ore ina arsisisho enye, nemeiwuang'ie enkarruoisho oo ng'ok enyena. Ara nanu Olaitoriani Enkai ino aitupukuo apa intae te nkop e Misiri; naa kaigil areu intae entobik too lng'oborri; anaa apa too nkolong'i o sirua otegeluaki. Airorie apa nanu iloibonok; nanu apa ilo otoponayie induaat, ore too loibonok naishoru nkitanyaanyukot. Tenaa ketii entorroni Gilead meeta nchere pee mepuonu ninche aaku pesho; Tenaa kepolosi iloing'ok te Gilead, ore lelo perereni lenye naa kepuo aatiu anaa sotot loo soito too nong'ot e nkurma. (Eisikaka apa Yakobo enkop e Aram, ore teine neisiaisho Israel te nkaraki enkitok, naa ore te nkaraki enkitok neirrita nkerra.) To loiboni le Nkai eilepunye Olaitoriani Israel aitung'uaa Misiri; naa to loiboni le Nkai eitagolieki ninye. Eyaua Efraim embae naitagorisho oleng; neaku ore Olaitoriani lenye, keing'uaa ina kitarrurroto o sarge te shumata ninye, nerrinyoki ninye ina kurruna enye. Teneiro apa Efraim, neikirikira iltung'ana; eilepieki apa ninye tiatua Israel; kake etaasa ninye entorroni te Baal neye. Ore taata neponaa ninche aas ing'ok, neitobiraki ate nkitanyaanyukot naasholuni, o nkitanyaanyukot naaitayuni te nkarriyiano te nkosholai enye, ore ninche pooki naa esiaai oo ltung'ana arriyiak. Nejo, “Entopolosaki kuna. Neng'utut iltung'ana ilasho.” Ore enkaraki ina ketiu ninche anaa enkinuku e nkakenya, arashu anaa enkoileelio nayooki aishunye, anaa suut naakutaa osiwuo te wueji neidong'ishoreki arashu anaa empuruo naipang'u te lusie. Ara nanu Olaitoriani Enkai ino ore apa te nkop e Misiri; miyiolo ae Ai neme nanu, nemetii likae aitajeunoni leme nanu. Nanu apa ilo laatayiolo ti ong'ata, tiatua ina kop o lpurkel; kake ore apa pee edaa ninche aaraposho, neiputakino ninche, ore iltauja lenye nedumunye; neaku aatorikinote ninche nanu. Ore enkaraki ina katiu nanu te ninche anaa olng'atuny, karresh ninche te mbata e nkoitoi anaa olowuaru keri. Kadoiki nanu ninche anaa olng'arurumi otooruoki nkera enyena, kapolos nanu olgoo lenye, ore teine naidaikie nanu ninche anaa olng'atuny, anaa enaiko enkukuu. Kaidaikie nanu intae, Israel; kaing'ae oidim atareto intae? Koree taata olaiguanani lino pee kintajeu; koree lelo kituaak linono pooki pee kimitu lelo apa litejo iyie, “Inchooki nanu olaiguanani o ilkituaak?” Aaishoo nanu iyie olaiguanani te ngoro, naiwuang'ie ninche te ngoro ai. Ore enkarruoisho e Efraim netirridaki, ore eng'oki enye netushumaki te mpere. Etabawua emion esaisai te nkaraki ninye, kake olayioni omoda ninye, amu ore o taata melotu ninye aimu eng'uset e ishoi. Kakordu nanu ninche te ng'olon e nemeneng'a? Kainyang'u nanu ninche aitung'uaa keeya? Nakeeya, koree ilmeita linono? Nemeneng'a koree enkidaata ino? Eiwuang'ieki olng'ur too nkonyek aainei. Ore hoo duoo ninye tenaa kebul ninye anaa oseyiai kelotu olkutati oing'uaa enkilepunoto e nkolong, kelotu olkutati lo Laitoriani, ailepu eing'uaa olpurkel; ore inkonyek enyena oo nkariak netoyu, ore nchorroi enyena neishieki; neishie ilo kutati olchumati lenye te pooki toki e tipat. Kelo Samaria anap enkitarruoroto enye, enkaraki natogolong'aka ninye Enkai enye; kepuo ninche aabatata to lalem, ore nkera enye kutiti neitaa ndung'udung'ot, ore nkituaak naanuta, nebuli nkoishuaa. Tushukunye iyie Israel, torrinyokinoyu Olaitoriani Enkai ino amu itarrorre iyie te nkaraki enkarruoisho ino. Shomo iata rorei nirrinyokino Olaitoriani; tiaaki ninye, “Iwuang'ie enkarruoisho pooki; tang'amai ina sidai naa ekinchoru iyiook ilng'anayio loo nkutukie ang. Meitajeu iyiook Asiria, mikipuo iyiook aaked mbartan; nimiking'il ae kata aajo, ‘Enkai ang, too siaaitin oo nkaik ang. Ti atua iyie etum enkerai okishi olng'ur.’ ” Kaishiunye nanu ina golong'akinoto enye; kanyorru nanu ninche to ltau lai, amu eibelekenye engoro ai aing'uaa ninche. Katiu nanu anaa enkoileelio te Israel; naitupuku ninye anaa entapukai, naa keibung ntona anaa olchani onyaanyukie olchartuyian, neisuaa ilng'osil lenyena; netiu esidano enye anaa oloirien, ore erropili enye netiu anaa iltarakua ootii Lebanon. Kerrinyunye ninche nepuonu aamany abori oloip lai, naa kebul ninche anaa enkurma nebul anaa osabibu, nepuo ninche aaning'oyu anaa enaisho e Lebanon. Oo Efraim kaa nanu aporokinore nkitanyaanyukot oo nkaitin? Nanu doi ilo likiwaliki nikigolie iyie. Atiu nanu anaa olchani onyori, onyaanyukie oltarakuai, nanu eing'uaa ilng'anayio linono. Ore ilo ora ng'en, nchoo eyiolou kuna baa; ore ilo ojurrisho, nchoo eyiolou ninche; amu keitoriori nkoitoi o Laitoriani, ore ilasipak neim ninche, kake kerrorro ilaitarruorok te ninche. Ororei lo Laitoriani ele oirriwaka Yoel olayioni le Petuel. Entoning ena intae iltung'ana moruak, nining'ining'i intae iloomanya ena kop! Ketaase aekata embae naikununo nji too nkolong'i inyi, anaa too nkolong'i oo loo papaai linyi? Entoliki nkera inyi, naa nchoo nkera inyi metoliki nkera enye, neliki nkera enye eishoi enye. Ore entoki naleku ilo maati o dung'isho, neinos ina mus oo lmaat. Ore entoki naleku ina mus oo lmaat, neinos olmaati le mpukunoto oo ntargeet ore entoki naleku ilo maati le mpukunoto oo ntargeet neinos ilo maati le nkidaata. Enyeito intae ilamerak; enchira intae ilaokok le naisho, te nkaraki ina aisho namelok, amu eiwuang'ieki aaitung'uaa nkutukie inyi. Amu eewuo olosho agilunore enkop ai, negol nemeikenayu te nkumoi; netiu ilala lenyena anaa ilala lo lng'atuny, neeta iltagiligil le lipong o lng'atuny. Eitomijoono ninche ilkeek laainei loo sabibu, neidaikie ninche ilng'abolo laainei, etikinyutua ninche nkabobok enye nenang'aki enkop; eiborrieki ilng'osil lenye. Nchira anaa esila naishopokoki ilkuniyiani, eishiraki keeya eilo ojo pee eyam ninye. Ore olasar lenye le ntapa o lasar lenye ooki neiwuang'ieki, te nkaji o Laitoriani. Eishira ilapolosak, lelo aisiaayiak lo Laitoriani. Eitomijoonoki nkong'at, neishir enkop; enkaraki naidaikieki entapa, etoito isabibu neishunye eilata. Esinanuoto intae ilaturok le nkop, enchira intae iloota nkurman oo sabibu, enchiraki enkano o shairi amu eidaayie enkisampuare e nkurma. Etoyio olchani loo sabibu, netoyio olng'aboli, ore kukumanka, o ltukai, o lchani loo lng'anayio, netoito pooki. Neiting'o enchipai too nkera e tung'ana. Enchopo ilkuniyiani, niyietutu aaishir intae ilapolosak. Enteyieutu enchira intae ilaisiaayiak lo lperere lo lasar. Entijing'u intae, entotoni enkewarie, pooki nchopitoto ilkuniyiani, intae ilaisiaayiak le Nkai ai! Amu ore olasar le ntapa o lasar ooki, neiwuang'ieki te nkaji e Nkai inyi. Entisinya eenata inyi e mpukoroto, empotu eumata nasinya enturrurro ilpayiani, o lelo pooki oomanya ina kop meetu enkaji o Laitoriani Enkai inyi; nipuonunu aaishiraki Olaitoriani. Oi ina olong! Amu etataana ina olong o Laitoriani, nelotu anaa enkidaaroto naing'uaa ilo magilani. Keitu eiwuang'ieki endaa aaitung'uaa te dukuya nkonyek ang, neiwuang'ieki eng'ida o enchipai te nkaji e Nkai ang? Etumutate ilanterera te nkop natoyio, netomijoonito nkajijik naashumishoreki einyalaki mpechen enkaraki nemeetae entapa. Eng'ura eneba olkiyioi loo ng'uesi! Ore iluaat oo nchoo neidang'a enkaraki nemeetae ndaat oo nchoo tenkaraki ninche. Ore sii iluaat oo nkerrai neiputukunyo. Aaishiraka nanu iyie Olaitoriani. Amu etumuta enkima ndaat e ong'ata, neinos olng'ejep le nkima ilkeek pooki liong'ata. Eikinchiraki sii ninche ing'uesi e ntim, amu etoito nchorroi oo nkariak, netumuta enkima ndaat e ong'ata. Entoosh entarumpeta te Sion; entoosh entadara teilo doinyo lai sinyati! Nchoo eikirikira lelo pooki oomanya ena kop, amu kelotu enkolong o Laitoriani etataana. Enkolong e naimin o sina, enkolong oo nkatampo o enaimin nagut! Etotiuo anaa erokan eisalaashakino ildoinyo, olorere kitok ogol, eitu aekata etumi enanyaanyukie ninche ebaiki moitie, nemetumi aekata enanyaanyukie ena too larin loo ishoritin pooki. Kemutisho enkima te dukuya ninche. Ore te siadi ninche neinosisho olang'at le nkima. Eikununo ina kop anaa enkurma e Eden te dukuya ninche, kake ore te siadi ninche naa ong'ata nememanya, nemeetae entoki naidim ailanya ninche. Ore eliooto enye neikununo anaa mbartan, nekuet ninche anaa mbartan o larrabal. Ore anaa elototo oo ng'arrin oo mbartan, neipid ninche too nchumat oo ldoinyo, anaa endarata enkima nainos isuut, anaa enjore nagol, natoluaakine olarrabal. Ore te dukuya ninche neirut olorere, neipusita nkomomi enye. Nerasaa ninche anaa ilmurran, neked isunta anaa sikarini, nepuo ninche dukuya oltung'ani ake te nkoitoi enye, meibelekenya ninche aapaash nkoitoi enye. Meetae olorruesh olikae, enkoitoi enye ake eibung pooki lenye, epuo ninche eeta imasaa enye o larrabal, nemeibooroyu. Neipid ninche te nchumata eina anasa, nekuet too nchumat oo sunta; neked nkajijik, neim ilusien anaa lapurrok. Neikirikira enkop te dukuya ninche, neikirikira shumata. Neitomisimisi enkolong o lapa, neibooyo ilakir ewang'an enye. Neitayu Olaitoriani oltoilo lenye, te dukuya enjore enye, amu aikitok oleng olorora lenye ore ilo olimu ororei lenye neeta engolon. Amu ore ina olong o Laitoriani naa kitok neitureisho oleng, aing'ae oidim ating'iria? “Ore ake sii o taata,” Olaitoriani ojo, “Torrinyunye wou enatii to ltau lino pooki, te enata e mpukoroto o te nkishirata o to sina. Nipolososo iltauja linyi, mme ilkilani linyi.” Torrinyokinoyu Olaitoriani Enkai ino, amu aisupat ninye neeta olng'ur, mesioki agoro, neeta enyorrata nauno, neirridu entorroni. Kalo oyiolo tenaa keibelekenya ninye neirridu, neing'uaa emayianata etulusoyie ninye, olasar le ntapa o lasar ooki, te nkaraki Olaitoriani Enkai ino. Entoosh entarumpeta te Sion. Entisinya eenata e mpukoroto; empotu eumata nasinya; enturrurro iltung'ana. Entisinya eumata; enturrurro ilpayiani; enturrurro nkera ometabaiki nkutiti naanakita. Nchoo oloyamisho eing'uaa olgilata lenye neing'uaa ina nayami olgilata lenye. Ore te rishata enjing'et o lperere lo lasar, nchoo lapolosak lelo aisiaayiak lo Laitoriani eishir, nejo, “Teleku iltung'ana linono, Olaitoriani, nimintaa enjung'ore ino enkurruna, entoki naimakini tiatua iloreren. Kainyoo pee ejo ninche tiatua iloreren, ‘Koree Enkai enye?’ ” Neitoki Olaitoriani atum olom tenkaraki enkop enye, neing'urrie iltung'ana lenyena. Newal Olaitoriani nejoki iltung'ana lenyena, “Kairriwaki nanu intae entapa o enaisho oo sabibu, o eilata. Naa ipuopuo intae aaraposho; nemaigil aekata nanu aitaa intae enkurruna too loreren. Kaiwuang'ie nanu ilo le moikuape aitung'uaa intae, nareu nanu ninye empusel mitil. Ore lelo lenye le lukunya nepuo enaiposha o loosaen, ore lelo le siadi nepuo atua enaiposha o loontoluo; ore olng'usil o eng'uan enye nedumunye, amu etaasa ninye mbaa sapuki. Miureishoyu iyie na kop tishipayu iyie ning'ida, amu etaasa Olaitoriani mbaa sapuki. Emiureishoyu intae ing'uesi e ong'ata, amu kenyori ndaat e ong'ata; eiu olchani ilng'anayio lenyena, neiu olng'aboli o sabibu ilng'anayio lenye te nkumoi. Entishipata intae ilayiok le Sion, ning'idakinono Olaitoriani Enkai inyi; amu eitasiekuo ninye enchan tenkaraki intae. Eitashaikia ninye intae olari seur; eirriwua enchan naituruku o ene siadi anaa apake. Keiput entapa ilkurrot ooidong'ishoreki, nedooyo enaisho oo sabibu o eilata too lbenia. Kaarrinyoki nanu iyie, ilarin apa ooinosie emus olmaati enkop, o ntargeet, o enamutisho, o enadung'isho ina jore ai kitok nairriwua nanu atua intae. Inos iyie endaa endaa sapuk nikiraposh, nilo aisis Olaitoriani Enkai ino, ilo laa ninye otaasa inenking'asia te nkaraki iyie. Maigil aekata aaitukurru iltung'ana laainei. Iyiolouu intae nchere atii nanu atua Israel, naa nanu Olaitoriani Enkai inyi nemetii likae. Nemeigili aekata aaitukurru iltung'ana laainei. Naa kepuonu nkolong'i te siadi ena, naa kabukoki nanu enkiyang'et ai pooki tung'ani; ore ilayiok linyi o ntoyie inyi neibonisho, ore ilpayiani linyi neidetidet ore ilbarnot linyi neidetidet nedol ilbarnot linyi nduaat. Ore doi ninye isinkan linyi isinkan linyi lewa o sinkan inyi ng'orou, kenya te nena olong'i, naa kabukoki nanu enkiyang'et ai. Naa kaishoru nanu nkikoot te keper o te nkop, osarge o enkima, o empuruo nairrusha. Keitomisimisi enkolong, neitotiuni olapa anaa osarge, eng'or ina olong kitok o Laitoriani naitureisho. Naa keaku ore pooki ng'ae oipot enkarna o Laitoriani, nekorduni. Amu ore to ldoinyo le Sion o te Yerusalem netii lelo oopuo aaimisho, anaa enatejo Olaitoriani; ore te lelo ooleku, ninche etii lelo ooipot Olaitoriani. Ng'ura, ore kenya te nena olong'i, o teina kata, tenarrinyu nanu lelo ootarayioki le Yuda o le Yerusalem, naa kaiturrur nanu iloreren pooki, nayau ninche aitadou oerata le Yehoshafat, naiguanare nanu ninche te nkaraki iltung'ana laainei o enjung'ore e Israel amu eidapashakaki apa ninche atua iloreren, netooro ninche enkop ai, netooshokitio ninche iltung'ana laainei enkukuo, neishooyo ninche enkayioni aainosie emulayoi, nemir entito aainosie enaisho oo sabibu, netooko ninche ina aisho. “Ira iyie nyoo te nanu iyie Turo o Sidon, o kulo kirinen le Filistia? Kaa toki kirrinyoki nanu alaaki? Tenaa eikilaaki iyie nanu, naitalaku nanu enkias ino te nchumata endukuya ino makewan, te wuapunoto o te nkisarrisar. Amu iwa iyie enkosholai ai o sahabu ai, nitanapa iyie ilchumat laainei le karsisisho atua nkajijik oo nkaitin inyi. Itimiraka iyie iltung'ana le Yuda o le Yerusalem Ilgiriki, niya ninche aitalamaa oleng to lpolosie lenye. Kake ore taata kaputu nanu ninche teine wueji nitimiraka ninche, naitalaku nanu enkias ino te ndukuya ino makewan. Kamir nanu ilayiok linono o ntoyie inono apik nkaik oo layiok le Yuda, naa kepuo ninche aamiraki lelo oshon le Sabea, oolakua, amu Olaitoriani oiroro.” Entolimu ena embalie tiatua iloshon: entobira olarrabal, entuputu iltung'ana magil. Nchoo iltung'ana pooki lo larrabal enyiku, nchoo ninche epuonu aailepu. Endogo ilchempei linyi metaa lalema, nintaa ilalema linyi oodung'ishoreki iremeta; nchoo ilo oshal ejo, “Ara nanu olmurrani.” Entasieku wootu, intae iloreren pooki ootaana, enturrurro ate teine. Ntadou ilmurran linono, iyie Olaitoriani. Nchoo iloreren eputu ate, nepuonu oerata le Yehoshafat; amu teine nanu alo aton adung'oki enkiguana, lelo oreren pooki ootaana. Tipika olalem oololo amu eo enkisampuare. Entijing'u entunyo amu eipute enkironyet. Eilogilog iltooi aadooyo, amu aikitok entorroni enye. Ilororani, ilororani, tiatua oearata odung'ieki enkiguana. Amu etinyikua enkolong o Laitoriani tiatua ilo erata odung'ieki enkiguana. Eitomisimisoki enkolong o lapa netajaaitie ilakir ewang'an enye. Neikurrukur Olaitoriani te Sion neitayu oltoilo lenye te Yerusalem, ore keper o enkop neikirikira. Kake Olaitoriani esarunoto too ltung'ana lenyena, osempewuet too ltung'ana lenyena le Israel. “Metaa ilo iyie ayiolou nchere ara nanu Olaitoriani Enkai ino, ilo obik te Sion, to ldoinyo lai sinyati. Naa keaku Yerusalem sinyati, nemeigil aekata iltung'ana omon aaim atua ninye. Ore kenya teina olong neitong'u ildoinyo enaisho oo sabibu namelok, neruko ndoinyo te kule, ore inongot pooki e Yuda neruko enkare; nerukunye enchorro e nkare naing'uaa enkaji o Laitoriani, nepik oerata le Shitim enkare. Kelo Misiri aaku olmuate, neaku Edom ong'ata mitil tenkaraki enkarruoisho apa naitaasaki iltung'ana le Yuda, amu eibukoitie apa osarge lemeeta entioto te nkop enye. Kake kemanyi Yuda ntarasi nememanyi Yerusalem too iishoritin pooki. Kaitalaku nanu osarge lenye, naiwuang'ie nanu entorroni enye, amu ebik Olaitoriani te Sion.” Kulo irorei le Amos, apa laa obo loo lairritak loo ntare le Tekoa. Etoduaa apa ninye kuna naaipirta Israel too nkolong'i e Usia olaiguanani le Yuda o too nkolong'i e Yeroboam olayioni le Yoash, olaiguanani le Israel ilarin oare eng'or enkikirikirata e nkop. Nejo ninye: “Eikurrukur Olaitoriani te Sion, neitayu oltoilo lenye te Yerusalem; eishir ndaat oo lairritak loo ntare, netoyu enchumata e Karmel.” Nji ejo Olaitoriani: “Ore too nkitarruorrot uni e Dameski, o tiong'uan, maiwuang'ie nanu enkitamioto enye; Amu eironya ninche Gilead too nkironyeta e sekenkei. Neaku kairriwaki nanu enkima shumata enkaji e Hasael, naa kemut ninye isempewueti le Benhadad. Kagil nanu esekenkei e Dameski naiwuang'ie lelo oomanya aitung'uaa oerata le Afen, naiwuang'ie ilo oibung'ita eng'udi e nkitoo aitung'uaa Besedan; naa kepuo iltung'ana le Siria eyararoto te Kir, Olaitoriani ojo.” Nji ejo Olaitoriani: “Ore too nkitarruorrot uni e Gasa, o tiong'uan, maiwuang'ie enkitamioto enye; amu ewaita ninche eyararoto olosho olulung'a pee eyaki ninche Edom. Neaku kairriwaki nanu enkima shumata esuntai e Gasa, naa kenya isempewueti lenye. Kaiwuang'ie nanu lelo oomanya Ashdod, o ilo oibung'ita eng'udi e nkitoo aitung'uaa Ashkelon; kaibelekeny nanu enkaina ai aarare Ekron ore ilo pisiai loo Lfilisti neidaaya.” Olaitoriani Enkai ojo. Nji ejo Olaitoriani: “Ore too nkitarruorrot uni e Turo, o tiong'uan, maiwuang'ie enkitamioto enye; Amu etokordutua eyakita ninche olosho olulung'a le Edom, neitu edamu osotua loo lalashera. Neaku kairriwaki nanu enkima shumata esuntai e Turo, naa kenya isempewueti lenyena.” Nji ejo Olaitoriani: “Ore too nkitarruorrot uni e Edom o tiong'uan, maiwuang'ie nanu enkitamioto enye; amu etimira ninye olalashe lenye to lalem, neiturraa olng'ur pooki, neibung ninye engoro anaake, neshum engoro napi ntarasi. Neaku kairriwaa nanu enkima shumata Teman, naa kenya lelo sempewueti le Bosra.” Nji ejo Olaitoriani: “Ore too nkitarruorrot uni oo Lamoni o tiong'uan, maiwuang'ie nanu enkitamioto enye; amu etadanya ninche inkoshuaa oo nkituaak e Gilead, pee etum ninche aaitalala olpolosie lenye. Naa kainok nanu enkima te suntai e Raba, naa kenya isempewueti lenyena too mbuakunot e ina olong o larrabal to sina teina olong olemua te ilo arrabal oikununo anaa osiuo. Ore olaiguanani lenye o lkituaak lenye nepuo eyararoto,” Olaitoriani ojo. Nji ejo Olaitoriani: “Ore too nkitarruorrot uni e Moab, o tiong'uan, maiwuang'ie nanu enkitamioto enye, amu etapejo ninye aitaa nkuruon iloik lo laiguanani le Edom. Neaku kairriwaa nanu enkima shumata Moab, naa kenya isempewueti le Keriot, naa keye Moab te mpolos e enkishirata te mpolos e mbuata o to ltoilo le ntarumpeta. Kaiwuang'ie nanu olaiguanani te mpolos e Moab, naar metuata ilkituaak lenyena te nebo ninye Olaitoriani ojo.” Nji ejo Olaitoriani: “Ore too nkitarruorrot uni e Yuda, o tiong'uan, maiwuang'ie nanu enkitamioto enye, amu etanyaita ninche nena kitanapat o Laitoriani neitu eibung nkiguanat enyena kake eitapong'oiyie ninche elejare enye, naa ninye etusuja iloo menye. Neaku kairriwaki nanu enkima shumata Yuda, naa kenya isempewueti le Yerusalem.” Nji ejo Olaitoriani: “Ore too nkitarruorrot uni e Israel, o tiong'uan maiwuang'ie nanu enkitamioto enye; amu kemir ninche ilo asipani te nkosholai nemir ilo omena aainosie inamuka are. Ninche lelo ooitunyoki endukuya o laisinani enterit e nkop, neibelekeny enkoitoi eilo oibookoki enkop nelo olayioni o menye ayiaya enkitok nabo, neidurukie ninche enkarna ai sinyati. Neirrag ninche te mbata e pooki perere lo lasar too nkilani naalakieki isilen; naa ore tiatua enkaji e Nkai enye neok ninche enaisho e lelo ooitalaaki esile. “Ore eyia aidaikie apa nanu Ilamori te dukuya ninche, ooba enkadoro enye anaa enkadoro oo ltarakua negol oleng anaa ilkeek sapuki; aidaikie nanu ilng'anayio lenyena te shumata, o ntona enyena te kop. Ayaua sii nanu intae aitayu te nkop e Misiri, narik intae ilarin artam tiong'ota, pee ipuonunu aaya enkop oo Lamori. Aitaa nanu embata oo layiok linyi iloibonok le Nkai ore embata oo lbarnot linyi Ilnasari, aimesipa ena, lo tung'ana le Israel?” Olaitoriani ojo. “Kake intooko intae Ilnasari enaisho, nintanapinapa iloibonok le Nkai aajoki ‘Emimbonisho’. “Ng'ura, karogonyaki nanu intae enkop te wueji inyi, anaa enarogony enkop engarri nabore lolan. Keimin enkuetata te ilo oneneng, ore ilo ogol nemeitoki aata engolon enye; nemeitoki ilo magilani aidim aitajeu enkishui enye. Ore ilo oibung enkawuo nemeitashe, ore ilo oneneng too nkejek nemeitajeu kewan, nemeitajeu ilo oked embarta enkishui enye; naa ore ilo ogol tau tialo lelo magil naa keyooki aisik ailanyisho meishopo te ina olong.” Olaitoriani ojo. Entoning'o ele ororei laa ninye eiroro Olaitoriani tialo intae: lo tung'ana le Israel, tialo ilo marei pooki apa ailepunye nanu aitayu tiatua enkop e Misiri. “Intae ake atayiolo nanu, too lmareita pooki le nkop; neaku kaitame nanu intae te ntorroni inyi pooki.” Amaa keiriamari iltung'ana oare te nebo te neitu ening'o? Amaa, Keikurrukur olng'atuny te ntim eitu ninye eibung toki, Keikurrukur olkuoo lo lng'atuny te nkapune enye meeta ninye toki? Amaa kedoiki emotonyi orreshet te nkop eitu epikakini ninye orreshet? Kegamisho irresheta te nkop eitu eibung toki? Amaa keoshi entarumpeta te nkanasa nemeirut iltung'ana? Kejing entorroni enkanasa te neme Olaitoriani oyaua? Esipa meeta enaas Olaitoriani Enkai, eitu eibalunye enkisudoroto enye too sinkan lenyena, lelo oibonok lenyena. “Eikurrukurro olng'atuny; ai ng'ae lemeureishoyu: Eiroro Olaitoriani Enkai; aing'ae lemeibonisho?” Enosai too sempewueti te Asiria, o too sempewueti tiatua enkop e Misiri, nijojo, “Enturrurroto maate te nchumata oldoinyo le Samaria, eng'ura embuakunoto o lkiyioi tiatua ninye o enkitorogonyare tiatua ninye.” “Meyiolo ninche eneiko teneas esipata.” Olaitoriani ojo. “Kulo ooshum ilchumat le ntorroni e nkikonya too sempewueti lenye.” Neaku nji ejo Olaitoriani Enkai: “Kelotu olmang'atinta airin enkop neibung imasaa nimitunyenye ate neraya intokitin naatii isempewueti linyi.” Nji ejo Olaitoriani: “Ore anaa enasaru olchekut loo ntare nkejek are aashu endung'oti e nkiok te nkutuk olng'atuny, naatelekua olng'atuny neijia etiu iltung'ana le Israel oomanya Samaria ilkuti ake ooleku, eeta embelati o lorika o enchoto e rruat.” “Entoning naa, ninchakenokiki enkaji e Yakobo” Olaitoriani Enkai, Enkai oo lororani, ojo. “Nchere te ina olong naitame nanu Israel te nkitarruorroto enye, naa kaitame nanu ilperereni loo lasarri le Betel, ore mouarak o lperere lo lasar nedung'ori nesulakini enkop. Kagil nanu enkaji e nkata enkirobi o enkaji enkata enkirouaj; ore nkajijik naaikodo too lala loo lkanchaoni nerruoyo, ore nkajijik kituaak neidaaya,” Olaitoriani ojo. “Entoning ele rorei, ntae nkishu e Bashan, naatii oldoinyo le Samaria, nena naaibooki olaisinani enkop neitorogony olomena nena naajoki ilpayiani lenye, ‘Eyau pee kitum atook!’ Einosa Olaitoriani olmumai te sinyatisho enye, nchere, ng'ura kepuonu nkolong'i shumata intae, peyie eyau intae too lala oo loolo o metabaiki iloobayie linyi too lala oo loolo loo sinkir. Naa ipuopuo intae aaim esuntai nataaraki neitashe pooki ng'ae te dukuya ninye nepuoi aanang'aki intae Harmon,” Olaitoriani ojo. “Wou Betel, tigila nkitanapat, Wou Gilgal, toponai engilata oo nkitanapat; iyau ilasarri linono anaake tadekenya, o matuan inono e tomon te pooki olong e uni. Intayu olasar le nashe; eina naisuijieki nimbalie inkishorunot e mpiris nilikioo ninche amu inyorrinyorro aaikuna neijia, lo tung'ana le Israel!” Olaitoriani ojo. “Nanu oyaua olameyu atua nkanas inyi pooki o enkiishunoto oo mukateni too nkajijik inyi pooki, ore ake eyia neitu intae kishukokinono nanu,” Olaitoriani ojo. “Naa nanu sii oibooyie enchan meshaiki intae eton eng'or ilapaitin okuni le nkisampuare nairriwaki; nanu enchan shumata e nkanasa nabo napal enkae anasa atashaikia ewueji nebo ore ewueji neitu eshaiki netoyu; neaku ore iloo nkanas are aashu uni nepuo enkanasa nabo pee eok enkare, nemeishunye ninche enkure; ore eyia neitu intae kirinyokinono nanu,” Olaitoriani ojo. “Ataara indaiki inyi te nkeeya naitomijoon inkurman inyi aitoi isabibu linyi; ore ilng'abolo o loirienito linyi neinos olmaati; ore eyia neitu kishukokinono nanu,” Olaitoriani ojo. “Airriwaka nanu atua intae olmeitai anaa apa enaikununo te Misiri; naar nanu ilbarnot linyi to lalem; naya nanu imbartan inji aiwuang'ie naya nanu olng'usil loo lng'oborri linyi apik nkumeishin inyi; ore eyia eitu intae kishukokinono nanu,” Olaitoriani ojo. “Aidakie nanu ilkulikae te ntae, anaa apa pee eidaikie Enkai Sodom o Gomora, nitiuu apa anaa olmishire oitayioki tiatua enkima nayupuyup; ore eyia eitu intae kishukokinono nanu,” Olaitoriani ojo. “Neaku ena nanu aaitaas, iyie Israel, ore enkaraki naa kaas nanu ena terretenayu pee itumore Enkai ino iyie Israel!” Amu ore ilo oitobira ildoinyo neitayu osiuo, neibalakinye iltung'ana enaikununo endamunoto enye; ilo oitomisimis enkakenya neroro ineeika enkop–Olaitoriani, Enkai oo lororani, ninye enkarna enye! Entoning ele rorei lajo nanu te nkishirata te nkaraki intae na aji e Israel: “Etabatate nemeigil ae kata adumunye ina selenkei e Israel; eiturrayioki te nkop enye nemeetae olodumu ninye.” Amu nji ejo Olaitoriani Enkai: “Ore enkanasa napukunye iltung'ana enkalifu nabo iip ake ooleku, ore ina napukunye iltung'ana iip, tomon ake oolekaki enkaji e Israel.” Amu nji ejoki Olaitoriani enkaji e Israel: “Eng'oruaki nanu pee ipokipoko; kake eming'oruru intae Betel, nimijing'ijing'i Gilgal aashu idung'udung'u aapuo Beer-sheba; amu meeta nchere melo Gilgal eyararoto, naa keaku Betel entoki nemeetae.” Eng'orutu Olaitoriani pee ipokipoko, pee melotu ake ninye anaa enkima ajing enkaji e Yosef, nenya ninye nemetii oloar ninye te Betel, Intae kulo ooibelekeny esipata aaitaa esayiet, nenang'aki esipata enkop! Ore ilo oitobira Inkokua o Inkapiak uni neibelekeny enaimin nagut aitaa enkakenya neitomisimis endama aitaa enkewarie ilo oipotu nkariak e naiposha neitashaiki ninche shumata oriong e nkop, Olaitoriani ninye enkarna enye, ilo oyau enkidaaroto anaa enkiwuang'ata egilunore ilo ogol neaku kelotu enkidaaroto shumata ine negol. Eiba ninche ilo oisikong'isho te kishomi neinyal ilo oiro esipata. Neaku ore enkaraki nimbookiki olaisinani enkop nioruru ninye enkano enye, itesheta intae nkajijik oo soito oogueta, kake mibikiekie intae ninche; ituno intae isabibu sidain, kake miokioko enaisho enye. Amu ayiolo nanu eneba nkitarruorrot inyi o enaba esapuko oo ng'ok inyi, intae ilooibooki enkop olasipani, niyaya ntokitin e ropare, nimbelekenyenye ilo omena aarriny te kishomi. Neaku ore ilo ng'en negira te nkata naikununo nji; amu enkata e ntorroni. Eng'orutu isidain, mme ntorrok, pee ipokipoko; pee etum Olaitoriani, Enkai oo lororani ataa te nebo intae, anaa enitejo intae. Embai entorroni, ninyorrurru esupatisho, nintubulaa esupatisho te kishomi; amu eidimayu to Laitoriani, Enkai oo lororani pee eipirisie Enkai olpisiaai le Yosef. Nji naa ejo Olaitoriani, Enkai oo lororani, Olaitoriani: “Ore too nkoitoi pooki kituaak naa keaku enkishirata; ore too nkoitoi pooki nejo ninche, ‘Aha, aha!’ Naa keipotu ninche ilaturok le nkurma meetu aaishir, neyietu lelo arriyiak te nkishirata, ore too wuejitin pooki oo sabibu naa keaku e nkishirata, amu kaim nanu atua empolos inyi.” Olaitoriani ojo. Intae lelo oong'uar enkolong o Laitoriani! Kainyoo pee iyieuu intae enkolong o Laitoriani? Enaimin ninye neme ewang'an; ketiu anaa oltung'ani okuet ailany olng'atuny nenang'are olng'arurumi, aashu elo atua aji neigaraki enkaina enye esuntai neony olasurai ninye. Aime enaimin enkolong o Laitoriani neme ewang'an, o emisimisi nemewang? “Kaiba nanu namen isiruai linyi nemashipakino lelo turrurri linyi. Ore hoo nikintaikiki nanu ilasarri linyi oopejori o lasarri le nkurma, mang'amaa nanu ninche, ore lelo asarri linyi le seriani loo nchoo inyi naapir, maning'ore nanu. Ewaita entung'uayioki nanu enkilepilep oo sinkolioitin linyi; mainining nanu oltoilo loo nkinantani inyi. Kake enchoo esipata erukunye anaa nkariak nerukunye esupatisho anaa enchorro nemetoyu ae kata. Amaa eikiyakita apa intae ilasarri o nkishorot to lpurkel too lapa arin artam, naaji e Israel? Ewaita intae Sakuti olaiguanani linyi, o Kaiwana ina ai inyi o lakira o nkitanyaanyukot inyi apa nintobirakita ate; neaku kaya nanu intae enchom eyararoto te idia alo Dameski,” Olaitoriani ojo, laa ore enkarna enye naa Enkai oo Lororani. “Oi lekua ooisikarra te Sion, o lekua oodol eserian to ldoinyo le Samaria, lelo tung'ana ning'ot le dukuya too loshon, laa ninche esaru olosho le Israel! Entalang enchom Kalne entodol; nidumunyenye te ine aapuo Hamat kitok; nintokiki aapuo Gat oo Lfilisti. Keikash ninche aalang kuna kitoriat pooki aashu aisapuk enkop enye alang enkop inyi. Intalakuanana intae enkolong e ntorroni, niyauu aaitataanu entonata o larrabal? “Oi lekua ooirrag too ndapashi naaikodo too lala loo lkanchaoni, neitoriori too lorikan dapashi, nenya ilkuoo le kerra too luaat nenya ilasho to lale; lelo oorany isinkoliotin le pesho to ltoilo le nkinanta, neitobiraki ate ntokitin oo sinkolioitin anaa Daudi; ook enaisho too lbakulini neeyel ate te ilata sidai oleng, kake meisina ninche te nkidaata e Yosef! Neaku keaku taata ninche ile dukuya te lelo oopuo eyararoto, ore isiruai linyi o sikarri inyi neishunye.” Einosa Olaitoriani Enkai olmumai te kewan enye (Olaitoriani ojo, Enkai oo lororani): “Kaiba nanu olwuasa le Yakobo, naiba isempewueti lenye; naa kaishooyo nanu enkanasa o pooki natii atua.” Naa te neleku iltung'ana tomon te nkaji nabo neye ninche. Naa ore oltung'ani opejoo olalashe lenye, te neitayu loik lenye tiatua aji, nejoki ilo otii atua aji, “Keton etii likae tung'ani te nebo iyie?” Nejo ninye “A-a nejo, tigirayu! Mikintoki iyiook aaipot enkarna o Laitoriani.” Amu ng'ura, eitayu Olaitoriani enkitanapata neari enkaji sapuk aaitaa mbelibelat, neitaae enkaji kiti irrarrat. Amaa, kekuet mbartan te nchumata indapidapo Ketur oltung'ani enaiposha too lmong'i? Kake mbelekenya intae esipata aaitaa esayiet o lng'anayio le sipata nintaa olchani odua intae kulo oong'ida te Mpesho, oojo, “Keitu iyiook te ngolon ang maate kiya Karnaim?” “Amu ng'ura, kadumaki nanu intae olosho, lo tung'ana le Israel, Olaitoriani ojo, Enkai oo lororani; naa keibooki ninche intae enkop ebaiki enejing'ieki Hamat o metabaiki Ereyiet e Araba.” Ena nanu aaitoduaa Olaitoriani: ng'ura, eitobirita ninye olmaati te nkiterunoto embulunoto e ndaa natuunoki to loirujuruj, naa ng'ura embulunoto e are eidipa olaiguanani atudung'o. Ore pee eidip ilo maati ainosa inkujit e ina kop, najo nanu, “Olaitoriani Enkai, tapalaki ninche, aatasayia iyie! Kaji naa eiko pee eitashe Yakobo? Eikiti ninye oleng!” Neirridu Olaitoriani ena bae; Meekure eaku, Olaitoriani ojo. Ena nanu aaitoduaa Olaitoriani; ng'ura, eipotu Olaitoriani Enkai enkiguana e nkima, nenya ina kima ineegut oleng, neinosita sii enkop. Naitoki nanu ajo, “Olaitoriani Enkai, tapala, aatasayia iyie! Kaji naa eiko pee eitashe Yakobo? Eikiti ninye oleng!” Neirridu Olaitoriani ena; “Meitoki sii ena atiu,” Olaitoriani Enkai ojo. Aaitoduaa ninye: ng'ura, eitashe Olaitoriani te mbata e suntai nateshetaki te ntemet e nkitorioroto, eibung'ita entemet te nkaina enye. Naajoki nanu Olaitoriani, “Amos, kainyoo iyie idolita?” Najoki nanu, “Entemet e nkitorioroto.” Neitoki Olaitoriani ajo. “Ng'ura, kapik nanu entemet e nkitorioroto empolos oo ltung'ana laainei Israel; maigil ae kata nanu agiroo ninche; ore iwuejitin neeika e Isaak naa keitomijooni ore iwuejitin e Israel neeseremishoreki neitomijooni, naa kadumakino nanu enkaji e Yeroboam to lalem.” Neitoki Amasia olapolosani le Betel airriwaki olkilikuai Yeroboam olaiguanani le Israel, ejoki, “Eitobirita Amos entorroni tialo iyie te mpolos e nkaji e Israel; meidimaa ena kop ilomon lenyena pooki. Amu nji apa etejo Amos, ‘Keye Yeroboam to lalem nemeeta nchere pee melo Israel eyararoto aing'uaa enkop enye.’ ” Nejoki Amasia Amos, “Iyie oladuaani shomo, isika shomo enkop e Yuda, inosa endaa te ine, nimbonisho te ine; kake mingil ae kata aibonisho te Betel, amu enkaji o laiguanani naseremishore naa enkaji e nkitoo naseremieki Enkai.” Neitoki Amos awaliki Amasia ejo, “Mara nanu oloiboni le Nkai nemara olayioni lo loiboni, kake kara olairritani o laitobirani loo lkeek oonyaanyukie ilng'abolo, naaya apa nanu Olaitoriani aitung'uaa esujata oo ntare, naajoki nanu Olaitoriani, ‘Shomo, mbonoki iltung'ana laainei Israel.’ “Ore naa taata toning'o ororei lo Laitoriani. Ijo iyie ‘Mimbonoki Israel niminosu ilomon le nkikoo tialo enkaji e Isaak?’ Nji naa ejo Olaitoriani: ‘Keaku enkitok ino enaiborrie onyek tiatua ena anasa, ore ilayiok linono o ntoyie inono naa kebatata to lalem, ore olokeri lino naa kedung'i aaorrior to lgosoi, ore iyie makewan naa iye te nkop nemesinya, nemeeta nchere pee melo Israel eyararoto aing'uaa enkop enye.’ ” Ena nanu aaitoduaa Olaitoriani: ng'ura, enkikapu nabore ilng'anayio le nkata e nkirowuaj. Naajoki ninye, “Amos, kainyoo iyie idolita?” Najoki nanu, “Oljilchil obore ilng'anayio le nkata e nkirowuaj.” Naaitoki nanu Olaitoriani ajoki, “Etabaikia enkiting'oto iltung'ana laainei Israel; maigil ae kata nanu agiroo ninche. Ore isinkolioitin le nkaji e Nkai naa keaku olkiyioi te ina olong,” Olaitoriani Enkai ojo; “Ore mpopoki oo ltung'ana ootuata naa keaku kumok, ore te pooki wueji naa kepuoi aaiturraa ninche egirae.” Entoning ena, intae ilooibooki iloomena enkop, niyauu lelo aisinak le nkop aaishie, ijojo, “Kanu eishunye olapa ng'ejuk pee kitum aatimir enkurma. Keishunye sabato, pee kitum aatimir enkano, pee kitum aaterepeny entemet naji eta nikiponaa shekeli, nikilej iltung'ana too ntemat e lejare, Pee kitum iyiook aainyang'u olaisinani te nkosholai ore olomena nikinyang'u too namuka are nikimir isuut e nkano?” Einosa Olaitoriani olmumai te nkaraki olwuasa le Yakobo: “Esipa maarikino ae kata hoo nabo oo nkiasin enye. Aimeikirikira enkop te nkaraki ena, Neishir to sina pooki ng'ae omanya atua ninye, nedumunye ninye pooki anaa olkeju le Nail neilugo neitoki aimis, anaa olkeju le Nail te Misiri?” “Naa ore akenya te ina olong.” Olaitoriani Enkai ojo, “Naitadoyio nanu enkolong tenkipirata enkolong, naitomisimis enkop dama. Kaibelekeny nanu isiruai linyi aitaa osina, ore isinkolioitin linyi pooki neaku olkiyioi; karrotianaki nanu inkilani o lkuniyia pooki tung'ani napik enkurroto pooki lukunya, kaitotiu nanu anaa enkishirata naishirakini olayioni obo laa ninye ake eetae ore enkiting'oto enye netiu anaa enkolong nadua. “Ng'ura, kepuonu nkolong'i,” Olaitoriani Enkai ojo, “Nairriwaki nanu enkop olameyu; mme olameyu le ndaa aashu olameyu le nkure e nkare, kake oloning'ieki ororei lo Laitoriani. Kelimana ninche ebaiki enaiposha o metabaiki enaiposha, moikuape o metabaiki enkilepunoto e nkolong; kekuet ninche aapuo neitu, aaing'oru ororei lo Laitoriani, kake metum ninche. “Ore akenya te ina olong isilan sidain o lbarnot naa keiterre te nkure. Ore lelo oonya olmumai te Ashima e Samaria, nejo ‘Ore anaa enaishu enkai ino, Dan;’ naa ‘Ore anaa enaishu enkoitoi e Beer-sheba;’ kebatata ninche nemeigil ae kata aadumunye.” Atoduaa nanu Olaitoriani eitashe te mbata olperere lo lasar, nejo ninye: “Toosho lukuny oo ng'apeta, o meikirikirata ntonat oo ng'apeta, tebelibelaki ninche inchumat oo ilukuny oo ltung'ana pooki; ore ilooleku lenye naar nanu ninche to lalem; melo ninye obo lenye aisik nemeimisho ninye obo lenye. “Ore hoo naaji ninye te netur enkop aapuo enemeneng'a, naa keitayu ake enkaina ai ninche te ine, ore hoo naaji ninye tenaa keilep aapuo shumata, naa kaitadou nanu ninche te ine. Ore hoo naaji ninye tenaa keisudori te nchumata oldoinyo oji Karmel naa kaing'oru nanu ninche naitayu ninche; naa ore hoo naaji ninye tenaa keisudori too nkonyek aainei aapuo abori enaiposha naa kairriwaa nanu olasurai ine metoonyo ninche. Naa ore naaji tenaa kepuo ninche eyararoto te dukuya ilmang'ati lenye, naitanap nanu olalem teine pee ear ninche naa kaing'or nanu ninche te ntorroni neme te sidai.” Ore Olaitoriani, Enkai oo lororani, ilo laa te neiseyie enkop neshola, ore lelo pooki oomanya atua neishir to sina nedumunye pooki anaa olkeju le Nail, neitoki adou, anaa olkeju le Nail te Misiri; ilo oshet enkaji enye e shumata te keper nepik olkitamanyunoto lenye shumata enkop ilo oipotu nkariak e naiposha nebukoki ninche shumata oriong e nkop Olaitoriani ninye enkarna enye. “Aimitiuu intae anaa Olosho le Etiopia te nanu, intae lo tung'ana le Israel?” Olaitoriani ojo. “Keitu nanu aitayu ailepunye Israel aitung'uaa enkop e Misiri naitung'uaa Ilfilisti Kafta naitung'uaa Siria Kir? Ng'ura, etii nkonyek o Laitoriani Enkai shumata enkitoria oo ng'ok, naa kaidaikie nanu aitung'uaa oriong e nkop; Meteleku ake nchere maidaikie nanu tukul enkaji e Yakobo,” Olaitoriani ojo. “Amu ng'ura, kaitanapisho nanu, pee aipirripir asilu nanu enkaji e Israel tiatua loreren pooki anaa enasil oltung'ani te silet, kake meetae olantererai odoiki enkop. Ore lelo aing'okok loo ltung'ana laainei pooki naa keye to lalem, lelo oojo, ‘Meinepu ae kata entorroni iyiook aashu etum iyiook.’ “Ore akenya te ina olong naitasheiyie nanu enkaji e Daudi apa naturori naitobir nanu ineetarruoitie, nashumu nanu ineeturori, naitoki nanu ashet metotiuo anaa apa. Pee etum ninche aawaita olpisiai le Edom o lelo oreren pooki ooipoti te nkarna ai,” Olaitoriani ilo oas ena, ojo nji. “Ng'ura, kepuonu nkolong'i,” Olaitoriani ojo, “ore ilo oturisho neinepu ilo oisampisho ore ilo oirony ilng'anayio neinepu ilo ounisho; ore ildoinyo neitong'u enaisho namelok, neruko too ildoinyo pooki. Kashuku nanu emunyani oo ltung'ana laainei Israel naa keshet ninche nkanas apa naaidaaitie nemany ninche; keun ninche isabibu neok enaisho enye; naa keitayu ninche nkurman neya ilng'anayio lenye. Kaun nanu ninche te nkop enye, nemeigili ae kata aadotu ninche, aaitayu tiatua ina kop naishoo nanu ninche,” Olaitoriani Enkai ojo. Enduaata e Obadia. Inji ejo Olaitoriani ti alo Edom: Kitoning'o iyiook ilomon supati ooing'uaa Olaitoriani, neirriwuaki olkilikuai atua iloreren. “Tudumunye! Matudumakinoto iyiook ninye to larrabal!” Ng'ura kaaitaa iyie kiti ti atua iloreren, eikipuoi aamenu iyie oleng. Kiteleja iyie ilo wuasa lo ltau lino, iyie ilo omanya enchumata endapidapoi, laa keika oleng emanyisho enye, ilo ojo to ltau lino, “Kaing'ae laaitadou nanu ayau enkop!” Ore hoo nilepa alo shumata anaa olkurragos, ore hoo naa atua lakir etii enkaji ino, kaayau ake aitadou enkop, Olaitoriani ojo. Amaa te nepuonu lapurrok enitii kewarie, kebaa enkidaata nikindakieki iyie! Aimepurroo ninche ina ake naidip ninche? Amaa te nepuonu lasotok loo sabibu aimeleku ninche embata? Kebaa elilituni Esau, neing'oruni ilchumat lenyena! Kiteleja lelo pooki lining'ore, kitimiraitie ninche aareu olpolosie; ore apa lelo liatayie eseriani nikitimira ninche; ore lelo shoreta linono lisilig netipika orreshet abori iyie embae nemeyiolounoyu ina. Amaa kenya te ina olong, Olaitoriani ojo, aimaidaikie nanu lelo tung'ana ang'eni te Edom, o eyiolounoto to ldoinyo le Esau? Ore lelo tung'ana linono magil, Teman, neitukureti, o metaa ore pooki oing'uaa oldoinyo le Esau neiwuang'ieki aar metua. Ore te nkaraki ina kinyalata nainyalaki olalashe lino Yakobo, eikimulumul iyie enkurruna, naa eikiwuang'ieki ntarasi. Ore apa te ina olong nintasho aitirring'a, ore apa te ina olong nawaita iltung'ana leiking'a imasaa enyena, neimu ilmang'ati nchomito enyena, neoshoki enkukuo Yerusalem, nitotiwuo iyie anaa obo lenye. Enyor apa neitu ishipakino ina olong o lalashe lino te ina olong apa natijing'a ninye olbuket; enyor apa neitu ing'idakino ina olong e lelo tung'ana le Yuda, te ina olong e nkidaata enye; enyor apa neitu iwuasayu te ina olong o sina. Enyor apa neitu ijing kishomi oo ltung'ana laainei, te ina olong o sina lenye; enyor apa neitu ing'idakino ashil enkidaata enye, te nena olong'i e nkidaata enye; enyor apa neitu imbung imasaa enyena te ina olong e nkidaata enye. Enyor apa neitu intashe te rishata oo nkoitoi pee imbung lelo ooisik; enyor apa neitu iyau ilo pisiai lenye te ina olong o sina. Amu etataama ina olong o Laitoriani te shumata iloreren pooki. Ore anaa enitaasa, ina eyookini aitaas intae, keshukokino nkiaasin inyi shumata ilukuny inyi maate. Amu ore anaa enitookishote intae te nchumata e ilo doinyo lai sinyati, keokisho sii ninche lelo oshon pooki oomanita ntae keokisho ninche neimisiloo, netiu ninche anaa keitu ae kata eng'as aaku. Kake Oldoinyo le Sion epuo aatii lelo ooilanyisho, naa keaku sinyati ine; ore enkaji e Yakobo neya wuejitin enye. Neaku enkaji e Yakobo enkima, ore enkaji e Yosef olang'at le nkima, neaku enkaji e Esau nkabobok; nepej ninche neishu ninche, nemetum hoo obo oleku te nkaji e Esau; amu Olaitoriani oiroro. Ore lelo le Negeb naa keya oldoinyo le Esau, ore lelo le Shefela neya enkop oo Lfilisti; neya ninche ina kop e Efraim o enkop e Samaria neya Benchamen Gilead. Ore lelo aisikak le Hala laa ilo lorere le Israel neya Foenike o metabaiki Serefait; ore lelo ooibung'aki le Yerusalem ootii atua Sefarad nepuo aaya nena anas e Negeb. Keilep ilaitajeunok aapuo Oldoinyo le Sion aaitore Oldoinyo le Esau; neaku enkitoria eno Laitoriani. Eewuo apa ororei lo Laitoriani enetii Yona olayioni le Amitai, ejo, “Tudumunye, shomo Ninawi, ina anasa kitok, ninchiraki ninye; amu eilepua entorroni enye alotu dukuya nanu.” Kake etudumunye Yona aisikaki Tarshishi ailany Olaitoriani. Nedoyio ninye alo Yopa netum emeli naloito Tarshishi; metaa etalaa entikit, neked ajing, pee elo te nebo ninche Tarshishi, enelakua ailany Olaitoriani. Kake eirriwua Olaitoriani olkutati sapuk shumata enaiposha, nejing enkilugo kitok enaiposha, o metaa kejo emeli pee egila. Neiputukuny to lkirutoto lelo ootii emeli, neishiraki ake oltung'ani enkai enye; nenang'aki ninche lelo olan apa ootii emeli atua enaiposha, pee eiteneneng. Kake eshomo apa Yona adoyio alo olgilata li abori emeli neirrag, neirura aitayu njo. Neaku eewuo olkitok le meli nejoki ninye, “Kainyoo iyie idamu, laairragani? Tuputunye, impoto enkai ino! Eidimayu pee edamu iyiook ina ai pee mikindaaya.” Nejokino ninche maate, “Wootu, matoosh enkukuo, pee kitum aatayiolo nchere kaing'ae eimua ena torroni naewuo shumata iyiook.” Neosh ninche enkukuo, nedoiki enkukuo Yona. Neitoki ninche aajoki ninye, “Toliki iyiook, kaing'ae eimua ena torroni naewuo shumata iyiook? Kainyoo esiaai ino? Naa kaji ing'uaa? Kaa enkop inyi? Naa eira iyie oli alo orere?” Nejoki ninye ninche, “Ara nanu Olheburaniai; naure nanu Olaitoriani, Enkai e shumata, laa ninye oitobira enaiposha o enkop natoyio.” Neitoki lelo tung'ana aairut oleng, nejoki ninye, “Kainyoo ena nitaasa iyie!” Amu etayioloito iltung'ana nchere keisikita apa ninye ailany Olaitoriani, enkaraki natolikio ninye ninche. Neitoki ninche aajoki ninye, “Kaa iyiook kintaas iyie, pee etum enaiposha aitirring'ayu te iyiook?” Amu etoponari enaiposha ailugo oleng. Nejoki ninye ninche, “Entudumuaki nanu entanang'akaki atua enaiposha; pee etum enaiposha aitirring'ayu te intae; amu ayiolo ajo enkaraki nanu pee eewuo ele kutati kitok shumata intae.” Ore ake eyia neijia netonyuaa lelo tung'ana aajo kireu emeli meeu enkop natoyio, kake etalaikinote amu etoponari enaiposha ailugo oleng oleng ti alo ninche. Neaku eishirakitia ninche Olaitoriani, ejo, “Kisai iyie, Olaitoriani, mincho iyiook kindak te nkaraki enkishui ele tung'ani, niminteleiki iyiook osarge le meeta entioto; amu itaasa iyie Olaitoriani anaa enikintiship iyie.” Nedumu ninche Yona nenang'aki ninye atua enaiposha; neitirring'a enaiposha te nkilugoto enye. Neureyu lelo tung'ana Olaitoriani oleng, neitaiki ninche Olaitoriani olasar, neinos olmumai. Neirriu Olaitoriani osinkirri sapuk metoijoi Yona; netii apa Yona enkoshoke o sinkirri nkolong'i uni o nkewarieitin uni. Neomon Yona Olaitoriani Enkai enye ti atua enkoshoke e ilo sinkirri, ejo, “Aipoto nanu Olaitoriani, ti atua osina lai, naawaliki ninye nanu; ti atua enkoshoke e nemeneng'a aishira nanu, nitoning'o iyie oltoilo lai. “Amu kitanang'aka nanu atua enguton, atua enguton oo naaiposha, naaman nanu nkariak pooki wueji; ore lopir pooki o nang'arot oo nkariak neim shumata nanu. “Najo nanu, Aatanang'ayioki aaiturraa aaitung'uaa dukuya ino; kaji pasa nanu aiko pee aigil adol enkaji ino sinyati? “Aaimulumulaitie nanu nkarriak, aatamana nanu enguton nkaloli pooki; neteene olairampai aman endukuya ai, “too ntonat oo ldoinyo. Nadoyio nanu alo ina kop naaikenorieki nanu ntarasi; ore ake eyia, niyaua iyie enkishui ai ailepunye ti atua engumoto, Iyie Olaitoriani Enkai ai. “Ore pee eiterre oltau lai ti atua nanu, nadamu nanu Olaitoriani; nelotu enkomono ai enitii atua enkaji ino sinyati. “Ore lelo ooyanyit nkitanyaanyukot oo nkaitin e pesho neituraa enkisiligata enye nasipa. “Kake ore nanu to ltoilo le nkishoroto e nashe naa kaapolosaki iyie olasar; ore ina nainosie olmumai kalak nanu. Eno Laitoriani enkordunoto!” Neirorie Olaitoriani osinkirri, nelopu Yona te nkop natoyio. Neitoki ororei lo Laitoriani alotu enetii Yona enkata e are, ejo, “Tudumunye shomo Ninawi, idia anasa kitok, nimbalakinye ninye ilo kilikuai laaliki nanu iyie.” Nedumunye Yona nelo Ninawi, te risioroto o rorei lo Laitoriani. Ore apa Ninawi naa enkanasa kitok oleng, elototo oo nkolong'i uni endapasho. Neiteru Yona alo atua ina anasa, nelo elototo e nkolong nabo. Neishir ninye ajo, “Nkolong'i artam ake naangor pee eidaikieki Ninawi!” Neiruk iltung'ana le Ninawi Enkai; neibalie ninche eenata e ate e mpukoroto, neishop ilkuniyiani, ebaiki olkitok lenye o metabaiki oloti lenye. Nebaiki lelo omon olaiguanani le Ninawi, nedumunye ninye to lorika lenye le nkitoo, neitayu olkila lenye, neimulumul kewan too lkuniyiani, neton too nkuruon. Nedung'u ninye enkitanapata neitubulaa ti atua Ninawi pooki ejo, “Ore te nkitanapata o laiguanani o lkituaak lenyena: Mincho oltung'ani aashu eng'ues, o inchoo aashu nkerrai eishamisham hoo toki; inchoo ninche etoni medaa, aashu eok enkare, kake nchoo oltung'ani o eng'ues eimulumuli too lkuniyiani, naa nchoo ninche eishiraki oleng Enkai; ee nchoo pooki ng'ae eibelekenya aing'uaa enkoitoi enye torrono neing'uaa ina torroni nataasa too nkaik enyena. Kaing'ae nayiolo nchere eidim Enkai airridu neibelekenya te ina goro enye napi, pee mikindaaya iyiook?” Ore ake pee edol Enkai ina nataasa ninche, ina naibelekenyate ninche aaing'uaa enkoitoi enye torrono, neirridu Enkai ina torroni apa natejo ninye aitaas ninche; neitu ninye eas ina. Kake eitu eitiship ena Yona tukul, etagore ninye oleng. Neomon ninye Olaitoriani nejo, “Aatoomono nanu iyie, Olaitoriani, aime ena apake nanu atejo eton atii enkop ang? Enkaraki ena apa pee aisarisara nanu aisikaki Tarshishi; amu atayiolo apa nanu nchere ira iyie Enkai o sotua naata olng'ur, nemegoro asioki, nikibore enyorrata nauno, nirridu entorroni. Ore naa taata, Olaitoriani, intayu enkishui ai intung'uayioki nanu, aatasayia iyie, amu enaikash te nanu te naye alang te naishu.” Nejo Olaitoriani, “Amaa, itaasa iyie esidai itagore?” Neitoki Yona aipang alo auluo enkanasa neton te nkalo e nkilepunoto e nkolong e ina anasa neitobiraki kewan olng'obor te ine. Neton ninye ti abori oloip o metaba anaa nedol enapukoki ina anasa. Negelu Olaitoriani Enkai enkaitubului neisho ninye metubulu te shumata Yona, pee etum ataa oloip te shumata endukuya enye, pee eitajeu ninye te nyamali e nkolong. Neng'idayu Yona oleng te nkaraki ina aitubului. Kake ore ake pee emanaa enkakenya te nkolong e are, negelu Enkai olkurto oinosa ina aitubului, neaku etoyio. Ore ake pee eilepu enkolong, neirriu Enkai olkutati oirowua oing'uaa nkilepunoto e nkolong, near enkolong endukuya e Yona o meiterria, neikilikuanu ninye pee eye, nejo, “Enaikash nanu te naye alang te naishu.” Kake etiaaka Enkai Yona, “Itaasa iyie esidai ti nigorokino enkaitubului?” Nejo ninye, “Ataasa nanu esidai agoro, atagore ene keeya.” Nejo Olaitoriani, “Ing'urrie iyie ina aitubului neitu iasaki esiaai, neitu iyie intubulu ninye, ina naaku kewarie neidaaya te nkewarie. Aimaing'urrie naa nanu Ninawi, idia anasa kitok, natii atua ninye ilkumok oogiroo inkalifuni iip o tikitam lemeyiolo ninche aaitirrisha enkaina enye e tatene o ene kedienye, netii sii nchoo kumok?” Ororei lo Laitoriani ele oewuo enetii Mika le Moreshet, too nkolong'i e Yotam, o Ahas, o Hesekia, lelo aiguanak le Yuda. Etoduaa apa ninye kuna baa naaipirta Samaria o Yerusalem. Entoning intae, intae lo oreren pooki; toning'o na kop, o pooki naatii atua, naa nchoo Olaitoriani Enkai eaku olchakeni tialo intae, Olaitoriani oiro teina aji enye Sinyati. Amu ng'ura, kelotu Olaitoriani aipang'u teine wueji enye, nedou alotu aituny iwuejitin neeika e nkop. Neshola ildoinyo tiabori ninye, neaku ierat iwululuni, netiu anaa suut te dukuya enkima, netiu anaa nkariak naatubukokoki enegut. Ore ena pooki naa te nkaraki enkitapong'oto e Yakobo, o ng'ok e nkaji e Israel. Kainyoo enkitapong'oto e Yakobo? Aime Samaria? Naa kainyoo eng'oki e nkaji e Yuda? Aime Yerusalem? Ore enkaraki ina kaitaa nanu Samaria osototi te nkop naisiaja, ewueji neunieki isabibu; naa kabukoki nanu isoito lenyena atua oearata, nanuk ilkitamanyunot lenyena. Ore nena kitanyaanyukot enyena oo nkaitin neidong'i aaitaa mbelibelat, ore nena tokitin e marmalisho nepejori te nkima. Ore nena kitanyaanyukot enyena oo nkaitin neirrag te mijoonisho. Amu too mpisai e mulayoi etasotuo ninye ninche, naa nena pisai e mulayoi errinyokino ninye. Ore te nkaraki ena kayietu nanu aishir; kalo nanu ara olmasipai maishopo; kaitayu nanu enkishirata anaa mbariak, naishir anaa isidan. Amu meishiunoyu olbae lenye neewuo Yuda, etabawua kishomi oo ltung'ana laainei, eewuo Yerusalem. Milimu ena te Gat minchir aitasim ore tiatua Betlefara mperiperayu te nterit. Eima enkoitoi inyi iloomanya Shafir, te masipaisho o te nkurruna; mepuonu lelo oomanya Saanan emipuonu aaipang'u; Ore enkishirata e Betesel naa kaiwuang'ie te iyie enkitashoto enye. Amu ore lelo oomanya Marot neanyisho te yieunoto oleng amu etoduaa entorroni eing'uaa Olaitoriani nelotu nchomito e Yerusalem. Enteen ingarrin oo mbartan iloomanya Lakish; intae apa enkiterunoto oo ng'ok nirikokiki entito e Sion, amu tiatua iyie enotoki inkitarruorrot e Isirael. Ore enkaraki ina ilo iyie aisho nkishorot ole sere Moreshetgat; ore nkajijik e Akisib naa keaku entoki nalejisho, too laiguanak le Israel. Kaigil nanu ayau oloisulie shumata intae, iloomanya Maresha; ore enkitoo oo Siraeli nelotu Adulam. Entukur ilukuny inyi nibarnibarna ilpapit linyi, te nkaraki nena kera e ng'ida inyi; nchoo esipayu ilukuny inyi, anaa ilkurragoso, amu kepuo nkera inyi eyararoto. Woi ninche lelo ooipiru entorroni neas entorroni too rruatin enye! Ore ake pee ekenyu neas ina naiguanutua, amu engolon oo nkaik enye etii. Eng'uar ninche nkurman neya ninche; neng'uar nkajijik neya ninche; eibooki ninche oltung'ani enkop o enkaji enye, o ltung'ani o enjung'ore enye. Ore enkaraki ina nji ejo Olaitoriani: Ng'ura kagilunore nanu ele marei aipiru entorroni ometaa mindimidimi aaibelekenya imurto inyi. Nimintokiki aapuo te nkitokoos amu keaku enkata e ntorroni. Ore teina olong nerany ninche osinkolio le nkitumusumuset te nkaraki iyie, neishir ninche te nkishirata e mion ejo, “Eidaikieki iyiook katukul, eibelekenya ninye erubata oo ltung'ana laainei; eiwuang'ie ninye te nanu! Tiatua lelo ootaraitie iyiook etooro ninye nkurman ang.” Ore enkaraki ina mintoki aata hoo obo onang'aa enkopito te oshoto e nkukuo, tiatua eumata o Laitoriani. “Mintoki naa alimu irorei le naibon.” Ejo ninche elimu ilomon, “Meishiaakino nelimu oltung'ani ilomon le kuna baa; meinepu iyiook esulare.” Keimakini ena na aji e Yakobo? Aimeeta Enkiyang'et o Laitoriani eng'iriata? Ke nkiaasin enyena kuna? Aimeeta enaitaas irorei laainei ilo olo too sipat? Kake itudumakine iyie iltung'ana laainei anaa olmang'atinta; nioru olkila ilo oata eseriani, lelo oopuo eisiligayu lelo lemeeta ndamunot o larrabal. Ore nkituaak oo ltung'ana laainei, niaraa boo, aitung'uaa ninche nkajijik enye sidain, nintung'uaa ninche nkera enye kutiti, nintung'uaa enkitoo ai ntarasi. Tudumunye shomo amu mme ewueji neyeng'iyeng'areki ene, te nkaraki olduruk omutisho, te nkidaaroto torrono. Tenelo oltung'ani airo mbaa e nkijape o elejare, ejo, “Kaaliki nanu iyie ilomon le naisho oo sabibu o enaisho napi?” Neidim ninye ataa olalikioroni lele orere! Esipa kalo nanu aiturrur intae Yakobo, kaiturrur nanu ilo pisiai loo Siraeli kapik nanu ninche te nebo anaa eluaata nabo, anaa ntare te ndaata te nkilepilep olorora loo ltung'ana. Ore ilo obol elusie, neituruk alo te dukuya ninche, nepuo ninche aaim kishomi, neipang auluo aaim ine. Olaiguanani lenye nelo dukuya ninche, Olaitoriani otii endukuya enye. Atejo nanu: entoning intae ilukuny e Yakobo o larikok le nkaji e Israel! Aimeishiaakino intae niyiolouu esipata, intae ilooiba esupatisho ninyorrinyorro entorroni, intae ilooyieng iltung'ana laainei, nirishushu nkiri enye too loik lenye intae ilooinos nkiri oo ltung'ana laainei, nenang'aa ilonito lenye aaidie ninche, nigiligili iloik lenye aaitaa ng'iligilat, nigiligil anaa iloik oopiki emoti, netiu anaa nkiri naatii emoti. Neitoki ninche aaishiraki Olaitoriani, kake mewaliki ninye ninche; eisudoo ninye enkomom enye te ninche teina rishata, enkaraki naitaa ninche nkiaasin enye torrok. Nji ejo Olaitoriani tialo lelo oibonok ooitapong'oo iltung'ana laainei. Lelo ooishir aajo, “Eseriani” ina kata eeta ninche endaa nainos, neitayu olarrabal te ilo lemeeta endaa naisho meinosa. Ore enkaraki ina, kemutu te ntae nimintokiki aata nduaat nemisimisu te ntae nimintokiki aata nkitumusumusot. Kedoyio enkolong too loibonok, neman emisimisi ninche; ore lelo aduaak netusulaki, neitukurruni lelo aitumusumusok; kepuo pooki aaiken nkutukie enye, amu metii ewalata naing'uaa Enkai. Kake ore nanu, aaiputa engolon, o enkiyang'et o Laitoriani, te sipata o te nkidimata, pee aibalakinye Yakobo enkitapong'oto enye, naibalekinye Israel eng'oki enye. Entoning ena, intae ilarikok le nkaji e Israel, intae ooibooyo esipata, nimbelekenyenye enkiguana nasipa. Ilo oshet Sion to sarge neshet Yerusalem te ntorroni. Edung ilarikok lenye enkiguana te ropare, neiteng'enisho ilapolosak lenye te laakinoto, neibonisho iloibonok lenye too ropiyiani; eji neigarakino ake sii Olaitoriani ejo, “Aimetii Olaitoriani atua iyiook? Meetae entorroni nalotu shumata iyiook.” Ore naa te nkaraki iyie kepuoi aatur Sion anaa enkurma; keaku Yerusalem osototi le nkidaata; neaku ilo doinyo le nkaji entim. Ore too nkolong'i e siadi, ore ilo doinyo le nkaji o Laitoriani neitasheyieki anaa oldoinyo ooado aisul neilepieki aaitulusoo too ldoinyo nepuo iltung'ana kumok ine. Naa kepuonu iloshon kumok nejo: “Wootu mailepa aapuo oldoinyo lo Laitoriani, maape enkaji e Nkai e Yakobo; pee etum ninye aiteng'ena iyiook nkoitoi enyena, nikipuo iyiook too rrekiei lenyena.” Amu Sion epukunye enkitanapata, neing'uaa ororei lo Laitoriani Yerusalem. Keiguanare ninye iloreren kumok nedung'oki enkiguana iloshon oogol oo lakua; neidong ninche ilalema lenye aaitaa ntokitin naaturishoreki neitaa iremeta enye ntokitin naasilieki enkurma; nemeitoki olosho adumaki olosho olalem, nemeigil aekata aaitamok ate olarrabal. Kake kelo ake pooki tung'ani oton tiabori osabibu lenye o tiabori olng'aboli lenye, nemeetae oloiture ninche; amu enkutuk o Laitoriani loo lororani nairoro. Amu epuoito iltung'ana pooki, oltung'ani ake te nkarna e Nkai enye. Kake eikipuo iyiook te nkarna o Laitoriani Enkai ang ntarasi o ntarasi. Ore kenya teina olong Olaitoriani ojo, naa kalo nanu aiturrur ilmaiman, naiturrur lelo apa ootarayioki o lelo apa laaisilisilo. Ore lelo maiman naitaa nanu olpisiai oleku; ore lelo apa ooiturrayioki, naitaa olorere ogol; nelo Olaitoriani aitore ninche to ldoinyo le Sion; ebaiki ena kata o ntarasi. Naa ore iyie lo talet loo ntare, na doinyo e ntito e Sion iyie kenya epukunye, iyie epukunye enkitoria nalotu, ina kitoria e ntito e Yerusalem. Kainyoo naa pee inchir abuaku? Aimetii olaiguanani atua iyie keidaa olautaroni lino, eji metaa kitijing'a emion anaa enkitok nasaisai? Temerregelayu ning'or aishir, na tito e Sion, anaa enkitok nasaisai; amu ore taata naa ilo aing'uaa ena anasa, nilo abik teina kop naisiaja ilo iyie Babilon. Naa teine kipuoi aakordu, teine kilo Olaitoriani alaku iyie aitung'uaa nkaik oo lmang'ati linono. Eiturrurrote taata iloshon kumok, pee kigilunore iyie ejo, “Nchoo ninye eisarkionieki, naa nchoo nkonyek ang eing'or Sion.” Kake meyiolo ninche ndamunot o Laitoriani, mening'u ninche nkitobirat enyena nchere eiturrurro ninche anaa suut to lkurroto oidong'ishoreki. Tudumunye ndong'o ninche na tito e Sion, amu kaitaa nanu emowuo ino esekenkei, naitaa iloisotok linono osuyai; iar iyie iloreren kumok aitaa mpurdat, ore imasaa enye nintisinyaki Olaitoriani. Ore enkarsisisho enye nintisinyaki Olaitoriani le nkop pooki. Eitamanaki intae esuntai, etamanaki iyiook aamuat to ngudi etoosho ninche eseder o Laitoriani le Israel. Kake ore iyie Betlehem Efrata, iyie ora kiti too lgilat le Yuda, iyie epukunye ilo olotu te nkaraki nanu, ilo olo aaku Olaitoriani loo Siraeli; ilo laa ore enkiterunoto enye naa e niopa, ebaiki nkolong'i e moitie. Ore enkaraki ina, kepalaa ninye ninche ometabau ina kata, pee eiu ina nanuta ninye, netum taa ilalashera lenyena pooki aatorrinyokinoto iltung'ana le Israel. Naa keitashe ninye aitoti nkerra enyena te ngolon o Laitoriani te nkitoo e nkarna o Laitoriani Enkai enye. Naa kelo ninye ayau eseriani. Pee kitum iyiook aatudumakinoto ninye ilchekuti oopishana, o ltung'ana isiet kituaak loo ltung'ana. Kepuo ninche aaitore enkop e Asiria to lalem, neitore enkop e Nimrod te nchutati o lalem; naa kepuo ninche aakordu iyiook too le Siria, tenepuonu ninche enkop ang nepuonu aaituny ilpolosien lang. Netum taa ilo pisiai le Yakobo atijing'a empolos oo ltung'ana kumok, anaa enkoiliolio naing'uaa Olaitoriani, anaa enchan nashaiki nkujit nemeanyu iltung'ana anaa nkera e tung'ana. Naa kelo ilo pisiai le Yakobo aaku tenebo iloshon, nejing empolos oo ltung'ana kumok netiu anaa olng'atuny otii atua ing'uesi e ntim, anaa olkuoo lo lng'atuny oti atua eluaata oo nkerra, naa teneimaa atua nenang'ie enkop; neitaa ndung'udung'ot, nemeetae olokordu. Kepuoi aailepie enkaina ino te shumata ilmang'ati linono, ore ilmang'ati linono pooki naa keiwuang'ieki. Ore kenya teina olong Olaitoriani ojo, naa kaiwuang'ie nanu mbartan inyi aitung'uaa intae, naidaikie ngarrin inyi oo mbartan; naa kaiwuang'ie nanu nena anas e nkop inyi nauroo lelo sempewueti linyi pooki; naiwuang'ie nanu esakutore te nkop inyi, niming'iligili aekata aata esakutore. Naa kaiwuang'ie nanu nkitanyaanyukot inyi, naiwuang'ie ng'apeta inyi te ntae, niming'iligili intae aairrugokino esiaai oo nkaik inyi; naa kadotu nanu Asherim inyi aiwuang'ie tiatua intae naidaikie nkanas inyi. Naa ore te ngoro o te ngoro napi naitalaku elap, te lelo oshon leitu ening'isho. Toning'o enajo Olaitoriani: “Tudumunye, tasaisho te dukuya ildoinyo, nincho ndoinyo metoning'o oltoilo lino. Entoning intae lo doinyo, enchankar o Laitoriani, o ntae ilkitamanyunot oo bikoo te nkop; amu eeta Olaitoriani enchankar o ltung'ana lenyena, naa kelo ninye aitang'or Israel. “Lo tung'ana laainei, kaa nanu aitaasa intae? Kainyoo nanu aitanaurie intae? Entawalikiaki nanu! Amu ayawua nanu intae ailepunye te nkop e Misiri, nalaku intae te nkaji e sinkaisho; nairriu nanu Musa meshomo te dukuya intae, o Aron, o Miriam. Lo tung'ana laainei, entadamu ina apa naipirua Balak olaiguanani le Moab, o ina natawalikia Balaam olayioni le Boer ninye, o ina nataasa ebaiki Shitim o metabaiki Gilgal pee itumutumu aatayiolo iasat naaitajeusho o Laitoriani. “Kainyoo nanu ayau dukuya Olaitoriani, nalotu airrugo te dukuya Enkai natii shumata aisul? Kalotu nanu dukuya ninye oo lasarri oopejori too lasho lo lari obo? Keitiship Olaitoriani ilmeregeshi enkalifu nabo, o lkejek enkalifu nabo le ilata? Kaishooyo nanu olkikau lai te nkaraki nkitarruorrot aainei, ilo ng'anayioi lo sesen lai te nkaraki eng'oki o ltau lai?” Kintoduaa ninye iyie lo tung'ani embae sidai o ina nayieu Olaitoriani te iyie, pee ias esipata ninyorru isupati nilo te mborron tenebo Enkai ino? Eishiraki oltoilo lo Laitoriani enkanasa naa eng'eno nagut teneurei enkarna enye: “Toning'o lo osho o eumata ena anasa. Ilchumat le nkarrueisho tiatua enkaji o larruoni, o ina temet natii elejare naata oldeket? Kapalaa nanu oltung'ani oata entemet naineneng'ishoreki e lejare o lbene otii isoito ooineneng'ishoreki le lejare? Eeta ilkarsisi linono olarrabal; neiro lelo le nkop ino elejare, neeta ilng'ejepa lenye elejare. Ore enkaraki ina, aaiterua nanu aosh iyie, naitomijoon te nkaraki ing'ok inono. Ilo iyie adaa nimiraposho naa kelo olameyu atii iwuejitin inono e atua. Inteng'el iyie kake mintagol, ore ina ninteng'el nemeaku. Ore ina nisudoo aiteng'el naisho nanu metara olalem. “Iun iyie kake misampu; iramat iyie iloirienito kake mielare eilata enye; Irony iyie isabibu, kake miok enaisho enye. Amu imbung'a iyie nkikoot e Omri, o siaaitin pooki e nkaji e Ahab; nimbung'a iyie nkikoot enye, pee aatum nanu aitaa iyie olmuaate naitaa emanyisho ino entoki naimakini; neaku inap iyie esukeny oo ltung'ana.” Woi nanu, amu atotiwuo anaa enkata naiturrurri ilng'anayio le nkata e nkirowuaj anaa enkata naisampuni isabibu, eitu eleku toki naidimi aainosa meetae nkimarrimarrat oo lng'abolo le nkiterata ooshipakino oltau lai. Eidaayie oltung'ani le Nkai te nkop, nemeetae oltung'ani supat too ltung'ana eirragita pooki aanyu embukoroto o sarge, nerresh ake pooki tung'ani olalashe to rreshet. Etii nkaik enye shumata entorroni, pee eas te nkarriyiano, eikilikuanu olkitok o ladung'oni le nkiguana eropare, ore oltung'ani kitok neimaiki ntorrok naang'uar oltau lenye; nena ninche eas tenebo. Ore ilo supat aisul te ninche netiu anaa enkaitubului, ore ilo lenye oji olasipani netiu anaa olpaashe loo lkiku. Etabawua enkata oo larripok lenye le nkitamioto enye. Etataana taata olmilo lenye. Mipik osiligi lino ole latia, niming'arakino olchore; torripo enkutuk ino teina nikilej etii olgoo lino; amu keitaas olayioni menye mbaa e sulare, nedumakino entito ng'otonye, nedumakino entito nayamaki enkaputani; ore ilmang'ati lo ltung'ani naa lelo le nkaji enye makewan. Kake ore nanu, kaing'or Olaitoriani naanyu nanu Enkai e njeunoto ai; kaaning nanu Enkai ai. Mikishipakino nanu, lo mang'atinta lai; tenabatata nanu naa kadumunye; tenaton nanu te naimin, neaku Olaitoriani ewang'an te nkaraki nanu. Kang'iri nanu engoro o Laitoriani, amu ataasa nanu eng'oki tialo ninye, ometaba anaa naamitu ninye, naadung'oki ninye nanu enkiguana. Kaayau ninye nanu enetii ewang'an naa kaing'or nanu enkordunoto enye. Nedol taa olmang'atinta lai, neiput enkurruna teina naatiaaka nanu, “Koree Olaitoriani Enkai ino?” Neing'or nkonyek aainei ninye; naa kepuoi aaitunyoki ninye enkop, anaa esarng'ab e nkoitoi. Enkolong nashetieki isunta inono! Ore teina olong naa kepuoi aaitalala ilpolosien aaponaa. Ore teina olong naa kepuonu enitii eing'uaa Asiria o metabaiki Misiri, o ebaiki enaiposha ometabaiki enaiposha, o ebaiki oldoinyo ometabaiki oldoinyo. Kake keaku enkop mijooni te lelo oo manya, te nkaraki ilng'anayio loo nkiaasin enye. Taramata iltung'ana linono te ng'udi ino, ina luaata e njung'ore ino. Oobik maate tiatua entim, te mpolos e nkurma eina kop. Nchoo ninche edaa te Bashan o te Gilead, anaa apa too nkolong'i e apa. Anaa apa too napa olong'i nitupukunye te Misiri, kaitodol nanu ninche mbaa e nking'asia. Kedol iloshon nekurru te nkidimata enye pooki; neibung ninche nkutukie enye too nkaik, neming'anu nkiyiaa enye; nemej ninche enterit anaa olasurai, anaa nkeenta e nkop; nepuonu ninche eikirikira eing'uaa isempewueti lenye; neibelekenyakino ninche to lkirutoto Olaitoriani Enkai ang, neureishoyu ninche te nkaraki iyie. Kaa Ai natiu anaa iyie, apalaki ntorrok, negiroo nkitarruorrot te nkaraki olpisiai le njung'ore enye? Meibung ninye engoro enye ntarasi amu keshipakino ninye enyorrata nauno. Keig'il ninye atum olng'ur te nkaraki iyiook, neitunyoo ninye ntorrok ang too nkejek enyena. Inturraa iyie ing'ok ang, anang'aki enguton e naiposha. Intodolu iyie esupatisho o enkisiligata te Yakobo, nintodolu enyorrata nauno te Abraham anaa apa eninosa olmumai too loo papa ebaiki nkolong'i e moitie. Olkilikuai ele oipirta Ninawi. Embuku ena oo nduaat e Nahum le Elkosh. Ore Olaitoriani naa Enkai o lom neitalaku elap, eitalaku Olaitoriani elap neeta engoro napi, eitalaku Olaitoriani elap too lmang'ati lenyena, negorokino ilmang'ati lenyena. Mesioki Olaitoriani agoro neeta enkidimata kitok, nemeeta kata nemeitalaku Olaitoriani entorroni. Ore enkoitoi enye naa olkutati o siwuo, ore nkatampo naa enterit oo nkejek enyena. Eisikong ninye enaiposha neitoi, eitoi ninye ilkejek pooki neitoi Bashan o Karmel, ore ina kishiaa e sikar e Lebanon netoyu. Eikirikira ildoinyo te dukuya ninye, neshola ndoinyo; neirrag enkop eitomijoonoki te dukuya ninye, o enkop o pooki namanya atua ninye. Kaing'ae oidim aitasho te dukuya engoro enye? Kaing'ae oidim ating'iria enkirowuaj e ngoro enye? Etubukuoki engoro enye napi anaa enkima, netebelaki ndapidapo aaidapash te dukuya ninye. Aisupat Olaitoriani osempewuet ninye te nkolong e nyamali; eyiolo ninye lelo oosaru ninye. Kake to loirrag le nkare nadooyo eishie ninye tukul ilmang'ati lenyena, nemir ilmang'ati lenyena amiraki enaimin. Kainyoo iyie irreshie Olaitoriani? Eikindaikie ninye iyie, meetae hoo obo ogilunore ninye katitin are. Kemuti ninche anaa orrarrati loo lkiku, anaa olkujita otoyio. Keitu elotu obo oing'uaa atua iyie, oitobira entorroni tiaalo Olaitoriani, oiguanu mbaa torrok? Nji ejo Olaitoriani, “Ore hoo negol ninche naa kumok keiwuang'ieki ninche neitarasari. Ore hoo naaisilisilo nanu iyie maaigil nanu aisilisil iyie. Kagil taata nanu enchata enye oo murto aiwuang'ie te iyie nadung inkeenta nikiteenieki iyie aidapash.” Eishorua Olaitoriani enkitanapata nikimpirta iyie: “Meigili aekata aadumu enkarna ino; kaiwuang'ie nanu te nkaji oo nkaitin inono, kitanyaanyukoto e nkai naguetuno oina nasholuno. Kaitobir nanu enkurare ino amu ira iyie arruoni.” Ng'ura roruat enyena too ldoinyo, eilo oyau ilomon supati, ilo olimu eseriani! Imbung'a isiruai linono iyie, Yuda, intabai ilmuma linono, amu mikingil aekata olarruoni agilunore iyie, eiwuang'ieki ninye tukul. Kiewuo olainyalani arasaki iyie, intagolo iltimito, ing'ura enkoitoi terretena empolos ino; enturrurro engolon inyi pooki. (Amu kerrinyu Olaitoriani enkishiaa e nkitoo e Yakobo. Anaa enkishiaa e nkitoo e Israel, amu eibung'a apa ilainyalak ninche, neinyal ilngosil lenye.) Ore ina long'o oo ltung'ana lenye magil naa kenyokie, neishopito isikarini lenye nkilani pilei neiwuang ngarrin enyena oo mbartan anaa olng'ejep le nkima, teneipotuni olarrabal neitureisho lelo ookuetu. Neruko ngarrin oo mbartan too nkoitoi e nkanasa nepuo idia alo neitu ena alo too wuejitin neetumoreki e nkanasa. Neiwuang'u te nkimerlel anaa sitimani, neimerlel anaa nkiwuang'at e nchan. Neipotuni lelo kituaak, nerrorro ninche epuoito, nekuetiki ninche esuntai, neidipaki aaitolok iloketa. Etaboloki nkishomin o lkeju neiputa enkaji e nkitoo enkuretisho. Ore ina aiguanani enye, etooruoki ilkilani, etanapaki aaya, neishirita nkaisiayak enyena neishir anaa nturkuluoni, neoshiosh ilgooitie lenye. Eikununo Ninawi anaa olchorro oruko enkare enye neishir ninche aajo, “Ntasho! Ntasho!” Kake meetae olorrinyunye. Ewaita enkosholai ewaita sahabu, meeta olchumati eneiting'ie anaa karsisisho e pooki toki e tipat. Olmuate! Emijoonisho o enkidaata! Etalepori iltauja, neikirikira nkejek, eiputa olkirutoto mpolosi enye pooki, neipusita nkomomi enye pooki! Koree enkapune oo lng'atunyo ina apune oo lkuoo loo lng'atunyo ine neyau olng'atuny engues natara, ine netii nkiyioitin enyena nemeeta entoki naitanyamal? Eibung'a olng'atuny engues nainos neyiataa ina ngues neyaki ilkuoo lenyena, negor ina meinosa iliponga enyena. Neiput enkapune enye inguesi naatara ninye neiput isanagi lenyena nkiri. Ng'ura kaagilunore nanu iyie, Olaitoriani loo lororani ojo, naa kapejoo ngarrin inono oo mbartan te mpuruo nemut olalem lelo ng'atunyo linono ooti; Kaiwuang'ie nanu nena ng'uesi inono te nkop. Nemeigili aekata aaning oltoilo loo lkiliku linono. Woi ena anasa o sarge ebore elejare o enkisima nemeiting aekata eyararoto enye. Entoning endarata e oshoto enkeene, o ltoilo loo nkejek oo ngarrin enkuetata oo mbartan o elototo oo ngarrin oo mbartan! Ekuetu ilakedok loo mbartan, eimerlel ilalema neiwuang'u iremeta, olorora olo aye osototi loo mpopoki. Meeta eneiting'ie mpopoki enye nerrorro ninche te nena popoki enye! Te nkaraki ina kibor oo nkonyek eina mulayoi, ina kitok nasakutisho naata esulare, ina nakaldaa iloshon enkibor enye oo nkonyek, nekaldaa iloreren too ntaleng'o enyena. Ng'ura kaagilunore nanu iyie, Olaitoriani loo lororani ojo, naa kadumu nanu olkila lino lirrotianita apik enkomom ino, naisho nanu iloshon metoduaa emasipaisho ino, nedol nkitoriat enkurruna ino. Kaairriwaki nanu iyie olduruk naaitaas iyie mbaa e sulare, naitaa entoki torrono naing'asiakinoi. Ore lelo pooki liking'or iyie, nikilam ejo, “Etumute Ninawi; kaing'ae naishiraki ninye? Kaji nanu atumie iltung'ana ooitagol ninye?” Ira supat alang Tebes, apa natotona te mbata Nail, neman enkare ninye, anaa enaiposha esuntai olpaashe lenye? Etiopia apa engolon enye o Misiri, nemeeta engolon enye enkiting'oto; Ilaretok lenyena apa ile Libia. Ore ake eyia etarayioki ninye neyae, eshomo ninye eyararoto, ore nkera enyena neitaaki ndung'udung'ot, te nkiterunoto e pooki oitoi kitok, amu etooshoki enkukuo oo ltung'ana lenyena ooyanyiti, ore iltung'ana lenyena pooki kituaak eteenaki too lpisia. Ilo sii iyie amera, ilo sii iyie aisudori, nilo aing'oru, enkisudoroto tenkaraki ilmang'ati. Ore isempewueti linono pooki, neikununo anaa ilng'abolo, ooto ilng'anayio le dukuya teneipiripiri, nerrarrunye, aadoiki enkutuk eilo oinos. Ng'ura ilturrurri linyi ajo nkituaak naatii empolos inyi. Ore nkishomin e nkop inyi naa kebolo aang'a too lmang'ati linyi, einosa enkima isekenke inyi. Entooku enkare enterreten emanata inyi, entagolo isempewueti linyi, enchom atua enterit entunyo esarng'ab, embung'a entobira enkitobirata oo lmatofali. Eikilo enkima ainos teine, eikilo olalem ashurtu eikimut iyie anaa olmaati. Entoponai ate anaa olmaati, entoponari anaa ntargeet! Itoponaiyie ilamirak linono aitulusoo too lakir le shumata. Eisalaash olmaati inaipuko nepuo. Eikununo ilkituaak linono anaa ntargeeti neikununo ilaigerok linono pooki anaa emus o lmaati, neirragita too lpaashen te nkolong e nkirobi ore ake pee eilepu enkolong, nelaari aapuo; meetae oltung'ani oyiolo enetii ninche. Eirura ilairritak linono, lo aiguanani le Asiria; neimug iltung'ana linono kituaak. Eidapashate iltung'ana linono too ldoinyo, nemeetae oloiturrurr ninche. Meetae embaata too lbaa linono, aitorrono oleng olbae lino. Ore lelo pooki ooning mbaa inono, neosh nkaik tenkaraki iyie. Amu kaing'ae eitu ebaiki ina torroni ino nemeish aekata? Olkilikuai lo Laitoriani ele otoduaa oloiboni le Nkai oji Habakuki. Iyie Olaitoriani ke nkata nabaa aishir nanu te nkaraki eretoto, nimining iyie? Aishir nanu ajo olarrabal! Neitu iyie kintajeu? Kainyoo iyie pee kincho nanu matoduaa ntorrok, naing'or enyamali? Etii enkidaata o larrabal dukuya nanu; naatudumakine enyamali o enchankar. Etaa enkitanapata pesho nemeas aekata esipata esiaai amu etamuata iltorrok aaman lelo loo sipat, neaku keibelekenyi esipata. Ing'ura atua iloshon, pee idol; ning'asia nimputukuny. Amu aasita nanu esiaai too nkolong'i inyi, nimindimidimi intae aairuko tenelikini intae. Amu eng'ura, kailepunye nanu Ilkaldayo ilo osho odua neisosion, nelo aibulu enkop pooki, nepuonu aaya imanyishoritin neme nkunenye. Iltung'ana ooitureisho ninche; ore isipat enye o nkiguanat enye naa ninche maate epukunye. Eneneng mbartan enye aalang ilowuarak kerin, nepi aalang isuyian le nteipa; ore lakedok lenye loo mbartan nenyok oleng to lwuasa. Ee enelakua eing'uaa lakedok lenye loo mbartan, nepuo tiai anaa olkurragos oipirri alo ainos eng'ues. Eetuo pooki te nkaraki olarrabal; ore olkirutoto te nkaraki ninche nelo te dukuya ninche. Neiturrur ninche iyarunot anaa osinyai. Ore te dukuya ilaiguanak nesukenyisho ninche. Ore ilaitoriak neiguranie ninche. Ekueniyie ninche pooki sempewuet, amu kerup ninche enterit neya ine. Nepuo ninche neor, enkop epuo anaa olkutati, aapuo ninche eeta entioto, kulo tung'ana ooitaa engolon enye enkai enye. Aimira iyie oloo ntarasi, iyie Olaitoriani Enkai ai lo Sinyati lai? Mikiye iyiook, Olaitoriani itegelua iyie ninche aitaa iladung'ok le nkiguana; ore iyie na dapidapoi, nintasheyie ninche pee eitameisho. Iyie oloata nkonyek sidain nemeidim aaing'ura entorroni nemeidim aaing'ura enkarruoisho, kainyoo iyie pee ing'or iltung'ana lemeisiligayu, nintirring'a iyie eijoo ilarruok, lelo supati aalang ninche. Amu ntotiu iyie iltung'ana anaa sinkir le naiposha, anaa nena tokitin naaikurtutari nemeeta oloitore. Eyau ninye ninche pooki to ltarge, neyietu ninche pooki to rreshet neiturrur ninche to rreshet lenye sapuk; netum taa atishipayu neitokoos. Ore enkaraki ina eitayio ninye olasar te nkaraki orreshet lenye, nepej enkorropil te nkaraki orreshet lenye sapuk; amu te nkaraki ninche pee eishu ninye te sikar, nepir endaa enye. Keitayu ninye lelo ootii orreshet lenye, near ninye iloshon metuata nemeing'urrie ntarasi? Kaitashe nanu te rishata ai arripisho. Naton nanu to ltalet orripishoreki naing'orisho nanu, pee adol ina naajoki ninye nanu, o ina nawalu nanu tialo enking'unyung'uny ai. Naawaliki nanu Olaitoriani ejo, “Ngero ena duaata; ngero mbalie too soito dapashi, pee etum akueta ilo oisum. Amu eton ake eanyu enduaata enkata enye; kesieku ninye alotu erishata enye - nemelejisho ninye. Tenelioo ninye aa yietut, taanyu ninye, esipa kelotu ninye, meimutie ninye. Ng'ura, ore ilo leme sidai oltau lenye, nemetum puan, kake ore ilo asipani eishu te nkirukoto.” Ore ake sii enkalejani enaisho; mebikoo ilo tung'ani oitokoos nelala olorok lenye eba anaa enemeneng'a; etiu anaa keeya meraposho ae kata. Eiturrurroki ninye kewan iloshon pooki neiturrur iloreren pooki anaa iltung'ana lenyena makewan. Aimeibelekenyakino kulo pooki ninye, neitalaku elap, nesukeny ninye ejo, “Woi ninye ilo osot ntokitin neme nkunenyena - ae te nkata nabaa ilo asotoki kewan elaakinoto oo silen.” Aimedumunye lelo lintalak isilen nabo kata, ore lelo oodumunye nikinkirikirie iyie? Nilo iyie aaku oloyaruno te ninche. Ore enkaraki nimbung'a araya iloshon kumok, eikimbung iyie aaraya ilo pisiai oleku loo ltung'ana te nkaraki osarge loo ltung'ana o larrabal te nkop, too nkanas e lelo pooki oomanya atua. Woi ninye ilo otum tumoto e ntorroni te nkaji enye, ilo oilepunye orreshet lenye, pee medoiki entorroni! Mpiraka iyie enkaji ino enkurruna, ore teine niwuang'ie iloreren kumok ninturrayie enkishui ino makewan. Amu keishir osoit te suntai, neng'amaa iloom. Woi ninye ilo oshetu enkang to sarge, neitayu enkanasa te ntorroni. Ng'ura mme Olaitoriani loo lororani eing'uaa, nchere pee easisho iltung'ana te nkaraki enkima, neitanaur ilosho ate te mpesho? Amu keyookini aaiput enkop, te ng'eno e nkitoo o Laitoriani, anaa enaibulua enkare enaiposha. Woi ninye ilo oitook ile latia enye, enkikompe e ngoro enye, neitemer ninche, pee etum atishila enkurruna enye! Eikipuoi iyie aaishopoki esulare te rishata e nkitoo, tookisho iyie, niesiesari. Ore enkikompe natii enkaina e tatene o Laitoriani, naa keitamanuni aayau enitii, nelotu enkurruna shumata ekitoo ino! Ore olarrabal oitayioki te Lebanon naa eikimisie iyie; Ore enkidaata oo ng'uesi naa eikirutie iyie, te nkaraki ilo sarge loo ltung'ana o larrabal te nkop, nejing'aki nkanas o lelo pooki oomanya atua. Kaa dupoto eeta enkitanyaanyukoto e nkai, teneidip olaitobirani lenye aitobiru, enkitanyaanyukoto e nkai e sekenkei, olaiteng'enani le lejare? Amu keisilig oloasisho ina kitobirunoto naitobirua ninye, nemeitobiru ninye nkitanyaanyukot nemeiro! Woi ninye ilo ojoki enchata, inyo; nejoki osoit lemeiro, tudumunye! Ng'ura etumuraki ninye te sahabu o te nkosholai, kake metii enkiyang'et tukul atua ninye. Kake etii Olaitoriani atua enkaji enye Sinyati; nchoo enkop pooki eitirring'a te dukuya ninye. Enkomono ena e Habakuki oloiboni le Nkai, te risioroto e Shiginot. Iyie Olaitoriani, atoning'o nanu mbaa inono, ore esiaai ino, iyie Olaitoriani kaure nanu. Ore te mpolos oo larin intang'ejuko iyie ninye ore te mpolos oo larin nchoo metayiolouni; ore te ngoro, tadamu olng'ur. Na Ai wou te Teman, nelotu ilo obo Sinyati eing'uaa oldoinyo le Paran. Neiput enkitoo shumata, neiput enkop e nkisisa enye. Ore enkimerlel enye netiu anaa ewang'an, neng'orunye ewang'an te nkaina enye; ore teine neimulumul engolon enye. Nelo olbuket te dukuya ninye, nesuju olmeitai ninye etaaniki. Eitashe ninye netem endapasho e nkop; neing'orisho ninye neiposhiposh iloreren, neitokini aaidapash lelo doinyo ootii atua. Ore lelo doinyo loo ntarasi neidapasha ore nena doinyo oo ntarasi nedoyio aaimis. Ore nkoitoi enyena naa iniapa moitie. Atoduaa nanu ilng'oborri le Kushan tiatua emion ore iltung'ana le Midian neikirikira. Itagorokine apa iyie ilkejek iyie Olaitoriani? Itagorokine iyie ilkejek anaa ke naiposha igilunore. Pee itakedo iyie mbartan inono, nena bartan inono e nkishuroto. Itabolo iyie emootian ino, nipik mbaa empito e nkawuo. Imperra iyie enkop apik ilkejek. Kidol iyie ildoinyo neikirikira, nenang'ari nkariak aaruko, ore enguton neitayu oltoilo lenye, nedumu nkaik enyena ailepie. Neitashe enkolong o lapa too wuejitin enye, te wang'an e nkimerlel oo mbaa inono epuo etangoroyioki, o te nkimerlel e ina remet ino naimerlel. Ntunyoyie iyie aimaa enkop te mpushuna, ntunyoyie iyie iloshon te ngoro. Ishomo iyie te nkaraki enjeunoto oo ltung'ana linono, te nkaraki enjeunoto eilo litubukoko eilata aput. Itupurda iyie endukuya eilo arruoni, irragie ninye meishopo ebaiki enkupes o metabaiki emurt. Itangoro iyie too mbaa inono endukuya oo lmurran lenyena, ilo oewuo anaa olkutati aidapash iyiook, neng'ida ninye anaa oloidaikie olaisinani te nkisudoroto. Ntunyo iyie enaiposha too mbartan inono, ine wueji oo nkariak kumok. Atoning'o nanu naikirikira, naaonyo enkutuk, teilo toilo latoning'o. Neng'ueyu iloik laainei tiatua nanu, neikirikira nkejek aainei. Kaitirring'a nanu aanyu enkolong e nyamali, pee elotu shumata lelo oorasaki iyiook. Ore hoo nemeitapuku olng'aboli, nemeiu osabibu ilng'anayio, neimin ilng'anayio lo loirien, nemeiu nkurman endaa, neiwuang'ieki aaishie iluaat oo ntare nemeitoki aatii nchoo nkang'itie. Ore ake eyia, kashipakino nanu Olaitoriani, kang'idakino nanu Enkai e njeunoto ai. Enkai, Olaitoriani ninye engolon ai; neitotiu nkejek aainei anaa ine ntarakuet te neneng'i, naaidimie ninye maimai nchumat oo ldoinyo. Ele rorei lo Laitoriani oewuo enetii Sefania olayioni le Kushi, olayioni le Gedalia, olayioni le Amaria, olayioni le Hesekia, too nkolongi e Yosia ilo ayioni le Amon, olaiguanani le Yuda. “Kajutu nanu tukul pooki toki aiwuang'ie ti oriong enkop,” Olaitoriani ojo. “Kajutu nanu tung'ani o eng'ues; kajutu nanu aiwuang'ie ntaritik o loing'ang'e o sinkir le naiposha. Kanang'aa nanu aiturraa lelo torrok; kaishie nanu iltung'ana, aiwuang'ie ti oriong e nkop,” Olaitoriani ojo. “Kaitorioo nanu enkaina ai aarare Yuda, naarare sii lelo pooki oomanya Yerusalem; naa kaishie nanu aiwuang'ie tene wueji ilo pisiai le Baal o ina arna e lelo apolosak ooserem nkitanyaanyukot; lelo ooirrugokino too nchumat oo nkajijik olorora le shumata; lelo ooirrugo neinosie Olaitoriani olmumai neitoki ake sii aainos olmumai te nkarna e nkai naji Milkom; lelo ooibelekenyate ootapala esujata o Laitoriani, lelo lemeing'oru Olaitoriani anaa eikilikuanishore ninye.” Ntirring'ayu te dukuya olaitoriani Enkai! Amu etataana enkolong o Laitoriani; eitobira Olaitoriani olasar neitisinya ilomon lenyena. Naa ore te ina olong o lasar lo Laitoriani, “Kaitame nanu lelo kituaak o lelo ayiok lo laiguanani o lelo pooki ooishopote too nkilani oo loreren. Ore te ina olong naitame nanu lelo pooki ooseremisho anaa iltung'ana lemeyiolo Enkai lelo oopurrisho near iltung'ana metuata pee etumi aaiputa nkajijik o lkitok lenye iyarunot.” “Ore akenya te ina olong,” Olaitoriani ojo, “naa kening'i olkiyioi teina Kishomi o Sinkirri, eyietunoto e nkishirata naing'uaa Endung'oto e Are, esulunoto kitok too ldoinyo. Enteyietu enchira intae iloomanya Motar! Amu meekure eetae ilbiasharani; ore lelo pooki ooipim enkosholai nedungori aaiwuangie. “Ore akenya te ina olong naa kajur nanu Yerusalem too ltaai, naa kaitame nanu lelo tung'ana ooishiligate te okoto e naisho enye, oojo too ltauja lenye, ‘Meas Olaitoriani esidai nemeas entorrono.’ Kerayae imasaa enye, neitomijooni nkajijik enye. Ore hoo neshet ninche nkajijik memany ninche; ore hoo neun ninche nkurman oo sabibu meok ninche enaisho enye.” Ore ina olong kitok o Laitoriani netinyikua, etinyikua naa kesieku; kedua oltoilo le ina olong o Laitoriani, keyietu aishir oltung'ani magilani te ine. Enkolong e ngoro napi ina olong, enkolong o sina o emion, enkolong e nkidaata o emutata, enkolong e naimin o enkimuntut, enkolong oo nkatampo o enaimin nagut, enkolong e oshoto e ntarumpeta o lkiyioi lo larrabal, egilunore nena anas naasheta isunta negilunore iltaleta lo larrabal. Kayau nanu osina shumata iltung'ana, o metaa kepuo ninche anaa ilmodook, enkaraki nataasa ninche eng'oki ti alo Olaitoriani; keibukori osarge lenye anaa enterit, neikoni inkiri oo seseni lenye anaa emodioi. Mekordu ninche enkosholai enye aashu sahabu enye te ina olong e ngoro o Laitoriani. Ore ti atua enkima e ina goro enye o lom, keinosi aamut enkop pooki; amu te nkiting'oto nara ee enkiting'oto naluamisho keiting'ie ninye asioki lelo pooki oomanya enkop. Wootu enturrurroto entuumata ele osho lemedol enkurruna, eton eitu kirewi anaa nguetat, eton eitu elotu shumata iyie engoro o Laitoriani napi, eton eitu elotu shumata iyie ina olong e ngoro o Laitoriani. Eng'oru Olaitoriani, intae pooki oobor lena kop, lelo ooas nkitanapat enyena; eng'oru esupatisho, eng'oru emborron; eidimayu neisudori intae te ina olong e ngoro o Laitoriani. Amu keing'uari Gasa, naa keaku Ashkelon mijooni; nearari iltung'ana le Ashdod enaipirie enkolong, nedotuni Ekron. Woi intae iloomanya olomanaa le naiposha, intae ilo osho le Kereti! Eipirare intae ororei lo Laitoriani, iyie Kanaan na kop oo Lfilisti; kaidurukie nanu intae o metaa meleku ninye obo. Ore iyie, Loomanaa le naiposha, naa iaku endaata oo ntare, ilokerin loo lchekuti o muatat oo luaat oo ntare. Keaku olomanaa le naiposha ewueji e ilo pisiai otelekua le nkaji e Yuda, naa ninye eirritishore ninche, ore ti atua nkajijik e Askelon neirragie ninche teipa. Amu ore Olaitoriani Enkai enye kedamu ninche neitopok ninche. “Atoning'o nanu imorot e Moab o esukeny oo le Amon, ina natusukenya ninche iltung'ana laainei nerup ate ti alo enkop enye. Neaku ore anaa enaishu nanu,” Olaitoriani loo lororani ojo, Enkai e Israel, “Ketiu Moab anaa Sodom, ore ile Amon netiu anaa Gomora, enkop oo suut o ngumot e munyan, neaku olmuate ntarasi. Ore ilo pisiai otelekua loo ltung'ana laainei neraya ninche, ore ilo pisiai otelekua lo losho lai neya ninche.” Ena eitalakuni te ninche to lwuasa lenye, enkaraki natusukenya nerup ate ti alo iltung'ana lo Laitoriani loo lororani. Kegilunore Olaitoriani ninche; keishie ninye nkaitin pooki e nkop, neaku ninye eirrugokinoi, pooki ake te wueji enye, nkuapi pooki oo loreren. Ore sii intae, ile Etiopia, keari intae to lalem lai. Naa keitorioo ninye enkaina enye aarare moikuape, neidaikie Asiria; neitaa ninye Ninawi olmuate, ewueji netoyio anaa olpurkel. Keirrag iluaat te mpolos enye, ing'uesi pooki e ong'ata; ore olmotonyi o enjolis nemany ilpaashen lenyena; neishiraki emotonyi oo nkiyiaa ilusien enye neru olkurruk tembata e kishomi enye ore nkeek oo lpaashen lenye neitomijooni. Enkanasa naturupa kewan ena apa natobiko te seriani, apa najo ninye makewan, “Nanu ake nemeetae ae.” Ketaa ninye olmuate anaa nyoo, ewueji neirragie ing'uesi e ntim! Ore pooki ng'ae ogiroo ninye neiputukuny nenunuk enkaina enye aikirikirie. Woi ninye ina natogolong'ua neinosieki olminong ina anasa naitorogonyisho! Mening ninye hoo likae toilo, meng'amaa ninye ererioroto enkikoo. Meisilig ninye Olaitoriani, menyikaki ninye Enkai enye. Ore lelo kituaak lenyena ootii atua naa ilng'atunyo ooipur; ore ilarishak lenyena naa isuyian le nteipa lelo lemeing'uaa toki o mekenyu. Pesho iloibonok lenyena, iltung'ana lemeeta enkirukoto; ore ilapolosak lenyena neisarkionie ina sinyati, neinyala ninche nkitanapat. Ore Olaitoriani otii atua ninye naa kaasipani, meitarruoo ninye; ore anaake tadekenya neitodolu ninye esupatisho e nkiguana enye, ore anaake ekenyu melai; kake ore lelo torrok nemeyiolo aatodol enkurruna. “Aiwuang'ie nanu iloshon; eidaa nkanas enye; aitomijoono nanu nkoitoi enye e nkanasa o metaa melo hoo ng'ae aim ninche; eitaaki nkanas enye ilmuateni, nemetii oltung'ani, nemetii olomanya. Atejo nanu, ‘Esipa kaaureyu ninye, keng'amu ninye enkikoo; merikino ninye nena pooki naitanapa nanu ninye.’ Kake etoponari ninche aayieu neitarruoo nkiasin enye.” “Metaa entaanyuaki nanu,” Olaitoriani ojo, “te ina olong nadumunye nanu ara olchakeni. Amu ore enatudung'o nanu naa pee aiturrur nkuapi, pee aum nkitoriat, nabukoki ninche engoro ai, ina kirowuaj pooki e ngoro ai; amu te ina kima e ngoro o lom lai emuti enkop pooki. “Ee, te ina kata kenya aibelekeny nanu nkirorot oo ltung'ana, aitaa nkirorot sidain, pee etum ninche pooki aaipoto enkarna o Laitoriani, neisiaai ninye to ltau obo. Ebaiki te idia alo ilkejek le Etiopia aayaki nanu lelo laasai nkishorot, ina tito oo looidapashari laainei. “Ore akenya te ina olong nimikintukurruni iyie te nkaraki nena kiasin nikitogolong'aka nanu; amu kaiwuang'ie nanu te ina kata te mpolos inyi lelo linyi oowuasa oorup ate, nimintoki iyie awuasa te ilo doinyo lai sinyati. Amu kaleku nanu ti atua iyie iltung'ana supati oobor. Naa keing'oru ninche enkisudoroto te nkarna o Laitoriani, ore lelo ootelekuaki te Israel; nemeas ninche entorroni nemeiro elejare, nemetumi too nkutukie enye olng'ejep le lejare. Amu kedaa ninche neirrag nemeetae oloiture ninche.” Tabuaku taranya, na tito e Sion; tabuaku Israel! Ting'idayu nishipayu to ltau lino pooki, na tito e Yerusalem! Eiwuang'ie Olaitoriani nena dungokinot e nkiguana ti alo iyie, etaarayie ninye ilmang'ati linono. Ilo aiguanani le Israel, Olaitoriani ninye otii empolos inyi; mingil ae kata iyie aureyu entorroni. Ore akenya te ina olong naa keji te Yerusalem: “Miureshoyu iyie Sion; mincho nkaik inono elepori. Olaitoriani, Enkai ino, otii empolos ino, olmurrani oishoru enkishuroto; eikishipakino ninye iyie te nchipai, eikintang'ejuk ninye iyie te nyorrata enye kepik ninye shumata iyie embuakunoto o sinkolio anaa te nkolong o sirua. Kaiwuang'ie nanu osina te iyie, pee mitum iyie esulare te ninye. Ng'ura, ore akenya te ina kata naa Kagilunore nanu lelo likintorogony pooki. Naa kaitajeu nanu lelo maiman naiturrurru lelo ooidapashari, naibelekeny nanu enkurruna enye metaa errepet neyiolouni ti atua enkop pooki. Ore akenya te ina kata naa kayau nanu intae ang, te ina kata naiturrur nanu intae te nebo; ee, kaisho nanu metayiolouni intae nerrepi ti atua iloreren pooki le nkop, te ina kata nalo nanu arrinyoki karsisisho inyi dukuya nkonyek inyi,” Olaitoriani ojo. Ore to lari li are le Darias ilo aiguanani, to lapa le ile, te nkolong e dukuya o lapa, eewuo ororei lo Laitoriani aimu Hagai ilo oiboni le Nkai, alotu enetii Serubabel olayioni le Shealtiel, olbalusui le Yuda, o Yoshua olayioni le Yehosadak, ilo apolosani kitok. “Nji ejo Olaitoriani loo lororani: Ejo kulo tung'ana inchere eton eitu ebau enkata pee eigili aashet enkaji o Laitoriani.” Neitoki ororei lo Laitoriani alotu eimu Hagai ilo oiboni le Nkai, ejo, “Kenkata naishiaakino nitonini intae ti atua nena ajijik inyi naaikodo too mbaoi, eton etii ena aji enkidaaroto. Ore naa nji ejo Olaitoriani loo lororani; Entadamu eninkunariri intae. Ituunishote oleng, nisampumpu nkuti; idaa intae, kake miraposhosho; niokishosho, kake miishushu ae kata enkure; ninchopishopo ate, kake meetae oloirouaju; naa ore ilo ong'amu olmushaara, neng'amu olmushaara nepik embene naudo. “Nji ejo Olaitoriani loo lororani: Entadamu eninkunariri intae. Elepa enchom ildoinyo niyauu ilkeek lishetietie ena aji, pee atum atishipakinoyu natum sii ataliooyu te nkitoo ai, Olaitoriani ojo. Isiligutua intae nkumok, naa ng'ura, etaa kuti; ore pee iyauu intae ang, nakutaa nanu. Aainyo? Olaitoriani loo lororani ojo. Te nkaraki ena aji ai nairragita te nkidaaroto amijoonu, intanyamaluoluo maate oltung'ani ake te nkaji enye makewan. Ore enkaraki ina, eibooyie keper natii shumata intae enkoiliolio, ore enkop neibooyo ilng'anayio lenyena. Naipotuo nanu olameyu meeu shumata enkop o ldoinyo, meeu shumata nkurman, o sabibu, o eilata, te nena pooki naabulu te nkop, too ltung'ana o nkishu, o too siaaitin enye pooki.” Neiruk Serubabel olayioni le Shealtiel, o Yoshua olayioni le Yehosadak, ilo apolosani kitok, te nebo nena lekunot oo ltung'ana ilo pisiai pooki loo ltung'ana ororei lo Laitoriani Enkai enye, o rorei le Hagai ilo oiboni le Nkai anaa enairriwayie Olaitoriani Enkai enye ninye; neureishoyu iltung'ana te dukuya Olaitoriani. Neitoki Hagai, ilo kilikuai lo Laitoriani, airorie iltung'ana to lkilikuai lo Laitoriani, ejo, “Atii nanu te nebo intae, ejo Olaitoriani.” Neputu Olaitoriani enkiyang'et e Serubabel le Shealtiel, ilo balusui le Yuda, o enkiyang'et e Yoshua olayioni le Yehosadak, ilo apolosani kitok, o enkiyang'et e lelo lekunot pooki loo ltung'ana; nepuonu ninche aas esiaai e ina aji o Laitoriani loo lororani Enkai enye, te nkolong e tikitam o ong'uan o lapa, to lapa le ile. Ore ti atua olari li are le nkitoria e Darias ilo aiguanani, to lapa li opishana, te nkolong e tikitam o obo o lapa, eeuo ororei lo Laitoriani enetii Hagai ilo oiboni le Nkai ejo, “Irorie taata Serubabel olayioni le Shealtiel ilo balusui le Yuda, o Yoshua olayioni le Yehosadak, ilo apolosani kitok, o nena lekunot pooki oo ltung'ana, nijoki, ‘Kaing'ae etung'uayioki te intae, apa ootodua ena aji te nkishiaa e nkitoo enye? Aidolitata taata intae etiu aja? Ae me pesho taata too nkonyek inyi? Ore etiu neijia entagoluoto, iyie Serubabel, Olaitoriani ojo, ntagoluoyu, iyie Yoshua, olayioni le Yehosadak, ele olapolosani kitok, intagoluoyu intae lo tung'ana pooki lena kop, Olaitoriani ojo; entaasisho, amu atii nanu te nebo intae; Olaitoriani loo lororani ojo, te risioroto oo nkisiligat apa naisiligie intae ipukuku te Misiri. Etii Enkiyang'et ai te nebo intae; emiureisho. Amu nji ejo Olaitoriani loo lororani: Ore ake sii, te nkiti rishata, naa kaikirikirie keper o enkop o enaiposha o enkop natoyio, naikirikirie nanu iloreren pooki, ore ilchumat lenye neyauni ene neiput enkaji e Nkai esikar, Olaitoriani loo lororani ojo. Enaai enkosholai naa enaai sahabu, Olaitoriani loo lororani ojo. Ore ina sikar nayooki alotu ena aji naa keaku kitok alang enapa, e dukuya Olaitoriani loo lororani ojo, naa ti atua ene wueji aaishooyo nanu dupoto, Olaitoriani loo lororani ojo.’ ” Ore te nkolong e tikitam o ong'uan, o lapa li oudo to lari li are le nkitoria e Darias, eeuo ororei lo Laitoriani aimu Hagai ilo oiboni le Nkai, ejo, “Nji ejo Olaitoriani loo lororani: Nkilikuana lelo apolosak metolimu ewalata ena kikilikuanata, ‘Amaa te nenap oltung'ani enkiring'o nasinya to lcholoi lo lkila lenye, neiseyie te ilo sholoi lenye emukate, aashu enkurma, aashu enaisho oo sabibu, aashu eilata, aashu ae pukunoto e ndaa, keaku ina sinyati?’ ” Newal ilapolosak aajo, “A-a.” Neitoki Hagai ajo, “Amaa oltung'ani oiduruk te nkaraki olmeneng'ani te neiseyie nabo e kuna, keiduruku?” Newal ilapolosak, aajo “Keaku keiduruk.” Neitoki Hagai ajo, “Neijia sii etiu kulo tung'ana, o kulo oshon ootii dukuya nanu ejo Olaitoriani; naa neijia sii etiu pooki siaai oo nkaik enye; ore ina kishorunoto naishoru ninche teine keiduruk naa. “Asai naa taata intae, entadamu ina nayooki aaku ebaiki ena olong neito idia alo. Amaa eton eitu eiteleikini osoit olikae soit ti atua enkaji o Laitoriani, kainyoo intae inotito? Tenelotu oltung'ani orupati loo mboreitin tikitam, tomon ake etum; te nelotu oltung'ani olchumati le naisho oo sabibu, ajo aaoku mboreitin onom, tikitam ake naatii. Atoosho nanu intae o lng'anayio pooki le nkinyinyiret inyi to lasai o te mpurukunyi o te nchan oo soito, neitu ake kishukokinono nanu, ejo Olaitoriani. Entadamu ebaiki ena olong neito idia alo, ebaiki enkolong e tikitam o ong'uan o lapa li oudo. Ebaiki ina olong apa natipikaki olkitamanyunoto le nkaji o Laitoriani, entadamu: Amaa keton etii olantererai hoo obo atua empeche, keton eiu osabibu, o lng'aboli, o kukumanka, o loirien hoo toki? Ore ebaiki ena olong neito idia alo, kaamayian nanu iyie.” Enyaaka ororei lo Laitoriani alotu enetii Hagai enkata e are te nkolong e tikitam o ong'uan o lapa, ejo, “Irorie Serubabel, olbalusui le Yuda, tiaki, etaa enkiti kata pee aikirikirie nanu keper o enkop, naibelekeny ilorikan le nkitoo loo nkitoriat; etaa enkiti kata pee ainyal nanu engolon oo nkitoriat oo loreren, naibelekeny nena garrin oo mbartan o lakedok lenye; ore mbartan o lelo ookedito nedoyio, o ltung'ani ake to lalem lo likae. Ore akenya teina olong, ejo Olaitoriani loo lororani, naa kaaya nanu iyie, Serubabel osinka lai, olayioni le Shealtiel, ejo Olaitoriani naaitotiu nanu iyie anaa olgisoi oata olmishire; amu aategelua nanu iyie, ejo Olaitoriani loo lororani.” Ore to lapa le isiet tiatua olari liare le nkitoria e Darias, eewuo ororei lo Laitoriani enetii Sakaria olayioni le Berekia olayioni le Ido, ilo oiboni le Nkai ejoki, “Etagore apa Olaitoriani oleng tenkaraki iloo papaai linyi. Metaa tiaaki ninche, ena ejo Olaitoriani loo lororani: Entushukunye enatii, ejo Olaitoriani loo lororani, naa kashukokino sii nanu intae, ejo Olaitoriani loo lororani. Emitiuu anaa enaikununo apa iloo papaai linyi, laa ore apa lelo oibonok le Nkai le dukuya eishirakita ninche ejoki, Nji ejo Olaitoriani loo lororani, Entushukunye entung'uai nkoitoi inyi torrok o nkiasin inyi torrok! Kake eitu ninche aaning arashu aashilaa nanu, ejo Olaitoriani. Amaa taata iloo papaai linyi koree taata ninche? O loibonok, kebikoo sii ninche intarasi? Kake ore irorei laainei o nkiguanat aainei, nena apa naitanapa isinkan laainei lelo oibonok le Nkai, keitu ninche egiroo iloo papaai linyi? Metaa eirridutua ninche ejo, Anaa enatumuta Olaitoriani loo lororani pee eitame iyiook tenkaraki inkoitoi ang o siaaitin ang, neaku ina eitaasa ninye iyiook.” Ore te nkolong e tikitam oo ng'uan o lapa le tomon oobo, olapa le Shebat to lari liare le nkitoria olaiguanani Darias, eewuo ororei lo Laitoriani enetii Sakaria olayioni le Berekia olayioni le Ido ilo oiboni le Nkai; nejo Sakaria, “Atoduaa tena kewarie naa ing'ura, oltung'ani okedito embarta nanyokie! Negira duoo aitashe tiatua ilkeek oo nyori ooji mihadasi tiatua oyerata ore tesiadi ninye netii kulie bartan pilei, o naanyokie o naaibor. Naitoki ajo, ‘Ainyoo doi kuna Olaitoriani lai?’ Ore ilo malaika laairorie nanu, aatiaaka, ‘Ekaaitodol aitayiolo ajo ainyoo ninche.’ Metaa etawala ilo tung'ani oitashe tiatua lelo keek ooji mihadasi ajoki ‘ore kuna naa inaairriwua Olaitoriani meetu aaman enkop pooki. Newaliki ilo malaika lo Laitoriani otii atua ilkeek ooji mihadasi ejo, Kishomo aarrip enkop pooki, naa ng'ura, nikitoduaa aajo eeta enkop pooki enkiyeng'iyengata!’ “Neitoki ilo malaika lo Laitoriani ajoki, iyie Olaitoriani loo lororani, kerishata nabaa miata olng'ur tiatua Yerusalem o nkanas e Yuda, nena nitagorokine tiatua kulo arin intomoni naapishana? Newaliki Olaitoriani ilo malaika laairorie too rorei supati le nkitagoloto e oshoke.” Metaa ore ilo malaika laairorie aatiaaka, Inchira tabuaku tejo, ena ejo Olaitoriani loo lororani: Aata olom sapuk tenkaraki Yerusalem o Sion. Natagorokine oleng lelo oshon oodol ate anaa keserian. Amu ore apa pee agorokino ninche penyo, neitaa lelo oshon osina sapuk te ninche. Metaa, ina ejo Olaitoriani, atushukokine Yerusalem to lng'ur sapuk; naa ekesheti enkaji ai tiatua ninye, ejo Olaitoriani loo lororani nepiki enkopito e nkitorioroto shumata Yerusalem. Nyaaki inchira tejo, nji Olaitoriani loo lororani; Ekeitoki inkanas aainei aatum dupoto nalus, naa keitoki Olaitoriani aitagol Sion oshoke neigil agelu Yerusalem. Naraposhu inkonyek aainei aingorisho, naa ng'ura, imowuarak ong'uan! Najoki ilo malaika laairorie nanu, “Ainyoo doi kuna?” Naawaliki ninye ajoki, “Ore kuna mowuarak naa ninche naaidapasha Yuda, o Israel o Yerusalem.” Naaitoki Olaitoriani aitodol ilkunono oong'uan. Najo nanu, “Kainyoo doi epuonu kulo aas?” Newal ajo, “Ore kuna naa imowuarak naa ninche naaidapasha Yuda metaa meetae oltung'ani oraposhu endukuya; neetuo kuna aaiture ninche, pee etum aitadou abori imowuarak oo loshon, lelo ootudumutua imowuarak enye aaitame ina kop e Yuda aaidapash ninye.” Naraposhu inkonyek aainei aing'orisho, naa ng'ura, oltung'ani oota enkopito natemishoreki te nkaina enye. Naitoki nanu ajo, “Kaji doi iloito iyie?” Naajoki ninye nanu, “Kalo atem Yerusalem, pee ayiolou eneba endapasho enye o eneba enkadori enye.” Naa ng'ura, ore ilo malaika laairorie eewuo dukuya, nelotu likae malaika dukuya anang'are ninye, nejoki ninye, “Kueta, shomo tiaaki lido barnoti, ekeaku Yerusalem enkanasa nemeeta isunta tenkaraki enkumoi o lorere o nkishu naatii atua. Amu kaaku nanu te ninye esuntai enkima namanita ninye, Olaitoriani ojo, naaku sii enkisisa tiatua ninye!” Oi! Oi! Enkuet entung'uai ina kop e kopikop, Olaitoriani ojo; amu aidapasha intae aitalamaa anaa enatii inkaloli ong'uan enkijape e keper, Olaitoriani ojo. Oi! Isikaki Sion, iyie ilo oboitare ina tito e Babilon. Amu inji ejo Olaitoriani loo lororani, te nkitoo enye laa ninye makewan laairriwaka lelo oreren ooidaikie intae, amu ore ilo likiseyie iyie, naa enerok enkong'u ai eiseyie: Ing'ura, ekaikirikirie enkaina ai te shumata ninche, naa keidaikie ninche lelo ooisiaai ninche. Nitum taa atayiolo nchere Olaitoriani loo lororani ninye lairriwua nanu. Taranya nishipayu, iyie na tito e Sion; Amu ng'ura ajo, kalotu naa kabik tiatua intae, Olaitoriani ojo. Naa keibung'are iloreren kumok Olaitoriani teina olong, naa keaku ninche iltung'ana laainei; naa katon nanu tiatua intae, niyiolouu aajo Olaitoriani loo lororani laairriwua nanu atua intae. Naa kejung Olaitoriani Yuda anaa erubata enye tiatua ina kop enye sinyati, neitoki ake agelu Yerusalem! Entigirata, pooki toki naishu te dukuya Olaitoriani; amu etudumunye ninye tiatua ina manyisho enye sinyati. Naaitoki ninye aitodol nanu Yoshua olapolosani kitok eitashe te dukuya ilo malaika lo Laitoriani, neitashe sii ninye shetani te nkaina e tatene aitangor ninye. Nejoki Olaitoriani shetani, “Mikisikong'a iyie Olaitoriani, iyie shetani! Metaa ilo Aitoriani otegelua Yerusalem likisikong iyie! Amaa ele aime olchata oishu otawuapuaki te nkima.” Ore ina kata egira Yoshua aitashe te dukuya ilo Malaika, eishopokoki inkilani naaiduruk naang'u. Nejoki olmalaika lelo ooitashe te dukuya ninye, “Entayu nena kilani naang'u naaiduruk naaishopito entung'uai ninye.” Nejoki ninye, ninye “Ing'ura, aiwuang'ie ing'ok inono te iyie naa kaaishopoki nanu iyie inkilani sidain.” Naitoki nanu ajo Enchoo ninche epik aaishopoki enkarasha sidai endukuya enye neishopokini ninye inkilani; ore olmalaika lo Laitoriani neitashe te mbata ninye. Neitanap olmalaika lo Laitoriani Yoshua ejoki, “Inji ejo Olaitoriani loo lororani: ‘Tinilo tiatua inkoitoi aainei nimbung enkitanapata ai, neaku iyaku oloitore enkaji ai nintore sii indung'orot aainei, naa kaaisho iyie esipata nijing'ie tenebo kulo ooitashe tene. Toning'o naa taata, iyie Yoshua olapolosani kitok iyie tenebo ilchorueta linono ootoni te dukuya iyie, amu iltung'ana supati ninche ooitodolu imbaa naapuonu. Ng'ura, ekayaki osinka lai ilo oji Olng'osila. Amu ng'ura, ore shumata eilo soit laitasheyie te dukuya Yoshua, enchumata osoit obo oota imatuan naapishana, naguetaki osirata, Olaitoriani loo lororani ojo, naa kaitayu ina kitarruorroto ena kop te nkolong nabo. Ore teina olong ejo Olaitoriani loo lororani, naa keitoomon pooki te intae olelatia enye meetu aatoni te ntonata o sabibu lenye o te ntonata olng'aboli lenye.’” Ore ilo malaika laairorie nanu, enyaaka arrinyunye, naainyoyie nanu, anaa oltung'ani otuputuoki too njo. Naajoki ninye nanu, “Ainyoo idolita?” iyie. Najo nanu, “Adolita naa ng'ura, enkitashet oltaa naitobiruno pooki te sahabu, neeta olbakuli otii shumata ninye, o ltaai oopishana te nchumata ninye, o ltampii oopishana otii lelo taai otii shumata e ina kitashet. Netii embata iloirienito aare, obo te nkalo e tatene ilo bakuli netii olikae kedienye enye.” Naajoki ilo malaika laairorie nanu, “Ainyoo doi kuna, olkitok lai?” Ina pee aawaliki nanu ilo malaika laairorie ejo, “Aimiyiolo doi ajo ainyoo kuna?” Najo, “A'a, olkitok lai.” Ina pee aajoki ninye nanu, “Ore ele naa ororei lo Laitoriani oirriwakaki Serubabel: Ime te nkidimata, neme te ngolon, kake te Nkiyang'et ai Sinyati, Olaitoriani loo lororani ojo. Koree iyie, iyie lo doinyo sapuk? Ore te dukuya Serubabel naa iyaku enkisiashata; naa keyau ninye dukuya ilo soit le shumata ebuakitae aajo, ‘Empiris, Empiris te ninye!’ ” Ore ake sii eewuo ororei lo Laitoriani enatii aajoki, “Inkaik e Serubabel naaitasheyie olkitamanyunoto lena aji; naa inkaik enyena ake sii naaidip ninye. Ina pee iyiolouu aajo aairriwua nanu Olaitoriani loo lororani enitii. Amu ore pooki ng'ae otemenayie ina olong oo ntokitin kutiti naa keshipa, naa kedol ina temet te nkaina e Serubabel. Ore kuna naapishana naa nena onyek o Laitoriani, nena naapuo tiatua enkop pooki. Naitoki nanu ajoki ninye, Ainyoo eutu kulo oirienito aare ootii enkaina e tatene o enkaina e kedienye tene netii enkitashet oltaa?” Naitoki ajoki ninye eniare, “Ainyoo eutu kulo ng'osil pokira lo loirien, lelo ootii embata lelo goso ooitobiruno te sahabu oobukunyeki ina ilata aaitayu?” Naajoki ninye nanu, “Aimiyiolo ajo ainyoo kulo?” Najo, “A'a olkitok lai.” Ina pee ejo, “Ore kulo naa lelo aare ootubukoki eilata aaput ooitashe te mbata Olaitoriani laa olopeny enkop pooki.” Naitoki ake araposhu inkonyek aainei aing'orisho, ng'ura olpiyayati le mbuku olo to loing'ang'e! Naajoki ninye nanu, “Ainyoo idolita?” Nawal ajo, “Adolita olpiyayati le mbuku nalo to loing'ang'e; naa ore enkadori enye naa intemat enkaina tikitam ore endapasho naa intemat e nkaina tomon.” Ina pee aajoki ninye nanu, “Ore ena naa oldeket olo oriong enkop pooki, amu ore ake ninye pooki opurrisho naa kedung'ori aaiwuang'ie ebaiki ena kata nelo dukuya te risioroto eina purrorre, anaa pooki ng'ae onya olmumai te lejare naa kedung'ori aaiwuang'ie te risioroto ele mumai. Ekairriwaa nanu meshomo dukuya, Olaitoriani loo lororani ojo, naa kejing enkaji o lapurroni, nejing sii enkaji e ilo onya olmumai te lejare te enkarna ai; naa kebik te nkaji enye anya ninye, enya imbaoi tenebo isoito.” Ina pee elotu dukuya ilo malaika laairorie nanu naajoki, “Taraposhu inkonyek inono nidol ena toki nalotu?” Najo, “Ainyoo doi?” Nejo ninye, “Ore ena naa enkikapu, neitodolu ena kikapu ing'ok enkop pooki.” Naa ng'ura, etaboloki ninye aadumu enkikenet enye, netii atua enkitok natonita tiatua enkikapu. Nejo ninye, “Ore ina kitok naa Entorroni eutu.” Nerrumoki ninye atua enkikapu nerrinyoki enkikenet enye aiken enkikapu. Naraposhu inkonyek aainei aing'orisho, naa ng'ura, inkituaak are naapuonu dukuya! Etii osiwuo inaipuko enye; neeta inaipuko naatiu anaa inaipuko emotonyi nanyaanyukie entilagos, nedumu aailepie ina kikapu metaa etii erishata enkop o keper. Ina pee ajoki ilo malaika laairorie nanu, “Kaji doi eyaita ina kikapu?” Naajoki nanu, “Enkop e Shimor, aa te ine epuo aashetaki ninye enkaji, naa ore pee eidip aitobira, nepik ina kikapu pee ebik teine.” Naitoki ake araposhu inkonyek aainei aing'orisho, naa ng'ura, ing'arrin ong'uan oo mbartan naatupukutuo te rishata oo ldoinyo aare, naa ore lelo doinyo naa ildoinyo lo suyai. Ore engarri e dukuya neeta imbartan naanyokie, ore eniare neeta imbartan naarook, ore ene uni neeta imbartan naaibor, ore eniong'uan neeta imbartan pusi naata iltipot. Ina pee ajoki ilo malaika laairorie nanu, “Ainyoo doi kuna, olkitok lai?” Naawaliki nanu olmalaika ajoki, “Ore kuna naa inaapuo ilkutat oong'uan le nkijape e keper, eidipa aaitayu ate te dukuya Olaitoriani le nkop pooki. Ore ngarrin oo imbartan naarook, naa enkop e moikuape epuo, ore ngarrin oo mbartan naaibor naa enkop oloontoluo epuo teneidip kunda aashom, ore ngarrin oo mbartan pusi naata iltipot naa enkop e kopikop epuo.” Ore pee epuku nena bartan naagol, neenyiyenyu eyieu nepuo aarrip enkop. Nejoki olmalaika ninche, “Enchom, entorrip enkop.” Metaa eshomo aarip enkop. Ina pee aaishiraki ninye nanu ajoki, “Ng'ura ore nena naapuo ina kop e moikuape neitoborro Enkiyang'et ai te nkop e moikuape.” Nelotu ororei lo Laitoriani enatii ejo: Iwa te lelo oararo, Heldai, o Tobiya, o Yedaia, laa ninche ootabautua eing'uaa Babilon nilo ina olong ake ina aji e Yosia olayioni le Sefania. Iwa te ninche enkosholai o sahabu, nintobiru enkopiyia e nkitoo, nipik ninye endukuya e Yoshua, olayioni le Yehosadak olapolosani kitok; nijoki ninye, inji ejo Olaitoriani loo lororani, “Ng'ura, ore ilo tung'ani oji enkarna enye Olng'osila: naa kebulaa ninye teine netii, naa keshetaki ninye Olaitoriani enkaji e Nkai. Ninye oshetu ina aji o Laitoriani naa keishopokini ninye enkisisa o enkanyit, naa keton aitoreisho to lorika lenye le nkitoria. Naa keaku ketii olapolosani embata o lorika lenye le nkitoo. Nejing olning'o le seriani erishata enye pokira.” Naa kejing enkopiyia e nkitoo atua enkaji Olaitoriani metaa endamunoto te Heldai o Tobiya o Yedaia o Yosia olayioni le Sefania. “Naa ore lelo oo lakua naa kepuonu aaretu aashet ina aji Olaitoriani, naa iyiolouu aajo ilo Aitoriani loo lororani ninye laairriwua nanu enetii. Naa kelotu ina bae abaya tininyorraa katukul aairuk ilo toilo lo Laitoriani Enkai inyi.” Ore to lari liong'uan le nkitoria o olaiguanani Darias, eewuo ororei lo Laitoriani enetii Sakaria te nkolong e ong'uan o lapa le naaudo laa ninye eji Kislef. Ore ina kata eirriwaitie iltung'ana le Betel Sharese o Regemelek oltung'ana lenye pee epuo aomonu omom to Laitoriani. Neikilikuan ilo apolosani le nkaji Olaitoriani loo lororani tenebo iloibonok le Nkai, ena kikilikuanata: “Amaa kaishir napukoo aaomon to lapa le imiet, anaa enataasa too larin kumok ooishari?” Ina pee elotu ororei lo Laitoriani loo lororani enatii aajoki: Tiaaki iltung'ana pooki leina kop tenebo ilapolosak, “Amaa ina kata nipukoo pee iomon, ninchir sii to lapa le imiet, o to liopishana, te kulo arin intomoni naapishana, itupukoyie apa te nkaraki nanu kiomon? Amaa ina nidaa, niokishosho aimidaa tenkaraki nkorroki inyi, niokishosho tenkaraki nkorroki inyi?” Aeme irorei apa kulo ooiroro Olaitoriani too loibonok le Nkai te dukuya ina kata apa eton egol Yerusalem o nkanas naamanita, nebore iltung'ana atua ninche, atua o neemanita olkerenket le kopikop te nkalo oo ntonat oo ldoinyo lo loontoluo? Nelotu ororei lo Laitoriani enetii Sakaria ejoki, “Ena etejo Olaitoriani loo lororani apa: ng'ura oleng metaasi esipata te nkiguana intodolu esupatisho olng'ur tiatua olalashe lino, mimbooki enkop enkoliai anaa oltung'ani okishi anaa olomoni, midamu intorrok to ltau lino tenkaraki olalashe lino.” Kake etanyaita ninche ening, neuno aagolong'u neany ening, nenuk inkiyiaa enye pee mening. Neitagol iltauja lenye anaa osoit pee mening, ake ina kitanapata o rorei oirriwua Olaitoriani loo lororani te Nkiyang'et enye aimunye lelo oibonok le Nkai le dukuya. Metaa eewuo engoro sapuk naing'uaa enetii Olaitoriani loo lororani. “Ore aipotisho nanu nemaaning ninche nanu, ore pee eipotisho sii ninche, nemaning sii nanu ninche” Olaitoriani loo lororani ojo. “Naidapash ninche to siwuo torrono aidapashaki lelo oreren lemeyiolo ninche. Neaku ore ina kop natung'uaitie neaku mijooni metaa meetae oltung'ani ojing arashu opuku, neitaae ina kop sidai naitishipisho e mijooni.” Nelotu ororei lo Laitoriani loo lororani enatii aajoki, Inji ejo Olaitoriani loo lororani, ekaata olom sapuk oleng te nkaraki Sion, naata olom sapuk tenkaraki ninye te ngoro sapuk. Inji ejo Olaitoriani: Kashukokino Sion, naa kalotu amany atua Yerusalem, naa keitokini aaipot Yerusalem aajo enkanasa naisiligayu, oldoinyo lo Laitoriani loo lororani, ilo doinyo sinyati. Inji ejo Olaitoriani loo lororani: Ore ilpayiani kituaak o ntasati moruak, ekeitoki aatoni too nkoitoi naalala e Yerusalem, pooki ng'ae eeta entirma te nkaina enye tenkaraki enkitoo. Naa Ore inkoitoi naalala eina anasa, neiput inkayiok o ntoyie eiguran teine. Inji ejo Olaitoriani loo lororani: Amaa tenaa embae enking'asia te nduata e lelo lekunot tiatua lelo oreren ootung'uayioki te kuna olong'i, Keaku sii embae enking'asia too nkonyek aainei, Olaitoriani loo lororani ojo. Inji ejo Olaitoriani loo lororani: “Ng'ura, kaitajeu iltung'ana laainei te nkalo enkop oloosaen, o te nkalo enkop oloontoluo; naa kayau ninche metotoni tiatua Yerusalem; naa keaku ninche iltung'ana laainei naaku nanu Enkai enye, te dede o te sipata.” Inji ejo Olaitoriani loo lororani: “Enchoo inkaik inyi etum engolon, intae lelo te kuna olong'i ooning'ito kulo rorei oing'uaa enkutuk oo Loibonok le Nkai, eiteru ina olong apa nairragieki olkitamanyunoto le ina aji o Laitoriani loo lororani, nchere pee etumi aateshet enkaji e Nkai. Amu ore apa eng'or nena olong'i, meetae apa oltung'ani oidim aigero oltung'ani arashu eng'ues meitaiki esiaai. Nemeetae sii oltung'ani oserian too lmang'ati lenyena te pooki ng'ae oipang'a arashu olotijing'ua. Amu eibelekanyaka aitaar pooki tung'ani olelatia enye. Kake ore naa tena kata, meekure aitaas ilekunot le kulo tung'ana anaa enaikuna too nkolong'i naatulusoitie, Olaitoriani loo lororani ojo. Naa keun ninche nkurman enye te seriani; naa keiu o sabibu ilng'anayio lenyena naa keiu enkop te nkumoi enye naa keishoru keper enkoileelio enye. Naa kaisho kulo lekunot le kulo tung'ana meitaa kuna tokitin pooki inkunenye. Ore apa anaa enira entoki naimakini aadiaare too loreren, Iyie na aji e Yuda o enkaji e Israel, kaitajeu nanu intae niakuku emanyianata. Emiureisho, kake enchoo egolu nkaik inyi.” Amu inji ejo Olaitoriani loo lororani: “Anaa enatonyorra apa aitaas intae intorrok aitame ina kata pee aaitagor iloo papaai linyi te ng'oro sapuk, neitu arriny endamunoto ai, ejo Olaitoriani loo lororani, neaku ore te kuna olong'i atipika endamunoto peyie eitaas esidai Yerusalem o enkaji e Yuda; metaa emiureisho. Kuna imbaa nayieu niasiasa: eroro esipata o likae o to likae, entayu too nkishomin inyi inkiguanat naasipa nintayuyu sii osotua. Nimimpiru entorroni to ltau lino tenkaraki olikae. Niminyorru enkinosata olmumai le lejare, amu ore kuna tokitin pooki naa kaiba, Olaitoriani ojo.” Nelotu ororei lo Laitoriani loo lororani enatii aajoki, “Inji ejo Olaitoriani loo lororani: Ore ina enata nintupukoo ate to lapa liong'uan o enata enkitupukoroto nintupukoo ate to lapa le imiet, o ina enata enkitupukoroto o lapa liopishana, o enata nintupukoo ate to lapa le tomon, keaku ninche te nkaji e Yuda irishat e ng'ida o enchipai o sirua lo lkerempe. Metaa entonyor esipata o eseriani.” Inji ejo Olaitoriani loo lororani: Ekelotu enkata naaku kepuonu olorere le kulie anas Yerusalem. Keaku kepuo olorere le ae anasa enkae anasa aajoki, “Emaape nabo kata aaomonu omom to Olaitoriani, niking'oru Olaitoriani loo lororani; aloito nanu! Ore iloshon kumok o loreren oogol naa kepuonu aaserem Olaitoriani loo lororani te Yerusalem, neomonu omom to Laitoriani. Inji ejo Olaitoriani loo lororani; ore te nena olong'i, keibung iltung'ana tomon ooing'uaa iloreren le pooki ng'ejep olkila lo Lyahudi, ejoki, ‘Maape tenebo aairiamari, amu kitoning'o aajo etii Enkai tenebo iyie.’ ” Ore ele naa ororei lo Laitoriani ogilunore ina kop e Hadrak, tenebo ina anasa e Dameski. Amu ino Laitoriani inkanas e Aram anaa enatiu iloshon le Israel; neijia sii etiu Hamat natii olpolosie le Hadrak, tenebo Turo o Sidon tenebo enkarriyiano e ng'eno enye. Eteshetaka Turo kewan esuntai nagol, netasoto ninye enkosholai naba anaa enterit, tenebo sahabu naba anaa enterit oo nkoitoi. Kake ng'ura, ekeya Olaitoriani aiwuang'ie nena pooki naata ninye, nenang'aki enkarsisisho enye atua enaiposha naa kepejori ninye aamut te nkima. Kedol Ashkelon ina neureishoyu; neijia sii etiu Gasa, nemerregela te mion sapuk, neijia sii etiu Ekron, amu keiting osiligi lenye. Ekeidaikieki olaiguanani le Gasa, nepuoi aaisik aaing'uaa Ashkelon memanya. Kemany Ashdod iloreren ooshulushula, naa kaiting'ie nanu ilo wuasa le Filistia. Meitoki aekata ninche aanya inkiri naatii osarge arashu kulie daiki naaiturujaki. Ore lelo lekunot naa keaku ile nchoto oo ltung'ana laainei, netiu anaa olgilata tiatua olosho le Yuda, neaku sii Ekron ile nchoto oo ltung'ana laainei anaa enataasa Ilyebusi. Ekamany nanu enkaji ai arrip, pee metii ololotu nelo; nemetii olaitorogonyani oitoki aitunyoo ninche. Amu ore taata, adolita too nkonyek aainei. Iltung'ana le Sion! Entabuaku te nchipai sapuk, intae iltung'ana le Yerusalem! Eng'ura, elotu olaiguanani linyi atua intae, elotu eisula etimirishe, nelotu te mborron ekedito enkurrarru e sikiria. Ejo Olaitoriani, “Ekaiwuang'ie ing'arrin oo mbartan e njore te Israel; naa kaiwuang'ie imbartan te Yerusalem; naa keinyali aaisho enkawuo olarrabal, naa keitobir olaiguanani lino osotua o iloreren; ore enkitoo enye neiteru te naiposha o metabaiki enaiposha neiteru to lkeju te Frati o metabaiki ineeiting'ie enkop.” Ejo Olaitoriani, Ore sii tialo iyie, Te nkaraki olning'o lo sotua o iyie, apa otimishiraki to sarge loo lasarri, kalaku nanu iltung'ana linyi ooena nepuku teina gumoto nemetii enkare. Entorrinyokinoto isempewueti linyi, intae ilooena oota osiligi. Aibalunye nanu ena olong nchere karrinyoki intae eseriani. Atoriwuo nanu Yuda aitaa enkawuo ai. Naitotiu Efraim anaa mbaa enyena. Naa kaasishore ilewa le Sion anaa olalem, pee earare ilayiok loo Lyunani. Ekeliooyu Olaitoriani te shumata iltung'ana lenyena; naa kengoroo ninye imbaa enyena anaa enkiwuang'ata, Olaitoriani Enkai ninye oosh entarumpeta; naa kelotu te ngolon tiatua osiwuo ogol oing'uaa kopikop. Olaitoriani loo lororani omitu ninche, naa kemut ninche neitunyoki enkop ilmang'ati lenye. Naa keok ninche osarge lenye anaa enaisho oo sabibu, neiputayu anaa olbakuli; nedooyo anaa too lpijat lo lperere lo lasar. Ore tenebau ina olong, naa keitajeu Olaitoriani iltung'ana lenyena. Amu ore ninche naa intare oo ltung'ana lenyena. Naa kewang'u ninche te nkop enye anaa enawang isoito ooripakino enkopiyia. Kebaa esidano natum ina kop! Ore lelo barnot naa kabul tenkaraki entapa enye tenebo enaisho o sabibu. Entoomon Olaitoriani enchan te nkata oloirujuruj, Olaitoriani ninye oitobiru olkutati o nkatampo, naa ninye oisho iltung'ana enkirujuruj e nchan, neitonyorij pooki toki tiong'ota. Eikilikuanishore iltung'ana nkitanyaanyukot o laitumusumusok kake ore iwalat naatum naa elejare o emodai. Eibelekeny kulikae nkidetidetat neitapong'oo intae. Enepesho enkikoo enye. Neaku kelimana iltung'ana anaa ntare naaimina. Etii ninche atua enyamali amu meeta olarikoni. “Eirowuaja engoro ai tenkaraki lelo shekuti, naa kaitame nanu lelo arikok; amu kegolie Olaitoriani loo lororani eluata enye ina aji e Yuda. Eketiu ninche anaa imbartan aainei naagol o larrabal. Atua ninche epukunye ilaitoriak, o larikok o lkituaak ooitore iltung'ana laainei. Ore pooki tenebo naa keaku iltung'ana magil to larrabal, eitunyoki ilmang'ati lenye atua esarng'ab oo nkoitoi naalala; naa kearisho ninche amu etii Olaitoriani tenebo ninche, naa kemir ninche lelo akedok loo mbartan. Ekaitagol iltung'ana le Yuda; naa kaitajeu enkaji e Yosef. Ekashuku ninche amu aata olng'ur te ninche, naa ketiu ninche anaa keitu aekata ang'as aany ninche: Amu are nanu Olaitoriani Enkai enye, naa kawaliki ninche. Ketiu Efraim anaa olmorrani magilani, neshipa iltauja lenye anaa iltung'ana ootooko enaisho oo sabibu. Edol inkera enye ina naa keshipa, neshipakino ina mirata naishoo Olaitoriani ninche. Kaipot iltung'ana laainei aiturrurr tenebo, amu atokordua nanu ninche, naa keaku ninche kumok anaa apa te moitie. Ore hoo naidapashaka nanu ninche atua iloreren, kake ore too nkuapi naalakua naa kaadamu ninche, nanu, neaku ore ninche tenebo inkera enye naa kepok nerrinyunye ang tenebo. Ayau ninche aitung'uaa Misiri o Asiria enkang enye nalotu aitamany ninche enkop enye. Ekaitamany sii ninche enkop e Gilead o Lebanon, o metaa meekure eeta enkop enemanyi te nkumoi o lorere. Naa keeim ninche enaiposha e Misiri ore ilopir le naiposha naa kepuoi aaishie ore eng'uton pooki olkeju le Nail naa keitoi. Ore olwuasa le Asiria naa keitadoyiori aaitobor, ore engolon e Misiri nelo aing'uaa ninye. Ekaitagol ninche tiatua Olaitoriani, naa kepuo ninche tiatua enkitoo e nkarna enye, Olaitoriani ojo.” Tabolo nchomito inono, iyie Lebanon, Pee etum enkima ainosa atumuta iltarakua linono! Teyietu inchira iyie lo shani onyaanyukie oltarakuai, amu eturori oltarakuai, ore lelo keek oota enkishiaa sidai einyalaki pooki. Enchira niyietutu lo keek oogol le Bashan; ore ina tim nasur too lkeek netumutaki aadung! Entoning olkiyioi le lelo shekuti; amu eiwuang'ieki aaoru enkitoo enye! Entoning, enkikurrukur e lelo ng'atunyo ore entim natii embata e Yordan, netumutaki aaidaikie. Inji ejo Olaitoriani Enkai ai: “Taa olchekut le nena tare naapuoi aayieng. Ore lelo ooinyang'u ninche neyieng ninche nepuo eitu eitamei ninche. Emir ninche inkiri nejo, ‘Meisisi Olaitoriani ataa nanu karsis.’ Ore ilchekuti lenye maate nemeatayie ninche olng'ur. Amu maitoki nanu aing'urrie lelo oomanya ena kop, Olaitoriani ojo, ng'ura, kaisho nanu iltung'ana metabatatakinoyu, oltung'ani ake, inkaik olchekut lenye, oltung'ani ake nkaik o laiguanani lenye, naa kepuo ninche aarrarrakino enkop, nemakordu nanu hoo obo too nkaik enye.” Metaa ataa nanu olchekut le nena tare naaiguanareki pee eyiengi te lelo oomir intare, naya nanu ing'udisin are. Ore nabo naisho enkarna ajo “Empiris,” ore enkae naisho enkarna aajo, “Naboisho,” Nairrita nanu ntare. Ore to lapa obo, naidaikie lelo shekuti okuni. Ataa nanu olemeeta eng'iriata te ninche, naaibayie sii. Metaa atejo, “Maaku nanu olchekut linyi. Ore ilo oye inchoo eye; ore ina namuta inchoo emuta; ore lelo ootelekutua nchoo eidaikie iseseni loo lkulikae maate.” Nadumu eng'udi ai naji “Empiris,” nagil ninye pee atum atujuto ilo sotua apa oitayio Olaitoriani too loshon pooki. Metaa etua apa ilo sotua ina olong. Ore lelo amirak o lainyang'ak le nena tare naagira aaing'or, neyiolou aajo ororei lo Laitoriani. Ina pee ajoki ninche, “Tinidolidolo eishaakino too nkonyek inyi, enchooki olekoisiaayio lai naa tenemeishaakino, niminchoruru.” Metaa aatalaakita ninche nanu olekoisiaayio lai shekeli tomoni uni e nkosholai. Ina pee aajoki Olaitoriani nanu, “Tipika ninche atua olbene le nkaji Enkai.” Ina laata sapuk natejo ninche ekaaishaakino. Meeta atudumua nena shekeli tomoni uni enkosholai napik atua olchumati otii atua enkaji o Laitoriani. Naitoki agil eng'udi ai e are naji “Naboisho.” Neaku etaraki Naboisho oo lalashera, Yuda o Israel. Ina pee aajoki Olaitoriani nanu, “Nyaaki ake iwa imasaa olchekut lemeeta tipat. Amu ng'ura, ekadumu aitasheyie tena kop olchekut lemeret lelo ooye, arashu eing'oru nena naaidapashari, arashu eishiunye nena ng'ojiniaa, arashu eitoti nena naatelekutua, kake nenya nkiri e nena naapir nepolol o metabaiki iloisotok lenye. Oi ele shekut lai lemeeta tipat, ilo olo aing'uaa intare! Metara olalem enkaina enye tenebo enkong'u enye e tatene! Inchoo enkaina enye eikaolo pooki, ore enkong'u enye e tatene nemodoku tukul!” Ele ninye ororei lo Laitoriani oipirta Israel. Nji ejo Olaitoriani, ilo oisalaasha keper neitobir enkop, neisho tung'ani enkishui natii atua ninye, “Ng'ura, etaa nanu enajo pee aitotiu Yerusalem anaa enkikompe e naisho oo sabibu; ore lelo oshon oomanita ninye naa keok netiu epuo anaa oltung'ani otemere. Naa ore teneman Yerusalem, naa kemani sii nena anas e Yuda. Ore teina olong naa kaitaa Yerusalem osoit oiroishi too loreren pooki le nkop tenetem ninche aadumu ninye, naa keitame ate oleng. Naa kedumakino ninye iloreren pooki le nkop aarare ninye. Ore akenya teina olong Olaitoriani ojo, naa kaosh nanu pooki barta to lkirutoto, naosh olakedoni lenye to lmilo, kake ore tialo enkaji e Yuda, naa kamitu nanu ninche, ina kata aosh nanu pooki barta oo loreren te modoki. Ina pee ejokino ilgilat le Yuda maate, ‘Ore lelo oomanya Yerusalem eeta engolon tiatua Olaitoriani loo lororani, Enkai enye.’ “Ore teina olong naa kaitotiu nanu ilgilat le Yuda anaa olmoti le nkima te mpolos entim, arashu enkima nayupuyup natii atua irridat le nkano; naa kemut ninche eiteru te tatene o metabaiki kedienye olorere pooki omanita ninche. Ore Yerusalem neton ake emanyae. “Naa keng'as Olaitoriani aisho enkisulata lelo ng'oborri le Yuda, pee eaku ore enkitoo e nkaji e Daudi o enkitoo e lelo oomanya Yerusalem, nemelus te nkitoo Yuda. Ore akenya teina olong, naa keitaman Olaitoriani elong'o lelo oomanya Yerusalem, metaa ore ninye oloshal aisul tiatua ninche teina olong netiu anaa Daudi. Ore enkaji e Daudi netiu anaa Enkai, netiu anaa olmalaika lo Laitoriani olo te dukuya ninche. Naa ore teina olong, naa kaing'oru amut lelo oshon pooki oopuonu aarare Yerusalem. “Naa kabukoki nanu enkaji e Daudi o lelo oomanya Yerusalem enkiyang'et o lng'ur o esayiare, metaa, tenelo neing'or aakurraki ilo otaremo ninche, naa keishiraki ninye, anaa oltung'ani oishiraki ina kerai nabo naa ninye ake eeta. Neishir te mion sapuk oleng te ninye anaa ilo oishiraki olkikau lenye otua. Ore teina olong, naa ketiu olkiyioi te Yerusalem anaa olkiyoi le Hadadrimon te nkisiashata e Megido. Ekeishir enkop pooki, neishir pooki marei openy; neishir ilo marei le Daudi openy, neishir inkituaak enye maate; neishir olmarei le Natan makewan, neishir inkituaak enye maate. Neishir olmarei le nkaji e Lawi makewan, neishir inkituaak enye maate; neishir olmarei le Shemeit makewan, neishir inkituaak enye maate; ore lelo marei ootelekutua, neishir ake olmarei makewan, neishir inkituaak enye maate. “Ore akenya teina olong, naa ketumi enkong'u enkare nabolo te nkaraki enkaji e Daudi o lelo oomanya Yerusalem pee eitukuoo ing'ok enye o pooki nemesinya. Naa ore teina olong, Olaitoriani loo lororani ojo, ekajutoo aiwuang'ie nkarn oo nkitaanyaanyukot oo nkaitin teina kop, ometaa meigili aekata aadamu; naiwuang'ie sii iloibonok o nkiyang'eta torrok. Naa teneitoki ake ninye oltung'ani alotu anaa oloiboni naa kejoki ninye menye otoiwuo tenebo ng'otonye, ‘Mintoki taa aishu, amu iroro elejare te nkarna o Laitoriani;’ ore menye o ng'otonye naatoiutuo ninye nengor ninche ninye meipang'a ina kata eibonisho. Ore akenya teina olong naa kekurru pooki oiboni teneibonisho te nduata enye; meitoki aishop olkila oju pee etum atelejisho. Ekeaku kejo, ‘Mara nanu oloiboni, ara olaturoni le nterit; amu ara apake olaturoni ebaiki lelero ai.’ Naa teneikilikuan likae ajoki ninye, ‘Ainyoo doi kulo baa ootii enkoriong ino?’ Naa kejo, ‘Ilbaa laatipikaki tiatua enkaji oo lchoreta laainei.’ ” “Inyo lo alem tudumakinoyu olchekut lai, tigilunore ilo tung'ani oitashe te mbata nanu:” Olaitoriani loo lororani ojo. “Toosho ilo shekut, pee etum ntare aaidapashata; naa kaibelekeny, enkaina ai agilunore lelo ooti. Ore tiatua enkop pooki, Olaitoriani ojo, ore ematua e are te uni tiatua iltung'ana naa kemuta, neaku ematua nabo te uni eing'uari eishu. Naa kapik nanu ina matua nabo te uni atua enkima, naa kasil nanu ninche anaa olosil enkosholai naitoki atem ninche anaa enatemi sahabu. Naa keipot ninche enkarna ai, nawaliki nanu ninche. Naa kajo nanu, ‘Iltung'ana laainei ninche, Olaitoriani Enkai ang.’ ” Ngura, elotu enkolong o Laitoriani, naa ore iyarunot naawaki aitung'uaa intae naa keori te dukuya inkonyek inyi. Amu kaiturrurru iloreren pooki metudumakinoto Yerusalem to larrabal, naa keyai ina anasa, nepurri inkajijik, neikonyi inkituaak. Eyae ematua e nkanasa te yararoto. Ore ilkulikae tung'ana nemeyae ninche te nkanasa. Ina pee elo Olaitoriani aarare lelo oshon, anaa enataarishe ninye te nkolong o larrabal. Ore akenya teina olong naa keitashe nkejek enyena toldoinyo loo loirienito, ilo otii dukuya Yerusalem te nkalo o loosaen. Ore ilo doinyo loo loirienito naa keiperra kat are eiteru to loo saen o meshomo oloo ntoluo aaku eululu sapuk. Metaa ore ematua nabo oldoinyo nelo enkalo e moikuape ore enkae seshati oldoinyo nelo enkalo e kopikop. Ore ina ululu oo ldoinyo laainei nemeitoki aponari agutu neaku keibung'are isunta pokira oldoinyo, nitumutumu aaisika anaa apa ina kata nisikisiki aailany olokirikiri too nkolong'i e Usia olaiguanani le Yuda. Ina pee elotu Olaitoriani Enkai inyi tenebo lelo pooki sinyat eboitare ninye. Ore akenya teina olong, meetae hoo enkirobi arashu enkurriny e ndeem. Naa keaku endama enaado oleng (Olaitoriani oyiolo ena), ime endama neme enkewarie, amu ore enoshi kata nikijo iyiook emuto, eton ake etii ewang'an. Ore teina olong naa keruko inkariak e mpuaan naapuku aing'uaa Yerusalem. Ore ematua enye nabo nerukokino enaiposha enkalo oloo saen ore enkae matua nerukokino enaiposha e nkalo oloontoluo; naa keruko to lari pooki. Naa keaku Olaitoriani Olaiguanani le nkop pooki, ore kenya te ina olong neaku Olaitoriani obo o enkarna enye nabo. Ore enkop pooki naa keibelekenyi aitaa enkop naisiasha eiteru te Geba o metabaiki Rimon natii kopikop e Yerusalem. Ore Yerusalem neaku ketala etii shumata ina kop namanita ninye; ebaiki enkanasa e Yerusalem epuku te nkishomi e Benchamen o metabaiki ewueji e nkishomi musana, ine apa ebaiki oltalet le Hananel o meshomo ina aji naironyieki enaisho oo sabibu o laiguanani. Naa kemany iltung'ana ninye amu meitokini aata oldeket, keton Yerusalem te seriani. Naa ele olmeitai laa ninye emutie Olaitoriani iloreren pooki lelo oodumaki olarrabal Yerusalem. Ekeng'uoyu iseseni lenye eton eitashoo, naa keng'uoyu inkonyek enye etii atua ilukuny enye, naa keng'uoyu ilng'ejepa lenye tiatua inkutukie enye. Naa ore akenya teina olong naa kedoiki ninche olkirutoto sapuk oing'uaa Olaitoriani, ometaa keibung ake oltung'ani enkaina o likae, ore nkaik enye, nedumakino olikae olikae aarare. Ore sii iltung'ana le Yuda naa keara emitu Yerusalem. Naa kearu ninche enkarsisisho oo loshon pooki oomanita sahabu, o enkosholai tenebo inkilani te nkumoi. Naa kedoiki olmeitai laaijo oloo mbartan, o nyumpui, o ntamesin, o sirkon o pooki ng'ues ake ninye natii atua lelo ng'oborri. Ore taa pooki ng'ae oimisho te lelo oshon pooki ooetuo aadumakino Yerusalem, neaku keilepu too larin pooki aapuonu aaserem olaiguanani, ilo Aitoriani loo lororani, neibung osirua loo lng'oborri. Naa tenetii olmare obo te nkop lemelo Yerusalem aserem Olaiguanani, Olaitoriani loo lororani, nemetum ninche enchan. Naa tenemelo olmarei loo Lmisiri aapuo aaitarasaa ate, nedoiki ninche olmetai laa Olaitoriani ninye oosh lelo oshon lemeilep aapuo aaibung osirua loo lng'oborri. Ena nalo aaku enkitamioto te Misiri o enkitamioto oo loshon pooki lemeilep aapuo aaibung osirua loo lng'oborri. Naa ore akenya teina olong, naa keaku keetae iltualan loo mbartan nesirakino irorei oojo, “Sinyati to Laitoriani.” Ore imotioo naayierishoreki naatii atua enkaji Enkai naa keaku sinyat anaa ilbakulini otii dukuya olperere; neaku ore pooki moti natii atua Yerusalem o Yuda neaku pooki sinyati to Laitoriani loo lororani, metaa ore lelo pooki ooitayu olasar, nepuonu aaya ninche neitokitokie nena kiri o lasar tiatua ninche. Nemeitokini aata olamirani tiatua ina aji Olaitoriani loo lororani ina olong. Olkilikuai ele oishoo Olaitoriani Malaki metoliki Israeli. Ejo Olaitoriani: Atonyorra intae. Kake itejo intae “Kaji doi inkuna tininyorru iyiook?” “Amaa Esau aime olalashe le Yakobo?” Olaitoriani ojo. “Natonyorra nanu Yakobo naibayu Esau, naitomijoono nanu enkop enye oo ldoinyo, naing'ueiki enjung'ore enye imbariak o lpurkel.” Tenejo Edom; “Etumutaki iyiook kake kintoki aashet ineeidaaitie”; ejo Olaitoriani loo lororani: “Eidim ninche aateshet, kake kasulaki nanu enkop ometaba anaa neipoti aajo enkop e ntorroni, iltung'ana ootagorokine Olaitoriani intarasi.” Idolidolo ena too inkonyek inyi maate, nijojo ina kata; “Aikitok Olaitoriani negiroo enkitoo enye ilpolosien loo Siraeli!” “Eyanyit olayioni menye, neyanyit osinka olkitok lenye. Amaa naa tenaa kara papaai linyi, koree enkanyit ai? Naa tenaa kara olkitok, koree euriata ai? Ejo Olaitoriani loo lororani. Lo apolosak kulo oomen enkarna ai. Ijojo intae, ‘Kaji doi kinkuna tinikimenu enkarna ino?’ Aliki intae ajoki; tinintayuyu endaa naiduruk aapik shumata olperere lo lasar lai. Nijojo sii; ‘Kaji doi kinkuna tinikindurukie ninye?’ Ajoki intae: Amaa enidamumu to lmena emisa o Laitoriani, nintemenimene sii ilkulikae meibayu. Amaa tinintayuyu ilasarri loo masaa modook, aime eng'oki ina sapuk? Amaa sii tinintayuyu ilasarri loo ntokitin ng'ojiniaa anaa inaamuoi, aime eng'oki ina? Entetem sii intae enchoo nena olkitok linyi, aijojo keshipakino intae anaa eisho intae omom? Ejo Olaitoriani loo lororani. “Ajoki intae teina kata, engoru omom e Nkai peyie eidim aing'urrie iyiook. Amaa teina kishooroto naing'uaa inkaik inyi, aijojo keidim aing'urrie hoo obo linyi? Ejo Olaitoriani loo lororani. Oi te naa ketii obo linyi oidim aikeno kutuk aji peyie mikintokiki aainuaaki enkima e pesho to lperere lo lasar! Mashipakino nanu intae, ejo Olaitoriani loo lororani, nemang'amaa sii olasar linyi too nkaik inyi. Amu ore eiteru te nkilepunoto enkolong o metabaiki endoyioroto, kitok enkarna ai too loreren pooki, ore te pooki wueji, neitayuni enkorropil te nkaraki enkarna ai, neitayuni sii ilasarri oosinya amu aikitok enkarna ai neyanyiti too loreren pooki, ejo Olaitoriani loo lororani. Kake isarkionie intae ninye pee ijojo eidurukieki emisa o Laitoriani, ore sii endaa enye nemenuni. Ijojo intae; eng'ura sii intae eneba enauri, nikidasakiki nkineji, ejo Olaitoriani loo lororani. Kiyakiki sii intokitin naapurruno anaa ing'ojiniaa, o naamuoi, eji naa ninche kipuonunu aaitaikinye olasar! Aijojo kang'amaa ina too nkaik inyi? Ejo Olaitoriani. Metedeki olalejani pooki ooata olkuoo supat te luaata enye, neinos olmumai ejo ekaishoru eji neitoki apolosaki Olaitoriani ina naata eleyiata. Amu ara nanu olaiguanani kitok, ejo Olaitoriani loo lororani naa keurei enkarna ai too loreren pooki. “Ore naa taata lo apolosak, eninyi ena kitanapata. Ti nimining'ining'i, tinimipikipiki atua iltauja ninchosho enkitoo enkarna ai, ejo Olaitoriani loo lororani, kaae nairriu oldeket shumata intae nadek sii imayianat inyi. Nesipa ajo aidipa nanu atediaa ninche, enkaraki mipikitata ntae ltauja linyi. Ng'ura, kaisikong nanu eishoi inyi, napik inkomomi inyi emodioi, nena modiok oo lasarri linyi, naitalamaa intae te dukuya nanu. Ore enkaraki ina, niyiolouu aajo airriwua nanu ena kitanapata atua intae, pee etum olning'o lai lo sotua o Lawi aitasho, ejo Olaitoriani loo lororani. “Ore apa olning'o lai lo sotua o ninye, naa olning'o lo osotua le nkishui o eseriani, naishoo apa nanu ninye kuna peyie etum ninye aturia; naaureyu ninye nanu, neitashe te nkanyit euriata e nkarna ai. Etii apa enkiteng'enata nasipa enkutuk enye, neitu etumi enkitapong'oto te enkutuk enye. Eshomo tenebo nanu te seriani o te nkitashoto nanare, neibelekenya ninye ilkumok metung'uai intorrok. Amu ore enkutuk olapolosani neishiaakino nerrip eng'eno, ore sii iltung'ana neishiaakino neing'oru enkiteng'enare te nkutuk enye, amu ore ninye naa olkilikuai lo Laitoriani loo lororani. “Kake mbelekenye iyie apaash enkoitoi; nchoo ilkumok errorro too nkiteng'enat inono, indurukie iyie olning'o lo sotua le Lawi naa kaisho nanu mikitemenuni nikintadouni te dukuya iltung'ana pooki, anaa ina neitu iyie imbung nkoitoi aainei, kake intodolua olkep too nkiteng'enat inono.” Aimikiaata iyiook pooki papa obo? Aime Enkai nabo naitobira iyiook? Ainyoo naa peyie mikisiliga iyiook maate, nikisarkionie olning'o loo loo papa lang? Etaa Yuda olemeisiligayu, netaasaki embae o lminong te Israel o tiatua Yerusalem, amu eisarkionie Yuda ewueji sinyati o Laitoriani, teina natonyorra neyam entito e nkai oo loreren. Metudung'oi Olaitoriani aiwuang'ie too lng'oborri le Yakobo tenebo oltung'ani oas ina, o loishakenoki, anaa olowal anaa oloyaki olasar Olaitoriani loo lororani! Niaasita ake sii ena. Imulumul olperere lo lasar to Laitoriani too lkiyio, te nkishirata o too nkigorot eshipakino te nkaina ino. Ninkilikuanu ajo, “Ainyoo doi pee meng'amaa ninye?” Enkaraki nataa Olaitoriani shakeni lo lning'o te rishata eina kitok niyama te kitisho, itaa iyie olemeisiligayu te ninye hoo duoo naa enkitok ino te naboisho o to lning'o. Aime Enkai nabo naitaa neitopok enkiyang'et e nkishui te iyiook? Naa kainyoo ninye eyieu? Eyieu ninye eishoi naure Enkai. Metaa ng'ura entagolie ate emincho obo linyi eaku olemeisiligayu teina kitok e kitisho enye. “Amu kaiba nanu, eoro o lpayian o enkitok ejo Olaitoriani Enkai e Israel naiba enkimulumulata o lkila le nkarruoisho, ejo Olaitoriani loo lororani. Metaa eng'ura ate, nimiakuku ilemeisiligayu.” Intanaura intae Olaitoriani too rorei linyi. Nijojo ake sii: “Kaji doi kinkuna ti nikintanaur ninye?” Intanaura ninye te nijojo: “Aisupat pooki tung'ani oas ntorrok too nkonyek o Laitoriani, naa keshipakino ninye ninche.” Anaa inkilikuanunu ijojo, “Koree doi Enkai oo sipat?” “Ng'ura, ekairriu nanu olkilikuai lai pee eitobir enkoitoi te dukuya nanu ore ilo Aitoriani ling'oruru, nelotu nabo kata atua enkaji enye. Ore olkilikuai leilo ning'o lishipakinono, ng'ura elotu ninye, ejo Olaitoriani loo lororani. “Kake aing'ae oidim ating'iria ina olong elotunoto enye? Naa aing'ae oidim aitasho tenelioyu ninye? Amu etiu ninye anaa enkima o lasikani, netiu sii anaa osabuni oishu oloirerio. Kelo ninye aton anaa olasilani osil enkosholai, naa kesil aitisidan ilayiok le Lawi neitisidan ninche anaa sahabu o enkosholai o metaba anaa neitarasaki Olaitoriani ilasarri ooishiaakino. Neaku ore olasar le Yuda o Yerusalem neitiship Olaitoriani anaa inkolong'i apa e moitie oo larin ootulusoitie. “Natum taa atinyikaki intae te nkiguana, aaku olchakeni osieku agilunore ilkuyandik, nagilunore iloololoito, nagilunore lelo oonya ilmuma le lejare, nagilunore lelo ooitorogonyisho too laakinot enye, tenebo inkolia o nkera okishin, nagilunore lelo ooinyal ilomon nemaaure ninche nanu; ejo Olaitoriani loo lororani. “Ore nanu maibelekenya nanu Olaitoriani; ore naa intae, lo ayiok le Yakobo, neitu emuti intae. Ore ebaiki nkolong'i oo loo papaai linyi itapaasha nkiguanat aainei neitu imbung'ubung'u ninche. Entushukunye enatii, naa kashukokino sii nanu intae ejo Olaitoriani loo lororani. Kake ijojo ntae; ‘Kaji kinko tenikishukunye?’ Kepur oltung'ani Enkai? Eji nikipurritoto intae nanu. Nijojo ake sii, ‘Kaji doi kinkuna tinikipur iyie?’ Te matua inyi e tomon o too lasarri. Etediaaki intae to ldeket, amu kipurritoto intae nanu, intae olosho pooki. Eyau ematua e tomon pooki atua enkaji ai nashumishoreki pee eaku ketii endaa atua enkaji ai; entetemaki sii iyie, ejo Olaitoriani loo lororani tenemaboloki intae ilusien e shumata, nabuku abori imayianat naadooyo. Kaisikong sii ilo maati omutisho te nkop peyie meitoki aainyal ilng'anayio le nkop ino. Ore osabibu otii enkurma nemeitoki aalau eishoi, ejo Olaitoriani loo lororani. Ore iloshon pooki nikimpot aajo olomayiana, amu iaku enkop nashipakinoi, ejo Olaitoriani loo lororani. “Ore irorei linyi naaitame nanu katukul Olaitoriani ojo. Nijojo ake: ‘Kaji kinkuna tinikiro mbaa torrok tialo iyie? Itejo intae Pesho ti nikisiaai Enkai,’ ainyoo esidano ti nikimbung enkitanapata enye anaa tinikipuo anaa ilooata osina te dukuya Olaitoriani loo lororani? Ore anaa enatiu iloo wuasa anaa kemayiana, ore ilarruok, neme kebul ake, kake tenetem ninche Enkai neimisho.” Ore lelo ooure Olaitoriani, neiro maate, naa keirrugoki Olaitoriani ninche enkiok ainining ninche. Neigeri embuku nadamunyeki te dukuya ninye, o lelo pooki ooure Olaitoriani, neing'oru sii enkarna enye. “Keaku ninche iltung'ana laainei ejo Olaitoriani loo lororani, intokitin aainei kiroteti teina olong naasisho nanu naa kaleku nanu ninche anaa oltung'ani opalaki enkerai enye naisiaaita. Nitum taa ina kata ategela ilo oitashe too sipat o laasani loo ng'ok, o ilo oisiaai Enkai o lemeisiaai ninye. “Amu ng'ura; elotu enkolong napejisho anaa olmoti le nkima, ina pee eaku ilooitokoos o laasak pooki loo ng'ok isuut; ore ina olong nalotu napejoo ninche, ejo Olaitoriani loo lororani, melekaki ninch entonai anaa olng'osila. Kake ore iyie oure enkarna ai, keilepaki intae enkolong e supatisho eetae enkishiunoto too naipuko enyena. Ipuopuo intae intigiranana anaa ilasho ooti ooitigiran epuku to lale. Naa intunyokiki enkop iltorrok. Amu keaku nkuruon tiabori ndapi oo nkejek inyi ina olong naas ina Olaitoriani loo lororani. “Entadamu inkiguanat o sinka lai Musa, o nkitanapat naitanapa ninye to ldoinyo le Horeb naaipirta Israel pooki. “Ng'ura, kairriwaki nanu intae Eliya oloiboni le Nkai eton eitu elotu ina olong torrono o Laitoriani. Naa keibelekenyaki ninye iltauja loo menye inkera enye, neibelekenyaki sii iltauja loo nkera iloo menye, malotu ake aosh enkop to ldeket.” Embuku e ntipat e Yesu Kristo, enkerai e Daudi, enkerai e Abraham. Etoiwuo Abraham Isaak, neiu Isaak Yakobo, neiu Yakobo Yuda o lalashera lenyena; neiu Yuda Peres o Sera te Tamar; neiu Peres Hesron; neiu Hesron Aram; neiu Aram Aminadab; neiu Aminadab Nashon; neiu Nashon Salmon; neiu Salmon Boas; neiu Boas Obed te Ruti; neiu Obed Yese; neiu Yese olaiguanani Daudi. Neiu Daudi Solomon te nkitok e Uria; neiu Solomon Rehoboam; neiu Rehoboam Abiya; neiu Abiya Asa; neiu Asa Yehoshafat; neiu Yehoshafat Yoram; neiu Yoram Usia; neiu Usia Yotam; neiu Yotam Ahas; neiu Ahas Hesekia; neiu Hesekia Manase; neiu Manase Amon; neiu Amon Yosia; neiu Yosia Yekonia o lalashera lenyena te nkata e yararoto e Babilon. Ore te siadi e yararoto e Babilon, neiu Yekonia Shealtiel; neiu Shealtiel Serubabel; neiu Serubabel Abiud; neiu Abiud Eliakim; neiu Eliakim Asor; neiu Asor Sadok; neiu Sadok Akim; neiu Akim Eliud; neiu Eliud Eleasar neiu Eleasar Matan; neiu Matan Yakobo; neiu Yakobo Yosef, ilo payian le Mariamu natoiwuo Yesu oji Kristo. Metaa era iishoritin ebaiki Abraham o metabaiki Daudi iishoritin tomon o ong'uan; ore ebaiki Daudi o metabaiki yararoto e Babilon era iishoritin tomon o ong'uan; ore ebaiki e yararoto e Babilon o metabaiki Kristo nera iishoritin tomon o ong'uan. Inji eikununo einoto e Kristo; ore eidipa Yosef atisira Mariamu ng'otonye Yesu, eton eitu enyikakino, nedoli eeta enutai e Nkiyang'et Sinyati. Ore amu oltung'ani loo sipat Yosef, olpayian lenye, nemeyieu nesul, neyieu neleliari aing'uaa. Ore eton eiguanare kuna baa, ng'ura neipang'aki olmalaika lo Laitoriani te nkidetidet, nejoki, “Yosef, olayioni le Daudi, miureyu irik esiankiki ino Mariamu, amu ore enutai naata ninye, naa ene Nkiyang'et Sinyati. Naa keiu enkayioni, nijo enkarna enye Yesu, amu ninye oyooki aitajeu iltung'ana lenyena too ng'ok enye.” Etaasate kuna pooki pee ebaya inaatejo Olaitoriani to lkilikuai lo loiboni le Nkai otejo, “Ng'ura kenutayu entito neiu enkayioni; nejo ninche enkarna enye Immanuel;” naa eji, “Enkai te nebo iyiook.” Ore pee eputunye Yosef too injo neas anaa enaitanapa olmalaika lo Laitoriani nerik esiankiki enye ang; neitu eyiolou ninye o metoiu enkayioni, nejo enkarna enye Yesu. Ore pee eini Yesu te Betlehem e Yudea te nkata o laiguanani Herode ng'ura, nepuonu ilang'eni ooing'uaa oloosaen, nebau Yerusalem, ejo, “Kaji etii olaiguanani loo Lyahudi, otoiwuoki? Amu kitoduaa olakira lenye eilepu to loosaen, nikietuo iyiook aaserem ninye.” Ore pee ening Herode ina, neing'aeng'ai ninye o Yerusalem pooki. Ore pee eiturrur ninye ilapolosak kituaak o laiteng'enak loo nkitanapat le ilo orere, neipar ajoki, “Kaji eiunyeki Kristo?” Nejokini, “Te Betlehem e Yudea; amu inji etisiraki aajo to loiboni le Nkai: ‘Ore iyie Betlehem te nkop e Yuda, mira hoo kini tiatua ilaitoriak le Yuda; amu iyie epukunye olarikoni oyooki aitore ltung'ana laainei Isiraeli.’ ” Ina pee eipotu Herode ilang'eni too nkurrat, netem asipunye oleng enkata apa nataliee ilo akira. Neirriwaa ninche Betlehem nejoki, “Enchom, emparu imbaa e ina kerai, ore pee itumutumu ninye nikiyakiki olomoni pee alotu sii nanu aserem ninye.” Ore pee eidip ninche aatoning olaiguanani nepuo; ng'ura, ore ilo akira apa otoduaa ninche to loo saen nerikoo ninche o metaba anaa neitashe te shumata ewueji netii enkerai. Ore pee edol ninche ilo akira neng'ida te ng'ida kitok oleng. Ore pee ejing aji, nedol ina kerai o Mariamu ng'otonye, negil kung aaserem ninye; nebol ilbenia lenye neitaiki ninye inkishorot; sahabu o enkorropil o emanoo. Ore pee eikok Enkai ninche te nkidetidet pee meshukokino Herode nerrinyo ti ae oitoi aapuo enkop enye. Ore pee errinyo, ng'ura, neipang'aki olmalaika lo Laitoriani Yosef te nkidetidet nejoki, “Inyo, tudumu enkerai o ng'otonye, isikaki Misiri, niton te ine o metaba anaa naaliki, amu eing'oru Herode ina kerai pee ear metua.” Neinyototo nedumu enkerai o ng'otonye arik kewarie Misiri; neton te ine o metua Herode; pee ebaya enapa natejo Olaitoriani to loiboni le Nkai pee ejo, “Aipotuo enkerai ai aitung'uaa Misiri.” Ore pee edol Herode ajo etipika lelo ang'eni olosek negoro metiminisa, neirriwaa iltung'ana metaara metuata inkayiok pooki naatii Betlehem o neemanita pooki naatabaitie ilarin aare nedou aishiaakinye ina kata natisipunye lelo ang'eni. Nebaya ina kata ororei oiroro oloiboni le Nkai oji Yeremia etejo, “Etoning'oki oltoilo te Rama, olkiyioi o enkishirata sapuk, eishiraki Raheli inkera enyena, nemeitigirayu amu meekure eetae.” Ore pee eidip atua Herode, ng'ura neipang'aki olmalaika lo Laitoriani Yosef te nkidetidet te Misiri, ejo, “Inyo tudumu enkerai o ng'otonye, shomo enkop e Israel amu etuata lelo apa ooing'oru enkishui e ina kerai.” Neinyototo arik enkerai o ng'otonye nepuo enkop e Israel. Kake ore pee ening inchere etaa Arkelaus olaiguanani le Yudea, te rishata e papaai lenye Herode neureyu errinyo ina alo; neikoki te nkidetidet neboina alo olkerenket le Galilaya. Nelo aton te nkang naji Nasaret, pee ebaya enatejo oloiboni le Nkai nchere: “Keaku keji Olnasarayoi.” Ore te nena olong'i nelotu Yohana Olaibatisani elikioo ti ong'ata e Yudea, ejo, “Erridutu, amu etinyikua enkitoria e shumata.” Amu ore ele, ninye eimaka oloiboni le Nkai oji Isaya otejo, “Etii oltoilo obuaku ti ong'ata Entobiraki Olaitoriani enkoitoi nalala entorioi nkoitoi enyena.” Neishopito apa ninye Yohana enkila oo lpapit le ntames, o enkeene te mpolos enye; ore endaa enye na lmaat o naishi e ong'ata. Nepuo apa enetii ninye ina kata Yerusalem o Yudea pooki o lkirinen pooki le Yordan; neibatisai pooki to lkeju le Yordan eirridu ng'ok enye. Ore pee edolu ninye Ilfarisayo kumok o Sadukayo epuonu meibatisae nejoki ninche, “Naishoi oo lasuriaa ai ng'ae otoroja intae elanya engoro nalotu? Entoiu ilng'anayio ooishiaakinore enkirridunoto. Nimijojo ti atua ate, ‘Kiaata iyiook Abraham aa papa lang’; amu ajoki intae, keidim Enkai aishoo Abraham nkera te kulo soito. Neiteleikiaki taata entolu intana oo lkeek naa ore pooki shani lemeiu lng'anayio sidain, nedung'i aanang'aki enkima. “Aibatisa nanu intae te nkare pee eitodolu nchere irridutua ng'ok; kake ore olaasujita, naa kegol ninye, aalang nanu, maaishiaakino hoo nanu te nanapaki inamuka enyena, naa ninye oibatisa intae te Nkiyang'et Sinyati o te nkima. Neeta esilet enye te nkaina enye, naa keor asip olkurroto lenye oidong'ishoreki, nesotoki enkano enye empeche ore isuut nepej te nkima nemearayu.” Ore te siadi ina nelotu Yesu eing'uaa Galilaya enetii Yohana te Yordan meibatisae ninye. Neyieu Yohana neany eibatisa, nejoki, “Keishiaakino naa iyie likimbatisa nanu, pa nilotu iyie enatii?” Newaliki Yesu ajoki, “Tonyorrai taata iyie, amu te ina eishiakino nikintabaya naayieu Enkai pooki.” Nenyorraa Yohana. Ore pee eidipi aaibatisa Yesu, neilepu nabo kata aing'uaa enkare; ng'ura, nebolokino shumata nedol ninye Enkiyang'et Sinyati e Nkai edou anaa enturkulu, elotu shumata ninye; naa ng'ura, nepuku oltoilo te shumata nejo, “Enkerai ai ena nanyor, natishipe te ninye.” Ore ina kata neilepie Enkiyang'et Sinyati Yesu arik ong'ata metetema shetani. Ore pee eidip atupukoi nkolong'i artam dama o kewarie. Nelotu olatemani nejoki, “Te naa ira iyie Enkerai e Nkai, tiaaki kulo soito metaa mukateni.” Kake newaliki ajoki, “Etisiraki, ‘Meishuyie oltung'ani emukate ake, kake eishuyie pooki rorei opukunye enkutuk e Nkai.’ ” Neitoki shetani arik enkanasa sinyati neitoton ninye te ntopij e nkaji e Nkai. Nejoki. “Te naa ira iyie Enkerai e Nkai, tusulai kewan enkop; amu etisiraki aajo: ‘Keitanap ninye ilmalaika lenyena te nkaraki iyie, eikinap ninche too nkaik enye, pee mikinkob osoit enkeju ino.’ ” Nejoki Yesu ninye, “Etisiraki sii aajo, ‘Mitem iyie Olaitoriani Enkai ino.’ ” Neitoki shetani arik ninye oldoinyo oado oleng, neitodol ninye nkitoriat pooki e nkop o enkitoo enye. Nejoki ninye, “Ekaaisho nanu iyie kuna tokitin pooki ti nikigilaki kung aserem.” Nejoki Yesu ninye, “Shomo shetani amu, etisiraki aajo, ‘Teserema Olaitoriani Enkai ino naa ninye ake openy isiaai.’ ” Neing'uaa shetani ninye te ina kata; naa ng'ura, nepuonu ilmalaika aaisiaai ninye. Ore pee ening ninye ajo eteenaki Yohana neibelekenya alo Galilaya. Neing'uaa Nasaret nelotu abik te Kapernaum, enkang natii embata e naiposha te nkop e Sebulon o Naftali, pee ebaya enatejoki to loiboni le Nkai oji Isaya pee ejo, “Enkop e Sebulon o enkop e Naftali ineeshepita enkoitoi nalo enaiposha, lido kekun le Yordan Galilaya oo loreren, etoduaa ewang'an kitok olorere otonita ti atua enaimin, ore lelo ootonita te nkop o to loip lee keeya, ekenyikia ewang'an.” Ore ebaiki ina kata neiteru Yesu alikioo ororei le Nkai nejo, “Erridutu amu etinyikua enkitoria e shumata.” Ore eloito te mbata e naiposha e Galilaya nedol ilalashera oare, Simon oji Petero o lalashe lenye Anterea, enang'aki o rreshet atua enaiposha, amu ilarreshok apa loo sinkir. Nejoki ninche, “Wootu, erukurukoreki, naa kaitaa intae ilarreshok loo ltung'ana.” Neing'uaa nabo kata irresheta lenye neirukurukore. Ore pee eigutaa penyo nedol kulikae alashera oare. Yakobo le Sebedayo, o Yohana olalashe lenye, ti atua empeut eboitare papaai lenye Sebedayo, eripita irresheta lenye neipot ninche. Neing'uaa nabo kata empeut o papaai lenye neirukurukore. Nemanaa Yesu te Galilaya pooki eiteng'enisho too nkajijik enye e ntumo, nelikioo ilomon Supati le ina kitoria, neishiunye pooki keeya o emueyian ti atua olorere. Neibulu olning'o lenye enkop pooki e Siria; neyakini ninye iltung'ana pooki oomueyiaa ooibung'a nkeyaitin oo mpukunot kumok o looata loiriruani o looata emuoyian e nkiterria o lmaiman o looidimua emion; neishiunye ninye ninche. Nesuj ilororani kituaak ooing'uaa Galilaya o Dekapoli o Yerusalem o Yudea o lido kekun le Yordan. Ore pee edol Yesu isiamon neilepaki oldoinyo: ore pee eton nepuonu ilooiteng'eni lenyena enetii. Neiteng'en ninye ninche nejo: “Emayiana ilaisinak too ltauja; amu enenye enkitoria e keper. Emayiana ilooishir; amu ninche eilejileji. Emayiana iloobor; amu ninche oojung enkop. Emayiana ilooata esumash o enkure eing'oru enayieu Enkai; amu ninche eitaraposhi. Emayiana iloata olng'ur amu ninche eing'urrieki. Emayiana ilooitukuo ltauja; amu ninche oodol Enkai. Emayiana lelo ooitayu osotua; amu ninche eji inkera e Nkai. Emayiana lelo ooisilisili te nkaraki enayieu Enkai amu enenye enkitoria e keper. “Imayianana intae te nesukeny ninche intae, neisilisil, neiteeniki intae imbaa pooki torrok e lejare te naa nkaraki nanu. Enting'idata nishipapa oleng; amu kitok olerrinyore linyi te shumata; amu eisilisilo ninche aaiko neijia iloibonok le Nkai ootii apa te dukuya intae. “Irara intae emunyan e nkop; kake te netuyiatuyu emunyan, ainyoo eshukokinyeki enkisuisho? Meitoki aata tipat katukul, kake kenang'ari boo meitunyoi iltung'ana too nkejek. “Irara intae ewang'an e nkop. Meisudoroyu enkanasa natii oldoinyo. Nemeinok sii ltung'ana oltaa nepising to ltoo, kake eiteleiki olperere; neitawang'aki pooki ootii aji. Neijia sii enchoo ewang'an inyi metawang'a te dukuya iltung'ana pee edol iasat inyi supati, pee eyanyituni Papa linyi otii shumata. “Emijo kaewuo aitarruoo Nkitanapat aashu loibonok le Nkai, eitu alotu aitarruoo kake pee aitabaya. Amu esipa ajoki intae, ore o metaba anaa nelusoo shumata o enkop, melusoo osirata obo anaa oltipoto obo loo Nkitanapat eitu eitabari. Ore pooki ng'ae ogil enkitanapata nabo e kuna kutiti, hoo te naa enkinyi, neitayiolo ilkulikae metigila, naa keipoti ninye aajo olkini te pooki te nkitoria e keper; kake ore oloas nena neitayiolo sii ilkulikae metaasa, naa keipoti ilo aajo olkitok te nkitoria e keper. Amu ajoki intae te naa melusoo esupatisho inyi alang enoo laiteng'enak loo nkitanapat o enoo Lfarisayo, nimijing'ijing'i enkitoria e keper. “Itoning'o aajo etiaakaki iltung'ana li apa, ‘Miar metua; naa ore oloar metua neishiaakino enkiguana.’ Kake ajoki nanu intae, ore pooki ogorokino olalashe, naa keishiakino enkiguana; ore olosurdaany olalashe, neishiaakino, nerikokini ilkituaak; ore olodekisho ajo ‘Lo modai!’ Keishiaakino olbalbal le nkima. Naa ti niyau enkishoroto ino olperere lo lasar, nidamu te ine olalashe lino likiaatakinore, tung'uai teine enkishoroto te mbata o lperere lo lasar, shomo; tang'asa toning'ore olalashe lino, pee intoki ashukunye aitayu enkishoroto ino. “Tasioki toning'ore olintarrikinore eton iriamariri te nkoitoi; pee mikirik enetii oladung'oni le nkiguana nikirikoki oladugoni le nkiguana esikari, nikinang'akini korokoroni. Esipa aajoki, mipuku te ine katukul o metaba anaa nilak empisai nabayie. “Itoning'o aajo etejoki, ‘Miloloito.’ Kake ajoki nanu intae, ore oloing'or eng'oruoi neng'uar eidipa atololoito to ltau lenye. Ti nikintasur enkong'u ino e tatene, tukurtu, inturrai, amu enaikash te neimin erubata nabo alang te nenang'akini osesen lino pooki olbalbal le nkima. Naa ti nikintasur enkaina ino e tatene, tudung'u inturrai; amu eikash erubata ino nabo te neimin, alang osesen lino pooki te nenang'akini olbalbal le nkima. “Etejoki sii, ‘Ore oloorore enkitok enye, inchoo eisho ninye empalai naorore.’ Kake ajoki nanu intae, ore pooki ng'ae oorore enkitok enye, neme te nkaraki e loloito ake, etipika ninye atua eloloito; ore oloyam ina natoororeki, etololoite ninye. “Itoning'o sii iltung'ana li apa enatiaakaki, ‘Minya olmumai le lejare, kake intabai ilmuma linono to Laitoriani.’ Kake ajoki nanu intae minos ilmuma katukul hoo te shumata, amu olorika le nkitoria e Nkai; aashu te nkop, amu olorika loo nkejek enyena; aashu te Yerusalem, amu enkang o laiguanani kitok. Niminos olmumai te ndukuya ino, amu mindim aiborrie olpapita obo anaa aitoroka. Kake enchoo irorei linyi metaa ee, neaku ee, aashu mme, neaku mme, amu ore enalusoo te nena naa ilo torrono eing'uaa. “Itoning'o aajo etejoki, ‘Enkong'u o te nkong'u, o olalae to lalae.’ Kake ajoki nanu intae, migilunore olikintaas entorrono kake ore olikiosh eseder e tatene, imbelekenyaki sii enkae. Ore oltung'ani pooki oyieu nikirik enkiguana, eyieu nikioru olkila li atua, inchoo meewa sii oli oriong. Ore olikiaraki, shomo kilomita nabo, shomo are. Ore olikiomon, inchoo; ore olikisilen, mimitiki. “Itoning'o aajo etejoki, ‘Tonyorra ole latia ino, nimbayu olmang'atinta lino.’ Kake ajoki nanu intae, entonyor ilmang'ati linyi, niomonokiki lelo ooisilisil intae; pee itumutumu intae aataa inkera e Papa linyi otii keper; amu eilepakinye enkolong enye iltorrok o supati neirriwaki enchan iloota sipat o ile meeta. Amu ti ninyorrinyorro iloonyor intae, kaa shunet itumutumu intae? Ai meiko neijia oshi ilasotok le kodi? Naa te naa ilalashera linyi ake irorokiki, kaa yasata naa italang'ie ilkulikae? Ai meiko oshi neijia ilkulikae oreren? Entaa naa bayarot anaa Papa linyi otii keper laa bayaroti. “Eng'ura pee miasiaasa isupati inyi te dukuya inkonyek oo ltung'ana ijojo pee edol ninche intae; amu ti ninkoko neijia nimitumutumu shunet te Papa linyi otii keper. “Ore ti nintayu iyie enkishoroto ino o lng'ur nimiosh emowuo, anaa enaiko isunkuro too nkajijik e ntumo o too nkoitoi, pee errep iltung'ana. Esipa ajoki intae, eidipa ninche aanoto enchunet enye. Kake ti nintayu iyie enkishoroto ino o lng'ur nimincho enkaina ino e kedienye metayiolo enaas ene tatene; pee eaku intokitin ninchooyo, inoo nkisudorot; naa ore Papa lino odol too nkisudorot, nikincho ninye olerrinyore. “Naa ti niomonono nimitiuwu anaa isunkuro, amu enyor ninche aatoomon eitashoo too nkajijik e ntumo o too lojat oo nkoitoi naalala e nkanasa, pee etum aatodol iltung'ana. Esipa ajoki intae, eidipa ninche aanoto shunet enye. Kake ti niomon iyie, tijing'a olgilata lino, ore pee indip aikeno kutuk aji niomon Papa lino too nkisudorot, ore Papa lino odol too nkisudorot naa aikilaaki iyie. “Naa tiniomonono, emintaa irorei kumok anaa enaas iloreren, amu edamu ninche aajo kening'i ninche te nkumoi oo rorei lenye. Emitiu anaa ninche, amu eyiolo Papa linyi iniyieuwu eton eitu iomonunu intae. Naa inji entejo: ‘Papa lang otii shumata meitisinyi enkarna ino meeu enkitoria ino, metaasi eniyieu te nkop anaa enatiu te shumata. Inchoo iyiook ena olong endaa ang e anaake. Nipalaki iyiook isilen ang, anaa ti nikipalaki iyiook ilooata isilen ang. Nimirik iyiook atua intemat, kake intajeu iyiook tiaatua ilo torrono.’ “Amu tinipalakiki intae iltung'ana inkitarruorrot enye, naa kepalaki sii ninye intae Papa linyi otii shumata. Kake ti nimipalakiki intae iltung'ana inkitarruorrot enye, nemepalaki sii intae Papa linyi inkitarruorrot inyi. “Naa ti nieniene ate aapukoo, emitiu anaa isunkuro oosot inkomomi, amu keidisie ninche inkomomi enye, pee edol iltung'ana aajo etupukoitie. Esipa ajoki intae, eidipa aanoto shunet enye. Kake ore ti nipukoo iyie, iela endukuya ino nisuj enkomon ino; mikidol iltung'ana inchere itupukoiyie, kake edol Papa lino otii inkisudorot; ore Papa lino odol too nkisudorot nikimputaki. “Emishumaki ate te nkop masaa kiroteti, eneinosie olasai o endoron, negil ilapurrok, nepurroo, Kake entushumaki ate te shumata masaa inyi kiroteti, te nemeinosie olasai, anaa endoron, nemegil ilapurrok nemepurroo; amu ore enetii masaa inono kiroteti, naa ine eyooki atii oltau lino. “Ore oltaa lo sesen naa enkong'u, metaa te neikishiaan enkong'u ino, neiput osesen lino pooki ewang'an. Kake te naa torrono enkong'u ino neiput osesen lino pooki enaimin. Amaa te neaku ewang'an natii iyie enaimin: kebaa esapuko e ina aimin! “Metii oltung'ani oidim aaisiaayia ilkituaak oare amu eibayu obo nenyorru olikae; aashu eibung'are obo nemenu olikae. Mindimidimi aaisiaayia Enkai o Mamon, enkai oo masaa. “Enkaraki ina pe ajoki intae, eminyamaliki enkishui inyi, aajo ainyoo inyanya, anaa ainyoo iokioko, anaa too seseni linyi aajo ainyoo inchopishopo. Ai melusoo enkishui alang endaa, nelusoo osesen alang nkilani? Eng'ura intaritik o loing'ang'e inchere, meunisho nemeisampu, nemeiturrurroki impechen; neitoti Papa linyi otii shumata ninche. Ai mirara intae kiroteti aalang ninche? Ai ng'ae te intae oidim te neitanyamaluo atoponai enkadori enye entemata nabo? “Ainyoo naa pee inyamalakiki inkiliani? Entadamu intapuka e ong'ata enaikununye te nebulu; amu measisho ninche nemepiyaisho; kake ajoki nanu intae eitu eishopi ninye Solomon te sikar enye pooki anaa nabo e kuna. Amaa te neishop Enkai inkujit e ong'ata aiko neijia, naatai taata neyookini aanang'aki enkima taaisere, ai meitulusoo oleng aishop intae, lo tung'ana ooti enkirukoto? “Eminyamalu ijojo, ‘Ainyoo kinya?’ Anaa, ‘Ainyoo kiok?’ Ana, ‘Ainyoo kinchop?’ Amu nena pooki eing'oru iloreren lemeyiolo Enkai; amu eyiolo Papa linyi le shumata ajo iyieuu nena pooki. Kake entang'as eng'oru enkitoria enye o sipat enyana; naa keponikini intae nena pooki. Metaa eminyamalaki ine taaisere amu enyamalaki taaisere kewan. Eidip enkolong intorrok enyena. “Eminguanare pee meinguanareki intae. Amu ore enkiguana ninguanarere, naa ninye eiguanareki intae; ore enintorisiokiki ilkulikae, naa ninye eitorisiokini intae. Ainyoo pee ing'uraa esuama natii enkong'u o lalashe lino, nimidol olchata otii enkong'u ino makewan? Anaa kaji inko ti nijoki olalashe lino, ‘Inchooki maitayu esuama te nkong'u ino;’ naa, ing'ura etii olchata atua enkong'u ino makewan? Lo sunkuroi, tang'asa intayu ilo shata te nkong'u ino makewan pee itumoki atoduaa oleng, aitayu ina suama te nkong'u o lalashe lino. “Emincho ildiein entoki nasinya, niminang'akiki ilului inyi ilbitiro pee meituny too nkejek enye, neibelekenyakino intae aakij. “Entoomonu pee eishori intae; eng'oru naa itumutumu entooshiosh kutuk aji pee eboluni intae. Amu ore pooki oomonu neng'amaa, ore olooshiosh neboluni. Anaa kalo tung'ani te intae laa, te neomon e nkerai emukate, keisho ninye osoit? Aashu ae te neomon osinkirri, keisho olasurai? Aiti niyiololo intae oora torrok aaishoo inkera inyi inkishorot sidain, kebaa eitulusoo naleng Papa linyi otii shumata aisho intokitin sidain lelo oomon ninye? Metaa ore pooki niyieuwu neitaas intae iltung'ana entaasa sii intae ninche nena, amu kuna nkitanapat o loibonok le Nkai. “Entijing intae te nkishomi napirik amu dapash kishomi nelala enkoitoi nalo enkiminata, naa kumok iloojing ina. Amu kepirik kishomi naa ronkai enkoitoi nalo enkishon, naa ilkuti ootum ina. “Entorrip ate too loibonok le lejare oopuonu enitii eishopito inkilani oo ntare, kake ore atua ninche, naa isuyian ooata enkarri. Too lng'anayio lenye iyiolouu. Keitayuni sabibu too lkiku anaa ilng'abolo too lkikarreta? Neijia etiu, eiu pooki shani sidai ilng'anayio sidain, neiu pooki shani torrono ilng'anayio torrok. Meidim olchani sidai atoiu ilng'anayio torrok, nemeidim sii olchani torrono atoiu ilng'anayio sidain. Ore pooki shani lemeiu ilng'anayio sidain, nedung'i aauroo nenang'akini enkima. Neijia naa etiu, too lng'anayio lenye iyiolouu ninche. “Mme pooki tung'ani laajo ‘Olaitoriani, Olaitoriani,’ ojing enkitoria e Nkai, kake ilo oas enayieu Papa lai otii shumata. Aayooki aajoki ilkumok te ina olong, ‘Olaitoriani, Olaitoriani, keitu kimbonisho te nkarna ino, nikiaraa iloiriruani te nkarna ino, nikiaas ine nking'asia te nkarna ino?’ Naa kashirraki ina kata ajoki ninche, ‘Eitu ae kata ayiolou intae, enchom entung'uayoki intae, ilaasak loo ntorok.’ “Metaa ore pooki ng'ae oning lelo rorei laainei neas, neitanyaanyukieki oltung'ani oteshetaka enkaji enye endapidapoi, nesha enchan, nenang'unye enkare, nekut olkutati, neosh ina aji, neitu euroo; amu etuunokoki olkitamanyunoto lenye shumata endapidapoi. “Na ore pooki ng'ae oning kulo rorei laainei nemeas, neitanyaanyukieki oltung'ani omoda oteshetaka enkaji enye shumata osinyai; nesha enchan nenang'unye enkare, nekutu olkutati, neosh ina aji, neurori neaku kitok euroroto enye.” Ore pee eidip Yesu kulo rorei, neing'asia siamon te nkiteng'enare enye; amu eiteng'ena ninche anaa oloata enkidimata nemetiu anaa ilaiteng'enak lenye loo nkitanapat. Ore pee edou ninye to ldoinyo, neirukurukore siamon kituaak. Naa ng'ura, nelotu enetii oloata enkeeya oo lbolot, negil kung aserem, nejoki, “Lo kitok, ti niyieu kindim atisika.” Neitorioo enkaina enye neiseyie nejo, “Ayieu; tisikayu.” Nesikari nabo kata enkeeya enye. Nejoki Yesu ninye, “Ng'ura, miliki oltung'ani; kake shomo intoduaa kewan olapolosani, nintayu enkishoroto naitanapishe Musa, metaa shakenisho te ninche.” Ore pee ejing ninye Kapernaum, nelotu olkitok le sikari enetii asai ninye, ejo, “Lo kitok, eirrag olaisiaayiani lai ti aji, etaa olmaima, neitabayie oleng.” Nejoki Yesu, “Kalotu aishiunye.” Newaliki ilo kitok le sikari ajoki, “Lo kitok, kaamakua nanu ti nijing'u enkaji ai, kake tejo ake ororei, naa keishiu olaisiaayiani lai. Amu ara sii nanu oltung'ani otii abori enkitoo, naata nanu sikarini laatii ti abori, te najoki obo, ‘Shomo,’ nelo; najoki likae, ‘Wou,’ nelotu; naa te najoki osinka lai, ‘Taasa ena, neas.’ ” Ore pee ening Yesu nena, neing'asia nejoki lelo oosujita, “Esipa ajoki intae, eitu ae kata adolie likae ti atua Siraeli enkirukoto sapok naba inji. Najoki nanu intae, epuonu ilkumok ooing'uaa oloo saen o loontoluo aatoni te nebo Abraham o Isaak o Yakobo ti atua enkitoria e shumata; kake ore lelo laa ninche naaji ile ina kitoria nenang'akini atua enaimin e auluo; neaku enkishirata o eonyoto oo lala.” Nejoki Yesu ilo kitok loo sikarini, “Shomo ang; metotiwuo te iyie anaa ina niruko.” Neishiunyeki olaisiaayiani lenye te ina kata ake. Ore pee ejing Yesu enkaji e Petero, nedol enkaputani enye eirrag emuei oloirobi. Neiseyie enkaina enye neing'ueki oloirobi, neinyototo aisiaai ninye. Ore pee eaku teipa, neyakini ilkumok ooata iloiriruani nearaa iloiriruani to rorei, neishiunye lelo pooki oomuei. Pee etum atabai enairoroki to loiboni le Nkai oji Isaya pee ejo, “Ewa ninye openy imuoyiaritin ang, netanapa inkeyaitin ang.” Ore pee edol Yesu esiamo kitok emanita, neitanap metalang'a aapuo lido kekun. Nelotu olaiteng'enani loo nkitanapat nejoki, “Lo Aiteng'enani, kaasuj pooki weuji nilo.” Nejoki Yesu, “Eeta imbariak ingumot, neeta intaritik o loing'ang'e sinkin kake meeta Enkerai e Tung'ani eneiteleiki endukuya enye.” Nejoki likai loo looiteng'eni lenye, “Lo kitok, inchooki matang'asa alo anukaa papa.” Kake etiaaka Yesu ninye, “Tusujuaki; inchoo ilmeneng'a metunukai ilmeneng'a lenye.” Ore pee ejing Yesu empeut, nesuj ilooiteng'eni lenyena. Ng'ura, neinyototo olkutati kitok te naiposha, metaa keimisie ilopir le nkare empeut; kake keirura ninye. Nepuo enetii ilooiteng'eni lenyena, neinyeyie, nejoki, “Intajeu iyiook, Lo Kitok, amu kindaaitie.” Nejoki, “Aainyo pee iureishoyuyu intae ilooti enkirukoto?” Neinyototo neisikong olkutati o enaiposha; nelotu enkitirring'ata kitok. Neing'asia lelo tung'ana nejo, “Kaa pukunoto o ltung'ani ele oning olkutati o enaiposha?” Ore pee ebaiki lido kekun le nkop oo Lgadaren, nenang'are iltung'ana oare oaata iloiriruani oopi oleng ooing'uaa inkuraren o metaa meidim oltung'ani aima ina oitoi. Naa ng'ura, nebuak ninche aajo, “Ainyoo iatakinore iyie iyiook Enkerai e Nkai? Amaa iewuo iyie aitame iyiook eton eng'or enkata?” Netii eluaata oo lbitiro nalakuaniki ninche nadaa. Nesai lelo oiriruani aajoki, “Te naa iaraa iyiook aipung'ie, inchoo iyiook maape aajing enda boo oo lbitiro.” Nejoki, “Enchom.” Ore pee eipung ninche, nepuo aajing ilbitiro; naa ng'ura! Nekuet emboo pooki, nesulari te marti aajing enaiposha, neye ti atua enkare. Neilanyisho ilchekuti aapuo inkang'itie enye nelikioo imbaa pooki o nena naatotiwuo te lelo ooata iloiriruani. Naa ng'ura! Nepuku enkanasa pooki aapuo aanang'are Yesu; ore pee edol nesai metung'uai ilo kirine lenye. Neked empeut nelang alo enkanasa enye. Naa ng'ura neyakini oltung'ani maima, eirrag te rruat; ore pee edol Yesu enkirukoto e lelo tung'ana, nejoki ilo maima, “Na kerai, ntagoluoyu to ltau amu kitapalakaki ng'ok inono.” Naa ng'ura nejo kulikai aiteng'enak loo nkitanapat ti atua ate, “Enkai emor ele tung'ani.” Neyiolou Yesu ndamunot enye nejoki, “Aainyo pee mbirribirrirri ntorrok too ltauja linyi? Kaa nalelek, te neji ‘Kitapalakaki ng'ok inono.’ Ana te neji, ‘Inyoo shomo?’ Kake ore pee itumutumu aatayiolo aajo, eeta Enkerai e Tung'ani engolon te nkop napalakinye iltung'ana ng'ok,” nejoki ilo maima, “Inyo, tudumu erruat ino, shomo ang.” Neinyototo, nelo ang. Kake ore pee edol siamon neureishoyu neisho Enkai enkitoo naishoo ltung'ana engolon naaijo ina. Ore eim Yesu ine nedol oltung'ani oji Matayo, eton te neitainyeki kodi nejoki, “Tusujuaki,” neinyototo asuj. Neaku ore eton te ina aji enye ainos endaa, ng'ura, nepuonu ilasotok le kodi o laing'okok kumok netoni te nebo Yesu o looiteng'eni lenyena. Ore pee edol Ilfarisayo ina, nejoki ilooiteng'eni lenyena, “Aainyo pee eng'arie Olaiteng'enani linyi endaa ilasotok le kodi laing'okok?” Kake ore pee ening, nejo, “Meyieu ilememuei olabaani, kake iloomuoi ooyieu. Enchom enteng'ena ate eneikununo ele rorei, ojo, ‘Olng'ur ayieu mme olasar;’ amu eitu alotu aipot isupati kake ilaing'okok.” Nepuonu ina kata ilooiteng'eni le Yohana enetii nejoki, “Aainyo pee kipukoo oleng iyiook o Lfarisayo, nemepukoo ilooiteng'eni linono?” Nejoki Yesu ninche, “Keidim ilchorueta lo loyamishe aaishira eton eboitare oloyamishe? Kake kepuonu nkolong'i naayae olayamishe aaitung'uaa ninche, ina kata kenya epukoo. “Meetae oltung'ani opik erashe ng'ejuk enkila musana; amu ore ina natipikaki epolos enkila, neponari apolosa. Nemepik sii iltung'ana enaisho ng'ejuk oo sabibu ilbenia musan; naa te nepik nepolosa ilbenia, neibukori enaisho oo sabibu nepolosa sii Lbenia; kake ilbenia ng'ejuko epiki pee erripi pokira are.” Ore eton eliki ninche kuna baa, ng'ura, nelotu oltung'ani oitore enkaji e ntumo negilaki kung nejoki, “Etua te na kata entito ai, kake wou inteleiki enkaina ino pee epiu ninye.” Neinyototo Yesu o looiteng'eni lenyena nesuj ninye. Naa ng'ura, nelotu enkitok te siadi ninye, naruko osarge larin tomon o are, neiseyie olcholoi lo lkila lenye; amu etejo to ltau lenye, “Te naiseyie ake olcholoi lo lkila lenye naishiu.” Neibelekenya Yesu nedol ninye, nejoki, “Naito, intagoluoyu amu kinchiunye enkirukoto ino.” Neishiu ina kitok aiteru te ina kata ake. Ore pee elotu Yesu enkaji e ilo oitore enkaji e ntumo nedol ilookut indulen o lorere eilepilep oleng, nejoki, “Ewuang'a amu eitu eye entito, keirura.” Nekueniyie ninche aayiet. Ore pee eidipi aaipung'ie olorere, nejing neibung enkaina enye, neinyototo entito. Neibulu kulo omon ilo kerenket pooki. Ore egiroo Yesu aing'uaa ine nesuj iltung'ana aare modook ooishiraki aajoki, “Ing'urrie iyiook enkerai e Daudi.” Ore pee ebaiki aji, nepuonu ilmodook enetii, nejoki Yesu ninche, “Irukuruku aajo kaidim ataasa ena?” Nejoki, “Ee lo kitok.” Neiseyie nkonyek enye ejo, “Inchoo etiu anaa enkirukoto inyi.” Neboloyu nkonyek enye. Neitanap Yesu nereiki ajoki ninche, “Entodol emincho hoo oltung'ani obo eyiolou.” Kake eipung'o nepuo aaibulunye ilomon lenyena ilo kerenket pooki. Ore pee eipung lelo, ng'ura, neyakini ninye oltung'ani lemeiro otijing'a oloirirua. Ore pee eitupuku oloirirua, neiro ilo lemeiro apa, neing'asia esiamo nejo, “Eitu ae kata edoli ena ti atua enkop e Israel.” Kake etejo Lfarisayo, “Engolon oo loiriruani eararie ninye loiriruani.” Neman Yesu inkang'itie pooki sapuki o nkutiti, neiteng'enisho too nkajijik enye e ntumo, nelikioo ilomon supati le nkitoria e keper, neishiunye pooki keeya o pooki pukunoto e mueyian. Ore pee edol ninye olorere netum olng'ur te ninche amu eteekate ninche, nelepori neidapashari netiu anaa ntare nemeeta olchekut. Nejoki ninye ilooiteng'eni lenyena, “Esipa aisapuk enkisampuare kake kuti ilaisiaayiak. Kaae, entoomon naa Olaitoriani le nkisampuare meirriu ilaisiaayiak atua enkisampuare enye.” Neipot lelo ooiteng'eni lenyena tomon o aare, neisho meitoria nearaa iloiriruani ooiduruk, neishiunye sii mpukunot pooki oo mueyiaritin o nkeyaitin. Naa kuna nkarn oo looiteng'eni lenyena pokira tomon o aare; ole dukuya Simon oji Petero, o Andrea olalashe lenye; Yakobo le Sebedayo o Yohana olalashe lenye; Filipo, o Bartolomayo; Tomas o Matayo olasotoni le kodi; Yakobo le Alfayo, o Tadayo; Simon onyor olosho lenye o Yudas Iskariot laa ninye oishooyie Yesu. Kulo pokira tomon o aare eirriwayie Yesu neitanap ajoki, “Emipuo nkoitoi oo Loreren, nimijing'ijing'i enkang hoo nabo oo ltung'ana le Samaria kake enchom enetii ntare kiminat e nkaji e Siraeli. Ore ipuopuo, entolikioi entejo ‘Etinyikua enkitoria e shumata.’ Enchiunye iloomuei, entopiu ilootuata enchiunye iloota enkeeya oo lbolot, entaarai iloiriruani. Eishooki intae pesho, enchooi sii intae pesho. Emishoroo sahabu anaa mpesai too nkimeitani inyi, nimishoroo embene te lototo inyi, anaa nkilani maare, anaa namuka, anaa eng'udi, amu eishiaakino olaisiaayiani endaa enye. Ore pooki ang sapuk o enkiti nijing'ijing'i, enkilikuanisho tenaa ketii oltung'ani supat atua, nitonini tenebo ninye o metaba anaa nidumunyenye aapuo. Na ti nijing'ijing'i enkaji eroroki. Naa te neishiaakino intae ina aji, nejing osotua linyi shumata ninye, naa te nemeishiaakino, neshukokino intae osotua linyi. Ore pooki ng'ai lemeng'amaa intae, anaa olemening ororei linyi, ore pee ipukuku aaing'uaa ina aji, anaa ina ang, nimpiripiroo enterit natii nkejek inyi. Esipa ajoki intae, keikashieki Sodom o Gomora te ina ang te nkolong enkiguana. “Eng'urai airriwayie intae anaa nkerra atua suyian, enteng'enita anaa lasuriaa, niborrurru anaa nturkuluni. Kake entodol ate too ltung'ana amu keishooyo intae meiguanareki neidong intae ti atua nkajijik enye e ntumo. Naa keriki intae dukuya ilbalosini o laiguanak te nkaraki nanu, pee iakuku shakeni te ninche o too Loreren. Kake ore ina kata te nerik intae, eming'aeng'ae aajo, ‘Kaa kijo’, amu keishori intae te ina kata enijojo. Amu mme intae ooiro, Enkiyang'et e Papa linyi nairo ti atua intae. “Naa keishooyo olalashe olikae, metaari metua, neishooyo menye enkerai, nedumakino nkera ntoiuo enye neishooyo ninche metaari metuata. Naa keibayu intae iltung'ana pooki, enkaraki enkarna ai, kake ore olong'iri metabaiki enkiting'oto nejeu. Naa te nearari intae te na ang, esikaki enkae, amu esipa ajoki intae, miishushu nkang'itie e Siraeli pooki eitu elotu Enkerai e Tung'ani. “Melang oloiteng'eni oloiteng'en ninye, nemelang osinka oloitore ninye. Eidip oloiteng'eni te netiu anaa oloiteng'en ninye, netiu osinka anaa oloitore ninye. Asa taa etejo olopeny enkaji Beelsebul, kebaa eitulusoo aajo neijia lootii enkaji enye! “Metaa emiure ninche amu, meetae embae naisudoyioki nemeyiolouni. Ore enajoki nanu intae te naimin embalunye te wang'an, ore enining'ining'i te nkiok, entolikioi too nchumarot oo nkajijik. Emiureyu ilooar osesen nemeidim aatar enkiyang'et, enare ti niureyuyu ilo oidim aidaikie pokira are enkiyang'et o sesen ti atua olbalbal le nkima. Ai meinosieki ntiitiini are esenti nabo, kake mesulunye nabo aosh enkop, meyiolo Papa linyi. Ore ninche intae, eikenaki o metabaiki lpapit loo lukuny inyi. Ore enkaraki e ina emiureishoyu amu, inkashikasha aalang intiitiini kumok. “Ore naa pooki laaibalie te dukuya ltung'ana, naa kaibalie sii ninye te dukuya Papa lai otii shumata. Ore pooki laamiki te dukuya ltung'ana naa kamiki sii nanu ninye te dukuya Papa lai otii shumata. “Emidamu nijojo kaewuo ayau osotua enkop; eitu alotu ayau osotua, kake olalem ayawua. Aewuo nanu airriki oltung'ani o menye nairriki entito o ng'otonye, nairriki entito o enkaputani. Ore lmang'ati lo ltung'ani keaku lelo le nkaji enye. “Ore olonyor menye anaa ng'otonye aitalang nanu, anaa olonyor olayioni lenye anaa entito enye pee aaitalang nanu, nemaishiaakino nanu. Ore olemenap osalaba lenye naasuju nemaaishiakino nanu. Ore ologolie enkishui enye neiminie, ore oloiminie enkishui enye enkaraki nanu negolie. “Ore olong'amaa intae, nanu etang'amayie, ore olaang'amaa nanu naa ilo lairriwua etang'amayie. Ore olong'amaa oltung'ani supat te nkaraki naa supat, netum olerrinyore lo ltung'ani supat. Ore oloitook obo le kulo ooti, enkikompe e nkare nairobi enkaraki naa oloiteng'eni lai, esipa ajok intae, meimin olerrinyore lenye.” Ore pee eidip Yesu aitanapa ilooiteng'eni lenyena tomon o are, neing'uaa ine nelo aiteng'enisho, nelikioo ororei too nkang'itie naamanita ine. Nening Yohana eena te korokoroni nkiasin e Kristo, neirriwaki ilooiteng'eni lenyena nejoki, “Ai yie elde olotu ana keetae likae likiaanyu?” Newaliki Yesu ajoki, “Enchom entoliki Yohana imbaa nining'itoto o nidolitata. Etodolishote ilmodook, nepuo ilmaiman, neishiunyeki le nkeeya oo lbolot, nening'ishoyu lming'anta, neitopiuni ilootuata, ore ilaisinak, nelikini Ororei Supat le Nkai. Nemayiana olemetum olkob te nanu.” Ore pee epuo ninche neimaki Yesu Yohana to lorere ajoki, “Ainyoo ishomo intae aadol ti ong'ata? Kolperesi oyuk enkijape? Kake aainyo pee impang'a aapuo? Ko ltung'ani oishopito nkilani naapuyiapui ishomo aadol? Ng'ura, ore ilooishop inkilani naapuyiapui nkajijik oo laiguanak etii. Kake ainyoo pee impang'a aapuo? Ko loiboni le Nkai ishomo aadol? Ee pae olkitok olang oloiboni le Nkai. Amu ninye eimakaki pee etisiraki aajo, ‘Ng'urai airriwaa olkipaaret lai aiturukie te iyie, likintobiraki enkoitoi ino.’ Esipa ajoki intae, eitu etumi ae kata too ltung'ana ooiu nkituaak, olkitok olang Yohana Olaibatisani. Kake ore oloti aisul te nkitoria e shumata naa kitok te ninye. Ore ebaiki nkolong'i e Yohana Olaibatisani o taata eisimitai te ngolon enkitoria e keper, neisimaa iloogol. Amu eibonishote loibonok pooki le Nkai nkitanapat o metabaiki Yohana; naa te naa iyieuwu ning'amumu ena, ele doi Eliya, olapa olotu. Oloata nkiyiaa toning'o. “Ainyoo aitanyaanyukie ltung'ana le na kata? Etiu anaa nkera naatoni too neemirishoreki, neipot inkulie nejoki, ‘Kitooshokitio intae ndulen neitu iranyiranya; nikinchirakita intae neitu nchirishiri.’ Amu eewuo Yohana nemedaa, nemeokisho, nejo ltung'ana, ‘Keeta oloirirua.’ Ore Enkerai e Tung'ani neewuo nedaa, neokisho, nejo ninche, ‘Eng'ura oltung'ani oulu, olaokoni le naisho naa olchore loo loosotu kodi o laing'okok!’ Kake too nkiasin etokorduaki kulo ti atua ltung'ana, pee eaku ilng'anayio le dukuya le Nkai o lo Lkuoo le Ker.” Neiteru aisikong nkang'itie naataasie siaitin enyena e nking'asia, amu eitu eirridu ng'ok enye, “Ee kake ayia Korasin, ee kake ayia Betsaida, amu te naa ketaasaki inenking'asia naataasaki ti atua intae, te Tiro o te Sidon anaata erridutua apa moitie, nepika ilkuniyiani o nkuruon. Kake ajoki intae, keikashieki Tiro o Sidon te nkolong e nkiguana aaitalang intae. Oi iyie Kapernaum aa ijo eikisisi aailepie shumata? Ae kintadouni tabaiki enemeneng'a. Amu ore isiaaitin naataasaki ti atua iyie, te naa ketaasaki apa te Sodom anaata eton eetae ina ang o tene. Amu esipa ajoki intae, keikashieki enkang e Sodom te nkolong e nkiguana aaitulusoo te iyie.” Neitoki Yesu ajo te ina kata, “Aaisho iyie enashe, Papa Olaitoriani le shumata o enkop, amu isudorie kuna baa iltung'ana ng'eni niboloki nkera. Ee neijia etiu Papa amu ina nikintishipa iyie. “Aaishoo Papa pooki toki, nemeetae hoo obo oyiolo ina Kerai leme Papa ake, nemeetae hoo obo oyiolo Papa leme ina Kerai ake o pooki ng'ae ogelu Enkerai aboloki. “Wootu enatii intae pooki oonyamal niatata ilolan ooiroshi, pee ayeng'iyeng'ie intae. Enteleiki ate enchata ai oo murto, enteng'ena ate te nanu, amu kabor nemawuasa to ltau, naa itumutumu intae enkiyeng'iyeng'ata ti atua nkorroki inyi; amu kelelek enchata ai oo murto naa keneneng olola lai.” Ore te ina kata nelo Yesu te nkolong e nkiyeng'iyeng'ata aim atua nkurman e nkano, netir esumash ilooiteng'eni lenyena, neitayu enkano aainos. Ore pee edol Ilfarisayo nejoki, “Ng'ura enaasita ilooiteng'eni linono, nemebara te neasi te nkolong e nkiyeng'iyeng'ata.” Nejoki, “Keitu isomama enataasa apa Daudi o looboitare etotiro esumash? Etijing'a enkaji e Nkai neinos emukate enkitoduaaroto nemeishoruno too nkitanapat meinosa ninye o lelo ooboitare, ilapolosak ake ooinos. Ana keitu isomama too nkitanapat inchere kegil ilapolosak le nkaji e Nkai enkolong e nkiyeng'iyeng'ata nemeikeni aajo eisarkionie ninche nemeikoni aajo eitarruoitie ninche? Kake ajoki intae, etii ene entoki kitok alang enkaji e Nkai. Kake te naa itayioloito eneikununo ele rorei ojo, ‘Olng'ur ayieu mme olasar.’ Naa anaata mipikipiki entioto ilemeeta. Amu Olaitoriani le nkolong e nkiyeng'iyeng'ata Enkerai e Tung'ani.” Nelo ninye aing'uaa ine alo ajing enkaji e ntumo Netii ine oltung'ani tasat aina. Neikilikuan ninche aajoki, “Inyorriki keishoruno too nkitanapat te nebakishoi te nkolong e nkiyeng'iyeng'ata?” Aa kejo taa pee etum aaitang'oro ninye. Nejoki ninche, “Kalo tung'ani linyi oata enker nabo, naa te nedoiki ina ker engumoto te nkolong e kiyeng'iyeng'ata, nemeibung aitayu? Kebaa naa elusoo oltung'ani te nker! Te nkaraki e ina keishoruno metaasi mbaa supati te nkolong e nkiyeng'iyeng'ata.” Nejoki ilo tung'ani, “Intorioi enkaina ino!” Neitorioo neishiu atiu anaa enkae. Kake eipang'a ake Ilfarisayo nepuo aaiguanare aaing'oru eneiko pee ear ninye metua. Neyiolou Yesu ilo rorei nelo te ine, nesuj iltung'ana kumok neishiunye ninche pooki. Neitanap ajoki, pee melikioo, ejo pee etum atabai enatejoki te nkutuk o loiboni le Nkai oji Isaya pee ejo, “Osinka lai ele, lategelua, olanyor lai, oshipakino oltau lai; naa kapik Enkiyang'et shumata ninye, olaa ninye odung'oki loreren enkiguana; nemeilepilep ninye nemebuakita; nemening'i oltoilo lenye too nkoitoi oo nkaulelie, nemegil olperesi oilenye, nemear olkilang'ilang'et oiliilari, o manaa neisulie enkiguana. Naa enkarna enye eyooki Loreren aaisilig.” Nerikokini ina kata oltung'ani oata oloirirua; naa modooni nemeiro, neishiunye, Yesu ninye neiro nedolishoyu. Neing'asia olorora pooki nejo, “Keidim ele ataa ninye Enkerai e Daudi?” Ore pee ening Ilfarisayo ina nejo, “Mearaa ele tung'ani iloiriruani mme te ngolon e Beelsebul olkitok loo loiriruani.” Neyiolou ndamunot enye nejoki, “Ore enkitoo pooki naoro ti atua nerruoyo; anaa enkang ake pooki, anaa enkaji naoro aara maate, meitashe. Amaa teniaraa Shetani, Shetani, neoro ninye makewan kaji naa eiko enkitoria enye teneitashe. Amaa te naa te Beelsebul aaraa nanu iloiriruani, ai ng'ae eararie ninche nkera inyi? Ninche maate ooyooki aairrash intae. Kake amaa te naa te Enkiyang'et e Nkai aaraa nanu iloiriruani, enkitoria e Nkai naa naewuo atua intae. “Keidim oltung'ani atijing'a enkaji o ltung'ani ogol neya ntokitin enyena, eitu eng'as aen ilo tung'ani ogol? Pee etum aawa ntokitin e nkaji enye? “Ore olemaaning'ore naa olmang'atinta lai ore olemeiturrur te nebo nanu, keisardaikie. Enkaraki ena ajoki intae, epalakini ltung'ana ng'ok pooki o emoroto namor Enkai, kake ore emoroto namor Enkiyang'et Sinyati, nemepalakini. Ore olomor Enkerai e Tung'ani, kepalakini, kake ore pooki ng'ae omor Enkiyang'et Sinyati, nemepalakini tele porror o to lolporor olotu. “Entaa olchani sidai, nesidanu ilng'anayio lenyena, aashu entaa olchani torrono, netorronu lng'anayio lenyena amu too lngayio lenyena eyiolouni olchani. Naishoi oo lasuriaa, kaji nkoko pee ndimidimi aairoro irorei supati irara intae torrok? Amu inaabore oltau eiro enkutuk. Ore oltung'ani supat neitayu supati ti atua olchumati lenye sidai, ore oltung'ani torrono, neitayu ntorrok to lchumati lenye torrono. “Ajoki naa intae, ore pooki rorei lemeeta tipat oiro iltung'ana, eikenu kenya ake te nkolong e nkiguana. Amu to rorei lino kinkenakini isupati, naa to rorei lino kinkenakini ntorrok.” Nejoki ilaiteng'enak loo nkitanapat o Lfarisayo, “Olaiteng'enani, kiyieu nikidol olmonekie te iyie.” Newaliki ajoki, “Eyieu kulo tung'ana lena kata torrok oololoito olmonekie nemeishori, pooki o lmonekie oishori naa olo loiboni le Nkai oji Yona. Ore anaa apa etii Yona enkoshoke e ntiamasi o sinkirri ndamaritin uni o nkewarieitin uni, neijia sii etiu Enkerai e Tung'ani, kelo aton ndamaritin uni o nkewarieitin uni ti atua enkop. Keitasheikinore iltung'ana le Ninawi te nkiguana ltung'ana le na ishoi, naa keiguanaki ninche nchere, eitarruoitie amu eirridutua ninche to lkilikuai le Yona; netii ene olkitok olang Yona. Keitasheikinore enkaiguanani e moikuape te nkiguana ltung'ana le na kata naa keiguanaki ninche nchere eitarruoitie, amu eewuo ninye te nkop nalakua alotu ainining eng'eno e Solomon, netii ene olkitok olang Solomon. “Te nepuku oloirirua torrono aing'uaa oltung'ani neimaa wuejitin neetoito eing'oru eneyeng'iyeng'are, nelau; nejo, ‘Kashukokino enkaji ai natung'uayie’; ore pee elotu nedol ajo mijooni etooroki enkaji neikodi. Nelo ariku kulikae oiriruani oopishana torrok aalang ninye, nejing aatoni, neaku mbaa e ilo tung'ani torrok aalang enkiterata; neijia sii etiu te kulo tung'ana le na ishoi torrono.” Ore eton eirorie olorora neitashe ng'otonye o lalashera te boo eyieu neirorie. Nejoki oltung'ani, “Eitashe ng'utunyi te boo, o lalashera linono, kiyieu nikirorie,” Newaliki ilo tung'ani nejoki, “Ae ng'ae yieyio anaa ae loo ng'ae ilalashera laainei?” Neutaki te nkaina enye lelo ooiteng'eni lenyena nejoki, “Kulo yieyio o lalashera laainei. Amu ore oloas enanyor Papa otii shumata, ninye olalashe lai o enkanashe ai, o yieyio lai.” Nepuku Yesu te ina olong ti ang, nelo aton te mbata e naiposha. Neiturrurrokino ilororani kumok, nejing empeut aton, neitashe olorere te mbata e naiposha. Neirorie ninye too nkitanyaanyukot ajoki, “Etupukuo olaunoni alo aunisho. Ore eunisho, nedoiki kulikae anterera embata e nkoitoi, nepuonu ntaritik aanya. Nedoiki kulikae olkarkar loo soito ewueji nemetii enkulupuoni sapuk, nebulu nabo kata, amu metii enkulupuoni sapuk. Ore pee edalu enkolong nepej, ore enkaraki meeta ntona netoyu. Nedoiki kulikae atua ilkiku negor ilkiku nkaitubulu. Nedoiki kulikae enetii enkulupuoni sidai, neiu obo iip neiu likae ntomoni ile, neiu likae tomoni uni.” “Oloata nkiyiaa toning'o.” Nepuonu ilooiteng'eni lenyena nejoki ninye, “Kaji etiu pee irorie ninche too nkitanyanyukot?” Neng'amaa ajoki, “Enkaraki naishooki intae entayiolo inkisudorot e nkitoria e shumata, kake eitu eishori ninche. Amu ore oloata naa keishori neponikini ninye enadooyo, ore olemeeta neoruni ninye in naata. Enkaraki e ina pee airorie nanu ninche too nkitanyaanyukot amu edolisho too nkonyek nemedol, nening'isho too nkiyiaa nemening, nemejing'aa. “Naa te ninche eitabari enaibon e Isaya pee ejo, ‘Ining'ining'i nimining'ung'u hoo pito, ning'oring'oro, nimidolidolo toki, amu eiroshiutuo ltauja le kulo tung'ana, netiripate nkiyiaa mening, neikeno nkonyek enye, pee medolisho ake too nkonyek enye, nening'ishoyu too nkiyiaa enye, neyiolou ltauja lenye, naaibelekenyakino nanu pee aishiunye ninche.’ “Kake emayiana inkonyek inyi amu idolishosho, nemayiana nkiyiaa inyi amu ining'ishosho. Esipa ajoki intae, kumok iloibonok le Nkai o ltung'ana supati oong'uar apa pee edol kuna baa nidolitata intae, neitu edol, o pee ening kuna baa nining'ining'i intae, neitu ening. “Entoning naa intae enkitanyaanyukoto o launoni. Ore pooki tung'ani oning ororei le nkitoria e shumata nemejing'aa, nelotu ilo torrono awuapaa inaatuunoki to ltau lenye. Nena etuunoki te mbata e nkoitoi. Ore inaatuunoki to lkarkar loo soito, na elde oning ororei neng'amaa nabo kata te ng'ida; kake meeta intona makewan, kake eton penyo, ore pee epuonu isinaitin anaa enkinyala, enkaraki e ilo rorei nerrorro. Naa ore inaatuunoki ti atua lkiliku, naa ilo oning ororei, neirony isinaitin le na kop, o elejare oo masaa e na kop, negor ororei nemeisho. Ore nena naatuunoki te nkulupuoni sidai, naa ilo oning ororei nejing'aa naa keiu ilng'anayio aiu obo iip, neiu likae intomoni ile, neiu likae tomoni uni.” Neitoki aliki ae kitanyaanyukoto ajo, “Etiu enkitoria e shumata anaa oltung'ani otuuno enkano te nkurma enye. Kake ore eirura ltung'ana nelotu olmang'atinta aun endiati ti atua, nelo. Ore pee ebulu enkano, neiu ilng'anayio nebulu sii ninye endiati. Nepuo isinkan enetii olopeny enkaji nejoki, ‘Lo kitok, keitu iyie iun enkano te nkurma ino? Kaji eing'uaa endiati?’ Nejoki, ‘Olmang'atinta lai oikona neijia.’ Nejoki isinkan, ‘Iyieu nikipuo aadotu aaiturrurru?’ Nejoki, ‘Emipuo pee midotunyenye endiati enkano. Entapal metubulu pokira are o metaa enkata nadung'i, paa ore enkata e nkisampuare, najoki iladung'ok entang'as enturrurro endiati, enteen irridat, entapejoi, ninturrurrokiki enkano empeche ai.’ ” Neitoki aliki ninche ae kitanyaanyukoto ajo, “Etiu enkitoria e shumata enaa enkantererai naji karadali natuuno oltung'ani te nkurma enye. Naa kiti ninye alang ilanterera pooki, kake ore pee ebulu neaku sapuk alang inkaitubulu o metaa olchani, o meetu intaritik aapik isinkin ilng'osil lenyena.” Neitoki aliki ninche ae kitanyaanyukoto nejo. “Etiu enkitoria e shumata anaa enkaisiijoi natudumua enkitok neitushulaki imboreitin uni e nkurma e nkano o metaba anaa neisuijoyu pooki.” Einosaka Yesu olorora mbaa pooki too nkitanyaanyukot, neitu hoo einosaki likae rorei metii enkitanyaanyukoto. Pee etum atabai enatolimuo oloiboni le Nkai ejo, “Too nkitanyaanyukot abol enkutuk ai, alimu mbaa naaisudoro apa moitie pee eitamanyuni enkop.” Neing'uaa siamon nejing aji, nepuonu ilooiteng'eni lenyena nejoki, “Imbalakinye iyiook enkitanyaanyukoto o ndiati e nkurma.” Neng'amaa ajoki, “Ore oloun ilanterera sidain, naa Enkerai e Tung'ani. Ore enkurma naa enkop, ore ina antererai sidai naa nkera e ina Kitoria, ore endiati na nkera e ilo torrono. Ore ilo mang'atinta oun naa shetani, ore enkisampuare, naa enkiting'oto e nkop, ore ilooisampu naa ilmalaika. Ore anaa enatasotuoki endiati aapejoo te nkima, nejia sii etiu te nkiting'oto e nkop. Keirriu Enkerai e Tung'ani ilmalaika lenyena, meitayu ti atua enkitoria enye inkitadiaat pooki o loas intorrok. Nenang'aki ninche olmoti le nkima, neaku enkishirata o eonyoto oo lala. Ore te ina kata newang'u isupati anaa enkolong te nkitoria e Menye. Oloata nkiyiaa naaning'ie, toning'o. “Etiu enkitoria e shumata anaa olchumati oisudoyioki tiatua enkurma, netum oltung'ani neturoo aisudoo, ore te nchipai enye, nelo amir pooki toki naata nelotu ainyiang'u ina kurma. “Etiu enkitoria e shumata anaa oltung'ani omirisho, oing'oru soito oogol enkinyang'a. Ore pee etum obo, nelo amir intokitin pooki naata, neinyang'u ina. “Ore ake sii etiu enkitoria e keper anaa orreshet otanang'akaki atua enaiposha, nejing impukunot pooki oo sinkir. Ore pee eboreyu neyietuni embata e naiposha, netoni aagelaki isupati iltutuan, neiturrarri iltorrok. Neijia etiu te nkiting'oto e nkop. Kepuonu ilmalaika aagelu iltorrok aarishie isupati. Nenang'akini ninche atua olmoti le nkima, neaku enkishirata o eonyoto oo lala.” Neikilikuan Yesu ajoki, “Itoning'utuo nena pooki?” Nejoki ninche, “Ee.” Nejoki, “Enkaraki ina, ore pooki aiteng'enani loo nkitanapat ng'en te nkitoria e shumata, netiu anaa oltung'ani openy enkaji oitayu te nkaji enye nashumishoreki olchumati lenye, ing'ejuko o musan.” Ore pee eidip Yesu atolimu kuna kitanyaanyukot nelo. Ore pee ebaya enkang enye, neiteng'enisho te nkaji e ntumo, neing'asia ninche oleng, nejo, “Kaji enotie ele tung'ani eng'eno o enkidimata naasie kuna naas e nking'asia? Ae mme ele doi olayioni lo laguetani? Neji ng'otonye Mariamu? Nemeji lalashera lenyena Yakobo o Yosef o Simon o Yuda? Ae metii sii nkanashera enyena pooki atua iyiook? Kaji enotie ele tung'ani kuna baa pooki?” Neaku etanyaita ninche ninye, kake etiaaka Yesu ninche, “Melau oloiboni le Nkai enkanyit mme te nkop enye aashu te nkaji enye.” Neitu eas inenking'asia kumok te ine enkaraki enkirukoto nemeeta ninche. Ore ina kata nening'oo olaiguanani Herode olning'o le Yesu nejoki sinkan lenyena, “Yohana Olaibatisani taa ele otopiwuo aing'uaa lootuata, paa ina magilanisho naasisho ti atua ninye.” Amu eibung'a apa Herode Yohana aen apik korokoroni, enkaraki e Herodias enkitok e Filipo olalashe lenye. Amu etiaaka Yohana, “Mikinchoro too nkitanapat ti niaata ninye.” Ore pee eyieu near metua, neureyu olorere amu ejo pooki oloiboni le Nkai Yohana. Ore pee ebau enkolong e inoto e Herode, neranyisho entito e Herodias te mpolos o lorere, neitiship Herode. Nenya olmumai nchere, ore entoki pooki naomon ninye, neisho. Neiguan ng'otonye, nejo, “Inchooki tena mbesen elukunya e Yohana Olaibatisani.” Neisina Olaiguanani, kake ore enkaraki lmuma lenyena o lelo ooboitare neitanapisho meishori. Neirriwaa oltung'ani meshomo adung'u elukunya e Yohana te korokoroni. Neyauni elukunya enye te mbesen neishori entito, neyaki ina tito ng'otonye. Nepuo ilooiteng'eni lenyena aaya osesen aanukaa, nepuo aainosaki Yesu. Ore pee ening Yesu lelo omon, neinyototo ajing empeut alo ewueji neliyio, ore pee ening olorere, nesuj too nkejek eing'uaa nkang'itie enye. Ore pee edou Yesu te mpeut, nedol olorere kitok, neing'urrie neishiunye ltamueyia lenye. Ore pee eaku teipa, nepuo ilooiteng'eni lenyena enetii nejoki, “Ore ene nikitii naa ewueji neliyio, netaa teipa tiaaki olorere meshomo kuna ang'itie pee epuo aainyiang'aki ate endaa.” Nejoki Yesu, “Meeta tipat napuoyie, enchoo intae endaa.” Nejoki, “Mikiaata iyiook toki neme mukateni miet o sinkir aare.” Nejoki, “Eyakaki.” Nejoki olorere metotona too nkujit, nedumu nena mukateni imiet o sinkir aare, neing'or shumata, nemayian, negil nena mukateni, neisho ilooiteng'eni lenyena, neisho ilooiteng'eni lenyena olorere. Nenya pooki neraposho, nesotuni naatelekutua nkikapuni tomon o aare, naabore. Ore ilooinosa naa inkalifuni imiet ilewa metii nkituaak o nkera. Neitanap ina kata ilooiteng'eni lenyena meituruko aapuo te mpeut lido kekun metaba anaa neitanapare olorere. Ore pee eidip aitanapare esiamo, neilepaki oldoinyo alo aomon; ore pee eaku teipa neaku ninye ake openy. Netalama empeut enkop natoyio, eyukito lopir le nkare amu kenang'are osiwuo. Ore pee enyiku esiran, nelotu Yesu enetii ninche elo too nkejek ti oriong enkare. Ore pee edol ilooiteng'eni lenyena eloito too nkejek ti oriong enkare neureishoyu nejo, “Oloip doi!” Nebuak aaishir te nkuretisho. Neirorie taa Yesu nejoki, “Entagoluoto, Nanu doi! Emiureisho.” Newaliki Petero ajoki, “Lo Kitok, te naa eiyie, tiaakaki maeu enitii too nkejek ti oriong enkare.” Nejoki, “Wou.” Nedou Petero te mpeut nelo too nkejek ti oriong enkare enetii Yesu. Ore pee edol osiwuo neureishoyu neiteru aimis, nebuak to ltoilo sapuk ajo, “Lo Kitok, tasaruaki!” Neitorioo Yesu enkaina nabo kata aibung nejoki, “Oi iyie oloti enkirukoto, aainyo pee inyaaka aing'ash?” Ore pee eilepaki, empeut, negira osiwuo. Ore ilootii ina peut neserem ninye nejoki, “Esipa ira iyie Enkerai e Nkai.” Ore pee eidip aatalang, nebaiki enkop e Genesaret. Ore pee eyiolou iltung'ana le ina kop ninye neirriwaa ilkiliku lubot pooki e ilo kirine neyakini ltamueyia. Nesai meiseyie olcholoi lo lkila lenye, ore ilooiseyie pooki neishiu. Nepuonu Ilfarisayo oo laiteng'enak loo nkitanapat ooing'uaa Yerusalem enetii Yesu ejo, “kainyoo pee einyal ilooiteng'eni linono nkoon oo lpayiani? Amu einos endaa meisuja inkaik.” Newaliki ajoki ninche, “Ainyoo pee inyalinyala intae inkitanapat e Nkai enkaraki e nena koon inyi? Amu etejo Enkai, ‘Iyanyita minyi o ng'utunyi; ore oloitarriki menye aashu ng'otonye, inchoo metua.’ Kake ijojo intae, ore oltung'ani ojoki menye anaa ng'otonye inchere, ‘Ore toki naata naaretie iyie etaa enaisho Enkai to lasar,’ neaku meyanyit menye aashu ng'otonye. Ore te nkaraki nkoon inyi niwuang'ieng'ie nkitanapat e Nkai. Lo sunkuro, enotoko Isaya te naibon enye pee ejo, ‘Aayanyit ele orere too nkutukie, kake kaalakuaniki iltauja lenye; naa pesho aaserem ninche nanu, aa nkitanapat oo ltung'ana eitudupaa anaa ae ninche enkiteng'enare nasipa.’ ” Neipotu olorora nejoki, “Enining'o niyiolouu. Mme entoki naim enkutuk naidurukie oltung'ani, kake enapuku te nkutuk naidurukie oltung'ani.” Nepuonu ilooiteng'eni lenyena nejoki, “Itayioloito ajo etirikate Ilfarisayo pee ening ilo rorei?” Newaliki ninye ajoki ninche, “Ore pooki aitubului neme Papa le shumata otuuno kedotuni. Entapal ilarikok modook loo lmodook. Naa te nerik olmoodooni olikae modooni nesulakino pokira aare engumoto.” Newaliki Petero ajoki, “Imbalakinye iyiook ena kitanyaanyukoto.” Nejoki Yesu, “Keton ake sii mejing'aa intae? Aimiyiololo aajo ore pooki toki najing enkutuk o ltung'ani, enkoshoke elo neipang? Kake ore enapuku te nkutuk, oltau eing'uaa; naa ninye naisarkionie oltung'ani; amu oltau epukunye indamunot torrok, enkitayunoto oo loikop eloloito, enkibor oo nkonyek, enkiteenikinoto, o emorore. Kuna naaisarkionie oltung'ani, kake te nedaa meisuja inkaik, nemeisarkinonie oltung'ani.” Nelo Yesu te ine aito enkalo o lkerenket le Turo o Sidon. Ng'ura, nelotu enkitok e Kanaan naing'uaa ina kop neishiraki ajoki, “Lo Kitok, ng'urrieki, ara Daudi, eitanyamalita enkerai ai oloirirua.” Kake eitu hoo eng'amaa. Nepuonu ilooiteng'eni lenyena aasai aajoki, “Inchoo ena kitok elo amu, esujita iyiook eishirita.” Newaliki ajoki, “Ntare kiminat ake e nkaji e Siraeli aairriwakaki.” Nelotu neserem nejoki, “Lo Kitok, taretuoki.” Newaliki ajoki, “Meishiaakino te nenang'akini ildiein endaa oo nkera.” Nejoki, “Edede, Lo Kitok; kake einos sii ildiein inaadoyio te mesa oo lkituaak lenye.” Newaliki Yesu ajoki, “Na kitok, aisapuk enkirukoto ino, metotiwuo te iyie anaa ina niyieu;” neishiu entito enye te ina kata. Nelo Yesu te ine ashep enaiposha e Galilaya; neilepaki oldoinyo neton te ine. Neyiaya isiamon kumok, erikito iltung'ana ng'ojiniaa o lmodook o lemeiro, o lmaiman, o lkulikae kumok neirragie too nkejek enyena, neishiunye pooki, metaba anaa neing'asia olorora pee edol eiroro ilemeiro, neishiu ilmaiman, nepuo iltung'ana ng'ojiniaa, nedolishoyu ilmodook, neisis Enkai e Israel. Neipot Yesu ilooiteng'eni lenyena meetu enetii nejo, “Kaing'urrie esiamo amu, nkolong'i uni taata aaboitare nemeeta entoki nanya, nemayieu naisho meshomo eeta esumash, meiterriaa te nkoitoi.” Nejoki ilooiteng'eni lenyena, “Kaji kitumie tena ong'ata imukateni naaitaraposh ena siamo kitok naba inji?” Nejoki Yesu, “Kaja mukateni niaatata?” Nejoki, “Naapishana o lkuti sinkir kutiti.” Neitanap esiamo metotona te nkop; nedumu nena mukateni naapishana o lelo sinkir, ore pee eisho Enkai enashe, nebelibel neisho ilooiteng'eni lenyena pee eisho ilooiteng'eni esiamo. Neinos pooki neraposho; neiturrur mbelat naatelekuaki naaiputa nkikapuni naapishana. Ore ilooinosa nera ilewa nkalifuni ong'uan, metii inkituaak o nkera. Neisho esiamo meshomo nejing ninye empeut nelo enkop e Magadani. Nepuonu Ilfarisayo o Sadukayo enetii aatem eyieu neitodol olmonekie ooing'uaa shumata. Newaliki ajoki, “Ore te nteipa nijojo, ‘Mesha ade taata amu kenyokie shumata.’ Nijojo tadekenya, ‘Keidis ade taata amu kenyokie shumata netunukua.’ Indimidimi intae aatumusu ilmonek le shumata kake mindimidimi aaibalie ilmonek le kuna katitin. Eing'oru kulo tung'ana torrok lena kata olmonekie kake meishori likae leme olapa le Yona.” Nelo aing'uaa ninche. Ore pee epuo ilooiteng'eni lido kekun, nerikino eitu eya mukateni. Nejoki Yesu ninche, “Entorrip ate te nkisuijo oo Lfarisayo o Sadukayo.” Nejokino maate, “Enkaraki neitu kiyau mukateni.” Neyiolou Yesu ilo rorei nejo, “Oi intae ilooti enkirukoto, ainyoo pee ijokinono maate mukateni miaatata? Keitu ejing'aa intae? Aimidamumu mukateni imiet naainosa iltung'ana nkalifuni imiet, kaja nkikapuni ninturrurrutuo? Aashu mukateni naapishana naainosa inkalifuni ong'uan oo ltung'ana, kaja nkikapuni ninturrurrutuo? Ainyoo pee mejing'aa intae nchere mme mukateni aimaka? Kake entorrip ate te nkisuijo oo Lfarisayo o Sadukayo.” Nejing'aa te ina kata inchere, mme enkisuijo oo mukateni eimaka kake inenkiteng'enare oo Lfarisayo o Sadukayo. Ore pee elo Yesu enkalo e Kaisari e Filipi neikilikuan ilooiteng'eni lenyena ajoki, “Kejo iltung'ana ae ng'ae Enkerai e Tung'ani?” Nejoki, “Ejo kulikae Yohana Olaibatisani; nejo kulikae Eliya; nejo kulikae Yeremia, anaa obo loo loibonok le Nkai.” Nejoki, “Paa aijojo intae kara nanu ng'ae?” Newaliki Simon Petero ajoki, “Ira Iyie Kristo, Enkerai e Nkai naishu.” Newaliki Yesu ajoki, “Imayiana Simon ara Yona, amu eitu kiboloki ena entoki naata osesen o sarge, kake Papa lai otii shumata. Naajoki nanu iyie, ira Petero naa te nchumata ena soit ashet enkanisa ai; nemegilu ae kata ltimito le nemeneng'a. Naa kaaisho iyie ilboleta le nkitoria e shumata ore eniyooki aen te nkop, neaku eidipaki aateen te shumata; ore enilak te nkop eidipaki aatalak te shumata.” Neitanap ilooiteng'eni lenyena pee meliki oltung'ani nchere ninye Kristo. Neiteru Yesu te ina kata aibalakinye looiteng'eni lenyena inchere meeta kata nemelo Yerusalem meisilisili too mbaa kumok ilpayiani o lapolosak kituaak, o laiteng'enak loo nkitanapat neari metua, neitopiuni te nkolong e uni. Nerik Petero enkilepata nekurraki ajoki, “Mikintapaasha Enkai, Lo Kitok, mikitalama nena.” Neibelekenyakino Petero ajoki, “Shomo oriong ai shetani, amu aikirror; amu mme imbaa e Nkai idamu kake noo ltung'ana.” Nejoki Yesu te ina kata ilooiteng'eni lenyena, “Ore pooki tung'ani oyieu naasuj inchoo eany kewan nenap osalaba lenye naasuj. Amu ore pooki tung'ani ojo aitajeu enkishui enye neiminie, ore pooki oiturraa enkishui enye te nkaraki nanu, neitoki atum. Amu kaa dupoto etum oltung'ani te netum enkop pooki, neiturraa enkishui enye? Amu kelotu Enkerai e Tung'ani te nkitoo e Menye te nebo o lmalaika lenyena; nelaaki pooki tung'ani te ina kata aitorisioki inaataasa. Esipa ajoki intae, etii kulikae ooitashe te ne, lemeinyorrinyor keeya katukul metaba anaa nedol Enkerai e Tung'ani elotu te nkitoria enye.” Ore pee elusoo inkolong'i ile, nerik Yesu Petero o Yakobo o lalashe lenye Yohana ailepie ninche oopeny shumata oldoinyo oado. Neibelekenya empukunoto enye newang'u enkomom enye anaa enkolong, neiborru inkilani enyena aatiu anaa ewang'an. Naa ng'ura, neipang'aki Musa o Eliya aairorie ninye. Neirorie Petero Yesu nejoki, “Lo Kitok, ai sidai kitii ene, naa te naa iyieu naitobir ilng'oborri okuni, olino obo, o le Musa obo, o le Eliya obo.” Ore eton eiro, ng'ura, neitushur enkatampoi nawang; naa ng'ura, nepuku oltoilo te ina atampoi ojo, “Enkerai ai ena nanyor, natishipe te ninye. Entoning ninye.” Ore pee ening ilooiteng'eni lenyena neirut oleng nebatata aairrabalakino enkop. Nelotu Yesu neiseyie nejoki, “Enyeito emirut.” Nejo entaraposhu nkonyek, neitu edol likae tungani Yesu ake openy. Ore edou ninche to ldoinyo neitanap Yesu ajoki, “Emiliki oltung'ani nena nitoduaa metaba anaa nepiu Enkerai e Tung'ani aing'uaa ilootuata.” Neikilikuan ilooiteng'eni lenyena aajoki, “Ainyoo naa pee ejo ilaiteng'enak loo nkitanapat eji eng'as Eliya alotu?” Newaliki Yesu ajoki, “Esipa eng'as Eliya alotu neitobir imbaa pooki. Kake ajoki intae, eidipa Eliya aeu, neitu eyiolou ninche ninye, kake eitaasa pooki ninye naayieu. Neijia sii etiu Enkerai e Tung'ani, keisilisil ninche.” Neyiolou taa te ina kata ilooiteng'eni aajo Yohana Olaibatisani eimaka. Ore pee ebaya enetii esiamo nelotu oltung'ani obo agilaki kung nejoki, “Lo Kitok, ing'urrie enkerai ai amu eeta enkiterria neisilisilo oleng amu katitin kumok eurokino enkima nesulakino enkare. Natorikoko ilooiteng'eni linono, neitu eidim aaishiunye.” Newaliki Yesu ajoki, “Oi intae iltung'ana lena ishoi lemeeta enkirukoto, ootapong'ori, kaboitare intae o anu? Kang'iri te intae o anu? Entorikokoki.” Neisikong Yesu oloirirua, nepuku ninye aing'uaa neishiu enkayioni te ina kata. Nepuo ina kata ilooiteng'eni enetii Yesu oopeny nejoki, “Ainyoo pee eitu kindim iyiook aataarai?” Nejoki, “Enkaraki naa kiti enkirukoto inyi, amu esipa ajoki intae, ti niaatata enkirukoto naba anaa ene kantererai naji karadali, naa indimidimi aatiaaki ele doinyo ‘Tadotunye te ne, shomo idie;’ nedotunye; nemetii embae nemeidimayu te intae. Kake mepuku eneeijo ena mme te nkomono o te mpukoroto.” Ore eiturrurro te Galilaya nejoki Yesu ninche, “Etaa epiki Enkerai e Tung'ani nkaik oo ltung'ana; near ninche ninye metua, ore te nkolong e uni neitopiuni.” Neisinanuo ninche oleng. Ore pee epuonu Kapernaum, nepuo iloosotu olpisiai le shekeli e kodi enetii Petero nejoki, “Aimelak Olaiteng'enani linyi shekeli e kodi?” Nejo, “Kelak.” Ore pee ejing aji nemurutoki Yesu aikilikuan ajoki, “Ijo aa Simon? Ai ng'ae eitalak ilkituaak le na kop kodi oo masaa arashu enoo ltung'ana, ai nkera enye ana ineeiking'a.” Ore pee ejo Petero, “Ineeiking'a.” Nejoki Yesu ninye, “Neijia etiu, metii nkera enye siana. Kake ore pee mikintagor, shomo iyie enaiposha tanang'aki erreshet nintayu osinkirri ling'as aibung; nibol enkutuk, nitum shekeli, niya aitainye kodi ai o enino.” Nepuonu ina kata ilooiteng'eni enetii Yesu nejoki, “Kaing'ae olkitok te nkitoria e shumata?” Neipot enkerai neitasheyie te mpolos enye. Nejo, “Esipa ajoki intae, te neitu imbelekenyanya aatiu anaa inkera kutiti, nimijing'ijing'i katukul enkitoria e shumata. Ore pooki oitadou kewan anaa ena kerai, ninye olkitok aisul te nkitoria e shumata. Ore pooki ng'ae ong'amu enkerai naba anaa ena te nkarna ai, naa nanu etang'amua. “Kake ore oloitapong'oo nabo kiti te kuna naairuk nanu metaasa inyok, eishiaakino neenikini osoit oituutishoreki emurt nenang'akini olmegut le naiposha. Oi enkop te nkaraki mbaa naayau empong'oroto, amu meeta nchere pee mepuonu mbaa e nkitapong'oroto. Kake ee kake ayia te ilo laa ninye eimu empong'oroto. “Ti nikintapong'oo enkaina ino aashu enkeju ino, tudung'o nturrai amu enaikash te nijing enkishui miaata enkaina aashu enkeju alang ti niaata inkaik are o nkejek are, nikinang'akini enkima oo ntarasi. Naa ti nikintapong'oo enkong'u ino, tukurtu nturrai amu enaikash ti nijing enkishui iata enkong'u nabo alang ti nikinang'akini enkima e Gehena iata nkonyek pokira are. “Eng'ura emimenaa nabo e kuna kutiti; amu ajoki intae ore te shumata, eing'orita oshi ake ilmalaika lenye enkomom e Papa lai otii shumata. [Amu eewuo Enkerai e Tung'ani pee eitajeu inaaimina.] “Aijojo aa intae? Amaa te neeta oltung'ani nkerra iip nabo, aimeing'uaa kunda ntomoni naaudo o naaudo too ldoinyo nelo aing'oru ina naimina? Ore pee etum, esipa ajoki intae, eshipakino oleng ina alang nena ntomoni naaudo o naaudo neitu eimin. Neijia sii etiu mme eyieunoto e Papa linyi otii shumata, pee eimin nabo e kuna kutiti. “Ti nikinyal olalashe lino, shomo toliki enikinyalie aa intae ake pokira aare; naa ti nikining inoto olalashe lino. Naa te neitu kining, torikoki likae tung'ani obo aashu aare, pee esipuni pooki bae too nkutukie oo lchakenini oare aashu okuni. Naa te neany ening ninche toliki kanisa; naa te neitu ening sii kanisa, inchoo etiu te iyie anaa oloo loreren lemeiruk, anaa olosotu kodi. “Esipa ajoki intae, ore pooki niyeniyene te nkop, neeni te shumata; ore pooki nitalaa te nkop, nelaki sii te shumata. “Esipa aitoki ajoki intae, te nining'okinono oare linyi embae ake pooki te nkop niomonunu, naa keitaas intae Papa lai otii shumata. Amu ore enetumore oare anaa akuni te nkarna ai, natii nanu ine atua ninche.” Nelotu Petero te ina kata nejoki, “Lo Kitok, ae katitin aja aainyal olalashe lai, napalaki? Kemetabaiki katitin naapishana?” Nejoki Yesu, “Maajoki metabaiki katitin naapishana, kake metabaiki ntomoni naapishana katitin naapishana. Ore enkaraki ina, etiu enkitoria e shumata anaa olaiguanani otayiewua neikenisho te nebo isinkan lenyena. Ore pee eiteru aikenisho nerikokini oltung'ani obo oata esile enye intalantani nkalifuni tomon. Ore pee elau entoki nalakie, neitanapisho olkitok lenye metimiri ninye o enkitok enye o nkera enyena o ntokitin pooki naata, aalakie ina sile. Nebatata ilo sinka too nkejek enyena nesai nejoki, ‘Lo Kitok, ting'iriakaki metaba anaa naalaaki pooki.’ Neig'urrie olkitok ilo sinka nelaku nepalaki ina sile pooki. “Ore pee eipung ilo sinka nedol likae sinka oboita te siaai oata esile enye dinari iip nabo; neibung olgos agor nejoki, ‘Talaakaki esile ai pooki.’ Nebatata ilo sinka oboita te siaai too nkejek enyena nesai ejo, ‘Ting'iriakaki metaba anaa naalaaki pooki.’ Neany nerik apik korokoroni metaba anaa nelak esile pooki. Ore pee edol ilkulikae ooboitare te siaai enatotiwuo, neisinanuo oleng nepuo aaliki olkitok lenye inaataasate pooki. Neipot olkitok ilo sinka nejoki, ‘Lo sinka arruoni, kaatapalaka idia sile pooki enkaraki nikitasayia: paa aimeishiaakino sii iyie ning'urrie osinka liboitare te siaai anaa enaaing'urrie nanu iyie?’ Negoro olkitok nepik inkaik oo looitameisho metaba anaa nelak esile enye pooki. “Neijia sii eiko intae Papa lai otii keper ti nimipalakiki too ltauja pooki tung'ani olalashe lenye.” Ore pee eidip Yesu atejo kuna baa neing'uaa Galilaya nelotu enkop e Yudea te lido kekun Yordan; nesuj ninye isiamon kumok; neishiunye ninche te ine. Nepuonu Ilfarisayo enetii aatem aajoki, “Kebara te neorore oltung'ani enkitok enye te pooki bae?” Newaliki ajoki, “Keitu isomama aajo ore oloitobira ninche te nkiterunoto, eitobira olee o eng'oruoi? Nejo ninye te nkaraki ena eing'uaa olee menye o ng'otonye neibung'are enkitok enye, neaku ninche pokira osesen obo? Metaa meekure aa are, kake osesen obo. Ore enaidikidiko, Enkai, mincho erish oltung'ani.” Nejoki ninche ninye, “Ainyoo naa pee eitanapishe Musa meishori empalai e oro, neing'uaro?” Nejoki, “Eishoo Musa intae entoorore inkituaak inyi enkaraki engolon oo ltauja linyi, kake mme neijia apa etiu te nkiterunoto. Ajoki nanu intae, ore pooki ng'ae oorore enkitok enye neme enkaraki eloloito neyam ae, netololoite, ore oloyam enda natoororeki naa keloloito.” Nejoki ilooiteng'eni ninye, “Te naa inji naa etiu, embae o lmoruo o enkitok enye, meeta tipat enkiyama.” Nejoki ninye ninche, “Mme pooki ooidim aatang'amai ele rorei, kake lelo ake ooishoro. Amu etii ilooini aa sunashi too nkoishuaa oo noo ng'otonye, netii iloogelem iltung'ana, netii ilooitaa ate sunashi te nkaraki enkitoria e shumata. Ore ilo oidim atang'amu ena, inchoo eng'amu.” Neyakini ninye inkera kutiti pee eiteleiki nkaik enyena, neomonoki; neisikong ilooiteng'eni lenyena ilooyautua. Nejoki Yesu, “Entapal inkera kutiti emimitiki epuonu enatii, emimitiki amu enoo naatiu anaa kuna enkitoria e shumata.” Neiteleiki ninche inkaik enyena nelo te ine. Ng'ura, nelotu oltung'ani nejoki, “Olaiteng'enani, kaa bae naikishiaan aas pee atum enkishui nemeish?” Nejoki ninye, “Ainyoo pee kinkilikuan nanu inenkishiaa? Obo ake eetai aa supat; te naa iyieu nijing atua enkishui, imbung'a inkitanapat.” Nejoki, “Akua?” Nejoki Yesu, “Kuna, miar metua, miloloito, mipurrisho, minchakenoki elejare. Iyanyita minyi o ng'utunyi, tonyorra ole latia ino anaa kewan.” Nejoki ilo barnoti ninye, “Aidipa aibung'a nena pooki: ainyoo ae naatong'orikia?” Nejoki Yesu, “Te naa iyieu niaku bayaroti, shomo timira masaa pooki niaata, inchoo ilaisinak, neaku iata olchumati te shumata, nikilotu asuj.” Ore pee ening ilo barnoti ilo rorei, nelo eisinanuo amu eata masaa kumok. Nejoki Yesu ilooiteng'eni lenyena, “Esipa ajoki intae nchere egol pee ejing olkarsis enkitoria e keper. Naitoki ajoki intae, kelelek te ntames eim enaudoto o ltidu alang olkarsis ejing enkitoria e keper.” Ore pee ening ilooiteng'eni lenyena neing'asia oleng nejo, “Aing'ae naa oidim atajeu?” Nekurraki Yesu nkonyek nejoki ninche, “Meidimayu ina too ltung'ana, kake eidimayu pooki te Nkai.” Newaliki Petero te ina kata ajoki, “Ng'ura kitung'aitie iyiook pooki toki, nikisuj iyie, ainyoo naa kenya kitum?” Nejoki Yesu ninche, “Esipa ajoki intae, ore intae likitusuja nanu, ore te nkop ng'ejuk te neton akenya Enkerai e Tung'ani to lorika le nkitoo enye, ore intae likitusuja nanu nitonini sii intae too lorikan tomon o aare aaiguanare lelo oshon tomon o aare le Israel. Naa ore pooki ng'ae otung'uayie inkajijik, anaa lalashera, anaa nkanashera, anaa menye anaa ng'otonye, anaa nkera, anaa nkurman te nkaraki enkarna ai naa ketum ninche enaalus enkishui nemeish. Kake keaku ilkumok le dukuya ile siadi, neaku ile siadi ile dukuya. “Amu etiu enkitoria e shumata anaa oltung'ani openy enkang otayoo enasirie alo aing'oru iltung'ana ootur enkurma enye oo Ing'anayio. Ore pee eidip atoning'ore ilaisiaayiak pee elaaki dinari te nkolong, nerik enkurma enye oo sabibu. Neitoki alo saa uni, netum kulikae eitashoo te nemirishoreki meeta esiaai, nejoki sii lelo, ‘Enchom sii intae enkurma oo sabibu naisho intae entoki nairirikino.’ Nepuo. Neitoki ake alo anaa saa ile, o saa naaudo, neiko ake neijia. Ore saa tomon o obo, nelo netum kulikae ooitashoo nejoki, ‘Ainyoo pee intasheshe intae te ne endama pooki, miatata esiaai?’ Nejoki ninche ninye, ‘Amu eitu kitum oltung'ani oishoo iyiook esiaai.’ Nejoki, ‘Enchom sii intae enkurma oo sabibu.’ “Ore pee eaku teipa nejoki olopeny enkurma oo lng'anayio olaitasheikinoni lenye, ‘Impoto laisiaayiak, inchoo olmushaara, tang'asu to lobayie o mpung'ie to loiturukuo.’ Ore pee epuonu laduoo ooiterutua saa tomon o obo netum ake pooki tung'ani dinari. Nepuonu ile dukuya ejo ketum ninche nkumok, netum sii ninche pooki tung'ani dinari. Ore pee eidip ninche aatang'amu neing'unyung'unyaki ilo openy enkang. Nejo, ‘Ore kulo ooisiadutua esaa nabo ake etaasishote, nintorisioko iyiook ooting'iria esiaai nagol o ldalati pooki.’ “Newaliki obo lenye ajoki, ‘Olchore eitu nanu aainyal. Keitu duoo kining'okino o iyie dinari? Imbung'a enino shomo. Amu atonyorrayie aisho ele oisiadua anaa enaaisho iyie. Aimaaishiaakino te naas anaa enayieu too naainei? Ana keiba enkong'u ino te nkaraki nara nanu aminin?’ “Neijia etiu, keaku ile siadi ile dukuya, neaku ile dukuya ile siadi.” Ore pee eaku eilep Yesu alo Yerusalem nerik lelo ooiteng'eni lenyena tomon o aare enkilepata te nkoitoi nejoki, “Ng'ura kilepita aapuo Yerusalem, naa kepiki Enkerai e Tung'ani nkaik oo lapolosak o laiteng'enak loo nkitanapat neiguanare ninye enkiguana e keeya. Neisho iloreren meikordodo, near, too nkeenta, neshei neitopiuni te nkolong e uni.” Nelotu ng'otonye layiok le Sebedayo enetii Yesu eboitare ilayiok lenyena pokira aare neserem eeta enaomonu. Neikilikuan Yesu ajoki, “Ainyoo iyieuu?” Nejoki, “Intanapisho metotona kulo ayiok laainei pokira aare obo te nkaina ino e tatene, neton olikae te nkaina e kedianye te nkitoria ino.” Newaliki Yesu ajoki, “Miyiololo eniomonunu, aa ndimidimi aatook enkikompe naok nanu?” Nejoki, “Ee kindim.” Nejoki ninye ninche, “Ee esipa iokioko enkikombe ai kake ore entonata te nkaina ai e tatene ana te ne kedienye, mme nanu oishoru, kake eaku ene lelo ooitobiraka Papa lai.” Ore pee ening kuldo tomon ina, negorokino lelo alashera pokira aare. Neipot Yesu ajoki, “Iyiololo aajo, ore laitoriak loo Loreren eitaa ate kituaak, neitoreisho te ngolon. Ore te intae metiu nejia; kake ore pooki tung'ani te intae oyieu neaku kitok; inchoo eaku olaisiaayiani linyi, ore oloyieu neaku ole dukuya te intae neaku osinka linyi; anaa eneitu elotu e nkerai e Tung'ani meisiaai kake eewuo aisiaaisho neitayu enkishui enye metaa elakunoto oo lkumok.” Ore epuo aaing'uaa Yeriko nesuj olorora kitok. Naa ng'ura, etii ltung'ana aare modook ootoni te mbata e nkoitoi, ore pee ening inchere Yesu ilo oimita ine nebuak aajo, “Lo Kitok ara Daudi, ing'urrie iyiook.” Neisikong olorere ninche aaitigir, kake enyaakita aaitulusoo aabuak aajo, “Lo Kitok ara Daudi, ing'urrie iyiook.” Neitashe Yesu neipot ninche nejoki, “Kaa iyieuu naitaas intae?” Nejoki ninche ninye, “Lo Kitok, pee eboli iyiook inkonyek.” Neing'urrie Yesu ninche neiseyie inkonyek enye; nedolishoyu ninche te ina kata nesuj ninye. Ore pee enyikaki Yerusalem nebaiki Betfage to Ildoinyo loo loirienito neirriwaa Yesu ilooiteng'eni oare, nejoki ninche, “Enchom enkang natii dukuya intae na idolidolo nabo kata te ine esikiria naena o lkurrarru, entalaku enterewakaki. Naa te neng'amaa intae oltung'ani entiaaki, ‘Olkitok oatayie enkolat’; nerewakini te ina kata.” Netaasate nena pee ebaya enatejo oloiboni le Nkai, “Entiaki entito e Sion, ng'ura, elotu enitii iyie olaiguanani lino, nebor nekedito esikiria, akedito olkurrarru le sikiria.” Nepuo ilooiteng'eni neas anaa inaitanapa Yesu, nereu ina sikiria o enkurrarru neirotoki inkilani enye neked Yesu atonie. Neisalaash ilkumok lo lorora ilkilani lenye te nkoitoi nedung'u kulikae ilng'osil loo lkeek neisalaashaki enkoitoi. Ore olorere oituruko o losujita, nebuak aajo, “Hosana, Enkerai e Daudi; metamayiani ilo olotu te nkarna o Laitoriani; Hosana te shumata naisul pooki.” Ore pee ejing ninye Yerusalem, neing'oling'ola enkang pooki, aajo, “Ai ng'ai ele?” Nejo esiamo, “Yesu ele, oloiboni le Nkai le Nasaret e Galilaya.” Nejing Yesu enkaji e Nkai nearaa lelo pooki oomirisho o looinyiang'isho aitupuku te nkaji e Nkai neibeloo mesai oo looitawal mpesai o lorikan loo loomir inturkuluni. Nejoki ninche, “Etisiraki inchere, ore enkaji ai keji enkaji e nkomono kake intaa intae enkapune oo laisimak.” Nepuonu enetii ninye ti atua enkaji e Nkai ilmodook o lng'ojiniaa; neishiunye ninye. Kake ore pee edol ilapolosak kituaak o laiteng'enak loo nkitanapat imbaa e nking'sia naataasa ninye o nkera eilepie iltoiloishi lenye te nkaji e Nkai ejo, “Hosana, Enkerai e Daudi.” Negoro ninche, nejoki ninye, “Aa ining'ito enajoito kuna?” Nejoki Yesu ninche, “Ee, keitu isomama ai kata nchere, ‘Intabayie enkisisa too nkutukie oo nkera kutiti naanakisho’?” Neing'uaa ninche, neipung te ina anasa nelo Betania neirrag ine. Ore tadekenya eloito arrinyokino ina anasa netir esumash. Nedol olng'aboli te mbata e nkoitoi neiwuang'aki, neitu etumie toki, imbenek ake; nejoki ilo shani, “Tala Ing'anayio ntarasi.” Netoyu nabo kata olng'aboli. Ore pee edol ilooiteng'eni ina bae, neing'asia nejo, “Kaji eikuna pee etoyio olng'aboli nabo kata?” Newaliki Yesu, ajoki, “Esipa ajoki intae, te naa iatata enkirukoto ming'ashing'asha, neme ena ake naitaasaki olng'aboli iasiasa kake ti nijokiki oldoinyo, ‘Tadotunye tanang'akinoyu enaiposha,’ neaku ina. Ore pooki toki ninkilikuanunu te nkomono te nkirukoto nitumutumu.” Ore pee ejing enkaji e Nkai nepuonu ilapolosak kituaak o lpayiani lo lorere enetii, eiteng'enisho nejoki, “Ai ti aa kidimata ias iyie kuna baa? Naa ai ng'ae likinchoo ena kidimata?” Newaliki Yesu nejoki, “Aikilikuan sii nanu intae embae nabo, naa tinikiwalikiki, naliki sii nanu intae enkidimata naasie kuna baa. Amaa, enkibatisa e Yohana, kaji eing'uaa? Keshumata eing'uaa ana iltung'ana?” Nejokino maate, “Te nikijo, ‘Shumata eing'uaa;’ naa kejoki iyiook, ‘Oo naa pee eitu irukuruku?’ Naa ti nikijo, ‘Iltung'ana eing'uaa’ nikiure olorere, amu kejo ltung'ana pooki oloiboni le Nkai Yohana.” Newaliki ninche Yesu aajoki, “Mikiyiolo.” Nejoki sii ninye, “Maliki sii nanu intae enkidimata naasie kuna baa. “Ijojo aa? Eeta apa oltung'ani ilayiok aare; nelo enetii obo nejoki, ‘Enkerai ai, shomo taata ntayu esiaai te nkurma oo sabibu.’ Neng'amaa ajoki, ‘Malo’ ore te siadi neirridu nelo. Neitoki alo enetii olikae nejoki neijia. Neng'amaa ilo ajoki, ‘Alo Papa’, kake eitu elo. Kalo te lelo pokira aare otaasa enanyor menye?” Nejoki, “Lido le dukuya.” Nejoki Yesu, “Esipa ajoki intae, iloosotu kodi o loololoito oong'as aajing enkitoria e Nkai te dukuya intae. Amu eewuo Yohana enitii, te nkoitoi e supatisho, neitu irukuruku; kake eiruko iloosotu kodi o loololoito; kake ore pee indolidolo intae ina, neitu irridudu te siadi, aairuk ninye. “Enining'o sii ai kitanyaanyukoto: Etii apa oltung'ani oata enkang, neun enkurma oo lng'anayio neitaman enkikarrata netur ewueji neironyie lng'anayio, neshetaki oltalet, neing'ueiki ilaturok, nelo ninye paran. Ore pee eaku enkata naku lng'anayio, neirriwaki isinkan lenyena lelo aturok, meishoo lng'anayio lenyena. Neibung ilaturok isinkan lenyena, neidong obo, near likai metua, near likai too soito. Neitoki airriwaki kulikae sinkan kumok oolang lelo le dukuya, neiko sii ninche neijia. Ore te siadi neirriwaki enkerai enye ejo, ‘Keyanyit ninche enkerai ai.’ “Kake ore ake pee edol ilaturok enkerai, nejokino maate, ‘Ele olajung'oni, mataar pee kitum enjung'ore enye.’ Neibung ninye nearaa aaipung'ie oriong enkurma oo lng'anayio near metua. Amaa kenya te nelotu olopeny ina kurma oo lng'anayio, kaa eitaas lelo aturok?” Nejoki, “Kear oleng lelo tung'ana torrok metuata neisho enkurma oo lng'anayio kulikae aturok ooitabaiki ninye ilng'anayio too rishat enye.” Nejoki Yesu ninche, “Keitu ae kata isomama too lkigerot, ‘Ore ilo soit otanyaita lashetak otaa osoit kitok lo lmairroto. Ore ilo rorei naa Olaitoriani eing'uaa, naa ole nking'asia too nkonyek ang.’ Enkaraki e ina pee ajoki intae, keoruni intae enkitoria e Nkai aaisho olorere oiki lng'anayio, [ naa ore olosulakino ilo soit, negiligil. Ore olosulakino ilo soit ninye neidong aitaa emposio.]” Ore pee ening ilapolosak kituaak o Lfarisayo kuna kitanyaanyukot, neyiolou aajo ninche eipirta. Ore eing'oru eneiko pee ibung, neureyu olorere amu ejo ninche, oloiboni le Nkai. Neitoki Yesu airorie ninche, too nkitanyaanyukot ejo: “Etiu enkitoria e keper anaa olaiguanani oitobiraka enkerai enye osirua le nkiyama. Neirriwaa isinkan lenyena meipoto ilooitoomonoki meetu osirua le nkiyama neany ninche epuonu. Neitoki airriwaa kulikae sinkan ajoki, ‘Entiaki lelo ooipotoki, Eng'ura aidipa aitobira endaa osirua, eyiang'a ilmong'i o lasho oopir eidipate intokitin pooki, wootu osirua le nkiyama.’ Neitu ninche eshilaa ina, nepuo pooki nkolati enye, nelo likae enkurma enye, nelo likai emirare enye. Ore ilkulikae ootelekutua, neibung isinkan lenyena aainyal near metuata. Ore pee ening olaiguanani ina negoro oleng, neirriwaa iltimito loo lmurran lenyena metaara lelo tung'ana aarak, nepejoo enkang enye. Nejoki olopeny enkiyama isinkan lenyena, ‘Eoto indaiki o sirua le nkiyama, kake ore lelo ooipotoki nemeishiaakino. Enchom ineerishare inkoitoi ore pooki lidolidolo, empotoki osirua le nkiyama.’ Nepuo lelo inkoitoi naalala enkanasa, neiturrurru pooki oonoto ninche, iltorrok o supati, neiput ilomon ina aji e nkiyama. Nejing'u olaiguanani aing'or ilomon, nedol oltung'ani obo lemeishopito enkila e nkiyama; nejoki, ‘Olchore kaji nkununye ene miaata enkila e nkiyama?’ Negira Nejoki olaiguanani isinkan lenyena, ‘Enteen ninye inkaik o nkejek, ninang'akiki enaimin e auluo; neaku enkishirata o eonyoto oo lala.’ “Amu kumok ilooipotoki kake ilkuti oogeluno.” Nepuo ina kata Ilfarisayo aaiguana eneiko pee erresh ninye too nkirorot enyena. Neirriwaki ninche ninye iloointeng'eni lenye te nebo le Herode aajoki, “Lo Aiteng'enani, kiyiolo aajo ira olasipani nintayiolo ltung'ana; enkoitoi e Nkai te sipata amu miing'or empukunoto o ltung'ani. Toliki naa iyiook. Ijo aa iyie? Kebara ti nikincho Kaisari kodi ana eimebara?” Kake neyiolou Yesu esunkureisho enye nejoki, “Lo sunkuro, aainyo pee kitemiteme intae? Entoduaaki empesai e kodi.” Neyaki ninche ninye empisai. Neikilikuan Yesu ninche ajoki, “Koleng'ae ele oip o ele kigeroto?” Nejoki, “Ole Kaisari.” Nejoki ina kata, “Enchoo Kaisari ine Kaisari, ninchosho Enkai ine Nkai.” Ore pee ening ninche ina, neing'asia oleng nepuo aaing'uaa ninye. Ore te ina olong' nepuonu Isadukayo, lelo oojo meetae empiunoto, neikilikuan aajoki, “Lo Aiteng'enani, etejo Musa te neye oltung'ani neitu eiu inkera, neyam olalashe enkitok enye aiki olalashe. Etii apa atua iyiook ilalashera oopishana, neyamisho ole dukuya neye meeta inkera, neing'ueiki olalashe enkitok enye. Neiko neijia ole aare o le okuni o metabaiki ole oopishana. Ore te siadi pooki neye sii enkitok. Amaa, kenya te mpiunoto, keaku enkitok ene ng'ae te lelo oopishana? Amu eyama pooki.” Newaliki Yesu ajoki, “Ipong'oriri amu miyiololo ilkigerot anaa engolon e Nkai. Amu ore te mpiunoto nemeyamishoi, nemeishoori meyami, kake etiu anaa ilmalaika te keper. “Kake ore too naaipirta empiunoto oo lootuata, keitu isomama enatiaaka intae Enkai pee ejo, ‘Ara Enkai e Abraham nara Enkai e Isaak nara Enkai e Yakobo?’ Mme Enkai oo lootuata, enoo looishu.” Ore pee ening esiamo, neing'asia too nkiteng'enat enyana. Kake ore pee ening Ilfarisayo inchere eitigira Isadukayo nepuo aatumo. Neikilikuan olang'eni obo lenye atem ninye, ajoki, “Lo Aiteng'enani kaa kitanapata naisul inkitanapat?” Nejoki, “Tonyorra Olaitoriani Enkai ino to ltau lino pooki ote nkishui ino pooki o te ng'eno ino pooki. Ena kitanapata ene dukuya naa ninye naisul. Ore eni are nenyaanyukie naa ena, ‘Tonyorra ole latia ino anaa kewan.’ Ore kuna kitanapat pokira are ninche naaun nkitanapat o loibonok le Nkai.” Ore pee eiturrurro lelo Farisayo neikilikuan Yesu ninche ajoki, “Ijojo aa too mbaa e Kristo? Kole ng'ae?” Nejoki, “Ole Daudi.” Nejoki ninye ninche, “Kaji naa etiu pee eipot Daudi te Nkiyang'et Sinyati ajo ‘Olaitoriani’, ejo, “Etiaaka Olaitoriani, Olaitoriani lai, Totona te tatene ai, metaba anaa naitadou ilmang'ati linono apik abori nkejek inono. Amaa naa te naa kejo Daudi ninye Olaitoriani, kaji eiko pee eitoki ninye aaku enkerai enye?” Nemetii ho obo oidima atawaliki ninye ororei hoo obo, nemetii oltung'ani ebaiki ina olong onyaaka aitieu aikilikuana likai rorei. Neirorie Yesu ina kata siamon o looiteng'eni lenyena ajoki, “Laiteng'enak loo nkitanapat o Lfarisayo ootonita to lorika le Musa. Ore imbaa pooki naajoki ninche intae entaas, niaasiasa; amu eiro ninche nemeas. Amu eeniki ilolan sapuki ooiroishi aaiteleiki iloilila loo ltung'ana; nemeyieu ninche neigusie to lkimojino lenye. Neas isiaaitin enye pooki pee edol iltung'ana, amu eitalala lkerreti lenye neitulus enkikodo oo nkilani enye. Nenyor iwuejitin enkanyit too siruai, o lorikan sidain tiatua inkajijik entumo, neshipa te neirorokini too wuejitin neemirishoreki, nenyor te neipoti aajo ‘Olaiteng'enani’. Kake eminchosho eipoti intae aajo ‘Olaiteng'enani’ amu obo olaiteng'enani linyi, nirara pooki ilalashera. Nimijojo oltung'ani papa te nkop, amu obo Papa linyi otii keper. Niminchosho eji intae ilarikok amu obo olarikoni linyi naa Kristo. Ore ilo ora kitok te intae, keaku osinka linyi. Ore oloilepie kewan, neitadouni; ore oloitadou kewan neilepieki. “Oi! Intae sunkuro loo laiteng'enak loo nkitanapat o Lfarisayo! Amu irishieshie ltung'ana enkitoria e keper, nimijing'jing'i intae maate, ore ilooyieu nejing, nimitikiki ejing. ‘Ee kake ayia! Sunkuro o laiteng'enak loo nkitanapat o Lfarisayo, amu idaarere nkajijik oo nkolia, niomonono enkomono naado aaitaakuno; ore enkaraki ina itumutumu enkiguana nagol oleng.’ “Ee kake ayia! Ilasirak olfarisayo isunkuro! Amu imanimana naaiposha o enkop natoyio aaing'oru obo osuj intae, ore pee eibelekenya, nintaa ninye ololmoti le nkima katitin are alang ninye intae. “Ee kake ayia! Ilarikok modook oojo, ‘Te nenyayie oltung'ani enkaji e Nkai olmumai neme toki; kake te nenyayie olmumai sahabu e nkaji e Nkai neen ilo mumai.’ Lo moda modook; kaa nalusoo, ai sahabu ana kenkaji e Nkai naitisiny ina sahabu? Ijojo sii ore oloinosie olmumai olperere lo lasar, neme toki kake ore oloinosie olmunmai enkishorunoto natii olperere lo lasar, neen ilo mumai. Lo tung'ana modook, kaa nalusoo, e ina kishorunoto ana kolperere lo lasar oitisiny ina kishorunoto? Ore oloinosie olmumai olperere lo lasar, einosie olperere lo lasar o pooki toki natii enchumata enye. Ore oloinosie olmumai enkaji e Nkai neinosie o ilo obik ti atua. Ore oloinosie keper olmumai neinosie olorika le nkitoo le Nkai neinosie ilo otonita. “Ee kake ayia! Ilasirak o lfarisayo isunkuro! Amu intayuyu ematua e tomon oe nkorropil o sinantei o empeu naitorropil endaa, nitapalaitie mbaa kituaak oo nkitanapat, aa isipat e nkiguana, o lng'ur o enkirukoto; kuna eishiaakino nitaasa nimipalipala nena kulie. Lo arikok modook, isilisili enkojong'ani nimurgutaa entames! “Ee kake ayia! Ilasirak o lfarisayo sunkuro amu isujusuju oriong enkikompe o engirra kake ebore atua intae eului o enkarri nemeeta enkiririkinoto. Lo Farisayoi modooni! Tang'asa isuja atua enkikompe o engirra pee etum sii oriong ataa sidai. “Ee kake ayia! Ilasirak olfarisayo! Amu itiuu intae anaa nkuraren naaelieki enturoto meiborra, nedoli anaa ai sidain ti oriong kake ore atua eiputa loik loo lmeneng'a o loirerioni pooki. Naa neijia sii itiuwu intae, edoli intae ti oriong aaijo irara supati kake ore ti atua, nebore esunkureisho o enkarruoisho. “Ee kake ayia! Ilasirak o lfarisayo isunkuro amu ishetishete inkuraren oo loibonok ninkodikodo inkuraren e lelo oiloonok le Nkai, nijojo, ‘Te naa ai kitii apa too nkolong'i oo loo Papa, anaata eitu kishulare ninche te nkibukoroto osarge loo loibonok.’ Nitaa intae shakeni nchere irara inkera e lelo ootara lelo oibonok le Nkai. Emputa eneitong'oro iloo minyi. Naishoi oo lasuriaa o nturbubuani, kaji inkoko pee ilanyilanya enkiguana o lmoti le nkima. “Ore enkaraki ena, eng'urai airriwaki intae iloibonok o ltung'ana ng'eni o laiteng'enak loo nkitanapat; niariara kulikae, metuata nisheshe, niariara kulikae too nkajijik inyi e ntumo, niaraa kulikae too nkang'itie aaisikie; pee etum ainepu intae osarge loo ltung'ana le Nkai oibukori te nkop ebaiki osarge le Abel lemeeta entiyoto, o metabaiki osarge le Sakaria le Barakia litaara intae te rishata ewueji sinyati o olperere lo lasar. Esipa ajoki intae, kepuonu kuna baa pooki shumata kulo tung'ana le na kata. “Woi Yerusalem, Yerusalem naar iloibonok le Nkai, nenang too soito lelo ooirriwakini ninye! Ai katitin aja atonyuaa ajo aiturrur inkera inono anaa enkuku naiturrur inkuoo enyena too naipuko enyena, nitanyaita! Neina enkaji inyi natung'eikiaki eliyio. Amu ajoki intae, mikintokiki aadol katukul, metaba anaa nijojo, ‘Emayiana ilo olotu te nkarna o Laitoriani.’ ” Nepuku Yesu te nkaji e Nkai alo, nepuonu ilooiteng'eni lenyena enetii pee eitodol enchetunoto e nkaji e Nkai. Newaliki ajoki, “Ai midolitata kuna pooki? Esipa ajoki intae meing'uari te ne wueji osoit obo te shumata olikae, lemesulakini enkop.” Ore eton to ldoinyo loo loirienito, nepuonu enetii ilooiteng'eni too nkurrat nejoki, “Toliki iyiook ajo kanu ebau kuna baa? Naa ainyoo olmonekie le lotunoto ino o ene nkiting'oto e na kop?” Neng'amaa Yesu nejoki, “Entorrip ate meitapong'oo intae oltung'ani. Amu kepuonu ilkumok te nkarna ai oojo, ‘Ara nanu Kristo,’ neitapong'oo ilkumok. Naa aining'ining'i intae ilarrabali o mbaa oo njoreitin eimakini, naa entodol ake emirut amu meeta inchere pee mebau kuna baa; kake eton eng'or enkiting'oto. Amu kedumakino olorere olikae orere, nedumakino enkitoria enkae kitoria; naa kepuonu ilameitin o nkikirikirat e nkop too wuejitin kumok. Kake ore nena baa pooki naa ine nkiterunoto oo sinaitin. Te ina kata taa eishoori intae meisilisili neari intae entuata; neibayu intae iloreren pooki te nkaraki enkarna ai. “Te ina kata taa errorro ilkumok nekaldaa olikae olikae, neibayuno ninche maate. Naa kepuku iloibonok kumok le lejare neiminie lkumok. Naa ore te nkaraki naponari entorroni neiropiju enyorrata oo lkumok. “Kake ore olongiri ometabaiki enkiting'oto nejeu. Naa kelikiori kulo omon supati le na kitoria e Nkai te nkop pooki metaa shakenisho too loreren pooki; ore ina kata nebau enkiting'oto. “Ore pee idolidolo ina torroni nabau e mutata natolimuo oloiboni le Nkai oji Daniel eitashe te wueji sinyati. (Inchoo ilo oisomita metayiolo.) Ore ina kata lootii Yudea neipukoki ldoinyo. Ore olotii shumata enkaji nemedou alo aitayu intokitin te nkaji enye. Ore olotii enkurma nemeshukunye adumu enkila enye. Wooi nena naairoshiutuo o naaitanakisho te nena olong'i! Entoomon pee meaku enaipuk inyi ene nkata o loirujuruj anaa enkolong e nkiyeng'iyeng'ata. Amu keaku elotu ina kata entaboi sapuk neitu ae kata etumi, anaa pee eiteruni enkop o taata, nemeitoki aaku katukul. Naa te neme keitodorropaki nena olong'i anaata mejeu toki naishu; kake ore te nkaraki oo lgelunot lenyena eitodorropaki nena olong'i. “Te nejoki intae ina kata oltung'ani, ‘Nele Kristo otii ene!’, Anaa ‘Nelido otii idie!’ Emiruk. Amu kepuonu ilooitaa ate ilkristoi te lejare o looitaakuno loibonok ooitoduaaya ilmonek o nenking'asia kituaak o ne nking'asia pee te naa keidimayu naaji neiminie ninche lelo gelunot le Nkai. Ng'ura aidipa atoliki intae te dukuya eitu abau. Metaa te nejoki intae, ‘Ng'ura, etii ong'ata’, emipuku; anaa, ‘Ng'ura etii lgilat li atua aji’ emiruk. Amu ore anaa enatiu enkiwuang'ata naing'uaa eneilepunye enkolong nelioyu te nedoyiorie; neijia etiu elotunoto e Nkerai e Tung'ani. Amu enetii empopok eiturrurrokino lmotonyi. “Ore ake pee eish isinaitin le nena olong'i, neitomisimisi enkolong nemeitoki olapa awang'u, nesulunye ilakir to loing'ang'e, neigirigiro engolon o loing'ang'e. Nelioyu ina kata olmonekie le Nkerai e Tung'ani te keper neaku olkiyioi lo lauui too loreren pooki le nkop, nedoli Enkerai e Tung'ani elotu too nkatampo e keper te ngolon o te nkitoo sapuk. Naa keirriwaa ninye ilmalaika lenyena te ndarata kitok e ntarumpeta meiturrurru ilgelunot lenyena too lubot pokira ong'uan naaing'uaa osiwuo, neitung'uaa ineeiting'ie keper, too lubot pooki. “Entuutarie ate enkitanyaanyukoto o lng'aboli ore te neiteru aitayu imbenek niyiolouu aajo etinyikua olodalu. Ore sii intae ti nidolidolo nena pooki, entayiolo aajo etinyikua, ee etii inkutukie oo nkajijik. Esipa ajoki intae, meishari kulo tung'ana le na kata eitu ebau kuna baa. Keish shumata o enkop kake meish irorei laainei katukul. “Kake meetae oloyiolo ina olong anaa ina saa, aa ilmalaika le shumata anaa Enkerai, Papa ake oyiolo. Amu ore anaa enatiu apa too nkolong'i e Noa, neijia sii etiu elotunoto e Nkerai e Tung'ani. Amu ore te nena olong'i eton etioyo oloirrag le nkare, kedaae, neokishoi, neyamishoe, neishoori meyami, o metabau ina olong natijing'a Noa esafina, neitu eyiolou o meeu oloirrag le nkare aya pooki; neijia sii etiu elotunoto e Nkerai e Tung'ani. Ore ina kata te netii ilewa oare enkurma, neyae obo neing'uari olikae. Neiutuutisho nkituaak are to soit neyai nabo neing'uari enkae. “Entorripisho naa, amu miyiolo enkolong nalotu Olaitoriani linyi. Kake iyiololo aajo, te naa keyiolo olopeny enkaji enkata nalotu olapurroni, anaata etorripishe pee meisho enkaji enye metigili. Enterretenata sii intae; amu te nkata niminteikiki elotu Enkerai e Tung'ani. “Kalo naa sinka ilo oisiligayu naa ng'en otung'eikia olkitok lenye enkaji enye, meitotio ltung'ana te nkata naishiaakino? Emayiana ilo sinka laa te nelotu olkitok lenye nenyorriki easita enatung'eikia. Esipa ajoki intae, eisho meitoria intokitin enyena pooki. Kake te nejo ilo sinka torrono to ltau lenye, ‘Keimutie olkitok lai’; neng'as aar isinkan ooboitare, nedaa neokisho te nebo lamerak; kelotu olkitok le ilo sinka te nkolong nemeiteikini o te saa nemeyiolo, naa kedung'udung neitaboitaki sunkuro. Neaku enkishirata oenyoto oo lala. “Etiu enkitoria e keper anaa ntoyie tomon, naatudumutua ltaai lenye aapuo aanang'are oloyamisho. Ore imiet nemoda, ore inkulie imiet naa ng'eni. Amu ore nekua naamoda ewaita iltaai lenye neitu eya eilata Ore nekua ng'eni, neya eilata too ltuleta lenye te nebo iltaai. Ore pee eimutie oloyamisho, neimug pooki neirura. Ore te mpolos e nkewarrie, nebuaki aajo, ‘Neilo oloyamisho, entupuku entanang'are.’ Neinyototo ina kata nena toyie aaitobir iltaai lenye. Nejoki naamoda kunda ng'eni, ‘Enchoo iyiook enkiti ilata inyi; amu keye iltaai lang.’ Kake newaliki ng'eni nejoki, ‘Aa mebaiki iyiook o intae; neikash ti nipuopuo enetii loomir aainyang'aki ate.’ Ore pee einyototo aapuo aainyiang'u, nebau olayamisho, nejing nena naaterretenate tenebo oloyamisho atua osirua le nkiyama; neikeni kutuk aji. Neitoki te siadi aapuonu nekua toyie aajo, ‘Lo kitok, Lo, kitok, tabolu iyiook.’ Newaliki ajoki, ‘Esipa ajoki, intae, mayiolo intae.’ Entorripisho, naa, amu miyiololo intae ina olong aashu esaa. “Amu etiu anaa te neyieu oltung'ani nelo enkop nalakua neipot isinkan lenyena neitaaki ntokitin enyena. Neitaaki obo talanta imiet, neitaaki olikae are neitaaki likae nabo; aisho pooki tung'ani anaa enkidimata enye; nelo. Ore lido oitaakaki talanta imiet nelo nabo kata aasishore netum kulie talanta imiet. Netumie sii elde oitaakaki are kulie are. Kake ore elde oitaakaki nabo, nelo aturoo aisudoo empesai o lkitok lenye. Ore etulusoyie enkata naado nelotu olkitok le lelo sinkan, neyieu esiana oo ntokitin enyena. Neng'asunye oloitaakaki talanta imiet ayau kulie talanta imiet; nejoki, ‘Lo Kitok kinchoo talanta imiet; ng'ura anoto kulie imiet.’ Nejoki olkitok lenye, ‘Ee osinka supat laisilig, itaa oloisiligayu too nkuti, kaaisho intoria kumok; tijing'a eng'ida o lkitok lino.’ Nelotu oloitaakaki talanta are nejoki, ‘Lo Kitok, kintaaka talanta are, ing'ora, anotie kulie are.’ Nejoki olkitok lenye, ‘Ai sidai enitaasa iyie osinka supat oisiligayu; tijing'a eng'ida o lkitok lino.’ Nelotu sii elde oitaakaki talanta nabo nejo, ‘Lo Kitok, ayiolo ajo ira iyie oltung'ani ogol odung ineitu iun, ninturrur ineitu isuaaya. Neaku atureishe nanu nalo aturoo aisudoo ina talanta ino ti atua enkop, ing'ura, nena enino inko.’ Neng'amaa olkitok lenye ajoki, ‘Lo sinka torrono oshal, itayiolo ajo adung ineitu aun, nasotu ineitu aisuaaya; anaata naa inchoo ina pesai ai lelo ooasishore pee te alotu natum enaai o kulie. Entooru naa ina talanta enchoo ilo oata talanta tomon. Amu ore pooki ota neponikini pee eaku naata kumok, kake ore olemeeta, ore ninye enda naata neoruni. Entanang'aki ilo sinka le meeta tipat enaimin e auluo; neaku enkishirata o eonyoto oo lala.’ “Ore te nelotu Enkerai e Tung'ani te nkitoo enye, eboitare ilmalaika pookin, neton ina kata to lorika lenye le nkitoo. Neiturrurrukino loreren pooki dukuya ninye negel ninche anaa olchekut ogelu nkerra arishie nkineji. Nepik nkerra enkaina enye e tatene, nepik inkineji ene kedianye. Naa kejoki ina kata olaiguanani lelo ootii enkaina enye e tatene, ‘Wootu intae ilootamayiana Papa lai, entujung enkitoria naitobirakaki apa intae apa ebaiki enkiterunoto e nkop. Amu aata apa esumash nikinchosho endaa; naata enkure nikinchosho enaok; nara omoni nikirikiriki ang; nemaishopo nikinchopishopo; namuei nikirumurumu, naena nikibaikiki.’ Neng'amaa ina kata ltung'ana le Nkai aajoki, ‘Lo kitok, kanu kitaduaa iyie iata esumash nikintoti iyie? Aashu iata enkure nikintook iyie? Ana kanu kitaduaa iyie ira omoni nikirik iyie ang? Anaa minchopo nikinchop iyie? Ana kanu kitaduaa iyie imuei anaa iena nikibaiki iyie? Naa keng'amaa olaiguanani ajoki, Esipa, ajoki intae, ore anaa enintaasa lelo alashera laainei ooti, nanu intaasa.’ Neitoki Yesu ina kata ajoki ilootii enkaina enye e kedienye, ‘Enyeito intae entung'uayioki iloodiaa, enchom enkima oo ntarasi naitobirakaki shetani o lmalaika lenyena. Amu aata apa esumash neitu kintotiti; naata enkure neitu kinchosho enaok. Nara omoni neitu kirikiriki ang; nemaishopo neitu kinchopishopo; namuei, naena neitu kibaikiki.’ Neng'amaa sii ninche aajoki, ‘Kanu kitaduaa iyie iata esumash, anaa enkure, anaa ira omoni, anaa minchopo, anaa imuei anaa iena neitu kisiai iyie?’ Naa keng'amaa ajoki, ‘Esipa ajoki intae, ore anaa eneitu intaasiasa obo le kulo ooti, nanu eitu intaasiasa.’ Naa kepuo ninche enkitamioto oo ntarasi; nejing iltung'ana le Nkai enkishui nemeish.” Ore pee eidip Yesu lelo rorei pooki, nejoki ilooiteng'eni lenyena, “Iyiololo aajo inkolong'i are naatiooyo pee eaku Pasaka, naa keishoori Enkerai e Tung'ani metashei.” Neiturrurro lapolosak kituaak o lpayiani te wueji olapolosani kitok oji Kaiafa; neiguana maate te nebo pee etum aaibung'a Yesu to losek aataar metua. Neitoki aajo, “Neme to sirua pee mejing olong'oling'oli atua ltung'ana.” Ore etii Betania enkaji e Simon le nkeeya oo lbolot, nelotu enetii ninye enkitok naata oltulet lo soit oji alabasta le ilata narropil nagol enkinyang'a nebukoki elukunya enye te ine einosita endaa. Ore pee edol ilooiteng'eni lenyena ina negoro naleng nejo, “Ijo meima ena ilata siu? Amu anaata etimiraki aainosie mpesai kumok pee eishori ilaisinak.” Kake etayiolo Yesu ina nejoki, “Aainyo pee intanyamalala ena kitok? Naa esupat aaitaasa. Amu iatata ilaisinak anaa ake kake mikiatata nanu anaa ake. “Amu ore ina ilata narropil naatubukoko, osesen lai eitobiraki enukaroto. Esipa ajoki intae, ore pooki wueji nelikiorieki ele rorei supat te nkop pooki, naa keimakini ena naaitaasa ena kitok metaa enadamunyeki ninye.” Nelo ina kata obo te lelo tomon o aare oji Yudas Iskariot enetii ilapolosak kituaak, nejoki, “Ainyoo kinchosho te naitarasaki intae ninye?” Nelaaki ninche impisai tomoni uni e nkosholai. Ore ebaiki ina kata neing'oru erishata nakaldare ninye. Ore te nkolong e dukuya o sirua loo Mukateni Nemeisuijieki, nepuonu ilooiteng'eni enetii Yesu nejoki, “Kaji kintobiraki iyie pee inyayie osirua le Pasaka?” Nejoki, “Entijing enkanasa enchom enetii oltung'ani oje entiaki, ‘Eji Olaiteng'enani, etinyikua enkiririkinoto e nkata ai; te nkaji ino aitobir Pasaka te nebo o looiteng'eni laainei.’ ” Neas ilooiteng'eni ina natiaka Yesu, neitobiraki Pasaka. Ore pee eaku tara, neton te misa tenebo looiteng'eni lenyena tomon aare. Ore einosita endaa nejoki, “Esipa ajoki intae, kaakaldaa obo linyi.” Neisinanuo oleng neikilikuana moo obo, “Ai nanu sa Lo Kitok?” Newaliki ajoki, “Elde oitadoikio enkaina enye engirra te nebo nanu, ninye laakaldaa nanu. Elo Enkerai e Tung'ani anaa enatisiraki, kake, ee kake ayia elde la ninye oitarasaa Enkerai e Tung'ani. Enaikash apa te neitu eini.” Neng'amaa Yudas laa ninye oishooyie ajoki, “Aijo, sa ai nanu, Olaiteng'enani?” Nejoki Yesu, “Iyie otejo.” Ore einosita endaa nedumu Yesu emukate nemayian negiligil; neisho ilooiteng'eni lenyena nejo, “Enkoito enosa; osesen lai ele.” Nedumu enkikompe, neisho Enkai enashe, neitarasaki ninche nejoki, “Entook pooki; amu osarge lai ele lo sotua oibukori te nkaraki oo lkumok te mpalakinoto oo ng'ok. Ajoki intae, ore ebaiki taata, maitoki ae kata aok enaisho oo lng'anayio loo sabibu o metabau enkolong naok eokoto ng'ejuk te nebo intae te Nkitoria e Papa.” Ore pee erany osinkolio neipung aapuo oldoinyo loo Loirienito. Nejoki Yesu ninche, “Ore tena kewarie, naa aikisikisiki pooki aaing'uaa nanu amu etisiraki aajo, ‘Kaosh olchekut neisardaka emboo oo nkerra.’ Kake ore pee aaitopiuni naituruk alo Galilaya.” Newaliki Petero ajoki, “Te naa aiking'uaa pooki, maaing'uaa aekata nanu. Nejoki Yesu, Esipa aajoki iyie, ore te na kewarie, eitu eru olkuku, nikimiki iyie katitin uni.” Nejoki Petero, “Te naa kaye te nebo iyie maamiki nanu iyie.” Nejo sii neijia ilooiteng'eni pooki. Nelotu Yesu o ninche ewueji neji Getsemane nejoki ilooiteng'eni lenyena, “Entotoni te ne mashomo ende aomon.” Nerik Petero o layiok pokira aare le Sebedayo. Neiteru aisinanuo nenyamalu oltau. Nejoki, “Eeta oltau lai osina kitok o metaa kaye; entotoni te ne enchololoto te nebo nanu.” Nelo penyo aigut neirrabalakino enkop neomon nejo, “Papa lai, te naa keidimayu intapaashaki ena kikompe, kake mme anaa enayieu nanu kake anaa eniyieu iyie.” Nelotu enetii ilooiteng'eni neinepu eirurate, nejoki Yesu Petero, “Amaa ai mindimidimi hoo aaishololoto te nebo nanu esaa nabo? Enchololoto niomonono pee mijing'ijing'i intemat; esipa eyieu oltau, kake eshal osesen.” Neitoki alo enkata e are neomon nejo, “Papa lai, te nemeidimayu pee aapaash ena kikompe eitu aok, inchoo metotiwuo anaa eniyieu.” Neitoki alotu, neinepu ninche eirurate, amu eiroshiutuo inkonyek enye. Neitoki aing'uaa ninche nelo aomon enkata e uni te lelo ake rorei. Neitoki ashukokino ilooiteng'eni lenyena nejoki, “Keton doi ake irurara aayeng'iyeng'a! Eng'ura etinyikua esaa napikieki Enkerai e Tung'ani inkaik oo looata ng'ok. Enyeito emaape; eng'ura, nelde olaakaldaa otabawua.” Ore eirorita, ng'ura, nelotu Yudas laa obo le lelo tomon o aare, eboitare empikas sapuk naata lalema o siaren ooing'uaa lapolosak o lpayiani lo lorere. Naa ore ilo oitarasayie eidipa aishoo ninche olmonekie ejoki, “Ore elde lang'utut, ninye ilo embung'a.” Nelo ina kata enetii Yesu nejoki, “Supa Olaiteng'enani;” neng'utut. Nejoki Yesu, “Olchore, ainyoo pee itii ene? Tasioki taasa ina nikiyawua.” Nepuonu taa enetii neibung aakurraki. Neshutu obo le lelo ooboitare Yesu olalem, neosh osinka lo lapolosani nedung'u enkiok. Nejoki Yesu, “Tushukoki olalem lino enchashur amu ore pooki oibung olalem nemuta to lalem. Aijo iyie eimaidim atasayia Papa maairriwaki nabo kata mpuot tomon o aare oo lmalaika? Paa kaji naa eiko pee eitabari ilkigerot nemeeta nchere pee eitu ebaya?” Ore ina kata nejoki Yesu ina siamo, “Aikipuonunu aaibung iatata ilalema o siaren anaa ilooibung olaisimani? Natii oshi ake enkaji e Nkai aiteng'enisho neitu kimbung'ubung'u?” Kake etaasate kuna pooki pee ebaya ilkigerot loo loibonok le Nkai. Neilanyisho ina kata ilooiteng'eni pooki aaing'uaa. Ore lelo ooibung'a Yesu nerikoki olapolosani kitok, oji Kaiafas, enotote te ine laiteng'enak loo nkitanapat o lpayiani. Kake esujita Petero ninye te nelakua, o metabaiki olgoriet lo lapolosani kitok. Ore pee ejing atua, neton ninye te nebo ilarripok adol eneiting'oki. Neing'oru ilapolosak kituaak o enkiguana pooki shakenisho e lejare naiteeniki Yesu pee eari metua. Kake eitu etum hoo pito hoo neetuo lchakenini kumok le lejare. Ore te siadi nepuonu aare ootejo, “Etejo ele tung'ani kaidim atigila enkaji e Nkai naitoki ashet too nkolong'i uni.” Neitashe olapolosani kitok ajoki ninye. “Aimeeta eniwalu? Kakua baa kuna nikinteeniki kulo tung'ana?” Kake etigire Yesu. Nejoki taa olapolosani kitok, “Aainosie olmumai te Nkai naishu, toliki iyiook te naa ira iyie Kristo, Enkerai e Nkai.” Nejoki Yesu, “Iyie otejo; kake ajoki intae, ore ebaiki taata idolidolo Enkerai e Tung'ani eton te nkaina e tatene naata engolon edou too nkatampo e shumata!” Nepolos olapolosani kitok ilkilani lenyena nejo, “Etamorishe ele, ainyoo shakenisho neton kiyieu? Itoning'o emorore enye. Ijojo aa?” Newaliki aajoki, “Keiririkino ele tung'ani keeya.” Ore te ina kata nenotaki enkomom neikum, nedam, neosh kulikae te ndap. Ejoki, “Kristo, imbonoki yiook, ai ng'ae likitoosho?” Neton Petero te boo to olgoriet. Nelo enkaisiaayiani enetii nejoki, “Ira sii iyie obo loo loboitare Yesu le Galilaya.” Nemiki ninye te dukuya ninche pooki ejo, “Maiyiolo enijoito.” Ore pee eipung alo entaloishi e kishomi nedol ai tito ninye nejoki ilootii ine, “Eiriamariyie sii ele tung'ani Yesu le Nasaret.” Neitoki anya olmumai amiki ajo, “Maiyiolo ilo tung'ani.” Ore te nkiti kata nepuonu lelo ooitashoo te ine nejoki Petero, “Esipa ira sii iyie obo le lelo; amu aikilikioo ororei lino.” Neiteru, adek kewan nenya olmumai nejo, “Maiyiolo ilo tung'ani.” Neru nabo kata olkuku. Nedamu Petero lido rorei otiaaka Yesu inchere, “Ore eitu eru olkuku, aikimiki katitin uni.” Neipung alo aishir te mion. Ore pee ekenyu, netumo ilapolosak pooki o lpayiani lo lorere neiguanare pee ear Yesu metua. Neen ninye nerik aaitarasaki olbalusui oji Pilato. Ore Yudas ilo oitarasayie pee edol ajo eidipaki aaiguanare, neitoki ainosu neshuku nena pisai tomoni uni e nkosholai ashukoki ilapolosak kituaak o lpayiani, ejo, “Aitarruoyie aitarasayie oltung'ani lemeeta entiyoto metari.” Kake etiaakita ninche, “Ainyoo natii ninche iyiook? Iyie ine.” Nenang'aki nena pisai e nkosholai atua enkaji e Nkai neipung; nelo agor kewan. Nedumu ilapolosak nena pisai enkosholai nejo, “Mebara ti nikipik olbene le Nkai amu osarge einosieki.” Neiguana te nebo neinyiang'unye enkurma o laitobirani loo motioo pee enukarieki iltung'ana leeiking'a. Enkaraki e ina pee eji ina kurma, enkurma o sarge o taata. Ina kata eitabayioki ina natejo oloiboni le Nkai oji Yeremia pee ejo, “Neya ninche impisai tomoni uni e nkosholai nainosieki ilo otudung'oki enkinyiang'a, otudung'okito enkinyiang'a lkulikae ayiok le Israel. Neishooyo aainosie enkurma o laitobirani loo motioo anaa enaaitanapa nanu Olaitoriani.” Neitasheyieki Yesu te dukuya olbalusui neikilikuan olbalusui ninye ajoki, “Aa ira iyie olaiguanani loo Lyahudi?” Nejoki Yesu, “Iyie ojo.” Ore pee eitang'or ilapolosak kituaak o lpayiani, neitu hoo ewaliki. Nejoki Pilato, “Ai mining eneba imbaa nikinteenikini?” Kake eitu ewaliki te mbae hoo nabo, o meing'asiayu olbalusui oleng. Naa ore apa ake to sirua le Pasaka, naa kelaaki olbalusui esiamo oltung'ani obo oena anaa oloyieu ninche. Netii ina kata oltung'ani obo yioloti te nkarruisho oena oji Barabas. Ore pee etumo, nejoki Pilato ninche, “Kalo iyieuu nalaaki intae? Ai Barabas anaa Yesu oji Kristo?” Amu eyiolo ajo to lom eishooitie ninye. Ore pee eton Pilato to lorika le nkiguana neirriwaki enkitok enye olkilikuai ajoki, “Toduaa miaas ae te ilo tung'ani lemeeta entiyoto amu atanyamala duoo too mbaa kumok te nkidetidet te nkaraki ninye.” Kake etukurrakita ilapolosak kituaak o lpayiani lolorere metoomonu Barabas, neishooyo Yesu metaari. Neitoki ake olbalusui ajoki ninche, “Kaing'ae te kulo pokira aare iyieuu nalaaki intae?” Nejo, “Barabas.” Nejoki Pilato, “Kaa naa aitaas Yesu oji Kristo?” Nejoki pooki, “Inchooi metashei.” Nejo, “Aainyo, kaa torroni etaasa ninye?” Neitoki aaitulusoo aabuak aajo, “Inchoo metashei.” Ore pee edol Pilato ajo meeta ae naidim ataasa, kake keponari ake oloilole nedumu enkare, neisuj inkaik te dukuya olorere nejo, “Maata taa nanu entiyoto to sarge lele tung'ani eng'urai maate ena bae.” Newal iltung'ana pooki aajo, “Inchoo osarge lenye meeu shumata iyiook o nkera ang.” Nelaaki te ina kata Barabas; neari Yesu too nkeenta, neishori metashei. Nerik isikarini lo lbalusui Yesu atua enkaji o lbalusui naji Praitorio neiturrurrokinote oltim pooki. Neoru nkilani enyena neishopoki olkila onyokie. Neshetu olmarisian loo lkiku nepik elukunya enye, nepik entiyani enkaina enye e tatene, negilaki kung aakueniyie nejoki, “Supa olaiguanani loo Lyahudi!” Nenotaki ninye neoru ina tiyani naibung'ita, neoshioshie endukuya enye. Ore pee eidip aatakueniyie, neoru olkila onyokie neishopoki nkilani enyena, nerik ninye aapuo aashe. Ore epuku aapuo neinepu oltung'ani le Kirene oji Simon nearaki ninye pee enap osalaba. Ore pee ebaiki ewueji neji Golgata, aa keji ewueji e mborbor, neisho ninche Yesu enaisho oo sabibu naitushulakaki olodua metooko. Ore pee eishamisham neany eok. Ore pee eidip aatasho ninye, neor nkilani enyena aaoshie enkukuo. Netoni ninche aarrip ninye te ine. Nepik ele sirata shumata elukunya enye aajo “YESU ELE OLAIGUANANI LOO LYAHUDI.” Neshei te ina kata te nebo ninye ilapurrok aare, obo te nkaina e tatene, o likae te nkaina e kedienye. Nemor iloogiroo eipirripir ilukuny, aajo, “Eiyie doi ogil enkaji e Nkai nishet too nkolong'i uni, intajeu kewan; te naa iyie Enkerai e Nkai, tadou to salaba.” Neiko sii ninche neijia lapolosak o lasirak te nebo lpaiyiani ejo, “Kulikae ake eitajeu nemeidim aitejeu kewan, olaa ninye olaiguanani loo Siraeli. Inchoo taata edou to salaba pee kiruk ninye.” Ore amu Enkai etipika osiligi lenye inchoo naa eitajeu taa Enkai ninye tenaa keetayie tipat; amu etejo naa, “Ara Enkerai e Nkai!” Nemor sii lelo apurrok ootashoki te nebo o ninye. Ore pee ebaiki saa ile, nerip enaimin enkop o metabaiki saa naaudo. Ore pee ebaya saa naaudo, neishir Yesu to ltoilo sapuk ajo, “Eli, Eli, lama sabaktani?” Naa inchere, “Enkai ai, Enkai ai, aainyo pee kitung'uayie?” Ore pee ening kulikae te lelo ooitashe te ine nejo, “Eliya eipoto.” Nekuet nabo kata obo le lelo nepik osuguroi enaisho naisuijo oo sabibu neremoki eng'udi naado neisho metooko. Nejoki ilkulikae, “Tapala maing'urai te naa kelotu Eliya aitajeu.” Neitoki Yesu aishir to ltoilo sapuk, nedung'o tau. Neiperra nabo kata olkarasha le nkaji e Nkai aaku are, aiteru te shumata o metabaiki abori, neikirikira enkop nedanya ndapidapo; nebolo inkuraren neitopiuni seseni kumok loo sinyat ooirurate; ore pee epuku too nkuraren eidipa Yesu atopiu, nejing ina ang sinyati neipang'aki ltung'ana kumok. Ore ilo kitok loo sikarini oorripito Yesu o lelo ootii te nebo ninye, pee edol eikirikire enkop o kulie baa naatotiwuo, neureishoyu oleng ejo, “Esipa Enkerai e Nkai ele tung'ani.” Netii ine wueji inkituaak kumok naaing'orita te nelakua naatusujutua Yesu eing'uaa Galilaya eisiaaita ninye. Ore te nebo ninche etii Mariamu Magdalene o Mariamu ng'otonye Yakobo o Yosef, o ng'otonye layiok le Sebedayo. Ore pee eaku teipa nelotu oltung'ani karsis oing'uaa Arimatea oji Yosef, otaa apa olointeng'eni le Yesu. Nelo sii apa ninye enetii Pilato neomonu osesen le Yesu. Neitanapisho Pilato pee eishori. Neitayu Yosef osesen, neirin te nkarasha sidai e kitani, neirragie te nkurare enye ng'ejuk nataguetua to soit, neibeleleng'oki osoit sapuk enkutuk e ngumoto, nelo. Netii ine Mariamu Magdalene o enkae Mariamu etoni aaipirare enkurare. Ore taaisere aa enkolong nasujita ene Nkitobirare, neiturrurrokino lapolosak kituaak o Lfarisayo Pilato, aajoki, “Lo kitok, kitadamutua aajo etejo, apa ilo kalamas eton eishu, ‘Ore pee elusoo nkolong'i uni, napiu.’ Intanapisho naa metorripi enkurare metabaiki enkolong e uni, pee mepuonu ilooiteng'eni lenyena aapurroo nejoki olorere, ‘Etopiwuo’; neaku elejare e siadi kitok alang ene dukuya.” Nejoki Pilato, “Iatata larripok loo sikarini, enchom entorrip anaa enindimidimi.” Nepuo aaitagol erripoto e nkurare, nepik olmishire osoit te nebo ilarripok. Ore pee eidipayu enkolong e nkiyeng'iyeng'ata ekenyua enkolong e nkiterata e wiki, nelotu Mariamu e Magdalene oo enkae Mariamu aaing'uraa enkurare. Ing'ura, etijing'a enkikirikirata kitok enkop, amu etadowuo olmalaika lo Laitoriani oing'uaa shumata, nelotu neibeleleng'oo osoit netonie enchumata. Netiu enkomom enye anaa enkiwuang'ata, neibor inkilani enyena anaa empaso. Neikirikira ilarripok te nkaraki ninye, netiu anaa ilootuata. Nejoki ilo malaika inkituaak, “Emiureishoyu intae; amu ayiolo ajo Yesu ing'oruru otashoki. Metii ene amu etopiwuo anaa enatejo ninye. Wootu eng'urai ewueji neirragieki. Naa enchom entasiooi entoliki ilooiteng'eni lenyena entiaaki, ‘Etopiwuo aing'uaa lootuata; neituruko alo Galilaya, naa te ine idolidolo.’ Eng'ura aidipa atoliki intae.” Nepuo nabo kata aaing'uaa enkurare te nkuretisho o te ng'ida sapuk, nekuet aaliki ilooiteng'eni. Naa ng'ura, nenang'are Yesu ninche nejoki, “Entakuenya.” Nenyikaki ninche aaibung inkejek enyena aaserem. Nejoki Yesu, “Emiureishoyu; enchom entoliki ilalashera laainei meshomo Galilaya naa kaadol te ine.” Ore epuo te nkoitoi, ng'ura, nejing kulikae loo larripok atua enkanasa neliki ilapolosak kituaak imbaa pooki naatotiwuo. Netumo ilpayiani te nebo ore pee eidip aaiguanata, neisho isikarini impesai kumok aajoki, “Entiaaki olorere, ilooiteng'eni lenyena ooetuo kewarie aapurroo kirura. Naa te nebaiki ele rorei nkiyiaa o lbalusui, nikirorie iyiook pee kintung'uaa intae enyamali.” Neya ninche impesai neas anaa enatiaakaki. Neibulunyeki ele rorei Ilyahudi o metabaiki taata. Nepuo lekua ooiteng'eni tomon o obo Galilaya o metabaiki oldoinyo otiaaka Yesu enchom. Ore pee edol neserem ninye; kake eing'asha kulikae. Nelotu Yesu enetii neirorie ajoki, “Aaishooki enkidimata pooki te shumata o te nkop. Enchom entaa loreren pooki ilooiteng'eni laainei, nimbatisasa te nkarna e Papa o ene Nkerai o ene Nkiyang'et Sinyati: ninteng'ening'ene meibung'a inaitanapa intae pooki; naa ng'ura, atii te nebo intae nkolong'i pooki o metabau enkiting'oto e nkop.” Enkiterunoto oo lomon supati le Yesu Kristo Enkerai e Nkai. Anaa enaigero oloiboni le Nkai oji Isaya pee ejo, “Ng'ura, airriwaa olkilikuai lai dukuya enkomom ino, oitobir enkoitoi ino. Etii oltoilo obuaku ti ong'ata, ‘Entobiraki Olaitoriani enkoitoi, entobiraki irrekiei ooitoriori.’ ” Neipang'u ti ong'ata Yohana Olaibatisani, nelimu enkibatisa naitoduaaya enkirridunoto nayau empalakinoto oo ng'ok. Nepuo enetii ninye iltung'ana le nkop pooki e Yudea, o le Yerusalem, neibatisae ninche to lkeju le Yordan eirridu ng'ok enye. Naa enkila oo lpapit le ntames eishopito Yohana neeta enkimeita e nchoni te mpolos enye, naa lmaat o naishi e ong'ata enya. Nelikioo ninye ejo, “Elotu te siadi nanu ologol laalang nanu olaa kaamakua te nairrugokino alak enkeene e namuke enye. Aidipa nanu aibatisa intae te nkare kake te Nkiyang'et Sinyati eibatisa ninye intae.” Nelotu Yesu te nena olong'i eing'uaa Nasaret e Galilaya neibatisa Yohana ninye te Yordan. Ore nabo kata pee eilepu ninye te nkare, nedol pee ebolo shumata nedou Enkiyang'et Sinyati eikununo anaa enturkulu adoiki ninye; nelotu oltoilo oing'uaa shumata ojo, “Ira iyie Oinoti lai lanyor; atishipe te iyie.” Ore nabo kata nereu ninye Enkiyang'et e Nkai ong'ata. Nebik ti ong'ata nkolong'i artam, etemita shetani; neboitare ng'uesi e ong'ata; neisiaai ilmalaika ninye. Ore eidipaki aateen Yohana, nelotu Yesu Galilaya, alikioo lomon Supati le Nkai; ejo, “Etabaua enkata, netinyikua enkitoria e Enkai; erridutu, naa eruko ele rorei supat.” Ore eshepita enaiposha e Galilaya, nedol Simon o Andrea olalashe le Simon enang'aki orreshet atua enaiposha; amu ilarreshok loo sinkir ninche. Nejoki Yesu ninche, “Entusujuaki pee aitaa intae ilarreshok loo ltung'ana.” Neing'uaa nabo kata irresheta lenye nesuj ninye. Ore pee enyikaa peno, nedol Yakobo le Sebedayo o Yohana olalashe lenye, etii atua empeut eripita irresheta. Neipot nabo kata; neing'uaa Sebedayo menye lenye te mpeut eboitare ilaisiaayiak nesuj ninye. Nepuo aabaya Kapernaum; ore ake pee eaku enkolong e sabato nejing enkaji e ntumo neiteng'enisho. Neing'asiae te nkiteng'enare enye, amu eiteng'ena ninye ninche anaa oloitore enajo, nemetiu anaa lasirak. Netii te ina kata ake te nkaji enye e ntumo oltung'ani oata oloirirua oiduruk; nebuaku ajo, “Ainyoo iatayie iyie iyiook, Yesu le Nasaret? Iyewuo aidaikie iyiook? Kaayiolo ajo ira ng'ae, ira iyie ilo Sinyati le Nkai.” Kake eisikong'a Yesu ninye ajoki, “Tigirayu, tupuku tung'uai ninye!” Nediding'unye oloirirua aiterreyie, nebuaku to ltoilo sapuk, nepuku aing'uaa. Neing'asia pooki, o meikilikuanata aajo, “Ainyoo ena? Enkiteng'enare ng'ejuk! Eji keitore te ngolon iloiriruani ooiduruk, nening ninche ninye.” Ore ina kata ake, neibulu olning'o lenye pooki wueji te nene neemanita Galilaya. Nepuku ake te nkaji e ntumo, nejing enkaji e Simon o Andrea, eboitare Yakobo o Yohana. Neirrag enkaputani e Simon emuoi oloirobi, neinosakini te ina kata. Nelotu neibung enkaina nedumu, neing'ueiki oloirobi, neinyototo aisiaai ninche. Ore pee eaku teipa, etadoyie enkolong, nerikokini iltamueyia pooki o lelo ooata loiriruani. Nesotokino enkanasa pooki enkalo e kutuk aji. Neishiunye ilkumok ooata mueyiaritin oo mpukunot kumok, nearaa iloiriruani kumok; neitu eisho iloiriruani meiroro amu keyiolo ninche ninye. Ore enasirie, te niosowuani, neinyototo ayok alo ewueji neliyio neomon te ine. Neing'oru Simon o lelo ooboitare. Ore pee etum nejoki, “King'oru ltung'ana pooki.” Nejoki ninche, “Emaape kunda kulie ang'itie, pee aliki sii ninche, amu ina doi pee aewuo enkop.” Neibulu Galilaya pooki, alikioo ilo rorei too nkajijik enye e ntumo nearaa loiriruani. Nelotu oltung'ani oata enkeeya oo lbolot esai, negilaki kung ajoki, “Tiniyieu eikindim aishiunye matisikayu.” Neing'urrie, neitorioo enkaina aiseyie, nejoki, “Ekayieu, tisikayu.” Neing'uaa enkeeya oo lbolot nabo kata, nesika. Neing'ode areiki nereu nabo kata, nejoki, “Toduaa ake miliki likae tung'ani; kake shomo intoduaai kewan to lapolosani; ninchooyo entoki apa naitanapishe Musa te nkisujata, pee intadedeyie to lorere.” Kake etupukuo ake neiteru ainosaa, aibalie ilo omoni, neaku eitu eitoki Yesu aidim atijing'a enkang eduaakini, neaku ti ong'ata eton; nepuonu ltung'ana aayiaya eing'uaa nkaloli pooki. Ore pee errinyo, Kapernaum eishari nkuti olong'i, nening'i aajo etii ang. Neiturrurrokino iltung'ana kumok o metaa meetae empaash ebaiki te kutuk aji, einosaki Yesu ninche ilomon. Nepuonunui neyakini oltung'ani tarrush oilenye onapita ltung'ana oong'uan. Ore pee elau eneimu te nkumoi o lorere, nebol aadede shumata enkaji, ine neipirare. Ore pee eidip aatabol neitadou erruat napetita ilo oilenye. Ore pee edol Yesu enkirukoto enye, nejoki ilo oilenye, “Enkerai ai, kitapalakaki ng'ok inono.” Netoni te ine ilasirak nedamisho aajo too ltauja lenye, “Ainyoo pee ejo ele tung'ani inji? Eijo kemorisho! Ai ng'ae oidim atapalaki ng'ok, leme Enkai ake?” Neyiolou nabo kata Yesu ina to ltau lenye nchere, edamu ninche nena too ltauja lenye, neikilikuan ajoki, “Kaji etiu pee nkilikuanana ate nena too ltauja linyi? Kaa nalelek, ai te najoki ele oilenye, ‘Kitapalakaki ng'ok inono,’ ana ai te najoki, ‘Inyo, tudumu erruat ino shomo’? Kake ore pee itumutumu aatayiolo nchere keeta Enkerai e Tung'ani enkidimata te nkop napalakinye ng'ok.” Nejoki ilo oilenye, “Aajoki, inyo, tudumu erruat ino shomo ang.” Neinyototo, nedumu nabo kata erruat enye, neipung te dukuya ninche pooki; o meing'asiata pooki neisis Enkai, ejo, “Eitu ai kata kidol embae naaijo ena!” Neitoki apuku te ine nelo embata e naiposha, nesotokino olorora pooki ninye neiteng'en ninye ninche. Ore ina kata eloito nedol Lawi ole Alfayo eton te nkapisi oo mpesai e kodi nejoki, “Tusujuaki.” Neinyototo asuj ninye. Ore eton anya endaa te nkaji enye, netoni lasotok kumok loo mpesai e kodi o looata ng'ok te nebo Yesu o looiteng'eni lenyena; amu ai kumok iloosujita. Ore pee edol ilasirak lo Lfarisayo eng'arie ninye endaa looata ng'ok o lasotok le kodi, nejoki ilooiteng'eni lenyena, “Kaji etiu pee eng'arie ninye ilasotok le kodi o looata ng'ok endaa?” Ore pee ening Yesu, nejoki ninche, “Meyieu ilememuei olabaani, iloomuei ake ooyieu neitu alotu aipot isupati, kake looata ng'ok aewuo aipot.” Neaku enkata naitupukoo ate ilooiteng'eni le Yohana o loo Lfarisayo; nepuonu ltung'ana enetii ninye nejoki, “Kaji etiu pee eitupukoo ate ilooiteng'eni le Yohana o loo Lfarisayo, nemeitupukoo ate ilinono?” Nejoki Yesu ninche, “Keitupukoo ate ilchoreta lo loyamishe eton eisiritore? Ore eton eisiritore oloyamishe, nemeidim aaitupukoi ate. Keyooki aapuonu nkolong'i, naayae oloyamishe aaitung'uaa ninche, neitupukoo taa ate ina olong. Meetae oltung'ani oripaki erashe nemenota enkila musana; amu te neripaki, neng'erunye ina ng'ejuk te idia musana, nejarari eng'erata. Nemeetae oltung'ani opik enaisho ng'ejuk atua lbenia musan; naa te nepik, nedany ina aisho ilbenia. Ilbenia ng'ejuko ake epiki enaisho ng'ejuk.” Ore egira eim inkurman te nkolong e sabato ore epuoito neiteru ilooiteng'eni lenyena aagilu lukuny e nkano. Nejoki Ilfarisayo ninye, “Ng'ura, kaji etiu pee easita enemeishoruno too nkitanapat metaasi te nkolong e sabato?” Nejoki ninye ninche, “Keitu ai kata isomama enataasa Daudi, etanyamala netir esumash, ninye o lelo ooisiritore: eneikuna pee ejing enkaji e Nkai enapa kata aa Abiatar olapolosani, kitok, nenya emukate enkitoduaaroto nemeishoruno too nkitanapat meinosa likae leme olapolosani, nenya ninye neisho sii lelo ooboitare?” Nejoki ninche, “Eitayioki enkolong e sabato te nkaraki oltung'ani, eitu eitaini oltung'ani te nkaraki enkolong e sabato; netaa enkerai e tung'ani olaitoriani le nkolong e sabato.” Neitoki Yesu ajing enkaji e ntumo, netii ine oltung'ani oikaolo enkeeya enkaina. Neing'or ninche te naa keishiunye ilo te nkolong e sabato, pee etum aaitang'oro ninye. Nejoki ninye ilo tung'ani oikaole enkaina “Wou ene.” Nejoki ninye ninche, “Kaa naishoruno too nkitanapat mataas te nkolong e sabato, metaasi isupati anaa metaasi intorrok, meitopoki ana metaari metua?” Kake etigirate ninche. Nekurraki ninche pooki nkonyek te ngoro, eisinanuo te nkaraki narook oishuaa, nejoki ilo tung'ani “Intorioi enkaina ino!” Neitorioo, neishiu, enkaina. Neipang Ilfarisayo, nepuo nabo kata aainos enkiguana eboitare esirit oo le Herode, pee egilunore ninye eing'oru olosek oarie ninye metua. Nerrinyo Yesu te ine te nebo looiteng'eni lenyena aapuo enaiposha, nesuj olorora kitok oing'uaa Galilaya; o looing'uaa Yudea o Yerusalem o Ldumea o lido kekun le Yordan o lorora kitok oing'uaa Turo o Sidon; etoning'o nena pooki naataasa, nepuonu enetii ninye. Nejoki ilooiteng'eni lenyena meitobirakini empeut te nkaraki olorere, pee merratanyi ninye; amu eidipa aishiunye lkumok, metaa keiding'akino lelo pooki oomueiaa ejo maiseyie. Naa ore ake pee emaniki iloiriruani ooiduruk, nerriaa te dukuya ninye ebuaku aajo, “Ira iyie Enkerai e Nkai!” Nekurraki areiki ajoki pee melikioo. Neilepaki ninye oldoinyo, neipotu lelo ooyieu ninye openy nepuonu enetii ninye. Negelu tomon o aare, ooisiritore ninye, pee etum airriwai metolikioi ororei le Nkai; neaku eeta enkitoria naararie iloiriruani; Neisho Simon enkarna ajo Petero; Yakobo le Sebedayo, o Yohana olalashe Yakobo, neisho lelo enkarna ajo Boanerge, aa keji Ilenkikurrukur: Andrea, o Filipo, o Bartolomayo, o Matayo, o Tomas, o Yakobo le Alfayo o Tadayo, o Simon olkanaani, o Yudas Iskariot, laa ninye otakaldayie. Nelo ang. Neitoki ake esiamo aasoto, metaa metumoki ninche aainosa endaa. Ore pee ening iltung'ana lenyena le sotua, nepuo pee epuo aaibung, amu kejo, “Etarruoyie elukunya.” Nejo laiteng'enak loo nkitanapat ootadoutuo eing'uaa Yerusalem, “Beelsebul eeta, naa oloitore loiriruani eararie loiriruani.” Neipotu enetii ninye, nejoki too nkitanyaanyukot, “Kaji eiko pee eidim shetani ataarai shetani? Te neoro enkitoria ti atua, nemeidim ina kitoria aitasho. Naa te neoro enkaji ti atua kewan, nemeidim ina aji aitasho. Naa te netudumakine shetani kewan aoro, meitashe, kake keiting. Meetae oltung'ani oidim atijing'a enkaji o ltung'ani ogol nearaa masaa enyena, eitu eng'as aen ilo ogol, pee etumoki taa ataara enkaji enye. Esipa ajoki intae, epalakini ltung'ana ng'ok pooki, o emorore pooki namorisho ake; kake ore oloba anaa olomor Enkiyang'et sinyati, meeta empalakinoto aikata, kake etaa eng'oki ntarasi.” Amu ketejo ninche, “Oloirirua oiduruk eeta ninye.” Nelotu ng'otonye o lalashera lenyena; ore eeitashe ninche te boo neirriwaa enkutuk meipoti. Netoni esiamo aamanita ninye; nejokini, “Etii ng'utunyi o lalashera linono boo kinkilikuanu.” Newaliki ajoki, “Ai ng'ae yieyio o lalashera laainei?” Ore pee eitaman inkonyek lelo oomanita ninye, nejo, “Noolo yieyio o lalashera laainei! Ore pooki ng'ae oas enayieu Enkai, ninye olalashe lai, o enkanashe ai o yieyio.” Neitoki aiteru aiteng'enisho te mbata e naiposha. Neiturrurrokino olorora kitok oleng, o metijing'a atua empeut aton ti atua te naiposha; neton ilo orora te nkop natoyio te mbata e naiposha. Neutaki ninche mbaa kumok too nkitanyaanyukot nejoki, “Entoning! Ng'ura, eshomo olaunoni aunisho. Ore eunisho nedoiki kulikae anterera embata e nkoitoi, nepuonu ntaritik aanya. Nedoiki kulikae enkop oo soito nemetii nkulupuok kumok, nesioki aabulu, naa ore ake pee ebulu amu megut nkulupuok; ore pee eilepu enkolong nepej, naa ore amu meeta ntana netoyu. Nedoiki kulikae anterera atua lkiku nebulu lelo kiku negor, metaa eitu eiu ilng'anayio. Nedoiki kulikae anterera atua nkulupuok sidain nebulu neiu ilng'anayio, neponari aaiu maa tomoni uni, maa ntomoni ile, maa iip.” Nejo, “Oloata nkiyiaa naaning'ishore, toning'o.” Ore etaa ninye ake, neikilikuan lelo ooboitare te nebo ilooiteng'eni lenyena enajo nena kitanyaanyukot. Nejoki, “Eishooki intae entayiolo mbaa nemeibala e nkitoria e Nkai, kake ore te lelo ootii auluo, etiu mbaa pooki anaa nkitanyaanyukot; pee te neing'or, neing'or nemedol, naa te nening, nening nemejing'aa, pee meibelekenyakino ake Enkai, nepalakini.” Nejoki ninye ninche, “Aimining'ung'u ena kitanyaanyukoto? Kaji naa inkoko pee ining'ung'u nkulie kitanyaanyukot pooki? “Ore olaunoni, ororei eun. Naa kulo ilootii embata e nkoitoi, ine neunieki ororei; ore pee ening; nelotu shetani nabo kata aya ilo rorei otuunoki ti atua ninche. Naa inji etiu lelo ootuunoki te nkop oo soito, lelo laa, ore pee ening ororei, neng'amu nabo kata te ng'ida; nemeeta ntana ti atua ate, kake ebikie enkiti kata; kake ore pee elotu osina anaa enkisilisilore te nkaraki ilo rorei, nerrorro nabo kata. Ore lelo ootunokoki atua lkiku; naa lelo ooning ilo rorei, kake ore pee ejing'aki nyamalitin e nkop, o eng'ida oo masaa, o eng'uarrata e kulie tokitin, negor ilo rorei, metaa meisho etum ilng'anayio. Kake ore lelo ootuunokoki enkulupuoni sidai, naa lelo ooning ilo rorei neiruk nepik iltauja neiu ilng'anayio maa tomoniuni, maa ntomoni ile, maa iip.” Nejoki Yesu ninche, “Keyauni oltaa nepising'ari to ltoo, aashu epiki orunku le erruat? Mme eneiperere epiki? Amu meetae entoki naisudoyioki neme keji ake pee eibalunyeki; nemeetae entoki natunukaki neme keji ake pee eibalayu. Oloata nkiyiaa naaning'ishore, toning'o.” Nejoki ninche, “Eng'urai ena nining'itoto; amu ore emborei ninchooyo iyie naa ninye kinchori sii iyie, nikiponikini. Amu keponikini ilo oata aaisho kulie; ore ilo lemeeta, neoruni ina naata.” Nejo ninye, “Etiu enkitoria e Nkai anaa te neisuaaki oltung'ani lanterera enkop. Neirura neinyototo dama o kewarie, nerumishoyu lanterera nebulu, nemeyiolo ninye eneikununye. Enkop naitubulu openy, neng'asunye mbenek, neitoki ntapuka neitoki lanterera aajing elukunya. Kake ore pee eku lanterera, neitayu oltung'ani olalem adung'u amu etabawua enkisampuare.” Nejo ninye, “Ainyoo kintanyaanyukie enkitoria e Nkai anaa kaa kitanyaanyukoto kiaasishore te ninye? Etiu anaa empeu e karadali, enaa ore euni te nkop, ninye enkini aisul ilanterera le nkop; kake ore pee euni nebulu, aisul inkeek e ntim, neitayu lng'osil, o metaa kepuonu ntaritik e shumata aapik sinkin oloip lenye.” Neinosaki ilo rorei aiko neijia too nkitanyaanyukot kumok, anaa enaidima ninche aatoning; neitu eirorie metii enkitanyaanyukoto, kake ore pee eaku ninye ake o looiteng'eni lenyena neibalakinye ninche pooki toki. Ore ina olong pee eaku teipa, nejoki ninye ninche, “Ematalang aapuo lido kekun.” Neing'uaa olorere nerik ninche ninye, etiu anaa duoo ake, te ina peut. Netii kulie peuti ine te nebo ninye. Nedumunye olkutati kitok, nedam ilopir le nkare ina peut, o metaa keiput enkare. Kake etii ninye siadi empeut, eirura epetita enkirishet e lukunya; neinyeyie ninche ninye nejoki, “Olaiteng'enani, ai mme toki te iyie te nikindaaya?” Neinyototo nebuaaki osiwuo, nejoki enaiposha, “Tigirayu! Ntirring'ayu.” Neish osiwuo, negira enkare oleng. Nejoki ninche, “Ainyoo pee itureishote?” Neiputukuny ninche, nejokino, “Ai ng'ae doi ele? Olaa kening ninye osiwuo o enaiposha?” Nebaiki ninche olikae kekun le naiposha, nebaiki enkop oo Lgerasene. Ore pee edou te mpeut, nenang'are nabo kata oltung'ani otamanya nkuraren, eeta oloirirua oiduruk: nemeetae oltung'ani oidima ateena ninye too lpisia. Amu eteenaki katitin kumok too lgoteta; nemeeta hoo obo oidimua aitoborro. Naa kebuakita ake dama o kewarie too nkuraren o to o ldoinyo, near kewan too soito. Ore pee edol Yesu te nelakua, nekuet aserem ninye. Nebuaku to ltoilo sapuk, ejo, “Ainyoo kiatayie nanu, Yesu, Enkerai e Enkai natii Shumata Aisul? Aatasayia te Nkai, mikisilisil.” Amu ketiaaka, “Tupuku tung'uai ilo tung'ani, lo oirirua oiduruk!” Neikilikuan Yesu ajoki, “Aikiji ng'ae?” Newaliki ajoki, “Kaaji empuoto; amu aikira kumok.” Nesai ninche ninye oleng pee mearaa teina kop. Netii eluaata oo lbitiro nadaa te ine te mbata o ldoinyo; nesai iloiriruani Yesu aajoki, “Irriwai iyiook maape aajing kuldo bitiro, nchoo iyiook matijing.” Neisho ninche meshomo. Nepuku lelo oiriruani ooiduruk nejing lelo bitiro; ore ina luaata, nabaya nkalifuni are, neipirri aadoyio to loshong'ishong'i nengorokino enaiposha, neimis te naiposha. Neisik ilchekuti lenye, nepuo aalikioo te ina anasa o te ina kop. Nepuonu ltung'ana aadol enatotiwuo. Nepuonu enetii Yesu, nedol oladuoo oata oloirrirua eton te ine, eishopo naa biyoto enkorrok enye, oladuoo otang'asa aata empuoto loo loiriruani: neureishoyu ninche. Ore lelo ootoduaa ina nelikioo nena naatotiutuo te ilo apa otang'asa aata iloiriruani o too lbitiro. Neiteru aaomon Yesu metung'uai ina latia enye. Ore ejing'ita empeut, neomon ilo apa otang'asa aata iloiriruani eji pee eisiritore. Kake etanya Yesu nejoki, “Shomo ang enetii ilchoreta linono, toliki ninche eneba enikintaasa Olaitoriani, o eneikuna pee king'urrie.” Nelo neiteru alikioo te Dekapoli nena naaitaasa Yesu ninye; neing'asia ltung'ana pooki. Ore pee eitoki Yesu alang'aki olikae kekun, neiturrurrokino olorora kitok; etii ninye embata e naiposha. Nelotu ina kata obo le lelo ooitore enkaji e ntumo, oji enkarna Yairo; ore pee edol ninye, nebatata too nkejek enyena. Nesai, ajoki, “Etaa keye entito ai kiti. Wou inteleiki nkaik, pee eishiu, nepok.” Neiriamariyie ninye. Nesuj esiamo kitok, neiding'akino. Netii enkitok naturuke larin tomon o aare, netanyamala oleng eruk ilabaak kumok, netumuta ntokitin pooki apa naata, nepal enaikashu, neponari arrishu. Netoning'o eimakini Yesu, neimu te siadi ti atua olorere neiseyie olkila lenye. Amu etejo, “Te naiseyie ninye olkila lenye, naishiu.” Negem nabo kata erukoto enye, nening to sesen lenye nchere eishiunyeki emueyian enye. Ore Yesu, etayiolo ajo Eshomo engolon aing'uaa ninye, neibelekenya nabo kata ti atua olorere, nejo, “Ai ng'ae naaiseyie lkilani laainei?” Nejoki ilooiteng'eni lenyena, “Idolita esiamo kinding'akino, nintoki ajo, ‘Ai ng'ae laaiseyie?’ ” Neing'orisho ninye pee edol olotaasa ina. Kake eishoo ina kitok pee edol enaitaasaki, nelotu te nkuretisho eikirikira, nebatata te dukuya ninye, neliki sipat pooki. Nejoki Yesu ninye, “Na kerai, kinchiunye enkirukoto ino; shomo te seriani, ninchiu emuoyian ino.” Ore eton eirorita, nepuonu ilooing'uaa enkaji e ilo oitore enkaji e ntumo nejo, “Etua entito ino. Oo pee intoki aitanyamal Olaiteng'enani?” Kake eitu eshilaa Yesu ina natejoki, nejoki oloitore enkaji e ntumo, “Miureishoyu, iruko ake iyie.” Neitu eisho likae tung'ani metusuja ninye leme Petero ake o Yakobo o Yohana olalashe Yakobo. Ore pee abaiki ninche enkaji e ilo oitore enkaji e ntumo, nedol olorere o ltung'ana ooishirita oobuaku aaishir oleng. Ore pee ejing atua, nejoki ninche, “Ainyoo pee nchirishiri aabuakita? Eitu eye enkerai keirura.” Nekueniyie ninche ninye. Kake eitupukuo ninye lelo pooki boo, nerik menye enkerai o ng'otonye o lelo ooiriamunore, nejing ine netii enkerai. Neibung enkaina nejoki, “Talita kumi;” eji, “Entito kinyi, aajoki inyo.” Neinyototo nabo kata entito aitashe nelo, amu enoo larin tomon o aare embotoro enye. Ore nabo kata nenum ninche enking'asia. Nereiki aitore ajoki meliki hoo likae tung'ani ena bae nejoki ninche meishoo ninye endaa nanya. Neing'uaa ine nelotu enkop enye; nesuju ilooiteng'eni lenyena. Ore te nkolong e sabato neiteru aiteng'enisho te nkaji e ntumo; ore ilkumok ootoning'o ninye neing'asia, ejo, “Kaji enotie ele tung'ani kuna pooki. Kaa ng'eno eishooki ninye? Ebaa kuna baa e nking'asia naas inkaik enyena! Mme olaguetani loo nkeek doi ele, olayioni le Mariamu, naa olalashe Yakobo o Yosef Yudas o Simon, naa ai metii nkanashera enyena atua iyiook?” Nerikare ninye. Nejoki Yesu ninche, “Melaikini oloiboni le Nkai enkanyit mme te nkop enye, o ti atua enkaji enye.” Nelaikino ataasa inenking'asia te ine; ilkuti tung'ana ake oomuei eiteleikia nkaik neishiunye. Neing'asia ninye te nkaraki nemeeta ninche enkirukoto. Nemanaa too nkang'itie eiteng'enisho. Neipotu ninye lelo tomon o aare, neisho meitoria iloiriruani torrok. Neitanap ajoki, “Emishoroo toki te lototo inyi, eng'udi ake; naa emiya mukateni, aashu olbene, aashu mpesai too nkimeitani inyi. Enchopoi inamuka kake eminchopoo lkilani maa are.” Nejoki ninche, “Ore ake enkaji nijing'ijing'i, entotoni te ine o entung'uai ine wueji. Naa te neitu eng'amu intae dikae wueji, nemening intae, ore ipuopuo, empiripiroi enterit niaatata too nkejek inyi metaa shakeni te ninche.” Nepuo aalikioo nchere keishiaakino neirridu ltung'ana. Nearaa ninche iloiriruani kumok, neelie eilata iltamueyia kumok neishiunye. Nening olaiguanani oji Herode ina; amu etayioloki enkarna e Yesu. Nejo kulikae, “Eitopiwuoki Yohana Olaibatisani too lootuata; ina pee easisho ena golon ti atua ninye.” Nejo kulikae, “Eliya doi.” Nejo sii kulikae, “Oloiboni le Nkai otiu anaa loibonok le Nkai li apa.” Kake ore pee ening Herode nejo, “Yohana, olapa latudung'oyie elukunya eitopiwuoki.” Amu eirriwayie Herode ltung'ana meibung'i Yohana, neen apik korokoroni te nkaraki Herodias, enkitok o lalashe lenye oji Filipo amu eyama apa ninye. Amu etiaaka Yohana Herode, “Mikinchoro too nkitanapat iyama enkitok o lalashe lino.” Neilap Herodias ninye neaku keyieu near metua. Kake etalaikine, amu keure Herode Yohana, eyiolo ajo oltung'ani supat naa sinyati, nerrip eserian. Ore pee elo neinining nemilo; eji neng'ida sii te nening. Kake eewuo erishata to lkekun otoinieki Herode neitoomonisho ninye neipot ilkituaak lenyena o ltung'ana arikok le Galilaya. Ore pee elotu entito e Herodias aranyaki, neitiship Herode o lomon lenyena; nejoki olaiguanani ina tito, “Toomonoki entoki ake pooki niyieu, naa kaaisho.” Neinosaki olmumai ajo, “Ore entoki ake pooki nikiomon, kaaisho o te naa ematua e nkop naitore.” Neipung nelo ajoki ng'otonye, “Ainyoo aomonu?” Nejoki, “Elukunya e Yohana Olaibatisani.” Nejing'u nabo kata asieku enetii olaiguanani, neomon ejo, “Ayieu nikincho nabo kata elukunya e Yohana Olaibatisani te mbesen.” Neisinanuo naleng olaiguanani; kake ore te nkaraki lmuma lenyena o lelo omon lenyena neaku, meyieu nedot ina natiaaka. Neirriwaa olaiguanani nabo kata osikari le rripore, neitanap ninye meyau elukunya e Yohana. Nelo ilo nedung'u elukunya te korokoroni, neyau ina lukunya te mbesen, neisho ina tito; neisho entito ng'otonye. Ore pee ening ilooiteng'eni lenyena, nepuonu aaya osesen lenye, neirragie te nkurare. Nerrinyunye ilkipaareta enetii Yesu, neliki ninye nena pooki naataasa o naaitengenishote. Nejoki ninye ninche, “Wootu oopeny emaape eneliyio, eyeng'iyeng'ata enkiti kata.” Amu aikumok iloopuonu epuo, neaku meeta ninye erishata nainosie endaa. Nepuo te mpeut ewueji neliyio aa ninche ake oopeny. Netoduaaitie ltung'ana kumok, neyiolou, neipirri aapuo too nkejek ine eing'uaa nena ang'itie pooki, neng'asie ine wueji. Ore pee edou te mpeut nedol olorora kitok, neing'urrie ninche, amu etiu anaa ntare nemeeta olchekut; neiteru aiteng'en mbaa kumok. Ore pee emutu, nepuonu ilooiteng'eni lenyena enetii nejoki, “Keliyio ene wueji, nemuto; intanapa ninche, meshomo nkurman o kuna ang'itie naamanita ene aainyang'aki ate entoki nanya.” Kake etawalikia ninye ajoki ninche, “Enchoo intae ninche entoki nanya.” Nejoki ninche ninye. “Aikipuo aainyiang'u mukateni oo ndinarii iip are, pee kincho meinosa?” Nejoki ninche, “Kaja mukateni niatata intae? Enchom eng'urai.” Ore pee eing'oraa neyiolou, nejoki, “Imiet o sinkir aare.” Neitanap meitotona olorere too nkujit naanyori, anaa ltimito. Netoni aaitayu ltimito maa iip, anaa onom. Ore pee edumu Yesu nena mukateni imiet o sinkir aare neraposhu nkonyek aing'or shumata, nemayian, nebel imukateni neisho ilooiteng'eni lenyena meishoo lelo tung'ana; neoriki lelo sinkir aare ninche pooki. Nenya pooki neraposho. Nesotu mbelat naatelekuaki o noo sinkir sii neiput nkikapuni tomon o aare. Ore lelo ooinosa nena mukateni nera nkalifuni imiet ilewa. Nejoki ilooiteng'eni lenyena nabo kata meshomo nejing empeut neituruk aapuo lido kekun, aapuo Betsaida eitanapare ninye esiamo. Ore pee eorore, nelo aomon te nena doinyo. Ore etaa teipa, eidipa empeut ashomo empolos e naiposha, netii ninye openy enkop natoyio. Nedol ajo keekenya earare enkurtoroto e mpeut amu kenang'are osiwuo ninche. Ore te rripore e ong'uan e nkewarie nelotu enetii ninche, elo eporito enkare. Neyieu negiroo. Kake etoduaa ninche ninye elo te shumata e nkare nejo ke nkukuu, nebuaku aaishir; amu etoduaa pooki ninye, neiputukuny. Kake eirorie nabo kata nejoki, “Entagoluoto, nanu doi, emiureisho.” Nejing ninye atua empeut te nebo ninche negira osiwuo. Neirriang pooki, amu eitu ejing'aa enapa kias oo mukateni, kake etagolo iltauja lenye. Ore pee elang ninche lido kekun, nepuonu enkop e Genesaret, neen empeut te mbata e naiposha. Ore pee epuku te mpeut neyiolou iltung'ana ninye te ina kata ake. Nekuet aaman ina kop pooki, neiteru aariku ltung'ana pooki oomuei too rruatin enye aaya ewueji ake pooki nening'oki aajo etii. Neaku ore pooki wueji nelo, too nkang'itie, too nkanas kituaak, o te ina kop, nerikokini iloomueyiaa aairragie too wuejitin neemirishoreki, nesai Yesu meisho eiseyie ninye olcholoi lo lkila lenye; ore lelo pooki ooiseyie neishiunyeki. Ore pee eiturrurrokino Ilfarisayo enetii Yesu, eboitare ninche ematua oo lasirak, ooetuo eing'uaa Yerusalem, nedol aajo keinos kulikae ooiteng'eni lenyena endaa eiduruk inkaik, eji meisuja. (Amu ore Lfarisayo, naa neijia etiu Ilyahudi pooki, menya endaa eitu eisuj inkaik enye, pee eitabaya nkoon oo lpayiani. Naa te nepuonu eing'uaa ineemirishoreki; menya endaa eitu eng'as aaisuj ate. Naa keeta kulie koon naaitabaya ninche, anaa enkisujata oo nkikompeni o motioo o ntokitin oo suyan.) Neikilikuan Ilfarisayo o lasirak aajoki, “Ainyoo pee mesuj ilooiteng'eni linono nkoon oo lpayiani metaa kenya endaa too nkaik naaiduruk.” Nejoki ninye ninche, “Esipa enotoko Isaya pee eibonisho ajo ti alo intae isunkuro, anaa enaigero, ‘Too nkutukie ake, aayanyit, kulo tung'ana, kake kaalakuaniki ltauja lenye nanu, naa pesho aaserem nanu, aa nkoon oo ltung'ana eiteng'enare. Itapalaitie intae inkitanapat e Nkai, nikurrakiki aaibung inkoon oo ltung'ana.’ ” Nejoki ninye ninche, “Inotito intae olosek lianyienyie nkitanapat e Nkai, pee itumutumu aaitabai nkoon inyi. Amu etejo, Musa ‘Iyanyita minyi o ng'utunyi,’ nejo sii, ‘Ore olomor menye anaa ng'otonye, neiririkino keeya.’ Kake nijojo intae, ‘Te nejoki oltung'ani menye aashu ng'otonye, Ore entoki duoo nikitumie nanu etaa korban (aa taa enaishori Enkai) nimintokiki aaisho ilo meitaasa menye anaa ng'otonye toki.’ Ore te ina nintaa pesho ororei le Nkai te nena koon inyi nintarasakinono. Niasiasa doi kulie kumok neeijo nena.” Neitoki aipotu olorere nejoki, “Entoning'oki intae pooki, naa enchoo ejing'aa intae. Meetae entoki e oriong oltung'ani naa te nejing ade atua neidim aisarkionie ninye; kake mbaa naapuku ti atua oltung'ani naaitaa ninye torrono. Te neeta oltung'ani nkiyiaa naaning'ishore toning'o.” Ore pee ejing aji, neing'uaa olorere, neikilikuan ilooiteng'eni lenyena enajo ina kitanyaanyukoto. Nejoki ninche, “Aimejing'aa sii ninche intae? Aimidolidolo aajo ore pooki toki natii oriong oltung'ani, te nejing nemeidim aitarruoi; amu te nejing, mme oltau lenye ejing kake enkoshoke, neipung ade ake?” (Ore pee ejo neijia neitisiny indaiki pooki.) Nejo, “Ore inaapuku ti atua oltung'ani, ninche naaitarruoo oltung'ani. Amu atua oltung'ani eing'uaa indamunot torrok, enkiborra oo nkonyek, empurrorre, earata metua, eloloito, ng'uarrat torrok, enkarrueisho, olosek torrono, enkipororonkos, olom, esulare, olwuasa, emodai. Atua oltung'ani eing'uaa kuna torrok pooki, naa kuna naaisarkionie oltung'ani.” Ore pee epuku te ine nelo olkirine le Turo o Sidon. Nejing enkaji nabo, nemeyieu neyiolouni aajo etii ine; kake etalaikinoteki aaisudoi. Kake ore nabo kata netii enkitok, naibung'a entito enye kiti oloirirua oiduruk, nening ajo etii ine, nelotu, nebatata too nkejek enyena aserem. Ore ina kitok naa enoo Lyunani, o losho le Sirofoinike te inoto. Neomon metaarai oloirirua te ina tito enye. Nejoki ninye ina kitok, “Inchoo eng'asi aaitoti nkera, amu meishiaakino teneyae mukateni oo nkera aanang'aki ldiein.” Kake etawalikia ninye nejoki, “Ee itisipa lo kitok; kake ore sii ninche ndiein naalutoo emisa nesotu rrarrat ooitadoyio nkera.” Nejoki ninye, “Ore te nkaraki ina nitejo, shomo ang; etung'uayie oloirirua entito ino.” Nelo ang, neinepu enkerai eirrag te rruat, neshomo oloirirua. Nerrinyunye Yesu aing'uaa ilo kirine le Turo, neimaa Sidon alo enkalo e naiposha e Galilaya, nepolos aimaa atua Dekapoli. Nerikokini oltung'ani ming'ani laa penyo sii neiro, nesai meiteleiki enkaina. Nerik aitung'uaa atua olorere arik aa ninye ake openy, nepik ilkimojik nkiyiaa enyena, nenotu nkamulak neiseyie olng'ejep lenye; neing'or shumata, neitadoiyie oltau, nejoki ninye, “Efafata,” nchere, “Taboloyu.” Nebolo nkiyiaa enyena, nelaa eneta o lng'ejep lenye, neiro aitobiraki. Neitanap pee meliki likae tung'ani; kake ore anaa pee eitanap ajoki melikioo, neitulus ninye eitadaraa ina. Nelus enking'asia enye neaku keji, “Etaasa mbaa pooki aitobiraki ore ninye ilming'anta o lemeiro, neidimie aisho meiroro.” Ore te nena olong'i, enyaaka olorora kitok asoto, nemeeta entoki nanya, neipotu ilooiteng'eni lenyena nejoki ninche, “Kaata olng'ur te le orere, amu nkolong'i uni taata aaisiritore nanu nemeeta entoki nanya. Naa te najoki meshomo nkang'itie enye, neiterriaa te nkoitoi; neetuo kulikae eing'uaa enelakua.” Newaliki ilooiteng'eni lenyena aajoki, “Kaji eiko oltung'ani te neitoti kulo tung'ana too mukateni te ne ti ong'ata?” Neikilikuan ajoki, “Kaja mukateni niatata intae?” Nejoki, “Naapishana.” Neitanapisho metotona ltung'ana te nkop, nedumu nena mukateni naapishana, ore pee eishooyo enashe nebelibel neisho ilooiteng'eni lenyena meitarasaki olorere. Neitarasaki ninche ilo orora. Neeta sii lkuti sinkir ooti. Ore pee emayian, neitanapisho meitarasari sii ninche lelo aaisho olorere. Nenya, neraposho. Nesotuni lmong'oishi ootelekutua, nkikapuni naapishana naabore. Nebaya lelo tung'ana nkalifuni ong'uan. Neitanap meshomo ang; nejing ninye nabo kata atua empeut te nebo ilooiteng'eni lenyena, nepuo enkalo o Dalmanuta. Nepuonu Ilfarisayo aaishankarrarre ninye, aayie olmonekei oing'uaa keper aatem. Neitadoiyio oltau te nguton, nejo, “Ainyoo pee eing'oru kulo tung'ana le na kata olmonekie oing'uaa shumata? Esipa, ajoki intae, meetae hoo olmonekie oishori ltung'ana le na kata.” Neing'uaa Yesu ninche, neitoki ajing empeut nelo olikae kekun. Netorikine ninche eitu eyau mukateni; neaku emukate nabo ake eeta tiatua empeut. Neitanap Yesu ninche ajoki, “Entorrip ate te nkisuijo oo Lfarisayo o te nkisuijo e Herode.” Neiguana maate ejo, “Mukateni mikiaata.” Neyiolou Yesu ina, nejoki ninche, “Ainyoo pee ijokinono eji miatata mukateni? Keton ake mejing'aa intae naa aimining'ung'u? Kaji etiu pee egol intae ilukuny? Aimidolidolo niatata nkonyek? Niatata nkiyiaa aimining'ishosho? Aimidamumu? Amaa pee abel imukateni imiet abelaki ltung'ana nkalifuni imiet, kaja nkikapuni oo lmong'oishi oobore litasotutuo?” Nejoki, “Tomon o aare.” “Oo napa naapishana natebelaka nkalifuni ong'uan: kaja nkikapuni naabore oo lmong'oishi litasotutuo?” Nejoki, “Naapishana.” Nejoki ninche, Neton ake intae mining'ung'u? Nepuonu Betsaida. Nerikokini olmodooni, aaomon meiseyie. Nerik ilo modooni aibung enkaina, neipung'ie te ina ang. Ore pee enotaki nkonyek enyena, neiteleiki nkaik, neikilikuan ajoki, “Idol toki?” Neshumu nkonyek nejo, “Kadol iltung'ana; kake etiu anaa lkeek, epuoito.” Neitoki ake Yesu aiteleiki nkonyek enyena nkaik, neing'orisho ninye oleng neishiu, nedolishoyu abaraki, Neisho elo ang, nejoki, “Nimirrinyo ake ajing ena ang.” Nelo Yesu o looiteng'eni lenyena, nkang'itie e Kaisarii e Filipi. Ore epuo te nkoitoi neikilikuan Yesu ilooiteng'eni lenyena ajoki, “Kejo iltung'ana kara nanu ng'ae?” Nejoki ninche ninye, “Yohana Olaibatisani, nejo kulikae, Eliya; nejo sii kulikae ira obo loo lapa oibonok le Nkai.” Neikilikuan ajoki, “Kake amaa intae, nijojo kara ng'ae?” Newaliki Petero ajoki, “Ira iyie Kristo.” Neitanap ninche pee meliki likae tung'ani. Neiteru aiteng'en ajoki meeta nchere pee meisilisili Enkerai e Tung'ani too mbaa kumok neanyi ilpayiani o lapolosak kituaak o lasirak, neari metua, ore pee elusoo nkolong'i uni neitoki apiu. Nelimu ina aibalunye. Nerik Petero ninye neiteru aikok. Kake eibelekenye Yesu ore pee edol ilooiteng'eni lenyena, neing'ode Petero, nejoki, “Shomo kurum ai shetani! Amu mitii iyie enkalo e Nkai, kake enoo ltung'ana itii.” Neipotu olorere te nebo ilooiteng'eni lenyena meetu enetii ninye, nejoki ninche, “Te neyieu oltung'ani naasuj nanu, nchoo metanya inaayieu oltau lenye, nedumu osalaba lenye naasuj nanu. Amu ore olojo aitopok enkishui enye neiminie; ore oloiturraa enkishui enye te nkaraki ele rorei supat, neitajeu. Amu ainyoo edupore oltung'ani, te netum enkop pooki neiturraa enkishui enye? Anaa ainyoo einosie oltung'ani enkishui enye? Amu ore olodol isora te naaimaki nanu aashu ororei lai tena ishoi oo ng'ok naloloito nedol sii ninye enkerai e Tung'ani isora eimaki ninye te ina olong elotu te nkitoo e Menye eiriamunore ilmalaika sinyat.” Nejoki Yesu ninche, “Esipa, ajoki intae, etii doi ilooitashe tene lemeinyorrinyor keeya katukul o metaba anaa nedol enkitoria e Nkai eewuo te ng'olon.” Ore pee eishunye nkolong'i ile nerik Yesu Petero o Yakobo o Yohana, neilepie enchumata o ldoinyo oado aa ninche ake; newala emua enye edolita ninche. Neitintilu lkilani lenyena, aaiborru oleng, enaa meetae olaisujani te nkop oidim aiborrie metotiwuo neijia. Neliooyu Eliya o Musa te dukuya ninche; eirorie Yesu. Newalu Petero nejoki Yesu, “Olaiteng'enani, aisidai kitii ene; nchoo iyiook kishetu ilng'oborri okuni, olino obo o le Musa obo o le Eliya obo.” Naa aimeyiolo enajoito, amu eiputukunyo oleng. Neitemoo enkatampoi nejo, “Nele Oinoti lai lanyor, ninye entoning.” Ore nabo kata ake, ejo maing'orisho neitu eitoki aadol likae otii te nebo ninche. Yesu ake openy. Ore edou to ldoinyo, neitanap amitiki einosaki likae tung'ani nena naatoduaa ninche, o metaba naa nepiu Enkerai e Tung'ani aing'uaa ilootuata. Neibung ninche ilo rorei, neikilikuana maate aajo. “Ainyoo doi ena najo ake, kepiu aing'uaa ilootuata?” Neikilikuan ninche Yesu aajoki, “Ainyoo pee ejo ilaiteng'enak loo nkitanapat eji meeta nchere meng'as Eliya alotu?” Newaliki Yesu ajoki ninche, “Esipa eng'as Eliya alotu neitang'ejuk imbaa pooki. Paa amaa, ainyoo pee ejo lkigerot ti alo Enkerai e Tung'ani, eji keitamei too mbaa kumok nemenuni? Kake ajoki nanu intae, eewuo Eliya, neitaas ninche ninye enapa ake nayieu neitaas, anaa enatisirakaki ninye.” Ore pee epuonu enetii ilkulikae ooiteng'eni, nedol emanita olorere kitok, neishankarrarre ilaiteng'enak loo nkitanapat ninche. Ore ake pee edol ilo orere Yesu, neing'asia oleng, nekuetiki aairoroki. Neikilikuan ajoki, ninche, “Ainyoo doi ena shankar niaatata o ninche?” Newaliki oltung'ani obo te ina siamo ajoki, “Olaiteng'enani, atorikuo duoo enkayioni ai enitii, eeta oloirirua lemeiro; olaa ore pee eibung, nenang'ie enkop; neitayu ilabur, nenya lala neikaolo; najo ajoki ilooiteng'eni linono metaarai, nelaikino.” Newaliki ajoki ninche, “Wooi ena ishoi nemeeta enkirukoto! Kebaa aton aboitare intae? Kapal intae o anu? Entoriku ninye ene natii.” Nerikokini; ore pee edol ilo oirirua Yesu neiterreyie nabo kata, nebatata te nkop neiperipera, neitayu ilabur te nkutuk. Neikilikuan Yesu menye enkerai ajoki, “Kebaya aa nkat eeta ena pukunoto?” Nejo, “Te kereisho eiterua. Naa katitin kumok etanang'aka ninye atua enkima nenang'aki enkare ejo aar; kake te nindim iyie ataasa ae, ing'urrie iyiook taretu iyiook.” Nejoki Yesu ninye, “Eji te nindim! Eidimayu imbaa pooki to loiruk.” Nebuak nabo kata menye ina ayioni nejo, “Airuko, ore eneton eitu airuk taretokoki!” Ore pee edol Yesu olorere ekuetu aasotokino, neing'ode ilo oirirua oiduruk, nejoki, “Lo oirirua ming'ani lemeiro, nanu laaitore, tupuku tung'uai, nimingil ajing ae kata.” Nebuaku aishir neiterreyie aipushupush oleng, nepuku, netiu enkayioni anaa olmeneng'ani o metejo lkumok, “Ae etua!” Kake eibung'a Yesu enkaina nedumu, neinyototo aitashe. Ore pee ejing atua aji, neikilikuan ilooiteng'eni lenyena too nkurrat aajoki, “Oo pee eitu kindim iyiook aataaarai ninye?” Nejoki, “Meararoyu ena pukunoto ti ae neme te nkomono ake.” Nepuo te ine neimaa Galilaya. Nemeyieu Yesu neyiolou hoo oltung'ani: amu ilooiteng'eni lenyena eiteng'enita, ajoki, “Eitarasakini Enkerai e Tung'ani nkaik oo ltung'ana, near ninche ninye metua; ore pee eidipi aatar metua, neishari nkolong'i uni nepiu.” Kake eitu ening'u ninche ina natejo, neureyu sii eikilikuan. Nepuonu Kapernaum; ore etii Yesu aji neikilikuan ninche ajoki, “Ainyoo naaji enchankar niaatata te nkoitoi?” Negira ninche; amu keishankarrate aajo kalo olkitok te pooki. Neton neipot lelo tomon o aare; nejoki ninche, “Ore oloyieu neaku ole dukuya, nchoo metaa ninye obayie te pooki neaku osinka le pooki.” Nedumu enkerai, neitasheyie te mpolos enye; nedumu aibung too nkaik enyena nejoki ninche, “Ore pooki ong'amu enkerai anaa ena te nkarna ai, nanu eng'amu; ore olaang'amu, neme nanu ake eng'amu kake ilo laairriwua.” Nejoki Yohana ninye, “Olaiteng'enani, kitoduaa oltung'ani earaa iloiriruani te nkarna ino, nikimitiki, amu mme ole ncholiek ang.” Kake etiaaka Yesu, “Emimitiki, amu meetae hoo oloas embae sapuk te nkarna ai, laa ore aa enaidipie ina, naaitoki aidim atusukenya. Amu ore ilo lemegilunore iyiook naa ole nkalo ang. Esipa, ajoki intae, ore ake oloisho intae enkikompe e nkare entook te nkaraki naipotieki intae Kristo, nemeeta nchere pee etala olerrinyore lenye. “Ore ake oloitapong'oo nabo e kuna kutiti naairuk nanu, enaikash te neenikini ninye osoit kitok oiutuutishoreki emurt, nenang'akini enaiposha. Naa ti nikintapong'oo enkaina ino, tudung'oi; enaikash te nijing enkishui iata enkumur alang te ti niata nkaik pokira are, nilo Gehanum, atua enkima nemeye ntarasi; (enemeye lkuru lenye nemeye enkima.) Naa ti nikintapong'oo enkeju ino, tudung'oi; amu enaikash te iyie ti nijing enkishui ira ng'ojine, alang ti nikinang'akini Gehanum, iata nkejek pokira are; (ewueji nemeye ilkuru lenye, nemeye enkima.) Naa ti nikintapong'oo enkong'u ino, tukurtu; enaikash ti nijing enkitoria e Nkai iata enkong'u nabo alang ti nikinang'akini Gehanum iata inkonyek pokira are; ewueji nemeye ilkuru lenye, nemeye enkima. “Amu keitisinyi pooki ng'ae te nkima, anaa enaitisinyi olasar te munyan. Sidai emunyan; kake amaa te nelau emunyan enkisukut enye, kaji eikoni pee eitokini aaisukutie? Enoto emunyan ti atua ate, nitonini te seriani intae maate.” Nedumunye te ina alo, nelotu olkirine le Yudea o lido kekun le Yordan, neiturrurrokino ninye aaitoki isiamon kumok enetii ninye; neitoki ake aiteng'en anaa enatamoo apake. Nepuonu Ilfarisayo enetii ninye neikilikuan aajoki, ejo pee etem, “Keishiaakino te neiturraa oltung'ani enkitok enye?” Newaliki ajoki, “Kaa eitanapa intae Musa?” Nejoki, “Eishorua Musa meigeroki oltung'ani enkitok enye empalai naiturrarie, nearaa.” Kake etiaaka Yesu ninche, “Enkaraki engolon oo ltauja linyi pee etisiraka intae ina kitanapata. Kake ore ebaiki enkiterunoto e nkop, eitobira Enkai olee o eng'oruoi. Enkaraki ena pee eing'uaa olee menye o ng'otonye, neibung'are enkitok enye, neaku ninche pokira are osesen obo, Metaa meekure era are kake etaa osesen obo. Ore naa inaaitutumo Enkai mincho ake erish oltung'ani.” Ore ti aji neitoki ake ilooiteng'eni lenyena aaikilikuan ena bae. Nejoki ninye ninche, “Ore ake oloiturraa enkitok enye neyam ae, keloloito. Naa te neiturraa enkitok olmoruo lenye, nelo meyama likae, keloloito.” Neyakini Yesu nkera kutiti pee etum aiteleiki nkaik nebuaaki ilooiteng'eni lenyena lelo ooriku. Ore pee edol Yesu ina, negoro, nejoki, “Enchoo nkera epuonu enatii emimitiki; amu enoo naatiu anaa kuna enkitoria e Nkai. Esipa ajoki intae, ore olemeng'amu enkitoria e Nkai anaa enang'amu enkerai kiti, nemejing katukul.” Nemuataki nkera nkaik amayian, neiteleiki nkaik nemayian ninche. Ore te nkoitoi epuku Yesu alo, nekuetiki oltung'ani negilaki kung, neikilikuan ajoki, “Olaiteng'enani supat, kaji aiko pee ajung enkishui nemeish?” Nejoki Yesu, “Kaji etiu pee kijo nanu supat? Meetae hoo obo supat, Enkai ake esupat. Iyiolo iyie nkitanapat, inchere, ‘Miar metua, miloloito, mipurrisho, minteeniki likae elejare, minkonyisho to losek, iyanyita minyi o ng'utunyi.’ ” Nejoki ninye, “Olaiteng'enani, aibung'a kuna pooki ebaiki apa ara enkerai.” Neing'or Yesu ninye akurraki nkonyek nenyorru, nejoki, “Nabo ake nikitong'orikia; shomo, timira iniata pooki nincho laisinak, naa itum olchumati te shumata; nikilotu taa asuj.” Nesot enkomom enye te ina bae, nelo eisinanuo; amu keeta masaa kumok. Neing'or Yesu nkaloli pooki, nejoki ilooiteng'eni lenyena, “Egol atiu aja to lkarsis pee ejing enkitoria e Nkai!” Neing'asia ilooiteng'eni too rorei lenyena. Kake eigilie Yesu ajoki, “Nakera, egol atiu aja pee ejing oltung'ani enkitoria e Nkai! Entames nalelek te neim enaudoto o ltidu alang olkarsis ejing enkitoria e Nkai.” Neing'asia ninche oleng, nejoki ninche ninye, “Ae ng'ae naa kenya oidim atajeu?” Neing'or Yesu ninche nejoki, “Meidimayu too oltung'ana, kake mme neijia etiu te Nkai; amu keidimayu mbaa pooki te Nkai.” Neiter Petero ajoki ninye, “Ng'ura, kitung'uaitie iyiook pooki toki aasuj iyie.” Nejo Yesu, “Esipa ajoki intae, meetae hoo obo otung'uayie enkaji anaa lalashera anaa nkanashera anaa ng'otonye anaa menye anaa nkera anaa nkurman, te nkaraki nanu o te nkaraki kulo omon supati, lemetum inkatitin iip taata te na kata, aa nkajijik o lalashera o nkanashera o noo ng'otonye o nkera o nkurman te nebo oloisilisili, naa ore te idia kata nalotu netum enkishui nemeish. Kake etii ilkumok ooiturukutuo ooyooki aaku ile siadi, neaku ilooisiadutua ile dukuya.” Ore etii enkoitoi, eilep aapuo Yerusalem eituruko Yesu dukuya ninche; neing'asia ninche, ore iloosujita netureishote. Neitoki ake arik lelo tomon o aare neiter aliki nena naapuo aatum ninye. Ejo, “Ng'ura, Yerusalem kilep aapuo; naa keitarasakini Enkerai e Tung'ani ilapolosak kituaak o laiteng'enak loo nkitanapat, nedung'oki ninche ninye enkiguana e keeya, neitarasaki Iloreren; nesurdaany ninche ninye, nenotaki, neosh aaitame near metua ore pee eishari nkolong'i uni nepiu.” Neisho Yakobo o Yohana, ilayiok le Sebedayo, nepuonu enetii ninye, nejoki, “Olaiteng'enani, kiyieu nintaas iyiook embae ake pooki nikiomon iyie.” Nejoki ninye ninche, “Ainyoo iyieuu naitaas intae?” Nejoki ninche, ninye, “Inchoo iyiook meitoton obo lang te nkaina ino e tatene neton olikae te ne kedienye, te nkitoo ino.” Kake etiaaka Yesu ninche, “Miyiololo intae ina niomonunu. Indimidimi sa aatook enkikompe naok nanu, aashu meibatisai intae te nkibatisa naaibatisai nanu?” Nejoki, “Ee kindim.” Nejoki Yesu ninche, “Iokioko taa ninye enkikompe naok nanu, neibatisae intae te nkibatisa naaibatisai nanu; kake ore entonata te nkaina ai e tatene aashu te ne kedienye, mme nanu oishoru, kake ene lelo laa ninche eitobirakaki.” Ore pee ening lelo pokira tomon ina, neiter aagorokino Yakobo o Yohana. Neipotu Yesu ninche enetii nejoki, “Iyiololo aajo ore lelo ooitaa ate ilaitoriak loo Loreren neitoreisho te ng'olon, negilu iltung'ana lenye kituaak ninche. Kake mme neijia etiu te intae; kake ore olinyi oyieu neaku kitok neaku olaisiaayiani linyi, ore oloyieu neituruk neaku osinka le pooki. Amu eitu elotu Enkerai e Tung'ani meisiaai kake keewuo aisiaaisho, neishoru enkishui enye metaa elakunoto oo lkumok.” Nepuonu Yeriko; ore epuo aaing'uaa Yeriko eiriamariyie ilooiteng'eni lenyena o lorora kitok, netii olmodooni oomonisho oji Bartimayo ole Timayo, oton te mbata e nkoitoi. Ore pee ening eji Yesu le Nasaret ilo neiteru abuak eishiraki ajo, “Yesu, olayioni le Daudi, ing'urrieki!” Nebuaaki ilkumok aajoki metigirayu; kake etabuaa oleng ejo, “Olayioni le Daudi, ing'urrieki nanu!” Neitashe Yesu nejo, “Empoto.” Neipoti ilo tung'ani modooni aajoki, “Intagoluoyu; inyo amu kimpot ninye.” Nenang'aa olkila lenye, neipid nelo enetii Yesu. Neng'amaa Yesu ajoki, “Kaa iyieu naaitaas?” Nejoki ilo modooni, “Lo kitok kayieu nadolishoyu.” Nejoki Yesu, “Shomo, kinchiunye enkirukoto ino.” Nedolishoyu ina kata ake neirukurukore te nkoitoi. Ore pee etaaniki ninche embata Yerusalem, aabaiki Betfage o Betania, to ldoinyo loo Loirienito, neirriwaa ilooiteng'eni aare lenyena, nejoki, “Enchom enda ang naipirare intae, ore ake pee ijing'ijing'i nitumutumu olkurrarru oena, leitu ae kata eked likae tung'ani. Entalaku entereu ene. Ore te nejoki intae oltung'ani, ‘Oo pee inkoko inji?’ Entejo, ‘Olkitok oatayie enkolat naa keshuku ene nabo kata.’ ” Nepuo ninche, neinepu olkurrarru eena te kishomi ti auluo enkoitoi nalala e nkanasa, nelaku ninche. Nejoki lelo ooitashe te ine, “Kaa iasitata aalak olkurrarru?” Neliki ina natiaaka Yesu, neisho ninche meshomo. Nerewaki Yesu ilo kurrarru, neirotoki lkilani lenye, neked atonie. Neisalaash ilkumok lenye lkilani te nkoitoi naalala, neisalaash kulikae ilng'osil oota mbenek ootudung'utuo too nkurman. Ore lelo ooituruk o loosujita nebuaku aajo, “Hosana! Emayiana ilo olotu te nkarna o Laitoriani! Emayiana enkitoria nalotu e papa lang Daudi! Hosana te shumata naisul!” Nejing Yerusalem, nelo atua enkaji e Nkai, ore pee eshil pooki toki, nemuto, neipung alo Betania o lelo pokira tomon o aare. Ore te nkolong nasujita ina, pee eshukunye te Betania, netir esumash. Ore pee edol te nelakua olng'aboli oata mbenek, nelo ejo ebaiki netumie toki. Nejo abaiki, mbenek ake eeta, amu mme enkata oo lng'abolo. Nejoki ilo, “Metaa mikingil likae anyayie lng'anayio ntarasi.” Nening ilooiteng'eni lenyena. Nepuonu Yerusalem. Nejing enkaji e Nkai neiteru aaraa lelo oomirisho o looinyang'isho te nkaji e Nkai, neibeleleng'oo mesai oo laitawalak loo mpesai o lorikan le lelo omir nturkuluni; nemit meitoki oltung'ani anap toki aitudung enkaji e Nkai. Neiteng'enisho, nejoki ninche, “Keitu eigeri aajo, ‘Keaku enkaji ai ene sayiare too loreren pooki’? Kake intaa intae enkapune oo laisimak. Nening ilapolosak kituaak o laiteng'enak loo nkitanapat ina neing'oru enkoitoi pee ear ninye; kake etureita ninye, amu eing'asiayie enkikoo enye ilo orora pooki. Ore pee ebau enteipa neipung te ina anasa.” Ore epuo te nkakenya, nedol olang'ole ng'aboli etoyio o metabaiki ntana. Nedamu Petero nejoki ninye, “Olaiteng'enani, ng'ura! Etoyio olang'ole ng'aboli litediaa.” Newaliki Yesu ajoki, “Eruko Enkai. Esipa ajoki intae, ore ake olojoki ele doinyo, ‘Tadotunye tanang'akinoyu enaiposha’, nemeing'ash to ltau lenye, kake eiruk ina najo nchere keaku, neaku te ninye anaa enatejo. Metaa ajoki intae, ore embae ake pooki nisaishosho niomonunu, eruko nchere itumutumu neaku ina. Naa ore nkatitin pooki ni nintasheshe aaomon, entapalakinoto toki; pee epalaki sii ninche intae Papa linyi otii shumata nkitarruorot inyi. (Kake ti nimipalakinono, nemepalaki sii ninye Papa linyi otii shumata intae nkitarruorot inyi.)” Neitoki ake aapuonu Yerusalem. Ore eloolo ninye te nkaji e Nkai, nepuonu aayiaya ninye ilapolosak kituaak o lasirak o lpayiani, nejoki ninche ninye, “Kaa golon ena niaasie iyie kuna baa, naa ae ng'ae likinchoo ena golon niasie?” Nejoki Yesu ninche, “Kaikilikuan intae embae nabo; entawalikiaki pee, aliki intae engolon naasie kuna baa. Amaa apa enkibatisare e Yohana ae keper eing'uaa anaa ei ltung'ana? Entawalikiaki.” Neishankarra ejo maate, “Ti nikijo, ‘Keper eing'uaa,’ naa taata nejoki iyiook, ‘Oo naa pee eitu irukuruku?’ Kake aikijo, ‘Ltung'ana eing'uaa?’ ” Neureyu iltung'ana, amu etonyorraitie pooki inchere oloiboni le Nkai le dede Yohana. Neaku etawalikitia Yesu aajoki, “Mikiyiolo.” Nejoki Yesu ninche, “Maliki sii nanu intae enkitoria naasie kuna baa.” Neiteru airorie ninche too nkitanyaanyukot ejo, “Etuuno oltung'ani enkurma oo sabibu, neitaman enkikarrata, neturu engumoto naironyieki lng'anayio, neshetu ol talet oado, neitaaki aisilenoki laturok enkurma enye, nelo enkop nalakua. Ore pee ebau enkata enye, neirriwaki lelo aturok osinka, meishoo ematua oo lng'anayio le ina kurma. Neibung ninche ninye near, nearaa meeta toki. Neitoki ake airriwaki likae sinka, nebor ilo elukunya, neinyal aasul. Neirriwaki ake likae, near ilo metua; neiko sii neijia kulikae kumok, neosh kulikae near kulikae metuata. Neaku eton apa eeta likae obo, laa oinoti lenye kirotet; neirriwaki aitabayie ninye, ejo, ‘Keyanyit oinoti lai.’ Kake etiakinote lelo aturok ooisilenokoki enkurma, ‘Ele doi olajung'oni; wootu, mataar metua pee eaku enaang enjung'ore.’ Neibung ninche ninye near metua, nenang'aki auluo ina kurma oo sabibu. Kaa kenya eitaas olopeny ina kurma oo sabibu? Kelotu kenya aidaikie lelo aturok neisho ninye kulikae enkurma oo sabibu. Keitu doi isomama ele kigeroto ojo, ‘Ilo soit otanyaita ilashetak otaa ole lukunya o lmairroto; Olaitoriani eing'uaa ena, naa ene nking'asia too nkonyek ang’?” Neing'oru ninche eneiko pee eibung, kake etureita olorere, amu etayioloito aajo ninche eipirta ina kitanyaanyukoto; neaku eshomo aaing'uaa. Neirriwakini ematua oo Lfarisayo o ematua oo lencholiek e Herode, pee epuonu aarresh too rorei lenyena. Nepuonu enetii nejoki, “Olaiteng'enani, kiyiolo aajo ira iyie, asipani, nimishilaa hoo iyie likae tung'ani; amu mishilaa enkitoo oo ltung'ana, kake enkoitoi ake e Nkai iutaa too sipat. Keishiaakino te nikincho Kaisari kodi, anaa aimeishiaakino? Aikilak, ana aimikilak?” Kake ore amu etayiolo esunkureisho enye, nejoki, “Ainyoo pee kitemiteme? Eyakaki empisai, maing'ura.” Neyakini. Nejoki ninye ninche, “Ai ng'ae ele osirakino naa ae ng'ae eigero?” Nejokini, “Kaisari.” Nejoki Yesu ninche, “Enchoo Kaisari ine Kaisari, ninchosho Enkai ine Nkai.” Neing'asiae te ninye oleng. Nepuonu Sadukayo enetii, lelo taa oojo eji meetae empiunoto; neikilikuan aajoki, “Olaiteng'enani, eigeroko Musa iyiook nchere te neye oltung'ani alashe olikae, neing'uaa enkitok meeta enkerai, neyam olalashe ina kitok, pee eiki olalashe nkera. Eetae apa lalashera oopishana; neyam olbotor enkitok, ore pee eye neitu eing'uaa nkera. Neyam oliaare, neye neitu eiu nkera; naa neijia eikuna oliookuni; neaku eitu eing'uaa nkera pokira oopishana. Ore te nkiting'oto neye ina kitok. Omaa kenya te mpiunoto oo lootuata, keaku ene ng'ae ina kitok? Amu eyama naa pokira oopishana?” Nejoki Yesu ninche, “Eijojo mme nji taa doi etiu pee ipong'oriri, mme ilkigerot miyiololo nimiyiololo sii engolon e Nkai? Amu te nepiu kenya lelo too lootuata, meyamisho nemeyami, kake ketiu anaa lmalaika te shumata. Naa amaa doi enkitopiunoto oo lootuata, keitu isomama te mbuku e Musa, te noshi nesirakino enapa shani, pee ejoki Enkai ninye. ‘Ara nanu Enkai e Abraham, o Enkai e Isaak, o Enkai e Yakobo?’ Mme Enkai oo lootuata ninye, kake enoo looishu, itapong'ori oleng.” Nelotu obo loo laiteng'enak loo nkitanapat nening eishankarra, ore pee ening ajo etawalikia aitobiraki, neikilikuan ninye ajoki, “Kaa kitanapata naituruk?” Newaliki Yesu ajoki, “Ena naituruk, ‘Toning'o iyie Siraeli; Enkai ang Olaitoriani; obo Olaitoriani; naa tonyorra Olaitoriani Enkai ino to ltau lino pooki, o te nkishui ino pooki, o te ng'eno ino pooki, o te ngolon ino pooki.’ Naa ena eniare, ‘Tonyorra ole latia ino anaa kewan.’ Meetae ae kitanapata kitok nalang kuna.” Nejoki ilo aiteng'enani loo nkitanapat, “Itisipa, Olaiteng'enani; itisipa nchere nabo Enkai, nemeetae likae leme ninye; naa ti ninyorru ninye to ltau lino pooki o te ng'eno ino pooki, o te ngolon ino pooki, ninyorru sii ole latia ino anaa kewan, nelang nena nkishorunot pooki naapeji elulung'a nelang ilasarri ake pooki.” Ore pee edol Yesu ajo etawalikia te ng'eno, nejoki, “Milakuaniki iyie enkitoria e Nkai.” Ore ebaiki ina kata, metii oltung'ani onyaaka aitieu aikilikuana ae bae. Ore eiteng'enisho Yesu te nkaji e Nkai, nejo, “Kaji etiu pee ejo laiteng'enak loo nkitanapat Kristo eji olayioni le Daudi? Netejo Daudi openy, etuutaka Enkiyang'et Sinyati, nchere, ‘Etiaka Olaitoriani Olaitoriani lai, Totona te nkaina ai e tatene, o matipika lmang'ati linono abori nkejek inono.’ Eipoto Daudi openy ajo Olaitoriani; kaji eitoki aakunye enkerai enye?” Neinining ilo orora kitok ninye te ng'ida. Ore eiteng'enisho nejo, “Entodol ake ate too laiteng'enak loo nkitanapat, oonyor aaishopo lkilani adoru neyieu neirorokini too neemirishoreki, nenyor ilorikan le nkitoo too nkajijik e ntumo o wuejitin e nkitoo too mashoi, nedaare nkajijik oo nkolia neitaakuno eitoodor esayiare. Keyooki lelo aatum enkiguana kitok.” Neton ninye aishiaakinore eneitadoikini mpisai e nkaji e Nkai, nejur olorere epik mpisai ilo sanduku. Nepik iltung'ana kumok karsisi te nkumoi. Nelotu enkoliai aisinani, nepik elai are naanyokie naabaya esenti nabo. Neipotu Yesu ilooiteng'eni lenyena enetii, nejoki, “Esipa, ajoki intae, etipika ena oliai aisinani nkumok alang lelo kulikae pooki ootipika ilo sanduku. Amu etipika pooki te nkumoi naata; kake ore ninye to sina lenye netipika entoki duoo pooki naata, entoki duoo pooki naishuyie.” Ore ina kata epuku Yesu te nkaji e Nkai, nejoki obo loo looiteng'eni lenyena ninye, “Olaiteng'enani, ng'ura eneba kulo soito le nking'asia o kuna ajijik e nking'asia!” Nejoki Yesu ninye, “Idol kuna kituaak ajijik sapuki? Meing'uari tene osoit obo oiteleikino olikae lemesulakini enkop.” Ore eton to ldoinyo loo loirienito eipirare enkaji e Nkai, neikilikuan Petero o Yakobo o Andrea too nkurrat aajoki, “Toliki iyiook, kanu ebau kuna baa, naa kalo olmonekie oitodolu enkata nataanu kuna baa pee eitabari?” Neiteru Yesu ajoki, “Enteng'enuoto meitapong'oo intae oltung'ani. Kepuonu lkumok te nkarna ai, ejo, ‘Nanu ilo!’ Neitapong'oo lkumok. Naa te nining'ining'i njoreitin o lmarenke loo njoreitin, eming'aing'ae; amu meeta nchere pee metiu neijia; kake eton eng'or ina kiting'oto. Amu kedumakino olorere olikae orere, nedumakino enkitoria enkae kitoria; netumi olokirikiri le nkop too wuejitin kumok, netumi lameitin; naa ena enkiterata oo sinaitin. “Kake entodol ate. Amu keitarasakini intae nkiguanat; neari intae too nkajijik enye e ntumo; nintasheshe te dukuya lbalusini o laiguanak te nkaraki nanu, pee iakuku shakeni te dukuya ninche. Nemeeta nchere meng'asi aalikioo ele rorei supat too loreren pooki. Naa ore pee erikuni intae enkiguana aaitarasaa, eming'aing'ae te dukuya aajo aikijo aa; kake ina naishori intae te ina saa entejo, amu mme intae ooiro, kake Enkiyang'et Sinyati. Naa keitarasaa olalashe olalashe lenye metari metua, neitarasaa menye enkerai enye, nedumakino nkera iloomenye, neitarasaa metari metuata. Naa keibayuni intae iltung'ana pooki te nkaraki enkarna ai. Kake ore olong'iri metabaiki enkiting'oto naa keitajeuni. “Kake ore pee idolidolo ina taboi nayau emutata eitashe te wueji nemeishiaakino (tayiolo taa ake oloisoma ena), esikaki ildoinyo ilootii Yudea. Ore olotii shumata enkaji nemedou ajing aji ashoroo ae toki. “Ore olotii enkurma nemeshuko ang ajo ashoroo olkila lenye. Wooi nena tuaan o naaitanakisho te nena olong'i! Entasaisho pee mebau nena te nkata e nkirobi. Amu ore te nena olong'i kepuonu isinaitin leitu ae kata etumi anaa apa pee eitayu Enkai enkop o te nne, nemeitokini ae kata aatum intarasi. Te neme Olaitoriani oitodorropa nena olong'i, anaata meetae hoo oltung'ani obo opok. Kake ore te nkaraki ilgelunot lenyana ootegelua ninye, neitodorropa ninye nena olong'i. Ore ina kata te nejoki intae oltung'ani, ‘Ng'ura, nele Kristo otii ende!’ Anaa ‘Ng'ura, nelido otii ende!’ Emiruk. Keinyototo ilkristiano le lejare o loibonok le lejare neitoduaaya lmonek o mbaa e nking'asia, ejo maitapong'oi, te naa keidimayu, ebaiki lelo ootegeluaki. Kake entodol ate; aidipa atoliki intae mbaa pooki te dukuya. “Kake ore te nena olong'i, etulusoitie lelo sinaitin, nemisimisu enkolong, nemeitoki olapa awang'u nesulunye ilakir te keper, neikirikirieki engolon o loing'ang'e. Nedoluni ina kata Enkerai e Tung'ani elotu too nkatampo te ngolon sapuk o te nkitoo. Neirriwaa te ina kata ilmalaika, meiturrurro lelo gelunot lenyena aaitung'uaa ilubot pokira ong'uan, neitung'uaa ineeiting'ie enkop o neeiting'ie keper. “Enteng'ena ate te nkitanyaanyukoto o lng'aboli; laa ore ake pee enanau ilng'osil neiturumisho mbenek, niyiolouu aajo etinyikua olari. Neijia naa etiu, ti nidolidolo nena baa etabautua, niyiolouu aajo etataana ninye, auluo etii. Esipa ajoki intae, meishari ena ishoi eitu eitabari kuna baa pooki. Keishari shumata o enkop, kake meishari irorei laainei. “Kake ore ina olong o ina saa, meetae hoo obo oyiolo, aimeyiolo ninche lmalaika le shumata, nemeyiolo Enkerai e Tung'ani, Papa ake oyiolo. Entodol ate, enchololoto; amu miyiololo aajo kanu ebau ina kata. Etiu anaa oltung'ani oshomo elototo, ore elo ti ang, neing'ueiki ilaisiaayiak, neisho ake oltung'ani eramatare enye, neitanap olorrip kishomi meishololoyu. Enchololoto naa amu miyiololo aajo kanu elotu olopeny enkaji, anaa ae te nteipa, anaa ae te nasirie pee melotu ake neluamisho neinepu intae irurara. Naa ore ina najoki intae, neijia ajoki pooki: enchololoto.” Ore etaa nkolong'i are naatiooyo pee ebau Pasaka, nebau sii osirua loo Mukateni Nemeisuijieki. Neing'oru ilapolosak kituaak o laiteng'enak loo nkitanapat eneiko pee eibung to losek, aar metua; amu etejo ninche, “Neme taa te nkata o sirua, mepuku ake olong'oling'oli lo lorere.” Ore etii Betania enkaji e Simon le nkeeya oo lbolot, ore einosita endaa, nejing'u enkitok naata oltulet lo soit oji alabasta nebore eilata narropil naleng naji nardo, nagol oleng enkinyang'a, nedany ilo tulet nebukoki ina ilata elukunya enye. Kake etii ilootagorote nejokino, “Ainyoo pee eitarruoyioki ena ilata narropil aaiko inji? Amu anaata etimiraki ena ilata aainosie dinari iip uni, neishori laisinak.” Neing'unyung'unyaki ina kitok. Nejo Yesu, “Entapal, ainyoo pee intanyamalala? Nanu eitaasa embae naikishiaan oleng. Amu iatata laisinak anaake, naa te niyieuu, indimidimi ake aaitaasa ninche isupati; kake mikiaatata nanu anaake. Etaasa anaa enaidima; osesen lai eitera ael eton eitu enukari. Naa esipa, ajoki intae, ore pooki wueji nelikiorieki ele rorei supat te nkop pooki, neinosari ena nataasa edamunyeki ninye.” Nelo Yudas Iskariot laa obo le lelo tomon o aare enetii ilapolosak kituaak pee etum atakaldai ninye te ninche. Ore pee ening ninche neshipayu neitayu ole kutuk aajo keisho mpisai. Neing'oru ninye erishata nakaldarie ninye. Ore te nkolong e nkiterata e nkata oo Mukateni Nemeisuijieki, enkolong apa nayieng'i ilkuoo, oodamunyeki Pasaka, nejoki ilooiteng'eni lenyena ninye, “Kaji iyieu nikipuo aaitobir pee inyayie Pasaka?” Neirriwaa ilooiteng'eni lenyena aare, nejoki, “Enchom enda anasa, ore pee enang'are intae oltung'ani onapita emoti e nkare; erukurukore, ore ake enejing, entiaaki olopeny enkaji. ‘Etejo Olaiteng'enani, Koree enkaji ai oo lomon, nainosie Pasaka te nebo ilooiteng'eni laainei?’ Naa keitodol intae enkaji e shumata nalala naitobira; te ine entobiraki iyiook.” Nedumunye ilooiteng'eni lenyena nepuo ina anasa, neinepu etiu anaa enatiaakaki neitobiraki Pasaka. Ore pee eaku teipa nelotu Yesu o lekua tomon o aare. Ore etoni aainos endaa, nejo Yesu, “Esipa, ajoki intae, kaakaldaa obo linyi, oloinosita endaa te nebo nanu.” Neiteru ninche aaisinanuo, nejoki maa obo ninye, “Kae nanu sa?” Nejoki ninye ninche, “Obo doi le kulo tomon o aare, obo oitadoiki emukate engirra te nebo nanu. Amu elo ake Enkerai e Tung'ani aikunari anaa enatisirakaki ninye, kake ooi ilo tung'ani laa ninye okaldaa Enkerai e Tung'ani! Enaikash apa te neitu eini ilo tung'ani.” Ore einosita endaa, nedumu emukate nemayian, nebelibel, neisho ninche, nejo, “Enkoito; osesen lai ele.” Nedumu enkikompe, ore pee eishooyo enashe neisho ninche, neok pooki. Nejoki ninye ninche, “Osarge lai ele lo sotua, oibukori te nkaraki ilkumok. Esipa, ajoki intae, meekure aigil aok ae kata enoo lng'anayio loo sabibu o metabau ina olong naok eokoto ng'ejuk te nkitoria e Nkai.” Ore pee eidip aatarany osinkolio nepuku aapuo oldoinyo loo loirienito. Nejoki Yesu ninche, “Isikisiki ade pooki aailanyisho; amu etisiraki aajo, ‘Kaosh olchekut, neisardak intare!’ Kake ore pee aaitopiuni, naituruk te intae alo Galilaya.” Nejoki Petero, “Te naa keisik pooki, maaorore nanu.” Nejoki Yesu ninye, “Esipa aajoki iyie, ore ade te na kewarie, eton eitu eru olkuku katitin are nikimiki iyie katitin uni.” Neisimu ejo oleng, “Te naa kaye te nebo o iyie, maamiki nanu iyie.” Nejo ninche pooki neijia. Nepuo ewueji neji Getsemane; nejoki ilooiteng'eni lenyena, “Entaanyisho te ne, o maidipa enkomono.” Nerik Petero o Yakobo o Yohana, pee eiriamariyie, neiteru aiputukuny oleng nenyamalu. Nejoki ninche, “Keeta oltau lai osina kitok oba anaa keeya; entotoni tene enchololoto.” Neigut penyo, neirrabalakino enkop eomon inchere, te naa keidimayu metogiroi ina kata ninye. Nejo, “Abba, Papa, eidimayu imbaa pooki te iyie; tooruoki ena kikompe; kake mme enaa enayieu nanu, kake anaa eniyieu iyie.” Neshukunye neinepu eirurate, nejoki Petero, “Simon, iyie ilo oirura? Italaikine aishololoyu ena ninye nabo? Enchololoto naa entasaisho pee mijing'ijing'i atua ntemat; keyieu oltau, kake eshal osesen.” Neitoki ake alo neomon, neigil iladuoo ake rorei. Neitoki aitu neinepu eirurate, amu eiroshiutuo nkonyek oleng; nelau ninche enawaliki ninye. Neitu ene uni nejoki ninche, “Keton ake duoo irurara aayeng'iyeng'a? Eidipe; etabawua esaa; naitarasari Enkerai e Tung'ani aaitarasaki nkaik oo larruok. Enyeito, emaape; idol etabaua ilo laakaldaa.” Ore nabo kata, eton eirorita, nelotu Yudas, obo le lelo tomon o aare, neiriamunore ninye empuoto neeta lalema o siaren, eirriutua ilapolosak kituaak o lasirak o lpayiani. Eishoo taa duoo ilo otakaldayie olmonekie, ajoki, “Ore taa olang'utut ninye ilo; embung'a entorik entirrisha.” Ore pee elotu Yudas, nelo nabo kata enetii Yesu, nejoki, “Lo kitok!” Neng'utut. Nesaru aaibung ninye. Kake etushutua obo le lelo ooitashe te ine olalem, neosh osinka lo lapolosani kitok nedung'u enkiok. Nejoki Yesu ninche, “Ietuo itanapate anaa iloopuo aaibung olaisimani, aa nanu ipuonunu aaibung inapitata ilalema o siaren? Natii oshi ake enkaji e Nkai te nebo intae aiteng'enisho, neitu kimbung'ubung'u? Kake nchoo eitabari ilkigerot.” Neing'uaa ilooiteng'eni lenyena pooki ninye, neilanyisho. Neirukurukore oloti barnoti laa olkarasha ake errotianita; neibung ninche ninye. Kake eitiaa ninye ilo karasha neisik meishopo. Nerikoki ninche Yesu olapolosani kitok, netumo lapolosak pooki kituaak o lpayiani o lasirak. Nesujita Petero ninye elakuaniki, o metijing'a abaiki olgoriet lo lapolosani kitok; neton te nebo ilarripok aij enkima. Neing'oru lapolosak kituaak o ina kiguana pooki shakenisho naarie Yesu metua; kake etalaita. Amu eetuo lkumok ooiteenikitia ninye mbaa, kake eitu eipira enkiteenikinoto enye. Neinyototo kulikae aaiteeniki, ejo, “Kitoning'o iyiook ejo, ‘Kagil nanu ena aji e Nkai naitobiraki too nkaik, ore nkolong'i uni nashetu ae, neitu eitobiri too nkaik.’ ” Kake ore ake eyia, eitu eipira ina shakenisho enye. Neinyototo olapolosani kitok nelo aitashe te mpolos, neikilikuan Yesu ajoki, “Ai miata ewalata niwalu? Kaa shakenisho ena nikintang'orie kulo tung'ana?” Kake etigire neitu ewaliki. Neitoki ake olapolosani kitok aikilikuan ajoki. “Ira iyie Kristo, Oinoti lo Lomayiana?” Nejo Yesu, “Ee, ara, naa iyookiki aadol Enkerai e Tungani eton te nkaina e tatene o Lopeny Engolon, elotu too nkatampo e keper.” Nepolos olapolosani kitok ilkilani lenyena nejo, “Ainyoo kintoki aayieunye lchakenini? Itoning'okito ate emoroto namor Enkai. Ijojo aa?” Nedung'oki pooki enkiguana aajo keishiakino keeya. Neiteru kulikae aanotaki, neimulumul enkomom, nedam, nejoki, “Imbonisho!” Neitanang'are ilarripok ninye ioshot. Ore etii Petero olgoriet ti abori ine, nelotu enkaisiaayiani nabo o lapolosani kitok; ore pee edol Petero eijito enkima, neing'or ninye, nejo, “Iboitare sii oshi iyie Yesu le Nasaret.” Kake etomikio ejo, “Mayiolo nemaning'u enijoito.” Nepuku ninye alo kishomi. Nedol ina aisiaayiani, neitoki ake ajoki lelo ooitashe te ine, “Ore ele tung'ani, obo lenye.” Kake enyaaka ake amiki. Ore ake sii te nkiti rishata nejoki lelo ooitashe te nebo Petero, “Edede taa ninye ira iyie obo lenye; amu ira ole Galilaya.” Kake eiterua adek kewan nenya lmuma ejo. “Mayiolo nanu ele tung'ani liimakiki.” Ore nabo kata ake neru olkuku ene are. Nedamu Petero enatiaaka Yesu nchere, “Ore eton eitu eru olkuku katitin are, nikimiki iyie katitin uni.” Nedanya aishir. Ore ake pee ekenyu, neiguana ilapolosak kituaak, o lpayiani o lasirak o enkiguana pooki nalulung'a. Neen Yesu, nerik neitarasaki Pilato. Neikilikuan Pilato ajoki, “Ira doi iyie Olaiguanani loo Lyahudi?” Newaliki ajoki, “Iyie otejo neijia.” Neitang'or ilapolosak kituaak ninye too mbaa kumok. Neigil Pilato aikilikuan ninye ajoki, “Aimiata hoo embae niwalu? Nidol eneba mbaa nikintang'orie ninche?” Kake eitu hoo ewaliki Yesu, metaba anaa neing'asia Pilato. Naa ore apake te ilo sirua kelaaki apa ninye ninche oltung'ani obo oena, naa olotoomonutuo ake. Ore too ltung'ana oopidilare enkitoria ooena te korokoroni, neitayutuo loikop ina kata, netii oltung'ani oji Barabas. Nelotu ina siamo neiter aaikilikuan Pilato meitaasa enoshi ake naitaas. Newaliki ajoki, “Iyieuu nalaaki intae Olaiguanani loo Lyahudi?” Amu etayiolo Pilato ajo olom ake eitarasarie ilapolosak kituaak Yesu. Kake einuaakita ilapolosak kituaak olorere metejo pee elaakini ninche Barabas. Neitoki ake Pilato ajoki ninche, “Paa kaa naa aitaas ele tung'ani lijojo Olaiguanani loo Lyahudi?” Neilepilep aaigil aajo, “Tasho ninye.” Nejoki Pilato ninche, “Ainyoo, kaa torrono etaasa ninye?” Kake eilepilepa oleng aajo, “Tasho ninye.” Ore amu keyieu Pilato neitiship ina siamo, nelaaki Barabas neng'as aishooyo Yesu metooshi too nkeenta neitoki aitarasaa metashei. Neriku sikarini ninye atua enkaji e nkitoo naji praitorio; neipotu esikari e sirit nalulung'a. Neishopoki ninye olkila mugie neshetu olmarisian loo lkiku neishopoki Yesu elukunya. Neiter aairoroki aajoki, “Olele Olaiguanani loo Lyahudi!” Neigilie aaosh elukunya te ntiyani, nenotaki, negilaki kung aaitaakuno keserem. Ore pee eidip aatadalare, neoru ilo kila mugie neishopoki nkilani enyena. Nerik auluo pee epuo aashe. Nearaki olpayian obo oji Simon le Kirene, odoku ti ae kop, menye taa Aleksanta o Rufus, metanapa osalaba le Yesu. Nerik o meitabaiki Golgota eji ewueji e mborbor. Neisho enaisho natipikaki entoki naji manemane, kake etanya ninye eok. Neshe ninche ninye, neorikino lkilani lenyena, neoshie enkukuo pee etum oloya. Naa saa uni ina kata pee eshe ninche ninye. Ore embae naitanang'aki ninye neigero ajo, “Olaiguanani loo Lyahudi.” Netashoki lapurrok aare te nebo ninye, atii obo te tatene netii olikae te kedienye. Neitabari olkigeroto ojo, “Eikenayioki ninye te nebo ilarruok.” Ore lelo oopuaya oloim ine, nesurdaany ninye eing'unie lukuny, nejo, “Hoo! Eiyie doi ojo agil enkaji e Nkai nintoki ashetu too nkolong'i uni? Intajeu kewan tadou te ilo salaba!” Neiko sii ninche neijia ilapolosak kituaak aaikordod ejokino maate, “Kulikae ake eitajewuo; nemeidim aitajeu kewan. Nchoo naa duoo Kristo. Olaiguanani le Siraeli, edou to salaba matodol pee kiruk.” Ore lelo ootashoki te nebo ninye nemor sii ninche. Ore pee eipir enkolong, nerip enaimin enkop pooki o metabaiki saa naaudo. Ore pee eaku saa naaudo nebuak Yesu to ltoilo sapuk ajo, “Eloi, Eloi, lama sabaktani?” eji, “Enkai ai, Enkai ai, ainyoo pee kitung'uayie?” Ore pee ening kulikae ooitashe te ine nejo, “Ining, Eliya eipoto.” Nekuet obo, neiput osuguroi enaisho naisuisho naji siki, nepik oloomi neisho metooko, ejo, “Ntasho matodol te naa kelotu Eliya aitadou.” Nebuaku Yesu oleng, nedung'o tau. Neiperra aaku are olkarasha oor enkaji e Nkai, eiteru te shumata o meiting'o ti abori. Ore pee edol osajini oitashe aipirare ninye, ajo etaa etundung'e tau, nejo, “Edede Oinoti le Nkai ele tung'ani.” Netii sii nkituaak naaing'orita elakuaniki inaatii Mariamu Magdalene, o Mariamu ng'otonye Yakobo oti o Yosef, netii sii Salome, ninche napa, etii ninye Galilaya, naatusujutua neisiaai. Netii sii kulie kituaak kumok naairiamunore ninye epuonu Yerusalem. Ore pee eaku teipa, naa enkolong e Nkitobirakinoto, aa enoshi olong taa pee eyookini enkolong e nkiyeng'iyeng'ata. Neshirraki Yosef le Arimatea, obo loo looyanyiti le nkiguana, olaa keanyita ninye enkitoria e Nkai, nelo enetii Pilato neomonu osesen le Yesu. Neing'asia Pilato pee eji eidipa Yesu atua, ore pee eipotu osajini, neikilikuan te naa keidipa atua. Ore pee ening to sajini ajo etua, neisho Yosef ilo sesen. Neinyang'u ninye olkarasha le kitani, neirragie te nkurare nataguetuaki to soit, neibeleleng'oki osoit enkutuk e ina kurare. Netoduaa Mariamu Magdalene o Mariamu ng'otonye Yosef eneirragieki ninye. Ore pee eishari enkolong nayeng'iyeng'areki, neinyang'u Mariamu Magdalene o Mariamu ng'oto Yakobo, o Salome iila naarropil pee epuo aael ninye. Ore tadekenya oleng te nkolong e nkiterata e wiki, nepuonu enkurare eilepua enkolong, ejokino maate, “Ae ng'ae ade oret iyiook aibeleleng'oo, osoit te nkutuk e nkurare?” Nejo maing'ura, nedol aajo eidipaki aaibeleleng'oi osoit aaiwuang'ie amu ae sapuk apa oleng. Ore pee ejing enkurare, nedol oltung'ani lelerue eitashe te nkalo e tatene, neishopito olkila oibor; neing'asia ninche. Nejoki ilo ninche, “Eming'asia; Yesu le Nasaret ing'oruru, otashoki. Etopiwuo, metii ene; eng'ora enapa wueji neirragieki ninye. Kake enchom, entoliki ilooiteng'eni lenyena o Petero nchere, keituruk alo Galilaya; te ine ipuopuo aadol, anaa enatiaaka intae.” Nepuku aapuo neipirri aaing'uaa enkurare; amu einepua olokirikiri o enkiputukuny, neitu eliki likae tung'ani, amu etureishote. [Ore pee epiu Yesu enasirie te nkolong e nkiterata e wiki. Mariamu Magdalene etang'asa aipang'aki enapa nataararie loiriruani oopishana. Kake etolikio Petero too ndorropu, o lelo ooboitare nena naatolikioki ninche. Ore te siadi nena, neitanap Yesu makewan ninche mewaita enkilepunoto neya endoyioroto elikioroto sinyati e njeunoto nemeish nebik intarasi.] Nelo ninye aliki lelo apa ooiriamariyie ninye, eishirita ninche neilisho. Kake ore pee ening ninche aajo eishu netoduaa ninye, neitu sii eiruk. Ore te siadi nena, etawale ninye atum ae mua, neitalioo kewan te kulikae aare lenye epuo nkurman. Nerrinyo lelo aapuo aaliki lkulikae, kake eitu ninche eiruk. Ore te siadi nena, neipang'aki lelo tomon oobo etoni aadaa; neisikong ninche te nkaraki engolon oo lukuny enye o te nkaraki nemeeta enkirukoto amu eitu eiruk lelo ootoduaa ninye eidipa atopiu. Nejoki ninye ninche, “Enchom enkop pooki entoliki ltung'ana pooki ele rorei supat. Ore oloiruk neibatisae nejeu; ore olemeiruk nedung'okini enkiguana. Naa kulo lmonek ooiriamariyie lelo ooiruk te nkarna ai earaa loiriruani; neiro too nkutukie ng'ejuko. Nedumu lasuriaa, naa te neok entoki ake pooki nayaisho nemeeta enaiko ninche; neiteleiki ltamueyia nkaik, neishiu.” Neaku ore pee eidip Olaitoriani Yesu airorie ninche, neilepieki aaya shumata, neton te nkaina e tatene e Nkai. Nedumunye ninche aapuo aalikioo ilo rorei too wuejitin pooki, neasisho Olaitoriani te nebo ninche neitadedeyie ilo rorei too lmonek ooiriamariyie. Esai.] [ Ore te nkaraki natii lkumok ootonyuaakita aaiger imbaa naatupukutuo ti atua iyiook, neigero anaa enainosakaki iyiook lelo apa ootoduaa te nkiterunoto too nkonyek enye, oora ninche laisiaayiak ooinosu ele rorei le Nkai. Nadol sii nanu, Oloyanyiti Teofilo, ajo keishiaakino, natisipua mbaa pooki te rishata naado, naaigeroki mbaa naaitobirakino aitisipaki, pee itum atayiolo esipata e kuna baa nikinosakaki. Etii apa te nkata o laiguanani Herode, le Yudea, olapolosani oji Sakaria, lo lkekun le Abija; ore enkitok enye naa ene ntalipa e Aaron, neji enkarna enye Elisabet. Naa supati ninche pokira are ti alo Enkai, nesuj inkitanapat o nkitoriat pooki o Laitoriani, meitong'or. Nemeeta enkerai, amu koolupi Elisabet, naa moruak pokira are. Neaku ore eitayu Sakaria esiaai e mpolosare too nkatitin olkekun lenye te dukuya Enkai, anaa enaikununo olokishoni loo lapolosak, nedoiki enkukuo metaa ninye ojing enkaji o Laitoriani, ainok olasar le nkorropil. Neomon olorora te boo, ina kata einoki enkorropil. Neipang'aki olmalaika lo Laitoriani aitashe te nkalo e tatene olperere lo lasar le nkorropil. Ore pee edol Sakaria neirut, nejoki olmalaika, “Sakaria, miureishoyu, etoning'oki enkomono ino: naa aikiiki enkitok ino Elisabet enkayioni, naa eimpot enkarna enye ajo Yohana. Naa itum iyie enchipai o eng'ida to ltau lino, neng'ida ltung'ana kumok te inoto enye. Amu eaku ninye kitok te dukuya Olaitoriani, nemeok enaisho oo sabibu arashu enaisho napi, naa keigany Enkiyang'et Sinyati ebaiki etii enkoshoke e ng'otonye. Naa kerrinyoki Siraeli kumok Olaitoriani Enkai enye, neituruk dukuya ninye aaku olkilikuai lenye, te nkiyang'et o te ngolon e Eliya, eitaiki osotua enkerai o menye, neibelekeny iloogol onyek menoto eng'eno e lelo supati pee eitobiraki Olaitoriani iltung'ana ooishiaakino.” Nejoki Sakaria olmalaika, “Ainyoo ayiolounye ena bae? Nataa moruo, naa moruo sii ninye enkitok ai?” Newaliki olmalaika ajoki, “Ara nanu Gabriel, oitashe te dukuya Enkai; naairriwuaki maairorie naaitabaiki ele kilikuai supat. Ng'ura kionyo enkutuk mintoki airo, o metabau ina olong naibalayu nena, amu eitu iruk irorei laainei, kake eitabari ake te nkata naikenakaki.” Naa keanyita ake lekua tung'ana Sakaria neing'asia te nkimutioto naimutie ti atua Enkaji e Nkai. Ore pee epuku, neitu eidim airorie ninche, neyiolou ninche aajo eeta enatoduaa te neinokieki olasar. Neitodol too lmonek meidim airorie. Ore pee eidipayu ilkekuno le nkisiayiare enye, nelo ang. Ore pee elusoo nena olong'i, neiroshiu enkitok enye Elisabet, neisudoo kewan ilapaitin imiet, ejo, “Ena aaitaasa Olaitoriani te nkata natoduaa naaoru esulare te dukuya iltung'ana.” Ore to lapa le ile, neirriwaa Enkai olmalaika oji Gabriel, meshomo enkang e Galilaya naji Nasaret, enetii eselenkei natisira oltung'ani oji Yosef, lo lgilata le Daudi; naa keji ina selenkei Mariamu. Nejing'aki nejoki, “Takuenya na kirotet! Etii Olaitoriani te nebo iyie!” Neirut oleng te nkaraki lelo rorei, nejo to ltau, “Kaji eikununo ena kirorokino?” Nejoki olmalaika, “Mariamu, miureishoyu, itaa kirotet te Nkai. Naa ing'ura inutayu, niiu enkayioni, nimpot enkarna enye ajo Yesu. Naa keaku kitok neji Oinoti lo Lotii Shumata Aisul te pooki naa keisho Olaitoriani Enkai ninye olorika le nkitoo le Daudi menye lenye, neitore olgilata le Yakobo intarasi, nemeiting enkitoria enye.” Nejoki Mariamu ilo malaika, “Kaji eiko pee eaku ena nemayiolo olee?” Newaliki olmalaika ajoki, “Elotu Enkiyang'et Sinyati shumata iyie, nikintoip engolon o Lotii Shumata Aisul, ore te nkaraki ina, ore enkerai naini, neji sinyati, Enkerai e Nkai. Naa ing'ura, ore enkanashe ino Elisabet nenuta te moruo enye, naa keiu enkayioni, naa ole ile ele apa, te nutai enye, enatejoki oshi koolupi. Amu meetae embae nemeidimayu te Nkai.” Nejo Mariamu, “Kara nanu esinka o Laitoriani; metotiwuo te nanu anaa enitejo.” Nelo olmalaika aing'uaa ninye. Ore te nena olong'i, nedumunye Mariamu aisarrisar alo enkop oo oldoinyo, enkanasa e Yuda, nejing enkaji e Sakaria, neiroroki Elisabet. Ore ake pee ening Elisabet enkirorokino e Mariamu, neipid enkerai te nkoshoke; neigany Elisabet Enkiyang'et Sinyati, nebuak to ltoilo sapuk ajo, “Kitamayianaki iyie too nkituaak, nemayiani eishoi e ng'uset ino! Kaji eikununo ele rorei, eji ng'otonye Olaitoriani lai nalotu enatii? Amu ore ake pee aning too nkiyiaa aainei enkiroroto ino, neipid enkerai te nchipai te nkoshoke ai. Emayiana enairuko inchere keitabari inaatiaakaki ninye eing'uaa Olaitoriani.” Nejo Mariamu, “Alimu te nkorrok ai enkitoo o Laitoriani; neshipakino enkiyang'et ai Enkai Olaitajeunoni lai, amu etoduaa enchalan e rrindik enye. Amu ore ebaiki taata, kaajo ishoritin pooki namayiana; amu aaitaasa ologol isapuki, ai sinyati enkarna enye. Ore olng'ur lenye netii shumata lelo ooure ninye too ishoritin pooki. Etaasa ine ngolon te nkaina enye; neisardakie iloowuasa o nkiguanat oo ltauja lenye. Eitadowuo ilaitoriak too lorikan lenye le nkitoo, neilepie iloomeni. Eitaraposho iloata esumash too ntokitin sidain, nearaa ilkarsisi erook. Etasarua Israel osinka lenye, etadamua olng'ur lenye, anaa enatiaaka iloo papa, Abraham o eishoi enye intarasi.” Neton Mariamu aboitare ninye ilapaitin oobaya okuni, nerrinyo alo ang. Nebau enkata neisho Elisabet, neiu enkayioni. Nening elatia enye, o lgilata lenye nchere, eing'urrie Olaitoriani, neshipayu te nebo ninye. Ore te nkolong e isiet, nepuonu aa murat enkerai, neyieu nedung'oki enkarna aaipotie Sakaria menye lenye. Nejoki, ng'otonye, “Mme neijia, keipoti aajo, Yohana.” Nejokini, “Meetae oltung'ani lo lmarei linyi oji neijia.” Neikilikuan menye too lmonek enayieu neji. Neipotu osoit dapash neiger ajo, “Keji enkarna Yohana!” Neingasia pooki. Nebolo Sakaria enkutuk ina kata ake, nelaa olng'ejep lenye, neiro, aisis Enkai. Neureishoyu pooki oomanya ina latia, nelikiori nena baa pooki to ldoinyo le Yudea. Ore lootoning'o pooki neiteng'el too ltauja lenye ejo, “Keaku pasa ena kerai keniaa pukunoto?” Amu eiriamunore enkaina e Nkai ninye. Neiput Sakaria, menye lenye Enkiyang'et Sinyati neibonisho ajo, “Meisisi Olaitoriani Enkai e Siraeli, amu etabaikia nekordu ltung'ana lenyena,” eishorua Olaitajeunoni Magilani to lgilata lo sinka lenye Daudi, anaa enatejo apake too nkirorot oo sinyat, enoo loibonok le Nkai liapa moitie pee kijeu too lmang'ati lang, o too nkaik e lelo pooki ooiba iyiook; neitabaya olng'ur oisiligie iloo papa lang, nedamu osotua lenye sinyati, olmumai oinosaka papa lang Abraham, nchere, ore pee eitajeu iyiook, too nkaik oo lmang'ati lang, nikisiaai ninye, te sinyatisho o te supatisho, too nkolong'i pooki e nkishui ang. Ore sii iyie na kerai, aikiji oloiboni lo Lotii Shumata Aisul te pooki. Amu inturuk te dukuya Olaitoriani, aitobiraki nkoitoi enyena. Aliki ltung'ana lenyena enjeunoto, te mpalakinoto oo ng'ok enye, te nkaraki enanai o lng'ur le Nkai ang, laa te ninye ekenyiki iyiook enjeunoto eing'uaa shumata, eitawang'aki ilootoni te naimin, o lootoni to loip le nkeeya, pee eutaki nkejek ang inkoitoi o sotua. Nebulu enkerai, neponari engolon e nkiyang'et, nebik ti ong'ata o metabau enkolong naipang'akinyeki olorere le Israel. Ore te nena olong'i nepuku enkitanapata naing'uaa olaiguanani kitok Kaisari Augustus inchere kesiri iltung'ana pooki inkarn. Naa ena enkigerore oo nkarn e nkiterata naigeroki te nkata e Kirinius olbalusui le Siria. Nelo ake oltung'ani enkang enye meigeri. Nelo sii Yosef te Galilaya aing'uaa enkang e Nasaret, ailep alo enkang e Daudi naji Betlehem amu ole nkaji e Daudi te ntalipa, pee eigeri te nebo enkitok enye, Mariamu, natasayia aa entuaa. Ore ebikito te ine, nebaya inkolong'i pee eisho. Neiu enkerai enye kikau, neishopoki nkilani e keraisho, neirragie ninye te mpeut oo nkishu, amu eitu etum enejing te nkaji oo lomon. Naa ore te ina kop etii ilchekuti ootoni aarrip intare kewarie. Neipang'aki olmalaika lo Laitoriani, neimerlelu esikar o Laitoriani too nkaloli pooki, neureishoyu ninche oleng. Nejoki olmalaika ninche, “Emiureishoyu amu ilomon supati le ng'ida kitok ayau naaku too ltung'ana pooki, amu ore te nkang e Daudi, etoiwuoki Olaitajeunoni, te nkaraki intae, laa ninye Kristo, Olaitoriani. Naa ele olmonekie te intae: itumutumu elooyo naishopokino nkilani e keraisho, neirragita te mpeut oo nkishu.” Neboitare ilo malaika, olorora kitok le shumata oisis Enkai ejo, “Meisisi Enkai te shumata naisul te pooki, neaku osotua te nkop, too ltung'ana pooki laa ninche eshipakino ninye!” Ore pee epuo lelo malaika shumata aaing'uaa ninche, nejokino ilchekuti, “Enyeito emaape aabaya Betlehem, aadol ena bae nataase naitayiolo iyiook Olaitoriani.” Neisarrisar aapuo neinepu Mariamu o Yosef, neirrag elooyo te mpeut. Ore pee edol neinosu ninche lomon ootiaakaki te nkaraki ina looyo. Ore lelo pooki ootoning'o nena naatolimutuo ilchekuti neing'asia. Kake eiteng'ela Mariamu nena baa pooki edamu to ltau lenye. Neshuko lelo shekuti eisho Enkai enkitoo neisis too mbaa pooki naatoning'o o naatoduaa anaa enatiaakaki ninche. Ore pee eaku enkiting'oto e nkolong e isiet, nemurati neipoti aajo Yesu, ina arna apa natudung'oko olmalaika eton eitu enutaini. Ore pee ebaya nkolong'i e nkata e nkipooto anaa enatiu too nkitanapat e Musa, neriku ninye Yerusalem pee eitarasakini Olaitoriani, anaa enatisiraki too nkitanapat o Laitoriani nchere, “Ore pooki lee kikau pooki, neipoti aajo sinyati to Laitoriani.” Ejo sii pee eishooyo olasar anaa enajo nkitanapat o Laitoriani, aa, “Nturkuluni are, aashu nkera are e nturkulu.” Naa ng'ura etii apa Yerusalem oltung'ani oji Simeon, naa oltung'ani supat nenyor Enkai, oanyita ninye meitajeu Enkai Siraeli, netii Enkiyang'et Sinyati atua ninye. Neitayiolo Enkiyang'et Sinyati ninye nchere meye eitu edol Kristo lo Laitoriani. Nelotu enkaji e Nkai, erikito Enkiyang'et Sinyati ninye: ore pee eyaki intoiwuo enkerai Yesu meitaasa anaa entipat oo nkitanapat e Musa, neng'amu ninye Yesu too nkaik enyena, neisis Enkai nejo, “Olaitoriani, inchoo taata osinka lino meshomo te seriani, anaa enitejo. Amu etoduaa nkonyek aainei enjeunoto ino nintobira meibalayu too loreren pooki: ewang'an naboloki loreren enkoitoi ino, neaku errepet oo Siraeli linono.” Neingasia menye o ng'otonye te nena naairoroki te nkaraki ninye. Nemayian Simeon ninche nejoki Mariamu, ng'otonye, “Ng'ura, eitaaki ena kerai olobatatare naa olodumunore sii ilkumok ootii Siraeli. Neaku olmonekie oirori aasukeny, naa aikiim olalem oltau lino iyie, pee eibalunyeki indamunot oo ltauja kumok.” Netii enkoiboni naji Ana ene Fanuel, o losho le Asheri: naa entasat moruo, naa larin oopishana ake etotona eeta, olmoruo. Na enkoliai oo larin ntomoni isiet o oong'uan. Nemepuku ti atua enkaji e Nkai, neen kewan aitupukoo. Nelotu ninye te ina kata, neisho Enkai enashe, neimaki ina kerai aliki lelo pooki ooanyita metalaku Enkai Yerusalem. Ore pee eidip aaitabai inaaitanapishoteki pooki, too nkitanapat o Laitoriani, nerrinyo aapuo Galilaya, enkang enye te Nasaret. Nebulu ina kerai negolu, neiput eng'eno nagut, netii enkirotetisho e Nkai shumata ninye. Nepuo apake ntoiwuo enyena Yerusalem to lari ake pooki pee emanu osirua le Pasaka. Ore pee eaku oloo larin tomon o aare neilep aapuo anaa entipat e ilo sirua. Ore pee ebaya nkolong'i naashukore, neing'uari enkayioni Yesu te Yerusalem. Nemeiyiolo intoiwuo enyena. Kake ore ejo ninche etii ake atua encholiek enye, nepuo endama nalulung'a, neing'oru te lelo lo lgilata lenye, o too le latia enye. Ore pee elau ninye, neshuko Yerusalem aapuo aaing'oru. Ore etulusoitie nkolong'i uni, netum te nkaji e Nkai, eton te rishata ilaiteng'enak, einining'ito neikilikuanishore. Ore ilooinining'ito pooki, neing'asia te ng'eno enye o too naawalu. Ore pee edol intoiwuo neing'asia. Nejoki ng'otonye, “Na kerai; aainyo pee inkuna iyiook inji? King'orutua iyie, nanu o papaai lino te nkirutoto o to sina.” Nejoki, “Ainyoo pee king'oruru? Aimiyiololo aajo eishiaakino tenatii enkaji e Papa?” Neitu ejing'aa ele rorei otiaaka. Nedou Yesu airiamunore ninche nebau Nazaret, nening ninye ninche. Neshum ng'otonye nena baa pooki to ltau lenye. Neponari Yesu eng'eno, nebulu, neitiship Enkai o ltung'ana. Ore to lari le tomon o miet le nkitoria o laiguanani kitok oji Tiberia Kaisaria, aa Pontio Pilato olbalusui le Yudea, naa Herode olkitok le Galilaya, naa Filipo olalashe lenye olkitok le Iturea o Trikoniti, naa Lisenias olkitok le Abilene, naa Annas o Kaiafas ilapolosak kituaak, nebaiki ororei le Nkai Yohana olayioni le Sakaria ti ong'ata. Nelo ina kop pooki oo mbat o lkeju le Yordan elikioo enkibatisa naitoduaaya enkirridunoto nayau e mpalakinoto oo ng'ok, anaa enasira te mbuku e Isaya oloiboni le Nkai ajo, “Oltoilo lo lobuakita ti ong'ata, entobiraki Olaitoriani enkoitoi, entorioi irrekiei lenyena nenuki nong'ot pooki, ore pooki doinyo o lkiushin neitodorropi; ore ineekordilo nererei, ore nkoitoi naasur neisiashayieki; pee edol iltung'ana pooki enjeunoto e Nkai.” Nejoki Yohana lelo ororani ooetuo enetii ninye meibatisa, “Na ishoi oo lasuriaa! Ae ng'ae naikoo intae eng'atai engoro nalotu? Entadedeyie naa enkirridunoto inyi too lng'anayio lenyena; nimintokiki ake ajo, ‘Kiata Abraham aa papa lang.’ Ajoki intae, keidim Enkai ainyeyieki Abraham nkera te kulo soito. Eidipaki taata aaiteleiki entolu ntonat oo lkeek; ore olchani ake pooki lemeiu lng'anayio sidain nedung'i aauroo nenang'akini enkima.” Neikilikuan lelo ororani ninye aajoki, “Kaa naa kiaas?” Newaliki ajoki, “Ore oloata nkilani are, inchoo eisho nabo ilo lemeeta, ore oloata endaa neng'arie olemeeta.” Nepuonu sii ninche iloosotu kodi meibatisai, neikilikuan aajoki, “Lo aiteng'enani, kaa kiaas iyiook?” Nejoki ninche, “Emintulus aaoru ltung'ana enalang ina naitanapaki intae.” Neikilikuan sii ninche sikarini aajoki, “Oo iyiook, kaa kiaas?” Nejoki ninche, “Emisim oltung'ani anaa nteenikiki elejare, ninchosho sii ebaiki intae olekoisiayio linyi.” Ore elimana ltung'ana eanyita enaaku, neitiko ltauja le pooki te nkaraki Yohana, emusumusu aajo ebaiki naa Kristo ninye, ana mme ninye, newaliki Yohana ninche pooki ajoki, “Esipa aibatisa nanu intae te nkare, kake kelotu ologol te nanu lemeishiaakino nalak enkeene e namuke enye. Ilo oibatisa intae te Nkiyang'et Sinyati o te nkima; neibung'ita ninye esilet enye te nkaina pee eor asip katukul olkurroto lenye oidong'ishoreki, nesotoki enkano empeche; kake ore suut, nepej te nkima nemearayu ntarasi.” Ore te kulie kumok nereiki aikok olorere eliki lomon supati. Kake ore Herode ilo balusui pee eisikong ninye te nkaraki nayama Herodias enkitok o lalashe lenye, o sii te nkaraki kulie bususi naataasa Herode, neponiki ena nena pooki neikenoo Yohana te korokoroni. Ore eibatisaki iltung'ana pooki neidipaki aaibatisa sii ninye Yesu, eomonito Enkai nebolo shumata, nedou Enkiyang'et Sinyati etiu anaa enturkulu adoiki ninye. Nelotu oltoilo oing'uaa shumata ojo, “Ira iyie Oinoti lai lanyor, kaashipakino iyie.” Ore pee eiteru Yesu enkisiaayiare enye naa oloo larin oobaya tomoni uni. Ore ninye anaa enajo iltung'ana, olayioni le Daudi, olayioni le Heli, olayioni le Matat, olayioni le Lawi, olayioni le Matat, olayioni le Lawi, olayioni le Melki, olayioni le Yanai, olayioni le Yosef, olayioni le Matatias, olayioni le Amos, olayioni le Nahum, olayioni le Elsi, olayioni le Nagai, olayioni le Maat, olayioni le Matatias, olayioni le Semein, olayioni le Yosek, olayioni le Yuda, olayioni le Yonan, olayioni le Resa, olayioni le Serubabel, olayioni le Shealtiel, olayioni le Neri, olayioni le Melki, olayioni le Adi, olayioni le Kosam, olayioni le Elmadam, olayioni le Er, olayioni le Yoshua, olayioni le Eliesa, olayioni le Yorim, olayioni le Matar, olayioni le Lawi, olayioni le Simeon, olayioni le Yuda, olayioni le Yosef, olayioni le Yonam, olayioni le Eliakim, olayioni le Melea, olayioni le Mena, olayioni le Matata, olayioni le Natan, olayioni le Daudi, olayioni le Obed, olayioni le Boas, olayioni le Sala, olayioni le Nashon, olayioni le Aminadab, olayioni le Admin, olayioni le Arni, olayioni le Hesron, olayioni le Peres, olayioni le Yuda, olayioni le Yakobo, olayioni le Isaak, olayioni le Abraham, olayioni le Tera, olayioni le Nahor, olayioni le Serug, olayioni le Reu, olayioni le Peleg, olayioni le Eber, olayioni le Shela, olayioni le Kainan, olayioni le Alfasad, olayioni le Shem, olayioni le Noa, olayioni le Lamek, olayioni le Metusela, olayioni le Enok, olayioni le Yared, olayioni le Mahalalel, olayioni le Kainan, olayioni le Enos, olayioni le Seti, olayioni le Adam, olayioni le Nkai. Neiganya Yesu Enkiyang'et Sinyati apa pee errinyunye eing'uaa olkeju le Yordan, Nerik Enkiyang'et ninye ong'ata, nkolong'i artam, metetema shetani. Neitu enya toki te nena olong'i, ore pee eitabaya netir esumash. Nejoki shetani ninye, “Te naa ira iyie Enkerai e Nkai, tiaaki ele soit metaa endaa.” Newaliki Yesu ajoki, “Etisiraki aajo, ‘Mme endaa ake eishuyie oltung'ani.’ ” Neilepie shetani Yesu enchumata o ldoinyo oodo, neitodol enkitoo pooki e nkop, te nkiti kata, nejoki Shetani ninye, “Aaisho ntoria kuna pooki, o enkitoo enye, pee aisho pooki, o enkitoo enye, pee aisho pooki layieu naisho; metaa te nikiserem iyie nanu neaku nkuninono pooki.” Newaliki Yesu ajoki ninye, “Etisiraki aajo, ‘Olaitoriani Enkai ino ake iserem, naa ninye ake isiaai.’ ” Nerik Yerusalem neitasheyie te ntopij e enkaji e Nkai, nejoki, “Te naa ira Enkerai e Nkai, tusulai kewan, amu etisiraki aajo, ‘Kaikirriwaki lmalaika, mikitorripo,’ netejoki sii, ‘Niking'amaa too nkaik enye, pee mikinkob osoit enkeju ino.’ ” Newaliki Yesu ajoki, “Etejoki, ‘Mitem iyie Olaitoriani Enkai ino.’ ” Ore pee emitunye shetani too ntemat enyena pooki nelo aing'uaa eanyu ai rishata enye. Nerrinyo Yesu Galilaya ebore engolon e Nkiyang'et Sinyati, neibulaa enkisisa, nkuapi naamanita. Neiteng'enisho too nkajijik enye e ntumo nerrep iltung'ana pooki ninye. Neito ninye Nasaret ine netubulaka, nejing enkaji e ntumo te nkolong e nkiyeng'iyeng'ata, anaa enaiko apake, neitashe aisoma. Neishori embuku o loiboni le Nkai Isaya. Nebol ina buku netum ewueji netisiraki aajo, “Etii Enkiyang'et o Laitoriani atua nanu, amu aatubukoko ninye e ilata, aput, naairriwua matoliki laisinak ororei supat, nalaku te sinkaisho ilooena, naliki lmodook emboloto oo nkonyek enye, nalaku aisho epuo, lelo ooitorogonyaki, nalimu olari osarunye Enkai ltung'ana lenyena.” Neiken embuku, neshukoki olashumani neton; neibelekenya lelo pooki ootoni te nkaji e ntumo aaing'or ninye. Neiter ajoki ninche, “Eitabayioki taata kulo sirat ining'itoto too nkiyiaa inyi.” Neimaki pooki ninye aarrep eing'asia too rorei le mpiris ooimu enkutuk enye. Nejo, “Ae mme olayioni le Yosef doi ele?” Nejoki ninye ninche, “Meeta nchere pee eitu kiyookiki aadung'ie rashe aajoki, ‘Olabaani tabaa kewan,’ nijojo, ‘Taasa sii iyie te ine nitubulaka, mbaa nijo nena nikitoning'o nchere itaasa te Kapernaum.’ ” Nejo, “Esipa ajoki intae, meetae oloiboni le Nkai oyanyiti te murua nabulaki. Esipa nchere keetae apa nkolia kumok ti atua Siraeli te nkata o loiboni Eliya, pee elai enchan too larin okuni o lapaitin ile, neibulu olameyu ina kop pooki; kake ore eyia, eitu eirriwakini Eliya hoo nabo e nena, enkoliai e Sarepta ake eirriwakaki te nkop e Sidon. Kumok sii iltung'ana le nkeeya oo lbolot oatae te Siraeli te nkata o loiboni le Nkai Elisha, nemeetae hoo likae obo oitukuoki, leme Naaman ake le Siria.” Ore pee ening nena baa pooki etoni ti atua enkaji e ntumo neiput engoro. Neinyototo, nearaa auluo e ina anasa neriku embata e marti namanya ina anasa, ejo pee esulaa te ina marti; kake etapaashare apolos atua ninche nelo ninye. Nedou alotu Kapernaum, aa enkanasa e Galilaya, neiteng'en ninche te nkolong e nkiyeng'iyeng'ata. Neing'asia te nkiteng'enare enye, amu keiro anaa oloata enkitoria. Netii atua ina aji e ntumo oltung'ani oata oloirirua oiduruk. Nebuak aishir to ltoilo sapuk ejo, “Ooi Yesu le Nasaret, ainyoo iatakinore iyiook? Iyewuo aidaikie iyiook? Kaayiolo ajo ira ng'ae: ira ilo obo Sinyati le Nkai.” Neisikong Yesu nejoki, “Tigirayu! Tupuku tung'uai ninye.” Nebatat ilo oirirua torrono te dukuya ninye nepuku aing'uaa meeta enaitaasa ninye. Neing'asia pooki nejokino, “Kaa kiroroto ena nairo? Aaku kearaa te nkitoria o te ngolon iloiriruani ooiduruk, nepuku ninche.” Neibulu enkisisa enye pooki wueji te nena murua naamanita. Ore pee eing'uaa enkaji e ntumo nejing enkaji e Simon. Neitirrishaka olkirobi enkaputani e Simon, neikilikuani enkaraki ninye. Neitashe arumaki ninye kop nearaa ilo kirobi, nepuku olkirobi aing'uaa. Neinyototo nabo kata aisiaai ninche. Ore edoyio enkolong, neyau lelo pooki ooata ltamueyia loo mpukunot kumok aayaki ninye meishiunye. Neiteleiki ake pooki tung'ani nkaik neishiunye ninche. Nepuku sii iloiriruani ooiduruk kumok, aaing'uaa ltung'ana ebuaaya aajo, “Ira iyie Enkerai e Nkai.” Neing'ode amitiki eiro, amu keyiolo ninche aajo Kristo ninye. Ore pee ekenyu nelo ewueji neliyio; kake eing'oru olorere ninye. Nepuonu enetii, nejo maiboo neing'uaa ninche; kake etiaaka ninche, “Kalo ake pee aliki sii ninche kulie ang'itie kulo omon supati le nkitoria e Nkai. Ina pee aairriwuaki.” Nelikioo lelo omon too nkajijik e ntumo e Yudea. Ore eiding'akino ltung'ana aamanita einining'u lomon le Nkai, neitashe ninye te mbata e naiposha e Genesaret, nedol impeuti are eirrag te mbata e naiposha. Etupukutuo larreshok loo sinkir aapuo aaisuj irresheta lenye. Nejing atua empeut nabo, naa ene Simon nejoki meturrumoi peno aitalam enkop natoyio. Neton aiteng'en olorere eton ninye ti atua empeut. Ore pee eidip airoro nejoki Simon, “Terewa enegut nintadoikiki rresheta inyi enaiposha aaibung isinkir.” Nejoki Simon, “Lo Kitok, kitaasishote enkewarie nalulung'a neitu kitum toki, kake ore amu itejo, kaitadoyio resheta.” Ore pee eiko neijia neibung olkito turrur loo sinkir neiteru aang'era resheta lenye. Neyuku ilenchuluek enye ootii enkae peut meetu aaret. Nepuonu, neiput impeuti pokira are, o metaa keimis. Ore pee edol Simon Petero ina nebatata too nkejek e Yesu, ejoki, “Olaitoriani, tung'uayioki nanu amu, kara oltung'ani loo ng'ok.” Amu eing'asie ninye o lelo ooboitare, te nkumoi oo sinkir ooibung'a; eing'asiate sii ninche layiok le Sebedayo, aa Yakobo o Yohana, oora le ncholiek e Simon, Nejoki Yesu Simon, “Miureishoyu; ore ebaiki taata, iltung'ana intorioo aibung.” Neyau mpeuti enkop natoyio, neing'uaa pooki toki nesuj ninye. Ore etii ninye ae ang, ng'ura, netii oltung'ani oata enkeeya oo lbolot, ore pee edol ninye Yesu, nebatata te nkomom, neserem ajoki, “Olaitoriani, te niyieu eikindim aishiunye atisika.” Neitorioo enkaina enye neiseyie nejoki, “Ekayieu, ninchiu tisikayu.” Neishiu asika nabo kata ina keeya oo lbolot. Neitanap Yesu ninye pee meliki likae tung'ani; nejoki, “Kake inyo, intoduaai kewan mikitisipu olapolosani ninchooyo olasar le nkishiunoto naaitanapishe Musa pee eitadedeyie ina sikata ino te ninche.” Kake etoponari lomon lenyena aaibulu enkop pooki, nepuonu siamon kumok enetii aainining neishiunye mueyiaritin enye pooki. Kake kekepari ake nelo ong'ata, aomon Enkai openy. Ore nabo olong eiteng'enisho, netii ine ilfarisayo olasirak ooing'uaa nkang'itie pooki e Galilaya, o Yudea o Yerusalem. Netii engolon e Nkai atua Yesu pee etum aishiunye olorere. Nepuonu ina kata ltung'ana oonapita te rruat, oltung'ani maima, netem aajo mayaki Yesu ti atua aji. Ore te nkaraki enkiding'a o lorere nelaikino aayaki. Nedumu aailepakinye shumata enkaji, nebol aaitayu elusie, neitadou te rruat aaitadoiki nkejek e Yesu te mpolos o lorere. Ore pee edol Yesu enkirukoto naata ninche, nejoki ilo tung'ani, “Olchore, kitapalakaki ng'ok inono.” Neiteru lasirak o Lfarisayo aaishankarra ejo, “Ae ng'ae ele oiro amor Enkai? Ai mme Nkai ake naidim atapalaki oltung'ani ng'ok?” Nedol Yesu eishankarra newaliki ajoki, “Ainyoo pee inchankarrarra maate? Kaa nalelek, te najo, ‘Kitapalakaki ng'ok inono,’ ana te najo, ‘Inyo shomo?’ Kake ore pee iyiolouu aajo keeta Enkerai e Tung'ani enkitoria te nkop napalakinye ng'ok,” nejoki ilo tung'ani maima, “Aajoki inyo tudumu erruat ino shomo ang.” Neinyototo nabo kata te dukuya ninche, nedumu enaduoo rruat napetita, nelo ang eisisita Enkai. Neing'asia pooki nesis Enkai, neureishoyu, nejo, “Kitoduaa ake taata mbaa e nking'asia!” Ore pee eidipayu nena nelo Yesu, nedol oltung'ani osotu kodi oji Lawi, eton te wueji nesotunye kodi; nejoki, “Tusujuki nanu.” Neing'uaa pooki toki, neinyototo asuj Yesu. Neitoomon Lawi ninye to sirua kitok netii esiamo kitok oo loosotu kodi o kulikae ake oodaa te nebo ninche. Neing'unyung'unyaki Lfarisayo o lasirak ilooiteng'eni lenyena ajo, “Oo pee ing'arierie endaa niokishosho te nebo iloosotu kodi o laing'okok?” Newaliki Yesu ajoki, “Imeyieu iltung'ana biyot olabaani, iloomuoi ooyieu. Eitu alotu aipot lelo supati kake ilaing'okok meetu aairridu.” Nejoki taa ninche ninye, “Anaa eijo keen ate aapukoo oshi ilooiteng'eni le Yohana neomon Enkai naleng sii, naa neijia eiko ilooiteng'eni loo Lfarisayo, nedaa ninche linono neokisho?” Nejoki Yesu ninche, “Indimidimi aaitupukoi ilomon lo loyamisho eton eboitare oloyamisho? Kake keyooki aapuonu nkolong'i naayae oloyamisho aaitung'uaa, nepukoo taa ninche te nena olong'i.” Neitoki aliki enkitanyaanyukoto nejoki, “Meetae oltung'ani oboru erashe to lkila ng'ejuk aripaki olkila musana, pee meinyal ilo ng'ejuk elde musana. Meetae sii olobukoki enaisho oo sabibu ng'ejuk ilbenia musan pee medany ina aisho oo sabibu lelo benia musan, neibukori ninye neidaaya ilbenia. Kake ilbenia ng'ejuko epiki enaisho ng'ejuk. Meetae sii oltung'ani otooko enaisho nao oitoki ayieu enajon, amu kejo, ‘Enao esidai.’ ” Neaku ore te nkolong e sabato, neim Yesu atua nkurman e nkano. Negilu ilooiteng'eni lenyena lukuny e nkano nepupu too nkaik aanya lanterera. Nejoki lkulikae loo Lfarisayo, “Kaji etiu pee iasiasa enemeishoruno too nkitanapat ang te nkolong e sabato?” Newaliki Yesu ajoki, “Keitu ai kata isomama enataasa Daudi o looisiritore pee etir esumash? Ajo etijing'a enkaji e Nkai, neitayu emukate e nkitoduaaroto, nenya, neng'arie sii lelo ooisiritore. Neibala nchere meishoruno too nkitanapat meinosa likae tung'ani ina mukate leme lapolosak?” Neitoki ajoki, “Olkitok le nkolong e sabato doi Enkerai e Tung'ani.” Ore ti ae olong e sabato nejing Yesu enkaji e ntumo aiteng'enisho. Netii oltung'ani ine tasat enkaina e tatene. Neing'oru ake kulikae asirak o Lfarisayo embae naitang'orie Yesu aajo eitarruoyie; nejur pee edol te naa keeta oltung'ani oishiunye te nkolong e sabato. Kake etayiolo Yesu ndamunot enye nejoki ilo tung'ani tasat o aina, “Inyo wou dukuya tene.” Neinyototo ilo tung'ani neitashe te ine. Nejoki taa Yesu ninche, “Aikilikuan intae ena? Kaa naishoruno too nkitanapat mataas te nkolong e sabato? Keishoruno mataar ana mataret?” Nekurraki pooki inkonyek aing'or, neitoki ajoki ilo tung'ani, “Intorioi enkaina ino!” Neiko neijia, neishiu enkaina enye. Kake eiputa ninche engoro napi neiguana maate eing'oru enaitaas Yesu. Ore te nena olong'i, neilep alo oldoinyo aomon, neton enkewarie pooki eomonito Enkai. Ore pee ekenyu neipot ilooteng'eni lenyena negelu tomon o aare ti atua ninche nejo ninche lkipaareta. Naa Simon oipoto ajo Petero o Anterea olalashe lenye; o Yakobo o Yohana, o Filipo o Bartolomayo; Matayo o Tomas, Yakobo ole Alfayo o Simon oji olkirowuai; Yudas olayioni le Yakobo o Yuda Iskariot laa ninye otaa olakaldoroni. Neiriamunore adou to ldoinyo nelotu enkisiashata. Netii ine ilooiteng'eni lenyena kumok o siamon naaing'uaa Yudea o Yerusalem o lomanaa le Turo o Sidon; laa ninye oetuo aainining ninye nejo sii pee eishiunye nkeyaitin enye; ore lelo ooitanyamalita loiriruani ooiduruk, neishiunye. Neyietu pooki ng'ae te ina siamo neiseyie ninye amu, kepuku engolon ti atua ninye neishiunye pooki. Neraposhu ninye nkonyek aing'or ilooiteng'eni lenyena nejo, “Imayianana intae ilaisinak amu eninyi enkitoria e Nkai. “Imayianana ilooata taata esumash; amu keitaraposhi intae. “Imayianana ilooishir taata amu iyookiki aakueni. “Imayianana te neibayu intae iltung'ana, nekepaa intae nemor, nemit eipoti nkarn inyi ejo torrok, te nkaraki Enkerai e Tung'ani. Ore ina olong entishipata niranyiranya aaipidipid te ng'ida, amu kesipa ai kitok enkishorunoto naishori intae te shumata; amu ina apa eitaasa iloo papaai linyi iloibonok li apa. “Kake woi ee ekake ayia intae ilkarsisi taata; indipa intae aanoto olkar linyi. “Ee kake ayia intae ilooraposho taata; keyooki atir intae esumash. “Woi ake intae ilookueni taata; iyookiki ake aaishir. “Ee kake ayia te neimaki intae ltung'ana aaisis; neijia taa apake eikuna iloo papaai linyi aaisis iloibonok le lejare. “Kake ajoki intae kulo laaning'ito entonyor ilmang'ati linyi; entaasa isupati ilooiba intae; entamayian iloodek intae; ore iloosukeny intae neinyial, entoomonoki. Ore pee kiosh oltung'ani eseder nyaaki inchoo sii enkae; ore pee eya oltung'ani engoti ino; inchoo sii enchati meewa. Inchoo pooki likiomon; ore pee eya oltung'ani enino, mimpotu aoru. Intaasa ilkulikae tung'ana anaa eniyieu nikintaas ninche iyie. “Amaa te naa iloonyor intae ake inyorrinyorro, kaji eret ina te intae? Kenyor sii ninche larruok iloonyor ninche. Amaa sii te naa lelo ake ooitaas intae isupati intaasiasa sii intae, kaji eret ina te intae? Neijia eiko sii ninche ilarruok. Naa omaa te naa pooki ake olisilen naa elde ake liyiolo ajo kilaaki, ainyoo eret ina te iyie? Keisilenokino sii ninche larruok eyiolo aajo kelaakini aaiputaki. Kake ore intae, entonyor ilmang'ati linyi niaasiasa isupati; enchooi te sile misiligugu toki naitu; naa itumutumu enkishorunoto kitok; niaakuku nkera o lotii Shumata Aisul te pooki, amu ore ninye eing'urrie ilarruok o lemeeta enashe. Enoto olng'ur anaa Papa linyi oata ong'ur. “Minguanare pee mikinguanareki; minor pee mikinorri, entapalaki pee epalakini intae. Enchooi pee eishori intae; aaisho emborei sidai narujakino, neiposhakino, o metadooi nepiki ilbenia too lgooitie linyi; amu ore ake ina nitemakinyenye lkulikae naa ninye ake etemakinyeki sii ninche intae.” Neitoki aisho enkitanyaanyukoto ejo, “Keidim olmodooni atoriko likae modooni? Aimesulakino pokira aare engumoto? Megiroo oloiteng'eni oloiteng'en; kake ore eidipaki aaiteng'ena netiu anaa oloiteng'ena ninye. Ainyoo pee ing'or entubuloi natii enkong'u o lalashe lino, nimidol olchata otii enkong'u ino makewan? Kaji nko pee ijoki olalashe lino, ‘Olalashe lai, ntasho maaitayu entubuloi nikitii enkong'u ino makewan,’ eji nimidol olchata likitii enkong'u, ino makewan? Lo sunkuroi, tang'asa intayu ilo shata likitii enkong'u ino pee itum taa atodolisho, nintayu entubuloi natii enkong'u o lalashe lino. “Amu meetae olchani sidai oiu lng'anayio torrok; aashu olchani torrono oiu lng'anayio sidain; amu eyiolouni ake olchani too lng'anayio lenyena. Amu metumieki olaimurunyai ilng'abolo, nemetumieki isabibu intulele. Eitadou oltung'ani supat isupati naaitung'uaa olchumati supat otii oltau lenye, neitadou oltung'ani torrono ntorrok naaitung'uaa olchumati torrono otii oltau lenye, amu inaabore oltau lo ltung'ani eiro te nkutuk enye. “Ainyoo pee kijojo, ‘Olaitoriani, Olaitoriani,’ nimiaasiasa enajoki intae? Aliki intae enetiu ololotu enatii nening enajoki, neas nena natejo. Etiu ninye anaa oltung'ani oshet enkaji, neng'as atur enkop aitugut, neunoki osoit olkitamanyunoto. Ore pee enang'unye enkare nenang'akino ina aji, kake eitu eidim aigusugusie amu enotokoki olkitamanyunoto. Kake ore ilo oning nemeas ae, etiu anaa oltung'ani otesheta enkaji eitu eng'as apik olkitamanyunoto. Ore pee enang'unye enkare neipony te ngolon enaduoo aji, neurori nabo kata, neme euroroto ina naturori enaduoo aji.” Ore pee eidip Yesu aishaki nena baa nkiyiaa enye, nejing Kapernaum. Nemuei naleng osinka kirotet lo lkitok loo sikarini, etaa keye. Ore pee ening eimakini Yesu, neirriwaki lpayiani loo Lyahudi meeu ninye aishiunye ilo sinka lenye. Ore pee epuonu ninche enetii Yesu, neitirrishaki aasai aajoki, “Keishiaakino nintaasa ninye ena: amu kenyor olorere lang, neteshetaka ninye iyiook enkaji e ntumo.” Neiriamariyie Yesu ninche. Ore etataanikia enkaji enye, neirriwaki ilo kitok loo sikarini ilchoreta lenyena ajoki, “Olaitoriani, mintanyamal kewan, amu maaishiaakino nanu te nijing'u enkaji ai: nemajo kara hoo ng'ae likilotu anang'are: kake ororei doi ake tejo neishiu osinka lai. Amu ara sii nanu oltung'ani otii enkitoria, naaitorei, naata sii nanu sikarini laitore. Naitore ele ajoki, ‘Shomo!’ Nelo; najoki elde ‘Wou!’ Nelotu; naitore osinka lai ajoki, ‘Taasa ena!’ Neas.” Ore pee ening Yesu nena, neing'asia te nkaraki ninye, neibelekenya, nejoki lelo tung'ana oosujita, “Ajoki intae, eitu ai kata atum enkirukoto kitok naba nji tiatua Siraeli, eitu atum.” Nejo matorrinyoto aji iladuoo ooirriwuaki eishiwuo oladuoo sinka omuei. Ore te nkiti kata nelo enkanasa naji Nain; neiriamariyie ninye ilooiteng'eni lenyena o lorora kitok. Ore etii auluo etinyikaka kishomi e ina anasa, ng'ura, enapitai olmeneng'ani aaya, naa ilo otua ake eeta ng'otonye, naa enkoliai; nerubare ltung'ana kumok le ina anasa. Ore pee edol Olaitoriani ninye neing'urrie nejoki, “Minchir.” Nenyikaki neiseyie osanduku neitashe lewa oonapita. Nejoki Yesu, “Lo barnoti! Inyo!” Neinyototo ilo duoo otua aton, neiteru airo. Neisho ng'otonye. Neureishoyu ninche pooki; neisis Enkai nejo, “Einyo oloiboni kitok le Nkai ti atua iyiook,” nejo sii, “Eewuo Enkai abaiki ltung'ana lenyena.” Neibulu enkisisa e ina nataasa Yudea pooki, o ina kop namanita. Neliki ilooiteng'eni le Yohana. Yohana nena baa pooki. Neipot Yohana aare le lelo kipaareta lenyena neirriwaki Yesu ejo, “Aa iyie doi apa olotu? Anaa ai likae kiaanyu?” Ore pee epuonu lelo tung'ana enetii Yesu nejoki, “Yohana Olaibatisani oirriwua iyiook enitii ejo, ‘Aa iyie doi apa olotu anaa ai kianyu likae?’ ” Ore te ina kata ake neishiunye Yesu ltung'ana ooata nkeyaitin o mueyiaritin kumok, nearaa loiriruani; ore lmodook kumok nebol inkonyek nedolishoyu. Newaliki Yesu ninche nejoki, “Enchom entoliki Yohana kuna nitoduaa o nitoning'o; etodolishote ilmodook, nepuo lmaiman, neishiunyeki aasik iloota enkeeya oo lbolot, nening'ishoyu lming'anta, neitopiuni ilootuata, nelikini laisinak ororei supat, nemayiana ilo tung'ani lemetum olkob te nanu.” Ore eidipa aashom ilooirriwuaki le Yohana neiteru Yesu ainosaa Yohana to lorere nejo, “Ainyoo nawa intae enchom entodol ti ong'ata? Kolperesi oyuk enkijape? Mme ninye? Ainyoo naa ishomo intae aadol? Koltung'ani oishopito nkilani naapuyiapui o naaitintil? Nkang'itie oolooitoreisho etumieki lelo ooishop nkilani naapuyiapui o ne nkuso. Kake ainyoo doi ishomo aadol? Koloiboni le Nkai? Ee pae naa kelang ninye oloiboni le Nkai. Ninye doi eimakita lkigerot aajo, ‘Nele olkilikuai lai laiturukie te iyie, olaa ninye likintobiraki enkoitoi ino.’ Ajoki intae, kitok Yohana alang pooki tung'ani oiu enkitok kake ore eyia, ore olobayie te nkitoria e Nkai naa kitok alang ninye.” Ore pee ening iltung'ana pooki o loosotu kodi neitadedeyie Enkai amu eibatisaki te nkibatisare e Yohana. Kake etanyaita ninche Lfarisayo o laiteng'enak loo nkitanapat enayiewuaki Enkai amu etanyaita ninche maate eibatisa Yohana. Nejo Olaitoriani, “Ainyoo atemaki kulo tung'ana le kuna olong'i? Kainyoo enyaanyukie? Enyaanyukie nkera naatoni te nemirishoreki, naaipotuno ejo, ‘Kitooshokito intae ndulen, neitu iranyishosho; nikinchirakita intae, neitu nchirishiri.’ Amu eewuo Yohana Olaibatisani eitupukoo kewan, nemeok enaisho oo sabibu; nijojo intae, ‘Keeta oloirirua.’ Eewuo Enkerai e Tung'ani nedaa neokisho; nijojo, ‘Eng'ura oltung'ani olubo, naa olamerani, naa olchore loo loosotu kodi o laing'okok!’ Ore naa eng'eno e Nkai, neitadedeyie pooki oora inkera enyena.” Neipot oltung'ani obo loo Lfarisayo Yesu pee eitoomon te nkaji enye. Nejing enkaji e ilo Farisayoi neton anya endaa. Naa ng'ura, etii enkitok ina anasa, naa enkaasani oo ng'ok; ore pee iyiolou ajo einosita Yesu endaa te nkaji e ilo Farisayoi, neyau oltulet lo soit oji alabasta le ilata narropil, neitashe te siadi ninye too nkejek enyena, neiter aituku nkejek enyena too lkiyio, nejut too lpapit le ndukuya enye, neng'utut nkejek enyena, neelie ina ilata. Ore pee edol ilo Farisayoi oitoomono nejo to ltau, “Te naa koloiboni le Nkai ele tung'ani anaata etayiolo ajo aing'ae anaa kaa pukunoto e nkitok ena naibung ninye!” Neirorie Yesu nejoki, “Simon, aata embae naaliki.” Nejoki, “Ee Olaiteng'enani.” Nejoki, “Eisilenoko oltung'ani aisilenoni ltung'ana aare indinari enyena, neisho obo indinari iip imiet, neisho olikae onom. Ore pee elau pokira aare entoki nalakie, nepalaki pokira aare. Amaa te pokira aare, kalo onyorru ninye oleng?” Newaliki Simon ajoki, “Amen ajo, elde otapalakaki nkumok.” Nejoki Yesu, “Etisipa ewalata.” Neibelekenyakino enkitok, nejoki Simon, “Dol ena kitok? Aewuo enkaji ino neitu kincho enkare oo nkejek; kake aaitashala ena kitok inkejek aainei too lkiyio nejut too lpapit lenyena. Eitu king'utut; ore ninye, anaa duoo pee ajing'u eitu aapal maangutut inkejek aainei. Eitu kiel endukuya te ilata, kake aaela ninye nkejek te na ilata. Aajoki naa te nkaraki ina, etapalakaki ng'ok enyena, aa kumok, amu etonyorrishe oleng, amu ore doi olopalakini nkuti naa kiti enyorrata enye.” Nejoki ninye ina kitok, “Kitapalakaki ng'ok inono.” Ore lelo ootoni aadaa te nebo ninye neiter aajo maate, “Ai ng'ae ele eji opalaki oltung'ani ng'ok?” Nejoki ina kitok, “Kintajewuo enkirukoto ino; shomo te seriani!” Neaku ore eidipayu nena, neruk nkanas sapuki o nkutiti elikioo ilo rorei neyaki lomon supati le nkitoria e Nkai. Neiriamariyie ilooiteng'eni lenyena tomon o aare ninye, o nkituaak naaishiunyeki loiriruani o nkeyaitin: Mariamu Magdalena, nataarayioki loiriruani oopishana metung'uai, o enkitok e Kusa osinka le Herode naji Yoana, o Susana, o kulie kumok naaitoomono ninche Yesu o looiteng'eni too masaa enye. Ore pee etumo esiamo kitok aaiturrurro, nesotokino lelo le nena ang'itie pooki, neiro alimu enkitanyaanyukoto, “Etupukuo olaunoni alo aun ilaanterera lenyena: ore eunisho, nedoiki kulikae embata e nkoitoi; neitunyori too nkejek, nenya motonyi e shumata. Nedoiki kulikae enkop o soit, nejo matubulu, netoyu amu meeta enkare naok. Nedoiki kulikae atua lkiku, neiriamunore lkiku, negor ninche. Nedoiki kulikae enkop sidai, nebulu, neiu ilng'anayio iip nabore.” Ore ejoito neijia, nebuak ajo, “Oloata nkiyiaa, toning'o!” Neikilikuan ilooiteng'eni lenyena ninye enalimu ena kitanyaanyukoto. Newaliki Yesu ajoki, “Eishooki intae entayiolo nkisudorot e nkitoria e Nkai; kake eishori lkulikae too nkitanyaanyukot, pee eing'or nemedol, nening ninche nemejing'aa. “Naa inji eikununo ina kitanyaanyukoto: Ore ilanterera naa ninche ororei le Nkai. Ore lelo ootadoikitio embata e nkoitoi naa lelo ooning ororei; nelotu Shetani aitayu too ltauja lenye arishie pee meiruk neitajeuni. Ore lanterera ootadoikitio enkop o soit naa lelo ooning ororei neng'amu te ng'ida. Kake eitu ejing'aa atua ninche; neiruk te nkiti kata ake, ore pee epuonu ntemat nebatata aaitiak. Ore lelo ootadoikitio atua lkiku naa lelo ooning; kake nepuo neitirrishaki enyamali oo masaa o esikar e na kishon nemeitabaya aaiu ilng'anayio. “Meetae oltung'ani oinok oltaa neitoki aitoip to ltoo anaa epik orunku le rruat, kake epik enerupa neitasheyie pee edol iloojing' ewang'an. Amu meetae entoki naisudoro, nemeibalunyeki; nemeetae enoo nkurrat nemeibalunyeki te wangan. Enteng'enuoto too mbaa nining'ining'i amu ore oloata, naa keishori, ore olemeeta neoruni ina najo ninye keeta.” Nelotu ng'otonye Yesu o lalashera lenyena neitu eidim aatabaiki ninye te nkiding'a o lorere. Neyakini olkilikuai aajoki, “Etii ng'utunyi o lalashera linono boo, eitashe, kiyieu nikitumore.” Newaliki ajoki, “Ore yieyio o lalashera laainei naa, lelo ooning ororei le Nkai neibung.” Ore nabo olong; nejing empeut ninye o looiteng'eni lenyena: nejoki ninche, “Ematalang aapuo lido kekun le naiposha,” nedumunye aapuo. Ore epuoito neirura ninye. Nedumunye olkutati te naiposha, neaku keiput empeut enkare, nejing bata. Nepuo aainyeyie ajoki, “Lo Kitok! Lo Kitok! Kindaaitie!” Neinyototo nebuaki osiwuo o enkilugo e nkare; negira, nelotu enkitirring'a. Nejoki ninche, “Koree enkirukoto inyi?” Neureishoyu, neing'asia, nejokino maate, “Kaing'ae taa ele laa keitore osiwuo o enkare, nening?” Nebaya lido kekun loo Lgeraseni, oipirare Galilaya. Ore pee edoiki enkop natoyio nenang'are oltung'ani obo le ina anasa oota iloiriruani; oshomo nkolong'i kumok meishopo, nemejing ang, too nkuraren eton. Ore pee edol Yesu, nebuak, nebatata te dukuya ninye, nejo to ltoilo sapuk, “Kainyoo aatayie nanu iyie Yesu, Oinoti le Nkai Natii Shumata Aisul te pooki? Aatasayia mikisilisil.” Amu ketaarayie ninye ilo oirirua torrono otii ilo tung'ani metupuku. (Amu eibung'a nkolong'i kumok, neteenaki aarrip, nerridi too sekenke naairoishi o too munyororoni; ore pee eitirrie pooki nearaa oloirirua ninye ong'ata.) Neikilikuan Yesu ajoki, “Ai kiji ng'ae?” Nejo, “Kaaji, Empuoto;” amu loiriruani kumok ootijing'a. Nesai pee mearaa ninche meshomo olodo le nkop. Netii ine emboo oo lbitiro, nadaa to losho; nesai meishoo pee epuo aajing lelo bitiro. Neisho meshomo. Nepuku lelo oiriruani te ilo tung'ani, nejing ilbitiro; nekuet ina luaata oo lbitiro to loshong'ishongi neimis te naiposha neya enkare. Ore pee edol lchekuti le lelo bitiro inaatotiwuo, eisik aapuo aalikioo te ina anasa o te ina kop. Nepuku iltung'ana aapuo aadol enatotiwuo; nepuonu enetii Yesu, neinepu ilo tung'ani otooruoki loiriruani aaraa, eton, neishopo, nenyakua oltau lenye biyoto, etonita too nkejek e Yesu; neureishoyu ninche. Nelikioo lelo apa ootoduakita ilo tung'ani eoruni loiriruani aaraa neaku biyoto, enaikuna pee eishiunyeki. Ore lelo tung'ana pooki le nkop oo Lgeraseni o neemanita, nesai metung'uai ninche amu etureishote oleng. Nejing ninye empeut ashuko. Nesai oladuoo oishiunyeki meturubare, kake eitanapa ajoki, “Tushukoyu enkang inyi, imbalakinye enaba ina nikintaasa Enkai.” Nelo aing'uaa, einosaa te ina anasa pooki nena e nking'asia naaitaasa Yesu ninye. Ore pee eitu Yesu, neitoomon olorere te nchipai amu keanyita ake pooki. Nelotu oltung'ani oji Yairo naa olkitok le nkaji e ntumo; nebatata too nkejek e Yesu nesai meshomo enkaji enye, amu esila nabo ake eeta, oo larin tomon o aare, neirrag etaa keye. Kake ore ejo alo neiding'akino olorere. Netii enkitok naruko osarge larin tomon o aare; neishang'itie masaa enyena kumok too labaak, neitu eishiunye hoo obo. Neimu te siadi, neiseyie olcholoi lo lkila lenye, negem nabo kata osarge. Nejo Yesu, “Ae ng'ae naatoshoroyie?” Neitolilo olorere, nejoki Petero, “Lo Kitok, kironyita olorere likinturrurrokinote!” Kake etiaka Yesu, “Etii oltung'ani laatoshoroyie, amu atayiolo ajo etii engolon natupukuo te nanu.” Neisho ina kitok, pee edol ajo meekure eidim aisudori, nekuetu eikirikira, nebatata te dukuya ninye, neibalakinye mbaa pooki te dukuya olorere, ajo aainyo pee etaasa ina, o eneikuna pee eishiwuo. Nejoki Yesu ina kitok, “Naito, kinchiunye enkirukoto ino. Shomo te seriani.” Ore ejo neijia, nelotu oltung'ani oing'uaa enkaji e ilo kitok le nkaji e ntumo, nejoki, “Etua esila ino; mintoki aintanyamal olaiteng'enani.” Ore pee ening Yesu ina, newaliki ajoki ninye, “Miureishoyu: iruko ake iyie, naa keitaae biyoto.” Ore pee elotu ina aji, neitu eisho likae tung'ani ejing'u, Petero ake o Yohana o Yakobo, o menye o ng'otonye ina kerai. Ore aa kitok olkiyioi eishirita ltung'ana nejoki Yesu ninche, “Eminchir amu eitu eye, keirura.” Nekueniyieki oleng, amu eyiolo aajo eidipa atua. Kake ore ninye, neibung, neipot ajoki, “Nakerai, inyo!” Neshukokino ninye enkiyang'et enye, neinyototo nabo kata, neitanapisho meishori endaa. Neing'asia ntoiwuo e ina kerai kake eitanapa meliki hoo tung'ani enataase. Neipot lekua ooiteng'eni tomon o aare, neisho engolon, o enkidimata naitoreyie loiriruani pooki, neishiunye mueyiaritin. Neirriwaa metolikioi enkitoria e Nkai, neishiunye iloomueyiaa. Nejoki ninche, “Emiya hoo toki te lototo inyi, aa eng'udi, aashu embene, aashu endaa, aashu mpesai, nimiyaya nkilani maa are. Ore enkaji pooki nijing'ijing'i, entotoni te ine o entupuku te ina ang. Ore ilemeitoomon intae, entung'uai ina ang nimpiripiroo enterit natii nkejek inyi metaa shakeni te ninche.” Nepuo aamanaa te nena ang'itie, pooki elikioo lomon supati, neishiunye ltamueyia too wuejitin pooki. Ore Herode laa ninye oitore Galilaya, nening nena pooki naasitae; neiputukuny amu ejo kulikae tung'ana, “Yohana otopiwuo too lootuata.” Nejo kulikae, “Eliya oipang'aka.” Nejo kulikae, “Obo loo loibonok li apa otopiwuo.” Nejo Herode, “Atudung'oyie taa ninye Yohana elukunya, ae ng'ae naa ele laning mbaa enyena?” Neing'oru eyieu nedol ninye. Ore pee eshukunye ilkipaareta, neinosaki Yesu mbaa pooki naataasa. Nerik nepuo enkilepata, o metoriko enkanasa naji Betsaida. Ore pee eyiolou olorora, nesujaa; neitoomon neirorie aliki ninche mbaa e nkitoria e Nkai, neishiunye ilooyieu neishiunyeki. Ore pee eaku kedoiyo enkolong, nepuonu ilooiteng'eni lenyena enetii nejoki, “Intanapa olorere meshomo kuna kurman o nkang'itie naataana aairrag neing'oru endaa amu ong'ata ene nikitii.” Nejoki, “Enchoo doi intae endaa.” Nejoki ninche, “Mikiaata ae toki neme mukateni miet o sinkir aare, aashu te naa aikipuo aainyang'aki ele orere pooki endaa.” Amu ebaya lewa ootii, nkalifuni miet. Nejoki Yesu ilooiteng'eni lenyena, “Entotona olorere too intukusi maa onom.” Neas ina, neitoton iltung'ana pooki. Nedumu mukateni pokira miet, o sinkir are, neing'or shumata nemayian nebel, neisho ilooiteng'eni lenyena meitoomonie olorere. Nenya, neraposho pooki. Nesotuni lmong'oitie loo lekunot, neiput inkikapuni tomon o aare. Ore eomonito Yesu openy, netii ilooiteng'eni lenyena, neikilikuan ajoki, “Kejo olorere kara ng'ae?” Newaliki aajoki, “Ejo Yohana Olaibatisani, nejo kulikae, Eliya; nejo kulikae ira obo loo loibonok li apa otopiwuo.” Nejoki, “Nijojo intae kara ng'ae?” Nejoki Petero, “Iyie Kristo le Nkai.” Neitanap ninye ninche neitore pee meliki hoo oltung'ani ilo rorei. Nejoki, “Meeta nchere pee meinyali Enkerai e Tung'ani too mbaa kumok, neany ilpayiani o lapolosak kituaak o lasirak neari metua, neitopiuni te nkolong e uni.” Nejoki ninche pooki, “Te neyieu oltung'ani naasuj, nanu, inchoo emenaa kewan, nenap osalaba lenye inkolong'i pooki, naasuj. Amu ore oloyieu neitajeu enkishui enye, neiminie; kake ore pooki oiturraa enkishui enye enkaraki nanu neitajeu. Amu ainyoo dupoto o ltung'ani tenetum enkop pooki neiturra enkishui enye. Amu ore olodol anyit te nanu o too rorei laainei, neduaaki sii ninye Enkerai e Tung'ani ninye anyit te nelotu te nkitoo enye o ene menye o enoo lmalaika sinyat. Kake ajoki intae too sipat nchere etii kulo ooitashe te ne ilemeishamisham enkeeya katukul, eitu eng'as aadol enkitoria e Nkai.” Ore too nkolong'i naabaya isiet eidipate nena baa nerik Petero o Yohana o Yakobo neked oldoinyo aaomon. Neaku ore eomonito, neibelekenya emua e nkomom enye, o nkilani enyena, neiborru neimerlelu. Naa ng'ura, neirorie ninye Musa o Eliya etalioote te nkitoo e keper neirorie Yesu eimaki eneyooki aiko eitabaya eyieunoto e Nkai aye te Yerusalem. Ore Petero o looboitare neiliara njo, kake edolisho ake nedol enkitoo e Yesu, o lelo tung'ana pokira aare ooitashe te nebo ninye. Ore epuo lelo tung'ana aaing'uaa Yesu, nejoki Petero Yesu, “Lo Kitok, sidai kitii ene, maitobira lng'oborri okuni, obo lino, o obo le Musa o le Eliya.” Nemeyiolo enajoito. Ore ejo neijia nedou enkatampoi neitoip apik oloip; neureishoyu pee ejing atua ina atampoi. Nepuku oltoilo te nkatampoi nejo, “Ena Enkerai ai Gelunoti, entoning ninye.” Ore pee egira ilo toilo, nedoli Yesu aa ninye ake. Negira ninche, eitu eliki ltung'ana te nena olong'i inaatoduaa. Ore taaisere pee edou to ldoinyo, netumore olorora kitok Yesu. Naa ng'ura, nebuaku oltung'ani obo tiatua ina siamo ejo, “Olaiteng'enani, aatasayia ng'urai enkerai ai amu ninye ake aata; naa kenang'aa oloirirua, nebuak, neiterreyie o meitayu labur nemeing'uaa asioki, near oleng. Natasayia ilooiteng'eni linono meitayu netalaikinote.” Newaliki Yesu ajoki, “Oi ena ishoi nemeeta enkirukoto, kaboitare intae naitaas intae o anu? Iyau enkerai ino ene.” Ore eyau, nenang'aa oloirirua neiterreyie, nebuaaki Yesu ilo oirirua torrono, neishiunye ina kerai, neshukoki menye. Neing'asia lelo pooki ootoduaa engolon magilani e Nkai. Ore eton eing'asia pooki too mbaa naataasa, nejoki ninye ilooiteng'eni lenyena, “Emincho ake erikino intae kuna taata naliki intae! Keishoori Enkerai e Tung'ani aaitarasaki inkaik oo ltung'ana.” Kake eitu ejing'aa ina natiaaka; eton eisudoro te ninche, metaa mening'u tipat enye, nemeitieu sii aaikilikuana. Neiteru enchankar tiatua ninche maate ejo kalo lenye olkitok te pooki. Neyiolou Yesu ina nadamu ninche, nedumu enkerai neitataaniki kewan aitasheyie; nejoki ninche, “Ore pooki ng'ae ong'amu ena kerai te nkarna ai, nanu etang'amua, ore oloisul te nkitisho ti atua intae, naa ninye oisul te nkitoo.” Neng'amaa Yohana ajoki, “Lo Kitok, kitoduaa oltung'ani earaa loiriruani te nkarna ino nikimitiki, amu mme ole ncholiek ang.” Nejoki Yesu ninye, “Emimitiki, amu ore olemekes intae, naa ole nkalo inyi.” Netaanu nkolong'i pee eilep alo shumata, nemut nabo ajo kelo Yerusalem. Neirriwaa ilooiteng'eni meituruko dukuya ninye aajing ang oo Samaria, pee eitobiraki enejing. Kake eitu eitoomon ilopeny enkaraki naipirta Yerusalem. Ore pee edol ilooiteng'eni lenyena, Yakobo o Yohana, nejo, “Olaitoriani, iyieu nikimpotu enkima te keper metapejoi?” Neibelekenyakino aing'ode [nejoki, “Miyiololo aajo kaa pukunoto oo ltauja iatata, amu eitu doi elotu Enkerai e Tung'ani amut iltauja loo ltung'ana, kake pee eitajeu.”] Nepuo ae ang. Ore epuo te nkoitoi, nejoki oltung'ani obo Yesu, “Ekaasuj nanu iyie pooki wueji nilo.” Nejoki Yesu, “Eeta mbariak ngumot enye, neeta motonyi sinkin. Kake meeta Enkerai e Tung'ani eneirishaki elukunya enye.” Nejoki likae, “Tusujuaki nanu.” Kake etiaka, “Lo Kitok, nchooki ang'as alo anukaa papa.” Nejoki, “Inchoo lmeneng'a, metunukai, ilmeneng'a kake shomo iyie tolikioi ilomon le nkitoria e Nkai.” Nejoki sii likae, “Olaitoriani, aasuj kake, nchooki ang'as alo aitanapare iltung'ana to lmarei lang.” Nejoki Yesu, “Ore oltung'ani otonyorra enturore neitoki anang silig, nemeishiaakino enkitoria e Nkai.” Ore te siadi nena, negelu Olaitoriani kulikae ntomoni naapishana neirriwaa maare, meturuko nena ang'itie o pooki wueji neyieu openy nelo. Nejoki ninche, “Sapuk enkisampuare, kake kuti laisiaayiak entoomon naa olopeny enkisampuare meirriu laisiaayiak meetu enkisampuare enye. Enchom! Airriwaa intae anaa lkuoo le kerra ooirrikini atua suyian. Emiya embene, aashu nkilani, aashu namuka, nimirorokiki hoo oltung'ani te nkoitoi. Ore enkaji pooki nijing'ijing'i entang'as entejo, ‘Metijing'a eseriani ena aji.’ Naa te netii oltung'ani le seriani ine netum ninye eseriani inyi, naa te nemetii, neshukokino intae eseriani inyi. Entotoni te ina aji ninosinoso, niokioko entoki naba anaa enaishori intae, amu enare olaasani le siaai olekoisiaayio lenye; emipuo aarukurukoo nkajijik. Ore enkang pooki nijing'ijing'i neitoomon intae, entam endaa naishooki intae; ninchiunyenye iloomuei ootii nijokiki etinyikua enkitoria e Nkai. Ore enkang nijing'ijing'i nemeitoomon intae, enchom inkoitoi enyena naalala nijojo, ‘Ore ninye enterit e nkang inyi nikiaata too nkejek ang, kimpiripiroki intae, kake entayiolo nchere, etinyikua enkitoria e Nkai.’ Esipa ajoki intae, ore te ina olong e nkiguana, Sodom eikashieki alang enaitaasi ina ang! “Ee kake ayia iyie Korasin! Ee kake ayia iyie Betsaida! Amu te naa ketaasaki apa te Tiro o Sidon nena e nking'asia naatasaki tiaatua intae, anaata eirridutua apa moitie, neishop lkuniyiani, neelare nkuruon. Kake Tiro o Sidon eikashieki te nkolong e nkiguana aaitalang intae. Oi iyie Kapernaum, eijo shumata kilepieki, kintadouni shomo enemeneng'a.” Nejoki ilooiteng'eni lenyena, “Ore pooki oning intae, nanu ening, ore oloany intae, nanu eany, ore olaany nanu, naa ilo laairriwua etanya.” Neshukunye lekua ntomoni naapishana o aare te ng'ida. Ejo, “Olaitoriani, ore ebaiki loiriruani, etoning'o iyiook kiaaraa te nkarna ino!” Newaliki Yesu nejoki, “Atoduaa Shetani esulunye anaa enkiwuang'ata eing'uaa shumata. Enining'o! Aishoo intae enkidimata, metaa indimidimi aaitunyoi ilasuriaa o nkulupani, o engolon pooki e ilo mang'atinta, nemeeta enaiko intae. Kake eming'idare ina naning intae iloiriruani; kake enting'idata amu eigero nkarn inyi te shumata.” Ore ina kata ake neshipayu Yesu eiganya Enkiyang'et Sinyati, nejo, “Ashe Papa Olaitoriani le keper o enkop! Amu isudorie kuna baa ilang'eni o looata eyiolounoto niboloki inkera naanana, amu ina eyieunoto e mpiris ino. Nanu eishoo Papa pooki toki, nemeetae oloyiolo Oinoti leme Papa ake, nemeetae oloyiolo Papa leme Oinoti lenye ake, o lelo pooki ngae ake ogelu enkerai aboloki ninye.” Neibelekenyakino ilooiteng'eni lenyena, neirorie too nkurrat nejo, “Emayiana nkonyek naadol kuna nidolitata intae. Amu ajoki intae, eyieu apa loibonok o laiguanak, nedol kuna nidolidolo, kake eitu hoo edol; neyieu apa nening kuna nining'ining'i kake eitu hoo ening.” Naa ng'ura, neinyototo olang'eni obo aikilikuanishore, eyieu netem, nejoki, “Lo Aiteng'enani, kaji aiko pee ajung enkishui nemeish?” Nejoki Yesu, “Kakua baa naaigero too nkitanapat e Nkai? Kejo aa enisoma iyie?” Newaliki ajoki, “Tonyorra Olaitoriani Enkai ino to ltau lino pooki, o te nkiyang'et ino pooki, o te ng'eno ino pooki, o te ngolon ino pooki, ninyorru o le latia ino anaa eninyor kewan.” Nejoki ninye, “Itawala aitobiraki, taasa ina pee iton inchu.” Neyieu ninye neitaa kewan asipani, nejoki Yesu, “Ai ng'ae doi ole latia ai?” Newaliki Yesu ajoki, “Etadowuo oltung'ani eing'uaa Yerusalem alo Yeriko, neinepu ilaisimak neoru nkilani, near neing'uaa etaa keye. Nelotu olapolosani aim ina oitoi, ore pee edol nepaash, nelo. Nelotu sii ninye ole Lawi aim ine ore pee edol nepaash, nelo. Kake ore pee elotu Osamariyiai olo sii ninye nkang'itie, ore pee edol neing'urrie. Nebaiki neen ilbaa lenyena nebukoki eilata neisho enaisho oo sabibu, neitoki aitaked esikiria enye, nerik enkaji naitoomonishoreki neitobir te ine. Ore taaisere, neitayu dinari are aisho olopeny ina aji nejoki, ‘Ing'ura taa ele tung'ani, ore pooki toki nanya nalusoo te nena, nalotu alak te nashukunye.’ Kaa idol iyie te lelo tung'ana pokira okuni, kalo otaa ole latia te ilo otara ilaisimak?” Nejo ninye; ilo oing'urrie ninye. Nejoki Yesu Ninye shomo sii iyie taasa ina. Ore epuo neimaa Yesu enkang namanya enkitok naji Marisa neitoomon te nkaji enye. Neeta enkanashe naji Mariamu, nelotu ina aton too nkejek e Yesu, aton aainining inkiteng'enat. Nenyamalu Marisa too siaaitin enyena kumok, nelotu enetii nejoki, “Olaitoriani, ai midol ajo emakua te naasisho openy, naapalaki enkanashe ai? Tiaaki naa maaeu aret.” Kake etawalikia Olaitoriani ajoki, “Marisa, Marisa, intanyamaluo nimposha too mbaa kumok; kake nabo bae ake naata tipat, ena bae natudutayie Mariamu naisul; nemeyae aaitung'uaa ninye.” Neaku ore eomonito te dikae wueji, ore pee eidip, nejoki obo loo looiteng'eni lenyena, “Olaitoriani, inteng'ena iyiook enkomono anaa enaiteng'ena Yohana ilooiteng'eni lenyena.” Nejoki, “Ti niomonono entejo: Papa meitisinyi enkarna ino, meeu enkitoria ino. Inchoo iyiook anaa ake endaa nabaiki iyiook. Nipalaki iyiook ing'ok ang, anaa te nikipalaki sii iyiook ilooinyal iyiook. Nimirik iyiook atua ntemat.” Nejoki ninche, “Kalo linyi oota lchore laa te nelo ainyeyie eitorite enkewarie, ajoki, ‘Olchore, isilenokoki mukateni uni; amu eewuo olchore lai eing'uaa nkang'itie nemaata entoki naisho.’ Kejoki ilo otii aji, ‘Mikintanyamal, amu eikeno kutuk aji, neirurate nkera, kirurate pooki. Meekure aidim ainyo pee aaisho?’ Ajoki ntae, te nemeisho duoo te nkaraki naa olchore lenye, kake ore enkaraki naitirrishaka olikae, einyototo ake aisho naaba anaa naayieu. Najoki naa ntae, entoomonu pee eishori ntae, eng'oru pee itumutumu; entooshiosh kutuk aji pee eboluni ntae. Amu ore pooki oomonu netum; ore oloing'oru netum; ore olooshiosh kutuk aji neboluni. “Kalo te ntae oisho enkerai enye osoit etoomonuo emukate? Aashu te neomonu osinkirri, keisho olasurai? Aashu te neomonu olmosori, keisho enkulupa? Asa taa doi iyiololo ntae iltung'ana torrok, aaisho nkera inyi ntokitin sidain, kebaa na aitulus Papa linyi otii keper aisho Enkiyang'et Sinyati lelo oomon ninye?” Nearaa oloirirua lemeiro. Neaku ore pee epuku ilo oirirua lemeiro, neiro ilo tung'ani apa oonyo kutuk, neing'asia olorere. Kake etejo kulikae lenye, “Beelsebul, olkitok loo loiriruani, oishoo engolon naararie loiriruani.” Netem sii kulikae eing'oru osapiipiyiet oing'uaa keper. Kake ore pee eirrash ndamunot enye, nejoki, “Ore enkitoria ake ninye pooki naoro aara oopeny neidaaya, ore enkaji naara openy neurori. Kaji eiko Shetani te neoro aara makewan, keitoki enkitoria enye auno? Amu ijojo naa te ngolon e Beelsebul aaraa loiriruani? Naa omaa te naa kengolon e Beelsebul aararie nanu loiriruani, kengolon e ng'ae doi aararie ninche nkera inyi loiriruani? Ninche naa ooyooki aaiguanare ntae. Kake te naa ai to lkimojino le Nkai aaraa loiriruani, enkitoria e Nkai naewuo atua ntae. Ore te nerrip oltung'ani ogol otanape enkaji enye, neserian imasaa enyena pooki. Kake te nerasaki ologol alang ninye nemir, neoru masaa o larrabal duoo naawuasare, nelo aor iyarunot naatarua. “Ore pooki leme ole nkalo ai, nau ekesh, ore ole maaret osotu, naa keisardaikie. “Ore te neidur oloirirua oiduruk to ltung'ani nelo aimaa iwuejitin nemetii enkare, eing'oru eneyeng'iyeng'are; ore pee elau, nejo, ‘Kashukokino enkaji ai apa natung'uayie.’ Ore pee ebau, neinepu etooroki neikodi, neito ninye alo aipot kulikae oiriruani oopishana torrok aalang ninye, meetu aamany ine; nerruoyo empukunoto e ilo tung'ani enatiu apa te dukuya.” Ore pee ejo neijia, nebuaku enkitok nabo ti atua olorora nejoki, “Emayiana sii ake enkoshoke nikitoiwuo o lki likintanaaki.” Newaliki Yesu ajoki, “Ee paa emayiana aaisul, ilooning ele rorei le Nkai neibung.” Ore pee eiturrurrokino esiamo Yesu neiter ajoki, “Arruok sii ake ltung'ana lena kata, embae eing'oru; kake meetae naa embae enking'asia naishori neme e Yona. Amu ore anaa enataa Yona embae enking'asia too ltung'ana le Ninawi, neijia sii etiu Enkerai e Tung'ani too ltung'ana le na kata. Eyooki enkaiguanani e kopikop adumunye te nkiguana oo ltung'ana lena ishoi nedung'oki ninche enkiguana, amu eewuo ninye too neeiting'ie enkop elotu ainining eng'eno e Solomon, naa ng'ura, etii ene olkitok olang Solomon. Eyooki ltung'ana le Ninawi aaitasheiki neitang'or ltung'ana le na ishoi, te nkolong e nkiguana, nedung'oki enkiguana, amu eirridutua ninche etolikio Yona ororei le Nkai, naa ng'ora, etii taa ene olkitok olang Yona. “Meetae oltung'ani oinok oltaa nepik orunku aashu epising to ltoo, kake epik eneiperere pee eitawang'aki iloojing'u. Etiu nkonyek inono anaa oltaa lo sesen lino, naa te naa biyot nkonyek inono, newang osesen lino pooki; kake ore pee kira torrok nkonyek nerip enaimin osesen lino pooki. Toduaa naa pee miaku ewang'an niata enaimin. Amu te nebore osesen lino pooki ewang'an, nemeeta enemisimis, newang'u pooki wueji, atiu anaa te nikilang oltaa owang.” Ore eirorita Yesu, neipot Olfarisayoi obo meshomo anya endaa te nkaji enye, nelo, neton anya endaa. Neing'asia ilo Farisayoi pee edol ajo eitu eng'as aisuj inkaik eitu enya endaa. Kake etiaka Olaitoriani ilo farisayioi, “Intukuku ntae Lfarisayo oriong enkikompe o esaani, kake ore atua ntae ebore enkowuarisho o enkarruoisho. Lo moda! Ai me ele obo oitobira oriong o atua? Kake enchoru to lng'ur nena tokitin naatii atua, naa ng'ura, kesinyayu pooki toki te ntae. “Kake ee kake aiyia ntae lo Farisayo! Amu nchoruru ematua e tomon oo ntasimi oo mbenek pooki nipalaa enkiguana oo sipat o enyorrata e Nkai, naa eishiaakino nitaasa nimipalaa nena kulie. Ee kake aiyia ntae Ilfarisayo! Amu inyorrinyorro lorikan sidain too nkajijik entumo, ninyorrinyorro lng'asak too wuejitin neemirishoreki. Ee kake aiyia ntae! Amu itiuu anaa nkuraren nemelioo, naaitunyoo ltung'ana meyiolo.” Newaliki obo loo laiteng'enak loo nkitanapat ajoki, “Olaiteng'enani, te nijo nji, iyiook sii iyiet.” Nejoki, “Ee kake ayia sii ntae ilang'eni loo nkitanapat! Amu intanapinapa ilkulikae ilolan ooiroishi lemenapayu, ore ntae maate nimiseyieyie too lkimojik linyi. Ee kake ayia! Amu ishetishete nkuraren oo iloibonok le Nkai laa papaai linyi ootaara metuata. Metaa, itaa shakeni, nitonyorraitie nkiasin oo loo minyi, amu ninche ootaara metuata, nishetakiki ntae nkuraren. “Ore enkaraki ina, etejo, eng'eno e Nkai, ‘Kairriwaki ninche loibonok o lkipaareta, near kulikae metuata, nearaa kulikae’, paa ore ilo sarge loo loibonok le Nkai, oibukoyioki ebaiki apa pee eitamanyuni enkop, neitalakuni ltung'ana le na ishoi; ebaiki osarge le Abel o metabaiki osarge le Sakaria, oitanang'aki erishata olperere lo lasar o ewueji sinyati ee ajoki intae keitalakuni too ltung'ana lena ishoi. “Ee kake aiyia lang'eni loo nkitanapat! Amu iwaita embolet najing'ieki ewueji e ng'eno; neitu ijing'ijing'i ntae maate nirishieshie lelo oojing'ita. “Ore eing'uaa ine, neiteru lasirak o Lfarisayo aaitirrishaki oleng, nerrumoki meimaki imbaa kumok erreshu enaitang'orie te nena naajo ninye.” Ore etiu neijia, pee eiturrurro olorora kitok metaa keitunyoro, neiteru aiturukie ilooiteng'eni lenyena ajoki, “Entodol ake ate te nkisuijo oo Lfarisayo nchere esunkureisho. Meetae enaimulumularo nemeibalunyeki, aashu enaisudoro nemeyiolouni. Ore embae pooki nitejo ntae te naimin neyookini aalikioo te wang'an, ore nena nipuopuo aaing'omingo'makino too lgilat loo nkisudorot neyookini aalikioo too nchumarot oo nkajijik. “Ajoki ntae, loshoreta laainei, emiure lelo ooar osesen, nemeitoki aata ai naaidim aataas eidipa ina. Kake aikok intai aliki olonare niurere; entureita ilo laa ore eidipa atara metua, neitoki aata engolon nanang'akinye Yehanum; ee ajoki ntae, ilo enturiata! “Ai mme elai are ake enya ntiitiini miet? Nemelang ninye Enkai hoo nabo e nena. Oo naa ntae ilaa keikena ninye lpapit loo lukuny inyi. Emiureisho; iatata pae tipat aalang ntiitiini kumok. “Najoki nanu ntae, ore pooki laaibalie te dukuya ltung'ana, neibalie sii ninye Enkerai e Tung'ani ninye te dukuya ilmalaika le Nkai. Kake ore ilo laamiki te dukuya ltung'ana nemikini sii ninye te dukuya lmalaika le Nkai. Ore oltung'ani pooki osukeny Enkerai e Tung'ani kepalakini, kake ore olomor Enkiyang'et Sinyati nemepalakini. Naa te neyae ntae nkajijik e ntumo o laitoriak o enkitoo, eming'aing'ai aajo ai jojo aa anaa aiwalulu aajo aa; amu keutaki ntae Enkiyang'et Sinyati te ina saa enijojo.” Nejoki oltung'ani obo otii atua ilo orere, “Olaiteng'enani, tiaaki olalashe lai maatooriki enjung'ore ang.” Kake etiaka, “Lo tung'ani, ai ng'ae laaitaa nanu olarishani anaa olooriki ntae?” Neitoki ajoki ninche, “Entodol ake ate, entodol ate to lng'uarra; amu ore enkishui neme nkumoi oo masaa naata.” Neitoki aliki enkitanyaanyukoto, nejoki, “Eetae apa olkarsis neisho enkurma enye oleng, nejoki kewan enye, ‘Kaa taa aas, amu maata enapik endaa ai?’ Nejo, ‘Inji aiko, kaar impechen aainei nashetu naalala naalang kuna; pee ashumie endaa ai o masaa aainei. Naa kajoki oltau lai, lo tau! Iata masaa kumok nikitushumakaki too larin kumok; isikarrayu tadaayu niokisho nishipa.’ Kake nejoki Enkai, ‘Lo modai! Ena kewarie kiyieki oltau lino; paa omanaa nena tokitin ninteng'ela keaku pasa nkuneng'ae ninche?’ Neijia etiu oloshumaki kewan imasaa neme karsis ti alo Enkai.” Nejoki ninye ilooiteng'eni lenyena, “Ajoki naa ntae, emintanyamaluo te nkaraki enkishon inyi, te ntoki ninyanya, o too seseni linyi te ntoki ninchopishopo. Amu kitok enkishui alang endaa, naa kitok osesen alang inkilani. Ing'ura lkurruki; meunisho, nemesotisho, nemeeta sitooni anaa mpechen, neitoki ake Enkai sii ninche. Kebaa naa elang tipat inyi ntae enoo motonyi! Naa kalo obo linyi oidim atoponiki kewan entemata nabo e nkaina te nkishui enye? Amaa naa te nimindimidimi aataas enkiti bae anaa ina, oo pee intanyamaluoluo too nkulie pooki? Ng'ura ntapuka, eneiko te nebulu, nemeekenya nemepiyaisho; kake ajoki ntae, ore ninye Solomon te sikar enye pooki nemeikodo anaa enatiu nabo e kuna. Kake pasa taa eishop Enkai aiko nji olkujita obulu taata ti ong'ata ore taaisere nenang'akini enkima, kebaa eitulus aishop intae, lo tung'ana kulo ooti enkirukoto! Naa eming'oruru entoki ninyanya anaa eniokioko, naa emisinanuo. Amu kuna tokitin eing'oru loreren pooki le nkop; neyiolo Papa linyi ajo nkolati inyi nena. Ore enaikash naa eng'oru enkitoria enye, naa keaku sii nkuninyi nena kulie. “Emiureisho, lo turrur oti, amu Papa linyi otonyorra aisho ntae enkitoria enye. Entimir imasaa inyi, enchoo laisinak; engoraki ate lbenia lememusanu, ooata olchumati te shumata lememuta, ine nemenyikaki olapurroni nemeinosie oriri. Amu ore ine netii olchumati lino naa ine etii oltau lino. “Enterreten impolosi inyi, naa enchoo etoni eyupuyup ltaai linyi nitiuu anaa ltung'ana ooanyita olkitok lenye elotu eing'uaa osirua le nkiyama, pee te nebau neipotisho nesioki aabolu nabo kata. Emayiana ake lelo aisiaayiak laa te nebau olkitok lenye neinepu erripisho. Esipa ajoki ntae, kerretena ninye openy neisho ninche metotona te mesa, nelotu aitoti ninche. Naa te neewuo te rripore e are, aashu te ne uni, neinepu etiu neijia, nemayian ake lelo aisiaayiak! Kake entayiolo nchere, te naa keyiolo olopeny enkaji esaa nalotunye olapurroni, anaata etorripishe naa anaata eitu eisho metigili enkaji enye. Entashololoto sii ntae; amu elotu Enkerai e Tung'ani te saa niminteikiki.” Nejoki Petero, “Olaitoriani, aiyiook ake iliki ena kitanyaanyukoto ena ei pooki ng'ae?” Nejoki Olaitoriani, “Kalo pasa abarani ilo supat naa ng'en otung'eikia olopeny enkaji, meitotio lootii too rishat enye? “Emayiana ake sii ilo aisiaayiani oinepu olkitok lenye easita ina naitanapa. Esipa ajoki ntae, keisho meitoria masaa enyena pooki. Kake oo te nejo ilo aisiaayiani openy, ‘Eimutie olkitok lai,’ neiteru aidong nkaisiaayiak, nedaa ninye neokisho amera, neyooki alotu olkitok le ilo aisiaayiani to lkekun, lemeiteikini o te saa nemeyioloi, neitame neitaboitaki ilemening'isho. Ore ilo aisiaayiani apa oyiolo enayieu olkitok lenye, neitu eas aitabaya aashu ina nanyor, neidong'i oleng. Kake ore ilo lemeyiolo, netaasa enaishiaakino enkidong'oto, eari penyo. Ore pooki oishooki nkumok, neyieki ninye nkumok; ore ilo laa ninye eitanap iltung'ana nkumok neyieki ninye nkumok oleng. “Aewuo aisuroki enkop enkima; naa oi sii ake duoo te naa keidipa atudupai! Kake kaata enkibatisa naaibatisae; nebaa enaaitirrishita o meitabari kenya! Aijojo pasa kaewuo ayaki enkop osotua? A'a, ajoki eoro ayaki; amu ore ebaiki taata eoro enkaji nara miet; nepong'ore uni are, nepong'ore are uni; nepong'o enkerai o menye, nepong'o entito o ng'otonye, nepong'ore enkaputani enkitok o layioni lenye, nepong'ore esiankiki enkaputani.” Nejoki sii olorere, “Te nidolulu oshi enkatampoi eilepa te nkalo e ndoyioroto, nijojo nabo kata, ‘Kelotu asha’; netiu neijia. Ore pee idolidolo osiwuo oing'uaa moikuape nijojo, ‘Kelotu airowuaju’; netiu neijia. Lo sunkuro! Kulo iyiololo intae aatolimu eliooto enkop o loing'ang'e; kake kaji nkoko pee miyiololo aaing'ura nilimumu enatiu ena kata? “Naa kaji etiu pee mirishushu oopeny enasipa? Ore eton iriamariri te nkoitoi o ilo likintang'or to larishani, tetema toning'ore ninye eton ipuopuo, pee mikiyeataki enetii olaiguanani, nikintarasaki olaiguanani osikari, nikipik osikari korokoroni. Aajoki, mipuku aikata te ine mme italaa empisai nabayie.” Netii apa kulikae ootii ine ina kata ootolikitio Yesu eneikuna Pilato Ilgalilaya ootara metuata neitushulaki osarge oloo lasarri lenye. Newaliki ninche ajoki, “Ijojo pasa ai lelo Galilaya oota ng'ok aalang ilkulikae Galilaya pooki, eji amu neijia eikunaki enkitamioto? Ajoki ntae, mme neijia; kake te neitu iridudu sii ntae nindaayaya aaiko neijia.” Aashu doi lapa oora tomon o isiet ootuurokine enkaji naado te Siloam near metuata, ijojo pasa ninche larruok aalang ilkulikae pooki oomanya apa Yerusalem? Ajoki ntae mme neijia; kake te neitu irridudu sii ntae nindaayaya aaiko neijia. Neinosaki ena kitanyaanyukoto: “Eeta apa oltung'ani olng'aboli ouno te nkurma enye oo lng'anayio nelotu aing'orunye lng'anayio neitu etumie. Nejoki oloramat ilng'anayio, ‘Eji larin okuni taata alotu ake aing'orunye ele ng'aboli lng'anayio, nematumie, tudung'o tuuroi; oo pee etumuta enkop?’ Newaliki ajoki, ‘Tapala, lo kitok, te le ari sii taata, matuturoki napik entulugumi. Ore pee etoiwuo lng'anayio te le ari olotu naa sidai; kake te neitu, nidung auroo.’ ” Neaku eiteng'enisho apa ninye te nkaji nabo te nkolong e sabato. Netii enkitok naata oloirirua le lepori too larin tomon o isiet; neaku keirrugori meidim ataraposhunye. Ore pee edol Yesu ninye, neipot, nejoki, “Na kitok, kitooruoki entasato ino.” Neiteleiki nkaik enyena, neraposhunye te ina kata. Neisis Enkai. Kake etagore olkitok le nkaji e ntumo enkaraki naishiunye Yesu olorere te nkolong e sabato nejoki olorere, “Eetai nkolong'i ile naaishiaakino neasieki esiaai; wootu te nena olong'i meishiunyeki ntae, neme te nkolong e sabato.” Newaliki taa Olaitoriani nejoki, “Lo sunkuro! Keetae obo linyi lemelaku olkiteng anaa osikiria lenye to lale te nkolong e sabato, nerik aitook enkare? Paa ai meishiaakino ninye ena kitok, entito e Abraham nateena shetani larin tomon o isiet ai meishiaakino netalakuaki te nkolong e sabato.” Ore pee ejo neijia, nekurru lelo pooki ooing'orunore; neshipa olorere pooki too mbaa pooki e nkisisa naataasa ninye. Neitoki taa ajoki, “Kaji eikununo enkitoria e Nkai? Naa ainyoo pasa eitanyaanyukieki? Etiu anaa enkantererai e karadali natuuno oltung'ani te nkurma enye; nebulu aaku olchani, nemany intaritik ilng'osil lenyena aapik isinkin.” Neitoki ake Yesu ajoki, “Ainyoo pasa aitanyaanyukie enkitoria e Nkai? Etiu anaa enkisuijoi natudumua enkitok neitushulaki mboreitin uni e nkano, o metaba anaa neisuijoyu pooki.” Neimaa nkang'itie sapuki oo nkutiti neiteng'enisho eloito enkalo e Yerusalem. Nejoki oltung'ani obo, “Olaitoriani, ai kuti pasa lelo oojeu?” Nejoki ninche, “Entonyok eimu kutuk aji napirik; amu ajoki ntae, eyooki lkumok aaing'oru pee eimu nelaikino. Ore ake pee eaku einyo olopeny enkaji aiken kutuk aji, ninteruru aaitashoo te boo ioshiosho kutuk aji ijojo, ‘Olaitoriani, tabolu iyiook.’ Newaliki ninye ntae ajoki, ‘Mayiolo nanu ajo kaji ng'uaa.’ Nintokiki taa aajo, ‘Kitadaate nikitookishote o iyie, ninteng'enishe too nkoitoi ang naalala enkanas.’ Kake kejoki ninye ntae, ‘Ajoki ntae, mayiolo nanu kaji ng'uaa; entalamaki nanu, intae pooki oora laasak loo ntorrok?’ Ore te ine ninchirishiri nionyionyo lala, idolidolo Abraham o Isaak o Yakobo o loibonok le Nkai pooki etii enkitoria e Nkai nimanikiki ate etanang'ayioki ntae auluo. Naa kepuonu ltung'ana ooing'uaa enkilepunoto o endoyioroto, o looing'uaa kopikop o moikuape aatoni te mesa ti atua enkitoria e Nkai. Naa ng'ura, ketii ile siadi ooaku le dukuya, netii ile dukuya ooaku le siadi.” Ore te ina saa ake nepuonu embata oo Ilfarisayo, nejoki, “Inyo shomo te ne amu keyieu Herode nikiaar tua.” Nejoki ninye ninche, “Enchom entiaaki ilo barie, ‘Ng'ura, aaraa nanu loiriruani naishiunye iltamuoyia taata o taaisere o te nkolong e uni; naidip inkolati aainei. Kake ore etiu neijia enkoitoi ai ake asuj taata o taaisere o idia olong; amu meidimayu metaa kenang oloiboni le Nkai dikae neme Yerusalem.’ Ooi Yerusalem, Yerusalem naar iloibonok le Nkai ninang too soito lelo likirriwakini. Aikat aja pasa ejo aiturrur inkera inono te nebo anaa enkuku naiturrur inkuoo enyena ti abori inaipuko enyena nimiyieu. Ng'ura eitaa Enkai enkaji ino mijooni. Naajoki meekure kintoki ae kata adol o tejo, ‘Emayiana ilo olotu te nkarna o Laitoriani!’ ” Ore apa te sabato nabo nelo ninye ainos endaa te nkaji o Lfarisayoi obo kitok, te nkolong e nkiyeng'iyeng'ata, neing'or ninche aajur. Naa ng'ura, etii oltung'ani dukuya ninye otejia osesen. Neirorie Yesu lang'eni loo nkitanapat o Lfarisayo, ajoki, “Keishoruno pasa too nkitanapat meishiunyeki oltung'ani te nkolong e sabato anaa ai meishoruno?” Kake etigirate ninche. Neibung ilo tung'ani neishiunye, neisho meshomo. Nejoki ninche, “Ai ng'ae te ntae laa te neeta enkurrarru anaa olkiteng otusulakine olkesumet lemesaru nabo kata aitayu, oi aa te nkolong e sabato.” Nelaikino aatawaliki ina. Neitoki aliki enkitanyaanyukoto lelo ooitoomoni, etoduaa eneiko tenegelaki ate iwuejitin lorikan ooilepie, nejoki ninche, “Te nikimpotokini osirua le nkiama, mitonie ake ewueji enkanyit, melotu ake likae oipoto kitok likilang; nelotu ilo oipoto ntae, pokira oare, nikijoki, ‘Nchoo sii iyie ele tung'ani enetonie,’ nintoki iyie adou te nkurruna alo ewueji e abori. Kake ore iyie pee kimpoti, totona te wueji nebayie tukul, paa te nelotu ilo oitoomonisho nikijoki, ‘Olchore, ilepa sii iyie;’ nikiyanyitu esiamo pooki niboitare te mesa. Amu ore pooki oilepie kewan neitadouni, ore oloitadou kewan neilepieki.” Nejoki sii ninye ilo oitoomonisho, “Te nincho ltung'ana endaa aashu ntobiraki osirua, mimpot lchoreta linono o lalashera linono o lelo lo lmarei lino aashu lkarsisi le latia ino, pee mikiyooki sii ninche aaitoomon, nikilaaki enda apa nintaasa. Kake ore ti nintobir iyie osirua, mpoto laisinak, o ltarrushi o lng'ojiniaa o lmodook, naa eikimayiani amu mikindim ninche aatalaaki iyie. Aikilaakini kenya ake te mpiunoto e lelo supati.” Ore pee ening ina obo le lelo ootoni te mesa, nejoki, “Emayiana ilo oyooki adaa te nkitoria e Nkai.” Kake etiaka ninye ilo, “Etii apa oltung'ani oitobira osirua kitok, neipot iltung'ana kumok, ore pee ebau enkata e ilo sirua neirriwaa olaisiaayiani lenye metiaaki lelo ooipotoki, ‘Wootu; amu eirrag pooki toki!’ Kake eiterutua pooki aaitaakuuk. Nejo ole dukuya, ‘Ainyang'ua enkurma, naa kalo ake adol; aatasayia tung'ueikiaki nanu.’ Nejo likae, ‘Ainyang'ua nanu lmong'i tomon naa kalo pee alo asipu; aatasayia tung'ueikiaki nanu.’ Nejo likae, ‘Enayamie enkitok, nemaidim naa aeu.’ Kaae, nelotu olaisiaayiani aliki olkitok lenye nena. Negoro olopeny enkaji nejoki olaisiaayiani lenye, ‘Tasiooi shomo nkoitoi oo nkaulele e ina anasa, toriku laisinak o ltarrushi o lmodook o lng'ojiniaa.’ Nejoki ilo aisiaayiani, ‘Lo kitok, eidipaki aataas ina natejo, neton ake meiputa enkaji.’ Nejoki olkitok ilo aisiaayiani lenye, ‘Shomo nkoitoi sapuki o nkutiti, o lkirinen taaru ltung'ana meetu, o meiputayu enkaji ai. Amu ajoki ntae, meishiamisham hoo obo le lelo apa ooipotokoki endaa ai.’ ” Ore eiriamariyie olorora kitok, neibelekenyakino nejoki, “Ore pooki ng'ae olotu enatii lemeibayu menye o ng'otonye, o enkitok enye o nkera, o lalashera o nkanashera, ee o ebaiki enkorrok enye, nemeidim ataa oloiteng'eni lai. Ore pooki lemenap osalaba lenye naairukurukore, nemeidim ataa oloiteng'eni lai. Amu kalo pasa linyi, laa te neyieu neshetu oltalet, lemeng'as aton aikenisho pee eyiolou te naa keidip intokitin naata? Pee meaku ake, ore eidipa aitamanyu nelaikino aidipa, nesukeny pooki ng'ae odol, ejo, ‘Eiterua ele tung'ani ashetisho, neitu eidip.’ Anaa kalo aiguanani oyieu nerasaki likae aiguanani to larrabal, eitu eng'as aiguana te naa keirish ilenyena iip tomon, iip tikitam le lido oarare? Naa te nemeirish, ore eton eitu enyiku olikae, neirriwaki lkiliku aikilikuanu mbaa naaitayu osotua. Neijia naa etiu, ore ake olinyi lemeibayu pooki toki naata nemeidim ataa olaiteng'eni lai. “Ai sidai emunyan; kake amaa te netuyiatuyu emunyan kerrinyokinoyu enkisukut enye? Meitoki aata tipat te nkurma nemeeta to lchala; keiturrarri ake. Oloata nkiyiaa naaning'ie inchoo ening.” Ore lasotok le kodi o laasak loo ng'ok neaku kepuonu aanyikaki aainining. Neing'unyung'uny Ilfarisayo o lasirak ejo, “Keitoomon ele tung'ani ilaasak loo ng'ok neng'arie endaa.” Ore te nkaraki ina, neliki ninche ena kitanyaanyukoto: “Kalo te ntae laa te neeta intare iip pee eimin nabo, lemeing'uaa kunda ntomoni naaudo ti ong'ata, alo aing'oru ina nabo naimina, o menoto ade? Ore pee etum, neiteleiki oloililai, eshipa. Ore pee ebau ang, neiturrurru ilchoreta lenyena o elatia enye ajoki ninche, ‘Matishipata, amu anoto enaduoo ker ai naimina.’ Ajoki ntae, neijia etiu, ai kitok oleng enchipai natumi te shumata to laasani loo ng'ok obo oirridu alang iltung'ana ntomoni naaudo o naaudo supati lemeetayie ninche tipat enkirridunoto. “Anaa kaa kitok ina, naa te neeta impisai tomon e nkosholai, pee eimin nabo, nemeinok oltaa neor enkaji neing'oru ade o menoto? Ore pee etum, neiturrurru nchorueta enyena o elatia ajoki, ‘Matishipata amu anoto enkosholai ai naimina.’ Ajoki ntae, neijia etiu, keshipa sii lmalaika le Nkai to laasani loo ng'ok obo oirridu.” Nejoki, “Etii apa oltung'ani oata layiok aare; nejoki oloti menye, ‘Papa, nchooki nanu masaa naaku inaainei.’ Neoriki pokira masaa enyena. Ore pee elusoo nkuti olong'i, neiturrurru ilo oti masaa pooki naata nemir newalu mpesai nelo enkop nalakua, nelo aishang'itie masaa enyena te ine te nkiwushuush. Ore pee eidip atumuta pooki toki, nelotu olameyu sapuk te ina kop, neiteru atir esumash. Ore te nkaraki ina nelo aibung'are olkarsis obo le ina kop, neirriwaa ilo shoo meshomo airrita lbitiro. Neaku nena kinyat naanya lbitiro eng'uar pee enya; nemeetae oloisho toki. Kake ore pee eirrash kewan nejo, ‘Kaja pasa laisiaayiak le papa ooata endaa nanya neleku, kake eji nanu ele oya olameyu te ne! Kainyototo alo enetii papa, najoki, “Papa, ataasa engoki te Nkai o te dukuya iyie, meekure eishiaakino naaji kara enkerai ino; ntaaki anaa abo le kulo aisiaayiak linono.”’ Neinyototo nelotu enetii menye. Kake ore eton elakua, nedolu menye neing'urrie, nekuetiki aibung ang'utut. Nejoki olayioni menye, Papa, ataasa eng'oki te Nkai o te dukuya iyie; meishiaakino naaji kara enkerai ino. Kake etiaaka menye laisiaayiak lenyena, Entasieku olkila oisul, enchopoki; naa entipik olgisoi enkaina enye, ninchopokiki namuka nkejek enyena; entereu olkiteng opir enteyieng, ematishipata emating'idata; amu ore ena kerai ai ketua apa, nenyaaka apiu. Neimina apa, nenyaakaki aatum. “Netiooyo ina kata olayioni lenye botor te nkurma; ore pee elotu anyikaki ina aji, nening'oo osinkolio eranyishoi. Neipot olaisiaayiani obo aikilikuan enaasitai. Nejoki, ‘Eewuo olalashe lino, neyiang'aki papaai lino olashe opir, amu enoto menye eserian.’ Kake negoro neany ejing'u. Nepuku menye ailejilej. Kake etawalikia ninye menye ajoki, ‘She, aaisiaayia nanu iyie kulo arin kumok, neitu ai kata aany aas enikijoki, neitu ai kata kincho nanu olkuoo ninye, pee atum atishipayu tenebo ilchoreta laainei. Kake ore pee elotu ele ayioni lino, otumutaka masaa inono mulayoni, niyieng'aki olkiteng opir.’ Nejoki, ‘Enkerai ai, itii oshi ake iyie ene natii naa enino entoki pooki naata. Keishiaakino pae duoo niking'ida, nikishipa amu ketua apa ele alashe lino, neishu taata, eimina apa nenotoki.’ ” Neitoki Yesu ajoki ilooiteng'eni lenyena, “Etii apa oltung'ani karsis oata olaing'urani le nkaji, neitang'ori ilo aing'urani aajo keishang'itie intokitin olkitok lenye. Neipotu ninye nejoki, ‘Kaa bae ena natoning'o nikimpirta iyie? Inkenakaki intokitin pooki aainei ning'orita.’ Nejo olaing'urani ti atua kewan, ‘Kaji aiko, netaa aaoru olkitok lai enking'urata e siaai? Nemaata engolon naturishore, nemaaisho isura aomonisho. Atayiolo enaas, pee aang'amu ltung'ana too nkajijik enye te naaoruni enking'urata e siaai.’ Kaae, neipot lelo pooki ooatayie olkitok lenye silen maa obo, nejoki oloiturukuo, ‘Kebaa esile niata o lkitok lai?’ Nejo, ‘Iltuleta iip le ilata.’ Nejoki ninye ilo, ‘Tudumu empalai ino e sile, totona tasioki ngero onom.’ Neitoki ajoki likae, ‘Kebaa esile niata iyie?’ Nejo, ‘Mboreitin iip e nkano.’ Nejoki ninye ilo, ‘Tudumu empalai ino e sile ngero ntomoni isiet.’ Neisis olkitok ilo aing'urani aimonkoni amu kalamas; amu ng'eni nkera e na kop too mbaa enye aalang nkera e wang'an. “Najoki intae entaiki ate lchoreta te kuna masaa enkop nemesinya, paa kore pee emuta neng'amari intae te nenen neebikieki ntarasi. “Ore ilo oisiligayu too nkuti neisiligayu sii too nkumok ore olemeisiligayu too nkuti nemeisiligayu too nkumok. Amaa naa te nimisiligayuyu too masaa nemesinya, aing'ae pasa likintoki aisiligie imasaa e dede? Naa amaa te neitu iaku oloisiligayu too neeiking'a, ai ng'ae likincho nena naara ninono? Meetae osinka oidim aisiaayia lkituaak aare; eibayu ake obo nenyorru olikae, aashu eibung'are obo nemenaa olikae. Mindimidimi sii intae aaisiaayia Enkai o masaa.” Ore pee ening Ilfarisayo, iloonyor naa masaa neikordod Yesu. Kake etiaka Yesu, “Ntae lelo ooitaakuno irara asipak too ltung'ana, kake eyiolo Enkai ltauja linyi; amu ore ina nailepie ltung'ana naa olminong too nkonyek enyim Enkai. “Eetae nkitanapat e Musa o loibonok o metabaiki Yohana; ore ebaiki ina kata nelikiori lomon supati le nkitoria e Nkai, nediding'akino pooki ng'ae te ngolon. Kake elelek pee eish shumata o enkop alang te nelau tipat o ltipoto obo loo nkitanapat e Nkai. “Ore oltung'ani ake pooki oituraa enkitok enye neyam ai keloloito. Ore oloyam enkitok natung'uayie olmoruo lenye naa keloloito.” Nejoki, “Etii apa oltung'ani karsis, oishop olkila onyokie o loibor, nenya olkar nkolong'i pooki. Neirrag te kutuk aji e nkaji enye oltung'ani aisinani oomonisho oji Lasaro, oata mpaldakani oyieu neitaraposh kewan too mbelat naasulunye te mesa o lkarsis; neaku kepuonu ldiein aamej mpaldakani enyena. Neye ilo aisinani nenap ilmalaika aaya olgoo le Abraham. Neye sii ninye olkarsis nenukari; ore etii Yehanum, eitamei, nedumu nkonyek, nedol Abraham elakua netii Lasaro olgoo lenye. Neipotisho ajo, ‘Papa Abraham, ing'urrieki, irriu Lasaro meitadoiki olkimojino lenye enkare naaitong'aki olng'ejep lai; amu aainosita ena kima.’ Kake etiaka Abraham, ‘Nakerai, tadamu nchere inoto olkar loo mbaa pooki inchu te nkop, ore Lasaro nenoto sii ninye osina, kake ore taata neitishipi etii ene, nitii iyie osina. Naa ore etii kuna pooki, etipikaki eng'erem narish iyiook o intae, pee melang'u ole naalo ine nemelang'u oleine alotu ene nikitii.’ Nejoki, ‘Aatasayia naa, papa, irriwai ninye metaa olkilikuai te nkang e papa, amu imiet ilalashera laata, metoliki pee mepuonu sii ninche ene wueji o somit.’ Kake etiaaka Abraham, ‘Eeta Musa o loibonok le Nkai inchoo ninche ening lelo.’ Nejoki, ‘A'a papa Abraham mme neijia; te netum olkilikuai loolooinguaa ilootuata, neirridu.’ Nejoki ninye, ‘Te nemening Musa o loibonok le Nkai, nemening sii ninye oloing'uaa lootuata.’ ” Nejoki Yesu ilooiteng'eni lenyena, “Meeta nchere mepuonu ntemat e nkarrueisho; kake ee kake aiyia ilo laa ninye eimu! Enaikash te neenikini ninye osoit oiutuutishoreki emurt nenang'akini atua enaiposha, alang te neitapong'oo nabo e kuna kutiti. Entodol ate; te neitarruoo olalashe lino, irorie, ore pee eirridua, tapalaki; naa te nikinyala nabo, olong kat naapishana, nikingil kat naapishana ajoki, ‘airridua’, nipalaki ake.” Nejoki ilooiteng'eni, “Olaitoriani, toponiki iyiook enkirukoto!” Nejoki Olaitoriani, “Te naa iatata napaji enkirukoto naba anaa enkantererai e karadali, indimidimi aatiaaki ele ng'aboli, ‘Tadotunye, tuunokinoyu enaiposha.’ nening intae. “Keetae obo linyi oata osinka oturisho aashu oloirritisho, ojoki te nelotu eing'uaa enkurma, ‘Wou nabo kata totona tadaayu?’ Anaa keng'as ake ajoki, ‘Tang'asa taa ntobirakaki endaa, nirretena nikiyaki, ore aidipa atadaayu naokisho; nilo sii iyie adaa niokisho?’ Ijojo pasa keisho ilo sinka enashe enkaraki nataasa enaitanapaki? Neijia itiuu sii intae, ore pee ndipidipi aataas inaaitanapaki intae pooki, entejo, ‘Mikira sinkan le tipat; kitaasa ake iyiook enaishiaakino nikiaas.’” Neaku ore te nkoitoi elo Yerusalem neim erishata e Samaria o Galilaya. Ore ejing enkang nabo, nenang'are ltung'ana tomon ooata enkeeya oo lbolot neitashe ninche te nelakua nebuaku aajo, “Olaitoriani, Yesu, ing'urrie iyiook.” Ore pee edol ninye ninche nejoki, “Enchom entoduaai ate too lapolosak.” Ore epuoito neishiu nesika. Ore pee edol obo lenye ajo eishiunyeki, neshukunye eisisita Enkai to ltoilo sapuk; neirrabalakino enkop too nkejek e Yesu, ejoki ashe. Naa Osamariyiai ninye. Nejoki Yesu, “Ai mme tomon duoo ilaishiunye metisikata? Koree lkulikae pokira ooudo? Kaji etiu pee eitu etumi obo oshukunye aisho Enkai enashe meteleku ele leeiking'a?” Nejoki ninye ilo, “Inyo shomo; kintajewuo enkirukoto ino.” Ore pee eikilikuan Ilfarisayo enkata nalotu enkitoria e Nkai, newaliki ajoki ninche, “Melotu enkitoria e Nkai too lmonek oolioo; nemeyookini aajo, ‘She, nena natii ene!’ Aashu ‘Neidia!’ Amu ng'ura, etii enkitoria e Nkai atua intae.” Nejoki Yesu ilooiteng'eni lenyena, “Kepuonu inkolong'i naa ing'uarring'uarra te ni idolidolo enkolong nabo e Nkerai e Tung'ani, nimidolidolo. Naa kejokini intae, ‘Ng'ura ende!’ Aashu, ‘Ng'ura ene!’ Emipuo ake emirubare. Amu ore enatiu enkiwuang'ata naimerlelu neitawang embata nabo e shumata o metabaiki enkae, neijia etiu Enkerai e Tung'ani te ina olong enye. Kake ore eitu ebau ine eng'asi ake aainyal too nkumok neany iltung'ana le na kata. Ore anaa enatiu apa too nkolong'i e Noah, neijia etiu too nkolong'i e Nkerai e Tung'ani. Kedaai apa, neokishoi, neyamishoi, neishoori meyami, o meeu ina olong natijing'a Noa atua emeli, nelotu oloirrag le nkare nemut ninche pooki. Neijia sii apa etiu too nkolong'i e Lot aa, kedaae apa, neokishoi, neinyiang'ishoi, nemirishoi, neunishoi, neshetishoi, kake ore ake ina olong natupukuo Lot aing'uaa Sodom neshau enkima oo soito le nkima eing'uaa shumata neidaikie ninche pooki. Neijia sii etiu ina olong naibalunyeki Enkerai e Tung'ani. “Ore te ina olong, inchoo ilo otii shumata enkaji, oata ntokitin ti atua, milotu ake ajo aya; ore sii ilo otii enkurma mirrinyo ake. Entadamu enkitok e Lot. Ore pooki ng'ae ojo agolie enkishui enye neiminie, kake ore pooki oiturraa enkishui enye neitopoki. Ajoki intae, Ore te ina kewarie keirrag ltung'ana aare erruat nabo; neyai obo, neing'uari olikae. Neiutuutisho nkituaak are te nebo to soit obo; neyai nabo neing'uari enkae. [Netii ltung'ana aare enkurma; neyae obo neing'uari olikae.”] Nejoki ninche ninye, “Olaitoriani, ae ti aji?” Nejoki, “Enetii empopok, eiturrurrokino lmotonyi.” Neliki Yesu ninche enkitanyaanyukoto; eitodol inchere eishiaakino ake neomon anaa ake nemenauru. Nejoki, “Eetae apa te nkanasa nabo olaiguanani lemeure Enkai nemeshilaa tung'ani; neetae enkoliai te ina anasa nalotu anaa ake enetii ajoki, ‘Tomituoki sii ake te le mang'atinta.’ Neng'as aany; ore te siadi nejo openy, ‘Ore hoo nemaure Enkai nemaikenu tung'ani, kake ore amu aateeka ena oliai, kamitu pee maaitoki aisomit te na lotunoto enye.’ ” Ejo Olaitoriani, “Entoning enajo ilo aiguanani arruoni. Paa aijojo memitu ninye Enkai ilgelunot lenyena, ooishiraki dama o kewarie? Ijojo keimutie ti alo ninche? Ajoki intae kemitu asioki. Kake amaa eyia, keinepu pasa Enkerai e Tung'ani te nelotu, eetai enkirukoto te nkop?” Etolikio sii ena kitanyaanyukoto lelo ooisilig ate aajo supati te Nkai nemen ilkulikae, “Eilepa ltung'ana aare aapuo aaomon te nkaji e Nkai, naa Olfarisayoi obo naa olasotoni le kodi olikae. Neitashe Olfarisayoi neomon te nkorrok enye makewan ejo nji, ‘Na Ai, aaisho enashe amu matiu nanu anaa ikulikae tung'ana, matiu anaa laikonyak ilaimonkok, iloololoito, nematiu sii anaa ele osotu kodi. Kat are aen kewan aitupukoo te wiki, naishooyo ematua e tomon e pooki toki natum.’ Kake eitasho ninye olasotoni le kodi, te nelakua nemeshumu ninye nkonyek enyena aing'orie shumata kake olgoo eoshiosh, ejo, ‘Na Ai, ing'urrieki nanu olaing'okoni!’ Ajoki intae, etadoyie ele tung'ani alo enkaji enye eishooki esipata alang ilo likae; amu ore pooki ng'ae oilepie kewan neitadouni, ore oloitadou kewan neilepieki.” Neyakini sii ninche nkera kutiti pee etum aiseyie, ore pee edol ilooiteng'eni ina neisikong ninche. Kake eipotuo Yesu enetii nejoki, Enchoo nkera epuonu enatii emimitiki; amu enoo naatiu anaa kuna enkitoria e Nkai. Edede, ajoki intae, ore pooki ng'ae lemeng'amu enkitoria e Nkai anaa enang'amu enkerai nemejing katukul. Neikilikuan oltung'ani obo oitoreisho ajoki, “Laai teng'enani supat, kaji aiko pee ajung enkishui oo ntarasi?” Nejoki Yesu ninye, “Ainyoo pee kijo kara supat? Meetae hoo obo supat leme Enkai ake. Iyiolo iyie nkitanapat. ‘Miloloito, miar likae metua, mipurrisho, minteeniki likae elejare iyanyita minyi o ng'utunyi.’ ” Nejoki ninye, “Aibung'a kuna pooki ebaiki apa ara oti.” Ore pee ening Yesu ina, nejoki, “Kitong'orikia nabo toki. Timira pooki toki niaata tooriki laisinak, naa itum olchumati te shumata; wou taa tusujuaki.” Kake ina ake etoning'o neisinanuo oleng, amu karsis apa naleng. Neing'or Yesu ninye nejo, “Egol taa duoo to ltung'ani oata imasaa pee ejing enkitoria e Nkai! Amu elelek te ntames pee eim enaudoto o ltidu alang oltung'ani karsis te nejing enkitoria e Nkai.” Nejo lelo ootoning'o, “Ai ng'ae naa doi eitajeuni?” Kake etejo, “Ore enemeidimayu too ltung'ana keidimayu te Nkai.” Nejo Petero, “Ng'ura, kitung'uaitie iyiook inkang'itie ang nikisuj iyie.” Nejoki Yesu ninche, “Edede, ajoki intae, meetae oltung'ani otung'uayie enkaji, aashu enkitok aashu, lalashera, aashu ntoiwuo aashu nkera, te nkaraki enkitoria e Nkai, lemetum nkatitin kumok taata te na kata, ore te idia kata nalotu netum enkishui oo ntarasi.” Nerik lelo tomon o aare enkilepata, nejoki, “Ng'ura, Yerusalem kilep aapuo, naa ore mbaa pooki naatisiraki naaipirta Enkerai e Tung'ani too loibonok le Nkai naa keitabari. Amu keitarasakini ninye Iloreren nesurdaanyi neitaasi enesulare nenotakini; neoshi ninye neari metua, ore te nkolong e uni nepiu.” Kake eitu hoo ening'u embae nabo e kuna; keisudoro ena bae te ninche, neaku eitu ening'u enajoki. Ore pee enyikaki Yeriko, netii oltung'ani modooni oton te mbata e nkoitoi aomonisho; ore pee ening olorere egiroo aapuo, neikilikuanisho ajo ainyoo ina. Nejokini, “Yesu le Nasaret oimita ene.” Nebuaku ajo, “Yesu, olayioni le Daudi, ing'urrieki nanu!” Ore lelo ootii dukuya ninye nebuaaki metigirayu; kake etabuakua ninye aitulus oleng, “Ara Daudi, ing'urrieki!” Neitashe Yesu nejo metorikuni enetii; ore pee enyikaki, nejoki, “Kaa iyieu naaitaas?” Nejo, “Olaitoriani, kayieu nadolishoyu.” Nejoki Yesu ninye, “Todolisho; kinchiunye enkirukoto ino.” Nedolishoyu nabo kata nesuj ninye, eisisita Enkai; ore lelo tung'ana pooki, pee edol ina, neisis Enkai. Ore pee ejing Yesu Yeriko, nepolos alo. Netii oltung'ani oji Sakayo; naa olkitok loo lasotok le kodi, naa karsis. Neing'oru eneiko pee edol Yesu ajo ai ng'ae, nelaikino, te nkaraki olorere, amu dorrop ninye. Neipirri aituruk neked o lng'aboli pee edol, amu ine wueji, eim Yesu. Ore pee ebaiki Yesu ine neraposhu nkonyek nejoki, “Sakayo, tasieku tadou; amu enkaji ino ade taata ajing.” Nesieku taa nedou neng'amu te ng'ida. Ore pee edol ninche neing'unyung'uny pooki ejo, “Eshomo meitoomoni te nkaji o ltung'ani aing'okoni.” Neinyototo Sakayo nejoki Olaitoriani, “Ng'ura, Olaitoriani, aitorit aor imasaa aainei naisho laisinak naa te neetae hoo oltung'ani latooruo toki enye, te nkeleekisho, nalaaki katitin ong'uan.” Nejoki Yesu ninye, “Eewuo taata ena olong enjeunoto ena aji, amu ole Abraham sii doi ninye. Amu eewuo Enkerai e Tung'ani aing'oru pee eitajeu ilooimina.” Ore einining'ito ltung'ana nena, neitoki Yesu aliki ninche enkitanyaanyukoto, amu etinyikaka ninye Yerusalem naa kejo ninche etaa keibalunyeki enkitoria e Nkai te ina kata. Ore te nkaraki ina, nejoki, “Eshomo olaiguanani obo kitok enkop nalakua meishori enkitoria neshukunye. Neipot isinkan lenyena tomon, neisho ake obo empisai e sahabu nejoki, ‘Etaasishore o maeu.’ Kake ore enkaraki naiba ltung'ana le ina kop enye ninye, neitusuj olkilikuai ejo, ‘Mikiyieu neitore iyiook ele tung'ani.’ Ore pee eitu, eidipa atang'amai enkitoria, neipot lelo sinkan lenyena apa ootung'eikia impesai, meetu, pee eyiolou dupoto nanoto te nkinyang'a. Neituruku ole dukuya, ejo, ‘Olaitoriani, enoto ropiyiani inono tomon kulie katitin tomon.’ Nejoki, ‘Intobira, osinka supat! Ore enkaraki nitaa oloisiligayu too nkuti oleng, iyooki aitore nkanas tomon!’ Nelotu ole aare, ejo, ‘Olaitoriani, enoto ropiyiani inono kulie tomon katitin imiet.’ Nejoki ilo, ‘Intore sii iyie nkanas imiet.’ Neitoki alotu likae sinka ejo. ‘Olaitoriani, nena empisai ina e sahabu naisudoyie apa te nkarasha; amu iyie aturia, amu ira oltung'ani ogol pukunoto; odumu ineitu irragie, nidung neme iyie otuno!’ Nejoki ninye, ‘Ekaadung'oki naa enkiguana te nkiroroto ino makewan, lo sinka torrono! Iyiolo apa ajo kara oltung'ani ogol pukunoto, odumu ineitu airragie, nasotu ineitu aun? Kaji naa etiu pee eitu ishum impesai aainei te mbenki, pee te na lotu, natum nena aainei o naaiu?’ Nejoki lelo ooitashe te ine, ‘Entooru ina pisai e sahabu naata ninye enchoo elde oata tomon.’ (Nejoki ninche ninye, ‘Olaitoriani, keeta ninye ropiyiani tomon katitin tomon!’) Nejo ninye, ‘Ajoki intae, ore pooki ng'ae oata keponikini aaisho; kake ore elde lemeeta, keoruni ninye ina kiti naata. Kake ore ninche kulo mang'ati laainei, apa lemeyieu naitore, eyau entaar metuata tene natii.’ ” Ore pee eidip atejo neijia, negiroo alo ailepaki Yerusalem. Neaku ore pee enyikaki Betfage o Betania, to ildoinyo oji oloo Loirienito, neirriwaa ilooiteng'eni lenyena aare, ejo, “Enchom enda ang naipirare intae, ore pee ijing'ijing'i nidolidolo enkurrarru naena, neitu ae kata eked oltung'ani; ore pee ilakuku nireuu ene. Naa te neikilikuani intae aajoki, ‘Oo pee ilakuku?’ Entejo nji, ‘Olaitoriani oata enadung'ie.’ ” Nepuo lelo ooirriwayioki neinepu etiu anaa ina natiaaka. Ore elaku olkurrarru, nejoki lopeny, “Kaji etiu pee ilakuku olkurrarru?” Nejo ninche, “Olaitoriani oata enadung'ie.” Nerewaki Yesu, ore pee eirotoki enkurrarru nkilani enye, neitaked Yesu, ore elo ekedito osikiria, neisalaash ninche nkilani enye te nkoitoi. Ore pee enyiku, to loshong'ishong'i lo ldoinyo loo Loirienito, neiteru aang'ida olorora pooki oo looiteng'eni neisis Enkai to ltoilo sapuk too nkiaasin e ngolon naatoduaa, ejo, “Emayiana Olaiguanani olotu te nkarna o Laitoriani, Eseriani te keper naa enkitoo te Nkai!” Nejoki kulikae loo Lfarisayo ootii atua olorere, “Olaiteng'enani, intigira ilooiteng'eni linono.” Newaliki ajoki, “Ajoki intae, ore te negira kulo nebuaku ninche kulo soito.” Ore pee enyikaki ina anasa nedol neishiraki; ejo, “Ooi te naa iyiolo sii ake te le kekun imbaa naayau eseriani! Kake ore taata keisudoro medol inkonyek inono. Amu kepuonu nkolong'i, nikintamuat lmang'ati linono oolkerenket, nikipunyaki too nkaloli pooki, nikinang'ie enkop, iyie taa, o nkera niata ti atua, nemeetae osoit obo ti atua iyie oing'uari eiteleikino olikae; amu eitu iyiolou olkekun likibaikinye Enkai.” Nejing enkaji e Nkai neiteru aaraa lelo oomirisho ejoki ninche, “Etisiraki aajo, ‘Ore enkaji ai keaku ene nkomono;’ kake intaa intae enkapune oo laisimak.” Neiteng'enisho anaa ake te nkaji e Nkai. Neing'oru ilapolosak kituaak, o lasirak o ltung'ana kituaak le ilo orere pee eidaikie ninye; kake etalaita enaas, amu eteenikinote ltung'ana pooki irorei lenyena. Ore nabo olong, eiteng'enita ltung'ana nelikioo lomon supati te nkaji e Nkai, nepuonu lapolosak kituaak o lasirak o lpayiani enetii nejoki ninye, “Toliki iyiook ae te ngolon e ng'ae ias iyie kuna baa, ae ng'ae likincho ena golon?” Newaliki ninye ajoki, “Kaikilikuan sii nanu intae embae nabo; entolikioki, amaa apa enkibatisa e Yohana ai shumata eing'uaa, anaa ltung'ana?” Neiguana maate ejo, “Amaa tenikijo, ‘Shumata eing'uaa’, nejoki iyiook, ‘Oo naa pee eitu irukuruku?' Kake ti nikijo, Iltung'ana eing'uaa,’ nenang iyiook kulo tung'ana pooki too soito; amu eyiolo too ltauja aajo oloiboni le Nkai Yohana.” Newaliki aajoki, mikiyiolo eneing'uaa. Nejoki Yesu ninche, “Maliki sii nanu intae eneing'uaa engolon naasie kuna baa.” Neiter aliki olorere ena kitanyaanyukoto, “Etuno oltung'ani enkurma oo lng'anayio, neisho laramatak meisilenoi nelo ai kop nebik enkata naado. Ore pee ebau enkata, neirriu osinka airriwaki ilaramatak, meishoo ematua oo lng'anayio le ina kurma; kake eidong'o lelo ooisilenoitie ninye nerriny too nkaik naarook. Neirriwaa likae sinka; near sii ilo nesul, nearaa too nkaik naarook. Neitoki ake airriwaa oli okuni, nepik ilbaa ilo nearaa ong'ata. Nejo olopeny enkurma ina oolng'anayio, ‘Kaji aiko? Olayioni lai kirotet airriwaa; kebaiki neyanyit ninye.’ Kake ore pee edol lelo ooisilenoitie ninye, nejokino maate, ‘Ele doi olajung'oni, mataar pee eaku enaang enjung'ore.’ Nearaa auluo enkurma near metua. Kaa pasa kenya eitaasi ninche olopeny enkurma? Kelotu aidaikie lelo ooisilenoitie neisho kulikae ina kurma.” Ore pee ening ninche ina nejo, “Taba meiwuang'a!” Kake eing'ura Yesu ninche nejo, “Kaa naa ena nasira, ‘Ilo soit otanyaita lashetak otaa ole lukunya o lmairroto?’ Ore pooki ng'ae osulakino ilo soit negiligil aitaa mpurdat; kake ore ake olourokino ninye nerrar tukul.” Neiteru lasirak o lapolosak kituaak aajo matipik inkaik te ina saa, kake etureita olorere; amu etoduaa aajo ninche eipirie ina kitanyaanyukoto. Metaa neing'or ninche ninye neirriwaki ilaikeernok ooitaakuno supati te Nkai, pee etum aawaita kuna naajo, netum aaitarasaki enkitoria o enkiguana o lbalusui. Neikilikuan ninche aajoki, “Olaiteng'enani, kiyiolo aajo iro iyie ninteng'enisho too sipat, metii enyorrakino, kake iutu iyie enkoitoi e Nkai te sipata. Keishiaakino neishori Kaisari kodi ana aimeishiaakino?” Kake etayiolo ninye enkeleekisho enye, nejoki, “Entoduaaki empisai. Ai ng'ae esirakino naa kole ng'ae olkigeroto oata?” Nejoki, “Ole Kaisari.” Nejoki ninche, “Enchoo naa Kaisari inaara ine Kaisari, ninchosho Enkai inaara ine Nkai.” Nelaikino aaibung'a ninye etii olorere te nena naatejo; kake eing'asiate ninche te nena naawalu negira. Nepuonu Sadukayo enetii, lelo apa oojo meetae empiunoto, neikilikuan embae nabo, aajo, “Olaiteng'enani, etisiraka iyiook Musa nchere te neye olalashe oltung'ani, oata enkitok nemeeta nkera, neya ake ilo tung'ani ina kitok pee eiki olalashe nkera. Eetae apa ilalashera oopishana; neyam ole dukuya enkitok, neye meeta nkera; neiko neijia oli aare, neyam sii oli okuni, neiko neijia pokira oopishana neitu eing'uaa nkera neye. Ore te siadi neye sii ninye enkitok. Amaa kenya te mpiunoto, etiu neijia, keaku ene ng'ae ina kitok? Amu eyama pokira oopishana ninye.” Nejoki Yesu ninche, “Eyamisho neishoori meyami nkera e na kata; kake ore lelo oishiaakino nebaiki ina kata nebaiki sii empiunoto oo lootuata meyamisho nemeyami, amu metiooyo eitoki aaye, amu etiu anaa lmalaika neaku nkera e Nkai, aaku nkera e mpiunoto. Kake ore nchere epiu ilootuata, ketuutua ninye Musa, te ine neigerore mbaa osanag teine neipotie ninye Olaitoriani ajo Enkai e Abraham naa Enkai e Isaak, naa Enkai e Yakobo. Mme naa Enkai oo lootuata, kake enoo looishu; amu ninye eishuyie pooki.” Newal embata oo lasirak aajo, “Olaiteng'enani, iroro aitobiraki.” Amu eitu eitoki aaitieu aaikilikuana ae bae. Kake etiaka ninye ninche, “Kaji etiu pee eji Kristo enkerai e Daudi? Amu etejo Daudi openy te mbuku e Olkerempe le Nkai, ‘Etiaka Olaitoriani Olaitoriani lai, Totona te nkaina ai e tatene o metaba anaa naitaa ilmang'ati linono olorika loo nkejek inono.’ Metaa eipoto Daudi ninye ajo Olaitoriani; kaji eiko pee eitoki aaku enkerai enye?” Nejoki ilooiteng'eni lenyena ening'ito olorere pooki, “Entorrip ate too lasirak, oopuaya eishopito lkilani ooado, nenyor neirorokini too neeimishoreki nenyor ilorikan sidain aaisul ti atua nkajijik e ntumo, o wuejitin enkanyit too mashoi, oonya aamut nkajijik oo nkolia neitaakuno neitoodor enkomono e Nkai. Etum ninche enkiguana narrish oleng.” Neshumu Yesu nkonyek nedol ilkarsisi eitadoiki nkishorot enye osanduku oshumishoreki; nedol sii enkoliai aisinani eitadoiki ielai are naanyokie. Nejo, “Edede ajoki intae, ena oliai aisinani natipika aisul too lkulikae pooki; amu eishorutua pooki te nkumoi oo naata, kake eishorua ninye to sina lenye pooki toki naata.” Ore eimaki kulikae enkaji e Nkai, eneikunaki teneikodi too soito sidain o too nkishorunot, nejoki, “Ore anaa kuna tokitin nidolitata, kepuonu nkolong'i nemeitokini aata osoit obo oiteleikino olikae lemesulakini enkop.” Neikilikuan aajoki, “Olaiteng'enani, kanu eaku kuna baa, naa ainyoo olmonekie outu ajo etaa ebau?” Nejo, “Entodol meitapong'ori intae; amu kepuonu lkumok te nkarna ai, ejo, ‘Nanu ilo? Etinyikua enkata!’ Emisuj intae ninche. Naa ore pee ining'ining'i njorin o long'oling'oli, emiureisho, amu eituruku ake nena aatiu neijia, kake melotu enkiting'oto e nkop nabo kata.” Nejoki ninche, “Kedumakino olosho likae osho, nedumakino enkitoria enkae kitoria; nelotu olokirikiri le nkop too wuejitin kumok, nelotu olameyu o olmeitai too wuejitin kumok, naa kepuonu ntabo naaitureisho o lmonek ooing'uaa shumata, kake ore eton eitu ebau nena pooki keibung'i intae, neinyali, neitarasakini intae nkajijik e ntumo e korokoroni, nerikokini intae laiguanak o lbalusuni te nkaraki enkarna ai. Neaku te intae enkata nimbalielie enkirukoto inyi. Entumut ena nabo too ltauja linyi nchere, emidamu eitu ebau enkata aajo kaa kiwal; amu nanu oisho intae enkutuk o eng'eno, nemeetae hoo obo le lelo mang'ati linyi oidim airisha aashu ewal. Keitarasaa intae intoiwuo o lalashera o ltung'ana lo lmarei o lchoreta, naa keari kulikae linyi metuata; neibayu intae pooki te nkaraki enkarna ai. Kake meimin ninye olpapita obo loo lukuny inyi. Kake te ng'iriata inyi itumutumu enkishui. “Kake ore pee idolidolo Yerusalem etamana mpuot, entayiolo aajo etinyikua emutata enye. Ore ina kata lootii Yudea esikaki ldoinyo, ore lelo ootii atua ina anasa nepuku aapuo, nemejing'u lelo ootioyo ti ong'ata; amu nkolong'i e nkitamioto kuna, naabaya mbaa pooki naatisiraki. Woi nena naanuta o naaitanakisho te nena olong'i! Amu keaku kitok osina o engoro e Nkai nadoiki kulo tung'ana; kedung'ori aauroo too lalema, neriki atua loreren pooki meshomo sinkaisho; neitiamie Yerusalem Iloreren, o metaba anaa neitabari nkatitin oo Loreren. “Naa kepuku ntabo e nkolong o lapa o lakir, ore te nkop neinepu osina loreren o enking'aing'ai neikurrukur enaiposha o lopir le nkare, neiterriaa ltung'ana te nkiputukuny 3 nena baa naapuonu enkop; amu keigirigiro engolon pooki e shumata. Ore te ina kata nedoluni Enkerai e Tung'ani elotu te ngolon te nkatampoi o te nkisisa kitok. Ore taa pee eng'as aabau kuna baa eng'ura shumata entushumu lukuny inyi, amu etinyikua esarunoto inyi.” Neliki enkitanyaanyukoto ajoki. “Eng'ura olng'aboli o lkeek pooki; ore ake pee eiteru aaitayu mbenek, niduaakiki ate nchere etinyikua olodalu. Neijia naa etiu, ore pee idolidolo eaku kuna baa, entayiolo entejo etinyikua enkitoria e Nkai. Edede, ajoki intae, meishari ena ishoi eitu eitabari nena pooki. Keish shumata o enkop, kake meish ororei lai hoo obo. “Kake eng'ura ate pee meaku ltauja linyi biitia o emerai o nkolati e na kop, neirrashu intae ina olong neluam intae anaa orreshet; amu neijia etiu kedoiki lelo pooki, oomanya enkop pooki. Kake enchololoto intae inkatitin pooki, niomonunu meishori intae engolon nipaashieshie nena naapuonu, pee intasheshe te dukuya Enkerai e Tung'ani.” Neiteng'enisho dama nkolong'i pooki te nkaji e Nkai, kake ore kewarie neipang alo airrag oldoinyo oji oloo Loirienito. Ore enasirie neyooki ltung'ana pooki aapuo aainining ninye te nkaji e Nkai. Nenyiku osirua loo Mukateni neitu oji Pasaka. Neing'oru ake lapolosak kituaak o lasirak eneiko pee ear metua; paa olorere eure. Nejing Shetani Yudas oji Iskariot, olaa obo le lelo tomon o aare; nedumunye alo aning'ore lapolosak kituaak o sikarini, aitoriak eneiko pee ekaldaa Yesu te ninche. Neshipa ninche nejoki keisho mpesai. Nenyorraa, neing'oru erishata naitarasarie ninye metii olorere. Nebau enkolong oo Mukateni Nemeisuijieki, ina olong nayieng'i olkuoo lo sirua le Pasaka. Neirriwaa Yesu Petero o Yohana, ajoki, “Enchom entobiraki iyiook Pasaka pee kitum aainosa.” Nejoki ninche, “Kaji iyieu nikipuo aaitobirie?” Nejoki, “Eng'ura, ore ijing'ijing'i ena anasa, nenang'are intae olee onapita oltoo le nkare, enturubare nijing'ijing'i enkaji najing, nijokiki olopeny enkaji, ‘Kitiaaka Olaiteng'enani, koree ake olgilata loo lomon, lainosie Pasaka o looiteng'eni laainei?’ Naa keutaki intae olgilata le shumata oidipaki aaitobira; entobira te ine.” Nepuo, neinepu etiu anaa enatiaaka; neitobiraki Pasaka. Ore pee ebaya esaa, neton adaa, netoni lkipaareta lenyena te nebo ninye. Nejoki ninche, “Atayiewua te yieuna sapuk nanya ena Pasaka te nebo intae eton eitu aaisilisili. Amu ajoki intae, meekure aitoki ai kata anya o meitabari te nkitoria e Nkai.” Ore pee eng'amu enkikompe, neisho Enkai enashe nejo, “Entudumu ena entang'ar; amu ajoki intae ore ebaiki taata meekure aitoki ai kata aok ena oo lng'anayio lo sabibu o meeu enkitoria e Nkai.” Nedumu emukate, ore pee eisho Enkai enashe nebel neisho ninche ejo, “Osesen lai ele oishoori te nkaraki intae. [Entaas ena kidamumu nanu.” Neiko neijia enkikompe eidipa endaa, ejo, “Ore ena kikompe osotua ng'ejuk oitaiki intae osarge lai, oibukori te nkaraki intae.] Kake eng'ura amu etii ilo laaitarasaa ena mesa te nebo nanu. Amu eikunari Enkerai e Tung'ani anaa enatejoki apake; kake ee kake aiyia ilo laa ninye oitarasaa!” Neiteru ninche aaikilikuana maate, aajoki kalo pasa oiko neijia. Nepuku sii enchankar ti atua ninche eji kalo lenye oaku olkitok aisul te ninche. Nejoki ninye ninche, “Eitoreisho laiguanak loo Loreren; ore lelo ooata enkitoria te ninche neji ninche ilooduporeki. Kake mme neijia etiu te intae; enchoo ilo kitok aisul te intae pooki metotiwuo anaa ai ninye oloti aisul, netiu olarikoni anaa oloisiaisho. Amu kalo olkitok, koloton te mesa, anaa keilo oisiaaisho? Aime ilo oton te mesa? Kake atii nanu atua intae atiu anaa oloisiaaisho. “Naa intae ootobiko kiboitarere too ntemat aainei ore anaa enaaishoo Papa enkitoria, aisho sii nanu intae aiko neijia pee itonini aadaa te nebo nanu te nkitoria ai, nitonini too lorikan le nkitoo aaiguanaki lelo oshon tomon o aare le Israel. “Simon, Simon, ng'ura, kitoomonu iyie Shetani neishooki pee kitum ninye aipiripiro, anaa enkano, kake aatoomonoko iyie pee meish enkirukoto ino, naa ore pee iitu, ntagolo lalashera linono.” Nejoki ninye, “Lo Kitok, atonyorrayie nanu pee aarubare korokoroni aashu keeya.” Nejoki, “Aajoki, Petero, meru olkuku ade taata, eitu kimiki iyie, katitin uni ajo mikiyiolo.” Nejoki ninche, “Amaa apa pee airriwaa intae miatata mbenia oo mpesai aashu olbene aashu namuka, italaita toki?” Nejo, “Eitu.” Nejoki, “Kake ore ilo oota olbene inchoo eya, naa inchoo ilo lemeeta olalem emir enkila enye pee einyang'u. Amu meeta nchere pee eitu eitabari ele sirata te nanu ojo, ‘Amu eikenakini ninye ilwushuush;’ amu epuonu o metimitunye inaatisiraki ti alo nanu.” Nejo ninche, “Olaitoriani, ng'ura doi, noolo lalema aare.” Nejoki ninche, “Eidipe.” Nepuku anaa enaiko apake, nelo oldoinyo loo Loirienito, nesuj ilooiteng'eni lenyena. Ore pee ebaiki ine wueji nejoki ninche, “Entoomon pee mijing'ijing'i atua ntemat.” Nelam ninche alo eneba anaa enang'aroto o soit, negil kung aomon ejo, “Papa, ti niyieu, tirishieki ena kikompe; kake ore ake eyia mme anaa enayieu nanu, kake nchoo metotiwuo anaa eniyieu iyie.” [Neipang'aki ninye olmalaika oing'uaa shumata, aitagol. Ore te nkaraki naisina neitirrish oleng aomon netiu enkinyinyiret enye edoiki enkop anaa lkituaa kitong'at lo sarge.] Ore pee einyototo te nkomono, nelotu enetii loointeng'eni lenyena neinepu eirurate te nkaraki osina, nejoki, “Ainyoo pee irurara? Enyeito entoomon pee mijing'ijing'i atua ntemat.” Ore eton eirorita, nelotu esiamo tenebo ltung'ani oji Yudas, obo le lelo tomon o aare, erikito. Nenyikaki Yesu ang'utut; kake etiaka Yesu, “Yudas, ai te ng'ututata intarasaa Enkerai e Tung'ani?” Ore pee edol lelo ooboitare enapuku, nejo, “Olaitoriani, eikiosh to lalema?” Neosh obo osinka le lapolosani kitok nedung'u enkiok e tatene. Kake etejo Yesu, “Entapal ena!” Neiseyie enkiok enye neishiunye. Neitoki Yesu ajoki lapolosak kituaak o laitoriak loo sikarini le nkaji e Nkai, o lpayiani, ooetuo aarasaki, “Amaa, eikipuonunu aarasaki anaa kara olaisimani, iatata lalema o siaren? Aboitare intae anaa ake te nkaji e Nkai, neitu kimbung'ubung'u. Kake esaa inyi ena, o engolon e naimin.” Ore pee eidip aaibung'a nerik, neitabaiki enkang o lapolosani kitok. Nesuju Petero tenelakua; ore pee einoki enkima te mpolos o lgoriet netoni te nebo, neton Petero te nebo ninche. Ore pee edol enkaisiaayiani eton te newang neunoki enkong'u nejo, “Ore ele tung'ani eboitare oshi ninye.” Kake etomikio ninye, ejo, “Naa kitok, maiyiolo nanu ninye.” Ore te nkiti kata nedol likae ejo, “Ira sii iyie obo lenye.” Kake etejo Petero, “Ero, mara nanu.” Ore eshomo enkata naba anaa esaa nabo neitoki ake likae aitirrishaki, ejo, “Edede eboitare sii oshi ake ele tung'ani ninye amu Olgalilayai.” Kake etejo Petero, “Lo lee, maiyiolo nanu enijoito.” Ore nabo kata, eton eirorita, neru olkuku. Neibelekenya Olaitoriani aing'or Petero. Nedamu Petero ororei lo Laitoriani otiaka, “Ore ade taata eitu eru olkuku aikimiki iyie katitin uni.” Neipung alo aishir te mion. Ore ina kata lelo ooibung'ita Yesu nesurdaany near ninye; neitoki sii aarrid nkonyek neikilikuan aajoki, “Imbonu! Ai ng'ae likitoosho?” Nejo sii kulikae rorei kumok aayietaa ninye neinyal. Ore ekenyu, netumo olkiama loo lpayiani lo lorere, ilapolosak kituaak o lasirak neriki ninye enetii olkiama, nejoki, “Te nira Kristo, toliki iyiook.” Nejoki ninche, “Te naliki intae, mikirukuruku; naa te naikilikuan intae embae nimikiwalikiki. Kake ore ebaiki taata keton Enkerai e Tung'ani te nkaina e tatene e ngolon e Nkai.” Nejo ninche, “Metaa eira doi Enkerai e Nkai?” Nejoki ninye ninche, “Intae ootejo kara.” Nejo ninche, “Ainyoo ai shakenisho neton kiyieu? Kitoning'okito ate eimunye enkutuk enye.” Nedumunye olorora pooki, nerikokini Pilato. Neiter aaitang'or ninye, ejo, “Kineputua ele tung'ani eiwushie olorere lang nemitiki iyiook kincho Kaisari kodi, nejo kewan Kristo naa olaiguanani.” Neikilikuan Pilato ninye ajoki, “Ai yie doi Olaiguanani lo Lyahudi?” Newaliki ajoki, “Iyie otejo neijia.” Nejoki Pilato lapolosak kituaak o lorora, “Eitu atum entiyoto te le tung'ani.” Kake eitirrishakita ejo, “Keing'oling'ol olorere, eiteng'enita te Yudea pooki, ebaiki Galilaya o meeu ene.” Ore pee ening Pilato ina, neikilikuan te na kole Galilaya. Ore pee ening ajo ole nkalo naitore Herode, neirriwaki Herode etii ninye Yerusalem ina kata. Ore pee edol Herode Yesu, neshipa oleng, amu keyieu apa nedol te nkata naado, amu ketoning'o imbaa enyena, nejo sii pee edol neas embae e nking'asia. Ore te nkaraki ina neikilikuanishore te nkata naado; kake eitu ewaliki. Neitashoo lapolosak kituaak o lasirak aaitirrishaki aaitang'or ninye. Nesul Herode o sikarini lenyena, neikordod; neitoki neishopoki olkila nerrinyoki Pilato. Neaku lchoreta Herode o Pilato ade ina olong, amu ore eton eitu ebau ena, neeta apa ninche mang'atisho pokira. Neitoki Pilato aipot ilapolosak kituaak o laitoriak lo lorere nejoki ninche, “Intae likitorikokito ele tung'ani anaa oloiwushie olorere; naiguanare te dukuya intae, ng'ura, eitu atumie ele tung'ani entiyoto hoo nabo te nitipika; eitu sii atumie Herode amu etorrinyoko iyiook. Ng'ura, eitu hoo eas ai nairirikino keeya; metaa kaitame naisho elo.” [ Nemeeta kata ake nemelaaki Pilato ninche oltung'ani obo te ilo sirua.] Kake etabuakutua pooki te nebo ejo, “Iwuang'ie ele tung'ani, naa Barabas talaaki iyiook” oltung'ani taa otanang'akaki korokoroni, te nkaraki enkitarrikinoto natijing'a ina anasa, o te nkaraki natarishe. Neitoki Pilato airorie, eyieu nelaku Yesu; kake nebuaku ninche aajo, “Tasho ninye tasho!” Neigilie ene uni ajoki, “Ainyoo kaa torroni eitayio? Eitu atumie nanu ninye entiyoto nairirikino keeya; metaa kaitame nalak.” Kake eitirrishakita nekurraki to ltoilo sapuk ejo metashei. Neidimu oltoilo lenye ninye. Nedung'oki Pilato enkiguana meitaasi ina nayieu ninche. Nelaku ilo tung'ani otanang'akaki korokoroni te nkaraki enkitarrikinoto o te nkaraki natarishe, ilo oipotutuo, kake eishoyie Yesu meitaasi ina nayieu ninche. Ore erikitoi, neibung'i oltung'ani obo oji Simon le Kirene, oewuo eing'uaa nkurman, neitanapa osalaba, metanapa esujita Yesu. Nesuj olorora kitok le lelo tung'ana, o nkituaak naaishiraki eoshiosh ilgooitie. Kake eibelekenye Yesu aing'or nejoki, “Na toyie e Yerusalem, emikinchiraki nanu, kake ate enchiraki o nkera inyi, amu ng'ura, kepuonu nkolong'i naaku keji, ‘Emayiana nkolupeno, nemayiana nkoishuaa neitu eisho, nemayiana ilki leitu enaki!’ Neaku kejokini ldoinyo, ‘Entuurokinoto iyiook,’ nejokini ndoinyo, ‘Entoipoi iyiook.’ Amu, pasa taa eikoni nji olchani onyori, kaji eikoni olotoyio?” Neriki sii kulikae wushuush aare, metari te nebo ninye. Ore pee ebaiki ewueji naji Emborbor, neshe ninye te ine, o lelo maisero, atii obo te tatene netii olikae te kedianye. Nejo Yesu, “Papa, tapalaki ninche, amu ai meyiolo enaasita.” Neosh ninche enkukuo pee etum aatoor nkilani enyena. Neitashoo ltung'ana te ine, aaing'or; kake kesurdaany ilaitoriak, ejo, “Eitajeuo kulikae, nchoo naa eitajeu kewan te naa ai ninye doi Kristo le Nkai, ilo gelunoti lenye.” Nesurdaany sii ninche isikarini, epuonu aayaki enaisho naisuijo ejo, “Te naa ira Olaiguanani loo Lyahudi, intajeu kewan!” Etisiraki sii olkigeroto te shumata elukunya enye ojo, “Ele Olaiguanani loo Lyahudi.” Nemor obo le lelo wushuush ootashoki te nebo ninye, ejo, “Ai mira doi Kristo? Intajeu kewan o iyiook!” Neisikong olikae ajoki, “Ai miure iyie Enkai, nidol ajo ina kiguana kitudung'okoki sii iyie? Neishiaakino ninche iyiook; amu inikitaasa eitalakitae iyiook; kake meeta hoo ele entorrono nataasa.” Nejoki, “Yesu, tadamuaki nanu te nilotu te ngolon ino e nkitoria.” Nejoki Yesu ninye, “Esipa aajoki iyie, ejing ade Paradiso te nebo nanu.” Neaku ina kata enaipirie enkolong, nerip enaimin enkop pooki o metabaiki saa naaudo, neimis ewang'an e nkolong; nepolosa olkarasha orish enkaji e Nkai aaku are. Ore Yesu, nebuaku to ltoilo sapuk, nejo, “Papa, inkaik inono apik enkiyang'et ai!” Ore pee ejo neijia nedung'o tau. Ore pee edol olkitok loo sikarini enatotiwuo, neisis Enkai, nejo, “Edede meeta hoo ele tung'ani entiyoto!” Ore ilo orora pooki ooetuo enking'urare, pee edol enatotiwuo, nerrinyo nkang'itie enye eoshiosh ilgooitie eisina. Ore ilooyiolore pooki o nkituaak naatusujutua eing'uaa Galilaya neitashe te nelakua aadol kuna baa. Netii apa oltung'ani oji Yosef le nkang oo Lyahudi naji Arimatea. Naa obo ninye lo lkiama, naa oltung'ani supat asipani, leitu enyorraa ninye ina nayieu o enataasa ninche, amu keanyita enkitoria e Nkai. Nelo ilo tung'ani enetii Pilato aomonu osesen le Yesu. Neitadou neirin to lkarasha le kitani, neirragie te nkurare naguetuno to soit, neitu ai kata epiki likae. Naa enkolong e Nkitobirare, etaa keiteru sabato abau. Nesuj nkituaak naairiamunore Yesu eing'uaa Galilaya, nedol enkurare, nedol eneikunakaki; nerrinyo aapuo ang, nepuo aaitobir sonkoyoni o ila narropil. Neyeng'iyeng'a te nkolong e sabato anaa enajo inkitanapat. Kake ore te nkolong e dukuya e wiki, enasirie, nepuo enkurare, neshoroo sonkoyoni naaitobira. Neinepu osoit eibeleleng'oyioki te nkurare, kake ore pee ejing atua neitu etum ilo sesen. Ore pee erriang te nkaraki ina bae, ng'ura neipang'aki iltung'ana aare ooata nkilani naaimerlel; ore pee eirut neirrugo aaing'orie nkomomi enye enkop, nejoki lelo lewa, “Ainyoo pee ing'oruru oloishu to lootuata? Metii ninye ene, kake etopiwuo. Entadamu anaa enatiaka intae, eton etii Galilaya, nchere, eitarasari ake Enkerai e Tung'ani aaitarasaki nkaik oo looas ing'ok, neshei, nepiu te nkolong e uni.” Nedamu nena kituaak irorei lenyena, ore pee errinyo aaing'uaa enkurare neinosaki lelo pokira tomon o obo nena baa neliki sii lkulikae. Naa Mariamu e Magdalene, Yohana o Mariamu ng'otonye Yakobo o nkulie kituaak naatii te nebo ninche naatolikitio lkipaareta kuna baa. Kake etiutuo lelo rorei te ninche anaa le mpesho, neaku eitu eiruk ninche. Kake einyo Petero neipirri alo enkurare; neirrugo aing'or atua, nedol lkarash le kitani eirrag oopeny; nerrinyo alo ang eing'asia te nena naatotiwuo.) Naa ng'ura, ore te ina olong ake epuo aare lenye enkang naji Emmaus, naa mael naapishana ing'uaa Yerusalem, neimaki pokira aare nena baa naatotiwuo. Ore einosaa lomon eiguana pokira aare, neinepu Yesu openy airiamariyie ninche. Neikeno nkonyek enye pee meyiolou. Nejoki Yesu ninche, “Kakua omon kulo liimakiki ipuopuo pokira aare?” Neitashe, neisinanuo. Ore obo lenye, oji Kleopas, newaliki ajoki ninye, “Keiyie doi ake olomoni te Yerusalem lemeyiolo kuna baa naatotiutuo te ine te kuna olong'i?” Nejoki, “Akua baa?” Nejoki ninche ninye, “Mbaa e Yesu le Nasaret, ora apa oloiboni le Nkai ogol too nkiasin o to rorei ti alo Enkai o te dukuya ltung'ana pooki o eneikuna lapolosak lang kituaak o laitoriak pee eitarasaa metudung'okini enkiguana metari metua, neshei ninye. Kake kisilig apa iyiook aajo ninye olaku Siraeli. Ee pae naa ore etii nena pooki, enkolong e uni duoo taata anaa netiu nena baa. Ore sii, eing'asiayie iyiook kulie kituaak e ncholiek ang. Etayookito enkurare duoo enasirie neitu einepu ilo sesen; neshukunye aajoki iyiook eji etoduaa ilmalaika, ootiaakita keishu. Nepuo sii kulikae lang enkurare, nepuo ainepu etiu ake anaa ina natolimutuo nkituaak; kake ninye ake eitu edol.” Nejoki ninye ninche, “Lo tung'ana moda, nirara yietuti ltauja mirukuruku nena pooki naatejo loibonok le Nkai! Keeta apa kata nemeitamei Kristo aaiko neijia pee ejing enkitoo enye?” Neiteru too mbukui e Musa o too loibonok pooki, neibalakinye ninche ilkigerot ooipirta enkorrok enye. Ometaa nenyikaki ina ang apa napuo. Neiko ninye anaa keyieu negiroo. Kake neibok ninche ninye, aajoki, “Irraga iyiook amu emuto netaa kewarie.” Nejing taa aton te nebo ninche. Ore enya endaa te nebo ninche, nedumu emukate nemayian, negil, neisho ninche. Nebolo nkonyek enye neyiolou ninye; neimisilori ina kata ake neitu eitoki nkonyek enye aadol. Nejokino, “Keitu eyupuyup iltauja lang eirorie iyiook te nkoitoi, eboloki iyiook, ilkigerot?” Neinyototo ake te ina saa nerrinyo Yerusalem; neinepu lelo tomon o obo o lelo ooboitare, ootiaakita, “Etopiwuo taa ninye Olaitoriani neipang'aka Simon!” Neliki taa ninche nena baa naatotiwuo te nkoitoi, o eneikuna pee eitayiolo kewan ninche ebelaki emukate. Ore ejoito ninche nena, neitashe Yesu makewan ti atua ninche, nejoki, “Entaseriana!” Kake eirriang'a ninche, neureishoyu, ejo koloip etoduaa. Nejoki ninche, “Ainyoo pee inyamalala? Naa kaji etiu pee etii olng'ash iltauja linyi? Eng'ora nkaik aainei o nkejek nchere kewan ai nanu kewan ele; embung'aki pee idolidolo; amu meeta enkiyang'et nkiri o loik anaa kulo lidolitata aata.” [Ore pee ejoki neijia, neitodol nkaik enyena o nkejek.] Ore eton ake meiruk te nkaraki eng'ida e nking'asia nejoki ninche, “Iatata tene toki nanyae?” Neisho embelati o sinkirri oyiera, nedumu nenya te dukuya ninche. Nejoki ninche, “Ilapa rorei laainei kulo latiaaka intae, eton atii te nebo intae, nchere ore mbaa pooki naatisiraki aaipirta nanu too nkitanapat e Musa o too loibonok le Nkai o to Lkerempe le Nkai, meeta nchere meitabari.” Nebol iltauja lenye metayiolo ilkigerot, nejoki ninche, “Etisiraki aajo, keitamei Kristo naa ore te nkolong e uni nepiu aing'uaa lootuata, naa te nkarna enye elikiori enkirridunoto o empalakinoto oo ng'ok too loreren pooki, neiteruni te Yerusalem. Irara intae shakeni le kuna baa. Naa ng'ura, kairriwaki intae ilo otejo Papa keisho intae; kake entotoni te na anasa, o meishopokini intae engolon naing'uaa shumata.” Neitoki arik o metabaiki Betania, neilepie nkaik enyena nemayian. Ore emayianita ninye ninche, neilep aing'uaa ninche. Nerrinyo ninche aapuo Yerusalem te ng'ida sapuk, netii anaa ake enkaji e Nkai eisisita Enkai. Ore te nkiterunoto etii apa Ororei, netii ilo Rorei te nebo Enkai, naa Enkai ilo Rorei. Etii ninye te nkiterunoto te nebo Enkai. Etaa pooki toki te ninye, nemeetae hoo toki te nena naataa, naitaaki metii ninye. Atua ninye etii enkishui, ore ena kishui naa ewang'an oo ltung'ana. Newangu ewang'an ti atua enaimin neitu eidimu enaimin ninye. Etii apa oltung'ani oirriwuaki oing'uaa Enkai; oji enkarna enye Yohana. Neewuo ele te nkaraki shakenisho, pee eishakenoki ina wang'an, pee etum pooki aairuko te ninye. Neme ina wang'an ninye, kake eewuo pee eishakenoki ina wang'an. Ewang'an nadede naitawang pooki tung'ani, nalotu enkop. Netii ninye enkop, naa te ninye eitaa Enkai enkop, neitu eyiolou enkop ninye. Neewuo enetii ilenyena, neitu eng'amu ltung'ana lenyena ninye. Kake ore lelo pooki ootang'amutua ninye lelo ooiruko enkarna enye, neishoo engolon naakunye nkera e Nkai, ilo otoiwuoki neme to sarge neme te yieunoto o sesen aashu te yieunoto o lee, kake ene Nkai. Neaku Ororei osesen neton ti atua iyiook, nikitoduaa enkitoo enye, naa enkitoo o Inoti Obo le Papa, obore empiris o esipata. Neishakenoki Yohana ninye nebuak ajo, “Ele taa atolimuo ajo, ‘Ore ololotu te siadi nanu ninye oituruk te nanu, amu etii apa ninye te dukuya nanu.’ ” Enaing'uaa emborei enye kitang'amutua pooki, empiris naiteleikino empiris. Amu te Musa eishoruaki Nkitanapat; nelotu empiris o esipata te Yesu Kristo. Meetae oltung'ani ai kata otoduaa Enkai; ilo inoti obo laa Enkai otii olgoo le Papa, oibalunye ninye. Naa ena shakenisho e Yohana pee eirriwaki Lyahudi lapolosak o Lawi ooing'uaa Yerusalem pee epuo aaikilikuan ninye aajoki, “Ira iyie ng'ae?” Neibalunye, neitu emiki, neibalunye ajo, “Mara nanu Kristo.” Neikilikuan aajoki, “Ira Eliya?” Nejoki, “Mara.” Nejoki, “Ira ilo oiboni?” Newaliki ajoki, “A'a,” Nejokini, “Ira ng'ae, pee kitum ewalata nikiyaki lelo ooirriutua iyiook? Aijo iyie aa te nkaraki enkorrok ino?” Nejo, “Ara oltoilo lo lobuak ti ong'ata, ‘Entorioi enkoitoi o Laitoriani,’ Anaa enatejo oloiboni Isaya.” Ore lelo ooirriwakaki Yohana naa Ilfarisayo eing'uaa. Neikilikuan ninche ninye aajoki, “Aainyoo naa pee imbatisisho iyie, ti nimira ilo Kristo, aashu Eliya aashu ilo oiboni?” Newaliki Yohana ajoki ninche, “Te nkare aibatisisho nanu. Eitashe ti atua intae Obo limiyiololo, laa ninye ilo olotu te siadi nanu, lemaaishiakino nalak enkeene e namuke enye.” Etaasate kuna baa te Betania te lido kekun le Yordan, teine apa naibatisishore Yohana. Ore te nkolong nasujita ina nedol Yohana Yesu elotu enetii, nejo, “Ing'ura, olkuoo le ker le Nkai oya eng'oki e nkop. Ele taa atolimuo ajo, ‘Ore te siadi nanu elotu oltung'ani oituruk te nanu, amu etii ninye te dukuya nanu.’ Neitu ayiolou nanu ninye, kake te nkaraki ena pee aeuo nanu aibatisisho te nkare, pee aataboloki ninye Israel.” Neishakenoki Yohana ejo, “Atoduaa Enkiyang'et edou anaa enturkulu eing'uaa shumata netonie shumata ninye. Neitu ayiolou nanu ninye, kake ilo laairriwua maibatishisho te nkare, ninye laatiaaka nanu, ‘Ore olidol edoiki Enkiyang'et netonie, ninye oibatisisho te Nkiyang'et Sinyati.’ Natoduaa nanu naishakenoko nchere Enkerai e Nkai ele.” Neitoki te nkolong nasujita ina, neitashe Yohana o looiteng'eni aare lenyena; neing'or Yohana Yesu elo nejo, “Ing'ura olkuoo le ker le Nkai!” Nening lelo ooiteng'eni lenyena aare nesuj ninche Yesu. Neibelekenya Yesu, nedol esujita nejoki, “Ainyoo ing'oruru?” Nejoki ninche ninye, “Rabbi, aa keji enkitawalata olaiteng'enani, kaji nikimanya?” Nejoki ninche, “Wootu entodol.” Nepuonu nedol enemanya; nebik o ninye ina olong. Netaa eaku saa tomon ina kata. Ore obo le lelo oare ootoning'o Yohana eiro, nesuj ninye, naa Andrea, olashe le Simon Petero. Olalashe lenye Simon etang'asa atum nejoki ninye, “Kinoto Mesia,” laa ninye eji Kristo. Neriku Simon arikoki Yesu. Neing'or Yesu nejoki, “Ira iyie Simon, enkerai e Yohana, naa aikiji Kefa.” Aa keji enkitawalata Petero aashu Osoit. Ore te nkolong nasujita ina, neyieu Yesu nelo Galilaya, netum Filipo. Nejoki Yesu ninye, “Tusujaki.” Ore apa Filipo naa Betsaida eing'uaa, enkanasa oo Andrea o Petero. Netum Filipo Natanael nejoki, “Kinoto olapa otisira Musa ti atua nkitanapat nesir too loibonok, le Nkai Yesu le Nasaret olayioni le Yosef.” Nejoki Natanael, “Keidim atupukunye Nasaret entoki sidai?” Nejoki Filipo, “Wou toduaa.” Nedolu Yesu Natanael elotu enetii, nelimu ninye ajo, “Ing'ura Osiraeli le dede lemeeta emonkoi.” Nejoki Natanael, “Ai ti aji kitayiolo?” Newaliki Yesu ajoki, “Aatoduaa eton eitu kimpot Filipo, itii entonata o lng'aboli.” Newaliki Natanael ajoki, “Rabbi, ira iyie Enkerai e Nkai, Iyie Olaiguanani le Israel.” Newaliki Yesu ajoki, “Kenkaraki naatiaaka aatoduaa te ntonata o lng'aboli pee iruko? Iyooki adol imbaa kituaak naalang kuna.” Nejoki ninye, “Esipa, esipa, ajoki intae, aidolidolo keper etabole neilep nedou ilmalaika le Nkai te aadoiki Enkerai e Tung'ani.” Ore te nkolong e uni neetae apa enkiyama te Kana e Galilaya: netii ng'otonye e Yesu ine. Neipotoki sii Yesu o looiteng'eni lenyena te ina kiyama. Ore pee emita enaisho oo sabibu nejoki ng'otonye Yesu, “Meetae enaisho o sabibu.” Nejoki Yesu, “Na kitok, kaa kiatayie neton eng'or enkata ai?” Nejoki ng'otonye laisiaayiak, “Entaas pooki najoki intae.” Netii ine iltooi loo soito, naa iloo mboreitin are aashu uni obo, netushumaki te ine to lkerreti le nkitukuore oo Lyahudi. Nejoki Yesu ninche, “Emputa iltooi enkare.” Neiput metabaiki nkutukie. Neitoki ajoki, “Entooku enkiti, eyaki olaitasheikinoni lele sirua.” Neyaki. Ore pee eishamisham olkitok le nkiyama enaduoo are naitaaki enaisho oo sabibu, nemeyiolo eneing'uaa, hoo neyiolo laduoo sinkan ootookokito enkare, neipot olkitok le nkiyama oloyamisho, nejoki, “Eng'as oshi ake pooki ng'ae aishoru enaisho oo sabibu sidai ore etookishoteki, neishoru eneme sidai oleng; imboo iyie idia sidai o taata.” Atua Kana e Galilaya etaasie Yesu ena anaa enkiterunoto oo nkitoduaat, neitoduaaya enkitoo enye; neiruk ilooiteng'eni lenyena. Ore etulusoyie ina nedoiyio aapuo Kapernaum, ninye o ng'otonye, o lalashera o looiteng'eni lenyena; nebik inkuti olong'i te ine. Netinyikua osirua oji Pasaka loo Lyahudi, neilep Yesu alo Yerusalem. Neinepu lamirak loo nkishu o loo nkerra oo loo nturkuluni ti atua enkaji e Nkai, netoni laitawalak loo mpesai. Ore pee eitobir elishie oo nkopit, nearaa ntare o nkishu pooki aipangie te enkaji e Nkai, neisuaaya mpesai oo laitawalak, neibeleleng'oo mesai enye. Nejoki lamirak loo nturkuluni, “Ewaita kuna tokitin te ne emintaa enkaji e Papa ene biashara.” Nedamu looiteng'eni lenyena enatisiraki nchere, “Kaanya olom le nkaji ino amut.” Newaliki Lyahudi aajoki, “Ainyoo enkitoduaata nintodol iyiook, oo pee ias kuna baa?” Newaliki Yesu ajoki, “Entarruoi enkaji e Nkai, ore too nkolong'i uni naitasheyie.” Nejoki taa Ilyahudi, “Artam o ile ilarin eshetitai ena aji e Nkai hekalo, eji nijo iyie intasheyie too nkolong'i uni?” Kake enkaji e Nkai o lo sesen lenye eimaka ninye. Ore pee eitopiuni too lootuata nedamu ilooiteng'eni lenyena inchere etiaaka neijia, neiruk ilkigerot, o rorei oiroro Yesu. Ore etii ninye Yerusalem, to sirua oji Pasaka, neiruk ilkumok enkarna enye etoduaa nkitoduaat naasita. Kake eitu eiruk Yesu aisho makewan ninche, amu keyiolo ltung'ana pooki, nemeetayie tipat shakenisho te tung'ani amu keyiolo openy naatii atua tung'ani. Etii apa oltung'ani loo Lfarisayo oji enkarna Nikodemo, aitoriani loo Lyahudi. Nelotu ele tung'ani enetii Yesu kewarie, nejoki ninye, “Rabbi, kiyiolo aajo ira iyie olaiteng'enani oing'uaa Enkai: amu meetae oltung'ani oidim ataasa kuna kitoduaat nias iyie te nemeboitare Enkai ninye.” Newaliki Yesu ninye, “Esipa, esipa, aajoki iyie, te neitu eini oltung'ani aaigil te inoto naing'uaa shumata, nemeidim atoduaa Enkitoria e Nkai.” Nejoki Nikodemo ninye, “Kaji eiko pee eidimi aatoiu oltung'ani etaa moruo? Keidim ninye atushukokinoyu eniare enkoshoke e ng'otonye metoini?” Newaliki Yesu ajoki, “Esipa, esipa, aajoki iyie, te neitu eini oltung'ani te nkare o te Nkiyang'et, nemeidim atijing'a Enkitoria e Nkai. Ore ina natoiwuoki to sesen, naa osesen, ore enatoiwuoki te Nkiyang'et naa enkiyang'et. Ming'asia te naajoki iyie, ‘Meeta nchere pee miking'ili aaiu.’ Eisiusiu enkijape nelo eneyieu, nining oltoilo lenye, nimiyiolo eneing'uaa, aashu enelo: neijia etiu pooki ng'ae oini te Nkiyang'et.” Newaliki Nikodemo ajoki ninye, “Kaji eiko pee eidim aataa kuna baa?” Newaliki Yesu ajoki ninye, “Amaa, aa ira iyie olaiteng'enani le Siraeli nimiyiolo kuna baa? Esipa, esipa, aajoki iyie, inikiyiolo kilimu, nikinchakenoki inikitoduaa niming'amaa intae shakenisho ang. Amaa te natolikio intae mbaa e nkop nimirukuruku, kaji nkoko pee irukuruku te naliki intae mbaa e shumata? Meetae oloilepa shumata, leme ilo otadowuo aing'uaa shumata.” Ore anaa enailepie Musa olasurai ti ong'ata meeta nchere pee eitu eilepieki Enkerai e Tung'ani aaiko neijia, paa ore pooki ng'ae oiruk ninye netum enkishui nemeish. Amu etonyorra Enkai enkop aiko nji o meishoru Enkerai enye nabo, paa ore pooki ng'ae oiruk nemeimin kake netum enkishui nemeish. Amu eitu erriu Enkai Enkerai enye enkop, meeu aiguanare enkop, kake pee etum enkop atajeunye. Ore ilo oiruk ninye; nemeiguanareki, ore ilo lemeiruk neidipaki aaiguanare, amu eitu eiruk enkarna e Nkerai inoti nabo e Nkai. Naa ena enkiguana, eewuo ewang'an enkop, kake etonyorra iltung'ana enaimin aaitalang ewang'an amu ai torrok iasat enye. Ore pooki ng'ae oas ntorrok naa keiba ewang'an, nemelotu enewang pee meibalieki iasat enyena, kake ore oloas esipata, kelotu enewang pee eibalayu iasat enyena inchere etaasaki ti atua Enkai. Ore te siadi kuna baa nelotu Yesu o looiteng'eni lenyena enkop e Yudea, nebik te ine te nebo ninche olorere. Eibatisa sii apa ninye Yohana olorere te Enon nataaniki Salim, amu ai sapuk enkare te ine; naa kepuonu ninche ine meibatisae; amu eton eitu epiki Yohana korokoroni. Nepuku enchankar oo looiteng'eni le Yohana o Lyahudi obo too mbaa e nkitukuo enkitisinyare. Nepuonu enetii Yohana nejoki, “Rabbi, ore olapa liboitare te lido kekun le Yordan, liimaka aishakenoki, ing'ura, eibatisisho, nepuonu pooki enetii ninye.” Newaliki Yohana ajo, “Meidim oltung'ani atang'amai hoo toki te neme keishooki eing'uaa keper. Kinchakenokiki intae maate nchere atejo, ‘Mara nanu Kristo, kake kaairriwuaki te dukuya ninye.’ Ore olorikito esiankiki e nkiyama, ninye oyamisho; kake ore olchore lo loyamisho, oitashe ainining, neshipakino oleng oltoilo lo loyamisho. Etaboreyia naa ena shipai ai. Meeta nchere pee mebul ninye nang'oroo nanu.” Ore oloewuo eing'uaa keper netii shumata e pooki; ore oloing'uaa enkop naa enkop eing'uaa neiro ninye ine nkop. Ore ilo oing'uaa keper netii shumata pooki. Eishakenu ninye ina natoduaa, o enatoning'o ore ake eyia, nemeetae olong'amaa shakenisho enye. Ore olotang'amayie shakenisho enye netipika olmishire lenye ena nchere asipani Enkai. Ore ilo oirriwua Enkai ninye oiro orerei le Nkai, amu meishoru Enkai Enkiyang'et te ntemakinoto. Enyor papa Enkerai, neishoo intokitin pooki metijing'a atua enkaina enye. Ore oloiruk Enkerai eeta enkishui oo ntarasi; ore ologolong'aki Enkerai nemedol enkishui: kake keipirare ninye enkiguana e Nkai. Ore apa pee eyiolou Yesu nchere etoning'o Ilfarisayo aajo eitaa Yesu iltung'ana kumok ilooiteng'eni neibatisa lkumok oolang ile Yohana, hoo neitu eibatisisho Yesu makewan, ilooiteng'eni lenyena ake, neing'uaa Yudea nerrinyo aito alo Galilaya. Kake meeta kata nemeimaa Samaria. Nelotu taa enkanasa e Samaria naji Sikar, nanyikita enkurma apa naishoo Yakobo olayioni lenye Yosef. Netii enchorro e Yakobo ine. Neton Yesu te mbata e nchorro etiu neijia, etanaure te lototo enye. Netaa enaaku saa ile ina kata. Nelotu enkitok e Samaria aoku enkare. Nejoki Yesu ninye, “Inchooki enaok,” amu eshomo ilooiteng'eni lenyena aainyiang'u endaa te ina anasa. Nejoki ina kitok e Samaria ninye, “Kaji etiu pee kiomon iyie Olyahudi enkare nara nanu Esamariai?” Amu mejing'a Lyahudi o Samaria. Newaliki Yesu ajoki, “Te naa iyiolo enkishorunoto e Nkai anaa ilo likijoki ‘inchooki enaok,’ anaata aa iyie naomon ninye naa eikincho ninye enkare naishu.” Nejoki enkitok ninye, “Lo Kitok, miaata toki niokunye negut olkesumet: ai ti aji iata enkare naishu? Aira iyie kitok alang papa lang Yakobo, oishoo iyiook ele kesumet netooko ninye o layiok lenyena, o nkishu enyena?” Newaliki Yesu ajoki ninye, “Ore pooki ng'ae ook ena are naa keitoki atir enkure, kake ore olook ina are naisho nanu, nemetir enkure ntarasi; amu ore ina are naisho nanu keaku enchorro ti atua ninye, naitootuaakino enkishui oo ntarasi.” Nejoki enkitok ninye, “Lo Kitok, inchooki ina are, pee maaitoki atir enkure, nemaitoki alotu ene neba inji aoku enkare.” Nejoki Yesu ninye, “Shomo impoto olpayian lino wootu ene.” Newaliki enkitok ajoki ninye, “Maata nanu olpayian.” Nejoki Yesu ninye, “Intorioko ina nitejo, ‘Maata nanu olpayian,’ amu imiet ilpayiani likiwaita, neme olino olikiaata taata. Ore tena iroro esipata.” Nejoki enkitok ninye, “Lo Kitok, adol ajo ira iyie oloiboni. Eteseremishote apa loo papa te le doinyo, nijojo intae eji atua Yerusalem etii ewueji nemeeta kata nemeseremishoreki.” Nejoki Yesu ninye, “Irukoki nanu na kitok, kelotu esaa neme tele doinyo, neme te Yerusalem iserememe Papa. Iserememe intae enimiyiololo, nikiserem iyiook enikiyiolo, amu Ilyahudi eing'uaa enjeunoto. Kake kelotu esaa, netaa taata, naserem ilaseremak oosipa Papa te nkiyang'et o te sipata; amu ileeijo lelo eing'oru Papa pee eserem ninye. Enkiyang'et Enkai, ore ilooserem ninye, neishiaakino ake neserem te nkiyang'et o te sipata.” Nejoki enkitok ninye, “Ayiolo ajo kelotu Mesia laa ninye eji Kristo, Naa te nelotu neboloki iyiook imbaa pooki.” Nejoki Yesu ninye, “Nanu doi ele laairorie, iyie,” Nepuonu te ina kata ilooiteng'eni lenyena, neing'asia enkaraki nairorie enkitok: kake metii olotejo, “Ainyoo ing'oru?” aashu, “Oo pee irorie iyie ninye?” Neing'uaa ina kitok oltoo lo soit le nkare, nelo ina anasa nejoki olorere, “Wootu entodol oltung'ani laatolikio mbaa pooki apa nataasa: kebaiki sa naa ele Kristo?” Neipang taa ninche te nkanasa nepuonu enetii Yesu. Ore te ina rishata ake nesai ilooiteng'eni lenyena aajoki, “Rabbi, tadaayu.” Nejoki ninye ninche, “Aata endaa nanya nimiyiololo intae.” Nejokino ilooiteng'eni lenyena, “Keetae oloyaka endaa?” Nejoki Yesu ninche, “Ore endaa ai naa te naas eyieunoto e lido laairriwua, naidip esiaai enye. Aimijojo intae, eng'or ilapaitin oong'uan, pee ebau enkisampuare? Eng'ura, entudumu nkonyek inyi, ajoki intae, eng'ura nkurman, eidipa aaiborrita pee eisampuni. Etumito olaisampuaani olmushaara, neiturrurrito lng'anayio oobaiki enkishui oo ntarasi pee eshipa te nebo olaunoni o laisampuani. Ele rorei osipa ilo otejoki nchere, eun obo neisampu likae. Airriwayie intae esampu eneitu iyekarere; kulikae ooteekare, nietuo intae aajing enkisampuare enye.” Neiruko Isamaria kumok le ina anasa te nkaraki ororei oishakenoko ina kitok inchere: “Aatolikio nataasa apa pooki.” Ore pee epuonu Isamaria enetii Yesu, nesai metotona te nebo ninche, nebik inkolong'i are te ine. Neiruk kulikae kumok te nkaraki ororei lenye. Nejoki ina kitok, “Meekure aa enkaraki e nkiroroto ino pee kiruk, amu kitoning'o iyiook maate, naa eikiyiolo aajo esipa ele Olaitajeunoni le nkop.” Ore pee elusoo nena olong'i pokira are neing'uaa ine alo Galilaya. Amu etejo Yesu makewan nchere, “Metum oloiboni enkanyit te nkop enye.” Ore pee elotu Galilaya, neng'amu Ilgalilaya ninye; etoduaa pooki naataasa te Yerusalem, to sirua; amu eshomo sii ninche ilo sirua. Neitoki alotu Kana e Galilaya ine neitaayie enkare enaisho oo sabibu. Netii apa oltung'ani kitok omuei olayioni lenye te Kapernaum. Ore pee ening ele tung'ani nchere eewuo Yesu eing'uaa Yudea alo Galilaya nelo enetii, nesai metadoi alo aishiunye olayioni lenye; amu etaa keye. Nejoki Yesu ninye, “Te neitu idolidolo ilmonek o mbaa e nking'asia nimirukuruku.” Nejoki ilo tung'ani kitok ninye, “Lo Kitok, tadou eton eitu ee enkerai ai.” Nejoki Yesu ninye, “Shomo, ekeishiu olayioni lino.” Neiruk ilo tung'ani ororei otiaaka Yesu, nelo. Ore eton edoyio alo nenang'are isinkan lenyena neliki ninye aajoki, “Eishu enkerai ino.” Neikilikuan esaa naishiunye. Nejoki ninche ninye, “Ng'ole saa naapishana, eing'ueiki olkirobi.” Neyiolou menye ina kata ajo, enang'ole saa natiaakinye Yesu, “Ekeishiu olayioni lino.” Neiruk ninye makewan o enkaji enye pooki. Ele taa olmonekie li are nataasa Yesu pee elotu eing'uaa Yudea alo Galilaya. Ore te siadi nena, neetae osirua loo Lyahudi neilep Yesu alo Yerusalem. Ore ti atua Yerusalem te mbata o lturoto loo nkerra, netii ewueji neji te nkutuk oo Lhebrania Betsaida, neeta nchomito imiet. Neirrag te nena olorora kitok loo ltamueyia, ilmodook, ilng'ojiniaa, ilmaiman, [eanyu meing'oling'oli enkare. Amu keeta nkatitin naadoiki olmalaika ilo turoto neing'oling'ol enkare. Ore oloiteru ajing aa enaing'oling'olieki enkare neishiunyeki emueyian ake ninye pooki naata.] Netii ine oltung'ani otobiko emuei ilarin tomoni uni o isiet. Ore pee edol Yesu ninye eirrag, neiyiolou ajo etobiko enkata naado te ine, nejoki ninye, “Iyieu nikinchiunyeki?” Newaliki oltamueyiai ajoki ninye, “Lo Kitok, maata nanu oltung'ani laaitadoiki olturoto te neing'oling'oli enkare; ore ajo alotu, nedoiki likae te dukuya nanu.” Nejoki Yesu ninye, “Inyo tudumu erruat ino shomo.” Neishiu nabo kata ilo tung'ani, nedumu erruat enye nelo. Naa enkolong e sabato apa ina olong. Ore te nkaraki ina nejoki Lyahudi ilo oishiunyeki, “Sabato taata, nimikinchoro inap erruat ino.” Newaliki ninye ninche ajoki, “Ilo laaishiunye nanu laatiaaka, ‘Tudumu erruat ino shomo.’ ” Neikilikuan ninche ninye aajoki, “Aing'ae ilo likitiaaka, ‘Tudumu erruat ino shomo?’ ” Nemeyiolo ilo oishiunyeki ajo aing'ae, amu eiwuang'a Yesu, etii olorere ine wueji. Ore eidipate nena netum Yesu ninye to nkaji e Nkai, nejoki ninye, “Ing'urai, inchiwuo; mintoki ae kata aas ing'ok mikijing entorrono nalang ena.” Nelo ilo tung'ani, neliki Ilyahudi nchere Yesu oishiunye. Ore te nkaraki e ina neiteru Ilyahudi aaing'orunore Yesu te nkaraki nataasa nena baa te enkolong e sabato. Newaliki Yesu ajoki ninche, “Easisho Papa o te na kata, naa kaasisho sii nanu.” Ore te nkaraki ina, nenyok Ilyahudi aaing'oru enkoitoi naarie metua, neme enkaraki ake natigila enkolong e sabato kake enkaraki sii natejo menye lenye Enkai, aitorisioki makewan Enkai. Newaliki Yesu ajoki ninche, “Esipa, esipa ajoki intae, meidim Enkerai ataasa ae toki openy, te neme naduaaki menye easita; amu ore pooki naas menye neas sii ninye Enkerai aiko neija. Amu enyor Papa Enkerai enye, neitodol pooki naas, naa keitodol kulie yasat sapuki naalang kuna, pee ing'asiasia intae. Ore anaa enaitopiu Papa ilootuata neisho ninche enkishui neijia sii ninye etiu Enkerai enye eisho enkishui, oloyieu neisho. Amu edede meiguanare hoo Papa oltung'ani, Kake eishoo ninye Enkerai enye enkiguana pooki, pee eyanyitu pooki Enkerai anaa te neyanyit Papa. Ore pooki ng'ae lemeyanyit Enkerai, nemeyanyit Papa oirriwua ninye. Esipa, esipa, ajoki intae, ore oloinining'u ororei lai, neiruk ilo laairriwua, eeta enkishui oo ntarasi, nemejing enkiguana, kake etupukuo te keeya ajing atua enkishui. “Esipa esipa, ajoki intae, kelotu enkata netii taata, naning ilootuata oltoilo le Nkerai e Nkai, ore lelo ootoning'o neishu. Amu ore anaa enaata Papa enkishui makewan, neijia sii eikuna aisho Enkerai metaa keeta enkishui makewan; enyaaka sii aisho enkitoria aiguanayu, amu Enkerai e Tung'ani ninye. Eming'asia te na, amu kelotu enkata nayooki pooki ootii nkuraren aaning oltoilo lenye. Neipang'u; ore ilootaasa isupati nejing empiunoto e nkishui; ore ilootaasa intorrok nejing empiunoto e nkiguana. “Maidim ataasa toki te nkitoria ai makewan; aiguanare anaa enaning; naa enoo sipat enkiguana ai, amu mme eyieunoto ai aing'oru, kake eyieunoto e Papa laairriwua. Te naishakenoki makewan, nemesipa shakenisho ai. Etii likae laaishakenoki, nayiolo ajo ore ilo laaishakenoki kesipa shakenisho enye. Irriwakita Yohana olkilikuai, neishakenoki esipata. Kake mang'amaa nanu shakenisho naing'uaa tung'ani, kake kairo nanu kuna baa pee ijeuu. Netaa Yohana oltaa oinuaaki newang, nitonyorraitie intae aang'idakino te nkiti kata ewang'an enye. Kake ore shakenisho naata nanu kitok alang ina e Yohana; amu ore isiaaitin naaishoo Papa maitabai, nena siaaitin naasita ninche maate naishakenoki nchere, Papa laairriwua. Ore Papa laairriwua ninye makewan laaishakenoko. Eitu ae kata ining'ining'i intae oltoilo lenye, neitu idolidolo eneikununo; nimiaatata ororei lenye eton ti atua intae, amu ore ilo oirriwua ninye nimirukuruku. Ijurrujuru intae ilkigerot amu idamumu aajo ninche itumiemie enkishui oo ntarasi, naa kulo kigerot lelo laaishakenoki nanu. Niminyorraa intae aapuonu enatii pee itumutumu enkishui. Mang'amu nanu enkitoo te tung'ani, kake ayiolo intae ajo, miatata enyorrata e Nkai ti atua ate. Aewuo te nkarna e Papa, nimiking'amumu intae nanu. Te nelotu likae te nkarna enye makewan ilo intae ingamumu. Te nelotu likae te nkarna enye makewan, ilo intae ing'amumu. Enkai nara openy? Emijojo ake kaitang'or intae te Papa. Etii oloitang'or intae naa Musa laa ninye isiligigi. Te naa iruko Musa, anaata kirukuruku sii nanu, amu imbaa aainei etisira ninye. Amaa, ti nimirukuruku ilkigerot lenyena, kaji nkoko ti nirukuruku irorei laainei?” Ore pee eidipayu kuna baa nelo Yesu alang enaiposha e Galilaya, aa taa enaiposha e Tiberia netii olorere kitok osujita, amu etoduaa ilmonek lenyena ooitaasita iltamuoyia. Neilepaki Yesu endoinyo neton te ine te nebo ilooiteng'eni lenyena. Netinyikua Pasaka, aa osirua loo Lyahudi. Ore pee edumu nkonyek enyena nedol esiamo kitok elotu enetii, nejoki Filipo, “Kaji kinyang'unye mukateni pee etum kulo aainosa?” Ketejo neijia aa ketem: amu keyiolo ninye makewan enaitaas. Newaliki Filipo ajoki, “Mebaiki ninche inaainosieki dinarii iip are, te neishori pooki ng'ae enkiti.” Ore Andrea, obo loo looiteng'eni lenyena, olalashe le Simon Petero, nejoki ninye, “Etii enkiti ayioni natii ene naata mukateni imiet e shairi o sinkir aare; kake ainyoo ninche too lkumok ooba inji?” Nejo Yesu, “Entotona ltung'ana.” Etii ine wueji nkujit kumok, netoni taa lewa, nebaya esiana nkalifuni miet. Nedumu taa Yesu nena mukateni, neishooyo enashe neoriki lelo ootoni; neikunaki sii neijia isinkir anaa naatayieutua ninche. Ore pee eraposho ninche nejoki ninye ilooiteng'eni lenyena, “Enturrurru ilmong'oishi ootelekutua pee meimin toki.” Neiturrurru taa ninche, neiput nkikapuni tomon o aare ilmong'oitie loo naduoo mukateni miet e shairi ootelekutua lelo ooinosa. Ore lelo tung'ana ootoduaa ina kitoduaata nataasa Yesu nejo, “Esipa ele oloiboni olotu enkop.” Ore Yesu, etayiolo ajo kepuonu ninche aaibung ninye te ngolon aaitaa olaiguanani neiwuang ninye openy arrinyokino oldoinyo. Ore pee eaku teipa nedoiyio ilooiteng'eni lenyena aapuo enaiposha, ore pee ejing atua empeut, neaku epuo aalang enaiposha aalang'aki Kapernaum. Neidipa atomisimiso, neton eitu elotu Yesu enetii ninche; neiterua enaiposha ailugo, amu etukutua osiwuo kitok. Ore pee eidip aatukurtoi empeut mail uni aashu ong'uan nedol Yesu elo te shumata e naiposha elotu anyikaki empeut; neureishoyu ninche. Nejoki ninye ninche, “Nanu ele; emiureishoyu.” Neyieu taa neng'amu aapik empeut, ore nabo kata nebaiki empeut enkop duoo napuo. Ore te nkolong nasujita ina nedol enang'ole siamo naitashe te lido kekun le naiposha nchere, metii ai peut ine nabo ake, neitu eiriamariyie Yesu ilooiteng'eni lenyena ajing atua empeut amu eshomo ilooiteng'eni lenyena oopeny. Kake ore ake eyia, eetuo mpeuti te Tiberia aanyikaki ine wueji neinosie mukateni eidipa Olaitoriani aishooi enashe. Ore te nkaraki ina, ore pee edol esiamo ajo metii Yesu ine anaa ilooiteng'eni lenyena, nejing ninche oopeny atua e mpeut nepuonu Kapernaum, eing'oru Yesu. Ore pee etum ninche ninye te lido kekun le naiposha, nejoki ninye, “Rabii kanu ilotu ene?” Newaliki Yesu ninche nejoki, “Esipa, esipa ajoki intae, ore pee king'oruru intae nanu, mme te nkaraki nitoduaa ilmonek kake te nkaraki ninosa mukateni niraposhosho. Emisiayu endaa narruoyo kake esiaayu idia daa nabikoo eyau enkishui nemeish, naisho intae Enkerai e Tung'ani, amu ninye etipika Enkai Papa olmishire lenye.” Nejoki ninche ninye, “Kaji kinko pee kitum aataas isiaaitin e Nkai?” Newaliki Yesu ajoki ninche, “Ena esiaai e Nkai, pee irukuruku ilo oirriwua ninye.” Nejoki taa ninche ninye, “Kaa kitoduata ias, pee kidol nikiruk iyie? Kaa iasita iyie? Einosa iloo papa enapa mana ti ong'ata, anaa enatisiraki aajo, ‘Eishoo ninche emukate naing'uaa shumata meinosa.’ ” Nejoki Yesu ninche, “Esipa, esipa, ajoki intae, eitu eisho intae Musa emukate naing'uaa shumata. Kake eishorita intae Papa lai ina mukate nasipa naing'uaa shumata. Ore emukate naishoru Enkai naa ina nadou aing'uaa shumata neisho enkop enkishui.” Nejoki ninche ninye, “Lo Kitok, inchoo iyiook anaa ake ina mukate.” Nejoki Yesu ninche, “Ara nanu emukate e nkishui; ore ololotu enatii metum esumash, naa ore olaairuk nanu meitoki ai kata atir enkure. Kake atiaaka intae nchere, kitoduaa kake eton mirukuruku. Ore pooki laaisho Papa epuonu enatii, ore ololotu enatii nemanang'aa boo katukul, amu atadowuo aing'uaa shumata neme pee alotu aas eyieunoto ai, kake eyieunoto e ilo laairriwua. Ena eyieunoto e ilo laairriwua inchere pee maiturraa hoo obo le lelo laaishoo, kake kaitopiu nanu ninche te nkolong e nkiting'oto. Amu ena eyieunoto e Papa inchere, ore pooki odol Enkerai neiruk ninye, netum enkishui nemeish; naa kaitopiu nanu ninye te nkolong e nkiting'oto.” Neaku keing'unyung'unyaki Lyahudi ninye, enkaraki natejo, “Ara nanu emukate natadowuo aing'uaa keper.” Nejo ninche, “Aime Yesu ele enkerai e Yosef, likiyiolo menye o ng'otonye? Kaji naa etiu pee etejo, ‘Atadowuo aing'uaa shumata?’ ” Newaliki Yesu ajoki ninche, “Eming'unyung'uny maate. Metii oltung'ani oidim aeu enatii, te neme Papa laairriwua oyietu ninye; naa kaitopiu nanu ninye te nkolong e nkiting'oto. Eigeroki too mbaa oo loibonok le Nkai aajo, ‘Naa keaku Enkai naiteng'en pooki.’ Ore naa pooki ng'ae otoning'o neiteng'enuo kewan te papa nelotu enatii. Mme taa ketoduaa hoo obo Papa, leme ilo oing'uaa Enkai, ninye otoduaa Papa. Esipa, esipa, ajoki intae, ore olaairuk nanu eeta enkishui nemeish. Ara nanu emukate e nkishui. Einosa loo papaai linyi mana ti ong'ata netuata. Ena mukate nadou aing'uaa shumata, ore olonya ninye nemeye. Ara nanu emukate naishu natadowuo aing'uaa shumata. Ore pooki ng'ae onya ena mukate neishu intarasi; naa ore emukate naishoru naa osesen lai, te nkaraki enkishui e nkop.” Neaku keishankarra Lyahudi aaitirrishakino maate, ejo, “Kaji eiko te neidim aishoo iyiook ele tung'ani osesen lenye mainosa?” Nejoki Yesu ninche, “Esipa, esipa ajoki intae, te neitu inyanya osesen le Nkerai e Tung'ani niokioko osarge lenye, miaatata enkishui ti atua ate. Ore olonya osesen lai neok osarge lai, eeta enkishui nemeish, naa kaitopiu nanu ninye te nkolong e nkiting'oto. Amu endaa nasipa osesen lai, naa eokoto nasipa osarge lai. Ore olonya osesen lai neok osarge lai, neton ti atua nanu naton nanu ti atua ninye. Ore anaa enaairriwua Papa oishu, naishuyie nanu Papa, neijia sii etiu elde laanya nanu, nanu eishuyie. Ena mukate natadowuo aing'uaa shumata, mme anaa enapa nainosa loo papaai, netuata; ore olonya ena mukate neishu ntarasi.” Etejo ninye kuna baa ti atua enkaji e ntumo, eiteng'enisho te Kapernaum. Ore pee ening ilkumok loo looiteng'eni lenyena kuna, nejo, “Kegol ele rorei. Aing'ae oidim atoning'o?” Neyiolou Yesu makewan nchere keing'unyung'uny ilooiteng'eni lenyena te nkaraki ina, nejoki ninche, “Amaa keikob intae ena? Oo naa ti nidolidolo Enkerai e Tung'ani eilepieki enetii apa te dukuya? Enkiyang'et naishoru enkishui; meeta osesen dupoto. Ore lelo rorei latiaaka intae, enkiyang'et naa enkishui. Kake etii kulikae te intae leton meiruk.” Amu eyiolo apa ake Yesu te nkiterunoto ajo kakua leitu eiruk, naa kalo olo akaldaa ninye. Nejo ninye, “Te nkaraki ina atiaaka intae nchere meetae oloidim aeu enatii, te neme keishoro te Papa.” Ore ebaiki ina kata, te nkaraki nena, nerrinyo ilkumok loo looiteng'eni lenyena neitu eitoki aairiamariyie ninye. Nejoki taa Yesu lekua tomon o aare, “Amaa, aiyieuu sii intae nipuopuo?” Newaliki Simon Petero ajoki ninye, “Lo Kitok, aing'ae kipuo enetii? Iyie aota rorei le nkishui nemeish, nikiruko iyiook nikitayioloito nchere, ira iyie Ilo Obo Sinyati le Nkai.” Newaliki Yesu ninche nejo, “Keitu agelu intae, pokira tomon oare, ore obo linyi naa oloirirua?” Eimaka Yudas olayioni le Simon Iskariot, amu obo apa ninye te lelo tomon oare, laa ninye oyooki akaldaa. Ore pee eidipayu kuna baa neloolo Yesu te Galilaya, amu meyieu neloolo te Yudea te nkaraki naing'oru Lyahudi pee ear ninye metua. Netinyikua osirua loo Lyahudi, aa osirua loo lng'oborri. Neaku etiakitia lalashera ninye, “Tung'uai ene shomo Yudea, pee edol sii ninche looiteng'eni linono isiaaitin niasita. Amu meetae oloas ai bae too nkisudorot laa keyieu ninye openy nelioyu aibalayu. Te naa iasita iyie nena baa aibalunye, imbalakinye kewan enkop.” Amu eitu doi eiruk ilalashera lenyena ninye. Nejoki Yesu ninche, “Eton eitu ebau enkata ai, kake etii enkata inyi oshi ake. Meidim enkop aibayu intae, kake kaaiba nanu, amu kaishakenoki nchere arruok iasat enyena. Elepa intae enchom osirua. Mailep nanu alo ele sirua amu eton eitu ebaya enkata ai.” Ore pee eidip atiaki ninche neijia, nebik te Galilaya. Ore eidipa lalashera lenyena aailepa aashom ilo sirua, neitoki sii ninye alo, neitu eitalio kewan, kake etiu anaa keisudori. Neaku keing'oru ninye Lyahudi te ine to sirua, nejo, “Koree ninye?” Netii olong'unyung'unyi atua esiamo te nkaraki ninye, ejo kulikae, “Oltung'ani supat,” nejo kulikae, “A'a keitapong'oo ninye olorere.” Kake ore eyia neijia metii obo oimaki ninye aibalunye eurei Lyahudi. Ore pee eitorito ilo sirua, neilep Yesu ajing enkaji e Nkai, neiteru aiteng'enisho. Neing'asia Ilyahudi nejo, “Kaji eiko pee eyiolo ele tung'ani sirat, neitu ae kata eiteng'eni?” Newaliki Yesu nejoki ninche, “Mme enaai enkiteng'enare ai, kake ene ilo laairriwua. Te nenyorraa oltung'ani aas eyieunoto e Nkai, keyiolou ineina kiteng'enare, te naa ke Nkai eing'uaa aashu te naa ai te nkitoria kewan ai airo. Ore oloiro makewan, enchunet enye makewan eing'oru; kake ore ilo oing'oru enchunet e ilo oirriwua, nesipa ninye, nemetii inemesipa atua ninye. Keitu eisho intae Musa nkitanapat? Nemetii obo linyi oibung'ita nena kitanapat. Ainyoo pee king'oruru aar nanu?” Newaliki olorere aajoki, “Aiata oloirirua. Aing'ae liking'oru aar?” Newaliki Yesu ajoki ninche, “Ataasa esiaai nabo ning'asiate pooki. Te nkaraki ena pee eishoo intae Musa emuratare, neme Musa doi eing'uaa kake lekua loo papa, nimuratata intae oltung'ani te nkolong e sabato. Amaa amu kemurati oltung'ani te nkolong e Sabato pee megili nkitanapat e Musa, oo pee kigorokinono intae nanu amu aitaa oltung'ani biyoto katukul te nkolong e Sabato? Eminguanare anaa inaalioo, kake enguanare te nkiguana oo sipat.” Nejo kulikae le Yerusalem, “Aime ele doi eing'oruni aar metua? Kake eng'urai, eiro aibalie, neitu ejoki ninche ae. Keidimayu sa metaa keyioloi ilooitoreisho aajo ele Kristo? Kake ore ele eikiyiolo eneing'uaa.” Naa tenelioyu kenya ilo oji Kristo eibalunye nemeetae oloyiolo eneing'uaa ninye. Te nkaraki ina etabua Yesu to nkaji e Nkai eiteng'enisho ejo, “Eikiyiololo nanu niyiololo enaing'uaa. Neitu alotu te yieunoto ai makewan, kake ore elde laairriwua ninye osipa, naa ninye miyiololo. Kayiolo nanu ninye, amu ninye aing'uaa naa ninye laairriwua.” Neing'oru ninche eneiko pee eibung ninye, kake metii obo oiteleikia enkaina ninye, amu eton eitu ebau esaa enye. Neiruk ilkumok ninye ti atua olorere, nejo, “Amaa te nelotu Kristo, keas inkitoduaat kumok naalang inaasita ele tung'ani?” Nening Ilfarisayo eimaki esiamo nena baa enyana, neirriwaa lapolosak kituaak o Lfarisayo larripok meshomo aaibung ninye. Nejoki Yesu ninche, “Eng'or enkiti kata eton atii te nebo intae, pee aitoki alo enetii ilo laairriwua. Aikiyookiki aaing'oru, kake mikitumutumu, ore enatii nimindimidimi aaetu.” Nejokino Lyahudi maate, “Kaji ejo pee elo, nimikitumie? Kejo pee elo enetii Lyahudi ooidapashakinote Ilyunani, nelo aiteng'en Ilyunani? Kalo rorei ele otejo, ‘Aikiyookiki aaing'oru nimikitumutumu, ore enatii nimindimidimi aaetu?’ ” Ore te nkolong nabayie, naa ninye enkolong kitok e ilo sirua, neitashe Yesu nebuak ajo, “Te neeta oltung'ani enkure, inchoo elotu enatii aokisho. Ore olaairuk nanu, ore anaa enajo ilkigerot. ‘Keyooki aarukunye nchorroi e nkare naishu to ltau lenye.’ ” Ore pee etejo ninye neijia, Enkiyang'et eimaka natum lelo pooki ooiruk ninye, amu eton eitu ebau ina Kiyang'et ina kata, amu eton eitu eilepieki Yesu metaa kitok. Ore pee ening ematua e siamo kulo rorei nejo, “Esipa ilo oiboni ele.” Nejo kulikae, “Ele Kristo.” Nejo kulikae, “Ai Galilaya epukunye Kristo? Keitu ejo lkigerot eishoi e Daudi eimu Kristo, apukunye Betlehem, enkang natii apa Daudi?” Ore te ina nejing empong'o atua esiamo te nkaraki ninye. Neyieu kulikae neibung ninye, kake metii oloitabaikia ninye enkaina. Nepuonu ilarripok enetii lapolosak kituaak o Lfarisayo, nejokini ninche, “Ainyoo pee eitu iyauu ninye?” Newaliki larripok nejo, “Eitu ae kata eiro oltung'ani anaa enairo ele tung'ani.” Newaliki Lfarisayo ninche nejoki, “Keitapong'oyioki sii intae? Keetae too laitoriak anaa too Lfarisayo oloiruko ninye? Kake ore ena siamo nemeyiolo nkitanapat, kedia.” Nejoki Nikedemo ninche, olapa taa otang'asa alotu enetii Yesu, laa obo te lelo, “Amaa kedung'oki nkitanapat ang oltung'ani enkiguana eton eitu eng'asi aainining neyiolouni enaasita?” Newaliki aajoki ninye, “Aa Galilaya sii yie ing'uaa? Ing'oru tisipu: inchere meetae oloiboni opuku eing'uaa Galilaya.” Nelotu pooki tung'ani enkaji enye. Kake eshomo Yesu Oldoinyo loo Loirienito. Ore enasirie neitoki ajing atua enkaji e Nkai, nepuonu ltung'ana pooki enetii ninye; neton neiteru aiteng'en ninche. Nerikoki ninye lasirak o Lfarisayo enkitok nairrashaki eloloito. Neitasheyie ninye te mpolos. Nejoki, “Lo Aiteng'enani, eirrashaki ena kitok eloloito. Ore ti atua nkitanapat e Musa neitanapa iyiook mataar too soito nkituaak naatiu neijia; aijo iyie aa tiaalo ninye?” Netejo ninche nji, aa entemata etem, pee etum aaitang'oro Yesu. Kake eirruge Yesu nesir enkop to lkimojino. Ore pee ekurraki aaikilikuan neapunye, nejoki ninche, “Enchoo eng'as olinyi lemeeta ng'ok, anang ninye to soit.” Neitoki aigil airrugo, asir enkop to lkimojino. Ore pee ening ninche, neiteru aaipung maa obo, aaiteru too lbotor lenye, neing'uari Yesu aa ninye ake, o enaduoo kitok eitashe te mpolos. Neapunye Yesu nejoki ninye, “Naa kitok, koree ninche? Ai meetae olikitudung'oko enkiguana?” Nejoki, “Metii Lo Kitok.” Nejoki Yesu, “Maaiguanare sii nanu. Shomo, ore ebaiki taata mintoki aas ing'ok.” Neitoki Yesu airorie ninche nejoki, “Ara nanu ewang'an e nkop. Ore olaasuj nanu nemelo ai kata te naimin, kake keeta ewang'an e nkishui.” Nejoki Lfarisayo ninye, “Iyie oishakenoki kewan. Mesipa shakenisho ino.” Newaliki Yesu nejoki, “Te naa kaishakenoki duoo ninye kewan, kesipa shakenisho ai, amu kayiolo enaing'uaa nayiolo enalo; kake miyiololo intae enaing'uaa, aashu enalo. Inguanarere intae anaa to sesen; maiguanare nanu oltung'ani. Kake te naiguanare, nesipa enkiguana ai, amu mme nanu ake, kake nanu o ilo laairriwua. Etisiraki ti atua nkitanapat inyi nchere, kesipa shakenisho oo ltung'ana aare. Ara nanu ilo olimu shakenisho enye makewan, naa kaaishakenoki nanu Papa laairriwua.” Nejoki taa ninche ninye, “Koree Papa lino?” Newaliki Yesu ajoki, “Mikiyiololo nanu nimiyiololo sii Papa te naa eikitayioloito nanu, naa anaata iyiololo sii ninye Papa.” Eiroro Yesu kulo rorei te wueji nepiki mpesai, eiteng'enisho te Nkaji e Nkai. Nemetii oltung'ani oibung'a ninye, amu eton eitu ebau esaa enye. Neitoki ajoki ninche, “Kalo nanu, naa eiking'oruru intae, kake niyeye ti atua ing'ok inyi. Ore enalo mindimidimi aaetu.” Nejo Ilyahudi, “Kear kewan? Amu etejo, ‘Ore enalo nanu nimindimidimi aaetu’?” Nejoki ninye ninche, “Irara intae ile abori; nara nanu ole shumata; nirara intae ile na kop; nemara nanu ole na kop. Ore te ina atiaaka intae, iyeye ti atua ing'ok inyi amu ti nimirukuruku nchere ‘Ara nanu’ niyeye ti atua ing'ok inyi.” Nejoki ninche ninye, “Aira iyie ng'ae?” Nejoki Yesu ninche, “Anaa ake ina natolikio intae te nkiterunoto. Aata mbaa kumok naimaki ti alo intae, naiguanare; kake olaairriwua ninye osipa, naa inatoning'o te ninye, ninche ajoki enkop.” Neitu eyiolou ninche inchere Papa eimaki. Nejoki Yesu ninche. “Ti nilepiepie intae Enkerai e Tung'ani niyiolouu nchere ‘Ara nanu’, nemeeta nanu enaas te nkitoria ai makewan, kake airo kuna baa pooki anaa enaatolikio Papa. Ore olaairriwua netii te nebo nanu. Eitu aaing'uaa aa nanu ake, amu inaaitiship ninye oshi ake aas.” Ore ejoito kuna baa neiruk ilkumok ninye. Akaae, nejoki Yesu lelo Yahudi ooiruko ninye, “Ti nitonini to rorei lai nirara ilooiteng'eni laainei oosipa; naa iyiolouu esipata; nelaku intae esipata.” Newaliki ninche ninye aajoki, “Kira eishoi e Abraham; neitu ae kata kiaaku isinkan le likae tung'ani; kaji etiu pee ijo iyie, ‘Kelakuni intae?’ ” Newaliki Yesu ninche nejoki, “Esipa, esipa, ajoki intae, osinka loo ng'ok pooki ng'ae oas ing'ok. Mebik osinka te nkaji o kenya; nebik enkerai o kenya. Te nelaku intae ina Kerai, ilakunono aaitorioki. Kayiolo ajo irara eishoi e Abraham; kake king'oruru intae nanu aar, amu metii atua intae ororei lai. Alimu enatoduaa te Papa; niaasiasa intae enitoduakita papaai linyi.” Newaliki ninche aajoki ninye, “Abraham papa lang.” Nejoki Yesu ninche, “Te naa irara nkera e Abraham, anaata iasiasa nena naataasa Abraham; kake king'oruru taata intae aar matua oltung'ani otolikio intae esipata natoning'o te Nkai. Eitu eas Abraham ena. Iasiasa intae enataasa papaai linyi.” Nejoki ninche ninye, “Mikitaluno; kiaata Papa obo, naa Enkai.” Nejoki Yesu ninche, “Te naa Papaai linyi Enkai, anaata kinyorrinyorro, amu Enkai aing'uaa, pee atii ene, Neitu alotu makewan, kake ninye laairriwua. Ainyoo pee mining'ung'u intae enajo? Enkaraki nimindimidimi aatoning ororei lai. Irara le papaai linyi, ilo oirirua, ore eyieunoto inyi naa easata oo ng'uarrat naaing'uaa papaai linyi. Olarani apa ake ninye te nkiterunoto, meitashe ninye te sipata, amu metii esipata, atua ninye. Te nejo ninye elejare, nejo te risioroto olkuaak lenye makewan; amu olalejani naa menye le lejare. Kake ore nanu te nkaraki naa esipata airo, nimikirukuruku. Kalo linyi laatoduaaka ng'ok? Omaa te nairo esipata aainyo pee mikirukuruku intae nanu? Ore ilo le Nkai nening irorei le Nkai. Ore te nkaraki ena nimining'ining'i intae amu mirara le Nkai.” Newaliki Lyahudi aajoki ninye, “Keitu kisip ti nikijo aira Osamariai naa iata oloirirua?” Newaliki Yesu ajoki, “Maata nanu oloirirua, kake Papa ayanyit, nikioruru intae enkanyit ai. Maing'oru nanu enkitoo ai makewan; kake etii oloing'oru naa ninye oladung'oni le nkiguana. Esipa, esipa, ajoki intae, te neibung oltung'ani ororei lai nemedol ai kata keeya.” Nejoki Ilyahudi ninye, “Kitisiputua taata aajo iata oloirirua. Etua Abraham neijia sii etiu iloibonok le Nkai, eji nijo iyie, ‘Ore pooki ng'ae oibung ororei lai meishamisham ai kata keeya?’ Ai iyie olkitok alang papa lang Abraham, otua? Netuata sii loibonok le Nkai. Aing'ae doi iyie ijo aitaa kewan?” Newaliki Yesu ajo, “Te naa ai nanu oitaa kewan kitok, neme toki enkitoo ai. Papa doi laaitaa kitok ilo lijojo intae, Enkai ang ninye. Kake miyiololo doi intae ninye, nayiolo nanu ninye; naa te najo nanu mayiolo ninye, naaku olalejani anaa intae; kake kayiolo doi ninye nasuj ororei lenye. Eting'ide papa linyi Abraham, pee edol enkolong ai; nedol ninye, neng'ida.” Nejoki Lyahudi ninye, “Eton eitu ntabaya larin onom, pa nijo kitoduaa Abraham iyie?” Nejoki Yesu ninche, “Esipa, esipa, ajoki intae, ore eton meetae Abraham, ‘Atii nanu.’ ” Nedumu ninche soito pee ear, kake eisudori Yesu, nepuku to nkaji e Nkai. Ore elo ninye nedol oltung'ani otoiwuoki aa modooni. Neikilikuan ilooiteng'eni lenyena ninye aajoki, “Rabbi, aing'ae otaasa eng'oki, kele tung'ani, anaa ilootoiutuo, pee etoiwuoki ninye aa modooni?” Newaliki Yesu ajoki, “Eitu eitarruoo ele tung'ani, anaa ilootoiutuo, kake esiaai e Nkai eji pee eibalunyeki ti atua ninye. Kenare nikias isiaaitin e ilo laairriwua eton aa dama; amu kelotu enkewarie, nemeidim oltung'ani aitayu esiaai. Ore eton atii enkop, ara nanu ewang'an e nkop.” Ore pee ejo ilo rorei, nenotaki enkop, neipurjaki nkamulak inkulupuok; neyelie nkonyek e ilo modooni. Nejoki, “Shomo sujai to lmoti le Siloam.” (Keji ina arna oirriwayioki). Neaku eshomo aisuja neshukunye etodolishe. Neaku, ore ile latia, o lelo ootoduaa apa inchere olaomononi, nejo. “Ai mme ele oshi oton aomonisho?” Nejo kulikae, “Ninye.” Nejo kulikae, “Mme ninye, kake kenyaanyukie ninye.” Nejo ninye openy. “Nanu ilo.” Nejoki ninche ninye. “Kaji kinkunaki pee etabolote nkonyek inono?” Newaliki ajoki, “Oltung'ani oji Yesu oipurja esarng'ab, naaelie nkonyek aainei, naajoki, ‘Shomo Olmoti le Siloam isujai.’ Nalo aisujaa nadolishoyu.” Nejoki ninche, “Kaji etii?” Nejoki, “Mayiolo nanu.” Nerik ninche elde apa modooni enetii Ilfarisayo. Naa enkolong e sabato ina olong pee eipurj Yesu esarng'ab, abol inkonyek enyena. Neitoki sii Lfarisayo aaikilikuan ninye eneikuna pee etodolishe. Nejoki ninche, “Esarng'ab aaelie nkonyek aainei, naisuja, nadolishoyu.” Nejo kulikae loo Lfarisayo, “Mme Nkai eing'uaa ele tung'ani, amu meibung enkolong e sabato.” Nejo kulikae, “Keidim oltung'ani arruoni ataasa inaaing'asiaisho neeijo kuna?” Nejing empong'o atua ninche. Naeku etiakitia ninche ilo tung'ani modooni, “Aijo iyie aa ninye, amu kitabolo naa nkonyek?” Nejo, “Oloiboni ninye.” Kake ore ake etiu neijia, eitu eiruk Ilyahudi mbaa enyena nchere modooni apa netodolishe, o metaba anaa neipot intoiuo eilo tung'ani otodolishe, neikilikuan ninche aajoki, “Kele ayioni linyi litejo apa etoiwuoki aa modooni? Kaji etiu taata pee edolisho?” Newaliki ilootoiutuo aajoki. “Kiyiolo aajo olayioni lang, netoiwuoki apa aa modooni; kake mikiyiolo eneikuna pee edolisho taata, nimikiyiolo olotabolo nkonyek enyena. Ai botor doi, enkilikuana ninye; kelimu mbaa enyena makewan.” Etejo intoiuo ena te nkaraki naure Ilyahudi; amu eidipa Lyahudi aatoning'okinoto nchere, “Ore ake oltung'ani oibalie ajo ninye Kristo, nearari aaipang'ie te nkaji e ntumo. Neaku ina pee etejo intoiuo, ‘Ai botor doi, enkilikuana ninye,’ ” Neitoki taa aaipot ene are elde tung'ani ora apa modooni, nejoki ninye, “Inchoo Enkai enkisisa. Kiyiolo iyiook aajo olarruoni ele tung'ani.” Newaliki ninye ajoki, “Te naa kolarruoni mayiolo nanu; nabo ayiolo, inchere kara apa modooni nadolisho taata.” Neitoki ninche aajoki, “Kaji kinkuna? Kaji eikuna pee kitabolo nkonyek inono?” Newaliki ajoki ninche, “Aidipa duoo atoliki intae, neitu ining'ining'i. Kaji etiu pee iyieuu nintokiki ake aaning? Iyieuu sii intae niakuku ilooiteng'eni lenyena?” Nemor ninche ninye nejoki, “Ira iyie oloiteng'eni lenye; kake kira iyiook ilooiteng'eni le Musa. Kiyiolo iyiook aajo eirorie Enkai Musa; kake ore ele, mikiyiolo eneing'uaa.” Newaliki ilo tung'ani ninche ajoki, “Ainyoo, ene nking'asia eji miyiololo eneing'uaa ninye kake etabolo nkonyek aainei! Kiyiolo aajo mening Enkai ilaing'okok; kake ore oloserem Enkai neas enayieu ninye, kening Enkai ninye. Eitu ae kata ening'i olotabolo nkonyek o ltung'ani oini aa modooni. Te neme Enkai eing'uaa ele tung'ani meidim ataasa toki.” Newaliki ninche ninye aajoki, “Aa iyie olotu aiteng'en iyiook oltung'ani otoikioki atua elulung'ata oo ng'ok?” Nearaa ninche ninye aaipang'ie. Nening Yesu nchere etaaraitie ninche ninye aaipang'ie; ore pee elo netum nejoki ninye, “Iruko iyie Enkerai e Tung'ani?” Newaliki ajoki, “Lo Kitok, ai ng'ae ilo pee atum airuko ninye?” Nejoki Yesu ninye, “Itoduaa iyie, naa ninye ele likirorie.” Nejo ninye, “Olaitoriani, airuko,” neserem ninye. Nejo Yesu, “Te nkaraki enkiguana pee aewuo nanu enkop, pee edolishoyu lelo lemedolisho, neaku modook iloodolisho.” Nening ele rorei kulikae Farisayo ooboitare nejo, “Eikira sii iyiook modook?” Nejoki Yesu ninche, “Te naa naaji irara modook anaata miatata eng'oki. Ore enatiu, ijojo, ‘Kidolisho;’ nebik enkitarruoroto inyi. “Esipa esipa, ajoki intae, ore elde lemeimu kishomi ejing emuatata, kake dikae ekedu aimu, olapurroni naa olaisimani, kake ore ilo oimu kishomi ninye olchekut loo nkerra. Naa ninye ebolu olarriponi; nening nkerra oltoilo lenye; neipot inkerra enyena too nkarn enye nerik auluo. Ore pee eidip aitupuku nkerra enyena pooki nerik ninche, nesuj inkerra ninye; amu keyiolo oltoilo lenye. Mesuj olomoni, kake keituria amu meyiolo oltoilo loo lomon.” Etolikio Yesu ninche ena kitanyaanyukoto, kake eitu eyiolou ninche enatiaaka. Neitoki Yesu ajoki nchere, “Esipa, esipa ajoki intae, ara nanu kishomi oo nkerra. Ore pooki ooiturukutuo te dukuya nanu naa lapurrok o laisimak, kake eitu ening inkerra ninche. Ara nanu kishomi; ore olaaimu nanu keitajeuni, nejing atua nepuku netum endaata. Melotu olapurroni mme kelotu apurroo neiyieng neitarruoo. Aewuo nanu pee etum aanoto enkishui, netum te nkiputakinoto. Ara nanu olchekut supat. Eitayu olchekut supat enkishui enye te nkaraki oo nkerra. Ore olchekut oigero, leme olopeny inkerra, edolu osuyiani elotu, neing'uaa nkerra aisik, neibung osuyiani ninche, neisardaikie. Amu ore olchekut oigeroki nemeetayie tipat inkerra. Ara nanu olchekut supat; nayiolo inaainei, naayiolo sii nanu inaainei, anaa enaayiolo Papa, nayiolo sii nanu Papa; naa kaitayu nanu enkishui ai te nkaraki oo nkerra. Naata sii kulie kerra, neme ine na muatata. Meeta kata nemareu sii ninche naa kening oltoilo lai, naa keaku emboo nabo, o lchekut obo. Te nkaraki ena pee aanyor Papa, amu kaitayu enkishui ai, pee aitoki adumu. Meetae olaaoru enkishui ai, kake kaitayu openy te yieunoto ai. Aata enkidimata pee aitayu, naata enkidimata naitoki ang'amunye. Papa atangamayie ena kitanapata.” Neitoki ake ajing eoro atua. Lyahudi te nkaraki kulo rorei. Nejo ilkumok lenye, “Keeta oloirirua netijing'aki. Oo pee ining'ining'i?” Nejo kulikae, “Mme loata oloirirua kulo rorei. Keidim oloirirua atabolo nkonyek oo lmodook?” Neetae apa osirua le Nkitisinyata te Yerusalem, naa te nkata e nkirobi; neloolo Yesu to nkaji e Nkai, to lgoriet le Solomon. Neman Ilyahudi ninye nejoki, “O anu kenya ing'ashing'ashieshie iyiook? Te naa iyie Kristo toliki iyiook imbalakinye.” Newaliki Yesu ninche nejoki, “Atolikio intae neitu irukuruku; isiaaitin naas te nkarna e Papa, kuna naaishakenoki nanu; kake mirukuruku intae, amu mirara loo nkerra aainei, anaa enatiaaka intae. Kening inkerra aainei oltoilo lai, nayiolo ninche, naa kaasuj ninche, naa kaisho ninche enkishui nemeish, nemeimin ninche ntarasi, nemetii olaaidim aikonyarie ninche aitung'uaa enkaina ai. Ore Papa laaishoo nanu ninche naa kitok te pooki, nemetii hoo oloidim aikonyai te nkaina e Papa. Kira nabo nanu o Papa.” Neitoki Ilyahudi aadumu soito aanang ninye. Newaliki Yesu ajoki ninche. “Aitoduaa intae isiaaitin kumok naaing'uaa Papa lai. Kaa nabo te kuna siaaitin kinang'ieng'ie nanu too soito?” Newaliki Lyahudi aajoki, “Mikinang iyie too soito te siaai supat, kake te nkaraki nitamoro Enkai, o te nkaraki nintaa iyie kewan Enkai, nira oltung'ani.” Newaliki Yesu nejoki, “Aimesira ti atua Nkitanapat inyi nchere, ‘Atejo irara nkaitin?’ Amaa te netejo ninche nkaitin, lelo ootabaikia ororei le Nkai, nemeidimi aaiwuang'ie ilkigerot, nijokiki intae oloitisinyua Papa, neirriu enkop, ‘Itamoro Enkai,’ enkaraki natejo, ‘Ara nanu Enkerai e Nkai?’ Te nemaas isiaaitin e Papa, emikiruk; kake te naas ninche, ore hoo ti nimikirukuruku nanu eruko nena siaaitin, pee imusoso niyiolouu aajo etii Papa atua nanu natii nanu atua Papa.” Neitoki ake aaing'oru eneibung'ie ninye; kake etuluarie ninye ninche. Neitoki alo lido kekun le Yordan ewueji neibatisishore apa Yohana te nkiterunoto; neton te ine. Nepuo ilkumok enetii ninye; nejo, “Eitu eas Yohana olmonekie kake ore pooki natejo Yohana eimaki ele tung'ani kesipa.” Neiruk iltung'ana kumok ninye te ine. Etii apa oltung'ani obo omuei, oji Lasaro le Betania, le nkang oo Mariamu enkanashe Marisa. Enapa Mariamu naelie Olaitoriani eilata narropil nejut nkejek too lpapit lenyena, ninye emuei olalashe lenye Lasaro. Neirriwaki taa nkanashera olkilikuai ejo, “Lo Kitok, ng'urai, emuei oloshi linyor.” Ore pee ening Yesu ina nejo, “Mme ene keeya ena mueyian, kake ene nkitoo e Nkai, paa ore te ina neitaae kitok Enkerai e Nkai.” Nenyor apa Yesu Marisa o enkanashe o Lasaro. Ore pee ening inchere emuei, nebik nkolong'i are te ine netii; ore pee eidipayu nena, nejoki ninye ilooiteng'eni lenyena, “Enyeito manyaai Yudea.” Nejoki looiteng'eni lenyena, “Rabbi king'oru det Ilyahudi aar too soito; nintoki ake aito ine?” Newaliki Yesu ajoki, “Ai mera saai e ndama tomon o are? Ore te nelo oltung'ani dama nemerrorro, amu edol ewang'an ena kop. Kake te nelo oltung'ani kewarie nerrorro amu metii ewang'an atua ninye.” Ore pee eidip atejo kuna baa, neitoki ajoki ninche, “Eirure olchore lang Lasaro; kake kalo pee alo ainyeyie ninye.” Nejoki ilooiteng'eni lenyena, “Lo Kitok, te naa keirure ninye, keishiu.” Naa dolita enaimaka Yesu, enkeeya enye. Kake nejo ninche enkirurata oo njo eimaka. Neliki taa Yesu ninche aibalakinye nejoki, “Etua Lasaro, nang'ida nanu te nkaraki intae inchere matii ine, pee itumutumu aairuko. Kake enyeito maape enetii ninye.” Nejoki Tomas oji Olmaoi lkulikae ooiteng'eni, “Emaape sii yiook pee kiye te nebo ninye.” Ore pee elotu Yesu nenyorriki etobiko Lasaro te nkurare nkolong'i ong'uan. Naa ketaaniki Betania Yerusalem, enyikaki mail are. Neetuo ltung'ana kumok loo Lyahudi enetii Marisa o Mariamu o aaitigir tenkaraki lo lalashe lenye. Ore pee ening Marisa nchere elotu Yesu nelo anang'are; kake etotona Mariamu ti aji. Nejoki taa Marisa Yesu, “Lo Kitok, te naa itii apa ene anaata eitu eye olalashe lai. Kake ore o taata, ayiolo ajo ore embae pooki niomonu te Nkai, aikincho iyie.” Nejoki Yesu ninye, “Kepiu olalashe lino aitoki.” Nejoki Marisa, “Ayiolo ajo keitoki apiu te mpiunoto e nkiting'oto.” Nejoki Yesu ninye, “Ara nanu empiunoto nara enkishui. Ore ilo laairuk nanu, ore ninye te neye, neishu; ore pooki oishu laairuk nanu nemeye ntarasi Iruko iyie kuna?” Nejoki, “Ee Olaitoriani, airuko nchere ira Kristo, Enkerai e Nkai nalotu enkop.” Ore pee eidip atejo neijia, nelo arojaa enkanashe enye Mariamu, arik enkilepata ajoki, “Eewuo Olaiteng'enani nikimpot.” Ore pee ening Mariamu ina neinyototo asioki nelotu enetii. Neton eitu ejing Yesu ina ang kake eton etii enaduoo wueji netii pee enang'are Marisa. Ore Ilyahudi ootii aji te nebo ninye aaitigir, pee edol Mariamu einyototo asioki neipang, nesuj ejo, “Enkurare elo aishir te ine.” Ore pee elotu Mariamu enetii Yesu nedol nebatata too nkejek enyena nejoki, “Lo Kitok, te naa itii apa ene anaata eitu eye olalashe lai.” Ore pee edol Yesu ninye eishir, neishir sii Lyahudi ooiriamunore, nenyamalu to ltau lenye netum osina, nejo, “Ai ti aji irragie?” Nejoki ninche, “Lo Kitok, wou toduaa.” Neishir Yesu. Nejo taa Lyahudi, “Eng'ura eneba enyorrata nanyor ninye!” Kake etejo kulikae lenye, “Ai meidim apa ninye, olotabolo nkonyek o lapa tung'ani modooni, ataasa ai pee meye ele tung'ani?” Neitoki Yesu aisinanuo, nebaiki enkurare. Enkapune ina kurare, neigarakino osoit. Nejo Yesu, “Ewuang'ie osoit.” Ore Marisa, enkanashe lido otua, nejoki ninye, “Lo Kitok, etong'ua taata, amu nkolong'i ong'uan anaa neye.” Nejoki Yesu ninye, “Keitu duoo aajoki ti niruk iyie nidol enkitoo e Nkai?” Neaku, eiwuang'ie ninche osoit te idie neirragie olotua; nedumu Yesu nkonyek aing'or shumata nejo, “Papa aaisho enashe amu kitoning'o. Nayiolo nanu makewan ajo kining oshi ake; kake te nkaraki ele orere laamanita pee atejo nji, pee etum aairuko nchere iyie likirriwua.” Ore pee eidip atejo neijia, nebuak ninye to ltoilo sapuk ajo, “Lasaro tupuku boo.” Nepuku lido otua, neena nkaik o nkejek too nkarash naanukarieki ltung'ana; neena enkomom enye te nkarasha. Nejoki Yesu ninche, “Entalak ninchosho ninye meshomo.” Ore lkumok loo Lyahudi, ooetuo tenebo Mariamu, pee edol kuna baa naataasa Yesu, neiruk ninye, kake eshomo kulikae enetii Lfarisayo neliki enataasa Yesu. Neaku eipoto ilapolosak kituaak o Lfarisayo, entumo e Nkiguana nejo, “Kaa kiaas iyiook? Amu easita ele tung'ani ilmonek kumok. Tinikipalaa iyiook ninye etiu nji, neiruk pooki ninye, neyooki Ilroma aapuonu aaidaikie ene wueji ang sinyati neidaikie olorere lang.” Ore Kaiafas, obo lenye, laa ninye Olapolosani Kitok te ilo ari nejoki ninche, “Miyiololo intae toki nimidamishosho aajo keikash te yiook te nenang oltung'ani obo olosho pee meidaaya olorere olulung'a.” Kake eitu ejo ninye nena te ngolon enye makewan; kake te nkaraki nara ninye Olapolosani Kitok te ilo ari nelimu ajo kenang Yesu ilo orere, neme ilo orere ake kake keji sii pee eiturrurru nkera e Nkai pooki naaisardaka aitaa nabo. Neaku ore ebaiki ina olong nemut enkiguana pee ear Yesu. Ore te nkaraki ina neitu eitoki Yesu aibalie kewan aloolo ti atua Lyahudi, kake eshomo enkalo e nkop nanyikita ong'ata, nelo enkanasa naji Efraim, nebik te ine te nebo ilooiteng'eni lenyena. Netinyikua Pasaka oo Lyahudi, neilep ilkumok aapuo Yerusalem eing'uaa ina kop eton eitu ebau Pasaka, pee epuo aaipok ate. Neing'oru Yesu, ejokino maate eitashe to hekalo, “Aijojo aa? Eji melotu tukul ele sirua?” Ore lapolosak kituaak o Lfarisayo neitanapishe paa tenetii oltung'ani oyiolo enetii, neitayiolo ninche, pee etum aaibung'a ninye. Ore eng'or inkolong'i ile pee ebau Pasaka, nelotu Yesu Betania, enetii Lasaro, ilo oitopiwuo Yesu aitung'uaa keeya. Neitobiraki ninche ninye endaa e teipa te ine neisiaaisho Marisa; ore Lasaro naa obo le lelo ootonita te ndaa te nebo ninye. Neitayu taa Mariamu orratili le ilata narropil e nardo, nagol enkinyang'a, neyelie nkejek e Yesu, nejut nkejek too lpapit lenyena. Neiput enkaji erropili e ina ilata. Nejo Yudas Iskariot, obo loo looiteng'eni lenyena, (ilo oyooki akaldaa) “Oo pee eitu emiri ena ilata narropil aainosie dinarii iip uni neishori laisinak.” Ore pee etejo neijia, mme nkaraki naing'urrie laisinak, kake enkaraki naa olapurroni ninye nenapita olbene loo mpesai, neya nena naapik ine. Nejo Yesu, “Tapala; aaitobiraka ena te nkaraki enkolong enukaroto ai; amu ore laisinak iatata anaa ake te nebo intae, kake mikiaaata nanu anaa ake.” Ore pee eyiolou esiamo kitok oo Lyahudi aajo etii ninye ine nepuonu kake mme te nkaraki Yesu ake, kake eetuo sii aadol Lasaro, oitopiwuo aitung'uaa keeya. Neiguanate lapolosak kituaak eyieu near sii Lasaro metua. Amu ore te nkaraki ninye etoorori Lyahudi kumok aairuk Yesu. Ore te nkolong nasujita, nening ina siamo kitok naewuo osirua nchere elotu Yesu Yerusalem. Nedumu lng'osil loo ltuka nepuo aanang'are ninye. Nebuakita aajo, “Hosana! Emayiana ilo olotu te nkarna o Laitoriani. Laa Olaiguanani le Israel!” Ore pee etum Yesu olkurrarru netonie; anaa enatisiraki aajo, “Miureisho, na tito e Sion! Ing'ura, elotu olaiguanani lino, ekedito olkurrarru le sikiria.” Neitu eyiolou ilooiteng'eni lenyena kuna baa te dukuya, kake ore pee eidipi aaitaa Yesu kitok, nedamu ninche ina kata nchere etisiraki kuna baa te nkaraki ninye, naa kuna eitaasa ninche ninye. Ore ina siamo naboitare netolimutuo pee eipot Lasaro metung'uai enkurare eitopiu aitung'uaa lootuata. Enkaraki ina sii pee eshomo ina siamo anang'are amu etoning'o aajo etaasa ele monekie. Nejokino Lfarisayo maate, “Idolitata taa aajo mitumutumu toki. Eng'urai, eirukurukore enkop pooki ninye.” Naa Ilyunani kulikae ooetuo aaseremisho te ilo sirua. Neaku eshomo nepuonu lelo enetii Filipo le Betsaida te Galilaya, neikilikuan ninye nejoki, “Lo Kitok, aikiyieu nikidol Yesu.” Nelotu Filipo neliki Andrea; nepuonu Andrea o Filipo neliki Yesu. Newaliki Yesu ninche nejoki, “Etabawua esaa pee eitaae kitok Enkerai e Tung'ani. Esipa, esipa, ajoki intae, te neitu edoiki enkantererai e nkano enkop neye, nebik aa ninye ake openy; kake te neye, neiu ilng'anayio kumok. Ore olonyor enkishui enye neiminie, ore oloibayu enkishui enye te nkop nerrip ti atua enkishui nemeish. Te naaisiaai oltung'ani nanu, inchoo aairukurukore, ore enatii nanu neaku ine etii sii olaisiaayiani lai. Ore pooki ng'ae laaisiaai, neyanyitu Papa ninye. “Aatanyamala oltau lai taata, naa kajo aa? Kajo ‘Papa intajeuoki te na saa?’ Kake te nkaraki ena bae e mion pee atabaikia ena saa. Papa, intaa kitok enkarna ino.” Nelotu oltoilo oing'uaa shumata, “Aitaa kitok, naa kaigil aitaa kitok.” Ore ina siamo naitashe te ine, nening nejo etadara. Nejo kulikae, “Olmalaika oirorie ninye.” Newaliki Yesu nejo, “Mme te nkaraki nanu pee eewuo ele toilo, kake te nkaraki intae. Taata enkiguana e na kop; taata earari olaitoriani le na kop aaitupuku. Te naailepieki nanu te nkop nayietu iltung'ana pooki enatii.” Netejo ninye ena eutu ajo kaa keeya eye ninye. Newaliki esiamo aajoki, “Kitoning'o too nkitanapat nchere ebik Kristo ntarasi; oo naa pee ijo iyie meeta nchere pee meilepieki Enkerai e Tung'ani. Ai ng'ae doi ena Kerai e Tung'ani?” Nejoki Yesu ninche, “Enkiti kata eton etii ena wang'an atua intae. Enchom eton iatata ina wang'an, pee meidimu intae enaimin, ore ilo olo te naimin nemeyiolo enelo. Ore eton iatata ewang'an, eruko ina wang'an, pee itumutumu aataa nkera e wang'an.” Ore pee ejo Yesu kuna baa nelo aisudori pee medol ninche. Ore hoo netaasa ilmonek kumok etii ninche eitu eiruk ninche ninye, pee eitabari ororei lo loiboni le Nkai Isaya otejo, “Olaitoriani aing'ae oiruko elikioroto ang? Naa aing'ae etabolokoki enkaina e Nkai?” Te ina eitu eidim ninche aairuko amu enyaaka sii Isaya ajo, “Eitamodoo nkonyek enye, neitagol iltauja lenye, pee medol ake too nkonyek enye, neyiolou too ltauja lenye, neibelekenya, pee aishiunye.” Netejo Isaya kuna baa amu etoduaa enkitoo enye nelimu mbaa enyena. Kake ore etiu neijia, eiruko ilkumok loo lkituaak, kake ore te nkaraki Ilfarisayo, eitu eibalunye pee merishieki enkaji e ntumo; amu etonyorra enkisisa oo ltung'ana aaitalang enkisisa e Nkai. Nebuak Yesu ajo, “Ore olaairuk nanu mme nanu eiruk kake lido laairriwua eiruko; ore olaaing'or nanu eing'orita lido laairriwua; aewuo nanu pee aaku ewang'an e nkop paa ore pooki laairuk nanu nemeton ti atua enaimin. Te nening oltung'ani irorei laainei nemeibung nemaiguanare nanu ninye, amu eitu alotu pee aiguanare enkop, kake pee aitajeu enkop. Ore ilo laany nanu, nemeng'amu irorei laainei, neeta oloiguanare. Ilo rorei lairoro oiguanare ninye te nkolong e nkiting'oto; amu eitu airo nanu makewan; kake Papa laairriwua, ninye openy laaishoo enkitanapata e nena najo o nena nalimu. Nayiolo nanu nchere ore enkitanapata enye naa empuaan oo ntarasi; metaa ore nena najo nanu, naa inaatiaaka Papa ninche alimu.” Ore eton engor enkolong osirua oji le Pasaka, etayiolo Yesu ajo etabawua esaa enye nalotie aing'uaa ena kop, alo enetii Papa. Netonyorra lelo lenyena ootii enkop, netonyorra ninche metabaiki enkiting'oto. Ore einosita endaa, neidipa oloirirua atijing'a oltau le Yudas Iskariot, enkerai e Simon, nchere pee ekaldaa. Neyiolou Yesu ajo eishoo Papa enkaina enye pooki toki, neyiolo ajo enetii Enkai eing'uaa naa enetii Enkai eito. Neinyototo aing'uaa endaa, neirragie nkilani enyena, nerrapu enkarasha arreten kewan. Nebukoki enkare embesen neiteru aisuj inkejek oo looiteng'eni nejut te nkarasha narretenare. Nelotu enetii Simon Petero. Nejoki ninye, “Lo Kitok, aa inkejek aainei intuku?” Neng'amaa Yesu ajoki ninye, “Ore enaasita nimiyiolo iyie taata kake iyooki ayiolou te siadi.” Nejoki Petero ninye, “Mikintuku nkejek aainei ai kata!” Newaliki Yesu ajoki ninye, “Te neitu aaisuj iyie, nimira ole nkalo ai.” Nejoki Simon Petero ninye, “Lo Kitok, mme naa nkejek aainei ake, kake o nkaik o endukuya ai.” Newaliki Yesu ninye, “Ore oloidipa aitukuoyu meitoki ayieu enkitukuo meteleku nkejek enyena, tuan pooki wueji enye, nirara intae tuani, kake mme intae pooki;” amu keyiolo apa olokaldaa. Ina pee etejo, “Mirara tuani intae pooki.” Ore pee eidip aitukuo nkejek enye neishopo nkilani neitoki aton, nejoki ninche, “Aiyiololo enaitaasa intae? Kijojo intae nanu, ‘Lo Aiteng'enani’, o ‘Lo Kitok’ nitisipa amu kara. Omaa te naituku nanu intae Olkitok, nara Olaiteng'enani nkejek inyi, keishiaakino sii ninche intae neituku olikae olikae nkejek. Aishoo intae enkitanyaanyukoto, paa ore ena naitaasa intae, nintaasasa sii intae, esipa, esipa, ajoki intae, mme kitok orrindik to lkitok lenye, neme kitok oloipaayioki to loipaayie. Ti niyiololo kuna baa, imayianana ti niaasiasa. Mme intae pooki aimaki. Ayiolo ilo lategelua; kake nchoo eitabari lkigerot oojo, ‘Ore ilo oinosa emukate ai aatudumaka entutunyo enye aagilunore nanu.’ Ore ebaiki taata, aliki intae eton eitu eaku, pee te neaku, nirukuruku nchere, Ara nanu. Esipa, esipa, ajoki intae, ore olong'amu pooki ng'ae lairriwaa, nanu eng'amu, ore olaang'amu naa ilo laairriwua eng'amu.” Ore pee eidip Yesu atejo neijia, nenyamalu to ltau nejo, “Esipa, esipa, ajoki intae, kaakaldaa obo linyi nanu.” Neing'urung'ura ilooiteng'eni maate amu meyiolo aajo kalo eimaki. Neirishakino olgoo le Yesu, obo loo looiteng'eni onyor Yesu. Neyuk Simon Petero te nkaina nejoki, “Nkilikuana tiaaki ai ng'ae eimaki.” Neirishakino olgoo le Yesu nejoki ninye, “Lo Kitok, aing'ae?” Newaliki Yesu ajoki, “Ilo laisho endung'oti aidipa aitadoiki.” Ore pee eidip aitadoiki, neitayu neisho Yudas Iskariot olayioni le Simon. Ore pee eidip Yudas atang'amai endung'oti nejing Shetani atua ninye. Neaku etiaka Yesu ninye, “Tasioki taasa eniaas.” Nemetii te lelo ooinosita endaa, oloyiolo ajo aainyo pee etiaka neijia. Nejo kulikae, amu Yudas apa onap olbene loo mpesai, eji ketiaaka Yesu, “Inyang'u ntokitin nikiyieu to sirua,” aashu etiaka meishoo laisinak toki. Ore pee eng'amaa ninye endung'oti neipang nabo kata; naa kewarie. Ore pee eidip Yudas aipung'o boo nejo Yesu, “Eitaaki taa kitok Enkerai e Tung'ani, neitaaki Enkai kitok ti atua ninye. Te neitaaki Enkai kitok ti atua ninye, keitaa sii ninye Enkai ninye kitok ti atua kewan, naa taata inji eitaa ninye kitok. Nkera aainei, eng'or enkiti kata eton aboitare intae. Eikiyookiki aaing'oru nanu, naa ore anaa enatiaaka Lyahudi, ‘Ore ine nalo mindimidimi aaetu,’ neijia sii ajoki intae taata. Aisho intae enkitanapata ng'ejuk, entonyorrata anaa enatonyorra nanu intae. Te ina eyiolou pooki aajo, irara looiteng'eni laainei, ti niatata enyorrata olikae o likae.” Nejoki Simon Petero ninye, “Lo Kitok, kaji ilo?” Newaliki Yesu ajoki, “Ore enalo, nimikindim atusuju taata, kake eikisuju te siadi.” Nejoki Petero ninye, “Lo Kitok, Aainyo pee maaidim atusuju taata? Ekaitayu enkishui ai te nkaraki iyie.” Newaliki Yesu nejoki ninye, “Eji intayu enkishui ino te nkaraki nanu? Esipa, esipa, aajoki, meru olkuku eitu kimiki iyie katitin uni. “Emincho enyamalu iltauja linyi, eruko Enkai nikirukuruku sii nanu. Etii enkaji e Papa ilgilat kumok amaa, te neme neijia etiu kanaata atiaaka intae, amu kalo aitobiraki intae ewueji? Naa te nalo aitobiraki intae ewueji, naitoki ashukunye, naa karikoki intae kewan paa ore enatii nitii sii intae. Ore enalo, iyiololo intae enkoitoi.” Nejoki Tomas ninye, “Lo Kitok mikiyiolo enilo; kaji kinko ti nikiyiolou enkoitoi?” Nejoki Yesu ninye, “Ara nanu enkoitoi o esipata, o enkishui. Metii oltung'ani olotu enetii Papa mme nanu eimayie. Te naa aikitayioloito nanu, anaata iyiololo sii Papa. Ore ebaiki taata iyiololo ninye; nitoduaa ninye.” Nejoki Filipo ninye, “Lo Kitok, intoduaa iyiook Papa, amu eidip iyiook.” Nejoki Yesu ninye, “Kaboitare oshi intae ena kata pooki, neton ake mikiyiolo iyie Filipo? Ore olaatoduaa nanu netoduaa Papa: aainyo pee itejo intoduaa iyiook Papa? Ai miruk inchere atii nanu atua Papa netii Papa atua nanu? Ore irorei laliki intae malimu te nkitoria ai makewan, kake Papa oton ti atua nanu oas isiaaitin enyena. Irukoki inchere atii nanu atua Papa, netii Papa atua nanu: aashu naa kiruk te nkaraki oo siaaitin ate. Esipa, esipa, aajoki, ore elde laairuk nanu, ore kuna siaaitin naas neas ninye, naa keas isapuki naalang kuna amu kalo enetii Papa; naa ore pooki niomonunu te nkarna ai, ina aas, pee etumi aaterrep Papa te nkaraki Enkerai. Ti nikiomonono entoki te nkarna ai naa kaas ina. “Te naa aikinyorrinyorro nanu nimbung'ubung'u nkitanapat aainei; naa kaomon nanu Papa, naa keisho intae likae Autaroni metobiko te nebo intae intarasi; laa Enkiyang'et e sipata, lemeng'amu enkop amu medol ninye nemeyiolo ninye. Iyiololo intae ninye amu keton ti atua intae, netii atua intae. “Maing'uaa intae irara okishin; kalotu enitii. Eng'or enkiti kata pee maaitoki adol ena kop, kake kidolitata intae nanu, ore amu kaishu ninchushu sii intae. Ore te ina olong niyiolouu intae aajo atii atua Papa, nitii intae atua nanu, nanu natii atua intae. Ore oloata nkitanapat aainei, neibung ninche, ninye laanyor; naa ore olaanyor kenyorru Papa ninye, naa kanyorru nanu ninye. Naa kaibalakinye kewan ninye.” Nejoki Yudas ninye kake mme Iskariot, “Kaji inko lo Kitok, ti niboloki iyiook kewan, nimiboloki enkop?” Newaliki Yesu ajoki ninye, “Te naanyor oltung'ani nanu, keibung ororei lai, naa kenyorru Papa ninye, naa aikipuonu enetii ninye nikimany nebo o ninye. Ore olemaanyor nanu, nemeibung irorei laainei, ore ele rorei lining'ining'i neme olalai kake ole Papa laairriwua. “Atolikio intae kuna baa, eton aboitare intae. Kake lido Autaroni, ora Enkiyang'et Sinyati oirriu Papa te nkarna ai, oitayiolo intae imbaa pooki neitadamu intae nena pooki natolikio intae. Atung'eikia intae eseriani, aishoo intae eseriani ai. Aisho intae neme anaa enaishoru enkop. Emincho ltauja linyi enyamalu; emincho eureishoyu. Itoning'o enatiaaka intae ajo, ‘Kalo, naa kashukokino intae.’ Te naa napaji ai kinyorrinyorro anaata ing'idada nchere enetii Papa alo, amu kitok Papa te nanu. Ore o taata, atolikio intae eton eitu eaku, pee te neaku nirukuruku. Meekure aitoki airorie intae oleng, amu elotu olkitok le na kop, kake meeta engolon te shumata nanu, kake aas nanu anaa enaaitanapa papa pee etum enkop atayiolo nchere kanyor nanu Papa. Enyeito emaape te ne. “Ara osabibu odede, naa Papa olaramatani. Ore olng'osila ti atua nanu lemeiu lng'anayio, neiwuang'ie ninye, ore olng'osila pooki oiu lng'anayio, neitobir metisidana, peyie eiu lng'anayio kumok. Neitaaki taata intae sidain te nkaraki o rorei latiaaka intae. Entotoni ti atua nanu anaa te naton ti atua intae. Ore anaa enemeidim olng'osila otoiu lng'anayio makewan, te nemetii olchani, mindimidimi sii intae ti ni mitonini ti atua nanu. Nanu osabibu; intae ilng'osil. Ore oloton ti atua nanu, anaa te naton sii nanu ti atua ninye, neiu lng'anayio kumok, amu ore matii nanu mindimidimi intae aataas toki. Te nemeton oltung'ani ti atua nanu nenang'ari boo anaa olng'osila, netoyu, nesotu iltung'ana ninche nenang'akini enkima, metapejo. Ti nitonini intae ti atua nanu, neton ororei lai ti atua intae, entoomonu entoki pooki niyieuu naa keitaasi intae. Te ina errepi Papa, inchere iatata lng'anayio kumok, niakuku taa ilooiteng'eni laainei. Ore anaa enaatonyorra Papa, atonyorra sii nanu intae. Entotoni ti atua enyorrata ai. Tinimbung'ubung'u intae nkitanapat aainei, na aitonini ti atua enyorrata ai, anaa enaibung'a nkitanapat e Papa naton ti atua enyorrata enye. Atolikio intae kuna baa pee etum eng'ida ai atotona ti atua intae, pee etum eng'ida inyi ataboreyia. “Ena enkitanapata ai, inchere tonyorra olikae anaa enatonyorra nanu intae. Meetae oloata enyorrata sapuk nalang ena, eji aitayu oltung'ani enkishui enye te nkaraki lchoreta lenyena. Irara intae lchoreta laainei ti niaasiasa pooki ake bae naitanapa intae. Maitoki ajo intae isinkan, amu meyiolo osinka enaasita olkitok lenye; kake atejo intae ilchoreta, amu atolikio intae pooki natoning'o te Papa. Mme intae likitegelutua nanu kake kategelua intae naitanap intae enchom entoiu ilng'anayio, nebik ilng'anayio linyi, paa ore pooki niomonono Papa te nkarna ai, neisho, intae. Ena aitanap intae, inchere entonyorrata. “Te neibayu intae enkop, entayiolo nchere nanu etang'asa aibayu eton eitu eibayu intae. Te naa irara le nkop, naa anaata enyor enkop ilenyena; kake mirara ile nkop, amu ategelua intae aitung'uaa enkop, te nkaraki e ina pee eiba intae enkop. Entadamu ilo rorei latiaaka intae, ‘Mme kitok osinka to lkitok lenye.’ Te naaisilisilo nanu keisilisil sii ninche intae; te neibung'a ororei lai, keibung sii ninche intae; te neibung'a ororei lai, keibung sii ninye olinyi. Kake keitaas intae kuna baa pooki te nkaraki enkarna ai, amu meyiolo ninche ilo laairriwua. Te neitu apa alotu airorie ninche, anaata meeta eng'oki; kake meekure taata eeta eneitolonyaki te ng'oki enye. Ore olaaiba nanu neiba sii ninye Papa. Te neitu apa aas ti atua ninche isiaaitin neitu eas likae, anaata meeta eng'oki; ore taata netoduaa naaibayu nanu o Papa lai. Kake ororei oigeroki ti atua nkitanapat enye eitabari, ‘Aaibaitie nanu pesho'.’ Ore te nelotu olautaroni, Enkiyang'et e sipata, olotu aing'uaa papa intae oing'uaa Papa ninye laaishakenoki nanu; niraa sii intae ilchakenini, amu ore ebaiki enkiterunoto kiboitarere intae nanu.” “Atolikio intae kuna baa pooki pee merrorri intae. Kearaa intae aaipung'ie too nkajijik e ntumo: ee kelotu enkata naa kejo pooki ng'ae oar intae entuata nedamu ajo ke Nkai eisiaita. Neitaas intae kuna baa amu eitu eyiolou Enkai aashu nanu. Kake atolikio intae kuna baa pee te nebau enkata enye, nidamumu ninche nchere atolikio intae. “Neitu aliki intae kuna te nkiterunoto, amu aboitare apa intae. Kake alo taata enetii lido laairriwua, kake metii obo linyi laaikilikuan ajoki, ‘Kaji ilo?’ Kake ore amu atolikio intae kuna baa, eiputa iltauja linyi osina. Kake esipata ena naliki intae, intae eret te nalo; amu te neitu alo nemelotu Olautaroni enitii; kake te nalo, nairriwaki intae ninye. Ore te nelotu ninye neitumus enkop enetii eng'oki o esipata o enkiguana; te ng'oki amu maairuk nanu. Too sipat amu kalo enetii Papa nimikintokiki aadol: te nkiguana amu eiguanareki olkitok le na kop. “Eton aata mbaa kumok najoki intae, kake mindimaa taata; kake te nelotu ninye, ina Kiyang'et e sipata nerik intae atua esipata pooki, amu melotu airo anaa makewan, kake enaning pooki elimu, neliki intae imbaa naapuonu. Naa ninye laaitaa nanu kitok; amu inaainei eng'amu neitodol intae. Ore nena pooki naata Papa inaainei; ina pee atejo, inaainei; eng'amu neitodol intae. “Eng'or enkiti kata, pee mikintokiki aadol ore ake sii te nkiti kata, nikintokiki aa dol.” Nejokino, nejokino ematua oo looiteng'eni, “Kalo rorei ele ojoki ninye iyiook, ‘Enkiti kata, nimikintokiki aadol ore ake sii te nkiti kata nikintokiki aadol?’ Nejo naa, ‘Enkaraki naa kalo enetii Papa?’ ” Nejo, “Kalo rorei ele ojo, ena ‘kiti kata?’ Mikiyiolo iyiook enajoito.” Neyiolou Yesu ajo keyieu neikilikuanishore, nejoki ninche, “Kenadoi iyieuu nikinkilikuanana natejo, ‘Eng'or enkiti kata pee mikintokiki aadol, ore ake sii te nkiti kata nikintokiki aadol’? Esipa, esipa, ajoki intae, ainchirishiri niyietutu to sina, kake keng'ida enkop; keinosieki intae osina, kake keibelekenya osina linyi aaku eng'ida. Ore eisho enkitok neeta osina le mion sapuk amu etabawua enkata enye; kake ore pee eidip atoiu enkerai, meitoki adamu osina te nkaraki eng'ida to ltung'ani otoiwuoki te nkop. Ore sii intae iatata taata osina; kake kaitoki ake adol intae, neng'ida iltauja linyi, nemetii oltung'ani ooru intae eng'ida inyi. Ore te ina olong mikinkilikuanana nanu toki. Esipa, esipa, ajoki intae, ti niomonunu toki te Papa, neisho intae te nkarna ai. Ore o taata eton eitu iomonunu toki te nkarna ai; entoomonu, naa itumutumu, pee eboreyu eng'ida inyi. “Airorie intae too nkitanyaanyukot te kuna baa. Kelotu enkata nemaitoki airorie intae too nkitanyaanyukot, kake kaibalakinye intae aliki imbaa e Papa. Ore te ina olong, niomonono te nkarna ai, nemajoki intae kaomonoki intae te Papa; amu kenyor ninye Papa openy intae, amu kitonyorra intae nanu niruko nchere kaewuo aing'uaa Enkai. Enetii Papa aing'uaa, nalotu enkop; naa kaitoki aing'uaa enkop alo enetii Papa.” Nejoki ilooiteng'eni lenyena, “Aha, iroro taata aibalie, neme te nkitanyaanyukoto iroro. Kitayioloito taata aajo iyiolo iyie pooki toki, nimikinare nikinkilikuanishore oltung'ani; te na kiruko inchere iewuo iyie aing'uaa Enkai.” Newaliki Yesu ninche ajoki, “Iruko taata? Eng'ura, kelotu enkata, neewuo taata, naisardakieki intae, nelo pooki tung'ani enkang enye, naaing'uari aa nanu ake; kake mme nanu ake, amu aaboitare Papa. Atolikio intae kuna baa pee iatata osotua ti atua nanu. Iatata osina ti atua ena kop, kake entagoluoto! Atimira nanu enkop!” Ore pee etejo Yesu kuna baa, neing'orie nkonyek enyena keper, ajo, “Papa etabawua esaa; intaa kitok Enkerai ino pee kintaa sii Enkerai ino iyie kitok. Amu inchoo meitoria pooki tung'ani pee eisho enkishui nemeish lelo pooki linchoo iyie ninye. Naa ena enkishui nemeish, inchere pee kiyiolou iyie Enkai nasipa nabo ake, neyiolou Yesu Kristo, ilo lirriwua. Aaitaa nanu iyie kitok te nkop; aitabayie esiaai nikinchoo mataasa. Ore taata Papa, intaaki iyie nanu kitok, te nebo iyie te nkitoo naata apa te nebo iyie eton eitaae enkop. “Aibalakinye enkarna ino lelo tung'ana likinchoo iyie aitung'uaa enkop. Ilinono apa ninche, nikinchoo iyie ninche, neibung'a ororei lino. Netayioloito taata ninche aajo ore pooki nikinchoo naa iyie eing'uaa; amu ore irorei likinchoo iyie naishoo nanu ninche, netang'amutua ninche, netisiputua aayiolou inchere, iyie aing'uaa, neiruko inchere iyie likirriwua. Ninche aomonoki; maomonoki enkop, kake lelo likinchoo, amu ilkulinono ninche; naa ore ntokitin aainei pooki inkuninono, naa inaainei ininono, naaitaaki kitok ti atua ninche. Meekure atii nanu enkop, netii ninche enkop; etaa alotu nanu enitii. Papa Sinyati, torripo ninche te ngolon e nkarna ino, te ina arna apa nikinchoo nanu, pee eaku nabo anaa enikira sii iyiook nabo. Ore oshi eton atii te nebo ninche natorripo ninche, te nkarna ino, lelo likinchoo nanu atagolie nanu ninche, nemetii hoo obo oimina, meteleku ina kerai e nkiminata pee eitabari ilkigerot. Alotu taata enitii iyie, najo kuna baa te nkop pee eiputakino ninche eng'ida ai. Aishoo ninche ororei lino; neibayu ninche enkop, amu mme le nkop anaa enemara nanu ole nkop. Maomonoki intayu ninche te nkop, kake pee intajeu iyie ninche te ilo torrono. Mme le nkop ninche anaa enemara nanu ole nkop. Intisinya ninche te sipata ino. Esipata ororei lino. Ore anaa enikirriwua iyie nanu atua enkop, airriwayie sii nanu ninche atua enkop; naa kaitisiny kewan te nkaraki ninche pee esinyayu sii ninche te sipata. “Neme ninche ake aomonoki, kake o lelo pooki laairuk nanu enkaraki ororei lenye; pee eaku pooki nabo, anaa iyie Papa itii atua nanu natii nanu atua iyie, pee etii sii ninche atua iyiook, pee etum enkop airuko nchere iyie likirriwua. Aishoo ninche ina kitoo nikinchoo iyie nanu, pee etum aataa nabo anaa enikira iyiook nabo; atii nanu atua ninche nitii iyie atua nanu, pee eitaai ninche ilooiputakinote o metaa nabo, pee etum enkop atayiolo nchere iyie likirriwua, nitonyorra ninche anaa enikitonyorra nanu. “Papa, ayieu netii, lelo likinchoo enatii nanu, pee edol enkitoo ai nikinchoo iyie, amu kitonyorra iyie nanu eton etioyo enkitamanyunoto e nkop. Iyie Papa sinyati, eitu kiyiolou enkop, kake aatayiolo nanu netayioloito kulo nchere iyie likirriwua nanu. Netaiyioloito ninche enkarna ino naa kaitoki aitayiolo, pee etii atua ninche ina nyorrata nikitonyorrie nanu, natii nanu atua ninche.” Ore pee eidip Yesu atejo kuna baa nepuku o looiteng'eni lenyena, aapuo lido kekun le reyiet e Kidron enetii olokeri oshomo ninye o looiteng'eni lenyena. Ore Yudas, ilo otakaldayie ninye, neyiolo sii ninye ine wueji amu kesesh apa elo Yesu ine o looiteng'eni lenyena. Nedumu Yudas empikas oo sikarini o larripok ooing'uaa lapolosak kituaak o Lfarisayo, nepuonu ine eeta ltaai o lkilang'ilang'eta o masaa o larrabal. Ore Yesu, eyiolo inaaitaasi ninye pooki, nepuku nejoki, “Ai ng'ae ing'oruru?” Newaliki ninche aajoki, “Yesu le Nasaret.” Nejoki Yesu ninche, “Ara ninye.” Ore sii Yudas ilo otakaldayie ninye neitashe te nebo ninche. Ore pee eidip atiaaki ninche, “Ara ninye,” nerrinyo siadi nebatata te nkop. Neigil, aikilikuan ajoki, “Ai ng'ae ing'oruru?” Nejo ninche, “Yesu le Nasaret.” Newaliki Yesu ajoki, “Atiaka intae ara ninye, te naa nanu ing'oruru, enchoo kulo epuo.” Pee eitabari ororei apa oiroro, ajo, “Ore te lelo likinchoo maata olaiturrayie.” Neeta Simon Petero, olalem, neshutu, neoshie osinka lo Lapolosani Kitok nedung'u enkiok e tatene. Keji enkarna e ilo sinka Malkus. Nejoki Yesu Petero, “Inyaaki olalem lino enchashur. Amaa enkikompe naaishoo Papa, ai ninye maok?” Ore ina pikas o sikarini o lkitok lenye o larripok loo Lyahudi, neibung Yesu neen, neng'as aarikoki Annas, amu olaputani le Kaiafas, laa ninye Olapolosani Kitok te ilo ari. Kaiafas olapa otiaaka Lyahudi nchere keishiaakino naa oltung'ani obo onang olorere. Nesuj Simon Petero o ilo likae oiteng'eni Yesu. Neyiolo ilo likae oiteng'eni Olapolosani Kitok, nejing ninye o Yesu atua olgoriet lo Lapolosani Kitok. Kake eitashe Petero ti auluo te mbata e kutuk aji. Nelotu taa ilo likae oiteng'eni oyiolo Olapolosani Kitok, neirorie enkarriponi e kutuk aji, neitijing'u Petero atua. Ore ina tito narrip kutuk aji, nejoki Petero, “Aa ira sii iyie obo loo looiteng'eni lele tung'ani?” Nejo, “Mara.” Neinuaa isinkan o larripok enkima oo nkuk amu keirobi, naa ore eitashoo te ine, eijito enkima, neitashe Petero o ninche, eijito enkima. Neikilikuan Olapolosani Kitok Yesu mbaa oo looiteng'eni lenyena o mbaa naaiteng'enishe. Newaliki Yesu ajoki ninye, “Airorie enkop aibalakinye mbaa. Aiteng'enisho oshi ake too nkajijik e ntumo o te nkaji e Nkai natumore Lyahudi pooki, nemeeta embae nairoro too nkisudorot. Aainyo paa nanu inkilikuan? Inkilikuana ilaatoning'o enatiaaka. Eyiolo ninche enatejo.” Ore pee ejo ninye neijia, neosh obo loo larripok oitashe te mbata eseder te nkaina, nejoki, “Ai neijia ijo ti niwaliki Olapolosani Kitok?” Newaliki Yesu ajoki ninye, “Te naa katejo ntorrok, tolimu shakeni e ina torroni; kake amaa te naa sipat, aainyoo pee kiosh?” Neirriwaa Annas ninye eena enetii Olapolosani Kitok Kaiafas. Neitashe Simon Petero aij enkima. Nejoki ninche ninye, “Oo iyie, aa ira obo loo looiteng'eni lenyena?” Nemiki, nejo, “Mara.” Ore osinka obo lo Lapolosani Kitok alashe le ilo otundung'oyie Petero enkiok, nejo, “Keitu duoo aadol to lokeri te nebo ninye?” Neitoki ake Petero amiki, ore ina kata neru olkuku. Nerik ninche Yesu aaitung'uaa Kaiafas, aarik enkaji o Lbalusui; naa enasirie. Eitu ejing ninche maate enkaji o Lbalusui pee meidurukieki. Amu kejo pee etum aainosa Pasaka. Neaku eipang'aka, neipang'aki Pilato ninche nejo, “Kaa kitarruorroto iyaunye ele tung'ani?” Newaliki ninche aajoki, “Te neme olaasani loo ntorrok ele tung'ani, anaata eitu kirikoki iyie.” Nejoki Pilato ninche, “Ewaita intae ninye eng'uanare too nkitanapat inyi.” Nejoki Lyahudi ninye, “Meishoro iyiook matar oltung'ani metua.” Etotiwuo neijia pee etum atabai enatejo Yesu pee eutu ajo kaa keeya eye ninye. Neitoki Pilato ajing atua enkaji o Lbalosi neipot Yesu nejoki, “Aa ira iyie olaiguanani lo Lyahudi?” Newaliki Yesu ajoki, “Ai yie makewan ojo nji ana ail kulikae likitolikitio mbaa aainei?” Newaliki Pilato, “Kara nanu Olyahudi? Olorere lino o lapolosak kituaak likiyakita nanu. Kaa itaasa iyie?” Newaliki Yesu nejoki, “Ore enkitoria ai mme ene na kop. Te naa napaji ke ne na kop enkitoria ai anaata aatang'oro ilooiteng'eni laainei, pee maapiki nkaik oo Lyahudi; kake ore enatiu, mme ene ne enkitoria ai.” Nejoki Pilato ninye, “Metaa ira iyie olaiguanani?” Newaliki Yesu ajoki, “Iyie otejo nchere ara nanu olaiguanani. Aatoiwuoki nanu enkaraki ena, naa enkaraki ena pee aewuo enkop pee aishakenoki esipata, Ening ole sipata pooki oltoilo lai.” Nejoki Pilato ninye, “Ainyoo esipata?” Ore pee eidip atejo neijia, neitoki aipang'aki Lyahudi nejoki, “Eitu atumie hoo ninye entiyoto naishiakinore enkiguana. Kake iatata olkerreti lalaakinye intae oltung'ani obo te Pasaka. Iyieuu nalaaki intae olaiguanani loo Lyahudi?” Nebuak pooki aaitoki aajo, “Mme ele tung'ani, kake Barabas.” Naa olaisimani apa Barabas. Nerik Pilato Yesu neidong te nkeene; neshetu isikarini olmarisian loo lkiku, nepik elukunya enye, neishopoki olkila onyokie. Neaku kepuonu enetii aajoki, “Supa, lo aiguanani loo Lyahudi!” Nedam isederi. Neitoki Pilato aipang nejoki ninche, “Eng'urai, aipang'akinye intae ninye pee iyiolouu aajo eitu atumie hoo enkitarruorroto.” Neipang'u taa Yesu eishopito olmarisian loo lkiku o lkila onyokie. Nejoki ninye ninche, “Eng'ura ele tung'ani.” Ore pee edol ilapolosak kituaak o larripok ninye, nebuak aajo, “Tasho! Tasho!” Nejoki Pilato ninche, “Ewaita intae oopeny, entasho; amu eitu atumie nanu ninye hoo enkitarruorroto.” Newaliki Lyahudi ninye aajoki, “Kiata iyiook enkitanapata naa ore te ina kitanapata keishiaakino keeya te nkaraki naitaa kewan Enkerai e Nkai.” Ore pee ening Pilato ilo rorei neureishoyu oleng, neitoki ajing atua enkaji o Lbalusui, nejoki Yesu, “Kaji ng'uaa iyie?” Kake eitu eisho Yesu ewalata hoo nabo. Nejoki Pilato, “Aimikirorie nanu? Ai miyiolo ajo kaata engolon naalakie naata engolon naasheyie?” Newaliki Yesu nejoki, “Miata hoo napaji engolon te nanu te neme eikinchooki eing'uaa shumata. Enkaraki e ina pee eeta olaatorikoko iyie eng'oki nalusoo.” Ore te nkaraki ena walata neing'oru Pilato eneiko pee elak. Neidikidik Ilyahudi aabuak ejo, “Ti nilak ele tung'ani, nimira olchore le Kaisari. Ore pooki ng'ae oitaa kewan olaiguanani, naa Kaisari egilunore.” Ore pee ening Pilato lelo rorei neipang'unye Yesu boo, neton to lorika le nkiguana te wueji neji olpura loo soito, neji te nkutuk oo Lhebrania Gabata. Naa te Nkitobirakinoto e Pasaka, anaa saa ile. Nejoki ninye Lyahudi, “Eng'ura olaiguanani linyi!” Nebuak aajo, “Iwuang'ie Iwuang'ie ninye, tasho ninye!” Nejoki Pilato, “Kashe olaiguanani linyi?” Newaliki lapolosak kituaak, “Mikiaata iyiook olaiguanani leme Kaisari.” Neishoo taa Pilato ninye meshomo aashe. Neibung neya ninche Yesu nerik; neipang enapita openy osalaba aya eneji Ewueji e Mborbor, neji te nkutuk oo Lyahudi Golgota. Neshe ninche ninye te ine, o kulikae aare te nebo ninye, atii ake obo enkae matua netii olikae enkae netii Yesu erishata. Nesir Pilato olkigeroto nepetoki osalaba, osira ajo, “Yesu le Nasaret, Olaiguanani loo Lyahudi.” Neisum Ilyahudi kumok ilo kigeroto amu ore ine wueji netasheyieki Yesu kenyikita ina anasa, natisiraki te nkutuk oo Lhebrania o enoo Roma o enoo Lyunani. Enkaraki e ina pee etiaakita ilapolosak kituaak loo Lyahudi Pilato, “Misir ajo, ‘Olaiguanani loo Lyahudi’, kake nchere etejo ninye, ‘Ara Olaiguanani loo Lyahudi.’ ” Newaliki Pilato ajo, “Ore enatisira, atisira.” Ore pee eidip isikarini aatasho Yesu neya nkilani enyena neitaa orot ong'uan, neya ake osikari eoroti nabo, o lkila sii. Nemeeta ilo kila lenye osugat keshetuno te shumata o meiting'o. Naa ina pee etiaakinote, “Emikipolos, ematooshie ole nkukuo, pee kitum oloya,” pee ebaya ilo kigeroto ojo, “Etoorikinote nkilani aainei neoshie ole nkukuo olkila lai.” Kuna baa etaasa isikarini. Ore te mbata o salaba le Yesu neitashe ng'otonye, o Mariamu enkanashe ng'otonye, o enkitok e Kleopas, o Mariamu Magdalena. Ore pee edol Yesu ng'otonye, eitashe te ine, o oloiteng'eni apa onyor, nejoki Yesu ng'otonye, “Yieyio, ng'ura enkerai ino.” Neitoki ajoki ilo oiteng'eni, “Ng'ura ng'utunyi.” Ore ebaiki ina kata nerik ilo oiteng'eni ninye enkang enye. Ore te siadi ena, etayiolo Yesu ajo eitabayioki mbaa pooki, pee etumi aaitabai olkigeroto katukul, nejo, “Aata enkure.” Netipikaki emoti ine, nabore siki; nepik osuguroi obore ina siki oloomi le hisopo netuloki enkutuk enye. Ore pee eng'amu Yesu ina siki nejo, “Eidipe!” Neirrug elukunya nedung tau. Ore Ilyahudi te nkaraki naa enkolong e Nkitobirakinoto, ejo pee meing'uari seseni te shumata o salaba te nkolong e sabato amu enkolong kitok sabato, neomon Pilato metigili ninche nkejek neiwuang'ieki aaya. Neaku eetuo isikarini apa negil inkejek ole dukuya o no likae apa otashoki te nebo ninye. Ore pee epuonu enetii Yesu, nedol aajo eidipa atua, neitu egil inkejek enyena. Kake etaremo osikari obo ematua te remet, nepuku osarge o enkare. Ore ilo otoduaa neishakenoko, naa kesipa shakenisho enye, neyiolo ninye ajo esipata ejoito, pee irukuruku sii intae. Etotiutuo kuna baa pee ebaya olkigeroto ojo, “Meetae oloito lenye ogili.” Enyaaka sii ajo likae kigeroto, “Eyooki ninche aaing'or ilo otaremo.” Ore te siadi nena, neisho Yosef le Arimatea, laa oloiteng'eni le Yesu, kake too nkurrat te nkaraki naure Ilyahudi, neomon Pilato meishoo meewa osesen le Yesu; neisho Pilato. Nelotu neya osesen lenye. Nelotu sii Nikodemo, olapa otang'asa alo ayiaya ninye kewarie, neshoru enkitushulati e ilata narropil o emanoo o esonkoyo nabaya rrantilini iip. Neya osesen le Yesu neirin too nkarash e kitani napuyiapui te nebo ina ilata narropil, anaa enatiu olkerreti loo Lyahudi le nukaroto. Netii ine wueji netasheyieki ninye enkurma, netii atua ina kurma enkurare ng'ejuk neton eitu ae kata eirragieki likae. Ore te nkaraki Enkitobirakinoto oo Lyahudi, netaana ina kurare, neirragie Yesu te ine. Ore enasirie te nkolong e dukuya e wiki, ore eton emisimis nelotu Mariamu Magdalena enkurare nedol ajo eiwuang'ieki osoit te nkurare. Neaku ekueta alo enetii Simon Petero o enetii olikae oiteng'eni apa onyor Yesu, nejoki ninche, “Eitayutuo Olaitoriani te nkurare, nimikiyiolo enetipika ninye.” Nepuku Petero o ilo likae oiteng'eni aapuo enkurare. Nekuet aairiamari pokira aare; kake neing'ataa ilo likae oiteng'eni Petero nemurutoki enkurare. Neirrugo arum nedol inkarash e kitani napuyiapui eirrag teine, kake eitu ejing atua. Nelotu sii ninye Simon Petero, esujita, nejing atua enkurare; nedol nena arash e kitani napuyiapui teine, kake eitu ejing atua, o ina anka natii apa endukuya enye. Nemeboitare inkarash e kitani napuyiapui, kake keirina ti ai wueji openy alamita. Nejing taa sii ninye ilo likae oiteng'eni otumurutoko olikae enkurare, atua nedol neiruk; amu eton apa eitu eyiolou olkigeroto ajo meeta nchere mepiu aing'uaa lootuata. Neitoki lelo ooiteng'eni aapuo nkang'itie enye. Kake eitasho Mariamu te nkutuk e nkurare, eishirita. Ore eishir neirrugo arum enkurare, nedol ilmalaika oare ooishopito nkilani naaibor, neton obo te nkalo e ndukuya ore olikae neton te nkalo oo nkejek e ine neirragie osesen le Yesu. Nejoki ninche ninye, “Na kitok, aainyoo pee inchirita?” Nejoki ninche, “Amu ewaita ninche Olaitoriani lai, nemayiolo nanu eneshomo aapik ninye.” Ore pee ejo neijia, neibelekenya nedol Yesu eitashe, neitu eyiolou ajo Yesu. Nejoki Yesu ninye, “Na kitok, ainyoo pee nchirita? Ai ng'ae ing'oru?” Ore amu kejo kolaturoni le nkurma nejoki, “Lo Kitok, te naa iyie owa ninye, tolikioki enishomo apik ninye, pee alotu aya.” Nejoki Yesu, “Mariamu!” Neibelekenya nejoki te nkutuk oo Lhebrania, “Rabboni!” Eji Olaiteng'enani. Nejoki Yesu ninye, “Mikimbung, amu eton eitu ailep alo enetii Papa, kake shomo enetii lalashera laainei tiaaki ninche, ‘Kailep alo enetii Papa lai laa Papa linyi, enetii Enkai ai naa Enkai inyi.’ ” Nelo Mariamu e Magdalena aliki lelo ooiteng'eni ajoki, “Atoduaa Olaitoriani,” neliki nena baa naatiaakaki ninye. Ore ina olong teipa aa enkolong e dukuya e wiki, eikeno nkutukie e ina aji nasotore lelo ooiteng'eni te nkaraki naure Ilyahudi, nelotu Yesu neitashe te mpolos, nejoki ninche, “Entaseriana.” Ore pee eidip atejo neijia, neitodol ninche inkaik enyena o ematua enye. Neng'ida lelo ooiteng'eni pee edol Olaitoriani. Neitoki ake Yesu ajoki ninche, “Entaseriana. Ore anaa pee aairriwayie Papa, airriwaa sii nanu intae.” Ore pee eidip atejo neijia neyang'aki ninche nejoki, “Entang'amu Enkiyang'et Sinyati. Tenipalakiki oltung'ani ingok nepalakini, tenimipalakiki oltung'ani ingok, nemepalakini.” Ore Tomas oji Olmaoi, laa obo le lelo tomon o aare, nemetii te nebo ninche pee elotu Yesu. Nejoki lelo kulikae ooiteng'eni, “Kitoduaa Olaitoriani.” Nejoki, “Te neitu adol nanu inkiporo oo lmushumaani too nkaik enyena napik olkimojino lai ine wueji oo lmushumaani napik enkaina ai ematua enye, mairuk nanu katukul.” Ore etulusoitie nkolong'i isiet neitoki aatii lelo ooiteng'eni atua aji, netii Tomas te nebo ninche. Nelotu Yesu eikeno nkutukie e ina aji, neitashe te mpolos nejo, “Entaseriana.” Neitoki ajoki Tomas, “Tipika olkimojino lino ene, ing'ura inkaik aainei; nipik enkaina ino ene mbung'a ematua ai nimiaku olemeeta enkirukoto kake iruko.” Newaliki Tomas ajoki, “Olaitoriani lai naa Enkai ai!” Nejoki Yesu ninye, “Iruko iyie te nkaraki nikitoduaa nanu? Emayiani lelo leitu edol neiruko.” Etaasa, Yesu kulikae monek kumok etii lelo oiteng'eni lenyana neitu esiri tena buku; kake etisiraki kuna pee itumutumu aairuko nchere ore Yesu ninye Kristo, Enkerai e Nkai, naa tenirukuruku, nitumutumu enkishui tiatua enkarna enye. Ore te siadi kuna baa neitoki Yesu aitoduaaya kewan te lelo ooiteng'eni lenyena te naiposha e Tiberias; neitoduaaya kewan tena oitoi. Ore eboita Simon Petero, o Tomas oji Olmaoi, o Natanael le Kana e Galilaya, o layiok le Sebedayo o kulikae ooiteng'eni aare lenyena. Nejoki Simon Petero lkulikae, “Kalo arresh isinkir.” Nejoki ninche ninye, “Aikiriamariyie sii iyiook iyie.” Nepuku aapuo nejing nabo kata empeut enye, neitu eibung ninche toki ina kewarie. Ore enasirie neitashe Yesu te mbata e naiposha, kake eitu eyiolou lelo ooiteng'eni aajo Yesu. Nejoki ninche, “Loyie ooti, iatata isinkir?” Newaliki aajoki, “Mikiaata.” Nejoki ninche, “Entanang'aki orreshet tatene e mpout, naa itumutumu.” Nenang'aki orreshet ore te nkaraki enkumoi oo sinkir eitu eitoki aaidim aateyietu. Nejoki ilo oiteng'eni onyor Yesu Petero, “Olaitoriani doi!” Ore pee ening Simon Petero meishopo, neidaki atua enaiposha; kake eetunye lelo kulikae ooiteng'eni empeut enye, eikurtutu orreshet loo sinkir amu melamita enkop natoyio, keba anaa iroruat iip nabo. Ore pee epuku aabaiki enkop natoyio nedol te ine enkima oo nkuk naiteleikino sinkir, o emukate. Nejoki Yesu ninche, “Eyau ene ematua oo sinkir limbung'a te na kata.” Neked Simon Petero empeut neikurtutu orreshet enkop natoyio ebore sinkir sapuki oora iip o onom o okuni; kake ore hoo naa kumok aaba neijia eitu epolosa orreshet. Nejoki Yesu ninche, “Wootu entadaata.” Nemeetae hoo obo loo looiteng'eni oikilikuana ajoki, “Aira iyie ng'ae?” Etayioloto aajo Olaitoriani. Nelotu Yesu nedumu emukate neisho, neikunaki sii neijia sinkir. Ena taa taata enkata e uni eipang'aki Yesu lelo ooiteng'eni eidipa atopiu too lootuata. Ore pee eidip aatadaata nejoki Yesu Simon Petero, “Simon olayioni le Yohana, ai kinyor iyie nanu alang kulo?” Nejoki, “Ee Olaitoriani, iyiolo iyie ajo kaanyor.” Nejoki ninye, “Intotio lkuoo laainei le kerra.” Neitoki ajoki eni are, “Simon olayioni le Yohana, ai kinyor iyie nanu?” Nejoki, “Ee Olaitoriani, iyiolo ajo kaanyor.” Nejoki, “Irrita nkerra aainei.” Neitoki ake ajoki ninye ene uni, “Simon olayioni le Yohana, ai kinyor iyie nanu?” Neisinanuo Petero amu etiaaka ene uni, “Ai kinyor iyie nanu?” Nejoki ninye, “Olaitoriani, iyiolo iyie pooki toki; iyiolo ajo kaanyor.” Nejoki Yesu ninye, “Intotio nkerra aainei. Esipa, esipa, aajoki iyie, ore apa ira oti irreten kewan nilo eniyieu; kake ore kenya pee imoruau iyooki aitorio nkaik inono, nikirreten likae nikiya ewueji nimiyieu nilo.” Etejo neijia eutu enkeeya nayaki Enkai enkitoo. Ore pee eidip atejo neijia nejoki ninye, “Tusujuaki nanu.” Neibelekenya Petero nedol olapa oiteng'eni onyor Yesu esujita. Aa ninye olapa oirishakine olgoo lenye te ndaa e teipa nejoki, “Olaitoriani, ai ng'ae ilo likirojaa?” Ore pee edol Petero ilo nejoki Yesu, “Olaitoriani, oo ninye ele?” Nejoki Yesu, “Amaa te nayieu nebik ninye o maeu, ainyoo nikitii iyie? Tusujuaki iyie nanu.” Neibulaa ilo rorei too lalashera nchere ore ele oiteng'eni nemeye, hoo neitu ejo Yesu, meye ninye, “Kake, Amaa tenaa eyiunoto ai pee eton ninye o metushukunye, kainyoo nikitii iyie?” Ilo oiteng'eni ele oishakenu kuna baa neigero ninche, nikiyiolo iyiook aajo kesipa shakenisho enye. Netii sii kulie baa kumok naataasa Yesu; naa te neigeri naaji maa naabo, kajo nanu meishaa enkop imbukui naaji naaigeri. Aigero te embuku naitera, Oloyanyiti Teofilo, mbaa pooki aaitera Yesu aas o naaiteng'enishe, o metabaiki ina olong apa nailepieki aaya shumata. Ore eton eitu eilepieki neitanapisho te ngolon e Nkiyang'et Sinyati, aitanap lelo tung'ana apa ootegelua metaa lkipaareta, lenyena. Ore te rishata oo nkolong'i artam, etulusoyie enkeeya enye, neitodol kewan ninche nkatitin kumok, too nkoitoi naaitadedeyie aaoru ninche olng'ash nchere keishu; netoduaa ninche ninye, eirorie ninche aimaki mbaa e nkitoria e Nkai. Ore pee etumo ninche te nebo, neitanap Yesu ajoki, “Emipuo aaing'uaa Yerusalem, kake entaanyu enkishorunoto natejo Papa keishoru, anaa enatiaaka intae. Amu te nkare apa eibatisishe Yohana, kake ore too nkuti olong'i, keibatisai intae te Nkiyang'et Sinyati.” Ore enotote ilkipaareta te nebo neikilikuan Yesu aajoki, “Olaitoriani, ei te na rishata irrinyoki Siraeli enkitoria?” Nejoki Yesu ninche, “Ore rishat o nkatitin Papa lai ake openy oitore makewan, nemeishoro intae entayiolo enkata naaku. Kake ing'amumu intae engolon, tene elotu Enkiyang'et Sinyati shumata intae, niaakuku intae lchakenini laainei ti atua Yerusalem, o ti atua Yudea pooki o Samaria, o metabaiki ineeiting'ie enkop.” Ore pee eidip atejo neijia, eing'orita ninche, neilepieki aaya keper neitemoo enkatampoi arishie nkonyek enye. Ore eimariri keper eduaaya ninye eloito, ore nabo kata nemaniki ltung'ana aare ooishopito nkilani naaibor eitashe. Nejo, “Lo lewa le Galilaya, oo pee intasheshe te ne aaing'or keper? Ore Yesu, ele oilepieki aaitung'uaa intae aaya keper keitu aikununye anaa ina nitoduaaitie elo keper.” Neitoki ninche aashuko Yerusalem aaing'uaa oldoinyo oji Olooloirienito otaaniki Yerusalem oba anaa elototo e nkolong e sabato. Nejing ninche Yerusalem nepuo aailepaki olgilata le shumata le nkaji apa natijing'a: Aa Petero, Yohana, Yakobo o Anterea, Filipo o Tomas, Bartolomayo o Matayo, Yakobo le Alfayo o Simon loo olkirowuai, o Yudas ole Yakobo. Neiturrurro pooki anaa ake aasaisho te nebo, netii nkituaak naaisiritore, inaatii Mariamu ng'otonye Yesu o lalashera lenyena. Ore tenena olong'i neitashe Petero tiatua ilalashera, oobaya eumata oo ltung'ana oobaya esiana iip o tikitam. Nejo, “Ilalashera laainei, meeta kata apake nemeitabari ilkigerot anaa enatejo Enkiyang'et Sinyati, alimunye Daudi, eimaki Yudas, laa ninye otorikuo ltung'ana ooetuo aaibung Yesu. Amu ole siana ang apa Yudas neishooki ematua enye te na siaai.” “Neinyiang'ua ele tung'ani enkurma to lerrinyore le nkarrueisho enye, naa ine etanang'a etusulari neng'era adanya neitiakunye enkoshoke pooki. Nening iltung'ana pooki oomanya Yerusalem ina, nedung'oki ina kurma enkarna te nkutuk enye aajo Akeldama, (eji ‘Enkurma osarge’). Amu etisiraki te Mbuku e Olkerempe le Nkai aajo, ‘Metomijoono enkaji enye; nelaii oltung'ani omany.’ Ore sii nchoo, ‘Meisiaaisho likae te rishata enye.’ Ore naa oltung'ani obo le lelo ooisiritore iyiook te ina kata pooki etii Yesu atua iyiook, eiteru te nkibatisare e Yohana, o metabaiki ina olong nailepieki Yesu aaya keper, aaitung'uaa iyiook, meeta kata nemeaku obo le lelo shakenini le mpiunoto te nebo iyiook.” Neaku etegelutua ltung'ana aare: Yosef oji Barsabas (neji sii Yustus), o Matias. Neomon ninche nejo, “Olaitoriani, iyiolo iyie ltauja loo ltung'ana pooki. Ore te nkaraki ina, Olaitoriani, tuutaki iyiook olitudutayie te kulo pokira aare, ojing ena rishata aaku olkipaaret neisiaaisho amu eshomo Yudas ewueji enye apake.” Neosh enkukuo aadut nena arn pokira are. Nedoiki enkukuo Matias neikenakini encholiek e lelo kipaareta tomon o obo. Ore pee ebau enkolong o Pentekoste, netii apa pooki ewueji nebo. Ore nabo kata nelotu enkikurrukur naing'uaa keper neeijo eno lkutati, neiput ina aji pooki natii ninche. Nedol ninche entoki neeijo lng'ejepa le nkima eisuaari: neiseyie ake ina ng'ejep neeijo enkima o lng'ejep le pooki tung'ani otii ine. Neigany Enkiyang'et Sinyati ninche pooki neiteru aairo kulie kutukie, anaa enaidimie Enkiyang'et Sinyati meiroro. Nemanya Yerusalem Ilyahudi laa iltung'ana asayiak le Nkai, ooetuo ninche eing'uaa nkuapi pooki e nkop. Ore pee ening ina kikurrukur neiturrurro olorora kitok. Neiputukuny neing'asia pooki amu meetae ake oleitu ening ninche eiro enkutuk naikini ninye. Neiputukuny neing'asia nejo, “Amaa kulo tung'ana aime Lgalilaya pooki! Aainyo naa pee kining'ito iyiook pooki eiro nkutukie ang naaikini iyiook? King'uaa iyiook Partia, Media, Elam; niking'uaa Mesopotamia, Yudea, o Kapodokia; niking'uaa Ponto o Asia, niking'uaa Frigia o Pamfiliam niking'uaa Misiri o lkirinen le Libya o Kirene, neing'uaa kulikae lang Roma, ndung'ot pokira, Lyahudi o Loreren ooibelekenyate aaku Lyahudi; niking'uaa kulikae lang Krete o Arabia kake eji nikining pooki eiro ninche nkutukie ang eimaki mbaa kituaak naataasa Enkai!” Ore eing'asiate pooki nemilo neikilikuana taa ake aajo, “Ainyoo eutu ena bae?” Kake etii ilookueniyie ilairukok ejo, “Ketemerate kulo tung'ana!” Kake neinyototo Petero eboitare ninye lelo kulikae tomon o obo, neiteru airorie olorere to ltoilo sapuk ajoki, “Lo lewa lang loo Lyahudi, o intae pooki oomanya Yerusalem, entoning enajo, matoliki intae enautu ena bae. Eitu emera kulo tung'ana anaa ina nijojo, ene uni ena saa anaa pee ekenyu. Maa, enapa bae ena natolimuo oloiboni le Nkai oji Yoel pee ejo, ‘Kaas ena bae te nena olong'i naabayie, Enkai najo, kabukoki ltung'ana pooki Enkiyang'et ai. Keyooki aaibonisho layiok linyi o ntoyie inyi; nedol ilbarnot linyi nduaat, netum ilpayiani linyi nkidetidetat. Ee, o metabaiki sii ninche sinkan laainei, loo lewa o loo ng'oruo, kabukoki Enkiyang'et ai te nena olong'i, naa keibonisho kenya ninche. Naa kaitodolu ine nking'asia te ntaiya e shumata, o sapiipiyieti ti abori te nkop. Nedoli osarge o enkima, o empuruo nairrusha: neitomisimisi enkolong, nedoru olapa atiu anaa osarge, eton etiooyo ina olong o Laitoriani, enkolong kitok e nkisisa. Ore te ina kata, ore pooki ng'ae oipot enkarna o Laitoriani neitajeuni.’ “Lo lewa le Israeli! Entoning kulo rorei. Ore Yesu le Nasaretii, oltung'ani otisirua Enkai abaraki te intae too mbaa e ngolon o ine nking'asia o nkitoduaat o lmonek ooitaasa intae Enkai te nkaina enye; niyiololo intae ina amu atua intae etaasieki. Enkai openy natudutayie te yieunoto o te ng'eno enye makewan apake nchere, keitarasari Yesu, nitara intae ninye, aaisho ltung'ana arruok metasho. Kake eitopiwuo Enkai ninye aitung'uaa ilootuata: nelaku aoru emion e keeya amu meidimayu apa neenikino enkeeya ninye. Amu eimaka Daudi ninye nejo, ‘Atoduaa Olaitoriani etii dukuya nanu nkatitin pooki: aatii te tatene, metaa maaigusugusieki. Amu ore te nkaraki ena keng'ida oltau lai, nebore irorei laainei enchipai; ore nanu, nara ake olenye, nayeng'iyeng'a aanyisho to siligi, amu ming'uaa iyie oltau lai te nemeneng'a, nimincho osinka lino sinyati metupurdayu ang'uoyu. Kituutaka iyie nanu inkoitoi enkishui, ore amu itii iyie, ei kilo aiput enchipai.’ “Ilalashera laainei, enchooki maibalakinye intae ashirraki too mbaa e papa lang Daudi, Etua ninye, nenukari, netii enkurare enye atua iyiook o tene. O loiboni le Nkai apa metaa ketayiolo ina naisiligie Enkai ajoki, ore eishoi enye keikini likae aiguanani kitok oitoreisho anaa apa Daudi. Ina etodolua Daudi naas kenya ake Enkai, paa keiroro aimaki empiunoto e Kristo pee ejo: ‘Eitu eing'uari ninye te nemeneng'a. Neitu epurda osesen lenye ang'uoyu.’ “Ele Yesu likiimaki eitopiwuo Enkai aitung'uaa ilootuata, nikira iyiook lchakenini le ina bae. Ore pee eilepieki nepiki tatene e Nkai, neng'amu Enkiyang'et Sinyati te Menye anaa enatejo apake; naa ore ena nidolitata nining'itoto ina kishorunoto enye etubukoko iyiook. Amu eitu elo Daudi makewan keper; kake etejo ninye kewan, ‘Etiaka Olaitoriani Olaitoriani lai: Totona te tatene ai, pee aitadou ilmang'ati linono metotiutu anaa olorika loo nkejek inono.’ Entayioloito naa taata enkaji pooki e Israel ena nadede nchere, ele Yesu, lishomo intae aashe to salaba, eitaa Enkai Olaitoriani o Kristo.” Kuna ake etoning'o ninche nerem ilo rorei iltauja, nejoki Petero o lkulikae kipaareta, “Kaa naa kiaas, ilalashera lang?” Nejoki Petero ninche, “Erridutu pooki tung'ani, neibatisai pooki te intae te nkarna e Yesu Kristo, pee epalakini intae ng'ok inyi; naa ing'amumu enkishorunoto e Enkiyang'et Sinyati. Amu ore ena kisiligata eninyi apa o nkera inyi, o lelo pooki oolakua lelo pooki ooipotoki Enkai kewan.” Neitirrishaki Petero aitadedeyie te kulie baa kumok, nejoki, “Entajeu ate te ina nainepu kulo tung'ana arruok.” Neiruk ilkumok nena baa naainosua ninye, neibatisai; neponikini ilo turrur iltung'ana oobaya nkalifuni uni te ina olong. Neaku ketumo ninche anaa ake te nkiteng'enare oo lkipaareta, neshulare aaisiritore, neng'arie endaa, neshulare te nkomono. Nejing aiput enkuretisho pooki ng'ae; neasi inenking'asia, olmonek too lkipaareta. Nebik ilairukok pooki te nebo te nchula neyau masaa enye aang'ar. Neaku kemir masaa enye o ntokitin naata neorikino pooki mpesai, anaa enaatayie oltung'ani enkolat. Netumo anaa ake ilo turrur te nkaji e Nkai, neng'ar ndaiki too nkajijik enye, neng'ida edaa to ltau obo, neisis Enkai, neshipakino iltung'ana pooki ninche. Neponaa Olaitoriani ilo turrur lenye anaa ake te lelo ooitajeuni. Ore nabo olong, nepuo Petero o Yohana enkaji e Nkai saa naaudo etushuke enkolong, te nkata e nkomono. Ore te Kishomi Sidai, amu neijia eji, netii oltung'ani laa olmaima eiteru te inoto enye. Naa kenapi anaa ake aaya ina kishomi meshomo aomonu mpesai too ltung'ana oopuo aajing enkaji e Nkai. Ore pee edolu Petero o Yohana epuonu aajing ine, neomon meishoo enkiti toki. Neipirie ninche nkonyek aaing'or, nejoki Petero, “Ng'ura iyiook!” Neing'or ninche eisiligu toki te ninche. Nejoki Petero ninye, “Maata enkosholai o sahabu, kake kaaisho enaata. Te nkarna e Yesu Kristo le Nasareti, aajoki shomo!” Neibung enkaina e tatene aitasheyie. Negolu nabo kata ndapi o rubat oo nkejek e ilo tung'ani; neipid, neitashe too nkejek enyena, neiteru alo amanimanaa. Neitoki airiamariyie ninche ajing atua enkaji e Nkai, eloito neipid neisisita Enkai. Nedol olorere pooki eloito neipid eisisita Enkai. Ore ade pee epuonu aaiyiolou aajo ninye oloshi aomononi oton te Kishomi Sidai e Nkaji e Nkai, neing'asia pooki, neiputukuny te ina naitaasaki ninye. Ore eibung'ita ilo tung'ani Petero o Yohana, neing'asia ltung'ana pooki nekuetu enetii ninche to lgoriet le Solomon, amu neijia eji ine. Ore pee edol Petero ina, nejoki ninche, “Lo lewa lang le Israel, ainyoo naing'asiayie intae te ne, naa kaji etiu paa iyiook ing'oring'oro? Ijojo pasa ai te nkaraki ongolon ang maate arashu te nkaraki esupatisho ang pee eishiunyeki ele tung'ani meinyo alo? Enkai e Abraham, o Isaak o Yakobo, Enkai oo loo papa, naishoo Osinka lenye Yesu, enkitoo, Intae ooitarasaitie ninye aaisho lelo ooitoreisho, nitanyaita intae ninye te dukuya Pilato, etejo ninye alaku aisho elo. Kake itanyaita intae Ilo Sinyati naa Supat. Niomonunu olarani meishori intae. Niariara metua ilo aishoroni le nkishui. Kake eitopiwuo Enkai ninye aitung'uaa ilootuata, nikira iyiook lchakenini le ina bae. Enkarna e Yesu o enkirukoto e nkarna enye naitagolo ele tung'ani lidolitata niyiololo, ore enkirukoto ti atua Yesu neisho ele tung'ani ena biyotisho nalulung'a nidolitata pooki. “Ore naa taata, ilalashera laainei, ayiolo ajo ore intae o lelo aitoriak linyi, te nkaraki emodai pee itaasa ina. Etolimuo apake Enkai too nkutukie oo loibonok lenyena pooki ajo, meeta nchere meitamei Kristo lenye; netaa te kuna naatasate eitabayie. Erridutu naa, embelekenyakinoto Enkai, pee ejutori ng'ok inyi, o pee epuonu nkatitin naayagieki enkishui, naaing'uaa enetii Olaitoriani, Enkai, oo sii pee eirriu Yesu, laa ninye ilo Kristo lenye otisiraka apake intae. Meeta kata nemeng'as ninye abik te shumata o metaba anaa neitang'ejuki pooki toki anaa enatolimuo apake Enkai te dukuya too nkutukie oo loibonok lenyena sinyat. Amu etejo Musa, ‘Keirriwaki intae Olaitoriani oloiboni anaa apa pee aairriu nanu, olaa ololorere linyi. Entoning ake mbaa pooki naaliki ninye intae. Ore oltung'ani pooki lemening enajo ilo oiboni le Nkai, neari aaidaikie to lorere.’ Netolimutuo lelo oibonok le Nkai, pooki ooiroro, ebaiki Samuel o lelo ootusujutua ninye, eibalunye sii apa ninche kuna olong'i. Irara intae inkera e lelo oibonok le Nkai, o ne ilo sotua oishoo Enkai iloo minyi, anaa pee ejoki Abraham, ‘Te ishoi ino emayiani iloreren pooki le nkop.’ Metaa Enkai nainyeyie Osinka lenye, naa intae eiteru airriwaki, pee emayian intae pooki aibelekeny entung'uai nkoitoi inyi e nkarrueisho.” Ore eirorie Petero o Yohana olorere nepuonu ilapolosak o lkitok loo larripok le nkaji e Nkai o Sadukayo enetii ninche. Netagorote enkaraki naiteng'enita ilkipaareta olorere aaliki te Yesu empiunoto o lootuata. Neibung ninche aapik jela o mekenyu, amu emuto ina kata. Kake eiruko ilkumok le lelo ootoning'o ilo rorei; nebaya lewa anaa nkalifuni imiet. Ore taaisere neiturrurro larikok o lpayiani loo Lyahudi, o laiteng'enak loo nkitanapat te nebo te Yerusalem. Netii etii Olapolosani Kitok oji Ananias, netii Kaiafas, o Yohana o Aleksanta o kulikae ake lo lmarei lo Lapolosani Kitok. Neitasheyie lelo kipaareta te dukuya ninche neikilikuan aajoki, “Kaji intae nkuna pee itaasa ena? Kaa golon ena niatata, naa keneng'ae enkarna nitaasishore?” Ore eiganya Petero Enkiyang'et Sinyati, newaliki ajoki, “Lo kituaak lo lorere, o lpayiani, te naa taa keikilikuanishoreki iyiook te le kekun te mbae supat naitaasaki oltung'ani maima o eneikuna pee eishiunyeki ele tung'ani, neishiaakino te niyiolouwu intae pooki, neishiaakino neyiolou olorere pooki le Israeli nchere, ore pee eitashe ele tung'ani te dukuya intae aa biyoto katukul, enkaraki engolon e nkarna e Yesu Kristo le Nasareti lishomo intae aashe neitopiwuo Enkai ninye aitung'uaa ilootuata. Yesu eimakita lkigerot pee ejo, ‘Ilo soit litemenaitie intae ilashetak otaa osoit kitok lo lmairroto.’ Meetae tukul likae otumieki enjeunoto, nemeetae ai arna naishoruno ti abori shumata, naishooki ltung'ana pee kijeunye.” Ore pee edol Enkiguana ina natishirrakita Petero o Yohana, nemusu aajo ltung'ana ake ninche lemeeta enkisuma nashomo, neme ng'eni sii, neing'asia; neyiolou aajo ninche lapa ooisiritore Yesu. Ore enkaraki nadolita ilo tung'ani oishiunyeki eitashe te nebo ninche, nelau enawaliki. Kake ore pee eitanap ninche meipung'o te nkaji e nkiguana, neiteru lpayiani aaiguana oopeny, ejo kuna, “Kaa kintaas kulo tung'ana? Amu eibale ake ninye too ltung'ana pooki oomanya Yerusalem nchere ninche etaasishoreki te na bae naba nji e nking'asia, nimikiindim sii aatomiki. Kake ore naa pee meitadarari ena bae ti atua olorere, maing'odia, nikirishie kulo tung'ana pee meigil aairorie likae tung'ani te na arna.” Neipotu ninche neitanap nereiki aajoki pee meigil ake aairorie aashu eiteng'en likae tung'ani te nkarna e Yesu. Kake etawalikitia Petero o Yohana aajoki ninche, “Entirish intae o openy enaishiaakino te Nkai, te naa ai intae kining ana ke Nkai. Amu mikiindim ake iyiook aatapal mikilimu inikitoduaa o nikitoning'o.” Neitoki ake ina kiguana aaing'ode ninche neitirrishaki oleng, neitoki aaisho epuo. Etalaita taa katukul enaitameyie ninche amu errepita ltung'ana pooki Enkai te ina nataasaki. Amu ore ilo tung'ani oitaasaki ina e nking'asia aaishiunye neitogiroyie larin artam. Ore pee eing'ueikini ninche, nepuonu enetii lchoreta lenye, nelikioo nena pooki naatiaakita ninche ilapolosak kituaak o lpayiani. Neisho ninche pee ening nena, neilepie tenebo iltoiloishi lenye aailepakinye Enkai ejo: “Olaitoriani, oitobira shumata o enkop o enaiposha, o nena pooki naatii, naa iyie oirorie Papa lang Daudi ilo sinka lino, te Nkiyang'et Sinyati, pee ejo, ‘Aainyo pee epush Iloreren leme Lyahudi, neipiru ltung'ana enkiguana nemeaku? Etanapate laiguanak kituaak le nkop, nesoto laitoriak te nebo, aa Olaitoriani Enkai earare, o ilo lenye otubulokoki eilata aaput.’ Amu esipa nchere tiatua ena anasa apa esotokinoi Osinka lino Yesu, osinka lino sinyati laa ninye itubukoko eilata aput, ninye etasotokinote Herode o Pontio Pilato o Loreren leme Lyahudi o ltung'ana le Israel, pee eitaas enapake naidipa magilanisho ino o enkiguana ino makewan atejo keaku. Ore naa taata, Olaitoriani, toduaa iyie ina king'odia enye, nincho isinkan linono meiroro te ororei lino mpijan pooki; nintorioo iyie enkaina ino aishiunye olorere; ninchoru metaasi ilmonek o mbaa e nking'asia te nkarna e Yesu, Osinka lino sinyati.” Ore pee eomon neigirigiro ine netumore, neiput ninche pooki Enkiyang'et Sinyati neshirraki aairo ororei le Nkai. Neaku lelo pooki ooiruko ilo ltau obo o le yieunoto nabo, nemeetae olojo nkunenyena masaa naata, amu etang'ara ninche ntokitin pooki naata. Nelimu ilkipaareta te ngolon shakenisho e mpiunoto o Laitoriani Yesu; nelotu empiris e Nkai shumata ninche pooki. Nemeetae hoo obo te ninche olau toki, amu ore lelo apa ooata masaa oo nkurman aashu inoo nkajijik, nemir neyau mpesai naainosieki nena masaa, neirragie too nkejek oo lkipaareta pee eorikini pooki tung'ani, anaa naabaiki. Neetae Yosef, oishoo lkipaareta enkarna aajo Barnabas (kejo ina oloitagol ilkulikae oishuaa) naa oloo Lewi, laa ole nkop e Kipros, neaku eeta ninye enkurma, nemir, neyau iropiyiani naainosie, neirragie too nkejek oo lkipaareta. Kake etii oltung'ani oji Ananias, o enkitok enye naji Safira, otimira erubata enkurma enye, kake neshumaki kewan ematua oo mpesai, neyiolo enkitok enye, neyaki ilkipaareta nkulie naatelekutua. Nejoki Petero, “Ananias, aainyo pee nchoo Sheitani mikintoria oltau lino teleja Enkiyang'et Sinyati adung'oo ematua oo mpesai nitimirie te nkurma ino? Aemme nkuninono apa eton eitu imir, naa nkuninono mpesai indipa atimira. Kaji naa etiu pee, itudutayie to ltau lino ajo aas ina. Mme taa oltung'ani iteleja kake Enkai iteleja!” Ore ake pee ening Ananias ina nebatata neye. Ore lelo pooki ootoning'o neiput enkuretisho. Nejing'u lbarnot, neirin osesen lenye, neipung'ie, nepuo aanukaa. Ore etulusoitie saai uni nejing'u enkitok enye nemeyiolo ninye nena naatupukutuo. Nejoki Petero ninye, “Tolikioki sii iyie, amaa, kena siana inosie enkurma inyi? Ei mpesai esiana naje ake inosie?” Nejoki, “Ee esiana naje ake.” Nejoki taa Petero, “Kaji etiu pee itoning'okinote intae aatem Enkiyang'et o Laitoriani? Ng'ura nenena nkejek oo laduoo ooshomo aanukaa olpayian lino naatii kutuk aji, naa iyie sii epuonu aaipung'ie aaya.” Nebatata nabo kata te nkalo oo nkejek enyena neye; nejing'u lelo barnot neinepu etua, neipung'ie aaya, nepuoi aanukaa aaitatashaki olpayian lenye. Neiput enkuretisho sapuk ina sirit e lelo ooiruko pooki, o lelo pooki ootoning'o kuna baa. Etaasaki apa ilmonek o mbaa e nking'asia tiatua iltung'ana too nkaik oo lkipaareta. Netii apa pooki tenebo to lgoriet le Solomon. Nemeetae oltung'ani leme ole ina sirit oitieu atushulare, hoo neimaki ake ltung'ana pooki esupatisho enye, neponari ake sii esiana enye too lewa o nkituaak kumok naairuk Olaitoriani. Ore te nkaraki nena pooki naasita ilkipaareta, neaku kenapuni ltamueyia mbat oo nkoitoi oo nkaulele, neirragieki too rruatin o too lkarash paa ore eim Petero ine, neporoo oloip lenye kulikae lenye. Neiturrurrunye sii ltung'ana loo nkang'itie naamanita Yerusalem, eyau ltamueyia lenye o lelo ooata loiriruani; neishiunyeki ninche pooki. Kake einyio Olapolosani Kitok, o lelo pooki ooboitare (oora le sirit oo Sadukayo), eiputa lelo pooki olom, nepik ilkipaareta nkaik, nepuo aaen te korokoroni napiki olorere. Kake etabolo olmalaika lo Laitoriani nkishomin e korokoroni kewarie, neitupuku, nejoki, “Enchom intae, entasho eroro te nkaji a Nkai entoliki Iltung'ana mbaa pooki e na kishui.” Ore pee ening ninche ina neyooki ajing enkaji e Nkai enasirie neiteng'enisho. Kake eewuo Olapolosani Kitok, o lelo ooboitare, neiturrur enkiguana nalulung'a te nebo, o erikore pooki e Israel, neirriwaa olkilikuai korokoroni metorikuni ninche. Kake etejo sikarini maetu korokoroni nelau; neitu aalimu, aajo, “Kineputua korokoroni eikeno osupatei, neitashoo larripok too nkishomin: kake kitejo matabol, metii oltung'ani otii atua.” Ore taa pee ening olkitok loo sikarini le nkaji e Nkai o Lapolosak kulo rorei, nemilo oleng etalaita enapukoki ina. Nelotu oltung'ani obo nejoki ninche, “Ng'ura! Ore lang'ole tung'ana litipika korokoroni, etii enkaji e Nkai eitashe aaiteng'en olorere.” Nelo taa olkitok loo sikarini erikito sikarini lenyena neriku lkipaareta, kake eitu earu amu etureita olorere, meari ake ninche too soito. Ore pee eriku, neitasheyie te dukuya enkiguana. Neikilikuan Olapolosani Kitok, ajoki, “Kitutukunyakita apa intae nikintanap intae pee mintokiki ake aiteng'enisho te na arna: naa ng'ura! Noolo intae ooibulunye Yerusalem pooki ena kiteng'enare inyi, ijojo pee iyauwu osarge le le tung'ani shumata iyiook.” Kake etawalikitia Petero o lelo kulikae kipaareta nejoki, “Enkai pae kining iyiook alang te nikining iltung'ana. Enkai oo loo papa naitopiwuo Yesu, lishomo intae aar, aashe to lchani. Ninye eilepie Enkai te nkaina enye e tatene metaa ninye Olaiguanani Kitok, neaku Olaitajeunoni, oisho Siraeli enkirridunoto o empalakinoto oo ng'ok. Nikira iyiook lchakenini te kuna baa, naa shakeni Enkiyang'et Sinyati, naisho Enkai lelo ooning metoning'o ninche, nerem oltau nejo mataar. Ore pee ening ninche ena, negoro oleng neyieu near ninche metuata. Kake einyo obo le ina kiguana, loo Lfarisayo oji Gamaliel, laa olaiteng'enani kitok loo nkitanapat, oyanyit iltung'ana pooki, nejo meitupukuni lelo lewa te nkiti kata. Nejoki ninye ninche, Lo lewa le Israel, entodol ake ate te kulo tung'ana, te na bae niyieuu nintaasiasa. Amu einyo apa ai kata Teudas, neitaa kewan likae taani kitok, nesuj iltung'ana oobaya iip ong'uan. Neari ninye, o lelo pooki ootoning'o ninye, neisardakieki, neaku pesho. Ore eshomo ilo neinyototo Yudas le Galilaya, too napa olong'i e nkikenare, nerik sii ninye ltung'ana ootusuja, neidaaya sii ninye; olelo pooki ootusuja, neisardak. Najoki naa nanu intae taata, entalam kulo tung'ana entapal. Amu tenaa kenoo ltung'ana ena kitobirata aashu ena siaai naa kebatata. Kake te naa kene Nkai, nimindimidimi intae aatabatat ninche; naa entodol ake meaku Enkai iararere!” Nening ninche ina kikoo enye: ore pee eipotu lkipaareta meetu enetii, near, neitanap meitoki ake aairo te nkarna e Yesu, neisho epuo. Nepuo ninche aaing'uaa ine netii enkiguana eng'ida etoduaa aajo keishiaakino ninche enkitamioto te nkaraki ina Arna. Ore too nkolong'i pooki, eitu egira ninche meiteng'enisho te nkaji e Nkai o too nkang'itie enye nchere ore Yesu, ninye Kristo. Ore apa te nena olong'i, eponari esiana oo looiteng'eni abul nejing olong'unyung'unyi erishata oo Lyahudi ooiro enkutuk oo Lgiriki o Lyahudi ooikini enkop enye. Ejo lelo loo Lgiriki eji eitololoikiaki inkolia enye te ndaa naorikini anaa ake. Neipot lelo Tomon o Aare esirit nalulung'a o looiteng'eni te nebo nejoki, “Meishiaakino te nikipal iyiook elikioroto o rorei le Nkai pee kitumoki aaisiaayia ltung'ana too mpesai. Ilalashera lang, entegelu intae iltung'ana oopishana liyiololo ti atua ate nchere kebore Enkiyang'et Sinyati nebore eng'eno, pee kincho lelo meitasheiki ena bae. Kake ore iyiook maate, enkomono kisheikino, o elikioroto e le rorei.” Neitiship ina walata ilo turrur pooki; negelu Stefano, oltung'ani naa obore enkirukoto o Enkiyang'et Sinyati, Filipo, Prokorus, o Nikanor, o Timos, o Parmenas o Nikolaus, oltung'ani leme oloo Lyahudi laa Antiok eing'uaa, oibelekenye apa ninye ang'amu enkirukoto oo Lyahudi. Neriku ilo turrur lelo aarikoki Lkipaareta; ore pee eomon, neiteleikini nkaik. Neponari ororei le Nkai, ore esiana oo looiteng'eni neponari oleng te Yerusalem, ore ilapolosak kumok neunokino enkirukoto. Ore Stefano, obore empiris o engolon, neas imbaa e nking'asia o olmonek ti atua olorere. Kake einyieito kulikae le nkaji e ntumo naji enoo Lkilakuno (amu neijia eji), o Lkirene, o le Aleksantria o Lkilikia o looing'uaa Asia, aaishankarrarre Stefano. Kake nelaikino aairisha eng'eno o Enkiyang'et nairorie Stefano. Nepuo too nkisudorot aarop iltung'ana ooetuo aajo, “Kitoning'o ninye eiro amor Musa, nemor Enkai.” Neinuaaki olorere, o lpayiani o laiteng'enak loo nkitanapat, nepuonu lelo enetii ninye, neibung aayaki enkiguana. Nesotu ltung'ana ooaku lchakenini le lejare, nejo lelo, “Megira ele tung'ani eitu esukeny ene wueji sinyati, nesukeny inkitanapat. Amu kitoning'o iyiook ninye ejo, eji keyooki ilo oji Yesu le Nasareti aar ene wueji, neibelekeny nkoon naaitanapa iyiook Musa.” Ore lelo pooki ootii ina kiguana pee eing'or enkomom e Stefano, neyia anaa enkomom o lmalaika. Nejoki Olapolosani Kitok, “Ei neijia etiu nena baa?” Nejo Stefano, “Ilalashera laainei, o loo papa! Entoning'oki! Enkai e nkitoo naipang'aka papa lang Abraham eton emanya Mesopotamia, eitu eidur alo Haran, nejoki, ‘Tung'uai olmarei linyi o enkop inyi, shomo enkop naautaki.’ Neaku etung'uayie enkop e Kaldea nelo amany Haran. Ore pee eitianya menye Abraham, nejoki Enkai meidurraki ena kop taata namanya intae. Eitu taa eisho Enkai ninye hoo enkiti wueji metujung'o aitaa enenye, eitu hoo eisho enkiti rashe e nkop, kake eishoo Enkai ninye o siligi ajoki keaku ene ishoi enye eshomo ninye. Naa ore taa ejoki Enkai ninye neijia, meeta Abraham enkerai. Inji etiaaka Enkai ninye, ‘Kepuo kenya ilng'anayio linono aamany ai kop eeiking'a, nepuoi aaisinkanishore te ine neinyali too larin iip ong'uan. Kake kadung'oki enkiguana ilo orere oisinkanishore ejo Enkai. Naa ore te siadi neidurru te ina kop naapuonu aaserem nanu tene wueji.’ Neisho Enkai ina kata Abraham olkerreti le muratare. Abraham Isaak, nemurat te nkolong e isiet; Neiu Isaak Yakobo, neiu Yakobo lelo loo papa pokira tomon o aare. Ore te nkaraki olom oatayie apa lelo loo papa Yosef, olalashe lenye, nemiraki Misiri, kake etii apa Enkai te nebo ninye, nesaru too sinaitin enyena pooki, neisho ninye omom o eng'eno nagut te dukuya Farao, olaiguanani le Misiri; neisho ninye meitoria Misiri neitore enkaji enye pooki. Neaku eewuo olameyu Misiri, o Kanaan, nelotu osina sapuk; nelau lelo loo papa entoki nanya. Kake ore pee ening Yakobo nchere keetae entapa te Misiri, neirriwaa lelo loo papa te nkata e nkiterata. Ore te nkata e are neibalakinye Yosef kewan ilalashera lenyena, neyiolou Farao, olorere le Yosef. Neirriwaa Yosef olkilikuai aipotu menye, Yakobo, o lmarei lenye pooki, iltung'ana oobaya ntomoni naapishana o miet. Nedoyio Yakobo alo Misiri, te ine eitianye ninye o lelo loo papa. Nenapuni seseni lenye aayau Shekem nenukari te nkurare apa nainyiang'ua Abraham ainyiang to layiok le Hamor te Shekem te nkosholai. Kake ore pee etaanu enkata apa naisiligie Enkai Abraham, nebul olorere oleng te Misiri, o metaba anaa netumi likae aiguanani kitok te Misiri lemeyiolo Yosef. Neesek ilo olorere lang, nearaki te ngolon iloo papa metanang'ai nkera naaini ong'ata peyie eye. Te ina kata eini Musa naa sidai apa ninye oleng te dukuya Enkai; neitubuluni ninye lapaitin okuni te nkaji e menye: ore pee eyai ninye ong'ata, nedumu entito e Farao, neitubulu aitoti, neitaa olenye. Neiteng'eni Musa aaishaki eng'eno pooki oo Lmisiri; neaku magilani to rorei o too nkiaasin. Ore pee eaku Musa oloo larin artam nejo kelo abaiki ilalashera lenyena. Nedol obo lenye einyalitai oltung'ani le Misiri; nelo amitu aitalaku te ilo Misiri near metua. (Aa kejo ninye keyiolou olorere lenye aajo ninye eyooki Enkai aisiaaishore elaku ninche te sinkaisho; kake eitu eyiolou ninche ina). Ore te nkolong nasujita ina nedol Siraeli aare ooara, nejo aitaiki osotua. Nejoki, ‘Loyie, irara doi lalashera, ainyoo iorrorro pokira?’ Kake eiponyayie ilo oinyal olikae nejoki, ‘Ai ng'ae doi likinchoo iyie ntoria nirish iyiook? Ijo sa pee kiaar matua anaa eninkuna olang'ole Misiri?’ Neisik Musa te nkaraki ilo rorei, nelo aaku olomoni te nkop e Midian, nelo aiu layiok aare te ine. “Ore etulusoitie larin artam, neipang'aki olmalaika ti ong'ata o ldoinyo le Sinai, te nchani nayupuyup. Ore pee edol Musa neing'asiayie ina, nejo anyikaki adol, nelotu oltoilo lo Laitoriani ojo, ‘Ara Enkai oo loo minyi, Enkai e Abraham o Isaak, o Yakobo.’ Neikirikira Musa meitieu aing'ora. Nejoki Olaitoriani ninye, ‘Talaku namuka too nkejek inono, amu ore ene nintasheyie, ewueji nesinya. Esipa nchere atoduaa osina loo ltung'ana laainei te Misiri, naning olkiyioi lenye, naewuo pee asaru: wou naa taata amu, kaairriwaa Misiri.’ “Olapa taa Musa ilo otanyaita ninche ejo, ‘Ai ng'ae doi likinchoo iyie ntoria nirish iyiook?’ Ninye eirriwaka Enkai metaa oloitore nesaru te nkaina e ilo malaika oipang'aka to lnchani. Ilo tung'ani otorikuo, eidipa ataasa ine nking'asia o nkitoduaat te Misiri o te naiposha nanyokie, o ti ong'ata, larin artam. Ilo Musa otiaaka nkera e Siraeli, ‘Keputoki intae Enkai oloiboni too lalashera linyi, leeijo nanu.’ Olapa taa otii atua ina siamo ti ong'ata te nebo olmalaika apa oirorie ninye to ldoinyo le Sinai, neirorie loo papa netang'amua sii nkitanapat naaishu naaishoo iyiook. Ninye eitu ening iloo papa, neaku etaaraitie aarishie ate, nerrinyo ltauja lenye aaito Misiri, nejoki Aaron, ‘Ntobiraki iyiook inkaitin naarik iyiook; amu ore ele oji Musa, otorikuo iyiook aitung'uaa enkop e Misiri, mikiyiolo inaanoto ninye.’ Neitobiru enkitanyaanyukoto o lashe te nena olong'i, neyaki lasarri lenye enkitanyaanyukoto, neng'idakino esiaai oo nkaik enye. Kake eibelekenya Enkai neishooyo ninche meteserema lakir le shumata anaa enatisiraki aajo te mbuku oo loibonok le Enkai, ‘Ei nanu nchoo ng'uesi naayieng'i o, te lelo arin pokira artam ti ong'ata, na aji e Siraeli? Itudumutua olng'obor le Molok, o lakira le nkai e Rafan, nkitanyaanyukot nintobirakita ate iteserema; kaidurrie naa intae aitogiroo Babilon.’ “Neeta apa iloo papa olapa ng'obor le shakeni ti ong'ata. Neitobiraki ninye ilo anaa enaitanapa Enkai Musa meiturubare anaa enaitoduaaki. Ilo ng'obor enyaakita loo papa aanapu te nebo Yoshua pee epuonu aajung enkop etaarayie Enkai kulikae oreren aing'atarie ninche, Nebik ilo ng'obor o metabaiki enkata e Daudi. Enoto ninye kirotetisho te Enkai, neomonu meishoo meteshetaki Enkai e Yakobo enkaji. Kake Solomon oteshetaka enkaji. Hoo nememany Olotii Shumata Aisul te pooki inkajijik naashetuni too nkaik: ana enatejo oloiboni, ‘Olorika lai le nkitoo shumata, naa olorika loo nkejek aainei enkop. Kenkaji natiu aja pasa kishetakiki? Olaitoriani ojo: Naa kaji ine nayeng'iyeng'are? Mme nkaina ai naitobira kuna pooki?’ “Lo tung'ana oosho murto, lememurata ltauja nememurata nkiyiaa, igolong'akiki oshi ake Enkiyang'et Sinyati; ore enapake nataasa iloo minyi, neijia nkona sii intae. Kalo oiboni eitu einyal iloo minyi? Netara metuata lelo apa ooitera aalimu elotunoto e ilo obo supat, lietuo intae aaitarasaa niariaara metua; naa intae ootang'amutua nkitanapat, anaa enaishorutua lmalaika kake eitu ntabayaya.” Ore ake pee ening kuna baa, neminisu neonyiki lala te ngoro. Ore ninye, eiganya Enkiyang'et Sinyati neitirring'a aing'or shumata, nedol enkitoo e Enkai o Enkerai e Tung'ani eitashe te nkaina e tatene e Enkai, nejo, “Ng'ura, adolita etabole shumata, neitashe Enkerai e Tung'ani te nkaina e tatene e Enkai. Kake etabuaa ninche to ltoilo sapuk, neiken inkiyiaa enye, neitiamaki pooki te nebo; nearaa auluo e ina anasa neirrui too soito: ore lelo ootaa shakeni neirragie nkilani enye te nkalo oo nkejek o lbarnoti oji Saulo. Neirrui ninche Stefano too soito, eomonito ninye Olaitoriani, ejo, Olaitoriani Yesu, tang'amai enkiyang'et ai.” Negil kung, nebuak ajo to ltoilo sapuk, “Olaitoriani, mintalak ninche ena ng'oki.” Ore pee ejo neijia, neirura. Netonyorrayie sii ninye Saulo ina keeya, nataaraki ninye. Nedumakino ina olong ake osina kitok ina sirit oo looiruko natii Yerusalem, neidapashakino pooki olkirine pooki le Yudea o le Samaria, ilkipaareta ake otelekutua. Nedumunye ltung'ana asayiak le Enkai aapuo aanukaa Stefano, eishiraki to ltoilo sapuk. Kake etetema ninye Saulo ajo amut ina sirit, oi aa lewa arashu nkituaak, nejing'aki too nkajijik, neikurtutaa anang'aki korokoroni. Neaku ore lelo ooidapashakinote nena kuapi nepuo ninche aalikioo ilo rorei. Nelo Filipo enkanasa oo Samaria neinosaki ninche Kristo. Ore ina siamo pooki neinining oleng, neng'amu pooki te nebo ilo rorei oinosaka Filipo, te nebo ilo rorei oinosaka Filipo, etoning'o nedol ninche nkitoduaat naataasa. Amu ore lkumok lenye te neeta loiriruani torrok, nepuku aaing'uaa eishir to ltoilo sapuk: ore lkumok ooilenyate o lmaiman, neishiunyeki. Nejing eng'ida sapuk ina anasa. Kake eetae apa oltung'ani obo te ine oji Simon oosh enkidong te ina anasa, neing'asiayie ilo orere le Samaria, eitaa kewan likae taani kitok, nening pooki ninye oloti o lbotor, ejo, “Ore ele tung'ani, ele taa oshi enoshi naji ‘Engolon Kitok Enkai.’ ” Neinining ninche ninye amu keing'asiayie ninche te nkata naado, eing'asiayie nena kidong'i enyena. Kake ore pee epuonu aairuk ilomon supati le nkitoria e Enkai ooinosu Filipo, neimaka enkarna e Yesu Kristo, neibatisae ninche ndung'ot pokira, ilewa o nkituaak. O meiruko sii ninye Simon; ore pee eibatisae, neaku Filipo eisiritore. Ore pee edol nkitoduaat o mbaa sapuki e ngolon naas Filipo neitoki ninye aing'asia. Ore pee ening lekua kipaareta ootii Yerusalem nchere etang'amutua iltung'ana loo Samaria ororei le Enkai, neirriwaki Petero o Yohana. Ore pee ebaya ninche, neomonoki lelo ooiruko pee eng'amu Enkiyang'et Sinyati; amu eton apa meetae olenye otadoikio Enkiyang'et Sinyati, keidipaki ake aaibatisa te nkarna o Laitoriani Yesu. Neiteleiki Petero o Yohana ninche nkaik neng'amu Enkiyang'et Sinyati. Ore taa pee edol Simon ajo te neiteleiki lkipaareta oltung'ani nkaik neishori ilo Enkiyang'et Sinyati, neisho Petero o Yohana mpesai, nejoki, “Enchooki sii ninye nanu ena kidimata paa ore ake oltung'ani laiteleiki nkaik neng'amu Enkiyang'et Sinyati.” Kake etiaka Petero ninye, “Indaa o nena pesai inono! Amu itejo ainosie enkishorunoto e Enkai mpesai! Miata iyie ematua aashu erubata te na bae. Amu meisiriri oltau lino ti alo Enkai. Irridu naa enkarrueisho ino niomon Olaitoriani pee idol te naa eikipalakini ina yieunoto o ltau lino. Amu adol ajo kibore enduaran o lodua, niteenikine atua ng'ok.” Newaliki Simon ajoki, “Entoomonokoki intae to Laitoriani pee maatum ake nena baa pooki nitejo.” Neaku ore pee eidip aaitadedeyie neinosaa ororei lo Laitoriani, nerrinyori aapuo Yerusalem, neimaa nkang'itie kumok oo Samaria, einosaa ilo rorei supat. Kake eirorie olmalaika lo Laitoriani Filipo nejoki, “Inyo tanapayu shomo enkalo e kopikop, enkalo e idia oitoi oshi naing'uaa Yerusalem elo Gasa, (enoshi e mpusel).” Neinyototo alo. Naa ng'ura! Nedol oltung'ani kitok le Etiopia. Naa osunash ele tung'ani naa kitok te nkitoria e Kandake, aa taa, enkaiguenani kitok e Etiopia. Naa ilo tung'ani oitore masaa enyena pooki. Neewuo ilo Yerusalem aseremisho: paa enkop enye errinyo alo, neton te ngarri enye oo mbartan aisum embuku o loiboni le Nkai oji Isaya. Nejoki Enkiyang'et Sinyati Filipo, “Shomo tinyikaki, turubare ina garri.” Nekuet Filipo alo enetii, nening ajo embuku e Isaya eisuma, neikilikuan ajoki, “Ining'u sa nena baa nisumita?” Nejoki, “Kaji aiko te naning'u eitu atum oltung'ani laautaa?” Neikilikuan Filipo meilepaki ina garri enye aton atashare. Ore ine wueji neisuma ilo tung'ani too lkigerot naa ewueji nejo, “Etorikoki anaa olkuoo le ker opuoi aayieng; anaa enoshi ker nemebol enkutuk edung'i ilpapit, eitu sii ninye ebol enkutuk enye. Ore te nborron enye, neoruni ninye esipata: naa ae ng'ae naa olimu eishoi enye? Amu eisha enkishui enye te nkop.” Newaliki ilo kitok sunash Filipo nejoki, “Aatasayia tolikioki, ae ng'ae doi eimaki ele oiboni le Nkai, ai kewan eimaki anaa ai likae?” Nebol taa Filipo enkutuk neiteru te ilo kigeroto, neinosaki ninye ilomon supati le Yesu. Ore epuoito, nebaiki ewueji netii enkare. Nejo ilo sunash, “Nena enkare ainyoo namit aaibatisai?” [Nejoki Filipo ninye, “Kindimi pae aaibatisa te naa iruko iyie to ltau lino pooki.” Nejo, “Airuko nchere Yesu Kristo oinoti le Enkai.”] Neitanapisho meitasheyieki engarri; nedoyio pokira aare aapuo enkare, Filipo o ilo sunash, neibatisae ninye. Ore pee eilepu ninche te nkare, newuapaa Enkiyang'et o Laitoriani Filipo te ine. Neitu eitoki ilo sunash adol, nelo ninye enkop enye te ng'ida. Nelo Filipo amaniki kewan etii Asotos. Ore eim ine, neinosaka ilo rorei supat te nena ang'itie pooki o metabai Kaisaria. Kake ore eton ake eiture Saulo nejo aar metuata ilooiteng'eni lo Laitoriani, nelo enetii Olapolosani Kitok aomon impala lelo ooitore nkajijik e ntumo te Dameski, paa te netum iloosujita ina Oitoi te ine, neidim atipika nkaik, aa lewa o aa nkituaak, neriku Yerusalem eena. Neaku ore etii enkoitoi eloito netinyikaka Dameski, neimerlelu nabo kata ewang'an naing'uaa keper neman ninye. Nebatata aosh enkop nening oltoilo ojoki, “Saulo, Saulo, aainyoo pee kinosie osina?” Neikilikuan ajoki, “Eira ng'ae, Olaitoriani.” Nejoki, “Ara Yesu linosie osina; kake inyo tijing'a ena anasa paa te ine kilikini eniaas.” Neisirng'ang'a lelo ooisiritore ninye negira aaitashe, naa oltoilo ake etoning'o neitu edol oltung'ani. Neinyototo Saulo nebol inkonyek, nemedol toki. Neaku enkaina eibung'aki aarik atua Dameski. Neya nkolong'i uni aa modooni nemedaa nemeok toki. Neetae oloiteng'eni te Dameski oji Ananias. Nejoki Olaitoriani ninye te nduaata, “Ananias,” nejo ninye, “nele nanu, Olaitoriani.” Nejoki Olaitoriani ninye, “Inyo shomo enoshi oitoi naji Naisiriri, nkilikuanu te nkaji e Yudas oltung'ani le Tarso oji Saulo; amu ng'ura, eomonito ninye, netoduaa oltung'ani te nduaata oji Ananias elotu enetii aiteleiki nkaik pee eitoki adolishoyu.” Kake etawalikia Ananias nejoki, “Olaitoriani, atoning'oyie ele tung'ani too ltung'ana kumok, eneba entorroni naitaasa isinyat linono te Yerusalem; naa ore te ne keeta enkidimata naisho lapolosak kituaak naenie lelo pooki ooipot enkarna ino.” Kake etiaka Olaitoriani, “Shomo amu, emasaai ai nageluno ninye pee eya enkarna ai aitayiolo iloreren, o laiguanak o nkera e Israel; amu kaliki nanu eneba enkitamioto naitamei ninye te nkaraki enkarna ai.” Nelo Ananias nejing ina aji, neiteleiki ninye nkaik nejoki, “Olalashe lai Saulo, ilo likimpang'aka te nkoitoi niimua, Yesu kewan laairriwua pee ngil adolishoyu, nikingany Enkiyang'et Sinyati.” Ore ina kata ake neing'abobunye entoki neeijo lpala too nkonyek enyena neitoki a dolishoyu. Neinyototo neibatisae. Ore pee enya endaa netum engolon. Nebik Saulo te nebo o lelo ooiteng'eni otii Dameski nkolong'i naaje. Ore te ina kata ake too nkajijik e ntumo nelikioo ninye Yesu, nejo, “Enkerai e Enkai ninye.” Neing'asia lelo pooki ootoning'o ninye nejo, “Ai mme olapa tung'ani ele oitayio ntabo te Yerusalem ear lelo ooipot ena arna? Naa ina pee eewuo ene, pee etum ateena kulo neyaki lapolosak kituaak?” Kake etoponari ninye Saulo agolu, neitala enkalo Ilyahudi ootii Dameski eitadedeyie nchere ore Yesu ninye Kristo. Ore etulusoitie nkolong'i kumok, netumo Lyahudi aaiguana peyie ear ninye metua; Kake etayiolo Saulo ina kiguana enye. Neaku kerrip nkishomin e ina anasa dama o kewarie, pee eari ninye metua; kake neaku etoriko ilooiteng'eni lenyena ninye kewarie, neitadooyo te suntai e ina anasa, neililioo te nkikapu o metadoi. Ore pee elo Saulo Yerusalem netem ajo ashulare lelo ooiteng'eni le ine, kake etureita ninche pooki, amu meiruk ninche aajo etaa ninye oloiteng'eni. Kake etudumua Barnabas ninye, nerikoki lkipaareta, neinosaki ninche eneikuna pee edol Olaitoriani te nkoitoi, neirorie ninye, o naataasa te Dameski alikioo enkarna e Yesu te mpijan. Neparana o lelo neibulu Yerusalem pooki, nelikioo lomon te mpijan te nkarna o Laitoriani. Neiro aishankarrarre lelo ooiro enkutuk oo Lyunani; neaku kejo maing'oru aasesekuan. Ore pee eyiolou ilalashera, neitadou aariku Kaisari, neirriwaa meshomo Tarso. Netum esirit eseriani te Yudea pooki o te Galilaya o te Samaria neitubuluni; nelotie enkuretisho o Laitoriani neitagol Enkiyang'et Sinyati, neponari. Neaku kelo Petero idie o idie abaiki ninche pooki o meeu enetii isinyat oomanya Luda. Netum oltung'ani otii ine oji Aeneas oirraga te rruat larin isiet naa keilenye. Nejoki Petero ninye, “Aeneas, kinchiunye Yesu; inyo ntobira erruat ino.” Neinyototo nabo kata. Nedol iltung'ana pooki oomanya Luda o Sharon ninye neibelekenyakino Olaitoriani. Neetae te ine te Yopa enaiteng'eni naji Tabisa, (eji Dorkas arashu Enkoilii). Naa kumok isiaaitin sidain o nkiaasin o lng'ur naataasa ninye. Ore te nena olong'i nemueyu neye. Ore pee eidip ninche aaisuja, nepuo aairragie to lgilata le shumata. Ore amu kenyikita Luda Yopa, ore pee ening ilooiteng'eni nchere etii Petero ine, neirriwuaki lewa aare nesai aajoki, “Wou sii ake ene nikitii nimimutie.” Neinyototo Petero airiamariyie ninche. Ore pee ebau, nerik ninche ninye ilo gilata le shumata. Neitashoo nkolia pooki te ine aatashare ninye eishirita, neitodol lngotin o nkilani naatiripaka apa Dorkas eton eboitare ninche. Kake eipang'ie Petero ninche pooki boo negil kung aomon: neitoki aibelekenyakino ilo sesen nejoki, “Tabisa, topiu!” Nebol ninye nkonyek enyena, ore pee edol Petero, neinyototo aton. Neitarasaki ninye enkaina neitasheyie. Neitoki taa aipot lelo sinyat o nena olia neitarasaki ninche eishu. Neyiolouni ina bae te Yopa pooki, neiruk ilkumok Olaitoriani. Nebik inkolong'i kumok te Yopa te nkaji e Simon, olaitobirani loo lonito. Etii apa Kaisaria, oltung'ani oji Kornelio, laa osajini kitok te sikari oo Roma naji, “Esirit oo Ltalian.” Oltung'ani apa aseremani neure Enkai ninye o enkaji enye pooki, naa aminin naleng too ltung'ana aisinak loo Lyahudi, neomon ninye Enkai anaa ake. Ore nabo olong anaa saa naaudo e ndama, nedol te nduaata eibale olmalaika le Enkai elotu enetii, nejoki, “Kornelio!” Ore ninye, nekurraki nkonyek te nkirutoto nejoki, “Ainyoo lo Kitok?” Nejoki ninye, “Etadamua Enkai enkomono ino o enkaminino ino o lng'ur. Irriwai naa taata ltung'ana meshomo Yopa, aariku Simon oji Petero, laa olomoni te nkaji e likae oji Simon, olaitobirani loo lonito, omanya embata e naiposha.” Ore pee elo ilo malaika aing'uaa ninye, neipot ilaisiaayiak aare le nkaji enye, o sikari obo oserem Enkai, oisiritore ninye anaa ake. Ore pee einosaki nena pooki naatotiwuo neirriwaa ninche Yopa. Ore taaisere, etii lelo enkoitoi, etinyikakita ina anasa, nelo Petero aomon te shumata enkaji, etaa enaipirie enkolong. Netir ninye esumash oleng, neyieu endaa. Kake ore eton eitobiritai, neimug aidetidet. Nedol shumata etabole nedou entoki neeijo olkarasha oililio too lcholo pokira oong'uan eililiunye adoiki enkop; nebore ng'uesi pooki oo nkejek maa ong'uan o naaikurtutari te nkop o motonyi e shumata. Nelotu oltoilo ojoki ninye, “Inyo Petero, teyiang'a nosa.” Kake etiaka Petero, “Mme neijia Olaitoriani; amu eitu ai kata anya nanu entoki naiduruk anaa enturuj.” Neigil ake oltoilo alotu enetii nejoki, “Ore entoki naa Enkai naitukuo, nimintaa iyie enturuj.” Neigilieki ina bae katitin uni: neito ilo karasha keper. Ore enoshi kata eing'asie ninye Petero oleng eiguana makewan aing'oru enajoki ina duaata natamanikia, ng'ura! Noolo lang'ole tung'ana ooirriwua Kornelio, ooikilikuanu enkaji e Simon ooitashe te kishomi. Neipotisho aaikilikuanu te naa ketii Simon oji Petero ina aji. Ore eton edamu Petero ina natamanikia, nejoki Enkiyang'et ninye, “Ng'ura, nelelo ltung'ana okuni liking'oru. Kake inyo, tadoi shomo, naa iriamariyie, nimiaata ake olng'ash, amu nanu oirriwua ninche.” Nedoyio Petero alo enetii lelo tung'ana, nejoki, “Ng'ura, nanu ele doi ling'oruru; ainyoo nayawua intae?” Nejo ninche, “Kornelio, osajini kitok, oltung'ani supat oserem Enkai naa yioloti eyanyit olorere pooki loo Lyahudi, eirriwaka Enkai olmalaika neirorie ajoki mikirriwaki olkilikuai wou shomo enkaji enye, meshomo ninye aning irorei lijoki.” Nepuonu aji neisho ninche enkirragata. Ore pee ekenyu neinyototo airiamariyie ninche, nerik kulikae alashera ooing'uaa Yopa aitaa encholiek. Ore taaisere nejing Kaisaria. Neanyita Kornelio ninche, neipoto aiturrur olmarei lenye pooki o lchoreta le latia enye. Ore pee eaku eewuo Petero ajing ine, nenang'are Kornelio ninye nebatata te nkalo oo nkejek enyena aserami. Kake eitasheyie Petero ninye, nejoki, “Inyo ntasho. Kara sii nanu makewan oltung'ani ake.” Ore eirorie, nejing aji, neinepu etasotote ltung'ana kumok: nejoki ninche, “Iyiololo intae pooki aajo kemito ena amu meshulare oltung'ani loo Lyahudi ole likae orere, nemejing enkaji enye; paa Enkai naatiaaka nanu mijo ake enturuj likae tung'ani nimijo mesinya; naa ina pee aaipotoki nalotu neitu aing'ash. Naikilikuan naa intae ajoki, aainyoo pee kietuo aaipot?” Nejoki Kornelio ninye, “Ong'uan ade taata nkolong'i naashomo, are aomonito anaa oshi ake saa naaudo e ndama te nkaji ai; ng'ura, neitashe oltung'ani oimerlel nkilani te dukuya nanu, nejo, ‘Kornelio! Etoning'oki enkomono ino, netadamua Enkai enkaminino ino o lng'ur too laisinak. Irriwai naa lkiliku Yopa, meipoto Simon oji Petero; naa olomoni ninye te nkaji e Simon laa olaitobirani loo lonito, omanya embata e naiposha.’ Naairriwaki ltung'ana te ina kata ake; nintobira naa iewuo. Ore naa etiu neijia, noolo iyiook pooki ootii ene te dukuya Enkai, pee kining nena pooki nikintanapa ninye tejo.” Nebol Petero enkutuk enye nejo, “Esipa atayiolo nchere ore Enkai, meeta olkep, kake ore pooki ng'ae oure ninye aa ololorere ora, neas isupati te Enkai, nenyorraa ninye. Iyiololo intae olapa rorei oirriwaka nkera oo Siraeli, otolikioyioki lomon supati lo sotua te Yesu Kristo (olaa ninye Olaitoriani le pooki), ilo rorei ilo liyiololo intae maate, oitadarayioki te Yudea pooki, aaiteru te Galilaya, eidipe enkibatisa apa nalikioo Yohana. Yesu le Nasareti etuputo Enkai te Nkiyang'et Sinyati o engolon nelotoo aas isupati, neishiunye lelo pooki ooibooko oloirirua enkop, amu ketii naa Enkai te nebo ninye. Nikira iyiook shakeni le nena baa pooki naataasa te nkop oo Lyahudi, o te Yerusalem. Ninye doi etara ninche, aashe to lchani. Neitopiu Enkai ninye te nkolong e uni, neishoru metodoli, neme too ltung'ana pooki, kake te lelo apake ootegelua Enkai te dukuya metaa lchakenini, naa iyiook lelo ootang'arie endaa kiokisho te nebo ninye eidipa atopiu too lootuata. Ninye oitanapa iyiook matolikioi too ltung'ana pooki, nikinchakenoki nchere ninye osiruno te Enkai metaa oloiguanaki ilooishu o lootuata. Ninye eitaikitia iloibonok le Enkai pooki shakenisho, nchere ore pooki oiruk enkarna enye netum empalakinoto oo ng'ok.” Ore eton ejoito Petero kulo rorei, nedoiki Enkiyang'et Sinyati lelo pooki ootoning'o ilo rorei. Ore pee edol lelo airukok Lyahudi neing'asia, lelo taa ooiriamunore Petero, te nkaraki natubukokoki sii ninche Loreren enkishorunoto e Nkiyang'et Sinyati. Amu ketoning'o ninche eiro te kulie kutukie aaisis Enkai. Newaliki Petero nejo, “Keetae oltung'ani omit enkare ajo meibatisai kulo ootang'amutua Enkiyang'et Sinyati anaa enikitang'amutua apa sii iyiook?” Neitanapisho meibatisai te nkarna e Yesu Kristo Nesai ninche ninye metobiko nkuti olong'i. Neaku etoning'o apa ilkipaareta o lalashera ootii Yudea nchere etang'amutua sii ninche loreren ororei le Enkai. Ore pee eilepu Petero alotu Yerusalem, neishankarrarre lelo le muratare ninye, aajoki, “Ishomo iyie ajing enetii Lmemurata, nilo ang'arie endaa.” Kake eiterua Petero aibalakinye ina bae osupatei, ajoki, “Enkanasa naji Yopa apa atii naomonito: naainepu enduaata, e ntoki natiu anaa olkarasha oing'uaa shumata oitadouni too lcholo pokira oong'uan, nelotu enatii. Neaku ore pee akurraki nkonyek aing'or, nadol ajo, ng'uesi e nkop oo nkejek maa ong'uan, o ng'uesi e ong'ata, o ntokitin naaikurtutari o motonyi e shumata. Naning sii oltoilo laajoki, ‘Inyo, Petero, teyiang'a naa nosa.’ Kake atejo, ‘Olaitoriani, Mme neijia, amu eitu ae kata eim enkutuk ai entoki e nturuj anaa enemesinya.’ Kake aatawalikia ilo toilo ajoki te nkata e are eing'uaa keper, ‘Ore entoki naitisinya Enkai, nimintaa iyie enturuj.’ Neikoni neijia katitin uni, neitokini aainyaaya pooki keper. Naa ng'ura, eitashe ina kata ltung'ana okuni ti auluo ina aji nikitii, eirriwuaki eing'uaa Kaisaria pee epuonu enatii. Naajoki Enkiyang'et maturubare, nemapik olng'ash. Naairiamariyie kulo alashera pokira ile; nikijing enkaji e ilo tung'ani. Neliki ninye iyiook olmalaika otoduaa te nkaji enye, nejoki, ‘Irriwai ltung'ana Yopa, mpoto Simon oji Petero; pee kilotu aliki irorei lijeunye, iyie o enkaji ino pooki.’ Neaku ore pee aiter airo nedoiki ninche Enkiyang'et Sinyati, anaa apa enatadoikio iyiook te nkiterunoto. Nadamu ororei lo Laitoriani, otejo apa, te nkare eibatisishe Yohana, kake keibatisae intae te Nkiyang'et Sinyati. Amaa naa te neishoo Enkai ninche enkishorunoto neeijo enapa naishoo ninye iyiook pee kiruk Olaitoriani Yesu Kristo kara nanu ng'ae oibooyo Enkai?” Ore pee ening ninche nena baa negira neisis Enkai nejo, “Eishoo naa Enkai sii ninche Loreren enkirridunoto nayau puaan.” Neaku ore lelo ooisardakieki to lapa sina otupukuo te nkaraki Stefano nepuo o metabaiki Foenike o Kupro o Antiokia, naa Lyahudi ake einosakita ilo rorei. Kake etii kulikae lenye, ltung'ana ooing'uaa Kupro o Kirene, laa ore pee ebaya Antiokia neinosaki sii ninche Ilyunani, nelikioo Olaitoriani Yesu. Neiriamariyie engolon o Laitoriani ninche; ore lkumok ooiruko neibelekenyakino Olaitoriani. Nebaiki ina nataasa ninche nkiyiaa e ina sirit natii Yerusalem: neirriwaa ninche Barnaba meshomo Antiokia. Ore pee ebaya, nedol enkiaas e mpiris e Nkai, neng'ida, neisisaki pooki nejoki metaa ilooisiligayu to Laitoriani te nkitashoto nauno oo ltauja. Amu oltung'ani supat ninye obore Enkiyang'et Sinyati o enkirukoto. Neponikino Olaitoriani olturrur sapuk. Neaku eshomo Barnaba Tarso aing'oru Saulo. Ore pee etum, neriku Antiokia. Neya olari olulung'a etumore ake ina sirit, neiteng'en esiamo kitok e ilo orere; naa te Antiokia eiteraki aajo ilooiteng'eni Ilkristiano. Ore te nena olong'i nepuonu loibonok le Nkai ooing'uaa Yerusalem aapuo Antiokia. Ore obo lenye oji Agabus neinyototo aibonu te Nkiyang'et ajo kelotu olameyu kitok e nkop pooki; (neewuo ina aaku too nkolong'i e Klaudius). Nedung ilooiteng'eni anaa ake enaidima oltung'ani, aajo keirriwaki eretoto ilalashera oomanya Yudea. Neiko neijia, neyaki lpayiani too nkaik e Barnaba o Saulo. Ore te ina kata neibung olaiguanani Herode kulikae tung'ana le ina sirit pee einosie osina. Nejo ninye metaari Yakobo olalashe Yohana to lalem. Ore pee edol ajo keitiship ina Lyahudi, neitulus aibung sii Petero. Naa to sirua loo Nkolong'i oo Mukateni Nemeisuijieki. Ore pee eya Petero, nepik korokoroni, neitarasaki ndung'ot ong'uan oo sikarini maa oong'uan metorripo ninye, aa kejo pee eyooki arikoki olorere etulusoyie osirua oji Pasaka. Nerripi Petero te korokoroni; kake eitirrisha ina sirit aasai Enkai naleng te nkaraki ninye. Ore ina kewarie, etaa kejo Herode pee elaku Petero, ore te ina kewarie ake, neirura Petero te rishata isikarini aare, neenikino lelo pokira too munyororoni: nerripito kulikae sikarini kutuk aji e ina korokoroni. Naa ng'ura! Neitashe olmalaika lo Laitoriani atashare ninye, neitawang ewang'an ina aji: neosh ilo Petero ematua, neinyeyie, nejoki, “Inyo tasioki?” Neitiaari inaduoo munyororoni naatii nkaik te ine. Nejoki olmalaika ninye, “Terretenayu, nchopo namuka.” Neiko neijia. Nejoki, “Nchopo olkila tusujuaki.” Neipung alo nesujaa sii ninye: neton meyiolo ajo kesipa ina naasita olmalaika, kejo kenduaata ake. Ore pee egiroo larripok le dukuya o li aare, nepuonu kishomi e sekenkei naipang'aki ina anasa; nebolo openy neipung aapuo, negiroo neng'eliki ai oitoi nabo nelo nabo kata olmalaika, ainguaa ninye. Ore pee eputunye Petero ayiolou enaasita, nejo, “Atayiolo taa taata ajo Olaitoriani oirriwua olmalaika lenye maatasaru ang'adie enkaina e Herode, o nena pooki naayiewuaki olorere lo Lyahudi.” Ore pee eyiolou ina bae, nelotu enkaji e Mariamu, ng'otonye Yohana oji Marko naa ine esotore esiamo kitok eomonito. Ore pee eoshiosh kishomi, nelotu enkaisiaayiani ainining'isho, naa keji ina Rhoda. Ore pee eyiolou oltoilo le Petero, neng'as apal kishomi mebolo, nekuet aji te ng'ida alikioo nchere eitashe Petero te kishomi. Nejokini, “Oloirirua iata iyie.” Kake etareikio ninye ajo neijia etiu. Nejo ninche, “Olmalaika lenye pae!” Ore eirorita ninche eton ake eitashe Petero eoshito elusie e kishomi, ore ade pee eboluni, nedoli ninye neing'asiai. Kake eiyuko ninye ninche te nkaina metigirata, neibalakinye eneikuna Olaitoriani pee esaru aitung'uaa korokoroni. Nejoki, “Entoliki kuna baa, Yakobo nilikiki sii lalashera.” Nelo ninye, dikai wueji. Ore ake pee ekenyu, mme nenguala sikarini ejo ainyoo nawa Petero. Ore pee eing'oru Herode, nelau, nejur lelo sikarini ootorripo neitanapisho meewai aar metuata. Neing'uaa ninye Yudea nedoyio alo Kaisaria, nebik te ine. Netagorokine Herode oleng lelo le Turo o Sidon: nepuonu ninche etoning'ote enetii ninye. Neng'as aaning'ore ninche Blastus aa ninye olaing'urani le nkaji o laiguanani, nepuonu aaing'oru osotua, amu enkop e ilo aiguanani etumie ninche endaa. Ore te ina olong negeluno neisikarra Herode aishop ilkilani le nkitoo, neton to lorika le nkitoo, neirorie olorere. Nebuakita lelo tung'ana aajo, “Ole nkai ele toilo, mme olo ltung'ani.” Ore nabo kata ake neosh olmalaika lo Laitoriani ninye, amu mme Nkai eishoo enkitoo, neiruj; ilkurt nedung'o tau. Kake etubula ninye ororei le Nkai neponari. Nerrinyunye Barnaba o Saulo eing'uaa Yerusalem, eidipa esiaai enye, neriku Yohana oji Marko. Neetae apa te sirit e Antiokia, te sirit natii ine, iloibonok le Nkai o laiteng'enak Barnaba Simeon oji Olorok, o Lukio le Kirene, o Manaen oyati lo lmarei lo laiguanani Herode o Saulo. Ore eserem ninche nesaita Olaitoriani neitupukoo ate, nejo Enkiyang'et Sinyati “Entegelakaki Barnaba o Saulo te nkaraki esiaai naipotoko.” Neaku ore pee eidip empukoroto neomon, neiteleiki ninche lelo nkaik, neirriwaa meshomo. Neisho ninche, eirriwayie Enkiyang'et Sinyati, nedoyio aapuo Seleukia; nejing empeut te ine aapuo Kupro. Ore etii Salamis, nelikioo ororei le Nkai te nkaji oo Lyahudi e ntumo; nerikito Yohana eretito ninche. Ore pee epolos ilo odung'oro pooki aabaiki Pafo, netum olkuyantiki, oloiboni le lejare, Olyahudi, oji Bar-Yesu; neboitare ilo olbalusui oji Sergio Paulo, oltung'ani ng'en. Neipot ilo tung'ani Barnaba o Saulo meshomo enkang enye, eyieu nening ororei le Nkai. Kake etirishie Elimas, (amu nejia eji ewalunoto e nkarna enye), ilo taa kuyantiki ejo pee eng'adie ilo balusui enkirukoto. Kake ore Saulo, oji Paulo, eiganya Enkiyang'et Sinyati, neing'ode ninye, nejoki, “Aish ele obore olosek o enkarrueisho pooki, ai mipal ake mikordil nkoitoi supati o Laitoriani? Ng'ura! Kitabaikia enkaina o Laitoriani. Naa imodoku, nimidol enkolong o metulusoi enkata.” Nedoiki nabo kata ninye enkirupurup o enaimin; nemana eing'oru olorik aibung enkaina. Ore ilo balusui, pee edol ina nataasaki, neiruk, eing'asie te nkaraki enkiteng'enare o Laitoriani. Nejing Paulo o encholiek enye empeut te Pafos, nepuonu Perga te Pamfilia; nelo Yohana aing'uaa ninche te ine nerrinyo Yerusalem. Kake etudumunye ninche te Perga, nepolos aapuonu Antiokia e Pisidia, nepuo enkaji e ntumo te nkolong e sabato, netoni. Ore eidipaki aaisoma nkitanapat e Musa o loibonok le Nkai, ore ilaitoriak le ina aji e ntumo, nejoki, “Ilalashera, te niatata ororei oret olorere, eroro.” Neinyototo Paulo, neyuk te nkaina nejo, “Lo lewa loo Siraeli o intae ilooure Enkai, enining'o. Enkai e le orere le Siraeli nategelua iloo papa, neitaa olorere kitok eton emanya Misiri neilepie enkaina enye neriku aitung'uaa ine. Naa ore te rishata oo larin artam neng'iri empeepeen enye ti ong'ata. Ore pee eidip atumuta loreren oopishana te nkop e Kanaan, neisho ninche enkop enye metujung'o, te rishata oo larin iip ong'uan o onom. Ore etulusoitie nena neisho ninche larishak o metabaiki enkata e Samuel olapa oiboni le Nkai. Ore tesiadi neomonu ninche olaiguanani, neisho Enkai ninche Saulo ole Kishi, oltung'ani lo losho le Benchamen, te rishata oo larin artam. Ore pee eiwuang'ie ninye, neitasheyie Daudi metaa olaiguanani lenye, oloitaikia Enkai shakeni, nejo, ‘Anoto Daudi ole Yese, oltung'ani onyor oltau lai, oas nena pooki nayieu.’ Te ishoi e ilo tung'ani eitaikia Enkai Siraeli, Olaitajeunoni, Yesu anaa apa enaisiligie. Netang'asa apa Yohana alikioo etiooyo elotunoto enye, enkibatisa naitoduaaya enkirridunoto natolikio ltung'ana pooki loo Siraeli. Naa ore eitabaya ninye Yohana inaaitanapaki, nejo, ‘Ijojo intae kara nanu ng'ae? Mara nanu ninye. A'a kake ng'ura, kelotu likae te siadi nanu, laa kaamakua te nalak inamuka enyena.’ Lo alashera, kira e ntalipa e Abraham, o intae kulo ooure enkai, iyiook eirriwakaki irorei le na jeunoto. Tenkaraki lekua oomanya Yerusalem o laitoriak lenye, amu ninye eitu eyiolou, arashu eyiolou iltoiloishi loo loibonok le Nkai ooisomai anaa ake too nkolong'i e sabato, ninche ooitabaitie ena pee edung'oki ninye enkiguana e keeya. Naa ore hoo netalaita te ninye ai naitanang, etoomono Pilato meishoo ninye metari. Ore pee eitabaya nena pooki naasirakino ninye, neitadou ninye to lchani neirragie te nkurare. Kake eitopiwuo Enkai ninye aitung'uaa ilootuata: netoduaaki too nkolong'i kumok lelo opa ooiriamunore ninye eing'uaa Galilaya alotu Yerusalem, naa ninche taata shakeni to lorere. Nikiyaki intae ilomon supati le nkisiligata naishoo apa Enkai iloo papa, eneikona Enkai pee eitabaya ina te iyiook inkera enye, aitopiu Yesu anaa enaigero to Lkerempe le Nkai, le are nchere, ‘Ira iyie Enkerai ai, te le kekun aatoiwuo.’ Naa ore ina naitopiwuo aitung'uaa ilootuata, nemeitoki naa ai kata arrinyokino erruorroto, eiroro nejo, ‘Ekaaisho iyie ilo sinyati imayianat naadede e Daudi.’ Amu etejo sii to Lkerempe le Nkai, ‘Nimincho iyie Ilo Sinyati lino edol erruorroto.’ Amu ore Daudi, eidipa too rishat enyena aitabai inaaitanapishe Enkai, neirura, neirragieki te nebo iloo menye, netum erruorroto. Kake ore ilo oitopiwuo Enkai eitu etum ninye erruorroto. Entayioloito naa aajo, ilalashera laainei, te le tung'ani elikini intae enkitayunoto oo ng'ok: naa te ninye eoruni ntiyot pooki ng'ae oiruk ninye, neikenakini esupatisho te Nkai nemetum too nkitanapat e Musa. Entodol naa ate, meinepu intae enapa nairoro iloibonok le Nkai aajo: ‘Eng'ura intae, ilasurdaanyak, ning'asiasia nindaayaya; amu keeta enaas too nkolong'i inyi, o enkiaas nemeeta nchere iruko, te neliki intae likae.’ ” Ore eipung aapuo, nesai menyaaki aaigilie lelo omon te nkolong e sabato nasuju ina. Ore pee eidapasha entumo, nesuj Ilyahudi kumok o kulikae ooure Enkai Paulo o Barnaba: neirorie ninche lelo neitirrishaki metobiko te mpiris e Nkai. Ore te nkolong e sabato natusujua ina, peno eitu etumokino ine enkanasa nalulung'a aaning ororei le Nkai. Kake, ilo orere ake etoduaa Ilyahudi, neigany olom, neishankarru nena naatejo Paulo, nemor Enkai. Neiro Paulo o Barnaba aashirraki, nejo, “Keishiaakino naa intae eiteraki aaliki ororei le Nkai. Kake ore amu itanang'aitie, nitoduaa oopeny nchere meishiaakino intae enkishui nemeish, ng'ura, kipuo iyiook enetii Loreren. Amu ina doi eitanapa iyiook Olaitoriani, ajoki. ‘Aaitaa iyie ewang'an oo Loreren, peyie iyau iyie enjeunoto o metabaiki ineeiting'ie enkop.’ ” Ina ake etoning'o loreren, neng'ida oleng, neisho ilo rorei le Nkai enkisisa: ore lelo oogelakino enjeunoto neiruk. Neibulunyeki ororei lo Laitoriani ilo kirine pooki. Kake eshomo Lyahudi aaisur nkituaak naayanyiti, o lewa ooitore ina anasa, neing'oling'ol pee einyali Paulo o Barnaba, nearari metung'uai ilo Kirine lenye. Kake eipiripirokito ninche enterit oo nkejek enye, nepuonu Ikonio. Neiput ilooiteng'eni enchipai o Enkiyang'et Sinyati. Neaku ore te Ikonio, nejing enkaji e ntumo oo Lyahudi te nebo, neiro, o meiruko esiamo kitok oo Lyahudi o enoo Ilyunani. Kake eing'oling'ola lelo Yahudi leitu eiruk iltung'ana loo Loreren, neitagogong iltauja ti alo lalashera. Neaku etobiko naleng te ine eshirraki aairo ti atua Olaitoriani, neitadedeyie ninye ilo rorei le mpiris enye, neishoru metaasi ilmonek o mbaa e nking'asia too nkaik enye. Kake etoorote olorere le ina anasa neibung'are kulikae Ilyahudi, neibung'are kulikae lkipaareta. Ore pee edumakino ndung'ot pokira, Iloreren o Lyahudi o laitoriak lenye pee esuli ninche aaitukurru, nenang'i too soito, neirrash ninche ina, neisikaki Listra o Derbe nena anas e Likonia o lelo kirinen oomanita: nelikioo ororei le Nkai te nene wuejitin. Ore apa te Listra netii oltung'ani otonita otuata nkejek, olaa olmaima pee eini, leitu ai kata elo too nkejek. Nening ilo Paulo eiro, ore Paulo, nekurraki nkonyek nedol ajo keeta enkirukoto pee eishiunyeki, nejo to ltoilo sapuk, “Ntasho ntoriori too nkejek inono!” Neitiamu aitashe nelo. Ore pee edol esiamo ina nataasa Paulo, neilepie ltoiloishi, ejo te nkutuk oo Likonia, “Etadoutuo nkaitin naatiu anaa ltung'ana!” Nejo Barnaba Seu; nejo Paulo Herme, amu ninye oljartan to rorei. Nereu olapolosani le Seu otii olkitaret lenye auluo ina ang ilmong'i neyau lmarisiani kishomi, naa anaata etopolosishote te nebo o nena siamon. Kake ore pee ening ilkipaareta ina, Barnaba o Paulo, nepolos ilkilani lenye, neipangu te siamo, ebuakita neishir, nejo, “Lo kituaak! Ainyoo pee nkoko nji? Kira sii yiook iltung'ana ake leeijo intae, naa lomon supati kiyaki intae, pee imbelekenyanya, aaing'uaa kuna nemeeta tipat aaing'or Enkai naishu, naitobira shumata o enkop o naaiposha, o nena naatii pooki: olaa ninye oishoo loreren pooki too lajijik ooishari meshomo loshon too nkoitoi enye maate. Kake eitu sii epal kewan meeta ake shakeni enye, amu etaasa supati, neisho intae enchan eing'uaa shumata neisho intae larin oosinyunye, neitaraposh iltauja linyi te ndaa o te ng'ida.” Naa te mpesho ade te kulo rorei etomitikio Paulo nena siamon epolosaki ninche. Kake eetuo Lyahudi ine ooing'uaa Antiokia o Ikonio: ore pee eitoosh isiamon, nenang Paulo too soito neikurtutaa auluo ina anasa, ejo ninche ketua. Kake ore eitashe ilooiteng'eni aamanita, neinyototo, nejing ina anasa: ore pee ekenyu nepuku o Barnaba aapuo Derbe. Ore pee elikioo ororei supat te ina anasa, neitaa lkumok ilooiteng'eni, nerrinyo aapuo Listra, o Ikonio o Antiokia, eitagol ilooiteng'eni ltauja, nekurraki metobiko tiatua enkirukoto, amu kumok isinaitin likiimaa kijing enkitoria e Nkai. Ore pee egelaki ninche lpayiani te sirit ake pooki, neomon eitupukoo ate, neomonoki ninche Olaitoriani, ilo laa ninye eiruko ninche. Neimaa Pisidia, nepuonu Pamfilia. Ore pee einosaa ilo rorei te Perga, nedoyio aapuo Italia; nejing empeut e ine aapuo Antiokia, enapa wueji neisiligieki ninche empiris e Nkai te nkaraki ina siaai naitabaitie. Ore pee epuonu, neiturrur esirit te nebo, neinosaki nena pooki naataasishore Enkai ninche, ina nataboloko loreren enkoitoi e nkirukoto. Neme kuti nkolong'i naatobiko ninche te nebo lelo ooiteng'eni. Nedou kulikae tung'ana ooing'uaa Yudea neiteng'en ilalashera, aajoki, “Te nememurati intae anaa enaitanapishe Musa, nimindimidimi aatajeu.” Ore pee eishankarrarre Paulo o Barnaba ninche neirish aaiguanare too mbaa neme kuti, negelu lalashera Paulo o Barnaba o kulikae ake lenye, meshomo Yerusalem eitarioo esirit ninche, neimaa Foenike o meshomo Yerusalem enetii lkipaareta o lpayiani te ina bae. Ore taa pee eitarioo esirit ninche, neimaa Foenike o Samaria, einosaa enkibelekenyata oo ltung'ana loo Loreren; neyaki lalashera pooki eng'ida kitok oleng. Ore pee epuonu Yerusalem, neng'amu ina sirit o lkipaareta o lpayiani, neinosaki mbaa pooki naataasie Enkai ninche. Kake einyieito kulikae te ncholiek oo Lfarisayo ooiruko, nejo, “Meeta nchere pee memurati ninche, neitanapi meibung'a nkitanapat e Musa.” Netumo lkipaareta o lpayiani te nebo aaimaki ena bae. Ore etoodoro enkiguana narrish, neinyototo Petero, nejoki ninche, “Ilalashera laainei, iyiololo aajo ore apa te nkata naado etegelua Enkai obo linyi, peyie aa te nkutuk ai ening ltung'ana loo Loreren ororei supat, neiruk. Ore Enkai nayiolo ltauja, neaku shakeni te ninche aisho Enkiyang'et Sinyati, anaa enapake naishoo iyiook; neitu epik olgelati arish iyiook o ninche, neituku ltauja lenye te nkirukoto. Oo naa taata pee itemiteme intae Enkai, aaiteleiki enchata murto oo lalashera, eneitu eidim iloo papa neitu kindim iyiook aatanap? Paa kake, kiruko iyiook nchere te mpiris e Yesu Kristo kijeu iyiook, naa neijia etiu ninche.” Negira olturrur pooki; neinining Barnaba o Paulo einosaki nkitoduaat o ne nking'asia naataasie Enkai ninche too ltung'ana lo Loreren. Ore pee egira ninche, newalu Yakobo nejo, “Ilalashera, entoning'oki: einosua Simeon eneikona apa Enkai pee ebaiki ltung'ana loo Loreren, agelu ti atua ninche ltung'ana le nkarna enye. Neitadedeyie ina naairoro iloibonok le Nkai anaa enatisiraki nchere, ‘Ore pee elusoo kuna karrinyunye nanu, naa kaitoki ashetu enkaji e Daudi e nkomono naturori; naa kaitoki ashet ilmuaateni lenye: naitasheyie nanu: pee eing'oru ltung'ana ootelekutua Olaitoriani, lelo tung'ana pooki loo loreren, ooipotieki enkarna ai. Olaitoriani ojo, ololimu apa kuna baa te nkiterunoto e nkop.’ Ore te nkaraki ina, neiguana aajo, emikintanyamal lelo loo Loreren ooibelekenyakino Enkai; kake emaigeroki metalama lkereu loo nkiri naapolosakini ntokitin naaitaai nkaitin, nelam eloloito, o ntokitin naagori, o sarge. Amu eeta Musa too lajijik o lajijik te nkanasa ake pooki lelo oolikioo ninye, eisumitai ninye anaa ake too nkolong'i e sabato too nkajijik e ntumo.” Nedol ilkipaareta o lpayiani o ina sirit pooki aajo sidai te negeluni ltung'ana le ina sirit enye, neirriwari Antiokia te nebo Paulo o Barnaba. Negelu Yudas oji Barnaba o Sila, laa larikok too lalashera. Neigeroki lelo nejo, “Ilkipaareta o lpayiani alashera ooigeroki ilalashera oora iloo Loreren te Antiokia o te Siria o Kilikia, kiroroki intae; te nkaraki naa ai kitoning'o aajo etii kulikae ooing'uaa atua iyiook ooetuo aaitanyamal intae too rorei neitapong'oo ltauja linyi; neitu kincho iyiook ninche imbaa naayaki ninche intae; nikidol iyiook eishiaakino, kitoning'okinote nabo, nikigelu lewa likirriwaki intae meiriamunore ilaisotuak lang Barnaba o Paulo, iltung'ana ootipika bata enkishon enye te nkaraki enkarna o Laitoriani lang Yesu Kristo. Kirriutua naa Yudas o Sila naa ninche maate ooliki intae kuna baa te nkutuk. Amu etoduaa Enkiyang'et Sinyati o iyiook; nchere pee mikinteleiki intae likae ola olusoo te kuna baa naata tipat; nchere entirishie ate nkiri oo ntokitin naapolosakini nkitanyaanyukot naaitaai nkaitin, o sarge o ntokitin naagori, o eloloito; amu te nintalamilama ate nena, nintobira osupatei. Ayia sere.” Ore ninche, pee eishori epuo, nedoiyio aapuo Antiokia; ore pee eiturrurru olorere te nebo, neitarasaki ina palai. Ore pee eisum ninche, neng'ida te nkaraki ina kilejilejata. Ore Yudas o Sila amu loibonok le Nkai sii ninche maate, neinosaki lalashera nkumok neitagol. Ore ewaita enkata ebikito te ine, neitanapare ilalashera ninche te seriani neisho enetii lelo apa ooirriutua ninche. [Kake etoduaa ninye Sila ajo keishiakino neton te ine.] Kake etobiko ninche Paulo o Barnaba te Antiokia eiteng'enisho nelikioo ororei lo Laitoriani, te nebo sii kulikae kumok. Ore etulusoitie nkuti olong'i nejoki Paulo Barnaba, “Manyaai aabaiki ilalashera too nkanas apa pooki nikinosakita ororei lo Laitoriani, pee kidol eneikununo.” Neyieu Barnaba neshoroo Yohana oji Marko meiriamariyie. Kake etoduaa Paulo ajo mme sidai te nerik oltung'ani apa otorrinye aing'uaa ninche te Pamfilia, leitu erubare ninche te siaai. Nejing empong'o o metooroto olikae o likae, nerik Barnaba Marko pee eiriamari nejing empeut aapuo Kupro. Kake etegelua ninye Paulo Sila, nepuo, neitanap ilalashera ninche neomonoki empiris e Nkai. Neimaa Siria o Kilikia neitagol nena sirito. Nelotu sii Derbe o Listra, naa ng'ura, eetae apa oloiteng'eni te ine oji Timoteo, olayioni le nkitok Yahudi nairuko, kake Olyunani menye. Neimaki lalashera ninye aarrep ilootii Listra o Ikonio. Ninye etegelua Paulo pee eiriamariyie; neibung nemurat te nkaraki lelo Yahudi le ilo kirine; amu keyiolo pooki aajo Olyunani apa menye. Ore epuoito te nkoitoi eimaa nkang'itie, neisho napa baa meibung'a, naaitanapishote lkipaareta o lpayiani ootii Yerusalem. Metaa nedupayu nena sirito enkirukoto, neponari esiana anaa ake. Neimaa olkirine le Frigia o Galatia, etirishie Enkiyang'et Sinyati pee melikioo ilo rorei te Asia. Ore pee epuonu aaipirare Misia, netem aajo matijing Bitinia; neitu eisho Enkiyang'et e Yesu meshomo; neim embata e Misia nedou aapuonu Troas. Neipang'aki Paulo enduaata kewarie, oltung'ani oitashe le Makedonia, osaita ninye ajoki, “Wou talang'u Makedonia, taretu iyiook.” Ore pee edol Paulo ina, neiteru nabo kata aing'oru elototo nalo Makedonia, etumuta ajo Enkai naipoto iyiook maape aaliki ninche ele rorei supat. Ore pee kijing empeut te Troas, nikipolos aaitoriokino Samotrake, nikiyiooki te ntaaisere aapuo Neapolis; nikidumunye te ine aapuo Filipi; enkanasa e Makedonia, naa ninye enkanasa kitok te ilo kerenket, naa abori oo Roma etii: nikibik te ina anasa nkolong'i naaje. Ore te nkolong e sabato nikimpang auluo kishomi e ina anasa, te mbata o lkeju, kijo ebaiki neetae ewueji e nkomono te ine; nikitoni, aairorie nkituaak naatoni te nebo. Netii enkitok naji Lidia naa enkamirani oo lkarash oodo, naa ene nkanasa naji Tiatira, naserem ninye Enkai, nening iyiook. Nebol Olaitoriani e ltau lenye, metoning'o mbaa naairoro Paulo. Ore pee eibatisai ninye o enkaji enye, nesai iyiook, ajoki, “Te nikitoduaa intae aajo kaisiligayu to Laitoriani, wootu entijing enkaji ai, entotoni.” Neidimu iyiook. Neaku ore kipuoito ine wueji e nkomono, nenang'are iyiook esila naata e nkiyang'et e naibon nadol imbaa, netopokie lkituaak lenyena ninye too masaa naayaki te ina aibon. Nesuj ninye Paulo o iyiook nebuaku eishir ajo, “Ore kulo tung'ana ilaisiaayiak le Nkai natii Shumata Aisui te pooki, naa intae eliki enkoitoi e njeunoto.” Neiko neijia nkolong'i kumok. Kake ore Paulo, etanyamala oleng neibelekenya nejoki ilo oirirua, “Aaitanapa iyie te nkarna e Yesu Kristo tupuku tung'uai ninye.” Nepuku aing'uaa te ina saa ake. Kake ore pee edol ilopeny aajo eshomo osiligi le ina dupoto enye, neibung Paulo o Sila, neikurtutaa aaya enetii laitoriak te nemirishoreki, ore pee eyau enetii iladung'ok le nkiguana, nejo, “Ore kulo tung'ana, loo Lyahudi, eitanyamalita naleng ena anasa ang, aalimu lkerreti lemeishoruno matang'amai arashu kisuj, kira Iroma.” Nedumakino esiamo pooki te nebo nepololoki lkilani lenye aaoru, neitanapisho meidong'i too ng'udisin. Ore eitudupaki ninche iwoshot kumok, nenang'akini korokoroni, neitoriakini olarriponi meitirrisha oleng. Ore pee eng'amu ilo ina kitanapata, nepik ninche korokoroni e atua, neen nkejek enye akurraki too lgarrameta. Kake ore etaa keitorito enkewarie eomonito Paulo o Sila neranyaki Enkai isinkoliotin; neinining'ito ilooena ninche; ore nabo kata, neikirikira enkop, neigirigiro lkitamanyunot le ina aji e korokoroni; nebolo nabo kata nkutukie enyena pooki; nelaa lgarrameta loo looena pooki. Ore pee einyiototo olarriponi etuputuoki too njo, nedol inkutukie e korokoroni ebolo, neshutu olalem neaku kejo aar kewan, ejo keisika ilooena aapuo. Kake etabuaa Paulo to ltoilo sapuk, nejo, “Miar kewan, kitii pooki ene.” Neipotu lkilangilang'eta, nengorokino atua, eikirikira te nkuretisho, nebatatakino Paulo o Sila, neitupuku, nejoki, “Lo kituaak, kaji aiko pee ajeu?” Nejoki ninche, “Iruko Olaitoriani Yesu, pee ijeu iyie o enkaji ino.” Neinosaki ninye ororei lo Laitoriani, te nebo lelo pooki ootii enkaji enye. Nedumu ninye ninche te ina saa ake e nkewarie, neisuj nena oshot enye, neibatisae ninye nabo kata o lelo lenyena pooki. Neriku ninche enkaji enye, neisho endaa, neshipa oleng o enkaji enye pooki, eiruko Enkai. Ore pee ekenyu, neirriu iladung'ok le nkiguana lsikarini nejoki, “Enchoo lelo tung'ana epuo.” Neyaki olarriponi le korokoroni Paulo ilo rorei, ajoki, “Eirriutua iladung'ok le nkiguana olkilikuai meishori intae enchom, enyeito naa taata naa enchom te seriani.” Kake etiaaka Paulo ninche, “Etaara iyiook te dukuya olorere, eitu eiguanareki iyiook, nikira sii ile Roma, netanang'akita iyiook korokoroni; neyieu taata neitupuku iyiook too nkurrat? Mme neijia; kake enchoo epuonu ninche maate aaitupuku iyiook.” Nepuo lelo sikarini aainosaki iladung'ok le nkiguana lelo rorei, neureishoyu, etoning'o aajo ile Roma ninche. Nepuonu aasai ninche; ore pee eitupuku, neikilikuan te naa kepuo aaing'uaa ina anasa. Nepuku ninche te korokoroni, nepuo enkaji e Lidia: ore pee eidip aatodol ilalashera, neilejilej ninche nepuo. Nepuo aaimaa Amfipoli o Apolonia o meetu Sesalonike, netii ine enkaji oo Lyahudi e ntumo. Nelo Paulo nejing ine anaa olkuaak lenye. Ore te rishata oo wikii uni neishankarrarre too lkigerot, eliki enajo neitadedeyie ti atua ninche nchere meeta apake kata nemeinosieki Kristo osina, neitoki ake apiu too lootuata. Nejoki, “Naa ele Yesu laliki intae, ninye doi Kristo.” Nenyorraa kulikae lenye nena neaku ile nkalo e Paulo o Sila, naa neijia etiu Lyunani kumok ooserem Enkai, neme kuti sii ninche nkituaak arikok naairuko. Kake eishoo ninche Lyahudi te nkaraki olom nepuo aasotu ilarruok olwushuush too neemirishoreki, nesotu esiamo neliman ina anasa pooki; nerasaki enkaji e Yason, ejo pee erikoki ninche lelo tung'ana. Ore pee elau, neikurtutaa Yason o kulikae le lelo alashera aayaki ilaitoriak le ina anasa, ebuakita aajo, ore “Kulo tung'ana ooijulujulo enkop aing'orie shumata abori neetuo sii ene; naa Yason otang'amua arik enkaji enye: neetuo pooki aas inemeishoruno aakesh Kaisari, ejo eji eetae likae aiguanani oji Yesu.” Neng'uyan ninche ilo orere o lelo aitoriak le ina anasa pee ening ilo rorei. Ore pee eya te Yason o te lelo kulikae mpesai naaisiligieki, neishori meshomo. Ore ake pee emutu neisikie nabo kata lelo alashera Paulo o Silas kewarie meshomo Berea. Ore pee ebaya ninche ine nepuo aajing enkaji oo Lyahudi e ntumo. Neaku kening'isho ninche lelo metiu anaa ile Sesalonike, amu etang'amutua ilo rorei eyieu to lokiyo sapuk, nejur ilkigerot anaa ake pee edol te naa ai neijia etiu kuna baa. Neaku eiruko lkumok lene te nkaraki ina, o meiruko sii ninche nkituaak neme kuti naa nkarikok o Lyunani, o lewa leme kuti sii ninche. Ina ake etoning'o Lyahudi le Sesalonike nchere etolikioyie Paulo ororei le Nkai te Berea, neitoki ake aapuonu ine, neing'oling'ol olorere aaitanyamal. Nerik nabo kata lelo alashera Paulo meshomo o meitabaiki enaiposha: neng'as ninche Silas o Timoteo aabik te ine. Ore lelo ootoriko Paulo neitabau Atene. Ore eitanap Paulo ninche aisho olkilikuai oyaki Silas o Timoteo metasieku ine, nerrinyo aapuo. Ore eanyita Paulo ninche te Atene, nenyamalu naleng te kewan enye etoduaa eneba enkumoi oo nkitanyaanyukot naaitaai nkaitin te ina anasa. Neishankarrarre Lyahudi o lkulikae tung'ana ooserem Enkai te nkaji e ntumo, o te nemirishoreki anaa ake, ilooba anaa lootumore. Neetae sii kulikae ang'eni te ine, ooji ile Epikureo looji ile Stoiko oonotore ninye. Nejo kulikae lenye, “Kejo aa ele shoshoroi?” Nejo kulikae, “Ketiu anaa nkaitin eeiking'a elimu;” naa enkaraki natolimuo Yesu o empiunoto. Metaa ninche ootudumutua nerik olkiu te wueji neji Areopago, ejoito, “Kaa kiteng'enare ng'ejuk ena nilimu amu eikiyieu nikiyiolou? Amu eijo keitu ae kata kining kuna baa nilimu: kiyieu naa nikiyiolou enajo kuna baa.” (Naa ore lelo tung'ana pooki le Atene o lomon ootii ina anasa, meeta ai naas neme ketoni ake aairo, einosakino aashu einining'u embae ake pooki ng'ejuk.) Metaa neitashe Paulo te dukuya ilo kiu le Areopago, nejo, “Lo lewa le Atene, adolita ajo ore te pooki oitoi irara ilaseremak oleng. Amu ore aloito, nadol olperere lo lasar oigero ajo nji, ‘ENE ENKAI NEMEYIOLOI.’ Ore naa ina Ai niserememe miyiololo ninye ena naliki nanu intae. Ore ina Ai naitobira enkop o ntokitin pooki, aa ninye taa Olaitoriani le shumata enkop, mme nkajijik naaitobiri too nkaik emany ninye. Neme too nkaik eisiaai ninye, anaa keeta ae toki nayieu, naa ninye sii doi oisho pooki ng'ae enkishui, o enkiyang'et, o pooki toki. Naa te ilo obo eitobira iloreren pooki te nkop, metamanya oriong e nkop. Naa ketang'asa te dukuya aitaiki rishat o lpolosien oorish ineemany. Neitaa ninche peyie etum aaing'oru Enkai, pee ebaiki ake neirrapirrapu, nebaiki netum. Hoo nemelakuaniki ninye hoo obo lang, amu, ‘Ninye kinchuyie, naa ninye kipuoyie, naa ninye pee kira.’ Anaa enatejo likae aranyani linyi otejo, ‘Kira sii iyiook eishoi enye.’ Te nikira naa eishoi e Nkai, emikintoki naa ake aajo eji ketiu empukunoto e Nkai anaa saabu, anaa enkosholai, anaa osoit oguetu enkarriyiano arashu endamunoto olosek le tung'ani. Enkaraki ina pee eimula Enkai enkong'u te nena katitin e modai; kake ore taata eitanapa ajoki ltung'ana te pooki wueji, ‘Embelekenyata entung'uai nkoitoi inyi e nkarruoisho.’ Amu eidipa ninye atuuno enkolong, nayooki aiguanare enkop too sipat, te ilo tung'ani otegelua. Naa ninye eitadedeyie ninye too ltung'ana pooki, eitopiwuo ilo aitung'uaa ilootuata.” Ore pee ening ninche eimaki empiunoto oo lootuata neikordod kulikae; kake etii kulikae lenye ootejo, “Kintoki ake aainining iyie te likae kekun.” Metaa nepuku Paulo alo aing'uaa. Kake etii kulikae ootaa le nkalo enye neiruk: ilootii Dionisio, obo le lelo le Areopago, o enkitok naji Damaris, o kulikae ake. Ore pee elusoo kuna nedumunye Paulo te Atene, nelotu Korinto. Netum Olyahudi obo oji Akuila, laa oinoti le Ponto, naa enalotunye det eing'uaa Italia te nebo enkitok enye Prisila, enkaraki naitanapishe olaiguanani kitok Klaudius meshomo Lyahudi pooki aaing'uaa Roma. Nelo Paulo enetii ninche; naa ore amu keng'ar enkarriyiano e siaai enye, nebik te nebo ninche, neasisho; amu ilaitobirak loo emai ninche. Neiguana anaa ake te nkaji e ntumo too nkolong'i e sabato ejo ayietu Ilyahudi o Lyunani meiruko. Ore pee edou Sila o Timoteo te Makedonia, nesheikino ninye Paulo elikioroto o rorei neishakenoki too Lyahudi nchere Kristo Yesu. Ore pee egilunore ninche maate ninye nemor, neipiripiroki Paulo ilkilani lenyena nejoki, “Meeu osarge linyi shumata lukuny inyi. Maata nanu entioto; ore ebaiki taata iltung'ana loo Loreren alo enetii.” Nelo aing'uaa lelo, nejing enkaji o ltung'ani oji Tito Yusto, oserem ninye Enkai, otashare enkaji enye ene ntumo. Ore Krispas laa ninye oitore ina aji e ntumo, neiruk Olaitoriani, neiruk sii enkaji enye pooki; ore pee ening Ilkorintio kumok neiruk neibatisae. Nejoki Olaitoriani Paulo nabo olong kewarie eirura, “Miureishoyu, iroro, nimigira; amu atii nanu te nebo iyie. Nemeetae oltung'ani likibaiki aitaas entorrono: amu kumok iltung'ana laainei te na anasa.” Nebik Paulo te ine olari obo o lapaitin ile, eiteng'enita ninche to rorei le Nkai. Ore pee eitaai Galio olbalusui loo Roma te Akaia, nedumakino Lyahudi pooki Paulo te nebo, nerik olorika le nkiguana, ejoito, “Keyiataki ele tung'ani olorere pee eserem Enkai te nkoitoi nemeishoruno too nkitanapat.” Kake ore ejo Paulo abol enkutuk, nejoki Galio Lyahudi, “Te nesipa naaji ajo kembae e ntorroni aashu ene karrueisho, lo Yahudi, naa anaata iatata esipata nang'iri ainining intae. Kake te na kenchankar oo rorei o nkarn o nkitanapat inyi, eng'urai oopeny; mayieu nanu naaku olarishani loo mbaa neeijo nena.” Nearaa aitung'uaa olorika le nkiguana. Nesar pooki aaibung Sostene, ilo apa oitore enkaji e ntumo oo Lyahudi, neidong te nkalo o lorika le nkiguana. Neitu hoo eshilaa ninye Galio nena baa pooki. Ore te siadi kuna, enyaaka abik nkolong'i kumok etulusoitie nena, neitanapare lalashera, neked emeli alo Siria, neiriamariyie Prisila o Akuila. Netabarnoki te Kenkrea: amu einosa olmumai. Nepuonu ninche Efeso, neing'uaa ninche te ine. Kake eshomo Paulo ajing enkaji e ntumo neishankarrarre Lyahudi. Ore pee eji maiboo metobiko oleng, neany; kake etudumunye nejoki ninche, “Kaitoki ake ashukunye, te neyieu Enkai.” Neked emeli alo Efeso. Ore pee elang'aki Kaisaria, neilep airoroki esirit, neitoki adoyio alo Antiok. Ore pee ebik nkuti olong'i te ine, nedumunye alo neimaa olkirine le Galatia, o Prigia aruk nenen, eitagol ilooiteng'eni pooki. Neetae Olyahudi oji Apolo, laa te Aleksantria eini, nelotu elo Efeso; naa arriyia to rorei naa magilani too lkigerot. Neiteng'enaki apa ilo tung'ani te nkoitoi e o Laitoriani; naa ore amu oltung'ani oisusunkat oleng, neiro neiteng'enisho abaraki mbaa e Yesu, hoo naa enkibatisa e Yohana ake eyiolo neiteru airo te mpijan te nkaji e ntumo. Kake ore pee einining Prisila o Akuila, nerik enkaji enye, neibalakinye Enkoitoi e Nkai aabaraki. Ore pee eyieu ninye, nelang alo Akaia, neitagol ilalashera ninye nesiraki ilooiteng'eni empalai metang'amu ninye: ore pee ebaya Akaia neretu naleng lelo laa te nkaraki empiris e Nkai pee eiruko: amu etigilua ninye Ilyahudi te ng'olong naa te dukuya ltung'ana eitoduaayie too lkigerot inchere ore Yesu ninye Kristo. Neaku ore etii ninye Apolo Korinto, neimayie Paulo ina kop oo ldoinyo nelotu Efeso, neinepu kulikae ooiteng'eni te ine. Nejoki lelo, “Itang'amaitie apa Enkiyang'et Sinyati pee irukuruku?” Nejoki ninche ninye, “A'a, keitu ninye ai kata kining aajo keetae Enkiyang'et Sinyati.” Nejoki ninche, “Kaa kibatisare naa apa eibatisaki intae?” Nejoki ninche, “Enkibatisa e Yohana.” Nejoki Paulo, “Eibatisishe Yohana enkibatisa e nkirridunoto, nejoki olorere, meiruko ilo olotu te siadi ninye, naa, Yesu taa ilo.” Ore pee ening ina, neibatisae te nkarna o Laitoriani Yesu. Ore pee eiteleiki Paulo nkaik enyena, nedoiki Enkiyang'et Sinyati ninche: neiro kulie kutukie neibonisho. Nera lelo tung'ana pooki tomon o aare. Nejing enkaji e ntumo neshirraki airo te rishata oo lapaitin okuni, neishankarrarre nesayieki ninche mbaa naaipirta enkitoria e Nkai. Kake ore pee eikirnyanya kulikae neitagol onyek, nemor ena oitoi te dukuya olorere, nelo aing'uaa ninche, negelu ilooiteng'eni, nelo aiteng'enisho anaa ake te nkaji naisumareki. Neidikidik aas ina te rishata oo larin aare; o metaa ore lelo pooki oomanya Asia aa Lyahudi o Lyunani, nening ororei lo Laitoriani. Neas Enkai e nking'asia too nkaik e Paulo: o metaa kenapakini ltamueyia nkarash, o nkitampaani o nkarash o sesen le Paulo o nkarash naaisiaaishore, nepuo nkeyaitin aaing'uaa, nepuku loiriruani aapuo. Kake enotoki sii kulikae Yahudi oopuaya, ooaraa loiriruani, nedumunye aaku enkarna o Laitoriani Yesu ejokinye lelo oiriruani, “Aainosie olmumai te nkarna e ilo oji Yesu olikioo Paulo.” Neetae ilayiok oopishana le likae, apolosani kitok, oji Skewa ooikuna ninche neijia. Newaliki oloirirua ajoki ninche, “Kayiolo Yesu, nayiolo Paulo; kake airara doi intae iloo ng'ae?” Neipidoki ilo apa tung'ani ooata oloirirua lelo pooki, neidimu ninche aare, negilu aar, neisikie te ina aji meishopo neeta lbaa. Neyiolou pooki ng'ae ina ebaiki Lyahudi o Lyunani oomanya Efeso; nedoiki enkuretisho ninche pooki nerrepi enkarna o Laitoriani Yesu. Nepuonu sii lkumok le lelo ooiruko, neirridu, neibalunye nkiaasin enye. Ore esiana e lelo apa ooasishore ilosekin le naibon neyau mbukui enye aaiturrur: nepejoo edolita pooki ng'ae: neikeni esiana oo mpesai naainosieki neaku ropiyiani naaibor naabaya nkalisuni onom. Neijia eikuna ororei lo Laitoriani te magilanisho neponari te ngolon. Ore pee eiting kuna baa, nemut Paulo openy te Nkiyang'et Sinyati ajo, ore pee eidip aimai Makedonia o Akaia, neitoki alo Yerusalem, nejo, “Ore pee aidip ashomo ine, meeta nchere eitu alo Roma.” Ore pee eirriwaa aare le lelo aretok lenyena Makedonia, aa taa Timoteo o Erasto, neng'as ninye makewan abik te Asia te nkiti rishata. Ore ake te nena, katitin nedumunye oloilole leme oti ti alo ena Oitoi. Amu eetae oltung'ani oji Demetrus, kunoni loo sekenke oo mpesai, oidong'u too sekenke oo mpesai Artemis* naatudupore oleng lelo kunono. Nesotu ilo kulikae kunono ooitobir sii ninche nena tokitin, nejoki, “Lo kituaak, iyiololo aajo ena siaai ang oshi kidupore. Nidolitata, nining'itoto aajo mme te Efeso ake, kake etaa ore ninye Asia pooki, eibelekenye eilejileja ilo oji Paulo ltung'ana kumok aitapong'oo, ajoki eji mme hoo nkaitin kuna naa too nkaik eitobiri. Mme taa doi ena siaai ang ake etarrikio eyookini aamenaa; kake taaisere doi neaku ore ninye enkaji e nkai ng'oruoi kitok naji Artemis neitaai pesho, nebaiki doi ninye nesuluni te sikar enye, ina naa ninye eserem Asia neserem enkop pooki.” Ore ake pee ening ninche ina neiput engoro, nebuak aajo, “Kitok ake Artemis oo Leefeso.” Neiput olmilo ina anasa; nekuet pooki te nebo aapuo eor e nkiguran eikurtutaa Gayo o Aristako, oora ninche ltung'ana le Makedonia, ooiriamunore Paulo pee elotu. Ore pee ejo Paulo ajing atua lelo tung'ana, nemitiki ilooiteng'eni. Ore sii kulikae loo laitoriak le Asia, laa lchoreta lenyena, neirriwaki enkutuk esai pee metem ninye makewan alo ina aji e nkiguana. Nebuaku kulikae ejo ena nebuaku kulikae ejo ai: amu eing'oling'ole ina tumo: naa aimeyiolo esejata sapuk ajo aainyo pee eiturrurroteki te nebo. Neitupukuni Aleksanta ti atua olorere, naa Lyahudi ooturrumoitie. Neyuk Aleksanta ninche te nkaina, eyieu newaliki olorere. Kake ninye ake etayioloito aajo Olyahudi; nebuaku pooki to ltoilo obo neidikidik aaiko neijia te rishata oo saai are ejoito, “Kitok ake Artemis oo Leefeso.” Ore ade pee eitigir olasirani kitok le ina anasa olorora, nejo, “Lo lewa le Efeso, keetae pasa oltung'ani lemeyiolo ajo ena anasa e Efeso oshi enkarriponi e nkaji naomonieki Artemis kitok o ilo soit sinyati apa odou eing'uaa te shumata? Ore naa amu iyiololo aajo meetae oltung'ani oishankarru kuna baa, keishiaakino naaji nigirara, pee miwuapakinono ake aas ai bae namurtana. Amu iyautua kulo tung'ana ene, neme ketupurro nkajijik naaomonishoreki neitu sii emor enkai ang. Te neeta Demetrus, aashu kulo kunono ooiriamunore embae naatakinore likae tung'ani, ebolo nkajijik e nkiguana neetae ilbalusuni: enchoo epuonu aaiguana olikae o likae. Kake te niaatata kulie ning'oruru, epuonunui aaiguanare nena te noshi ake kiguana. Amu kebaiki doi neiguanareki iyiook te le ongolingoli le na olong, amu ai meeta duoo tipat nadumunyeki; naa te neikilikuani iyiook nikilau enikijo te nkaraki ele oilole.” Ore pee eidip atejo nejia, neidapasha ina tumo. Ore pee eishunye ina liman, neipotisho Paulo aiturrur ilooiteng'eni neikok, neitanapare, nelo aing'uaa eyieu Makedonia. Ore pee eimaa nene wuejitin, neikok ninche oleng nelotu enkop oo Lyunani. Ore etobiko lapaitin okuni te ine, neiguanare Lyahudi ejo pee ear metua, enoshi kata ejo pee elo aked emeli alo Siria, nerrinyo etumuta ajo keimaa ake pookata Makedonia. Neiriamariyie Sopater olayioni le Pirro, le Berea o meitabaiki Asia; o kulo le Sesalonike, Aristako o Sekunto; o Gayo le Derbe, o Timoteo; ore ile Asia naa Tikikos o Trifimo. Kake eituruko apa kulo, nepuo aanyu iyiook te Troas. Nikiked emeli te Filipi eishari osirua loo mukateni Nemeisuijieki, nikibau Troas too nkolong'i miet; nikibik nkolong'i naapishana te ine. Ore te nkolong e dukuya e wiki, kitoni te nebo aagil emukate, neikok Paulo ninche ejo pee eyooki alo te ntaaisere; neitoodor ororei o meitoritoyu enkewarie. Naa kumok ilkilang'eta te ilo gilata le shumata, likitumore. Neton oloti barnoti oji Yutikas te lusie, neimug eiroshiutuo njio. Ore eton ake eitoodorita Paulo ororei, neidimutua olbarnoti njio nesulunye te nkaji e uni te shumata, nedumuni eji ketua. Nedou Paulo, nepetaa nedumu amuataki nkaik nejo, “Emimputukuny amu eton eishu.” Ore pee eilep, nebel emukate, nedaa, neitoki ake airorie kata naado, o mekenyu, nelo taa aing'uaa. Nerikuni oladuoo barnoti eishu neme kiti enkilejilejata nanoto ninche. Kake kinturuko iyiook aapuo enetii emeli, nikiked nikilang aapuo Aso, kijo pee kipuo aang'amu Paulo te ine, amu ninye otejo neijia eyieu ninye nelo aimaa enkop natoyio. Ore pee elotu anang'are iyiook te Aso, nikintaked emeli, nikipuonu mitelene. Ore pee kidumunye te ine, nikiyooki aapuonu te ntaaisere o maipirare Kios, ore te nkolong nasuju nikintashe peno te Samo, ore te nkae olong nikipuonu Mileto. Amu etumuta Paulo ajo kegiroo Efeso te meli, pee meya enkata te Asia; eyieu nesiooyo, ejo te neidimayu neyieu netii Yerusalem te nkolong e Pentekoste. Ore kitii Mileto, neirriwaa Paulo olkilikuai Efeso, aipot ilpayiani le ina sirit. Ore pee epuonu enetii ninye nejoki ninche: “Iyiololo maate ebaiki enapa olong nang'as are Asia, eneikununo entonata ai ti atua intae te ina kata pooki; aisiaaita Olaitoriani te mborron pooki o te ng'eno, o too lkiyio, o too ngolot nanoto te nkaraki losekin loo Lyahudi. Niyiololo aajo eitu ai kata aing'ash aibalunye intae embae ake pooki naret intae, naiteng'en intae te dukuya ltung'ana, naruk inkajijik, aishakenoki ndung'ot pokira aa Lyahudi o aa Lyunani meirridu ti alo meirridu ti alo Enkai, neiruk Olaitoriani lang Yesu Kristo. Ore naa taata, ng'ura, Yerusalem aloito aaena oltau mayiolo mbaa naapuo aatum te ine: meteleku ake Enkiyang'et Sinyati ake naaishakenoki nanu te pooki anasa inchere inkeenta naanyita o inkitamiot. Kake maikenaa enkishui ai ajo keeta tipat, anaa keeta dupoto te nanu, aa kajo pee aitabaya elototo ai, o esiaai natang'amua to Laitoriani Yesu, aishakenoki ororei supat le mpiris e Nkai. Ore naa taata ng'ura, ayiolo ajo meekure intokiki ai kata aadol enkomom ai, intae kulo laisiritore alikioo enkitoria e Nkai. Ore enkaraki ina, aishakenoki taata intae ajo maata eng'oki to sarge lo ltung'ani ake pooki. Amu maata enatelekua eitu aibalakinye intae lulung'ata e nkikoo e Nkai neitu aliki intae. Entagolie ate maate o ina luaata pooki naitaa intae Enkiyang'et Sinyati ilaing'urak lenye, aaitoti esirit e Nkai nainyiang'aka ninye kewan to sarge lenye. Kayiolo ajo nanu ake olo nejing atua intae isuyian ooata enkarri, lemeing'urrie ena luaata; naa keinyiototo ltung'ana ti atua intae, oojo mbaa e nkiushoto, pee eyiataa looiteng'eni laa ninche esujaa. Enchololoto naa nidamumu aajo ore te rishata oo larin okuni eitu agira aikokito intae pooki dama o kewarie too lkiyio. Ore naa taata inkaik e Nkai aitarasaki intae, o ele rorei le mpiris, oidim atesheta intae neisho intae enjung'ore te nebo lelo pooki ooitengelaki. Eitu ang'uar enkosholai aashu saabu o enkila e likae tung'ani. Iyiololo maate aajo kuna aik naaisiaayiakita nkolati aainei makewan o ne lelo laisiritore. Aitoduaa intae pooki toki, nchere ti nisiaaishosho aaiko neijia niretirete ilooshal, idamumu irorei lo Laitoriani Yesu anaa enatejo openy inchere, ‘Enkishooroto namayiana alang eng'amaroto.’ ” Ore pee eidip atejo neijia, negil kung neomon te nebo ninche pooki. Neishiraki pooki ninye oleng, nemuataki Paulo nkaik neng'utut ninye, neisina oleng te nkaraki ilo rorei otejo eji, meitoki ae kata aadol enkomom enye. Neitarioo ninche ninye aaitabaiki enetii emeli. Ore kitung'uaitie ninche nikiked emeli, nikintoriounye aapuonu Kos, ore te nkolong nasuju nikibau Rodos, nikidumunye te ine nikipuonu Patara. Ore pee kitum emeli nalang alo Foenike, nikiked aapuo. Ore pee kidol Kipros, nikincho kedienye aaporoo aapuo Siria o maetu Tiro, amu te ine eitadou emeli lolan. Ore king'orutua ilooiteng'eni, nikibik nkolong'i naa pishana te ine. Nejoki lelo Paulo te Nkiyang'et nchere pee melo ake Yerusalem. Ore pee kiishu nena olong'i, nikidumunye aapuo enapake lototo ang; neitarioo iyiook ninche pooki o nkituaak o nkera, o maetu auluo e ina anasa, nikigil kung te mbata e naiposha nikiomon nikinchoro ole sere. Nikintoki aaked emeli, nerrinyo ninche aapuo ang. Ore kindipa elototo ang king'uaa Tiro, nikibau Tolemai; nikiroroki ilalashera nikibik nabo olong te nebo ninche. Ore te ntaaisere nikidumunye o maetu Kaisaria; nikijing enkaji o lalikioroni Filipo, obo loo lapa oopishana, nikitoni te nkaji enye. Neeta ninye ntoyie ong'uan nemeayama, naaishoro enaibon e Nkai. Ore kitobiko nkuti olong'i, nelotu oloiboni le Nkai oing'uaa Yudea oji Agabo. Nelotu ine nikitii nedumu enkimeita e Paulo neen kewan inkejek o nkaik, nejo, “Inji ejo Enkiyang'et Sinyati, ‘Inji epuo aaiko Lyahudi te Yerusalem aaen olopeny ena kimeita neitarasaki nkaik oo Loreren.’ ” Ore pee kining ina nikisai iyiook o lelo tung'ana ninye pee meilep alo Yerusalem. Newal Paulo nejo, “Kaa ena niaasitata, kinchirakiki nikintashalishala oltau? Mme doi enkeene ake aitieu naaeni kake te naa kaye te Yerusalem naye te nkaraki enkarna o Laitoriani Yesu.” Ore pee elaikinoi aaiboo, nikigira nikijo, “Metotiwuo naa anaa enayieu Olaitoriani.” Ore pee eishunye nena olong'i nikinapa pee kilep aapuo Yerusalem. Neiriamariyie iyiook kulikae ooiteng'eni oing'uaa Kaisaria, nerik iyiook enkaji e likae oji Mnason le Kipros, olaa oloiteng'eni musana ninye, paa ninye kirragaitie. Ore pee kipuonu Yerusalem, neng'amu iyook ilalashera te nchipai. Ore te ntaaisere neeiriamunore iyiook Paulo kipuo enetii Yakobo; nelulung'a ilpayiani pooki te ine. Ore pee eidip airoroki ninche, neinosaki aa maa nabo nena baa pooki naataasa Enkai ti atua Loreren ooisiaaishore ninye. Ore pee ening ninche, neisis Enkai. Nejoki ninche ninye, “Olalashe, idolita eneba nkalifuni oo Lyahudi ooiruko; neeta pooki olokiyo too nkitanapat. Nikietuoki aakur te ninche nchere ishomo aiteng'en Ilyahudi pooki ootii Loreren metung'uai Musa, eji nepal memurat inkera enye nemesuj lkerreti lang. Kaa naa easi? Nemeeta nchere eitu ening aajo iewuo. Taasa ena nikijoki iyie. Kiaata ltung'ana oong'uan ooata olmumai; tudumu kulo tung'ana pokira oong'uan mikintukui te nebo ninche nilaaki ninche nena tokitin naaitalakishoi, pee ebarni. Ina eyiolounye pooki ng'ae nchere meeta tipat kunda baa naatiaakaki ti alo iyie amu isujita iyie makewan nkitanapat e Nkai te nkishon ino. Kake ore ltung'ana loo Loreren ooiruko, kirriwakita apa empalai nayakita enkiguana ang nchere pee erishie ate ntokitin naapolosakini nkitanyaanyukot neme Enkai o sarge o ntokitin naagori o eloloito.” Nedumu taa Paulo lelo tung'ana pokira oong'uan te nkolong nasuju, neitisiny kewan, tenebo ninche nejing atua enkaji e Nkai, alikioo eneiting'ie nkolong'i e ina kitukuoto, neishooyo sii ntokitin naaitukuyieki ninche pokira. Ore etaa keidipayu nena olong'i pokira naapishana, netii Ilyahudi ooing'uaa Asia, ootoduaa ninye te nkaji e Nkai, neing'oling'ol esiamo, neitabaiki ninye nkaik aaibung, ebuakita aajo, “Lo lewa le Israel, entaret iyiook! Ele tung'ani doi oiteng'enita ltung'ana te pooki wueji meibai ele orere neibayu nkitanapat e Nkai o ene wueji; nenyaaka ayau Iyunani aitijing enkaji e Nkai, neewuo aisarkionie ene wueji sinyati.” Naa Trofimo etoduaaki ae olong eiriamariyie Paulo te ina anasa, nejo ninche ketoriko Paulo aitijing enkaji e Nkai. Neing'oling'ola taa enkanasa pooki, nekuetu ltung'ana aaiturrurro te nebo; neibung'i Paulo neikurtutari in aji e Nkai, neikeni kutuk aji nabo kata. Ore eji matar metua, nebaiki ororei olkitok loo sikarini loo ltimito nchere einyio oloilole te Yerusalem pooki. Nedumu ninye isikarini o lkituaak le lelo timito, nekuetu adoiki ninche: ore pee edoluni ilo kitok o sikarini, nepal eitu eitoki aar Paulo. Nenyikaki ilo kitok loo sikarini, neibung arik ninye, neitanapisho meteeni too munyororoni are, neikilikuan ajoki aira ng'ae neikilikuan enataasa. Nebuaku kulikae ti atua ilo orora ae bae, nejo kulikae ai; ore pee edol ajo meeta ae natum te nkaraki olodoo; neitanapisho meyauni atua emanyata oo sikarini. Ore enoshi naitabaikini inkedeta e kishomi, neaku te shumata eya isikarini aaing'atie enkop te nkaraki olong'oling'oli le ilo orora egorokinoi; amu esujita ake ilo orere ebuakita aajo, “Ewaita ninye!” Ore etaa keitabaikini Paulo ina manyata, nejoki ilo kitok loo sikarini, “Eikincho pasa maairorie?” Nejoki ninye, “Iyiolo doi enkutuk oo Lyunani? Metaa mira doi olanaarri Misiri oirrikia olorere meitarrikinore sirkali nerik ilapa tung'ana asesesekuanak nkalifuni ong'uan ong'ata?” Newaliki Paulo ajoki, “Kara nanu Olyahudi, oing'uaa Tarso e Kilikia, metaa mme misil enkanasa naing'uaa; aatoomono naa nchooki mairorie ele orere.” Ore pee eisho, neitashe Paulo te nena kedeta e kishomi, neyuk olorere te nkaina; ore pee egira aajo tim, neirorie te nkutuk oo Lhebrania, nejoki: “Ilalashera laainei o loo papa, entoning'oki te kuna namitunye kewan te dukuya intae.” Ore pee ening'i aajo enkutuk oo Lhebrania eirorie, neitirring'a oleng aagira. Nejo, “Ara Olyahudi, naa te Tarso e Kilikia aaini, kake te na anasa aaitubuluni too nkejek e Gamaliel, naaiteng'eni te risioroto oo nkitanapat oo loo papa naarrish, naata olokiyo te Nkai anaa ena nitiuwu pooki te le kekun. Ainosie nanu ena Oitoi osina o metuata naen anang'aki korokoroni ilewa o nkituaak, naa shakeni lai olapolosani kitok naa neijia etiu olkiaama pooki loo lpaiyiani. Ninche laaishoo mpala nayaki lalashera, pee adumunye alo Dameski aibung lelo ootii ine ayau Yerusalem eena pee eitamei. “Ore aloito atinyikaka Dameski, etaa enaipirie enkolong newang'u nabo kata ewang'an naing'uaa shumata naaman. Nabatata te nkop naning oltoilo laajoki, ‘Saulo Saulo aainyo pee kisilisil?’ Nawaliki ajoki, ‘Olaitoriani, aira ng'ae?’ Naajoki ninye, ‘Ara Yesu le Nasaret lisilisilito!' Ore lelo laairiamariyie nanu nedol ina wang'an kake eitu ening oltoilo le ilo laairorie. Najo, Olaitoriani, kaji aiko?’ Naajoki Olaitoriani, ‘Inyo, shomo tijing'a Dameski, paa te ine kilikini nena pooki nikitegelakaki taasa.’ Ore amu meekure adolisho te nkaraki ina wang'an, naariki aaibung enkaina lelo ootii te nebo nanu, o maetu Dameski. “Netii ine oltung'ani obo oji Ananias, oserem ninye Enkai anaa enajo nkitanapat, ooilet Ilyahudi pooki te supatisho, laa ine nemanya ninye. Nelotu ilo enatii, neitashe ti alo nanu naajoki, ‘Olalashe lai Saulo, todolisho.’ Ore te ina saa ake nadolishoyu nadol ninye. Nejo ninye, ‘Enkai oo loo papa nikitegelua tayiolo yieuna enye, nikincho toduaa ilo obo Asipani nining oltoilo te nkutuk enye; amu iaku shakeni lenye too ltung'ana pooki te nena nitoduaa o nitoning'o. Ainyoo naa taata ianyita? Inyo mikimbatisai, intukuoi ing'ok inono, impoto enkarna enye.’ “Ore pee aidip atushukunye Yerusalem aomonito te nkaji e Nkai, naainepu enduaata nadol aajoki ninye nanu, ‘Isarisara tasiooi tung'uai Yerusalem, amu meng'amaa hoo ninche shakenisho ino ti alo nanu.’ Najo, ‘Olaitoriani, eyiolo ninche maate enaikuna meeta enkaji e ntumo neitu ajing napik korokoroni naar lelo likiruko. Naa ore pee eibukori osarge le Stefano olchakeni lino, aitashe sii nanu atonyorrayie, naa nanu oitasheikio nkilani e lelo ootara.’ Naajoki ninye, ‘Shomo, amu nanu laairriwaa enelakua shomo enetii Loreren.’ ” Neinining lelo tung'ana Paulo o metejo ele rorei; nejo ake neijia, neilepie pooki ltoiloishi nejo, “Ewuang'ie ele tung'ani te nkop! Amu meishiaakino neishu!” Ore ebuakita neisuaakita ilkilani lenye nekur enterit aaisuaaya, neitanapisho ilo kitok loo sikarini meyauni ninye atua emanyata enye, nejo metaari meiroro, pee eyiolouni enatabuaakinye ninche Paulo. Ore eidipaki aateen too nkeenta, nejoki Paulo osajini oitasheiki, “Keishiaakino pasa neidong'i oltung'ani loo Roma, leitu eng'asi aaiguanare?” Ore pee ening ilo sajini ina nelo enetii olkitok loo sikarini nejoki, “Kaa bae ena nijo aas? Amu oloo Roma ele tung'ani.” Metaa nelotu ilo kitok enetii nejoki, “Tolikioki sii iyie japa, eji ira doi oloo Roma?” Nejoki, “Ee.” Newaliki ilo kitok loo sikarini ajoki, “Kainyiang'ua nanu ina kiela too ropiyiani kumok oleng.” Nejoki Paulo, “Kaikino nanu.” Metaa nepuo nabo kata aalam lelo apa oojo pee epuonu aajur; neureshoyu sii ninye ilo kitok loo sikarini amu etayiolo ajo oloo Roma Paulo neidipaki aateen. Kake ore taaisere, neyieu ninye ake neyiolou enaitang'orie Lyahudi Paulo pee eisitaaitie, neen ninye, nejoki lapolosak kituaak o lkiaama pooki menototo, neriku Paulo neitasheyie te dukuya ninche. Neing'or Paulo ninche akurraki olkiaama nkonyek, nejo, “Ilalashera laainei, aitasho te dukuya Enkai o metabau ele kekun aata oltau sidai.” Nejoki olapolosani kitok oji Ananias lelo ooitashe aatashare Paulo metooshi enkutuk. Nejoki Paulo, “Enkai nikiyooki aosh iyie, oleeijo esuntai naiborrieki! Aiton pee kinguanare too nkitanapat e Nkai nintoki apaash enajo nena kitanapat ajo maatooshi?” Nejoki lelo ooitashe te ine, “Kolapolosani kitok le Nkai imor?” Nejo Paulo, “Enkaraki naa ai mayiolo lalashera laainei, ajo ninye olapolosani kitok, amu etisiraki aajo, ‘Mijo ake ine nkarrueisho ti alo oloitore olorere linyi.’ ” Kake ore pee edol Paulo ajo Isadukayo enchoto nabo naa Lfarisayoi enkai, nebuaku ajo to lkiama, “Ilalashera laainei, ara nanu Olfarisayoi naa Lfarisayoi laaiu; olapa siligi o empiunoto oo lootuata doi pee aaiguanareki.” Ore pee ejo neijia, nepuku empong'o oo Sadukayo o Lfarisayoi, neoro olkiaama. Amu ejo Sadukayo meetae empiunoto, nemeetae ilmalaika, nemeetae enkiyang'et; kake enyorraa ninche Lfarisayo nena pooki. Nepuku olodoo kitok; neinyiototo kulikae aiteng'enak loo nkitanapat Farisayo neiguana nejo, “Eitu hoo kitum iyiook entioto te le tung'ani. Oo doi te naa kenkiyang'et aashu olmalaika oirorie?” Ore pee eaku keibelekenya empong'o aaku olarrabal, nedol ilo kitok loo sikarini, neureyu ajo kepolosi Paulo aaitaa ng'urrot, neirriwaa sikarini metadoi aayau ninye te ngolon aaitung'uaa ninche neyau emanyata. Ore te nkai kewarie natusujua ina, neitashe Olaitoriani ti alo ninye nejo, “Intagoluoyu, amu ore anaa ina nikinchakenoko nanu te Yerusalem, neijia kiyooki aiko aishakenoki te Roma.” Ore pee ekenyu neiguana Lyahudi nenya olmumai pee menya endaa nemeok ae toki o metaba anaa near Paulo metua. Negiroo artam ilooinosa ina kiguana o kiguan enkarruesho. Nepuo lelo enetii ilapolosak kituaak o lpayiani; nejo, “Kiteena ate katukul to lmumai nchere mikinchamisham endaa o metaba anaa nikiaar Paulo metua. Enyeito intae, o lkiama, entiaaki taata olkitok loo sikarini meitadou ninye, entaakunoto keeta eniyieuu nisipunyenye, aabaraki. Amu kitanapate iyiook pee kiar metua eton eitu enyikaki intae.” Nening olayioni le nkanashe Paulo ina rreshoto enye nelo ajing emanyata neliki Paulo. Neipot Paulo obo le lelo sajinini nejo, “Toriko ele barnoti enetii olkitok loo sikarini, amu keeta enajoki.” Nerikoki olkitok loo sajinini nejo, “Paulo oloshi oena laaipoto naajoki maatorikoki ele barnoti, amu keeta enikijoki.” Neibung ilo kitok enkaina nerik enkilepata neikilikuan too nkurrat ajoki, “Kaa kiyieu nikijoki?” Nejoki, “Eiguanate Ilyahudi pee kipuonu aaikilikuan tayooki taaisere intadoi Paulo meshomo enetii olkiaama, anaa keeta enayieunye pee epuo aajur oleng. Kake minyorraa ina nayieu ninche; amu artam nadooyo iltung'ana lenye ootii olnukata aaresh ninye, eteena ate to lmumai aajo menya endaa nemeok toki mme keidipa aatar ninye metua; neidipa taata aatanapata, iyie eanyita tonyorrai ina.” Neisho ilo kitok loo sikarini olbarnoti elo neitirrishaki ajo, “Nimiliki ake likae tung'ani ajo kitolikio ena bae.” Neitoki ilo aipot isajinini aare nejoki, “Ore te saa uni e nkewarie enchoo enapa sikarini iip are te nebo intomoni naapishana loo mbartan o loo remeta iip are oopuo aabaya Kaisaria. Naa sii erotoki Paulo embarta naked, entorikoki olbalusui Feliks.” Neiger empalai ajo nji: “Nanu Klaudius Lisia laairoroki, Oloyanyiti Olbalusui Feliks. Ele tung'ani eibung'a Lyahudi, naa anaata etara metua, neaku ainepua aata sikarini nasaru, atayiolo ajo oloo Roma. Ore ajo pee ayiolou embae naisitaarieki nariku aitadoiki olkiaama lenye. Nayiolou ajo mbaa oo nkitanapat enye eisitaarieki, kake meeta enataasa nairirikino keeya anaa eenata. Ore pee aarojakini nchere einosaki enkiguana pee eari ele tung'ani metua, nairriu nabo kata enitii iyie, naitanap lelo ooisitaaya meetu aalimu te dukuya iyie enaatakinore ninye.” Neaku etoriko isikarini Paulo anaa enaitanapaki nerik kewarie o meitabaiki Antipatri. Neyooki taaisere aashukunye emanyata, neing'ueikini iloo mbartan metoriko aapuo. Ore pee epuonu Kaisaria neitarasaki olbalusui empalai, neitodol Paulo etii dukuya ninye. Ore eisom empalai, neikilikuan ajoki koliaalo osho. Ore pee eyiolou ajo ole Kilikia nejo, “Kaayooki ainining te nebau lelo likintang'or.” Neitanapisho metorripi te nkaji e Herode e nkitoo. Ore etulusoitie nkolong'i miet nedou Anania olapolosani kitok o kulikae payiani o ltung'ani olotu airo, oji Tertulo. Nepuonu aainosaki olbalusui nena baa naaitang'orie Paulo; ore pee eipoti neiteru Tertulo aitang'or Paulo ejo: “Ore amu iyie pee king'idare ena seriani kitok, naa te leng'on ino, Oloyanyiti Feliks, pee eibelekenyitai mbaa aaitang'ejuk te le orere, niking'amaa nena te nashe too nkoitoi pooki o te pooki wueji. Kake ore pee mikintoki aaibok iyie, naaomon to lng'ur lino toning'o iyook too ndorropu. Amu kinoto aajo serseri ele tung'ani naa oltang'oroi too Lyahudi pooki te nkop pooki, naa ninye obo loo larikok le na kiteng'enare kilaut naji eno Lnasarayoi. Ketetema doi ninye ajo aisarkionie enkaji e Nkai paa iyiook ooibung'a. [Eikijo apa iyiook pee kinguanare too nkitanapat ang, kake Lisia olkitok loo sikarini oewuo newuapaa aoru iyiook te ngolon oleng. Neitoki ake Lisia aitoreisho nejo meetu lelo ooitang'or dukuya iyie.] Te nijur ele tung'ani, te ninye iyiolou iyie openy esipata e nena nikintang'orie.” Neirukoki Ilyahudi ina kitang'oro, neitisip aajo neijia etiu. Ore pee eyuk olbalusui meiroro, newal Paulo nejo: “Ore amu kayiolo ajo kumok ilarin intore ele orere, kashipa amitu kewan. Te niyieu naa indim aitadedeyie nchere, eitu egiroo tomon o aare nkolong'i anaa nailep alo aserem Enkai te Yerusalem; neitu aainepu ninche aishankarrarre likae tung'ani aashu aing'oling'ol esiamo, te nkaji e Nkai, aashu too nkajijik e ntumo aashu te ina anasa. Nemeidim doi ninye aaitadedeyie kuna naapuonu aaitang'orie. Kake anyorraa ena nabo te dukuya iyie, nchere te na Oitoi, najo ninche enkiteng'enare kilaut aserem nanu Enkai oo loo papa, airukito mbaa pooki naalimuno too nkitanapat anaa too naaigero too loibonok le Nkai. Naata osiligi te Nkai naanyorra sii ninche kulo nchere kelotu empiunoto e lelo ooata esipata o lemeeta. Metaa anyokita oshi ake pee aata oltau sidai ti alo Enkai o ti alo ltung'ana. Ore det etulusoitie lkuti arin nalotu ayaki olorere lang nkishorunot naaretieki laisinak nkishorunot e nashe. Ore aa ina aasita, naainepu aaitisinyaki te nkaji e Nkai, neitu adumu aashu aliman. Kake eetae Lyahudi le Asia laa keishiaakino napaji netii ene pee aapuonu aaitang'or, te naa keeta enaatakinore. Aashu doi elimu ninche kulo maate aajo kaa torroni apa aanotie pee aitashe te dukuya olkiaama, neme ena nabo ake natabuakua aitashe te dukuya ninche ajo, ‘Enkaraki oo lootuata pee aitashe te dukuya intae maaiguanareki te le kekun.’ ” Kake ore ninye Feliks, amu ketiu anaa ketabaraka ayiolou ena Oitoi, neilitilit, ajoki, “Ore pee edou Lisia, olkitok loo sikarini naadung'oki enkiguana.” Neitanap osajini metorripi kake meitirrishi sii, nememitikini lchoreta lenyena epuonu aaret anaa enayieu. Ore eshomo nkuti olong'i nelotu Feliks oe enkitok enye naji Drusila, naa Eyahudi ninye; nejo meipoti Paulo meinining'o eimaki enkirukoto nairuki Yesu Kristo. Ore pee eishankarrarre too mbaa naaipirta enkiguana oo sipat o enkibooroto naaibooyo oltung'ani kewan arishie ntorrok, o enkiguana kenya nalotu, neureishoyu Feliks nejo, “Shomo taata; ore pee atum erishata naaipot.” Ore eyia neijia naa kejo apa kebaiki neisho Paulo mpesai. Neaku keirriwaa lkiliku nkatitin kumok neinosie lomon. Kake ore pee elusoo larin aare, neirriuni Porkio Festo meibung'a erishata e Feliks; ore ninye Feliks ejo pee eitiship Ilyahudi, neing'uaa Paulo te korokoroni. Ore pee ebau Festo, ina kop naitore, nkolong'i uni ake naatulusoitie, nedumunye te Kaisaria ailep alo Yerusalem. Neitang'or ilapolosak kituaak o larikok loo Lyahudi Paulo te ninye nesai aaitirrishaki, aajoki meitobiraki ninche mbaa aisho ilo tung'ani meewai Yerusalem, aa kejo pee erresh aasesekuan te nkoitoi. Newaliki Festo ajoki te Kaisaria erripi Paulo, netaa etataana pee elo sii ninye ine. Nejoki, “Metaa, enchoo ltung'ana ooata enkitoria te intae edou mairiamari, naa te neetae enatapong'e te ilo tung'ani, nepuo aaitang'or.” Ore etobiko nkolong'i naabaya isiet anaa tomon te nebo ninche, nedoyio alo Kaisaria; ore te nkolong nasujita ina nelo aton to lorika lenye le nkiguana neitanapisho metorikuni Paulo. Ore pee elotu ninye, neisho Lyahudi ootadoutuo eing'uaa Yerusalem neitashe aaman Paulo neitang'or too mbaa kumok torrok kake etalaikinote aaitadedeyie. Nejo Paulo emitu kewan, “Maata tukul enaitorruoyie too Lyahudi, nemaata te nkaji e Nkai te Kaisari.” Kake eishoo ninye Festo, ejo pee eitiship Ilyahudi, nejoki Paulo, “Iyieu nilep alo Yerusalem, pee kipuoi aaiguanare te ine te dukuya nanu te nkaraki kuna baa?” Kake etejo Paulo, “To lorika le Kaisari le nkiguana aitashe, naa te ne eishaakino naaiguanareki; maata doi entorrono naitaasa Ilyahudi, naa esipata ina niyiolo iyie aitorioki. Te naa kara olkiminchali, aashu te naa kaata enataasa nairirikino keeya, maing'oru ajo ailanyaa keeya; kake te nemeetae esipata te nena naaitang'orieki, nemeetae likae laaidim aitarasaki ninche. Atejo Kaisari eyakini enkiguana ai.” Ore Festo, etang'asa aikilikuanishore olkiaama lenye newaliki ajoki, “Kaisari itejo meyakini enkiguana ino, ilo naa ake enetii Kaisari.” Ore etulusoitie nkolong'i naaje, nebau olaiguanani Agripa o Bernike Kaisari aairoroki Festo. Ore etobiko nkolong'i kumok te ine, neinosaki Festo olaiguanani enkiguana e Paulo, nejoki, “Eetae oltung'ani otung'uayie Feliks eena. Ore atii Yerusalem naainosaki lapolosak kituaak o lpayani loo Lyahudi mbaa enyena, eyieu nadung'oki ninye enkiguana. Nawaliki ajoki ninche, mme olkerreti lang Iroma ilo oishoori oltung'ani eitu etumo nkomomi e lelo ooitang'oro, ooisitaare, netum oloitang'oroki erishata namitunye kewan newalu nena naaisitaarieki. Ore taa pee etumo tene, eitu aimutie, amu ore pee ekenyu naton to lorika le nkiguana naitanapisho metorikuni ilo tung'ani. Ore pee einyiototo aaitashe lelo ooitang'or, eitu eyau e nkarrueisho anaa apa enajo nanu; kake eji enchankar eeta o ninye naipirta nkoon enye neipirta oltung'ani oji Yesu, otua apa, neitadedeyie ninye Paulo ajo eishu. Ore amu katala enaikonakino pee atum atujurro kuna baa, naikilikuan ninye tenaa keyieu nelo Yerusalem paa te ine epuoi aaiguanare te nena. Kake ore pee einyaku Paulo ajo metorripi paa Kaisari olo aiguanare, naitanapisho metorripi o manoto enaikunaa airriwaki Kaisari.” Nejoki Agripa Festo, “Kayieu o nanu nainining ilo tung'ani.” Nejoki, “Taaisere iyiooki aning ninye.” Neaku ore te nkolong nasujita ina nelotu Agripa o Bernike eisikarrate, nejing ina aji e nkiguana te nebo lkituaak loo sikarini o ltung'ana kituaak le ina anasa, neitanapisho metorikuni Paulo. Nejo Festo, “Olaiguanani Agripa, o intae pooki ootii ene te nebo iyiook, ele tung'ani doi aaetuo olorere pooki loo Lyahudi aaitang'or, te idie te Yerusalem o te ne sii, eilepilep aajo meishiaakino neitoki aishu. Ore nanu makewan, natisipua ajo eitu eas ai bae nairirikino keeya, kake ore pee ejo ninye lido Aiguanani Kitok ake olo aiguanare, najo kareu naa. Nemaata embae enye nauno najo aigeroki Olaiguanani Kitok. Ina pee atorikuo dukuya iyie, Olaiguanani Agripa, peyie aa ore pee eidipi aatujur natum enaiger ajo. Kadol nanu aa kemakua te nairriwaa oloena nemaitoduaaya mbaa naaitang'orieki.” Nejoki Agripa Paulo, “Kinchoro iroro te kewan ino.” Neitorioo Paulo enkaina neiteru airishisho nejo: “Kajo nanu kamunyak aa te dukuya iyie Olaiguanani Agripa, airishisho te le kekun te nkaraki nena pooki naaitang'orie Lyahudi, amu iyiolo pae iyie lkerreti o enchankar oo Lyahudi; naa ina pee aaomon ting'iria inining'okoki. “Keyiolo Ilyahudi enkishon ai abaiki keraisho, neyiolo nkiterunot atii atua ele orere lang te Yerusalem. Aayiolo te nkata naado, te naa napaji keyieu neishakenoki, nchere olkerreti orrish aisul te seremata e Nkai ataa Olfarisayoi. Naa ore pee aitashe taata maaiguanareki te ne, enkaraki osiligi oinosie olmumai Enkai iloo papa, olaa ninye eisiligita lelo oshon pokira tomon o aare ejo pee etum, naa ina pee eitirrish aaserem Enkai dama o kewarie. Naa te nkaraki ele siligi, Olaiguanani, pee aaitang'oro Lyahudi! Aainyo doi pee ijojo meirukoyu te intae nchere keitopiu Enkai ilootuata? “Kajo apa nanu makewan keishiaakino te naas mbaa kumok agilunore enkarna e Yesu le Nasaret. Naiko doi neijia te Yerusalem; neme taa kaikenoyie ake lelo sinyat kumok te korokoroni, ekaaishoo lapolosak kituaak enkidimata, ore ninye pee eari metuata katii esiana e lelo ooyiewuaki ina. Nainosie ninche osina nkatitin kumok too nkajijik pooki e ntumo natem ajo aitamor ninche Enkai; naa te ina goro napi, atusujaka nkanas oo loreren. “Ina pee atudumunye alo Dameski aaitanapa lapolosak kituaak naata sii mpala enye. Ore enaipirie enkolong, lo aiguanani, nadol te nkoitoi ewang'an naing'uaa keper, nawang alang enkolong, newang'u aamanita o lelo apa laairiamariyie. Ore pee kibatata te nkop, naning oltoilo laajoki te nkutuk oo Lhebrania, ‘Saulo, Saulo, aainyo pee kisilisil? Iyie doi omeyu te niroro ljipeta!' Najo, Aira ng'ae Lo Kitok?’ Nejo Olaitoriani, ‘Ara Yesu lisilisilito. Kake inyo ntasho too nkejek inono; amu kaatayie enkolat pee aaipang'aka, aategelua iyie taasisho ninchakenoki nena baa nitoduaa o nena naaitoki aitaliorie te iyie. Naa kaaitajeu te kulo tung'ana o too Loreren laa ninche aairriwaki pee ibol inkonyek enye, pee eibelekenya aaing'uaa enaimin aapuonu ewang'an, neing'uaa engolon e sheitani aapuonu enetii Enkai, pee eng'amu ampalakino oo ng'ok netum ewueji ti atua lelo ooitisinyaki amu nanu eiruko.’ “Ore te nkaraki ina, Olaiguanani Agripa, eitu agolong'aki ilo otaliee te keper, kake aibalakinye lelo ootii Dameski, o lootii sii Yerusalem o atua enkop pooki e Yudea, o Loreren sii ninche, nchere pee eirridu neibelekenyakino Enkai neas nkiaasin naairirikino enkirridunoto enye. Enkaraki ena pee aaibung'a Ilyahudi te nkaji e Nkai naajo matar matua. Ore ebaiki ena olong aata eretoto naa Enkai eing'uaa, naa ina pee aitashe aishakenoki too looti o too lkituaak, maata ae najo neme napa naajo iloibonok le Nkai nejo Musa keaku: nchere meeta kata apa nemeitamei Kristo, o sii nchere ninye ong'as apiu to lootuata, pee eibalakinye ewang'an iltung'ana o loreren.” Ore eirishisho ajo neijia, nejo Festo to ltoilo sapuk, “Paulo, oloirirua iata, eng'eno ino kitok nikioshoo elukunya.” Kake etejo Paulo, “Maata nanu oloirirua, Oloyanyiti kitok Festo, isipat naaishiaakino airorita. Amu keyiolo ninye olaiguanani kuna baa, naa ninye ashirraki airorie; amu majo keeta hoo embae nabo e kuna nemeyiolo ninye, amu mme too nkurrat etaasaki kuna. Olaiguanani Agripa, isiligita doi iyie loibonok le Nkai? Ayiolo ajo isiligita.” Nejoki Agripa Paulo, “Ijo sa eikintaa olkiristianoi te nkiti kata.” Nejo Paulo, “Te naa ai te nkiti aashu te naado, kayieu napaji te Nkai neme iyie ake kake o kulo pooki laaning'ito te na olong netiu anaa enatiu nanu metii taa kulo pisia.” Neinyiototo taa Olaiguanani aitashe, o ilo balosi o Bernike o lelo ootoni te nebo ninche, ore pee epuo, nejokino maate, “Meeta ele tung'ani enaasita nairirikino keeya anaa eenata.” Nejoki Agripa Festo, “Keidimi napaji aatalaku ele tung'ani te neme ketoomonuo meyakini Kaisari enkiguana enye.” Ore pee edung'i aajo kiked emeli aapuo Italia, neitarasakini Paulo o kulikae ooteenaki olkitok loo sikarini oji Yulio, lo ltim le Augusto. Nikiked emeli e Adramitio nairoto pee edumunye alo nena ang'itie e mbata e naiposha te Asia, nikipuo, neiriamariyie iyiook Aristako Olmakedoniai le Sesalonike. Ore te nkolong nasujita ina niking'eliki Sidon; neing'urrie Yulio Paulo, neisho meshomo abaiki lchoreta lenyena meitoomoni. Ore te enaiposha neigara iyiook Kipros, amu ketaa keibooyo iyiook olkutati. Ore kitalang'a enaiposha naipirare Kilikia o Pamfilia, nikibau Mira, enkanasa e Likia. Ore te ine netum ilo sikari kitok emeli e Aleksantria nalang alo Italia neitaked iyiook ina. Nikipuo aa kutiti too nkolong'i kumok aa te ngoloto kitabautua enetaaniki Nido; ore amu meisho iyiook olkutati kipuo, nikiporoo kingura Krete o maipirare Salmone. Nikipuo te ngoloto kingara ine, o maetu ewueji neji Enkutoto Sidai, nenyikita enkanasa naji Lasea. Ore amu eiturrayioki enkata sapuk, netasuro elototo amu eidipa atulusoi enkata e mpukoroto, neiguan Paulo ninche, nejoki, “Lo kituaak, kadol ajo keaku kearisho ena lototo e meli neimin intokitin kumok, kake bata sii enkishui ang iyiook maate.” Kake etoning'o olkitok le ina meli loo sikarini, o lopeny emeli nening sii olopeny ina meli aitalang ina natejo Paulo. Naa ore amu mme sidai ina kutoto oo melin ebikieki te nkata e nkirobi, nejo lkumok lenye ai sidai te neporoo aapuo te ine, ejo te neidimayu nebaya Foinike, naa enkutoto ina oo melin te Krete, naipirta enkalo e nkilepunoto e kopikop o erishata e nkilepunoto e moikuape, peyie ebik te ine te nkata e nkirobi. Ore pee ekutu maa kutiti olkutati le moikuape, nejo ninche kenoto ina nayieu, nedotu eenet e meli neporoo aashep Krete, enyikita embata e ina kop. Kake ore te nkiti kata nelotu osiwuo oji ole rishata e nkilepunoto e kopikop, adoku teina kop; ore pee eibung osiwuo ina meli nelaikino emeli aitoriokinore, nikipalaa meterewa iyiook. Ore ekuetie yiook kigira aagiroo enkiti lemankale naji Kauda, te ngoloto kinotokito eenata e mpeut; ore ina kata pee eyietu, etureita aajo ebaiki nepuoi aaitar isinya le Sirti, neitadou olkarasha kitok oreu emeli, nerei etiu neijia. Ore eiposhita iyiook olkutati, neiteru te nkolong nasuju ina aaitadooyo ilolan oonapita emeli. Ore te nkolong e uni, neitadooyo ntokitin naagolieki emeli too nkaik enye maate. Ore etulusoitie nkolong'i kumok eitu ae kata eliooyu enkolong anaa lakir, neme kiti olkutati opetita iyiook, neish iyiook osiligi nikijo ebaiki ake neitajeuni iyiook. Ore amu etupukoitie kata naado, neipang'u Paulo ti atua ninche nejo, “Lo lewa, keishiaakino apa te naa eikitoning'o naa anaata eitu idumunyenye te Krete nipuonunu metobori intae aaiko nji neimina imasaa naaba nji. Ajoki naa taata intae, entagoluoto; amu meetae hoo obo oye ti atua intae, kake eye emeli. Amu ore duoo te na kewarie neitashe olmalaika le Nkai nara nanu olenye naa ninye aserem, nejo, ‘Paulo miureishoyu, amu meeta nchere pee mintashe ake te dukuya Kaisari, naa ng'ura, kinchoo Enkai pooki likiriamariyie te meli.’ Metaa, entagoluoto, lo lewa, amu kaata enkirukoto te Nkai nchere ketiu anaa ina ake naatiaakaki. Kake keetae ole mankale likikuetiki aaiponyakino.” Ore pee ebau enkewarie e tomon oong'uan, Kipuoito ake te naiposha e Adria, o metaa keitorito enkewarie, nemusu lelo tung'ana arewak le meli aajo kitinyikakita ae kop. Neitadooyo entemet netum ntemeta tomon o miet. Ore pee eureishoyu ejo ebaiki neitooshi iyiook emarti oo soito, neitadooyo ienet oong'uan te dukuya emeli, nesaisho mekenyu. Ore eing'oru lelo arewak le meli eneiko pee eluaya aaing'uaa emeli neidipa doi ninye aaitadoiki empeut enaiposha, eitaakuno keeta kulikae eenata ooitadooyo te dukuya e meli, nejoki Paulo olkitok loo sikarini o sikarini lenyena, “Te neitu etoni ltung'ana ti atua emeli meitajeuni intae.” Nedung'oo sikarini nkeenta e ina peut, neisho meshomie ina. Ore etaa kekenyu, nejoki Paulo ninche pooki meinosa endaa, nejoki, “Ene tomon o oong'uan ade taata ena olong isirng'ang'ate miatata endaa, eitu inyanya toki. Asayiaki naa intae ajoki enosa endaa; ekeisho intae engolon amu medoyio hoo ninye olpapita le lukunya e likae obo linye.” Ore pee ejo neijia nedumu emukate, ore pee eisho Enkai enashe etii pooki, negil neiter anya. Negolu pooki oishuaa nenya sii ninche maate endaa. (Nikira pooki iltung'ana oobaya iip are o ntomoni naapishana o ile ti atua ina meli.) Ore pee edaa aaraposho, neiteneneng emeli, nenang'aki enkano atua enaiposha. Ore pee ekenyu, eitu eyiolou ninche ina kop, kake etoduaa enkutoto naata osinyai oisiasha, neiguana te naa keidim aaitabaiki ina meli ina kop natoyio. Metaa neiturraa ieneta lenyena nelaku nkeenta naaenita lkurteta ooboinieki emeli; neitoki taa alaaki olkarasha kitok osiwuo neitoriokino ilo sinyai oisiasha. Kake neikob likae sinyai oitemoro neing'irtit emeli enkop neuno olkidong'oe le meli metaa meekure edotunoyu, negilita ilopir le naiposha dukuya emeli. Neiguanare isikarini pee ear lelo tung'ana ooena metuata, pee mepor ake neisik aapuo; kake ore ilo kitok loo sikarini te nkaraki nayieu neitajeu Paulo, nerishie amitiki ninche eas ina nayieu. Neitanap ilooba anaa ilooidim aatapor enkare meituruko aadoyo te meli nepor enkare aapu enkop natoyio, ore lkulikae ooleku nepororie lkeek aashu mbelat e ina meli. Metaa neaku etasarutua pooki enkop natoyio. Ore kitajeutuo, nikipuonu aayiolou aajo keji ilo lemankale Malta. Ore ilopeny ina kop neitoomon iyiook to lng'ur otuluso, amu einuaa enkima neng'amaa iyiook pooki, amu eiterua asha naa keirobi. Netasotuo Paulo looti keek nepik enkima, nepuku olasurai te nkaraki enkirowuaj neirinakino enkaina enye. Ore pee edol lelo oopeny ine eililio ina ng'ues te nkaina enye nejokino maate, “Meeta nchere mme olarani ele tung'ani. Ore hoo netajeuo te naiposha, meeta esipata naishuyie.” Ore ninye, neipiripiroki ina ng'ues enkima nemeeta enaitaasa ninye. Neanyu ninche ejo ebaiki nejeyu aashu ebatata aosh enkop etua; kake ore pee eanyu te nkata naado neitu eduaaki ninye ae napiak, neibelekenya neaku kejo enkai ninye. Ore embata e ine wueji naa ninye etii olopololi lo laiguanani oitore ilo lemankale, neji ninye Publio, neng'amu ninye iyiook aitoomon osupatei inkolong'i naara uni. Neaku emuei menye Pubilio eeta oloirobi nerotu sii osarge; nelo Paulo abaiki neomon, neiteleiki nkaik neishiunye ninye. Ore pee etiu nejia, ore lkulikae tung'ana pooki le ilo lemankale ooata mueyiaritin, nepuonu sii ninche meishiunyeki. Neisho iyiook nkishorot kumok; naa ore pee kidumunye, nepikaki iyiook emeli ntokitin pooki nikiaatayie enkolat. Ore etulusoitie lapaitin okuni nikiked emeli, netobiko ninye te ilo le mankale te nkata e enkirobi, emeli e Aleksantria, naa nkaitin mao naasirakino elukunya enye. Nikipuo aang'eliki Sirakusa, nikibik nkolong'i uni te ine. Te ine kitudumunye nikimanaa o metabau Regio; enkolong nabo ake nashomo nedumunye osiwuo le moikuape ore te nkolong e are nikipuonu Puteoli. Nikitum lalashera te ine, neitoomon iyiook nikibik nkolong'i naapishana. Metaa nikipuonu Roma. Ore ilalashera ootii ine, pee ening'oo iyiook, nepuonu o metabau Sokoni e Apio o Mukaonini Uni aanang'are iyiook. Ninche ake etoduaa Paulo neisho Enkai enashe negolu oshoke. Ore pee kibau Roma, neishori Paulo eton openy, te nebo ilo sikari oirrita ninye. Ore pee elusoo nkolong'i uni neipotu Paulo larikok loo Lyahudi te nebo; ore pee eiturrurro nejoki ninye ninche, “Ilalashera laainei, ore hoo nemaata enaitaasa iltung'ana lang, aashu ilkerreti loo loo papa, kake aaishooyioki aena te Yerusalem aaisho nkaik oo Roma. Ore pee aajur ninche nanu, neyieu naalaku mashomo, amu maata apa ae naaitanang'i pookata. Kake ore pee eany Ilyahudi, naamiraki matasaru Kaisaria hoo nemaata ae naaipotoki olorere lang. Te nkaraki ina pee atejo kayieu nadol intae nairorie intae, amu enkaraki ilo ora osiligi le Israel pee aena te le pisiai.” Nejoki ninche ninye, “Mikiaata iyiook mpala nikitang'amaitie eing'uaa Yudea nikimpirta iyie, nimikiaata too lalashera lang ooetuo ene oloinosua aashu eliki iyiook ae torroni ti alo iyie. Kake kiyieu pae nikining enijo iyie o nena nilimu; amu pooki enikiyiolo ti alo ena kiteng'enare ng'ejuk napaashari, keimakini te pooki wueji eibai.” Ore pee egelaki ninye olkekun, nepuonu enetii te nkaji natijing'a aa kumok oleng. Neinosaki ena bae te nkakenya o memuto, eishakenoki enkitoria e Nkai netem ajo aitijing'aa ninche mbaa e Yesu too nkitanapat e Musa, o too loibonok le Nkai. Nejing'aa kulikae nena naatejo ninye kake eitu eiruk kulikae. Ore pee egela ninche maate, nepuo pee eidip Paulo atejo ena bae: “Etisipa apa Enkiyang'et Sinyati pee ejoki iloo minyi to loiboni le Nkai oji Isaya, ‘Shomo enetii kulo tung'ana, tiaaki, ining'ining'i doi kake mejing'aa hoo intae, ning'oring'oro doi kake midolidolo hoo intae, amu eikang'ate ltauja le kulo tung'ana, naa ming'anta nkiyiaa mening, neikeno nkonyek enye; pee medol ake too nkonyek enye, nening too nkiyiaa enye, nejing'aa ltauja lenye, neibelekenya maishiunye nanu ninche.’ Entayioloito naa intae inchere, ore ena jeunoto e Nkai, eirriwakaki Loreren; ekeinining'u ninche.” [Ore pee ejo neijia nepuo ninche Ilyahudi eishankarra maate.] Nebik ilarin aare oolulung'a te ine, te nkaji enye naisilenuo, neng'amu lelo pooki ooetuo enetii ninye. Nelikioo enkitoria e Nkai neiteng'enisho too mbaa o Laitoriani Yesu Kristo aibalie nemeetae olomitiki. Paulo osinka le Yesu Kristo, oipotoki metaa olkipaaret, negeluni te nkaraki ororei supat le Nkai otolimuo apake te dukuya too loibonok le Nkai lenyena tiatua ilkigerot, naa ilo rorei supat oipirta ilo Inoti lenye, le ntalipa e Daudi ti alo osesen netolimuoki neitadedeyieki ninye te ngolon inchere Enkerai e Nkai to rrekie le Nkiyang'et Sinyati pee eitopiuni too lootuata, naa Yesu Kristo Olaitoriani lang, laa ninye kinotie iyiook empiris o kipaaretisho nikiyaunye enkirukoto naning'isho too loreren pooki te nkaraki enkarna enye, nitii sii intae ilooipotoki te nebo ninche entaa le Yesu Kristo. Airoroki intae lelo pooki oonyor Enkai ti atua Roma, ooipotoki entaa sinyat. Meeu empiris o eseriani atua intae eing'uaa Enkai Papa lang o Laitoriani lang Yesu Kristo. Ore enaituruk, ang'as aisho Enkai ai enashe ti atua Yesu Kristo tenkaraki intae pooki, enkaraki netaa kelikiori enkirukoto inyi te nkop pooki. Amu Enkai shakeni lai, naa ninye aisiaai te nkishui ai ti alo ilo rorei supat lo Inoti lenye nchere eitu apal maimaki intae anaa ake te nkomono ai, ajo oi kenya eishoru Enkai te yieunoto enye manoto erishata nabaikinye intae. Amu ayieu naleng nadol intae, pee atum atang'arie intae enkishorunoto e nkiyang'et, natum aitagolo intae; ajo pee kiretutu intae te nkirukoto inyi naretu sii nanu intae te naai. Kayieu niyiolouu ilalashera laainei nchere kumok inkatitin nayieu oshi nalotu abaiki intae, (kake eitu aaishori ebaiki taata,) peyie atum embata e nkisampuare tiatua intae o too loreren. Aata nanu esile too Lyunani o too leme Lyunani, too looiteng'enaki o leitu. Ina pee ayieu oleng naliki sii ninche intae Ilomon Supati ti atua Roma. Amu makurru nanu te lelo Omon Supati; amu ninche engolon e Nkai nayau enjeunoto te pooki ng'ae oiruk, neituruk too Lyahudi neitoki too Lyunani. Amu te ninche eibalunyeki te lelo omon supati nchere ore enkiterunoto o enkiting'oto e nkoitoi naitopokie Enkai oltung'ani naa enkirukoto. Anaa enajo ilkigerot, “Ore oltung'ani oisho Enkai esipata te nkoitoi e nkirukoto nepok.” Amu eibalunyeki taata e ngoro e Nkai eing'uaa shumata eiba entorroni pooki o enkarruoisho oo ltung'ana ooibooyo te esipata. Amu ore mbaa naayiolounoyu ti alo Enkai keibala te ninche, amu Enkai naitoduaa ninche. Ore anaa apa pee eitaini enkop netayioloki ake ina pukunoto enye nemelioo, aa taa enkidimata enye oo ntarasi o ina nara ninye Enkai, netaliee te nena tokitin naaitayioki. Metaa meeta hoo ninche eneitolonyaki; amu ore hoo neyiolo Enkai, eitu eyanyit aaitaa ninye Enkai aashu eisho ninye enashe, kake eirriirrana too ndamunot enye, neirriirrana nkorroki enye nemisimisu. Ore ejo ninche ai ng'eni neaku lmoda, neitawal enkitoo e Nkai nemeye ninye ntarasi newalunye inkitanyaanyukot neeijo oltung'ani oye ake, aashu imotonyi aashu ng'uesi, aashu ng'uesi naaikurtutari. Ore enkaraki ina etung'uayie Enkai ninche neisho ing'uarrat oo ltauja lenye oonyor iloirerioni, o metaa kelaiki enkanyit iseseni lenye maate, amu etawalunye emonkoi isipat e Nkai nesai neisiaai entoki naitobiruaki nepal Ilo Oitobira, omayiana ninye intarasi. Esai. Ore enkaraki ina etung'uayie Enkai ninche metang'uarra imbaa e sulare. Eibelekenyate ng'oruo enye aaing'uaa orrekie oishiaakino nepuo ilo lemeishiaakino, nepal sii ninche ilewa aaku meing'oru nkituaak neinuaakino ng'uarrat maate, neas ilewa o lewa mbaa e nkurruna neng'amu too seseni lenye maate nena naaiu ina torroni nataasa. Naa ore amu eitu edol ninche aajo keishiaakino neyanyit Enkai, neing'uaa Enkai ninche metaa, keriata indamunot enye netum olkuaak torrono. Iloobore empukunoto ake pooki e nkarruoisho, o entorroni, o ing'uarrat, ilaa ntorrok ake edol, iloobore olom, o ilooitayu loikop enchankar, olosek torrono, esayiet, enkurrare, o enkisuro, ilooiba Enkai, ilooilash, iloonya kutukie, ilooipiru ntorrok, iloogolong'aki ntoiwuo, ilmoda lemedamisho, ilemeisiligayu, ilooiba ilkulenye, ilemeeta olng'ur. Ore hoo neyiolo enatundung'o Enkai ajo ore lelo ooas nena neiririkino keeya, neme ake duoo keas ninche kake kening'okino o lelo ooas. Ore enkaraki nena, miaata enintolonyaki, lo tung'ani ira toki nira, te ninguanare likae; amu ore pee inguanare iyie likae naa kewan inguanare, amu ore iyie, ira oloiguanare olikae, niaasita sii iyie nena. Nikiyiolo aajo edoiki enkiguana e Nkai lelo ooas nena baa. Ijo pasa, lo tung'ani, te ninguanare lelo ooas nena niaasita sii iyie openy, eijo pasa ilany iyie enkiguana e Nkai? Ana aimenaa iyie enkitoo o lng'ur lenye o eanyunoto o eng'iriata enye? Aimiyiololo aajo kejo Enkai pee kirikoki olng'ur lenye enkirridunoto? Kake engolon o ltau lino lemeirridu nikintaany iyie engoro e Nkai kenya te neboluni. Amu kelaaki ninye pooki tung'ani aitorisioki isiaaitin enyena: ore lelo oong'iri aas isupati eing'oru enkitoo o enkanyit o empuaan nemeish, neisho ninye lelo enkishui nemeish. Kake ore lelo oonyor ate lemeiruk ina sipata, laa ntorrok esuj nening ninche, netum lelo engoro o erasakinoto. Keaku osina o emion to ltung'ani pooki oas intorrok, neituruk to Lyahudi naa neijia etiu to Lyunani, kake keaku enkitoo o enkanyit o eseriani te pooki ng'ae oas isupati, neituruk to Lyahudi naa neijia etiu too Lyunani. Amu meeta Enkai olkep. Ore lelo pooki ooas ing'ok meeta nkitanapat naa keimin meeta nkitanapat ore lelo ootaasa ng'ok eeta nkitanapat neiguanareki te nena kitanapat. Amu mme lelo ooning ake nkitanapat, isupati ti alo Enkai, kake lelo ooitabaya nkitanapat eishori isipat. Te neas iloreren lemeeta nena kitanapat to lkerreti lenye oopeny nena naajo Inkitanapat, netaa ninche meeta nkitanapat, hoo nemeeta ninche nekua kitanapat. Keitoduaaya aajo keigero nena naajo nkitanapat ti atua iltauja lenye, neaku too nkorroki enye shakeni, ore ndamunot enye eiguanare ti ai kata, ore ti ai kata nemitu ninche, te ina olong kenya anaa enalimu nanu te kulo omon laainei supati, te ina olong kenya eiguanare Enkai inkisudorot oo ltung'ana te Yesu Kristo. Kake ti nikiji ira Olyahudi naa Nkitanapat ingarakino niwuasare osotua lino o Enkai, niyiolo iyie eyieunoto enye ninyor ina naikishiaan, amu kituutakaki ti atua nkitanapat, naa te naa kesipa nchere ira iyie olarikoni loo lmodook, nira ewang'an e lelo ootii enaimin, nira oloutaa ilmoda, nira oloiteng'en inkera, amu iata eyiolounoto e sipata oo nkitanapat amaa naa iyie oloiteng'en ilkulikae, oo pee minteng'en kewan? Amaa ilikioo ajo mipurrisho, ipurrisho pasa iyie? Oo iyie olojo miloloito, iloloito pasa iyie? Oo iyie oloiba nkitanyaanyukot naaitaai nkaitin, ipur pasa iyie inkajijik enye naasaishoreki? Ore iyie olowuasare nena kitanapat, intukurru pasa Enkai apaashare nkitanapat? Amu ore anaa enatisiraki, “To lbae linyi emori enkarna e Nkai ti atua Loreren.” Amu esipa eeta emurata tipat te nimbung inkitanapat; kake te nigil inkitanapat netiu imurata anaa eimimurata. Metaa, te neibung oltung'ani lememurata nena naajo nkitanapat, aimetiu ole memurata anaa olomurata? Ore naa lelo lememurata ooibung nena kitanapat ninche ooiguanare intae iloota nkitanapat naasira niaatata emurata kake nitapaashare nena kitanapat. Amu mme Olyahudi odede pooki ng'ae ake odoli etiu ti oriong, neme pooki ake emurata naa olodung'o ake osesen. Olyahudi odede olora ti atua kewan, ore emurata nara naa embae o ltau naa ene nkiyang'et mme enasira ake. Ore enkisisa e ilo neme enoo ltung'ana kake ene Nkai. Amaa naa, kaa dupoto eeta Olyahudi? Amaa ainyoo tipat e murata? Eeta tipat naleng too rrekiei pooki. Neituruk inchere, Ilyahudi eitanapa Enkai ilkiliku lenyena. O etaa meisiligayu kulikae lenye? Keidim ina aibelekenya metaa meisilgayu Enkai? Mme neijia ina katukul! Nchoo eaku Enkai asipani hoo naa aimonkoni pooki tung'ani, anaa enatisiraki nchere, “Kintadedeyieki iyie Enkai too rorei linono, nimirisho ake te nikinguanareki.” Kake amaa te naa kenkarruoisho ang naibalie esipata e Nkai, te nkiguana, eikijo aa naa? Eikijo mme asipani Enkai te neyau engoro enye (Kairorita taa doi anaa naajo ltung'ana.) Mme neijia! Amu te neaku neijia etiu, kaji naa eitoki Enkai aiko te neaku ninye olaiguanani le nkop? Naa amaa te naa kelejare ai naibalie oleng isipat e Nkai, neyaki ninye enchunet nalusoo oleng, oo naa pee aaitokini aaiguanare eji ataasa ng'ok? Oo naa pee mikiaas ntorrok pee epuonu isupati? Amu ina doi eiteenikitia kulikae iyiook aajo neijia kijo. Ore endung'okinoto e nkiguanan natum ninche lelo naa keishiaakino. Ainyoo naa? Kitalang'ie iyiook Ilyahudi ilkulikae? Meeta katukul, amu kindipa iyiook aatejo nchere etii Ilyahudi, naa neijia etiu Ilyunani; abori engolon oo ng'ok. Anaa enatisiraki nchere: “Meetae hoo oloota esipata, netaa hoo obo Enkai nemeetae hoo olojing'aa, nemeetae hoo obo oing'oru Enkai. Etapong'ori pooki, netaa te nebo: nemeetae obo oas isupati, meetae hoo obo.” “Enkurare nang'a ilgoso lenye, neasishore ilng'ejepa lenye aalejishore.” “Esayiet o lasuriaa nanuka too nkutukie enye.” “Nebore nkutukie enye ildeketa o enduaran.” “Neten inkejek enye epuo aaibukoo osarge, ore irrekiei lenye naa enkidaaroto o sinaitin, nemeiyiolo ninche inkoitoi e seriani.” “Nemetii olturiaki le Nkai dukuya nkonyek enye.” Neaku kiyiolo iyiook aajo ore pooki najo nkitanapat naa lelo ejoki ootii abori nena kitanapat, pee eitigiri ake pooki kutuk, neaku Enkai eikenaki enkop pooki imbaa enye. Amu meetae oltung'ani hoo obo oikenakini esupatisho ti alo ninye to lbae loo nkiasin oo nkitanapat, amu nkitanapat eimu eyiolounoto oo ng'ok. Kake eibalunyeki taata esupatisho e Nkai neitu eimu nena kitanapat, hoo neishakenokito inkitanapat o loibonok le Nkai, esupatisho e Nkai to rrekie le nkirukoto ti atua Yesu Kristo, te lelo pooki ooiruk. Amu meeta enepaashare; etaasa pooki ng'ok neitong'oro enkitoo e Nkai, neikenakini esupatisho te mpiris enye metaa enkishorunoto pesho, te lakunoto natii atua Kristo Yesu, ilo oishorua Enkai metaa olkipoket to sarge lenye, ongamaroyu te nkoitoi e nkirukoto. Ore apa ena naa enaitodolu esipata e Nkai, amu ore teng'iriata e Aisho enye, netogiroyie ninye ing'ok naatulusoitie; pee etum aitadedeyie makewan neitusupat sii ilo oota enkirukoto ti atua Yesu. Kaji naa etii olwuasa lang? Eiwuang'ieki. Ti aa kitanapata? Ai te nkitanapata oo nkiasin? Mme neijia, kake te nkitanapata e nkirukoto. Amu kimbung'a iyiook nchere te nkirukoto eitaae oltung'ani supat metii easata oo nkitanapat. Ana ketaa Enkai ke Nkai oo Lyahudi ake? Ai mme Enkai ninye oo Loreren sii ninche leme Ilyahudi? Ee pae, enoo Loreren sii ninche. Amu nabo Enkai, naa ninye oitusupat iloomurata te nkitanapata e nkirukoto enye o lelo lememurata te nkirukoto enye. Ketaa naa iyiook ooibelekeny nekua kitanapat te na kirukoto? Mme neijia! Ore enatii, nkitanapat kintudupaa. Kaa naa kijo enoto papa lang Abraham to rrekie lo sesen? Amu te naa napaji ei te nyuaata enye enotoko Abraham kewan esipata naa enaata eeta enawuasare. Kake mme te dukuya Enkai. Amu kejo aa ilkigerot? “Eiruko Abraham Enkai ore enkaraki ina neikenaki Enkai ninye esupatisho.” Ore naa oloisiaaisho nemeikenakini olekoisiaayio lenye anaa kenkishoroto kake anaa enenye naisiayua. Ore naa ilo leitu eisiaayu toki kake neiruk ilo oikenaki isipat oleme supat, neikenaki Enkai enkirukoto enye nchere esupatisho. Neijia sii eikuna Daudi aimaki emayianata o ltung'ani oikenaki Enkai esupatisho neme te nkaraki isiaaitin ejo: “Emayiana lelo ootapalakaki enkarruoisho neitoipori ng'ok enye; nemayiana ilo tung'ani lemeikenaki Olaitoriani eng'oki enye.” Amaa ena mayianata ei loo murata ake ootum, anaa ketum sii ninche ilememurata? Kijo iyiook, eikenakaki Abraham esupatisho te nkirukoto. Kaji naa eikuna pee eikenakaki ninye? Eidipaki aatumurat anaa etiu. Mme eidipaki aatumurat, anaa eitu. Mme eidipaki aatumurat, kake eton eitu emurati. Ketumurataki pee eaku ina olponoto anaa olmishire le supatisho naata apa te nkirukoto eton memurata. Eikonaki neijia pee eaku ninye menye le lelo pooki ooiruk memurata laa te ina eikenakini esupatisho, neaku sii menye le lelo oomurata leme kemurata ake, kake esuj ina kirukoto naata apa papa lang Abraham eton memurata. Ore ina kisiligata naishooki Abraham o eishoi enye, nchere keyooki aajung enkop eitu eishori te nkaraki nkitanapat kake te nkaraki esupatisho e nkirukoto. Te naa napaji ilasujak loo nkitanapat oaku ilajung'ok, pesho naa enkirukoto naa pesho ina kisiligata. Amu eyau nkitanapat engoro kake ore enemetii nkitanapat nemetii engilata oo nkitanapat. Enkaraki e ina paa enkirukoto eitasheyie peyie aa empiris eigarakino ina kisiligata, neitadedeyieki te ishoi enye pooki, neme te lelo asujak loo nkitanapat aa ninche ake, kake o te lelo oong'arie Abraham enkirukoto, amu ninye menye iyiook pooki. Anaa enatisiraki aajo, “Aaitaa nanu iyie menye loo loreren kumok.” Te dukuya Enkai etang'amua ninye ina kisiligata, ina Ai nairuko ninye, naa ninye naisho ilootuata enkishui, neipotu intokin nemeetae neaku. To siligi eiruko neisilig melioo entoki naisiligu pee etum ataa menye loo loreren kumok; anaa enapa natiaakaki eji, “Inji ebayu eishoi ino.” Eitu eshalu enkirukoto enye pee eing'or osesen lenye makewan, ototiwuo anaa olotua amu etinyikaka ilarin iip te moruao enye, aashu pee eing'or enguset e Sara ajo olupi. Meetae olng'ash oidima aigusugusie enkisiligata naisiliga Enkai kake etagolo ninye te ina kirukoto anaa pee eishoo Enkai enkitoo. Etonyorrayie tukul inchere keidim Enkai aitabai ina naisiligie. Ina pee eikenakaki enkirukoto enye nchere esupatisho. Kake ore ilo rorei ojo “Eikenakaki”, mme enkaraki ninye ake pee etisiraki; kake enkaraki sii ninche iyiook ilooiruk ilo oitopiwuo Yesu Kristo Olaitoriani lang too lootuata, olotaraki te nkaraki eanyata ang, neitopiuni pee eikenakini iyiook esupatisho. Ore enkaraki ina, amu te nkirukoto eikenakaki iyiook isipat, kiaata iyiook eserian te Nkai ti atua Olaitoriani lang Yesu Kristo. Te ninye sii kinoto enyikakinoto e mpiris nikintasheyie, naa eiking'ida to siligi kitok likiaata te Nkai. Ore enalusoo te ina, eiking'ida o ti atua sinaitin lang, kiyiolo aajo osina oiu eng'iriata, neiu eng'iriata olkuaak nadupa, neiu entonata nadupa osiligi, nemeitukurru iyiook ilo siligi, amu etubukokoki enyorrata e Nkai atua iltauja lang te Nkiyang'et Sinyati naishooki iyiook. Ore apa eton mikiaata eretoto, ore te nkata naishiakino neye Kristo te nkaraki ltorrok. Amaa, ei mme egol pee enang likae oltung'ani oikenakaki isipat, hoo nebaiki neitieu likae atua te nkaraki oltung'ani supat. Kake eitodolua Enkai eneba enyorrata nanyor iyiook amu ore apa eton kira iloo ng'ok, netua Kristo te nkaraki iyiook. Ore naa, enkaraki ina, naikenakini taata iyiook isipat to sarge lenye, neisul naa eyooki ninye aitajeu iyiook te ngoro e Nkai. Amaa te naa ore apa kira iyiook ilmang'ati neitoning'oki iyiook o Enkai te nkeeya o Inoti lenye, elusoo oleng, taata kitoning'ote, eitajeu iyiook enkishui enye. Neme ina ake, eiking'ida sii te Nkai ti atua Olaitoriani lang Yesu Kristo, laa te ninye kinoto ilo sotua. Ore etiu neijia, enkaraki oltung'ani obo pee etijing'a ng'ok enkop, neitijing'u ng'ok enkeeya. Neaku eibulua enkeeya enkop pooki amu eitarruoitie ltung'ana pooki. Ore doi ninye eton meetae inkitanapat, ekeetai apake ng'ok te nkop, kake ore te nemeetae nkitanapat nemeikenakini oltung'ani ng'ok. Kake ore ake etiu neijia, ore ebaiki enkata e Adam o metabaiki Musa, neitoria ake enkeeya pooki o metabaiki lelo lemeeta enkitanapata natanyaita anaa pee etanya Adam. Ore Adam apa nenyanyukie lido olotu. Paa meing'ura tukul enkiaas e mpiris e Nkai o idia apa kitarruorroto nabo e Adam. Eyaka eng'oki o ltung'ani obo iltung'ana pooki keeya, kake ore empiris e Nkai o enkishorunoto enye te ilo tung'ani obo oji Yesu Kristo neyaka pooki ng'ae emayianata nabor. Meing'ura tukul enkishorunoto e Nkai o nena naayawua enkitarruorroto e ilo tung'ani obo, amu ore enaiguanaka Enkai ina kitarruorroto nabo naa mutata, kake ore enkishorunoto enye e mpiris neitayio inkitarruorrot kumok neyau empalakinoto. Amu eyawua eng'oki o ltung'ani obo enkitoria e keeya, te ilo tung'ani obo. Kebaa elusoo empiris e Nkai ayaki olning'o o ninye neidimie lelo oong'amu ina te mborei pooki meitoreisho te nkishui ti atua Yesu Kristo. Ore anaa ina nayaka enkias nabo torrono mutata pooki tung'ani, neyaki sii ninye enkias nabo supat o ltung'ani supat, iltung'ana pooki elakunoto. Ore anaa ina naitaaki lkumok ilaitarruorrok te nkaraki engogong'i o ltung'ani obo, neijia eitaae lkumok supati. Eetuo nkitanapat aaponaa ianyat, kake ore ine netoponariyie ing'ok te ine etuluso empiris aboreyu oleng. Neaku ore ina nayau enkitoria oo ng'ok keeya too ltung'ana, neyau ninye empiris olning'o o Enkai, olning'o oriku enkishui oo ntarasi ti atua Yesu Kristo Olaitoriani lang. Aikijo aa naa? Aikienikino atua ng'ok pee eponari empiris? Mme neijia pae! Kaji iyiook kinko ilootuata ti alo ng'ok ti nikintoki aaenikino atua? Aimiyiololo aajo ore iyiook pooki ooibung'are Yesu Kristo ti atua enkibatisa ang nikimbung'are ninye, nikitaa nabo o ninye te ina te nkaraki enkeeya enye? Naa ore anaa ina nikitaa nabo o ninye te nkeeya enye te nkibatisa ang, netaa ina ketunukayioki iyiook te nebo ninye, neaku ina naitopiwuo Papa ninye too lootuata te nkias e nkitoo, neaku ina enkishui ng'ejuk te iyiook. Amu te neitaaki iyiook nabo o ninye te nkeeya naaijo enenye, nesipa pae keyookini aaitaa iyiook nabo o ninye te mpiunoto naaijo enenye. Nikiyiolo aajo etashoki enkorrok ang musana te nebo ninye peyie eitarruorri osesen loo ng'ok pee mikintoki aaku rrindiki loo ng'ok. Amu ore olotua netalakuaki too ng'ok. Kake te naa eikituata iyiook te nebo Kristo, nikiruko aajo eikinchu sii te nebo ninye. Amu eikiyiolo aajo ore Kristo eitopiwuoki too lootuata nemeitoki ae kata aigil aye. Meekure eitore keeya ninye. Ore keeya natua ninye naa ng'ok etanang'a, nabo kata ake. Kake ore enkishui naishu ninye naa te Nkai eishu. Enkenai sii intae ate nchere ituata ti alo ng'ok ninchushu ti alo Enkai ti atua Kristo Yesu. Emincho naa ng'ok eitoreisho ti atua iseseni linyi ooyooki aaye, metaa kearaki intae entoning ing'uarrat enye. Emincho rubat oo sesen linyi eaku entoki naasishore tenkarruoisho, kake enchoo ate Enkai anaa ltung'ana ooitopiwuoki aaitung'uaa enkeeya meetu empuaan, ninchosho Enkai rubat oo seseni linyi metaa ntokitin naaisiaaishore esupatisho. Amu meitoki eng'oki aitore intae, amu meekure itii abori nkitanapat kake abori empiris. Kaa naa ae? Eikias ng'ok amu meekure kitii abori nkitanapat kake abori empiris kitii? Mme neijia pae! Aimiyiololo aajo ore ake olinchosho meitoria intae niakuku rrindiki lenyena, nitaa rrindiki le ilo lining'ining'i, aa too ng'ok naa ore pee aa ng'ok isiayiayia neiting'oki keeya; ore pee aa Enkai ining'ining'i, neiting'oki esupatisho. Kake ashe te Nkai amu ore intae oora apa rrindiki loo ng'ok nitaa ilooning'isho too ltauja, aaning ina kiteng'enare naishooki intae. Naa ore pee elakuni intae too ng'ok niakuku rrindiki le supatisho. (Airo anaa naajo ltung'ana enkaraki e nchalan inyi e tung'ani.) Amu ore anaa ina apa ninchooitie ate aaku irrindiki loo loirerioni o enkarruoisho, etaa taata inchooitie ate aaku rrindiki le supatisho pee itumutumu aatubulu te sinyatisho. Ore apa irara rrindiki loo ng'ok, nemeeta enabaikinore intae esupatisho. Naa ainyoo lng'anayio linoto te ina? Inoto mbaa naaitukurru taata intae amu keeya eiting'oki. Kake eidipaki aatalaku intae entaa rrindiki le Nkai, niaatata ilng'anayio lenyena laa embolunoto te sinyatisho, neiting'oki ina enkishui oo ntarasi. Amu ore olekoisiayio loo ng'ok naa keeya; kake ore enkishorunoto e Nkai e pesho naa enkishui oo ntarasi ti atua Kristo Yesu Olaitoriani lang. Eimiyiololo intae ilalashera laainei amu ltung'ana sii doi ooyiolo nkitanapat airorie nchere eitore ake nkitanapat oltung'ani eton eishu? Etiu anaa te neeniki nkitanapat enkitok olpayian lenye eton eishu. Kake ore pee eye olpayian nelakuni enkitok te nena kitanapat te nkaraki enkeeya o lpayian lenye. Ore enkaraki ina, keji ake keloloito te nelo meewa likae lee eishu olpayian lenye. Kake te neye olpayian netalakuaki te ina kitanapata, naa te neyam likae lee nemeji keloloito ninye. Neijia sii itiuu intae, ilalashera laainei, ituata intae ti alo nkitanapat to rrekie lo sesen le Kristo, pee iakuku ile likae, naa ilo oitopiwuoki too lootuata pee kitum iyiook aatoiki Enkai ilng'anayio. Ore apa aa osesen kinchuyie, ore ng'uarrat ang oo ng'ok, etupututuo nkitanapat, neasisho ti atua rubat ang neiu ilg'anayio le keeya. Kake ore taata, netalakuaki iyiook ti alo nena kitanapat, nikituata iyiook ti alo ina apa nateena iyiook, nemeekure aa nena kitanapat naaigero naaitore iyiook kake ena kishui ng'ejuk e Nkiyang'et kinchuyie. Eikijo naa taa? Ketaa ng'ok inkitanapat? Mme neijia pae! Paa kake te neme nena kitanapat, anaata mayiolo nanu ajo ainyoo ng'ok. Anaata mayiolo ng'uarrat ajo ainyoo te neme nena kitanapat naatejo, “Ming'uar.” Kake ore ng'ok, pee eisho nkitanapat erishata, neputu ti atua nanu impukunot pooki oo ng'uarrat. Ore te nemeetae nkitanapat netuata ng'ok. Eetae apa enkata naishu ake maata nkitanapat, kake ore pee elotu ina kitanapata, neinyototo ng'ok naye nanu. Ina kitanapata kewan naji apa aayaki enkishui nataa keeya te nanu. Amu ng'ok naatijing'a ina rishata naayautua nkitanapat. Naalej nanu ng'ok naa ore tiaraki ina kitanapata naar nanu matua. Neaku sinyat ninche nkitanapat nesinya sii ina kitanapata, nesipa naa supat. Ketaa ina apa naji aaret naanyaaka aar matua? Mme ninye. Ore enatiu, eng'oki, pee elioyu naa duoo eng'oki, nataasishore embae naji apa pee aaret aa nanu ear matua eji, eng'oki nataasishore enkitanapata pee etum aitodolu entorroni enye nemeeta eneiting'ie. Kiyiolo doi aajo ore Nkitanapat naa ne nkiyang'et, nematiu nanu neijia. Kake ara nanu oltung'ani otimiraki mataa orrindik loo ng'ok. Eimayiolo doi iasat aainei makewan, amu maas enayieu naas, kake ina naiba ninye aas. Neaku te eina aas, netiu anaa nkitanapat ake atonyorrayie ajo supati. Kake ore enatii meekure aa nanu oas inaas, kake ina ng'oki natii atua nanu. Amu kayiolo ajo, metii entoki supat namanya atua nanu, aa taa osesen lai, amu ore hoo naata eyiolounoto naasie esupat, maata enkidimata. Kayieu naas isupati kake maas; neaku ntorrok nemayieu ninche aas. Ore pee aas enda nemayieu naas nemeekure aa nanu oas kake eng'oki natii atua nanu. Nena duoo enkewan natayiolo nanu; ekayieu nanu naas isupati kake maaing'uaa ai kata entorroni. Ore ti atua enkorrok ai kewan nashipakino aning'ore nkitanapat e Nkai. Kake nadol ake ae golon naarare ake nena nadamu openy. Ina kitanapata oo ng'ok naasisho ti atua osesen lai aaitaa orrindik. Oi ele oibe oji nanu! Ainyoo kenya naakordu nanu tele sesen le keeya! Ashe te Nkai, tiatua Olaitoriani lang Yesu Kristo, ore naa, nanu enkorrok ai, naisiai enkitanapata e Nkai te ndamunoto ai, kake ore to sesen lai, naisiai enkitanapata oo ng'ok. Metii naa taata enkiguana te lelo ootii atua Kristo Yesu. Amu aatalakutua nanu nkitanapat e Nkiyang'et e nkishui natii atua Kristo Yesu aaitung'uaa nkitanapat oo ng'ok o enkeeya. Amu Enkai nataasa ina natalaikinote nkitanapat, to lbae le nchalan o sesen, aataas; eirriwua Oinoti lenye te mpukunoto o sesen loo ng'ok ti atua osesen, pee etumi aaitabai nena sipat naajo nkitanapat ti atua iyiook, ilemerubare mbaa o sesen kake kirubare Enkiyang'et. Amu ore lelo oopuo erubare osesen naa mbaa o sesen naaitore ltauja lenye, kake ore lelo oopuo erubare Enkiyang'et naa mbaa e Nkiyang'et naaitore ltauja lenye. Ore paa osesen oitore mbaa o ltau neaku ina keeya, ore paa Enkiyang'et naitore oltau neaku ina enkishui o eseriani. Amu ore oltau oitore osesen naa olmang'atinta te Nkai; amu meishoru meitoria nkitanapat e Nkai; nemeidim; naa ore lelo laa osesen oitore nemeidim aaitishipa Enkai. Kake mme osesen oitore intae, Enkiyang'et naitore intae, te nesipa nchere etamanya atua intae Enkiyang'et e Nkai. Ore pooki ng'ae ake lemeeta Enkiyang'et e Kristo neme olenye ilo. Kake ore ake pee etii Kristo atua intae, te neye ninye iseseni linyi te nkaraki ng'ok, neishu enkiyang'et e ilo oitopiwuo Yesu, ore ilo oitopiwuo Kristo Yesu too lootuata neisho sii lelo seseni linyi ooye enkishui te ina kiyang'et enye namany atua intae. Ore enkaraki ina, lalashera laainei, eikiaata esile, kake mme eno sesen, metaa osesen oitore iyiook kinchu– amu ore ake pee eaku osesen irubarere inchushu niyeye, kake ti niaariara intae te nkiyang'et inkiaasin o sesen metuata ninchushu. Amu ore lelo pooki laa Enkiyang'et e Nkai narikito, ninche nkera e Nkai. Amu mme enkiyang'et e rrindikisho eishooki intae entushukokinoto enkuretisho, kake eishooki intae enkiyang'et oo nkera inot. Ore te nikijo “Abba! Papa!” Enkiyang'et kewan naishakenu te nebo enkiyang'et ang nchere kira nkera e Nkai, naa ti nikira nkera, nikira ilajung'ok, kira lajung'ok le Nkai te nebo Kristo, te naa keisilisili iyiook te nebo ninye pee eyookini sii aaisho iyiook enkitoo te nebo ninye. Ayiolo nanu ajo ore nkisilisilot ena kata meitorisiokini ina kitoo nayookini aaboloki yiook. Keanyita seseni pooki toki naitayioki, te yieunoto kitok, metaboluni nkera e Nkai. Amu etipikaki seuseu erruorroto, neme nkaraki naa enkop nayieu, kake to siligi, amu keyookini aalaku seuseu pooki aaitung'uaa rrindikisho enye e nkidaaroto, neng'amu elakunoto e nkitoo oo nkera e Nkai. Amu kiyiolo aajo ore o tena kata, eigorito te mion seuseu pooki naitayioki losilisili le mion o metabaiki ena olong. Neme seuseu ake, kake ore sii ninche iyiook, ooidipa aanoto enkishorunoto e Nkiyang'et naiturukuo te kulie naapuonu, nikinchirita sii iyiook ti atua ate kiaanyu meitaa Enkai iyiook inkera enyena, neitabaya elakunoto ang. Amu tele siligi apa eitajewuoki iyiook. Te naa eikidolita entoki nikisiligu, nemeitoki ilo siligi aata tipat. Keisiligu pasa oltung'ani entoki nadolita? Kake ti nikisiligu entoki nemelioo, naa eikiaanyu te ng'iriata. Neijia eiko Enkiyang'et pee elotu aretu iyiook te nchalan ang; amu aimikiyiolo iyiook aajo ainyoo kiomonu nimikiyiolo enikijo ti nikiomonu, kake Enkiyang'et makewan naomonoki iyiook te mion nagut nemeinosunoyu. Ore ilo laa ninye ojur iltauja neyiolo ninye enajo Enkiyang'et, amu Enkai nayieu neaku enkiyang'et nanyikaki ninye too mbaa oo ltung'ana lenyena. Nikiyiolo aajo ore te pooki toki neasisho Enkai too mbaa supati te lelo oonyor ninye, te lelo oo ipotoki te risioroto e yieuna enye. Amu etayiolo apake Enkai ilenyena negelu metotiutu anaa ilo Inoti lenye, pee eaku ilo Inoti olkikau loo lalashera kumok. Ore lelo ooidipa ninye ategelu, neiteng'el; ore lelo ooiteng'ela ninye neipot, ore lelo ooipoto neikenaki esipata, ore lelo ooikenaka esipata neisho ake sii enkitoo. Kaa naa kijo te na? Amaa te netii Enkai enkalo ang, kalo oidim atigilunore iyiook? Eitu eibooyo ninye ilo Inoti lenye kake eishorua ninye te nkaraki iyiook pooki. Amaa etaasa ina, ainyoo ae naitoki amitiki ninye, eisho iyiook pooki toki pesho? Ae ng'ae oitoki aitang'or ilgelunot le Nkai? Mme Enkai, amu ninye makewan naishoo ninche isipat. Ae ng'ae naa odung'oki ninche enkiguana? Ae Kristo Yesu otua, oonyaaka apiu aing'uaa keeya, netii taata, enkaina e tatene e Nkai, nesipa nchere ninye oomonoki iyiook. Ainyoo naidim atirishie iyook enyorrata e Kristo? Keidim ingolikinot, anaa emion, anaa enkisilisiloto? Anaa olameyu, anaa enikipuo mikinchopo, anaa batisho, anaa enkeeya o anaa olalem? Ejo Ilkigerot oojo: “Ore te nkaraki iyie earitai iyiook dama o kewarie matuata; kitotiutuo anaa noshi tare naapuoi aayieng.” A'a, ore te kuna pooki kisulie kimirisho aaisulie te nkaraki ilo otonyorra iyiook. Amu aitisipa nanu nchere mme keeya, neme enkishui, neme ilmalaika, neme engolon e naimin, ne ntokitin naatii, ne ntokitin naapuonu neme nkitoriat neme enguton, neme ae toki to seuseu pooki, naidim atirishie iyiook enyorrata e Nkai natii Kristo Yesu Olaitoriani lang. Neme kulie kiyang'eta o loing'ang'e, aashu naatii olodo le nkop, neme hoo ae toki natii enkop o loing'ang'e pooki naidim atirishie iyiook enyorrata e Nkai natii Kristo Yesu Olaitoriani lang. Isipat ajoito tiatua Kristo, malejisho nanu; naaishakenoki nanu oltau lai te Nkiyang'et Sinyati, nchere kaara sapuk oleng osina o emion ti atua oltau lai. Amu ketaa kayieu napaji naa nanu makewan edeki naadung'ori aarishie Kristo te nkaraki lalashera, laainei entalipa o lorere lai. Isiraeli ninche, naa ninche eitaa nkera enyena, neisho enkitoo, ilkulenye isotuaitin, ninche eishooki Nkitanapat, o esayiata e Nkai o nkisiligat enyena; ilkulenye iloo Akuiyiaa, naa ole ilo orere Kristo. Metamayiani Enkai natii shumata pooki ntarasi. Esai. Kake mme taa doi keetae enaturua ororei le Nkai. Amu mme Siraeli ate lelo pooki le ishoi e Siraeli, neme nkera e Abraham lelo pooki le ishoi enye; kake, “Nkera e Isaak eji nkera inono.” Nejo ina nchere mme nena kera o sesen naara nne Nkai, kake nkera e nkisiligata enye eikenakini aajo eishoi enye. Amu inji etejo enkisiligata enye, “Kalotu kenya tena rishata netum Sara enkayioni.” Neme neijia ake, kake inoolpayian obo papa lang Isaak nkera e Rebeka. Kake, ore meino eton eitu eas ninche ae supat aashu entorrono, ore eji peyie eitobirari eyieunoto e Nkai o engelunoto enye, neme te nkaraki isiaaitin kake te nkaraki e nkipototo enye, nejokini Rebeka, “Keaku olbotor oisiaai oloti.” Anaa enatisiraki aajo, “Yakobo atonyorra kake aibayie Esau.” Aikijo aa iyiook? Aikijo mme asipani Enkai te nkiguana enye? Mme neijia pae! Amu etiaaka ninye Musa, “Nanu oing'urrie olayieu naing'urrie, naitanana oshoke to layieu naduaya.” Ore pooki nemeigarakino enayieu oltung'ani, kake eigarakino olng'ur le Nkai. Amu etiaakita Ilkigerot Farao, “Nanu laailepie naa kajo paa te iyie aitoduaaya engolon ai, nelikiori enkarna ai tiatua enkop pooki.” Neaku ninye oing'urrie oloyieu neing'urrie, neitagol oltau lo loyieu neitagol. Naa ore taata nikijoki, “Oo naa pee eitokini ake aajo eitarruoitie ltung'ana?” Ae ng'ae oidim aibooi eyieunoto enye? Kake aira ng'ae lo tung'ani owaliki Enkai? Kejoki entoki naitobiruni ilo oitobirita, “Oo pee kintayio aikunu inji? Eimeitore esarng'ab oloitobiru motioo e sarng'ab, neitainyie ae entoki sidai nashili, neitobirie ae entoki ake naasishoreki? Oo te naa Enkai nayieu, ejo pee etumoki aitoduaai engoro enye neyiolouni sii engolon enye, netang'asa ang'iriaki oleng lelo oora ile ngoro laa enkitarruorroto ake eitobirakaki, naa ore pee eyiolouni eneba enkarsisisho e nkitoo enye te lelo laa olng'ur eitobirakaki, naa ninye sii oitera aitobiraki ninche te dukuya te nkitoo enye, iyiook taa lelo laa ninye oitopiwuo, neme too Lyahudi ake kake too Loreren sii?” Nesipa etejo ninye te Hosea, “Iltung'ana apa leme laainei ayooki nanu aipot ajo, ‘ltung'ana laainei’, ore apa ina tinki nayooki nanu ajo, ‘Enkirotet ai.’ ” “Ore te napa ake wueji netiaakinyeki ninche, ‘Mirara ltung'ana laainei’ te ina eyookini aajo ninche ‘Nkera e Nkai naishu.’ ” Netabuaa Isaya ajo ti alo Siraeli: “Ore hoo neba nkera e Siraeli anaa osinyai le naiposha, oloti pisiai ake eitajeuni ti atua ninche; amu keitabaiki Enkai enkop enkiguana natudung'oko asioki o te ngolon.” Naa ore anaa enatoduaa Isaya, “Te neme Olaitoriani loo lororani otelekaka iyiook nkera, anaata kitotiutuo anaa Sodom, neikoni iyiook anaa Gomora.” Aikijo aa naa iyiook? Iloreren leitu eing'oru ninche esupatisho ninche oonoto, naa to rrekie le nkirukoto; kake eji ore ninche Siraeli ooing'orutua esupatisho aa nekua kitanapat eitasheyie neitu eidim ninche aaitabai nena kitanapat. Aainyo? Enkaraki neitu eing'oru to rrekie le nkirukoto, kake etiu anaa too nkiaasin. Ketarrorrote te ilo soit orrorrisho, anaa enatisiraki, “Ng'ura, nanu oirragie te Sion osoit orror iltung'ana, osoit kitok obatat ninche, kake ore oloiruk ninye nemeitukurruni.” Ilalashera laainei, ore enayieu oleng oltau lai te ninche naa pee eitajeuni. Ara nanu shakeni te ninche nchere keeta olokiyo kitok te Nkai, kake mewang eyiolounoto. Amu ore enkaraki nemeyiolo esupatisho naa Enkai eing'uaa, nejo ninche maing'oru enenye naitasheyie, neaku eito eisho meitoria esupatisho naing'uaa Enkai. Amu eitabayie Kristo enajo nkitanapat, peyie aa ore pooki ng'ae oata enkirukoto neisho Enkai ninye esipata. Eigero Musa ajo, “Ore oltung'ani oitabaya esupatisho naa nkitanapat eitabari, neishuyie ina supatisho.” Kake inji ejo esupatisho naa enkirukoto eimu, Nimijo to ltau lino, “Ae ng'ae oilep alo keper?” Eji, alo aitadou Kristo enkop, aashu “Ae ng'ae odoyio alo olodo le nkop?” Eji, ailepunye Kristo too lootuata. Kake kejo aa? “Kinyikita ilo rorei, enkutuk ino etii, netii oltau lino,” eji, ilo rorei le nkirukoto likilikioo; amu ti nimbalunye iyie te nkutuk ino nchere ninye Olaitoriani Yesu niruk sii to ltau nchere eitopiwuo Enkai ninye aitung'uaa ilootuata, nikintajeuni. Amu to ltau eiruk oltung'ani neaku te ina eishori sipat, nelimu te nkutuk enye neitajeuni te ina. Ejo Lkigerot, “Meetae hoo oloiruk ninye oitukurruni.” Amu meeta enepaashare Ilyahudi o Lgiriki; ilo Aitoriani obo Olaitoriani le pooki naa ninye oitadoiki enkarsisisho enye lelo pooki ooipot ninye. Amu, “Ore pooki ng'ae oipot enkarna o Laitoriani naa neitajeuni.” Kake amaa, kaji eiko iltung'ana te neipot ilo leitu eiruk? Naa kaji eiko te neiruk ninye oleitu ae kata elikini metoning'o? Naa kaji eiko te nening meeta olalikioroni? Naa kaji eiko tenelikioo eitu eirriwari, “Kebaa esidano oo nkejek e lelo ooyau lomon supati.” Kake mme pooki ootishilaitie lelo omon supati; amu ejo Isaya, “Olaitoriani, aing'ae oiruko inaatoning'o te iyiook?” Neaku nena naaning'i eimu enkirukoto, ore ina naning'i naa elikioroto e Kristo. Kake aikilikuanu nanu ajo, keitu doi ening ninche? Eibala ajo etoning'o; amu, “Eshomo oltoilo lenye enkop pooki, nepuo irorei lenye ineeiting'ie enkop.” Naitoki ake nanu aikilikuanu ajo, keitu pasa ening'u Siraeli? Musa oitera ajo, “Apik intae olom too ltung'ana leme olorere; naitagor intae to lorere omoda.” Nenyaaka Isaya ajo te mpijan, “Aanotito lelo leitu aaing'oru nanu, naitoduaayie kewan te lelo leitu aaikilikuanu nanu.” Kake etejo ninye tialo Siraeli, “Aitorioko nkaik aainei endama pooki ailejileju ltung'ana lemening'isho naatanyaita nanu.” Naikilikuanu naa ajo, keidipa ninye Enkai atanya ltung'ana lenyena? Mme neijia pae! Ara nanu makewan Osiraeli, ole ishoi e Abraham, ole ntalipa o losho le Benchamen. Eitu eany Enkai ltung'ana lenyena laa ninche apake etayiolo, Aimiyiololo enajo Ilkigerot te Eliya o ina natasayia Enkai agilunore Isiraeli ejo? “Olaitoriani, etara ninche iloibonok linono metuata, eturoitie lperereni loo lasarri linono, nanu ake openy otelekua, naa enkishui ai taata eing'oru.” Ketawalikia ninye Enkai ajoki aa? “Atelekaka kewan ilewa oora inkalifuni naapishana leitu egilaki kung Baal.” Neijia sii taata etiu keetae olpisiai, laa te mpiris egeluno. Kake te naa te mpiris nemeekure aa too nkiasin amu meitoki naa empiris aaku empiris. Ainyoo naa? Siraeli leitu etum ina apa naing'oru ninche. Nenoto ninche lelo oogeluno, kake neitiming'ani lelo kulikae, anaa enatisiraki aajo, “Eishoo Enkai ninche ltauja o lukuny nemening'u toki o nkonyek nemedolisho o nkiyaa ometabaiki ena olong, nemening'isho o te ne.” Nejo Daudi, “Enchoo metaa osirua lenye orreshet o eloket, neaku enarror o enaitalakuni te ninche; nchoo emisimisu nkonyek enye pee medolishoyu, neirrugori too nkoriong'i enye ntarasi.” Naikilikuanu naa ajo, amaa, amu etabatatate Ilyahudi teine metaa meekure esarunoyu? Mme neijia pae! Kake enkaraki natagolo onyek pee eewuo enjeunoto Loreren, peyie epiki Siraeli olom. Amaa te nenyaaka taata engolon enye oo nkonyek aaku enkarsisisho too loreren, naa amaa te netaa ina natalaikinote ninche naitaa Iloreren karsisi, kebaa kenya elusoo ina nayau emborei e ning'oto te nening'ishoyu ninye! Ore taata, intae Iloreren airorie. Naa enkaraki nara nanu olkipaaret oirriwakaki Iloreren, esiaai ai aitasapuk peyie atumoki atipika Ilyahudi lang olom, pee ebaiki neitajeu ina kulikae lenye. Amu te naa ina natanyaita ninche nayaka enkop metoning'ore Enkai, keeta ae nayau enyorrarroto enye neme empiunoto too lootuata? Te nesinya eoroti e nkurma naipurji naiteri aaisho Enkai aaitaa ilng'anayio ooiteruni aatum, nesinya sii ninye enkae lulung'ata pooki; naa te nesinya entonai, nesinya sii ninche ilng'osil. Kake amaa te netigiluaki kulikae ng'osil, ore iyie olng'osila lo loirien le ntim, nikirubakini ine netigilunyeki pee king'arieki ina arsisisho e ilo oirien, nimiwuasa naa ake ti alo lelo kulikae ng'osil. Naa ti niwuasa, tadamu tejo mme iyie doi onapita ina tonai, kake ina tonai nikinapita. Naa iyie oyooki ajo, “Etigiluaki ilng'osil peyie aarubakini nanu.” Nesipa ina. Etigiluaki enkaraki neitu eiruk, kake te nkirukoto ake sii pee intashe iyie. Metaa miwuasa ake iyie, kake tureisho intashe. Amu te neitu eingurrie Enkai ilng'osil ate le ilo shani, mikiduaaya sii ninye iyie. Toduaa naa olng'ur o empijan e Nkai, ina pijan enye te lelo ootabatatate, kake ore olng'ur le Nkai, tenebik tiatua, te neme neijia nikidung'ori sii ninye iyie. Naa ore sii ninche lelo kulikae, te neibelekenya aapal ina neitu eiruk, kerubakini sii ninche, amu keeta Enkai engolon naitoki arubakinye ninche. Amu ti nikitudung'uoki to loirien le ntim, nikipuonunui aarubaki oloirien oramati, kebaa naa etumoki lelo ng'osil le ilo oirien oramati enkibung'ata einyakuaki oloirien openy. Ore pee miaakuku iloo wuasa te ng'eno inyi, ayieu niyiolouu ena naisudoro, ilalashera laainei, nchere einepua engoloto ae shoto e Israel, o metaba anaa neiputayu esiana oo Loreren oopuonu, neaku keitajeuni kenyake Israeli pooki; anaa enatisiraki aajo, “Ekelotu Olasarunoni eing'uaa Sion, neoru Yakobo enkiba naiba Enkai; naa nelo osotua lai o ninche ina kata alotu aiwuang'ie ng'ok enye.” Ore ti alo ororei supat ilmang'ati le Nkai ninche, naa enkaraki intae; kake ore te nkalo e ngelunoto nenyorri te nkaraki lekua loo menye. Amu meibelekenyayu nkishorunot aashu engelunoto e Nkai. Ore anaa enapa nining'ining'i intae Enkai nitang'amutua olng'ur lenye te nkaraki natagolong'utua ninche, neijia sii taata etiu ore te nkaraki engolong'u enye neing'urrieki intae naa, keyookini aaing'urrie sii ninche. Amu eteenikia Enkai ltung'ana pooki engolong'u pee etum aing'urrie pooki. Wooi kebaa enguton o enkarsisisho o enkarriyiano e ng'eno nagut e Nkai! Meing'orunoyu nkiguanat enyena nemeturunoyu nkoitoi enyena! “Amu ai ng'ae doi otayiolo oltau le Nkai amu ai ng'ae otaa oloiguen ninye?” “Amaa ai ng'ae oishoo ninye enkishorunoto metaa keyookini aalaaki?” Amu ninye eing'uaa naa ninye eimu naa enetii ninye epuo intokitin pooki. Metaa enenye enkitoo ntarasi. Esai. Aishiraki naa intae, ilalashera laainei, te ilo ng'ur le Nkai, enchoru iseseni linyi metaa olasar oishu, osinya neng'amunoyu te Nkai, amu ina eseremata inyi e nkiyang'et. Eminturubare ate ena kop kake embelekenyata enchoo eitang'ejuki intae indamunot pee itumutumu aaitadedeyie eyieunoto e Nkai, naa supat ninye neng'amunoyu naa bayaroti. Amu ore te nkaraki empiris naaishooki nanu, ajoki pooki ng'ae linyi pee medamu ajo ailepie kewan alang enairirikino kake pee etem aiguanare kewan too naatiu, aitorisioki tung'ani kewan entemet e nkirukoto naishoo Enkai ninye. Amu ore anaa enikiaata irubat kumok to sesen obo, neme nabo esiaai oo rubat pooki, neijia sii kitiu iyiook, ore hoo nikira kumok, kira osesen obo ti atua Kristo, nikira rubat olikae o likae. Ore kiaata nkishorunot naapaasha anaa eneba empiris naishooki iyiook, mataasishore nena: ore paa enaibon e Nkai, neiririkino enkirukoto ang; ore paa ene nkisiaayiare nikisiaaishore, ore paa ene nkiteng'enare, nikinteng'enishore; ore paa ene nkikoo nikinkokishore; ore paa ene leng'on te nkaminino; ore paa eretore, neaku te nkisosion; ore paa eno lng'ur, niking'urrie te nchipai. Emincho enyorrata ejing esunkureisho; embai intae intorrok, entirrisha isupati; entonyorrata intae maate to sotua loo lalashera; entukujata te nkanyit. Emincho enkisosion inyi edukenya, entaa lkirowua te Nkiyang'et, esiayia Olaitoriani. Enting'idata to siligi linyi enting'iria to sina, entasheikinoto enkomono. Enchooi te nkaraki lelo sinyat ooata ngolikinot, entaa loonyor enkitoomono oo lomon. Entamayian lelo ooisilisil intae; entamayian emidek ninche. Enting'idata o lelo oong'ida ninchirishiri o lelo ooishir. Entotoni ining'ong'o olikae o likae emiika, entushulare lelo oomeni; emitiira. Emilakie entorroni enkae torroni, kake ore enaishiaakino te pooki ng'ae entipik intae indamunot. Te naa keidimayu, paa intae etioorie, entotoni te seriani o pooki ng'ae. Ilanyor laainei, emintalaku ilapi, kake entung'eiki mbaa inyi engoro e Nkai; amu etisiraki aajo, “Enaai elap, nanu oitalaku lapi, Olaitoriani ojo.” A'a, “Ore pee eeta olmang'atinta lino esumash, intotio; ore pee eeta enkure nchoo entoki naok; amu ore inko neijia, inkuk naayupuyup inteleikia elukunya enye.” Emincho entorroni emir intae, kake entimir entorroni too supati. Entoning pooki tung'ani oitoreisho. Amu meetae enkitoria neme Enkai eing'uaa, ore lelo ooatae naa Enkai naitasheyie. Neaku ore ake oloibooyo enkitoria te ngogong'i ina naa Enkai naitasheyie, ore lelo ooibooyo te ngogong'i naa ate eyaki enkiguana. Amu meiture laitoriak oltung'ani lo lkuaak supat, kake eiture olo ltorrono. Iyieu iyie nimiaata enkuretisho te ilo oitoreisho? Taasa naa isupati, naa itum errepet te ninye. Amu osinka le Nkai ninye likiyaki isupati. Kake ore ake pee ias intorrok, tureisho, amu menapita ninye olalem pesho; osinka le Nkai ninye oitabaiki engoro enye ilo oas intorrok. Ore enkaraki ina entoning naa, neme enkaraki ake naa iurere engoro e Nkai kake te nkaraki oltoilo lo ltau. Naa enkaraki ake ina sii pee ilakilaka kodi, amu ore lelo ooitoreisho naa laisiaayiak le Nkai ooirrita ina bae. Enchoo lelo pooki nena naairirikino ninche, enchoo kodi ilooishori kodi, ninchosho esotore lelo le sotore, entureita ninchosho enkanyit lelo ooiririkino enkanyit. Emiaatayie esile oltung'ani hoo obo, ae neme ene nyorrata maate; amu ore ilo onyor ole latia enye neitabayie nkitanapat. Ore nena kitanapat naajo, “Miloloito, miaar metua, mipurrisho, ming'uar” o kulie ake kitanapat, naa kulo rorei ooitululung. “Tonyorra ole latia ino anaa eninyor kewan.” Meitaas enyorrata ole latia entorrono; enkaraki ina paa enyorrata enkitabaroto oo nkitanapat. Ore etii nena niyiololo sii aajo kaa saa ena nchere etabawua tukul enkata pee iputunyenye aaing'uaa injo. Amu taata etataanikia iyiook enjeunoto alang enapa kata pee kinteru aairuk; etinyikayie enkewarie, etaa ekenyu. Ematuburukushu naa isiaaitin e naimin emaishopo masaa e wang'an; emaitobirai ate anaa loopuo dama, neme te sikar o te merai, neme te malmalisho oo ng'uarrat torrok, neme too nkitarrikinot o to lom. Kake enchopo Olaitoriani Yesu Kristo, naa emintoki ake aaisho osesen erishata, metaa nena ake naayieu intabayaya. Ore ilo tung'ani omena enkirukoto, entang'amu, kake mme pee eishankarrareki too ltau lenye. Eiruk likae ajo keidim ainosa pooki toki, ore olomena naa mbenek ake enya ninye. Toduaa olonya mimen olemenya, nimidung'oki olemenya enkiguana olonya; amu etang'amua Enkai ninye. Ira ng'ae olodung'oki enkiguana osinka le likae? To lkitok lenye makewan eitashe aashu ebatata. Naa keitasheyieki, amu Olkitok lenye eitasheyie ninye. Eitirrish likae tung'ani enkolong nabo aitulusoo te nkae, neitirrish likae nkolong'i pooki aitoris. Enchoo pooki tung'ani metonyorrai te ndamunoto enye makewan. Ore oloitirrish enkolong nabo neitirrish aa Olaitoriani eyanyit. Ore sii ilo onya nenya aa Olaitoriani eyanyit; amu Enkai eisho enashe; naa ore sii ilo lemenya, nemenya te nkaraki naa Olaitoriani eyanyit neisho Enkai enashe. Meetae hoo obo lang laa kewan ake eishuyie, nemeetae olalang laa kewan ake enang. Ti nikinchu, Olaitoriani kinchuyie, naa ti nikiye Olaitoriani kinang metaa ti nikinchu aashu te nikiye kira ake ilo Laitoriani. Amu enkaraki e ina pee etua Kristo neitoki aishu, pee etum ataa Olaitoriani loo lootuata o looishu. Oo doi pee idung'oki olalashe lino enkiguana? Oo, pee imen olalashe lino? Amu kintashe ake pooki te dukuya olorika le Nkai le nkiguana; amu etisiraki aajo, “Ore anaa pee aishu nanu, Olaitoriani ojo, ‘Aayooki pooki ng'ae agilaki kung, neyooki pooki ng'ejep aisis Enkai.’ ” Neaku kiyooki pooki ng'ae aaikenaki Enkai imbaa ang maate. Emikintoki naa aadung'okino enkiguana ae kata olikae o likae, kake ematumut aajo mikipikaki aekata iyiook likae alashe entoki narror anaa ae bae narruesh ninye. Ayiolo nanu naaitijing'ayioki sii ti atua Olaitoriani Yesu nchere meetae entoki naiduruk te kewan enye; kake eiduruk entoki te pooki ng'ae ojo eiduruk. Te naa keitarru olalashe lino entoki ninosita iyie, nemeekure ilotie iyie enyorrata. Mincho ake ina toki ninya eaku ninye nabatat obo otanang'a Kristo. Neaku mincho esupat te iyie eimakini aajo torrono. Amu ore enkitoria e Nkai mme endaata o eokore kake esupatisho o eseriani o eng'ida naaing'uaa Enkiyang'et Sinyati. Ore ilo oisiaai Kristo aiko neijia neng'amunoyu te Nkai nenyorrarri sii too ltung'ana. Ematusuj naa ina nayau eseriani o enchetunoto nashetu olikae olikae. Emintarruoo esiaai e Nkai te nkaraki endaa. Kesinya pooki toki, kake torrono te neaku kebatat oltung'ani ilkulikae te ntoki nanya; enaikash te nemenya oltung'ani nkiri aashu eok enaisho oo sabibu aashu ae ake bae nabatat likae alashe. Ore enkirukoto niata, tagolie te kewan o te Nkai. Emayiana ilo lemeeta ai naiguanare te kewan te nena naatonyorrayie ninye. Kake ore ilo oata ilng'ashi eidipaki aatudung'oki enkiguana, te nenya, amu mme te nkirukoto etaasa ina; amu ore pooki neme enkirukoto eing'uaa naa eng'oki. Ore iyiook iloogol neishiaakino nikinap enchalan oo looshal, pee me ate kintiship. Enchoo pooki ng'ae eitiship ole latia enye too supati enyena, neitagol ninye. Amu eitu eitiship Kristo kewan; kake ore anaa enatisiraki aajo, “Ore imorot le lelo likimor iyie nanu etuurokinote.” Amu ore nena apa pooki naaigeroki te nena olong'i naaishari naa iyiook eigerokoki pee eutarieki, paa ore enkitashoto o enkikoo oo lkigerot nikitumie iyiook osiligi. Meishoo intae Enkai e nkitashoto nauno o ene nkilejilej entobik to lning'o olikae o likae, oleeijo ole Yesu Kristo, pee itumutumu to ltau obo aaisisa Enkai nara menye lo Laitoriani lang Yesu Kristo. Entang'amu olikae olikae, naa enkuna anaa ina natang'amua intae Kristo, te nkaraki enkitoo e Nkai. Amu ajoki nanu intae etaa Kristo osinka le lelo oomurata pee eitoduaaya esipata e Nkai, netum aitabai enkisiligata naishoo apa iloo papa, o pee etum sii ninche Loreren aaisisa Enkai te nkaraki olng'ur lenye. Anaa enatisiraki aajo, “Ore te nkaraki ina kaaisis iyie ti atua Loreren, naranyaki enkarna ino;” nenyaakaki sii ajo, “Enting'idata Loreren, te nebo ltung'ana lenyena;” o sii, “Esisa Olaitoriani, Iloreren pooki;” nenyaaka sii Isaia ajo, “Kelotu entonai e Yese ninye ilo oinyototo aitore Iloreren; naa ninye eyooki Iloreren aaisilig.” Meiputaki intae Enkai osiligi o enchipai pooki o eseriani ti atua enkirukoto, paa te ngolon e Nkiyang'et Sinyati ebul nedooyo osiligi linyi. Atonyorrayie nanu openy intae, ilalashera laainei, nchere ebore intae esupatisho, nebore intae eng'eno pooki, naa indimidimi aatuutai olikae olikae. Kake etii nkuti baa naigeroko intae te mpijan pee aitadamu intae, te nkaraki empiris naaishoo Enkai mataa olaisiaayiani le Kristo Yesu too Loreren naas esiaai o lapolosani lo rorei supat le Nkai, pee eaku Iloreren olasar ong'amunoyu, oitukuoki Enkiyang'et Sinyati. Ore naa ti atua Kristo Yesu, kaata esipata nawuasare esiaai ai te Nkai. Amu maitieu aimaki ae toki neme ina nataasa Kristo te nanu pee etum Iloreren aatoning ninye, to rorei o too nkiaasin, te ngolon oo nkitoduaat o too ne nking'asia e ngolon e Nkiyang'et Sinyati, metaa ore ebaiki Yerusalem o metamanai alo Ilirikum, atolikioyie tukul ororei supat le Kristo. Naitaa eyieunoto natii oltau elikioroto o rorei supat, neme te nene wuejitin neeidipaki aaipoto Kristo, pee meaku enkitamanyunoto e likae tung'ani alotu ashet, kake ore anaa enatisiraki, “Keyooki aadol lelo leitu ae kata elikini ninye, neyooki ajing'aa lelo leitu ae kata ening ninye.” Enkaraki ena pee aaibooyioki nkatitin kumok eitu alotu abaiki intae. Kake ore taata, amu meekure aata dikai wueji naisiaaishore te kulo kirinen, naa larin kumok ayieu ake nalotu abaiki intae, kaisilig ajo kalotu adol intae agiroo alo Spein, nikintobiraa sii intae te ina lototo ai, atang'asa ashipakino aparanare intae te nkiti rishata. Ore te na kata, ake etiu neijia, alo Yerusalem ayaki lelo sinyat eretoto. Amu etishipakinote Makedonia o Akaia esotore te nkaraki lelo sinyat aisinak ootii Yerusalem; netishipate ninche eas ina, neibala ajo keetayie ninche esile, amu amaa te naa keetuo Loreren aang'arie ninche enkirukoto e nkiyang'et, neishiaakino sii ninche neret aaisiaai lelo too masaa e mayianata. Ore naa pee aidip ena, naitabaiki ninche kuna naatasotuoki, nalotu aimaa intae alo Spein; nayiolo ajo ore pee alotu enitii intae naa kalotu te mborei e mayianata e Kristo. Asai naa intae ilalashera laainei, to Laitoriani lang Yesu Kristo o te nyorrata e Nkiyang'et entonyok te nebo nanu te nkomono niomonono Enkai kiomonokiki nanu, pee aarishieki lelo lemeiruk ootii atua Yudea, neaku sii esiaai ai naisiaai lelo sinyat te Yerusalem enang'amu te lelo sinyat pee te neyieu Enkai nayooki alotu enitii te ng'ida naitumurru aparan intae. Metaa Enkai e seriani te nebo intae pooki. Esai. Arrepaki intae enkanashe ang Febe, enkaisiaayiani e sirit natii Kendrea, nchere entang'amu to Laitoriani anaa enaishiaakino lelo sinyat, niretutu te mbae ake pooki nayieu te intae, amu ninye nataa enkaretoni oo lkumok ebaiki latii nanu. Eroroki Priska o Akuila, aisiaayiak te nebo nanu ti atua Kristo Yesu, etipika ate batisho te nkaraki nanu, neme nanu ake oisho ninche enashe, keishorita sii ninche sirito pooki oo Loreren; eroroki sii ina natii enkaji enye. Eroroki olanyor Epaeneto, laa ninye oiteru aibelekenyakino Kristo te Asia. Eroroki Mariamu nataasishe oleng ti atua intae. Eroroki Androniko o Yunias, le mudong ang likiriamakinote eenata; iltung'ana ooibala lelo ti atua lkipaareta, ooitera apa ninche aairuk Kristo eitu nanu. Eroroki Ampilato lanyor ti atua Olaitoriani. Eroroki Urbano, likisiaayia Kristo te nebo, o lanyor Stakis. Eroroki Apelle, otonyorrayioki ti atua Kristo. Eroroki lelo lo lmarei le Aristobolo. Eroroki oltung'ani le mudong lang oji Herodion. Eroroki lootii atua Olaitoriani le nkaji e Nakirso. Eroroki nena aisiaayiak ti atua Olaitoriani, Trifana, o Trifosa. Eroroki nanyor Persi, nataasishe oleng ti atua Olaitoriani. Eroroki Rufo, ogeluno ti atua Olaitoriani, o ng'otonye naa yieyio sii nanu. Eroroki Arinkristo, Flegon, Herme, Patroba, Herma, o lelo alashera ootii te nebo ninche. Eroroki Filologo o Yuliaa, Nerea o enkanashe enye, O Olimpa, o lelo sinyat pooki ootii te nebo ninche. Erorokinoto te ng'ututata nasinya. Eiroroki intae isirito pooki e Kristo. Asai intae, lalashera laainei, entodol ake lelo ooipiru enchankar o ngolikinot, earare ina kiteng'enare natuutakaki intae; entaapaash ninche. Amu ore ltung'ana leeijo lelo mme Olaitoriani lang Kristo eisiaaita ninche kake ng'uarrat enye maate, naa nkutukie eitamelon too rorei le nkisisa pee etumoki aatelej lelo oomaae. Amu ore hoo neyiolo ltung'ana aajo ining'ishosho intae, o metaa kang'idare nanu intae, kayieu ning'enunu aayiolou nena supati nemetii elejare, niyiolouu sii nena torrok; pee etum Enkai e seriani atasioki atupurda shetani ti alo nkejek inyi. Metaa te nebo intae empiris o Laitoriani lang Yesu Kristo. Eiroroki intae Timoteo, laaisiritore te siai; naa neijia etiu Lukio o Yason o Sosipater oora le mudong lang. Nanu Tertio, olaigeroni le na palai, oiroroki intae ti atua Olaitoriani. Eiroroki sii intae Gayo laa enkaji enye atii, o Erasto olashumani le nkanasa, o lalashera lang Kuarto. [Metaa te nebo intae empiris o Laitoriani lang Yesu Kristo. Esai.] Metaa taata enkisisa ene ilo oidim aitagolo intae anaa enatejo te ilo rorei lai supat o te likioroto e Yesu Kristo, o enatiu embolunoto e ina naisudoro apa too lporori ootulusoitie apa moitie, netabolokoki taata, ore tiatua ilkigerot le naibon, neitayioloki iloreren, te risioroto e nkitanapata e Nkai oo ntarasi pee eyau e nkanyit e nkirukoto Metaa ene Nkai ang enkitoo ntarasi, tiatua Yesu Kristo. [Esai] Paulo eing'uaa ena palai, oloipotoki te yieunoto e Nkai metaa olkipaaret le Kristo Yesu, neing'uaa sii olalashe lang Sostene, aigeroki esirit e Nkai natii Korinto. Etegeluaki intae ti atua Kristo Yesu neipoti intae entaa ltung'ana le Nkai te nebo lelo pooki ootii pooki wueji ooipot enkarna o Laitoriani lang Yesu Kristo, ilo Aitoriani lenye naa olalang. Metaa eninyi empiris o eseriani naing'uaa Enkai Papa lang o Laitoriani lang Yesu Kristo. Ashukoki oshi ake Enkai ai enashe te nkaraki intae. Ashukoki ninye enashe te mpiris enye naishooki intae ti atua Kristo Yesu, amu ore te pooki oitoi intae karsisi too mpukunot pooki. Iatata eng'eno pooki, naa ndimidimi aatolimu katukul amu ore shakenisho ang te Kristo neitadedeyieki ti atua intae neaku eitu eng'oriki intae enkishorunoto e nkiyang'et hoo nabo, ianyitata embolunoto o Laitoriani lang Yesu Kristo. Ninye ake sii oitasheyie intae o meiting'o miatata entorrono naiguanareki te intae te ina olong o Laitoriani lang Yesu Kristo. Keisiligayu Enkai, naa enchula enye eipotokoki intae te nebo ilo Inoti lenye, Yesu Kristo Olaitoriani lang. Asai intae ilalashera laainei, te nkarna o Laitoriani lang Yesu Kristo; entoning'oto pooki; emincho ejing iorot atua intae, kake enchoo errinyokini intae oltau obo o eyieunoto nabo. Amu aatolikioki mbaa inyi, lalashera laainei, eing'uaa enkaji e Kloe nchere etii enchankar atua intae. Naa inji etiu: ejo obo linyi, “Ara nanu ole Paulo,” nejo likae, “Ara nanu ole Apolos,” nejo likae, “Ara nanu ole Kefas,” nejo likae, “Ara nanu ole Kristo.” Ketoore Kristo? Ei Paulo apa etashoki te nkaraki intae? Ei te nkarna e Paulo eibatisaki intae? Ajo ashe amu maata nanu lkulinyi laibatisa leme Krispo o Gaio, pee mejo ake likae eji te nkarna ai eibatisaki intae. Aibatisa sii enkaji e Stefana; ore metii lelo majo kaata likae laibatisa nanu. Eitu aairriwaa Kristo maibatisa, kake pee alikioo lelo Omon Supati naitelelek enkutuk pee ening'unoyu meoruni ake osalaba le Kristo ina najo. Ore ina likioroto o salaba naa emodai te lelo ootii enkoitoi nalo mutata, kake ore iyiook ilootii enkoitoi e njeunoto naa ninye engolon e Nkai. Amu ejo lkigerot, “Kaitarruoo nanu eyiolounoto oo lang'eni, naiwuang'ie eng'eno e lelo ng'eni.” Koree ilo tung'ani ng'en? Koree ilo asirani. Koree olaiguanani le na kata? Keitu eitomod Enkai eng'eno ena kop? Amu ore ina neitu elotu enkop ayiolou Enkai te ng'eno enye, netaa ena naitiship Enkai neitajeu ninye lelo ooiruk te modai e le rorei likilikioo. Olmonekie eikilikuanu Lyahudi neing'oru Lyunani eng'eno, kake Kristo otashoki kilikioo iyiook, otaa ninye errorroto too Lyahudi neaku kemoda too Loreren; kake ore te lelo ooipotoki, aa Lyahudi aashu aa Lyunani, Kristo ninye, ora engolon e Nkai naa eng'eno e Nkai. Amu ng'en emodai e Nkai alang eng'eno o ltung'ani, negol enchalan e Nkai alang engolon o ltung'ani. Entadamu enkipototo inyi, lalashera laainei. Mme kumok ilkulinyi oora apa ng'eni anaa naajo ltung'ana, neme kumok iloogol; neme kumok iloo lmarei kituaak; kake etegelua Enkai nena naamoda te nkop pee eitukurru nena naagol, etegelua lelo oojo enkop emodai pee eitukurru lelo oogol. Etegelua Enkai lelo lemejo enkop eeta tipat nemenari sii, o lelo lemeetae apa pee etum aitaa pesho nena naatae, pee metumi oltung'ani hoo owousa te dukuya Enkai. Te nkaraki easata enye pee itii intae atua Kristo Yesu oitaa te iyiook eng'eno naing'uaa Enkai o esupatisho, o esinyaroto o elakunoto. Peyie, anaa enajo lkigerot, “Ore ake oloyieu neng'ida nchoo eng'idare Olaitoriani.” Ore naa etiu neijia, lalashera laainei, eitu alotu enitii te nkarriyiano oo nkirorot aashu te ng'eno, apa pee alotu aliki intae ina sipata naisudoro e Nkai. Atumuta apa ajo mayieu nayiolou toki tiatua intae neme Yesu Kristo, naa ilo otashoki. Ore ina kata pooki atii atua intae kashal apa, naureisho naikirikira. Neitu aasishore rorei oomelok le ng'eno airorita, o te likioroto ai, kake aataasishore enkitoduaaroto e Nkiyang'et o engolon, pee meaku eng'eno e tung'ani eitasheyie enkirukoto inyi kake te ngolon e Nkai eitashe. Nikiaasishore, ake etiu irorei le ng'eno te lelo ootubulutua, kake mme eng'eno ele porror neme ene lelo ooitoreisho te le porror amu eidipa ninche aataa keurori. A'a, eng'eno e Nkai naisudoro kilimu, eng'eno naisudoro apake, naa Enkai naiguanua eton eitu eiteruni aata enkata naa te nkaraki enkitoo ang. Nemeetae hoo obo le lelo aitoriak le na towuo otoning'uo ina, amu te naa ketoning'utuo, anaata eitu epuo aashe Olaitoriani le enkitoo; kake, ore anaa enajo lkigerot, “Eneitu hoo edol enkong'u neitu hoo ening enkiok, neitu hoo ejing oltau lo ltung'ani, ninye eitobiraka Enkai lelo oonyor ninye.” Iyiook etaboloko Enkai kuna baa te Nkiyang'et. Enkiyang'et najur pooki toki, o metabaiki enguton e Nkai. Aing'ae nayiolo naatii oltau lo ltung'ani neme enkiyang'et natii atua ilo tung'ani? Neijia naa etiu, Enkiyang'et e Nkai ake nayiolo naatii oltau le Nkai. Mme nkiyang'et e na kop kitang'amutua iyiook kake enkiyang'et naing'uaa Enkai kitang'amutua, pee kitum aatayiolo nena kishoroto naaishoo Enkai iyiook. Ninye ena nikilimu, neme too rorei oolimu eng'eno e tung'ani kake too rorei ootuutaka iyiook Enkiyang'et eitawaliki nena e nkiyang'et lelo tung'ana le nkiyang'et. Menyorra oltung'ani ake le nkop inkishorunot e Nkiyang'et e Nkai; kemoda nena te ninye; nemening'u nena amu te nkiyang'et ake eidimi aatujur. Nejur ninye oltung'ani le nkiyang'et pooki toki, hoo nemeetae olojur ninye. Ai ng'ae doi, otayiolo indamunot o Laitoriani metaa keutaa ninye? Kake kiata endamunoto e Kristo. Ore etiu neijia, lalashera laainei, maidim apa airorie intae anaa ltung'ana ootamanya enkiyang'et e Nkai kake anaa ltung'anak ake, anaa nkera kutiti ti atua Kristo. Kule aitotiyie intae, mme endaa nagol, amu mindimidimi apa aainosa ina neton doi ake mindimidimi, amu eton aa enoshi ake netii lkulikae tung'ana itii. Amaa te neton etii olom o enchankar atua intae, aimirara intae ilo sesen? Neton inkunariri ake anaa lkulikae tung'ana? Amu ore pee eaku kejo likae, “Ara nanu ole Paulo,” nejo likae, “Ara nanu ole Apolos,” nyorrikiki naa mirara iltung'ana ake? Ainyoo ninye Apolos? Ainyoo ninye Paulo? Kira ake sinkan laa te ninche ietuo intae aairuk. Neeta ake oltung'ani ina naa Olaitoriani oishoo. Nanu otuuno, nepik Apolos enkare, kake Enkai naitubulua lelo ng'anayio. Neaku mme toki ilo otuno neme toki olotipika enkare, kake Enkai nara naitubulu. Erisio ake olaunoni o lopik enkare, naa keyooki ake oltung'ani atum olekoisiaayio lenye eiririkino esiaai enye. Kira iyiook ilaisiaayiak te nebo Enkai; nirara intae enkurma enye, airara enkaji Enkai. Ore te nkaraki empiris naaishoo Enkai, atotiwuo nanu anaa olashetani arriyia aitobir enkitamanyunoto; likae taata oshetisho te ine. Toduaa naa ake pooki tung'ani eninkunaa enchetata ino te ine. Meetae hoo oloidim anyaaki aitamanyu ae kitamanyunoto neme enapake naidipaki aatipik, naa ninye Yesu Kristo. Kake te naa keshetaki likae ena kitamanyunoto sahabu, anaa enkosholai, anaa sooito le tipat, aashu nkeek, aashu olkujita, aashu suut, kelioyu kenyake esiaai o ltung'ani. Amu keyooki akenyu ina olong te nkima naibalunye enatiu esiaai o ltung'ani. Ina kima naitisip eneikununo esiaai o ltung'ani. Ore pee etune enchetata naitayio oltung'ani, netum ilo olekoisiayio lenye; ore pee eaku etapejoyioki; nemetum olekoisiayio lenye kake keitajeuni ninye enkorrok, kake ketiu anaa oloimunyeki enkima. Aimiyiololo intae aajo irara enkaji e Nkai neidipa Enkiyang'et e Nkai atamanya atua intae? Ore ake oloitarruoo enkaji e Nkai, neitarruoo Enkai sii ninye; amu sinyati enkaji e Nkai, naa intae doi ina aji. Emincho elej oltung'ani kewan. Te nejo likae linyi ng'en ninye anaa naajo taata ele porror, enchoo ilo eaku keshal, pee etum ataa ng'en; amu ore eng'eno e na kop kedol Enkai anaa emodai. Ejo Lkigerot, “Ninye ilo oibung ilang'eni ti atua lelo osekin lenye!” Neitoki sii aajo, “Keyiolo Olaitoriani ndamunot oo lang'eni neyiolo ajo empesho!” Emincho hoo obo eng'idare ltung'ana. Amu nkuninyi ntokitin pooki, Paulo, Apolos, o Kefa, enkop, enkishui o keeya, entaata o entaaisere, nkuninyi pooki. Kake irara intae ile Kristo, naa ole Nkai Kristo. Enkenai iyiook entejo kira laisiaayiak le Kristo ooisiligaki aaitanap nkisudorot e Nkai. Naa lelo ooitanapaki etiorie metaa ilooisiligayu. Mme hoo nyoo te nanu paa intae likipuonunu aajur aashu aaiguanare aashu likae ake tung'ani. Eimaiguanare doi ninye kewan. Nemayiolo hoo toki namen ti atua kewan, kake mme taa keaku ina maata nanu ai tiyoto. Olaitoriani laaiguanare nanu. Neaku emipuny intae aadung'oki likae enkiguana eng'or enkata, o meeu Olaitoriani. Ninye olotu aitupuku nkisudorot e naimin meetu enewang, nebolu iyieunot oo ltauja loo ltung'ana. Te ina kata kenya etum pooki tung'ani enkisisa naing'uaa Enkai. Ilalashera laainei oloji, Apolos o kewan ai aimakinye kuna baa peyie aretu intae te nkitanyaanyukoto. Entuutarie ate iyiook pee iyiolouu enoshi naji, “Lkigerot turubare iyie.” Ayieu napaji ning'enunu pee miwuasasa aaku lo ltung'ani obo nimbayuyu olikae. Ainyoo doi nailepie intae? Ainyoo doi ena niaatata neme enitang'amutua? Amaa naa te naa enitang'amutua ake, aainyo pee isisisisi ate anaa leitu eng'amu toki? Indipa naa doi aaiputakinoto? Metaa ndipakinote? Itaa intae karsisi! Nitaa intae ilaiguanak mikitii iyiook! Wooi te naa ndipa aataa laitoriak, pee kitum sii iyiook aataa laitoriak te nebo intae. Adol nanu ajo eitaa Enkai iyiook kira lkipaareta, ilooisiadu te pooki, iltung'ana laa keeya ake eanyita, amu kitaa iyiook entoki ake nashil enkop, neshil ilmalaika neshil iltungana. Iyiook ootaa Lmoda te nkaraki Kristo, nitaa intae ng'eni ti atua Kristo! Kishal iyiook; nigoligolo intae! Neyanyiti ninche intae, nemenuni iyiook. Ore o te na kata, kiaata esumash nikiaata enkure, nimikinchopo toki, nelimanitae iyiook, nimikiaata enemanya iyiook, nikintanaur ate kiaasisho too nkaik ang. Ore pee emori iyiook, nikimayianisho, ore pee eisilisili iyiook niking'iri. Ore pee epiki iyiook mbaa e sulare nikiropiropisho. Kitotiwuo anaa suut e nkop; ore o te ne kitaa olchala loo suut e pooki toki! Aigero Kuna neme kajo pee aitukurru intae, kake intae aikok anaa nkera aainei nanyor. Te nera iip katitin iip laramatak linyi ti atua Kristo, mme kumok iloo papaai linyi! Amu ore ti atua Kristo Yesu nanu otaa papaai linyi atolikio intae lelo Omon Supati. Asai naa intae pee kiduaayaya nanu. Ina pee airriwaki intae Timoteo. Enkerai ai nanyor ninye neisiligayu ti atua Olaitoriani. Ninye olotu aitadamu intae nkoitoi aainei ti atua Kristo anaa oshi enaiteng'enisho ti atua sirito pooki. Kejo kulikae eji malotu ine nitii naa ina pee eitarriki lkulikae; kake kalotu asieku te neyieu Olaitoriani; mme kalotu ayiolou nena naajo lelo oowuasa, kake ayiolou enetii engolon enye. Ore enkitoria e Nkai mme embae oo rorei kake ene ngolon. Kaa taa iyieuu? Kalotu enitii te ng'udi; ana ei te nyorrata o te nkiyang'et e mborron? Etolimuo doi ninye ajo etii entilare atua intae, enkiboraa oo nkonyek torrono nemeetae ninye tiatua iloreren lemeyiolo Enkai; eji eeta likae enkitok e menye! Neton ake iwuasasa. Oo pee eitu nchirishiri, o metaba anaa nearari aaitung'uaa intae ilo otaasa ina bae? Ore taa nanu te nkalo ai, hoo nematii ine to sesen atii te nkiyang'et, naidipa atudung'oki ilo enkiguana anaa katii te nkarna o Laitoriani Yesu ilo otaasa ina bae. Enototo te nebo te nkarna o Laitoriani Yesu, enototo te nebo atii sii nanu te nkiyang'et, ore te ngolon o Laitoriani Yesu entarasaki Sheitani ilo tung'ani meitarruoi osesen lenye, pee eitajeuni kenya oltau lenye te ina Olong o Laitoriani. Mme sidai olwuasa linyi. Aimiyiololo aajo eisuijie enkiti suguroi entapa naipurji pooki? Entukuoi ilo suguroi musana, pee itumutumu aataa entapa ng'ejuk. Esipa metii osuguroi atua intae, amu Pasaka lang, Kristo eidipaki aaitaa olasar. Emainosa naa osirua lang, neme ti ilo suguroi musana, neme to suguroi le nkarrueisho o le ntorroni, kake te ntapa nemeisuijieki e sidano o esipata. Atisiraka intae ti atua empalai nchere emisiritore ltung'ana ooibor onyek. Mme taa apa ltung'ana le nkop ooibor onyek aimaka, aashu lelo loo ng'uarrat torrok o laisimak, aashu iloomon nkitanyaanyukot naaitae nkaitin, aashu te naa ipuopuo tena kop tukul aaing'uaa! Ore ake apa enaigeroko intae naa nchere emisiritore ilo tung'ani oji olalashe, leton ake aa eibor onyek, iloota olorok, esai nena kitanyaanyukot naaitae nkaitin, nemorisho, nemera aashu aa olaisimani. Eming'arie tukul endaa oltung'ani laaijo ilo. Kara nanu ng'ae oiguanare lelo leme le sirit ang? Aime intae ooiguanare lelo ootii atua esirit? Ore lelo leme le sirit ang Enkai naiguanare. Entaarai intae oltung'ani arruoni metung'uai atua intae. Keetae pasa obo linyi, laa te neetakinore olikae, neitieu ashomo kotini e lelo leitu eiruk lemelo dukuya ltung'ana le Nkai? Aimiyiololo aajo ltung'ana le Nkai ooyooki aaiguanare enkop? Amaa te naa intae ooyooki aaiguanare enkop, keaku mindimidimi aaiguanare nkunyinyi baa? Aimiyiololo aajo iyiook ooyooki aaiguanare lmalaika, tapala duoo iyie noshi ake baa pooki e nkishon? Amaa ti niaata noshi ake baa pooki e nkishon, ei lelo tung'ana leme le toki ti atua esirit igelulu meiguanare? Kairo pee aitukurru intae. Ketaa doi meetae oltung'ani ng'en ti atua intae ooidim atirisha oltung'ani o lalashe lenye? Ketaa doi kerik olalashe olikae alashe enkiguana naa enoo leitu eiruk? Etaa ina naibalie nchere eturua intae tukul ena te neton ake iatata nkiguanat e kotini olikae o likae. Aime enaikash ti ning'iri mikintaasi enemetii esipata? Oo doi pee mincho kisimarieki? Neaku, intae ooinyalisho, ninyal sii lalashera! Anaa aimiyiololo aajo mejung ileme supati enkitoria e Nkai? Emilej ate, ore lelo tung'ana ooibor onyek, o loomon nkitanyaanyukot naaitaae nkaitin, o loololoito, iloosokori o loosokorisho, ilapurrok, iloota olorok, ilamerak, iloomorisho, ilaisimak, meetae hoo obo le lelo ojung enkitoria e Nkai. Naa neijia apa etiu kulikae linyi, kake eitukuoki intae, eitisinyaki intae, eikenakakaki intae esipata, te nkarna o Laitoriani lang Yesu Kristo, o te Nkiyang'et e Nkai ang. Eishoruno pooki toki te nanu kake meretisho ntokitin pooki, “Aaishoro nanu pooki toki” – kake mayieu naaitore engolon e ae toki. “Ene nkoshoke endaa, naa ene ndaa enkoshoke” – kake keiwuang'ie kenyake Enkai pokira are. Ore osesen pee eetae mme ole nkiborra oo nkonyek kake olo Laitoriani: naa olo sesen Olaitoriani; Enkai naas pokira are eitopiwuo Olaitoriani naa keitopiu sii iyiook te ngolon enye. Aimiyiololo aajo ore iseseni linyi naa irubat o sesen le Kristo? Paa kalo nanu aya rubat o sesen le Kristo aitaa rubat o sesen le mulayoi? Maiko aikata neijia! Aimiyiololo aajo ore oloibung'are emulayoi netaa osesen obo o ninye? Amu ejo Lkigerot: “Keaku pokira are osesen obo.” Kake ore ilo oibung'are Olaitoriani netaa enkiyang'et nabo o ninye. Elanya enkiborra oo nkonyek. Ore enkae ng'oki ake pooki naas oltung'ani naa oriong osesen lenye etii kake ore ilo orubare entilare naa osesen lenye epik eng'oki. Amaa aimiyiolo ajo ore osesen lino enkaji e Nkai namany Enkiyang'et Sinyati natii atua iyie, naa Enkai eing'uaa ina pee iata, nemeekure ira ole kewan ino? Kinyiang'uaki te nkinyang'a. Nchoo naa Enkai enkitoo ti atua osesen lino. Naa ore taata, te nkaraki nena baa nikingerokito: Aisidai te nemeboitare olee nkitok, kake ore enkaraki natasapuka oleng enkiborra oo nkonyek, enchoo ake olee eeta enkitok enye, neeta enkitok olpayian lenye. Neisho olpayian enkitok ina naaishiaakino; neiko sii ninye enkitok neijia olpayian lenye. Meitore enkitok osesen lenye, kake eitore olpayian lenye; nemeitore sii ninye olpayian osesen lenye, kake enkitok naitore. Emimitikino naa, meteleku ti nining'okinono te rishata naje pee itumokiki enkomono nintokiki ake aatumo. Emincho ake Sheitani erishata meyaki intae intemat enkaraki nemeidim oltung'ani aitoria kewan. Ajo neijia aa intae aiteleliaki, mme kaitoriaki intae. Kayieu naaji netiu lewa pooki anaa nanu; kake eeta ake oltung'ani enkishoroto enye naing'uaa Enkai, neisho likae te na oitoi, neisho likae te nda. Ajoki lelo leitu eyamisho o nkolia eji, sidai te netoni etiu ninche anaa nanu. Kake te nemeidim aaitoria ate, enchoo eyama ninche; enaikash ti niyama alang ti nikipejito ake eyieunoto. Kake aitanap lelo ooyamishote, naa Olaitoriani oitanap mme nanu, pee meorore ake enkitok olpayian lenye, nemeiturraa sii ninye olpayian enkitok enye. Naa te neorore enkitok olpayian, neton meyama aashu eshuko aning'ore olpayian lenye. Ore te lelo kulikae pooki najo nanu, neme Olaitoriani te neeta olalashe enkitok neitu eiruk, netonyorrayie metotona ninche te nebo, nemeitoki ilo aituraa ina; naa te neeta enkitok olpayian leitu eiruk, netonyorrayie metotona te nebo, nemeorore sii ninye olpayian lenye. Ore ilo payian leitu eiruk naa ole Nkai te nkaraki ina kitok enye, naa ene Nkai enkitok te nkaraki ilo oiruko. Naa te neme neijia neaku mme ne Nkai nkera inyi; kake ore enatiu, ine Nkai ninche. Kake te neyieu ilo leitu eiruk, neorori, ore ilo alashe aashu ina anashe, nelakuno te nena pukunot. Kake eipoto Enkai intae ilooiruko entotoni to sotua. Na kitok, ai ti aji iyiolo te naa aiyie naitajeu olpayian lino? Lo payian, ai ti aji iyiolo te naa iyie oitajeu enkitok ino? Ore ake etiu neijia, enchoo oltung'ani eunokino enkishon enye te risioroto oo nkishorunot naaisho Olaitoriani o te nkipototo natang'amayie te Nkai. Ena kitanapata aitanap sirito pooki. Keipotoki oltung'ani eidipaki aatumurat? Emincho etem ajo aisudoo lmonek le murata. Keipotoki oltung'ani memurata? Emijo metumurati. Mme emurata toki, neme toki te nememurata oltung'ani, kake enkitabaroto oo nkitanapat e Nkai naata tipat. Enchoo eton pooki tung'ani etiu anaa pee eipoti. Ira orrindik pee kimpoti? Mme toki ina. Ti nikitalakuaki taasishore ake iyie ina sinkaisho ino. Ore oloipot Olaitoriani aa orrindik netaa ilo ololakuno lo Laitoriani; ore sii ninye ilo oipotoki elakuno netaa orrindik le Kristo. Einyang'uaki intae te nkinyang'a. Emiaku rrindiki loo ltung'ana. Neaku lalashera laainei, totona ake pooki tung'ani te nebo Enkai te mpukunoto apake niaata pee kimpoti. Ore too naaipirta lelo leitu eyamisho nemaata nkitanapat naaing'uaa Olaitoriani kake aliki intae enajo nanu anaa ina naaitaa olng'ur lo Laitoriani oloisiligayu. Ajo nanu, ore te nkaraki nena baa taata naaitanyamalita intae, sidai te naa keton oltung'ani etiu anaa enatiu ninye. Iyamishe aata enkitok? Mijo oi alakuno pee maata. Ira ilo lemeeta enkitok naenikino? Ming'oru naa enkitok. Kake ti niyamisho, neitu ias eng'oki. Naa teneyami entito neitu eas eng'oki, kake ore lelo ooyamisho ketum osina te nkop, naa ilo ajo pee arishie intae. Ajo nanu nji, lalashera laainei, dorrop enkata; enchoo lelo ooata nkituaak etiu anaa aimeeta, ore lelo ooishir netiu anaa ilemeishir, netiu lelo oong'ida anaa lemeng'ida, netiu lelo ooinyang'isho anaa meeta toki, ore lelo ooinyang enkop netiu anaa lemeeta eneinyang; amu kelusoo empukunoto ena kop o mbaa enyena pooki. Ayieu nimiaatata osina. Ore oltung'ani leitu eyamisho naa mbaa o Laitoriani enyamaliki, neyieu neitiship Olaitoriani. Ore oltung'ani oyamishe naa mbaa e nkop enyamaliki, neyieu neitiship enkitok enye, naa keoro ndamunot enyena. Ore enkitok nemeyama, anaa enemeyiolo olee naa mbaa o Laitoriani enyamaliki; pee etum ataa sinyati to sesen o to ltau. Kake ore enkitok nayama naa mbaa e nkop enyamaliki; naa olpayian lenye eyieu neitiship. Enkaraki intae pee ajoito kuna baa; neme kajo pee aibooyo intae, kake te nkaraki barare nauno o ndamunot naasho naanyor Olaitoriani. Te nedol oltung'ani ajo keitanyamalita entito shoruet enye nemeyiolo likae lee, naa te nerrish naleng eyieunoto, nchoo eyama; eitu eas eng'oki. Kake te neitashe oltung'ani auno to ltau lenye, nemeeta ae naitirrishita, neidim ninye aitoria enkorrok enye makewan, netaasa esupat te neitu eyam ina tito neisho eton meyama. Neaku ore ilo oyam entito shoruet enye netaasa esupat, ore ilo leitu eyamisho, ninye oikash to likae. Eteenikiaki enkitok olpayian lenye anaa neishu; kake te neye olpayian lenye nelakuno neidim ayama likae oyieu, kake anaa te neyieu Olaitoriani. Kake eshipa neikash te neton etiu neijia. Neijia ajo nanu, naa kajo sii kaata Enkiyang'et e Nkai. Oo taa endaa napolosakini nkitanyaanyukot naaitaai nkaitin. Aikiyiolo doi anaa enoshi nijojo, “aikiata pooki eng'eno.” Kake ore ina “ng'eno” inyi naa olwuasa epik iltung'ana; kake keshetu ninye enyorrata ltung'ana. Te nejo likae keeta ae nayiolo nemeeta ilo enayiolo anaa enaaishiaakino neyiolo; kake ore ake olonyor Enkai neyiolo Enkai ninye. Ore te nkinosata e ina daa napolosakini enkitanyaanyukoto naitaai enkai “neme toki te nkop,” nikiyiolo aajo, “meetae ae Ai neme nabo ake.” Naa te neetae nena naaji nkaitin, te keper aashu te nkop, amu esipa eetae nkaitin kumok, o laitoriak kumok, kake ore te iyiook nabo ake Enkai, Papa, laa ninye eing'uaa ntokitin pooki, naa ninye kinchuyie iyiook naa obo Olaitoriani, Yesu Kristo laa ninye eimu ntokitin pooki naa ninye kinchuyie. Kake eeta ake pooki ng'ae eng'eno enye. Ore amu etamoo kulikae tung'ana nena kitaanyaanyukot naaitaai nkaitin, neton edol lelo endaa nanya etiu anaa enatopolosakaki ina kitanyaanyukoto; ore to ltau, lenye enkaraki naton eshal neidurukie ina. Meisho iyiook endaa errepet te Nkai; nimikilau toki te neitu kinya endaa, nemeeta ae nikitum ti nikinya. Entodol naa ake ate meaku ina naishoro intae narror lelo ooshal. Te nedol intae oltung'ani oshal, intae taa lelo ng'eni, itonini aadaa te mesa e nkaji nasayieki enkitanyaanyukoto, ijo meitagol ina oltau, te ina shalan enye, nelo ninye anya endaa natopolosakaki nena kitanyaanyukot? Neaku ina ng'eno inyi natara ilo tung'ani oshal, ilo alashe otua Kristo te nkaraki ninye. Ore pee intaasiasa ilalashera linyi ng'ok naaikununo neijia, iltauja lenye itipika lbaa, niyiololo eshal, Kristo intaasa nena ng'ok. Neaku te naa kendaa narror olalashe lai, nemaitoki ai kata anya nkiri, pee marror olalashe lai. Aimalakuno nanu? Aimara olkipaaret? Keitu adol nanu Yesu Olaitoriani lang? Aimirara intae ilng'anayio le siaai ai to Laitoriani? Te ne mara olkipaaret te kulikae, nara ake ninye te intae; naa intae olmishire le kipaaretisho ai ti atua Olaitoriani. Namitu naa kewan ajoki lelo laayieu naajur. Aimeishoro doi iyiook endaa mainosa nikiok iokisho? Aimeishoro doi iyiook metoriko oltung'ani enkitok nairuko Kristo anaa nena naasita lelo kulikae kipaareta, neiko sii neijia lalashera Olaitoriani, neiko Kefa? Anaa ei Barnabas doi ake o nanu etiakaki maisiayu entoki nikinya? Keetae osikari oisiai likae neitoki alaaki kewan olekoisiayio? Keetae oltung'ani oun enkurma oo lng'anayio nemenya lelo ng'anayio? Keetae oltung'ani oirrita eluaata oo masaa nemeok kule enye? Koltung'ani laatiaka matejo kuna? Aimme neijia sii ninche ejo Nkitanapat? Etisiraki too Nkitanapat e Musa neji, “Nimien olkiteng enkutuk errarru entapa.” Ijojo ei lelo, mongi doi eimaka Enkai? Ana mme iyiook sa pee etejo neijia? Enkaraki iyiook pee etisiraki ina, amu ore ilo oturisho neishaakino neturisho to siligi, ore olorrarru lng'anayio nerrarru eisiligu ajo ketum eoroti enye. Ti nikituunokito intae ilng'anayio lo ltau kenyaaka aaku embae sapuk ti nikitumie intae ntokitin e sotore? Amaa te neeta kulikae esipata natumie toki te intae, aime iyiook ooata enalusoo te ina? Kake eitu king'orunye iyiook intae ina. Kiting'iria pooki toki, pee mikintarru ororei supat le Kristo. Aimiyiololo aajo ore lelo ooisiaaisho te nkaji e Nkai naa ina aji e Nkai etumie endaa, ore lelo oopolosisho to lperere lolasar neng'arie ilo perere entoki natii? Ina sii eitanapa Olaitoriani lelo oolikioo kulo Omon Supati metaa ore nkolati e nkishon enye netumie kulo Omon Supati. Kake eitu ajo nanu aing'oru hoo nabo e kuna tokitin, neme ina pee atisiraka intae kuna baa; enaikash te naye alang te naiko neijia. Pee metumi oltung'ani hoo obo oyooki ajo kawuasare empesho. Te nalikioo lelo Omon Supati, neme toki ina nawuasare nanu. Maata nchere, eitu alikioo. Wooi kewan ai te nemalikioo kulo Omon Supati. Te naa kalikioo napaji enkaraki naa nanu oyieu, keaku olekoisiaayio aanyu maatalaakini; kake teneme eyieunoto ai, naa enkaraki naa Enkai naaisiliga aitanap ena siai. Ainyoo naa olekoisiayio lai laalaakini? Enkidimata nalikiorie kulo Omon Supati nemaitalaku toki; ina doi natanya aalaakini te nkaraki elikioroto oo Lomon Supati. Ore hoo nemara orrindik le likae tung'ani, aitaa nanu kewan orrindik le pooki ng'ae peyie ariku anaa enaidimayu, naitaa ilkumok ile Kristo. Ataa Olyahudi ti alo Lyahudi peyie atum Ilyahudi; ore nena kitanapat naaitore ninche, atotiwuo anaa oloitore nena kitanapat peyie atum atoriku ninche, hoo neme nena kitanapat naaitore nanu makewan; ore ajo pee atumoki Loreren leme nena kitanapat naaitore, atotiwuo anaa olemetii atua Nkitanapat, hoo natii nanu atua nkitanapat e Kristo metaa matii sii duoo auluo nkitanapat e Nkai; ore to loshal natiu anaa oloshal peyie ariku sii ninche, ataa pooki toki too ltung'ana pooki, peyie atem too nkoitoi pooki aitajeu ematua enye. Naas nena pooki te nkaraki kulo Omon Supati, peyie eaku katii atua lelo oong'ar ina mayianata. Aimiyiolo aajo ore te nkesha naa keitukuja pooki, kake obo ake lenye otum enchunet? Neaku enkuet pee itumutumu. Ore olokuet pooki naa keenu kewan too mbaa pooki. Neiko ninche neijia ejo pee eishori olmarisian omuta, kake ole memuta kitum iyiook. Neaku, makuetita nanu maata enkipirta, nemaipusho anaa oloosh lng'am; kake kaarita osesen lai naitore, pee meaku ore aidipa atoliki ilkulikae naadung'ori nanu. Lalashera laainei, eyieu niyiolouu nena baa naanoto iloo papa. Etoriko lelo pooki enapa atampoi, neima pooki ina Aiposha Nanyokie eserian, neibatisaki pooki te ina atampoi o te ina aiposha netushulare Musa. Einosa pooki ina daa apa naisho Enkai, netooko pooki ina are naishoo Enkai; amu etookishote te ilo soit oishoo Enkai metusuja ninche. Ore ilo soit Kristo kewan. Kake ore ake eyia eitu eshipakino Enkai ilkumok lenye neidapashaki impopoki enye ilo kees. Netaa kuna pooki enkikoo te iyiook, pee miking'uar enkarrueisho anaa enataasa ninche. Emiaaku intae iloomon nkitanyaanyukot anaa enaikuna kulikae lenye; anaa enajo Lkigerot, “Etotona Itung'ana aadaa neokisho neinyototo aaranyisho.” Mikirubare iyiook mbaa torrok e nkiborra oo nkonyek, anaa enaikuna ilkulikae lenye, ore te nkolong nabo neye nkalifuni tikitam o okuni. Nimikitem iyiook Olaitoriani, anaa enaikuna apa kulikae lenye, nemut ilasuriaa lelo. Eming'unyung'uny anaa enaikuna kulikae lenye, lelo apa ooidaikie Olmalaika Omutisho. Eineputua ninche nena pooki pee eaku enkikoo, netisiraki pee eikoki iyiook aarishie, ilaa te nkata ang eitabayioki nkatitin. Neaku ore ilo ojo kenotoko enkitashoto neing'or kewan mebatata. Eitu einepu intae ae temata nemetiu anaa noshi ake naatum ilkulikae tung'ana. Keisiligayu Enkai, nemeisho ninye metetemi intae enalang ina nimindimidimi aairisha, kake ore ake entemata nalotu neisho ake intae enkoitoi nipaashieshie pee itumutumu aairisha. Ore enkaraki ina, lchoreta laainei, entalam esayiata oo nkitanyaanyukot. Airorie intae anaa ltung'ana ooning'u mbaa; eng'uanare intae kuna najo. Amaa oshi kinchooyo enashe te ina kikompe e mayianata, mme osarge le Kristo oshi ilo liking'ar? Naa amaa oshi kibel emukate, mee osesen le Kristo ilo liking'ar? Ore amu nabo emukate, ore iyiook hoo nikira kumok nikira osesen obo; amu eng'amu ake oltung'ani embelati e ina mukate nabo. Eng'ura sii intae enkirukoto o lkerreti loo Lyahudi: keitu eaku lelo oonya nena tokitin naapolosi ile nchula e ina Ai natopolosakita lelo asarri? Kaa doi ajoito? Katejo doi eji ore endaa natopolosakaki nena kitanyaanyukot naaitaae nkaitin netubula ninye aaku ae toki? Aashu ajo kaae toki ninye ina kitanyaanyukoto? A'a, Kajoito ore lelo asarri oopolos lelo lemeyiolo Enkai loiriruani epolosaki mme Enkai. Nimindim iyie atooko ina kikompe o Laitoriani nintoki enoo loiriruani: nimindim ataa olong'ar emesa o Laitoriani ning'arie sii enoo loiriruani. Aikiyieu sa iyiook nikintagor nikipik Olaitoriani olom? Aiyiook oogol te ninye? Ijojo, “Keishoruno ntokitin pooki,” ee, kake mme pooki toki naretisho. Nijojo, “Keishoruno ntokitin pooki,” kake mme pooki toki nashetisho. Emincho eaku enaret kewan ake eing'oru oltung'ani, kake enchoo eing'oru oltung'ani enaret olikae. Enosa pooki toki namiri te ine nemirieki nkiri, niminkilikuanunu nena baa o ltoilo lo ltau; ore enkop o ntokitin pooki naatii naa no Laitoriani. Ti nikintoomon iyie oleitu eiruk niyieu nilo, nosa nena pooki naatii dukuya iyie, niminkilikuanu nena naajo oltoilo lo ltau. Kake ti nikijoki oltung'ani ake pooki “Olasar ele le nkaji oo ntaleng'o.” Minya te nkaraki ilo likitolikio o te nkaraki oltoilo lo ltau; neme taa olo ltau lino makewan, ajo, kake olo ltau le ilo tung'ani. Ijojo intae, “Oo paa ore elakunoto” ai naa to ltoilo lo ltau le likae eiguanareki? Amaa te nang'arie likae endaa etii enashe, oo pee aaitokini aapik esulare te ntoki naishoorie enashe? Naawaliki ajoki, ti nidaa aashu ti niokisho aashu ti nias ai ake bae pooki, taasa nena pooki te nkaraki enkitoo e Nkai. Nimiaaku iyie olkob too Lyahudi aashu to Lyunani aashu te sirit e Nkai, anaa sii enatiu nanu oloitiship iltung'ana pooki te pooki oitoi, nemaing'oru dupoto ai makewan, kake ene pooki, pee eitajeuni. Nanu entoduaai anaa enaduaaya sii nanu Kristo. Aisisita intae amu kidamumu te pooki toki o enkaraki nitukurrakita aaibung ilkerreti anaa enapake naitarasaka intae. Kake kayieu niyiolouu aajo Kristo endukuya o lee ake pooki, naa olee elukunya e nkitok, naa Enkai endukuya e Kristo. Ore pooki ng'ae oiro aomon aashu elimu olkilikuai le Nkai eitoipito endukuya enye naa Kristo elaiki enkanyit, laa ninye elukunya enye. Ore enkitok ake pooki naomon aashu elimu olkilikuai le Nkai eitu eitoip endukuya enye, meeta enatalang'ie ina enkitok natabarnoki endukuya. Te nemeimulumul enkitok endukuya nemeeta naa enatiu te nedung'i ilpapit; naa te naa esulare te nedung'i enkitok ilpapit aashu ebarni elukunya, neishaakino naa neimulumul endukuya. Meishiaakino neimulumul olee endukuya enye, amu ninye oitodolu eneyia empukunoto o enkitoo e Nkai; kake enkitoo o lee eitodolu ninye eng'oruoi. Mme eng'oruoi etupukunye olee, kake olee etupukunye eng'oruoi; neitu eitaini olee te nkaraki eng'oruoi, kake enkaraki olee pee eitayioki engorui. Ore te ina enkaraki ilmalaika, keishiaakino ake neeta eng'oruoi enkitoduaata nautu enkitoria te lukunya enye. Kake ore ake eyia, ore atua Olaitoriani, mme toki eng'oruoi metii olee neme toki olee metii enguruoi; amu ore anaa pee eitayioki eng'oruoi to lee, neing'uaa sii ninye olee, kake Enkai eing'uaa ntokitin pooki. Eng'uanare oopeny, ijojo keishiakino te neomon eng'oruoi Enkai meimulumula endukuya? Ai meutaa intae empukunoto enye naitobirunyeki, ajo te neeta olee lpapit adoru, neaku enkurruna te ninye, kake te naa adoru enkitok ilpapit, neaku esikar te ninye. Eishooki ninye lelo papit adoru pee eitoipore. Te netii oloyieu neishankarru kuna, najoki nanu intae, mikiaata likae kerreti, nemeeta sii ninche sirito e Nkai. Ore aitanap intae kuna baa, kaata enamen te intae naa nchere, keinyalisho ntumoritin inyi meretisho. Eituruk enatoning'o nchere ketii eoro atua intae ti nitumomo irara esirit, naa kairuk kulie e nena. Amu meeta nchere pee eitu eoro intae indamunot, pee kitum aatodol ilewa le tipat. Kake ti nitumomo te nebo, neme Endaa o Laitoriani ina nipuonunu aanya. Amu ipuonunu pooki aanya ndaiki inyi nelo likae eeta esumash nelo likae etemere. Amaa ai nkajijik miatata nidaarere? Anaa imenimene esirit e Nkai, nintukurrurru lelo aisinak? Kajoki aa intae? Kaisis intae? Maisis intae te ina. Ore olkerreti laishoo intae to Laitoriani atang'amua: ore te ina kewarie naitarasarieki, etudumua Olaitoriani Yesu emukate, ore pee eidip aishooi enashe, nebelibel nejo, “Osesen lai ele, te nkaraki intae etigilaki; entaas ena kidamumu nanu.” Neiko sii neijia nedumu enkikompe eidipe endaa, nejo, “Ore ena kikompe ninye Osotua ng'ejuk oitayu osarge lai; entaas ena, anaa ake ti niokioko, pee kidamunyenye nanu.” Amu ore enkata pooki ninosinoso ena mukate niokioko ena kikompe, naa nkeeya o Laitoriani ilikioo, o meeu. Neaku ore pooki tung'ani onya ina mukate neok ina kikompe meishiaakino keaku eeta eng'oki e ilo sesen o ilo sarge lo Laitoriani. Keishiaakino nejur ake oltung'ani kewan eton eitu enya ina mukate neokie ina kikompe. Amu te nenya oltung'ani neok neitu eyiolou tipat e ilo sesen, kewan etudong'oko enkiguana te ina kinosata o te ina okoto. Ina pee eshal nemueyiaa lkumok ti atua intae, netuata esiana. Ti niking'uanare ate too sipat nemeitokini aaiguanare iyiook; kake ore amu Olaitoriani oiguanare iyiook, ina pee eitamei iyiook, pee medung'okini iyiook enkiguana aairiamaa o enkop. Neaku, lalashera laainei, ti nitumomo te nebo pee inosinoso, entaanyunoto. Te netii oloata esumash, nenya endaa ti ang, pee meaku entumo enapukoki endung'okinoto e nkiguana. Kalotu aitanap intae kulie baa te nalotu. Ore too mbaa naaipirta nkishorot e nkiyang'et, lalashera laainei, nayieu niyiolouu sipat. Iyiololo aajo, ore apa miyiololo Enkai, nkitanyaanyukot nemeiro erikokini intae, te na oitoi o ti ae. Enkaraki ina pee aitayiolo intae nchere meetae hoo obo oidim atejo, “Olaitoriani Yesu,” mme Enkiyang'et Sinyati naishoo metejo. Eetaempukunot oo nkishorot e nkiyang'et, kake ena kiyang'et nabo naishoru pooki; eetae enkisiaayiare oo mpukunot kumok, kake obo ake Olkitok; neetae mpukunot kumok e ngolon e Nkai naasisho, kake ena Ai nabo naisiaaisho te nena kidimat pooki. Neishooki pooki tung'ani ewang'an naretie lkulikae tung'ana pooki. Eetai oloishoo Enkai engolon nairorie mbaa e ng'eno te Nkiyang'et, neishori likae meiroro mbaa e nkarriyiano e ng'eno, anaa enaisho ake ina Kiyang'et, neishori likae enkirukoto, naa te ina Kiyang'et nabo ake, neishori likae nkishorot e mbaare, naa ina Kiyang'et ake ina, neishori likae engolon naasie mbaa naagol e nking'asia, neishori likae engolon nalikiorie lomon te naibon, neishori likae enkidimata nayiolo aitirisha ltauja, naishori likae enkidimata naasishore lng'ejepa oopaasha, neishori likae enkidimata nawalunye nkutukie; ore kuna pooki naa esiaai e ina Kiyang'et nabo ake, naa ninye naoriki nerishaki iltung'ana aiko anaa enayieu ninye. Ore taata, anaa enatiu osesen lo ltung'ani ara obo neeta rubat kumok, ore nena rubat aa kumok, naa osesen obo, neijia sii etiu te Kristo; amu ti nikira apa Lyahudi anaa kira Lgiriki, nikira rrindiki aashu kira ltung'ana oolakuno, ore te nkibatisa te ina Kiyang'et nabo nikitaa pooki osesen obo neitamataki iyiook ina Kiyang'et nabo. Ore osesen lo ltung'ani mme rubata nabo kake oloo nkumok. Te nejo napaji enkeju, “Ore amu mara nanu enkaina, mara eno sesen,” nemeibelekenya aaku mme eno sesen te nkaraki ina. Naa te nejo enkiok, “Ore amu mara nanu enkong'u, mara nanu eno sesen,” nemeibelekenya aaku mme eno sesen te nkaraki ina. Amaa naaji te naa kenkong'u osesen pooki, kaji eitoki atii enkiok? Naa amaa te neaku pooki enkiok, kainyoo naa eitokini aaingueishore? Ore enatiu, Enkai natipika rubat pooki, aa naabo, nepik ilo sesen anaa enayieu ninye. Amaa naaji te naa kerubata nabo pooki, kaji eitoki atii osesen? Ore enatiu, eetae rubat kumok, kake obo osesen. Nemeidim enkong'u atiaki enkaina, “Maatayie nanu iyie tipat,” nemeidim sii ninye elukunya atiaki nkejek, “Maatayie nanu intae tipat.” A'a, ore metii ina, ore noshi rubat o sesen naashal naa ninche naata tipat oleng; nikiyanyit naleng nena rubat o sesen naaijo mme ne tipat; ore nena nemeing'urayu naa ninche kirrita oleng; ore nena rubat sidain naaing'urayu nemeetayie tipat enkirrita. Kake eiruburuba Enkai osesen, neisho enkanyit sapuk nena rubat nemeeta, pee mejing ake osesen eoro, kake pee etum ake erubata pooki airrita enkae rubata. Ore pee eme erubata nabo, nemeyu rubat pooki te nebo ina; ore pee eisisi erubata nabo, neshipa nkulie rubat pooki te nebo ina. Irara taata intae osesen le Kristo, nirara moobo rubat enyena. Netipika Enkai atua ina sirit neiturukie lkipaareta, ile aare iloibonok le Nkai, li okuni laiteng'enak neitoki lelo ooas nkiasin e nking'asia, ilabaak, ilaretok, ilarikok o lelo ooiro lng'ejepa oopaasha. Eilkipaareta doi pooki? Eiloibonok le Nkai pooki? Eilaiteng'enak pooki? Keas pooki nkiasin e nking'asia? Keeta pooki nkishorot naaishiunye olorere? Keiro pooki to lng'ejepa oopaasha? Keyiolo pooki aatawalu? Kake entonyok eng'oru nena kishorot naata tipat aaisul te pooki. Naa kaitodol intae enkoitoi nalus te pooki. Tenairo naa kairo napaji too lng'ejepa loo ltung'ana anaa too loo lmalaika, kake nemaata enyorrata natotiwuo ana esekenkei naru anaa empilbil nadar. Kaidim ataa kaata enkishoroto e naibon o eyiolounoto oo nkisudorot misili pooki o eng'eno pooki, kaidim ataa kaata enkirukoto nadotu ldoinyio, kake te nemaata enyorrata mara toki. Kaidim ataasishore pooki toki naata naitoti laisinak naidim aishooi osesen lai metapeji, kake te nemaata enyorrata, nematum toki. Eng'iri enyorrata, neeta olng'ur, nemeeta olom, nemewuasa enyorrata, nememenisho, nemeas mbaa e nkinyala, neme naaret kewan ake eing'oru, neme ng'arng'arri, nemeiken ntorrok, nemerrep enkarrueisho, kake eshipakino esipata; nenyuaakino mbaa pooki, neeta enkirukoto te pooki toki, neeta osiligi le pooki toki, neng'iriakino pooki toki. Ore enyorrata nemeru ae toki ntarasi. Te neetai enaibon ekeiting'ieki; te naa lng'ejepa keiting ore eng'eno naa keishari. Mebaya eng'eno ang, nemebaya enaibon ang; kake keish nena pooki naang'or te nebau kenya idia lulung'ata naiputakine. Ore apa ara enkerai, nairo, nadamisho anaa enkerai nawalu ana enkerai, ore taata ara oltung'ani botor, naiting'ie mbaa e keraisho. Ore taata mbaa nikidol netiu anaa naairupurup ti atua kiok, kake ore te idia kata nikiduaa nkomomi; melulung'a taata eng'eno ai, kake ore idia kata naitululung ayiolou, anaa ena aaitululung'a Enkai ayiolou nanu. Ore naa, ebik kuna pokira uni: enkirukoto, o siligi, o enyorrata; kake enyorrata esapuk aisul pooki. Entuunokinoto enyorrata empirare, kake entonyok eng'oru nkishorot e nkiyang'et, neisul ina kishorunoto e likioroto o lkilikuai le Nkai. Ore ilo oiro to lng'ejep oje neme oltung'ani eirorie kake Enkai, amu mening'u oltung'ani enajo; nkisudorot eiro aibonu. Kake ore ilo olimu olkilikuai le Nkai naa ltung'ana eirorie aliki mbaa naashetu, neisisaa, neilejilej. Ore ilo oiro te likae ng'ejep kewan eitubulu; ore ilo olimu olkilikuai le Nkai naa esirit eitubulu. Kayieu naaji nanu niroro pooki te lelo ng'ejepa, kake eisul ayieu oleng nilimumu olkilikuai le Nkai; ore ololimu olkilikuai le Nkai ninye olkitok alang ilo oiro too lng'ejepa, aashu naa te neetae olowalu neretu esirit metang'amu enkiti toki nashetu. Ore enkaraki ina ilalashera, te nalotu naaji enitii nairo too lng'ejepa, ainyoo eret ina te intae aime enaikash te naa kairo irorei le mbolunoto aashu le ng'eno aashu le naibon aashu le nkiteng'enare ina kata airorie intae? Neijia sii etiu too ntokitin nemeishu anaa endule aashu enkawuo oo sinkolioitin Te neaku ore eoshitoi, nemening'unoyu osinkolio ooshitoi, kaji eiko pee eyiolouni aajo kalo sinkolio ilo? Naa amaa te nemeibala enkorui e mowuo, aing'ae orretena alo olarrabal? Neijia naa etiu, te neitu ilimu ororei oibala to lng'ejep lino, kaji eiko pee ening'unoyu ina nilimu? Keaku enkijape ake irorie, kajo ake, keetae mpukunot kumok e nkorui te nkop, nemeetae hoo enemeeta ake enajo. Neaku te nemayiolo enejo ina kutuk, naaku nanu oleeiking'a te ina kutuk, neaku sii ninye olomoni te nanu. Neijia sii itiuu intae, ore amu adol ajo iyieu naleng niaatata inkitoduaarot enkiyang'et, entonyok naa entejo maisulie pee eshetu esirit. Enchoo naa ilo oiro to lng'ejep oje, eomonu meishori enkidimata e walunoto. Amu te naomon to lng'ejep oje, enkiyang'et ai naomon, kake meeta enaitayu ndamunot aainei. Kaa naa aas? Kaomon ake te nkiyang'et ai kake aomon ake sii too ndamunot aainei narany te nkiyang'et naisis ake sii te narany ake sii te ndamunoto ai. Amu ti ninchooyo enashe te nkiyang'et ino, kaji eiko likae oton te ina tumo pee ejo “Esai” te ina ashe ino, te nemeyiolo enijoito? Keidim ataa sidai alang ina kishooroto ino e nashe, kake eitu eret ilo likae. Kashukoki Enkai enashe nchere kairo nanu too lng'ejepa alang intae pooki: kake ore ti atua entumo nayieu nairo irorei imiet loo ndamunot aainei, pee atum atuutai sii ninche lelo kulikae; alang te nairo irorei iip tomon te likae ng'ejep. Lalashera laainei emiaku nkera too ndamunot inyi. Ore too ntorrok entotiu ana nkera kutiti, kake ore too ndamunot inyi entimitunye. Etejo Lkigerot ti atua Nkitanapat: “Airorie nanu ele orere too ltung'ana le kulie kutukie, too nkutukie oo ltung'ana leeiking'a, kake ore etiu neijia nemaaning ninche nanu.” Neijia ajo Olaitoriani. Neaku ore ina kiroroto oo lng'ejepa mme olmonekie te lelo ooiruko kake te lelo leitu eiruk, kake ore elikioroto o rorei mme ene lelo leitu eiruk kake enoo looiruko. Te neiturrurro entumo pooki te nebo neiro pooki ng'ae too lng'ejepa, nepuonu ltung'ana ake duoo leitu eiruk, eimejo lelo, “Oloirirua pae iatata?” Kake te naa olkilikuai le Nkai elikioo pooki ng'ae nelotu oltung'ani ake duoo aashu ejing'u oleitu eiruk, ore embae pooki naning neputu metadamisho naleng. Ore nkisudorot o ltau lenye neibalunyeki newang'u. Nebatata ina kata te nkomom enye neomon Enkai, neibalunye ajo, “Esipa etii Enkai te nebo intae.” Aikijo aa naa, lalashera laainei? Te neaku nturrurrote, nebaiki neterretene likae eeta osinkolio anaa eeta enkisuma, e mbolunoto, e nkiroroto oo lng'ejepa aashu enkitawalata, kake enchoo nena pooki eaku ine nchetunoto ake e ilo turrur. Te neetae enkiroroto oo lng'ejepa, enchoo aare eiro aairukuruko anaa okuni nimintogiroo ine, naa enchoo eirukuruko, ninchosho oltung'ani obo ewalu, alimu enajo; naa te nemeetae olowalu, ninchosho ilo oiro to lng'ejep egira etiiki olturrur neirorie kewan neirorie Enkai. Ore lelo ooata olkilikuai oing'uaa Enkai, enchoo aare aashu okuni eiro, neineneng lelo kulikae irorei lenye; naa te neaku ore eirorita obo neinepu likae oton enatabolokoki, neng'as ilo le dukuya agira. Itumutumu pooki erishata nilimunyenye olkilikuai oing'uaa Enkai, moobo, pee eyiolou pooki neitagoli. Ore enkiyang'et e lelo ooata olkilikuai le Nkai ninche ooitore; amu ore Enkai, mme Enkai e ng'uyan kake ene seriani anaa enatiu too sirito pooki oo sinyat. Enchoo ng'oruo egira ti atua ntumoritin, amu meishoro meiroro. Ele kerreti esujita sirito pooki oo ltung'ana le Nkai. Enchoo ninche eigara olorere, amu neijia sii ninye ejo Olaitoriani. Ore pee eeta enayieu neyiolou, enchoo eikilikuan ilewa lenye ti ang, amu embae e nkurruna te neiro eng'oruoi etiiki entumo. Ainyoo! Ai te intae etang'asua olkilikuai le Nkai anaa ai intae ake etabaikia? Te neetae oltung'ani ojo keeta ninye olkilikuai le Nkai aashu ejo keeta nkishorot e nkiyang'et, entiaaki ore kuna naigeroki intae, Olaitoriani oitanapishe. Ore ake oloitaa ena parmetii enchoo sii ninye eaku parmetii. Neaku lalashera laainei, enosai olkilikuai le Nkai te nkisosion, naa emimit enkiroroto oo lng'ejepa, kake enchoo ebarakini aas pooki toki too nkiririkinot. Ore taata, lalashera laainei, ayieu naitadamu intae lelo Omon Supati latolikio intae natuutaka intae enejo. Nitang'amutua intae, nintasheito ti atua, naa ninye pee eitajeuni taata intae, te netaa mbung'itata aakurraki nena apa naitanapa nanu intae, nitisiputua aajo mme ene pesho enkirukoto inyi te ninye. Aitarasaka intae naiturukie ina natang'amua sii nanu: nchere etua Kristo te nkaraki ng'ok ang anaa enajo Lkigerot, netunukayioki ninye, neitopiwuoki te nkolong e uni anaa enajo Lkigerot, neipang'aka Kefa, neitoki lelo Tomon o Aare; ore te siadi ina neipang'aki nabo kata lalashera oolusoo te iip imiet, neton eishu lkumok le lelo o taata, kake etuata kulikae; ore te siadi ina neipang'aki Yakobo, neitoki ilkipaareta pooki; ore olobayie te pooki, naaipang'aki sii ninye nanu, atiu anaa ilo ini te nkata neme enenye. Amu aaipang'aka sii nanu, nanu oloti aisul ilkipaareta, nemaanarikino naaipoti aajo olkipaaret amu aisilisilo esirit e Nkai. Kake ore toki nara, nara te nkaraki empiris e Nkai, naa ore ina piris naaishoo ninye neitu eaku pesho ti atua nanu. Ore enatiu nanu otaasishe alang lelo kulikae pooki, kake mme nanu ilo kake ina piris e Nkai natii atua nanu. Neaku, ore etii nena, te nalikioo nanu aashu elikioo ninche ilo ake olkilikuai lang naa ninye iruko intae. Amaa te naa ketolikioyioki Kristo aajo eitopiwuoki too lootuata, kaji enyaaka atiu pee emanaa kulikae ti atua intae ejo meetae empiunoto oo lootuata? Te nemeetae empiunoto oo lootuata, netaa naa eitu eitopiuni Kristo kewan; naa te netaa eitu eitopiuni Kristo, naa pesho ele kilikuai likinosu, naa pesho sii ninye enkirukoto inyi. Ore etii nena, eitoki sii aaku kintaikitia iyiook Enkai shakenisho e lejare amu kinchakenikito aajo Enkai naitopiwuo Kristo; kake eitu naa eitopiu ninye te netaa meitopiuni ilootuata. Amu te nemeitopiuni ilootuata, netaa naa eitu sii ninye eitopiuni Kristo; naa te netaa eitu eitopiuni Kristo, naa pesho enkirukoto inyi neton itii atua ing'ok inyi. Netaa sii ore lelo ootuata etii atua Kristo neimina ntarasi. Te nemegiroo osiligi lang likisilig Kristo ena kishui nikiaata taata, nemeetae naa too ltung'ana pooki iltoluti oolang iyiook. Kake esipa tukul nchere eitopiwuoki Kristo too lootuata. Olng'anayioi le dukuya te lelo ootuata. Amu ore enkaraki naa oltung'ani obo oyaka enkop enkeeya, oltung'ani obo sii oyawua empiunoto oo lootuata. Ore ake anaa ina naye pooki ti atua Adam, neijia sii etiu keitopiuni kenya pooki ti atua Yesu Kristo. Kake elotu embae pooki te nkata enye: Kristo oituruko aitadedeyie, ore kenya, te neshukunye, neitoki lelo lenyena; neitoki alotu enkiting'oto, ina kata elotu aitarasaki Enkai Papa enkitoria, eidipa ninye aishie nkitoriat pooki, o nkidimat pooki o engolon. Amu eng'as ake Kristo aitoreisho o metaba anaa nepik Enkai lmang'ati lenyena pooki abori nkejek enyena; ore olmang'atinta obayie oishieki naa keeya. Amu, “Eitadowuo Enkai ntokitin pooki meetu abori nkejek enyena.” Ore taata te nejo Lkigerot eitadowuoki ntokitin pooki, eibala ajo metii ninye Enkai esiaana, amu Enkai naa apa naitadowuo ntokitin pooki aisho Kristo meitoria. Kake ore pee eidipi aaitadou ntokitin pooki abori ilo Inoti lenye, ina kata kenya eitadouni ninye kewan abori Enkai, neitadowuo ntokitin pooki abori ninye, peyie eitore Enkai pooki toki. Ore te nemeetae empiunoto kaji eret lelo tung'ana oopuo meibatisai te rishata e lelo ootuata? Amaa te nemeitopiuni tukul ilootuata, aainyo naa pee maserian saai pooki? Esipa ajoki intae, lalashera laainei, ore te nkaraki nawuasare intae Ilkiristiano laaijo nanu, kaye nanu anaa ake. Amaa te naa kataarare ng'uesi te Efeso te tung'anisho ai ake duoo, kaji napaji eret ina te nanu? Naa te netaa meitopiuni ilootuata, “Ematadaata naa nikiokisho, amu eikiyooki aaye taaisere,” anaa enajo Lkigerot. Emincho eitapong'ori intae: “Ore encholiek oo lkiminchal keinyal olkuaak.” Enoto intae olkuaak sidai, emienikino ng'ok. Etii kulikae linyi lemeeta eyiolounoto e Nkai. Najo neijia pee aitukurru intae. Kake taata nejo likae, “Kaji eikoni te neitopiuni ilootuata? Kaji eikununo osesen otum ninche?” Ebaa ena modai ninkilikuanua! Ore ina niun iyie openy nemeeta nchere eitu engas aye pee etum atubulu. Ore ina niun naa enkantererai ake, naa ene nkano aashu ene ae ake tapa. Enkai naishoo mpukunot enye anaa enayiewuaki ninye enkantererai ake pooki. Neme inempukunoto nabo nkiri pooki. Empukunoto nabo nkiri o ltung'ani, naa ai inoo ng'uesi, naa ai noo motonyi, naa ai noo sinkir. Eetaeseseni le keper neetae seseni le nkop; kake eeta seseni le keper enkishiaa enye neeta seseni le nkop enenye. Eeta enkolong enkishiaa enye neeta olapa enenye; keeta doi ninye olakira obo enkishiaa e wang'an nalang eno likae. Neijia etiu empiunoto oo lootuata. Etiu anaa enkantererai, kenukari osesen te nkop eidaaya, neitopiuni te mpukunoto nemeidaaya ai kata. Kenukari te menatisho, neitopiuni te nkishiaa. Keshal enukari, neitopiuni eiputa engolon. Enukari aa osesen le na kishon, neitopiuni aa ole nkiyang'et. Eetaeosesen le na kishon, kake eetae sii likae sesen le nkiyang'et. Ina doi pee ejo Lkigerot, “Neaku ilo tung'ani oiturukuo, Adam, osesen oishu,” ore Adam obayie, neaku oloishoru enkiyang'et enkishui. Eng'ura nchere mme ene nkiyang'et naiturukuo, kake ina e na kishon, neitoki taa ina e nkiyang'et. Enkop apa eing'uaa oltung'ani oiturukuo, too nkulupuok eitobiruaki; naa shumata eing'uaa ilo tung'ani li are. Ore apa anaa enatiu oltung'ani loo nkulupuok neijia sii etiu lelo laa loo nkulupuok, ore anaa enatiu oltung'ani le keper naa neijia sii etiu ile keper. Ore anaa enikiwaita nyaanyukie e ilo tung'ani loo nkulupuok, ai kiya sii nyaanyukie e ilo tung'ani le keper. Ore enajoito, lalashera laainei, naa ena; meidim nkiri o sarge aatujung enkitoria e Nkai, nemeidim entoki naidaaya atujung'o enkitoria e Nkai, nemeidim entoki naidaaya atujung'o enemeidaaya. Entoning, embae naisudoro aliki intae: mikiye pooki kake keibelekenyi kenya iyiook pooki, te nabo kata, te nkirriapata e nkong'u; amu keru ontarumpeta, neitopiuni ilootuata nelakuni aaoru keeya ntarasi, neibelekenyi iyiook. Amu ore nena pooki naaye neaku ake inemeye. Ore pee eaku etalakuaki nena naaye aaoru keeya, netaa nena naaye inemeye, neitabari ina kata ina nasira too Lkigerot nesipayu nchere. “Etoijoyioki keeya ti atua olkishuroto.” “Keeya, koree emirishoi ino? Keeya, koree enoshi bae ino?” Ore oshi embae nang'orishore keeya naa ng'ok, naa nkitanapat engolon oo ng'ok: kake ashe te nkai naishoo yiook matimirisho to Laitoriani lang Yesu Kristo. Ore te nkaraki nena, lalashera laainei lanyor, entasheito, entaa ilemeigusugusieki, entaboreyia anaa ake te siaai o Laitoriani, iyiololo aajo ore ti atua Olaitoriani mme ene pesho esiaai inyi. Ore ti alo esotore naishori isinyat enkona sii intae anaa ina naitanapa isirito e Galatia. Ore te nkolong e nkiterata e wiki ninchosho eitengel pooki tung'ani enkiti toki anaa enatudupe; paa te nalotu nemeitokini aata esotore. Entegelu kulikae linyi, ore pee abau, nairriwaa ninche naisho mpala mewaita ina kishorunoto inyi Yerusalem. Naa te neishiakino nalo sii nanu, nikiriamari. Kalotu ina alo atang'asa aimaa Makedonia amu kayieu naimaa Makedonia; nebaiki nang'as aton te nebo aashu abik te nebo intae te nkata e enkijape, paa intae likipuonunu aaitobiraa te nene wuejitin pooki nalo. Amu mayieu taata neaku kalotu ake aimaa intae, kaisilig ajo kabik te nebo intae te nkata naje, te neishoru Olaitoriani. Kang'as abik te Efeso o metabau Pentekoste; aatabolokoki empaash e siaai nadupa, naa kumok ilmang'ati. Ore te nelotu Timoteo, entodol ake pee meaku ketum ae toki naure etii te nebo intae, amu esiaai o Laitoriani easita anaa nanu, neaku emincho ake etumi oltung'ani omenaa ninye. Entaretoi meshomo te seriani pee elotu enatii. Amu aanyita nanu neanyita sii lalashera. Ore ti alo olalashe lang Apolo, aitirrishaka oleng pee elotu ine nitii te nebo lelo alashera; kake meyieu ninye nelotu te taata, kake kelotu te nkata naatae erishata. Entorripoto, entasheito oleng te nkirukoto, nipijuju, entagol. Enchoo eaku ore pooki bae niasiasa, entaas te nyorrata. Ilalashera laainei, iyiololo intae enkaji e Stefana ninche naaitera aaibelekenyakino Enkai te Akaia netasheikinote aaisiaai isinyat. Aisisaki intae ajoki entonyorrai erikore oo ltung'ana leeijo lelo, o ene pooki ng'ae oisiaaisho te nebo intae, o sinka. Atishipe naleng etabawua Stefana, o Fortunatu o Akaika, amu erishata inyi nimitii etijing'a ninche amu aayeng'iyeng'ie embaunoto enye ndamunot naa neijia itiuu sii intae. Entayioloito ake tipat oo ltung'ana laaijo kulo. Eiroroki intae sirito e Asia. Ore Akuila o Priska, te nebo esirit natii enkaji enye neirriwaki intae enkirorokino ti atua Olaitoriani. Eiroroki intae ilalashera pooki. Erorokinoto te ng'ututata nasinya. Nanu Paulo, oirriwaki intae ena kirorokino te nkaina ai makewan. Te netii obo lemenyor Olaitoriani inchoo metaa kediaa ilo! Olaitoriani lang, wou! Metaa te nebo intae empiris o Laitoriani Yesu. Airriwaki intae pooki enyorrata ai ti atua Kristo Yesu. Paulo, olkipaaret le Kristo Yesu te yieunoto e Nkai, o lalashe lang Timoteo, esirit e Nkai natii Korintio aigeroki o lelo sinyat ootii pooki wueji te Akaia. Metaa eninyi empiris o eseriani naing'uaa Enkai Papa o Laitoriani lang Yesu Kristo. Meisisi Enkai nara Papa lo Laitoriani lang Yesu, Papa lo lng'ur lemeish ntarasi enkilejilej enye. Ninye oilejilej iyiook ti atua sinaitin lang pooki pee kindim sii iyiook aailejileja lkulikae ooata osina te ina kilejilej nailejilejie iyiook Enkai. Amu te neidimua sii ninche iyiook emion e Kristo, neijia sii ninye eikuna ina kilejilej nikitang'amutua te nkaraki Kristo. Te neinosieki iyiook osina keji pee eilejileji intae neitajeuni; naa te neilejileji iyiook kejo Enkai pee eilejilej intae ti nintasheshe to sina leeijo ele likitii; ore osiligi lang te intae nemeigusugus, amu eikiyiolo aajo, ore pee ing'arierie iyiook osina, ning'arierie sii iyiook ina kilejilej. Amu mikiyieu nimiyiololo lalashera, lang eneba enyamali nikinoto te Asia. Eirotokoki iyiook inaalang engolon ang o metaba anaa neish iyiook osiligi le nkishui. O metaa aikitejo etudung'okoki iyiook enkiguana e keeya, naa keji apa pee mikingarakino ake ate kake nikingarakino Enkai, naitopiu ilootuata. Ninye otasarua iyiook te batisho naitureisho e keeya, naa keitoki ake aigil asaru iyiook. Ninye kitipika osiligi lang nchere keitoki ake aigil asaru te nkomono. Neaku Enkai eisho ltung'ana kumok enashe te nkaraki iyiook te easata enye e mpiris naitaasa iyiook. Amu ena shakenisho ake oo ltoiloishi loo ltauja lang kingidare, nchere ore ti atua ltung'ana, neisul ti atua intae, kintoriokito iyiook aairo sipat naaisho Enkai iyiook, naa te mpiris e Nkai mme te nkarriyiano e ng'eno e tung'ani. Ore kulo rorei lisomama taata nining'ung'u, kuna naajoito ake elimu ninche. Ore o taata nchot ake oo mbaa iyiololo te iyiook. Naisilig ajo iyookiki aayiolou tukul aamitu, te ina olong o Laitoriani Yesu, niyookiki ina kata aadol aajo iatata esipata niwuasarere te iyiook anaa enikiaata iyiook te intae. Enkaraki apa naa kang'idare ena pee atejo kalotu abaiki intae. Kayieu apa naitaas intae kuna are sidain, eituruk ayieu apa naimaa intae alo Makedonia naitoki sii aimu intae ashukunye; nayieu sii apa nikiretoo alo Yudea. Amaa te kuna pooki, ijojo kanyaaka aing'ash? Ana ijojo te kiri ake duoo aidipa nkiguanat aainei neaku kairiamaki ajo “Ee” najo sii “A'a?” Ore anaa pee eisiligayu Enkai, mme ake ninye ororei lang te intae ole “Ee” o “A'a.” Ore ilo Inoti le Nkai Yesu Kristo, likitolikioitie iyiook ti atua intae, o Silfanos, o Timoteo, o nanu, neme A'a; kake ore te ninye naa Ee. Ti atua ninye etejo Enkai “Ee” too nkisiligat enyena pooki; na ina paa te ninye kijo Esai kisis Enkai. Enkai doi naitagol indung'ot pokira are, iyiook o intae ti atua Kristo. Enkai doi natubukoko iyiook eilata, nepik iyiook olmishire ojo kira ilenyena, neisho iyiook Enkiyang'et ti atua ltauja lang anaa embae naiturumu kulie naapuonu. Enkai aipot metaa shakeni lai nchere intae atejo aduaaya pee eitu aigil alotu Korintio. Mme doi nena baa nemeeta nchere pee eitu irukuruku kisikong'aki intae; eidipa pae atuunoyu enkirukoto inyi. Eikisiaaisho doi te nebo intae too mbaa e nchipai inyi maate. Ina pee atejo malotu aigilie, intae ai baikinoto name. Naa omaa te naitame nanu intae, aing'ae aitoki nanu ang'idare? Eilo laitame? Ina pee aigeroko intae aiko neijia, pee te nalotu nemaitame lelo ooishiaakino neaku ninche laaiting'id. Amu ayiolo intae ajo ang'ida nanu ning'idada sii intae. Aigeroko intae aabore osina kitok o emion atua oltau, o too lkiyio kumok, neme kajo pee aitame intae, kake kajo pee iyiolouu eneba enyorrata nanyor nanu intae. Te neyawua likae emion, neme nanu eyaka, kake kajo intae pooki, hoo nemayieu napon. Ore ilo otiu neijia netabaikia ina aa kenoto earata naba neijia too ltung'ana kumok. Intae taata etioorie naa enaikash te nipalakiki neilejileji ninye, pee meidimu emion nalusoo. Asai naa intae enyaaki entadedeyie enyorrata ninyorrinyorro ninye. Naa ina doi apa pee aigeroko intae, pee atem intae ayiolou te naa irara ilooning'isho too mbaa pooki. Ore pooki ng'ae lipalakiki embae ake pooki, natapalaka sii nanu. Amu ore olatapalaka, te naa kaata enatapalaka, nataasa ina te nkaraki intae, anaa ketii Kristo, ine. Eikiyiolo losekin le sheitani nimikiyieu neidimu iyiook. Ore apa pee alotu Troas alikioo Lomon Supati le Kristo, kaabolokino tukul kutukaji maisiaayia Olaitoriani; kake eitu aapal maanyamal oltau amu eitu atum olalashe lai Tito; neaku atung'uayie ninche nalo Makedonia. Kake ashe te Nkai, narik iyiook maisula anaa ake te Kristo, neasishore iyiook maibulunye e yiolounoto e Kristo pooki wueji anaa esonkoyo narropil. Eikira doi iyiook erropili e Kristo kewan naing'uaa Enkai alo enetii lelo oopuo erruorroto, erropili naa enkishui te lelo ooitajeuni, naa enkeeya te lelo ooye. Aing'ae doi ilo obaya te kuna pooki? Mikitiu iyiook anaa kulikae kumok oopuo aaitaa olkilikuai le Nkai anaa nkutiti baa nemeeta tipat; kiro iyiook anaa ltung'ana oojo mbaa naasipa, naa Enkai eing'uaa, naa te dukuya Enkai kiro, anaa ltung'ana ootii atua Kristo. Ketaa ate kinteru aaitadaraa aaigil? Eikiaatayie iyiook tipat, enaatayie kulikae, eikiaatayie tipat mpala naarrepakini iyiook intae aashu nirrepiepie intae iyiook? Intae ate empalai e rrepet ang, naigero to ltauja lang, nayioloi neisoma ltung'ana pooki. Eibala nchere irara intae empalai naing'uaa Kristo, naa iyiook ooitarasutua neme olbukoi eigerore kake Enkiyang'et e Nkai naishu, neme too soito eigero kake too ltauja loo ltung'ana. Te Kristo kidup iyiook aatejo neijia ti alo Enkai. Ore ti atua ate nimikiaata toki. Nimikijo atua iyiook ate eing'uaa ae toki. Enkai eing'uaa enkidimata ang, naa ninye oishoo iyiook inaaidip nkolati ang pooki ina kata pee eitaa iyiook ilaisiaayiak lo sotua ng'ejuk leme too nkitanapat ake naasira kake te nkiyang'et; amu keeya eyau nena kitanapat naasira, kake te enkishui e Nkiyang'et. Ore enkishorunoto e nena kitanapat, naaigeroki too sirat lo soit, naa keeya eiting'oko. Kake ore ake eyia neewuo te nkishiaa e nking'asia o metaa meitieu Siraeli aaing'ura enkomom e Musa te nkaraki ewang'an enye, hoo naa enaishari apake. Kebaa elusoo, naa enkishiaa nalotu te nkishorunoto e Nkiyang'et? Naa amaa te neiriamunore enkishiaa naba neijia enkishorunoto oo nkitanapat naayau endung'okinoto e nkiguana, kebaa naa elusoo enkishiaa e nkishorunoto e ina Kiyang'et naitaa iyiook ilemeetakinore Enkai? Esipa, ore tena bae, eina apa naata enkishiaa neewuo aaku meeta enkishiaa tukul, te nkaraki ina kishiaa nalus teine. Amu te neeta apa ina nang'ishari enkishiaa enye, kebaa naa elusoo oleng enkishiaa e ina nabik intarasi? Ore enkaraki naa ele osiligi lang, eikiro kintieu. Mikitiu anaa Musa, laa keimul apa enkomom pee meduaaya Siraeli eishari ina wang'an. Eitagoloki apa lukuny enye; amu ore o taata, eton ake eitu eiwuang'ieki ina kimulata te neisomai Lkigerot lo sotua musana. Ti atua Kristo ake eiwuang'ieki. Ee, ore o taata, te neisomai mbukui e Musa, netiu anaa keimulumula lukuny e lelo ooning; “Hoo naa” anaa enatejo Lkigerot ti alo Musa, “ore ake pee eibelekenyakino Olaitoriani neiwuang'ieki ina kimulata.” Ore ilo “Aitoriani” naa ninye Enkiyang'et ore pooki wueji netii Enkiyang'et o Laitoriani, netii elakunoto. Ore iyiook, pooki nikitaa ilemeimula nkomomi, nikiwariwaru anaa kiok teina kishiaa o Laitoriani, eibelekenyitai iyiook matotiuo anaa ninye eponari ake ina kishiaa. Enkias o Laitoriani, ena naa Enkiyang'et ninye. Neaku, ore anaa ina naisho iyiook Enkai ena kisiaaiyiare to lng'ur lenye, mikidukenya iyiook. Kitejo mikiyieu nkiaasin pooki e nkurruna o nemeeta anyit; nikinchu mikiaata losekin torrok. Nimikordil ororei le Nkai kake esipata kiyau enewang pee kirrep ate to ltoilo lo ltau le pooki ng'ae, anaa loodolita Enkai. Amu te naa keimulumularo Lomon lang Supati, naa te lelo ake oopuo enkiminata eimulumularo. Enkai e na kop naitamodoo nkonyek e kulo lemeiruk, pee medol ewang'an oo Lomon Supati le nkishiaa e Kristo, laa ninye nyaanyukie e Nkai. Mme ate kilikioo iyiook; Kristo Yesu kilikioo aajo Olaitoriani, nikira iyiook isinkan linyi, te nkaraki Yesu. Amu ina Ai natejo, “Inchoo metawang'a ewang'an te naimin,” ninye natawang'a ti atua ltauja, lang ayaki iyiook ewang'an e yiolounoto e nkitoo e Nkai te nkomom e Kristo. Kake aikiaata iyiook ele shumata atua masaa oo nkulupuok pee eliooyu nchere ore ina golon magilani naa Enkai eing'uaa, mme atua iyiook ate. Eironyitai iyiook te pooki oitoi, kake eitu epurdi iyiook, neimagitai iyiook kake eitu kipalari; nenang'ieki iyiook enkop, nebatati iyiook kake eitu sii emuti, neinosieki iyiook osina kake eitu sii eiturrarri iyiook. Kinapita anaa ake too seseni lang keeya e Yesu, pee eitoduaari enkishui e Yesu ti atua seseni lang. Amu ore iyiook, hoo nikinchu keishoori ake iyiook pooki kata aaisho keeya te nkaraki Yesu, peyie eitoduaari sii enkishui e Yesu te kulo seseni lang ooye kenyake. Neaku easisho ake keeya ti atua iyiook, kake enkishui naasisho ti atua intae. Kake kiaata enkirukoto. Ejo Lkigerot, “Enkirukoto apa aata, pee airoro.” Ina kiyang'et ake e nkirukoto kiaata sii iyiook, naa ina sii iyiook pee kiro; amu aikiyiolo aajo ore ilo oitopiwuo Olaitoriani Yesu keitopiu sii ninche yiook te nebo Yesu neyau iyiook te nebo intae maetu enetii ninye. Naa enkaraki intae pee etiu kuna pooki. Paa ore anaa enaponari empiris e Nkai too ltung'ana kumok o kulikae ake, neponaa enkishooroto e nashe te nkitoo e Nkai. Enkaraki e na pee mikidukenya. Ore hoo naa kemusanu ake ele tung'ani li oriong amuta, kake ore ilo tung'ani lang li atua neitang'ejuki nkolong'i pooki. Ole nkiti kata ake osina lang, kake eyaki iyiook enkishiaa kitok oo ntarasi nemeetae ae toki natemakini, amu mme kuna naalioo king'orita kake nena nemelioo. Ore kuna naalioo naa ne nkiti kata; ore nena nemelioo naa noo ntarasi. Amu aikiyiolo aajo te neidaikieki ele ng'obor te nkop likimanya nikiaata emanyisho naing'uaa Enkai, e nkaji neme too nkai eitobiraki, nabikoo te shumata ntarasi. Ore doi kitii ele ng'obor eikinchir kiyieu erripoto e ina ang e keper, paa ore eitoipito iyiook ina nemeinepuni iyiook mikinchopo. Amu ore kitii ele ng'obor, nikinchirita te le ola lang. Mikiyieu nikinturaa osesen le nkop, kake kiyieu nikitum erripoto e ilo ng'ejuk, paa ore ilo oye neijori te nkishui. Ore ilo oitobiraka iyiook ena toki naa Enkai, laa ninye oishoo iyiook Enkiyang'et meitisipa. Ore enkaraki ina eikintieusho iyiook oshi ake, amu aikiyiolo aajo ore eton kitii ang te le sesen, nikilamita Olaitoriani. Enkirukoto kipuoyie, neme enduaata. Eikintieusho iyiook, naa aikiyieu napaji naa eikipuo aing'uaa ele sesen pee kitii ang te nebo Olaitoriani. Metaa ti nikitii ena ang, aashu ti nikitii idia, ninye kiyieu nikintiship oleng. Amu kintashe ake pooki te dukuya olorika le Kristo le nkiguana, neng'amu pooki ng'ae inaairirikino nena naataasa to sesen aa supati aashu aa torrok. Ore naa kiyiolo euriata o Laitoriani, nikiyietu iltung'ana keyiolo Enkai iyiook tukul enikinkununo, naisilig iyiololo sii intae enikinkununo. Mme taa ate kintoki aaisisaki intae, intae doi kincho erishata entawuasare iyiook, nitumutumu eniwalikiki lelo oowuasare enkitoo o ltung'ani, neme enatiu oltau lenye. Te naa koloirirua kiaata iyiook naa enkaraki Enkai naa tenelulung'a iyiook ilukuny naa enkaraki intae. Amu enyorrata e Kristo naitore iyiook. Ena bae kinting'okito iyiook nchere: etua ilo obo te nkaraki pooki; ore enkaraki ina etuata pooki. Etua ninye te nkaraki pooki, paa ore lelo ooishu nemeishu te nkaraki ate ake kake te nkaraki ilo otua nenyaakaki aaitopiu te nkaraki ninche. Ore naa ebaiki ena kata neito dukuya, nimikishilaa iyiook oltung'ani, te mpukunoto e tung'anisho, hoo nikitishilaitie apa Kristo te mpukunoto e tung'anisho, meekure iyiook kishilaa ninye aaiko neijia neaku te netii oltung'ani atua Kristo, netaa enkitayunoto ng'ejuk etulusoyie enapa musana, ng'ura nelotu ng'ejuk. Enkai eing'uaa nena pooki, naa ninye oitoning'o iyiook o kewan te Kristo neisho iyiook esiaai maitoning'o ilkulikae, aa taa, Enkai apa tiatua Kristo naitoning'o e nkop o kewan enye. Meshum ninye nemeikenaki iltung'ana nkitadiaat enye, kake eisiliga iyiook aisho olkilikuai oning'oreki ninye. Neaku kira lkiliku le Kristo, Enkai makewan, nasaisho te iyiook. Kitasayia intae te Kristo entoning'ore Enkai. Meeta apa Kristo ng'ok. Kake eitaa Enkai ninye eng'oki te rishata ang iyiook, paa te ninye king'ar esupatisho e Nkai. Ore kira laisiaayiak te nebo ninye nikisai intae eming'amaa empiris e Nkai pesho; amu ejo ninye, “Ore te nkata namunyak aatoning'o nanu iyie; ore te nkolong e njeunoto naatareto nanu iyie.” Ng'ura, taata ina kata namunyak; ng'ura, taata ina olong e njeunoto. Mikiaata iyiook olkob likipikaki hoo likae tung'ani, pee metumi ake olopik esiaai ang entiyoto. Kira ilaisiaayiak le Nkai ooitobiraa ate to mbaa pooki etiu enatiu: niking'iri ti atua enkinyala, too ngolikinot o too nkirrikinot, too ooshot o too o larrabali ti atua olorere, too nkiaasin naagol, nikirripo, nikiaata esumash, ore mikiaata ntiyot, nikiaata eyiolounoto, o eng'iriata o lng'ur; te Nkiyang'et Sinyati, o te nyorrata, kilikioo esipata, naa te ngolon e Nkai; too masaa e supatisho te tatene o te kedianye, eyanyiti iyiook o meyanyiti; einorri iyiook o meinorri. Keitaai iyiook ilalejak, kake kira asipak; netiu anaa aimeyioloi iyiook neyioloi sii oleng; kiye, nikitiu anaa looyena, naa ng'ura kinchu iyiook, kake eitu eari iyiook matuata; neinyalitai iyiook, niking'ida anaa ake; kira aisinak, kake kintaa iyiook ilkumok karsisi; anaa ilemeeta toki, nikiaata pooki toki. Lo Korintio, eikirorie intae aabaraki, newang ltauja lang naleng; mikijo maibooi intae, intae ooning nimbooyoyo ate. Entawang'a sii taata ltauja linyi. Airorie intae anaa olpayian oirorie nkera enyena. Emishulare aaku nabo o lelo lemeiruk. Ai ti aji eshula supati o ntorrok? Kaa shula eeta ewang'an o enaimin? Kening'o ae kata Kristo o Belial? Ainyoo eng'ar oloiruko o leitu eiruk? Ainyoo eng'arie enkaji e Nkai enoo nkitanyaanyukot naaitaai nkaitin? Amu kira iyiook enkaji e Nkai naishu. Anaa enatejo Enkai, “Kamany atua ninche nairiamariyie ninche; naaku Enkai enye, neaku ninche ltung'ana laainei. Enkaraki ina entupuku ti atua ninche, entoorunye entung'uai ninche, Olaitoriani ojo. Emiseyie entoki naiduruk, naa kang'amu nanu intae, naaku nanu Papa linyi niaakuku intae layiok o ntoyie aainei, Olaitoriani Magilani ojo.” Ore enkaraki nikiaata iyiook kuna kisiligat, ilanyor laainei, emaitukuoi enkiduruk pooki o sesen aashu ene nkiyang'et, nikintabaya esinyatisho te uriata e Nkai. Enchoo iyiook erishata ti atua ltauja linyi. Mikiaata iyiook olikintaasa enemesipa, nimikiaata olikiminie nimikiaata olikimaga. Nemajo neijia aa intae adung'oki enkinguena; aidipa atiaaki intae nchere kinyor intae enaa eikiyieu ake niking'arie intae embae pooki nalotu nara keeya aashu puaan. Kaitieu nanu airorie intae; ekawuasare intae. Aabore enkilejilejata; ore sinaitin lang pooki kaadooyo nanu eng'ida. Ekesipa nchere ore pee kipuonu Makedonia neitu eishori iyiook mayagie. Kinoto osina too nkaloli pooki: eetae iarat ti oriong, o enkuretisho ti atua. Kake ore Enkai, naa ninye naitagol ilooata, osina, neitagol iyiook te mbaunoto e Tito; neme te mbaunoto enye ake, kake o te nkitagolo nanoto ti atua intae. Etolikio iyiook ina niyiewu intae naleng nidolidolo, neliki iyiook olkiyioi linyi, nitaa intae ilaamitu nanu. Ina bae naaitishipa oleng. Amu te naa kaitamio intae (hoo te naainosua) te mpalai ai, nemairridu, amu adol ajo eitamio intae ina palai, hoo te naa te nkiti rishata ake; kashipa taata, neme te nkaraki naitamio intae, kake te nkaraki nayawua enkilishoto inyi enkirridunoto, iwaita ina mion inyi anaa enayieu apa Enkai, neaku meetae hoo enatalang'a intae neitu itumutumu enkaraki yiook. Ore emion nainyiaaya oltung'ani enkalo nanyor Enkai naa keyau enkirridunoto nabaiki enjeunoto nemeitoki aata enkusaka, kake ore emion e nkop keeya eyau. Eng'ura enaba enayaka intae ena sipata niwaita ina mion to rrekie onyor Enkai: eng'ura entejo kebaa enkisosion, kebaa eyieunoto niyieuu nimbalielie sipat inyi; kebaa engoro, kebaa enkuretisho, kebaa yieuna, kebaa enyuaata, kebaa enkitamioto! Ore too nkoitoi pooki nintoduaaitie intae nchere miaatata entiyoto te ina bae. Neaku taa, ore hoo naigeroko nanu intae, eitu aigeroki intae te nkaraki ilo oinyalishe, neme sii te nkaraki ilo oinyalaki, kake te nkaraki pee aitodol intae te dukuya Enkai nchere irowuarere ijing'ijing'i enkalo ang. Enkaraki ena pee eitagoloki ltauja lang. Neme lkulalang ake eilejilejaki kake eikiting'idate naleng te nchipai e Tito. Iyeng'iyeng'ie intae pooki indamunot enyena. Te naa taa oshi katawuasare nanu intae te netii ninye, eitu kintukurrurru intae nanu. Mikiaata ai nikitejo te dukuya Tito natisipe. Enyaaka alusoo enyorrata nanyor ninye intae to ltau lenye te nedamu ina nitoning'ishote o to lokirikiri. Ang'ida nanu oleng amu kaidim aisiliga intae katukul. Eikiyieu niyiolouu intae ilalashera, enataasa empiris e Nkai naishooki sirito e Makedonia. Etetemaki naleng to sina, kake ore ti atua nena pooki nedooyo eng'ida enye, naa ore hoo naa aisinak naleng, neitulusoitie elengon te nkishooroto enye. Amu kaidim nanu atiaaki intae nchere eishorutua naairirikino nena naata neitoki aaitogiroo ine. Ore te yieunoto enye maate, eitirrishakita iyiook naleng eyieu neishori metang'ara eretoto nareti ltung'ana le Nkai. Netogiroitie kuna pooki enikinteiki apa iyiook, amu ate etang'asa aaisho Olaitoriani paa keitoki taa, te yieunoto e Nkai, aaisho iyiook. Ina pee kitiaakita Tito meitabai enkitobirunoto e na kishooroto ti atua intae; aa ninye apake oitasheikio te nkiterunoto. Ore anaa enituluso te pooki toki, ti atua enkirukoto, ti atua rorei, ti atua eyiolounoto, ti atua enyuaata pooki o ti atua enyorata inyi te iyiook; entoduaai inchere ilusoo sii te na siaai e mpiris. Majo ena nkaraki intae. Kajo pee aitisip te nkirowuaj e kulikae inchere kedede sii ninye enyorrata inyi. Iyiololo empiris o Laitoriani lang Yesu Kristo. Iyiololo eneba enkarsisisho enye! Kake etaa aisinani te nkaraki intae, peyie iakuku intae karsisi te nkaraki aisinanisho enye. Neaku kaliki intae enajo nanu te ina bae. Ore te elde ari oishari naa intae ooitera aayieu niretishosho naa intae sii ooitera aaiko neijia. Keishiaakino na taata nindipidipi ina apa ninterutua. Iyiewu apa oleng niretishosho ina kata, neaku entabai naa eririki anaa e niaatata. Te nesipa eyieu oltung'ani neishooyo, nemejoki Enkai ninye meishooi entoki nemeeta, kake eng'amu ina naata eishorua. Eitu ajo meiteneneng'i ilolan le kulikae neponari olinyi. Enchoo easi anaa nkiririkinot. Ore taata, dupoto inyi naret laikin enye; nerisioroyu nkaloli pooki ina kata. Anaa enejo lkigerot, “Ore ilo otasotuo esapuk neitu etum enalusoo, ore olotasotuo enkiti neitu eing'atiki.” Kake ashe te Nkai naishoo Tito enyuaata metaa keyieu neret intae anaa enikitiu iyiook. Iyiook apa ootiaakita meeu enitii nenyorraa, kake eyieu apake ninye openy nelotu abaiki intae. Kirriu taata te nebo ninye likae alashe oning'o too sirito pooki te siaai e likioroto oo Lomon Supati. Neme doi ina ake, ketegelutua sirito ninye meisiritore iyiook neaku ninye oya ena kishoroto nikiramatita te nkaraki enkitoo o Laitoriani kewan, neitoduaaya sii enyuaata ang maate. Kinyokita pee metumi ake entiyoto naipotokini iyiook likae te ramatata e na kishorunoto e lengon; kiyieu nikias esupat neme te dukuya Olaitoriani ake, kake o te dukuya iltung'ana. Nikirriwaa te nebo ninche likae ake alashe lang likitetema enkirowuaj enye nkatitin kumok too nkoitoi kumok, naa ninye taata oirowua oleng te nkaraki enkisiligata kitok naata ti atua intae. Ore te Tito, ole ncholiek ai naa olaisiaayiani te nebo nanu te nkaraki intae, ore ti alo kulo lalashera lang, ilkiliku loo sirito, neisisi Kristo te nkaraki ninche. Entoduaa naa enyorrata inyi o ina nikiwuasare intae te kulo tung'ana, ina edol isirito. Ore ti alo ena siaai naitaasi isinyat neme nanu oigeroki intae. Kayiolo eneba eyieunoto niyieuu niretirete, kawuasare oshi aimaki intae too Lmakedonia, naliki ajoki eidipa apa Akaia esotore e pooki toki te lde ari oishari. Enyuaata inyi nairowuajie ilkumok lenye. Kake airriu lalashera pee aitadedeyie nchere ore nena pooki nikiimakita te intae te na bae neibalieki nchere esipa anaa enatejo neijia itiuu. Ayieu nelulung'a nkuninyi pooki anaa ina natejo nanu ndipa aaitabai. Pee meaku ake te nairiamunore kulikae le Makedonia nikinepu intae, eitu ianyishosho, neme iyiook ake ookurru, kake neijia itiuu sii intae, amu keaku kintuluso olwuasa. Ina pee atoduaa ajo keishiaakino ake nairriu lalashera meituruku aapuonu enitii te dukuya neitobir ina kishoroto nitejo nchoruru. Naa te neetuo eirrag eidipe neitoduaaya ina nchere intae ate ootonyorra aaishoru, nemetii olmonir. Entadamu ena nchere ore ilo oun te nkutisho nesotu te nkutisho, ore ilo oun te nkumoi nesotu sii te nkumoi. Tumuta pooki tung'ani to ndamunot inono tayiolo entoki ninchooyo inyor metii olng'ash; ilo oishoru te nchipai enyor Enkai. Keidim Enkai aishoo intae inoo nkolati inyi neitulusoo, pee itumutumu aataret esiaai pooki supat enkaraki niaatata anaake inaaidip intae te pooki toki. Anaa enajo Lkigerot, “Eidapashaka pesho, eishoo laisinak, nebik esupatisho enye ntarasi.” Ore ilo oisho olaunoni lanterera neisho emukate olonya, ninye oisho intae ilanterera neitubul; ninye oponaa esotore e nkaminino inyi. Ninye oitaa intae karsisi oleng pee itumutumu aataleng too nkoitoi pooki, nedumaki ina lkulikae meishoo Enkai enchunet too nikitaasa iyiook. Amu ore ena siaai nikiasita mme ltung'ana le Nkai ake eretito; kelusoo sii te nashe nashukokini Enkai eing'uaa ltung'ana kumok. Ore ena siaai e nkisiaayiare naa ninye naitadedeyie enkirukoto inyi, neisis ninche Enkai te ina; amu mme ororei supat le Kristo ake ilimumu kake itoning'o sii ing'aring'ara pooki niaatata te lengon inyi te ninche o too lkulikae pooki. Neyooki ninche aadol enking'asia e supatisho e Nkai te nkishorunoto enye, nemeinosunoyu. Ashe te Nkai te nkishorunoto enye nemeimakinoyu! Nanu Paulo taata osai intae te nkaripo o te mborron e Kristo kewan, nanu oloshi obor enotote nkomomi kake neitieu intae enoshi kata mitii. Aomon intae, te nalotu enitii pee meaku kaitodolu empijan natiu anaa enoshi naidim aitoduaa lelo oojo mbaa e nkop naadumu iyiook mataasisho. Ore hoo naa enkop kitii kinchu, mme enjore e nkop kitii. Ore masaa nikiarare neme ake masaa o larrabal; kake keeta nkunaang enkidimata e Enkai enaa keparripar isempewueti. Eikiparripar iyiook enchankar oo monko; o pooki toki naitashe to lwuasa aibooyo eyiolounoto e Enkai; nikimbung aaen nkibirribirrat ake pooki metoning'o Kristo; naa ore pee eaku italaari aaishoru ate katukul, nikiterretenate pee kintame enkiaas pooki e ilo lemening'isho. Eng'ura nena baa naatii dukuya nkonyek inyi. Ketayiolo oltung'ani tukul ajo ole Kristo? Sidai, kake enchoo ilo menyaaki aikenaa ena ai bae nchere: kira sii iyiook ile Kristo anaa pee era ninye. Ore te naa kanya naaji kutuk oleng awuasare enkidimata ai, naa Olaitoriani laaisho pee ashetunye intae, neme pee aar intae, kake makurru. Emijo ake eji intae atem ajo aiture too mpala. Amu ejo ninche, “Keiroishi mpala e Paulo negol, kake te ning'or ninye mijo hoo toki naa ore te neiro neme hoo nyoo ninye.” Enchoo olojo neijia eyiolou nchere ore ina nitoduaa too mpala aainei alakuaniki intae, nikiyooki aas atabawua ine nitii. Naa aimikintieu iyiook aaitorisioki aashu kintanyaanyukie ate likae le lelo ooipang'u taata eisis ate. Ore oltung'ani laa ate etemie ilkulikae, naa ate eitorisioki ate, neidang'a oleng. Kake mikiwuasa iyiook aaitulus inaairirikino iyiook. Neidipa Enkai makewan aishoru nena kiririkinot, nebaiki sii intae. Iyiook ooiteru aapuonu enitii kiyaki intae lelo Omon Supati le Kristo eton eitu hoo ebau likae, metaa ti nikiwuasare intae neitu taata kintogiroo nkiririkinot ang. Neme iyiook oopuo aagiroo nena kiririkinot kiwuasare enaa kulikae ootaasa kake kisilig nchere ore nkiririkinot ang naa pee eponari enkirukoto inyi, neponari murruna ang ti atua intae. Nikitumoki ina kata aatolikioi kulo Omon Supati too nkuapi naatii te idia alo intae, nemeitokini aata enalejishoi aajo kitawuasare iyiook esiaai naa kulikae ootaasa te wueji enye. “Te neyieu oltung'ani newuasa nchoo eaku Olaitoriani ewuasare.” Errepet o Laitoriani ake naata tipat, ene pesho errepet o ltung'ani makewan. Enting'iria peno emodai ai nayiolo ajo ndipa aating'iria. Kalom nanu intae to lom le Enkai kewan. Aishoo intae Kristo anaa entito naishoori meyiolo likae lee, naishoo intae ninye metaa ninye ake openy olpayian linyi. Kake sunkuroi apake sheitani oteleja Hawa, naure ake pee meinyali ndamunot inyi neaku mirukurukorere Kristo te nyorrata naitoriori nemetii leyiata. Omaa te nelotu likae aliki intae likae Yesu leme olikitolikitio intae aashu ti nitang'amutua ai kiyang'et neme enapa nitang'amutua, itasiokito pae aang'amu! Ajo nanu madou hoo ti ai bae ake pooki te lelo kipaareta kituaak oleng. Ebaiki nemara jartan to rorei, kake ajo sii ayiolo naaba anaa nayiolo likae ake pooki. Kimbalakinye intae ina bae too nkoitoi pooki o too ntokitin pooki. Atolikio intae Ilomon Supati neitu aitalak intae hoo toki. Aiturukie intae hoo naisiadunye kewan. Keng'oki apa ina? Atang'amayie eretoto e kulie sirito naasishore nena pesai aisiaai intae. Kempurrorre ina? Ore apa atii atua intae naata nkolati, neitu aitaa kewan olola le likae, amu ore pee ebau ilalashera ooing'uaa Makedonia naaiputakita nkolati aainei neitulusoo. Aing'ura oleng pee maaku hoo olola te intae ti ae oitoi ake pooki, naa neijia eton aikunita o te ne. Ore anaa enatii esipata e Kristo atua nanu, meetae entoki hoo naamitiki awuasare ina ti atua Akaia. Aainyo? Kenkaraki nemanyor intae? Eyiolo Enkai ajo anyor intae. Kake alotoo aasita ena ake naasita taata, pee maisho erishata lelo ooyieu ina, ilooyieu erishata naitoduaarie ate anaa kerisiore esiaai naishooki ninche enaang, amu etejo ninche ninye eeta. Ore ltung'ana leeijo lelo naa lkipaareta le lejare, ilaisiaayiak oolejisho, ooitaakuno lkipaareta le Kristo. Neme enking'asia ina amu keitaakuno ninye sheitani kolmalaika le wang'an. Neme enking'asia naa, te neitaakuno isinkan lenyena eitaa ate isinkan le supatisho; eyooki aaiting'oki enaishiaakino nena naataasa ninche. Aitoki ake ajo emincho ake ejo likae kamoda, anaa ti nijojo nikinchosho sii ilo oti wuasa lai. Ore kuna najoito taata naitieu atawuasare, neme nkirorot oo Lkiristiano, emodai nabaraki. Kenya ltung'ana kumok kutukie too mbaa enye e nkishon; ainyoo naa pee manya sii nanu kutuk? Ijo ming'idada aa ing'iriri Imoda! Ijo mirara pasa intae ng'eni maate! Ing'iriri te neitaa intae likae irrindiki, nedaare intae likae, neinos likae intae anaa olowuaru, nerumaki likae intae kop, nedam likae intae nkomomi. Atonyorrayie nanu te nkurruna nchere atashala oshi. Kake te neetae oloyieu nenya kutuk ti ai toki (kairorita taa doi anaa olmodai), kaidim sii nanu ainosa kutuk. Ae Lhebrania ninche? Ara sii nanu. Ae Siraeli ninche, ara sii nanu. Ae leishoi e Abraham ninche, ara sii nanu ae laisiaayiak le Kristo ninche, nanu olusoo. Airorita anaa oloata oloirirua? Ateeke nanu te siaai nagol, te eenata te korokoroni, te earata oo nkeenta o te batisho e keeya nalang enayiolo ninche. Katitin imiet aatipika Lyahudi noshi oshot artam neng'oru nabo; katitin uni aatooshoki too nkeenta oo sekenke; aairruyaki kata nabo too soito, katitin uni eimiso emeli atii; aawa enkewarie nalulung'a o enkolong nabo ti atua enaiposha. Ore too lotot aainei nemayeng'iyeng'a, nanoto batisho too lkejek, batisho too laisimak, batisho to lorere lang, batisho too ltung'ana loo Loreren, batisho ti atua enkanasa, batisho ti ong'ata, batisho ti atua enaiposha, batisho ti atua lelo ooitaakuno lalashera. Ateeke natamio too ngolikinot. Kumok nkatitin alau njo, naata esumash o enkure, nkatitin kumok maata endaa, naanya enkijape nkatitin kumok maadupa nkilani. Ore metii nena kulie pooki, naata olola laainaur anaa nkakeny anyamaliki sirito pooki. Aing'ae oshal paa nanu lemeshal? Eimang'arie sii nanu ina shalan enye? Omaa te nebatata likae, eimaanya osina? Te naa kanya ake kutuk, nanya too mbaa naaipirta enchalan ai. Enkai naa Papa lo Laitoriani lang Yesu Kristo, laa ninye eisisi ntarasi, nayiolo ajo malejisho nanu. Ore te Dameski naa olbalosi otii ti abori Olaiguanani Aretas otorripo enkanasa e Dameski ejo pee aaibung nanu kake aaitadoyioki aaililioo te nkikapu aaimie elusie e suntai, naluarie nkaik enye. Anya ake kutuk hoo naamakua, metaa kalimu taata nduaat o mbolunot naaing'uaa Olaitoriani. Ayiolo nanu oltung'ani ti atua Kristo, laa ore apa too larin tomon o ong'uan ooishari neilepieki aaya shumata e uni; naa te naa ei to sesen aashu metii osesen nemayiolo Enkai nayiolo. Ayiolo ajo ore ilo tung'ani (te naa taa to sesen, aashu metii osesen nemayiolo, Enkai nayiolo) eilepieki aaya Paradiso, nelo aning mbaa nemelimunoyu, nemeishoro oltung'ani meiroro. Kawuasare mbaa o ltung'ani leeijo ilo, kake ore ti alo kewan ai nanu nemanya kutuk, meteleku mbaa e menai ai. Ore hoo te naa kayieu nanya kutuk nemaaku olmodai, nanu, amu keaku sipat airo; kake mawuasa, amu ebaiki nejo likae kara kitok alang enaba, negiroo ina mbaa aainei naadolita ninye te nanu o nena naaning aa nanu eing'uaa. Naa ore pee majo ailepie kewan ajo kara kitok te nkaraki enkumoi oo mbaa naatabolokoki, aaishooki olkikuei to sesen lai, olkipaaret le sheitani, oirriwuaki maatarasaki, pee maailepieki aaitulusoo oleng. Katitin uni atasayia Olaitoriani maatooru aya. Kake aatiaaka ninye, “Eikibaiki iyie empiris ai, amu te wueji neshal eitabari engolon ai katukul.” Neaku kang'idakino oleng awuasare enchalan ai, pe eparnat engolon e Kristo atua nanu. Enkaraki ina pee ang'amu menatisho te ng'ida, o enkinyala o ngolikinot, sinaitin o nyamalitin, te nkaraki Kristo; amu ore enkata nashal nanu ina kata agol. Atomode! Intae likitaarakita neishiaakino naaji aa intae likirrepirrepe; amu eitu hoo adou ti ai bae te lelo kipaareta kituaak oleng, hoo nemara nanu toki. Aitoduaa intae ilmonek lo lkipaaret o sipa, too lmonek o mbaa e nking'asia o nkiaasin e ngolon. Ainyoo italaita nanoto nkulie sirito, ai neme ena nchere eitu aaku olola te ntae? Entapalakaki ena kitadiaata! Kayieu taata nalotu enitii te nkata e uni, nemaaku olola, amu mme doi masaa inyi ayieu kake intae ate. Mme nkera oshi naashumaki ntoiwuo kake ntoiwuo naashumaki nkera. Ore nanu, aishooyo kewan naleng te ng'ida, naishorua kewan katukulie maataasishoreki enkaraki iltauja linyi. Omaa te naituluso enyorrata nanyor intae, keng'oru enyorrata naanyorri nanu? Omaa hoo neitu aaku olola te intae, ijojo pasa kataa osunkuroi opik intae olosek? Ketaa kaesek intae to ltung'ani obo lairriwaki intae? Nanu otiaaka Tito meeu nairriu olalashe obo meiriamunore. Ketudupore pasa intae Tito? Keitu kipuoyie iyiook ina Kiyang'et nabo, nikiimu orrekie obo? Ijojo pasa kaate kiripaa ena kata pooki? Ijo mme neijia naa ijojo? Itapong'ori! Te dukuya Enkai kirorita, ti atua Kristo. Pooki enikiyieu iyiook nikiaas, lo shorueta lang, eikiyieu nikishetu intae aaitubulu. Amu kaure ajo te nalotu, nalotu ainepu intae mitiuwu anaa enayieu, nebaiki ninyorrikiki matiu nanu anaa eniyieuu intae. Kaure mepuku enchankar, olom, o engoro, o lorok, o lmarenke o lejare, o enkingolingol. Kaure ajo te nalotu naaigil aitukurru Enkai ai te dukuya intae neaku kaishiraki lelo ooidipa aataas ntorrok neitu eirridu aapal ilduruki o ng'ok e loloito o ng'uarrat torrok naatamoo apa ninche. Enkata e uni ena alotu enitii. Ore anaa enajo Lkigerot, “Too nkutukie oo lchakenini aare aashu okuni edung'i enkiguana ake pooki.” Ore enapa kata e are pee alotu eniti aikoo lelo apa ootaasa ntorrok, naikoo sii lkulikae pooki. Ore sii taata alamita intae naigil aikok intae; naa te naitoki taata alotu nemeekure aduaaya intae. Ena doi iyieuu naitadedeyie nchere Yesu oirorie intae ti atua nanu. Nemeshal taa ninye too nkiaasin naaitaas intae; keasisho engolon enye ti atua intae. Eshal apa ninye pee eshei, kake enyaaka engolon e Enkai aisho ninye enkishui. King'arie sii iyiook ninye ina shalan, kake engolon e Enkai naisho iyiook enkishui enye, pee kitumoki aaipirare intae. Entujur ate te naa itii atua enkirukoto; entetem ate. Eimiyiololo aajo etii Yesu Kristo atua intae? Aashu te nesipa eturua intae. Aisilig nanu ajo iyiolouu ake ninye aajo mikitii iyiook lelo ootabatatate. Kiomon Enkai pee miaasiasa ntorrok, neme pee eji kitudupote iyiook, ti niaasiasa intae isupati, hoo naa keing'or kulikae iyiook nejo eturua iyiook. Amu mikindim hoo iyiook aataas ai bae naarare esipata, kake enaipirare esipata kiaas. Eiking'ida iyiook ti nikishal igoligolo intae. Ore enatii, intae kiomonoki pee imputakinono. Ore pee aigerito nanu ena matii kajo paa te nabau nemaasishore enkidimata naata aitame intae. Olaitoriani laaishoo ena kidimata mateshetishore mme enaitarruorrie. Ore enabayie, lalashera laainei, ole sere. Entarerio nkoitoi inyi, entang'amu enkikoo ai, entoning'oto maate, entobikie eseriani; naa keaku Enkai e nyorrata o eseriani te nebo intae. Erorokinoto te ng'ututata nasinya. Eiroroki intae isinyat pooki. Metaa empiris o Laitoriani lang Yesu Kristo o enyorrata e Enkai o enchula e Nkiyang'et Sinyati, te nebo intae pooki. Paulo olkipaaret leme ltung'ana ooitaa neme ltung'ana eimua, kake Yesu Kristo eimua o Enkai Papa, oitopiwuo ninye aitung'uaa ilootuata o kulo alashera ootii te nebo nanu. Isirito e Galatia aigeroki: Meeu empiris o eseriani atua intae eing'uaa Enkai Papa o Laitoriani lang Yesu Kristo ilo oishorua kewan te nkaraki ng'ok ang pee esaru iyiook te na towuo arruoni te risioroto eyieunuto e Enkai ang naa Papa; Metaa enenye enkitoo ntarasi o ntarasi. Esai. Aing'asia nanu eji intae lelo oosioki aaing'uaa Ilo oipoto intae te mpiris e Kristo aaibelekenyakino kulikae omon oopaashari ooji supati. Meetae kulikae omon supati. Iltung'ana ooetuo aaliman intae eyieu neitapong'oo Lomon Supati le Kristo. Kake te naa doi napaji eiyiook aashu olmalaika ooing'uaa shumata oopuonu aaliki intae kulikae “omon supati” leme lapa likitolikitio intae, nchoo ilo metaa kediaa. Kindipa apa aatejo naa kaitoki ake nanu ajo, te naa keetae oltung'ani olikioo kulikae “omon supati” leme lapa litang'amutua, nchoo ilo metaa kediaa. Ketiu pasa ena anaa kenkisisa oo ltung'ana aing'oru ana kene Nkai? Katiu pasa anaa eiltung'ana ayieu naitiship? Te naa ltung'ana napaji ayieu naitiship, nemaitoki aaku olaisiaayiani le Kristo. Amu, lalashera laainei ayieu niyiolouwu, nchere, ore lelo Omon Supati latolikio intae mme oltung'ani otang'asua. Eitu ang'amu te likae tung'ani, neitu aautaki likae tung'ani. Yesu Kristo laataboloko makewan. Itoning'o intae empukunoto ai apa eton aa lkerreti loo lyahudi aishuyie. Iyiololo enaikona ainosie osina esirit e Enkai maibooroyu aa kajo aidaikie, niyiololo aajo ore te sujata oo lkerreti lang nanu oisul to lporror lang aitirrish nkoon oo loo papa. Kake Enkai naategelua apa eton maino naaipot aimunye empiris enye. Neaku ore pee edutaa ninye ajo kaaboloki ilo Inoti lenye peyie atum atolikioi Lomon Supati ti atua Loreren, eitu aikilikuanishore likae tung'ani loo nkiri o sarge. Keitu doi ninye alo Yerusalem enetii lelo apa oora lkipaareta eitu aaku nanu. A'a, Arabia atang'asa alo naitoki ashukunye alotu Dameski. Ore etulusoitie larin okuni, nashomo Yerusalem peyie alo abaiki Kefa. Atobiko nkolong'i tomon o miet kiboita o ninye. Kake maata likae kipaaret laatoduaa meteleku Yakobo, olalashe Olaitoriani. Anya olmumai ajo kesipa kulo rorei pooki laigerito malejisho te dukuya Enkai. Anyaaka alo ilkirinen e Siria o Kilikia. Kake ore te nena sirito e Kristo naatii Yudea, eton apa maayiolo ninche enkorrok ai. Ketoning'o ake eji, “Ore olapa tung'ani oinosie iyiook osina, nele taata olikioo enapa kirukoto natang'asa ajo aidaikie,” neisis ninche Enkai enkaraki nanu. Ore etulusoitie larin tomon o oong'uan nanyaaka alo Yerusalem kiboita o Barnabas, narikito sii Tito. Ore pee ashomo ina kata, Enkai naataboloko mashomo. Anotore te nkilepata, lelo apa oitaaki larikok naibalakinye ninche kulo Omon Supati alikioo nanu ti atua Loreren; mayieu nanu neaku esiaai ai nataasa apa o ena naasita taata ene pesho. Kake ore ninye Tito laboitare te ine neitu earakini metumurati, hoo naa Olyunani ninye. Kanaata doi ninye eitu eimakini ina bae te neme keiseleejakinote atua iyiook ltung'ana ooitaakuno ilalashera epuonu aajur elakunoto nikiaata iyiook ti atua Kristo Yesu. Kejo apa pee eitaa iyiook irrindiki, kake eitu hoo king'as aaisho enkiti rishata. Esipata apa e kulo Omon Supati kiyieu neserian ti atua intae. Ore lelo apa ooji kituaak neme hoo ainyoo ina te nanu etiu o mme, amu meeta ninye Enkai olkep, netalaita hoo toki najo maanyaaki aaponiki. Ore hoo enatii, ketoduaa aajo aaisiligaki too Lomon Supati mayaki Ilmemurata anaa enaisiligaki Petero meyaki Iloomurata. Amu Enkai naidimie Petero metaa olkipaaret too Loomurata naaidimie sii nanu mataa olkipaaret too Loreren. Neaku Yakobo, Kefa o Yohana, lelo ooitaai ng'apeta e ina sirit ootoduaa kirotetisho naaishoo Enkai nanu neng'amaa Barnabas o nanu eitodolu aajo king'ar ena siaai. Neaku kipuo iyiook Iloreren nepuo ninche enetii Iloomurata. Ena bae nabo ake eitanapa iyiook nchere atadamu laisinak naa ina bae apake airowuare aas. Kake ore pee elotu Kefa Antiok naitasheiki ashirraki maing'urata, amu kelioo ajo eitarruoyie. Etang'asa aaku kedaa te nebo Loreren, kake ore pee epuonu ltung'ana ooing'uaa enetii Yakobo neitoki aaku kekepari, amu eturia lelo ooyieu nemurati Loreren. Ore lelo kulikae Yahudi ooiriamunore nesuj sii ninche ilo kuaak le sunkureisho, o metaa doi keteyiatayioki sii ninye Barnabas te ina sunkureisho. Kake ore pee adol nanu ajo meiriamari olkuaak lenye o esipata e kulo Omon Supati, najoki Kefa te dukuya ninche pooki, “Ira iyie Olyahudi inoti, naa nele iyie olotie olkuaak loo Loreren, nimitiu anaa Olyahudi. Oo naa pee ijo aaraki Loreren metotiutu anaa Lyahudi?” Eikira doi iyiook iinot loo Lyahudi mikira, “Loreren aasak loo ng'ok.” Kake kiyiolo ake iyiook aajo mme te nkitabaroto oo Nkitanapat meitoki Enkai aatakinore oltung'ani, kake enkirukoto eimu ina ti atua Yesu Kristo; naa ore iyiook ate enkaraki enkirukoto ti atua Kristo Yesu meekure eetakinore Enkai iyiook, mme nkitanapat kintabaitie. Anaa enajo Lkigerot, “Meetae hoo obo laa enkitabaroto oo Nkitanapat eimua pee meekure eetakinore Enkai ninye.” Kake amaa te neaku te ina naitaasi iyiook te nkaraki Kristo meitoki Enkai aatakinore iyiook te nkaraki Kristo neitokini aanyorriki nchere kira laasak loo ng'ok anaa enatiu Loreren, keaku ina eji ng'ok eisiaaita Kristo? Mme neijia pae. Te neaku ilo rrekie loo Nkitanapat laturoyie aitoki aitasheyie, neitoduaaya naa ina nchere kesipa kara olotigila nkitanapat. Amu ore te nanu nena Kitanapat ate naaiting'ie enkishui ai naitore nena Kitanapat. Ore ti alo nena Kitanapat atua nanu, peyie atum ataa kaishu te nkaraki Enkai. Etashoki Kristo naatashoki nanu te nebo ninye. Aatashoki nanu tenebo Kristo, meekure aa nanu oishu, kake etaa Kristo oishu tiatua nanu. Ore enkishui naishu nanu taata to sesen, naishu te nkirukoto, natii atua enkerai e Nkai Ilo laatonyorra nanu neishoru kewan te nkaraki nanu. Nemaany nanu empiris e Nkai. Te neaku te nkitabaroto oo nkitanapat eikenakini oltung'ani esipata nemeitoki naa enkeeya e Kristo aata tipat. Lo Galatia oomoda, aing'ae natasakuto intae? Amu eibalakinyeki intae tukul enchoto natashoki Yesu Kristo metotiwuo anaa itoduaa too nkonyek inyi maate. Entolikioki naa ena nabo; ei nena Kitanapat intabaitie pee itang'amutua Enkiyang'et anaa kenkirukoto niruko Lomon Supati apa pee ining'ining'i? Kesipa nchere imodada enaba nji? Enkaraki Enkiyang'et e Enkai pee nterutua enkishui inyi ng'ejuk. Ijojo pasa indimidimi aaitabai mbaa katukul ti ae oitai neme nkiyang'et? Keton eeta tipat te intae nena baa pooki naaimunyeki intae? Mme neijia sii ake etiu. Amaa ilo oisho intae Enkiyang'et enye neas ine nking'asia ti atua intae. Ketaasa enkaraki naa nkitanapat intabaitie ana kenkaraki niruko Lomon Supati apa pee ining'ining'i? Ejo Lkigerot, “Enkai eiruko Abraham; ore enkaraki ina neikenaki Enkai ninye ajo eeta esipata.” Neijia sii etiu te intae. Ajo naa sii ake idolidolo aajo lelo ooata enkirukoto oora nkera e Abraham. Ejo Lkigerot, ti alo Abraham, ilo tung'ani oiruko, “Ti atua iyie emayiani Loreren pooki;” naa te lelo rorei etolikioki apa ninye eton etiooyo kulo Omon Supati. Enkata eitodoluaki nayooki Enkai aikenaki Loreren isipat te nkaraki enkirukoto enye. Neaku ore ilooiruk pooki nemaiyiana te nebo ilo Abraham oiruko. Ore lelo pooki ooigarakino enkitabaroto oo Nkitanapat netii abori oldeket, amu ejo lkigerot, “Etediaaki pooki ng'ae lemeas nena pooki naaigero too nkitanapat.” Neibala nchere meetae hoo obo lemeetakinore Enkai enkaraki naitabayie ninye Nkitanapat, amu ejo Lkigerot, “Ore pooki ng'ae lemeetakinore Enkai ninye enkaraki enkirukoto nepok.” Kake mme nabo tukul Nkitanapat o enkirukoto, amu ejo Nkitanapat, “Ti niaas nena naajo Nkitanapat nipok.” Kristo oinyiang'ua iyiook asaru to ldeket loo Nkitanapat etanapa ninye makewan ilo deket te nkaraki iyiook, amu ejo Lkigerot, “Kediaa pooki ng'ae oilili to lchani.” Paa te Kristo Yesu ebaiki emayianata e Enkai natamayiana Abraham Iloreren, neaku enkirukoto eimu ina pee king'amu iyiook enkishorunoto e Nkiyang'et natolimuoki apake. Lalashera laainei aisho intae enkitanyaanyukoto oo ltung'ana. Entadamu embae natoning'okinote ltung'ana aare. Ore pee eaku eidipa nemeitokini aata oloiwuang'ie arashu eponaa, hoo naa olning'o ake otoning'okinote ltung'ana. Ore too Lkigerot naa Abraham eishooki nkisiligat o ilo oiu ninye. Neitu eji, “O looiu ninye,” aajo ilkumok, kake obo etoiwuoki. Ore ilo obo naa Kristo. Ena doi ajo nanu; ore nena Kitanapat naaetuo enyaakita aalusoo larin iip ong'uan o tomoni uni, nemeidim ninche aaiwuang'ie osotua oidipa Enkai atuno, nemeidim aaibooi enkisiligata enye pee meaku. Te naa to Nkitanapat kitum enkishorunoto e Nkai, nemeitoki naa aaku enkisiligata enye eitabayioki; kake ore enkishorunoto e Enkai naishoo Abraham pesho naa enkisiligata enye eitabayie. Kaa tipat naa apake eeta ninche Nkitanapat pee eetae? Eishoruaki pee eyiolouni engilata oo nkitanapat aajo ainyoo oshi ninche, kake eishooki metobiko o metabau ilo oiu naa ninye apa eipirieki enkisiligata naitayioki. Too lmalaika apa eitarasuaki aaimunye nkaik o lkilikuai. Ore embae naa obo oas nemeetayieki tipat olkilikuai. Naa nabo Enkai. Kepaashare nena kitanapat enkisiligata e Nkai? Mme neijia pae. Te naa apa kepokie ltung'ana nkitanapat naaishoruaki, naa anaata eikenaka Enkai iyiook isipat enkaraki nena kitanapat. Kake euno Lkigerot nchere eena pooki toki too ng'ok, paa ina kisiligata, naa te nkirukoto ti atua Yesu Kristo eitashe, eishori lelo ake ooiruk. Ore etiooyo enkirukoto, eton apa kiena iyiook ti abori nkitanapat o metaba anaa neboluni ina kirukoto nalotu. Neaku etotiutuo nena Kitanapat anaa olaramatani lang o metabau Kristo, pee eikenaki Enkai iyiook isipat enkaraki enkirukoto; kake ore taata eewuo enkirukoto nemeekure kitii abori ilo aramatani. Amu te nkirukoto irara nkera e Enkai ti atua Yesu Kristo. Ore intae lelo pooki ooibatisaki aapik atua Kristo ninchopo Kristo. Meitokini aata Olyahudi anaa Olyunani, orrindik arashu ololakuno, olee arashu eng'oruoi; irara pooki nabo ti atua Kristo Yesu. Naa ti nirara ltung'ana le Kristo, nirara eishoi e Abraham, nirara ilajung'ok le Enkai te risioroto e ina kisiligata. Ajo doi nanu nji; ore olayioni te menye naa keidim ataa ninye ojung masaa pooki, kake ore eton aa oti nemerisha o rrindik; eton aa abori laramatak etii ilaitasheikinok o metabau enkata apa natejo menye. Neijia sii kitiu iyiook, ore apa eton kira ooti, neton kira rrindiki loo nkiyang'eta e nkop, kake ore pee ebau enkata sidai, neirriu Enkai Oinoti lenye, otoiwuo enkitok, netoiwuoki ninye te abori Nkitanapat, pee einyiang'u lelo leton etii abori nena kitanapat pee kitum iyiook aatang'amu kiela naitaa iyiook nkera enyena. Ore pee etum aitodolu nchere irara nkera enyena, eirriwua Enkai Enkiyang'et o Inoti lenye atua ltauja lang, nebuak ajo, “Aba, Papa.” Neaku meekure ira orrindik, kake itaa enkerai, naa ti nitaa enkerai, itaa sii olajung'oni, te nkiaas e Enkai makewan. Ore apa miyiololo intae Enkai, neaku irara apa rrindiki loo ntokitin neme hoo nkaitin; kake amaa taata itayioloito Enkai, aashu doi taata eewuo Enkai ayiolou intae, kaji etiu pee intokiki arrinyokino nkiyang'eta aisinak nemeeta tipat neshal, eji niyieuwu intae nintokiki ake aaku rrindiki lenye. Niaatata nkolong'i nieniene, o lapaitin, o nkatitin o larin. Kintureita nanu matejo ore esiaai pooki nagol nataasa te nkaraki intae netaa ene pesho. Asai intae ilalashera, entotiu anaa enatiu nanu, amu atotiwuo sii nanu anaa enitiuwu intae. Eitu kintaasiasa nanu ae bae torrono, iyiololo aajo enkaraki emueyian o sesen pee anoto erishata nalikinye intae Lomon Supati te nkiterunoto, naa ore eyia, eitu ntodolulu olmena arashu enyimore te nkaraki naamena osesen, hoo netetemaki intae enkuna neijia, kake kitang'amutua anaa kara olmalaika le Nkai, anaa kara Kristo Yesu. Koree naa taata ina aripo inyi? Ara shakeni nchere te naa apa ndimidimi, anaata itukurtutuo nkonyek inyi pee kinchosho nanu. Amaa naa, kataa olmang'atinta linyi, amu atolikio intae isipat? Einyeito lelo laaiba aaitirrish intae oleng, kake mme too supati; kejo pee erishie intae nanu pee eaku ninche enyokitai. Aisidai te nikirrepi too mbaa sidain, te naa sidai embae napukoki ina. Naa too nkatitin pooki mme enoshi kata ake atii te nebo intae. Nkera aainei kutiti, kame asaisai ajo pee eigili aaiu intae, o metaba anaa nepurupuranayu Kristo ti atua intae. Kayieu napaji naa katii te nebo intae pee atum aibelekenya oltoilo, amu eimayiolo enaas enkaraki intae. Entolikioki intae lelo ooyieu nitii intae abori nkitanapat, keitu pasa oshi ining'ining'i enajo nena Kitanapat? Amu ejo Lkigerot eji etoiwuo Abraham layiok aare, ole rrindik obo naa ole sayunoti nalakuno olikae. Kake ore ilo le rrindik netoiwuoki to loshi ake rrekie loo ltung'ana, ore ole sayunoti nalakuno naa enkisiligata e Enkai eitabayioki. Neeta nena pooki enagut nalimu ninche, ore nena kituaak pokira are naa sotuaitin pokira aare eutu. Oldoinyo le Sinai eimua obo, are nkera naaiu naa nkera e sinkaisho eiting'oki; naa Hagar eimaka ina. Eitodolu Hagar Oldoinyo le Sinai otii Arabia. Netiu anaa ena Yerusalem natii taata, amu etii Yerusalem sinkaisho te nebo nkera enyena. Kake ore ina kitok sayunoti nalakuno naa Yerusalem e keper eutu ninye naa ninye yieyio ang iyiook. Amu ejo Lkigerot, “Ting'idayu enkolupi nemeisho, tabuaa nchira, hoo nimisaisai; amu ina kitok naton openy naata nkera kumok naalang ine ina naata olmoruo.” Kake ore doi intae, lalashera laainei itiuwu anaa Isaak, irara nkera e nkisiligata e Nkai. Etii ae, ore apa te nena olong'i, ore elde otoiwuoki to loshi ake rrekie lo ltung'ana neinosie osina ilo otoiwuoki te ngolon e Nkiyang'et, naa neijia sii taata etiu. Kake kejaa Lkigerot? “Taarai ina rrindik o ilo ayioni lenye; amu mejung'isho olayioni le rrindik te nebo olayioni le sayunoti.” Neaku, lalashera, mikira iyiook nkera e rrindik, kake ine nkitok sayunoti nalakuno. Etalakua iyiook Kristo pee kibik kilakuno, Entasheito naa oleng, emincho eitokini aaibooki intae abori enchata e sinkaisho. Nanu Paulo, ele oirorie intae. Entisipu kuna najoito. Te neaku inchosho emurati intae, nimintokiki aata dupoto te Kristo. Kaigil ake aaishakenoki pooki ng'ae olo metumurati nchere, ketioorie ninye meitabai nena pooki naajo nena Kitanapat. Etudung'oyioki intae aarishie Kristo, intae taa lelo ooimu nkitanapat eji pee eikenaki Enkai intae isipat; imbelokinote oriong empiris e Nkai. Ore iyiook, Enkiyang'et naidimie iyiook maape dukuya te nkirukoto kiaanyu ilo siligi oikenakinye Enkai iyiook isipat. Amu ti nikitii atua Kristo Yesu nemeitoki aaku olomurata anaa olememurata ooata tipat; ore enatii naa enkirukoto naa enyorrata eimu. Aneeijo mpirrirri apa aaitobirari; ainyoo nanyaaka aibooyo intae pee mining'ining'i esipata? Mme ake ninye mbaa e Enkai naipoto intae eiroro ilo oewuo aitapong'oo intae. Eisuijie enkini aisuijoi entapa naipurji pooki. Aata osiligi to Laitoriani, nchere kuna najo ijojo sii intae; kake ore pooki ng'ae olotu aitanyamal intae, ketum ilo enkiguana enye, era toki nara. Amaa ninye nanu, lalashera laainei te naa napaji kemuratare eton alikioo ajo emuratishoi ake, oo naa doi pee eton ake aainosieki nanu osina? Te naa napaji keton aa emuratare alikioo, nemeitoki elikioroto nalikioo nanu osalaba aitagor likae. Keyieu napaji naa ore lelo ooliman intae naa kepuo aadung ate. Ore intae, lalashera laainei, elakunoto eipotokoki intae; nabo emiaas, emincho elakunoto inyi eaku enakurore osesen; kake tareto olikae olikae te nyorrata; amu eitabari nkitanapat te le rorei obo, nchere, “Tonyorra ole latia ino anaa eninyor kewan.” Kake te neaku ionyonyo ninosasa maate anaa ng'uesi, entodol naa ake pee mimutumutu ate. Kake nanu enchom te Nkiyang'et nimintabaya iyieunot o sesen; amu ore iyieunot o sesen negilunore ine nkiyang'et ore iyieunot e nkiyang'et negilunore ino sesen, amu mening'o pokira are, neaku mindimidimi aataas nena niyieuu niaasiasa. Te naa Enkiyang'et narikito intae, nimitii intae abori nena Kitanapat. Keibala nkiaasin o sesen, naa ninche kuna, emarmalisho e loloito, loirerioni, ng'uarrat torrok, eomonoto e kulie tokitin neme Enkai, esakutore, mang'atisho, enchankar, olom, engoro, olorok, eoro, olarrabal le oro, enkiba neeta likae toki, emerai, enkului, o kulie naatiu neijia. Aikok nanu intae anaa, enaidipa oshi aikoo nchere, ore lelo ooas mbaa naaijo nena nemejung katukul Enkitoria e Nkai. Kake ore ilng'anayio le Nkiyang'et naa enyorrata, eng'ida, eseriani, eng'iriata, enanai e nkoshoke, esupatisho, enkisiligata, emboron, enkibooroto e kewan. Nemeetae nkitanapat naagilunore mbaa naaijo kuna. Ore lelo oora ile Kristo Yesu neidipa ninche aatasho enkewan o sesen o nena yieunot enyena. Te netaa Enkiyang'et taata kinchuyie iyiook, ematurubare naa erikore e Nkiyang'et. Ematalam olwuasa le modai; nimikintagor olikae olikae aashu kimbaikino olikae olikae. Ilalashera laainei, te neaku keirrashaki oltung'ani te nkitarruorroto naje, ore intae ile nkiyang'et nitemiteme aasaru te nkiyang'et e mborron; naa entodol ate, pooki ng'ae; mikitemi sii ninye iyie. Entaretokinoto lolan olikae o likae, amu te ina ntabayaya enkitanapata e Kristo. Te neitaa likae kewan kitok mme toki ninye kewan elej. Enchoo ejur pooki tung'ani esiaai enye, paa te netonyorrayioki netum aisisa kewan neme to le latia enye; amu enap ake pooki tung'ani olola lenye makewan. Enchoo ilo oiteng'enani eng'arie mbaa pooki supati ilo oiteng'en ninye. Emilej ate; mederrieki Enkai. Amu inaaun oltung'ani elo ake sii aisampu. Ore ilo ounoki enkulupuoni oe nkewan o sesen nelo aisampu te ina kewan o sesen erruorroto, ore olounoki enkulupuoni e Nkiyang'et nelo aisampu te Nkiyang'et enkishui oo ntarasi. Ore aa isupati kiaasita emikidukenya, amu kelotu enkata nikisotisho te neitu kintololong enyuaata ang. Ore enkaraki ina, ore ake irishat pooki nikitum, emaitaasa pooki ng'ae isupati, neisul lelo le nkaji e nkirukoto. Ore kulo kigerot sapuki lisomama ilatisira te nkaina ai makewan. Ore lelo ooyieu newuasare intae eyiewuaki intae olkerreti lo sesen intae ejo pee earaki metumurati, aa kejo pee mepuoi aarare ninche te nkaraki osalaba le Kristo. Ore doi ninche lelo oojo meeta nchere pee memurati intae, mesujita ninche oopeny nena kitanapat, kake eyieu ake nemurati intae pee etum ninche maate aatawuasare ina dung'oto oo seseni linyi. Ore nanu, mawuasare ai kata ae toki neme osalaba lo Laitoriani lang Yesu Kristo, laa te ninye etashoki enkop ti alo nanu neaku aatashoki nanu ti alo enkop. Te naa kemurata oltung'ani arashu memurata neme toki; ore enatii naa te naa keitaaki enkitobirata ng'ejuk. Menoto lelo pooki oosuj ena kitanapata eseriani o lng'ur, naa taa, lelo oora Siraeli le Nkai. Ore ebaiki taata, mayieu naaitoki likae tung'ani aitanyamal, amu ore nkiporo to sesen lai ilmishiren le Yesu ninche. Metaa empiris o Laitoriani lang Yesu Kristo te nebo enkishui inyi, ilalashera laainei. Esai. Paulo, olkipaaret le Kristo Yesu te yieunoto e Nkai, enetii lelo sinyat ooisiligayu tiatua Kristo Yesu: Metaa eninyi empiris o eseriani naing'uaa Enkai Papa lang o Laitoriani lang Yesu Kristo. Meisisi Enkai Papa lo Laitoriani lang Yesu Kristo, olaa ninye otamayiana iyiook ti atua Kristo too mayianat pooki e nkiyang'et naaing'uaa iwuejitin e shumata. Ore eton eitu eitayuni enkop netegelua ninye iyiook ti atua Kristo mataa sinyat nimikiaata entibili te ninye. Etegelua apa ninye iyiook te nyorrata mataa nkera enyena tiatua Yesu Kristo, te risioroto enkipirta nyor laainei, ninye otonyorra iyiook, negelaki iyiook kewan neel iyiook mataa nkera enyena kiimutua Kristo Yesu. Neijia apa eikununo enyorrata e yieunoto enye. Neikuna ninye neijia pee kisipu iyiook nikiyiolou eneba enkishorunoto enye naikishiaan naishoo ninye iyiook pesho ti atua ilo Inoti lenye. Ti atua ninye kiaata iyiook enkordunoto te nkaraki osarge lenye, aa empalakinoto oo ntorrok ang, te risioroto e mpiris enye, natoponikia ninye iyiook, te ng'eno o te yiolounoto enye pooki te risioroto e mbarakinoto enye te atua Kristo te nebau enkata nairirikino; ore barakinoto enye naa keyooki aiturrur pooki toki naitayioki metaa nabo tiatua Kristo, ntokitin naatii shumata o naatii enkop. Ti atua ninye, te risioroto e ina nayieu ninye ilo oitabaya intokitin pooki te risioroto e nkiguana enye, ore iyiook ilooitera aairuk Kristo netegeluaki iyiook nesirakini enkitoo enye. Ti atua ninye intae ilootoning'o ilo rorei lesipata, lelo omon supati le njeunoto inyi, niruko ninye, nemishiri intae te ina Kiyang'et Sinyati e nkisiligata enye, naa ninye enkitisipata nauno e njung'ore ang, o metaba anaa niking'amu ina, te nkisisa oe nkitoo enye. Ore enkaraki ena bae, ebaiki apa paa aning enkirukoto inyi ti atua Olaitoriani Yesu, o enyorrata ninyorrinyorro lelo sinyat, eitu apal maishooyo enashe te intae, nadamu intae te nkomono ai, pee eisho intae Enkai o Laitoriani lang Yesu Kristo, iloo papa le nkitoo enkiyang'et nagut e ng'eno o ene mbolokinoto, entayiolo ninye. Aomon pee eitawang inkonyek oo ltauja linyi pee itumutumu aatayiolo ilo siligi oipotokoki intae, aatayiolo aajo kebaa ina golon enye nemetemayu naa ninye naasisho ti atua iyiook iloiruko, te risioroto easata enkidimata enye kitok. Enapa nataasishore ti atua Kristo pee eitopiu aitung'uaa enkeeya neisho metotona te nkaina enye e tatene too wuejitin e shumata. Te ine eitore tukul pooki ooitoreisho, o nkidimat pooki, o engolon e nkitoria, neitoreisho oleng te shumata pooki arna naipoti neme kuna ake e na kata kake o ne idia nalotu. Netipika Enkai ntokitin pooki inkejek enyena nepik ninye metaa elukunya oo ntokitin pooki te nkaraki esirit, nara osesen lenye, elulung'ata e ilo oitululung pooki toki ti atua pooki toki. Naa intae eitopiwuo ninye, enapa kata ituata te nkaraki oo nkitarruorrot o ng'ok, inaa ninche apa ipuoyieyie isujitata olkerreti le na kop, nisujitata ilo kitok le ngolon o loing'ang'e, ina kiyang'et naisiaaisho taata ti atua nena kera naagolong'u. Naa atua kuna apa kitii sii iyiook pooki too ng'uarrat oo seseni lang, nikisuj iyieunot o sesen o enoo ndamunot, nikiaku iyiook maate te ikinet inkera e ngoro, anaa ina natiu ilkulikae tung'ana pooki. Kake ore Enkai, naata olng'ur kitok, te nkaraki enyorrata kitok naa ninye etonyorrie iyiook, hoo nikituata apa te nkaraki nkitarruorrot ang, enyaaka ninye aitopiu iyiook pee kinchu te nebo Kristo, (enkaraki empiris pee eitajewuoki intae) neitopiwuo iyiook te nebo ninye neisho iyiook matotoni te nebo ninye too wuejitin e shumata ti atua Kristo Yesu, paa ore too lporori oopuonu netum aitoduaai eneba enkarsisisho e mpiris enye nemetemayu te nanai e nkoshoke enye ti alo iyiook ti atua Kristo Yesu. Amu te mpiris eitajewuoki intae to rrekie le nkirukoto: neme hoo te nkaraki ae nitaasa intae, enkishorunoto e Nkai, neme enkaraki nkiaasin, metum ake likae tung'ani enawuasare. Amu kira iyiook esiaai enye naitayioki ti atua Kristo Yesu te nkaraki isiaaitin sidain naaitobira apa Enkai te dukuya pee kipuo ti atua ninche. Neaku entadamu inchere ore apa ae kata intae Iloreren ti alo osesen, ooji ilmemurata lelo kulikae ooji iloomurata naa entoki naitobiri to sesen too nkaik entadamu nchere ore apa ina kata miaatata Kristo niminkenaroro intae ti atua olorere loo Siraeli, nirara apa ileeiking'a minkenaroro too sotuaitin le ina kisiligata, nimiaatata osiligi nimiaatata Enkai te nkop. Kake ore taata ti atua Kristo ore intae iloolakuaniki apa oleng neitinyikuaki intae ti atua ilo sarge le Kristo. Amu ninye eseriani ang, olaa ninye oitaa iyiook indung'ot pokira nabo, neturoyie enapa suntai e nkiba narish iyiook, naa to sesen lenye eiwuang'ie ninye nena kitanapat o nkoon naaitanapishoteki pee etum ninye aitaiki kewan oltung'ani obo ng'ejuk te lelo ootoorote are, neyau eseriani, netum aitutumoki iyiook pokira Enkai ti atua ilo sesen obo te nkoitoi o salaba, neishu ina kiba neiting'ie. Neewuo ninye aliki intae eseriani iloolakua apa neliki eseriani lelo apa ootaana, te ninye kindim indung'ot pokira are, te ina kiyang'et nabo, aatinyikaki Papa. Meekure naa irara lomon o leeiking'a; kake ing'aring'ara olorere obo o lelo sinyat nitaa ile nkaji e Nkai, ooteshetakaki shumata enkitamanyunoto e lelo kipaareta o loibonok le Nkai, aa Kristo Yesu makewan ilo soit kitok lo lmairroto, laa atua eidikidikokini enchetata pooki te nebo, nebulu enkaji nasinya ti atua Olaitoriani, laa atua ninye sii eteshetakaki intae entaa ewueji nemanya Enkai ti atua ina Kiyang'et. Ore enkaraki ena bae, ore nanu Paulo, oloena le Kristo Yesu te rishata inyi intae Iloreren amu ajo sii ake itoning'o enkitanapa e mpiris e Enkai naaishoki metaa eninyi intae o eneikuna pee aaboloki nkisudorot e yieunoto enye, anaa enaidipa aigeroki intae too ndorropu. Ore pee isumama ena niyiolouwu aajo katabaraka ayiolou embae e kristo naisudoro, eneitu apa elikini nkera oo ltung'ana te kulikae porori anaa ena taata naibalakinyeki ilkipaareta lenyena sinyat o loibonok le Enkai te ina Kiyang'et, naa ena naishooki Iloreren metang'arieki enjung'ore neaku irubat o sesen obo, le ncholiek e ina kisiligata ti atua Kristo Yesu eimu lelo Omon Supati. Te kulo Omon Supati aaitaaki nanu olaisiaayiani te risioroto e nkishorunoto e mpiris e Enkai naaishooki nanu te ngolon enye. Nanu taa hoo nara oloti aisul too sinyat pooki, nanu eishooki ena piris, matoliki Iloreren lelo Omon Supati, le nkarsisisho nemejurroyu e Kristo, naaishooki maitoduaa ltung'ana pooki eneikunari enkitabaroto e ina kishorunoto naisudoyioki apa too lporori ti atua Enkai naitayio pooki toki; nchere to rrekie le sirit eboluni taata eng'eno enye oo mpukunot kumok metayiolo laitoriak e enkitoo pooki too wuejitin e shumata. Ore ena nerubare enkiguana enye oo ntarasi naitabayie ninye ti atua Kristo Yesu Olaitoriani lang, laa te ninye kiaata empijan o enkitieunoto nikinyikakinye Enkai to rrekie le nkirukoto ang ti atua ninye. Neaku ajoki intae emishalu to sina laainosieki enkaraki intae, amu ninye enkisisa inyi. Enkaraki ena pee agilaki kung ilo Papa, laa ninye eipotieki olmarei ake pooki te keper o te nkop, paa te risioroto e nkarsisisho e nkitoo enye eisho meitagoli intae te ngolon naimu Enkiyang'et enye te ilo tung'ani li atua, nemany sii Yesu atua iltauja linyi eimu enkirukoto; paa ore intae, inoto ntona nitonini te nyorrata, nitumutumu engolon niyiolounyenye te nebo isinyat pooki eneba elalai o enkadori o elakuani e shumata o enguton, niyiolouu enyorrata e Kristo nalusoo te ng'eno pooki, nimitunyenye aaboreyu te nkiputakinoto. Ore taata ilo laa te ngolon naisiaaisho ti atua iyiook eidim ninye ataasa neitulusoo oleng alang nena pooki nikinkilikuanu aashu kidamu, metaa enenye enkitoo ti atua esirit o ti atua Yesu too lporori pooki intarasi o ntarasi. Eesai. Ore naa nanu olora oloena te nkaraki Olaitoriani, asai intae entobik te nkishon naishiaakino ina kipototo naipotoki intae, te nkanyit pooki o te mborron, te nebo eng'iriata iretokinono olikae o likae ti atua enyorrata, inyuaakiki aata naboisho e Nkiyang'et ti atua eenata e seriani. Eetae osesen obo o Enkiyang'et nabo anaa ina ake naipotokoki intae ilo siligi obo le ina kipototo inyi, obo Olaitoriani, nabo enkirukoto, nabo enkibatisa, nabo Enkai naa Papa lang iyiook pooki, laa ninye otii shumata pooki neim atua pooki netii atua pooki. Kake eishooki ake oltung'ani pooki te iyiook, empiris te risioroto e enkishorunoto e Kristo. Ina pee etejoki, “Ore pee eilep ninye alo shumata nerik olorora loo looena, neisho ltung'ana nkishorot.” (Ore pee eji “eilepa” kaa ae naji neme nchere etadoyie sii apa alo wuejitin e abori enkop? Ilo ake otadoyie onyaaka sii ailep agiroo shumata pooki, pee etum ninye aiputa pooki toki). Ore nena kishorunot enyena naa ketejo pee eaku kulikae ilkipaareta, neaku kulikae iloibonok le Nkai, neaku kulikae ilalikiorok, neaku kulikae ilairritak o laiteng'enak, peyie erreteni lelo sinyat, te nkaraki ina siaai e ramatare, ene nchetata o sesen le Kristo, o metabaiki pooki naboisho naimu enkirukoto o eyiolounoto e ilo Inoti le Nkai, nikiaku iltung'ana ootubulutua aamitunye, aabaiki entemet e mbotoro nalulung'a e Kristo; pee mikintoki aaku nkera, naanang'ari idie o idie to lkutati ake pooki le nkiteng'enare, o losek loo ltung'ana ti atua esunkureisho o losekin le lejare. Ore enatii, emairoro esipata ti atua enyorrata, nikibulu too nkoitoi pooki aabulaki atua ilo ora elukunya ang; aabulaki atua Kristo, olaa ti atua ninye eruba osesen pooki, neidikidikokino atua ninye pooki rubata naishoro, easisho nena rubat pooki aaitobiraki, neitubulu osesen neitubulu kewan ti atua enyorrata. Najo taata ena naishakenoki ti atua Olaitoriani nchere emintoki ake aaisho orrekie le nkishon inyi etiu anaa enatiu oloo loreren, too ndamunot enye e pesho; eitomisimisoki ening'unoto enye; neaku ina kishui naishoru Enkai eneeiking'a te ninche, te nkaraki nemeyiolo toki; te nkaraki engolon oo ltauja lenye; eikaolote ninche neishooitie ate aaisho iloirerioni, netum enkului e pooki bae naiduruk. Neme nena eiteng'enieki intae ti atua Kristo! Amu ajo sii indipa aatoning imbaa enyena naaiteng'enieki intae ti atua ninye, anaa enatiu esipata tiatua Yesu. Entuburukushu enkewan inyi musana, e napa kishon inyi musana narruoyo enkaraki ng'uarrat naalejisho, naa enchoo eitang'ejuki indamunot inyi, enchopo enkewan ng'ejuk, naitayioki enyaanyukie Enkai ti atua esupatisho nasipa o te sinyatisho. Ore enkaraki ina, enturrai elejare, eroro sipat pooki ng'ae eirorie ole latia enye, amu kira iyiook irubat olikae o likae. Entagoroto kake emiaas ng'ok; emincho edoyio enkolong itagorote. Emincho sii sheitani erishata. Nchoo olapurroni metapala empurrorre, enaikash enincho ninye metaasisho aas esiaai e nkanyit too nkaik enyena, pee etum entoki naisho lelo lemeeta toki. Emiimunye lderrat torrok inkutukie inyi, kake eroro nena sidan naaretisho, neishiaakino te ina kata, pee eshetu te mpiris lelo ooning. Emintagor Enkiyang'et Sinyati e Nkai, natipikieki intae olmishire le ina olong e lakunoto. Enchoo enkiba pooki o engoro o ewuapa o enchankar o esulare metalama intae te nebo o emorore o entorroni pooki. Eng'urrie olikae olikae entaa loonana oishuaa, entapalakinoto olikae o likae anaa enatapalaka Enkai intae ti atua Kristo. Ore enkaraki ina entanyaanyukie ate Enkai anaa nkera kutiti naanyorri. Naa enchomie enyorrata, anaa enatonyorra iyiook Kristo neishooyo kewan to lbae lang, neaku enkishooroto o lasar orropil oishooki Enkai. Kake ore eloloito o loirerioni pooki aashu ng'uarrat torrok, emincho ake eipoti ti atua intae, amu ina naishiaakino ti atua isinyat. Emintoki aata loirerioni, aashu lderrat loo mbaa naata sura, aashu le modai, lemeishiaakino; kake enkishooroto e nashe entoponai. Entayiolo ena nasipa nchere meetae hoo olololoito aashu oloo loirerioni, aashu oloo ng'uarrat torrok (nkitanyaanyukot taa eomon olotiu neijia), otum hoo enjung'ore ti atua enkitoria e Kristo o ene Nkai. Emincho hoo elej intae oltung'ani too rorei le pesho, amu enkaraki oshi kuna baa pee edoiki engoro e Enkai nena kera nemening'isho. Ore enkaraki ina emisiritore ninche, amu irara apa intae enaimin, kake irara taata ewang'an ti atua Olaitoriani; enchom anaa nkera e wang'an, (amu ore ilng'anayio le wang'an naa ninche etumieki nena pooki sidain neitoriori nesipa), naa entetem aajo mateng'ena te nena naaitiship Olaitoriani. Emiaata eniporokiki nkiaasin e naimin nemeeta lng'anayio, kake ore eninkoko intae entayu meibalata. Amu enkurruna doi ninye te neimakini nena naas ninche too nkisudorot; kake ore embae pooki nabolokini ewang'an naa keliooyu, amu ewang'an pooki toki nalioo. Enkaraki pee eji, “Inyo oloirura, tudumunye, tung'uai ilootuata, naa eikincho Kristo ewang'an.” Eng'ura entabaraki eninkunariri elototo, mme anaa ltung'ana oomoda kake anaa lng'eni, entaasishore enkata, amu torrok inkolong'i. Ore naa, emiaaku ilmoda, entoning'u eyieunoto o Laitoriani. Emimera te naisho oo sabibu amu emutata e nkishon ina; kake enchoo Enkiyang'et eiput intae, iranyakinono to lkerempe le Nkai o sinkolioitin o rrepeta e nkiyang'et, iranyishosho aaisis Olaitoriani too ltauja linyi pooki; ore anaake o too mbaa pooki enchooi enashe te nkarna o Laitoriani lang Yesu Kristo aaisho Enkai Papa. Entoning'oto maate te nkaraki naa Kristo iyanyititi. Na kituaak, entoning ilpayiani linyi, anaa eninkoko Olaitoriani, amu olpayian elukunya e nkitok anaa paa Kristo elukunya e sirit, ilo sesen lenye, naa ninye Olaitajeunoni lenye. Ore anaa enaning esirit Kristo, enchoo etiu sii ninche inkituaak neijia aaning ilpayiani lenye to mbaa pooki. Lo payiani, entonyor inkituaak inyi, anaa enatonyorra Kristo esirit neishooyo kewan te nkaraki ninye, pee etum aitisinya ninye, eidipa aisuja te nkitukuoto e nkare o te nebo ilo rorei, pee etum aitaiki kewan ina sirit te sikar nemeeta entibili aashu emuguta aashu eeta ae ake toki nayia neijia, pee etum esirit ataa sinyati nemeeta eleyiata. Neijia sii etiu ilpayiani eishiaakino nenyor inkituaak enye anaa iseseni lenye maate. Ore olonyor enkitok enye kewan enyor. Amu meetae ae kata oltung'ani oiba osesen lenye makewan, kake eitoti neramat ninye, anaa enaramat Kristo esirit, amu kira iyiook irubat o sesen lenye! Ore enkaraki ena “elo aing'uaa olee menye o ng'otonye neibung'are enkitok enye, neaku pokira are nabo.” Enkisudoroto kitok ena najo nanu Kristo elimu o kanisa; ore etiu neijia, nchoo ake pooki ng'ae linyi enyorru enkitok enye anaa kewan, naa nchoo enkitok edol ajo keyanyit olpayian lenye. Na kera, eyanyita intoiwuo inyi ti atua Olaitoriani, amu aisidai ina. “Iyanyita papaai lino o yieyio lino.” (Ena kitanapata naituruk neeta enkisiligata), “pee eitobirari mbaa inono nibik inkolong'i kumok te nkop.” Ore intae iloo papa, emintagor inkera inyi, kake entubulu ninche te nkitamioto e utaroto o te nkiteng'enare o Laitoriani. Lo rrindiki, entoning intae lelo oora ilaitoriak linyi te nkop te nkuretisho o lokirikiri, to ltau obo, anaa eninkoko Kristo; neme eji pee edoli intae, anaa ilooitiship iltung'ana, kake anaa ilaisiaayiak le Kristo, iasiasa eyieunoto e Enkai eing'uaa atua ltauja, nisiaaishosho te yieunoto sidai anaa eninkoko to Laitoriani neme anaa too ltung'ana, iyiololo aajo ore esupat ake pooki naas oloas, neyooki ake atum ina nataasa eing'uaa Olaitoriani, aa osinka aashu ololakuno. Lo aitoriak, nena ake entaasa sii intae ninche, naa embooi olbuaa, iyiololo aajo etii shumata Olaitoriani lenye naa olinyi sii intae, nemeetae olkep te ninye. Ore enabayie, entagol ti atua Olaitoriani naa te ngolon e nkidimata enye. Enchopo iruparen pooki e Nkai, pee indimidimi aaitasho aairisha ilosekin pooki le sheitani. Amu mikiarare iyiook osesen o sarge, kake ilaitoriak, nikiarare engolon oo mpukunot kumok, nikiarare ilaitoriak le nkop le na aimin taata, nikiarare lororani loo nkiyang'eta torrok too wuejitin e shumata. Ore enkaraki ina, entudumu iruparen pooki e Nkai, pee indimidimi intae aairishisho te ina olong torrono, ore indipa aataas pooki, nintasheshe. Entasheito naa, iterretena mpolosi inyi te sipata, ninchopo elong'o o lgoo e supatisho, ninchopokito nkejek inyi inamuka oo Lomon Supati le seriani; ore ene shumata nena pooki embung'a elong'o e nkirukoto naa ninye naidimie intae entushurie nena baa pooki e ilo torrono naayupuyup. Naa embung'a emaupe e njeunoto, o lalem le Nkiyang'et laa ninye ororei le Nkai. Entoomon inkatitin pooki te Nkiyang'et te nkomono pooki o eomonokinoto. Ore te ina enchololoto te ncheikinoto iomonokiki isinyat pooki, o nanu sii, pee aaishori enkiroroto te nabol enkutuk te mpijan alikioo mbaa naaisudoro e kulo Omon Supati, laa te nkaraki ninche pee ara olkilikuai oena too lpisia; pee atum atolikioi te mpijan, anaa enaishiaakino nairo. Ore taata pee iyiolouwu sii intae enikinkununo, o enaasita, Tikikos olalashe lang onyorri naa olaisiaayiani oisiligayu ti atua Olaitoriani olotu ainosaki intae imbaa pooki. Nanu oirriwua ninye enitii te nkaraki ena pee iyiolouu enaikununo, netum ninye ailejileja iltauja linyi. Menoto ilalashera eseriani o enyorrata te nebo enkirukoto naing'uaa Enkai Papa o Laitoriani Yesu Kristo. Metobiko empiris te nebo lelo pooki oonyor Olaitoriani lang Yesu Kristo te nyorrata nemeye. Paulo o Timoteo, isinkan le Kristo Yesu ooigeroki lelo sinyat pooki ti atua Kristo Yesu ootii enkang e Filipi te nebo ilaitasheikinok le sirit e Nkai o laisiaayak. Metaa eninyi empiris o eseriani eing'uaa Enkai Papa lang o Laitoriani Yesu Kristo. Ore oshi enkata pooki nadamu intae naisho Enkai ai enashe, naa te naomon nadamu intae pooki te nchipai sapuk, te nkaraki ina nitaa intae ilaasak te nebo nanu te nkitubularoto o rorei supat ebaiki apa te nkiterunoto o taata. Nayiolo aitisip nchere ore ilo oiterua esiaai sidai ti atua intae naa keitabaya te ina olong e Yesu Kristo. Eishiaakino te naata kuna ti alo intae pooki amu aibung'ita intae to ltau lai amu itii te nebo nanu ti atua empiris o te enata ai o te ng'oroto o te nkitisipata o rorei supat. Amu shakeni lai Enkai te ina yieunoto naata te intae te ina nyorrata e Yesu Kristo. Ore enkomono ai naa nchere pee eponari enyorrata inyi oleng ti atua eyiolounoto o erishunoto oo mbaa, pee itumutumu aatonyorrai ina naisula, niaakuku biyot, ilemeeta leyiat te nkolong e Kristo. Neboreyu intae ilng'anayio le supatisho, ooimu atua Yesu Kristo, neyau enkitoo e enkisisa e Nkai. Ayieu niyiolouwu lalashera laainei nchere, ore nena naaitaasaki nanu, netaretutuo enkitubularoto o rorei supat, metaba anaa neyiolou isikarini pooki le nkaji enkitoo o ltung'ana pooki nchere ore pee aena naa te nkaraki Kristo; nenotito ilalashera kumok enkitagoloto ti atua Olaitoriani te enata ai neaku kelimu ororei le Enkai te nkitieunoto metii enkuretisho. Einosu kulikae Kristo to lom o te nkesha kake einosu kulikae to ltau sidai. Ore kulo neinosu te nyorrata eyiolo aajo aatipikaki nanu ene te nkaraki nangorito ilo rorei supat; ore kulo nelimu Kristo te nkitokoos ejo pee aaitang'or nanu te ina enata ai. Kainyoo naa enkiting'oto? Ena, nchere, ore too nkoitoi pooki, te ina nang'ida. Ee naa kang'ida. Amu ayiolo ajo ore te nkaraki enkomono inyi o te retoto e Nkiyang'et e Yesu neyau nena elakunoto ai; aa ore eyieunoto e eanyunoto o siligi lai naa nchere pee makurru, kake ore te mpijan nabore taata anaa oshiake, neyanyituni Kristo to sesen lai, aa te nkishui aashu te keeya. Ore te nanu Kristo enkishui ore keeya naa dupoto. Kake te naishu to sesen, neaku ina lng'anayio le siaai ai kake mayiolo ajo kaa adutaa. Amu kang'aashana aaitirrishita oleng nkaloli pokira are. Ore eyieunoto ai naa pee aiwuang'a to sesen naaku te nebo Kristo, amu ina esidai oleng. Kake te nabik ti atua ele sesen naa ina naata tipat te intae. Aitisip ena nchere, kayiolo ajo katon naa kabik aret intae pooki, te nkaraki enkitubulunoto inyi o eng'ida ti atua enkirukoto, paa ore ti atua nanu nitumutumu esipata niwuasarere ti atua Kristo naibala te naitoki alotu enitii. Ore too mbaa pooki enkuna ena nabo enchoo orrekie le nkishui inyi meishiaakinore ororei supat le Kristo, peyie te naewuo adol intae aashu te nematii naning'oo ajo ituunote intasheshe to ltau obo, o te ndamunoto nabo, ninyokinyoko aairiamari te nkaraki enkirukoto o rorei supat, nemeiture intae ae toki e lelo mang'ati ookesh intae. Ele olmonekie oibala le mutata te ninche kake ole njeunoto te intae, naa Enkai eing'uaa ina. Amu eishooki intae nchere ore te nkaraki ninye, itii atua ilo arrabal apa ake litoduaa nining'itoto taata aajo eton ake atii. Metaa te naa keetae enkitagoloto oo nkoishuaa ti atua Kristo, te netii enkilejilejata e nyorrata, te netii enchula ti atua Enkiyang'et te netii enkaripo o lng'ur, entabai eng'ida ai, aaku le na damunoto ooata ena nyorrata nabo niaatata oltau obo nidamumu nabo. Emiaas ae bae to nkesha te nkitokoos. Kake te nkitadounoto e kewan meetae olemeitulusoo olikae aitalang kewan. Nchoo pooki te intae meaku mbaa enyena ake eing'or kake nchoo sii eing'or inoo lkulikae. Enoto ena damunoto ti atua intae maate niaatata sii ti atua Kristo Yesu, aa ore hoo neeta empukunoto e Nkai, neitu ninye eiken ina narisiore Enkai anaa ae toki naaji najo apidilakino, eitoroka kewan neitanyaayukie kewan osinka, neini anaa iltung'ana. Ore ake pee edoli eeta empukunoto e tung'ani neitadou kewan, nening'isho o metabaiki keeya, o metabaiki ina keeya, te nchumata osalaba. Ore enkaraki ena neitaa ninye Enkai kitok oleng, neisho ninye enkarna nalang inkarn pooki, neaku ore te nkarna e Yesu naa kegil pooki ng'ae kung, te shumata o te nkop o ti abori enkop, neibalunye pooki ng'ejep inchere Yesu Kristo ninye Olaitoriani, te nkitoo e Enkai Papa. Ore naa ilanyor laainei, anaa enitoning'ishote oshi ake neijia sii o taata mme ake anaa atii kake eisul oleng matii, entabai enjeunoto inyi te nkuretisho o te nkikirikirata. Amu Enkai naasisho ti atua intae, te pokira are, te yieunoto o te asata inyi te nkaraki murruna enye sidai. Entaas mbaa pooki metii enking'unyung'uny anaa nkikilikuanat, pee metumi ake eleyiata napiki intae niaakuku nkera e Enkai nemeeta eleyiata ti atua ena kishon torrono niwang'ung'u aaku ewang'an te na kop; imbung'itata aakurraki ororei le mpuaan pee aa ore te nkolong e Kristo nawuasare intae nchere eitu akuet pesho aashu aisiaaisho pesho. Te naa naaji ninye kaabukokini shumata olasar le enkirukoto inyi naa kang'ida nashipa nanu te nebo intae pooki. Ore te ina, entishipata sii intae ning'idada te nebo nanu. Aisilig ti atua Olaitoriani Yesu ajo airriu Timoteo meeu enitii asieku, pee aaitiship ilomon linyi. Maata likae laaijo ninye oing'or negolie mbaa inyi oleng; mbaa enye ake eing'or ilkulikae, pooki neme nena e Yesu Kristo. Kake iyiololo intae tipat e Timoteo, nchere ore anaa enkerai o menye, netaasishe te nebo nanu ti atua ororei supat. Aisilig naa ajo airriu asioki te nayiolou mbaa ainei eneikunari; naisilig ti atua Olaitoriani nchere kalotu sii nanu makewan asieku. Atoduaa ajo keishiaakino nairriwaki intae Epafroditas olalashe lai, naa olaisiaayiani te nebo nanu, osikari te nebo nanu, naa olkipaaret linyi naa olaisiaayiani too nkolati aainei. Amu eyieuta oshi neduaare intae pooki, nenoto osina oleng amu itoning'o aajo esipa etamuoyia. Etamuoyia o metinyikaki keeya kake eing'urrie Enkai neme ninye ake kake o nanu sii, pee matum ake osina aponiki likae sina. Nanu oyieu nairriu ninye, ajo pee ing'idayuyu te nintokiki aadol ninye, nemaitoki sii nanu aata osina. Entang'amu naa ti atua Olaitoriani te nchipai pooki niyanyititi iltung'ana ootiu inji. Amu eyieu eye te nkaraki esiaai e Kristo, etipika enkishui enye batisho pee eitabaya enkisiaayiare inyi. Ore enabayie, ilalashera laainei, enting'idata ti atua Olaitoriani. Te nasiraki intae aigil kuna nemaaitanaur, kake keitagol intae. Entodol ate te lelo diein, entodol ate te lelo aasak loo ntorrok, entodol ate te lelo oodung osesen. Amu iyiook emuratare nasipa, ilooserem Enkai te nkiyang'et, nikiwuasare Kristo Yesu, nimiking'idare osesen. Ore hoo duoo naata sii nanu makewan esipata pee ang'idare osesen, te netii likae tung'ani ojo keeta esipata pee eng'idare osesen, nanu olusoo: te nkolong e isiet aatumurataki, nara ololorere loo Siraeli, lo losho le Benchamen, Olhebraniai, ore ti alo nkitanapat nara Olfarisayoi, ore te nyuaata nara olaisilisiloni le sirit, ore te supatisho ti abori nkitanapat, nemaata eleyiata. Kake ore dupoto apa naata, naikena aitaa pesho te nkaraki Kristo. Aikenayie ntokitin pooki aitaa pesho te nkaraki nemeeta endutet katukul, eyiolounoto e Kristo Yesu Olaitoriani lai. Ore te nkaraki ninye, naiturrayie ntokitin pooki naikenaa ajo etiu anaa nkik, pee atum Kristo. Naliooyu nanu ti atua ninye, maata esupatisho ai makewan naing'uaa nkitanapat, kake ina naing'uaa enkirukoto ti atua Kristo, ina supatisho naing'uaa Enkai nang'amuni te nkirukoto, pee ayiolou nanu ninye o engolon e mpiunoto enye, nang'arie olosilisili lenye, atiu anaa ninye ti atua enkeeya, paa te neidimayu natum empiunoto aing'uaa ilootuata. Mme taa kaidipa anoto ena neme kaidipa ataa bayaroti, kake kanyokita aitaa enaai amu Kristo Yesu laaitaa olenye. Ilalashera, mme taa kaikena kewan ajo kaidipa aitaa enaai; kake ena nabo aas, aishoo maatorikinoto inaatii siadi, naekenya alo dukuya abaiki idia naipirakinore, nanyok aisarrisar pee abaiki idia rishata o enkishoroto o enkipototo e Enkai e shumata ti atua Kristo Yesu. Enchoo lelo lang ootubulutua aabaya metadamu ena, naa te nepaashari intae indamunot ti ae toki, naa keibalakinye sii ninche intae Enkai. Emaibung'a ake intae te sipata ina nikindipa aatang'amu. Ilalashera, embung'ata entaa lasujak laainei, ning'oring'oro lelo ootiu neijia te nkishon enye amu iatata enkitanyaanyukoto te iyiook. Amu ore ilkumok laa ketii ilaidipa atoliki intae, naa kaliki sii taata intae, ebaiki too lkiyio, naa ilmang'ati lo salaba le Kristo te nkishui enye neng'idare enkurruna enye naa ntokitin e nkop eenikino ndamunot enye. Kake kira iyiook ile nkop natii shumata, naa ine eing'uaa Olaitajeunoni likiaanyita, Olaitoriani lang Yesu Kristo, laa ninye oyooki aibelekeny ele sesen lang odou metotiwuo anaa ilo sesen lenye le nkitoo te ina golon naidimie ninye metipika ebaiki ntokitin pooki abori enkitoria enye makewan. Ore naa ilalashera laainei lanyor nayieu naduaare, eng'ida ai o enkopiyia e nkitoo, entashoito enkuna neijia ti atua Olaitoriani, ilanyor laainei. Asai Eudia, nasai Sintike metoning'oto ti atua Olaitoriani. Naaikilikuan sii iyie encholuek ai nadede, taretu kuna kituaak amu aatang'arie ninche enyamali te enkaraki ororei supat, te nebo Klement o lelo kulikae ootaasishote te nebo nanu, ootii nkarn enye atua embuku e mpuaan. Enting'idata ti atua Olaitoriani anaake, naitoki ake ajo enting'idata. Nchoo iltung'ana pooki metayioloito emborron inyi. Etataana Olaitoriani. Emintanyamal ate ti ae toki, kake ore te pooki toki te nkomono o te nkishoroto e nashe. Enchoo Enkai metayiolo inkolati inyi neaku eseriani e Enkai nalang eyiolounoto pooki narrip iltauja linyi o ndamunot inyi ti atua Kristo Yesu. Ore enabayie ilalashera naa inchere, ore pooki naasipa, ore pooki nayanyitayu, ore pooki naata errepet sidai, te netii orrekie sidai netii orrekie oiririkino enkisisa, kuna entadamu. Ore nena nitayioloto, nitang'amutua, nitoning'o, nitoduaa te nanu, entaas; neaku Enkai e seriani te nebo intae. Ekang'ida ti atua Olaitoriani lang nchere inyaakita aitopiu osotua te nanu, esipa kitadamutua sii apa kake eitu itumutumu erishata. Neme taa kaing'unyung'uny ayieu ae toki, amu ateng'enaka, aidipakinore mbaa pooki. Ayiolo eneikununo eng'orikinoto aashu te enkiputakinoto, ore te pooki toki oo too rishat pooki atayiolo olosek lashurakinye eraposhoi e esumash, ti ari o ti ameyu. Aidim ataasa mbaa pooki ti atua ilo laa ninye laaidimie. Kake itaasa enaishiaakino te nkaraki kitang'arie osina lai. Niyiololo intae Ilfilipi oopeny nchere ore apa te nkiterunoto o rorei supat, ina kata pee aing'uaa Makedonia, nemetii esirit naatang'arie enkishooroto aashu eng'amunoto meteleku intae ake. Ore ninye apa atii Sesalonike, kirriwakita nanu eretoto e dukuya o ene nkaigil. Neme taa enkishorunoto aing'orua, kake aing'oru ilng'anayio ooponari ooikenakini intae. Atangamua te Epafroditas nkishorot nirriutua enkishorunoto e rropili, o lasar ong'amaroyu naa oloitiship Enkai. Naa keiputaki Enkai pooki olat inyi te risioroto e nkarsisisho enye te nkitoo ti atua Kristo Yesu. Metaa ene Enkai naa Papa lang, enkitoo ntarasi o ntarasi. Eesai. Eroroki lelo pooki sinyat ti atua Kristo Yesu. Eiroroki intae ilalashera ootii te nebo nanu. Eiroroki intae isinyat pooki neisulaki lelo le nkaji e Kaisari. Metaa empiris o Laitoriani Yesu Kristo te nebo enkishui inyi. Paulo olkipaaret le Yesu Kristo te yieunoto e Enkai, o Timoteo olalashe lang. Kingeroki isinyat o lalashera ooisiligayu ti atua Kristo ootii Kolosai. Metaa eninyi empiris o eseriani eing'uaa Enkai Papa lang. Kishukoki oshi ake e nashe Enkai, Papa lo Laitoriani lang Yesu Kristo, too nkatitin pooki kiomonoki intae; amu kitoning'oitie enkirukoto inyi ti atua Kristo Yesu o enyorrata ninyorrinyorro isinyat. Ore eneing'uaa nena pokira are naa ilo siligi litoning'o apa pee elotu enitii olkilikuai osipa loo Lomon Supati, naa te keper eiputakini intae ilo siligi. Nebulita lelo Omon Supati aaiu ilng'anayio te nkop pooki; naa enaikuna ti atua intae ebaiki ina olong apa nining'ining'i empiris e Enkai niyiolouwu te sipata, anaa eninteng'ena ate te Epafras lanyor naa osinka le ncholiek ai, naa osinka oisiligayu le Kristo ninye te rishata ang, naa ninye oinosaka iyiook eneba enyorrata naishoo Enkiyang'et intae. Ore naa, eitu kigira mikiomonoki intae ebaiki ina olong nikitoning'o pee eiput intae eyiolounoto e yieunoto enye ti atua eng'eno pooki e yiolounoto o ltau, nikisaisho pee ipuoyieyie enkishon naaku to Laitoriani, naitiship ninye katukul, nitumutumu aatoiu ilng'anayio too mpukunot pooki e supatisho, nitumutumu aatobikoi iponaa oleng oleng aayiolou Enkai. Meitagoli intae te ngolon pooki, te risioroto e ngolon kitok e nkisisa enye, te ng'iriata pooki ning'iriri te nebo enchipai, ninchosho Papa enashe, oisho iyiook esipata neng'arieki iyiook enjung'ore oo sinyat ti atua ewang'an. Ninye otalakua iyiook aitung'uaa enkitoria e naimin neidurrie iyiook maape enkitoria o Inoti lenye kirotet, laa te ninye kiaata elakunoto, naa empalakinoto oo ng'ok ang. Ninye nyaanyukie e ina Ai nemelioo, olkikau le pooki toki naitayioki; te nkaraki ninye pee eitayioki ntokitin pooki, naatii shumata o naatii enkop, inaalioo o nemelioo te naa lorikan loo looitoreisho, aashu nkitoriat, aashu looishoro engolon e nkitoria, te ninye eitayioki ntokitin naa ninye eitobirakaki. Ninye otii enkiterunoto oo ntokitin pooki, naa atua ninye eitasheyie aatumokino ntokitin pooki. Ninye elukunya o sesen, eji ene sirit, ninye ora enkiterunoto, olkikau oiterunye aing'uaa ilootuata, peyie eaku ninye oituruk te pooki toki. Amu atua ninye etonyorra aitamany emborei pooki e Enkai, naa kewan eitaikinye osotua ntokitin pooki, te naa inaatii enkop aashu inaatii shumata, neyau eseriani to sarge lo salaba lenye. Ore intae, iloora apa ae kata ileeiking'a ti alo Enkai nirara ilmang'ati ti atua ndamunot inyi, to lbae loo iasat inyi torrok, enotoko intae enkitobirakinoto too nkiri o sesen lenye te nkeeya enye, pee etum aitarasai intae irara sinyat nimiaatata ntiyot nimiaatata entibili naipotokini intae te dukuya ninye, te nesipa nchere ipuoyieyie enkirukoto, niunokinono nemeigusugusieki intae, nemeiwuang'ieki intae to siligi too Lomon Supati litoning'o, ootolikioki pooki oishu ti abori shumata, laa ninye ataa nanu Paulo olaisiaayiani lenye. Nang'ida taata nanu ti atua sinaitin laainosieki te nkaraki intae to sesen lai, aitabaya nena naang'or te nkisilisiloto e Kristo to lbae lo sesen lenye, eji naa esirit ina. Nataa nanu olaisiaayiani lenye te risioroto e siaai naaisho Enkai te nkaraki intae, maitudupai ilo rorei le Enkai katukul, naa ninye enkisudoroto naisudoyioki too nkatitin o too lajijik kake etabolokoki taata isinyat lenyena. Ninche etegelua Enkai aitayiolo eneba ti atua iloreren enkarsisisho e nkitoo ena kisudoroto, naa Kristo ti atua intae olora osiligi le nkitoo. Ninye kilikioo, kinkok pooki tung'ani nikinteng'en pooki tung'ani te ng'eno pooki, peyie kitum aaitarasai pooki tung'ani etabayie ti atua Kristo. Enkaraki ena pee anyokita; nanyamaliki te ngolon pooki e nkidimata e ilo oisiaaisho ti atua nanu. Amu ayieu niyiolouwu eneba enyamali nanyamaliki intae, lelo ootii Laodikea, o lelo pooki leitu ae kata aadol enkomom, pee ailejileji iltauja lenye neitushuli te nebo ti atua enyorrata, pee etum endupai pooki e ning'unoto nasipuno eng'eno e nkisudoroto e Enkai, o Kristo, olaa ti atua ninye eisudoro masaa pooki sidain e yiolounoto o eng'eno. Najo kuna, pee melej intae likae too rorei le nkeleekisho. Amu ore hoo nematii ine to sesen, kake atii te nkiyang'et ang'ida te nadol orrekie linyi sidai o enkitashoto e nkirukoto inyi ti atua Kristo. Ore anaa apa enitang'amutua Olaitoriani Kristo Yesu, enchoo eaku ninye inchuyieyie, niunokinono neshetuni intae, niponana inchosho ninye enashe. Entodol ate mewuapaa intae likae te ng'eno oo losekin o elejare e pesho, nasuj inkoon e tung'ani, anaa inaajo nkiyang'eta o loing'ang'e, neme anaa naajo Kristo. Amu atua ninye emanya elulung'ata e pooki e Nkai to sesen, neewuo alulung'ayu enkishui inyi ti atua ninye, olaa ninye elukunya e nkitoria o enkidimata. Ti atua ninye etumurataki intae te murata neme enoo nkaik, eitayioki aaoru intae ina kewan o sesen ti atua emurata e Kristo; netunukayioki intae te nebo ninye ti atua enkibatisa, naa te ninye enyaakaki aaitopiu intae te nkirukoto ti atua enkiaas e Enkai, naitopiwuo ninye aitung'uaa ilootuata. Naa intae, ilootuata apa too nkitarruorrot o too seseni linyi lememurata eitopiwuo intae Enkai te nebo ninye, netapalaka iyiook inkitarruorrot ang pooki, netujuto enkiguana; ninye oiwuang'ie kuna, neshe to salaba. Ninye otuuruo nkitoriat o loogol pooki o masaa o larrabal neitoduaaya te neibala, nerik aitaa iarunot etigilua ninche. Emincho naa edung'oki likae intae enkiguana too mbaa e ndaa anaa te naoki aashu te masho, aashu te nkiborra o lapa aashu te nkolong e nkiyeng'iyeng'ata. Oloip ake kuna le kulie naapuonu; kake ore enkewan ene Kristo. Emincho hoo eoruni intae nchuneti eji meeta nchere pee eitu intadouwu ate anaa iserememe ilmalaika, eji neunore kulikae induaat, neipopong'a meeta esipata, too ndamunot enye e tung'ani, nemeenikino ilo ora Elukunya, olaa ninye etumie osesen pooki oladakite neruburuba to morlooshi o sinigi lenyena, nebulu te mbulunoto naa Enkai eing'uaa. Te naa eituata te nebo Kristo te nkalo e nena kiyang'eta o loing'ang'e, oo naa pee eton ake ipuopuo anaa leton era ile nkop? Oo pee inchosho eitore intae irrekiei leeiking'a? Eji, “Mimbung, Minyorrinyor, Miseyie?” (Eimaki ninche intokitin naapurda easishoreki), aasuj inkoon oo ltung'ana o enkiteng'enare enye? Kedoli doi kuna etiu anaa ine ng'eno etukunyaki ltung'ana esujata enye neitadou ate neitupukoo iseseni lenye kake, meeta hoo eneret te nkibooroto oo ng'uarrat o sesen. Tenaa keitopiwuoki intae te nebo Kristo, eng'oru nena baa naatii shumata, netii Kristo, etonita te nkaina e tatene e Enkai. Empirie indamunot inyi nena baa naatii shumata, mme nena naatii enkop. Amu indipa aatuata, neisudoyioki enkishui inyi te nebo Kristo ti atua Enkai. Ore pee eliooyu Kristo laa ninye enkishui ang, niliooyuyu sii intae te nebo ninye ti atua enkisisa. Entaar naa metuata ti atua intae, nena naara ine nkop; aa enkiborra oo nkonyek, iloirerioni, olorok, ng'uarrat torrok, olodoong'u, eomonoto oo kitanyaanyukot naaitaae nkaitin. To kuna baa elotu engoro e Enkai. Kuna apa ipuoyieyie eton itii atua ninche. Kake ore taata, ewuang'ie nena pooki: aa ewuapa, engoro, enkiba, esukeny, o lderrat torrok ooing'uaa inkutukie inyi. Milej olikae olikae, idolitata aajo ituburushutua enkewan musana o rrekiei lenyena. Ninchopo enkewan ng'ejuk, naitang'ejuki te ng'eno metanyaanyukie ilo oitayio ninye. Ore naa nemeetae Olgiriki o Lyahudi, olomurata o lememurata, olmeeki, Osikite, orrindik, ololakuno, kake Kristo pooki toki, netii ninye atua pooki. Anaa ilgelunot, le Enkai, oosinya nenyorri enchopo enanai e nkoshoke, olng'ur, emoolisho emborron o eng'iriata, ning'iriri oltung'ani ake te likae, naa teneeta ake oltung'ani enkigunyung'uny to likae, nepalaki olikae anaa pee kitapalaka sii iyie Olaitoriani, neaku eishiaakino sii iyie pee ipalaki. Ore enaituruk te kuna pooki enchopo enyorrata, te naboisho nabaya. Naa enchoo eseriani e Kristo eitoreisho ti atua iltauja linyi, amu ina eipotokoki intae ti atua ilo sesen obo. Naa enoto enashe. Enchoo ororei le Kristo emany atua intae te nkarsisisho, inteng'enana niutaroro olikae o likae te ng'eno pooki, iranyiranya Olkerempe le Nkai o sinkolioitin le nkishui inchosho Enkai enashe ti atua iltauja linyi. Ore embae ake pooki niaasiasa, to rorei aashu too nkiaasin, entaas pooki toki te nkarna o Laitoriani Yesu. Inchosho Enkai Papa enashe te ninye. Na kituaak, entoning ilpayiani linyi, anaa enaitoriori ti atua Olaitoriani. Lo payiani, entonyor inkituaak inyi, emisomit. Na kera, entoning intoiwuo inyi too mbaa pooki, amu ena naitiship Olaitoriani. Ore intae iloo menye, emintagor inkera inyi, pee miariara iltauja. Lo rrindiki, entoning te pooki bae lelo oora ilkituaak linyi te nkop, neme te nkisiaayiare oo nkonyek anaa looitiship iltung'ana, kake to ltau obo, iurere Olaitoriani. Ore esiaai inyi pooki entaas too ltauja, anaa Olaitoriani iasakiki neme iltung'ana, iyiololo aajo to Laitoriani itumutumu enjung'ore anaa olekoisiaayio linyi; Olaitoriani Kristo isiaaitata. Amu keyookini aaitalak oloas intorrok nena torrok naataasa, nemeetae enyorrakinoto. Ore intae ilooitoreisho, entaasa rrindiki linyi too sipat o too nkiririkinot, iyiololo aajo iatata sii intae Olkitok linyi te shumata. Entasheikinoto enkomono emingusugus, irripishosho nisholololo, niomonokiki sii ninche iyiook, metaboloki Enkai iyiook enkoitoi ele rorei, matolikioi enkisudoroto naipirta Kristo naa te nkaraki ninye pee atii nanu korokoroni, peyie atum aibalunye enaaishiaakino nairo. Enchom irara ng'eni ti alo lelo ootii auluo entaasishore inkat pooki. Enchoo nkirorot inyi nkatitin pooki eaku ine mborron naata emunyan, pee itumutumu aatayiolo enijojo te niwalikiki pooki ng'ae. Tikikos olotu aliki intae mbaa aainei; olalashe lai lanyor naa olaisiaayiani oisiligayu naa osinka le ncholiek ai ti atua Olaitoriani. Nanu oirriwua enitii ajo pee, itumutumu aatayiolo enikitiu netum ailejileja iltauja linyi, neiriamunore Onesimas olalashe onyorri neisiligayu, laa obo linyi. Ninche oopuonu aainosaki intae mbaa pooki naataasate te ne. Eiroroki intae Aristakos oloena te nebo nanu, neiroroki intae Marko le nkanashe e Barnabas (Iindipa aanoto olkilikuai loo mbaa enyena - te neewuo ninye enitii, entang'amu), neiroroki intae Yesu oji Yusto. Kulo tung'ana ake le lelo oomurata oora laisiaayiak le ncholiek ai kisiaai enkitoria e Enkai, naataretutuo ninche. Ore Epafras, ora obo linyi, osinka le Yesu Kristo, neiroroki intae, nedamu intae anaa ake te nkomono enye, peyie intasheshe itubulutua neitisipaki eyieunoto e Enkai ti atua intae. Ara shakeni lenye nchere etonyuaa aisiaai intae naleng o lelo ootii Laodikea o lelo ootii Hierapolis. Eiroroki intae Lukas oloshi abaani lanyor, neiroroki intae Demas. Enchoo lalashera laainei ootii Laodikea enkirorokino ai, ninchosho Nimfa o ina sirit natii enkaji enye. Naa ore pee eidipi aaisumaki intae ena palai enchoo sii eisumakini esirit oo Laodikea; naa entodol pee eisumakini sii ninche intae ina palai naing'uaa Laodikea. Naa entiaaki Arkipus, “Toduaa ake pee intabaya ina siaai nitang'amua ti atua Olaitoriani.” Nanu, Paulo oigero ena kirorokino te nkaina ai makewan. Entadamu ilpisia laainei. Metaa empiris te nebo intae. Paulo, Silvano, o Timoteo, enetii esirit oo Lsesalonike, Ti atua Enkai Papa o Laitoriani Yesu Kristo, Metaa eninyi empiris o eseriani. Kincho oshiaake Enkai enashe te nkaraki intae pooki kimpot intae anaake ti atua enkomono ang. Kidamu intae te dukuya Enkai ang Papa o esiaai inyi e nkirukoto o enyamali e nyorrata o enkitashoto o siligi ti atua Olaitoriani lang Yesu Kristo. Amu ilalashera oonyor Enkai kiyiolo aajo etegelua ninye intae, amu ime to rorei ake etabaikia intae ororei supat, kake te ngolon sii o te Nkiyang'et Sinyati o te sipunoto nalulung'a. Iyiololo empukunoto ang enaikununo apa kitii atua intae naa te nkaraki intae. Nitaa intae ilooduaaya iyiook o Laitoriani amu, itang'amutua ilo rorei te nkaripo sapuk, te ng'ida nadumaki intae Enkiyang'et Sinyati; itaa intae enkitanyaanyukoto too lairukok pooki ti atua Makedonia o ti atua Akaia. Amu ime taa ake ti atua Makedonia o Akaia etoning'e ele rorei lo Laitoriani na intae eing'uaa kake ore enkirukoto inyi ti atua Enkai neshomo neibulaa pooki wueji, neaku meeta tipat pee kijo ae. Amu ore ninche maate netolimutuo ti alo iyiook eneba enkitoomono nikinoto te intae o eninkuna pee imbelekenyakinono Enkai aaing'uaa inkitanyaanyukot, aaisiaai Enkai naishu nasipa, niaanyunyu Oinoti lenye eing'uaa shumata, ilo oitopiwuo ninye aitung'uaa lootuata, Yesu laa ninye olaku iyiook aitung'uaa engoro nalotu. Amu iyiololo intae maate, ilalashera inchere ime ene pesho elotunoto ang nikietuo enitii intae. Amu iyiololo, enkisilisiloto o morot nikinoto te Filipi, neme toki amu eishoo iyiook Enkai empijan nikilikinye intae Ilomon Supati, hoo netii kesha sapuk. Amu ore esayiakinoto ang nemepuku eing'uaa enkitapong'oroto anaa ilduruki neme to losek eitobiruaki. Kake ore anaa enatonyorrayie iyiook Enkai neisiligaki too Lomon Supati, neijia kijo iyiook neme pee kintiship iltung'ana, kake pee kintiship Enkai naineneng iltauja lang. Amu ore iyiook neitu ae kata kiaasishore irorei le nkilelemare, anaa eniyiololo, aashu kiaata imbaa naisudoo eului, naa Enkai shakeni; neitu king'oru enkisisa too ltung'ana, aa te intae, arashu te kulikae, hoo naa anaata kinkuna neijia anaa ilkipaareta le Kristo. Kake aikibor apa ti atua intae anaa enkaibung'ani naing'or inkera enyena. Neaku ore te nkaripo kiyieu intae kiterretenate pee king'ar te nebo intae neme ilomon ake Supati maate, kake oyiook sii maate amu itaa intae kiroteti oleng te iyiook. Amu idamumu intae enyamali ang o esiaai nagol, ilalashera, kitaasishote dama o kewarie, pee mikiek hoo likae te intae, kiliki intae Ilomon Supati le Nkai. Irara intae shakeni, naa neijia sii etiu Enkai, te sinyatisho o te supatisho nimikiaata entiyoto to lkuaak lang ti alo intae ilairukok. Iyiololo aajo kintaasa intae anaa enaitaas menye inkera enyena, kinkoo pooki ng'ae te intae nikintagol oshuaa, nikintanapa intae. Pee ipuopuo te nkishon naishiaakino te Nkai, ilo oipotoki intae atua enkitoria enye makewan e nkitoo. Nikincho sii iyiook oshiaake Enkai enashe te nkaraki ena, inchere pee ing'amumu ororei le Enkai litoning'o te iyiook, eitu intae ing'amumu anaa ororei loo ltung'ana, kake anaa enatiu te dede orerei le Enkai ti atua intae ilairukok. Amu ore intae loo lalashera intoduaarie ate isirito e Enkai ti atua Kristo Yesu naatii atua Yudea. Amu inoto sii intae olosilisili too ltung'ana lo lorere linyi anaa enanoto sii ninche too Lyahudi, laa ninche ootaara ndung'ot pokira metuata Olaitoriani Yesu o loibonok le Nkai, nearaa iyiook ong'ata, nemeitiship Enkai neibooyo ltung'ana pooki emitiki iyiook kiliki Loreren enaiko pee eitajeuni, ejo pee etum aaiputu emborei o ng'ok enye pooki. Kake eewuo engoro e Enkai te nkiting'oto shumata ninche. Kake ore ilalashera anaa neorieki iyiook intae te nkiti kata, too seseni neme too ltauja, kitoinyua o te yieuna sapuk o te nyorrata kitok pee kiduaa inkomomi. Amu kitayieutua nikiponu enitii intae, atetema nanu Paulo enkata neme nabo kake eibooyie iyiook shetani. Amu ainyoo osiligi lang aashu eng'ida aashu entoki naisul nikiwuasare te dukuya Olaitoriani lang Yesu te lotunoto enye? Aime intae? Amu irara intae enkitoo ang o eng'ida ang. Ore te ina imeekure kindim aating'iria, nikinyorraa metung'uari iyiook oopeny te Atene. Nikirriutua iyiook Timoteo, olalashe lang naa osinka le Enkai ti atua Lomon Supati le Kristo pee elotu ashet intae ti Atua enkirukoto inyi neilejilej sii intae; pee metii hoo obo oigusugusie kulo sinaitin, amu iyiololo intae maate inchere erubata ang ina. Amu ore apa kitii te nebo intae, kitolikitio intae eado kop inchere keyookini aaisilisil iyiook; anaa enayewuo ake atiu, anaa eniyiolo intae. Ore te nkaraki ina neitu aitoki aidim ating'iria, nairriu olkilikuai enitii ayiolou enkirukoto inyi, amu aure ajo ebaiki netetema intae olatemani neaku esiaai ang ene pesho. Kake ore taata eewuo Timoteo enikitii eing'uaa enitii intae, neinosaki iyiook ilomon sidain le nkirukoto o enyorrata inyi, nelimu inchere idamumu oshiaake iyiook too sidain niyieuwu oleng nidolidolo iyiook anaa enikiyieu sii iyiook nikidol intae. Ore te nkaraki ena lo alashera, eilejilejaki yiook ti alo emion o sinaitin lang pooki te nkaraki nkirukoto inyi. Amu ore taata naa aikinchu iyiook, tinintasheshe intae nimiwuatiwuatata ti atua Olaitoriani. Amu kebaa enashe nikindim aaishoo Enkai te nkaraki intae, te ng'ida pooki nikiaata te nkaraki intae te dukuya e Nkai. Kiomon aaitirrish kewarie o dama pee kitum aatodol intae e notote inkomomi, pee kitum aaishoo intae ina nang'or ti atua enkirukoto inyi. Ore taata Enkai ang naa Papa makewan, o Laitoriani lang Yesu Kristo meitorioki enkoitoi ang, enitii intae; metoponai Olaitoriani enyorrata te rishata inyi intae maate o too ltung'ana pooki anaa enikitiu iyiook te intae, pee etum ninye aitagolo iltauja linyi meeta entiyoto te sinyatisho te dukuya e Enkai ang naa Papa lang te lotunoto o Laitoriani lang Yesu te nebo isinyat lenyena pooki. Ore enabaiyie ilalashera, kiaata ae toki nikinkilikuan intae nikisai ti atua Olaitoriani Yesu, ore anaa enitayioloito te iyiook enaishiaakino te nitiuwu to lkuaak o te nkitishipata e Nkai, anaa eniaasitata, entaas ina oleng oleng. Amu iyiololo inkiteng'enat, nikincho iyiook intae eing'uaa Olaitoriani Yesu. Amu ena eyeiunoto e Enkai te intae, enkitisinyata inyi, entalam eloloito, inchere pee eiyiolou pooki ng'ae linyi enaiko te nerikoki kewan enkitok te sinyatisho o te nkanyit, neme ti atua ing'uarrat torrok anaa iltung'ana lemeiyiolo Enkai; inchere mepong'ori oltung'ani meinyial olalashe lenye te na bae; amu Olaitoriani oitalaku ti atua kuna baa pooki, anaa enikinturukokito aaikok intae te dukuya. Amu eitu eipotoki iyiook Enkai olduruk kake atua esinyatisho. Metaa ore oltung'ani pooki le meshilaa ena neme oltung'ani eitu eshilaa kake Enkai, naisho intae, Enkiyang'et enye Sinyati. Kake ore ti alo enyorrata oo lalashera, nemeeta tipat pee eigeroki likae tung'ani ae toki, amu ore intae maate eiteng'ena intae Enkai entonyorrata olikae o likae, nedede inchere inyorrinyorro ilalashera pooki ootii atua Makedonia. Kake kisai intae ilalashera entaas ina oleng oleng, eng'oru pee itonini aaitirring'a nigolielie isiaaitin inyi. Niaasishosho too nkaik inyi anaa enikintanapa intae; pee itilitili kuldo leme ile ncholuek inyi, nemeitoki aaku oltung'ani ingarakinono. Kake mikiyieu intae nimiaatata eiyiolounoto ilalashera, ti alo lelo ooirura pee misinanuonuo anaa anaiko kulikae lemeeta osiligi. Amu ore enkaraki nikiruko inchere etua Yesu neitoki apiu neijia sii etiu ti atua Yesu, kerrinyu Enkai te nebo ninye lelo ooirurate. Amu ena kimbalakinye intae to rorei lo Laitoriani inchere ore iyiook ilooishu, ootelekutua ometabau elotunoto o Laitoriani, nimikipuo aaituruk te lelo ooirurate. Amu Olaitoriani makewan odou eing'uaa shumata to ltoilo le nkitoria o to ltoilo lo lmalaika kitok o endarata e mowuo e Nkai. Ore ilootuata ti atua Kristo nepiu te dukuya. Ore iyiook ilooishu, ootelekutua, neibung'i iyiook aailepie te nebo ninche ti atua inkatampo pee kinang'are Olaitoriani to loing'ang'e, neaku keaku iyiook tenebo Olaitoriani anaake. Metaa entagoloto olikae olikae te kulo rorei. Kake ore anaa inkatitin o rishat ilalashera nemeeta tipat pee eigerokini intae ae bae. Amu iyiololo intae maate oleng inchere elotu enkolong o Laitoriani anaa olapurroni te nkewarie. Ore ejo olorere, “Eetae eseriani nemeetae embatisho.” Ore nabo kata nelotu erruorroto shumata ninche anaa emion nainepu enkitok nairoshiwuo nemeeta eneilanyaki. Kake mitii intae atua enaimin ilalashera metaa keluam intae ina olong anaa olapurroni. Amu kira iyiook pooki inkera e wang'an o nkera e ndama, metaa imikira ile nkewarie aashu ile naimin. Ore enkaraki ina emikirura naa anaa enairura kulikae, kake matashololoto nikinteng'enuo. Amu ore kuldo ooirura naa kewarie eirura ore kuldo oomera naa kewarie emera. Kake ore amu kira ile ndama emaiteng'enuoto nikinchop elong'o oo lgooitie inchere enkirutoto o enyorrata, ore enkopiyia e sekenkei osiligi le njeunoto. Amu ime engoro enye eiyieu Enkai nikinting'oki kake pee kitum enjeunoto naimu Olaitoriani lang Yesu Kristo, otua te nkaraki iyiook paa te naa aikinchu aashu kirura nikinchu te nebo ninye. Neaku entagoloto oshuaa o likae o likae naa enteshet olikae olikae anaa ina niaasitata. Kake kisai intae, lalashera, enchoo enkanyit lelo ooasisho ti atua intae, naa ilairukok laikook linyi ti atua Olaitoriani neikok intae. Enchoo ninye enkanyit sapuk nalus o enyorrata te nkaraki esiaai enye, enchoo ejing eseriani atua intae maate. Nikisai intae ilalashera, enkoo ilturua nipikipiki enyuaata ilootapalari niretutu ilooshal, enting'iria te lelo pooki. Entodol pee melaaki oltung'ani olikae entorrono te ntorroni, kake entetem anaake entaasata isidain maate o ltung'ana pooki. Entishipata anaake. Entoomon pooki kata, enchoo enashe te pooki pukunoto, amu ena doi eyieunoto e Enkai te intae ti atua Kristo Yesu. Nimisiorogogo Enkiyang'et, nimimenaa enaibon e Nkai. Kake eneneng'a pooki toki, embung'a entukurraki ina sidai, entalam empukunoto pooki e ntorroni. Meitisinya intae tukul Enkai e siriani makewan, ore Enkiyang'et inyi o ltau o sesen, metaa biyoto meeta entibili o metaa enkata e lotunoto o Laitoriani lang Yesu Kristo. Ore ilo ooipot intae, keisiligayu naa keitabaya ninye. Ilalashera entoomonoki iyiook. Eroroki ilalashera pooki te ng'ututata sinyati. Nasai intae to Laitoriani pe eisomakini ena palai ilalashera pooki. Metaa empiris o Laitoriani lang Yesu Kristo tenebo intae. Paulo o Silvano, o Timoteo, Enetii esirit oo Lsesalonike e Enkai Papa lang o Laitoriani Yesu Kristo. Metaa eninyi empiris o eseriani naing'uaa Enkai Papa o Laitoriani Yesu Kristo. Meeta inchere pee mikincho Enkai enashe inkatitin pooki te nkaraki intae ilalashera, anaa enaishiaakino amu ebulu oleng enkirukoto inyi, ore enyorrata e pooki ng'ae te intae to likae o likae neponari. Ore enkaraki aikiwuasare iyiook intae maate ti atua nena sirito e Enkai te nkitashoto inyi nemeiwuatiwuata o enkirukoto ti atua inkisilisilot inyi pooki, o ti atua isinaitin ling'iriri taata. Olmonekie ele le nkiguana nasipa e Enkai, pee etumi aaitaa intae ilooishiaakino enkitoria e Enkai naa te ninye eisilisilitoi intae ore te nkaraki natoduaa Enkai inchere esipata te nelaaki te nkisilisiloto lelo ooisilisilito intae, neisho intae ilooisilisiloki enkiyeng'iyeng'ata te nebo iyiook, te ina kata naibalunyeki Olaitoriani Yesu Kristo eing'uaa shumata te nebo ilmalaika lenyena magil, ti atua enkima nayupuyup neyau enkitamioto e nkitalaata shumata kuldo lemeyiolo Enkai, o shumata kuldo lemening Ilomon Supati lo Laitoriani lang Yesu. Amu keitamei te mutata oo ntarasi nekepari aaitalam enetii Olaitoriani o enetii enkitoo e nkidimata enye. Ore te nelotu ninye te ina olong pee eitaai kitok ti atua isinyat lenyena pee eing'asiakinoi ninye te atua lelo pooki ooiruko, amu ore shakenisho ang te intae neirukoki. Ina pee kiomonoki oshiaake intae, pee eitaa intae Enkai ang ilooishiaakino te nkipototo enye, neitabaya pooki bae sidai o esiaai enkirukoto te ngolon enye. Pee aa ore enkarna o Laitoriani lang Yesu, neisisi ti atua intae, neisisi intae tiatua ninye, te risioroto e mpiris e Enkai ang o Laitoriani Yesu Kristo. Ore ti alo elotunoto o Laitoriani lang Yesu Kristo o enkiturrurroto ang pee kinang'are ninye, kisai iyiook intae, ilalashera eminchosho eirrirri indamunot inyi aasioki aashu eituria neme te nkiyang'et to rorei aashu te mpalai naji iyiook eing'uaa eji etabawua Enkolong o Laitoriani. Eminchosho ake oltung'ani elej intae te pooki oitoi, amu melotu ina olong te neme eserserisho nalotu te dukuya, neibalunyieki ilo tung'ani le ngogong'i, enkerai e nkiminata, okeshisho neilepie kewan eiba pooki toki ake ninye naji enkai aashu ina naseremi, neitoton kewan to lorika te nkaji e Enkai, nelikioo kewan eitaa kewan Enkai. Aimidamumu intae aajo ore apa aboitare intae atolikio intae ena? Niyiololo intae entoki neton eibokito taata pee etumi aaibalunye ninye te nkata enye. Amu ore ina kisudoroto e ngogong'i neasisho taata, ore ilo oibooyo ninye neiko neijia o metaba anaa neiwuang'ieki ninye. Ore ina kata neibalunyieki ilo torrono, naa kear Olaitoriani Yesu te ntooma e nkutuk enye, naa keidaikie Ninye ninye te liooto enye o te lotunoto enye. Ore te lotunoto e ilo torrono te ngolon e shetani, neasi te nkidimata pooki ilmonek le lejare o ne nking'asia, neleji lelo ooimin te monkoi e ntorroni amu etanyaita ninche enyorru esipata naidim aitajeu ninche. Neaku eirriwaka ninche Enkai enkitarruorroto nagol, meiruko enda e monkoi, pee etumi aaiguanara lelo pooki lemeiruk esipata kake eshipakino entorroni. Kincho oshiaake Enkai enashe te nkaraki intae ilalashera oonyorri to Laitoriani, amu etegelua apa intae Enkai ebaiki enkiterunoto pee eitajeuni te nkoitoi e nkitisinyata te Nkiyang'et o te nkirukoto ti atua esipata. Eipotoko ninye intae ena oo Lomon Supati likiyakita iyiook intae pee itumutumu enkitoo e nkisisa o Laitoriani lang Yesu Kristo. Ore naa ilalashera, entasheito emiseuseu embung'a entukurraki olkerreti likituutakita iyiook intae to rorei le nkutuk aashu te mpalai. Ore ninye Olaitoriani lang Yesu Kristo makewan, o Enkai Papa lang ootonyorra iyiook, neisho iyiook enkilejilej oo ntarasi o siligi sidai oing'uaa empiris, meilejileja iltauja linyi neitasheiyie ninche ti atua enkiaas pooki sidai o to rorei. Ilalashera ore enabayie entoomokie iyiook, pee esioki ororei lo Laitoriani aidapasha nemirisho anaa enaikunaki ti atua intae, pee eitajeuni iyiook too ltung'ana arruok naa torrok; amu ime pooki ooata enkirukoto. Kake eisiligayu Olaitoriani naa keitagol ninye intae nerrip intae te ntorroni. Aikiaata enkitieunoto ti atua Olaitoriani ti alo intae inchere iasitata naa imookiki aas imbaa nikintanap intae. Metuutai Olaitoriani iltauja aitorioki enyorrata e Enkai o enkitashoto nemeiwuatiwuata e Kristo. Intae ilalashera kintanap taata te nkarna o Laitoriani lang Yesu Kristo inchere entalam olalashe pooki oton te nturuaisho lemesuj ilo kerreti litang'amutua te iyiook. Amu iyiololo intae maate eninkoko te niduaayaya iyiook, amu ore apa kiboitare intae neitu kitoni pesho, neitu kinya endaa o ltung'ani hoo obo eitu kilak kake kinaurita nikisiaaisho, aasisho kewarie o dama, pee mikiaaku ake olola le likae obo linyi. Neme enkaraki naa esipata mikiaata kake pee kincho iyiook intae to lkuaak lang enkitanyaanyukoto niduaayaya. Ore doi ninye ina kata kiboitare intae nikinchoo intae ena kitanapata: Te nemeasisho oltung'ani emincho enya endaa. Amu kining ake inchere etii kulikae linyi ootoni ti atua enturuaisho neitanyamaluo too siaaitin e kulikae nemeeta esiaai naas. Kintanap iltung'ana anaa lelo nikinkok te nkarna o Laitoriani Yesu Kristo metaasa esiaai enye te ngira nenya endaa naisiaayu oopeny. Ilalashera eminauru te asata oo supati. Te neany oltung'ani ening enikiliki iyiook intae te na palai, entayiolo ilo tung'ani, nimintokiki aata eniporokiki ninye, pee ekurru ninye. Eming'or ninye anaa olmang'atinta, kake enkoo anaa olalashe. Ore taata Olaitoriani le seriani meishoo ninye intae makewan eseriani inkatitin pooki ti tua nkoitoi pooki, metaa Olaitoriani te nebo intae pooki. Nanu Paulo oigero ena kirorokino te nkaina ai makewan. Ele olilmonekie le mpalai ai pooki, neijia oshiaake aiko te naiger. Metaa empiris o Laitoriani lang Yesu Kristo te nebo intae pooki. Paulo, olkipaaret le Kristo Yesu te nkitanapata e Enkai Olaitajeunoni lang, o te ne Kristo Yesu osiligi lang. Oigeroki Timoteo, enkerai ai te sipata ti atua enkirukoto. Metaa enino empiris, o lng'ur, o eseriani eing'uaa Enkai Papa o Kristo Yesu Olaitoriani lang. Ore anaa enapa naaitanapa aloito Makedonia, tobiko te Efeso peyie intanap amitiki lelo kulikae elikioo pooki kiteng'enare napaashaa. Aashu eitanyamal ate too nkatinin o lmakui nemeeta enkiting'oto, naayau nkikilikuanat naapaashari neme enchetunoto e atua Enkai natii enkirukoto atua. Amu ore enaipirta enkitanapata ang naa enyorrata naing'uaa oltau owang o ltau sidai lemeeta ileeni, enkirukoto nemetii esunkureisho. Ore kulikae netapaashari aapong kuna neidapashakino enchankar e pesho, eyieu ninche neaku ilaiteng'enak loo nkitanapat nemeyiolo nena naajoito aashu nena baa naaimaki aakurraki. Ore iyiook nikiyiolo aajo sidain inkitanapat te neasishore oltung'ani te sipata, kiyiolo ena nchere, ore nkitanapat, eitu eitanapisho te nkaraki lelo supati, kake te nkaraki lelo aasak loo ntorrok o loogolong'u, te nkaraki lelo lemeure Enkai o laing'okok, te nkaraki lelo lemesinya o loomorisho, te nkaraki lelo ooar iloo menye o looar inoo ng'otonye metuata, te nkaraki lelo ooitayu iloikop, iloololoito, iloosokorisho, ilapurrok loo ltung'ana, o ilaimonkok, o loonya olmumai le lejare, o lelo pooki oopaashare enkiteng'enare supat, naipirare ilomon supati kituaak le Enkai namayiana, laaishooki nanu aaisilig. Aisho nanu Kristo Olaitoriani lang enashe, laa ninye laaishoo engolon naasishore nanu aatoduaa ajo kara olairukoni naagelaki ena kisiaayiare enye, hoo te natamoro apa enkarna enye naisilisil namor ninye: kake atang'amua olng'ur amu ataasa apa nena te modai maata enkirukoto, naaiputakini empiris o Laitoriani lang aaitadooyo te nebo enkirukoto, o enyorrata natii atua Kristo Yesu. Ekesipa ena kiroroto, neishiaakino neng'amari nenyorrarri katukul inchere, eewuo Kristo enkop aitajeu ilooata ng'ok. Naa nanu oituruk too looata. Kake te nkaraki ena ore ti atua nanu ara oloituruk naibalunye Yesu Kristo o eng'iriata enye nalulung'a, pee aaku enkitanyaanyukoto te lelo ooyooki aairuk ninye, netum enkishui nemeiting. Metaa eno laiguanani loo lporori pooki, lemeye ae kata, lemelioo, laa ninye ake Enkai, enkanyit o enkitoo intarasi o ntarasi, Esai. Ena kitanapata aaishoo iyie, Timoteo, enkerai ai, te risioroto oo nkirorot e naibon nikimpirta iyie, pee kidumu ninche tijing'a ilo arrabal sidai. Imbung'ita enkirukoto to ltau supat lemeeta ileeni. Ore kulikae netanyaita enkikoo oo ltauja lenye neidaikie enkirukoto enye, ore te lelo netii Hemanayo o Aleksanta laitarasaka shetani pee eiteng'eni meigil aamor Enkai. Ore naa enaituruk, aitirrish, esayiata o enkomono o eomonokinoto e enkishooroto e nashe metaasi too ltung'ana pooki, too laiguanak o lelo pooki ootii iwuejitin e nkitoo pee kitoni te mborron o te nkishon naserian, neure Enkai neyanyitisho too nkoitoi pooki. Ena esidai naa ninye nang'amaroyu too nkonyek e Enkai Olaitajeunoni lang, laa keyieu ninye neitajeuni iltung'ana pooki nepuonu aatum eyiolounoto e sipata. Amu eetae Enkai nabo, naa obo olaitutumoni le Enkai o ltung'ana, oltung'ani oji Kristo Yesu, oishorua kewan enye pee eaku elakunoto te pooki, neitakiaki enchakenisho te nkata enye naishiaakino. Te nkaraki ena pee aategeluaki nanu mataa olalikioroni o lkipaaret (naasipa ajoito, malejisho nanu), ataa olaiteng'enani loo loreren te nkirukoto o te sipata. Ayieu naa neomon ilewa too wuejitin pooki, neilepie inkaik naasinya nemetii engoro aashu enchankar; neijia sii etiu inkituaak, inchoo ekus ate aaiririki te ng'eno o too lkilani ooishiaakino, neme te enchetata oo lpapit aashu te sahabu aashu too lului, aashu too nkilani naagol enkinyang'a kake too iasat sidain, anaa enaishiaakino inkituuak naajo keeta enkirukoto. Inchoo enkitok eiteng'enuo te ngira neaku enaning'isho. Manyorraki hoo enkitok meiteng'enisho aashu meitoria ilewa, inchoo ninye metigirayu. Amu Adam apa eiteraki aaitobir neitokini Hawa. Neme Adam apa etelejaki, kake enkitok apa etelejaki, neaku etigila nkitanapat. Kake keitajeuni enkitok te ishoi oo nkera te nebik ti atua enkirukoto, o enyorrata o esinyatisho, te nebo eng'eno o esupatisho te nebo eng'eno biyoto. Enkiroroto nasipa ena inchere, te neyieu oltung'ani neaku olaitasheikinoni le sirit, naa eyieunoto sidai. Eishiaakino olaitasheikinoni le sirit, nemeeta eleyiata olee le nkitok nabo loo nkiririkinot, naa ng'en, pirisut, naa aminin, neyiolo aiteng'enisho, nememera, nemearisho, kake oltung'ani supat, neme olaishankarrani, nemenyor impesai. Neitasheiki olmarei lenye aitobiraki, neitoning'isho inkera enyena, pee eyanyitisho too nkoitoi pooki. Amaa te nemeyiolo oltung'ani aitasheiki enkaji enye, kaji eiko te neing'or esirit e Enkai? Enyor neme ilo oibelekenye det pee merup kewan to Iwuasa nebatatakino enkiguana e shetani. Neme ina ake eishiaakino neeta errepet te lelo ootii boo pee medoiki ake atua esulare o rreshet le shetani. Neijia ake sii etiu ilaisiaayiak, inchoo emut nabo nemeitoki aaing'ashing'ash too nkirorot, neme ilooitabaitie enaisho, nemeeta olorok le dupoto, inchoo eibung enkirukoto to ltau owang. Nchoo sii eng'asi aatem ninche, ore ake peyie eitisipi nchere meeta ileyiat, nchoo easisho anaa ilaisiaayiak. Neijia ake sii eikununo inkituaak, nchoo emut nabo, neme inaakurrisho kake inoo nkiririkinot, naaisiligayu too mbaa pooki. Nchoo laisiaayiak eaku olmoruo le nkitok nabo, neitasheiki sii ninche inkera enye o nkajijik enye aaitobiraki. Amu ore lelo ooasisho aaitobiraki anaa ilaisiaayiak naa ketum errepet sidai maate, netum enkitieunoto kitok ti atua enkirukoto natii atua Kristo Yesu. Aisilig ajo kalotu enitii asieku, kake aasiraki kuna kiteng'enat peyie, te naimutie niyiolou enaishiaakino neas oltung'ani ti atua enkaji e Enkai. Naa ninye esirit e Enkai naishu, ninye eng'ape, o lkitamanyunoto loo sipat. Kitejo iyiook tukul inchere, kitok oleng enkisudoroto e nkirukoto ang: Eibalunyeki ninye to sesen, neitadedeyieki ninye te Nkiyang'et nedol ilmalaika, nelikiori too loreren, neiruk enkop, neyae ninye shumata te nkitoo. Neaku ejo Enkiyang'et Sinyati aibalunye nchere, ore too nkatitin e nkiting'oto, naa keing'uaa kulikae enkirukoto nerubare lelo tauja le lejare o nkiteng'enat oo loiriruani eimu esunkureisho e lelo oolejisho ootokilote iltauja lenye, oomit eyamishoe, nemit einosi kulie daiki naaitayio Enkai, nemit eng'amuni te nashe lelo ooata enkirukoto ooyiolo isipat. Amu ore pooki toki naitayio Enkai naa eisidai, nemeetae hoo ae toki nabo naanyi te naa te nashe eng'amuni; amu keitisiny ororei le Enkai o enkomono. Te ninguan ilalashera te kuna kiteng'enat niaaku olaisiaayiani supat le Kristo Yesu, oitubuluaki too rorei le nkirukoto e nkiteng'enare sidai naa ninye iyie itusuja. Tapaasha nena atinin e modai neme ne Enkai. Intamoo kewan orrekie le Enkai; amu te naa keeta enkitamooto o sesen enkiti retoto, enkitamooto oo mbaa e Enkai naata te pooki oitoi, amu keeta enkisiligata tena kishui o te nkishui nalotu. Ororei osipa ele neishiaakino neng'amari katukul. Enkaraki kuna pee kintanyamal ate nikinyok, amu Enkai naishu kitipika osiligi lang naa ninye Olaitajeunoni le pooki tung'ani neisulaki lelo ooiruk. Intanapisho ninteng'enishore kuna baa. Mincho oltung'ani hoo obo kimenu te nkaraki kitisho ino, kake intoduaa ilairukok enkitanyaanyukoto ti atua enkiroroto o to lkuaak, ti atua enyorrata, ti atua enkirukoto, o ti atua esinyatisho. Tasheikinoyu enkisomata oo lkigerot te dukuya iltung'ana o elikioroto, o enkiteng'enare o metaba anaa nalotu. Mintololoiki ina kishoroto niaata, nikinchooki apa too nkirorot e naibon apa peyie kinteleiki ilpayiani inkaik. Intamoo kewan kuna siaaitin tasheikinore ninche, pee edol pooki ng'ae eninkonari te nyuaata. Tonyuaa kewan o nena kiteng'enat inono, imbung'a, amu te niaas ina nintajeu kewan o lelo likinining. Mibuaaki olpayian kitok kake tasayiaki anaa papaai lino, inkuna ltung'ana ooti anaa ilalashera linono, ninko nkituaak moruak anaa noo ng'utunyi, ninko nkituaak kutiti anaa nkanashera inono te sinyatisho pooki. Iyanyita nkolia naara te dede. Naa te neeta enkoliai nkera aashu inoo nkoko nchoo eng'as aitabaya nena siaaitin e nkirukoto too lmareita lenye neisho ntoiwuo enye olerrinyore amu keng'amaroyu ena te dukuya Enkai. Ore naa enkoliai te dede, netung'uayioki aa ninye ake naa Enkai eisilig nebik te eomonokinoto o te nkomono dama o kewarie; kake ore ina naa enoo ng'uarrat ake, netua hoo neishu. Intanapisho ena pee metum ake ninche ileyiat. Te netii oltung'ani lemegolie iltung'ana lenyena neisulaki lelo le nkaji enye, neiturrayie ninye enkirukoto, neaku torrono alang oleitu eiruk. Nchoo eng'amuni aaiger enkoliai nemeitong'or ilarin ntomoni ile, naa enkitok apa o lpayian obo, neeta ake sii enchakenisho oo mbaa enyena sidain anaa enaitubulua inkera neitoomonishe, neitukuo inkejek oo sinyat, netasarua lelo oonyamal, netasheikine aas impukunot pooki oo siaaitin sidain too nkoitoi pooki. Kake tanya ing'amu aiger inkolia kutiti: amu te nepaashari ninche neyieu neyami, neaku keiguanareki ninche amu eiturraitie enapa kiroroto natang'asa aaibung. Ore ake etiu neijia, neitamok ate enturuaisho neirrang'irrang aaruk inkajijik, neme neijia ake, kake eeta sii olmarenke o enkilepilep nekurrisho neiro mbaa nemeishiaakino neiro. Metaa ajo nanu, keishiaakino neyami nkolia kutiti, neiu nkera, neitore nkajijik enye, peyie metum olmang'atinta erishata nasukenyie iyiook. Amu eidipa kulie aatapong'ori aasuj shetani. Te netii enkairukoni naata inkolia too lmarei lenye, nchoo enap ninche; Mincho esirit eiteleikini olola, peyie etum ataretu nena olia te dede. Nchoo lelo payiani laa larikok supati, nchoo edamuni neigilieki aaisho enkanyit, neisulaki lelo oonyok te likioroto o te nkiteng'enare. Amu ejo lkigerot, “Mien olkiteng enkutuk eidong'ito enkurma,” nejo sii, “Eishiaakino olaisiaayiani olekoisiaayio lenye.” Minyorraa te neitang'ori olpayian aashu te naa ketii lchakenini oare anaa okuni. Kake ore lelo ooenikino ng'ok tabuaaki etii pooki pee etum iltung'ana pooki enkuretisho. Ore te dukuya Enkai o Kristo Yesu o lelo malaika oogeluno aaitanap iyie nchere imbung'a kuna kitanapat miaata nyorrakino, nimiaas hoo ae bae to lkep. Misioki enkiteleikinoto oo nkaik, niming'arie likae tung'ani ng'ok enyena, torripo kewan taa sinyati. Mintoki aok enkare narok, kake tooko enkiti aisho o sabibu te nkaraki enkoshoke ino o te ina mueyian e anaa ake. Eibala ng'ok e kulikae tung'ana neutu edungokinoto e nkiguana, kake ore kulikae te siadi eyooki aaibalayu. Neijia sii etiu iasat supati e kulikae tung'ana, keibalayu aasioki, naa te nemeibala nemeidim aaisudori o akenya. Nchoo lelo pooki ootii abori enchata e rrindikisho eikenaa ilkituaak lenye aajo keiririkino enkanyit pooki peyie mesukenyi ake enkarna e Enkai aashu nkiteng'enat. Ore lelo ooata lkituaak ooidipa aairuko nemepal enkanyit enye amu ejo lelo ilalashera, kake peyie, easisho oleng amu ore lelo oodupore ena siaai enye naa ile tipat, amu lairukok nenyorri. Inteng'ena nintudup ninche kuna siaaitin. Te neiteng'enisho oltung'ani ae kiteng'enare napaashaa neibung irorei supati lo Laitoriani lang Yesu Kristo o enkiteng'enare naishiaakino orrekie le Nkai nerup kewan te modai nemeyiolo toki. Eeta ninye enkure oe nchankar o empong'o, naa ine epukunye olom o lolepilepi, o emorore, o nkiteenikinot torrok, o enchankar ti atua iltung'ana lemelulung'a lukuny enye nemeeta esipata. Oojo ore orrekie le Enkai naa enkoitoi naduporeki. Etii dupoto sapuk orrekie le Enkai te nebo enkidipakinoto. Amu eitu apa kiyau ae toki atua enkop, nimikindim aawaita hoo toki aaitung'uai enkop. Kake ti nikiaata endaa o naaishopi, ore kiaata kuna, neidip iyiook nena. Kake ore lelo ooyieu neaku karsisi naa kedoiki ntemat, atua orreshet, nedoiki atua mbaa kumok e modai, naaitameisho neitadoiki iltung'ana atua enkitarruorroto o enkidaaroto. Amu ore enyorrata oo mpesai ninye entonai oo ntorrok pooki, enkaraki kuna pee etapaashari lkulikae aaing'uaa enkirukoto nerem ltauja lenye too nkitamiot kumok. Kake ore iyie, lo tung'ani le Enkai, ilanya kuna pooki, ing'oru esupatisho, o rrekie le Enkai, o enkirukoto, o enyorrata o enkitashoto, o emborron. Taarisho te ilo arrabal sidai le nkirukoto; imbung'a ina kishui nemeiting, nikimpotokoki apa pee imbalie te dukuya ilchakenini kumok. Ore te dukuya Enkai laa ninye oishoo empuaan pooki toki; o te dukuya Kristo Yesu laa ore enchakenisho enye te dukuya Pontio Pilato neibalunye enkirukoto enye, aaitanap inchere, imbung'a inkitanapat miaata olduruki nimiaata enikimpotokini o metabau elioto o Laitoriani lang Yesu Kristo. Naa keibalunyeki ena te nkata naishiaakino, ilo omayiana naa ninye ake Olaitoriani loo laitoriak; laa ninye ake le meye, obik te wang'an nemeing'urayu. Nemeetae ae kata oltung'ani otoduaa ninye nemeeta oloidim atoduaa. Metaa enenye enkanyit o enkitoria intarasi. Esai. Ore lelo karsisi le na kop inkoo pe mepik osiligi atua enkarsisisho enye nemebikoo, kake peyie eisilig Enkai naiputaki iyiook nena pooki pee kishipakino. Nchoo ninche eaku supati, nekarsisu too iasat sidain, neretisho neleng'u sii, amu te nena eitobiraki ate olkitamanyunoto sidai too nkolong'i naapuonu, peyie eyooki aang'amu ina kishui naa ninye nara katukul. Oo Timoteo, torripo ina toki apa nikisiligieki. Talama nena kirorot neme no rrekie le Enkai, o mpaashat e nena naaitaae eng'eno te lejare. Amu ena eibung'a kulikae nepong'ori neitu etil enkirukoto. Metaa empiris te nebo intae. Paulo, olkipaaret le Yesu Kristo te yieunoto e Enkai te risioroto e nkisiligata e mpuaan natii atua Kristo Yesu. Timoteo enkerai ai nanyor aigeroki: Metaa te nebo iyie empiris, o lng'ur o eseriani eing'uaa Enkai Papa o Kristo Yesu Olaitoriani lang. Te naadamu oshi te nkomono dama o kewarie naisho Enkai enashe, ina naisiaaita to oltoilo loltau owang, anaa apa iloo papa. Ore te nadamu ilkiyio linono ina kata apa nchirita, naayieu naadol dama o kewarie, peyie aaboreyu eng'ida. Adamu sii ina kirukoto ino nasipa, enkirukoto apa naitera amany kokoo ino Lois, o ng'utunyi Oinike, nayiolo taata aitisip nchere etamanya atua iyie. Te nkaraki ina peyie aaitadamu nchere nyaaki ntopiu enkishoroto e Enkai natii atua iyie ninoto apa te nkiteleikinoto oo nkaik aainei. Amu eitu eisho iyiook Enkai oltau le nkuretisho kake oltau le ngolon o le nyorrata o le nkibooroto e kewan. Mikurru te nintayu shakenisho o Laitoriani lang aashu te nanu oloena lenye, kake tonyorrai erishata ino o sina litum te nkaraki ororei supat te ngolon e Enkai, naitajewuo iyiook neipot iyiook te ina kipototo nasinya, neme enkaraki esupatisho oo nkiaasin ang kake, te nkaraki esupatisho e yieunoto enye makewan, o te mpiris naishoo ninye iyiook ti atua Kristo Yesu apa moitie. Neibalunyeki taata te liooroto o Laitajeunoni lang Kristo Yesu, oiwuang'ie keeya neyau puaan o enkiishata e keeya. Te nkaraki ele rorei aategeluaki mataa olalikioroni o Lkipaaret o laiteng'enani, naa te nkaraki ena pee aata ele sina. Kake madol enkurruna amu ayiolo ilo lairuko natisipua nchere eidim ninye atorripo ina naaisiligieki nanu o metabau ina olong. Tusuja ilo rrekie loo rorei ooata empuaan apa litoning'uo te nanu. Te nkirukoto o te nyorrata natii atua Kristo Yesu. Torripo ina sipata nikinchooki iyie te Nkiyang'et Sinyati natamanya atua iyiook. Iyiolo ajo ore lelo pooki ootii Asia neibelekenyate, naaing'uaa nanu, ore te lelo netii Figelo o Ermogene. Meishoo Olaitoriani olng'ur enkaji e Onesiforo amu aaitagolo ninye oshoke katitin kumok, eitu edol isura too lpisia le enata ai, kake ore pee ebau Roma naalilitu o maanoto. Meidimie Olaitoriani menoto olng'ur te idia olong kenya o Laitoriani niyiolo sii eneba esiaai nataasishe te Efeso. Ore naa iyie, enkerai ai, tagolo te mpiris natii atua Kristo. Ore ina nitoning'o te nanu te dukuya lchakenini kumok, intarasaki lelo tung'ana ooisiligayu ooidim sii ninche aaiteng'ena ilkulikae. Tonyorrai tang'ara osina anaa osikari odupa le Kristo Yesu. Meetae osikari otii enjore oisho metarruesha mbaa neme ne njore, amu ore enayieu ninye naa pe eitiship ilo oigero. Meishori olokuet emaupe a e nkitoo mme ketekeshe te risioroto oo nkitanapat. Ore olaturoni le nkurma onyok eiririkino netum ilng'anayio le dukuya. Tadamu kuna najo amu eikincho Olaitoriani ening'unoto te pooki toki. Tadamu Yesu Kristo, otopiwuo aing'uaa ilootuata, le ntalipa e Daudi, anaa enainosuaki te ilo rorei lai supat. Lelo omon supati laa te ninye aainosieki osina o maateeni too lpisia anaa olarruoni. Kake ore ororei le Enkai nemeena. Neaku kang'iri pooki te nkaraki lelo gelunot, pee etum sii ninche aanoto ina jeunoto ti atua Kristo Yesu, te nebo enkitoo oo ntarasi. Ororei osipa ele nchere: Te nikituata te nebo ninye, naa eikiyooki sii aaishu te nebo ninye. Te niking'iri nikiyooki sii aaitoreisho te nebo ninye; te nikimiki ninye nemiki sii ninye iyiook; te nimikisiligayu, neton ninye eisiligayu – amu meidim ninye atomiki kewan. Intadamu ninche ena, nintanap te dukuya Olaitoriani, metapaashare enchankar oo rorei amu meretisho, kake keiminie ake lelo ooning. Tonyuaa ntoduaai; kewan te Enkai ajo inyorraro, nira olaisiaayiani lemeeta enaitukurru, oasishore te nkitoriokinoto ilo rorei osipa. Tapaasha nena kirorot e pesho nemetii euriata e Enkai, amu iltung'ana ake erikoo oleng oleng metalama euriata e Enkai. Ore nkirorot enye nedaari anaa enkeeya nayieng'i, ore te lelo netii Hermenayo o Fileto; ootapong'o enkoitoi nasipa, eji ejo eidipa empiunoto oo lootuata atulusoi, neibelekeny enkirukoto e kulikae. Kake etuno Enkai olkitamanyunoto le nkirukoto, nepik ele mishire ojo, “Eyiolo Olaitoriani lelo oora ilenyena,” neitoki ajo, “Ore pooki ng'ae oipot enkarna o Laitoriani nchoo eing'uaa entorroni.” Ore ti atua enkaji sapuk neme ntokitin e sahabu o enkosholai ake natii, kake etii sii noo nkeek o ne nkulukuoni, ore nkulie neasishoreki too mbaa naailep ore nkulie neasishoreki too mbaa naadou. Te neituku oltung'ani kewan nepaash iloirerioni neaku entoki naasishoreki te nkanyit, naitisinyaki pee easishore olopeny enkaji, neirragieki aaitaanyu nena siaaitin sidain. Neaku ilanya naa ng'uarrat e lelero, ning'oru esupatisho o enkirukoto, o enyorrata o eseriani, te nebo lelo ooipot enkarna o Laitoriani to ltau owang. Miaata eniporoki enchankar e modai nemeeta enajo, iyiolo iyie ajo ilarrabali ake eiu. Meishiaakino osinka lo Laitoriani te neaku olo larrabal kake oltung'ani oibor oshoke te pooki ng'ae olaiteng'enani onyor aiteng'enisho, ong'iri, nererioo te mborron lelo ookesh ninye, amu ebaiki neidim Enkai aishoo meirridu nepuonu aayiolou ina sipata. Pee ebaiki neisik aaing'uaa oorreshet le sheitani, otang'asa apa aibung metaasa enayieu ninye. Kake tayiolo ena nchere ore too nkolong'i e nkiting'oto naa kepuonu nkatitin oo sinaitin. Amu keaku iltung'ana iloonyor ate, iloonyor mpesai, iloowuasa, ilooilash, iloomorisho, iloogolong'aki ntoiwuo enye, ilemeeta ashe, nemeure Enkai. Iloorook oishuaa, ilemesayiayu, nekurrisho, nemeeta esupatisho, ilemeibooyo ate too ntorrok pushunot, ilooiba esupatisho. Ilooudoo ilkulenye, neipopong'a to lwuasa, iloonyor esikar alang enanyor Enkai. Oitaakuno kenyor Enkai netanyaita engolon enye. Talama iyie iltung'ana ooikununo neijia. Amu ore ti atua ninche netii lelo ooruk nkajijik, neibung nena kituaak naamoda naanapita lolan loo ng'ok naarikito ng'uarrat enye oo mpukunot kumok, naainining pooki ng'ae nemebaiki aikata eyiolounoto e ina sipata. Anaa Yanes o Yampres ootanyaita enatejo Musa, neijia sii etiu kulo tung'ana ootanyaita esipata, iltung'ana ootarruoitie ndamunot ninche. Kake meeta dikai nebaya ilenkirukoto e nkitaakuno amu keibalayu emodai enye te pooki anaa ene lelo tung'ana apa pokira oare. Kake indipa iyie atoduaa enkiteng'enare ai o rrekie lai o enaipirta te nkishui ai enkirukoto ai, eng'iriata ai, enyorrata ai, o enkitashoto ai, inkisilisilot aainei, sinaitin laainei, nena naaineputua te Antiok, te Ikonio o te Listra, eneba inkisilisilot nating'iria nanu; kake ore te nena pooki naatokordua Olaitoriani. Esipa ore lelo pooki ooyieu neibung orrekie le Enkai ti atua Kristo Yesu, nemeeta nchere pee meisilisili; ore kuldo tung'ana torrok o lalejak neponari aaku torrok, elejisho neleji sii ninche. Kake ore iyie, tobiko te nena nindipa atayiolo aitisip, amu iyiolo iyie ajo aing'ae likinteng'ena ina. Naa ore ebaiki keraisho ino itayiolo lelo kigerot sinyat likindim aaiteng'ena te njeunoto naimu enkirukoto ti atua Yesu Kristo. Ore ilkigerot pooki naa Enkai naiyiang'ua, neeta dupoto te nkiteng'enare, o te nkisikong'at o ererioto, o te nkitubulunoto ti atua esupatisho, paa ore oltung'ani le Enkai neitabari te nkiaas pooki sidai. Aaitanap iyie te dukuya Enkai o Kristo Yesu, laa ninye oyooki aiguanare ilooishu o lootuata, o te ina liooto enye, tolikioi ele rorei isiosiono te nkata sidai o te ntorrono. Inguanaki intijing'ai, nisikong, ninkok niaaku otemesi te ngiriata o te nkiteng'enare. Amu kelotu enkata nemeyieu iltung'ana neng'iri ina kiteng'enare supat kake esuj ninche iyieunot enye neing'uraki ate ilturrurri loo laiteng'enak ooitabaya nena naayieu ninche, te ng'ion oo nkiyiaa enye, nepaash inaasipa aasuj inkatinin e lejare. Kake ore iyie ntasho anaake, ting'iria osina taasa esiaai o lalikioroni, ntabai enkisiaayiare ino. Amu aidipa atabaiki enkata pee aaitaai olasar. Etabawua enkata e lototo ai. Ataarare olarrabal sidai, aidipa ina kuetata, atagolie enkirukoto. Ore ebaiki taata naatushumakaki nanu emaupe e nkitoo e supatisho, naa Olaitoriani, ilo arishani asipani laayooki aisho, te ina olong, neme nanu ake eishori, kake keishori sii lelo ootonyorra enkata naliooyu ninye. Tonyuaa oleng, tasioku ene natii. Amu ore Demas, etonyorra ena kop e taata naashomo aing'uaa nelo Sesalonike, eshomo Kreskes Galatia neshomo Tito Dalmatia. Luka ake openy laaboitare. Ing'oru Marko pee ishoru, amu kaaretu oleng te siaai. Airriwayie Tikikos meshomo Efeso. Ore te nilotu iyie nishoru olkila apa latung'ueikia Karpo te Troas o mbukui sii neisulaki nena oo ndapan. Ore Aleksanta ele kunoni loo suyan aaitaasa ntorrok oleng, keitalak Olaitoriani te nkaraki nkiaasin enyena. Torripo naa kewan te ninye amu etishirraka aany olkilikuai lang. Ore apa ang'orito kewan te dukuya metii hoo obo laatijing'a enkoriong; aatung'uatie pooki. Oi ake eaku meikenakini ninche ena! Kake eitasho Olaitoriani te nkalo ai, naaisho nanu engolon nalimunye ororei te lulung'ata, pee etum iloreren pooki aatoning, neaku aatang'adieki enkutuk o lng'atuny. Ee kaakordu Olaitoriani te ntorroni ake pooki naitajeu aaitaany ina kitoo enye e shumata metaa enenye enkitoo ntarasi o ntarasi. Eesai. Iroroki Priska o Akuila o enkaji e Onesiforos. Etobiko Erasto te Korinto natung'uayie Trofimo emuoi te Mileto. Tonyuaa tasioku eton eng'or enkata e nkirobi. Kirriwaki Eibulo enkirorokino naa neijia etiu Punten o Lino o Klaudia o lalashera pooki. Metaa Olaitoriani te nebo enkishui ino. Metaa empiris te nebo intae. Paulo osinka le Enkai olkipaaret le Yesu Kristo, pee eitubulaa enkirukoto e lelo gelunot le Enkai, o eng'eno naishiaakino orrekie le Enkai, te ilo siligi le nkishui nemeiting, oisiligie apa Enkai, nemeeta elejare ninche apa moitie; ore ake pee eiririkino enkata, neibalunye ti atua ororei lenye aimunye ina likioroto naaishooki nanu mainosai te nkitanapata e Enkai Olaitajeunoni lang. Tito aigeroki, enkerai ai nasipa ti atua enkirukoto niking'er: Meeu enitii empiris, o eseriani eing'uaa Enkai Papa o Kristo Yesu Olaitajeunoni lang. Enkaraki ena apa pee aatung'uayie te Krete, pee itum aitobira mbaa naang'or, nigelu ilpayiani too nkang'itie pooki anaa enaatuutaka, oltung'ani lemeeta eleyiata, olee le nkitok nabo, neiruko inkera nemekurri aajo keiser aashu mening'isho. Amu ore olaitasheikinoni te nkaji e Nkai, naa olaisiaayiani le Enkai, meishiaakino neeta eleyiata; nchoo eaku mme ole kewan aashu olosieku engoro asioki, aashu emera, aashu arruoni aashu eeta olorok le dupoto. Kake aminin, olonyor esupatisho, oloata tonata, oloitoriori, sinyati neibooyo kewan. Neibung akurraki ilo rorei osipa anaa enaiteng'enishoteki, pee eidim ninye aishooi eutaroto ti atua ina kiteng'enare supat, neibooyo lelo ooishankarra. Amu etii iltung'ana kumok lemening'isho, ooata rorei le pesho, oolejisho neisul lelo ooibung mbaa e muratare. Meeta nchere meitigiri ninche, meitoki aaibelekeny nkajijik naalulung'a eiteng'enisho nena nemeitoriori ejo pee etumisho te ntorroni nemeeta esipata naiteng'enishore. Ore obo lenye maate eji laa kejo ninche oloiboni, nejo, “Lalejak oshiaake Lkrete, ilowuarak torrok, ilaikoshuaak turua!” Ekesipa ena shakenisho. Metaa isikong'a ninche te mpijan pee etum aataa supati te nkirukoto alang te nesuj nkatinin oo Lyahudi aashu nkitanapat oo ltung'ana ooany isipat. Ore to supat naa eisidain ntokitin pooki kake ore te ilo torrono o too lemeiruk meetae entoki sidai. Eidurukieki eng'eno enye o ltoiloishi loo ltauja lenye. Ejo ninche keyiolo Enkai, kake neany ninye too nkiasin enye; ilainyialak ninche, oogolong'u lemeeta tipat ti ae siaai sidai hoo nabo. Kake ore iyie nteng'enisho nena naaishiaakino enkiteng'enare sidai. Tiaki ilpayiani kituaak meiririki mbaa, nedupayu naa ng'eni, sidain te nkirukoto, te nyorrata o te nkitashoto, o te nyorrata o te ng'iriata. Tiaki nkituaak moruak neijia, metaa inaayanyitayu to lkuaak, nepal olmarenke nemeaku rrindiki e merai; nchoo eiteng'enisho nena sidain; neiteng'eni sii isiankikin metonyorra Lmoruak lenye o nkera enye, neaku ng'eni neisosion, neramatisho ti ang, naa supati, nening ilpayiani lenye pee memenuni ake ororei le Enkai. Neijia sii nkuna tiaaki ilpayiani ooti pee eibooyo ate. Intoduaai kewan too mbaa pooki, niaaku enkitanyaanyukoto, oo nkiasin sidain, ore te nkiteng'enare ino ntodolu esipata o ltau o entukunyakinoto, o enkiroroto sidai nemeidimi aatusukeny, pee etumi aaitukurru ilo okeshisho, meeta ae torrono najo ti alo iyiook. Tiaki rrindiki metoning'o ilaitoriak lenye, neitiship ninche te pooki bae, nemeeta oltawalu, pee eitoduaaya esupatisho pooki, paa ore too mbaa pooki nejukaa enkiteng'enare e Enkai Olaitajeunoni lang. Amu eitaliooki empiris e Enkai te nkaraki enjeunoto oo ltung'ana pooki, eiteng'en iyiook maibai nena pooki neme nne Enkai, o ng'uarrat e nkop, nikitoni te nkiririkinoto, te nkitorioroto o to rrekie le Enkai tena kop, nikiaanyu osiligi lang omayiana, ina lotunoto e nkitoo e Enkai ang kitok o Laitajeunoni lang Yesu Kristo, oishorua kewan te nkaraki iyiook, pee elaku iyiook aitung'uaa entorroni pooki neitisinyaki kewan iltung'ana lenyena. Lelo ooata enyuaata te nkaraki nkiasin sidain. Mbalunye kuna baa, nkoo ninguen te ngolon pooki. Mincho hoo obo tung'ani mikitemena. Ntadamu ninche metaa ilooning'isho too laitoriak nening'isho, neas pooki siaai metii esunkureisho, nememor likae tung'ani, nepaash olarrabal, neaku loobor, neitoduaaya esupatisho too ltung'ana pooki. Amu eikira sii apa iyiook ilmoda, nikigolong'u, neitapong'oyioki iyiook, nikiaaku rrindiki loo ng'uarrat o sikarri oo mpukunot pooki, nikinturraa nkolong'i ang te ntorroni o lom, neibayuni iyiook iltung'ana nikimbayuno iyiook maate; kake ore ake pee eliooyu esidano oe enyorrata e supatisho e Enkai Olaitajeunoni lang, neitajeu ninye iyiook neme te nkaraki nkiasin nikitaasa iyiook ti atua esupatisho, kake te nkaraki olng'ur lenye, te nkitukuoto o enkitang'ejukoto o einoto ti atua Enkiyang'et Sinyati, ina natubukoko ninye iyiook te nkiputakinoto ti atua Yesu Kristo Olaitajeunoni lang, pee eikenaki iyiook esupatisho te mpiris enye nikiaaku ilajung'ok to siligi le nkishui oo ntarasi. Ororei osipa ele. Ayieu naa nimbung akurraki kuna baa, peyie aa ore looiruko Enkai nejurru aaitayiolo ate nkiasin sidain; kuna ninche sidain naata dupoto too ltung'ana. Kake tapaasha nchankarri, iishoritin oo lmakui, impaashat o enchankar oo mbaa oo nkitanapat, amu meeta eretoto naa pesho. Ore oltung'ani okepari, indipa aikoo ninye ene dukuya o eniare, talama. Iyiolo ajo ore oltung'ani oikununo inji netapong'ori naa aing'okoni netudung'oko kewan enkiguana. Te nairriu nanu Atemas aashu Tikikos meeu enitii, tonyuaa oleng, wou ene natii te Nikapolis, amu atudung'o pee aton te ine te nkata e nkirobi. Tonyuaa isosionie Senos, ilo loo nkitanapat o Apolos te lototo enye; nimincho eng'oriki hoo toki. Naa nchoo iltung'ana lang meitamoo ate nkiasin sidain, pee eretu nkolati naarrish nemeaku ilemeeta ilng'anayio. Eirriwaki intae enkirorokino kulo pooki laboitare. Iroroki lelo pooki oonyor iyiook ti atua enkirukoto. Metaa empiris te nebo intae pooki. Paulo oloena te nkaraki Yesu Kristo o Timoteo olalashe lang. Filimon king'eroki likinyor oasisho te nebo iyiook. O Afia enkanashe ang o Arkipos osikari te nebo iyiook, o esirit natii atua enkaji ino. Meeu empiris enitii o eseriani eing'uaa Enkai Papa lang o Laitoriani Yesu Kristo. Aisho Enkai ai enashe te naadamu iyie te nkomono ai, amu aning'ito enyorrata ino o enkirukoto niaata ti alo Olaitoriani Yesu o lelo sinyat, naomon pee aa ore ing'arie ilkulikae enkirukoto ino, neitubulaa eyiolounoto enena pooki supati naara nkunaang ti atua Kristo. Amu anoto nanu eng'ida sapuk o enkilejilejata naayaka enyorrata ino, olalashe lai, amu eitagoloki iltauja loo sinyat te nkaraki iyie. Ore etiu neijia, hoo naaitieu ti atua Kristo aaitanap taasa ina naishiaakino, Kake ore te nkaraki enyorrata nayieu naasai nanu Paulo, Olkilikuai lo Laitoriani naena taata te nkaraki Kristo Yesu aasai nanu iyie te nkaraki enkerai ai Onesimas, lataa nanu menye ti atua eenata ai. (Ore apa te dukuya naa pesho ninye te iyie, kake ore taata netaa ole tipat oleng, te iyie o te nanu.) Naa airriu nanu ninye metushukunye enitii, airriu oltau lai kewan. Kayieu naaji naa kaiboo maataboitare, peyie aatum aisiaayia te rishata ino, te enata ai te nkaraki Ororei Supat; kake atejo maas toki eitu atum ewalata ino pee metiu esupatisho ino anaa earakinoto kake pee eaku eyieunoto ino makewan. Ebaiki naa ina apa pee kintung'uayioki ninye te nkiti kata, pee kintokini aaitaboitaki ntarasi, meekure aa orrindik, kake etuluso alang orrindik, etaa olalashe onyorri, eisulaki te nanu kake eisul naa oleng te iyie, te pokira are to sesen o to Laitoriani. Metaa te naa eikinken ajo kira nabo, tang'amu ninye anaa naaji eniking'amu nanu. Te nikinyala apa ninye ti ae bae aashu te neeta esile ino e ae toki, nchoo eaku esile ai. Nanu Paulo, oigero ena te nkaina ai makewan, ekalak nemaimaki esile nikiaatayie nanu ebaiki kewan ino. Ee, olalashe kayieu nanu dupoto te iyie ti atua Olaitoriani. Entagolo oltau lai ti atua Kristo. Ore amu kaaisilig ajo ining'isho, aaigeroki kuna ayiolo ajo ias oleng aitulus enatejo. Ore te nebo nena, intobirakaki olgilata loo lomon, amu aisilig ajo ore te nkaraki enkomono inyi naa kaaishori nanu maeu enitii intae. Kirriwaki enkirorokino Epafras, ilo o ena te nebo nanu te nkaraki Kristo Yesu. Naa neijia etiu Marko, o Aristakos o Demas o Luka ooasisho tenebo nanu. Metaa empiris o Laitoriani Yesu Kristo te nebo enkiyang'et inyi. Eirorie apa Enkai iloo papa too nkoitoi kumok o too mpukunot kumok too loibonok le Enkai; kake ore te kuna olong'i naabayie neirorie iyiook to Inoti otegelua ninye metaa olajung'oni loo ntokitin pooki, olaa te ninye eitayioki enkop. Ninye oitodolu enatiu enkisisa e Enkai naa ninye otaa olmishire le naikununo Enkai, naa ninye oibung'ita shumata o enkop to rorei le ngolon enye. Ore apa pee eidip aitobira enkipooto oo ng'ok, neton te tatene e Nkitoo te shumata. Eidipa ninye aisula ilmalaika amu ore enkarna nanoto naa ninye nalusoo te nenye. Amu kalo malaika etiaaka Enkai ae kata nchere, “Ira iyie Oinoti lai latoiwuo te le kekun?” Aashu sii, “Kaaku nanu menye lenye, neaku ninye Oinoti lai?” O sii, pee eyau olkikau lenye enkop nejo, “Inchoo eserem ninye ilmalaika pooki le Enkai.” Ore ti alo ilmalaika nejo ninye, “Oloitaa ilmalaika lenyena isiwuon, neitaa isinkan lenyena ilng'ejepa le nkima.” Kake etejo ti alo Oinoti lenye, “Ore olorika lino, iyie Enkai naa oloo ntarasi o ntarasi orinka le supatisho ilo rinka le nkitoria ino. Itonyorra iyie esupatisho nimbayu engogong'i ore enkaraki ina nikitubukoko Enkai ino eilata aput, nikiela te ilata e ng'ida nalang ene sirit ino.” Ore sii, “Iyie, Olaitoriani, oitobira enkop te nkiterunoto, ore shumata naa esiaai oo nkaik inono. Keishari ninche, kake ibik ake iyie, kemusanu ninche, kake ibik ake iyie, kemusanu ninche anaa enkila, naa iyie oyooki apiyai ninche anaa enkila neibelekenya ninche. Kake itiu iyie anaa apake, nemeishunye ilarin linono ntarasi.” Kake kalo malaika etiaaka ae kata, “Totona te nkaina ai e tatene, o metaba anaa naitaa ilmang'ati linono olorika loo nkejek inono?” Aime nkiyang'eta aisiaayiak ake ninche pooki naairriwayioki meisiaaisho, te nkaraki lelo ootum enjeunoto? Ore enkaraki ina keishiaakino nikirrip nena nikitoning'o oleng, pee mikipaashare ake. Amu amaa te na keewuo olkilikuai apa otolimutuo ilmalaika neaku ore engilata enye aashu eanyata netum enkitamioto, kaji kijeunye iyiook ti nikintololoiki enjeunoto kitok naba inji? Olaitoriani otang'asa alimu te dukuya, neetuo aaishakenoki ti alo iyiook lelo apa ootoning'o ninye. Neishakenoko sii ninye Enkai too lmonek o too mbaa e nking'asia o too mpukunot kumok e nking'asia o too nkishorunot e Nkiyang'et Sinyati naori te risioroto e yieuna enye. Amu mme lmalaika eishoo Enkai meitoria enkop nalotu, naa ninye ena nikiimaki. Eishakenoki aajo te dikae, “Ainyoo ninye oltung'ani linkenaa iyie, anaa enkerai e tung'ani niramat iyie? Iyie oitadowuo ninye te nkiti rishata meeu abori lmalaika, naa iyie oishoo olmarisian le nkitoo o enkanyit, nintadowuo pooki toki meeu abori nkejek enyena.” Netipika pooki toki abori enkitoria enye, nemeetae ae toki natelekua nemeitore ninye. Ore anaa enatiu, eton mikidol iyiook pooki toki, tiabori enkitoria enye. Kake kidolita Yesu, otang'asaki aaitadou te nkiti rishata metadou abori ilmalaika, neishooki enkopiyia e nkitoo o enkanyit te nkaraki emion enye e nkeeya, peyie aa te mpiris e Enkai eishiamishama ninye enkeeya te rishata e pooki ng'ae. Amu ninye apa eiririkino, olaa nkunenyena naa ninye pee eetae ntokitin pooki, ore pee etumoki ninye atorikoki inkera kumok enkitoo neiteraka emion neitaa bayarot ilo oipirua enjeunoto enye te mion o larikoni. Amu ore ilo oitisinyi o lelo ooitisinyi nebo eing'uaa pooki. Naa ina pee mekurru ninye ejo ninche ilalashera ejo, “Kaliki lalashera laainei enkarna ino, naaisis iyie te mpolos e umata.” Nejo sii, “Ekapik nanu osiligi lai atua ninye” neigil ake ajo, “Nele nanu o nena kera naaishoo nanu Enkai.” Ore naa enkaraki nang'ar nkera nkiri o sarge, etang'arie sii ninye makewan ina pukunoto, paa te keeya etum ninye aitarruoi ilo oata engolon e nkeeya, aa ninye Sheitani, netum atokordu lelo pooki ooena te nkishui enye pooki enkaraki naure enkeeya. Amu esipa nchere mme lmalaika doi eimaki kake eishoi e Abraham. Enkaraki e ina pee eishooki metotiwuo anaa lalashera lenyena too mpukunot pooki, pee etum ataa olapolosani oata olng'ur neisiligayu te siaai e Enkai, netum aitayu enkitukuoroto oo ng'ok oo ltung'ana. Amu ore enkaraki natamio ninye makewan netetemaki, ekeidim ninye atareto lelo ootemi. Ore enkaraki nena, lo alashera sinyat, oong'ar enkipototo e shumata, entadamu Yesu, olkipaaret naa olapolosani kitok le na limunoto ang. Etaa ninye oloisiligayu ti alo ilo otegelua ninye, anaa apa sii ninye Musa otaa oloisiligayu ti atua enkaji e Enkai. Kake ore ninye Yesu neikenakaki nchere keiririkino enkitoo nalang ene Musa anaa te neeta oloshetu enkaji enkitoo nalang ene nkaji. Amu eeta ake enkaji pooki oloteshetua kake Enkai olashetani loo ntokitin pooki. Etaa apa Musa oloisiligayu, anaa olaisiaayiani te pooki naatii enkaji e Nkai, pee eishakenoki mbaa naanyaakaki aalimu te siadi. Kake ore Kristo netaa oloisiligayu te nkaji e Enkai anaa Oinoti. Nikira iyiook enkaji enye ti nikimbung aakurraki empijan ang o lwuasa ti atua ilo siligi lang. Ore nkaraki ina, anaa enajo Enkiyang'et Sinyati, “Ore taata ena olong, ti nining'ining'i oltoilo lenye, emintagol iltauja linyi anaa te napa gogong'i, te napa olong e ntemata ti ong'ata, peyie atem iloo minyi, nedol isiaaitin aainei too larin artam. Ore enkaraki naaitagoro ilo porror, najo, ‘Kepaashari oshi ake ninche ti atua iltauja lenye; neitu ae kata eyiolou nkoitoi aainei.’ Ore anaa enainosa olmumai te ngoro ai, ‘Mejing ae kata ninche enkiyeng'iyeng'ata ai.’ ” Entodol ate, lo alashera, pee metii ake atua intae likae linyi lo ltau torrono, lemeiruk, orik intae nesulaa neitapaash Enkai naishu. Kake entaretunoto anaa ake, anaa neton ejoitoi, “taata ena olong,” pee megolu likae linyi lukunya te nkaraki elejaroto oo ng'ok. Amu Kristo king'ar iyiook, te nesipa kikurraki aaibung empijan ang o meiting'o, eton ejoitoi, “Ore taata ena olong, ti nining'ining'i oltoilo lenye, emintagol iltauja linyi anaa te napa gogong'i.” Kakua apa lelo ootoning'o neitoki aagolong'aki? Aime lapa pooki ootung'uaitie Misiri ootorikuo Musa? Naa kakua etagorokine ninye too larin artam? Aime lelo ootaasa ng'ok, ooitanang'a seseni lenye ilo purkel? Naa kakua einosaka olmumai ajo, mejing enkiyeng'iyeng'ata enye ntarasi, ei kulikae leme lelo ootogolong'akita? Neaku kidol aajo eitu eidim ninche aatijing ine te nkaraki neitu eiruk. Ore enkaraki ina, ore eton eetae enkisiligata najing'ieki nkiyeng'iyeng'ata enye, ematureita pee meiguanareki ake likae linyi neji eturua ebaiki. Amu etabaikita iyiook lelo omon supati anaa enatabaikita sii ninche; kake ore ilo kilikuai otoning'o ninche neitu eret, amu eitu einepu enkirukoto ti atua lelo ootoning'o. Amu iyiook ilooiruko oojing ina kiyeng'iyeng'ata, anaa ina natejo ninye eji, “Anaa enainosa olmumai ti atua engoro ai nchere, ‘Mejing aekata ninche enkiyeng'iyeng'ata ai ntarasi.’ ” Hoo neidipate isiaaitin enyena ebaiki apake pee eitamanyu enkop. Amu eimaka enkolong e naapishana te dikae nejo nji, “Neyeng'iyeng'a Enkai te nkolong e naapishana eidipa isiaaitin enyena pooki.” Nenyaaka ake ajo te ine wueji, “Mejing aekata ninche enkiyeng'iyeng'ata ai.” Ore naa amu etiooyo pee ejing kulikae ine, ore lelo ootang'amutua lelo omon supati neitu ninche ejing te nkaraki eitu eiruk, enyaaka naa apik ae olong, “Taata” ena olong etejo te Daudi etulusoyie enkata naado, te lelo rorei ooidipaki aairoro, “Ore taata ena olong ti nining'ining'i oltoilo lenye, emintagol iltauja linyi.” Amu te naa keidipa apa Yoshua aishoo ninche enkiyeng'iyeng'ata, anaata eitu eitoki Enkai aimaki ae olong. Neaku eton ake eetae enkiyeng'iyeng'ata e sabato oo ltung'ana le Enkai; amu ore pooki ng'ae, ojing enkiyeng'iyeng'ata e Enkai nepal sii ninye isiaaitin enyena anaa enatapala Enkai nkunenyena. Ematonyok naa pee kijing ina kiyeng'iyeng'ata, pee mebatata hoo obo te ngolong'u neeijo ina apa enye. Amu keishu ororei le Enkai neeta engolon, nepi ninye alang olalem ake pooki opi mbat pokira, neimisho enarish oltau o enkiyang'et, neim irubat o ntolo, neyiolou ndamunot o nkiguanat o ltau. Naa ore te dukuya ninye, meetae hoo toki te nena naaitayioki naisudoro kake keibala pooki neboluni te dukuya nkonyek e ilo likiyaki imbaa ang. Ore naa amu kiaata olapolosani kitok oilepa shumata, Yesu, Oinoti le Enkai, ematukurraki aaibung elimunoto ang. Amu mme olapolosani likiaata olemeidim atayiolo enchalan ang, kake ore ilo obo likiata naa oloidipaki apa aatetem anaa enatemitae iyiook kake eitu eas ninye ng'ok. Ematinyikaki naa ilo orika le mpiris kintieu, pee king'amu olng'ur nikitum empiris naretu iyiook te nkata e ngoloto. Amu ore olapolosani ake pooki ogeluni ti atua olorere negeluni metaasisho te nkaraki olorere tiaalo Enkai, neitayu nkishorot o lasarri te nkaraki ng'ok. Neidim ninye ataretu te mborron ilmoda o lwushuush, enapita ninye makewan enchalan enye. Ore te nkaraki ena meeta nchere meng'as aitayu olasar loo ng'ok enyena makewan neitayu sii noo ilkulikae tung'ana. Nemeetae oloisho kewan ina kitoo, kake Enkai naipot, anaa apa pee eipot Aron. Neaku ore sii ninye Kristo eitu eilepie kewan meitaae olapolosani kitok, kake ketegeluaki ilo otiaaka ninye, “Ira iyie Oinoti lai taata aatoiwuo iyie,” anaa pee ejo te dikae wueji, “Ira iyie olapolosani ntarasi, to lkerreti le Melkisedek.” Ore too nkolong'i enyena o sesen etoomonuo Yesu esaisho, nebuaku oleng too lkiyio, esai ilo apa oidim aitajeu te nkeeya, netoning'oki ninye te nkaraki naure ninye Enkai. Amu ore hoo naa Oinoti ninye, eitamoo kewan enkirukoto te ina mion nanoto, naa ore amu eitabayioki, etaa ninye enjeunoto oo ntarasi te lelo pooki ooning ninye, neitaa Enkai ninye olapolosani kitok to lkerreti le Melkisedek. Ore te na bae keetae nkumok naaji naagol elimunoto, amu eijo ketagolo intae ilukuny mining'ung'u. Amu ore aa intae napaji taata ilaiteng'enak, neton eiririkino te nelotu likae aigilie intae nkiterunot o rorei le Enkai. Eton aa kule naairirikino intae, mme endaa nagol; amu ore pooki ng'ae laa kule ake eishuyie naa alani to rorei le supatisho, amu eton aa enkerai ninye. Kake ore endaa nagol naa enoo ltung'ana botoro, ene lelo ooiteng'enaki to lmoo metayiolo aatirishu isupati o ntorrok. Ore naa ematogiroi nkiterunot oo nkiteng'enat e Kristo emaape dukuya aabulu, meaku eikintoki aaitamanya enkirridunoto niking'uaa isiaaitin naatuata, o enkirukoto nikiruk Enkai, o enkiteng'enata e nkisuja o enkiteleikinoto oo nkaik, o empiunoto oo lootuata, o enkiguana oo ntarasi. Naa aikiaas kuna pooki eishorua Enkai. Amu meidimayu neitokini aitasheyie te nkirridunoto lelo ooidipaki aaitawang'a, neishamishama enkishorunoto e shumata, netang'arieki Enkiyang'et Sinyati, neishamishama esupatisho o rorei le Enkai o engolon e ina kata nalotu, teneitoki ninche etii nena, aaibelekenya neany eiruk, amu ilo Inoti le Nkai eigil aashe maate nepik enkurruna metalioyu. Amu ore enkop naok enkare nashaiki nkatitin kumok, nebulaki endaa naret lelo ooturokini, netum emayianata naing'uaa Enkai. Kake te neiu ilkiku o endiati, neaku pesho nenyikaki oldeket; naa empejoroto eiting'oki. Ore hoo naa neijia ti nikiro, ore te intae, ilanyor laainei, kesipa nchere kiaatayie intae osiligi loo mbaa naaikash e njeunoto. Mme Enkai neme asipani metaa kerikino enkisiaayiare inyi enyorrata nintoduaaitie ti alo lelo sinyat ooisiaaisho, neton ake isiaaitata. Nikiyieu neitoduaaya pooki ng'ae linyi enyuaata naikununo neijia pee itumutumu emborei oo sipat osiligi o meiting'o, pee miaakuku yietuti, kake ilooduaaya lelo laa te nkirukoto enye o te ng'iriata etujung'o nkisiligat. Amu ore pee eisho Enkai Abraham enkisiligata naa ore amu meetae likae kitok olang oinosie olmumai, neinosie kewan olmumai, nejo, “Esipa kaamayian nanu iyie naaponaa.” Neaku ore Abraham, etobiko neng'iri, netum enkisiligata. Oltung'ani kitok alang kewan einosie oltung'ani olmumai naa ore te nchankar ake pooki aa olmumai oitadedeyie. Neaku ore apa pee eyieu Enkai neitoduaya tukul nchere meibelekenya enkiguana enye, nepik olmumai, peyie aa too mbaa are nemeibelekenya, naa te nena meidimayu pee eaku Enkai olalejani, kinoto iyiook ilooisikakita aasaru eretoto nagol nikimbung'ie ilo siligi otipikaki dukuya iyiook. Kiata iyiook ena ng'ape nauno naenikino oltau, naa osiligi ojing agiroo oliatua lo lkarasha orish enkaji e Enkai, ine neshomo Yesu aituruk te nkaraki iyiook, eidipa ninye ataa olapolosani kitok intarasi to lkerreti le Melkisedek. Amu ore ele oji Melkisedek, olaiguanani le Salem, naa olapolosani le Enkai, netii shumata te pooki, netanang'are ninye Abraham eshukunye aing'uaa enjore natimirie laiguanak, nemayian ninye; naa ninye etoorikia Abraham ematua e tomon e pooki toki. Eituruk ninye, te newaluni enkarna enye, aa olaiguanani le supatisho, naa olaiguanani le Salem, eji Olaiguanani le seriani. Meeta ninye menye anaa ng'otonye, nemeeta entipat, nemeeta eneiting'ie enkishui enye, kake etiu anaa ilo Oinoti le Nkai, ora olapolosani ntarasi. Ng'ura eneba enkitoo enye! Eishoo papa lang Abraham ninye ematua e tomon oo yarunot. Naa ore lelo le ishoi e Lawi oong'amu empolosare neetae naitanapaki ti atua nkitanapat meishoo olorere ninche ematua e tomon, naaton lalashera lenye, hoo naa le ishoi e Abraham sii ninche. Kake ematua e tomon naishoo Abraham nemayian ninye ilo apa otang'amua nkisiligat. Metii enchankar inchere olkitok ake omayian oloti, ore te ne, iltung'ana ooyooki aaye, oong'amu ematua e tomon, ore te ine, naa ilo obo oitadedeyieki aajo keishu. Keidim doi ninye oltung'ani atejo ore ninye Lawi makewan, oishoro metang'amu ematua e tomon, eishooyie ematua e tomon te Abraham, amu eton apa etioyo too sapo too sapo e nkakuyiaa lenye pee enang'are Abraham Melkisedek. Ore taata te naa ketumoyu apa bayaroti te mpolosare oo le Lawi, amu te ninye etang'amutua ilo orere nkitanapat, ainyoo eitokini aayieunye likae apolosani olotu to lkerreti le Aron? Amu te neibelekenyi lapolosak neibelekenyi sii ninche nkitanapat. Amu ore ele oimaki kuna baa naa ole likae osho lemeeta ninche ae kata oltung'ani lenye otopolosishe to lperere lo lasar. Amu eibala olosho le Yuda etoikioki Olaitoriani lang, naa ore te ilo osho, neitu ejo Musa ae naipirta ilapolosak. Keitoki ena bae awang'u oleng te neinyototo likae apolosani lo rreikie le Melkisedek, ajo eitaaki olapolosani neme to rrekie loo nkitanapat anaa te ntipat o sesen ake eeta engolon, kake te nkidimata enkishui nemeidimi aaishie. Amu eitaikiaki ninye shakenisho nchere, “Iraiyie olapolosani ntarasi to rrekie le Melkisedek.” Ore te nabo alo, eiwuang'ieki enapa kitanapata naituruku te nkaraki nashal nemeeta dupoto, amu meetae entoki naiputakine te nkaraki nkitanapat, ore te nkae alo, eyawuaki osiligi oikash, laa te ninye kinyikaki iyiook Enkai. Neitu easi ina metii olmumai. Ore lelo apa ooitera aaku ilapolosak netaa metii olmumai, kake ore ele netolimuoki to lmumai, “Einosa Olaitoriani olmumai nemeibelekeny enatejo inchere, ‘Ira iyie olapolosani intarasi.’ ” Ena naishoo Yesu meitadedeyie osotua olusoo to likae. Ore lapa apolosak ooiturukutuo naa kumok esiana enye, amu etomitikio enkeeya ebikoo te mpolosare; kake eibung'ita ninye empolosare enye nemeiting, amu ebik ninye intarasi. Ina pee eidim ninye aitajeu nkatitin pooki lelo ooimu ninye epuonu aanyikaki Enkai, amu eishu oshi ake ninye netumoki atoomonoki ninche. Amu eikash te iyiook, ti nikiata olapolosani kitok oba nji osinyati, lemeeta entiyoto, nemeeta entibili, olotirishuaki too laing'okok neilepieki aaitogiroo shumata. Meetayie ninye tipat, anaa enatiu apa lelo kulikae apolosak, meeta tipat napolosishore anaake, to lbae loo ng'ok enyena makewan, neitoki apolosisho to lbae loo ng'ok o lorere, eitabayie ninye ina nabo kata ake apa pee eishooyo kewan. Esipa nchere nkitanapat naaitaa ltung'ana ooshal lapolosak kituaak, kake ore ilo rorei lo lmumai, otusujua nkitanapat, netegelua ilo Inoti bayaroti obik intarasi. Ore embae sapuk te kuna naaji naa ena: eikiaata doi iyiook olapolosani kitok oba neijia. Olotonita te tatene e Nkitoo e Shumata, olaisiaayiani le ine wueji sinyati o le ilo ng'obor osipa leme oltung'ani oitasheyie kake Olaitoriani. Amu ore olapolosani ake pooki netegeluaki meishooi nkishorot neitayu lasarri, naa keishaakino apa neeta sii ninye ele apolosani entoki naishooyo. Ore te naa kena kop etii, nemeaku hoo olapolosani, amu keetae naa lelo kulikae apolosak ooishooyo nkishorot anaa enajo nkitanapat. Neisiaai ninche nyaanyukie o loip le ine wueji sinyati te shumata; amu ore pee eaku keun Musa olng'obor, netuutaka Enkai ninye nejoki, “Toduaa taa ntobira pooki toki nturubare lelo sirat likintoduaaki to ldoinyio.” Kake ore anaa enatiu, enoto ninye Kristo enkisiaayiare naikishiaan ele sotua oyau ninye, amu eitabayioki too nkisiligat naalusoo te nekua. Amu tene meeta apa ilo sotua ntiyot, naa anaata meetae ae nayaunyeki likae liaare. Amu ntiyot etoduaa te ninche pee etejo: “Kepuonu nkolong'i, Olaitoriani ojo, naa kayooki aitayu osotua ng'ejuk o enkaji e Israel o enkaji e Yuda. Lemetiu anaa olapa sotua laitayio o loo menye enapa olong pee aibung ninche te nkaina ariku aitung'uaa enkop e Misiri; amu eitu ninche etoni ti atua osotua lai, naa ina pee eitu aitoki ashilaa ninche Olaitoriani ojo. Nele osotua laitayu o enkaji e Israel te nelusoo nena olong'i, Olaitoriani ojo. Kapik nkitanapat aainei atua lukuny enye, naiger ninche ti atua iltauja lenye, naa kaaku Enkai enye, neaku ninche iltung'ana laainei. Nemeitoki pooki ng'ae aiteng'en ole latia enye aashu eiteng'en pooki ng'ae olalashe lenye, ajoki, ‘Tayiolo Olaitoriani,’ amu kaayiolou pooki nanu, eiteru to loti te pooki o metabaiki olkitok te pooki. Amu katum kenya ake olng'ur ti alo ntorrok enye, nemaitoki ae kata adamu ng'ok enye.” Ore eimaki ninye osotua ng'ejuk neitaa musana ole nkiterata. Ore ilo omusanu aaku moruo netinyikaka enkiishata. Ore doi ninye ilo sotua le dukuya neeta apa irrekiei le seremare o ewueji sinyati e nkop. Amu eitobiraki olng'obor li oriong, laa atua ninye etii olkilang'et o emesa omukateni e nkitoduaaroto; neji ine Ewueji Sinyati. Ore ti oriong olkarasha li aare neitashe olng'obor oji Sinyati Oleng, netii olperere lo lasar le nkorropil le sahabu o ilo sanduku losotua omura pooki alole te sahabu, netii atua ilo moti e sahabu natii mana, o enapa ng'udi e Aron natubulakita mbenek, o lapa soito lo sotua; netii ilkerubi le nkitoo ooitushurita ilo orika lo lng'ur. Ore kuna tokitin nimikindim aaimaki taata nikisipu. Ore pee eidipi aaitabai kuna kitobirat, neaku kejing ilapolosak anaake atua ilo ng'obor aaitabaya empolosare enye; kake ore ine e are, olapolosani kitok ake ojing, ore ninye naa kata nabo to lari, nemejing meetae osarge oishooyo te nkaraki kewan enye o te nkaraki inkitarruorrot e ilo orere. Te na bae eitodolu Enkiyang'et Sinyati inchere eton mebolo enkoitoi najing'ieki ine wueji sinyati eton ake eitashe ilo ng'obor lioriong, naa ina enkitanyaanyukoto e na kata taata. Ore te risioroto ele rrekie neishoori inkishorunot, o lasarri lemeidim aaitaa supati indamunot elelo oosaisho, kake endaa ake eipirta o enaoki o enkitukuore oo mpukunot kumok, naa imbaa naaitore osesen naatuunoki o metabau enkata enkibelekenyata. Kake ore eewuo Kristo anaa olapolosani kitok loo mbaa supati naapuonu, neaku ore to lng'obor kitok obaya, leme inkaik naaitobira, inchere, ime olena kitayunoto, etijing'a ninye nabo kata Ewueji Sinyati, neme osarge loo lkineji o lasho etoshoroyie kake osarge lenye makewan, neitadedeyie te ina elakunoto oo ntarasi. Amu amaa te naa ore iltung'ana ooiduruk naa keituku enkisuaakinoto o sarge loo lkineji o loo loing'ok o nkuruon e ntawuo te nkipooto o lo sesen, kebaa naa elusoo osarge le Kristo, laa te ina Kiyang'et oo ntarasi eishoo kewan Enkai meeta entiyoto, aituku indamunot inyi neitung'uaa isiaaitin naatuata esiaayia Enkai naishu. Ore te nkaraki nena, ninye olaidikidikoni lo sotua ng'ejuk, paa ore lelo ooipotoki netum inkisiligat e njung'ore oo ntarasi, amu enotoki enkeeya ng'ejuk nalaku too nkitarruorrot lelo ootii abori lido sotua le dukuya. Amu ore te neetae empalai e njung'ore, neng'asi ake aaitadedeyie enkeeya eilo oitujung'ishe. Amu pooki ake pee ejung'ishoi naa te neetae olotua, amu mejung'ishoi eishu oloitujung'ishe. Naa ina pee eitu apa eitabari olapa sotua musana metii osarge. Amu ore apa, keimaki ake Musa enkitanapata ake pooki enena aliki olorere nedumu osarge loo lasho o loo lkineji, te nebo enkare olpapit oonyokie loo ntare o lchani oji hisop, neisuaaki embuku kewan o lelo tung'ana pooki, ejoito, “Osarge ele lo sotua oitanapa intae Enkai.” Neiko sii neijia ilo sarge eisuaaki kunda pokira are, ilo ng'obor o ntokitin pooki naasishoreki te seremare. Esipa nchere, ore to lkerreti loo nkitanapat o sarge apake eipoki pooki toki to sarge, naa ore eitu eibukori osarge nemeetae empalakinoto oo ng'ok. Neaku meeta apake kata nemeitukui kuna tokitin naa inkitanyaanyukot ake e nekua e shumata aaipokie kulo asarri, kake ore nena tokitin maate e shumata neipokieki lasarri oolang kulo. Amu eitu eitijing'i Kristo, ewueji sinyati naitobiraki too nkaik naa enkitanyaanyukoto ake e idia nasipa, kake atua shumata kewan, paa keitashe taata te dukuya Enkai terishata ang. Neme keitoki ninye aigiligil aishooyo kewan, anaa enaiko ilo apolosani kitok ejing atua ine Wueji Sinyati anaake to lari eeta osarge leme o lenye; amu te naa neijia etiu, naa anaata eigilieki ninye emion ana apa moitie pee eitamanyuni enkop. Kake ore enatiu, etaliee ninye nabo kata ake te pooki eiting'o enkata pee eiwuang'ie ng'ok eitaa ninye kewan olasar. Naa ore anaa enaitanapishoteki metuata iltung'ana nabo kata ake, ore pee elusoo ina nelotu enkiguana, neijia sii etiu Kristo, ore eidipaki aaitarasai ena nabo newa ng'ok oo lkumok, keliooyu eni are, neme ng'ok elotu aararr kake kelotu aitajeu lelo ooanyita ninye te yieunoto sapuk. Ore amu oloip ake le nena sidain naapuonu eeta nena kitanapat neme nekua tokitin naasipa naara nemeidim aekata, te lelo asarri ooitaini to lari ake osuju olikae, imeidim aaitaa bayarot lelo oonyikaki. Amu te naa keidim anaata apa meekure eitaini. Te naa keitukuoki lelo aseremak, anaata meitoki aayioloiki ate ng'ok. Kake ore ti atua lelo asarri netii enkitadamunoto oo ng'ok anaa ake te pooki ari. Amu meidimayu metaa osarge loo loing'ok o lkineji ooya ng'ok. Enkaraki nena, ore apa pee elotu Kristo enkop, nejo, “Ore ilasarri o nkishorunot imiyieu iyie kake osesen kintobiraka nanu; ore ilasarri oopeji o nkishorunot oo ng'ok neitu ishipakino iyie. Ina pee tejo, ‘Ng'ura nele nanu, oewuo pee aas eniyieu, eyieunoto ino, Na Ai ai,’ anaa enatisiraki tialo nanu ti atua olpiyayati le mbuku.” Ore pee ejo to ine te shumata, “Eitu iyieu iyie neitu ishipakino ilasarri o nkishorunot naapeji o nkishorunot oo ng'ok.” Neishooyioki kuna te risioroto anaa enajo nkitanapat, nenyaaka aponaa ajo, “Nele nanu, aewuo paa aas enyieunoto ino.” Keiwuang'ie ninye idia e dukuya peyie etum aitasheyie eniare. Naa ina eitukuyieki iyiook te nkishorunoto o sesen le Yesu Kristo nabo kata ake te rishata e pooki. Neitashe olapolosani ake pooki anaake te siaai enye, eigil aitayu iloshi ake asarri, lemeidim ae kata aawaita ng'ok. Kake ore pee eidip Kristo aitayu olasar loo ng'ok obo ake loo nkatitin pooki, neton ninye te nkaina e tatene e Enkai, Paa te ine eton o metaba anaa neitaae ilmang'ati lenyena olorika loo nkejek enyena. Amu to lasar obo eitabayie ninye te nkata pooki lelo ooitukuoki. Neitaiki sii ninye enkiyang'et Sinyati iyiook shakeni; te nkata nasuju ejo, “Nele osotua laitayu nanu o ninche te siadi nena olong'i, Olaitoriani ojo, naa kapik inkitanapat aainei iltauja lenye, naiger ninche too ndamunot enye.” Neitoki aponaa nejo, “Ore ing'ok o nkitarruorrot enye nemaitoki adamu ae kata.” Ore enetii empalakinoto e kuna, nemeitoki atii olasar loo ng'ok. Ore enkaraki nena, ilalashera, ore naa amu eikiaata iyiook enkitieunoto nikijing'ie ine wueji sinyati to sarge le Yesu, te ina oitoi ng'ejuk naishu nataboloko ninye iyiook te ilo karasha, aa taa to sesen lenye, nikiaata sii olapolosani kitok oitore enkaji e Enkai; ematinyikaki to ltau osipa ti atua emborei e nkirukoto, neisuaakaki iyiook aaisuj ltauja lang metaa mikiaata ileeni too ltauja lang neisujaki iseseni lang te nkare nasila. Emaibung'a aakurraki elimunoto o siligi lang mikingusugus, amu keisiligayu ilo oishorua ina kisiligata; naa ematadamu enikinkunakino olikae olikae enkisusunkat o enyorrata o siaaitin sidain, nimikipalaa entumo, anaa enatiu olkuaak le kulikae, kake intagolo olikae olikae neisul idolitata aajo etinyikua ina Olong. Amu ti nikiaas ing'ok aaotiki kindipa aatang'amu eyiolounoto e sipata, nemeitokini aata olasar loo ng'ok, kake enkuretisho e anyunoto e ndung'okinoto e nkiguana, o engoro e nkima namut lelo mang'ati. Ore apa oltung'ani ogil nena kitanapat e Musa neye metii olng'ur te neetae shakenisho oo ltung'ana aare aashu okuni. Ijo kebaa elusoo enkitamioto nayaki kewan oltung'ani oany Oinoti le Enkai, neisarkionie osarge lo sotua laa ninye eitukuyieki neitagor ina Kiyang'et e mpiris? Amu eikiyiolo ilo otejo, “Enaai elap, nanu oitalaku.” Nejo sii, “Olaitoriani oiguanare iltung'ana lenyena.” Entoki naitureisho ti nibatatakino inkaik e Enkai naishu. Kake entadamu sii intae napa olong'i e dukuya ina kata apa eidipaki aaitawang'aki intae, ing'iriri enkitirrishakinoto nagol te nebo emion, neaku kebolori intae metamori te dukuya olorere neisilisili intae, nitaa ti ae kata encholiek e lelo ooikunaki neijia. Amu iutata apa olng'ur too looena, nitonyorraitie te nchipai meishang'itieki masaa inyi, amu eiyiololo apa aajo iatata intae maate entoki nalang naa enabikoo. Ore enkaraki ina eminturraa naa enkitieunoto inyi, naata olerrinyore kitok. Amu meeta nchere pee miaatata eng'iriata, pee itumutumu aataas enayieu Enkai, ning'amumu ina kisiligata natolimuoki, “Amu eng'or enkiti kata, pee elotu ilo olotu nemeimutie; Kake enkirukoto eishuyie osinyati lai, naa te nerrinyo siadi, nemeshipakino oltau lai ninye.” Kake mikira iyiook ile lelo oorrinyo siadi nemuti, kake kira ile lelo ooata enkirukoto negolie iltauja lenye. Ore enkirukoto naa ninye naitadedeyie intokitin naaisiliguni, naa ninye enkitisipata e nena tokitin nemelioo. Amu te nkirukoto etonyorrarrie Enkai iltung'ana li apa. Te nkirukoto kiyiolo aajo eitayioki enkop te nkiroroto e Enkai, neaku ore kuna naadolitai naa too nemelioo eitobiraki. Te nkirukoto eyaka Abel Enkai olasar ong'amaroyu alang ole Kain, laa ninye etonyorrarrie Enkai ninye ajo supat, etaa Enkai shakeni amu etang'amayie olasar lenye; etua ninye kake ore te nkirukoto enye neton eirorita. Te nkirukoto ewaki Enok aailepie pee medol keeya; neitu etumi, amu Enkai nawa ninye. Naa ore eton eitu eilepieki neitisipaki nchere eitishipa ninye Enkai. Naa ore metii enkirukoto nemeidimayu peyie eitishipi ninye. Amu ore pooki ng'ae oyieu nenyikaki Enkai naa ore ake meiruko inchere keetae ninye naa ninye oisho inkishorot lelo ooing'oru ninye. Te nkirukoto eitatala Enkai Noa nena baa apa neton melioo nening ninye neitobir esafina pee esaru enkaji enye; te na bae etudong'oko enkop enkiguana neaku ninye olajung'oni le supatisho natumi te nkirukoto. Te nkirukoto etoning'ishe Abraham pee eipoti metupuku alo ewueji nelotu atum nejung; nepuku ninye nelo, nemeyiolo enelo. Te nkirukoto etobiko aa omoni te ina kop naisiligieki, anaa te neeiking'a naa ilng'oborri emany o Isaak o Yakobo, oora sii ninche ilajung'ok le ina kisiligata te nebo ninye. Amu ina anasa eanyita naata enkitamanyunoto enaa ore oloshetu o loitobir naa Enkai. Te nkirukoto enoto Sara enkidimata nemenayu te ishoi etaa moruo, netulusoitie ilarin lenyena, etoduaa ninye ajo keisiligayu ilo oishoo enkisiligata. Enkaraki nena paa oltung'ani obo, etiu apa ninye anaa olotua enotoki eishoi naba te nkumoi anaa ilakir le shumata nemeikenayu etiu anaa osinyai le mbata e naiposha. Etuata kulo pooki etii atua enkirukoto, neitu eng'amu ninche enapa naisiligieki, kake etoduaa neirorokita, te nelakua, netolimutuo inchere ilomon ninche naa inkisikat te nkop. Amu ore lelo tung'ana oojo neijia neibalunye inchere enkop apa nabikie eing'oru. Te naa kenkop apa natung'uaitie edamu ninche, anaata apa enoto erishata nashukore. Kake ore anaa enatiu, ae kop eyieu sidai te ina, naa ene shumata, Enkaraki e ina pee mekurru Enkai te neji ninye Enkai enye, amu eitobiraka ninye ninche enkanasa. Te nkirukoto eitayio Abraham, Isaak, enapa kata pee etemi, aishooyo oinoti lenye obo, oloimakaki aajo, “Isaak eipotieki eishoi ino.” Etoduaa ninye ajo keidim Enkai aitopiu iltung'ana ebaiki ilootuata; te ina kitanyaanyukie aajo, enoto ang'amu. Te nkirukoto etamayiana Isaak Yakobo o Esau too naapuonu. Te nkirukoto, etaa keye, etamayiana Yakobo ilayiok le Yosef, eigarakino ninye elukunya e ntirma enye eirrugo aseremisho. Te nkirukoto etaa eiting'o Yosef, eimaka enaidurra oo Siraeli neutaki eneikunaa enukaroto enye. Te nkirukoto, pee eini Musa, eisudoyioki lapaitin okuni intoiwuo enyena, amu etoduaa ninche aajo aisidai ina kerai; neitu eureyu ninche ina naitanapishe olaiguanani. Te nkirukoto, etanya Musa, etubulua, eipoti aajo ole ntito e Farao, nedutaa meinosieki osina te nebo iltung'ana le Enkai alang te neton aitumurru olkar loo ng'ok. Etoduaa ajo emoroto namori te nkaraki Kristo naikash alang enkarsisisho o masaa kiroteti e Misiri, amu keanyita idia kishorunoto. Te nkirukoto eshomo aing'uaa Misiri, neitu eiureyu engoro e ilo aiguanani; amu eting'iria anaa olodolita ilo lemelioo. Te nkirukoto, eitayio Pasaka neisuaaya osarge, pee, mear ninche ilo Arani loo lkikaunot. Te nkirukoto etalang'a lelo tung'ana enaiposha nanyokie anaa enkop natoyio; kake ore Ilmisiri pee etem aajo maikuna neijia, neya enkare. Te nkirukoto etuurori isunta e Yeriko etamanaki too nkolong'i naapishana. Te nkirukoto pee eitu eari Rahabu ina mulayoi, te nebo lelo apa kulikae lemening'isho, amu etang'amua ninye lelo aikitalak to sotua. Naa kakua kulie naitoki aajo? Amu maata enkata naimakinye Gideon, Barak, Samson, Yepta, Daudi o Samuel o lelo oibonok le Enkai ilaa te nkirukoto etimira inkitoriat, neitabaya te ngolon enkiguana oo sipat, neng'amu nkisiligat, neibooyo nkutukie oo lng'atunyo, near olkutati le nkima, neilany enepi o lalem enkidimata ti atua enchalan, neaku magil te njore, nemir injoreitin oo lmang'ati. Etang'amutua inkituaak ilootuata lenye eitopiwuoki, Einosieki kulikae osina, etanyaita elakuni, ejo pee eyooki aapiu te mpuaan nalang ina. Eting'iria kulikae imorot o oshot, o metabaiki ilpisia o korokoroni. Eirruyaki too soito, nedung'i te musumeno aitaa are, neari to lalem nepuaya eishopito ndapan oo nkerra oo noo nkineji, ilaisinak o looisilisili neinyali ilemeishiakino enkop te netii nepuaya too lpurkel o too ldoinyo, o too ldoinyio, o too rrumati o too nkapuniaa e nkop. Ore kulo pooki, hoo neitadedeyieki te nkirukoto enye, neitu eng'amu ina kisiligata, amu etasioko apa Enkai adol embae naikash te iyiook, inchere ore mikitii iyiook nemeitabari ninche. Ore enkaraki nena, amu etaa emanita iyiook enkatampoi kitok e lelo shakenini, emaiturrai sii iyiook enkiroishi ake pooki, o eng'oki naonyikino iyiook oleng, emaipirrio te ng'iriata te ina kuetata natipikaki dukuya iyiook. Emaimariria Yesu olaa ninye olaiturukoni naa oloitabaya enkirukoto ang, olaa ore enkaraki eng'ida natipikaki dukuya ninye neting'iria osalaba, nemenu ina kurruna, neton taata te nkaina e tatene o lorika le nkitoo e Enkai. Entadamu intae ilo oting'iria enkiba naba neijia oo laing'okok eiba kewan enye, pee minaururu intae nemidukenyanya ti atua iltauja linyi. Ore te nkesha inyi iararere ing'ok neton eitu igilunorere o meibukori osarge. Anaa ketorikine intae ina naikokieki intae anaa nkera? “Enkerai ai, nimimenu earata nikiaar Olaitoriani, nimilepori ti nikiosh ninye! Amu olonyor eosh Olaitoriani, neitame enkerai ake pooki nang'amu ninye.” Enkaraki naa ioshot e nkikoo pee ing'iriri. Eitaasa intae Enkai enaitaas inkera enyena anaa kaa kerai eetae nemeosh menye arere? Te nemeoshi intae aarere, anaa enaitaasaki ilkulikae pooki, nitaa nkera naadumuni nimirara inot. Ore etii ena, nikiaata loo papa lang te nkop oosh aarere nikiyanyita ninche. Paa eimikiyanyit naa oleng ilo Papa loo nkiyang'eta pee kinchu? Amu etoosho ninche iyiook aarere te nkiti rishata anaa enayieu ninche, kake keosh ninye iyiook arere amu eisidai ina te iyiook pee kitum esinyatisho esupatisho enye. Ore te ina rishata eoshoto pooki narere oltung'ani imemelok; ore te siadi neiu ilng'anayio le seriani e supatisho te lelo ootarerioki te ina. Ore enkaraki ina entarrapu nena aik naalepori naa entagolo nena kung inyi naashal, naa entobiraki inkejek inyi inkoitoi naaitoriori, paa ore ilo ng'ojine nemeburukusha kake pee etumi aaishiunye. Entonyok eng'oru osotua too ltung'ana pooki, o esinyatisho naa ore te nemeetae nemetumi hoo olodol Olaitoriani. Entodol ake pee meetae hoo obo olau empiris e Enkai; inchere pee metumi “entonai e nduaran” nabulu neyau entorroni, neaku te ina ilkumok te ina eisarkionieki ilkumok; niminchosho etumi oltung'ani hoo obo ololoito aashu olemeserem Enkai anaa Esau, otimira enjung'ore e ikinet enye neinosie endaa e nabo kata. Amu iyiololo aajo ore te siadi, pee eitoki aayieu nejung ina mayianata, netanyaki ninye, amu eitu etum erishata pee eirridu, hoo neing'orua too lkiyio. Amu mme doi entoki naiseyieki ietuo enetii, enkima nayupuyup, o enaimin o entoki naitureisho, o lkutati, o ltoilo le ntarumpeta o ltoilo laa ore nkirorot enyena neitureita lelo apa ootoning'o metasaisho aajo pee meitokini aaigilie kulie kirorot. Amu meitieu apa ninche aating'iria enkitoria naishooki, “Te neiseyie ninye eng'ues ele doinyio, neari too soito.” Eituria ina naitoduaaki o metejo Musa, “Kaikirikira nanu te nkuretisho.” Kake Oldoinyo le Sion ietuo intae o enkanasa e Enkai naishu, Yerusalem e keper, o enetii ilmalaika lemeikenayu ooiturrurro eikodoki, nietuo eumata oo lkikaunot ooigero te shumata, nietuo enetii olarishani laa ninye Enkai e pooki; o enetii inkiyang'eta oo ltung'ana sinyat ooitabayioki, o enetii Yesu, ilo Aitutumoni lo sotua ng'ejuk, o enetii ilo sarge oisuaayioki neiro te mpiris nalang eno sarge le Abel. Entodol ake emiaany ele olimu kuna. Amu amaa te neitu eilanyisho lelo ootanyaita ninye te nkop, mikiaata sii iyiook enikilanyie ilo oirorie iyiook etii shumata. Eikirikirie oltoilo lenye enkop ina kata apa; kake eitayio taata enkisiligata ajo, “Eton aigil ena nabo neme enkop ake aikirikirie kake o shumata sii.” Ore ena bae najo aigil ena nabo, neitodolu inchere keiwuang'ieki ina apa naikirikirieki, neitodulu ena entoki naitobiraki, pee eing'uari ina nemeikirikirieki. Enkaraki ina emanoto iyiook enashe kitang'amutua enkitoria nemeidimi aaigusugusie, naa emaishoo Enkai eseremata nang'amaroyu, natii enkanyit o lturiaki; amu ore Enkai ang naa enkima namutisho. Enchoo enyorrata oo lalashera ebikoo. Emintololoiki enkitoomono oo lomon amu te ina eitoomono apa kulikae ilmalaika meyiolo. Entadamu lelo ootii korokoroni, anaa eitii korokoroni te nebo ninche, o lelo ooinyali, amu itii sii intae atua ilo sesen. Enchoo eyanyiti enkiyama ti atua iltung'ana pooki naa emincho ina rruat e nkiyama eisarkionieki; amu Enkai naiguanare lelo ooibor onyek o loololoito. Torripo enkishui ino ti alo enyorrata oo mpesai aa nchoo kibaiki entoki niaata; amu etejo ninye, “Maapal maadamu nemaaing'uaa.” Neaku eikintieu aatejo, “Olaitoriani olaretoni lai, maureishoyu, kaa aaidim oltung'ani aitaasa?” Entadamu ilaiturukok linyi, lelo ooinosakita intae ele rorei le Enkai, entoduaai enkiting'oto e mpuaan enye, naa enturubare enkirukoto enye, ore Yesu Kristo ninye ake olang'ole taata o ntarasi. Emincho eitapong'ori intae too nkiteng'enat naapaashaa; amu keishiaakino naa empiris naitagol oltau, neme indaiki, neitu eret lelo ooitudupita. Eikiaata iyiook olperere lo lasar lemeng'arie iyiook lelo ooisiaaisho teilo ng'obor. Amu ore nkiri e nena kishu naayau olapolosani ine wueji sinyati aitaa olasar loo ng'ok naa ti auluo enkang oo lng'oborri epejori. Neaku ore sii ninye Yesu naa ti auluo kishomi einosieki osina pee etum aitisinya iltung'ana lenyena to sarge lenye makewan. Ore enkaraki ina emainyeito aapuo auluo enkang oo lng'oborri, nikinapaki nena morot. Amu mikiaata iyiook enkanasa nikibikie te ne, kake ae anasa king'oru nalotu. Ti atua ninye naa maitaiki Enkai anaa ake olasar le nkisisa, aa inchere, ilng'anayio loo nkutukie naalimu enkarna enye. Emintololoiki easata oo supati, o eng'arata oo ntokitin niaatata, amu ore ilasarri laaijo lelo naa keitiship Enkai. Entoning ilarikok linyi niyanyititi, amu iltauja linyi eirrita, anaa iltung'ana ooyookini aikilikuan, enchoo naa eiko ninche neijia te ng'ida, neme to sina, amu meeta ina dupoto te intae. Entoomonoki iyiook, amu king'idare ena nchere mikiaata ileeni ti atua iltauja lang, eikiyieu nikiaasisho to rrekie sidai too mbaa pooki. Atukunyaki intae naleng enkuna neijia pee aasiokini aarrinyoki intae. Ore naa taata Enkai e seriani nanyaaka ashuku Olaitoriani Yesu aitung'uaa ilootuata, ilo shekut kitok loo nkerra, te ilo sarge lo sotua loo ntarasi, meishopoki intae pooki toki sidai pee itumutumu aataas ina nayieu ninye, neas ina naitiship ninye ti atua intae; ti atua Yesu Kristo, olaa enenye enkitoo ntarasi o ntarasi. Esai. Asai intae ilalashera, emisi tele rorei lai le nkikoo, amu too ndorropu atisiraka intae. Entayiolo inchere etalakuaki olalashe lang Timoteo, naa kayooki adol intae te nebo ninye te netasiekuo. Eroroki ilarikok linyi pooki o lelo sinyat pooki. Eiroroki intae ilooing'uaa Italia. Metaa empiris te nebo intae pooki. Esai. Yakobo, osinka le Enkai o lo Laitoriani Yesu Kristo, Enkirorokino, too loshon tomon o aare ooisardakino inkuapi pooki. Ilalashera laainei, enkenai inchere eng'ida, te nitumutumu intemat oo mpukunot kumok, amu iyiololo nchere ore entemata natemi enkirukoto inyi eyau eng'iriata. Ning'iriri metabaiki enkiting'oto pee iakuku ilooiputakinote nelulung'a neitu eng'oriki toki. Naa te netii olinyi otong'orikia eng'eno, inchoo ninye metoomonu te Enkai naisho iltung'ana pooki te leng'on metii enkisikong'akinoto naa keishori sii ninye. Kake inchoo ninye eikilikuanu te nkirukoto meeta olng'ash katukul; amu ore oltung'ani oing'ash netiu anaa ilopir le naiposha ooreu osiwuo nekutaa. Mincho oltung'ani laaijo ilo edamu ajo ketum toki to Laitoriani, oltung'ani oata mbaa are to ltau lemeuno too rrekiei lenyena pooki. Inchoo olalashe oshal metishipayu te nkaraki nailepieki ninye, ore olalashe karsis inchoo sii ninye metishipayu te nkaraki neitadowuoki, amu etiu anaa intapuka e ntim kelusoo. Amu eilepu enkolong eirowua, nepej intapuka nemugut, nedoiyio, nerruoyo empukunoto e sidano enye. Neijia ake etiu oltung'ani karsis, kerruoyo eitoritote mbaa enyena pooki. Emayiana oltung'ani ong'iri too ntemat, amu ore pee eidip ating'iria entemata neng'amu ninye enkopiyia e nkitoo e nkishui naisiligie Enkai, lelo oonyor Ninye. Emincho ake oltung'ani te netemi, ejo, “Enkai naatetema;” amu metem Enkai too ntorrok, nemetem sii ninye Enkai oltung'ani. Kake etemi pooki tung'ani, te nkaraki eng'uarrata enye torrono; neyiataa aitalamaa neitasur. Ore pee eidip ina ng'uarrata anoto intona neiu ing'ok. Ore pee ebaya ng'ok, neiu enkeeya. Ilalashera laainei lanyor, eminchosho eleji intae. Ore entoki pooki sidai o enkishoroto pooki nemeeta entiyoto edou eing'uaa shumata enetii Papa loo wang'aritin, nemeibelekenya Ninye, aashu etii enetii Ninye oloip le nkibelekenyata. Te nkaraki eyieunoto enye, etoiwuo Ninye iyiook to rorei loo sipat, pee eaku iyiook ilng'anayio le dukuya loo nkitobirat enyena. Entayiolo ena lalashera laainei lanyor. Inchoo pooki tung'ani metaa olosioki aning, nemesioki airo, nemesioki sii agoro. Amu ore engoro o ltung'ani nemeas isipat e Enkai. Entalama ate olduruk pooki o enkumoi oo ntorrok, ning'amaa te mborron Ororei otuunokoki atua intae oidim aitajeu iltauja linyi. Kake entaa ilaasak lo rorei, mme laning'ok ake ilejileje ate. Amu te neaku ake oltung'ani olaning'oni lo rorei, mme olaasani, netiu ninye anaa oltung'ani oing'or enkomom enye te nking'uret. Amu eing'or ninye enkomom enye, ore pee elo, nerikino nabo kata enaikununo. Kake ore olojur asipu inkitanapat bayarot, inkitanapat e lakunoto, nesheikino, nemetiu anaa elde ake oning nerikino, kake olaasani ooata nkiaasin, ore ilo nemaiyiani ti atua iyasat enyena. Te nedamu oltung'ani ajo olaseremani le Enkai, nemeitore olng'ejep lenye, kewan elej ore eseremare enye naa pesho. Ore eseremare sidai nemeeta entiyoto te nkomom e Enkai, Papa, naa ena: embaikinoto oo ltung'ana okishin o nkolia, ti atua isinaitin lenye nerrip kewan pee metum entibili te nkop. Ilalashera laainei, emiaaku iloota olkep imbung'itata enkirukoto o Laitoriani lang Yesu Kristo, Olaitoriani le nkisisa. Amu te nelotu naaji oltung'ani oata ilgiso le sahabu, neishopito inkilani sidain atua enkaji inyi e ntumo, nelotu sii ninye ine oltung'ani aisinani oishopito siapird. Ning'oring'oro intae elde oishopito inkilani sidain, nishilaa aajoki, “Totona te ne,” nijokiki elde aisinani, “intasho te nde,” aashu, “Isukudoyu te mbata oo nkejek aainei.” Aimidol ajo itipikate olgelati maate, niaakuku ilooiguenare too ndamunot torrok? Entoning, ilalashera laainei lanyor. Keitu egelu Enkai laisinak te nkop metaa karsisi te nkirukoto o lajung'ok le nkitoria naisiligieki lelo oonyor ninye? Kake eitu iyanyititi intae ilo tung'ani aisinani. Aime ilkarsisi doi ooibooki intae enkop? Aime ninche doi ooiyietaki entai inkajijik e nkiguana? Aime ninche doi oomor ina arna sidai nayanyiti? Te nintabayaya inkitanapat o Laitoriani anaa enajo isirat, “Tonyorra olelatia ino anaa kewan,” itaasa esupat. Kake te nintodolulu olkep, nitaasa eng'oki, neiguanare intae inkitanapat inchere irara ilagilak loo nkitanapat. Amu ore pooki ng'ae oibung inkitanapat pooki neitapong te nabo, netaa eitarruoyie te pooki. Amu ore olotejo, “Miloloito,” netejo sii, “Miaar metua.” Metaa te neitu iloloito, kake itaara metua, itaa naa olagilani loo nkitanapat. Eroro, niaasishosho, anaa iloopuoi aaiguanare too nkitanapat e lakunoto. Amu meeta enkiguana olng'ur, te ilo leitu eitodolu olng'ur, kake emir olng'ur enkiguana. Kaa dupoto, ilalashera laainei, eeta, te nejo oltung'ani keeta enkirukoto nemeeta siaaitin? Keidim enkirukoto enye aitajeu? Amaa te nemeishopo anaa te nemeeta endaa olalashe anaa enkanashe, nejoki obo linyi ninche. “Enchom te seriani, erowuaja, niraposhosho,” neitu eisho ninche nkolati o sesen, kaa dupoto eata? Neijia etiu enkirukoto openy, te nemeeta siaitin, ketua. Kake eidim oltung'ani oje atejo, “Iata iyie enkirukoto naata nanu siaitin.” Intoduaaki naa enkirukoto ino aa ninye ake, metii isiaitin inono, ore naa too siaitin aainei naaitodol enkirukoto ai. Iruk iyie ajo nabo Enkai, itaasa esidai. Eiruk sii ninche iloirriruani neikirikira. Iyieu iyie nikintodoli lo tung'ani omoda inchere ore enkirukoto nemeeta siaitin naa koolupi? Amaa papa lang Abraham keitu eikenakini sipat te nkaraki siaitin, pee eitayu oinoti lenye Isaak to olperere lo lasar? Aimidol ajo ore enkirukoto o nkiaasin enyena easisho te nebo? Neitabayioki enkirukoto enye too nkiaasin. Pee ebaya osirata ojo, “Eiruko Abraham Enkai, ore te nkaraki enkirukoto neikenaki Enkai ninye esupatisho,” neipoti aajo olchore le Enkai. Idol taa ajo eikenakini oltung'ani sipat too siaitin mme to lbae le nkirukoto ake. Aime te ina oitoi ake sii oo nkiaasin eikenakaki Rahabu ina naibor onyek isipat pee eng'amu lelo aikitalak, neipung'ie ti ae oitoi? Ore anaa enatua osesen te nemetii enkiyang'et neijia etiu enkirukoto nemetii siaitin etua. Emincho ilkumok te intae ilalashera laainei eaku ilaiteng'enak, amu iyiololo aajo ore iyiook pooki ooiteng'enisho naa keiguanareki enagol te nikintadiak. Amu ore iyiook pooki nikintadiak too nkumok naa te netii obo lemeitadiak too naajo, oltung'ani aa o lemeeta entiyoto ilo, oidim sii aitoria osesen lenye pooki. Ing'ura ti nikipik mbartan isenkenke inkutukie naarewueki, nening iyiook, nikindim aaboin iseseni lenye pooki anaa enikiyieu. Eng'urai sii imelin, hoo naa sapuki oleng, nerrumoo olkutati ogol oleng, eutaa ninche enkiti toki aipirie enkalo ake ninye naba anaa enayieu olarewani. Neijia etiu olng'ejep enkiti rubata to sesen, kake ejo sapuki oleng. Tadamu eneba esapuko e ntim, naidim oloti tiili atapejo? Ore olng'ejep enkima, enkop nebore intorrok ti atua irubat ang, nepik osesen pooki intibil, neinuaaki enkima enkishui o sesen olulung'a te nkima naing'uaa Yehanum. Amu eidim iltung'ana aaidondorra neidipa aidondorra pooki pukunoto oo ng'uesi o motonyi o noo ng'uesi naaiserpepiari oo noo ng'uesi e naiposha, kake metii oltung'ani oidim aidondorra olng'ejep, entorroni nemeitirring'a, ebore esayiet nayaisho. Te ilo ng'ejep kimayian Olaitoriani o Papa, naa ninye kidekie iltung'ana, lelo ooitobiraki te nkitanyaanyukoto e Enkai. Ina kutuk ake eimu emayian o ldeket. Ilalashera laainei, aime neijia duoo eishiaakino netiu. Keimu enkong'u nabo e nchorro enkare namelok o e naisukut? Amaa ilalashera laainei, keidim olng'aboli atoiu ilosiyio anaa sabibu ilng'abolo? Meidim sii ninye enchorro naisukut aishoru enkare namelok. Kaing'ae te intae olng'en neeta endamunoto? Nchoo eitoduaaya te nkishon enye sidai o to lkuaak lenye inkiaasin enyena te mborron e ng'eno. Kake ti niatata olom odua o enyorrata e ate ti atua iltauja linyi, eminya kutukie nimilejishosho aaibooyo esipata. Ore ena ng'eno eitu edou eing'uaa shumata, kake ene nkop, o enoo ltung'ana, o enoo loiriruani. Amu ore enetii olom o enyorrata e kewan, netii olong'oling'oli o empukunoto pooki suuji. Kake ore eng'eno nagut naing'uaa shumata nesila neeta eseriani, nebor, netemaa mbaa, nebore olng'ur, neiu ilng'anayio sidain, nemeeta olng'ash anaa esunkureisho. Ore enkisampuare e supatisho neun ti atua osotua lelo ooitayu osotua. Ainyoo nayau injorin, ainyioo nayau ilarrabali ti atua intae? Aime ng'uarrat inyi naara ti atua intae? Iyieuwu nimitumutumu; ina pee, iariara metuata. Ning'uarring'uarra, nimindimidimi aanoto naa ina pee iarara nidumumu enjore. Miaatata toki amu miomonunu. Iomonunu intae nimitumutumu, amu iomonunu te nkoitoi torrono, pee itumokiki aaishang'itie too ng'uarrat oo seseni linyi. Intae iloololoito too ltauja, aimiyiololo aajo ore olchore le nkop naa olmang'atinta te Enkai? Ore pooki oyieu neaku olchore le nkop, neitaa kewan olmang'atinta le Enkai. Anaa aijojo keiroro ene mesipa isirat ootejo, “Ore ina kiyang'et natipika Enkai atua iyiook keeta olom too nguarrat o sesen?” Kake eisho empiris nalus, amu ejo isirat, “Eany Enkai iloowuasa neisho empiris iloobor.” Entoning naa Enkai, erisha oloirirua, naa keipirri ninye ailany intae. Entinyikaki, pee enyikaki sii ninye intae. Entukuo inkaik inyi, intae ilaing'okok, nintukuku iltauja linyi, intae iloo bukaasha. Esinanuoto, ninchirishiri, niyietutu aaishir. Enchoo enkuenia inyi metawalayu aaku enkishirata neaku eng'ida inyi enkimuntut. Entadou ate te dukuya Olaitoriani, pee eilepie ninye intae. Emisukenya maate ilalashera laainei, amu ore ilo osukeny olalashe lenye anaa eiguanare olalashe lenye, inkitanapat esukeny, aa ninche eiguanare. Amu te ninguanare inkitanapat, nimira naa olaibung'ani loo nkitanapat, kake itaa oloiguanare. Obo ake olaishooroni loo nkitanapat o ladung'oni le nkiguana naa ninye oidim aitajeu anaa aitarruoi. Aira iyie ng'ae oiguanare olelatia ino? Entoning naa lelo oojo, “Kipuo taata anaa taaisere atua enkanasa naje o enaje nikibik te ine olari obo nikimirisho, nikitum dupoto.” Nimiyiololo enayooki atiu taaisere; anaa ainyioo enkishon inyi? Itiuwu ake anaa enkinuku naliooyu enkiti kata, kiti neishunye. Ore enaishiaakino te nijojo. “Naa inchere te neyieu Olaitoriani, nikinchu nikiaas ena anaa enda.” Kake ore eyia, isisisisi ate to lwuasa. Ore ina kinosata e kutuk pooki, entorroni. Ore pooki ng'ae oiyiolo ataasa esidai, nemeas, naa eng'oki te ninye. Aiyia naa, lo karsisi, enchira nibuakibuaka amu kelotu shumata intae osina. Netupurdate imasaa inyi, neinosa olasai inkilani inyi. Ore sahabu inyi o nkoshola inyi etodoro einosa enkop, ore ina doron e nkinosata e nkop neaku olmonekie te intae naa kenya inkiri oo seseni linyi anaa enkima. Irragie olchumati loo masaa too nkolong'i e nkiting'oto. Ng'ura, ore olekoisiaayio loo laisiaayiak ootudung'o inkurman, litomito too losekin, etabuaa aishir, netabaikia olkiyioi loo laisiaayiak inkiyiaa o Laitoriani loo lororani. Inosa intae olkar te nkop, nitonini ti atua inaaitiship osesen, nintotiti iltauja linyi te nkolong e yieng'are. Itudung'okito enkiguana niaariara metua oltung'ani supat lemeirish ninye intae. Enting'iria, intae ilalashera; o metabau elotunoto o Laitoriani. Eng'ura eanyu olaturoni le nkurma ilng'anayio sidain le nkop. Neng'iri o metaba anaa netum enchan e dukuya o ene siadi. Enting'iria sii intae. Entagolo ltauja linyi, amu etinyikua elotunoto o Laitoriani. Eming'unyung'unyakino, ilalashera laainei pee meiguanareki ake intae, eng'urai eitashe Oladung'oni le nkiguana too nkutukie oo nkajijik. Entusuj, ilalashera laainei enkitanyaanyukoto o sina o eng'iriata oo loibonok le Enkai ooiroro te nkarna o Laitoriani. Eng'urai, kijo emayiana lelo oongiri. Itoning'o eng'iriata e Yoab, nitoduaa enaitaasa Olaitoriani ninye te nkiting'oto, amu kenana Olaitoriani enkoshoke neeta olng'ur. Kake ore enalang pooki, ilalashera laainei eminya olmumai te shumata anaa te nkop, anaa ti ae ake ninye toki, enchoo “ee” inyi metaa “ee” ake, ore “A'a” neaku “A'a” ake, pee mijing'ijing'i ake abori enkiguana. Ketii obo ti atua intae oata enyamali? Inchoo eomon. Ketii oloshipa? Inchoo erany isinkoliotin le nkisisa. Ketii obo ti atua intae omuoi Inchoo eipot ninye ilpayiani le sirit pee eomonoki, neelie ninye eilata te nkarna o Laitoriani; naa keitajeu enkomono e nkirukoto ilo tung'ani omuoi, neinyeyie Olaitoriani ninye, naa te netaasa ng'ok, nepalakini. Metaa, embalakinoto ng'ok inyi maate, niomonokinono, pee eishiunyieki intae. Amu eeta enkomono o ltung'ani supat enkidimata sapuk. Ore Eliya, oltung'ani apake le mpukunoto ang. Netoomono ekurraki pee mesha; neitu eshaiki enchan enkop too larin okuni o lapaitin ile. Neitoki ake aomon, neishoru shumata enchan, neiu enkop ilng'anayio lenyena. Ilalashera laainei te neibakibak obo linyi aing'uaa esipata, neshuku likae ninye, nincho ninye metaiyiolo inchere ore pooki oshuku olaasani loo ng'ok aitung'uaa enkoitoi enye e marmalisho, eitajewuo oltau lenye te nkeeya neitoipoo olorora loo ng'ok. Petero, olkipaaret le Yesu Kristo, enetii ilaisikak oo idapashaki Ponto, o Galatia, o Kapodokia, o Asia o Bitinia. Ootegeluaki apa neitaanya Enkai Papa te Nkiyang'et metoning'o Yesu Kristo te nkisuaakinoto o sarge lenye. Metoponari ti atua intae empiris o eseriani. Meisisi Enkai naa Papa lo Laitoriani lang Yesu Kristo, laa te nkaraki olng'ur lenye sapuk eishoo iyiook metoini aaigil ti atua osiligi oishu te mpiunoto e Yesu Kristo aing'uaa lootuata, pee kitum enjung'ore nemerruoyo, nemeiduruk, nememusanu naiteng'elaki te shumata te nkaraki intae. Oorripi te ngolon e Enkai te nkaraki enkirukoto inyi, pee itumutumu enjeunoto nairragita ake pee eibalunyieki te nkolong e nkiting'oto. Entishipata te nkaraki ina hoo ninye, te naa aimeeta inchere pee mitumutumu intemat oo mpukunot kumok te nkiti kata, ore pee etiu inji enkirukoto inyi eji pee etemi nenyorrarri aajo eeta tipat alang sahabu narruoyo netetemaki te nkima nitumutumu enkisisa, o enkitoo o enkanyit te mbolunoto e Yesu Kristo. Oleitu idolidolo, ninyorrinyorro ninye, nirukuruku hoo nimidolitata ninye taata, nishipapa, enchipai nemeimakinoyu ebore enkisisa. Ning'amumu te nkiting'oto e nkirukoto inyi, enjeunoto oo ltauja linyi. Ena jeunoto apa eing'orutua, neikeni iloibonok le Nkai ooibonutuo empiris nalotu aaku eninyi. Etakekenutuo aajo kalo tung'ani naa kaa kata etuutua Enkiyang'et e Kristo natii atua ninche, ina kata apa namurutoo aalimu inkisilisilot e Kristo o enkitoo nasuju. Etabolokoki ninche metayiolo, inchere imme ate eisiaayiaki te nena kake intae, nena baa naainosakaki intae taata lelo oolikioo ilomon supati te ngolon e Nkiyang'et Sinyati nairriwuaki eing'uaa shumata naa imbaa naang'uar apa ilmalaika pee edol. Ore naa entirrisha ndamunot inyi, eririki mbaa nipikipiki osiligi linyi pooki shumata empiris nayakini intae te mbolunoto e Yesu Kristo. Anaa inkera naaning'isho, eminturubare inapa ng'uarrat niaatata enapa kata imodada. Kake ore anaa sinyati ilo oipoto intae entaa sii intae sinyat to lkuaak linyi pooki. Amu etisiraki aajo, “Entaa intae sinyat, amu ara Nanu Sinyati.” Naa te naa aimpotipoto ninye aajo Papa, ilo oiguenare pooki tung'ani metii enyorrakinoto eng'ura ate entotoni te nkuretisho tena rishata nitii ene anaa nkisikat. Iyiololo aajo, etalakuaki intae too rrekiei linyi lemeeta tipat litujung'utuo too loo papaai linyi, mme too ntokitin naaruoyo anaa enkosholai o sahabu kake to sarge ogol enkinyiang'a le Kristo, otiu anaa olkuoo lemeeta entiyoto anaa entibili. Oloitaanyitai apa eton eitu eitamanyuni enkop, kake eibalunyieki te nkiting'oto oo nkatitin te nkaraki inyi, naa te ninye ing'idarere intae Enkai, ilo oitopiwuo ninye aitung'uaa ilootuata, neisho ninye enkitoo paa ore enkirukoto o siligi linyi naa atua Enkai etii. Ore enkaraki nindipa aaitukuo iltauja linyi te nkibung'ata oo sipat, niaatata enyorrata nemetii esunkureisho too lalashera linyi, entonyorrata intae maate aakurraki too ltauja. Etoiwuoki intae aaigil neme te mpeu narruoyo kake te nemerruoyo, kake to rorei le Enkai oishu nebik intarasi. Amu “Etiu iseseni anaa nkujit, netiu enkitoo enye pooki anaa ene ntapukai oo nkujit. Etoyu inkujit, nedoiyio entapukai; kake ebik ororei lo Laitoriani intarasi.” Ore ilo rorei naa kuldo omon supati ooinosakaki intae. Enturrai elap pooki, o losek, o esunkureisho o esukeny pooki, nitiuwu anaa inkera naanana, entang'uar ororei le Nkiyang'et nemeeta olosek, paa te ninye ibululu aabaiki enjeunoto. Amu inchiamishama enanai e oshoke o Laitoriani. Wootu enetii ninye, osoit otanyaita iltung'ana, kake etegeluaki, neeta tipat too nkonyek e Enkai. Anaa isoito ooishu, pee iakuku inkasisin e mumuaisho sinyati ooitayu ilasarri sinyat le Nkiyang'et oong'uarrayu te Enkai te Yesu Kristo. Amu etisiraki ti atua Ilkigerot aajo, “Ng'ura airragie te Sion Osoit kitok lo lmairroto, ogeluno negol enkinyiang'a, ore pooki oiruk nemeitukurruni.” Ore te intae ilooiruk keeta tipat oleng, kake ore te lelo lemeiruk, etaa “Ilo soit otanyaita ilashetak otaa kitok to lmairroto” naa “Osoit orror iltung'ana, osoit sapuk obatat iltung'ana,” errorro ninche amu etanyaita ening ororei, naa ina apake eitaanyaki ninche. Irara intae olorere ogeluno, inkasisin e nkaji e nkitoo, olorere sinyati, iltung'ana le Enkai makewan, pee itumutumu aainosai inkiaasin enyena e nking'asia, oloipotuo intae entung'uai enaimin aitijing atua ewang'an enye naing'asiasho. Intae ilemera olorere apa; kake irara taata olorere le Enkai Ileitu apa etum olng'ur kake itang'amutua olng'ur. Ilanyor laainei asai intae, anaa ilomon o laisikak pee ipaasharere ing'uarrat o sesen naashet enjore naarare iltauja linyi. Niaakuku ilooata orrekie sidai ti atua Loreren lemeiruk, pee te neiro neiteleiki intae mbaa anaa laasak loo ntorrok, neidim te nedol too nkiasin inyi sidain, aaisisa Enkai te nkolong e muta. Eyanyita pooki kitoria oo ltung'ana to lbae lo Laitoriani, te naa ko laiguanani kitok, anaa ilooti te ninye ooirriwuaki meitamio lelo ooas intorrok neisis lelo ooas isidain. Amu eyieunoto e Enkai inchere ore te yasata oo sidain nintigiriri emodai oo ltung'ana oomoda. Entotoni anaa iltung'ana oolakuno, nimintaa elakunoto inyi entoki nintiemorierie entorroni, kake entobik anaa ilaisiaayiak le Enkai. Eyanyita iltung'ana pooki, entonyor ilalashera, entureita olaiguanani kitok. Lo aisiaayiak entadou ate, niyanyititi oleng ilaitoriak linyi, neme ake isupati nebor, kake o metabaiki lelo ooisomit intae. Amu keishori oltung'ani enchunet te naa, ore nkaraki nadamu Enkai neng'iri te neidong'i metii esipata. Amu kaa dupoto ina, te neitamei intae enkata niaasiasa intorrok? Kake te niaasiasa isupati, ning'iriri te neisilisili intae niaatata enchunet te Enkai. Amu te ina eipotoki intae, amu eisilisiloki sii ninye Kristo te nkaraki intae, neing'ueki intae enkitanyaanyukoto, pee isujusuju iroruat enyena. Eitu eas ninye eng'oki, neitu etumieki te nkutuk enye ororei lo losek laa ore pee emori, neitu eshukoki emorisho, ore pee e isilisili neitu ejo aarisho, kake eitarasaka imbaa enyena pooki ilo oiguenare te sipata. Ninye makewan otanapa ing'ok ang to sesen lenye te shumata olchani, pee kitum aatuata too ng'ok, neaku aikinchu too supati, too lbaa lenyena eishiunyieki intae. Amu itapong'ori anaa intare naaimina, kake itorrinyokinote taata Olchekut naa Olaing'urani loo ltauja linyi. Neijia entotiu sii intae, na kituaak entadou ate too lpayiani paa te netii te ninche olemeiruk Ororei, netumi aateyietu metii ororei te nkaraki olkuaak loo nkituaak enye, te nkaraki nadol ninche olkuaak linyi sidai, le nkuretisho. Eminchosho eaku enkuso inyi enioriong osesen, o enchetata oo lpapit, o enkikodo oo ntokitin e sahabu anaa ene nkishopoto o nkilani, kake enaisudoro ti atua oltau, nememuta o emborron o engira, neeta tipat oleng too nkonyek e Enkai. Amu neijia ti apa eikuna inkituaak sinyat, naaisilig Enkai te nekus ate, aaning ilmoruak lenye. Anaa enatoning'o Sara Abraham pee eipot ninye ajo laaitore lai. Nitaa intae inkera enyena, ti niaasiasa esidai, niminchosho toki meituria intae. Entotiu sii intae neijia lo payiani, entotoni o nkituaak inyi te ng'eno, nincho enkitok inaairirikino anaa entoki nashal, amu irara ilajung'ok te nebo le mpiris e mpuaan pee meiboori enkomono inyi. Ore enabayie entaa pooki ilooata endamunoto nabo, loobore olng'ur o enyorrata oo lalashera, iloonana oishuaa, iloobor indamunot. Neme iloolaakino entorroni te ntorroni, anaa oldeket to ldeket, kake entapaashare intae entamayianisho, amu te ina doi eipotoki intae pee itumutumu aatujung emayianata. Amu ejo ilkigerot “Ore ilo onyor enkishui neyieu nedol inkolong'i sidain, inchoo erishie olng'ejep lenye entorroni nerishie enkutuk enye pee mejo emonkoi. Inchoo eibelekenya apaashare entorroni neas esidai; inchoo eing'oru eseriani nesuj oleng. Amu etii inkonyek o Laitoriani shumata oo supati, nebolo inkiyiaa enyena te enkomono enye; kake egilunore enkomom o Laitoriani lelo ooas intorrok.” Kaing'ae oidim aitaasa intae entorrono, te naa airara intae ilanyuaak le nena sidain? Kake te naa keisilisili hoo ninye intae te nkaraki oo supati, nimayianana. Emiureyu ninche, nimiruturutu. Kake ore too ltauja linyi eyanyita Kristo anaa Olaitoriani, enterretenata anaake pee iwalikiki oltung'ani pooki oikilikuan intae olbae lo siligi otii atua intae. Kake te mborron o te nkanyit. Entisidana iltauja linyi, paa ore enkata nasukeny olkuaak linyi sidai ti atua Kristo, netumi aaitukurru. Amu enaikash te neitamei oltung'ani easita isupati te naa eyieunoto e Enkai, alang te naa intorrok. Amu etua sii Kristo nabo kata ake too ng'ok nemeigil, osupat too leme supati, pee etum atoriku iyiook enetii Enkai. Amu etaraki metua to sesen neitopiwuoki te Nkiyang'et te ninye sii eshomo ainosaki ilomon nkiyang'eta naaena. Lelo apa moitie ootanyaita ening, eton eanyisho eng'iriata e Enkai too nkolong'i e Noa eshetita emeli, ina naa ilkuti tung'ana isiet ake eitajewuoki te nkare. Naa enkare e nkibatisata naitajeunyeki ina, neme te nkisujata o loirerio lo sesen, kake enchirrakinoto e Enkai to ltoilo oisiasha lo ltau te mpiunoto e Yesu Kristo, oilepa alo shumata, neton te nkaina e tatene e Enkai, netipikaki te nebo ilmalaika, o enkitoria e ngolon meetu abori ninye. Ore naa te nkaraki naitamioki Kristo to sesen, enterreten sii intae ate te ina damunoto, amu ore pooki onoto emion to sesen etapala eyasata oo ng'ok, pee meitoki ninye arubare imbaa o sesen too nkolong'i enyena naatelekutua te nkop anaa enatiu ing'uarrat oo ltung'ana kake anaa eyieunoto e Enkai. Nchoo enkata natulusoiyie eidip nena naayieu neas iloreren oolamita Enkai oopuoyie enkiborra oo nkonyek, o ng'uarrat e merai, ooitalala indaat, incholieki e okore, agilak loo nkitanapat oosai kulie aitin. Neing'asia te nedol intae mishularere ninche te nena baa e nkiminchalisho, nemor intae; kake epuo aaisho iwalat ilo oterretene pee eiguanare ilooishu o lootuata. Naa enkaraki ena pee etolikioki sii ilootuata Ilomon Supati pee eiguanareki to sesen anaa iltung'ana, nepok te nkiyang'et anaa Enkai. Etinyikua enkiting'oto oo ntokitin pooki, neaku enoto eng'eno oo ndamunot nauno nebor pee itumokiki enkomono. Ore enalusoo te pooki, embung'a enyorrata nauno olikae o likae amu eitoip enyorrata olorora loo ng'ok. Intoomono olikae olikae metii enking'unyung'uny. Taasishore inkishorot naaba anaa inikinchooki aisiaayie ilkulikae, anaa olaing'urani supat te mpiris e Enkai oo mpukunot kumok. Naa te neiro oltung'ani inchoo eiro anaa enatiu Ororei le Enkai; naa te neisiaaisho oltung'ani, inchoo eisiaaisho anaa enkidimata naishoo Enkai: pee eisiaai Enkai te pooki toki ti atua Yesu Kristo, laa enenye enkisisa, o enkitoria ntarasi o ntarasi. Esai. Ilanyor laainei, eming'asia intae too ntemat naata emion e nkima naapuonu shumata intae, aatem intae anaa duoo kentoki omoni naipang'aka intae. Kake enting'idata te nkaraki ning'arierie Kristo isinaitin lenyena pee itumutumu sii intae aating'idata te ng'ida sapuk te nkata naibalieki enkisisa o enkitoo enye. Te naa imayianana intae te nesukenyi intae te nkaraki enkarna e Kristo, imayianana amu eton te shumata intae oltau le nkisisa e nkitoo o le Enkai. Kake emincho obo te intae meitamei te nkaraki etara metua anaa olapurroni, anaa olarruoni, anaa olaisurusuroni. Kake te neitamei oltung'ani, eji amu olkiristianoi, mincho edol enkurruna, kake inchoo eisis Enkai te ina arna. Amu etabawua enkata e nkiguana naa te nkaji e Enkai eng'asu, amaa te naa iyiook eng'as, kaji pasa etiu enkiting'oto e kuldo lemeiruk Ororei supat le Enkai? Naa, “Amaa aa te mpesho eitajeuni Oltung'ani supat, ai ti aaji eliooyu oltung'ani lemeiruk Enkai naa olaasani loo ng'ok?” Enkaraki ena enchoo lelo pooki oomeyu te risioroto o enyorrata e Enkai, eas isupati neitarasaki iltauja lenye ilo oitayio enkop oisiligayu. Neaku airorie ilpayiani ootii atua intae, ara sii nanu olpayian anaa ninche nara shakeni loo nkisilisilot e Kristo Nang'arie enkitoo napuoi aabolu. Taramata ntare e Enkai niking'orieki, neme te arakinoto kake te nyorrata ino, neme te dupoto e nkurruna kake te yieunoto neme anaa ilaitoriak ooimagarraki lelo ooishooki intae entaramat, kake aaku enkitanyaanyukoto naduaaya intare. Pee te neboluni ilo Shekut kitok, neishori intae enkopiyia e nkitoo e nkisisa nemeibil emua. Neijia enkuna sii intae iltung'ana leleru entoning enkitoo inyi, Enchopoki ate intae pooki emborron anaa enkila, nintadounyenye ate pee isiaayiayia maate, amu eany Enkai iloowuasa, “Kake eisho empiris ilooitadou ate.” Entadou naa ate ti abori enkaina nagol e Enkai, pee etum ninye ailepie intae te nkata nageluno. Enteleiki inkolati inyi shumata Ninye, amu kegolie Ninye intae. Enterretenata entashololoto. Amu emanimanaa olmang'atinta linyi, sheitani, anaa olng'atuny, oikurrukuru eing'oru olonya. Erisha ninye te nkirukoto nauno iyiololo aajo osina laaijo ele eimatie ilalashera linyi te nkop pooki. Ore pee indipidipi aanoto osina le nkiti kata, ore Enkai e mpiris pooki naa ninye naipotoko intae atua enkisisa e nkitoo enye oo ntarasi ti atua Kristo, ninye makewan oramat intae, neitirring'ie miwuatiwuatata neitopok, neitasheyie neitagol intae. Metaa enenye enkitoo o enkitoria, intarasi o ntarasi. Esai. Te Silvano, olalashe laaijo nanu eisiligayu, atisiraka intae ena kiti palai, pee aruj intae naishakenoki intae inchere empiris e Enkai ena nasipa. Entasho emiwuatiwuata ti atua Ninye. Eiroroki intae esirit natii atua Babilion nageluno sii ninye anaa intae, neijia etiu enkerai ai Marko. Erorokinoto intae maate te ng'ututata e nyorrata, Metijing'a osotua intae pooki ootii atua Kristo. Simon Petero osinka naa olkipaaret le Yesu Kristo, enetii lelo oonoto enkirukoto naba anaa enaang, ti atua esupatisho e Enkai ang o eno Laitajeunoni lang Yesu Kristo. Metoponari empiris o sotua te intae te yiolounoto e Enkai o Yesu o eno Laitoriani lang. Engolon e aisho Nkai naishoo iyiook intokitin pooki naaishiaakino te nkishon o te sinyatisho e Nkai, te yiolounoto enye ilo oipotoko iyiook enkitoo o enkikishiaan enye. Naa te na oitoi eishoo iyiook nkisiligat enyena e tipat naa sapuki oleng, pee ore te nkaraki nena nitumutumu aailanya errorroto natii enkop te nkaraki ing'uarrat, niaakuku ilooshulakino esinyatisho e mpukunoto e Enkai. Te nkaraki ena entipik enyuaata pooki, entoponiki eyiolounoto; ore eyiolounoto inyi niponikiki enkibooroto ate, ore enkibooroto e ate enkitashoto, ore enkitashoto esinyatisho e mpukunoto e Nkai. Ore esinyatisho e mpukunoto e Nkai entoponiki enkaripo e nyorrata too lalashera, ore enkaripo enyorrata too lalashera. Ore iyatata kuna tokitin te nkumoi nemeisho intae iliarara anaa ilauwu ilng'anayio ti atua eyiolounoto o Laitoriani lang Yesu Kristo. Ore pooki ng'ae lemeeta kuna baa naa modooni, nemedol enelakua, netorikine enkisujaroto oo ng'ok enyena musan. Te nkaraki ena, ilalashera. Entonyok oleng entisipa enkipototo o engelunoto inyi, amu ti niaasiasa ina nimirrorrorro aekata. Amu te na oitoi eishori intae esipata te leng'on entijing atua enkitoria oo ntarasi o Laitoriani lang naa Olaitajeunoni Yesu Kristo. Ore te nkaraki ena ayieuta oshiaake naitadamu intae kuna baa, hoo ninye te naa aindipa aatayiolo, nintirring'ang'a ti atua isipat naatii atua intae. Adol ajo eitoriori, eton atii ele ng'obor te nkop, te nainyeiyie intae te nkoitoi e nkitadamunoto, amu ayiolo ajo, asioki airragie osesen lai le nkop, anaa enaitoduaa Olaitoriani lang Yesu Kristo. Anyok aas anaa enaidim, paa ore ninye aidipa ashomo, nindimidimi aatadamu kuna baa inkatitin pooki. Amu eitu kisuj iyiook inkatinin naaitobiruaki te ng'eno ina kata kintayiolo intae engolon o elotunoto o Laitoriani lang Yesu Kristo, kake kira shakeni ootoduaa too nkonyek enkitoo enye e nkisisa. Amu ore pee eng'amu enchunet e nkisisa e nkitoo eing'uaa Enkai Papa, neewuo oltoilo enetii eing'uaa Enkitoo e nkisisa nalus, nejo, “Oinoti lai ele lanyor, natishipe oleng te ninye.” Kitoning'o iyiook ele toilo pee elotu eing'uaa shumata amu kiboitare apa iyiook ninye te ilo doinyo sinyati. Amu kiaata iyiook ilo rorei le naibon oitadedeyieki oleng nitaasa intae esidai te ning'amaa ninye anaa oltaa ooilang ewueji nemisimis o metaba naa nekenyu, neilepu olakira too ltauja linyi. Ore enaituruk te pooki, entayiolo ena inchere meetae enaibon o sirat nalotu ake to lbae lo ltung'ani makewan, amu metii ae kata enaibon naishoruaki te yieunoto o ltung'ani, kake eiroro iltung'ana sinyat ilomon le Enkai anaa enautaki Enkiyang'et Sinyati eing'uaa Enkai. Kake einyeito sii apa iloibonok le lejare ti atua olorere, anaa enayooki sii aainyototo ti atua ilaiteng'enak le lejare, ooyau too nkisudorot inkiteng'enat naaiminie neitarruoo, nemiki doi ninye Olaitoriani laa ninye oinyiang'ua ninche, neyaki ate enkidaaroto nasieku. Naa kesuj ilkumok irrekiei lenye torrok ore te nkaraki ninche nesukenyi enkoitoi oo sipat. Ore te nkowuarisho enye neitorogony intae too rorei loo monko, amu meiyiata enkiguana enye e opa, nemeirura erruorroto enye. Amu amaa te neitu eing'urrie Enkai ilmalaika apa pee eitarruoo, kake etanang'aka ninche atua enkima, meteeni too ngumot e naimin, pee eitaanyu enkiguana, amaa te neitu eing'urrie enapa kop musana, kake etalakua Noa eserian ilo alikioroni loo supati te nebo kulikae oopishana, pee eyau oloirrag le nkare shumata enkop oo ltung'ana torrok; amaa te neibelekenya inkang'itie e Sodom o Gomora metaa inkuruon, nedung'oki enkiguana neidaikie, neitaa enkitanyaanyukoto e natiu too nkolong'i naapuonu te lelo lemeure Enkai; naa amaa te neitajewuo Lutu supat, oitanyamala naleng orrekie lo duruk loo ltung'ani torrono, ebikito ti atua ninche, nemeyu oltau lenye supat too easat enye torrok oo nkolong'i pooki: neaku keyiolo Olaitoriani enaiko te nekordu too ntemat lelo ooure ninye, o enaiko pee eibooki enkitamioto lelo ooas intorrok o metabau ina olong e nkiguana neisulaki lelo oosuj ing'uarrat naaidurukie osesen nemen enkitoria. Ilootolo negogong, nemeure ninche aatamor ilo oata enkitoo le shumata, ore ninye ilmalaika, oo lusoo te nkidimata o te ngolon, eitu eyau enkitang'oroto e nkiguana torrono shumata ninche te dukuya Olaitoriani. Kake ore kulo, ootiu anaa ing'uesi nemedamisho, ooitore ing'uarrat e atua ate, ilootoiwuoki pee eibung'i neari metuata, iloomorisho too mbaa nemeyiolo, keidaikieki ninche te ina kidaaroto te nebo ninche. Netum osina torrono te nkaraki iyasat enye torrok, nedol ninche anaa olkar te nemera dama, intibil ninche o ntiyot, edaa te nkilepilep, epeipeeno enyaita osirua te nebo intae. Neeta nkonyek naabore eloloito, nemeraposho ae kata ing'ok nelejaa iltauja lemeuno, neeta iltauja ooitamooki ing'uarrat nemeishiaakino, Inkera o Ldeket! Etung'uaitie enkoitoi naitoriori, eibaabaa aasuj inkoitoi e Balaam olayioni le Beor, otonyorra dupoto naing'uaa eyasata oo ntorrok. Kake etabuaakaki te nkaraki natigila ninye makewan inkitanapat; airo osikiria lemeeta enkutuk to ltoilo lo ltung'ani; aibooyo oloirirua le ilo oiboni. Ore kulo naa inchorroi nemetii enkare, inkinukun naareu olkutati, amu ninche eitaanyaki emisimisi o lodo le nkop. Amu eiro ninche imbaa o lwuasa le pesho, neitasur too yieunot o sesen, o ng'uarrat torrok lelo tung'ana laa enailanyie kuldo ootoni ti atua inkitadiaat. Eisiligie ninche lelo elakunoto, ore ninche maate naa isinkan le ntorroni; amu ore pooki naidimu oltung'ani neaku ninye osinka le ina naidimua ninye. Amu amaa eidipa ailanya ilduruki le nkop te yiolounoto o Laitoriani naa Olaitajeunoni lang Yesu Kristo, neitoki ake aaisho metarrueshi te ninche, neidimuni, ore imbaa enye e nkiting'oto neaku torrok te ninche oleng aalang ine dukuya. Amu enaikash te ninche te neitu apa eitasim aaiyiolou nkoitoi e sipata, alang teneyiolou ina oitoi, neitoki aaibelekenya aaing'uaa ina kitanapata sinyati naishooki ninche. Etotiwuo te ninche anaa endung'et e rashe nasipa inchere, “Eshukokino oldia irrugumat enyena,” neji sii “Naa keisuji embitir neitoki ashukokino olokidong'oi aiperipera.” Ena taata empalai e are nasiraki intae, ilanyor laainei, ore te pokira are natuputuo indamunot inyi nemetii enkeleekisho te nkoitoi e nkitadamunoto, inchere enyor nidamumu intae irorei ooiroro iloibonok sinyat le dukuya o enkitanapata o Laitoriani naa Olaitajeunoni, oimua ilkipaareta linyi; entayiolo ena te dukuya inchere ore too nkolong'i e siadi kepuonu ilasukenyak te sukeny enye, oopuoyie ing'uarrat enye maate, neikilikuanu aajo, “Koree doi enkisiligata e lotunoto Enye? Amu ore apa ebaiki pee eirura iloo papa epuoito intokitin pooki aaikunari anaa enatiu apake te nkiterunoto pee eitaae enkop.” Etootikitio ninche aagiroo ena sipata, inchere to rorei le Nkai eetae shumata apa moitie o enkop naitobiraki te nkare naa enkare eitainyieki; naa te ninye etumutaki ina kop apa naatae aaitemoo to loirrag le nkare neidaaya. Naa te ilo rorei ake sii etushumaki keper taata natii o nkop aaitanyu enkima, nepali o metabaiki enkolong e nkiguana o mutata oo ltung'ana lemeure Enkai. Kake ore intae, ilchorueta laainei, emincho elang intae ena bae nabo, inchere ore enkolong nabo to Laitoriani netiu anaa ilarin enkalifu, ore ilarin enkalifu netiu anaa enkolong nabo. Meimutie Olaitoriani eitu eitabaya enkisiligata enye anaa enadamu kulikae enkimutioto, kake keng'iri te intae amu meyieu obo oimin, kake pee ebaiki pooki ng'ae enkirridunoto. Kake elotu enkolong o Laitoriani anaa olapurroni. Ore teina olong neishieki keper to ltoilo kitok. Ore wuejitin e shumata nepejori aaidaikie, ore enkop o pooki toki natii neishieki. Amaa taa te naa inji eikoni kuna tokitin pooki aaidaikie keishiaakino intae niaakuku iltung'ana ooikununo aja, to rrekie le sinyatisho o esidano e nkishiaa inyi too naaishiaakinore e Enkai? Iyanyitata nintasiekuku ina olong e Enkai, amu enkaraki ina pee epeji keper nesholi, ore intokitin naaitobirieki inkulie neshola te nkima. Kake ore te risioroto e nkisiligata enye, kiaanyita iyiook keper ng'ejuk o enkop ng'ejuk naa atua ninye emanya esupatisho. Ore enkaraki ina ilanyor amu kuna iyanyitata entonyok naa pee einepu ninye intae miaatata entibili anaa entiyoto, niserianana. Naa enkenai eng'iriata o Laitoriani lang inchere enjeunoto, neijia sii etiu olalashe lang onyorri Paulo etisiraka risioroto, e ng'eno naishooki ninye, eimaki ena anaa enajo too mpala enyena pooki. Amu etii atua ninche kulie naagol eyiolounoto naaboin iltung'ana lemeiteng'ena, nemeeta enkitashoto nauno nemerregel te nkidaaroto enye maate, anaa enaiko ilkulikae kigerot. Ore naa intae, ilanyor, iyiololo ena eton eado kop, entorrip ate pee meshoroo ake aaya intae te nkitapong'oroto oo ltung'ana lemeshilaa inkitanapat, neitiakieki intae enkitashoto inyi nauno. Kake entubulu te mpiris o te yiolounoto o Laitoriani naa Olaitajeunoni lang Yesu Kristo. Metaa enenye enkitoo te pokira, taata o metabaiki ina olong oo ntarasi. Ilo oatae apake te nkiterunoto. Ilo likitoning'o iyiook, nikitoduaa too nkonyek ang, niking'ura nikimbung'a too nkaik ang, ilo rorei le nkishui ina kishui olkipoket, nikitoduaa iyiook, naa ina kintayu shakeni aajoki intae nchere ina kishui oo ntarasi natii apake te nebo Papa, neibalakinyeki iyiook. Ilo likitoduaa nikitoningo kinosaki sii ninche intae pee itumutumu enchula te nebo iyiook; naa ene Papa enchula ang te nebo Oinoti lenye Yesu Kristo. Nikiinger ena pee elulung'ayu eng'ida ang. Olkilikuai ele laa ninye kitoning'o te ninye kinosaki intae nchere, ewang'an Enkai nemetii enaimin atua ninye tukul. Ti nikijo kiaata o ninye enchula neton ake kipuo te naimin, eikilejisho neme sipat kinchuyie; kake ti nikipuoyie ewang'an, anaa pee etii ninye ewang'an, nikiata enchula olikae o likae, neisuj iyiook osarge le Yesu Kristo, Oinoti lenye aoru ng'ok pooki. Ti nikijo mikiata ng'ok, ate kilej, nemetii esipata atua iyiook. Ti nikimbalunye ng'ok ang keisiligayu ninye naa asipani, metaa kepalaki ninye iyiook ng'ok ang neisujaa ntorrok ang pooki. Ti nikijo eitu kias ng'ok, ninye kintaa olalejani, nemetii ororei lenye atua iyiook. Nkera aainei kutiti, intae aigeroki kuna pee miasiasa ng'ok; kake te neas oltung'ani ng'ok, nikiata olomitu iyiook te Papa, naa Yesu Kristo loo sipat; naa ninye olkituket loo ng'ok ang, neme nkunaang ake kake o ne nkop pooki. Naa te na kintadedeyie nchere eikiyiolo ninye, ti nikimbung nkitanapat enyena. Ore olojo, Kayiolo nanu ninye kake nemeibung inkitanapat enyena naa olaimonkoni ilo, nemetii esipata atua ninye; kake ore pooki ng'ae oibung ororei lenye, naa ti atua ninye eitabayioki enyorrata e Nkai. Te ina kintisip inchere kitii iyiook atua ninye: ore olojo keton ti atua ninye neishiakino te neikunari anaa eneikunari apa ninye. Ilanyor laainei, mme enkitanapata ng'ejuk aigeroki intae, kake enkitanapata musana niatata apake te nkiterata; ore ina kitanapata musana naa ilo rorei lindipa aatoning. Kake, aigeroki ake intae enkitanapata ng'ejuk, nasipa te ninye nesipa te intae amu keishari enaimin neidipa atawang'a ina wang'an nasipa. Ore ilo ojo te wang'an eloito neton ake eiba olalashe lenye neton etii ilo atua enaimin. Ore olonyor olalashe lenye neton ti atua ewang'an, ore tiatua ewang'an nemeetae entoki narrorrisho. Kake ore ilo oiba olalashe lenye enaimin etii neloito ti atua enaimin, nemeyiolo enelo, amu eitamodoo enaimin inkonyek enyena. Nkera aainei kutiti, aigeroki intae, amu, etapalakaki intae ng'ok inyi te nkaraki ninye. Naigeroki intae iloo papa amu, iyiololo ilo otii apake te nkiterunoto. Naigeroki intae lo murran, amu itimira ilo torrono. Naigeroki intae, nakera, amu iyiololo Papa. Naigeroki intae iloo papa, amu iyiololo ilo otii apake te nkiterunoto. Naigeroki intae, lo murran, amu igoligolo, neton ororei le Nkai intae, nitimira ilo torrono. Eminyorru enkop anaa ntokitin naatii enkop. Ore oltung'ani ake pooki onyor enkop, nemetii enyorrata nanyor Papa atua ninye. Amu ore nena pooki naatii enkop, ng'uarrat o sesen, ng'uarrat oo nkonyek o lwuasa le nkishui, ine nkop nena mme ne Papa. Naa keishari enkop, o ng'uarrat enyena; kake ore ilo oas enayieu Enkai nebik intarasi. Na kera esaa nabayie ena, naa ore amu itoning'o aajo kelotu Oloiba Kristo, eidipa doi taata aaetu ilooiba Kristo kumok, te ina kiyiolo aajo esaa nabayie ena. Ti atua iyiook etupukutuo aapuo, kake mme ilkulalang apake, amu te naa eilkulalang apa, anaata etotona aaisiritore iyiook; kake etupukutuo aapuo, pee eibalayu nchere mme lkulalang lelo pooki. Kake eidipaki aaela ninche intae ilo Obo Sinyati, niyiololo pooki. Ore pee aigeroki intae, neme enkaraki nimiyiololo esipata, kake enkaraki niyiololo, niyiololo sii aajo metii emonkoi atua esipata. Kalo doi olaimonkoni leme ilo otanya ejo ore Yesu ninye Kristo, Ilo doi Oloiba Kristo olotanya Papa neany Oinoti lenye. Meetae oloany ilo Inoti oitoki ninye aata Papa. Ore oloibalunye ilo Inoti keeta sii ninye Papa. Enchoo ina nitoning'o apake te nkiterunoto ebik ti atua intae. Te nebik ti atua intae ina nitoning'o apake te nkiterunoto naa eibikibiki sii ti atua ilo Inoti o ti atua Papa. Naa ena eisiligie iyiook, enkishui oo ntarasi. Aigeroki intae ena ti alo lelo oojo pee elej intae; kake etamanya intae enkielata nitang'amutua te ninye; nimiatayieyie tipat enkiteng'enata nalotu likae aitoki aiteng'en intae amu eiteng'ena intae enkielata too mbaa pooki, nesipa ninye, mme monko, ore ake anaa ina naiteng'ena intae, entotoni intae ti atua ninye. Ore taata, naa kera kutiti, entotoni ti atua ninye, paa ore pee elioyu nikintieu aaing'ura mikikurru te lotunoto enye. Ti nitayioloito ilo aajo oloo sipat ninye, ina naitadedeyie te intae nchere ore ake pooki ng'ae oas esupat keino te Nkai. Eng'ura eneba enyorrata natonyorra iyiook Papa, pee eipoti iyiook aajo nkera e Nkai; naa kesipa eikira. Ore pee meyiolo iyiook enkop enkaraki neitu eiyiolou ninye. Ilanyor laainei, kira taata iyiook inkera Enkai neton eitu elioyu enikiyooki aatiu, kake kiyiolo aajo ore pee elioyu ninye nikitiu anaa ninye amu aikidol ninye eneikununo. Naa ore pooki ng'ae oata ilo siligi te ninye neitisiny kewan anaa enasinya ninye. Ore pooki ng'ae oas intorrok neeta entiyoto e mpaashata oo nkitanapat; ing'ok empaashata o nkitanapat. Iyiololo aajo eewuo ninye pee etum aawa ng'ok, nemetii ng'ok atua ninye. Meetae oloton ti atua ninye oas ng'ok, nemeetae oloas ng'ok etoduaa ninye aashu otayiolo ninye. Na kera kutiti, emincho elej intae oltung'ani. Ore ilo oas esidai naa olasipani, anaa paa asipani ninye. Ore ilo oas ing'ok naa ole sheitani, amu etaasa apa sheitani ing'ok ebaiki enkiterunoto. Ina pee etaliee Oinoti le Nkai pee eidaikie isiaaitin e Sheitani. Meetae oloino te Nkai oas ing'ok amu eton empukunoto e Nkai tiatua ninye. Nemeas ninye ing'ok amu keino te Nkai. Tena eidimi aatodol nchere kaku nkera e Nkai, naa kakua nkera e Sheitani: ore pooki ng'ae lemeas enaishaakino neme ole Nkai, naa neijia etiu ilo lemenyor olalashe lenye. Amu ele kilikuai itoning'o apake te nkiterunoto, nchere matonyorrata olikae o likae, pee mikitiu anaa Kain le ilo torrono otara apa ninye olalashe lenye metua. Naa ainyoo pee etara ninye metua? Enkaraki naa torrok nkiasin enye naasidain ino lalashe lenye. Eming'asia lalashera, nchere eiba intae enkop. Eikiyiolo iyiook aajo kitupukutuo te keeya aajing empuaan, amu kinyor ilalashera. Ore olemenyorrisho etii atua keeya. Ore pooki ng'ae oiba olalashe lenye naa olarani, niyiololo intae aajo meetae olarani omany enkishui nemeish atua ninye. Ena kiyiolounye enyorrata, nchere eirragie ninye enkishui enye te nkaraki iyiook; neishiakino sii ninche iyiook te nikirragie enkishui ang te nkaraki lalashera. Kake te neeta ake oltung'ani masaa e nkop neduaaki olalashe enyamali, neitoki ake aiken oltau ti alo ninye, kaji naa etamanya enyorrata e Nkai ti atua ninye? Na kera kutiti emikinyorrisho to rorei ake aashu to lng'ejep kake te asata o te sipata. Ena kiyiolounye aajo kira iyiook ile sipata, nikintadedeyie ltauja lang te dukuya ninye, enoshi kata naiguenare iyiook iltauja lang, amu kitok Enkai alang iltauja lang, neyiolo pooki toki. Ilanyor laainei, te nemeiguenare iyook iltauja lang, nikiata enkitieunoto nikintoriokinore Enkai; naa eikitum pooki toki nikiomonu, amu eikimbung nkitanapat enyena nikias ina naitiship ninye. Naa ena enkitanapata enye, nchere mairuko enkarna o Inoti lenye Yesu Kristo nikinyorruno maate, anaa ina ake naitanapa iyiook. Ore lelo pooki ooibung nkitanapat enyena netoni ninche tiatua ninye. Naa ena kiyiolounye nchere etonita ninye ti atua iyiook, te nkaraki ina Kiyang'et Sinyati naishoo ninye iyiook. Ilanyor laainei, emiruk enkiyang'et ake pooki, kake entetem nkiyang'eta pee idolidolo te naa eine Nkai; amu etijing'a enkop iloibonok kumok le lejare. Ena iyiolounyenye Enkiyang'et e Nkai; ore enkiyang'et ake pooki naibalunye Yesu Kristo nchere eewuo to sesen naa ene Nkai; ore enkiyang'et ake pooki nemeibalunye Yesu neme ene Nkai. Enkiyang'et o Loiba Kristo ina, naa ninye apa itoning'o aajo kelotu, neidipa taata atijing'a enkop. Na kera kutiti, irara intae ine Nkai, nindipa aatimir ninche; amu ore ilo otii atua intae naa kitok alang ilo otii atua ena kop. Ile nkop ninche, metaa ore ina najo ninche naa ene nkop, naa ninche ening enkop. Kira iyiook ile Nkai nemeinining ninche iyiook. Ena kiyiolounye enkiyang'et e sipata o enkiyang'et e nkitadiata. Ilanyor laainei, ematonyorrata maate amu ene Nkai enyorrata naa ore ilo onyorrisho keino te Nkai neyiolo Enkai. Ore ilo lemenyorrisho nemeyiolo Enkai; amu ore Enkai naa enyorrata. Inji eikuna Enkai pee eibalie enyorrata enye ti atua iyiook, nchere eirriwua Enkai Enkerai enye meeu enkop, metaa ninye kinchuyie. Ene doi etii enyorrata nchere, mme iyiook ootonyorra Enkai kake ninye natonyorra iyiook neirriu Enkerai enye metaa olkipoket loo ng'ok ang. Ilanyor laainei, te netonyorra iyiook Enkai aiko neijia, keishiakino sii ninche iyiook te nikinyorru olikae olikae. Meetae oltung'ani otoduaa Enkai ae kata; te nikinyorra maate, nebik Enkai ti atua iyiook neitabari enyorrata enye ti atua iyiook. Ena kiyiolounye nchere neton ti atua ninye, neton ninye ti atua iyiook, enkaraki naishoo iyiook Enkiyang'et enye. Nikitoduaa iyiook nikintayu shakenisho nchere eirriwua Papa Enkerai enye metaa Olaitajeunoni le nkop. Ore pooki ng'ae oibalie nchere Enkerai e Nkai Yesu kebikito Enkai ti atua ninye, nebikito ninye tiatua Enkai. Metaa eikiyiolo iyiook nikiruko enyorrata naata Enkai te iyiook. Ore Enkai naa enyorrata, ore ilo obik ti atua enyorrata nebik ti atua Enkai, nebik Enkai ti atua ninye. Ena eitabarieki enyorrata ti atua iyiook, nchere eikiata enkitieunoto te nkolong e nkiguana, amu ore enatiu ninye naa neijia sii iyiook kitiu te na kop. Metii enkuretisho atua enyorrata, kake kearaa enyorrata nalulung'a enkuretisho. Amu ore enkuretisho naa enkitamioto eipirta, naa ilo oureisho melulung'a enyorrata te ninye. Kinyor iyiook ninye amu ninye otang'asa anyorru iyiook. Te nejo likae, “Kanyor nanu Enkai,” neiba olalashe lenye, kelejisho amu ore olemenyor olalashe lenye otoduaa, nemeidim ninye atonyorra Enkai neitu ae kata edol. Naa ena enkitanapata nikiata aa ninye eing'uaa, nchere ore ilo onyor Enkai neishiakino nenyorru sii ninye olalashe lenye. Ore pooki ng'ae oiruk nchere ore Yesu ninye Kristo naa enkerai e Nkai ilo ore pooki ng'ae onyor menye nenyor sii ninye enkerai enye. Ena kiyiolounye nchere kinyor nkera e Nkai te nikinyor Enkai nikimbung nkitanapat enyena. Amu ena enyorrata e Nkai, nchere maibung'a nkitanapat enyena. Naa ore nkitanapat enyena nemeekisho. Amu ore pooki toki naino te Nkai nemir enkop; ina ena emirata namir enkop naa enkirukoto ang. Ai ng'ae doi omir enkop leme ilo oiruko nchere Enkerai e Nkai Yesu? Ninye doi ele oewuo te nkare o to sarge, Yesu Kristo, leme te nkare ake eewuo kake te nebo enkare o sarge. Naa Enkiyang'et shakeni, amu ore Enkiyang'et naa esipata. Eetae shakeni nara uni Enkiyang'et, enkare, o sarge; neishaki pokira uni ena nabo. Te naa eiking'amaa shakeni oo ltung'ana, shakeni e Nkai nalusoo; naa ena shakeni e Nkai nchere etaa ninye shakeni te Nkerai enye. Ore ilo oiruk Enkerai e Nkai neeta shakeni ti atua kewan. Ore ilo lemeiruk Enkai neitaa ninye olalejani, amu eitu eiruk shakenisho naitadedeyie Enkai te Nkerai enye. Naa ena shakeni, nchere eishoo iyiook Enkai enkishui oo ntarasi, naa atua Enkerai enye etii ina kishui. Ore oloata ina Kerai neeta enkishui; ore olemeeta ina Kerai e Nkai nemeeta enkishui. Intae lelo ooiruko Enkerai e Nkai aigeroki ena, pee iyiolouu intae aajo iatata enkishui oo ntarasi. Naa ena kitieunoto kiata iyiook ti atua ninye, nchere ti nikiomonu ake ninye entoki pooki te risioroto e yieunoto enye naa kening ninye iyiook. Naa ti nikiyiolo aajo kening ninye iyiook te pooki nikiomonu, nikiyiolo aajo kitang'amutua nena pooki nikitoomonutuo te ninye. Te neduaki likae lang olalashe eas entorrono neme ene keeya, neomonoki, naa kening'oki Enkai neisho enkishui lelo leme ine keeya ng'ok enye. Keetae ng'ok e keeya; eitu ajo metomonokini oltung'ani te ina. Ng'ok nkitarruorrot pooki, kake eetae ng'ok neme ne keeya. Kiyiolo iyiook aajo ore pooki ng'ae oino te Nkai nemeas ng'ok, kake Ilo oino te Nkai orrip ninye nemeiseyie ilo torrono ninye. Kiyiolo iyiook aajo kira ile Nkai, ore enkop pooki naa atua eng'olon eilo torrono etii. Nikiyiolo iyiook aajo eewuo Enkerai e Nkai neishoo iyiook enining'unoto, matayiolo olosipa; naa ilo osipa kitii iyiook atua, aatii atua Enkerai enye Yesu Kristo. Ele doi Enkai nasipa naa ninye enkishui oo ntarasi. Naa kera kutiti, entodol ate too nkitanyaanyukot naaitaae nkaitin. Olpayian oigeroki enkitok nageluno o nkera enyena, nanyor ti atua sipat, neme nanu ake, kake neijia etiu lelo pooki ooyiolo esipata, te nkaraki esipata nebikito ti atua iyiook naa keton te nebo iyiook ntarasi. Metaa te nebo iyiook empiris o lng'ur, o eseriani naing'uaa Enkai Papa neing'uaa Yesu Kristo Oinoti le Papa, te sipata o te nyorrata. Kang'ida naleng adol kulie kera inono esujita esipata anaa ina ake naitanapa iyiook Papa. Naasai naa taata na kitok, neme taa kaata ae kitanapata ng'ejuk naaigeroki, kake enapa ake nikiaata te nkiterunoto, nchere matonyorrata maate. Naa inji eikununo enyorrata te nikisuj iyiook nkitanapat enyena, naa ena enkitanapata anaa enikitoning'o apake te nkiterunoto, nchere enchomie enyorrata. Amu etijing'a lalejak kumok enkop, iltung'ana lemenyorraa elotunoto e Yesu Kristo to sesen; naa olalejani leeijo ilo oloiba Kristo. Entodol ate pee minturraa ina nikisiaayutua, kake pee itumutumu olekoisiaayio linyi ebore. Ore pooki oitulus nemebik te nkiteng'enare e Kristo nemeeta ilo Enkai; ore ilo obik te ina kiteng'enare neeta pokira aare Papa o Enkerai. Ore ake ololotu enitii lemeyau ena kiteng'enare eming'amu aaitijing aji aashu irorokiki; amu ore oloiroroki netang'arie esiaai enye torrono. Ore hoo naata nkumok naaigeroki, mayieu naasishore enkardasi o lbukoi, kake kaisilig ajo kalotu adol intae nairorie intae inotote nkomoni, pee elulung'ayu eng'ida ang. Eiroroki intae nkera e nkanashe ino nageluno. Olpayian oigeroki olanyor Gaius, ilo lanyor te sipata. Olanyor lai, aaomonoki pee eitabari mbaa pooki te iyie niaku biyoto; kayiolo ajo biyoto oltau lino. Amu ating'ide oleng pee ebau kulikae alashera ootaa shakeni nchere inyok too sipat te nkishon ino, amu kesipa ajo isujita iyie esipata. Matum nanu ae ng'ida nalang ena, te naning eji kesujita nkera aainei esipata. Olanyor lai, itaa oloisiligayu too nintaasa ilalashera, neisul too ltung'ana omon, lelo ooishakenutuo, enyorrata ino te dukuya esirit. Embae sidai ina teneitobiraa ninche epuo anaa, enaishiaakino esiaai e Nkai. Amu te nkaraki ninye pee etudumunye nemeeta toki natang'amutua te lelo leitu eiruk. Metaa keishiakino te nikiretu ltung'ana leeijo lelo, pee kiaku laisiayiak ti atua esipata. Aata enaigeroko esirit; kake ore Diotrefes, ilo oyieu neiturukie kewan, meyieu naaning maitoria nanu. Metaa, te nalotu, nabolu nena naasita, nanu esukeny too rorei le nkarrueisho. Neitu doi eidip ina, etanya ninye makewan eng'amu lalashera, nemitiki sii lelo ooyieu neitoomon nearaa ninche te sirit. Olanyor lai, misuj iyie enkarrueisho kake isupati tusuja. Ore oloas isupati ninye ole Nkai; ore oloas enkarrueisho neitu edol Enkai. Eeta Demetrus shakenisho sidai te pooki ng'ae, o te sipata kewan, naitadedeyie sii nanu, nikira sii iyiook shakeni niyiolo ajo kesipa shakeni ang. Kaata nkumok naaigeroki paa ae mayieu naiger te nkalamu o to lbukoi; ekaisilig ajo ketaanu pee kitumo, nikiro te nebo enotote nkomomi. Metaa eseriani tenebo iyie. Kiroroki lchorueta. Iroroki lchorueta, pooki ng'ae. Yuda, osinka le Yesu Kristo naa olalashe le Yakobo, oigeroki lelo ooipotoki, oonyorri ti atua Enkai Papa lang ooiteng'elaki te nkaraki Yesu Kristo. Metoponikini intae olng'ur o eseriani o enyorrata. Ilanyor laainei, ore anaa eyieunoto naata naleng pee aigeroki intae mbaa naaipirta enjeunoto ang niking'ar, nadol ajo meeta nchere maigeroki intae, asai intae erishisho aamitu enkirukoto e Nkai naishooki apa nabo kata te lulung'ata lelo sinyat. Amu etijing'aki atua intae te mpurrokinoto ilkulikae laa ninche apa etegelakaki endung'okinoto e nkiguana, iltung'ana lemeiruk Enkai ookur empiris e Nkai ang aaitaa enkoitoi naasie ntorrok nemiki ilo laa ninye ake olkitok lang, naa Olaitoriani lang Yesu Kristo. Ayieu naitoki aitadamu intae, hoo naidipa apa aitayiolo intae nchere ore ilo oitajewuo iltung'ana aitung'uaa enkop e Misiri, nenyaaka amut lelo leitu eiruk. Ore lelo malaika leitu egolie ewueji enye neing'uaa emanyisho enye naishiaakino, neteena ninche too lpisia loo ntarasi ti abori te nemisimis metabau ina olong kitok e nkiguana; anaa enaikunaki Sodom o Gomora o nkang'itie naamanita naatusuja sii ninche ng'uarrat oo loirerioni torrok, neitamioki ninche te nkima oo ntarasi pee eaku enkitanyaanyukoto te pooki. Neton ake eiko neijia kulo tung'ana too nkidetidetat enye neidurukie osesen, neany enkitoria, nemor iloata enkitoo le shumata. Kake ore Mikael ilo malaika kitok, eishankarra o loirirua eorro osesen le Musa eitu ninye eitasim aipotoki emoroto e nkiguana, Kake etiaaka, “Metaa Enkai nikisikong.” Edekisho lelo tung'ana too ldeketa lemening'u ninche, ore too naayiolo te mpukunoto o sesen anaa pee eyiolo ng'uesi, neyaki ate embatisho nemuti ninche. Oi ninche! Amu etusujaitie orrekie le Kain netapalakita ate enkitapong'oroto e Balaam te nkaraki dupoto, nemuti ninche te nkiseroto e Kora. Ore ninche naa iltipot ooiduruk ti atua isiruai linyi le nyorrata epeipeeno te nebo meeta osul negolie ate meeta isura. Inkatampo nemeeta enkare, naaya osiwuo, o lkeek lemeeta ilng'anayio te siadi ari ootuata katitin are, ootadotuoki. Ilopir le naiposha ootarasutua ooitokitoku labur le nkurruna enye, lakir oopuaya laa ninche eitaanyitai emisimisi e naimin o lodo le nkop ntarasi. Kuna apa sii eibonuo Enok ilo apa le ishoi e naapishana ebaiki Adam ejo, “Ng'ura eewuo Olaitoriani te nebo iip inkuyu oo sinyat lenyena, pee edung'oki enkiguana pooki ng'ae nemir lelo pooki lemeure Nkai, too nkiaasin enye pooki torrok nemetii euriata e Nkai naatasa too rrekiei lemetii olturiaki le Nkai, o too mbaa pooki e nkisikong naatejo laasak loo ng'ok lemeure Enkai neiba ninye.” Kulo laing'unyung'unyak, iloata olorok, iloosuj ing'uarrat oo seseni lenye, iloorup ate te njartano enye, nepakas iltung'ana ejo pee edupore. Kake entadamu intae ilanyor laainei nena apa naatolimutuo ilkipaareta lo Laitoriani lang Yesu Kristo. Etiaakita intae, “Ore te nkata e nkiting'oto naa kepuonu ilasukenyak, oosuj ing'uarrat enye nemetii euriata e Nkai.” Kulo ninche ooyau eoro, ile na kop ninche lemeeta Enkiyang'et Enkai. Kake ore intae ilanyor laainei, enteshetu ate ti atua ina kirukoto inyi nasinya, entoomon te Nkiyang'et Sinyati. Entotoni intae maate ti atua enyorrata e Nkai, entaanyu olng'ur lo Laitoriani lang Yesu Kristo oitabaiki intae ina kishui oo ntarasi. Entudupa ilkulikae leton eing'ashing'ash. Entajeu ilkulikae entawuapu ninche ti atua enkima eng'urrie lelo kulikae to lturiaki nimbayuyu ebaiki ninye enkila naidurukie osesen. Ore taata ilo oidim atorripo intae mibatatata, neitoduaaya intae te dukuya enkitoo enye miaatata eleyiata, iatata eng'ida, laa ninye ake Enkai Olaitajeunoni lang, ti atua Yesu Kristo Olaitoriani lang, metaa enenye enkitoo, enkisisa, o enkitoo, o engolon, te dukuya nkatitin pooki o taata o ntarasi. Esai. Embolunoto e Yesu Kristo, naishoo Enkai ninye meitaduaa isinkan lenyena, imbaa nemeeta nchere meaku aasioki; neisho metayiolouni te nkirriwakinoto nairriwaka olmalaika osinka lenye Yohana, oishakenoko ororei le Enkai o enchakenisho e Yesu Kristo, ebaiki nena pooki naatoduaa. Emayiana ilo oisoma metoning'i irorei le naibon nemayiana lelo ooning, neibung nena naaigero te ine, amu etataana enkata. Nanu Yohana oigeroki isirito naapishana e Asia: Metaa eninyi empiris o eseriani eing'uaa ilo otii taata, netii apa, naa ninye kenya olotu netii neing'uaa sii inkiyang'eta naapishana naatii dukuya olorika le nkitoo, neing'uaa Yesu Kristo olchakeni osipa, laa ninye olkikau loo lootuata, naa Olaitoriani loo laiguanak ootii enkop. Metaa ene ilo otonyorra iyiook nelaku iyiook too ng'ok ang to sarge lenye, neitaa iyiook kituaak, o lapolosak le Enkai Menye lenye, metaa enenye enkisisa o enkitoo ntarasi o ntarasi. Esai. Ng'ura elotu ninye too nkatampo, naa kedol pooki ong'u ninye, lelo pooki ootaremo ninye ore loshon pooki le nkop, neyietu neishir te nkaraki ninye. Neijia taa Esai. “Ara nanu Alfa o Omega,” Olaitoriani Enkai ojo, Otii taata, netii apa, naa ninye olotu, Olaidimani. Nanu Yohana olalashe linyi ong'arie intae ti atua Yesu, osina o enkitoo o eng'iriata o enkisulata, atii apa lemankale le naiposha oji Patmos te nkaraki ororei le Enkai o enchakenisho e Yesu. Naainepu Enkiyang'et te nkolong o Laitoriani, naning oltoilo kitok te siadi nanu laaijo ole ntarumpeta, ejo, “Ingero nena nidol ti atua embuku nirriwaki nena sirito pokira naapishana, ene Efeso, o Smirna o Pergamum o Tiatira o Sardis o ene Filadelfia o Laodikea.” Naibelekenya ajo pee adol ilo toilo laairorie, ore ake pee aibelekenya nadol ilkilang'ilang'eta oopishana le sahabu, naa ore te neitorit lelo kilang'ilang'eta netii ilo obo laaijo Enkerai e Tung'ani, eishopokoki olkila oado neenita enkimeita e sahabu to lgoo lenye; ore endukuya enye o lpapit lenyena naa keibor anaa lpapit loo ntare, neibor anaa enturoto, netiu nkonyek enyena anaa olng'ejep le nkima, netiu inkejek enyena anaa suya oosika te nkima, netiu oltoilo lenye anaa ltoilo loo nkariak kumok; neeta te nkaina enye e tatene ilakir oopishana, nepuku te nkutuk enye olalem opi nkaloli pokira are, netiu enkomom enye anaa enkolong te nedalu te ngolon enye pooki. Ore peyie adol ninye nabatatakino nkejek enyena natiu anaa oltung'ani olotua. Kake aaiteleikia enkaina enye e tatene, nejo, “Miureishoyu, ara nanu ole nkiterunoto o le nkiting'oto; nara ilo oishu atua apa, naa ng'ura aishu taata o ntarasi, naa nanu oata imboleta e keeya o ewueji e nkima. Naa ngero taata nena nidol, enatii o enayooki aaku. Ore enkisudoroto e lelo akir oopishana litoduaa te nkaina ai e tatene, o lelo kilang'ilang'eta oopishana le sahabu, ore lakir oopishana naa ilmalaika loo sirito naapishana ore ilkilang'ilang'eta naa sirito, pokira naapishana. “Tisiraki ilo malaika le sirit natii atua Efeso nchere, ‘Irorei le ilo oibung'ita lakir oopishana te nkaina enye e tatene, olo ti atua ilkilang'ilang'eta oopishana le sahabu. “ ‘Ayiolo nkiaasin inono o eekenyata ino o eng'iriata ino, nchere mindim aisiritore iltung'ana torrok kake itetema lelo oojo ate ilkipaareta neme ninche, nirrasha ninche ajo lalejak, ayiolo ajo iata enyuaata ning'iri te nkaraki enkarna ai, neitu inauru. Kake aata ena namen te iyie. Nchere, itung'uaiyie enyorrata apa niaata te dukuya. Tadamu naa eneba enitusulunore, irridu niaas isiaaitin niaasita apa te dukuya. Naa ti nimiaas, naa kalotu enitii naiwuang'ie olkilang'ilang'et lino te wueji enye, te neitu irridu. Kake iata ena nabo, imba isiaaitin oo Lnikolatin naiba sii nanu. Ore oloata enkiok inchoo ening enajoki Enkiyang'et nena sirito. Ore ilo omirisho naisho meinosa ilng'anayio te ilo shani le mpuaan natii atua emparadiso e Enkai.’ “Naa ore olmalaika le sirit natii atua Smirna tisiraki nchere, ‘Irorei le ilo le Nkiterunoto o le nkiting'oto, otua apa, nenyaaka apiu. “ ‘Ayiolo osomit lino o aisinanisho ino, kake ira karsis. Ayiolo sii imorot e lelo oojo ate Ilyahudi neme ninche, kake enkaji e ntumo e sheitani ninche. Miureyu ilo sina olotu. Ng'ura, etaa enajo pee enang'aki sheitani lkulikae te intae atua korokoroni pee etum atetema intae, naa ore too nkolong'i tomon nitumutumu intae osomit. Taa oloisiligayu o tabaiki keeya naa kaaisho iyie enkopiyia e nkitoo e nkishui. Oloata enkiok, inchoo ening enajoki Enkiyang'et nena sirito. Ore ilo omirisho nemeitame ninye ina keeya e are.’ “Naa ore olmalaika le sirit natii atua Pargamum, tisiraki, ‘Irorei lo loata olalem opi nkaloli pokira are. “ ‘Ayiolo enikimanya, ine etii olorika le nkitoo le sheitani; nimbung'ita enkarna ai akurraki, neitu imiki enkirukoto ai ebaiki inkolong'i e Antipas olchakeni lai, airukoni lai, otaraki metua ti tua intae te ine nemanya sheitani. Kake aata nkuti namen te iyie; iata kulikae te ine ooibung inkiteng'enat e Balaam oiteng'ena Balak metipiki eloket narror inkera e Siraeli pee etum aainosa ndaiki oo lasarri ootopolosaki leme le Enkai, neas intorrok e loloito. Metaa iata sii iyie kulikae ooibung nkiteng'enat oo Lnikolatin. Irridu naa. Naa te neitu, nalotu enetii asieku naitainyie ninche olarrabal to lalem le nkutuk ai. Oloata enkiok inchoo ening enajoki, Enkiyang'et nena sirito. Ore ilo omirisho naa kaisho ninye eoroti e mana naisudoro, naisho osoit oibor, osirakino enkarna enye ng'ejuk, nemeyiolo likae tung'ani meteleku ilo ake ong'amu.’ “Ore olmalaika le sirit natii atua Tiatira, tisiraki nchere, ‘Irorei lo Inoti le Enkai, otiu nkonyek enyena anaa lng'ejepa le nkima, netiu nkejek enyena anaa suya ootisirakaki. “ ‘Ayiolo isiaaitin inono, enyorrata ino, o enkirukoto o enkisiaayiare, o eng'iriata, o nchere etalang'a isiaaitin inono e det ine dukuya. Kake amen ena te iyie nchere, itapalayie ina kitok naji Yesebel naitaa kewan enkoiboni pee eiteng'enisho neitapong'oo isinkan laainei metaasa imbaa e loloito neinos indaiki naatopolosakaki inkitanyaanyukot. Aishoo ninye enkata meirridu, kake etanya eirridu te loloito enye. Ng'ura, ekanang'aki ninye erruat e mueyian ore lelo oololoito te nebo ninye nanang'aki atua olosilisili kitok aashu te neirridu inkiaasin enyena. Naa kaosh inkera enyena metuata. Naa keyiolou isirito pooki aajo nanu ilo ojur indamunot o ltau, naa nanu oisho pooki ng'ae linyi anaa erisioroto e siaai enye. Kake ore intae kulikae ootii atua Tiatira leitu eibung ena kiteng'enare, leitu eiteng'en ate te nena naajo kulikae imbaa naagut e sheitani, ajoki intae, maitoki aiteleiki intae likae ola. Embung'a ake intae entukurraki ina niaatata, o metaba anaa nalotu. Ore ilo omirisho neibung isiaaitin aainei o metabau enkiting'oto naisho ninye engolon meitoria loreren. Naa keitore ninche te ng'udi e sekenkei anaa te nedanyi motioo oo nkulukuok metaa mbelibelat, anaa sii ninye nanu enatang'amua engolon eing'uaa Papa lai. Naa kaisho ninye olakira le nkakenya. Oloata enkiok nchoo ening enajoki Enkiyang'et nena sirito.’ “Naa ore to lmalaika le sirit natii atua Sardis, ingero nchere, ‘Irorei le ilo oata nena kiyang'eta naapishana e Enkai o lelo akir oopishana. “ ‘Ayiolo isiaaitin inono, iata enkarna anaa oltung'ani oishu, nitua. Tuputunye naa nintagol ina natelekua netaa keye, amu eitu ainepu isiaaitin inono aa bayarot too nkonyek e Enkai ai. Tadamu naa ina apa natang'amua nitoning'o torripo ina nirridu. Te nimiputunye nalotu anaa olapurroni, nimiyiolou ajo kaa saa alotunyie enitii iyie. Neton ake iatata nkuti arn ti atua Sardis, iltung'ana leitu epik oloirerio nkilani enye, naa kaairiamariyie ninche nanu eishopo nkilani naaibor amu keiririkino ninche. Ore ilo omirisho neikodi aaiko neijia too nkilani naaibor, nemajut enkarna enye te mbuku e mpuaan; naishakenoki enkarna enye te dukuya Papa lai o te dukuya lmalaika lenyena. Oloata enkiok, nchoo ening enajoki Enkiyang'et nena sirito.’ “Naa ore to lmalaika le sirit natii atua Filadelfia, ingeroki nchere, ‘Irorei le ilo Obo Sinyati, olosipa, oloata olbolet le Daudi, olobol nemeatae likae oiken, oloiken nemeetae likae obol. “ ‘Aiyiolo nkiaasin inono. Ng'ura, atipika dukuya iyie kutukaji nabolo nemeidim hoo ng'ae aikeno; aiyiolo ajo enkiti golon iata, kake imbung'a ororei lai neitu imiki enkarna ai. Ng'ura, kareu lelo le nkaji e ntumo e sheitani oojo ate Ilyahudi neme ninche, kake kelejisho ng'ura, kareu ninche meetu aairrugokino nkejek inono neyiolou nchere aatonyorra nanu iyie. Ore amu imbung'a ororei lai te nyuaata o eng'iriata, ekaarrip te ina saa oo ntemat nalotu enkop pooki, atem lelo ootii enkop. Ekalotu asieku. Imbung'a tukurraki ina niaata pee mikioru ake likae enkopiyia ino e nkitoo. Ore ilo omirisho naitaa ninye eng'ape ti atua enkaji e Enkai ai, nemeitoki ae kata aipang aing'uaa ine, naa kasiraki ninye enkarna e Enkai ai, o enkarna e nkanasa e Enkai ai, ina Yerusalem nadou eing'uaa Enkai ai te keper o enkarna ai kewan ng'ejuk. Oloata enkiok, nchoo ening enajoki Enkiyang'et nena sirito.’ “Naa ore to lmalaika le sirit natii atua Laodikea, ingeroki, ‘Irorei le ilo oji Esai, Oloisiligayu naa olchakeni osipa, naa ninye enkiterunoto e nkitobirata naitobira Enkai seuseu. “ ‘Ayiolo nkiaasin inono. Mirobi iyie nimirowua, oi imut airopiju aashu irowuaju. Neaku ore amu imololong, mirobi nimirowua, ekaanotu aitayu te nkutuk ai. Amu ijo iyie, Kara nanu karsis, atudupe, malau toki. Nimiyiolo iyie ajo ira menati, ira tolut, nira olaisinani modooni niminchopo. Ore te nkaraki ina aaikok iyie naa pee inyiang'u te nanu sahabu natisilaki te nkima, pee itum ataa karsis, ninchop ilkilani ooibor pee eitemoo enkurruna e masipaisho ino, meitokini aadol, o lchani liyelie nkonyek inono pee idolishoyu. Ore lelo lanyor naa kaisikong naitame metaa, tonyuaa naa irridu. Ng'ura, aitashe te kutukaji naoshiosh, ore ake pooki ng'ae oning oltoilo lai nebol kutukaji, naa kajing'aki nanu; nalo adaa te nebo ninye, nedaa sii ninye te nebo nanu. Ore ilo omirisho naa kaisho ninye metotona te nebo nanu to lorika lai le nkitoo anaa apa enatimirishe nanu, naton te nebo Papa lai to lorika lenye le nkitoo. Oloata enkiok nchoo ening enajoki Enkiyang'et nena sirito.’ ” Ore pee eidipayu ena, naing'orisho, ng'ura, etii atua keper kutukaji nabolo! Ore oladuoo toilo latang'asa aning aairorie te dukuya, etiu anaa ole ntarumpeta. Nejo, “Ilepu, tinyiku ene, pee aaitodol ina nemeeta nchere meaku asuju ena.” Ore nabo kata naaigany Enkiyang'et, naa ng'ura, euno olorika le nkitoo te keper, netii obo otonita te ilo orika. Ore ilo otonita te ine neikununo anaa osoit oji Yaspa, o ltoto oonyori ooji karnelian nemanita olokirrai ilo orika oikununo anaa ltoto ooji emerald. Nemanita ilo orika ilorikan tikitam oong'uan le nkitoo. Netonita te lelo orikan le nkitoo ilpayiani tikitam o oong'uan ooishopito nkilani naaibor, neeta too lukuny enye nkopiyiani e nkitoo e sahabu. Nepukunye ilo orika le nkitoo inkiwuang'at naaimerlel o ndarat o enkikurrukur. Ore te dukuya ilo orika le nkitoo neyupuyup ilkilang'ilang'eta oopishana le nkima, naa ninche inkiyang'eta naapishana e Enkai. Ore dukuya, ilo orika le nkitoo netii entoki natiu anaa enaiposha e kiok nayia anaa oltotoi oibor, nemanita ilo orika le nkitoo too nkaloli pooki ing'uesi ong'uan naaishu, naabore nkonyek dukuya o siadi. Ore ina ng'ues e dukuya naishu neikununo anaa olng'atuny, ore ina ng'ues e are naishu neikununo ana olkiteng, ore ina ng'ues e uni naishu neeta enkomom o ltung'ani, ore ina ng'ues e ong'uan naishu neikununo anaa olkurragos olo ti ai. Ore nena ng'uesi ong'uan naaishu neeta ake nabo inaipuko ile, nebore ninche nkonyek pooki wueji, oriong o atua. Ore dama o kewarie nemegira ae kata meranyisho ejo, “Osinyati, Osinyati, Osinyati, Osinyati, Olaitoriani Enkai, Olaidimani le pooki, otii apa netii taata, naa ninye olotu.” Naa ore ake pee eisho nena ng'uesi naaishu enkisisa, o enkitoo o enkanyit enashe ilo otonita to lorika le nkitoo, oishu ntarasi o ntarasi. Nebatata lelo payiani tikitam o oong'uan te dukuya ilo otonita to lorika le nkitoo, neserem ilo oishu ntarasi o intarasi, neirragie nkopiyiani enye e nkitoo te dukuya ilo orika le nkitoo, neranyisho aajo, “Kinchiaakino iyie, Olaitoriani lang o Enkai ang, pee ing'amu enkisisa o enkanyit o engolon, amu iyie oitobirua intokitin pooki, naa te yieuna ino eetae ninche eitobiruaki ninche.” Nadol sii te nkaina e tatene e ilo otonita to lorika le nkitoo olpiyayati le embuku naigero atua o oriong, netipikaki ilmishiren oopishana. Nadol sii olmalaika ogol elimu to ltoilo sapuk ajo, “Ai eishiaakino nebol ele piyayati le mbuku nebol lelo mishiren lenyena.” Nemeetae hoo obo te keper aashu te nkop aashu tiabori enkop oidima atabolo ilo piyayati aashu aing'ura atua. Naishir oleng amu eitu etumi oltung'ani hoo obo oishiaakino pee edol ilo piyayati arishu eing'or atua. Naajoki nanu obo le lelo payiani lo losho le Yuda, mintoki aishir. Ng'ura, olng'ur le ntonai e Daudi etimirishe peyie etum atabolo ilo piyayati o lelo mishiren lenyena oopishana. Ore te rishata o lorika le nkitoo ore ng'uesi ong'uan naaishu, o tiatua ilpayiani, nadol olkuoo le ker eitashe, etiu anaa keteyiang'aki apa, neeta mowuarak naapishana o nkonyek naapishana, naa ninche nkiyang'eta naapishana e Nkai, naairriwayioki meshomo enkop pooki. Nelo nedumu ilo piyayati le mbuku te nkaina e tatene e ilo otonita to lorika le nkitoo. Ore ake pee edumu ilo piyayati le mbuku, nebatata nena ng'uesi naaishu ong'uan te dukuya ilo kuoo le ker, nemeetae ake enemeibung'ita enkawuo oo sinkolioitin, o ngirran e sahabu naabore empuruonarropil naa enkomono oo sinyat. Nerany osinkolio ng'ejuk aajo, “Kinchiaakino iyie pee idumu olpiyayati le embuku, nibel ilmishiren lenyena. Amu kiteyieng'aki apa naa to sarge lino inyiang'aka Enkai iltung'ana aitung'uaa loshon pooki, o lng'ejepa, o ltung'ana o loreren. Nintaa ninche enkitoria o lapolosak le Enkai ang, naa keyooki ninche aaitoreisho te nkop.” Naing'orisho nanu naning emanita olorika le nkitoo o nena ng'uesi naaishu o lelo payiani oltoilo loo lmalaika kumok. Ore esiana enye naa iip nkuyu iip nkuyu, iip nkuyu, nkalifuni o nkalifuni. Nejo ninche to ltoilo sapuk, “Eishiakino ilo Kuoo le ker apa oteyiang'aki, te neng'amu engolon, o enkarsisisho, o eng'eno nagut, o enkidimata, o enkanyit, o enkitoo, o emayianata.” Naning nena pooki naaiseuseu te keper o te nkop oti abori enkop o naatii enaiposha, o nena pooki naatae ejo, “Metaa ene ilo otonita to lorika le nkitoo neaku eno lkuoo le ker, emayianata o enkanyit o enkisisa o enkidimata intarasi o ntarasi!” Nejo nena ng'uesi ong'uan naaishu, “Esai.” Nebatata ilpayiani aaserem. Nadol ina kata pee elo ilo Kuoo le Ker abol obo le lelo mishiren oopishana, naning nabo e nena ng'uesi ong'uan naaishu ejo to ltoilo le ndarata, “Wou!” Nadol, naa ng'ura, embarta naibor, neeta ilo okedito enkawuo, o enkopiyia e nkitoo naishooki ninye, neipang alo. Ore pee ebol ninye ilo mishire li aare, naning ina ng'ues e are naishu ejo, “Wou!” Neipang'u enkai barta nanyokie oleng, ore ilo okedito neishooki engolon meiwuang'ie eseriani aitung'uaa e nkop pee eyiang'a iltung'ana maate, neishooki ninye olalem sapuk. Ore pee ebol olmishire le okuni, naning ina ng'ues e uni naishu ejo, “Wou!” Ng'ura, nadol nanu, embarta narok, ore ilo okedito neeta entemet te nkaina enye. Naning entoki naaijo oltoilo te mpolos e nana ng'uesi ong'uan naaishu ejo, “Emborei e mpilbil e nkano te mpesai nabo, o mboreitin uni o shairi te dinari. Kake mintarruoo eilata o enaisho oo sabibu.” Ore pee ebol ninye olmishire li oong'uan, naning oltoilo le ina ng'ues e ong'uan naishu ejo, “Wou!” Nadol nanu, naa ng'ura embarta pus, ore enkarna e ilo okedito naa keji Keeya, neirukurukore ninye Enemeneng'a. Neishooki ninye engolon meitoria ematua e ong'uan e nkop, peyie ear metuata to lalem o to lameyu o too lmeitai o too ng'uesi e ntim naatii enkop. Ore ebol ninye olmishire le imiet nadol ti abori olperere lo lasar iltauja le lelo apa ootaaraki te nkaraki ororei le Enkai o te nchakenisho naitayutuo. Neishir aajo to ltoilo sapuk, “Iyie Olaitoriani Kitok, Oyanyiti nesipa, kanu akenya inguana intalaku osarge lang te lelo ootii enkop?” Neishori pooki te lelo olkila oibor, nejokini meyeng'iyeng'ata te nkiti kata, o metaba anaa neiputayu esiana e lelo ooisiaaishote te nebo ninche leton eitokini aar anaa apa ninche maate. Ore pee ebol olmishire le ile, naing'orisho naa ng'ura, nadol etii enkikirikirata sapuk enkop, neroku enkolong netiu anaa olkila orok, neibelekenya olapa olulung'a netiu anaa osarge. Nesulunye lakir to loing'ang'e nesulakino enkop anaa lng'abolo oorrarrunye ilng'anayio te nkata enkirobi eyukito olkutati. Neng'ishari oloing'ang'e anaa olpiyayati otununukoki. Neiwuang'ieki pooki doinyo, o pooki lemankale aaitung'uaa ewueji enye. Ore laiguanak le na kop, o ltung'ana kituaak, o larikok loo njorin, o lkarsisi o loogol, o pooki ng'ae, orrindik aashu ololakuno. Neisudori too nkapuniaa o too isoito loo ldoinyo, neipot nejoki ildoinyo o soito, “Entusulakinoto iyiook, nisudoo iyiook too nkonyek e ilo otonita to lorika le nkitoo, o te ngoro e ilo Kuoo le Ker. Amu etabawua ina olong kitok e ngoro enye, naa ae ng'ae oidim aitasho te dukuya ninye?” Ore te siadi ena nadol ilmalaika oong'uan eitashe too lubot pokira ong'uan e nkop, eibooyo isiwuon pokira oong'uan le nkop, pee meitoki olkutati akutu te nkop aashu te naiposha aashu akutaki olchani ake pooki. Naitoki adol likae malaika eilepu te nkilepunoto e nkolong, neeta olmishire le Enkai naishu, neipot to ltoilo sapuk lelo malaika oong'uan ooishooki engolon meinyiala enkop o enaiposha. Nejoki, “Eminyial enkop aashu enaiposha aashu ilkeek, o metaba anaa nikimishir isinkan le Enkai ang inkomomi enye.” Naning esiana, e lelo ootimishiraki; naa nkalifuni iip artam o oong'uan ilootimishiraki eing'uaa iloshon pooki loo layiok le Israel, inkalifuni tomon o aare ilo losho le Yuda, inkalifuni tomon o aare ilo losho le Ruben, inkalifuni tomon o aare ilo losho le Gad, inkalifuni tomon o aare ilo losho le Asheri. Inkalifuni tomon o aare ilo losho le Naftali. Inkalifuni tomon o aare ilo losho le Manase. Inkalifuni tomon o aare ilo losho le Simion, inkalifuni tomon o aare ilo losho le Lawi, inkalifuni tomon o aare ilo losho le Isaakar naa nkalifuni tomon o aare ilootimishiraki eing'uaa olosho le Sebulon, nkalifuni tomon aare ilo losho le Yosef, nkalifuni tomon oare ilootimishiraki to losho le Benchamen. Ore te siadi ena, naing'orisho, naa ng'ura, olorora kitok lemeeta oltung'ani oidim aikena, eing'uaa pooki orere, neing'uaa loshon pooki, o ltung'ana o lng'ejepa, eitashe te dukuya olorika le nkitoo o te dukuya ilo Kuoo le Ker, neishopito ilkilani naaibor, neibung'ita ilng'osil loo ltuka too nkaik enye. Nebuaku to ltoilo sapuk aajo, “Ene Enkai ang enjeunoto: ina natonita to lorika le nkitoo o ene ilo Kuoo le Ker.” Neitashe ilmalaika pooki aaman olorika le nkitoo o lelo payiani o nena ng'uesi ong'uan naaishu, nebatata too nkomomi enye te dukuya ilo orika le nkitoo neserem Enkai. Ejoito, “Esai, metaa emayianata o enkisisa o enkitoo, o eng'eno nagut o enkishooroto enashe o enkanyit o engolon o enkidimata ena Enkai ang intarasi o ntarasi. Esai.” Naaitoki obo le lelo payiani airorie nanu ajoki, “Kakua kulo, ooishop ilkilani ooibor, naa kaji eing'uaa ninche?” Najoki nanu ninye, “Olkitok, iyiolo iyie.” Naaitoki aajoki, “Kulo ninche lelo ooiturukutuo aaing'uaa ilo sina kitok neitukuo ilkilani lenye neiborrie to sarge lo Lkuoo le Ker.” Naa enkaraki ina pee etii dukuya olorika le nkitoo le Enkai neisiaai ninye dama o kewarie ti atua enkaji enye, ore ilo otonita to lorika le nkitoo naa keitushur ninche te ine netii ninye. Nemeitoki ae kata ninche aaisumashu aashu aatum enkure. Nemedal enkolong ninche aashu ae kirowuaj napejisho. Amu ilo Kuoo le Ker otii empolos o lorika le nkitoo oaku olchekut lenye, anaa kerikoo ninche too nchorroi oo nkariak naaishu. Naa kejut Enkai pooki kiyioi too nkonyek enye. Ore pee ebol Olkuoo le Ker olmishire li oopishana, negira keper te rishata naba anaa enusu e saa. Nadol nanu lelo malaika oopishana, ooitashe te dukuya Enkai, neishori ninche ntarumpetani naapishana. Nelotu likae malaika aitashe te mbata o lperere lo lasar, eeta emoti e sahabu nairishoreki, neishori enkorropil sapuk, meitushulaki enkomono e lelo sinyat pooki te nchumata o lperere lo lasar le sahabu otii dukuya olorika le nkitoo. Neilep empuruo e nkorropil o lasar te nebo enkomono e lelo sinyat te nkaina o lmalaika otii dukuya Enkai. Nedumu olmalaika emoti neiput enkima naitayio to lperere lo lasar, neisuaaki enkop neaku kumok indarat sapuki o nkikurrukurrot naabuaku, o enkimerlel o nkiwuang'at, o enkikirikirata e nkop. Ore lelo malaika oopishana ooibung'ita ntarumpetani naapishana neitobir ejo pee eosh. Neosh ilo malaika le dukuya entarumpeta enye, neshau enchan oo soito o enkima, nashulare osarge; nedoiki enkop; nepejori ematua e uni e nkop, nepejori ematua e uni oo lkeek, nepejori nkujit pooki naanyori. Neosh olmalaika li aare entarumpeta enye. Ore enkito toki naaijo oldoinyo nayupuyup te nkima nenang'akini atua enaiposha. Neaku ematua e uni e naiposha osarge, neye ematua e uni oo ng'uesi naaishu naatii atua enaiposha, nemuti ematua e uni oo melin. Neosh olmalaika li okuni entarumpeta enye, nedou olakira sapuk oing'uaa shumata eyupuyup anaa olkilang'ilang'et, nedoiki ninye ematua e uni oo lkejek, o enoo nkonyek oo nkariak. Neji enkarna e ilo akira enduaran, neitaduari neye ematua e uni e nkare iltung'ana kumok te ina are, amu eitaduaraki. Neosh olmalaika li oong'uan entarumpeta enye, ore ematua e uni e nkolong neari, o ematua e uni o lapa, o ematua e uni oo lakir, neaku eitomisimisoki ematua e uni e wang'an enye. Nemitikini ematua e uni e ndama ewang'u naa neijia etiu ematua e uni enkewarie. Naitoki aing'orisho naning olkurragos oishirita to ltoilo sapuk eipirri te mpolos o loing'ang'e nejo, “Wooi, Wooi, Wooi, ninche lelo oomanya enkop, te nkaraki enkorui e nena tarumpetani netaa keosh ilmalaika okuni.” Neitoki olmalaika le imiet aosh entarumpeta enye, nadol olakira otusulunye eing'uaa shumata elotu enkop. Neishori ninye olbolet lo lgos le ina gumoto nemeeta eneiting'ie. Nebol ilo gos le ina gumoto nemeeta eneiting'ie, neilepu empuruo te ilo gos naikununo anaa empuruo o lkokuet sapuk, nemisimisu enkolong, o enkijape te ina puruo napuku te ina gumoto. Nepuku te ina puruo ilmaat nepuonu enkop. Neishori engolon natiu anaa engolon oo nkolopani e nkop. Nejokini ninche pee meinyal inkujit e nkop, aashu ae toki nabulu nanyori aashu pooki shani, kake lelo tung'ana ake lemeeta olmishire le Enkai too lpurai loo nkomomi enye. Neishori ninche meisilisilo ninche too lapaitin imiet, kake pee mear metuata. Netiu enkitamioto enye anaa emion e nkolopa, te neng'or oltung'ani. Naa ore te nena olong'i naa keing'oru oltung'ani keeya nemetum ninye. Neng'uar ninche keeya, neilany keeya ninche. Ore lelo maat te nidol, neikununo anaa mbartan naatanapate to larrabal. Netii ilukuny enye ntokitin naatiu anaa nkopiyiani e nkitoo e sahabu, neikununo nkomomi enye anaa nkomomi oo ltung'ana. Neikununo ilpapit lenye anaa ilpapit loo nkituaak, neikununo ilala lenye anaa ilala loo lng'atunyo. Neeta ilpala laaijo nkilani oo lgooitie oo sekenke, ore enkikurrukur oo naipuko enye, netiu anaa enkikurrukur oo ngarrin oo mbartan kumok ekuetiki olarrabal. Neeta ilkidong'o laaijo loo nkolopani oonyisho, ore engolon enye naitameiyie iltung'ana too lapaitin imiet naa atua lkidong'o lenye etii. Ore olaiguanani oitore ninche naa ilo malaika le ina gumoto nemeeta eneiting'ie. Ore enkarna enye too Lhebrania naa Abadon neji te nkutuk o Lyunani Apolion (nchere olamutani). Eidipa entaboi e dukuya atulusoi, ng'ura eton eng'or intabo are naapuonu te siadi. Neitoki olmalaika le ile aosh entarumpeta enye, naning oltoilo oing'uaa nena mowuarak pokira ong'uan o lperere lo lasar le sahabu otii dukuya Enkai, ejoki ilo malaika le ile, oata emowuo, “Talaku lelo malaika oong'uan ooena to lkeju sapuk le Frati.” Neaku nelakuni lelo malaika pokira oong'uan apa ooibooki aaitaanyu ina saa, o ina olong, o ilo apa, oilo ari, pee ear ematua e uni o ltung'ana. Ore esiana oo ltimito ookedito mbartan netasha are naa nkalifuni tomon katitin nkalifuni tomon. Atoning'o nanu esiana enye. Naa inji eikununo nena bartan natoduaa te nduaata ai, neeta lelo ookedito nkilani oo lgooitie oo sekenke naayia anaa enkima, neyia anaa soito pusi ooji Salfa neyia anaa enkima e nkibiriti. Neikununo lukuny oo mbartan anaa lukuny oo lng'atunyo Nepuku enkima e Nkibiriti too nkutukie enye. Ore te kulo meita pokira okuni near metuata ematua e uni oo oltung'ana te nkima, o te mpuruo o te nkima e nkibirti, naing'uaa nkutukie enye. Amu ore engolon e nena bartam naa atua nkutukie enye etii, olkidong'o lenye. Netiu lkidong'o lenye anaa lasuriaa, keeta lukuny, naa ninche epikishore ilbaa. Ore iltung'ana ootelekutua, leitu eari metuata te kulo meita, neitu eirridu nkiaasin oo nkaik enye, neitu epal eseremata o eomonoto oo loiriruani, o nkitanyaanyukot neme Enkai e sahabu o enkosholai, o suyai, o soito o enoo nkeek nemedolisho, aashu ening'isho aashu aashom. Neitu sii eirridu too loikop lenye o te sakutore enye, o te loloito enye o te mpurrorre enye. Naitoki adol likae malaika edou aing'uaa shumata, eimulumula te nkatampoi, netii olokirrai shumata endukuya enye, netiu enkomom enye anaa enkolong, neikununo nkejek enyena anaa ng'apeta e nkima. Neeta te nkaina enye enkiti piyayati e mbuku nabolo. Neroro te nkeju enye e tatene enaiposha, neroro te ne kedianye enkop natoyio. Neipotisho abuaku to ltoilo sapuk, anaa olo lng'atuny oipur. Ore ake pee eipotisho nedaru nena kikurrukurrot naapishana. Ore pee edar nena kikurrukurrot naapishana, najo aigerisho kake, naning oltoilo oing'uaa shumata ejo, “timishira nena naatejo ndarat naapishana, niminger ake.” Ore ilo malaika latoduaa eitashe te naiposha o te nkop natoyio, neilepie enkaina enye e tatene keper. Neinos ninye olmumai te ilo oishu ntarasi o ntarasi, laa ninye oitaa keper o pooki naatii atua, o enkop o pooki natii atua, o enaiposha oo pooki naatii atua pee meitoki atii enkimutioto. Kake pee ore ti atua nkolong'i naaoshi ina tarumpeta, naosh kenya ilo malaika li oopishana, o enkisudoroto neitabari enkisudoroto e Enkai anaa apa enatolikio ninye, sinkan lenyena lelo oibonok naa eitabari. Ore ilo toilo duoo latoning'o eing'uaa shumata, naaitoki airorie, nejo, “Shomo tudumu ilo piyayati le mbuku obolo, otii enkaina e ilo malaika oitashe te naiposha o te nkop natoyio.” Neaku ashomo enetii olmalaika najoki ninye maaishoo nanu ilo piyayati le mbuku. Naajoki ninye nanu, “Tudumu naa inosa. Kelo aduaru te nkoshoke kake kemelok anaa enaisho oo lotorok te nkutuk ino!” Nadumu ilo piyayati le mbuku te nkaina e ilo lmalaika, nanya. Naa kemelok anaa enaisho te nkutuk ai, kake ore ake pee aidip ainosa neitaduar enkoshoke ai. Naajokini, “Meeta nchere pee mintoki aibonisho too ltung'ana kumok, o too lng'ejepa o laiguanak.” Naaitokini aaisho entemet naikununo anaa eng'udi, naajokini nanu, “Inyo tetema enkaji e Enkai o ewueji o lperere lo lasar o lelo ooserem te ine. Kake mitem ake olgoriet otii boo e nkaji e Enkai. Tapala ilo amu eishooki iloreren, naa keituny ninche ina ang sinyati too lapaitin artam o aare. Naa kaisho ilchakenini laainei oare engolon naibonishore nkolong'i enkalifu nabo o iip are o ntomoni ile, eishopito ilkuniyiani.” Kulo ninche lelo oirienito aare, o lelo kilang'ilang'eta aare ooitashe te dukuya Olaitoriani le nkop. Naa te neyieu oltung'ani neinyal ninche, nepuku enkima too nkutukie enye, nemut ilmang'ati lenye. Te neyieu oltung'ani near ninche neari metua aaiko neijia. Eeta ninche engolon naikenie oloing'ang'e pee meshau enchan te nena olong'i e naibon enye. Neeta ninche engolon naitoreyie nkariak o enaibelekenyie metaa osarge. Near enkop to lmeitai ake pooki naaba anaa enayieu ninche. Ore ake pee eidip ninche enchakenisho enye, ore ina ng'ues nailepua te ina gumoto nemeeta eneiting'ie nedumaki ninche enjore, nemir ninche, near ninche metuata. Neirrag impopoki enye te nkoitoi nalala eina anasa kitok, naji te nkiroroto e nkitumususet, Sodom o Misiri, naa te ine apa etashoki Olaitoriani lenye. Ore too nkolong'i uni o lpisiai ore iltung'ana loo loshon, o lng'ejepa o loreren neshil nena popoki enye, nemit enukari aapik inkuraren. Ore lelo olomanya enkop, neshipakino ninche, neitayu isiruai neishoro nkishorot, amu ore kulo oibonok le Enkai pokira aare, naisomita oleng lelo ootii enkop. Kake ore te siadi nena olong'i uni o lpisiai, nejing enkiyang'et e nkishui naing'uaa Enkai, atua ninche neitashe ninche too nkejek enye, neiput enkuretisho sapuk lelo ootoduaa ninche. Ore ina kata nening oltoilo sapuk oing'uaa shumata ejoki ninche. “Elepu wootu ene!” Ore eing'orita ilmang'ati lenye neilep ninche aapuo shumata te nkatampoi. Ore te ina saa nejing olokirikiri kitok enkop, neurori ematua e tomon e ina anasa. Neari iltung'ana nkalifuni naapishana, metuata te ina kikirikirata. Neiputukuny lelo ootelekutua, neisho enkisisa Enkai e shumata. Etulusoyie entaboi e are. Ng'ura, kelotu entaboi e uni asioku. Neitoki olmalaika li oopishana aosh entarumpeta enye, netii iltoiloishi sapuki shumata oojo, “Etaa enkitoo e nkop enkitoo o Laitoriani lang o ene Kristo lenye, naa keitoreisho ninye intarasi o ntarasi.” Ore lelo payiani tikitam o oong'uan ootoni too lorikan lenye le nkitoo te dukuya Enkai nebatata too nkomomi enye aaserem Enkai. Nejo, “Kincho iyie enashe, Olaitoriani Enkai, olopeny enkidimata pooki, otii taata, netii apa amu iwa te ngolon ino sapuk, ninterua aitoreisho. Etoopishote loreren, kake neewuo engoro ino, neewuo enkata naiguanareki ilootuata, nilaaki ole koisiaayio isinkan linono, iloibonok sinyat o lelo ooure enkarna ino, ilooti o lkituaak, o enkata namuti lelo amutak le nkop.” Neitokini aabol enkaji e Enkai te shumata nedoli osanduku lo sotua lenye ti atua enkaji e Enkai. Netii enkimerlel oo nkiwuang'at o ltoiloishi oobuak, o ndarat e nkikurrukur o lokirikiri le nkop, o enchan oo soito sapuki oleng. Neliooyu entoki sapuk enking'asia te shumata, enkitok naishopokoki enkolong netii olapa abori inkejek enyena. Ore te ndukuya enye, neeta enkopiyia e nkitoo oo lakir tomon o aare. Naa entuaa ninye, neishir te mion e saisai o te mion e ishoi. Neitoki aliooyu enkae toki sapuk e nking'asia te shumata, ng'ura enkito, tiamasi nanyokie, naata lukuny naapishana, o mowuarak tomon, neishopokino nkishiliaa e nkitoria naapishana ilukuny enyena. Neor olkidong'oe lenye ematua e uni oo lakir le shumata, nenang'aki ninche enkop. Neitashe ilo asurai te dukuya ina tuaa nasaisai, pee enya enkerai enye te neini. Neiu enkayioni naa ninye oyooki aitore iloreren pooki te ng'udi e sekenkei, kake etawuapayioki ina kerai enye aailepie enetii Enkai o enetii olorika lenye le nkitoo. Neipirri ina kitok ong'ata, ewueji neitobiraka Enkai, naa ine eitotiyieki aaitagol ninye too nkolong'i enkalifu nabo o iip are o ntomoni ile. Nepuku olarrabal te shumata. Earare Mikael olmalaika le ilo asurai. Nearare sii ninye ilo asurai o lmalaika lenyana. Kake etimiraki ninche neaku meeta ewueji netii ninche te shumata. Nenang'uni ilo asurai kitok enkop, ilo asurai musana, laa ninye eji oloirirua o shetani, ilo alejani le nkop pooki, nenang'uni ninye enkop, ore ilmalaika lenyena nenang'akini enkop te nebo ninye. Naning oltoilo sapuk te shumata ejo, “Eewuo taata enjeunoto, o engolon, o enkitoria e Enkai ang, o enkidimata e Kristo lenye. Amu etanang'akaki enkop olaitang'oroni loo lalashera lang, laa ninye oitang'or ninche dama o kewarie te dukuya Enkai ang. Netimira ninche ninye te ilo sarge lo Lkuoo le Ker, o to rorei le nchakenisho enye, amu eitu enyorru ninche enkishui enye o metabaiki keeya. Ting'idayu naa, iyie shumata o intae lelo pooki ootii atua. Kake wooi, intae nakop o enaiposha, amu etadowuo shetani enitii te ngoro sapuk. Amu eyiolo ajo dorrop enkata enye.” Ore ake pee edol ilo asurai ajo etanang'aki enkop, nemir ina kitok natoiwuo enkayioni. Kake eishooki ina kitok inaipuko are naaijo ino lkurragos sapuk loo lmurran, pee elotie ti ai ailany ilo asurai, nelo ong'ata, ine ewueji neitotiyieki aaitagol, te nkata, o too nkatitin, o lpisiai le nkata. Nebuku ilo asurai enkare naaijo olkeju eing'uaa enkutuk enye te siadi ina kitok ejo pee eoroo to loirrag le nkare. Kake etaretuo enkop ina kitok, neng'a enkop enkutuk neijoo ilo keju otonotua ilo asurai te nkutuk enye. Negorokino taa ilo asurai ina kitok nelo aitainye olarrabal eishoi natelekua e ina kitok, lelo pooki leton eibung'ita nkitanapat e Enkai, neishakenoki Yesu. Neitashe ninye to sinyai le naiposha. Nadol nanu eng'ues eilepu aing'uaa atua enaiposha naata imowuarak tomon, o lukuny naapishana neishopokino nkishiliaa tomon e nkitoo nena mowuarak enyena. Netii enkarna e morore nena lukuny enyena. Ore ina ng'ues natoduaa neikununo ana olowuaru keri. Netiu nkejek enyena anaa ino lng'arurumi, netiu enkutuk enye ana eno lng'atuny. Neisho ilo asurai ina ng'ues engolon enye o lorika lenye le nkitoo, o enkidimata sapuk. Ore nabo oo lukuny enyena, eijo keeta olbae le nkeeya. Ore ilo bae lenye le keeya neishiwuo, nesuj enkop pooki ina ng'ues eing'asia. Neserem iltung'ana ilo asurai, amu eishoo ninye enkidimata enye ina ng'ues neserem, ninche ina ng'ues ejo “Ae ng'ae otiu anaa ina ng'ues, naa ae ng'ae oidima airisha?” Neishori ina ng'ues enkutuk nairorie imbaa naarupie kewan o rorei le morore, neishori meitoreisho too larin artam o aare. Nebol enkutuk enye emorisho, nemor Enkai, amor enkarna enye o emanyisho enye. Aa nchere lelo pooki oomanya shumata. Neishori sii meitayunye olarrabal isinyat, nemir ninche. Neishori ninye enkitoria naitoreyie iloshon oltung'ana, o lng'ejepa, o loreren. Ore lelo pooki ootii enkop neserem ninye, pooki ngae apa leitu eigeri enkarna enye apa eton eitu eitamanyuni enkop, ti atua embuku e mpuaan e ilo Kuoo le Ker apa otaraki. Te neetae oloata enkiok, nchoo ening. Ore ake pooki ng'ae oarari, nelo eyaroto; ore ake pooki ng'ae oarisho to lalem meeta nchere meari sii ninye to lalem. Ene taa etii enkipototo te nkaraki eng'iriata o enkirukoto oo sinyat. Naitoki adol ae ng'ues natudumunye te nkop neeta mowuarak are anaa olkuoo le ker, neiro ninye anaa ilo asurai. Neitoreishore ninye enkidimata pooki e idia ng'ues e dukuya, te ine netii ninye, nearaki enkop o pooki oomanya enkop meteserema ina ng'ues e dukuya, apa naishiwuo olbae lenye le keeya. Neas ilmonek sapuki o metaa ninye keitadou enkima eing'uaa keper meeu enkop edolita iltung'ana. Ore too lmonek ooishooki metaasa te ine netii ina ng'ues neitapong'oo lelo ootii enkop. Neitanap lelo oomanya enkop meitobira ninche enkitanyaanyukoto e ina ng'ues naata endung'oto o lalem neton ake eishu. Neishori ninye meishoo enkiyang'et ina kitanyaanyukoto e ina ng'ues, pee etum ninye ina kitanyaanyukoto ataa keiro. Nejo metaari metuata lelo pooki lemeserem ina kitanyaanyukoto e ina ng'ues. Neisho sii pooki ng'ae, looti o lkituaak, ilkarsisi o laisinak, irrindiki o leme rrindiki, metipiki olmishire enkaina e tatene aashu enkomom, pee meitoki hoo obo ainyiang'isho aashu emirisho, meteleku ake te neeta ilo mishire, aa taa enkarna e ina ng'ues, aashu esiana e ina arna enye. Eyieu taa ena eng'eno nagut, nchoo ilo oata ening'unoto eikenisho atum esiana e ina ng'ues. Amu esiana e tung'ani. Ore esiana enye naa iip ile o ntomoni ile o ile. Naitoki aing'orisho, naa ng'ura, ore te nchumata o ldoinyo le Sion eitashe Olkuoo le Ker. Netii te nebo ninye nkalifuni iip artam o oong'uan ooata enkarna enye o ene menye lenye eigero too lpurai loo nkomomi enye. Naning oltoilo eing'uaa shumata laaijo enkikurrukur oo nkariak kumok, netiu sii anaa enkikurrukur sapuk. Ore ilo toilo latoning'o netiu anaa oltoilo loo laoshok loo nkinantani eoshito inkinantani enye. Nerany osinkolio ng'ejuk te dukuya olorika le nkitoo o te dukuya nena ng'uesi ong'uan naaishu, o te dukuya lelo payiani. Nemeetae hoo obo oidim aitayiolo kewan ilo sinkolio meteleku ake lelo nkalifuni iip artam o ong'uan ooidipaki aatokordu te nkop. Naa kulo leitu eidurukie ate too ng'oruo, amu meyiolo ninche nkituaak. Naa kulo ooirukurukore ilo Kuoo le Ker pooki wueji nelo. Etokorduaki kulo ti atua ltung'ana, pee eaku ilng'anayio le dukuya le Enkai o lo Lkuoo le Ker. Neitu etumieki nkutukie enye emonkoi, amu meeta eleyiata. Naitoki adol likae malaika eipirri te mpolos o loing'ang'e, neeta lomon supati loo ntarasi olo aliki lelo oomanya enkop, pooki kop, o pooki osho o pooki lng'ejep o ltung'ana. Nejo to oltoilo sapuk, “Entureita Enkai ninchosho ninye enkisisa. Amu eewuo e nkiguana enye. Enteserem ilo oitobira shumata o enkop, o enaiposha o nchorroi oo nkariak.” Ore likae malaika, li aare, nesuju, ejo, “Eturori, eturori Babilon kitok ina naitooko loreren pooki e naisho e mpushuna e loloito enye.” Nelotu likae malaika li okuni asuju ninche, ejo to ltoilo sapuk, “Ore pooki ng'ae oserema ina ng'ues o enkitanyaanyukoto enye, netum olmishire to lpura le nkomom enye aashu te nkaina enye, neyooki sii aok e naisho e ngoro, e Enkai, natubukokoki enkikompe e ngoro eirrusha. Naa keitamei te nkima o te nkibiriti te dukuya lelo malaika sinyat o te dukuya ilo Kuoo le Ker? Ore empuruo e nkisilisiloto enye neilep ntarasi o ntarasi. Nemeeta enkiyeng'iyeng'ata dama o kewarie lelo aseremak le ina ng'ues o enkitanyaanyukoto enye, o pooki ng'ae ong'amu olmishire le nkarna enye.” Ene taa etii enkipototo eng'iriata e lelo sinyat lelo ooibung inkitanapat e Enkai o enkirukoto e Yesu. Naning oltoilo oing'uaa shumata ejo, “Ngero ena, Emayiana lelo ootuata laa ti atua Olaitoriani eye taata o akenya.” “Esipa emayiana,” ejo enkiyang'et, “pee etum aayeng'iyengata too sinaitin lenye, amu esuj ninche inkiaasin enye.” Naitoki aing'orisho naa ng'ura, enkatampoi naibor. Netonita te ina atampoi obo onyaanyukie enkerai e tung'ani, neishopito te lukunya enye enkopiya e nkitoo e sahabu, neibung'ita olalem opi oololo te nkaina enye. Nepuku likae malaika eing'uaa atua enkaji e Enkai, eipotito to ltoilo sapuk ilo otonita te nkatampoi amu ejo, “Tudung'ishore ilo alem lino oololo nisampisho amu enkata e nkisampuare, eo abaya enkisampuare e nkop.” Neaku neyuk ilo otonita te nkatampoi olalem lenye oololo te nkop neisampuni enkop. Neitoki apuku likae malaika te ina aji e Enkai natii shumata, neeta sii ninye olalem opi oololo. Neitoki likae malaika apuku eing'uaa olperere lo lasar, laa ninye oota naitoreyie enkima. Neipot to ltoilo sapuk ilo oata olalem opi oololo nejoki, “Tudung'ishore olalem lino oololo tasotu nkimarrimarrat oo sabibu te nkop, amu eoto isabibu lenyena.” Neaku eyuko olmalaika olalem lenye oololo te nkop nesotu isabibu le nkop. Nenang'aki ninche atua enkironyet e ngoro e Enkai. Neitunyi ina kironyet ti auluo ina anasa, nerukunye osarge te ina kironyet, o metabaiki mbartan inkeenta oo nkutukie, neba te nkadoro anaa kilometa iip uni. Naitoki adol entoki sapuk enking'asia te shumata, kitok naa ene nking'asia, ilmalaika oopishana ooata ilmeita oopishana laa ninche oobayie, laa te ninche etimitunye engoro e Enkai. Naitoki adol entoki naikununo anaa enaiposha e kiook nashulare enkima. Ore lelo ootimira ina ng'ues o enkitanyaanyukoto enye o esiana e nkarna enye, neitashe te mbata e ina aiposha e kiook, neibung'ita nkinantani e Enkai too nkaik enye. Nerany osinkolio le Musa ilo sinka le Enkai o sinkolio lo Lkuoo le ker, ejo, “Eikituaak naa ine nking'asia nkiaasin inono, iyie Olaitoriani Enkai Magilani, keitoriori nesipa inkoitoi inono, Olaiguanani loo lporori. Ae ng'ae lemeureisho neisis enkarna ino, Olaitoriani. Amu iyie ake openy osinyati. Eikipuonu nkuapi pooki aserem iyie, amu ore inkiguanat inono neidipaki aaibalunye.” Ore te siadi ena naing'orisho, ore enkaji e Enkai o lng'obor le nchakenisho ti atua shumata neboli. Neipang'u ti atua ina aji e Enkai lelo malaika oopishana ooata ilmeita oopishana, eishopito nkilani nemeiduruk naawang oleng neenita too lgooitie lenye inkimeitani e sahabu. Ore nabo e nena ng'uesi ong'uan naaishu, neisho lelo malaika oopishana ngirran naapishana e sahabu naabore engoro e Enkai, naishu ntarasi o ntarasi. Neigany enkaji e Enkai empuruo eing'uaa enkitoo e Enkai neing'uaa engolon enye. Nemeetae hoo obo oidima atijing'a atua ina aji e Enkai o metaba anaa nelusoo lelo meita oopishana le lelo malaika oopishana. Naitoki aning oltoilo sapuk oing'uaa enkaji e Enkai ejoki lelo malaika oopishana, “Enchom entubukoki enkop lelo bakulini oopishana le ngoro e Enkai.” Neaku eshomo olmalaika le dukuya nebukoki olbakuli lenye oriong enkop. Nejing impaldakani torrok naang'u lelo tung'ana ooata olmishire le ina ng'ues neserem enkitanyaanyukoto enye. Nebukoki olmalaika li aare olbakuli lenye enaiposha, netiu ninye anaa osarge lo ltung'ani otua. Nee pooki toki naishu natii atua enaiposha. Nebukoki olmalaika li okuni olbakuli lenye atua lkejek o nchorroi e nkare, neaku ninche osarge. Naning ilo malaika loo nkariak ejo, “Ira iyie asipani te kuna kiguanat inono, iyie olotii taata nitii apake, losinyati obo, amu ena enkiguana ino. Amu eibukoitie iltung'ana osarge loo sinyat o loo loibonok le Enkai, ninchoo iyie ninche osarge metooko. Ina nairirikino ninche.” Naning olperere lo lasar pee eishir ajo, “Ee Olaitoriani Enkai, Olmagilani, esipa neitoriori nkiguanat inono.” Nebukoki olmalaika liong'uan olbakuli lenye enkolong, neishori ninye metapejo ltung'ana te nkima. Nepeji iltung'ana te nkirowuaj napi, nedek ninche enkarna e Enkai naa ninye naata engolon te kulo meita. Neitu eirridu ninche anaa eisho ninye enkitoo. Nebukoki olmalaika le imiet olbakuli lenye ilo orika le nkitoo le ina ng'ues, nemisimisu enkitoria enye. Neony iltung'ana ilng'ejepa lenye te mion. Nedek Enkai e shumata te nkaraki emion o te nkaraki impaldakani, neitu eirridu nkiaasin enye. Nebukoki olmalaika le ile olbakuli lenye olkeju kitok le Freti, netoyu enkare e ilo keju, pee eitobiri enkoitoi naimu ilaiguanak ooing'uaa enkilepunoto e nkolong. Nadol nanu, epuku te nkutuk e ilo asurai, o te nkutuk e ina ng'ues, o te nkutuk e ilo le lejare, inkiyang'eta uni torrok naaijo ntuaan e nkare. Amu inkiyang'eta oo loiriruani ninche naas inkitoduaat, nepuaya enetii ilaiguanak le nkop pooki pee eiturrurru ninche te njore ena olong kitok e Enkai Magilani. “Ng'ura, kalotu nanu anaa olapurroni. Emayiana ilo oshololo, ogolie inkilani enyena pee melo ake meishopo nedoli meishopo.” Neiturrur ninche te wueji neji te nkutuk oo Lhebrania Har-Magedon. Nebukoki olmalaika li oopishana olbakuli lenye atua enkijape. Nepuku oltoilo sapuk ti atua enkaji e Enkai, eing'uaa ilo orika le nkitoo ejo, “Etaasaki!” Nepuku nkiwuang'at e enkimerlel, o ltoiloishi sapuki, o ndarat o enkikurrukur, o enkikirikirata e nkop neitu ae kata etumi anaa nejing tung'ani oriong enkop. Kitok ilo okirikiri le nkop oleng. Neoro ina anasa kitok aaku matuan uni, neurori nkanas kituaak oo loreren. Nedamu Enkai Babilon kitok, pee eitook ninye metimita enkikompe e mpijan e ngoro enye. Neilanyisho aaisik pooki lemankale, neitu eitokini aadol ildoinyo. Neshau enchan oo soito sapukin oleng, laa nkiloi onom enkiroishi o soito obo, nedoiki ltung'ana eing'uaa shumata, o metaba anaa nedek iltung'ana Enkai te nkaraki ina shan oo soito, ilo meitai oitureisho naleng. Neitoki olmalaika obo le lelo oopishana ooata ilbakulini oopishana alotu enatii naajoki, “Wou, maaitoduaa nanu iyie enkiguana nadung'okini ena mulayoi kitok, natonita too nkariak kumok. Naa te ninye etololoitore ilaiguanak le nkop naa te naisho e loloito enye etemerate lelo ootii enkop.” Naaya ninye nanu te nkiyang'et ong'ata nadol enkitok natonita te nkoriong e ng'ues nanyokie nabore nkarn e morore neeta lukuny naapishana o mowuarak tomon. Netukusoki ina kitok too nkilani morijo o naanyokie. Neikodi te sahabu o too ntoto sidain o museitani naagol o too lului. Neibung'ita te nkaina enye enkikompe e sahabu nabore olminong o loirerioni le loloito enye. Ore to lpura le nkomom enye neigero enkarna e nkisudoroto: “Babilon kitok, ngoto mulayoni o ilo minong le nkop.” Nadol ina kitok etemere to sarge loo sinyat le Enkai o to sarge loo lchakenini le Yesu. Ore pee adol nanu ninye naing'asia oleng. Kake aatiaaka olmalaika, “Ainyoo pee ing'asia? Kaaliki taata enkisudoroto e na kitok, o ene ina ng'ues naata lukuny naapishana o mowuarak tomon nanapita ninye. Ore ina ng'ues nitoduaa keetae apa, nemeekure eetae. Naa kepuku ailepu te ngumoto nemeeta enkiting'oto nelo atua enkidaaroto. Ore lelo oomanya enkop leitu esiri inkarn enye te mbuku e mpuaan ebaiki apa pee eitamanyuni enkop naa keing'asia te nedol ina ng'ues, amu etii apa, nemeetii taata, naa kelotu. Eyieu ena eng'eno nagut. Ore nena lukuny naapishana naa ildoinyo oopishana ootonita ina kitok. Naa ilaiguanak oopishana sii. Netabatatate imiet lenye, netii obo, neton eitu elotu olikae, naa ore te nelotu meeta nchere pee me nkiti kata ake eton. Ore ina ng'ues apa natii nemetii taata, naa ene isiet kake ene nena naapishana sii, naa kelotu enkidaaroto. “Ore nena mowuarak tomon nitoduaa naa ilaiguanak tomon leton eitu eng'amu engolon naitoreishore. Kake keng'amu engolon anaa ilaiguanak te saa nabo te nebo ina ng'ues. Ile ndamunoto nabo kulo neishoo ina ng'ues engolon o enkidimata enye. Neitayunyie olarrabal ilo kuoo le ker, nemir Olkuoo le Ker ninche, amu ninye Olaitoriani loo laitoriak naa Olaiguanani loo laiguanak, ore lelo ooboitare ninye naa keipoto negeluno neisiligayu.” Naajoki ninye nanu, “Ore nena ariak nitoduaa te ine netonie emulayoi naa iltung'ana o lororani o nkuapi o lng'ejepa. Ore nena mowuarak tomon nitoduaa, ore ninche o ina ng'ues keibayu ina mulayoi, nekiny ninye aitalioo meishopo, nenya nkiri o sesen lenye nepejoo ninye te nkima. Amu Enkai natipika atua oltau lenye meitabai inaayieu ninye, neaku ile ndamunoto nabo, neishooyo engolon enye, e nkitoria aaisho ina ng'ues, o metaba anaa neitabari ororei le Enkai. Ore ina kitok nitoduaa naa ina anasa kitok naata enkitoria te shumata oo laiguanak le nkop.” Ore te siadi ena nadol likae malaika edou aing'uaa shumata neeta enkidimata sapuk, neitawang'i enkop te ina sikar enye. Nebuaku to ltoilo le ngolon ejo, “Eturori, eturori Babilon kitok! Etaa emanyisho oo loiriruani, orrumat le pooki kiyang'et torrono orrumat le pooki motonyi torrono naibaisho. Amu etooko iloreren pooki enaisho oo sabibu, oo ng'uarrat enyena torrok. Ore laiguanak le nkop neloloito te ninye, netaa karsisi ilbiasharani te nkop te nkiborra enye oo nkonyek.” Naitoki aning likae toilo oing'uaa shumata ejo, “Entupuku entung'uai ninye lo tung'ana laainei, pee mimbung'arere ake ninye ti atua ing'ok enyena, pee ming'arierie ake ilmeita lenyena. Amu eturupate ng'ok enyena oleng aabaya shumata. Netadamua Enkai intorrok enyena. Entalaaki ninye anaa enaitalakishe sii ninye makewan. Entalaaki katitin are te risioroto oo nkiaasin enyena. Eng'oling'olaki ninye mboreitin are te ina kikompe naing'ola sii ninye. Ore anaa ina naturupa ninye kewan neiborrie onyek nchoo sii ninye olosilisili o lkiyioi ntorisioki ena. Amu ejo to ltau lenye eton ara enkaiguanani, mara nanu enkoliai, ore olkiyioi madol ae kata. Metaa kepuonu ilmeita lenyena te nkolong nabo, inkeyaitin o lkiyioi o lameyu. Naa kepejori ninye te nkima. Amu eimagilani Olaitoriani Enkai odung'oki ninye enkiguana.” Ore ilaiguanak le nkop ootololoitare o ninye neiborrie onyek te nebo ninye naa keyietu neishir neishiraki ninye te nedol empuruo enye e mpejoroto. Neitashe ninche te nelakua te nkuretisho o enkitamioto enye ejo, “Wooi ina anasa kitok, naa magilani Babilon. Te saa nabo eewuo endung'okinoto ino enkiguana.” Ore ilbiasharani le nkop neishir aaishiraki ninye amu meekure eetae hoo obo oitoki ainyiang'u imasaa enyena. Masaa e sahabu, enkosholai, o soito oogol enkinyang'a o lului, o lkarash oopuyiapui o lmorijo, o loonyokie o mpukunot pooki oo lkeek oorropil o ntokitin pooki naaguetuni too lala loo lkanchaoni, o ntokitin pooki oo nkeek naagol enkinyang'a, o suyai, o esekenkei o ltoto ooibor. Olmadalasini oltankausi o enkorropil, o emanoo narropil, olbani, o enaisho oo sabibu, o eilata enkurma napuyiapui, o enkano, o nkishu o nkerrai o mbartan o ngarrin oo mbartan o rrindiki, aa taa iltauja loo ltung'ana. “Ore ilo ng'anayioi oshi otang'uarra oltau lino nikitung'uayie iyie, ore intokitin inono pooki e nkuso o esikar kitung'uaitie ninche, nemeitokini ae kata aatum.” Ore ilamirak le nena masaa ootudupore enkarsisisho naing'uaa ninye neitashe te nelakua te nkuretisho e mion enye, neishir neyietu abuaku ajo, “Wooi wooi ena kito anasa naishopo apa too nkilani naapuyiapui o morijo o naanyokie, neikodi, te sahabu o too soito oogol enkinyang'a o too lului. Te saa nabo eidaikieki ena arsisisho pooki.” Ore ilkituaak pooki loo melin, o ltung'ana oopuo too naaiposha, ilaisiaayiak loo melin o pooki laa ore enkinyang'a enye naa enaiposha etii neitashe te nelakua. Nebuaku aaishir ina kata pee edol empuruo e mpejoroto nejo, kaa anasa nanyaanyukie enkanasa kitok neisuaaki enterit ilukuny enye, eishiraki ninye. Neyietu nebuaku aaishir nejo, “Wooi, wooi, te nkaraki ena anasa kitok natudupore kulo pooki ooata melin, te naiposha te ina arsisisho enye. Te saa nabo eidaikieki. Ting'idakinoyu iyie ninye na shumata o intae isinyat, o lkipaareta, o loibonok le Enkai, amu etudung' oko Enkai ninye enkiguana te nkaraki intae.” Nedumu olmalaika ogol osoit kitok laaijo oloiwutuutishoreki nenang aki atua enaiposha nejo, “Neijia eikunakini Babilon kitok ina ang kitok esuluni enkop te ngolon, meitokini ae kata aatum; ore iltoiloishi loo loowosh nkinantani o laranyak, o lakutak loo ndulen, o ntarumpetani, nemeitokini ae kata aaning ti atua iyie. Nemeitokini ae kata aatum ti atua iyie oltung'ani le nkiaas e nkarriyiano hoo nabo. Ore Oltoilo lo soit ooiwutuutishoreki nemeitokini ae kata aaning ti atua iyie; ore ewang'an o ltaa nemeitoki ae kata awang'u ti atua iyie; ore oltoilo lo loyamisho o enayami nemeitokini ae kata aaning ti atua iyie amu ore lbiasharani linono naa ninche apa ltung'ana kituaak te nkop, netelejaki nkuapi pooki te ina sakutore ino. Naa ti atua ninye enotoki osarge loo loibonok le Enkai o loo sinyat, o lelo pooki ootaraki te nkop.” Ore te siadi ena naning entoki naijo oltoilo kitok lo lorora kitok te shumata ebuaku aajo, “Haleluya, ene Enkai ang enjeunoto o enkisisa o ngolon. Amu ore nkiguanat enyena nesipa neitoriori; etudung'oko ninye enkiguana ina mulayoi kitok apa naitapong'oyie enkop te loloito enye, neitalakua te ninye osarge loo sinkan lenyena.” Neitoki ake ninche aaigil aabuaku aajo, “Haleluya eijukujuk empuruo enye ailep alo shumata ntarasi o ntarasi.” Ore lelo payiani tikitam oong'uan o nena ng'uesi naaishu nebatata neserem Enkai etonita te ilo orika le nkitoo, ejoito, “Esai Haleluya!” Nepuku oltoilo oing'uaa olorika le nkitoo ebuaku aajo “Esisa Enkai ang intae isinkan lenyena pooki, intae olooure ninye, ilooti o lkituaak.” Naitoki aning oltoilo laaijo olo lorora kitok oikununo anaa enkikurrukur oo nkariak kumok netiu sii anaa indarat oo nkikurrukurrot sapuki ebuaku aajo, “Haleluya! Amu Olaitoriani Enkai ang Magilani oitoreisho. Mating'idata nikiosh olkerempe, nikincho ninye enkitoo, amu etabawua enkiyama o Lkuoo le Ker, netukuso kewan ina nayami. Neishooki ninye meishopo ilkarash oopuyiapui ooibor newang,” nemetii olduruki. Amu ore lelo karash sidain naa iasat supati e lelo sinyat. Naajoki ilo malaika, “Ingero, ena; emayiana lelo ooitoomonoki to sirua le nkiyama o Lkuoo le Ker.” Naajoki ninye nanu, “Irorei oosipa le Enkai kulo.” Nabatata too nkejek enyena aserem ninye, kake aatiaaka ninye nanu, “Mintoki aiko neijia! Amu kara ake osinka oasisho te nebo iyie o lalashera linono ooibung'ita enchakenisho e Yesu. Teserema Enkai!” Amu ore enchakenisho e Yesu ninye enkiyang'et e naibon. Naitoki adol shumata etaboloki; ng'ura, nadol embarta naibor, ore ilo okedito ina naa keji, Oloisiligayu naa Asipani, naa too sipat eiguana neitayu olarrabal. Ore nkonyek enyena neikununo anaa olng'ejep le nkima neeta te lukunya enye nkaradan e nkitoria kumok, neeta enkarna nasirakino nemeyiolo likae tung'ani kake ninye ake oyiolo. Neishopito olkila oitadoikioki osarge neji enkarna naipotieki Ororei le Enkai. Nesujita ninye njorin e shumata naaishopito nkilani sidain e kitani napuyiapui newang, nesujita ninye imbartan naaibor. Nepuku te nkutuk enye olalem opi laa ninye earie inkuapi, neitore ninche te ng'udi e sekenkei. Neituny ninye ewueji e nkironyet e naisho e ngoro napi e Enkai Magilani. Ore to lkila lenye o te nkupes enye neeta enkarna naigerokino ajo, Olaiguanani loo laiguanak naa Olaitoriani loo laitoriak. Naitoki adol olmalaika eitashe ti atua enkolong. Nebuaku aipotisho to ltoilo sapuk aipot imotonyi pooki naapuoto te mpolos o loing'ang'e, nejoki, “Wootu enturrurrunye osirua kitok le Enkai, pee inosinoso nkiri oo ilaiguanak, o ilarikok loo njorin, o nkiri oo ltung'ana magil, nkiri oo mbartan o noo lookedito ninche, o nkiri oo ltung'ana pooki, loolakuno o rrindiki, ndung'ot pokira, ilooti o lkituaak.” Nadol nanu ina ng'ues o lelo aiguanak le nkop te nebo o njorin enye eiturrurrote pee earare ilo okedito ina barta nearare enjore neye. Neibung'i ina ng'ues, te nebo ilo oiboni lenye le lejare, otaasa ilmonek te dukuya ninye naa ninche etelejie lelo ootang'amaitie olmishire le ina ng'ues o lelo ooteserema ina kitanyaanyukoto enye ore lelo pokira o are, nenang'akini eishu atua ilo balbal le nkima, oyupuyup te nkibiriti. Ore ilootelekutua neari to lalem le ilo okedito ina barta. Te ilo alem opuku ti tua enkutuk enye; ore imotonyi pooki nenya inkiri enye omeisiligata. Naitoki adol olmalaika odou aing'uaa shumata, eibung'ita te nkaina enye olbolet le ina gumoto nemeeta eneiting'ie o lpisiai kitok. Neibung ninye ilo asurai, ilo asurai musana laa ninye oloirirua naa sheitani, neen ninye ilarin iip tomon. Nenang'aki ninye atua ina gumoto, neiken nemishiraa ninye te ine pee meitoki ae kata alej iloreren, o metaba anaa neishunye lelo arin iip tomon. Ore pee elusoo ina nemeeta nchere melakuni te nkiti rishata. Naitoki adol ilorikan le nkitoo, ore lelo ootonita ninche naa ninche eishoro endung'okinoto e nkiguana. Naitoki sii adol iltauja le lelo ootudung'oyioki lukuny enye te nkaraki enchakenisho e Yesu o te nkaraki ororei le Enkai, naa lelo leitu eserem ina ng'ues aashu ina kitanyaanyukoto enye, neitu, eng'amu olmishire lenye too lpurai loo nkomomi enye aashu too nkaik enye. Nepiu ninche neitoreisho te nebo Kristo ilarin iip tomon. Ore lelo kulikae ootuata neitu epiu o metaba anaa neishunye ilarin iip tomon. Ena empiunoto e dukuya. Emayiana naa sinyati ilo ong'arieki empiunoto e dukuya. Ore te lelo, nemeeta keeya e are engolon. Kake keaku ninche ilapolosak le Enkai o le Kristo naa keitoreisho ninche te nebo ninye ilarin iip tomon. Ore pee eishunye lelo arin iip tomon, nelakuni sheitani te korokoroni enye. Naa kelotu alej nkuapi naatii lubot pokira ong'uan e nkop, aa taa Gog o Magog, neiturrur ninche te nkaraki olarrabal, neba esiana enye anaa osinyai le naiposha. Neidondorra ninche aailepaki endapasho e nkop, neman ina ang oo ilng'oborri loo sinyat, o ina anasa kirotet. Etadowuo enkima eing'uaa shumata neidaikie ninche. Ore oloirirua laa ninye apa oteleja ninche nenang'akini atua olbalbal le nkima o enkibiriti ine netii ina ng'ues o ilo oiboni le lejare, nepuoi aaitame ninche dama o kewarie intarasi o ntarasi. Naitoki adol olorika le nkitoo oibor kitok o ilo otonita neilanyisho enkop o keper aaing'uaa ine netii ninye nelaii ewueji neishaa ninche. Nadol nanu lelo apa ootuata, ilkituaak o looti eitashe te dukuya olorika le nkitoo, neboli mbukui. Neitokini sii aabol ae buku naa ninye embuku e mpuaan. Nedung'okini lelo ootuata enkiguana anaa enasira ti atua nena bukui, te nena apa naataasa ninche. Neitayu enaiposha ilootuata ootii atua ninye. Neitayu keeya o ene meneng'a ninche neiguanareki ninche too naataasa. Nenang'akini keeya o enemeneng'a atua ilo balbal le nkima; Ena ninye keeya e are, ilo balbal le nkima. Naa ore pooki ng'ae leitu etumi enkarna enye eigero ti atua ina buku e mpuaan, nenang'akini ninye atua olbalbal le nkima. Naitoki adol keper ng'ejuk o enkop ng'ejuk. Amu ore keper e dukuya o enkop e dukuya neidipa aatulusoi, meekure eetae enaiposha. Nadol ina anasa sinyati, Yerusalem ng'ejuk edou te shumata eing'uaa Enkai, eitobiraki anaa esiankiki naikodokini olpayian lenye. Naning oltoilo kitok oing'uaa olorika le nkitoo ejo, “Ng'ura etii emanyisho e Enkai te nebo iltung'ana. Keton ninye te nebo ninche neaku iltung'ana lenyena. Ore Enkai kewan neaku ketii te nebo ninche; naa kejut ninye pooki kiyioi too nkonyek enye, ore keeya nemeitokini ae kata aata aashu eitokini aata olkiyioi, aashu enkishirata aashu emion ae kata. Amu etulusoitie intokitin pooki e dukuya.” Ore ilo otonita to lorika le nkitoo nejo, “Ng'ura, ekaitaa intokitin pooki ng'ejuko.” Nejo sii, “Ngero ena, amu ore kulo rorei naa keisiligayu nesipa.” Naajoki ninye nanu. “Eidipe, ara nanu Alfa o Omega, enkiterunoto e enkiting'oto. Ore oloata enkure naa kaisho nanu enkare metii enkinyiang'a eing'uaa enchorro e nkare e mpuaan. Ore ilo omirisho naa ketum ena jung'ore naa kaaku nanu Enkai enye neaku ninye enkerai ai. Kake ore ilkureti o lemeiruk, o looikereek, larak, o loololoito o lasakutok, o looserem inkitanyaanyukot, o lalejak pooki, ore ewueji enye naa keaku ilo balbal le nkima oyupuyup te nkima e nkibiriti. Naa ninye enkeeya e are.” Neitoki alotu olmalaika obo le lekua oopishana ooata ilbakulini naapishana naabore ilmeita oopishana oobayie naairorie naajoki, “Wou, kaaitodol ina siankiki, ina kitok o Lkuoo le Ker.” Naaya enkiyang'et o maaitabaiki oldoinyo kitok oado, naaitodol ina anasa sinyati, Yerusalem, edou te shumata eing'uaa enetii Enkai te keper, eeta enkitoo e Enkai, naikununo enkitiil anaa eno soit lemetumoyu aashu osoit oji yasper, owang anaa oltotoi. Neeta esuntai kitok naado, neeta nchomito tomon o aare, netii ilmalaika tomon o aare, nena shomito, nesira inkarn e lelo oshon tomon o aare loo layiok le Siraeli te nena shomito. Netii enkalo e nkilepunoto e nkolong inchomito uni, netii kopikop inchomito uni, netii moikuape uni, netii endoyioroto e nkolong inchomito uni. Neeta ina suntai e ina anasa ilkitamanyunot tomon o aare, nesirakino ninche inkarn tomon o aare o lkipaareta lo Lkuoo le Ker. Ore ilo laairorie nanu neeta ninye entemet e ng'udi e sahabu natemie ina anasa, o nchomito enyena o sunta. Ore ina anasa nerisio nkaloli pokira ong'uan, erisio enkadoro enye o endapasho enye, netem ninye ina ang te ina ng'udi, neaku kilometa nkalifuni are o iip ong'uan. Erisio enkadoro o endapasho o enkadoro nailep. Netem sii esuntai enye naa meta ntomoni ile te ntemata o ltung'ani aa taa enoo lmalaika. Ore ina suntai naa osoit oji yasper eshetare. Ore ina anasa naa ene sahabu nasila, newang anaa kiook. Ore ilkitamanyunot le suntai e ina anasa neikodoki te pooki soit oata tipat; ore ole dukuya naa yasper, ore oli aare naa soito pusi ooji safire, ore oli okuni naa soito ooji agate, ore oli oong'uan naa soito oonyori ooji emerald, ore ole imiet naa osoit oji oniks ore ole ile naa osoit oji karnelian, ore ole oopishana naa osoit oji krisolite, ore ole isiet naa osoit oji beril, ore oli ooudo naa osoit oji topas, ore ole tomon naa osoit oji krisopras, ore ole tomon o obo naa osoit oji yasinas, ore ole tomon o aare naa osoit oji ametist. Ore nena shomito tomon o aare naa ilului tomon o aare, ore ake enkishomi naa lulu nabo eitobirieki, ore enkoitoi e ina anasa naa sahabu nasila newang anaa kiook. Neitu adol enkaji e Enkai te ina anasa amu ore enkaji enye naa Olaitoriani Enkai Magilani, o Lkuoo le Ker. Ore ina anasa nemeetayie tipat enkolong aashu olapa oitawang ninye amu enkitoo e Enkai ewang'an enye naa ilo Kuoo le Ker Oltaa lenye. Naa ina wang'an enye epuoyie iloreren ore ilaiguanak neyau enkitoo enye atua ninye. Nemeikeni ae kata inchomito enyena dama nemeetae enkewarie te ine. Naa keyau ninche atua ina anasa enkitoo o enkanyit oo loreren. Kake mejing entoki hoo nabo naiduruk atua ninye aashu pooki ng'ae oas olminong aashu elejare, kake lelo ake ooigeroki inkarn enye ti atua embuku e mpuaan e ilo Kuoo le Ker. Naaitoki aitodol nanu olkeju le nkare e mpuaan, owang anaa oltotoi orukunye aing'uaa olorika le nkitoo le Enkai o lo Kuoo le Ker. Neruko aim empolos enkoitoi nalala e ina anasa. Ore sii too lkekuno pokira leilo keju netii ilo shani le mpuaan te nebo o mpukunot tomon o aare oo lng'anayio lenyena. Neiu ake to lapa lelo ng'anayio lenyena; ore imbenek e ilo shani naa ninche naaishiunye iloreren. Nemeitokini ae kata aata hoo toki nadiaa, kake ilo orika le nkitoo le Enkai o lo Lkuoo le Ker, ninche kenya ootii atua ine, naa keserem ninye isinkan lenyena; naa Kedol ninche enkomom enye, ore inkarn enye netii ilpurai loo nkomomi enye. Nemeitokini ai kata aata enkewarie nemeetayie ninche tipat ewang'an o ltaa aashu ene nkolong, amu Olaitoriani Enkai oaku ewang'an, naa keitoreisho ninche intarasi ontarasi. Naajoki ninye nanu, “Keisiligayu nesipa kulo rorei. Naa Olaitoriani Enkai o nkiyang'eta oo loibonok le Enkai nairriwua olmalaika lenye meitoduaa isinkan lenyena nena nemeeta nchere pee eitu epuonu aasieku. Naa ng'ura, kalotu asioku.” Emayiana ilo oibung ororei le naibon e na buku. Nanu Yohana ilo otoning'o nadol kuna baa, Ore ake pee aning nadol ninche, nabatata too nkejek e ilo malaika laaitoduaa ninche aserem ninye. Kake aatiaaka ninye nanu, “Mintoki aiko neijia! Ara nanu osinka te nebo iyie o lalashera linono lelo oibonok le Enkai, o lelo ooibung irorei le na mbuku. Enkai teserema.” Naajoki ninye nanu, “Minuk irorei le naibon e na buku, amu etinyikua enkata. Inchoo olarruoni eton aas enkarrueisho, nchoo oloiduruk eton eiduruk, nchoo osupat eton aas isupati. Neton osinyati aa sinyati. Ng'ura, kalotu asioku naata olekoisiaayio lai te nebo nanu, pee alaaki pooki ng'ae anaa anataasa ninye. Ara nanu Alfa o Omega, ole dukuya o le siadi, enkiterunoto o enkiting'oto.” Emayiana lelo ooisuj ilkilani lenye pee etum esipata nabaikinye ilo shani le mpuaan netum sii aaima nchomito e ina anasa. Auluo etii ildiein, o lasakutok, o loololoito, o looitayu iloikop, o looserem inkitanyaanyukot, o pooki tung'ani onyor elejare nelejisho. “Nanu Yesu laairriwaka iyie olmalaika lai meeu enitii, ayau ena shakenisho enkaraki sirito, nanu entonai e ishoi e Daudi, olakira owang le Nkakenya.” Ejo enkiyang'et o ina siankiki narikori. “Wou!” Nchoo ilo oning ejo, “Wou!” Nchoo ilo oata enkure, elotu, nchoo ilo oyieu eng'amu enkare e mpuaan metii enkinyiang'a. Aikok pooki ng'ae oning irorei le naibon e na buku: te nepon ake oltung'ani, neponiki sii ninye Enkai lelo meita ootolimuoki ti atua ena buku. Ore pooki ng'ae oiwuang'ie ti atua ilo irorei le naibon e na buku, neiwuang'ie Enkai erubata enye ti atua ilo shani le mpuaan ti atua ina anasa sinyati, nalimuno imbaa enye ti atua ena buku. Ore ilo oishakenoki kuna baa, “Ejo kalotu asioku!” Esai. Wou, Olaitoriani Yesu! Metaa empiris o Laitoriani Yesu te nebo isinyat pooki. Esai.