Ini tu daftar keturunan nene moyang dari Yesus Kristus. Yesus ini tu raja Daud pe keturunan deng Abraham pe keturunan. Bagini tu daftar: Abraham dapa anak laki-laki, de pe nama Ishak. Ishak dapa anak laki-laki, de pe nama Yakub. Yakub dapa anak laki-laki, de pe nama Yehuda deng Yehuda pe sudara-sudara laki-laki. Yehuda dapa dua anak laki-laki dari de pe bini Tamar, dorang dua pe nama Peres deng Zerah. Peres dapa anak laki-laki, de pe nama Hezron. Hezron dapa anak laki-laki, de pe nama Ram. Ram dapa anak laki-laki, de pe nama Aminadab. Aminadab dapa anak laki-laki, de pe nama Nahason. Nahason dapa anak laki-laki, de pe nama Salmon. Salmon dapa anak laki-laki dari de pe bini Rahab, tu anak itu pe nama Boas. Boas dapa anak laki-laki dari Rut tu de pe bini, tu anak itu pe nama Obed. Obed dapa anak laki-laki, de pe nama Isai. Isai dapa anak laki-laki, de pe nama Daud, tu jadi bangsa Israel pe raja. Daud dapa anak laki-laki dari Batsyeba, tu Uria pe bini dulu, tu anak itu pe nama Salomo. Salomo dapa anak laki-laki, de pe nama Rehabeam. Rehabeam dapa anak laki-laki, de pe nama Abia. Abia dapa anak laki-laki, de pe nama Asa. Asa dapa anak laki-laki, de pe nama Yosafat. Yosafat dapa anak laki-laki, de pe nama Yoram. Yoram dapa anak laki-laki, de pe nama Uzia. Uzia dapa anak laki-laki, de pe nama Yotam. Yotam dapa anak laki-laki, de pe nama Ahas. Ahas dapa anak laki-laki, de pe nama Hizkia. Hizkia dapa anak laki-laki, de pe nama Manasye. Manasye dapa anak laki-laki, de pe nama Amon. Amon dapa anak laki-laki, de pe nama Yosia. Waktu bangsa Israel dapa buang ka Babel, Yosia dapa anak laki-laki, de pe nama Yekhonya deng de pe sudara-sudara laki-laki. Abis bangsa Israel dapa buang ka Babel, Yekhonya dapa anak laki-laki, tu anak itu pe nama Sealtiel. Sealtiel dapa anak laki-laki, de pe nama Zerubabel. Zerubabel dapa anak laki-laki, de pe nama Abihud. Abihud dapa anak laki-laki, de pe nama Elyakim. Elyakim dapa anak laki-laki, de pe nama Azor. Azor dapa anak laki-laki, de pe nama Zadok. Zadok dapa anak laki-laki, de pe nama Akhim. Akhim dapa anak laki-laki, de pe nama Eliud. Eliud dapa anak laki-laki, de pe nama Eleazar. Eleazar dapa anak laki-laki, de pe nama Matan. Matan dapa anak laki-laki, de pe nama Yakub. Yakub dapa anak laki-laki, de pe nama Yusuf. Yusuf ini tu Maria pe laki. Maria kase lahir anak laki-laki, tu Anak itu pe nama Yesus, yang ja bilang Kristus tu Raja yang se slamat pa manusia. Jadi mulai dari Abraham sampe pa Daud, ada ampa blas keturunan. Kong dari Daud sampe waktu bangsa Israel dapa buang ka Babel, ada ampa blas keturunan lei. Abis itu, dari waktu bangsa Israel hidop di Babel sampe waktu Kristus, ada ampa blas keturunan lei. Bagini tu cirita tentang Yesus Kristus da lahir: Maria, tu Yesus pe mama so baku janji mo kaweng deng Yusuf. Waktu itu dorang dua blum perna tidor sama-sama, mar Maria so hamil. Maria da hamil lantaran Roh Kudus pe kuasa. Kong waktu Yusuf dapa tau Maria hamil, dia barencana mo se putus pa Maria deng babadiam. Soalnya Yusuf nimau mo beking malo pa Maria di muka banya orang. Yusuf nimau beking malo pa Maria lantaran dia itu orang yang ja beking tu butul di muka pa Tuhan. Mar waktu Yusuf masi da pikir-pikir tu de pe rencana itu, Tuhan pe malaekat datang pa dia di mimpi. Malaekat itu bilang pa dia, “Yusuf, raja Daud pe keturunan, ngana nyanda usa tako mo ambe Maria jadi ngana pe bini. Soalnya tu bayi yang ada pa de pe puru itu dari Roh Kudus. Nanti Maria mo se lahir satu anak laki-laki. Ngana musti kase nama tu anak itu Yesus, lantaran Dia yang mo se slamat tu Dia pe orang-orang dari dorang pe dosa-dosa.” Samua tu da jadi itu Tuhan so bilang dari dulu lewat Dia pe nabi, kong skarang samua itu so gnap. Bagini tu Tuhan da bilang, “Tarukira jo bae-bae, nanti ada satu nona yang masi prawan mo hamil. Dia mo se lahir satu Anak laki-laki, kong orang-orang mo pangge pa tu Anak itu Imanuel.” (Imanuel dari kata Ibrani tu de pe arti: Tuhan Allah da sama-sama deng torang.) Pe klar bamimpi, Yusuf tabangong kong beking samua tu Tuhan pe malaekat da bilang pa dia. Dia ambe pa Maria jadi de pe bini. Mar slama Maria blum se lahir de pe Anak itu, Yusuf nyanda tidor sama-sama deng Maria. Kong waktu Anak laki-laki itu so lahir, Yusuf kase nama pa tu Anak itu, Yesus. Yesus da lahir di Betlehem di daera Yudea waktu Herodes jadi raja di sana. Waktu itu, ada ahli-ahli bintang datang dari Timur ka Yerusalem. Dorang batanya pa orang-orang di sana, “Di mana kang tu orang Yahudi pe raja yang baru lahir itu? Soalnya torang da lia di Timur tu bintang yang da se tanda Dia da lahir, kong torang datang skarang for mo semba pa Dia.” Waktu raja Herodes dengar tentang hal itu, dia jadi kuatir, bagitu lei deng samua orang di Yerusalem. So itu raja Herodes suru se kumpul tu orang-orang Yahudi pe imam-imam kapala deng ahli-ahli Taurat, kong dia batanya pa dorang, “Di mana Kristus tu Raja yang se slamat pa manusia mo lahir akang?” Dorang manyao pa dia, “Dia mo lahir di Betlehem, di daera Yudea. Soalnya ada nabi yang so dari dulu da tulis tu Tuhan Allah da bilang pa dia bagini, ‘Hei orang-orang di Betlehem di tana Yehuda. Ngoni pe tampa bukang yang paling kacili dari antara tu tampa-tampa laeng di Yehuda. Soalnya dari pa ngoni mo muncul satu pemimpin yang mo pimpin tu Kita pe orang-orang Israel, Dia bapimpin sama deng gembala yang bajaga de pe domba.’ ” Pe dengar itu, raja Herodes babadiam pangge tu bebrapa ahli bintang itu, trus dia cari tau bae-bae pa dorang kalu tempo apa tu bintang da muncul. Abis itu, dia suru pa dorang pigi ka Betlehem. Dia bilang pa dorang, “Pigi jo ngoni ka Betlehem, kong cari bae-bae tu Anak itu. Kalu ngoni so dapa pa Dia, ngoni datang kase tau akang pa kita supaya kita lei bole mo pigi ka sana for mo semba pa Dia.” Pe dengar tu raja Herodes da bilang, dorang brangkat. Waktu dorang pigi, dorang dapa lia tu bintang yang sama deng tu dorang da lia di sabla Timur. Tu bintang itu balebe dulu dari pa dorang kong brenti di atas tampa tu Anak itu ada. Waktu dorang lia tu bintang, dorang snang skali. Kong waktu dorang maso ka ruma itu, dorang lia tu Anak ada sama-sama deng Maria tu de pe mama. Trus dorang berlutut basemba pa tu Anak itu. Dorang lei buka tu dong pe tampa harta, kong dorang kase kaluar tu harta yang dorang da bawa for kase pa tu Anak itu. Tu harta-harta itu: mas, kemenyan deng mur. Abis itu, Tuhan Allah kase pringatan pa tu ahli-ahli bintang itu lewat mimpi. Pa dorang pe mimpi itu Tuhan Allah da bilang, “Ngoni jang babale pa raja Herodes.” Jadi dorang pulang pa dorang pe negri iko jalang laeng. Serta tu ahli-ahli bintang itu brangkat, Tuhan Allah pe malaekat batunjung pa Yusuf di mimpi. Tu malaekat itu bilang pa dia, “Yusuf, bangong jo! Bawa tu Anak deng tu Anak pe mama kong pi lari ka Mesir. Ngoni tinggal jo di sana sampe kita kase tau tempo apa ngoni bole pulang ulang kamari. Soalnya raja Herodes mo cari tu Anak itu for mo bunung pa Dia.” Pe dengar itu, Yusuf tabangong, kong malam itu jo, dia bawa tu Anak deng tu Anak pe mama kong pigi ka Mesir. Dorang tinggal di Mesir sampe raja Herodes mati. Samua itu jadi sama deng tu Tuhan perna da bilang dulu pa Dia pe nabi bagini, “Kita da pangge Kita pe Anak for kaluar dari negri Mesir.” Serta raja Herodes sadar kalu tu ahli-ahli bintang itu so tipu pa dia, dia jadi mara skali. So itu dia suru de pe orang-orang ka Betlehem deng kampung-kampung tu ada dekat situ for bunung samua tu anak laki-laki yang umur dua taong ka bawa. Dia da suru bunung tu anak laki-laki yang umur dua taong ka bawa lantaran dia so rekeng tu waktu dari tu ahli-ahli bintang itu da lia pertama kali tu bintang kira-kira dua taong lalu. Waktu dorang bunung tu anak-anak itu, apa tu Tuhan da bilang dulu pa nabi Yeremia so jadi. Bagini tu Tuhan da bilang, “Di Rama, dapa dengar orang pe suara yang da bamanangis lantaran sedi skali. Itu tu Rahel pe suara yang da manangis for de pe anak-anak. Kong dia nimau orang mo buju pa dia, lantaran de pe anak-anak so mati.” Serta raja Herodes so mati, Yusuf masi ada di Mesir kong Tuhan pe malaekat batunjung pa dia di mimpi. Tu malaekat itu bilang pa dia, “Yusuf bangong jo, kong bawa tu Anak deng tu Anak pe mama pulang ka tana Israel. Soalnya tu orang-orang yang da cari for bunung pa tu Anak itu so mati.” Pe dengar itu, Yusuf bangong kong bawa tu Anak deng tu Anak pe mama pulang ka tana Israel. Mar waktu Yusuf dapa dengar kalu Herodes pe anak tu Arkhelaus da ganti pa dia so jadi raja di daera Yudea, Yusuf jadi tako mo pulang ka sana. Trus Tuhan kase tau pa Yusuf di mimpi, supaya dia jang pigi di daera Yudea mar pigi di daera Galilea. Jadi dorang pigi ka Galilea, kong dorang tinggal di satu kota tu de pe nama Nazaret. Deng bagitu, apa tu Tuhan da bilang dulu pa nabi-nabi so jadi, kalu orang-orang mo bilang tu Anak itu, ‘orang Nazaret’. Yohanes Pembaptis pigi ka padang gurun di daera Yudea. Dia kase tau tu Tuhan Allah pe pesan, dia bilang, “Bertobat jo lantaran so nyanda lama Tuhan Allah mo Berkuasa sbagai Raja!” Yohanes ini, tu orang yang nabi Yesaya perna da bilang dulu. Nabi Yesaya da bilang bagini, “Ada orang yang babicara deng suara kuat di padang gurun. Tu orang itu babilang, ‘Buka jalang for trima pa Tuhan, kong kase tre tu jalang for sambut pa Dia.’ ” Yohanes ja pake baju panjang dari bulu onta deng da ika tu pinggang pake tali dari kuli binatang. Dia pe makanan belalang deng madu utang. Waktu itu, banya orang datang pa Yohanes. Dorang datang dari Yerusalem, dari sluru daera Yudea, deng lei dari samua daera di sekitar kuala Yordan. Dorang mangaku dong pe dosa-dosa, kong Yohanes baptis pa dorang di kuala Yordan. Waktu itu lei banya orang dari golongan Farisi deng Saduki datang pa Yohanes supaya bole dapa baptis. Mar waktu Yohanes lia pa dorang, dia bilang, “Hei ngoni orang-orang jaha, ngoni pe jaha itu sama deng ular yang babisa! Jang ngoni kira kalu ngoni dapa baptis trus ngoni bole lolos dari Tuhan pe hukuman. So itu ngoni musti hidop ja beking tu bae sama deng tu cara hidop yang pantas for orang yang so bertobat. Kalu ngoni beking bagitu, ngoni bole mo se sama deng pohong yang babua bagus. Jang ngoni kira kalu ngoni so nyanda mo dapa hukuman lantaran ngoni itu Abraham pe keturunan. Kita bilang pa ngoni, kalu Tuhan Allah suka, Dia bole mo beking tu batu-batu ini jadi Abraham pe keturunan. Tuhan so siap mo hukum samua orang yang nyanda bertobat, itu sama deng satu orang yang so siap-siap deng de pe tamako di akar pohong for potong tu pohong yang nyanda babua bagus, kong nanti abis itu, dia mo buang ka api. Kita babaptis pa ngoni pake aer, tanda ngoni so bertobat. Mar abis kita, nanti ada satu Orang yang mo datang, Dia lebe berkuasa dari kita. Hele mo bantu pa Dia for bawa akang Dia pe capatu sama deng tu biasa orang karja ja beking, kita nyanda pantas. Dia yang mo baptis pa ngoni pake Roh Kudus deng api. Dia mo kase pisa tu orang yang ja iko pa Dia dari tu orang yang nyanda ja iko pa Dia, Dia itu bole mo se sama deng tu orang yang da batapis pake sosiru for se pisa tu konga dari gandum. Tu gandum dia simpang di lumbung, mar tu konga dapa buang ka api yang nyanda mati-mati.” Waktu itu, dari daera Galilea Yesus pigi pa Yohanes di kuala Yordan supaya Yohanes bole mo baptis pa Dia. Mar Yohanes nimau mo baptis pa Yesus. Dia bilang pa Yesus, “Sebenarnya kita yang musti Bapak baptis, bukang Bapak tu datang pa kita for kita mo baptis.” Kong Yesus bilang pa dia, “Biar jo bapak baptis pa Kita skarang. Deng beking bagitu, torang so beking tu butul di muka pa Tuhan.” Pe dengar itu, Yohanes iko akang tu Yesus da bilang. Abis Yohanes baptis pa Yesus, Yesus iko kaluar dari aer. Waktu itu jo, langit tabuka kong Yesus lia Tuhan Allah pe Roh yang rupa burung pombo turung di atas pa Dia. Kong dapa dengar Tuhan Allah pe suara dari sorga da babilang, “Ini Kita pe Anak, Kita sayang pa Dia. Dia ini yang beking Kita pe hati snang.” Abis itu, Tuhan Allah pe Roh bawa pa Yesus ka padang gurun supaya setang pe bos mo goda pa Dia. Di situ, Yesus bapuasa slama ampa pulu hari ampa pulu malam. Pe abis itu, Yesus lapar. Kong waktu itu, setang pe bos tu pangbagoda itu datang pa Dia trus babilang, “Ngana ini Anak Allah to? No kalu bagitu, prenta jo tu batu-batu ini jadi roti.” Mar Yesus manyao pa dia, “Di Kitab Suci ada tulis bagini, ‘Manusia hidop bukang cuma dari roti, mar manusia hidop lantaran da dengar kong beking samua tu Tuhan Allah da bilang.’ ” Abis itu, setang pe bos bawa pa Yesus ka Yerusalem, tu kota yang kudus. Di sana setang pe bos taru pa Yesus di tampa yang paling tinggi di Ruma Ibada Pusat. Kong setang pe bos bilang pa Yesus, “Ngana ini Anak Allah to? Kalu bagitu, Ngana baciri jo dari sini. Soalnya di Kitab Suci da tulis bagini tentang Ngana, ‘Tuhan Allah mo suru Dia pe malaekat-malaekat for jaga pa Ngana. Dorang mo dafo pa Ngana waktu Ngana ciri, supaya Ngana pe kaki nyanda kana di batu.’ ” Mar Yesus manyao pa dia, “Di Kitab Suci da tulis lei bagini, ‘Ngoni jang coba-coba pa Tuhan, tu Tuhan Allah yang ngoni semba.’ ” Trus setang pe bos da bawa lei pa Yesus ka satu gunung yang tinggi skali. Dia kase lia pa Yesus samua krajaan di dunia deng tu krajaan-krajaan pe kekayaan. Kong setang pe bos bilang pa Yesus, “Samua itu kita mo kase pa Ngana, asal Ngana berlutut semba pa kita.” Yesus manyao pa Dia, “Hei, setang pe bos, pigi jo ngana dari sini! Soalnya di Kitab Suci da tulis bagini, ‘Ngoni musti semba pa ngoni pe Tuhan, tu Tuhan Allah yang ngoni ja semba, kong cuma Dia tu ngoni ja layani.’ ” Abis itu, setang pe bos kase tinggal pa Yesus, trus tu malaekat-malaekat datang layani pa Yesus. Yesus dapa dengar kalu Yohanes da dapa tangka kong da se maso ka bui, trus Yesus babale dari Yudea ka daera Galilea. Di daera Galilea, Yesus pigi ka Nazaret. Abis itu, Dia se tinggal tu Nazaret, trus Dia pi tinggal di Kapernaum yang ada di pinggir danau Galilea, yang ada di daera Zebulon deng Naftali. Yesus da tinggal di Kapernaum, deng bagitu apa tu Tuhan Allah da kase tau dulu pa nabi Yesaya so jadi. Bagini tu Tuhan Allah da bilang, “Tana Zebulon deng tana Naftali, tu ada di pinggir danau Galilea deng di sabla kuala Yordan, tu tampa orang-orang bukang Yahudi da tinggal akang. Tu orang-orang di situ tinggal di dalam glap, dorang skarang so lia satu trang yang luar biasa. Kong dorang yang tinggal di tampa yang maut da kuasai itu, pa dorang itu so muncul tu trang yang se trang tu dorang pe hati.” Waktu Yesus so di Kapernaum, Yesus mulai kase tau tu Tuhan Allah pe pesan pa orang-orang. Dia bilang, “Bertobat jo, lantaran Tuhan Allah so mo Berkuasa sbagai Raja!” Satu kali, Yesus da bajalang di pinggir danau Galilea, kong Dia dapa lia dua orang kaka ade. Dorang dua pe nama Simon tu ja bilang lei Petrus, deng de pe ade Andreas. Dorang da balego jala di danau, lantaran dorang dua pe karja ja bacari ikang. Kong Yesus pangge pa dorang dua, “Mari jo, iko pa Kita! Ngoni biasa bacari ikang, mar Kita mo kase ajar pa ngoni bagimana ja bacari orang for iko pa Kita.” Pe dengar itu, dorang iko kase tinggal dong pe jala kong iko pa Yesus. Abis itu, Yesus bajalang lei kong Dia dapa lia dua orang kaka ade. Dorang pe nama Yakobus deng Yohanes, kong dorang pe papa pe nama Zebedeus. Waktu itu, dorang dua da sama-sama deng dong pe papa di prao da beking butul dong pe jala. Yesus lei pangge pa dorang dua. Trus dorang dua iko se tinggal tu prao deng dong pe papa, kong dorang iko pa Yesus. Abis itu, Yesus babaron di sluru daera Galilea kong mangajar di ruma-ruma ibada agama Yahudi. Dia kase tau Kabar Bae dari Tuhan Allah yang Berkuasa sbagai Raja. Dia lei kase bae orang-orang dari samua panyaki deng tu orang-orang cacat dari antara tu bangsa itu. Kong tu kabar tentang Yesus tasiar sampe ka sluru daera Siria. So itu orang-orang bawa pa Dia samua orang saki for Dia kase bae. Tu orang-orang saki itu pe panyaki ada macam-macam: ada yang siksa skali, ada yang da kemasukan setang, ada yang saki mati-mati ayam deng ada lei yang lumpu. Kong Yesus kase bae pa dorang samua. Waktu itu banya skali orang yang da iko-iko pa Yesus. Tu orang-orang itu ada yang dari daera Galilea, dari Dekapolis, dari kota Yerusalem, dari daera Yudea deng dari sabla kuala Yordan. Waktu Yesus lia tu orang banya da iko pa Dia, Dia nae ka satu bukit. Abis itu, Dia dudu di situ kong Dia pe murit-murit datang badekat pa Dia. Kong Yesus mulai mangajar pa dorang, Dia bilang, “Orang-orang yang rasa dong pe diri nyanda pantas di muka pa Tuhan, dorang itu sama deng tu orang yang anggap dong pe diri miskin di muka pa Tuhan. Dorang itu yang paling snang, lantaran dorang jadi orang-orang dari Tuhan Allah yang Berkuasa sbagai Raja. Orang-orang yang dong pe hati sedi, dorang itu yang paling snang, lantaran Tuhan mo hibur pa dorang. Orang-orang yang nyanda sombong, dorang itu yang paling snang, lantaran Tuhan mo kase pa dorang tu dunia ini. Orang-orang yang suka skali beking tu butul di muka pa Tuhan, dorang sama deng tu orang yang lapar deng aus yang suka skali cari tu makanan deng minuman, dorang itu yang paling snang, lantaran Tuhan mo se puas pa dorang. Orang-orang yang se tunjung tu rasa kasiang pa orang laeng, dorang itu yang paling snang, lantaran Tuhan lei mo se tunjung tu Dia pe rasa kasiang pa dorang. Orang-orang yang dong pe hati bersi, dorang itu yang paling snang, lantaran dorang nanti mo lia pa Tuhan Allah. Orang-orang yang ja beking orang laeng baku bae, dorang itu yang paling snang, lantaran dorang itu nanti mo ja bilang Tuhan Allah pe anak-anak. Orang-orang yang da dapa siksa lantaran da beking tu butul di muka pa Tuhan, dorang itu yang paling snang, lantaran dorang jadi orang-orang dari Tuhan yang Berkuasa sbagai Raja. Ngoni ini da iko pa Kita, lantaran itu kalu ngoni dapa hina, dapa siksa deng lei ada orang se besae ngoni pe nama bilang ngoni ini kata ja beking tu jaha, ngoni itu yang paling snang. Tu nabi-nabi dulu lei da alami samua sama deng itu. So itu, ngoni snang deng sukacita jo lantaran Tuhan mo kase akang upah basar for ngoni di sorga.” Yesus bilang lei, “Ngoni ini sama deng garam di dunia ini, ngoni musti kase pengaru yang bae sama deng tu garam yang ada de pe guna. Mar kalu ngoni so nyanda kase pengaru yang bae, itu sama deng garam yang so jadi tawar kong so nyanda mungkin lei mo beking bagaram ulang. Tu garam itu so nyanda ada lei de pe guna, kong kurang bole tu garam itu mo buang kong orang injang-injang. Ngoni ini sama deng trang dunia, ngoni musti beking tu hal-hal yang bae sama deng tu sinar yang kase trang ni dunia. Orang-orang pasti mo lia tu ngoni da beking, sama deng dorang da lia tu kota di atas gunung yang nyanda mungkin mo tasambunyi. Nyanda ada orang tu da pasang pelita kong tutu akang deng loto. Pasti dia taru tu pelita itu pa de pe tampa supaya bole mo kase trang for samua orang yang ada di dalam ruma itu. Bagitu lei ngoni, ngoni musti kase trang pa orang-orang deng cara beking tu hal-hal yang bae supaya orang-orang bole mo lia tu ngoni ja beking itu, kong dorang mo puji deng hormat pa Tuhan Allah tu ngoni pe Bapa di sorga.” Yesus bilang lei, “Ngoni jang bapikir kalu Kita datang ka dunia ini for mo hapus tu atoran-atoran yang ada di kitab Taurat deng tu nabi-nabi pe ajaran, nyanda kasiang. Malatare Kita datang ka dunia ini for se gnap tu samua itu. Kita bilang pa ngoni, slama ni langit deng bumi masi ada, nyanda ada biar cuma satu huruf ato satu titik dari tu atoran-atoran di kitab Taurat yang so nyanda mo berlaku, samua yang Tuhan bilang mo jadi pasti mo jadi. So itu, sapa jo yang langgar satu dari tu atoran-atoran itu, biar lei tu atoran yang paling nyanda penting kong kase ajar pa orang laeng supaya beking sama deng dia, dia itu mo jadi yang paling nyanda penting di antara orang-orang dari Tuhan Allah yang berkuasa sbagai Raja. Mar sapa yang beking atoran-atoran itu kong kase ajar pa orang laeng supaya beking tu atoran-atoran itu, dia itu mo jadi yang paling penting di antara orang-orang dari Tuhan Allah yang Berkuasa sbagai Raja. Kita bilang pa ngoni, ngoni musti ja beking tu butul di muka pa Tuhan lebe dari tu ahli-ahli Taurat deng tu orang-orang dari golongan Farisi ja beking, kalu nyanda, ngoni nyanda mo jadi orang-orang dari Tuhan yang Berkuasa sbagai Raja.” Yesus bilang lei, “Ngoni so dengar tu atoran-atoran yang torang pe nene moyang da dapa dari dulu, tu de pe isi bagini, ‘Jang babunung. Sapa yang babunung musti dapa hukum.’ Mar Kita bilang pa ngoni, sapa jo yang mara pa dia pe sudara, dia musti dapa hukum. Kong sapa yang bamomake pa dia pe sudara, dia musti se mangada ka Mahkamah Agama for dapa adili. Kong sapa lei yang bilang de pe sudara biongo, dia itu musti mo dapa hukum di api yang bamanyala-manyala di neraka. Jadi kalu ngoni bawa tu ngoni pe korban persembahan ka tampa korban persembahan, kong waktu itu ngoni dapa inga kalu ada orang yang mara pa ngoni, ngoni se tinggal jo dulu tu persembahan di tampa korban persembahan, trus ngoni pigi pa tu orang itu kong baku bae deng dia. Kalu so baku bae, baru ngoni babale for kase tu korban persembahan. Kalu ada orang yang tuntut pa ngoni kong mo bawa ngoni mangada pa hakim for dia mo adili, ngoni capat-capat jo se klar tu masala deng dia waktu ngoni deng dia samantara di jalang mo pigi pa hakim, supaya tu masala nyanda perlu sampe pa hakim. Kalu ngoni nyanda beking bagitu, tu orang itu mo srahkan ngoni pa hakim, kong tu hakim mo srahkan ngoni pa de pe pengawal. Abis itu, tu pengawal kase maso pa ngoni ka bui. Kita bilang pa ngoni, ngoni nyanda mo kaluar dari bui seblum ngoni bayar samua tu hakim da suru bayar.” Yesus bilang lei, “Ngoni so dengar tu atoran, tu de pe isi, ‘Jang bersina’. Mar Kita bilang pa ngoni, kalu ada yang haga deng nafsu pa parampuang, dia so bersina deng tu parampuang pa de pe hati. Kalu ngana pe mata kanan beking ngana berdosa sampe ngana jadi sesat, cungkel jo kong buang tu mata itu! Soalnya masi lebe bae ngana tailang akang satu mata, daripada ngana pe mata lengkap mar ngana dapa lempar ka neraka. Kalu ngana pe tangan kanan beking ngana berdosa sampe ngana jadi sesat, potong jo kong buang tu tangan itu! Soalnya masi lebe bae ngana ilang akang tangan sabla, daripada tangan lengkap mar ngana maso ka neraka.” Yesus bilang lei, “Ada lei atoran yang bagini, ‘Sapa yang kase cere de pe bini, dia musti kase surat cere pa de pe bini itu.’ Mar Kita bilang pa ngoni, kalu ada laki-laki yang kase cere de pe bini padahal de pe bini itu nyanda bersina, dia so beking de pe bini itu bersina kalu nanti de pe bini kaweng ulang deng laki-laki laeng. Kong kalu ada laki-laki yang kaweng deng tu parampuang yang de pe laki da se cere, tu laki-laki itu lei so bersina.” Yesus bilang lei, “Ngoni so dengar tu atoran-atoran yang torang pe nene moyang da dapa, tu de pe isi, ‘Jang langgar tu sumpa. Kalu ngoni basumpa, ngoni musti beking tu sumpa itu sama deng ngoni beking itu for Tuhan.’ Mar Kita bilang pa ngoni, lebe bae jang basumpa sama skali. Ngoni jang basumpa demi langit, lantaran langit itu Tuhan Allah pe tahta. Ngoni lei jang basumpa demi bumi lantaran bumi itu Tuhan Allah pe tampa taru kaki. Ngoni jang basumpa demi Yerusalem lantaran tu Yerusalem itu kota dari Raja Basar. Ngoni jang basumpa demi ngoni pe kapala sandiri, lantaran ngoni nyanda ada kuasa for beking puti ato itang tu ngoni pe rambu biar lei cuma satu ujung rambu. Kalu ngoni mo bilang ‘iyo’, lebe bae ngoni cuma bilang ‘iyo’. Kong kalu ngoni mo bilang ‘nyanda’, lebe bae ngoni cuma bilang ‘nyanda’. Soalnya kalu ngoni bilang lebe dari itu, de pe asal dari setang pe bos.” Yesus bilang lei, “Ngoni so dengar tu atoran-atoran, tu de pe isi bagini, ‘Mata ganti mata, gigi ganti gigi.’ Mar Kita bilang pa ngoni, kalu ada orang beking hal yang jaha pa ngoni, ngoni nyanda usa malawang pa dia. Malatare kalu ada orang tampeleng ngoni pe pipi kanan, ngoni kase lei tu pipi kiri for dia mo tampeleng. Kong kalu ada orang yang tuntut pa ngoni di pengadilan lantaran suka mo ambe tu ngoni pe baju, ngoni kase lei pa dia tu ngoni pe juba. Kong kalu ada penguasa yang paksa pa ngoni for pikul de pe barang deng jarak satu kilometer, ngoni pikul jo tu barang kong tamba akang tu jarak jadi dua kilometer. Kalu ada orang yang baminta apa-apa pa ngoni, ngoni kase jo tu dia da minta itu. Kong kalu ada orang yang mo pinjam apa-apa pa ngoni, ngoni kase pinjam jo pa dia.” Yesus bilang lei, “Ngoni so dengar tu atoran-atoran, tu de pe isi bagini, ‘Sayang jo tu ngoni pe tamang-tamang, kong binci tu ngoni pe musu-musu.’ Mar Kita bilang pa ngoni, ngoni musti sayang tu ngoni pe musu kong sombayang akang tu orang-orang yang ja siksa pa ngoni. Kalu ngoni beking bagitu, ngoni jadi anak-anak dari ngoni pe Bapa di sorga. Dia yang beking tu matahari for kase sinar pa orang jaha deng lei orang bae-bae. Dia ja kase turung tu ujang for orang yang ja beking tu butul di muka pa Tuhan deng lei for tu orang yang nyanda ja beking tu butul di muka pa Tuhan. Kalu ngoni sayang cuma pa orang yang sayang pa ngoni, ngoni jang baharap kalu Tuhan mo kase upah dari apa yang ngoni da beking itu. Soalnya enter tu petugas pajak yang orang anggap berdosa, dorang itu ja sayang tu orang yang sayang pa dorang. Kalu ngoni kase salam cuma pa ngoni pe tamang-tamang, tu ngoni da beking itu sama deng tu bangsa yang nyanda kanal pa Tuhan ja beking. Soalnya tu orang-orang yang nyanda kanal pa Tuhan lei ja kase salam pa dong pe tamang-tamang. Ngoni pe Bapa di sorga itu butul-butul sempurna, nyanda perna beking sala. So itu ngoni samua lei musti brusaha supaya bole sempurna sama deng Dia sempurna.” Yesus bilang lei, “Inga bae-bae, ngoni jang beking tu butul di muka pa orang-orang supaya dorang mo lia kong puji pa ngoni. Kalu ngoni beking bagitu, ngoni pe Bapa di sorga nyanda mo kase upah pa ngoni. Jadi kalu ada yang bakase apa-apa for bantu tu orang miskin, dia jang bilang-bilang pa orang tu dia da beking itu. Kalu dia bilang-bilang tu dia da beking itu, itu sama jo deng tu orang-orang munafik ja beking di ruma-ruma ibada agama Yahudi ato di jalang-jalang. Dorang ja tiop trompet di tampa-tampa itu for se hebo pa orang banya apa tu dorang da beking supaya orang-orang mo puji pa dorang. Kita bilang pa ngoni, tu pujian yang dorang da dapa itu, so itu no tu dong pe upah. Mar kalu ngoni mo kase apa-apa for bantu tu orang miskin, ngoni kase jo deng babadiam, itu sama deng apa tu ngana pe tangan kanan da beking, tu ngana pe tangan kiri nintau. Jadi biar jo tu orang laeng nintau kalu ngoni da bakase apa-apa for bantu tu orang miskin. Kalu ngoni beking bagitu, ngoni pe Bapa yang bole lia apa tu ngoni da beking di tampa yang tasambunyi, Dia mo balas apa tu ngoni da beking itu.” Yesus bilang lei, “Kalu ngoni basombayang, ngoni jang basombayang sama deng tu orang munafik. Soalnya dorang itu suka ja basombayang badiri di ruma-ruma ibada agama Yahudi deng lei di tampa umum supaya orang laeng mo lia. Kita bilang pa ngoni, waktu orang-orang puji pa dorang, so itu no tu dorang pe upah. Mar kalu ngoni basombayang, maso jo pa ngoni pe kamar kong tutu tu pintu, trus ngoni basombayang jo pa ngoni pe Bapa tu ada di tampa tasambunyi. Kalu ngoni beking bagitu, ngoni pe Bapa yang ja lia apa tu ngoni da beking di tampa yang tasambunyi, Dia mo balas apa tu ngoni da beking. Kong kalu basombayang, ngoni nyanda usa basombayang panjang-panjang tu nyanda ada de pe arti, sama deng tu orang-orang yang nyanda kanal pa Tuhan Allah biasa ja beking. Soalnya dorang pe kira kalu dorang basombayang bagitu, dorang mo dapa apa tu dong da minta, padahal nyanda. Jadi ngoni jang sama deng dorang, lantaran ngoni pe Bapa tau apa yang ngoni perlu seblum ngoni minta pa Dia. So itu, ngoni basombayang jo bagini, ‘Torang pe Bapa yang ada di sorga, torang minta supaya samua hormat tu Bapa pe nama lantaran Bapa itu kudus. Bapa, datang jo Berkuasa sbagai Raja pa torang. Torang minta supaya samua Bapa pe mau jadi di bumi sama deng tu da jadi di sorga. Kase akang pa torang makanan yang cukup for ni hari. Tolong kase ampung akang tu torang pe sala, sama deng torang kase ampung tu orang yang da beking sala pa torang. Kong jang kase biar torang tagoda for beking tu jaha, mar kase lapas akang pa torang dari tu jaha. [Soalnya Bapa tu Berkuasa sbagai Raja, Bapa yang punya tu kuasa, deng Bapa lei yang luar biasa sampe slama-lamanya. Amin.’] Kita bilang pa ngoni, kalu ngoni kase ampung tu orang yang beking sala pa ngoni, ngoni pe Bapa lei di sorga mo kase ampung pa ngoni. Mar kalu ngoni nyanda kase ampung tu orang yang da beking sala pa ngoni, ngoni pe Bapa lei di sorga nyanda mo kase ampung pa ngoni.” Yesus bilang lei, “Kalu ngoni bapuasa, ngoni pe muka jang dapa lia susa sama deng tu orang munafik ja beking. Soalnya dorang itu sengaja kase tunjung tu dong pe muka susa supaya orang laeng lia kalu dorang samantara bapuasa kong puji pa dorang. Kita bilang pa ngoni, waktu orang-orang puji pa dorang, so itu no tu dorang pe upah. Mar kalu ngoni da bapuasa, ngoni taru minya tu ngoni pe kapala supaya rapi deng cuci tu ngoni pe muka. Ngoni beking bagitu supaya orang laeng nintau kalu ngoni da bapuasa, yang tau itu cuma tu ngoni pe Bapa yang ada di tampa yang tasambunyi. Dia da lia samua tu orang da beking deng cara sambunyi-sambunyi, kong nanti Dia mo balas kase upah pa ngoni.” Yesus bilang lei, “Ngoni jang kumpul harta di bumi. Soalnya di bumi ini, tu binatang rayap deng karat bole mo beking rusak tu harta itu, deng lei papancuri bole datang pancuri tu harta itu. Mar lebe bae ngoni kumpul harta di sorga. Soalnya di sorga, nyanda ada binatang rayap deng karat yang mo se ancor tu harta itu, deng lei nyanda ada papancuri yang mo bongkar deng pancuri tu harta itu. Soalnya di mana jo tu ngoni pe harta ada, di situ lei ngoni pe hati.” Yesus bilang lei, “Orang pe mata itu sama deng pelita. Tu mata itu yang kase trang pa orang pe hati. Kalu ngoni pe mata balia deng jelas, ngoni pe hati lei jadi trang. Mar kalu dia pe mata nyanda balia deng jelas, dia pe hati lei iko jadi glap. Kong kalu tu trang yang ada pa dia pe hati so jadi glap, tu glap itu mo jadi lebe glap.” Yesus bilang lei, “Satu orang karja nimbole mo bakarja pa dua bos. Soalnya kalu dia ada dua bos, dia pasti mo binci tu bos yang satu kong sayang tu bos yang laeng, dia lei mo setia pa tu bos yang satu kong nyanda farduli deng tu bos laeng. Bagitu lei deng ngoni, nyanda mungkin ngoni mo layani pa Tuhan Allah kalu ngoni lei masi ja pikir-pikir tu kekayaan dunia.” Yesus bilang lei, “So itu kita bilang pa ngoni, ngoni nyanda usa kuatir tu ngoni pe hidop, tentang apa tu ngoni mo makang ato minum, deng lei nyanda usa kuatir tentang baju tu ngoni mo pake. Soalnya ngoni pe hidop itu lebe penting dari apa tu ngoni mo makang, kong ngoni pe badan itu lebe penting dari tu baju yang ngoni mo pake. Co ngoni lia tu burung-burung di udara! Burung-burung itu nyanda ja baambor bibit deng nyanda ja bapete apa-apa kong nyanda simpang makanan di lumbung, mar biar lei bagitu ngoni pe Bapa di sorga kase makang pa dorang. Ngoni tantu tau kalu for Tuhan Allah, ngoni itu jao lebe penting dari tu burung-burung itu. Kalu ngoni kuatir deng tu hal-hal itu, apa ngoni pe kuatir itu bole mo se tamba panjang tu ngoni pe umur? Pasti nyanda to? Jadi ngoni nyanda perlu kuatir tentang ngoni pe baju. Co ngoni lia tu bunga-bunga bakung tu da batumbu di padang, dorang itu pe bagus skali. Dorang nyanda bakarja deng nyanda ja beking benang for beking baju. Mar Kita bilang pa ngoni, biar lei tu raja Salomo pe kaya deng pe hebat, mar dia pe baju nyanda ada apa-apa kalu se banding deng tu bunga itu pe bagus. Tuhan Allah piara deng beking bagus tu rumpu yang batumbu di padang, tu rumpu yang ni hari ada trus eso dapa bakar. Kalu tu rumpu itu Tuhan piara deng beking bagus, lebe-lebe lei tu ngoni pe hidop tantu katu Tuhan mo piara deng beking bagus. Jadi kiapa so ngoni nyanda talalu percaya pa Dia? So itu ngoni nyanda usa kuatir deng batanya rupa ini, ‘Apa tu torang mo makang?’ ato ‘Apa tu torang mo minum?’ ato lei ‘Apa tu torang mo pake?’ Soalnya tu orang-orang yang nyanda kanal pa Tuhan Allah slalu kuatir tentang tu samua itu, mar ngoni pe Bapa di sorga tau kalu ngoni perlu samua itu. Mar lebe dulu, cari jo pa Tuhan Allah supaya Dia Berkuasa sbagai Raja pa ngoni deng ngoni beking tu butul di muka pa Dia. Deng bagitu, samua tu ngoni pe perlu Dia mo kase pa ngoni. Jadi, ngoni nyanda usa kuatir tentang apa tu mo jadi hari eso lantaran hari eso ada de pe susa sandiri. Tu susa ni hari cukup jo for ni hari, nyanda usa lei ngoni tamba.” Yesus bilang lei, “Ngoni jang hakimi orang laeng, supaya Tuhan lei nyanda hakimi pa ngoni. Soalnya tu cara yang ngoni da pake for hakimi orang, tu cara itu jo tu Tuhan mo pake for hakimi pa ngoni. Kong tu ukuran yang ngoni da pake for ukur pa orang laeng, tu ukuran itu lei tu Tuhan mo pake for se ukur pa ngoni. Ngoni pe capat ja tarukira tu orang laeng pe sala yang pe kacili, mar tu ngoni pe sala yang pe basar, ngoni se biar. Ngoni itu bole mo se sama deng tu orang yang da lia tu serbuk kayu pa de pe sudara pe mata, padahal tu balak yang ada pa dia pe mata, dia nyanda dapa lia. Bagimana lei ngoni bole babilang pa ngoni pe sudara bagini, ‘Mari jo kita se kaluar tu serbuk kayu pa ngana pe mata,’ padahal pa ngoni pe mata sandiri ada balak. Hei orang munafik! Ngoni musti se kaluar dulu tu balak dari pa ngoni pe mata baru ngoni bole mo balia deng jelas for se kaluar tu serbuk kayu dari pa ngoni pe sudara pe mata. Ngoni jang kase tau tu Tuhan pe firman pa orang-orang yang nyanda mo trima, kalu ngoni kase tau itu bole mo se sama deng ngoni se lempar barang yang kudus pa anjing trus tu anjing cuma bale gigi pa ngoni. Itu lei sama deng ngoni da se lempar mutiara pa boke trus tu boke cuma injang-injang akang tu mutiara.” Yesus bilang lei, “Minta jo pa Tuhan apa tu ngoni pe perlu, nanti Dia mo kase apa tu ngoni da minta. Cari jo pa Dia apa tu ngoni pe perlu, nanti ngoni mo dapa itu dari pa Dia. Batoki jo pa Dia pe pintu for baminta, nanti Dia mo buka akang tu pintu for kase apa tu ngoni da minta. Soalnya tiap orang yang baminta pa Tuhan, dia mo trima apa tu dia da minta. Kong tiap orang yang cari apa tu de pe perlu pa Tuhan, dia mo dapa itu. Trus tiap orang yang batoki Tuhan pe pintu for baminta, Tuhan mo buka akang pintu kong kase tu dia da minta. Apa ada di antara pa ngoni, kalu ngoni pe anak minta roti, ngoni mo kase akang batu pa dia? Nyanda ada to? Kong nyanda mungkin lei to kalu ngoni pe anak minta ikang pa ngoni, ngoni mo kase akang ular pa dia? Jadi biar ngoni pe hati jaha, ngoni tau bakase tu bae pa ngoni pe anak-anak. No apa lei tu ngoni pe Bapa di sorga, Dia pasti mo kase tu bae pa orang-orang yang baminta pa Dia. Jadi samua tu ngoni suka orang beking pa ngoni, ngoni musti beking bagitu lei pa orang laeng. Soalnya itu no tu de pe isi dari tu atoran-atoran yang ada di kitab Taurat deng tu nabi-nabi pe ajaran.” Yesus bilang lei, “Ngoni maso jo lewat tu pintu yang sempit. Soalnya tu pintu yang lebar mo pigi di tampa for binasa, de pe jalang lebar kong banya orang yang iko di situ. Mar tu pintu for dapa tu hidop kekal itu sempit deng de pe jalang lei susa mo iko akang, cuma sadiki tu orang yang iko di situ.” Yesus bilang lei, “Ngoni musti hati-hati pa tu nabi-nabi palsu yang datang pa ngoni! Dorang bilang kalu dorang itu nabi, tu orang-orang yang ja kase tau tu Tuhan Allah pe pesan pa orang-orang padahal bukang. Dorang itu pura-pura pangbae sama deng domba, mar sebenarnya dorang itu jaha sama deng tu srigala yang ganas. Ngoni bole mo dapa tau kalu dorang itu butul-butul nabi ato nabi palsu dari apa tu dorang da beking, sama deng dapa tau pohong dari de pe bua. Nyanda mungkin to tu rumpu baduri mo babua anggor ato mo babua ara. Samua pohong yang bagus de pe bua lei bagus, mar pohong yang nyanda bagus de pe bua lei nyanda bagus. Nyanda mungkin tu pohong yang bagus kong de pe bua nyanda bagus, ato nyanda mungkin tu pohong yang nyanda bagus kong de pe bua bagus. Tu pohong yang babua nyanda bagus, mo dapa potong kong bakar. Jadi, torang bole dapa tau kalu dorang itu butul-butul nabi ato nabi palsu dari apa tu dorang da beking.” Yesus bilang lei, “Bukang samua orang yang pangge pa Kita, ‘Tuhan, Tuhan’ tu mo jadi orang-orang dari Tuhan Allah yang Berkuasa sbagai Raja, cuma tu orang-orang yang ja beking tu Kita pe Bapa di sorga pe mau. Nanti waktu hari kiamat, banya orang mo bilang pa Kita bagini, ‘Tuhan, Tuhan, torang ini tu ja kase tau Tuhan pe pesan pake Tuhan pe nama. Torang ja user setang-setang dari pa orang-orang pake Tuhan pe kuasa, kong torang lei da beking banya hal yang luar biasa pake Tuhan pe kuasa.’ Mar waktu itu jo, Kita mo bilang pa dorang, ‘Kita nyanda perna kanal pa ngoni, bajao jo dari pa Kita ngoni yang ja beking tu jaha!’ ” Yesus bilang lei, “Sapa yang da dengar apa tu Kita da se ajar ini kong ja beking, dia itu sama deng tu orang bijaksana yang da se badiri ruma di atas fondasi batu. Waktu ujang kras kong banjer datang, trus angin kras lei bage tu ruma, tu ruma nyanda mo rubu. Soalnya tu ruma da se badiri di atas fondasi batu. Mar sapa tu da dengar apa tu Kita da se ajar ini kong nyanda ja beking, dia itu sama deng tu orang biongo yang da se badiri ruma di atas fondasi paser. Waktu ujang kras kong banjer datang, deng angin kras lei bage tu ruma itu, tu ruma iko rubu kong ancor skali.” Serta Yesus so klar babicara, tu orang banya itu jadi taheran-heran da dengar tu Dia pe ajaran itu. Soalnya Dia da mangajar pa dorang punung deng kuasa, nyanda sama deng dorang pe ahli-ahli Taurat pe mangajar. Yesus turung dari tu bukit, kong banya orang rame-rame da iko pa Dia. Waktu itu, ada satu orang saki kusta datang pa Yesus. Tu orang itu berlutut di muka pa Yesus, trus babilang, “Bapak, kalu Bapak suka, Bapak bole kase bae pa kita.” Pe dengar itu, Yesus pegang tu orang itu kong babilang, “Iyo Kita suka, jadi bae jo ngana!” Waktu itu jo, tu orang yang da saki kusta iko jadi bae. Abis itu, Yesus bilang pa tu orang itu, “Inga eh! Ngana jang se tau pa sapa-sapa tu Kita da beking pa ngana. Mar ngana pigi jo pa imam supaya dia bole lia kalu ngana so bae. Abis itu, ngana bawa korban persembahan sama deng tu Musa da prenta, itu tu bukti for mo se tunjung pa orang-orang kalu ngana memang butul-butul so bae.” Waktu Yesus maso ka Kapernaum, datang satu orang perwira Romawi kong bamohon pa Dia, “Bapak, kita pe budak da saki di ruma. Dia so nimbole bagra, kurang da tidor-tidor di koi, kong dia mendrita skali.” Yesus bilang pa dia, “Kita mo pigi pa bapak pe ruma for se bae tu bapak pe budak itu.” Mar tu perwira Romawi itu bilang pa Yesus, “Bapak, kita rasa kalu kita nyanda pantas for trima pa Bapak pa kita pe ruma. Mar cuma deng Bapak bilang sesuatu jo dari sini, pasti kwa kita pe budak mo bae. Kita bilang bagitu, lantaran kwa bagini: di atas pa kita, ada kita pe bos, kong dia bole kase prenta pa kita. Bagitu lei deng kita, kita ada anak bua, kong kalu kita prenta pa satu dari kita pe anak bua, ‘Pigi jo!’ pasti dia pigi. Kong kalu kita prenta pa anak bua laeng, ‘Datang jo!’ pasti dia datang. Kong kalu kita prenta pa kita pe budak, ‘Beking ini!’ pasti dia beking tu kita da prenta.” Pe dengar tu perwira da bilang, Yesus taheran-heran, kong Dia bilang pa orang-orang yang da iko deng Dia, “Kita bilang pa ngoni, di antara orang Israel Kita blum perna baku dapa deng satu orang yang de pe iman basar sama deng tu orang Romawi ini pe iman. Kita bilang pa ngoni, nanti ada de pe waktu banya orang yang bukang Yahudi sama deng orang Romawi ini mo datang dari sgala tampa di dunia ini, dari Timur sampe Barat. Dorang itu mo dudu makang sama-sama deng Abraham, Ishak deng Yakub di tampa tu Tuhan Allah Berkuasa sbagai Raja. Mar banya orang Yahudi yang dulu jadi orang-orang dari Tuhan Allah yang Berkuasa sbagai Raja, mar dorang nyanda mo ada di sana. Tuhan Allah mo kase lempar pa dorang kaluar ka tampa yang glap. Di situ dorang mo manangis sampe dong pe gigi baku goso sampe babunyi lantaran mendrita.” Abis itu, Yesus bilang pa tu perwira Romawi, “Bapak, bapak pulang jo. Bapak percaya kalu Kita bole kase bae tu bapak pe budak, jadi skarang bapak pe budak so bae sama deng tu bapak pe percaya.” Kong waktu itu jo, tu perwira Romawi pe budak iko bae. Abis itu, Yesus pigi pa Petrus pe ruma. Pe sampe di sana, Dia lia Petrus pe mama mantu da tidor-tidor lantaran saki panas. Yesus pegang tu ibu pe tangan kong tu ibu pe panas ilang. Trus tu ibu iko badiri kong layani pa Yesus. Waktu so mo malam, orang-orang bawa pa Yesus tu orang-orang yang da kemasukan setang kong Dia user tu setang cuma deng satu prenta. Dia lei kase bae samua orang yang da saki. Deng beking bagitu, Dia so se gnap tu nabi Yesaya da bilang dulu tentang Dia bagini, “Dia tanggong torang pe pendritaan, kong Dia kase bae torang pe panyaki.” Waktu Yesus lia ada banya orang yang da bakumpul pa Dia, Dia suru pa Dia pe murit-murit sadia prao for pigi ka sabla danau. Kong waktu itu, ada satu ahli Taurat datang pa Yesus. Dia bilang pa Yesus, “Guru, ka mana jo Guru pigi, kita suka mo iko deng Guru.” Yesus bilang pa dia, “Rubah ada de pe lobang for tinggal akang, bagitu lei deng burung-burung ada sarang for tinggal akang, mar tu Anak Manusia nyanda ada tampa for mo tinggal akang.” Kong satu dari orang yang ja iko pa Yesus babilang pa Dia, “Bapak, kase isin akang kita pulang dulu for se kubur kita pe papa, abis itu kita iko deng Bapak.” Mar Yesus bilang pa dia, “Iko jo pa Kita. Tu orang yang nyanda percaya, dorang itu sama deng orang yang so mati, kong se biar jo dorang urus tu dorang pe penguburan sandiri.” Abis itu, Yesus nae ka prao kong Dia pe murit-murit baku iko deng Dia. Serta dorang so di danau, kage-kage datang angin pe kancang skali. Tu angin itu beking tu danau jadi baomba basar sampe tu prao amper tengglam. Mar waktu itu Yesus da tasono. Kong Dia pe murit-murit se bangong pa Dia, dorang bilang, “Guru, tolong se slamat akang pa torang, torang so mo mati.” Kong Yesus bilang pa dorang, “Hei ngoni orang yang kurang percaya, kiapa ngoni tako?” Abis itu, Yesus badiri kong togor deng kras tu angin deng tu omba di danau itu, trus tu danau jadi tedo skali. Pe lia itu, Yesus pe murit-murit jadi heran, kong dorang baku bilang, “Sapa so Dia sebenarnya sampe angin deng omba di danau iko Dia pe prenta?” Yesus deng De pe murit-murit sampe di sabla danau, pa orang Gadara pe daera. Di situ ada dua orang yang da kemasukan setang. Dorang dua itu bahaya skali sampe nyanda ada orang yang brani mo lewat di situ. Waktu Yesus sampe di sana, dorang dua datang dari kuburan trus pi pa Yesus. Kong dorang dua babicara deng suara kuat, “Hei Anak Allah! Apa so Ngana pe urusan deng torang? Apa Ngana datang mo siksa pa torang seblum de pe waktu?” Nyanda jao dari situ, ada banya skali boke da bamakang. Kong tu setang-setang bamohon pa Yesus, “Kalu mo user pa torang, suru jo pa torang maso pa tu boke-boke di sana.” Kong Yesus bilang pa dorang, “Pigi jo!” Trus tu setang-setang kaluar dari tu dua orang itu kong maso pa tu boke-boke itu. Abis itu, samua tu boke-boke itu balumpa dari pinggir jurang ka danau kong mati malamise di situ. Trus tu orang-orang yang bajaga boke itu lari kong pe sampe di kota dorang se cirita samua tu da jadi. Dorang lei se cirita tentang apa tu da jadi pa tu dua orang yang da kemasukan setang. Pe dengar itu, tu samua orang di kota itu iko kaluar pigi pa Yesus. Waktu dorang baku dapa deng Yesus, dorang minta deng sangat pa Yesus supaya Dia se tinggal tu dorang pe daera itu. Abis itu, Yesus deng Dia pe murit-murit nae ka prao kong pigi ka sabla danau kong sampe di kampung tu Dia da tinggal akang. Di situ ada bebrapa orang da bawa satu orang lumpu pa Yesus. Tu orang lumpu itu dorang da se tidor di atas tikar. Waktu Yesus lia tu dorang da beking, Yesus tau dorang percaya pa Dia, kong Dia bilang pa tu orang lumpu itu, “Se kuat jo ngana pe hati! Ngana pe dosa-dosa so dapa ampung.” Pe dengar itu, bebrapa ahli Taurat yang ada di situ bapikir dalam hati, “Dia anggap Dia itu Tuhan Allah, Dia so bahojat pa Tuhan Allah.” Mar Yesus tau tu dorang pe pikiran, kong Dia bilang, “Kiapa ngoni bapikir yang jaha pa ngoni pe hati? Mana tu lebe gampang orang mo percaya? Kita bilang, ‘Ngana pe dosa so dapa ampung,’ ato Kita bilang, ‘Bangong jo kong bajalang’? Mar skarang, Kita mo kase bukti pa ngoni supaya ngoni tau kalu di dunia ini Anak Manusia ada kuasa for kase ampung dosa.” Kong Yesus bilang pa tu orang lumpu itu, “Badiri jo, angka ngana pe tikar, kong pulang pa ngana pe ruma!” Trus tu orang lumpu itu badiri kong pulang pa de pe ruma. Pe lia itu, tu orang banya jadi tako kong dorang puji deng hormat pa Tuhan Allah yang so kase kuasa pe basar sama deng itu pa manusia. Abis itu Yesus se tinggal tu tampa itu, kong Dia lia satu petugas pajak tu de pe nama Matius, da dudu di loket, tu tampa ja babayar akang pajak. Kong Yesus bilang pa dia, “Iko jo pa Kita.” Pe dengar itu, Matius badiri kong iko pa Yesus. Trus Yesus deng Dia pe murit-murit da pi makang pa Matius pe ruma. Kong ada banya tu petugas pajak deng tu orang-orang yang orang ja anggap berdosa da datang iko makang sama-sama deng Yesus deng Dia pe murit-murit. Waktu tu orang-orang dari golongan Farisi lia itu, dorang bilang pa Yesus pe murit-murit, “Kiapa ngoni pe guru makang sama-sama deng tu petugas-petugas pajak deng tu orang-orang berdosa?” Yesus dapa dengar tu dorang da bilang, kong Dia manyao, “Bukang orang sehat tu perlu dokter mar tu orang saki. Dulu Tuhan Allah da babilang bagini, ‘Kita suka orang-orang se tunjung dong pe rasa kasiang pa orang laeng, daripada dorang kase korban persembahan mar dorang nyanda ada rasa kasiang.’ Jadi skarang ngoni pi cari tau jo tu arti dari tu Tuhan Allah da bilang itu. Soalnya Kita datang bukang for pangge tu orang-orang yang anggap dong pe diri ja beking tu butul di muka pa Tuhan, mar Kita datang for pangge tu orang-orang berdosa supaya iko pa Kita.” Ada bebrapa orang dari Yohanes Pembaptis pe murit datang pa Yesus. Dorang batanya pa Dia, “Kiapa torang deng tu orang-orang dari golongan Farisi ja bapuasa mar kiapa dang tu Bapak pe murit-murit nyanda?” Yesus manyao pa dorang, “Kalu tu pengantin laki-laki masi ada di pesta kaweng sama-sama deng de pe tamang-tamang, nyanda mungkin to kalu tu de pe tamang-tamang mo basedi. Mar ada de pe waktu orang-orang mo ambe tu pengantin laki-laki dari pa de pe tamang-tamang, kong waktu itu no tu de pe tamang-tamang mo bapuasa. Nyanda ada satu orang tu mo tampal kaeng baru di baju tua. Soalnya tu kaeng baru yang da se tampal itu mo bakacili kong beking rabe tu baju tua, trus de pe rabe mo jadi lebe basar. Bagitu lei, nyanda ada orang yang mo isi anggor baru di tampa anggor so tua yang dari kuli binatang. Soalnya kalu tu tampa anggor so tua, trus isi akang anggor baru, kong tu anggor baru itu mengembang, tu anggor itu mo beking polote tu tampa itu. De pe laste, tu anggor tabuang deng de pe tampa itu jadi rusak. Tu anggor baru musti isi di tampa anggor yang masi baru lei, supaya tu anggor deng de pe tampa tahang lama.” Waktu Yesus masi babicara deng tu bebrapa orang dari Yohanes Pembaptis pe murit, datang satu orang kapala ruma ibada agama Yahudi pa Dia. Tu orang itu berlutut di muka pa Yesus kong bilang, “Guru, kita pe anak parampuang baru da mati. Mar tolong kwa iko pa kita pigi pa kita pe ruma kong taru Guru pe tangan pa dia, kong dia mo hidop ulang.” Pe dengar itu, Yesus badiri kong Dia deng De pe murit-murit iko pa tu orang itu pigi pa tu orang itu pe ruma. Waktu dorang da bajalang, ada satu parampuang yang so dua blas taong da mendrita saki pendarahan badekat pa Yesus dari blakang kong dia sontong tu Yesus pe ujung juba. Dia beking bagitu lantaran dalam hati dia babilang, “Asal jo kita sontong tu Yesus pe juba, kita mo bae.” Yesus balia ka blakang, Dia dapa lia pa tu parampuang itu, kong Dia bilang, “Hei ibu, kase kuat jo ibu pe hati! Ibu skarang so bae lantaran percaya pa Kita.” Waktu itu jo tu parampuang itu jadi bae. Yesus bajalang trus kong sampe pa tu kapala ruma ibada pe ruma. Di situ Yesus lia ada tu orang-orang yang ja batiop suling, deng orang-orang yang da bamanangis. Mar Yesus bilang pa dorang, “Kaluar jo ngoni dari sini lantaran dia nyanda mati, dia cuma da tidor.” Mar dorang cuma da tatawa akang pa Yesus. Serta tu orang-orang itu dapa suru kaluar, Yesus maso pa tu anak itu pe kamar. Yesus pegang tu anak itu pe tangan, trus tu anak itu hidop ulang kong badiri. Tu kejadian itu tasiar ka sluru daera itu. Abis itu, Yesus pigi dari situ. Waktu Dia samantara bajalang, ada dua orang buta da iko-iko pa Dia, kong dorang babilang deng suara kuat, “Bapak, raja Daud pe keturunan, kasiang akang dang pa torang!” Waktu Yesus so maso ka satu ruma, tu dua orang buta itu datang pa Dia, kong Yesus tanya pa dorang dua, “Apa ngoni percaya kalu Kita bole se bae pa ngoni?” Dorang manyao pa Dia, “Iyo Bapak, torang percaya.” Kong Yesus raba tu dorang pe mata kong babilang, “Jadi jo pa ngoni sama deng tu ngoni percaya.” Waktu itu jo dorang so bole balia, kong Yesus bilang pa dorang deng tegas, “Ngoni jang kase tau pa sapa-sapa tentang tu Kita da beking pa ngoni ini.” Mar waktu dorang kaluar dari tu ruma, dorang se siar brita tentang Yesus ka sluru daera itu. Kong waktu tu dua orang buta yang so bae itu kaluar, ada bebrapa orang lei da bawa pa Yesus tu satu orang wowo tu da kemasukan akang setang. Kong waktu Yesus user tu setang dari pa tu orang wowo itu, tu orang itu so bole babicara. Tu orang-orang yang da bakumpul di situ taheran-heran kong baku bilang, “Torang blum perna lia tu kejadian rupa ini di Israel!” Mar tu orang-orang dari golongan Farisi babilang, “Dia da pake tu setang-setang pe bos pe kuasa da bauser tu setang-setang.” Kong Yesus babaron ka samua kota deng kampung. Yesus mangajar di ruma-ruma ibada agama Yahudi kong kase tau tu Kabar Bae tentang Tuhan Allah yang Berkuasa sbagai Raja. Dia lei kase bae orang-orang dari samua macam panyaki deng cacat. Waktu Yesus lia tu orang banya yang da iko-iko pa Dia, Dia rasa kasiang pa dorang. Soalnya dorang banya masala deng tabiar sama deng domba yang nyanda ada gembala. Kong Yesus bilang pa Dia pe murit-murit, “Tu orang-orang yang siap for trima tu Kabar Bae, dorang itu sama deng tu gandum yang so siap mo panen. Tu gandum itu pe banya, mar sadiki tu orang karja yang mo bapanen. So itu, minta jo pa tu tuang yang punya kobong itu supaya Dia kirim akang orang for bapanen pa Dia pe kobong.” Yesus pangge pa Dia pe dua blas murit, kong Dia kase kuasa pa dorang for user setang-setang deng for kase bae macam-macam panyaki deng cacat. Tu dua blas rasul tu Yesus pe utusan-utusan itu, dorang pe nama-nama ini: yang pertama Simon tu ja pangge lei Petrus, Andreas tu Petrus pe ade, Yakobus deng Yohanes tu Zebedeus pe anak-anak, Filipus, Bartolomeus, Tomas, Matius tu petugas pajak, Yakobus tu Alfeus pe anak, Tadeus, Simon tu dari Gerakan Yahudi Merdeka, deng Yudas Iskariot yang mo bahianat pa Yesus. Yesus utus tu Dia pe dua blas murit itu deng kase pesan pa dorang, “Ngoni jang pigi di tampa tinggal dari tu orang-orang yang bukang Yahudi ato jang lei maso ka kota-kota tu tampa tinggal orang Samaria, malatare ngoni pigi jo pa ngoni pe orang-orang Israel yang so sesat tu sama deng domba yang so ilang jalang. Ngoni pi kase tau pa dorang bagini, ‘So dekat de pe waktu for Tuhan Allah Berkuasa sbagai Raja.’ Kong kase bae jo tu orang-orang saki, kase hidop ulang tu orang-orang yang so mati, kase bae tu orang-orang yang da saki kusta deng user tu setang-setang dari pa orang-orang. Ngoni so trima samua itu deng cuma-cuma, jadi ngoni musti pake samua itu for tolong orang laeng deng cuma-cuma lei. Waktu ngoni pigi, ngoni jang bawa doi mas, doi perak ato doi tembaga pa ngoni pe tampa doi. Ngoni lei jang bawa tas bekal, baju for baganti, deng jang bawa lei slop ato tongkat, lantaran tu orang yang da beking de pe karja, dia itu pantas mo dapa tu de pe upah. Kalu ngoni maso di satu kota ato kampung, ngoni cari satu orang yang suka mo trima pa ngoni kong manumpang jo pa dia pe ruma sampe ngoni kaluar dari situ. Waktu ngoni maso ka satu ruma, ngoni musti kase salam pa orang-orang yang da tinggal di situ. Kalu dorang trima pa ngoni, tu berkat yang ngoni da kase lewat salam itu mo tetap tinggal di situ, mar kalu dorang nyanda trima pa ngoni, tu ngoni pe salam itu mo bale ulang pa ngoni. Kong kalu ada orang di satu ruma ato kota yang nyanda mo trima pa ngoni ato nyanda mo dengar ngoni pe ajaran, ngoni kaluar jo dari situ, ngoni paka jo tu abu pa ngoni pe kaki itu jadi tanda kalu Tuhan mo hukum pa dorang. Kita bilang pa ngoni, nanti di hari kiamat tu hari Tuhan mo adili samua orang, tu hukuman yang orang-orang di kota itu dapa mo lebe brat dari tu hukuman orang-orang yang dulu hidop di Sodom deng Gomora.” Yesus bilang lei, “Inga bae-bae, Kita utus pa ngoni pigi ka tenga-tenga orang-orang yang jaha, itu sama deng domba yang pigi ka tenga-tenga srigala yang ganas. Jadi ngoni musti banya akal sama deng ular yang cerdik deng ngoni pe hati lei musti tulus sama deng burung pombo yang bae-bae. Ngoni musti hati-hati, lantaran ada orang-orang yang mo bawa pa ngoni ka pengadilan agama deng ngoni mo dapa cambok di ruma-ruma ibada agama Yahudi. Dorang lei mo bawa pa ngoni mangada pa penguasa-penguasa deng raja-raja lantaran ngoni da iko pa Kita, kong itu justru jadi kesempatan for ngoni kase tau tu Kabar Bae dari Tuhan Allah pa dorang deng lei pa orang-orang yang nyanda kanal pa Tuhan Allah. Kalu dorang tangka pa ngoni, ngoni nyanda usa tako tentang apa tu ngoni mo bilang ato bagimana ngoni mo bicara pa dorang, lantaran Tuhan mo kase pa ngoni tu kata-kata yang musti ngoni bilang waktu itu. Soalnya apa tu ngoni mo bilang waktu itu, itu bukang ngoni pe kata-kata mar ngoni pe Bapa pe Roh pe kata-kata, Dia tu mo babilang lewat ngoni. Nanti ada de pe waktu, kalu tu orang yang nyanda percaya pa Kita mo srahkan dia pe sudara sandiri yang percaya pa Kita for dapa bunung, bagitu lei deng tu papa-papa mo beking pa dong pe anak-anak. Ada lei tu anak-anak mo malawang pa dorang pe orang tua, kong srahkan tu dorang pe orang tua for dapa bunung. Kong samua orang mo binci pa ngoni lantaran ngoni da iko pa Kita. Mar tu orang yang tetap iko pa Kita sampe ni dunia ini abis, so dia itu yang Tuhan mo se slamat. Kalu orang siksa pa ngoni di satu kota, ngoni lari jo ka kota laeng. Kita bilang pa ngoni, ngoni blum sempat pigi ka samua kota di Israel, kong tu Anak Manusia so datang. Nyanda ada murit yang lebe dari de pe guru, kong nyanda ada budak yang lebe dari de pe tuang. So cukup kalu ada murit jadi sama rupa de pe guru, kong cukup kalu ada budak jadi sama rupa de pe tuang. Kita ini sama deng satu tuang ruma, kong kalu orang-orang bilang Kita ini Beelzebul tu setang-setang pe bos, lebe soe lei ngoni dang tu ja iko pa Kita, dorang mo bilang yang lebe soe tentang ngoni. Jadi hati-hati jo ngoni. Mar ngoni nyanda usa tako pa dorang yang mo siksa pa ngoni. Soalnya apa yang jaha tu skarang ini tasambunyi, nanti orang mo dapa tau, deng apa yang skarang ini masi jadi rahasia, nanti orang mo tau. Apa yang Kita da bilang pa ngoni yang masi rahasia for orang laeng, ngoni musti kase tau itu di muka banya orang. Apa tu Kita da se bise pa ngoni pe talinga, ngoni musti pi kase tau di muka banya orang sama deng babicara dari atas ruma. Ngoni lei jang tako pa orang yang cuma mampu bunung ngoni pe badan mar nyanda ada kuasa bunung ngoni pe jiwa. Mar ngoni tako jo pa Tuhan Allah yang ada kuasa for se binasa tu ngoni pe badan deng lei ngoni pe jiwa di neraka. Co ngoni pikir kalu dua ekor burung pipit ja jual deng harga yang mura skali. Mar biar dorang nyanda ada harga, nyanda ada satu ekor yang mo jatung sampe ka tana kalu bukang Bapa pe mau. Bagitu lei deng ngoni, sampe ngoni pe rambu di kapala Tuhan tau de pe jumla. Jadi ngoni nyanda usa tako lantaran ngoni itu lebe berharga di mata pa Tuhan dari banya burung pipit. Sapa yang mangaku di muka pa orang-orang kalu dia iko pa Kita, Kita lei mo mangaku di muka pa Kita pe Bapa di sorga kalu Kita kanal pa dia. Mar sapa yang manyangkal di muka orang-orang kalu dia iko pa Kita, Kita lei mo manyangkal di muka pa Kita pe Bapa di sorga kalu Kita kanal pa dia”. Yesus bilang lei, “Ngoni jang bapikir kalu Kita datang di dunia ini for mo beking orang-orang hidop damai. Kita datang bukang for mo beking orang-orang hidop damai, malatare Kita datang beking orang-orang baku malawang. Soalnya Kita datang beking tu orang percaya deng nyanda percaya baku malawang: anak laki-laki malawang pa de pe papa, anak parampuang malawang pa de pe mama, deng anak mantu parampuang malawang pa de pe mama mantu. Tu orang pe kluarga sandiri yang jadi dia pe musu. Sapa yang sayang de pe papa ato de pe mama lebe dari sayang pa Kita, dia itu nyanda pantas iko pa Kita. Kong sapa yang sayang de pe anak laki-laki ato parampuang lebe dari sayang pa Kita, dia itu lei nyanda pantas iko pa Kita. Sapa yang nyanda pikul de pe salib, tu de pe arti dia nyanda siap mendrita sampe mati kong iko pa Kita, tu orang itu nyanda pantas mo iko pa Kita. Sapa yang mo hidop cuma for de pe diri sandiri, so dia tu nyanda mo dapa hidop kekal. Mar komang, sapa yang mo kase de pe hidop lantaran iko pa Kita, so dia tu mo dapa hidop kekal.” Yesus bilang lei, “Sapa jo yang trima pa ngoni, dia so trima pa Kita. Kong sapa jo yang trima pa Kita, dia so trima pa Tuhan Allah yang da utus pa Kita. Sapa jo yang trima pa satu nabi lantaran dia itu nabi, tu orang itu mo dapa upah dari pa Tuhan yang sama deng tu nabi mo dapa. Kong sapa jo yang trima pa orang yang ja beking tu butul di muka pa Tuhan lantaran tu orang itu memang ja beking tu butul, tu orang yang trima tu orang yang ja beking tu butul itu mo dapa upah dari Tuhan sama deng tu upah yang Tuhan mo kase pa samua orang yang ja beking tu butul di muka pa Dia. Sapa jo yang kase minum, biar lei cuma satu glas aer puti pa satu orang yang nyanda penting lantaran dia itu orang yang ja iko pa Kita, Kita bilang pa ngoni kalu tu orang yang beking itu pasti mo dapa de pe upah dari Tuhan.” Serta Yesus so klar mangajar pa Dia pe dua blas murit, Dia pigi kong mangajar deng kase tau tu Tuhan pe firman pa orang-orang yang ada di kota-kota di daera Galilea. Waktu itu, Yohanes Pembaptis ada di dalam bui. Kong waktu Yohanes dengar tentang samua tu Yesus Kristus da beking, dia suru de pe murit-murit pigi pa Yesus for batanya. Kong tu Yohanes pe murit-murit pi batanya pa Yesus bagini, “Apa Bapak tu Tuhan Allah da janji mo datang itu? Ato torang musti tunggu orang laeng lei?” Kong Yesus manyao pa dorang, “Ngoni babale jo pa Yohanes kong bilang pa dia apa tu ngoni da dengar deng ngoni da lia: tu orang buta so bole balia, orang yang lumpu so bole bajalang, orang yang saki kusta so bae, orang yang pongo so bole badengar, orang mati so hidop ulang, kong orang miskin so dengar tu Kabar Bae dari Tuhan Allah. Kong orang yang nyanda tolak for percaya pa Kita, dia itu yang paling snang.” Serta tu Yohanes pe murit-murit itu pigi, Yesus mulai babicara pa orang banya yang ada di situ tentang Yohanes. Dia tanya pa dorang, “Apa ngoni pe tujuan pi lia pa Yohanes di padang gurun? Apa ngoni ka sana supaya ngoni mo pi lia tu orang yang ni hari bicara laeng kong eso laeng, sama deng kusu-kusu yang tagoyang kasana-kamari lantaran angin da tiop? Tantu bukang bagitu to? No kalu bagitu dang, for apa ngoni ka padang gurun? Apa ngoni ka sana supaya ngoni mo pi lia tu orang yang da pake baju mewa? Tantu bukang bagitu lei to? Soalnya tu orang yang ja pake baju mewa, de pe tampa tinggal pa raja pe istana. Jadi for apa ngoni ka sana? Apa ngoni ka sana for lia pa nabi? Itu butul. Mar Kita bilang pa ngoni kalu Yohanes itu lebe dari nabi. Soalnya di Kitab Suci da tulis tu Tuhan Allah da bilang tentang Yohanes, ‘Tarukira jo bae-bae, Kita suru tu Kita pe utusan lebe dulu dari Ngana, dia itu yang mo buka akang jalang for Ngana, supaya orang pe hati siap trima pa Ngana.’ Kita bilang pa ngoni, dari antara orang-orang yang parampuang da se lahir di dunia ini, nyanda perna ada tu lebe penting dari Yohanes Pembaptis. Mar tu orang yang orang ja anggap nyanda penting dari antara orang-orang yang Tuhan Allah da Berkuasa sbagai Raja, so tu orang itu yang lebe penting dari Yohanes Pembaptis. Mulai dari waktu Yohanes Pembaptis muncul sampe skarang, ada orang-orang jaha malawang tu orang-orang dari Tuhan Allah yang Berkuasa sbagai Raja, tu orang-orang jaha itu brusaha deng kekrasan mo kuasai pa dorang. Soalnya seblum Yohanes muncul, di samua kitab tu nabi-nabi da tulis deng lei di atoran-atoran yang ada di kitab Taurat, so bilang tentang tu mo jadi skarang ini. Nabi-nabi dulu so kase tau kalu nabi Elia mo datang ulang. Jadi kalu ngoni suka mo trima tu nabi-nabi da bilang dulu tentang Yohanes ini, so dia ini no tu nabi-nabi ja bilang Elia yang mo datang ulang itu. Jadi sapa tu ada talinga, badengar jo bae-bae. Kita mo se banding deng apa tu orang-orang yang nyanda percaya di jaman ini? Dorang ini Kita mo se sama deng anak-anak yang da dudu bermain di pasar kong bataria pa dong pe tamang-tamang bagini, ‘Torang da tiop suling for ngoni, mar ngoni nyanda manari. Torang da manyanyi lagu duka, mar ngoni nyanda manangis.’ Itu sama deng ngoni nyanda trima Yohanes deng Kita. Waktu Yohanes datang ja bapuasa deng nyanda minum anggor, mar orang-orang bilang, ‘Dia itu da kemasukan setang!’ Kong skarang tu Anak Manusia so datang. Dia nyanda bapuasa deng Dia lei ja minum anggor, kong orang-orang bilang, ‘Co lia, tu orang ini pe rakus deng pangmabo. Dia lei ja batamang deng tu petugas-petugas pajak deng tu orang-orang berdosa.’ Mar biar ngoni bilang bagitu, torang bole lia Tuhan pe hikmat dari tu kalakuan yang bagus dari tu orang-orang yang da iko Tuhan pe ajaran.” Abis itu, Yesus mulai togor deng kras pa tu orang-orang yang ada di kota-kota tu Dia da beking akang mujisat paling banya, lantaran dorang nimau mo bertobat. Yesus bilang, “Hei ngoni tu orang-orang di Khorazim deng Betsaida, cilaka jo ngoni! Soalnya Kita so beking mujisat-mujisat di tenga-tenga pa ngoni mar ngoni nimau mo percaya kong bertobat. Padahal kalu tu orang-orang di Tirus deng Sidon waktu dulu da lia tu mujisat-mujisat yang Kita da beking pa ngoni, pasti so dari dulu dorang da bertobat kong pake baju karong deng taru abu pa dong pe kapala tanda dorang manyasal da beking dosa. Mar Kita bilang pa ngoni, nanti waktu di hari kiamat tu hari Tuhan mo adili samua orang, tu ngoni pe hukuman mo lebe brat dari tu orang-orang dulu di Tirus deng Sidon pe hukuman. Kong ngoni orang-orang di Kapernaum, ngoni kira Tuhan mo angka pa ngoni sampe ka sorga? Nyanda kasiang, malatare Dia mo buang pa ngoni ka neraka. Soalnya Kita so beking mujisat-mujisat di tenga-tenga pa ngoni mar ngoni nimau bertobat. Padahal kalu tu mujisat-mujisat yang Kita da beking pa ngoni da jadi lei jaman dulu di Sodom, pasti tu Sodom itu masi ada sampe skarang. Kita bilang pa ngoni, nanti di hari kiamat tu hari Tuhan mo adili samua orang, tu ngoni pe hukuman mo lebe brat dari tu orang-orang dulu di Sodom pe hukuman.” Abis itu Yesus basombayang, “Kita bilang makase pa Bapa, Tuhan yang berkuasa di langit deng bumi, lantaran Bapa nyanda kase tunjung samua hal itu pa tu orang-orang yang tau banya hal deng pa orang-orang pande for mangarti tu samua itu. Mar Bapa beking jelas samua itu pa tu orang-orang biasa yang dong pe hati polos sama deng anak kacili. Iyo Bapa, itu yang beking snang Bapa pe hati.” Abis itu Yesus bilang, “Kita pe Bapa so kase samua pa Kita. Nyanda ada satu orang yang tau sapa tu Bapa pe Anak, kacuali Bapa sandiri. Kong nyanda ada satu orang yang tau sapa tu Bapa kacuali Dia pe Anak, deng sapa jo tu Anak da pili for tau tentang Bapa. Mari jo datang pa Kita, samua ngoni yang lala deng yang banya beban, kong Kita mo beking ngoni pe hati jadi lega. Ngoni iko jo tu prenta yang Kita da kase pa ngoni, sama deng tu sapi yang da se pake akang kuk for iko de pe tuang pe mau. Ngoni blajar jo dari pa Kita lantaran Kita ini bae-bae deng nyanda sombong. Kalu ngoni beking bagitu, ngoni pe hati mo jadi lega. Soalnya tu prenta yang Kita da kase itu nyanda susa, kong tu beban yang Kita da kase pa ngoni nyanda brat.” Satu hari pas hari Sabat, tu hari yang orang nimbole bakarja, Yesus deng De pe murit-murit bajalang lewat di kobong gandum. Samantara bajalang di situ, Dia pe murit-murit so lapar, so itu dorang mulai bapete gandum kong dorang makang. Waktu itu, ada orang-orang dari golongan Farisi yang da lia itu, kong dorang babilang pa Yesus, “Bapak, co lia tu Bapak pe murit-murit! Sebenarnya kalu iko atoran agama, dorang nimbole bakarja di hari Sabat, mar dorang da langgar tu atoran itu.” Mar Yesus manyao pa dorang, “Tantu ngoni so perna baca di Kitab Suci tu cirita tentang Raja Daud waktu dia deng de pe orang-orang so lapar. Dia maso ka dalam Tuhan Allah pe tenda ibada kong makang tu roti yang da kase persembahan for Tuhan Allah, trus dia kase berbage tu roti itu pa de pe orang-orang, padahal dia ato de pe orang-orang nimbole makang tu roti, cuma tu imam-imam yang bole makang itu. Ngoni lei pasti so baca tu atoran-atoran yang ada di kitab Taurat kalu tiap hari Sabat tu imam-imam bertugas di Ruma Ibada Pusat. Deng beking bagitu dorang lei so langgar tu hari Sabat pe atoran. Mar nyanda sala to tu dorang da beking itu? Kita bilang pa ngoni, tu Ruma Ibada Pusat penting skali, mar di sini ada yang lebe penting dari itu. Di Kitab Suci, Tuhan Allah da bilang bagini, ‘Kita suka orang-orang se tunjung dong pe rasa kasiang pa orang laeng, daripada dorang kase korban persembahan mar nyanda ada rasa kasiang.’ Kalu ngoni mangarti tu Tuhan da bilang itu, pasti ngoni nyanda mo kase sala pa Kita pe murit-murit yang nyanda beking sala apa-apa. Soalnya tu Anak Manusia ada kuasa for ator apa tu manusia bole mo beking di hari Sabat.” Yesus se tinggal tu tampa itu kong pigi pa dorang pe ruma ibada agama Yahudi. Di situ ada tu satu orang yang dia pe tangan sabla cacat, deng ada lei orang-orang dari golongan Farisi. Tu orang-orang dari golongan Farisi batanya pa Yesus, “Bole ato nyanda se bae orang saki di hari Sabat, tu hari orang nimbole bakarja?” Dorang da lia-lia trus pa Yesus mo cari tau kalu Dia mo kase bae orang saki di hari Sabat tu hari orang Yahudi nimbole bakarja, supaya kalu Dia beking bagitu, dorang bole ada alasan for se sala pa Dia. Kong Yesus bilang pa dorang, “Kalu dari pa ngoni ada yang punya satu ekor domba kong tu domba itu taisi di lobang pas di hari Sabat, pasti dia mo pi kase kaluar tu domba itu dari lobang. No, tu manusia lebe berharga dari domba, kong so lantaran itu torang bole beking tu bae di hari Sabat.” Trus Yesus bilang pa tu orang yang de pe tangan sabla cacat, “Co se kamuka kamari tu ngana pe tangan!” Tu orang itu se kamuka de pe tangan, kong dia pe tangan itu jadi bae sama deng de pe tangan sabla yang nyanda cacat. Mar tu orang-orang dari golongan Farisi kaluar dari tu ruma ibada itu kong baku skongkol for bunung pa Yesus. Yesus tau kalu tu orang-orang dari golongan Farisi da barencana mo bunung pa Dia, so itu Dia pigi dari situ. Waktu Dia pigi, banya orang da iko pa Dia kong Dia kase bae samua orang yang da saki. Mar Dia larang deng kras pa dorang kase tau sapa Dia. Deng bagitu so gnap apa tu Tuhan Allah da bilang dulu pa nabi Yesaya, bagini tu Dia da bilang, “Ini tu Kita pe Playan yang Kita so pili. Kita sayang pa Dia, Dia itu beking snang Kita pe hati. Kita mo kase pa Dia tu Kita pe Roh, kong Dia mo kase tau pa bangsa-bangsa kalu Kita nanti mo adili samua orang deng cara yang adil. Dia nyanda mo baku ambe deng sapa-sapa deng nyanda mo bataria akang, orang-orang lei nyanda mo dengar Dia babicara di muka banya orang di jalang-jalang. Dia mo bae-bae akang tu orang yang lemah, itu sama deng Dia nyanda mo kase putus tu buluh yang so pata, sama lei deng Dia nyanda mo se mati tu pelita yang de pe manyala so kacili. Dia mo pimpin sampe tu adil menang dari tu nyanda adil. Samua bangsa mo baharap deng yakin pa Dia.” Satu kali, ada bebrapa orang pigi pa Yesus, kong dorang da bawa satu laki-laki yang da kemasukan akang setang. Tu laki-laki itu buta deng wowo. Yesus se bae pa dia, kong dia so bole balia deng babicara. Pe lia bagitu, tu orang-orang di situ jadi taheran-heran, kong dorang baku bilang, “Dia stou kang tu raja Daud pe keturunan yang Tuhan da janji mo datang?” Mar waktu tu orang-orang dari golongan Farisi dapa dengar itu, dorang babilang, “Dia da bauser setang-setang pake Beelzebul pe kuasa, tu setang-setang pe bos.” Mar Yesus tau tu dorang pe pikiran, kong Dia bilang pa dorang, “Kalu rakyat di satu krajaan baku malawang kong tapisa-pisa, tu krajaan so pasti mo ancor, deng lei kalu satu kota ato satu ruma tangga baku malawang kong tapisa-pisa, so pasti mo ancor. Bagitu lei kalu setang user setang, dorang itu so tapisa-pisa lantaran da baku musu, so pasti dong pe krajaan mo ancor. No kalu butul Kita da bauser setang pake Beelzebul pe kuasa, ngoni pe murit-murit dang da bauser setang pake sapa pe kuasa? Tantu katu pake Tuhan Allah pe kuasa to? Jadi dari apa tu ngoni pe murit-murit da beking itu, itu se tunjung kalu tu ngoni da tudu pa Kita itu sala. Mar kalu Kita da bauser setang pake kuasa dari Tuhan Allah pe Roh, itu de pe arti Tuhan Allah so Berkuasa sbagai Raja di tenga-tenga pa ngoni. Kalu ada satu orang mo maso ambe barang pa orang kuat pe ruma, dia musti ika dulu tu orang kuat itu baru dia bole ambe tu barang-barang di ruma itu. Sapa yang nimau sama-sama deng Kita, dia itu sebenarnya malawang pa Kita. Kong sapa yang nyanda tolong pa Kita for se kumpul tu orang-orang supaya dorang sama-sama deng Kita, dia itu yang beking orang-orang tafiaro jao dari pa Kita. So itu Kita bilang pa ngoni, samua tu dosa yang orang da beking masi bole mo dapa ampung, bagitu lei deng bahojat. Mar kalu orang bahojat pa Roh Kudus, dia nyanda mo dapa ampung. Kalu orang bilang sesuatu yang malawang pa Anak Manusia, dia masi bole mo dapa ampung. Mar kalu orang bilang sesuatu yang malawang pa Roh Kudus, dia so nyanda mo dapa ampung, skarang ato sampe slama-lamanya.” Yesus bilang lei, “Kalu ada pohong yang bagus, tantu lei de pe bua bagus. Kalu ada pohong yang nyanda bagus, tantu lei de pe bua nyanda bagus. Torang bole mo dapa tau kalu tu pohong bagus ato nyanda, cuma dari de pe bua. Ngoni itu orang jaha, tu bole mo se sama deng tu ular babisa. Nyanda mungkin ngoni bole mo bilang tu hal-hal yang bae lantaran ngoni sandiri jaha. Soalnya apa yang ada pa orang pe dalam hati, itu yang mo kaluar dari dia pe mulu. Orang yang bae-bae ja bilang tu bae, lantaran samua yang ada pa dia pe dalam hati bae. Mar tu orang jaha ja bilang tu jaha, lantaran samua yang ada pa dia pe dalam hati jaha. Kita bilang pa ngoni, nanti di hari kiamat tu hari Tuhan mo adili pa samua orang, tiap orang musti tanggong jawab pa Tuhan tu samua kata-kata yang dia da bilang, biar tu kata-kata yang da tabilang nyanda bapikir dulu. Soalnya Tuhan mo tentukan kalu ngoni itu orang yang butul ato orang yang mo dapa hukum lewat tu ngoni pe kata-kata.” Kong bebrapa ahli Taurat deng orang dari golongan Farisi bilang pa Yesus, “Guru, torang suka Guru se tunjung satu mujisat.” Mar Yesus bilang pa dorang, “Ngoni tu orang-orang skarang ini, ngoni ini jaha deng nyanda setia pa Tuhan Allah. Ngoni minta pa Kita beking mujisat for se bukti kalu Kita dari pa Tuhan Allah. Mar Kita nyanda mo kase bukti apa-apa pa ngoni, kacuali Kita mo se inga pa ngoni apa tu da jadi pa nabi Yunus dulu. Dulu nabi Yunus ada di dalam ikang basar pe puru slama tiga hari tiga malam, bagitu lei deng Anak Manusia, Dia mo ada di dalam kubur slama tiga hari tiga malam. Kong nanti di hari kiamat tu hari Tuhan mo adili pa samua orang, tu orang-orang yang dulu da tinggal di kota Niniwe mo hidop ulang sama-sama deng ngoni tu orang-orang skarang ini, kong dorang mo kase tunjung tu ngoni pe sala trus ngoni mo dapa hukuman. Soalnya tu orang-orang Niniwe itu bertobat serta dorang dengar tu Tuhan pe pesan yang Yunus da kase tau. Kong tarukira jo bae-bae, skarang ini ada Orang yang lebe berkuasa dari nabi Yunus di tenga-tenga pa ngoni, ngoni so dengar tu Tuhan pe pesan mar ngoni nimau bertobat. Deng lei nanti di hari kiamat tu hari Tuhan mo adili pa samua orang, tu ratu Syeba yang dulu da kuasai negri di bagean Slatan mo hidop ulang sama-sama deng ngoni tu orang-orang skarang ini, trus dia mo se tunjung tu ngoni pe sala kong ngoni mo dapa hukuman. Soalnya dulu dia itu da datang dari jao skali pigi pa raja Salomo for dengar tu raja Salomo pe hikmat. Mar ngoni tarukira jo bae-bae, skarang di sini ada Orang yang lebe berkuasa dari raja Salomo, mar ngoni tetap nyanda mo badengar pa Dia.” Yesus bilang lei, “Kalu setang kaluar dari satu orang, tu setang itu pi babaron lewat tu tampa-tampa tandus for cari tampa mo tinggal akang. Mar lantaran dia nyanda dapa tampa mo baistirahat akang, dia bapikir bagini, ‘Lebe bae kita babale jo di tampa tinggal dulu, tu orang yang kita so perna tinggal akang.’ Waktu dia bale kong maso ulang pa tu orang itu, dia lia tu orang itu sama deng ruma yang so sosapu akang bersi deng so taator rapi. Abis itu, tu setang pi pangge tuju setang laeng yang lebe jaha dari dia, kong dorang maso pa tu orang itu trus tinggal di situ. De pe laste, tu orang itu pe keadaan so lebe soe dari tu pertama. Itu no yang mo jadi pa ngoni tu orang-orang yang tinggal di jaman ini.” Waktu Yesus masi babicara deng tu orang banya itu, Dia pe mama deng De pe sudara-sudara da badiri di luar, dorang da brusaha mo babicara deng Dia. Kong ada satu orang kase tau pa Yesus, “Bapak, co lia tu Bapak pe mama deng Bapak pe sudara-sudara ada di luar, kong dorang brusaha mo baku dapa deng Bapak.” Kong Yesus bilang pa tu orang yang kase tau itu pa Dia, “Sebenarnya sapa so tu Kita pe mama deng Kita pe sudara-sudara?” Kong Yesus tunjung tu De pe murit-murit trus babilang, “Co lia, dorang ini no tu Kita pe mama deng Kita pe sudara-sudara. Soalnya sapa yang beking tu Kita pe Bapa di sorga pe mau, so dia tu Kita pe sudara laki-laki, so dia tu Kita pe sudara parampuang deng so dia tu Kita pe mama.” Hari itu, Yesus kaluar dari tu ruma kong pigi ka pinggir danau Galilea, trus Dia dudu di situ. Di pinggir danau itu banya skali orang datang bakumpul pa Dia. So itu Dia nae ka prao tu ada di situ trus dudu di atas prao, kong tu orang banya da badiri di pinggir danau. Yesus kase ajar banya hal pa dorang pake prumpamaan, Dia bilang, “Ada tu petani pigi baambor bibit. Samantara dia baambor di kobong, ada bibit yang da taciri di jalang, kong burung-burung datang teto tu bibit sampe abis. Ada lei bibit tu da taciri di tana yang babatu-batu, tu de pe tana cuma sadiki. Tu bibit di tampa itu capat batumbu lantaran de pe tana sadiki. Mar serta matahari so kaluar, tu tanaman itu layu kong kring lantaran de pe akar nyanda tatanang butul di tana. Kong tu bibit laeng da taciri di tana yang ada rumpu baduri. Serta tu bibit mulai batumbu, tu rumpu baduri lei batumbu jadi lebe basar kong tu rumpu gepe tu tanaman yang so batumbu sampe mati. Mar tu bibit laeng komang da taciri di tana subur. Tu bibit batumbu kong babua. Dia babua sampe de pe hasil ada tu tiga pulu kali lipa, ada tu anam pulu kali lipa, deng ada lei tu sratus kali lipa. Sapa tu ada talinga, badengar jo bae-bae.” Abis itu, Yesus pe murit-murit pi badekat pa Dia kong batanya, “Guru, kiapa Guru da babicara pa orang banya itu pake prumpamaan?” Yesus manyao, “Tuhan Allah beking ngoni bole tau deng jelas tu rahasia tentang Tuhan Allah Berkuasa sbagai Raja, mar pa orang laeng, dorang nimbole tau tu rahasia itu. Soalnya kalu ada orang yang mo trima tu Tuhan pe firman, Tuhan mo beking dia lebe mangarti sampe dia jadi mangarti skali. Mar kalu ada orang yang nimau mo trima tu Tuhan pe firman, apa yang dia so tau, Tuhan mo ambe dari pa dia. So itu no Kita da mangajar pa dorang pake prumpamaan, lantaran ‘Biar dorang balia, dorang nyanda mangarti apa tu da lia. Biar dorang badengar, dorang nyanda dengar deng dorang nyanda mangarti.’ Jadi apa tu da jadi pa orang-orang ini, itu beking gnap tu Tuhan da bilang dulu pa nabi Yesaya. Tuhan da bilang bagini, ‘Biar ngoni mo dengar-dengar trus, mar ngoni nyanda mo mangarti. Biar lei ngoni mo lia-lia trus, mar ngoni nyanda mampu mo mangarti apa tu da jadi. Soalnya tu bangsa ini so kras hati. Dorang pe talinga so nimau mo badengar, dorang lei tutu dong pe mata. So lantaran dorang da beking bagitu, dorang nyanda mo lia tu butul. Dorang nyanda mo badengar deng dong pe talinga, dorang lei nyanda mo mangarti deng dong pe hati, jadi dorang nyanda mo bertobat, kong Kita nyanda mo se slamat pa dorang.’ ” Yesus bilang lei pa Dia pe murit-murit, “Mar ngoni ini yang paling snang. Soalnya ngoni bole lia deng ngoni pe mata kapala sandiri trus mangarti, deng ngoni lei bole dengar deng ngoni pe talinga kong tau de pe arti. Kita bilang pa ngoni, dulu banya nabi deng orang yang ja beking tu butul yang suka mo lia apa tu ngoni so lia, mar dorang nyanda dapa kesempatan for lia itu. Dorang lei suka mo dengar apa tu ngoni so dengar, mar dorang nyanda dapa kesempatan for dengar itu.” Yesus bilang lei, “Jadi ngoni dengar bae-bae jo tu arti dari prumpamaan bibit di macam-macam tana. Tu bibit yang da taciri di jalang sama deng orang-orang yang da dengar tu firman tentang Tuhan Allah Berkuasa sbagai Raja, mar dorang nyanda mangarti. Pe klar dorang dengar tu firman, setang pe bos datang ambe tu firman itu dari pa dorang pe hati. Tu bibit yang da taciri di tana babatu-batu, itu sama deng orang-orang yang da dengar tu firman kong iko trima itu deng hati snang. Mar tu firman nyanda baakar butul pa dorang pe hati, so itu nyanda lama da batahang. Kalu dapa siksa deng mendrita lantaran percaya tu firman itu, dorang iko jadi nyanda percaya lei pa Tuhan. Tu bibit yang da taciri di tana yang ada rumpu baduri, itu sama deng orang-orang yang so dengar tu firman, mar dorang talalu kuatir deng tu dorang pe hidop deng dorang tagila-gila deng harta. Samua itu beking tu firman nyanda ada de pe arti pa dong pe hidop, itu sama deng tu firman nyanda babua pa dong pe hati. Kong tu bibit yang da ciri di tana subur, itu sama deng tu orang-orang yang badengar tu firman kong dia mangarti. So itu dorang hidop iko tu Tuhan pe mau, sama deng tu bibit yang da batumbu sampe babua. Ada yang babua tiga pulu kali lipa, ada tu anam pulu kali lipa deng ada lei tu sratus kali lipa.” Kong Yesus kase cirita lei prumpamaan laeng pa tu orang banya itu, Dia bilang, “Waktu Tuhan Allah Berkuasa sbagai Raja pa Dia pe orang-orang, de pe keadaan sama deng ni prumpamaan ini: satu hari, ada satu orang da baambor bibit gandum yang bagus pa de pe kobong. Mar satu malam waktu samua orang yang karja di situ da tasono, tu orang yang baambor bibit pe musu datang pa tu orang itu pe kobong. Tu musu pi ambor akang bibit kusu-kusu, abis itu dia pigi. Kong waktu tu bibit gandum batumbu deng mulai babiji, tu kusu-kusu lei mulai muncul. Waktu tu orang yang punya kobong pe orang karja lia tu kusu-kusu itu, dorang pigi pa tu yang punya kobong itu kong babilang bagini, ‘Tuang, torang tau kalu tuang da ambor cuma tu bibit yang bagus di kobong. Mar skarang, kiapa dang sampe so ada kusu-kusu da batumbu di kobong?’ Tu orang yang punya kobong itu bilang pa dorang, ‘Ini samua pasti kita pe musu yang da beking.’ Kong tu dia pe orang karja batanya lei pa dia, ‘Kalu bagitu, apa tuang suka kalu torang mo pi cabu tu kusu-kusu yang ada di kobong?’ Mar tu tuang itu manyao, ‘Ngoni jang beking bagitu. Soalnya kalu ngoni cabu tu kusu-kusu itu, nanti ada tu gandum lei yang mo iko tacabu. Jadi lebe bae se biar jo tu gandum deng tu kusu-kusu itu batumbu sama-sama sampe tu oras panen datang. Kong nanti waktu so oras panen, kita mo suru pa tu orang-orang yang bapanen for kase kumpul dulu tu kusu-kusu, kong ika jadi satu-satu bal for mo bakar. Abis itu baru kase kumpul tu gandum kong pi simpang pa kita pe lumbung.’ ” Kong Yesus se cirita prumpamaan laeng lei pa dorang. Dia bilang, “Tuhan Allah Berkuasa sbagai Raja pa Dia pe orang-orang, mo jadi bagini: Tuhan pe orang-orang pertama cuma sadiki, itu sama deng tu biji paling kacili yang orang da kase ambor pa de pe kobong. Tu biji itu yang paling kacili dari samua biji. Mar kalu tu biji batumbu, dia jadi tanaman yang lebe basar dari tu tanaman-tanaman laeng di kobong sayor, dia jadi sama deng pohong, so itu burung-burung datang basarang pa de pe cabang-cabang, bagitu lei deng Tuhan pe orang-orang jadi banya sama deng tu biji yang da jadi pohong itu.” Yesus lei kase tau prumpamaan laeng pa dorang, Dia bilang, “Tuhan Allah Berkuasa sbagai Raja pa Dia pe orang-orang yang dari sadiki orang kong jadi banya, itu bole mo se sama deng ragi sadiki yang satu parampuang da ambe kong kase campur ka ampa pulu liter topong trigu sampe bareis tu adonan.” Yesus mangajar pa tu orang banya itu pake prumpamaan, Dia nyanda kase tau apa-apa pa dorang kalu nyanda pake prumpamaan. Deng Dia pake prumpamaan rupa itu, so jadi apa tu Tuhan da bilang dulu lewat Dia pe nabi, bagini tu Tuhan Allah da bilang, “Kita mo babicara pa orang banya pake prumpamaan. Kita mo kase tau tu hal-hal yang orang blum perna tau dari dulu waktu Kita da beking ni dunia.” Abis itu, Yesus kase tinggal tu orang banya kong babale ka ruma. Di situ Dia pe murit-murit datang kong babilang, “Guru, co trangkan akang pa torang dang tu arti dari prumpamaan kusu-kusu yang da batumbu di antara gandum di kobong.” Kong Yesus bilang pa dorang, “Orang yang da baambor tu bibit yang bagus, itu tu Anak Manusia. Tu kobong itu sama deng dunia, kong tu bibit yang bagus sama deng tu orang-orang dari Tuhan Allah yang Berkuasa sbagai Raja. Mar tu kusu-kusu itu sama deng setang pe bos pe orang-orang, kong tu musu yang da baambor tu bibit kusu-kusu, so dia tu setang pe bos. Tu oras panen itu, itu no tu hari kiamat, hari Tuhan mo adili pa samua orang. Kong tu orang-orang yang bapanen itu, so dorang itu tu malaekat-malaekat. Jadi sama deng tu kusu-kusu yang orang da cabu kong kumpul trus buang di api, bagitu lei no tu mo jadi di hari kiamat. Waktu itu, tu Anak Manusia mo utus De pe malaekat-malaekat. Dorang mo pigi pa tu orang-orang dari Tuhan Allah yang Berkuasa sbagai Raja, kong dari antara pa dorang itu, tu malaekat-malaekat mo se kumpul tu orang-orang yang beking orang laeng berdosa deng tu orang-orang yang ja beking tu jaha. Kong Dia pe malaekat-malaekat itu mo se lego tu orang-orang itu ka dalam tampa yang baapi. Di situ dorang pe siksa skali, dorang mo manangis deng dong pe gigi tabaku goso kong babunyi lantaran pe mendrita skali. Mar tu orang-orang yang ja beking tu butul, dorang mo basinar sama deng matahari di dalam krajaan dari dorang pe Bapa yang Berkuasa sbagai Raja. Jadi sapa tu ada talinga, badengar jo bae-bae!” Kong Yesus bilang lei, “Kalu Tuhan Berkuasa sbagai Raja pa Dia pe orang-orang, itu sama deng tu prumpamaan ini: ada harta yang orang da tambung di kobong. Satu hari ada satu orang dapa tu harta itu kong dia kase tambung ulang tu harta itu. Tu orang itu pe snang skali kong pi jual samua tu dia punya trus pake tu doi dari hasil da bajual for bli tu kobong itu, supaya tu harta yang da tambung itu jadi dia punya.” Yesus bilang lei, “Kalu Tuhan Berkuasa sbagai Raja pa Dia pe orang-orang, itu sama lei deng tu prumpamaan ini: ada tu satu orang pedagang da bacari mutiara yang bagus deng mahal for dia mo bli. Waktu dia dapa tu satu mutiara yang bagus deng mahal, dia pi jual samua yang dia punya trus tu doi dari hasil da bajual itu dia pake for bli tu mutiara itu.” Yesus bilang lei, “Tuhan Allah Berkuasa sbagai Raja de pe keadaan sama deng tu prumpamaan ini: ada tu bebrapa orang buang jala basar ka danau kong dorang dapa macam-macam ikang. Serta tu jala so punung deng ikang, dorang hela tu jala ka pinggir danau. Abis itu dorang dudu kong kase pisa-pisa tu ikang-ikang, yang bagus dorang taru di tampayang, mar tu ikang yang nyanda bagus dorang buang. Bagitu lei no tu mo jadi nanti di hari kiamat, tu hari Tuhan mo adili samua orang. Waktu itu, tu malaekat-malaekat mo datang kong kase pisa tu orang-orang jaha dari tu orang-orang yang ja beking tu butul di muka pa Tuhan. Kong tu malaekat-malaekat mo kase lego tu orang jaha ka dalam tampa yang baapi. Di sana orang-orang manangis deng dong pe gigi tabaku goso kong babunyi lantaran pe mendrita skali.” Abis itu Yesus batanya pa De pe murit-murit, “Apa ngoni mangarti samua tu prumpamaan-prumpamaan itu yang Kita da kase cirita pa ngoni?” Kong dorang manyao pa Yesus, “Iyo Guru, torang mangarti.” Kong Yesus bilang lei pa dorang, “Tiap ahli Taurat yang so trima tu ajaran bagimana Tuhan Allah Berkuasa sbagai Raja, dia itu bole mo se sama deng tu satu tuang ruma yang da simpang barang pa dia pe ruma: dia bole kase kaluar de pe barang-barang berharga yang lama deng lei dia bole kase kaluar de pe barang-barang yang masi baru dari de pe tampa simpang barang.” Waktu Yesus so klar kase cirita tu prumpamaan-prumpamaan itu, Dia kase tinggal tu tampa itu. Yesus pigi pa Dia pe kampung. Di situ Yesus mangajar pa orang-orang di ruma ibada agama Yahudi. Tu orang-orang yang da badengar pa Dia taheran-heran kong babilang, “Dia tau dari mana stou kang tu ajaran ini? Kong sapa tu da kase kuasa pa Dia for beking tu mujisat-mujisat itu? Padahal Dia itu cuma tukang kayu pe anak. Dia pe mama tu Maria kong Dia pe sudara-sudara laki-laki tu Yakobus, Yusuf, Simon deng Yudas. Samua tu Dia pe sudara-sudara parampuang lei da tinggal sama-sama deng torang di sini. Jadi dari mana Dia bole mo dapa tu ajaran deng kuasa itu?” Kong tu orang-orang nyanda trima pa Dia, so itu Yesus bilang pa dorang, “Di mana-mana orang ja hormat pa nabi, kacuali pa tu nabi pe kampung sandiri deng pa de pe ruma.” So lantaran dorang nyanda percaya pa Yesus, Dia nyanda beking banya mujisat di situ. Waktu itu, Herodes yang da jadi raja di daera Galilea. Dia dapa dengar kabar tentang Yesus, kong dia bilang pa de pe pegawai-pegawai, “Tu Orang yang Dia pe nama Yesus, so Dia tu Yohanes Pembaptis yang so mati mar skarang so hidop ulang, so itu Dia ada kuasa for beking tu mujisat-mujisat.” Herodes bilang bagitu, lantaran tempo hari, dia yang da suru tangka pa Yohanes kong suru ika deng rante trus kase maso ka bui. Dia da suru beking bagitu pa Yohanes lantaran tu masala Herodias. Dia da ambe pa Herodias jadi dia pe bini, padahal waktu itu Herodias so kaweng deng Filipus tu dia pe sudara sandiri. Trus Yohanes da togor ulang-ulang pa Herodes, dia bilang, “Bapak, bapak so langgar tu atoran agama, lantaran bapak so ambe pa Herodias beking jadi bapak pe bini, padahal dia itu bapak pe sudara pe bini.” So lantaran itu no Herodes mo bunung pa Yohanes, mar dia tako pa orang banya lantaran dorang pikir kalu Yohanes itu nabi tu orang yang ja kase tau tu Tuhan pe pesan pa orang-orang. Mar satu kali, waktu Herodes pe hari jadi, tu Herodias pe anak parampuang da manari di muka pa Herodes deng de pe tamu-tamu. Dia da manari beking snang pa Herodes. So itu, Herodes basumpa for kase apa jo tu dia mo minta. Waktu itu, tu anak parampuang pe mama hasut pa dia. Jadi dia pigi pa Herodes kong bilang, “Kita suka kase pa kita skarang ini tu Yohanes Pembaptis pe kapala yang da taru di baki!” Pe dengar itu, Herodes jadi sedi skali. Mar lantaran dia so basumpa di muka pa de pe tamu-tamu, dia iyo akang jo tu anak parampuang da minta. Jadi dia suru de pe anak bua pi potong tu Yohanes pe kapala di dalam bui. Tu Yohanes pe kapala da taru di baki kong bawa pa tu anak parampuang, trus tu anak parampuang bawa itu pa de pe mama. Kong Yohanes pe murit-murit datang ambe tu de pe mayat kong kase kubur. Abis itu, dorang pi kase tau tu kabar itu pa Yesus. Waktu Yesus dengar tu Yohanes Pembaptis so mati, Dia pigi dari situ. Dia nae prao kong pigi ka tampa yang jao dari kampung for mo basandiri. Mar waktu orang banya dapa tau itu, dorang kaluar dari dong pe kota-kota kong iko jalang darat for baku dapa deng Yesus. Waktu Yesus turung dari prao, Dia lia tu orang banya itu kong muncul De pe rasa kasiang pa dorang, trus Dia kase bae tu orang-orang saki. De pe sore jo, Yesus pe murit-murit datang pa Dia kong babilang, “Guru, ni tampa so jao dari kampung, kong sadiki lei so mo malam. Suru jo pa dorang pigi dari sini, supaya dorang bole mo babli makanan di kampung-kampung dekat sini.” Mar Yesus babilang pa Dia pe murit-murit, “Dorang nyanda perlu pigi dari sini, ngoni yang kase makang pa dorang.” Kong tu murit-murit bilang pa Dia, “Guru, yang ada pa torang di sini cuma lima roti deng dua ikang.” Yesus bilang pa dorang, “Bawa jo kamari tu roti deng ikang itu.” Abis itu Dia suru tu orang banya dudu di atas rumpu. Dia ambe tu lima roti deng tu dua ikang itu, Dia mangada ka langit kong bilang makase pa Tuhan. Abis itu Dia pela-pela tu roti kong kase pa De pe murit-murit, trus De pe murit-murit kase berbage pa tu orang banya. Kong dorang samua makang sampe kanyang. Abis itu, Yesus pe murit-murit kase kumpul tu makanan yang da talebe, samua ada dua blas loto fol. Waktu itu yang da iko makang kira-kira lima ribu orang laki-laki, blum tamaso tu parampuang deng anak-anak. Abis itu, Yesus iko suru Dia pe murit-murit nae ka prao kong pigi lebe dulu ka sabla danau, kong samantara itu Dia suru tu orang banya pulang. Serta Yesus so suru tu orang banya pulang, Dia nae ka satu bukit for basombayang sandiri. Waktu so mo malam, Yesus masi ada di situ sandiri. Samantara itu, tu prao yang Dia pe murit-murit da nae akang so jao ka tenga danau. Kong tu prao itu tagoyang kras kasana-kamari lantaran omba da paka. Soalnya tu angin da batiop baku malawang deng tu prao. Kira-kira amper siang, Yesus datang pa dorang deng cara bajalang di atas aer. Waktu De pe murit-murit lia Dia bajalang di atas aer, dorang takage kong bataria, “Setang!” Mar Yesus iko bilang pa dorang, “Tenang jo, nyanda usa tako! Ini Kita.” Kong Petrus bilang pa Dia, “Guru, kalu butul-butul itu Guru, suru jo pa kita datang pa Guru deng cara bajalang di atas aer.” Yesus manyao, “Mari jo kamari!” Kong Petrus turung dari prao kong bajalang di atas aer pigi pa Yesus. Mar waktu Petrus dapa rasa tu angin da batiop pe kuat, dia jadi tako kong dia mulai tengglam. Dia bataria pa Yesus, “Guru, tolong akang pa kita!” Kong Yesus iko pegang pa Petrus, trus bilang, “Hei, ngana orang yang kurang percaya. Kiapa ngana ragu-ragu percaya pa Kita?” Abis itu dorang nae ka prao kong tu angin jadi tedo. Pe lia samua itu, tu orang-orang yang ada di prao basemba pa Yesus, kong dorang babilang, “Guru, memang butul Guru itu Anak Allah.” Yesus deng De pe murit-murit sampe di sabla danau, di daera Genesaret. Kong waktu tu orang-orang di situ dapa kanal pa Yesus, dorang iko se siar ka samua tampa di daera itu kalu Dia ada, kong orang-orang bawa samua orang saki pa Dia. Trus dorang bamohon pa Yesus supaya tu orang-orang saki itu bole mo pegang pa Dia biar lei cuma tu De pe ujung juba, kong samua orang saki yang da bapegang pa Dia jadi bae. Satu kali, ada bebrapa orang dari golongan Farisi deng ahli Taurat dari Yerusalem datang pa Yesus, kong dorang batanya pa Dia, “Bapak, kiapa Bapak pe murit-murit langgar tu torang pe nene moyang pe adat? Soalnya kwa waktu dorang mo makang, dorang nyanda bacuci tangan iko tu torang pe adat.” Mar Yesus manyao, “Kiapa ngoni da langgar Tuhan Allah pe prenta supaya bole mo iko tu ngoni pe nene moyang pe adat? Soalnya Tuhan Allah da prenta bagini, ‘Ngoni musti hormat tu ngoni pe papa deng mama’, deng ‘Sapa tu bakutuk pa de pe papa ato de pe mama, dia musti dapa hukuman mati.’ Mar ngoni da kase ajar laeng. Ngoni kase ajar pa orang-orang supaya dorang bole babilang pa dong pe papa deng mama bagini, ‘Kita so nyanda mo kase apa-apa for bantu pa papa deng mama, lantaran tu kita mo kase pa papa deng mama, kita so kase persembahan for Tuhan.’ Kong ngoni bilang pa tu orang-orang itu kalu dorang so nyanda perlu lei mo hormat tu dong pe papa deng mama deng cara bantu pa dong pe papa deng mama. Deng ngoni se ajar bagitu, ngoni so nyanda pake tu Tuhan Allah pe prenta, ngoni cuma da pake tu ngoni pe adat sandiri. Hei ngoni orang-orang munafik! So butul no tu Tuhan Allah da bilang dulu pa nabi Yesaya tentang ngoni. Tuhan Allah da bilang bagini, ‘Bangsa ini puji pa Kita deng dorang pe mulu, mar dorang pe hati jao dari pa Kita. Nyanda ada guna dorang ja semba pa Kita. Soalnya tu ajaran yang dorang ja kase ajar pa orang-orang, itu cuma iko manusia pe adat.’ ” Abis itu, Yesus pangge tu orang banya kong babilang pa dorang, “Ngoni dengar deng tarukira jo bae-bae tu Kita mo bilang ini: apa tu da maso pa orang pe mulu, itu nyanda mo beking tu orang jadi berdosa pa Tuhan. Mar apa yang da kaluar dari orang pe mulu, itu yang beking tu orang jadi berdosa pa Tuhan.” Abis itu, Yesus pe murit-murit datang pa Dia. Dorang batanya pa Dia, “Guru, apa Guru sadar kalu tu Guru pe kata-kata tadi itu so beking tersinggung pa orang-orang dari golongan Farisi?” Mar Yesus manyao pa dorang, “Tu orang-orang yang se ajar tu nyanda iko Bapa di Sorga pe mau bole mo se sama deng tanaman yang Dia nyanda tanang, kong samua tu tanaman yang Dia nyanda tanang itu Dia mo cabu sampe de pe akar-akar. Dorang itu sama deng orang buta yang da tuntun orang buta yang laeng. Kalu orang buta tuntun pa orang buta, dorang dua itu pasti mo sama-sama taisi ka lobang. Jadi ngoni se biar jo pa dorang.” Abis itu Petrus babilang pa Yesus, “Co Guru kase tau akang pa torang apa dang tu prumpamaan itu pe arti.” Kong Yesus manyao pa dorang, “Ngoni lei masi blum mangarti apa tu prumpamaan itu pe arti? Ngoni pasti so tau kalu apa tu orang da se maso di mulu, itu turung pa de pe puru kong kaluar. Mar tu kata-kata yang kaluar dari orang pe mulu, itu samua de pe asal dari de pe hati, so kata-kata itu no yang beking orang jadi berdosa pa Tuhan. Soalnya dari hati timbul samua yang jaha: pikiran jaha, babunung, bersina, beking tu cabul, bapancuri, basaksi dusta deng lei bicara besae tentang orang laeng. Itu samua tu beking orang jadi berdosa pa Tuhan. Mar kalu orang makang deng tangan yang nyanda da cuci iko tu adat, itu nyanda mo beking tu orang jadi berdosa pa Tuhan.” Yesus deng Dia pe murit-murit se tinggal tu tampa itu kong pigi ka daera di dekat kota Tirus deng Sidon. Di situ ada tu satu ibu tu de pe asal dari daera itu. Dia bukang orang Yahudi, dia orang Kanaan. Tu ibu itu datang pa Yesus kong minta pa Dia deng suara kuat, “Hei Bapak, tu raja Daud pe keturunan, kasiang akang dang pa kita! Kita pe anak parampuang da kemasukan setang kong dia so mendrita skali.” Mar Yesus nyanda bilang apa-apa pa tu ibu itu. Kong Dia pe murit-murit datang trus bamohon pa Dia, “Guru, lebe bae Guru suru pigi jo pa dia lantaran dia babataria trus di blakang pa torang.” Kong Yesus bilang, “Tuhan Allah da utus pa Kita skarang ini for tolong tu torang pe bangsa Israel yang so sala jalang. Orang-orang Israel yang sala jalang itu sama deng domba yang so tailang dari dorang pe gembala.” Mar tu ibu itu badekat pa Yesus kong berlutut di muka pa Yesus, trus babilang, “Bapak, tolong akang kwa pa kita.” Yesus bilang pa dia, “Nyanda bagus ambe tu makanan yang da se sadia for anak-anak kong kase lempar pa anjing.” Tu ibu itu manyao, “Butul Bapak, mar tu anjing lei makang tu sisa-sisa makanan yang da taciri dari de pe tuang pe meja.” Pe dengar itu, Yesus bilang pa dia, “Hei ibu, pe basar skali ibu pe iman. Jadi jo pa ibu sama deng tu ibu da minta.” Waktu itu jo, tu ibu itu pe anak parampuang yang da kemasukan setang itu jadi bae. Abis itu, Yesus deng De pe murit-murit kase tinggal tu tampa itu kong pi bajalang di pinggir danau Galilea. Dorang nae ka atas bukit kong Dia dudu di situ. Waktu itu banya orang datang pa Yesus. Dorang da bawa orang lumpu, orang buta, orang kento, orang wowo deng orang yang saki laeng lei. Tu orang-orang saki itu dorang taru di muka pa Yesus, kong Yesus se bae pa tu orang-orang saki itu. Tu orang banya yang ada di situ jadi taheran-heran, lantaran dorang da lia tu orang wowo so bole babicara, tu kento so bae, tu lumpu so bole bajalang deng tu orang buta so bole balia. So itu dorang samua puji deng hormat pa Tuhan Allah, tu Tuhan yang orang Israel ja semba. Trus Yesus pangge De pe murit-murit kong babilang, “Kita rasa kasiang pa tu orang banya ini. Soalnya dorang so tiga hari da iko pa Kita kong dorang so nyanda ada makanan. Kita nimau mo suru pulang pa dorang deng puru kosong, nanti dorang mo flao di jalang.” Kong Yesus pe murit-murit bilang pa Dia, “Guru, ini tampa so jao dari kampung, bagimana lei torang bole mo se makang pa dorang yang pe banya skali ini?” Mar Yesus cuma bale batanya pa dorang, “Ada brapa ngoni pe roti?” Dorang manyao, “Pa torang ada tuju roti deng ada lei bebrapa ikang kacili.” Kong Yesus suru tu orang banya itu dudu di tana. Abis itu Yesus ambe tu tuju roti deng tu bebrapa ikang kong Dia bilang makase pa Tuhan. Klar itu, Dia pela-pela tu roti deng tu bebrapa ikang kong kase pa Dia pe murit-murit, trus dorang kase berbage pa tu orang banya itu. Kong dorang samua makang sampe kanyang. Klar itu, Yesus pe murit-murit kumpul tu makanan yang da talebe, de pe banya tuju kranjang fol. Tu orang-orang yang da makang waktu itu, de pe banya ampa ribu orang laki-laki, blum tamaso tu parampuang deng anak-anak. Kong Yesus suru pulang tu orang banya itu. Abis itu Dia deng De pe murit-murit nae ka prao kong pigi ka satu daera tu de pe nama Magadan. Orang-orang dari golongan Farisi deng Saduki datang pa Yesus. Dorang datang for mo jebak pa Dia, dorang minta pa Dia supaya Dia beking mujisat for se bukti kalu Dia memang dari Tuhan Allah. Mar Yesus manyao pa dorang, “Kalu so sore waktu tu matahari so mo maso, kong tu langit so mera, ngoni babilang bagini, ‘Cuaca mo bagus.’ Kong waktu pagi ngoni lia tu langit mera kong so baglap, ngoni babilang bagini, ‘Ni hari tu cuaca mo besae.’ Ngoni tau ja balia tu tanda-tanda di langit trus tau tu cuaca nanti, mar ngoni nintau balia tu tanda-tanda yang se bukti kalu Tuhan Allah da bakarja skarang ini. Ngoni tu orang-orang skarang ini, ngoni ini jaha deng nyanda setia pa Tuhan Allah. Ngoni minta pa Kita beking mujisat for se bukti kalu Kita dari pa Tuhan Allah. Mar Kita nyanda mo kase bukti apa-apa pa ngoni, kacuali Kita mo se inga pa ngoni apa tu da jadi pa nabi Yunus dulu.” Pe klar Yesus babicara, Dia deng De pe murit-murit se tinggal pa dorang kong pigi dari situ. Waktu Yesus deng Dia pe murit-murit sampe di sabla danau Galilea, dorang dapa inga kalu dorang lupa bawa roti. Kong Yesus babilang pa dorang, “Ngoni musti bajaga-jaga deng hati-hati deng tu ragi dari orang-orang golongan Farisi deng Saduki.” Pe dengar itu, Dia pe murit-murit baku bilang, “Guru da bilang bagitu, lantaran torang nyanda bawa roti.” Mar Yesus tau apa tu dorang da cirita, so itu Dia bilang pa dorang, “Hei ngoni orang-orang yang kurang percaya! Kiapa ngoni bacirita soal nyanda ada roti? Ngoni masi blum mangarti lei so? Ngoni pasti masi inga tu lima roti yang da kase makang for lima ribu orang. Kong waktu itu, ada brapa kranjang roti yang da talebe tu ngoni da kumpul? Kong lei ngoni pasti masi inga waktu Kita da kase makang ampa ribu orang cuma deng tuju roti, kong waktu itu ada brapa kranjang roti yang da talebe tu ngoni da kumpul? No skarang, kiapa ngoni nyanda mangarti kalu tu Kita da bilang tadi itu bukang tentang roti? Mar Kita bilang ulang lei pa ngoni kalu ngoni musti hati-hati deng ragi dari tu orang-orang golongan Farisi deng Saduki!” Waktu dorang dengar tu Yesus da bilang, dorang jadi mangarti kalu Yesus pe maksut bukang tu ragi yang ja pake for se bareis roti, mar Dia pe maksut supaya dorang musti hati-hati deng tu ajaran dari orang-orang golongan Farisi deng Saduki, yang beking orang jao dari Tuhan, yang sama deng ragi pe pengaru yang ja beking roti bareis. Yesus deng Dia pe murit-murit sampe di kota Kaisarea Filipi. Di situ Yesus batanya pa Dia pe murit-murit, “Kalu menurut orang-orang, sapa dang tu Anak Manusia?” Kong dorang manyao, “Ada tu ja bilang kalu Guru tu Yohanes Pembaptis, tu laeng ja bilang kalu Guru tu nabi Elia, kong ada lei yang ja bilang kalu Guru itu nabi Yeremia ato satu dari nabi-nabi laeng.” Trus Yesus batanya pa dorang, “Mar menurut ngoni, sapa dang Kita ini?” Simon Petrus manyao, “Guru itu Kristus tu Raja yang se slamat pa manusia, Tuhan Allah yang hidop pe Anak!” Yesus bilang pa Simon, “Simon, Yunus pe anak. Ngana itu yang paling snang lantaran bukang manusia yang da kase tau tentang hal itu pa ngana, mar Kita pe Bapa di sorga. Ngana pe nama Petrus, tu de pe arti batu. Kong di atas tu batu ini, Kita mo beking jadi fondasi for Kita pe orang-orang yang percaya, kong tu maut nyanda mampu mo se kala tu Kita pe orang-orang itu. Kita mo kase pa ngana kuasa for pimpin tu Kita pe orang-orang, itu sama deng Kita kase pa ngana tu kunci sorga. Kong apa jo tu ngana larang orang beking di bumi, itu lei mo dapa larang beking di sorga. Bagitu lei deng apa tu ngana kase for orang beking di bumi, itu lei mo dapa kase beking di sorga.” Kong Yesus larang pa Dia pe murit-murit supaya jang kase tau pa sapa-sapa kalu Dia itu Kristus tu Raja yang mo se slamat pa manusia. Mulai waktu itu, Yesus ja babilang trus trang pa De pe murit-murit kalu Dia musti pigi ka Yerusalem, kong di sana Dia mo mangada banya siksa dari tu tua-tua Yahudi, imam-imam kapala deng ahli-ahli Taurat. Dia mo dapa bunung, mar di hari katiga Tuhan Allah mo se hidop ulang pa Dia. Abis Yesus bilang bagitu, Petrus hela pa Dia ka sei kong togor, “Guru nimbole babilang bagitu! Smoga jo Tuhan Allah nyanda mo se biar itu mo jadi.” Mar Yesus bahaga pa Petrus kong babilang, “Ka sana jo ngana! Ngana pe bicara itu kurang sama deng setang pe bos pe bicara. Ngana halangi pa Kita mo beking tu Tuhan Allah pe mau, itu sama deng ngana jadi batu sandungan for Kita. Ngana cuma pikir apa tu manusia ja pikir, bukang apa tu Tuhan Allah ja pikir.” Kong Yesus bilang pa De pe murit-murit, “Sapa tu mo iko pa Kita, dia so nimbole iko tu de pe mau, dia musti pikul de pe salib tu de pe arti dia siap mendrita sampe mati, kong iko pa Kita. Soalnya sapa tu hidop cuma for de pe diri sandiri, so dia yang nyanda mo dapa hidop kekal. Mar komang, sapa tu mo kase de pe hidop lantaran iko pa Kita, so dia tu mo dapa hidop kekal. Apa so de pe untung kalu satu orang dapa samua harta di dunia, mar dia nyanda dapa hidop kekal? Kong ada so yang dia bole mo kase for se tukar supaya dia bole dapa tu hidop kekal? Nyanda ada to? Soalnya tu Anak Manusia mo datang ulang ka dunia sama-sama deng Dia pe malaekat-malaekat, Dia mo datang deng kuasa yang luar biasa tu dari Dia pe Bapa. Kong waktu itu, Dia mo hukum ato mo kase akang upah pa orang-orang iko tu dorang da beking. Kita bilang pa ngoni, dari antara pa ngoni tu ada di sini, ada yang blum mo mati seblum lia tu Anak Manusia datang Berkuasa sbagai Raja.” Serta so lewat anam hari, Yesus bawa pa Petrus, Yakobus deng Yohanes tu dua kaka ade sama-sama deng Dia ka satu gunung tinggi, di situ cuma ada dorang. Waktu itu, dorang tiga lia Yesus so bruba jadi laeng. Yesus pe muka basinar sama deng matahari kong Dia pe baju jadi puti mangkilat. Kong dorang tiga lia muncul tu nabi Musa deng nabi Elia da bacirita deng Yesus. Trus Petrus babilang pa Yesus, “Guru, pe snang skali torang ada di sini. Kalu Guru suka, kita mo kase badiri akang tiga sabua: satu for Guru, satu for Musa, deng satu for Elia.” Waktu Petrus masi bacirita, kage-kage turung awan yang trang kong tutu pa dorang. Trus dari dalam awan itu dapa dengar suara bagini, “Ini tu Kita pe Anak, Kita sayang pa Dia. Dia beking Kita pe hati snang. Badengar jo pa Dia!” Waktu tu tiga murit itu dengar tu suara, dorang jadi tako skali sampe taplaka ka tana. Mar Yesus badekat pa dorang, Dia pegang pa dorang kong babilang, “Badiri jo, jang ngoni tako!” Waktu dorang angka dong pe kapala, dorang so nyanda lia orang laeng di situ, kurang Yesus tu ada di situ. Kong waktu dorang samantara turung dari tu gunung, Yesus bapesan pa dorang, “Ngoni jang dulu kase cirita pa sapa-sapa apa tu ngoni da lia tadi! Nanti kalu tu Anak Manusia so hidop ulang dari antara orang mati baru ngoni bole kase cirita itu.” Kong Yesus pe murit-murit batanya pa Dia, “Kiapa tu ahli-ahli Taurat da bilang kalu nabi Elia musti datang lebe dulu dari tu Anak Manusia?” Yesus manyao, “Memang, nabi Elia musti datang lebe dulu kong kase siap samua for Tuhan mo datang. Mar Kita bilang pa ngoni, tu Elia yang torang orang Israel da tunggu-tunggu, dia itu so datang. Mar orang-orang nyanda kanal pa dia, dorang tare cuma da beking iko dong pe suka pa dia, bagitu lei pa Anak Manusia dorang mo beking Dia mendrita.” Pe dengar itu, Yesus pe murit-murit mangarti kalu nabi Elia yang Yesus pe maksut itu, tu Yohanes Pembaptis. Waktu Yesus deng Dia pe tiga murit babale di tampa orang banya itu, ada satu laki-laki badekat pa Yesus kong berlutut di muka pa Dia, trus babilang, “Bapak, tolong kasiang akang tu kita pe anak laki-laki! Dia da saki mati-mati ayam kong so mendrita skali. Kalu de pe saki so datang, dia amper slalu jatung ka api ato ka aer. Dia itu kita so bawa pa Bapak pe murit-murit, mar dorang nyanda mampu kase bae pa dia.” Kong Yesus bilang, “Hei ngoni orang-orang yang nyanda percaya deng yang sesat! Mo sampe tempo apa Kita musti tinggal di tenga-tenga pa ngoni? Kong mo sampe tempo apa Kita mo basabar pa ngoni? Bawa jo kamari tu anak itu!” Waktu dorang so bawa tu anak itu pa Yesus, Yesus togor deng kras tu setang, trus tu setang kaluar dari tu anak itu. Kong waktu itu jo, tu anak iko bae. Abis itu, Yesus pe murit-murit pi badekat pa Dia waktu Dia sandiri, kong dorang batanya, “Guru, kiapa dang torang nyanda dapa user tu setang itu?” Kong Yesus manyao pa dorang, “Ngoni nyanda mampu mo user tu setang itu lantaran ngoni nyanda talalu percaya pa Tuhan. Mar Kita bilang pa ngoni, biar lei tu ngoni pe percaya itu de pe basar cuma sama deng tu biji yang paling kacili, ngoni bole bilang pa tu gunung ini bagini, ‘Pinda jo ka sana!’ pasti tu gunung ini mo pinda ka sana. Jadi samua ngoni bole mo beking, asal ngoni percaya. [ Mar ngoni lei musti tau, tu setang rupa itu nyanda mampu ngoni mo user kalu ngoni nyanda basombayang deng bapuasa.]” Waktu Yesus deng De pe murit-murit da bakumpul di Galilea, Yesus babilang pa dorang, “Nanti ada orang yang mo srahkan tu Anak Manusia pa orang-orang yang berkuasa. Kong dorang mo bunung pa Dia, mar di hari katiga Dia mo hidop ulang.” Waktu tu murit-murit dengar tu Yesus da bilang, dong pe hati jadi sedi skali. Waktu Yesus deng De pe murit-murit sampe di Kapernaum, tu petugas pajak dari Ruma Ibada Pusat datang pa Petrus kong batanya pa dia, “Bapak, apa bapak pe Guru ja babayar pajak for tu Ruma Ibada Pusat?” Kong Simon Petrus manyao pa dorang, “Iyo, Dia ja babayar no.” Waktu Simon Petrus maso ka ruma, Yesus batanya lebe dulu pa dia, “Simon, kalu iko ngana, sapa yang musti babayar pajak pa raja-raja yang pegang kuasa di dunia ini? Dorang pe rakyat sandiri ato orang-orang asing?” Kong Petrus manyao pa Yesus, “Tu musti babayar pajak, tantu katu tu orang asing.” Trus Yesus bilang pa dia, “Butul itu. Jadi tu dorang pe anak sandiri nyanda perlu babayar pajak. Torang lei nyanda perlu bayar pajak, mar supaya tu orang di Ruma Ibada Pusat nyanda tersinggung, ngana pigi jo ka danau for bapancing ikang. Ngana ambe tu ikang pertama tu ngana da dapa, kong buka tu ikang itu pe mulu. Di situ ngana mo dapa doi perak yang de pe nilai ampa hari orang karja. Ngana ambe jo tu doi itu kong pi bayar jo pa dorang tu torang dua pe pajak.” Waktu itu, Yesus pe murit-murit datang pa Dia, kong batanya, “Guru, sapa kang tu paling basar dari tu orang-orang yang Tuhan Allah berkuasa sbagai Raja?” Yesus pangge satu anak kacili, kong kase badiri tu anak di tenga-tenga pa dorang, trus Dia bilang, “Kita bilang pa ngoni, sapa jo yang mo jadi orang-orang dari Tuhan Allah yang berkuasa sbagai Raja, ngoni musti bertobat deng jadi sama deng anak kacili yang dong pe hati polos. Jadi sapa yang de pe hati polos sama deng tu anak kacili, so dia tu mo jadi paling basar di antara orang-orang dari Tuhan Allah yang Berkuasa sbagai Raja. Kong sapa jo yang trima satu anak kacili rupa ini lantaran tu orang itu percaya pa Kita, itu sama deng tu orang itu so trima pa Kita.” Yesus bilang lei, “Sapa jo yang beking sesat satu dari anak-anak kacili rupa ini yang percaya pa Kita, lebe bae tu orang itu pe leher kase ika akang deng batu basar kong kase tengglam ka dalam laut yang dolong. Cilaka jo ni dunia ini lantaran pe banya skali hal yang bole mo beking orang-orang tagoda beking dosa sampe jadi sesat. Memang tu hal-hal itu pasti mo ada, mar cilaka jo tu orang yang beking orang laeng jadi bagitu! Kalu satu dari ngana pe tangan ato kaki beking ngana berdosa sampe jadi sesat, potong jo kong buang tu tangan ato tu kaki! Lebe bae ngana maso sorga cuma deng satu tangan ato satu kaki, daripada ada dua tangan deng dua kaki mar ngana maso neraka. Tu tampa itu de pe api nyanda mo mati for slama-lamanya. Kalu satu dari ngana pe mata beking ngana berdosa sampe ngana jadi sesat, cungkel jo kong buang tu mata! Lebe bae ngana maso sorga cuma deng satu mata, daripada ngana ada dua mata mar ngana dapa lempar ka dalam api di neraka.” Yesus bilang lei, “Ngoni inga bae-bae, ngoni jang pandang enteng tu anak-anak kacili ini biar lei cuma satu dari pa dorang. Soalnya Kita bilang pa ngoni, dorang itu ada malaekat-malaekat di sorga yang slalu ada di muka pa Kita pe Bapa di sorga. [ Soalnya Anak Manusia datang ka dunia ini for se slamat tu orang-orang sesat.”] Yesus bilang lei, “Ngoni pikir bae-bae ni prumpamaan ini. Kalu ada satu orang yang punya sratus ekor domba kong satu ekor dari tu domba-domba itu tailang akang jalang, apa dia mo kase tinggal tu sambilan pulu sambilan ekor domba di tampa yang bagunung kong pi cari tu satu ekor domba yang da tailang akang jalang? Iyo to? Kong kalu dia dapa tu domba itu, Kita bilang pa ngoni, dia pasti snang skali da dapa tu domba itu lebe dari de pe snang lantaran tu sambilan pulu sambilan ekor domba yang nyanda ilang. Bagitu lei deng ngoni pe Bapa di sorga, Dia nimau kalu satu dari tu anak-anak kacili rupa ini ilang dari pa Dia.” Yesus bilang lei, “Kalu ada ngoni pe sudara yang percaya beking sala pa satu dari antara pa ngoni, bagus ngoni pigi jo sandiri pa tu sudara itu, kong kase tau pa dia apa tu dia pe sala. Kalu tu ngoni pe sudara itu mangaku so beking sala, ngoni deng dia itu so baku bae, ngoni so berhasil dapa ulang pa dia. Mar kalu dia nimau mo trima tu ngoni da bilang, ngoni bawa jo satu ato dua orang sama-sama deng ngoni, kong ngoni pi bilang pa dia kalu dia da beking sala. Itu sama deng tu da bilang di Kitab Suci bagini, ‘Kalu ada orang dapa tudu beking sala, musti ada dua ato tiga orang yang jadi saksi for bilang kalu tu orang itu sala ato nyanda.’ Mar kalu tu sudara itu lei nimau mo trima lei tu ngoni da bilang, pi kase tau jo tu masala itu pa jemaat. Kalu jemaat so togor, trus dia lei nimau mo dengar pa jemaat, anggap jo dia itu orang yang nyanda kanal pa Tuhan ato anggap jo dia itu petugas pajak yang ja tipu orang. Kita bilang pa ngoni, apa jo tu ngoni larang orang beking di bumi, itu lei mo dapa larang beking di sorga. Bagitu lei deng apa tu ngoni kase for orang beking di bumi, itu lei mo dapa kase beking di sorga. Kita bilang lei pa ngoni, kalu di dunia ada dua orang dari ngoni sama-sama spakat mo minta apa-apa kong ngoni basombayang minta itu, Kita pe Bapa di sorga mo kase tu ngoni da minta. Soalnya kalu ada dua ato tiga orang yang da bakumpul lantaran dorang percaya pa Kita, di situ Kita ada sama-sama deng dorang.” Abis itu Petrus datang pa Yesus kong dia batanya, “Guru, kalu kita pe sudara yang percaya beking sala trus pa kita, kita musti se ampung pa dia sampe brapa kali? Sampe tuju kali?” Kong Yesus manyao pa dia, “Nyanda. Kita bilang pa ngana, bukang cuma sampe tuju kali, mar ngana musti kase ampung pa dia sampe tuju pulu kali tuju kali. Ngana musti beking bagitu, lantaran Tuhan Allah yang Berkuasa sbagai Raja pe cara bapimpin sama deng tu prumpamaan ini: ada tu satu raja mo urus tu de pe budak-budak pe masala utang pa dia. Waktu dia mulai urus tu masala utang itu, ada yang bawa di muka pa dia satu budak yang da bautang sampe juta-juta pa dia. Mar tu budak itu nyanda mampu mo bayar de pe utang. So itu tu raja suru jual tu budak itu, tu budak pe bini deng anak-anak, deng samua tu budak pe kepunyaan supaya tu budak pe utang bole mo tabayar. Pe dengar itu, tu budak iko berlutut di muka pa raja kong bamohon bagini, ‘Tuang raja, tolong basabar akang kwa pa kita supaya kita bole mo bayar tu kita pe utang-utang.’ Pe dengar tu budak da bilang, tu raja jadi rasa kasiang pa dia so itu dia se lapas deng hapus samua de pe utang. Mar waktu budak itu kaluar dari situ, dia baku dapa deng de pe tamang tu budak lei. Tu de pe tamang itu da bautang pa dia sratus doi perak, tu jumla yang jao lebe sadiki dari tu de pe utang pa raja. Mar dia pegang tu de pe tamang itu trus ramas di leher, dia bilang pa de pe tamang bagini, ‘Bayar jo tu ngana pe utang pa kita!’ Pe dengar itu, de pe tamang berlutut kong bamohon pa dia bagini, ‘Tamang, tolong basabar akang kwa pa kita supaya kita bole mo bayar tu kita pe utang.’ Mar dia tolak tu de pe tamang da minta itu. Abis itu dia kase maso tu de pe tamang itu ka bui sampe de pe tamang itu bayar samua tu utang. Waktu tu de pe tamang-tamang budak yang laeng lia apa tu da jadi, dorang jadi sedi skali kong dorang lapor samua itu pa raja. Pe dengar itu, raja suru pangge tu budak itu kong raja babilang pa dia, ‘Hei budak yang jaha! Samua ngana pe utang pa kita, kita so se hapus lantaran ngana da bamohon pa kita. Ngana mustinya rasa kasiang lei pa ngana pe tamang, sama deng kita da rasa kasiang pa ngana.’ Tu raja itu jadi mara skali pa tu budak itu, kong raja srahkan dia pa tu algojo-algojo di bui supaya dorang siksa pa dia sampe dia bole kase lunas tu utang. Bagitu lei no deng Kita pe Bapa di sorga, Dia mo hukum pa ngoni kalu ngoni nyanda butul-butul kase ampung tu ngoni pe sudara yang percaya.” Serta Yesus so klar se ajar samua itu, Dia kase tinggal tu daera Galilea kong pigi ka daera Yudea di sabla kuala Yordan. Di situ ada banya orang tu da iko-iko pa Dia, kong Dia kase bae tu orang-orang yang da saki. Ada bebrapa orang dari golongan Farisi yang datang mo jebak pa Yesus, dorang batanya, “Kalu mo iko torang pe atoran agama, bole so tu laki-laki yang so kaweng se cere tu dia pe bini deng macam-macam alasan?” Mar Yesus manyao pa dorang, “Ngoni pasti so baca di Kitab Suci kalu dari pertama waktu Tuhan beking pa manusia, Dia tu da beking laki-laki deng parampuang. Kong Tuhan Allah da bilang bagini, ‘So itu, tu laki-laki mo se tinggal tu de pe papa deng mama, kong dia hidop sama-sama deng de pe bini, kong dorang dua itu jadi satu.’ Jadi dorang dua so nyanda hidop sandiri-sandiri, mar so jadi satu. So lantaran itu, tu laki-laki deng parampuang yang Tuhan Allah so beking jadi satu, nimbole manusia mo kase cere.” Pe dengar itu, tu orang dari golongan Farisi batanya lei pa Yesus, “Kalu bagitu, kiapa dang Musa suru orang kase surat cere for laki-laki yang mo kase cere de pe bini?” Kong Yesus manyao pa dorang, “So lantaran ngoni pe kapala batu sampe Musa kase isin pa ngoni for kase cere ngoni pe bini, mar sebenarnya dari dulu Tuhan nyanda kase bagitu. Mar Kita bilang pa ngoni, kalu ada laki-laki yang kase cere de pe bini padahal de pe bini itu nyanda bersina, kong tu laki-laki itu kaweng ulang deng parampuang laeng, tu laki-laki itu so bersina.” Pe dengar itu, Yesus pe murit-murit bilang pa Dia, “Kalu rupa itu tu laki-bini pe hubungan, lebe bae nyanda usa kaweng.” Mar Yesus bilang pa dorang, “Nyanda samua orang yang mampu trima tu hal itu. Tu orang yang mampu trima itu, cuma tu orang-orang yang Tuhan so kase kemampuan. Soalnya ada laki-laki yang nyanda kaweng lantaran dari lahir dorang memang so bagitu, kong ada lei laki-laki yang nyanda kaweng lantaran orang laeng da beking sampe jadi bagitu. Ada lei yang nyanda kaweng lantaran dorang pe mau sandiri, supaya dorang bole pake tu dong pe waktu for layani pa Tuhan yang Berkuasa sbagai Raja. Sapa jo yang mampu trima tu Kita pe ajaran ini, bagus dia trima itu.” Satu kali ada orang-orang bawa anak-anak kacili pa Yesus supaya Dia taru De pe tangan pa tu anak-anak itu kong basombayang akang pa dorang. Mar Dia pe murit-murit cuma da mara akang pa tu orang-orang yang da bawa anak-anak kacili itu. Mar Yesus bilang pa De pe murit-murit, “Kase biar jo tu anak-anak itu datang pa Kita! Ngoni jang larang pa dorang lantaran tu orang-orang sama deng ini yang mo jadi orang-orang dari Tuhan Allah yang Berkuasa sbagai Raja.” Abis itu, Yesus taru Dia pe tangan pa tu anak-anak itu kong se berkat pa dorang. Klar itu Dia pigi dari situ. Satu hari, ada satu orang laki-laki datang pa Yesus, kong dia batanya, “Guru, hal bae apa yang kita musti beking supaya kita bole mo dapa tu hidop kekal?” Yesus manyao pa dia, “Kiapa so ngana batanya pa Kita tentang apa yang bae? Yang bae cuma ada Satu. Kalu ngana suka mo dapa hidop kekal, ngana musti iko tu Tuhan Allah pe prenta-prenta.” Kong tu orang itu batanya lei, “Prenta-prenta mana tu kita musti iko akang?” Yesus manyao pa dia, “Jang babunung, jang bersina, jang bapancuri, jang basaksi dusta, hormat tu ngana pe papa deng mama, deng sayang pa orang laeng sama deng ngana sayang pa ngana pe diri sandiri.” Kong tu orang muda itu bilang pa Yesus, “Samua tu prenta itu kita so beking. Apa lei tu kita blum beking?” Yesus bilang pa dia, “Kalu ngana suka mo iko pa Tuhan deng sempurna, ngana pigi jo kong jual samua tu ngana pe harta, kong tu doi ngana kase berbage pa orang-orang miskin. Kalu ngana beking bagitu, Tuhan mo kase pa ngana harta di sorga. Abis itu ngana datang jo kamari kong iko pa Kita.” Waktu tu orang muda dengar tu Yesus da bilang itu, dia pigi deng hati sedi lantaran dia itu pe kaya skali. Abis itu Yesus bilang pa De pe murit-murit, “Kita bilang pa ngoni, pe susa skali for orang kaya mo jadi orang dari Tuhan Allah yang Berkuasa sbagai Raja. Kong Kita bilang lei pa ngoni, masi lebe gampang satu ekor onta maso ka lobang jarum, daripada orang kaya mo trima tu Tuhan Allah for mo Berkuasa sbagai Raja pa dia.” Pe dengar itu, Yesus pe murit-murit jadi taheran-heran, kong dorang bilang, “No kalu bagitu, sapa dang tu bole mo slamat dari hukuman dosa?” Yesus haga pa dorang kong babilang, “For manusia nyanda mungkin mo se slamat tu de pe diri sandiri, mar for Tuhan Allah, Tuhan Allah bole se slamat pa manusia lantaran samua Dia bole beking.” Kong Petrus babilang pa Yesus, “Guru, torang ini so kase tinggal samua tu tong pe kepunyaan for iko pa Guru. Jadi apa dang tu torang mo dapa?” Yesus bilang pa dorang, “Kita mo bilang pa ngoni, nanti kalu Tuhan so beking samua jadi baru, tu Anak Manusia mo dudu di atas Dia pe tahta yang luar biasa. Waktu itu, ngoni samua tu ja iko pa Kita mo dudu di atas dua blas tahta kong adili tu dua blas suku bangsa Israel. Kong sapa jo yang so se tinggal de pe ruma, de pe kaka ade laki-laki ato parampuang, de pe papa ato de pe mama, de pe anak-anak ato de pe kobong lantaran dia da iko pa Kita, dia itu mo trima ulang sratus kali lipa tu samua itu deng lei dia mo dapa tu hidop kekal. Mar banya orang yang orang ja bilang orang penting, dorang itu nyanda mo jadi apa-apa, kong tu orang yang orang ja bilang nyanda penting, dorang itu tu mo dapa hormat.” Yesus bilang lei, “Tuhan Allah Berkuasa sbagai Raja sama deng tu prumpamaan ini: ada tu satu tuang tana yang punya kobong anggor. Masi amper siang, dia so kaluar for pi cari orang karja for bakarja pa dia pe kobong anggor. Waktu dia dapa bebrapa orang karja, dia baku ator deng dorang mo bayar satu doi perak for satu hari karja. Abis itu, dia suru pa dorang pi bakarja pa dia pe kobong. Kira-kira jam sambilan pagi, dia kaluar ulang kong pigi ka pasar. Di sana dia lia ada bebrapa orang yang nyanda beking apa-apa. Kong dia bilang pa dorang, ‘Ngoni pigi jo bakarja pa kita pe kobong anggor. Nanti kita mo kase akang gaji yang pantas for ngoni.’ Pe dengar itu, dorang pigi bakarja di kobong. Kong kira-kira jam dua blas deng lei jam tiga sore, dia kaluar ulang kong pi cari orang karja di pasar. Kira-kira jam lima sore dia kaluar ulang lei kong dia lia masi ada orang di pasar yang nyanda beking apa-apa, trus dia tanya pa dorang, ‘Kiapa ngoni satu hari ini cuma da badiri di sini kong nyanda beking apa-apa?’ Dorang manyao pa dia, ‘Soalnya kwa blum ada orang yang kase karja pa torang.’ Kong dia bilang pa dorang, ‘Kalu bagitu, ngoni pigi jo bakarja pa kita pe kobong anggor!’ Waktu so mo malam, yang punya kobong anggor itu babilang pa de pe mandor, ‘Pangge kamari samua tu orang karja kong bayar akang dong pe gaji. Ngana bayar pa dorang mulai dari tu da maso paling terakhir sampe tu pertama.’ Kong waktu tu orang-orang karja yang da bakarja mulai dari jam lima sore datang ambe dorang pe gaji, dorang masing-masing trima tu gaji satu doi perak. Trus tu orang-orang yang da bakarja dari pertama datang for ambe dorang pe gaji, dorang kira kalu dorang masing-masing mo dapa lebe banya gaji dari tu orang yang da bakarja terakhir, mar dorang masing-masing cuma da trima lei satu doi perak. Waktu dorang trima tu doi itu, dorang bafeto pa tu tuang tana. Dorang bilang, ‘Tuang, tu orang-orang yang da datang karja terakhir kong cuma da bakarja satu jam, masa dorang pe gaji sama deng torang, padahal torang tu da bakarja satu hari fol kong da rasa tu matahari pe panas.’ Mar tu tuang kobong bilang pa tu sala satu dari pa dorang itu, ‘Tamang, kita to nyanda beking sala pa ngana. Soalnya dari pertama torang dua so baku ator kalu kita mo bayar pa ngana satu doi perak for satu hari. Jadi ngana ambe jo tu ngana pe gaji kong pulang. Kita suka mo kase gaji yang sama pa tu orang yang da maso terakhir deng lei pa ngana. Kita bebas for pake tu kita pe doi iko kita pe mau sandiri. Ato ngana mangiri pa kita lantaran kita bae-bae pa tu orang-orang yang karja terakhir itu?’ ” Yesus bilang lei, “Jadi bagitu lei nanti di hari kiamat tu orang yang orang anggap nyanda penting, dia itu mo dapa hormat, kong tu orang yang orang bilang orang penting, dia itu nyanda mo jadi apa-apa.” Yesus deng Dia pe murit-murit da pigi ka kota Yerusalem. Di tenga jalang Dia pangge Dia pe murit-murit for basandiri, kong Dia bilang pa dorang, “Torang skarang da bapigi ka Yerusalem. Di sana orang mo srahkan tu Anak Manusia pa imam-imam kapala deng ahli-ahli Taurat, kong dorang mo ambe keputusan for kase hukum mati pa Dia. Dorang mo srahkan Dia pa orang-orang bukang Yahudi, kong dorang mo sosere akang pa Dia, mo cambok deng mo se salib pa Dia, mar di hari katiga Dia mo hidop ulang.” Kong Zebedeus pe bini datang pa Yesus sama-sama deng dia pe dua anak, tu Yakobus deng Yohanes. Dia berlutut di muka pa Yesus for minta sesuatu. Yesus batanya pa dia, “Apa dang tu ibu suka mo minta?” Dia bilang pa Yesus, “Bapak, nanti kalu Bapak so jadi Raja yang Berkuasa, Bapa suru jo supaya kita pe dua anak ini bole dudu di sabla pa Bapak, tu satu di sabla kanan kong tu satu lei di sabla kiri.” Pe dengar itu, Yesus babilang, “Ngoni nyanda mangarti deng apa tu ngoni da minta. Kita nanti mo dapa banya siksa, kong apa ngoni mampu mo pikul tu siksa sama deng tu Kita mo pikul, sama deng mo minum tu cawan pendritaan yang Kita musti minum?” Kong dorang manyao, “Torang mampu.” Trus Yesus bilang pa dorang, “Memang ngoni mo pikul tu siksa sama deng tu Kita mo trima, mar sapa tu mo dudu di sabla kanan deng kiri pa Kita, itu bukang Kita pe hak for ator. Tu tampa itu Kita pe Bapa so se sadia for orang-orang yang Dia so tentukan.” Waktu Yesus pe spulu murit dengar tu dorang dua da minta, dorang jadi mara pa tu dua basudara itu. Jadi Yesus pangge De pe murit-murit kong Dia bilang, “Ngoni tau kalu tu pemimpin-pemimpin dari bangsa-bangsa yang nyanda kanal pa Tuhan, dorang itu da kuasai deng ja beking siksa dong pe rakyat, kong tu dorang pe penguasa-penguasa lei ja tekan tu rakyat for beking tu dorang pe mau. Mar ngoni jang sama deng dorang! Sapa tu suka jadi orang basar di antara pa ngoni, dia musti jadi orang yang ja layani pa ngoni. Kong sapa yang suka jadi paling penting di antara ngoni, dia musti ja layani pa ngoni sama deng budak. Itu sama deng tu Anak Manusia. Dia datang ka dunia bukang for orang mo layani, mar Dia datang for layani banya orang deng datang for srahkan Dia pe diri for tubus banya orang pe dosa.” Waktu Yesus deng Dia pe murit-murit kase tinggal tu kota Yerikho, ada banya orang yang da iko pa Yesus. Kong ada dua orang buta da dudu di pinggir jalang. Waktu dorang dengar kalu Yesus da balewat, dorang babilang deng suara kuat, “Bapak, raja Daud pe keturunan, kasiang akang dang pa torang!” Pe dengar itu, tu orang banya togor pa dorang dua supaya badiam. Mar dorang dua babilang lebe kuat, “Bapak, Raja Daud pe keturunan, kasiang akang dang pa torang!” Kong Yesus brenti trus pangge pa dorang dua. Dia batanya pa dorang, “Apa dang tu ngoni suka Kita mo beking pa ngoni?” Dorang manyao, “Bapak, torang suka supaya torang bole mo balia.” Pe dengar itu, Yesus jadi rasa kasiang pa dorang. Dia raba dorang pe mata kong waktu itu jo dorang so bole balia. Abis itu, dorang iko pa Yesus. Waktu Yesus deng Dia pe murit-murit so dekat di Yerusalem, dorang sampe di kampung Betfage tu ada di Bukit Zaitun. Kong di situ Yesus suru pa Dia pe dua murit, Dia bilang pa dorang, “Pigi jo ngoni ka kampung di muka sana. Waktu ngoni maso di situ, ngoni mo iko dapa lia satu ekor keledai betina tu da se ika deng de pe anak ada di dekat pa dia. Ngoni buka jo tu dua keledai itu pe tali trus bawa pa Kita. Kong kalu ada orang yang batanya pa ngoni kiapa ngoni beking bagitu, ngoni bilang pa dia bagini, ‘Tuhan perlu tu keledai, nanti Dia mo iko se bale ulang.’ ” Samua itu jadi supaya gnap apa tu Tuhan da bilang dulu pa Dia pe nabi, Dia bilang, “Bilang jo pa tu orang-orang di Yerusalem tu ja bilang lei Sion bagini, ‘Co lia, ngoni pe Raja datang pa ngoni. Dia nyanda sombong. Dia cuma da nae satu ekor keledai, tu keledai pe anak yang masi muda.’ ” Abis itu, tu dua murit itu pigi kong dorang beking sama deng tu Yesus da bilang pa dorang. Dorang bawa tu keledai betina sama-sama deng de pe anak pa Yesus, kong dorang se alas tu dong pe juba di atas keledai trus Yesus dudu di situ. Waktu Yesus lewat, pe banya orang yang da se alas tu dorang pe juba di jalang. Ada lei yang pi potong cabang-cabang kacili yang badaong ijo kong se ambor di jalang tu Yesus mo lewat akang. Kong ada orang yang bajalang di muka pa Yesus deng ada lei yang baiko di blakang pa Dia. Dorang sama-sama puji pa Dia deng suara kuat, “Hosana! Puji jo pa Dia tu raja Daud pe keturunan! Puji jo pa Dia yang da datang dalam nama Tuhan. Hosana! Puji jo pa Dia yang ada di tampa mahatinggi!” Waktu Yesus maso ka kota Yerusalem, sluru kota itu jadi hebo, kong orang-orang di situ baku tanya, “Sapa kang tu orang itu?” Tu orang banya itu manyao, “Dia itu Yesus, tu nabi dari Nazaret di daera Galilea!” Kong Yesus maso ka kintal Ruma Ibada Pusat. Di situ Dia user samua orang yang da bajual deng yang da babli, Dia lei kase bobale tu meja-meja dari tu orang-orang yang da tukar doi deng tu bangku-bangku dari tukang bajual burung pombo. Kong Yesus bilang pa dorang, “Di Kitab Suci ada tatulis bagini, ‘Kita pe ruma orang mo bilang tampa basombayang.’ Mar ngoni so beking jadi tampa batipu orang!” Abis itu, tu orang-orang buta deng orang-orang kento pigi ka kintal di kompleks Ruma Ibada Pusat for datang pa Yesus, kong Dia kase bae pa dorang. Mar tu imam-imam kapala deng ahli-ahli Taurat mara da lia Yesus se bae tu orang-orang itu, deng dorang lei mara da dengar anak-anak yang ada di kintal kompleks Ruma Ibada Pusat da babilang deng suara kuat, “Hosana! Puji pa raja Daud pe keturunan ini!” Kong dorang babilang pa Yesus, “Ngana da dengar apa tu anak-anak itu da se bataria?” Yesus manyao pa dorang, “Iyo, Kita da dengar. Pasti ngoni so perna baca tu da tulis di Kitab Suci bagini, ‘Tuhan so kase ajar pa anak-anak kacili deng tu bayi-bayi for puji pa Dia.’ ” Abis itu, Yesus kase tinggal pa dorang. Dia pigi ka luar Yerusalem kong sampe di kampung Betania kong Dia bamalam di situ. De pe eso pagi, Yesus deng Dia pe murit-murit da babale ka Yerusalem. Di tenga jalang, Yesus rasa lapar. Kong Dia dapa lia ada pohong ara di pinggir jalang. Dia pi badekat ka pohong itu mo cari de pe bua, mar Dia nyanda dapa apa-apa di situ kacuali daong-daong. So itu Dia bilang pa tu pohong itu, “Ngana so nyanda mo babua lei sampe slama-lamanya!” Kong waktu itu jo tu pohong ara itu iko kring. Waktu Yesus pe murit-murit lia itu, dorang taheran-heran kong batanya, “Bagimana kong tu pohong ara itu iko kring?” Kong Yesus manyao pa dorang, “Kita bilang pa ngoni, kalu ngoni percaya pa Tuhan deng nyanda ragu-ragu, ngoni bukang cuma mampu beking apa tu Kita da beking pa tu pohong ara itu, malatare ngoni bole mo prenta pa tu gunung ini, ‘Taangka jo kong talempar ka dalam laut!’ Itu pasti mo jadi. Kalu ngoni basombayang minta pa Tuhan, ngoni mo trima tu ngoni da minta itu asal ngoni percaya.” Waktu itu, Yesus maso ka kintal di Ruma Ibada Pusat kong mulai mangajar pa orang-orang di sana. Samantara Yesus mangajar, datang pa Dia tu imam-imam kapala deng tua-tua Yahudi, kong dorang batanya, “Kalamaring, Bapak da user orang-orang dari sini. Bapak da dapa kuasa dari mana sampe Bapak bole beking samua itu? Kong sapa so yang da kase tu kuasa itu pa Bapak?” Yesus manyao pa dorang, “Kita lei mo batanya pa ngoni. Kalu ngoni jawab tu Kita da tanya, Kita mo jawab lei tu ngoni da tanya pa Kita tentang sapa tu da kase kuasa pa Kita for user tu orang-orang itu. Kita mo tanya bagini: menurut ngoni, tu Yohanes Pembaptis dapa kuasa dari mana for babaptis? Dari Tuhan ato dari manusia?” Kong tu imam-imam kapala deng tua-tua Yahudi baku bilang, “Kalu torang bilang pa Dia, ‘Tuhan yang da kase kuasa pa Yohanes’, pasti Dia mo bilang bagini pa torang, ‘Kalu bagitu, kiapa ngoni nyanda percaya pa Yohanes?’ Mar kalu torang bilang, ‘Manusia yang da kase kuasa’, pasti tu orang banya ini mo bakacau lantaran dorang anggap tu Yohanes itu nabi.” Jadi dorang bilang pa Yesus, “Torang nintau tu Yohanes da dapa kuasa dari mana!” Kong Yesus bilang pa dorang, “No kalu bagitu, Kita lei nyanda mo bilang pa ngoni sapa tu da kase kuasa pa Kita for beking itu.” Yesus batanya pa tu pemimpin-pemimpin agama Yahudi, “Kalu menurut ngoni, bagimana tentang tu prumpamaan ini: ada tu satu bapak yang punya dua anak laki-laki. Satu hari, dia pigi pa de pe anak yang tua kong babilang bagini, ‘Ni hari, ngana pigi jo bakarja di kobong anggor.’ Tu anak itu manyao, ‘Kita nimau papa,’ mar abis itu tu anak itu iko bruba pikiran, kong dia da pigi bakarja di kobong anggor. Abis itu, tu bapak pigi pa de pe anak bungsu kong bilang lei, ‘Ni hari, ngana pigi jo bakarja di kobong anggor.’ Tu anak bungsu itu manyao, ‘Iyo papa!’ mar dia nyanda jo jadi pigi bakarja di kobong anggor. Jadi menurut ngoni, sapa dari tu dua anak yang da beking tu dorang pe papa pe mau?” Dorang manyao, “Tu anak yang tua.” Kong Yesus bilang pa dorang, “Kita bilang pa ngoni, tu petugas-petugas pajak deng tu parampuang-parampuang nakal, dorang itu mo jadi orang-orang dari Tuhan Allah yang berkuasa sbagai raja lebe dulu dari ngoni. Soalnya waktu Yohanes Pembaptis datang pa ngoni, dia da kase tunjung bagimana tu cara hidop ja beking tu butul di muka pa Tuhan, kong ngoni nyanda percaya pa dia. Mar tu petugas-petugas pajak deng tu parampuang-parampuang nakal, dorang itu percaya pa Yohanes. Kong biar lei ngoni da lia dorang itu percaya, ngoni pe pikiran nyanda bruba, ngoni tetap nyanda percaya deng tu dia da bilang.” Yesus bilang lei, “Co ngoni dengar ni prumpamaan laeng. Ada tu satu tuang tana da buka kobong anggor kong dia beking pagar kase ron tu kobong itu. Dia gale lobang for beking bak, tu tampa mo peras akang anggor. Dia lei beking sabua for tu orang yang mo bajaga kobong. Klar samua itu dia baku ator deng tu orang-orang yang ja bakarja kobong. Abis itu, dia pigi ka daera laeng. Serta so de pe oras bapete anggor, dia suru de pe budak-budak for pigi pa tu orang-orang yang da bakarja di kobong anggor itu for ambe tu de pe bagean. Mar dorang cuma da tangka tu de pe budak-budak itu. Dorang pukul tu satu budak, dorang bunung tu budak laeng, trus tu laeng lei dorang lempar deng batu. Abis itu, yang punya kobong suru lei de pe budak-budak laeng for pigi pa dorang. Ini kali komang dia da suru lebe banya budak dari tu pertama. Mar tu orang-orang karja da beking pa tu budak-budak itu sama deng tu dorang da beking pa tu budak-budak pertama. De pe laste, yang punya kobong suru de pe anak laki-laki pigi pa tu orang-orang karja itu, kong dia bilang, ‘Tantu katu kalu kita suru pigi tu kita pe anak, pasti dorang mo hormat.’ Mar waktu tu orang-orang karja lia tu yang punya kobong pe anak itu, dorang baku skongkol, ‘Napa dia tu nanti mo dapa warisan kobong ini. So itu lebe bae torang bunung jo pa dia, supaya tu de pe warisan kobong ini mo jadi torang punya.’ Jadi dorang tangka tu anak itu, trus dorang kase lego pa dia kaluar dari tu kobong anggor itu kong bunung pa dia.” Kong Yesus batanya pa dorang, “Menurut ngoni, kalu tu tuang kobong datang, dia mo beking apa pa tu orang-orang karja itu?” Dorang manyao pa Yesus, “Dia pasti mo bunung tu orang-orang karja yang jaha itu. Abis itu, dia mo kase sewa pa tu orang-orang karja laeng yang suka kase bagean dari tu hasil kobong itu pa dia kalu nanti so de pe oras bapete.” Kong Yesus bilang pa dorang, “Ngoni tantu so baca di Kitab Suci yang da tulis bagini, ‘Batu yang tukang-tukang bangunan da buang, batu itu so jadi batu fondasi yang paling penting. Tuhan tu da beking itu, kong torang lia yang Dia da beking itu luar biasa.’ ” Yesus bilang lei pa dorang, “So lantaran itu, Kita bilang lei pa ngoni, Tuhan mo cabu tu ngoni pe hak for jadi orang-orang dari Tuhan Allah yang berkuasa sbagai Raja. Dia mo kase tu hak itu pa orang laeng, lebe kusus pa orang-orang yang suka mo beking tu Dia pe mau, kong dorang itu sama deng pohong yang kase hasil bua yang bagus. [ Sapa yang jatung di atas tu batu itu, dia mo ancor. Sapa yang da tatindis akang deng tu batu itu, dia mo ancor-ancor, bagitu lei deng ngoni yang nyanda trima pa Kita.]” Waktu tu imam-imam kapala deng orang-orang dari golongan Farisi dengar tu prumpamaan-prumpamaan yang Yesus da bilang itu, dorang jadi mangarti kalu Yesus pe maksut deng tu orang-orang karja di prumpamaan itu dorang. So itu dorang brusaha mo tangka pa Dia, mar dorang tako pa orang banya lantaran tu orang banya itu anggap Yesus itu nabi, tu orang yang ja kase tau Tuhan Allah pe pesan. Kong Yesus kase tau lei pake prumpamaan pa dorang. Yesus bilang, “Tuhan Allah Berkuasa sbagai Raja sama deng ini: ada tu satu raja yang beking pesta kaweng for de pe anak laki-laki. Waktu tu pesta so mo mulai, Dia suru de pe budak-budak for pangge tu orang-orang yang dia so undang supaya datang jo ka pesta kaweng itu. Mar tu orang-orang itu nimau mo datang. So itu tu raja suru lei tu de pe budak-budak laeng bagini, ‘Pigi jo kong bilang pa tu orang-orang yang kita da undang, kalu tu pesta for kita pe anak mo kaweng so siap. Tu kita pe sapi laki-laki deng sapi muda yang gumu so potong kong so momasa. Jadi samua so tasadia, so itu datang jo ka pesta kaweng ini.’ Mar tu orang-orang yang da dapa undang itu, dorang nyanda farduli akang tu undangan itu. Dorang itu ada yang da pigi ka kobong, kong tu laeng da pi urus tu dong pe usaha. Malatare tu laeng da tangka pa tu budak-budak itu, trus dorang siksa kong bunung tu budak-budak itu. Pe dengar apa tu da jadi, raja jadi mara skali. Kong dia suru tu de pe tentara-tentara pigi ka sana for bunung tu orang-orang yang da babunung tu de pe budak-budak, deng lei suru bakar tu orang-orang itu pe kota. Abis itu, raja bilang pa dia pe budak-budak laeng bagini, ‘Pesta kaweng so siap, mar tu orang yang kita da undang nyanda pantas mo iko kita pe pesta. So itu ngoni pigi jo ka jalang-jalang, kong undang jo sapa-sapa yang ngoni da baku dapa akang di sana supaya dorang datang for iko tu pesta kaweng ini.’ Pe dengar itu, tu budak-budak pigi ka jalang-jalang kong kase kumpul samua orang yang dorang da baku dapa akang di sana, biar itu orang jaha ato orang bae-bae. Dorang undang tu banya orang sampe tu ruangan pesta kaweng jadi punung deng tamu-tamu. Mar waktu tu raja maso ka ruangan pesta for lia-lia tu tamu-tamu itu, dia lia ada satu tamu yang nyanda da pake baju pesta. Kong raja batanya pa tu tamu itu, ‘Hei tamang, bagimana ngana da maso kamari kong nyanda da pake baju pesta?’ Mar tu orang itu cuma da badiam. Trus tu raja itu babilang pa de pe orang-orang karja bagini, ‘Ngoni ika tu orang itu pe kaki deng tangan kong lego pa dia kaluar di tampa yang glap. Di sana mo dapa dengar orang mo manangis deng dong pe gigi tabaku goso kong babunyi lantaran pe mendrita skali.’ ” Kong Yesus bilang lei, “Banya orang yang Tuhan da pangge, mar cuma sadiki yang da tapili.” Abis itu, orang-orang dari golongan Farisi pigi dari situ kong baku skongkol for jebak pa Yesus deng pertanyaan. Kong tu orang-orang dari golongan Farisi itu suru pa dong pe murit-murit deng bebrapa orang yang ja iko pa raja Herodes pigi for jebak pa Yesus deng pertanyaan. Tu orang-orang itu batanya pa Yesus, “Guru, torang tau kalu Guru itu orang jujur, deng trang-trangan Guru kase ajar tu cara yang butul for iko Tuhan Allah. Guru nyanda pandang muka lantaran Guru nyanda ja pili-pili orang. So itu Guru, tolong kase tau akang pa torang, menurut Guru kalu iko tu torang pe atoran agama, bole ato nyanda torang babayar pajak pa raja yang paling tinggi di krajaan Romawi?” Mar Yesus tau dorang pe maksut jaha, kong Dia bilang pa dorang, “Hei orang-orang munafik, kiapa ngoni mo jebak pa Kita? Co kase tunjung satu doi perak pa Kita tu ngoni ja pake for babayar pajak!” Kong dorang bawa akang pa Dia satu doi perak. Trus Yesus batanya pa dorang, “Sapa pe gambar deng nama ini?” Dorang manyao, “Itu gambar deng nama dari raja yang paling tinggi di krajaan Romawi.” Kong Yesus bilang pa dorang, “No kalu bagitu, kase jo pa raja yang paling tinggi di krajaan Romawi apa tu ngoni musti kase pa dia, kong kase jo pa Tuhan Allah apa tu ngoni musti kase pa Tuhan Allah.” Pe dengar itu, dorang taheran-heran kong dorang pigi kase tinggal pa Dia. Hari itu jo, bebrapa orang dari golongan Saduki datang pa Yesus. Tu golongan itu nyanda percaya kalu orang yang so mati mo hidop ulang. Dorang batanya pa Yesus, “Guru, dulu nabi Musa da kase tau kalu satu laki-laki yang so kaweng kong mati mar nyanda dapa anak, de pe kaka ato ade laki-laki musti kaweng deng tu laki-laki itu pe bini, supaya de pe kaka ato ade itu kase akang keturunan for dia. No skarang bagini, umpama ada tuju kaka ade laki-laki di antara pa torang. Tu paling tua kaweng mar nyanda lama dia mati, kong dia ini nyanda dapa anak. Kong tu kadua kaweng deng tu parampuang itu. Dia lei mati kong nyanda dapa anak. Trus tu hal yang sama itu jadi pa yang katiga sampe yang katuju. De pe laste, abis dorang tuju laki-laki itu mati, tu parampuang itu lei mati. No kalu so hari kiamat waktu Tuhan se hidop ulang samua orang, sapa dari tu tuju kaka ade itu yang mo jadi tu parampuang itu pe laki? Soalnya dorang samua da kaweng deng dia!” Yesus manyao pa dorang, “Ngoni ini so sala skali. Soalnya ngoni nyanda mangarti tu Kitab Suci deng ngoni lei nintau tu Tuhan Allah pe kuasa. Soalnya nanti waktu Tuhan so kase hidop ulang samua orang yang mati, tu laki-laki deng lei tu parampuang so nyanda mo kaweng deng so nyanda mo kase kaweng, mar samua mo hidop sama deng malaekat-malaekat di sorga. Kong tentang orang mati yang mo hidop ulang, ngoni tantu so baca apa tu Tuhan Allah da bilang dulu pa torang pe nene moyang, Dia da bilang bagini, ‘Kita ini Tuhan Allah, tu Abraham, Ishak deng Yakub ja semba.’ Waktu itu, tu Abraham, Ishak deng Yakub so mati mar da hidop ulang deng Tuhan Allah. Jadi Tuhan Allah itu bukang orang yang mati pe Tuhan, mar orang yang hidop pe Tuhan.” Waktu tu orang banya da dengar tu Yesus da bilang, dorang taheran-heran lantaran suka skali deng Dia pe ajaran. Waktu itu, tu orang-orang dari golongan Farisi dapa dengar tu Yesus pe jawaban yang luar biasa. Yesus pe jawaban itu beking sampe tu orang-orang dari golongan Saduki nyanda tabilang apa-apa. So itu, tu orang-orang Farisi bakumpul, kong satu dari pa dorang, dia itu ahli hukum Taurat, dia coba jebak pa Yesus deng pertanyaan bagini, “Guru, atoran mana tu paling penting dari antara tu atoran-atoran yang ada di kitab Taurat?” Yesus bilang pa dia, “Ngoni musti butul-butul sayang pa Tuhan Allah yang ngoni ja semba, ngoni nimbole badua hati. Ngoni sayang jo pa Dia deng samua yang ada pa ngoni pe diri, deng lei sayang jo pa Dia deng cara slalu pikir apa tu bole mo beking snang pa Dia. Itu no tu atoran yang penting deng yang pertama. Kong tu atoran yang kadua tu sama deng itu, ‘Ngoni sayang jo pa orang laeng sama deng ngoni sayang pa ngoni pe diri sandiri.’ Dua atoran ini no tu jadi dasar dari samua atoran yang ada di kitab Taurat deng nabi-nabi pe ajaran.” Waktu tu orang-orang dari golongan Farisi masi da bakumpul di situ, Yesus batanya pa dorang, “Co ngoni bilang pa Kita, apa ngoni pe pendapat tentang Kristus? Dari sapa pe keturunan Dia?” Kong dorang manyao pa Dia, “Dia itu raja Daud pe keturunan.” Kong Yesus batanya lei pa dorang, “No kalu bagitu, kiapa dulu waktu Roh Kudus da kuasai pa raja Daud, raja Daud sandiri da bilang kalu Kristus itu dia pe Tuhan? Waktu itu, dia da bilang bagini, ‘Tuhan Allah da bilang pa kita pe Tuhan bagini, “Dudu jo di tampa terhormat di sabla kanan pa Kita, sampe Ngana pe musu-musu Kita taru di bawa Ngana pe kaki.” ’ Jadi kalu raja Daud da bilang Kristus itu dia pe Tuhan, no bagimana lei torang mo bilang kalu Kristus itu raja Daud pe keturunan?” Dari samua orang yang ada di situ, nyanda ada yang dapa manyao apa-apa pa Yesus. Kong dari tu waktu itu jo, nyanda ada orang yang brani batanya pa Dia. Abis itu, Yesus bilang pa tu orang banya deng pa De pe murit-murit, “Tu ahli-ahli Taurat deng tu orang-orang dari golongan Farisi, dorang itu sama deng da dudu pa Musa pe kursi for jelaskan tu atoran-atoran di kitab Taurat pa orang-orang. So itu, ngoni musti dengar kong iko jo samua tu dorang da se ajar pa ngoni, mar ngoni jang iko tu dorang pe kalakuan. Soalnya dorang ja se ajar pa ngoni mar dorang sandiri nyanda ja beking itu. Dorang da beking atoran pe banya kong tu atoran-atoran itu pe susa skali mo iko akang, itu sama deng dorang da ika beban-beban brat kong taru itu pa orang-orang pe bahu, mar dorang sandiri nimau mo tolong tu orang-orang itu for beking tu atoran itu. Samua tu dorang da beking de pe maksut cuma supaya orang lia pa dorang. De pe conto, tu kotak kacili yang da isi akang tulisan dari tu nabi-nabi dulu, kotak itu dorang beking jadi basar kong dong pasang pa dong pe tangan. Dorang lei da beking lebe panjang tu rumbai yang ada pa dong pe juba. Di pesta-pesta deng di ruma-ruma ibada, dorang suka ja dudu di tampa paling muka tu tampa yang terhormat. Dorang suka orang ja hormat pa dorang di tampa yang ja takumpul akang banya orang, kong dorang lei suka kalu orang ja pangge ‘guru’ pa dorang. Mar ngoni jang bagitu! Ngoni jang kase biar orang laeng pangge pa ngoni ‘guru’! Soalnya ngoni pe Guru cuma satu, kong ngoni samua itu basudara. Ngoni jang bapangge ‘bapa’ pa sapa-sapa di dunia ini, lantaran cuma satu tu ngoni pe Bapa, tu Bapa yang ada di sorga. Ngoni lei jang kase biar orang laeng pangge ‘pemimpin’ pa ngoni, lantaran ngoni pe Pemimpin cuma satu. Ngoni pe Pemimpin itu Kristus tu Raja yang se slamat pa manusia. Sapa yang jadi orang penting di antara pa ngoni, dia musti ja layani pa ngoni. Soalnya sapa jo yang angka de pe diri sandiri, Tuhan mo beking tu orang itu nyanda ada arti apa-apa, kong sapa jo yang nyanda sombong, Tuhan mo angka pa dia jadi orang yang penting.” Yesus bilang lei, “Cilaka jo ngoni tu ahli-ahli Taurat deng orang-orang dari golongan Farisi! Ngoni itu orang-orang munafik. Soalnya ngoni beking susa tu orang-orang yang suka mo jadi orang-orang dari Tuhan Allah yang Berkuasa sbagai Raja, itu sama deng ngoni da tutu akang tu pintu for dorang. Ngoni sandiri nyanda jadi orang-orang dari Tuhan Allah yang berkuasa sbagai Raja, kong ngoni ja halangi tu orang-orang yang suka mo jadi orang-orang dari Tuhan Allah. [ Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik, lantaran ngoni ja batipu tu janda-janda for ambe tu dorang pe ruma. Ngoni ja basombayang panjang-panjang supaya orang anggap ngoni itu orang bae-bae. So itu, ngoni pasti mo trima tu hukuman yang lebe brat.] Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik. Ngoni pigi kamana-mana lewat laut deng darat cuma for cari orang yang mo iko tu ngoni pe ajaran. Mar serta tu orang itu so jadi ngoni pe pengikut, ngoni beking dia jadi calon maso neraka yang dua kali lebe jaha dari ngoni. Cilaka jo ngoni! Ngoni ini pemimpin-pemimpin yang sama deng orang buta yang batuntun orang laeng. Ngoni ja kase ajar pa orang-orang bagini, ‘Kalu orang basumpa demi tu Ruma Ibada Pusat, tu orang itu so nyanda taika deng tu sumpa itu. Mar kalu dia basumpa demi tu mas yang ada di Ruma Ibada Pusat, dia musti beking tu de pe sumpa.’ Ngoni itu pe biongo, ngoni itu orang-orang buta! Ngoni kira tu mas itu lebe penting dari tu Ruma Ibada Pusat? Nyanda kasiang. Soalnya tu Ruma Ibada Pusat itu yang beking tu mas jadi kudus. Ngoni lei da kase ajar bagini, ‘Sapa yang basumpa demi tu tampa korban persembahan, tu orang itu so nyanda taika deng tu sumpa itu. Mar kalu dia basumpa demi tu korban persembahan yang ada di tampa korban persembahan itu, dia taika deng tu sumpa itu.’ Ngoni ini orang-orang buta! Ngoni kira tu korban persembahan itu lebe penting dari tu tampa korban persembahan? Nyanda kasiang. Soalnya tu tampa persembahan itu yang beking suci tu korban persembahan. So itu sapa yang basumpa demi tu tampa korban persembahan, dia itu so basumpa demi tu tampa korban persembahan itu deng lei demi samua korban persembahan yang ada di atas tampa itu. Trus sapa yang basumpa demi Ruma Ibada Pusat, dia da basumpa demi tu Ruma Ibada Pusat itu deng lei demi Tuhan yang tinggal di situ. Kong sapa yang basumpa demi sorga, dia da basumpa demi tu Tuhan Allah pe tahta deng lei demi Dia tu da dudu di tahta itu. Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik. Ngoni ja kase pa Tuhan tu spulu persen dari ngoni pe hasil bumbu-bumbu yang paling kacili rupa ini: selasi, adas manis deng jintan. Mar tu hal-hal yang lebe penting dari tu atoran-atoran di kitab Taurat ngoni nyanda farduli rupa tu bagini: beking tu adil pa orang, se tunjung tu rasa kasiang pa orang, deng jadi orang yang setia. Ngoni tetap musti kase tu ngoni pe spulu persen itu, mar ngoni lei jang lupa beking tu hal-hal yang lebe penting. Ngoni itu pemimpin-pemimpin yang buta! Ngoni ja beking tu prenta yang kurang penting mar tu Tuhan pe prenta yang lebe penting ngoni nyanda beking, itu sama deng ngoni da saring kong buang tu gonone dari ngoni pe minuman, mar tu onta yang ada di dalam tu ngoni pe minuman, ngoni tare cuma da tlang. Cilaka jo ngoni tu ahli-ahli Taurat deng orang-orang dari golongan Farisi! Ngoni itu orang-orang munafik. Ngoni dapa lia ja beking tu atoran agama, mar sebenarnya ngoni ja barampas orang laeng punya deng nyanda mampu kuasai ngoni pe diri, itu sama deng orang yang ja kase bersi tu cawan deng piring cuma de pe bagean luar, mar de pe bagian dalam pe kotor skali. Hei ngoni tu orang-orang dari golongan Farisi, ngoni itu orang-orang buta! Kase bersi dulu tu ngoni pe pikiran dari pikiran yang jaha, baru apa tu ngoni mo beking deng bilang lei jadi bagus, itu sama deng kase bersi tu cawan deng piring pe bagean dalam kong tu bagean luar lei mo bersi. Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik. Ngoni sama deng tu kubur-kubur yang da cet puti. Di luar dapa lia pe bagus, mar di dalam punung deng tulang orang mati deng samua yang busu-busu. Bagitu lei deng ngoni, dari luar ngoni dapa lia sama deng orang yang ja beking tu butul di muka pa Tuhan, mar dari dalam ngoni itu butul-butul orang munafik deng nyanda ja beking tu Tuhan da suru. Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik. Ngoni da beking bagus tu nabi-nabi dulu pe kubur-kubur, deng ngoni lei ja hias tu tugu-tugu pringatan, tu tugu-tugu yang da beking for inga tu orang-orang yang ja beking tu Tuhan pe mau. Trus ngoni bilang bagini, ‘Kalu torang da hidop di jaman tong pe nene moyang dulu, pasti torang nyanda mo iko deng dorang tu ja babunung nabi-nabi itu.’ Mar deng ngoni bilang bagitu, ngoni mangaku sandiri kalu ngoni itu keturunan dari orang-orang yang babunung tu nabi-nabi itu. Jadi lebe bae, ngoni kase lengkap jo tu kejahatan yang ngoni pe nene moyang da beking itu! Hei ngoni orang-orang jaha, ngoni pe jaha sama deng tu ular babisa. Ngoni itu keturunan orang jaha, jadi ngoni itu sama deng ular babisa pe keturunan. Ngoni nyanda mo lolos dari Tuhan pe hukuman tu mo se maso pa ngoni ka neraka. So lantaran itu, Kita mo utus pigi pa ngoni tu nabi-nabi, orang-orang yang tau banya hal deng ahli Taurat yang mangajar pa ngoni. Bebrapa dari antara pa dorang itu ngoni mo bunung deng tu laeng mo se salib. Ada lei laeng tu ngoni mo siksa pa ngoni pe ruma-ruma ibada kong ada lei yang ngoni mo dusu-dusu dari satu kota ka kota laeng for beking susa. So itu Tuhan mo hukum pa ngoni lantaran samua orang yang ngoni deng ngoni pe nene moyang da bunung itu. Tu orang-orang yang ngoni da bunung itu, dorang yang ja beking tu butul di muka pa Tuhan. Tu ngoni pe nene moyang da bunung dulu itu mulai dari Habel sampe tu terakhir yang ngoni da bunung tu nabi Zakharia. Zakharia itu Berekhya pe anak yang da dapa bunung di antara tu Ruang Mahasuci deng meja tu tampa korban persembahan di Ruma Ibada Pusat. Kita bilang pa ngoni, ngoni yang ada jaman ini nanti mo dapa hukum lantaran samua tu hal-hal jaha itu.” Yesus bilang lei, “Hei ngoni tu orang-orang Yerusalem! Ngoni yang da bunung tu nabi-nabi, ngoni lempar deng batu tu orang-orang yang Tuhan da utus pa ngoni. Kita so ulang-ulang kase kumpul pa ngoni di dekat pa Kita, sama deng tu ayam mai da se kumpul de pe anak-anak for jaga di bawa de pe sayap, mar ngoni nimau Kita beking bagitu. So itu nanti ngoni mo lia kalu Tuhan mo se tinggal tu ngoni pe tampa ini, tu tampa ini mo jadi sunyi skali. Kita bilang pa ngoni, mulai skarang ngoni so nyanda mo lia lei pa Kita, mar nanti pa de pe waktu, ngoni mo lia pa Kita kong mo bilang, ‘Puji jo pa Dia yang da datang dalam nama Tuhan.’ ” Abis itu Yesus bajalang se tinggal tu Ruma Ibada Pusat. Waktu itu Dia pe murit-murit badekat pa Dia kong batunjung ka gedung-gedung yang ada di kompleks Ruma Ibada Pusat. Kong Yesus bilang pa dorang, “Ngoni lia to tu gedung-gedung itu? Kita bilang pa ngoni, nanti satu waktu nyanda mo ada satu batu lei yang tasusung pa de pe tampa, samua itu mo dapa kase rubu.” Abis itu, Yesus pigi ka bukit Zaitun kong dudu di situ. Waktu itu Dia pe murit-murit datang badekat for babicara sandiri deng Dia, dorang bilang, “Guru, kase tau akang pa torang, tempo apa dang tu Guru da bilang tadi mo jadi? Kong apa dang tu tanda-tanda waktu Guru mo datang ulang deng tu tanda waktu hari kiamat?” Yesus manyao pa dorang, “Hati-hati jo ngoni, jang sampe ada orang yang mo beking sesat pa ngoni. Soalnya banya orang mo datang kong mo pake Kita pe nama. Dorang mo bilang bagini, ‘So kita ini tu Kristus tu Raja yang se slamat pa manusia’ kong dorang itu mo beking sesat banya orang. Kong ngoni mo dengar ada prang di satu daera, ato ngoni mo dengar kabar-kabar tentang prang di tampa laeng. Mar biar bagitu, ngoni jang tako lantaran samua itu musti jadi lebe dulu, mar itu blum de pe waktu mo kiamat. Soalnya nanti satu suku bangsa mo baprang deng suku bangsa laeng, satu krajaan baprang deng krajaan laeng, kong mo ada lei kelaparan deng tana goyang di mana-mana. Mar samua itu baru de pe awal pendritaan seblum kiamat, sama deng tu pendritaan yang parampuang da rasa waktu mo melahirkan. Waktu itu, ada orang-orang yang tangka pa ngoni trus mo srahkan for siksa deng bunung pa ngoni. Kong orang-orang dari samua suku bangsa mo binci pa ngoni lantaran da iko pa Kita. Kong banya orang yang percaya so nyanda mo percaya lei pa Kita. Dorang mo baku binci deng mo baku hianat. Ada banya nabi palsu mo muncul kong beking sesat banya orang. Kong tu kejahatan yang orang da beking mo lebe tatamba banya, so itu banya orang so nyanda mo basayang lei. Mar orang yang tetap batahang percaya pa Kita sampe akhir, Tuhan mo kase slamat pa dia. Kong tu Kabar Bae tentang Tuhan Allah Berkuasa sbagai Raja mo se siar dulu ka sluru dunia supaya samua suku bangsa bole tau itu, abis itu baru dunia mo kiamat.” Yesus bilang lei, “Ngoni mo lia satu orang yang paling jaha tu tukang beking ancor samua, kong dia mo badiri di tampa yang kudus di Ruma Ibada Pusat. Nabi Daniel so tulis firman tentang hal itu. (Sapa yang da babaca ini, tarukira jo bae-bae!) Kong kalu tu orang paling jaha itu so badiri di tampa yang kudus, lebe bae tu orang-orang yang ada di daera Yudea lari pi manyingkir jo ka gunung-gunung. Tu orang yang ada di atas ruma jang turung pi ambe tu barang-barang pa de pe ruma, mar turung kong lari jo. Bagitu lei deng tu orang yang ada di kobong, jang babale for ambe dia pe baju. Waktu itu yang paling cilaka tu ibu-ibu yang hamil deng tu masi ja se batoto ade. Basombayang jo supaya waktu ngoni da lari pi manyingkir itu, nyanda pas oras dingin ato di hari Sabat. Soalnya tu hari-hari itu de pe siksa pe hebat skali, mulai dari pertama Tuhan Allah da beking ni dunia sampe skarang, nyanda perna ada tu siksa yang sama deng itu, kong nyanda perna mo ada lei. Kong kalu Tuhan nyanda beking pende tu hari-hari yang pe siksa itu, nyanda ada satu orang yang mo slamat. Mar lantaran Dia sayang pa orang-orang yang Dia so pili, Dia beking pende tu hari-hari itu. Waktu itu, kalu ada orang bilang pa ngoni bagini, ‘Co lia, Kristus ada di sini!’, ato ‘Kristus ada di sana!’, ngoni jang percaya itu. Soalnya kristus-kristus palsu deng nabi-nabi palsu mo muncul. Dorang mo beking mujisat-mujisat deng hal-hal luar biasa, sampe kalu bole tu orang-orang yang Tuhan so pili jadi sesat. Jadi tarukira jo bae-bae, samua ini Kita so bilang lebe dulu pa ngoni. So itu kalu ada orang yang bilang pa ngoni bagini, ‘Co lia, Kristus ada di padang gurun,’ ngoni jang pigi ka situ. Ato kalu ada yang bilang pa ngoni, ‘Co lia, Kristus ada di ruang yang da tasambunyi,’, ngoni lei jang percaya itu. Soalnya waktu Anak Manusia mo datang ulang, Dia pe kedatangan mo dapa lia ka sluru dunia, sama deng kilat pe cahaya yang muncul di timur trus sampe ka barat. Kalu torang lia ada burung pangmakang bangkai bakumpul di satu tampa, itu de pe tanda kalu di tampa itu pasti ada bangkai, bagitu lei deng kalu tu Anak Manusia datang ulang ka dunia, orang pasti mo dapa tau itu lantaran lebe dulu ada tu de pe tanda-tanda.” Yesus bilang, “Pe klar tu hari-hari siksa itu, matahari so nyanda mo basinar, tu bulan mo jadi glap, tu bintang-bintang mo ciri dari langit, deng samua kuasa di langit mo tabongkar-bongkar. Waktu itu, mo ada tanda di langit kalu tu Anak Manusia datang ulang, kong samua suku bangsa di bumi mo sedi skali deng manangis. Dorang samua mo lia tu Anak Manusia datang di atas awan-awan dari sorga, Dia datang deng Dia pe kuasa deng Dia pe luar biasa. Dia mo suru tu De pe malaekat-malaekat kaluar, kong mo dapa dengar bunyi trompet pe kuat skali. Dorang itu mo se kumpul tu orang-orang yang tu Anak Manusia so pili dari samua tampa di bumi ini, dari ujung barat sampe ka ujung timur, deng dari ujung utara sampe ka ujung slatan.” Yesus bilang lei, “Co ngoni blajar dari tu pohong ara. Kalu de pe cabang-cabang kacili so baijo deng mulai batunas, ngoni tau kalu tu oras panas so dekat. Bagitu lei kalu ngoni lia tu hari-hari siksa yang Kita da bilang tadi so mulai jadi, so nyanda lama tu Anak Manusia mo datang, so dekat skali. Kita bilang pa ngoni, tu orang-orang yang hidop jaman ini ada yang blum mo mati sampe samua ini jadi. Langit deng bumi mo ancor, mar tu Kita pe firman mo ada trus.” Yesus bilang lei, “Nyanda ada satu orang yang tau tempo apa deng jam brapa tu Anak Manusia mo datang ulang. Malaekat-malaekat di sorga nintau, enter Anak Manusia sandiri lei nintau, cuma Bapa sandiri yang tau. Waktu tu Anak Manusia mo datang ulang, de pe keadaan sama deng keadaan dulu waktu jaman Nuh. Dulu seblum Tuhan kase tu banjer basar skali, tu orang-orang pe hidop cuma makang minum, kaweng deng da se kaweng, dorang pe hidop cuma babagitu trus sampe di hari waktu Nuh maso ka kapal basar. Tu orang-orang itu nyanda sadar kalu banjer basar mo datang. Dorang nanti sadar serta tu banjer so datang se abis pa dorang. No bagitu lei orang-orang nanti nyanda mo siap kalu kage-kage tu Anak Manusia so datang ulang. Kong nanti waktu itu ada dua laki-laki da bakarja di kobong, tu satu laki-laki mo dapa angka ka sorga kong tu satu mo se tinggal. Kong waktu itu lei ada dua parampuang da sama-sama bagiling gandum, tu satu parampuang mo dapa angka ka sorga kong tu satu mo se tinggal. So itu bajaga-jaga jo, lantaran ngoni nintau tempo apa ngoni pe Tuhan mo datang. Mar tarukira jo ini bae-bae, kalu tuang ruma so tau tempo apa tu papancuri mo bapancuri pa de pe ruma, tantu katu dia nyanda mo tidor lantaran dia mo bajaga-jaga supaya tu papancuri nyanda mo maso pa de pe ruma. Bagitu lei deng ngoni, ngoni musti slalu siap for batunggu tu Anak Manusia mo datang. Soalnya ngoni nintau tempo apa tu Anak Manusia mo datang ulang, Dia mo datang kage-kage.” Yesus bilang lei, “Sapa tu budak yang setia deng bijaksana, yang de pe tuang da angka jadi kapala for budak-budak laeng, supaya bole kase makang pa dorang pas jam makang? Tantu katu tu budak yang paling snang itu tu budak yang waktu de pe tuang pulang dia masi samantara da bakarja. Kita bilang pa ngoni, pasti tu dia pe tuang itu mo angka pa dia kong kase percaya for awasi samua tu de pe tuang pe kepunyaan. Mar kalu tu budak itu jaha, dia babilang pa de pe hati bagini, ‘Kita pe tuang masi lama baru mo pulang.’ Kong dia mulai pukul-pukul tu budak-budak laeng, trus dia pi makang deng minum sama-sama deng tu pangmabo-pangmabo. Kong di hari yang dia nyanda sangka-sangka, kage-kage dia pe tuang pulang, kong tu dia pe tuang itu mo hukum pa dia sampe mati, trus dia pe nasib itu sama deng tu nasib dari orang-orang yang munafik. Di situ dorang mo manangis deng dong pe gigi tabaku goso kong babunyi lantaran pe mendrita skali.” Yesus bilang lei, “Kalu Tuhan Allah Berkuasa sbagai Raja, waktu itu mo jadi sama deng prumpamaan ini: ada spulu nona-nona yang da bawa pelita for pi dola pa pengantin laki-laki. Kong dari dorang spulu itu, ada lima yang biongo deng lima yang pande. Tu lima nona-nona yang biongo da bawa pelita mar nyanda da bawa persediaan minya, kong tu lima nona-nona yang pande da bawa pelita deng da bawa lei minya di dalam pa de pe tampa tu da beking dari tana liat for persediaan. Tu spulu nona-nona itu da tunggu-tunggu tu pengantin laki-laki mo datang, mar lantaran tu pengantin itu lama mo datang, dorang manganto kong tatidor. Waktu so tenga malam, kage-kage dapa dengar ada orang babilang deng suara kuat bagini, ‘Hei, napa tu pengantin so datang! Mari jo torang pi sambut pa dia!’ Pe dengar itu, tu spulu nona-nona itu bangong, kong dorang se siap tu dong pe pelita. Tu lima nona-nona yang biongo babilang pa tu lima nona-nona yang pande bagini, ‘Kase akang minya sadiki dang pa torang, lantaran kwa torang pe pelita so mo mati.’ Mar tu lima nona-nona yang pande cuma da manyao pa dorang bagini, ‘Torang nimbole mo kase akang minya pa ngoni, lantaran torang pe minya nyanda cukup for torang deng lei for ngoni mo pake. Lebe bae ngoni pigi jo pa tu orang yang ja bajual minya kong ngoni pi bli minya di situ.’ Trus tu lima nona-nona yang biongo itu pigi for babli minya. Mar waktu dorang da pi babli minya, tu pengantin laki-laki sampe. Kong tu lima nona-nona pande yang so siap-siap itu maso sama-sama deng tu pengantin itu ka tampa pesta kaweng, trus tu pintu dapa tutu. Waktu tu lima nona-nona yang biongo itu babale ulang kong lia tu pintu so tutu, dorang babilang, ‘Bapak, Bapak, tolong dang buka akang tu pintu for torang.’ Mar tu pengantin laki-laki manyao dari dalam, ‘Kita bilang pa ngoni, Kita nyanda kanal pa ngoni.’ ” Kong Yesus bilang lei, “So lantaran itu bajaga-jaga jo, soalnya ngoni ini lei nintau hari ato tempo apa tu waktu itu mo jadi.” Yesus bilang lei, “Tu keadaan waktu Tuhan Allah Berkuasa sbagai Raja sama deng ni prumpamaan: ada tu satu orang laki-laki mo pigi di satu tampa yang jao. Seblum dia pigi, dia kase kumpul dia pe budak-budak kong kase percaya akang pa dorang for urus tu de pe harta. Pa dia pe budak satu, dia kase akang lima ribu doi mas. Kong pa dia pe budak kadua, dia kase akang dua ribu doi mas. Trus pa dia pe budak katiga, dia kase sribu doi mas. Dia da se percaya pa dorang tu doi iko dong pe kemampuan masing-masing. Abis dia se berbage tu doi, dia brangkat. Kong tu budak yang da trima lima ribu doi mas itu iko pi badagang, kong dia dapa untung lima ribu doi mas lei. Bagitu lei deng tu budak yang da trima dua ribu doi mas. Dia pi badagang, kong dapa untung dua ribu doi mas lei. Mar tu budak yang da trima sribu doi mas, dia cuma da pi gale lobang di tana kong kase sambunyi tu de pe tuang pe doi di situ. Serta so lama, tu budak-budak itu pe tuang pulang. Kong dia suru de pe budak-budak se lapor pa dia bagimana dorang da pake tu doi yang dia da kase percaya pa dorang. Tu budak yang da trima lima ribu doi mas datang pa de pe tuang itu, kong dia bawa lei lima ribu doi mas tu de pe keuntungan. Tu budak itu bilang pa de pe tuang, ‘Tuang, tuang da kase percaya pa kita lima ribu doi mas, kong skarang kita so dapa untung lima ribu doi mas lei.’ Kong de pe tuang itu bilang pa dia, ‘Bagus skali tu ngana da beking, hei budak yang setia deng yang da karja bae-bae. Ngana so setia urus tu hal yang kacili, jadi kita lei nanti mo kase percaya pa ngana tu hal-hal yang basar, so itu mari jo maso ka dalam kong basnang-snang deng kita!’ Abis itu, datang tu budak yang da trima dua ribu doi mas, kong babilang, ‘Tuang, tuang da kase percaya akang pa kita dua ribu doi mas, kong skarang tuang bole lia kalu kita so dapa untung dua ribu doi mas lei.’ Kong tu de pe tuang itu bilang pa dia, ‘Bagus skali tu ngana da beking. Ngana memang kita pe budak yang setia deng da karja bae-bae. So lantaran ngana setia di hal-hal yang kacili, kita mo kase percaya akang pa ngana tu hal-hal yang basar, so itu mari jo maso ka dalam kong basnang-snang deng kita!’ Kong datang tu budak yang da trima sribu doi mas, kong babilang, ‘Tuang, kita tau kalu tuang itu orang yang kras. Tuang ja bapanen di tampa yang tuang nyanda da baambor akang, kong ja baambe hasil di tampa tu tuang nyanda ja batanang akang. So itu kita tako kalu kita mo se ilang tuang pe doi. Jadi kita pigi ka satu tampa kong gale lobang di tana trus simpang tu tuang pe doi di situ supaya aman. Kong skarang, napa tu tuang pe doi, tuang so bole ambe ulang.’ Kong dia pe tuang itu bilang pa dia, ‘Hei ngana budak yang jaha deng malas. Ngana tau kalu kita ja bapanen di tampa yang kita nyanda da baambor akang, kong ja baambe hasil di tampa tu kita nyanda da batanang akang. Jadi kalu bagitu, paling kurang mustinya ngana simpang tu kita pe doi itu di bank supaya waktu kita bale kamari, kita bole mo trima tu doi deng de pe bunga.’ Kong tu tuang itu babilang pa tu budak laeng, ‘Ambe jo tu sribu doi mas dari pa dia, kong kase pa tu budak yang da dapa spulu ribu doi mas. Soalnya tiap orang yang so urus bae-bae apa yang da kase pa dia, dia mo dapa tamba lebe banya lei sampe mo talebe-lebe. Mar orang yang nyanda urus bae-bae apa tu ada kase pa dia, apa jo yang ada pa dia mo dapa ambe dari pa dia. Jadi kase lego jo kaluar tu budak yang nyanda da beking apa-apa itu ka tampa yang paling glap. Tu orang-orang di tampa itu mo dapa hukum kong mo manangis deng dong pe gigi tabaku goso kong babunyi lantaran dorang pe mendrita skali.’ ” Yesus bilang lei, “Waktu tu Anak Manusia datang ulang deng Dia pe kuasa yang luar biasa, deng lei samua malaekat da sama-sama deng Dia, Dia mo dudu di atas De pe tahta yang luar biasa. Samua suku bangsa mo dapa kumpul di muka pa Dia, kong Dia mo kase pisa pa dorang jadi dua klompo, itu sama deng gembala yang da kase pisa tu domba dari tu kambing. Tu orang-orang yang ja beking tu butul yang Dia se sama deng domba, Dia kase kumpul pa dorang di sabla kanan pa Dia, kong tu orang-orang yang nyanda ja beking tu butul yang Dia se sama deng kambing, Dia kase kumpul pa dorang di sabla kiri pa Dia. Waktu itu, tu Anak Manusia yang baprenta sbagai Raja itu mo babilang pa orang-orang yang ada di sabla kanan pa Dia bagini, ‘Datang jo kamari ngoni tu Kita pe Bapa da kase berkat! Datang di tampa tu Kita da Berkuasa sbagai Raja, Kita so se sadia akang for ngoni tampa di situ dari pertama ni dunia da beking. Soalnya waktu Kita lapar, ngoni kase akang makang pa Kita. Waktu Kita aus, ngoni kase akang minum pa Kita. Waktu Kita jadi orang asing pa ngoni pe tampa, ngoni trima Kita pa ngoni pe ruma. Waktu Kita nyanda ada baju, ngoni kase akang baju pa Kita. Waktu Kita da saki, ngoni datang urus pa Kita. Waktu Kita di bui, ngoni datang lia pa Kita.’ Kong tu orang-orang yang ja beking tu butul di muka pa Tuhan mo bilang bagini pa Dia, ‘Tuhan, tempo apa torang lia Tuhan lapar kong torang kase akang makang, ato Tuhan aus kong torang kase akang minum? Tempo apa lei torang lia Tuhan itu orang asing yang datang pa torang pe tampa kong torang trima pa torang pe ruma? Ato tempo apa torang lia Tuhan nyanda ada baju kong torang kase akang baju? Kong tempo apa torang da lia Tuhan saki kong torang datang besuk lei pa Tuhan? Ato tempo apa torang lia Tuhan ada di bui kong torang datang lia pa Tuhan?’ Kong nanti tu Raja itu mo manyao pa dorang bagini, ‘Kita bilang pa ngoni, samua tu ngoni da beking for sala satu dari Kita pe sudara-sudara yang orang ja anggap nyanda penting, ngoni so beking itu for Kita.’ Trus Dia mo babilang pa tu orang-orang yang ada di sabla kiri pa Dia, ‘Ngoni itu orang-orang yang Tuhan so kutuk. Pigi jo ngoni dari sini kong maso ka dalam api kekal tu da se sadia for setang pe bos deng de pe anak bua. Soalnya waktu Kita lapar, ngoni nyanda kase akang makang pa Kita. Waktu Kita aus, ngoni nyanda kase akang minuman pa Kita. Waktu lei Kita jadi orang asing pa ngoni pe tampa, ngoni nyanda trima Kita pa ngoni pe ruma. Waktu Kita nyanda ada baju, ngoni nyanda kase akang baju for Kita. Waktu Kita saki, ngoni nyanda besuk pa Kita deng lei waktu Kita ada di bui, ngoni nyanda datang lia pa Kita.’ Kong nanti tu orang-orang jaha itu lei mo manyao bagini, ‘Tuhan, no tempo apa dang so torang da lia Tuhan lapar ato aus mar torang nyanda da kase akang makang ato minum? Tempo apa torang da lia Tuhan jadi orang asing pa torang pe tampa ato nyanda ada baju, mar torang nyanda da trima pa Tuhan ato nyanda da kase akang baju? Tempo apa lei torang da lia Tuhan da saki ato ada di bui, mar torang nyanda da besuk ato nyanda da datang lia pa Tuhan?’ Kong Dia mo manyao pa dorang bagini, ‘Kita bilang pa ngoni, tiap kali ngoni nimau mo tolong satu dari Kita pe sudara tu orang-orang ja anggap nyanda penting, itu sama jo deng ngoni nimau tolong pa Kita.’ ” Kong Yesus bilang lei, “Tu orang-orang jaha itu mo dapa se maso di tampa hukuman yang kekal, mar tu orang-orang yang ja beking tu butul di muka pa Tuhan mo dapa hidop kekal.” Pe klar Yesus se ajar tu samua itu, Dia bilang pa De pe murit-murit, “Ngoni tau kalu so kurang dua hari lei, torang orang Yahudi mo rayakan Paskah tu hari for pringati waktu Tuhan Allah se bebas torang pe nene moyang dari Mesir. Kong di hari raya itu, ada orang yang mo srahkan Anak Manusia for se salib.” Waktu itu, tu imam-imam kapala deng tua-tua Yahudi da bakumpul lei pa Kayafas pe istana. Tu Kayafas itu imam basar agama Yahudi. Di situ dorang baku skongkol beking rencana for tangka pa Yesus deng cara sambunyi-sambunyi kong mo bunung pa Dia. Mar dorang baku bilang, “Torang jang beking itu slama torang pe hari raya, lantaran waktu itu banya orang, jang sampe waktu Yesus dapa tangka orang banya itu mo bakacau.” Waktu Yesus di kampung Betania, Dia da basingga pa Simon pe ruma. Simon ini yang perna dapa saki kusta. Kong samantara Yesus da dudu makang di ruma itu, datang satu parampuang pa Dia. Tu parampuang itu da bawa satu guci dari pualam. Tu guci itu da isi minya wangi yang mahal. Kong tu parampuang itu se sirang plang-plang tu minya pa Yesus pe kapala. Mar waktu Yesus pe murit-murit lia itu, dorang jadi mara, kong dorang bilang, “Mustinya kwa dia nyanda se royal tu minya wangi itu. Tu minya wangi itu bole mo jual deng harga yang mahal! Jadi kalu jual tu minya itu, tu doi bole mo kase pa orang-orang miskin.” Mar Yesus tau tu dorang pe pikiran, kong Dia bilang pa dorang, “Kiapa so ngoni beking susa pa ni parampuang? Dia so beking tu bae pa Kita. Tu orang-orang miskin slalu ada di sekitar pa ngoni kong ngoni bole mo bantu pa dorang. Mar Kita ini, so nyanda lama Kita so nyanda mo sama-sama deng ngoni. Waktu ni parampuang da se sirang tu minya pa Kita pe badan, itu de pe arti dia da se siap tu Kita pe mayat for se kubur. Kita bilang pa ngoni, di mana jo orang-orang se tau tu Kabar Bae dari Tuhan Allah ini di sluru dunia, pasti dorang mo se cirita apa tu parampuang ini da beking pa Kita kong orang-orang mo inga trus pa dia.” Ada satu dari Yesus pe dua blas murit, tu de pe nama Yudas Iskariot, dia pigi pa imam-imam kapala. Pe sampe di sana dia batanya, “Apa yang ngoni mo kase pa kita kalu kita srahkan Yesus pa ngoni?” Kong di situ dorang kase pa dia tiga pulu doi perak. Abis itu Yudas cari-cari kesempatan mo srahkan Yesus pa dorang. Di hari pertama waktu prayaan Roti Nyanda Baragi, Yesus pe murit-murit datang pa Dia kong batanya, “Di mana dang Guru suka torang se sadia akang tu makanan for hari raya Paskah?” Kong Yesus bilang pa dorang, “Ngoni pigi jo maso ka kota Yerusalem, kong di situ ngoni mo baku dapa deng satu laki-laki, trus bilang pa dia bagini, ‘Guru pe waktu kata so dekat. Dia bilang kalu Dia mo rayakan Paskah sama-sama deng Dia pe murit-murit pa bapak pe ruma.’ ” Pe dengar itu, Dia pe murit-murit iko beking apa tu Yesus da suru pa dorang, kong dorang kase sadia tu makanan for hari raya Paskah di situ. Waktu so malam, Yesus deng Dia pe murit-murit bakumpul di tampa itu kong makang sama-sama di situ. Samantara dorang bamakang, Yesus babilang, “Kita bilang pa ngoni, ada satu dari pa ngoni yang mo bahianat pa Kita.” Pe dengar itu, Dia pe murit-murit jadi sedi skali, kong satu-satu dari pa dorang mulai babilang pa Dia, “Guru, bukang kita to itu?” Yesus bilang pa dorang, “Tu orang itu, satu dari pa ngoni yang da kase colo de pe roti di satu baskom deng Kita, so dia itu no tu mo bahianat pa Kita. Memang Anak Manusia mo mati sama deng tu nabi-nabi da tulis dulu di Kitab Suci, mar cilaka jo tu orang yang da bahianat pa Anak Manusia. Lebe bae tu orang itu nyanda perna da se lahir.” Kong Yudas tu mo bahianat pa Dia babilang, “Guru, bukang kita to itu?” Kong Yesus manyao pa dia, “Ngana sandiri yang so bilang bagitu!” Waktu Yesus deng De pe murit-murit da bamakang, Yesus ambe tu roti kong bilang makase pa Tuhan Allah. Abis itu Dia se pela-pela tu roti, trus Dia kase berbage pa dorang kong babilang, “Roti ini Kita pe badan, ambe kong makang jo.” Klar itu Yesus ambe tu cawan kong bilang makase pa Tuhan Allah. Abis itu Dia kase pa dorang, kong babilang, “Ngoni samua minum jo tu anggor dari cawan ini! Soalnya tu anggor ini Kita pe dara. Kita pe dara mo tatumpa for beking sah tu perjanjian antara Tuhan Allah deng manusia. Kita pe dara mo tatumpa for banya orang, supaya dorang pe dosa-dosa bole dapa ampung. Kita bilang pa ngoni, Kita so nyanda mo minum anggor ini lei, mar nanti kalu so di tampa tu Kita pe Bapa Berkuasa sbagai Raja, di situ no baru Kita minum anggor yang baru lei sama-sama deng ngoni.” Abis itu, Yesus deng De pe murit-murit manyanyi lagu pujian, kong pigi ka bukit Zaitun. Trus Yesus babilang pa dorang, “Ni malam, ngoni samua pe iman mo tagoyang sampe ngoni mo lari akang pa Kita. Soalnya dulu Tuhan Allah da bilang pa satu nabi bagini, ‘Kita mo bunung tu gembala, kong de pe domba-domba mo lari tafiaro.’ Kita mo mati, mar serta Kita so hidop ulang, Kita mo lebe dulu dari ngoni pigi ka Galilea.” Kong Petrus bilang pa Yesus, “Biar lei dorang samua pe iman mo tagoyang sampe dorang mo lari akang pa Guru, mar kita komang pasti nyanda mo bagitu.” Kong Yesus bilang pa dia, “Petrus, Kita bilang pa ngana. Malam ini jo, seblum ayam bakuku, ngana so manyangkal tiga kali kalu ngana kanal pa Kita.” Mar Petrus bilang pa Dia, “Biar lei kita musti mati sama-sama deng Guru, kita nyanda mo manyangkal kalu kita kanal pa Guru.” Kong samua Yesus pe murit-murit laeng lei baku iko bilang bagitu. Abis itu, Yesus deng De pe murit-murit pigi kong sampe di satu tampa tu de pe nama Getsemani. Kong Yesus bilang pa dorang, “Ngoni dudu jo di sini, samantara Kita mo pi ka sana for basombayang.” Trus Yesus pangge pa Petrus deng tu Zebedeus pe dua anak iko sama-sama deng Dia. Waktu itu, Dia pe hati mulai sedi deng gelisa. Kong Dia bilang pa dorang, “Kita pe hati sedi skali, dapa rasa sama deng mo mati. Ngoni tinggal jo di sini kong bajaga-jaga deng Kita.” Abis itu Yesus bajalang sadiki, Dia berlutut sampe tu De pe muka di tana kong basombayang, “Oh Kita pe Bapa, kalu bole, nyanda usa jo Kita tanggong tu pendritaan ini. Mar jang iko Kita pe mau, iko jo tu Bapa pe mau.” Abis itu Yesus babale pa De pe tiga murit, kong Dia lia dorang da tasono. Dia se bangong deng bilang pa Petrus, “Petrus, nyanda mampu so ngoni bajaga-jaga deng Kita biar cuma satu jam? Memang ngoni suka mo beking tu Kita da bilang, mar ngoni pe diri nyanda mampu mo beking. So itu bajaga-jaga deng basombayang jo supaya ngoni nyanda tagoda beking dosa.” Abis itu Yesus pi basombayang kadua kali, Dia bilang, “Oh Kita pe Bapa, kalu memang Kita musti tanggong tu pendritaan ini, biar jo Bapa pe mau tu mo jadi pa Kita.” Kong Dia babale ulang, Dia lia dorang so tasono ulang, lantaran dorang so manganto skali. Yesus se tinggal pa dorang di situ trus Dia pigi basombayang for katiga kali, kong tu kata-kata yang Dia da bilang sama deng tu Dia da bilang tadi. Klar itu Dia babale pa De pe tiga murit. Dia se bangong pa dorang kong babilang, “Bagimana lei kong ngoni masi baistirahat deng masi lei tasono? Co lia, skarang so sampe de pe waktu orang so mo srahkan tu Anak Manusia pa orang-orang yang nyanda kanal pa Tuhan Allah. Badiri jo! Mari jo torang pigi pa tu orang yang mo bahianat pa Kita, dia so bakamari.” Waktu Yesus masi da babicara, Yudas tu sala satu dari De pe dua blas murit datang sama-sama deng banya orang. Tu orang banya itu, ada tu da bawa peda deng ada lei tu da bawa kayu for pake bapukul. Dorang datang ka situ lantaran tu imam-imam kapala deng tu tua-tua Yahudi da prenta pa dorang. Seblum dorang datang ka situ, Yudas tu mo srahkan Yesus pa orang banya itu, dia so kase tau tu tanda pa dorang rupa ini, “Tu orang yang kita mo ciong, so Dia tu ngoni musti tangka.” Jadi waktu dorang sampe di situ, Yudas iko badekat pa Yesus kong bilang, “Salam Guru!” Abis itu dia ciong pa Yesus. Kong Yesus bilang pa dia, “Hei tamang, for itu dang ngana da datang kamari?” Abis itu tu orang-orang yang datang sama-sama deng Yudas itu badekat trus tangka pa Yesus. Mar ada tu satu dari orang-orang yang ja iko pa Yesus cabu de pe peda dari sarong trus potong sampe putus tu talinga dari tu imam basar pe budak. Kong Yesus bilang pa De pe orang itu, “Kase maso ulang jo tu ngana pe peda itu di sarong! Soalnya tiap orang yang cabu de pe peda for babunung orang, dia lei nanti mo mati deng peda. Ngoni jang lupa kalu Kita bole minta tolong pa Kita pe Bapa, kong Dia mo iko kirim lebe dari dua blas klompo malaekat for tolong pa Kita. Mar kalu Kita beking bagitu, samua tu perna da tulis di Kitab Suci yang musti jadi pa Kita sama deng tu da jadi skarang ini, tantu katu so nyanda mo jadi lei.” Kong waktu itu jo, Yesus bilang pa tu orang banya yang mo tangka pa Dia, “Kita to bukang prampok, kong kiapa ngoni datang tangka pa Kita pake peda deng kayu? Padahal saban hari Kita da dudu mangajar di kintal Ruma Ibada Pusat, cuma ngoni nyanda tangka pa Kita di situ. Mar biar jo Kita dapa tangka lantaran samua itu memang nabi-nabi so tulis di Kitab Suci, kong samua itu musti jadi gnap.” Abis itu, samua tu Yesus pe murit lari se tinggal pa Dia. Serta tu orang-orang tangka pa Yesus, dorang bawa Dia pa imam basar Kayafas pe ruma. Di situ so bakumpul tu ahli-ahli Taurat deng tu tua-tua Yahudi. Samantara itu, Petrus da iko-iko pa Yesus dari jao sampe pa imam basar pe kintal ruma. Di sana dia dudu bagabung deng tu pengawal-pengawal for lia apa tu mo jadi pa Yesus. Tu imam-imam kapala deng samua anggota Mahkamah Agama ja cari orang yang basaksi dusta supaya dorang bole mo hukum mati pa Yesus. Mar dorang nyanda dapa bukti, biar lei waktu itu banya orang yang datang for basaksi dusta tentang Yesus. Mar de pe laste ada dua orang yang maju ka muka, kong dorang babilang pa tu anggota Mahkamah Agama, “Tu Orang ini perna da babilang kalu Dia mo kase rubu tu Ruma Ibada Pusat kong dalam waktu tiga hari Dia mo se badiri ulang.” Kong tu imam basar badiri trus babilang pa Yesus, “Ngana sama skali nyanda mo manyao apa-apa deng tu dorang pe tuduhan-tuduhan itu?” Mar Yesus cuma babadiam. Kong tu imam basar itu babilang lei pa Dia, “Demi Tuhan Allah yang hidop, Ngana bilang jo kamari pa torang, Ngana itu Kristus tu Anak Allah?” Kong Yesus manyao, “Butul, bapak sandiri yang da bilang itu. Mar Kita bilang pa ngoni, ngoni nanti mo lia tu Anak Manusia dudu di sabla kanan pa Tuhan Allah yang Mahakuasa, kong ngoni mo lia Dia datang di atas awan-awan dari sorga.” Pe dengar itu, tu imam basar se rabe de pe baju lantaran mara skali kong babilang, “Dia so angka diri rupa jo Dia itu Tuhan Allah, Dia so bahojat pa Tuhan Allah. Jadi torang nyanda perlu mo ada saksi lei. Ngoni sandiri da dengar kalu Dia so bahojat. So itu, menurut ngoni bagimana dang skarang?” Dorang manyao, “Dia musti dapa hukuman mati.” Abis itu, dorang luda akang tu Yesus pe muka deng pukul pa Dia. Ada lei orang yang tampeleng pa Dia. Trus dorang bilang pa Dia, “Hei Kristus, co Ngana tebak, sapa tu da batampeleng pa Ngana?” Samantara itu, Petrus da dudu di kintal pa tu imam basar pe ruma. Di situ lei ada tu satu pembantu parampuang, dia badekat pa Petrus kong babilang, “Ngana lei tu satu yang ja sama-sama deng Yesus tu orang Galilea itu.” Mar Petrus cuma da manyangkal itu di muka samua orang, dia bilang, “Kita nyanda mangarti deng tu ngana pe maksut.” Kong Petrus pigi ka pintu gerbang. Di situ ada tu satu pembantu parampuang laeng da lia pa dia kong babilang pa orang-orang di situ, “Tu orang ini lei ja sama-sama deng Yesus, tu Orang Nazaret itu.” Mar Petrus cuma lei da manyangkal itu, dia bilang, “Sumpa demi Tuhan, kita nyanda kanal pa Dia.” Pe nyanda lama jo, tu orang-orang yang ada di situ badekat pa Petrus kong babilang, “So nyanda sala komang, tantu ngana tu satu dari pa dorang itu lantaran dapa kantara dari ngana pe logat.” Trus Petrus bakutuk de pe diri sandiri, dia basumpa, “Sumpa demi Tuhan, kita nyanda kanal pa Dia!” Kong waktu itu jo tu ayam bakuku. Pe dengar tu ayam bakuku, Petrus tainga tu Yesus perna da bilang pa dia, “Seblum ayam bakuku, ngana so tiga kali manyangkal kalu kanal pa Kita.” Kong Petrus kaluar trus manangis deng sedi. Waktu amper siang, samua imam-imam kapala deng tua-tua Yahudi bakumpul for baku skongkol mo bunung pa Yesus. Dorang ika pa Yesus, kong dorang bawa trus srahkan pa Pilatus, tu gubernur di negri itu. Yudas, tu da bahianat pa Yesus, dia dapa tau kalu Yesus so dapa hukuman mati. Kong dia rasa manyasal skali, trus dia kase pulang tu tiga pulu doi perak pa imam-imam kapala deng pa tu tua-tua Yahudi. Yudas babilang, “Kita ini so berdosa lantaran kita so bahianat pa Orang yang nyanda sala apa-apa.” Mar dorang bilang pa dia, “Itu to bukang torang pe urusan, itu ngana pe urusan sandiri!” Kong Yudas se lempar tu doi perak itu ka dalam Ruma Ibada Pusat. Abis itu dia pi bagantong diri. Trus tu imam-imam kapala punggu tu doi perak itu kong babilang, “Tu doi ini doi dara lantaran da dapa dari babunung orang. Kong kalu mo iko tu torang pe atoran agama, tu doi ini nimbole mo kase maso ka tampa persembahan di Ruma Ibada Pusat.” Abis itu, dorang badiskusi kong spakat mo pake tu doi itu for se bli akang tana. Dorang bli tu tana dari pa orang yang ja babeking barang-barang dari tana liat. Tu tana yang dorang da bli itu mo pake for beking kuburan kusus for orang-orang bukang Yahudi yang da mati pa dorang pe daera itu. Kong tu tana itu sampe skarang orang ja bilang ‘Tana Dara’. Deng dorang beking bagitu, apa tu nabi Yeremia da bilang dulu so jadi. Bagini tu nabi da bilang, “Dorang da trima tu tiga pulu doi perak, itu no tu harga yang orang-orang Israel da spakat for bayar pa Dia. Kong dorang pake tu doi itu for bli tu tana dari orang yang ja babeking barang-barang dari tana liat. Dorang da bli tu tana dari tu orang itu sama deng Tuhan da suru pa kita.” Dorang da se mangada Yesus pa gubernur Pilatus. Trus tu gubernur batanya pa Yesus, “Apa butul Bapak tu orang Yahudi pe Raja?” Yesus manyao, “Bapak sandiri yang da bilang itu.” Mar waktu tu imam-imam kapala deng tu tua-tua Yahudi bilang tu dorang pe tuduhan pa Yesus, Yesus nyanda manyao apa-apa. Kong gubernur Pilatus bilang pa Yesus, “Ngana da dengar to tu saksi-saksi pe tuduhan yang pe banya skali pa Ngana?” Mar Yesus nyanda manyao apa-apa sampe gubernur itu jadi heran skali. Tiap taong, orang Yahudi ja beking dong pe hari raya agama Yahudi tu prayaan Paskah, kong di prayaan itu gubernur pe biasa ja kase bebas satu orang dari bui. Tu orang yang dia se bebas ja iko tu orang Yahudi pe mau. Kong waktu itu, di bui ada tu satu orang yang top lantaran de pe jaha, de pe nama Yesus Barabas. Kong waktu tu orang Yahudi so bakumpul pa gubernur Pilatus pe istana, gubernur Pilatus batanya pa dorang, “Ngoni suka sapa tu kita mo kase bebas for ngoni, Yesus Barabas ato Yesus tu orang ja bilang Kristus?” Gubernur Pilatus batanya bagitu, lantaran dia tau kalu tu pemimpin-pemimpin Yahudi da srahkan Yesus pa dia lantaran dorang mangiri pa Yesus. Samantara itu, dia da dudu pa de pe kursi tu ja pake for baadili orang, kong de pe bini kirim pesan pa dia, “Nyanda usa jo maso campur deng tu Orang yang butul itu pe masala. Soalnya so lantaran Dia kong kita da mimpi yang beking kita rasa mendrita skali.” Mar tu imam-imam kapala deng tua-tua Yahudi hasut tu orang banya for minta pa gubernur Pilatus supaya kase bebas pa Barabas trus se hukuman mati pa Yesus. Kong tu gubernur Pilatus batanya pa orang banya, “Dari ni dua orang, ngoni suka sapa tu kita mo kase bebas for ngoni?” Kong dorang manyao, “Barabas jo!” Trus gubernur Pilatus batanya pa dorang, “No kalu bagitu, apa dang tu kita musti beking pa Yesus tu orang ja bilang Kristus ini?” Dorang samua bataria, “Se salib jo pa Dia!” Kong gubernur Pilatus batanya lei pa dorang, “Apa so tu kejahatan yang Dia da beking?” Mar dorang tare cuma bataria lebe kuat, “Se salib jo pa Dia!” Waktu itu, gubernur Pilatus sadar kalu dia so nimbole mo beking apa-apa lei, malatare tu orang-orang di situ so mulai bakacau. Jadi dia ambe aer kong cuci de pe tangan di muka pa orang banya kong dia babilang, “Kita nyanda tanggong jawab deng ni Orang ini pe kematian. Itu samua ngoni pe urusan!” Kong tu orang banya itu manyao, “Iyo, biar jo torang deng tong pe anak cucu yang tanggong tu hukuman atas tu Orang itu pe kematian.” Trus gubernur Pilatus se bebas pa Barabas for dorang, mar dia suru cambok pa Yesus kong srahkan for se salib. Abis itu, tentara-tentara dari gubernur Pilatus bawa pa Yesus ka gubernur pe istana for dapa adili, kong dorang pangge samua dong pe tamang tentara bakumpul di situ trus bakliling pa Yesus. Dorang buka Yesus pe baju kong kase pake akang juba warna pars pa Dia. Abis itu, dorang beking satu mahkota dari cabang-cabang kacili yang baduri kong kase pake pa Yesus pe kapala. Trus dorang kase pegang akang tongkat pa Dia pe tangan kanan beking rupa Dia itu raja. Kong dorang berlutut di muka pa Dia, pura-pura se hormat deng dorang lei hina pa Dia, dorang bilang, “Hidop orang Yahudi pe raja!” Dorang lei luda akang pa Dia, kong dong ambe tu buluh trus pukul Dia pe kapala. Abis dorang basosere pa Dia, dorang buka tu juba pars yang da se pake pa Dia kong kase pake ulang tu Dia pe baju, trus dorang bawa pa Dia kaluar dari kota for se salib. Waktu dorang da bajalang kaluar dari kota Yerusalem, dorang baku dapa deng satu orang dari Kirene, tu de pe nama Simon. Tentara-tentara paksa pa dia pikul Yesus pe kayu salib. Trus dorang sampe di satu tampa yang de pe nama Golgota, tu de pe arti, ‘Tampa Tengkorak’. Di situ dorang kase minum anggor pa Dia yang da campur deng empedu. Mar serta Dia da rasa tu anggor, Dia nimau jo mo minum tu anggor itu. Waktu dorang so klar se salib pa Yesus, dorang cabu lot for se berbage Dia pe baju. Kong dorang dudu di situ for jaga pa Dia. Di atas Yesus pe kapala, ada tulis akang tu alasan kiapa sampe Dia da dapa hukum, bagini tu da tulis, ‘Ini Yesus, tu orang Yahudi pe Raja’. Dorang lei da se salib dua orang prampok baku sabla deng Dia. Tu satu di sabla kanan kong tu satu lei di sabla kiri pa Dia. Orang-orang tu da lewat di situ se goyang-goyang dong pe kapala kong bahina pa Yesus, dorang bilang, “Hei, Ngana to bilang kalu Ngana bole mo se rubu tu Ruma Ibada Pusat kong mo beking ulang dalam tiga hari? No kalu memang Ngana Anak Allah, se slamat jo Ngana pe diri kong turung jo dari tu salib itu!” Tu imam-imam kapala, tu ahli-ahli Taurat, deng tua-tua Yahudi bahina lei pa Yesus, dorang bilang, “Orang laeng Dia kase slamat, mar De pe diri sandiri Dia nyanda dapa se slamat! Kalu memang butul Dia itu orang Israel pe Raja, mustinya Dia turung dari tu salib itu, deng bagitu torang mo percaya pa Dia. Dia percaya pa Tuhan Allah. Dia lei perna bilang kalu Dia itu Anak Allah. Jadi biar jo nanti Tuhan Allah se slamat pa Dia kalu itu memang butul Tuhan Allah pe mau.” Malatare tu prampok-prampok yang da se salib di sabla pa Yesus da bahina bagitu lei pa Dia. Abis itu, tu sluru daera itu jadi glap dari jam dua blas siang sampe jam tiga sore. Kong kira-kira jam tiga sore, Yesus babilang deng suara kuat, “Eli, Eli, lama sabakhtani!” tu de pe arti, ‘Tuhan Allah, Kita pe Tuhan Allah, kiapa Tuhan Allah kase tinggal pa Kita?’ Pe dengar itu, bebrapa orang yang da badiri di situ babilang, “Dia da bapangge pa nabi Elia.” Kong ada satu orang dari pa dorang yang capat-capat ambe spons, dia se colo di anggor asang kong se cucu di buluh trus kase pa Yesus for minum. Mar tu orang-orang laeng babilang, “Nyanda usa! Biar jo torang lia kalu Elia mo datang for se slamat pa Dia.” Kong Yesus bataria kuat-kuat, abis itu Dia srahkan De pe nyawa. Waktu itu, tu kaeng pampele basar yang da se gantong for pele tu Ruang Mahasuci di Ruma Ibada Pusat iko tarabe jadi dua dari atas sampe bawa. Kong ada lei tana goyang pe kuat skali deng tu bukit-bukit batu tabla. Tu kubur-kubur lei tabuka kong banya orang yang so mati yang waktu masi di dunia ja hidop deng hati yang bersi di muka pa Tuhan, dorang da hidop ulang. Kong serta Yesus so hidop ulang, dorang itu kaluar dari kubur trus maso ka kota Yerusalem. Dorang batunjung dong pe diri pa banya orang di kota itu, tu kota yang ja bilang lei kota kudus. Tu perwira Romawi deng dia pe tentara-tentara yang da bajaga pa Yesus di dekat kayu salib. Dorang jadi tako skali waktu dorang lia tu tana goyang deng samua tu da jadi. Dorang bilang, “Memang butul, Orang ini Anak Allah!” Di situ lei ada banya parampuang tu da lia-lia dari jao. Dorang da iko-iko pa Yesus mulai dari daera Galilea for layani pa Dia. Dari antara pa dorang itu ada Maria orang Magdala, Maria tu Yakobus deng Yusuf pe mama, deng lei tu Zebedeus pe bini tu Yakobus deng Yohanes pe mama. Ada tu satu orang datang dari daera Arimatea, tu de pe nama Yusuf. Yusuf ini orang kaya, kong dia lei ja iko pa Yesus. Waktu dia datang di situ, tu hari so mo malam. Dia pi mangada pa gubernur Pilatus kong minta tu Yesus pe mayat, trus gubernur Pilatus suru kase tu Yesus pe mayat pa dia. Yusuf ambe tu Yesus pe mayat kong se lingkar akang deng kaeng puti. Abis itu dia taru tu Yesus pe mayat di dalam kubur di satu bukit batu. Tu kubur itu dia punya, dia baru da gale tu kubur di bukit batu itu. Klar itu dia se guling satu batu basar for tutu tu kubur itu pe lobang, kong dia pigi dari situ. Maria tu orang Magdala deng Maria yang laeng da dudu di situ di muka tu kubur itu. De pe eso, di hari Sabat, imam-imam kapala deng orang-orang dari golongan Farisi pi mangada pa gubernur Pilatus. Dorang bilang, “Bapak gubernur, torang inga waktu Yesus tu ja beking sesat itu masi hidop, Dia perna da babilang bagini, ‘Tiga hari abis Kita mati, Kita mo hidop ulang.’ So itu bapak gubernur, tolong prenta akang jo tu bapak pe tentara for jaga tu Yesus pe kubur sampe di hari katiga. Soalnya kalu nyanda bagitu, Dia pe murit-murit bole mo datang pancuri De pe mayat kong dorang kase tau pa orang-orang kalu Dia da mati mar so hidop ulang. Kalu sampe dorang mo bilang bagitu, itu mo beking sesat orang lebe banya for iko pa Dia skarang daripada waktu Dia masi ada itu.” Pe dengar itu, Pilatus babilang pa dorang, “Ngoni bawa bebrapa tentara, kong pi jaga jo bae-bae tu kubur itu.” Abis itu dorang pigi ka kubur itu, kong taru segel Romawi di batu yang da se tutu di kubur itu supaya orang nimbole mo maso ka situ, trus dorang suru bebrapa tentara bajaga di muka kubur itu. Serta hari Sabat so lewat, pas so pagi-pagi skali hari Minggu tu hari pertama di minggu itu, Maria orang Magdala deng Maria yang laeng pi lia tu Yesus pe kubur. Kage-kage jadi tana goyang pe kuat skali lantaran ada satu Tuhan pe malaekat turung dari sorga kong datang se guling tu batu yang da se tutu tu kubur itu, trus dia dudu di atas tu batu. Dia pe muka bacahaya sama deng cahaya kilat, kong de pe baju puti skali sama deng salju. Tu tentara-tentara yang da bajaga di situ jadi tako skali sampe totofore, trus dorang pe badan sama deng orang mati. Tu malaekat itu babilang pa tu parampuang-parampuang, “Ngoni jang tako! Kita tau kalu ngoni da cari pa Yesus tu da se salib itu. Dia so nyanda ada di sini, Dia so hidop ulang sama deng tu Dia da bilang dulu. Mari jo, lia tu tampa da taru akang tu Dia pe mayat. Abis itu ngoni capat-capat pi se tau pa Dia pe murit-murit kalu Dia so hidop ulang dari antara orang-orang mati, trus Dia so pigi lebe dulu ka daera Galilea kong di sana ngoni mo lia pa Dia. Inga jo samua tu kita da bilang ini!” So itu, tu parampuang-parampuang itu iko se tinggal tu kubur itu. Dorang ada rasa tako mar dorang lei rasa snang skali. Dorang balari capat-capat for pi se tau tu samua itu pa Yesus pe murit-murit. Kage-kage Yesus datang baku dapa deng dorang kong bilang, “Salam for ngoni”. Kong dorang badekat pa Yesus trus dorang polo tu Yesus pe kaki deng dong semba lei pa Dia. Kong Yesus bilang pa dorang, “Ngoni jang tako. Ngoni pigi jo kong se tau pa Kita pe sudara-sudara yang percaya supaya dorang pigi ka daera Galilea, kong di sana dorang mo lia pa Kita.” Waktu tu parampuang-parampuang itu masi di tenga jalang, tu bebrapa tentara yang da jaga Yesus pe kubur pigi ka kota Yerusalem kong kase tau pa imam-imam kapala samua tu da jadi. Trus tu imam-imam kapala deng tua-tua Yahudi bakumpul kong badiskusi, kong dorang ambe keputusan for kase doi banya pa tu tentara-tentara itu, kong bilang pa dorang, “Ngoni musti kase tau pa orang-orang bagini, ‘Yesus pe murit-murit da datang malam-malam kong pancuri tu Yesus pe mayat waktu torang da tasono.’ Kong nanti kalu gubernur Pilatus dapa dengar itu, torang yang mo babicara pa dia supaya ngoni nyanda mo dapa hukuman.” Abis itu, tu tentara-tentara ambe tu doi kong dorang beking sama deng tu da suru itu. Kong sampe skarang orang Yahudi ja se cirita kalu Yesus pe murit-murit da pancuri tu Yesus pe mayat. Yesus pe seblas murit pigi ka daera Galilea, ka satu bukit yang Yesus da suru pa dorang pigi akang. Pe sampe di sana, dorang lia pa Yesus kong semba pa Dia, mar ada bebrapa orang dari pa dorang yang ragu-ragu kalu butul itu Yesus. Yesus badekat pa dorang kong babilang, “Kita so trima samua kuasa di sorga deng di bumi. So itu ngoni pigi jo kong beking samua suku bangsa jadi Kita pe murit-murit. Ngoni baptis jo pa dorang dalam nama Bapa, Anak deng Roh Kudus. Ngoni se ajar pa dorang supaya beking samua yang Kita so perna da prenta pa ngoni. Ngoni tarukira jo bae-bae, Kita slalu sama-sama deng ngoni sampe akhir jaman.” Ini tu Kabar Bae tentang Yesus Kristus, tu Anak Allah. Kabar Bae ini mulai deng tu da tulis di kitab nabi Yesaya bagini, “Tarukira jo bae-bae, Kita mo suru tu Kita pe utusan lebe dulu dari Ngana. Dia itu yang mo buka akang jalang for Ngana, supaya orang pe hati siap trima pa Ngana. Dia babicara deng suara kuat di padang gurun, dia babilang, ‘Buka jalang for trima pa Tuhan, kong kase tre tu jalang for sambut pa Dia.’ ” Tuhan pe utusan itu, de pe nama Yohanes Pembaptis. Dia datang di padang gurun kong ja babilang pa orang-orang yang datang pa dia, “Bertobat jo supaya Tuhan kase ampung tu ngoni pe dosa, kong kase jo ngoni pe diri for mo baptis, tanda ngoni so bertobat.” Banya orang dari sluru daera Yudea deng dari kota Yerusalem pigi pa Yohanes di kuala Yordan. Dorang mangaku dong pe dosa-dosa, kong Yohanes baptis pa dorang di situ. Yohanes ja pake baju panjang dari bulu onta deng da ika tu pinggang pake tali dari kuli binatang, trus dia pe makanan belalang deng madu utang. Kong ini tu dia ja kase tau pa orang-orang, “Abis kita, ada tu mo datang yang lebe berkuasa dari kita. Hele mo maruku for buka Dia pe tali capatu, kita nyanda pantas. Kita baptis pa ngoni deng aer, mar Dia mo baptis pa ngoni deng Roh Kudus.” Waktu itu, Yesus datang dari Nazaret di daera Galilea, kong Yohanes baptis pa Dia di kuala Yordan. Serta Yesus kaluar dari aer, Dia iko lia tu langit tabuka, trus tu Tuhan pe Roh yang rupa burung pombo turung di atas pa Dia. Kong dapa dengar suara dari sorga, “Ngana ini Kita pe Anak, Kita sayang pa Ngana. Ngana ini beking Kita pe hati snang.” Pe klar itu, Tuhan pe Roh iko bawa pa Yesus ka padang gurun. Yesus ada di padang gurun itu slama ampa pulu hari, kong di situ setang pe bos goda pa Dia. Yesus tinggal di situ deng binatang-binatang liar, kong malaekat-malaekat ja layani pa Dia. Waktu Yohanes so dapa tangka kong kase maso ka bui, Yesus pigi ka daera Galilea kong kase tau tu Kabar Bae dari Tuhan Allah. Dia bilang, “Tu waktu yang Tuhan Allah da tentukan so sampe, Tuhan Allah so mo Berkuasa sbagai Raja. So itu, bertobat jo deng percaya tu Kabar Bae.” Satu kali Yesus da bajalang di pinggir danau Galilea, kong Dia dapa lia dua orang kaka ade, dong dua pe nama Simon deng Andreas. Dorang da balego jala di danau, lantaran dorang pe karja ja bacari ikang. Kong Yesus pangge pa dorang, “Mari jo iko pa Kita! Ngoni biasa bacari ikang, mar Kita mo kase ajar pa ngoni bagimana ja bacari orang for iko pa Kita.” Pe dengar itu, dorang iko kase tinggal dong pe jala kong iko pa Yesus. Abis itu, Yesus bajalang nyanda jao dari situ kong Yesus dapa lia pa Yakobus deng de pe sudara Yohanes, dorang dua itu Zebedeus pe anak-anak. Dorang da beking butul dorang pe jala di prao. Dia iko pangge pa dorang dua, kong dong iko pa Dia. Dorang kase tinggal dong pe papa di prao sama-sama deng tu orang-orang karja. Yesus deng Dia pe murit-murit sampe di Kapernaum. Serta so hari Sabat, Yesus iko maso ka dalam ruma ibada agama Yahudi kong mangajar di situ. Orang-orang yang badengar pa Dia taheran-heran da dengar tu Dia pe ajaran, lantaran Dia da mangajar pa dorang punung deng kuasa, nyanda sama deng dorang pe ahli-ahli Taurat pe mangajar. Waktu itu, ada satu orang di ruma ibada itu yang da kemasukan setang. Tu orang itu bataria, “Yesus, orang Nazaret! Apa so Ngana pe urusan deng torang? Ngana datang mo kase binasa pa torang kang? Kita tau sapa Ngana, so Ngana Yang Kudus dari Tuhan Allah.” Mar Yesus togor deng kras pa tu setang itu, “Badiam, kaluar ngana dari pa dia!” Tu setang beking sampe tu orang itu tagoyang kras, kong deng bataria kuat tu setang kaluar dari pa dia. Samua orang di situ jadi taheran-heran, sampe dorang baku bilang, “Eh, co lia! So ajaran baru ini! Dia pe bicara punung deng kuasa. Dia user tu setang-setang kong tu setang-setang itu lei iko De pe prenta.” Abis itu, tu brita tentang Yesus iko tasiar ka samua tampa di daera Galilea. Pe kaluar dari ruma ibada agama Yahudi, Yesus, Yakobus deng Yohanes pigi pa Simon deng Andreas pe ruma. Waktu itu Simon pe mama mantu da tidor-tidor lantaran saki panas, kong dorang iko kase tau pa Yesus kalu Simon pe mama mantu da saki. Abis itu, Yesus pi badekat pa Simon pe mama mantu, trus Yesus pegang de pe tangan kong bantu kase badiri pa dia. Waktu itu jo, tu Simon pe mama mantu pe panas ilang, kong dia mulai layani pa dorang. Waktu so mo malam, orang-orang bawa pa Yesus samua orang da saki deng da kemasukan setang. Kong samua orang di kota itu bakumpul di muka ruma. Trus Yesus kase bae banya orang dari rupa-rupa panyaki, deng Dia lei user tu setang-setang yang da maso pa orang-orang. Yesus nyanda kase tu setang-setang mo babicara, lantaran dorang tau sapa Dia. Waktu amper siang, Yesus bangong kong kaluar ruma. Dia pigi ka tampa yang jao dari kampung kong basombayang di situ. Mar Simon deng de pe tamang-tamang pi cari pa Dia. Pe baku dapa deng Dia, dorang bilang, “Guru, pe banya orang da bacari pa Guru.” Kong Yesus bilang pa dorang, “Mari jo, torang pigi ka tampa laeng, di kota-kota dekat sini. Di situ lei Kita mo kase tau tu Kabar Bae dari Tuhan Allah, so lantaran itu Kita da datang.” Abis itu Yesus pigi ka samua tampa di Galilea, kong Dia kase tau pa dorang tu Kabar Bae dari Tuhan Allah di ruma-ruma ibada agama Yahudi deng Dia user tu setang-setang yang da maso pa orang-orang. Ada satu orang saki kusta datang pa Yesus. Tu orang itu berlutut di muka pa Dia kong minta tolong, “Kalu Bapak suka, Bapak bole kase bae pa kita.” Pe dengar itu, Yesus rasa kasiang, kong Dia pegang tu orang itu kong babilang pa dia, “Iyo Kita suka, jadi bae jo ngana!” Waktu itu jo, tu orang itu pe panyaki kusta iko ilang, kong dia bae. Abis itu Yesus iko suru pigi pa dia, kong deng tegas Yesus kase inga, “Inga eh! Ngana jang se tau pa sapa-sapa tu Kita da beking pa ngana. Mar ngana pigi jo pa imam supaya dia bole lia kalu ngana so bae. Abis itu, ngana bawa korban persembahan sama deng tu Musa da prenta, itu tu bukti for mo se tunjung pa orang-orang kalu ngana memang butul-butul so bae.” Mar tu orang itu cuma tare da pi bacirita kamana-mana apa tu da jadi pa dia. So itu Yesus so nimbole maso ka kota deng trang-trangan, Dia kurang da tinggal di tampa-tampa yang jao dari kampung di luar kota. Mar biar lei bagitu, dari mana-mana orang badatang trus pa Yesus. Serta so lewat bebrapa hari, Yesus babale ulang ka Kapernaum. Orang-orang di sana dapa dengar kalu Dia ada di ruma. So itu pe banya skali orang da takumpul riki so nyanda ada tampa di situ, hele di muka pintu so fol deng orang-orang. Di tampa itu, Yesus kase tau pa dorang tu firman. Samantara itu, datang ampa orang da bawa satu orang lumpu pa Yesus. Mar lantaran so talalu banya orang, dorang nyanda dapa bawa tu orang lumpu itu pa Yesus. So itu dorang bongkar tu atap di atas pa Yesus, trus dorang kase turung tu orang lumpu itu pake tikar yang dia da tidor akang. Waktu Yesus lia tu dorang da beking, Yesus tau dorang percaya pa Dia, kong Dia bilang pa tu orang lumpu, “Ngana pe dosa-dosa so dapa ampung.” Mar di situ lei ada dudu bebrapa ahli Taurat, kong dorang mulai bapikir dalam hati, “Kiapa Dia bicara bagitu? Dia anggap Dia itu Tuhan Allah, Dia so bahojat pa Tuhan Allah. Nyanda ada orang yang bole se ampung dosa, cuma Tuhan Allah yang bole beking itu.” Mar Yesus iko dapa tau apa yang dorang da pikir, kong Dia bilang pa dorang, “Kiapa ngoni bapikir bagitu pa ngoni pe hati? Mana tu lebe gampang orang mo percaya, Kita bilang pa tu orang lumpu, ‘Ngana pe dosa so dapa ampung,’ ato, ‘Bangong jo, angka ngana pe tikar kong bajalang.’ Mar skarang Kita mo kase bukti supaya ngoni tau kalu di dunia ini Anak Manusia ada kuasa for kase ampung dosa.” Kong Yesus bilang pa tu orang lumpu, “Kita bilang pa ngana, badiri jo, angka ngana pe tikar kong pulang pa ngana pe ruma!” Trus tu orang itu badiri, dia iko angka de pe tikar, kong di muka banya orang dia kaluar dari ruma itu. Waktu itu samua orang taheran-heran. Dorang puji deng hormat pa Tuhan Allah, dorang bilang, “Blum perna torang lia tu kejadian rupa ini.” Yesus pigi ulang ka pinggir danau Galilea. Di situ banya orang datang pa Dia, kong Dia mangajar pa dorang. Abis itu, samantara Yesus bajalang kong Dia lia pa Lewi, tu Alfeus pe anak. Lewi itu petugas pajak kong dia da dudu di loket, tu tampa ja babayar akang pajak. Yesus bilang pa dia, “Iko jo pa Kita.” Pe dengar itu, Lewi badiri kong iko pa Yesus. Trus Yesus deng Dia pe murit-murit da pi makang pa Lewi pe ruma, kong ada banya tu petugas pajak deng tu orang-orang yang orang ja anggap berdosa da datang iko makang sama-sama deng Yesus deng Dia pe murit-murit, lantaran waktu itu pe banya orang tu da iko pa Yesus. Ada lei ahli-ahli Taurat yang dari golongan Farisi yang ada di situ. Dorang lia Yesus da makang sama-sama deng petugas-petugas pajak deng orang-orang tu orang ja anggap berdosa, kong dorang bilang pa Yesus pe murit-murit, “Kiapa ngoni pe Guru makang sama-sama deng tu petugas-petugas pajak deng tu orang-orang berdosa?” Yesus dapa dengar itu kong Dia bilang pa dorang, “Bukang orang sehat tu perlu pa dokter, mar orang saki. Kita datang bukang for pangge tu orang-orang yang anggap dong ja beking tu butul, mar Kita datang for pangge tu orang-orang berdosa supaya iko pa Kita.” Satu kali, waktu Yohanes pe murit-murit deng orang-orang dari golongan Farisi da bapuasa, datang pa Yesus bebrapa orang kong batanya pa Dia, “Yohanes pe murit-murit deng orang-orang dari golongan Farisi pe murit-murit ja bapuasa, mar kiapa dang tu Bapak pe murit-murit nyanda?” Yesus manyao, “Kalu tu pengantin laki-laki masi ada di pesta kaweng sama-sama deng de pe tamang-tamang, nyanda mungkin to kalu tu de pe tamang-tamang mo bapuasa. Slama tu pengantin laki-laki masi sama-sama deng dorang, dorang nyanda mo bapuasa. Mar ada de pe waktu orang-orang mo ambe tu pengantin laki-laki dari pa de pe tamang-tamang, kong waktu itu no tu de pe tamang-tamang mo bapuasa.” Trus Dia bilang lei, “Nyanda ada satu orang tu mo tampal kaeng baru di baju tua. Soalnya tu kaeng baru yang da se tampal itu mo bakacili kong beking rabe tu baju tua, yang baru beking rabe tu tua, trus de pe rabe mo jadi lebe basar. Bagitu lei, nyanda ada satu orang mo isi anggor baru di tampa anggor so tua yang dari kuli binatang. Soalnya kalu tu tampa anggor so tua, trus isi akang deng anggor baru, kong tu anggor baru itu mengembang, tu anggor itu mo beking polote tu tampa itu. De pe laste, tu anggor tabuang deng de pe tampa jadi rusak. Jadi tu anggor yang baru musti isi di tampa anggor yang masi baru lei.” Satu hari pas hari Sabat, tu hari yang orang nimbole bakarja, Yesus deng Dia pe murit-murit bajalang lewat di kobong gandum. Samantara bajalang di situ, Dia pe murit-murit mulai bapete gandum. Waktu itu, ada orang-orang dari golongan Farisi yang ada di situ, kong dorang babilang pa Yesus, “Bapak, co lia tu dorang da beking! Sebenarnya kalu iko atoran agama, dorang nimbole bakarja di hari Sabat, mar dorang langgar tu atoran itu.” Kong Yesus manyao pa dorang, “Tantu ngoni so perna baca di Kitab Suci tu cirita tentang raja Daud waktu dia deng de pe orang-orang so lapar. Dia maso ka dalam Tuhan Allah pe tenda ibada, kong dia makang tu roti persembahan for Tuhan Allah, padahal dorang nimbole makang tu roti, yang bole makang cuma tu imam-imam. Dia kase lei tu roti pa de pe orang-orang. Waktu kejadian itu, Abyatar tu imam basar.” Kong Yesus bicara lei pa dorang, “Tu hari Sabat, Tuhan Allah da beking for jadi berkat pa torang manusia, Dia nyanda beking manusia cuma for iko tu atoran hari Sabat. So itu tu Anak Manusia ada kuasa lei for ator apa tu manusia bole mo beking di hari Sabat.” Yesus pigi ulang ka ruma ibada agama Yahudi. Di situ ada tu satu orang, dia pe tangan sabla cacat. Kong di situ lei ada bebrapa orang yang da lia-lia trus pa Yesus. Dorang mo cari tau kalu Dia mo kase bae tu orang itu di hari Sabat, tu hari orang Yahudi nimbole bakarja, supaya dorang bole se sala pa Dia. Yesus bilang pa tu orang yang de pe tangan sabla cacat, “Mari jo badiri di tenga-tenga sini.” Kong Dia batanya pa tu orang-orang di situ, “Mana tu bole mo beking di hari Sabat? Beking tu bae ato tu jaha? Mo se slamat orang ato mo bunung orang?” Mar dorang cuma babadiam. Dia sedi skali lantaran dorang pe kras hati. Dia haga pa dorang samua deng mara, kong Dia bilang pa tu orang yang de pe tangan sabla cacat, “Co se kamuka kamari tu ngana pe tangan!” Tu orang itu se kamuka de pe tangan kong de pe tangan itu jadi bae. Abis itu tu orang-orang dari golongan Farisi kaluar dari tu ruma ibada, kong dorang iko baku skongkol deng orang-orang Yahudi yang iko pa raja Herodes for mo bunung pa Yesus. Yesus deng De pe murit-murit manyingkir ka danau Galilea, kong banya orang da iko pa Dia. Ada tu dari Galilea, Yudea, Yerusalem, Idumea, dari sabla Yordan, dari Tirus deng Sidon. Dorang da datang pa Yesus lantaran dorang so dengar samua tu Dia da beking. Pe banya skali orang da datang pa Dia, so itu Yesus suru pa De pe murit-murit sadia prao for Dia mo nae akang, supaya orang-orang nyanda gepe pa Dia. Soalnya Dia so kase bae banya orang, jadi banya orang saki baku ruju badekat pa Dia for mo bapegang pa Dia. Tiap kali tu orang da kemasukan setang dapa lia pa Yesus, dorang iko maruku sampe ka tana di muka pa Dia kong bataria, “So Ngana ini tu Anak Allah!” Mar Yesus larang deng kras pa dorang kase tau sapa Dia. Abis itu Yesus nae ka atas bukit. Di situ Dia pangge tu orang-orang yang Dia da pili, kong dorang datang pa Dia. Yesus tetapkan dua blas orang, tu ja bilang rasul-rasul, for sama-sama deng Dia, yang Dia mo utus for kase tau tu Kabar Bae dari Tuhan Allah, deng Dia lei da kase kuasa pa dorang for user setang. Tu dua blas orang yang Dia da tetapkan itu, dorang pe nama-nama: Simon (tu Dia ja pangge lei Petrus), Yakobus deng Yohanes tu dua kaka ade (dorang dua itu Zebedeus pe anak-anak, dorang itu lei Dia kase nama Boanerges lantaran dorang sama deng guntur), Andreas, Filipus, Bartolomeus, Matius, Tomas, Yakobus (tu Alfeus pe anak), Tadeus, Simon (tu dari Gerakan Yahudi Merdeka), deng Yudas Iskariot (yang nanti mo bahianat pa Yesus). Abis itu, Yesus maso ka satu ruma. Di situ lei banya orang datang bakumpul pa Dia, sampe Dia deng Dia pe murit-murit so nyanda riki mo makang. Waktu Yesus pe kluarga dengar Dia ada di situ, dorang datang mo ambe pa Dia lantaran dorang bilang Dia so nyanda waras. Ahli-ahli Taurat tu da datang dari Yerusalem babilang, “Beelzebul da maso pa Dia! Dia da bauser setang-setang pake tu setang-setang pe bos pe kuasa.” Yesus pangge pa dorang, kong bicara akang pa dorang pake prumpamaan, “Bagimana lei kong setang mo user setang? Kalu rakyat di satu krajaan baku malawang kong tapisa-pisa, tu krajaan so pasti mo ancor, deng lei kalu satu ruma tangga baku malawang kong tapisa-pisa, so pasti lei mo ancor. Bagitu lei kalu setang deng setang baku malawang kong tapisa-pisa, so pasti mo ancor kong abis. Kalu ada satu orang yang mo maso ambe barang pa orang kuat pe ruma, dia musti ika dulu tu orang itu, baru dia bole ambe tu barang-barang di ruma itu. Kita bilang pa ngoni, samua dosa yang orang da beking masi bole mo dapa ampung, bagitu lei deng bahojat. Mar sapa jo yang bilang sesuatu yang bahojat pa Roh Kudus, dia nyanda mo dapa ampung for slama-lamanya, lantaran dia so beking dosa for slama-lamanya.” Yesus bilang bagitu lantaran dorang bilang kalu Dia da kemasukan setang, dorang nimau percaya kalu Dia da bauser setang pake kuasa Roh Kudus. Yesus pe mama deng Dia pe sudara-sudara datang di ruma tu Dia da mangajar akang. Samantara dorang badiri di luar, dorang suru orang pi pangge pa Dia. Di tampa itu, pe banya skali orang da dudu baron pa Yesus, kong dorang bilang pa Dia, “Bapak, co lia tu Bapak pe mama deng Bapak pe sudara-sudara ada di luar, kong dorang brusaha mo baku dapa deng Bapak.” Yesus manyao pa dorang, “Sebenarnya sapa so tu Kita pe mama deng Kita pe sudara-sudara?” Yesus haga pa dorang yang da dudu baron pa Dia, kong babilang, “So ngoni samua ini no tu Kita pe mama deng Kita pe sudara-sudara. Sapa yang beking tu Tuhan Allah pe mau, so dia tu Kita pe sudara laki-laki, sudara parampuang, deng Kita pe mama.” Satu kali Yesus mangajar lei di pinggir danau Galilea. Di situ banya skali orang datang bakumpul pa Dia. So itu, Dia nae ka prao tu da berlabu di pinggir danau trus dudu di situ, kong tu orang banya ada di pinggir danau. Yesus kase ajar banya hal pa dorang pake prumpamaan. Dia kase ajar bagini pa dorang, “Dengar bae-bae, ada tu petani pigi baambor bibit. Samantara dia baambor di kobong, ada tu bibit yang da taciri di jalang, kong burung-burung datang teto tu bibit sampe abis. Ada lei bibit tu da taciri di tana babatu-batu, tu de pe tana cuma sadiki. Tu bibit di tampa itu capat batumbu, lantaran de pe tana sadiki. Mar serta matahari so kaluar, tu tanaman itu layu kong kring lantaran de pe akar nyanda tatanang butul di tana. Kong tu bibit laeng da taciri di tana yang ada rumpu baduri. Serta tu bibit mulai batumbu, tu rumpu baduri lei batumbu jadi lebe basar kong gepe tu tanaman sampe so nimbole mo babua. Mar tu bibit laeng komang da taciri di tana subur kong batumbu subur trus babua. Tiap pohong de pe hasil ada tu tiga pulu kali lipa, ada tu anam pulu kali lipa, deng ada lei tu sratus kali lipa.” Yesus bilang lei, “Sapa tu ada talinga, badengar jo bae-bae.” Serta Yesus so kurang sandiri, tu dua blas murit deng orang-orang tu da iko pa Dia batanya pa Dia tentang arti dari tu prumpamaan tadi. Kong Yesus manyao, “Tuhan Allah beking ngoni bole tau tu rahasia tentang bagimana Tuhan Allah Berkuasa sbagai Raja. Mar pa orang laeng, tu hal itu da se tau pake prumpamaan, supaya apa tu da tulis di Kitab Suci mo jadi, ‘Biar dorang balia, mar dorang nyanda mangarti apa tu da lia. Biar lei dorang badengar, mar dorang nyanda mangarti. So lantaran dorang bagitu, dorang nyanda bertobat kong dapa ampung.’ ” Abis itu, Yesus bilang pa dorang, “Ngoni nyanda mangarti so tu prumpamaan tadi? Kong bagimana dang ngoni mo dapa mangarti tu prumpamaan laeng? De pe arti bagini: tu bibit yang petani da se ambor sama deng tu firman yang orang ja kase tau. Tu bibit yang da taciri di jalang sama deng orang-orang yang da dengar tu firman. Pe klar dorang dengar, setang pe bos datang ambe tu firman dari pa dorang. Tu bibit yang da taciri di tana babatu-batu, itu sama deng orang-orang yang da dengar tu firman kong iko trima deng hati snang. Mar tu firman nyanda baakar butul pa dorang pe hati, so itu nyanda lama da batahang. Kalu dapa siksa deng mendrita lantaran percaya tu firman itu, dorang iko jadi nyanda percaya lei pa Tuhan. Tu bibit yang da taciri di tana yang ada rumpu baduri sama deng orang-orang yang so dengar tu firman, mar dorang talalu kuatir deng tu dorang pe hidop deng dorang tagila-gila deng harta deng lei tu keinginan-keinginan laeng. Samua itu beking tu firman nyanda ada de pe arti pa dong pe hidop, itu sama deng tu firman nyanda babua pa dong pe hati. Kong tu bibit yang da ciri di tana subur, itu sama deng tu orang-orang yang badengar tu firman kong trima itu. Dorang hidop iko tu Tuhan pe mau, sama deng tu bibit yang da batumbu sampe babua. Ada yang babua tiga pulu kali lipa, ada tu anam pulu kali lipa, deng ada lei tu sratus kali lipa.” Yesus bilang pa dorang, “Nyanda ada orang tu da pasang pelita kong tutu deng loto ato taru di kolong koi. Pasti dia taru pa de pe tampa supaya trang. Bagitu lei, apa yang skarang ini tasambunyi, nanti orang mo dapa tau, deng apa yang skarang ini masi jadi rahasia, nanti orang mo tau. So itu sapa tu ada talinga, badengar jo bae-bae!” Kong Yesus bilang ulang, “Inga bae-bae apa tu ngoni da dengar. Kalu ngoni cari mangarti bae-bae, Tuhan Allah mo beking ngoni mangarti, kong Dia tamba lei sampe ngoni mo lebe mangarti. Soalnya kalu ada orang yang mo trima tu Tuhan pe firman, Tuhan mo beking dia lebe mangarti. Mar kalu ada yang nimau mo trima tu Tuhan pe firman, apa yang dia so tau, Tuhan mo ambe lei dari pa dia.” Yesus bilang lei, “Tuhan Allah Berkuasa sbagai Raja pa Dia pe orang-orang, itu bole mo se sama deng ni prumpamaan: ada tu satu petani da baambor bibit gandum di kobong. Tiap malam dia tidor serta so siang dia bangong, kong dia so nyanda inga lei deng tu bibit itu. Tu bibit itu batunas, batumbu trus sampe jadi tinggi, mar dia nintau bagimana kong tu gandum sampe jadi bagitu. Soalnya tu tana itu sandiri yang da kase kaluar tu de pe hasil. Pertama tu tana kase batumbu de pe tunas, de pe batang kong de pe gandum yang baisi. Kalu tu gandum itu so masa, tu petani itu iko pi potong lantaran so de pe oras bapete.” Yesus babilang lei, “Kita mo pake satu prumpamaan for se trangkan tu Tuhan Allah Berkuasa sbagai Raja. Tuhan Allah Berkuasa sbagai Raja bole mo se sama deng tu biji paling kacili yang da kase ambor di tana. Tu biji itu yang paling kacili dari samua biji yang ada di dunia. Mar kalu tu biji itu se ambor di tana, dia batumbu kong jadi lebe basar dari samua tanaman di kobong sayor. De pe cabang-cabang basar sampe burung-burung bole mo basombar kong basarang di situ.” Kong ada banya prumpamaan yang sama deng itu, tu Yesus ja pake for kase tau tu firman pa dorang. Dia ja mangajar pa dorang iko apa tu dorang mampu mo mangarti. Dia cuma ja pake prumpamaan kalu mangajar pa tu orang banya. Mar kalu kurang Dia deng De pe murit-murit, Dia se tau deng jelas samua tu prumpamaan pe arti. Di hari itu, serta so sore, Yesus bilang pa Dia pe murit-murit, “Mari jo torang pigi ka sabla danau.” Kong dorang kase tinggal tu orang banya itu trus nae ka prao tu Yesus da nae akang. Yesus deng Dia pe murit-murit pigi deng prao, kong tu prao-prao laeng baku iko deng dorang. Nyanda lama datang angin kancang, kong ada omba lei bapaka tu prao sampe tamaso akang aer kong tu prao mulai punung deng aer. Waktu itu Yesus da tasono pake bantal di bagian blakang prao, kong Dia pe murit-murit se bangong pa Dia, dorang bilang, “Guru, Guru jang kase biar torang so mo mati.” Yesus badiri kong togor deng kras tu angin, deng bilang pa tu danau itu, “Badiam! Tenang jo!” Trus tu angin badiam, kong tu danau jadi tedo skali. Abis itu, Yesus bilang pa Dia pe murit-murit, “Kiapa ngoni tako? Kiapa ngoni nyanda percaya pa Kita?” Dorang so tako skali kong baku bilang, “Sapa so Dia sebenarnya sampe tu angin deng omba di danau iko Dia pe prenta?” Abis itu, Yesus deng De pe murit-murit sampe di sabla danau Galilea, pa orang Gerasa pe daera. Bagitu Yesus turung dari prao, ada tu satu orang yang da kemasukan setang datang pa Yesus dari kuburan. Dia tinggal di situ kong nyanda ada orang yang mampu mo ika pa dia, biar lei pake rante. Soalnya so banya kali dia pe tangan deng kaki dapa ika pake rante, mar tu rante dia cuma ja beking putus. Memang nyanda ada orang yang kuat yang bole mo tangka pa dia. Siang malam dia cuma di kubur deng di bukit-bukit, dia babataria deng bage de pe badan pake batu sampe luka. Kong waktu dari jao dia lia pa Yesus, dia lari pigi pa Yesus kong berlutut di muka pa Dia. Trus tu orang itu babilang deng suara kuat, “Hei Yesus, Tuhan Allah Yang Mahatinggi pe Anak! Apa so Ngana pe urusan deng kita? Demi Tuhan, jang siksa pa kita!” Tu orang da bicara bagitu, lantaran Yesus so lebe dulu bilang, “Hei setang! Kaluar ngana dari pa dia.” Kong Yesus batanya pa tu setang yang ada pa tu orang itu, “Sapa ngana pe nama?” Kong tu setang manyao, “ Legion, lantaran torang kwa da banya.” Trus tu setang-setang itu minta deng sangat pa Yesus supaya jang user pa dorang kaluar dari daera itu. Di dekat situ, ada banya boke da bamakang di lereng bukit. Kong tu setang-setang itu bamohon pa Yesus, “Suru jo pa torang maso pa tu boke-boke di sana.” Kong Yesus iko akang tu dorang da minta. Trus tu setang-setang kaluar dari pa tu orang, kong maso pa boke-boke tu de pe banya kira-kira ada dua ribu ekor. Kong tu boke-boke itu balumpa dari pinggir jurang ka danau kong mati malamise di situ. Tu orang-orang yang bajaga boke itu lari kong pi cirita apa tu da jadi itu di kota deng kampung-kampung dekat situ. Kong orang-orang iko datang di tampa itu for lia apa tu da jadi di situ. Waktu dorang datang pa Yesus, dong lia tu orang da kemasukan setang-setang da dudu, dia so pake baju kong dia so bae. Pe lia itu dorang jadi tako. Tu orang-orang yang da lia sandiri waktu Yesus da user tu setang-setang, dorang se cirita apa tu da jadi pa tu orang-orang yang baru datang di situ. Dorang lei se cirita tentang apa tu da jadi pa tu boke-boke. Trus tu orang-orang yang tinggal di daera itu mulai minta deng sangat pa Yesus supaya Dia se tinggal tu dorang pe daera itu. Waktu Yesus samantara banae ulang ka prao, tu orang yang tadi da kemasukan setang bamohon pa Yesus supaya dia bole iko deng Yesus. Mar Yesus nyanda kase, Dia bilang pa tu orang itu, “Lebe bae, ngana pulang jo pa ngana pe ruma, kong se cirita pa orang-orang satu kampung deng ngana samua tu Tuhan da beking pa ngana, deng bilang bagimana Tuhan pe rasa kasiang pa ngana.” Tu orang itu pigi kong mulai kase tau pa orang-orang di daera Spulu Kota. Dia kase tau samua tu Yesus da beking pa dia, kong dorang samua taheran-heran. Abis itu Yesus deng De pe murit-murit babale ulang deng prao ka sabla danau Galilea. Di pinggir danau, ada banya skali orang datang bakumpul pa Dia. Kong datang satu orang kapala ruma ibada agama Yahudi, tu de pe nama Yairus. Waktu dia lia pa Yesus, dia iko berlutut di muka pa Yesus, trus dia minta deng sangat pa Yesus deng sunggu-sunggu, dia bilang, “Guru, kita pe anak parampuang kasiang da saki brat, amper-amper mo mati. Tolong Guru datang kwa pa kita pe ruma, kong taru Guru pe tangan pa dia supaya dia bole bae deng tetap hidop.” Pe dengar itu, Yesus iko pigi deng Yairus. Waktu dorang bajalang, pe banya skali orang tu da iko pa Yesus deng da baku-baku ruju di dekat pa Dia. Di situ lei ada tu satu parampuang yang so dua blas taong da mendrita saki pendarahan. Dia so pi brobat pa dokter-dokter sampe de pe doi so abis, mar dia nyanda bae-bae. Jadi biar dia so pigi pa dokter-dokter nyanda ada de pe guna, malatare de pe saki so lebe soe. Tu parampuang itu so banya dengar tentang Yesus. Jadi biar lei banya orang, dia pi basosuru di tenga-tenga pa dorang trus badekat pa Yesus dari blakang kong dia sontong tu Yesus pe juba. Dia beking bagitu lantaran dalam hati dia babilang, “Asal jo kita sontong tu Dia pe juba, kita mo bae!” Waktu itu jo dia pe pendarahan iko brenti kong dia dapa rasa kalu dia so bae. Waktu itu jo Yesus tau kalu ada kuasa yang da kaluar dari pa Dia, kong Dia balia ka blakang pa orang banya itu kong batanya, “Sapa kang tu da sontong Kita pe juba?” Yesus pe murit-murit manyao, “Guru, Guru da lia sandiri pe banya skali orang da baku-baku ruju di dekat pa Guru, masa Guru batanya, ‘Sapa kang tu da sontong pa Kita?’ ” Mar biar lei bagitu, Yesus lia tu orang-orang di sekliling pa Dia, lantaran mo cari tau sapa tu da sontong pa Dia tadi. Tu parampuang itu jadi tako skali sampe totofore, lantaran dia tau kalu dia tu da sontong Yesus pe juba kong jadi bae. So itu dia berlutut di muka pa Yesus, kong dia se cirita samua tu da jadi pa dia sampe dia jadi bae. Kong Yesus bilang pa tu parampuang itu, “Ibu, skarang ibu so bae lantaran percaya pa Kita. Pigi jo deng hati tenang, ibu butul-butul so bae dari ibu pe panyaki.” Waktu Yesus samantara babicara, datang bebrapa orang dari Yairus kapala ruma ibada itu pe ruma, kong babilang pa Yairus, “Bapak pe anak so mati, jadi for apa lei batrosol pa Guru?” Mar Yesus nyanda farduli tu dorang da bilang. Dia bilang pa Yairus, “Jang tako, mar percaya jo.” Kong Yesus pigi pa Yairus pe ruma, mar Dia nyanda kase isin for orang mo iko pa Dia, Dia cuma da bawa pa Petrus, deng tu dua kaka ade Yakobus deng Yohanes. Bagitu dorang sampe pa Yairus pe ruma, Yesus lia tu orang-orang pe ribut deng manangis kras-kras. Dia maso ka dalam kong batanya pa tu orang-orang itu, “Kiapa ngoni pe ribut deng manangis? Tu anak itu nyanda mati, dia cuma da tidor!” Mar dorang tare cuma da tatawa akang pa Yesus. Kong Yesus suru tu orang-orang kaluar dari situ. Abis itu Dia bawa tu anak pe mama, papa deng tu Dia pe murit-murit yang da sama-sama deng Dia maso pa tu anak pe kamar. Yesus pegang tu anak pe tangan kong Dia babilang, “Talita kum ” de pe arti ‘Hei anak, bangong jo!’ Waktu itu jo tu anak itu badiri kong bajalang lantaran dia pe umur so dua blas taong. Samua orang yang da lia tu kejadian itu taheran-heran. Kong Yesus larang pa dorang supaya jang kase tau apa tu da jadi di situ, kong Dia suru pa dorang kase akang makang pa tu anak itu. Abis itu Yesus deng Dia pe murit-murit se tinggal tu tampa itu kong pigi pa Yesus pe kampung. Pas hari Sabat Yesus mulai mangajar di ruma ibada agama Yahudi. Waktu itu banya orang badengar pa Dia kong dorang sampe taheran-heran, kong dorang deng dorang baku tanya, “Dia tau dari mana stou kang tu ajaran ini? Kiapa Dia jadi pande bagitu kang? Kong bagimana sampe Dia bole beking tu mujisat-mujisat rupa itu? Padahal Dia itu cuma tukang kayu. Dia pe mama tu Maria, kong tu Dia pe sudara-sudara laki-laki tu Yakobus, Yoses, Yudas deng Simon. Tu Dia pe sudara-sudara parampuang lei da tinggal sama-sama deng torang di sini.” Kong tu orang-orang nyanda trima pa Dia. Kong Yesus bilang pa dorang, “Di mana-mana orang ja hormat pa nabi, kacuali pa tu nabi pe kampung sandiri, pa de pe kluarga, deng pa de pe ruma.” So itu Yesus nyanda dapa beking banya mujisat di sana, Dia cuma kase bae bebrapa orang saki deng cara taru Dia pe tangan pa dorang. Dia heran lantaran dorang nyanda percaya. Abis itu Yesus pigi mangajar di kampung-kampung. Dia pangge pa Dia pe dua blas murit kong utus pa dorang pigi dua-dua orang. Dia kase kuasa pa dorang for user setang-setang. Dia prenta pa dorang supaya jang bawa apa-apa di perjalanan. Dorang jang bawa makanan, tas bekal ato doi pa dong pe tampa kacuali tongkat. Bole pake slop, mar jang bawa baju for baganti. Kong Yesus bilang pa dorang, “Kalu di satu tampa ada orang trima pa ngoni pa dong pe ruma, tinggal jo di situ sampe ngoni kase tinggal tu tampa itu. Mar kalu orang-orang di satu tampa nimau mo trima deng nimau mo dengar pa ngoni, kalu ngoni kaluar dari situ, ngoni paka jo tu abu dari pa ngoni pe kaki itu jadi tanda kalu Tuhan mo hukum pa dorang.” Abis itu dorang pi kase tau pa orang-orang kalu dorang musti bertobat kong iko pa Tuhan. Dorang lei user banya setang dari pa orang-orang deng goso pake minya banya orang saki for kase bae pa dorang. Raja Herodes lei dapa dengar tentang Yesus lantaran Yesus pe nama so top, kong ada orang bilang tentang Yesus, “Tu Orang ini Yohanes Pembaptis yang so mati mar skarang so hidop ulang, so itu Dia ada kuasa for beking tu mujisat-mujisat.” Tu laeng bilang, “Dia tu nabi Elia!” Kong ada lei tu laeng da bilang, “Dia tu nabi laeng, sama deng tu nabi-nabi tempo dulu.” Waktu Herodes dapa dengar tu orang-orang da cirita, dia bilang, “Dia itu tu Yohanes Pembaptis yang kita so potong de pe kapala, Dia so hidop ulang.” Herodes bilang bagitu, lantaran tempo hari dia yang da suru tangka pa Yohanes kong suru ika deng rante trus kase maso ka bui. Dia da suru beking bagitu pa Yohanes lantaran tu masala Herodias. Dia da ambe pa Herodias jadi de pe bini, padahal waktu itu Herodias so kaweng deng Filipus tu dia pe sudara sandiri. Trus Yohanes tu da togor ulang-ulang pa Herodes, dia bilang, “Bapak, bapak so langgar tu atoran agama, lantaran bapak so ambe bapak pe sudara pe bini kong beking jadi bapak pe bini.” So itu Herodias dendam pa Yohanes deng barencana mo bunung pa Yohanes, mar dia blum dapa beking itu. Soalnya Herodes da suru jaga bae-bae tu Yohanes di bui, lantaran dia segan pa Yohanes. Dia tau Yohanes itu ja beking tu butul di muka pa Tuhan deng Yohanes itu Tuhan pe orang. Memang tiap kali dia dengar Yohanes ja babicara, dia pe hati rasa nyanda sadap, mar dia lei rasa snang badengar pa Yohanes. Satu kali, Herodias dapa kesempatan yang pas for balas dendam pa Yohanes. Waktu itu Herodes pe hari jadi, kong Herodes da beking pesta basar. Dia undang samua tu orang-orang basar, kapala-kapala perwira Romawi deng orang-orang yang punya pengaru di Galilea. Samantara pesta, Herodias pe anak parampuang maso kong manari. Dia pe manari gaga skali, sampe beking Herodes deng de pe tamu-tamu snang skali. Pe klar manari, Herodes pangge pa dia kong bilang, “Bilang kamari apa jo tu ngana mo minta, nanti kita kase!” Trus Herodes basumpa pa dia, “Apa jo tu ngana mo minta kita kase, biar lei ngana mo minta kita pe stenga krajaan, itu kita mo kase!” Pe dengar itu, tu anak parampuang itu pi batanya pa de pe mama, “Ma, apa kang tu kita mo minta?” Dia pe mama manyao, “Kita minta tu Yohanes Pembaptis pe kapala!” Trus capat-capat dia babale pa Herodes kong baminta bagini, “Kita minta supaya skarang ini jo kase pa kita tu Yohanes Pembaptis pe kapala yang da taru di baki!” Pe dengar itu, Herodes jadi sedi skali. Mar lantaran dia so basumpa di muka pa de pe tamu-tamu, dia nimbole mo tolak tu anak parampuang da minta. So itu dia iko prenta de pe anak bua for pi potong tu Yohanes pe kapala. Tu orang pigi kong potong Yohanes pe kapala di dalam bui. Tu orang itu bawa Yohanes pe kapala di baki kong kase pa tu anak parampuang. Trus tu anak parampuang kase itu lei pa de pe mama. Kong waktu Yohanes pe murit-murit dapa dengar Herodes so potong Yohanes pe kapala, dorang datang ambe tu de pe mayat kong pi kubur. Yesus pe murit-murit yang Dia da utus babale pa Dia, kong dorang kase tau pa Dia samua tu dorang da beking deng tu dorang da kase ajar. Waktu itu, pe banya orang yang datang deng pigi, sampe Yesus deng De pe murit-murit so nyanda sempat mo makang. So itu Yesus bilang pa de pe murit-murit, “Mari jo, torang pigi ka tampa yang jao dari kampung supaya torang kurang sandiri kong torang baistirahat sadiki!” Jadi dorang nae prao kong brangkat ka tampa yang jao dari kampung, supaya dorang bole basandiri di situ. Mar waktu dorang brangkat, banya orang tu da lia trus dapa tau dorang mo kamana. Jadi orang-orang kaluar dari kampung-kampung sekitar situ, trus dorang capat-capat iko jalang darat kong sampe lebe dulu di tampa tu Yesus deng Dia pe murit-murit mo pigi akang. Waktu Yesus pe sampe di darat, Dia lia pe banya skali orang da bakumpul di situ. Dia rasa kasiang pa dorang lantaran nyanda ada orang yang tolong kase tunjung jalang yang butul pa dorang sama deng domba yang nyanda ada gembala, kong Yesus mulai kase ajar banya hal pa dorang. Serta so mo malam, Yesus pe murit-murit datang pa Dia kong babilang, “Guru, ni tampa so jao dari kampung, kong sadiki lei so mo malam. Suru jo pa dorang pigi dari sini, supaya dorang bole mo babli makanan di kampung-kampung dekat sini.” Mar Yesus manyao, “Ngoni yang kase makang pa dorang!” Dorang manyao pa Dia, “Apa torang mo pi babli makanan yang de pe harga 200 doi perak for dorang mo makang? Tu doi itu pe banya skali kasiang.” Kong Yesus bilang pa dorang, “Co ngoni priksa. Ada brapa banya tu ngoni pe roti?” Abis dorang priksa kong dorang bilang, “Lima roti deng dua ikang.” Abis itu, Yesus suru supaya tu orang-orang dudu baklompo-klompo di atas rumpu. Kong tu orang-orang itu dudu baklompo-klompo, ada tu sratus deng ada tu lima pulu orang. Abis itu Yesus ambe tu lima roti deng dua ikang, Dia mangada ka langit kong bilang makase pa Tuhan Allah. Trus Dia pela-pela tu roti kong kase pa De pe murit-murit, supaya dorang kase berbage pa orang-orang itu. Bagitu lei deng tu dua ikang, Dia kase berbage pa dorang samua. Kong dorang samua makang sampe kanyang. Abis itu, Yesus pe murit-murit kumpul tu roti deng tu ikang yang da talebe, samua ada dua blas loto fol. Waktu itu yang da iko makang ada kira-kira lima ribu orang laki-laki. Abis itu, Yesus iko suru Dia pe murit-murit nae ka prao kong pigi lebe dulu ka sabla danau, di kampung Betsaida. Trus Dia suru tu orang banya pulang. Abis Yesus baku pisa deng tu orang banya, Dia pigi ka satu bukit for basombayang. Serta so malam, tu prao yang Dia pe murit-murit da nae akang so di tenga danau, samantara itu Yesus kurang tinggal sandiri di darat. Kong Yesus lia De pe murit-murit so nyanda kuat bapanggayung lantaran da malawang angin. Waktu so amper siang, Yesus datang pa dorang deng cara bajalang di atas aer. Dia rencana mo balewat pa dorang. Mar waktu dorang lia Dia bajalang di atas aer, dorang kira Dia setang, kong dorang babataria lantaran dorang samua tako skali da lia pa Dia. Mar Dia iko bilang pa dorang, “Tenang jo, nyanda usa tako! Ini Kita.” Abis itu Yesus nae ka prao sama-sama deng dorang, kong tu angin jadi tedo. Dorang samua taheran-heran skali. Soalnya biar lei dorang so lia Yesus kase makang banya orang pake roti deng ikang, dorang masi blum mangarti tu Yesus pe kuasa lantaran dorang masi kras hati. Yesus deng De pe murit-murit sampe di sabla danau di daera Genesaret, kong dorang berlabu di situ. Waktu dorang turung dari prao, orang-orang di situ iko dapa kanal pa Yesus. Kong tu orang-orang itu lari ka samua tampa di daera itu trus dorang bawa orang-orang saki pake tandu, di mana jo dorang dapa dengar Yesus ada. Ka mana jo Yesus pigi, dari kampung-kampung sampe ka kota-kota dorang taru tu orang-orang saki di pasar kong bamohon pa Yesus, supaya tu orang-orang saki itu mo pegang pa Dia biar lei cuma tu De pe ujung juba. Kong samua orang saki yang da bapegang pa Dia jadi bae. Satu kali, ada orang-orang dari golongan Farisi deng bebrapa ahli Taurat dari Yerusalem datang pa Yesus. Dorang lia bebrapa dari Yesus pe murit-murit da bamakang nyanda bacuci tangan, jadi dong anggap Yesus pe murit-murit pe tangan itu najis lantaran nyanda cuci dulu iko dong pe adat Yahudi. Soalnya kwa bagini: orang-orang dari golongan Farisi deng samua orang Yahudi yang laeng ja pegang kras dong pe nene moyang pe adat. Kalu dorang mo makang, dorang musti bacuci tangan iko dong pe adat. Bagitu lei kalu dorang pulang dari pasar, dorang nimbole mo makang kalu nyanda beking bersi diri iko dong pe adat. Ada banya lei atoran laeng dari dong pe nene moyang yang dorang pegang kras, rupa tu atoran mo cuci glas, tampayang deng perkakas-perkakas dari tembaga. So itu, tu orang-orang dari golongan Farisi deng ahli-ahli Taurat batanya pa Yesus, “Bapak, kiapa Bapak pe murit-murit nyanda iko tu torang pe nene moyang pe adat? Dorang da makang deng tangan yang najis.” Kong Yesus manyao pa dorang, “Hei ngoni orang-orang munafik! So butul no tu Tuhan Allah da bilang dulu pa nabi Yesaya tentang ngoni. Tuhan Allah da bilang bagini, ‘Bangsa ini puji pa Kita deng dorang pe mulu, mar dorang pe hati jao dari pa Kita. Nyanda ada guna dorang ja semba pa Kita. Soalnya tu ajaran yang dorang ja kase ajar pa orang-orang, itu cuma iko manusia pe adat.’ Jadi bagini, Tuhan Allah pe prenta ngoni nyanda pake, mar tu manusia pe prenta ngoni iko akang.” Yesus bilang pa dorang, “Pe pande skali ngoni nyanda pake tu Tuhan Allah pe prenta for jaga tu ngoni pe adat. De pe conto di kitab Suci, Musa da bilang bagini, ‘Ngoni musti hormat tu ngoni pe papa deng mama,’ deng ‘Sapa tu bakutuk pa de pe papa ato mama, dia musti dapa hukuman mati.’ Mar ngoni da kase ajar laeng. Ngoni kase ajar pa orang-orang supaya dorang bole babilang pa dong pe papa deng mama bagini, ‘Kita so nyanda mo kase apa-apa for bantu pa papa deng mama, lantaran tu kita mo kase pa papa deng mama, kita so kase persembahan for Tuhan.’ Kong ngoni bilang pa dia kalu dia so nyanda perlu lei mo beking apa-apa for mo bantu tu de pe papa deng mama. Deng ngoni se ajar bagitu, ngoni so nyanda pake tu Tuhan Allah pe firman, ngoni cuma da pake tu ngoni pe adat sandiri yang ngoni da se trus pa tu orang-orang. Ada banya lei ngoni pe adat yang sama deng itu.” Abis itu Yesus pangge ulang tu orang banya kong babilang pa dorang, “Ngoni samua dengar jo bae-bae pa Kita supaya mangarti. Apa tu da maso pa torang, itu nyanda mo beking torang berdosa pa Tuhan. Mar apa yang da kaluar dari pa torang, itu yang beking torang berdosa pa Tuhan.” [ Sapa tu ada talinga, badengar jo bae-bae!] Abis itu Yesus deng De pe murit-murit kase tinggal tu orang banya kong pi maso ka satu ruma. Trus Dia pe murit-murit batanya pa Dia tentang tu Dia da bilang tadi. Kong Yesus manyao pa dorang, “Ngoni lei masi blum mangarti apa tu prumpamaan itu pe arti? Ngoni pasti so tau kalu apa tu orang da se maso di mulu, itu nyanda beking dia berdosa pa Tuhan. Soalnya tu makanan itu nyanda maso ka dalam hati, mar cuma turung pa de pe puru kong nanti kaluar.” Deng bilang bagitu, Yesus bilang samua makanan bole mo makang. Kong Yesus bilang lei, “Tu kata-kata yang kaluar dari orang pe mulu, itu yang beking dia jadi berdosa pa Tuhan. Soalnya dari hati timbul samua yang jaha: pikiran jaha, baseks bebas, bapancuri, babunung, bersina, sraka, keji, putar-bale, nyanda ada moral, pangmangiri, bahojat, sombong deng kabal. Samua tu hal-hal jaha itu kaluar dari hati kong beking orang jadi berdosa pa Tuhan.” Abis itu, Yesus brangkat dari tu tampa itu kong pigi ka satu daera tu de pe nama Tirus. Sampe di situ Dia maso ka satu ruma, kong Dia nimau orang laeng tau kalu Dia ada di situ. Mar orang dapa tau kalu Dia ada di situ. Di situ ada tu satu ibu yang Dia pe anak parampuang da kemasukan setang. Waktu dia dengar Yesus ada di sana, dia iko pigi kong berlutut di muka pa Yesus. Tu ibu itu bukang orang Yahudi, dia itu orang Yunani tu da lahir di daera Siro Fenisia. Dia bamohon pa Yesus for user tu setang dari pa de pe anak. Mar Yesus bilang pa dia, “Biar jo Kita bantu lebe dulu tu orang-orang Yahudi. Kalu Kita tolong lebe dulu pa ngana, itu nyanda bagus, sama deng ambe tu makanan yang da se sadia for anak-anak kong kase lempar pa anjing.” Mar tu ibu itu manyao, “Butul Bapak, mar tu anjing di kolong meja lei makang tu sisa-sisa makanan yang anak-anak da kase ciri.” Kong Yesus bilang pa tu ibu itu, “So lantaran apa tu Ibu da bilang itu, pigi jo skarang, tu setang so kaluar dari ibu pe anak.” Abis itu, tu ibu pulang pa de pe ruma, kong dia lia de pe anak da tidor di koi kong tu setang so kaluar. Abis itu, Yesus deng Dia pe murit-murit kaluar dari daera Tirus. Dorang iko di Sidon, bajalang ka daera Spulu Kota kong sampe di danau Galilea. Di situ ada orang-orang yang bawa satu orang yang pongo deng wowo pa Yesus, kong dorang bamohon pa Yesus supaya taru Dia pe tangan pa tu orang for se bae pa dia. Waktu itu Yesus bawa tu orang itu bajao dari orang banya supaya dorang dua tasandiri. Kong Yesus kase maso Dia pe jare pa tu orang itu pe dua talinga, abis itu Dia baluda kong raba tu orang itu pe lida. Kong Yesus mangada ka langit, Dia bahela nafas trus babilang, “Efata!” de pe arti ‘Tabuka jo’! Kong tu orang itu iko badengar, deng waktu itu jo dia iko babicara deng jelas. Abis itu Yesus larang pa orang-orang di situ for kase tau pa orang-orang laeng apa tu da jadi di situ. Mar lebe Dia larang pa dorang, dorang lebe beking hebo apa tu da jadi di situ. Dorang taheran-heran deng kagum kong bilang, “Samua yang Dia beking itu bagus skali. Tu pongo Dia beking badengar, tu wowo Dia beking babicara.” Waktu itu, ada banya orang lei da bakumpul pa Yesus. Dorang nyanda ada makanan, so itu Yesus pangge De pe murit-murit kong babilang, “Kita rasa kasiang pa tu orang banya ini. Soalnya dorang so tiga hari da iko pa Kita kong dorang so nyanda ada makanan. Kalu Kita suru pulang pa dorang deng puru kosong, kage dorang flao di jalang lantaran ada yang datang dari jao.” Kong Yesus pe murit-murit manyao, “Guru, ini tampa so jao dari kampung, so nyanda mungkin torang mo kase makang pa dorang.” Kong Yesus batanya pa dorang, “Ada brapa ngoni pe roti?” Dorang manyao, “Ada tuju roti.” Kong Yesus suru tu orang banya itu dudu di tana. Abis itu Dia ambe tu tuju roti kong Dia bilang makase pa Tuhan. Klar itu, Yesus pela-pela tu roti kong kase pa Dia pe murit-murit, trus dorang kase berbage pa tu orang banya. Dorang lei ada bebrapa ikang kacili. Yesus ambe tu ikang itu kong Dia bilang makase pa Tuhan, abis itu Dia suru pa De pe murit-murit kase berbage tu ikang pa orang banya. Kong dorang samua makang sampe kanyang. Klar itu, Yesus pe murit-murit kumpul tu makanan yang da talebe, de pe banya tuju kranjang fol. Tu orang-orang yang da makang waktu itu, de pe banya kira-kira ampa ribu orang. Abis itu Yesus suru pulang pa dorang samua. Kong Yesus deng De pe murit-murit iko nae ka prao kong pigi ka satu daera tu de pe nama Dalmanuta. Orang-orang dari golongan Farisi datang pa Yesus kong mulai baku ambe deng Dia. Dorang mo coba jebak pa Dia, jadi dorang minta pa Dia supaya beking mujisat for se bukti kalu Dia memang dari Tuhan Allah. Pe dengar itu, Yesus bahela nafas panjang kong bilang, “Kiapa ni orang-orang skarang baminta mujisat? Kita bilang pa ngoni, Kita sama skali nyanda mo kase mujisat for orang-orang skarang ini.” Klar itu, Yesus kase tinggal pa dorang. Dia nae ulang ka prao sama-sama deng Dia pe murit-murit kong pigi ka sabla danau. Yesus pe murit-murit lupa bawa roti, kacuali tu satu roti yang ada pa dorang di prao. Kong Yesus kase inga pa dorang, “Ngoni musti bajaga-jaga deng hati-hati deng tu ragi dari orang-orang golongan Farisi deng raja Herodes.” Pe dengar itu, Dia pe murit-murit baku bilang, “Guru da bilang bagitu, lantaran torang nyanda ada roti.” Mar Yesus tau apa tu dorang da cirita, so itu Dia bilang pa dorang, “Kiapa ngoni bacirita soal nyanda bawa roti? Apa ngoni blum mangarti tu Kita pe maksut? Ngoni memang kras hati. Soalnya, ngoni so lia deng ngoni pe mata sandiri mar ngoni nyanda mangarti. Ngoni so dengar deng ngoni pe talinga sandiri mar ngoni lei nyanda mangarti. Ngoni pasti masi inga waktu Kita da pela-pela tu lima roti yang kase makang for lima ribu orang. Ada brapa kranjang tu roti yang da talebe tu ngoni da kumpul?” Kong dorang manyao, “Dua blas kranjang.” Yesus batanya ulang, “Waktu kita da kase makang ampa ribu orang cuma deng tuju roti, ada brapa kranjang roti yang da talebe tu ngoni da kumpul?” Dorang manyao, “Tuju kranjang.” Kong Dia bilang pa dorang, “No skarang, blum mangarti lei ngoni?” Abis itu Yesus deng De pe murit-murit sampe di Betsaida. Di situ orang-orang bawa satu orang buta pa Yesus kong dorang bamohon pa Dia supaya Dia taru De pe tangan pa tu orang buta itu. Kong Yesus pegang tu orang buta itu pe tangan, trus bawa tu orang itu kaluar dari kampung. Abis itu, Yesus luda akang tu orang itu pe mata kong taru Dia pe tangan pa tu orang itu pe mata, trus Yesus batanya pa dia, “Bagimana, ngana so bole balia?” Tu orang itu balia ka muka, kong dia bilang, “Kita da lia orang-orang, mar tu orang-orang itu sama deng pohong-pohong yang da babajalang.” Yesus taru ulang Dia pe tangan pa tu orang itu pe mata, kong tu orang itu butul-butul so bole balia, dia so jadi bae. Dia so bole lia samua deng jelas. Abis itu Yesus bilang pa tu orang itu, “Pulang jo, ngana jang babale ka Betsaida.” Abis itu, Yesus deng Dia pe murit-murit pigi ka kampung-kampung di dekat Kaisarea Filipi. Di tenga jalang, Dia batanya pa Dia pe murit-murit, “Kalu menurut orang-orang, sapa dang Kita ini?” Kong dorang manyao, “Ada tu ja bilang kalu Guru tu Yohanes Pembaptis, tu laeng ja bilang kalu Guru tu nabi Elia, kong ada lei ja bilang kalu Guru tu satu dari tu nabi-nabi laeng.” Trus Yesus batanya pa dorang, “Mar kalu menurut ngoni, sapa dang Kita?” Petrus manyao, “Guru itu Kristus tu Raja yang se slamat pa manusia!” Kong Yesus larang deng kras pa Dia pe murit-murit supaya jang kase tau pa sapa-sapa tentang Dia. Waktu itu Yesus mulai mangajar pa Dia pe murit-murit kalu tu Anak Manusia musti mo mangada banya siksa, deng lei tu tua-tua, imam-imam kapala deng ahli-ahli Taurat mo tolak pa Dia. Kong Dia mo dapa bunung, mar di hari katiga Dia mo hidop ulang. Samua ini Yesus bilang deng trang-trangan. Mar Petrus hela pa Dia ka sei kong togor, “Guru, jang bilang bagitu.” Yesus trus haga pa Dia pe murit-murit kong bale togor pa Petrus deng kras, “Ka sana jo ngana! Ngana pe bicara itu kurang sama deng setang pe bos. Ngana cuma pikir apa tu manusia ja pikir, bukang apa tu Tuhan Allah ja pikir.” Yesus pangge tu orang banya deng Dia pe murit-murit kong bilang pa dorang, “Sapa tu mo iko pa Kita, dia so nimbole iko tu de pe mau, dia musti pikul de pe salib tu de pe arti dia siap mendrita sampe mati, kong iko pa Kita. Sapa yang mo hidop cuma for de pe diri sandiri, so dia tu nyanda mo dapa hidop kekal. Mar komang, sapa yang mo kase de pe hidop lantaran iko pa Kita deng lantaran tu Kabar Bae, so dia tu mo dapa hidop kekal. Apa so de pe untung kalu satu orang dapa samua tu harta dunia, mar dia nyanda dapa tu hidop kekal? Soalnya ada so yang dia bole mo kase for se tukar supaya dia bole dapa tu hidop kekal? Nyanda ada to? Sapa yang malo mo mangaku kalu dia ja iko pa Kita deng tu Kita pe ajaran di muka orang-orang skarang yang jaha deng nyanda suka iko pa Tuhan Allah, tu Anak Manusia lei mo malo mangaku kalu tu orang itu ja iko pa Dia deng tu Dia pe ajaran waktu Dia mo datang ulang. Waktu Dia mo datang itu, Dia mo datang deng Dia pe Bapa pe kuasa yang luar biasa deng lei mo datang sama-sama deng tu malaekat-malaekat yang kudus.” Yesus bilang lei pa dorang, “Kita mo bilang pa ngoni, dari antara pa ngoni tu ada di sini, ada yang blum mo mati seblum lia Tuhan Allah Berkuasa sbagai Raja deng kuasa yang basar.” Serta so lewat anam hari, Yesus bawa pa Petrus, Yakobus deng Yohanes sama-sama deng Dia nae ka satu gunung tinggi, di situ cuma ada dorang. Waktu itu dorang tiga lia Yesus so bruba jadi laeng. Yesus pe baju jadi puti mangkilat. Di dunia ini nyanda ada orang yang bole mo cuci baju sampe jadi puti sama deng itu. Kong kage dorang dapa lia tu nabi Elia deng nabi Musa, dorang dua da bacirita deng Yesus. Trus Petrus babilang pa Yesus, “Guru, pe snang skali torang ada di sini. Lebe bae torang kase badiri akang tiga sabua: satu for Guru, satu for Musa, deng satu for Elia.” Petrus da bilang bagitu lantaran dia so nintau apa tu dia mo bilang, soalnya dia deng de pe dua tamang so tako skali. Abis itu, turung awan kong tutu pa dorang. Trus dari dalam awan itu dapa dengar suara bagini, “Ini tu Kita pe Anak, Kita sayang pa Dia. Badengar jo pa Dia!” Kage-kage waktu dorang lia kasana-kamari, dorang so nyanda lia orang laeng di situ, kurang Yesus tu ada di situ sama-sama deng dorang tiga. Kong waktu dorang samantara turung dari tu gunung, Yesus bapesan pa dorang tiga supaya dorang jang dulu kase cirita pa sapa-sapa apa tu dong da lia, nanti kalu tu Anak Manusia so mati kong hidop ulang baru dorang bole kase cirita itu. Jadi dorang nyanda kase cirita pa sapa-sapa, mar dorang masi da baku tanya lei apa tu de pe maksut mati kong hidop ulang. Kong dorang batanya pa Dia, “Kiapa tu ahli-ahli Taurat da bilang kalu nabi Elia musti datang lebe dulu dari tu Anak Manusia?” Yesus manyao, “Memang nabi Elia musti datang lebe dulu kong kase siap samua for Anak Manusia mo datang. Mar bagimana deng tu Anak Manusia? Kiapa nabi-nabi dulu da tulis di Kitab Suci kalu Dia musti banya mendrita deng orang mo sosere pa Dia? Mar Kita bilang pa ngoni, tu Elia yang torang orang Israel da tunggu-tunggu, dia itu so datang kong orang-orang so beking susa pa dia iko dorang pe mau sandiri, sama deng tu da tulis dari dulu tentang dia.” Waktu Yesus deng De pe tiga murit babale ulang pa tu murit-murit laeng, dorang lia pe banya orang da bakumpul pa tu murit-murit itu. Kong di situ ada ahli-ahli Taurat yang da baku ambe deng tu murit laeng itu. Waktu tu orang banya dapa lia pa Yesus, dorang takage kong capat-capat pi jemput pa Dia. Kong Yesus batanya pa dorang, “Apa so tu ngoni da baku ambe akang deng tu ahli-ahli Taurat?” Satu dari tu orang banya itu manyao, “Guru, kita da bawa ta pe anak laki-laki ini supaya Guru bole mo kase bae akang pa dia. Dia da kemasukan setang yang beking dia jadi wowo. Saban kali tu setang itu srang pa dia, tu setang banting pa dia ka tana kong de pe mulu kaluar gabu, de pe gigi tabaku goso sampe babunyi, deng de pe badan jadi kejang. Kita so minta pa Guru pe murit-murit supaya dorang user akang tu setang dari pa kita pe anak, mar dorang nyanda mampu.” Kong Yesus bilang pa dorang, “Hei ngoni orang-orang yang nyanda percaya. Mo sampe tempo apa Kita musti tinggal di tenga-tenga pa ngoni? Kong mo sampe tempo apa Kita musti mo basabar pa ngoni? Bawa jo kamari tu anak itu!” Kong dorang bawa tu anak itu pa Yesus. Bagitu tu setang lia pa Yesus, tu setang iko kase goyang-goyang tu anak itu sampe taplanteng ka tana, taguling-guling kong de pe mulu kaluar gabu. Kong Yesus batanya pa tu anak pe papa, “So brapa lama dia bagini?” Tu anak itu pe papa manyao, “So dari kacili kasiang. Kong amper slalu tu setang ja tarek pa dia ka api ato ka aer for beking mati pa dia. Mar kalu Guru bole beking sesuatu, tolong deng kasiang akang dang pa torang.” Yesus manyao, “Kiapa dang ngana bilang kalu Kita bole? Samua bole jadi for orang yang percaya!” Kong tu anak pe papa iko babilang deng suara kuat, “Kita percaya, mar tolong akang dang pa kita supaya lebe percaya.” Waktu Yesus lia so mulai banya orang datang bakumpul di situ, Dia togor deng kras tu setang itu. Dia bilang, “Hei setang tu da beking orang jadi wowo deng pongo. Kita prenta ngana, kaluar dari tu anak ini kong jang maso ulang pa dia!” Trus tu setang bataria deng goyang-goyang tu anak itu deng kuat skali kong dia kaluar. Tu anak itu dapa lia sama deng orang mati, sampe banya orang babilang, “Dia so mati!” Mar Yesus pegang tu anak pe tangan, Yesus kase bangong pa dia, kong tu anak badiri. Abis itu, Yesus deng De pe murit-murit maso ka satu ruma, kong waktu dorang sandiri di situ, Yesus pe murit-murit batanya pa Dia, “Guru, kiapa dang torang nyanda dapa user tu setang itu?” Yesus manyao pa dorang, “Tu setang model bagitu nyanda mo kaluar kacuali deng basombayang.” Yesus deng De pe murit-murit kaluar dari tampa itu kong se trus dong pe perjalanan lewat daera Galilea, lantaran Dia samantara da mangajar pa De pe murit-murit. Dia babilang pa dorang, “Nanti ada orang yang mo srahkan tu Anak Manusia pa orang-orang yang berkuasa, kong dorang mo bunung pa Dia. Mar katiga hari abis dorang bunung pa Dia, Dia mo hidop ulang.” Mar Yesus pe murit-murit nyanda mangarti apa tu Dia da bilang, deng dorang lei rasa bagitu mo batanya pa Dia. Abis itu Yesus deng De pe murit-murit sampe di Kapernaum. Waktu dorang sampe di ruma, Yesus batanya pa dorang, “Tadi waktu di tenga jalang, apa so tu ngoni da cirita?” Mar dorang samua cuma badiam, lantaran tadi waktu di tenga jalang, dorang da baku ambe pendapat sapa tu paling basar di antara pa dorang. Yesus dudu kong pangge tu De pe dua blas murit. Dia bilang pa dorang, “Kalu sapa suka mo jadi orang basar, de pe hidop musti sama deng orang biasa, kong dia musti jadi orang yang ja layani pa samua orang.” Abis itu, Yesus ambe satu anak kacili kong kase badiri di tenga-tenga pa dorang. Dia polo tu anak itu kong bilang pa dorang, “Sapa jo yang trima satu anak kacili sama deng ini lantaran dia percaya pa Kita, itu sama deng tu orang itu so trima pa Kita. Kong sapa jo yang trima pa Kita, bukang cuma Kita yang dia trima, mar dia so trima pa Tuhan Allah yang da utus pa Kita.” Abis itu Yohanes bilang pa Yesus, “Guru, torang lia ada satu orang yang da user setang pake Guru pe nama. Trus torang da larang pa dia supaya jang pake Guru pe nama, lantaran dia itu bukang torang pe tamang.” Mar Yesus bilang pa dorang, “Ngoni jang larang pa dia! Sapa jo yang so beking mujisat pake Kita pe nama, nyanda mungkin dia itu lei mo beking besae Kita pe nama. Sapa jo yang nyanda malawang pa torang, dia itu torang pe orang. Kita bilang pa ngoni, sapa jo yang kase minum biar lei satu glas aer pa ngoni lantaran ngoni ini orang yang ja iko pa Kristus, dia pasti mo dapa de pe upah dari Tuhan.” Yesus bilang lei, “Sapa jo yang beking satu dari anak-anak kacili rupa ini beking dosa kong jadi sesat, lebe bae tu orang itu pe leher kase ika akang deng batu basar kong pi kase lego ka laut. Kalu satu dari ngana pe tangan beking ngana berdosa sampe ngana jadi sesat, potong jo tu tangan! Lebe bae ngana maso sorga cuma deng satu tangan, daripada ada dua tangan mar ngana maso neraka. Tu tampa itu de pe api nyanda mo mati. [ Di situ tu gai-gai nyanda mati, deng tu api lei nyanda mo mati.] Kalu satu dari ngana pe kaki beking ngana berdosa sampe ngana jadi sesat, potong jo tu kaki! Lebe bae ngana maso sorga cuma deng satu kaki, daripada ada dua kaki mar ngana dapa lempar ka neraka. [ Di situ tu gai-gai nyanda mati, deng tu api lei nyanda mo mati.] Kalu satu dari ngana pe mata beking ngana berdosa sampe ngana jadi sesat, cungkel jo tu mata! Lebe bae ngana jadi Tuhan Allah pe orang cuma deng satu mata, daripada ngana ada dua mata mar ngana dapa lempar ka neraka. Di tampa itu, gai-gai nyanda mo mati, deng tu api lei nyanda mo mati. Samua orang Tuhan Allah mo uji tu dorang ja beking, sama deng mas ja bakar deng api for beking murni. Garam memang bagus for makanan, mar kalu tu garam so jadi tawar, so nyanda mungkin lei mo beking bagaram ulang. Ngoni lei musti jadi orang bae, sama deng garam yang ja beking sadap makanan, ngoni slalu ja baku-baku bae deng orang laeng.” Abis itu, Yesus pigi ka daera Yudea deng daera di sabla kuala Yordan. Di situ lei ada banya orang datang bakumpul pa Dia. Kong sama deng biasa, Yesus mangajar lei pa dorang. Ada bebrapa orang dari golongan Farisi yang datang mo jebak pa Yesus, dorang batanya, “Kalu mo iko torang pe atoran agama, bole so tu laki-laki yang so kaweng se cere tu dia pe bini?” Yesus manyao pa dorang, “Apa so tu atoran yang Musa da kase pa ngoni?” Dorang bilang, “Musa kase isin pa laki-laki for kase cere de pe bini deng cara beking surat cere.” Kong Yesus manyao pa dorang, “Musa da tulis tu atoran lantaran ngoni pe kapala batu. Mulai ni dunia ada, Tuhan Allah beking laki-laki deng parampuang. So itu, tu laki-laki mo se tinggal tu de pe papa deng mama, kong dia hidop sama-sama deng de pe bini, kong dorang dua itu jadi satu. Jadi dorang dua so nyanda hidop sandiri-sandiri, mar so jadi satu. So lantaran itu, tu laki-laki deng parampuang yang Tuhan Allah so beking jadi satu, nimbole manusia mo kase cere.” Abis itu, Yesus deng De pe murit-murit maso ka satu ruma. Di situ Yesus pe murit-murit batanya lei pa Dia tentang tu De pe ajaran tadi. Kong Yesus manyao pa dorang, “Kalu ada laki-laki yang kase cere de pe bini kong kaweng ulang deng parampuang laeng, dia so bersina. Bagitu lei deng tu bini yang kase cere de pe laki kong kaweng ulang deng laki-laki laeng, dia so bersina.” Satu kali ada orang-orang bawa anak-anak kacili pa Yesus supaya Dia taru De pe tangan pa dorang for se berkat, mar Dia pe murit-murit cuma da mara akang pa dorang yang da bawa anak-anak kacili itu. Pe lia itu, Yesus mara kong bilang pa dorang, “Kase biar jo tu anak-anak itu datang pa Kita! Ngoni jang larang pa dorang lantaran tu orang-orang sama deng ini yang mo jadi orang-orang dari Tuhan Allah yang Berkuasa sbagai Raja. Kita bilang pa ngoni, sapa jo yang nyanda trima pa Tuhan Allah sama deng anak-anak kacili yang dong pe hati polos, so dorang itu yang nyanda mo jadi orang-orang dari Tuhan Allah yang Berkuasa sbagai Raja.” Abis itu, Yesus polo pa tu anak-anak itu. Dia taru De pe tangan pa dorang kong se berkat pa dorang. Waktu Yesus mulai se trus De pe perjalanan, ada satu orang balari kong datang berlutut di muka pa Dia. Tu orang itu batanya, “Guru yang pangbae, apa yang kita musti beking supaya kita bole mo dapa tu hidop kekal?” Yesus manyao, “Kiapa so ngana bilang kalu Kita ini pangbae? Nyanda ada satu orang yang pangbae, cuma Tuhan Allah yang pangbae. Ngana so tau tu Tuhan Allah pe prenta-prenta ini: jang babunung, jang bersina, jang bapancuri, jang basaksi dusta, jang batipu pa orang, deng lei musti hormat pa ngana pe papa deng mama!” Kong tu orang itu bilang pa Yesus, “Guru, samua tu prenta itu kita so beking dari lei kita masi nyong-nyong.” Mar Yesus haga pa orang itu deng rasa kasiang kong bilang pa dia, “Mar masi ada satu yang ngana blum beking. Pigi jo kong jual samua tu ngana pe harta, kong tu doi ngana kase pa orang-orang miskin, deng bagitu Tuhan mo kase pa ngana harta di sorga. Abis itu, datang jo kamari kong iko pa Kita.” Pe dengar tu Yesus da bilang itu tu orang itu trus murung, kong dia pigi deng hati sedi lantaran dia pe kaya skali. Kong Yesus haga pa De pe murit-murit kong bilang pa dorang, “Pe susa skali orang kaya mo jadi orang dari Tuhan Allah yang Berkuasa sbagai Raja.” Dia pe murit-murit heran da dengar tu Dia da bilang. Mar Yesus bilang lei, “Kita pe anak-anak, pe susa skali for orang mo trima tu Tuhan Allah mo Berkuasa sbagai Raja pa dia. Masi lebe gampang satu ekor onta mo maso ka lobang jarum, daripada orang kaya mo trima tu Tuhan Allah for mo Berkuasa sbagai Raja pa dia.” Pe dengar itu, dorang jadi lebe heran kong dorang baku bilang satu deng laeng, “No kalu bagitu, sapa dang tu bole mo slamat dari hukuman dosa?” Yesus haga pa dorang kong babilang, “For manusia nyanda mungkin mo se slamat de pe diri sandiri, mar for Tuhan Allah, Dia bole se slamat pa manusia lantaran samua Tuhan Allah bole beking.” Kong Petrus babilang pa Yesus, “Guru, torang ini so kase tinggal samua tu tong pe kepunyaan for iko pa Guru.” Yesus manyao, “Kita bilang pa ngoni, sapa jo yang so se tinggal tu de pe ruma, de pe kaka ade laki-laki ato parampuang, de pe mama ato de pe papa, de pe anak-anak ato de pe kobong lantaran dia da iko pa Kita deng lantaran tu Kabar Bae, skarang ini dia mo trima ulang sratus kali lipa dari tu dia da kase tinggal: ruma, kaka ade laki-laki ato parampuang, mama, anak deng kobong, mar biar lei bagitu dia tetap mo dapa banya siksa, kong nanti dia lei mo dapa tu hidop kekal. Mar banya orang yang orang ja bilang orang penting, dorang itu nyanda mo jadi apa-apa, kong tu orang yang orang ja bilang nyanda penting, dorang itu tu mo dapa hormat.” Yesus deng Dia pe murit-murit samantara bajalang ka kota Yerusalem. Waktu itu Yesus da bajalang di muka. Dia pe murit-murit kuatir deng lei tu orang-orang yang da iko pa Dia dari blakang so tako. Yesus pangge lei tu De pe dua blas murit kong bilang pa dorang apa tu mo jadi pa Dia. Yesus bilang, “Torang skarang da bapigi ka Yerusalem. Di sana, orang mo srahkan Anak Manusia pa imam-imam kapala deng ahli-ahli Taurat, kong dorang mo ambe keputusan for kase hukum mati pa Dia. Dorang mo srahkan Dia pa orang-orang bukang Yahudi. Dorang mo sosere pa Dia, mo luda akang, mo cambok kong mo bunung pa Dia. Mar de pe hari katiga, Dia mo hidop ulang.” Abis itu Yakobus deng Yohanes, tu Zebedeus pe anak-anak, badekat pa Yesus kong bilang pa Dia, “Guru, ada yang torang mo minta pa Guru, kong kalu bole, Guru iyo akang.” Yesus batanya pa dorang, “Apa so tu ngoni suka mo minta dari pa Kita?” Kong dorang manyao, “Bagini kwa, Guru. Nanti kalu Guru so jadi Raja kong berkuasa, torang minta pa Guru supaya torang dua bole dudu di sabla pa Guru, tu satu di sabla kanan kong tu satu lei di sabla kiri.” Yesus manyao, “Ngoni nyanda mangarti deng apa tu ngoni da minta. Kita nanti mo dapa banya siksa, kong apa ngoni mampu mo pikul tu siksa sama deng tu Kita mo pikul, sama deng mo minum tu cawan pendritaan yang Kita musti minum ato dapa baptis sama deng tu baptisan yang Kita da trima?” Kong dorang manyao, “Torang mampu.” Trus Yesus bilang pa dorang, “Memang ngoni mo pikul tu siksa sama deng tu Kita mo trima deng mo dapa baptis sama deng tu baptisan yang kita da trima. Mar sapa tu mo dudu di sabla kanan deng kiri pa Kita, itu bukang Kita pe hak for ator. Tu tampa itu Tuhan Allah so se sadia for orang-orang yang Dia so tentukan.” Waktu tu spulu murit dengar tu Yakobus deng Yohanes da minta, dorang jadi mara pa dong dua. So itu, Yesus pangge pa dorang samua kong bilang, “Ngoni tau kalu tu pemimpin-pemimpin dari bangsa-bangsa yang nyanda kanal pa Tuhan Allah, dorang da kuasai deng ja beking siksa tu dong pe rakyat. Kong tu dorang pe penguasa-penguasa lei ja tekan tu rakyat for beking tu dorang pe mau. Mar ngoni jang sama deng dorang! Sapa tu suka jadi orang basar di antara pa ngoni, dia musti jadi orang yang ja layani pa ngoni. Kong sapa yang suka jadi paling penting di antara ngoni, dia musti ja layani samua orang sama deng budak. Bagitu lei deng tu Anak Manusia. Tu Anak Manusia datang ka dunia bukang for orang mo layani, mar Dia datang for layani banya orang deng datang for srahkan Dia pe diri for tubus banya orang pe dosa.” Yesus deng Dia pe murit-murit sampe di kota Yerikho. Waktu dorang so mo kaluar dari kota Yerikho, ada banya orang baku iko deng dorang. Ada lei di situ satu orang buta da dudu baminta-minta di pinggir jalang. Tu orang itu de pe nama Bartimeus, tu Timeus pe anak. Waktu dia dengar Yesus tu orang Nazaret da balewat, dia babilang deng suara kuat, “Yesus, raja Daud pe keturunan, kasiang akang dang pa kita!” Pe dengar dia babilang bagitu, tu orang banya togor pa dia supaya badiam. Mar dia tare cuma babilang deng suara lebe kuat. “Raja Daud pe keturunan, kasiang akang dang pa kita!” Pe dengar itu, Yesus brenti kong bilang, “Pangge jo kamari pa dia!” So itu dorang pangge tu orang buta itu kong bilang pa dia, “Kase kuat ngana pe hati kong badiri jo, Yesus da pangge pa ngana.” Kong Bartimeus se lapas de pe juba, dia iko badiri kong pigi pa Yesus. Kong Yesus batanya pa dia, “Apa dang yang ngana suka Kita mo beking for ngana?” Bartimeus manyao, “Guru, kita suka supaya kita bole mo balia.” Kong Yesus bilang pa dia, “Pigi jo, ngana percaya pa Kita jadi skarang ngana so bole balia.” Waktu itu jo, Bartimeus so bole balia, kong dia iko pa Yesus. Waktu Yesus deng Dia pe murit-murit so dekat di Yerusalem, dorang sampe di kampung Betfage deng Betania tu ada di bukit Zaitun. Di situ Yesus suru pa Dia pe dua murit, Dia bilang pa dorang, “Pigi jo ngoni ka kampung di muka sana. Waktu ngoni maso di situ, ngoni mo iko dapa lia satu ekor keledai muda tu da se ika, yang blum perna ada orang da nae akang. Ngoni buka jo tu de pe tali trus bawa kamari tu keledai itu. Kong kalu ada orang batanya pa ngoni, ‘Kiapa ngoni beking bagitu?’ Ngoni manyao jo bagini, ‘Tuhan perlu tu keledai, nanti Dia mo iko se bale ulang kamari.’ ” Abis itu dorang pigi, kong dong dapa lia satu ekor keledai muda da kase ika di muka ruma tu ada di pinggir jalang. Kong dorang se lapas tu keledai. Trus tu orang-orang yang da badiri di situ togor pa dorang, “Hei! Kiapa ngoni se lapas tu keledai itu?” Kong dorang manyao sama deng tu Yesus da bilang, trus tu orang-orang itu kase biar dorang bawa tu keledai. Abis itu, tu dua murit itu bawa tu keledai pa Yesus. Dorang se alas tu dong pe baju di atas keledai, trus Yesus nae di keledai itu. Di sana ada banya orang yang da se alas dorang pe juba di jalang. Ada lei yang da taru tu cabang-cabang kacili yang badaong ijo tu dorang da ambe dari kobong, for Yesus mo lewat akang. Ada orang-orang yang bajalang di muka pa Yesus kong tu laeng baiko dari blakang, kong dorang puji pa Dia deng suara kuat, “Hosana! Puji jo pa Dia yang da datang dalam nama Tuhan. Puji jo pa Dia yang mo jadi Raja, kong berkuasa sama deng raja Daud tu torang pe nene moyang. Hosana! Puji jo pa Dia yang ada di tampa mahatinggi!” Waktu Yesus sampe ka Yerusalem, Dia maso ka Ruma Ibada Pusat. Di situ Dia balia-lia tu sekliling Ruma Ibada Pusat itu, mar lantaran so mo malam, Dia kaluar kong pigi ka Betania sama-sama deng Dia pe dua blas murit. De pe eso jo, Yesus deng Dia pe murit-murit kaluar dari Betania. Samantara bajalang, Yesus so rasa lapar. Dari jao Dia lia ada pohong ara yang de pe daong banya. Dia pi badekat ka pohong itu mo cari de pe bua, mar Dia nyanda dapa apa-apa kacuali daong-daong. Soalnya waktu itu blum de pe oras pohong ara mo babua. Kong Dia kutuk tu pohong itu, “So itu ngana so nyanda mo babua lei, jadi nyanda ada tu mo makang ngana pe bua!” Dia pe murit-murit lei da dengar tu Dia da bilang. Waktu Yesus deng Dia pe murit-murit sampe di Yerusalem, Yesus maso ka kintal Ruma Ibada Pusat. Di situ Dia mulai user tu orang-orang yang da bajual deng yang da babli, Dia lei kase bobale tu meja-meja dari tu orang-orang yang da tukar doi deng tu bangku-bangku dari tukang bajual burung pombo. Dia lei larang tu orang-orang babawa barang-barang lewat di kintal Ruma Ibada Pusat. Kong Dia kase ajar pa dorang, “Di Kitab Suci ada tatulis bagini, ‘Kita pe ruma orang mo bilang tampa basombayang for samua suku bangsa.’ Mar ngoni so beking jadi tampa batipu orang!” Waktu tu imam-imam kapala deng tu ahli-ahli Taurat dengar tu Yesus da beking di kintal Ruma Ibada Pusat, dorang cari akal for mo bunung pa Dia. Mar dorang lei tako pa Dia lantaran tu orang banya suka De pe ajaran. Serta so mo malam, Yesus deng De pe murit-murit kaluar dari Yerusalem. De pe eso pagi, samantara bajalang, Yesus deng De pe murit-murit dapa lia tu pohong ara yang Yesus da kutuk kalamaring so kring sampe pa de pe akar-akar. Kong Petrus dapa inga tu Yesus da bilang kalamaring, trus dia bilang pa Yesus, “Guru, co lia! Tu pohong ara yang Guru da kutuk so kring.” Kong Yesus manyao pa dorang, “Ngoni musti percaya pa Tuhan Allah. Kita bilang pa ngoni, sapa jo yang prenta pa ni gunung, ‘Taangka jo kong talempar ka dalam laut!’ kalu de pe hati nyanda ragu-ragu kong percaya apa tu dia da minta mo jadi, itu pasti mo jadi. So itu Kita bilang pa ngoni, apa jo tu ngoni minta pa Tuhan, ngoni percaya jo kalu tu ngoni da minta itu ngoni so trima, kong itu pasti ngoni mo dapa. Kalu ngoni badiri for basombayang kong ngoni pe hati nyanda snang pa orang yang da beking sala pa ngoni, ngoni kase ampung jo dulu tu orang itu. Deng bagitu lei ngoni pe Bapa lei di sorga mo kase ampung pa ngoni.” [ Mar kalu ngoni nyanda kase ampung tu orang yang da beking sala pa ngoni, ngoni pe Bapa di sorga lei nyanda mo kase ampung pa ngoni.] Yesus deng De pe murit-murit babale ulang ka Yerusalem. Di sana Yesus maso ka kintal di Ruma Ibada Pusat kong babajalang di situ. Waktu itu, tu imam-imam kapala, ahli-ahli Taurat deng tua-tua Yahudi datang pa Dia. Dorang batanya pa Yesus, “Kalamaring, Bapak da user orang-orang dari sini. Bapak da dapa kuasa dari mana sampe Bapak bole beking samua itu? Kong sapa so yang da kase tu kuasa itu pa Bapak?” Yesus manyao pa dorang, “Kita lei mo batanya pa ngoni. Kalu ngoni jawab tu Kita da tanya, Kita mo jawab lei tu ngoni da tanya pa Kita tentang sapa tu da kase kuasa pa Kita for user tu orang-orang itu. Coba ngoni bilang pa Kita, tu Yohanes Pembaptis dapa kuasa dari mana for babaptis? Dari Tuhan Allah ato dari manusia?” Pe dengar itu, dorang deng dorang baku bilang, “Kalu torang bilang pa Dia, ‘Tuhan Allah yang da kase kuasa’, Dia mo bilang bagini, ‘Kalu bagitu, kiapa ngoni nyanda percaya pa Yohanes?’ Mar, kalu torang bilang, ‘Manusia yang da kase kuasa’, tu orang banya ini mo bakacau, lantaran dorang anggap kalu tu Yohanes itu butul-butul nabi.” Jadi dorang manyao pa Yesus, “Torang nintau tu Yohanes da dapa kuasa dari mana!” Kong Yesus bilang pa dorang, “No kalu bagitu, Kita lei nyanda mo bilang pa ngoni sapa tu da kase kuasa pa Kita for beking itu.” Yesus mulai babicara pake prumpamaan pa tu imam-imam kapala, ahli-ahli Taurat deng tu tua-tua. Dia bilang, “Ada satu orang buka kobong anggor kong dia beking pagar kase ron tu kobong. Dia gale lobang for beking bak, tu tampa mo peras akang anggor. Dia lei beking sabua for tu orang yang mo bajaga kobong. Klar samua itu, dia baku ator deng orang-orang yang ja bakarja kobong. Abis itu, dia pigi ka daera laeng. Serta so de pe oras bapete anggor, dia suru de pe budak pigi pa tu orang-orang yang da bakarja di kobong anggor itu for ambe tu de pe bagean. Mar dorang cuma da tangka tu budak itu kong bage pa dia, kong suru pulang deng nyanda bawa apa-apa. Abis itu, yang punya kobong suru lei de pe budak laeng pigi pa dorang. Tu budak itu lei dorang bage de pe kapala, deng dorang beking malo pa dia. Dia suru lei budak laeng pigi pa tu orang-orang karja kobong, kong dorang bunung pa dia. Trus dia suru lei banya budak pigi pa dorang, mar ada tu dorang da bage deng ada lei tu dorang da bunung. Skarang tu da tatinggal kurang satu orang, tu dia pe anak laki-laki yang dia sayang. De pe laste, yang punya kobong suru de pe anak pigi pa dorang, dia bilang, ‘Tantu katu kalu kita suru pigi tu kita pe anak, pasti dorang mo hormat.’ Mar tu orang-orang karja baku skongkol bagini, ‘Napa dia tu nanti mo dapa warisan kobong ini. So itu lebe bae torang bunung jo pa dia, supaya tu warisan kobong ini mo jadi torang punya.’ Jadi dorang tangka kong bunung pa dia, trus dorang kase lego pa dia kaluar dari tu kobong anggor itu.” Kong Yesus batanya pa dorang, “Kira-kira tu tuang kobong mo beking apa? Pasti dia mo datang bunung abis tu orang-orang yang bakarja di kobong itu, kong dia kase ofor tu kobong pa orang laeng. Ngoni tantu so baca di Kitab Suci yang da tulis bagini, ‘Batu yang tukang-tukang bangunan da buang, batu itu so jadi batu fondasi yang paling penting. Tuhan tu da beking itu, kong torang lia yang Dia da beking itu luar biasa.’ ” Pe dengar itu, tu pemimpin-pemimpin agama Yahudi iko jadi mangarti kalu Yesus pe maksut deng tu orang-orang karja di prumpamaan itu dorang. So itu dorang brusaha mo tangka pa Yesus, mar dorang tako pa tu orang banya, so itu dorang pigi se tinggal pa Dia. Abis itu, pemimpin-pemimpin agama Yahudi suru bebrapa orang dari golongan Farisi deng orang-orang Yahudi yang ja iko pa raja Herodes pigi for jebak pa Yesus deng pertanyaan. Dorang datang kong bilang pa Yesus, “Guru, torang tau kalu Guru itu orang jujur. Guru nyanda tako pa sapa-sapa lantaran Guru nyanda ja bacari muka, malatare deng trang-trangan Guru kase ajar tu cara yang butul for iko pa Tuhan Allah. So itu torang mo tanya, kalu mo iko tu atoran agama, bole ato nyanda torang babayar pajak pa raja yang paling tinggi di krajaan Romawi? Musti so torang mo babayar pajak ato nyanda?” Mar Yesus tau kalu dorang sebenarnya munafik. Kong Dia bilang pa dorang, “Kiapa ngoni mo jebak pa Kita? Co kase kamari satu doi perak for Kita mo lia!” Dorang kase pa Dia doi perak, kong Dia batanya pa dorang, “Sapa pe gambar deng nama ini?” Dorang manyao, “Itu gambar deng nama dari raja yang paling tinggi di krajaan Romawi.” Kong Yesus bilang pa dorang, “No kalu bagitu, kase jo pa raja yang paling tinggi di krajaan Romawi apa tu ngoni musti kase pa dia, kong kase jo pa Tuhan Allah apa tu ngoni musti kase pa Tuhan Allah!” Pe dengar itu, dorang taheran-heran. Abis itu, bebrapa orang dari golongan Saduki datang pa Yesus. Tu golongan itu nyanda percaya kalu orang yang so mati mo hidop ulang. Dorang batanya pa Yesus, “Guru, dulu nabi Musa da tulis for torang bagini: kalu satu laki-laki yang so kaweng kong mati mar nyanda dapa anak, de pe kaka ato ade laki-laki musti kaweng deng tu laki-laki itu pe bini, supaya de pe kaka ato ade itu kase akang keturunan for dia. No skarang bagini, umpama ada tuju kaka ade laki-laki. Tu paling tua kaweng deng satu parampuang, mar nyanda lama dia mati deng dia ini nyanda dapa anak. Kong yang kadua kaweng deng tu parampuang itu. Dia lei mati deng nyanda dapa anak. Bagitu lei deng tu katiga. Tu da jadi babagitu trus pa tu tuju kaka ade itu, samua mati kong nyanda dapa anak. Kong de pe laste, tu parampuang itu lei mati. Jadi nanti waktu Tuhan se hidop ulang pa orang-orang, sapa yang mo jadi tu parampuang itu pe laki? Soalnya tu tuju kaka ade itu so perna kaweng deng dia.” Yesus manyao pa dorang, “Ngoni ini so sala skali lantaran ngoni nyanda mangarti tu Kitab Suci, deng ngoni lei nintau tu Tuhan Allah pe kuasa. Sebenarnya kwa bagini, kalu orang mati kong hidop ulang, dorang so nyanda mo kaweng deng so nyanda mo kase kaweng, mar samua mo hidop sama deng malaekat-malaekat di sorga. Kong tentang orang mati yang mo hidop ulang, ngoni tantu so baca yang Musa da tulis tentang rumpu baduri yang da tabakar mar nyanda angus. Waktu itu, Tuhan Allah da bilang pa Musa bagini, ‘Kita ini Tuhan Allah, tu Abraham, Ishak deng Yakub ja semba.’ Waktu itu, tu Abraham, Ishak deng Yakub so mati mar da hidop ulang deng Tuhan Allah. Jadi Tuhan Allah itu bukang orang mati pe Tuhan mar orang yang hidop pe Tuhan. Ngoni komang memang butul-butul sala.” Waktu itu, ada tu satu ahli Taurat da dengar Yesus deng tu orang-orang dari golongan Saduki da baku ambe pendapat. Dia dengar tu Yesus pe jawaban pe bagus pa tu orang-orang itu. So itu dia batanya pa Yesus, “Dari samua tu Tuhan Allah pe atoran-atoran di Kitab Taurat, atoran mana tu paling penting?” Yesus manyao, “Bagini tu Tuhan Allah pe atoran yang paling penting: ‘Hei orang Israel, dengar jo bae-bae. Tuhan Allah itu torang pe Tuhan, Dia itu cuma satu. Ngoni musti butul-butul sayang pa Tuhan Allah yang ngoni ja semba, ngoni nimbole badua hati. Ngoni sayang jo pa Dia deng samua yang ada pa ngoni pe diri, deng lei sayang jo pa Dia deng cara slalu pikir apa tu bole mo beking snang pa Dia, kong beking yang Dia da suru.’ Kong tu atoran yang kadua, ‘Ngoni sayang jo pa orang laeng sama deng ngoni sayang pa ngoni pe diri sandiri.’ Nyanda ada atoran laeng yang lebe penting dari tu dua atoran ini.” Abis itu, tu ahli Taurat bilang pa Yesus, “Butul skali, tu Guru da bilang itu memang butul. Tuhan Allah itu memang cuma satu, nyanda ada laeng kacuali Dia. Torang musti butul-butul sayang pa Tuhan Allah, nimbole badua hati. Torang pake jo tu torang pe pande for sayang pa Dia, torang beking jo yang Dia da suru, deng lei torang sayang jo pa orang laeng sama deng torang sayang pa torang pe diri sandiri. Tu samua itu lebe penting dari samua korban bakaran deng persembahan laeng for Tuhan Allah.” Yesus lia tu orang itu da bajawab deng bijaksana, kong Dia bilang, “Sadiki lei ngana mo jadi Tuhan Allah pe orang.” Abis itu, so nyanda ada lei yang brani batanya pa Yesus. Waktu Yesus samantara da mangajar di kintal kompleks Ruma Ibada Pusat, Dia bilang, “Kiapa ahli-ahli Taurat da bilang kalu tu Mesias tu Raja yang mo se slamat pa manusia itu raja Daud pe keturunan? Soalnya waktu Roh Kudus da kuasai pa raja Daud, raja Daud sandiri da bilang bagini, Tuhan Allah da bilang pa kita pe Tuhan bagini, ‘Dudu jo di tampa terhormat di sabla kanan pa Kita, sampe Ngana pe musu-musu Kita taru di bawa Ngana pe kaki.’ Jadi kalu raja Daud sandiri da bilang Kristus itu dia pe Tuhan, no bagimana lei torang mo bilang kalu Kristus itu raja Daud pe keturunan?” Tu orang banya itu suka skali badengar tu Yesus da bilang. Yesus mangajar lei pa dorang, Dia bilang, “Ngoni musti hati-hati pa tu ahli-ahli Taurat! Dorang suka bajalang pake juba panjang deng suka orang ja hormat di tampa banya orang. Di ruma-ruma ibada agama Yahudi deng di pesta-pesta, dorang suka ja dudu di tampa paling muka tu tampa yang terhormat. Dorang lei ja batipu tu janda-janda for ambe tu janda-janda itu pe ruma, deng dorang ja basombayang panjang-panjang supaya orang anggap kalu dorang itu orang bae-bae. So dorang itu tu mo trima hukuman yang lebe brat.” Abis itu, Yesus dudu da mangada tu kotak persembahan di Ruma Ibada Pusat, Dia da tarukira tu orang banya ja baisi doi di kotak itu. Banya orang kaya da bakase doi banya. Kong datang satu janda miskin. Dia bakase dua doi logam di kotak itu, tu doi itu de pe nilai paling kacili. Trus Yesus pangge tu De pe murit-murit kong bilang, “Kita bilang pa ngoni, tu janda miskin da kase lebe banya dari samua orang yang da bakase di kotak persembahan. Soalnya tu orang-orang kaya itu da bakase dari dorang pe kepunyaan yang talebe-lebe, mar tu janda ini da bakase dari de pe kekurangan tu samua dia pe doi for de pe hidop.” Waktu Yesus bajalang kaluar dari tu kompleks Ruma Ibada Pusat, Dia pe satu murit babilang pa Dia tentang tu Ruma Ibada Pusat, “Guru, co lia kwa! Pe gaga kang tu gedung-gedung itu? Dorang da susung pake batu-batu pe basar.” Kong Yesus bilang pa dia, “Butul, tu gedung-gedung itu pe gaga. Mar nanti ada de pe waktu, nyanda ada satu batu lei yang mo tasusung pa de pe tampa, samua itu mo dapa kase rubu.” Abis itu, Yesus pigi ka bukit Zaitun kong dudu di situ mangada ka Ruma Ibada Pusat. Waktu itu Petrus, Yakobus, Yohanes deng Andreas pi badekat pa Dia supaya dorang bole basandiri deng Dia, kong dorang batanya, “Guru, kase tau akang pa torang, tempo apa dang tu Guru da bilang tadi itu mo jadi? Kong apa dang tu de pe tanda-tanda kalu samua itu so mo jadi?” Yesus bilang pa dorang, “Hati-hati jo ngoni, jang sampe ada orang yang beking sesat pa ngoni. Soalnya banya orang mo datang kong mo pake Kita pe nama. Dorang mo bilang, ‘So kita ini tu Kristus tu Raja yang se slamat pa manusia’ kong dorang itu mo beking sesat banya orang. Kong kalu ngoni dengar ada prang di satu daera, ato kalu ngoni dengar kabar ada lei prang di tampa laeng, ngoni jang tako. Samua itu musti jadi lebe dulu, mar itu blum de pe waktu mo kiamat. Soalnya nanti satu suku bangsa mo baprang deng suku bangsa laeng, satu krajaan baprang deng krajaan laeng. Kong mo ada lei tana goyang di mana-mana deng mo ada lei kelaparan. Samua itu baru de pe awal pendritaan seblum kiamat, sama deng tu pendritaan yang parampuang da rasa waktu mo melahirkan. Jadi hati-hati jo ngoni! Soalnya orang-orang mo tangka pa ngoni kong mo srahkan ka pengadilan agama, ngoni lei mo dapa pukul di ruma ibada agama Yahudi. Dorang mo kase mangada ngoni pa penguasa-penguasa deng raja-raja lantaran ngoni da iko pa Kita, kong itu justru jadi kesempatan for ngoni kase tau pa dorang tentang tu Kabar Bae dari Tuhan Allah. Soalnya tu Kabar Bae itu musti kase tau dulu ka samua suku bangsa baru kiamat. Kong waktu ngoni dapa tangka trus dorang bawa ka pengadilan, ngoni nyanda usa tako tentang apa tu ngoni mo bilang. Mar ngoni bilang jo tu kata-kata yang Tuhan mo kase pa ngoni waktu itu, soalnya apa tu ngoni mo bilang waktu itu, itu bukang ngoni pe kata-kata mar itu dari Roh Kudus. Nanti ada de pe waktu, kalu tu orang yang nyanda percaya pa Kita mo srahkan dia pe sudara sandiri yang percaya pa Kita for dapa bunung, bagitu lei deng tu papa-papa mo beking pa dong pe anak-anak. Ada lei tu anak-anak mo malawang pa dorang pe orang tua, kong srahkan tu dorang pe orang tua for dapa bunung. Kong samua orang mo binci pa ngoni lantaran ngoni da iko pa Kita. Mar tu orang yang tetap iko pa Kita sampe akhir, Tuhan mo kase slamat pa dia.” Yesus bilang lei, “Ngoni mo lia satu orang yang paling jaha tu tukang beking ancor samua, kong dia mo badiri di tampa yang nyanda cocok for dia. (Sapa yang da babaca ini tarukira jo bae-bae!) Kalu tu orang paling jaha itu so badiri di Yerusalem, lebe bae tu orang-orang yang ada di daera Yudea lari pi manyingkir jo ka gunung-gunung. Tu orang yang ada di atas ruma jang turung pi ambe tu barang-barang pa de pe ruma, mar turung kong lari jo. Bagitu lei deng tu orang yang ada di kobong, jang babale for pi ambe dia pe baju, mar pi lari jo! Waktu itu yang paling cilaka tu ibu-ibu yang hamil deng tu masi ja se batoto ade. Basombayang jo, supaya itu samua nyanda mo jadi pas oras dingin, lantaran tu hari-hari itu de pe siksa pe hebat skali, mulai dari pertama Tuhan Allah da beking ni dunia sampe skarang, nyanda perna ada tu siksa yang sama deng itu, kong nyanda perna mo ada lei. Kong kalu Tuhan nyanda beking pende tu hari-hari yang pe siksa itu, nyanda ada satu orang yang mo slamat. Mar lantaran Dia sayang pa orang-orang yang Dia so pili, Dia beking pende tu hari-hari itu. Waktu itu, kalu ada orang bilang pa ngoni bagini, ‘Co lia, Kristus ada di sini!’ ato ‘Co lia, Kristus di sana!’, ngoni jang percaya itu. Soalnya kristus-kristus palsu deng nabi-nabi palsu mo muncul. Dorang mo beking mujisat-mujisat deng hal-hal luar biasa, deng maksut kalu bole tu orang-orang yang Tuhan so pili jadi sesat. Jadi hati-hati jo ngoni, samua ini Kita so bilang lebe dulu pa ngoni!” Yesus bilang, “Pe klar tu hari-hari siksa itu, ‘Matahari so nyanda mo basinar deng tu bulan mo jadi glap. Tu bintang-bintang mo ciri dari langit, deng samua kuasa di langit mo tabongkar-bongkar.’ Kong waktu itu no orang-orang mo lia tu Anak Manusia datang di atas awan-awan deng Dia pe kuasa deng Dia pe luar biasa. Waktu itu jo, Dia mo suru tu De pe malaekat-malaekat kaluar for pi kumpul tu orang-orang yang Dia so pili dari sluru tampa di bumi ini.” Yesus bilang lei, “Co ngoni blajar dari tu pohong ara. Kalu de pe cabang-cabang kacili so baijo deng mulai batunas, ngoni tau kalu oras panas so dekat. Bagitu lei kalu ngoni lia tu Kita da bilang tadi so mulai jadi, so nyanda lama tu Anak Manusia mo datang, so dekat skali. Kita bilang pa ngoni, tu orang-orang yang hidop jaman ini ada yang blum mo mati sampe samua itu jadi. Langit deng bumi mo ancor, mar tu Kita pe firman mo ada trus.” Yesus bilang lei, “Nyanda ada satu orang yang tau tempo apa ato jam brapa tu Anak Manusia mo datang ulang. Malaekat-malaekat di sorga nintau, enter Anak Manusia sandiri lei nintau, cuma Bapa sandiri yang tau. So itu ngoni musti hati-hati deng bajaga-jaga! Soalnya ngoni nintau tempo apa itu mo jadi. Itu sama deng satu orang laki-laki mo se tinggal dia pe ruma lantaran mo pasiar ka tampa jao. Seblum dia brangkat, dia kase tanggong jawab pa de pe pembantu-pembantu for urus tu de pe ruma deng lei dia se tau tu dorang pe karja masing-masing. Dia lei suru penjaga supaya bajaga-jaga trus, kong dorang lei nintau tempo apa tu tuang ruma mo pulang. Bagitu lei deng ngoni, ngoni musti bajaga-jaga trus lantaran ngoni nintau tempo apa tu tuang ruma mo pulang. Dia mo pulang sore stou, tenga malam, so amper siang ato pagi-pagi. Jang sampe waktu dia datang kage-kage, kong ngoni da tasono. Apa tu Kita da bilang pa ngoni, Kita bilang lei pa samua orang: bajaga-jaga jo!” So kurang dua hari orang-orang Yahudi mo beking tu dorang pe hari raya Paskah tu hari for pringati waktu Tuhan Allah se bebas pa dorang pe nene moyang dari Mesir, kong di prayaan itu dorang lei beking prayaan Roti Nyanda Baragi. Waktu kurang dua hari itu, tu imam-imam kapala deng ahli-ahli Taurat baku skongkol beking rencana for tangka pa Yesus deng cara sambunyi-sambunyi kong mo bunung pa Dia. Mar dorang baku bilang, “Torang jang beking itu slama torang pe hari raya, lantaran waktu itu banya orang, jang sampe waktu Yesus dapa tangka orang banya itu mo bakacau.” Waktu Yesus di kampung Betania, Dia da basingga pa Simon pe ruma. Simon ini yang perna dapa saki kusta. Kong samantara Yesus da dudu makang di situ, datang satu parampuang da bawa satu guci dari pualam. Tu guci itu de pe isi minya wangi yang de pe harga mahal. Trus tu parampuang itu buka tu guci, kong dia se sirang plang-plang tu minya pa Yesus pe kapala. Mar ada lei bebrapa orang di situ tu da lia itu kong dorang jadi nyanda snang, kong dorang baku bilang, “Kiapa kwa dia da se royal tu minya wangi itu? Soalnya tu minya wangi bole jual deng harga lebe dari 300 doi perak, kong tu doi yang pe banya itu bole mo kase pa orang-orang miskin.” Trus dorang mara akang tu parampuang itu. Mar Yesus bilang pa dorang, “Kiapa so ngoni beking susa pa ni parampuang? Kase biar jo pa dia. Dia so beking tu bae pa Kita. Saban hari ngoni bole mo bantu tu orang-orang susa, lantaran dorang slalu ada di sekitar pa ngoni. Mar Kita ini so nyanda lama mo sama-sama deng ngoni. Ni parampuang so beking apa tu dia bole beking. Dia so sirang akang minya pa Kita pe badan, sama deng so kase siap tu Kita pe mayat for se kubur. Kita bilang pa ngoni, di mana jo orang-orang se tau tu Kabar Bae dari Tuhan Allah di sluru dunia, pasti dorang mo se cirita apa tu parampuang ini da beking pa Kita kong orang-orang mo inga trus pa dia.” Waktu itu Yudas Iskariot, tu satu dari Yesus pe dua blas murit, dia da pigi pa imam-imam kapala mo kase tau de pe rencana for srahkan Yesus pa dorang. Waktu dorang dengar tu Yudas pe rencana, dorang snang skali kong bajanji mo kase akang doi pa dia. Abis itu Yudas cari-cari kesempatan mo srahkan Yesus pa dorang. Di hari pertama waktu prayaan Roti Nyanda Baragi, orang Yahudi ja potong domba for korban persembahan di hari raya Paskah. Waktu itu, Yesus pe murit-murit batanya pa Dia, “Di mana dang Guru suka torang se sadia akang tu makanan for hari raya Paskah?” Kong Yesus suru pa Dia pe dua murit, “Ngoni pigi jo ka kota Yerusalem, di sana ngoni mo baku dapa deng satu laki-laki yang da pikul tampayang tu da isi akang aer. Ngoni iko jo pa dia, trus kalu dia maso ka satu ruma, ngoni babilang pa yang punya ruma itu bagini, ‘Torang pe Guru da tanya, di mana tu ruangan for Dia deng Dia pe murit-murit mo makang sama-sama di hari raya Paskah?’ Kong nanti yang punya ruma itu mo kase tunjung pa ngoni tu satu ruangan basar di lante atas yang de pe perlengkapan so tasadia lengkap. Di situ no ngoni musti se sadia akang tu makanan for torang!” Abis itu, tu dua murit itu pigi ka kota, kong dorang dapa samua sama persis deng tu Yesus da bilang pa dorang. Di situ dorang kase sadia tu makanan for dorang pe hari raya Paskah. Waktu so malam, Yesus datang ka tampa itu sama-sama deng Dia pe dua blas murit. Samantara dorang da dudu makang di situ, Yesus bilang, “Kita bilang pa ngoni, ada satu dari pa ngoni yang mo bahianat pa Kita. Tu orang itu da dudu makang sama-sama deng Kita.” Pe dengar itu, dorang jadi sedi, kong satu-satu babilang pa Dia, “Guru, bukang kita to itu?” Yesus manyao, “Tu orang itu, satu dari antara ngoni dua blas ini, yang da kase colo roti di satu baskom deng Kita. Memang Anak Manusia mo mati sama deng tu nabi-nabi da tulis dulu di Kitab Suci. Mar cilaka jo tu orang yang da bahianat pa tu Anak Manusia. Lebe bae tu orang itu nyanda perna da se lahir.” Waktu Yesus deng De pe murit-murit da bamakang, Yesus ambe tu roti kong bilang makase pa Tuhan, trus Dia pela-pela tu roti. Abis itu Dia se berbage pa dorang kong babilang, “Roti ini Kita pe badan, ambe jo.” Klar itu Yesus ambe tu cawan kong bilang makase pa Tuhan. Abis itu Dia kase pa dorang, trus dorang samua minum dari tu cawan. Yesus bilang pa De pe murit-murit, “Tu anggor ini Kita pe dara. Tu dara ini nanti mo tatumpa for beking sah tu perjanjian antara Tuhan Allah deng manusia supaya banya orang pe dosa bole dapa ampung. Kita bilang pa ngoni, Kita so nyanda mo minum anggor lei, mar nanti kalu so di tampa tu Tuhan Allah Berkuasa sbagai Raja, di situ no baru Kita minum anggor yang baru.” Abis itu, dorang manyanyi lagu pujian kong pigi ka bukit Zaitun. Kong Yesus bilang lei pa dorang, “Ngoni samua pe iman mo tagoyang sampe ngoni mo lari akang pa Kita. Soalnya dulu Tuhan Allah perna bilang di Kitab Suci bagini, ‘Kita mo bunung tu gembala, kong de pe domba-domba mo lari tafiaro.’ Kita mo mati, mar serta Kita so hidop ulang, Kita mo lebe dulu dari ngoni pigi ka Galilea.” Kong Petrus bilang pa Yesus, “Biar lei dorang samua pe iman mo tagoyang sampe lari akang pa Guru, mar kita komang nyanda mo bagitu.” Kong Yesus bilang pa dia, “Petrus, Kita bilang pa ngana. Ni hari, malam ini jo, seblum ayam bakuku dua kali, ngana so manyangkal tiga kali kalu ngana kanal pa Kita.” Mar Petrus deng lebe sunggu-sunggu babilang, “Biar lei kita musti mati sama-sama deng Guru, kita nyanda mo manyangkal kalu kita kanal pa Guru.” Kong Yesus pe murit-murit laeng lei baku iko bilang bagitu. Abis itu Yesus deng De pe murit-murit pigi kong sampe di satu tampa tu de pe nama Getsemani. Kong Yesus bilang pa dorang, “Ngoni dudu jo di sini, samantara Kita mo pi basombayang.” Trus Yesus pangge pa Petrus, Yakobus deng Yohanes iko sama-sama deng Dia. Waktu itu, Dia pe hati mulai susa deng gelisa. Kong Dia bilang pa dorang, “Kita pe hati sedi skali, dapa rasa sama deng mo mati. Ngoni tinggal jo di sini kong bajaga-jaga.” Abis itu Yesus bajalang sadiki. Dia baplaka di tana kong basombayang, supaya kalu bole Dia nyanda usa tanggong tu pendritaan yang Dia mo dapa. Yesus bilang, “Ya Abba, ya Bapa, samua Bapa mampu mo beking. Ambe jo tu pendritaan ini dari pa Kita. Mar jang iko Kita pe mau, iko jo Bapa pe mau.” Abis itu Yesus babale pa De pe tiga murit, kong Dia lia dorang da tasono. Dia se bangong deng bilang pa Simon Petrus, “Simon, ngana da tatidor kang? Nyanda mampu so ngana bajaga-jaga biar cuma satu jam? Memang ngoni suka mo beking tu Kita da bilang, mar ngoni pe diri nyanda mampu mo beking. So itu, bajaga-jaga deng basombayang jo supaya ngoni nyanda tagoda beking dosa.” Abis itu Yesus pi basombayang, Dia bilang sama deng tu Dia da bilang tadi. Kong Dia babale ulang, Dia lia dorang so tasono ulang lantaran dorang so manganto skali. Waktu Dia kase bangong pa dorang, dorang so nintau mo bilang apa pa Dia. Abis itu Yesus pi basombayang katiga kali, kong waktu Dia babale ulang lei pa dorang, Dia bilang, “Hei! Masi tatidor lei ngoni? So bole jo, so sampe de pe waktu. Co lia, orang so mo srahkan tu Anak Manusia pa orang-orang yang nyanda kanal pa Tuhan Allah. Badiri jo! Mari jo torang pigi pa tu orang yang mo bahianat pa Kita, dia so bakamari.” Waktu Yesus masi da babicara, datang Yudas, tu sala satu dari De pe dua blas murit, dia da sama-sama deng banya orang. Tu orang banya itu, ada tu da bawa peda deng ada lei tu da bawa kayu for pake bapukul. Dorang datang ka situ lantaran tu imam-imam kapala, tu ahli-ahli Taurat deng tu tua-tua Yahudi da prenta pa dorang. Seblum dorang datang ka situ, Yudas tu mo srahkan Yesus pa orang banya itu, dia so kase tau tu tanda pa dorang rupa ini, “Tu orang yang kita mo ciong, so Dia tu ngoni musti tangka. Abis itu, ngoni bawa kong jaga bae-bae.” Waktu Yudas sampe di situ, dia iko badekat pa Yesus kong bilang, “Guru!” Abis itu dia ciong pa Yesus. Kong tu orang-orang yang datang sama-sama deng Yudas itu badekat pa Yesus trus tangka pa Dia. Mar tu satu dari Yesus pe orang cabu de pe peda dari sarong trus potong sampe putus tu talinga dari imam basar pe budak. Kong Yesus babilang pa dorang, “Kita to bukang prampok, kong kiapa ngoni datang tangka pa Kita pake peda deng kayu? Padahal saban hari Kita ada di tenga-tenga pa ngoni mangajar di kintal Ruma Ibada Pusat, cuma ngoni nyanda tangka pa Kita di situ. Mar biar jo, lantaran yang da tulis di Kitab Suci memang musti jadi.” Abis itu samua tu Yesus pe murit lari se tinggal pa Dia. Waktu itu, ada satu nyong cuma da pake kaeng for tutu de pe badan. Dia da iko-iko pa Yesus. Trus tu orang-orang di situ mo cari tangka pa dia, mar dorang cuma dapa pegang de pe kaeng, trus dia se lapas tu kaeng kong lari batalanjang. Abis itu, dorang bawa pa Yesus pigi pa imam basar pe ruma. Kong samua tu imam-imam kapala, tua-tua Yahudi deng ahli-ahli Taurat bakumpul di situ. Samantara itu, Petrus da iko-iko pa Yesus dari jao sampe pa imam basar pe kintal ruma. Di sana dia dudu bagabung deng tu pengawal-pengawal kong barao di api. Tu imam-imam kapala deng samua anggota Mahkamah Agama ja cari orang yang basaksi supaya dorang bole mo hukum mati pa Yesus, mar dorang nyanda dapa. Banya orang da basaksi dusta for se sala pa Yesus, mar samua tu dorang da bilang nyanda baku maso. Kong bebrapa orang badiri trus basaksi dusta, dorang bilang, “Torang da dengar ni Orang da bilang bagini, ‘Kita mo kase rubu tu Ruma Ibada Pusat tu manusia da beking, kong dalam tiga hari Kita mo beking Ruma Ibada Pusat yang laeng, tu bukang manusia da beking.’ ” Mar tu dorang da bilang itu lei nyanda baku maso. Abis itu, tu imam basar badiri di tenga-tenga sidang itu kong batanya pa Yesus, “Ngana sama skali nyanda mo manyao apa-apa deng tu dorang pe tuduhan-tuduhan itu?” Mar Yesus cuma babadiam, Dia nyanda manyao apa-apa. Kong tu imam basar batanya lei pa Yesus, “Ngana so tu Kristus tu mo se slamat pa torang? Apa Ngana so tu Anak Allah, yang dari Tuhan Allah yang torang ja puji?” Kong Yesus komang manyao, “So Kita no itu. Nanti ngoni mo lia tu Anak Manusia dudu di sabla kanan pa Tuhan Allah Yang Mahakuasa, kong ngoni mo lia Dia datang di atas awan-awan dari sorga.” Pe dengar itu, tu imam basar se rabe de pe baju lantaran mara skali, kong babilang, “For apa lei torang mo perlu saksi? Ngoni sandiri so dengar kalu Dia so angka De pe diri jadi Anak Allah, itu to so bahojat pa Tuhan Allah. Kong menurut ngoni dang bagimana?” Kong dorang samua spakat kalu Yesus musti dapa hukum mati. Abis itu, ada bebrapa orang mulai baluda pa Yesus. Dorang tutu deng kaeng De pe muka trus bage pa Dia, kong dorang tanya, “Hei! Co Ngana tebak, sapa tu da bage pa Ngana?” Abis itu, tu pengawal-pengawal lei bage pa Dia. Samantara itu, Petrus masi ada pa imam basar pe kintal, kong datang tu imam basar pe pembantu parampuang ka situ. Waktu dia lia Petrus da barao di api, dia tarukira bae-bae tu Petrus kong bilang, “Ngana lei tu satu yang ja sama-sama deng Yesus tu orang Nazaret itu?” Mar Petrus cuma da manyangkal, dia bilang, “Kita nintau deng nyanda mangarti tu ngana pe maksut.” Abis itu Petrus pigi ka pintu gerbang pa imam basar pe ruma, kong waktu itu jo tu ayam bakuku. Di situ, tu pembantu itu dapa lia lei pa Petrus, trus dia babilang lei pa tu orang-orang di situ, “So dia no tu satu yang ja iko-iko pa Yesus.” Mar Petrus cuma lei da manyangkal. Pe nyanda lama jo, tu orang-orang di situ babilang lei pa Petrus, “So nyanda sala komang, ngana itu satu dari pa dorang lantaran ngana orang Galilea!” Mar Petrus tare cuma da basumpa, “Demi Tuhan, kita nyanda kanal tu orang yang ngoni da bilang!” Kong waktu itu jo tu ayam bakuku kadua kali. Kong dia tainga tu Yesus da bilang pa dia, “Seblum ayam bakuku dua kali, ngana so manyangkal tiga kali kalu ngana kanal pa Kita.” Trus Petrus manangis. Waktu amper siang, tu imam-imam kapala, tua-tua Yahudi, ahli-ahli Taurat deng samua anggota Mahkamah Agama da bakumpul kong baku ator mo kase hukum mati pa Yesus. Dorang ika pa Yesus kong srahkan pa gubernur Pilatus. Kong Pilatus batanya pa Yesus, “Apa butul Bapak tu orang Yahudi pe Raja?” Yesus manyao, “Bapak sandiri yang da bilang itu.” Kong imam-imam kapala bilang banya tuduhan pa Yesus. Pilatus batanya lei pa Dia, “Tarukira jo, pe banya skali tu dorang da tudu pa Ngana. Apa Ngana nyanda mo manyao apa-apa?” Mar Yesus nyanda manyao lei apa-apa sampe Pilatus jadi heran. Tiap taong, orang Yahudi ja beking dong pe hari raya Paskah. Kong di prayaan itu, Pilatus pe biasa ja kase bebas satu orang dari bui, tu orang yang dia se bebas itu ja iko orang Yahudi pe mau. Kong waktu itu, ada tu satu orang, de pe nama Barabas. Dia da dapa maso bui sama-sama deng tu orang-orang laeng, lantaran waktu dorang da malawang pa pemerenta Romawi, dorang da babunung orang. Kong datang orang banya pa Pilatus, dorang minta pa dia supaya se bebas satu orang dari bui sama deng tu dia ja beking. Kong Pilatus batanya pa dorang, “Ngoni suka kita mo kase bebas tu ngoni pe Raja Yahudi ini?” Pilatus batanya bagitu, lantaran dia tau kalu tu imam-imam kapala da srahkan Yesus pa dia lantaran dorang mangiri pa Yesus. Mar tu imam-imam kapala hasut pa tu orang banya for minta pa Pilatus supaya se bebas pa Barabas for dorang. Kong Pilatus batanya ulang pa dorang, “No kalu bagitu, apa tu kita musti beking deng ni orang yang ngoni ja bilang raja orang Yahudi?” Dorang bataria lei, “Se salib jo pa Dia!” Kong Pilatus batanya pa dorang, “Apa so tu kejahatan yang Dia da beking?” Mar dorang tare cuma bataria lebe kuat, “Se salib jo pa Dia!” Kong lantaran Pilatus suka mo se snang pa tu orang banya itu, dia se bebas pa Barabas for dorang, deng dia suru cambok pa Yesus kong srahkan for se salib. Abis itu, tentara-tentara bawa pa Yesus ka kintal istana Pilatus, kong dorang pangge samua dong pe tamang tentara bakumpul di situ. Dorang kase pake akang juba warna pars pa Dia. Abis itu dorang beking satu mahkota dari cabang-cabang kacili yang baduri, kong se pake pa Yesus pe kapala. Abis itu dorang mulai pura-pura se hormat pa Dia, dorang bilang, “Hidop orang Yahudi pe raja!” Dorang baku ganti pukul tu Yesus pe kapala deng buluh kong luda akang pa Dia. Abis itu dorang berlutut pura-pura se hormat pa Dia. Abis dorang basosere pa Dia, dorang buka tu juba pars yang da se pake pa Dia, kong kase pake ulang tu Dia pe baju. Abis itu, dorang bawa pa Yesus kaluar dari kota Yerusalem for se salib. Samantara dorang bajalang, dorang baku dapa deng satu orang Kirene tu de pe nama Simon. Dia itu Aleksander deng Rufus pe papa. Dia datang dari luar kota. Trus tu tentara-tentara paksa pa dia pikul Yesus pe salib. Dorang bawa pa Yesus ka satu tampa yang de pe nama Golgota, tu de pe arti ‘Tampa Tengkorak’. Di tampa itu, tu tentara-tentara kase pa Yesus anggor yang da campur deng obat mur for se kurang rasa saki, mar Yesus nimau mo minum. Abis itu, dorang se salib pa Yesus, kong dorang se berbage Dia pe baju deng cara cabu lot for mo tentukan masing-masing pe bagean. Waktu jam sambilan pagi, dorang se salib pa Yesus. Kong ada satu papang da tulis akang tu alasan kiapa sampe se salib pa Yesus, bagini tu da tulis, “Ini tu orang Yahudi pe raja.” Dorang lei da se salib dua orang prampok baku sabla deng Dia, tu satu di sabla kanan kong tu satu lei di sabla kiri pa Dia. [ Deng bagitu, so gnap apa tu da tulis di Kitab Suci bagini, “Dia mo tarekeng di antara orang-orang jaha”.] Orang-orang tu da lewat di situ se goyang-goyang dong pe kapala kong bahina pa Yesus. Dorang bilang pa Dia, “Hei, Ngana to bilang kalu Ngana bole mo se rubu tu Ruma Ibada Pusat kong mo beking ulang dalam tiga hari? No Ngana turung jo dari tu salib itu kong se slamat jo Ngana pe diri!” Tu imam-imam kapala deng tu ahli-ahli Taurat bahina lei pa Yesus. Dorang baku bilang, “Orang laeng Dia kase slamat, mar De pe diri sandiri Dia nyanda dapa se slamat! Kalu memang butul Dia itu Mesias tu Raja yang se slamat pa manusia, tu orang Israel pe Raja, mustinya Dia turung dari tu salib itu supaya torang bole mo lia kong percaya.” Tu dua orang yang da se salib sama-sama deng Yesus bahina lei pa Dia. Abis itu, waktu jam dua blas siang tu sluru daera itu jadi glap sampe jam tiga sore. Kong pas jam tiga sore, Yesus babilang deng suara kuat pake Dia pe bahasa sandiri, “Eloi, Eloi lama sabakhtani?” tu de pe arti ‘Tuhan Allah, Kita pe Tuhan Allah, kiapa Tuhan Allah kase tinggal pa Kita?’ Pe dengar itu, bebrapa orang yang da badiri di situ babilang, “Co dengar, Dia da bapangge pa nabi Elia.” Kong ada satu orang capat-capat ambe spons, dia se colo di anggor asang kong se cucu di buluh trus kase pa Yesus for minum. Kong tu orang itu bilang, “Biar jo torang tunggu kong lia kalu Elia mo datang for se turung pa Dia.” Kong Yesus bataria kuat-kuat, abis itu srahkan De pe nyawa. Waktu itu, tu kaeng pampele basar yang da se gantong for pele tu Ruang Mahasuci di Ruma Ibada Pusat iko tarabe jadi dua dari atas sampe bawa. Ada tu satu perwira Romawi yang da badiri di muka pa Yesus pe salib. Waktu dia lia Yesus mati deng cara bagitu, dia bilang, “Memang butul, Dia ini Anak Allah!” Waktu itu ada bebrapa parampuang tu da lia-lia dari jao. Dari antara pa dorang ada Maria orang Magdala, Maria tu Yakobus muda deng Yoses pe mama, deng lei ada Salome. Dorang itu yang da iko deng da layani pa Yesus waktu Dia ada di Galilea. Kong ada lei banya parampuang laeng di situ tu da iko sama-sama deng Yesus ka Yerusalem. Waktu Yesus dapa salib itu hari jumat, pas di hari persiapan for hari Sabat. Waktu itu, so mo malam. Di situ ada tu satu orang de pe nama Yusuf. Yusuf ini orang Arimatea, kong banya orang hormat pa dia sbagai anggota Mahkamah Agama Yahudi. Dia lei da tunggu-tunggu tu waktu Tuhan Allah Berkuasa sbagai Raja. Jadi lantaran so mo malam, Yusuf pigi deng brani pa Pilatus kong minta Yesus pe mayat for se kubur. Waktu Pilatus dengar Yesus so mati, dia jadi heran lantaran Yesus pe capat da mati. So itu dia pangge satu perwira di situ kong cari tau dari dia kalu Yesus so mati. Kong tu perwira manyao, “Butul, pak. Yesus memang so mati.” Waktu Pilatus da dengar dari tu perwira kalu Yesus so mati, Dia kase isin pa Yusuf for pi ambe tu Yesus pe mayat for se kubur. So itu Yusuf pi bli kaeng puti, kong dia kase turung tu Yesus pe mayat dari salib, dia se lingkar akang Yesus pe mayat deng kaeng puti itu, trus se kubur di satu goa yang da gale di bukit batu. Klar itu, dia kase guling satu batu basar for se tutu tu lobang goa. Samantara itu, Maria orang Magdala deng Maria tu Yoses pe mama da tarukira bae-bae tu tampa da kubur akang pa Yesus. Pe Sabtu malam, tu hari Sabat so lewat. So itu Maria orang Magdala, Maria tu Yakobus pe mama deng Salome pi babli minya wangi for kase sirang pa Yesus pe mayat. Kong de pe hari Minggu tu hari pertama di minggu itu, waktu matahari baru kaluar, dorang pigi ka kubur. Di jalang dorang da baku tanya, “Eh, kira-kira sapa kang yang mo se guling tu batu yang basar yang da se tutu pintu kubur itu?” Mar waktu dorang so lebe dekat di kubur, dorang lia tu batu pe pai itu so taguling dari pa de pe tampa. Waktu dorang maso ka dalam kubur, dorang takage skali lantaran dorang lia di sabla kanan ada satu nyong da pake juba puti da dudu di situ. Kong tu nyong itu bilang pa dorang, “Ngoni jang tako! Kita tau ngoni da cari pa Yesus, tu orang Nazaret yang dong da se salib itu. Dia so hidop ulang. Dia so nyanda ada di sini. Co ngoni lia, ini tu tampa yang da taru akang Dia pe mayat. Jadi skarang, pigi jo se tau pa Dia pe murit-murit, deng pa Petrus bagini, ‘Yesus so hidop ulang kong Dia so pigi lebe dulu ka daera Galilea. Di sana ngoni mo lia pa Dia sama deng tu Dia so perna bilang pa ngoni.’ ” Pe klar itu, dorang iko kaluar dari kubur kong lari lantaran so bingo deng tako skali sampe totofore. Kong dorang nyanda bilang apa-apa pa orang-orang lantaran dorang pe tako. Hari Minggu pagi, waktu Yesus so hidop ulang, Yesus pigi batunjung De pe diri lebe dulu pa Maria orang Magdala. Dari tu Maria itu Yesus perna da kase kaluar tuju setang. Kong Maria pigi pa orang-orang yang ja iko pa Yesus. Dorang samantara berduka deng bamanangis. Di situ Maria se cirita apa tu dia da lia. Mar waktu dorang dengar dari dia kalu Yesus so hidop ulang deng kalu Maria so lia pa Dia, dorang nyanda percaya. Abis itu, Yesus batunjung De pe diri pa De pe dua murit. Dorang dua ini da bajalang ka kampung. Pertama dorang nyanda dapa kanal pa Yesus lantaran Dia dapa lia laeng nyanda sama deng dulu. Mar serta so lama-lama, dorang dapa kanal pa Dia. Kong dorang dua babale pi kase tau pa dong pe tamang-tamang laeng kalu dorang da baku dapa deng Yesus, mar dorang pe tamang-tamang itu nyanda percaya. De pe laste, Yesus batunjung De pe diri pa Dia pe seblas murit. Waktu itu dorang samantara bamakang. Dia togor pa dorang lantaran dorang pe kras hati deng nyanda percaya pa tu orang-orang yang so lia pa Dia da hidop ulang. Kong Dia bilang pa dorang, “Pigi jo ngoni ka sluru dunia, kong kase tau tu Kabar Bae dari Tuhan Allah pa samua orang. Sapa yang percaya kong dapa baptis, dia mo slamat dari hukuman dosa. Mar sapa yang nyanda percaya, dia mo dapa hukuman. Orang yang percaya mo beking tanda-tanda rupa ini: mo user setang-setang pake Kita pe nama, mo babicara pake bahasa yang dorang blum tau, mo pegang ular babisa deng dong pe tangan, deng mo minum racun mar dorang nyanda mo apa-apa. Dorang mo taru dong pe tangan pa orang-orang saki kong tu orang saki mo jadi bae.” Pe klar Tuhan Yesus babicara pa De pe murit-murit, Dia taangka ka sorga kong dudu di tampa terhormat di sabla kanan pa Tuhan Allah. Abis itu, Yesus pe murit-murit pigi kamana-mana kong kase tau tu Kabar Bae tentang Yesus pa orang-orang. Samantara itu, Tuhan bakarja sama-sama deng dorang deng Tuhan bantu pa dorang beking mujisat-mujisat, kong deng cara bagitu orang-orang bole tau kalu tu firman itu memang butul dari Tuhan. Bapak Teofilus yang kita hormat. Banya orang so brusaha tulis tu brita tentang Yesus waktu Dia ada di tenga-tenga pa torang. Dorang da tulis tu samua itu sama deng tu dorang da dengar langsung dari pa orang-orang yang da lia tu samua itu deng dong pe mata kapala sandiri. Tu orang-orang itu no yang dari pertama da lia waktu samua itu da jadi, dorang itu yang da pi kase tau tu brita itu pa orang-orang. Bapak Teofilus yang bae, kita so priksa bae-bae tu samua itu mulai dari pertama. Abis itu kita ambe keputusan for tulis pa bapak samua tu da jadi waktu itu iko de pe urutan. Deng bagitu, bapak bole tau persis kalu apa tu orang da se tau pa bapak memang butul. Waktu Herodes jadi raja di negri Yudea, di situ ada tu satu orang de pe nama Zakharia. Dia itu imam dari klompo imam Abia. Dia pe bini pe nama Elisabet. Dorang dua itu dari keturunan imam Harun. Dorang dua ja beking tu butul di muka pa Tuhan, deng dorang ja beking samua tu Tuhan Allah pe prenta deng tu atoran-atoran. Dorang dua nyanda ada anak lantaran tu Elisabet nimbole mo dapa anak, kong dorang dua lei so tua. Satu kali, Zakharia beking dia pe tugas di muka pa Tuhan Allah di Ruma Ibada Pusat. Dia beking de pe tugas itu lantaran waktu itu klompo imam Abia dapa giliran bertugas di situ. Waktu itu tu klompo imam Abia da cabu lot sama deng tu biasa imam-imam ja beking, kong Zakharia yang da tapili for maso ka dalam Ruma Ibada Pusat for bakar kemenyan. Serta so de pe waktu for bakar kemenyan, dia maso ka dalam Ruang Mahasuci. Samantara itu orang banya yang ada di luar Ruang Mahasuci basombayang. Kage-kage Tuhan pe malaekat batunjung pa Zakharia. Malaekat itu da badiri di sabla kanan meja, tu tampa ja bakar akang kemenyan. Pe lia tu malaekat itu, Zakharia takage kong jadi tako skali. Mar tu malaekat bilang pa dia, “Zakharia, ngana jang tako! Tuhan Allah so dengar ngana pe sombayang. Elisabet tu ngana pe bini nanti mo se lahir satu anak laki-laki, kong ngana musti kase nama Yohanes pa tu anak itu. Tu anak nanti mo beking ngana pe hati jadi snang skali, kong banya orang lei mo iko snang lantaran dia da lahir. Dia mo jadi orang basar di mata pa Tuhan. Dia nimbole minum anggor ato minum tu minuman laeng yang beking mabo. Kong dari lei dia masi pa de pe mama pe puru, Roh Kudus so kuasai pa dia. Nanti dia mo bimbing banya orang Israel babale iko pa Tuhan Allah, tu Tuhan yang dorang ja semba. Tu sifat deng kuasa yang dulu ada pa nabi Elia mo ada pa dia. Kong dia mo datang lebe dulu seblum Tuhan for se siap tu orang-orang for Tuhan mo datang. Dia mo beking tu papa-papa mo jadi sayang pa dorang pe anak-anak. Dia lei mo beking tu orang yang pangmalawang pa Tuhan mo babale ja beking tu butul di muka pa Tuhan Allah.” Kong Zakharia bale batanya pa tu malaekat itu, “Bagimana dang kita bole tau kalu kita deng kita pe bini mo dapa anak? Soalnya torang so tua.” Kong tu malaekat manyao pa dia, “Kita ini Gabriel, kita yang slalu ada di muka pa Tuhan Allah for beking tu Dia da suru. Dia da suru pa kita for bilang tu kabar bagus ini pa ngana. Mar ngana nyanda percaya deng tu kita da bilang. So itu ngana mo jadi wowo sampe samua tu kita da bilang itu jadi.” Samantara itu, tu orang banya yang ada di luar da batunggu trus pa Zakharia. Dorang heran lantaran dia pe lama skali di dalam Ruang Mahasuci. Waktu Zakharia kaluar, dia so nimbole bicara apa-apa pa dorang. Mar dia basein trus pa dorang lantaran dia tetap wowo. Pe lia bagitu, dorang iko dapa tau kalu dia da dapa penglihatan di dalam Ruang Mahasuci. Kong serta Zakharia pe tugas so klar, dia pulang pa de pe ruma. Serta so bebrapa lama, dia pe bini Elisabet hamil. Kong slama lima bulan Elisabet cuma da bakurung di ruma. Elisabet bilang, “Tuhan so se tunjung Dia pe sayang pa kita lantaran kita so hamil, kong orang laeng so nyanda mo basosere lei pa kita.” Waktu Elisabet so hamil anam bulan, Tuhan Allah suru lei tu malaekat Gabriel pigi ka Nazaret, tu satu kota di daera Galilea. Gabriel dapa suru pigi pa satu nona yang masi prawan. Tu nona itu pe nama Maria. Dia so baku janji mo kaweng deng satu nyong, tu de pe nama Yusuf. Yusuf itu raja Daud pe keturunan. Malaekat itu datang pa Maria kong bilang pa dia, “Salam hei Maria. Tuhan Allah sama-sama deng ngana, Dia mo kase tunjung Dia pe bae pa ngana.” Maria takage skali da dengar tu malaekat da bilang, kong dia pikir-pikir dalam hati apa tu malaekat itu pe maksut. Trus tu malaekat itu babilang lei pa dia, “Maria, ngana jang tako. Soalnya Tuhan Allah da se tunjung Dia pe bae pa ngana. So nyanda lama lei ngana mo hamil kong mo kase lahir satu anak laki-laki. Ngana se nama tu anak itu, ‘Yesus’. Dia itu mo jadi orang basar, deng orang-orang mo bilang kalu Dia itu Anak Allah Yang Mahatinggi. Tuhan Allah mo beking Dia berkuasa sama deng Dia pe nene moyang tu raja Daud yang da berkuasa dulu. Dia mo jadi raja yang berkuasa for slama-lamanya pa bangsa Israel, tu Yakub pe keturunan. Kong Dia pe krajaan mo ada trus sampe slama-lamanya.” Mar Maria bilang pa tu malaekat itu, “Bagimana lei itu bole mo jadi? Soalnya kita blum perna tidor deng laki-laki.” Tu malaekat itu manyao pa dia, “Roh Kudus mo turung pa ngana, kong Tuhan Allah Yang Mahatinggi mo kuasai pa ngana. So itu tu Anak yang ngana mo se lahir itu, orang mo bilang kudus, tu Anak Allah. Tarukira jo, tu ngana pe sudara Elisabet, dia itu orang bilang so nimbole mo dapa anak, deng lei dia so tua. Mar skarang ini dia so hamil anam bulan. Samua jadi bagitu, lantaran for Tuhan Allah samua Dia mampu mo beking.” Kong Maria bilang pa tu malaekat, “Kita ini cuma orang yang ja beking tu Tuhan da suru. Biar jo jadi pa kita samua tu da bilang tadi.” Abis itu, tu malaekat se tinggal pa Maria. Nyanda brapa lama, Maria capat-capat pigi ka satu kota di daera pegunungan di tana Yehuda. Dia pigi pa Zakharia pe ruma. Pe sampe di sana, dia maso ka ruma kong kase salam pa Elisabet. Waktu Elisabet dengar tu Maria pe salam, tu anak yang ada pa Elisabet pe puru iko bagra, kong Roh Kudus kuasai pa Elisabet. Trus Elisabet bilang deng suara kuat, “Maria, Tuhan Allah so kase berkat pa ngana lebe dari samua parampuang! Tuhan kase lei berkat pa tu Anak yang ngana mo kase lahir. Kita rasa taangka skali lantaran kita bukang sapa-sapa mar Tuhan pe mama datang pa kita. Co ngana tarukira, waktu kita dengar tu ngana pe salam tadi, kita pe anak dalam puru iko bagra lantaran snang. Ngana percaya tu Tuhan Allah da bilang pa ngana mo jadi, so itu ngana yang paling snang.” Abis itu, Maria bilang, “Kita pe jiwa puji deng hormat pa Tuhan Allah. Kita pe hati lei snang lantaran Tuhan Allah tu kita pe Juruslamat. Soalnya Dia so tarukira akang pa kita, tu orang yang nyanda ada arti apa-apa, yang cuma ja beking tu Dia da suru. Kong mulai dari skarang samua orang mo bilang kalu kita ini parampuang yang paling snang, lantaran Tuhan Allah Yang Mahakuasa so beking hal-hal yang luar biasa pa kita. Dia itu memang suci. Tuhan Allah se tunjung tu Dia pe sayang pa orang yang hidop punung hormat pa Dia, dari satu keturunan ka keturunan laeng. Kong deng Dia pe kuasa, Dia beking hal-hal yang luar biasa. Dia lei beking kacau tu orang-orang yang sombong sampe dong pe rencana nyanda jadi. Dia kase turung tu orang-orang yang berkuasa dari pa dorang pe kedudukan, kong Dia angka tu orang-orang yang nyanda penting. Dia kase samua yang bae pa tu orang-orang miskin sampe dorang jadi puas, kong pa tu orang-orang kaya Dia suru pigi deng nyanda dapa apa-apa. Dia tolong pa Dia pe hamba tu orang-orang Israel, Dia da inga tu Dia pe janji for se tunjung tu De pe rasa kasiang pa torang pe nene moyang, tu Abraham deng Abraham pe keturunan. Tu janji itu memang Dia so bilang dari dulu kong berlaku sampe slama-lamanya.” Kong Maria tinggal deng Elisabet kira-kira tiga bulan, abis itu dia pulang pa de pe ruma. Tu waktu for Elisabet mo melahirkan so sampe, kong dia se lahir satu anak laki-laki. Elisabet pe birman-birman deng de pe sudara-sudara dapa dengar kalu Tuhan Allah so kase tunjung tu Dia pe rasa kasiang pa Elisabet sampe Elisabet bole dapa anak, kong dorang samua iko snang sama-sama deng dia. Waktu tu bayi so umur dlapan hari, dia mo dapa sunat iko tu dorang pe atoran agama Yahudi. Kong tu birman-birman deng sudara-sudara datang ka situ. Dorang mo se nama tu bayi itu Zakharia sama deng de pe papa pe nama. Mar tu ade itu pe mama bilang pa dorang, “Nimbole! Dia itu pe nama Yohanes.” Kong dorang balas babilang pa dia, “Kiapa bagitu dang? Soalnya nyanda ada dari pa ngoni pe nene moyang tu da pake nama Yohanes.” Trus dorang basein pa Zakharia for batanya kalu tu dia pe anak mo se nama apa. Zakharia basein minta alat tulis, kong dia tulis tu kata-kata ini, “De pe nama Yohanes”. Kong samua orang yang ada di situ jadi heran. Waktu itu jo, Zakharia bole babicara ulang, kong dia puji-puji pa Tuhan Allah. Trus samua orang yang tinggal di dekat situ jadi heran deng tako. Kong samua tu da jadi itu tasiar pa orang-orang yang tinggal di daera pegunungan di Yudea. Kong samua orang yang da dengar itu batanya dalam hati, “Mo jadi apa kang tu anak kalu so basar?” Dorang bapikir bagitu lantaran Tuhan Allah da sama-sama deng tu anak itu. Abis itu, Roh Kudus kuasai pa Zakharia, tu Yohanes pe papa. Trus Zakharia kase tau tu Tuhan Allah da bilang pa dia, “Puji pa Tuhan Allah, tu torang orang Israel pe Tuhan! Soalnya Dia so datang pa torang, tu Dia pe orang-orang for kase bebas pa torang. Dia so angka satu Orang yang punya kuasa for mo kase slamat pa torang. Tu Orang itu dari raja Daud pe keturunan. Samua itu Dia so janji dari dulu, kong tu janji itu Dia da se tau lewat tu De pe nabi-nabi yang Dia so pili. Tuhan pe Orang ini mo kase bebas pa torang dari tong pe musu-musu, deng dari kuasa orang-orang yang binci pa torang. Tuhan beking bagitu for se tunjung tu Dia pe rasa kasiang pa torang pe nene moyang, deng lei lantaran Dia inga tu Dia pe janji yang kudus pa dorang. Tu janji itu Tuhan da bilang deng sumpa pa torang pe nene moyang Abraham. Dia bajanji kalu Dia mo se lapas pa torang dari tong pe musu-musu. Deng bagitu, torang nyanda rasa tako mo layani pa Dia. Kong slama torang hidop, torang hidop kudus deng cuma beking tu butul di muka pa Dia. Kong ngana Yohanes, ngana ini kita pe anak. Nanti orang mo bilang kalu ngana itu Tuhan Allah Yang Mahatinggi pe nabi, tu ja kase tau Dia pe pesan pa orang-orang. Dorang bilang bagitu, lantaran ngana mo datang lebe dulu dari Tuhan, for se siap orang-orang pe hati mo trima pa Dia. Ngana mo kase tau pa Tuhan Allah pe orang-orang, kalu Dia mo kase slamat pa dorang deng cara kase ampung pa dorang dari dong pe dosa-dosa. Soalnya torang pe Tuhan Allah itu butul-butul rasa kasiang pa torang. So itu Dia datang kase slamat pa torang sama deng tu matahari yang muncul for kase sinar. Dia itu mo datang se trang pa orang-orang yang hidop dalam glap, yang blum kanal pa Tuhan deng tu orang-orang yang tako mati. Dia mo datang pa torang supaya torang tau tu jalang for torang hidop deng hati tenang.” Yohanes lebe hari lebe tatamba basar, trus dia lebe kuat dalam hal-hal rohani. Kong dia tinggal di padang gurun sampe dia mulai beking de pe playanan di tenga-tenga orang Israel. Waktu Agustus jadi raja paling tinggi di krajaan Romawi, dia kase kaluar prenta supaya samua orang di daera-daera yang ada di bawa dia pe krajaan pe kuasa, se daftar tu dorang pe nama for sensus. Sensus ini, pertama kali da beking waktu Kirenius jadi gubernur di Siria. Samua orang musti pigi pa dorang pe kota masing-masing for se daftar dorang pe nama. Kong Yusuf tu raja Daud pe keturunan, dia pigi lei dari kota Nazaret di daera Galilea ka daera Yudea di kota raja Daud, tu de pe nama Betlehem. Yusuf pigi sama-sama deng Maria tu de pe tunangan supaya dorang dua lei bole se daftar tu dong pe nama di sana. Waktu itu, Maria samantara hamil. Kong waktu dorang di Betlehem, so de pe waktu for Maria mo melahirkan. Kong Maria da se lahir satu anak laki-laki, tu de pe anak pertama. Dia bungkus tu anak itu deng kaeng kong kase tidor di tampa makang binatang. Dorang beking bagitu lantaran dorang so nyanda dapa tampa for manginap akang. Waktu malam, ada bebrapa gembala yang da tinggal di padang rumpu di luar Betlehem, dorang da jaga tu dong pe kambing deng domba. Kong kage-kage satu dari Tuhan Allah pe malaekat batunjung pa dorang. Tu Tuhan Allah pe cahaya yang trang skali basinar tutu pa dorang, kong dorang so tako skali. Mar tu malaekat itu bilang pa dorang, “Ngoni jang tako! Soalnya kita datang kamari for kase tau pa ngoni satu brita yang bae. Tu brita ini mo beking samua orang snang. Bagini tu brita: ini hari, Kristus tu Raja yang mo se slamat pa manusia so lahir. Dia da lahir di Betlehem, di kota Daud. Dia itu Tuhan yang mo se slamat pa ngoni dari hukuman dosa. Ini de pe tanda supaya ngoni dapa kanal pa tu bayi itu: ngoni nanti mo lia satu bayi yang da bungkus deng kaeng. Tu bayi itu da se tidor di tampa makang binatang.” Kong kage-kage dorang dapa lia ada pe banya skali malaekat dari sorga yang da sama-sama deng tu satu malaekat itu. Tu malaekat-malaekat itu puji-puji pa Tuhan Allah, “Puji deng hormat jo pa Tuhan Allah yang ada di sorga! Kong di bumi, Tuhan Allah kase damai sejahtra pa tu orang-orang yang Dia snang.” Abis itu, tu malaekat-malaekat babale ulang ka sorga. Kong tu gembala-gembala baku bilang, “Mari jo torang pigi ka Betlehem. Torang mo lia apa tu da jadi di sana, sama deng tu Tuhan Allah da bilang pa torang.” Jadi dorang capat-capat pigi ka Betlehem. Di sana dorang dapa pa Maria, Yusuf deng tu bayi yang da se tidor di tampa makang binatang. Waktu dorang lia tu bayi itu, dorang kase tau pa orang-orang di situ samua tu malaekat da bilang pa dorang tentang tu bayi itu. Kong samua orang jadi heran da dengar tu gembala-gembala itu pe cirita. Mar samua tu cirita itu Maria simpang pa de pe hati, kong dia pikir bae-bae tentang samua itu. Abis itu, tu gembala-gembala babale ka padang rumpu. Kong samantara itu, dorang puji deng hormat pa Tuhan Allah lantaran samua yang dorang da lia sama persis deng tu malaekat da bilang pa dorang. Serta tu bayi so gnap dlapan hari, dorang sunat tu bayi itu iko tu dong pe atoran agama. Kong waktu itu, dorang kase nama Yesus pa Dia. Tu nama itu, nama yang malaekat da se tau pa Maria seblum dia hamil. Ada satu atoran tu ada di kitab Taurat yang da bilang kalu ampa pulu hari abis parampuang dapa ade, tu parampuang itu musti beking upacara beking bersi diri. So itu, waktu so sampe de pe waktu for Maria beking tu upacara itu, dia deng Yusuf pigi ka Yerusalem for beking itu. Dorang lei da bawa pa Yesus ka sana for srahkan pa Tuhan, lantaran di atoran-atoran di kitab Taurat da tulis bagini, “Samua orang pe anak laki-laki pertama, dorang musti srahkan tu anak itu pa Tuhan for jadi Dia punya.” Kong dorang lei kase korban persembahan satu pasang burung tekukur ato dua ekor burung pombo, iko tu atoran yang ada di kitab Taurat. Waktu itu di Yerusalem, ada satu orang de pe nama Simeon. Dia itu orang yang ja beking tu butul di muka pa Tuhan deng ja iko Tuhan pe mau. Dia da tunggu-tunggu tu waktu Tuhan Allah mo kase slamat bangsa Israel. Kong Roh Kudus slalu sama-sama deng dia. Roh Kudus so kase tau pa dia, kalu dia nyanda mo mati seblum dia lia pa Kristus tu Raja yang se slamat pa manusia. Kong waktu Roh Kudus suru pa Simeon pi maso ka kintal di kompleks Ruma Ibada Pusat, Yusuf deng Maria lei maso ka situ. Yusuf deng Maria ka situ for srahkan Yesus pa Tuhan Allah iko tu atoran-atoran yang ada di kitab Taurat. Trus waktu Simeon lia tu Anak itu, dia pi ambe kong polo tu Anak itu trus puji-puji pa Tuhan Allah, dia bilang, “Ya Tuhan, tempo hari Tuhan so janji pa kita, kong skarang Tuhan so se gnap tu janji itu. Jadi skarang, kita tu ja beking tu Tuhan da suru, biar jo kita mati deng tenang. Soalnya kita so lia deng kita pe mata kapala sandiri tu Orang yang Tuhan da utus for se slamat pa manusia. Tu Orang yang mo se slamat pa manusia itu, Tuhan da se siap pa Dia di muka samua bangsa. Tu Orang itu sama deng trang, Dia se trang tu orang-orang yang bukang Yahudi pe hati supaya dorang bole datang pa Tuhan Allah, deng lei supaya orang-orang puji deng hormat tu Tuhan pe bangsa Israel.” Yusuf deng Maria taheran-heran da dengar samua tu Simeon da bilang tentang dorang pe Anak itu. Kong Simeon basombayang supaya Tuhan Allah kase berkat pa Yusuf, Maria deng tu Anak. Trus dia bilang pa Maria, tu Anak pe mama, “Maria, tarukira jo bae-bae, Tuhan Allah so tentukan kalu so lantaran ni Anak ini nanti banya orang Israel yang mo binasa, mar so lantaran Dia lei nanti banya orang Israel laeng yang mo slamat. Dia itu jadi tanda dari tu Tuhan Allah pe kuasa, mar banya orang nyanda mo trima pa Dia. Tuhan Allah mo pake pa Dia supaya bole dapa tau tu orang-orang pe isi hati. Trus ngana Maria, ngana nanti mo sedi skali lantaran ni Anak, tu ngana pe sedi dapa rasa sama deng ngana pe hati da cucu deng peda.” Ada tu satu parampuang tu de pe nama Hana. Dia itu so tua. Dia ja se tau pa orang-orang tu pesan yang Tuhan Allah da bilang pa dia. Dia ini anak dari Fanuel dari suku Asyer. Kong waktu Hana kaweng trus so hidop slama tuju taong deng dia pe laki, de pe laki mati kong dia jadi janda sampe skarang. Dia pe umur skarang so dlapan pulu ampa taong. Dia itu nyanda perna se tinggal tu Ruma Ibada Pusat. Siang deng malam dia baibada pa Tuhan Allah deng cara bapuasa deng basombayang. Kong waktu Simeon da bacirita sama-sama deng Yusuf deng Maria, Hana lei datang ka situ. Hana da bilang makase pa Tuhan Allah kong dia se tau tentang tu Anak itu pa samua orang yang ada di situ, tu orang-orang yang da tunggu-tunggu tu hari waktu Tuhan Allah mo se bebas dorang pe bangsa Israel. Serta Yusuf deng Maria so klar beking samua tu upacara iko tu atoran-atoran di kitab Taurat, dorang babale ka Nazaret, tu dong pe kota sandiri di daera Galilea. Trus Yesus lebe tatamba basar deng jadi kuat. Dia lei jadi bijaksana, deng Tuhan Allah se tunjung tu Dia pe bae pa Yesus. Tiap taong, Yesus pe orang tua pigi ka Yerusalem for iko tu dorang pe prayaan Paskah tu hari for pringati waktu Tuhan Allah se bebas dorang pe nene moyang dari Mesir. Waktu Yesus so umur dua blas taong, Dia pe orang tua pigi ka Yerusalem for iko tu hari raya itu sama deng tu biasa orang Yahudi ja beking. Kong waktu itu, dorang lei da bawa pa Yesus. Tu prayaan itu ja beking bebrapa hari. Kong serta tu prayaan so klar, Yesus pe orang tua bajalang pulang ka Galilea, mar Yesus da tinggal di Yerusalem kong Dia pe orang tua nintau kalu Dia da tinggal di situ. Dorang kira Yesus ada di antara orang-orang yang da bajalang sama-sama deng dorang. Waktu dorang so bajalang satu hari, dorang mulai cari pa Dia pa dorang pe sudara-sudara deng orang-orang yang dorang kanal. Mar waktu dorang nyanda dapa pa Dia, dorang babale ka Yerusalem for cari pa Dia. Serta so tiga hari, dorang dapa pa Yesus di kintal kompleks Ruma Ibada Pusat. Dia da dudu badengar tu guru-guru agama Yahudi deng babatanya pa dorang. Kong samua orang yang da dengar tu Yesus ja bilang jadi taheran-heran, lantaran Dia mangarti banya hal deng lei Dia pe jawaban bagus skali. Pe lia itu, Yesus pe papa deng mama jadi heran skali. Kong Dia pe mama bilang pa Dia, “Yesus, kita deng Ngana pe papa so tako skali da cari-cari pa Ngana. Kiapa dang kong Ngana beking bagini pa torang?” Mar Yesus cuma da manyao, “Papa deng mama mustinya nyanda usa cari pa Kita. Soalnya papa deng mama pasti so tau kalu Kita ini musti ada pa Kita pe Bapa pe ruma.” Mar Dia pe papa deng mama nyanda mangarti apa tu Dia da bilang pa dorang. Kong Dia pe mama simpang tu samua itu di dalam hati. Yesus pulang ka Nazaret sama-sama deng De pe papa deng mama, kong Dia tetap dengar-dengaran pa dorang. Yesus lebe tamba basar, lebe mangarti banya hal, deng Tuhan Allah lebe tamba sayang pa Dia, bagitu lei deng orang-orang lebe tamba sayang pa Dia. Tiberius da jadi raja yang paling tinggi di krajaan Romawi, kong dia so baprenta slama lima blas taong. Kong waktu itu, Pontius Pilatus tu da jadi gubernur di daera Yudea, deng Herodes tu da jadi raja di daera Galilea. Trus tu Herodes pe kaka Filipus tu da jadi raja di daera Iturea deng Trakhonitis, kong tu Lisanias tu da jadi raja di daera Abilene. Trus tu Hanas deng Kayafas tu da jadi imam basar. Kong waktu itu, Tuhan Allah da babicara pa Yohanes tu Zakharia pe anak di padang gurun. Kong Yohanes pigi ka sluru daera di sekitar kuala Yordan. Di situ Yohanes deng suara kuat se tau pa orang-orang supaya dorang dapa baptis. Trus dorang dapa baptis, itu jadi tanda kalu dorang so bertobat kong Tuhan Allah se ampung pa dorang dari tu dorang pe dosa-dosa. Tu Yohanes da beking itu sama deng tu da tulis di kitab nabi Yesaya bagini, “Ada orang yang babicara deng suara kuat di padang gurun. Tu orang itu babilang, ‘Buka jalang for trima pa Tuhan, kong kase tre tu jalang for sambut pa Dia.’ Tiap lembah mo dapa tambung. Tiap gunung deng bukit mo se rata. Tu jalang yang babelok-belok mo se tre, trus yang balobang-lobang mo dapa tambung for se rata. Kong samua orang mo lia bagimana Tuhan Allah se slamat pa orang-orang dari hukuman dosa.” Banya orang datang pa Yohanes for dapa baptis. Kong Yohanes bilang pa tu orang banya itu, “Hei ngoni orang-orang jaha, ngoni pe jaha itu sama deng ular yang babisa! Jang ngoni kira kalu ngoni dapa baptis trus ngoni bole lolos dari Tuhan pe hukuman. So itu ngoni musti hidop ja beking tu bae sama deng tu cara hidop yang pantas for orang yang so bertobat. Kalu ngoni beking bagitu, ngoni bole mo se sama deng tu pohong yang babua bagus. Jang ngoni kira kalu ngoni so nyanda mo dapa hukuman lantaran ngoni itu Abraham pe keturunan. Kita bilang pa ngoni, kalu Tuhan Allah suka, Dia bole mo beking tu batu-batu ini jadi Abraham pe keturunan. Tuhan so siap mo hukum samua orang yang nyanda bertobat, itu sama deng satu orang yang so siap-siap deng de pe tamako di akar pohong for potong tu pohong yang nyanda babua bagus, kong nanti abis potong tu pohong itu, dia mo buang ka api.” Abis itu, tu orang banya batanya pa dia, “No kalu bagitu, apa dang tu torang musti beking?” Yohanes manyao pa dorang, “Sapa tu ada dua baju, dia musti kase akang satu pa orang yang nyanda ada baju. Kong sapa yang ada makanan, dia lei musti berbage akang tu makanan pa orang yang nyanda ada makanan.” Di situ lei da datang tu petugas-petugas pajak supaya Yohanes bole mo baptis. Kong dorang batanya pa dia, “Guru, apa tu torang musti beking?” Dia manyao, “Waktu batagi pajak, ngoni jang batagi lebe dari tu pemerenta da tentukan.” Di situ lei ada bebrapa tentara kong dorang lei batanya pa Yohanes, “Kong torang dang, apa tu torang musti beking?” Dia bilang pa dorang, “Ngoni jang baperas pa orang laeng, deng jang barampas orang laeng pe doi. Ngoni musti puas deng tu gaji yang ngoni ja trima.” Waktu itu, tu orang-orang Yahudi da tunggu-tunggu deng baharap pa Kristus tu Raja yang se slamat pa manusia mo datang. So itu dorang da batanya-tanya pa dong pe dalam hati kalu Yohanes itu tu Kristus. So itu Yohanes bilang pa dorang samua, “Kita babaptis pa ngoni pake aer, mar nanti ada satu Orang yang mo datang, Dia yang lebe berkuasa dari kita. Hele mo bantu for buka akang Dia pe tali capatu sama deng tu biasa orang karja ja beking, kita nyanda pantas. Dia yang mo baptis pa ngoni pake Roh Kudus deng api. Dia mo kase pisa tu orang yang ja iko pa Dia dari tu orang yang nyanda ja iko pa Dia. Dia itu bole mo se sama deng tu orang yang da batapis pake sosiru for se pisa tu konga dari gandum. Tu gandum dia simpang di lumbung, mar tu konga dapa buang ka api yang nyanda mati-mati.” Kong deng banya nasehat laeng lei Yohanes se tau tu Kabar Bae dari Tuhan pa orang banya. Kong Yohanes lei da togor pa raja Herodes. Tu raja Herodes ini tu da pegang prenta di daera Galilea. Yohanes da togor pa raja Herodes lantaran Herodes da ambe pa Herodias jadi de pe bini, padahal waktu itu Herodias so kaweng deng Filipus tu dia pe sudara sandiri. Yohanes da togor lei pa dia lantaran tu samua kejahatan laeng yang dia da beking. Mar Herodes cuma da tamba de pe kejahatan, dia tare se maso tu Yohanes ka bui. Seblum Yohanes dapa tangka, dia babaptis banya orang kong Yesus lei dia da baptis. Kong waktu Yesus dapa baptis, Yesus basombayang kong tu langit tabuka, trus tu Roh Kudus yang rupa burung pombo turung di atas pa Dia. Kong dapa dengar Tuhan Allah pe suara dari langit, “Ngana ini Kita pe Anak, Kita sayang pa Ngana. Ngana beking Kita pe hati snang.” Waktu Yesus mulai Dia pe playanan, De pe umur kira-kira tiga pulu taong. Kong tu orang-orang tau kalu Yesus itu Yusuf pe anak. Tu Yusuf pe papa, de pe nama Eli. Eli pe papa Matat, Matat pe papa Lewi, Lewi pe papa Malkhi, Malkhi pe papa Yanai, Yanai pe papa Yusuf, Yusuf pe papa Matica, Matica pe papa Amos, Amos pe papa Nahum, Nahum pe papa Hesli, Hesli pe papa Nagai, Nagai pe papa Maat, Maat pe papa Matica, Matica pe papa Simei, Simei pe papa Yosekh, Yosekh pe papa Yoda, Yoda pe papa Yohanan, Yohanan pe papa Resa, Resa pe papa Zerubabel, Zerubabel pe papa Sealtiel, Sealtiel pe papa Neri, Neri pe papa Malkhi, Malkhi pe papa Adi, Adi pe papa Kosam, Kosam pe papa Elmadam, Elmadam pe papa Er, Er pe papa Yesua, Yesua pe papa Eliezer, Eliezer pe papa Yorim, Yorim pe papa Matat, Matat pe papa Lewi, Lewi pe papa Simeon, Simeon pe papa Yehuda, Yehuda pe papa Yusuf, Yusuf pe papa Yonam, Yonam pe papa Elyakim, Elyakim pe papa Melea, Melea pe papa Mina, Mina pe papa Matata, Matata pe papa Natan, kong Natan pe papa Daud, Daud pe papa Isai, Isai pe papa Obed, Obed pe papa Boas, Boas pe papa Salmon, Salmon pe papa Nahason, Nahason pe papa Aminadab, Aminadab pe papa Admin, Admin pe papa Arni, Arni pe papa Hezron, Hezron pe papa Peres, Peres pe papa Yehuda, Yehuda pe papa Yakub, Yakub pe papa Ishak, Ishak pe papa Abraham, Abraham pe papa Terah, Terah pe papa Nahor, Nahor pe papa Serug, Serug pe papa Rehu, Rehu pe papa Peleg, Peleg pe papa Eber, Eber pe papa Salmon, Salmon pe papa Kenan, Kenan pe papa Arpakhsad, Arpakhsad pe papa Sem, Sem pe papa Nuh, Nuh pe papa Lamekh, Lamekh pe papa Metusalah, Metusalah pe papa Henokh, Henokh pe papa Yared, Yared pe papa Mahalaleel, Mahalaleel pe papa Kenan, Kenan pe papa Enos, Enos pe papa Set, Set pe papa Adam. Kong Adam itu, Tuhan Allah pe anak. Roh Kudus da kuasai pa Yesus kong Yesus se tinggal tu kuala Yordan, trus Roh Kudus bawa pa Yesus ka padang gurun. Di situ Yesus tinggal slama ampa pulu hari, kong tu setang pe bos goda pa Dia. Kong slama ampa pulu hari itu, Dia nyanda makang apa-apa trus Yesus jadi lapar skali. Kong setang pe bos bilang pa Yesus, “Ngana ini Anak Allah to? No kalu bagitu, prenta jo tu batu ini jadi roti.” Kong Yesus manyao pa dia, “Di Kitab Suci ada tulis bagini, ‘Manusia hidop bukang cuma dari roti.’ ” Trus setang pe bos da bawa lei pa Yesus ka satu tampa yang tinggi. Di sana, dia da se tunjung pa Yesus deng capat skali tu samua krajaan di dunia. Trus dia bilang pa Yesus, “Samua tu krajaan di dunia pe kekuasaan deng de pe kekayaan itu kita mo kase pa Ngana! Soalnya samua itu kita so trima kong kita bole kase pa sapa jo yang kita suka mo kase akang. Jadi kalu Ngana berlutut semba pa kita, itu samua mo jadi Ngana punya.” Mar Yesus cuma da manyao pa dia, “Di Kitab Suci da tulis bagini, ‘Torang musti semba pa Tuhan tu torang pe Allah, deng cuma Dia tu torang ja layani.’ ” Abis itu setang pe bos bawa pa Yesus ka Yerusalem, dia taru pa Yesus di tampa yang paling tinggi di Ruma Ibada Pusat. Kong setang pe bos bilang pa Yesus, “Ngana ini Anak Allah to? Kalu bagitu, Ngana baciri jo dari sini! Soalnya di Kitab Suci da tulis bagini tentang Ngana, ‘Tuhan Allah mo suru Dia pe malaekat-malaekat for jaga pa Ngana. Dorang mo dafo pa Ngana waktu Ngana ciri, supaya Ngana pe kaki nyanda kana di batu.’ ” Mar Yesus manyao pa dia, “Di Kitab Suci da tulis lei bagini, ‘Ngoni jang coba-coba pa Tuhan, tu Tuhan Allah yang ngoni semba.’ ” Abis setang pe bos goda pa Yesus deng tu samua itu, dia kase tinggal pa Yesus kong tunggu waktu yang tepat for goda ulang pa Dia. Roh Kudus kuasai pa Yesus kong Yesus babale ka daera Galilea. Kong tu brita tentang Dia tasiar ka samua tampa di daera itu. Dia mangajar di ruma-ruma ibada agama Yahudi kong samua orang puji deng hormat pa Dia. Satu kali Yesus pigi ka Nazaret, tu tampa yang Dia da basar akang. Kong pas hari Sabat, Dia maso ka ruma ibada agama Yahudi sama deng tu biasa Dia ja beking. Dia badiri di sana for baca tu Kitab Suci. Kong ada orang di situ kase pa Yesus tu gulungan kitab dari nabi Yesaya. Trus Dia buka tu gulungan kitab itu, kong Dia dapa tu tulisan bagini, “Tuhan pe Roh ada pa Kita. Soalnya Dia so pili pa Kita for se tau tu Kabar Bae pa orang-orang susa. Kong Dia so utus pa Kita for kase tau pa orang-orang bagini: yang dapa tahang nanti mo bebas, yang buta bole mo balia, yang siksa lantaran orang ja tindas lei nanti mo bebas, kong mo se tau lei kalu tu waktu for Tuhan mo tolong pa orang-orang so sampe.” Abis itu Yesus gulung tu Kitab itu trus kase pa tu petugas di situ, kong Dia dudu. Samua orang yang ada di ruma ibada agama Yahudi itu bahaga pa Dia. Kong Yesus mulai babicara pa dorang, Dia bilang, “Ni hari, waktu ngoni da dengar tu bagean dari Kitab Suci yang Kita da baca tadi, samua itu so jadi.” Kong samua orang di situ bilang kalu tu Dia da bilang itu bagus skali, dorang taheran-heran deng Dia pe kata-kata yang bagus itu. Cuma abis itu dorang bilang bagini, “Dia itu Yusuf pe anak to?” Kong Yesus bilang pa dorang, “Tantu ngoni mo bilang tu pribahasa ini pa Kita, ‘Hei dokter, se bae jo ngana pe diri sandiri.’ Ngoni mo bilang bagitu, lantaran ngoni pikir kalu Kita memang so beking mujisat di kampung Kapernaum sama deng tu ngoni so dengar, paling Kita lei musti beking itu pa Kita pe kampung sandiri. Tarukira jo bae-bae tu Kita mo bilang, nyanda ada nabi yang dapa hormat pa de pe kampung sandiri. Co ngoni dengar tu Kita mo bilang ini, tu Kita mo bilang ini memang da jadi: dulu waktu jaman nabi Elia, Tuhan se tutu tu langit kong ujang nyanda turung slama tiga taong anam bulan, trus ada kelaparan pe hebat di sluru negri Israel. Kong waktu itu, ada banya janda di Israel. Mar Tuhan Allah nyanda utus Elia pigi pa janda yang ada di Israel, Dia cuma utus Elia pigi pa satu janda yang bukang orang Israel tu da tinggal di Sarfat, di daera Sidon. Bagitu lei dulu waktu jaman nabi Elisa, ada banya orang yang saki kusta di Israel. Mar nyanda ada satu dari pa orang Israel itu yang Tuhan Allah da se bae, Tuhan Allah cuma da se bae tu satu orang yang bukang orang Israel mar orang Siria. Tu orang itu pe nama Naaman.” Pe dengar tu Yesus da bilang, samua orang yang ada di ruma ibada itu iko mara skali. Dorang badiri kong user pa Yesus kaluar dari tu kota kong bawa pa Dia ka tebing. Tu kota itu memang dorang da beking di tampa yang loas tu ada di atas gunung. Dorang bawa pa Dia ka tebing for se lego pa Dia dari situ. Mar Yesus cuma bajalang lewat di tenga-tenga pa dorang, trus Dia pigi dari situ. Abis itu Yesus pigi ka Kapernaum, tu satu kota yang ada di daera Galilea. Kong di situ tiap hari Sabat Dia mangajar pa orang-orang di ruma ibada agama Yahudi. Tu orang-orang itu jadi taheran-heran da dengar tu Dia pe ajaran itu, lantaran Dia pe bicara punung deng kuasa. Kong di ruma ibada itu, ada satu orang yang da kemasukan setang, tu orang itu bataria, “Hei Yesus orang Nazaret, apa so Ngana pe urusan deng torang? Ngana datang mo kase binasa pa torang kang? Kita tau sapa Ngana, so Ngana Yang Kudus dari Tuhan Allah.” Mar Yesus togor deng kras pa tu setang itu, “Badiam, kaluar ngana dari pa dia!” Kong di muka banya orang tu setang banting tu orang yang dia da maso akang, trus dia kaluar dari pa tu orang itu, mar tu orang nyanda rasa saki apa-apa. Kong samua orang di situ jadi taheran-heran, trus dorang baku bilang, “Bukang maeng pe hebat tu Dia pe kata-kata itu. Dia pake kuasa deng wibawa for user tu setang-setang kong tu setang-setang itu kaluar.” Kong tu cirita tentang Yesus tasiar kamana-mana di sluru daera itu. Kong Yesus kaluar dari ruma ibada itu trus pigi pa Simon pe ruma. Di situ Simon pe mama mantu da saki panas kras, kong orang-orang minta tolong pa Yesus for kase bae pa dia. Yesus pi badiri di sabla pa Simon pe mama mantu kong se bae pa dia. Waktu itu jo, tu Simon pe mama mantu bae, kong dia iko badiri trus layani pa dorang. Waktu so mo malam, banya orang bawa pa Yesus tu orang-orang saki yang ada deng dorang. Tu orang-orang saki itu pe panyaki ada macam-macam. Kong Yesus taru Dia pe tangan di atas pa tu orang-orang saki, trus Dia se bae pa dorang. Kong setang-setang lei kaluar dari tu banya orang yang da kemasukan setang. Trus tu setang-setang bataria, “Ngana itu Anak Allah.” Mar Yesus togor pa dorang deng kras kong nyanda kase pa dorang mo babicara lantaran dorang tau kalu Dia itu no Kristus tu Raja yang mo se slamat pa manusia. De pe eso waktu matahari so kaluar, Yesus se tinggal tu kota itu kong pigi ka satu tampa yang jao dari kampung. Mar banya orang da pi cari pa Dia. Kong waktu dorang baku dapa deng Dia, dorang brusaha mo tahang pa Dia supaya nyanda kase tinggal pa dorang. Mar Yesus bilang pa dorang, “Kita musti pigi ka kota-kota laeng supaya bole se tau tu Kabar Bae tentang Tuhan Allah Berkuasa sbagai Raja, lantaran kita dapa utus for kase tau tu Kabar Bae itu.” Kong Yesus kase tau tu Kabar Bae di ruma-ruma ibada agama Yahudi di daera Yudea. Satu kali Yesus badiri di pinggir danau Genesaret, kong banya orang yang bakrumun pa Dia mo dengar tu Tuhan Allah pe firman. Waktu itu Yesus lia ada dua prao di pinggir danau. Tu orang-orang yang ja bacari ikang so turung dari prao, dorang da se bersi tu dorang pe jala. Kong Yesus nae ka satu prao, tu Simon pe prao. Trus Yesus minta pa Simon supaya tola tu prao sadiki jao dari pinggir danau. Kong Dia dudu di prao itu, trus mangajar pa orang banya yang ada di pinggir danau. Serta so klar mangajar, Dia babilang pa Simon, “Simon, bapanggayung jo ka tampa yang dolong kong se lego tu ngana pe jala for tangka ikang.” Simon manyao, “Guru, so satu malam torang da bacari ikang mar nyanda dapa apa-apa. Cuma skarang lantaran Guru da suru pa kita, kita mo se lego ulang tu jala ini.” Abis itu dorang beking apa tu Yesus da suru pa dorang, kong dorang dapa banya ikang sampe dong pe jala mulai tarabe. Kong dorang itu basein for pangge dong pe tamang-tamang yang ada di prao laeng supaya datang tolong pa dorang. Trus dorang pe tamang-tamang di prao laeng datang kong dorang samua sama-sama isi tu dua prao itu deng ikang sampe tu dua prao itu amper-amper mo tengglam. Waktu Simon Petrus lia itu, dia berlutut di muka pa Yesus kong babilang, “Bapak, kase tinggal jo pa kita lantaran kita ini orang yang banya beking dosa.” Dia bilang bagitu lantaran dia deng samua orang yang da sama-sama deng dia taheran-heran da lia tu ikang yang dorang da tangka itu pe banya skali. Bagitu lei deng Yakobus deng Yohanes, tu Zebedeus pe anak-anak, dorang dua taheran-heran da lia itu. Dorang dua itu Simon pe tamang-tamang karja. Kong Yesus bilang pa Simon, “Simon, jang tako! Ngana biasa ja bacari ikang, mar skarang ngana mo bacari orang for iko pa Kita.” Abis itu Simon deng dia pe tamang-tamang hela dorang pe prao-prao ka pinggir danau, trus dorang se tinggal tu samua itu kong iko pa Yesus. Satu kali Yesus ada di satu kota. Di situ ada satu orang yang de pe badan punung deng kusta. Kong waktu lia pa Yesus, tu orang itu berlutut di muka pa Yesus trus bamohon, “Bapak, kalu Bapak suka, Bapak bole kase bae pa kita.” Pe dengar itu, Yesus pegang tu orang itu kong babilang, “Iyo Kita suka, jadi bae jo ngana.” Waktu itu jo, tu orang yang da saki kusta iko jadi bae. Abis itu Yesus bilang, “Ngana jang se tau pa sapa-sapa tu Kita da beking pa ngana. Mar ngana pigi jo pa imam supaya dia bole lia kalu ngana so bae. Abis itu, ngana bawa korban persembahan sama deng tu Musa da prenta. Itu tu bukti for mo se tunjung pa orang-orang kalu ngana so bae.” Mar biar Yesus larang pa dia se cirita itu, tu cirita tentang Yesus so lebe tasiar kamana-mana. So itu banya orang datang for badengar pa Yesus deng lei minta supaya Dia se bae dorang pe panyaki. Abis itu Yesus ja pigi ka tampa-tampa yang jao dari kampung for basombayang. Satu kali waktu Yesus da mangajar, ada bebrapa orang dari golongan Farisi deng ahli Taurat da dudu badengar pa Dia. Dorang datang dari samua kampung di daera Galilea, Yudea deng lei dari Yerusalem. Tuhan Allah pe kuasa ada pa Dia sampe Dia bole kase bae orang saki. Kong waktu itu, datang bebrapa orang da bawa satu orang lumpu yang da se tidor di atas tikar. Dorang brusaha bawa maso pa tu orang lumpu itu for taru di muka pa Yesus. Mar dorang nyanda dapa bawa maso tu orang lumpu itu lantaran pe banya skali orang di situ. So itu dorang nae ka atas ruma kong bongkar tu de pe atap. Trus dorang kase turung tu orang lumpu pake tikar yang dia da tidor akang ka tenga-tenga orang banya pas di muka pa Yesus. Waktu Yesus lia tu dorang da beking, Yesus tau dorang percaya pa Dia, kong Dia bilang pa tu orang lumpu itu, “Ngana pe dosa-dosa so dapa ampung.” Pe dengar itu, tu ahli-ahli Taurat deng orang-orang dari golongan Farisi bapikir dalam hati, “Sapa so Dia itu sampe Dia anggap Dia itu Tuhan Allah? Dia so bahojat pa Tuhan Allah. Nyanda ada orang yang bole se ampung dosa, cuma Tuhan Allah yang bole beking itu.” Mar Yesus tau tu dorang pe pikiran, kong Dia bilang pa dorang, “Kiapa ngoni bapikir bagitu pa ngoni pe hati? Mana tu lebe gampang orang mo percaya? Kita bilang, ‘Ngana pe dosa so dapa ampung,’ ato Kita bilang, ‘Bangong jo kong bajalang’? Mar skarang, Kita mo kase bukti pa ngoni kalu di dunia ini Anak Manusia ada kuasa for kase ampung dosa.” Kong Yesus bilang pa tu orang lumpu itu, “Kita bilang pa ngana, badiri jo, angka ngana pe tikar kong pulang pa ngana pe ruma!” Waktu itu jo, di muka pa samua orang tu orang lumpu itu iko badiri, dia gulung de pe tikar trus pulang pa dia pe ruma. Samantara bapulang, dia puji deng hormat pa Tuhan Allah. Pe lia tu da jadi, samua orang taheran-heran kong puji deng hormat pa Tuhan Allah. Kong deng rasa tako dorang bilang, “Ni hari torang so lia tu hal yang luar biasa.” Abis itu Yesus pigi kaluar kong Dia lia satu petugas pajak da dudu di loket, tu tampa ja babayar akang pajak. Tu orang itu pe nama Lewi. Yesus bilang pa dia, “Iko jo pa Kita.” Pe dengar itu, Lewi badiri kong se tinggal samua trus iko pa Yesus. Kong tu Lewi beking pesta basar for Yesus pa de pe ruma. Banya petugas pajak deng orang laeng lei da iko makang sama-sama deng dorang di situ. Pe lia itu, ahli-ahli Taurat yang dari golongan Farisi deng orang-orang laeng yang dari tu golongan Farisi lei, dorang mara-mara pa Yesus pe murit-murit, dorang bilang, “Kiapa ngoni makang deng minum sama-sama deng tu petugas-petugas pajak deng tu orang-orang berdosa?” Yesus dapa dengar kong manyao pa dorang, “Bukang orang sehat tu perlu pa dokter mar tu orang saki. Kita datang bukang for pangge tu orang yang anggap dong pe diri ja beking tu butul di muka pa Tuhan, mar Kita datang for pangge tu orang-orang berdosa supaya bole bertobat.” Tu orang-orang dari golongan Farisi itu babilang lei pa Yesus, “Yohanes pe murit-murit ja bapuasa deng basombayang, bagitu lei deng torang pe murit-murit, mar kiapa dang tu Bapak pe murit-murit cuma tare da makang deng minum?” Yesus manyao pa dorang, “Kalu tu pengantin laki-laki masi ada di pesta kaweng sama-sama deng de pe tamang-tamang, nyanda mungkin to kalu tu de pe tamang-tamang dapa suru bapuasa. Mar ada de pe waktu orang-orang mo ambe tu pengantin laki-laki dari pa de pe tamang-tamang, kong waktu itu no tu de pe tamang-tamang mo bapuasa.” Trus Yesus lei bilang prumpamaan pa tu orang-orang dari golongan Farisi, “Nyanda ada satu orang yang mo se rabe kaeng spanggal dari pa dia pe baju baru for se tampal di baju yang so tua. Soalnya tu baju yang baru itu tantu mo rusak, kong lei tu kaeng spanggal yang da rabe dari baju baru itu nyanda cocok for se tampal di baju yang so tua. Bagitu lei, nyanda ada satu orang mo isi tu anggor baru di tampa anggor so tua yang dari kuli binatang. Soalnya kalu tu tampa anggor so tua, trus isi akang deng anggor baru, kong tu anggor baru itu mengembang, tu anggor itu mo beking polote tu tampa itu. De pe laste, tu anggor tabuang deng de pe tampa jadi rusak. Tu anggor yang baru musti isi di tampa anggor yang masi baru lei. Kong kalu satu orang yang so minum anggor lama, dia so nimau mo rasa lei tu anggor baru. Soalnya dia mo bilang, ‘Tu anggor yang so lama tu sadap.’ ” Satu hari pas hari Sabat, tu hari yang orang nimbole bakarja, Yesus deng De pe murit-murit bajalang lewat di kobong gandum. Samantara bajalang di situ, Dia pe murit-murit bapete gandum kong dong se bersi tu gandum itu dari pa de pe kuli pake dong pe tangan, trus dorang makang. Waktu itu, ada bebrapa orang dari golongan Farisi yang ada di situ kong dorang babilang, “Sebenarnya kalu iko atoran agama, ngoni nimbole bakarja di hari Sabat, mar ngoni langgar tu atoran itu.” Kong Yesus manyao pa dorang, “Tantu ngoni so perna baca di Kitab Suci tu cirita tentang raja Daud waktu Dia deng de pe orang-orang so lapar. Dia maso ka dalam Tuhan Allah pe tenda ibada, kong makang tu roti yang da kase persembahan for Tuhan Allah, trus dia kase berbage tu roti itu pa de pe orang-orang. Padahal kalu iko atoran agama, yang bole makang tu roti itu cuma tu imam-imam, mar dorang langgar itu.” Kong Yesus lei bilang pa dorang, “Tu Anak Manusia ada kuasa for ator apa tu manusia bole mo beking di hari Sabat.” Waktu di hari Sabat laeng, Yesus maso ka ruma ibada agama Yahudi kong mangajar. Di situ ada satu orang yang dia pe tangan kanan cacat. Kong di situ lei ada ahli-ahli Taurat deng orang-orang dari golongan Farisi. Dorang da lia-lia trus pa Yesus, dorang mo cari tau kalu Dia mo kase bae orang saki di hari Sabat supaya dorang ada alasan for se sala pa Dia. Mar Yesus tau tu dorang pe pikiran, kong Dia babilang pa tu orang yang de pe tangan kanan cacat, “Mari jo badiri di tenga-tenga sini!” Kong tu orang itu pi badiri di tenga-tenga pa dorang. Abis itu Yesus bilang pa orang-orang yang ada di situ, “Kita mo tanya pa ngoni dulu. Kalu iko tu torang pe atoran agama, mana tu bole mo beking di hari Sabat? Beking tu bae ato tu jaha? Mo se slamat orang ato mo bunung?” Trus Yesus lia sekliling pa dorang samua, kong Dia bilang pa tu orang yang de pe tangan kanan cacat, “Co se kamuka kamari tu ngana pe tangan!” Tu orang itu beking bagitu kong de pe tangan jadi bae. Pe lia itu, tu ahli-ahli Taurat deng orang-orang dari golongan Farisi itu jadi mara skali. Kong dorang mulai baku skongkol apa tu dorang mo beking pa Yesus. Kong satu kali, Yesus pigi ka bukit for basombayang. Di situ Dia basombayang satu malam pa Tuhan Allah. Serta so siang, Yesus pangge Dia pe murit-murit kong pili dua blas orang dari pa dorang. Tu dua blas orang itu Dia ja bilang rasul. Tu dorang pe nama-nama: Simon tu Dia ja pangge lei Petrus, Andreas tu Petrus pe ade, Yakobus, Yohanes, Filipus, Bartolomeus, Matius, Tomas, Yakobus tu Alfeus pe anak, Simon tu dari Gerakan Yahudi Merdeka, Yudas tu Yakobus pe anak, deng Yudas Iskariot yang nanti mo bahianat pa Yesus. Abis itu, Yesus turung dari bukit sama-sama deng Dia pe dua blas murit, kong dorang brenti di satu tampa yang rata. Di situ banya tu Dia pe murit so bakumpul deng banya orang laeng lei yang da datang dari sluru daera Yudea, dari Yerusalem, dari Tirus deng Sidon tu ada di daera pinggir pante. Dorang datang for dengar Yesus da mangajar deng lei supaya Yesus kase bae tu dorang pe panyaki, kong tu orang-orang yang da kemasukan setang-setang lei jadi bae. Samua orang itu brusaha mo bapegang pa Yesus lantaran ada kuasa yang kaluar dari pa Dia yang beking dorang samua jadi bae. Yesus lia tu Dia pe murit-murit kong babilang, “Tu orang-orang yang nyanda ada apa-apa, dorang itu yang paling snang, lantaran dorang itu jadi orang-orang dari Tuhan Allah yang Berkuasa sbagai Raja. Tu orang-orang yang skarang lapar, dorang itu yang paling snang, lantaran Tuhan Allah mo se puas pa dorang. Kong tu orang-orang yang skarang ini manangis, dorang itu yang paling snang, lantaran Tuhan Allah mo beking dorang tatawa. Tu orang-orang yang da iko pa Anak Manusia, dorang itu yang paling snang, biar lei orang laeng binci pa dorang, nimau mo bergaul deng dorang, ja hina pa dorang deng lei se basae tu dorang pe nama. Soalnya dulu tu torang orang Yahudi pe nene moyang lei binci tu nabi-nabi dulu. Jadi kalu ada orang-orang yang iko pa Anak Manusia kong orang-orang laeng binci pa dorang, dorang itu yang paling snang, lantaran Tuhan Allah so se sadia upah basar for dorang di sorga. Mar tu orang-orang yang skarang ini kaya, cilaka jo dorang lantaran dorang so lebe dulu rasa tu snang dari tu dorang pe kekayaan. Tu orang-orang yang skarang ini so kanyang, cilaka jo dorang lantaran dorang nanti mo lapar. Kong tu orang-orang yang skarang ini tatawa, cilaka jo dorang lantaran nanti dorang mo manangis. Tu orang-orang yang da dapa puji dari samua orang, cilaka jo dorang lantaran dulu tu dorang pe nene moyang lei da puji-puji bagitu pa tu nabi-nabi palsu.” “Mar for ngoni tu da dengar pa Kita, Kita mo bilang kalu ngoni musti sayang tu ngoni pe musu deng beking tu bae pa orang yang binci pa ngoni. Ngoni sombayang minta akang berkat for orang yang da kutuk pa ngoni, deng sombayang akang lei for orang yang da beking jaha pa ngoni. Kalu ada orang yang tampeleng ngoni pe pipi satu, kase lei tu ngoni pe pipi sabla. Kong kalu ada orang rampas tu ngoni pe juba, kase biar lei dia ambe tu ngoni pe baju. Sapa jo yang baminta apa-apa pa ngoni, ngoni kase jo tu dia da minta itu. Kong kalu ada orang yang rampas tu ngoni punya, ngoni nyanda usa suru pa dia se pulang ulang itu. Samua tu ngoni suka orang laeng beking pa ngoni, ngoni musti beking bagitu lei pa orang laeng. Kalu ngoni sayang cuma pa orang yang sayang pa ngoni, apa tu ngoni pe untung di muka pa Tuhan? Nyanda ada kasiang. Soalnya tu orang-orang yang nyanda ja iko pa Tuhan lei sayang pa orang-orang yang sayang pa dorang. Kalu ngoni ja beking tu bae cuma for orang yang ja beking tu bae pa ngoni, apa ngoni pe untung di muka pa Tuhan? Nyanda ada kasiang. Soalnya tu orang-orang yang nyanda ja iko pa Tuhan lei ja beking tu bae cuma for orang-orang yang ja beking tu bae pa dorang. Kalu ngoni kase pinjam doi cuma pa orang-orang yang ngoni harap bole mo kase pulang ulang tu ngoni pe doi, apa ngoni pe untung di muka pa Tuhan? Nyanda ada kasiang. Soalnya tu orang-orang yang nyanda ja iko pa Tuhan lei kase pinjam doi pa dorang pe tamang-tamang, supaya dorang bole trima ulang tu doi sama de pe banya. Mar ngoni musti sayang tu ngoni pe musu-musu deng beking tu bae pa dorang. Ngoni kase pinjam tu ngoni punya pa dorang, kong ngoni nyanda usa pikir kalu dorang mo se pulang itu pa ngoni. Kalu ngoni ja beking rupa itu, ngoni mo dapa upah yang basar, deng lei kalu ngoni beking rupa itu, itu se tunjung kalu ngoni ini Tuhan Allah Yang Mahatinggi pe anak-anak. Soalnya Tuhan itu bae pa tu orang-orang yang nintau ja bilang makase, deng Dia lei bae pa tu orang-orang yang ja beking tu jaha. Ngoni musti sayang pa orang laeng, sama deng torang pe Bapa di sorga lei sayang pa samua orang.” Yesus kase tau lei, “Ngoni jang hakimi pa orang laeng, supaya Tuhan nyanda mo hakimi pa ngoni. Ngoni jang hukum pa orang laeng, supaya ngoni nyanda mo dapa hukum. Ngoni kase ampung jo pa orang laeng, supaya ngoni bole dapa ampung. Ngoni bakase jo pa orang laeng, supaya Tuhan lei mo kase bale pa ngoni deng talebe-lebe. Tuhan mo bakase pa ngoni deng talebe-lebe, itu bole se sama deng orang yang baukur pake tu ukuran yang bagus, trus dia goyang-goyang sampe jadi padat, kong dia tamba akang lei sampe tabuang-buang, kong dia kase pa torang. Soalnya kalu ngoni bakase sadiki, Tuhan lei mo kase sadiki pa ngoni. Mar kalu ngoni bakase banya, Tuhan lei mo kase banya pa ngoni.” Yesus bilang lei satu prumpamaan pa dorang, “Bole so orang buta tuntun pa orang buta? Tantu nimbole. Soalnya dorang dua itu pasti mo sama-sama taisi ka lobang. Nyanda ada murit yang lebe dari de pe guru. Mar nanti kalu tu murit so klar blajar, dia mo jadi sama deng de pe guru.” Yesus bilang lei, “Ngoni pe capat ja tarukira tu orang laeng pe sala yang pe kacili, mar tu ngoni pe sala yang pe basar, ngoni se biar. Ngoni itu bole mo se sama deng tu orang yang da lia tu serbuk kayu pa de pe sudara pe mata, padahal tu balak yang ada pa dia pe mata, dia nyanda dapa lia. Jadi bagimana ngoni bole babilang pa ngoni pe sudara bagini, ‘Mari jo, kita se kaluar tu serbuk kayu pa ngana pe mata.’ Padahal pa ngoni pe mata sandiri ada balak yang ngoni kase biar. Hei orang munafik! Ngoni musti se kaluar dulu tu balak dari pa ngoni pe mata, baru ngoni bole mo balia deng jelas for se kaluar tu serbuk kayu dari pa ngoni pe sudara pe mata.” Yesus bilang lei, “Nyanda ada pohong yang bagus kong de pe bua nyanda bagus. Kong nyanda ada pohong yang nyanda bagus kong de pe bua bagus. Orang bole dapa tau tiap pohong dari de pe bua. Soalnya orang nyanda mungkin mo pete bua ara dari rumpu baduri, deng lei nyanda mungkin orang mo pete bua anggor dari duri-duri. Orang yang bae-bae ja beking tu hal-hal yang bae, lantaran samua yang ada pa dia pe dalam hati bae. Mar tu orang jaha ja beking tu hal-hal yang jaha, lantaran samua yang ada pa dia pe dalam hati jaha. Soalnya tu bae deng tu jaha yang ngoni ja beking, itu iko apa yang ada pa ngoni pe dalam hati.” Kong Yesus bilang lei, “Kiapa ngoni pangge-pangge pa Kita, ‘Tuhan, Tuhan’, padahal ngoni nyanda ja beking tu Kita da suru. Kalu ada orang yang datang pa Kita, trus dia dengar tu Kita da bilang kong beking itu, Kita mo kase tau pa ngoni kalu tu orang itu bole mo se sama deng apa: dia itu bole mo se sama deng orang yang da se badiri ruma. Lebe dulu dia gale tana dolong-dolong kong dia beking fondasi dari batu. Trus dia se badiri tu ruma di atas fondasi itu. Waktu banjer datang, trus tu banjer bage tu ruma itu, tu ruma tetap kuat lantaran da se badiri di atas fondasi yang kuat. Mar tu orang yang da dengar apa tu Kita da bilang kong nyanda ja beking itu, dia itu bole mo se sama deng satu orang yang da se badiri ruma di atas tana kong nyanda pake fondasi. Waktu banjer datang trus banjer bage tu ruma itu, tu ruma iko rubu kong ancor skali.” Serta Yesus so klar babicara pa tu orang banya, Dia pi maso ka Kapernaum. Di situ, ada tu satu perwira Romawi. Dia itu ada budak yang dia sayang skali. Tu budak itu da saki kras deng amper-amper mo mati. Waktu tu perwira itu dengar tentang Yesus, dia suru bebrapa tua-tua Yahudi pigi pa Yesus. Dia suru pa dorang for minta pa Yesus supaya datang for se bae tu dia pe budak. Tu tua-tua Yahudi itu pigi pa Yesus kong bamohon pa Dia supaya mo tolong pa tu perwira itu. Dorang bilang pa Yesus, “Bapak, tu perwira Romawi itu pantas for Bapak tolong. Soalnya dia sayang pa torang pe bangsa deng dia lei tu da se badiri akang ruma ibada for torang.” Kong Yesus pigi sama-sama deng dorang. Waktu Dia so dekat deng tu perwira itu pe ruma, tu perwira suru pa de pe tamang-tamang pigi pa Yesus kong bilang tu de pe pesan bagini, “Bapak, suda jo Bapak basusa-susa datang pa kita pe ruma. Soalnya kita rasa kalu kita nyanda pantas trima pa Bapak pa kita pe ruma. So itu kita nyanda pigi pa Bapak, lantaran kita anggap kita pe diri nyanda pantas for pigi pa Bapak. Mar cuma deng Bapak bilang sesuatu jo dari sini, pasti kwa kita pe budak mo bae. Kita bilang bagitu, lantaran kwa bagini: di atas pa kita, ada kita pe bos, kong dia bole kase prenta pa kita. Bagitu lei deng kita, kita ada anak bua. Kong kalu kita prenta pa satu dari kita pe anak bua, ‘Pigi jo!’ pasti dia pigi. Kong kalu kita prenta pa anak bua laeng, ‘Datang jo!’ pasti dia datang. Kong kalu kita prenta pa kita pe budak, ‘Beking ini!’ pasti dia beking tu kita da prenta.” Pe dengar tu perwira pe kata-kata yang dorang da bilang itu, Yesus jadi heran lantaran tu perwira itu pe iman pe basar. Kong Yesus mangada pa tu orang banya yang da iko deng Dia, trus Dia bilang, “Kita bilang pa ngoni, Kita blum perna baku dapa deng orang yang dia pe iman basar sama deng tu orang dari bangsa Romawi ini pe iman, hele di antara orang Israel lei nyanda ada.” Serta tu orang-orang yang perwira itu da suru itu babale pa tu perwira itu pe ruma, dorang lia tu budak so bae. Abis itu Yesus iko pigi ka kota Nain. Dia pe murit-murit deng banya orang lei da iko sama-sama deng Dia. Waktu Yesus so dekat pintu gerbang kota, ada orang-orang yang samantara kaluar kota yang da bapikul tandu tu da taru akang orang mati. Tu orang yang da mati itu laki-laki, kong dia pe mama so janda trus cuma dia tu anak. Kong banya orang dari kota itu yang da batamang akang pa tu dia pe mama yang so janda itu. Waktu Tuhan Yesus lia pa tu janda itu, Dia jadi rasa kasiang. Kong Dia bilang pa tu janda, “Ibu, nyanda usa manangis!” Abis itu, Yesus pi badekat ka tandu itu trus pegang tu tandu, kong tu orang-orang yang da pikul tu tandu itu brenti. Trus Yesus babilang, “Hei nyong, Kita bilang pa ngana, bangong jo!” Trus tu nyong yang so mati itu hidop ulang, kong dia dudu, trus mulai babicara. Kong Yesus srahkan tu nyong itu pa tu nyong pe mama. Samua orang yang ada di situ jadi tako kong dorang puji deng hormat pa Tuhan Allah. Dorang bilang, “Tuhan Allah so utus satu nabi basar di tenga-tenga pa torang! Tuhan Allah so datang di tenga-tenga pa Dia pe orang-orang for tolong pa dorang!” Kong tu cirita tentang Yesus tasiar ka samua tampa ka daera Yudea deng daera-daera sekitar situ. Yohanes dapa dengar dari pa de pe murit-murit samua tu Yesus da beking. Kong Yohanes pangge dua orang dari pa de pe murit-murit, trus dia suru dorang dua pigi pa Tuhan Yesus kong batanya pa Dia bagini, “Apa Bapak tu Tuhan Allah da janji mo datang itu? Ato torang musti tunggu orang laeng lei?” Waktu tu dua orang itu sampe pa Yesus, dorang bilang, “Yohanes Pembaptis da suru pa torang for tanya pa Bapak bagini, ‘Apa Bapak tu Tuhan Allah da janji mo datang itu? Ato torang musti tunggu orang laeng lei?’ ” Waktu itu, Yesus da kase bae banya orang dari macam-macam panyaki, Dia user tu setang-setang dari pa orang yang da kemasukan setang, kong Dia lei beking tu orang buta bole mo balia. Yesus manyao pa tu Yohanes pe murit-murit, “Ngoni babale jo pa Yohanes kong bilang pa dia apa tu ngoni da lia deng ngoni da dengar: tu orang buta so bole balia, orang yang lumpu so bole bajalang, orang yang saki kusta so bae, orang yang pongo so bole badengar, orang mati so hidop ulang, kong orang miskin so dengar tu Kabar Bae dari Tuhan Allah. Kong orang yang nyanda tolak for percaya pa Kita, dia itu yang paling snang.” Serta tu Yohanes pe murit-murit itu pigi, Yesus mulai babicara pa orang banya yang ada di situ tentang Yohanes. Dia tanya pa dorang, “Apa ngoni pe tujuan pi lia pa Yohanes di padang gurun? Apa ngoni ka sana supaya ngoni mo pi lia tu orang yang ni hari bicara laeng kong eso laeng, sama deng kusu-kusu yang tagoyang kasana-kamari lantaran angin da tiop? Tantu bukang bagitu to? No kalu bagitu dang, for apa ngoni ka padang gurun? Apa ngoni ka sana supaya ngoni mo pi lia tu orang yang da pake baju mahal? Tantu bukang bagitu lei to? Soalnya tu orang yang ja pake baju bagitu deng hidop mewa, de pe tampa tinggal pa raja pe istana. Jadi for apa ngoni ka sana? Apa ngoni ka sana for lia pa nabi? Itu Butul. Mar Kita bilang pa ngoni, kalu Yohanes itu lebe dari nabi. Soalnya di Kitab Suci da tulis tu Tuhan Allah da bilang tentang Yohanes, ‘Tarukira jo bae-bae, Kita mo suru tu Kita pe utusan lebe dulu dari Ngana. Dia itu yang mo buka akang jalang for Ngana supaya orang pe hati siap trima pa Ngana.’ Kita bilang pa ngoni, dari antara orang-orang yang parampuang da se lahir di dunia ini, nyanda perna ada tu lebe penting dari Yohanes Pembaptis. Mar tu orang yang orang ja anggap nyanda penting dari antara orang-orang yang Tuhan Allah da Berkuasa sbagai Raja, so tu orang itu yang lebe penting dari Yohanes Pembaptis.” Samua orang yang da dengar tu Yesus da bilang itu so tamaso lei deng tu petugas pajak, dorang samua bilang kalu Tuhan Allah itu butul lantaran Yohanes tu da baptis pa dorang. Mar tu orang-orang dari golongan Farisi deng tu ahli-ahli Taurat nyanda trima tu Tuhan Allah pe rencana for dorang pe hidop, lantaran dorang nimau Yohanes mo baptis pa dorang. Yesus bilang lei, “Kita mo se banding deng apa tu orang-orang yang nyanda percaya di jaman ini? Kong Kita mo se sama deng apa pa dorang itu? Dorang itu sama deng anak-anak yang da dudu bermain di pasar, kong ja baku bataria pa dong pe tamang-tamang bagini, ‘Torang da tiop suling for ngoni, mar ngoni nyanda manari. Torang da manyanyi lagu duka, mar ngoni nyanda manangis.’ Itu sama deng ngoni nyanda trima Yohanes deng Kita. Waktu Yohanes Pembaptis datang ja bapuasa deng nyanda minum anggor, mar ngoni bilang, ‘Dia itu da kemasukan setang.’ Kong skarang tu Anak Manusia so datang. Dia nyanda bapuasa deng Dia lei ja minum anggor, kong ngoni bilang, ‘Co lia, tu orang ini pe rakus deng pangmabo. Dia lei ja batamang deng tu petugas-petugas pajak deng tu orang-orang berdosa.’ Mar biar ngoni nyanda trima pa Kita deng Yohanes, Tuhan Allah pe hikmat yang ada pa torang, itu nanti mo dapa lia dari kalakuan dari tu orang-orang yang da iko torang pe ajaran.” Ada tu satu orang de pe nama Simon, dia itu dari golongan Farisi, tu golongan yang kras iko atoran agama Yahudi. Dia da undang makang pa Yesus pa dia pe ruma. Jadi Yesus pigi pa Simon pe ruma trus dudu makang di situ. Kong di kota itu ada satu parampuang yang orang banya tau kalu dia itu parampuang nakal. Waktu dia dapa dengar kalu Yesus samantara makang di ruma pa tu orang dari golongan Farisi itu, dia datang ka situ bawa minya wangi yang mahal tu da isi di guci dari pualam. Kong dia pi badiri di blakang pa Yesus, di dekat Yesus pe kaki. Kong deng mamanangis dia se basa Yesus pe kaki deng de pe aer mata, abis itu dia seka deng de pe rambu. Trus dia ciong Yesus pe kaki kong dia kase cura tu minya wangi pa Yesus pe kaki. Waktu Simon yang da undang pa Yesus lia tu parampuang itu da beking, dia bapikir dalam hati, “Kalu memang Dia itu butul-butul nabi, tantu katu Dia tau parampuang model bagimana tu da bapegang pa Dia itu. Dia tantu katu tau kalu tu parampuang itu nakal.” Kong Yesus bilang pa Simon, “Simon, ada tu Kita mo bilang pa ngana.” Simon manyao, “Bilang jo Guru.” Yesus bilang, “Ada dua orang yang bapinjam doi pa tu satu orang yang ja bakase pinjam doi. Tu satu orang da bapinjam lima ratus doi perak, kong tu satu lei lima pulu doi perak. Kong dorang dua nyanda mampu mo se pulang tu doi yang dorang da pinjam itu. Mar tu orang yang da se pinjam doi itu kase hapus tu dorang dua pe utang. No skarang Simon, menurut ngana, sapa dari pa tu dorang dua itu yang nanti mo lebe sayang pa tu orang yang da kase pinjam doi itu?” Simon manyao, “Kita pikir, tu orang yang de pe utang paling basar.” Yesus bilang, “Butul tu ngana da bilang itu.” Kong Yesus bahaga pa tu parampuang itu trus babilang pa Simon, “Simon, co ngana lia ni parampuang ini. Kita da datang pa ngana pe ruma, mar ngana nyanda sadia akang aer for Kita mo beking bersi Kita pe kaki sama deng tu torang biasa ja beking. Mar ni parampuang ini dia se basa tu Kita pe kaki deng dia pe aer mata, trus dia seka se bersi tu Kita pe kaki deng de pe rambu. Tadi waktu kita datang kamari, ngana nyanda ciong pa kita. Mar ni parampuang ini, dari jo Kita pe sampe di sini, dia nyanda brenti-brenti ciong tu kita pe kaki. Ngana lei nyanda taru akang minya pa Kita pe kapala, mar ni parampuang ini, dia so kase cura minya wangi pa Kita pe kaki. So itu Kita bilang pa ngana, tu parampuang ini pe dosa yang pe banya Kita so kase ampung, kong so lantaran itu dia kase tunjung tu de pe sayang yang pe basar pa Kita. Mar kalu orang pe dosa cuma sadiki kong dapa ampung akang, dia lei cuma sadiki mo se tunjung tu dia pe sayang.” Abis itu Yesus bilang pa tu parampuang itu, “Ngana pe dosa so dapa ampung!” Tu orang-orang yang da dudu makang sama-sama deng Yesus, dorang itu baku bilang, “Sapa so Dia ini sampe Dia bole mo kase ampung dosa-dosa?” Mar Yesus bilang pa tu parampuang itu, “Ngana so slamat lantaran ngana percaya pa Kita. Jadi pigi jo deng hati tenang!” Abis itu Yesus pigi ka kota-kota deng ka kampung-kampung, kong di tampa-tampa itu Dia kase tau tu Kabar Bae tentang Tuhan Allah Berkuasa sbagai Raja. Tu Dia pe dua blas murit lei da sama-sama deng Dia. Kong ada lei tu bebrapa parampuang yang da sama-sama deng Dia. Dari pa dorang itu, ada yang perna Dia da user akang setang deng ada lei yang perna Yesus da se bae dari saki. Di situ ada tu Maria orang Magdala. Yesus da user akang tuju setang dari pa dia itu. Kong ada lei Yohana tu Khuza pe bini. Khuza ini Herodes pe kapala urusan ruma tangga. Trus ada lei Susana deng parampuang-parampuang laeng. Tu samua parampuang itu pake dorang pe harta for bantu pa Yesus deng De pe murit-murit. Satu kali ada orang-orang dari banya kampung datang rame-rame pa Yesus. Kong waktu dorang so takumpul, Yesus kase tau satu prumpamaan, “Ada tu petani pigi baambor bibit. Samantara dia baambor bibit di kobong, ada bibit yang da taciri di jalang, kong orang tainjang akang tu bibit itu, trus burung-burung datang teto tu bibit sampe abis. Ada lei bibit tu da taciri di tana yang babatu-batu. Tu bibit di tampa itu batumbu mar jadi kring lantaran tu tana nyanda ada aer. Kong tu bibit laeng da taciri di tana yang ada rumpu baduri. Tu rumpu baduri batumbu sama-sama deng tu tanaman, kong gepe tu tanaman yang so batumbu sampe mati. Mar tu bibit laeng komang da taciri di tana subur, tu bibit itu batumbu kong babua. Dia babua sampe sratus kali lipa.” Waktu so klar bicara bagitu, Yesus bilang lei, “Sapa tu ada talinga, badengar jo bae-bae.” Abis itu Yesus pe murit-murit batanya pa Dia tentang arti dari tu prumpamaan tadi. Kong Dia bilang, “Tuhan Allah beking ngoni bole tau deng jelas tu rahasia tentang bagimana Tuhan Allah berkuasa sbagai Raja, mar pa orang laeng, tu hal itu da se tau pake prumpamaan. Deng bagitu, ‘Biar dorang balia, mar dorang nyanda mangarti apa tu da lia. Biar lei dorang badengar, mar dorang nyanda mangarti.’ Bagini tu prumpamaan pe arti: tu bibit itu, Tuhan Allah pe firman. Tu bibit yang da taciri di jalang, itu sama deng orang-orang yang so dengar tu Tuhan Allah pe firman, trus tu setang pe bos datang ambe tu firman itu dari pa dorang pe hati supaya dorang nyanda percaya kong nyanda mo slamat dari hukuman dosa. Tu bibit yang da taciri di tana babatu-batu, itu sama deng orang-orang yang da dengar tu firman kong trima itu deng hati snang. Mar tu firman nyanda baakar butul pa dorang pe hati. Dorang percaya mar nyanda lama, kong waktu dapa cobaan dorang jadi nyanda percaya lei pa Tuhan. Tu bibit yang da taciri di tana yang ada rumpu baduri, itu sama deng tu orang-orang yang so dengar tu firman mar dorang talalu kuatir deng tu dorang pe hidop, dorang tagila-gila deng dong pe harta, deng lei suka hidop snang-snang. Kong itu samua beking tu dorang pe percaya jadi nyanda kuat sama deng tu bibit yang nyanda babua butul lei. Kong tu bibit yang da taciri di tana subur, itu sama deng orang-orang yang so dengar tu firman, kong dorang simpang tu firman pa dorang pe hati yang bae deng tulus. Kong dorang tetap beking trus tu firman itu.” Yesus bilang lei, “Nyanda ada orang tu da pasang pelita kong tutu deng loto ato taru di kolong koi. Tantu dia mo taru tu pelita itu pa de pe tampa supaya samua orang yang maso ka dalam ruma bole lia tu de pe cahaya. Bagitu lei, apa yang skarang ini tasambunyi, nanti orang mo dapa tau, deng apa yang skarang ini jadi rahasia, nanti mo tabuka sampe orang bole tau. So itu tarukira jo bae-bae apa tu ngoni da dengar. Soalnya kalu ada orang yang mo trima tu Tuhan pe firman, Tuhan mo beking dia lebe mangarti. Mar kalu ada orang yang nimau mo trima tu Tuhan pe firman, apa yang dia so tau Tuhan mo ambe dari pa dia.” Yesus pe mama deng De pe sudara-sudara datang pa Dia, mar dorang nyanda dapa badekat pa Dia lantaran pe banya skali orang. Kong ada orang pi kase tau pa Yesus, “Bapak, Bapak pe mama deng sudara-sudara ada di luar kong dorang suka mo baku dapa deng Bapak.” Mar Yesus manyao pa dorang, “Orang-orang yang badengar deng beking tu Tuhan Allah pe firman, so dorang itu no tu Kita pe mama deng Kita pe sudara-sudara.” Satu kali Yesus deng Dia pe murit-murit nae ka prao, kong Dia bilang pa Dia pe murit-murit, “Mari jo torang pigi ka sabla danau.” Trus dorang pigi. Waktu dorang samantara di tenga danau, Yesus da tasono. Kong kage-kage batiop angin kancang di danau sampe tu prao tamaso akang aer, kong dorang amper-amper mo cilaka. Yesus pe murit-murit se bangong pa Dia. Dorang bilang, “Guru, Guru, torang so mo mati!” Kong Yesus badiri trus togor deng kras tu angin deng tu omba yang da mangamu itu. Trus tu angin deng omba brenti mangamu, kong tu danau itu jadi tedo. Kong Yesus bilang pa Dia pe murit-murit, “Kiapa ngoni nyanda percaya pa Kita?” Dorang jadi tako deng heran, kong dorang baku bilang, “Sapa so Dia sebenarnya sampe kase prenta pa tu angin deng aer, kong tu angin deng aer iko Dia pe prenta?” Kong Yesus deng De pe murit-murit trus blayar kong sampe di sabla danau Galilea, pa orang Gerasa pe daera. Di situ, ada tu satu laki-laki dari kota dekat situ, tu da kemasukan setang-setang. Tu laki-laki itu so lama nyanda ja pake baju deng nyanda tinggal di ruma, dia cuma da tinggal di kuburan. Kong waktu Yesus turung dari prao, tu laki-laki itu badatang pa Dia. Serta dia lia pa Yesus, dia bataria kong berlutut di muka pa Yesus. Trus dia babilang pa Yesus deng suara kuat, “Hei Yesus, Tuhan Allah Yang Mahatinggi pe Anak! Apa so Ngana pe urusan deng kita? Kita mohon kwa supaya Ngana jang siksa pa kita.” Tu setang yang ada pa tu orang itu bilang bagitu pa Yesus lantaran Yesus da prenta pa dia supaya kaluar dari tu orang itu. Soalnya tu setang amper slalu ja kuasai pa tu orang itu, so itu tu orang-orang di situ ika tu orang itu pe tangan deng kaki pake rante for tahang pa dia. Mar tu orang itu cuma da se putus tu rante yang da se ika pa dia kong tu setang bawa pa dia ka tampa-tampa yang jao dari kampung. Yesus batanya pa tu setang yang ada pa tu orang itu, “Sapa ngana pe nama?” Kong tu setang manyao, “Legion,” lantaran ada banya setang yang da maso pa tu orang itu. Trus tu setang-setang itu bamohon pa Yesus supaya Dia jang prenta pa dorang maso ka jurang maut, tu tampa mo hukum akang setang-setang. Di dekat situ, ada banya skali boke da bamakang di lereng bukit. Kong tu setang-setang itu bamohon pa Yesus supaya Dia kase isin pa dorang for maso pa tu boke-boke itu. Trus Yesus iko akang tu dorang da minta. Trus tu setang-setang itu kaluar dari pa tu orang itu, kong maso pa tu boke-boke. Abis itu tu boke-boke balumpa dari pinggir jurang ka danau kong mati malamise di situ. Pe lia apa tu da jadi, tu orang-orang yang bajaga boke itu lari kong pi cirita itu di kota deng kampung-kampung dekat situ. Kong orang-orang dari kota deng kampung-kampung di dekat situ datang for lia apa tu da jadi. Dorang datang pa Yesus kong dorang lia tu orang yang tadi da kemasukan setang so dudu dekat pa Yesus pe kaki, dia so pake baju kong dia so bae. Pe lia itu, dorang jadi tako. Tu orang-orang yang da lia sandiri waktu Yesus da user tu setang-setang, dorang se cirita pa tu orang-orang yang baru datang di situ bagimana sampe tu orang yang da kemasukan itu jadi bae. Kong samua orang di daera Gerasa itu bamohon pa Yesus supaya Dia se tinggal tu dorang pe daera itu lantaran dorang samua tako skali. So itu Yesus nae ka prao for bale ulang ka sabla danau. Tu orang yang tadi da kemasukan setang bamohon pa Yesus supaya dia bole iko deng Yesus. Mar Yesus suru pigi pa dia, Yesus bilang, “Lebe bae ngana pulang jo pa ngana pe ruma, kong se cirita jo pa orang-orang samua tu Tuhan Allah so beking pa ngana.” Tu orang itu pigi ka samua tampa di kota itu trus dia kase tau pa orang-orang samua tu Yesus da beking pa dia. Waktu Yesus bale dari sabla danau, banya orang sambut pa Dia lantaran dorang samua da tunggu-tunggu pa Dia. Kong datang satu orang kapala ruma ibada agama Yahudi, tu de pe nama Yairus. Dia datang kong berlutut di muka pa Yesus trus dia bamohon supaya Yesus datang pa dia pe ruma. Soalnya dia pe anak satu-satunya da saki kong amper-amper mo mati. Dia pe anak itu parampuang, kong de pe umur kira-kira dua blas taong. Kong Yesus pigi pa Yairus pe ruma. Samantara Yesus bajalang pigi pa Yairus pe ruma, ada banya orang yang da baku-baku ruju di dekat pa Dia. Kong dari pa orang-orang itu, ada satu parampuang yang so dua blas taong da mendrita saki pendarahan, [Dia so se abis samua tu dia pe harta for brobat pa dokter-dokter], mar nyanda ada yang bole mo se bae pa dia. Dia badekat pa Yesus dari blakang kong dia sontong tu Yesus pe ujung juba, waktu itu jo dia pe pendarahan iko brenti. Abis itu, Yesus batanya, “Sapa kang tu da sontong pa Kita?” Mar nyanda ada orang yang mangaku. Kong Petrus bilang pa Dia, “Guru, ada banya orang yang da bakrumun deng da baku-baku ruju di dekat pa Guru.” Yesus bilang, “Mar ada tu da sontong pa Kita no, lantaran kwa ada kuasa yang da kaluar dari pa Kita.” Tu parampuang itu lia kalu apa tu dia da beking so dapa tau, jadi deng batotofore dia datang berlutut di muka pa Yesus. Trus di muka pa samua orang di situ, dia se cirita kiapa sampe dia da sontong tu Yesus pe juba. Dia lei bilang kalu waktu itu jo dia iko bae. Abis itu Yesus bilang pa tu parampuang itu, “Ibu, skarang ibu so bae lantaran percaya pa Kita. Pigi jo deng hati tenang.” Waktu Yesus masi samantara babicara, datang satu orang dari Yairus pe ruma, kong babilang pa Yairus, “Bapak pe anak so mati. Jadi nyanda usa jo batrosol pa Guru!” Mar Yesus dapa dengar tu orang itu da bilang, kong Dia bilang pa Yairus, “Jang tako, mar percaya jo! Tu bapak pe anak pasti mo bae.” Serta so sampe pa Yairus pe ruma, Yesus nyanda kase orang-orang maso deng Dia ka ruma, cuma Petrus, Yohanes, Yakobus, deng tu anak itu pe papa deng mama. Samua orang ja manangis akang tu anak yang so mati itu. Mar Yesus bilang, “Nyanda usa manangis lei! Tu anak itu nyanda mati, dia cuma da tidor.” Mar dorang tare cuma da tatawa akang pa Dia lantaran dorang tau kalu tu anak itu so mati. Kong Yesus pegang tu anak itu pe tangan, trus Dia bilang, “Hei anak, bangong jo!” Waktu itu, tu anak itu pe jiwa babale ulang pa dia kong dia hidop ulang, trus dia iko badiri. Abis itu Yesus suru pa dorang kase akang makang pa tu anak itu. Tu anak itu pe papa deng mama taheran-heran da lia itu. Mar Yesus larang pa dorang for se cirita pa sapa-sapa apa tu da jadi. Yesus pangge pa Dia pe dua blas murit, kong Dia kase pa dorang kekuatan deng kuasa supaya dorang bole user setang-setang deng kase bae pa orang dari macam-macam panyaki. Abis itu Dia utus pa dorang for kase tau pa orang-orang tentang bagimana Tuhan Allah Berkuasa sbagai Raja pa Dia pe orang-orang, deng lei Dia utus pa dorang for kase bae tu orang-orang saki. Dia bilang lei pa dorang, “Ngoni jang bawa apa-apa di perjalanan. Ngoni jang bawa tongkat, tas bekal, makanan, doi ato baju for baganti. Kalu ngoni dapa trima di satu ruma, tinggal jo di ruma itu sampe ngoni kase tinggal tu kota itu. Kong kalu ada orang yang nimau mo trima pa ngoni, ngoni kaluar jo dari dorang pe kota, ngoni paka jo tu abu dari pa ngoni pe kaki itu jadi tanda kalu Tuhan mo hukum pa dorang.” Abis itu, tu Yesus pe murit-murit bajalang pigi ka kampung-kampung for kase tau tu Kabar Bae dari Tuhan Allah deng kase bae orang-orang saki di mana-mana. Waktu itu raja Herodes yang da pegang prenta di daera Galilea. Dia dapa dengar tentang Yesus. Dia bingo lantaran ada orang yang bilang kalu Yesus itu no tu Yohanes Pembaptis yang dulu so mati kong skarang so hidop ulang. Kong ada lei yang bilang kalu Yesus itu no tu nabi Elia yang da muncul ulang. Trus ada lei yang bilang kalu Yesus itu no tu satu dari nabi-nabi dulu yang so hidop ulang. Kong raja Herodes bilang, “Tempo hari to kita so suru orang potong Yohanes pe kapala, no sapa dang tu Orang itu lei? Soalnya kita so dengar tentang tu hal-hal yang Dia da beking.” Kong raja Herodes brusaha supaya dia bole mo lia pa Yesus. Waktu Yesus pe murit-murit yang Dia da utus so babale ulang, dorang se cirita pa Dia samua tu dorang da beking. Kong Dia bawa pa dorang pi basandiri deng Dia ka satu kampung, tu de pe nama Betsaida. Mar orang banya dapa tau tu tampa yang Yesus deng De pe murit-murit da pigi akang, kong dorang pi iko pa Dia. Yesus trima pa tu orang-orang itu kong babicara pa dorang tentang bagimana Tuhan Allah Berkuasa sbagai Raja pa Dia pe orang-orang, deng Dia lei kase bae orang-orang yang da saki. Serta so mo malam, Yesus pe dua blas murit datang pa Dia kong babilang, “Guru, ni tampa so jao dari kampung. Suru jo tu orang banya itu pigi, supaya dorang bole pigi ka kampung-kampung yang paling dekat dari sini for cari makang deng lei cari tampa mo manginap akang.” Mar Yesus babilang pa De pe murit-murit, “Ngoni yang kase makang pa dorang!” De pe murit-murit manyao, “Guru, yang ada pa torang cuma lima roti deng dua ikang, mar kalu Guru suka, torang mo pi bli akang makanan for dorang samua.” Yesus pe murit-murit da bilang bagitu lantaran ada kira-kira lima ribu orang laki-laki di situ, blum tarekeng tu parampuang deng tu anak-anak. Kong Yesus bilang pa De pe murit-murit, “Suru jo tu orang-orang itu dudu baklompo-klompo, satu klompo kira-kira lima pulu orang.” Kong tu murit-murit beking sama deng apa tu Yesus da suru, trus dorang suru samua orang dudu. Abis itu Yesus ambe tu lima roti deng dua ikang, Dia mangada ka langit kong bilang makase pa Tuhan Allah trus Dia pela-pela tu roti deng ikang itu, kong kase pa De pe murit-murit supaya se berbage pa tu orang banya. Kong dorang samua makang sampe kanyang. Abis itu, Yesus pe murit-murit kase kumpul tu makanan yang da talebe, samua ada dua blas loto. Satu kali Yesus samantara basombayang sandiri. Dia pe murit-murit lei ada di dekat pa Dia. Kong Dia batanya pa dorang, “Kalu menurut banya orang, sapa dang Kita ini?” Kong dorang manyao, “Ada tu ja bilang kalu Guru tu Yohanes Pembaptis, tu laeng ja bilang kalu Guru tu nabi Elia, kong ada lei yang bilang kalu Guru tu satu dari tu nabi-nabi dulu yang so hidop ulang.” Trus Yesus batanya pa dorang, “No kalu menurut ngoni, sapa dang Kita ini?” Petrus manyao, “Kristus tu Raja yang se slamat pa manusia, tu Tuhan Allah da utus.” Kong Yesus larang deng kras pa Dia pe murit-murit supaya dorang jang kase tau tentang itu pa sapa-sapa. Kong Yesus bilang lei, “Tu Anak Manusia musti mo mangada banya siksa, deng lei tu tua-tua Yahudi, imam-imam kapala deng ahli-ahli Taurat mo tolak pa Dia. Kong Dia mo dapa bunung, mar di hari katiga Tuhan Allah mo se hidop ulang pa Dia.” Dia bilang pa dorang samua, “Sapa tu mo iko pa Kita, dia so nimbole iko tu de pe mau. Dia musti pikul de pe salib saban hari, tu de pe arti saban hari dia musti siap mendrita sampe mati kong iko pa Kita. Soalnya sapa tu hidop cuma for de pe diri sandiri, so dia itu tu nyanda mo dapa hidop kekal. Mar komang, sapa tu mo kase de pe hidop lantaran iko pa Kita, so dia tu mo dapa hidop kekal. Apa so de pe untung kalu satu orang dapa samua tu harta di dunia, mar itu samua beking dia binasa kong nyanda dapa hidop kekal? Sapa yang malo mo mangaku kalu dia ja iko pa Kita deng tu Kita pe ajaran, Kita tu Anak Manusia lei mo malo mangaku kalu tu orang itu ja iko pa Kita deng tu Kita pe ajaran waktu Kita mo datang ulang. Waktu itu Kita mo datang deng Kita pe kuasa yang luar biasa deng Bapa pe kuasa yang luar biasa, kong Kita lei mo datang sama-sama deng tu malaekat-malaekat yang kudus. Kita bilang pa ngoni, dari antara pa ngoni tu ada di sini, ada yang blum mo mati seblum lia tu Tuhan Allah Berkuasa sbagai Raja pa Dia pe orang-orang.” Kira-kira dlapan hari abis Yesus kase tau tu hal-hal itu, Dia pangge pa Petrus, Yohanes deng Yakobus pi nae ka satu gunung for basombayang. Kong waktu Yesus samantara basombayang di gunung itu, Dia pe muka dapa lia laeng deng Dia pe baju jadi puti mangkilat. Trus kage-kage ada dua orang babicara deng Dia. Dorang dua itu nabi Musa deng nabi Elia. Waktu dorang dua da batunjung dong pe diri, dorang dua dapa lia bacahaya luar biasa. Dorang da babicara tentang Yesus yang mo mati, yang nanti mo jadi di Yerusalem. Waktu itu, Petrus deng de pe dua tamang da tasono. Kong waktu dorang tabangong, dorang dapa lia Yesus bacahaya luar biasa deng tu dua orang yang da badiri di dekat pa Dia. Kong waktu tu dua orang itu mo se tinggal pa Yesus, Petrus babilang pa Yesus, “Guru, pe snang skali torang ada di sini. Lebe bae torang kase badiri akang tiga sabua. Satu for Guru, satu for Musa, deng satu for Elia.” Mar Petrus nyanda bapikir bae-bae waktu dia da bilang itu. Samantara dia bilang bagitu, datang awan kong tutu pa dorang, kong dorang jadi tako skali. Trus dari dalam awan itu dapa dengar suara bagini, “Ini tu Kita pe Anak, Kita da pili pa Dia. Badengar jo pa Dia!” Serta tu suara itu so nyanda lei dapa dengar, dorang lia Yesus so kurang sandiri. Kong waktu itu, tu Yesus pe tiga murit nyanda se cirita pa sapa-sapa apa tu dorang da lia. De pe eso, Yesus deng Dia pe tiga murit itu turung dari gunung, kong orang banya datang pa Yesus. Satu dari tu orang banya itu babicara deng suara kuat pa Yesus, dia bilang, “Guru, kita mohon pa Guru supaya tolong lia akang tu kita pe anak laki-laki, dia itu kasiang kita pe anak satu-satunya. Dia da kemasukan setang. Kong kalu tu setang srang pa dia, dia kage-kage bataria kong tu setang beking dia kejang-kejang sampe de pe mulu kaluar gabu. Tu setang itu ja siksa trus pa dia kong amper-amper nimau mo se tinggal pa dia. Kita so minta pa Guru pe murit-murit supaya dorang user akang tu setang itu dari pa kita pe anak, mar dorang nyanda mampu.” Kong Yesus bilang, “Hei ngoni orang-orang yang nyanda percaya deng yang sesat! Mo sampe tempo apa Kita musti tinggal di tenga-tenga pa ngoni, kong mo basabar pa ngoni?” Abis itu Yesus bilang pa tu bapak itu, “Bawa jo kamari tu ngana pe anak itu!” Waktu tu anak itu pi badekat pa Yesus, tu setang banting tu anak itu ka tana kong beking de pe badan kejang-kejang. Mar Yesus togor deng kras tu setang itu kong Dia kase bae tu anak itu. Abis itu Yesus srahkan tu anak itu pa de pe papa. Samua orang yang ada di situ jadi taheran-heran da lia tu Tuhan Allah pe kuasa yang basar. Waktu orang-orang masi taheran-heran lantaran da lia samua tu Yesus da beking, Yesus babilang pa Dia pe murit-murit, “Ngoni dengar jo bae-bae samua tu Kita mo bilang ini: nanti ada orang yang mo srahkan tu Anak Manusia pa orang-orang yang ada kuasa.” Mar Yesus pe murit-murit nyanda mangarti apa tu Dia da bilang. Tu Dia pe kata-kata itu masi rahasia for dorang supaya dorang nyanda mangarti apa tu de pe arti. Mar dorang rasa bagitu mo batanya pa Dia. Satu kali, Yesus pe murit-murit baku ambe pendapat tentang sapa tu paling basar dari antara pa dorang. Yesus tau tu dorang pe pikiran itu, so itu Dia ambe satu anak kong kase badiri di sabla pa Dia. Trus Dia bilang pa De pe murit-murit, “Sapa jo yang trima anak kacili rupa ini lantaran tu orang itu percaya pa Kita, itu sama deng tu orang itu so trima pa Kita. Kong sapa jo yang trima pa Kita, itu sama deng dia so trima pa Tuhan Allah yang da utus pa Kita. Soalnya sapa yang anggap dia pe diri nyanda penting dari antara pa ngoni, so dia itu yang paling basar.” Yohanes bilang pa Yesus, “Guru, torang lia ada satu orang yang da user setang pake Guru pe nama. Trus torang da larang pa dia supaya jang pake Guru pe nama, lantaran dia itu bukang torang pe tamang.” Mar Yesus bilang, “Ngoni jang larang pa dia, lantaran sapa jo yang nyanda malawang pa torang, dia itu torang pe orang.” Serta tu waktu for Yesus mo taangka ka sorga so dekat, Dia ambe keputusan musti pigi ka Yerusalem. Dia suru bebrapa orang pigi lebe dulu dari Dia. Dorang itu pigi kong maso ka satu kampung di daera Samaria, mo se siap samua for Yesus. Mar tu orang-orang di kampung itu nimau mo trima pa Yesus lantaran dorang tau Yesus pe tujuan mo pigi ka Yerusalem. Waktu Yesus pe dua murit tu Yakobus deng Yohanes tau tentang itu, dorang batanya pa Dia, “Tuhan, apa Tuhan mau, torang minta api turung dari sorga for bakar abis pa dorang?” Mar Yesus babale haga pa dorang trus togor pa dorang. Kong dorang pigi ka kampung laeng. Waktu Yesus deng De pe murit-murit samantara bajalang, ada satu orang babilang pa Dia, “Guru, ka mana jo Guru pigi, kita suka mo iko deng Guru.” Yesus bilang pa dia, “Rubah ada de pe lobang for tinggal akang, bagitu lei deng burung-burung ada de pe sarang for tinggal akang, mar tu Anak Manusia nyanda ada tampa for mo tinggal akang.” Kong Yesus babilang pa orang laeng, “Iko jo pa Kita!” Mar tu orang itu manyao, “Bapak, kase isin akang kita pulang dulu for se kubur kita pe papa, abis itu kita iko deng Bapak.” Yesus bilang pa dia, “Tu orang yang nyanda percaya, dorang itu sama deng orang yang so mati, kong se biar jo dorang urus tu dorang pe penguburan sandiri. Mar ngana, ngana pigi jo kong kase tau tu brita tentang Tuhan Allah Berkuasa sbagai Raja pa Dia pe orang-orang.” Kong ada lei orang laeng yang babilang pa Yesus, “Guru, kita suka mo iko pa Guru, mar kase isin akang kita pulang for babilang dulu pa kita pe kluarga, baru kita datang kong iko pa Guru.” Kong Yesus bilang, “Orang yang da bapajeko, dia itu nimbole batengo ka blakang mar musti lia ka muka. Bagitu lei kalu mo jadi orang-orang dari Tuhan Allah yang Berkuasa sbagai Raja, ngoni nimbole pusing deng tu hal-hal laeng.” Abis itu, Yesus pili tuju pulu orang laeng tu ja iko pa Dia. Kong utus pa dorang pigi dua-dua orang for lebe dulu dari Dia ka kota-kota deng tampa yang Dia mo pigi akang. Kong Yesus bilang pa dorang, “Tu orang yang siap for trima tu Kabar Bae, dorang itu sama deng gandum di kobong yang siap mo panen. Tu gandum itu pe banya, mar tu orang-orang yang bakarja di situ cuma sadiki. So itu minta jo pa Yang Punya kobong itu supaya Dia tamba akang orang mo bapanen. Skarang ngoni pigi jo kong tarukira bae-bae: Kita utus pa ngoni pigi pa orang-orang jaha, itu sama deng domba yang pigi ka tenga-tenga srigala yang ganas. Waktu ngoni pigi, ngoni jang bawa tampa doi, tas bekal ato slop. Kong kalu baku dapa deng orang di jalang, ngoni jang batogor supaya ngoni bole bajalang trus. Kong kalu ngoni maso ka satu ruma, ngoni musti lebe dulu bilang bagini, ‘Damai sejahtra for ngoni samua.’ Kong kalu di ruma itu ada orang yang suka damai, tu ngoni pe salam itu mo ada pa dia. Mar kalu nyanda ada orang yang suka damai, tu ngoni pe salam itu mo bale ulang pa ngoni. Trus kalu ada orang yang so trima pa ngoni, ngoni tinggal jo pa dia pe ruma jang bapinda-pinda. Kong ngoni makang deng minum jo apa tu dia da kase pa ngoni, lantaran tu orang yang da beking de pe karja, dia itu pantas mo dapa tu de pe upah. Kalu ngoni maso ka satu kota kong orang-orang di kota itu trima pa ngoni, ngoni makang jo apa tu dorang da kase. Kong ngoni kase bae tu orang-orang yang da saki di kota itu, deng kase tau pa orang-orang di situ, ‘So nyanda lama lei Tuhan Allah so mo Berkuasa sbagai Raja di tenga-tenga pa ngoni.’ Mar kalu ngoni maso ka satu kota kong tu orang-orang di situ nyanda trima pa ngoni, ngoni pigi jo ka jalang-jalang raya di kota itu trus ngoni babilang deng suara kuat bagini, ‘Tu abu dari pa ngoni pe kota ini yang da malakat pa torang pe kaki, torang paka se kaluar itu jadi tanda kalu Tuhan mo hukum pa ngoni. Mar biar bagitu, ngoni inga tu hal ini: so nyanda lama lei Tuhan Allah so mo Berkuasa sbagai Raja pa Dia pe orang-orang.’ Kita bilang pa ngoni, nanti di hari kiamat tu hari Tuhan mo adili samua orang, tu hukuman yang orang-orang di kota itu dapa mo lebe brat dari tu hukuman orang-orang yang dulu hidop di Sodom.” Yesus togor pa dorang, “Hei ngoni tu orang-orang di Khorazim deng Betsaida, cilaka jo ngoni! Soalnya Kita so beking mujisat-mujisat di tenga-tenga pa ngoni, mar ngoni nimau mo percaya kong bertobat. Padahal kalu tu orang-orang di Tirus deng Sidon waktu dulu da lia tu mujisat-mujisat yang Kita da beking pa ngoni, pasti so dari dulu dorang da bertobat kong pake baju karong deng taru abu pa dong pe kapala tanda dorang manyasal da beking dosa. Mar nanti waktu hari kiamat tu hari Tuhan mo adili samua orang, tu ngoni pe hukuman mo lebe brat dari tu hukuman orang-orang di kota Tirus deng Sidon. Kong ngoni orang-orang di Kapernaum, ngoni kira Tuhan mo angka pa ngoni sampe ka sorga? Nyanda kasiang. Malatare Dia mo buang pa ngoni ka neraka.” Kong Yesus babilang lei pa tu orang-orang yang ja iko pa Dia itu, “Sapa jo yang badengar pa ngoni, dia lei badengar pa Kita. Kong sapa jo yang tolak pa ngoni, dia lei tolak pa Kita, kong tu orang yang tolak pa Kita, dia itu lei tolak pa Tuhan Allah yang da utus pa Kita.” Tu tuju pulu orang yang Yesus da utus babale pa Dia. Dorang bale pa Dia deng rasa snang, kong dorang babilang pa Dia, “Guru, waktu ada orang yang da kemasukan setang, torang user tu setang pake Guru pe nama, trus tu setang-setang lei iko tu torang pe prenta.” Yesus bilang pa dorang, “Oh iyo. Kita so lia tu setang pe bos so ciri dari langit sama deng kilat. Tarukira jo bae-bae, Kita so kase kuasa pa ngoni supaya ngoni bole injang tu ular babisa deng kalajengking, deng supaya ngoni bole se kala samua tu setang pe bos pe kuasa, sampe nyanda ada yang bole beking cilaka pa ngoni. Mar biar lei bagitu, ngoni jang snang lantaran tu setang-setang iko tu ngoni pe prenta, lebe bae tare ngoni snang jo lantaran tu ngoni pe nama-nama da tatulis di sorga.” Waktu itu jo, tu Roh Kudus kuasai pa Yesus kong De pe hati snang. Dia bilang, “Kita bilang makase pa Bapa, Tuhan yang berkuasa di langit deng bumi, lantaran Bapa nyanda kase tunjung samua hal itu pa tu orang-orang yang tau banya hal deng pa orang-orang pande for mangarti tu samua itu. Mar Bapa beking jelas samua itu pa tu orang-orang biasa yang dong pe hati polos sama deng anak kacili. Iyo Bapa, itu yang beking snang Bapa pe hati.” Abis itu Yesus bilang, “Kita pe Bapa so kase samua pa Kita. Nyanda ada satu orang yang tau sapa tu Bapa pe Anak, kacuali Bapa sandiri. Kong nyanda ada satu orang yang tau sapa tu Bapa kacuali Dia pe Anak, deng sapa jo tu Anak da pili for tau tentang Bapa.” Abis itu Yesus mangada pa Dia pe murit-murit, kong bicara sandiri deng dorang, Dia bilang pa dorang, “Samua yang ngoni da lia skarang ini, itu beking ngoni jadi orang yang paling snang. Soalnya dulu banya nabi deng raja yang suka mo lia apa tu ngoni so lia, mar dorang nyanda dapa kesempatan for lia itu. Dorang lei suka mo dengar apa tu ngoni so dengar, mar dorang nyanda dapa kesempatan for dengar itu.” Satu kali, ada satu ahli Taurat badiri for jebak pa Yesus. Dia batanya pa Yesus, “Guru, apa yang kita musti beking supaya kita bole dapa tu hidop kekal?” Yesus bale batanya pa dia, “Apa tu da tatulis tentang itu di atoran-atoran yang ada di kitab Taurat? Apa tu ngana da baca di situ?” Tu orang itu manyao, “Ngoni musti butul-butul sayang pa Tuhan Allah yang ngoni ja semba, ngoni nimbole badua hati. Ngoni sayang jo pa Dia deng samua yang ada pa ngoni pe diri, kong beking yang Dia da suru, deng lei sayang jo pa Dia deng cara slalu pikir apa tu bole mo beking snang pa Dia. Ngoni sayang jo pa orang laeng sama deng ngoni sayang pa ngoni pe diri sandiri.” Yesus bilang pa tu ahli Taurat itu, “Butul tu bapak da bilang itu! Kalu bapak beking samua itu, bapak nanti mo hidop slama-lamanya deng Tuhan.” Mar tu ahli Taurat itu mau supaya orang pikir kalu de pe diri itu butul, jadi dia batanya lei pa Yesus, “No sapa dang tu orang laeng yang musti kita sayang?” Yesus manyao pake prumpamaan, “Ada tu satu laki-laki orang Yahudi yang turung dari Yerusalem ka Yerikho. Di tenga jalang, dia baku dapa deng prampok-prampok. Kong dorang pukul pa dia trus rampas samua tu ada pa dia. Abis itu, dorang kase tinggal pa dia amper mati di situ. Kong waktu itu di jalang itu pas-pas lewat satu orang imam agama Yahudi. Dia da lia tu orang yang da dapa rampok itu, mar dia tare cuma da lewat akang pa tu orang itu kong bajalang trus iko di pinggir jalang. Kong waktu itu lei, lewat di jalang itu satu orang Yahudi dari suku Lewi yang biasa ja layani pa Tuhan Allah di Ruma Ibada Pusat. Dia dapa lia pa tu orang yang da dapa rampok itu, mar dia lei cuma da lewat akang tu orang itu kong bajalang trus iko di pinggir jalang. Kong lewat lei di jalang itu satu orang Samaria. Waktu dia lia tu orang yang da dapa rampok itu, dia rasa kasiang pa tu orang itu. Dia pi badekat pa tu orang itu kong kase bersi tu luka-luka deng cara kase sirang anggor di luka trus dia pake minya for se obat tu luka itu, kong dia perban tu luka-luka itu. Abis itu dia kase nae tu orang itu pa de pe keledai, kong bawa ka tampa tu ja manginap akang. Di situ dia urus bae-bae tu orang itu. Kong de pe eso, tu orang Samaria kase dua doi perak pa tu orang yang punya tampa ja manginap akang itu. Kong tu orang Samaria itu bilang, ‘Bapak, tolong urus akang dang pa dia. Trus kalu tu doi for urus pa dia masi kurang, nanti kita tamba akang kalu kita so babale.’ ” Abis itu Yesus batanya pa tu ahli Taurat itu, “No skarang, kalu menurut bapak dang, dari tu tiga orang itu, mana tu orang yang da kase tunjung de pe sayang pa orang laeng yang da dapa rampok itu.” Tu ahli Taurat itu manyao, “Tantu katu tu orang yang da se tunjung tu de pe rasa kasiang pa tu orang itu.” Kong Yesus bilang pa dia, “Jadi skarang bapak pigi jo, kong bapak beking sama deng itu.” Waktu Yesus deng De pe murit-murit samantara bajalang, dorang sampe di satu kampung. Kong di situ ada satu parampuang tu de pe nama Marta, kong dia trima pa Yesus pa de pe ruma. Tu Marta ada sudara parampuang tu de pe nama Maria. Kong waktu itu, Maria da dudu di dekat pa Tuhan Yesus pe kaki kong badengar trus tu Yesus pe ajaran. Mar tu Marta komang cuma da sibuk se sadia tu makanan. Kong dia pi badekat pa Yesus trus babilang, “Guru, apa Guru nyanda farduli kalu tu kita pe ade Maria cuma da se biar pa kita bakarja sandiri? Tolong kwa Guru bilang akang pa dia for baku tulung deng kita.” Mar Tuhan Yesus cuma da manyao pa dia, “Marta, Marta, ngana cuma da kuatir deng beking sibuk tu ngana pe diri deng banya hal. Padahal yang penting itu cuma satu, kong Maria so pili tu bagean yang bae itu. Tu bae itu nyanda mo dapa ambe dari pa dia.” Satu kali Yesus basombayang di satu tampa. Waktu Dia so klar basombayang, De pe satu murit babilang pa Dia, “Guru, tolong dang ajar akang pa torang basombayang, sama deng Yohanes Pembaptis da se ajar pa de pe murit-murit basombayang.” Yesus bilang pa dorang, “Kalu ngoni basombayang, bilang jo bagini, ‘Bapa, torang minta supaya samua hormat tu Bapa pe nama lantaran Bapa itu kudus. Bapa, datang jo Berkuasa sbagai Raja pa torang. Kase akang pa torang makanan yang cukup for tiap hari. Tolong kase ampung akang tu torang pe dosa-dosa lantaran torang lei kase ampung sapa jo yang da beking sala pa torang, kong jang kase biar pa torang tagoda for beking tu jaha.’ ” Trus Yesus bilang pa dorang satu prumpamaan, “Di antara pa ngoni ini ada satu orang yang pigi pa de pe tamang waktu tenga malam, kong babilang, ‘Tamang, tolong kwa kase pinjam akang tiga roti pa kita. Soalnya ada kwa kita pe tamang yang da beking perjalanan da basingga pa kita pe ruma, mar kita kasiang nyanda ada makanan for kase makang pa dia.’ Kong tu de pe tamang yang di dalam ruma itu manyao bagini pa dia, ‘Jang batrosol pa kita! Kita so kunci tu pintu, kong kita deng kita pe anak-anak lei so tidor. Kita so nyanda mo bangong for kase tu ngana da minta itu.’ Kita bilang pa ngoni, biar lei dorang dua batamang, tu tamang yang di dalam ruma itu nimau mo bangong for kase tu dia pe tamang da minta itu. Mar lantaran tu tamang itu nyanda malo baminta-minta trus, de pe laste dia pe tamang itu bangong kong kase pa dia apa tu dia da minta. So itu, Kita bilang pa ngoni, minta jo pa Tuhan apa tu ngoni pe perlu, nanti Dia mo kase apa tu ngoni da minta. Cari jo pa Dia apa tu ngoni pe perlu, nanti ngoni mo dapa itu dari pa Dia. Batoki jo pa Dia pe pintu for baminta, nanti Dia mo buka akang tu pintu for kase apa tu ngoni da minta. Soalnya tiap orang yang baminta pa Tuhan, dia mo trima apa tu dia da minta. Kong tiap orang yang cari apa tu de pe perlu pa Tuhan, dia mo dapa itu. Trus tiap orang yang batoki pa Tuhan pe pintu for baminta, Tuhan mo buka akang pintu kong kase tu dia da minta. Dari samua papa yang ada di antara pa ngoni ini, kalu ngoni pe anak baminta ikang, apa ada yang mo kase ular pa dia pe anak? Nyanda to? Kong kalu ngoni pe anak minta telor, apa ngoni mo kase kalajengking pa dia? Nyanda to? Jadi biar ngoni pe hati jaha, ngoni tau bakase tu bae pa ngoni pe anak-anak. No apa lei tu ngoni pe Bapa di sorga! Dia pasti mo kase Roh Kudus pa orang-orang yang baminta pa Dia.” Satu kali, ada tu orang yang jadi wowo lantaran dia da kemasukan akang setang, kong Yesus user tu setang dari pa tu orang itu. Serta tu setang so kaluar, tu orang itu so bole babicara, kong banya orang yang da lia tu kejadian itu taheran-heran. Mar di antara orang banya itu ada tu da babilang, “Dia da bauser setang-setang pake Beelzebul pe kuasa, tu setang-setang pe bos.” Kong ada lei dari antara pa dorang yang mo coba-coba pa Yesus. Dorang minta pa Dia supaya Dia beking mujisat for se bukti kalu Dia memang dari Tuhan Allah. Mar Yesus tau tu dorang pe pikiran, kong Dia bilang pa dorang, “Kalu rakyat di satu krajaan baku malawang kong tapisa-pisa, tu krajaan so pasti mo ancor, deng lei kalu satu ruma tangga baku malawang kong tapisa-pisa, so pasti lei mo ancor. Bagitu lei kalu setang deng setang tapisa-pisa kong dia sama deng da malawang de pe diri sandiri, so pasti de pe krajaan mo ancor kong abis. Kita bilang bagitu lantaran ngoni bilang kalu Kita da user setang pake kuasa dari Beelzebul tu setang pe bos. No kalu butul Kita da bauser setang pake Beelzebul pe kuasa, ngoni pe murit-murit dang da bauser setang pake sapa pe kuasa? Tantu katu pake Tuhan Allah pe kuasa to? Jadi dari apa tu ngoni pe murit-murit da beking itu, itu se tunjung kalu tu ngoni da tudu pa kita itu sala. Mar kalu Kita da bauser setang pake Tuhan Allah pe kuasa, itu de pe arti Tuhan Allah so Berkuasa sbagai Raja di tenga-tenga pa ngoni. Kalu ada satu orang kuat yang pake senjata lengkap bajaga tu de pe ruma sandiri, tantu katu samua tu dia punya aman. Mar kalu ada satu orang yang lebe kuat dari dia datang srang kong se kala pa dia, tu orang yang lebe kuat itu mo rampas samua de pe senjata yang jadi de pe andalan. Abis itu, tu orang yang lebe kuat itu mo rampas samua tu dia pe barang-barang, kong dia se berbage samua barang itu pa tu orang yang lebe kuat itu pe tamang-tamang. Sapa yang nimau sama-sama deng Kita, dia itu sebenarnya malawang pa Kita. Kong sapa yang nyanda tolong pa Kita for se kumpul tu orang-orang supaya dorang sama-sama deng Kita, dia itu yang beking orang-orang tafiaro jao dari pa Kita.” Yesus bilang lei, “Kalu setang kaluar dari satu orang, tu setang itu pi babaron lewat tu tampa-tampa tandus for cari tampa mo tinggal akang. Mar lantaran dia nyanda dapa tampa mo baistirahat akang, dia bapikir bagini, ‘Lebe bae kita babale jo di tampa tinggal dulu, tu orang yang kita so perna tinggal akang.’ Waktu dia bale kong maso ulang pa tu orang itu, dia lia tu orang itu sama deng ruma yang so sosapu akang bersi deng so taator rapi. Abis itu, tu setang pi pangge tuju setang laeng yang lebe jaha dari dia, kong dorang maso pa tu orang itu trus tinggal di situ. De pe laste, tu orang itu pe keadaan so lebe soe dari tu pertama.” Waktu Yesus masi babicara tentang hal-hal itu, ada satu parampuang dari orang banya itu babilang deng suara kuat pa Dia, “Bapak pe mama yang da se lahir pa Bapak deng da se batoto, dia itu yang paling snang.” Mar Yesus manyao, “Sebenarnya yang paling snang, orang yang badengar tu Tuhan Allah pe firman kong iko tu firman itu.” Waktu tu orang di situ so lebe banya bakrumun pa Yesus, Dia babilang, “Orang-orang skarang ini, orang-orang jaha. Dorang minta pa Kita beking mujisat for se bukti kalu Kita dari Tuhan Allah. Mar Kita nyanda mo kase bukti apa-apa pa dorang, kacuali Kita mo se inga pa dorang apa tu da jadi pa nabi Yunus dulu. Soalnya dulu nabi Yunus ada di dalam ikang basar pe puru trus Tuhan se kaluar pa dia, itu sama deng satu mujisat for jadi bukti pa orang Niniwe supaya badengar pa dia. Kong bagitu lei deng Anak Manusia, Tuhan mo beking mujisat pa Anak Manusia for jadi bukti pa orang-orang skarang ini. Nanti di hari kiamat, tu hari Tuhan mo adili pa samua orang, tu ratu Syeba yang dulu da kuasai negri di bagian Slatan mo hidop ulang sama-sama deng ngoni tu orang-orang skarang ini. Trus dia mo se tunjung tu ngoni pe sala kong ngoni mo dapa hukuman. Soalnya dulu dia itu da datang dari jao skali pigi pa raja Salomo for dengar tu raja Salomo pe hikmat. Mar ngoni tarukira jo bae-bae, skarang di sini ada Orang yang lebe berkuasa dari raja Salomo, mar ngoni tetap nyanda mo badengar pa Dia. Kong nanti di hari kiamat tu hari Tuhan mo adili pa samua orang, tu orang-orang yang dulu da tinggal di kota Niniwe mo hidop ulang sama-sama deng ngoni tu orang-orang skarang ini, kong dorang mo kase tunjung tu ngoni pe sala trus ngoni mo dapa hukuman. Soalnya tu orang-orang Niniwe itu bertobat serta dorang dengar tu Tuhan pe pesan yang Yunus da kase tau. Kong tarukira jo bae-bae, skarang ini ada Orang yang lebe berkuasa dari nabi Yunus di tenga-tenga pa ngoni, ngoni so dengar tu Tuhan pe pesan mar ngoni nimau bertobat.” Yesus bilang satu prumpamaan, “Nyanda ada satu orang tu da pasang pelita kong taru tu pelita itu di tampa yang tasambunyi ato tutu akang deng loto. Pasti dia mo taru tu pelita itu pa de pe tampa supaya samua orang yang maso ka dalam ruma bole lia tu de pe cahaya. Ngoni pe mata itu sama deng pelita. Ngoni pe mata itu yang kase trang pa ngoni pe hati. Kalu ngoni pe mata balia deng jelas, ngoni pe hati lei jadi trang. Mar kalu ngoni pe mata nyanda balia deng jelas, ngoni pe hati lei iko jadi glap. So itu ngoni musti hati-hati, jang sampe ngoni pikir kalu tu trang ada pa ngoni pe hati, padahal itu no tu glap. Soalnya kalu ngoni pe sluru hati trang kong nyanda ada bagean yang glap biar cuma satu, pasti ngoni pe sluru hati jadi trang skali, itu sama deng pelita pe cahaya da se trang pa ngoni.” Pe klar Yesus babicara, ada satu orang dari golongan Farisi undang pa Yesus for makang pa de pe ruma. So itu Yesus pigi pa orang itu pe ruma kong dudu makang di situ. Tu orang dari golongan Farisi itu heran lia pa Yesus da makang nyanda bacuci tangan lebe dulu iko tu dorang pe atoran agama. Kong Tuhan Yesus bilang pa dia, “Ngoni tu orang-orang dari golongan Farisi, ngoni se tunjung kalu ngoni ja iko tu ngoni pe atoran agama, mar pa ngoni pe hati punung deng tu jaha deng ngoni lei ja rampas tu orang pe harta. Itu bole mo se sama deng ngoni ja kase bersi tu ngoni pe glas deng piring cuma pa de pe bagian luar, mar de pe bagian dalam pe kotor skali. Pe biongo skali ngoni itu! Tuhan Allah tu da beking tu bagean luar dari pa ngoni pe diri, deng Dia lei tu da beking tu bagean dalam dari pa ngoni pe diri tu ngoni pe hati itu. So itu ngoni kase jo apa tu ada pa ngoni pa tu orang-orang miskin. Kalu ngoni beking bagitu, ngoni pe diri deng ngoni pe pikiran mo jadi butul-butul bersi. Cilaka jo ngoni tu orang-orang dari golongan Farisi! Soalnya ngoni memang ja kase tu spulu persen pa Tuhan Allah sampe dari tu ngoni pe hasil tanaman rupa tu selasi, tu inggu deng samua jenis sayor, samua itu ngoni beking. Mar de pe masala ngoni nyanda adil pa orang laeng deng nyanda sayang pa Tuhan Allah. Bagus katu kalu ngoni tetap kase ngoni pe spulu persen, deng ngoni lei musti adil pa orang laeng deng sayang pa Tuhan Allah. Cilaka jo ngoni tu orang-orang dari golongan Farisi! Soalnya di ruma-ruma ibada agama Yahudi, ngoni suka ja dudu di tampa paling muka tu tampa yang terhormat, deng ngoni lei suka orang ja hormat di tampa yang ja takumpul akang banya orang. Cilaka jo ngoni, ngoni sama deng kubur yang nyanda dapa lia kubur lantaran nyanda ada tanda apa-apa pa de pe atas. Jadi orang-orang bajalang di atas kubur itu lantaran dorang nintau kalu ada orang mati di dalam tana itu.” Kong ada satu dari tu ahli-ahli Taurat babilang pa Yesus, “Guru, deng Guru bilang bagitu, Guru so hina lei pa torang.” Trus Yesus manyao pa dorang, “Cilaka jo ngoni tu ahli-ahli Taurat! Soalnya ngoni tuntut orang laeng for beking tu atoran-atoran yang susa for dorang mo beking, itu jadi beban yang brat for dorang mo beking. Trus, biar cuma sadiki ngoni sandiri nyanda tolong pa dorang for beking tu atoran-atoran itu. Cilaka jo, lantaran ngoni yang da beking bagus tu nabi-nabi dulu pe kubur-kubur, padahal ngoni pe nene moyang dulu yang nyanda iko tu nabi-nabi da bilang kong ngoni pe nene moyang itu yang da bunung pa tu nabi-nabi itu. Jadi deng ngoni beking bagus tu kubur-kubur itu, ngoni so stuju deng tu ngoni pe nene moyang tu da bunung tu nabi-nabi itu. Tu ngoni pe nene moyang da bunung tu nabi-nabi itu, kong ngoni da ambe bagean di situ deng cara beking tu dorang pe kubur jadi bagus. So itu, dulu Tuhan Allah yang bijaksana babilang bagini, ‘Kita mo utus tu nabi-nabi deng tu rasul-rasul itu pigi pa orang-orang Israel, kong dari antara pa tu nabi-nabi deng tu rasul-rasul itu ada yang dorang mo siksa deng yang laeng dorang mo bunung.’ Jadi Tuhan Allah mo hukum pa ngoni yang da hidop di jaman ini lantaran samua nabi yang da dapa bunung dari waktu Tuhan Allah beking ni dunia, mulai dari waktu Habel da dapa bunung sampe waktu Zakharia da dapa bunung di Ruma Ibada Pusat antara tampa ja kase korban persembahan deng tu Ruang Mahasuci. Kita bilang pa ngoni, nanti Tuhan Allah mo hukum tu orang-orang di jaman ini lantaran samua tu dorang da beking. Cilaka jo ngoni tu ahli-ahli Taurat! Soalnya ngoni so tau tu kitab Taurat pe isi mar ngoni sandiri nyanda beking itu, malatare ngoni da halangi pa orang laeng for iko pa Tuhan. Itu sama deng ngoni da pegang kunci for buka pintu mar ngoni sandiri nyanda maso, malatare ngoni larang orang laeng mo maso.” Serta Yesus se tinggal tu tampa itu, tu ahli-ahli Taurat deng tu orang-orang dari golongan Farisi mulai cari-cari hal trus pa Yesus, deng lei dorang tanya-tanya akang trus for pancing pa Dia. Dorang brusaha trus for jebak pa Dia supaya Dia sala bicara. Waktu itu, ada ribuan orang da datang bakumpul sampe dorang baku-baku ruju. Kong Yesus mulai mangajar. Pertama Dia mangajar pa De pe murit-murit, Dia bilang, “Hati-hati jo ngoni deng tu orang-orang dari golongan Farisi, jang ngoni iko dorang pe kalakuan. Dorang kase tunjung kalu dorang itu ja iko pa Tuhan mar sebenarnya nyanda. Dorang pe hidop itu ja kase pengaru pa banya orang, itu kurang sama deng tu ragi sadiki yang da taru di adonan roti yang beking tu adonan itu bareis. Mar apa yang jaha tu skarang ini tasambunyi, nanti orang mo dapa tau, deng apa yang skarang ini masi jadi rahasia, nanti orang mo tau. So itu, apa tu ngoni da bilang yang masi rahasia for orang laeng, itu mo dapa tau di muka banya orang. Deng lei apa tu ngoni da se bise pa orang pe talinga di dalam kamar, itu mo kase tau dari atas ruma supaya banya orang dengar.” Yesus babilang lei, “Hei ngoni Kita pe tamang-tamang, dengar bae-bae tu Kita mo bilang ini: ngoni jang tako pa orang yang cuma mampu bunung ngoni pe badan. Soalnya biar dorang so bunung pa ngoni, dorang nimbole mo beking apa-apa deng ngoni pe jiwa. Mar Kita mo se tunjung pa ngoni sapa tu ngoni musti tako akang. Ngoni musti tako pa Tuhan Allah lantaran Dia itu bole babunung orang deng Dia itu lei yang ada kuasa for kase lempar orang pe jiwa ka neraka. Kita bilang pa ngoni, ngoni musti tako pa Dia! Co ngoni pikir tu lima ekor burung pipit ja jual deng harga yang mura skali. Mar biar dorang nyanda ada harga, nyanda ada satu ekor yang Tuhan Allah da lupa akang. Jadi ngoni nyanda usa tako lantaran ngoni itu lebe berharga di mata pa Tuhan Allah dari banya burung pipit. Hele tu ngoni pe rambu di kapala Tuhan tau de pe jumla.” Kong Yesus babilang lei, “Sapa yang mangaku di muka pa orang-orang kalu dia iko pa Kita, nanti Kita tu Anak Manusia lei mo mangaku di muka pa Tuhan Allah pe malaekat-malaekat kalu Kita kanal pa tu orang itu. Mar sapa yang manyangkal di muka orang-orang kalu dia iko pa Kita, Kita lei mo manyangkal di muka pa Tuhan Allah pe malaekat-malaekat kalu Kita kanal pa dia. Kalu orang bilang sesuatu yang malawang pa Anak Manusia, dia masi bole mo dapa ampung, mar sapa jo yang bilang sesuatu yang bahojat pa Roh Kudus, dia nyanda mo dapa ampung. Kong kalu orang bawa ngoni ka ruma-ruma ibada agama Yahudi ato pa pemerenta-pemerenta ato pa orang-orang yang pegang kuasa for dapa adili, ngoni nyanda usa tako tentang apa tu ngoni mo bilang ato bagimana ngoni mo babela diri. Soalnya waktu itu jo tu Roh Kudus mo se tau pa ngoni apa tu ngoni musti bilang.” Kong satu dari antara orang banya itu babilang pa Yesus, “Guru, bilang akang pa kita pe sudara supaya dia berbage deng kita tu warisan.” Mar Yesus bilang pa dia, “Bapak, sapa so yang da angka pa Kita jadi hakim ato jadi tukang berbage ngoni pe warisan?” Kong Yesus bilang pa tu orang banya yang ada di situ, “Bajaga-jaga deng hati-hati jo ngoni supaya ngoni jang sraka. Soalnya manusia pe hidop nyanda tagantong pa de pe harta, biar lei de pe harta itu tabuang-buang.” Trus Yesus kase tau satu prumpamaan pa dorang, “Ada satu orang kaya. Dia pe kobong pe hasil banya skali sampe tabuang-buang. Kong tu orang kaya itu mulai bapikir pa de pe hati bagini, ‘Kita so nyanda ada lei tampa for tampung akang tu kita pe hasil kobong, kong skarang apa kang tu kita musti beking?’ Trus dia bapikir lei, ‘Kita beking jo bagini: kita mo bongkar tu tampa-tampa yang kita ja tampung akang, kong kita mo beking yang baru tu lebe basar dari itu. Trus kita bole mo simpang di situ samua tu gandum deng tu kita pe barang-barang yang laeng. Abis itu kita mo bilang pa kita pe diri sandiri: kita so simpang banya gandum deng barang-barang laeng pa kita pe tampa ja tampung akang, kong itu bole mo pake deng taong-taong. Jadi skarang kita so bole baistirahat trus, kita bole makang, minum deng basnang-snang.’ Mar Tuhan Allah bilang pa dia, ‘Ngana pe biongo! Ini malam jo ngana pe nyawa mo dapa ambe dari pa ngana. Kong samua tu harta yang ngana da kumpul itu so bukang lei ngana punya.’ Bagitu no tu mo jadi pa orang yang cuma da kumpul harta for de pe diri sandiri. Dia nyanda farduli tu Tuhan Allah pe mau, dia itu sama deng orang yang nyanda punya apa-apa di muka pa Tuhan Allah.” Yesus babilang pa Dia pe murit-murit, “So itu Kita bilang pa ngoni, ngoni nyanda usa kuatir tu ngoni pe hidop, tentang apa tu ngoni mo makang deng lei tentang baju tu ngoni mo pake. Soalnya ngoni pe hidop itu lebe penting dari apa tu ngoni mo makang, kong ngoni pe badan itu lebe penting dari tu baju yang ngoni mo pake. Co ngoni lia tu burung-burung gagak itu. Tu burung-burung itu nyanda ja baambor bibit deng nyanda ja bapete apa-apa, kong nyanda ada gudang ato lumbung for simpang akang makanan. Mar biar lei bagitu Tuhan Allah kase makang pa dorang. Kong ngoni itu jao lebe penting dari tu burung-burung itu. Kalu ngoni kuatir deng tu hal-hal itu, apa ngoni pe kuatir itu bole mo se tamba panjang tu ngoni pe umur? Pasti nyanda to? Jadi kalu ngoni nyanda mampu mo beking tu hal kacili rupa se tamba tu ngoni pe umur itu, no kiapa dang ngoni musti kuatir deng tu hal-hal laeng? Ngoni nyanda perlu kuatir deng itu. Co ngoni tarukira bagimana tu bunga bakung batumbu. Tu bunga itu pe bagus, tu bunga itu nyanda bakarja deng nyanda ja beking benang for beking baju. Mar Kita bilang pa ngoni, biar lei tu raja Salomo pe kaya deng pe hebat mar dia pe baju nyanda ada apa-apa kalu se banding deng tu bunga itu pe bagus. Rumpu yang batumbu di padang, Tuhan Allah piara deng beking bagus. Tu rumpu itu ni hari ada, trus eso dapa bakar. Kalu tu rumpu itu Tuhan piara deng beking bagus, lebe-lebe lei tu ngoni pe hidop tantu katu Tuhan mo piara deng beking bagus. Jadi kiapa so ngoni nyanda talalu percaya pa Dia? Ngoni nyanda usa kuatir deng pikir-pikir tentang apa tu ngoni mo makang ato apa tu ngoni mo minum. Soalnya tu orang-orang yang nyanda kanal pa Tuhan Allah slalu kuatir tentang tu samua itu, mar ngoni pe Bapa di Sorga tau kalu ngoni perlu samua itu. Mar lebe bae ngoni cari jo pa Tuhan Allah supaya Dia Berkuasa sbagai Raja pa ngoni, kong Dia mo kase samua tu ngoni pe perlu.” Yesus babilang lei, “Ngoni cuma sadiki, sama deng satu klompo kacili domba-domba. Mar biar bagitu, ngoni jang tako! Soalnya ngoni pe Bapa snang lantaran ngoni mo sama-sama deng Dia mo Berkuasa sbagai Raja. Jual jo ngoni pe harta kong kase tu doi hasil dari da bajual itu pa orang-orang miskin. Kalu ngoni beking rupa itu, itu sama deng ngoni da simpang tu ngoni pe harta di sorga, kong aman di situ di pundi-pundi yang nyanda perna mo rusak. Soalnya di sorga nyanda ada papancuri yang mo ambe tu harta itu, deng lei nyanda ada binatang rayap yang mo se ancor tu harta. Soalnya di mana jo tu ngoni pe harta ada, di situ lei ngoni pe hati.” Kong Yesus bilang lei, “Lebe bae ngoni siap jo for layani pa Tuhan Allah, sama deng orang di siang hari da siap deng baju karja for bakarja, sama lei deng orang da pasang lampu supaya dia so siap karja di malam hari. Ngoni siap lei mo karja sama deng tu budak-budak yang da batunggu dorang pe tuang mo pulang dari pesta kaweng, supaya kalu dorang pe tuang itu pulang so malam kong batoki pintu, dorang so siap mo buka tu pintu mo sambut pa dia. Tu budak-budak rupa itu yang paling snang lantaran waktu dorang pe tuang pulang, dong pe tuang itu dapa riki dorang masi tetap siap da batunggu pa dia. Kita bilang pa ngoni: dorang pe tuang itu mo pake baju karja kong siap-siap layani pa dorang. Kong dia mo suru tu de pe budak-budak itu dudu for makang, trus dia sandiri lei yang layani pa dorang. Kong kalu tu tuang itu datang waktu tenga malam ato amper siang, kong dia dapa riki dorang da siap batunggu rupa itu, so dorang itu yang paling snang. Mar ngoni lei musti tau tu prumpamaan ini: kalu tu tuang ruma tau jam brapa tu papancuri mo datang, tantu dia nyanda mo se biar de pe ruma tu papancuri mo maso akang. Jadi, ngoni lei musti slalu siap for batunggu tu Anak Manusia mo datang ulang. Soalnya ngoni nintau tempo apa tu Anak Manusia mo datang, Dia mo datang kage-kage.” Abis itu Petrus batanya pa Yesus, “Tuhan, tu prumpamaan tadi itu for torang ato for samua orang?” Kong Tuhan Yesus manyao pa dorang pake prumpamaan lei, “Sapa tu budak yang setia deng bijaksana? Tu budak itu de pe tuang mo angka jadi kapala for ator tu budak laeng di ruma. Dia pe tuang kase tanggong jawab pa dia for kase makang tu budak laeng pas jam makang. Tantu katu tu budak yang paling snang itu tu budak yang waktu de pe tuang pulang dia masi samantara da bakarja. Kita bilang pa ngoni, pasti tu dia pe tuang itu mo angka pa dia kong kase percaya for awasi samua tu de pe tuang pe kepunyaan. Mar kalu tu budak itu jaha, dia babilang pa de pe hati bagini, ‘Kita pe tuang masi lama baru mo pulang.’ Kong dia mulai pukul-pukul tu budak-budak laki-laki deng budak-budak parampuang. Abis itu dia makang deng minum sampe mabo. Kong di hari yang dia nyanda sangka-sangka, kage-kage dia pe tuang pulang, kong tu dia pe tuang itu mo hukum pa dia sampe mati, trus dia pe nasib itu sama deng tu nasib dari orang-orang yang nyanda setia. Kong pa tu budak yang tau apa tu de pe tuang pe mau mar nyanda siap-siap ato nyanda beking apa tu de pe tuang pe mau, dia itu mo dapa hukuman brat. Mar tu budak yang nintau de pe tuang pe mau kong beking sala sampe dapa hukuman, dia mo dapa hukuman mar cuma ringan. Soalnya sapa yang so trima banya kemampuan, pa dia nanti Tuhan mo tuntut lebe dari orang laeng. Deng pa sapa jo yang Tuhan so se banya percaya akang, dia pe tanggong jawab lei basar.” Yesus bilang lei, “Kita datang for beking tu orang yang percaya pa Kita baku malawang deng tu orang yang nyanda percaya, itu sama deng Kita da lempar api di bumi, kong Kita suka kalu tu api itu so bamanyala. Kita nanti mo alami pendritaan, kong Kita pe hati susa skali kalu tu pendritaan itu blum abis. Apa ngoni pikir kalu Kita datang beking orang-orang di dunia ini hidop damai? Nyanda kasiang. Mar so lantaran Kita sampe tu orang-orang yang nyanda percaya pa Kita baku malawang deng tu orang-orang yang percaya. Soalnya mulai skarang, kalu ada lima orang di satu ruma dorang mo baku malawang. Tu tiga orang percaya pa Kita kong tu dua nyanda, ato dua orang percaya pa Kita kong tu tiga nyanda. Dorang mo baku malawang, tu papa malawang pa de pe anak laki-laki, kong anak laki-laki malawang de pe papa. Mama malawang pa de pe anak parampuang, kong anak parampuang malawang pa de pe mama. Mama mantu malawang pa de pe anak mantu parampuang, kong anak mantu parampuang malawang pa de pe mama mantu.” Yesus bilang lei pa orang banya, “Kalu ngoni lia awan nae ka sabla barat, ngoni iko babilang, ‘Ini tanda mo ujang,’ kong nyanda lama memang turung ujang. Kalu ngoni lia angin slatan batiop, ngoni bilang, ‘Ini tanda mo panas skali,’ kong itu memang jadi bagitu. Hei ngoni orang-orang munafik! Ngoni bole tau cuaca cuma deng lia tu langit deng bumi pe keadaan. Mar kiapa dang ngoni so lia tu Kita ja beking deng da dengar tu Kita ja bilang, kong ngoni lei nyanda mangarti itu.” Yesus bilang lei, “Kalu ngoni ada masala, ngoni sandiri musti mampu putuskan tu butul. Kalu umpama ada yang lapor pa ngoni ka pengadilan, kong ngoni deng tu da balapor da samantara bajalang mo pigi ka sana, lebe bae ngoni brusaha baku ator damai jo deng dia. Soalnya kalu nyanda, nanti tu yang balapor itu mo bawa deng paksa pa ngoni for mangada pa hakim. Kong tu hakim itu mo srahkan ngoni pa de pe pengawal, kong tu pengawal kase maso pa ngoni ka bui. Kita bilang pa ngoni, ngoni nyanda mo kaluar dari bui seblum ngoni bayar samua tu hakim da suru bayar.” Waktu itu ada bebrapa orang datang pa Yesus, kong kase tau pa Dia kalu ada orang-orang Galilea yang Gubernur Pilatus da bunung. Dorang itu dapa bunung waktu samantara bawa korban for persembahan pa Tuhan Allah di Yerusalem. Yesus bilang pa tu orang-orang yang datang pa Dia, “Kalu tu orang-orang Galilea dapa bunung rupa itu, apa ngoni pikir dorang da beking dosa lebe banya dari tu orang Galilea laeng? Nyanda kasiang! Mar Kita bilang pa ngoni, kalu ngoni nyanda bertobat dari ngoni pe dosa-dosa, ngoni samua lei mo binasa sama deng dorang. Ada lei dlapan blas orang tu da mati tatindis deng menara yang da rubu di dekat Siloam. Apa ngoni pikir lei dorang da beking dosa lebe banya dari tu orang-orang laeng yang tinggal di Yerusalem? Nyanda kasiang! Mar Kita bilang lei pa ngoni, kalu ngoni nyanda bertobat, ngoni samua lei mo binasa sama deng dorang.” Abis itu Yesus se tau satu prumpamaan, “Ada satu orang yang da tanang pohong ara pa de pe kobong anggor. Kong satu kali dia datang for cari bua di pohong itu, mar nyanda ada bua biar cuma satu. Kong dia bilang pa tu orang yang ja baurus kobong anggor itu, ‘Co lia, so tiga taong kita datang cari bua di pohong ara ini mar kita nyanda dapa. Potong jo tu pohong ini! Jang se biar tu pohong ini ada di tana ini kalu nyanda ja babua!’ Mar tu orang ja baurus kobong anggor itu manyao, ‘Bapak, se biar jo ni pohong ini batumbu satu taong lei. Kita mo pacol tu tana pa de pe sei-sei kong mo kase akang pupuk. Sapa tau katu taong depan tu pohong ini mo babua, mar kalu nyanda, lebe bae potong jo.’ ” Satu kali pas hari Sabat, Yesus mangajar di satu ruma ibada agama Yahudi. Di situ ada satu parampuang yang so dlapan blas taong bongko kong so nimbole badiri tre lantaran setang da kuasai pa dia. Waktu Yesus lia pa tu parampuang itu, Dia pangge tu parampuang itu kong babilang, “Ibu, Kita se bae pa ibu dari ibu pe panyaki.” Yesus taru Dia pe tangan pa tu parampuang itu, kong waktu itu jo tu parampuang so bole badiri tre. Trus tu parampuang puji deng hormat pa Tuhan Allah. Mar tu kapala ruma ibada agama Yahudi mara lantaran Yesus da se bae orang di hari Sabat. So itu tu kapala ruma ibada babilang pa orang banya, “Ada anam hari for bakarja. Kalu ngoni suka mo bae, ngoni datang jo di sala satu hari itu, jang datang waktu hari Sabat.” Mar Yesus bilang pa tu orang itu, “Ngoni ini munafik! Ngoni sandiri di hari Sabat da kase lapas ngoni pe sapi ato keledai dari dong pe kandang, kong bawa kaluar for se minum. Ni ibu ini Abraham pe keturunan, kong so dlapan blas taong setang pe bos da kuasai pa dia. Tantu katu di hari Sabat ini Kita bole se lapas pa dia dari tu setang pe bos pe kuasa.” Waktu Yesus bilang bagitu, samua orang tu ja malawang pa Yesus jadi malo, mar tu orang banya snang skali lantaran samua yang Yesus da beking itu luar biasa. Kong Yesus bilang lei, “Kira-kira bagimana kang tu Tuhan Allah berkuasa sbagai Raja pa Dia pe orang-orang? Kong Kita mo se sama deng apa dang itu? Bagini, tu Tuhan Allah pe orang-orang pertama cuma sadiki mar nanti mo jadi banya, itu sama deng tu biji paling kacili yang orang da tanang pa de pe kobong. Lama-lama tu biji kacili itu batumbu jadi pohong, kong burung-burung datang basarang pa de pe cabang-cabang. Kong Kita mo se sama deng apa lei kang tu Tuhan Allah Berkuasa sbagai Raja pa Dia pe orang-orang? Bagini, tu Tuhan Allah pe orang-orang itu bole mo se sama deng ragi sadiki yang satu parampuang da ambe kong kase campur ka ampa pulu liter topong trigu, kong tu ragi itu beking samua tu adonan dari topong itu bareis jadi basar.” Abis itu, Yesus se trus Dia pe perjalanan ka Yerusalem. Dia da lewat di kota-kota deng kampung-kampung, kong Dia mangajar pa orang-orang di tampa-tampa tu Dia da lewat akang itu. Trus ada satu orang yang batanya pa Dia, “Guru, apa cuma sadiki so tu orang-orang yang mo dapa slamat dari hukuman dosa?” Yesus bilang pa orang-orang di situ, “Tu orang-orang yang mo slamat, dorang itu bole se sama deng tu orang-orang yang brusaha lewat tu pintu yang sempit! Kita bilang pa ngoni, banya orang yang nanti brusaha mo maso, mar dorang nyanda mo dapa maso. Soalnya kalu tu tuang ruma so badiri kong tutu tu pintu, ngoni mo badiri di luar trus batoki-toki pintu. Kong ngoni mo babilang, ‘Bapak, buka akang kwa tu pintu for torang!’ Kong dia mo manyao pa ngoni, ‘Kita nyanda kanal pa ngoni deng nintau ngoni itu dari mana.’ Trus ngoni mo babilang, ‘Torang ini so makang deng minum sama-sama deng Bapak, kong Bapak da mangajar di jalang-jalang pa torang pe kota.’ Mar Dia mo babilang pa ngoni, ‘Kita bilang pa ngoni, Kita nyanda kanal pa ngoni deng nintau ngoni itu dari mana. Bajao jo ngoni dari pa Kita, ngoni samua yang ja beking tu jaha.’ Kong waktu itu, ngoni mo manangis sampe ngoni pe gigi baku goso sampe babunyi lantaran mendrita. Soalnya ngoni mo lia tu ngoni pe nene moyang Abraham, Ishak, Yakub deng samua nabi yang laeng ada di tampa tu Tuhan Allah Berkuasa sbagai Raja, mar ngoni sandiri dapa user dari situ. Trus mo ada orang-orang datang dari timur deng barat, dari utara deng slatan, kong dorang mo dudu makang sama-sama di tampa tu Tuhan Allah Berkuasa sbagai Raja. Kong tarukira jo bae-bae, nanti di hari kiamat, tu orang yang orang anggap nyanda penting, dia itu mo dapa hormat, kong tu orang yang orang bilang orang penting, dia itu nyanda mo jadi apa-apa.” Waktu itu jo, ada bebrapa orang dari golongan Farisi datang pa Yesus. Dorang babilang pa Yesus, “Bapak, pigi jo dari sini lantaran raja Herodes mo bunung pa Bapak.” Yesus manyao pa dorang, “Ngoni pigi jo pa tu bapak Herodes yang licik sama deng rubah itu, kong bilang pa dia bagini, ‘Tarukira jo bae-bae, ni hari deng de pe eso Kita da user setang deng da se bae orang saki, kong di hari katiga Kita mo se klar samua tu Kita pe karja.’ Mar biar lei bagitu, ni hari, eso deng lusa, Kita musti bajalang trus ka Yerusalem. Soalnya memang nabi mustinya dapa bunung di Yerusalem, bukang di luar Yerusalem. Hei ngoni tu orang-orang Yerusalem! Ngoni yang da bunung tu nabi-nabi, ngoni lempar deng batu tu orang-orang yang Tuhan da utus pa ngoni. Kita so ulang-ulang kase kumpul pa ngoni di dekat pa Kita, sama deng tu ayam mai da se kumpul de pe anak-anak for jaga di bawa de pe sayap, mar ngoni nimau Kita beking bagitu. Tarukira jo bae-bae, Tuhan Allah so mo se tinggal tu ngoni pe tampa ini, tu tampa ini mo jadi sunyi skali. Kita bilang pa ngoni, ngoni so nyanda mo lia lei pa Kita, mar nanti pa de pe waktu, ngoni mo lia pa Kita kong mo bilang, ‘Puji jo pa Dia yang da datang dalam nama Tuhan.’ ” Satu kali pas hari Sabat, Yesus pigi ka ruma pa tu satu pemimpin golongan Farisi for makang di situ. Kong tu orang-orang di situ da tarukira trus pa Yesus. Waktu itu, ada satu orang pi badiri di muka pa Yesus. Tu orang itu ada panyaki yang beking de pe tangan deng kaki jadi bangka. Kong Yesus batanya pa tu ahli-ahli Taurat deng tu orang-orang dari golongan Farisi itu, “Kalu iko torang pe atoran agama, bole ato nyanda se bae orang di hari Sabat?” Mar tu ahli-ahli Taurat deng tu orang-orang dari golongan Farisi cuma badiam. Kong Yesus pegang tu orang itu pe tangan trus se bae pa dia. Abis itu Dia suru pigi pa tu orang itu. Kong Yesus bilang pa dorang, “Kalu di hari Sabat kong ngoni pe anak ato ngoni pe sapi taisi di parigi, apa ngoni mo se biar pa dia? Tantu nyanda to? Ngoni pasti mo iko se kaluar pa dia dari parigi.” Kong nyanda ada satu orang yang mampu mo bilang apa-apa for balas tu Dia da bilang. Waktu itu, Yesus da tarukira tu orang-orang yang da dapa undang makang, dorang cuma da pili tampa dudu di muka, tu tampa yang terhormat. So itu Yesus kase prumpamaan pa dorang, “Kalu ada orang undang pa ngoni ka pesta kaweng, ngoni jang dudu di muka, tu tampa yang terhormat. Soalnya sapa tau ada orang yang lebe penting dari ngoni tu dia da undang, kong tu tuang ruma yang da baundang itu mo datang pa ngoni trus babilang bagini, ‘Minta maaf ne, tu tampa ini so se sadia for ni tamu.’ Trus ngoni deng rasa malo musti pinda ka tampa dudu paling blakang. Jadi kalu ngoni dapa undang, lebe bae ngoni pili jo tampa dudu tu paling blakang. Sapa tau tu tuang ruma mo datang kong babilang pa ngoni bagini, ‘Bapak, mari jo pi dudu di tampa dudu paling muka, tu tampa yang terhormat.’ Deng bagitu ngoni mo dapa hormat di muka samua tamu yang laeng tu da makang sama-sama deng ngoni. Soalnya sapa jo yang angka de pe diri sandiri, Tuhan Allah mo beking dia jadi orang yang nyanda ada arti apa-apa. Kong sapa jo yang nyanda sombong, Tuhan Allah mo angka pa dia.” Abis itu, Yesus bilang lei pa tu orang yang baundang pa Dia, “Laengkali kalu bapak beking acara makang-makang, siang ato malam, bapak jang undang tu tamang-tamang ato tu bapak pe kaka ade ato bapak pe sudara-sudara ato lei tu bapak pe birman-birman yang kaya. Soalnya dorang nanti mo balas undang lei pa bapak. Deng bagitu, apa tu bapak da kase pa dorang, dorang mo balas kase lei pa bapak. Mar kalu bapak beking acara makang-makang, undang jo tu orang-orang miskin, orang-orang cacat, orang-orang lumpu deng orang-orang buta. Kalu bapak beking bagitu, Tuhan Allah mo beking bapak snang skali lantaran dorang itu nyanda ada apa-apa mo balas tu bapak pe bae. Soalnya nanti Tuhan Allah yang mo balas tu bapak pe bae waktu Tuhan Allah da se hidop ulang tu orang-orang yang ja beking tu butul.” Ada satu orang tu da dudu makang sama-sama deng Yesus. Kong waktu dia dengar tu Yesus da bilang itu, dia babilang, “Pe snang skali tu orang yang nanti mo sama-sama makang di tampa Tuhan Allah Berkuasa sbagai Raja.” Kong Yesus kase tau satu prumpamaan pa dia, “Ada satu orang yang da beking acara basar for makang-makang, kong dia da undang banya orang. Waktu tu acara makang itu so mo mulai, dia suru dia pe orang karja bilang pa tu orang-orang yang dia so undang bagini, ‘Mari jo datang, lantaran samua so siap!’ Mar dorang samua yang da dapa undang itu mulai kase alasan macam-macam. Tu pertama bilang pa tu orang karja bagini, ‘Ado, kita minta maaf ne. Kita kwa da bli kobong kong kita musti pigi ka sana for pi lia tu kobong.’ Tu laeng babilang, ‘Kita minta maaf, kita baru da bli sapi lima par. Jadi kita musti pi se coba bakarja tu sapi.’ Trus tu laeng lei babilang, ‘Kita baru da kaweng, so itu kita nyanda mo dapa datang.’ Kong tu orang karja itu babale se tau samua itu pa de pe tuang. Trus tu tuang ruma itu mara skali kong babilang pa de pe orang karja bagini, ‘No kalu bagitu, ngana pigi jo capat-capat ka samua jalang deng lorong di kota. Ngana bawa jo kamari tu orang miskin, orang cacat, orang buta deng orang lumpu.’ Trus tu orang karja itu pi beking tu de pe tuang da suru, abis itu dia babilang pa de pe tuang, ‘Tuang, samua tu tuang da prenta, kita so beking. Mar biar lei dorang samua so datang, masi banya lei tu tampa dudu yang da tasisa.’ Kong tu tuang babilang pa tu orang karja itu, ‘No kalu bagitu, ngana pigi jo ka samua jalang, deng lei pigi ka lorong-lorong di luar kota, kong ngana paksa jo pa tu orang-orang yang ada di situ maso kamari supaya punung tu kita pe ruma ini.’ Kita bilang pa ngana, nyanda ada satu orang dari tu orang-orang yang da dapa undang pertama mo makang pa Kita pe acara ini.” Satu kali, ada banya orang bajalang iko pa Yesus. Kong Yesus mangada pa dorang trus babilang, “Kalu orang butul-butul suka iko pa Kita, mar dia masi lebe sayang pa de pe papa, de pe mama, de pe bini, de pe anak-anak, de pe kaka ade laki-laki ato parampuang, ato dia lebe sayang tu de pe nyawa sandiri daripada sayang pa Kita, dia itu nyanda mo jadi Kita pe murit. Sapa yang nyanda pikul de pe salib, tu de pe arti dia nyanda siap mendrita sampe mati kong iko pa Kita, tu orang itu nimbole mo jadi Kita pe murit. Kalu ada satu dari pa ngoni mo beking satu menara for jaga kobong, apa tu dia musti beking lebe dulu? Tantu katu dia mo dudu kong rekeng tu biaya for beking tu menara. Deng bagitu, dia bole mo dapa tau kalu tu dia pe doi itu cukup ato nyanda for se klar tu menara. Kalu dia nyanda rekeng lebe dulu tu de pe biaya, waktu dia mulai beking tu menara pe fondasi, dia nyanda mampu mo se klar tu menara itu lantaran de pe doi nyanda cukup. Kong samua orang yang da lia itu mo tatawa akang pa dia. Dorang babilang, ‘Dia mulai babeking tu menara, mar dia nyanda mampu mo se klar.’ Ato tu conto laeng bagini: ada satu raja yang dia pe tentara spulu ribu orang, kong dia mo pi baprang malawang tu raja laeng yang de pe tentara dua pulu ribu orang. Tu raja itu tantu mo dudu for pikir bae-bae dulu apa dia mampu ato nyanda mo malawang tu raja itu cuma deng de pe spulu ribu tentara. Kong kalu dia tau nyanda mampu, tantu katu waktu de pe musu masi jao, dia so kirim de pe utusan for baku ator mo minta baku bae. Bagitu lei deng ngoni. Kalu ngoni suka jadi Kita pe murit, ngoni pikir bae-bae dulu apa ngoni mampu mo se tinggal tu ngoni pe kepunyaan ato nyanda. Kalu ngoni nyanda mampu, ngoni nimbole mo jadi Kita pe murit.” Yesus bilang lei, “Garam memang bagus for makanan, mar kalu tu garam so jadi tawar, so nyanda mungkin lei mo beking bagaram ulang. Kalu so bagitu, tu garam itu so nyanda ada lei de pe guna. Biar lei mo pake di kobong for beking subur tana ato for beking pupuk, so nyanda ada de pe guna lei. Jadi kalu so bagitu, lebe bae buang jo itu. Sapa tu ada talinga, badengar jo bae-bae!” Satu kali tu petugas-petugas pajak deng orang-orang yang orang ja anggap berdosa datang pa Yesus for badengar pa Dia. Kong di situ lei ada orang-orang dari golongan Farisi deng ahli-ahli Taurat. Dorang lia itu kong dorang babafeto bagini, “Ni Orang ini trima tu orang-orang berdosa deng makang sama-sama deng dorang.” So itu, Yesus se tau satu prumpamaan pa dorang, “Kalu ada di antara pa ngoni yang ada sratus ekor domba, kong tailang akang satu ekor, apa tu dia mo beking? Pasti dia mo kase tinggal tu sambilan pulu sambilan ekor di padang rumpu kong dia pi cari sampe dapa tu satu ekor yang da ilang itu. Kalu dia so dapa tu domba itu, dia jadi snang kong pikul tu domba pa de pe bahu. Kong pe sampe di ruma, dia pangge de pe tamang-tamang deng birman-birman kong bilang pa dorang, ‘Mari jo basnang-snang deng kita, lantaran tu kita pe domba yang da ilang itu so dapa ulang.’ Kita bilang pa ngoni, bagitu lei kalu ada satu orang berdosa kong dia bertobat, samua tu ada di sorga lei mo snang skali. Tu dorang pe snang waktu tu satu orang bertobat itu, lebe dari dorang pe snang lantaran tu sambilan pulu sambilan orang yang so butul, tu nyanda perlu lei bertobat.” Yesus se tau satu prumpamaan lei, “Ada satu parampuang yang ada spulu doi perak. Kong dia tailang akang satu doi perak. Trus apa tu dia mo beking? Tantu katu dia mo se manyala tu pelita, trus dia sosapu tu de pe ruma kong cari bae-bae tu doi sampe dia dapa tu doi itu. Kong waktu dia dapa tu doi itu, dia pangge pa de pe tamang-tamang deng birman-birman kong babilang, ‘Mari jo basnang-snang deng kita, lantaran kita so dapa ulang tu kita pe doi yang da ilang.’ Kita bilang pa ngoni, bagitu lei kalu ada satu orang berdosa kong dia bertobat, di sorga Tuhan Allah pe malaekat-malaekat lei snang skali.” Yesus se tau satu prumpamaan lei, “Ada satu bapak yang ada dua anak laki-laki. Satu kali, tu bungsu babilang pa dia pe papa, ‘Papa, kase jo kwa pa kita tu warisan yang jadi kita pe bagean!’ Kong dia pe papa kase berbage tu dia pe kepunyaan pa dia pe dua anak itu. Kong serta so bebrapa hari, tu bungsu jual samua tu de pe bagean itu kong pigi ka negri yang jao. Di sana dia kase boros tu de pe doi deng hidop bafoya-foya. Waktu de pe doi samua so abis, di negri itu ada kelaparan pe hebat skali, sampe dia mulai susa. Kong dia pi bakarja pa satu orang di negri itu. Tu orang itu suru pa dia pigi ka kobong for jaga tu orang itu pe boke. Dia pe lapar skali sampe dia suka mo makang tu boke-boke pe makanan. Mar biar dia lapar, nyanda ada satu orang yang da kase makanan pa dia. Kong de pe laste, dia sadar deng de pe keadaan trus babilang, ‘Pa kita pe papa pe ruma, samua tu orang karja pe makanan talebe-lebe, mar kita di sini amper mo mati kelaparan. Lebe bae kita pulang pa kita pe papa, kong kita mo bilang pa dia, “Papa, kita so berdosa pa Tuhan Allah deng pa papa lei. Kita nyanda pantas mo jadi papa pe anak lei. Jadi skarang beking jo kita ini jadi papa pe orang karja.” ’ So itu dia pulang pa de pe papa. Kong masi lei dari jao, tu de pe papa so lia pa dia. Kong de pe papa jadi rasa kasiang skali pa dia, sampe dia pe papa lari pi badekat trus polo kong ciong pa dia. Tu anak itu babilang pa de pe papa, ‘Papa, kita so berdosa skali pa Tuhan Allah deng pa papa lei. Kita nyanda pantas lei mo jadi papa pe anak.’ Mar dia pe papa itu babilang pa de pe orang-orang karja, ‘Capat bawa akang kamari tu juba yang paling bagus kong se pake pa dia. Trus se pake lei tu cincin pa de pe jare deng capatu pa de pe kaki. Kong ambe jo tu sapi muda yang gode kong potong. Abis itu, mari jo torang makang deng basnang-snang. Soalnya kita pe anak ini sama deng so mati kong so hidop ulang. Dia so ilang, kong so dapa ulang.’ Trus dorang mulai basnang-snang. Waktu itu, tu anak yang tua ada di kobong. Waktu dia pulang kong so dekat deng de pe ruma, dia dapa dengar ada suara musik deng orang-orang yang da bamanari. Kong dia pangge satu orang karja trus batanya pa tu orang karja itu, ‘Ada apa pa kita pe ruma kang?’ Tu orang karja itu manyao, ‘Bos pe ade so pulang! Kong bos pe papa so suru potong sapi muda yang gode lantaran bos pe ade so pulang ulang deng slamat.’ Pe dengar itu, tu anak yang tua itu jadi mara kong dia so nimau mo maso ka ruma. So itu de pe papa kaluar kong pi buju pa dia. Mar dia tare cuma da manyao pa de pe papa, ‘Papa, kita so deng taong-taong da karja kras for papa, deng kita lei blum perna langgar tu papa pe prenta. Mar papa blum perna kase akang pa kita biar cuma satu ekor kambing supaya bole makang for basnang-snang deng kita pe tamang-tamang. Mar tu papa pe anak itu, dia so se boros tu papa pe kepunyaan deng tu parampuang-parampuang nakal. Kong skarang waktu dia so pulang, papa potong akang sapi muda yang gode for dia.’ Kong dia pe papa manyao pa dia, ‘Hei papa pe anak, ngana ini slalu ada sama-sama deng papa kong samua tu papa pe kepunyaan, ngana punya lei. Torang skarang musti snang deng beking pesta lantaran tu ngana pe ade sama deng so mati, mar skarang dia so hidop ulang. Dia itu sama deng so ilang mar skarang so dapa ulang.’ ” Abis itu Yesus cirita lei satu prumpamaan pa De pe murit-murit, “Ada tu satu orang kaya, dia ada satu orang yang ja baurus tu samua de pe kepunyaan. Trus ada yang da balapor pa dia kalu tu de pe orang itu ja pake tu de pe kepunyaan for se foya-foya. So itu dia pangge tu de pe orang itu kong babilang, ‘Kita dengar-dengar ngana ja pake tu kita pe kepunyaan for foya-foya. Skarang ngana kase pa kita laporan lengkap tentang tu kita pe kepunyaan yang ngana ja urus. Soalnya ngana so nimbole lei mo urus tu kita pe kepunyaan.’ Tu orang yang ja baurus tu orang kaya itu pe kepunyaan itu babilang dalam hati, ‘Kita pe bos so pecat pa kita dari kita pe karja ini. Apa kang tu kita musti beking skarang? Kalu mo bapacol, kita nyanda kuat. Kalu mo baminta-minta, kita malo. Oh, kita tau apa tu kita mo beking supaya kalu nanti kita so nyanda karja, ada orang tu mo trima pa kita pa dia pe ruma.’ Kong dia pangge satu-satu tu orang-orang yang da bautang pe de pe bos. Kong dia bilang pa tu orang yang pertama, ‘Brapa ngana pe utang pa kita pe bos?’ Tu orang itu manyao, ‘Kita ada utang minya zaitun sratus tampayang.’ Kong dia bilang pa tu orang yang bautang itu, ‘Napa ngana pe surat utang. Ngana dudu di situ kong capat jo tulis lima pulu tampayang.’ Abis itu, dia bilang lei pa tu orang kadua yang da bautang, ‘Brapa ngana pe utang pa kita pe bos?’ Tu orang itu manyao, ‘Sribu karong gandum.’ Kong dia bilang pa tu orang yang da bautang itu, ‘Napa ngana pe surat utang. Kong skarang tulis jo dlapan ratus karong.’ Waktu tu orang kaya itu dengar tu de pe orang yang nyanda jujur itu da beking, dia puji pa tu de pe orang itu lantaran tu orang itu jago cari akal for de pe bae sandiri. Memang orang-orang yang iko dunia pe mau lebe jago cari akal for dorang pe bae di dunia ini daripada tu orang-orang yang hidop dalam trang Tuhan. Kita bilang pa ngoni, pake jo tu kekayaan dunia ini for tolong orang supaya bole dapa banya tamang. Jadi kalu tu kekayaan di dunia so abis, nanti ngoni mo dapa trima di tampa yang ngoni mo tinggal akang for slama-lamanya. Sapa yang bole mo se percaya akang tu hal-hal kacili, dia lei bole mo se percaya akang tu hal-hal basar. Kong sapa yang nimbole mo se percaya akang tu hal-hal kacili, dia lei nyanda mo se percaya akang tu hal-hal basar. Jadi, kalu ngoni nimbole mo se percaya akang tu kekayaan dari dunia ini, nyanda ada tu mo se percaya akang pa ngoni tu hal-hal yang dari sorga. Kalu ngoni nimbole se percaya akang orang laeng pe kekayaan, sapa lei tu mo kase sesuatu pa ngoni for jadi ngoni punya? Nyanda ada to? Satu orang karja nimbole mo bakarja pa dua bos. Soalnya kalu dia ada dua bos, dia pasti mo binci tu bos yang satu kong sayang tu bos yang laeng, dia lei mo setia pa tu bos yang satu kong nyanda farduli deng tu bos laeng. Bagitu lei deng ngoni, nyanda mungkin ngoni mo layani pa Tuhan Allah kalu ngoni lei masi ja pikir-pikir tu kekayaan dunia.” Waktu itu, tu orang-orang dari golongan Farisi yang gila doi itu, dorang da dengar samua tu Yesus da bilang, kong dorang tatawa akang pa Dia. Kong Yesus bilang pa dorang, “Ngoni se lia pa orang-orang kalu ngoni pe diri itu butul, mar Tuhan Allah tau ngoni pe isi hati. Soalnya apa yang orang anggap paling bagus, itu yang Tuhan Allah paling binci. Tu atoran-atoran yang ada di kitab Taurat deng yang da tatulis di kitab-kitab nabi-nabi, samua itu torang orang Yahudi ja iko akang, kong torang ja iko itu sampe Yohanes Pembaptis datang. Trus mulai dari situ, tu Kabar Bae tentang Tuhan Allah Berkuasa sbagai Raja ja se tau pa orang-orang, kong dorang brusaha kras for jadi orang-orang dari Tuhan Allah yang Berkuasa sbagai Raja. Samua atoran di kitab Taurat deng samua yang da tatulis di kitab nabi-nabi nyanda mo ilang biar lei cuma satu huruf, samua itu pasti mo jadi. Lebe gampang kalu tu langit deng tu bumi ilang daripada samua yang da tatulis itu nyanda mo jadi. Kalu ada laki-laki yang kase cere de pe bini kong kaweng ulang deng parampuang laeng, dia itu so bersina. Kong kalu ada laki-laki yang kaweng deng tu parampuang yang de pe laki da se cere, tu laki-laki itu lei so bersina.” Yesus se cirita lei satu prumpamaan, “Ada tu satu orang kaya yang ja pake juba warna pars deng baju dari kaeng alus. Kong tiap hari dia hidop basnang-snang deng dia pe kekayaan. Kong ada lei satu orang miskin tu de pe nama Lazarus. Dia itu punung skali deng kado. Orang-orang bawa pa dia di muka pintu pa tu orang kaya itu pe ruma. Dia lapar kong suka mo makang tu makanan yang da ciri dari pa tu orang kaya itu pe meja. Kong lei katu tu anjing-anjing datang pa dia kong jilat-jilat tu de pe kado. Waktu tu orang miskin itu mati, tu malaekat-malaekat bawa pa dia di sabla pa Abraham. Kong tu orang kaya itu lei mati trus orang se kubur pa dia. Di tampa orang mati, tu orang kaya itu siksa skali. Kong dia bahaga ka atas, trus dari jao dia lia pa Abraham kong tu Lazarus ada pa Abraham pe sabla. Trus dia babilang deng kuat bagini, ‘Bapak Abraham, kasiang akang dang pa kita. Suru jo pa Lazarus supaya kase colo tu de pe ujung jare ka aer, trus dia se basa akang tu kita pe lida. Soalnya kwa kita so siksa skali di dalam api ini.’ Mar Abraham cuma da manyao bagini, ‘Ngana inga bae-bae ne, dulu waktu ngana masi hidop, ngana so trima samua tu bagus. Mar kasiang tu Lazarus waktu dia hidop, dia cuma ja trima tu besae-besae. Kong skarang dia dapa hibur di sini, ngana dapa siksa. Kong lei di antara pa torang deng ngana, Tuhan da beking jurang yang pe basar deng pe dolong skali, supaya tu orang yang ada di sini nyanda dapa pigi ka sana, kong tu orang yang ada di sana nyanda dapa datang kamari.’ Trus tu orang kaya itu bilang lei, ‘No kalu bagitu dang, kita minta tolong pa bapak supaya bapak suru akang pa Lazarus pigi pa kita pe papa pe ruma. Soalnya kita masi ada lima sudara laki-laki di sana. Suru jo dang pa Lazarus pi se inga akang pa dorang for bertobat, supaya nanti dorang lei nyanda maso di tampa pendritaan ini.’ Mar Abraham manyao, ‘Pa dorang itu so ada kitab Taurat yang dari pa nabi Musa deng tu kitab-kitab dari nabi-nabi laeng. Jadi biar jo dorang iko apa tu da tulis di kitab-kitab itu.’ Tu orang kaya itu manyao, ‘Ado, itu kasiang nyanda cukup bapak Abraham. Mar kalu ada satu orang yang so mati kong dia hidop ulang trus pigi pa dorang, dorang itu mo bertobat.’ Mar Abraham bilang pa dia, ‘Kalu dorang nyanda mo iko tu nabi Musa deng nabi-nabi laeng da bilang, dorang lei pasti nyanda mo percaya, biar lei tu da babilang itu orang yang so mati kong hidop ulang.’ ” Satu kali, Yesus bilang pa Dia pe murit-murit, “Pasti ada tu hal-hal yang bole beking orang tagoda beking dosa kong jadi sesat, mar sapa jo yang beking orang jadi sesat, cilaka jo dia. Lebe bae tu orang itu pe leher kase ika akang deng batu basar kong pi kase lego ka laut, daripada dia beking sesat tu satu dari tu orang-orang yang dunia ini ja anggap orang yang nyanda penting. So itu hati-hati jo ngoni. Kalu ngoni pe sudara yang percaya da beking sala pa ngoni, togor jo pa dia. Kalu dia manyasal deng tu dia da beking itu, ngoni kase ampung jo pa dia. Kong kalu dalam satu hari dia so beking sala pa ngoni tuju kali, trus dia bale-bale pa ngoni tiap kali dia beking sala kong babilang, ‘Minta maaf dang, kita so beking sala’, ngoni musti tetap kase ampung pa dia.” Satu kali, rasul-rasul tu Tuhan Yesus pe utusan-utusan babilang pa Dia, “Guru, tolong akang supaya torang pe percaya jadi lebe kuat.” Tuhan Yesus manyao, “Biar lei ngoni pe percaya itu de pe basar cuma sama deng tu biji yang paling kacili, ngoni bole bilang pa tu pohong ara ini supaya tapinda ka laut kong tatanang di situ. Tu pohong ini pasti mo iko tu ngoni da bilang.” Yesus bilang lei, “Kalu ngoni pe budak yang da bapajeko tana ato yang da bajaga domba pulang, sapa tu dari pa ngoni yang mo babilang pa tu ngoni pe budak itu, ‘Mari jo makang!’ Pasti nyanda ada to? Ngoni pasti mo babilang pa tu budak itu bagini, ‘Sadia akang makanan deng minuman for kita. Kong ngana pi baganti jo baju, trus layani pa kita sampe kita klar makang. Kalu kita so klar, baru ngana so bole makang deng minum.’ Kong kalu tu budak itu so beking samua tu ngoni da suru pa dia, apa ngoni mo bilang lei makase pa dia? Paling nyanda. Bagitu lei deng ngoni. Kalu ngoni so beking samua tu Tuhan da suru pa ngoni, ngoni bilang jo bagini, ‘Torang ini kasiang cuma budak-budak yang nyanda pantas mo dapa puji. Torang ja beking apa yang mustinya torang beking.’ ” Waktu Yesus pigi ka Yerusalem, Dia iko di perbatasan daera Samaria deng daera Galilea. Kong waktu Dia mo maso di satu kampung, datang spulu orang yang da saki kusta mo baku dapa deng Dia. Dorang itu da badiri sadiki jao dari pa Dia. Kong dorang bataria, “Yesus! Guru! Kasiang akang dang pa torang!” Kong Dia lia pa dorang trus babilang, “Pigi jo ngoni pa imam-imam for se lia tu ngoni pe diri pa dorang.” Trus dorang pigi, kong masi di tenga jalang dorang so jadi bae. Kong ada tu satu dari pa dorang, waktu dia lia de pe diri so bae, dia babale ulang pa Yesus kong puji deng hormat pa Tuhan Allah deng suara kuat. Trus dia berlutut di muka pa Yesus kong bilang makase pa Yesus. Tu orang itu orang Samaria. Yesus tanya, “Kita tau spulu orang tu bae tadi, kong mana dang tu sambilan orang? Nyanda ada dang dari pa dorang itu yang da babale for puji-puji pa Tuhan Allah, kacuali bapak tu orang yang bukang Yahudi?” Kong Yesus bilang pa tu orang itu, “Bapak, badiri jo kong pigi. Bapak so bae lantaran bapak percaya pa Kita.” Satu hari ada bebrapa orang dari golongan Farisi batanya pa Yesus kalu tempo apa Tuhan Allah mo datang Berkuasa sbagai Raja. Kong Yesus manyao pa dorang, “Kalu Tuhan Allah datang Berkuasa sbagai Raja, nyanda ada tanda-tanda lebe dulu yang bole ngoni mo lia. So itu nyanda ada yang bole bilang bagini, ‘Co lia dia ada di sini’ ato ‘Co lia, dia ada di sana!’ Soalnya sebenarnya Tuhan Allah so Berkuasa sbagai Raja di tenga-tenga pa ngoni.” Kong Yesus babilang pa Dia pe murit-murit, “Nanti ada de pe waktu ngoni suka skali mo lia pa Anak Manusia biar lei cuma satu hari, mar ngoni nyanda mo dapa lia. Nanti orang mo bilang pa ngoni, ‘Co lia, Dia ada di sana!’ ato, ‘Co lia, Dia ada di sini!’ Mar ngoni jang pi ka situ, ngoni jang iko pa dorang. Soalnya waktu Anak Manusia mo datang ulang, samua mo dapa lia pa Dia. Dia mo datang sama deng kilat pe cahaya yang muncul dari ujung langit satu ka ujung langit laeng. Mar tu Anak Manusia musti lebe dulu tanggong banya siksa dari tu orang-orang jaman ini yang nyanda trima pa Dia, baru Dia datang ulang. Waktu tu Anak Manusia mo datang ulang, tu orang-orang pe cara hidop sama deng dulu waktu jaman nabi Nuh seblum dia maso ka kapal basar. Dorang nyanda pikir tentang Tuhan, dorang itu cuma makang, minum, deng kaweng sama deng biasa sampe waktu tu Nuh maso ka kapal. Kong tu banjer basar datang se abis pa dorang samua. Bagitu lei deng tu orang-orang pe hidop dulu waktu jaman Lot. Dorang makang, minum, bajual deng babli, batanang deng babangun ruma. Mar waktu tu Lot kaluar dari Sodom, turung ujang api deng ujang belerang dari langit kong se abis pa dorang samua. Tu cara hidop dari tu orang-orang waktu jaman Nuh deng Lot dulu, itu sama deng tu orang-orang pe cara hidop nanti waktu tu Anak Manusia datang ulang. Nanti waktu itu, tu orang yang ada di atas ruma jang turung for pi ambe tu dia pe barang-barang pa de pe ruma, mar turung kong lari jo. Bagitu lei deng tu orang yang ada di kobong, jang babale for pi ambe barang-barang pa dia pe ruma. Inga jo apa tu da jadi pa Lot pe bini, dia mati lantaran da inga-inga tu dia pe barang di ruma! Sapa yang mo hidop cuma for de pe diri sandiri, dia itu nyanda mo dapa hidop kekal. Mar komang sapa yang mo kase de pe hidop lantaran iko pa Kita, so dia tu mo dapa hidop kekal. Kita bilang pa ngoni, di waktu Anak Manusia datang ulang, kalu ada dua orang yang tidor di atas satu koi, tu satu Tuhan mo angka, kong tu satu mo se tinggal. Ada lei dua orang parampuang yang sama-sama da bagiling gandum, tu satu Tuhan mo angka, kong tu satu mo se tinggal.” [ Trus ada lei dua orang di kobong, tu satu Tuhan mo angka, kong tu satu lei mo se tinggal.] Pe dengar itu, Yesus pe murit-murit batanya pa Dia, “Guru, di mana dang itu mo jadi?” Yesus manyao pa dorang, “Kalu torang lia ada burung pangmakang bangkai bakumpul, itu de pe tanda kalu di situ ada bangkai, bagitu lei deng orang-orang mo lia tu tanda-tanda seblum Kita mo datang ulang.” Yesus se cirita satu prumpamaan pa Dia pe murit-murit supaya dorang pe smangat nyanda ilang for basombayang trus pa Tuhan Allah. Dia bilang, “Ada satu orang hakim di satu kota, dia itu nyanda tako pa Tuhan Allah deng nyanda hormat pa sapa-sapa. Trus ada satu janda lei di kota itu. Tu janda itu slalu datang pa tu hakim kong babilang, ‘Bapak hakim, tolong dang urus akang deng adil tu kita pe perkara di muka pa kita pe musu.’ Tu hakim itu tolak trus apa tu janda itu da minta, mar lama-lama jo tu hakim bapikir bagini, ‘Kita memang nyanda tako pa Tuhan Allah deng nyanda hormat pa sapa-sapa. Mar ni janda ini beking susa trus pa kita, so itu lebe bae kita urus akang deng adil tu dia pe perkara supaya dia nyanda datang-datang trus kong beking susa pa kita.’ ” Kong Yesus babilang lei, “Co ngoni tarukira apa tu hakim yang nyanda butul itu da bilang. No bagimana dang deng Tuhan Allah, apa Dia nyanda mo kase keadilan pa tu orang-orang yang Dia so pili, yang siang malam basombayang pa Dia? Kong apa Dia mo lama-lama for tolong pa dorang? Kita bilang pa ngoni, tantu katu Tuhan Allah mo iko tolong pa dorang for dapa keadilan. Mar kalu tu Anak Manusia datang ulang, apa Dia masi mo dapa orang yang percaya pa Dia di bumi ini?” Yesus se cirita prumpamaan for orang-orang tu ja anggap dorang pe diri butul deng tu ja pandang enteng pa orang laeng. Yesus bilang, “Ada dua orang pigi ka Ruma Ibada Pusat for basombayang. Tu satu orang dari golongan Farisi kong tu satu lei petugas pajak. Tu orang dari golongan Farisi badiri basandiri kong basombayang, ‘Ya Tuhan Allah, kita bilang makase pa Tuhan lantaran kwa kita ini nyanda sama deng tu orang laeng. Kita ini bukang prampok, bukang orang yang nyanda butul, bukang orang yang ja bersina, deng kita lei nyanda sama deng tu petugas pajak itu. Kita lei ja bapuasa satu minggu dua kali, kong kita ja bakase spulu persen dari samua tu kita pe penghasilan for persembahan pa Tuhan.’ Mar tu petugas pajak itu, dia badiri jao-jao, deng lei dia nyanda brani mangada ka langit. Malatare dia sapu de pe dada tanda manyasal ja beking dosa, kong babilang, ‘Ya Tuhan Allah, kasiang akang dang pa kita ini tu orang yang ja beking dosa.’ Kita bilang pa ngoni, tu petugas pajak itu pulang pa de pe ruma sbagai orang yang Tuhan anggap butul di muka pa Dia, mar tu orang yang dari golongan Farisi itu nyanda. Soalnya sapa jo yang angka de pe diri sandiri, Tuhan mo beking tu orang itu nyanda ada arti apa-apa. Kong sapa jo yang nyanda sombong, Tuhan Allah mo angka pa dia jadi orang yang penting.” Satu kali ada orang-orang bawa tu dorang pe anak-anak kacili pa Yesus supaya Dia taru De pe tangan pa tu anak-anak itu for se berkat pa dorang. Mar waktu Yesus pe murit-murit lia, dorang cuma da mara akang pa tu orang-orang yang da bawa anak-anak kacili itu. Mar Yesus pangge pa tu anak-anak itu kong bilang pa De pe murit-murit, “Kase biar jo tu anak-anak itu datang pa Kita! Ngoni jang larang pa dorang lantaran tu orang-orang sama deng ini yang mo jadi orang-orang dari Tuhan Allah yang Berkuasa sbagai Raja. Kita bilang pa ngoni, sapa jo yang nyanda trima pa Tuhan Allah sama deng anak-anak kacili yang dong pe hati polos, so dorang itu yang nyanda mo jadi orang-orang dari Tuhan Allah yang Berkuasa sbagai Raja.” Ada satu orang pemimpin agama Yahudi batanya pa Yesus, “Guru yang pangbae, apa yang kita musti beking supaya kita bole mo dapa tu hidop kekal?” Yesus manyao pa dia, “Kiapa dang bapak bilang kalu Kita ini pangbae? Nyanda ada satu orang yang pangbae, cuma Tuhan Allah yang pangbae. Bapak pasti so tau tu Tuhan Allah pe prenta-prenta ini: jang bersina, jang babunung, jang bapancuri, jang basaksi dusta, deng lei musti hormat pa ngana pe papa deng mama.” Kong tu orang itu bilang, “Samua tu prenta itu kita so beking dari lei kita masi nyong-nyong.” Pe dengar itu, Yesus bilang pa dia, “Mar masi ada satu hal yang ngana blum beking. Ngana jual jo samua tu ngana pe harta, kong tu doi ngana kase berbage pa orang-orang miskin. Deng bagitu Tuhan mo kase pa ngana harta di sorga. Abis itu ngana datang jo kamari kong iko pa Kita.” Waktu tu orang itu dengar tu Yesus da bilang itu, dia jadi sedi lantaran dia itu pe kaya skali. Yesus lia kalu tu orang itu sedi, kong Yesus bilang, “Pe susa skali for orang kaya mo trima tu Tuhan Allah mo Berkuasa sbagai Raja pa dia. Masi lebe gampang satu ekor onta mo maso ka lobang jarum, daripada orang kaya mo trima tu Tuhan Allah for mo Berkuasa sbagai Raja pa dia.” Orang-orang yang da badengar tu Yesus da bilang, dorang bilang, “No kalu bagitu, sapa dang tu bole mo slamat dari hukuman dosa?” Yesus manyao, “For manusia nyanda mungkin mo se slamat tu de pe diri sandiri, mar for Tuhan Allah, Tuhan Allah bole se slamat pa manusia lantaran samua Tuhan Allah bole beking.” Kong Petrus babilang, “Guru, torang ini so kase tinggal samua tu tong pe kepunyaan for iko pa Guru.” Yesus manyao pa dorang, “Kita bilang pa ngoni, sapa jo yang se tinggal tu de pe ruma, ato de pe bini, ato de pe sudara, ato de pe orang tua ato de pe anak-anak lantaran Tuhan Allah Berkuasa sbagai Raja pa dia, skarang ini dia mo trima talebe-lebe dari samua tu dia da se tinggal, deng nanti di jaman yang mo datang, dia mo dapa tu hidop kekal.” Yesus pangge Dia pe dua blas murit, kong bilang pa dorang, “Skarang torang da bapigi ka Yerusalem. Di sana, samua tu nabi-nabi da tulis dulu tentang tu Anak Manusia so mo jadi. Soalnya nanti orang mo srahkan Dia pa orang-orang bukang Yahudi. Kong dorang mo basosere pa Dia, mo hina pa Dia deng mo luda akang pa Dia. Dorang lei mo cambok trus bunung pa Dia. Mar di hari katiga, Dia mo hidop ulang.” Mar dorang nyanda mangarti samua tu Yesus da bilang itu. Soalnya samua itu masi rahasia for dorang, so itu dorang nintau apa de pe maksut. Waktu Yesus so amper sampe di Yerikho, ada satu orang buta yang da dudu baminta-minta di pinggir jalang. Tu orang buta itu da dengar banya orang da balewat di situ, kong dia batanya, “Ada apa kang?” Trus orang kase tau pa dia, “Yesus, tu orang Nazaret da balewat.” Kong tu orang buta itu babilang deng suara kuat, “Yesus tu raja Daud pe keturunan, kasiang akang dang pa kita!” Tu orang-orang yang da bajalang di muka mara, kong togor pa tu orang buta itu supaya badiam. Mar tu orang buta itu cuma tare babilang lebe kuat, “Raja Daud pe keturunan, kasiang akang dang pa kita!” Kong Yesus brenti, trus suru bawa tu orang buta itu pa Dia. Waktu tu orang buta so dekat pa Dia, Dia batanya pa tu orang buta itu, “Apa dang tu ngana suka Kita mo beking for ngana?” Tu orang buta itu manyao, “Tuhan, kita suka supaya kita bole mo balia!” Kong Yesus bilang pa dia, “Skarang ngana so bole balia, ngana so bae lantaran ngana percaya pa Kita.” Waktu itu jo, tu orang buta itu so bole balia kong dia iko pa Yesus trus puji deng hormat pa Tuhan Allah. Samua orang yang da lia tu da jadi itu puji deng hormat lei pa Tuhan Allah. Yesus sampe di kota Yerikho kong bajalang trus mo balewat tu kota itu. Di kota itu ada satu orang kaya, tu dia pe nama Zakheus. Dia itu kapala dari tu petugas-petugas pajak. Waktu Yesus balewat, Zakheus brusaha mo lia bagimana tu Yesus itu. Mar Zakheus nyanda dapa lia pa Yesus, lantaran pe banya orang di situ deng lei Zakheus pe badan pende. Jadi dia balari for balebe dulu dari tu orang banya itu, kong dia nae ka atas pohong ara for lia pa Yesus yang mo lewat di situ. Waktu Yesus sampe di dekat pohong ara itu, Dia bahaga ka atas kong babilang, “Zakheus, capat jo turung! Soalnya ni hari Kita musti manumpang pa ngana pe ruma.” Pe dengar itu, Zakheus iko turung, kong dia trima Yesus pa de pe ruma deng snang hati. Waktu tu orang-orang da lia itu, dorang mulai babafeto, “Tu Zakheus itu orang berdosa, no kong kiapa dang Dia mo pi basingga pa Zakheus pe ruma?” Kong Zakheus badiri trus babilang pa Tuhan Yesus, “Bapak, co lia, kita mo kase pa orang miskin tu stenga dari kita pe kepunyaan. Trus pa sapa jo yang perna kita da peras akang for dapa doi, kita mo se bale ulang pa dia sampe ampa kali lipa.” Yesus bilang, “Ni hari, samua orang yang ada di ruma ini so slamat dari hukuman dosa lantaran ni Zakheus so se tunjung kalu dia itu butul-butul Abraham pe keturunan. Soalnya tu Anak Manusia datang for cari tu orang-orang yang jao dari pa Tuhan Allah, kong se slamat pa dorang dari hukuman dosa.” Samantara tu orang banya badengar tu Yesus ja bilang, Yesus se trus babicara pa dorang. Dia cirita satu prumpamaan lantaran waktu itu so dekat Yerusalem, deng tu orang banya bapikir kalu dorang so langsung lia Tuhan Allah Berkuasa sbagai Raja pa Dia pe orang-orang. Yesus bilang, “Ada satu bangsawan brangkat ka satu negri yang jao for dapa lantik jadi raja. Abis dia dapa lantik, dia babale ulang pa de pe negri. Seblum dia brangkat, dia pangge spulu budak dari tu de pe budak-budak. Kong dia kase pa tu spulu budak itu masing-masing satu doi mas kong dia bilang pa dorang, ‘Pake jo tu doi itu for bausaha akang sampe kita babale ulang kamari.’ Mar tu orang-orang pa de pe negri itu binci pa dia. Jadi waktu dia so brangkat, dorang kirim utusan pigi ka negri yang jao itu for bilang bagini, ‘Torang nimau tu orang itu mo jadi tong pe raja.’ Mar biar bagitu tu bangsawan itu tetap dapa lantik jadi raja. Kong waktu dia babale pa dia pe negri, dia pangge tu de pe budak-budak yang dia da kase akang doi mas itu for cari tau brapa tu untung yang dorang da dapa dari dong pe usaha. Tu budak yang pertama datang kong babilang pa dia, ‘Tuang, tu satu doi mas yang tuang da kase pa kita itu, skarang so tatamba spulu doi mas.’ Kong dia bilang pa tu budak itu, ‘Bagus skali tu ngana da beking, hei budak yang bae. Ngana so setia urus tu hal yang kacili skali, so itu skarang kita kase percaya akang pa ngana for baprenta spulu kota.’ Abis itu, datang tu budak kadua kong babilang, ‘Tuang, tu satu doi mas yang tuang da kase pa kita itu, skarang so tatamba lima doi mas.’ Kong tu raja bilang pa tu budak, ‘Kalu bagitu, kita kase percaya akang pa ngana for baprenta di lima kota.’ Trus tu budak yang laeng datang kong babilang, ‘Tuang, napa tu tuang pe satu doi mas. Kita da bungkus akang tu tuang pe doi mas ini deng lengso for kita simpang. Kita kwa tako pa tuang, so itu no kita beking bagitu. Soalnya tuang itu orang yang kras, tuang ja ambe apa tu bukang tuang punya deng lei ja bapanen apa tu bukang tuang da tanang.’ Kong tu raja bilang pa tu budak itu, ‘Hei budak yang jaha, kita mo hukum pa ngana iko tu ngana da bilang itu. Ngana so tau kalu kita pe orang kras. Kita ja ambe apa tu bukang kita punya, kita ja bapanen apa yang bukang kita da tanang. Kalu bagitu, kiapa dang kita pe doi itu ngana nyanda simpang di bank? Jadi waktu kita bale kamari, kita bole ambe tu doi deng de pe bunga.’ Kong tu raja bilang pa orang-orang yang da badiri di situ, ‘Ambe jo tu satu doi mas dari pa dia, kong kase pa tu budak yang tatamba spulu doi mas.’ Mar dorang manyao, ‘Tuang, dia itu so tatamba spulu doi mas. Kiapa dang bapak mo beking bagitu?’ Tu raja manyao pa dorang, ‘Kita bilang pa ngoni, sapa tu bole mo se percaya akang sesuatu, pa dia itu mo dapa se percaya akang lebe banya lei. Mar sapa yang nimbole mo se percaya akang sesuatu, apa jo yang ada pa dia mo dapa ambe biar itu cuma sadiki. Mar skarang, samua tu kita pe musu yang nyanda suka kita mo berkuasa pa dorang, tangka jo pa dorang samua kong bawa kamari trus bunung jo pa dorang di muka pa kita.’ ” Abis Yesus cirita tu prumpamaan itu, Dia bajalang lebe dulu dari tu orang banya for se trus Dia pe perjalanan ka Yerusalem. Waktu so dekat kampung Betfage deng Betania, tu ada di bukit Zaitun, Yesus suru pa Dia pe dua murit, Dia bilang, “Pigi jo ngoni ka kampung di muka sana. Waktu ngoni maso di situ, ngoni mo dapa lia satu keledai muda tu da se ika yang blum perna ada orang da nae akang. Ngoni buka jo tu de pe tali trus bawa kamari tu keledai itu. Kong kalu ada orang batanya pa ngoni, ‘Kiapa ngoni kase lapas tu keledai itu dang?’ Ngoni jawab jo, ‘Tuhan perlu tu keledai.’ ” Trus tu dua murit itu pigi, kong dorang dua da alami samua sama deng tu Yesus da bilang pa dorang. Waktu dorang buka tu keledai itu pe tali, tu orang-orang yang punya keledai itu babilang pa dorang, “Hei, kiapa ngoni se lapas tu keledai itu dang?” Dorang manyao, “Tuhan ada mo pake ni keledai.” Abis itu, tu dua murit itu bawa tu keledai pa Yesus, kong dorang se alas tu dong pe baju di atas keledai, trus dorang tolong pa Yesus nae di keledai itu. Samantara Yesus di atas keledai, Yesus se trus tu perjalanan. Kong orang-orang da se alas dorang pe juba di jalang for sambut pa Yesus. Waktu Dia so mo sampe di Yerusalem, di jalang yang baturung-turung dari Bukit Zaitun, samua orang tu ja iko pa Yesus snang deng puji-puji pa Tuhan Allah deng suara kuat lantaran samua mujisat yang dorang so lia. Dorang bilang, “Puji jo pa Dia tu da datang sbagai Raja, yang da datang dalam nama Tuhan! Skarang manusia so bole baku bae deng Tuhan Allah tu ada di sorga, kong puji deng hormat jo pa Dia di tampa mahatinggi!” Mar ada bebrapa orang dari golongan Farisi di antara orang banya itu babilang pa Yesus, “Guru, togor akang tu orang-orang yang ja iko-iko pa Guru supaya badiam.” Mar Yesus cuma bilang pa tu orang-orang dari golongan Farisi itu, “Kita bilang pa ngoni, kalu tu orang-orang itu badiam, tu batu-batu ini yang mo bataria puji-puji pa Kita.” Waktu Yesus so dekat di kota Yerusalem, Yesus lia tu kota itu kong Dia manangis. Dia bilang, “Ado kasiang ngoni tu orang-orang Yerusalem. Kita harap ngoni tau apa yang bole beking ngoni hidop deng damai, mar skarang so terlambat, itu so tasambunyi dari pa ngoni. Soalnya nanti ada de pe waktu, tu ngoni pe musu mo kepung pa ngoni, dorang mo pele tu kota kong mo srang pa ngoni dari samua arah. Dorang mo se ancor tu ngoni pe kota kong dorang mo bunung pa ngoni samua yang da tinggal di dalam. Dorang nyanda mo se biar ada batu yang tasusung pa de pe tampa, biar lei itu cuma satu. Ngoni samua yang ada di dalam deng tu ngoni pe kota mo dapa hukuman, lantaran ngoni nyanda trima pa Tuhan Allah waktu Dia datang for se slamat pa ngoni.” Serta so di Yerusalem, Yesus maso di kintal Ruma Ibada Pusat. Di situ Dia mulai user samua orang yang da bajual. Kong Dia bilang pa dorang, “Di Kitab Suci ada tatulis bagini, ‘Kita pe ruma orang mo bilang tampa basombayang, mar ngoni so beking jadi tampa batipu.’ ” Kong tiap hari Yesus mangajar di kintal Ruma Ibada Pusat. Tu imam-imam kapala, ahli-ahli Taurat, deng orang-orang terhormat dari bangsa Yahudi brusaha mo bunung pa Dia. Mar dorang nintau bagimana de pe cara mo beking itu lantaran samua orang suka datang kong badengar tu Dia pe ajaran. Satu hari, Yesus mangajar di kintal Ruma Ibada Pusat deng Dia da kase tau tentang tu Kabar Bae dari Tuhan Allah pa orang banya di situ. Kong samantara itu datang ka situ tu imam-imam kapala, ahli-ahli Taurat deng tua-tua Yahudi. Dorang batanya pa Yesus, “Co Bapak kase tau kamari, Bapak da dapa kuasa dari mana sampe Bapak bole beking samua itu? Kong sapa so yang da kase tu kuasa itu pa Bapak?” Yesus manyao pa dorang, “Kita lei mo batanya pa ngoni, co bilang pa Kita, tu Yohanes Pembaptis dapa kuasa dari mana for babaptis? Dari Tuhan Allah ato dari manusia?” Pe dengar itu, dorang deng dorang baku bilang, “Kalu torang bilang Tuhan Allah yang da kase kuasa, pasti Dia mo bilang bagini, ‘Kalu bagitu, kiapa ngoni nyanda percaya pa Yohanes?’ Mar kalu torang bilang, ‘Manusia yang da kase kuasa,’ pasti tu orang banya ini mo lempar pa torang deng batu lantaran dorang anggap kalu tu Yohanes itu nabi.” Jadi dorang manyao pa Yesus, “Torang nintau tu Yohanes da dapa kuasa dari mana.” Kong Yesus bilang pa dorang, “No kalu bagitu, Kita lei nyanda mo bilang pa ngoni sapa tu da kase kuasa pa kita for beking itu.” Kong Yesus kase cirita satu prumpamaan pa orang banya, Dia bilang, “Ada satu orang buka kobong anggor, kong abis itu dia se sewa tu kobong itu pa orang-orang yang ja bakarja kobong. Abis itu dia pigi ka daera laeng kong dia tinggal di sana sadiki lama. Serta so de pe oras bapete anggor, dia suru de pe budak pigi pa tu orang-orang yang da bakarja di kobong anggor for pi minta tu dia pe bagean dari tu kobong pe hasil. Mar dorang cuma da bage pa tu budak itu kong suru pulang deng nyanda bawa apa-apa. Kong yang punya kobong suru lei de pe budak laeng pigi pa dorang. Mar tu budak itu lei dorang cuma da bage deng dorang da beking malo, trus dorang suru pulang pa dia deng nyanda bawa apa-apa. Kong dia suru de pe budak yang katiga pigi pa dorang. Mar tu budak itu lei dorang tare cuma da bage sampe luka-luka kong lego kaluar dari tu kobong. Kong yang punya kobong anggor itu babilang bagini, ‘Apa lei tu kita musti beking kang? Lebe bae kita kirim pa dorang tu kita pe anak laki-laki yang kita sayang, pasti kwa dorang mo hormat pa dia.’ Mar waktu tu orang-orang karja lia tu yang punya kobong pe anak itu, dorang baku skongkol, ‘Napa dia tu nanti mo dapa tu warisan kobong ini. So itu lebe bae torang bunung jo pa dia, supaya tu warisan ini mo jadi torang punya.’ Kong dorang tangka tu anak itu trus kase lego pa dia kaluar dari tu kobong anggor kong bunung pa dia.” Kong Yesus batanya pa tu orang banya itu, “Kira-kira tu tuang kobong mo beking apa pa tu orang-orang karja itu? Pasti dia mo datang bunung abis tu orang-orang yang bakarja di kobong itu, kong dia kase ofor tu kobong itu pa orang laeng for dorang sewa.” Pe dengar itu, orang-orang babilang pa Yesus, “Jang sampe komang jadi bagitu!” Yesus haga bae-bae pa dorang kong babilang, “Ngoni tantu so baca di Kitab Suci yang da tulis bagini, ‘Batu yang tukang-tukang bangunan da buang, batu itu so jadi batu fondasi yang paling penting.’ Sapa yang jatung di atas tu batu itu, dia mo ancor. Sapa yang da tatindis akang deng tu batu itu, dia mo ancor-ancor, bagitu lei deng ngoni yang nyanda trima pa Kita.” Pe dengar itu, tu ahli-ahli Taurat deng imam-imam kapala jadi mangarti kalu Yesus pe maksut deng tu orang-orang karja di prumpamaan itu dorang. So itu dorang brusaha mo tangka pa Dia, mar dorang tako pa orang banya. Tu ahli-ahli Taurat deng imam-imam kapala cari kesempatan for jebak pa Yesus. Kong dorang tarukira trus pa Yesus. Dorang suru brapa orang jadi mata-mata yang bapura-pura jadi orang yang butul for batanya pa Yesus, supaya kalu Dia tasala bicara dorang bole mo srahkan Dia pa gubernur yang ada kuasa mo baadili. Tu orang-orang itu batanya pa Yesus, “Guru, torang tau kalu samua tu Guru da bilang deng se ajar itu butul. Guru nyanda ja bacari muka, malatare deng trang-trangan Guru kase ajar tu cara yang butul for iko pa Tuhan Allah. So itu torang mo tanya pa Guru, kalu mo iko torang pe atoran agama Yahudi, bole ato nyanda torang babayar pajak pa raja paling tinggi di krajaan Romawi?” Mar Yesus tau kalu dorang sebenarnya cuma mo jebak pa Dia, kong Dia bilang pa dorang, “Co kase tunjung kamari satu doi perak. Sapa pe gambar deng nama ini?” Dorang manyao, “Itu gambar deng nama dari raja yang paling tinggi di krajaan Romawi.” Kong Yesus bilang pa dorang, “No kalu bagitu, kase jo pa raja yang paling tinggi di krajaan Romawi apa tu ngoni musti kase pa dia, kong kase jo pa Tuhan Allah apa tu ngoni musti kase pa Tuhan Allah.” Dorang nyanda dapa jebak pa Yesus waktu Dia jawab tu dorang pe pertanyaan itu di muka banya orang. Dorang tabadiam deng taheran-heran da dengar tu Yesus pe jawaban itu. Abis itu bebrapa orang dari golongan Saduki datang pa Yesus. Tu golongan itu nyanda percaya kalu orang yang so mati mo hidop ulang. Dorang batanya pa Yesus, “Guru, dulu nabi Musa da tulis for torang bagini: kalu satu laki-laki yang so kaweng kong mati mar nyanda dapa anak, de pe kaka ato ade laki-laki musti kaweng deng tu laki-laki yang so mati itu pe bini, supaya de pe kaka ato ade itu kase akang keturunan for dia. No skarang bagini, umpama ada tuju kaka ade laki-laki. Tu paling tua kaweng deng satu parampuang, mar nyanda lama dia mati deng dia ini nyanda dapa anak. Kong yang kadua kaweng deng tu parampuang itu. Dia lei mati deng nyanda dapa anak. Bagitu lei deng tu katiga, dia lei mati deng nyanda dapa anak. Tu da jadi babagitu trus sampe pa tu dorang pe ade katuju. Dorang samua mati kong nyanda dapa anak. Kong de pe laste tu parampuang itu lei mati. Jadi nanti waktu Tuhan se hidop ulang pa orang-orang, dari tu tuju kaka ade itu sapa yang mo jadi tu parampuang itu pe laki? Soalnya tu tuju kaka ade itu so perna kaweng deng dia.” Yesus manyao pa dorang, “Orang-orang yang ada di dunia ini kaweng. Mar tu orang-orang yang Tuhan anggap pantas for hidop di sorga, Dia mo se hidop ulang pa dorang, kong di sorga dorang itu so nyanda mo kaweng deng so nyanda mo kase kaweng. Soalnya di sorga dorang so hidop sama deng malaekat-malaekat pe cara hidop, kong dorang lei so nyanda mo mati. Dorang itu Tuhan Allah pe anak-anak lantaran Dia tu da se hidop ulang pa dorang. Kong tentang orang mati yang mo hidop ulang, Musa so se tau itu waktu dia bilang tentang rumpu baduri yang da tabakar mar nyanda angus. Waktu itu dia bilang kalu Tuhan Allah itu yang Abraham, Ishak deng Yakub ja semba. Waktu dia bilang itu, tu Abraham, Ishak deng Yakub so mati mar da hidop ulang deng Tuhan Allah. Jadi Tuhan Allah itu bukang orang yang so mati pe Tuhan, mar orang yang hidop pe Tuhan. Soalnya di muka pa Tuhan Allah, samua orang itu hidop.” Pe dengar itu bebrapa ahli Taurat babilang, “Guru, Guru pe jawaban itu butul.” Mulai waktu itu dorang nyanda brani lei batanya apa-apa pa Yesus. Kong Yesus bilang pa dorang, “Orang bilang kalu Kristus tu Raja yang mo se slamat pa manusia itu raja Daud pe keturunan, apa Dia itu cuma raja Daud pe keturunan? Soalnya raja Daud sandiri perna da bilang tentang Kristus di kitab Mazmur bagini, ‘Tuhan Allah da bilang pa kita pe Tuhan bagini: Dudu jo di tampa terhormat di sabla kanan pa Kita, sampe Ngana pe musu-musu Kita taru di bawa Ngana pe kaki.’ Jadi kalu raja Daud da bilang kalu Kristus itu dia pe Tuhan, no bagimana lei torang mo bilang kalu Kristus raja Daud pe keturunan?” Waktu orang banya samantara badengar Yesus babicara, Yesus bilang pa De pe murit-murit, “Ngoni musti hati-hati pa tu ahli-ahli Taurat! Dorang suka bajalang pake juba panjang deng suka orang ja hormat di tampa yang ja takumpul akang banya orang. Di ruma-ruma ibada agama Yahudi deng di pesta-pesta dorang suka ja dudu di tampa paling muka tu tampa yang terhormat. Dorang lei ja batipu tu janda-janda for ambe tu janda-janda itu pe ruma. Dorang ja basombayang panjang-panjang supaya orang anggap kalu dorang itu orang bae-bae. So dorang itu tu mo trima hukuman yang lebe brat.” Waktu Yesus ada di Ruma Ibada Pusat, Dia da tarukira tu orang-orang kaya yang da kase maso doi di kotak persembahan. Dia da tarukira lei tu satu janda miskin yang da kase maso dua doi logam ka kotak persembahan, tu de pe nilai paling kacili. Kong Yesus bilang, “Kita bilang pa ngoni, tu janda miskin da kase lebe banya dari tu dorang samua itu da kase. Soalnya tu orang-orang kaya itu da bakase persembahan dari dorang pe kepunyaan yang talebe-lebe, mar tu janda ini da bakase persembahan dari de pe kekurangan, malatare dari samua tu doi for de pe hidop.” Waktu itu ada bebrapa Yesus pe murit da babicara tentang tu Ruma Ibada Pusat yang pe bagus lantaran da se badiri pake batu-batu yang pe bagus, deng da prong deng macam-macam barang for se persembahan pa Tuhan Allah. Kong Yesus babilang pa dorang, “Apa yang ngoni da lia di Ruma Ibada Pusat itu, nanti satu waktu nyanda ada satu batu lei yang mo tasusung pa de pe tampa, samua itu mo dapa kase rubu.” Kong tu Yesus pe murit-murit batanya pa Dia, “Guru, tempo apa dang tu Guru da bilang tadi itu mo jadi? Kong apa dang tu de pe tanda-tanda kalu samua itu so mo jadi?” Yesus bilang pa dorang, “Hati-hati jo ngoni, jang sampe ada orang yang mo beking sesat pa ngoni. Soalnya banya orang mo datang kong mo pake Kita pe nama. Dorang mo bilang bagini, ‘So kita ini tu Kristus, tu Raja yang mo se slamat pa manusia!’ Deng dorang lei mo babilang bagini, ‘Tu hari kiamat so dekat!’ Mar ngoni jang iko pa dorang. Kong kalu ngoni dengar kabar ada prang deng ada orang yang babrontak pa pemerenta, ngoni jang tako. Soalnya samua itu musti jadi lebe dulu, mar itu blum de pe waktu mo iko kiamat.” Kong Yesus bilang lei pa dorang, “Nanti satu suku bangsa mo baprang deng suku bangsa laeng, satu krajaan baprang deng krajaan laeng. Kong nanti lei mo ada tana goyang pe kuat skali, di mana-mana mo ada panyaki yang ja bajangke, deng lei mo ada kelaparan. Kong mo jadi lei tu hal-hal yang pe dapa tako deng tanda-tanda yang hebat di langit. Mar seblum tu samua itu jadi, lebe dulu orang-orang mo tangka kong siksa pa ngoni. Dorang mo srahkan deng mo adili pa ngoni di ruma-ruma ibada agama Yahudi, kong mo kase maso pa ngoni ka bui. Ngoni lei orang-orang mo bawa pa raja-raja deng pa penguasa-penguasa. Samua itu mo jadi pa ngoni lantaran ngoni da iko pa Kita. Mar waktu ngoni mo dapa adili, itu justru jadi kesempatan for ngoni kase tau pa orang-orang tu Kabar Bae dari Tuhan Allah. So itu se kuat jo tu ngoni pe hati supaya ngoni nyanda usa pikir-pikir apa tu kata-kata yang ngoni musti bilang nanti for babela tu ngoni pe diri. Soalnya Kita sandiri yang mo kase pa ngoni tu kata-kata supaya ngoni bole babicara deng bijaksana, sampe nyanda ada satu dari ngoni pe musu tu bole mo malawang ato babanta apa tu ngoni da bilang. Kong ngoni pe orang tua, ngoni pe kaka ade, ngoni pe sudara deng ngoni pe tamang-tamang, samua dorang yang nyanda percaya itu mo srahkan ngoni pa tu orang-orang yang nyanda percaya sampe ada bebrapa orang dari pa ngoni yang mo dapa bunung. Samua orang mo binci pa ngoni lantaran ngoni da iko pa Kita. Mar ngoni jang tako lantaran nyanda ada satu dari tu ngoni pe rambu yang mo ciri dari ngoni pe kapala. Kalu ngoni tetap batahang percaya pa Kita, ngoni mo dapa hidop kekal.” Yesus bilang lei, “Kalu ngoni lia tentara-tentara so kepung tu Yerusalem, ngoni mo tau kalu so nyanda lama tu kota itu mo ancor. Waktu itu orang-orang yang ada di daera Yudea musti manyingkir ka pegunungan. Deng orang-orang yang ada di kota musti pi manyingkir ka luar kota, kong orang-orang yang ada di kampung jang maso lei ka dalam kota. Soalnya itu no tu waktu for Tuhan mo kase hukuman, supaya apa tu da tulis di Kitab Suci so mo jadi. Waktu itu yang paling cilaka tu ibu-ibu yang hamil deng tu masi ja se batoto ade. Soalnya mo ada pendritaan yang hebat skali di sluru negri, kong Tuhan Allah mo hukum bangsa ini. Tu orang-orang itu ada yang mo mati dapa bunung deng peda, ada lei dari pa tu orang-orang itu yang mo dapa bawa ka samua suku bangsa for jadi tawanan di sana. Kong bangsa-bangsa yang nyanda kanal pa Tuhan Allah itu mo injang-injang tu Yerusalem sampe so klar tu waktu yang Tuhan Allah da tentukan for tu bangsa-bangsa itu.” Trus Yesus babilang lei, “Nanti pa de pe waktu, mo dapa lia tanda-tanda tu mo jadi di matahari, bulan deng bintang. Kong di bumi lei orang-orang dari bangsa-bangsa mo rasa tako deng bingo da dengar tu angin basar pe bunyi di laut deng lei omba basar pe bunyi. Orang-orang lei mo tako skali sampe mo flao waktu dorang lia samua tu da jadi di bumi, lantaran tu kuasa-kuasa yang ada di langit mo jadi kacau. Kong waktu itu no orang-orang mo lia tu Anak Manusia datang di atas awan deng Dia pe kuasa deng Dia pe luar biasa. Kalu samua itu so mulai jadi, badiri jo kong angka jo tu ngoni pe kapala lantaran so dekat tu waktu for ngoni mo dapa slamat dari samua tu siksa itu.” Abis itu, Yesus se cirita satu prumpamaan pa tu orang-orang itu, “Co ngoni tarukira tu pohong ara ato pohong apa jo. Kalu ngoni lia tu pohong-pohong itu so mulai bakaluar de pe daong, ngoni sandiri tau kalu tu oras panas so dekat. Bagitu lei kalu ngoni lia samua tu tanda-tanda yang Kita da bilang itu so jadi, ngoni so tau kalu so dekat Tuhan Allah Berkuasa sbagai Raja pa De pe orang-orang. Kita bilang pa ngoni, tu orang-orang jaman ini ada yang blum mo mati sampe samua jadi. Langit deng bumi mo ancor, mar tu Kita pe firman mo ada trus.” Kong Yesus babilang lei, “Jaga jo tu ngoni pe diri supaya ngoni pe pikiran jang cuma punung deng pikir-pikir tu mo bapesta pora deng tu mo baminum minuman kras sampe mabo, deng lei punung deng tu pikiran yang kuatir tentang tu ngoni pe hidop hari-hari. Kalu ngoni jaga tu ngoni pe diri rupa itu, waktu tu Anak manusia datang ulang ngoni so siap. Tu hari itu mo datang kage-kage pa ngoni, sama deng binatang yang kage-kage takana prangkap. Soalnya tu hari itu mo datang kage-kage pa samua orang di dunia. So itu ngoni musti slalu bajaga-jaga! Ngoni basombayang jo supaya ngoni dapa kekuatan for batahang mangada samua tu pendritaan yang mo jadi sampe ngoni lolos dari itu. Deng bagitu ngoni bole mampu for mangada di muka pa tu Anak Manusia.” Serta so siang Yesus mangajar di kintal kompleks Ruma Ibada Pusat, kong serta so malam Dia kaluar dari tu Yerusalem kong pi tidor di bukit Zaitun. Kong pagi-pagi skali, banya orang datang di kompleks Ruma Ibada Pusat for dengar Dia mangajar. Tu orang Yahudi pe hari raya Roti Nyanda Baragi so dekat. Hari raya itu ja bilang lei Paskah tu hari for pringati waktu Tuhan Allah se bebas pa dorang pe nene moyang dari Mesir. Kong waktu itu, tu imam-imam kapala deng ahli-ahli Taurat cari jalang for bunung pa Yesus deng cara sambunyi-sambunyi, lantaran dorang tako tu orang banya yang suka badengar pa Dia mo bakacau. Waktu itu setang pe bos kuasai pa Yudas, tu ja pangge lei Iskariot. Dia itu satu dari Yesus pe dua blas murit. Kong Yudas pigi pa imam-imam kapala deng pa kapala-kapala penjaga Ruma Ibada Pusat for bicara deng dorang bagimana de pe cara dia bole mo srahkan Yesus pa dorang. Dorang snang skali da dengar tu Yudas da bilang kong dorang spakat for kase akang doi pa dia. Yudas stuju, kong dia cari-cari kesempatan mo srahkan Yesus pa dorang deng cara sambunyi-sambunyi, supaya orang banya nyanda dapa tau. Kong so sampe tu prayaan Roti Nyanda Baragi, di hari itu orang Yahudi ja potong domba for korban persembahan di hari raya Paskah. So itu Yesus suru pa Petrus deng Yohanes, “Ngoni pigi jo for se sadia tu torang pe makanan for prayaan Paskah.” Kong dorang dua batanya pa Dia, “Di mana dang Guru suka torang se sadia akang tu makanan itu?” Yesus bilang, “Kalu ngoni maso ka kota, ngoni mo baku dapa deng satu laki-laki yang da pikul tampayang tu da isi akang aer. Ngoni iko jo pa dia sampe di ruma tu dia da maso akang. Trus ngoni bilang pa yang punya ruma itu bagini, ‘Torang pe Guru da tanya, di mana tu ruangan for Dia deng Dia pe murit-murit mo makang sama-sama di hari raya Paskah?’ Kong nanti yang punya ruma itu mo kase tunjung pa ngoni tu satu ruangan basar di lante atas yang de pe perlengkapan so tasadia lengkap. Di situ no ngoni musti se sadia akang samua.” Trus Petrus deng Yohanes pigi kong dorang dapa samua sama persis deng tu Yesus da bilang pa dorang dua. Trus dorang dua kase sadia samua for tu hari raya Paskah. Serta so de pe waktu mo makang di hari raya itu, Yesus dudu makang sama-sama deng Dia pe rasul-rasul. Yesus bilang pa dorang, “Kita so suka skali makang sama-sama deng ngoni di hari raya Paskah ini seblum Kita mendrita. Soalnya Kita bilang pa ngoni, ini yang terakhir kali Kita mo makang makanan tu biasa ja makang di hari raya ini sampe tu maksut dari Paskah ini jadi jelas di waktu Tuhan Allah Berkuasa sbagai Raja pa De pe orang-orang.” Kong Yesus ambe satu cawan yang da isi akang anggor, Dia bilang makase pa Tuhan Allah, trus Dia bilang pa De pe murit-murit, “Ambe jo ni cawan ini, trus ngoni samua minum jo dari ni cawan ini. Kita bilang pa ngoni, mulai skarang Kita so nyanda mo minum ini anggor sampe tu waktu Tuhan Allah so Berkuasa sbagai Raja pa De pe orang-orang.” Abis itu Yesus ambe roti, Dia bilang makase pa Tuhan Allah. Trus Dia se pela-pela tu roti kong Dia kase berbage pa dorang kong babilang, “Roti ini Kita pe badan yang Kita srahkan for ngoni. Ngoni beking jo rupa tu torang da beking skarang ini for inga pa Kita.” Bagitu lei waktu so klar makang, Yesus ambe cawan yang da isi akang anggor kong bilang pa dorang, “Tu anggor di cawan ini Kita pe dara yang beking sah tu Perjanjian Baru antara Tuhan Allah deng manusia, tu Kita pe dara ini yang da tacura for ngoni. Mar inga jo, tu orang yang mo bahianat pa Kita, skarang ini dia da makang sama-sama deng torang di sini. Memang tu Anak Manusia mo mati sama deng Tuhan Allah so tentukan, mar cilaka jo tu orang yang da srahkan tu Anak Manusia.” Pe dengar itu, Yesus pe murit-murit mulai baku-baku tanya kalu sapa dari pa dorang tu mo beking itu. Yesus pe murit-murit mulai baku ambe pendapat tentang sapa sebenarnya tu paling basar di antara pa dorang. Kong Yesus bilang pa dorang, “Raja-raja dari bangsa-bangsa yang nyanda kanal pa Tuhan Allah, dorang itu da kuasai deng ja beking siksa tu dong pe rakyat, mar dorang itu ja bilang ‘pelindung rakyat’. Mar ngoni jang sama deng dorang, kalu sapa jo dari antara pa ngoni yang jadi orang basar, dia musti beking de pe diri sama deng tu orang yang paling muda. Kong sapa jo dari pa ngoni yang jadi pemimpin, dia itu musti beking de pe diri sama deng tu orang yang ja layani samua orang. Menurut ngoni kira-kira sapa yang paling basar, tu orang yang dudu makang ato yang ja balayani? Pasti katu tu orang yang da dudu makang. Mar Kita nyanda bagitu, waktu Kita da sama-sama deng ngoni, Kita ja layani pa ngoni. Waktu Kita dapa susa, ngoni nyanda perna kase tinggal pa Kita. So itu Kita mo kase kuasa pa ngoni for berkuasa sbagai raja sama deng Kita pe Bapa da kase kuasa pa Kita for Berkuasa sbagai Raja. Deng bagitu, waktu Kita so Berkuasa sbagai Raja di tampa Kita mo berkuasa akang, ngoni bole mo makang deng minum satu meja deng Kita. Ngoni lei mo dudu di atas tahta for adili tu dua blas suku bangsa Israel.” Yesus bilang pa Simon Petrus, “Simon, Simon, tarukira jo bae-bae, setang pe bos so dapa isin for goda pa ngoni supaya ngoni tapisa dari pa Kita sampe nyanda percaya lei. Itu bole mo se sama deng tu petani yang da batapis tu gandum for se pisa dari konga. Mar Kita so sombayang akang for ngana Simon, supaya ngana tetap percaya pa Kita. Kong nanti waktu ngana pe percaya pa Kita so kuat ulang, ngana musti bantu tu ngana pe sudara-sudara yang percaya supaya dorang pe percaya jadi kuat lei.” Simon Petrus bilang pa Yesus, “Tuhan, kita siap mo maso bui deng kita lei siap mo mati sama-sama deng Tuhan!” Mar Yesus bilang pa dia, “Kita bilang pa ngana, ni hari jo seblum ayam bakuku, ngana so tiga kali manyangkal kalu ngana kanal pa Kita.” Yesus bilang lei pa De pe murit-murit, “Tempo hari, waktu Kita da utus pa ngoni, Kita nyanda kase isin pa ngoni for bawa tas, doi deng slop. Kong waktu ngoni pigi itu, apa ngoni ada kekurangan apa-apa?” Dorang manyao, “Nyanda, torang nyanda kekurangan apa-apa.” Yesus bilang pa dorang, “Mar skarang ini, sapa yang ada tampa doi, lebe bae dia bawa tu tampa doi itu, bagitu lei deng sapa yang ada tas, lebe bae dia bawa tu tas itu. Kong sapa yang nyanda ada peda, lebe bae dia jual tu dia pe juba for bli peda. Kita bilang pa ngoni apa tu da tulis di Kitab Suci tentang Kita memang musti jadi. Ini tu da tulis di Kitab Suci, ‘Dia mo tarekeng di antara orang-orang yang jaha.’ Soalnya apa tu da tulis tentang Kita, skarang samua itu mo jadi.” Kong Yesus pe murit-murit bilang pa Dia, “Guru, co lia ini, ada dua peda.” Yesus manyao pa dorang, “Suda, so cukup jo itu.” Yesus kaluar dari kota, kong sama deng biasa Dia pigi ka Bukit Zaitun, kong Dia pe murit-murit lei iko pa Dia. Serta so sampe di tampa itu, Dia babilang pa dorang, “Basombayang jo supaya ngoni nyanda tagoda for beking dosa.” Kong Yesus pi bajao dari pa dorang kira-kira tiga pulu meter de pe jao. Abis itu Dia berlutut kong basombayang, “Bapa, kalu Bapa mau, ambe jo tu pendritaan ini dari pa Kita. Mar jang iko Kita pe mau, iko jo tu Bapa pe mau.” [Kong ada satu malaekat dari sorga da batunjung pa Yesus for kase kuat pa Dia. Yesus rasa pe mendrita skali kong Dia lebe sunggu-sunggu basombayang. Dia pe suar itu sama deng dara yang da malele ka tana.] Pe klar basombayang, Dia badiri kong babale pa De pe murit-murit. Dia lia dorang da tatidor lantaran dorang pe sedi skali sampe lela. Kong Yesus bilang pa dorang, “Kiapa dang ngoni cuma da tatidor? Bangong jo kong basombayang jo supaya ngoni nyanda tagoda for beking dosa.” Waktu Yesus masi babicara, datang satu rombongan orang, kong Yudas tu satu dari Yesus pe dua blas murit da bajalang di muka tu orang-orang itu. Trus dia pi badekat pa Yesus for ciong pa Yesus. Mar Yesus bilang pa Yudas, “Hei Yudas, ngana mo bahianat pa Anak Manusia deng cara ciong pa Dia?” Waktu Yesus pe murit-murit laeng tu da sama-sama di situ lia apa tu mo jadi, dorang batanya pa Yesus, “Guru, apa torang mo srang pa dorang deng peda?” Kong satu dari Yesus pe murit-murit srang tu imam basar pe budak sampe tu budak itu pe talinga kanan putus. Mar Yesus bilang, “Brenti jo!” Kong Yesus pegang tu orang itu pe talinga kong se bae tu de pe talinga. Abis itu Yesus babilang pa imam-imam kapala, kapala-kapala penjaga Ruma Ibada Pusat deng tua-tua Yahudi yang da datang for tangka pa Dia. Dia bilang, “Kita to bukang prampok, kong kiapa ngoni datang tangka pa Kita pake peda deng kayu? Padahal saban hari Kita ada di tenga-tenga pa ngoni di kintal Ruma Ibada Pusat, cuma ngoni nyanda tangka pa Kita di situ. Mar skarang ini no so de pe waktu for ngoni mo tangka pa Kita, deng lei so de pe waktu for setang pe bos se tunjung tu de pe kuasa glap.” Kong tu orang-orang itu tangka pa Yesus trus bawa pa Dia kaluar dari situ. Dorang bawa pa Dia pigi pa imam basar pe ruma, kong samantara itu, Petrus da iko-iko dari jao. Di tenga-tenga imam basar pe kintal ruma, orang-orang beking api unggun kong dudu balingkar di situ. Trus Petrus lei pi dudu sama-sama deng dorang kong barao di situ. Petrus da dudu di dekat tu api unggun itu jadi ada cahaya yang se trang pa dia di situ. Trus ada tu satu pembantu parampuang dapa lia pa dia. Kong tu parampuang itu tarukira bae-bae pa Petrus trus babilang pa tu orang-orang di situ, “Tu orang ini lei ja sama-sama deng Yesus!” Petrus manyangkal, dia bilang, “Nyanda, Kita nyanda kanal pa Dia itu!” Kong nyanda brapa lama, ada satu orang laeng da lia pa Petrus. Trus tu orang itu babilang, “Ngana lei to tu satu dari Yesus pe orang-orang!” Mar Petrus bilang, “Nyanda, bukang kita.” Kong kira-kira satu jam brikut, ada satu orang laeng lei da babilang deng tegas pa Petrus. Dia bilang, “Butul, ni orang lei ja sama-sama deng Yesus, lantaran dia lei orang Galilea.” Mar Petrus manyangkal, dia bilang, “Kita nintau apa tu bapak pe maksut da bilang itu.” Samantara Petrus babicara, waktu itu jo tu ayam bakuku. Kong Tuhan Yesus bahaga pa Petrus. Trus Petrus tainga tu Tuhan Yesus da bilang pa dia, “Petrus, ni hari seblum ayam bakuku, ngana so tiga kali manyangkal kalu ngana kanal pa Kita.” Pe inga itu, Petrus pigi dari tu kintal kong manangis lantaran sedi skali. Kong tu orang-orang yang da tahang pa Yesus, dorang hina pa Yesus deng bage pa Dia. Dorang tutu Dia pe mata deng kaeng kong batanya, “Co tebak, sapa tu da babage pa Ngana?” Abis itu masi banya lei tu kata-kata yang bahina tu dorang ja bilang pa Dia. Serta so pagi, tu tua-tua Yahudi, imam-imam kapala deng ahli-ahli Taurat bakumpul for beking sidang mo urus Yesus pe perkara. Trus dorang bawa pa Yesus se mangada pa dorang pe Mahkamah Agama, kong di situ dorang tanya-tanya akang pa Yesus, “Co kase tau kamari pa torang, butul Ngana itu Kristus tu Raja yang se slamat pa manusia?” Yesus manyao, “Biar lei Kita kase tau pa ngoni, ngoni tetap nyanda mo percaya. Kong biar lei Kita batanya pa ngoni, ngoni lei pasti nyanda mo bajawab. Mar mulai dari skarang tu Anak Manusia mo dudu baprenta di tampa terhormat di sabla kanan pa Tuhan Allah Yang Mahakuasa.” Pe dengar itu, dorang samua babilang, “Kalu bagitu, Ngana ini Anak Allah?” Yesus manyao, “Ngoni sandiri yang bilang kalu Kita ini Anak Allah.” Pe dengar itu, dorang bilang, “For apa lei torang mo tamba saksi? Torang so dengar dari pa Dia pe mulu sandiri kalu Dia anggap Dia sama deng Tuhan Allah.” Kong samua orang yang da iko tu sidang itu badiri trus bawa pa Yesus se mangada pa Pilatus. Dorang mulai tudu pa Yesus di muka pa Pilatus, dorang bilang, “Torang dapa ni orang da bahasut torang pe orang-orang satu bangsa. Dia da larang orang-orang bayar pajak pa raja yang paling tinggi di krajaan Romawi. Dia bilang lei kalu Dia pe diri itu Kristus, tu Raja yang se slamat pa manusia.” Kong Pilatus batanya pa Yesus, “Apa butul Bapak orang Yahudi pe Raja?” Yesus manyao, “Bapak sandiri yang da bilang itu.” Trus Pilatus bilang pa imam-imam kapala deng samua orang yang ada di situ, “Kita nyanda dapa ni Orang pe sala biar lei cuma satu.” Mar orang-orang lebe tamba batudu pa Yesus, “Dia tu ja bahasut pa rakyat sampe kacau. Dia ja se tau Dia pe ajaran di sluru Yudea, mulai dari Galilea sampe di Yerusalem ini.” Kong waktu gubernur Pilatus dengar tu dorang da bilang itu, dia batanya pa dorang, “Jadi, Yesus ini dang orang Galilea?” Serta dia tau kalu Yesus itu dari daera Galilea tu daera yang raja Herodes da berkuasa akang, dia suru dorang bawa Yesus pa Herodes. Waktu itu, Herodes lei ada di Yerusalem. Herodes so ja dengar tu brita tentang Yesus, kong so lama dia suka skali mo lia pa Yesus. So itu waktu dia lia pa Yesus, dia snang skali kong baharap kalu dia bole mo lia Yesus beking satu mujisat. Herodes banya batanya pa Yesus, mar Yesus nyanda manyao apa-apa. Samantara itu, tu imam-imam kapala deng tu ahli-ahli Taurat badiri trus dorang mulai bilang tu tuduhan-tuduhan yang brat pa Yesus. Kong Herodes deng de pe tentara-tentara basosere pa Yesus deng beking suka pa Dia. Dorang kase pake akang tu juba bagus yang biasa raja ja pake, trus bawa ulang Dia pa Pilatus. Seblum itu, tu raja Herodes deng gubernur Pilatus da baku musu, kong itu hari jo dorang dua jadi batamang. Gubernur Pilatus pangge tu imam-imam kapala, tua-tua Yahudi deng rakyat for bakumpul. Trus Pilatus bilang pa dorang, “Ngoni so bawa Orang ini pa kita, kong ngoni bilang kalu Dia ja bahasut orang for malawang pa pemerenta. Mar co ngoni lia, kita so priksa pa Dia di muka-muka pa ngoni, kong kita nyanda dapa Dia pe kejahatan biar lei cuma satu sama deng tu ngoni da se tudu pa Dia. Herodes lei bapikir sama deng itu, so itu dia da se bale ulang tu Orang ini pa torang. Tarukira jo bae-bae, ni Orang ini nyanda beking sala apa-apa yang pantas beking Dia mo dapa hukuman mati. Jadi kita mo cambok pa Dia, kong abis itu kita mo se lapas pa Dia.” [ Pilatus bilang bagitu lantaran tiap kali orang Yahudi pe hari raya for pringati waktu Tuhan Allah se bebas dorang pe nene moyang di Mesir, Pilatus lei musti se lapas satu orang tahanan dari bui iko tu rakyat pe mau.] Mar tu orang banya yang da bakumpul di situ bataria, “Bunung jo pa Dia! Kase bebas jo Barabas for torang!” Tu Barabas itu da se maso ka bui lantaran di kota Yerusalem dia da babrontak pa pemerenta Romawi deng lei da babunung orang. Mar Pilatus suka mo se bebas pa Yesus, so itu dia babicara ulang deng kuat pa tu orang banya itu. Mar tu orang banya tare cuma da babataria trus-trus pa dia, “Se salib jo pa Dia, se salib jo pa Dia!” Kong for katiga kali Pilatus bilang pa dorang, “Mar apa so tu kejahatan yang Dia da beking? Soalnya kita nyanda dapa kejahatan biar lei cuma satu yang pantas for kase hukuman mati pa Dia. Jadi kita mo cambok jo pa Dia kong abis itu kita mo se bebas pa Dia.” Mar dorang trus-trus bapaksa kong batuntut deng suara kras supaya kase salib pa Yesus. De pe laste dorang menang lantaran dorang trus-trus bapaksa deng babataria. Gubernur Pilatus ambe keputusan for iko akang tu orang-orang itu pe mau. Dia kase bebas pa Barabas tu orang yang da dapa maso bui lantaran da babrontak pa pemerenta Romawi deng lei da babunung orang, gubernur itu cuma iko sama deng tu orang-orang Yahudi da minta, kong dia srahkan Yesus for se salib da iko lei tu dorang pe mau. Abis itu tentara-tentara bawa pa Yesus ka luar kota Yerusalem. Di tenga jalang dorang baku dapa deng satu orang dari Kirene tu dia pe nama Simon. Simon ini baru mo maso ka kota. Tu tentara-tentara tahang pa Simon kong paksa pa dia pikul tu salib deng bajalang baiko pa Yesus. Banya orang da iko pa Yesus dari blakang. Di antara pa dorang itu ada tu parampuang-parampuang yang ja bamanangis deng babataria kuat lantaran pe sedi skali. Mar Yesus haga pa parampuang-parampuang itu kong babilang pa dorang, “Hei ngoni tu parampuang-parampuang Yerusalem! Ngoni jang manangis akang pa Kita. Lebe bae ngoni manangis akang jo tu ngoni pe diri sandiri deng tu ngoni pe anak-anak! Soalnya nanti mo ada tu pendritaan yang brat skali sampe ada tu mo babilang bagini, ‘Pe snang skali tu parampuang mandul, tu parampuang yang nyanda perna hamil deng tu parampuang yang nyanda perna se batoto ade.’ Kong waktu itu mo susa skali sampe orang mo babilang pa gunung-gunung bagini, ‘Rubu jo kong tindis akang pa torang!’ deng babilang pa bukit-bukit bagini, ‘Tatambung jo pa torang!’ Kita bilang bagitu lantaran kalu dorang beking bagini pa Kita yang nyanda beking dosa, nanti dorang beking tu lebe jaha lei pa ngoni yang ja beking dosa. Kita sama deng tu pohong yang blum kring tu nyanda mo tabakar samua, mar ngoni sama jo deng pohong-pohong yang so kring tu kana api mo tabakar samua.” Waktu itu, tu tentara-tentara Romawi da bawa lei dua orang jaha for hukum mati sama-sama deng Yesus. Serta dorang so sampe di satu tampa tu de pe nama Tengkorak, dorang se salib pa Yesus di situ. Tu dua orang jaha itu lei da se salib di sabla pa Yesus, tu satu di sabla kiri kong tu satu lei di sabla kanan. [ Yesus basombayang, “Bapa, kase ampung akang pa dorang lantaran dorang nintau apa tu dorang da beking.”] Kong dorang cabu lot for dapa tu Yesus pe baju. Banya orang tu da badiri di situ kong lia samua tu da jadi, mar tu pemimpin-pemimpin Yahudi bahina pa Yesus. Dorang bilang, “Orang laeng Dia kase slamat. No skarang biar jo Dia kase slamat tu Dia pe diri sandiri kalu Dia itu memang butul-butul Kristus tu Raja yang se slamat pa manusia yang Tuhan Allah da pili.” Tu tentara-tentara hina lei pa Dia. Dorang badekat pa Dia kong kase minum anggor asang pa Dia. Dorang lei bilang pa Dia, “Kalu Ngana ini memang butul orang Yahudi pe Raja, se slamat jo Ngana pe diri.” Di atas Yesus pe kapala, ada satu papang da tulis akang bagini, “Ini tu orang Yahudi pe Raja.” Kong satu dari tu dua orang jaha yang da se salib di sabla pa Yesus bahina pa Dia, “Ngana to tu Kristus? No skarang se slamat jo Ngana pe diri deng torang dua ini!” Mar tu orang jaha yang satu togor pa tu orang itu, “Ngana mustinya tako pa Tuhan Allah, lantaran ngana itu orang jaha yang dapa hukuman sama deng Dia. Torang dua memang musti dapa tu hukuman ini lantaran ini pantas deng tu kejahatan yang torang da beking. Mar Dia nyanda pantas dapa hukuman ini, lantaran Dia nyanda beking sala apa-apa.” Trus dia bilang pa Yesus, “Yesus, inga akang dang pa kita kalu nanti datang sbagai Raja.” Yesus manyao pa dia, “Kita bilang pa ngana, sebenarnya ni hari jo, ngana mo ada sama-sama deng Kita di dalam sorga.” Waktu kira-kira so jam dua blas siang, tu sluru daera itu jadi glap sampe jam tiga sore. Soalnya waktu itu matahari brenti basinar. Kong tu kaeng pampele basar yang da se gantong for pele tu ruang Mahasuci di Ruma Ibada Pusat tarabe jadi dua. Kong Yesus babicara deng suara kuat, “Bapa, Kita srahkan tu Kita pe nyawa pa Bapa.” Abis bilang bagitu Yesus mati. Waktu tu perwira Romawi lia apa tu da jadi, dia puji deng hormat pa Tuhan Allah kong dia bilang, “Memang butul, Dia ini Orang yang nyanda beking sala apa-apa!” Samua orang yang da bakumpul di situ da lia apa tu da jadi, kong dorang pe hati sedi skali. Jadi waktu dorang samantara pulang, dorang pukul-pukul tu dong pe dada sandiri. Samua orang yang kanal dekat pa Yesus so tamaso deng tu parampuang-parampuang yang da iko-iko pa Dia dari Galilea sampe di Yerusalem, dorang samua da badiri dari jao kong lia samua tu da jadi itu. Ada satu orang tu de pe nama Yusuf. Dia anggota Mahkamah Agama Yahudi. Dia itu pangbae deng ja beking tu butul di muka pa Tuhan Allah. Dia dari Arimatea, tu satu kota di daera Yudea. Dia itu da tunggu-tunggu tu waktu Tuhan Allah Berkuasa sbagai Raja pa Dia pe orang-orang. Dia nyanda stuju tu keputusan for hukum mati pa Yesus, deng dia lei nyanda suka tu Mahkamah Agama pe tindakan. Waktu Yesus so mati, dia pi mangada pa Pilatus kong minta supaya Pilatus kase tu Yesus pe mayat pa dia. Serta so dapa isin, dia kase turung tu Yesus pe mayat dari salib kong dia se lingkar akang deng kaeng puti, trus dia taru tu Yesus pe mayat di dalam kubur goa tu da gale di bukit batu. Tu kubur itu blum perna kubur akang. Yesus da mati pas di hari basadia for hari Sabat. Kong waktu Yusuf pi se kubur pa Yesus, waktu itu so mo malam kong tu hari Sabat so mo mulai. Parampuang-parampuang yang datang sama-sama deng Yesus dari daera Galilea da iko pi se kubur pa Yesus. Dorang lia tu kubur deng bagimana Yesus pe mayat da taru di kubur goa batu itu. Abis itu dorang pulang kong kase sadia ramuan-ramuan deng minya wangi for se goso pa Yesus pe mayat. Mar waktu hari Sabat, dorang brenti bakarja for iko tu atoran agama yang nimbole bakarja di hari Sabat. Hari Minggu waktu masi pagi-pagi skali, parampuang-parampuang itu pigi ka kubur bawa ramuan tu dorang so se sadia. Pe sampe di kubur, dorang lia tu batu yang da se tutu lobang kubur goa so taguling dari pa de pe tampa. Dorang maso ka dalam kubur itu, kong dorang lia tu Tuhan Yesus pe mayat so nyanda ada di situ. Samantara dorang da badiri tabingo-bingo lantaran itu, kage-kage ada dua laki-laki da pake baju bamangkilat badiri di dekat pa dorang. Tu parampuang-parampuang itu tako skali kong dorang berlutut sampe dorang pe muka kana di tana. Tu dua laki-laki itu babilang pa dorang, “Ngoni mustinya nyanda cari orang yang hidop di tampa orang mati. Dia so nyanda ada di sini, Dia so hidop ulang. Co ngoni inga apa tu Dia da bilang pa ngoni waktu Dia masi di Galilea. Dia da bilang kalu orang mo srahkan tu Anak Manusia pa orang-orang berdosa, kong dorang mo se salib pa Dia. Mar di hari katiga tu Anak Manusia mo hidop ulang.” Abis itu, dorang tainga apa yang Yesus so perna bilang pa dorang. So itu, dorang se tinggal tu kubur kong dong pi se tau samua itu pa tu seblas murit deng pa tu samua orang yang ja iko pa Yesus. Tu parampuang-parampuang yang da se tau samua itu pa tu rasul-rasul tu Yesus pe utusan-utusan, dorang itu tu: Maria orang Magdala, Yohana, Maria tu Yakobus pe mama deng lei parampuang laeng yang da sama-sama deng dorang. Mar Yesus pe murit-murit itu pikir kalu samua tu parampuang-parampuang itu da bilang nyanda butul, jadi dorang nyanda percaya apa tu parampuang-parampuang itu da bilang. Mar biar lei bagitu, Petrus badiri trus lari ka kubur. Waktu dia maruku for bahoba di dalam kubur, dia lia di dalam cuma ada tu kaeng puti yang da se lingkar tu Yesus pe mayat. Kong dia pulang deng babatanya dalam hati tentang apa tu da jadi. Hari itu jo, ada dua orang dari tu orang-orang yang ja iko pa Yesus pigi ka satu kampung tu de pe nama Emaus. Tu kampung itu de pe jao kira-kira seblas kilometer dari Yerusalem. Kong samantara dorang dua bajalang, dorang da bacirita tentang samua tu da jadi pa Yesus. Waktu dorang samantara bacirita deng baku tukar pikiran, Yesus sandiri datang badekat pa dorang kong bajalang sama-sama deng dorang. Dorang da lia pa Yesus mar rupa ada sesuatu yang da pele dorang pe mata sampe dorang nyanda dapa kanal kalu Dia itu Yesus. Yesus bilang pa dorang, “Apa tu ngoni da bacirita samantara da bajalang ini?” Kong deng muka sedi dorang brenti bajalang. Trus satu dari pa dorang tu de pe nama Kleopas babilang pa Dia, “Cuma Bapak stou tu orang yang datang di Yerusalem yang nintau apa tu da jadi baru-baru ini.” Yesus tanya pa dorang, “Apa so tu da jadi di Yerusalem?” Dorang manyao, “Ini tentang tu da jadi pa Yesus tu Orang Nazaret itu. Dia itu Nabi kong Dia ja bamangajar punung deng kuasa deng ja beking mujisat-mujisat deng kuasa Tuhan, Dia beking samua itu di muka pa Tuhan Allah deng pa manusia. Mar tu torang pe imam-imam kapala deng tu pemimpin Yahudi so srahkan Dia pa pemerenta Romawi for dapa hukuman mati kong so se salib pa Dia. Padahal dulu torang baharap kalu Dia itu yang mo se bebas pa torang pe bangsa Israel dari torang pe musu-musu. Kong ini hari so hari katiga dari tu samua da jadi itu. Mar ada bebrapa parampuang dari pa torang pe klompo yang so beking kage pa torang. Soalnya waktu masi amper siang dorang da pigi ka kubur, kong dorang lia tu Yesus pe mayat so nyanda ada di situ. Trus dorang babale pa torang kong kase tau kalu dorang da lia malaekat-malaekat di sana. Tu malaekat-malaekat itu da babilang pa dorang kalu Yesus so hidop ulang. Kong abis itu, ada bebrapa dari torang pe tamang pigi ka kubur itu. Di sana dorang lia samua sama persis deng tu parampuang-parampuang itu da bilang, mar dorang lei nyanda lia pa Yesus.” Kong Yesus bilang pa dorang, “Ngoni ini orang yang nintau apa-apa. Pe susa skali ngoni mo percaya samua tu nabi-nabi da bilang dulu di Kitab Suci. Dorang bilang seblum Kristus dapa puji deng hormat, Dia musti rasa dulu samua tu siksa itu.” Kong Yesus se jelaskan pa dorang samua tu da tulis tentang Dia di Kitab Suci, mulai dari tu kitab-kitab yang nabi Musa da tulis sampe tu kitab-kitab yang nabi-nabi laeng da tulis. Waktu dorang so dekat deng tu kampung Emaus, tu kampung yang dua orang itu mo pigi akang, Yesus beking rupa jo Dia mo se trus tu Dia pe perjalanan. Kong dorang bapaksa supaya Dia tinggal dulu deng dorang. Dorang bilang, “Tinggal jo kwa dulu sama-sama deng torang lantaran skarang so mo malam, matahari so mo maso.” So itu Yesus maso ka dalam ruma for tinggal sama-sama deng dorang dua. Waktu Yesus deng dorang dua dudu mo makang, Dia ambe tu roti kong bilang makase pa Tuhan Allah, trus kase pela-pela tu roti kong kase berbage pa dorang dua. Waktu itu jo dorang dua pe mata sama deng da tabuka kong dapa kanal pa Yesus, mar Dia iko ilang dari tenga-tenga pa dorang. Kong dorang baku bilang, “So itu kang torang pe hati smangat skali waktu Dia da babicara deng torang tadi di jalang, waktu Dia da se trangkan tu Kitab Suci pa torang.” Kong dorang dua badiri trus iko babale ulang ka Yerusalem. Di sana dorang pi baku dapa deng tu seblas murit deng tu orang-orang laeng yang percaya tu samantara da bakumpul di situ. Kong dari antara yang da bakumpul itu babilang pa dorang dua, “Memang butul, Tuhan Yesus so hidop ulang, Dia so batunjung De pe diri pa Simon.” Abis itu, tu dua orang itu kase cirita apa tu da jadi pa dorang di tenga jalang, deng bagimana dorang bole dapa kanal pa Tuhan Yesus waktu Dia da pela-pela tu roti. Samantara dorang bacirita tentang samua tu da jadi itu, kage-kage Yesus badiri di tenga-tenga pa dorang kong babilang pa dorang, “Damai sejahtra for ngoni samua!” Dorang takage kong tako, dorang kira dorang da lia hantu. So itu, Yesus bilang pa dorang, “Kiapa ngoni tako bagini dang? Kong kiapa lei ngoni masi ragu-ragu kalu Kita so hidop ulang? Co ngoni lia tu Kita pe tangan deng kaki. Ini memang Kita sandiri, bukang hantu. Co ngoni lia kong pegang pa Kita, Kita ada daging deng tulang, mar kalu hantu pasti nyanda ada daging deng tulang.” Samantara babilang itu, Yesus kase lia tu Dia pe tangan deng kaki pa dorang. Mar waktu itu dorang masi blum percaya lantaran dorang masi heran deng lei snang da lia pa Yesus, kong Dia babilang pa dorang, “Apa ada makanan pa ngoni di sini?” Kong dorang kase akang ikang bakar pa Dia. Yesus ambe tu ikang kong makang di muka pa dorang. Abis itu Dia bilang pa dorang, “Waktu Kita masi da sama-sama deng ngoni, Kita so perna bilang kalu samua tu da tulis tentang Kita yang ada di kitab Taurat, kitab nabi-nabi deng di kitab Mazmur, samua tu da tatulis tentang Kita itu musti jadi.” Kong waktu itu Yesus beking tu dorang pe pikiran jadi tabuka sampe dorang bole mangarti tu Kitab Suci. Trus Dia bilang pa dorang, “Di Kitab Suci ada tulis kalu Kristus tu Raja yang mo se slamat pa manusia musti mendrita, mati kong hidop ulang di hari katiga. Kong ada orang-orang yang mo dapa kuasa dari Dia pe nama for kase tau kalu orang-orang musti bertobat trus dorang pe dosa-dosa dapa ampung, kong itu samua mo kase tau mulai dari Yerusalem sampe ka samua suku bangsa. Kong ngoni ini no tu saksi-saksi dari samua itu, jadi ngoni pi kase tau itu pa orang-orang. Tarukira jo bae-bae, Kita nanti mo kase tu Roh Kudus pa ngoni, tu Roh Kudus yang Kita pe Bapa so janji dari dulu. Mar ngoni tinggal jo di kota ini sampe tu kuasa Roh Kudus yang dari pa Tuhan Allah itu so ada pa ngoni.” Yesus bawa tu Dia pe murit-murit kaluar kota, kong serta dorang so dekat deng kampung Betania dorang brenti, trus Dia angka Dia pe tangan kong kase berkat pa dorang. Waktu Dia samantara kase berkat pa dorang, Dia mulai taangka ka sorga kong tapisa dari pa dorang. Kong dorang berlutut semba pa Dia. Trus dorang pulang ka Yerusalem deng hati snang skali. Tiap hari dorang pigi ka kompleks Ruma Ibada Pusat kong dorang puji deng hormat pa Tuhan Allah. Dulu seblum ni dunia ada, Yesus tu ja bilang firman itu so ada. Dia itu da sama-sama deng Tuhan Allah, kong Dia itu no tu Tuhan Allah. Tu firman itu so ada sama-sama deng Tuhan Allah seblum ni dunia ada. Tuhan Allah yang da beking samua yang ada lewat Yesus tu ja bilang tu firman itu. Kong kalu bukang lewat Dia, nyanda ada yang Tuhan Allah da beking biar cuma satu. Tu firman itu yang da kase hidop samua yang ada, deng Dia lei tu trang yang se trang tu manusia pe hati supaya bole tau tentang Tuhan Allah. Yesus tu ja bilang trang itu, beking tu glap jadi trang, kong tu glap nyanda mampu mo se kala tu trang itu. Satu waktu, ada tu satu orang yang Tuhan Allah da utus, de pe nama Yohanes. Dia itu datang jadi saksi for kase tau tentang tu trang itu, supaya samua orang yang da dengar tu dia da kase tau itu bole jadi percaya pa tu trang itu. Yohanes itu bukang tu trang itu, mar dia datang for kase tau tentang tu trang itu pa orang-orang. Kong tu trang yang sebenarnya, Dia itu no tu Yesus, Dia so datang ka dunia ini. Dia itu yang nanti mo se trang tiap orang pe hati supaya bole tau tentang Tuhan Allah. Tu trang itu so ada di dunia ini, kong lewat Dia no Tuhan Allah da beking ni dunia, mar tu orang-orang di dunia nyanda kanal pa Dia. Dia datang pa Dia pe orang-orang sandiri tu orang-orang Yahudi, mar dorang nyanda trima pa Dia. Mar samua orang yang trima deng percaya pa Dia, Dia mo kase pa dorang itu kuasa for jadi Tuhan Allah pe anak-anak. Dorang itu da jadi Tuhan Allah pe anak-anak bukang lantaran dorang pe orang tua, bukang lei lantaran hubungan laki-bini, kong bukang lei lantaran suka mo dapa anak. Mar dorang da jadi Tuhan Allah pe anak-anak, itu lantaran Tuhan Allah sandiri yang beking dorang jadi Dia pe anak-anak. Dia yang ja bilang lei firman itu so jadi manusia, kong Dia tinggal di tenga-tenga pa torang manusia. Kong torang so lia tu Dia pe luar biasa, tu luar biasa yang Dia da dapa dari pa Tuhan Allah tu Dia pe Bapa, lantaran Dia itu Tuhan Allah pe Anak satu-satunya. Dia yang beking torang bole tau yang butul tentang Tuhan Allah deng tentang Tuhan Allah pe sayang pa torang. Satu kali, Yohanes Pembaptis kase tau pa orang-orang tentang Dia tu ja bilang firman itu, deng suara kuat dia bilang, “Dia itu yang kita so perna bilang pa ngoni! Kita da bilang kalu nanti ada yang mo datang abis kita, Dia pe kuasa lebe basar dari kita lantaran Dia memang so lebe dulu ada dari lei kita blum lahir.” Dia pe sayang pa torang nyanda perna abis. Kong lantaran Dia pe sayang itu, Dia nyanda brenti-brenti se tunjung tu Dia pe bae pa torang samua. Dulu dari pa nabi Musa, torang so trima tu Tuhan Allah pe atoran-atoran di kitab Taurat. Mar dari pa Yesus Kristus, torang bole tau yang butul tentang Tuhan Allah deng tentang Dia pe sayang pa torang. Nyanda ada orang yang perna lia pa Tuhan Allah, mar tu Tuhan Allah pe Anak satu-satunya yang jadi satu deng Tuhan Allah, Dia itu yang kase tunjung deng jelas pa torang bagimana tu Tuhan Allah tu Dia pe Bapa itu. Satu kali, tu pemimpin-pemimpin agama Yahudi di Yerusalem da utus bebrapa imam deng orang Lewi tu orang yang ja balayani di Ruma Ibada Pusat for pigi pa Yohanes Pembaptis. Dorang dapa utus for batanya bagini pa dia, “Sapa so sebenarnya bapak ini?” Dia bilang pa dorang deng trus trang, “Kita ini bukang Kristus, tu Raja yang mo se slamat pa manusia.” Kong dorang batanya lei pa dia, “No kalu bagitu, bapak ini sapa dang? Apa bapak itu tu nabi Elia yang mo datang seblum Kristus?” Dia manyao pa dorang, “Bukang!” Trus dorang batanya ulang lei, “Apa bapak tu nabi yang torang da tunggu-tunggu mo datang itu?” Dia manyao lei, “Bukang!” Kong dorang batanya lei pa dia, “Sapa dang bapak sebenarnya? Soalnya torang musti kase tau pa orang-orang yang da suru pa torang. Kalu bapak dang, sapa bapak ini?” Trus Yohanes manyao pa dorang, “Kita ini tu orang yang nabi Yesaya da bilang babicara deng suara kuat di padang gurun bagini, ‘Kase tre tu jalang for sambut pa Tuhan!’ ” Di antara tu orang-orang yang dapa suru itu, ada bebrapa orang dari golongan Farisi, tu golongan yang pegang kras tu atoran agama Yahudi. Dorang itu batanya pa dia, “Kalu bapak itu bukang Kristus tu Raja yang mo se slamat pa torang, bukang lei nabi Elia deng bukang tu nabi yang mo datang itu, no kiapa dang bapak da babaptis?” Yohanes manyao pa dorang, “Kita babaptis pa ngoni pake aer, mar so ada satu Orang di tenga-tenga pa ngoni yang ngoni nintau sapa Dia sebenarnya. Dia itu yang da datang abis kita, deng Dia lei lebe penting dari kita. Hele mo bantu for buka akang Dia pe tali capatu sama deng tu biasa orang karja ja beking, kita nyanda pantas.” Yohanes da babicara deng dorang itu di kampung Betania, di sabla kuala Yordan, tu tampa Yohanes ja babaptis akang orang. De pe eso, Yohanes lia Yesus da badatang pa dia. Kong Yohanes bilang pa orang-orang, “Co lia, Dia itu tu Anak Domba Allah. Dia mo jadi korban for hapus manusia pe dosa, sama deng tu domba pe anak yang torang orang Israel ja se korban for hapus dosa. Dia itu no tu kita pe maksut waktu kita da bilang, ‘Nanti ada yang mo datang abis kita, Dia pe kuasa lebe basar dari kita lantaran Dia memang so lebe dulu ada dari lei kita blum lahir.’ Dulu, kita lei nintau kalu Dia itu Kristus tu Raja yang se slamat pa manusia. Mar skarang kita datang for babaptis deng aer, supaya bangsa Israel lei bole tau kalu Dia itu Kristus.” Kong Yohanes Pembaptis kase tau yang dia da lia tu da jadi pa Yesus, dia bilang, “Kita so lia tu Tuhan Allah pe Roh rupa burung pombo turung dari langit kong tinggal di atas pa Dia. Kong kita lei dulu nintau kalu Dia itu Kristus, tu Raja yang se slamat pa manusia. Mar Tuhan Allah yang da utus pa kita for babaptis deng aer, Dia so bilang pa kita bagini, ‘Kalu ngana lia tu Kita pe Roh turung ka atas satu Orang kong tinggal di atas pa Dia, so Dia yang mo baptis pa ngoni deng Roh Kudus.’ Kita so lia deng kita pe mata kapala sandiri, kong kita kase tau pa orang-orang kalu Dia itu tu Anak Allah.” De pe eso, Yohanes Pembaptis badiri lei di situ deng dia pe dua murit. Waktu Yohanes lia Yesus da balewat, dia bilang, “Co lia, Dia itu tu Anak Domba Allah. Dia mo jadi korban for hapus manusia pe dosa, sama deng tu domba pe anak yang torang orang Israel ja se korban for hapus dosa.” Tu Yohanes pe dua murit itu da dengar apa tu Yohanes da bilang, trus dorang pi iko pa Yesus. Yesus batengo ka blakang kong Dia lia dorang da baiko pa Dia. Trus Dia batanya pa dorang, “Ngoni da cari apa?” Dorang manyao, “Guru, di mana Guru pe tampa tinggal?” Dia manyao pa dorang, “Mari jo kong ngoni mo lia tu Kita pe tampa tinggal.” Kong dorang pigi deng Yesus for lia di mana Dia pe tampa tinggal. Waktu itu kira-kira jam ampa sore kong spanjang hari itu dorang tinggal sama-sama deng Yesus. Tu satu orang yang da dengar tu Yohanes da bilang kong iko pa Yesus, de pe nama Andreas. Dia itu Simon Petrus pe ade. Kong tu Andreas iko pigi pa de pe sudara Simon kong bilang pa dia, “Torang so baku dapa deng Mesias.” (Tu de pe arti Kristus tu Raja yang mo se slamat pa manusia). Kong Andreas bawa tu Simon pa Yesus. Trus Yesus haga pa Simon deng bilang, “Ngana ini Simon, tu Yohanes pe anak. Mar skarang ngana pe nama jadi Kefas.” (Itu sama deng Petrus tu de pe arti batu). De pe eso, Yesus mo pigi ka daera Galilea. Seblum Dia pigi, Dia pi baku dapa dulu deng Filipus kong bilang pa dia, “Mari jo iko pa Kita!” Filipus pe asal dari Betsaida, sama deng Andreas deng Petrus lei dari situ. Abis Yesus pangge pa Filipus for iko pa Dia, Filipus pi baku dapa deng Natanael trus bilang pa dia, “Torang so baku dapa deng tu Orang yang Tuhan Allah da janji mo se slamat pa torang. Dia itu dulu tu nabi Musa da bilang di kitab Taurat deng tu nabi-nabi laeng lei ja bilang. Dia pe nama Yesus, tu Yusuf pe anak. Kong Yesus itu dari Nazaret.” Kong Natanael manyao, “Masa komang ada yang bagus yang datang dari kampung Nazaret.” Kong Filipus bilang, “Mari jo kong ngana lia sandiri!” Trus dorang pigi pa Yesus. Waktu Yesus lia Natanael badatang pa Dia, Yesus bilang, “Co lia, dia ini butul-butul orang Israel, dia nyanda pangbadusta.” Natanael bilang pa Yesus, “Bagimana kong Bapak bole kanal pa kita dang?” Yesus manyao, “Tu Filipus blum pangge pa ngana, Kita so lia pa ngana di bawa pohong ara.” Natanael bilang pa Yesus, “Guru, Guru ini memang Anak Allah. Guru ini tu bangsa Israel pe Raja.” Yesus bilang pa dia, “Ngana percaya pa Kita cuma lantaran Kita bilang ‘Kita lia pa ngana di bawa pohong ara?’ Ngana mo lia tu hal-hal yang jao lebe basar dari itu yang Kita mo beking.” Kong Yesus bilang lei, “Kita bilang pa ngana, nanti satu waktu ngana mo lia tu langit tabuka kong Tuhan Allah pe malaekat-malaekat nae turung pigi pa Anak Manusia.” De pe hari katiga, abis Yesus babicara deng Natanael, ada pesta kaweng di Kana di daera Galilea, kong Yesus pe mama ada di situ. Yesus deng Dia pe murit-murit dapa undang lei ka pesta kaweng itu kong dorang pigi ka situ. Kong samantara dorang bapesta, dorang abis akang anggor. Trus Yesus pe mama babilang pa Yesus, “Dorang so abis akang anggor.” Kong Yesus bilang pa Dia pe mama, “Mama, kiapa dang mama suru bagitu pa Kita? Blum de pe waktu for Kita mo se tunjung sapa Kita sebenarnya.” Mar Yesus pe mama suru pa tu orang-orang karja, “Ngoni beking jo apa tu Dia mo bilang pa ngoni.” Di situ, ada anam tampayang yang biasa ja taru akang aer for beking bersi macam-macam iko atoran agama Yahudi. Kong satu tampayang bole mo isi akang aer de pe banya kira-kira 80 ato 120 liter. Yesus bilang pa tu orang-orang karja itu, “Isi akang aer jo tu tampayang-tampayang itu.” Kong dorang isi akang aer tu tampayang-tampayang itu sampe punung. Abis itu, Yesus bilang pa dorang, “Skarang falo akang sadiki, kong kase pa tu kapala pesta.” Trus dorang bawa itu pa tu kapala pesta. Kong tu kapala pesta rasa tu aer yang so jadi anggor yang dong da bawa pa dia. Dia nintau dari mana tu anggor itu, mar tu orang-orang karja tau kalu itu dari mana. Trus tu kapala pesta pangge pa tu pengantin laki-laki, kong bilang pa dia, “De pe biasa, orang ja kase anggor tu bagus lebe dulu kong kalu tamu so puas minum, baru kase tu anggor yang nyanda bagus. Mar sampe skarang ngana da simpang tu anggor yang bagus.” Tu mujisat itu Yesus da beking di Kana di daera Galilea. Itu jadi Dia pe mujisat yang pertama. Deng bagitu Dia so se lia Dia pe luar biasa sampe Dia pe murit-murit percaya pa Dia. Abis tu pesta kaweng itu, Yesus pigi ka Kapernaum sama-sama deng Dia pe mama, Dia pe ade-ade deng lei Dia pe murit-murit. Dorang tinggal di sana sampe bebrapa hari. Waktu hari raya agama Yahudi tu prayaan Paskah so dekat, Yesus pigi ka Yerusalem for rayakan tu hari raya itu di situ. Kong di kintal Ruma Ibada Pusat, Dia lia ada tu orang-orang yang ja bajual sapi, domba deng burung pombo, di situ lei dudu tu orang-orang yang ja se tukar doi. Kong Yesus beking cambok dari tali trus Dia user pa samua orang di situ deng dorang pe sapi deng domba. Kong tu orang-orang yang ja se tukar doi pe meja lei Dia se bobale sampe dorang pe doi tafiaro. Kong Dia bilang pa tu orang-orang yang ja bajual burung pombo, “Bawa kaluar samua ini dari sini. Ngoni jang beking jadi tampa bajual tu Kita pe Bapa pe ruma ini.” Waktu Yesus pe murit-murit lia tu Yesus da beking itu, dorang dapa inga tu da tatulis di kitab Mazmur, “Tu Kita pe cinta for Tuhan Allah pe ruma sama deng api yang da bakar Kita pe hati.” Kong tu pemimpin-pemimpin agama Yahudi malawang pa Yesus. Dorang bilang, “Apa tu mujisat yang bole Bapak se tunjung pa torang, sampe Bapak ada kuasa beking bagitu?” Yesus manyao, “Co se rubu ni Ruma Ibada Pusat, kong de pe hari katiga Kita mo se badiri ulang itu.” Kong tu pemimpin-pemimpin agama Yahudi babilang pa Dia, “Apa? Ampa pulu anam taong orang da se badiri ni Ruma Ibada Pusat, kong Bapak bilang bole mo se badiri ini cuma dalam tiga hari?” Mar tu Yesus pe maksut deng Ruma Ibada Pusat itu, Dia pe badan sandiri. So itu nanti, abis Dia hidop ulang, Dia pe murit-murit tainga kalu Dia so perna bilang tu hal itu, kong dorang lei percaya tu Kitab Suci deng tu kata-kata yang Dia so bilang. Yesus ada di Yerusalem slama hari raya agama Yahudi tu prayaan Paskah, kong waktu itu banya orang yang percaya pa Dia lantaran dorang da lia tu mujisat-mujisat yang Dia da beking. Mar Yesus sandiri nyanda percaya kalu dorang so percaya pa Dia, lantaran Dia tau manusia pe isi hati. Kong orang lei nyanda perlu mo kase tau pa Dia tentang manusia, lantaran Dia tau tu manusia pe isi hati. Ada tu satu orang de pe nama Nikodemus. Dia itu pemimpin agama Yahudi dari golongan Farisi tu golongan yang pegang kras tu atoran agama Yahudi. Satu malam, dia datang pa Yesus kong babilang, “Guru, torang tau kalu Guru ini Tuhan Allah da utus. Torang tau itu lantaran orang bole mo beking tu mujisat-mujisat sama deng tu Guru da beking, kalu Tuhan Allah ada sama-sama deng dia.” Yesus bilang pa dia, “Kita bilang pa bapak, cuma orang yang da lahir ulang tu bole jadi orang dari Tuhan Allah yang Berkuasa sbagai Raja.” Nikodemus bilang pa Dia, “Masa komang orang so tua kong bole mo lahir ulang? Nyanda mungkin dia bole mo maso ulang pa de pe mama pe puru kong se lahir ulang.” Yesus manyao pa dia, “Kita bilang pa bapak, orang musti lahir ulang dari aer deng dari Tuhan Allah pe Roh, baru dia mo jadi orang dari Tuhan Allah yang Berkuasa sbagai Raja. Soalnya torang lahir di dunia ini lantaran torang pe orang tua, mar torang pe roh lahir dari Tuhan Allah pe Roh. Bapak jang heran kalu Kita bilang pa bapak, ‘Bapak musti lahir ulang kalu bapak mo jadi orang dari Tuhan Allah yang Berkuasa sbagai Raja.’ Torang ambe conto dari angin: tu angin batiop ka mana jo dia suka, kong torang bole dengar de pe bunyi, cuma torang nintau dari mana tu angin datang deng ka mana dia mo pigi. Itu bole mo se sama deng Tuhan Allah pe Roh yang bakarja pa orang sampe tu orang lahir ulang, torang nintau bagimana tu Roh itu bakarja sampe jadi bagitu.” Kong Nikodemus bilang pa Yesus, “Bagimana lei tu Guru da bilang itu mo jadi?” Yesus manyao pa dia, “Bapak itu torang orang Israel pe guru yang terhormat, masa komang bapak nyanda mangarti tu hal-hal itu? Kita bilang pa bapak, Kita deng orang-orang yang percaya pa Kita, torang kase tau tentang apa yang torang da lia deng yang torang tau butul, mar ngoni nyanda trima tu torang da se tau itu. Kita da kase tau tentang apa tu da jadi di dunia, mar ngoni nimau percaya pa Kita, no lebe soe lei kalu Kita kase tau pa ngoni tentang apa tu da jadi di sorga, paling ngoni lebe nimau mo percaya. Nyanda ada satu orang yang so perna nae ka sorga, kacuali tu Anak Manusia yang so turung dari sorga kong se tau pa ngoni tentang apa tu da jadi di sorga. Dulu di padang gurun, nabi Musa beking ular dari tembaga kong kase nae tu ular itu di kayu supaya sapa jo yang ular da gigi kong balia pa tu ular tembaga itu, dia bole tetap hidop. Bagitu lei deng tu Anak Manusia mo dapa angka deng cara paku di kayu salib, supaya sapa jo yang percaya pa Dia bole mo dapa hidop kekal. Soalnya Tuhan Allah sayang skali ni dunia sampe Dia srahkan tu Dia pe Anak satu-satunya, supaya tiap orang yang percaya pa Dia nyanda mo binasa mar mo dapa hidop kekal. Soalnya Tuhan Allah da utus Dia pe Anak datang ka dunia ini bukang for mo bahakimi, mar Dia pe Anak itu mo kase slamat orang-orang di dunia ini dari hukuman dosa. Sapa jo yang percaya pa Dia, tu orang itu nyanda mo dapa hukum. Mar sapa jo yang nyanda percaya, Tuhan Allah so sadia dia pe hukuman, lantaran dia nyanda percaya pa tu Anak Allah satu-satunya. Tuhan Allah so sadia tu hukuman itu lantaran bagini: Dia datang ka dunia ini beking trang tu manusia pe hati, mar manusia lebe suka tu glap daripada tu trang lantaran manusia pe kalakuan jaha. Soalnya, sapa jo yang suka ja beking tu jaha, dia binci tu trang kong nimau datang di trang itu, supaya dia pe kalakuan-kalakuan yang jaha itu nyanda dapa lia. Mar sapa jo yang da beking tu ajaran yang butul, dia datang pa tu trang itu, supaya dapa lia kalu dia pe kalakuan iko Tuhan Allah pe mau.” Abis itu, Yesus pigi deng Dia pe murit-murit ka daera Yudea, kong Dia tinggal sama-sama deng dorang di sana kong babaptis orang. Waktu itu, Yohanes lei da babaptis orang di kampung Ainon, dekat Salim, lantaran di situ banya aer. Banya orang ja datang trus ka situ for dapa baptis. (Waktu itu Yohanes blum dapa se maso ka bui). Satu kali, bebrapa dari Yohanes pe murit deng tu satu orang Yahudi da baku ambe tentang beking bersi diri iko dong pe atoran agama Yahudi. Trus Yohanes pe murit-murit datang pa Yohanes kong babilang tentang Yesus, “Guru, tu Orang yang guru da kase tau pa torang, tu da sama-sama deng guru di sabla kuala Yordan, Dia lei da babaptis orang kong samua orang tare so datang pa Dia.” Yohanes manyao pa dorang, “Manusia nimbole mo beking apa-apa kacuali kalu Tuhan kase akang isin pa dia for beking itu. Ngoni sandiri so dengar apa tu kita so kase tau dulu. Kita bilang, kita ini bukang Kristus tu Raja yang mo se slamat pa manusia, mar kita datang lebe dulu dari Dia for se siap jalang supaya orang mo trima pa Dia. Dia itu sama deng pengantin laki-laki kong kita ini Dia pe tamang. Tu pengantin laki-laki itu yang penting lantaran dia punya tu pengantin parampuang. Mar tu pengantin laki-laki pe tamang nyanda penting, dia cuma badiri jadi pendamping kong badengar pa tu pengantin laki-laki. Dia snang skali badengar tu pengantin laki-laki pe suara. Bagitu lei deng kita, kita snang skali da dengar lebe banya orang tu da iko pa Dia. Dia musti jadi lebe penting dari kita, kong kita musti lebe hari jadi nyanda penting.” Yesus itu datang dari sorga, so itu Dia lebe basar dari samua orang di dunia ini. Manusia itu dari dunia ini, dia itu cuma mo babicara tentang dunia. Mar Yesus, Dia itu datang dari sorga, Dia itu lebe dari samua. Dia kase tau tentang apa tu Dia da lia deng tu Dia da dengar, mar nyanda ada satu orang yang percaya deng apa tu Dia da kase tau itu. Mar sapa yang percaya deng tu Dia da kase ajar itu, tu orang itu mangaku kalu Tuhan Allah da bilang itu lei butul. Soalnya Dia yang Tuhan Allah da utus, Dia itu yang da kase tau tu Tuhan Allah pe firman, lantaran tu Tuhan Allah pe Roh da kase kuasa pa Dia talebe-lebe. Bapa sayang pa Dia pe Anak kong Dia kase kuasa pa Dia pe Anak itu for kuasai samua. Sapa jo yang percaya pa tu Anak, dia dapa tu hidop kekal, kong sapa yang nyanda iko tu Anak pe mau, dia nyanda mo dapa hidop kekal, mar Tuhan Allah pe hukuman ada pa dia slama-lamanya. Orang-orang Yahudi dari golongan Farisi da dengar kabar kalu so banya orang tu ja iko pa Yesus deng yang Dia da baptis, sampe lebe banya dari Yohanes. (Biar lei dorang dengar kabar bagitu, mar sebenarnya bukang Yesus yang da babaptis mar Dia pe murit-murit yang da babaptis). Waktu Yesus tau kalu orang-orang Yahudi dari golongan Farisi dengar tu kabar itu, Dia kaluar dari Yudea kong babale ka daera Galilea. Waktu Dia mo ka daera Galilea, Dia musti balewat di daera Samaria. Dia bajalang kong sampe di satu kota di daera Samaria, tu kota itu pe nama Sikhar. Tu kota itu dekat deng tu tana yang dulu Yakub da kase pa dia pe anak Yusuf. Di situ ada satu parigi, tu ja bilang parigi Yakub. Yesus lela skali lantaran tu Dia pe perjalanan, kong Dia dudu di pinggir parigi itu. Tu hari itu kira-kira jam dua blas tenga hari. Tu parampuang Samaria bilang pa Dia, “Bapak ini to orang Yahudi, kong kita orang Samaria. Masa komang Bapak mo minta aer pa kita for minum!” (Dia bilang bagitu lantaran orang Yahudi nyanda ja bergaul deng orang Samaria, lantaran orang Yahudi anggap dorang itu najis). Yesus bilang pa dia, “Kalu ibu tau sapa sebenarnya Kita yang da baminta minum pa ibu, deng lei ibu tau yang Tuhan Allah mo kase pa ibu, pasti ibu yang mo bale minta minum pa Kita kong Kita mo kase akang tu aer yang bole beking hidop.” Tu parampuang itu babilang, “Bapak, Bapak nyanda ada timba kong ni parigi lei pe dolong. Kong dari mana dang Bapak mo dapa tu aer yang bole beking hidop? Tu torang pe nene moyang Yakub yang da kase ni parigi ini pa torang. Kong dia sandiri so minum dari ni parigi ini, bagitu lei deng de pe anak-anak deng de pe binatang-binatang yang dia ja piara. Apa Bapak ini lebe jago dari tu torang pe nene moyang itu?” Yesus manyao pa dia, “Sapa jo yang minum aer dari ni parigi, tantu dia mo aus ulang. Mar sapa jo yang minum tu aer yang Kita mo kase, dia nyanda perna mo aus ulang lei for slama-lamanya. Malatare tu aer yang Kita mo kase pa dia, nanti mo jadi sama deng mata aer pa dia pe diri yang mo trus bapancar pa dia sampe dia bole dapa tu hidop kekal.” Tu parampuang itu bilang pa Dia, “No kalu bagitu, Bapak kase akang dang pa kita tu aer itu, supaya kita so nyanda mo aus kong so nyanda usa lei mo bale ulang kamari for batimba di parigi ini.” Yesus bilang pa dia, “Pigi jo pangge ibu pe laki, trus ngoni dua datang kamari.” Tu parampuang itu manyao pa Dia, “Kita nyanda ada laki.” Trus Yesus bilang pa dia, “Butul tu ibu da bilang kalu ibu nyanda ada laki. Soalnya ibu so kaweng lima kali, kong skarang tu laki-laki yang ada deng ibu itu lei, bukang ibu pe laki. Jadi yang ibu da bilang, ‘Kita nyanda ada laki’, itu memang butul.” Tu parampuang itu bilang pa Dia, “Bapak, kita tau skarang kalu Bapak itu nabi. Torang orang Samaria pe nene moyang ja baibada pa Tuhan Allah di gunung ini, mar ngoni orang Yahudi bilang kalu di Yerusalem itu tu tampa orang ja baibada pa Tuhan Allah.” Yesus bilang pa dia, “Ibu, percaya jo tu Kita mo bilang ini: Nanti ada de pe waktu orang mo baibada pa Tuhan Allah tu Bapa bukang di gunung ini, deng bukang lei di Yerusalem. Ngoni orang Samaria, ngoni semba pa Tuhan Allah mar ngoni nintau sapa Dia sebenarnya, mar torang orang Yahudi semba pa Tuhan Allah kong torang tau sapa Dia sebenarnya. Soalnya Tuhan Allah so janji kalu tu Orang yang mo se slamat pa manusia mo datang dari antara orang Yahudi. Mar nanti mo ada de pe waktu, malatare so skarang ini, for orang-orang yang butul-butul semba pa Tuhan Allah, dorang mo semba pa Dia deng Roh Kudus pe kuasa deng iko yang butul tu dari pa Tuhan Allah. Soalnya Tuhan Allah da cari orang-orang yang semba pa Dia sama deng itu. Tuhan Allah itu Roh, so itu orang-orang yang semba pa Dia, dorang itu musti semba pa Dia deng Roh Kudus pe kuasa deng iko yang butul tu dari pa Tuhan Allah.” Tu parampuang itu bilang pa Yesus, “Kita tau kalu tu Mesias mo datang. Dia itu ja bilang lei Kristus tu Raja yang mo se slamat pa manusia. Kong kalu Dia datang, Dia mo kase tau samua hal pa torang.” Yesus bilang pa dia, “Kita yang da babicara deng ngana ini, Kita ini no Dia.” Waktu itu, Yesus pe murit-murit bale pa Dia kong dorang heran lantaran dorang lia Dia da babicara deng satu parampuang. Mar nyanda ada satu dari antara pa dorang yang brani batanya pa tu parampuang itu, “Ada perlu apa dang?”, ato batanya pa Yesus, “Kiapa Guru da babicara deng tu parampuang itu?” Tu parampuang itu se tinggal tu de pe tampayang di situ trus dia pi maso ka kota kong babilang pa tu orang-orang di situ, “Mari jo torang pi lia tu Orang yang da bilang samua tu kita so perna beking. Dia itu stou Kristus tu Raja yang mo se slamat pa manusia?” Trus tu orang-orang di kota itu kaluar kong pigi pa Yesus. Samantara itu, tu Yesus pe murit-murit pangge pa Dia for makang, “Guru, makang jo.” “Pa Kita ada makanan for makang yang ngoni nintau makanan apa itu.” Kong Dia pe murit-murit baku tanya, “Apa ada yang bawa akang makanan for Dia?” Yesus bilang pa dorang, “Tu Kita pe makanan, itu no tu beking Tuhan Allah pe mau deng lei se klar tu karja yang Dia da suru pa Kita. Dia itu Tuhan Allah yang da utus pa Kita. Ngoni bilang kalu so baambor bibit, so kurang ampa bulan lei to mo bapanen? Mar Kita bilang pa ngoni: co lia ngoni pe sekliling kong tengo tu orang-orang yang da badatang kamari. Dorang itu sama deng tu tanaman yang so bakuning deng so masa kong so siap mo panen lantaran dorang so siap mo percaya pa Kita. Tu orang-orang yang bapanen tantu so mulai trima tu dorang pe gaji kong dorang se kumpul tu hasil kobong. Kong dorang deng tu orang-orang yang baambor bibit mo sama-sama snang lantaran sama-sama da dapa tu hasil kobong. Tu hasil kobong yang da panen, itu sama deng tu orang-orang yang so percaya kong dapa tu hidop kekal. Butul tu kata-kata yang ngoni ja bilang ini, ‘Tu satu orang baambor bibit kong tu laeng bapanen.’ Kita suru pa ngoni for bapanen apa tu ngoni nyanda da karja akang, orang laeng yang so karja di situ. Trus ngoni yang datang kurang mo bapanen tu dorang pe hasil karja.” Banya orang Samaria di kota itu yang jadi percaya pa Yesus lantaran tu parampuang itu da kase tau bagini, “Dia da kase tau pa kita samua tu kita so perna beking.” Jadi, waktu tu orang-orang Samaria itu sampe pa Yesus, dorang minta pa Dia supaya tinggal deng dorang. Kong Dia tinggal deng dorang di situ slama dua hari. Kong lebe banya lei orang yang jadi percaya pa Yesus lantaran dorang da dengar tu Dia pe ajaran. Dorang bilang pa tu parampuang itu, “Torang skarang percaya bukang cuma lantaran tu ngana da bilang, mar lantaran torang sandiri so dengar dari pa Dia kong torang so tau kalu Dia itu memang butul-butul yang mo se slamat pa manusia dari hukuman dosa.” Serta Yesus so dua hari da tinggal di kota Sikhar, Dia pigi ka daera Galilea. Yesus sandiri perna kase tau kalu nyanda ada nabi yang dapa hormat pa de pe kampung sandiri. Mar waktu Yesus sampe di Galilea, orang-orang di situ sambut pa Dia. Soalnya waktu dorang da bakumpul di Yerusalem for rayakan tu orang Yahudi pe hari raya for pringati waktu Tuhan Allah da se bebas tu dorang pe nene moyang dari Mesir, waktu hari raya itu dorang sandiri da lia samua tu Yesus so beking di Yerusalem. Kong abis itu, Yesus bajalang di daera Galilea trus sampe di kota Kana. Di situ Dia perna da roba tu aer jadi anggor. Kong di Kapernaum tu dekat dari situ, ada tu satu pegawai istana tu dia pe anak laki-laki da saki. Waktu dia dengar Yesus so datang dari daera Yudea ka daera Galilea, dia pigi pa Yesus kong minta supaya Yesus datang ka Kapernaum for kase bae dia pe anak yang da saki tu amper-amper mo mati. Yesus bilang pa dia, “Kalu ngoni ini nyanda lia mujisat-mujisat deng hal-hal luar biasa, ngoni nyanda mo percaya.” Tu pegawai itu bilang pa Dia, “Bapak, mari jo kwa torang pigi, jang sampe kita pe anak mati.” Yesus bilang pa dia, “Pigi jo, bapak pe anak so bae.” Tu pegawai itu percaya deng tu Yesus da bilang kong dia pigi. Waktu tu pegawai itu masi di tenga jalang, dia pe orang-orang karja so dola pa dia kong kase tau kalu de pe anak so bae. So itu, dia batanya pa dorang kalu jam brapa tu de pe anak itu mulai bae. Dorang manyao pa dia, “Kalamaring jam satu siang, dia so nyanda panas.” Tu pegawai itu dapa inga kalu pas jam itu Yesus da bilang pa dia, “Bapak pe anak so bae.” Kong tu pegawai deng samua de pe kluarga jadi percaya pa Yesus. Yesus da kase bae tu anak itu, itu Dia pe mujisat yang kadua yang Dia da beking waktu Dia pulang dari daera Yudea ka daera Galilea. Abis itu, Yesus pigi ka Yerusalem lantaran tu orang Yahudi pe hari raya so nyanda lama. Di Yerusalem ada pintu gerbang, tu de pe nama ‘Pintu Domba’. Di dekat tu pintu itu ada satu kolam tu dalam bahasa Ibrani de pe nama Betesda. Di sekliling tu kolam itu ada lima place. Di place-place itu ada banya skali orang saki yang da batidor: ada orang buta, orang kento deng orang lumpu. [Dorang da batunggu tu aer kolam mo bagoyang. Soalnya laengkali Tuhan Allah pe malaekat turung ka kolam itu kong se goyang tu aer itu. Trus sapa jo yang lebe dulu maso ka kolam waktu tu aer samantara bagoyang, dia pasti mo bae, apa jo tu de pe panyaki.] Di situ, ada satu orang yang so tiga pulu dlapan taong da saki lumpu. Yesus lia tu orang itu da batidor di situ, deng lei Dia tau kalu tu orang itu so lama saki bagitu. So itu Dia bilang pa tu orang itu, “Ngana suka mo bae?” Tu orang saki itu manyao pa Dia, “Iyo Bapak, kita suka mo bae, mar nyanda ada orang yang bantu angka pa kita for se turung ka kolam itu waktu tu aer so mulai bagoyang. Kong kalu kita coba turung ka kolam itu, orang laeng so lebe dulu turung.” Yesus bilang pa dia, “Badiri jo, angka ngana pe tikar kong bajalang.” Waktu itu jo, tu orang itu iko bae kong dia angka de pe tikar trus bajalang. Tu kejadian pas hari Sabat, tu hari orang agama Yahudi nimbole bakarja. So itu, tu pemimpin-pemimpin agama Yahudi bilang pa tu orang yang baru bae itu, “Ini hari, hari Sabat to? Kalu iko torang pe atoran agama, ngana nimbole angka ngana pe tikar.” Mar dia manyao pa dorang, “Tu Orang yang so kase bae pa kita, Dia da suru pa kita supaya angka kita pe tikar kong bajalang.” Kong tu pemimpin-pemimpin agama Yahudi batanya pa tu orang itu, “Sapa tu Orang yang da suru pa ngana angka ngana pe tikar kong bajalang?” Mar tu orang yang baru bae itu nintau sapa yang da kase bae pa dia, lantaran Yesus so maso di tenga-tenga orang banya. Kong nyanda lama jo, Yesus baku dapa lei deng dia di kompleks Ruma Ibada Pusat kong babilang pa dia, “Inga eh, ngana so bae. Jang beking dosa lei supaya nyanda ada yang lebe soe tu mo jadi pa ngana.” Kong tu orang itu pi kase tau pa tu pemimpin-pemimpin agama Yahudi kalu Yesus itu yang so se bae pa dia. So itu tu pemimpin-pemimpin agama Yahudi mulai beking susa pa Yesus lantaran Dia da kase bae orang pas hari Sabat. Mar Yesus bilang pa dorang, “Hele Kita pe Bapa ja bakarja trus sampe ni hari, so itu Kita musti lei bakarja trus.” Tu Yesus pe kata-kata itu beking tu pemimpin-pemimpin agama Yahudi lebe brusaha mo bunung pa Dia. Dorang mo bunung pa Dia bukang cuma lantaran Dia da langgar tu atoran hari Sabat, mar lantaran Dia lei da bilang kalu Tuhan Allah itu Dia pe Bapa sandiri. Deng Dia bilang kalu Tuhan Allah itu Dia pe Bapa, Dia so beking Dia pe diri sama deng Tuhan Allah. Kong Yesus bilang pa dorang, “Kita bilang pa ngoni: Kita tu Anak Allah, Kita nyanda ada kuasa mo beking apa-apa iko Kita pe mau sandiri kalu Kita nyanda lia apa tu Bapa da beking. Soalnya apa tu Bapa da beking, itu lei no yang Kita da beking. Soalnya Bapa sayang pa Dia pe Anak kong Dia se tunjung pa Dia pe Anak samua tu Dia da beking. Dia lei se tunjung tu hal yang lebe basar dari tu hal-hal rupa tu se bae orang saki supaya ngoni mo taheran-heran. Bapa yang kase hidop ulang orang-orang yang so mati kong beking dorang hidop deng Dia. Bagitu lei deng Dia pe Anak mo kase hidop pa sapa jo yang Dia suka. Bapa nyanda ja adili orang, mar Dia so srahkan tu tugas baadili itu pa Dia pe Anak. Bapa beking bagitu supaya samua orang hormat pa Dia pe Anak sama deng dorang hormat pa Bapa. Sapa jo yang nyanda hormat pa Dia pe Anak itu, dia lei nyanda hormat pa Bapa yang da utus pa tu Anak. Kita bilang pa ngoni, sapa jo yang dengar tu Kita da bilang deng percaya pa Tuhan Allah tu da utus pa Kita, dia itu mo dapa hidop kekal. Dia so nyanda mo dapa hukuman tapisa deng Tuhan Allah for slama-lamanya, mar dia so talapas dari hukuman itu kong so dapa hidop kekal. Kita bilang pa ngoni, ada de pe waktu malatare so skarang de pe waktu, kalu orang-orang mati mo dengar tu Anak Allah pe suara, kong dorang yang dengar itu mo dapa hidop kekal. Soalnya sama deng Bapa ada kuasa kase tu hidop, Dia lei kase kuasa pa Dia pe Anak for kase tu hidop. Bapa so kase kuasa pa Dia pe Anak for baadili lantaran Dia pe Anak itu no tu Anak Manusia. Ngoni jang heran deng tu Kita da bilang itu, lantaran nanti ada de pe waktu kalu samua orang yang so mati tu ada di kubur mo dengar lei tu Anak Manusia pe suara, kong tu orang-orang yang waktu dorang masi hidop ja beking tu bae, dorang mo hidop ulang kong dapa hidop kekal. Mar tu orang-orang yang waktu dorang masi hidop ja beking tu jaha, dorang mo hidop ulang kong dapa hukuman tapisa deng Tuhan Allah for slama-lamanya.” “Kita nyanda dapa beking apa-apa iko Kita pe mau sandiri. Kita baadili iko apa yang Kita da dengar dari pa Bapa. Kong Kita baadili deng adil lantaran nyanda iko tu Kita pe mau sandiri mar iko tu Bapa yang da utus pa Kita pe mau. Kalu Kita basaksi tentang Kita pe diri sandiri bilang Tuhan Allah da utus pa Kita, pasti ada orang yang nyanda mo trima kalu tu Kita da bilang itu butul. Mar Tuhan Allah yang da basaksi tentang Kita, Kita tau kalu apa tu Dia da bilang tentang Kita itu butul. Ngoni so perna suru tu ngoni pe utusan pigi pa Yohanes Pembaptis, kong Yohanes itu da basaksi tentang Kita, trus tu dia da bilang itu butul. Mar sebenarnya Kita nyanda perlu sapa-sapa for mo basaksi tentang Kita, Kita cuma da bilang tentang tu Yohanes supaya ngoni bole percaya pa Kita kong ngoni mo slamat dari hukuman dosa. Tu Yohanes pe kesaksian tentang Kita itu bole mo se sama deng pelita yang da manyala kong bacahaya trang. Kong tu cahaya itu beking snang pa ngoni mar cuma for samantara waktu. Mar samua yang Kita so beking itu se tunjung kalu Bapa yang da utus pa Kita. Kong samua itu, Dia yang da suru pa Kita for beking, trus itu samua lebe basar dari tu Yohanes pe kesaksian tentang Kita. Tu samua yang Kita da beking itu no jadi kesaksian kalu Kita ini memang Bapa yang da utus. Kong lebe dari itu lei, Bapa yang da utus pa Kita, Dia da basaksi sapa Kita pa orang-orang. Mar ngoni nyanda perna dengar Dia pe suara deng ngoni nyanda perna lia pa Dia. Kong tu Bapa pe firman nyanda tatanang pa ngoni pe hati, lantaran ngoni nyanda percaya pa Kita tu Dia da utus. Ngoni ini da teliti bae-bae tu Kitab Suci lantaran ngoni pikir deng cara bagitu ngoni mo dapa hidop kekal. Padahal di Kitab Suci itu lei Tuhan Allah da basaksi tentang Kita. Mar biar lei bagitu, ngoni nimau datang pa Kita for dapa tu hidop kekal. Kita nyanda perlu manusia mo puji deng hormat. Mar Kita tau tentang ngoni, kalu ngoni pe dalam hati nyanda sayang pa Tuhan Allah. Kita datang bawa Kita pe Bapa pe nama mar ngoni nyanda trima pa Kita. Mar kalu orang laeng datang pa ngoni bawa dia pe nama sandiri, ngoni mo trima pa dia. Ngoni suka dapa puji deng hormat dari pa orang-orang, mar ngoni nyanda beking tu Tuhan Allah pe mau supaya dapa puji deng hormat dari pa Tuhan Allah yang cuma satu itu. Jadi bagimana ngoni mo percaya pa Kita? Jang ngoni pikir nanti Kita yang mo se sala pa ngoni di muka pa Bapa. Yang mo se sala pa ngoni itu nabi Musa sandiri. Padahal dia itu yang ngoni da baharap akang. Musa tu da tulis tentang Kita yang mo datang ini. Jadi kalu ngoni percaya apa yang Musa da tulis, pasti ngoni lei percaya pa Kita, lantaran dia da tulis tentang Kita. Mar sebenarnya ngoni nyanda percaya yang Musa da tulis itu, jadi ngoni lei nyanda percaya apa yang Kita bilang.” Satu kali, Yesus nae prao pigi ka sabla danau Galilea, tu ja bilang lei danau Tiberias. Pe banya skali orang tu da iko pa Yesus. Dorang da iko pa Dia lantaran dong da lia tu mujisat-mujisat yang Dia so beking pa orang-orang saki sampe dorang jadi bae. Kong Yesus deng De pe murit-murit nae ka tampa yang bagunung, trus dorang dudu di situ. Waktu itu, tu hari raya agama Yahudi tu prayaan Paskah so dekat. Di situ Yesus lia ka sekliling, Dia lia pe banya skali orang badatang pa Dia. Kong Dia bilang pa Filipus, “Di mana kang torang bole bli makanan, supaya samua orang ini bole mo makang?” Sebenarnya Yesus so tau apa tu Dia mo beking, mar biar lei bagitu Dia tetap batanya bagitu pa Filipus for mo lia apa Filipus butul percaya pa Dia. Filipus manyao pa Dia, “Biar lei torang ada 200 doi perak for mo se bli akang makanan, tu doi pe banya itu tetap nyanda cukup for dorang samua, biar lei tiap orang cuma mo dapa sadiki.” Kong ada tu satu dari Yesus pe murit, tu de pe nama Andreas, dia itu Simon Petrus pe ade. Dia babilang pa Yesus, “Di sini ada tu anak laki-laki da bawa lima roti deng dua ikang. Mar itu nyanda mungkin mo se makang tu orang banya bagini.” Yesus bilang, “Suru jo tu orang-orang itu dudu.” Di situ ada banya rumpu, kong tu orang banya itu dudu di rumpu-rumpu itu. Dorang samua itu kira-kira ada lima ribu orang laki-laki, blum tarekeng tu parampuang deng anak-anak. Yesus ambe tu roti itu, Dia bilang makase pa Tuhan Allah trus Dia se berbage pa dorang yang da dudu di situ. Bagitu lei Dia da beking deng tu ikang-ikang itu, kong dorang makang sampe kanyang. Waktu dorang samua so jadi kanyang, Yesus bilang pa Dia pe murit-murit, “Kumpul jo tu makanan yang da talebe supaya nyanda ada tu tabuang.” Kong dorang kumpul yang da talebe dari tu lima roti itu kong isi di loto, kong de pe banya ada dua blas loto. Waktu tu orang-orang lia tu mujisat yang Yesus da beking itu, dorang babilang, “Dia ini memang butul-butul Nabi yang Tuhan Allah da janji mo datang ka dunia ini.” Yesus tau kalu dorang mo paksa pa Dia for jadi dorang pe raja. So itu Dia pi manyingkir ka gunung supaya bole mo basandiri. Waktu so mo malam, Yesus pe murit-murit pigi ka danau. Dorang di situ sampe malam kong Yesus blum datang-datang pa dorang, so itu dorang nae ka prao blayar ka Kapernaum. Kong nyanda lama, tu danau baomba lantaran angin batiop kancang. Waktu dorang so bapanggayung de pe jao kira-kira lima ato anam kilometer, dorang lia Yesus da bajalang di atas aer da pi badekat ka prao, kong dorang jadi tako skali. Mar Yesus bilang pa dorang, “Nyanda usa tako! Ini Kita.” Pe dengar itu, dorang snang se nae pa Dia ka prao. Kong waktu itu jo, dorang pe prao so sampe di tampa yang dorang mo pigi akang. De pe eso, tu orang banya yang masi ada di sabla danau da cari-cari pa Yesus. Dorang cari pa Dia lantaran dorang tau kalu de pe kalamaring cuma ada satu prao di pinggir pante kong Yesus pe murit-murit so nae akang, mar Yesus sandiri nyanda nae di prao itu. Samantara itu, ada orang-orang datang deng dorang pe prao-prao dari Tiberias. Dorang sampe di dekat tampa orang banya da makang roti abis Yesus bilang makase pa Tuhan Allah. Jadi, lantaran tu orang banya so lia kalu Yesus nyanda ada di situ deng Dia pe murit-murit lei nyanda ada, tu orang banya nae tu prao-prao yang ada di situ kong pigi ka Kapernaum for cari pa Yesus. Waktu tu orang banya sampe di sabla danau di Kapernaum kong baku dapa deng Yesus, dorang bilang pa Dia, “Guru, tempo apa dang Guru sampe di sini?” Kong Yesus manyao pa dorang, “Kita bilang pa ngoni, ngoni ini da cari pa Kita bukang lantaran ngoni da lia tu mujisat-mujisat kong mangarti sapa Kita, mar ngoni da cari pa Kita lantaran ngoni so makang tu roti sampe kanyang. Ngoni jang cuma bakarja for mo cari makanan yang mo abis deng mo busu, mar ngoni brusaha jo for mo dapa tu makanan yang nyanda mo busu kong bole beking ngoni dapa hidop kekal. Tu makanan itu Anak Manusia mo kase pa ngoni, lantaran Tuhan Allah so kase kuasa pa Dia.” Kong dorang batanya pa Yesus, “Apa dang yang torang musti beking supaya iko Tuhan Allah pe mau?” Yesus manyao pa dorang, “Ini tu Tuhan Allah pe mau for ngoni mo beking: percaya jo pa Dia yang Tuhan Allah da utus.” Pe dengar itu, dorang bilang pa Dia, “Kalu bagitu, apa dang tu mujisat yang Guru bole mo se tunjung pa torang supaya torang bole percaya kalu Guru itu dari pa Tuhan Allah? Kong apa dang yang Guru mo beking? Soalnya dulu tu torang pe nene moyang, waktu dorang di padang gurun dorang da dapa makanan tu ja bilang manna kong dorang makang itu. Itu sama deng tu da tatulis di Kitab Suci, ‘Dia da kase roti dari sorga for dorang mo makang.’ ” Yesus bilang pa dorang, “Kita bilang pa ngoni, dulu itu bukang Musa tu da kase roti dari sorga pa torang pe nene moyang, mar Kita pe Bapa yang da kase itu. Kong skarang Kita pe Bapa lei yang da kase pa ngoni tu roti yang butul dari sorga. Soalnya tu makanan yang butul itu no tu roti yang Tuhan Allah da kase turung dari sorga, kong tu makanan yang butul itu bole mo beking manusia di dunia ini mo dapa hidop kekal.” Kong dorang bilang pa Dia, “Guru, kase akang jo dang slalu tu roti itu pa torang.” Yesus bilang pa dorang, “Kita ini no tu roti yang bole beking orang dapa hidop kekal. Sapa jo yang datang pa Kita, dia itu so nyanda mo lapar lei, kong sapa jo yang percaya pa Kita, dia itu so nyanda mo aus lei. Mar sama deng tu Kita so bilang pa ngoni, biar lei ngoni so lia pa Kita, ngoni nyanda percaya pa Kita. Samua orang yang Bapa so kase pa Kita, dorang itu mo datang pa Kita. Kong sapa jo yang datang pa Kita, Kita nyanda mo tolak pa dia. Soalnya, Kita so turung dari sorga bukang for beking Kita pe mau, mar mo beking tu Dia yang da utus pa Kita pe mau. Tu Dia yang da utus pa Kita pe mau itu bagini: Dia suka samua orang yang Dia so kase pa Kita nyanda mo mati slama-lamanya, mar di hari Kiamat Kita mo se hidop ulang. Soalnya ini tu Kita pe Bapa pe mau: Dia suka supaya tiap orang yang lia pa Dia pe Anak trus percaya pa tu Anak, dorang itu mo dapa hidop kekal kong nanti di hari kiamat, Kita mo se hidop ulang pa dorang.” Kong tu orang-orang Yahudi babafeto pa Yesus lantaran Dia da bilang kalu Dia itu tu makanan yang so turung dari sorga. Dorang bilang, “Dia itu to Yesus, tu Yusuf pe anak? Torang kanal tu De pe mama deng papa. Kong kiapa dang sampe Dia babilang kalu Dia itu turung dari sorga?” Yesus bilang pa dorang, “Ngoni jang babafeto bagitu. Nyanda ada orang yang bole datang pa Kita kalu Bapa yang da utus pa Kita nyanda bawa tu orang itu pa Kita. Kong Kita mo se hidop ulang tu orang yang Bapa da bawa pa Kita itu di hari Kiamat. Ada tatulis di kitab nabi-nabi bagini, ‘Tuhan Allah mo mangajar pa samua orang.’ Kong tiap orang yang so dengar deng blajar dari pa Dia mo datang pa Kita. Mar itu de pe arti bukang ada orang yang so lia pa Bapa, cuma Kita yang so lia pa Tuhan Allah tu Bapa lantaran Kita datang dari pa Tuhan Allah. Kita bilang pa ngoni, sapa jo yang percaya pa Kita, dia itu mo dapa hidop kekal. Kita ini tu makanan yang beking orang bole hidop kekal. Tu ngoni pe nene moyang da makang tu makanan yang ja bilang manna di padang gurun, mar dorang itu tetap mati. Mar di muka pa ngoni ini ada tu makanan yang turung dari sorga, kong sapa jo yang makang tu makanan itu nyanda mo mati. Kita ini tu makanan yang so turung dari sorga, tu makanan yang bole mo se hidop pa manusia. Sapa jo yang makang tu makanan ini, dia bole mo dapa hidop kekal. Kong tu makanan yang Kita mo kase itu, itu no tu Kita pe badan yang Kita mo kase pa samua orang di dunia ini supaya dorang bole hidop.” Pe dengar itu, tu orang-orang Yahudi baku ambe kong babilang, “Bagimana lei kong Dia ini bole mo kase Dia pe badan for torang mo makang?” Kong Yesus bilang pa dorang, “Kita bilang pa ngoni, kalu ngoni nyanda makang tu Anak Manusia pe badan deng minum Dia pe dara, ngoni nyanda mo dapa tu hidop kekal. Tu orang yang makang Kita pe badan deng minum Kita pe dara, tu orang itu mo dapa hidop kekal kong Kita mo se hidop ulang pa dia di hari Kiamat. Soalnya, Kita pe badan itu makanan yang butul deng Kita pe dara itu minuman yang butul. Sapa jo yang makang Kita pe badan deng minum Kita pe dara, dia hidop satu deng Kita kong Kita lei hidop satu deng dia. Bapa yang da utus pa Kita, Dia itu yang kase hidop pa samua, kong Dia lei yang kase hidop lei pa Kita. Bagitu lei deng sapa jo yang makang Kita pe badan, dia mo dapa hidop kekal lantaran Kita. Kita ini tu makanan yang da turung dari sorga. Tu makanan ini nyanda sama deng tu manna yang ngoni pe nene moyang da makang, lantaran biar dorang makang, dorang tetap mati. Mar sapa jo yang makang ni makanan dari sorga, dia mo dapa tu hidop kekal.” Samua ini Yesus da bilang di Kapernaum waktu Dia mangajar di ruma ibada agama Yahudi. Waktu tu banya orang yang ja iko pa Yesus da dengar tu Yesus da bilang itu, dorang baku bilang, “Tu Guru pe ajaran itu brat. Nyanda ada orang yang bole mo trima tu ajaran itu.” Yesus tau kalu tu orang-orang yang ja iko pa Dia itu babafeto, so itu Dia bilang pa dorang, “Kiapa dang, ngoni tersinggung? Kalu ngoni tersinggung, bagimana lei kalu nanti ngoni lia tu Anak Manusia taangka ka sorga, bale pa Dia pe tampa dulu? Manusia nyanda mungkin mo dapa hidop kekal pake dia pe kekuatan sandiri, cuma tu Roh Kudus yang bole beking manusia hidop kekal. Tu kata-kata yang Kita da bilang ini, ini samua kata-kata dari Roh Kudus kong kata-kata ini lei yang kase hidop kekal. Mar ada di antara pa ngoni yang nyanda percaya.” (Yesus bilang bagitu lantaran Dia tau dari dulu sapa yang nyanda percaya deng sapa yang mo bahianat pa Dia). Kong Dia bilang, “So itu Kita so bilang pa ngoni, nyanda ada orang biar lei cuma satu yang bole mo datang pa Kita, kalu Bapa nyanda kase pa dia for datang pa Kita.” Mulai dari waktu itu, banya dari orang-orang yang ja iko pa Yesus yang se tinggal pa Dia, dorang nimau mo iko pa Dia lei. Kong Yesus bilang pa Dia pe dua blas murit, “Apa ngoni lei mo se tinggal pa Kita?” Simon Petrus manyao pa Dia, “Tuhan, torang mo pigi pa sapa lei? Cuma Tuhan pe firman yang bole se tau pa torang bagimana torang mo dapa tu hidop kekal. Torang ini so percaya deng so tau kalu Guru itu Yang Kudus tu Tuhan Allah da utus.” Yesus bilang pa dorang, “Kita sandiri yang da pili pa ngoni dua blas murit ini to? Mar ada satu dari pa ngoni yang setang da kuasai.” Tu Yesus pe maksut itu Yudas, tu Simon Iskariot pe anak. Yudas itu satu dari Yesus pe murit, mar dia itu yang nanti mo bahianat pa Yesus. Abis itu, Yesus pi bakliling di daera Galilea. Dia nimau bakliling di daera Yudea lantaran tu pemimpin-pemimpin agama Yahudi di sana brusaha mo bunung pa Dia. Waktu itu, so dekat tu orang Yahudi pe hari raya Pondok Daong. So itu Yesus pe saudara-saudara babilang pa Dia, “Lebe bae Ngana se tinggal jo ni tampa kong pigi ka daera Yudea for rayakan tu hari raya, supaya banya orang tu ja iko pa Ngana bole lei lia tu mujisat-mujisat yang Ngana ja beking. Soalnya nyanda ada orang yang beking sesuatu deng cara babasambunyi kalu dia itu suka mo jadi orang yang top. Jadi kalu Ngana mo beking tu mujisat-mujisat, orang-orang di dunia ini musti lia tu Ngana da beking itu.” Yesus pe saudara-saudara bilang bagitu lantaran dorang sandiri nyanda percaya pa Dia. Kong Yesus manyao pa dorang, “Blum de pe waktu for Kita mo ka sana, mar for ngoni slalu ada de pe waktu for pigi ka sana. Soalnya manusia di dunia ini yang nyanda percaya pa Kita, dorang itu nyanda binci pa ngoni mar dorang binci pa Kita, lantaran Kita da bilang kalu dorang pe kalakuan nyanda butul. Ngoni jo tu pigi ka prayaan di Yerusalem. Kita skarang nyanda mo pigi ka sana lantaran blum de pe waktu for Kita ka sana.” Bagitu no tu Yesus da bilang pa Dia pe saudara-saudara, kong Dia da tinggal bebrapa hari lei di daera Galilea. Yesus pe saudara-saudara so pigi ka Yerusalem for rayakan tu hari raya. Kong serta so bebrapa hari, Yesus pigi ka sana nyanda deng trang-trangan mar Dia pigi deng babadiam. Di Yerusalem pas hari raya itu, tu pemimpin-pemimpin agama Yahudi da cari-cari pa Yesus di prayaan itu, dorang babatanya, “Di mana tu Yesus kang?” Kong ada banya orang yang baku-baku bise tentang Yesus. Ada tu da bilang, “Dia itu orang bae-bae.” Mar ada lei yang da bilang, “Nyanda, Dia ja beking sesat banya orang.” Mar nyanda ada orang biar lei cuma satu yang brani mo babicara trang-trangan tentang Dia, lantaran dorang tako pa tu pemimpin-pemimpin agama Yahudi. Dorang rayakan hari raya Pondok Daong itu slama satu minggu, kong di tenga-tenga minggu itu Yesus maso ka kompleks Ruma Ibada Pusat kong mulai mangajar di situ. Kong tu pemimpin-pemimpin agama Yahudi heran skali da dengar tu Dia pe ajaran, dorang bilang, “Orang ini tau skali tentang atoran-atoran di kitab Taurat, padahal Dia itu nyanda perna blajar sama deng torang.” Yesus manyao pa dorang, “Tu Kita da se ajar ini, bukang dari Kita pe diri sandiri, mar dari Tuhan Allah yang da utus pa Kita. Sapa jo yang suka mo beking tu Tuhan Allah pe mau, dia itu mo tau apa tu Kita da se ajar itu dari Tuhan Allah ato itu cuma dari pa Kita pe diri sandiri. Sapa jo yang mangajar pake de pe pikiran sandiri, dia itu suka kalu de pe diri mo dapa puji deng dapa hormat. Mar sapa jo yang mangajar supaya Tuhan Allah yang da utus pa dia dapa puji deng dapa hormat, pasti tu orang itu ja beking tu butul deng dia nyanda ja badusta. Tu nabi Musa so kase tu atoran-atoran di kitab Taurat for ngoni to? Mar nyanda ada satu dari pa ngoni yang da beking tu atoran-atoran itu. Kalu ngoni iko tu atoran-atoran itu, no kiapa dang ngoni mo bunung pa Kita?” Kong tu orang banya itu bilang pa Dia, “Ngana ini so kemasukan setang! Sapa tu mo bunung pa Ngana?” Trus Yesus manyao pa dorang, “Kita da se bae orang di hari Sabat satu kali, kong ngoni samua so heran deng itu. Padahal ngoni sandiri lei da bakarja di hari Sabat waktu ngoni ja sunat orang iko tu nabi Musa da suru. Mar sebenarnya tu sunat itu bukang Musa pe atoran, mar itu atoran dari torang pe nene moyang tu Abraham, Ishak deng Yakub. No kalu ngoni sunat orang di hari Sabat, supaya tu Musa pe atoran itu ngoni nyanda langgar, no kiapa dang ngoni mara pa Kita lantaran Kita da se bae satu orang di hari Sabat? Ngoni jang hakimi orang cuma dari apa yang ngoni bole lia, mar ngoni musti hakimi orang iko apa yang butul.” Kong ada bebrapa orang Yerusalem da dengar tu Yesus da bilang, trus dorang babilang, “Dia ini to tu Orang yang torang pe pemimpin-pemimpin agama Yahudi da brusaha mo cari bunung? Co lia, Dia da babicara deng bebas di muka banya orang kong tu pemimpin-pemimpin itu nyanda bilang apa-apa pa Dia. Dorang stou so tau kang kalu Dia itu butul-butul Kristus tu Raja yang mo se slamat pa manusia? Mar nyanda mungkin kalu ni Orang tu Kristus, lantaran torang tau Dia ini pe asal dari mana. Mar kalu Kristus, nyanda ada orang yang tau Dia itu pe asal dari mana.” Waktu Yesus masi samantara mangajar di Ruma Ibada Pusat, Dia babilang deng suara kuat, “Memang ngoni kanal pa Kita deng ngoni tau Kita pe asal dari mana. Mar Kita datang bukang lantaran Kita pe mau sandiri, mar Kita datang lantaran Tuhan Allah tu da utus pa Kita. Dia itu yang butul, tu ngoni nyanda kanal. Kita kanal pa Dia lantaran Kita datang dari pa Dia, kong Dia itu yang da utus pa Kita.” Pe dengar itu, dorang brusaha tangka pa Yesus, mar nyanda ada orang yang bole tangka pa Dia lantaran blum sampe tu waktu yang Tuhan Allah da tentukan. Mar di antara tu orang banya itu ada banya yang jadi percaya pa Dia, kong dorang babilang, “Kalu Kristus tu Raja yang mo se slamat pa manusia datang, apa mungkin Dia mo beking lebe banya mujisat dari yang Dia da beking? Pasti nyanda to.” Orang-orang dari golongan Farisi, tu golongan yang pegang kras tu atoran agama Yahudi, dorang da dengar tu orang banya da baku-baku bise tentang Yesus. So itu, tu imam-imam kapala deng orang-orang dari golongan Farisi suru tu penjaga-penjaga Ruma Ibada Pusat for tangka pa Dia. Waktu itu, Yesus babilang pa orang banya, “So kurang sadiki tu waktu for Kita mo ada sama-sama deng ngoni. Kong abis itu Kita mo bale ulang pa Dia yang da utus pa Kita. Ngoni mo cari pa Kita mar ngoni nyanda mo dapa pa Kita, lantaran ngoni nimbole pigi ka tampa tu Kita mo pigi akang.” So itu, tu pemimpin-pemimpin agama Yahudi itu baku bilang, “Ka mana so Dia mo pigi sampe torang so nyanda mo dapa pa Dia? Apa Dia pe maksut Dia mo pigi pa tu orang-orang Yahudi yang da merantau ka bangsa bukang Yahudi, supaya Dia mo mangajar pa tu orang-orang yang bukang Yahudi di sana? Kong apa dang Dia pe maksut waktu Dia bilang torang mo cari pa Dia mar torang nyanda mo dapa pa Dia, trus lei kalu di tampa tu Dia mo pigi akang, torang nimbole mo ka sana?” Waktu so hari terakhir dari tu hari raya itu, pas de pe puncak prayaan, Yesus badiri kong babilang deng suara kuat, “Sapa jo yang aus, lebe bae dia datang pa Kita kong Kita mo se minum. Sapa jo yang percaya pa Kita, dia itu nanti mo dapa apa tu da tulis di Kitab Suci bagini, ‘Dari dalam pa dia pe hati sama deng ada aer yang da mengalir tu beking dia bole mo hidop kekal.’ ” Waktu Yesus bilang aer itu, Dia pe maksut Tuhan pe Roh tu orang percaya mo trima. Soalnya waktu Yesus masi ada di dunia, orang-orang blum trima tu Roh Kudus lantaran Tuhan Allah blum kase tunjung tu Yesus pe luar biasa. Waktu tu orang banya da dengar tu Yesus pe kata-kata itu, ada bebrapa dari pa dorang yang babilang, “Dia ini butul-butul nabi tu Tuhan Allah da janji mo datang.” Kong tu laeng babilang, “Dia ini Mesias, Tu Raja yang mo se slamat pa torang.” Mar tu laeng lei babilang, “Bukang, Tuhan Allah dulu da janji kalu Mesias itu datang dari Yudea bukang dari Galilea. Di Kitab Suci da bilang kalu nanti Mesias mo datang dari pa raja Daud pe keturunan dari kampung Betlehem, tu raja Daud pe kampung.” Kong tu orang-orang itu mulai baku ambe tentang Yesus. Ada bebrapa orang mo tangka pa Dia, mar nyanda ada orang yang brani mo pegang pa Dia. Tu penjaga-penjaga Ruma Ibada Pusat itu babale pa tu imam-imam kapala deng pa tu orang-orang dari golongan Farisi yang suru pa dorang, kong tu penjaga-penjaga itu dapa tanya, “Kiapa dang ngoni nyanda bawa pa Yesus kamari?” Dorang manyao, “Blum perna ada orang yang babicara pe bagus sama deng Dia.” Kong tu orang-orang dari golongan Farisi bilang pa dorang, “Apa Dia so beking sesat lei pa ngoni? Ada so dari pa torang tu orang-orang dari golongan Farisi ato dari tu pemimpin-pemimpin agama Yahudi yang jadi percaya pa Dia? Nyanda ada to? Mar tu orang banya itu percaya pa Dia lantaran dorang nintau tu atoran-atoran di kitab Taurat, dorang itu dapa kutuk dari Tuhan Allah.” Di antara tu orang-orang dari golongan Farisi itu ada tu Nikodemus. Dia itu yang dulu perna da datang pa Yesus. Dia bilang pa dorang, “Kalu iko torang pe atoran-atoran di kitab Taurat, apa torang mo hukum orang seblum torang dengar dari pa dia deng seblum torang tau apa yang dia da beking?” Kong dorang manyao pa dia, “Apa bapak lei orang Galilea sama deng Dia? Co bapak priksa bae-bae di Kitab Suci, di situ bapak bole tau kalu nyanda perna ada nabi yang datang dari Galilea.” [ Abis itu, dorang samua pulang pa dong pe ruma masing-masing. Kong Yesus pigi ka bukit Zaitun. De pe eso pagi-pagi skali, Yesus pigi ulang ka kompleks Ruma Ibada Pusat. Banya orang datang pa Dia di situ, trus Dia dudu kong mangajar pa dorang di situ. Waktu itu, datang tu ahli-ahli Taurat deng orang-orang dari golongan Farisi tu golongan yang pegang kras tu atoran agama Yahudi. Dorang da bawa satu parampuang yang dapa riki da bersina. Dorang taru tu parampuang itu di tenga-tenga pa dorang, trus dorang bilang pa Yesus, “Guru, ni parampuang ini da dapa riki waktu dia da bersina. Kalu iko tu atoran-atoran yang nabi Musa da kase, tu parampuang-parampuang yang bagini musti dapa lempar deng batu sampe mati. Kalu Guru pe pendapat dang bagimana?” Dorang bilang bagitu for tes pa Yesus, supaya dorang bole mo se sala pa Dia lewat tu Dia pe jawaban pa dorang. Mar Dia cuma da maruku kong batulis deng Dia pe jare di tana. Waktu dorang tanya-tanya trus pa Yesus, Dia badiri kong bilang pa dorang, “Sapa dari pa ngoni yang nyanda berdosa, biar jo dia tu lebe dulu lempar batu pa tu parampuang itu.” Abis itu Dia maruku ulang kong batulis di tana. Waktu tu ahli-ahli Taurat deng tu orang-orang dari golongan Farisi dengar tu Dia da bilang itu, dorang pigi dari situ satu-satu, mulai dari yang paling tua. Kong de pe laste, di situ kurang tatinggal Yesus deng tu parampuang. Trus Yesus badiri kong batanya pa tu parampuang, “Ibu, mana jo dorang itu? Apa nyanda ada orang yang da hukum pa ibu?” Tu parampuang manyao pa Dia, “Nyanda ada, Bapak.” Kong Yesus bilang pa dia, “Kita lei nyanda mo hukum pa ibu. Pigi jo, kong mulai skarang jang beking lei dosa.”] Abis itu, Yesus babicara ulang pa orang banya, “Kita ini trang dunia yang kase trang manusia pe hati. Sapa jo yang iko pa Kita, dia itu so nyanda lei mo hidop di glap, mar dia hidop di trang yang beking dia bole dapa hidop kekal.” Kong tu orang-orang Yahudi dari golongan Farisi bilang pa Dia, “Tu Bapak da kase tau itu nyanda butul, lantaran tu Bapak da kase tau itu tentang Bapak pe diri sandiri.” Yesus manyao pa dorang, “Biar lei Kita da kase tau tentang Kita pe diri sandiri, mar tu Kita da se tau itu butul lantaran Kita tau dari mana Kita da datang kong ka mana Kita mo pigi, mar ngoni nintau dari mana Kita datang kong ka mana Kita mo pigi. Ngoni ja hakimi orang iko tu manusia pe pikiran, mar Kita nyanda bahakimi orang. Mar kalu lei Kita mo bahakimi orang, Kita bahakimi orang deng butul lantaran Kita nyanda bahakimi sandiri mar Kita da bahakimi sama-sama deng Bapa yang da utus pa Kita. Pa ngoni pe atoran-atoran di kitab Taurat da tulis bagini: kalu ada dua orang jadi saksi tentang satu hal yang sama, itu de pe arti butul tu kesaksian itu. Tu saksi yang da basaksi tentang Kita, itu Kita pe diri sandiri deng lei Bapa yang da utus pa Kita.” Kong dorang bilang pa Dia, “Di mana so Guru pe Bapa?” Yesus manyao pa dorang, “Ngoni nyanda kanal pa Kita deng lei tu Kita pe Bapa. Kalu ngoni kanal pa Kita, tantu katu ngoni lei kanal tu Kita pe Bapa.” Tu kata-kata ini Yesus da bilang waktu Dia da mangajar di dekat tampa ja kase akang doi persembahan di Ruma Ibada Pusat. Mar nyanda ada orang biar lei cuma satu yang da tangka pa Dia lantaran de pe waktu blum sampe. Yesus bilang ulang lei pa tu pemimpin-pemimpin agama Yahudi, “Kita mo pigi ka tampa laeng kong ngoni mo cari-cari pa Kita, mar ngoni nyanda mo dapa. Ngoni nyanda percaya pa Kita, jadi waktu ngoni mati, ngoni pe dosa-dosa blum dapa ampung. Kong di tampa tu Kita da pigi akang, ngoni nyanda dapa mo pigi ka situ.” Pe dengar itu, tu pemimpin-pemimpin agama Yahudi babilang, “Dia mo bunung diri so? Soalnya kwa Dia bilang kalu di tampa tu Dia mo pigi akang torang nyanda dapa mo pigi ka situ.” Kong Yesus bilang pa dorang, “Ngoni ini orang-orang yang de pe asal dari ni dunia, mar Kita pe asal dari sorga. Ngoni Cuma tau dunia pe pikiran, mar Kita nyanda. So itu, tadi Kita bilang pa ngoni kalu ngoni mo mati lantaran ngoni pe dosa-dosa nyanda dapa ampung. Soalnya ngoni nyanda percaya kalu ‘Kita ini’ no yang so perna Kita da bilang pa ngoni, so itu ngoni mo mati lantaran ngoni pe dosa-dosa nyanda dapa ampung.” Kong dorang bilang pa Dia, “Sapa so Bapak?” Yesus manyao pa dorang, “Sapa Kita sebenarnya, Kita so kase tau pa ngoni dari dulu. Masi banya lei tu Kita mo bilang tentang ngoni deng lei masi banya tu Kita mo hakimi tentang ngoni. Mar Kita cuma mo se tau pa orang-orang di dunia ini tu Kita da dengar dari pa Dia yang da utus pa Kita, kong yang Dia da bilang itu butul.” Tu orang-orang yang da badengar pa Yesus nyanda mangarti kalu Yesus da babicara pa dorang tentang Dia pe Bapa di sorga. So itu, Yesus bilang pa dorang, “Nanti waktu ngoni so angka tu Anak Manusia for se salib, baru ngoni mo tau kalu Dia itu no Kita. Kong ngoni lei mo tau kalu Kita nyanda da beking apa-apa cuma dari Kita pe diri sandiri, mar samua yang Kita da beking, itu samua dari pa Bapa yang da se ajar pa Kita. Kong Dia yang da utus pa Kita ada sama-sama deng Kita. Dia nyanda perna mo se biar Kita sandiri lantaran Kita slalu ja beking apa tu Dia snang.” Abis Yesus bilang samua itu, banya orang jadi percaya pa Dia. Yesus bilang pa tu orang-orang Yahudi yang so jadi percaya pa Dia, “Kalu ngoni beking trus tu Kita pe ajaran, ngoni ini butul-butul orang yang ja iko pa Kita. Kalu ngoni bagitu, ngoni mo tau tu ajaran yang butul trus tu ajaran yang butul itu mo beking ngoni jadi bebas dari apa yang da se budak pa ngoni.” Dorang manyao pa Dia, “Torang ini Abraham pe keturunan kong torang nyanda perna jadi sapa-sapa pe budak. Jadi bagimana lei kong Bapak bilang kalu torang ini mo bebas dari apa yang da se budak pa torang?” Yesus bilang pa dorang, “Kita bilang pa ngoni, tiap orang tu ja beking dosa, dia itu jadi budak dari dosa. Kong kalu orang jadi budak, itu de pe arti dia nyanda tetap tinggal di dalam ruma deng tu kluarga. Mar kalu anak, dia tinggal di dalam ruma deng dia pe kluarga for slama-lamanya. Jadi kalu tu Anak Manusia se bebas pa ngoni dari dosa, ngoni ini butul-butul bebas. Kita tau kalu ngoni ini Abraham pe keturunan, mar biar lei bagitu ngoni brusaha bunung pa Kita lantaran ngoni nimau trima tu Kita pe ajaran. Apa tu Kita dengar dari pa Bapa, itu yang Kita se ajar pa ngoni. Mar ngoni iko apa tu ngoni pe papa da se ajar.” Dorang manyao pa Dia, “Torang pe papa itu Abraham.” Yesus bilang pa dorang, “Kalu ngoni ini butul Abraham pe anak-anak, tantu ngoni beking sama deng tu Abraham da beking. Mar tu ngoni da beking nyanda sama deng Abraham, ngoni tare brusaha mo bunung pa Kita cuma lantaran Kita so bilang pa ngoni tu ajaran yang butul tu Kita da dengar dari Tuhan Allah. Tu ngoni da beking itu sama deng tu ngoni pe papa sandiri da beking.” Dorang manyao, “Torang ini bukang anak haram. Torang pe Bapa cuma satu, Dia itu Tuhan Allah sandiri.” Yesus bilang pa dorang, “Kalu Tuhan Allah itu ngoni pe Bapa, ngoni mo sayang pa Kita lantaran Kita ini datang dari Tuhan Allah kong skarang Kita ada di sini. Kong lei Kita ini da datang bukang lantaran Kita pe mau sandiri, mar lantaran Dia yang da utus pa Kita. Ngoni nyanda mangarti deng tu Kita da bilang lantaran ngoni nimau mo trima tu Kita pe ajaran. Ngoni pe papa itu setang pe bos, kong ngoni suka beking tu ngoni pe papa pe mau. Tu setang pe bos itu, dari dulu sampe skarang tukang babunung orang. Dia nyanda ja beking tu butul, lantaran pa dia itu nyanda ada yang butul. Kalu dia badusta, itu dia bilang memang dari pa dia pe diri sandiri lantaran dia itu pangbadusta, kong dia itu papa dari samua tu pangbadusta. Mar so lantaran Kita ini ja kase tau tu ajaran yang butul, ngoni nyanda percaya pa Kita. Sapa dari antara pa ngoni yang bole se bukti kalu Kita da beking dosa? Kalu Kita se tau pa ngoni tu ajaran yang butul, no kiapa dang ngoni nyanda percaya pa Kita? Sapa jo yang de pe asal dari pa Tuhan Allah, dia dengar kong trima tu Tuhan Allah pe ajaran. Mar ngoni nimau badengar tu Tuhan Allah pe ajaran lantaran ngoni pe asal bukang dari pa Tuhan Allah.” Tu pemimpin-pemimpin agama Yahudi manyao pa Yesus, “Butul tu torang da bilang kalu Bapak ini bukang orang Israel, mar Bapak ini orang Samaria deng lei da kemasukan setang.” Yesus manyao, “Kita ini nyanda kemasukan setang. Kita hormat pa Kita pe Bapa mar ngoni hina pa Kita. Kita nyanda cari puji deng hormat for Kita pe diri sandiri. Ada Satu yang suka supaya Kita dapa puji deng hormat, deng Dia itu no yang mo baadili. Kita bilang pa ngoni, sapa jo yang iko tu Kita pe ajaran, dia nyanda mo mati for slama-lamanya.” Tu pemimpin-pemimpin agama Yahudi itu babilang pa Dia, “Skarang komang so jelas kalu Bapak memang da kemasukan setang. Tu Abraham deng tu nabi-nabi so mati, mar Bapak bilang kalu orang iko Bapak pe ajaran, tu orang nyanda mo mati for slama-lamanya. Abraham deng nabi-nabi so mati, kong apa Bapak lebe hebat dari dorang itu? Bapak ini sapa so?” Yesus manyao, “Kalu Kita cari puji deng hormat for Kita pe diri sandiri, itu pujian deng hormat yang Kita da dapa itu kasiang nyanda ada de pe arti. Mar tu Kita pe Bapa tu ngoni ja bilang ngoni pe Tuhan Allah lei, Dia itu yang suka supaya Kita dapa puji deng hormat. Mar sebenarnya ngoni nyanda kanal pa Dia. Kita ini yang kanal pa Dia. Kalu Kita bilang Kita nyanda kanal pa Dia, Kita ini pangbadusta sama deng ngoni. Mar yang sebenarnya Kita kanal pa Dia deng Kita ja beking tu Dia da bilang. Tu ngoni pe nene moyang Abraham, dia snang skali lantaran dia tau nanti dia mo lia Kita datang. Kong memang dia so lia pa Kita, so lantaran itu dia snang skali.” Kong tu pemimpin-pemimpin agama Yahudi itu babilang pa Dia, “Bapak pe umur jo blum lima pulu taong. Bagimana lei kong Bapak bilang kalu Bapak so lia pa Abraham?” Yesus bilang pa dorang, “Kita bilang pa ngoni, seblum lei tu Abraham lahir, Kita ini so ada.” Waktu orang-orang Yahudi dengar itu, dorang ambe batu for lempar pa Dia, mar Yesus basambunyi kong se tinggal tu Ruma Ibada Pusat. Waktu Yesus samantara bajalang, Dia lia satu orang buta yang so buta dari lahir. Tu Dia pe murit-murit batanya pa Yesus, “Guru, kiapa dang ni orang ini buta dari dia lahir? Apa dia bagitu lantaran dia pe dosa ato lantaran dia pe orang tua pe dosa?” Yesus manyao, “Dia lahir buta, itu bukang lantaran dia pe dosa deng bukang lei lantaran dia pe orang tua pe dosa, mar dia bagitu supaya orang-orang bole lia tu Tuhan Allah pe kuasa yang bakarja pa dia. Torang musti beking tu karja yang Tuhan Allah da kase. Dia itu yang da utus pa Kita. Torang musti beking tu karja yang Dia da kase itu slama torang masi di dunia ini. Itu bole mo se sama deng torang bakarja slama hari masi siang lantaran kalu so malam so nyanda ada lei tu bole mo bakarja. Slama Kita masi ada di dunia, Kita ini tu trang dunia yang kase trang pa samua orang pe hati.” Abis Yesus bilang itu, Dia baluda ka tana kong se campur tu luda deng tana sampe jadi pece. Abis itu, Dia se goso tu pece itu pa tu orang buta pe mata. Kong Yesus bilang pa tu orang buta itu, “Pigi jo, kong cuci ngana pe muka di kolam Siloam.” (Siloam itu de pe arti, ‘Tu dapa utus’.) Pe dengar itu, tu orang itu pi cuci de pe muka di situ. Kong waktu dia mo babale pa de pe ruma, dia so bole balia. Trus dia pe birman-birman deng tu orang-orang yang da lia dia dulu ja baminta-minta, dorang babilang, “Dia ini to yang dulu ja dudu-dudu kong baminta-minta?” Ada tu babilang, “Butul, dia no ini.” Kong ada lei yang babilang, “Bukang, mar dia ini sama deng tu orang itu.” Kong tu orang yang dulu buta itu babilang, “Butul, kita no itu.” Kong dorang tanya pa dia, “Bagimana kong skarang ngana pe mata so bole balia dang?” Dia manyao, “Tu Orang yang Dia pe nama Yesus, Dia yang da campur tu tana deng Dia pe luda sampe jadi pece, kong Dia se goso tu pece pa kita pe mata. Abis itu, Dia suru pa kita pigi ka kolam Siloam for cuci tu kita pe muka. Kong kita pigi, trus pe abis bacuci, kita so bole balia.” Kong dorang batanya pa dia, “Di mana dang Dia skarang?” Tu orang itu manyao, “Kita nintau lei.” Kong dorang bawa tu orang yang seblumnya da buta itu pa orang-orang dari golongan Farisi, tu golongan yang pegang kras tu atoran agama Yahudi. Waktu Yesus da campur tu luda deng tana sampe jadi pece kong se bae tu orang buta itu, itu pas hari Sabat, tu hari orang Yahudi nimbole bakarja. So itu, tu orang-orang dari golongan Farisi batanya ulang pa tu orang yang seblumnya da buta itu bagimana sampe dia pe mata bole balia. Trus dia manyao, “Ada tu Orang yang da goso pece pa kita pe mata. Abis itu, kita cuci tu kita pe muka, kong kita so bole balia.” Kong tu orang-orang dari golongan Farisi itu babilang, “Tu Orang yang da beking itu, Dia itu nyanda datang dari pa Tuhan Allah lantaran Dia nyanda iko tu atoran hari Sabat.” Mar tu orang-orang laeng babilang, “Kalu Dia orang berdosa, nyanda mungkin dia dapa beking tu mujisat rupa itu.” Kong dorang deng dorang mulai baku ambe. Kong tu orang-orang dari golongan Farisi itu batanya lei pa tu orang yang seblumnya da buta itu, “Kalu menurut ngana dang, sapa Dia itu? Soalnya Dia itu to so se bae ngana pe mata.” Dia manyao pa dorang, “Dia itu nabi, tu orang yang ja kase tau Tuhan Allah pe pesan pa orang-orang.” Mar tu pemimpin-pemimpin agama Yahudi itu nimau mo percaya kalu tu orang itu perna buta kong skarang so bole balia. So itu, dorang pangge dia pe orang tua. Kong dorang batanya pa de pe orang tua, “Dia ini ngoni pe anak to? Ngoni bilang kalu dia so buta dari lahir, no kiapa dang skarang dia so bole balia?” Kong dorang manyao, “Butul, Dia ini memang torang pe anak, kong dia so buta dari lei dia lahir. Mar tentang bagimana sampe dia skarang ini bole balia, torang nintau itu, deng sapa yang da beking sampe dia bole balia, itu lei torang nintau. Tanya jo sandiri pa dia, dia itu so dewasa, dia bole mo bajawab sandiri.” Dia pe orang tua babilang bagitu lantaran dorang tako pa tu pemimpin-pemimpin agama Yahudi. Soalnya tu pemimpin-pemimpin agama Yahudi itu so spakat kalu ada orang yang mangaku Yesus itu Mesias tu Raja yang mo se slamat pa manusia, tu orang itu mo dapa larang maso ka ruma ibada agama Yahudi. So itu, dia pe orang tua manyao, “Dia itu to so dewasa, tanya sandiri jo pa dia.” Pe dengar itu, dorang pangge for kadua kali tu orang yang seblumnya buta itu kong bilang pa dia, “Ngana musti basumpa demi Tuhan Allah kalu ngana mo bilang tu butul. Torang tau kalu tu Yesus itu Orang berdosa.” Tu orang yang seblumnya da buta itu manyao, “Tu Orang itu berdosa ato nyanda, kita nintau. Mar yang kita tau cuma satu, kalu yang lalu kita ini buta mar skarang kita so bole balia.” Dorang batanya pa dia, “Apa tu Dia da beking pa ngana sampe ngana pe mata so bole balia?” Tu orang yang seblumnya da buta itu manyao pa dorang, “Kita to so bilang dari tadi pa ngoni, mar ngoni nimau mo dengar. Kong kiapa ngoni mo dengar ulang itu dang? Ngoni stou suka mo jadi Dia pe murit lei kang?” Kong dorang hina pa dia bagini, “Ngana itu, tu Orang itu pe murit, mar torang ini nabi Musa pe murit-murit. Torang tau kalu Tuhan Allah so babicara pa nabi Musa, mar tentang Yesus itu torang nintau Dia itu da datang dari mana.” Tu orang itu manyao pa dorang, “Pe aneh lei kalu ngoni nintau dari mana Dia datang, padahal Dia so se bae tu kita pe mata sampe kita so bole balia. Torang tau kalu Tuhan Allah nyanda dengar tu orang-orang berdosa, mar Dia dengar sapa jo yang tako deng hormat pa Dia, deng lei yang hidop beking tu Dia pe mau. Dari pertama Tuhan Allah da ciptakan ni dunia sampe skarang, blum perna dapa dengar kalu ada orang yang se bae tu orang yang buta dari lahir sama deng kita ini. Kalu tu Orang yang se bae pa kita itu nyanda datang dari pa Tuhan Allah, Dia itu pasti nimbole beking apa-apa rupa tu Dia da beking pa kita.” Kong dorang manyao pa dia, “Ngana ini punung deng dosa dari lei ngana lahir. Masa komang ngana tu mo se ajar pa torang!” Kong dari waktu itu, dorang nyanda kase pa dia maso ka ruma ibada agama Yahudi. Yesus dapa dengar kalu tu orang yang seblumnya da buta itu so dapa larang maso ka ruma ibada agama Yahudi. Kong Yesus pi baku dapa deng tu orang itu trus babilang pa dia, “Ngana percaya pa Anak Manusia?” Dia bale batanya, “Bapak, sapa so Dia? Kase tau dang pa kita supaya kita bole percaya pa Dia.” Yesus bilang pa tu orang itu, “Ngana so lia pa Dia, Dia itu no tu Orang yang skarang ini da babicara pa ngana.” Tu orang itu bilang pa Yesus, “Tuhan, kita percaya.” Trus dia berlutut kong semba pa Yesus. Kong Yesus bilang, “Kita datang ka dunia for mo bahakimi, supaya sapa jo yang buta bole mo balia, kong supaya sapa jo yang anggap dia pe diri bole balia, dia itu mo jadi buta.” Di situ, ada bebrapa orang Yahudi dari golongan Farisi. Dorang da dengar tu Yesus pe kata-kata kong dorang babilang pa Dia, “Jadi menurut Bapak, torang ini lei buta dang?” Yesus manyao pa dorang, “Kalu ngoni buta, itu sama deng ngoni nintau apa itu dosa, jadi waktu ngoni beking dosa ngoni nyanda berdosa. Mar lantaran ngoni anggap ngoni pe diri bole balia, itu sama deng ngoni tau tu dosa mar tetap beking, jadi ngoni masi berdosa.” Yesus babicara pake prumpamaan, “Kita bilang pa ngoni: sapa jo yang maso ka kandang domba, kalu dia nyanda lewat pintu mar cuma da balumpa lewat pagar, tu orang itu papancuri deng prampok. Mar sapa jo yang maso lewat pintu, tu orang itu no tu domba-domba pe gembala. Kong kalu tu gembala mo maso kandang, tu orang yang jaga pintu buka akang tu pintu for tu gembala. Tu domba-domba kanal pa tu gembala pe suara, kong tu gembala pangge masing-masing tu dia pe domba-domba pe nama, trus bawa pa dorang kaluar. Kalu samua tu dia pe domba so kaluar, dia bajalang di muka tu domba-domba itu kong dorang iko pa dia lantaran dorang kanal tu de pe suara. Mar kalu orang laeng, pasti dorang nyanda mo iko pa dia, malatare dorang mo lari lantaran dorang nyanda kanal tu orang laeng itu pe suara.” Yesus da bilang tu prumpamaan ini pa tu orang-orang dari golongan Farisi itu, mar dorang nyanda mangarti apa tu Dia pe maksut da bilang itu pa dorang. So itu, Yesus babilang lei, “Kita bilang pa ngoni, Kita ini pintu for tu domba-domba. Samua orang yang datang seblum Kita kong mangaku gembala, dorang itu papancuri deng prampok, mar tu domba-domba itu nyanda badengar pa dorang. Kita ini pintu. Jadi sapa jo yang datang lewat Kita, dia itu mo slamat. Dia itu bole mo se sama deng domba yang maso kaluar pintu kandang for dapa makanan. Papancuri datang cuma for bapancuri, babunung deng se ancor orang pe hidop. Mar Kita datang supaya orang bole butul-butul hidop, kong tu hidop itu punung deng berkat. Kita ini gembala yang bae. Tu gembala yang bae kase tu dia pe nyawa supaya tu de pe domba-domba bole hidop. Mar tu orang yang bukang tu domba-domba pe tuang, tu cuma da dapa bayar for jaga tu domba-domba, tu orang itu mo lari kase tinggal tu domba-domba itu kalu dia lia srigala datang. Dia lari kase tinggal tu domba-domba itu sampe tu srigala bole srang kong beking tu domba-domba lari tafiaro. Tu orang itu lari lantaran dia karja cuma for dapa doi kong nimau mo tarukira tu domba-domba itu. Kita ini gembala yang bae. Kita kanal tu Kita pe domba-domba kong tu Kita pe domba-domba lei kanal pa Kita, itu sama deng Bapa kanal pa Kita deng Kita lei kanal pa Bapa, kong Kita kase Kita pe nyawa supaya tu Kita pe domba-domba bole hidop. Mar Kita lei ada domba-domba laeng tu bukang dari ni kandang, tu domba-domba itu musti Kita tuntun lei kong dorang mo dengar tu Kita pe suara. Dorang itu mo jadi satu klompo deng tu domba-domba yang ada di kandang ini, kong dorang samua itu cuma ada satu gembala. Bapa sayang pa Kita lantaran Kita kase tu Kita pe nyawa supaya Kita bole mo dapa ulang itu. Nyanda ada orang yang bole mo ambe tu Kita pe nyawa dari pa Kita, mar Kita mo kase itu iko Kita pe mau sandiri. Kita ada kuasa mo kase tu Kita pe nyawa, deng Kita lei ada kuasa for mo ambe ulang itu. Itu no tu prenta yang Kita da trima dari Kita pe Bapa.” Pe dengar Yesus bilang bagitu, tu orang-orang Yahudi baku ambe pendapat. Banya di antara pa dorang yang bilang, “Kiapa ngoni badengar pa Dia? Dia itu da kemasukan setang, so itu Dia jadi gila.” Mar tu laeng babilang, “Itu bukang kata-kata dari orang yang da kemasukan setang. Kalu orang da kemasukan setang, dia nimbole beking orang buta bole mo balia.” Waktu itu, so nyanda lama lei tu orang-orang Yahudi mo rayakan tu dorang pe hari raya for mo pringati waktu tu Ruma Ibada Pusat da resmikan di Yerusalem. Kong waktu itu, oras dingin. Yesus babajalang di kompleks Ruma Ibada Pusat, di place Salomo. Kong tu orang-orang Yahudi bakrumun pa Dia trus babilang, “Brapa lama lei Guru mo se biar torang jadi ragu-ragu bagini? Kalu Guru ini memang Mesias, tu Raja yang mo se slamat pa manusia, bilang jo dang trus trang pa torang.” Yesus manyao pa dorang, “Kita so bilang itu pa ngoni, mar ngoni nyanda percaya. Tu samua yang Kita da beking itu pake Tuhan Allah pe kuasa, itu no yang kase tunjung deng jelas tentang sapa Kita. Mar ngoni nyanda percaya lantaran ngoni bukang Kita pe orang-orang, itu sama deng domba-domba yang bukang tu gembala punya. Kita pe domba-domba kanal tu Kita pe suara, kong dorang iko pa Kita. Kita lei kanal pa dorang. Kong Kita kase hidop kekal pa dorang deng dorang pasti nyanda mo binasa, kong nyanda ada satu orang yang mo rampas dorang dari pa Kita. Kita pe Bapa yang da kase dorang pa Kita, Dia pe kuasa lebe basar dari samua. Nyanda ada satu orang yang bole mo rampas dorang dari pa Kita pe Bapa pe tangan. Kita deng Bapa itu satu.” Pe dengar tu Yesus da bilang, tu orang-orang Yahudi ambe batu for mo lempar pa Dia. Yesus bilang pa dorang, “Ngoni so banya lia tu Kita da beking yang pe bagus itu, itu samua Kita pe Bapa da suru pa Kita beking for ngoni lia. Kong dari samua tu Kita da beking itu, tu mana yang beking sampe ngoni mo lempar batu pa Kita?” Tu orang-orang Yahudi manyao, “Torang mo lempar batu pa Ngana bukang lantaran satu dari tu Ngana da beking yang pe bagus itu, mar lantaran Ngana da bahojat pa Tuhan Allah deng cara Ngana beking Ngana pe diri sama deng Tuhan Allah, padahal Ngana ini cuma manusia.” Yesus manyao pa dorang, “Di atoran-atoran di kitab Taurat, ada tulis tu Tuhan da bilang dulu, ‘Kita bilang, ngoni sama deng allah’. Torang tau kalu apa yang da tulis di atoran-atoran di kitab Taurat itu nimbole mo se batal, jadi kalu Tuhan Allah sandiri da bilang ‘allah’ pa tu orang-orang yang da trima tu Dia pe firman itu, no kiapa dang ngoni bilang Kita ini so bahojat pa Tuhan Allah waktu Kita bilang Kita ini Anak Allah? Padahal Tuhan Allah tu Bapa, Dia yang da pili deng yang da utus pa Kita datang ka dunia ini. Kalu Kita nyanda beking tu Kita pe Bapa da suru, ngoni jang percaya pa Kita. Mar Kita ini da beking tu Dia da suru itu, kong ngoni nimau percaya pa Kita. Cuma biar dang ngoni nyanda percaya pa Kita, mar ngoni musti percaya deng tu Kita da beking, itu supaya ngoni bole tau deng mangarti kalu Bapa satu deng Kita kong Kita satu deng Dia.” Abis itu, dorang coba tangka ulang pa Yesus mar Dia lolos dari pa dorang. Kong Yesus pigi lei ka sabla kuala Yordan, ka tampa tu dulu Yohanes ja babaptis akang orang, kong Dia tinggal di situ. Banya orang yang datang pa Yesus kong dorang baku bilang, “Yohanes memang nyanda perna beking mujisat biar lei cuma satu, mar samua yang dia da bilang tentang Yesus ini butul.” Kong banya orang di sana yang jadi percaya pa Yesus. Ada satu laki-laki yang da saki brat. Dia pe nama Lazarus, kong dia da tinggal di kampung Betania, satu kampung deng de pe dua sudara parampuang tu Maria deng Marta. Maria itu no tu parampuang yang mo se sirang minya wangi pa Yesus pe kaki deng seka pake dia pe rambu. Kong lantaran Lazarus da saki brat, tu de pe dua sudara parampuang itu suru orang pigi pa Yesus, trus kase tau pa Dia, “Tuhan, tu Tuhan pe tamang Lazarus yang Tuhan sayang da saki brat.” Waktu Yesus dengar tu brita itu, Dia bilang, “Tu Lazarus pe panyaki itu nyanda mo beking dia mati, mar mo se tunjung tu Tuhan Allah pe luar biasa. Deng lei lewat dia pe saki itu, orang-orang mo puji deng hormat pa Anak Allah.” Yesus memang sayang pa Maria, Marta deng Lazarus. Mar waktu Yesus dengar Lazarus da saki, Dia sengaja batinggal slama dua hari lei di tampa Dia da tinggal akang itu. Kong serta so lewat tu dua hari itu, Yesus bilang pa De pe murit-murit, “Mari jo torang pigi ulang ka daera Yudea.” Mar dorang bilang pa Dia, “Guru, baru-baru ini tu orang-orang Yahudi da coba lempar batu for bunung pa Guru. Kong kiapa dang skarang Guru masi suka mo ka sana?” Yesus manyao pa dorang pake prumpamaan, “Tu siang hari itu to ada dua blas jam. Jadi sapa jo yang bajalang di siang hari, dia pasti nyanda mo tasontong lantaran ada trang. Mar kalu orang bajalang malam hari, dia pe kaki mo tasontong lantaran nyanda ada trang.” Abis Yesus bilang bagitu, Dia bilang lei pa dorang, “Torang pe tamang Lazarus itu so tatidor, mar Kita mo pi ka sana for se bangong pa dia.” Kong Dia pe murit-murit bilang pa Dia, “Tuhan, kalu memang Lazarus da tidor, dia itu pasti mo bae kong bangong.” Padahal sebenarnya, waktu Yesus bilang Lazarus da tatidor itu, Yesus pe maksut Lazarus so mati. Mar tu murit-murit pikir kalu tu Lazarus cuma da tidor sama deng biasa. So itu, Yesus bilang pa dorang deng trus trang, “Sebenarnya Lazarus itu so mati. Mar Kita snang Kita nyanda ada di situ waktu dia mati, lantaran itu ada de pe untung for ngoni, itu mo beking ngoni lebe percaya pa Kita. Mari jo torang pigi pa Lazarus skarang.” Kong tu satu murit yang de pe nama Tomas tu ja pangge lei Kembar itu babilang pa tu murit-murit laeng, “Mari jo torang pigi ka sana, biar jo torang mati sama-sama deng Dia.” Waktu Yesus deng Dia pe murit-murit sampe di kampung Betania, ada orang yang se tau pa Yesus kalu Lazarus so mati kong so ampa hari da se kubur. Kampung Betania itu nyanda jao dari Yerusalem, de pe jarak kira-kira tiga kilometer. Jadi banya orang Yahudi dari Yerusalem yang datang for hibur pa Maria deng Marta lantaran Lazarus tu dorang dua pe sudara so mati. Kong waktu Marta dapa dengar kalu Yesus so datang, dia pi dola pa Yesus, mar tu Maria tetap tinggal di ruma. Pe baku dapa deng Yesus, Marta bilang pa Dia, “Tuhan, kalu kwa Tuhan ada di sini, pasti kita pe sudara Lazarus nyanda mati. Mar biar bagitu, skarang lei kita tetap tau kalu Tuhan Allah mo kase apa jo yang Tuhan minta dari pa Dia.” Yesus bilang pa Marta, “Ngana pe ade itu mo hidop ulang.” Kong Marta bilang pa Yesus, “Tuhan, kita tau no kalu dia nanti mo hidop ulang di hari kiamat, waktu samua orang yang mati mo hidop ulang.” Yesus bilang lei pa Marta, “Kita ini yang se hidop ulang tu orang yang so mati, deng Kita ini lei yang bole kase tu hidop kekal. Jadi, sapa jo yang percaya pa Kita, biar lei nanti dia so mati, dia mo hidop ulang. Kong tiap orang yang hidop deng percaya pa Kita, dia itu nyanda mo mati slama-lamanya.” Trus Yesus tanya pa Marta, “Apa ngana percaya deng tu Kita da bilang itu?” Marta manyao pa Yesus, “Iyo Tuhan, kita percaya kalu Tuhan itu Kristus tu Raja yang se slamat pa manusia. Tuhan tu Anak Allah yang Tuhan Allah da janji datang ka dunia ini.” Abis Marta bilang bagitu pa Yesus, dia babale pa de pe ruma kong pangge pa de pe sudara Maria trus babise pa dia, “Guru so mo datang, kong Dia da pangge pa ngana.” Pe dengar itu, Maria iko badiri kong pigi pa Yesus. Mar waktu itu, Yesus blum maso ka kampung, Dia masi ada di tampa Dia da baku dapa akang deng Marta. Kong di ruma, ada tu orang-orang Yahudi yang da sama-sama deng Maria for hibur pa dia. Waktu dorang lia Maria iko da badiri kong pigi kaluar, dorang iko pa dia lantaran dorang pikir kalu dia mo pigi ka kubur for manangis di situ. Pe sampe jo Maria di tampa Yesus ada, dia lia pa Yesus kong berlutut di muka kaki pa Yesus trus babilang, “Tuhan, kalu kwa Tuhan ada di sini, pasti kita pe sudara nyanda mati.” Waktu Yesus lia Maria da manangis, deng tu orang-orang Yahudi yang da sama-sama deng dia da manangis lei, Yesus pe hati jadi susa deng sedi skali. Kong Dia bilang, “Di mana dang ngoni da kubur akang pa Lazarus?” Dorang manyao pa Yesus, “Mari jo Tuhan, torang pi lia.” Kong Yesus manangis. Bebrapa orang Yahudi babilang, “Co lia, Dia sayang skali pa Lazarus.” Mar ada tu laeng babilang, “Dia tu da beking orang buta bole balia. Apa Dia nyanda mampu beking sesuatu supaya Lazarus nyanda mati?” Yesus pe hati jadi sedi skali lei, kong Dia pigi di goa, tu tampa da kubur akang pa Lazarus. Tu lobang maso ka goa da tutu akang deng batu basar. Kong Yesus bilang, “Se guling tu batu itu.” Mar Marta tu Lazarus pe sudara bilang, “Mar Tuhan, dia itu so ampa hari da mati, pasti dia so bobou.” Yesus bilang, “Kita so bilang pa ngana tadi to? Kalu ngana percaya pa Kita, ngana mo lia tu Tuhan Allah pe luar biasa.” Kong dorang se guling tu batu itu. Trus Yesus bahaga ka atas kong bilang, “Bapa, Kita bilang makase pa Bapa lantaran Bapa so dengar pa Kita. Kita tau kalu Bapa slalu dengar pa Kita, mar Kita bilang samua ini supaya orang banya yang ada di sini bole dengar kong dorang bole percaya kalu Bapa yang da utus pa Kita.” Abis Dia bilang bagitu, Dia babilang deng suara kuat, “Lazarus, kaluar jo!” Kong Lazarus yang so mati itu kaluar dari tu kubur. Tu dia pe tangan deng kaki masi da talingkar deng kaeng puti tu biasa ja pake for orang mati, kong de pe muka da tatutu deng kaeng lei. Trus Yesus bilang pa dorang, “Buka akang tu kaeng-kaeng itu supaya dia bole bebas bajalang.” Waktu tu orang-orang Yahudi yang da datang bahibur pa Maria lia tu Yesus da beking itu, banya dari pa dorang yang jadi percaya pa Yesus. Mar ada lei tu bebrapa orang dari pa dorang yang pigi pa tu orang-orang dari golongan Farisi trus balapor tentang apa tu Yesus so beking. So itu, tu orang-orang dari golongan Farisi deng tu imam-imam kapala pangge Mahkamah Agama for bakumpul, kong dorang bilang, “Apa tu torang musti mo beking pa Yesus? Soalnya Dia itu so beking banya mujisat. Kalu torang se biar pa Dia, samua orang mo jadi percaya pa Dia, kong pemerenta Romawi mo suru tu dong pe tentara-tentara datang kong se ancor tu torang pe Ruma Ibada Pusat deng lei tu torang pe bangsa.” Mar ada satu orang dari antara pa dorang, tu de pe nama Kayafas. Dia yang da jadi imam basar di taong itu. Tu Kayafas itu bilang pa dorang, “Ngoni ini nintau apa-apa. Ngoni nyanda mangarti apa yang bae for ngoni. Lebe bae cuma satu orang yang mati for samua orang, daripada tu orang-orang Romawi mo kase binasa samua torang pe bangsa Yahudi.” Kayafas itu yang da jadi imam basar di taong itu, kong dia da se tau kalu Yesus itu mo mati jadi korban for bangsa Yahudi. Waktu itu Kayafas da se tau tentang itu bukang dari dia pe pikiran sandiri, mar dia da kase tau tu pesan yang Tuhan Allah da bilang pa dia. Mar Yesus mati bukang cuma for torang pe bangsa Yahudi, Dia mati supaya lei Dia bole mo kumpul jadi satu tu orang-orang yang so jadi Tuhan Allah pe orang-orang yang so tafiaro kamana-mana. Mulai waktu itu, tu pemimpin-pemimpin agama Yahudi baku skongkol mo bunung pa Yesus. So itu Yesus so nyanda lei muncul di muka umum di antara orang-orang Yahudi di situ, mar Dia pigi ka satu kota tu de pe nama Efraim, tu kota yang ada di daera dekat padang gurun. Trus Dia tinggal di situ sama-sama deng Dia pe murit-murit. Waktu itu so dekat tu hari raya agama Yahudi tu prayaan Paskah, so itu banya orang Yahudi dari daera-daera laeng datang ka Yerusalem for iko dorang pe atoran agama beking bersi diri. Kong waktu dorang bakumpul di kompleks Ruma Ibada Pusat, dorang da cari-cari pa Yesus, kong dorang baku bilang, “Menurut ngoni, apa Yesus mo datang di hari raya ini?” Dorang baku bilang bagitu lantaran tu imam-imam kapala deng orang-orang Yahudi dari golongan Farisi so kase prenta supaya tiap orang yang tau kalu Yesus ada di mana, tu orang itu musti balapor supaya dorang bole mo tangka pa Yesus. Anam hari seblum hari raya agama Yahudi tu prayaan Paskah, Yesus datang ka kampung Betania tu Lazarus pe kampung. Tu Lazarus itu yang da mati kong Yesus da se hidop ulang. Kong di kampung itu, bebrapa orang beking acara makang-makang for Yesus. Kong Waktu itu, Marta da layani pa dorang, trus tu Lazarus da dudu makang sama-sama deng Yesus deng tu orang-orang yang datang ka situ. Waktu dorang samantara bamakang, Maria ambe stenga liter minya wangi asli tu de pe nama narwastu, tu minya yang de pe harga mahal skali. Kong dia se sirang tu minya wangi itu di kaki pa Yesus, trus dia seka Yesus pe kaki deng de pe rambu. Kong tu minya wangi itu pe bobou wangi dapa ciong di sluru ruma itu. Mar Yudas Iskariot tu satu dari Yesus pe murit-murit yang nanti mo bahianat pa Yesus babilang bagini, “Kiapa tare tu minya wangi itu nyanda jual jo? Kalu mo jual, de pe harga 300 doi perak, kong tu doi yang pe banya itu bole mo se berbage pa orang-orang miskin.” Sebenarnya Yudas da babicara bagitu bukang lantaran dia da tarukira tu orang-orang miskin, mar itu lantaran dia papancuri. Dia itu yang da se tanggong jawab ja pegang dorang samua pe doi, kong dia ja pancuri akang tu doi itu. Mar Yesus bilang, “Kase biar jo Maria beking itu pa Kita, lantaran deng dia beking itu, dia itu so kase siap pa Kita for mo kubur. Soalnya Kita so nyanda mo ada sama-sama deng ngoni lei, mar tu orang miskin slalu ada di sekitar pa ngoni kong kapan jo ngoni suka, ngoni bole bantu pa dorang.” Ada banya skali orang Yahudi da dengar kalu Yesus ada di kampung Betania, so itu dorang pigi ka sana. Mar dorang da ka sana bukang cuma mo lia pa Yesus, mar mo lia lei pa Lazarus tu orang yang Yesus da se hidop ulang. So itu imam-imam kapala baku skongkol for mo cari bunung lei pa Lazarus. Soalnya deng dia da hidop ulang, banya orang Yahudi yang so jadi percaya pa Yesus kong so nimau iko pa dorang. De pe eso, banya orang so datang ka Yerusalem for rayakan hari raya agama Yahudi tu prayaan Paskah. Dorang da dengar kalu Yesus samantara badatang lei ka Yerusalem. Tu orang banya itu ambe daong-daong palem, trus pi sambut pa Yesus kong babilang deng suara kuat, “Hosana! Puji jo pa Dia yang da datang dalam nama Tuhan. Dia itu bangsa Israel pe Raja!” Yesus dapa satu ekor keledai muda, kong Dia da nae tu keledai itu. Tu da jadi itu sama deng tu nabi da tulis di Kitab Suci bagini, “Hei orang-orang Yerusalem tu ja bilang lei orang-orang Sion, ngoni jang tako, lia jo tu ngoni pe Raja so badatang, Dia da dudu di atas satu keledai muda.” Waktu itu, Yesus pe murit-murit blum mangarti deng apa tu orang banya da beking for Yesus. Mar nanti waktu Yesus so mati kong hidop ulang, baru dorang mo mangarti samua yang orang da beking itu pa Yesus, itu samua sama deng tu da tulis di Kitab Suci. Tu orang-orang yang ada waktu Yesus da pangge pa Lazarus kaluar dari kubur kong se hidop ulang pa dia, dorang itu kase tau trus pa orang-orang laeng tentang tu Yesus da beking itu. So itu, banya orang pi sambut pa Yesus lantaran dorang so dengar kalu Dia so beking tu mujisat yang satu itu. Kong tu orang-orang dari golongan Farisi baku bilang, “Co ngoni lia sandiri itu, samua tu torang pe usaha for mo se brenti pa Dia nyanda ada de pe hasil. Samua orang di dunia datang iko pa Dia.” Waktu orang banya datang ka Yerusalem for baibada pa dorang pe hari raya itu, dari antara pa dorang, ada lei bebrapa orang Yunani. Tu bebrapa orang Yunani itu pigi pa Filipus. Tu Filipus itu, orang Betsaida di daera Galilea. Kong dorang bilang pa dia, “Bapak, torang suka mo baku dapa deng Yesus.” Filipus pi kase tau itu pa Andreas, trus dorang dua pi kase tau lei pa Yesus. Kong Yesus bilang pa dorang, “So sampe de pe waktu Tuhan Allah mo se tunjung tu Anak Manusia pe luar biasa. Kita bilang pa ngoni, kalu bibit gandum nyanda da se tanang di tana, tu bibit itu cuma satu kong bole mo bilang sama deng so mati. Mar kalu tu bibit itu da se tanang di tana, tu satu bibit itu bole mo batumbu kong babua banya. Bagitu lei deng ngoni, sapa tu hidop cuma for de pe diri sandiri, so dia yang nyanda mo dapa hidop kekal. Mar sapa yang kase tu dia pe hidop di dunia ini lantaran iko pa Kita, dia itu mo dapa hidop kekal. Sapa jo tu da jadi orang yang ja beking tu Kita da suru, dia itu musti iko pa Kita kong di mana jo Kita ada, di situ lei dia musti ada. Sapa jo yang ja beking tu Kita da suru, dia itu mo dapa hormat dari pa Bapa.” Yesus babicara lei, “Kita sedi skali. Kita nintau mo bilang apa. Apa Kita mo bilang, ‘Bapa, se lapas akang Kita dari tu Kita pe pendritaan ini?’ Tantu nyanda bagitu. Soalnya justru Kita da datang ka dunia ini for alami tu pendritaan.” Kong Yesus basombayang, “Bapa, se tunjung jo tu Bapa pe luar biasa.” Kong dapa dengar suara dari sorga, “Kita so se tunjung tu Kita pe luar biasa, kong Kita mo se tunjung ulang lei tu Kita pe luar biasa.” Tu orang banya yang da badiri di situ da dengar tu suara itu, kong dorang bilang kalu itu suara guntur. Ada lei yang bilang kalu itu malaekat pe suara yang da babicara deng Yesus. Kong Yesus bilang, “Tu suara yang ngoni da dengar itu da babicara bukang for Kita, mar for ngoni. Skarang ini so de pe waktu for Tuhan Allah mo adili orang-orang yang ada di dunia ini, deng lei so de pe waktu for tu setang pe bos yang ada kuasa di dunia ini mo dapa se kala. Kong Kita, kalu Kita dapa se angka tinggi di atas bumi, Kita mo tarek samua orang for iko pa Kita.” Yesus bilang bagitu supaya jelas kalu nanti Dia mo mati deng cara se salib. Kong tu orang banya itu babilang, “Torang so baca di atoran-atoran kitab Taurat kalu Kristus tu Raja yang mo se slamat pa manusia itu tetap mo hidop slama-lamanya. Jadi bagimana lei kong Bapak bilang kalu Anak Manusia mo dapa angka tinggi di atas bumi kong mo mati? Sapa dang tu Anak Manusia itu?” Kong Yesus bilang pa dorang, “So nyanda lama lei tu trang ada deng ngoni, so itu slama tu trang itu masi ada sama-sama deng ngoni, ngoni musti hidop trus di trang itu. Deng ngoni bagitu, tu glap nyanda mo kuasai pa ngoni. Sapa jo yang hidop di glap, dia itu nintau ka mana dia da pigi. Jadi waktu trang masi ada sama-sama deng ngoni, ngoni percaya jo pa tu trang itu supaya tu trang lei beking trang tu ngoni pe hati.” Abis Yesus bilang bagitu, Dia kaluar dari situ kong pigi ka tampa yang dorang nintau. Biar lei Yesus beking banya mujisat di muka pa dorang, mar dorang tetap nyanda percaya pa Dia. Deng dorang bagitu, so gnap apa tu nabi Yesaya da bilang dulu tu da tulis di Kitab Suci bagini, “Tuhan, nyanda ada orang yang percaya deng tu brita yang torang da kase tau. Biar lei Tuhan so kase tunjung tu Tuhan pe kuasa pa dorang, dorang tetap nyanda percaya.” Dorang nimbole mo percaya lantaran dulu lei nabi Yesaya so perna da tulis di Kitab Suci bagini, “Tuhan so beking dorang nimau mo lia tu butul, itu sama deng Dia so se buta tu dorang pe mata. Tuhan so beking dorang pe hati kras, dorang nyanda mo mangarti tu butul. Kong deng bagitu, dorang nyanda mo bertobat, supaya Tuhan nyanda mo se slamat lei pa dorang.” Nabi Yesaya da kase tau tu samua itu lantaran Tuhan Allah so kase penglihatan pa dia tentang Yesus yang luar biasa deng lei kase tau tentang Dia yang mo datang itu. Biar lei ada orang-orang yang nyanda percaya pa Yesus, mar ada banya jo yang jadi percaya pa Dia, malatare dari pa dorang yang percaya itu ada tu pemimpin-pemimpin agama Yahudi. Cuma dorang nimau mo se tunjung pa orang-orang kalu dorang so jadi percaya, lantaran dorang tako kalu tu orang-orang Yahudi dari golongan Farisi mo larang pa dorang maso ka ruma ibada. Soalnya tu pemimpin-pemimpin agama Yahudi lebe suka kalu dorang dapa puji deng hormat dari pa manusia daripada dorang dapa puji deng hormat dari pa Tuhan Allah. Kong Yesus babilang deng suara kuat, “Sapa jo yang percaya pa Kita, dia itu bukang cuma percaya pa Kita, mar dia lei percaya pa Tuhan Allah yang da utus pa Kita. Kong sapa jo yang so lia pa Kita, dia itu lei so lia pa Tuhan Allah yang da utus pa Kita. Kita ini datang ka dunia ini sbagai trang, supaya sapa jo yang percaya pa Kita, dia itu so nyanda lei mo hidop di dalam glap. Kalu orang dengar tu Kita pe ajaran mar dia nyanda beking itu, Kita nyanda mo hakimi pa dia. Soalnya Kita datang bukang for mo hakimi orang-orang yang ada di dunia, mar Kita datang for mo se slamat pa dorang. Sapa jo yang tolak pa Kita deng nimau mo trima tu Kita pe ajaran, so ada yang mo bahakimi pa dia, itu no tu Kita pe ajaran yang Kita da se tau. Nanti di hari kiamat, tu ajaran itu yang mo bahakimi pa dia. Soalnya tu Kita pe ajaran bukang dari Kita pe diri sandiri, mar itu dari Bapa yang da utus pa Kita. Dia itu yang da prenta pa Kita for bilang tu ajaran yang musti Kita bilang deng yang musti Kita se tau. Kong Kita tau kalu lewat Tuhan Allah pe prenta itu, ngoni bole dapa hidop kekal. Jadi apa tu Kita ja se ajar pa ngoni, itu samua sama deng Bapa da kase tau pa Kita.” So dekat tu hari raya agama Yahudi tu prayaan Paskah, kong Yesus tau kalu so sampe tu de pe waktu for Dia mo kase tinggal ni dunia for babale pa Dia pe Bapa. Dia sayang pa Dia pe orang-orang yang ada di dunia ini, kong Dia mo se tunjung kalu Dia slalu sayang pa dorang biar lei sampe pa Dia pe akhir hidop. Kong waktu Yesus deng Dia pe murit-murit da makang malam, setang pe bos so taru pikiran jaha di hati pa Yudas tu Simon Iskariot pe anak, supaya dia bahianat pa Yesus. Yesus tau kalu Dia pe Bapa so kase samua kuasa pa Dia. Dia lei tau kalu Dia itu datang dari Tuhan Allah kong Dia nanti mo babale ulang pa Tuhan Allah. Jadi waktu dorang da makang sama-sama itu, Yesus badiri trus buka tu Dia pe juba. Abis itu, Dia ambe handuk kong se ika pa Dia pe pinggang. Dia saleng aer di loyang, kong Dia mulai cuci tu Dia pe murit-murit pe kaki, trus Dia lap tu dorang pe kaki deng handuk yang Dia da se ika pa Dia pe pinggang. Kong waktu Dia sampe pa Simon Petrus for cuci tu Petrus pe kaki, Petrus bilang pa Dia, “Tuhan, masa komang Tuhan mo cuci tu kita pe kaki?” Yesus manyao pa Petrus, “Apa tu Kita da beking ini, ngana blum mo mangarti skarang, mar nanti komang ngana mo mangarti ini.” Petrus bilang lei, “Tuhan, kita sama skali nyanda perna mo kase Tuhan mo cuci tu kita pe kaki.” Mar Yesus bilang pa Petrus, “Kalu Kita nyanda cuci tu ngana pe kaki, ngana nyanda ada hubungan deng Kita.” Kong Simon Petrus bilang, “Tuhan, kalu bagitu dang, jang cuma kita pe kaki, mar kita pe tangan deng kapala lei.” Yesus bilang lei pa Petrus, “Sapa jo yang so mandi, dia pe badan itu so bersi samua, so itu dia cuma perlu se bersi ulang tu dia pe kaki. Bagitu lei ngoni, ngoni lei so bersi, mar memang nyanda samua dari pa ngoni yang so bersi.” Yesus bilang bagitu lantaran Dia tau sapa yang mo bahianat pa Dia, so itu Dia bilang kalu nyanda samua dari pa dorang yang so bersi. Serta Yesus so klar cuci tu dorang pe kaki, Dia pake ulang tu Dia pe juba trus babale ka tampa yang dia da dudu akang. Trus Dia batanya pa dorang, “Apa ngoni mangarti deng tu Kita da beking tadi? Ngoni pangge pa Kita ‘Guru’ deng ‘Tuhan’ kong memang itu butul. Kita ini ngoni pe Guru deng ngoni pe Tuhan tu ngoni ja iko akang. Jadi kalu Kita tu ngoni pe Guru deng Tuhan da cuci tu ngoni pe kaki sama deng budak ja beking, ngoni deng ngoni lei musti cuci ngoni pe kaki satu deng laeng. Kita so kase conto pa ngoni beking bagitu, jadi ngoni lei musti beking pa orang laeng sama deng tu Kita da beking pa ngoni. Kita bilang pa ngoni, tu budak nyanda lebe penting dari de pe tuang, tu orang yang dapa utus lei nyanda lebe penting dari tu orang yang da bautus. Kalu ngoni mangarti tu Kita da se ajar pa ngoni skarang ini, ngoni lei musti beking itu supaya ngoni snang. Mar bukang for ngoni samua tu Kita da bilang itu. Soalnya Kita tau sapa yang Kita so pili. Mar apa tu da tulis di Kitab Suci musti mo jadi, bagini tu da tatulis, ‘Sapa yang da makang roti sama-sama deng Kita, dia itu nanti yang mo bahianat pa Kita.’ Kita se tau itu skarang pa ngoni seblum itu jadi, supaya kalu itu so jadi, ngoni bole percaya kalu ‘Kita ini’ Dia yang Kita so perna bilang pa ngoni. Kita bilang pa ngoni, sapa jo yang trima orang-orang yang Kita da utus, dia itu lei so trima pa Kita. Kong sapa jo yang trima pa Kita, dia lei trima pa Bapa yang da utus pa Kita.” Abis Yesus bilang bagitu, Dia jadi sedi kong babilang lei, “Kita bilang pa ngoni, ada satu dari pa ngoni yang mo bahianat pa Kita.” Kong Dia pe murit-murit baku haga, dorang jadi bingo tentang sapa tu Yesus pe maksut itu. Waktu itu ada satu dari Yesus pe murit, tu murit yang Dia paling sayang, dia da dudu dekat skali deng Yesus. Simon Petrus basein pa tu murit itu kong babilang pa dia, “Tanya akang dang, sapa tu Guru pe maksut itu!” Trus tu murit yang da dudu di dekat skali deng Yesus itu batanya pa Dia, “Tuhan, sapa dang dia itu?” Yesus manyao, “Dia itu yang nanti Kita mo kase akang roti abis Kita se colo tu roti di baskom.” Abis bilang bagitu, Yesus ambe roti spanggal trus se colo, kong Dia kase pa Yudas, tu Simon Iskariot pe anak. Abis Yudas trima tu roti itu, setang pe bos iko kuasai pa dia. Kong Yesus bilang pa dia, “Apa tu ngana mo beking, iko beking jo itu.” Mar nyanda ada satu dari pa dorang tu dudu makang yang mangarti apa tu Yesus pe maksut bilang bagitu pa Yudas. Kong lantaran Yudas yang ja pegang doi, ada yang pikir kalu Yesus da suru pa Yudas for pi babli apa-apa yang dorang perlu for tu prayaan itu ato for kase akang sesuatu pa orang miskin. Waktu Yudas so trima tu roti dari pa Yesus, dia iko pigi. Kong waktu itu so malam. Serta Yudas so pigi, Yesus bilang, “Skarang so de pe waktu for Anak Manusia dapa puji deng hormat, deng lei Tuhan Allah dapa puji deng hormat lewat apa yang Anak Manusia mo beking. Kong kalu Tuhan Allah dapa puji deng hormat lewat apa tu Anak Manusia da beking, Tuhan Allah lei mo beking tu Anak Manusia dapa puji deng hormat, kong samua itu so nyanda lama lei mo jadi. Kita pe anak-anak, so nyanda lama lei Kita so nyanda mo ada sama-sama deng ngoni. Ngoni ini mo cari pa Kita, mar sama deng yang Kita so bilang tu hari pa pemimpin-pemimpin Yahudi, Kita mo bilang itu lei pa ngoni, ‘Di tampa tu Kita mo pigi akang, ngoni nimbole mo pigi ka situ.’ Skarang, Kita mo kase prenta baru pa ngoni bagini: Ngoni musti baku sayang. Ngoni musti baku sayang sama deng Kita so sayang pa ngoni. Deng ngoni baku sayang, samua orang bole tau kalu ngoni itu orang-orang yang iko tu Kita pe ajaran.” Simon Petrus bilang pa Yesus, “Tuhan, Tuhan mo pigi ka mana dang?” Yesus manyao pa dia, “Tu tampa yang Kita mo pigi akang skarang, itu blum bole ngana mo pigi akang. Mar nanti ngana mo menyusul pa Kita ka sana.” Petrus bilang pa Yesus, “Tuhan, kiapa dang skarang kita blum bole mo iko pa Tuhan? Kita siap mo mati for Tuhan.” Yesus bilang, “Ngana bilang, ngana siap mati for Kita? Kita bilang pa ngana, seblum ayam bakuku, ngana so tiga kali manyangkal kalu ngana kanal pa Kita.” Yesus babicara pa Dia pe murit-murit, “Ngoni nyanda usa sedi. Percaya jo pa Tuhan Allah deng percaya lei pa Kita. Pa Kita pe Bapa pe ruma ada banya tampa, kong Kita pigi ka sana for se siap tu tampa itu for ngoni. Kita kase tau itu pa ngoni lantaran itu memang butul-butul ada di sana. Kong kalu Kita so kase siap tu tampa-tampa itu, Kita mo bale ulang kamari kong bawa pa ngoni for pigi ka sana. Deng bagitu, di mana Kita ada, di situ lei ngoni bole mo ada. Kong ngoni lei so tau tu jalang ka tampa Kita mo pigi akang.” Tomas bilang pa Yesus, “Tuhan, torang nintau Tuhan mo pigi ka mana. Jadi bagimana torang bole mo tau tu jalang mo ka sana dang?” Kong Yesus bilang, “Kita ini tu jalang mo pigi pa Tuhan Allah, Kita ini yang kase tau tu butul tentang Tuhan Allah, deng Kita ini lei yang kase tu hidop. Jadi cuma lewat Kita, orang bole pigi pa Bapa. Kalu ngoni so kanal pa Kita, pasti ngoni kanal lei pa Kita pe Bapa. Jadi mulai skarang ini, ngoni so kanal lei pa Dia deng ngoni so lia pa Dia.” Filipus bilang pa Dia, “Tuhan, se tunjung akang tu Tuhan pe Bapa itu pa torang, biar torang pe hati rasa puas.” Yesus bilang pa Filipus, “Filipus, so lama Kita da sama-sama deng ngoni, masa komang ngana nyanda kanal pa Kita? Sapa jo yang so lia pa Kita, dia itu so lia pa Bapa. Jadi, kiapa lei ngana minta Kita se tunjung akang tu Bapa pa ngoni? Ngana nyanda percaya dang kalu Kita deng Bapa satu, kong Bapa deng Kita satu? Jadi, apa yang Kita bilang pa ngoni itu bukang dari Kita sandiri mar dari Bapa yang satu deng Kita. Kong apa jo yang Kita beking, itu Bapa yang da beking lewat Kita. Percaya jo pa Kita, kalu Kita deng Bapa satu kong Bapa deng Kita satu. Kalu ngoni susa mo percaya tu Kita da bilang ini, percaya jo pa Kita lantaran tu mujisat-mujisat yang Kita da beking. Kita bilang pa ngoni, sapa jo yang percaya pa Kita, tu orang itu mo beking tu mujisat-mujisat sama deng yang Kita so beking, malatare dia bole mo beking mujisat-mujisat yang lebe basar dari yang Kita so beking. Soalnya Kita pigi pa Bapa, kong apa jo yang ngoni minta pake Kita pe nama, Kita mo beking itu for ngoni, supaya lewat apa yang Kita da beking itu, orang-orang bole puji deng hormat pa Bapa. Kalu ngoni minta sesuatu pa Kita pake Kita pe nama, Kita mo kase itu pa ngoni.” Yesus bilang lei, “Kalu ngoni sayang pa Kita, ngoni mo beking tu Kita pe prenta-prenta. Kong Kita mo minta pa Bapa, trus Dia mo kase tu Roh yang mo batolong pa ngoni. Tu Roh itu mo ada sama-sama deng ngoni for slama-lamanya. Tu Roh yang mo batolong pa ngoni itu Tuhan Allah pe Roh. Tuhan Allah pe Roh itu mo se ajar pa ngoni apa yang butul tentang Tuhan Allah. Orang-orang yang nyanda percaya pa Tuhan Allah, dorang nyanda trima tu Tuhan Allah pe Roh, lantaran dorang nyanda dapa lia pa Dia deng nyanda kanal pa Dia. Mar ngoni ini kanal pa Dia lantaran Dia ada sama-sama deng ngoni kong mo jadi satu deng ngoni. Waktu Kita se tinggal pa ngoni nanti, ngoni ini nyanda sandiri sama deng yatim piatu. Kita mo bale ulang pa ngoni. So nyanda lama lei, tu orang-orang yang nyanda percaya nyanda mo lia pa Kita lei. Mar ngoni mo lia ulang pa Kita lantaran Kita mo hidop ulang, kong ngoni mo dapa hidop kekal. Kong waktu Kita hidop ulang, ngoni mo tau kalu Kita ini satu deng Kita pe Bapa, kong ngoni ini satu deng Kita kong Kita satu deng ngoni. Sapa jo yang trima Kita pe prenta kong beking itu, dia itu yang sayang pa Kita. Kong sapa jo yang sayang pa Kita, Kita pe Bapa lei mo sayang pa dia, kong Kita lei mo sayang pa dia deng Kita mo datang se tunjung pa dia sapa Kita sebenarnya.” Kong Yudas yang bukang Yudas Iskariot bilang pa Yesus, “Tuhan, kiapa dang cuma pa torang Tuhan mo se tunjung sapa Tuhan sebenarnya, kong pa orang-orang laeng yang ada di dunia ini nyanda?” Yesus manyao pa dia, “Kalu orang sayang pa Kita, dia mo beking tu Kita pe ajaran, kong Kita pe Bapa mo sayang pa dia, trus Kita deng Kita pe Bapa mo datang pa dia kong mo tinggal sama-sama deng dia. Mar sapa jo yang nyanda sayang pa Kita, dia itu nyanda beking tu Kita pe ajaran. Tu Kita pe ajaran itu bukang dari Kita pe diri, mar dari pa Bapa yang da utus pa Kita. Samua yang Kita da bilang ini, Kita da bilang waktu Kita masi sama-sama deng ngoni. Mar Bapa mo kirim tu Roh Kudus yang mo batolong pa ngoni. Tu Roh Kudus itu mo datang kalu Kita so pigi for ganti pa Kita, Dia mo se ajar pa ngoni samua yang ngoni musti tau kong mo se inga pa ngoni samua yang Kita so bilang pa ngoni. Kita so mo pigi, mar Kita mo kase pa ngoni tu hidop deng hati tenang. Tu hidop deng hati tenang itu, cuma Kita yang bole mo kase, samua di dunia ini nyanda ada tu bole mo kase itu pa ngoni. Ngoni pe hati nyanda usa kuatir deng tako. Ngoni so dengar kalu Kita da bilang bagini pa ngoni: Kita so mo pigi, mar Kita mo datang ulang pa ngoni. Jadi kalu ngoni sayang pa Kita, pasti ngoni pe hati snang lantaran Kita pigi pa Kita pe Bapa. Soalnya Bapa lebe berkuasa dari Kita. Kita so kase tau itu pa ngoni seblum samua itu jadi, supaya kalu nanti samua itu jadi, ngoni bole percaya. Kita so nyanda mo bicara banya lei deng ngoni, lantaran tu setang pe bos yang da kuasai ni dunia mo datang, cuma dia nyanda ada kuasa mo ator pa Kita. Mar Kita mo beking tu Bapa da prenta pa Kita supaya samua orang di dunia ini bole tau kalu Kita ini sayang pa Bapa. Skarang badiri jo kong torang pigi dari sini.” Yesus bilang satu prumpamaan bagini, “Kita ini sama deng tanaman anggor yang butul, kong Kita pe Bapa sama deng orang yang punya kobong anggor. Kita pe orang-orang sama deng cabang-cabang, kong tu cabang-cabang yang babua, Dia potong sadiki for beking bersi supaya tamba babua, kong tu cabang-cabang yang nyanda babua, Dia potong kong buang. Ngoni yang percaya memang so bersi lantaran ngoni so percaya tu firman yang Kita so kase tau pa ngoni. Ngoni badekat jo pa Kita, deng Kita lei badekat pa ngoni. Soalnya, ngoni nyanda dapa beking tu bae kalu ngoni jao dari pa Kita, itu sama deng tu cabang yang nyanda mo babua kalu dia tapisa dari tu tanaman anggor. Kita ini sama deng tu tanaman anggor kong ngoni ini sama deng tu Kita pe cabang-cabang. Sapa jo yang badekat pa Kita kong Kita badekat pa dia, dia itu bole mo beking tu bae. Soalnya dia nyanda mampu beking tu bae kalu dia bajao dari pa Kita. Sapa jo yang jao dari pa Kita, Tuhan Allah mo beking pa dia sama deng cabang yang nyanda babua, tu orang yang punya kobong potong tu cabang trus kalu so kring dia lego ka api. Kalu ngoni badekat pa Kita deng tu Kita pe firman ada pa ngoni pe hati, ngoni minta jo pa Tuhan Allah apa yang ngoni suka kong Dia mo kase itu pa ngoni. Kalu ngoni ja beking tu bae sama deng tu cabang yang babua banya, itu kase tunjung kalu ngoni ini Kita pe murit-murit, trus deng orang-orang lia ngoni ja beking tu bae, dorang mo puji deng hormat tu Kita pe Bapa.” Yesus bilang lei, “Kita sayang pa ngoni, sama deng Bapa sayang pa Kita. So itu, badekat trus jo pa Kita supaya ngoni bole rasa tu Kita pe sayang itu. Kalu ngoni beking tu Kita pe prenta-prenta, ngoni mo rasa trus tu Kita pe sayang, sama deng Kita beking tu Kita pe Bapa pe prenta-prenta kong Kita bole rasa trus tu Dia pe sayang. Kita bilang samua itu pa ngoni, supaya tu rasa snang yang ada pa Kita bole ada pa ngoni pe hati, sampe ngoni bole rasa snang luar biasa. Ini tu Kita pe prenta: ngoni musti baku sayang sama deng Kita so sayang pa ngoni. Tu sayang yang paling basar itu, kalu orang siap mati supaya de pe tamang-tamang bole hidop. Kalu ngoni ja beking tu Kita pe prenta, ngoni itu memang Kita pe tamang. Kita nyanda bilang kalu ngoni ini budak, lantaran kalu budak nintau apa tu de pe tuang ja beking. Mar Kita bilang kalu ngoni ini Kita pe tamang, lantaran Kita so kase tau pa ngoni samua yang Kita so dengar dari pa Kita pe Bapa. Bukang ngoni yang da pili pa Kita, mar Kita yang da pili pa ngoni. Kita da suru pa ngoni supaya pigi for beking tu hal bae yang mo ada trus, sama deng cabang yang babua trus. Deng bagitu, apa yang ngoni minta pa Bapa pake Kita pe nama, Dia mo kase itu pa ngoni. Jadi yang Kita prenta pa ngoni bagini: Ngoni ini musti baku-baku sayang.” Yesus bilang lei, “Kalu orang-orang dunia yang nyanda percaya pa Kita binci pa ngoni, ngoni musti inga kalu dorang so lebe dulu binci pa Kita. Kalu misalnya ngoni ini sama deng dorang yang nyanda percaya pa Kita, pasti dorang sayang pa ngoni. Mar ngoni ini beda deng dorang. Kita da pili pa ngoni supaya ngoni beda deng dorang, so itu dorang binci pa ngoni. Ngoni musti inga apa tu Kita so bilang pa ngoni: satu budak nyanda lebe penting dari de pe tuang. Jadi, kalu orang-orang so siksa pa Kita di dunia ini, dorang lei mo siksa pa ngoni. Kalu orang-orang beking tu Kita pe ajaran, dorang lei mo beking tu ajaran yang ngoni da se ajar. Dorang mo siksa pa ngoni lantaran ngoni da iko pa Kita. Dorang beking bagitu lantaran dorang nyanda kanal pa Tuhan Allah yang da utus pa Kita. Kalu Kita nyanda datang ka dunia ini for kase tau tu Tuhan Allah pe ajaran pa dorang, tantu Tuhan Allah nyanda bilang dorang itu berdosa kalu nyanda beking tu ajaran lantaran dorang nintau. Mar skarang Kita so datang ka dunia ini kong so kase tau tu ajaran itu pa dorang, jadi dorang so nyanda ada alasan mo bilang kalu dorang itu nyanda berdosa. Sapa jo yang binci pa Kita, dia binci lei tu Kita pe Bapa. Kalu misalnya Kita nyanda beking mujisat-mujisat yang orang laeng blum perna beking di muka pa dorang, tantu katu dorang itu nyanda berdosa kalu binci pa Kita. Mar skarang ini komang, dorang so lia tu mujisat-mujisat yang Kita da beking, kong dorang tetap binci pa Kita deng Kita pe Bapa lei. Mar biar jo dorang binci pa Kita, lantaran memang musti jadi tu da tulis di atoran-atoran yang ada di kitab Taurat. Bagini tu da tulis, ‘Dorang binci pa Kita mar nyanda ada de pe alasan.’ Nanti Kita mo utus tu Roh yang mo batolong pa ngoni, tu Roh itu dari Tuhan Allah. Tu Roh itu ja kase tau tu butul tentang Tuhan Allah, kong Dia memang dari Tuhan Allah. Tu Roh itu no yang mo kase tau pa orang-orang tentang Kita. Kong ngoni ini lei musti kase tau tentang Kita pa orang-orang lantaran ngoni dari pertama da sama-sama deng Kita.” Yesus bilang, “Kita da bilang samua itu pa ngoni, supaya ngoni nyanda brenti percaya pa Kita. Soalnya nanti mo ada de pe waktu, ngoni mo dapa user dari ruma-ruma ibada agama Yahudi, malatare ada orang-orang yang mo bunung pa ngoni, kong dorang pikir tu dong da beking itu Tuhan Allah pe mau. Dorang mo beking bagitu pa ngoni, lantaran dorang nyanda kanal tu Bapa deng lei nyanda kanal pa Kita. Kita kase tau samua itu pa ngoni, supaya kalu sampe de pe waktu dorang siksa pa ngoni, ngoni mo inga kalu Kita so perna kase tau itu pa ngoni. Kita nyanda bilang itu dari pertama waktu ngoni jadi Kita pe murit, lantaran Kita masi ada sama-sama deng ngoni. Skarang, Kita mo pigi pa Bapa yang da utus pa Kita. Kong kiapa dang nyanda ada dari pa ngoni yang batanya kalu Kita mo pigi ka mana? Mar ngoni pe hati sedi skali skarang lantaran Kita so bilang kalu Kita so mo pigi. Mar butul, lebe bae memang Kita pigi dari pa ngoni, itu for ngoni pe bae. Soalnya kalu Kita nyanda pigi, tu Roh yang mo batolong pa ngoni itu nyanda mo datang pa ngoni. Mar kalu Kita pigi, Kita mo utus tu Roh itu pa ngoni. Kong kalu tu Roh itu so ada di dunia ini, Dia mo se sadar pa orang-orang di dunia ini tentang dosa, tentang apa tu butul, deng tentang tu Tuhan Allah pe hukuman. Tentang tu dosa: tu Roh itu mo se sadar pa orang-orang di dunia kalu dorang itu so beking dosa lantaran dorang nyanda percaya pa Kita. Tentang tu butul: tu Roh mo se sadar pa orang-orang kalu Kita tu butul lantaran Kita pigi pa Bapa. Kong waktu itu ngoni so nyanda dapa lia pa Kita lei. Tentang tu Tuhan Allah pe hukuman: tu Roh mo se sadar lei pa orang-orang kalu Tuhan Allah mo hukum pa dorang, lantaran tu setang pe bos yang berkuasa di dunia ini so dapa hukuman. Masi banya lei yang Kita mo bilang pa ngoni, mar skarang ngoni blum mampu mo mangarti. Mar nanti kalu tu Roh yang mo batolong itu so datang, Dia mo se ajar pa ngoni sampe ngoni bole mangarti samua tu butul. Soalnya tu Roh itu nyanda babicara iko apa yang ada pa De pe pikiran sandiri, mar Dia babicara iko apa yang Dia da dengar dari pa Tuhan Allah. Dia lei yang mo kase tau pa ngoni apa tu mo jadi nanti. Tu Roh itu mo hormat pa Kita deng cara se tau pa ngoni yang Dia so lebe dulu dengar dari pa Kita. Samua yang Bapa punya, itu Kita punya. So itu Kita bilang pa ngoni, tu Roh mo kase tau pa ngoni samua yang Dia da trima dari pa Kita.” Yesus bilang lei, “So nyanda lama, ngoni so nyanda mo lia pa Kita. Kong so nyanda lama lei, ngoni mo lia ulang pa Kita.” Pe dengar itu, bebrapa orang dari De pe murit baku-baku tanya, “Apa de pe maksut Dia bilang so nyanda lama torang so nyanda mo lia pa Dia, kong so nyanda lama lei, torang mo lia ulang pa Dia? Kong kiapa lei Dia bilang kalu Dia mo pigi pa Bapa?” Yesus pe murit-murit baku-baku tanya trus, “Apa Dia pe maksut da bilang so nyanda lama lei? Torang nyanda mangarti tu Dia pe maksut itu.” Yesus tau kalu dorang mo batanya pa Dia. So itu, Dia bilang pa dorang, “Ngoni ini da baku-baku tanya tentang tu Kita da bilang tadi kang? Tu Kita da bilang, ‘So nyanda lama, ngoni so nyanda mo lia pa Kita. Kong so nyanda lama lei, ngoni mo lia ulang pa Kita.’ Kita bilang pa ngoni, waktu ngoni so nyanda lia pa Kita, ngoni mo manangis deng bataria, mar tu orang-orang yang nyanda percaya pa Kita mo snang. Ngoni mo sedi, mar ngoni pe sedi itu mo bruba jadi snang. Itu sama deng parampuang yang da mendrita waktu mo melahirkan, mar abis dia se lahir de pe anak, dia so nyanda inga lei tu de pe pendritaan. Soalnya dia so jadi snang skali lantaran tu de pe anak so lahir. Bagitu lei deng ngoni, skarang ini ngoni pe hati sedi, mar nanti ngoni pe hati mo jadi snang waktu torang baku dapa ulang lei, kong nyanda ada yang bole kase brenti tu ngoni pe snang itu. Waktu torang baku dapa ulang, ngoni so nyanda mo tanya apa-apa lei pa Kita. Kita bilang pa ngoni, waktu itu lei samua yang ngoni minta pa Bapa pake Kita pe nama, Dia mo kase itu pa ngoni. Dari dulu sampe skarang ngoni blum baminta pake Kita pe nama. Baminta jo kong ngoni mo dapa itu supaya ngoni mo jadi snang skali. Samua ini Kita bilang pa ngoni pake prumpamaan. Mar mo ada de pe waktu Kita mo babicara pa ngoni so nyanda mo pake prumpamaan lei, mar deng trus trang Kita mo bilang tentang Bapa. Waktu itu, ngoni mo baminta langsung pa Bapa pake tu kuasa yang dari pa Kita. Kita nyanda bilang kalu Kita mo minta akang pa Bapa for ngoni, lantaran Bapa sandiri sayang pa ngoni. Bapa sayang pa ngoni, lantaran ngoni so sayang pa Kita deng percaya kalu Kita ini datang dari pa Dia. Kita datang dari pa Bapa, kong Kita datang ka dunia ini. Mar skarang, Kita mo se tinggal ni dunia kong babale pa Bapa.” Yesus pe murit-murit bilang pa Dia, “Guru, skarang Guru so babicara deng trus trang, so nyanda pake prumpamaan lei. Skarang torang tau kalu Guru tau samua hal, kong so nyanda perlu ada orang mo batanya-tanya lei pa Guru. So lantaran itu torang percaya kalu Guru dari Tuhan Allah.” Yesus bilang pa dorang, “Apa ngoni so percaya skarang? Inga, mo ada de pe waktu, malatare so de pe waktu kalu ngoni mo se tinggal pa Kita sandiri, kong ngoni mo tafiaro pa ngoni pe kampung masing-masing. Mar Kita nyanda sandiri lantaran Bapa da sama-sama deng Kita. Kita bilang samua itu pa ngoni, supaya ngoni pe hati bole tenang lantaran ngoni percaya pa Kita. Di dunia ini ngoni mo mendrita lantaran dapa siksa, mar ngoni pe hati musti tetap kuat, lantaran Kita so se kala samua kuasa di dunia ini.” Abis Yesus bilang bagitu, Dia bahaga ka langit kong basombayang, “Bapa, so de pe waktu Bapa mo se tunjung tu Bapa pe Anak pe luar biasa, supaya Bapa pe Anak bole mo beking Bapa dapa puji deng hormat. Bapa so kase kuasa pa Kita tu Bapa pe Anak for ator pa samua manusia, supaya Kita bole kase hidop kekal pa samua orang yang Bapa so kase pa Kita. Kong tu hidop kekal itu bagini: dorang itu kanal pa Bapa tu satu-satunya Tuhan Allah yang butul, deng dorang kanal pa Kita tu Yesus Kristus tu Bapa da utus. Bapa, Kita so kase klar samua yang Bapa da suru Kita beking di dunia ini, kong lewat samua tu Kita da beking itu Bapa bole dapa puji deng hormat. Bapa, skarang kase tunjung jo tu Kita pe luar biasa di muka pa Bapa, sama deng tu luar biasa yang ada pa Kita deng Bapa seblum ni dunia ada.” Yesus masi trus basombayang lei, Dia bilang, “Bapa, Kita so kase tunjung sapa Bapa sebenarnya pa orang-orang yang Bapa so kase pa Kita di dunia ini. Dorang itu Bapa punya, Bapa so kase dorang pa Kita, kong dorang so beking tu Bapa pe firman. Skarang dorang so tau kalu samua tu Kita so bilang deng Kita so beking, itu datang dari pa Bapa. Soalnya Kita so kase tau pa dorang, samua tu Bapa pe firman yang Bapa so kase tau pa Kita, kong dorang percaya itu. Dorang butul-butul tau kalu Kita ini datang dari Bapa, kong dorang percaya kalu Bapa yang da utus pa Kita. Bapa, skarang Kita basombayang for dorang itu, bukang for orang-orang dunia yang nyanda percaya pa Kita. Kita basombayang for dorang yang Bapa so kase pa Kita, lantaran dorang itu Bapa punya. Samua tu Bapa punya, dorang itu lei Kita punya. Samua Kita punya, dorang itu lei Bapa punya. Kong lewat dorang itu Kita dapa puji deng hormat. So nyanda lama lei Kita ada di dunia ini lantaran Kita mo pigi pa Bapa. Mar dorang mo tetap ada di dunia ini. Ya Bapa yang kudus, jaga akang pa dorang itu pake tu Bapa pe kuasa yang Bapa so kase pa Kita. Deng bagitu dorang bole jadi satu, sama deng Kita deng Bapa lei satu. Slama Kita ada deng dorang, Kita da jaga pa dorang pake tu kuasa yang Bapa da kase pa Kita. Kita da jaga pa dorang kong nyanda ada biar cuma satu dari pa dorang tu mo binasa, kacuali tu satu yang memang mo binasa supaya tu da bilang di Kitab Suci mo jadi. Bapa, skarang Kita pigi pa Bapa, kong samantara Kita masi di dunia ini Kita da basombayang bagitu, supaya dorang yang Bapa kase pa Kita bole lei rasa snang yang luar biasa sama deng tu snang yang Kita da rasa. Kita so kase tau pa dorang tu Bapa pe firman kong orang-orang yang nyanda percaya pa Bapa binci pa dorang, lantaran dorang nyanda sama deng tu orang-orang yang nyanda percaya pa Bapa. Itu sama deng Kita lei nyanda sama deng tu orang-orang dunia yang nyanda percaya pa Bapa. Bapa, Kita nyanda minta pa Bapa supaya Bapa kase jao dorang dari pa tu orang-orang duniawi, nyanda mar Kita minta supaya Bapa jaga akang jo pa dorang dari tu setang pe bos. Dorang itu nyanda sama deng tu orang-orang duniawi, sama deng Kita lei nyanda sama deng tu orang-orang duniawi itu. Bapa, tu Bapa pe firman itu butul. Pake jo tu Bapa pe firman yang butul itu for beking dorang pe hati bersi di muka pa Bapa. Bapa so utus pa Kita datang pa orang-orang di dunia ini, bagitu lei Kita so utus pa dorang pigi pa orang-orang yang ada di dunia ini. Bapa, Kita srahkan Kita pe hidop pa Bapa. Kita beking bagitu for dorang pe bae, dorang yang Bapa da kase pa Kita, supaya dorang lei mo srahkan dorang pe hidop pa Bapa iko tu ajaran yang butul itu.” Yesus masi trus basombayang, Dia bilang, “Bapa, Kita basombayang bukang cuma for Kita pe murit-murit, mar Kita basombayang lei for dorang yang mo jadi percaya pa Kita lantaran da dengar tu ajaran tentang Kita, yang Kita pe murit-murit da se ajar. Bapa, Kita minta supaya dorang itu jadi satu hati, sama deng Kita lei jadi satu hati deng Bapa kong Bapa jadi satu hati deng Kita. Kita minta bagitu pa Bapa supaya dorang lei jadi satu hati deng Torang, deng bagitu orang-orang di dunia ini bole jadi percaya kalu Bapa tu da utus pa Kita. Kita so beking dorang itu supaya dapa puji deng hormat sama deng Bapa yang so beking bagitu pa Kita, deng bagitu dorang bole jadi satu hati sama deng Torang dua lei jadi satu hati. Dorang jadi satu hati deng Kita kong Bapa jadi satu hati deng Kita, supaya dorang itu butul-butul jadi satu hati. Deng bagitu, tu orang-orang di dunia yang nyanda percaya pa Bapa bole tau kalu Bapa yang da utus pa Kita, kong kalu Bapa itu sayang pa dorang sama deng Bapa sayang pa Kita. Bapa, Kita suka tu Kita pe murit-murit yang Bapa so kase pa Kita mo ada sama-sama deng Kita pa Kita pe tampa tinggal, supaya dorang bole lia tu Kita pe luar biasa yang Bapa so kase pa Kita waktu dunia blum ada. Bapa pe luar biasa itu Bapa da kase pa Kita lantaran Bapa sayang pa Kita. Ya Bapa yang adil, tu orang-orang yang ada di dunia ini nyanda kanal pa Bapa, mar Kita kanal pa Bapa. Deng Kita pe murit-murit tau kalu Bapa yang da utus pa Kita. Kita so kase tau pa Kita pe murit-murit sapa Bapa sebenarnya, kong Kita mo kase tau trus itu pa dorang, supaya dorang baku sayang sama deng Bapa sayang pa Kita, kong Kita mo jadi satu deng dorang.” Serta Yesus so klar basombayang, Dia deng Dia pe murit-murit pigi ka sabla kuala Kidron. Di situ ada satu kobong kong Dia deng Dia pe murit-murit maso ka kobong itu. Yudas tu da bahianat pa Yesus tau lei tu tampa itu lantaran Yesus deng Dia pe murit-murit biasa ja bakumpul di situ. Trus Yudas datang ka tampa itu. Dia da bawa tentara-tentara Romawi deng bebrapa orang yang ja bajaga tu Ruma Ibada Pusat. Tu bebrapa orang yang bajaga tu Ruma Ibada Pusat itu da datang lantaran tu imam-imam kapala deng orang-orang dari golongan Farisi da suru. Dorang datang da bawa senjata, obor deng pelita. Yesus so tau samua tu mo jadi pa Dia, so itu Dia maju ka muka kong babilang pa dorang, “Sapa yang ngoni da cari?” Kong dorang manyao pa Dia, “Torang da cari pa Yesus tu orang Nazaret.” Kong Dia babilang lei pa dorang, “Kita ini no Dia.” Di situ lei ada Yudas yang da bahianat pa Yesus, dia da badiri sama-sama deng dorang tu da datang itu. Kong waktu Yesus babilang pa dorang, “Kita ini no Dia,” dorang mundur ka blakang kong jatung ka tana. Dia batanya ulang lei pa dorang, “Sapa yang ngoni da cari?” Kong dorang babilang, “Yesus tu orang Nazaret.” Trus Yesus babilang lei pa dorang, “Kita so bilang pa ngoni, Kita ini no tu Dia itu. Jadi kalu ngoni da cari pa Kita, kase biar jo tu Kita pe murit-murit ini pigi dari sini.” Dia bilang bagitu, supaya apa yang Dia perna bilang bole jadi. Bagini tu Dia perna bilang, “Samua orang yang Bapa so kase pa Kita, nyanda ada yang mo binasa biar cuma satu.” Kong tu Simon Petrus yang da bawa peda, dia cabu tu dia pe peda dari tu peda pe sarong trus potong tu Malkus pe talinga kanan sampe putus. Malkus ini imam basar pe anak bua. Trus Yesus bilang pa Petrus, “Kase maso ulang jo tu ngana pe peda pa de pe sarong. Bapa so kase tau kalu Kita memang musti mendrita, itu sama deng Kita musti minum dari tu cawan yang Bapa da kase for Kita mo minum.” Abis itu kapala perwira Romawi, de pe tentara-tentara, deng tu orang-orang yang ja bajaga di Ruma Ibada Pusat yang pemimpin-pemimpin agama Yahudi da suru, dorang samua itu tangka pa Yesus kong ika pa Dia. Dorang bawa Yesus lebe dulu pa Hanas, lantaran tu Hanas itu Kayafas pe papa mantu. Kayafas itu yang da jadi imam basar waktu itu. Kong Kayafas ini yang so perna da se nasehat pa tu pemimpin-pemimpin agama Yahudi bagini, “Lebe bae cuma satu orang yang mati for samua orang.” Tu Simon Petrus da iko pa Yesus dari blakang sama-sama deng tu satu murit laeng lei. Tu satu murit itu baku kanal deng tu imam basar, jadi dia bole maso sama-sama deng Yesus ka imam basar itu pe kintal ruma. Mar Petrus cuma da batunggu di luar di dekat pintu pagar. Kong tu satu murit yang baku kanal deng imam basar, dia kaluar ulang trus bacirita deng tu satu pembantu parampuang yang da bajaga tu pintu maso supaya tu murit itu bole bawa pa Petrus maso ka kintal ruma, trus Petrus maso ka dalam sama-sama deng dia. Tu pembantu parampuang yang bajaga tu pintu pagar itu babilang pa Petrus, “Hei, bapak ini to tu satu dari tu Orang itu pe murit?” Kong Petrus manyao, “Bukang kita.” Waktu itu pe dingin skali, so itu tu pembantu-pembantu deng tu orang-orang yang bajaga tu Ruma Ibada Pusat, dorang beking api dari arang supaya bole mo badiri dekat api kong barao di situ. Kong Petrus pi badiri di situ sama-sama deng dorang for barao lei. Waktu itu, tu Hanas mulai batanya pa Yesus tentang Dia pe murit-murit deng lei tentang Dia pe ajaran. Trus Yesus manyao pa dia, “Kita slalu bicara trang-trangan di muka banya orang. Kita ja se ajar pa orang-orang di ruma-ruma ibada agama Yahudi deng di Ruma Ibada Pusat, tu tampa-tampa orang-orang Yahudi ja bakumpul akang. Kita se ajar pa orang-orang di tampa-tampa umum, bukang di tampa yang tasambunyi. Jadi kiapa dang skarang bapak tanya-tanya pa Kita? Tanya jo kwa pa tu orang-orang yang so dengar tu Kita pe ajaran, dorang tau kwa apa tu Kita ja se ajar itu.” Waktu Yesus bilang bagitu, ada satu orang tu ja bajaga Ruma Ibada Pusat da badiri di situ kong dia tampeleng pa Yesus, trus dia babilang, “Pe brani skali Bapak manyao rupa itu pa tu imam basar!” Kong Yesus manyao pa dia, “Kalu tu Kita da bilang itu sala, co bilang dang yang mana tu sala, mar kalu tu Kita da bilang itu butul, kiapa dang kong bapak tampeleng pa Kita?” Abis itu, Hanas suru bawa Yesus pa Kayafas tu imam basar itu, kong waktu itu Yesus pe tangan dorang da ika. Waktu itu, Simon Petrus masi da badiri di sei api for barao. Kong tu orang-orang di situ babilang pa dia, “Ngana lei to tu satu dari Yesus pe murit-murit?” Petrus manyangkal, dia bilang, “Bukang kita.” Di situ ada lei tu satu pembantu dari tu imam basar, dia itu basudara deng tu orang yang de pe talinga Petrus da potong. Dia babilang, “Bapak to yang kita da lia tadi di kobong da sama-sama deng Yesus?” Mar Petrus manyangkal ulang kalu dia kanal pa Yesus. Kong pas waktu itu tu ayam bakuku. Waktu masi pagi-pagi skali, dorang bawa pa Yesus dari tu imam basar Kayafas pe kintal ruma ka gubernur Romawi pe istana. Mar tu orang-orang Yahudi sandiri nyanda maso ka situ lantaran tu gubernur itu bukang orang Yahudi. Soalnya kalu iko tu orang Yahudi pe adat, dorang mo jadi najis kalu ada sama-sama deng orang yang bukang Yahudi, kong orang Yahudi yang jadi najis so nimbole mo makang pa dong pe hari raya Paskah. So itu, tu gubernur Pilatus kaluar dari pa de pe istana supaya bole baku dapa deng dorang, kong batanya, “Apa so tu sala yang ngoni da tudu pa tu Orang ini?” Kong dorang babilang pa dia, “Kalu tu Orang ini nyanda beking tu jaha, torang nyanda mo bawa Dia pa bapak.” Trus tu gubernur Pilatus babilang pa dorang, “Ngoni bawa kong urus jo pa Dia iko tu ngoni pe atoran agama sandiri.” Mar tu orang-orang Yahudi itu babilang pa Pilatus, “Torang orang Yahudi nyanda ada hak mo kase hukuman mati.” Dorang bilang bagitu supaya apa tu Yesus so perna bilang tentang tu cara Dia nanti mo mati itu bole mo jadi. Abis itu, tu gubernur Pilatus maso ulang ka istana kong pangge pa Yesus trus batanya pa Dia, “Apa butul Bapak orang Yahudi pe raja?” Kong Yesus manyao, “Tu bapak da tanya itu apa dari bapak sandiri, ato orang laeng yang da bilang tentang Kita pa bapak?” Tu gubernur Pilatus manyao pa Dia, “Kita orang Yahudi so? Bapak pe orang-orang satu bangsa sandiri deng tu imam-imam kapala da datang for srahkan Bapak pa kita. No apa dang tu Bapak da beking?” Kong Yesus manyao pa dia, “Tu Kita pe krajaan bukang dari dunia ini. Kalu tu Kita pe krajaan dari dunia ini, pasti tu orang-orang yang ja beking tu Kita da suru so datang baprang mo bela pa Kita, supaya Kita nyanda dapa srahkan pa tu orang-orang Yahudi. Mar Kita pe krajaan memang bukang dari ni dunia.” Trus gubernur Pilatus batanya lei pa Yesus, “Jadi Bapak ini Raja dang?” Yesus manyao pa dia, “Bapak yang da bilang kalu Kita ini Raja. Itu no tu tujuan Kita da lahir, deng itu no tu tujuan Kita datang ka dunia ini supaya Kita bole kase tau tu butul. Kong sapa jo yang suka tu butul, dia pasti ja badengar pa Kita.” Kong tu gubernur Pilatus itu batanya lei pa Yesus, “Bagimana torang bole tau tu butul itu?” Abis tu gubernur Pilatus bilang bagitu, dia kaluar ulang dari pa de pe istana kong babilang pa tu orang-orang Yahudi di situ, “Kita so priksa tu Orang itu, mar kita nyanda dapa sala apa-apa pa Dia biar lei cuma satu. Mar kalu iko tu ngoni pe biasa, tiap kali ngoni pe hari raya Paskah, kita ja se bebas satu orang dari bui for ngoni. No skarang, apa ngoni suka kalu kita mo kase bebas tu ngoni orang Yahudi pe Raja ini?” Kong dorang samua bataria, “Jang Dia tu mo se bebas, mar se bebas jo pa Barabas!” Tu Barabas itu orang yang da malawang pa pemerenta Romawi. Abis itu, Pilatus suru dia pe tentara-tentara ambe pa Yesus kong cambok pa Dia. Kong tu tentara-tentara lei beking satu mahkota dari cabang-cabang kacili yang baduri kong se pake pa Yesus pe kapala. Trus dorang se pake pa Dia juba warna pars. Abis itu, dorang badekat pa Dia kong pura-pura hormat pa Dia, dorang bilang, “Hidop orang Yahudi pe raja!” Kong dorang lei tampeleng Dia pe muka. Abis itu, Pilatus kaluar ulang kong bilang pa orang banya itu, “Co lia, kita bawa pa ngoni tu Yesus, supaya ngoni tau kalu kita so priksa pa Dia kong kita nyanda dapa sala apa-apa pa Dia.” Waktu Yesus kaluar, Dia so pake mahkota tu dong da beking dari cabang-cabang kacili yang baduri deng so pake juba warna pars. Trus Pilatus bilang pa dorang, “Co lia ni Orang ini.” Waktu tu imam-imam kapala deng tu orang-orang yang ja bajaga Ruma Ibada Pusat lia pa Yesus, dorang bataria, “Se salib jo pa Dia, se salib jo pa Dia!” Pilatus bilang pa dorang, “Kalu ngoni mo se salib pa Dia, napa Dia ambe jo kong ngoni se salib jo pa Dia. Soalnya kita so priksa pa Dia, kong kita nyanda dapa Dia pe sala.” Tu pemimpin-pemimpin agama Yahudi bilang pa dia, “Torang ada atoran agama. Kong kalu mo iko torang pe atoran agama, Dia itu musti mati lantaran Dia bilang kalu Dia itu Anak Allah.” Waktu Pilatus dengar tu dorang da bilang itu, dia jadi lebe tako. Kong dia bawa Yesus maso ulang ka dalam istana, trus bilang pa Yesus, “Ngana ini dari mana so?” Mar Yesus nyanda manyao pa dia. So itu Pilatus batanya lei pa Dia, “Ngana nimau mo bicara deng kita so? Ngana nintau so kalu kita ini ada kuasa for se bebas pa Ngana, deng kita lei ada kuasa for se salib pa Ngana?” Kong Yesus manyao pa dia, “Kalu bapak ada kuasa pa Kita, itu cuma lantaran Tuhan Allah da kase tu kuasa itu pa bapak. Jadi, tu orang-orang yang da srahkan Kita pa bapak, dorang itu pe dosa lebe basar dari bapak pe dosa.” Waktu Pilatus dengar tu Yesus da bilang itu, dia brusaha cari-cari jalang for se lapas pa Yesus. Mar tu orang-orang Yahudi bataria, dorang bilang, “Kalu bapak se lapas pa ni Orang ini, bapak bukang tamang dari tu raja yang paling tinggi di krajaan Romawi. Soalnya tiap orang yang mangaku kalu dia itu raja sama deng tu Yesus da mangaku, dia itu so malawang pa tu raja yang paling tinggi itu.” Waktu Pilatus da dengar tu kata-kata itu, dia suru bawa Yesus kaluar dari de pe istana. Kong Pilatus dudu di kursi yang biasa dia dudu akang kalu mo baadili, tu tampa itu orang ja bilang Lante Batu. Tu de pe bahasa Ibrani, dorang ja bilang Gabata. Tu hari itu, dorang da basadia for hari raya agama Yahudi tu prayaan Paskah, kong kira-kira jam dua blas tenga hari, Pilatus babilang pa tu pemimpin-pemimpin agama Yahudi, “Co lia, ini ngoni pe raja!” Mar deng bataria dorang bilang, “Bunung jo pa Dia! Bunung jo pa Dia! Se salib jo pa Dia!” Pilatus bilang lei pa dorang, “Dia ini ngoni pe raja. Ngoni suka kita kase prenta for se salib pa Dia?” Tu imam-imam kapala manyao, “Torang nyanda ada raja laeng, torang pe raja cuma tu raja yang paling tinggi di krajaan Romawi.” De pe laste, Pilatus srahkan Yesus pa dia pe tentara-tentara for se salib. Dorang bawa pa Yesus for se salib. Waktu itu, Yesus pikul Dia pe salib kong kaluar dari kota trus pigi ka satu tampa tu dalam bahasa Ibrani ja bilang Golgota, tu de pe arti Tampa Tengkorak. Di tampa itu dorang se salib pa Yesus. Di sabla kiri deng kanan pa Yesus dorang da se salib lei dua orang laeng, kong Yesus ada di tenga-tenga pa dorang. Pilatus da suru pasang akang papang pa Yesus pe salib bagian atas, tu da tulis akang bagini, ‘Ini Yesus orang Nazaret, tu orang Yahudi pe Raja.’ Banya orang Yahudi da baca tu tulisan itu lantaran tu tampa Yesus da se salib itu dekat kota, kong tu kata-kata itu da tulis pake bahasa Ibrani, bahasa Latin deng bahasa Yunani. So itu, tu imam-imam kapala bilang pa Pilatus, “Bapak, jang tulis, ‘Tu orang Yahudi pe Raja’, mar tulis jo, ‘Orang ini da bilang kalu Dia itu orang Yahudi pe Raja.’ ” Pilatus bilang pa dorang, “Apa yang kita so tulis, itu yang kita so tulis.” Abis tu tentara-tentara se salib pa Yesus, dorang ambe De pe baju kong dorang berbage ampa supaya dorang dapa satu-satu bagean. Kong De pe juba lei dorang ambe. Mar tu juba itu pe model enteru dari atas sampe bawa, nyanda da manjae akang. So itu dorang baku bilang, “Tu juba ini nyanda usa torang se rabe for kase berbage, mar torang cabu lot jo for tentukan sapa tu bole mo dapa ni juba.” Itu baju deng juba dorang beking bagitu, supaya apa tu da tulis dulu di Kitab Suci mo jadi. Bagini tu da tulis, “Dorang da se berbage Kita pe baju di antara pa dorang, kong dorang cabu lot for dapa tu Kita pe juba.” Jadi apa tu tentara-tentara da beking itu, sama skali deng tu da tulis dari dulu. Di dekat Yesus pe salib, da badiri tu Yesus pe mama, Yesus pe mama pe sudara parampuang, Maria tu Klopas pe bini deng lei ada Maria orang Magdala. Waktu Yesus lia Dia pe mama deng De pe murit yang Dia sayang da badiri di sabla pa Dia pe mama, Yesus bilang pa De pe mama, “Mama, Kita pe murit itu, mama anggap jo mama pe anak skarang.” Kong Yesus bilang pa tu murit itu, “Tu Kita pe mama itu, anggap jo dia itu ngana pe mama!” Mulai tu waktu itu, tu Yesus pe murit bawa pa Yesus pe mama itu pa de pe ruma. Abis itu, Yesus tau kalu samua tu Tuhan Allah da suru pa Dia, Dia so beking. Kong for se gnap apa tu da tulis di Kitab Suci, Yesus babilang, “Kita aus.” Di situ ada satu sal punung deng anggor yang asang, kong dorang ambe spons trus se colo di anggor asang itu. Abis itu dorang se cucu tu spons di cabang kayu tu ja bilang hisop, kong dong angka se dekat pa Yesus pe mulu. Yesus isap tu anggor asang itu, kong abis itu Dia bilang, “So klar samua yang Kita musti beking.” Kong Yesus batundu trus Dia srahkan De pe nyawa pa Tuhan Allah. Tu hari waktu dorang da se salib pa Yesus, itu hari basadia for hari Sabat. Tu hari Sabat itu lei pas deng tu dorang pe hari Paskah tu hari for pringati waktu Tuhan Allah da se bebas dorang pe nene moyang dari Mesir. Jadi, tu orang-orang Yahudi datang pa Pilatus kong dorang minta supaya dia suru de pe tentara se pata tu Yesus deng tu dua orang pe kaki supaya dorang capat mati, kong dorang bole lebe capat se turung tu mayat-mayat dari kayu salib. Soalnya dorang nimau kalu ada mayat-mayat yang tagantong trus di kayu salib pas tu hari Sabat. Pilatus iyo akang pa dorang, kong de pe tentara-tentara se pata tu kaki dari tu dua orang yang dapa salib sama-sama deng Yesus. Mar waktu dorang sampe pa Yesus kong dorang lia Yesus so mati, dorang nyanda se pata tu De pe kaki. Mar satu dari tentara-tentara di situ cucu tu Yesus pe lambung deng tombak, kong iko kaluar tu dara yang da tacampur deng aer. Tu orang yang da lia itu deng de pe mata kapala sandiri, dia da kase tau samua itu kong dia tau kalu samua itu butul. Dia kase tau yang butul itu supaya ngoni bole jadi percaya. Itu jadi bagitu, supaya apa tu da tulis di Kitab Suci itu jadi. Bagini tu da tulis, “Nyanda ada Dia pe tulang yang da se pata.” Kong di Kitab suci lei da bilang bagini, “Dorang mo lia pa Dia yang dorang so cucu.” Ada satu orang de pe nama Yusuf, dia itu orang Arimatea. Dia lei orang yang ja iko pa Yesus, mar dia ja babasambunyi lantaran tako tu pemimpin-pemimpin agama Yahudi mo dapa tau. Yusuf ini datang pa Pilatus for minta isin mo ambe tu Yesus pe mayat for se kubur. Kong Pilatus se isin pa Yusuf pi ambe tu Yesus pe mayat. Jadi Yusuf pi kase turung tu Yesus pe mayat for se kubur. Nikodemus lei datang ka situ. Dia itu yang perna datang pa Yesus waktu malam-malam. Nikodemus da bawa minya wangi dari campuran minya mur deng gaharu for goso pa Yesus pe mayat. Tu minya-minya itu de pe brat kira-kira tiga pulu kilo. Dorang da ambe Yesus pe mayat kong se lingkar akang deng kaeng puti, samantara itu dorang goso deng tu macam-macam minya wangi iko tu orang Yahudi biasa beking for mayat tu mo kubur. Di dekat tampa Yesus da se salib ada satu kobong. Kong di kobong itu, ada satu kubur yang baru kong blum perna da kubur akang orang. Waktu itu so mo lewat tu hari basadia for hari Sabat, so itu Yusuf deng Nikodemus pi taru tu Yesus pe mayat di dalam kubur goa itu lantaran tu kubur itu nyanda jao dari tu tampa dorang da se salib pa Yesus. Serta hari minggu pagi-pagi skali, Maria orang Magdala pigi pa Yesus pe kubur. Pe sampe di kubur, dia lia tu batu yang da se tutu di kubur so taguling dari pa de pe tampa. So itu, Maria lari pigi pa Simon Petrus deng pa tu murit yang Yesus paling sayang. Pe sampe pa dorang, Maria bilang pa dorang, “Hei! Orang-orang so ambe tu Tuhan pe mayat dari kubur, kong torang nintau dorang da taru di mana pa Dia.” Jadi Petrus deng tu satu murit laeng itu pigi ka kubur. Dorang dua balari, mar tu murit yang laeng itu balari lebe capat dari Petrus kong sampe lebe dulu di kubur. Tu murit yang laeng itu nyanda maso ka dalam mar cuma maruku sadiki for bahoba ka dalam, kong dia lia tu kaeng puti yang da se lingkar tu Yesus pe mayat ada di lante. Simon Petrus lei baku iko deng dia, kong Petrus maso ka dalam kubur itu. Dia da lia lei tu kaeng puti yang ada di lante. Kong tu kaeng spanggal yang da se lingkar pa Yesus pe kapala nyanda ada di dekat tu kaeng yang da se lingkar pa Yesus pe badan, mar ada di tampa laeng kong da talipa. Trus tu murit laeng yang lebe dulu sampe di kubur itu lei maso, kong dia lia samua itu kong dia percaya kalu Yesus so hidop ulang. Soalnya, dulu dorang blum mangarti tu Kitab Suci da bilang, kalu Yesus itu mo mati kong hidop ulang. Kong abis itu, tu dua murit itu pulang ka ruma. Mar Maria orang Magdala da badiri di muka pintu kubur deng mamanangis. Samantara dia mamanangis, dia maruku sadiki bahoba di dalam kubur. Kong dia lia ada dua malaekat da pake baju puti. Dorang dua itu da dudu di tampa orang-orang da taru akang Yesus pe mayat. Tu satu da dudu di tampa dorang da taru akang Yesus pe kapala, kong tu satu da dudu di tampa dorang da taru akang Yesus pe kaki. Tu dua malaekat itu batanya pa dia, “Ibu, kiapa ibu manangis dang?” Maria manyao pa dorang, “Kita da manangis lantaran dorang so ambe kita pe Tuhan kong kita nintau dorang da taru di mana pa Dia.” Abis Maria bilang bagitu, dia baputar ka blakang kong dia lia ada orang da badiri di blakang pa dia, mar dia nintau kalu itu Yesus. Kong Yesus batanya pa dia, “Ibu, kiapa ibu manangis dang? Sapa so yang ibu da cari?” Maria pikir kalu Yesus itu orang yang ja bajaga tu kobong, kong dia bilang, “Bapak, kalu bapak yang da ambe tu kita pe Tuhan pe mayat, bilang kwa pa kita da taru di mana, supaya kita bole mo pi ambe.” Abis itu, Yesus pangge pa Maria, “Maria!” Maria bahaga pa Yesus trus bilang deng bahasa Ibrani, “Rabuni” tu de pe arti ‘guru’. Yesus bilang pa Maria, “Jang pegang pa Kita, lantaran Kita blum nae pigi pa Bapa. Mar ngana pigi jo pa Kita pe sudara-sudara yang ja iko pa Kita kong bilang pa dorang kalu skarang Kita mo nae pigi pa Kita pe Bapa deng tu ngoni pe Bapa lei. Dia itu lei tu Kita pe Tuhan Allah deng tu ngoni pe Tuhan Allah lei.” Trus Maria orang Magdala pigi pa tu murit-murit kong bilang pa dorang, “Kita so lia pa Tuhan!” Kong Maria bilang tu Yesus pe pesan pa dorang. Waktu so malam di hari minggu itu, Yesus pe murit-murit da bakumpul di satu ruma. Tu pintu-pintu ruma samua dorang da kunci lantaran dorang tako pa tu pemimpin-pemimpin agama Yahudi. Waktu itu, Yesus datang pa dorang kong badiri di tenga-tenga pa dorang, Dia bilang, “Kita minta Tuhan Allah beking ngoni hidop deng hati tenang!” Kong abis Dia bilang bagitu, Dia se lia pa dorang De pe dua tangan deng lambung. Tu murit-murit itu snang skali waktu dorang da lia pa Tuhan. Kong Yesus bilang ulang pa dorang, “Kita minta Tuhan Allah beking ngoni hidop deng hati tenang! Bapa so utus pa Kita, bagitu lei Kita utus pa ngoni.” Abis Yesus bilang bagitu, Dia tiop pa dorang deng Dia pe nafas kong bilang, “Trima jo ni Roh Kudus. Kalu ngoni kase ampung orang pe dosa, de pe dosa mo dapa ampung, kong kalu ngoni nyanda kase ampung orang pe dosa, de pe dosa lei nyanda mo dapa ampung.” Tomas tu satu dari Yesus pe dua blas murit, yang orang ja pangge lei Kembar, dia itu nyanda ada sama-sama deng tu murit-murit laeng waktu Yesus batunjung tu Dia pe diri pa dorang. Jadi Yesus pe murit-murit laeng bilang pa Tomas, “Tomas, torang so lia pa Tuhan!” Mar Tomas bilang pa dorang, “Kalu kita blum lia tu bekas paku pa Dia pe tangan, deng kalu kita blum cucu kita pe jare di situ, deng lei kalu kita blum se maso kita pe tangan pa Dia pe lambung, kita nyanda mo percaya.” Serta so lewat satu minggu, Yesus pe murit-murit bakumpul ulang di ruma yang dorang da bakumpul akang tu hari. Kong ini kali, Tomas lei ada di situ sama-sama deng dorang. Samua tu pintu-pintu lei da takunci. Biar bagitu, Yesus datang trus badiri di tenga-tenga pa dorang, kong Dia bilang, “Kita minta Tuhan Allah beking ngoni hidop deng hati tenang.” Kong Dia bilang pa Tomas, “Tomas, lia Kita pe tangan kong ngana se cucu jo tu ngana pe jare pa Kita pe tangan, trus se maso jo tu ngana pe tangan pa Kita pe lambung. Kong, jang bilang ngana nyanda percaya lei kalu Kita so hidop ulang, mar percaya jo.” Tomas bilang pa Yesus, “Ini memang kita pe Tuhan deng Tuhan Allah yang kita ja semba.” Yesus bilang pa dia, “Apa ngana jadi percaya pa Kita lantaran ngana so lia pa Kita? Pe snang skali tu orang yang nyanda lia pa Kita mar dia jadi percaya pa Kita.” Yesus da beking banya lei mujisat di muka pa Dia pe murit-murit, cuma samua itu nyanda tulis di kitab ini. Mar samua yang so tulis di kitab ini, itu da tulis supaya ngoni percaya kalu Yesus itu Kristus tu Raja yang se slamat pa manusia deng Dia itu Anak Allah. Kalu ngoni so percaya pa Dia, ngoni mo hidop deng Dia yang ngoni so percaya itu for slama-lamanya. Abis itu, Yesus batunjung Dia pe diri lei pa Dia pe murit-murit di pinggir danau Tiberias. Bagini tu cirita Dia da batunjung Dia pe diri: Satu kali, da bakumpul tu Simon Petrus, Tomas tu ja pangge lei Kembar, Natanael dari Kana tu ada di daera Galilea, Zebedeus pe anak dua, deng lei Yesus pe dua murit laeng. Kong Simon Petrus bilang pa dorang, “Kita mo pi bacari ikang.” Kong dorang bilang pa dia, “Torang lei mo iko deng ngana.” Trus dorang pigi ka pinggir danau kong nae prao for pi bacari ikang. So satu malam dorang da bacari ikang, mar nyanda dapa ikang sama skali. Kong waktu so mo pagi, Yesus da badiri di pinggir danau, mar Dia pe murit-murit nintau kalu itu Yesus. Yesus bilang pa dorang, “Hei tamang-tamang! Ngoni da dapa ikang ato nyanda?” Dorang manyao, “Nyanda.” Kong Yesus bilang pa dorang, “Se lego jo tu ngoni pe jala ka sabla kanan prao, kong ngoni mo dapa ikang.” Kong dorang se lego dorang pe jala trus dorang tarek tu jala mar dorang nyanda mampu mo hela itu lantaran pe banya skali tu ikang yang dorang da dapa. Kong tu murit yang Yesus paling sayang itu bilang pa Petrus, “Itu Tuhan!” Petrus pe dengar kalu itu Tuhan, dia pake de pe baju luar lantaran tadi dia da buka, kong balumpa ka danau. Tu murit-murit laeng datang deng prao pa Yesus. Dorang itu nyanda jao dari pinggir danau, de pe jarak kira-kira cuma sratus meter dari pinggir danau, kong waktu dorang datang itu dorang lei hela tu dong pe jala yang so punung deng ikang. Waktu dorang so sampe di pinggir danau, dorang lia ada bara api kong pa de pe atas so ada ikang deng roti lei. Yesus bilang pa dorang, “Bawa kamari jo bebrapa ikang yang ngoni baru tangka.” So itu Simon Petrus nae ka prao kong dia hela tu jala ka pinggir danau, kong tu jala punung deng ikang-ikang basar. Tu ikang pe banya ada sratus lima pulu tiga ekor ikang. Mar biar lei tu ikang pe banya bagitu, tu jala nyanda tarabe. Yesus bilang pa dorang, “Mari jo torang smokol.” Nyanda ada satu dari tu murit-murit yang brani batanya pa Dia, “Sapa dang Bapak ini?” Soalnya dorang tau kalu Dia itu Tuhan. Kong Yesus badekat pa dorang, Dia ambe tu roti trus Dia kase pa dorang, bagitu lei deng tu ikang. Itu so katiga kali Yesus da batunjung Dia pe diri pa De pe murit-murit abis Dia mati kong hidop ulang. Waktu dorang so klar smokol, Yesus batanya pa Simon Petrus, “Simon, Yohanes pe anak, apa ngana sayang pa Kita lebe dari dorang ini?” Simon manyao pa Yesus, “Iyo Tuhan, Tuhan tau kalu kita sayang pa Tuhan.” Yesus bilang pa dia, “Kalu bagitu, urus akang bae-bae tu Kita pe orang-orang, sama deng gembala yang urus bae-bae tu dia pe domba-domba.” Yesus batanya pa Simon for kadua kali, “Simon, Yohanes pe anak, apa ngana sayang pa Kita?” Simon manyao pa Yesus, “Iyo Tuhan, Tuhan tau kalu kita sayang pa Tuhan.” Yesus bilang lei pa dia, “Urus akang bae-bae tu Kita pe orang-orang, sama deng gembala yang jaga bae-bae tu dia pe domba-domba.” Yesus batanya pa dia lei for katiga kali, “Simon, Yohanes pe anak, apa ngana sayang pa Kita?” Kong Petrus jadi sedi lantaran Yesus da tanya pa dia sampe katiga kali kalu dia sayang pa Yesus. Kong Petrus jawab pa Yesus, “Tuhan, Tuhan tau samua hal, Tuhan tau kalu kita sayang pa Tuhan.” Yesus bilang pa Petrus lei, “Urus akang bae-bae tu Kita pe orang-orang, sama deng gembala yang urus bae-bae tu de pe domba-domba. Kita bilang pa ngana, waktu ngana masi muda, ngana pake baju sandiri deng ngana bajalang ka mana jo ngana suka. Mar kalu ngana so jadi tua, ngana mo se kamuka ngana pe tangan kong orang mo ika, trus bawa pa ngana ka tampa yang ngana nyanda suka pigi.” Yesus da bilang bagitu for se tau bagimana Petrus nanti mo mati, kong kalu Petrus so mati bagitu, Tuhan Allah mo dapa puji deng hormat. Abis Yesus bilang bagitu, Dia bilang lei pa Petrus, “Iko jo pa Kita.” Waktu itu, Petrus balia ka blakang, dia lia kalu tu murit yang Yesus paling sayang da baiko pa dorang. Tu murit itu yang da dudu di dekat pa Yesus waktu dorang da makang sama-sama seblum Yesus mati. Kong dia itu yang da batanya, “Tuhan, sapa so tu mo bahianat pa Tuhan?” Waktu Petrus lia tu murit itu, dia bilang pa Yesus, “Tuhan, apa dang tu mo jadi pa dia ini?” Yesus manyao pa Petrus, “Kalu Kita suka dia tetap hidop sampe Kita datang ulang, itu bukang ngana pe urusan. Mar ngana, iko jo pa Kita.” Abis Yesus bilang bagitu, dapa dengar kabar dari tu sudara-sudara yang percaya kalu tu satu murit itu nyanda mo mati. Padahal Yesus nyanda bilang kalu tu murit itu nyanda mo mati, mar Yesus cuma da bilang kalu misalnya Yesus suka tu murit itu tetap mo hidop sampe Yesus datang ulang, itu bukang Petrus pe urusan. Tu murit yang Yesus sayang itu, so dia tu da kase tau deng yang da tulis samua tu ada di kitab ini. Torang tau yang dia da kase tau itu butul. Kong masi banya lei tu hal-hal laeng yang Yesus da beking. Kalu samua yang Yesus da beking itu mo tulis satu-satu, kita rasa ni dunia nyanda cukup mo muat samua tulisan tentang tu Yesus da beking itu. Bapak Teofilus yang bae! Bapak Teofilus, pa kita pe buku yang pertama, kita da tulis tentang samua tu Yesus da beking deng da se ajar, sampe waktu Dia taangka ka sorga. Seblum Yesus taangka, Roh Kudus da tolong pa Yesus for kase tau pa rasul-rasul tu Dia da pili, apa tu dorang musti beking. Yesus da mendrita sampe mati deng da hidop ulang, abis itu Dia batunjung Dia pe Diri pa rasul-rasul supaya dorang bole tau kalu Dia so butul-butul hidop. Dia batunjung Dia pe diri ulang-ulang pa dorang slama ampa pulu hari, kong Dia babicara deng dorang tentang Tuhan Allah Berkuasa sbagai Raja. Satu kali, Yesus da bamakang sama-sama deng dorang. Waktu itu, Dia suru pa dorang bagini, “Ngoni jang kase tinggal ni Yerusalem. Ngoni tinggal jo di sini for tunggu Bapa mo kase tu Dia da janji pa ngoni, sama deng tu ngoni perna da dengar dari pa Kita. Dulu Yohanes Pembaptis ja babaptis deng aer, mar so nyanda lama lei ngoni mo dapa baptis deng Roh Kudus.” Satu kali Yesus deng De pe rasul-rasul bakumpul, kong dorang batanya pa Dia, “Tuhan, apa skarang ini Tuhan mo beking bangsa Israel jadi krajaan sama deng dulu?” Yesus manyao pa dorang, “Ngoni nyanda perlu tau tu waktu deng tempo apa itu mo jadi, cuma Bapa yang tau. Dia sandiri yang ada hak mo ator tu waktu itu. Mar nanti Roh Kudus mo turung pa ngoni kong ngoni mo dapa kuasa, trus ngoni mo jadi saksi for se tau tentang Kita pa orang-orang di Yerusalem, di sluru daera Yudea deng daera Samaria, deng lei ka ujung bumi.” Abis bilang bagitu, Yesus taangka ka sorga di muka-muka pa dorang, kong ada awan da tutu pa Dia sampe dorang so nyanda dapa lia lei pa Dia. Waktu dorang masi bahaga ka langit, kage-kage badiri dua orang da pake baju puti di dekat pa dorang. Kong tu dua orang itu babilang pa dorang, “Hei orang-orang Galilea, kiapa lei ngoni masi da haga-haga ka langit? Yesus so taangka ka sorga, kong Dia lei mo datang ulang deng cara yang sama waktu ngoni da lia Dia da taangka ka sorga.” Abis itu, tu rasul-rasul turung dari bukit Zaitun kong babale ka Yerusalem. Tu bukit itu de pe jao kira-kira satu kilometer dari Yerusalem. Waktu dorang sampe di Yerusalem, dorang pigi ka tampa tu dong da manumpang akang kong nae ka ruang atas. Dorang samua itu: Petrus, Yohanes, Yakobus, Andreas, Filipus, Tomas, Bartolomeus, Matius, Yakobus tu Alfeus pe anak, Simon dari Gerakan Yahudi Merdeka deng Yudas tu Yakobus pe anak. Dorang samua ja bakumpul deng satu hati for basombayang. Dorang basombayang sama-sama deng bebrapa parampuang, Yesus pe sudara-sudara, deng lei Maria tu Yesus pe mama. Satu kali tu sudara-sudara yang percaya pa Yesus bakumpul sama-sama. Dorang pe jumla kira-kira ada sratus dua pulu orang. Kong Petrus badiri di tenga-tenga pa dorang trus babilang, “Sudara-sudara, samua yang da tulis dulu di Kitab Suci tentang Yudas, memang musti jadi. Dulu, Roh Kudus da pake pa raja Daud for bilang tentang Yudas. Yudas itu yang da bawa tu orang-orang for mo tangka pa Yesus. Padahal dulu Yudas itu sala satu dari torang, dia lei ja beking de pe bagian playanan sama-sama deng torang.” So Yudas itu yang da trima tu doi waktu dia da bahianat pa Yesus, kong tu doi itu dia da pake for bli akang tana. Di tana itu, dia jatung taplaka kong de pe puru tabla sampe samua tu de pe isi puru takaluar. Samua orang di Yerusalem dapa tau apa tu da jadi pa Yudas, sampe tu tana itu dorang se nama pake tu dorang pe bahasa sandiri, Akeldama, tu de pe arti Tana Dara. Kong Petrus babilang lei, “Dulu raja Daud so tulis tentang tu Yudas. Dia da tulis bagini di kitab Mazmur, ‘Biar jo de pe tampa tinggal jadi sunyi, nyanda ada orang yang mo tinggal di situ.’ Raja Daud lei tulis bagini, ‘Biar jo orang laeng ambe tu de pe tugas.’ Jadi torang musti pili satu orang for mo ganti pa Yudas. Tu orang itu musti dari orang-orang yang ja iko deng torang, waktu Tuhan Yesus masi da sama-sama deng torang, mulai dari waktu Yohanes da baptis pa Yesus sampe waktu Yesus da taangka ka sorga se tinggal pa torang. Tu orang itu mo basaksi sama-sama deng torang kalu Yesus so hidop ulang.” Pe klar Petrus babicara, tu orang-orang yang da bakumpul di situ kase usul dua orang. Tu satu pe nama Yusuf, orang ja pangge pa dia Barsabas, deng ada lei tu ja pangge pa dia Yustus. Kong tu satu lei, de pe nama Matias. Abis itu dorang samua basombayang. Dorang bilang, “Tuhan, Tuhan tau butul samua orang pe hati. Tolong kase tunjung akang pa torang sapa yang Tuhan mo pili dari tu dua orang ini. Nanti tu orang itu yang mo ganti pa Yudas di playanan ini, dia mo jadi rasul tu Yesus pe utusan, tu jabatan yang Yudas so se tinggal. Soalnya Yudas so mati kong pigi ka tampa yang cocok for dia.” Klar basombayang, dorang cabu lot for tu dua orang, kong Matias yang da dapa. Jadi dorang angka pa Matias jadi rasul for sama-sama deng tu seblas rasul itu. Pas waktu orang Yahudi pe hari raya, tu dorang ja bilang hari Pentakosta, samua orang yang percaya pa Yesus bakumpul di satu ruma. Kage-kage dapa dengar ada bunyi dari langit sama deng angin yang da batiop kancang. De pe bunyi pe kuat skali sampe dapa dengar di samua tampa di ruma tu dorang da dudu bakumpul. Kong dorang dapa lia api yang de pe model sama deng lida-lida yang tasebar kong brenti di atas pa dorang masing-masing. Kong Roh Kudus kuasai pa dorang samua, trus dorang bole babicara pake bahasa-bahasa laeng yang Roh Kudus da kase. Waktu hari raya itu, tu orang-orang Yahudi yang dari samua bangsa di sluru dunia da pulang ka Yerusalem. Dorang ini ja iko Tuhan pe mau. Dorang dapa dengar tu bunyi itu, so itu dorang datang bakumpul di tampa itu. Dorang takage lantaran dorang dengar tu orang-orang percaya itu da babicara pake dorang pe bahasa masing-masing. Dorang samua tahaga deng taheran-heran, kong dorang babilang, “Tu orang-orang yang da babicara itu orang Galilea. Jadi bagimana sampe torang bole dengar dorang babicara pake torang pe bahasa yang torang ja pake pa tong pe kampung masing-masing? Torang ini orang-orang dari: Partia, Media, Elam, Mesopotamia, Yudea deng Kapadokia, Pontus deng Asia, Frigia deng Pamfilia, Mesir deng daera-daera di Libia tu baku dekat deng Kirene, orang-orang pendatang dari Romawi, tu orang-orang Yahudi deng yang bukang Yahudi mar so maso agama Yahudi, kong ada lei orang Kreta deng orang Arab. Torang samua da dengar dorang babicara pake torang pe bahasa sandiri tentang perbuatan-perbuatan basar tu Tuhan Allah da beking.” Dorang samua taheran-heran deng tahaga-haga kong baku bilang, “Apa so samua ini pe arti?” Mar tu laeng cuma da basindir bagini, “Dorang ini da mabo lantaran anggor manis.” Abis itu, Petrus deng tu seblas rasul yang laeng badiri. Kong deng suara kuat Petrus bilang pa orang banya itu, “Hei sudara-sudara orang Yahudi deng ngoni samua orang yang da tinggal di Yerusalem. Tarukira jo bae-bae, kita mo se tau deng jelas pa ngoni apa tu da jadi di sini. Torang ini kasiang nyanda mabo sama deng tu ngoni da kira, lantaran skarang ini baru jam sambilan pagi. Mar apa tu ngoni da dengar tadi, dulu memang Tuhan Allah so kase tau tentang itu lewat De pe nabi Yoel, bagini tu Tuhan Allah da bilang, ‘Di akhir jaman, Kita tu Tuhan Allah mo kase cura tu Kita pe Roh pa samua orang. Ngoni pe anak-anak laki-laki deng parampuang mo kase tau pa orang-orang apa tu Kita da bilang pa dorang. Tu anak-anak laki-laki muda mo dapa penglihatan, kong tu orang-orang tua laki-laki mo dapa mimpi. Kita lei mo kase cura Kita pe Roh sampe pa tu orang-orang yang ja beking tu Kita ja suru, bae dia laki-laki ato parampuang, kong dorang mo kase tau pa orang-orang apa tu Tuhan Allah da bilang pa dorang. Kita mo beking hal-hal luar biasa di langit, deng tanda-tanda di bumi: mo ada dara, api deng asap yang bagumpal-gumpal. Matahari mo bruba jadi glap, kong bulan mo jadi mera sama deng dara. Itu samua mo jadi seblum Tuhan mo datang ulang for adili pa samua orang. Hari itu, hari yang basar deng luar biasa. Kong sapa tu minta Tuhan se slamat pa dia dari tu hukuman dosa, dia itu mo slamat.’ ” Kong Petrus babilang lei, “Hei sudara-sudara orang Israel! Dengar bae-bae tu kita mo bilang ini: Tuhan Allah so tentukan Yesus orang Nazaret itu, kong torang tau itu lantaran lewat Dia, Tuhan Allah beking mujisat-mujisat, hal-hal yang luar biasa deng tanda-tanda di tenga-tenga pa ngoni. Yesus ini, Tuhan Allah da srahkan pa ngoni iko Dia pe maksut deng rencana. Kong ngoni so bunung pa Yesus deng cara srahkan Dia pa orang-orang yang nyanda iko tu Tuhan Allah pe atoran-atoran, supaya dorang bole se salib pa Dia. Mar Tuhan Allah kase hidop ulang pa Dia, Tuhan Allah kase bebas pa Dia dari siksa waktu mati lantaran maut nyanda mampu mo tahang pa Dia. Dulu Raja Daud perna bilang bagini tentang Yesus, ‘Kita lia Tuhan slalu di muka pa kita. Dia sama-sama deng kita, so itu kita nyanda mo tako apa-apa. So lantaran itu kita pe hati snang, deng kita pe mulu kita puji-puji trus pa Dia, deng kita lei mo babaharap trus pa Dia. Soalnya Tuhan nyanda mo kase biar kita tinggal trus di tampa orang mati, deng Tuhan nyanda se biar tu Dia pe Orang Kudus pe badan mo busu di dalam kubur. Tuhan kase tunjung jalang pa kita supaya kita bole dapa hidop kekal. Tuhan mo beking pa kita butul-butul snang lantaran Tuhan da sama-sama deng Kita.’ Sudara-sudara, kita mo bicara trang-trangan pa ngoni tentang Daud, tu torang pe nene moyang. Dia bilang bagitu, bukang dia se cirita de pe diri sandiri. Soalnya dia sandiri so mati deng so se kubur, kong de pe kubur masi ada sampe skarang di negri ini. Mar Daud ini Tuhan Allah pe nabi tu ja kase tau Tuhan Allah pe pesan pa orang-orang. So itu Daud tau Tuhan Allah so bajanji pa dia deng basumpa kalu satu dari de pe keturunan mo jadi raja. Jadi waktu itu, Daud so lia apa tu mo jadi nanti. Dia so se tau lebe dulu kalu Tuhan Allah nyanda mo se biar pa Kristus tu Raja yang mo se slamat pa manusia ada trus di tampa orang mati, deng Dia pe badan nyanda mo busu mar Dia mo hidop ulang. So Dia no tu Yesus yang Daud da bilang itu. Yesus itu yang Tuhan Allah so kase hidop ulang, kong torang ini jadi saksi kalu Dia so hidop ulang. Tuhan Allah so angka pa Yesus di sabla kanan pa Tuhan Allah, tu tampa yang terhormat. Tuhan Allah lei so kase pa Dia tu Roh Kudus, sama deng tu Tuhan Allah da janji dari dulu. Tu Roh Kudus itu Dia so kase pa torang, itu no yang ngoni da dengar deng da lia di sini. Daud sandiri nyanda taangka ka sorga, mar dia da bilang tentang Yesus bagini, ‘Tuhan Allah da bilang pa kita pe Tuhan bagini, Dudu jo di tampa terhormat di sabla kanan pa Kita, sampe Ngana pe musu-musu Kita taru di bawa Ngana pe kaki.’ So itu sudara-sudara orang Israel, ngoni musti tau butul-butul kalu Yesus tu ngoni da salib itu, so Dia no tu Tuhan Allah da beking jadi torang pe Tuhan deng jadi Kristus tu Raja yang se slamat pa manusia.” Waktu tu orang-orang dengar samua itu, dorang rasa manyasal skali kong dorang batanya pa Petrus deng pa rasul-rasul yang laeng, “Sudara-sudara, apa dang tu torang musti beking?” Petrus manyao pa dorang, “Bertobat jo kong kase tu ngoni pe diri for dapa baptis dalam nama Yesus Kristus. Deng bagitu Tuhan Allah mo kase ampung tu ngoni pe dosa-dosa, trus Tuhan Allah mo kase tu karunia Roh Kudus pa ngoni. Soalnya Tuhan Allah so kase tu samua janji itu pa ngoni deng pa ngoni pe keturunan, deng lei pa tu orang-orang yang tinggal di tampa-tampa yang jao. Tu janji itu Tuhan Allah mo kase pa samua orang yang Dia pangge for iko pa Dia.” Petrus bicara banya lei pa dorang. Dia basaksi deng kase smangat pa dorang, dia bilang, “Skarang ini banya orang jaha, mar ngoni jang iko pa dorang. Ngoni musti kase ngoni pe diri pa Tuhan supaya mo slamat.” Tu orang-orang yang da trima tu Petrus da bilang itu dapa baptis, kong tu orang-orang yang jadi percaya pa Yesus tatamba kira-kira tiga ribu orang. Dorang ja bakumpul sama-sama deng orang-orang laeng yang percaya pa Yesus. Dorang lei rajin ja badengar tu ajaran dari rasul-rasul kong dorang ja beking perjamuan deng basombayang sama-sama. Waktu itu, tu rasul-rasul da beking banya hal-hal yang luar biasa deng tanda-tanda ajaib yang se tunjung Allah pe kuasa, sampe samua orang jadi taheran-heran kong hormat pa Tuhan Allah. Samua orang yang so percaya itu so jadi satu, dorang ja bakumpul sama-sama. Samua harta yang ada pa dorang, dong pake sama-sama. Dorang jual dong pe harta, kong tu doi dorang kase berbage pa orang-orang iko tu orang-orang pe perlu masing-masing. Saban hari deng satu hati dorang ja bakumpul di kintal kompleks Ruma Ibada Pusat. Dorang beking perjamuan dari satu ruma ka ruma laeng kong makang sama-sama deng snang deng tulus hati. Dorang ja puji pa Tuhan Allah, deng banya orang suka lei pa dorang. Kong saban hari Tuhan se tamba pa dorang tu orang-orang yang jadi percaya pa Dia for dapa slamat dari hukuman dosa. Satu hari Petrus deng Yohanes pigi ka Ruma Ibada Pusat, dorang da pigi jam tiga sore tu orang Yahudi pe jam basombayang. Di Ruma Ibada Pusat ada tu satu pintu gerbang, de pe nama ‘Pintu Gaga’. Di pintu itu, ada satu laki-laki tu de pe kaki so lumpu dari lahir. Saban hari orang bawa dia ka situ, supaya dia bole baminta-minta pa orang-orang yang maso ka Ruma Ibada Pusat. Kong waktu dia dapa lia pa Petrus deng Yohanes so mo maso ka Ruma Ibada Pusat, dia baminta doi pa dorang. Petrus deng Yohanes lia pa dia, kong Petrus bilang pa dia, “Co ngana haga pa torang!” Trus tu orang itu haga pa dorang deng baharap mo dapa doi dari pa dorang. Mar Petrus cuma bilang pa dia, “Kita nyanda ada mas ato perak. Mar apa tu kita bole kase skarang, itu yang kita mo kase pa ngana: dalam nama Yesus Kristus dari Nazaret itu, badiri kong bajalang jo!” Trus Petrus pegang tu orang itu pe tangan kanan kong bantu se badiri pa dia. Waktu itu jo tu orang itu pe kaki deng de pe pergelangan jadi bae. Kong tu orang itu balumpa trus bajalang kasana-kamari, kong dia baku iko deng dorang maso ka kompleks Ruma Ibada Pusat. Dia bajalang deng babalumpa deng lei bapuji pa Tuhan Allah. Waktu itu, samua orang lia kalu dia so bajalang deng da puji-puji pa Tuhan Allah. Trus dorang dapa kanal pa dia, kalu dia itu tu orang lumpu yang ja dudu baminta-minta di muka Pintu Gaga. Dorang jadi taheran-heran deng kagum lantaran tu orang itu bole jadi bae. Tu orang lumpu yang so bae itu bapegang pa Petrus deng Yohanes. Kong waktu dorang tiga sampe di place tu de pe nama ‘Place Salomo’, tu orang banya yang taheran-heran itu, datang bakrumun pa dorang. Waktu Petrus lia tu orang banya itu, dia bilang pa dorang, “Hei sudara-sudara orang Israel, kiapa so ngoni heran kalu dia so bae? Kong kiapa lei ngoni cuma da haga-haga trus pa torang sama deng torang ini yang beking dia bajalang? Dia so bole bajalang, bukang lantaran torang pe jago ato lantaran torang slalu ja beking tu Tuhan Allah pe mau. Tuhan Allah tu torang pe nene moyang tu Abraham, Ishak deng Yakub ja semba, so Dia tu da beking itu. Dia beking itu supaya Yesus tu Dia pe playan itu dapa puji deng hormat. Tempo hari ngoni nyanda trima pa Yesus kong srahkan Dia pa gubernur Pilatus for mo bunung, padahal waktu itu gubernur mo se lapas pa Dia. Mar ngoni tetap tolak pa Dia Yang Kudus itu, Yang Ja Beking Tu Butul di muka pa Tuhan Allah. Ngoni cuma da minta pa gubernur for se lapas tu ja babunung orang. Ngoni so bunung pa Dia, padahal Dia yang da kase torang pe hidop, mar biar Dia mati Tuhan Allah so kase hidop ulang pa Dia. Torang so lia pa Dia so hidop ulang, jadi torang kase tau hal itu pa ngoni. Tu orang lumpu itu ngoni so kanal, kong ngoni lei so lia apa tu da jadi pa dia. Dia so bae kong so jadi kuat lantaran dia percaya pa Yesus. Jadi de pe percaya itu no kong sampe ngoni samua bole lia dia so jadi bae. Sudara-sudara, kita tau kalu ngoni deng ngoni pe pemimpin-pemimpin so bunung pa Yesus lantaran ngoni nintau apa tu ngoni da beking. Mar Tuhan Allah so kase tau dari dulu lewat Dia pe nabi-nabi kalu Kristus tu Raja yang se slamat pa manusia mo dapa banya siksa, kong skarang samua itu so jadi. So itu bertobat jo kong se tinggal tu ngoni pe dosa-dosa deng iko pa Tuhan, trus Dia mo se hapus tu ngoni pe dosa-dosa itu. Deng bagitu, ada de pe waktu for Tuhan mo beking ngoni pe hati tenang, deng Dia lei mo utus Yesus pa ngoni lantaran Dia so tentukan dari dulu supaya Yesus tu Kristus jadi Raja yang mo se slamat pa manusia. Mar skarang, Yesus musti tetap tinggal di sorga, sampe datang de pe waktu Tuhan Allah beking samua jadi baru. Itu samua Tuhan Allah so janji dari dulu lewat De pe nabi-nabi yang Dia da pili. Musa so perna babilang bagini, ‘Tuhan Allah mo utus satu Nabi for ngoni, sama deng Dia so utus pa kita jadi nabi. Tu Nabi itu satu dari antara torang pe sudara-sudara orang Israel. Dengar jo samua tu Nabi itu mo bilang pa ngoni. Sapa yang nyanda badengar pa tu Nabi itu, dorang itu Tuhan Allah mo buang dari antara orang-orang yang Dia so pili kong Dia mo se binasa pa dorang.’ Bukang cuma Musa tu da bilang tentang Dia, samua nabi mulai dari nabi Samuel sampe nabi-nabi laeng abis Samuel, dorang samua bilang tentang apa yang Yesus mo beking di jaman ini. Dorang so bilang lebe dulu pa ngoni pe nene moyang tu janji dari Tuhan Allah tentang Kristus, so itu ngoni ini lei mo dapa bagean dari tu janji itu. Dulu Tuhan Allah da bilang pa Abraham bagini, ‘Dari ngana pe keturunan, samua bangsa di bumi mo dapa berkat.’ So itu, Tuhan Allah angka Dia pe playan itu, Dia utus lebe dulu tu Dia pe playan itu pa torang supaya bole jadi berkat deng cara bantu pa torang bertobat dari samua torang pe kalakuan jaha.” Waktu Petrus deng Yohanes da babicara pa orang banya, datang tu imam-imam, kapala penjaga Ruma Ibada Pusat deng orang-orang dari golongan Saduki. Tu orang-orang itu mara skali pa Petrus deng Yohanes lantaran dorang dua da mangajar pa orang banya kalu orang yang percaya pa Yesus mo hidop ulang. Kong dorang suru tangka pa Petrus deng Yohanes, trus kase maso pa dorang dua ka bui, mar dorang dua mo dapa urus de pe eso lantaran waktu itu so malam. Mar dari pa tu orang-orang yang da badengar tu ajaran itu banya yang jadi percaya sampe dorang pe jumla so kira-kira lima ribu laki-laki. De pe eso, tu pemimpin-pemimpin Yahudi, tua-tua Yahudi deng ahli-ahli Taurat beking sidang di Yerusalem. Di situ da hadir lei tu imam basar Hanas, deng tu Kayafas, Yohanes, Aleksander deng orang-orang laeng yang tamaso kluarga imam basar. Kong dorang suru orang pi ambe pa Petrus deng Yohanes for bawa di muka pa dorang. Abis itu dorang mulai tanya-tanya akang pa dorang dua, “Sapa yang da kase kuasa pa ngoni? Kong ngoni pake sapa pe nama da beking samua itu?” Kong tu Roh Kudus da kuasai pa Petrus, trus Petrus manyao pa dorang bagini, “Hei pemimpin-pemimpin deng tua-tua Yahudi. Kalu skarang torang musti dapa priksa lantaran torang da beking tu bae pa tu orang yang da saki lumpu, deng ngoni lei mo tanya bagimana sampe tu orang saki itu jadi bae, ngoni deng torang samua orang Israel musti tau kalu tu orang lumpu ini jadi bae lantaran tu kuasa dari Yesus Kristus. Yesus itu orang Nazaret yang ngoni so se salib. Mar waktu Dia mati, Tuhan Allah so kase hidop ulang pa Dia, kong Dia itu no yang beking orang lumpu ini jadi bae sampe bole badiri di muka pa ngoni. Yesus itu, ‘Batu yang ngoni tukang-tukang bangunan da buang, batu itu so jadi batu fondasi yang paling penting.’ Cuma Yesus yang bole se slamat pa manusia. Soalnya nyanda ada nama laeng di dunia ini yang Tuhan da kase tu bole se slamat pa manusia.” Tu orang-orang yang da sidang pa Petrus deng Yohanes lia kalu dorang dua itu pe brani. Dorang lei tau kalu dorang dua itu orang biasa yang nyanda skola. Samua itu beking tu orang-orang yang da sidang pa dorang dua itu jadi taheran-heran. Kong dorang dapa kanal kalu dulu tu dua orang itu ja iko pa Yesus. Mar tu orang-orang yang da sidang pa dorang dua nimbole mo bilang apa-apa for malawang pa dorang, lantaran tu orang-orang itu da lia sandiri kalu tu orang lumpu itu so bae kong da badiri di sabla pa dorang dua. Jadi dorang suru kaluar pa Petrus deng Yohanes dari tu tampa sidang. Abis itu, dorang badiskusi tentang tu masala itu, kong dorang baku tanya, “Apa tu torang musti beking pa dorang dua itu? Soalnya samua orang di Yerusalem so tau kalu dorang da beking mujisat yang luar biasa kong torang nimbole mo sangkal. Bagini jo, supaya tu brita itu nyanda tasiar pa orang banya, lebe bae torang ancam pa dorang supaya nyanda se ajar tentang Yesus pa orang-orang.” Abis itu, dorang pangge pa Petrus deng Yohanes maso ulang ka ruang sidang. Kong dorang larang pa dorang dua supaya jang bicara deng se ajar pa orang-orang tentang Yesus. Mar Petrus deng Yohanes manyao pa dorang, “Kalu menurut bapak-bapak, mana tu paling butul di muka pa Tuhan Allah? Iko bapak-bapak pe prenta ato iko Tuhan Allah pe prenta? Soalnya tempo hari torang so lia apa yang Yesus beking deng so dengar sandiri apa yang Dia se ajar. Jadi skarang torang musti kase tau pa orang-orang apa tu torang so lia deng so dengar itu.” Pe dengar itu, tu pemimpin-pemimpin Yahudi lebe kras baancam pa Petrus deng Yohanes, mar tu pemimpin-pemimpin itu kase lapas pa Petrus deng Yohanes lantaran dorang nintau mo hukum bagimana pa dorang dua itu. Dorang lei tako jang sampe tu orang banya mo mangamu. Soalnya tu orang banya itu da puji deng hormat pa Tuhan Allah lantaran tu orang lumpu itu so bae. Soalnya tu orang itu lumpu so ampa pulu taong lebe, kong skarang dia so bae. Waktu Petrus deng Yohanes so se bebas dari bui, dorang babale pa dong pe tamang-tamang. Dorang dua se cirita pa dong pe tamang-tamang samua tu imam-imam kapala deng tua-tua Yahudi da bilang pa dorang. Waktu dorang pe tamang-tamang dengar samua itu, dorang sama-sama basombayang pa Tuhan Allah, “Ya Tuhan, Tuhan tu da beking langit, bumi, laut, deng samua de pe isi. Dulu, Tuhan babicara lewat Roh Kudus pa raja Daud tu Tuhan pe playan, tu torang pe nene moyang, supaya raja Daud bilang bagini, Kiapa orang-orang dari bangsa yang nyanda kanal pa Tuhan bamara? Kiapa orang-orang ini beking rencana tu nyanda ada de pe guna? Tu raja-raja basiap-siap deng pemimpin-pemimpin dunia bakumpul for baprang malawang pa Tuhan deng tu Mesias yang Tuhan so pili dari dulu. Tu raja Daud da bilang dulu so jadi pa torang, lantaran di kota ini raja Herodes, gubernur Pilatus, orang-orang laeng yang nyanda kanal pa Tuhan Allah deng lei tu orang-orang Israel so bakumpul. Dorang samua baku skongkol malawang pa Yesus tu Tuhan pe Playan yang kudus, Dia yang Tuhan Allah da pili itu. Samua tu dorang da beking itu Tuhan Allah so tentukan dari dulu lantaran Dia pe kuasa deng Dia pe mau. Kong skarang Tuhan, tolong lia akang tu dorang pe ancaman-ancaman. So itu, bantu akang pa torang tu ja beking Tuhan da suru supaya brani kase tau tu Tuhan pe firman. Tuhan tolong pa torang supaya bole kase bae tu orang-orang saki, beking tanda-tanda deng hal-hal yang luar biasa pake kuasa dari Yesus, tu Tuhan Allah pe Playan yang kudus.” Abis dorang basombayang, tu tampa dorang da basombayang akang iko bagoyang. Trus tu Roh Kudus kuasai pa dorang samua kong deng brani dorang kase tau tu Tuhan Allah pe firman pa orang-orang. Samua orang yang percaya pa Yesus itu satu pikiran deng satu hati. Dorang samua so baku bilang kalu apa yang dorang punya bukang cuma dorang punya sandiri, mar samua orang punya. Kong deng kuasa yang basar tu rasul-rasul kase tau kalu Tuhan Yesus so hidop ulang, dorang itu jadi saksi waktu Yesus da hidop ulang. Kong Tuhan ja se tunjung Dia pe bae pa dorang pe hidop. Nyanda ada satu orang dari pa dorang yang kekurangan apa-apa, lantaran tu orang-orang yang punya tana ato ruma, dorang jual dong pe kepunyaan itu, kong tu doi dari dorang da bajual itu, dorang bawa pa rasul-rasul, kong tu rasul-rasul kase berbage samua tu doi pa orang-orang iko tu orang-orang pe keperluan. De pe conto, ada tu satu orang de pe nama Yusuf. Dia itu dari suku Lewi kong da lahir di Siprus. Tu rasul-rasul se nama pa dia Barnabas, tu de pe arti orang yang ja se smangat pa orang laeng. Dia da jual tu de pe kobong kong tu doi hasil da jual kobong itu, dia bawa pa rasul-rasul. Ada tu satu laki-laki, de pe nama Ananias, kong de pe bini pe nama Safira. Dia deng de pe bini lei da jual tu dorang pe tana. Tu doi dari hasil bajual tana itu, sbagian Ananias da tahang, kong tu sbagian lei dia kase pa rasul-rasul. Dia pe bini lei tau samua tu Ananias da beking itu. Kong Petrus bilang, “Ananias, kiapa dang ngana kase biar tu setang pe bos kuasai tu ngana pe hati, sampe ngana so badusta pa Roh Kudus? Tu doi hasil da bajual tu tana, sbagian ngana da tahang. Bagini Ananias, waktu tu tana ngana blum jual, itu tetap ngana punya. Kong waktu so jual lei, tu de pe doi tetap ngana punya, itu samua mana-mana pa ngana. Mar kiapa ada rencana jaha pa ngana pe hati, sampe ngana beking bagini? Ngana nyanda badusta pa manusia, mar ngana so badusta pa Tuhan Allah.” Waktu Ananias dengar itu, dia iko tabanting ka tana kong mati. Samua orang yang da dengar tu kejadian itu jadi tako skali. Trus datang bebrapa nyong pi bungkus tu Ananias pe mayat deng kaeng puti, klar itu dorang bawa kaluar tu de pe mayat kong pi kase kubur. Serta so tiga jam, Ananias pe bini maso, mar dia nintau apa tu da jadi. Kong Petrus bilang pa dia, “Co ngana kase tau pa kita. Butul tu tana pe harga bagini?” Safira manyao, “Butul, de pe harga cuma bagitu.” Kong Petrus bilang pa dia, “Kiapa ngana deng ngana pe laki baku skongkol mo coba-coba pa Tuhan pe Roh? Co ngana lia, tu orang-orang yang baru klar se kubur ngana pe laki so di muka pintu, kong dorang lei tu mo kase kubur ngana pe mayat.” Waktu itu jo Safira iko tabanting di muka pa Petrus kong mati. Abis itu, tu bebrapa nyong maso ka dalam kong dorang lia tu Safira so mati. Trus dorang bawa kaluar tu de pe mayat kong se kubur di sei pa de pe laki. Kong samua orang yang percaya jadi tako skali. Bagitu lei deng tu orang laeng yang da dapa dengar itu, dorang lei jadi tako skali. Waktu itu, tu rasul-rasul da beking banya tanda-tanda ajaib deng mujisat-mujisat di muka banya orang. Samua orang yang percaya deng satu hati ja bakumpul di Place Salomo di Ruma Ibada Pusat. Banya orang yang segan pa dorang, mar biar lei bagitu, tu orang-orang yang blum percaya nyanda brani bagabung deng dorang. Kong lebe hari lebe tatamba banya orang-orang yang jadi percaya pa Tuhan, bae itu laki-laki ato parampuang. Trus banya orang bawa tu orang-orang saki ka pinggir jalang kong kase tidor di tandu deng tikar. Dorang beking bagitu supaya kalu Petrus lewat di situ, biar cuma de pe bayangan takana pa tu orang-orang saki, dorang bole jadi bae. Waktu itu lei ada banya orang datang dari kota-kota laeng yang ada di dekat Yerusalem. Dorang datang rame-rame da bawa tu orang-orang saki deng orang-orang yang da kemasukan setang, kong dorang samua jadi bae. Waktu itu, imam basar deng de pe orang-orang Yahudi dari golongan Saduki jadi mangiri skali pa tu rasul-rasul. Jadi dorang tangka tu rasul-rasul itu trus kase maso ka bui. Mar de pe malam itu jo, Tuhan pe malaekat datang buka tu pintu-pintu bui, kong bawa kaluar pa dorang. Klar itu tu malaekat bilang pa dorang, “Pigi jo ka Ruma Ibada Pusat kong kase ajar pa orang-orang tu firman yang bole beking dorang dapa hidop kekal.” Pe dengar tu malaekat da bilang, de pe amper siang dorang maso ka kintal Ruma Ibada Pusat kong mulai mangajar di situ. Waktu itu lei di tampa laeng, tu imam basar deng de pe orang-orang kase kumpul tu anggota-anggota Mahkamah Agama. Dorang itu penasehat-penasehat deng tua-tua Yahudi bangsa Israel. Kong dorang suru pi ambe tu rasul-rasul dari bui. Mar waktu tu penjaga-penjaga sampe di bui, dorang lia tu rasul-rasul itu so nyanda ada di situ. Trus tu orang-orang yang da dapa suru itu babale pa tu pemimpin-pemimpin Yahudi. Kong dorang bilang, “Waktu torang sampe di bui, tu pintu bui da takunci bae-bae, kong ada orang yang da bajaga di muka pintu. Mar serta torang buka tu pintu, so nyanda ada sapa-sapa di dalam.” Pe dengar itu, tu kapala penjaga Ruma Ibada Pusat deng imam-imam kapala jadi bingo kong batanya-tanya apa tu mo jadi nanti. Kong satu orang datang pa dorang kong kase tau, “Bapak-bapak, tu orang-orang yang bapak-bapak da se maso ka dalam bui, skarang ada di kintal kompleks Ruma Ibada Pusat. Dorang da mangajar pa orang banya di situ.” Pe dengar itu, tu kapala penjaga Ruma Ibada Pusat deng de pe anak bua pi ambe deng bae-bae pa tu rasul-rasul lantaran tako pa tu orang banya yang snang pa rasul-rasul itu. Dorang tako jang sampe tu orang banya mo lempar deng batu pa dorang. Dorang bawa tu rasul-rasul itu kong se mangada pa tu Mahkamah Agama. Trus tu imam basar mulai batanya pa tu rasul-rasul itu, dia bilang, “Torang so larang deng kras pa ngoni supaya jang mangajar tentang Orang itu, mar ngoni tetap kase tau tu ngoni pe ajaran ka samua tampa di Yerusalem. Malatare, ngoni tudu pa torang kalu lantaran torang ini sampe tu Orang itu mati.” Kong Petrus deng tu rasul-rasul laeng manyao, “Torang musti taat pa Tuhan Allah, bukang pa manusia. Tuhan Allah yang torang pe nene moyang ja semba, Dia tu da se hidop ulang pa Yesus, yang ngoni so bunung di kayu salib. Yesus itu yang Tuhan Allah so angka ka tampa terhormat di sabla kanan pa Dia. Yesus so jadi Pemimpin supaya buka jalang for torang orang Israel bole dapa kesempatan bertobat, Dia lei so jadi Juruslamat supaya torang pe dosa-dosa bole dapa ampung. Torang ini yang jadi saksi tentang samua itu, kong Roh Kudus lei tau kalu samua itu butul. Roh Kudus ini yang Tuhan Allah da kase pa samua orang yang ja iko De pe prenta.” Pe dengar tu Petrus da bilang, tu pemimpin-pemimpin Yahudi jadi mara skali, kong dorang barencana mo bunung pa tu rasul-rasul itu. Mar ada tu satu orang anggota Mahkamah Agama, de pe nama Gamaliel. Dia ini ahli Taurat dari golongan Farisi, deng orang-orang lei segan pa dia. Kong dia badiri di situ, trus suru orang-orang bawa kaluar pa tu rasul-rasul dari situ for samantara. Trus Gamaliel bilang pa de pe tamang-tamang di Mahkamah Agama itu, “Hei sudara-sudara orang Israel, torang musti pikir bae-bae apa tu torang mo beking pa orang-orang itu. Co ngoni inga, dulu, ada satu orang de pe nama Teudas. Dia angka de pe diri jadi orang penting, kong banya yang jadi de pe orang sampe dorang pe banya kira-kira ampa ratus orang. Mar waktu dia dapa bunung, samua de pe orang jadi tapisa-pisa sampe so nyanda ada sama skali. Abis dia, ada lei satu orang de pe nama Yudas. Dia itu orang Galilea. Dia muncul waktu pemerenta Romawi da beking sensus penduduk. Dia pangge banya orang for jadi de pe orang kong malawang pa pemerenta Romawi. Mar de pe laste, dia lei dapa bunung kong samua de pe orang tapisa-pisa. Jadi skarang sudara-sudara, kita bilang pa ngoni lebe bae ngoni jang beking apa-apa pa tu orang-orang itu. Se biar jo pa dorang. Kalu dorang pe ajaran itu cuma dari manusia, tantu nyanda mo batahang. Mar kalu tu ajaran itu memang butul dari Tuhan Allah, torang nyanda mampu mo se brenti pa dorang, malatare torang sandiri stou tu mo malawang pa Tuhan Allah.” Pe dengar bagitu, tu anggota Mahkamah Agama itu trima tu samua Gamaliel da bilang. Abis itu, dorang pangge tu rasul-rasul itu kong dorang cuma da suru cambok pa tu rasul-rasul. Trus dorang lei larang pa tu rasul-rasul for mo mangajar pa orang-orang tentang Yesus. Klar itu dorang se lapas tu rasul-rasul itu. Tu rasul-rasul kaluar deng hati snang dari tu sidang Mahkamah Agama, lantaran dorang rasa kalu Tuhan Allah anggap dorang itu pantas mendrita dapa hina lantaran ja iko pa Yesus. Kong saban hari dorang mangajar di kintal kompleks Ruma Ibada Pusat deng lei di ruma-ruma. Dorang nyanda brenti kase tau tu Kabar Bae kalu Yesus itu Kristus tu Raja yang se slamat pa manusia. Waktu itu, tu orang-orang yang ja iko pa Yesus so lebe tatamba banya, kong tu orang-orang Yahudi yang pake bahasa Yunani nyanda snang pa orang-orang Yahudi yang pake dorang pe bahasa Yahudi asli. Dorang nyanda snang lantaran tu dorang pe janda-janda nyanda dapa bagean waktu orang-orang se berbage tu keperluan hari-hari. So itu, tu rasul-rasul itu pangge bakumpul pa samua orang yang ja iko pa Yesus kong bilang, “Torang dua blas ini musti se tau trus pa orang-orang tu Tuhan Allah pe firman. Nyanda bagus kalu torang brenti se tau itu lantaran mo urus tu orang-orang pe makanan. Jadi bagini jo sudara-sudara, lebe bae ngoni pili tuju orang dari pa ngoni. Dorang itu musti orang bae-bae, bijaksana deng Roh Kudus da kuasai. Tu orang-orang itu yang nanti torang mo se tugas for urus tu soal makanan. Deng bagitu, torang bole lebe banya kase perhatian for basombayang deng kase tau tu Tuhan pe firman pa orang-orang.” Samua orang percaya di situ da trima deng bae tu usul itu. Jadi dorang pili tu tuju orang ini: Stefanus yang de pe percaya pa Yesus kuat deng Roh Kudus da kuasai pa dia, deng tu Filipus, Prokhorus, Nikanor, Timon, Parmenas, deng Nikolaus yang bukang orang Yahudi mar so maso agama Yahudi, dia ini dari Antiokhia. Kong tu tuju orang itu, dorang bawa di muka pa tu rasul-rasul. Trus tu rasul-rasul itu taru dorang pe tangan pa tuju orang itu kong basombayang for tuju orang itu pe playanan. Tu Tuhan Allah pe firman so lebe tasiar, kong tu orang-orang di Yerusalem yang ja iko pa Yesus so lebe tatamba banya. Ada banya lei imam yang jadi percaya pa Yesus. Waktu itu Tuhan Allah da se tunjung De pe bae pa Stefanus deng kase kuasa pa dia, so itu Stefanus beking tu hal-hal yang luar biasa deng tanda-tanda ajaib di muka banya orang. Mar di situ ada lei orang-orang yang nyanda trima pa Stefanus kong da baku ambe deng dia. Dorang itu orang Yahudi yang dari Kirene, dari Aleksandria, deng ada lei bebrapa orang dari daera Kilikia deng daera Asia. Dorang dulu perna jadi budak, mar skarang so nyanda. Dorang pe ruma ibada di situ pe nama, ‘Ruma Ibada orang yang dulu budak’. Dorang itu nyanda mampu baku ambe deng Stefanus lantaran dia babicara deng hikmat deng lei Tuhan pe Roh bantu pa dia for babicara. So itu, deng babadiam dorang hasut bebrapa orang for mo basaksi dusta tentang Stefanus. Dorang suru bilang bagini, “Torang dengar Stefanus so bicara jaha tentang nabi Musa deng Tuhan Allah.” Bagitu no dorang pe cara bahasut tu orang banya, tua-tua Yahudi deng ahli-ahli Taurat. Jadi dorang pi tangka pa Stefanus, kong hela pa dia trus bawa pa Mahkamah Agama Yahudi. Di situ dorang suru bebrapa orang basaksi dusta tentang Stefanus, kong tu orang-orang itu bilang, “Orang ini nyanda brenti-brenti bicara jaha tentang tu Ruma Ibada Pusat deng tu atoran-atoran di kitab Taurat. Dia bilang kalu Yesus tu orang Nazaret itu mo kase rubu tu Ruma Ibada Pusat, deng dia lei bilang kalu Yesus mo roba tu adat istiadat yang dulu Musa so kase ajar pa torang pe nene moyang, kong torang ja pake sampe skarang.” Waktu itu, samua orang yang da bakumpul di sidang Mahkamah Agama Yahudi itu haga pa Stefanus kong dorang lia de pe muka bacahaya sama deng malaekat. Kong imam basar batanya pa Stefanus, “Butul tu dorang da tudu pa ngana?” Kong Stefanus manyao, “Bapak-bapak deng sudara-sudara, co dengar akang dulu pa kita. Dulu, torang pe nene moyang Abraham tinggal di daera Mesopotamia seblum dia tinggal di Haran. Di situ, Tuhan Allah yang luar biasa da batunjung De pe diri pa Abraham, kong babilang, ‘Abraham, kaluar jo dari ngana pe negri ini deng se tinggal tu ngana pe sudara-sudara, kong pigi jo ka satu negri tu nanti Kita mo se tunjung pa ngana.’ Abis itu, Abraham kaluar dari daera Mesopotamia tu orang Kasdim pe tampa tinggal, kong pi tinggal di Haran. Kong waktu Abraham pe papa so mati, Tuhan Allah suru pa Abraham bapinda dari Haran ka tampa tu torang da tinggal akang skarang ini. Waktu itu, Tuhan Allah nyanda kase tana pa Abraham biar cuma satu jingkal. Mar Tuhan Allah da bajanji pa Abraham kalu nanti mo kase akang tu tana itu pa Abraham deng pa de pe keturunan, padahal waktu itu Abraham blum ada anak. Kong Tuhan Allah da bilang bagini pa dia, ‘Ngana pe keturunan mo tinggal pa orang laeng pe negri. Kong tu orang-orang di negri itu mo beking budak deng siksa pa dorang, de pe lama ampa ratus taong. Mar tu bangsa yang da beking budak pa dorang itu, Kita mo hukum pa dorang. Abis itu, ngana pe keturunan mo kaluar dari tu negri itu kong dorang mo baibada pa Kita di tampa ini.’ Klar itu, Tuhan Allah beking sah Dia pe janji deng Abraham, deng cara Tuhan Allah suru sunat samua anak laki-laki. Jadi waktu Abraham dapa anak Ishak, dia sunat de pe anak itu waktu de pe umur dlapan hari. Trus Ishak dapa anak Yakub kong sunat pa dia, bagitu lei Yakub da beking pa de pe dua blas anak yang jadi torang pe nene moyang. Torang pe nene moyang ini mangiri pa Yusuf tu dong pe sudara sandiri, so itu dorang jual pa dia ka tana Mesir. Mar Tuhan Allah tetap da sama-sama deng Yusuf, kong se lapas pa dia dari samua de pe siksa. Tuhan Allah kase tunjung Dia pe bae pa Yusuf kong beking dia bole mangarti banya hal di muka pa raja Mesir. So itu, raja Mesir angka pa dia jadi penguasa di sluru tana Mesir deng lei pa raja pe istana. Abis itu ada kelaparan di sluru tana Mesir deng tana Kanaan. Tu kelaparan itu pe hebat skali sampe tu orang-orang so siksa skali, kong torang pe nene moyang lei so nyanda ada makanan. Waktu itu, Yakub dapa dengar di tana Mesir ada gandum. Jadi dia suru tu torang pe nene moyang pigi ka sana, itu tu pertama kali dorang pigi ka Mesir. Abis itu dorang pulang. Kong waktu dorang pigi kadua kali ka Mesir, Yusuf kase kanal de pe diri pa de pe sudara-sudara. Waktu itu lei raja Mesir dapa tau tu Yusuf pe kluarga. Kong Yusuf suru pi ambe tu de pe papa Yakub deng samua de pe sudara for mo tinggal di Mesir. Dorang samua pe banya ada tuju pulu lima orang. Jadi Yakub pigi kong tinggal di tana Mesir. Yakub deng de pe anak-anak tinggal di situ sampe mati. Kong dorang pe keturunan se pinda dorang pe tulang-tulang ka Shikem di Israel, kong pi kase kubur di tampa tu Abraham da bli pake doi perak. Tu tampa itu Abraham da bli pa Hemor pe anak-anak di Sikhem. Tuhan Allah da bajanji pa Abraham mo se kaluar pa torang pe nene moyang dari tana Mesir. Serta tu waktu for mo se kaluar pa dorang so lebe dekat, dorang so lebe tatamba banya di Mesir. Kong waktu itu, ada satu raja baru yang mulai baprenta di Mesir. Tu raja itu nintau tentang Yusuf. Tu raja itu ja tipu for ambe untung pa torang pe nene moyang deng ja siksa pa dorang. Dia paksa pa torang pe nene moyang for buang tu dorang pe bayi-bayi yang baru lahir supaya mati. Pas waktu itu, Musa lahir. Kong Musa ini pe gaga skali di muka pa Tuhan Allah. Slama tiga bulan, Musa pe kluarga da piara pa dia pa dorang pe ruma. Abis itu, deng terpaksa dorang musti buang pa Musa. Abis dorang beking bagitu, tu raja Mesir pe anak parampuang ambe pa Musa trus piara pa dia sama deng de pe anak sandiri. Kong orang Mesir se ajar pa Musa samua tu dorang pe pengetahuan, kong dia jadi pande babicara deng samua dia bole beking. Satu hari, waktu Musa pe umur so ampa pulu taong, dia suka mo pi lia pa de pe sudara-sudara tu orang-orang Israel. Waktu itu Musa da lia satu orang Mesir da siksa tu satu orang Israel, kong dia pi tolong deng bela tu dia pe sudara orang Israel itu deng cara bunung tu orang Mesir. Musa pe kira, de pe sudara-sudara orang Israel mo mangarti kalu Tuhan Allah da pake pa dia for mo se lapas pa dorang dari dong pe siksa di Mesir, mar dorang kote nyanda mangarti. De pe eso, Musa lia ada dua orang Israel da bakalae. Kong dia coba mo se baku bae pa dorang, dia bilang, ‘Hei! Kiapa kong ngoni dua bakalae? Ngoni dua basudara!’ Mar tu orang yang da babage pa de pe tamang itu, tola pa Musa kong babilang, ‘Sapa so tu da angka pa ngana jadi torang pe bos? Sapa yang da angka pa ngana for urus tu torang pe masala? Kiapa so, ngana mo bunung pa kita sama deng kalamaring ngana da bunung pa tu orang Mesir itu?’ Pe dengar itu, Musa iko lari dari Mesir kong pi tinggal pa orang Midian pe negri. Di situ dia kaweng kong dapa dua anak laki-laki. Serta so ampa pulu taong Musa tinggal di situ, ada satu malaekat pi batunjung pa Musa di padang gurun di Gunung Sinai. Tu malaekat itu da batunjung di tenga-tenga api yang da kaluar dari pohong kacil yang baduri. Musa jadi heran deng apa tu dia da lia kong dia pi badekat ka situ for mo lia bae-bae tu pohong kacil yang baduri itu. Kage-kage dia dengar Tuhan pe suara da bilang bagini, ‘Kita ini, Tuhan Allah yang ngana pe nene moyang Abraham, Ishak deng Yakub ja semba.’ Waktu dengar tu suara itu, Musa totofore kong nyanda brani lei mo lia ka situ. Abis itu, Tuhan bilang lei pa dia, ‘Se lapas jo tu ngana pe slop, lantaran tu ngana da badiri akang itu tana kudus. Kita so tarukira bae-bae tu Kita pe umat di Mesir. Kita tau kalu dorang so siksa di sana. Kita so dengar tu dorang pe keluhan. Jadi Kita turung kamari for mo se bebas pa dorang. So itu, skarang Kita mo utus pa ngana bale ulang ka tana Mesir for mo bawa pa dorang kaluar dari sana.’ Musa ini tu dulu orang-orang Israel nyanda trima. Dorang cuma da bilang pa dia, ‘Sapa so tu da angka pa ngana jadi torang pe bos? Kong sapa tu da tunjung pa ngana for urus torang pe masala?’ Mar Tuhan Allah yang utus pa Musa lewat Dia pe malaekat. Tu malaekat itu yang da batunjung pa Musa di tenga-tenga api yang da kaluar dari rumpu baduri. Di situ Tuhan Allah utus pa Musa jadi orang Israel pe pemimpin deng lei jadi orang yang se bebas pa dorang dari tana Mesir. Musa tu da bawa orang-orang Israel kaluar dari Mesir, kong waktu itu dia beking hal-hal luar biasa deng tanda-tanda ajaib di Mesir, di Laut Mera deng lei di padang gurun slama 40 taong. Kong Musa ini lei yang da bilang pa orang-orang Israel bagini, ‘Tuhan Allah mo utus satu nabi for ngoni sama deng Dia so utus pa kita jadi nabi. Tu orang itu satu dari antara torang pe sudara-sudara orang Israel.’ Musa ini tu da sama-sama deng torang pe nene moyang orang Israel di padang gurun. Waktu di Gunung Sinai, ada malaekat yang babicara deng dia. Waktu itu Musa da trima tu firman yang beking orang bole hidop, kong tu firman itu so sampe pa torang pe nene moyang lewat Musa, deng lei so sampe pa torang samua. Mar torang pe nene moyang nimau badengar pa Musa. Malatare dorang nyanda trima pa dia kong pa dorang pe dalam hati dong suka mo babale ulang ka Mesir. Tu torang pe nene moyang lei bilang pa Harun bagini, ‘Harun, tu Musa itu da bawa pa torang kaluar dari Mesir, mar skarang torang nintau apa tu da jadi pa dia. So itu beking akang jo patong opo-opo for torang mo semba, nanti tu patong-patong itu yang mo pimpin pa torang.’ Jadi waktu itu, dorang beking satu patong tu de pe model sama deng sapi pe anak. Kong dorang potong binatang for kase persembahan pa tu patong itu, trus dorang rame-rame beking prayaan for tu patong yang dorang da beking. So itu Tuhan Allah kase tinggal pa dorang kong kase biar dorang semba pa bintang-bintang. Samua itu da tatulis di kitab nabi-nabi bagini, ‘Hei orang-orang Israel! Waktu ngoni tinggal slama ampa pulu taong di padang gurun, ngoni nyanda perna kase korban persembahan deng persembahan laeng pa Kita. Malatare ngoni cuma da bawa tu ngoni pe tenda yang da isi patong dari ngoni pe opo Molokh deng lei tu patong bintang dari opo Refan. Tu patong-patong itu yang ngoni da beking for ngoni mo semba akang. So itu Kita mo buang pa ngoni di tampa yang jao skali di negri Babel pe sabla.’ ” Kong Stefanus bilang lei, “Waktu di padang gurun, torang pe nene moyang ja bawa satu tenda tu tampa Tuhan Allah ja datang pa dorang. Tu tenda itu Musa da beking iko tu model yang Tuhan Allah da kase tunjung pa dia. Abis itu, torang pe nene moyang so bawa maso tu tenda itu ka tana Israel ini. Dorang da bawa maso tu tenda itu, waktu Yosua da pimpin pa dorang rampas tu tana ini dari pa bangsa-bangsa laeng. Tu bangsa-bangsa itu Tuhan Allah da user di muka pa torang pe nene moyang. Kong tu Tenda itu da pake trus sampe Daud jadi raja. Tuhan Allah sayang pa Daud. Kong Daud bamohon pa Tuhan Allah mo beking Ruma Ibada Pusat for Tuhan Allah tu Yakub deng de pe keturunan ja semba. Mar bukang Daud yang da beking, de pe anak tu de pe nama Salomo yang da beking itu. Padahal, Tuhan Allah yang Mahatinggi nyanda tinggal di ruma-ruma tu manusia da beking. Dulu, torang pe nabi kase tau tu Tuhan Allah da bilang bagini, ‘Langit itu Kita pe tahta, bumi itu Kita pe tampa for taru Ta pe kaki. Ruma tu model bagimana yang ngoni mo beking for Kita? Tu tampa yang model bagimana tu Kita mo istirahat akang? Soalnya, samua yang ada Kita tu da beking.’ ” Abis itu, Stefanus bilang lei, “Ngoni ini memang kapala batu! Ngoni sama deng tu orang yang nyanda ja iko pa Tuhan Allah kong nimau ja badengar pa Dia. Ngoni slalu ja malawang pa Roh Kudus sama deng tu torang pe nene moyang. Co ngoni bilang kamari, sapa-sapa dari tu nabi-nabi yang torang pe nene moyang nyanda ja siksa? Malatare dorang bunung tu nabi-nabi yang da kase tau kalu tu Kristus Yang Butul itu mo datang. Kong ngoni lei, serta Dia so datang, ngoni hianati deng bunung pa Dia. Ngoni so trima tu atoran-atoran di kitab Taurat yang malaekat-malaekat da kase tau, mar ngoni nyanda beking itu.” Waktu tu anggota-anggota Mahkamah Agama dengar samua itu, dorang jadi saki hati kong mara skali pa dia. Mar Stefanus yang Roh Kudus da kuasai, bahaga ka langit kong dia lia Tuhan Allah yang luar biasa, dia lia lei Yesus da badiri di sabla kanan pa Tuhan Allah, tu tampa yang terhormat. Kong Stefanus bilang, “Co lia! Kita lia langit tabuka kong tu Anak Manusia da badiri di sabla kanan pa Tuhan Allah.” Pe dengar itu, tu orang-orang di situ babataria deng tutu dong pe talinga, trus dorang srang pa Stefanus. Dorang hela pa dia kaluar kota. Kong tu orang-orang yang jadi saksi di situ buka tu dorang pe juba trus dorang taru di muka pa satu nyong tu de pe nama Saulus. Abis itu, dorang lempar deng batu pa Stefanus. Kong samantara dorang ja lempar pa Stefanus, dia basombayang, “Oh Tuhan Yesus, trima akang pa kita pe roh.” Abis itu, dia berlutut kong babilang deng suara kuat, “Tuhan, jang hukum pa dorang lantaran da beking tu dosa ini!” Klar bilang bagitu Stefanus mati. Saulus lei stuju waktu dorang da bunung pa Stefanus. Waktu itu, tu orang-orang yang percaya pa Yesus mulai dapa siksa hebat di Yerusalem. Jadi dorang tafiaro ka daera-daera di Yudea deng Samaria, mar tu rasul-rasul tetap tinggal di Yerusalem. Tu orang-orang yang ja iko Tuhan pe mau ambe Stefanus pe mayat kong se kubur, trus dorang manangis akang lei pa dia. Mar Saulus brusaha for mo kase abis tu orang-orang yang percaya pa Yesus. Dia maso ka ruma satu kong ka ruma laeng trus hela kaluar tu laki-laki deng parampuang, trus kase maso pa dorang ka bui. Tu orang-orang percaya yang so tafiaro itu kase tau tu Kabar Bae tentang Yesus kamana-mana. Kong Filipus pi ka satu kota di daera Samaria. Di situ dia se tau pa orang-orang tentang Kristus, tu Raja yang se slamat pa manusia. Tu orang-orang di situ da dengar tu Filipus da bilang deng lei da lia samua tanda-tanda ajaib tu dia da beking, jadi dorang samua tarukira bae-bae samua tu Filipus da bilang. Waktu itu, ada banya orang yang da kemasukan setang, kong Filipus user tu setang-setang dari pa dorang, trus tu setang-setang itu kaluar deng babataria. Ada banya lei orang lumpu deng orang kento yang dia da kase bae. So itu, orang-orang di kota itu jadi snang skali. Di situ, ada satu orang tu de pe nama Simon. Dia itu so lama ja bapokos-pokos kong beking tu orang-orang Samaria taheran-heran. Dia ja angka de pe diri sama deng dia itu paling jago. Samua orang di situ, sapa jo dia badengar pa Simon. Dorang ja bilang, “Tu orang ini ada kuasa dari Tuhan Allah, tu ja bilang Kuasa Basar.” Dorang itu iko pa dia, lantaran so lama dia ja beking dorang taheran-heran pake de pe pokos-pokos. Mar Filipus da mangajar pa dorang tu Kabar Bae tentang bagimana Tuhan Allah Berkuasa sbagai Raja deng bagimana percaya kalu Yesus itu Kristus tu Raja yang se slamat pa manusia. Jadi waktu dorang da dengar tu Filipus da bilang, dorang jadi percaya kong dorang dapa baptis, bae itu laki-laki ato parampuang. Simon lei jadi percaya kong dapa baptis. Klar itu, dia ja iko pa Filipus ka mana jo Filipus pigi. Kong waktu dia lia tu mujisat-mujisat deng tanda-tanda ajaib tu Filipus da beking, dia jadi taheran-heran. Waktu itu, tu rasul-rasul yang ada di Yerusalem dapa dengar kalu banya orang di daera Samaria so percaya tu Tuhan Allah pe firman tentang Yesus. So itu dorang utus pa Petrus deng Yohanes ka sana. Pe sampe di sana, tu dua rasul itu basombayang supaya tu orang-orang Samaria yang so percaya bole mo trima tu Roh Kudus. Dorang basombayang bagitu lantaran Roh Kudus blum ada pa tu orang-orang Samaria itu. Soalnya tu orang-orang itu baru da dapa baptis dalam nama Yesus. Jadi, Petrus deng Yohanes taru dong pe tangan pa tu orang-orang Samaria itu, trus dorang trima tu Roh Kudus. Waktu itu, Simon da lia rasul-rasul itu taru dong pe tangan pa orang-orang, kong tu orang-orang itu trima tu Roh Kudus. So itu, dia coba kase doi pa Petrus deng Yohanes supaya dia lei bole beking bagitu. Dia babilang, “Bapak-bapak, kase akang lei pa kita tu kuasa itu supaya kalu kita taru ta pe tangan pa orang, tu orang itu bole mo trima Roh Kudus.” Mar Petrus bilang pa dia, “Cilaka jo ngana deng ngana pe doi, lantaran ngana kira ngana bole mo bli tu Tuhan Allah pe kuasa. Kalu bagitu, ngana nimbole sama-sama deng torang beking tu Tuhan pe karja ini, lantaran ngana pe hati nyanda butul di muka pa Tuhan Allah. So itu, bertobat jo dari ngana pe pikiran-pikiran jaha itu, kong basombayang jo pa Tuhan supaya Dia kase ampung tu ngana pe pikiran jaha itu. Soalnya kita lei tau kalu ngana pangmangiri skali sama deng tu empedu yang pe pait skali, deng dosa so kuasai pa ngana sama deng ngana so maso di prangkap.” Kong Simon bilang, “Bapak-bapak, se sombayang akang for kita pa Tuhan Allah, supaya tu ngoni da bilang pa kita itu nyanda mo jadi.” Serta Petrus deng Yohanes so kase tau pa orang-orang tu Tuhan pe firman deng apa tu dorang da lia tu Yesus da beking dulu, trus dorang babale ulang ka Yerusalem. Kong di jalang, dorang ja basingga di kampung-kampung laeng di daera Samaria kong kase tau pa orang-orang tu Kabar Bae tentang Yesus. Satu kali, Tuhan Allah pe malaekat suru pa Filipus, “Filipus, pigi jo ka slatan. Ngana iko jo tu jalang yang baturung dari Yerusalem ka Gaza.” Tu jalang itu pe sunyi. Pe dengar itu, Filipus iko pigi. Waktu di tenga jalang, dia lia ada satu orang pejabat dari Etiopia. Tu orang itu ja urus samua harta dari Kandake ato Ratu yang kuasai negri Etiopia. Tu pejabat itu baru klar iko ibada di Yerusalem. Waktu itu dia da bapulang ka Etiopia. Dia da dudu pa de pe kreta kong da babaca tu kitab nabi Yesaya. Trus Roh Kudus bilang pa Filipus, “Pi badekat jo ngana di kreta itu!” Filipus capat-capat pigi badekat di kreta itu, kong dia dengar tu pejabat itu da babaca tu kitab nabi Yesaya. Trus Filipus batanya pa dia, “Bapak mangarti apa tu bapak da baca itu?” Tu pejabat manyao, “Kita nyanda mangarti no. Musti ada orang yang mo trangkan pa kita baru kita mangarti.” Kong tu pejabat itu mohon pa Filipus supaya dudu sama-sama deng dia. Tu pejabat da baca tadi, de pe bunyi bagini, “Orang-orang bawa pa Dia sama deng da bawa domba for mo potong. Dia lei cuma babadiam, nyanda bicara apa-apa, sama deng domba waktu orang da gunting de pe bulu. Abis itu, orang-orang bahina pa Dia, kong Dia pe perkara dorang urus nyanda adil. Trus dorang bunung pa Dia, kong Dia nyanda ada keturunan.” Trus tu pejabat batanya pa Filipus, “Tolong dang bapak kase tau akang pa kita. Tu nabi ini da bilang dia pe diri sandiri ato orang laeng?” Abis itu, Filipus pake tu bagian-bagian itu kong mulai se cirita tu Kabar Bae tentang Yesus. Waktu dorang bajalang trus deng dong pe kreta, dorang sampe di tampa yang ada aer. Kong tu pejabat itu bilang pa Filipus, “Co lia, di situ ada aer! Bagimana, so bole stou kita dapa baptis?” [ Kong Filipus manyao, “Kalu bapak percaya, bapak so bole dapa baptis.” Tu pejabat itu manyao, “Kita percaya kalu Yesus Kristus itu Anak Allah.”] Abis bilang bagitu, tu pejabat suru se brenti tu kreta. Trus dorang dua turung maso ka dalam aer, kong Filipus baptis pa dia. Waktu dorang dua kaluar dari aer, kage-kage Tuhan Allah pe Roh bawa pa Filipus dari situ ka tampa laeng, kong tu pejabat itu so nyanda perna lia lei pa dia. Mar tu pejabat se trus de pe perjalanan deng hati snang. Tu Filipus kote, kage-kage so ada di satu kampung tu de pe nama Asdod. Dari situ dia bajalang trus kong se tau pa orang-orang tu Kabar Bae tentang Yesus di samua kota sampe di Kaisarea. Waktu itu lei, Saulus masi suka ja baancam deng bunung tu orang-orang yang ja iko pa Yesus. Dia pi mangada pa imam basar, kong dia minta surat kuasa for mo bawa ka ruma-ruma ibada agama Yahudi di Damsyik. Tu surat itu dia mo pake di sana supaya kalu dia dapa tu laki-laki ato parampuang yang ja iko pa Yesus, dia mo tangka kong bawa pa dorang itu ka Yerusalem. Waktu Saulus so di tenga jalang so dekat deng tu kota Damsyik, kage-kage ada sinar dari langit yang bapancar bakliling pa Saulus. Trus dia tajatung ka tana kong dia dengar ada suara yang babilang bagini, “Saulus, Saulus, kiapa dang ngana siksa pa Kita?” Saulus manyao, “Sapa dang ini?” Tu suara itu manyao, “Kita ini Yesus yang ngana ja siksa itu. Mar skarang badiri jo kong pi maso ka kota Damsyik. Nanti di sana ada yang mo se tau pa ngana apa tu ngana musti mo beking.” Waktu itu, tu orang-orang yang da sama-sama deng dia jadi heran deng tabingo-bingo. Soalnya dorang da dengar tu suara itu, mar dorang nyanda lia sapa-sapa. Abis itu, Saulus badiri kong buka tu de pe mata, mar dia nyanda dapa balia. So itu dorang kele pa dia maso ka Damsyik. Slama tiga hari dia jadi buta kong nyanda makang deng minum. Di Damsyik ada tu satu orang yang ja iko pa Yesus, de pe nama Ananias. Kong Tuhan babicara pa Ananias lewat penglihatan. Di penglihatan itu, Tuhan da pangge pa dia, “Ananias!” Kong Ananias manyao, “Ya, Tuhan!” Trus Tuhan bilang pa dia, “Ngana pigi jo pa satu orang pe ruma, tu orang itu nama Yudas. Dia pe ruma ada di Jalang Tre. Di situ ngana cari tu satu orang yang de pe nama Saulus. Dia itu dari Tarsus, kong dia da samantara basombayang. Saulus ini so dapa penglihatan. Pa de pe penglihatan itu, dia da lia satu orang laki-laki tu de pe nama Ananias datang pa dia kong taru tangan di atas pa dia supaya bole balia ulang.” Mar Ananias manyao, “Ado Tuhan, kita so dengar tentang dia dari banya orang. Dia so banya da siksa tu orang-orang yang percaya pa Yesus di Yerusalem. Kong skarang dia so datang kamari, kong dia da bawa surat kuasa dari tu imam-imam kapala di Yerusalem. Tu surat itu dia mo pake supaya bole tangka tu orang-orang yang percaya pa Yesus tu ada di sini.” Mar Tuhan bilang pa dia, “Ngana pigi jo pa dia, lantaran Kita so pili tu orang itu for mo jadi Kita pe orang. Dia mo se tau tentang Kita pa orang-orang yang bukang Yahudi, pa raja-raja deng lei pa orang-orang Israel. Kita sandiri yang mo se tunjung pa dia kalu nanti dia mo dapa banya siksa lantaran da iko pa Kita.” Abis itu, Ananias pigi di ruma tu Saulus da tinggal akang kong maso di situ. Pe baku dapa deng Saulus, Ananias taru de pe tangan pa Saulus kong babilang, “Saulus, kita pe sudara orang Yahudi. Tuhan Yesus yang suru pa kita datang kamari. Dia itu yang ngana da lia di tenga jalang waktu ngana datang kamari. Dia suru pa kita datang pa ngana supaya ngana bole balia ulang deng lei supaya Roh Kudus kuasai pa ngana.” Waktu itu jo, ada tu sama deng ikang pe sisik taciri dari Saulus pe mata, kong dia so bole balia ulang. Trus Saulus bangong kong dapa baptis. Abis itu Saulus makang kong dia jadi kuat ulang. Saulus da tinggal bebrapa hari lei di Damsyik sama-sama deng orang-orang yang ja iko tu Yesus pe ajaran. Waktu itu jo, dia maso ka ruma-ruma ibada agama Yahudi kong kase tau pa orang-orang kalu Yesus itu Anak Allah. Samua orang yang da dengar pa Saulus jadi taheran-heran trus babilang, “Dia ini to yang ja siksa sapa jo yang percaya tu nama Yesus di Yerusalem? Torang kira dia lei datang kamari for mo tangka tu orang-orang yang percaya pa Yesus kong bawa pa imam-imam kapala di Yerusalem?” Mar biar lei bagitu, Saulus pe pengaru lebe tatamba basar. Dia se bukti dari Kitab Suci kalu Yesus butul-butul tu Mesias tu Raja yang mo se slamat pa manusia, kong tu orang-orang Yahudi di Damsyik itu nyanda mampu malawang pa Saulus. Serta so bebrapa hari Saulus da tinggal di Damsyik, orang-orang Yahudi baku skongkol mo bunung pa dia. Siang malam dorang bajaga di muka pintu gerbang kota supaya bole mo bunung pa dia. Mar dia dapa tau tu dorang pe rencana jaha itu. So itu satu malam, tu orang-orang yang ja iko pa Yesus bawa pa Saulus kong se turung pa dia pake kranjang basar dari tu dinding batu yang da se kliling di kota. Abis itu, Saulus pigi ka Yerusalem. Pe sampe di sana, dia coba pi bagabung deng orang-orang yang ja iko pa Yesus. Mar dorang tako pa dia lantaran dorang blum yakin kalu dia butul-butul ja iko pa Yesus. Mar Barnabas ada di situ, kong dia bawa pa Saulus pigi pa rasul-rasul. Trus dia se cirita pa dorang bagimana Saulus da lia pa Tuhan di tenga jalang waktu mo ka Damsyik. Barnabas se cirita lei bagimana Tuhan da babicara pa Saulus kong lei tu Saulus pe brani da mangajar tentang Yesus pa orang-orang di Damsyik. Deng bagitu, Saulus bole tinggal sama-sama deng tu orang-orang yang ja iko pa Yesus pe ajaran di Yerusalem. Saulus lei brani mangajar pa orang-orang di situ tentang Tuhan. Saulus babicara kong baku ambe pendapat deng orang-orang Yahudi yang ja pake bahasa Yunani. Mar dorang nyanda trima tu Saulus da bilang, kong dorang cari jalang mo bunung pa dia. Waktu tu sudara-sudara yang percaya dapa tau tu rencana itu, dorang bawa pa Saulus ka Kaisarea. Dari situ dorang bantu pa dia supaya bole pigi ka Tarsus. Abis itu, jemaat di sluru daera Yudea, Galilea deng Samaria hidop baku-baku bae. Dorang pe iman jadi kuat kong dorang hidop deng punung rasa hormat pa Tuhan Allah. Tu Roh Kudus da se smangat pa dorang, kong dorang lebe tatamba banya. Waktu itu, Petrus pigi ka banya tampa for baku dapa deng Tuhan pe orang-orang, dia lei basingga pa Tuhan pe orang-orang yang ada di kampung Lida. Di situ dia baku dapa deng satu laki-laki, tu de pe nama Eneas. Eneas ini so dlapan taong kurang da tidor-tidor lantaran lumpu. Kong Petrus bilang pa dia, “Eneas, Yesus Kristus so kase bae pa ngana. So itu, bangong jo kong manimpang tu ngana pe tampa tidor!” Waktu itu jo, Eneas iko bangong. Waktu samua orang di kampung Lida deng daera Saron da lia kalu Eneas so bae, dorang jadi percaya pa Tuhan. Di Yope, ada satu parampuang tu dia pe nama Tabita, tu dalam bahasa Yunani Dorkas. Tabita itu orang yang ja iko pa Yesus. Dia itu ja beking tu hal-hal bae deng ja batolong pa orang-orang susa. Waktu itu, dia da dapa saki kong mati. Abis itu orang kase mandi tu dia pe mayat kong taru di kamar yang ada di lante atas. Tu Lida itu baku dekat deng Yope. Jadi tu orang-orang yang ja iko pa Yesus dapa dengar kalu Petrus ada di Lida. So itu dorang suru dua orang pigi pa Petrus kong bamohon pa dia, “Bapak Petrus, tolong kwa bapak capat datang ka Yope.” So itu, Petrus iko basadia kong pigi deng dorang ka Yope. Pe sampe di sana, dorang antar pa dia di kamar yang ada di lantai dua. Samua janda yang ada di situ pi badekat pa Petrus. Trus deng mamanangis dorang se tunjung pa dia tu samua baju deng juba yang Tabita da beking waktu dia masi hidop. Mar Petrus suru pa dorang samua kaluar. Abis itu, dia berlutut kong basombayang. Dia mangada di mayat trus babilang, “Tabita, bangong jo!” Kong Tabita buka de pe mata. Dia pe lia pa Petrus, dia bangong kong dudu. Petrus pegang Tabita pe tangan kong bantu pa dia badiri. Abis itu Petrus pangge tu janda-janda deng samua orang percaya yang laeng, kong kase tunjung pa dorang kalu tu Tabita so hidop ulang. Tu kejadian itu tasiar ka samua daera di Yope kong banya orang jadi percaya pa Tuhan. Abis itu Petrus tinggal sadiki lama di Yope di ruma pa Simon tu de pe karja ja beking bersi kuli binatang. Di Kaisarea ada tu satu laki-laki, de pe nama Kornelius. Dia itu perwira Romawi yang bapimpin satu klompo tentara, tu klompo itu pe nama Tentara Italia. Dia rajin iko Tuhan Allah pe mau. Dia deng de pe kluarga ja basemba pa Tuhan Allah. Dia ja bantu orang-orang Yahudi yang susa, deng dia lei rajin basombayang pa Tuhan Allah. Satu kali, kira-kira jam tiga sore waktu jam sombayang agama Yahudi, Kornelius dapa penglihatan. Waktu itu, dia dapa lia deng jelas Tuhan Allah pe malaekat datang kong bapangge pa dia, “Kornelius!” Kornelius bahaga pa tu malaekat itu kong dia jadi tako skali, trus dia babilang, “Ada apa, Tuhan?” Tu malaekat itu manyao pa dia, “Tuhan Allah so dengar samua tu bapak pe sombayang, deng Dia so lia tu ngana ja kase pa orang-orang susa. Tuhan Allah da inga tu bapak ja beking itu. Skarang, suru jo bebrapa orang pigi ka Yope for pi ambe pa satu orang tu de pe nama Simon, yang orang ja pangge lei Petrus. Dia da manumpang pa satu orang pe ruma di pinggir pante. Tu orang itu pe nama lei Simon. Dia ini pe karja ja beking bersi kuli binatang.” Waktu tu malaekat so abis bicara deng Kornelius, tu malaekat se tinggal pa dia. Abis itu, Kornelius pangge tu de pe dua orang karja deng lei satu tentara yang ja kawal pa dia. Tu tentara itu lei ja iko Tuhan Allah pe mau. Kong Kornelius se tau tu de pe penglihatan pa dorang, trus dia suru pa dorang pigi ka Yope for mo ambe pa Petrus. De pe eso, tu tiga orang itu so dekat deng Yope. Waktu itu kira-kira tenga hari, jadi Petrus nae ka atas ruma for mo basombayang. Di situ Petrus rasa lapar, mar tu makanan masi samantara ja ator. Kage-kage dia dapa penglihatan. Dia dapa lia langit tabuka kong turung dari langit ka bumi sesuatu yang sama deng kaeng basar yang da tagantong pa de pe ampa ujung. Kong di dalam tu kaeng itu ada rupa-rupa binatang: ada binatang kaki ampa, binatang ja maraya deng burung. Trus dia dapa dengar suara da babilang pa dia, “Petrus, badiri jo. Ambe tu binatang-binatang kong potong, abis itu makang jo.” Mar Petrus cuma da manyao, “Nyanda Tuhan. Kita nyanda perna makang binatang-binatang yang haram deng najis kalu iko torang pe atoran agama.” Mar tu suara babilang kadua kali, “Apa yang Tuhan Allah so beking jadi halal, jang ngana bilang itu haram.” Itu samua da jadi sampe tiga kali, kong abis itu tu kaeng iko taangka ulang ka langit. Abis itu, Petrus jadi bingo kong da bapikir-pikir tentang tu penglihatan itu pe arti. Pas waktu itu, tu orang-orang yang Kornelius da suru so sampe di ruma tu Petrus da manumpang akang, kong dorang da badiri di muka pintu. Trus dorang pangge orang yang ada di situ kong dorang da batanya kalu Simon tu ja bilang lei Petrus da manumpang di ruma itu ato nyanda. Waktu itu, Petrus masi bapikir-pikir tentang tu penglihatan itu pe arti. Kong tu Tuhan pe Roh bilang pa dia, “Petrus, ada tiga orang da cari pa ngana. So itu badiri jo kong turung ka bawa, trus pigi jo sama-sama deng dorang. Ngana nyanda usa ragu-ragu lantaran Kita yang da suru pa dorang kamari.” Pe dengar itu, Petrus turung ka bawa. Waktu dia baku dapa deng tu tiga orang itu, dia bilang pa dorang, “Kita ini yang ngoni da cari. Kiapa dang ngoni datang kamari?” Kong dorang manyao, “Bagini bapak, torang pe perwira Romawi da suru pa torang for datang kamari. Dia pe nama Kornelius. Dia rajin iko Tuhan Allah pe mau deng ja basemba pa Tuhan Allah. Kong samua orang dari bangsa Yahudi bilang kalu dia itu orang bae-bae. Satu kali, Tuhan Allah pe malaekat da suru pa dia for mo undang pa bapak pigi pa de pe ruma, supaya dia bole mo dengar apa tu bapak mo bilang pa dia.” Pe dengar itu, Petrus undang pa dorang supaya manginap di situ. De pe eso, Petrus basadia kong pigi sama-sama deng tu tiga orang itu. Ada lei bebrapa sudara yang percaya dari Yope yang iko pa dia. De pe hari brikut baru dorang sampe di Kaisarea. Di situ Kornelius da tunggu-tunggu pa dorang. Dia lei da suru bakumpul dia pe kluarga deng dia pe tamang-tamang bae for mo dengar apa tu Petrus mo bilang. Waktu Petrus mo maso ka ruma, Kornelius dola pa dia kong berlutut di muka pa Petrus for mo semba pa dia. Mar Petrus se badiri pa Kornelius kong bilang, “Bapak badiri jo, kita ini cuma manusia.” Kong samantara dorang dua babacirita, dorang maso ka dalam ruma. Di situ Petrus lia banya orang so bakumpul. Kong Petrus bilang, “Sudara-sudara! Ngoni sandiri so tau torang orang Yahudi pe adat. No kalu mo iko tu torang pe adat itu, torang nimbole bergaul deng orang-orang bukang Yahudi sama deng ngoni ini, torang lei nimbole pigi pa ngoni yang bukang Yahudi pe ruma lantaran samua itu najis ato haram for torang. Mar Tuhan Allah so kase tau pa kita, kalu nyanda ada orang yang najis di muka pa Tuhan Allah. So itu, waktu ngoni undang pa kita for datang kamari, kita nyanda tolak. No skarang, kita mo tanya pa ngoni, kiapa dang sampe ngoni pangge pa kita datang kamari?” Kong Kornelius manyao, “Ampa hari lalu, waktu jam tiga sore kira-kira sama deng skarang ini, kita da basombayang pa kita pe ruma. Kage-kage ada satu orang pake baju mangkilat badiri di muka pa kita. Trus dia bilang bagini, ‘Kornelius, Tuhan Allah so dengar samua tu ngana pe sombayang, deng Dia da tarukira tu ngana ja kase pa orang-orang susa. Jadi, ngana suru jo orang pigi ka Yope for mo pi ambe pa Simon tu ja pangge lei Petrus. Dia da manumpang pa Simon pe ruma di pinggir pante, tu Simon itu pe karja ja beking bersi kuli binatang.’ So itu kita iko suru orang pi ambe pa bapak, kong pe bae skali sampe bapak bole datang kamari. Skarang, torang samua so ada di sini di muka pa Tuhan Allah for mo dengar apa yang Dia so kase tau pa bapak.” Petrus mulai babicara pa dorang, “Sudara-sudara! Skarang kita baru butul-butul tau kalu Tuhan Allah nyanda ja pili-pili orang. Tuhan Allah trima samua orang dari tiap suku bangsa yang hormat pa Dia deng lei yang ja beking tu butul di muka pa Dia. Ngoni pasti so tau apa tu Tuhan Allah da kase tau skarang ini pa orang-orang Israel. Dia kase tau pa dorang tu Kabar Bae tentang Yesus Kristus tu Raja yang se slamat pa manusia. Yesus Kristus ini yang bole beking dorang pe hubungan deng Tuhan Allah jadi bae. Dia itu yang jadi Tuhan for samua orang. Ngoni lei so tau samua yang baru-baru ini da jadi di sluru daera Yudea. Itu mulai waktu Yohanes da kase tau pa orang-orang kalu dorang musti dapa baptis for jadi tanda kalu dorang so bertobat. Tuhan Allah da kase Dia pe Roh Kudus deng De pe kuasa pa Yesus tu orang Nazaret. Abis itu, Yesus bajalang bakliling kong beking tu bae pa orang-orang deng lei Dia kase bae orang yang setang pe bos da kuasai lantaran Tuhan Allah da sama-sama deng Dia. Torang tu rasul-rasul yang jadi saksi samua tu Yesus da beking di Yerusalem deng di samua daera tu torang orang Yahudi da tinggal akang. Tu orang-orang Yahudi di Yerusalem bunung pa Dia deng cara se paku pa Dia di kayu salib. Mar de pe katiga hari, Tuhan Allah kase hidop ulang pa Dia deng beking Dia supaya bole batunjung De pe diri. Mar nyanda samua orang Yahudi yang bole dapa lia pa Dia, cuma torang tu saksi-saksi yang Tuhan Allah so pili lebe dulu yang bole lia pa Dia. Torang ini no tu saksi-saksi itu. Torang yang so makang deng minum sama-sama deng Dia waktu Dia so hidop ulang dari kematian. Trus Dia suru pa torang kase tau tu Kabar Bae pa orang-orang. Kong torang lei musti basaksi kalu Yesus itu tu Orang yang Tuhan Allah so pili for mo adili pa samua orang yang masi hidop deng orang yang so mati. Dulu, samua nabi so perna basaksi tentang Dia yang mo datang, dorang bilang kalu orang percaya pa Dia, tu orang itu pe dosa-dosa mo dapa ampung lewat Dia pe nama itu.” Waktu Petrus masi babicara, tu Roh Kudus turung pa samua orang yang da badengar tu Petrus da bilang itu. Di situ ada lei tu orang-orang Yahudi yang percaya pa Yesus tu da iko deng Petrus dari Yope. Dorang itu jadi heran skali lantaran dorang blum perna lia Tuhan Allah kase cura tu karunia Roh Kudus pa tu orang-orang bukang Yahudi. Soalnya dorang da dengar tu orang-orang bukang Yahudi itu babicara pake bahasa-bahasa laeng yang Roh Kudus da kase, dorang itu da puji-puji pa Tuhan Allah. Kong Petrus bilang, “Ngoni so lia sandiri! Dorang so trima Roh Kudus sama deng tu torang da trima. Jadi skarang, nyanda ada orang yang bole mo larang pa dorang mo dapa baptis deng aer.” Abis itu, Petrus suru baptis pa dorang dalam nama Yesus Kristus. Klar itu dorang minta pa Petrus tinggal bebrapa hari sama-sama deng dorang. Waktu itu, tu rasul-rasul deng tu sudara-sudara yang percaya pa Yesus di sluru daera Yudea dapa dengar, kalu ada orang-orang bukang Yahudi yang so trima tu Kabar Bae dari Tuhan Allah. So itu, waktu Petrus so bale ulang ka Yerusalem, ada bebrapa orang Yahudi yang kase sala pa Petrus. Dorang itu so percaya pa Yesus mar da sunat lei iko tu atoran di kitab Taurat. Dorang bilang, “Kiapa bapak pigi di ruma pa orang-orang bukang Yahudi yang nyanda da sunat? Malatare bapak da makang sama-sama deng dorang!” Pe dengar itu, Petrus se cirita pa dorang apa tu da jadi pa dia mulai dari pertama. Dia bilang, “Satu hari waktu kita samantara basombayang di Yope, kita dapa penglihatan dari Tuhan Allah. Kita dapa lia sesuatu sama deng kaeng basar tu da tagantong pa de pe ampa ujung turung dari langit kong brenti di muka pa kita. Kong kita tarukira tu di dalam kaeng itu, kita lia ada rupa-rupa binatang: ada binatang kaki ampa, binatang liar, binatang ja maraya deng burung. Trus kita dapa dengar suara yang babilang pa kita bagini, ‘Petrus, badiri jo. Ngana potong jo tu binatang-binatang kong makang.’ Mar kita manyao, ‘Nyanda Tuhan. Kita nyanda perna makang binatang-binatang yang kalu iko torang pe agama itu haram deng najis.’ Mar tu suara itu babilang kadua kali dari langit, ‘Jang ngana bilang haram lei kalu Tuhan Allah so beking jadi halal.’ Itu samua da jadi sampe tiga kali. Abis itu, tu kaeng iko taangka ulang ka langit. Waktu itu jo, ada tiga orang da badiri di muka pintu ruma tu kita da manumpang akang. Dorang tiga itu dapa suru datang pa kita dari Kaisarea. Kong tu Roh Kudus babilang pa kita, ‘Pigi jo sama-sama deng dorang. Ngana nyanda usa tako biar dorang bukang orang Yahudi.’ Pe dengar itu, kita deng tu anam orang sudara-sudara yang percaya pa Yesus ini lei da pigi sama-sama ka Kaisarea. Pe sampe di sana, torang maso di ruma pa satu perwira Romawi. Trus tu perwira Romawi se cirita pa torang bagimana dia da lia malaekat da badiri pa de pe ruma. Tu malaekat itu bilang pa dia bagini, ‘Suru jo bebrapa orang pigi ka Yope, kong pi ambe pa Simon tu orang ja bilang lei Petrus. Dia yang nanti mo kase tau tu brita yang mo se slamat pa ngana deng samua ngana pe kluarga.’ Waktu kita mulai kase tau tu Kabar Bae pa dorang, tu Roh Kudus turung pa dorang sama deng tu da jadi pa torang tempo hari. Pe lia itu, kita dapa inga tu Tuhan da bilang, ‘Yohanes Pembaptis babaptis orang deng aer, mar ngoni mo dapa baptis deng Roh Kudus.’ Jadi sudara-sudara, Tuhan Allah sandiri yang da kase Roh Kudus pa tu orang-orang bukang Yahudi itu. Dia da kase tu Roh Kudus pa dorang sama deng tu Dia da kase pa torang ini waktu torang jadi percaya pa Tuhan Yesus Kristus. Jadi, nyanda mungkin to kita mo malawang tu Tuhan Allah pe rencana?” Pe dengar itu, tu orang-orang Yahudi yang percaya pa Yesus so nyanda se sala lei pa Petrus. Dorang puji deng hormat pa Tuhan Allah kong babilang, “Jadi, orang-orang bukang Yahudi lei Tuhan Allah so kase kesempatan for bertobat supaya dorang bole dapa hidop kekal.” Tempo hari, waktu orang-orang da bunung pa Stefanus, ada orang-orang yang percaya pa Yesus dapa siksa kong tafiaro kamana-kamana. Dari tu orang-orang percaya itu, ada tu da pigi ka daera Fenisia, pulau Siprus deng Antiokhia di daera Siria. Dorang itu kase tau tu Kabar Bae tentang Yesus cuma pa orang-orang Yahudi. Mar ada lei bebrapa orang yang percaya pa Yesus dari pulau Siprus deng Kirene tu da pigi ka Antiokhia. Di situ dorang mulai kase tau tu Kabar Bae tentang Yesus pa orang-orang bukang Yahudi. Kong Tuhan da sama-sama deng dorang sampe banya skali orang bukang Yahudi jadi percaya pa Yesus trus bertobat. Tu brita yang da jadi di Antiokhia itu tasiar sampe pa jemaat yang ada di Yerusalem. Abis itu, jemaat di Yerusalem utus pa Barnabas pigi ka Antiokhia. Waktu Barnabas sampe di sana, dia lia memang Tuhan Allah kase tunjung De pe bae pa orang-orang yang percaya di situ. Pe lia bagitu, dia jadi snang skali, kong dia kase smangat pa dorang supaya butul-butul setia pa Tuhan Yesus. Barnabas itu orang bae-bae, Roh Kudus da kuasai deng dia lei percaya skali pa Tuhan. So itu, banya orang yang da badengar pa dia jadi percaya pa Tuhan Yesus. Abis itu Barnabas kase tinggal Antiokhia kong pigi ka Tarsus for mo cari pa Saulus. Kong serta dia so baku dapa deng Saulus, dia bawa tu Saulus ka Antiokhia. Slama satu taong, dorang dua tinggal sama-sama deng tu jemaat di sana kong da mangajar pa orang banya tentang Yesus. Di Antiokhia, itu tu de pe pertama kali orang bilang ‘orang Kristen’ for tu orang yang ja iko pa Yesus. Waktu itu, bebrapa nabi datang dari Yerusalem ka Antiokhia. Dorang ini Tuhan Allah da kase tau tu De pe pesan kong dorang kase tau pa orang-orang. Satu dari pa dorang itu, de pe nama Agabus. Waktu tu orang-orang percaya bakumpul, Roh Kudus da pake pa Agabus kong dia badiri trus kase tau pa orang-orang di situ kalu nanti mo ada oras kelaparan pe hebat skali di sluru dunia. (Kong tu kelaparan itu memang da jadi waktu Klaudius jadi raja yang paling tinggi di krajaan Romawi.) So itu, tu orang-orang yang ja iko pa Yesus ambe keputusan for mo kumpul doi sumbangan kong kirim pa sudara-sudara yang percaya tu ada di daera Yudea. Dorang da bakase iko tu dong pe kemampuan masing-masing. Abis dorang kumpul tu doi, dorang tunjung pa Barnabas deng Saulus for mo bawa tu doi itu pa penatua-penatua di daera Yudea. Waktu itu, raja Herodes mulai ja siksa bebrapa orang percaya di Yerusalem. Dia prenta pa de pe orang supaya bunung pake peda pa Yakobus, tu Yohanes pe sudara. Waktu Herodes tau kalu tu dia da beking itu beking snang tu orang-orang Yahudi, dia suru lei tangka pa Petrus. Waktu itu pas hari raya Roti Nyanda Baragi. Serta Petrus so dapa tangka, Herodes suru kase maso ka bui tu Petrus. Kong Herodes suru ampa regu tentara baku ganti bajaga pa Petrus. Tiap regu ada ampa orang tentara. Herodes pe rencana kase maso Petrus ka bui supaya kalu so klar tu hari raya agama Yahudi tu prayaan Paskah, dia mo adili pa Petrus di muka pa orang banya. Bagitu no tu Petrus da dapa tahang di bui, mar tu jemaat nyanda brenti-brenti basombayang pa Tuhan Allah for dia. Di dalam bui, Petrus da tidor di tenga-tenga dua tentara, de pe tangan da ika pake rante sama-sama deng dorang. Ada tentara lei yang bajaga di muka pintu bui. Kong satu malam, seblum Herodes mo adili pa Petrus di muka banya orang, kage-kage Tuhan pe malaekat badiri di dekat pa Petrus. Trus tu di dalam bui itu jadi trang skali. Tu malaekat itu kore pa Petrus for mo se bangong pa dia kong babilang, “Petrus, capat jo bangong!” Abis bilang bagitu, tu rante yang da ika pa Petrus pe tangan iko talapas. Trus tu malaekat bilang lei pa dia, “Pake jo tu ngana pe baju deng capatu.” Kong Petrus beking tu malaekat da bilang. Abis itu, tu malaekat bilang lei pa dia, “Pake tu ngana pe juba kong iko pa kita.” Petrus iko pa tu malaekat for kaluar dari bui. Waktu itu, Petrus pe kira itu cuma penglihatan, mar dia nintau kote kalu tu malaekat butul-butul da bawa pa dia kaluar dari bui. Dorang bajalang lewat di pos jaga pertama, trus lewat di pos jaga kadua kong dorang sampe di pintu gerbang yang da beking dari besi. Tu pintu gerbang itu tampa lewat kalu mo maso ato kaluar kota. Tu pintu tabuka sandiri for dorang, kong dorang bajalang kaluar dari situ sampe ka ujung jalang, trus kage-kage tu malaekat se tinggal pa dia. Abis itu Petrus sadar deng apa tu da jadi, kong dia bilang, “Skarang kita tau butul kalu Tuhan Allah so utus De pe malaekat for se slamat pa kita dari tu Herodes, deng dia lei so se slamat pa kita dari tu orang-orang Yahudi pe rencana jaha.” Abis dia bapikir-pikir sadiki, dia pigi pa Maria pe ruma. Maria itu Yohanes pe mama, tu Yohanes itu orang ja pangge lei Markus. Pa Maria pe ruma, banya orang yang percaya da bakumpul kong da basombayang. Pe sampe di situ, Petrus toki tu pintu gerbang. Kong ada satu pembantu parampuang, tu de pe nama Rode. Dia pigi di pintu gerbang for mo lia sapa tu da batoki. Kong waktu tu pembantu dengar Petrus babicara, dia dapa kanal tu Petrus pe suara. Mar lantaran de pe snang jo, dia nyanda buka tu pintu gerbang. Dia tare cuma da pi maso ulang ka dalam ruma kong kase tau pa orang-orang kalu Petrus ada di muka pintu gerbang. Mar dorang cuma da manyao, “Gila stou ngana!” Mar tu pembantu itu tetap bakras bilang kalu Petrus butul-butul ada. Dorang bilang lei, “Itu stou tu malaekat yang da jaga pa dia.” Samantara itu Petrus masi batoki trus. Kong waktu dorang buka tu pintu deng lia pa Petrus, dorang iko taheran-heran. Mar Petrus basein deng de pe tangan supaya dorang jadi tenang. Abis itu Petrus se cirita pa dorang bagimana Tuhan da bantu pa dia kaluar dari bui. Kong Petrus bilang lei pa dorang, “Ngoni kase tau samua ini pa Yakobus deng torang pe sudara-sudara laeng yang percaya pa Yesus.” Abis bilang bagitu, Petrus kaluar dari situ kong pigi ka tampa laeng. De pe eso pagi, waktu tu tentara-tentara lia Petrus so nyanda ada di bui, dorang jadi kacau. Dorang da cari-cari tau bagimana Petrus bole lapas dari bui. So itu Herodes suru de pe orang-orang pi cari pa Petrus, mar dorang nyanda dapa pa dia. Trus Herodes suru priksa tu tentara-tentara yang bajaga pa Petrus kong bunung pa dorang. Abis itu, Herodes pigi dari Yudea ka Kaisarea kong tinggal di situ. Orang Tirus deng orang Sidon ja babli makanan dari orang-orang di wilaya yang raja Herodes da kuasai. Mar waktu itu, Herodes mara pa orang-orang Tirus deng Sidon. So itu, orang-orang dari Tirus deng Sidon itu spakat for datang mangada pa dia. Dorang buju pa tu satu orang yang ja urus Herodes pe istana for tolong pa dorang. Tu orang itu de pe nama Blastus. Dorang minta tolong pa Blastus supaya bole baku bae deng Herodes, lantaran dorang pe negri ja babli makanan dari raja Herodes pe wilaya. Kong Herodes tentukan satu hari for mo trima pa dorang. Di hari itu, dia da pake de pe baju krajaan kong dudu di kadera raja. Abis itu dia mulai bapidato pa dorang. Kong tu orang banya puji pa dia deng suara kuat, “Ini tuhan pe suara bukang manusia pe suara!” Waktu itu Herodes kase biar dorang puji deng hormat pa dia, dia nyanda bilang kalu dorang musti puji deng hormat pa Tuhan Allah. Jadi waktu itu jo Tuhan pe malaekat hukum pa dia, kong cacing-cacing makang pa dia sampe mati. Samantara itu, orang-orang lebe se cirita tu Tuhan Allah pe firman kong lebe banya orang lei yang jadi percaya. Serta Barnabas deng Saulus so klar kase tu sumbangan di Yerusalem, dorang babale ulang ka Antiokhia. Ada satu orang yang da iko sama-sama deng dorang dari Yerusalem, tu orang itu pe nama Yohanes, tu ja bilang lei Markus. Di jemaat yang ada di Antiokhia, ada bebrapa nabi yang Tuhan Allah ja pake for kase tau Dia pe pesan pa orang-orang, deng ada lei orang-orang yang ja mangajar pa jemaat. Dorang itu: Barnabas, Simeon (tu ja pangge lei Itang), Lukius (tu orang Kirene), Menahem (tu dari kacili da piara sama-sama deng Herodes), deng lei Saulus. Satu kali, waktu dorang da baibada pa Tuhan deng bapuasa, Roh Kudus babilang, “Tunjung jo pa Barnabas deng Saulus for mo beking tu tugas yang Kita so sadia for dorang dua.” Pe klar bapuasa deng basombayang, dorang taru dong pe tangan pa Barnabas deng Saulus kong utus pa dorang dua for beking tu Tuhan da suru. Abis itu, Barnabas deng Saulus pigi for mo beking tu tugas yang Roh Kudus da suru pa dorang. Dorang pigi ka Seleukia, kong dari situ dorang blayar ka pulau Siprus. Pe sampe di Salamis di pulau Siprus, dorang dua kase tau tu Tuhan Allah pe firman di ruma-ruma ibada agama Yahudi. Waktu itu Yohanes tu ja pangge lei Markus da iko deng dorang for babantu. Abis itu, dorang pigi ka samua tampa di pulau itu sampe di Pafos. Di situ dorang baku dapa deng satu orang Yahudi, tu de pe nama Baryesus. Dia itu tukang sihir deng nabi palsu. Dia batamang deng gubernur di pulau itu, tu de pe nama Sergius Paulus. Tu gubernur itu pande skali. Dia pangge pa Barnabas deng Saulus lantaran dia suka mo dengar tu Tuhan Allah pe firman. Baryesus pe nama dalam bahasa Yunani Elimas, tu de pe arti tukang sihir. Dia da malawang pa Barnabas deng Saulus, kong dia brusaha supaya tu gubernur itu nyanda mo percaya pa Yesus. Mar Roh Kudus da kuasai pa Saulus tu ja pangge lei Paulus. Trus dia haga pa Baryesus kong babilang, “Hei setang pe bos pe anak! Ngana memang jaha deng tukang batipu orang. Ngana ja malawang samua tu butul. Ngana nyanda perna brenti ja se putar tu cara for trima pa Tuhan. Skarang, Tuhan hukum pa ngana jadi buta. Kong bebrapa hari ngana nyanda mo lia tu cahaya matahari.” Waktu itu jo, Baryesus jadi buta, sama deng ada awan da tutu pa dia sampe jadi glap. Dia babaraba cari orang yang mo pegang de pe tangan for tolong pa dia. Waktu tu gubernur lia apa tu da jadi, dia jadi percaya pa Yesus. Dia taheran-heran deng tu ajaran tentang Tuhan. Dari Pafos di pulau Siprus, Paulus deng dia pe tamang-tamang blayar ka Perga di daera Pamfilia. Mar Yohanes kase tinggal pa dorang di situ kong dia pulang ka Yerusalem. Kong dari Perga, Paulus deng de pe tamang-tamang bajalang trus sampe ka Antiokhia di daera Pisidia. Waktu hari Sabat, dorang maso kong dudu di ruma ibada agama Yahudi. Di situ, ada orang babaca atoran-atoran di kitab Taurat deng lei kitab nabi-nabi. Pe klar babaca, tu pemimpin-pemimpin ruma ibada itu suru orang bilang pa Paulus deng Barnabas, “Bapak-bapak, kalu ada tu ngoni mo bilang for se smangat pa torang iko pa Tuhan, bilang jo skarang!” So itu, Paulus badiri kong basein deng de pe tangan pa tu orang-orang di situ supaya badiam. Trus dia babilang pa dorang, “Sudara-sudara orang Israel deng orang-orang bukang Yahudi yang ja basemba pa Tuhan Allah, co dengar akang pa kita! Tuhan Allah so pili tu torang orang Israel pe nene moyang dari dulu. Waktu dorang ada di tana Mesir tu bukang dorang pe negri, Tuhan Allah beking dorang pe bangsa jadi banya skali orang. Abis itu, Tuhan Allah deng De pe kuasa bawa pa dorang kaluar dari tu tana Mesir itu. Abis itu, dorang hidop di padang gurun de pe lama ampa pulu taong. Di situ dorang pe kalakuan nyanda ja iko Tuhan Allah pe mau, mar Tuhan Allah tetap basabar pa dorang. Tuhan Allah da tolong pa dorang for kase abis tuju suku bangsa yang ada di tana Kanaan. Abis itu, Dia se berbage tu tana itu pa torang pe nene moyang for jadi dorang punya. Tu Tuhan Allah da beking samua itu, de pe lama ampa ratus lima pulu taong. Abis itu, Tuhan Allah pili orang-orang yang ja adili torang pe nene moyang pe perkara. Dorang itu yang ja pimpin pa torang pe nene moyang sampe Tuhan Allah pili pa nabi Samuel. Waktu itu, tu torang pe nene moyang minta pa Tuhan Allah satu orang for jadi dorang pe raja. So itu Tuhan Allah kase pa dorang satu orang raja, tu de pe nama Saul. Dia itu Kish pe anak, dari suku Benyamin. Saul jadi raja de pe lama ampa pulu taong. Abis itu, Tuhan Allah kase brenti pa Saul jadi raja, trus Dia pili pa Daud jadi raja for mo ganti pa Saul. Kong tentang Daud ini, Tuhan Allah perna da kase tau bagini, ‘Kita so tarukira pa Daud tu Isai pe anak. Dia ja beking Kita pe hati snang, deng ja beking samua tu Kita pe mau.’ Dari Daud pe keturunan ini, Tuhan Allah tunjung satu Orang for se slamat pa orang Israel, so Dia itu no tu Yesus. Mar seblum Dia datang, ada satu orang tu de pe nama Yohanes. Yohanes yang da kase tau pa samua orang Israel kalu dorang musti bertobat kong dapa baptis. Waktu Yohanes pe tugas so mo klar, dia bilang pa orang-orang, ‘Ngoni pikir kita ini sapa? Kita ini bukang Orang yang mo se slamat pa torang orang Israel. Mar, ngoni tarukira jo bae-bae. Abis kita, ada satu Orang yang mo datang. Hele mo bantu for buka Dia pe tali capatu sama deng tu biasa orang karja ja beking, kita nyanda pantas.’ Sudara-sudara, torang yang ada di sini, ada tu Abraham pe keturunan deng ada lei tu orang yang bukang Yahudi mar ja basemba pa Tuhan Allah. Pa torang samua ini Tuhan Allah so kase tau kalu Dia mo se slamat pa torang dari tong pe dosa-dosa. Tempo hari waktu Yesus datang, orang Israel yang da tinggal di Yerusalem deng dorang pe pemimpin-pemimpin nyanda kanal pa Dia. Dorang nyanda mangarti lei yang Tuhan Allah da kase tau pa tu nabi-nabi dulu tentang tu Kristus yang mo datang. Padahal yang Tuhan Allah da kase tau pa tu nabi-nabi itu ja se baca tiap hari Sabat. Jadi waktu dorang hukum mati pa Dia, dorang so se gnap yang Tuhan Allah da bilang dari dulu pa tu nabi-nabi kalu orang mo bunung pa Kristus. Padahal waktu itu torang pe pemimpin-pemimpin nyanda dapa alasan for mo kase hukuman mati pa Dia. Mar biar lei bagitu, dorang tetap minta pa Pilatus supaya kase hukuman mati pa Dia. Dulu tu nabi-nabi da bilang samua tu mo jadi pa Dia. Kong waktu dorang so beking samua tu nabi-nabi da bilang itu, dorang se turung pa Dia dari kayu salib kong se kubur. Mar Tuhan Allah kase hidop ulang pa Dia. Kong slama bebrapa waktu, Yesus batunjung De pe diri pa orang-orang yang perna iko pa Dia dari Galilea ka Yerusalem. So dorang itu yang jadi saksi for orang Israel. Kong skarang ini torang dua mo se tau tu Kabar Bae tentang Yesus, yang Tuhan Allah da janji dari dulu pa torang pe nene moyang. Tu janji itu Dia so se gnap pa torang ini deng cara so se hidop ulang pa Yesus. Itu sama deng tu da tulis di Mazmur kadua, tu da tulis bagini, ‘So Ngana tu Kita pe Anak, ini hari Kita so jadi Ngana pe Papa.’ Deng lei waktu Yesus so mati, Tuhan Allah so se hidop ulang pa Dia. Jadi waktu itu Dia pe badan nyanda busu, sama deng Tuhan Allah da bilang, ‘Tu Kita da janji pa raja Daud, itu janji yang Kudus kong pasti mo jadi pa ngoni ini.’ Bagitu lei di Mazmur yang laeng, tu da tulis bagini, ‘Tuhan nyanda kase biar tu Dia pe Orang Kudus pe badan mo busu di dalam kubur.’ Tu da tulis di Mazmur ini, bukang tentang Daud. Soalnya waktu Daud hidop, dia beking samua tu Tuhan Allah da suru pa dia, abis itu dia mati. Trus dorang kase kubur pa dia di sabla pa de pe nene moyang. Dia pe mayat lei memang so jadi busu. Mar waktu Yesus mati, Dia pe mayat nyanda busu di kubur, lantaran Tuhan Allah se hidop ulang pa Dia. Jadi sudara-sudara, torang kase tau pa ngoni kalu ngoni pe dosa-dosa bole dapa ampung lantaran Yesus so mati di kayu salib. Mar kalu torang cuma mo iko tu atoran-atoran di kitab Taurat, torang nyanda mo jadi butul di muka pa Dia. Jadi sapa yang percaya pa Yesus, tu orang itu mo jadi butul di muka pa Tuhan. So itu skarang ngoni musti hati-hati, supaya apa tu Tuhan Allah da bilang dulu lewat Dia pe nabi-nabi nyanda mo jadi pa ngoni. Bagini tu Dia da bilang, ‘Tarukira bae-bae hei ngoni yang ja bapandang enteng. Ngoni mo lia tu hal-hal yang luar biasa yang kita mo beking, sampe ngoni taheran-heran. Mar biar lei bagitu ngoni mo mati lantaran ngoni nyanda percaya, biar ada orang se cirita samua itu pa ngoni.’ ” Waktu so klar babicara, Paulus deng Barnabas bajalang kaluar dari ruma ibada itu. Mar tu orang-orang di situ bamohon pa dorang babale ulang minggu datang for babicara ulang tu hal-hal itu. Abis itu, tu orang-orang kaluar dari tu ruma ibada kong ada yang iko pa Paulus deng Barnabas. Dorang itu orang-orang Yahudi deng lei orang-orang bukang Yahudi yang so maso agama Yahudi. Paulus deng Barnabas kase nasehat pa dorang supaya tetap bagantong pa Tuhan Allah yang so se tunjung Dia pe bae pa dorang supaya dorang bole slamat dari tu hukuman dosa. De pe minggu datang pas hari Sabat, amper samua orang yang ada di Antiokhia datang bakumpul for badengar tu Tuhan pe firman yang Paulus deng Barnabas da se tau. Mar waktu tu pemimpin-pemimpin agama Yahudi lia tu orang pe banya itu, dorang jadi mangiri pa Paulus deng Barnabas. Kong dorang mulai bahina deng malawang samua tu Paulus ja bilang. Mar Paulus deng Barnabas deng brani manyao pa tu orang-orang itu, “Tu Tuhan Allah pe firman torang musti kase tau lebe dulu pa ngoni orang-orang Yahudi. Mar ngoni nimau percaya tu Tuhan Allah pe firman. Deng cara bagitu, ngoni rasa ngoni pe diri nyanda cocok mo dapa tu hidop kekal. So itu, skarang torang mo pigi pa orang-orang yang bukang Yahudi for mo kase tau tu Tuhan Allah pe firman itu. Soalnya Tuhan Allah da prenta pa torang bagini, ‘Kita so pili pa ngana, supaya ngana bole pigi kase tau tu kabar keslamatan pa orang-orang yang bukang Yahudi sampe ka ujung bumi. Deng bagitu, ngana mo jadi sama deng lampu yang beking trang pa dorang.’ ” Pe dengar itu, tu orang-orang yang bukang Yahudi jadi snang skali kong puji deng hormat tu Tuhan pe firman itu. Trus tu orang-orang yang Tuhan so pili mo dapa hidop kekal, dorang itu jadi percaya. Waktu itu, Tuhan pe firman tasiar ka samua tampa di daera itu. Mar tu orang-orang Yahudi malawang tu Tuhan pe firman. Dorang hasut tu parampuang-parampuang yang punya pengaru tu ja baibada pa Tuhan Allah deng lei pejabat-pejabat di situ. So itu, orang-orang siksa pa Paulus deng Barnabas kong user pa dorang dua dari daera itu. Kong Paulus deng Barnabas se paka tu abu dari pa dorang pe kaki, itu jadi tanda kalu Tuhan mo hukum pa orang-orang itu, kong dorang pigi ka Ikonium. Trus tu orang-orang yang ja iko pa Yesus tu ada di Antiokhia, dorang snang skali deng Roh Kudus da kuasai pa dorang. Waktu Paulus deng Barnabas di Ikonium, di situ lei dorang maso ka ruma ibada agama Yahudi sama deng biasa dorang ja beking. Di situ dorang kase tau tu Kabar Bae deng brani, sampe banya orang Yahudi deng orang-orang yang bukang Yahudi jadi percaya pa Yesus. Mar ada orang-orang Yahudi yang nyanda trima apa tu Paulus deng Barnabas ja se tau, trus dorang hasut pa orang-orang bukang Yahudi supaya malawang pa tu sudara-sudara yang percaya itu. Jadi Paulus deng Barnabas da tinggal sadiki lama di situ, kong dorang kase tau deng brani tu brita tentang Tuhan pe bae. Kong Tuhan se bukti kalu tu dorang da kase tau itu butul deng cara kase kuasa pa dorang for beking tanda-tanda ajaib deng hal-hal luar biasa. Mar tu orang-orang di kota itu so tapica dua. Ada tu bapro pa orang-orang Yahudi yang nyanda percaya, deng ada lei yang bapro pa rasul-rasul. Kong tu orang-orang Yahudi deng tu orang-orang yang bukang Yahudi deng lei dorang pe pemimpin-pemimpin ambe keputusan for mo siksa kong lempar deng batu pa Paulus deng Barnabas. Mar Paulus deng Barnabas dapa tau tu rencana jaha itu, so itu dorang dua pi manyingkir ka daera Likaonia. Di situ dorang pigi ka Listra, Derbe deng ka tampa-tampa laeng yang ada di dekat-dekat situ. Kong di situ lei dorang kase tau pa orang-orang tu Kabar Bae tentang Yesus. Di Listra, ada satu laki-laki yang dia pe kaki lemah deng lumpu dari dia lahir. Kong dia blum perna bajalang, dia cuma da dudu-dudu. Tu orang itu da badengar Paulus da babicara. Paulus da tarukira pa dia, kong Paulus tau kalu dia itu percaya pa Yesus, jadi dia bole mo bae. Kong Paulus babilang pa dia deng suara kuat, “Badiri jo!” Trus dia iko balumpa badiri, kong mulai bajalang kasana-kamari. Waktu orang banya lia tu Paulus da beking, dorang trus bataria pake bahasa Likaonia, “Opo-opo so turung di tenga-tenga pa torang sama deng manusia!” Tu Barnabas dorang kase nama ‘opo Zeus’, kong Paulus yang jago babicara dong kase nama ‘opo Hermes’. Di dekat kota, ada satu kuil for dong pe opo Zeus. Waktu itu datang dari sana tu kapala agama di kuil itu sama-sama deng banya orang kong da bawa tu sapi-sapi jantan deng karangan bunga ka pintu gerbang kota. Di situ dorang rencana mo beking korban persembahan for Paulus deng Barnabas. Mar waktu Barnabas deng Paulus dapa tau apa tu dorang mo beking itu, dorang dua se rabe dong pe baju for beking tanda kalu dorang nyanda trima tu orang-orang itu mo beking. Trus dorang dua lari basosuru ka tenga-tenga orang banya itu kong babilang deng suara kuat, “Hei ngoni samua, kiapa ngoni beking bagini? Torang ini manusia sama deng ngoni. Torang datang kamari for mo se tau pa ngoni tu Kabar Bae tentang Yesus. Deng bagitu ngoni bole se tinggal tu opo-opo yang nyanda ada de pe guna kong percaya pa Tuhan Allah yang hidop. So Dia no tu da beking langit, bumi, laut deng samua de pe isi. Dulu, biar samua bangsa hidop iko dong pe mau sandiri, Tuhan Allah nyanda beking apa-apa pa dorang. Mar Tuhan tetap kase tunjung tu Dia pe bae for samua manusia supaya tau kalu Dia itu ada. Dia kase tunjung tu Dia pe bae deng cara se turung ujang dari langit, Dia kase oras bapete for torang samua, Dia lei da kase makanan deng beking torang pe hati snang.” Mar biar Paulus deng Barnabas so bicara bagitu, dorang amper-amper nyanda dapa tahang tu orang banya itu mo kase korban persembahan for dorang. Kong waktu itu datang tu orang-orang Yahudi dari Antiokhia deng Ikonium. Di situ, dorang hasut pa orang banya sampe tu orang banya bapro pa dorang kong lempar pa Paulus deng batu. Abis itu dorang hela pa dia ka luar kota, lantaran dorang pe kira dia so mati. Mar waktu tu orang-orang yang ja iko pa Yesus badiri bakliling pa Paulus, dia iko badiri kong maso ulang ka Listra. De pe eso, dia deng Barnabas brangkat sama-sama ka Derbe. Paulus deng Barnabas da kase tau tu Kabar Bae tentang Yesus di Derbe, kong banya orang yang jadi percaya. Abis itu, dorang dua babale ka Listra, trus ka Ikonium deng lei ka Antiokhia di daera Pisidia. Di tampa-tampa itu, Paulus deng Barnabas kase kuat hati tu orang-orang yang ja iko pa Yesus. Dorang dua lei kase smangat pa tu orang-orang percaya itu supaya tetap batahang percaya. Kong Paulus deng Barnabas babilang lei pa dorang, “Kalu torang suka mo jadi orang-orang dari Tuhan Allah yang Berkuasa sbagai Raja, torang musti dapa banya susa.” Klar bilang bagitu, dorang dua lei tunjung penatua-penatua for tiap jemaat. Dorang basombayang deng bapuasa for mo srahkan tu penatua-penatua pa Tuhan yang dorang percaya itu, supaya Dia sama-sama deng tu penatua-penatua itu. Abis Paulus deng Barnabas bajalang lewat tu daera Pisidia, dorang pigi ka daera Pamfilia. Di daera Pamfilia, dorang kase tau tu Kabar Bae di Perga. Abis itu dorang pigi ka Atalia. Dari sana dorang blayar ka Antiokhia di daera Siria. Tempo hari, jemaat di Antiokhia yang da utus pa dorang for kase tau tu Kabar Bae. Tu jemaat itu da basombayang for srahkan dorang dua itu pa Tuhan Allah supaya Tuhan Allah se tunjung Dia pe bae pa dorang deng cara jaga pa dorang. Skarang dorang mo ka Antiokhia lantaran dong pe tugas so klar. Pe sampe di Antiokhia, dorang pangge tu jemaat for bakumpul. Kong dorang dua se cirita samua tu Tuhan Allah da beking lewat dorang, deng lei bagimana Dia da buka jalang supaya orang-orang bukang Yahudi bole jadi percaya pa Yesus. Abis itu, Paulus deng Barnabas tinggal bebrapa lama sama-sama deng tu orang-orang yang ja iko pa Yesus yang ada di kota itu. Waktu itu ada bebrapa orang sudara-sudara yang percaya pa Yesus pigi dari Yudea ka Antiokhia. Di situ dorang mangajar bagini pa orang-orang bukang Yahudi yang so percaya, “Biar lei ngoni so percaya, mar kalu ngoni nyanda sunat iko tu atoran yang Musa da se ajar, ngoni nyanda mo slamat.” Mar Paulus deng Barnabas malawang deng kras tu dorang pe pendapat itu kong baku ambe deng dorang. So itu tu orang-orang percaya di Antiokhia ambe keputusan for utus pa Paulus, Barnabas deng orang-orang percaya laeng ka Yerusalem. Di sana dorang mo baku dapa deng rasul-rasul deng tu penatua-penatua for mo babicara tentang tu masala itu. Kong tu orang-orang percaya di Antiokhia antar pa dorang sampe di luar kota. Trus dorang Paulus da bajalang lewat daera Fenisia deng Samaria. Di daera-daera itu, dorang se cirita samua pa orang-orang percaya kalu tu orang-orang yang bukang Yahudi di tampa laeng so bertobat kong jadi percaya pa Yesus. Tu cirita itu beking snang pa tu samua sudara yang percaya tu ada di daera-daera itu. Pe sampe di Yerusalem, rasul-rasul, penatua-penatua, deng jemaat trima deng bae pa dorang Paulus. Kong dorang dua se cirita pa dorang samua tu Tuhan Allah da beking lewat pa dorang dua. Mar di situ ada bebrapa orang Yahudi dari golongan Farisi yang so percaya. Dorang badiri kong babilang, “Orang-orang bukang Yahudi yang so percaya, dorang itu musti sunat deng lei musti iko tu atoran-atoran dari Musa.” Abis itu, tu rasul-rasul deng tu penatua-penatua bakumpul for mo bicara tu masala itu. Klar dorang bicara lama tu masala itu, Petrus badiri kong babilang pa dorang, “Sudara-sudara, ngoni tau tempo hari Tuhan Allah so pili pa kita dari antara pa torang samua, supaya kita bole se tau tu Kabar Bae pa orang-orang bukang Yahudi kong dorang jadi percaya. Tuhan Allah yang tau samua manusia pe hati, Dia kase tunjung kalu Dia so trima tu orang-orang yang bukang Yahudi deng cara kase tu Roh Kudus pa dorang sama deng yang Dia so kase pa torang. Tuhan Allah nyanda pili-pili antara orang Yahudi deng orang bukang Yahudi. Dia beking suci tu orang bukang Yahudi pe hati lantaran dorang so percaya pa Yesus. No kalu so bagitu kiapa dang ngoni mo bacoba pa Tuhan Allah, deng cara paksa tu orang-orang bukang Yahudi yang so iko Yesus pe ajaran supaya iko tu torang pe atoran-atoran di kitab Taurat yang susa dorang mo beking? Itu bole mo se sama deng sapi yang susa lantaran da pasang akang kuk. Hele torang pe nene moyang deng torang sandiri lei nyanda mampu mo iko tu atoran-atoran itu. Mar de pe butul, torang orang Yahudi yakin kalu torang bole slamat dari tu hukuman dosa cuma lantaran Tuhan Yesus so se tunjung tu Dia pe sayang pa torang, bagitu lei deng tu orang-orang bukang Yahudi.” Pe dengar itu, samua orang di situ tabadiam. Trus dorang badengar tu Paulus deng Barnabas pe cirita. Dorang dua se cirita tentang tanda-tanda ajaib deng hal-hal luar biasa yang Tuhan Allah da beking lewat dorang di tenga-tenga pa bangsa-bangsa bukang Yahudi. Pe klar Barnabas deng Paulus babicara, Yakobus babilang, “Sudara-sudara, dengar akang pa kita! Simon Petrus so se cirita bagimana Tuhan Allah da kase tunjung tu Dia pe sayang pa orang-orang yang bukang Yahudi. Dia da pili orang-orang dari pa orang-orang yang bukang Yahudi itu for jadi Dia pe orang-orang. Itu sama deng tu Tuhan Allah da bilang dulu lewat Dia pe nabi-nabi. Bagini tu Dia da bilang, ‘Abis itu Kita mo bale ulang kong se badiri ulang tu Daud pe krajaan yang so ancor, deng lei tu dia pe sisa-sisa Kita mo bangun ulang, supaya samua orang laeng cari pa Tuhan, deng lei samua orang bukang Yahudi yang Kita pili for jadi Kita pe orang. Bagitu tu Tuhan Allah da bilang kong Dia mo beking itu, kong samua orang so tau itu dari dulu.’ ” Kong Yakobus bilang lei, “Jadi menurut kita, torang nimbole paksa pa tu orang-orang bukang Yahudi yang so percaya pa Tuhan Allah for iko tu torang pe atoran-atoran di kitab Taurat. Soalnya itu cuma mo beking susa pa dorang. Lebe bae torang tulis surat jo for dorang, supaya dorang cuma iko tu atoran-atoran ini: nimbole makang tu makanan yang so kase pa opo-opo, nimbole makang daging dari binatang yang mati lantaran da ramas di leher, nimbole makang dara, deng nimbole baseks bebas. Soalnya dari dulu orang so kase tau tu hukum Musa yang larang tentang tu hal-hal itu di tiap kota. Kong skarang, saban hari Sabat tu hukum Musa itu ja se baca akang di ruma-ruma Ibada agama Yahudi.” Abis itu, tu rasul-rasul, tu penatua-penatua deng samua orang percaya di Yerusalem ambe keputusan for mo utus bebrapa orang dari pa dorang for iko pa Paulus deng Barnabas ka Antiokhia. Jadi, dorang pili pa Silas deng Yudas tu ja pangge lei Barsabas. Sudara-sudara yang percaya di Yerusalem segan pa dorang dua. Kong pa dorang dua da titip akang surat tu de pe isi bagini: “Salam sejahtra for ngoni tu sudara-sudara yang percaya dari bangsa-bangsa bukang Yahudi yang da tinggal di daera Antiokhia, Siria deng Kilikia. Ini salam dari torang tu rasul-rasul deng penatua-penatua di Yerusalem. Torang tulis ni surat lantaran torang da dengar ada bebrapa orang dari pa torang di Yerusalem yang so pigi pa ngoni. Dorang kata da se ajar pa ngoni tu dong pe ajaran sandiri kong beking bingo tu ngoni pe jemaat. Padahal torang nyanda perna suru tu orang-orang itu pigi pa ngoni. So itu torang so spakat for pili bebrapa orang kong utus pa dorang pigi pa ngoni. Dorang mo pigi sama-sama deng Barnabas deng Paulus tu torang pe tamang yang torang sayang. Dorang ini amper-amper mo mati lantaran da kase tau pa orang-orang tentang tu torang pe Tuhan Yesus Kristus. So itu, torang utus pa Yudas deng Silas for mo kase tau pa ngoni secara langsung tu torang pe isi surat ini. Roh Kudus so kase tunjung pa torang, deng lei torang stuju, kalu ngoni nyanda perlu sunat ato iko tu atoran-atoran Musa yang laeng, itu no beban yang brat for ngoni. So itu, torang cuma mo suru pa ngoni iko tu atoran-atoran ini: ngoni nimbole makang tu makanan yang so kase pa opo-opo, nimbole makang dara, nimbole makang daging dari binatang yang mati lantaran da ramas di leher, deng nimbole baseks bebas. Kalu ngoni so iko tu atoran-atoran ini, ngoni so beking tu bae. Sampe di sini dulu torang pe surat, salam dari torang.” Abis itu, Yudas deng Silas brangkat ka Antiokhia. Di sana, dorang pangge bakumpul samua tu orang-orang percaya, kong dorang kase tu surat pa tu orang-orang percaya itu. Waktu tu orang-orang percaya klar baca tu surat itu, dorang jadi snang lantaran tu surat itu beking smangat pa dorang. Tu Yudas deng Silas ja kase tau tu Tuhan Allah pe pesan pa orang-orang, kong dorang banya kase smangat deng kase nasehat tu sudara-sudara yang percaya di Antiokhia. Di situ dorang dua tinggal sadiki lama. Abis itu, sudara-sudara yang percaya di Antiokhia lapas deng bae-bae pa dorang for bale ulang pa tu orang-orang yang da utus pa dorang di Yerusalem. [ Mar Silas ambe keputusan tetap tinggal di Antiokhia.] Paulus deng Barnabas lei tinggal sadiki lama di Antiokhia. Dorang dua deng orang-orang banya yang ada di situ da mangajar deng kase tau tu Tuhan pe firman. Waktu Paulus deng Barnabas so sadiki lama di Antiokhia, Paulus bilang pa Barnabas, “Mari jo torang bale ulang ka kota-kota yang torang perna da kase tau akang tu Tuhan pe firman. Di kota-kota itu torang mo baku dapa deng tu sudara-sudara yang percaya for mo lia dorang pe keadaan.” Kong Barnabas stuju deng dia lei suka mo bawa pa Yohanes tu ja pangge lei Markus. Mar deng tegas Paulus bilang kalu nyanda perlu bawa tu orang yang so perna kase tinggal pa dorang di Pamfilia kong nyanda bantu se trus dorang pe karja di situ. Tu masala itu beking dorang dua baku ambe hebat sampe dorang baku pisa. So itu Barnabas bawa pa Markus kong blayar ka Siprus. Mar Paulus pili pa Silas. Waktu dorang so mo pigi, tu sudara-sudara yang percaya di Antiokhia minta pa Tuhan supaya jaga deng kase tunjung tu Dia pe bae pa dorang dua. Abis itu, dorang dua pigi ka tampa-tampa di daera Siria deng Kilikia, kong di tampa-tampa itu dorang dua se kuat tu jemaat pe iman. Paulus bajalang ka Derbe kong dia trus ka Listra. Di situ, ada satu orang tu dia pe nama Timotius, dia ini orang yang ja iko pa Yesus. Dia pe mama orang Yahudi yang so percaya pa Yesus, kong dia pe papa orang Yunani. Tu sudara-sudara yang percaya di Listra deng Ikonium tau skali kalu Timotius orang bae-bae. Paulus suka tu Timotius iko sama-sama deng dia dalam playanan, so itu Paulus suru orang sunat akang pa Timotius. Soalnya orang-orang Yahudi di daera yang dorang mo pigi akang tau kalu Timotius pe papa orang Yunani, jadi deng Timotius dapa sunat itu, dorang pe playanan nyanda mo dapa masala. Abis itu dorang Paulus bajalang dari kota ka kota. Dorang kase tau pa jemaat-jemaat tu atoran-atoran yang rasul-rasul deng penatua-penatua da beking di Yerusalem, supaya jemaat-jemaat bole mo iko tu atoran-atoran itu. Waktu jemaat-jemaat dengar tu atoran-atoran, dorang pe iman pa Yesus so tatamba kuat, kong saban hari tu orang yang percaya pa Yesus lebe tatamba banya. Paulus deng dia pe tamang-tamang cuma da lewat di daera Frigia deng Galatia di daera Asia. Soalnya Roh Kudus da larang pa dorang for mo kase tau tu Kabar Bae pa orang-orang yang ada di daera Asia. Serta dorang sampe di daera perbatasan Misia deng Bitinia, dorang coba mo maso ka Bitinia mar Yesus pe Roh larang pa dorang mo ka sana. Jadi dorang cuma da balewat di Misia kong sampe di plabuhan Troas. De pe malam, Paulus dapa satu penglihatan dari Tuhan. Pa dia pe penglihatan, ada satu orang dari daera Makedonia da badiri kong minta tolong pa dia. Tu orang itu bilang, “Datang jo kamari kong tolong akang pa torang.” Pe klar Paulus dapa tu penglihatan, torang langsung basiap-siap for mo pigi ka daera Makedonia, lantaran lewat tu penglihatan itu Tuhan Allah so pangge pa torang for mo kase tau tu Kabar Bae pa orang-orang di sana. Torang se tinggal tu Troas kong blayar ka pulau Samotrake. De pe eso, torang trus ka Neapolis di daera Makedonia. Dari Neapolis torang bajalang ka Filipi, tu kota penting di Makedonia, kong pemerenta Romawi lei yang da pegang kuasa di situ. Torang tinggal di situ bebrapa hari. Waktu hari Sabat, torang kaluar dari pintu gerbang kota. Torang pigi ka pinggir kuala kong cari tu tampa orang Yahudi ja basombayang akang, lantaran torang pikir ada di situ. Waktu sampe di sana, so ada bebrapa parampuang tu da bakumpul, kong torang dudu deng se cirita tentang Tuhan Yesus pa dorang. Di antara pa dorang, ada tu satu parampuang, de pe nama Lidia. Dia dari kota Tiatira, kong ja bajual kaeng mahal tu de pe warna pars. Lidia ini bukang orang Yahudi mar ja baibada pa Tuhan Allah. Kong waktu Paulus da bacirita tentang Yesus, Tuhan Allah buka Lidia pe hati sampe dia trima apa tu Paulus da bilang. Kong abis itu Lidia deng de pe kluarga dapa baptis. Trus Lidia bamohon pa torang, “Kalu ngoni yakin kita ini butul-butul so percaya pa Tuhan, mari jo manumpang pa ta pe ruma.” Dia babuju trus pa torang sampe torang iko akang de pe mau. Satu kali, torang pigi ulang ka tampa sombayang itu. Di jalang torang baku dapa deng satu budak parampuang. Ni parampuang ini mampu baramal orang pe nasib lantaran setang da kuasai pa dia. So itu banya orang ja datang pa dia kong de pe bos-bos dapa banya doi dari tu de pe ramalan-ramalan itu. Ni parampuang ini lei iko-iko pa Paulus deng torang dari blakang kong ja babilang deng suara kuat, “So dorang ini tu Tuhan Allah yang Mahatinggi pe orang karja. Dorang ja se tau tu de pe cara for orang-orang mo slamat.” Tu parampuang itu ja beking bagitu sampe bebrapa hari, riki Paulus so pastiu. So itu Paulus babale kong babilang pa tu setang yang da kuasai pa tu parampuang, “Hei setang! Deng Yesus Kristus pe kuasa, kita prenta ngana kaluar dari pa dia.” Waktu itu jo, tu setang iko kaluar dari pa tu parampuang itu. Serta tu setang so kaluar dari pa dia, tu parampuang itu pe bos-bos tau kalu dorang so nyanda lei mo dapa doi. So itu dorang tangka pa Paulus deng Silas kong hela ka pusat kota for mo kase mangada pa penguasa. Waktu dorang bawa pa Paulus deng Silas pa tu penguasa-penguasa di kota itu, dorang bilang, “Dorang dua ini orang Yahudi, kong dorang datang bakacau pa torang pe kota. Dorang ja se ajar tu adat yang torang orang Romawi nimbole mo trima deng beking itu.” Pe dengar itu, tu orang banya di situ bagabung for malawang pa Paulus deng Silas. Kong tu penguasa-penguasa kota itu suru rado sampe tarabe dorang dua pe baju kong pukul-pukul pa dorang deng kayu. Pe klar dorang pukul pa Paulus deng Silas, tu penguasa-penguasa itu prenta se maso pa dorang dua ka bui. Tu penguasa-penguasa lei prenta pa kapala bui jaga deng ketat pa dorang dua. Pe dengar tu prenta, tu kapala bui iko se maso pa dorang ka bui, di ruangan dalam tu paling susa mo lolos akang, dia taru dorang dua pe kaki di balak yang so se lobang for mo tahang pa dorang dua. Kong kira-kira tenga malam, Paulus deng Silas basombayang deng manyanyi lagu-lagu pujian for Tuhan Allah, kong tu orang-orang bui laeng badengar pa dorang dua. Kage-kage jadi tana goyang pe kuat skali sampe tu bui pe fondasi-fondasi iko tagoyang. Waktu itu jo, tu samua pintu tabuka deng tu rante-rante yang da ika pa samua orang di bui talapas. Waktu tu kapala bui tabangong, dia lia tu pintu-pintu bui so tabuka samua. So itu dia jadi tako skali, jadi dia cabu de pe peda for mo babunung diri, lantaran dia pikir tu orang-orang bui pasti so lari. Mar Paulus bataria pa tu kapala bui, “Hei bapak! Jang bunung diri! Torang samua masi di sini.” Pe dengar itu, tu kapala bui iko suru orang bawa obor. Abis itu dia lari maso ka dalam bui, kong deng batotofore dia berlutut di muka pa Paulus deng Silas. Abis itu tu kapala bui bawa kaluar pa dorang dua, kong babilang, “Bapak-bapak, apa tu kita musti beking supaya kita bole mo slamat?” Dorang manyao, “Percaya jo pa Tuhan Yesus supaya ngana bole slamat, bagitu lei deng samua yang ada pa ngana pe ruma.” Abis itu, Paulus deng Silas se tau tu Tuhan pe firman pa dia deng samua orang yang ada pa de pe ruma. Tenga malam itu jo, tu kapala bui bawa pa dorang kong se bersi dong pe luka. Waktu itu lei tu kapala bui deng de pe kluarga dapa baptis. Klar itu, tu kapala bui bawa dorang dua pa de pe ruma kong dia kase makang pa dorang. Dia snang skali lantaran dia deng samua de pe kluarga so jadi percaya pa Tuhan Allah. De pe eso pagi, tu penguasa-penguasa suru pa dong pe pengawal-pengawal pigi pa tu kapala bui deng pesan, “Kase bebas jo pa dorang dua!” Kong tu kapala bui bilang tu pesan itu pa Paulus, dia bilang, “Tu penguasa-penguasa kota da suru se bebas pa ngoni dua. Jadi skarang, ngoni so bole kaluar dari sini. Bae-bae jo di jalang!” Mar Paulus cuma da bilang pa tu orang-orang itu, “Tu penguasa-penguasa suru orang pukul pa torang di muka banya orang trus kase maso pa torang di bui, padahal waktu itu dorang blum adili pa torang. Dorang nimbole beking bagitu pa torang lantaran torang lei orang Romawi. Kong skarang, apa dorang mo kase kaluar pa torang deng babadiam? Oh, nimbole bagitu komang! Dorang musti datang sandiri kamari for mo se kaluar pa torang dari ni bui.” Abis itu, tu pengawal-pengawal kase tau pa penguasa-penguasa kota samua tu Paulus da bilang. Pe dengar kalu Paulus deng Silas orang Romawi, tu penguasa-penguasa jadi tako. Trus dorang datang ka bui kong minta maaf pa Paulus deng Silas. Abis itu, dorang bawa pa Paulus deng Silas kaluar dari bui kong bamohon pa dorang dua supaya kaluar dari tu kota. Pe kaluar dari tu bui, Paulus deng Silas pigi pa Lidia pe ruma. Kong abis dorang baku dapa deng tu sudara-sudara yang percaya di situ trus se smangat pa tu sudara-sudara itu, dorang dua pigi se tinggal tu kota itu. Paulus deng Silas se trus dong pe perjalanan lewat Amfipolis deng Apolonia kong dorang sampe di Tesalonika. Di situ, ada ruma ibada agama Yahudi. Kong sama deng biasa, tiap hari Sabat Paulus maso di ruma ibada agama Yahudi, kong slama tiga kali hari Sabat dia babicara deng orang-orang di situ tentang bagean-bagean Kitab Suci. Paulus se trangkan deng se bukti pa dorang tentang Mesias tu Raja yang se slamat pa manusia. Dia bilang kalu tu Mesias itu musti dapa siksa sampe mati kong hidop ulang. Kong Paulus bilang pa dorang, “Mesias yang kita da bilang pa ngoni, so Dia no tu Yesus.” Ada bebrapa dari orang Yahudi yang jadi percaya, deng ada banya lei tu orang Yunani yang tako pa Tuhan deng lei banya tu parampuang-parampuang yang punya pengaru di situ yang jadi percaya. Dorang samua iko bagabung sama-sama Paulus deng Silas. Mar tu orang-orang Yahudi laeng jadi mangiri pa Paulus deng Silas. So itu dorang kumpul tu orang-orang begal dari pusat kota, kong serta so banya tu orang da takumpul, dorang bakacau di kota itu. Dorang pi srang tu Yason pe ruma for mo cari pa Paulus deng Silas, lantaran mo urus pa dorang dua di muka banya orang. Mar dorang nyanda dapa pa Paulus deng Silas di situ, so itu dorang hela deng paksa pa Yason deng bebrapa sudara laeng yang percaya pa Yesus kong bawa pa penguasa-penguasa kota. Kong dorang bataria, “Tu orang-orang yang da bakacau di mana-mana so datang pa torang pe kota ini. Kong Yason da trima pa dorang manumpang pa de pe ruma. Dorang samua malawang tu prenta-prenta dari tu torang pe raja yang paling tinggi di krajaan Romawi. Dorang bilang kata ada raja laeng selain tu torang pe raja itu. Tu raja laeng itu, de pe nama Yesus.” Pe dengar itu, tu orang banya deng penguasa-penguasa kota iko ribut. Kong tu penguasa-penguasa suru pa Yason deng orang-orang laeng yang percaya pa Yesus supaya dorang kase doi pa tu penguasa-penguasa itu for jaminan kalu Yason deng tu orang-orang itu nyanda mo bakacau lei. Abis itu, dorang se lapas pa Yason deng tu orang-orang laeng yang percaya. De pe malam itu jo, sudara-sudara yang percaya di Tesalonika iko suru Paulus deng Silas brangkat ka Berea. Kong waktu Paulus deng Silas sampe di sana, dorang dua pigi ka ruma ibada agama Yahudi. Orang-orang Yahudi di Berea pe pikiran lebe tabuka dari tu orang-orang Yahudi di Tesalonika. So lantaran itu dorang suka badengar deng trima tu Tuhan pe firman. Kong saban hari dorang cari tau dari Kitab Suci kalu tu Paulus ja se ajar itu butul ka nyanda. So itu banya dari pa dorang yang jadi percaya pa Yesus. Kong ada banya lei orang Yunani yang jadi percaya pa Yesus, dorang itu laki-laki deng parampuang yang punya pengaru di situ. Mar waktu tu orang-orang Yahudi dari Tesalonika dapa tau kalu di Berea lei Paulus da se tau tu Tuhan Allah pe firman, dorang ka sana for pengaruhi pa orang banya kong beking kacau tu orang banya itu pe pikiran. So itu, sudara-sudara yang percaya di Berea capat-capat antar pa Paulus pi plabuhan, mar tu Silas deng Timotius masi tinggal di Berea. Kong tu orang-orang itu da antar pa Paulus blayar sampe ka Atena. Abis itu, tu orang-orang itu babale ka Berea. Dorang lei da bawa pesan dari Paulus for Silas deng Timotius, supaya dorang dua capat-capat baku iko ka Atena. Paulus da tunggu pa Silas deng Timotius di Atena. Di situ, Paulus pe hati sedi skali lantaran dia lia di kota itu punung deng tu patong opo-opo. So itu di ruma ibada agama Yahudi, Paulus badiskusi deng bebrapa orang Yahudi deng orang bukang Yahudi yang baibada pa Tuhan Allah. Kong saban hari, kalu Paulus pas baku dapa deng orang-orang di pusat kota, dia lei badiskusi deng dorang. Di Atena ada dua klompo yang ja se ajar tu dorang pe ajaran masing-masing. Tu satu klompo Epikuros deng tu satu lei klompo Stoa. Di situ Paulus kase tau pa dorang tu Kabar Bae tentang Yesus, deng kase tau tentang mo hidop ulang. Trus tu dua klompo itu baku ambe deng Paulus, kong ada bebrapa dari pa dorang babilang, “Ni orang pe banya bicara, mar nyanda maso akal tu dia ja bilang.” Kong tu laeng lei babilang, “Ni orang da kase tau tentang tu opo-opo dari bangsa laeng.” Abis itu dorang antar pa Paulus pa tu anggota-anggota dewan Areopagus yang da bakumpul di bukit tu de pe nama lei Areopagus. Pe sampe di situ, tu anggota-anggota dewan bilang pa dia, “Tolong ngana se tau kamari tu ajaran yang baru itu! Soalnya tu ngana da bilang itu baru skarang torang dengar. So itu torang suka mo cari tau apa tu samua itu pe arti.” Dorang minta bagitu, lantaran samua orang Atena deng lei tu pendatang, dorang itu sama deng nyanda ada waktu for beking hal-hal yang laeng, dorang cuma se abis tu waktu for kase tau ato badengar tu hal-hal yang baru. Di situ Paulus badiri di muka anggota-anggota dewan Areopagus, kong babicara, “Orang-orang Atena! Kita tarukira, ngoni ini orang yang rajin skali ja semba pa ngoni pe patong opo-opo. Kita bilang bagitu lantaran waktu kita da babaron pa ngoni pe kota ini, kita da tarukira tu ngoni pe patong opo-opo yang ngoni ja semba. Kong kita dapa satu tampa tu ngoni ja kase akang korban persembahan, yang ada tulisan bagini, ‘For Tuhan Allah yang torang nyanda kanal.’ Tu Tuhan Allah yang ngoni ja semba mar ngoni nyanda kanal itu, so Dia tu kita mo kase tau pa ngoni. Tuhan Allah itu yang da beking ni bumi deng samua de pe isi. So Dia no tu Tuhan yang pegang kuasa di langit deng di bumi. Dia nyanda tinggal di tampa-tampa sombayang yang manusia da beking. Dia nyanda perlu manusia mo layani, Dia nyanda kekurangan apa-apa. Soalnya Dia yang da kase tu nafas, tu hidop deng samua yang ada pa manusia. Dari satu orang Dia so beking samua suku bangsa for tinggal di bumi. Dia so ator samua manusia pe waktu deng Dia lei so se berbage tu batas-batas for manusia tinggal akang. Tuhan Allah da beking bagitu supaya torang samua cari pa Dia kong baharap bole mo baku dapa deng Dia, padahal sebenarnya Dia nyanda jao dari pa torang. Dia yang beking torang hidop, torang bagra deng torang ada. Itu sama deng ngoni pe tukang beking puisi sandiri da bilang, ‘Torang ini, Dia pe keturunan.’ Jadi kalu torang ini Tuhan Allah pe keturunan, torang jang bapikir kalu Tuhan Allah itu sama deng tu patong dari mas, perak ato batu yang tukang patong da beking. Dulu manusia blum kanal pa Tuhan Allah, apa tu manusia ja beking waktu itu Dia so nyanda mo inga lei. Mar skarang Tuhan Allah prenta supaya samua orang di mana jo dorang ada supaya bertobat. Soalnya, Dia so ator satu waktu for adili pa samua orang deng cara yang adil, kong Dia so tunjung satu Orang for beking itu. Torang bole yakin kalu samua itu mo jadi bagitu, lantaran tu Hakim itu mati kong Tuhan Allah so kase hidop ulang pa Dia.” Waktu tu orang-orang Atena dengar kalu orang mati bole mo hidop ulang, bebrapa dari pa dorang da tatawa akang pa Paulus. Mar tu laeng babilang pa dia, “Nanti laengkali jo torang suka mo dengar tu ngana da bilang tadi.” Abis itu, Paulus kase tinggal tu anggota-anggota dewan. Mar ada bebrapa orang iko pa Paulus yang da jadi percaya pa Yesus. Di antara pa dorang itu, ada satu laki-laki tu anggota dewan Areopagus, de pe nama Dionisius. Kong ada lei satu parampuang de pe nama Damaris, deng ada lei orang-orang laeng yang iko sama-sama deng dorang. Abis itu, Paulus kase tinggal tu Atena kong pigi ka Korintus. Di Korintus, Paulus baku dapa deng satu orang Yahudi tu dia pe nama Akwila. Akwila ini orang Pontus. Dia deng dia pe bini Priskila baru datang dari Italia. Dorang datang ka Korintus lantaran Klaudius tu raja yang paling tinggi di krajaan Romawi da prenta pa orang-orang Yahudi musti kaluar dari Roma. Kong satu waktu Paulus basingga pa Akwila pe ruma. Paulus deng Akwila pe karja sama-sama tukang babeking tenda, so itu Paulus manumpang pa Akwila pe ruma kong bakarja sama-sama. Saban hari Sabat, Paulus babicara pa orang-orang Yahudi deng Yunani di ruma ibada agama Yahudi, kong dia brusaha kase yakin pa dorang supaya jadi percaya pa Yesus. Waktu Silas deng Timotius datang dari Makedonia, Paulus pake samua de pe waktu for se tau tu firman, dia bilang pa orang-orang Yahudi kalu Yesus itu Mesias tu Raja yang se slamat pa manusia dari hukuman dosa. Mar tu orang-orang itu cuma da malawang kong bahina pa Paulus. So itu Paulus kase kabas tu abu dari pa dia pe baju, itu de pe tanda kalu dia so nyanda farduli lei pa dorang. Kong Paulus bilang, “Ngoni sandiri yang mo tanggong tu Tuhan Allah pe hukuman. Itu bukang kita pe sala, kita so se tau tu Kabar Bae mar ngoni nyanda percaya. Mulai skarang, kita mo pigi pa orang-orang yang bukang Yahudi for mo kase tau tu Kabar Bae.” Abis itu, Paulus kaluar dari tu ruma ibada. Dia pigi pa Titius Yustus pe ruma, tu baku sabla deng ruma ibada. Titius itu bukang orang Yahudi mar dia ja baibada pa Tuhan Allah. Ada tu kapala ruma ibada agama Yahudi di Korintus, de pe nama Krispus. Dia deng samua orang yang ada pa de pe ruma jadi percaya pa Tuhan. Kong banya orang Korintus yang da badengar tu Paulus da se ajar jadi percaya kong dorang dapa baptis. Satu malam, Paulus dapa penglihatan. Pa de pe penglihatan, Tuhan da babilang pa dia, “Paulus, ngana jang tako. Ngana se tau trus jo tu Kabar Bae pa orang-orang. Soalnya Kita sama-sama deng ngana. Nyanda ada satu orang tu bole mo pukul deng mo siksa pa ngana, lantaran ada banya Kita pe orang di kota ini.” So itu Paulus tinggal di Korintus slama satu taong anam bulan, dia kase ajar pa dorang tu Tuhan Allah pe firman. Mar waktu Galio so jadi gubernur di daera Akhaya, tu orang-orang Yahudi baku skongkol for tangka pa Paulus. Abis itu dorang bawa pa dia ka pengadilan. Kong dorang bilang pa gubernur Galio, “Ni orang ini ja pengaruhi pa orang banya, supaya baibada pa Tuhan Allah deng cara yang baku laeng deng torang pe atoran-atoran di kitab Taurat.” Mar waktu Paulus baru mo babela diri, tu gubernur Galio iko babilang pa orang-orang Yahudi, “Hei, orang-orang Yahudi! Kalu ngoni tudu ni orang da beking sala ato kejahatan, tantu katu kita musti urus tu masala. Mar ini, ngoni cuma da baku ambe pendapat tentang ngoni pe agama, tu soal kata-kata, nama-nama deng ngoni pe atoran-atoran agama. Jadi ngoni sandiri jo yang se klar tu masala, kita nimau mo jadi hakim pa ngoni pe perkara ini.” Abis itu, Galio user pa dorang dari tu pengadilan. Mar tu orang-orang Yahudi yang ada di situ tangka satu orang tu dia pe nama Sostenes. Dia itu kapala ruma ibada agama Yahudi. Dorang pukul pa dia di muka pa gubernur mar tu gubernur nyanda farduli akang pa dorang. Paulus masi da tinggal sadiki lama lei di Korintus. Abis itu, dia minta permisi pa sudara-sudara yang percaya di situ, kong dia pigi sama-sama deng Priskila deng Akwila ka Kengkrea for mo blayar ka daera Siria. Di Kengkrea, Paulus cukur de pe rambu. Dia beking bagitu for jadi tanda kalu de pe nasar dulu pa Tuhan Allah, dia so beking. Abis itu, dorang blayar kong sampe di Efesus. Di situ Paulus kase tinggal pa Priskila deng Akwila, kong dia maso ka ruma ibada agama Yahudi trus badiskusi deng orang-orang Yahudi tentang Yesus. Tu orang-orang Yahudi minta pa Paulus supaya tinggal lebe lama deng dorang, mar Paulus nyanda iko akang dong pe mau. Dia minta permisi kong babilang pa dorang, “Kalu Tuhan Allah pe mau kita bale, kita pasti mo bale ulang kamari.” Abis itu, Paulus se tinggal tu Efesus kong dia blayar. Paulus blayar sampe di Kaisarea, di situ dia turung bajalang ka Yerusalem. Di Yerusalem, dia basingga sadiki pa jemaat di sana for kase salam pa dorang, abis itu dia pigi ka Antiokhia di daera Siria. Di situ dia tinggal bebrapa lama, trus dia pigi dari satu tampa ka tampa laeng di daera Galatia deng Frigia. Di tampa-tampa itu, dia se kuat hati tu orang-orang yang ja iko pa Yesus. Ada satu orang Yahudi tu dia pe nama Apolos, kong dia itu pe asal dari Aleksandria. Dia baru sampe di Efesus. Dia jago babicara deng tau skali tu Kitab Suci pe isi. Dia so trima tu ajaran for mo iko pa Tuhan Yesus. Dia smangat skali se cirita tentang Yesus, kong samua tu dia da se cirita nyanda ada yang sala. Mar biar lei bagitu, dia cuma tau tu Yohanes Pembaptis pe baptisan. Apolos deng brani mulai mangajar di ruma ibada agama Yahudi. Satu kali, Priskila deng Akwila da badengar waktu Apolos da mangajar, kong abis itu, dorang undang pa dia pigi pa dorang pe ruma. Di situ dorang se tau lebe jelas pa dia tu cara for iko pa Tuhan Allah. Abis itu, Apolos suka mo pigi ka daera Akhaya. So itu, tu sudara-sudara yang percaya di Efesus bantu pa dia deng cara kirim surat pa orang-orang yang ja iko pa Yesus di Akhaya, supaya dorang bole mo trima deng bae pa Apolos. Kong waktu Apolos sampe di Akhaya, dia banya bantu pa tu orang-orang percaya, dorang itu da jadi percaya lantaran Tuhan se tunjung Dia pe sayang. Soalnya di muka banya orang, Apolos deng brani kase kala tu orang-orang Yahudi waktu dorang da baku ambe pendapat. Dia se tunjung tu bagean-bagean dari Kitab Suci yang se bukti kalu Yesus itu no tu Mesias yang Tuhan Allah da janji dari dulu for se slamat pa manusia. Waktu Apolos masi ada di Korintus daera Akhaya, Paulus pigi ka kampung-kampung di pedalaman kong dia sampe di Efesus. Di Efesus, dia baku dapa deng bebrapa orang yang ja iko pa Yesus. Kong Paulus batanya pa dorang, “Waktu ngoni jadi percaya pa Yesus, apa ngoni da trima tu Roh Kudus?” Dorang manyao pa dia, “Nyanda no, malatare torang blum perna dengar kalu tu Roh Kudus itu ada.” Paulus batanya ulang pa dorang, “No kalu bagitu, ngoni da baptis deng baptisan apa dang?” Dorang manyao, “Torang da dapa baptis pake tu Yohanes Pembaptis pe baptisan.” Kong Paulus bilang, “Yohanes pe baptisan itu jadi tanda kalu orang so bertobat. Dia lei kase tau pa orang-orang kalu ada satu Orang mo datang abis dia, kong dorang musti percaya pa tu Orang itu. Tu Orang itu no Yesus.” Pe dengar itu, dorang kase dong pe diri dapa baptis dalam nama Tuhan Yesus. Kong waktu Paulus taru de pe tangan di atas pa dorang, Roh Kudus turung pa dorang, kong dorang mulai babicara pake bahasa laeng yang Roh Kudus da kase, deng lei dorang kase tau pa orang-orang apa tu Tuhan Allah da pesan. Dorang samua itu, de pe banya kira-kira ada dua blas orang. Slama tiga bulan, Paulus ja maso ka ruma ibada agama Yahudi kong babicara deng brani pa orang-orang di situ, kong dia baku ambe pendapat deng dorang for se yakin pa dorang tentang Tuhan Allah yang Berkuasa sbagai Raja. Mar ada bebrapa orang yang kras hati, dorang nimau percaya tu cara for iko pa Tuhan, malatare dorang sosere akang itu di muka banya orang. Jadi Paulus se tinggal pa dorang, kong dia pangge tu orang-orang yang ja iko pa Yesus supaya kaluar dari ruma ibada agama Yahudi. Abis itu, saban hari Paulus mangajar kong badiskusi deng dorang di satu tampa kulia, tu de pe nama Tiranus. Dia ja beking bagitu slama dua taong, sampe samua orang yang tinggal di daera Asia dengar tu Tuhan pe firman. Tu orang-orang yang da badengar itu, orang Yahudi deng orang bukang Yahudi. Tuhan Allah kase kuasa pa Paulus for beking mujisat-mujisat yang luar biasa. Biar lei cuma tu lengso ato tu kaeng ja ika di pinggang yang Paulus perna pake kong orang bawa trus taru pa orang-orang saki, dorang iko jadi bae. Bagitu lei pa tu orang-orang yang da kemasukan setang, tu setang iko kaluar. Ada lei bebrapa orang Yahudi yang ja babaron for bauser setang-setang dari orang-orang yang da kemasukan. Dorang coba-coba ja pake Yesus pe kuasa for user tu setang-setang itu. Dorang bilang pa tu setang-setang itu, “Deng Yesus pe kuasa tu Paulus da kase tau, kita prenta pa ngoni kaluar dari pa tu orang ini!” Ada tuju anak laki-laki da coba bauser setang deng cara itu lei. Dorang itu kapala imam pe anak tu de pe nama Skewa. Mar satu kali, setang cuma da bilang pa dorang, “Yesus kita tau, bagitu lei deng tu Paulus. Mar sapa so ngoni?” Abis babicara, tu orang yang da kemasukan setang itu srang, bage deng se kala pa dorang. Dia lei rado dorang pe baju sampe dong lari batalanjang deng luka-luka dari tu orang itu pe ruma. Abis itu, samua orang Yahudi deng orang Yunani yang ada di Efesus so dapa dengar apa tu da jadi itu. Waktu dorang dengar itu dorang jadi tako, kong dorang puji-puji tu Tuhan Yesus pe nama. Banya dari pa dorang yang jadi percaya datang kong mangaku di muka banya orang tu hal-hal jaha yang perna dorang ja beking. Kong banya lei dari pa dorang yang ja pake pokos-pokos. Dorang kumpul dong pe buku-buku mantra kong bakar di muka banya orang. Tu buku-buku itu pe mahal skali, de pe harga kira-kira lima pulu ribu doi perak. Deng cara bagitu, tu Tuhan pe firman lebe tasiar, kong beking tatamba lebe banya tu orang yang percaya. Abis itu, Tuhan pe Roh suru pa Paulus for mo pigi ka Yerusalem lewat Makedonia deng Akhaya. Kong Paulus bilang, “Abis kita pigi ka Yerusalem, kita lei musti pigi ka Roma.” Abis Paulus bilang bagitu, dia suru tu de pe dua tamang karja tu Timotius deng Erastus supaya balebe dulu ka Makedonia, mar Paulus da tinggal sadiki lama di daera Asia. Waktu itu, di Efesus da jadi kekacauan basar lantaran orang-orang nyanda suka deng tu ajaran tentang Tuhan. Itu samua kwa da jadi lantaran bagini: ada satu laki-laki tu de pe nama Demetrius. Dia tukang beking barang-barang dari perak. Dia yang beking tu dewi Artemis pe kuil-kuil kacili dari perak. Kong dari tu usaha itu, tu orang-orang yang bakarja pa dia ja dapa doi banya. Satu kali, Demetrius kumpul samua tu de pe orang-orang karja deng tu orang-orang laeng yang dong pe karja itu ja beking barang-barang dari perak. Kong dia bilang pa dorang, “Sudara-sudara, ngoni pasti tau kalu torang dapa doi banya lantaran torang pe karja ini. Skarang, ngoni sandiri so lia deng so dengar kalu orang-orang so mulai nyanda ja semba pa torang pe dewi Artemis. Itu samua gara-gara Paulus. Dia hasut tu orang-orang, dia bilang kata tu patong-patong yang torang da beking itu nyanda butul. Dia bilang bagitu bukang cuma di Efesus, mar amper samua di daera Asia. Jadi kalu samua orang iko tu Paulus ja bilang, torang pe hasil karja ini orang so nyanda mo pake. Kong lebe soe lei, tu torang pe dewi Artemis pe kuil so nyanda mo ada arti. De pe laste, tu patong dewi Artemis yang samua orang di daera Asia deng di sluru dunia ja semba, dong so nyanda mo semba lei.” Pe dengar itu, tu orang-orang itu jadi mara, kong dorang babataria, “Hidop Artemis, tu orang Efesus pe dewi!” Kong samua tampa di Efesus jadi kacau. Tu orang-orang rame-rame pi tangka pa Gayus deng Aristarkhus kong bawa ka stadion. Tu dua orang ini orang Makedonia, dorang dua Paulus pe tamang yang da baku bawa sama-sama deng Paulus. Kong waktu itu, Paulus suka mo pigi ka tenga-tenga orang banya itu for mo babicara pa dorang, mar de pe murit-murit nyanda kase. Di situ, ada lei bebrapa pejabat di daera Asia yang batamang bae deng Paulus. Dorang suru orang for pi bamohon pa Paulus supaya dia jang maso ka stadion itu. Orang-orang di stadion itu so jadi kacau. Dorang babataria, ada yang bilang bagini ada yang bilang bagitu, mar dorang nintau apa tu masala sampe dorang bakumpul di situ. Kong di situ, ada bebrapa orang Yahudi yang suru tu dong pe orang for babicara di muka banya orang. Tu orang itu pe nama Aleksander. Dia angka de pe tangan for basein supaya tu orang-orang badiam, lantaran dia mo bilang kalu bukang orang Yahudi pe sala sampe jadi kacau bagini. Mar waktu tu orang-orang Efesus dapa tau kalu tu Aleksander itu orang Yahudi, dorang bataria lebe kras, “Hidop Artemis, tu orang Efesus pe dewi!” Dorang bataria bagitu kira-kira dua jam. Kong de pe laste, sekretaris kota kase tenang tu orang banya, kong dia babilang, “Hei orang-orang Efesus! Samua orang di dunia tau kalu orang-orang di Efesus ini ja jaga bae-bae tu dewi Artemis yang agung pe kuil deng tu de pe patong suci yang da turung dari langit. Samua orang kwa tau kalu samua itu butul. So itu, torang samua musti tenang kong bapikir bae-bae baru ambe tindakan. Ngoni so bawa kamari tu dua orang ini, padahal dorang dua nyanda bapancuri apa-apa dari pa torang pe dewi pe kuil, deng dorang lei nyanda bahina tu dewi pe nama. So itu, kalu Demetrius deng tukang-tukang yang sama karja deng dia batudu pa satu orang, lebe bae dorang bawa tu masala itu ka pengadilan ato pa gubernur. Di sana komang dorang bole bilang tu dong pe tuduhan. Kong kalu ada masala laeng yang ngoni mo tuntut, lebe bae ngoni se klar tu masala itu di sidang rakyat yang resmi. Soalnya torang skarang so bahaya. Pemerenta Romawi bole mo tudu kalu torang yang da beking kacau ini hari. Kong kalu sampe jadi bagitu, torang so nintau mo kase alasan apa pa dorang.” Pe klar tu sekretaris kota bilang bagitu, dia se bubar pa dorang samua. Pe klar tu kekacauan di Efesus, Paulus pangge tu orang-orang yang ja iko pa Yesus pe ajaran di situ kong kase smangat pa dorang supaya dorang pe iman tetap kuat. Abis itu, dia minta permisi kong brangkat ka daera Makedonia. Di daera Makedonia, dia babasingga pa orang-orang percaya di situ kong dia kase smangat for se kuat dorang pe iman. Abis itu, dia pigi ka daera Yunani. Di Yunani Paulus tinggal slama tiga bulan. Abis itu, dia basadia for mo blayar ka daera Siria. Mar waktu dia mo nae kapal, dia da dapa dengar kalu ada orang-orang Yahudi baku skongkol mo bunung pa dia. So itu, dia nyanda jadi nae kapal mo ka daera Siria mar dia babale ulang ka Antiokhia iko jalang darat lewat Makedonia. Ada bebrapa orang yang da iko pa Paulus. Dorang itu: Sopater dari Berea tu Pirus pe anak, Aristarkhus deng Sekundus dari Tesalonika, Gayus dari Derbe, Timotius, deng dua orang dari daera Asia, tu Tikhikus deng Trofimus. Dorang itu brangkat lebe dulu kong batunggu pa torang di Troas. Torang blayar sampe di Filipi di daera Makedonia. Kong serta so klar tu hari raya Roti Nyanda Baragi, torang nae kapal dari situ. Torang blayar slama lima hari kong sampe di Troas. Di situ torang bagabung deng tu orang-orang yang da pigi lebe dulu dari torang, kong tinggal slama tuju hari. Waktu hari pertama di minggu itu, torang deng orang-orang percaya laeng da bakumpul sama-sama for mo beking perjamuan. Di situ Paulus babicara lama pa orang-orang percaya itu sampe tenga malam, lantaran de pe eso dia so mo brangkat. Waktu itu, torang da bakumpul di ruang atas. Di situ ada banya pelita da pasang. Kong ada satu nyong tu de pe nama Eutikhus, dia da dudu di regel jendela. Tu nyong itu so nyanda dapa tahang de pe manganto lantaran Paulus pe lama skali da babicara. De pe laste, dia tasono kong jatung dari lante tiga. Waktu dorang turung angka pa dia, dia so mati. So itu Paulus turung ka bawa. Dia baplaka pa tu nyong itu, polo pa tu nyong kong dia babilang pa orang-orang di situ, “Jang tako kwa, dia hidop.” Klar itu Paulus babale ulang ka atas. Di situ dia se pela-pela tu roti kong beking perjamuan, abis itu dorang makang sama-sama. Dia babicara deng dorang sampe pagi. Klar itu dia se tinggal tu Troas. Kong tu orang-orang di situ antar tu nyong yang so hidop ulang itu pa de pe ruma, kong dorang samua snang skali. Abis itu, torang baku pisa jalang deng Paulus kong nanti mo baku dapa di Asos sama deng tu dia pe rencana. So itu torang pigi lebe dulu nae kapal, kong Paulus iko jalang darat. Waktu torang baku dapa ulang deng Paulus di Asos, dia iko deng torang nae kapal. Abis itu, torang blayar ka Metilene. Dari Metilene torang blayar trus, kong de pe eso torang pe kapal so di muka pulau Khios. De pe lusa torang sampe di pulau Samos, kong de pe hari brikut torang sampe di Miletus. Paulus suka mo capat-capat sampe di Yerusalem, lantaran dia suka supaya pas hari raya Pentakosta dia so ada di sana. So itu dia nyanda basingga di Efesus supaya de pe waktu nyanda abis di daera Asia. Waktu Paulus di Miletus, dia suru orang pi pangge tu penatua-penatua jemaat di Efesus supaya datang ka Miletus. Waktu tu pemimpin-pemimpin itu datang ka Miletus, Paulus bilang pa dorang, “Sudara-sudara, ngoni samua so tau bagimana kita pe hidop waktu kita da sama-sama deng ngoni mulai dari hari pertama kita sampe di daera Asia ini. Ngoni tau kalu kita deng hati yang nyanda sombong bakarja for Tuhan, kong kita banya kali manangis. Kita lei banya dapa susa lantaran tu orang-orang Yahudi baku skongkol mo bunung pa kita. Mar biar lei bagitu, kita tetap tolong pa ngoni supaya ngoni pe iman batumbu. Samua kita so se tau deng se ajar pa ngoni di muka banya orang deng lei di ruma-ruma. Kita slalu kase tau pa orang-orang Yahudi deng orang-orang bukang Yahudi supaya bertobat kong iko pa Tuhan Allah, deng percaya pa torang pe Tuhan Yesus. Skarang kita mo pigi ka Yerusalem, lantaran kita musti iko Roh Kudus pe prenta for pigi ka sana. Di sana, kita nintau apa tu mo jadi pa kita. Mar di tiap kota yang kita so pigi akang, tu Roh Kudus so kase tau pa kita kalu nanti di Yerusalem kita mo dapa siksa deng mo dapa maso bui. Mar kita so nyanda farduli deng kita pe hidop, asal kita bole mo kase klar tu tugas yang Tuhan Yesus da kase pa kita sampe kita pe waktu di dunia ini so abis. Tu kita pe tugas itu kita musti se tau tu Kabar Bae kalu Tuhan Allah kase tunjung Dia pe sayang pa torang manusia. Waktu kita da sama-sama deng ngoni ini, kita so se tau bagimana Tuhan Allah Berkuasa sbagai Raja. Skarang kita se tau pa ngoni, kalu ngoni so nyanda mo baku dapa lei deng kita. So itu kita bilang pa ngoni, kalu nanti ada dari pa ngoni yang mati mar blum percaya, itu so bukang kita pe sala. Soalnya kita tetap ja kase tau pa ngoni tentang samua tu Tuhan Allah pe rencana for ngoni. So itu, ngoni musti jaga bae-bae tu ngoni pe diri deng jemaat yang Roh Kudus da kase for ngoni mo jaga. Ngoni jaga tu Tuhan Allah pe jemaat sama deng gembala ja jaga de pe domba, tu jemaat yang Tuhan Allah da tubus deng De pe dara sandiri. Kita tau kalu kita so pigi, tu orang-orang yang de pe sifat sama deng srigala ganas mo maso di tenga-tenga pa ngoni. Dorang mo brusaha se ancor tu jemaat yang ngoni da jaga itu. Malatare dari pa ngoni sandiri mo muncul orang-orang yang mo kase tau tu dong pe ajaran yang nyanda butul. Dorang mo beking bagitu supaya orang-orang yang ja iko pa Yesus jadi nyanda percaya kong iko pa dorang. So itu ngoni musti hati-hati. Ngoni musti slalu inga kalu slama tiga taong waktu kita da sama-sama deng ngoni, siang malam kita da kase nasehat trus pa ngoni sampe malele aer mata. No skarang, kita srahkan ngoni pa Tuhan Allah supaya Dia jaga pa ngoni. Ngoni lei musti inga trus tu firman tentang Tuhan Allah pe sayang pa ngoni. Tu firman itu yang se kuat ngoni pe iman, deng lei yang nanti mo kase tu berkat yang Tuhan Allah so janji mo kase pa samua orang yang Dia so beking kudus. Kita nyanda perna suka orang-orang pe doi perak, doi mas ato baju. Malatare ngoni sandiri tau kalu kita bakarja deng kita pe tangan sandiri, sampe kita mampu se hidop ta pe diri deng kita pe tamang-tamang yang ja iko pa kita. Samua yang kita so beking itu, kita se conto pa ngoni kalu deng karja kras bagitu, torang musti bantu tu orang-orang yang nyanda mampu. Torang musti inga tu Tuhan Yesus da bilang, lantaran Dia sandiri tu da bilang, ‘Lebe snang bakase daripada batrima.’ ” Abis babicara bagitu, Paulus berlutut kong basombayang sama-sama deng dorang samua. Dorang samua manangis, dorang polo pa Paulus kong ciong-ciong pa dia. Dorang pe sedi skali lebe-lebe lei waktu Paulus bilang kalu dorang so nyanda mo baku dapa lei deng dia. Kong dorang antar pa dia ka kapal. Abis torang baku pisa deng tu penatua-penatua jemaat dari Efesus, torang iko blayar ka pulau Kos. De pe eso, torang sampe di pulau Rodos kong dari situ torang blayar trus ka plabuhan Patara. Di Patara torang dapa kapal laeng yang mo ka daera Fenisia, jadi torang nae ka kapal itu kong brangkat. Trus torang dapa lia pulau Siprus di sabla kiri, mar torang pe kapal blayar trus ka kota Tirus di daera Siria. Di Tirus, torang basingga for kase turung tu kapal pe muatan. Di situ, torang pasiar pa orang-orang yang ja iko pa Yesus kong tinggal deng dorang slama satu minggu. Roh Kudus kase tau pa dorang supaya bilang pa Paulus kalu dia nyanda usa pigi ka Yerusalem. Mar serta so abis de pe waktu for torang tinggal di situ, torang mo se trus tong pe perjalanan. So itu samua tu orang-orang percaya, dong pe bini deng anak-anak baantar pa torang sampe ka luar kota. Kong waktu sampe di pinggir pante, torang samua berlutut kong basombayang. Abis itu torang minta permisi pa tu orang-orang percaya trus nae ka kapal, kong dorang samua pulang pa dong pe ruma. Dari Tirus torang blayar trus sampe ka Ptolemais. Di sana torang basingga pa sudara-sudara yang percaya for kase salam pa dorang, kong torang tinggal satu hari sama-sama deng dorang. De pe eso torang bajalang dari situ kong sampe di Kaisarea. Di situ torang tinggal pa satu penginjil tu orang yang ja se tau tu Kabar Bae pa orang yang blum dengar itu, tu penginjil itu pe nama Filipus. Dia itu satu dari tuju orang yang tapili di Yerusalem for ja layani janda miskin. Tu Filipus ada ampa anak nona-nona. Dia pe anak-anak itu ada karunia for kase tau Tuhan Allah pe pesan pa orang-orang. Serta so bebrapa hari torang da tinggal di situ, datang satu orang nabi dari Yudea tu de pe nama Agabus. Dia datang pa torang kong ambe tu Paulus pe ban. Abis itu dia ika de pe kaki deng tangan sandiri pake tu ban itu, kong dia bilang, “Roh Kudus da bilang bagini, ‘Tu orang yang punya ban ini, orang-orang Yahudi di Yerusalem mo ika pa dia sama deng tu kita da beking bagini, kong dorang mo srahkan dia pa orang-orang yang bukang Yahudi.’ ” Pe dengar bagitu, torang deng samua tu orang-orang percaya tu da tinggal di Kaisarea itu bamohon pa Paulus supaya dia nyanda usa pigi ka Yerusalem. Mar Paulus cuma da manyao, “Kiapa ngoni manangis lantaran kita mo pigi dang? Ngoni beking kita pe hati jadi sedi. Kita siap pigi ka Yerusalem biar apa tu mo jadi pa kita di situ. Kita bukang cuma siap mo dapa ika, mar kita lei siap mo mati lantaran da kase tau tentang Tuhan Yesus.” Jadi lantaran Paulus nimau dengar apa tu torang da bilang pa dia, torang jadi pasra kong babilang, “Biar jo tu Tuhan pe mau yang jadi.” Serta so bebrapa hari tinggal di Kaisarea, torang manimpang tu tong pe barang-barang kong pigi ka Yerusalem. Kong ada bebrapa orang yang ja iko pa Yesus dari Kaisarea da iko sama-sama deng torang. Dorang antar pa torang pigi pa Manason pe ruma. Dia ini dari pulau Siprus kong so lama jadi orang yang ja iko pa Yesus. Torang mo manumpang pa de pe ruma. Waktu torang so sampe di Yerusalem, tu sudara-sudara yang percaya da trima pa torang deng snang hati. De pe eso, Paulus pigi sama-sama deng torang pa Yakobus, kong samua penatua so ada di sana. Kong Paulus kase salam pa dorang. Abis itu, dia se cirita samua tu Tuhan Allah da beking pa orang-orang bukang Yahudi waktu dia pi kase tau tu Kabar Bae pa dorang. Pe dengar itu, tu penatua-penatua di situ puji deng hormat pa Tuhan Allah. Abis itu dorang bilang pa Paulus, “Paulus, kita pe sudara yang percaya, bapak musti tau kalu so ribuan tu orang Yahudi di sini yang so percaya pa Yesus, kong dorang samua lei tetap rajin ja iko tu atoran-atoran di kitab Taurat. Mar dorang lei so dengar kalu bapak da se ajar pa samua orang Yahudi yang da merantau di antara bangsa-bangsa bukang Yahudi, supaya dorang nyanda usa iko tu atoran-atoran di kitab Taurat. Dorang lei dengar kalu bapak bilang nyanda usa sunat dong pe anak-anak, deng lei nyanda usa hidop iko torang pe adat. No skarang, bagimana dang? Dorang tantu mo dengar kalu bapak so datang kamari. So itu, lebe bae beking jo apa tu torang mo bilang ini: dari pa torang di sini, ada ampa orang yang so banasar. Bapak bawa pa dorang ampa ini kong beking tu adat beking bersi diri sama-sama deng dorang, kong bapak tanggong akang tu dorang pe ongkos for mo bacukur rambu. Kalu bapak beking bagitu, tu orang-orang Yahudi di sini yang so percaya pa Yesus bole mo dapa tau kalu samua tu dorang da dengar tentang ngana nyanda butul lantaran ngana sandiri da iko tu atoran-atoran di kitab Taurat. Mar for tu orang-orang laeng yang bukang Yahudi tu so percaya pa Yesus, torang so kirim surat pa dorang tentang tu tong pe keputusan. Tu keputusan pe isi bagini: dorang nimbole makang tu makanan yang so kase pa opo-opo, nimbole makang dara, nimbole makang daging dari binatang yang mati lantaran da ramas di leher, deng nimbole baseks bebas.” Abis itu, de pe eso, Paulus bawa tu ampa orang itu sama-sama deng dia. Dia iko tu adat beking bersi diri sama-sama deng dorang. Dia maso ka kompleks Ruma Ibada Pusat for se tau tempo apa tu adat beking bersi diri itu mo klar, kong kalu so klar beking itu, dorang masing-masing mo kase korban persembahan pa Tuhan. Waktu so mo klar tu satu minggu, orang-orang Yahudi yang da datang dari daera Asia lia pa Paulus ada di kompleks Ruma Ibada Pusat. Dorang hasut pa orang-orang yang ada di situ trus tangka pa dia. Kong dorang babilang deng suara kuat, “Hei sudara-sudara orang Israel, co tolong akang pa torang! Dia ini no yang da pigi kamana-mana kong mangajar pa samua orang tu ajaran-ajaran yang malawang bangsa Israel, malawang tu atoran-atoran di kitab Taurat deng tu Ruma Ibada Pusat ini! Kong lei, dia da bawa tu orang-orang bukang Yahudi ka Ruma Ibada Pusat kong beking najis tu tampa suci ini!” Dorang bilang bagitu lantaran dorang so perna lia pa Trofimus tu orang Efesus da sama-sama deng Paulus di Yerusalem, kong dorang kira kalu Paulus so bawa pa dia ka Ruma Ibada Pusat, padahal nyanda. Samua orang di Yerusalem jadi kacau kong dorang datang bakumpul. Trus dorang tangka pa Paulus kong hela kaluar dari kompleks Ruma Ibada Pusat, trus dorang iko tutu tu pintu-pintu gerbang di kompleks Ruma Ibada Pusat. Samantara dorang brusaha mo bunung pa Paulus, ada orang pi bilang pa kapala perwira Romawi kalu di Yerusalem so kacau. So itu, tu kapala perwira itu iko bawa de pe tentara-tentara deng perwira-perwira pigi ka tampa yang so jadi kacau itu. Kong waktu tu orang-orang lia tu kapala perwira deng de pe anak-anak bua itu, dorang brenti bapukul pa Paulus. Pe sampe di tampa itu, tu kapala perwira pi badekat pa Paulus kong tangka pa dia. Trus kapala perwira itu suru ika pa dia pake dua rante, kong dia cari tau sapa tu Paulus itu deng apa tu dia da beking. Mar dari antara orang banya itu ada yang bataria bagini, ada yang bataria bagitu, kong lantaran so kacau, tu kapala perwira nyanda dapa tau apa tu da jadi. So itu dia suru bawa pa Paulus ka markas. Waktu dorang sampe di tangga, tu orang banya so lebe gila da mangamu, so itu tu tentara-tentara angka pa Paulus kong bawa ka markas. Kong tu orang banya itu rame-rame iko di blakang, kong dorang bataria, “Bunung jo pa dia!” Waktu dorang mo se maso pa Paulus ka markas, Paulus batanya pa tu kapala perwira Romawi pake bahasa Yunani, “Bole kita mo bacirita deng bapak?” Tu kapala perwira manyao, “Bapak kote tau bahasa Yunani? Kita pe kira bapak tu orang Mesir yang blum lama ini da beking pembrontakan. Dia itu da bawa lari ampa ribu orang ka padang gurun. Dorang itu yang ja beking kacau pake senjata.” Paulus manyao, “Bukang bapak. Kita orang Yahudi, dari Tarsus, tu kota yang top di daera Kilikia. Kita minta supaya kita bole babicara pa tu orang banya itu.” Kong tu kapala perwira kase isin pa Paulus babicara. Trus Paulus pi badiri di tangga kong basein deng de pe tangan pa tu orang banya itu supaya badiam. Waktu tu orang-orang so tenang, dia mulai babicara pa dorang pake bahasa Ibrani, dia bilang, “Bapak-bapak deng sudara-sudara, co dengar akang kamari, ada tu kita mo bilang pa ngoni for mo babela ta pe diri!” Waktu orang banya itu dengar kalu Paulus babicara pa dorang pake bahasa Ibrani, dorang jadi lebe tenang. Kong Paulus bilang pa dorang, “Kita ini orang Yahudi. Kita da lahir di Tarsus di daera Kilikia, mar da basar di Yerusalem ini. Kita pe guru tu Gamaliel. Dia yang da se ajar pa kita deng butul-butul tu atoran-atoran di kitab Taurat yang Musa da kase pa tong pe nene moyang. Kita ja iko trus tu Tuhan Allah pe atoran-atoran itu sama lei deng ngoni skarang ini. Dulu, kita da siksa sampe mati tu orang-orang yang ja iko tu Yesus pe ajaran. Kita tangka tu laki-laki deng parampuang kong se maso ka bui. Tu imam basar deng anggota-anggota Mahkamah Agama lei bole mo kase tau pa bapak-bapak kalu samua tu kita da bilang itu butul. Dorang yang da kase surat-surat kuasa supaya kita bawa pa sudara-sudara orang Yahudi di Damsyik. Jadi kita pigi bawa tu surat-surat itu supaya kita bole mo tangka tu orang-orang di Damsyik yang ja iko tu Yesus pe ajaran, abis itu kita mo bawa tu orang-orang itu ka Yerusalem for mo hukum. Kong waktu kita samantara perjalanan ka Damsyik kira-kira so tenga hari, kage-kage ada cahaya pe silau skali dari langit bapancar pa kita. Trus kita tajatung ka tana kong kita dapa dengar ada suara babilang pa kita, ‘Saulus, Saulus, kiapa ngana beking siksa pa Kita?’ Kita bale batanya, ‘Sapa dang ini?’ Kong tu suara itu babilang, ‘Kita ini Yesus, tu orang Nazaret yang ngana ja siksa.’ Waktu itu, tu orang-orang yang da sama-sama deng kita da lia lei tu cahaya, mar apa tu suara itu da bilang pa kita dorang nyanda mangarti. Kong kita bilang, ‘Tuhan, apa dang tu kita musti beking?’ Tuhan manyao, ‘Badiri jo kong pigi ka Damsyik. Di sana ada yang mo se tau pa ngana tu tugas yang ngana mo beking.’ Abis itu, kita so nimbole balia lantaran tu cahaya pe silau itu. Jadi kita pe tamang-tamang yang da sama-sama deng kita pegang ta pe tangan kong antar pa kita ka Damsyik. Di Damsyik, ada tu satu orang de pe nama Ananias. Dia itu orang yang ja iko Tuhan pe mau, dia iko tu atoran-atoran di kitab Taurat. Samua orang Yahudi yang ada di situ tau kalu dia orang bae-bae. Dia datang badiri di sei pa kita kong babilang, ‘Saulus, kita pe sudara yang percaya, balia ulang jo ngana!’ Waktu itu jo, kita so bole balia ulang kong kita lia pa dia. Abis itu, Ananias bilang pa kita, ‘Tuhan Allah tu torang pe nene moyang ja semba, Dia so pili pa ngana supaya ngana tau apa tu Dia pe mau, supaya ngana lia pa Dia Yang Butul, deng dengar tu Dia pe suara. Soalnya ngana yang mo jadi Dia pe saksi, ngana mo kase tau pa samua orang apa tu ngana da lia deng da dengar. Kong skarang nyanda usa lama-lama, badiri jo kong kase ngana pe diri for mo dapa baptis, minta jo pa Tuhan kong ngana pe dosa-dosa mo dapa ampung.’ Abis itu, kita babale ka Yerusalem kong pi basombayang di Ruma Ibada Pusat. Waktu itu kita dapa penglihatan, kita lia pa Tuhan Yesus. Dia bilang pa kita bagini, ‘Capat jo se tinggal ni Yerusalem, lantaran dorang nyanda mo trima tu ngana pe kesaksian tentang Kita.’ Mar kita manyao, ‘Tuhan, dorang tau kalu dulu kita ini yang ja maso kaluar ruma-ruma ibada agama Yahudi for mo tangka, cambok kong kase maso ka bui tu orang-orang yang percaya pa Tuhan. Waktu tu orang-orang da bunung pa Stefanus tu Tuhan pe saksi, kita lei ada di situ kong stuju deng tu dorang da beking itu. Kong kita yang jaga tu dorang pe baju waktu dorang da babunung pa dia.’ Mar Tuhan cuma da bilang pa kita, ‘Pigi jo, Kita mo utus pa ngana pigi jao dari sini pa orang-orang bukang Yahudi.’ ” Tu orang-orang Yahudi badengar trus pa Paulus babicara, mar waktu dia bilang kalu Tuhan Allah so utus pa dia pigi pa orang-orang yang bukang Yahudi, dorang nyanda trima itu trus dorang mulai babataria, “Ni orang nyanda pantas mo hidop, bunung jo pa dia!” Dorang trus babataria deng se lempar-lempar tu dong pe juba, kong lei se ambor abu ka atas lantaran dorang so mara skali. So itu tu kapala perwira Romawi prenta pa de pe anak bua supaya bawa pa Paulus ka markas. Di situ, tu kapala perwira prenta for mo cambok deng tanya-tanya akang pa Paulus. Dorang beking bagitu for cari tau apa de pe alasan sampe tu orang banya itu babataria akang pa Paulus. Mar waktu dorang ika pa Paulus for mo cambok, dia bilang pa tu perwira Romawi yang bertugas di situ, “Kalu mo iko pemerenta Romawi pe atoran, apa bole mo cambok tu orang Romawi kalu orang itu blum dapa priksa?” Pe dengar itu, tu perwira pigi pa kapala perwira, kong dia babilang, “Bapak, tu orang itu kote orang Romawi. Jadi bapak mo beking apa dang pa dia?” Pe dengar itu, tu kapala perwira pigi pa Paulus kong batanya pa dia, “Co ngana bilang kamari, butul so ngana orang Romawi?” Paulus manyao, “Butul pak.” Kong tu kapala perwira itu bilang, “Kita da bayar mahal for jadi orang Romawi!” Paulus manyao, “Oh kalu kita komang, kita pe lahir jo, kita so jadi orang Romawi.” Waktu dorang dengar kalu Paulus orang Romawi, tu orang-orang yang mo cambok deng mo tanya-tanya akang pa dia iko mundur. Kong tu kapala perwira itu lei jadi tako lantaran dia so dapa tau kalu tu Paulus yang dia da suru ika itu orang Romawi. De pe eso, tu kapala perwira Romawi suka mo cari tau butul, kiapa sampe tu orang-orang Yahudi da tudu pa Paulus. So itu, dia suru pi ambe pa Paulus dari bui kong dia se prenta supaya tu imam-imam kapala deng anggota-anggota Mahkamah Agama yang laeng bakumpul. Kong dia bawa pa Paulus dari markas kong kase mangada pa dorang. Trus Paulus haga pa tu anggota-anggota Mahkamah Agama kong babilang, “Sudara-sudara, sampe ini hari kita tetap hidop deng hati yang bersi di muka pa Tuhan Allah.” Pe dengar itu, tu imam basar Ananias suru tu orang-orang yang da badiri di dekat pa Paulus supaya paka tu Paulus pe mulu. Pe klar dorang paka pa Paulus, Paulus bilang pa Ananias, “Tuhan Allah mo balas paka pa ngana, hei orang munafik. Ngana da dudu di situ for mo adili pa kita iko tu atoran-atoran di kitab Taurat, mar ngana sandiri lei langgar tu atoran-atoran di kitab Taurat deng cara prenta orang for paka pa kita.” Pe dengar itu, orang-orang yang ada di situ babilang, “He, brani skali ngana basosere tu Tuhan Allah pe imam basar.” Kong Paulus manyao, “Sudara-sudara, kita kwa nintau kalu dia itu imam basar. Memang katu di Kitab Suci ada tulis bagini, ‘Jang ngoni bicara jaha tentang ngoni pe pemimpin.’ ” Waktu itu, Paulus tau kalu tu anggota dari Mahkamah Agama itu dari dua golongan, ada yang dari golongan Farisi deng ada lei dari golongan Saduki. So itu Paulus babilang deng suara kuat, “Sudara-sudara, kita pe orang tua orang Farisi kong kita lei orang Farisi. Kita da se mangada di Mahkamah ini lantaran kita percaya kalu Tuhan Allah mo kase hidop ulang tu orang-orang yang so mati.” Waktu dia babilang bagitu, tu orang-orang dari golongan Farisi deng orang-orang dari golongan Saduki mulai baku ambe sampe dorang jadi taberbage dua. Soalnya, tu orang-orang dari golongan Saduki nyanda percaya kalu orang so mati bole mo hidop ulang, deng dorang lei nyanda percaya kalu tu roh-roh deng tu malaekat ada. Mar komang tu orang-orang dari golongan Farisi percaya kalu itu samua ada. So itu dorang baku ambe sampe samua jadi kacau. Trus ada bebrapa guru agama Yahudi dari golongan Farisi maju ka muka kong babela pa Paulus bagini, “Menurut torang, orang ini nyanda sala sama skali! Sapa tau ada roh ato malaekat yang so datang kong babicara pa dia.” Pe bilang bagitu, orang-orang golongan Farisi deng orang-orang golongan Saduki baku ambe lebe hebat, sampe tu kapala perwira Romawi tako jang sampe dorang malendong akang pa Paulus. So itu dia prenta tu de pe tentara turung ka bawa kong pi ambe deng paksa pa Paulus dari tenga-tenga tu orang banya kong bawa ka markas. De pe eso malam, Tuhan Yesus datang badiri di sei pa Paulus kong babilang, “Se kuat jo ngana pe hati! Ngana so basaksi tentang Kita pa orang-orang di Yerusalem ini, kong nanti lei ngana musti basaksi tentang Kita sama deng ini di Roma.” Serta so siang tu orang-orang Yahudi baskongkol sampe basumpa kalu dorang nyanda mo makang deng minum seblum dorang bunung pa Paulus. Dorang itu ada ampa pulu orang lebe. Dorang pigi pa imam-imam kapala deng tua-tua Yahudi kong babilang, “Torang so basumpa kalu torang nyanda mo makang ato minum seblum torang bunung pa Paulus. Jadi skarang torang mo beking bagini: lebe bae bapak-bapak deng anggota Mahkamah Agama pi mangada pa tu kapala perwira Romawi kong minta pa dia supaya kase mangada ulang tu Paulus pa bapak-bapak. Mar kalu mo babilang pa tu kapala perwira, bapak-bapak musti beking sama deng mo priksa ulang butul-butul tu Paulus pe perkara. Kong kalu dia mo bawa pa Paulus kamari, torang so siap-siap mo dola pa dorang di tenga jalang kong mo bunung pa Paulus seblum dia sampe pa bapak-bapak.” Mar Paulus pe kamanakan, tu de pe sudara parampuang pe anak laki-laki, dapa dengar tu dorang pe rencana itu. Kong dia pigi ka markas for kase tau pa Paulus samua tu dia da dengar. Abis itu, Paulus pangge tu satu perwira Romawi kong bilang, “Bapak, tolong bawa akang ni nyong ini pa bapak pe kapala perwira, lantaran ada tu hal penting yang dia mo kase tau pa kapala perwira itu.” Kong tu perwira Romawi bawa tu nyong itu pa de pe kapala perwira kong bilang, “Bapak, Paulus tu torang da tahang itu da minta tolong pa kita supaya bawa tu nyong ini pa bapak, lantaran tu nyong ini mo kase tau hal penting pa bapak.” Trus tu kapala perwira pegang tu nyong itu pe tangan kong hela pa dia supaya dorang dua bole basandiri. Abis itu tu kapala perwira batanya, “Apa so tu ngana mo kase tau pa kita?” Tu nyong itu manyao, “Tu orang-orang Yahudi so spakat for mo minta pa bapak supaya eso bapak kase mangada ulang tu Paulus pa Mahkamah Agama. Dorang kata mo bawa pa dia ka sana supaya dorang mo priksa butul-butul tu dia pe perkara. Mar bapak jang iko akang dorang pe mau. Soalnya ada lebe dari ampa pulu orang tu so siap-siap mo badola pa Paulus di tenga jalang. Dorang itu kwa so basumpa pa Tuhan kalu dorang nyanda mo makang ato minum seblum dorang bunung pa Paulus. Skarang dorang itu so siap-siap kong kurang mo tunggu bapak mo iyo akang tu dorang pe mau.” Pe dengar itu, tu kapala perwira Romawi bilang pa dia, “Ngana jang bilang pa sapa-sapa kalu ngana so kase tau pa kita tu hal ini.” Kong abis itu kapala perwira suru pulang tu nyong itu. Abis itu, tu kapala perwira Romawi pangge dua perwira kong babilang, “Ngoni kase siap akang dua ratus orang tentara, deng se siap tuju pulu orang yang nae kuda, deng lei dua ratus orang yang bawa tombak. Ini malam pas jam sambilan dorang samua itu mo pigi ka Kaisarea. Ngoni lei kase sadia bebrapa kuda for Paulus mo nae akang, kong ngoni antar pa dia deng slamat sampe pa Gubernur Feliks.” Abis itu, tu kapala perwira tulis surat for mo kase pa Gubernur Feliks. Tu surat itu pe isi bagini, “Bapak Gubernur Feliks yang kita hormat. Salam dari kita, Klaudius Lisias. Tu orang yang skarang kita da kirim ini, de pe nama Paulus. Orang-orang Yahudi da tangka kong amper bunung pa dia. Mar waktu itu, kita deng kita pe anak bua datang kong ambe pa dia supaya dia bole slamat. Soalnya, kita dengar kalu dia itu orang Romawi. Waktu itu kita da cari tau kiapa sampe orang-orang Yahudi da tudu pa dia. Jadi kita bawa pa dia pa dorang pe Mahkamah Agama. Mar waktu dorang da sidang pa dia, dorang nyanda dapa bukti kalu Paulus itu sala. Soalnya tu orang-orang Yahudi da tuntut pa dia cuma lantaran masala dorang pe agama, kong lei nyanda ada alasan yang beking dia pantas mo dapa hukum mati ato mo se maso bui. Abis itu, kita dapa dengar ada orang-orang Yahudi yang so barencana mo bunung pa dia. So itu kita iko suru antar tu Paulus pigi pa bapak. Kong kita lei suru pa tu orang-orang yang batudu pa dia supaya dorang pi bilang tu perkara itu pa bapak. Sampe sini jo kita pe surat.” Abis itu, tu tentara-tentara beking sama deng tu dong pe kapala perwira Romawi da prenta pa dorang. Tu malam itu jo, dorang pi ambe pa Paulus kong antar pa dia sampe ka Antipatris. De pe eso, tu tentara-tentara ofor tu Paulus pa tentara berkuda, kong tu tentara berkuda bawa pa Paulus pigi ka Kaisarea, mar tu tentara-tentara yang da baantar pertama babale ulang ka markas. Pe sampe di Kaisarea, tu tentara-tentara berkuda kase tu surat pa Gubernur, kong dorang lei srahkan tu Paulus pa dia. Pe abis Gubernur baca tu surat, dia batanya pa Paulus, “Ngana ini dari daera mana?” Kong Paulus manyao, “Kita dari daera Kilikia.” Gubernur bilang pa dia, “Kalu tu orang-orang yang da batudu pa ngana so sampe di sini, kita mo urus tu ngana pe perkara.” Pe klar bilang bagitu, Gubernur suru tahang pa Paulus di istana yang raja Herodes da beking. Serta so lewat lima hari, datang tu imam basar Ananias sama-sama deng tua-tua Yahudi deng satu orang pengacara tu de pe nama Tertulus. Dorang samua itu mangada pa gubernur Feliks kong kase tau tu Paulus pe perkara. Abis itu gubernur suru bawa Paulus ka situ. Trus Tertulus mulai batudu pa Paulus, dia bilang, “Bapak gubernur yang torang hormat. Serta Bapak pegang prenta di sini, torang pe hidop jadi tenang, deng lei torang pe daera ini jadi bagus lantaran bapak pande ja baator. Di mana-mana torang da pigi akang, torang tau kalu samua itu bapak yang da beking. Kong for samua itu, torang bilang makase pa bapak. Mar supaya torang nyanda beking abis talalu banya tu bapak pe waktu, kita bamohon pa bapak yang bae supaya dengar akang tu torang mo bilang sadiki ini. Bagini bapak, torang so lia kalu ni orang ini tukang beking kacau kong berbahaya. Soalnya di mana-mana dia beking kacau pa orang-orang Yahudi. Dia ini ja iko tu satu orang dari Nazaret pe ajaran, yang orang ja bilang aliran Nasrani. Kong dia yang jadi pemimpin dari tu aliran itu. Malatare dia coba-coba mo beking najis tu torang pe Ruma Ibada Pusat, mar torang tangka pa dia kong mo adili pa dia iko torang pe atoran-atoran di kitab Taurat. Mar tu kapala perwira Romawi Lisias datang ambe pa dia deng cara kasar dari pa torang. Abis itu, kapala perwira Romawi bilang kalu torang mo tuntut pa Paulus, torang musti mangada pa bapak. Jadi kalu bapak sandiri priksa pa Paulus, bapak mo dapa tau kalu samua tu torang da tudu pa dia itu butul.” Pe klar Tertulus bilang bagitu, tu orang-orang Yahudi laeng lei babilang kalu tu Tertulus da bilang itu butul. Abis itu, Gubernur basein pa Paulus kalu dia so bole babicara, kong Paulus bilang, “Bapak Gubernur, kita tau bapak so deng taong-taong ja urus perkara pa bangsa ini. So itu kita snang mo babela diri di muka pa bapak. Bagini kwa bapak, nyanda lebe dari dua blas hari yang lalu, kita da pigi ka Yerusalem for baibada. Bapak bole tanya pa orang-orang tentang itu. Waktu kita di Ruma Ibada Pusat, orang-orang Yahudi tau kalu kita nyanda baku ambe deng orang-orang deng nyanda beking kacau di situ. Kita lei nyanda beking kacau di tampa-tampa laeng tu ada di dalam kota. Kong skarang dorang tudu macam-macam pa kita, padahal tu dorang da lapor pa bapak tadi nyanda ada de pe bukti. Mar biar lei bagitu, kita mo bilang satu hal pa bapak. Kita ja semba pa Tuhan Allah tu torang pe nene moyang ja semba dari dulu. Kita semba pa Tuhan Allah deng cara iko tu ajaran yang Tuhan Yesus da kase ajar, tu ajaran yang dorang ja bilang sesat, tu aliran Nasrani. Kita percaya samua tu da tulis di atoran-atoran di kitab Taurat deng di kitab nabi-nabi. Kita sama deng dorang baharap deng yakin pa Tuhan Allah kalu nanti samua orang yang so mati mo hidop ulang. Tu orang-orang yang mo hidop ulang itu, ada yang ja beking tu butul di muka pa Tuhan, ada lei yang nyanda ja beking tu butul di muka pa Tuhan. So itu, kita slalu brusaha hidop deng hati bersi di muka pa Tuhan Allah deng lei di muka pa manusia. Kong serta so bebrapa taong di tampa laeng, kita babale ka Yerusalem. Kita datang for kase doi sumbangan pa orang-orang dari kita pe bangsa Yahudi yang hidop susa deng lei for kase korban persembahan di Ruma Ibada Pusat. Waktu kita da beking samua itu di Ruma Ibada Pusat, datang bebrapa orang Yahudi dari daera Asia. Dorang baku dapa deng kita di situ waktu kita baru klar beking tu adat beking bersi diri. Waktu itu, nyanda banya orang di situ deng kita lei nyanda da baribut. Sebenarnya dorang itu yang musti datang kamari kong babilang pa bapak tu dorang pe tuduhan for kita. Itu lei kalu dorang memang ada tuduhan for kita. Mar skarang tanya jo pa dorang ini, apa tu kita pe sala. Tu hari waktu dorang da urus pa kita di muka Mahkamah Agama, dorang nyanda dapa se bukti kalu kita ini memang sala. Ato stou dorang anggap kita sala lantaran waktu itu kita da bilang deng kuat di muka pa dorang, ‘Kita dapa urus di sini lantaran kita percaya kalu Tuhan Allah mo se hidop ulang tu orang-orang yang so mati.’ ” Mar gubernur Feliks yang tau banya tentang tu ajaran Yesus, dia se tunda tu dorang pe perkara, dia bilang, “Kalu tu kapala perwira Romawi Lisias so sampe di sini, baru kita mo ambe keputusan tu ngoni pe perkara.” Kong gubernur suru tu perwira Romawi tetap tahang pa Paulus, mar kase los sadiki pa dia. Paulus pe tamang-tamang lei bole babesuk pa dia kong kase sadia tu de pe keperluan. Serta so bebrapa hari, tu gubernur Feliks bale ulang ka Kaisarea sama-sama deng de pe bini Drusila. Dia pe bini itu orang Yahudi. Kong Feliks suru orang pangge pa Paulus. Serta Paulus so di situ, dia bilang pa Feliks bagimana de pe cara supaya orang bole percaya pa Kristus Yesus. Paulus lei babicara bagimana cara orang mo hidop butul di muka pa Tuhan, bagimana mo kuasai diri, deng lei tentang tu hari kiamat, waktu Tuhan mo adili samua orang. Pe dengar itu, Feliks jadi tako kong bilang, “So bole jo dulu, kong pigi jo skarang. Nanti kalu ada waktu kita mo pangge ulang pa ngana.” Samantara itu, Feliks kote da babaharap kalu Paulus mo kase doi pa dia. So itu dia ja pangge pa Paulus for bacirita deng dia. Pe lewat dua taong, Perkius Festus ganti pa Feliks jadi gubernur. Mar waktu Feliks masi ada di situ dia tetap tahang pa Paulus di bui lantaran dia mo ambe hati pa orang Yahudi. Festus datang ka Kaisarea for jadi gubernur di situ. Serta so tiga hari di situ, dia brangkat ka Yerusalem. Di Yerusalem, tu imam-imam kapala deng orang-orang Yahudi yang punya pengaru datang mangada pa dia for mo kase tau tu dorang pe tuduhan pa Paulus. Dorang bamohon pa gubernur supaya dia bantu suru orang antar pa Paulus ka Yerusalem. Dorang minta bagitu lantaran dong ada rencana mo bunung pa Paulus di tenga jalang. Mar gubernur Festus bilang, “Paulus tetap mo dapa tahang di Kaisarea, kong nyanda lama lei kita mo bale ka sana. So itu, lebe bae tu ngoni pe pemimpin-pemimpin baku iko jo sama-sama deng kita ka sana. Nanti kalu so di sana baru ngoni bilang tu tuduhan for Paulus, itu lei kalu dia memang butul da beking kejahatan.” Gubernur Festus da tinggal di Yerusalem kira-kira dlapan ato spulu hari, abis itu dia pulang ka Kaisarea. De pe eso, dia beking sidang di pengadilan for mo urus Paulus pe perkara kong dia suru orang bawa pa Paulus for mangada pa dia. Serta Paulus sampe di situ, tu orang-orang Yahudi tu da datang dari Yerusalem badiri kong baron akang pa dia, dorang bilang banya tuduhan mar nyanda ada bukti kalu itu butul. Mar Paulus babela diri, dia bilang, “Biar lei sadiki, kita kasiang nyanda beking sala. Kita nyanda malawang tu torang orang-orang Yahudi pe atoran-atoran di kitab Taurat, kita nyanda langgar tu atoran di Ruma Ibada Pusat, deng kita lei nyanda beking sala pa pemerenta Romawi.” Mar lantaran Gubernur Festus mo ambe hati pa orang Yahudi, dia batanya pa Paulus, “Bapak Paulus, apa bapak suka mo pigi ka Yerusalem supaya kita bole mo urus tu bapak pe perkara di sana?” Paulus manyao, “Skarang ini kita da badiri di tampa tu pemerenta Romawi ja baadili akang. Kita musti dapa urus di sini, bukang di Yerusalem. Bapak sandiri lei tau butul kalu kita nyanda beking sala apa-apa pa orang Yahudi. Kalu kita memang ada beking sala ato kejahatan yang musti dapa hukuman mati, kita rela mo mati. Mar komang, kalu samua tu dorang da tudu pa kita nyanda butul, nyanda ada satu orang yang ada hak for mo srahkan kita pa dorang. Kalu so bagini, kita minta nae banding pa raja yang paling tinggi di krajaan Romawi!” Pe dengar itu, Gubernur Festus badiskusi deng de pe penasehat-penasehat, klar itu dia bilang, “Bapak da minta nae banding pa raja yang paling tinggi di krajaan Romawi, jadi ngana musti pi mangada pa dia.” Serta so lewat bebrapa hari, raja Agripa pigi ka Kaisarea. Dia da pigi deng de pe ade parampuang, tu de pe nama Bernike. Dorang ka sana for mo kase slamat pa Festus yang baru da jadi gubernur. Kong serta dorang so sadiki lama tinggal di situ, gubernur Festus kase tau tu Paulus pe perkara pa raja Agripa. Gubernur Festus bilang, “Di sini, ada tu satu orang yang da dapa tahang. Tu gubernur Feliks perna urus tu orang ini pe perkara mar nyanda klar. So itu, dia masi da dapa tahang di sini. Waktu kita ada di Yerusalem, tu imam-imam kapala deng tu tua-tua orang Yahudi da lapor pa kita tu orang itu pe kejahatan. Dorang minta supaya dia dapa hukum. Mar kita bilang pa dorang kalu nyanda biasa for orang Romawi mo srahkan orang for dapa hukum seblum urus tu orang itu pe perkara. Tu orang itu musti dapa kesempatan for mo babela de pe diri kalu apa tu dorang da tudu pa dia itu nyanda butul. So itu, dorang iko sama-sama deng kita kamari. Trus de pe eso, kita beking sidang for urus tu perkara itu kong kita iko suru dorang bawa pa Paulus for mangada pa kita. Waktu itu, tu orang-orang yang da batudu pa Paulus badiri kong dorang bilang tu dong pe tuduhan for Paulus. Mar samua tu dorang da bilang itu, bukang soal kejahatan rupa tu kita da pikir. Dorang cuma da baku ambe deng dia tentang dorang pe agama, deng tentang satu orang tu de pe nama Yesus. Tu Orang itu so mati, mar Paulus cuma da batahang bilang kalu Dia itu da hidop ulang. So itu, kita bingo mo urus tu perkara yang model bagini. Jadi kita tanya pa Paulus kalu dia suka mo ka Yerusalem for mo urus tu de pe perkara di sana. Mar Paulus cuma da bilang kalu dia mo nae banding, dia minta supaya kita tahang pa dia di bui sampe tu raja yang paling tinggi di krajaan Romawi bole urus tu de pe perkara. So itu kita suru tahang pa dia sampe kita ada kesempatan mo kirim pa dia pa tu raja yang paling tinggi di krajaan Romawi.” Pe dengar tu gubernur Festus pe cirita, raja Agripa babilang, “Kita sandiri suka mo dengar langsung dari pa dia.” Kong gubernur Festus manyao, “Bole, nanti eso bapak bole mo dengar dari pa Paulus.” Kong de pe eso, raja Agripa deng Bernike datang di gedung pengadilan. Dorang dua da maso di situ pake baju krajaan kong orang-orang di situ hormat pa dorang. Dorang dua datang sama-sama deng tu kapala-kapala perwira Romawi deng tu orang-orang yang punya pengaru di kota itu. Kong serta dorang samua so ada di situ, gubernur Festus suru bawa pa Paulus ka situ. Serta Paulus so di situ, gubernur Festus babilang, “Raja Agripa yang kita hormat deng samua orang yang ada sama-sama deng torang skarang ini. Co torang lia pa orang ini, amper samua orang Yahudi yang ada di Yerusalem deng yang ada di Kaisarea da batudu pa dia. Dorang datang pa kita kong minta deng babataria kalu dia musti dapa hukuman mati. Mar waktu kita urus de pe perkara, kita nyanda dapa tu de pe sala sampe dia musti dapa hukuman mati. Mar lantaran dia sandiri yang minta for nae banding pa raja yang paling tinggi di krajaan Romawi, jadi kita ambe keputusan for kirim dia mangada pa raja. Cuma de pe masala skarang, kalu kita kirim tahanan pa raja, kita musti tulis samua tu tuduhan tentang orang ini, mar kita blum tau pasti apa tu de pe kejahatan. So itu kita da pangge pa dia kamari for mo se mangada pa ngoni samua di sini. Kita harap pa ngoni samua di sini, apa lei pa raja Agripa supaya sama-sama priksa tu dia pe perkara sampe dapa dia pe sala, trus kita bole tulis itu pa raja yang paling tinggi. Soalnya kita pikir kwa, nyanda maso akal kalu kita kirim satu tahanan pa raja yang paling tinggi mar nyanda ada tuduhan for tu orang itu.” Kong raja Agripa bilang pa Paulus, “No skarang, ngana so bole babicara for babela ngana pe diri.” Trus Paulus basein deng de pe tangan kong babilang, “Raja Agripa yang kita hormat. Orang-orang Yahudi da batudu pa kita, kong skarang kita rasa untung skali lantaran kita bole babela diri di muka pa bapak. Apa lei kita tau, kalu bapak tau skali tu torang pe adat deng tu masala-masala di antara torang orang Yahudi. So itu, kita minta pa bapak supaya dengar akang deng sabar pa kita. Samua orang Yahudi tau bagimana kita pe hidop pa kita pe kampung dari lei kita masi nyong-nyong, sampe kita tinggal di tenga-tenga kita pe bangsa di Yerusalem. Dorang so lama tau kalu kita ini ja iko golongan Farisi, tu golongan yang paling kras iko tu atoran-atoran pa torang pe agama. Kalu dorang suka, dorang bole kase tau samua itu pa bapak. Skarang kita musti mangada di pengadilan ini lantaran kita da baharap tu janji yang Tuhan Allah da kase pa torang pe nene moyang. Tu torang pe dua blas suku Israel da tunggu-tunggu Tuhan Allah mo se gnap tu Dia pe janji itu. Kong samantara batunggu tu janji, siang malam torang ja baibada trus pa Tuhan Allah. Tuhan Allah pe janji itu, Dia mo se hidop ulang orang yang so mati. Jadi Raja Agripa, so lantaran kita da baharap deng yakin tu janji itu no kong orang-orang Yahudi batudu pa kita. Kong skarang kita mo batanya pa orang-orang Yahudi yang ada di sini. Kiapa so ngoni anggap kalu nyanda mungkin Tuhan Allah mo se hidop ulang tu orang yang so mati? Dulu, kita lei perna bapikir kalu kita musti malawang deng kras pa tu orang-orang yang ja iko pa Yesus, tu Orang Nazaret itu. Di Yerusalem lei kita da beking bagitu. Kita dapa kuasa dari imam-imam kapala for tangka tu orang-orang yang ja iko pa Yesus kong kase maso ka bui pa dorang, malatare kita lei stuju kalu dorang itu musti dapa hukuman mati. Kita lei maso ka ruma-ruma ibada agama Yahudi, kong kita ja siksa tu orang-orang yang iko pa Yesus deng paksa pa dorang bahojat pa Dia. Kita binci skali pa dorang, jadi kita dusu pa dorang sampe ka kota-kota di luar daera for mo siksa pa dorang.” Paulus bilang lei, “Satu kali, kita dapa tugas deng surat kuasa dari tu imam-imam kapala kong kita pigi ka Damsyik for mo siksa tu orang-orang yang ja iko pa Yesus. Waktu so di tenga jalang pas tenga hari, kage-kage kita lia ada sinar pe silau skali dari langit. Tu sinar itu lebe trang dari matahari, kong tu sinar tutu pa kita deng tu orang-orang yang ada sama-sama deng kita. Torang samua tajatung ka tana. Kita dapa dengar suara yang da babilang pa kita pake bahasa Ibrani. Tu suara itu da babilang bagini, ‘Saulus, Saulus kiapa ngana siksa pa Kita? Ngana beking siksa ngana pe diri sandiri lantaran da malawang pa Kita yang berkuasa pa ngana.’ Kong kita bale batanya, ‘Sapa dang ini?’ Tu suara itu babilang, ‘Kita ini Yesus, tu ngana ja siksa. Skarang ngana bangong kong badiri jo. Kita da batunjung tu Kita pe diri pa ngana lantaran Kita da pili pa ngana mo jadi Kita pe playan. Ngana mo jadi saksi for se cirita apa tu ngana da lia skarang deng tu Kita mo se lia nanti pa ngana. Nanti tu orang-orang Yahudi deng bukang Yahudi mo siksa pa ngana, mar Kita mo se slamat pa ngana dari pa dorang. Skarang, Kita utus ngana pigi pa dorang, for buka dorang pe pikiran supaya dorang nyanda hidop di glap mar hidop di trang, supaya dorang talapas dari tu setang pe bos pe kuasa kong Tuhan Allah pe kuasa mo ada sama-sama deng dorang, kong so lantaran dorang percaya pa Kita dorang pe dosa-dosa mo dapa ampung, deng dorang mo dapa samua tu Tuhan da janji pa orang-orang yang Dia so beking jadi kudus.’ Jadi Raja Agripa, kita nyanda batolak for beking tu prenta yang Tuhan Yesus da kase pa kita waktu dapa penglihatan. Kita se tau pa orang-orang supaya dorang bertobat kong percaya pa Tuhan Allah. Dorang musti hidop beking tu butul for se tunjung kalu dorang butul-butul so bertobat. Samua itu kita da se tau lebe dulu pa orang-orang Yahudi di Damsyik, di Yerusalem deng di tampa-tampa laeng di daera Yudea, trus kita lei da se tau itu pa orang-orang bukang Yahudi. So lantaran kita da beking itu, tu orang-orang Yahudi tangka pa kita di Ruma Ibada Pusat trus coba mo bunung pa kita. Mar sampe ini hari Tuhan Allah ja tolong pa kita, so itu kita bole badiri di sini for basaksi tentang Yesus pa ngoni samua, biar ngoni pejabat ato orang biasa. Samua tu kita da se tau itu sama deng tu nabi Musa deng tu nabi-nabi laeng so kase tau dulu. Dorang so kase tau kalu tu Mesias musti tanggong banya siksa sampe mati, deng kalu Dia itu yang pertama tu mo hidop ulang. Kong Dia itu lei yang mo kase tau tu Kabar Bae pa orang-orang Yahudi deng orang-orang bukang Yahudi, itu sama deng Dia da kase trang pa dorang pe hati.” Samantara Paulus da babela de pe diri, gubernur Festus potong tu Paulus pe bicara. Dia babilang deng suara kuat, “So gila ngana Paulus! Ngana kwa so talalu banya blajar sampe ngana pe pikiran so nyanda butul.” Mar Paulus manyao, “Bapak Festus yang kita hormat. Kita kasiang nyanda gila, samua tu kita da bilang itu memang butul, kong kita pe pikiran lei masi sehat. Raja Agripa sandiri tau butul tentang samua tu kita da bilang itu, so itu kita brani babicara trang-trangan di muka pa raja. Kita kwa yakin nyanda ada satu dari tu hal-hal yang kita da bilang yang raja nintau, lantaran samua itu da jadi di muka banya orang. Raja Agripa percaya to apa tu nabi-nabi da tulis dari dulu itu? Kita yakin kalu raja percaya itu.” Kong raja Agripa babilang pa Paulus, “Paulus, apa ngana kira gampang mo beking kita jadi orang Kristen cuma deng waktu pe singkat bagini?” Kong Paulus bilang pa raja, “Kita basombayang pa Tuhan Allah supaya capat ato lama, bukang cuma Raja Agripa yang mo jadi percaya pa Yesus, mar samua orang yang ada di sini deng yang da dengar tu kita da bilang mo jadi sama deng kita. Mar tantu katu bukang jadi orang tahanan sama deng kita skarang ini.” Pe klar Paulus babicara, raja Agripa, Bernike, gubernur Festus deng samua orang yang dudu sama-sama deng dorang itu iko badiri. Waktu dorang bajalang kaluar, dorang baku bilang, “Tu orang itu nyanda beking kejahatan apa-apa yang beking dia musti maso bui ato mo dapa hukum mati.” Kong raja Agripa bilang pa gubernur Festus, “Sebenarnya kwa kalu tu orang itu nyanda minta nae banding pa raja yang paling tinggi di krajaan Romawi, dia so bole bebas.” Abis itu, dorang ambe keputusan for kirim pa torang ka daera Italia. So itu, dorang srahkan Paulus deng bebrapa tahanan laeng pa satu perwira tu de pe nama Yulius. Dia itu pemimpin tentara kusus dari tu raja yang paling tinggi di krajaan Romawi. Torang nae ka kapal yang dari Adramitium. Tu kapal itu mo brangkat ka plabuhan-plabuhan di daera Asia. Kong ada lei satu orang yang da iko pa torang, dia pe nama Aristarkhus, dia orang Makedonia dari Tesalonika. Torang samua blayar dari Kaisarea. De pe eso, torang basingga di Sidon. Yulius pe bae-bae skali pa Paulus. Dia se isin pa Paulus pigi pa de pe tamang-tamang supaya dorang bole sadia akang samua tu Paulus pe keperluan. Dari situ torang blayar ulang. Mar waktu itu torang da blayar malawang angin, jadi torang badekat di pulau Siprus supaya torang pe kapal tapele dari angin. Dari pulau Siprus, torang blayar bapotong laut bebas yang ada di muka daera Kilikia deng Pamfilia, trus torang blayar kong sampe di Mira di daera Likia. Di tampa itu, Yulius tu perwira Romawi dapa kapal yang da datang dari Aleksandria, tu kapal itu mo blayar ka Italia. So itu dia se pinda pa torang samua ka kapal itu. Torang da blayar so bebrapa hari mar tu kapal pe bajalang pe plang skali, lantaran torang da blayar malawang angin kancang. Torang da blayar pe stenga mati, mar da sampe jo di muka Knidus. Tu angin masi batiop kancang, so itu deng terpaksa torang blayar bapotong lewat tanjung Salmone di pulau Kreta. Di pulau itu torang blayar iko pinggir pante supaya tapele dari angin. Kong deng stenga mati torang blayar da iko tu tanjung itu. Abis itu torang sampe di satu tampa, de pe nama Plabuhan Indah. Ni tampa ini dekat deng Lasea. Pe banya tu waktu yang da tabuang lantaran torang da blayar malawang angin. Skarang oras bapuasa orang Yahudi so lewat jadi so de pe oras baomba, so itu so nyanda aman for mo blayar. Kong Paulus bilang pa dorang, “Sudara-sudara, kita pikir torang mo cilaka kalu torang mo blayar trus. Nanti torang pe kapal mo tengglam, tu barang-barang muatan mo ilang kong torang samua lei mo mati.” Mar tu perwira Romawi itu nimau mo dengar pa Paulus, dia lebe percaya pa tu kapten kapal deng pa tu yang punya kapal itu. Soalnya tu plabuhan itu memang nyanda cocok for kapal-kapal mo basandar akang di oras baomba. So itu, banya orang di kapal lebe stuju for mo blayar trus se tinggal tu plabuhan itu. Dorang suka mo blayar sampe di kota Feniks di pulau Kreta supaya bole tinggal di sana slama oras baomba. Kota Feniks itu kota plabuhan yang tapele dari angin lantaran da mangada ka barat daya deng barat laut. Waktu itu, angin dari slatan batiop plang-plang. So itu, tu orang kapal kira dong pe rencana for blayar ka kota Feniks mo berhasil. Jadi dorang angka jangkar kong blayar iko pinggir pante pulau Kreta. Mar nyanda lama jo, tu angin batiop kancang skali dari tu pulau Kreta. Tu angin itu orang ja bilang angin ‘Timur Laut’. Tu angin itu batiop kancang skali sampe torang pe kapal nyanda tahang malawang tu angin, so itu torang cuma da se biar tu angin bawa tu torang pe kapal takasana-kamari. Waktu itu torang taanyor sampe di blakang pulau kacili tu de pe nama Kauda, di situ torang da tapele sadiki dari angin. So itu biar lei pe stenga mati, torang bole da se muat tu skoci. Waktu tu orang kapal so se nae tu skoci ka atas kapal, dorang ika se lingkar deng tali tu kapal supaya nyanda ancor. Abis itu, dorang se turung tu kapal pe layar supaya angin bawa tu kapal. Dorang beking bagitu lantaran dorang tako jang sampe takandas di tampa tofor di dekat pante Sirtis. Tu angin kancang pe kuat skali bapaka torang pe kapal kasana-kamari, so itu de pe eso pagi tu orang di kapal mulai se buang tu kapal pe muatan. De pe hari katiga, tu orang-orang kapal sandiri yang buang tu kapal pe alat-alat. Kong slama bebrapa hari torang nyanda dapa lia matahari deng bintang-bintang. Tu angin nyanda brenti-brenti batiop kancang, sampe torang rasa kalu torang so nyanda ada harapan lei mo slamat. So bebrapa hari samua orang nyanda makang apa-apa. So itu Paulus badiri di tenga-tenga pa dorang kong babilang, “Sudara-sudara, kalu tu hari ngoni da dengar pa kita supaya nyanda blayar dari pulau Kreta, bagini torang nyanda dapa susa deng nyanda mo rugi rupa ini. Mar skarang, biar so susa bagini, kita mo se nasehat pa ngoni supaya ngoni jang tako. Nyanda ada satu dari pa ngoni tu mo mati, cuma ni kapal tu mo ancor. Kita ini Tuhan Allah pe orang, kong kita ja semba pa Dia. Kong tadi malam, Tuhan Allah suru Dia pe malaekat datang badiri di sei pa kita. Tu malaekat itu bilang pa kita, ‘Paulus, ngana jang tako! Ngana musti mangada pa raja yang paling tinggi di krajaan Romawi. Tuhan Allah sayang pa ngana, so itu Dia mo se slamat samua orang yang da blayar sama-sama deng ngana.’ Jadi sudara-sudara, ngoni jang tako! Soalnya kita yakin samua tu Tuhan Allah da bilang pa kita pasti mo jadi. Mar torang musti se tadampar tu kapal ini ka satu pulau.” Pas malam kaampa blas, tu angin kancang masi da bawa torang pe kapal kasana-kamari di laut Adria. Kong de pe tenga malam, tu orang-orang kapal barasa kalu tu kapal so dekat deng daratan. So itu, dorang se lucur tali yang da ika akang deng batu for mo ukur tu laut pe dolong. Tu laut pe dolong kira-kira 40 meter. Nyanda brapa lama tu kapal tamaju sadiki kong dorang ukur ulang, di situ de pe dolong kira-kira 30 meter. Kong lantaran tako kalu tu kapal mo takandas di batu karang, dorang buang tu ampa jangkar yang ada di bagian blakang kapal kong baharap supaya capat siang. Mar waktu itu, tu orang-orang kapal brusaha mo lari dari kapal. So itu dorang se turung tu skoci for bapura-pura mo se turung bebrapa jangkar di bagian muka kapal. Mar Paulus dapa tau itu, trus dia bilang pa tu perwira Romawi deng de pe tentara-tentara, “Kalu tu orang-orang kapal itu lari dari kapal, ngoni nyanda mungkin mo slamat.” Pe dengar itu, tu tentara-tentara itu pi potong tu skoci pe tali kong kase biar tu skoci itu anyor. Serta so mo pagi, Paulus suru pa samua orang di kapal for makang. Dia bilang pa dorang, “So dua minggu torang nyanda makang apa-apa lantaran cuma da tabingo-bingo for mo cari slamat. So itu kita bilang pa ngoni makang jo dulu supaya ngoni jadi kuat. Ngoni samua ini pasti mo slamat, nyanda ada satu ujung rambu tu mo tailang dari pa ngoni pe kapala.” Abis Paulus bilang bagitu, dia ambe roti kong bilang makase pa Tuhan Allah di muka pa dorang samua, dia pela-pela tu roti kong mulai makang. Abis itu, dorang samua jadi smangat kong baku iko makang. Torang samua yang di kapal itu de pe jumla ada 276 orang. Serta so kanyang, dorang se buang ka laut tu samua gandum di karong-karong supaya tu kapal jadi ringan. Serta so pagi, orang-orang kapal dapa lia daratan, mar dorang nintau tu tampa itu. Dorang dapa lia teluk deng de pe pante. Kong dorang ambe keputusan for se tadampar tu kapal di tampa itu. So itu dorang potong tu tali-tali jangkar kong se biar tu jangkar-jangkar di dasar laut. Samantara itu dorang se longgar tu tali-tali yang da tahang tu kamudi supaya bole pake ulang. Kong dorang lei se buka tu layar supaya angin tiop tu kapal itu ka pante. Mar tu kapal cuma da takandas di paser, kong de pe muka kapal tatanang di situ sampe so nimbole bagra. Kong tu kapal pe blakang lei ancor lantaran omba basar da paka. Serta so jadi bagitu, tu tentara-tentara barencana mo bunung tu orang-orang tahanan supaya nyanda ada satu orang bole mo lolos deng cara batobo. Mar tu perwira itu larang pa dorang mo beking tu dorang pe rencana, lantaran dia suka mo se slamat pa Paulus. So itu dia prenta pa dorang supaya tu orang-orang yang jago batobo, balumpa lebe dulu ka laut kong batobo ka darat. Kong tu laeng baku iko deng cara bapegang di papang ato bagean-bagean kapal yang so ancor. Deng cara bagitu, dorang samua bole slamat sampe ka darat. Waktu torang so sampe di pante deng slamat, di situ baru torang tau tu pulau itu pe nama Malta. Orang-orang di situ pe bae-bae skali pa torang. Dorang se manyala akang api kong pangge pa torang ka situ, lantaran waktu itu so mulai baujang deng so dingin. Paulus pi cari cabang-cabang kacili for taru di api. Waktu dia taru tu cabang-cabang itu di api, kage-kage kaluar satu ular babisa dari tu cabang-cabang itu lantaran tu api pe panas. Kong tu ular itu gigi Paulus pe tangan sampe nyanda talapas. Waktu orang-orang di pulau itu lia tu ular itu da tagantong pa Paulus pe tangan, dorang baku bilang, “Ni orang pasti babunung orang. Jadi biar lei dia so talapas dari bahaya di laut, tu Dewi Keadilan nyanda kase biar dia mo hidop.” Mar waktu itu, Paulus cuma da se kabas tu ular itu ka dalam api kong dia sama skali nyanda apa-apa. Padahal tu orang-orang yang da lia itu bapikir kalu nyanda lama lei tu Paulus pe tangan mo jadi bangka ato kage-kage dia mati. Mar serta so batunggu lama, dorang lia kalu Paulus nyanda jadi apa-apa, so itu dorang pikir kalu dia itu dewa. Nyanda jao dari tu tampa itu, ada tana tu pemimpin pulau itu punya. Tu pemimpin pulau itu pe nama Publius. Dia sambut pa torang kong layani pa torang deng bae-bae slama tiga hari. Waktu itu, Publius pe papa da tidor-tidor lantaran da saki panas deng mencret-mencret. Paulus maso pa Publius pe papa pe kamar, trus Paulus taru tu de pe tangan di atas tu bapak itu pe kapala kong dia basombayang. Pe klar itu, tu bapak jadi bae. Abis tu kejadian itu, tu orang-orang saki di pulau itu lei datang pa Paulus, kong Paulus kase bae lei pa dorang. Tu orang-orang di situ jadi hormat skali pa torang. Kong waktu torang so mo brangkat, dorang lei kase sadia samua tu torang pe keperluan. Serta so tiga bulan di pulau Malta, torang brangkat deng kapal yang dari Aleksandria. Tu kapal itu da berlabu di pulau Malta slama oras dingin. Tu kapal itu da pake lambang ‘Dewa Kembar Kastor deng Poluks’. Torang berlabu di Sirakusa di pulau Sisilia, kong torang tinggal di situ slama tiga hari. Dari situ torang blayar iko pinggir pante di pulau itu, kong torang sampe di Regium. De pe eso angin slatan batiop, so itu de pe hari kadua torang sampe di Putioli. Di situ, torang baku dapa deng sudara-sudara yang percaya pa Yesus kong dorang bamohon pa torang supaya tinggal deng dorang slama tuju hari. Abis itu torang brangkat ka Roma. Tu sudara-sudara di Roma yang percaya pa Yesus so dengar kalu torang mo ka sana. So itu dorang pi dola pa torang di tenga jalang. Ada tu da badola pa torang di Pasar Apius, kong tu laeng da badola pa torang di tampa tu de pe nama Tiga Penginapan. Waktu Paulus lia pa dorang, dia bilang makase pa Tuhan Allah kong de pe hati jadi kuat. Serta torang so sampe di Roma, Paulus dapa isin supaya bole tinggal di luar bui, jadi Paulus tinggal di satu ruma sama-sama deng satu tentara yang da jaga pa dia. De pe katiga hari, Paulus undang tu orang-orang Yahudi yang punya pengaru for baku dapa deng dia. Kong waktu dorang so takumpul, dia bilang pa dorang, “Sudara-sudara! Kita nyanda beking sala apa-apa yang malawang torang pe bangsa deng nyanda langgar tu torang pe nene moyang pe adat. Mar biar lei bagitu, orang-orang tangka pa kita di Yerusalem, kong srahkan kita pa pemerenta Romawi. Waktu tu orang-orang Romawi priksa pa kita di sana, dorang nyanda dapa kita pe sala yang bole mo beking kita dapa hukum mati, jadi dorang mo se bebas pa kita. Mar tu orang-orang Yahudi nyanda trima kalu kita mo bebas, so itu kita terpaksa nae banding pa raja yang paling tinggi di krajaan Romawi. Kita da beking bagitu bukang lantaran kita mo se sala tu kita pe bangsa sandiri. So itu kita minta mo baku dapa for babicara deng ngoni. Kita da baharap deng yakin pa Mesias tu Tuhan Allah da janji dari dulu pa torang orang Israel, kong cuma lantaran masala itu sampe dorang da ika pa kita.” Mar dorang bilang pa Paulus, “Torang nyanda trima surat dari Yudea tu da se tau tentang bapak, deng torang pe tamang-tamang yang pulang dari Yerusalem lei nyanda cirita jaha tentang bapak. Mar torang suka mo dengar sandiri dari bapak tentang tu aliran Nasrani yang torang tau di mana-mana ada orang-orang yang malawang tu aliran itu.” Abis itu dorang tentukan satu hari for mo baku dapa ulang deng Paulus. Kong di hari itu, pe banya skali orang yang da datang pa Paulus pe tampa tinggal. Pagi sampe sore Paulus kase tau deng basaksi pa dorang tentang Tuhan Allah Berkuasa sbagai Raja. Paulus pake tu atoran-atoran dari tu kitab Taurat deng kitab nabi-nabi supaya dorang mangarti kong percaya kalu Yesus tu Mesias. Dari samua tu orang-orang yang ada di situ, ada yang percaya deng tu Paulus da bilang, mar ada lei yang nyanda percaya. Dorang samua nyanda satu pendapat kong dorang kaluar dari Paulus pe tampa tinggal. Mar seblum dorang kaluar, Paulus kase tau satu hal lei pa dorang, dia bilang, “Memang butul kote tu Roh Kudus da kase tau pa torang pe nene moyang tu da tulis di kitab nabi Yesaya. Bagini tu da tulis, ‘Pigi jo pa bangsa Israel kong bilang pa dorang: Biar ngoni mo dengar-dengar trus, mar ngoni nyanda mo mangarti. Biar lei ngoni mo lia-lia trus, mar ngoni nyanda mampu mo mangarti apa tu da jadi. Soalnya tu bangsa ini so kras hati. Dorang pe talinga so nimau mo badengar, dorang lei tutu dong pe mata. So lantaran dorang da beking bagitu, dorang nyanda mo lia tu butul. Dorang nyanda mo badengar deng dong pe talinga, dorang lei nyanda mo mangarti deng dong pe hati, jadi dorang nyanda mo bertobat kong Kita nyanda mo se slamat pa dorang.’ Jadi sudara-sudara, ngoni musti tau kalu tu orang-orang yang bukang Yahudi so dengar lei tu kabar keslamatan dari Tuhan Allah, kong dorang itu mo trima tu kabar itu kong mo slamat.” [ Abis Paulus bilang bagitu, tu orang-orang Yahudi pulang kong dorang pe pendapat memang nyanda baku maso.] Paulus da tinggal slama dua taong di ruma tu dia da sewa akang. Dia trima samua orang yang datang pa dia. Paulus kase tau tu brita tentang Tuhan Allah Berkuasa sbagai Raja, dia lei se ajar pa dorang tentang Tuhan Yesus Kristus. Dia se ajar pa dorang deng brani, kong nyanda ada halangan apa-apa. Ni surat dari kita, Paulus. Kita ini orang yang ja beking tu Kristus Yesus da suru. Tuhan da pangge pa kita jadi rasul tu Kristus Yesus pe utusan, kong Dia da se kusus pa kita for kase tau tu Kabar Bae dari Tuhan Allah. Tu Kabar Bae itu Tuhan Allah so janji dari dulu pa Dia pe nabi-nabi, kong dorang tulis itu di Kitab Suci. Tu Kabar Bae itu tentang Anak Allah. Waktu Dia datang ka dunia sbagai manusia, Dia lahir dari raja Daud pe keturunan. Dia itu no Yesus Kristus tu torang pe Tuhan. Kong torang dapa tau pasti kalu Dia itu Anak Allah lantaran waktu Dia mati, Roh Kudus pe kuasa kase hidop ulang pa Dia. Kong lewat Yesus Kristus itu, Tuhan Allah se tunjung tu Dia pe bae pa kita sampe Dia pili pa kita jadi rasul for kase tau tu Kabar Bae tentang Yesus Kristus pa samua suku bangsa, supaya dorang percaya deng iko tu Yesus Kristus pe mau, kong banya orang puji pa Dia. Kong ngoni lei tamaso di samua tu suku bangsa itu, ngoni lei yang Tuhan pangge jadi Yesus Kristus pe orang. Kita tulis ni surat for ngoni samua yang percaya yang ada di Roma. Ngoni ini Tuhan Allah sayang, deng Dia pangge pa ngoni for hidop deng hati bersi di muka pa Dia. Kita minta pa Tuhan Allah tu torang pe Bapa deng Tuhan Yesus Kristus se tunjung tu bae pa ngoni, kong beking ngoni hidop deng hati tenang. Pertama kita bilang makase pa Tuhan Allah yang kita semba lewat Yesus Kristus lantaran ngoni. Soalnya ngoni pe percaya pa Tuhan Allah so tasiar ka sluru dunia. Kita slalu basombayang akang for ngoni; Tuhan Allah yang jadi saksi kalu kita butul ja beking itu. Tuhan Allah itu yang kita ja layani deng hati yang sunggu-sunggu waktu kita kase tau tu Kabar Bae tentang Dia pe Anak. Tiap kali kita basombayang, kita minta pa Tuhan Allah supaya skarang Tuhan kase kesempatan pa kita for pigi pa ngoni kalu itu memang Dia pe mau. Soalnya kita suka skali mo baku dapa deng ngoni for mo se ajar pa ngoni tu Tuhan pe Roh da ajar pa kita supaya ngoni pe percaya lebe kuat. Kita pe maksut, kalu kita ada sama-sama deng ngoni di sana, kita bole se kuat ngoni pe hati supaya ngoni pe percaya pa Tuhan lebe kuat, kong tu ngoni pe percaya itu bole lei se kuat kita pe hati supaya kita pe percaya pa Tuhan lebe kuat. Sudara-sudara, supaya ngoni tau, kita so banya kali mo pigi pa ngoni, mar sampe skarang slalu ada halangan. Kita mo se tau tu Kabar Bae supaya tu orang yang blum percaya bole jadi percaya sama deng tu da jadi di antara bangsa-bangsa bukang Yahudi yang laeng. Kita ada beban for kase tau tu Kabar Bae pa samua orang: pa tu orang-orang yang tinggal di kota, pa orang-orang yang tinggal di kampung, pa orang-orang yang pande, deng lei pa tu orang-orang yang nintau apa-apa. So itu, kita suka skali mo pi se tau tu Kabar Bae tentang Yesus pa ngoni lei tu ada di Roma. Kita nyanda malo mo kase tau tu Kabar Bae tentang Yesus. Soalnya tu Kabar Bae itu ada kuasa dari Tuhan Allah yang kase slamat dari hukuman dosa tu tiap orang yang percaya. Kong bukang cuma bangsa Yahudi tu mo dapa slamat, tu orang-orang bangsa bukang Yahudi lei mo dapa slamat. Lewat tu Kabar Bae itu, Tuhan Allah so se tunjung tu Dia pe cara for beking torang jadi butul di muka pa Dia. Kalu torang mo jadi butul di muka pa Tuhan Allah, torang musti percaya pa Dia dari pertama sampe slama-lamanya. Itu sama deng tu da tulis di Kitab Suci bagini, “Orang yang percaya pa Tuhan, Tuhan mo beking dia jadi orang yang butul di muka pa Tuhan, dia mo hidop deng Tuhan slama-lamanya.” Tuhan Allah tu ada di sorga mara pa samua orang yang nyanda iko tu Dia pe mau deng pa samua orang yang ja beking tu jaha. Kong dorang pe kejahatan itu beking orang nyanda iko tu ajaran yang butul. Tuhan mo hukum pa manusia yang rupa itu lantaran sebenarnya dorang bole mo tau tentang Tuhan Allah, soalnya Tuhan Allah sandiri yang beking jelas pa dorang tentang sapa Dia. Soalnya mulai dari dulu waktu Tuhan Allah da beking ni dunia sampe skarang, biar nyanda lia pa Dia, manusia bole tau deng jelas Dia pe sifat. Dorang bole tau Dia pe kuasa yang ada sampe slama-lamanya, deng dorang lei bole tau kalu Dia itu Tuhan. Jadi nyanda ada alasan for dorang mo bilang kalu dorang nintau Tuhan itu ada. Dorang so tau kalu Tuhan Allah itu ada kong Dia pantas mo dapa puji deng hormat, mar dorang nyanda puji deng hormat pa Dia, dorang lei nyanda bilang makase pa Dia. Dorang so nyanda pikir tentang Tuhan malatare dorang cuma pikir tu hal-hal yang nyanda ada guna. Dorang pe hati so jadi glap, so nyanda mangarti apa yang butul. Dorang bilang, dorang so tau banya, padahal sebenarnya dorang itu bodok. De pe laste dorang nyanda semba pa Tuhan Allah, padahal Tuhan Allah itu luar biasa kong hidop slama-lamanya. Dorang tare cuma da semba pa samua yang nyanda mo batahang slama-lamanya. Tu dorang da semba itu, patong-patong yang de pe model rupa ini: manusia, burung, binatang yang de pe kaki ampa, deng lei binatang yang ja bamaraya. So lantaran dorang nyanda semba pa Tuhan Allah, Dia se biar dorang iko tu dorang pe mau for beking tu hal-hal yang cabul, sampe dorang beking malo tu dorang pe diri sandiri deng lei orang laeng. Soalnya dorang nyanda trima yang butul yang dari Tuhan Allah tu da ciptakan langit deng bumi, malatare dorang cuma puji deng semba apa yang Tuhan Allah da ciptakan. Tuhan Allah itu no yang pantas mo dapa puji for slama-lamanya. Amin. So lantaran dorang so nyanda semba pa Tuhan Allah, so itu Tuhan Allah se biar dorang iko tu dorang pe nafsu yang beking dorang itu jadi malo. Dorang pe bini-bini so nyanda ja beking tu hubungan seks yang biasa dorang beking deng dong pe laki, malatare dorang cuma ja beking tu hubungan seks deng parampuang laeng. Bagitu lei deng tu laki-laki, dorang so nyanda ja beking tu hubungan seks yang biasa laki-laki ja beking deng dong pe bini, mar ada nafsu besae yang kuasai pa dorang sampe cuma suka beking tu hubungan seks deng laki-laki. Tu dorang ja beking itu sebenarnya beking malo, kong dorang dapa hukuman yang pantas iko tu dorang pe kalakuan yang nyanda butul itu. Dorang rasa dorang nyanda perlu tau tentang Tuhan Allah, so itu Tuhan Allah kase biar dorang pe pikiran yang nyanda ada de pe guna kuasai pa dorang. De pe laste, dorang beking tu hal-hal yang nyanda pantas dorang beking. Dorang pe hati punung deng tu hal-hal nyanda butul deng tu hal-hal yang jaha. Dorang sraka, bapikir tu jaha, mangiri, deng babunung. Dorang ja baku ambe, batipu, suka kalu orang laeng dapa cilaka, deng suka ja bicara tentang orang laeng. Dorang itu lei ja se besae orang laeng pe nama, binci pa Tuhan Allah, pandang enteng, sombong, suka bicara tinggi-tinggi, jago beking tu jaha, kong lei nyanda dengar-dengaran pa orang tua. Kong dorang lei biongo, nyanda setia, nyanda ja basayang, deng nyanda ada rasa kasiang. Dorang itu so tau Tuhan Allah pe atoran yang bilang kalu orang yang ja beking samua hal jaha itu, tu orang itu pantas mo hukum mati. Mar biar lei dorang tau, dorang tetap beking tu hal-hal jaha itu, kong dorang lei stuju kalu orang laeng ja beking tu hal-hal jaha itu. Sudara-sudara, Tuhan memang mo hukum tu orang-orang yang ja beking tu hal-hal jaha, mar ngoni nyanda ada alasan mo adili tu orang-orang itu lantaran ngoni sandiri lei ja beking hal-hal jaha. Jadi kalu ngoni babilang pa dorang, dorang itu pantas Tuhan mo hukum, itu sama jo deng ngoni hukum pa ngoni pe diri sandiri. Torang tau kalu Tuhan Allah pe hukuman pa orang-orang yang ja beking tu hal-hal jaha itu butul. Jadi ngoni yang babilang pa orang laeng kalu dorang pantas Tuhan mo hukum, jang ngoni pikir kalu ngoni mo bebas dari Tuhan Allah pe hukuman, lantaran ngoni lei ja beking tu hal-hal jaha sama deng dorang. Tuhan Allah itu pangsayang, Dia itu sabar deng Dia pe hati bae, mar biar bagitu torang jang pandang enteng kong bilang pa torang pe hati, “Kita nyanda usa roba kita pe kalakuan.” Ngoni inga jo, Tuhan pe hati bae bagitu pa torang supaya torang bole bertobat. Mar ngoni ini kapala batu, ngoni nimau bertobat. So itu ngoni sandiri yang beking ngoni pe hukuman tatamba brat di hari kiamat, tu waktu yang Tuhan Allah mo kase tunjung De pe mara deng mo kase hukuman yang adil pa samua orang. Dia mo balas pa tiap orang iko apa tu orang-orang da beking. Dia mo kase tu hidop kekal pa tu orang-orang yang ja beking trus tu bae lantaran dorang suka dapa puji deng hormat dari Tuhan Allah, deng lei suka dapa tu hidop kekal deng Dia. Mar ada lei tu orang-orang yang cuma hidop for dong pe diri sandiri. Dorang nimau iko Tuhan Allah pe ajaran yang butul, dorang tare cuma suka ja beking tu jaha. Tuhan Allah mo mara skali pa dorang. Tuhan Allah mo kase hukuman pa samua orang yang ja beking tu jaha sampe dorang mo susa deng mendrita skali. Kong bukang cuma orang-orang Yahudi tu mo dapa hukuman, orang-orang bukang Yahudi lei mo dapa hukuman. Mar samua orang yang beking tu bae, nanti Tuhan Allah mo puji deng hormat pa dorang deng Dia beking dong hidop deng hati tenang, bukang cuma orang-orang Yahudi mar orang-orang bukang Yahudi lei. Soalnya Tuhan Allah nyanda ja bapili-pili orang. Kalu tu orang-orang Yahudi, dorang itu so ada tu atoran-atoran di kitab Taurat, jadi kalu dorang langgar tu atoran itu, dorang itu so beking dosa kong Tuhan mo hukum pa dorang. Trus kalu tu orang-orang bukang Yahudi, biar dorang nyanda ada tu atoran-atoran itu, Tuhan Allah tetap anggap dorang itu berdosa kalu dorang beking sala, kong Tuhan Allah lei mo hukum lei pa dorang sampe tapisa deng Dia for slama-lamanya. Soalnya orang-orang yang butul di muka pa Tuhan Allah, bukang orang-orang yang cuma badengar tu atoran-atoran di kitab Taurat, mar yang da iko tu atoran-atoran itu. Orang-orang bukang Yahudi, dorang itu nintau tu atoran-atoran di kitab Taurat. Mar kalu dorang beking tu bae yang sama deng atoran-atoran di kitab Taurat, itu lantaran pa dorang pe hati so tau mana tu butul deng mana tu sala, biar dorang blum perna tau tu atoran-atoran di kitab Taurat itu. Dorang pe kalakuan yang bae itu no se tunjung kalu pa dorang pe hati sama deng so ada tu atoran-atoran di kitab Taurat. Pa dorang pe hati, dorang tau apa tu sala deng apa tu butul. Jadi laengkali, pa dorang pe hati dorang kase sala dorang pe diri sandiri, laengkali komang pa dorang pe hati dorang anggap dorang pe diri butul. Kong kalu so hari Kiamat, Tuhan Allah mo kase kuasa pa Kristus Yesus tu mo adili pa manusia iko tu dorang da beking, sampe tu hal-hal yang manusia nintau. Kong tu mo jadi di hari kiamat itu, kita so ja bilang waktu kita ja kase tau tu Kabar Bae. Torang tu orang-orang Yahudi, torang ini tu orang-orang yang Tuhan Allah da pili pertama jadi De pe orang-orang, deng yang Tuhan Allah da kase akang tu atoran-atoran di kitab Taurat. So itu ada di antara pa torang yang cuma baharap trus tu atoran-atoran di kitab Taurat deng ada yang babasombong lantaran pikir dorang ada hubungan dekat deng Tuhan. Kong torang tu orang-orang Yahudi, torang tau tu Tuhan pe mau yang musti torang beking. Torang lei tau mana yang butul yang torang musti beking lantaran torang so blajar dari tu atoran-atoran yang ada di kitab Taurat. Deng ada lei dari antara pa torang orang Yahudi yang yakin skali kalu dorang so bole ja se ajar pa orang tentang tu ajaran yang butul, sama deng orang yang se tunjung jalang pa orang buta, kong sama lei deng orang yang kase trang pa samua orang yang hidop di glap. Trus ada lei di antara pa torang orang Yahudi yang anggap kalu dorang so bole se ajar pa orang yang blum tau tu butul. Dorang pikir dorang so bole jadi guru pa orang yang blum tau atoran sama tu anak kacili yang blum tau atoran. Dorang pikir dorang so banya tau tentang tu pengetahuan deng tu ajaran yang butul dari tu atoran-atoran di kitab Taurat. Jadi kalu torang ja se ajar tu butul pa orang laeng, no kiapa dang ada di antara pa torang orang Yahudi sandiri yang nyanda blajar dari apa yang torang ja se ajar itu? Torang kase ajar, ‘jang bapancuri’, no kiapa dang ada di antara pa torang orang Yahudi yang bapancuri? Kong torang ja se ajar ‘jang bersina’, no kiapa dang di antara pa torang orang Yahudi ada yang bersina? Kong torang bilang torang orang Yahudi binci pa opo-opo, no kiapa dang ada di antara pa torang yang pancuri tu barang-barang di tampa yang ja basemba akang opo-opo? Torang bangga lantaran torang so ada tu atoran-atoran di kitab Taurat, mar kiapa dang ada di antara pa torang yang beking besae tu Tuhan Allah pe nama deng cara langgar tu atoran-atoran di kitab Taurat itu? Waktu torang tu orang Yahudi nyanda iko tu atoran-atoran di kitab Taurat, torang jadi sama deng tu da tulis di Kitab Suci yang bagini, “So lantaran orang-orang Yahudi nyanda butul-butul iko pa Tuhan Allah, itu yang beking bangsa-bangsa laeng yang bukang Yahudi bahojat Dia pe nama.” Torang orang dari bangsa Yahudi, torang dapa sunat for jadi tanda kalu torang ini yang Tuhan da pili jadi Dia pe orang. Kalu torang iko tu atoran-atoran di kitab Taurat, tu sunat itu ada de pe arti kalu torang ini butul-butul Tuhan punya. Mar kalu torang nyanda ja iko tu atoran-atoran di kitab Taurat, tu sunat itu jadi nyanda ada de pe arti, torang sama jo deng orang yang nyanda kanal pa Tuhan. Kong kalu orang-orang bukang Yahudi iko tu atoran-atoran di kitab Taurat, biar dorang nyanda sunat, Tuhan trima pa dorang jadi Dia pe orang. Jadi kalu tu orang-orang yang bukang Yahudi iko tu atoran-atoran di kitab Taurat, dorang itu se tunjung kalu torang tu orang-orang dari bangsa Yahudi itu sala. Soalnya torang tu ada atoran-atoran yang so tatulis itu deng lei torang so sunat, malatare torang tu da langgar tu atoran-atoran di kitab Taurat. Soalnya orang Yahudi yang butul Tuhan Allah pe orang, bukang cuma orang Yahudi lantaran da lahir dari de pe orang tua yang orang Yahudi, deng bukang cuma lantaran dapa sunat. Mar orang Yahudi yang butul-butul Tuhan Allah pe orang, tu orang yang dapa sunat bukang lantaran cuma mo iko tu atoran-atoran di kitab Taurat, mar lantaran dia so kase tu dia pe diri pa Tuhan kong Tuhan pe Roh bakarja pa dia pe dalam hati sampe dia pe hidop bruba. Dia itu mo dapa puji bukang dari manusia mar dari Tuhan Allah. Orang Yahudi deng orang bukang Yahudi itu sama di muka pa Tuhan. No kalu bagitu, apa ada untung so jadi orang Yahudi? Kong apa ada guna so iko tu orang Yahudi pe atoran sunat? Tantu katu banya skali de pe untung. Tu paling penting, tu orang-orang Yahudi yang Tuhan Allah pili for kase percaya akang Dia pe firman. Mar ada orang Yahudi yang nyanda setia pa Tuhan. No apa Tuhan Allah nyanda mo setia pa De pe perjanjian deng dorang? Tantu katu nyanda, Tuhan tetap mo setia pa De pe perjanjian. Tuhan Allah slalu butul biar lei samua orang pangbadusta. Tuhan Allah itu butul sama deng tu da tulis di Kitab Suci, “Samua tu Dia da bilang itu butul, kong kalu ada yang mo adili pa Dia, Dia pasti menang.” Mar kalu torang orang Yahudi nyanda ja beking tu butul, kong banya orang bole lebe kanal kalu Tuhan Allah itu butul, apa torang mo bilang, “Ada de pe untung kote kalu beking tu yang nyanda butul, jadi kalu torang dapa hukum itu de pe arti Tuhan Allah nyanda butul.” Kalu ada yang bilang bagitu, itu cuma manusia pe pikiran. Tu dorang pe pikiran itu sala. Soalnya kalu Tuhan Allah nyanda butul, Dia nyanda ada hak mo adili ni dunia di hari kiamat. Kong ada lei stou orang yang babilang bagini, “Kita pe kalakuan yang jaha kote, itu beking Tuhan Allah pe sifat yang butul lebe dapa lia sampe orang lebe puji deng hormat pa Dia. No kiapa dang Tuhan Allah masi hakimi pa kita lantaran kita pe dosa?” Kalu tu pikiran rupa itu, itu sama deng da babilang bagini, “Mari jo beking tu jaha supaya tare bole dapa lia tu bae!” Torang kasiang nimbole bagitu. Memang ada orang yang bilang kalu torang ja bilang rupa itu. Dorang itu so se besae torang pe nama kong dorang pantas Tuhan Allah mo hukum. Jadi dari situ dapa tau kalu torang tu orang Yahudi nyanda lebe bae dari tu orang yang bukang Yahudi. Soalnya tadi torang so se bilang lebe dulu kalu dosa so kuasai pa samua orang, biar lei itu orang Yahudi ato orang yang bukang Yahudi. Sama deng tu da tatulis di Kitab Suci bagini, “Nyanda ada orang yang hidop butul, biar lei cuma satu. Nyanda ada orang yang mangarti tu butul, biar lei cuma satu. Nyanda ada orang yang cari pa Tuhan Allah. Samua orang pe hati so jao dari pa Tuhan Allah, dorang pe hidop so nyanda ada de pe guna. Kong nyanda ada orang yang beking tu bae, biar lei cuma satu.” “Dorang pe kata-kata pe besae, sama deng tu bobou busu yang da kaluar dari tu kubur yang da tabuka. Dorang pe mulu tukang batipu”. “Dorang pe kata-kata bahaya sama deng ular pe bisa.” “Dorang pe mulu ja bamomake deng ja babicara besae.” “Kong dorang capat skali mo pi babunung pa orang. Di mana jo dorang pigi akang, slalu dorang beking rusak deng beking orang susa. Dorang lei so nintau bagimana mo hidop baku-baku bae.” “Dorang so nyanda ada rasa tako pa Tuhan Allah.” Torang tau kalu tu atoran-atoran di kitab Taurat itu for dorang yang iko tu atoran-atoran itu. Jadi deng ada tu atoran-atoran itu, torang so bole tau kalu nyanda ada manusia yang butul di muka pa Tuhan Allah, biar lei torang tu orang Yahudi ato tu orang-orang bukang orang Yahudi, samua nyanda ada yang butul di muka pa Dia. Soalnya nyanda ada satu orang yang Tuhan anggap butul di muka pa Dia lantaran tu orang itu da iko tu atoran-atoran di kitab Taurat. Mar Tuhan kase tu atoran-atoran itu supaya torang tau kalu torang ja beking dosa. Mar skarang, Tuhan Allah so se tunjung Dia pe cara for torang jadi butul di muka pa Dia, kong tu cara yang butul itu bukang lantaran torang ja iko tu atoran-atoran Taurat, itu sama deng tu da tulis di kitab Taurat deng kitab nabi-nabi, bagini: orang bole jadi butul di muka pa Tuhan Allah lantaran percaya pa Yesus Kristus. Itu mo jadi pa samua orang yang percaya lantaran Tuhan nyanda pili-pili orang. Soalnya samua orang so beking dosa, kong samua orang pe hidop so jao dari tu Tuhan Allah pe tujuan yang luar biasa tu hidop butul sama deng Dia. Cuma Tuhan Allah pe sayang yang Dia se tunjung deng cuma-cuma tu bole beking torang jadi butul di muka pa Dia, lantaran torang so percaya pa Kristus Yesus yang so tubus manusia dari samua dosa. Tuhan Allah utus Yesus ka dunia supaya Dia dapa hukuman; Dia mati kong De pe dara tacura. Tuhan Allah beking bagitu supaya Yesus ganti manusia yang berdosa. So lantaran itu, sapa yang percaya pa Yesus, dia itu jadi butul di muka pa Tuhan Allah. Itu kase tunjung kalu Tuhan Allah itu adil. Soalnya dulu Dia so sabar sampe Dia kase biar pa manusia yang ja beking dosa. Mar skarang Yesus mati ganti pa torang for jadi bukti kalu Tuhan Allah itu adil. Deng bagitu Tuhan Allah kase tunjung kalu Dia itu butul, deng Dia beking jadi butul tu orang yang percaya pa Yesus. No kalu Tuhan sandiri yang beking torang jadi butul, apa ada alasan for torang mo basombong? Apa torang pikir Tuhan beking torang jadi butul itu lantaran torang so beking tu atoran di kitab Taurat? Nyanda to? Soalnya Tuhan sandiri yang beking torang jadi butul di muka pa Dia lantaran torang percaya pa Yesus. Soalnya torang yakin kalu Tuhan Allah beking torang jadi butul di muka pa Dia cuma lantaran torang pe percaya, bukang lantaran torang da beking tu atoran-atoran di Kitab Taurat. Soalnya Tuhan Allah itu bukang cuma orang-orang Yahudi pe Tuhan, Dia itu lei orang-orang bukang Yahudi pe Tuhan to? Butul, Dia lei Tuhan Allah for orang-orang bukang Yahudi. Tuhan Allah memang cuma satu. Dia mo beking jadi butul pa orang-orang Yahudi yang so percaya pa Yesus deng lei pa orang-orang yang bukang Yahudi yang so percaya pa Yesus. Jadi Tuhan Allah so beking torang jadi butul di muka pa Dia lantaran torang percaya pa Yesus. Mar jang sampe ada orang bapikir kalu torang so nyanda perlu lei mo beking tu atoran-atoran di kitab Taurat, malatare deng torang percaya torang lebe tamba beking tu atoran-atoran di kitab Taurat. Abraham, dia itu tu torang orang Yahudi pe nene moyang. Kira-kira apa yang dia da beking sampe Tuhan beking dia jadi orang yang butul di muka pa Tuhan? Tuhan beking Abraham jadi orang yang butul bukang lantaran dia da beking tu bae. Soalnya kalu Tuhan beking Abraham jadi orang yang butul lantaran dia ja beking tu bae, itu de pe arti Abraham ada alasan for mo puji de pe diri sandiri. Mar Abraham nyanda ada alasan for mo puji de pe diri di muka pa Tuhan Allah. Soalnya di Kitab Suci da tulis bagini, “Abraham percaya pa Tuhan Allah, deng lantaran de pe percaya itu, Tuhan Allah beking Abraham jadi orang yang butul di muka pa Tuhan Allah.” De pe conto bagini: kalu orang bakarja, tantu dia dapa gaji. Tu gaji itu bukang hadia, mar memang itu dia pe hak yang dia mo dapa dari dia pe suar lala. Mar torang pe hubungan deng Tuhan nyanda bagitu. Tuhan beking torang jadi butul di muka pa Dia bukang lantaran apa tu torang ja beking, mar lantaran tu torang pe percaya pa Dia. Dia itu yang beking butul tu orang yang hidop jao dari pa Dia. Dulu, raja Daud da bilang kalu pe snang skali tu orang-orang yang Tuhan Allah beking jadi butul bukang lantaran dorang da beking tu bae. Bagini tu Raja Daud da bilang, “Tu orang yang so dapa ampung dari samua tu dia pe jaha deng samua tu dia pe dosa, dia itu yang paling snang. Tuhan so nyanda inga-inga tu dia pe dosa, so dia itu yang paling snang.” Tu rasa snang bagitu bukang cuma for orang-orang Yahudi, mar for orang-orang bukang Yahudi lei. Soalnya torang so bilang rupa tu conto Abraham tadi, kalu Tuhan Allah beking Abraham itu jadi orang yang butul di muka pa Tuhan cuma lantaran Abraham pe percaya pa Tuhan. Kong tempo apa Tuhan Allah beking Abraham jadi orang yang butul di muka pa Dia? Apa waktu dia so dapa sunat ato waktu dia blum dapa sunat? Tantu katu waktu dia blum dapa sunat. Jadi Abraham so percaya dulu pa Tuhan, baru dia dapa sunat. Tu sunat itu jadi tanda kalu Tuhan beking dia jadi orang yang butul lantaran dia pe percaya pa Tuhan. So itu, Abraham jadi bapak dari samua orang yang percaya, biar tu orang-orang yang percaya itu nyanda sunat. Deng bagitu, Tuhan beking dorang itu jadi orang yang butul lantaran dorang pe percaya. Kong Abraham lei jadi bapak dari orang-orang Yahudi. Abraham itu jadi bapak dari orang-orang Yahudi bukang cuma lantaran dorang dapa sunat mar lantaran lei dorang percaya pa Tuhan iko tu dia pe percaya waktu dia blum dapa sunat. Dia itu torang samua yang percaya pe bapak. Tuhan da janji pa Abraham deng de pe keturunan kalu Dia mo kase ni dunia pa dorang. Tuhan da janji bagitu pa Abraham bukang lantaran dia ja iko tu atoran-atoran di kitab Taurat, mar Tuhan janji bagitu lantaran Abraham percaya pa Tuhan sampe Tuhan beking Abraham jadi orang yang butul di muka pa Tuhan. Soalnya kalu tu orang-orang yang da iko tu atoran-atoran di kitab Taurat tu mo dapa tu Tuhan pe janji itu, itu de pe arti nyanda ada de pe guna orang percaya pa Tuhan, kong tu janji itu jadi batal. Soalnya nyanda ada yang mampu beking tu atoran-atoran di kitab Taurat, jadi cuma tare beking Tuhan mara sampe Dia mo hukum pa dorang. Mar kalu nyanda ada tu atoran-atoran di kitab Taurat, tantu nyanda ada orang tu mo langgar tu atoran-atoran di kitab Taurat itu. Jadi torang mo dapa tu Tuhan pe janji itu cuma lantaran torang percaya pa Dia. Tuhan kase tu janji lantaran Dia pe sayang supaya samua Abraham pe keturunan bole dapa tu Dia pe janji itu. Kong Tuhan pe janji bukang cuma for orang-orang yang ja iko tu atoran-atoran di kitab Taurat, mar lei for samua orang yang percaya sama deng Abraham, tu torang samua pe bapak. Itu so sama deng Tuhan Allah perna bilang pa Abraham dulu di Kitab Suci, “Kita so pili pa ngana jadi bapak for banya bangsa.” Kong di muka pa Tuhan Allah Abraham percaya tu Tuhan Allah da bilang itu. Tuhan Allah itu yang kase hidop orang yang so mati, deng so Dia yang da ciptakan samua deng Dia pe kata-kata. Abraham percaya Tuhan pe janji. Jadi biar dia nyanda ada harapan mo dapa anak, dia trus baharap deng yakin pa Tuhan. Dia percaya kalu dia pe keturunan mo jadi banya bangsa sama deng tu Tuhan da bilang pa dia, “Ngana pe keturunan mo jadi banya skali.” Abraham pe percaya tetap kuat biar lei dia tau kalu dia so talalu tua for mo dapa anak, bole bilang kalu dia so amper mo mati, de pe umur kira-kira sratus taong. Deng lei Sara tu de pe bini mandul. Abraham tetap percaya pa Tuhan Allah deng nyanda ragu pa Tuhan Allah pe janji. Malatare de pe percaya lebe tatamba kuat, deng dia puji deng hormat pa Tuhan Allah. Abraham yakin skali kalu Tuhan Allah mampu mo tepati tu De pe janji itu. So lantaran Abraham pe percaya itu, sampe da tulis di Kitab Suci tentang dia bagini, “Tuhan beking dia jadi orang yang butul di muka pa Dia.” Kong tu da tulis tentang Abraham jadi orang yang butul, itu da tulis bukang cuma for Abraham sandiri. Mar itu da tulis lei for torang. Soalnya Tuhan lei beking torang jadi orang yang butul lantaran torang pe percaya pa Dia. Waktu Yesus mati, Tuhan Allah tu da kase hidop ulang pa Dia tu torang pe Tuhan. Yesus itu yang so kase Dia pe diri mati for torang lantaran torang pe dosa. Kong Tuhan Allah se hidop ulang pa Dia supaya bole beking torang ini jadi orang yang butul di muka pa Dia. Tuhan Allah so beking torang jadi butul di muka pa Dia lantaran torang so percaya pa Yesus Kristus. So itu, torang pe hubungan deng Dia so jadi bagus ulang lantaran Yesus Kristus tu torang pe Tuhan da beking di kayu salib. So lantaran tu Yesus da beking itu, torang bole dapa jalang kong bole rasa tu Tuhan Allah pe sayang yang Dia so se tunjung pa torang yang so percaya. Kong torang bole rasa snang lantaran torang baharap deng yakin kalu nanti torang mo sama-sama deng Tuhan Allah mo dapa puji deng hormat. Mar bukang cuma itu, torang rasa snang lei waktu torang dapa siksa dari orang lantaran torang da iko pa Tuhan. Soalnya torang tau tu siksa itu beking torang lebe batahang percaya. Kong kalu torang lebe batahang percaya, itu beking torang jadi lebe kuat sampe nyanda tagoda beking dosa. Trus kalu torang jadi lebe kuat sampe nyanda tagoda beking dosa, itu beking torang bole lebe baharap deng yakin pa Tuhan. Kong kalu torang baharap deng yakin pa Tuhan, torang nyanda mo kecewa lantaran torang tau bagimana Tuhan Allah pe sayang pa torang. Tuhan Allah so kase Roh Kudus bakarja pa torang pe hati supaya torang bole rasa tu Dia pe sayang yang basar itu. Bagini tu Tuhan Allah pe sayang: waktu torang nyanda mampu beking apa-apa supaya torang bole bebas dari hukuman dosa, Kristus mati for torang yang hidop jao dari pa Tuhan Allah, Dia mati pas de pe waktu yang Tuhan Allah so tentukan. Soalnya kalu cuma mo iko torang pe biasa, nyanda ada orang yang suka mo mati for dia pe tamang yang da hidop ja beking butul, mar ada stou orang yang suka mo mati for de pe tamang kalu de pe tamang itu bae-bae. Mar Tuhan Allah se tunjung De pe sayang pa torang waktu torang masi berdosa. Soalnya waktu torang masi berdosa, Kristus mati for torang. Jadi Tuhan so beking torang jadi orang yang butul di muka pa Dia lantaran Tuhan Yesus pe dara yang tacura waktu Dia mati for torang. So itu skarang torang yakin kalu torang pasti mo slamat dari Tuhan Allah pe hukuman. Soalnya hele waktu torang masi pangmalawang pa Tuhan Allah, Tuhan Allah sandiri yang beking bagus torang pe hubungan deng Dia deng cara Dia kase De pe Anak mati for torang, no apa lei skarang. Torang pe hubungan deng Dia so bagus ulang, pasti torang mo slamat lantaran De pe Anak so hidop ulang. Deng bukang cuma dapa slamat, torang lei snang lantaran torang pe Tuhan Yesus Kristus sampe torang pe hubungan deng Tuhan Allah so jadi bagus ulang. Dosa mulai ada di dunia waktu Adam beking dosa, kong dia musti mati. Trus dari tu Adam pe dosa ini, samua orang jadi berdosa. Kong de pe laste, samua orang musti mati. Dosa so ada di dunia ini seblum Tuhan Allah kase tu atoran-atoran di kitab Taurat. Jadi kalu manusia beking dosa, itu blum tarekeng dosa lantaran blum ada atoran-atoran yang dorang langgar. Mar biar bagitu, dari Adam pe jaman sampe Musa pe jaman, samua orang pasti mati, biar lei tu orang-orang nyanda langgar Tuhan pe prenta sama deng tu Adam da beking. Adam deng Yesus ada de pe sama, dua-dua pe hidop da beking sesuatu yang kase pengaru pa orang-orang. Mar tu hasil dari apa yang Adam da beking deng yang Yesus da beking itu baku beda skali. Adam sandiri tu da langgar tu Tuhan pe prenta, de pe akibat samua orang mo mati. Mar tu Tuhan Allah da beking lewat Yesus Kristus jao lebe basar dari itu, Tuhan Allah da kase tunjung tu Dia pe bae deng Dia se tunjung tu De pe sayang deng cuma-cuma supaya samua orang yang percaya bole mo slamat dari tu hukuman dosa. Kong tu sayang yang Tuhan Allah da kase tunjung pa samua orang deng cuma-cuma itu jao lebe basar dari tu pelanggaran yang Adam da beking. Soalnya abis Adam langgar tu Tuhan pe prenta, Tuhan hukum pa dia. Mar serta samua orang so banya beking dosa, Tuhan kase tunjung Dia pe sayang pa samua orang, kong Dia pe sayang itu beking orang bole jadi butul di muka pa Dia. Soalnya Adam tu da langgar Tuhan pe prenta, itu beking samua orang mo mati. Mar yang Yesus Kristus da beking jao lebe basar. Orang-orang yang percaya pa Yesus Kristus, dorang itu mo hidop slama-lamanya deng Dia kong mo pegang prenta sama-sama deng Dia. Dorang dapa itu sama deng da dapa hadia cuma-cuma dari Tuhan lantaran Tuhan pe sayang pa dorang yang pe basar, kong Dia beking lei dorang itu jadi butul di muka pa Dia lantaran dorang so ada hubungan deng Yesus Kristus. Jadi lantaran Adam da langgar tu Tuhan pe prenta, itu beking samua orang dapa hukuman. Mar lantaran Yesus da beking yang butul, Dia buka jalang for samua orang supaya Tuhan beking dorang jadi butul di muka pa Tuhan kong dorang bole dapa hidop kekal. Soalnya lantaran Adam nyanda dengar-dengaran pa Tuhan Allah pe prenta, dia beking banya orang jadi berdosa. Mar lantaran Yesus sandiri yang dengar-dengaran pa Tuhan Allah, Dia beking banya orang bole jadi butul di muka pa Tuhan Allah. Tuhan Allah kase tu atoran-atoran di kitab Taurat supaya manusia sadar kalu manusia pe dosa so lebe banya. Mar biar manusia pe dosa lebe banya, Tuhan Allah pe sayang lei pa manusia lebe tatamba banya. Jadi, dulu tu dosa da kuasai samua orang sampe dorang dapa hukuman tapisa deng Tuhan. Mar skarang Tuhan Allah se tunjung tu De pe sayang for mo kuasai pa torang yang percaya pa Yesus Kristus tu torang pe Tuhan, kong Tuhan Allah pe sayang itu beking torang jadi butul di muka pa Dia deng torang mo dapa hidop kekal deng Dia. Tuhan sayang pa torang, Dia so se ampung tu torang pe dosa-dosa, mar jang sampe ada orang yang babilang bagini, “Kalu bagitu, torang beking dosa jo trus supaya Tuhan lebe se tunjung De pe sayang itu pa torang.” Tantu nyanda bagitu to? Soalnya waktu torang jadi percaya pa Kristus torang so putus hubungan deng dosa, torang itu sama deng orang yang so mati tu so nyanda ja beking dosa, jadi torang so nimbole trus-trus beking dosa lei. Ngoni tantu tau, torang dapa baptis, itu tanda kalu orang so percaya pa Kristus Yesus, itu sama deng torang pe hidop lama so mati sama-sama deng Dia. Jadi waktu torang dapa baptis, torang bole bilang kalu torang so kase tinggal tu hidop yang cuma iko torang pe mau sandiri kong cuma beking Kristus Yesus pe mau, itu sama deng torang so mati kong dapa kubur sama-sama deng Kristus. Deng bagitu torang yang so dapa baptis, torang pe kalakuan so bruba lantaran torang so hidop baru sama-sama deng Kristus yang hidop ulang lewat kuasa dari Tuhan Allah tu Bapa. Jadi kalu torang sama deng so mati sama-sama deng Kristus, torang lei mo hidop ulang sama deng Dia. Torang tau to, kalu torang pe hidop lama yang suka beking dosa so mati sama-sama deng Kristus di kayu salib, supaya torang so nyanda iko lei tu torang pe mau yang basar for beking dosa. Deng bagitu, dosa so nyanda lei kuasai pa torang. Soalnya torang itu sama deng orang yang so mati, jadi torang ini so bebas dari tu keinginan yang ja beking dosa lei. Jadi kalu torang itu sama deng so mati sama-sama deng Kristus, torang lei percaya kalu torang mo hidop sama-sama deng Dia. Torang bole percaya rupa itu lantaran torang tau kalu Kristus so hidop ulang, Dia so nyanda mo mati lei, kong nyanda ada satu kuasa lei yang bole beking Dia mati. Dia so mati for se kala tu kuasa dosa, kong Dia mati cuma satu kali for slama-lamanya. Kong skarang Dia so hidop ulang, Dia hidop supaya Tuhan Allah dapa puji. Bagitu lei ngoni, ngoni bapikir jo kalu ngoni itu sama deng orang yang so putus hubungan deng dosa, kong skarang ngoni hidop for Tuhan Allah lantaran ngoni so percaya pa Kristus. So itu, ngoni jang kase biar dosa kuasai lei ngoni pe badan di dunia ini supaya ngoni jang iko tu keinginan yang jaha. Jang kase biar tu ngoni pe anggota badan itu dosa kuasai for beking tu jaha, mar srahkan jo tu ngoni pe diri pa Tuhan Allah for beking Dia pe mau, lantaran ngoni sama deng so mati kong skarang Dia so kase hidop baru. Ngoni kase biar jo tu ngoni pe anggota badan Tuhan pake for beking tu butul. Ngoni dapa slamat bukang lantaran da iko tu atoran-atoran di kitab Taurat, mar lantaran Tuhan da se tunjung tu Dia pe sayang pa ngoni, so itu tu dosa so nimbole mo kuasai lei pa ngoni. Tuhan Allah so kase slamat pa torang dari hukuman dosa, bukang lantaran torang da iko tu atoran-atoran di kitab Taurat mar lantaran Dia pe sayang pa torang. Jadi apa skarang torang bole mo beking trus-trus tu dosa? Tantu nyanda to? Ngoni tau kalu ngoni srahkan ngoni pe diri pa satu orang for iko apa tu dia ja suru, ngoni itu so jadi dia pe budak. Bagitu lei kalu ngoni ja iko tu ngoni pe keinginan yang jaha, de pe arti ngoni itu so jadi budak dari dosa kong ngoni mo dapa hukuman tapisa deng Tuhan slama-lamanya. Mar kalu ngoni dengar-dengaran pa Tuhan, ngoni so kase ngoni pe diri jadi Dia pe budak kong Dia beking ngoni jadi butul di muka pa Dia. Dulu waktu ngoni blum percaya pa Tuhan, ngoni itu sama jo deng budak dari dosa. Mar skarang serta ngoni so percaya, ngoni so butul-butul iko tu ajaran yang torang so se ajar pa ngoni. So itu, torang bilang makase pa Tuhan Allah. Jadi, ngoni so bebas dari kuasa dosa kong skarang ngoni so srahkan ngoni pe diri jadi Tuhan pe budak for beking trus tu butul. Kita pake conto budak supaya gampang for ngoni sbagai manusia yang ada kelemahan mo mangarti. Dulu ngoni budak dari dosa lantaran ngoni so iko tu hal-hal caparuni deng tu hal-hal yang malawang Tuhan pe prenta sampe ngoni tamba trus beking tu hal-hal yang malawang Tuhan pe prenta itu. Mar skarang ngoni musti srahkan tu ngoni pe anggota-anggota badan itu for beking trus tu butul di muka pa Tuhan supaya ngoni bole hidop deng hati yang bersi di muka pa Dia. Waktu ngoni jadi budak dosa, ngoni nyanda perlu beking tu butul. Mar apa de pe untung yang ngoni dapa dari tu dosa yang ngoni ja beking? Nyanda ada to? Malatare ngoni jadi malo deng tu ngoni ja beking itu. Deng samua dosa beking orang mati tapisa deng Tuhan for slama-lamanya. Skarang ini ngoni so bebas dari kuasa dosa, kong ngoni so srahkan ngoni pe diri jadi Tuhan Allah pe budak. Ngoni pe untung, Tuhan beking ngoni bole hidop deng hati bersi di muka pa Dia, kong de pe laste ngoni mo dapa hidop kekal deng Dia. Soalnya orang yang ja beking dosa, de pe akibat dapa hukuman tapisa deng Tuhan for slama-lamanya, mar Tuhan Allah kase deng cuma-cuma tu hidop kekal pa orang-orang yang percaya pa Kristus, tu torang pe Tuhan. Sudara-sudara, skarang kita babicara pa ngoni yang so tau tu atoran-atoran di kitab Taurat. Ngoni pasti tau slama torang hidop, torang ja iko tu atoran-atoran itu. Kita ambe conto dari tu atoran tentang laki-bini. Tu bini itu masi ada hubungan deng de pe laki slama de pe laki masi hidop. Mar kalu de pe laki so mati, dia bebas dari tu atoran itu. So itu, kalu tu de pe laki masi hidop, trus tu bini kaweng ulang deng laki-laki laeng, tu bini itu so bersina. Mar kalu dia pe laki so mati, tu bini itu nyanda bersina kalu dia kaweng ulang, dia itu so bebas dari tu atoran itu. Kita pe sudara-sudara, bagitu lei yang jadi pa torang deng tu atoran-atoran di kitab Taurat. Dulu torang musti iko tu atoran-atoran di kitab Taurat supaya bole mo dapa slamat. Mar Kristus so mati, kong torang yang percaya pa Dia so se tinggal tu torang pe hidop lama yang cuma iko tong pe mau sandiri, so sama deng torang lei so mati sama-sama deng Dia. Jadi skarang for mo slamat torang bukang iko tu atoran-atoran di kitab Taurat. Torang so jadi Kristus punya, Dia itu yang so hidop ulang. Kong lantaran torang so jadi Kristus punya, torang beking tu hal-hal bae for Tuhan Allah. Soalnya waktu torang blum percaya pa Yesus, torang cuma hidop iko tu keinginan manusia yang suka ja beking dosa. Kong waktu torang tau tu atoran-atoran di kitab Taurat, torang pe mau for beking dosa lebe tatamba sampe tare torang ja beking tu dosa. Kong dosa itu no yang beking torang dapa hukum tapisa deng Tuhan slama-lamanya. Mar skarang for mo slamat torang bukang iko tu atoran-atoran di kitab Taurat. Soalnya torang so se tinggal tu hidop yang lama itu, sama deng torang pe hidop lama so mati sama-sama deng Kristus waktu Dia mati. Deng bagitu tu atoran-atoran di kitab Taurat so nyanda mo kuasai lei pa torang. So itu, torang bole hidop iko Tuhan Allah pe mau deng cara baru yang iko tu Roh pe mau, so bukang lei deng cara lama yang iko tu atoran-atoran tu da tulis di kitab Taurat. No kalu tu atoran-atoran di kitab Taurat itu beking torang lebe beking dosa, apa torang mo bilang kalu tu atoran-atoran di kitab Taurat itu besae? Nyanda to? Tu atoran-atoran di kitab Taurat itu nyanda besae, malatare deng ada tu atoran-atoran itu kita sandiri bole tau apa tu dosa. De pe conto: di kitab Taurat da tulis tu atoran, “Jang ngoni suka orang laeng punya for jadi ngoni punya.” Kita sandiri nintau kalu suka skali orang laeng punya kote itu dosa, baru dari tu atoran-atoran itu no kita tau kalu itu dosa. Mar waktu kita tau tu atoran itu, tu keinginan dosa pa kita pe hati beking kita lebe suka orang laeng punya for jadi kita punya. Mar kalu tu atoran itu nyanda ada, tu keinginan for beking dosa pa kita pe hati lei nyanda mo ada. Dulu waktu kita blum tau tu atoran-atoran di kitab Taurat, kita pikir kita hidop deng bae. Mar serta kita tau tu atoran-atoran di kitab Taurat, kita baru sadar kalu kita kote berdosa. Kong pa kita pe hati mulai kita rasa ada keinginan yang basar for beking dosa. Jadi kita pantas dapa hukuman tapisa deng Tuhan for slama-lamanya. Sebenarnya deng kita beking tu atoran-atoran di kitab Taurat, kita bole hidop deng Tuhan slama-lamanya. Mar waktu kita tau tu atoran-atoran di kitab Taurat itu, malatare kita beking dosa sampe kita nanti mo dapa hukuman tapisa deng Tuhan slama-lamanya. Tu atoran-atoran di kitab Taurat itu kase tunjung tu butul. Mar lantaran ada keinginan for beking dosa pa kita pe hati, so itu kita tatipu deng cara kita pikir kalu kita bole mo slamat kalu kita beking tu atoran-atoran itu. Mar kote tu keinginan for beking dosa pa kita pe hati itu tetap ada sampe kita lei beking dosa, jadi de pe laste, kita dapa hukuman tapisa deng Tuhan slama-lamanya, bole mo bilang kita sama deng so mati. Mar biar bagitu tu atoran-atoran di kitab Taurat itu nyanda besae mar dari Tuhan, bagitu lei tu prenta-prenta di kitab Taurat itu lei dari Tuhan, itu samua butul deng bagus. Mar jang sampe ada orang yang bapikir kalu tu atoran yang bagus itu yang beking sampe kita dapa hukuman tapisa deng Tuhan Allah for slama-lamanya, tantu katu nyanda bagitu. Dosa yang kita ja beking itu no, yang beking kita dapa hukuman tapisa deng Tuhan Allah for slama-lamanya. Soalnya bagini: tu atoran itu bagus, mar waktu kita tau tu atoran itu, kita pe keinginan for beking dosa tare lebe tatamba sampe kita beking dosa. Jadi deng ada tu atoran-atoran yang bagus itu kita bole tau mana tu dosa, kong kita bole tau lebe jelas kalu dosa itu jaha. Torang tau tu atoran-atoran di kitab Taurat itu dari Tuhan Allah pe Roh. Mar kita ini cuma manusia, kita so sama jo deng da jual jadi budak dosa. Kita sandiri bingo deng tu kita pe kalakuan. Soalnya kita suka mo beking tu bae mar yang kita ja beking tare tu jaha yang kita binci. Kalu kita beking tu jaha yang kita nyanda suka mo beking, itu de pe arti kita so mangaku kalu tu atoran-atoran di kitab Taurat itu bae. Jadi itu bukang kita pe mau sampe kita da beking tu jaha itu, mar kita beking tu jaha lantaran tu keinginan dosa yang ada pa kita pe hati. Soalnya kita tau, pa kita pe diri, nyanda ada tu bae. Kita cuma manusia, kita memang suka mo beking tu bae, mar kita nyanda mampu mo beking itu. Kita nyanda beking tu bae yang kita suka mo beking itu, malatare tu jaha yang kita nyanda suka, itu yang kita beking. Kalu kita beking tu jaha yang kita nyanda suka, itu de pe arti bukang kita pe mau sampe kita beking tu jaha, mar tu keinginan for beking dosa yang ada pa kita pe hati sampe kita beking itu. Jadi yang biasa tu da jadi pa kita bagini: biar kita suka mo beking tu bae, mar tu keinginan jaha tetap ada pa kita pe hati. Soalnya pa kita pe hati, kita suka skali mo iko tu Tuhan Allah pe atoran-atoran, mar de pe laste, kita nyanda iko tu Tuhan Allah pe atoran-atoran lantaran ada keinginan basar for beking dosa pa kita pe diri yang baku malawang tu kita pe pikiran for iko tu Tuhan Allah pe atoran-atoran itu. Tu pengaru itu beking kita pe diri susa mo talapas dari tu ja beking dosa. Ado kasiang skali kita ini! Sapa yang mo bantu pa kita lapas dari hukuman tapisa deng Tuhan for slama-lamanya lantaran kita beking dosa? Mar kita bilang makase pa Tuhan Allah lantaran lewat Tuhan Yesus Kristus, dosa so nyanda kuasai lei pa kita. Jadi pa kita pe hati, kita suka beking tu Tuhan Allah pe atoran-atoran, mar pa kita pe diri lei ada tu kita pe keinginan dosa yang ja suru kita beking tu dosa. Tuhan skarang so nyanda lei mo kase hukuman apa-apa pa torang lantaran torang ini orang-orang yang so percaya pa Kristus Yesus. Soalnya torang so percaya pa Kristus Yesus, jadi Tuhan Allah pe Roh bakarja pa torang pe hati beking torang bole hidop baru. Tuhan Allah pe Roh itu bantu pa torang supaya torang bole bebas dari tu keinginan dosa deng dari tu hukuman tapisa deng Tuhan for slama-lamanya. Torang nyanda mungkin mo slamat dari hukuman dosa waktu torang iko tu atoran-atoran di kitab Taurat, lantaran torang cuma manusia yang nyanda mampu mo iko samua tu atoran-atoran itu, mar torang bole mo slamat lantaran Tuhan Allah. Tuhan Allah kase slamat pa torang deng cara utus Dia pe Anak ka dunia. Dia pe Anak pe badan sama deng torang manusia yang ja beking dosa pe badan, kong Dia pe Anak mati for se hapus tu manusia pe dosa. Jadi sbagai manusia, Tuhan Allah pe Anak se kala tu hukuman dosa. Tuhan Allah pe maksut beking bagitu supaya torang samua ini bole beking tu Dia pe mau yang ada di atoran-atoran di kitab Taurat yang butul itu. Torang ini hidop iko tu Roh Kudus pe mau, bukang lei hidop iko tu keinginan manusia. Orang-orang yang hidop iko tu keinginan manusia, dorang itu pikir-pikir tu keinginan duniawi. Mar tu orang-orang yang hidop iko tu Tuhan pe Roh, dorang itu pikir-pikir tu hal-hal yang beking snang pa Tuhan. Tu orang-orang yang pikir-pikir tu keinginan manusia, dorang itu no tu mo dapa hukuman tapisa deng Tuhan slama-lamanya. Mar kalu orang-orang yang pikir-pikir tu Tuhan pe Roh, ada rasa tenang pa dorang pe hati, deng dorang lei mo hidop slama-lamanya deng Tuhan. Soalnya kalu orang-orang yang pikir-pikir tu keinginan manusia, dorang itu yang ja malawang pa Tuhan Allah. Jadi dorang nyanda ja iko tu Tuhan Allah pe atoran lantaran memang dorang nyanda mampu mo iko itu. Kong tu orang-orang yang cuma iko tu keinginan manusia, dorang itu nyanda mungkin mo beking Tuhan Allah snang. Mar ngoni so nyanda lei hidop iko tu keinginan. Ngoni so hidop iko tu Tuhan Allah pe Roh kalu memang Dia pe Roh so ada pa ngoni pe hati. Mar inga, orang yang nyanda ada Kristus pe Roh pa de pe hati, dia itu bukang Kristus punya. No kalu Kristus so ada pa ngoni pe hati, biar lei ngoni pe badan musti mati lantaran dosa mar Tuhan Allah pe Roh yang mo se hidop ulang pa ngoni slama-lamanya deng Tuhan. Ngoni bole hidop slama-lamanya deng Dia lantaran Tuhan so beking ngoni jadi butul di muka pa Dia. Tuhan pe Roh so se hidop ulang pa Kristus Yesus kong tu Tuhan pe Roh itu lei no yang so ada pa ngoni pe hati. Jadi biar ngoni pe badan mo mati mar Tuhan nanti mo kase hidop ulang pa ngoni pake tu kuasa dari tu Dia pe Roh yang ada pa ngoni itu. Sudara-sudara, ada tu torang musti beking lantaran Tuhan Allah pe Roh so ada pa torang. Itu sama deng torang masi ada utang yang musti bayar. Ini tu torang musti beking: torang musti hidop iko tu Tuhan Allah pe mau, bukang lei hidop iko tu keinginan manusia. Soalnya kalu ngoni hidop iko tu keinginan manusia, ngoni mo dapa hukuman tapisa deng Tuhan slama-lamanya. Mar kalu ngoni hidop iko tu Tuhan pe Roh pe mau, Tuhan pe Roh itu mo bantu pa ngoni brenti beking tu keinginan-keinginan yang jaha tu ada pa ngoni pe hati, trus ngoni mo hidop slama-lamanya deng Tuhan. Samua orang yang kase tu dorang pe diri supaya Tuhan Allah pe Roh pimpin tu dorang pe hati, so dorang itu no tu Tuhan Allah pe anak-anak. Torang so bole tau kalu torang ini Tuhan pe anak-anak lantaran torang so trima tu Roh yang dari Tuhan Allah. Tu Roh yang dari Tuhan Allah itu nyanda beking torang jadi tako sama deng budak tako pa de pe tuang. Mar Tuhan Allah pe Roh beking torang jadi Tuhan Allah pe anak-anak, supaya torang bole pangge pa Dia itu, “Ya Bapa, Tuhan Allah tu torang pe Bapa!”. Torang tau kalu torang ini Tuhan Allah pe anak-anak lantaran tu Roh yang da se yakin pa torang pe hati. Jadi kalu torang ini Tuhan Allah pe anak-anak, torang lei jadi Dia pe ahli waris, itu de pe arti torang ini ada hak for mo trima samua tu Dia so se sadia for De pe anak-anak. Kong torang mo dapa itu sama-sama deng Kristus supaya torang lei dapa puji deng hormat sama-sama deng Dia. Mar kalu torang suka mo dapa itu, torang lei musti mendrita lantaran da iko pa Tuhan sama deng Kristus so mendrita. Kita yakin kalu tu pendritaan yang torang da rasa skarang ini nyanda ada arti apa-apa kalu mo se banding deng tu hidop yang luar biasa yang Tuhan nanti mo kase pa torang. So itu, samua yang Tuhan Allah da ciptakan di dunia ini samantara da tunggu-tunggu deng snang hati tu waktu Tuhan mo se tunjung kalu torang yang percaya itu De pe anak-anak. Soalnya dulu tu bumi deng de pe isi Tuhan so kutuk sampe jadi besae nyanda sama waktu pertama Tuhan da beking. Tuhan da kase hukuman bagitu bukang iko tu bumi pe mau, mar iko Dia pe mau. Ni bumi deng samua de pe isi ada yang mo busu, rusak deng mo mati, mar nanti Tuhan mo kase bebas ni bumi deng de pe isi supaya nyanda mo jadi bagitu. Nanti ni bumi deng de pe isi mo hidop bebas dari samua itu kong mo hidop luar biasa sama-sama deng Tuhan Allah pe anak-anak. Kong samantara batunggu Tuhan mo beking samua mo jadi baru ulang, torang tau dari dulu sampe skarang ni bumi deng de pe isi susa deng sengsara, sama deng tu parampuang yang da saki skali waktu so dekat-dekat de pe anak mo lahir. Mar bukang cuma tu bumi yang da tunggu-tunggu tu waktu itu, deng torang yang percaya lei da tunggu-tunggu tu waktu itu. Pa torang ini Tuhan so kase akang tu Roh Kudus, so itu torang bole rasa sadiki tu hidop yang luar biasa yang Tuhan so janji pa torang for mo jadi Dia pe anak-anak. Torang lei mengelu susa deng sengsara pa torang pe hati lantaran torang da tunggu-tunggu Tuhan tu mo kase pa torang tu badan yang baru. Waktu torang jadi percaya kong Tuhan so se slamat, mulai waktu itu torang so baharap deng yakin kalu nanti torang mo dapa yang Tuhan so janji pa torang itu. Mar kalu torang so dapa apa tu torang da tunggu-tunggu itu, itu de pe arti torang so nyanda perlu baharap to? Soalnya bagimana orang masi mo baharap kalu tu dia da harap itu dia so dapa? Jadi, kalu torang blum dapa apa yang torang da harap-harap itu, torang tunggu-tunggu itu deng sabar sampe itu mo jadi. Waktu torang nyanda kuat, tu Tuhan Allah pe Roh yang bantu pa torang. De pe conto bagini: waktu torang basombayang, torang nintau apa tu torang musti bilang pa Tuhan, mar tu Roh yang tolong pa torang for kase tau tu torang mo bilang pa Tuhan Allah. Tu Roh itu yang kase tau pa Tuhan deng cara yang torang sandiri nyanda mampu mo bilang deng kata-kata. Tuhan Allah yang tau manusia pe isi hati, Dia tau apa tu Roh da bilang itu pe maksut. Soalnya apa yang tu Roh da bilang pa Tuhan for Tuhan pe orang-orang, itu iko Tuhan Allah pe mau. Orang yang sayang pa Tuhan Allah, tu orang yang Tuhan Allah so pangge for iko tu De pe mau, apa jo yang da jadi pa dia biar itu bae ato nyanda, torang tau Tuhan Allah beking samua itu jadi bae for dia. Soalnya dari dulu Tuhan Allah so pili pa samua orang yang Tuhan Allah tau kalu nanti tu orang-orang itu mo percaya pa Dia. Tuhan Allah so tentukan pa tu orang-orang itu supaya dorang pe sifat bole jadi sama deng Yesus tu De pe Anak pe sifat. Jadi dorang sama deng Yesus so basudara, kong Tuhan Allah beking Yesus jadi Anak yang tua dari dorang samua. Tu orang-orang yang Tuhan Allah so tentukan dari dulu, Tuhan Allah lei pangge pa tu orang-orang itu for iko pa Dia. Dari tu orang-orang yang Dia da pangge itu, Tuhan Allah lei da beking tu orang-orang itu jadi butul di muka pa Dia. Kong pa tu orang-orang yang so jadi butul itu, Tuhan Allah mo kase tu hidop yang luar biasa. Kalu inga samua yang Tuhan so beking for torang, torang yakin Tuhan Allah ada sama-sama deng torang. Jadi sapa dang yang mampu malawang pa torang? Nyanda ada to? Dia pe Anak sandiri, Dia nyanda tahang mar Dia kase sampe mati for torang. Jadi Tuhan Allah pasti mo kase pa torang samua yang torang perlu. Sapa yang bole mo kase sala pa tu orang-orang yang Tuhan Allah so pili for iko pa Dia? Nyanda ada to? Soalnya Tuhan Allah so beking tu orang-orang itu jadi orang-orang yang butul di muka pa Dia. Nyanda ada orang yang mo kase hukuman pa torang yang percaya pa Tuhan. Soalnya Kristus Yesus yang bela pa torang di muka pa Tuhan Allah. Kristus Yesus itu yang so mati for tubus torang pe dosa, deng lebe dari itu, skarang Dia so hidop ulang trus Dia dudu di tampa terhormat tu di sabla kanan pa Tuhan Allah. Nyanda ada yang bole mo kase pisa pa torang dari Kristus pe sayang. Biar torang mo dapa tu susa, siksa, aniaya, kelaparan, nyanda ada baju, cilaka ato lei mo dapa bunung, biar samua bagitu Kristus tetap sayang pa torang. Hal-hal itu jadi pa torang sama deng tu da tulis di Kitab Suci bagini: “Ya Tuhan, siang malam orang trus-trus mo cari bunung pa torang lantaran torang da iko pa Tuhan, dorang so anggap torang kurang sama deng domba-domba yang so siap mo dapa potong.” Mar biar lei torang mo dapa samua tu susa, torang tetap mo menang luar biasa dari samua itu lantaran Kristus sayang pa torang. Kita yakin skali biar torang mati ato torang hidop di dunia ini, biar malaekat-malaekat ato setang-setang mo beking bagimana, biar ada hal apa jo tu da jadi skarang ato nanti, biar tu kuasa yang di langit deng di bumi ato apa jo yang Tuhan da ciptakan mo beking bagimana, itu samua nyanda mo beking torang tapisa deng Tuhan Allah pe sayang yang torang so dapa lantaran Kristus Yesus tu torang pe Tuhan. Sudara-sudara, kita so percaya pa Kristus, jadi kita mo bicara deng sunggu-sunggu pa ngoni, kita nyanda badusta. Kita pe suara hati yang Roh Kudus da kuasai yang bantu pa kita mo bilang tu butul. Bagini kwa tu kita mo bilang: bukang main kita pe sedi deng saki hati lantaran kita pe sudara-sudara orang Yahudi nimau mo percaya pa Yesus. Dorang itu kita pe sudara satu bangsa, kita suka skali dorang dapa slamat dari tu hukuman dosa. Jadi kalu kwa bole, kita yang ganti akang pa dorang for dapa hukuman deng lei tapisa dari Yesus Kristus. Dorang itu Israel pe keturunan, Tuhan Allah so angka pa dorang dari dulu for jadi Dia pe anak-anak. Deng lei Tuhan so se tunjung tu Dia pe kuasa yang luar biasa pa dorang pe nene moyang. Tuhan beking perjanjian deng dorang pe nene moyang yang beking dorang itu jadi Dia pe orang-orang. Tuhan so kase tu atoran-atoran di kitab Taurat pa dorang deng se tunjung tu cara basemba pa Dia. Dia kase lei banya janji pa dorang pe nene moyang. Dorang itu lei no tu keturunan dari torang pe nene moyang Abraham, Ishak deng Yakub, deng dari keturunan ini lei da lahir Yesus Kristus tu Raja yang se slamat pa manusia. Kristus itu, tu Tuhan Allah yang Dia pe kuasa lebe basar dari samua, Dia yang musti dapa puji sampe slama-lamanya. Amin. Memang banya orang Yahudi yang nimau percaya pa Yesus Kristus, mar biar bagitu kita nyanda ada maksut mo bilang kalu tu Tuhan Allah pe janji-janji dulu pa dorang tu Israel pe keturunan itu so nyanda mo berlaku lei. Mar tu kita pe maksut nyanda samua yang lahir dari tu Israel pe keturunan yang jadi Tuhan pe orang-orang. Deng lei, nyanda samua tu Abraham pe keturunan yang Tuhan Allah anggap De pe orang tu mo dapa tu De pe janji. Soalnya Tuhan Allah da bilang bagini pa Abraham, “Cuma ngana pe anak Ishak pe keturunan yang mo jadi ngana pe keturunan tu mo dapa Kita pe janji.” Itu de pe arti, bukang samua tu Abraham pe keturunan yang Tuhan Allah anggap Tuhan Allah pe anak-anak, mar cuma orang-orang yang percaya tu janji yang Tuhan Allah kase pa dorang yang Tuhan Allah anggap De pe anak-anak. Tuhan Allah da bajanji pa Abraham bagini, “Satu taong lei Kita mo datang ulang kamari, kong waktu itu Sara mo se lahir anak laki-laki.” Deng bagitu, Abraham tau Ishak yang dapa Tuhan Allah pe janji. Bagitu lei deng tu Tuhan da beking pa Ribka pe anak-anak. Ribka da se lahir dua anak laki-laki kembar. Tu dorang pe papa itu no tu Ishak tu torang pe nene moyang. Tentang Yakub deng Esau itu, da tulis di Kitab Suci bagini: “Yakub Kita sayang, mar Esau Kita binci”. No kalu bagitu apa torang mo bilang kalu Tuhan Allah itu nyanda adil lantaran Dia da pili orang iko De pe mau? Nyanda to. Tuhan so perna bilang pa Nabi Musa bagini: “Kita sandiri yang pili pa sapa jo yang Kita mo kase tunjung Kita pe rasa kasiang. Deng Kita mo kase tunjung Kita pe rasa sayang pa sapa jo yang Kita suka mo kase tunjung tu Kita pe rasa sayang itu.” Jadi Tuhan Allah da pili orang nyanda ja iko tu orang itu pe mau ato apa tu orang itu ja beking, mar Tuhan Allah da pili orang iko tu Dia pe mau lantaran Dia suka kase tunjung De pe rasa kasiang pa orang-orang. Di Kitab Suci da tulis tentang apa yang Tuhan Allah da bilang pa raja Mesir, bagini, “Kita da angka pa ngana jadi raja ada de pe maksut. De pe maksut supaya waktu ngana malawang pa Kita, Kita mo kase tunjung Kita pe kuasa for malawang pa ngana, sampe samua yang ada di bumi ini puji Kita pe nama.” Jadi, Tuhan Allah kase tunjung Dia pe rasa sayang pa sapa jo yang Dia suka, deng Dia lei mo beking orang jadi kras hati pa sapa jo yang Dia suka itu mo jadi. Mar komang jang sampe ada orang bilang, “Kalu samua tu da jadi iko Tuhan pe mau, no kiapa dang Tuhan masi kase sala pa torang kalu torang beking dosa? Sapa yang bole mo lawang tu Dia pe mau?” Sapa so torang kong brani mo malawang pa Tuhan Allah? Tuhan tu da ciptakan pa torang, kong masa torang mo babilang pa Dia, “Kiapa Tuhan ciptakan bagini pa kita?” De pe conto sama deng tukang babeking pot dari tana liat. Tu satu loku tana liat, dia bole beking dua macam pot, dua-dua iko dia pe mau. Tu pot yang satu dia beking for pake di acara-acara yang penting, kong tu pot yang satu lei dia beking for mo pake hari-hari. Bagitu lei no deng Tuhan Allah, Dia pe hak beking pa torang iko Dia pe mau. Dia mara pa orang yang beking dosa deng kase tunjung kalu Dia pegang kuasa for mo bahukum. Mar Dia lei sabar skali pa dorang sampe nyanda jadi hukum pa dorang, biar dorang itu pantas for Dia mara kong hukum, kong biar lei dorang itu so se siap for se binasa. Tuhan Allah lei mo se tunjung Dia pe sayang yang luar biasa pa orang-orang yang Dia rasa kasiang. Tu orang-orang yang Dia so se sadia dari pertama for mo alami tu De pe luar biasa. Tu orang-orang itu, torang samua bukang cuma orang Yahudi, mar lei deng tu orang-orang bukang Yahudi. Tentang tu orang-orang bukang Yahudi, nabi Hosea tulis tu Tuhan Allah da bilang bagini, “Orang-orang yang blum jadi Kita pe orang-orang, nanti Kita mo pangge jadi Kita pe orang-orang. Bangsa yang dulu Kita nyanda sayang, nanti mo jadi bangsa yang Kita sayang.” “Di tampa yang Kita mo bilang pa dorang, ‘Ngoni ini bukang Kita pe orang,’ Di tampa itu Kita mo bilang bagini pa dorang, ‘Ngoni itu Tuhan Allah yang hidop pe anak-anak.’ ” Mar tentang tu orang Israel, nabi Yesaya so bicara kras bagini, “Biar orang Israel pe keturunan jadi banya skali sama deng paser di laut, mar nanti cuma sadiki yang mo dapa slamat dari hukuman dosa. Soalnya so nyanda lama lei Tuhan pasti mo kase hukuman pa orang-orang di dunia ini. Dia mo kase hukuman deng tegas deng nyanda mo tunda-tunda.” Nabi Yesaya lei so perna bilang bagini tentang dorang, “Tuhan yang Mahakuasa da kase biar hidop bebrapa orang dari torang pe keturunan. Kalu nyanda bagitu, torang samua so abis da dapa hukuman, sama deng tu da jadi pa orang-orang di Sodom deng Gomora dulu.” Jadi kalu bagitu, torang bole bilang bagini, “Tu orang-orang yang bukang Yahudi, dorang nyanda brusaha for mo jadi butul di muka pa Tuhan, mar Tuhan beking dorang itu jadi orang yang butul di muka pa Dia lantaran dorang percaya. Mar laeng deng tu orang-orang Israel. Dorang brusaha iko tu atoran-atoran di Kitab Taurat supaya dorang bole jadi orang yang butul di muka pa Tuhan, mar dorang nyanda mampu beking itu.” No kiapa dang sampe orang Yahudi jadi bagitu? Soalnya tu orang-orang Yahudi brusaha jadi orang yang butul di muka pa Tuhan deng cara iko tu atoran-atoran di Kitab Taurat, bukang deng percaya pa Tuhan. Itu sama deng orang da tasontong di batu kong jatung. Kong dorang yang nyanda percaya, itu sama deng tu da tulis di Kitab Suci, “Tarukira jo bae-bae, Kita so taru pa Dia di gunung Sion. Dia itu bole mo se sama deng satu batu, kong kalu orang nyanda percaya pa Dia, orang itu sama deng da tasontong di batu itu kong jatung. Mar sapa yang percaya pa Dia, orang itu nyanda mo malo.” Sudara-sudara, kita suka skali kita pe sudara satu bangsa orang Yahudi mo dapa slamat dari tu hukuman dosa. Itu yang kita da minta deng sunggu-sunggu pa Tuhan Allah. Kita sandiri bole basaksi kalu dorang memang smangat skali brusaha mo iko pa Tuhan Allah. Mar biar dorang smangat, dorang nyanda mangarti bagimana mo iko deng butul pa Tuhan Allah. Dorang nintau tu cara bagimana supaya Tuhan Allah beking dorang itu jadi orang yang butul di muka pa Dia. Dorang sandiri brusaha iko tu atoran-atoran di kitab Taurat, dorang pikir dorang mo jadi orang yang butul deng cara itu. So itu, dorang nimau mo iko tu Tuhan Allah pe jalang yang beking dorang bole jadi orang yang butul di muka pa Dia. Soalnya Kristus so beking samua maksut dari tu atoran-atoran di kitab Taurat. Jadi sapa jo yang percaya pa Dia, tu orang itu mo jadi butul di muka pa Tuhan kong dia so nyanda perlu lei mo iko tu atoran-atoran di kitab Taurat for mo jadi orang yang butul. Dulu nabi Musa da tulis tentang orang yang mo jadi butul di muka pa Tuhan asal dia iko tu atoran-atoran di kitab Taurat, Musa bilang: “Tu orang yang iko tu atoran-atoran di kitab Taurat, dia itu mo jadi orang yang butul.” Mar tentang bagimana Tuhan beking orang jadi butul di muka pa Dia lantaran percaya, ada tulis di Kitab Suci bagini, “Jang ngoni babilang pa ngoni pe dalam hati, ‘Sapa yang mo nae ka sorga dang?’ ” kalu ngoni bilang bagitu, itu de pe maksut mo bawa Kristus turung kamari dari sorga for se tau tu cara orang mo dapa slamat. Ato jang ngoni babilang pa ngoni pe dalam hati bagini, ‘Sapa yang mo turung ka tampa orang-orang mati dang?’ kalu ngoni bilang bagitu, itu de pe maksut mo angka pa Kristus dari antara orang mati kong bawa kamari for se tau tu cara orang mo dapa slamat. Ngoni nyanda usa bagitu lantaran di Kitab Suci da tulis bagini, “Tu firman itu so ada pa ngoni. Ngoni bole mangaku tu firman itu deng ngoni pe mulu, kong bole percaya tu firman itu pa ngoni pe hati.” Itu tu firman yang torang ja kase tau pa orang-orang, tu firman tentang percaya pa Yesus. Soalnya kalu ngoni mangaku Yesus itu tu Tuhan, kong percaya pa ngoni pe hati kalu Tuhan Allah so se hidop ulang pa Yesus, ngoni mo dapa slamat dari hukuman dosa. Kalu ngoni percaya, Tuhan mo beking ngoni jadi orang yang butul di muka pa Dia. Kong kalu ngoni mangaku Yesus itu ngoni pe Tuhan, ngoni mo dapa slamat dari hukuman dosa. Di Kitab Suci da bilang, “Sapa jo yang percaya pa Tuhan, dia nyanda mo kecewa lantaran Tuhan mo beking samua tu De pe janji.” Samua orang bole dapa slamat lantaran nyanda ada de pe beda antara tu orang Yahudi deng orang bukang Yahudi. Tuhan yang satu itu for samua orang, deng Dia pangbae for orang yang minta tolong pa Dia. Itu sama deng tu da tulis di Kitab Suci, “Tuhan kase slamat pa sapa jo yang minta pa Dia for se slamat.” Mar bagimana orang-orang mo minta pa Tuhan supaya bole mo slamat kalu dorang blum percaya pa Dia? Kong bagimana orang-orang mo percaya pa Dia kalu dorang blum perna dengar tentang Dia? Deng bagimana orang-orang mo dengar tentang Dia kalu nyanda ada yang kase tau itu pa dorang? Trus bagimana lei orang-orang mo kase tau tentang Dia kalu dorang nyanda dapa utus? Jadi sama deng tu da tulis di Kitab Suci, “Pe snang skali kalu datang orang-orang yang ja kase tau tu Kabar Bae dari Tuhan Allah.” Mar nyanda samua orang yang so dengar tu Kabar Bae itu yang trima itu. Itu sama deng dulu Nabi Yesaya perna da bilang, “Tuhan, sapa yang percaya tu brita yang torang da kase tau?” So itu, orang musti dengar dulu baru dorang mo percaya, kong tu brita yang dorang da dengar itu no tu brita tentang Kristus. Mar kita mo tanya, apa tu orang Yahudi nyanda percaya lantaran dorang blum sempat dengar tu brita itu? Dorang pasti so dengar tu brita itu to? Soalnya di Kitab Suci da tulis bagini, “Orang-orang so pigi kase tau tu brita itu kamana-mana di dunia ini, dorang pe kata-kata itu so tasiar ka sluru dunia.” Ato stou dorang nyanda mangarti tu brita itu? Nyanda mungkin to? Dorang so mangarti tu brita itu, lantaran hele orang yang bukang Yahudi so mangarti itu. Nabi Musa tu pertama da tulis tu Tuhan Allah da bilang tentang itu, bagini, “Ngoni tu orang Yahudi, Kita mo beking ngoni cemburu waktu ngoni lia tu Kita pe sayang pa orang-orang dari bangsa laeng yang bukang Kita pe orang. Tu orang-orang bukang Yahudi itu no yang ngoni anggap bodok, mar Kita sayang pa dorang. Itu yang mo beking ngoni mara.” Kong Nabi Yesaya lei deng brani babilang tu Tuhan Allah pe pesan tentang tu orang-orang yang bukang Yahudi bagini, “Orang yang nyanda perna cari tau tentang Kita, dorang so bole percaya pa Kita. Kita so se tunjung tu Kita pe diri pa orang-orang yang nyanda ja cari tau tentang Kita.” Mar tentang tu orang-orang Yahudi yang nyanda percaya, Nabi Yesaya kase tau Tuhan Allah pe pesan bagini, “Siang malam Kita minta pa ngoni supaya bale ulang pa Kita, mar ngoni nimau dengar pa Kita, ngoni memang kapala batu.” Tu orang-orang Yahudi dari dulu Tuhan Allah so pili, mar ada yang nyanda badengar pa Dia. No skarang, apa Dia tolak pa dorang? Tantu katu nyanda to? Soalnya kita sandiri orang Yahudi, Abraham pe keturunan, dari suku Benyamin, mar Dia nyanda tolak pa kita. Tuhan Allah nyanda tolak Dia pe orang-orang tu orang Yahudi yang Dia so pili dari dulu. Ngoni tau to di Kitab Suci waktu tu nabi Elia da bamengelu pa Tuhan Allah tentang tu orang-orang Yahudi, dia bilang, “Tuhan, tu nabi-nabi yang ja se tau Tuhan pe pesan, orang Yahudi sandiri yang da bunung pa dorang. Kong tu tampa-tampa korban persembahan dorang lei so kase ancor, cuma kita sandiri kasiang yang masi hidop, kong dorang lei mo cari bunung pa kita.” Mar waktu itu Tuhan Allah bilang bagini pa nabi Elia, “Masi ada tuju ribu orang Yahudi yang jadi Kita pe orang. Dorang itu setia pa Kita, dorang nyanda perna berlutut semba pa Baal.” Kong sama deng tu da jadi waktu nabi Elia itu, skarang lei banya orang Yahudi yang nyanda setia pa Tuhan, mar ada jo dari orang Yahudi yang setia biar cuma sadiki. Tu orang Yahudi yang setia itu yang Tuhan da pili dari dulu mo jadi De pe orang. Dia pili pa dorang lantaran Dia mo se tunjung De pe bae pa dorang, bukang lantaran dorang ja beking tu bae. Soalnya kalu Tuhan pili pa dorang lantaran dorang ja beking tu bae, de pe arti Tuhan pili pa dorang lantaran mo balas tu dorang pe bae, bukang lantaran Dia pe sayang yang Dia kase tunjung deng cuma-cuma. Jadi, orang Israel cari jalang for mo jadi butul di muka pa Tuhan, mar amper samua nyanda dapa. Ada yang dapa, mar cuma sadiki. Dorang itu yang Tuhan so pili dari dulu, dorang so dapa tu jalang for Tuhan beking dorang jadi butul di muka pa Dia. Kong tu laeng jadi kras hati, dorang nimau dengar pa Tuhan. Dorang itu sama deng tu da tulis di Kitab Suci bagini, “Tuhan Allah beking dorang sama deng orang yang da tasono, nyanda balia pake dorang pe mata, deng nyanda badengar pake dorang pe talinga, sampe ni hari dorang nyanda mangarti apa-apa.” Raja Daud bilang lei tentang dorang bagini, “Biar jo tu dorang pe makang-makang bole jadi sama jerat deng prangkap, pertama dorang rasa snang deng aman, mar de pe laste dong pe kejahatan beking dong jadi sesat sampe dong binasa. Dorang sama deng da tasontong di batu kong jatung. Itu no tu balasan for dorang pe kras hati. Biar jo dorang tanggong tu dorang pe hukuman bagini: dorang so nyanda mo mangarti apa-apa sama deng dorang pe mata so glap so nimbole mo balia, deng dorang lei pikul beban trus sama deng orang yang so bongko.” Jadi bagimana dang deng tu orang Yahudi yang nyanda percaya pa Yesus? Apa itu beking Tuhan tolak pa dorang sampe nyanda ada jalang lei for dorang mo dapa slamat dari hukuman dosa? Tantu nyanda katu to? Dorang masi bole mo slamat dari hukuman dosa asal dorang percaya, mar lantaran dorang nyanda percaya pa Yesus sampe tu bangsa-bangsa bukang Yahudi dapa kesempatan for percaya kong bole mo dapa slamat. Waktu tu orang-orang Yahudi lia pa orang-orang bukang Yahudi so jadi percaya kong dapa slamat, dorang itu jadi cemburu sampe dorang suka lei mo percaya. Tu orang-orang Yahudi pe nyanda percaya itu no yang beking sampe samua orang dari bangsa-bangsa laeng di dunia ini bole dapa berkat keslamatan. Jadi tu orang Yahudi pe nyanda percaya itu beking sampe orang bukang Yahudi jadi percaya, kong nanti kalu orang Yahudi lei jadi percaya, pasti tu berkat lei jadi lebe basar. Skarang kita mo babilang pa ngoni, kita pe sudara-sudara yang percaya yang bukang Yahudi: kita ini rasul tu Yesus pe utusan for ja kase tau tu Kabar Bae tentang Yesus pa ngoni tu orang-orang yang bukang Yahudi. Kita beking bae-bae tu kita pe tugas itu lantaran kita tau tu tugas itu luar biasa skali. Kita baharap deng kita pe tugas ini kita bole mo beking orang Yahudi tu satu bangsa deng kita mo cemburu lantaran dorang lia ada orang dari bangsa laeng yang dapa slamat. Sapa tau waktu tu orang-orang Yahudi lia itu, dorang lei bole percaya kong dapa slamat. Soalnya waktu Tuhan nyanda trima tu orang Yahudi yang nyanda percaya itu, itu jadi kesempatan for samua orang di dunia ini jadi percaya kong ada hubungan bagus deng Tuhan. No apa lei kalu kita pe sudara-sudara orang Yahudi percaya pa Yesus kong Dia trima pa dorang, tantu katu itu lebe bagus. Kalu itu jadi bagitu, dorang sama deng orang yang so mati kong hidop ulang. Kalu torang beking roti, roti pertama torang srahkan pa Tuhan, kong tu roti-roti brikut jadi Tuhan punya. Ato kalu tu akar pohong torang srahkan pa Tuhan, tu pohong itu lei jadi Tuhan punya. Bagitu lei deng torang orang Yahudi, torang so jadi Tuhan punya lantaran torang pe nene moyang Tuhan punya. Orang-orang Yahudi yang nyanda percaya, dorang itu bole mo se sama deng tu cabang-cabang pohong zaitun yang da se pata dari pohong yang da tanang. Kong di tampa itu ada se cangkok akang cabang pohong zaitun liar, tu ngoni orang bukang Yahudi yang percaya. Jadi ngoni bole mo trima lei tu janji yang Tuhan da kase pa orang-orang Yahudi pe nene moyang dulu. Ngoni tu orang-orang bukang Yahudi yang so percaya, ngoni nimbole pandang enteng pa tu orang-orang Yahudi yang nyanda percaya. Kalu ngoni pandang enteng pa dorang, inga kalu ngoni itu cuma cabang, bukang akar. Soalnya bukang cabang yang kase makang pa akar, mar tu akar yang kase makang pa cabang. So itu, jang sampe ada dari pa ngoni babilang, “Torang yang Tuhan sayang, Dia so tolak pa tu orang Yahudi, sama deng tu cabang-cabang pohong yang da se pata kong da se cangkok di pohong zaitun yang da tanang.” Memang butul, banya orang Yahudi yang Tuhan da tolak, mar Dia da tolak pa dorang lantaran dorang nyanda percaya. Kong Tuhan trima pa ngoni lantaran ngoni percaya pa Dia. Jadi ngoni jang basombong, mar lebe bae ngoni tako jo pa Tuhan. Soalnya Tuhan Allah tolak tu orang Yahudi yang nyanda percaya. Jadi lebe-lebe lei ngoni tu orang-orang bukang Yahudi, kalu ngoni nyanda percaya pasti Dia lei mo tolak pa ngoni. Dari samua tu kita da bilang tadi, torang bole mangarti kalu Tuhan Allah itu bae deng Dia lei tegas kalu ja kase hukuman. Dia kase hukuman pa orang-orang Yahudi yang nyanda percaya pa Dia, mar Dia se tunjung De pe bae pa ngoni tu orang-orang yang bukang Yahudi yang tetap baharap pa Dia pe bae pa ngoni itu. Jadi kalu lei ngoni tu orang yang bukang Yahudi nyanda percaya, Dia lei tetap mo hukum pa ngoni sama deng tu cabang yang da potong dari de pe pohong. Kong tentang tu orang Yahudi yang nyanda percaya itu, kalu dorang bertobat, Tuhan Allah mo trima ulang pa dorang lantaran Dia ada kuasa mo trima pa dorang. Ngoni tu orang-orang bukang Yahudi, ngoni sebenarnya nyanda pantas Tuhan trima, sama deng tu cabang dari pohong zaitun liar yang orang potong tu nyanda cocok dapa cangkok di pohong Zaitun yang da tanang. Mar biar bagitu Tuhan trima pa ngoni lantaran ngoni percaya pa Dia. Jadi lebe-lebe lei tu orang Yahudi kalu dorang percaya, Tuhan tantu mo trima ulang pa dorang. Dorang itu sama deng cabang yang dapa potong dari pohong zaitun yang da tanang itu, jadi cocok kalu se cangkok ulang di pohong zaitun itu. Sudara-sudara, kita mo kase tau tu Tuhan pe rahasia supaya ngoni nyanda rasa diri pande, bagini: banya tu orang-orang Yahudi yang so jadi kras kapala. Dorang bagitu sampe waktu so lengkap tu jumla dari orang-orang bukang Yahudi yang Tuhan so tentukan jadi percaya. Kong kalu so bagitu, baru samua keturunan Israel mo slamat. Itu sama deng tu da tulis di Kitab Suci, “Nanti mo datang dari Sion satu Orang yang mo se slamat pa manusia. Dia mo se hapus tu kejahatan dari orang-orang Yahudi tu Yakub pe keturunan. Itu Kita pe perjanjian deng dorang kalu Kita mo se ampung dorang pe dosa.” Banya orang Yahudi nyanda trima tu Kabar Bae tentang Yesus, so itu dorang so jadi Tuhan Allah pe musu. Mar so lantaran itu ngoni dapa untung. Biar bagitu, tu orang-orang Yahudi tetap Tuhan sayang lantaran dari jo dorang pe nene moyang Tuhan so pili. Soalnya kalu Tuhan Allah so pangge pa dorang for jadi Dia pe orang kong kase akang berkat pa dorang, Dia nyanda perna mo ruba tu De pe pikiran itu. Dulu, ngoni tu orang-orang yang bukang Yahudi nyanda iko pa Tuhan Allah. Mar skarang lantaran bangsa Yahudi so nyanda dengar-dengaran pa Tuhan Allah, kong Tuhan Allah se tunjung De pe rasa kasiang pa ngoni sampe Dia se bebas pa ngoni dari hukuman dosa. Skarang tu orang-orang Yahudi nyanda dengar-dengaran pa Tuhan Allah. Tuhan Allah lei mo se tunjung Dia pe rasa kasiang pa dorang sampe kase bebas pa dorang dari hukuman dosa sama deng tu da beking pa ngoni tu orang-orang bukang Yahudi. Jadi orang-orang Yahudi deng lei tu orang-orang bukang Yahudi da hidop nyanda dengar-dengaran pa Tuhan Allah, kong Tuhan Allah so kase biar pa dorang beking bagitu supaya Dia bole se tunjung tu Dia pe rasa kasiang pa dorang samua sampe dorang bole bebas dari hukuman lantaran dosa. Bukang main Tuhan Allah pe bae. Dia pe hikmat nyanda ada yang mo lawang, kong Dia tau samua hal. Nyanda ada satu orang tu bole mo mangarti tu Dia pe keputusan, deng lei apa Dia pe maksut tu Dia ja beking. Sama deng tu da tatulis di Kitab Suci, Sapa yang tau Tuhan pe pikiran? Sapa yang mampu mo kase nasehat pa Dia? Ato sapa yang perna kase sesuatu pa Tuhan sampe dia mo tuntut supaya Tuhan musti balas pa dia? Nyanda ada to? Tuhan Allah yang da ciptakan samua, Dia yang ja baator samua, kong samua itu for Dia. Jadi mari jo torang puji deng hormat pa Dia sampe slama-lamanya. Amin. Sudara-sudara, Tuhan Allah so se tunjung Dia pe rasa kasiang pa torang, so itu kita se nasehat supaya ngoni srahkan jo tu ngoni pe hidop for iko Dia pe mau sama deng ngoni kase korban persembahan yang hidop, yang kudus, deng yang beking snang pa Dia. Itu no tu ngoni pe ibada yang butul. Ngoni jang iko tu orang-orang di dunia ini pe cara hidop yang nyanda ja iko tu Tuhan Allah pe mau. Biar jo Tuhan Allah roba tu ngoni pe pikiran jadi baru supaya ngoni pe kalakuan lei bruba. Soalnya deng ngoni pe pikiran yang baru itu ngoni bole tau Tuhan Allah pe mau: mana yang bagus, mana yang beking snang pa Dia deng yang sempurna. Tuhan so se tunjung Dia pe bae pa kita sampe kita jadi rasul tu Dia pe utusan, kong so lantaran itu kita mo se nasehat pa ngoni samua supaya ngoni jang pikir tinggi-tinggi tentang ngoni pe diri, mar lebe bae tare ngoni pikir apa yang sebenarnya tentang ngoni pe diri iko tu kemampuan yang Tuhan Allah so kase pa ngoni masing-masing lantaran ngoni so percaya pa Dia. Torang mo ambe conto deng torang pe badan yang ada banya anggota badan, kong tiap anggota badan ada de pe tugas masing-masing. Bagitu lei deng torang yang so percaya pa Kristus. Torang ada banya mar so jadi satu, sama deng so jadi satu badan. Kong biar torang ada tugas masing-masing mar tetap baku perlu. Tuhan so kase pa torang masing-masing karunia yang baku beda lantaran Dia pe bae pa torang. So itu torang musti pake bae-bae sama deng ini tu karunia-karunia itu: kalu Tuhan kase pa torang karunia for kase tau tu Tuhan pe pesan pa orang-orang, kase tau jo tu pesan itu iko tu pesan yang torang percaya Tuhan Allah so kase pa torang. Kalu Tuhan so kase karunia for mo tolong pa orang laeng, tolong jo deng sunggu-sunggu. Kong kalu Tuhan kase karunia for mangajar, mangajar jo deng sunggu-sunggu. Kalu Tuhan kase karunia for kase smangat pa orang laeng, beking jo itu deng sunggu-sunggu. Kalu Tuhan kase karunia pa torang for bakase pa orang, bakase jo deng tulus. Kalu Tuhan kase karunia for mo jadi pemimpin, bapimpin jo deng bae-bae. Kong kalu Tuhan kase karunia for se tunjung tu rasa kasiang for tolong pa orang, torang beking jo deng snang hati. Ngoni basayang jo deng butul-butul, jang deng pura-pura. Ngoni binci jo samua hal yang jaha, kong beking jo trus samua tu hal bae yang so ada pa ngoni. Ngoni baku-baku sayang jo sama deng basudara. Ngoni brusaha jo hormat pa orang laeng lebe dari yang orang laeng beking. Ngoni karja jo deng rajin for Tuhan, jang ngoni malas. Ngoni karja jo deng smangat. Ngoni musti snang lantaran ngoni bole baharap deng yakin pa Tuhan. Ngoni musti batahang percaya biar dapa susa, deng lei musti slalu basombayang. Ngoni tolong jo pa Tuhan pe orang-orang kalu ada yang dorang perlu. Kong trima jo pa ngoni pe ruma tu orang-orang biar nyanda kanal pa dorang. Kong kalu ada orang yang beking ngoni mendrita, minta jo Tuhan kase akang berkat pa dia bukang kutuk. Trus kalu ada orang yang snang, ngoni snang jo sama-sama deng dia. Kong kalu ada orang yang sedi kong manangis, manangis jo deng dia. Ngoni hidop jo satu hati deng ngoni pe sudara-sudara yang percaya. Jang sombong mar batamang jo deng tu orang-orang yang orang laeng ja anggap nyanda penting. Kong jang anggap ngoni pe diri itu so pande. Kalu ada orang yang beking jaha pa ngoni, jang ngoni balas beking jaha lei pa dia. Ngoni beking jo trus tu bae di muka samua orang. Kong brusaha jo hidop damai deng samua orang, apa lei kalu hidop damai itu musti ngoni yang beking lebe dulu. Sudara-sudara yang kita sayang, jang ngoni balas dendam pa orang yang beking jaha pa ngoni mar se biar jo Tuhan Allah yang mara kong hukum pa dia. Soalnya da tulis di Kitab Suci bagini, “Tuhan bilang, Kita pe hak tu mo babalas, Kita tu mo bahukum.” “Mar kalu ngoni pe musu lapar, kase jo dia makang. Kalu dia aus, kase jo dia minum. Soalnya kalu ngoni beking bagitu pa ngoni pe musu, dia nanti mo jadi malo kong dia roba tu kalakuan.” Jadi jang sampe tu jaha se kala pa ngoni. Mar beking jo tu bae for kase kala tu jaha. Tiap orang musti dengar-dengaran pa pemerenta. Soalnya Tuhan Allah yang da kase kuasa pa pemerenta for baprenta. Kong tu pemerenta-pemerenta yang ada, dorang samua itu Tuhan Allah yang da tentukan. So itu no tu orang yang nyanda ja badengar pa pemerenta, dia itu sama jo deng nimau iko apa tu Tuhan Allah da tentukan for manusia. Kong sapa tu nyanda dengar-dengaran pa pemerenta dia pasti mo dapa hukuman. Kalu orang yang ja beking tu bae, dia itu nyanda perlu tako mo dapa hukuman dari pemerenta. Mar kalu orang ja beking tu jaha, dia itu yang mustinya tako mo dapa hukuman dari pemerenta. Jadi kalu ngoni tako mo dapa hukuman, ngoni beking jo tu bae supaya pemerenta mo puji pa ngoni. Soalnya tu pemerenta itu Tuhan da tentukan supaya bole layani pa ngoni for ngoni pe bae. Mar kalu ngoni da beking tu jaha, ngoni memang musti tako pa pemerenta lantaran dorang itu ada kuasa for kase hukuman. Pemerenta itu ada for layani pa Tuhan Allah, dorang itu sama deng Tuhan Allah pe wakil for kase Tuhan pe hukuman pa tu orang-orang yang da beking tu jaha. So itu, ngoni musti dengar-dengaran pa pemerenta. Ngoni dengar-dengaran pa pemerenta bukang cuma lantaran ngoni tako Tuhan Allah mara kong mo kase hukuman, mar ngoni dengar-dengaran pa pemerenta lantaran pa ngoni ada hati nurani. Kong lantaran itu lei no kong ngoni musti bayar pajak pa pemerenta. Deng ngoni bayar pajak, ngoni beking pemerenta itu bole beking tu tugas yang Tuhan Allah da kase pa dorang. Jadi ngoni kase jo pa samua orang apa tu pantas yang ngoni musti kase pa dorang: kalu ngoni musti babayar pajak ato musti babayar yang laeng, bayar jo pa orang yang musti ngoni mo bayar akang. Kong dengar-dengaran deng hormat jo pa sapa yang musti dapa hormat. Ngoni jang bautang apa-apa pa sapa-sapa, mar ada satu hal yang amper sama deng utang tu ngoni nimbole brenti bayar, ngoni musti baku-baku sayang. Soalnya sapa jo yang sayang pa orang laeng, dia itu sama deng so beking tu samua atoran yang ada di kitab Taurat. Soalnya atoran yang Tuhan da kase di kitab Taurat rupa ini: jang bersina, jang babunung, jang bapancuri, deng lei jang suka tu orang laeng punya for mo jadi ngoni punya. Samua itu deng atoran-atoran laeng torang so beking, kalu torang beking tu Tuhan pe atoran yang bagini, “Sayang jo pa orang laeng sama deng ngoni sayang pa ngoni pe diri sandiri.” Orang yang sayang pa orang laeng, dia itu nyanda mo beking tu jaha pa orang laeng. So lantaran itu, sapa yang basayang pa orang laeng, dia itu so beking samua tu Tuhan pe atoran di kitab Taurat. Ngoni beking jo apa yang kita bilang pa ngoni tadi lantaran so dekat tu waktu Tuhan mo datang ulang. Jadi sama deng orang yang da tatidor, ngoni bangong jo skarang kong beking jo apa yang kita da bilang tadi itu. Soalnya tu waktu Tuhan mo se slamat pa torang so lebe dekat dari skarang ini se banding waktu torang baru pertama percaya. Torang pe waktu for hidop di dunia ini amper abis, sama deng so malam kong so mo amper siang. Tu waktu Tuhan mo datang ulang so dekat. So itu, mari jo torang brenti beking tu hal-hal yang jaha, yang biasa tu orang yang hidop di glap ja beking. Kong torang lei musti beking samua hal yang bole bantu torang malawang tu jaha, sama deng tentara yang da pake perlengkapan prang yang siap malawang musu. Torang musti hidop deng kalakuan yang bae, tu kalakuan yang biasa orang-orang ja beking waktu siang hari, kong jang beking tu kalakuan yang biasa orang-orang ja beking waktu malam: jang bapesta-pesta deng bamabo-mabo, jang beking tu hal-hal caparuni, jang iko akang tu nafsu yang besae, jang bakalae deng jang bamangiri. Mar lebe bae tiap hari torang hidop jo iko tu Tuhan Yesus Kristus pe sifat, kong sama skali lei jang iko tu torang manusia pe sifat yang berdosa for se puas tu nafsu yang besae. Ada orang-orang yang so percaya pa Tuhan mar dorang pe percaya blum kuat, jadi dorang masi blum talalu tau bagimana mo hidop butul di muka pa Tuhan. Ngoni musti trima pa dorang, jang baku ambe pendapat deng dorang. De pe conto bagini: ada orang yang de pe percaya so kuat, kong dorang so tau kalu nyanda ada makanan yang haram lei di muka pa Tuhan. Mar tu orang yang de pe percaya blum kuat, dorang masi ragu tentang itu, dorang masi pikir kalu Tuhan anggap haram makang daging, kong dorang no cuma makang sayor-sayor. Tu orang-orang yang tau kalu dorang bole makang samua jenis makanan, dorang jang pandang enteng pa tu orang yang cuma makang sayor-sayor, lantaran Tuhan Allah so trima pa dorang. Kong tu orang-orang yang cuma makang sayor-sayor jang kase sala pa orang-orang yang ja makang samua jenis makanan, lantaran dorang lei Tuhan Allah so trima. Kong kiapa ngoni samua rasa ada hak for bilang kalu Tuhan pe orang-orang itu sala? Tuhan itu torang pe Tuang, so Dia tu ada hak for bilang pa De pe orang-orang itu sala ato nyanda. Tuhan pasti mo tolong De pe orang-orang supaya dorang bole hidop butul. Ada lei tu conto bagini: ada orang-orang yang bapikir kalu ada hari yang lebe penting dari hari yang laeng for semba pa Tuhan. Ada komang orang-orang yang bapikir kalu samua hari itu sama for semba pa Tuhan. Mar sebenarnya hari apa jo yang torang pili for semba pa Tuhan, torang musti yakin kalu tu torang da beking itu Tuhan anggap butul. Orang yang beking tu satu hari jadi lebe penting dari hari yang laeng, dia beking itu for hormat pa Tuhan. Kong orang yang makang samua jenis makanan, dia beking itu for hormat pa Tuhan lantaran dia mo bilang makase pa Tuhan. Trus tu orang yang cuma makang sayor-sayor lantaran pikir tu daging itu haram, dia beking itu for mo hormat pa Tuhan, deng dia lei mo bilang makase pa Tuhan Allah. Soalnya nyanda ada dari antara pa torang biar satu yang hidop for dia pe mau sandiri. Deng lei, nyanda ada dari antara pa torang yang mati for dia pe mau sandiri. Soalnya torang hidop, torang hidop for Tuhan, deng torang mati, torang mati for Tuhan. Jadi biar torang hidop ato mati, torang ini Tuhan punya. So itu, Kristus so mati kong so hidop ulang supaya Dia bole jadi torang pe Tuhan waktu torang hidop ato mati. Jadi ngoni yang makang samua jenis makanan, bole so ngoni pandang enteng pa ngoni pe sudara yang percaya yang cuma makang sayor? Tantu nyanda to? Kong ngoni yang cuma makang sayor, bole so ngoni kase sala pa ngoni pe sudara yang percaya yang makang samua jenis makanan? Tantu nyanda lei to? Soalnya torang samua ini nanti tu mo mangada pa Tuhan Allah for mo dapa adili. Sama deng tu da tulis di Kitab Suci bagini, “Kita tu Tuhan Allah, Kita butul-butul hidop, kong Kita se pasti kalu samua orang nanti mo berlutut kong basemba di muka pa Kita, deng samua mo mangaku kalu memang butul Kita ini Tuhan Allah.” Jadi torang samua nanti mo mangaku di muka pa Tuhan Allah samua tu torang so beking di dunia ini. Tuhan Allah yang mo adili pa torang, so itu torang jang baku kase sala lei. Mar lebe bae torang hidop hati-hati supaya torang jang beking tu hal-hal yang beking orang laeng tagoda beking dosa, sama deng tu orang itu da tasontong batu kong jatung. Kita so percaya pa Tuhan Yesus, jadi kita tau deng yakin kalu nyanda ada makanan yang haram di muka pa Tuhan. Mar kalu ada orang yang pikir ada makanan yang haram, tu makanan itu jadi haram for dia kalu dia makang itu. Mar kalu ngoni makang tu makanan yang ngoni pe sudara yang percaya anggap haram di muka pa dia sampe beking dia saki hati, itu de pe arti ngoni nyanda sayang pa dia. Jadi jang ngoni makang ato minum apa-apa yang dia ja anggap haram kalu itu beking dia beking dosa sampe jadi nyanda percaya lei. Soalnya Kristus da mati lei for dia. So itu, biar yang ngoni mo beking itu ngoni rasa butul, mar kalu ngoni pe sudara yang percaya rasa itu besae, lebe bae jang ngoni beking supaya jang dorang bicara yang besae tentang ngoni. Soalnya kalu Tuhan Allah berkuasa sbagai raja pa torang, yang penting bukang apa tu torang mo makang ato minum mar tu hal-hal ini: hidop ja beking tu butul, hidop baku-baku bae, hidop deng hati tenang, deng lei hidop deng hati snang. Samua itu torang bole beking lantaran Roh Kudus ada pa torang pe hati. Orang yang iko pa Kristus deng cara hidop rupa itu, dia beking snang pa Tuhan Allah kong orang-orang hormat pa dia. Jadi mari jo torang slalu brusaha beking tu hal-hal yang beking torang bole hidop baku-baku bae deng beking lei tu hal-hal yang bole baku kase kuat tu torang samua pe percaya. Tuhan Allah so bakarja pa orang pe hati sampe orang jadi percaya. So itu, kalu apa yang ngoni da makang beking tu ngoni pe sudara yang percaya beking dosa, itu de pe arti ngoni so se ancor tu Tuhan Allah pe karja pa orang itu. Memang butul so nyanda ada lei makanan yang Tuhan Allah larang ngoni mo makang, mar ngoni tare jadi sala kalu apa yang ngoni makang beking tu sudara yang percaya jadi tagoda beking dosa. Lebe bae jang ngoni makang daging ato minum anggor ato jang beking apa jo kalu itu cuma beking tu ngoni pe sudara yang percaya beking dosa. Kalu ngoni yakin apa yang ngoni da makang, minum ato beking sesuatu itu nyanda sala, simpang jo itu pa ngoni pe hati supaya cuma ngoni deng Tuhan Allah yang tau, nyanda perlu orang laeng tau. Kalu ngoni nyanda ada rasa bersala waktu ngoni beking sesuatu yang ngoni yakin itu butul, ngoni itu yang paling snang. Mar kalu ngoni pikir makang satu jenis makanan itu berdosa kong tetap makang, ngoni itu tare jadi sala lantaran tu da beking itu nyanda iko ngoni pe percaya. Soalnya apa jo yang ngoni da beking deng hati yang nyanda percaya, itu de pe arti ngoni so beking dosa. Torang yang so kuat percaya pa Tuhan, torang musti sabar deng tu kelemahan dari orang-orang yang de pe percaya blum kuat. Torang jang cuma cari torang pe snang sandiri. Mar torang musti beking tu hal-hal yang bae for torang pe tamang pe bae, supaya dorang pe percaya pa Tuhan tatamba lebe kuat. Torang musti beking bagitu lantaran Kristus nyanda cari Dia pe snang sandiri, malatare Dia siap dapa hina for Tuhan Allah. Tu so jadi pa Kristus itu, sama deng tu da tulis di Kitab Suci bagini, “Tu kata-kata besae yang orang-orang bilang pa Tuhan Allah, itu so kana pa Kita lei.” Samua tu da tulis di Kitab Suci dulu ada tulis for se ajar pa torang supaya torang bole tetap batahang percaya biar dapa siksa, deng supaya lewat tu Kitab Suci torang tetap smangat for baharap deng yakin pa Tuhan Allah. Kong Tuhan Allah yang beking orang bole batahang percaya biar lei dapa siksa, deng Dia lei yang kase smangat pa orang. Kong kita minta pa Tuhan Allah supaya Dia tolong pa ngoni hidop satu hati deng ngoni pe sudara yang percaya iko tu Kristus Yesus pe cara hidop. Jadi deng ngoni hidop satu hati bagitu, ngoni bole sama-sama puji deng hormat pa Tuhan Allah tu torang pe Tuhan Yesus Kristus pe Bapa. So itu sudara-sudara, ngoni musti trima satu deng laeng sama deng Kristus lei so trima pa ngoni. Kalu ngoni beking bagitu, Tuhan Allah dapa puji deng hormat. Kita se inga pa ngoni bagini: Kristus so datang ka dunia for mo layani pa torang orang Yahudi supaya mo tepati tu Tuhan Allah pe janji pa torang pe nene moyang. Deng bagitu Tuhan Allah mo se tunjung kalu Dia so bajanji pasti Dia mo tepati, Dia memang da beking tu butul. Deng lei Dia datang ka dunia for orang-orang yang bukang Yahudi lantaran Tuhan Allah kasiang pa dorang, supaya dorang lei bole puji deng hormat pa Tuhan Allah. Di Kitab Suci da tulis kalu nanti tu orang Yahudi mo puji pa Tuhan sama-sama deng orang-orang bukang Yahudi, bagini tu da tulis: “Kita mo puji-puji pa Tuhan di tenga-tenga orang-orang bukang Yahudi. Kita mo manyanyi lagu pujian for puji Tuhan pe nama.” Kong ada lei yang da tulis bagini, “Hei bangsa-bangsa bukang Yahudi! Snang jo sama-sama deng tu Kita pe orang-orang.” Trus ada lei tu da tulis, “Hei ngoni orang-orang dari samua bangsa bukang Yahudi, ngoni puji jo pa Tuhan! Biar jo samua suku bangsa puji pa Dia.” Kong nabi Yesaya lei da tulis di Kitab Suci bagini, “Dari Isai pe keturunan nanti mo muncul tu mo berkuasa pa bangsa-bangsa bukang Yahudi, kong dorang mo baharap deng yakin pa Dia.” Kita minta pa Tuhan Allah yang torang ja baharap akang, supaya Dia beking ngoni pe hati snang deng ngoni hidop deng hati tenang lantaran ngoni percaya pa Dia. Deng bagitu kuasa Roh Kudus bakarja pa ngoni pe hati for beking ngoni tamba trus baharap deng yakin pa Tuhan. Sudara-sudara, kita tau butul kalu ngoni so banya ja beking tu bae, ngoni so banya mangarti tentang tu Tuhan pe ajaran, deng lei ngoni so mampu for baku kase ajar tu butul. Mar biar lei bagitu, kita nyanda malo se nasehat pa ngoni di surat ini tentang bebrapa hal for mo se inga pa ngoni. Kita nyanda malo beking itu lantaran Tuhan Allah pe bae pa kita; Dia da kase tugas itu pa kita. Kita karja for Kristus Yesus, kita dapa tugas for pi kase tau tu Kabar Bae dari Tuhan Allah pa bangsa-bangsa bukang Yahudi. Kita pe karja sama deng imam yang ja kase korban persembahan pa Tuhan. Kalu ada dari pa orang-orang yang bukang Yahudi jadi percaya tu Kabar Bae lantaran kita ja kase tau pa dorang, tu orang-orang yang percaya itu sama deng tu korban persembahan yang beking snang pa Tuhan. Kong Tuhan trima pa dorang lantaran Roh Kudus beking dorang jadi Tuhan punya. Kita percaya pa Kristus Yesus, kong kita so rasa snang deng tu samua karja yang kita so beking for Tuhan Allah. Jadi yang kita brani bilang pa orang, itu cuma tu hal-hal yang kita so beking pake Kristus pe kuasa tu ada pa kita supaya beking bangsa-bangsa yang bukang Yahudi jadi dengar-dengaran pa Tuhan. Skarang so ada tu bangsa-bangsa bukang Yahudi yang so dengar-dengaran pa Tuhan lantaran apa yang kita da se ajar deng apa tu kita ja beking itu. Deng lei lantaran tu tanda-tanda ajaib deng mujisat-mujisat yang kita da beking pake Tuhan Allah pe Roh pe kuasa. Deng bagitu, kita so se tau tu Kabar Bae tentang Kristus pa orang-orang di samua kota yang kita pigi akang, dari Yerusalem sampe ka daera Ilirikum. Kita pe tujuan utama kita kase tau tu Kabar Bae tentang Kristus di tampa-tampa yang orang-orang blum perna dengar tu Kabar Bae itu, supaya kita nyanda sama deng da se badiri ruma di atas fondasi yang orang laeng da beking. Kita so beking sama deng da tulis di Kitab Suci, “Orang-orang yang blum perna trima brita tentang Dia, dorang mo tau sapa Dia. Orang-orang yang blum perna dengar tu brita tentang Dia, dorang mo mangarti tentang Dia.” Kita ja kase tau tu Kabar Bae di tampa-tampa yang orang-orang blum perna dengar tu Kabar Bae itu, so lantaran itu kita blum sempat pigi pa ngoni. Mar skarang kita so se klar tu kita pe karja di tampa-tampa itu. Kong so lama kita suka mo pi pa ngoni, so deng taong-taong lei. Kita ada rencana mo pigi ka negara Spanyol. Jadi waktu kita mo pigi ka sana, kita mo singga baku dapa dulu deng ngoni supaya kita pe hati jadi snang bole sama-sama deng ngoni. Abis itu, kita harap ngoni bole bantu akang pa kita pigi ka negara Spanyol. Mar skarang kita mo ka Yerusalem dulu, mo antar tu sumbangan for Tuhan pe orang-orang yang miskin di sana. Soalnya tu Tuhan pe orang-orang dari daera Makedonia deng Akhaya so kumpul doi for basumbang pa dorang. Dorang da sumbang itu deng snang hati deng memang pantas dorang mo bantu tu dorang pe sudara yang percaya tu orang-orang Yahudi di Yerusalem. Soalnya, tu orang-orang bukang Yahudi da dengar tu Kabar Bae tentang Yesus dari pa orang-orang Yahudi, jadi pantas katu no dorang balas tu orang Yahudi pe bae deng cara bantu dorang pe perlu. So itu kalu kita so klar kase tu sumbangan, baru kita mo brangkat ka Spanyol kong mo basingga dulu pa ngoni di Roma. Kong kita tau waktu kita singga pa ngoni, kita nanti mo bawa banya berkat dari Yesus Kristus pa ngoni. Sudara-sudara, torang so percaya pa Yesus Kristus tu torang pe Tuhan, deng lei Roh Kudus bakarja pa torang pe hati sampe torang bole baku sayang. So lantaran itu, kita bamohon pa ngoni supaya ngoni basombayang akang butul-butul for kita pa Tuhan Allah. Basombayang akang minta Tuhan jaga waktu kita pigi ka daera Yudea supaya tu orang-orang Yahudi yang nyanda percaya pa Yesus nyanda mo beking tu hal yang jaha pa kita. Kong lei basombayang akang supaya tu Tuhan pe orang-orang di Yerusalem bole trima deng bae tu sumbangan yang kita mo bawa. Ngoni basombayang akang bagitu for kita supaya kalu memang Tuhan Allah mau kita datang pa ngoni, kita bole datang deng snang hati kong lei di tenga-tenga pa ngoni kita bole kuat ulang. Tuhan Allah yang beking torang pe hati jadi tenang, kong kita basombayang pa Dia supaya Dia sama-sama deng ngoni samua. Amin. Kita mo se tau pa ngoni di surat ini tentang tu torang pe sudara parampuang yang percaya, de pe nama Febe. Dia ja layani jemaat di Kengkrea. Nanti waktu dia pigi pa ngoni, kita minta supaya ngoni trima jo pa dia deng bae lantaran dia so percaya pa Tuhan sama deng ngoni. Ngoni trima deng bae pa dia lantaran tu sikap rupa itu yang orang-orang percaya musti ja beking. Kong kita minta supaya ngoni kase dia tu dia perlu, lantaran dia so banya bantu pa orang-orang deng lei pa kita. Titip salam for Priskila deng de pe laki Akwila di sana. Dorang dua da karja for Kristus Yesus sama-sama deng kita. Dorang dua itu sampe amper mo mati waktu dorang da se slamat pa kita. Kita bilang makase pa dorang. Mar bukang cuma kita tu babilang makase pa dorang dua, deng lei tu jemaat-jemaat dari orang-orang bukang Yahudi babilang makase pa dorang. Kong titip salam lei pa tu jemaat yang ja bakumpul for baibada di ruma pa Priskila deng Akwila. Titip salam lei pa Epenetus, tu sudara yang percaya yang kita sayang. Dia itu orang pertama di daera Asia yang jadi percaya pa Kristus. Titip salam lei pa Maria, dia itu so karja kras for ngoni pe bae. Titip salam lei for Andronikus deng Yunias tu satu bangsa deng kita. Waktu kita blum percaya pa Yesus Kristus, dorang dua itu so percaya. Dorang itu so terkenal di antara tu rasul-rasul, kong dorang perna maso bui sama-sama deng kita. Titip salam pa Ampliatus. Kita sayang pa dia yang sama-sama percaya pa Tuhan. Titip salam lei for Urbanus tu torang pe tamang satu playanan for Kristus. Kong salam lei for Stakhis yang kita sayang. Titip salam for Apeles. Dia dapa banya cobaan mar tetap percaya pa Kristus. Kong titip salam lei for orang-orang yang ada pa Aristobulus pe ruma. Titip salam for Herodion, tu orang Yahudi yang satu bangsa deng kita. Titip salam lei for orang-orang percaya pa Tuhan yang ada pa Narkisus pe ruma. Titip salam lei for Trifena deng Trifosa yang lei so karja for Tuhan. Salam lei pa Persis, kita sayang pa dia deng dia lei so karja kras for Tuhan. Titip salam for Rufus. Dia banya orang ja hormat lantaran de pe percaya pa Tuhan luar biasa. Deng salam for de pe mama. De pe mama sayang pa kita kong kita so anggap de pe mama itu kita pe mama sandiri. Kong salam lei for Asinkritus, Flegon, Hermes, Patrobas, Hermas deng samua tu sudara-sudara yang percaya yang ada sama-sama deng dorang. Trus titip salam lei for Filologus, Yulia, Nereus deng de pe sudara parampuang. Kong titip salam lei for Olimpas deng for samua tu Tuhan pe orang-orang yang ada sama-sama deng dorang. Kalu ngoni bakumpul for baibada, ngoni sambut jo deng snang hati satu deng laeng deng cara baku kase salam. Kong ada salam lei for ngoni dari samua jemaat yang ada di sini. Sudara-sudara, kita se nasehat supaya ngoni hati-hati pa tu orang-orang yang beking torang jadi tapica-pica, deng lei pa tu orang-orang yang beking torang tagoda beking dosa kong jadi sesat. Dorang ja kase ajar tu ajaran yang baku beda deng tu ajaran yang butul yang torang so se ajar pa ngoni. Ngoni bajao jo dari pa dorang. Soalnya tu orang-orang yang bagitu, dorang bakarja bukang for Kristus tu torang pe Tuhan, mar dorang bakarja for iko akang tu dong pe mau sandiri. Dorang pake kata-kata yang manis deng kata-kata pujian for tipu pa tu orang-orang yang nyanda mangarti mana tu bae deng mana tu jaha. Sudara-sudara, samua orang so dengar tu kabar tentang ngoni pe dengar-dengaran pa Tuhan. So itu, kita snang skali deng ngoni. Mar kita mau supaya ngoni lebe tatamba tau mana tu bae, deng nyanda usa jo beking tu jaha. Kita minta Tuhan Allah yang beking torang pe hati tenang, mo iko kase ancor tu kuasa dari tu setang pe bos kong beking setang pe bos tunduk pa ngoni. Kong Yesus tu torang pe Tuhan se tunjung trus tu Dia pe bae pa ngoni. Timotius da titip salam for ngoni. Dia itu kita pe tamang karja di sini. Deng ada salam dari Lukius, Yason deng Sosipater tu kita pe tamang-tamang tu satu bangsa deng kita. Kita ini Tertius, kita yang tulis ni surat iko tu Paulus ja bilang, kita lei titip salam for ngoni yang so sama-sama percaya pa Tuhan. Gayus lei da titip salam for ngoni. Dia yang da kase de pe ruma for kita Paulus manumpang akang, deng lei kase de pe ruma for jemaat bakumpul baibada. Kong Erastus, tu bendahara kota, deng torang pe sudara yang percaya Kwartus, dorang lei da titip salam for ngoni. [ Kita minta Yesus Kristus tu torang pe Tuhan kase tunjung trus tu De pe bae for ngoni.] Puji jo pa Tuhan! Dia itu yang mampu beking ngoni pe percaya jadi kuat lantaran ngoni so dengar tu Kabar Bae tentang Yesus Kristus yang kita ja se tau pa orang-orang. Tu Kabar Bae itu dari dulu orang blum tau, mar skarang ini Tuhan Allah so se tunjung itu pa manusia. Tu Kabar Bae itu, Tuhan Allah so se tau pa nabi-nabi dulu kong Dia suru dorang tulis itu supaya samua orang yang dari samua suku bangsa tau kong dorang jadi percaya deng iko pa Kristus. Tuhan Allah itu slalu ada sampe slama-lamanya. Puji jo pa Tuhan Allah, Dia Tuhan yang slalu tau mana tu bae. Torang puji deng hormat trus pa Tuhan Allah sampe slama-lamanya lantaran apa yang Yesus Kristus so beking. Amin. Ni surat dari kita, Paulus. Tuhan Allah so pangge pa kita jadi rasul tu Kristus Yesus pe utusan iko Dia pe mau. Ni surat lei dari Sostenes tu torang pe sudara yang percaya. Surat ini for ngoni tu Tuhan Allah pe jemaat yang ada di Korintus. Ngoni so percaya pa Kristus Yesus, Dia so beking ngoni jadi kudus. Tuhan Allah so pangge pa ngoni for jadi Dia pe orang-orang sama-sama deng samua orang percaya di samua tampa. Ngoni samua itu yang ja semba pa Yesus Kristus tu torang samua pe Tuhan yang torang samua ja iko akang. Kita minta pa torang pe Allah Bapa deng Tuhan Yesus Kristus for kase tunjung tu bae pa ngoni deng beking ngoni hidop deng hati tenang. Kita slalu bilang makase pa Tuhan Allah yang kita ja semba lantaran ngoni. Soalnya Dia so se tunjung tu Dia pe bae pa ngoni lewat Kristus Yesus. Soalnya lewat ngoni pe percaya pa Kristus, ngoni jadi kaya di samua hal rupa ini: Dia beking ngoni mampu babicara deng lei mampu mangarti banya hal. Itu jadi bukti yang kase kuat kalu tu kesaksian tentang Kristus yang dulu torang da bilang pa ngoni itu memang butul. Ngoni so trima samua karunia dari Roh Kudus, jadi ngoni nyanda kurang karunia apa-apa samantara ngoni batunggu-tunggu tu torang pe Tuhan Yesus Kristus datang ulang. Dia lei no yang mo se kuat pa ngoni slama ngoni hidop supaya nanti waktu Dia datang ulang, Dia dapa pa ngoni nyanda ada sala apa-apa. Tuhan Allah mo beking samua itu lantaran Dia setia. Dia tu da pangge pa ngoni supaya ngoni bole ada hubungan dekat deng Dia pe Anak Yesus Kristus, tu torang samua pe Tuhan yang torang ja iko akang. Sudara-sudara, kita se nasehat pa ngoni atas nama torang pe Tuhan Yesus Kristus, supaya ngoni samua satu pendapat, nimbole tapisa-pisa, malatare ngoni musti tetap satu pikiran deng satu tujuan. Kita bilang bagitu pa ngoni sudara-sudara, lantaran ada orang-orang dari Kloe pe ruma tu da kase tau pa kita tentang ngoni. Dorang bilang kalu di antara pa ngoni ada tu da baku ambe pendapat. Tu kita pe maksut bagini: ada dari pa ngoni yang da babilang, “Kita ja iko pa Paulus.” Ada yang laeng babilang, “Kita ja iko pa Apolos.” Tu laeng lei babilang, “Kita ja iko pa Petrus.” Kong ada lei yang babilang, “Kita ja iko pa Kristus.” No kalu ngoni bicara bagitu, itu sama jo deng Kristus da taberbage, butul to? Padahal sebenarnya nyanda. Deng lei tentang kita ini Paulus, apa kita da mati di kayu salib for ngoni? Nyanda to? Kong waktu ngoni da dapa baptis, apa ngoni da dapa baptis pake kita pe nama? Nyanda lei to? Kita bilang makase pa Tuhan lantaran dari pa ngoni, kita cuma da baptis pa Krispus deng Gayus. Jadi nyanda ada orang yang mo babilang kalu dia itu ja iko pa kita lantaran dia da dapa baptis pake kita pe nama. Oh iyo kote, kita lei da baptis pa Stefanus deng tu orang-orang pa dia pe ruma. Mar selain dari pa dorang itu, kita nyanda inga apa ada orang laeng lei yang kita da baptis. Soalnya Kristus da utus pa kita bukang for babaptis orang mar for se tau pa orang-orang tu Kabar Bae tentang Dia. Kita dapa utus se tau tu Kabar Bae itu bukang pake tu kita pe pande ja babicara, lantaran kalu bagitu nanti orang-orang cuma iko tu kita pe pande itu, itu sama jo deng tu Kristus pe kematian di kayu salib nyanda ada de pe guna. Ada yang bapikir kalu tu brita tentang Yesus da mati di kayu salib, itu brita yang nyanda ada de pe arti apa-apa. Dorang itu no tu mo binasa. Mar for torang yang dapa slamat, torang tau kalu lewat tu brita tentang Yesus itu, Tuhan Allah se tunjung tu Dia pe kuasa lantaran kalu orang percaya tu brita itu, dia pasti mo slamat. Soalnya di Kitab Suci da tulis bagini, “Pa tu orang yang tau banya hal, Kita mo se ilang apa yang dia tau itu. Kong pa tu orang yang pande, Kita mo beking tu dia pe pande itu so nyanda ada lei.” No bagimana skarang deng tu orang yang tau banya hal? Bagimana deng ahli-ahli Taurat deng lei tu orang-orang yang pande baku ambe pendapat di jaman skarang ini? Samua yang dorang tau itu pengetahuan yang dari ni dunia, kong Tuhan Allah so beking tu samua itu jadi nyanda ada arti apa-apa. Soalnya biar bagimana lei manusia pe hikmat, manusia nyanda mampu mo kanal pa Tuhan Allah cuma pake tu dong pe hikmat sandiri. Kong memang Tuhan Allah yang so putuskan bagitu, lantaran Tuhan Allah itu tau samua hal. Yang Dia suka itu, se slamat pa manusia yang percaya deng tu brita tentang Yesus yang torang da se tau, biar lei orang-orang di dunia ja anggap kalu tu brita tentang Yesus itu nyanda ada de pe guna. Biasanya orang-orang Yahudi minta se tunjung tanda-tanda ajaib lebe dulu, deng lei biasanya tu orang-orang Yunani cari tau pake manusia pe hikmat. Mar torang, torang ja se tau tentang Kristus yang mati di kayu salib. Tu brita itu for orang-orang Yahudi, itu sama deng jadi batu sandungan for dorang. Kong for tu orang-orang yang bukang Yahudi, dorang anggap tu brita itu nyanda ada de pe arti. Mar tu orang-orang yang Tuhan da pangge for iko pa Dia, dorang itu orang-orang Yahudi deng lei tu orang-orang yang bukang Yahudi. Kong for dorang samua itu, Kristus itu no yang se tunjung tu Tuhan Allah pe kuasa deng Tuhan Allah pe hikmat. Biar manusia pikir yang Tuhan da beking itu nyanda ada de pe guna, mar tu Tuhan Allah da beking itu jao lebe basar de pe hikmat dari apa yang manusia pikir itu. Kong biar lei manusia pikir kalu tu Tuhan Allah da beking itu nyanda ada kuasa, mar tu Dia da beking itu lebe basar de pe kuasa dari yang manusia bole beking. Sudara-sudara, co ngoni inga bagimana tu ngoni pe keadaan waktu Tuhan da pangge pa ngoni iko pa Dia. Waktu itu, menurut orang-orang di dunia ini, cuma sadiki tu dari pa ngoni yang ada hikmat, cuma sadiki tu ada posisi penting deng lei cuma sadiki tu dari kluarga penting. Mar apa tu dunia ja anggap nyanda ada de pe guna, itu yang Tuhan Allah pili for beking malo tu orang-orang yang dunia ja anggap ada hikmat. Kong apa tu dunia ja anggap nyanda berkuasa, itu yang Tuhan Allah pake for beking malo tu orang-orang yang dunia ja anggap berkuasa. Tuhan Allah lei pili tu orang-orang yang dunia ja anggap nyanda penting, hina deng lei nyanda ada guna. Dia pili pa dorang for beking tu orang-orang yang dunia ja anggap penting mo jadi nyanda ada arti apa-apa. Tuhan beking bagitu supaya nyanda ada manusia yang mo basombong de pe diri di muka pa Tuhan Allah. Soalnya Tuhan Allah yang da buka jalang supaya torang bole hidop satu deng Kristus Yesus. Torang bole tau tu Tuhan Allah pe hikmat lewat Kristus Yesus. Yesus itu yang beking torang jadi butul di muka pa Tuhan Allah, Yesus beking torang ini jadi Tuhan Allah pe orang-orang, kong Yesus lei yang tubus tu torang pe dosa. So lantaran itu, torang musti beking sama deng tu da tulis di Kitab Suci, “Sapa jo yang mo basombong, lebe bae dia basombong tentang apa yang Tuhan da beking for dia.” Sudara-sudara, tempo hari waktu kita datang pa ngoni, kita da se tau pa ngoni tu Tuhan Allah pe rencana yang orang laeng blum tau. Waktu itu, kita nyanda da kase tau itu pake kata-kata tinggi ato pake tu manusia pe bijaksana. Soalnya waktu kita sama-sama deng ngoni, kita so putuskan kalu kita nimau pusing deng tu hal-hal laeng pa ngoni, kita cuma mo kase tau pa ngoni tentang Yesus Kristus yang da mati di kayu salib. Waktu kita ada sama-sama deng ngoni, kita rasa kita pe diri nyanda mampu, deng lei kita tako sampe totofore. Waktu kita babicara pa ngoni, kita nyanda pake manusia pe bijaksana for beking ngoni yakin deng tu kita da kase tau itu. Mar waktu itu, tu Roh Kudus se tunjung tu kuasa dari Tuhan Allah kong orang bole tau kalu apa tu kita da bilang itu butul. Deng Roh Kudus beking bagitu, ngoni pe percaya nyanda bagantong pa manusia pe bijaksana mar pa Tuhan Allah pe kuasa. Mar biar lei bagitu, kalu torang babicara pa orang-orang yang so butul-butul percaya, torang bicara tentang hal yang bijaksana. Tu hal yang bijaksana itu bukang dari ni dunia, deng bukang lei dari pemimpin-pemimpin di dunia ini yang memang nanti so nyanda lei mo berkuasa. Mar tu hal yang bijaksana yang torang da kase tau itu, itu dari pa Tuhan Allah. Tu hal yang bijaksana itu dulu yang Tuhan Allah da se sambunyi, deng lei yang Dia da se rahasia. Itu no tu rencana Tuhan for se slamat pa manusia dari hukuman dosa. Tu rencana itu so ada pa Dia seblum Dia beking ni dunia, kong Dia beking tu rencana itu supaya torang yang percaya bole mo dapa puji deng hormat. Kong nyanda ada pemimpin-pemimpin di dunia ini yang mangarti tentang tu Tuhan Allah pe rencana itu. Soalnya kalu dorang tau itu, dorang nyanda mo se salib pa Tuhan yang luar biasa itu. Di Kitab Suci da tulis bagini tentang tu rencana itu, “Tuhan Allah so se sadia banya hal for orang-orang yang sayang pa Dia. Tu Dia da se sadia itu blum perna manusia lia deng de pe mata sandiri, blum perna manusia dengar deng de pe talinga sandiri, deng lei blum perna ada pa manusia pe pikiran.” Memang dulu nyanda ada orang yang tau tentang tu Tuhan Allah pe rencana itu, mar skarang Tuhan Allah pake De pe Roh for kase tau itu pa torang. Soalnya tu Tuhan Allah pe Roh ja cari tau samua hal sampe deng tu hal-hal yang tasambunyi pa Tuhan Allah pe hati. Soalnya sapa dari antara manusia yang tau apa tu ada pa de pe hati? Tantu katu yang tau cuma tu manusia itu pe roh sandiri yang ada pa de pe diri. No bagitu lei deng Tuhan Allah, nyanda ada yang tau apa tu ada pa Tuhan Allah pe hati kacuali Dia pe Roh sandiri. Kong torang, torang nyanda trima tu roh yang dari dunia ini, mar torang da trima tu Roh yang dari pa Tuhan Allah supaya torang bole tau samua tu bae yang Tuhan Allah da kase pa torang. Jadi waktu torang kase tau pa ngoni tu Tuhan pe rencana for se slamat pa manusia, torang nyanda kase tau itu pake manusia pe bijaksana, mar torang kase tau itu pake tu kata-kata yang dari pa Tuhan Allah pe Roh. Torang cuma kase tau tu hal-hal rohani itu pa orang-orang yang Roh Kudus da kuasai. Tu orang yang ja iko ni dunia pe mau, dia nimau mo trima tu hal-hal rohani yang dari pa Tuhan Allah pe Roh. Soalnya dia anggap kalu tu hal-hal rohani itu nyanda ada de pe guna deng dia nyanda mampu mo mangarti itu. Tu hal-hal rohani itu bole orang mo mangarti cuma kalu Tuhan Allah pe Roh bantu pa dia for mangarti itu. Kong tu orang yang ada Tuhan Allah pe Roh, dia itu tau banilai mana tu hal yang bae deng mana tu nyanda. Mar orang laeng nimbole banilai pa tu orang kalu tu orang itu da beking bae ato nyanda. Soalnya di Kitab Suci da tulis bagini, “Sapa so yang bole mo tau tu Tuhan pe pikiran? Sapa so yang bole mo se nasehat pa Dia? Tantu nyanda ada.” Mar torang ini yang so percaya, torang pe cara bapikir sama deng Kristus pe cara bapikir. Sudara-sudara, tempo hari waktu kita da sama-sama deng ngoni, kita nimbole babicara pa ngoni sama deng kita da babicara pa orang yang Roh Kudus da kuasai. Kita cuma bole bicara pa ngoni sama deng bicara pa manusia yang cuma tau tu dunia pe cara bapikir. Waktu itu, ngoni baru percaya pa Kristus kong blum kuat tu ngoni pe percaya, ngoni itu bole mo se sama deng bayi. Bayi itu cuma bole mo minum susu, blum bole mo makang tu makanan kras. Bagitu lei ngoni, dulu ngoni blum mampu mo trima tu hal-hal rohani rupa tu orang yang Roh Kudus da kuasai ja trima, kong sampe skarang lei ngoni blum mampu mo trima itu. Soalnya sampe skarang, ngoni masi lei manusia yang cuma ja iko tu dunia pe cara bapikir. Kita bilang bagitu lantaran dari pa ngoni ada yang ja bamangiri deng baku ambe pendapat, itu no de pe tanda kalu ngoni masi ja iko tu dunia pe cara bapikir deng hidop cuma iko manusia pe mau sandiri. So lantaran dari antara pa ngoni ada yang bilang, “Kita ja iko pa Paulus,” deng tu laeng bilang, “Kita ja iko pa Apolos,” itu to so se tunjung kalu ngoni itu masi manusia yang ja iko tu dunia pe cara bapikir. Sapa so tu Apolos? Kong kita ini Paulus, sapa so kita? Torang dua ini cuma orang-orang yang ja beking tu Tuhan da suru, kong torang da kase tau tu Kabar Bae pa ngoni sampe ngoni jadi percaya pa Tuhan, itu iko tu karja yang Tuhan da kase pa torang masing-masing. Kita tu pertama yang da se tau tu Kabar Bae tentang Kristus pa ngoni, kong Apolos yang se ajar tu Kabar Bae itu, mar Tuhan Allah yang beking tu Kabar Bae itu jadi kuat pa ngoni pe hati. Itu sama deng kita yang da batanang tu bibit, Apolos yang basirang, mar yang da kase batumbu tu bibit itu Tuhan Allah. So itu, yang penting di sini bukang tu orang yang da batanang ato yang da basirang, mar yang penting itu Tuhan Allah yang da se batumbu. Tu orang yang da batanang deng yang da basirang itu sama dorang pe tujuan, kong dua-dua mo trima tu upah iko tu karja yang masing-masing da beking. Soalnya torang dua ini tamang karja yang bakarja for Tuhan Allah. Ngoni itu sama deng Tuhan Allah pe kobong tu tampa torang da karja akang, deng ngoni itu lei sama deng Tuhan Allah pe bangunan. Tuhan Allah se tunjung tu Dia pe bae pa kita deng cara beking kita jadi sama deng ahli bangunan yang pande. Kita so kase tau pa ngoni tu hal-hal rohani yang masi de pe dasar, itu sama deng kita da beking satu fondasi yang kuat. Abis itu ada orang yang datang for se trus se ajar pa ngoni tu hal-hal rohani itu, itu sama deng dia beking bangunan di atas tu fondasi itu, mar dia musti tarukira bae-bae bagimana tu bangunan yang dia mo se badiri di atas tu fondasi itu. Soalnya Yesus Kristus itu no tu fondasi, kong nyanda ada satu fondasi laeng yang orang laeng bole beking, kacuali tu fondasi itu. Ada orang yang se badiri bangunan di atas tu fondasi itu pake bahan dari: mas, perak, deng batu permata. Kong ada lei yang da pake bahan dari: kayu, rumpu kring deng jerami. Soalnya nanti di hari waktu Tuhan mo adili samua orang, tu karja dari tiap orang mo dapa lia, apa itu bagus ato nyanda, itu sama deng tu bahan yang da pake for beking tu bangunan da dapa tes deng api, apa tu bahan itu tahang waktu dapa bakar ato nyanda. Kalu tu karja itu bagus waktu dapa priksa, tu karja bagus itu bole mo se sama deng tu bahan bangunan yang tahang waktu da bakar kong tu orang itu mo dapa upah. Mar kalu tu karja nyanda bagus waktu dapa priksa, tu karja itu bole mo se sama deng tu bahan bangunan yang nyanda tahang waktu da bakar, kong tu orang itu mo rugi. Dia memang mo slamat dari tu hukuman dosa, mar dia sama deng orang yang da se slamat dari api yang amper bakar pa dia. Ngoni pasti tau kalu ngoni itu sama deng Tuhan Allah pe Ruma Ibada Pusat, kong Tuhan Allah pe Roh da tinggal pa ngoni. Kalu ada orang yang beking tu hubungan antara ngoni tu orang percaya jadi rusak, itu sama deng dia so beking rusak tu Tuhan Allah pe Ruma Ibada Pusat kong Tuhan Allah mo se binasa pa dia. Soalnya Tuhan Allah pe Ruma Ibada Pusat itu kudus, kong ngoni samua itu no tu Tuhan Allah pe Ruma Ibada Pusat. Kalu ngoni anggap tu ngoni pe diri itu bijaksana, itu sama deng ngoni so tipu tu ngoni pe diri sandiri, lantaran apa yang ngoni tau itu cuma iko dunia pe cara bapikir, mar di muka pa Tuhan Allah ngoni itu sebenarnya nintau apa-apa. Kalu ada orang yang anggap dia bijaksana iko dunia pe cara bapikir, lebe bae dia anggap de pe diri itu nintau apa-apa, supaya di muka pa Tuhan Allah dia itu bijaksana. Soalnya kalu ada orang yang bijaksana iko dunia pe cara bapikir, itu nyanda ada de pe guna for Tuhan. Soalnya itu so tatulis di Kitab Suci, “Ada orang yang bijaksana iko dunia pe cara bapikir, mar Tuhan Allah pake apa yang orang itu tau for bale se kala pa dia.” Deng ada lei yang tulis bagini, “Tuhan tau tu pikiran-pikiran dari tu orang-orang yang bijaksana iko tu dunia pe cara bapikir, mar sebenarnya tu dong pe pikiran itu nyanda ada de pe guna.” So lantaran itu, jang ada satu orang dari pa ngoni yang basombong lantaran dia da iko pa orang tertentu, lantaran samua tu Tuhan da kase pa ngoni itu for ngoni pe bae. Jadi kita tu Paulus, Apolos, deng Petrus, torang tiga ini Tuhan se tugas for bantu pa ngoni. Tuhan lei kase pa ngoni ni dunia, Dia lei kase tu ngoni pe hidop deng mati, Dia lei da kase tu ngoni pe waktu skarang deng lei ngoni pe masa depan. Samua itu Tuhan kase jadi ngoni punya. Kong ngoni itu Kristus punya, trus Kristus itu Tuhan Allah punya. Sudara-sudara, lia jo pa torang ini sbagai Kristus pe orang karja, tu orang-orang yang Tuhan Allah da se percaya akang for se tau tu Dia pe rencana for se slamat pa manusia, tu rencana yang dulu orang blum tau. Kong for torang tu Tuhan pe orang-orang karja, torang musti beking bae-bae samua tu tong pe karja itu, supaya dapa lia kalu torang ini bole mo se percaya akang. Mar kalu ngoni hakimi pa kita ato orang bawa pa kita di pengadilan, for kita itu nyanda masala. Kita sandiri lei nyanda ja banilai tu kita pe karja. Soalnya yang kita tau, kita nyanda da beking sala apa-apa. Mar biar lei kita tau itu, bukang berarti kita ini orang yang butul, nanti Tuhan sandiri yang mo hakimi pa kita. So itu, ngoni jang bahakimi pa orang laeng seblum de pe waktu. Nanti waktu Tuhan datang ulang, itu no tu waktu for mo bahakimi. Waktu Dia datang, Dia mo se trang samua hal yang orang da se sambunyi di dalam glap, Dia mo bongkar samua tu rencana yang ada pa orang pe hati. Kong waktu itu, Tuhan Allah mo puji tiap orang yang pantas mo dapa puji. Sudara-sudara, kita tulis tentang kita deng Apolos for ngoni pe bae. Kita pake torang dua sbagai conto, supaya ngoni bole blajar dari pa torang dua kong mangarti tu arti dari yang da bilang ini, “Beking jo apa tu da tulis di Kitab Suci.” Deng ngoni beking tu da tulis itu, nyanda ada dari pa ngoni yang mo basombong kalu dia da iko pa orang tertentu, sampe anggap tu orang itu lebe penting dari tu laeng. Ngoni pikir, apa ngoni itu lebe penting dari tu orang laeng? Nyanda kasiang. Kong apa so yang ada pa ngoni tu bukang ngoni da dapa dari pa Tuhan? Pasti samua dari pa Tuhan. Ngoni so dapa samua dari pa Dia, mar ngoni basombong sama jo deng itu ngoni da dapa dari ngoni pe pande sandiri kong bukang dari pa Dia. Ngoni so dapa cukup tu ngoni pe perlu, malatare lebe dari cukup sampe ngoni so dapa banya skali tu hal-hal rohani. Ngoni lei pikir ngoni so berkuasa sama deng raja, kong torang nyanda bantu apa-apa pa ngoni for jadi sama deng raja. Mar kalu nanti ngoni memang butul-butul da jadi raja, torang bole baprenta sama-sama deng ngoni. Soalnya menurut kita, Tuhan Allah so beking torang tu rasul-rasul jadi orang yang nyanda penting, torang ini so sama deng orang yang dapa hukuman mati di muka banya orang. Kita bilang bagitu lantaran orang-orang di dunia deng lei tu malaekat-malaekat da lia-lia apa tu da jadi pa torang kong tatawa akang pa torang. Torang ini jadi sama deng orang biongo lantaran torang ja se tau tentang Kristus. Kong ngoni pande lantaran ngoni percaya pa Kristus. Torang ini lemah, mar ngoni kuat. Ngoni dapa hormat, mar torang ini dapa hina. Kong sampe skarang ini, torang lapar lantaran nyanda ja cukup makang deng torang ja aus lantaran nyanda ja cukup minum, deng lei torang pe baju so robe-robe. Torang ja dapa pukul deng torang lei nyanda ada ruma for mo tinggal akang. Torang lei karja kras deng torang pe tangan sandiri for torang pe hidop. Kalu orang hina pa torang, torang balas itu deng minta akang berkat pa Tuhan for dia. Kalu orang siksa pa torang, torang sabar mangada itu. Trus kalu orang se besae torang pe nama, torang balas pa dia deng kata-kata yang bae. Orang di dunia ini so beking torang ini so sama deng sampa, deng lei sampe skarang ini orang anggap torang ini so sama deng samua yang busu. Kita tulis samua ini bukang for mo se malo pa ngoni, mar for mo togor pa ngoni lantaran ngoni itu sama deng kita pe anak-anak yang kita sayang. Soalnya kita ini yang pertama tu da se tau Kabar Bae tentang Yesus pa ngoni sampe ngoni jadi percaya pa Kristus Yesus, so itu kita ini jadi ngoni pe papa rohani. Jadi biar lei ada spulu ribu orang yang ja se ajar pa ngoni tentang Kristus, ngoni pe papa rohani cuma satu. So lantaran kita ini ngoni pe papa rohani, kita se nasehat pa ngoni supaya ngoni iko jo tu conto yang kita da beking. So itu no kita utus tu Timotius pigi pa ngoni. Dia itu kita so anggap kita pe anak sandiri deng kita sayang pa dia. Dia itu lei setia pa Tuhan. Kita da utus dia pa ngoni supaya dia bole mo se inga ulang pa ngoni tu conto kita pe cara hidop iko pa Kristus Yesus. Tu cara hidop itu yang kita so se ajar pa samua jemaat di tampa-tampa yang laeng. Ada bebrapa orang dari pa ngoni tu jemaat di Korintus yang bapikir kalu kita so nyanda lei mo datang ulang pa ngoni, so itu dorang so jadi sombong. Padahal kita mo iko datang ulang pa ngoni kalu Tuhan kase kita mo datang. Nanti waktu kita so ada, kita nyanda mo cari tau apa tu orang-orang sombong itu da bilang-bilang, mar kita mo cari tau apa dorang itu ada kuasa dari pa Tuhan ato nyanda. Soalnya tu orang yang jadi orang-orang dari Tuhan Allah yang Berkuasa sbagai Raja, orang laeng bole dapa tau itu bukang cuma dari tu orang itu pe kata-kata, mar lantaran tu Tuhan pe kuasa yang ada pa dia. Jadi mana tu ngoni suka dang? Kalu kita datang pa ngoni kong ngoni tetap sombong, kita mo togor deng kras pa ngoni, itu sama deng kita cambok pa ngoni. Ato apa ngoni suka kalu kita datang pa ngoni trus ngoni so nyanda sombong, kong kita mo sayang deng mo babae-bae akang pa ngoni? Sudara-sudara, kita da dengar, ada dari pa ngoni tu jemaat di situ yang ja baseks bebas, kong tu orang itu da baseks deng de pe mama tiri. Tu dia da beking itu jaha skali, hele tu orang yang nyanda kanal pa Tuhan nyanda ja beking itu. Mar biar lei ada tu dari pa ngoni yang ja beking bagitu, ngoni masi sombong. Padahal mustinya ngoni sedi deng itu, deng mustinya lei ngoni se kaluar pa dia dari antara pa ngoni. Soalnya kita, biar lei kita nyanda ada sama-sama deng ngoni di situ, mar kita slalu inga-inga pa ngoni sama jo deng kita ada sama-sama deng ngoni, kong deng bagitu kita so kase hukuman pa tu orang yang da beking tu jaha itu. Jadi waktu ngoni tu orang-orang yang percaya pa Tuhan Yesus bakumpul, kita pe pikiran ada sama-sama deng ngoni, deng lei tu kuasa dari Tuhan Yesus yang torang ja iko akang ada pa ngoni. Jadi waktu itu, ngoni srahkan jo dia pa setang pe bos pe kuasa. Deng bagitu dia mo rasa siksa sampe dia pe sifat jaha lei ilang, supaya de pe jiwa bole mo slamat di hari waktu Tuhan mo adili pa samua orang. Nyanda bagus kalu ngoni basombong, padahal ngoni ja beking tu kalakuan jaha itu. Pasti ngoni so tau kalu tu ragi biar sadiki bole mo beking samua adonan roti jadi bareis, itu sama deng satu orang dari pa ngoni da beking tu jaha, dia itu bole mo pengaruhi tu orang laeng sampe taiko beking tu jaha. Ngoni buang jo tu ragi yang lama, itu sama deng ngoni da buang tu ngoni pe kalakuan jaha. Deng bagitu ngoni so jadi sama deng adonan yang baru tu nyanda baragi, lantaran tu ngoni pe kalakuan so bae kong memang ngoni so bersi dari tu ngoni pe kalakuan yang jaha itu. Soalnya Kristus so srahkan Dia pe diri mati jadi korban persembahan, Dia itu sama deng domba yang ja kase korban persembahan di hari raya Paskah. So lantaran itu, torang jang hidop lei ja beking tu tong pe kalakuan dulu yang jaha deng ja beking tu dosa-dosa, itu sama deng torang beking tu tong pe hari raya itu deng roti yang da pake ragi lama. Mar torang jadi orang yang tulus deng yang butul, itu sama deng torang beking tu tong pe hari raya itu deng roti yang nyanda pake ragi. Pa kita pe surat dulu, kita so perna tulis for ngoni supaya ngoni jang ja bergaul dekat deng tu orang-orang yang ja baseks bebas. Kita pe maksut waktu tulis itu, kita bukang bicara tentang orang-orang yang nyanda percaya pa Tuhan yang ja baseks bebas, yang sraka, pangbatipu, deng ja basemba opo-opo. Ngoni bole bergaul deng tu orang-orang yang nyanda percaya itu lantaran dorang ada di mana-mana. Kalu umpama ngoni sama skali so nimbole bergaul deng dorang itu, ngoni musti hidop tapisa dari tu orang-orang di dunia ini. Mar skarang kita tulis pa ngoni supaya ngoni jang bergaul dekat deng orang yang bilang de pe diri itu torang pe sudara yang percaya mar dia lei ja beking tu hal-hal yang jaha rupa ini: ja baseks bebas, sraka, ja basemba opo-opo, ja bicara besae tentang orang laeng, pangmabo ato pangbatipu. Ngoni nimbole bergaul dekat deng tu orang bagitu, hele mo makang sama-sama deng dia nimbole sama skali. Soalnya torang ada tanggong jawab for adili tu orang-orang yang ada pa torang pe jemaat, mar torang nyanda ada tanggong jawab for mo adili tu orang-orang yang ada di luar torang pe jemaat. Dorang itu nanti Tuhan Allah yang mo adili. Ngoni musti beking apa tu da tulis di Kitab Suci, “User jo tu orang-orang yang ja beking tu jaha dari antara pa ngoni!” Sudara-sudara, kalu ada dari pa ngoni yang ada masala deng tu orang yang sama-sama percaya, apa ngoni brani mo pi urus tu ngoni pe masala itu di pengadilan pa tu orang-orang yang nyanda percaya? Pasti nyanda to? Apa nyanda ada dari pa ngoni tu Tuhan pe orang-orang yang bole mo urus akang tu masala itu? Ngoni nintau so kalu Tuhan pe orang-orang yang nanti mo adili ni dunia? No kalu ngoni tu Tuhan pe orang-orang yang mo adili ni dunia, masa dang ngoni nyanda mampu mo urus tu masala yang ada di antara pa ngoni, tu masala yang cuma kacili rupa itu. Ngoni lei nintau so kalu nanti torang samua yang percaya mo adili tu malaekat-malaekat? Pasti ngoni so tau to? No kalu ngoni so tau itu, masa dang ngoni nyanda mampu mo adili tu masala-masala yang cuma kacili pa ngoni pe hidop hari-hari. Jadi kalu ada masala di antara pa ngoni tu orang yang percaya, no kiapa dang ngoni bawa tu masala itu pa orang-orang yang nyanda percaya? Mustinya ngoni urus jo sandiri tu ngoni pe masala itu. Mar ngoni nyanda bagitu, malatare ngoni pi urus tu ngoni pe masala pa orang yang nyanda percaya, so itu kita se inga ini pa ngoni for beking malo pa ngoni. Soalnya apa nyanda ada di antara pa ngoni tu orang yang bijaksana yang mampu for adili tu masala-masala yang ada di antara pa ngoni? Pasti ada to? Mar waktu dari pa ngoni yang percaya ada masala deng tu satu sudara yang percaya lei, ngoni nyanda pi urus tu masala pa orang yang sama-sama percaya, mar ngoni tare cuma da pi urus tu masala itu ka pengadilan pa tu orang yang nyanda percaya. Mar sebenarnya deng ngoni jo ada masala di antara pa ngoni tu orang yang percaya, itu so se tunjung kalu ngoni so gagal. Jadi kalu orang beking tu nyanda adil ato beking rugi deng cara tipu pa ngoni, lebe bae ngoni trima jo itu, jang ngoni bawa itu ka pengadilan. Mar bebrapa orang dari pa ngoni so beking tu nyanda adil deng ngoni lei so beking rugi pa orang deng cara tipu pa dorang, malatare ngoni da beking itu pa ngoni pe sudara-sudara yang percaya. Ngoni pasti so tau kalu tu orang-orang yang ja beking tu nyanda butul, dorang itu nyanda mo jadi orang-orang dari Tuhan Allah yang Berkuasa sbagai Raja. Ngoni jang sesat! Tu orang-orang yang ja baseks bebas, ja basemba opo-opo, bersina, laki-laki yang ja baseks deng laki-laki, papancuri, sraka, pangmabo, ja bicara besae tentang orang laeng deng pangbatipu, tu dorang yang ja beking tu hal-hal itu pasti nyanda mo jadi orang-orang dari Tuhan Allah yang Berkuasa sbagai Raja. Ada bebrapa dari pa ngoni yang dulu memang ja beking tu hal-hal itu. Mar Tuhan Allah so beking ngoni pe hati bersi dari dosa, Dia beking ngoni jadi kudus deng lei Dia beking ngoni jadi orang yang butul di muka pa Dia lantaran ngoni percaya pa Tuhan Yesus Kristus deng lei lantaran tu kuasa Roh Kudus yang dari pa Tuhan Allah. Sudara-sudara, ada yang bilang, “Kita bole beking samua hal,” mar nyanda samua hal itu ada de pe guna. Jadi biar lei kita bole mo beking samua hal, mar kita nimau kalu ada dari tu hal-hal itu yang mo kuasai tu kita pe diri. Ada yang bilang bagini lei, “Makanan ada de pe guna for torang pe puru, kong torang pe puru lei perlu makanan,” mar tu dua-dua itu nanti Tuhan Allah mo se ancor. Mar biar lei tu badan nanti mo ancor, torang nimbole pake tu tong pe badan ini for baseks bebas. Torang musti pake tu tong pe badan for beking tu Tuhan da suru, kong Tuhan lei mo jaga tu torang pe badan. Tuhan Allah so kase hidop ulang pa Tuhan Yesus pake Dia pe kuasa. Kong bagitu lei deng torang, Dia lei nanti mo kase hidop ulang pa torang pake Dia pe kuasa. Ngoni pasti so tau to kalu tu torang pe badan itu bagean dari Kristus pe anggota badan? Jadi torang nimbole pake tu torang pe anggota badan ini for ja baseks bebas, lantaran itu sama deng torang beking tu torang pe badan ini jadi bagean dari tu parampuang nakal pe anggota badan. Ngoni jang beking bagitu! Ngoni pasti so tau to kalu sapa jo yang da tidor sama-sama deng parampuang nakal, dia itu so jadi satu badan deng tu parampuang itu. Soalnya di Kitab Suci da tulis bagini, “Tu dua orang mo jadi satu.” Mar sapa jo yang ada hubungan deng Tuhan, dia itu jadi satu roh deng Tuhan. Ngoni sama skali jang baseks bebas! Tu orang yang baseks bebas, dia itu beking dosa yang ada de pe akibat pa de pe badan sandiri. Mar tu dosa laeng yang manusia ja beking, itu nyanda ada de pe akibat pa de pe badan sandiri. Ngoni nintau so kalu tu Roh Kudus tinggal pa ngoni pe diri? Pasti ngoni so tau to? Jadi deng Roh Kudus so tinggal pa ngoni pe diri, itu sama jo deng ngoni so jadi Tuhan pe Ruang Mahasuci. Tu Roh Kudus yang ada pa ngoni itu dari pa Tuhan Allah, kong ngoni so nyanda ada hak lei pa ngoni pe diri sandiri. Soalnya Tuhan so bli pa ngoni, kong Dia da bayar lunas deng cara tubus tu ngoni pe dosa-dosa. So itu no ngoni musti pake tu ngoni pe badan for mo puji deng hormat pa Tuhan Allah. Sudara-sudara, ngoni tu jemaat Korintus da tanya pa kita di ngoni pe surat, apa bagus kalu tu laki-laki nyanda kaweng. Menurut kita itu memang bagus, mar lantaran orang-orang gampang tagoda for baseks bebas, paling bagus kalu tiap laki-laki ada bini sandiri deng tiap parampuang ada laki sandiri. Kong tu laki, dia musti ja beking tu dia pe kewajiban seks pa de pe bini, bagitu lei deng tu bini ja beking tu de pe kewajiban itu pa de pe laki. Tu bini, dia itu nyanda ada hak pa de pe badan sandiri, mar yang punya hak pa de pe badan itu de pe laki. Bagitu lei deng tu laki, dia itu nyanda ada hak pa de pe badan sandiri, mar yang punya hak pa de pe badan itu de pe bini. Tu laki-bini, ngoni dua nimbole ada yang batolak for beking tu kewajiban itu. Mar ngoni bole nyanda beking tu kewajiban itu for samantara waktu, kalu ngoni dua mo ambe waktu kusus for mo basombayang, itu lei asal ngoni dua so stuju. Cuma serta tu waktu for ngoni basombayang so klar, ngoni bale jo pa ngoni pe hidop sbagai laki-bini. Deng bagitu, tu setang pe bos nyanda goda pa ngoni for beking dosa lantaran ngoni nyanda mampu mo tahang tu ngoni pe nafsu. Tu kita da bilang itu bukang prenta mar cuma usulan. Mar sebenarnya kita lebe suka kalu samua orang yang blum kaweng sama jo deng kita nyanda da kaweng. Cuma katu, nyanda samua orang yang Tuhan Allah da kase karunia for hidop nyanda kaweng, lantaran pa laeng Dia kase karunia ini, kong yang laeng Dia kase karunia itu. Kita mo se nasehat pa orang-orang yang blum kaweng, lebe bae dorang nyanda usa jo kaweng, deng lei kita se nasehat pa tu janda-janda, lebe bae dorang nyanda usa jo kaweng ulang, sama deng kita nyanda da kaweng. Mar kalu dorang nyanda mampu mo tahang dong pe nafsu, lebe bae jo dorang kaweng. Soalnya lebe bagus dorang kaweng daripada nyanda kaweng mar dorang pe nafsu itu kuasai pa dorang, itu sama deng dorang tabakar deng tu dong pe nafsu sandiri. Kong pa orang-orang yang so kaweng kita bilang, mar bukang kita kote, Tuhan yang prenta, Dia pe prenta bagini: tu bini jang bacere dari dia pe laki. Kalu dia bacere, dia musti tetap hidop nyanda ada laki ato tare dia baku bale ulang jo deng de pe laki. Kong tu laki lei jang se cere dia pe bini. Kong yang kita mo bilang skarang, bukang dari pa Tuhan mar dari pa kita sandiri. Ini tu kita mo bilang: kalu ada laki yang percaya pa Tuhan kong dia pe bini nyanda percaya, trus tu dia pe bini itu suka jo mo tetap hidop sama-sama deng dia, tu laki itu nimbole se cere tu dia pe bini. Bagitu lei kalu ada bini yang percaya pa Tuhan kong de pe laki nyanda percaya, trus tu dia pe laki itu suka jo mo tetap hidop sama-sama deng dia, dia itu nimbole se cere tu dia pe laki itu. Soalnya tu laki yang nyanda percaya itu jadi kudus lantaran dia pe bini pe percaya pa Tuhan, kong tu bini yang nyanda percaya itu jadi kudus lantaran dia pe laki pe percaya pa Tuhan. Kalu nyanda bagitu, tantu katu tu dorang pe anak-anak lei nyanda kudus, mar lantaran ada satu dari dorang pe orang tua yang percaya, dorang jadi anak-anak kudus. Mar kalu tu laki ato tu bini yang nyanda percaya itu bakras for mo bacere, biar jo dia bacere. Ini komang tu bini ato tu laki yang percaya itu nyanda perlu taika deng tu dong pe janji waktu da kaweng. Soalnya Tuhan Allah so pili pa ngoni for hidop deng hati yang tenang. Hei ngoni tu bini yang percaya, ngoni musti tau kalu nanti ngoni stou bole mo se slamat tu ngoni pe laki dari hukuman dosa deng cara bantu pa dia percaya pa Yesus. Hei ngoni tu laki yang percaya, ngoni musti tau kalu nanti ngoni stou bole mo se slamat tu ngoni pe bini dari hukuman dosa deng cara bantu pa dia percaya pa Yesus. Tiap orang percaya, dia itu musti hidop trus sama deng waktu Tuhan Allah pangge pa dia for iko pa Dia. Tu orang yang so percaya pa Tuhan itu nyanda usa jo mo roba tu de pe hidop yang Tuhan so kase pa dia. Ini no tu atoran yang kita so se ajar for samua jemaat. De pe conto bagini: kalu ada orang yang so sunat, kong Tuhan pangge pa dia for iko pa Tuhan, dia itu nyanda perlu mo roba apa-apa pa de pe diri kalu dia itu so sunat. Kong kalu ada orang yang nyanda da sunat, kong Tuhan pangge pa dia for iko pa Tuhan, dia itu nyanda perlu mo sunat for iko pa Tuhan. Soalnya nyanda penting kalu orang itu da sunat ato nyanda. Yang penting di sini dia musti iko tu Tuhan Allah pe prenta. Jadi bagus kalu tiap orang tetap jo hidop sama deng waktu Tuhan Allah pangge for iko pa Dia. Kalu satu orang yang Tuhan pangge for iko pa Tuhan, kong waktu itu dia budak, dia nyanda perlu pusing deng de pe keadaan itu. Mar kalu ada kesempatan urus for mo bebas, pake jo tu kesempatan itu for mo bebas. Soalnya tu budak yang Tuhan da pangge for iko pa Tuhan, dia itu so sama deng orang bebas di muka pa Tuhan. Mar tu orang bebas yang Kristus da pangge, dia itu sama deng Kristus pe budak. Ngoni itu Tuhan so bli kong da bayar lunas, jadi jang se biar orang beking budak pa ngoni. Jadi sudara-sudara, kita pe maksut bagini: tiap orang hidop jo trus sama deng waktu Tuhan Allah pangge for iko pa Tuhan, kong hidop jo bagitu trus di muka pa Tuhan Allah. Skarang kita mo bicara tentang orang-orang yang blum kaweng. Kita nyanda da dapa prenta apa-apa dari Tuhan for dorang itu. Cuma biar lei bagitu, kita mo kase kita pe pendapat pa dorang sbagai orang yang bole ngoni mo percaya akang, lantaran Tuhan so se tunjung tu Dia pe rasa kasiang pa kita. Kita pe pendapat bagini: lebe bae ngoni yang blum kaweng, ngoni nyanda perlu roba apa-apa tu ngoni pe keadaan itu lantaran skarang ini tu keadaan so pe dapa tako. Kalu ada laki-laki yang so kaweng, dia jang brusaha mo se cere tu dia pe bini itu. Kong kalu ada laki-laki yang blum kaweng, nyanda usa lei dia brusaha mo kaweng. Cuma kalu laki-laki kaweng, dia nyanda berdosa. Bagitu lei kalu satu parampuang kaweng, dia nyanda berdosa. Mar tu orang-orang yang da kaweng, dorang mo dapa tu masala-masala pa dong pe hidop, kong kita brusaha supaya ngoni nyanda mo dapa tu masala-masala itu. Sudara-sudara, ini tu kita pe maksut: tu waktu for hari kiamat so dekat. So itu di waktu-waktu yang tasisa ini, tu orang-orang yang ada bini, dorang musti hidop setia pa Tuhan, rupa jo dorang itu nyanda ada bini. Bagitu lei deng orang-orang yang da manangis, dorang nimbole talalu bapikir tentang dorang pe sedi, dorang musti beking rupa jo dorang itu nyanda da manangis. Kong tu orang-orang yang snang, dorang lei nimbole talalu bapikir tu dong pe snang itu, dorang musti beking rupa jo dorang itu nyanda snang. Trus tu orang-orang yang da babli sesuatu, dorang nimbole talalu pikir-pikir tu dong pe kepunyaan itu, dorang musti beking rupa jo tu dorang da bli itu bukang dong punya. Kong tu orang-orang yang mo beking apa-apa di dunia ini, dorang jang cuma se abis tu dong pe waktu for mo talalu pikir-pikir deng tu hal-hal itu. Soalnya tu dunia yang torang tau skarang ini nanti so nyanda mo ada lei. Kita suka supaya ngoni hidop nyanda kuatir. Tu laki-laki yang nyanda ada bini, dia pe perhatian cuma for Tuhan, bagimana dia mo beking snang pa Tuhan. Mar tu laki-laki yang ada bini, dia pe perhatian lebe banya ka hal-hal dunia, rupa bagimana dia mo beking snang pa dia pe bini. Deng bagitu, dia pe perhatian taberbage. Kong tu parampuang yang nyanda da kaweng deng lei tu nona-nona, dorang pe perhatian cuma pa Tuhan, dorang pake tu dong pe badan deng dong pe diri cuma for Tuhan. Mar tu parampuang yang da kaweng, dia pe perhatian lebe banya ka hal-hal dunia rupa bagimana dia mo beking snang tu dia pe laki. Samua tu kita da bilang itu for ngoni pe bae, bukang mo larang-larang pa ngoni, malatare supaya ngoni hidop beking yang butul deng supaya ngoni ja layani pa Tuhan deng butul-butul kong ngoni pe pikiran cuma pa Tuhan. Kalu ada laki-laki yang rasa dia so beking tu nyanda bagus pa de pe tunangan, kalu de pe tunangan itu so lebe tatamba tua, kong lei kalu dia suka mo kaweng deng tu de pe tunangan itu, lebe bae dia kaweng jo, itu bukang dosa. Mar kalu ada laki-laki yang mampu tahang de pe nafsu, kong dia so ambe keputusan for nyanda mo kaweng deng de pe tunangan, deng lei nyanda ada yang paksa pa dia for ambe tu keputusan itu, dia itu lei so beking tu bae. Jadi orang yang kaweng deng dia pe tunangan, dia itu so beking tu bae. Kong tu orang yang nyanda kaweng deng dia pe tunangan, dia itu so beking yang lebe bae. Tu bini tetap ada ikatan kaweng deng dia pe laki slama tu de pe laki masi hidop. Kalu tu dia pe laki so mati, dia bebas for kaweng deng laki-laki sapa jo tu dia suka, asal tu orang yang dia mo kaweng akang itu orang yang percaya pa Tuhan. Mar menurut kita, dia itu mo lebe snang kalu dia tetap jo janda. Kita se nasehat ini lantaran kita tau kalu Tuhan Allah pe Roh ada lei pa kita. Sudara-sudara, skarang kita mo bicara tentang hal makang daging yang orang kase for persembahan pa opo-opo. Torang samua so tau yang orang ja bilang-bilang ini, “Torang tu orang percaya, torang samua so tau banya hal.” Cuma deng torang tau banya hal bagitu, itu bole beking torang jadi sombong. Mar kalu orang baku sayang, itu bole se kuat pa orang. Kalu ada yang pikir dia so tau banya hal, sebenarnya dia itu blum tau banya yang mustinya dia tau. Mar orang yang sayang pa Tuhan Allah, pasti Tuhan Allah kanal pa dia. Kong tentang tu hal makang daging yang da kase for persembahan pa opo-opo, torang so tau kalu tu opo-opo di dunia ini nyanda ada kuasa apa-apa, kong cuma ada satu Tuhan Allah, nyanda ada yang laeng. Soalnya biar lei di sorga ato di bumi ada sesuatu tu orang ja semba tu ja bilang “allah”, kong lei memang butul ada banya “allah” deng banya “tuhan” yang rupa itu, mar for torang, Tuhan Allah itu cuma satu, Dia itu torang pe Bapa. Dia yang beking samua, kong torang hidop for Dia. Kong cuma ada satu Tuhan, Dia itu Yesus Kristus. Samua yang ada da beking lewat Dia, trus lantaran Dia kong torang bole hidop. Mar biar lei bagitu, nyanda samua orang percaya yang tau kalu tu opo-opo itu nyanda ada kuasa apa-apa. Ada bebrapa orang yang so percaya pa Yesus, dorang dulu ja basemba pa opo-opo, trus sampe skarang dorang pe pikiran masi sama jo deng dulu. Dorang itu masi ja bapikir kalu dorang makang tu daging yang ja kase for persembahan pa opo-opo, itu dorang so semba pa opo-opo. So itu dorang pikir di hati kalu dorang so beking dosa lantaran dorang masi taika pa tu opo-opo kong dong pe percaya pa Yesus blum kuat. Sebenarnya makanan nyanda mo beking torang jadi lebe dekat deng Tuhan Allah. Jadi kalu torang nyanda makang tu makanan yang ja kase pa opo-opo, torang nyanda mo rugi apa-apa, deng biar lei torang makang tu makanan itu, torang nyanda mo untung apa-apa. Mar biar lei ngoni ini bebas for mo makang tu makanan itu, ngoni tetap musti hati-hati, jang sampe kalu ngoni makang itu, ngoni beking tu orang laeng yang dong pe percaya blum kuat jadi beking dosa, itu sama jo deng ngoni so jadi batu sandungan for dorang. Soalnya bagini: ngoni tu orang percaya, ngoni so tau kalu nyanda masala for makang daging yang orang so kase for persembahan pa opo-opo. Trus kalu ada orang percaya yang blum tau mo se beda tu butul deng nyanda butul, kalu dia lia ngoni da makang tu daging di dalam pa tu opo-opo pe kuil, dia pasti tapengaru mo makang tu daging itu. Jadi deng ngoni tau kalu ngoni bebas mo makang tu daging kong ngoni makang itu, ngoni so beking tu ngoni pe sudara yang de pe percaya blum kuat itu jadi rusak de pe hubungan deng Tuhan. Padahal Kristus lei da mati for dia. Kalu ngoni beking tu ngoni pe sudara jadi rupa itu, ngoni so beking dosa pa ngoni pe sudara-sudara yang percaya lantaran pa dorang pe hati, dorang pikir kalu yang dorang da beking itu dosa. Deng cara bagitu, ngoni lei so beking dosa pa Kristus. Jadi kalu yang kita makang itu beking tu sudara yang percaya jadi berdosa, itu sama jo deng kita so jadi batu sandungan for dorang. Kalu kita beking dia berdosa lantaran tu makanan itu, kita so nyanda lei mo makang itu slama kita hidop. Sudara-sudara, ngoni jang bapikir kalu kita ini nyanda bebas for beking samua hal yang bae. Ngoni lei jang sampe bapikir kalu kita ini bukang rasul. Trus ngoni jang sampe bapikir kalu kita ini blum perna lia pa Tuhan Yesus tu torang ja iko akang. Kong ngoni lei jang sampe blum tau kalu ngoni da jadi percaya pa Tuhan lantaran kita da se tau tu firman pa ngoni, ngoni itu no tu kita pe hasil karja. Kong biar lei ada orang-orang yang anggap kita bukang rasul, mar for ngoni, tantu ngoni anggap kita ini rasul. Soalnya ngoni so jadi percaya pa Tuhan, itu no de pe bukti kalu kita ini memang rasul. Kalu ada orang yang kritik pa kita, kita bela kita pe diri deng bilang bagini: torang ini ada hak for dapa makang deng minum dari pa tu orang-orang yang torang da layani. Torang lei ada hak for mo bawa bini yang sama-sama percaya iko deng torang for beking playanan, itu sama deng yang rasul-rasul laeng da beking, deng lei yang Tuhan Yesus pe sudara-sudara deng Kefas ja beking. Ato apa ngoni pikir cuma kita deng Barnabas yang musti karja di luar playanan for mo dapa tu torang pe perlu hari-hari kong tu rasul yang laeng nyanda? Pasti nyanda bagitu to? Apa ada orang yang jadi tentara kong dia se gaji tu dia pe diri sandiri? Kong apa ada lei petani yang da batanang anggor pa de pe kobong trus dia nyanda da makang tu hasil dari de pe kobong itu? Trus apa ada gembala yang da bapiara domba, kong dia nyanda da minum susu dari tu domba-domba yang dia da piara itu? So pasti nyanda to? Tu conto yang kita da bilang di atas, itu bukang cuma manusia pe pikiran kalu orang yang da karja pantas for mo dapa gaji, mar itu lei sama deng yang da tulis di atoran-atoran kitab Taurat. Soalnya di atoran-atoran kitab Taurat tu Musa da tulis, dia da tulis bagini, “Kalu sapi da bakarja kras for torang, torang nimbole ika de pe mulu. Kase biar jo tu sapi itu pe mulu nyanda taika, supaya dia bole mo makang.” Jadi apa itu da tulis lantaran Tuhan Allah tarukira pa tu sapi? Ato tu tulisan itu pe tujuan for torang? Tantu katu tu tulisan itu da tulis for torang. Tu tulisan itu pe arti bagini: tu orang yang bapajeko tana, dia musti bapajeko kong baharap deng yakin kalu dia mo dapa tu de pe hasil karja dari situ. Bagitu lei deng orang yang bakarja se lapas tu gandum dari de pe kuli, dia musti bakarja kong baharap deng yakin kalu dia mo dapa de pe hasil karja dari situ. Kong torang so se tau pa ngoni tu Kabar Bae tentang Kristus, itu bole mo se sama deng torang so batanang akang bibit rohani pa ngoni. No kalu bagitu, apa torang so talalu batuntut kalu torang minta tu torang pe perlu hari-hari dari pa ngoni? Soalnya itu to bole mo se sama deng torang da dapa tu tong pe hasil waktu bapanen. Kalu tu orang laeng yang mangajar tu firman pa ngoni ada hak for mo dapa tu dong pe perlu dari pa ngoni, tantu katu torang lei ada hak yang lebe basar for mo dapa itu dari pa ngoni! Mar biar lei bagitu, torang nyanda pake tu torang pe hak itu. Malatare biar lei torang susa, torang tetap tanggong samua tu torang pe perlu supaya torang nyanda minta itu pa ngoni, jang sampe deng torang minta bagitu, itu jadi halangan for orang mo trima tu Kabar Bae tentang Kristus. Ngoni tantu tau kalu orang-orang yang ja layani di Ruma Ibada Pusat, dorang itu ja dapa makanan dari situ. Kong lei tu orang-orang yang ja layani di tampa korban persembahan, dorang ja dapa bagean dari situ lei. Bagitu lei Tuhan so tetapkan kalu orang-orang yang ja kase tau tu Kabar Bae tentang Kristus, dorang itu musti dapa tu dong pe perlu hari-hari dari tu karja itu. Mar biar lei kita bole mo pake tu bebrapa hak for mo dapa apa-apa dari pa ngoni, kita nyanda perna pake tu hak itu biar lei cuma satu. Kong kita lei nyanda tulis ni surat supaya kita bole mo minta apa-apa dari pa ngoni. Nyanda ada tu bole mo paksa pa kita for minta pa ngoni tu kita pe perlu! Kita bangga lantaran kita nyanda minta apa-apa pa ngoni, kong lebe bae kita mati kalu kita pe bangga itu ilang dari pa kita. Kalu kita se tau tu Kabar Bae tentang Kristus, kita nyanda ada alasan for angka-angka tu kita pe diri sandiri, lantaran itu memang kita pe tugas yang kita musti mo beking. Cilaka jo kita ini kalu kita nyanda se tau tu Kabar Bae. Kong kalu kita kase tau tu Kabar Bae itu lantaran kita pe mau sandiri, kita memang ada hak mo dapa tu kita pe perlu dari situ. Mar sebenarnya kita da kase tau tu Kabar Bae itu bukang lantaran kita pe mau sandiri, kita kase tau itu lantaran Tuhan da se percaya akang pa kita for beking itu. No kalu bagitu, apa tu kita mo dapa dari situ for jadi kita pe upah? Tu kita mo dapa jadi kita pe upah ini: waktu kita se tau tu Kabar Bae, kita nyanda minta upah apa-apa. Deng bagitu, sbagai orang yang ja se tau tu Kabar Bae, kita nyanda da pake tu kita pe hak for dapa upah dari pa tu orang-orang yang kita ja layani. Biar lei kita ini orang bebas, bukang orang laeng pe budak, mar kita beking kita pe diri jadi sama deng samua orang pe budak. Deng bagitu kita bole mo se menang tu orang-orang dari kuasa jaha for bantu pa dorang percaya pa Yesus. Jadi bagini: kalu kita ada deng orang dari bangsa Yahudi, kita beking kita pe diri jadi sama deng dorang, supaya kita bole bantu pa dorang itu jadi percaya pa Yesus, itu sama deng kita so se menang pa dorang dari kuasa jaha. Kong kalu kita ada deng orang dari bangsa Yahudi yang taika deng tu atoran-atoran di kitab Taurat, kita beking kita pe diri jadi sama deng dorang jadi taika deng tu atoran-atoran itu, biar lei kita sandiri so nyanda lei taika deng tu atoran-atoran itu. Kita beking bagitu, supaya kita bole bantu pa dorang yang taika deng tu atoran-atoran itu jadi percaya pa Yesus, itu sama deng kita so se menang pa dorang dari kuasa jaha. Kong kalu kita ada deng orang yang bukang dari bangsa Yahudi, kita beking kita pe diri jadi sama deng dorang tu nyanda hidop iko tu atoran-atoran yang ada di kitab Taurat. Mar itu bukang berarti kita nyanda ja iko tu atoran yang dari Tuhan Allah, malatare kita ja beking tu Kristus da prenta pa kita. Kita beking samua itu, supaya dorang yang bukang dari bangsa Yahudi itu bole mo percaya pa Yesus, itu sama deng kita se menang pa dorang dari tu kuasa jaha. Kalu kita ada deng orang yang blum kuat percaya pa Yesus, kita lei nyanda beking tu hal-hal yang dorang anggap nyanda bagus mo beking, supaya kita bole bawa pa dorang itu jadi percaya pa Yesus. Kita so beking kita pe diri jadi sama deng samua orang, biar deng cara bagimana kita brusaha supaya bole bawa bebrapa dari antara pa dorang itu for mo dapa slamat. Kita beking tu kita pe diri bagitu supaya lebe tatamba banya tu orang yang percaya tu Kabar Bae tentang Kristus, kong deng bagitu kita deng dorang bole sama-sama dapa berkat dari tu Kabar Bae itu. Ngoni pasti tau kalu orang iko lomba lari, dorang samua brusaha balari, mar dari pa dorang itu cuma satu tu mo juara kong dapa piala. Ngoni lei musti sama deng tu orang yang da iko lomba lari: ngoni musti brusaha iko tu Tuhan Allah pe mau supaya ngoni bole mo dapa tu ngoni pe upah. Tiap orang tu da iko lomba, dia musti disiplin deng dia pe latihan di samua hal lantaran dia suka mo dapa tu piala. Dorang beking bagitu for mo dapa tu piala yang nyanda mo batahang sampe slama-lamanya, mar torang mo dapa tu upah yang mo batahang sampe slama-lamanya, itu no tu hidop kekal. So itu kita sama deng tu pelari yang nyanda sambarangan balari, mar kita brusaha lari sampe di finis. Kong lei kita sama deng tu petinju yang nyanda cuma sambarangan batinju. Mar kita latih kras deng se disiplin tu kita pe diri supaya nanti waktu kita so klar se tau tu Kabar Bae tentang Yesus pa orang-orang, Tuhan nyanda mo tolak pa kita mar kita mo dapa tu upah. Sudara-sudara, kita mo se tau pa ngoni kalu dulu waktu torang pe nene moyang da kaluar dari Mesir, Tuhan Allah pake tiang awan for lindungi pa dorang samua, deng dorang samua bole bajalang lewat tu Laut Mera yang de pe aer da tabla. Waktu tu awan da lindungi pa dorang samua, deng lei dorang da bajalang lewat di Laut Mera, dorang itu sama jo deng da dapa baptis dalam awan deng lei dalam laut for jadi Musa pe orang-orang. Kong waktu itu, dorang samua da makang tu makanan yang sama tu dari pa Tuhan sandiri. Dorang lei samua da minum tu minuman yang sama tu dari pa Tuhan sandiri. Tu dorang da minum itu, tu aer yang Tuhan da se kaluar dari satu batu. Tu batu itu bole mo se sama deng Kristus yang da bajalang sama-sama trus deng dorang. Mar biar lei bagitu, banya dari pa dorang yang dong pe kalakuan Tuhan Allah nyanda suka, so itu dorang mati di mana-mana di padang gurun. Samua itu jadi conto for kase inga supaya torang jang suka tu hal-hal jaha sama deng tu dorang da beking, deng lei supaya torang jang jadi orang-orang yang ja basemba pa opo-opo, sama deng tu banya dari pa dorang itu ja beking. Itu sama deng tu da tulis di Kitab Suci, “Tu bangsa itu, dorang dudu makang deng minum rame-rame, trus dorang badiri kong basnang-snang puji pa opo-opo.” Kong torang lei jang baseks bebas sama deng tu bebrapa dari pa dorang itu ja beking, so itu dalam waktu satu hari Tuhan da se mati dua pulu tiga ribu orang. Torang lei jang ja bacoba-coba pa Kristus, sama deng tu bebrapa dari pa dorang itu ja beking, so itu dorang mati ular da gigi. Torang jang babamengelu sama deng tu bebrapa dari pa dorang itu ja beking, so itu tu malaekat maut da se binasa pa dorang. Samua tu da jadi pa dorang itu jadi conto for torang, kong samua itu da tulis for jadi pringatan pa torang yang hidop skarang di waktu akhir jaman. So itu sapa yang bapikir kalu dia pe iman kuat, dia itu musti hati-hati supaya nyanda tagoda beking dosa. Tu cobaan-cobaan yang ngoni da rasa itu, itu cobaan-cobaan yang biasanya manusia da rasa. Mar Tuhan Allah slalu setia deng ngoni, Dia nyanda perna mo se biar pa ngoni dapa cobaan yang lebe dari tu ngoni mampu mo tanggong. Waktu ngoni dapa cobaan, Dia slalu mo kase pa ngoni jalang kaluar dari tu cobaan itu, supaya ngoni mampu batahang mangada tu cobaan itu. Jadi ngoni tu orang-orang yang kita sayang, ngoni jang basemba pa opo-opo. Kita bicara pa ngoni tu orang-orang yang bijaksana, ngoni pikir jo bae-bae apa tu kita da bilang. Waktu perjamuan, torang minum dari cawan kong bilang makase pa Tuhan, itu de pe arti torang ada hubungan dekat deng Kristus lewat Dia pe dara yang da tacura di kayu salib. Kong waktu itu lei, torang pela-pela roti kong makang itu, itu de pe arti torang so ada hubungan dekat deng Kristus lewat Dia pe badan. Soalnya tu roti cuma satu kong se pela-pela, trus torang samua dapa bagean dari tu roti itu. Itu de pe arti, torang yang pe banya ini anggota dari satu badan lewat tu torang pe hubungan deng Kristus. Bagitu lei deng tu orang-orang Israel dulu-dulu, dorang ja kase korban persembahan pa Tuhan di atas tampa korban persembahan, kong abis itu dorang sama-sama makang tu korban persembahan itu. Waktu beking samua itu, dorang so ambe bagean dari tu upacara korban persembahan itu. Kalu kita bilang bagitu, jang ngoni pikir kalu tu opo-opo deng makanan yang da kase persembahan for tu opo-opo, dua-dua itu ada de pe guna. Nyanda kasiang. Kita bilang bagitu lantaran apa tu dorang da kase persembahan itu, itu bukang for Tuhan Allah mar for setang-setang. Kita nimau kalu ngoni ada hubungan deng tu setang-setang itu. Waktu ngoni minum dari tu cawan deng makang pa Tuhan pe perjamuan, ngoni so ada hubungan dekat deng Dia. Jadi ngoni nimbole lei makang deng minum dari tu persembahan for tu setang-setang kong ada hubungan deng tu setang-setang itu. Ngoni so ambe bagean dari pa Tuhan pe perjamuan, jadi ngoni lei nimbole ambe bagean dari tu upacara for semba tu setang-setang. Kalu ngoni ambe bagean di upacara for semba tu setang-setang, ngoni beking Tuhan cemburu. Ato stou ngoni pikir kalu ngoni itu lebe kuat dari Tuhan? Nyanda kasiang. Sudara-sudara, ada yang bilang, “Torang bole beking samua hal.” Itu butul, mar nyanda samua hal itu ada de pe guna. Jadi biar lei “torang bole beking samua hal,” mar nyanda samua dari tu hal itu yang bole mo se kuat orang pe hati. Jang ada satu orang yang brusaha for dia pe bae sandiri, mar lebe bae tiap orang brusaha lei for orang laeng pe bae. Ngoni bole makang samua daging yang orang da jual di pasar. Ngoni nyanda usa mo cari tau kalu tu daging itu orang da pake for persembahan pa opo-opo ato nyanda. Kalu ngoni nintau tu daging itu for persembahan ato nyanda, ngoni pe hati nyanda mo rasa bersala makang itu. Soalnya bagini, “Bumi deng samua yang ada di bumi itu Tuhan punya.” Kalu ada orang yang blum percaya da undang makang pa ngoni, kong ngoni trima tu undangan itu, ngoni makang jo apa tu dia da kase pa ngoni. Ngoni nyanda perlu mo cari tau kalu tu makanan itu da kase persembahan pa opo-opo ato nyanda. Kalu ngoni nintau tu daging itu for persembahan ato nyanda, ngoni pe hati nyanda mo rasa bersala makang itu. Mar kalu ada orang yang babilang pa ngoni, “Itu daging persembahan for opo-opo,” itu komang jang ngoni makang. Soalnya ngoni musti pikir tu orang yang da kase tau itu deng dia pe hati rasa bersala mo makang itu. Tu kita pe maksut bukang ngoni pe hati yang mo rasa brat mo makang itu, mar tu orang yang da babilang itu pe hati yang mo rasa brat kalu ngoni mo makang itu. Mar mungkin ada orang yang de pe hati mo rasa brat kong babilang bagini, “Kiapa so torang pe kebebasan mo tagantong pa orang laeng pe rasa brat di hati? Kalu kita so lebe dulu basombayang bilang makase pa Tuhan seblum kita makang, no kiapa dang orang mo kritik pa kita cuma lantaran tu makanan yang kita da makang itu? Padahal, kita so lebe dulu bilang makase pa Tuhan for tu makanan itu.” Jadi bagini: kalu ngoni mo makang ato minum ato apa jo tu ngoni mo beking, ngoni beking jo itu samua supaya Tuhan Allah dapa puji deng hormat. Jang ngoni beking apa-apa yang mo halangi pa orang laeng for iko pa Tuhan, biar itu pa orang dari bangsa Yahudi, orang dari bangsa bukang Yahudi ato dari Tuhan Allah pe jemaat. Ngoni beking jo sama deng tu kita ja beking ini: di samua hal yang kita beking, kita beking itu samua deng bae-bae supaya samua orang snang deng tu kita da beking itu. Kita beking bagitu bukang for kita pe bae mar for tu orang banya pe bae, supaya dorang bole mo dapa slamat dari hukuman dosa. Ngoni iko jo tu kita pe cara hidop, sama lei deng kita da iko tu Kristus pe cara hidop. Kita puji pa ngoni lantaran ngoni slalu ja inga tu kita pe cara hidop deng lei ngoni tetap pegang tu ajaran yang kita da se ajar pa ngoni. Mar kita suka ngoni tau tentang ini: yang jadi Kapala for laki-laki itu Kristus, trus yang jadi kapala for parampuang itu laki-laki, kong yang jadi Kapala for Kristus itu Tuhan Allah. Waktu da bakumpul for baibada, tiap laki-laki yang basombayang ato ja kase tau tu pesan yang Tuhan da se tau pa dia, kong waktu itu dia da pake tutu kapala, dia itu sama jo deng so beking malo pa Kristus tu de pe Kapala. Kalu tiap parampuang yang basombayang ato ja kase tau tu pesan yang Tuhan da se tau pa dia, kong waktu itu dia nyanda da pake tutu kapala, dia itu sama jo deng da beking malo pa de pe laki tu de pe kapala, dia itu lei sama deng da cukur tu de pe rambu. Soalnya kalu parampuang nimau mo tutu dia pe kapala, dia itu musti gunting se pende skali de pe rambu. Mar kalu tu parampuang gunting se pende skali ato cukur de pe rambu, itu beking malo pa dia, lebe bae dia pake tutu kapala. Soalnya tu laki-laki nyanda perlu mo pake tutu kapala, lantaran Tuhan Allah da beking pa laki-laki satu gambaran deng Dia kong orang mo puji deng hormat pa Tuhan Allah lantaran tu laki-laki itu. Trus kalu parampuang pake tutu kapala, orang mo puji deng hormat pa tu laki-laki. Soalnya dulu waktu Tuhan Allah beking manusia, Dia nyanda beking laki-laki dari tu parampuang, mar Dia beking parampuang dari tu laki-laki. Bagitu lei Tuhan da beking laki-laki bukang for parampuang, mar Tuhan beking parampuang for laki-laki. So itu, tu parampuang musti pake tutu kapala, itu no tu tanda wibawa pa dia, deng lei lantaran tu malaekat-malaekat ja tarukira pa dia. Mar biar lei bagitu, for torang yang percaya pa Tuhan, nyanda ada parampuang yang nyanda perlu pa laki-laki, bagitu lei nyanda ada laki-laki yang nyanda perlu pa parampuang. Soalnya dulu Tuhan Allah beking tu parampuang dari pa laki-laki, trus serta itu komang tu laki-laki lahir dari pa parampuang, kong samua de pe asal dari pa Tuhan Allah. Co ngoni pikir bae-bae, apa pantas kalu tu parampuang nyanda pake tutu kapala waktu basombayang pa Tuhan Allah? Nyanda pantas to? Torang samua so tau kalu iko tong pe biasa, tu laki-laki nyanda pantas rambu panjang. Mar komang kalu parampuang pe rambu panjang, dia itu mo dapa puji deng dapa hormat. Soalnya tu rambu itu Tuhan da kase pa parampuang for jadi de pe tutu kapala. Mar kalu ada orang yang mo baku ambe tentang masala parampuang mo tutu kapala, torang se tau kalu torang deng Tuhan Allah pe jemaat-jemaat lei pe atoran rupa itu, mar tu atoran laeng dari itu nyanda ada. Kita mo kase tau bebrapa hal yang musti ngoni beking, mar komang kita nyanda puji pa ngoni di hal-hal ini. Soalnya kalu ngoni bakumpul for baibada, ngoni nyanda beking tu bae, malatare da beking tu besae. Pertama kita da dengar, kalu ngoni bakumpul for baibada, ngoni ada masala sampe ngoni tapica-pica, kong kita rasa yang kita da dengar itu ada de pe butul. Soalnya di antara pa ngoni memang musti ada tu tapica-pica, supaya dapa tau sapa dari antara pa ngoni yang butul-butul ja iko pa Tuhan deng yang nyanda. Kong lei waktu ngoni bakumpul da beking perjamuan, ngoni nyanda beking itu for mo inga tu Tuhan Yesus pe kematian. Soalnya waktu beking perjamuan, ada orang yang so makang deng minum lebe dulu sampe yang laeng nyanda riki makang kong jadi lapar. Kong ada yang laeng minum sampe mabo. Jadi bagimana lei itu? Apa ngoni nyanda ada ruma sandiri for makang deng minum? Ato apa ngoni mo hina pa Tuhan Allah pe jemaat deng beking malo pa tu orang-orang yang nyanda punya apa-apa? Apa dang tu kita mo bilang pa ngoni? Apa kita mo puji pa ngoni? Kalu bagitu komang, kita nyanda puji pa ngoni. Kita se tau pa ngoni apa tu kita so trima dari pa Tuhan sandiri, bagini: tu malam waktu orang hianati pa Tuhan Yesus, di perjamuan itu Dia da ambe roti, trus Dia bilang makase pa Tuhan Allah. Klar itu Dia se pela-pela tu roti deng babilang, “Ni roti Kita pe badan yang Kita srahkan for ngoni. Ngoni beking jo rupa tu torang da beking skarang ini for inga pa Kita.” Bagitu lei waktu abis makang, Tuhan Yesus ambe tu cawan deng babilang, “Tu anggor di cawan ini, ini no tu perjanjian yang baru antara Tuhan Allah deng manusia, yang da se metrai pake Kita pe dara. Tiap kali ngoni minum di perjamuan, ngoni beking jo rupa tu torang da beking skarang ini for inga pa Kita.” Jadi tiap kali ngoni beking perjamuan makang roti deng minum anggor di cawan, itu sama jo deng ngoni se tau ulang pa orang-orang tentang Tuhan pe kematian sampe Dia datang ulang. So itu, kalu ada yang makang roti deng minum anggor for inga tu Tuhan pe kematian, mar dia pe kalakuan nyanda pantas waktu beking tu perjamuan itu, dia itu so berdosa lantaran dia nyanda hargai tu Tuhan Yesus pe badan deng dara. So itu lebe bae tiap orang priksa dulu tu de pe hati sandiri kalu so siap, baru abis itu dia iko perjamuan makang tu roti deng minum tu anggor dari tu cawan. Soalnya sapa tu da makang roti deng minum anggor, mar dia pe kalakuan nyanda pantas waktu beking tu perjamuan, dia itu nyanda da hargai tu Tuhan pe badan. So itu dia mo dapa hukuman dari pa Tuhan. So lantaran itu no kong banya dari antara pa ngoni yang lemah, dapa saki deng ada lei yang mati. Mar kalu waktu itu torang lebe dulu priksa tu tong pe hati sandiri kalu so siap, torang nyanda mo trima tu hukuman. Cuma kalu torang dapa hukuman dari Tuhan, de pe tujuan for mo se ajar pa torang beking tu butul, supaya nanti torang nyanda mo dapa hukuman kekal sama-sama deng orang-orang yang nyanda percaya tu ja iko dunia pe mau. So itu kita pe sudara-sudara, kalu ngoni bakumpul for makang di perjamuan, ngoni musti baku tunggu for makang sama-sama. Kalu ada orang yang lapar, lebe bae dia makang lebe dulu pa de pe ruma. Deng torang beking bagitu, torang pe perjamuan itu nyanda mo beking torang dapa hukum dari Tuhan. Kong tentang hal-hal yang laeng, nanti kita ator kalu kita so datang pa ngoni. Sudara-sudara, skarang kita mo bicara tentang karunia-karunia dari Roh Kudus. Kita suka supaya ngoni mangarti yang sebenarnya tentang tu karunia-karunia itu. Ngoni tau kalu waktu ngoni masi blum kanal pa Tuhan Allah, ada yang se tipu deng se pengaruhi pa ngoni sampe ngoni semba tu opo-opo yang nimbole mo bicara. So itu kita bilang pa ngoni supaya ngoni bole tau tu hal ini, kalu ada satu orang yang Tuhan Allah pe Roh da kuasai, tu orang itu nyanda mungkin mo babilang rupa ini, “Terkutuk jo tu Yesus”. Mar kalu tu orang yang Roh Kudus da kuasai, tu orang itu mo babilang rupa ini, “Yesus itu Tuhan”. Tu karunia yang Roh Kudus da kase ada macam-macam, mar tu Roh Kudus itu cuma satu. Kong ada macam-macam cara for layani orang, mar tu Tuhan cuma satu. Trus ada lei macam-macam cara for beking tu karja yang dari pa Tuhan, mar yang da kase kuasa for beking samua tu karja itu Tuhan Allah yang sama. Tiap orang trima karunia dari Roh Kudus for samua orang pe bae. Bagini, tu Roh Kudus kase karunia pa satu orang supaya dia mampu for babicara deng bijaksana. Kong pa orang laeng, tu Roh Kudus yang sama itu kase karunia supaya tu orang itu tau banya hal kong mampu se tau tentang hal-hal itu. Kong pa satu orang, tu Roh Kudus yang sama itu kase akang karunia supaya dia pe percaya pa Kristus jadi kuat skali. Trus pa orang laeng, tu Roh Kudus yang sama itu lei da kase karunia supaya dia bole kase bae orang. Kong pa orang laeng, tu Roh Kudus kase akang karunia supaya dia bole beking mujisat. Trus pa orang laeng lei, tu Roh Kudus kase karunia supaya dia bole se tau pesan yang Tuhan da se tau pa dia. Kong pa orang laeng, tu Roh Kudus kase karunia supaya dia bole tau mana yang dari pa Tuhan deng mana yang nyanda dari pa Tuhan. Trus pa orang laeng, tu Roh Kudus kase karunia for babicara pake bahasa yang Roh Kudus da kase, kong pa orang yang laeng, tu Roh itu kase karunia supaya dia bole mo se arti tu bahasa yang Roh Kudus da kase. Tu macam-macam karunia itu dari Roh Kudus yang sama, kong tu Roh Kudus itu cuma satu. Tu Roh Kudus da kase pa masing-masing orang karunia yang beda-beda, iko tu Roh Kudus pe mau. Manusia pe badan itu cuma satu, mar tu de pe anggota badan ada banya. Biar tu anggota badan itu ada banya, mar ada di satu badan. Bagitu lei deng torang yang percaya pa Kristus, biar lei torang yang percaya ada banya, mar torang jadi satu lantaran torang sama-sama percaya pa Kristus. Torang ini, tu orang Yahudi, tu bukang Yahudi, budak deng tu orang bebas, torang samua ini jadi satu lantaran torang samua dapa baptis dari Roh Kudus yang satu. Tu Roh Kudus yang satu itu so ada pa torang samua. Memang manusia pe anggota badan ada banya, mar de pe badan itu tetap satu. Jadi kalu misalnya tu anggota badan rupa tu kaki babilang, “Kita nyanda tamaso di anggota badan, lantaran kita bukang tangan.” Kong biar tu kaki babilang bagitu, itu nyanda butul, lantaran tu kaki tetap anggota badan. Kong kalu lei misalnya tu talinga babilang, “Kita bukang mata, jadi kita nyanda tamaso di anggota badan.” Biar tu talinga lei babilang bagitu, itu nyanda butul, lantaran tu talinga tetap anggota badan. Kong kalu misalnya satu badan enteru cuma mata, di mana dang tu talinga for mo badengar akang? Kong kalu misalnya tu badan enteru cuma talinga, di mana dang tu idong for mo babobou akang? Mar Tuhan Allah so kase pa samua anggota badan masing-masing ada de pe tampa kusus di badan, tu Dia da kase itu iko Dia pe mau. Kalu misalnya samua anggota badan itu cuma jadi satu macam anggota badan, itu de pe arti bukang badan. Memang tu anggota badan ada banya, mar tu badan cuma satu. Jadi tu mata nimbole babilang pa tangan, “Kita nyanda perlu pa ngana.” Bagitu lei tu kapala nimbole mo babilang pa kaki, “Kita nyanda perlu pa ngana.” Mar sebenarnya tu anggota-anggota badan yang torang anggap nyanda penting, tu anggota-anggota badan itu yang paling torang perlu. Tu anggota-anggota badan yang torang kurang tarukira akang, itu yang torang tarukira akang bae-bae. Kong pa torang pe anggota-anggota badan yang nyanda pantas for orang mo lia, torang tarukira akang deng kusus. Kong for tu anggota-anggota badan yang biasa orang lia, itu nyanda perlu torang mo tarukira akang deng kusus. Tuhan Allah so ator bagitu rupa tu torang pe badan, supaya pa torang pe anggota-anggota badan yang torang anggap nyanda talalu penting, torang kase akang perhatian yang kusus. Deng bagitu torang pe badan nyanda mo tapisa-pisa, mar torang pe anggota-anggota badan yang baku beda itu bole mo baku tarukira. Jadi kalu satu anggota badan mendrita, samua anggota badan iko lei mendrita. Kalu satu anggota badan dapa puji, samua anggota badan lei jadi snang. Bagitu lei deng ngoni samua, ngoni samua sama deng Yesus Kristus pe badan, kong tiap orang dari pa ngoni itu jadi Kristus pe anggota badan. Kong dari jemaat, Tuhan Allah so pili orang-orang for jadi bagini: pertama, jadi rasul tu Tuhan pe utusan, kadua, jadi nabi tu ja kase tau Tuhan pe pesan, katiga, jadi guru tu ja se ajar tu Tuhan pe ajaran. Trus ada yang dapa karunia for beking mujisat, yang dapa karunia for se bae orang, yang dapa karunia for layani orang laeng, yang dapa karunia for bapimpin, deng lei yang dapa karunia for babicara deng macam-macam bahasa yang Roh Kudus da kase. Jadi samua dapa karunia mar tu karunia yang da dapa itu beda-beda, nyanda samua tu da jadi rasul, nyanda samua tu da jadi nabi, nyanda samua tu da jadi orang-orang yang ja se ajar tu Tuhan pe ajaran, nyanda samua lei yang dapa karunia for beking mujisat. Nyanda samua yang dapa karunia for mo kase bae orang, nyanda samua yang dapa karunia bole mo babicara pake tu bahasa yang Roh Kudus da kase deng nyanda samua yang dapa karunia for mo kase arti dari tu bahasa yang Roh Kudus da kase. Mar biar lei bagitu, ngoni musti butul-butul brusaha dapa tu karunia-karunia yang lebe penting. Kong skarang, kita mo se tunjung pa ngoni mana yang paling bagus. Biar lei kita bole babicara deng macam-macam bahasa yang manusia ja pake deng lei tu bahasa yang malaekat ja pake, mar kalu kita nyanda basayang pa orang laeng, tu kita da bicara pake bahasa-bahasa itu nyanda ada de pe guna, itu sama jo deng gong deng simbal yang da se babunyi sambarang. Kong biar lei kita ada karunia for se tau tu Tuhan pe pesan, deng biar lei kita bole mangarti banya hal yang orang laeng blum tau, deng biar lei kita tau tentang samua hal, deng biar lei kita ada iman yang kuat sampe bole kase pinda gunung, mar kalu kita nyanda basayang pa orang laeng, kita sama skali nyanda ada guna. Trus biar lei kita kase tu samua yang ada pa kita for orang miskin, kong biar lei kita kase kita pe diri dapa bakar jadi korban, mar kalu kita nyanda basayang pa orang laeng, samua itu nyanda ada guna for kita. Orang yang basayang itu bagini: dia pangsabar, pangbae, nyanda pangcemburu, nyanda ja angka-angka dia pe diri, deng lei dia nyanda sombong. Kong lei dia nyanda ja beking tu nyanda sopan, nyanda ja bapaksa pa orang for dia pe kepentingan diri sandiri, nyanda pangmara, deng lei dia nyanda ja basimpang tu orang laeng pe sala. Tu orang yang basayang, dia itu nyanda snang kalu orang ja beking tu nyanda butul, mar dia snang kalu orang ja beking tu butul. Tu orang yang basayang, dia lei batahang mangada samua hal, dia slalu percaya samua yang bae, dia trus baharap yang bae di samua hal, deng dia tetap sabar di samua hal. Tu sayang itu mo ada sampe slama-lamanya. Mar tu karunia for kase tau tu Tuhan pe pesan, itu nanti so nyanda mo ada lei. Kong lei tu karunia for babicara deng bahasa yang Roh Kudus da kase, itu nanti mo brenti. Bagitu lei deng tu karunia for tau samua hal, nanti itu lei mo ilang. Soalnya samua hal yang torang tau itu nyanda lengkap, deng lei torang pe kemampuan se tau Tuhan pe pesan, itu lei ada de pe batas. Mar nanti kalu Tuhan datang ulang kong so beking samua jadi sempurna, nanti yang nyanda sempurna itu mo ilang lei. De pe conto bagini: waktu kita masi anak kacili, kita babicara sama deng anak kacili, kita pe cara hidop deng cara bapikir sama deng anak kacili. No skarang, serta kita so dewasa, kita se tinggal tu sifat anak kacili itu. Skarang ini, torang blum kanal butul tentang Tuhan, itu sama deng torang da balia di satu kaca yang kabur, mar nanti torang mo baku mangada langsung deng Dia kong bole lia deng jelas pa Dia. Skarang tu hal-hal tentang Tuhan itu kita blum tau samua, mar nanti kita mo tau itu deng sempurna sama deng Tuhan da kanal pa kita deng sempurna. Jadi ada tiga hal yang torang tetap beking: torang percaya pa Tuhan, torang baharap deng yakin pa Tuhan, deng lei torang basayang. Mar dari tu tiga hal itu, yang paling penting, torang basayang. Sudara-sudara, ngoni brusaha jo for basayang. Ngoni lei musti brusaha skali supaya dapa tu karunia-karunia yang dari Roh Kudus, lebe-lebe lei tu karunia for kase tau tu pesan yang Tuhan da se tau. Sapa yang babicara pake bahasa yang Roh Kudus da kase, dia itu nyanda babicara pa manusia mar pa Tuhan Allah. Soalnya nyanda ada satu orang yang bole mangarti itu lantaran tu Roh Kudus da kuasai pa dia for babicara tentang tu hal-hal yang manusia blum tau. Mar sapa yang kase tau tu pesan yang Tuhan da se tau pa dia, dia itu babicara pa orang-orang for se kuat tu orang-orang pe percaya, kase smangat pa dorang, deng lei hibur pa dorang. Sapa yang babicara pake bahasa yang Roh Kudus da kase, dia itu mo se kuat tu dia pe diri sandiri. Mar sapa yang kase tau tu pesan yang Tuhan da se tau, dia itu ja kase kuat tu jemaat. Kita suka kalu ngoni samua babicara pake bahasa yang Roh Kudus da kase, mar yang kita lebe suka lei kalu ngoni ja kase tau tu pesan yang Tuhan da kase tau. Soalnya tu orang yang ja kase tau tu pesan yang Tuhan da se tau pa dia, dia itu lebe ada de pe guna for jemaat daripada tu orang yang ja babicara pake bahasa yang Roh Kudus da kase, kacuali katu tu orang itu lei bole mo kase tau tu arti supaya dia bole se kuat tu jemaat. Jadi sudara-sudara, kalu kita datang pa ngoni kong ja babicara pake bahasa yang Roh Kudus da kase, tantu katu nyanda ada de pe guna for ngoni to? Mar lebe bae, kita pake bahasa yang ngoni bole mo mangarti for se jelaskan pa ngoni sesuatu dari Tuhan Allah, ato for beking ngoni mampu mangarti banya hal, ato for se tau tu pesan yang Tuhan da kase tau, ato for se ajar pa ngoni. De pe conto: tu alat-alat musik rupa tu suling deng kecapi. Biar tu alat-alat musik itu nyanda hidop, mar kalu orang se bermain de pe nada-nada deng butul, tu alat-alat itu bole mo se kaluar bunyi yang jelas sampe orang bole dapa tau lagu apa itu. Conto laeng lei, kalu tu trompet nyanda da se babunyi deng butul for pangge tentara mo pi baprang, sapa yang tau kalu itu bunyi for se tau kalu so de pe waktu mo basiap pi baprang? Pasti nyanda to? Bagitu lei deng ngoni, kalu ngoni babicara pake bahasa yang Roh Kudus da kase kong orang laeng nintau tu bahasa itu, pasti orang laeng nyanda mangarti deng tu ngoni da bilang itu. Jadi nyanda ada de pe guna tu ngoni da bilang itu, itu kurang sama jo deng ngoni da babicara pa angin. Di dunia ini ada banya skali bahasa, kong masing-masing bahasa itu ada de pe arti. Mar kalu ada orang yang babicara pa torang trus torang nyanda mangarti tu bahasa itu, torang jadi orang asing for dia yang da babicara pake tu bahasa itu, kong dia jadi orang asing for torang. Jadi bagitu lei deng ngoni, ngoni memang so brusaha dapa karunia-karunia dari Roh Kudus, mar paling bae ngoni brusaha jo pake tu karunia-karunia yang ngoni dapa itu for beking kuat tu jemaat. So itu sapa yang babicara pake bahasa yang Roh Kudus da kase, dia itu musti basombayang supaya dia bole dapa se arti itu. Soalnya kalu kita basombayang deng babicara pake bahasa yang Roh Kudus da kase, kita bukang basombayang pake kata-kata dari kita pe pikiran sandiri mar kita basombayang cuma deng kita pe roh. Jadi apa tu kita musti beking? Kita mo basombayang dari kita pe roh pake bahasa yang Roh Kudus da kase, deng lei kita mo basombayang pake tu bahasa yang dari pa kita pe pikiran. Kong kita lei mo manyanyi dari kita pe roh pake tu bahasa yang Roh Kudus da kase, deng lei kita mo manyanyi pake tu bahasa yang dari pa kita pe pikiran. Kalu misalnya ngoni bilang makase pa Tuhan pake tu bahasa yang Roh Kudus da kase, kong tu orang yang ada deng ngoni di situ nyanda mangarti apa tu ngoni da bilang, pasti dorang nyanda mo bilang, “Amin” tu tanda kalu dorang stuju deng apa yang ngoni da bilang itu, lantaran dorang katu nyanda mangarti apa tu ngoni da bilang itu. Soalnya biar lei pe bagus skali ngoni da bilang makase pa Tuhan, mar itu nyanda se kuat tu dorang pe hati lantaran dorang nyanda mangarti itu. Kita bilang makase pa Tuhan Allah, lantaran kwa kita lebe banya da babicara pake tu bahasa yang Roh Kudus da kase daripada ngoni samua. Mar waktu jemaat bakumpul, kita lebe suka bilang lima kata yang orang bole mo mangarti, daripada kita babicara ribuan kata pake bahasa yang Roh Kudus da kase kong orang nyanda mangarti. Sudara-sudara, kalu ngoni mo coba mangarti satu hal, ngoni musti bapikir sama deng orang dewasa pe cara bapikir, jang sama deng tu anak kacili pe cara bapikir. Mar komang kalu itu ada hubungan deng tu hal-hal yang jaha, ngoni musti bapikir sama deng tu anak kacili yang nyanda ja bapikir for beking tu jaha. Di atoran-atoran yang ada di kitab Taurat, ada tulis tu Tuhan Allah da bilang, “Kita mo pake tu orang-orang laeng yang pake bahasa asing for mo babicara pa Kita pe orang-orang ini. Mar biar lei bagitu, dorang tetap nimau mo badengar pa Kita.” Jadi bagini: kalu ada orang yang babicara pake tu bahasa yang Roh Kudus da kase, itu jadi tanda Tuhan pe kuasa for orang yang nyanda percaya, bukang for orang yang so percaya. Mar kalu ada orang yang kase tau tu pesan yang Tuhan da se tau, itu jadi tanda Tuhan pe kuasa for orang yang so percaya, bukang for orang yang nyanda percaya. Jadi kalu samua jemaat bakumpul sama-sama kong tiap orang babicara pake bahasa yang Roh Kudus da kase, trus waktu itu lei maso orang-orang luar jemaat ato orang-orang yang nyanda percaya pa Tuhan, apa tu dorang mo bilang tentang ngoni? Pasti katu dorang mo bilang kalu ngoni itu so nyanda waras. Mar kalu ngoni samua babicara for kase tau tu pesan yang Tuhan da kase tau, kong waktu itu datang orang yang nyanda percaya ato orang yang dari luar jemaat, trus tu orang itu dengar apa tu ngoni samua da bilang, dia itu mo jadi sadar kalu dia so beking dosa deng lei bapikir kalu dia pantas for mo dapa hukum. Dia lei sadar kalu apa yang tasambunyi pa dia pe hati, itu Tuhan Allah tau samua. Jadi dia mo berlutut kong semba deng puji pa Tuhan Allah deng bilang, “Butul skali, Tuhan Allah itu memang ada di tenga-tenga pa ngoni.” Jadi sudara-sudara, apa tu torang musti beking? Kalu ngoni da bakumpul sama-sama for baibada, lebe bae kalu masing-masing dari pa ngoni ambe bagean rupa ini: ada orang yang manyanyi lagu for puji pa Tuhan, yang laeng bamangajar, yang laeng ja se jelaskan sesuatu dari Tuhan, yang laeng babicara pake bahasa yang Roh Kudus da kase, deng lei yang laeng se arti tu bahasa itu for jemaat. Ngoni beking jo samua itu for se kuat tu jemaat pe percaya. Kalu ada orang yang babicara pake bahasa yang Roh Kudus da kase, lebe bae kalu cuma dua orang ato paling banya tiga orang. Kong dorang itu jang skaligus babicara, dorang musti baku-baku ganti babicara, trus musti ada lei orang yang se tau tu arti dari apa yang dorang da bilang itu. Mar kalu nyanda ada orang yang bole se tau tu arti pa jemaat, tu orang yang babicara pake bahasa yang Roh Kudus da kase, lebe bae dia babadiam jo waktu jemaat da bakumpul. Lebe bae dia itu cuma babicara pa dia pe dalam hati, deng lei dia cuma babicara pa Tuhan Allah. Bagitu lei deng tu orang-orang yang bole kase tau tu Tuhan pe pesan. Lebe bae dari pa dorang itu, cuma dua ato tiga orang jo yang babicara for se tau tu Tuhan pe pesan pa jemaat, kong tu orang laeng pikir bae-bae apa tu dorang da bilang itu. Kalu misalnya waktu da baibada itu, ada satu orang yang da dudu di situ kage-kage dapa pesan dari pa Tuhan Allah, tu orang yang samantara da babicara, dia itu musti brenti babicara supaya tu de pe tamang yang dapa tu Tuhan pe pesan itu bole mo se tau itu. Kalu ngoni kase tau tu Tuhan pe pesan deng cara baku-baku ganti rupa itu, samua orang di jemaat bole blajar deng lei ngoni samua bole jadi smangat. Tu orang-orang yang ja kase tau tu Tuhan pe pesan, dorang itu mampu kontrol tu dong pe diri sandiri, dorang tau kapan mo babicara deng kapan mo brenti. Soalnya Tuhan Allah itu Tuhan yang nyanda suka tu ibada yang kacau, Dia suka tu ibada yang taator. Kong sama deng tu Tuhan pe orang-orang ja beking di samua jemaat, tu parampuang-parampuang, dorang itu musti babadiam waktu jemaat da bakumpul for baibada, lantaran dorang nyanda dapa kase for babicara. Dorang musti badengar pa tu pemimpin di situ, itu sama deng tu da tulis di atoran-atoran yang ada di kitab Taurat. Kalu ada dari tu parampuang-parampuang yang mo cari tau satu hal, lebe bae dia tanya itu pa dia pe laki di ruma. Soalnya nyanda sopan for parampuang babicara waktu samantara baibada. Apa ngoni pikir tu Tuhan Allah pe firman itu de pe asal dari pa ngoni? Ato apa ngoni pikir tu Tuhan Allah pe firman itu cuma for ngoni sandiri? Nyanda to? Kalu ada orang yang anggap de pe diri itu nabi tu ja kase tau tu Tuhan pe pesan, ato anggap de pe diri ada karunia dari Roh Kudus, dia itu pasti mo mangaku kalu samua tu kita da tulis ini memang butul-butul Tuhan pe prenta. Mar kalu dia nyanda trima tu kita da bilang, ngoni lei jang trima pa dia. So itu kita pe sudara-sudara, ngoni brusaha jo supaya ngoni bole kase tau tu pesan yang Tuhan da se tau, kong ngoni lei jang larang orang for babicara pake bahasa yang Roh Kudus da kase. Mar waktu ngoni baibada, ngoni beking jo itu deng bae-bae deng lei taator. Sudara-sudara, kita skarang mo se inga pa ngoni tu Kabar Bae tentang Yesus yang kita so perna se tau pa ngoni. Tu Kabar Bae itu yang ngoni so trima kong ngoni tetap kuat percaya deng tu Kabar Bae itu. Kalu ngoni tetap kuat percaya deng tu Kabar Bae yang kita so se tau pa ngoni itu, ngoni mo slamat dari tu hukuman dosa. Mar kalu nyanda, tu ngoni pe percaya itu nyanda ada de pe guna. Soalnya tu hal yang paling penting tu kita da trima, itu lei yang kita so se tau pa ngoni. Tu hal yang paling penting itu bagini: Kristus tu Raja yang se slamat pa manusia mati for tubus torang pe dosa-dosa, itu iko tu da tulis dulu di Kitab Suci. Kong serta orang se kubur pa Dia, Tuhan Allah se hidop ulang pa Dia di hari yang katiga, itu iko tu da tulis dulu di Kitab Suci Abis itu, Dia pi batunjung tu Dia pe diri pa Petrus, trus Dia lei batunjung pa Dia pe dua blas murit. Trus Dia lei pi batunjung skaligus pa lebe dari lima ratus sudara-sudara yang percaya, ada banya dari pa dorang itu yang masi hidop sampe skarang mar ada lei no yang so mati. Abis itu, Dia pi batunjung pa Yakobus, kong lei pa samua rasul. Kong paling akhir, Dia batunjung lei pa kita. Dari antara tu rasul-rasul, kita ini da jadi rasul di waktu yang nyanda da sangka-sangka, itu sama deng tu bayi yang da lahir blum pa de pe waktu. Sebenarnya kita ini nyanda pantas mo bilang rasul. Soalnya dulu kita ini yang ja siksa tu Tuhan Allah pe jemaat. So itu dari samua rasul, so kita ini no tu rasul yang paling hina. Mar Tuhan Allah se tunjung Dia pe bae pa kita sampe kita bole jadi rasul skarang ini, kong tu Dia pe bae yang Dia da se tunjung pa kita itu nyanda sia-sia. Malatare dari antara rasul-rasul, kita tu rasul yang da bakarja kras lebe dari tu rasul-rasul yang laeng. Mar samua tu karja yang kita da beking, itu samua kita da beking bukang deng kita pe kemampuan sandiri, itu bole jadi lantaran Tuhan Allah pe bae pa kita sampe kita mampu for beking tu kita pe karja itu. Jadi sebenarnya nyanda masala kalu kita ato tu rasul-rasul yang laeng tu da kase tau pa ngoni tentang Yesus, yang penting torang so se tau pa ngoni tentang Yesus, trus ngoni lei so jadi percaya. Torang ja se ajar pa orang-orang kalu Kristus da mati kong so hidop ulang. No bagimana mungkin dang ada dari antara pa ngoni yang bilang kalu tu orang yang so mati nyanda mo hidop ulang? Kalu misalnya tu orang mati nyanda mo hidop ulang, bagitu lei dang deng Kristus, pasti lei so nyanda da se hidop ulang. Kong kalu Kristus nyanda da se hidop ulang, itu de pe arti nyanda ada de pe guna tu brita tentang Dia yang torang da se tau, bagitu lei deng tu ngoni pe percaya pa Dia nyanda ada de pe guna. Trus kalu misalnya butul tu orang yang mati nyanda hidop ulang, itu de pe arti torang so basaksi yang nyanda butul tentang Tuhan Allah, lantaran torang ja kase tau pa orang-orang kalu Tuhan Allah da se hidop ulang pa Kristus. Padahal Tuhan Allah nyanda se hidop ulang pa Kristus kalu misalnya butul tu orang mati nyanda se hidop ulang. Soalnya kalu memang butul orang yang mati nyanda mo hidop ulang, tantu lei katu Kristus nyanda da se hidop ulang. Kong kalu memang Kristus nyanda da se hidop ulang, tu ngoni pe percaya pa Kristus itu nyanda ada de pe guna, kong ngoni pe dosa-dosa nyanda dapa ampung. Kong lei kalu memang Kristus nyanda da se hidop ulang, tu orang-orang yang so percaya pa Kristus kong so mati, dorang pe dosa-dosa nyanda dapa ampung kong mo dapa hukuman. So torang ini yang paling dapa sayang dari samua orang kalu misalnya torang baharap pa Kristus cuma for Dia mo tolong slama torang hidop di dunia ini, bukang baharap pa Kristus for torang pe hidop nanti abis mati. Sebenarnya yang butul bagini: Kristus so se hidop ulang dari antara orang mati. Dia itu no yang pertama tu da hidop ulang kong nanti tu orang percaya yang so mati, dorang lei mo se hidop ulang. Soalnya lantaran satu orang pe dosa, tu Adam, kong samua orang musti mati. Bagitu lei lantaran tu satu Orang da beking, tu Yesus, kong tu orang-orang bole mo hidop ulang. Samua orang musti mati lantaran samua orang ada hubungan deng Adam, mar samua orang yang ada hubungan deng Kristus pasti mo hidop ulang. Samua yang mo hidop ulang ada de pe urutan masing-masing: Kristus itu yang pertama da hidop ulang, trus nanti di waktu Dia so datang ulang ka dunia, itu waktu no tu Dia pe orang-orang mo hidop ulang lei. Waktu itu tu dunia mo kiamat, kong Yesus mo se binasa samua yang pegang prenta, samua yang ada kuasa deng yang punya pengaru di dunia ini. Pe klar itu, Dia srahkan tu Dia pe kuasa sbagai Raja pa Tuhan Allah, tu Dia pe Bapa. Soalnya seblum kiamat, Kristus musti tetap baprenta sbagai Raja sampe Tuhan Allah se kala samua tu Dia pe musu-musu, itu sama deng Tuhan Allah taru samua tu musu itu di bawa pa Kristus pe kaki. Tu Tuhan Allah pe musu yang terakhir yang Dia mo se kala, itu no tu maut yang bole se mati orang. Soalnya di Kitab Suci da tulis bagini, “Tuhan Allah se kala samua supaya samua itu ada di bawa Kristus pe kuasa, itu sama deng Dia taru samua di bawa Kristus pe kaki.” Jadi tu da tulis itu jelas for torang kalu samua yang ada di bawa Kristus pe kuasa, nyanda tamaso deng Tuhan Allah sandiri, yang da beking samua ada di bawa pa Kristus pe kuasa. Kong kalu samua so ada di bawa pa Kristus pe kuasa, Kristus sandiri sbagai Anak Allah mo kase Dia pe diri ada di bawa Tuhan Allah pe kuasa. Tuhan Allah itu no yang so se kala samua yang ada for taru di bawa Kristus pe kuasa, deng bagitu Tuhan Allah lebe basar dari samua yang ada. Kong tentang tu orang yang mati da hidop ulang, kalu misalnya tu orang mati nyanda mo hidop ulang, no bagimana dang deng tu orang-orang yang da dapa baptis for orang-orang yang so mati? Apa dang de pe guna dorang da dapa baptis for tu orang-orang yang so mati? Pasti itu samua nyanda ada de pe guna to? Kalu misalnya tu orang mati nyanda mo hidop ulang, no kiapa dang torang musti ambe risiko slalu ja mangada tu macam-macam bahaya lantaran ja kase tau tu Kabar Bae tentang Yesus? Sudara-sudara, tiap hari kita ini ja mangada tu siksa sampe amper-amper mo mati, itu sama deng tiap hari kita da baku mangada deng maut, kong tu kita da bilang itu butul. Kita tahang ja mangada tu siksa lantaran kita lei bangga pa ngoni yang so jadi percaya pa Kristus Yesus tu torang pe Tuhan. Dulu di sini, di Efesus, kita da mangada tu siksa lantaran tu kita pe musu-musu, itu bole mo se sama deng kita da berjuang malawang tu binatang-binatang buas. Kong kalu misalnya tu orang percaya yang so mati nyanda mo hidop ulang, nyanda ada de pe guna dang tu kita pe karja ini, deng lei lebe bae mari jo dang torang beking sama deng tu orang da bilang ini, “Mari jo skarang torang bapesta makang deng minum, lantaran eso torang so mo mati.” Jang ngoni tapengaru for iko tu pikiran yang sala. Soalnya ada tu kata-kata bagini, “Kalu bergaul dekat deng orang yang ja beking tu nyanda bagus, itu bole mo pengaruhi tu orang yang ja beking tu bagus jadi beking yang nyanda bagus.” Jadi skarang ngoni musti butul-butul sadar, ngoni jang beking lei dosa. Soalnya ada dari pa ngoni yang masi blum kanal pa Tuhan Allah. Kita bilang ini supaya ngoni jadi malo. Ada orang yang mungkin mo batanya bagini, “Bagimana lei kong orang mati mo hidop ulang? Dorang dang mo hidop ulang deng badan yang bagimana?” Pe biongo skali tu orang yang da batanya rupa itu. Kalu torang mo batanang bibit, tu bibit itu nyanda mo batumbu kalu dia nyanda mo tambung lebe dulu di tana, itu sama deng tu bibit da se mati lebe dulu baru dia hidop ulang. Kong tu bibit yang torang da tanang itu, itu bukang tanaman yang memang so jadi, mar cuma de pe bibit rupa tu bibit gandum ato bibit-bibit laeng. Tu bibit-bibit itu masing-masing nanti mo batumbu deng de pe model sandiri, kong yang da kase tu model itu Tuhan Allah sandiri, iko Dia pe mau. Bagitu lei deng samua yang hidop ada de pe model masing-masing. Tu manusia pe model baku beda dari tu binatang, kong baku beda dari tu burung deng lei baku beda dari tu ikang. Bagitu lei, tu benda-benda yang di langit itu luar biasa, deng tu benda-benda yang ada di bumi lei luar biasa. Dua-dua benda ini luar biasa, mar dua-dua itu pe model baku beda. Tu benda-benda di langit, tu matahari, bulan deng bintang-bintang, masing-masing pe luar biasa baku-baku beda. Kong tu bintang-bintang lei baku-baku beda tu dong pe luar biasa, tu bintang yang satu pe luar biasa baku beda deng tu bintang yang laeng pe luar biasa. Bagitu lei no tu mo jadi deng tu orang yang so mati kong hidop ulang. Tu orang itu pe badan waktu dia masi ada di dunia ini nyanda mo batahang lama, itu bole mo se sama deng tu bibit yang orang da tambung di tana tu nyanda mo batahang for slama-lamanya. Mar tu badan yang Tuhan mo kase nanti waktu torang hidop ulang, tu badan itu mo batahang for slama-lamanya. Waktu orang mati kong mo kubur, tu badan itu nyanda batahang kong mo jadi busu. Mar nanti waktu Tuhan se hidop ulang pa orang itu, tu badan itu so jadi badan yang kuat deng luar biasa. Tu badan yang da se kubur, itu badan yang torang pake di dunia ini. Mar tu badan yang nanti Tuhan kase waktu orang hidop ulang, itu badan yang dari Roh Kudus yang for torang di sorga. Kalu ada badan yang dari dunia ini, tantu katu ada lei badan yang dari Roh Kudus. Itu sama deng tu da tulis di Kitab Suci, “Adam itu manusia pertama yang Tuhan da beking, Tuhan beking Adam itu jadi hidop.” Kong Kristus bole mo bilang tu Adam yang terakhir, trus Dia tu bole se hidop kekal pa manusia. Tu torang pe badan yang ada skarang ini, itu badan yang torang pake di dunia ini. Nanti kalu Tuhan so se hidop ulang pa torang, baru torang dapa tu badan yang dari Roh Kudus. Tu manusia yang pertama Tuhan da beking dari abu, de pe asal dari dunia ini. Mar Kristus tu manusia yang kadua, Dia pe asal dari sorga. Samua manusia yang de pe asal dari dunia ini, de pe badan sama deng tu manusia pertama yang Tuhan da beking. Mar tu manusia yang nanti mo hidop di sorga, dorang pe badan mo sama deng Dia yang dari sorga. Skarang torang pe badan sama deng tu manusia pertama tu da beking dari abu, mar nanti torang pe badan mo sama deng Dia yang dari sorga. Sudara-sudara, ini tu kita mo bilang pa ngoni: torang pe badan skarang ini yang dari dara deng daging nimbole mo maso di tampa tu Tuhan Allah Berkuasa sbagai Raja, lantaran tu badan yang mo ancor ini nimbole mo ada di tampa yang kekal. Ngoni tarukira jo bae-bae, kita mo se tau pa ngoni satu rahasia: nyanda samua dari torang tu mo mati, mar samua torang pasti mo bruba, bae itu yang so mati ato tu blum mati. Soalnya waktu tu trompet yang terakhir babunyi, tu orang-orang mati mo hidop ulang, trus dorang so nyanda mo mati lei deng tu orang-orang yang masi hidop, dorang pe badan mo bruba trus nyanda mo mati lei. Ini samua mo jadi dalam waktu yang capat skali, waktu tu trompet babunyi. Soalnya torang pe badan yang bole mo mati deng mo ancor ini, nanti musti bruba jadi so nyanda lei mo mati deng nyanda mo ancor. Kong serta tu torang pe badan ini bruba jadi badan yang nyanda mo mati deng yang nyanda mo ancor, apa yang da tulis di Kitab Suci so jadi. Bagini tu da tulis, “Tuhan so se kala tu maut pe kuasa, so nyanda ada lei yang mo mati. Hei maut, ngana kasiang so kala! Hei maut, ngana kasiang so nyanda ada lei kuasa, ngana pe bisa so nyanda ada lei.” Tu maut pe bisa itu dosa yang bole beking orang mati. Kong tu orang yang beking dosa musti dapa hukuman lantaran so langgar tu atoran-atoran di Kitab Taurat. Mar torang bilang makase pa Tuhan Allah, Dia yang da se bebas pa torang dari hukuman dosa, itu sama deng Dia so se menang pa torang. Dia se menang pa torang lewat apa yang Yesus Kristus tu torang pe Tuhan da beking di kayu salib. So itu kita pe sudara-sudara yang kita sayang, ngoni pe percaya musti tetap kuat, jang se biar ada yang beking ngoni jadi ragu deng tu ngoni pe percaya itu. Ngoni slalu beking jo deng sunggu-sunggu tu karja yang Tuhan so kase pa ngoni lantaran ngoni tau kalu tu ngoni pe karja itu nyanda mo sia-sia. Kong skarang, kita mo bicara tentang doi yang da kumpul for kase pa Tuhan pe orang-orang yang ada di Yerusalem, supaya ngoni beking yang sama iko apa yang kita so se tunjung pa jemaat-jemaat yang ada di daera Galatia. Di hari pertama di tiap minggu, lebe bae ngoni masing-masing simpang akang sadiki doi yang ada iko tu doi yang ngoni da dapa. Ngoni beking bagitu supaya jang waktu kita datang baru ngoni mo bakumpul tu doi. Serta kita so sampe pa ngoni, kita mo utus bebrapa orang yang ngoni so pili for mo bawa tu doi yang ngoni so kumpul itu ka Yerusalem. Nanti kita beking surat pengantar for dorang mo bawa ka sana. Kong kalu memang bagus for kita mo pigi ka sana, kita lei nanti mo pigi sama-sama deng dorang. Kita mo datang pa ngoni, mar kita lebe dulu mo lewat di daera Makedonia lantaran kita memang musti lewat di sana. Kong di Korintus, kita stou mo tinggal sadiki lama deng ngoni di situ ato tare stou kita mo tinggal slama oras dingin di situ, supaya abis oras dingin ngoni bole mo tolong akang pa kita for mo se trus tu kita pe perjalanan ka mana jo kita mo pigi. Soalnya kita nimau kalu kita mo lia pa ngoni skarang mar cuma nyanda lama, kita harap supaya kita bole mo tinggal sadiki lama deng ngoni, kalu itu memang Tuhan pe mau. Mar kita tetap mo tinggal dulu di Efesus sampe tu hari raya Pentakosta. Soalnya di Efesus ini ada banya kesempatan for kita mo beking tu Tuhan pe karja yang basar deng penting, biar lei di sini ada banya yang malawang pa kita. Kalu Timotius datang, ngoni trima jo pa dia deng bae-bae supaya dia nyanda ada rasa tako waktu ada deng ngoni, lantaran dia lei ja beking Tuhan pe karja sama deng kita. So itu, jang ada dari antara pa ngoni yang pandang enteng pa dia, mar ngoni musti tolong pa dia, supaya dia bole mo kase trus de pe perjalanan deng slamat sampe dia bole datang ulang pa kita. Soalnya kita da tunggu pa dia di sini sama-sama deng tu sudara-sudara yang percaya yang laeng. Kong tentang Apolos tu torang pe sudara yang percaya, kita so ulang-ulang minta deng sangat pa dia, supaya dia bole sama-sama deng sudara-sudara yang percaya yang laeng for pigi pa ngoni. Mar skarang dia sama skali nimau mo pigi, cuma nanti kalu ada kesempatan yang bae baru dia mo pigi pa ngoni. Ngoni musti hati-hati, ngoni musti tetap bapegang kuat pa ngoni pe percaya! Kase kuat tu ngoni pe diri kong brani jo! Samua yang ngoni beking, ngoni musti beking itu deng sayang. Sudara-sudara, ngoni samua so kanal pa Stefanus. Dia deng de pe kluarga itu yang pertama tu da jadi percaya pa Yesus di daera Akhaya, kong dorang so kase dong pe diri for layani tu Tuhan pe orang-orang. Kong kita se nasehat pa ngoni, supaya ngoni dengar-dengaran pa tu orang-orang yang sama deng dorang itu. Ngoni lei dengar-dengaran pa tu orang-orang laeng yang da karja sama-sama deng dorang, tu orang-orang yang so karja kras for layani tu orang percaya. Kita snang skali lantaran tu Stefanus, Fortunatus deng Akhaikus so datang kamari. Deng dorang datang kamari, itu sama jo deng dorang da ganti pa ngoni di sini. Dorang itu beking kuat kita pe hati deng tantu lei ngoni pe hati. Ngoni musti hormat tu orang-orang yang sama deng dorang itu. Tu jemaat-jemaat di daera Asia da kirim salam for ngoni. Akwila deng de pe bini Priskila, deng tu jemaat yang da bakumpul pa dorang pe ruma da kirim salam banya-banya for ngoni yang sama-sama percaya pa Tuhan. Kong samua sudara-sudara yang di sini da kirim salam lei for ngoni. Trus kalu ngoni deng ngoni baku dapa, ngoni baku kase salam sayang jo satu deng laeng. Kita da tulis ini deng kita pe tangan sandiri: salam dari kita Paulus. Sapa jo yang nyanda sayang pa Tuhan, dia itu mo dapa kutuk. Maranata! Tuhan datang jo. Kita minta supaya Tuhan Yesus se tunjung trus tu Dia pe bae pa ngoni. Kita sayang trus pa ngoni samua yang so sama-sama percaya pa Kristus Yesus. Ni surat dari kita, Paulus. Kita ini Kristus Yesus pe rasul tu Dia pe utusan lantaran Tuhan Allah pe mau. Ni surat lei dari Timotius, dia itu tu torang pe sudara yang percaya. Surat ini for ngoni tu Tuhan Allah pe jemaat di Korintus, deng lei for samua Tuhan pe orang-orang tu ada di sluru daera Akhaya. Torang minta supaya Tuhan Allah tu torang pe Bapa deng lei Tuhan Yesus Kristus kase tunjung tu bae pa ngoni deng lei beking ngoni hidop deng tenang. Puji jo pa Tuhan Allah, tu Bapa dari Tuhan Yesus Kristus. Dia itu Bapa yang ja se tunjung Dia pe rasa kasiang pa torang deng Dia lei slalu se kuat pa torang samua. Dia yang se kuat pa torang pe hati waktu torang da dapa macam-macam pendritaan. Dia se kuat bagitu pa torang supaya torang lei bole mo bantu se kuat orang laeng pe hati yang dapa tu macam-macam pendritaan. Torang bole se kuat pa dorang sama deng tu Tuhan Allah da se kuat pa torang. Torang so banya da rasa tu pendritaan yang Kristus da rasa, mar torang lei banya dapa tu kekuatan dari Kristus waktu torang dapa macam-macam pendritaan. Kalu torang dapa pendritaan, Tuhan pake tu torang pe pendritaan itu supaya torang bole se kuat pa ngoni, kong ngoni bole mo dapa slamat dari hukuman dosa. Kalu Tuhan se kuat pa torang, tu kekuatan yang torang da dapa itu bole torang pake for se kuat pa ngoni. Deng bagitu ngoni bole tetap batahang percaya biar lei dapa pendritaan, tu pendritaan yang sama deng tu torang lei perna da rasa. So itu torang baharap deng yakin kalu ngoni mo tetap batahang percaya pa Tuhan, lantaran torang tau kalu ngoni so mendrita sama deng tu torang da rasa, jadi pasti lei Tuhan se kuat pa ngoni sama deng tu torang da rasa. Sudara-sudara, torang mo se tau pa ngoni tentang tu pendritaan yang torang da rasa di daera Asia. Tu pendritaan yang torang da tanggong pe basar deng pe brat, sampe torang so nyanda mampu mo tahang itu, torang rasa tong pe hidop so nyanda ada harapan. Malatare torang rasa kalu torang ini sama jo deng so dapa hukuman mati. Itu samua jadi supaya torang nimbole percaya pa tong pe diri sandiri, mar torang cuma bole percaya pa Tuhan Allah, so Dia yang ada kuasa for se hidop ulang pa orang-orang yang so mati. Dia so se slamat pa torang dari tu hal-hal yang amper-amper beking mati pa torang, kong torang lei baharap deng yakin pa Dia kalu Dia mo se slamat ulang pa torang dari tu hal-hal bagitu. Sudara-sudara, ngoni lei musti bantu pa torang deng cara basombayang akang jo trus pa torang. Kalu ngoni beking bagitu, itu bantu pa torang lantaran Tuhan mo dengar tu ngoni pe sombayang deng Tuhan mo se tunjung Dia pe bae deng tolong pa torang. Jadi lantaran tu ngoni pe sombayang itu, nanti banya orang yang mo bilang makase pa Tuhan lantaran Dia so dengar tu orang banya pe sombayang itu. Torang rasa bangga lantaran torang pe kalakuan pa orang-orang di dunia ini jujur deng torang pe tujuan butul-butul tulus dari Tuhan Allah, lebe-lebe lei torang beking itu waktu torang da sama-sama deng ngoni. Torang tau itu butul lantaran torang pe hati nurani bole jadi saksi tentang itu. Samua tu torang da beking itu nyanda iko manusia pe bijaksana, mar itu lantaran Tuhan Allah pe bae yang beking torang mampu for beking tu samua itu. Torang cuma da tulis pa ngoni apa yang ngoni bole baca deng mangarti akang. Kita harap deng yakin nanti ngoni mo mangarti samua ini deng butul. Mar biar lei skarang ngoni cuma mangarti sadiki tentang torang, kita harap nanti di hari waktu Tuhan Yesus datang ulang, ngoni mo bicara bangga tentang torang, sama deng torang lei mo bicara bangga tentang ngoni. Kita yakin kalu ngoni rasa bangga deng torang, so itu kita lei ada rencana for mo pigi dua kali pa ngoni supaya ngoni bole mo rasa dua kali tu Tuhan pe bae dari tu kita pe kunjungan itu. Jadi kita rencana waktu kita mo pigi ka daera Makedonia, kita mo basingga pa ngoni, kong abis itu baru kita se trus tu kita pe perjalanan ka Makedonia. Dari Makedonia kita mo babale ulang pa ngoni, supaya ngoni bole bantu tu kita pe perlu for se trus tu kita pe perjalanan ka daera Yudea. Mar biar lei kita blum sempat beking tu kita pe rencana itu, ngoni jang anggap kalu kita da ragu-ragu for beking tu kita pe rencana itu. Kita nyanda beking rencana iko cara bapikir yang duniawi. Kita nyanda ja bilang ‘iyo’ kong waktu itu lei pikir ‘nyanda’. Kita kasiang nyanda bagitu. Tuhan Allah itu setia deng tu Dia pe janji, bagitu lei deng torang, torang setia deng tong pe janji pa ngoni. Jadi torang nyanda bilang ‘iyo’ kong waktu itu lei torang pikir ‘nyanda’. Soalnya kita, Silas deng Timotius, torang so se tau pa ngoni tentang Yesus Kristus, tu Anak Allah. Kong Yesus Kristus beking apa tu Dia ja bilang. Dia nyanda bilang ‘iyo’, kalu Dia nyanda mo beking, mar Yesus itu ja beking apa yang Dia bilang ‘iyo’. Soalnya samua tu Tuhan Allah da janji, itu samua Yesus so beking gnap. So lantaran itu kong torang bilang Yesus itu, “Amin, pasti butul”. Kong deng torang bilang kalu Yesus itu butul, torang so puji deng hormat pa Tuhan Allah. Kong Tuhan Allah tu da beking torang deng ngoni jadi kuat percaya pa Yesus Kristus, Dia lei yang so pili pa torang. Tuhan Allah itu yang da kase tu Roh Kudus pa torang pe hati yang jadi jaminan for torang bole mo trima nanti samua tu Dia da janji pa torang. Tu Roh Kudus itu sama deng metrai for se tunjung kalu torang ini Dia punya. Tuhan Allah tau kalu kita nyanda da jadi datang pa ngoni di Korintus lantaran kita nimau datang kong togor kras pa ngoni. Tuhan Allah itu tu kita pe saksi, Dia tau tu kita pe isi hati itu, kalu kita nyanda jadi datang pa ngoni di Korintus lantaran kita nimau mo kras pa ngoni. Torang bilang bagitu bukang mo prenta pa ngoni tentang tu ngoni pe percaya, lantaran ngoni pe percaya pa Kristus so kuat. Torang pe tujuan supaya torang bole mo karja sama-sama deng ngoni supaya lei ngoni pe hati bole rasa snang. Jadi kita so ambe keputusan supaya kita nyanda mo pigi ulang pa ngoni for togor kong beking ngoni jadi sedi ulang. Soalnya kalu kita beking ngoni pe hati jadi sedi, so nyanda ada lei dang yang bole mo beking kita pe hati jadi snang, lantaran ngoni yang mustinya beking snang pa kita so jadi sedi lantaran kita da togor. So itu no kita tulis tu surat yang lalu itu supaya kita togor pa ngoni di surat, deng bagitu nanti kalu kita datang ulang pa ngoni di Korintus, ngoni nyanda mo beking kita pe hati jadi sedi lantaran da lia tu ngoni pe kalakuan yang nyanda bagus. Soalnya sebenarnya ngoni itu orang-orang yang mustinya beking kita pe hati jadi snang. Kita yakin kalu kita snang, ngoni lei pasti snang. Soalnya waktu kita tulis tu surat yang lalu itu pa ngoni, waktu itu kita pe hati rasa kuatir skali, sedi, deng banya lei manangis. Kita nyanda tulis tu surat itu for mo beking tu ngoni pe hati jadi sedi, nyanda kasiang, mar supaya ngoni tau kalu pe basar tu kita pe sayang pa ngoni samua. Ada orang dari pa ngoni pe jemaat yang da beking dosa. Tu dia da beking itu beking sedi pa kita, mar bukang cuma kita, tu dia da beking itu beking sedi lei pa ngoni samua ato tare bebrapa orang dari pa ngoni. Kita nyanda da se lebe-lebe ini samua. Kong for tu orang yang beking torang samua sedi, banya dari pa ngoni yang so se hukum pa dia, kong so cukup jo tu hukuman itu for dia. Jadi skarang, ngoni musti kase ampung pa dia deng se kuat lei pa dia. Deng ngoni beking bagitu, dia nyanda mo sedi deng putus asa. So itu no kita se nasehat pa ngoni, supaya ngoni se tunjung ulang kalu ngoni memang butul-butul sayang pa dia. Soalnya kita tulis surat yang lalu tentang ngoni musti se hukum tu orang itu deng maksut mo tes pa ngoni kalu ngoni beking itu samua ato nyanda. Kalu ngoni se ampung tu orang itu, kita lei se ampung pa dia. Kalu memang ada yang kita musti se ampung, kita pasti se ampung. Kita se ampung pa tu orang itu for ngoni pe bae, kong Kristus jadi kita pe saksi kalu kita so se ampung pa dia. Torang se ampung akang pa dia supaya tu setang pe bos nyanda dapa kesempatan for se bodok pa torang, lantaran torang tau tu dia pe rencana jaha. Waktu kita sampe di Troas for se tau tu Kabar Bae tentang Kristus, kita lia kalu Tuhan so buka akang jalang for kita se tau tu Kabar Bae di sana. Mar kita pe hati nyanda rasa tenang di situ, lantaran kita nyanda da baku dapa deng Titus tu kita pe sudara yang percaya. So lantaran itu no kong kita minta permisi dari sana kong brangkat ka daera Makedonia. Mar kita bilang makase pa Tuhan Allah yang slalu pimpin pa torang tu percaya pa Kristus supaya torang bole slalu menang dari tu kuasa jaha. Tuhan Allah pake pa torang for pigi kamana-mana supaya torang bole se tau pa orang-orang tu Kabar Bae tentang Dia kong dorang bole kanal pa Dia. Waktu dorang dengar tu Kabar Bae itu, itu sama deng dorang da ciong tu bobou wangi yang dari pa torang. Soalnya di muka pa Tuhan Allah, so torang ini no yang sama deng tu bobou wangi itu, tu bobou wangi yang dari pa Kristus di antara tu orang-orang yang mo dapa slamat dari hukuman dosa, deng bobou kematian di antara tu orang-orang yang mo binasa. For orang-orang yang mo binasa lantaran nyanda percaya, menurut dorang, torang ini sama deng bobou kematian lantaran torang se tau kalu Tuhan Allah mo se binasa pa dorang. Mar for orang-orang yang mo dapa hidop kekal lantaran percaya, menurut dorang, torang ini sama deng tu bobou wangi lantaran torang se tau pa dorang tentang tu Kabar Bae yang mo beking dorang dapa hidop kekal. No kong sapa dang yang mampu mo beking tu karja ini? Pasti nyanda ada to? Torang ini kasiang nyanda sama deng tu banya orang laeng yang ja kase tau tu Tuhan Allah pe firman cuma supaya dorang bole mo dapa untung dari situ. Mar torang nyanda bagitu, torang ja se tau tu firman, kong torang ja se tau tu firman deng hati yang tulus. Tuhan Allah sandiri tu da kase tugas itu pa torang. Torang ini percaya pa Kristus kong Tuhan Allah da lia pa torang waktu torang se tau tu firman pa orang-orang. Jang ngoni kira kalu torang so mulai lei bicara se bangga tentang tong pe diri sandiri. Ngoni tau kalu torang ini nyanda perlu bawa surat rekomendasi pa ngoni ato dapa rekomendasi dari pa ngoni sama deng tu orang laeng ja beking. Ngoni itu no tu da jadi torang pe surat rekomendasi, lantaran orang bole lia tu tong pe hasil karja dari pa ngoni pe hidop yang bagus itu. Kong itu so tatulis pa torang pe hati lantaran torang sayang pa ngoni kong samua orang bole kanal deng bole mo baca itu. Ngoni pe hidop yang bagus itu se tunjung kalu Yesus Kristus da karja pa ngoni pe hati, kong ngoni ini no tu torang pe hasil playanan. Jadi ngoni itu kurang sama jo deng surat yang Kristus da tulis. Kong Kristus nyanda tulis deng tinta ato nyanda da tulis di batu sama deng dulu waktu tu atoran-atoran yang Tuhan da kase pa Musa da tulis lei di batu, mar Dia da tulis itu samua pa ngoni pe hati kong Dia tulis itu pake Tuhan Allah yang Hidop pe Roh. Torang brani bilang tentang tu torang pe karja pa ngoni itu lantaran torang pe percaya pa Tuhan Allah, kong samua itu bole jadi lantaran tu Yesus Kristus da beking for torang. Torang nyanda ada alasan apa-apa for bilang kalu torang sandiri mampu for beking ni karja, mar Tuhan Allah yang beking torang jadi mampu for beking ni karja. Dia itu no yang beking torang mampu jadi orang-orang yang ja beking tu Dia da suru for se tau tu perjanjian yang baru pa manusia, tu perjanjian antara Tuhan Allah deng manusia. Tu perjanjian yang baru itu yang bakarja lewat Tuhan pe Roh kong beking manusia bole mo dapa tu hidop kekal, tu perjanjian yang baru itu bukang tu atoran-atoran di kitab Taurat yang da tatulis itu yang nyanda se slamat pa manusia dari hukuman dosa. Dulu Tuhan tulis tu atoran-atoran Taurat di batu kong kase itu pa Musa. Waktu itu, tu orang-orang Israel nyanda mampu mo haga tu Musa pe muka, lantaran Tuhan Allah pe kuasa yang luar biasa beking tu Musa pe muka bacahaya. Mar tu kuasa yang luar biasa itu cuma nyanda lama, so itu tu cahaya yang ada pa Musa pe muka mulai bailang sampe so nyanda ada sama skali. Kong biar lei tu atoran-atoran itu bole beking manusia mati lantaran dorang nyanda mampu iko tu atoran-atoran itu, Tuhan Allah pe kuasa yang luar biasa tu da beking Musa pe muka bacahaya dapa lia memang luar biasa pa Musa pe muka waktu itu. Jadi kalu tu Tuhan Allah pe kuasa yang luar biasa so bagitu de pe hebat waktu da kase tu atoran-atoran itu, pasti katu lebe basar lei no tu kuasa yang da sama-sama deng tu perjanjian yang baru itu yang bakarja lewat Tuhan pe Roh. Tu atoran yang Tuhan Allah da kase pa Musa itu se tunjung kalu manusia da beking dosa kong manusia musti dapa hukum, mar biar lei bagitu tu kuasa yang ada deng tu atoran itu tetap luar biasa. Cuma katu, tantu lebe luar biasa lei no tu kuasa dari pa Tuhan Allah tu da sama-sama deng tu perjanjian yang baru itu, tu kuasa itu no yang bakarja bantu pa manusia supaya Tuhan Allah beking orang jadi butul di muka pa Dia. Sebenarnya dulu tu kuasa yang ada deng tu atoran itu memang luar biasa, mar skarang tu kuasa itu so nyanda lei luar biasa kalu mo se banding deng tu kuasa dari Tuhan Allah yang da sama-sama deng tu perjanjian yang baru tu da bakarja pa manusia. Soalnya hele tu atoran-atoran di kitab Taurat yang cuma for samantara, pe luar biasa tu kuasa yang da sama-sama deng tu atoran itu. No apa lei tare deng tu kuasa yang da sama-sama deng tu perjanjian yang baru itu tu nyanda perna mo ilang, pasti katu jao lebe basar de pe kuasa lei. So lantaran torang samua baharap deng yakin pa tu perjanjian yang baru itu sampe torang brani skali for kase tau tu Kabar Bae pa orang-orang. Torang so nyanda usa beking sama deng Musa. Musa itu da tutu de pe muka deng kaeng supaya tu orang-orang Israel nyanda lia tu cahaya yang dari Tuhan pe kuasa tu mulai da bailang dari pa de pe muka. Tu orang-orang Israel dulu, dorang itu pe pikiran so jadi tumpul, dorang nyanda mangarti maksut dari tu atoran-atoran itu, itu sama deng ada kaeng yang da tutu tu dong pe kapala. Kong sampe skarang ini, kalu dorang baca tu atoran itu, dorang nyanda mangarti tu dia, itu so kurang sama jo deng masi ada yang da tutu tu dong pe pikiran. Soalnya cuma kalu dorang percaya pa Kristus, itu baru dorang bole mangarti deng butul. Malatare sampe ni hari, tiap kali dorang baca tu atoran-atoran di kitab Taurat tu Musa da tulis, ada sesuatu yang da tutu tu dong pe pikiran sampe dorang nyanda mangarti tu dorang da baca itu, itu sama deng ada kaeng yang da tutu tu dong pe kapala. Mar kalu ada jo yang bertobat kong jadi percaya pa Tuhan, pasti dorang pe pikiran yang tumpul itu mo tabuka. Soalnya Tuhan itu Roh. Kong kalu Tuhan pe Roh itu ada pa orang pe hati, tu orang itu mo jadi bebas dari tu atoran-atoran itu, tu atoran yang for torang brat mo beking. Kong for torang samua yang percaya, so nyanda ada lei yang da tutu tu torang pe pikiran. Trus orang bole lia tu Tuhan Allah pe kuasa yang luar biasa ada pa torang, torang ini sama deng kaca yang se pantul tu Tuhan pe luar biasa. Tuhan slalu roba tu torang pe hidop supaya torang mo jadi sama deng Dia, kong tamba hari torang lei mo jadi luar biasa. Tuhan yang da beking torang jadi bagitu, so Dia no tu Roh Kudus. Tuhan Allah so se tunjung Dia pe rasa kasiang pa torang, Dia so pili pa torang for se tau pa orang-orang tentang tu perjanjian yang baru, so itu torang nyanda perna putus asa beking tu torang pe karja. Kong torang so ambe keputusan for nyanda pake tu cara-cara yang besae for se tau tu Kabar Bae, tu cara-cara yang cuma beking malo pa torang. Trus torang lei nyanda ja beking bodok pa orang deng torang nyanda se putar bale tu Tuhan Allah pe firman, mar torang se tau deng jelas pa orang tu butul yang iko Tuhan pe mau. Kong deng torang beking bagitu, samua orang bole nilai pa dorang pe hati kalu tu brita yang torang da se tau itu butul ato nyanda. Kalu ada orang yang masi lei nyanda mo mangarti deng tu Kabar Bae dari Tuhan yang torang da se tau itu, itu sama deng tu Kabar Bae itu tatutu for dorang. Itu bukang lantaran torang nyanda se tau deng jelas pa dorang, mar itu lantaran dorang nimau mo percaya jadi dorang tu mo binasa. Tu orang-orang yang nyanda percaya itu, setang pe bos so kuasai. Setang pe bos itu yang da kuasai ni dunia. Dia so tutu tu dorang pe pikiran sampe dorang nyanda mangarti deng tu Kabar bae, jadi dorang nimbole lia lei tu trang dari tu Kabar Bae yang mo se trang tu dorang pe hati. Tu Kabar Bae itu tentang Kristus yang luar biasa, tu Kristus yang sama persis deng Tuhan Allah. Tu torang da se tau bukang tentang torang pe diri sandiri mar tentang Yesus Kristus tu Tuhan yang torang ja iko akang. Kong torang beking tong pe diri sama deng budak for layani pa ngoni, lantaran torang ini ja beking Yesus pe mau. Dulu Tuhan Allah da bilang bagini, “Dari glap mo muncul trang!” Kong skarang so Dia no tu da kase Dia pe trang for bacahaya pa torang pe hati, supaya torang bole tau tentang Dia pe luar biasa. Kong skarang tu Tuhan Allah pe luar biasa itu, torang bole lia pa Yesus Kristus pe hidop. Tu Kabar Bae yang Tuhan da se percaya akang pa torang, tu Kabar Bae itu bole mo se sama deng tu harta yang mahal. Kong torang yang da se tau tu Kabar Bae itu, torang bole mo se sama deng tu tampa simpang yang dari tana liat tu gampang pica. Deng bagitu, itu jelas skali dapa lia kalu tu kuasa yang basar yang ada pa torang itu memang dari pa Tuhan Allah, bukang dari pa torang sandiri. Torang ja dapa tindas di samua hal, mar torang nyanda ancor. Torang ja dapa tu susa sampe nintau mo beking bagimana, mar torang nyanda perna putus asa. Torang dapa siksa, mar Tuhan nyanda se biar torang sandiri. Torang dapa pukul sampe rubu, mar torang nyanda mati. Torang nyanda perna bebas dari bahaya yang bole mo beking mati pa torang sama deng tu Yesus da rasa, deng bagitu orang laeng bole mo lia kalu Yesus so hidop ulang lantaran dorang bole lia tu Dia pe kuasa pa torang pe diri. Soalnya slama torang masi da hidop, slalu ada orang-orang yang mo cari bunung pa torang lantaran torang da iko pa Yesus. Deng dorang beking bagitu, itu jadi jelas for samua orang kalu Yesus so hidop ulang, lantaran dorang bole lia Dia pe kuasa pa torang pe badan yang nyanda mo batahang lama ini. Jadi torang slalu ja mangada tu orang-orang yang mo cari bunung pa torang, itu sama deng torang slalu ja mangada tu maut. Mar biar lei torang mangada tu maut, yang penting ngoni bole dapa tu hidop kekal. Di Kitab Suci da tulis tentang satu orang yang da bilang bagini, “Kita percaya, so lantaran itu kita brani babicara”. Jadi bagitu lei no katu deng torang, so lantaran torang percaya kong torang brani babicara. Soalnya torang tau kalu Tuhan Allah tu da se hidop ulang pa Tuhan Yesus, Dia lei nanti mo se hidop ulang pa torang for hidop sama-sama deng Yesus. Dia mo se kumpul pa torang deng ngoni sama-sama di muka pa Dia. Torang dapa samua tu siksa ini waktu se tau tu Kabar Bae, itu samua for ngoni pe bae, deng lei supaya Tuhan Allah bole mo se tunjung tu Dia pe bae pa lebe banya orang, trus lebe banya lei orang yang mo bilang makase pa Tuhan Allah, kong samua ini beking Tuhan Allah dapa puji deng dapa hormat. So itu torang nyanda perna putus asa, biar lei tu torang pe badan lebe hari lebe nyanda kuat deng lei saki, mar tu torang pe hati lebe hari lebe tatamba kuat. Tu pendritaan yang torang da rasa skarang ini, itu cuma ringan deng lei cuma for samantara waktu. Mar kalu torang tetap batahang deng tu pendritaan, itu beking torang siap supaya nanti torang mo trima yang luar biasa di sorga for slama-lamanya. Kong tu luar biasa yang torang mo trima itu jao lebe basar kalu mo se banding deng tu pendritaan yang torang da rasa. Soalnya torang nyanda ja tarukira deng tu hal-hal yang bole mo dapa lia deng mata yang di dunia ini, lantaran itu kwa cuma for samantara waktu. Mar tu torang ja tarukira, itu hal-hal yang nimbole mo dapa lia deng mata yang ada di sorga, tu hal-hal itu no yang mo ada for slama-lamanya. Torang pe badan di dunia ini sama deng ruma yang torang da tinggal akang cuma for samantara waktu. Kong torang tau, waktu torang mati, itu de pe arti tu torang pe ruma ini ancor, mar Tuhan Allah so sadia akang for torang satu ruma yang baru di sorga. Tu ruma di sorga itu, bukang manusia yang da beking mar Tuhan yang da beking, kong itu mo batahang for slama-lamanya. Kong slama torang masi hidop di dunia ini torang mengelu lantaran torang mendrita deng torang pe badan skarang ini, so itu torang suka mo dapa badan baru tu ada di sorga. Torang suka nanti waktu torang mati, torang mo dapa tu torang pe badan yang baru. Deng bagitu tu torang pe jiwa mo ada badan. Soalnya kalu torang masi hidop pa torang pe badan di dunia ini, torang mengelu lantaran tu beban yang brat tu torang da rasa pa torang pe badan yang lama ini. Cuma biar torang mengelu, torang bukang baharap mo mati supaya torang se lapas tu torang pe badan skarang, mar torang suka supaya torang dapa badan yang baru supaya torang pe jiwa ada badan yang baru, itu bole mo se sama deng tu orang yang da dapa baju baru. Torang suka tu torang pe badan di dunia tu nyanda batahang ini taganti deng badan yang mo batahang for slama-lamanya. Kong Tuhan Allah sandiri yang so se siap pa torang supaya torang bole mo dapa tu badan yang baru itu, so Dia tu da kase pa torang tu Dia pe Roh supaya itu bole jadi jaminan kalu memang torang mo dapa tu badan yang baru itu. So lantaran torang tau kalu torang mo dapa tu badan yang baru, torang pe hati slalu kuat. Torang tau lei kalu slama torang masi pa torang pe badan yang lama ini, torang blum mo tinggal sama-sama deng Tuhan di sorga. Soalnya torang hidop di dunia ini, torang hidop iko yang torang percaya, torang bukang hidop cuma iko apa yang torang bole mo lia. Jadi torang pe hati tetap kuat, kong torang lebe suka se tinggal tu tong pe badan di dunia ini trus tinggal sama-sama deng Tuhan di sorga. So itu no torang slalu brusaha beking snang pa Tuhan, bae itu waktu torang masi ada pa torang pe badan di dunia ini ato pa torang pe badan yang baru di sorga. Soalnya torang samua musti mangada pa Kristus for mo dapa adili, supaya tiap orang mo dapa apa yang pantas for dia mo dapa, iko apa tu dia da beking slama dia hidop di dunia, apa tu dia da beking itu tu bae ato tu jaha. Kristus mo adili pa torang samua, so itu deng rasa tako pa Tuhan, torang brusaha supaya orang laeng bole jadi percaya pa Tuhan. Tuhan Allah tau butul tu torang pe isi hati, kong torang harap supaya ngoni lei bole tau tu torang pe isi hati. Ngoni jang pikir kalu torang bilang bagitu for mo bicara bangga lei tentang tong pe diri sandiri, nyanda kasiang. Mar torang cuma mo bilang tu bae yang torang da beking supaya ngoni ada alasan for mo babangga tentang torang, deng nanti ngoni ada sesuatu tu mo se manyao akang pa tu orang-orang yang suka ja basombong deng apa tu dorang ja beking. Dorang itu basombong deng apa tu orang bole mo lia deng mata mar dong pe hati nyanda butul pa Tuhan. Soalnya ada orang yang bilang kalu torang ini sama deng orang yang nyanda waras waktu ja kase tau tu firman, mar itu nyanda apa-apa lantaran torang da beking itu for Tuhan Allah. Trus laeng orang bilang kalu torang ini dapa lia waras, kong samua itu for ngoni pe bae. Torang beking samua itu lantaran Kristus pe sayang da kuasai pa torang pe hati. Soalnya torang tau kalu dulu waktu Dia mati, Dia mati for torang samua, so itu torang ini so sama deng orang yang so mati. Kristus so mati for samua orang, supaya tu orang-orang yang masi hidop di dunia ini nyanda lei hidop for dong pe diri sandiri, mar supaya dorang bole hidop for Kristus yang so mati deng lei yang Tuhan Allah so se hidop ulang for dorang. So itu, torang so nyanda lei ja banilai orang iko manusia pe ukuran. Biar dulu torang perna banilai pa Kristus iko tu manusia pe ukuran, mar skarang torang so nyanda lei banilai bagitu pa Dia. Jadi sapa jo yang percaya pa Kristus, dia itu so jadi manusia yang baru. Dia pe hidop so nyanda lei sama deng dulu seblum dia percaya pa Kristus, mar dia so hidop baru, itu sama deng yang lama so nyanda ada lei kong yang baru so ada. Samua itu Tuhan Allah yang da beking. Dia beking torang pe hubungan deng Dia jadi bagus lewat apa tu Kristus da beking. Trus Dia lei so se percaya akang pa torang tu tugas for bantu pa orang-orang supaya dorang bole jadi percaya kong dorang pe hubungan deng Dia bole lei jadi bagus. Kong ini tu brita yang torang ja se tau: Tuhan Allah beking manusia pe hubungan deng Dia jadi bagus lewat Kristus. Tuhan Allah beking itu deng nyanda baungkit-ungkit lei tu manusia pe dosa-dosa pa Dia. Kong Dia lei se percaya akang pa torang tu tugas for kase tau tu brita itu pa orang-orang supaya orang-orang pe hubungan deng Dia jadi bagus. So itu, torang tu orang-orang yang Kristus da utus for kase tau tu brita tentang Dia. Kalu torang se tau tu brita itu, itu so kurang sama jo deng Tuhan Allah da pake pa torang for se nasehat pa ngoni. So itu, atas nama Kristus, torang mohon pa ngoni supaya kase jo tu ngoni pe diri pa Tuhan Allah kong ngoni pe hubungan deng Dia bole mo jadi bagus. Kristus itu nyanda perna beking dosa, mar Tuhan Allah beking Dia tanggong tu torang pe dosa-dosa, itu sama deng Tuhan Allah beking Kristus jadi orang yang ja beking dosa. Tuhan Allah beking pa Kristus rupa itu supaya sapa jo yang percaya pa Kristus, Tuhan Allah beking tu orang itu jadi orang yang butul di muka pa Dia. Torang ini Tuhan pe tamang karja, kong torang se nasehat pa ngoni supaya ngoni jang se sia-sia tu Tuhan Allah pe bae yang ngoni so trima dari pa Dia. Soalnya dulu Tuhan Allah da bilang bagini, “Di waktu yang Kita so pili, Kita dengar pa ngana, kong di hari Kita se slamat pa orang-orang, Kita tolong pa ngana.” Kong ngoni tarukira jo, skarang ini no tu de pe waktu itu. Skarang ini de pe waktu for Tuhan mo se slamat pa orang-orang dari tu hukuman dosa. Torang hidop deng bae-bae supaya torang nyanda beking orang laeng jadi nyanda iko pa Kristus, itu sama deng torang nyanda jadi batu sandungan for orang laeng. Jadi deng torang hidop bae-bae bagitu, nyanda ada orang yang mo se sala apa-apa deng torang pe playanan. Torang ini orang yang ja beking tu Tuhan Allah da suru, kong waktu torang ja beking tu Dia da suru, torang se tunjung yang bae di samua hal rupa ini: torang tetap batahang biar dapa siksa, biar dapa susa, ato biar dapa masala. Torang lei tetap ja beking tu Tuhan da suru pa torang, biar torang dapa pukul, dapa maso di bui, deng biar lei waktu kerusuhan. Torang lei karja kras for Tuhan, sampe laengkali torang nyanda tidor deng torang nyanda makang apa-apa. Waktu torang ja beking tu Tuhan da suru, torang se tunjung tu tong pe hati yang bersi, torang tau banya hal lantaran Tuhan bantu pa torang, torang sabar, torang ja babae-bae pa orang, torang butul-butul basayang pa orang, deng tu Roh Kudus da kuasai pa torang. Torang ja se tau tu ajaran yang butul deng Tuhan Allah pe kuasa ada sama-sama deng torang. Torang slalu ja beking tu butul, kong tu butul yang torang ja beking itu, itu sama deng torang pe senjata for mo jaga tong pe diri deng lei for mo malawang tu orang-orang yang mo se besae Tuhan pe nama. Waktu torang dapa hormat, torang lei dapa hina, torang dapa fitna, torang lei dapa puji, kong ada yang bilang kalu torang ja se ajar yang sala, padahal torang ini ja se ajar yang butul. Torang ini sebenarnya orang-orang kanal, mar dorang beking rupa jo dorang nyanda kanal pa torang. Torang amper-amper mo mati, mar torang tetap hidop. Torang dapa hukuman siksa, mar torang nyanda mati. Tu susa yang torang da rasa pe banya, mar torang pe hati slalu snang. Torang ini miskin, mar torang bantu orang laeng dapa berkat. Torang ini dapa lia nyanda ada apa-apa, mar sebenarnya samua ada pa torang. Hei ngoni tu orang-orang Korintus, torang da babicara trus trang pa ngoni, deng torang lei sayang skali pa ngoni. Pa torang pe hati, tu torang pe sayang pa ngoni pe basar skali, mar pa ngoni pe hati, ngoni pe sayang pa torang nyanda basar. Kita bicara pa ngoni sama deng ngoni ini tu kita pe anak-anak, kita bilang bagini: sayang jo pa torang sama deng torang lei sayang pa ngoni. Ngoni yang percaya pa Tuhan, ngoni jang ada hubungan dekat deng tu orang-orang yang nyanda percaya. Co ngoni pikir, tu orang yang ja beking tu butul di muka pa Tuhan deng lei tu orang yang ja beking tu jaha, pa dorang dua itu pasti nyanda ada yang sama. Kong biasanya, tu trang pasti nyanda mungkin to bole mo jadi satu deng glap? Kristus deng tu Belial tu setang pe bos, dari pa dorang dua itu nyanda ada yang sama. Bagitu lei deng tu orang-orang yang percaya pa Tuhan deng tu orang-orang yang nyanda percaya, dari pa dorang itu pasti nyanda ada yang sama. Apa de pe hubungan antara tu Tuhan Allah pe Ruma Ibada Pusat deng tu opo-opo pe kuil? Nyanda ada to? Soalnya torang tu orang-orang percaya, torang ini no tu Tuhan Allah pe Ruma Ibada Pusat, lantaran Tuhan Allah yang hidop itu ada di tenga-tenga pa torang. Ini sama deng tu Tuhan Allah da bilang di Kitab Suci, “Kita mo tinggal sama-sama deng dorang, deng hidop di tenga-tenga pa dorang, kong Kita mo jadi dorang pe Tuhan Allah, deng dorang mo jadi Kita pe orang-orang.” Kong Tuhan Allah da bilang lei bagini, “Kaluar jo ngoni dari antara pa dorang tu orang yang nyanda percaya, bapisa jo dari pa dorang itu. Jang ngoni beking dosa yang beking ngoni jadi najis, trus Kita mo trima pa ngoni. Kong Kita mo jadi ngoni pe Bapa, trus ngoni lei mo jadi Kita pe anak laki-laki deng Kita pe anak-anak parampuang.” Itu no tu Tuhan da bilang di Kitab Suci, Dia itu yang Mahakuasa. Sudara-sudara yang kita sayang, torang so trima tu Tuhan pe janji-janji itu, so itu mari jo torang beking bersi tu torang pe diri dari samua hal yang bole mo beking kotor tu torang pe hati deng torang pe badan. Deng torang beking bagitu, tamba hari torang yang so kudus jadi lebe sempurna deng tako pa Tuhan Allah. Sudara-sudara, kase akang dang tampa torang ini pa ngoni pe hati. Torang nyanda perna beking sala pa sapa-sapa, nyanda perna beking sesat pa sapa-sapa, deng torang lei nyanda ja bacari untung biar cuma pa satu orang. Kita bilang bagitu, de pe tujuan bukang mo se sala pa ngoni. Soalnya rupa tu kita so perna da bilang, torang sayang pa ngoni, itu sama deng ngoni so ada pa torang pe hati. Torang nyanda mo tapisa deng ngoni biar torang hidop ato mati. Kita memang percaya skali pa ngoni, malatare kita lei bangga skali pa ngoni. Jadi biar lei kita banya kali ja mangada tu pendritaan, kita pe hati tahibur deng kita lei rasa snang skali. Soalnya waktu torang sampe di daera Makedonia, torang nyanda ada waktu for mo se istirahat tu tong pe badan, mar di mana-mana torang ja mangada tu pendritaan. Torang ja mangada tu tong pe rasa tako yang ada pa tong pe diri sandiri lantaran torang da pikir-pikir pa ngoni, deng lei tu orang laeng yang ja baku ambe deng torang. Mar Tuhan Allah tu ja kase kuat orang yang putus asa. Dia so kase kuat torang pe hati deng cara kirim Titus pa torang. Torang pe hati jadi kuat bukang cuma lantaran Titus da datang pa torang, mar torang lei jadi kuat lantaran tu kabar tentang ngoni yang dia da se tau pa torang. Dia da se tau pa torang bagimana ngoni da beking dia pe hati jadi kuat waktu dia da sama-sama deng ngoni, dia lei bilang kalu ngoni rindu for mo baku dapa deng torang. Trus ngoni lei kata pe hati manyasal deng apa tu ngoni da beking dulu, deng lei dia bilang tentang ngoni pe smangat for babela pa kita. So lantaran itu no tu kita pe sukacita lebe tatamba lei. Jadi biar lei kita so beking ngoni pe hati jadi sedi deng tu kita pe surat yang lalu itu, kita nyanda rasa manyasal deng itu. Memang no di hari waktu kita da tulis tu surat itu kita da rasa manyasal, lantaran kita tau kalu tu surat itu mo beking ngoni pe hati jadi sedi, biar lei tu sedi yang ngoni da rasa itu cuma nyanda lama. Mar skarang kita rasa sukacita, itu bukang lantaran ngoni da rasa tu sedi, mar lantaran tu sedi yang ngoni da rasa itu beking ngoni jadi bertobat. Soalnya tu sedi yang ngoni da rasa itu, itu sedi yang sama deng tu Tuhan Allah pe mau, kong kita pe surat itu nyanda beking rugi apa-apa pa ngoni, biar lei cuma sadiki. Kita bilang bagitu lantaran tu sedi yang iko Tuhan Allah pe mau, itu beking orang bole bertobat kong mo dapa slamat, so itu torang nyanda manyasal deng tu sedi rupa itu. Mar komang tu sedi yang dari orang-orang yang cuma ja iko tu dunia pe mau, tu sedi itu nyanda beking orang jadi bertobat kong dorang nanti mo dapa hukuman tapisa deng Tuhan Allah for slama-lamanya. Co ngoni tarukira jo bae-bae, tu sedi yang ngoni rasa waktu baca surat itu, itu tu sedi yang iko Tuhan pe mau. Tu sedi itu beking ngoni lebe brusaha mo beking tu butul, ngoni se bersi tu ngoni pe nama dari tu kalakuan yang nyanda bagus tu ngoni so perna da beking, ngoni binci deng dosa, ngoni tako beking dosa, ngoni rindu baku dapa deng torang, deng ngoni lei smangat for hukum tu orang-orang yang da beking dosa. Samua tu ngoni da beking itu se bukti kalu ngoni nyanda sala di samua hal itu. Jadi waktu kita da tulis tu surat itu pa ngoni, itu bukang lantaran for mo bantu tu orang yang da beking tu sala itu, ato bukang lei for mo bantu pa orang yang mendrita lantaran tu sala yang orang itu da beking pa dia. Mar kita tulis tu surat supaya ngoni sandiri bole tau kalu ngoni itu memang da sayang butul-butul pa torang, deng Tuhan Allah lei bole tau kalu ngoni so basayang deng butul-butul. So lantaran ngoni da beking tu kita da tulis itu, torang pe hati jadi kuat. Kong biar lei torang pe hati so jadi kuat, torang lei lebe rasa sukacita waktu torang tau kalu Titus da rasa sukacita lantaran ngoni da bae-bae pa dia kong itu beking dia pe hati jadi snang. Kita memang da se bangga-bangga ngoni pa Titus seblum dia pigi pa ngoni, kong memang ngoni nyanda beking malo pa kita. Bagitu lei samua yang torang da se tau pa ngoni itu butul sama deng samua tu torang da se bangga-bangga akang tentang ngoni pa Titus lei memang butul. Kong dia pe sayang pa ngoni lebe tatamba basar, lantaran dia inga kalu ngoni samua itu dengar-dengaran pa dia, deng lei bagimana ngoni da trima pa dia deng rasa hormat. Kita rasa sukacita lantaran di samua hal kita bole mo percaya akang pa ngoni. Sudara-sudara, torang mo se tau pa ngoni tentang tu Tuhan Allah pe bae yang Dia da se tunjung pa jemaat-jemaat di daera Makedonia. Dorang itu so dapa tes deng macam-macam pendritaan yang brat, mar dorang pe hati tetap sukacita waktu da mangada tu siksa itu. Biar lei dorang miskin skali, mar dorang pe hati rasa suka ja bakase pa orang laeng. Kita basaksi tentang dorang kalu dorang itu so kase iko dong pe kemampuan, malatare lebe dari yang mampu dorang kase, kong nyanda ada yang paksa pa dorang for ja bakase. Dorang sandiri bamohon-mohon pa torang supaya dorang bole ambe bagean for bantu kase doi sumbangan pa tu Tuhan pe orang-orang yang ada di Yerusalem. Dorang itu da bakase doi sumbangan lebe banya dari tu torang da harap tu dorang mo kase, dorang da kase dong pe diri pertama pa Tuhan, kong abis itu dorang kase dong pe diri pa torang iko tu Tuhan Allah pe mau. So lantaran itu, torang se smangat pa Titus supaya dia se trus beking apa tu dia so mulai da beking pa ngoni, dia bantu kumpul ngoni pe doi sumbangan sampe samua siap. Ngoni so jadi bagus di banya hal rupa ini: ngoni pe percaya kuat, ngoni mampu babicara di muka pa orang-orang, ngoni so tau banya hal rohani, deng ngoni slalu ada smangat for ja beking tu Tuhan pe mau, kong ngoni lei sayang skali pa torang. Ngoni so bagus di hal-hal itu, bagitu lei ngoni musti bagus waktu ngoni babantu for kase tu doi sumbangan pa tu orang-orang miskin, itu tanda ngoni pe sayang pa dorang. Kita da bicara tentang tu doi sumbangan itu bukang for mo prenta pa ngoni, mar kita cuma suka ngoni tau pe rajin skali tu orang-orang di Makedonia ja babantu, kong kalu ngoni lei beking bagitu, dari situ kita bole tau kalu ngoni butul-butul basayang pa orang laeng. Soalnya ngoni so tau bagimana tu bae yang Tuhan Yesus Kristus tu torang ja iko akang so se tunjung pa ngoni. Dia yang kaya beking Dia pe diri itu jadi miskin for ngoni pe bae, supaya Dia yang miskin itu bole beking ngoni jadi kaya di samua hal. Ini kita pe pendapat: satu taong yang lalu, ngoni tu pertama yang suka mo babantu tu orang-orang miskin di Yerusalem sampe ngoni mulai kumpul-kumpul tu doi for mo bantu pa dorang. Yang ngoni da beking itu ada de pe guna for ngoni, kong skarang se klar jo apa yang ngoni so mulai beking itu. Dulu ngoni pe smangat waktu ngoni da mulai kumpul tu doi sumbangan itu, so itu skarang ngoni lei musti smangat rupa waktu itu for se klar bakumpul tu sumbangan itu, iko apa yang ngoni mampu. Soalnya kalu torang ada smangat for bakase deng lei torang bakase iko apa yang ada pa torang, Tuhan mo trima apa tu torang da kase. Dia nyanda perna minta pa torang bakase dari apa yang nyanda ada pa torang. Soalnya kita nimau kalu ngoni bakase lebe banya dari tu ngoni mampu mo kase sampe ngoni pe tanggongan lebe brat kong tu orang laeng pe tanggongan lebe ringan dari ngoni, nyanda bagitu kasiang. Mar ini samua de pe tujuan supaya torang sama-sama bantu tu orang laeng deng tanggongan yang iko masing-masing pe kemampuan. Jadi skarang ini, lebe bae apa yang lebe tu ada pa ngoni bole mo se cukup akang apa yang kurang pa dorang di Yerusalem, supaya lei nanti apa yang lebe tu ada pa dorang bole mo se cukup lei apa yang kurang pa ngoni, deng bagitu samua bole mo sama-sama se cukup akang apa yang kurang. Itu samua sama deng tu da tulis di Kitab Suci, “Orang yang dapa hasil banya, dia nyanda talebe-lebe. Orang yang dapa hasil sadiki, dia nyanda kurang apa-apa.” Torang bilang makase pa Tuhan Allah, Dia yang kase pa Titus hati yang sama deng kita for suka skali babantu pa ngoni. Soalnya Titus trima deng bae waktu torang da se nasehat pa dia for pi babantu pa ngoni. Mar bukang cuma lantaran torang da suru kong dia da beking itu, mar memang dia sandiri smangat skali mo pi babantu pa ngoni. Torang lei da utus satu sudara yang percaya sama-sama deng dia for pigi pa ngoni. Samua jemaat ja puji-puji tu sudara itu lantaran de pe karja bagus waktu ja kase tau tu Kabar Bae. Bukang cuma itu, tu jemaat-jemaat lei da pili pa dia for batamang akang deng torang for mo antar tu doi-doi sumbangan pa sudara-sudara yang percaya tu ada di Yerusalem. Torang beking tu samua itu supaya Tuhan bole dapa puji deng hormat, deng lei orang bole lia kalu torang memang suka mo babantu orang. Torang hati-hati skali mo antar tu doi sumbangan supaya nyanda ada orang yang mo se sala pa torang waktu torang antar tu doi itu yang de pe jumla pe basar ini. Soalnya torang suka mo beking apa yang butul bukang cuma di muka pa Tuhan, mar di muka pa manusia lei. Kong sama-sama deng Titus deng tu sudara yang satu, torang da utus satu sudara lei yang percaya for pigi sama-sama deng dorang. Tu sudara itu, torang so tes brapa kali, kong memang dapa lia kalu dia rajin beking tu Tuhan pe karja. Kong skarang lei, dia suka skali mo bantu pa ngoni lantaran dia percaya skali pa ngoni. Kong tentang Titus, dia itu kita pe tamang tu da bakarja deng kita for bantu pa ngoni. Tu dua sudara yang percaya tu da sama-sama deng Titus, dorang itu da dapa utus dari jemaat-jemaat for mo pi antar tu sumbangan ka Yerusalem, kong Kristus bole dapa puji deng dapa hormat lantaran apa tu dorang da beking. So itu, ngoni tu orang Korintus, ngoni kase tunjung jo tu ngoni pe sayang pa dorang tiga yang da antar tu sumbangan itu, supaya samua jemaat tau kalu ngoni butul-butul sayang pa dorang deng lei apa tu torang ja se bangga-bangga tentang ngoni itu memang butul. Sebenarnya kita nyanda perlu lei mo tulis pa ngoni tentang kase doi sumbangan for bantu pa Tuhan pe orang-orang yang miskin tu ada di Yerusalem. Soalnya kita so tau kalu ngoni tu orang-orang yang ada di daera Akhaya rela mo babantu pa dorang, kong itu no tu kita da se bangga-bangga akang tentang ngoni pa tu orang-orang di daera Makedonia. Kita da bilang pa dorang di sana kalu ngoni so siap dari taong lalu for mo bantu kase doi sumbangan pa Tuhan pe orang-orang di Yerusalem. Kong ngoni pe smangat itu so beking banya orang lei di Makedonia jadi smangat for babantu rupa itu. Mar biar lei bagitu, kita utus tu sudara-sudara yang percaya itu pa ngoni supaya dorang bole bantu pa ngoni for urus tu doi sumbangan itu, deng bagitu orang bole lia kalu apa tu torang da se bangga-bangga akang tentang ngoni itu bukang cirita dusta. So itu, lebe bae ngoni siap jo sama deng tu kita so bilang pa orang-orang kalu ngoni so siap for babantu. Soalnya jang sampe waktu tu orang-orang dari Makedonia datang pa ngoni sama-sama deng kita, dorang dapa ngoni blum siap. Trus kalu dorang dapa ngoni blum siap, pe malo skali torang nanti, lantaran torang so bilang pa dorang kalu torang yakin ngoni mo babantu, kong ngoni lei tantu katu mo malo. So itu no kita rasa perlu for minta pa tu sudara-sudara yang percaya itu for brangkat lebe dulu dari kita pigi pa ngoni, supaya dorang bole lebe dulu se siap tu doi sumbangan yang ngoni so janji mo kase dulu. Kong kalu itu so tasadia, itu jadi bukti tu ngoni pe hati yang tulus ja bakase, deng bukang bakase lantaran da dapa paksa. Inga jo ini: tu orang yang da baambor bibit cuma sadiki, pasti dia mo bapanen cuma sadiki lei. Mar tu orang yang da baambor bibit banya, pasti dia mo bapanen banya lei. Tiap orang yang bakase, dia itu jang bakase deng rasa manyasal di hati ato bakase lantaran da dapa paksa, mar dia bakase jo lantaran dia so beking keputusan lebe dulu pa de pe hati kalu dia suka mo bakase. Soalnya Tuhan Allah sayang pa orang yang bakase deng hati snang. Kong Tuhan Allah itu mampu for kase tunjung samua tu Dia pe bae pa ngoni deng talebe-lebe, supaya ngoni slalu nyanda kurang di sgala hal malatare ngoni bole mampu beking banya hal yang bae for orang laeng. Di Kitab Suci da tulis bagini, “Tuhan Allah ja se berbage deng bakase pa orang-orang miskin, kong tu butul yang Dia ja beking itu mo ada for slama-lamanya.” Tuhan yang se sadia tu bibit for petani mo se ambor, Dia yang se sadia akang makanan for torang mo makang. Dia lei yang mo se sadia tu bibit deng beking lebe banya tu bibit yang ngoni mo se ambor, kong deng bagitu ngoni lei bole mo lebe beking tu bae pa orang laeng. Ngoni mo kaya di samua hal sama deng itu supaya ngoni bole lei bakase deng lebe pa orang laeng. Kong nanti samua yang ngoni kase tu torang da se berbage pa orang-orang, itu mo beking banya orang bilang makase banya pa Tuhan Allah. Soalnya tu ngoni pe bakase for bantu se cukup akang tu Tuhan pe orang-orang yang kekurangan, itu bukang cuma beking cukup tu dorang pe keperluan, mar itu lei mo beking banya orang bilang makase pa Tuhan Allah. Kong lantaran ngoni pe bakase yang dorang lia itu, itu beking dorang mo puji deng hormat pa Tuhan Allah lantaran dorang lia kalu ngoni setia ja iko tu Kabar Bae tentang Kristus yang ngoni percaya, deng lantaran dorang lia tu ngoni pe pangbae suka ja bakase sumbangan itu pa dorang deng lei pa orang laeng. Kong dorang mo basombayang akang pa ngoni deng rasa sayang di hati, lantaran Tuhan Allah so se tunjung tu Dia pe bae pe banya pa ngoni. Torang bilang makase pa Tuhan Allah lantaran tu Dia pe bae yang Dia da se tunjung pa torang itu nyanda mampu torang mo kase tau deng kata-kata. Kita, Paulus, kita minta pa ngoni supaya tarukira jo bae-bae tu kita mo bilang ini. Ada dari pa ngoni yang bilang kalu kita nyanda brani togor deng kras pa ngoni waktu kita ada sama-sama deng ngoni, mar kita brani togor deng kras lewat surat kalu kita jao dari pa ngoni. Kita skarang mo bicara pa ngoni deng lemah lembut sama deng Kristus pe sifat, kong kita bamohon pa ngoni supaya ngoni jang beking sampe kita terpaksa musti togor deng kras pa ngoni nanti waktu kita ada deng ngoni. Soalnya kita so pikir kalu kita mo togor deng kras pa tu orang-orang yang da babilang kalu torang ini ja hidop iko tu dunia pe mau. Memang torang masi hidop di dunia, mar torang kasiang nyanda da pake tu cara yang biasa dunia ja pake waktu torang berjuang malawang pa orang-orang yang malawang tu Tuhan pe firman. Soalnya tu senjata yang torang da pake waktu torang berjuang, itu bukang senjata yang dari ni dunia mar senjata yang dari pa Tuhan. Tu senjata yang dari pa Tuhan itu no tu kuasa yang dari pa Dia, tu kuasa yang mampu for se kala pa orang-orang yang malawang Tuhan pe firman, itu sama deng tu senjata yang da pake di prang for se ancor tu musu pe benteng-benteng. Kong tu Tuhan Allah pe kuasa itu beking torang mampu se kala samua tu prinsip deng tu pikiran yang sombong yang orang pake for ja halangi orang laeng kanal pa Tuhan Allah. Dorang pe pikiran yang sala itu torang roba supaya dorang bole iko Kristus pe mau. Kong kalu ngoni so butul-butul dengar-dengaran pa Kristus, torang siap for hukum pa sapa jo yang nyanda dengar-dengaran. Ngoni musti sadar deng tu keadaan yang ada di muka pa ngoni. Kalu ada orang yang butul-butul yakin kalu dia itu Kristus pe orang, dia lei musti se inga pa de pe diri sandiri kalu torang ini lei Kristus pe orang sama deng dia. Kita memang ja se bangga-bangga tu kuasa yang Tuhan Allah da kase pa torang. Tu kuasa itu Dia da kase for se kuat tu ngoni pe percaya, bukang for beking ancor pa ngoni. Jadi biar lei orang anggap so talebe kita se bangga-bangga tu kuasa itu, kita nyanda rasa malo deng itu. Kita nimau kalu ngoni anggap kita mo beking tako pa ngoni deng kita pe surat-surat. Soalnya ada yang ja bilang bagini, “Tu Paulus itu tegas deng kras cuma lewat de pe surat-surat, mar kalu baku mangada deng dia, dia sandiri nyanda kuat kong lei apa tu dia ja bilang nyanda ada de pe guna.” Jadi biar jo tu orang yang ja bapikir rupa itu sadar kalu torang pe sikap tetap sama, biar lei itu lewat tong pe kata-kata di surat-surat ato kalu torang ada deng ngoni. Memang katu torang nyanda brani mo se sama ato mo se banding tu torang pe diri deng tu orang-orang yang ja puji tu dong pe diri sandiri. Dorang itu ukur tu dong pe diri pake tu dong pe ukuran sandiri. Dorang itu ja se banding tu dong pe diri deng dong pe diri sandiri jo. Dorang itu nintau apa-apa! Mar torang nyanda bagitu. Kalu torang mo se bangga-bangga tu torang pe karja, torang nyanda mo se bangga apa-apa di luar torang pe wilaya karja. Torang cuma mo se bangga tu karja yang Tuhan Allah so kase pa torang, kong ngoni itu tamaso pa tong pe wilaya karja. Soalnya waktu torang mangajar pa ngoni tentang Kristus, torang so sampe pa ngoni, ngoni itu torang pe wilaya karja jadi nyanda kaluar dari torang pe batas wilaya karja. Torang yang pertama tu da datang bawa tu Kabar Bae tentang Kristus pa ngoni. Torang nyanda ja se bangga-bangga tu torang pe diri for tu karja yang orang laeng da beking di wilaya karja tu bukang da tentukan for torang. Mar torang cuma karja pa torang pe batas wilaya karja, kong torang baharap kalu nanti ngoni pe percaya so lebe kuat, tu karja yang torang ja beking di antara pa ngoni mo jadi lebe basar lei. Deng bagitu, torang bole mo se tau tu Kabar Bae di daera-daera yang lebe jao dari pa ngoni pe daera, tu tampa yang orang nyanda da karja akang. Kong deng bagitu, torang nyanda da bangga-bangga deng tu orang laeng pe hasil karja di wilaya yang da tentukan for dorang. Di Kitab Suci da tulis bagini, “Sapa yang mo babangga, lebe bae dia babangga tentang Tuhan”. Soalnya bukang tu orang yang babangga de pe diri sandiri yang butul di mata pa Tuhan, mar tu orang yang Tuhan da se bangga-bangga, dia itu yang butul di mata pa Tuhan. Sudara-sudara, kita mo babangga sadiki tentang kita pe diri cuma kita minta supaya ngoni basabar akang sadiki for dengar tu kita mo bilang, lantaran kita tau kalu kita babangga tu kita pe diri sandiri, itu sama deng tu orang yang nintau apa-apa ja beking, kong ngoni memang so sabar deng kita. Sudara-sudara, kita jaga bae-bae pa ngoni lantaran kita mara kalu ada orang yang ganggu tu ngoni pe percaya, kita pe hati sama deng Tuhan pe hati yang suka jaga pa ngoni. Kita sama deng satu papa yang da jaga tu de pe anak masi prawan yang so se batunangan deng satu laki-laki. Ngoni itu no tu sama deng anak prawan itu, trus tu ngoni pe tunangan itu Kristus, kong kita mo srahkan ngoni pa Kristus. Mar kita tako jang sampe orang se sesat tu ngoni pe pikiran sampe ngoni so nyanda butul lei iko pa Kristus deng segnap hati. Itu sama deng Hawa dulu yang da dapa goda sampe jadi sesat lantaran tu ular pe licik. Soalnya ngoni itu pe gampang skali trima kalu ada orang laeng datang kong kase tau pa ngoni tu ajaran tentang Yesus yang baku beda deng tu torang so se ajar pa ngoni, ato kalu dia kase pa ngoni tu roh yang laeng yang baku beda dari tu Roh Kudus yang ngoni so trima, ato lei dia se tau pa ngoni tu kabar bae laeng yang baku beda deng tu Kabar Bae yang torang so se tau pa ngoni. Mar kita pikir, tu orang-orang yang orang ja bilang “Rasul-rasul yang basar,” biar sadiki dorang itu nyanda lebe basar dari kita. Biar lei kita nyanda talalu tau babicara deng bagus, mar nyanda bagitu komang kalu dalam hal pengetahuan. Torang so slalu ja se tunjung itu deng jelas pa ngoni di sgala waktu deng di samua hal. Memang waktu kita da kase tau tu Kabar Bae dari Tuhan Allah pa ngoni, kita nyanda minta apa-apa dari pa ngoni for se biayai pa kita. Kita da beking kita pe diri jadi renda rupa itu for mo hormat pa ngoni. No apa tu kita da beking itu sala? Nyanda to? Waktu kita da layani pa ngoni, kita da dapa doi dari jemaat-jemaat laeng for biayai pa kita, itu bole mo se sama deng kita so rampok akang pa dorang supaya kita bole mo layani pa ngoni. Kong waktu kita kekurangan waktu da sama-sama deng ngoni, kita nyanda perna beking susa satu jo dari pa ngoni. Soalnya waktu itu, tu sudara-sudara yang percaya tu da datang dari daera Makedonia, dorang itu yang da se cukup akang tu kita pe kekurangan itu. Kita da brusaha jaga kita pe diri rupa itu supaya di samua hal kita nyanda jadi beban for ngoni, kong kita lei tetap mo beking bagitu trus. Kristus pe ajaran itu ajaran yang butul, kong tu Dia pe ajaran itu kita da simpang pa kita pe hati. Dia pe ajaran itu butul, bagitu lei yang kita ja babangga akang itu butul: kita ja babangga kalu kita nyanda perna minta apa-apa dari pa ngoni tu orang-orang Korintus di daera Akhaya deng lei pa tu orang-orang laeng di sluru daera Akhaya. Kong nyanda ada alasan for orang-orang di daera Akhaya mo larang pa kita for babangga tentang itu. Tu alasan kiapa sampe kita babangga rupa itu, itu bukang lantaran kita nyanda sayang pa ngoni. Bukang itu kasiang, Tuhan Allah tau kalu kita sayang pa ngoni! Kong apa tu kita da beking kita tetap mo beking itu, kita karja for layani pa ngoni kong nyanda da trima apa-apa dari pa ngoni. Kita tetap beking bagitu supaya tu orang-orang yang orang ja pangge rasul-rasul itu, nyanda ada alasan for mo babangga dorang pe diri kalu dorang itu da karja for layani pa ngoni sama deng torang yang nyanda trima apa-apa dari pa ngoni. Soalnya tu orang-orang yang sama deng itu, so dorang itu no tu rasul-rasul yang palsu. Dorang ja bakarja deng cara yang nyanda butul. Dorang da menyamar sbagai Kristus pe rasul-rasul, padahal sebenarnya dorang itu bukang Kristus pe rasul-rasul. Ngoni nyanda usa heran deng itu, lantaran tu setang pe bos lei ja menyamar sbagai malaekat yang bawa trang. Jadi ngoni nyanda usa heran lei kalu tu setang pe bos pe anak bua da menyamar rupa jo dorang itu orang-orang yang beking tu Tuhan da suru tu ja beking yang butul. Dorang itu nanti mo dapa balasan iko apa tu dorang da beking. Kita se tau ulang ini: kita nimau kalu ada orang yang anggap kita ini orang yang nintau apa-apa. Mar kalu memang ada yang anggap kita ini bagitu, no biar jo ngoni trima pa kita sama deng tu orang yang nintau apa-apa supaya kita bole mo babangga sadiki. Kita da se bangga-bangga apa tu kita da beking, kong apa tu kita bilang itu bukang Tuhan da suru bilang, mar tu kita bilang itu sama deng tu orang yang nintau apa-apa biasa ja bilang tu ja babangga diri sandiri. Memang ada banya orang yang ja babangga iko tu dunia pe cara, kong skarang lei kita suka mo babangga bagitu. Soalnya ngoni itu kwa suka deng pe sabar ja mangada pa tu orang yang nintau apa-apa, lantaran ngoni pikir kalu ngoni pe diri itu bijaksana. Ngoni trima kalu ada orang-orang yang beking rupa ini pa ngoni: dorang beking ngoni jadi sama deng dong pe budak, dorang makang untung dari pa ngoni, dorang kuasai pa ngoni, dorang anggap kalu dorang lebe dari ngoni deng dorang tampeleng pa ngoni. Kita rasa malo lantaran kita nyanda brani beking tu hal-hal bagitu. Mar kalu orang-orang laeng brani ja babangga tentang tu dorang pe diri, kita lei komang brani for babangga sama deng dorang! (Ini kita da bicara sama deng orang yang nintau apa-apa.) Dorang bilang kalu dorang itu orang Ibrani, kita ini lei orang Ibrani. Dorang lei bilang kalu dorang itu orang Israel, kita ini lei orang Israel. Trus dorang bilang kalu dorang itu Abraham pe keturunan, bagitu lei deng kita, kita ini lei Abraham pe keturunan. Trus dorang bilang lei kalu dorang itu orang-orang yang ja beking tu Kristus da suru. Lebe-lebe lei deng kita, kita ini orang yang ja beking tu Kristus da suru lebe dari dorang itu! (Kita ini da bicara sama deng orang yang nyanda waras lei.) Mar sebenarnya kita ini da karja kras lebe dari dorang itu. Kita lei lebe banya kali dapa maso bui, kita lebe banya kali da dapa ajar, deng lei kita lebe banya kali amper-amper mo mati. Dari kita pe orang-orang Yahudi, dorang lima kali da ajar pa kita pake cambok. Tiap kali dapa ajar, de pe banya tiga pulu sambilan kali cambok. Trus tiga kali kita da dapa ajar deng kayu, satu kali da dapa lempar deng batu for mo bunung pa kita, tiga kali kita da alami kapal da kandas, deng lei satu hari satu malam kita cuma da taapung-apung kasana-kamari di tenga laut. Kita sering ja beking perjalanan, trus kita banya kali mangada bahaya rupa ini: bahaya banjer, bahaya dari prampok, bahaya dari kita pe orang-orang sama-sama Yahudi deng lei bahaya dari orang-orang bukang Yahudi, bahaya di kota, bahaya di padang gurun, bahaya di tenga laut, deng lei bahaya dari tu orang-orang yang mangaku sbagai sudara-sudara yang sama-sama percaya pa Tuhan padahal nyanda percaya. Kita da brusaha kuat deng karja kras, sampe banya kali kita so nyanda ja tidor, banya kali rasa lapar, rasa aus, banya kali nyanda ada makanan, deng lei kedinginan kong so nyanda banya baju. Kong selain dari tu samua itu, tiap hari kita pe hati kuatir lantaran kita da pikir-pikir tu samua jemaat pe keadaan. Kalu ada orang yang rasa nyanda kuat, kita lei rasa apa tu dia da rasa. Kalu ada orang yang tagoda beking dosa sampe jadi sesat, kita pe hati lei jadi susa. Kalu kita musti babangga tentang kita pe diri sandiri, kita cuma mo babangga tentang hal-hal yang se tunjung tu kita pe diri yang nyanda kuat. Tuhan Allah tu torang pe Tuhan Yesus pe Bapa, Dia itu tau kalu kita nyanda badusta. Puji jo pa Dia sampe slama-lamanya. Waktu kita ada di Damsyik, tu gubernur yang raja Aretas da angka, dia da suru pa tu pengawal-pengawal yang ada di situ for jaga tu gerbang kota Damsyik supaya dorang bole tangka pa kita kalu kita kaluar. Mar kita pe tamang-tamang da se lolos pa kita, dorang se maso pa kita di kranjang kong se turung pa kita pake tali kaluar dari jendela tu ada di dinding batu yang da se kliling tu kota itu. Deng bagitu, tu gubernur itu nyanda dapa tangka pa kita. Kita musti babangga tentang kita pe diri, biar lei kita tau kalu bicara rupa itu nyanda ada de pe guna apa-apa. Kita mo se tau pa ngoni tentang tu hal-hal yang Tuhan so se tunjung deng tu penglihatan-penglihatan yang dari pa Dia. Kita kanal satu orang yang percaya pa Kristus. Ampa blas taong lalu, tu orang itu kage-kage taangka ka sorga di tingkat yang katiga. Waktu da jadi itu, kita nintau kalu dia da taangka deng de pe badan ato cuma de pe jiwa tu da taangka, cuma Tuhan Allah yang tau itu. Kita se bilang ulang ne tentang dia: kita tau tu orang itu, mar kita nintau kalu dia da taangka deng de pe badan ato nyanda, itu komang kita nintau, cuma Tuhan Allah yang tau itu. Pokoknya dia kage-kage da taangka ka tampa yang luar biasa tu ja bilang firdaus. Di sana, tu orang itu da dengar tu hal-hal yang nyanda mampu for manusia mo se bilang deng kata-kata, deng lei memang nimbole for manusia mo se bilang itu. Kong tu kita mo babangga akang ini tentang tu orang itu no, kita nyanda mo babangga tu kita pe diri. Mar kalu kita mo babangga tentang kita pe diri sandiri, kita cuma mo babangga tentang kita pe diri yang nyanda kuat. Kalu misalnya kita suka mo babangga tu kita pe diri sandiri, kita nyanda mo babangga sama deng tu orang laeng yang nintau apa-apa ja bilang, lantaran kita cuma mo se tau yang butul. Mar kita brusaha batahang diri nyanda babangga tentang tu penglihatan yang kita dapa itu supaya nyanda ada orang yang banilai pa kita lebe tinggi dari tu biasa dorang ja lia kita ja beking ato lebe tinggi dari tu biasa dorang ja dengar tu kita da se ajar. Jadi supaya kita nyanda mo jadi sombong lantaran kita tu da dapa penglihatan yang hebat itu, kita da dapa tu saki yang beking kita pe badan mendrita. Tu saki ini sama deng duri yang da tatanang pa kita pe badan. Tu saki ini dari setang pe bos. Tentang tu kita pe saki ini, kita so tiga kali da bamohon pa Tuhan supaya Tuhan se bae akang tu kita pe saki ini. Mar Tuhan tare cuma da bilang pa kita, “Tu Kita pe bae yang Kita da se tunjung pa ngana, itu so cukup for ngana. Soalnya kalu ngana dapa saki itu kong nyanda kuat sama deng itu, Kita pe kuasa pa ngana justru tare jadi sempurna.” Jadi so lantaran itu no kita lebe suka se bangga tentang kita pe badan yang nyanda kuat lantaran justru waktu kita nyanda kuat, tu Kristus pe kuasa mo ada sama-sama deng kita. So itu kita pe hati snang waktu kita pe badan nyanda kuat, kita lei snang biar kita dapa hina, mendrita, dapa siksa, deng biar lei kita susa lantaran kita da iko pa Kristus. Soalnya waktu kita nyanda kuat, waktu itu no Kristus bantu pa kita kong kita jadi kuat. Kita so babangga tentang kita pe diri sandiri, itu beking kita pe diri ini sama deng orang tu nintau apa-apa. Cuma ngoni yang da paksa pa kita sampe kita beking itu. Mar sebenarnya ngoni tu musti puji pa kita. Soalnya biar lei kita ini bukang apa-apa, mar kita nyanda kala di samua hal dari tu orang-orang yang orang ja bilang rasul-rasul yang basar itu. Waktu kita masi sama-sama deng ngoni, kita so se tunjung tanda-tanda kalu kita ini memang rasul, kita lei tetap batahang sabar biar lei dapa siksa kong kita da beking tanda-tanda ajaib, mujisat-mujisat deng lei beking tu hal-hal yang se tunjung Tuhan pe kuasa. Apa ngoni pikir kalu nyanda cukup tu kita da bantu pa ngoni? Kita kasiang so beking samua pa ngoni sama deng tu kita so beking pa jemaat-jemaat laeng. Cuma satu yang kita nyanda beking pa ngoni pe jemaat, kita nyanda perna suru pa ngoni for tanggong tu kita pe keperluan. Apa ngoni pikir kita sala kalu kita nyanda minta tu kita pe keperluan pa ngoni jadi kita musti minta maaf pa ngoni dang? Nyanda to? Sebenarnya skarang ini, kita so siap mo pigi pa ngoni for katiga kali. Kong kita lei nimau kalu ngoni tanggong tu kita pe biaya hidop waktu kita da sama-sama deng ngoni. Soalnya bukang ngoni pe harta yang kita da cari, mar ngoni sandiri yang kita da cari. Kita bilang bagitu lantaran kwa bagini: bukang anak-anak yang musti cari akang doi for tanggong tu dong pe orang tua pe keperluan, mar tantu katu tu dong pe orang tua yang musti cari akang doi for tanggong tu dong pe anak-anak pe keperluan. Kita suka pake samua yang ada pa kita for bantu pa ngoni, malatare kita pe hidop sandiri lei kita rela se korban supaya bole bantu pa ngoni. Kong kalu kita sayang skali pa ngoni rupa itu, masa ngoni nyanda talalu sayang pa kita. Ngoni itu memang stuju kalu waktu kita ada deng ngoni, kita ini nyanda jadi beban pa ngoni. Mar ada yang bilang kalu kita ini licik, kita kata da ambe untung pa ngoni deng cara batipu. Apa perna kita ambe untung dari pa ngoni lewat tu orang-orang yang kita da utus pigi pa ngoni? Nyanda to? Kita cuma da minta pa Titus for pigi pa ngoni, kong kita lei da utus tu satu sudara yang percaya sama-sama deng Titus. No skarang, apa waktu Titus pigi pa ngoni, dia da ambe untung? Pasti nyanda to? Soalnya kita deng Titus sama-sama ada hati for bantu pa ngoni, deng lei torang dua pe kalakuan itu sama. Mungkin ngoni da bapikir kalu samua tu torang da tulis pa ngoni ini cuma for mo babela tu tong pe diri sandiri, iyo to? Nyanda kasiang. Kita pe sudara-sudara yang kita sayang, samua yang torang da se tau pa ngoni ini butul, Tuhan Allah tu torang pe Saksi. Kita bicara ini sbagai orang yang percaya pa Kristus, kong samua yang torang ja se tau deng lei torang ja beking pa ngoni, itu samua cuma for mo se kuat tu ngoni pe percaya. Soalnya kita kuatir kwa kalu nanti kita datang pa ngoni, trus kita lia tu ngoni ja beking nyanda sama deng tu kita pe harapan, bagitu lei deng ngoni mo lia tu kita ja beking nyanda sama deng tu ngoni pe harapan. Kita kuatir jang sampe nanti kita dapa ngoni ada yang baku ambe, bamangiri, bamara, cuma pikir diri sandiri, bicara yang nyanda butul tentang orang laeng, bagosip, sombong deng bakacau. Kita kuatir kalu kita datang nanti, Tuhan Allah tu kita ja semba mo se malo pa kita di muka pa ngoni. Kong kita mo manangis lantaran pe banya tu orang yang dulu ja beking dosa kong skarang masi lei blum bertobat dari dorang pe kalakuan yang caparuni, baseks bebas deng ja beking tu hal-hal yang nyanda pantas mo beking. Ini mo jadi yang katiga kali for kita mo pigi pa ngoni. Inga jo apa yang da tulis di Kitab Suci bagini, “Kalu ada orang yang dapa tudu beking sala, musti ada dua ato tiga orang yang jadi saksi for bilang kalu tu orang itu sala ato nyanda.” Soalnya waktu kita da datang kadua kali pa ngoni, kita so perna da se inga pa tu orang-orang yang dulu so beking dosa. Kong skarang samantara kita da jao deng ngoni, kita mo se inga ulang lei pa dorang deng pa tu orang-orang laeng. Kita se inga pa dorang samua bagini: nanti waktu kita datang ulang, kita mo togor deng kras pa samua orang yang ja beking dosa. Kita nanti mo beking bagitu lantaran ngoni da cari bukti kalu Kristus memang butul-butul da pake pa kita. Kong kalu Kristus togor pa ngoni, Dia bukang togor deng cara yang nyanda tegas mar Dia mo se tunjung tu Dia pe kuasa di antara pa ngoni. Soalnya biar Kristus nyanda kuat di hari waktu Dia dapa salib, mar skarang Dia so hidop ulang lantaran tu kuasa dari pa Tuhan Allah. Bagitu lei deng torang yang percaya pa Kristus, torang lei nyanda kuat sama deng Kristus dulu, mar tu kuasa dari Tuhan Allah mo beking torang hidop sama-sama deng Kristus sampe torang lei bole layani pa ngoni. Co ngoni uji tu ngoni pe diri sandiri, apa ngoni itu butul-butul percaya pa Kristus ato nyanda. Uji jo dulu tu ngoni pe diri! Kalu uji ngoni pe diri bagitu, ngoni pasti mo sadar kalu Kristus itu ada pa ngoni pe hati. Kalu Kristus nyanda ada pa ngoni pe hati, ngoni nyanda tahang uji. Kong tentang torang, kita harap deng yakin ngoni tau kalu torang so tahang uji, torang ini rasul yang butul. Torang da minta pa Tuhan Allah supaya ngoni jang beking tu jaha. Torang pe tujuan da minta itu pa Tuhan bukang supaya dapa lia kalu torang ini lulus dari tu ujian kong torang ini butul-butul rasul, mar sebenarnya torang pe tujuan itu cuma supaya ngoni bole ja beking tu bae. Kalu ngoni bole ja beking tu bae, itu nyanda masala kalu orang laeng anggap kita ini kata bukang rasul. Soalnya torang nimbole beking sesuatu yang malawang tu ajaran yang butul, yang torang bole beking itu tu ajaran yang butul. Soalnya torang rasa sukacita biar torang dapa lia nyanda kuat asal torang bantu pa ngoni jadi kuat percaya pa Kristus. Torang minta pa Tuhan supaya ngoni jadi sempurna iko pa Tuhan. Jadi kita tulis ni surat for ngoni waktu kita ada jao dari pa ngoni, supaya nanti kalu kita so ada sama-sama deng ngoni, kita nyanda usa lei mo ambe tindakan kras mo togor pa ngoni. Kita nyanda mo pake tu kuasa yang Tuhan da kase pa kita for togor pa ngoni lantaran waktu trima kita pe surat ngoni so bertobat. Tu kuasa itu Tuhan da kase pa kita for se kuat tu ngoni pe percaya, bukang for se ancor pa ngoni. Sudara-sudara, di akhir surat ini kita minta pa ngoni supaya ngoni bersukacita jo. Ngoni brusaha jo supaya hidop bae-bae di sgala hal, ngoni trima jo samua tu kita so se nasehat pa ngoni. Ngoni musti hidop satu hati deng hidop baku-baku bae satu deng laeng. Kalu ngoni hidop rupa itu, Tuhan Allah yang sayang pa torang deng lei yang beking torang pe hidop jadi tenang mo sama-sama deng ngoni. Waktu ngoni baku dapa, ngoni baku kase salam jo satu deng laeng. Kong samua tu Tuhan pe orang-orang yang ada di sini da titip salam lei for ngoni. Kita minta supaya Tuhan Yesus Kristus kase tunjung Dia pe bae pa ngoni, supaya Tuhan Allah sayang pa ngoni, deng lei supaya ngoni ada hubungan dekat deng tu Roh Kudus, kong samua itu mo ada trus deng ngoni. Ni surat dari kita, Paulus. Kita ini rasul tu Yesus Kristus pe utusan. Kita da jadi Dia pe rasul bukang lantaran manusia da suru ato bukang lantaran manusia yang da angka pa kita for jadi Dia pe rasul, mar Yesus Kristus deng Tuhan Allah tu torang pe Bapa yang da angka pa kita. Tuhan Allah itu no yang da se hidop ulang pa Yesus Kristus waktu Yesus mati. Surat ini for ngoni tu jemaat-jemaat yang ada di daera Galatia. Samua sudara yang percaya tu da sama-sama deng kita di sini kirim surat ini for ngoni. Kita minta pa Tuhan Allah tu torang pe Bapa deng pa Tuhan Yesus Kristus supaya kase tunjung tu bae pa ngoni deng lei beking ngoni hidop deng hati tenang. Tuhan Yesus Kristus itu yang so srahkan Dia pe diri for tubus tu torang pe dosa-dosa supaya Dia bole se bebas pa torang dari tu kuasa jaha yang skarang ada di dunia ini, Dia beking samua itu iko Tuhan Allah tu torang pe Bapa pe mau. Puji deng hormat jo pa Tuhan Allah sampe slama-lamanya! Amin. Sudara-sudara, kita heran skali pa ngoni. Soalnya Tuhan Allah so pangge pa ngoni for iko pa Dia, Dia se tunjung tu Dia pe bae pa ngoni lewat Kristus. Mar ngoni pe capat da bruba, ngoni so nyanda percaya lei pa Dia, kong ngoni so iko tu ajaran laeng yang orang da se tau pa ngoni, tu dorang ja bilang kabar bae tentang Kristus. Padahal sebenarnya itu bukang tu Kabar Bae tentang Yesus. Mar dorang suka beking kacau ngoni pe pikiran deng cara se putar bale tu Kabar Bae tentang Kristus. Mar biar lei torang ato satu malaekat dari sorga datang se tau pa ngoni tu ajaran yang baku beda deng tu Kabar Bae tentang Kristus tu torang so se tau lebe dulu pa ngoni, dia itu mo dapa kutuk dari pa Tuhan Allah! Waktu torang masi ada deng ngoni, torang so perna bilang pa ngoni kong skarang kita mo bilang ulang lei pa ngoni bagini: kalu ada orang se tau pa ngoni tu kabar bae tentang Kristus yang baku beda deng tu perna ngoni trima dari pa torang, dia itu mo dapa kutuk dari pa Tuhan Allah. Kita da bilang bagitu, bukang supaya kita bole mo dapa pujian dari manusia, bukang bagitu kasiang, kita cuma suka cari pujian dari pa Tuhan Allah. Mungkin ada dari pa ngoni yang bapikir kalu kita cuma mo beking snang pa manusia, padahal nyanda bagitu. Kalu misalnya kita cuma suka mo beking snang tu manusia pe hati, itu de pe arti kita ini bukang tu orang yang ja beking tu Kristus da suru. Sudara-sudara, ngoni musti tau kalu tu Kabar Bae yang kita so perna da se tau pa ngoni itu, itu bukang ajaran dari manusia. Soalnya tu Kabar Bae itu kita da trima bukang dari pa manusia, deng lei bukang manusia yang da se ajar itu pa kita, mar Yesus Kristus sandiri yang da se tau itu langsung pa kita. Ngoni tantu so dengar tentang kita pe hidop dulu waktu kita masi iko tu agama Yahudi pe atoran. Waktu itu, kita ja siksa abis-abisan tu Tuhan Allah pe jemaat deng kita brusaha kras for se abis pa dorang. Kong di agama Yahudi, kita jao lebe banya blajar tentang tu torang pe atoran-atoran agama deng ja beking tu atoran itu. Kong di antara tu kita pe tamang-tamang yang satu umur deng kita tu sama-sama orang Yahudi, nyanda ada yang sama deng kita. Kita memang sunggu-sunggu da iko akang samua tu adat yang torang pe nene moyang ja iko akang. Mar Tuhan Allah so pili pa kita dari dulu lei waktu kita masi pa mama pe kandungan, Dia se tunjung tu Dia pe bae pa kita deng cara pangge pa kita for iko pa Dia. Waktu Tuhan Allah pangge pa kita, Dia snang se tunjung tu Dia pe Anak pa kita supaya kita bole se tau pa orang-orang bukang Yahudi tentang tu Dia pe Anak itu. Kong kita nyanda minta pendapat pa orang-orang tentang itu. Di Yerusalem, ada lei tu orang-orang yang so lebe dulu dari kita tu da jadi rasul-rasul. Kita lei nyanda pigi ka Yerusalem pi baku dapa deng tu orang-orang yang so lebe dulu jadi rasul for minta pendapat pa dorang, mar kita brangkat ka tana Arab, kong abis itu kita babale lei ka Damsyik. Kong serta so lewat tiga taong, kita pigi ka Yerusalem for baku dapa deng Petrus. Kita da tinggal deng dia slama lima blas hari. Mar waktu itu, kita nyanda baku dapa deng tu rasul-rasul yang laeng, kita cuma da baku dapa deng Yakobus tu Tuhan Yesus pe saudara. Sudara-sudara, apa tu kita da tulis tentang kita pe diri ini memang butul samua, Tuhan Allah tau kalu kita nyanda badusta. Kong abis baku dapa deng dorang, kita pigi ka daera-daera di Siria deng Kilikia. Waktu itu, tu orang-orang yang percaya pa Yesus di daera Yudea blum sempat kanal pa kita. Dorang di sana cuma da dengar tu cirita tentang kita bagini, “Tu orang yang dulu ja siksa pa torang tu orang yang percaya pa Yesus, skarang tu orang itu ja se tau pa orang-orang tentang percaya pa Yesus, padahal dulu dia itu yang mo se abis pa torang yang percaya pa Yesus.” Kong dorang puji deng hormat pa Tuhan Allah lantaran apa tu Tuhan da beking pa kita. Serta so lewat ampa blas taong, kita pigi ulang ka Yerusalem sama-sama deng Barnabas, deng kita lei da bawa pa Titus. Kita pigi ka sana lantaran Tuhan Allah sandiri da suru pa kita for pigi ka sana. Kong serta kita so di sana, kita baku dapa deng tu pemimpin-pemimpin dari tu orang-orang Yahudi yang percaya pa Yesus di satu pertemuan khusus. Trus kita jelaskan pa dorang di situ tentang tu Kabar Bae yang kita ja se tau pa tu orang-orang bukang Yahudi. Kita beking itu for cari tau apa ada yang sala pa kita pe ajaran, jang sampe tu karja yang kita so beking ato tu kita mo beking itu so nyanda ada de pe guna. Kong tu Titus yang ada sama-sama deng kita waktu itu, dia itu bukang orang Yahudi, mar tu pemimpin-pemimpin itu nyanda paksa pa dia for dapa sunat iko tu atoran di kitab Taurat. Mar ada bebrapa orang yang nyanda percaya pa Yesus yang maso babadiam di antara pa torang yang so percaya. Dorang itu mo cari tau torang pe hidop yang so percaya pa Kristus Yesus tu so nyanda taika lei deng tu atoran-atoran di kitab Taurat. Deng bagitu dorang brusaha beking torang taika ulang deng tu atoran-atoran di kitab itu, sama deng jadi budak dari tu atoran-atoran itu. Mar torang nyanda iko akang tu orang-orang yang menyamar itu pe mau biar lei cuma nyanda lama. Torang nyanda iko akang pa dorang bagitu supaya tu Kabar Bae yang butul tu ngoni ja iko akang nyanda baku campur deng tu dorang pe ajaran yang nyanda butul. Kong tentang tu pemimpin-pemimpin dari orang-orang yang percaya pa Yesus di Yerusalem, tu orang-orang ja anggap orang penting, dorang itu nyanda suru pa kita for mo tamba apa-apa pa kita pe ajaran tu Kabar Bae tentang Yesus yang kita ja se tau pa orang-orang. (For kita, kita nyanda talalu pikir tu dorang pe kedudukan tinggi ato renda, lantaran Tuhan Allah nyanda ja pili-pili muka.) Waktu di pertemuan khusus itu, dorang bole tau kalu Tuhan da se percaya akang pa kita for kase tau tu Kabar Bae tentang Yesus pa orang-orang yang bukang Yahudi, sama deng Petrus yang Tuhan da se percaya for kase tau tu Kabar Bae pa orang-orang Yahudi. Soalnya Tuhan yang da kase kuasa pa Petrus jadi rasul for tu orang-orang Yahudi, kong bagitu lei Tuhan lei yang da kase kuasa pa kita jadi rasul for tu orang-orang yang bukang Yahudi. Yakobus, Petrus deng Yohanes yang orang-orang ja anggap pemimpin-pemimpin basar itu, waktu dorang tau bagimana Tuhan da se tunjung tu Dia pe bae pa kita, dorang se tangan pa kita deng Barnabas tanda dorang trima pa torang dua. Trus torang samua stuju kita deng Barnabas yang mo se tau tu Kabar Bae pa orang-orang yang bukang Yahudi, tu orang-orang yang nyanda iko atoran sunat, kong dorang tiga itu yang mo se tau tu Kabar Bae pa tu orang-orang Yahudi, tu orang-orang yang iko tu atoran sunat. Dorang tiga itu cuma da pesan pa torang, supaya torang tetap inga tu orang-orang miskin kong ja babantu pa dorang, kong memang itu no yang kita brusaha beking. Satu kali waktu Petrus datang ka Antiokhia, kita deng trang-trangan da togor pa dia, lantaran tu dia da beking so sala. Soalnya kwa bagini: waktu tu orang-orang Yahudi yang percaya pa Yesus tu Yakobus da utus blum datang di Antiokhia, tu Petrus da dudu makang sama-sama deng tu sudara-sudara bukang Yahudi yang so percaya pa Yesus. Mar serta tu orang-orang yang Yakobus da utus itu sampe di situ, Petrus baangka dari antara tu sudara-sudara yang bukang Yahudi itu trus bajao dari pa dorang lantaran dia tako pa tu sudara-sudara Yahudi yang Yakobus da utus tu dari Yerusalem. Tu orang-orang Yahudi laeng lei yang so percaya pa Yesus, dorang lei iko-iko pa Petrus jadi munafik, sampe tu Barnabas lei tapengaru jadi munafik sama deng tu dorang itu. Mar waktu kita lia kalu tu sudara-sudara Yahudi da beking itu nyanda da iko tu ajaran yang butul di Kabar Bae, kita babilang pa Petrus di muka samua orang, “Ngana itu orang Yahudi, mar ngana nyanda iko tu atoran-atoran yang biasanya orang Yahudi ja beking, ngana ja hidop sama deng tu orang-orang yang bukang Yahudi. Jadi kalu bagitu, no kiapa dang ngana suka mo paksa tu orang-orang bukang Yahudi yang so percaya pa Yesus for iko tu atoran-atoran di kitab Taurat?” Torang ini da jadi orang Yahudi dari lei torang lahir. Tu orang yang bukang Yahudi, dorang itu nyanda percaya pa Tuhan, so itu torang anggap kalu dorang itu orang berdosa. Mar skarang torang tu orang Yahudi yang percaya pa Yesus, torang tau kalu nyanda ada orang yang Tuhan beking jadi butul di muka pa Dia lantaran tu orang itu da beking tu atoran-atoran di kitab Taurat. Soalnya Tuhan beking orang jadi butul di muka pa Dia, itu lantaran tu orang itu percaya pa Kristus Yesus. So itu, torang tu orang Yahudi, torang lei percaya pa Kristus Yesus supaya deng torang pe percaya itu, Tuhan beking torang jadi orang yang butul di muka pa Dia, bukang lantaran torang da beking tu atoran-atoran di kitab Taurat. Soalnya di Kitab Suci da bilang bagini, “Nyanda ada orang yang Tuhan beking jadi orang yang butul di muka pa Dia lantaran tu orang itu da beking tu atoran-atoran di kitab Taurat.” Torang ini orang Yahudi, kong torang so percaya pa Kristus lantaran torang suka Tuhan Allah beking torang jadi butul di muka pa Dia. Mar mungkin ada orang yang mo bilang kalu torang ini orang yang berdosa, torang so nyanda ja beking lei tu atoran-atoran di kitab Taurat. Jadi kalu sama deng itu, apa Kristus beking torang ini jadi orang berdosa lantaran torang percaya pa Dia kong so nyanda iko lei tu atoran-atoran di kitab Taurat? Sama skali nyanda bagitu! Mar kalu misalnya kita mo babale ulang beking tu atoran-atoran di kitab Taurat supaya Tuhan Allah beking kita jadi orang yang butul di muka pa Dia, kita bole mo se sama deng tu orang yang da se badiri ulang tu bangunan tua yang dia so se ancor. Kalu kita beking bagitu, kita komang butul-butul so malawang pa Tuhan Allah. Dulu waktu kita brusaha ja iko tu atoran-atoran itu, tu atoran-atoran itu cuma se tunjung tu kita pe dosa-dosa, itu sama deng kita so dapa hukuman mati lewat tu atoran-atoran itu. Mar skarang kita so nyanda taika lei deng tu atoran-atoran itu supaya kita bole hidop for Tuhan Allah. Waktu Kristus mati di kayu salib, kita sama deng so dapa salib sama-sama deng Dia. So itu kita hidop skarang, kita hidop nyanda iko tu kita pe cara hidop dulu, mar Kristus yang hidop deng berkuasa pa kita. Kong pa kita pe hidop skarang di dunia ini, kita hidop cuma bagantong pa kita pe percaya pa tu Anak Allah. Dia yang sayang pa kita, kong Dia so srahkan Dia pe diri mati di kayu salib for kita. Tuhan Allah so se tunjung tu Dia pe bae pa torang, Dia beking torang jadi orang yang butul di muka pa Dia, kong kita nyanda tolak tu Dia pe bae itu. Soalnya kalu misalnya torang bole jadi orang yang butul di muka pa Tuhan Allah deng beking tu atoran-atoran di kitab Taurat, itu de pe arti tu Kristus pe kematian di kayu salib nyanda ada de pe guna. Hei ngoni tu orang-orang percaya di Galatia, ngoni biongo. Sapa yang so pengaruhi pa ngoni for iko tu ajaran yang sala? Kita to so se tau deng jelas di muka-muka pa ngoni kalu Yesus Kristus da mati di kayu salib for torang samua. No skarang cuma ini tu kita mo cari tau dari pa ngoni: apa ngoni da trima tu Roh Kudus lantaran ngoni da beking tu atoran-atoran di kitab Taurat? Nyanda to? Ngoni da trima tu Roh Kudus lantaran ngoni da dengar tu Kabar Bae tentang Yesus trus ngoni percaya. Waktu ngoni baru percaya pa Yesus Kristus, tu Roh Kudus da bakarja kong kuasai tu ngoni pe hidop, mar skarang ngoni pake ngoni pe kekuatan sbagai manusia supaya ngoni jadi orang yang butul di muka pa Tuhan Allah. Mustinya ngoni jang jadi biongo rupa itu. Kalu ngoni mo babale bagitu, sia-sia dang tu siksa yang pe banya tu ngoni da dapa dulu waktu ngoni baru percaya pa Yesus. Masa dang kong mo jadi sia-sia rupa itu. Sudara-sudara, Tuhan Allah so kase tu Dia pe Roh pa ngoni deng beking mujisat di antara pa ngoni. Apa ngoni pikir Dia da beking tu samua itu lantaran ngoni da beking tu atoran-atoran di kitab Taurat? Nyanda kasiang, mar Dia beking tu samua itu cuma lantaran ngoni da dengar tu Kabar Bae tentang Yesus trus ngoni percaya. Bagitu lei deng Abraham, di Kitab Suci da tulis bagini, “Abraham percaya pa Tuhan Allah, kong Tuhan Allah beking dia jadi orang yang butul di muka pa Tuhan.” Jadi dari situ ngoni bole tau deng jelas kalu samua orang yang percaya pa Tuhan Allah, dorang itu jadi Abraham pe keturunan. Di Kitab Suci, torang bole tau kalu dari dulu Tuhan Allah so rencana mo beking tu orang-orang bukang Yahudi jadi orang yang butul di muka pa Dia kalu dorang percaya pa Kristus. Dulu Tuhan Allah da kase tau tu Kabar Bae tentang Yesus pa Abraham, bagini tu Kabar Bae, “Samua suku bangsa mo dapa berkat lewat pa ngana.” Jadi Tuhan Allah kase berkat pa Abraham lantaran Abraham pe percaya pa Tuhan. No bagitu lei deng torang samua yang percaya pa Tuhan, torang lei mo trima tu berkat dari Tuhan Allah, tu berkat yang sama deng tu Abraham da trima. Soalnya tu orang-orang yang brusaha for jadi orang yang butul di muka pa Tuhan deng cara iko tu atoran-atoran di kitab Taurat, dorang itu no tu orang-orang yang dapa kutuk dari Tuhan Allah lantaran nyanda ada dari pa dorang tu mampu iko samua tu atoran itu. Soalnya di Kitab Suci da tulis bagini, “Sapa yang nyanda iko samua tu atoran di kitab Taurat, dia itu mo dapa kutuk dari Tuhan Allah.” Jadi torang tau deng jelas kalu nyanda ada orang yang Tuhan Allah mo beking jadi orang yang butul di muka pa Dia lantaran tu orang itu da iko tu atoran-atoran di kitab Taurat. Soalnya di Kitab Suci da tulis bagini, “Tu orang-orang yang percaya pa Tuhan, Tuhan beking dorang itu jadi orang yang butul di muka pa Dia kong dorang mo dapa tu hidop kekal.” Mar kalu torang iko tu atoran-atoran di kitab Taurat supaya Tuhan Allah bole beking torang jadi butul di muka pa Dia, itu de pe arti torang bagantong pa torang pe diri sandiri for jadi orang yang butul di muka pa Tuhan, torang nyanda bagantong pa torang pe percaya pa Tuhan Allah. Soalnya di Kitab Suci da bilang bagini, “Orang yang iko tu atoran-atoran di kitab Taurat, dorang hidop cuma ja beking tu atoran-atoran itu.” Kong torang samua pantas dapa kutuk lantaran torang nyanda mampu for iko atoran-atoran di kitab Taurat. Mar biar lei bagitu, Kristus se bebas pa torang dari tu kutuk itu deng cara Dia kase Dia pe diri dapa kutuk mati for torang. Soalnya dari lei dulu ada tatulis di Kitab Suci bagini, “Orang yang dapa hukuman mati di kayu salib, dia itu sama deng dapa kutuk dari Tuhan Allah.” Kristus Yesus se bebas pa torang dari tu atoran-atoran di kitab Taurat supaya tu orang-orang yang bukang Yahudi lei bole dapa bagean dari tu berkat yang beking torang jadi butul di muka pa Tuhan Allah, tu berkat itu yang Tuhan so janji pa Abraham dulu. Jadi, kalu torang samua percaya pa Kristus Yesus, torang samua lei mo trima tu Tuhan pe Roh yang Tuhan so janji dari dulu itu. Sudara-sudara, kita mo kase tau bagimana manusia pe biasa ja beking satu perjanjian. Biasanya kalu manusia beking perjanjian trus dorang beking sah tu dorang pe perjanjian itu, so nyanda ada lei orang laeng yang bole mo tamba akang sesuatu di perjanjian itu ato mo kase batal tu perjanjian itu, biar lei katu tu perjanjian itu cuma manusia yang da beking. Bagitu lei no deng Tuhan Allah pe janji-janji pa Abraham deng Abraham pe keturunan. Tuhan Allah nyanda bilang tu janji-janji itu pa “tu Abraham pe keturunan-keturunan,” rupa jo itu for banya orang mar Dia bilang tu janji-janji itu cuma pa satu orang “tu Abraham pe keturunan,” Dia itu no tu Kristus. Kita pe maksut bagini: Tuhan Allah so lebe dulu da beking tu perjanjian deng Abraham, kong Tuhan Allah so beking sah tu perjanjian itu. Abis itu, ampa ratus tiga pulu taong brikut, Tuhan Allah lei kase tu atoran-atoran pa Musa, tu atoran-atoran di kitab Taurat. Jadi tu atoran-atoran yang da muncul ka blakang itu nimbole mo kase batal tu perjanjian yang so lebe dulu ada itu deng lei nimbole mo beking hapus tu perjanjian itu. Soalnya kalu ngoni musti lebe dulu beking tu atoran-atoran itu supaya ngoni bole trima apa tu Tuhan Allah da janji, itu kasiang de pe nama bukang janji. Mar yang sebenarnya Tuhan Allah memang mo kase pa ngoni tu janji yang Dia so kase pa Abraham dulu, Dia mo kase itu pa ngoni deng cuma-cuma lantaran Dia so janji mo kase itu. Jadi kalu Tuhan Allah so lebe dulu beking perjanjian deng Abraham, no apa dang de pe maksut kong Tuhan Allah da kase lei tu atoran-atoran di kitab Taurat? Sebenarnya Tuhan Allah tamba akang atoran-atoran itu supaya torang manusia bole tau tu torang pe dosa. Jadi waktu dulu itu, orang-orang musti iko akang tu atoran-atoran itu sampe tu Abraham pe keturunan yang satu itu datang. Tuhan Allah suru tu Dia pe malaekat-malaekat for kase tau tu atoran-atoran itu pa Musa, kong Musa jadi prantara for bilang akang tu atoran-atoran itu. Biasanya waktu beking perjanjian, musti ada orang yang jadi prantara for tu orang-orang yang da beking perjanjian. Mar waktu Tuhan Allah beking perjanjian deng Abraham, Dia nyanda pake prantara, Tuhan Allah sandiri yang beking tu perjanjian itu. Jang ngoni pikir kalu tu atoran-atoran di kitab Taurat yang Tuhan da kase pa Musa itu baku malawang deng tu Dia pe janji pa Abraham yang so lebe dulu ada, itu sama skali nyanda baku malawang. Kalu misalnya tu atoran-atoran itu da kase for torang iko akang supaya bole dapa tu hidop kekal, itu de pe arti torang iko jo tu atoran-atoran itu supaya Tuhan Allah bole beking torang jadi butul di muka pa Dia, mar yang sebenarnya bukang bagitu. Di Kitab Suci da tulis bagini, “Samua manusia di dunia ini so taika deng dosa.” Jadi lantaran samua manusia so taika deng dosa, so itu Tuhan Allah beking tu Dia pe janji deng Abraham itu supaya sapa yang percaya pa Yesus Kristus, dia itu mo dapa tu janji hidop kekal yang Tuhan Allah mo kase. Dulu seblum torang percaya pa Yesus, torang iko tu atoran-atoran di kitab Taurat. Waktu itu, torang sama deng tu orang yang dapa tahang di bui, lantaran torang taika skali deng tu atoran-atoran itu. Torang taika bagitu sampe di waktu Kristus datang kong torang bole percaya pa Dia. Jadi tu atoran-atoran di kitab Taurat itu ada pa torang, itu for se tunjung pa torang tu cara hidop sampe di waktu Kristus datang ka dunia. Waktu Kristus datang, sapa jo yang percaya pa Dia, Tuhan Allah beking dia jadi orang yang butul di muka pa Tuhan Allah. Jadi torang so nyanda perlu lei taika deng tu atoran-atoran di kitab Taurat, lantaran skarang torang so bole percaya pa Kristus. Ngoni ini so percaya pa Kristus Yesus, so itu ngoni so jadi Tuhan Allah pe anak-anak. Ngoni so dapa baptis, itu se tunjung kalu ngoni so percaya pa Kristus, ngoni so trima tu Kristus pe sifat pa ngoni pe diri. Tu Dia pe sifat yang ada pa ngoni pe diri itu bole mo se sama deng tu baju yang ngoni ja pake pa ngoni pe diri. Di muka pa Tuhan Allah, samua orang yang so percaya pa Kristus so nyanda ada beda: biar itu orang Yahudi ato orang bukang Yahudi, biar budak ato orang bebas, biar laki-laki ato parampuang, torang samua ini sama-sama orang-orang yang so percaya pa Kristus Yesus. Kong lei kalu ngoni itu Kristus pe orang-orang, itu de pe arti ngoni lei so jadi Abraham pe keturunan, ngoni lei mo trima yang Tuhan Allah da janji dulu pa Abraham. Sudara-sudara, kita mo jelaskan hal itu deng conto bagini: kalu ada satu orang yang nanti mo trima warisan dari de pe orang tua, mar kalu dia masi di bawa umur, dia blum bole trima itu. Dia itu kurang sama jo deng tu budak yang nyanda ada hak apa-apa deng tu de pe bos pe warisan. Jadi biar dia itu sebenarnya yang punya tu warisan, mar lantaran dia masi di bawa umur, dia blum bole mo dapa tu warisan itu. Jadi ada orang-orang yang urus pa dia deng lei awasi tu dia pe warisan sampe di waktu yang de pe orang tua so tentukan for mo trima tu warisan. Bagitu lei no deng torang manusia waktu Yesus blum datang, waktu itu torang bole mo se sama deng tu anak yang masi di bawa umur, torang masi taiko-iko deng tu atoran-atoran di dunia ini sampe torang sama deng da jadi budak dari tu atoran-atoran itu. Mar serta tu waktu yang Tuhan Allah da tentukan so sampe, Tuhan Allah utus tu Dia pe Anak datang ka dunia. Tu Dia pe Anak itu yang da lahir dari satu parampuang, kong tu Anak itu hidop iko tu atoran-atoran di kitab Taurat. Tu Anak Allah itu datang ka dunia for se bebas pa torang yang taika deng tu atoran-atoran itu supaya torang bole jadi Tuhan Allah pe anak-anak. So lantaran torang so jadi Tuhan Allah pe anak-anak, so itu Tuhan Allah suru tu Dia pe Anak pe Roh maso pa torang pe hati, kong tu Roh yang ada pa torang pe hati itu bole mo bapangge pa Tuhan Allah itu, “Ya Abba, ya Bapa”. Jadi ngoni itu bukang lei budak dari tu atoran-atoran mar ngoni itu Tuhan Allah pe anak-anak. Kong kalu ngoni itu anak, ngoni itu pasti mo dapa samua warisan yang Tuhan Allah so janji mo kase pa Dia pe anak-anak. Dulu waktu ngoni blum kanal pa Tuhan Allah, ngoni itu ja iko pa opo-opo, itu sama deng ngoni jadi tu opo-opo itu pe budak, padahal tu opo-opo itu bukang Tuhan Allah. Mar skarang ngoni so kanal pa Tuhan Allah, ato de pe butul ngoni ini Tuhan Allah so kanal. Jadi mustinya ngoni sama skali jang babale lei for iko tu adat deng tu atoran-atoran yang nyanda kuat itu deng yang nyanda ada de pe guna for ngoni. Mar kiapa dang ngoni so babale iko ulang tu adat deng atoran-atoran itu, itu sama deng ngoni jadi budak ulang dari tu atoran-atoran itu. Ngoni slalu ja rayakan tu hari-hari raya iko tu atoran-atoran di kitab Taurat rupa tu hari raya di hari-hari tertentu, bulan-bulan, waktu-waktu yang so tetap deng lei tu prayaan tiap taong. Kita kuatir deng ngoni rayakan tu hari-hari itu, jang sampe ngoni so nyanda lei bagantong pa Yesus kong kita pe karja kras for se tau pa ngoni tentang Yesus itu so nyanda ada de pe guna lei. Sudara-sudara, kita ini orang Yahudi mar biar kita orang Yahudi, kita so jadi sama deng ngoni tu orang yang bukang Yahudi lantaran kita so nyanda taika lei deng tu atoran-atoran di kitab Taurat. So itu, kita bamohon pa ngoni supaya ngoni conto jo tu kita pe cara hidop skarang ini yang so nyanda taika lei deng tu atoran-atoran itu. Waktu kita ada sama-sama deng ngoni, ngoni nyanda perna beking sala apa-apa pa kita. Ngoni pasti masi inga waktu kita da datang pertama pa ngoni. Waktu itu, kita da datang pa ngoni lantaran kita da dapa saki trus kita se tau lei tu Kabar Bae tentang Yesus pa ngoni. Waktu itu, kita saki sadiki brat sampe kita pe badan yang saki ini jadi beban pa ngoni, mar ngoni nyanda perna hina ato tolak pa kita, ngoni trima pa kita sama deng kita ini Tuhan Allah pe malaekat, ngoni da sambut pa kita rupa deng kita ini Kristus Yesus sandiri. Ngoni dapa lia pe snang skali waktu itu. Mar skarang, kiapa dang ngoni so nyanda snang rupa itu lei? Kita sandiri bole mo basaksi tentang bagimana ngoni dulu, waktu itu ngoni suka skali bantu pa kita, kalu perlu lei biar ngoni cungkel tu ngoni pe mata kong kase pa kita. Mar skarang ngoni pikir kita ini tu ngoni pe musu, padahal kita cuma da kase tau tu butul pa ngoni tentang Kristus Yesus. Tu orang-orang yang se ajar tu atoran-atoran itu, dorang brusaha skali tarek pa ngoni supaya ngoni iko pa dorang, mar tu dorang da beking itu nyanda bagus. Dorang suka beking putus tu torang pe hubungan deng ngoni supaya ngoni mo iko pa dorang kong bukang pa torang. Memang bagus kalu orang brusaha trus for beking sesuatu yang bae asal trus-trus bagitu, jang sampe cuma waktu kita ada tu orang itu beking bagitu. Hei ngoni yang kita so anggap kita pe anak-anak, skarang kita pe hati saki skali da pikir-pikir tentang ngoni, tu saki yang kita da rasa sama deng tu saki yang parampuang da rasa waktu mo melahirkan. Kalu ngoni pe sifat so bruba jadi sama deng Kristus pe sifat, waktu itu baru no tu kita pe saki hati mo ilang. Kita suka skali kalu kita da sama-sama deng ngoni di situ supaya kita bole mo babicara lebe bae-bae pa ngoni, lantaran kita so nintau mo beking bagimana lei pa ngoni. Hei ngoni tu sudara-sudara yang suka hidop iko tu atoran-atoran di kitab Taurat, ngoni sebenarnya memang nyanda mangarti deng apa tu da tatulis di kitab Taurat. Di kitab Taurat da tulis kalu tu Abraham pe anak laki-laki ada dua. Tu satu anak lahir dari satu budak parampuang, kong tu anak yang satu lahir dari satu parampuang yang bukang budak. Tu anak yang lahir dari tu budak parampuang, tu anak itu lahir lantaran manusia pe mau sandiri. Mar tu anak yang lahir dari tu parampuang yang bukang budak, dia itu lahir lantaran Tuhan Allah so janji pa Abraham. Tu Abraham pe dua bini itu bole mo se sama deng dua perjanjian yang ada di Kitab Suci. Tu Abraham pe bini Hagar itu bole mo se sama deng tu perjanjian antara Tuhan Allah deng orang Israel waktu di Gunung Sinai. Hagar itu sama deng mama dari samua orang yang da jadi budak dari tu atoran-atoran di kitab Taurat. Jadi tu Hagar itu bole mo se sama deng tu Gunung Sinai yang ada di tana Arab, deng lei bole mo se sama deng Yerusalem skarang ini. Soalnya kwa tu orang-orang Yerusalem so jadi budak dari tu atoran-atoran di kitab Taurat, dorang itu so jadi budak sama deng tu Hagar. Mar tu janji yang laeng itu da se sama deng Abraham pe bini tu Sara. Sara itu bole mo se sama deng tu Yerusalem yang di sorga. Dia itu mama dari torang samua tu orang yang percaya, tu orang-orang yang so bebas dari taika deng tu atoran-atoran di kitab Taurat. Soalnya di Kitab Suci da tulis bagini, “Hei ngana tu parampuang yang mandul, yang nyanda perna se lahir anak, ngana musti snang! Snang jo deng bersorak jo ngana tu parampuang yang nyanda perna rasa tu saki lantaran da se lahir anak! Soalnya tu parampuang yang de pe laki da se tinggal, dia dapa anak lebe banya dari tu parampuang yang ada laki.” Jadi ngoni sudara-sudara, ngoni itu so jadi Tuhan Allah pe anak-anak. Ngoni itu sama deng Sara pe anak Ishak yang lahir lantaran Tuhan Allah so janji pa Abraham. Dulu tu Hagar pe anak lahir sama deng biasa anak ja lahir lantaran manusia pe mau sandiri, tu anak itu da siksa tu Sara pe anak, tu anak yang lahir lantaran tu kuasa dari Tuhan pe Roh. Jadi bagitu lei deng tu da jadi skarang, tu orang yang iko tu atoran-atoran di kitab Taurat ja siksa pa torang yang percaya pa Kristus. Mar di Kitab Suci da tulis bagini, “User jo se kaluar tu budak parampuang itu deng de pe anak. Soalnya dia pe anak itu nimbole trima tu warisan dari pa de pe papa sama-sama deng tu anak yang da lahir dari tu parampuang yang bukang budak itu.” Jadi sudara-sudara, torang ini bukang sama deng anak-anak dari tu parampuang yang da jadi budak lantaran da iko tu atoran-atoran di kitab Taurat, mar torang ini sama deng anak-anak dari tu parampuang yang bukang budak lantaran torang percaya. Sudara-sudara, Kristus so se bebas pa torang dari tu atoran-atoran di kitab Taurat, so itu no torang memang so bebas. So lantaran itu torang musti tetap kuat deng tu torang pe percaya pa Dia, kong jang se biar lei tu torang pe diri jadi budak ulang taika deng tu atoran-atoran kitab Taurat itu. Tarukira jo bae-bae, kita ini Paulus, kong kita bilang pa ngoni bagini: kalu ngoni kase tu ngoni pe diri dapa sunat iko tu atoran sunat supaya Tuhan bole beking ngoni jadi orang yang butul di muka pa Dia, itu kasiang so sala, kong apa tu Kristus da beking di kayu salib nyanda ada de pe guna for ngoni. Kita se inga ulang lei pa ngoni: tiap orang yang kase de pe diri dapa sunat iko tu atoran, dia itu lei musti iko samua tu atoran di kitab Taurat. Kalu ngoni suka Tuhan beking ngoni jadi orang yang butul di muka pa Dia lantaran ngoni iko tu atoran-atoran di kitab Taurat, itu de pe arti ngoni pe hubungan deng Kristus so jadi putus. Dulu Tuhan so se tunjung tu Dia pe bae pa ngoni lewat Yesus Kristus supaya Tuhan bole beking pa ngoni jadi orang yang butul di muka pa Dia, mar skarang ngoni cuma suka iko tu atoran-atoran itu for jadi orang yang butul di muka pa Dia, deng bagitu ngoni so nyanda mo rasa tu bae yang Tuhan so se tunjung pa ngoni. Mar sudara-sudara, torang so percaya pa Kristus Yesus, so itu tu Roh Kudus bakarja pa torang pe hati, jadi torang baharap deng yakin kalu Tuhan mo beking torang jadi orang yang butul di muka pa Dia, itu no yang torang da tunggu-tunggu. Soalnya for torang yang so percaya pa Kristus Yesus, nyanda penting for torang kalu torang iko tu atoran sunat ato nyanda iko, mar yang paling penting torang percaya pa Kristus Yesus trus tu torang pe percaya itu bole dapa lia kalu torang basayang pa orang laeng. Dulu, ngoni pe bagus skali ja iko pa Yesus, ngoni bole mo se sama deng orang yang iko lomba lari kong da lari bae-bae for mo sampe di finis. Mar skarang ini ngoni so nyanda iko lei tu ajaran yang butul. Sapa so yang pengaruhi bagitu pa ngoni? Tu pengaru itu bukang dari pa Tuhan yang da pangge pa ngoni for iko pa Dia. Ada yang bilang bagini, “Sadiki ragi yang da taru di adonan roti, beking tu samua adonan itu jadi bareis,” bagitu lei no deng tu dorang pe pengaru yang sadiki itu bole beking banya orang jadi nyanda iko lei tu butul. Kita percaya pa Tuhan, kong kita yakin skali pa Dia kalu ngoni nyanda mo tapengaru for iko tu orang-orang yang kase pengaru yang nyanda butul itu. Kong tu orang yang ja kase pengaru sampe beking ngoni pe pikiran jadi kacau itu, dia itu pasti mo dapa hukuman dari Tuhan, biar sapa jo dia itu. Sudara-sudara, ada orang-orang yang bilang kalu kita ini ja se ajar pa orang-orang kalu dorang musti dapa sunat iko tu atoran yang ada di kitab Taurat. Padahal kita nyanda ja se ajar bagitu, lantaran kalu kita memang se ajar bagitu pasti tu orang-orang yang sama-sama Yahudi deng kita nyanda da siksa pa kita. Mar kita ja se ajar pa orang-orang kalu dorang musti percaya pa Yesus Kristus yang da mati di kayu salib, kong so lantaran kita se ajar bagitu tu orang Yahudi malawang skali pa kita, kong tu Yesus pe kematian di kayu salib itu sama deng jadi batu sandungan yang beking dorang nimau mo percaya. Tu orang-orang yang beking kacau pa ngoni pake tu ajaran sunat itu, lebe bae dorang itu potong jo sampe abis tu dorang pe alat kelamin sandiri! Sudara-sudara, Tuhan Allah so pangge pa ngoni for iko pa Dia supaya ngoni bole bebas dari taika deng tu atoran-atoran itu. Cuma ngoni jang bapikir kalu ngoni so bebas trus ngoni bole beking tu kalakuan yang nyanda bagus iko apa jo tu ngoni suka, bukang bagitu kasiang. Mar yang butul, ngoni baku-baku sayang jo deng baku-baku bantu jo. Soalnya tu dasar dari samua atoran di kitab Taurat bagini, “Sayang jo pa orang laeng sama deng ngoni sayang pa ngoni pe diri sandiri.” Mar kalu ngoni tare cuma bakalae deng baku beking susa, hati-hati jo ngoni, nanti ngoni tare cuma mo baku beking ancor, ngoni itu bole mo se sama deng tu binatang yang baku-baku gigi sampe baku abis. Kita pe maksut bagini: ngoni musti hidop iko tu Roh Kudus pe mau, kong deng bagitu ngoni nyanda mo beking tu keinginan yang nyanda bagus. Tu keinginan yang nyanda bagus, itu baku malawang deng tu keinginan dari Roh Kudus. Bagitu lei deng tu keinginan dari Roh Kudus, itu baku malawang deng tu keinginan yang nyanda bagus. Soalnya tu keinginan yang nyanda bagus deng tu keinginan yang dari Roh Kudus baku malawang, sampe itu beking torang nyanda beking tu hal-hal yang torang suka mo beking. Mar kalu torang hidop iko tu Roh Kudus pe mau, torang nyanda lei hidop taika deng tu atoran-atoran di kitab Taurat. Tu keinginan-keinginan yang nyanda bagus, itu dapa lia dari kalakuan yang rupa ini: ja baseks bebas, beking tu kalakuan yang caparuni, beking tu hal-hal yang nyanda pantas for beking, ja basemba hal laeng yang bukang Tuhan, pake ilmu sihir, binci pa orang laeng, ja baku ambe, mangiri pa orang laeng, pangmara skali, cuma pikir diri sandiri, suka beking orang-orang tapica-pica deng baku beda pendapat sampe baklompo-klompo, mangiri sampe badendam, pangmabo, beking pesta mabo-mabo sampe beking tu hal-hal sambarang, deng hal-hal laeng yang nyanda bagus lei. Tentang samua tu hal-hal nyanda bagus itu, ni hari kita se inga ulang pa ngoni sama deng tu kita so perna bilang pa ngoni waktu dulu lei, kita bilang bagini: orang yang hidop ja beking tu hal-hal itu, dia nyanda mo dapa bagean waktu Tuhan Allah Berkuasa sbagai Raja pa Dia pe orang-orang. Mar tu orang yang iko tu Roh Kudus pe mau, tu Roh Kudus mo bantu pa dia hidop rupa ini: ja basayang, sukacita, hidop deng hati tenang, pangsabar, pangbae, ja beking tu bae, bole mo percaya akang, lemah lembut deng bole kuasai diri sandiri. Nyanda ada atoran yang se sala tu orang yang ja beking bagitu. Sapa jo yang so jadi Kristus Yesus pe orang, dia itu so nyanda beking tu keinginan yang nyanda bagus deng tu nafsu yang besae, itu bole mo se sama deng dia so se mati tu sifat itu di kayu salib. Kalu tu Roh Kudus so kase hidop yang baru pa torang, mari jo torang hidop iko tu Roh Kudus pe mau. Torang jang angka-angka diri sandiri, jang torang baku pancing mara, kong jang torang baku mangiri. Sudara-sudara, kalu ngoni dapa satu jo dari antara pa ngoni yang beking dosa, lebe bae ngoni yang Roh Kudus da kuasai kase nasehat deng bae-bae pa dia supaya dia bole babale ka jalang yang butul. Ngoni lei musti bajaga-jaga supaya ngoni sandiri jang sampe tagoda for beking dosa sama deng tu orang itu da beking. Kalu ada dari pa ngoni yang dapa susa, ngoni musti baku-baku bantu jo satu deng laeng, itu sama deng ngoni bantu pikul tu orang laeng pe beban. Kalu ngoni baku bantu bagitu, ngoni so beking tu prenta yang Kristus da suru for ngoni mo beking. Soalnya kalu ada orang yang pikir dia pe diri itu lebe penting dari tu orang laeng padahal sama skali nyanda bagitu, dia so tipu tu de pe diri sandiri. Lebe bae tiap orang tarukira bae-bae tentang apa tu dia so beking, apa tu dia so beking itu bae ato nyanda. Kalu yang dia da beking itu bae, dia bole rasa bangga deng tu dia da beking itu, kong nyanda perlu dia se banding tu dia da beking itu deng tu orang laeng da beking. Soalnya tiap orang musti pikul tanggong jawab masing-masing dari apa tu dia da beking. Tiap orang yang da dapa se ajar akang tu Tuhan Allah pe firman, dia itu musti berbage akang tu dia pe hasil karja pa tu orang yang da mangajar pa dia tentang tu Tuhan Allah pe firman itu. Sudara-sudara, jang sampe ngoni sala mangarti: apa tu torang da beking, itu lei no yang nanti Tuhan Allah mo pake for tentukan apa yang Dia mo kase for se balas pa torang, itu sama deng apa tu torang da tanang di kobong, itu lei nanti yang torang mo panen. Jadi jang ada yang bapikir kalu dia bole mo beking bodok pa Tuhan Allah. Sapa yang hidop ja beking tu jaha iko tu dia pe keinginan yang nyanda bagus, nanti dia itu mo dapa balasan dari Tuhan Allah, dia itu mo binasa. Mar sapa yang beking tu bae iko tu Tuhan pe Roh pe mau, nanti dia itu mo dapa balasan dari Tuhan pe Roh, dia itu mo dapa hidop kekal. Torang jang pastiu for slalu ja beking tu bae, lantaran kalu torang tetap ja beking tu bae, Tuhan mo balas tu torang pe bae itu di waktu yang Dia so tentukan, itu sama deng petani mo dapa hasil dari apa yang dia da tanang di kobong. Jadi slama torang masi ada kesempatan, mari jo torang beking tu bae pa samua orang, lebe-lebe pa torang pe sudara-sudara yang sama-sama percaya. Sudara-sudara, ngoni tarukira jo bae-bae. Kita da tulis tu bagean surat ini deng kita pe tangan sandiri, tu tulisan yang pake huruf basar-basar itu. Tu orang-orang Yahudi yang suka orang-orang puji, dorang itu yang da paksa pa ngoni yang so iko pa Kristus supaya ngoni lei musti dapa sunat. Dorang yang bapaksa itu, tu orang Yahudi yang so percaya pa Kristus, lantaran kwa dorang tako kalu tu orang-orang Yahudi laeng nanti mo siksa pa dorang kalu dorang cuma mangajar for percaya pa Kristus yang mati di kayu salib kong nyanda mangajar for iko tu atoran sunat. Padahal sebenarnya, dorang yang iko tu atoran sunat itu for beking tu atoran-atoran di kitab Taurat, dorang sandiri nyanda iko samua tu atoran di kitab Taurat. Mar dorang brusaha buju pa ngoni iko tu atoran sunat supaya dorang bole angka diri sandiri deng babilang kalu ngoni so iko pa dorang dapa sunat. Mar for kita, kita nimau mo angka diri tentang apa-apa, kita cuma mo angka-angka tu torang pe Tuhan Yesus Kristus deng apa tu Dia so beking di kayu salib. Soalnya waktu Yesus dapa salib, tu kita pe hubungan deng tu keinginan-keinginan duniawi so jadi putus, itu sama jo deng kita lei da dapa salib. Kong tu kita pe hubungan deng tu orang-orang yang iko dunia pe mau so jadi putus lei. Soalnya dapa sunat ato nyanda dapa sunat, itu bukang hal yang penting. Mar yang penting, torang dapa tu hidop baru dari pa Tuhan. Trus ngoni yang hidop iko apa tu kita da bilang ini, kita minta supaya Tuhan Allah beking ngoni hidop deng hati tenang deng lei se tunjung tu Dia pe rasa kasiang pa ngoni. Ngoni yang hidop bagitu, ngoni itu no tu Tuhan Allah pe orang-orang. Kita minta supaya jang ada orang yang beking susa pa kita. Soalnya ada bekas-bekas luka pa kita pe badan lantaran waktu kita se tau tentang Yesus itu ada orang-orang yang siksa pa kita, itu samua tanda-tanda kalu kita ini Yesus pe orang. Sudara-sudara, kita minta pa Yesus Kristus tu torang pe Tuhan for se tunjung Dia pe bae pa ngoni. Amin. Ni surat dari kita, Paulus. Kita ini Kristus Yesus pe rasul tu Dia pe utusan lantaran itu Tuhan Allah pe mau. Ni surat for ngoni tu Tuhan pe orang-orang di Efesus, ngoni yang so percaya pa Kristus Yesus. Kita minta pa Tuhan Allah, tu torang pe Bapa deng pa Tuhan Yesus Kristus supaya kase tunjung tu bae pa ngoni deng beking ngoni hidop deng hati tenang. Mari jo torang puji pa Tuhan Allah, Dia itu Bapa dari torang pe Tuhan Yesus Kristus. Dia so kase samua berkat rohani dari sorga pa torang lantaran torang so percaya pa Kristus. Soalnya seblum Tuhan Allah beking ni dunia, Dia so pili pa torang for mo percaya pa Yesus Kristus. Dia pili pa torang supaya torang bole hidop kudus deng nyanda ada sala apa-apa di muka pa Dia. Tuhan Allah sayang pa torang, so itu dari lei dulu skali Dia so tentukan torang ini jadi Dia pe anak-anak. Torang jadi Dia pe anak-anak itu lewat Yesus Kristus, itu no tu Dia pe mau yang Dia suka beking. So itu, torang samua puji pa Tuhan Allah lantaran Dia so se tunjung tu Dia pe sayang yang luar biasa pa torang. Dia so se tunjung tu Dia pe sayang yang luar biasa itu, lantaran torang so percaya pa Yesus Kristus yang Dia sayang. Yesus Kristus mati kong Dia pe dara tacura, kong lewat Dia pe dara itu Tuhan Allah se bebas pa torang dari torang pe dosa-dosa lantaran torang so percaya pa Kristus, jadi torang bole dapa ampung dari torang pe dosa-dosa. Kong samua itu torang dapa lantaran Tuhan Allah pe sayang pa torang yang pe basar skali. Dia se tunjung tu Dia pe sayang itu deng nyanda ada batas, Dia lei beking torang jadi tau mana tu bae deng bole mo mangarti banya hal. Dulu nyanda ada yang tau tu Tuhan Allah pe mau, mar skarang Tuhan Allah so se tunjung tu Dia pe rencana pa torang, tu rencana yang Dia mo beking lewat Kristus. Ini tu Dia pe rencana itu: Tuhan Allah mo beking jadi satu samua yang di sorga deng samua yang di bumi di bawa Kristus pe kuasa, trus samua itu mo jadi pas di waktu yang Tuhan so tentukan. Tuhan Allah ator samua yang ada itu, Dia ator itu iko tu Dia pe mau. Dari dulu skali, Dia so pili pa torang iko tu Dia pe mau, supaya torang bole mo trima apa yang Dia so janji mo kase pa torang lantaran torang so percaya pa Kristus. Jadi torang orang Yahudi yang so lebe dulu baharap deng yakin pa Kristus, torang bole mo puji deng hormat pa Dia yang luar biasa. Kong ngoni tu orang bukang Yahudi, skarang ngoni lei so dengar tu firman yang butul, trus ngoni so percaya pa Kristus. Tu firman yang butul itu no tu Kabar Bae tentang Yesus yang bole beking ngoni dapa slamat dari tu hukuman dosa. Ngoni so percaya pa Kristus, jadi Tuhan Allah kase tu Roh Kudus jadi tanda kalu ngoni itu Dia punya. Tu Roh Kudus itu yang Dia so janji mo kase. Tu Roh Kudus itu jadi jaminan for torang skarang ini sampe nanti torang trima apa yang Tuhan Allah so janji mo kase pa torang. Tu jaminan itu ada for torang yang jadi Tuhan Allah punya sampe di hari Tuhan Allah se bebas pa torang dari samua yang jaha. So itu, mari jo torang puji pa Tuhan Allah yang luar biasa. Tuhan Allah so beking banya hal yang bae rupa samua itu pa ngoni, so itu waktu kita dengar kalu ngoni so percaya pa Tuhan Yesus deng bagimana ngoni pe basayang pa samua tu Tuhan pe orang-orang, kita nyanda brenti-brenti bilang makase pa Tuhan Allah lantaran ngoni. Waktu kita basombayang, kita slalu inga for basombayang akang for ngoni. Kita minta pa Tuhan Allah tu Bapa yang luar biasa, tu torang pe Tuhan Yesus Kristus ja semba, supaya Dia pe Roh beking ngoni jadi tau mana tu bae deng mo kase tunjung tentang Tuhan Allah pa ngoni supaya ngoni bole butul-butul tau tentang Tuhan Allah. Kita minta lei pa Tuhan Allah supaya se trang tu ngoni pe hati, deng supaya ngoni bole mangarti butul tentang tu harapan for mo dapa slamat dari Tuhan Allah tu da pangge pa ngoni for iko pa Dia. Deng kita minta lei pa Dia supaya ngoni lei mangarti butul kalu pe luar biasa skali tu samua yang Dia so janji mo kase pa Dia pe orang-orang. Trus kita minta lei pa Tuhan Allah supaya ngoni bole mangarti butul kalu pe hebat skali tu Dia pe kuasa yang bakarja pa torang yang percaya. Tu kuasa itu no tu Tuhan Allah pe kuasa yang luar biasa skali, yang Dia da pake waktu Dia se hidop ulang pa Kristus sampe Kristus taangka ka sorga kong dudu di tampa yang paling terhormat di sabla kanan dari pa Tuhan Allah. Tu kuasa itu so ada pa Kristus, kong kuasa itu jao lebe tinggi dari samua kuasa yang ada, jao lebe tinggi dari samua yang pegang prenta, deng jao lebe tinggi dari samua yang berkuasa di bumi deng di langit. Dia berkuasa bukang cuma skarang, mar Dia berkuasa sampe slama-lamanya. Kong Tuhan Allah kase kala samua supaya Kristus yang kuasai samua itu, itu sama deng Tuhan Allah taru samua yang ada itu di bawa Kristus pe kaki. Dia angka pa Kristus jadi pemimpin dari tu Dia pe jemaat, sama deng Kristus jadi kapala for tu Dia pe jemaat. Kong torang samua ini tu Dia pe jemaat, torang bole mo se sama deng Dia pe badan. Samua yang ada pa Kristus, Dia kase lei pa torang tu Dia pe jemaat, Dia itu yang berkuasa pa samua yang ada di samua tampa. Sudara-sudara, dulu seblum ngoni percaya pa Yesus Kristus, ngoni hidop ja beking tu dosa deng ngoni ja langgar tu Tuhan pe prenta. Waktu itu, ngoni bole mo se sama jo deng so mati. Ngoni hidop ja beking tu dosa, ngoni ja iko tu dunia pe cara hidop deng ngoni ja iko akang tu setang pe bos pe mau. Tu setang pe bos itu no tu pemimpin dari tu kuasa-kuasa jaha yang berkuasa di langit, kong sampe skarang ini dia masi bakarja di hati orang-orang yang nimau mo dengar-dengaran pa Tuhan Allah. Dulu torang samua lei sama deng dorang itu, torang pe kalakuan iko tu keinginan manusia yang suka ja beking dosa, torang hidop iko tu torang pe nafsu yang besae deng iko tu torang pe pikiran yang besae. So itu, torang pantas Tuhan Allah hukum sama deng samua orang yang ja beking dosa. Mar Tuhan Allah sayang skali pa torang, so itu Dia se tunjung tu Dia pe rasa kasiang yang pe basar skali pa torang. Sebenarnya waktu torang hidop ja langgar tu Tuhan Allah pe prenta, torang bole mo se sama jo deng so mati. Mar waktu Tuhan Allah kase hidop ulang pa Yesus Kristus, itu sama deng Dia so kase hidop ulang pa torang. Jadi, torang ini bole slamat dari hukuman dosa, itu cuma lantaran Tuhan Allah da se tunjung Dia pe bae pa torang. Kristus Yesus mati, mar Tuhan Allah kase hidop ulang pa Dia, bagitu lei yang Tuhan Allah beking pa torang yang so percaya pa Kristus Yesus. Tuhan Allah kase hidop baru pa torang, kong Dia kase pa torang tampa for pegang prenta sama-sama deng Kristus Yesus di sorga. Tuhan Allah beking bagitu supaya pa de pe waktu nanti Dia bole kase tunjung pa torang kalu pe basar skali tu Dia pe sayang deng tu Dia pe bae pa torang yang so percaya pa Kristus Yesus. So lantaran Tuhan Allah so se tunjung tu Dia pe sayang pa torang, so itu torang yang percaya pa Kristus Yesus bole slamat dari hukuman dosa. Torang bole slamat cuma lantaran Tuhan Allah pe sayang pa torang, bukang lantaran torang pe usaha ja beking tu hal-hal bae. Jadi nyanda ada orang bole mo basombong bilang dia slamat lantaran dia pe usaha ja beking tu hal-hal bae. Soalnya Tuhan Allah beking torang yang so percaya pa Kristus Yesus jadi manusia baru, supaya torang ja beking tu hal-hal bae. Dari dulu Tuhan Allah so beking rencana for torang supaya torang bole hidop ja beking tu hal-hal bae. Sudara-sudara, co ngoni inga tu ngoni pe hidop dulu. Dari jo ngoni lahir, ngoni itu orang-orang bukang Yahudi. Kong tu orang-orang Yahudi ja bilang kalu ngoni itu ‘orang-orang yang nyanda da sunat’, dorang anggap ngoni bukang Tuhan Allah pe orang-orang. Trus dorang ja bilang kalu dorang itu ‘orang-orang yang da sunat’, so itu dorang itu tu Tuhan Allah pe orang-orang. Padahal tu sunat cuma manusia ja beking di badan. Waktu itu, ngoni blum percaya pa Kristus. Ngoni itu sama deng orang luar, bukang orang Yahudi tu Israel pe keturunan. Jadi ngoni nyanda mo dapa tu Tuhan Allah pe janji-janji yang Dia mo kase pa tu orang-orang Israel. Ngoni da hidop di dunia ini nyanda ada hubungan deng Tuhan Allah, jadi nyanda ada yang ngoni bole baharap akang for dapa tu hidop kekal. Mar skarang ngoni so percaya pa Kristus Yesus, ngoni so nyanda sama deng dulu waktu ngoni masi hidop jao dari pa Tuhan Allah, skarang ngoni so jadi dekat deng Dia lantaran Kristus Yesus mati kong Dia pe dara tacura. Soalnya Yesus itu no yang beking torang samua bole hidop baku-baku bae. Dia beking torang tu orang-orang Yahudi deng orang-orang bukang Yahudi yang da baku musu jadi baku bae kong jadi satu, itu sama deng Dia beking ancor tu dinding beton yang da se baku pisa pa torang. Yesus mati di kayu salib, so itu tu atoran-atoran di kitab Taurat nyanda berlaku for mo dapa slamat. Deng Yesus beking bagitu, tu orang-orang Yahudi deng tu orang-orang bukang Yahudi bole jadi satu. Dorang yang dari dua klompo itu bole jadi manusia yang baru lantaran dorang so percaya pa Kristus, kong Dia beking dorang itu bole hidop baku-baku bae. Jadi lantaran Yesus da mati di kayu salib, Dia beking tu orang Yahudi deng tu orang bukang Yahudi itu pe hubungan deng Tuhan Allah jadi bagus, deng lei Dia beking tu dua klompo itu jadi satu kong baku bae. Dia datang ka dunia ini kase tau pa dua klompo itu kalu dorang bole baku bae deng Tuhan Allah. Dia kase tau itu pa orang-orang bukang Yahudi tu dulu jao dari Tuhan Allah, deng Dia kase tau lei pa orang-orang Yahudi tu dari dulu so dekat deng Tuhan Allah. Jadi lantaran Yesus beking bagitu, torang tu orang Yahudi deng orang yang bukang Yahudi so tabuka jalang for mo badekat pa Tuhan Allah tu torang pe Bapa, kong Dia pe Roh yang satu itu yang tolong pa torang for badekat pa Dia. Jadi, ngoni tu sudara-sudara yang bukang Yahudi, ngoni bukang lei orang asing ato orang luar, mar ngoni skarang so jadi Tuhan Allah pe orang-orang sama-sama deng torang tu orang-orang Yahudi, deng ngoni so tamaso Tuhan Allah pe kluarga. Sudara-sudara, biasanya kalu orang se badiri satu ruma dia musti taru lebe dulu tu batu yang paling penting deng fondasi, baru abis itu susung tu batu for beking ruma. No bagitu lei deng torang yang percaya pa Kristus Yesus. Kristus Yesus itu sama deng batu yang paling penting dari torang pe percaya. Tu nabi-nabi deng Yesus pe rasul-rasul, dorang itu bole mo se sama deng tu fondasi yang ada di atas tu batu yang paling penting. Kong torang yang percaya pa Kristus bole mo se sama deng tu ruma yang da se badiri di atas tu fondasi deng tu batu yang paling penting itu. Torang yang so percaya pa Yesus bole mo se sama deng tu bahan-bahan bangunan yang da susung di atas fondasi yang kuat for beking ruma. Torang yang so percaya pa Tuhan, torang itu so jadi satu, kong torang itu bole mo se sama deng satu ruma yang da se kusus for Tuhan mo tinggal akang. Kong skarang ngoni tu orang-orang bukang Yahudi yang so percaya pa Kristus Yesus, ngoni deng samua orang Yahudi yang so percaya ini so jadi sama deng satu ruma yang tu Roh Kudus da se badiri for jadi Tuhan Allah pe tampa tinggal. Sudara-sudara, Tuhan so kase tunjung Dia pe bae pa orang-orang yang bukang Yahudi, so itu kita, Paulus, kita dapa se maso ka bui lantaran kita ini ja se tau tu Kabar Bae tentang Kristus Yesus pa ngoni tu orang-orang bukang Yahudi. Ngoni pasti so dengar kalu Tuhan Allah so se tunjung Dia pe bae pa kita sampe Dia kase pa kita tu karja for kase tau tu Kabar bae pa ngoni tu orang-orang yang bukang Yahudi. Tuhan Allah sandiri so kase tau pa kita tu Dia pe rencana tentang Kristus yang masi rahasia for orang laeng. Kita so tulis akang tentang tu Tuhan Allah pe rencana itu di surat ini, mar cuma pende tu kita da tulis. Kong kalu ngoni so baca tu rencana tentang Kristus tu kita da tulis itu, ngoni bole tau kalu kita so mangarti tu rencana yang rahasia tentang Kristus. Dulu, Tuhan Allah blum se tau tu rahasia itu pa manusia, mar skarang Dia so se tau itu lewat tu Roh Kudus pa orang-orang yang Dia so pili, dorang itu tu rasul-rasul deng lei tu nabi-nabi. Kong tu Tuhan Allah pe rahasia itu bagini: tu orang-orang yang bukang Yahudi lei mo percaya tu Kabar Bae tentang Yesus, jadi dorang nanti mo sama-sama deng tu orang-orang Yahudi dapa warisan yang Tuhan Allah so janji mo kase pa Dia pe orang-orang. Torang, orang Yahudi ato bukang orang Yahudi, torang samua so jadi satu sama deng da jadi satu badan. Kong torang samua itu mo dapa yang Tuhan Allah da janji pa torang yang so percaya pa Kristus Yesus. Tuhan Allah da se tunjung tu Dia pe bae pa kita, Dia da pili pa kita supaya kita jadi orang yang ja se tau tu Kabar Bae tentang Yesus. Dia pe kuasa no tu da bakarja pa kita pe hati sampe kita dapa tugas itu. Kita ini orang yang paling hina dari antara samua tu Tuhan Allah pe orang-orang. Mar biar lei bagitu, Tuhan Allah se tunjung tu Dia pe bae pa kita supaya kita kase tau tu Kabar Bae pa orang-orang yang bukang Yahudi. Kita kase tau pa dorang tentang Yesus Kristus yang pe hebat skali, sampe susa orang mo bayangkan tu Dia pe hebat itu. Tuhan Allah da beking Dia pe rencana itu dari dulu, kong Dia pe rencana itu da se rahasia pa orang-orang. Tuhan Allah yang ciptakan samua yang ada, kong Dia se trang samua orang pe hati supaya mangarti apa tu Dia pe rencana itu pa orang-orang, supaya skarang ini lewat Dia pe jemaat, samua yang pegang prenta deng yang berkuasa di langit bole tau kalu Tuhan Allah itu butul-butul pintar deng bijaksana skali. Tuhan Allah beking itu iko apa yang Dia so rencana dari dulu yang nyanda mo bruba sampe slama-lamanya, kong tu Dia pe rencana itu jadi lewat Kristus Yesus tu torang pe Tuhan. Torang so percaya pa Kristus Yesus so itu torang so ada jalang for badekat pa Tuhan Allah deng so nyanda tako lei mo badekat pa Dia. So lantaran itu, kita minta pa ngoni supaya ngoni pe hati jang rasa susa waktu ngoni dengar kita da mendrita lantaran da kase tau tu Kabar Bae tentang Yesus pa ngoni. Soalnya tu pendritaan yang kita da rasa, itu samua de pe tujuan supaya ngoni dapa puji deng hormat. Jadi sudara-sudara, waktu kita pikir tu Tuhan Allah pe bae pa ngoni, kita berlutut kong basombayang pa Tuhan Allah tu torang pe Bapa. Dia itu Bapa dari torang samua tu ada di bumi deng lei yang so ada di sorga, Dia beking torang ini sama deng satu kluarga. Kita minta pa Tuhan Allah yang hebat deng luar biasa supaya Dia pe Roh pe kuasa beking kuat tu ngoni pe hati. Kita minta pa Tuhan Allah bagitu supaya Kristus bole tinggal pa ngoni pe hati lantaran ngoni so percaya pa Dia. Kita minta pa Tuhan Allah supaya Dia pe sayang jadi dasar pa ngoni pe hidop, sama deng tu akar tanaman yang kuat di dalam tana. Kita minta pa Tuhan Allah supaya ngoni sama-sama deng samua tu Tuhan pe orang-orang yang laeng, bole mo mangarti kalu pe basar skali tu Kristus pe sayang pa torang samua. Dia pe sayang yang basar itu, pe susa mo ukur de pe tinggi, de pe lebar, de pe panjang deng de pe tabal. Kong tu Dia pe sayang itu, lebe basar dari apa yang bole torang pikir. Mar biar bagitu, kita minta pa Tuhan Allah supaya ngoni bole mangarti butul tu Yesus pe sayang itu, supaya tu Tuhan Allah pe sifat lebe tatamba dapa lia pa ngoni pe diri. Tuhan Allah mampu mo beking lebe dari apa yang torang minta pa Dia, Dia lei bole beking lebe dari yang torang pikir Dia bole beking. Dia bole beking samua itu lantaran Dia pe kuasa, kong Dia pe kuasa itu yang bakarja pa torang pe hidop. So itu, mari jo torang tu Dia pe jemaat puji deng hormat pa Dia, mari jo tu torang yang percaya pa Kristus Yesus puji deng hormat pa Dia for slama-lamanya. Amin. Sudara-sudara, kita ini orang yang da dapa se maso ka bui lantaran ja beking tu Tuhan da suru. Kong so lantaran Tuhan so se tunjung Dia pe bae pa ngoni, so itu kita se smangat pa ngoni tu orang-orang yang Tuhan so pangge for iko pa Dia, supaya ngoni hidop butul sama deng tu orang-orang yang so iko pa Dia musti hidop. Ngoni pe cara hidop musti bagini: nyanda sombong, nyanda kasar pa orang laeng deng pangsabar. Kong kalu ada orang beking sala pa ngoni, ngoni sabar jo deng dia lantaran ngoni baku sayang. Tuhan pe Roh so beking ngoni jadi satu, so itu brusaha jo tetap hidop jadi satu deng cara hidop baku-baku bae. Torang yang percaya pa Yesus so jadi satu sama deng torang ini so jadi satu badan, deng tu Roh Kudus yang ada pa torang itu lei cuma satu. Bagitu lei Tuhan Allah so pangge pa torang for satu harapan, torang baharap deng yakin pa Dia yang da pangge pa torang for iko pa Dia. Cuma ada satu Tuhan, torang pe percaya cuma satu, deng cuma ada satu baptisan. Trus cuma ada satu Tuhan Allah tu Bapa dari torang samua. Dia yang berkuasa pa torang samua, Dia yang bakarja pa torang samua, deng Dia hidop pa torang samua pe hati. Mar pa torang masing-masing, Kristus so kase akang karunia yang baku-baku beda, kong tu torang pe karunia-karunia itu iko apa yang Dia suka kase pa torang. So lantaran itu, di Kitab Suci da tulis bagini, “Waktu Dia nae ka tampa yang tinggi, Dia bawa lei tu Dia pe musu-musu yang Dia so se kala itu, kong pa Dia pe orang-orang Dia kase akang berkat.” Jadi kalu bilang, “Dia nae ka tampa yang tinggi,” itu de pe arti Dia lei so perna turung ka tampa yang paling bawa di bumi. Dia yang so perna turung itu no Kristus, Dia lei yang so nae ka tampa yang paling tinggi di sorga, supaya Dia bole pegang prenta pa samua yang ada. Kristus da kase karunia pa Dia pe orang-orang, ada yang Dia kase karunia for jadi rasul tu Dia pe utusan, ada lei yang Dia kase karunia for jadi nabi tu orang yang ja kase tau Tuhan pe pesan, ada yang Dia kase karunia for jadi penginjil tu orang yang ja kase tau tu Kabar Bae pa orang yang blum dengar itu, ada yang Dia kase karunia for jadi pemimpin di jemaat sama deng gembala urus bae-bae tu de pe domba, deng ada lei yang Dia kase karunia for mangajar pa jemaat. Kristus kase Dia pe karunia pa tu orang-orang itu for tolong tu Tuhan pe orang-orang yang sama deng Yesus Kristus pe badan supaya dorang mampu beking tu dong pe playanan masing-masing, deng lei bole baku kase kuat tu dorang pe percaya, sampe torang samua tu Dia pe orang-orang jadi satu hati lantaran torang sama-sama percaya, kong torang bole kanal pa tu Anak Allah, torang lei bole mo butul-butul percaya, deng torang pe sifat lebe hari bruba jadi lebe bae sampe sama deng Yesus Kristus pe sifat. Kalu torang so rupa itu, torang pe pikiran nyanda mo sama deng anak kacili yang gampang kana tipu. Jadi kalu ada orang datang kase ajar de pe ajaran yang sesat for mo tipu pa torang supaya iko pa dia, torang nyanda mo taiko. Torang nyanda mo gampang taiko-iko sama deng omba yang takasana-kamari da iko angin batiop. Mar torang ja bilang yang butul pa orang laeng lantaran torang sayang pa dorang, kong di samua hal torang pe sifat lebe lama lebe tatamba sama deng Kristus pe sifat. Dia tu pemimpin for samua orang percaya, sama deng Dia tu torang pe kapala. Kong torang yang percaya so jadi satu, torang ini so jadi sama deng Dia pe badan. Dia pe kuasa ada pa torang samua kong beking torang itu jadi satu. Kalu torang masing-masing beking tu tugas yang Dia kase pa torang, itu mo beking torang baku kase kuat satu deng yang laeng kong lebe hari torang lebe baku sayang. Deng kuasa Tuhan, kita mo bilang deng kita mo se tegas pa ngoni bagini: ngoni pe cara hidop jang lei sama deng cara hidop dari orang yang nyanda kanal pa Tuhan Allah, pa dorang pe pikiran itu nyanda ada yang bae. Dorang pe pikiran so glap, susa for dorang mo tau yang butul. Dorang hidop jao dari tu hidop yang Tuhan Allah mo kase pa dorang lantaran dorang pe kapala batu, deng dorang nimau tau tentang Dia. Dorang lei so nyanda ada rasa malo, dorang ja iko tu dong pe nafsu yang besae deng dorang suka skali mo beking-beking trus tu hal-hal yang caparuni. Mar tu ajaran tentang Kristus yang ngoni so dengar, nyanda kase ajar tu ajaran for mo hidop besae rupa itu. Soalnya ngoni so dengar tu ajaran tentang Kristus dari tu orang-orang yang kase ajar pa ngoni. Ngoni so trima tu ajaran yang butul tentang Dia kong yang butul itu memang ada pa Yesus. Tu ajaran itu bagini: ngoni se tinggal jo tu ngoni pe kalakuan yang dulu, yang dari waktu ngoni blum percaya pa Yesus. Soalnya tu kalakuan yang dulu itu nyanda bagus, tu nafsu besae itu yang ngoni da iko akang yang beking sampe ngoni jadi sesat, kong tu nafsu itu tu da beking rusak tu ngoni pe hidop. Ngoni se biar jo tu Tuhan pe Roh roba tu ngoni pe pikiran, deng ngoni jadi manusia baru, manusia yang Tuhan Allah da ciptakan iko Dia pe sifat, supaya ngoni ja beking tu butul deng hidop kudus. Jadi brenti jo badusta, ngoni musti bicara jo yang butul satu deng laeng lantaran torang samua yang percaya pa Yesus ini so sama deng anggota dari satu badan. Kalu ngoni mara, jang ngoni beking dosa, jang simpang tu ngoni pe mara itu sampe matahari so maso. Kalu nyanda simpang mara bagitu, tu setang pe bos nyanda mo ada kesempatan goda pa ngoni for beking dosa. Orang yang bapancuri, jang dia bapancuri lei. Dia musti rajin bakarja supaya deng de pe hasil karja dia bole babantu pa orang yang ada perlu. Ngoni jang bicara tu besae-besae, jang tu kata-kata bagitu kaluar dari ngoni pe mulu. Mar kalu ngoni bicara, ngoni pake jo tu kata-kata yang se kuat orang pe hati, deng pake tu kata-kata yang orang perlu mo dengar for dia pe bae. Ngoni bicara jo yang bae-bae, jang sampe ngoni beking tu Tuhan Allah pe Roh yang Kudus itu jadi sedi. Soalnya Tuhan Allah pe Roh yang ada pa torang itu jadi tanda kalu torang ini memang Tuhan Allah punya sampe tu hari Dia datang ulang for se slamat pa torang. Ngoni musti kase tinggal jo tu ngoni pe kalakuan yang pangbasaki hati, pangbakalae deng kalakuan yang pangmara. Ngoni brenti jo bicara mara yang beking kacau, deng brenti jo se besae orang laeng pe nama. Ngoni brenti jo ja beking samua yang jaha. Mar lebe bae ngoni se tunjung tu bae pa orang laeng deng sayang pa dorang. Ngoni kase ampung jo tu orang yang beking sala pa ngoni, sama deng Tuhan Allah so kase ampung pa ngoni yang so percaya pa Kristus. Jadi sudara-sudara, ngoni ini Tuhan Allah pe anak-anak yang Dia sayang, ngoni musti iko tu Dia pe sifat. Ngoni musti hidop baku-baku sayang, sama deng Kristus sayang pa torang sampe Dia srahkan Dia pe diri mati for torang. Waktu Kristus srahkan Dia pe diri, itu sama deng korban persembahan yang bobou sadap tu beking Tuhan Allah pe hati snang. Ngoni itu Tuhan pe orang-orang, kong ngoni musti hidop iko tu kalakuan yang pantas for Tuhan pe orang-orang. Ngoni jang baseks bebas, jang beking tu kalakuan-kalakuan yang caparuni deng ngoni jang sraka, kong biar cuma mo cirita tu kalakuan-kalakuan itu jangan. Ngoni jang ja bilang tu kata-kata kotor, ngoni jang ja bilang tu hal-hal yang nyanda ada de pe guna, deng lei jang ja bakusedu tu caparuni. Soalnya tu kata-kata yang rupa itu nyanda pantas for ngoni yang percaya pa Kristus mo bilang, mar lebe bae ngoni basombayang kong bilang makase pa Tuhan. Soalnya ngoni musti inga bae-bae, tu orang-orang yang ja baseks bebas, yang beking tu kalakuan-kalakuan yang caparuni nyanda ada yang mo jadi orang-orang dari Tuhan Allah deng Yesus Kristus yang berkuasa sbagai Raja. Bagitu lei deng tu orang-orang yang suka samua jadi dorang punya, nyanda ada yang dari pa dorang tu mo jadi orang-orang dari Tuhan Allah deng Yesus Kristus, dorang itu kurang sama deng orang-orang yang so beking samua itu jadi lebe penting dari Tuhan. Jang ngoni percaya pa orang-orang yang bilang tu kalakuan-kalakuan rupa itu bukang dosa. Tu dorang da bilang itu nyanda butul. Dorang cuma mo tipu pa ngoni supaya ngoni beking tu kalakuan yang besae itu. Soalnya Tuhan Allah pasti mo hukum pa orang-orang yang beking dosa rupa itu, dorang yang nyanda dengar-dengaran pa Dia. So itu ngoni jang ja iko tu orang-orang yang beking dosa rupa itu. Dulu, ngoni nintau tu ajaran yang butul yang dari pa Tuhan, ngoni sama deng da hidop di dalam glap. Mar skarang ngoni so tau itu kong so percaya pa Tuhan, ngoni itu bole mo sama deng da hidop di dalam trang. Jadi ngoni sbagai anak-anak trang, ngoni hidop jo bae-bae sama deng Tuhan Allah pe anak-anak musti ja beking. Soalnya kalu ngoni hidop trus dalam trang, ngoni mo beking tu hal-hal yang bae, yang butul deng ngoni lei ja bicara yang jujur. Deng ngoni lei musti brusaha cari tau apa yang beking Tuhan pe hati snang. Jang iko tu kalakuan dari tu orang yang hidop dalam glap, tu dorang ja beking itu nyanda ada de pe guna, mar lebe bae ngoni bilang kalu tu kalakuan itu sala. Soalnya apa yang dorang beking deng sambunyi-sambunyi itu beking malo skali, biar lei torang cuma bicara tentang itu torang so rasa malo. Mar kalu orang-orang beking sala, trus dorang dengar tu Tuhan pe firman, itu sama deng da pasang lampu supaya dorang bole balia di glap. Soalnya tu trang yang beking orang-orang bole balia dalam glap. So itu, ada tu da tulis bagini, “Hei ngoni yang masi tidor, bangong jo, ngoni ini sama deng so mati mar ngoni musti hidop ulang. Kristus mo beking ngoni tau tentang tu ajaran yang butul, itu sama deng ada cahaya yang kase trang pa ngoni.” Jadi tarukira jo bae-bae tu ngoni pe cara hidop. Ngoni jang hidop sama deng orang-orang yang nintau apa-apa, mar hidop jo sama deng orang yang tau mana tu butul deng nyanda butul. Ngoni pake bae-bae jo tiap kesempatan yang ada for beking tu bae, lantaran skarang ini so banya orang yang ja beking dosa trus-trus. Jadi ngoni jang sama deng orang yang nintau apa-apa, mar ngoni musti mangarti bae-bae tu Tuhan Allah pe mau. Ngoni jang bamabo, itu beking ngoni nyanda mampu kuasai tu ngoni pe diri, mar lebe bae ngoni kase tu ngoni pe diri for Roh Kudus mo kuasai. Kong baku kase kuat tu ngoni pe hati satu deng laeng pake tu puji-pujian yang ada di Mazmur, lagu-lagu rohani deng lagu-lagu laeng yang Roh Kudus da kase pa ngoni. Ngoni manyanyi kong puji jo pa Tuhan deng segnap hati. Kong dalam samua hal, ngoni slalu bilang jo makase pa Tuhan Allah tu torang samua pe Bapa lantaran apa yang Yesus Kristus tu torang pe Tuhan so beking. Ngoni musti hidop baku-baku dengar satu deng laeng, kalu ngoni beking bagitu ngoni se tunjung ngoni pe hormat pa Kristus. Ngoni tu bini-bini, ngoni musti dengar-dengaran pa ngoni pe laki, sama deng ngoni dengar-dengaran pa Tuhan. Soalnya tu laki itu tu bini pe pemimpin, itu sama deng tu laki itu tu bini pe kapala. Itu sama deng Kristus, Dia itu kapala dari tu jemaat, kong tu jemaat itu bole mo se sama deng Dia pe badan. Dia yang da se slamat tu Dia pe jemaat dari hukuman dosa. Jadi sama deng tu jemaat dengar-dengaran pa Kristus, bagitu lei deng tu bini-bini musti dengar-dengaran pa dong pe laki dalam samua hal. Ngoni tu laki, ngoni musti sayang pa ngoni pe bini sama deng Kristus sayang pa Dia pe jemaat, sampe Dia srahkan Dia pe diri mati for torang. Kristus beking bagitu supaya Dia beking kudus pa torang tu Dia pe jemaat, Dia beking bersi pa torang dari dosa lantaran torang da iko tu Dia pe firman deng lei torang so dapa baptis. Deng beking bagitu, torang tu Dia pe jemaat bole jadi orang yang hati bersi, deng nyanda ada yang mo se sala pa torang, torang so nyanda mo ada dosa lei, jadi torang bole mo badiri di muka pa Dia. Bagitu lei ngoni tu laki, ngoni lei musti sayang tu ngoni pe bini sama deng Kristus da sayang pa Dia pe orang-orang. Ngoni sayang jo tu ngoni pe bini sama deng ngoni sayang tu ngoni pe badan sandiri. Sapa jo yang sayang pa de pe bini, itu sama jo deng dia sayang tu dia pe diri sandiri. Soalnya nyanda ada orang to yang mo beking besae tu de pe diri sandiri, pasti dia mo jaga deng sayang tu dia pe diri sandiri, sama deng Kristus da jaga deng sayang tu De pe jemaat. Dia jaga deng sayang pa torang lantaran torang ini sama deng Dia pe badan. Di Kitab Suci da tulis bagini, “So itu tu laki-laki mo se tinggal tu de pe papa deng mama, kong dia hidop satu deng de pe bini, kong dorang dua itu jadi satu.” Kita da tulis tentang tu hubungan laki bini, kong de pe arti dalam skali deng orang laeng lei blum tau tentang itu. Kita tulis tentang tu hubungan itu, kita pe maksut mo kase gambaran for tu hubungan antara Kristus deng Dia pe jemaat. Mar biar lei bagitu, tu laki musti tetap sayang pa de pe bini sama deng dia sayang tu de pe diri sandiri, kong tu bini musti hormat pa de pe laki. Ngoni tu anak-anak yang so percaya pa Tuhan, ngoni musti dengar-dengaran pa ngoni pe orang tua lantaran itu yang butul yang ngoni musti beking. Di Kitab Suci ada tu atoran bagini, “Ngoni musti hormat tu ngoni pe papa deng tu ngoni pe mama.” Kong dari antara tu atoran-atoran, tu atoran ini yang pertama Tuhan Allah da pake akang janji for sapa jo yang iko akang. Tu Tuhan pe janji itu bagini, “Ngoni mo hidop snang deng mo dapa umur panjang di dunia ini.” Ngoni tu papa-papa, ngoni jang kasar pa ngoni pe anak-anak sampe beking dorang jadi mara, mar ngoni didik jo deng latih pa dorang iko tu Tuhan pe ajaran. Ngoni tu budak-budak, dengar-dengaran jo pa ngoni pe tuang yang ada di dunia ini. Ngoni tako jo deng hormat pa dorang deng hati yang sunggu-sunggu, sama deng ngoni dengar-dengaran pa Kristus sandiri. Ngoni dengar-dengaran pa ngoni pe tuang jang cuma waktu dorang lia-lia pa ngoni supaya mo beking dong pe hati snang. Mar ngoni musti dengar-dengaran pa dorang lantaran ngoni itu orang-orang yang ja beking tu Kristus da suru, deng ngoni memang ja beking tu Tuhan Allah pe mau deng sunggu-sunggu. Ngoni beking jo tu ngoni pe karja deng snang hati, sama deng ngoni ja bakarja for Tuhan bukang for manusia. Ngoni karja jo rupa itu lantaran torang samua so tau kalu sapa jo ja beking tu bae, biar dia itu budak ato bukang budak, pasti Tuhan mo balas tu bae yang dia da beking itu. Deng ngoni tu tuang-tuang, ngoni musti beking lei bae-bae pa ngoni pe budak-budak. Jang ngoni baancam pa dorang. Ngoni tu tuang-tuang inga jo bae-bae: ngoni itu pe Tuang, deng lei tu budak-budak pe Tuang itu satu, Dia itu no tu Tuhan yang ada di sorga, kong Dia nyanda pili-pili orang. Di akhir ni surat, kita bilang bagini: ngoni so percaya pa Tuhan, jadi se kuat jo tu ngoni pe hati, se biar jo Tuhan pe kuasa yang kuasai pa ngoni. Tentara ja pake baju prang deng senjata lengkap supaya bole mo batahang malawang de pe musu, bagitu lei deng torang, torang musti pake tu perlengkapan prang dari Tuhan Allah supaya bole mo batahang malawang tu cobaan-cobaan dari setang pe bos. Soalnya torang nyanda baprang malawang pa manusia, mar torang baprang malawang tu setang pe bos deng dia pe anak-anak bua yang torang nyanda dapa lia. Torang baprang malawang samua yang berkuasa di dunia yang glap ini, deng torang lei malawang samua yang jaha yang berkuasa di langit. So itu pake jo samua tu perlengkapan prang yang dari Tuhan Allah supaya ngoni bole batahang malawang tu srangan-srangan di waktu yang jaha. Kong kalu ngoni so klar malawang tu srangan-srangan itu, ngoni pe percaya tetap mo kuat. Jadi ngoni se siap jo tu ngoni pe diri for malawang tu srangan-srangan itu deng cara ini: ngoni tetap hidop jo slalu ja iko tu ajaran yang butul, kalu ngoni hidop bagitu, ngoni itu bole mo se sama deng tu tentara yang da pake ban supaya dia so siap malawang tu musu. Ngoni musti hidop slalu ja beking tu butul kong nyanda ja beking tu jaha, itu bole mo se sama deng tu tentara yang da pake baju besi for jaga de pe diri dari tu srangan-srangan musu. Ngoni lei musti slalu siap for pi kase tau tu Kabar Bae tentang Yesus supaya orang bole baku bae deng Tuhan, kong kalu ngoni slalu siap bagitu, ngoni itu bole mo se sama deng tentara yang slalu ja pake de pe capatu for siap malawang de pe musu. Kong di tiap waktu ngoni musti tetap percaya jo pa Tuhan, kong kalu ngoni percaya bagitu, ngoni itu bole mo se sama deng tu tentara yang slalu pegang de pe perisai for pele de pe diri dari musu pe pana. Soalnya ngoni pe percaya itu bole mo kase mati tu pana api dari setang pe bos yang da se ser pa ngoni. Tuhan Allah so se slamat pa ngoni dari tu hukuman dosa, kong tu keslamatan yang Dia da kase pa ngoni itu bole mo se sama deng tu topi baja yang tentara da pake for lindungi tu kapala. Kong ngoni slalu siap jo for pake tu Tuhan Allah pe firman yang Dia pe Roh da kase pa ngoni, deng ngoni slalu siap bagitu, ngoni bole mo se sama deng tentara yang da pegang pedang for siap malawang de pe musu. Ngoni basombayang jo siang deng malam, kong ngoni minta pa Tuhan Allah dalam samua hal, kong se biar jo tu Roh Kudus yang tolong pa ngoni waktu ngoni basombayang. Ngoni basombayang deng smangat kong jang brenti basombayang akang for samua tu Tuhan Allah pe orang-orang. Ngoni basombayang akang lei for kita. Minta jo pa Tuhan supaya waktu kita mo babicara pa orang-orang, Dia kase akang pa kita kata-kata apa yang kita musti bilang, kong deng brani kita bole kase tau tu Kabar Bae tentang Yesus yang dulu manusia blum tau. Kita da jadi utusan for ja kase tau tu Kabar Bae tentang Yesus, kong kita da dapa se maso ka dalam bui lantaran da kase tau tu Kabar Bae itu. Ngoni basombayang akang jo for kita supaya kita deng brani kase tau tu Kabar Bae itu, sama deng yang mustinya kita kase tau pa orang-orang. Sudara-sudara, kita mau ngoni tau tu kita pe keadaan deng tu kita da beking di sini, so itu kita da suru pa Tikhikus pigi pa ngoni supaya dia bole pi kase tau tentang itu pa ngoni. Dia itu torang pe sudara yang percaya yang torang sayang, deng dia lei rajin ja beking tu karja yang Tuhan da kase pa dia. Kita suru pa dia for pigi pa ngoni supaya dia bole kase tau pa ngoni tentang tu torang pe keadaan di sini, deng supaya dia lei bole se kuat tu ngoni pe hati. Kita minta pa Tuhan Allah tu torang pe Bapa, deng pa Tuhan Yesus Kristus, supaya ngoni tu sudara-sudara bole hidop baku-baku bae, supaya ngoni bole hidop baku sayang, deng supaya ngoni lei bole tetap percaya pa Yesus Kristus. Kita minta pa Tuhan supaya kase tunjung De pe bae pa samua orang yang dorang pe sayang pa Yesus Kristus tu torang pe Tuhan itu nyanda mo abis-abis. Ni surat dari kita, Paulus, deng Timotius. Torang dua ini cuma orang-orang yang ja beking tu Kristus Yesus ja suru. Ni surat for ngoni samua tu Tuhan pe orang-orang yang ada di Filipi, ngoni tu orang-orang yang so percaya pa Kristus Yesus. Ni surat lei for ngoni tu da jadi pemimpin jemaat deng lei for ngoni tu da jadi diaken di situ. Kita minta supaya Tuhan Allah tu torang pe Bapa deng Tuhan Yesus Kristus kase tunjung tu Dia pe bae pa ngoni deng beking ngoni hidop deng hati tenang. Tiap kali kita inga pa ngoni, kita bilang makase pa Tuhan Allah tu Tuhan yang kita ja semba. Kong tiap kali kita basombayang for ngoni samua, kita slalu basombayang deng snang hati. Kita bilang makase rupa itu lantaran dari tu hari pertama ngoni jadi percaya pa Tuhan sampe skarang, ngoni so ambe bagean supaya orang-orang bole dengar tu Kabar Bae tentang Yesus. Tuhan Allah so mulai bakarja pa ngoni pe hati, Dia bakarja beking tu bae pa ngoni, kong kita yakin butul kalu Dia mo se trus tu karja itu sampe klar, sampe di hari Kristus Yesus datang ulang. Ngoni da bantu pa kita waktu kita ada di bui ini, kong kita ada di bui ini lantaran kita da kase tau pa orang-orang Kabar Bae tentang Yesus. Ngoni so bantu pa kita da bela tu Kabar Bae tentang Yesus dari tu orang-orang yang malawang tu Kabar Bae itu. Ngoni samua so ambe bagean di karja yang Tuhan da kase pa kita, tu karja itu Dia da kase pa kita lantaran Dia pe bae yang Dia da se tunjung pa kita. So itu memang pantas no kalu kita bilang makase rupa itu waktu kita inga pa ngoni, lantaran ngoni samua ada pa kita pe hati. Soalnya Tuhan Allah tau butul kalu kita rindu skali pa ngoni. Kita sayang skali pa ngoni sama deng Kristus Yesus sayang pa ngoni. Kong kita basombayang akang for ngoni, kita minta pa Tuhan supaya lebe hari tu ngoni pe basayang pa orang lebe tatamba, ngoni lebe mampu mangarti banya hal, deng lei ngoni bole mo se beda mana yang butul deng yang nyanda butul. Deng bagitu ngoni bole tau mo pili mana yang paling bae supaya ngoni bole hidop deng hati yang bersi, kong di hari Yesus Kristus datang ulang, ngoni nyanda ada sala apa-apa. Kita basombayang supaya ngoni ja beking tu butul lantaran Yesus Kristus bakarja pa ngoni pe hati, trus orang-orang mo puji deng hormat pa Tuhan Allah lantaran dorang lia tu ngoni pe kalakuan yang butul itu. Sudara-sudara, kita suka ngoni tau kalu kita da dapa se maso di bui, kong itu justru beking tatamba trus tu orang-orang yang dengar tu Kabar Bae tentang Yesus. Jadi so lantaran kita da dapa se maso ka bui di Roma ini, samua tu pengawal di istana yang ada di sini deng tu orang-orang laeng jadi tau kalu kita da dapa se maso ka bui lantaran kita ja beking tu Yesus Kristus da suru. Kong so lantaran kita da dapa se maso ka bui, banya dari tu sudara-sudara yang percaya tu ada di daera ini jadi lebe kuat tu dorang pe percaya pa Tuhan, sampe dorang lebe brani ja kase tau tu Kabar Bae tentang Yesus deng nyanda ada rasa tako lei. Memang butul ada bebrapa orang yang ja kase tau tu ajaran tentang Kristus lantaran dorang mangiri deng suka mo malawang pa kita. Mar ada lei katu no orang-orang yang ja kase tau tu ajaran tentang Kristus deng tujuan yang bae. Dorang yang ja kase tau tu ajaran tentang Kristus deng tujuan yang bae itu, dorang beking bagitu lantaran dorang sayang pa kita deng dorang lei tau kalu Tuhan Allah da pili pa kita for bela tu Kabar Bae supaya orang bole tau tu Kabar Bae itu butul. Mar ada bebrapa orang yang ja se tau tu Kabar Bae tentang Kristus bukang deng hati yang sunggu-sunggu. Dorang se tau tu Kabar Bae cuma supaya mo malawang pa kita, kong dorang pikir deng bagitu bole mo beking kita pe hati rasa susa di bui. Mar biar lei bagitu, itu nyanda apa-apa for kita. Soalnya biar dorang kase tau tu Kabar Bae itu deng maksut yang bae ato nyanda bae, yang penting dorang ja kase tau tu Kabar Bae tentang Kristus pa orang-orang, itu yang beking kita pe hati snang kong tu rasa snang itu mo ada trus pa kita pe hati. Soalnya kita tau kalu tu ngoni pe sombayang for kita deng lei tu Roh yang dari pa Yesus Kristus itu mo tolong pa kita, trus kita pasti nanti mo dapa se bebas. Kita baharap deng yakin kalu kita nyanda mo malo deng apa tu kita da beking di samua hal, kong itu no tu kita pe keinginan lei yang paling dalam. Mar kita baharap trus supaya kita brani for beking tu Yesus da suru pa kita sama deng tu kita da beking dari dulu. Jadi for kita, nyanda masala kalu kita mo hidop ato mo mati, yang penting tu Kristus bole mo dapa hormat dari apa tu kita da beking pa kita pe hidop. Soalnya for kita, kita hidop cuma for Kristus, kong kalu kita mati, itu kita pe untung lantaran kita bole mo sama-sama deng Kristus. Mar kalu kita hidop trus di dunia ini, itu kita pe kesempatan for beking tu Yesus pe karja. Jadi kita nintau mana tu kita mo pili. Kita ini sama rupa da dapa tarek di antara dua jalang. Kita suka mo se tinggal ni dunia ini for tinggal sama-sama deng Kristus, lantaran itu memang jao lebe bae. Mar lebe bae kalu kita tinggal sama-sama deng ngoni di dunia ini lantaran ngoni masi perlu pa kita. Kita yakin tentang ini, kita tau kalu kita masi tetap mo hidop sama-sama deng ngoni samua di dunia ini supaya kita bole mo tolong for beking kuat tu ngoni pe percaya pa Yesus, deng lei supaya ngoni bole lebe snang lantaran ngoni pe percaya. So itu nanti ngoni mo lebe babangga puji pa Kristus Yesus waktu ngoni lia kita so bebas kong babale pa ngoni. Jadi yang penting skarang, ngoni musti hidop sama deng tu cara hidop yang pantas for tu orang yang so percaya tu Kabar Bae tentang Kristus. Ngoni musti hidop sama deng itu supaya kalu kita pigi pa ngoni ato kalu kita blum sempat pigi pa ngoni, kita bole tau kalu ngoni samua tetap kuat percaya deng samua satu hati, ngoni sama-sama berjuang se tau tu Kabar Bae pa orang-orang supaya dorang bole jadi percaya. Ngoni sama skali jang tako pa tu orang-orang yang malawang pa ngoni. Deng dorang lia ngoni nyanda tako rupa itu, itu jadi tanda kalu dorang mo binasa, deng itu lei tanda kalu Tuhan Allah mo se slamat pa ngoni dari hukuman dosa. Soalnya Tuhan Allah so bantu pa ngoni supaya jadi percaya pa Kristus, mar bukang cuma itu, supaya lei ngoni bole rasa tu siksa lantaran ngoni percaya pa Dia. So itu skarang ngoni da berjuang malawang tu orang-orang yang nyanda trima tu Kabar Bae tentang Yesus, kong itu sama deng tu ngoni perna da lia kita da berjuang akang dulu deng lei yang skarang kita masi da berjuang akang di sini sama deng tu ngoni da dengar. Sudara-sudara, ngoni itu so percaya pa Kristus, so itu Dia so beking ngoni pe hati kuat, ngoni bole dapa hibur lantaran Dia sayang pa ngoni, ngoni so jadi satu deng Roh Kudus, ngoni so ada hubungan dekat satu deng laeng, deng ngoni lei ada rasa kasiang pa orang laeng. So itu, ngoni beking jo kita pe hati lebe tatamba snang deng cara ngoni beking bagini: ngoni hidop jo satu hati deng satu pikiran, hidop baku-baku sayang, ngoni ada hubungan dekat satu deng laeng, deng lei ngoni hidop deng tujuan yang sama. Ngoni jang beking sesuatu supaya ngoni itu jadi lebe penting dari orang laeng ato supaya ngoni dapa pujian yang nyanda ada arti apa-apa, mar lebe bae ngoni hidop jo deng nyanda sombong, ngoni anggap jo tu orang laeng lebe penting dari ngoni pe diri sandiri. Trus ngoni lei jang cuma ja tarukira tu ngoni pe kepentingan sandiri, mar tarukira lei tu orang laeng pe kepentingan. Kong ngoni pe sifat musti sama deng Kristus Yesus pe sifat, yang bagini: Biar Dia itu sama persis deng Tuhan Allah, mar Dia nyanda pikir Dia pe posisi sbagai Tuhan Allah itu sesuatu yang musti mo tahang, malatare Dia se tinggal tu samua itu, trus datang ka dunia jadi manusia, kong beking Dia pe diri itu jadi sama deng budak. Kong waktu Dia sbagai manusia, Dia beking Dia pe diri jadi renda, kong Dia taat pa tu Tuhan Allah sampe Dia mati, malatare sampe mati di kayu salib. So itu, Tuhan Allah angka pa Dia di posisi yang lebe tinggi dari samua, Tuhan Allah kase pa Dia kuasa yang lebe basar dari tu samua kuasa yang ada, supaya lewat Dia pe kuasa itu, samua mo berlutut for semba pa Dia, samua yang ada di sorga, yang ada di bumi, deng yang ada di bawa bumi tu tampa for orang mati. Trus samua dorang itu mo mangaku, “Yesus Kristus itu Tuhan tu torang ja iko akang,” deng bagitu Tuhan Allah tu Bapa mo dapa puji deng mo dapa hormat. Sudara-sudara tu kita sayang, kita tau waktu kita ada sama-sama deng ngoni, ngoni slalu dengar-dengaran pa Tuhan. So itu, ngoni musti beking sama deng itu bukang cuma waktu kita ada deng ngoni, mar ngoni musti lebe lei beking bagitu skarang waktu kita jao dari pa ngoni. Ngoni brusaha jo for hidop deng kalakuan yang pantas for tu orang yang Tuhan Allah so se slamat dari tu hukuman dosa, ngoni hidop jo punung hormat deng rasa tako pa Tuhan Allah. Soalnya Tuhan Allah sandiri yang bakarja pa ngoni pe hati supaya ngoni bole hidop iko Dia pe mau deng lei supaya ngoni mampu beking yang Dia suka ngoni mo beking. Samua yang ngoni beking, ngoni beking jo itu deng nyanda babamengelu deng lei jang baku-baku ambe. Deng ngoni nyanda babamengelu deng lei nyanda baku-baku ambe, itu se tunjung kalu ngoni itu memang Tuhan Allah pe anak-anak, ngoni hidop nyanda beking sala pa orang kong orang nyanda mo se sala pa ngoni, ngoni da hidop deng bae-bae di tenga-tenga tu orang-orang yang jaha deng orang-orang yang nintau tu butul, ngoni itu sama deng jadi bintang-bintang yang bacahaya di dunia yang glap. Ngoni pegang kuat jo tu Tuhan pe firman yang bole beking orang dapa hidop kekal. Kalu ngoni beking bagitu, kita bole rasa bangga nanti waktu Kristus datang ulang, lantaran ngoni so butul-butul percaya pa Yesus, kong so lantaran itu kita bole tau kalu tu kita pe karja di tenga-tenga pa ngoni yang dulu itu nyanda sia-sia mar ada de pe hasil. Dulu waktu pertama kita da se tau tu Kabar Bae tentang Yesus pa ngoni, ngoni jadi percaya kong srahkan ngoni pe hidop for beking tu Dia pe mau. Jadi biar lei kita dapa bunung lantaran kita se tau Kabar Bae pa ngoni, sampe ta pe dara tacura sama deng anggor yang da tacura di atas korban persembahan, itu nyanda apa-apa for kita. Kita pe hati tetap snang deng kita rasa snang sama-sama deng ngoni samua. Bagitu lei deng ngoni, kita harap ngoni pe hati snang sama deng itu deng lei bole mo rasa snang sama deng kita. Kita baharap deng yakin pa Tuhan Yesus kalu so nyanda lama lei kita so bole mo suru Timotius pigi pa ngoni. Deng bagitu, waktu dia babale ulang pa kita di sini, kita pe hati lei bole snang lantaran kita dengar tu ngoni pe kabar dari pa dia. Soalnya kita blum baku dapa deng orang yang satu hati deng satu pikiran deng kita rupa tu Timotius, dia itu memang butul-butul ja tarukira tu ngoni pe kepentingan. Orang laeng cuma ja pikir tu dorang pe kepentingan sandiri, dorang nyanda ja pikir tu Yesus Kristus pe mau. Mar ngoni samua so tau tu Timotius pe bae. Dia karja sama-sama deng kita se tau tu Kabar Bae tentang Yesus, dia tolong pa kita se tau tu Kabar bae, itu sama deng anak yang tolong tu de pe papa. So itu, kalu so jelas bagimana tu keputusan dari tu kita pe perkara nanti, kita mo iko suru dia for pigi pa ngoni. Kita yakin kalu Tuhan mo tolong pa kita supaya so nyanda lama lei kita sandiri yang mo pigi pa ngoni. Skarang ini kita pikir kalu kita perlu mo suru tu Epafroditus bale ulang pa ngoni, dia itu tu sudara yang sama-sama percaya. Dulu ngoni da suru pa dia for datang bantu tu kita pe perlu di sini, kong dia so berjuang sama-sama ja beking tu karja yang Tuhan da kase. Kita rasa perlu mo suru dia bale ulang pa ngoni lantaran dia itu so rindu skali pa ngoni samua, kong lei dia pe hati rasa susa lantaran dia tau kalu ngoni so dengar dia da saki. Memang butul dia da saki, malatare amper-amper mo mati. Mar Tuhan Allah kase tunjung tu Dia pe rasa kasiang pa dia sampe dia bole bae. Kong tu rasa kasiang yang Tuhan Allah da kase tunjung itu bukang cuma for dia pe bae mar for kita lei supaya tu kita pe susa jang sampe mo tatamba lei kalu misalnya dia da mati. So itu kiapa kita suka skali mo suru dia babale ulang pa ngoni supaya ngoni pe hati snang baku dapa deng dia, trus kita pe hati lei jadi tenang. Jadi, ngoni trima jo pa dia deng snang skali lantaran dia itu sudara yang sama-sama percaya pa Tuhan. Ngoni musti hormat tu orang-orang yang ja balayani Tuhan sama deng dia. Soalnya Epafroditus itu ja beking tu karja yang Kristus da suru, kong dia amper mati waktu dia beking tu karja itu. Dia nyanda farduli apa dia mo hidop ato mo mati lantaran dia suka mo bantu pa kita, dia itu sama deng da ganti pa ngoni for bantu pa kita lantaran kita jao dari pa ngoni skarang. Kita pe sudara-sudara, snang jo ngoni lantaran ngoni so percaya pa Tuhan. For kita, nyanda jadi masala kalu kita mo tulis ulang tu hal ini pa ngoni, lantaran kita mo jaga pa ngoni supaya nyanda ada orang yang mo beking sesat pa ngoni. Ngoni musti hati-hati deng tu orang-orang yang da se putar bale tu ajaran yang butul, dorang pe jaha bole mo se sama deng anjing-anjing. Hati-hati jo deng dorang, dorang itu suka ja bapaksa pa orang-orang for mo sunat. Dorang beking bagitu bole mo se sama deng tu orang yang suka potong beking rusak orang pe badan. Soalnya torang samua ini tu orang-orang yang butul-butul iko pa Tuhan, torang semba pa Tuhan Allah lantaran Tuhan Allah pe Roh yang ada pa torang pe hati bantu pa torang. Torang lei puji pa Kristus Yesus deng torang nyanda bagantong deng tu atoran-atoran. Jadi torang nyanda sama deng dorang yang bapikir kalu dorang bole jadi orang-orang yang iko pa Tuhan lantaran dorang bagantong deng tu atoran-atoran rupa tu atoran sunat. Kita nyanda bagantong deng tu atoran-atoran di Kitab Taurat supaya kita bole jadi orang yang iko pa Tuhan Allah, padahal kalu kita mo babangga, kita sebenarnya ada dasar for mo rasa bangga tentang sgala hal dari tu atoran di kitab Taurat yang dulu kita perna da beking. Kalu ada orang yang bapikir dia bole babangga tentang tu atoran-atoran di kitab Taurat yang dia so perna beking, sebenarnya kita lebe dari dia lei. Bagini, waktu kita masi umur dlapan hari, kita so dapa sunat iko tu atoran di kitab Taurat. Kita ini orang Israel tu ja bilang lei orang Ibrani, kita orang Ibrani asli tu dari suku Benyamin. Kita ini lei dari golongan Farisi, tu golongan yang kras ja iko tu atoran-atoran agama Yahudi. Kong kita taat ja beking tu atoran-atoran di kitab Taurat, sampe kita ja siksa tu orang-orang yang percaya pa Yesus lantaran kita pikir kalu dorang itu nyanda butul da iko tu atoran-atoran di kitab Taurat itu. Kita memang ja beking deng butul tu atoran-atoran di kitab Taurat, so itu nyanda ada yang bole mo se sala pa kita tentang hal itu. Tu kita pe hidop yang dulu itu, kita anggap bawa untung for kita. Mar serta skarang, kita pe hidop yang dulu itu kita anggap nyanda bawa untung apa-apa, lantaran kita skarang so iko pa Kristus. Mar bukang cuma itu lei, malatare samua hal kita anggap nyanda ada arti apa-apa lantaran kita skarang so bole kanal pa Kristus Yesus tu kita pe Tuhan, kong itu yang jao lebe berharga. So lantaran Dia, kita se lapas tu samua yang dulu itu, kita anggap tu samua itu sama deng sampa, supaya kita bole kanal pa Kristus, deng kita bole hidop satu deng Kristus. Kita bole jadi butul di muka pa Tuhan Allah, itu bukang lantaran kita da brusaha iko tu atoran-atoran di kitab Taurat, mar itu cuma lantaran kita percaya pa Kristus. Jadi Tuhan Allah beking kita jadi orang yang butul di muka pa Dia, itu bukang lantaran apa tu kita da beking dulu, mar itu cuma lantaran kita percaya pa Kristus. Tu kita pe mau, kita cuma mo kanal pa Kristus deng lei mo rasa tu kuasa yang kase hidop ulang pa Dia dari kematian. Kita so siap mendrita sama deng tu pendritaan yang Dia da rasa dulu, kong siap lei mati sama deng Dia da mati dulu. Kong de pe alasan kiapa kita suka bagitu supaya kalu kita mati Dia mo kase hidop ulang pa kita. Kita nyanda bilang kalu kita so mampu hidop sama deng Kristus ato kalu kita ini so jadi sempurna, nyanda kasiang. Mar kita tetap brusaha supaya kita bole hidop sama deng itu, lantaran Kristus Yesus tu da pili pa kita for jadi Dia punya. Sudara-sudara, kita nyanda anggap kalu kita pe cara hidop so sama deng Kristus pe cara hidop, mar ini tu kita ja beking: kita so nyanda ja inga-inga apa yang so perna kita da beking, mar kita brusaha kras maju trus sama deng tu orang da iko lomba lari yang brusaha kras supaya sampe di finis. Kita brusaha trus supaya kita bole sampe pa kita pe tujuan for hidop sama deng Kristus Yesus da hidop, itu bole mo se sama deng tu orang yang iko lomba lari da brusaha balari trus sampe di garis finis supaya bole mo dapa tu piala. Tu piala yang kita mo dapa, itu no tu hidop kekal, kong Tuhan Allah pangge pa kita for dapa tu hidop kekal itu lantaran kita so percaya pa Kristus Yesus. So itu torang samua yang so butul-butul percaya, torang itu musti satu hati for mo hidop rupa tu kita baru da kase tau di surat ini. Kalu ada di antara pa torang yang baku beda pendapat deng apa tu kita da kase, nanti Tuhan Allah kase tunjung kalu apa tu kita da bilang itu butul. Yang penting torang tetap hidop iko tu Tuhan Allah so kase tunjung pa torang. Sudara-sudara, kita minta pa ngoni supaya ngoni iko jo tu kita pe cara hidop, kong tarukira lei tu orang-orang yang dong pe cara hidop sama deng torang pe cara hidop tu jadi conto for ngoni iko akang. Soalnya kwa banya orang yang hidop ja malawang tu ajaran tentang Kristus, dorang nyanda trima tu ajaran yang bilang kalu Kristus mati di kayu salib for se ampung tu manusia pe dosa-dosa. Kita so banya kali se tau pa ngoni tentang itu, trus skarang deng manangis kita se tau ulang lei pa ngoni. Tu orang-orang yang ja malawang itu nanti mo binasa. Tu orang-orang itu cuma suka beking puas tu dorang pe diri sandiri, sampe itu jadi yang paling penting pa dorang pe hidop. Dorang beking tu hal-hal yang sebenarnya beking dorang jadi malo skali mar dorang suka orang puji-puji tu dorang da beking itu, kong dorang pe pikiran cuma da pikir-pikir tu hal-hal duniawi. Mar torang ini so jadi warga krajaan sorga, kong torang lei da tunggu-tunggu tu Tuhan Yesus Kristus tu Juruslamat mo datang dari sana. Torang pe badan yang skarang ini, badan yang mo binasa. Kong nanti Yesus mo roba torang pe badan ini mo jadi luar biasa sama deng tu Dia pe badan yang luar biasa. Dia nanti beking bagitu pake Dia pe kuasa, tu kuasa yang beking samua iko Dia pe prenta. Jadi sudara-sudara yang kita sayang deng yang kita rindu, kita minta supaya ngoni tetap jo percaya pa Tuhan. Ngoni yang beking kita pe hati jadi snang. Ngoni itu kita pe kebanggaan, itu sama deng ngoni itu kita pe mahkota. Kong kita memang sayang pa ngoni. Kita mohon pa Euodia deng Sintikhe supaya ngoni dua bole baku bae ulang, sama rupa tu orang-orang yang so percaya pa Tuhan musti beking. Kita minta pa ngana Sunsugos tu kita pe tamang karja yang setia, ngana bantu akang pa tu dua parampuang itu supaya dorang dua itu baku bae ulang. Dorang dua itu so karja kras sama-sama deng kita, torang ja kase tau pa orang-orang tu Kabar Bae tentang Yesus. Bagitu lei deng Klemens deng lei tu torang pe tamang-tamang laeng yang so karja sama-sama deng kita se tau tu Kabar Bae. Dorang samua pe nama so tatulis di buku kehidupan, tu buku yang da tulis akang tu nama-nama dari orang yang trima tu hidop kekal. Sudara-sudara, ngoni yang percaya pa Tuhan, ngoni musti slalu snang. Kong biar jo samua orang bole mo lia ngoni pe kalakuan yang bae-bae. So nyanda lama lei Tuhan so mo datang ulang. Ngoni jang kuatir tentang apa-apa, mar basombayang jo minta pa Tuhan Allah tentang samua hal. Ngoni se tau jo samua tu ngoni pe perlu pa Dia, deng bilang jo makase pa Dia. Deng ngoni beking bagitu, Tuhan Allah mo beking ngoni hidop deng hati tenang, kong manusia nyanda mampu mo mangarti bagimana sampe tu ngoni pe hati bole rasa tenang bagitu. Tu rasa tenang yang dari pa Tuhan Allah itu mo jaga tu ngoni pe hati deng pikiran supaya nyanda kuatir lantaran ngoni so percaya pa Kristus Yesus. Jadi sudara-sudara, de pe laste kita minta pa ngoni supaya ngoni pikir jo slalu tentang samua hal ini: samua yang butul, samua kalakuan yang pantas dapa hormat, samua yang adil, samua yang suci, samua yang bae, samua yang bagus tu orang suka mo dengar, samua kalakuan yang pe bagus skali, deng lei samua yang pantas for dapa puji, ngoni pikir-pikir jo tentang tu samua hal itu. Samua yang ngoni so blajar dari pa kita, yang ngoni so dengar deng trima dari pa kita, deng lei yang ngoni so lia dari pa kita, ngoni beking jo tu samua itu. Kalu ngoni beking bagitu, Tuhan Allah yang ja beking orang pe hati tenang, Dia mo sama-sama deng ngoni. Kita so hidop satu deng Tuhan kong kita pe hati snang skali lantaran skarang ngoni da tarukira akang ulang for bantu tu kita pe perlu. Memang katu dulu ngoni nyanda perna lupa for bantu pa kita, mar lantaran torang so lama da tapisa, ngoni nyanda ada kesempatan for mo kirim tu ngoni pe bantuan pa kita, mar skarang ngoni so bantu ulang pa kita. Kita da bilang bagitu bukang lantaran kita ada kekurangan kong minta ngoni bantu lei pa kita, bukang bagitu. Soalnya kwa kita so blajar beking cukup tu kita pe diri sandiri di samua keadaan. Kita tau bagimana hidop deng kekurangan, deng kita lei tau bagimana hidop deng talebe-lebe. Kita so blajar bagimana tu de pe rahasia for hidop beking cukup tu diri sandiri di samua keadaan, biar itu waktu kanyang ato lapar, biar itu waktu kita kekurangan ato di waktu kita talebe-lebe. Kita bole mangada samua tu keadaan lantaran Kristus yang kase kita kekuatan for mangada itu. Mar biar lei bagitu ngoni pe bae-bae pa kita, ngoni da bantu pa kita waktu kita da mangada tu keadaan susa. Hei ngoni tu kita pe sudara-sudara di Filipi, ngoni sandiri tau butul bagimana kita dulu waktu kita mulai se tau tu Kabar Bae pa ngoni, sampe kita se tinggal tu daera Makedonia. Waktu itu, nyanda ada jemaat laeng yang bantu kase akang doi sumbangan for se cukup tu kita pe perlu sampe kita bole se tau tu Kabar Bae itu pa orang laeng, cuma ngoni yang da bantu pa kita. Kong bukang cuma itu lei, waktu kita ada di Tesalonika, ngoni bebrapa kali da kirim akang doi sumbangan for bantu tu kita pe perlu di sana. Kita bilang bagitu, itu bukang lantaran kita suka cari ngoni pe sumbangan, mar kita suka ngoni trima tu berkat dari pa Tuhan lantaran ngoni so bantu pa kita. Kita skarang so trima samua tu kita pe perlu dari pa ngoni, malatare lebe dari cukup. Samua tu bantuan yang ngoni da kirim pa kita, kita so trima itu dari pa Epafroditus kong skarang yang ada pa kita sampe talebe-lebe lei. Tu ngoni pe bantuan itu kita so trima. Tu ngoni pe bantuan itu sama deng korban persembahan yang bobou sadap, tu Tuhan Allah suka deng yang beking Dia snang. Tuhan Allah yang kita semba mo kase samua tu ngoni perlu dari tu Dia pe kekayaan yang pe luar biasa. Dia kase tu ngoni pe perlu itu lantaran ngoni so percaya pa Kristus Yesus. Mari jo torang puji deng hormat pa Tuhan Allah tu torang pe Bapa sampe slama-lamanya! Amin. Kita minta pa ngoni supaya ngoni bilang akang tu kita pe salam pa samua Tuhan pe orang-orang yang ada di situ, tu orang-orang yang so percaya pa Kristus Yesus. Kong ngoni lei dapa salam dari tu sudara-sudara yang percaya tu ada sama-sama deng kita di sini. Salam for ngoni dari samua tu Tuhan pe orang-orang yang ada di sini, lebe kusus dari tu Tuhan pe orang-orang yang karja di istana dari raja yang paling tinggi di krajaan Romawi. Kita minta supaya Tuhan Yesus Kristus kase tunjung tu Dia pe bae pa ngoni samua. Ni surat dari kita, Paulus. Kita ini Kristus Yesus pe rasul tu Dia pe utusan lantaran itu Tuhan Allah pe mau. Ni surat ini lei dari Timotius tu torang pe sudara yang percaya. Ni surat for ngoni tu Tuhan pe orang-orang di Kolose, ngoni tu sudara-sudara yang setia pa Kristus. Kita minta pa Tuhan Allah tu torang pe Bapa supaya Dia kase tunjung tu bae pa ngoni deng beking ngoni hidop deng hati tenang. Waktu torang ja basombayang for ngoni, torang slalu ja bilang makase pa Tuhan Allah, tu Bapa dari Tuhan Yesus Kristus tu torang ja iko akang. Soalnya torang so dengar tentang ngoni pe percaya pa Kristus Yesus deng tentang tu ngoni pe sayang pa samua tu Tuhan pe orang-orang. Ngoni percaya deng basayang lantaran ngoni baharap deng yakin kalu ngoni mo dapa yang Tuhan Allah so se siap for ngoni di sorga. Kong tentang tu ngoni mo dapa itu ngoni da dengar dari tu ajaran yang butul, itu no tu Kabar Bae tentang Yesus. Tu Kabar Bae tentang Yesus itu ngoni so dengar, kong mulai waktu itu jo ngoni bole mangarti butul tu Tuhan Allah pe sayang pa ngoni sampe ngoni percaya tu Kabar Bae itu, kong ngoni hidop iko Tuhan Allah pe mau. Bagitu lei tu da jadi di sluru dunia, tu orang yang da dengar tu Kabar Bae itu so lebe tatamba kong dorang percaya tu Kabar Bae itu sampe dorang hidop iko Tuhan Allah pe mau. Tu Kabar Bae tentang Yesus itu Epafras so se ajar pa ngoni. Dia itu torang pe tamang karja yang torang sayang. Dia rajin ja beking tu Kristus da suru for mo se kuat tu ngoni pe percaya. Tu Epafras lei da se cirita pa torang di sini kalu ngoni samua ja baku-baku sayang lantaran tu Roh Kudus yang so ada pa ngoni pe hati. So itu, waktu pertama torang dengar ngoni pe percaya yang rupa itu, torang slalu basombayang for ngoni pa Tuhan. Torang minta pa Tuhan supaya ngoni bole tau mana tu bae deng bole mangarti tu hal-hal rohani, kong deng bagitu ngoni bole butul-butul tau tu Tuhan pe mau, supaya ngoni hidop deng kalakuan yang pantas sbagai orang yang percaya pa Tuhan kong beking snang Dia pe hati. Ngoni mo beking trus-trus tu bae, deng ngoni lei mo lebe tatamba kanal pa Tuhan Allah. Kita minta lei pa Tuhan supaya Dia kase kuat tu ngoni pe hati pake tu Dia pe kuasa yang luar biasa, supaya biar apa jo tu pendritaan yang ngoni mo alami ngoni tetap batahang percaya, ngoni tetap sabar deng ngoni tetap rasa snang. Deng kita minta lei pa Tuhan supaya ngoni slalu ja bilang makase pa Dia tu torang pe Bapa. Dia yang beking ngoni jadi pantas mo dapa apa yang Dia so janji mo kase pa Dia pe orang-orang. Kong tu janji itu Dia so se sadia for Dia pe orang-orang di sorga tu tampa yang trang, tu tampa yang Dia berkuasa akang sbagai Raja. Dia so se bebas pa torang dari tu kuasa glap, kong Dia se pinda pa torang for tinggal di tampa tu Dia pe Anak yang Dia sayang itu berkuasa sbagai Raja. Dia pe Anak itu yang se bebas pa torang dari torang pe dosa-dosa, torang pe dosa-dosa itu so dapa ampung. Sudara-sudara, torang bole tau Tuhan Allah pe sifat deng kuasa dari Dia pe Anak waktu Dia pe Anak da hidop di dunia, Dia pe Anak itu sama deng gambaran dari Tuhan Allah yang torang nyanda dapa lia. Dia pe Anak satu-satunya itu yang paling berkuasa dari samua yang Tuhan Allah da ciptakan. Soalnya lewat Kristus itu Tuhan Allah ciptakan samua yang ada di bumi deng lei di sorga. Dia ciptakan samua tu dapa lia deng tu nyanda dapa lia, Dia ciptakan samua yang berkuasa, yang pegang prenta deng tu da berkuasa di langit. Samua yang ada itu Tuhan Allah da ciptakan lewat Kristus, kong samua itu ada supaya Kristus dapa hormat. Dia so ada seblum samua ini ada, kong Dia yang ator kong jaga samua itu. Yesus Kristus itu pemimpin yang baator tu De pe jemaat, sama deng kapala yang kontrol tu badan. Dia itu yang pertama yang hidop ulang dari orang-orang yang so mati, deng bagitu Dia jadi yang paling penting dari samua yang ada. Soalnya Tuhan Allah pe mau supaya samua tu Dia pe sifat deng kuasa ada pa Yesus Kristus. Kong lewat Kristus, Tuhan Allah beking supaya samua yang ada di bumi deng di sorga bole baku bae ulang deng Dia. Tu hubungan deng Tuhan Allah itu jadi baku bae lantaran Kristus pe dara yang tacura di kayu salib. Ngoni dulu hidop jao dari Tuhan. Waktu itu ngoni jadi Tuhan Allah pe musu lantaran ngoni pe pikiran deng kalakuan jaha. Mar skarang Yesus Kristus so mati, kong lewat Dia pe badan yang so mati itu Tuhan Allah so buka jalang for ngoni supaya bole baku bae deng Dia. Tuhan Allah beking bagitu supaya di muka pa Dia ngoni itu kudus, nyanda ada sala, kong nyanda ada yang mo se sala apa-apa pa ngoni. So itu ngoni musti tetap percaya, jang skali-kali ngoni ragu. Ngoni percaya jo trus tu Kabar Bae tentang Yesus yang ngoni so dengar itu. Torang baharap deng yakin deng tu Kabar Bae tentang Yesus yang torang so dengar itu, kong torang nimbole se tinggal tu Kabar Bae itu. Tu Kabar bae itu so tasiar ka sluru dunia, deng kita ini lei Paulus, Tuhan Allah da pili pa kita for se tau tu Kabar Bae itu. Skarang ini kita pe hati snang lantaran kita da dapa siksa waktu kita da se tau tu Kabar Bae. Tu siksa itu memang musti kita mo dapa lantaran kita ja karja for Yesus Kristus, itu sama deng kita ambe bagean dalam Kristus pe siksa yang Dia da dapa for Dia pe jemaat, kong Dia pe jemaat itu sama deng tu Dia pe badan sandiri. Tuhan Allah pili pa kita jadi playan for beking tu Dia da suru pa Dia pe jemaat. Dia pili pa kita for kase tau samua tu Tuhan Allah pe firman pa ngoni tu orang-orang yang bukang Yahudi. Dari torang pe nene moyang dulu tu firman itu Tuhan Allah masi da se rahasia, mar skarang Dia so se tau tu rahasia itu pa De pe orang-orang. Tuhan Allah se tau pa Dia pe orang-orang tu rahasia yang bagus deng luar biasa. Tu rahasia itu bagini: Tuhan Allah mo se berkat pa tu orang-orang yang bukang Yahudi, tu berkat itu no tu Yesus Kristus mo hidop di hati pa tu orang-orang yang bukang Yahudi. So itu dorang bole baharap deng yakin kalu dorang lei nanti mo alami tu Tuhan pe luar biasa di sorga. Jadi torang ja kase tau pa samua orang tentang Yesus Kristus. Torang ja se inga pa dorang deng lei ja se ajar pa dorang, pake tu hikmat yang Tuhan da kase pa torang. Torang beking bagitu, supaya di muka pa Tuhan tiap orang bole butul-butul percaya pa Yesus Kristus. So itu kita karja kras ja beking tu kita pe karja ini. Kita pake Dia pe kuasa tu Dia da kase pa kita, tu da bakarja deng luar biasa pa kita pe diri. Kita suka mo se tau pa ngoni, kalu pe brat skali tu kita da berjuang for bantu pa ngoni yang percaya di Kolose deng for dorang di Laodikia, deng for samua orang yang blum kanal lei pa kita di tampa laeng. Kita kase tau itu supaya bole se kuat ngoni pe hati deng lei ngoni bole mo baku-baku sayang sampe ngoni jadi satu. Deng bagitu ngoni bole butul-butul yakin deng tau tentang Tuhan Allah pe rahasia. Tu Tuhan Allah pe rahasia itu no tu Yesus Kristus yang dari dulu Tuhan Allah nyanda kase tau pa orang-orang, mar skarang torang so bole tau. Lewat Yesus Kristus itu torang bole tau dua hal yang berharga skali yang dari dulu torang nimbole tau: torang bole tau banya hal deng torang bole tau mana tu bae yang torang musti beking. Ini samua kita kase tau pa ngoni supaya biar lei ada orang yang mo bicara deng kata-kata manis for mo se sesat pa ngoni, ngoni pe percaya tetap kuat. Soalnya biar lei kita sandiri nyanda ada sama-sama deng ngoni di sana, kita tetap ja inga pa ngoni, anggap jo kita ada di tenga-tenga pa ngoni. Kita lei snang da dengar tu ngoni pe hidop yang baku-baku bae, deng ngoni pe percaya pa Kristus tetap kuat. Sudara-sudara, lantaran ngoni so trima pa Kristus Yesus sbagai ngoni pe Tuhan yang ngoni ja iko akang, jadi ngoni musti hidop iko pa Dia yang ngoni percaya itu. Ngoni pe percaya pa Yesus Kristus musti kuat sama deng tu akar pohong yang da tatanang kuat di tana, kong ngoni musti hidop bagantong pa Dia. Deng ngoni pe percaya pa Dia musti tetap kuat iko tu ajaran yang so se ajar pa ngoni, kong ngoni musti slalu bilang makase pa Tuhan. Sudara-sudara, ngoni musti hati-hati deng tu orang-orang yang mo se pengaru pa ngoni supaya ngoni iko tu dorang pe ajaran tentang agama. Dorang pe ajaran itu nyanda ada de pe guna apa-apa kong mo beking sesat pa ngoni. Tu dorang pe ajaran itu cuma da iko dorang pe nene moyang pe kebiasaan dulu deng lei iko tu atoran-atoran yang cuma bicara tentang hal-hal duniawi, tu dorang pe ajaran itu bukang ajaran yang butul tentang Yesus Kristus. Jang ngoni tapengaru lantaran samua tu kuasa deng sifat dari Tuhan Allah itu ada pa Yesus Kristus pe diri. Kong yang ada pa Yesus Kristus so ada lei pa ngoni yang so percaya pa Dia. Yesus Kristus itu berkuasa pa samua yang pegang prenta deng pa samua kuasa yang ada. Kalu torang tu orang Yahudi dapa sunat, tu sunat itu cuma da beking pa torang pe badan for jadi tanda kalu torang so jadi Tuhan Allah pe orang. Mar skarang torang samua yang so percaya pa Kristus, torang lei sama deng so dapa sunat, mar bukang sunat sama deng tu torang orang Yahudi ja beking dulu. Torang samua yang percaya pa Kristus, torang pe sunat itu sama deng Kristus so se bebas pa torang dari tu sifat ja beking dosa. Waktu ngoni dapa baptis, itu sama deng tu ngoni pe sifat ja beking dosa itu so mati kong so se kubur sama-sama deng Yesus Kristus. Kong deng lei tu baptisan ngoni bole hidop ulang kong dapa hidop baru sama-sama deng Yesus Kristus. Itu samua ngoni bole dapa lantaran ngoni percaya tu Tuhan Allah pe kuasa yang luar biasa tu da se hidop ulang pa Yesus Kristus. Dulu waktu ngoni blum percaya, ngoni sama deng so mati lantaran ngoni ja langgar tu Tuhan Allah pe prenta, ngoni lei nyanda da sunat iko tu atoran di kitab Taurat, jadi ngoni ini bukang Tuhan Allah pe pilihan. Mar Dia se ampung samua tu ngoni pe dosa-dosa, Dia kase hidop baru pa ngoni sama-sama deng Yesus Kristus. Ngoni pe dosa-dosa so sama deng so tatulis di surat utang. Kalu mo iko tu de pe atoran di kitab Taurat, ngoni mo dapa hukuman lantaran malawang Tuhan Allah pe prenta. Mar tu ngoni pe surat utang itu so se paku di kayu salib, itu de pe arti tu ngoni pe dosa so dapa hapus. Kong di kayu salib itu Tuhan Allah so se kala samua tu kuasa glap tu da berkuasa, deng bagitu Dia beking dorang jadi malo di muka umum. Sudara-sudara, ada orang yang suka mo se sala pa ngoni lantaran nyanda iko tu atoran-atoran tentang makang deng minum, deng suka mo se sala pa ngoni lantaran nyanda iko tu prayaan hari-hari raya Yahudi, rupa tu hari raya bulan baru ato ngoni nyanda iko tu atoran-atoran for tu hari Sabat. Mar ngoni nyanda usa tarukira apa tu dorang ja bilang. Tu atoran-atoran itu nyanda penting, itu cuma sama deng bayang-bayang dari yang lebe penting yang mo datang itu, mar tu de pe butul itu ada pa Yesus Kristus, Dia itu yang penting. Ngoni jang dengar tu orang-orang yang ja bilang Tuhan Allah mo hukum pa ngoni lantaran nyanda iko tu dorang pe ajaran. Dorang mo suru ngoni hidop sama deng dorang yang pura-pura hidop renda hati, dorang mo suru lei ngoni basemba pa malaekat-malaekat. Dorang suka bicara ja se bangga tentang dong pe penglihatan-penglihatan. Dorang ja se sombong tu dorang pe diri iko tu dorang pe pikiran yang nyanda ada guna lantaran itu cuma manusia pe pikiran. Dorang lei so nyanda ja iko tu Yesus Kristus pe ajaran, padahal Yesus Kristus itu Kapala, deng De pe orang-orang sama deng Dia pe anggota badan. Tuhan Allah tu ja baator tu orang-orang percaya itu supaya dorang bole jadi satu sama deng anggota-anggota badan yang nimbole tapisa satu deng yang laeng, kong deng bagitu tu dorang pe percaya bole tatamba kuat. Sudara-sudara, ngoni yang so percaya pa Yesus Kristus, ngoni pe hidop lama sama deng so mati sama-sama deng Kristus, jadi ngoni so nyanda lei taika deng tu atoran-atoran yang cuma bicara tentang hal-hal duniawi. So itu, ngoni nyanda usa lei iko tu atoran-atoran yang rupa ini: “Jang pegang ini”, “Jang makang itu”, “Jang sontong ini”. Samua tu dorang pe ajaran itu cuma tentang makang deng minum, tu barang yang satu kali pake kong abis, trus nyanda ada guna lei. Tu atoran-atoran deng tu ajaran itu cuma ja iko tu manusia pe pikiran sandiri. Memang katu waktu dorang se tunjung tu atoran-atoran agama yang dorang da beking itu, dorang dapa lia orang-orang yang bijaksana. Dorang pura-pura hidop renda hati, dorang se ajar pa dorang pe orang-orang for beking siksa tu dorang pe diri iko tu dorang pe atoran-atoran supaya orang laeng puji pa dorang. Mar samua tu atoran-atoran itu nyanda ada de pe guna lantaran itu nyanda beking dorang mo bruba, dorang cuma iko dorang pe keinginan-keinginan duniawi. Sudara-sudara, Kristus so hidop ulang, kong ngoni yang so percaya pa Kristus, ngoni sama deng so dapa hidop baru sama-sama deng Dia. So itu ngoni brusaha jo cari tu hal-hal yang ada di sorga, tu tampa Kristus ada. Di situ Kristus dudu di tampa yang paling terhormat di sabla kanan pa Tuhan Allah. Ngoni pikir jo trus tu hal-hal yang di sorga, jang ngoni pikir tu hal-hal yang di dunia ini. Soalnya ngoni so nyanda iko tu dunia pe model, ngoni pe hidop yang dulu itu bole mo bilang sama deng so mati. Skarang Kristus so hidop sama-sama deng ngoni sampe ngoni so jadi satu deng Tuhan Allah. Kong tu ngoni pe cara hidop yang baru itu, tu orang-orang yang nyanda percaya nyanda mo mangarti. Yesus Kristus tu da kase hidop baru pa ngoni. Kong nanti waktu Dia datang ulang ka dunia, samua orang mo lia pa Dia, ngoni lei mo muncul kong dapa puji deng hormat sama-sama deng Dia. Jadi lantaran ngoni so hidop baru, ngoni se brenti jo ja beking tu kalakuan yang cuma ja iko tu dunia pe model rupa tu: ja baseks bebas, ja beking tu hal-hal yang caparuni, nafsu yang besae, deng tu keinginan yang suka beking tu jaha. Kong lei se brenti jo tu ngoni pe keinginan yang suka samua jadi ngoni punya lantaran itu sama deng so beking samua itu jadi lebe penting dari Tuhan. Kalu beking tu kalakuan-kalakuan besae rupa itu, pasti Tuhan Allah mo hukum. Dulu ngoni lei hidop ja beking tu hal-hal besae rupa itu waktu ngoni masi ja iko tu dunia pe model. Mar skarang ini ngoni musti se tinggal samua tu kalakuan yang besae rupa ini: pangmara, capat nae dara, suka beking jaha pa orang laeng, ja se besae orang laeng pe nama, deng ja bamomake. Ngoni jang ja badusta satu deng laeng lantaran ngoni so se tinggal samua tu ngoni pe hidop lama yang ngoni ja beking dulu. Ngoni yang so jadi percaya itu so jadi manusia baru, kong Tuhan Allah roba trus tu ngoni pe sifat jadi sama deng Dia pe sifat, kong ngoni bole tamba kanal pa Dia. Jadi ngoni yang so jadi manusia baru, so nyanda penting kalu ngoni ini orang Yahudi ato orang bukang Yahudi, kalu ngoni da sunat ato nyanda da sunat, kalu ngoni orang asing ato orang yang tinggal di utang, kalu ngoni ini budak ato yang bebas. Mar yang paling penting itu Kristus, kong so Dia itu yang da hidop pa ngoni samua pe hati. Sudara-sudara, Tuhan Allah so pili pa ngoni, ngoni ini so jadi Dia pe orang-orang deng Dia sayang pa ngoni. Jadi ngoni pe hidop musti bagini: ngoni ada rasa kasiang pa orang, pangbae, nyanda sombong, nyanda kasar pa orang deng pangsabar. Ngoni musti sabar pa orang laeng, kong kalu ada orang laeng yang beking sala pa ngoni, ngoni lei jang ja badendam mar se ampung pa dia. Tuhan so se ampung tu ngoni pe sala jadi ngoni lei musti kase ampung orang laeng pe sala pa ngoni. Yang paling penting dari samua itu, ngoni musti baku-baku sayang satu deng laeng. Kalu ngoni baku-baku sayang, itu yang beking ngoni taika kong butul-butul jadi satu. Kristus so beking torang bole hidop baku-baku bae satu deng laeng, kong se biar jo tu damai yang dari Kristus itu ada pa ngoni pe hati for mo kuasai ngoni pe hidop. Ngoni samua sama deng Yesus Kristus pe badan yang musti hidop baku-baku bae lantaran Tuhan pangge pa ngoni supaya ngoni hidop baku-baku bae. Kong ngoni lei musti ja bilang makase pa Tuhan. Ngoni musti inga-inga trus tu Kristus pe firman, simpang jo bae-bae dalam ngoni pe hati. Kong ngoni pake tu Dia pe firman itu for ajar deng se inga pa satu deng laeng pake tu hikmat yang dari pa Dia. Ngoni manyanyi lagu-lagu Mazmur, manyanyi lagu-lagu rohani, deng lei manyanyi lagu-lagu yang Roh Kudus kase pa ngoni, kong kalu beking samua itu ngoni bilang lei makase pa Tuhan Allah. Samua yang ngoni beking deng yang ngoni bilang, samua itu ngoni beking bae-bae lantaran ngoni ini orang-orang yang ja iko pa Tuhan Yesus, kong ngoni lei ja bilang makase pa Tuhan Allah tu torang pe Bapa lewat Yesus Kristus. Sudara-sudara, ngoni tu bini-bini musti dengar-dengaran pa ngoni pe laki, ngoni beking jo itu sama deng tu parampuang yang percaya pa Tuhan musti beking. Ngoni tu laki, ngoni musti sayang pa ngoni pe bini, kong ngoni jang kasar pa dia. Ngoni tu anak-anak, ngoni musti dengar-dengaran pa ngoni pe orang tua di samua hal lantaran itu yang beking Tuhan pe hati snang. Ngoni tu bapak-bapak, ngoni jang beking tu ngoni pe anak rasa saki hati supaya dorang nyanda mo putus asa. Sudara-sudara yang jadi budak, ngoni musti dengar-dengaran pa ngoni pe tuang yang di dunia ini di samua hal. Jang ngoni cuma dengar-dengaran pa ngoni pe tuang lantaran dia da lia pa ngoni, itu cuma ngoni mo beking snang pa dia, mar ngoni bakarja deng sunggu-sunggu lantaran ngoni tako pa Tuhan. Apa jo tu ngoni mo karja, ngoni karja jo itu deng sunggu-sunggu sama deng ngoni ja karja for Tuhan, bukang for manusia. Ngoni so tau kalu ngoni mo trima warisan tu hidop kekal yang Tuhan so janji mo kase pa ngoni. Kristus itu tu ngoni pe Tuhan deng ngoni itu tu ja beking yang Dia da suru. Soalnya sapa jo yang ja beking tu nyanda butul, dia mo dapa hukuman dari Tuhan lantaran Tuhan itu adil deng nyanda ja pili-pili orang kalu mo kase hukuman. Ngoni tu tuang-tuang, ngoni musti beking tu butul deng adil pa ngoni pe budak-budak. Inga jo, ngoni tau kalu ngoni lei ada Tuang di sorga. Sudara-sudara, ngoni tetap jo basombayang. Waktu ngoni basombayang, ngoni tarukira jo bae-bae apa tu ngoni mo bilang itu, kong ngoni bilang lei makase jo pa Tuhan. Kong ngoni basombayang akang lei for torang supaya Tuhan Allah buka jalang for torang, supaya torang bole kase tau tu firman tentang Kristus pa orang-orang, tu firman yang dulu orang nintau sama deng tasambunyi dari dorang. So lantaran kita da kase tau tu firman tentang Kristus itu, kong dorang se maso pa kita di bui. Ngoni sombayang akang for kita supaya kita bole kase tau deng jelas pa orang-orang tentang Kristus, sama deng tu kita musti beking. Kalu ngoni di tenga-tenga pa orang-orang yang nyanda percaya, pake jo hikmat bagimana ngoni bole hidop bae-bae deng dorang, pake jo kesempatan itu supaya dorang lei bole jadi percaya pa Kristus. Kalu ngoni babicara deng orang, ngoni se tunjung jo tu bae pa dorang kong pake tu kata-kata yang bole dorang mo trima. Kalu ngoni beking bagitu, ngoni lei bole tau bagimana ngoni mo bajawab kalu dorang batanya. Sudara-sudara, Tikhikus mo pigi pa ngoni kong kase tau pa ngoni tu kita pe kabar. Tikhikus itu sudara yang percaya yang torang sayang. Dia itu orang yang setia ja beking tu Tuhan da suru deng dia lei sama-sama jadi playan for Tuhan. Kita da suru pa dia pigi pa ngoni, supaya ngoni bole tau tu torang pe keadaan di sini, deng dia lei bole mo kase kuat tu ngoni pe hati. Kong Onesimus lei mo sama-sama deng Tikhikus mo pigi pa ngoni. Onesimus ini ngoni pe satu kampung, dia torang pe sudara yang percaya yang setia, deng torang sayang pa dia. Dorang dua itu tu mo kase tau pa ngoni samua tu da jadi pa torang di sini. Tu Aristarkhus da kirim salam for ngoni, dia ada sama-sama deng kita di bui. Torang pe tamang lei Markus, tu Barnabas pe anak basudara da kirim salam for ngoni. Tu hari kita so perna minta tolong pa ngoni tentang Markus, jadi kalu tu Markus itu so sampe pa ngoni, ngoni trima akang jo bae-bae pa dia. Deng lei Yesus tu dorang ja pangge lei Yustus da kirim salam pa ngoni. Dari samua tamang yang sama-sama karja deng kita, cuma dorang tiga itu yang orang Yahudi, yang bole mo bilang dari klompo da sunat. Dorang tiga itu da kase kuat kita pe hati. Kong cuma torang ini tu orang Yahudi yang sama-sama karja for ja se tau pa orang-orang tentang Tuhan Allah Berkuasa sbagai Raja pa Dia pe orang-orang. Epafras lei da kirim salam for ngoni, dia itu ngoni pe satu kampung, kong dia lei ja beking tu Kristus Yesus da suru. Dia bergumul dalam de pe sombayang-sombayang for ngoni. Dia ja minta pa Tuhan Allah supaya tu ngoni pe percaya pa Kristus Yesus jadi kuat kong ngoni bole tau butul-butul tu Tuhan Allah pe mau. Kita bole basaksi tentang Epafras pe karja kalu dia memang da brusaha kras for ngoni deng for tu orang-orang yang ada di Laodikia deng di Hierapolis. Ada salam dari dokter Lukas yang torang sayang, deng ada salam lei dari Demas for ngoni. Tolong kase tau akang tu torang pe salam ini pa torang pe sudara-sudara yang percaya yang tinggal di Laodikia, deng lei pa sudara yang percaya tu de pe nama Nimfa deng pa tu jemaat yang ja bakumpul baibada pa dia pe ruma. Kong kalu ni surat ini ngoni so se baca pa jemaat di Kolose, abis itu ngoni lei pigi kase baca pa tu jemaat di Laodikia. Trus tu surat yang kita so perna kase for tu jemaat di Laodikia, ngoni ambe kong bawa tu surat itu kong se baca lei pa tu jemaat di Kolose. Kase tau pa Arkhipus supaya dia se klar tu playanan yang dia so trima lantaran dia hidop satu deng Tuhan. Salam dari kita, Paulus. Di bagean surat ini, kita da tulis tu kita pe salam ini deng kita pe tangan sandiri. Jang ngoni lupa kalu kita ini masi da dapa ika di bui. Kita minta supaya Tuhan kase tunjung tu Dia pe bae pa ngoni. Ni surat dari kita, Paulus deng kita pe tamang-tamang tu Silas deng Timotius, for ngoni tu jemaat di Tesalonika. Ngoni yang percaya pa Allah Bapa deng pa Tuhan Yesus Kristus. Torang minta supaya Tuhan kase tunjung Dia pe bae pa ngoni deng lei beking ngoni hidop deng hati tenang. Torang slalu bilang makase pa Tuhan Allah lantaran ngoni samua, kong torang ja basombayang akang pa ngoni. Waktu torang basombayang pa Tuhan Allah, tu torang pe Bapa, torang inga trus tu playanan yang ngoni ja beking lantaran ngoni pe percaya. Torang inga bagimana ngoni da layani pa orang laeng lantaran ngoni pe sayang pa dorang. Torang inga lei biar ngoni dapa siksa, ngoni tetap batahang percaya lantaran slalu baharap deng yakin pa torang pe Tuhan Yesus Kristus. Sudara-sudara yang Tuhan Allah sayang, torang tau kalu Tuhan Allah so pangge pa ngoni for iko pa Dia, lantaran tempo hari torang da pigi pa ngoni di Tesalonika for kase tau tu Kabar Bae tentang Yesus pa ngoni. Waktu itu torang nyanda pake torang pe kata-kata, mar Tuhan pe kuasa deng tu Roh Kudus yang beking ngoni jadi yakin deng tu Kabar Bae itu. Ngoni lei so lia tu torang pe cara hidop, jadi ngoni tau kalu tu Kabar Bae itu butul. Trus ngoni iko tu torang pe conto deng lei tu conto dari Tuhan sandiri, biar ada orang yang siksa pa ngoni, ngoni tetap trima deng snang tu Tuhan pe firman lantaran tu Roh Kudus da bantu pa ngoni. Deng bagitu ngoni jadi conto for samua orang yang percaya pa Yesus di daera Makedonia deng Akhaya. Soalnya ngoni so kase tau tu Tuhan pe firman pa orang-orang di daera Makedonia deng daera Akhaya. Bagitu lei tu ngoni pe percaya pa Tuhan Allah so tasiar bukang cuma di tampa-tampa itu, mar so tasiar sampe di samua tampa. So itu, torang so nyanda perlu lei mo bilang apa-apa lantaran orang-orang so dengar tentang ngoni pe percaya. Soalnya orang-orang itu bacirita tentang bagimana ngoni da trima pa torang dulu waktu torang da pigi pa ngoni. Dorang bacirita lei tentang bagimana ngoni so kase tinggal tu opo-opo kong bertobat trus semba pa Tuhan Allah yang hidop deng yang butul. Dorang lei da bacirita tentang bagimana ngoni da tunggu-tunggu tu Anak Allah mo datang dari sorga. So Dia itu Yesus yang da mati mar Tuhan Allah so se hidop ulang. Yesus itu lei tu mo se slamat pa torang yang percaya pa Dia dari tu hukuman nanti. Sudara-sudara, ngoni sandiri tau kalu nyanda percuma torang da datang pa ngoni. Ngoni lei tau, seblum torang datang pa ngoni, torang da dapa siksa deng da dapa hina di Filipi. Mar biar lei bagitu, Tuhan Allah tolong pa torang supaya torang tetap brani kase tau pa ngoni tu Kabar Bae dari Tuhan Allah biar lei tu orang-orang pa ngoni pe kota malawang pa torang. Soalnya torang da kase tau tu Kabar Bae itu, torang bukang babilang tu ajaran yang sesat, torang nyanda ada maksut jaha deng nimau mo tipu orang. Mar Tuhan Allah yang so se percaya pa torang for kase tau tu Kabar Bae, lantaran Dia anggap torang pantas for itu. So itu torang kase tau tu Kabar Bae bukang for mo se snang pa manusia, mar for mo se snang pa Tuhan Allah yang bauji torang pe hati. Tuhan Allah tu torang pe saksi, Dia tau butul torang pe isi hati. Ngoni sandiri lei tau kalu torang nyanda sraka, torang nyanda perna pake tu kata-kata for mo cari untung dari orang. Torang lei nyanda perna cari pujian dari pa manusia, bae itu dari pa ngoni ato pa orang-orang laeng. Padahal torang ini Kristus pe rasul-rasul, jadi torang bole minta apa jo dari pa ngoni, mar torang nimau bagitu. Malatare torang ja babae-bae waktu torang da sama-sama deng ngoni, sama deng tu mama yang baurus deng bajaga de pe anak yang masi kacili. Torang sayang skali pa ngoni. Jadi torang bukang cuma snang ja kase tau tu Kabar Bae dari Tuhan Allah pa ngoni, mar torang lei snang kase torang pe hidop for ngoni. Soalnya torang memang so sayang skali pa ngoni. Sudara-sudara, ngoni pasti masi inga bagimana torang da brusaha deng karja kras siang malam supaya torang bole mo tanggong sandiri tu tong pe hidop. Deng bagitu torang nyanda jadi beban pa sapa-sapa di antara pa ngoni waktu torang kase tau tu Kabar Bae dari Tuhan Allah pa ngoni. Ngoni deng Tuhan Allah lei yang jadi saksi, kalu torang slalu hidop deng hati yang bersi, adil deng nyanda ada tu mo se sala pa torang waktu torang tinggal di antara pa ngoni tu orang-orang yang percaya. Ngoni tau kalu torang pe cara pa ngoni samua sama deng tu papa pa de pe anak-anak sandiri. Torang se nasehat pa ngoni masing-masing deng se kuat tu ngoni pe hati, torang lei minta deng sangat pa ngoni supaya hidop iko Tuhan Allah pe mau. So Dia itu yang pangge pa ngoni for jadi orang-orang dari Dia yang Berkuasa sbagai Raja, kong ngoni mo rasa tu Dia pe luar biasa. Waktu torang da kase tau tu Tuhan Allah pe firman pa ngoni, ngoni trima tu firman itu sbagai Tuhan pe kata-kata, bukang manusia pe kata-kata. Kong memang itu butul dari Tuhan Allah. So itu torang nyanda brenti bilang makase pa Tuhan Allah. Tu Tuhan Allah pe firman itu yang samantara da bakarja pa ngoni tu orang yang percaya. Sudara-sudara, ngoni so dapa siksa dari ngoni pe satu bangsa di Tesalonika. Deng bagitu ngoni so sama deng tu orang Yahudi yang percaya pa Kristus Yesus di daera Yudea, dorang lei dapa siksa dari dorang pe satu bangsa sandiri yang ada di sana. Tu orang Yahudi yang da basiksa itu dulu tu da bunung pa nabi-nabi deng lei pa Tuhan Yesus, kong dorang itu lei tu da siksa deng user pa torang. Dorang itu nyanda ja beking tu Tuhan Allah pe mau, deng dorang itu beking samua orang jadi dorang pe musu, lantaran dorang da brusaha supaya torang nimbole kase tau tu Tuhan Allah pe pesan pa tu orang-orang yang bukang Yahudi supaya tu orang-orang bukang Yahudi itu nimbole mo slamat. Deng bagitu dorang pe dosa lebe tatamba trus sampe jadi gnap, kong Tuhan Allah mara kong mo hukum deng brat pa dorang. Sudara-sudara, orang beking torang baku pisa deng ngoni for samantara waktu. Cuma, biar lei torang jao dari pa ngoni, ngoni tetap dekat pa tong pe hati. Torang rindu skali pa ngoni kong torang so brusaha for mo baku dapa deng ngoni. Soalnya torang memang suka mo pigi pa ngoni. Kita Paulus so brapa kali da coba mo pigi pa ngoni, mar setang pe bos beking sampe torang nyanda tapigi pa ngoni. Torang mo pigi pa ngoni, lantaran nanti kalu Tuhan datang ulang, ngoni tu torang pe harapan, ngoni tu beking torang pe hati snang, deng ngoni ini tu torang pe mahkota kebanggaan di muka pa Tuhan. Butul komang, so ngoni yang beking torang dapa puji deng hormat, deng beking torang snang. Torang so nyanda dapa tahang tu tong pe rindu pa ngoni. So itu, torang ambe keputusan kalu kita deng Silas tinggal jo di Atena, trus Timotius tu torang pe sudara yang percaya, torang utus pigi pa ngoni. Dia itu torang pe tamang yang ja beking tu karja for Tuhan Allah, dia da sama-sama deng torang ja kase tau tu Kabar Bae tentang Kristus. Torang da utus pa Timotius for kase kuat ngoni pe hati deng kase nasehat pa ngoni supaya ngoni pe percaya lebe tatamba kuat. Deng bagitu, biar lei ngoni dapa siksa, ngoni tetap percaya pa Yesus. Soalnya ngoni sandiri tau kalu orang yang percaya pa Yesus ditentukan for mendrita. Dulu waktu torang masi da sama-sama deng ngoni, torang so perna ja kase tau pa ngoni kalu nanti torang samua mo rasa tu siksa. Skarang torang so tau itu butul, torang so rasa tu siksa itu. So lantaran ngoni da rasa tu siksa, kita so nyanda tahang kalu nyanda ada kabar dari ngoni, jadi kita utus Timotius pa ngoni lantaran kita suka mo cari tau kalu ngoni masi percaya pa Yesus ato so nyanda. Kita kuatir jang sampe tu setang pe bos so goda pa ngoni, kong ngoni so nyanda percaya lei pa Yesus. Kalu jadi bagitu, percuma jo tu torang pe karja dulu. Skarang Timotius so bale dari pa ngoni di Tesalonika, kong dia da kase tau tu kabar tentang ngoni yang beking torang snang. Dia da cirita kalu ngoni tetap percaya pa Yesus deng da baku-baku sayang. Dia bilang lei kalu ngoni inga-inga pa torang, ngoni rasa snang. Kong ngoni suka mo baku dapa ulang deng torang, sama lei deng torang suka baku dapa deng ngoni. So itu no sudara-sudara, biar orang beking susa deng siksa pa torang, torang pe hati jadi kuat lantaran torang dengar kalu ngoni tetap percaya pa Yesus. Deng bagitu torang rasa torang pe hidop butul-butul ada de pe guna, lantaran ngoni pegang kuat tu ngoni pe percaya pa Tuhan. Torang bilang makase pa Tuhan Allah, soalnya torang pe hati snang di muka pa Dia lantaran ngoni pegang kuat tu ngoni pe percaya pa Dia. Siang deng malam torang basombayang deng sunggu-sunggu supaya torang bole baku dapa ulang deng ngoni. Torang mo se ajar pa ngoni for beking lengkap apa yang masi kurang pa ngoni pe iman. Torang minta pa Tuhan Allah tu torang pe Bapa, deng pa Yesus tu torang pe Tuhan supaya mo kase jalang pa torang for mo baku dapa ulang deng ngoni. Torang minta pa Tuhan supaya beking ngoni lebe tatamba baku sayang, deng lebe tatamba se tunjung tu sayang satu deng laeng deng for samua orang, sama deng torang sayang pa ngoni. Torang minta bagitu supaya nanti kalu Yesus tu torang pe Tuhan datang ulang sama-sama deng samua tu Tuhan pe orang-orang, ngoni pe hati bersi deng lei nyanda ada tu mo se sala pa ngoni di muka pa Tuhan Allah tu torang pe Bapa. Sudara-sudara, torang so se ajar pa ngoni tu cara hidop yang beking snang pa Tuhan, trus memang ngoni da hidop sama deng itu. Mar skarang torang minta lei deng se smangat pa ngoni yang percaya pa Tuhan Yesus, supaya ngoni lebe brusaha lei for hidop beking snang pa Tuhan Allah. Ngoni tau apa yang torang so se ajar pa ngoni, pake kuasa dari Tuhan Yesus. Ini tu Tuhan Allah pe mau: ngoni hidop deng hati yang bersi, nyanda baseks bebas, ngoni tu laki-laki musti tau hidop bae-bae deng ngoni pe bini, ngoni hidop jo deng hati yang bersi di muka pa Tuhan deng lei baku-baku hormat. Ngoni jang hidop iko tu ngoni pe hawa nafsu yang besae, cuma orang-orang yang nyanda kanal pa Tuhan Allah yang ja beking bagitu. Tentang hubungan laki-bini, ngoni nimbole tipu ato beking yang sala pa ngoni pe sudara satu iman. Soalnya Tuhan mo hukum tu orang yang beking bagitu, sama deng torang so bilang deng tegas pa ngoni tempo hari. Soalnya Tuhan Allah da pangge pa torang for mo hidop deng hati yang bersi, bukang for mo beking tu hal-hal yang caparuni. So itu, sapa yang tolak tu ajaran ini, dia bukang tolak pa manusia, malatare dia tolak pa Tuhan Allah yang so kase Dia pe Roh Kudus pa ngoni. Kong tentang tu cara bagimana ngoni baku-baku sayang deng sudara-sudara yang percaya, kita rasa itu so nyanda perlu lei mo se ajar lantaran Tuhan Allah so se ajar pa ngoni bagimana ngoni baku-baku sayang. Soalnya ngoni so beking itu deng cara ngoni kase tunjung tu ngoni pe sayang pa samua sudara yang percaya di sluru daera Makedonia. Mar sudara-sudara yang percaya, kita mo kase nasehat pa ngoni supaya ngoni lei lebe butul-butul baku-baku sayang. Ngoni musti brusaha hidop baku-baku bae deng orang laeng. Ngoni jang maso campur deng orang laeng pe urusan. Ngoni lei musti karja deng ngoni pe tangan sandiri for ngoni pe makang deng keperluan hari-hari sama deng tu torang perna bilang pa ngoni. Deng ngoni hidop bagitu, tu orang-orang yang nyanda percaya pa Tuhan mo hormat pa ngoni, kong ngoni lei nyanda bagantong pa orang laeng. Sudara-sudara, kalu ada orang yang mati, torang nimau ngoni sedi skali sama deng tu orang-orang yang nyanda baharap deng yakin pa Tuhan. So itu torang mo kase tau pa ngoni apa sebenarnya tu da jadi pa orang-orang yang so mati. Torang percaya kalu Yesus da mati kong Tuhan Allah so kase hidop ulang pa Dia. So itu torang lei percaya kalu tu orang-orang yang percaya pa Yesus mati, pasti Tuhan Allah lei mo se hidop ulang pa dorang kong mo bawa pa dorang for sama-sama deng Yesus. Kong tentang tu orang percaya yang so mati, Tuhan perna bilang pa torang kong skarang torang se tau pa ngoni bagini: nanti kalu Tuhan datang ulang, torang yang masi hidop di dunia ini, torang nyanda mo lebe dulu taangka dari tu orang-orang yang so mati lebe dulu. Kalu Tuhan so mo datang, mo ada satu prenta dari sorga tu da bilang deng suara yang kuat skali, tu malaekat pe pemimpin mo babicara kuat, kong Tuhan Allah pe trompet mo babunyi. Waktu itu, Tuhan Yesus mo turung dari sorga kong tu orang-orang mati yang percaya pa Yesus mo lebe dulu hidop ulang. Abis itu, torang yang waktu itu masi hidop, Tuhan Allah mo angka ka awan-awan sama-sama deng tu orang-orang yang so hidop ulang for mo sambut pa Tuhan Yesus di langit, kong torang samua mo tinggal sama-sama deng Tuhan Yesus slama-lamanya. So itu, ngoni musti se cirita ulang tu ajaran ini pa orang laeng supaya ngoni bole baku kase smangat. Sudara-sudara, torang nyanda perlu mo tulis pa ngoni tempo apa de pe waktu tu Tuhan Yesus mo datang ulang. Soalnya ngoni sandiri tau butul kalu nyanda ada orang tu tau tempo apa Tuhan Yesus mo datang ulang, sama deng papancuri yang datang malam-malam. Ada de pe waktu orang-orang mo bilang bagini, “Torang pe hidop tenang deng aman, kong torang nyanda perlu tako apa-apa.” Mar kage-kage dorang itu mo dapa pendritaan yang hebat skali. Dorang nyanda mo lolos dari tu pendritaan itu. Tu pendritaan yang dorang mo rasa itu, sama deng tu pendritaan yang parampuang da rasa waktu mo melahirkan. Mar ngoni sudara-sudara, ngoni pe hidop nyanda sama deng tu orang-orang yang hidop di dalam glap. So itu nanti waktu Tuhan Yesus datang ulang, ngoni nyanda mo takage sama deng tu orang yang da pancuri akang. Ngoni samua itu orang-orang trang deng orang yang hidop di siang. Torang nyanda hidop sama deng tu orang-orang malam ato orang-orang glap. So itu torang nimbole cuma tidor-tidor sama deng orang laeng. Torang musti bajaga-jaga deng kuasai diri. Soalnya tu orang-orang yang biasa tidor, dorang tidor waktu malam, kong tu orang-orang yang mabo, mabo waktu malam. Mar torang ini yang percaya pa Tuhan, torang musti kuasai diri sama deng anak-anak siang. Torang musti percaya pa Tuhan Allah deng baku sayang. Torang pe percaya deng sayang itu yang jaga pa torang sama deng tentara yang da pake baju besi for pele tu dada. Torang lei musti baharap deng yakin pa Tuhan for torang pe slamat, sama deng tentara yang da pake helem for jaga de pe kapala. Soalnya Tuhan Allah nyanda pili pa torang for Dia mo hukum, mar Dia pili pa torang for dapa slamat lewat torang pe percaya pa Yesus Kristus tu torang pe Tuhan. Yesus so mati for torang, supaya nanti waktu Dia datang ulang, biar waktu itu torang so mati ato masi hidop, torang bole hidop sama-sama deng Dia. So itu, ngoni musti cirita ulang tu ajaran ini pa satu deng yang laeng for mo kase smangat deng baku kase kuat hati, sama deng tu ngoni ja beking sampe skarang ini. Sudara-sudara, torang minta supaya ngoni hargai tu orang-orang yang da karja kras for Tuhan di tenga-tenga pa ngoni. Dorang ja pimpin pa ngoni, dorang itu yang ja kase nasehat deng togor pa ngoni for se kuat tu ngoni pe percaya pa Tuhan. Ngoni musti hargai deng sayang pa dorang lantaran samua tu dorang ja beking for tolong pa ngoni. Kong ngoni musti slalu hidop baku-baku bae. Sudara-sudara, torang lei se nasehat pa ngoni supaya beking bagini: togor deng bae-bae tu orang pangmalas supaya dong rajin bakarja, beking brani tu orang yang panako, tolong tu orang yang perlu mo tolong, kong basabar jo pa samua orang. Ngoni tarukira jo, supaya jang ada orang yang balas tu orang pe jaha deng jaha lei, mar ngoni musti brusaha ja beking tu bae satu deng laeng deng lei pa orang-orang laeng. Ngoni pe hati musti snang trus. Ngoni musti trus basombayang. Biar ngoni dapa susa ato snang, ngoni musti slalu bilang makase pa Tuhan Allah. Soalnya Tuhan Allah suka ngoni beking bagitu pa ngoni pe hidop lantaran ngoni so percaya pa Kristus Yesus. Jang ja halangi tu Tuhan Allah pe Roh da bakarja. Kalu Tuhan kase tau Dia pe pesan pa orang kong tu orang itu se tau tu pesan pa ngoni, jang ngoni pandang enteng tu pesan itu. Cuma ngoni memang musti cari tau bae-bae samua itu supaya tau kalu itu butul-butul dari Tuhan. Kalu memang itu butul dari Tuhan, ngoni musti trima kong iko itu. Ngoni lei jang beking tu jaha. Tuhan Allah tu da beking torang hidop deng hati tenang, kong torang minta pa Dia supaya Dia beking ngoni butul-butul jadi kudus. Torang minta supaya Dia jaga tu ngoni pe badan, hati deng jiwa supaya nanti kalu torang pe Tuhan Yesus Kristus datang ulang, nyanda ada tu mo se sala pa torang. Tuhan Allah yang da pangge pa ngoni for iko pa Dia, Dia itu setia. Dia pasti mo beking yang Dia da bilang pa torang. Sudara-sudara, torang minta ngoni basombayang akang pa torang. Ngoni bilang akang tu torang pe salam sayang pa sudara-sudara yang percaya. Kita minta pa ngoni deng kuasa dari Tuhan Yesus, supaya ngoni baca akang ni surat pa samua sudara yang percaya. Torang minta supaya Yesus Kristus tu torang pe Tuhan kase tunjung tu Dia pe bae pa ngoni. Ni surat dari kita, Paulus deng kita pe tamang-tamang tu Silas deng Timotius. Torang kirim ni surat for ngoni tu jemaat di Tesalonika. Ngoni yang percaya pa torang pe Allah Bapa deng pa Tuhan Yesus Kristus. Torang minta supaya Allah tu torang pe Bapa deng Tuhan Yesus Kristus kase tunjung tu bae pa ngoni deng lei beking ngoni hidop deng hati tenang. Sudara-sudara, torang musti slalu bilang makase pa Tuhan Allah lantaran ngoni. Torang memang musti bagitu lantaran ngoni pe percaya pa Yesus lebe tatamba, kong ngoni lei lebe baku-baku sayang. So itu, torang bangga bacirita tentang ngoni pa jemaat-jemaat yang sama-sama percaya pa Tuhan Allah. Torang bangga lantaran ngoni tetap batahang percaya pa Yesus biar lei da mangada tu siksa deng susa yang ngoni da rasa. Tu samua itu jadi bukti kalu Tuhan Allah adili orang deng butul. Ngoni pantas jadi orang-orang dari Tuhan Allah yang Berkuasa sbagai Raja, soalnya ngoni da dapa siksa lantaran ngoni da jadi Dia pe orang-orang. Tuhan Allah itu adil, Dia mo balas beking siksa tu orang-orang yang beking siksa pa ngoni. Dia mo beking ngoni deng torang lei bebas dari tu siksa yang skarang ini torang samua da rasa. Ini samua jadi nanti waktu Tuhan Yesus datang dari sorga sama-sama deng Dia pe malaekat-malaekat yang punung deng kuasa. Dia mo turung deng api yang bamanyala. Dia mo hukum tu orang-orang yang nimau kanal pa Tuhan Allah deng yang nimau iko tu Kabar Bae tentang torang pe Tuhan Yesus. Dorang mo dapa hukuman, dorang mo rasa siksa sampe slama-lamanya. Dorang mo dapa user dari Tuhan pe muka, deng dorang so nyanda mo lia lei tu Dia pe kuasa yang luar biasa. Samua itu mo jadi nanti waktu Tuhan Yesus datang ulang. Waktu Dia datang, Dia pe orang-orang mo puji deng hormat pa Dia. Samua orang percaya mo heran kong puji pa Dia, kong ngoni lei mo sama-sama deng dorang lantaran ngoni lei yang so percaya tu brita yang torang so kase tau pa ngoni. Torang da kase tau pa ngoni yang torang so perna lia deng dengar dari pa Tuhan. So itu torang ja basombayang for ngoni, supaya torang pe Tuhan Allah beking ngoni pantas jadi orang yang Dia so pangge for iko pa Dia. Torang lei basombayang supaya Tuhan Allah pake Dia pe kuasa for tolong pa ngoni beking klar samua tu bae yang ngoni mo beking, ngoni beking samua itu lantaran ngoni percaya. Torang basombayang bagitu supaya kalu ngoni pe cara hidop so sama deng itu, orang-orang mo puji deng hormat tu torang pe Tuhan Yesus pe nama. Deng bagitu, ngoni lei mo dapa puji deng hormat lantaran percaya pa Tuhan Yesus. Ini samua mo jadi bagitu lantaran Tuhan Allah deng torang pe Tuhan Yesus Kristus da se tunjung tu sayang pa ngoni. Sudara-sudara, tentang Tuhan Yesus Kristus mo datang ulang deng tentang Dia mo kase kumpul pa torang sama-sama deng Dia, torang minta pa ngoni, supaya ngoni jang capat bingo ato gelisa kalu ngoni dengar dari pa orang tentang tu hal-hal itu. Ada stou yang anggap kalu Tuhan da kase tau pa torang kalu Dia so datang ulang, ato ada lei yang kira torang da kase tau sandiri ato da tulis surat tentang itu. Padahal nyanda bagitu. Jang sampe orang tipu bagitu pa ngoni deng macam-macam cara! Soalnya seblum Tuhan Yesus datang ulang, lebe dulu musti jadi tu hal-hal ini: banya orang yang mo malawang pa Tuhan, deng lei ada orang yang paling jaha mo muncul, tu orang itu yang pasti mo binasa. Dia itu mo malawang pa Tuhan Allah deng mo angka diri lebe tinggi dari samua tu manusia ja semba sbagai Tuhan. Dia mo dudu di dalam Ruma Ibada Pusat kong mangaku di muka pa samua orang kalu dia itu tu Tuhan Allah. Ngoni masi inga to tu hal-hal itu? Waktu kita da sama-sama deng ngoni, kita ja se tau pa ngoni tentang samua itu. Kong skarang ngoni so tau tu da batahang pa orang yang paling jaha itu, sampe nanti orang yang paling jaha itu mo muncul di waktu yang Tuhan Allah so tentukan for dia. Tu orang yang paling jaha itu so mulai bakarja mar deng babasambunyi lantaran skarang masi ada yang da batahang. Mar nanti mo ada de pe waktu Tuhan Allah mo ambe tu da batahang pa dia. Waktu itu baru tu orang yang paling jaha itu mo muncul. Mar Tuhan Yesus mo bunung pa tu orang itu deng cara tiop pa dia. Kong waktu Tuhan Yesus datang ulang, Dia pe kuasa yang luar biasa mo beking ancor pa tu orang itu. Mar waktu Tuhan Yesus blum datang, tu orang yang paling jaha itu mo muncul pake setang pe bos pe kuasa. Dia itu mo tipu orang-orang deng cara se tunjung tu kuasa lewat mujisat-mujisat, tanda-tanda ajaib deng hal-hal yang luar biasa yang dia mo beking. Tu orang yang paling jaha itu mo pake macam-macam cara yang jaha for tipu pa orang-orang yang mo binasa. Dorang itu mo ancor lantaran dorang nimau trima deng nyanda suka tu ajaran yang butul tentang Tuhan Yesus yang bole se slamat pa dorang. So itu Tuhan Allah se biar ada pengaru yang beking dorang percaya tu nyanda butul kong jadi sesat. Tuhan Allah beking bagitu supaya samua orang yang nimau percaya tu ajaran yang butul tentang Tuhan Yesus kong suka beking tu jaha, dorang itu mo dapa hukuman. Sudara-sudara yang Tuhan sayang! Torang slalu musti bilang makase pa Tuhan Allah lantaran ngoni. Soalnya dari dulu Dia so pili pa ngoni for mo slamat. Tuhan se slamat pa ngoni lantaran ngoni percaya tu ajaran yang butul, deng tu Roh Kudus beking ngoni lei jadi kudus di muka pa Tuhan. So lantaran itu, Tuhan Allah pangge pa ngoni for iko pa Dia. Dia pangge pa ngoni waktu torang da se tau pa ngoni tu Kabar Bae tentang Yesus Kristus. Deng bagitu ngoni bole dapa puji deng hormat sama-sama deng Yesus Kristus tu torang pe Tuhan. So itu sudara-sudara, ngoni musti batahang iko trus tu ngoni pe percaya itu! Pegang bae-bae tu ajaran yang torang so se ajar pa ngoni lewat surat ato tu torang da bilang langsung. Tuhan Allah, tu torang pe Bapa, Dia yang sayang pa torang. Dia se tunjung De pe sayang pa torang supaya De pe sayang itu se kuat torang pe hati for slama-lamanya deng lei supaya kase harapan deng yakin pa torang mo dapa yang bae. Torang minta pa Tuhan Allah deng pa Yesus Kristus tu torang pe Tuhan, supaya se smangat deng se kuat tu ngoni pe hati supaya ngoni bole beking samua yang bae deng bicara tu hal-hal bae. Sudara-sudara, torang minta pa ngoni supaya basombayang akang for torang. Ngoni sombayang akang supaya tu Tuhan pe firman capat tasiar kong di mana-mana orang trima tu firman deng punung rasa hormat, sama deng waktu ngoni da trima tu firman itu. Kong ngoni basombayang lei supaya Tuhan se slamat pa torang dari tu orang-orang jaha deng tu tukang beking kacau. Soalnya nyanda samua orang percaya pa Tuhan. Mar Tuhan itu setia. Dia mo se kuat ngoni pe hati deng jaga pa ngoni dari yang ja beking tu jaha. Torang butul-butul yakin pa Tuhan tentang ngoni kalu ngoni da beking apa tu torang da pesan pa ngoni, deng ngoni mo beking itu trus. Torang minta supaya Tuhan bantu pa ngoni, supaya ngoni bole tau Tuhan Allah pe sayang, deng lei supaya ngoni tetap batahang percaya biar dapa siksa sama deng dulu Yesus Kristus da batahang waktu dapa siksa. Sudara-sudara, atas nama Tuhan Yesus Kristus, torang suru pa ngoni supaya ngoni bajao dari tu sudara-sudara yang percaya yang jadi malas sampe nyanda ja beking dorang pe karja hari-hari deng nyanda ja iko tu ajaran yang torang so kase pa ngoni. Soalnya ngoni sandiri tau kalu ngoni musti ambe conto dari tu torang pe cara hidop, waktu torang da sama-sama deng ngoni torang nyanda perna malas bakarja. Torang lei nyanda perna makang orang pe makanan kong nyanda bayar. Mar torang komang brusaha bakarja kras siang deng malam supaya torang nyanda jadi beban pa sapa jo dari pa ngoni. Torang beking itu bukang lantaran torang nyanda ada hak for jemaat mo bantu, mar torang karja kras supaya torang bole jadi conto for ngoni mo iko akang. Tempo hari waktu torang sama-sama deng ngoni, torang so prenta pa ngoni kalu ada orang yang nimau bakarja, dia nimbole makang. Torang bilang bagitu lantaran torang dengar kalu di antara pa ngoni ada orang-orang yang malas kong dorang nimau bakarja, malatare dorang itu cuma suka ja maso campur orang laeng pe urusan. Pa tu orang-orang rupa itu, deng kuasa dari Tuhan Yesus Kristus, torang prenta deng kase nasehat supaya dorang hidop deng cara yang bae kong bakarja for mo dapa makang. Kong ngoni sudara-sudara, ngoni jang pastiu ja beking tu bae. Kalu ada orang yang nimau mo iko tu torang da tulis di surat ini, ngoni musti hati-hati deng dia kong jang bergaul dekat deng dia supaya dia jadi malo kong bertobat. Mar jang ngoni anggap dia itu musu, lebe bae ngoni togor pa dia lantaran dia itu ngoni pe sudara yang percaya. Tuhan yang bole beking manusia hidop deng hati tenang, torang minta pa Dia supaya siang deng malam Dia beking torang pe hati tenang dalam samua hal. Torang lei minta supaya Tuhan sama-sama deng ngoni samua. Tu salam ini dari kita, Paulus. Kita tu da tulis tu salam ini deng kita pe tangan sandiri. Samua surat yang kita beking da pake tanda bagitu. Ini tu beking beda kita pe surat deng orang laeng pe surat. Kita minta supaya Tuhan Yesus Kristus se tunjung tu Dia pe bae for ngoni samua. Ni surat dari kita, Paulus. Kita ini Kristus Yesus pe rasul tu Dia pe utusan iko prenta dari Tuhan Allah yang jadi torang pe Juruslamat, deng lei iko Kristus Yesus tu torang pe harapan. Ni surat for Timotius. Ngana kita so anggap kita pe anak sandiri lantaran ngana pe percaya. Kita minta supaya Allah Bapa deng Kristus Yesus tu torang pe Tuhan se tunjung tu bae pa ngana, se tunjung tu rasa kasiang deng lei beking ngana hidop deng hati tenang. Waktu kita so mo pigi ka Makedonia, kita minta deng sangat pa ngana supaya tinggal di Efesus. Di Efesus itu ada tu orang-orang yang ja se ajar tu ajaran yang baku laeng deng torang pe ajaran, ngana suru jo dorang brenti se ajar tu ajaran itu. Ngana bilang lei pa dorang supaya jang bacirita tentang dongeng-dongeng deng daftar nene moyang yang talalu panjang. Tu hal-hal itu cuma beking orang baku ambe pendapat kong nyanda bantu orang iko tu rencana Tuhan Allah for se slamat pa manusia, yang torang so tau lantaran torang percaya pa Tuhan. Kita suru samua ini pa ngana, deng maksut supaya orang-orang baku-baku sayang. Tu sayang itu musti muncul dari hati yang bersi, dari pikiran yang tau tu butul, deng lei dari hati orang yang butul-butul percaya pa Tuhan. Mar ada orang yang so nyanda ja beking samua itu, malatare dorang so tasala jalang, dorang suka babacirita yang nyanda ada guna. Dorang itu yang suka mo jadi guru for se ajar tu atoran-atoran di kitab Taurat, mar dorang sandiri nyanda mangarti apa tu dorang da se ajar deng dorang nintau arti. Torang tau kalu tu atoran-atoran yang ada di kitab Taurat itu bae, asal orang pake itu iko tu maksut yang butul. Tu atoran-atoran yang ada di kitab Taurat itu bukang for orang yang ja beking tu butul, mar for tu orang-orang yang bagini: yang nyanda ja iko tu atoran, yang pangmalawang Tuhan pe prenta, yang hidop jao dari pa Tuhan Allah, yang ja beking dosa, yang cuma ja iko tu dorang pe mau sandiri, yang nyanda percaya pa Tuhan, yang babunung papa ato mama sandiri ato orang laeng, yang ja beking hal-hal caparuni, laki-laki yang main seks deng laki-laki, yang culik orang kong jual for beking budak, pangbadusta, yang ja basaksi dusta, deng lei orang-orang yang ja beking tu hal-hal yang baku laeng deng tu ajaran yang butul. Tu ajaran yang butul itu ada di Kabar Bae dari Tuhan Allah. Dia itu luar biasa kong pantas orang puji. Tu Kabar Bae ini Dia so se percaya pa kita. Kita bilang makase pa Kristus Yesus tu torang pe Tuhan, lantaran Dia yang se kuat pa kita, Dia anggap kita De pe orang yang setia sampe Dia kase percaya tu playanan ini pa kita. Dulu kita yang ja bicara jaha tentang Kristus Yesus. Kita lei ja beking siksa deng bahina pa tu orang-orang yang percaya pa Dia. Mar biar lei bagitu, Dia kase tunjung Dia pe rasa kasiang pa kita lantaran kita blum percaya pa Dia deng nyanda mangarti tu kita da beking. Malatare, tu torang pe Tuhan se tunjung tu Dia pe sayang pa kita deng talebe-lebe sampe kita jadi percaya pa Dia, kong kita lei bole basayang pa orang laeng lantaran kita so percaya pa Kristus Yesus. Tu kata-kata yang kita mo bilang ini, ngana bole trima deng percaya. Tu de pe bunyi bagini, “Kristus Yesus datang ka dunia for mo se slamat tu orang-orang yang beking dosa.” Kong dari samua orang yang perna beking dosa, kita yang paling banya beking dosa. Mar biar bagitu, Yesus Kristus se tunjung tu De pe rasa kasiang pa kita supaya orang-orang bole lia tu Dia pe sabar skali pa kita, tu orang yang banya kali beking dosa. Deng bagitu kita jadi conto for orang laeng yang berdosa, supaya dorang lei bole percaya pa Kristus Yesus kong mo hidop kekal deng Dia. Hormat jo pa Tuhan Allah! Dia itu torang pe Raja sgala jaman, Dia ada slama-lamanya, Dia nyanda dapa lia, Dia cuma satu. Puji deng hormat jo pa Dia sampe slama-lamanya. Amin. Timotius, tu kita so anggap kita pe anak, kita suru pa ngana supaya beking ngana pe tugas itu iko apa tu Tuhan so kase tau pa ngana lewat jemaat. Tu Tuhan da kase tau itu se smangat pa ngana for berjuang beking tu ngana pe tugas. Soalnya, ada orang-orang yang so nyanda iko tu dorang pe hati yang tau tu butul kong lantaran itu dorang so nyanda percaya lei. Dari pa dorang itu ada Himeneus deng Aleksander. Kita so srahkan dorang dua pa setang pe bos. Kita beking bagitu supaya dorang sadar kong brenti beking besae Tuhan Allah pe nama. Tu paling penting, kita se nasehat bagini: basombayang jo pa Tuhan Allah, minta jo pa Dia apa tu perlu, minta lei for orang laeng, trus bilang makase pa Dia for samua orang. Ngana basombayang bagitu for raja-raja deng for samua pemimpin yang laeng, supaya torang bole hidop aman deng baku-baku bae. Deng bagitu torang bole ja beking Tuhan Allah pe mau deng torang bole hidop deng kalakuan yang cocok for orang yang ja iko pa Tuhan. Tu basombayang bagitu, itu yang bae kong beking snang pa Tuhan Allah tu torang pe Juruslamat. Dia lei suka samua orang slamat deng mangarti tu ajaran yang butul. Tuhan Allah itu cuma satu, deng cuma ada satu yang bole se baku bae ulang antara Tuhan Allah deng manusia, Dia itu Kristus Yesus yang jadi manusia. Dia srahkan Dia pe diri for tubus samua manusia dari dong pe dosa. Deng bagitu Tuhan Allah se tunjung Dia pe rencana for tubus manusia pe dosa-dosa pas pa de pe waktu yang Dia so tentukan. Kong for mo kase tau tu Tuhan Allah pe rencana itu, Tuhan Allah pili pa kita for jadi rasul. Dia suru pa kita pi kase tau itu pa tu orang-orang yang bukang Yahudi supaya dorang percaya pa Yesus deng iko tu ajaran yang butul. Samua tu kita da bilang ini butul, kita nyanda badusta. So itu kita suka di mana-mana kalu basombayang, laki-laki angka tangan deng hati yang bersi pa Tuhan. Dorang nimbole bamara deng baku ambe deng orang laeng. Bagitu lei deng parampuang, lebe bae dorang pake baju yang sederhana, pantas deng sopan. Dorang nyanda perlu bagaya yang talebe-lebe rupa ini: beking model rambu yang talalu menyolok, pake mas ato mutiara, ato pake baju yang mahal-mahal. Mar lebe bae parampuang-parampuang itu beking cantik tu dong de pe diri deng cara beking tu bae. Itu yang pantas for parampuang yang mangaku ja semba pa Tuhan Allah. Kong kalu ada orang yang se ajar Tuhan pe firman, tu parampuang coba badiam kong dengar-dengaran waktu trima tu ajaran itu. Kita nyanda kase isin tu parampuang for mangajar deng lei nimbole baprenta pa laki-laki. Kalu samantara bakumpul for dengar tu ajaran, tu parampuang musti badengar bae-bae kong coba badiam. Soalnya, Adam yang pertama Tuhan Allah da beking baru Hawa. Deng lei bukang Adam tu da goda mar Hawa tu parampuang sampe dia langgar tu Tuhan Allah pe prenta. Mar parampuang mo slamat lantaran da se lahir anak, asal dia batahang percaya pa Tuhan biar dapa siksa, sayang pa orang laeng, hidop deng hati yang bersi di muka pa Tuhan, deng lei de pe cara hidop sederhana. Memang butul tu da bilang ini, “Orang yang suka mo jadi pemimpin jemaat, itu de pe arti dia so pili tu karja yang bagus.” So itu tu pemimpin jemaat, de pe orang musti bagini: dia hidop bae-bae sampe nyanda ada yang bole mo se sala pa dia, dia pe bini cuma satu, bole mo tahang diri, bijaksana, sopan, suka trima orang pa de pe ruma, pande mangajar, nyanda pangmabo, nyanda pangbakalae mar bae-bae, suka baku-baku bae deng nyanda gila doi. Dia lei musti tau ator bae-bae de pe kluarga, deng de pe anak-anak lei hormat deng dengar-dengaran pa dia. Soalnya kalu dia nyanda mampu mo ator tu de pe kluarga sandiri, nyanda mungkin lei dia mampu mo ator tu Tuhan Allah pe jemaat. Tu pemimpin itu nimbole yang baru percaya pa Tuhan, supaya dia nyanda jadi sombong. Soalnya kalu dia so jadi sombong, Tuhan mo hukum pa dia sama deng Tuhan da hukum tu setang pe bos. Tu pemimpin itu musti ada nama bae di antara orang-orang yang blum percaya pa Tuhan, supaya orang laeng nyanda mo bicara besae tentang dia. Deng bagitu setang pe bos nyanda mo dapa goda pa dia for beking dosa. Bagitu lei deng diaken-diaken yang ja babantu di jemaat, dorang itu musti orang yang sama deng ini: kalakuan bae yang beking orang hormat pa dia, nyanda munafik, nyanda pangmabo deng nyanda ja batipu for cari untung. Dorang musti pegang trus tu dorang pe percaya pa Kristus yang Tuhan Allah so kase tunjung skarang ini, kong dorang iko akang deng hati yang bersi. Kong jemaat musti lebe dulu priksa bae-bae pa dorang itu. Kalu jemaat so tau dorang hidop lurus, baru jemaat angka pa dorang jadi diaken. Bagitu lei deng dorang pe bini, dorang pe bini pe kalakuan musti bae sampe dorang dapa hormat, dorang nyanda ja beking besae orang laeng pe nama, bole batahang diri, deng bole mo percaya di samua hal. Tu diaken lei cuma bole ada satu bini, kong ja urus bae-bae tu de pe anak-anak deng de pe kluarga. Kalu tu diaken-diaken layani bae-bae tu jemaat, pasti jemaat mo hormat pa dorang. Deng bagitu dorang mo lebe brani babicara tentang tu dong pe percaya pa Kristus Yesus. Timotius, kita baharap supaya kita capat mo pi baku dapa deng ngana di sana. Mar biar lei blum baku dapa, kita so tulis ini surat for ngana, supaya kalu kita talat datang, kita pe surat so lebe dulu sampe pa ngana. Lewat ini surat, ngana bole tau bagimana tu orang percaya musti hidop jadi Tuhan Allah pe kluarga. Tu kluarga ini tu jemaat dari Tuhan Allah yang hidop. Kong Dia pe jemaat itu yang topang tu ajaran yang butul, sama deng tiang raja deng fondasi yang topang tu ruma. Dulu orang nintau tu ajaran yang butul itu, mar skarang Tuhan Allah so se tunjung tu rahasia yang luar biasa tentang tu ajaran itu. Bagini tu rahasia itu: Yesus so datang sbagai manusia. Roh Kudus kase tunjung kalu Dia itu yang butul, deng malaekat-malaekat lei da lia pa Dia. Dia pe cirita itu so tasiar ka bangsa-bangsa laeng, kong orang-orang di dunia ini percaya pa Dia, deng Tuhan Allah so angka pa Dia ka tampa yang paling tinggi deng cara yang luar biasa. Roh Kudus da bilang deng jelas kalu nanti di hari-hari seblum kiamat, mo ada orang percaya yang nyanda mo percaya lei pa Tuhan. Tu orang-orang itu cuma mo iko pa setang-setang yang ja beking sesat pa manusia deng lei ja beking tu setang-setang pe ajaran. Tu orang-orang yang ja kase ajar tu ajaran sesat itu, dorang itu munafik kong pangbadusta, dorang pe hati so nintau tu butul. Dorang itu kase ajar kalu orang nimbole kaweng, deng lei nimbole mo makang bebrapa jenis makanan, padahal Tuhan Allah so beking tu samua makanan itu for mo makang. Kong kalu orang-orang percaya yang ja iko tu ajaran yang butul itu mo makang, dorang bilang makase dulu pa Tuhan Allah baru dorang makang. Soalnya samua tu Tuhan Allah da beking itu bae. Tu Dia da beking itu samua nyanda ada yang haram, asal torang trima deng bilang makase pa Tuhan. Soalnya Tuhan Allah pe firman deng torang pe sombayang beking samua itu jadi kudus. Timotius, ngana musti ja se ajar tu hal-hal itu pa sudara-sudara yang percaya supaya dorang nyanda iko tu ajaran sesat, deng bagitu ngana mo jadi Kristus Yesus pe orang karja yang bae. Kalu ngana beking bagitu, ngana pe percaya jadi lebe kuat lantaran ngana slalu iko tu ajaran yang butul, tu ajaran itu yang dari dulu orang so se ajar pa ngana. Ngana jang badekat deng tu orang-orang yang suka bacirita dongeng-dongeng yang nyanda ada guna. Mar lebe bae tare, ngana latih jo bae-bae tu ngana pe diri supaya ja beking Tuhan Allah pe mau. Kalu orang latih de pe diri for beking de pe badan jadi kuat, itu memang bae mar de pe guna cuma sadiki. Mar kalu orang latih de pe diri for ja beking Tuhan Allah pe mau, itu banya skali de pe guna. Itu bawa berkat for torang pe hidop skarang di dunia ini deng lei for torang pe hidop nanti. Tu kata-kata itu butul kong torang musti iko akang itu. Soalnya torang da brusaha kras ja layani pa Tuhan Allah lantaran torang baharap deng yakin pa Dia yang hidop. Dia itu yang kase slamat samua orang dari hukuman dosa, lebe kusus tu orang-orang yang percaya. Ngana kase tau deng kase ajar jo tu samua itu pa orang-orang. Ngana jang se biar orang mo pandang enteng pa ngana lantaran ngana masi muda. Mar lebe bae, ngana jadi conto yang bae for orang percaya. Ngana kase conto pa dorang lewat ngana pe bicara, ngana pe kalakuan, ngana pe sayang pa orang laeng, ngana pe percaya pa Tuhan, deng lei tu ngana pe pikiran musti bersi di muka pa Tuhan. Samantara ngana batunggu pa kita mo datang, ngana musti ja baca akang tu Kitab Suci for orang-orang percaya di situ. Ngana lei kase smangat tu dorang pe percaya deng lei ajar bae-bae pa dorang. Jang ngana nyanda pake tu karunia yang Roh Kudus da kase pa ngana tempo hari. Tu karunia itu ngana da trima waktu tu pemimpin-pemimpin jemaat da taru tangan pa ngana for mo utus pa ngana. Waktu itu Tuhan Allah da kase tau tentang tu karunia pa dorang, kong dorang se tau pa ngana. Ngana musti beking samua itu pa ngana pe jemaat. Samua itu musti jadi yang paling penting for ngana, supaya orang-orang bole lia ngana pe kemajuan ja urus jemaat. Ngana musti jaga bae-bae ngana pe cara hidop deng lei jaga supaya ngana cuma ja se ajar tu ajaran yang butul. Ngana musti beking trus tu hal-hal itu, kalu ngana beking bagitu Tuhan mo se slamat pa ngana deng lei pa tu orang-orang yang badengar pa ngana. Timotius, ngana jang togor deng kras pa laki-laki yang lebe tua dari ngana. Lebe bae ngana se nasehat deng bae-bae pa dia sama deng ngana da babilang pa ngana pe papa sandiri. Kong pa tu nyong-nyong, ngana lei musti se nasehat deng bae-bae pa dorang sama deng ngana babilang pa ngana pe ade sandiri. Bagitu lei deng pa tu parampuang-parampuang yang lebe tua dari ngana. Ngana musti se nasehat deng bae-bae pa dorang sama deng ngana da babilang pa ngana pe mama sandiri. Kong pa tu nona-nona, ngana lei se nasehat pa dorang deng bae-bae sama deng ngana da babilang pa ngana pe ade sandiri. Kong lei kalu ngana bicara deng tu nona-nona, ngana pe pikiran musti bersi di muka pa Tuhan. Ngana musti tarukira akang tu keperluan dari janda-janda yang nyanda ada sapa-sapa tu mo bantu pa dorang. Mar kalu tu janda masi ada anak ato cucu, tu anak deng cucu itu yang musti lebe dulu urus pa tu janda itu pe perlu. Dorang musti blajar tu cara mo balas dorang pe mama deng oma pe bae pa dorang. Deng bagitu, dorang so beking snang Tuhan Allah pe hati. Tu janda yang nyanda ada anak ato cucu for mo urus pa dia, dia itu cuma baharap deng yakin pa Tuhan Allah. Siang deng malam dia slalu basombayang for minta tolong pa Tuhan Allah. Mar tu janda yang cuma suka hidop basnang-snang, biar lei dia masi hidop dia sama deng so mati. Kase inga akang samua itu pa dorang, supaya nyanda ada orang yang mo bicara busu tentang dorang. Soalnya kalu ada orang yang nimau mo urus tu orang-orang yang masi kluarga deng dia, lebe-lebe tu de pe kluarga sandiri, tu orang itu sama deng so manyangkal de pe percaya pa Tuhan. Dia itu so lebe soe dari tu orang yang nyanda percaya pa Tuhan. Tu janda yang jemaat bole mo se daftar for mo bantu, de pe syarat bagini: Dia pe umur musti anam pulu taong ka atas, cuma satu kali kaweng, deng lei orang-orang tau kalu dia ja beking tu bae pa orang laeng. Dia beking tu bae yang sama deng ini: dia da urus deng bae tu de pe anak-anak, dia suka trima orang laeng pa de pe ruma, dia ja layani tu Tuhan pe orang-orang deng renda hati, dia lei ja bantu tu orang-orang susa, kong dia slalu ja beking tu bae pa samua orang. Mar kalu tu janda-janda yang masi blum anam pulu taong, jang dulu se daftar pa dorang for mo dapa bantuan. Soalnya kalu tu nafsu birahi so kuasai pa dorang, dorang mo kaweng ulang. Dorang so se tinggal pa Kristus, sampe dorang so nyanda ada waktu lei mo beking tu dong pe janji dulu for mo layani tu jemaat. So itu Tuhan Allah mo hukum pa dorang. Kong lei kalu jemaat kase maso di daftar tu janda-janda yang blum sampe anam pulu taong, dorang itu cuma mo maso kaluar orang pe ruma kong mo jadi pangmalas. Kong bukang cuma itu lei, dorang bacirita tu orang pe busu, dorang maso campur tu orang laeng pe urusan deng lei bacirita tu hal-hal yang nyanda pantas. So itu kita suka tu janda-janda yang masi muda supaya dorang kaweng ulang. Kalu dorang kaweng ulang, dong bole dapa anak kong urus tu dong pe ruma tangga sandiri. Deng bagitu tu setang pe bos nyanda ada kesempatan mo pake orang for mo se besae torang yang percaya pe nama. Soalnya ada bebrapa janda muda yang so nyanda iko pa Kristus lei, dorang cuma da iko tu setang pe bos pe mau. Kalu ada satu parampuang yang percaya pa Tuhan tu de pe anggota kluarga ada yang so janda, dia yang musti bantu pa tu janda itu supaya nyanda jadi jemaat pe tanggongan. Deng bagitu jemaat komang bole mo bantu tu janda-janda laeng yang memang so nyanda ada sapa-sapa tu mo bantu pa dorang. Tu pemimpin-pemimpin jemaat yang da beking dong pe tugas deng bae, dorang itu musti dapa gaji dua kali lipa, itu tu tanda hormat pa dorang. Lebe-lebe lei for pemimpin yang rajin ja kase tau tu Tuhan pe firman deng mangajar pa jemaat. Kita bilang bagitu lantaran di Kitab Suci da tulis bagini, “Kalu sapi da bakarja kras for torang, torang nimbole ika de pe mulu, biar jo tu sapi itu pe mulu nyanda taika supaya dia bole makang.” Kong ada lei tu da tulis bagini, “Sapa yang da bakarja, dia itu pantas dapa gaji.” Kalu ada orang yang batudu pa pemimpin jemaat, ngana jang trima tu tuduhan itu. Mar kalu ada dua ato tiga saksi yang beking kuat tu tuduhan, itu baru ngana bole trima tu tuduhan kong urus pa dia. Kalu dia memang da beking dosa, ngana musti togor pa dia di muka pa samua anggota jemaat supaya tu anggota jemaat yang laeng jadi tako mo beking dosa. Timotius, kita kase tu tugas ini pa ngana di muka pa Tuhan Allah, Kristus Yesus deng malaekat-malaekat yang Tuhan Allah so pili. Kita minta pa ngana supaya beking samua tu kita da bilang ini di jemaat. Ngana musti beking tu samua ini pa samua orang deng cara nyanda bapili-pili orang deng nyanda brat sabla. Ngana jang talalu capat taru tangan pa orang for mo lantik pa dia jadi pemimpin jemaat. Kalu ada orang yang beking dosa, ngana jang taiko-iko beking dosa sama deng dorang. Ngana musti jaga supaya ngana pe hidop tetap bersi di muka pa Tuhan. Timotius, ngana ja dapa saki puru deng panyaki-panyaki laeng. Jadi ngana jang cuma ja minum aer puti, mar minum lei anggor sadiki for se bae tu ngana pe saki puru deng ngana pe panyaki laeng. Ada bebrapa orang yang beking dosa, kong itu dapa tau skali. Biar Tuhan tare blum adili pa dorang, samua orang so tau tu dong pe dosa. Mar komang tu laeng so beking dosa, cuma blum dapa tau. Dorang pe dosa itu nanti mo dapa tau brikut. Bagitu lei ada orang yang beking tu bae, kong itu dapa tau skali. Mar ada lei yang da beking tu bae nyanda dapa tau, kong nanti mo dapa tau brikut. Tu budak-budak yang percaya pa Yesus, dorang itu musti ja hormat tu dong pe tuang. Deng bagitu, tu orang-orang yang nyanda percaya pa Yesus nyanda mo dapa alasan for mo se besae Tuhan Allah pe nama deng lei tu tong pe ajaran. Kong tu budak-budak yang dong pe tuang lei percaya pa Yesus, dorang nimbole pandang enteng pa dong pe tuang lantaran dorang deng dong pe tuang itu sama-sama percaya pa Yesus. Malatare dorang musti ja layani deng bae skali lebe dari biasa pa dong pe tuang, lantaran dorang pe tuang lei sama-sama percaya pa Yesus kong dorang sayang tu dong pe tuang. Timotius, ngana musti kase ajar deng kase nasehat tu samua ini pa jemaat. Sapa yang kase ajar tu ajaran yang laeng kong anggap sala tu ajaran dari torang pe Tuhan Yesus Kristus deng tu torang pe ajaran for ja beking Tuhan Allah pe mau, so dia tu orang yang stel tau padahal dia nintau apa-apa. Dia pe pikiran nyanda sehat lantaran dia cuma suka ja baku ambe pendapat tentang arti dari kata-kata. Kong tu baku ambe rupa itu beking orang jadi bagini: pangmangiri, ja bakalae, ja se besae orang laeng pe nama deng curiga pa orang laeng, ja baku ambe, so nyanda ja bapikir tu bae, deng lei so nintau tu ajaran yang butul. Dia kira kalu dia ja beking Tuhan Allah pe mau, dia bole mo dapa untung yang basar. Sebenarnya kalu orang butul-butul ja beking Tuhan Allah pe mau, trus dia lei rasa puas deng apa yang ada pa dia, dia so dapa untung yang basar. Soalnya waktu torang lahir di dunia ini, torang nyanda bawa apa-apa. Bagitu lei kalu torang so mati, torang nyanda mo bawa apa-apa. So itu, kalu torang so ada cukup makanan deng baju, torang mustinya so puas deng apa tu ada pa torang itu. Mar tu orang-orang yang suka mo jadi kaya, dorang itu gampang tagoda for beking dosa, lantaran dorang pe nafsu so kuasai pa dorang. Dorang pe nafsu itu nyanda ada de pe guna, cuma mo beking dorang mendrita. De pe laste orang-orang yang suka skali mo jadi kaya tagoda sampe beking dosa, kong dorang beking dong pe diri sandiri cilaka deng ancor brantakan, itu sama deng da taprangkap. Soalnya kalu orang gila doi, dari situ muncul macam-macam kejahatan. Dorang itu brusaha skali mo jadi kaya, kong ada dari pa dorang itu yang so nyanda lei percaya pa Yesus. Kong de pe laste, dorang dapa banya pendritaan yang beking dong pe hati saki. Mar ngana Timotius, ngana itu Tuhan Allah pe orang. Ngana musti bajao dari samua hal yang jaha itu. Ngana musti brusaha beking bagini: beking tu butul di muka pa Tuhan, beking Tuhan Allah pe mau, lebe percaya pa Tuhan, sayang pa orang laeng, tetap batahang percaya biar dapa macam-macam siksa, kong babae-bae pa orang laeng. Ngana musti brusaha trus percaya pa Tuhan, sama deng orang yang iko pertandingan da brusaha for mo dapa tu piala. Ngana pegang trus tu ngana pe hidop kekal, lantaran Tuhan so pangge pa ngana for dapa tu hidop kekal itu. Waktu Tuhan da pangge pa ngana, ngana da bilang deng sunggu-sunggu di muka banya orang kalu ngana percaya pa Yesus Kristus. Skarang di muka pa Tuhan Allah yang beking samua jadi hidop, deng di muka lei pa Kristus Yesus yang da bilang tu kesaksian yang bae di muka gubernur Pilatus, kita suru pa ngana, ngana musti iko bae-bae tu prenta yang ngana so trima deng jang langgar apa-apa dari tu prenta itu supaya nyanda ada orang yang mo se sala pa ngana. Ngana beking bagitu sampe tu waktu Tuhan Yesus Kristus datang ulang. Tuhan Allah sandiri yang so tentukan tu waktu for Tuhan Yesus mo datang ulang. Tuhan Allah itu tu satu-satunya Penguasa, kong pantas mo dapa puji. So Dia no tu Raja dari samua raja yang ada, deng Tuhan dari samua tuhan yang orang puji. Dia itu satu-satunya yang nyanda perna mo mati. Dia tinggal di trang, kong orang nimbole mo badekat di trang itu. Kong nyanda ada orang yang so perna lia pa Dia deng memang nyanda ada orang tu bole mo lia pa Dia. Samua hormat for Dia. Samua kuasa ada pa Dia sampe slama-lamanya. Amin. Ngana musti kase inga pa orang-orang kaya di dunia ini, supaya dorang jang sombong deng jang hidop bagantong pa dorang pe harta. Harta di dunia ini, hari ini ada kong eso bole abis. Dorang itu musti hidop bagantong pa Tuhan Allah. Dia yang da kase samua pa torang deng talebe-lebe supaya torang bole mo rasa akang samua itu. Kase inga pa tu orang-orang kaya itu supaya dorang ja beking tu bae. Dorang musti suka bakase pa orang-orang kong ja bakase lei banya. Deng dorang beking bagitu, dorang so ada satu fondasi yang kuat di sorga, kong deng fondasi itu dorang bole mo dapa tu hidop sebenarnya yang sama-sama deng Tuhan. Timotius, ngana musti jaga bae-bae samua tu Tuhan so se percaya for ngana mo beking. Ngana jang bacirita tu nyanda ada guna deng nyanda hormat pa Tuhan Allah. Kong lei ngana jang baku ambe pendapat tentang tu hal-hal yang orang ja bilang “pengetahuan” padahal itu bukang pengetahuan, itu dorang cuma baku ambe tentang kata-kata. Ada bebrapa orang yang iko tu ajaran yang dong ja bilang “pengetahuan,” so itu dorang so nyanda percaya lei pa Yesus. Kita minta pa Tuhan supaya se tunjung tu De pe bae pa ngoni. Ni surat dari kita, Paulus. Kita ini Kristus Yesus pe rasul tu Dia pe utusan lantaran Tuhan Allah pe mau. Tuhan Allah da pili pa kita for kase tau tu Dia pe janji, kalu orang percaya pa Kristus Yesus, dia mo hidop slama-lamanya deng Tuhan. Timotius yang bae, ni surat for ngana. Kita sayang pa ngana, ngana ini kita so anggap kita pe anak. Kita minta supaya Allah Bapa deng Kristus Yesus tu torang pe Tuhan se tunjung tu bae for ngana, se tunjung tu rasa kasiang for ngana deng lei beking ngana hidop deng hati tenang. Siang deng malam kita ja basombayang bilang makase pa Tuhan Allah lantaran ngana. Kita bilang makase pa Tuhan Allah yang kita ja layani deng hati yang bersi sama deng kita pe nene moyang da beking dulu. Kalu kita inga tu tempo hari ngana da manangis waktu torang dua mo baku pisa, kita suka mo baku dapa ulang deng ngana supaya kita jadi snang. Kita lei inga kalu ngana butul-butul percaya pa Tuhan. Tu ngana pe percaya itu sama deng tu percaya yang so ada lebe dulu pa ngana pe oma Lois deng ngana pe mama Eunike. So itu kita kase inga supaya ngana tetap smangat pake tu karunia yang Tuhan Allah so kase pa ngana. Tu karunia itu yang ngana da dapa tempo hari dari Tuhan Allah waktu kita da taru tangan pa ngana, supaya ngana mampu beking tu tugas yang Tuhan da kase pa ngana. Soalnya Tuhan Allah nyanda kase roh panako pa torang, mar Dia kase roh yang beking torang pe hati jadi kuat, torang bole basayang pa orang laeng deng lei beking torang bole kuasai tong pe diri. Jadi ngana jang malo basaksi tentang torang pe Tuhan. Ngana lei jang malo lantaran kita tu ngana pe tamang ada di bui, soalnya kita ada di bui lantaran ja layani pa Tuhan. Ngana lei musti siap-siap dapa siksa sama deng kita lantaran torang ja kase tau tu Kabar Bae tentang Dia, kong Tuhan Allah mo kase kuat pa ngana for beking itu. Tuhan Allah yang so se slamat pa torang deng pangge pa torang supaya hidop deng hati yang bersi. Dia beking itu samua bukang lantaran torang ja beking tu bae, mar lantaran Dia pe rencana dari dulu deng Dia se tunjung tu Dia pe sayang pa manusia. Memang dari dulu waktu Tuhan Allah blum beking ni dunia, Dia so rencana kase tunjung tu De pe sayang pa manusia lewat Kristus Yesus. Kong skarang, Tuhan Allah so se tunjung Dia pe sayang pa torang deng cara Dia kase pa torang Kristus Yesus, tu torang pe Juruslamat. Kong lewat tu Kabar Bae tentang Yesus, torang bole tau kalu Dia so se kala tu maut sampe tu maut nyanda ada kuasa pa torang, deng lei kase hidop kekal pa torang. Tuhan Allah da pili pa kita for se tau tu Kabar Bae tentang Yesus pa orang-orang. Dia pili pa kita jadi rasul deng jadi guru. Kita da beking kita pe tugas itu, so itu kita dapa siksa rupa ini. Mar biar lei bagitu, kita nyanda malo. Soalnya kita kanal Tuhan yang kita percaya, deng kita yakin kalu Dia ada kuasa for jaga tu tugas yang Dia so kase percaya pa kita sampe nanti hari kiamat, tu hari Tuhan mo adili pa samua orang. Jadi iko jo tu ajaran yang ngana da dengar dari pa kita. Tu ajaran itu butul deng bole jadi conto for ngana se ajar pa orang laeng. Ngana percaya jo trus pa Kristus Yesus deng sayang pa samua orang lantaran ngana so hidop satu deng Kristus Yesus. Jaga jo tu harta yang berharga yang Tuhan so se percaya pa torang. Roh Kudus yang ada pa torang pe hati mo bantu jaga tu harta itu. Timotius, tantu ngana so tau kalu tu Figelus deng Hermogenes, deng lei tu samua orang yang ada di daera Asia da bale blakang akang pa kita. Mar cuma Onesiforus yang nyanda bagitu. Kita minta supaya Tuhan se tunjung De pe rasa kasiang pa Onesiforus deng de pe kluarga. Soalnya dia banya kali hibur pa kita, dia lei nyanda malo ja datang pa kita biar lei kita ada di bui. Waktu Onesiforus datang ka Roma, dia da brusaha cari pa kita sampe dia baku dapa deng kita. Ngana lei tau butul kalu tempo hari dia so banya kali da bantu pa kita di Efesus itu. Kita minta pa Tuhan supaya nanti di hari kiamat, tu hari Tuhan mo adili pa orang-orang, Tuhan se tunjung De pe rasa kasiang pa Onesiforus. Timotius, kita pe anak. Kristus Yesus so se tunjung Dia pe bae pa ngana lantaran ngana so percaya, so itu pake jo itu for se kuat ngana pe hati. Ngana so dengar tu ajaran yang kita da se ajar di muka banya orang. Ngana musti kase ajar tu ajaran itu pa orang laeng yang ngana bole mo se percaya akang itu deng yang pande mangajar. Deng bagitu dorang bole kase ajar pa orang laeng. Kalu ngana beking tu ngana pe tugas kong mendrita, ngana lei musti batahang. Ngana musti batahang sama deng Kristus Yesus pe tentara yang setia. De pe conto bagini: kalu tentara samantara beking de pe tugas, dia nyanda pusing deng urusan-urusan laeng. Dia cuma mangada trus tu de pe tugas supaya de pe kapala perwira Romawi snang pa dia. Kalu orang iko lomba, dia musti iko tu atoran-atoran lomba supaya bole mo dapa juara. Kong kalu petani karja kras pa de pe kobong, dia yang musti pertama dapa tu kobong pe hasil. Tarukira jo bae-bae apa yang kita da bilang tentang tu conto-conto tadi! Soalnya kalu ngana tarukira bae-bae, Tuhan pasti mo kase mampu pa ngana for mangarti samua itu. Kong inga bae-bae tu hal ini: Yesus Kristus, Dia itu raja Daud pe keturunan. Dia mati mar Tuhan Allah se hidop ulang. So ini no tu Kabar Bae tentang Yesus yang kita ja kase tau. Waktu kita da kase tau tu Kabar Bae itu, orang-orang siksa pa kita. Dorang ika pa kita pake rante, dorang tahang pa kita di bui rupa deng kita ini orang jaha. Mar biar lei bagitu, dorang nyanda dapa tahang tu Tuhan Allah pe firman mo tasiar. So itu no kita sabar ja tanggong samua tu siksa, supaya orang yang Tuhan Allah so pili bole mo dengar tu Kabar Bae tentang Yesus. Deng bagitu dorang bole percaya pa Kristus Yesus kong dapa slamat yang beking dorang dapa puji deng hormat sama-sama deng Tuhan sampe slama-lamanya. Memang butul tu kata-kata ini, “Kalu torang se tinggal tu torang pe cara hidop dulu yang malawang pa Tuhan, itu sama deng torang da mati sama-sama deng Dia. Deng bagitu, torang lei nanti mo hidop sama-sama deng Dia. Kalu torang mendrita kong batahang percaya, torang lei mo berkuasa sama-sama deng Dia. Kalu torang manyangkal kanal pa Dia, Dia lei mo manyangkal kalu Dia kanal pa torang. Biar torang nyanda setia, Dia tetap setia, lantaran apa yang Dia so bilang pasti Dia mo beking.” Kase inga pa orang-orang percaya tentang samua tu kita da bilang pa ngana ini. Bilang pa dorang deng sunggu-sunggu di muka pa Tuhan Allah kalu dorang jang baku ambe tentang arti dari kata-kata. Soalnya itu nyanda ada de pe guna, kong cuma mo beking kacau pa orang-orang yang da dengar itu. Beking jo tu ngana pe tugas deng bae-bae supaya Tuhan Allah snang pa ngana. Deng beking bagitu, ngana beking ngana pe tugas kong nyanda usa malo di muka pa Tuhan, ngana bole kase tau pa orang deng bae-bae tu ajaran yang butul itu. Ngana lei jang badekat pa tu orang-orang yang da bacirita tu cirita yang nyanda ada de pe guna deng yang nyanda hormat pa Tuhan. Soalnya orang-orang yang ja bacirita bagitu beking dorang pe kalakuan jadi sama deng orang yang nyanda percaya pa Tuhan. Dorang pe cirita yang nyanda butul itu menjalar deng bahaya sama deng tu panyaki kanker. Kong dari antara tu orang-orang yang ja bacirita itu, ada Himeneus deng Filetus. Dorang dua itu so nyanda iko tu ajaran yang butul. Dorang ja se ajar kalu Tuhan Allah so se hidop ulang tu orang-orang yang so mati, jadi kata nanti so nyanda ada lei orang yang mo hidop ulang. Deng dorang se ajar bagitu, ada bebrapa orang yang so nyanda percaya lei pa Yesus. Mar biar lei bagitu, Tuhan Allah pe ajaran tetap ada pa tu orang-orang percaya pe hati sampe dorang pe percaya nyanda mo tagoyang, itu sama deng satu fondasi yang Tuhan Allah da beking tetap kuat. Di fondasi itu ada tulis bagini, “Tuhan kanal tu De pe orang-orang” deng “Sapa jo yang semba pa Tuhan, dia musti brenti beking tu jaha.” Di ruma basar, ada barang-barang yang da beking dari macam-macam bahan. Ada yang da beking dari mas, perak, kayu deng ada lei yang dari tana liat. Tu barang yang da beking dari mas deng perak, tu barang-barang itu ja pake waktu acara kusus. Kong tu barang yang da beking dari kayu deng tana liat, ja pake for acara yang biasa-biasa. Bagitu lei deng tu orang percaya. Kalu ada yang brenti beking tu jaha, dia sama deng tu barang yang ja pake di acara kusus. Tuhan mo pake tu orang itu for hal-hal yang kusus. Tuhan beking tu orang jadi kudus. Tuhan snang pake pa dia lantaran dia lei siap mo beking samua karja yang bae. So itu ngana bajao jo dari tu nafsu yang besae tu biasa anak muda ja beking. Ngana musti bagini: beking tu butul di muka pa Tuhan, percaya pa Yesus, sayang pa orang laeng, kong deng hati yang bersi hidop tenang deng samua orang yang percaya pa Tuhan. Ngana lei jang taiko-iko baku ambe tentang tu hal-hal yang nyanda butul deng nyanda ada guna. Ngana tau kalu tu baku ambe bagitu cuma mo beking orang bakalae. Mar tu Tuhan pe orang karja rupa ngana ini nimbole baku ambe bagitu. Malatare tu orang itu musti bae-bae pa samua orang, pande mangajar deng lei sabar pa orang-orang. Tu orang itu musti mangajar deng cara yang nyanda sombong pa orang-orang yang ja malawang tu ajaran yang butul. Dia beking bagitu lantaran sapa tau Tuhan Allah kase kesempatan pa dorang for bertobat sampe dorang bole tau tu ajaran yang butul. Deng bagitu, dorang jadi sadar ulang kong talapas dari setang pe bos pe kuasa, sama deng da talapas dari prangkap. Soalnya dulu setang pe bos da kuasai pa dorang sampe dorang iko-iko dia pe mau. Timotius, ngana musti tau, kalu nanti waktu so mo kiamat, mo ada tu hari-hari yang pe siksa skali. Kong di hari-hari itu, orang-orang cuma mo sayang dorang pe diri sandiri deng gila doi. Dorang suka bicara tinggi deng sombong. Dorang suka bicara jaha tentang orang laeng, malawang pa dong pe orang tua, nimau bilang makase kong nyanda farduli tentang Tuhan. Dorang nintau basayang pa orang laeng, nimau baku-baku bae deng orang, suka se besae orang pe nama, nyanda mampu tahang diri, jaha skali, nimau tu bae, suka bahianat, nyanda ja pikir panjang, stel tau deng lebe suka iko dong pe nafsu yang besae daripada iko Tuhan Allah pe mau. Kalu cuma mo lia, dorang itu ja beking Tuhan Allah pe mau, mar sebenarnya dorang tolak tu Tuhan pe kuasa, jadi nyanda butul dorang da iko pa Tuhan. Bajao jo dari pa dorang itu! Soalnya bebrapa orang dari pa dorang maso pa orang pe ruma kong ja tipu tu parampuang-parampuang yang gampang tagoda. Tu parampuang-parampuang itu gampang tagoda lantaran dorang rasa bersala skali deng tu dosa yang dorang ja beking deng lei macam-macam nafsu da kuasai pa dorang. Tu parampuang-parampuang itu slalu suka dapa tu ajaran dari orang laeng, mar dorang nyanda perna tau mana tu ajaran yang butul. Ngana to masi inga tu cirita Yanes deng Yambres? Dulu dorang dua da malawang pa Musa, itu sama deng skarang tu orang-orang yang ja tipu pa tu parampuang-parampuang, dorang itu lei da malawang tu ajaran yang butul tentang Yesus. Tu orang-orang itu pe pikiran so rusak, dorang pe percaya nyanda butul pa Tuhan. Mar dorang tu ja batipu itu nyanda mo trus-trus berhasil. Lama-lama orang mo lia deng jelas kalu dorang itu nintau apa-apa, sama deng dulu orang lia kalu tu Yanes deng Yambres lei nintau apa-apa. Mar ngana Timotius, ngana so iko samua tu kita pe ajaran, kita pe cara hidop, kita pe tujuan hidop, kita pe percaya pa Yesus, kita pe sabar, kita pe sayang pa orang, deng biar kita dapa siksa kita tetap beking tu kita pe tugas. Ngana lei tau bagimana orang-orang da siksa deng beking susa pa kita di Antiokhia, Ikonium, deng Listra. Biar kita dapa siksa dari orang-orang di situ, mar Tuhan so se lapas pa kita dari samua itu. Memang samua orang yang percaya pa Kristus Yesus deng hidop iko Dia pe mau mo dapa siksa. Mar tu orang jaha deng tu ja batipu orang, dorang itu lebe hari lebe tamba jaha. Dorang mo tipu pa orang-orang kong orang laeng mo bale tipu pa dorang. Mar ngana komang Timotius, ngana musti pegang trus tu ajaran yang butul yang ngana so trima, deng yang ngana so butul-butul percaya. Soalnya ngana tau kalu tu orang-orang yang dulu da se ajar pa ngana, ngana bole percaya. Ngana lei musti inga kalu dari kacili, ngana so tau tu Kitab Suci. Tu Kitab Suci beking ngana jadi bijaksana kong ngana bole slamat lantaran percaya pa Kristus Yesus. Samua tu tulisan yang ada di Kitab Suci dari Tuhan Allah. Kong tu tulisan itu de pe guna for: se ajar pa orang, se tunjung tu sala, se roba tu cara hidop deng latih for beking tu butul di muka pa Tuhan. Deng bagitu, tu Kitab Suci beking tu Tuhan Allah pe orang mampu beking samua tu bae. Kristus Yesus nanti mo datang ulang kong Dia mo Berkuasa sbagai Raja. So Dia yang mo adili tu orang-orang yang masi hidop deng yang so mati. So itu skarang di muka pa Tuhan Allah deng Kristus Yesus, kita bilang pa ngana deng sunggu-sunggu supaya ngana kase tau tu Tuhan Allah pe firman pa orang-orang. Biar bagimana tu keadaan ngana musti slalu siap ja kase tau trus tu firman pa dorang. Ngana musti kase tau pa dorang kalu beking sala, ngana togor pa dorang supaya brenti beking tu sala, deng lei ngana kase nasehat pa dorang. Kong deng sabar ngana mangajar pa dorang. Ngana beking samua itu lantaran nanti ada de pe waktu, orang-orang nimau mo dengar tu ajaran yang butul, malatare dorang mo pangge guru-guru yang dorang suka. Tu guru-guru itu cuma mo bilang pa dorang tu hal-hal yang dorang suka mo dengar. Dorang nimau mo dengar tu ajaran yang butul, dorang lebe suka mo dengar dongeng-dongeng. Mar ngana komang Timotius, ngana musti tetap kuasai tu ngana pe diri di samua keadaan. Kalu ngana beking tu ngana pe tugas kong dapa siksa, ngana musti tetap batahang. Ngana ini penginjil tu orang yang ja kase tau tu Kabar Bae pa orang yang blum dengar itu, kong ngana musti beking bae-bae sampe klar tu ngana pe tugas yang Tuhan da kase pa ngana itu. Tentang kita ini, skarang so mo de pe waktu for kita mo mati. Kita pe hidop skarang sama deng minuman anggor tu da se cura for persembahan pa Tuhan yang so mo abis. Kita so beking tu kita pe tugas yang bae ini, itu sama deng kita da iko pertandingan deng bae. Kita beking ni tugas deng karja kras sampe klar, sama deng atlit yang da iko lomba lari sampe di finis. Kita beking samua itu deng kita tetap percaya pa Tuhan. Kalu orang iko lomba kong juara, dia dapa piala. Bagitu lei deng kita, Tuhan so kase sadia piala for kita lantaran kita da beking tu butul di muka pa Dia. Tu piala itu Dia da simpang kong nanti Dia mo kase pa kita di hari Dia mo adili samua orang. Tu piala itu bukang cuma kita yang mo dapa mar samua orang percaya yang da tunggu-tunggu Dia datang ulang ka dunia ini lei. Torang pe Tuhan ini memang Hakim yang adil. Timotius! Ngana brusaha jo for capat-capat datang pa kita. Soalnya Kreskes so pigi ka Galatia deng Titus so pigi ka Dalmatia. Demas so se tinggal pa kita lantaran dia lebe suka tu hal-hal di dunia ini, so itu dia so brangkat ka Tesalonika. Kong cuma Lukas tu da tinggal sama-sama deng kita di sini. Ngana pi ambe jo pa Markus kong ngana bawa jo dia kamari. Soalnya Markus bole bantu pa kita for beking tu kita pe tugas di sini. Kita so suru pa Tikhikus pigi ka Efesus. Kalu ngana datang kamari, ngana bawa akang tu kita pe juba yang kita da se tinggal pa Karpus pe ruma di Troas. Bawa akang lei tu kita pe kitab-kitab, lebe kusus tu kitab yang da beking dari kuli binatang. Aleksander tu orang yang ja beking barang dari tembaga, dia so banya beking tu hal jaha pa kita. Nanti Tuhan mo hukum pa dia iko tu dia da beking. Dia malawang skali tu ajaran yang torang da se ajar. So itu ngana lei musti hati-hati pa dia. Waktu pertama kali kita babela diri di pengadilan, nyanda ada orang yang sama-sama deng kita di situ, samua orang se tinggal pa kita. Cuma kita minta pa Tuhan supaya Dia nyanda hukum pa dorang. Mar biar dorang se tinggal pa kita, Tuhan tetap da sama-sama deng kita. Dia se kuat pa kita supaya kita bole se tau samua tu Kabar Bae tentang Yesus pa samua orang yang bukang Yahudi. Deng bagitu Tuhan se slamat pa kita dari bahaya kematian, sama deng kita da talapas dari mulu singa. Tuhan lei mo se lapas pa kita dari samua orang pe rencana jaha yang mo beking kita cilaka. Dia mo bawa pa kita ka sorga, tu tampa Dia Berkuasa sbagai Raja. Mari jo puji deng hormat pa Dia for slama-lamanya! Amin. Timotius, nanti bilang akang kita pe salam for Priska, Akwila deng for Onesiforus pe kluarga. Erastus masi da tinggal di Korintus, kong tu Trofimus terpaksa kita se tinggal di Miletus lantaran dia da saki. Kong ngana brusaha jo for datang kamari seblum oras dingin. Ebulus da titip salam for ngana, sama-sama deng Pudes, Linus, Klaudia deng lei banya sudara yang percaya da titip salam for ngana. Kita minta supaya Tuhan sama-sama deng ngana deng se tunjung Dia pe bae pa ngoni samua. Ni surat dari kita, Paulus. Kita ini ja beking tu Tuhan Allah da suru pa kita, deng kita ini Kristus Yesus pe rasul tu Dia pe utusan. Kita da dapa suru for kase ajar tu orang-orang yang Tuhan Allah so pili supaya dorang pe iman tatamba kuat, deng supaya dorang bole tau tu ajaran yang butul tu bole mo se tunjung pa dorang for hidop iko Tuhan pe mau. Kita se ajar bagitu pa tu orang percaya, supaya dorang bole baharap deng yakin mo dapa tu hidop kekal. Tuhan Allah so bajanji lebe dulu seblum Dia beking ni dunia kalu Dia mo kase tu hidop kekal. Dia pe janji itu pasti mo jadi lantaran Dia nyanda perna badusta. Kong pas de pe waktu yang Tuhan Allah so tentukan, Dia kase tunjung pa torang tu jalang for dapa hidop kekal. Dia se percaya pa kita for kase tau tu Kabar Bae itu, kong kita kase tau iko tu Tuhan Allah pe prenta, Tuhan Allah tu torang pe Juruslamat. Titus, torang dua sama-sama percaya pa Kristus Yesus, ngana kita so anggap kita pe anak sandiri. Kita minta supaya Allah Bapa deng Kristus Yesus tu torang pe Juruslamat slalu kase tunjung tu bae pa ngana deng lei slalu beking ngana bole hidop deng hati tenang. Tempo hari, kita da se tinggal pa ngana di pulau Kreta supaya ngana bole ator bebrapa hal yang masi perlu mo ator di jemaat. Ngana lei mo lantik pemimpin-pemimpin jemaat di tiap kota di pulau itu sama deng tu kita so bilang pa ngana. Tu orang yang mo jadi pemimpin, dia itu musti bagini: dia itu orang yang hidop lurus deng cuma ada satu bini. Trus de pe anak-anak lei percaya pa Tuhan, deng bagitu orang nyanda mo bilang kalu tu de pe anak-anak itu begal ato pangmalawang. Tu pemimpin jemaat ja ator tu Tuhan Allah pe jemaat, so itu dia musti orang yang nyanda beking sala sampe nyanda ada yang mo se sala pa dia. Dia nyanda sombong, nyanda pangmara, nyanda pangmabo, nyanda ja beking kekrasan deng nyanda gila doi. Mar dia itu musti orang yang suka trima orang laeng pa de pe ruma, suka tu bae, bijaksana, adil, hidop bersi di muka pa Tuhan deng mampu tahang diri. Dia itu lei musti orang yang iko butul-butul tu ajaran yang butul, tu ajaran yang so se ajar pa dia. Deng bagitu, dia mampu kase smangat pa orang pake tu ajaran yang butul itu, deng lei dia mampu se tre tu pikiran dari orang-orang yang malawang tu ajaran itu. Soalnya so banya orang yang ja malawang tu ajaran yang butul. Dorang beking sesat pa orang-orang pake cirita yang nyanda ada de pe guna. Di antara pa dorang itu, ada tu orang Yahudi tu so percaya pa Yesus, yang kase ajar kalu samua orang musti dapa sunat baru butul-butul iko pa Yesus. Ngana musti suru badiam tu orang-orang bagitu, supaya dorang nyanda lei se ajar tu nyanda-nyanda. Soalnya dorang so beking kacau banya kluarga deng dong pe ajaran itu, tu ajaran yang cuma mo tipu orang supaya dorang bole dapa doi. Di antara tu orang-orang Kreta, ada tu dorang pe nabi yang perna da babilang bagini, “Memang orang-orang Kreta pangbadusta, sama deng binatang buas, rakus deng pangmalas.” Tu nabi da bilang itu memang butul. So itu ngana musti togor deng tegas pa dorang supaya dorang percaya tu ajaran yang butul. Ngana larang pa dorang badengar tu orang Yahudi pe dongeng-dongeng deng nyanda mo iko tu atoran-atoran dari orang-orang yang nyanda trima tu ajaran yang butul. Orang-orang yang dong pe hati bersi di muka pa Tuhan, dorang bole beking samua. Mar for orang-orang yang dong pe hati kotor di muka pa Tuhan kong nyanda percaya pa Tuhan, samua yang dong beking itu najis lantaran dorang itu pe hati deng pikiran so kotor. Dorang bilang kalu dorang kanal pa Tuhan Allah, mar kalu mo lia tu dorang pe cara hidop, dorang sama deng tu orang yang nyanda kanal pa Tuhan Allah. Orang-orang rupa dorang ini tu paling jaha, nimau beking tu Tuhan Allah da prenta deng nyanda mampu beking tu bae. Mar Titus, ngana se ajar jo pa orang-orang iko tu ajaran yang butul. Ngana bilang pa laki-laki yang so tua supaya dorang mampu tahang diri, dong pe kalakuan musti kalakuan yang cocok for orang yang ja iko pa Tuhan, bijaksana, tetap percaya pa Tuhan, sayang pa orang laeng deng tetap batahang percaya pa Tuhan biar lei dapa siksa. Bagitu lei deng tu parampuang-parampuang yang so tua, ngana bilang pa dorang supaya dorang pe cara hidop iko Tuhan pe mau. Dorang nimbole se besae orang laeng pe nama deng nyanda tagantong deng minuman kras. Dorang musti se ajar yang bae pa orang-orang. Deng bagitu dorang bole se ajar pa tu parampuang-parampuang yang masi muda supaya sayang pa dong pe laki deng dong pe anak-anak. Dorang lei se ajar tu parampuang-parampuang muda itu supaya hidop bijaksana, hidop deng hati yang bersi di muka pa Tuhan, rajin ja ator tu dong pe ruma tangga, pangbae deng dengar-dengaran pa dong pe laki. Deng dorang beking bagitu, orang nyanda ada alasan for mo hina tu Tuhan Allah pe firman. Bagitu lei deng tu laki-laki yang masi muda, se nasehat akang pa dorang supaya dorang tahang diri di samua hal. Kong ngana Titus, ngana musti ja beking tu butul supaya ngana bole jadi conto for dorang. Ngana musti jujur deng mangajar deng sunggu-sunggu. Waktu mangajar, ngana musti bijaksana pili tu kata-kata yang tepat supaya orang nyanda mo kritik pa ngana. Deng bagitu tu orang-orang yang ja malawang tu ajaran yang butul mo jadi malo sandiri, lantaran dorang nyanda mo dapa tu hal-hal yang besae tentang torang for dorang mo cirita akang. Ngana lei musti se nasehat akang pa tu budak-budak supaya di samua hal dorang ja badengar pa dong pe tuang. Dorang musti beking snang tu dong pe tuang deng nimbole bamanyao pa dong pe tuang. Dorang lei nimbole baruci pa dorang pe tuang. Lebe bae dorang se tunjung pa dorang pe tuang kalu dorang pe hati itu butul-butul tulus deng setia pa dong pe tuang. Deng bagitu, dorang di samua hal beking orang laeng suka deng puji tu ajaran dari Tuhan Allah, tu torang pe Juruslamat. Torang samua musti ja beking tu bae lantaran Tuhan Allah so kase tunjung tu Dia pe sayang for se slamat pa samua orang. Kong Tuhan pe sayang itu beking torang jadi sadar for se tinggal tu cara hidop dulu yang nyanda iko Tuhan pe mau deng lei yang ja iko tu keinginan duniawi. Tuhan pe sayang itu lei beking torang mampu tahang diri, adil deng lei ja iko Dia pe mau di dunia skarang ini. Samantara torang beking samua itu, torang batunggu kong baharap deng yakin tu hari waktu Tuhan mo datang ulang. Dia itu torang pe Tuhan Allah yang Mahabesar, so Dia itu Yesus Kristus tu torang pe Juruslamat. Dia mo datang deng cara yang hebat deng luar biasa, kong waktu itu Dia bawa berkat for torang samua. Dia yang so srahkan De pe diri for se bebas pa torang dari samua torang pe dosa. Dia lei beking torang jadi bersi deng jadi Dia punya yang suka ja beking tu bae. Titus, ngana musti kase ajar samua itu pa orang-orang. Ngana kase nasehat pa dorang, deng togor tu orang-orang yang ja beking tu sala. Waktu ngana beking itu, ngana pake tu kuasa dari Tuhan supaya ngana ada wibawa, kong jang ada orang yang pandang enteng pa ngana. Titus, ngana musti kase inga akang pa orang-orang percaya supaya dorang ja badengar deng iko akang tu atoran dari pemerenta deng orang-orang yang pegang kuasa. Dorang musti slalu siap beking tu hal-hal yang bae. Dorang lei nimbole se besae orang laeng pe nama deng nimbole baku ambe. Malatare dorang musti bae-bae pa samua orang deng nyanda sombong. Dulu waktu torang blum percaya, torang nyanda mangarti apa-apa. Waktu itu torang nyanda ja iko Tuhan Allah pe mau, torang tapengaru beking tu hal-hal yang jaha, torang jadi budak dari nafsu deng keinginan yang cuma for se snang diri sandiri. Torang hidop bamangiri pa orang laeng, torang jaha pa orang deng torang lei ja baku binci. Mar biar lei bagitu, Tuhan Allah tu torang pe Juruslamat, Dia so se tunjung Dia pe bae deng Dia pe sayang pa samua orang. Tuhan se slamat pa torang bukang lantaran torang da beking tu butul di muka pa Dia, mar lantaran Dia se tunjung tu Dia pe rasa kasiang pa torang. Dia beking bersi pa torang dari tong pe dosa-dosa, Dia pake tu Roh Kudus for beking torang pe hidop jadi baru, sama deng torang da lahir ulang. Tuhan so kase talebe-lebe Dia pe Roh pa torang lewat Yesus Kristus tu torang pe Juruslamat. Dia se tunjung Dia pe sayang pa torang supaya torang bole jadi butul di muka pa Dia, kong deng bagitu torang ada hak for mo trima tu hidop kekal sama deng apa yang torang da harap deng yakin mo dapa. Samua tu kita da bilang ini butul, kong bagus deng ada de pe guna for samua orang. Kita suka ngana bilang tu ajaran itu deng tegas pa samua orang yang percaya pa Tuhan Allah, supaya dorang brusaha butul-butul beking tu hal-hal yang bae. Ngana jang iko baku ambe pendapat tentang hal-hal yang nyanda ada de pe guna deng tentang daftar keturunan dari ngoni pe nene moyang. Ngana lei nimbole baku ambe pendapat kong bakalae tentang tu atoran-atoran di kitab Taurat. Soalnya samua itu percuma deng nyanda ada de pe guna. Kalu ada orang yang beking orang-orang di jemaat jadi tapisa-pisa, ngana musti kase pringatan pa dia. Kalu ngana so kase pringatan pa dia sampe dua kali kong dia nyanda badengar, ngana jang bergaul lei deng dia. Soalnya ngana tau kalu tu orang rupa itu pe pikiran memang so nyanda lei iko tu butul. Dia pe dosa sandiri se tunjung kalu dia sala kong dia pe dosa-dosa da hukum de pe diri sandiri. Titus, nanti kita mo suru pa Artemas ato Tikhikus pigi pa ngana. Kalu dia sampe, ngana brusaha jo iko datang pa kita di Nikopolis. Soalnya kita ambe keputusan for mo tinggal di situ slama oras dingin ini. Ngana lei brusaha jo tolong pa Zenas tu ahli hukum deng pa Apolos supaya dorang nyanda mo kekurangan apa-apa pa dorang pe perjalanan. Kong torang pe orang-orang musti blajar ja beking tu bae supaya bole mo bantu orang laeng dapa tu keperluan hari-hari, deng bagitu dorang pe hidop mo ada de pe guna. Titus, samua orang yang da sama-sama deng kita di sini da kirim salam pa ngana. Kong tolong bilang akang kita pe salam for torang pe tamang-tamang yang sayang pa torang, tu sama-sama percaya pa Yesus. Kita minta Tuhan se tunjung Dia pe bae pa ngoni samua. Ni surat dari kita, Paulus. Kita da dapa tahang di bui lantaran da kase tau tentang Kristus Yesus pa orang-orang. Surat ini lei dari Timotius, tu torang pe sudara yang percaya. Surat ini for bapak Filemon, tu torang pe tamang karja yang torang dua sayang. Ni surat lei for Apfia, tu torang pe sudara parampuang yang percaya deng lei for Arkhipus tu torang pe tamang yang sama-sama da berjuang for se tau tentang Yesus pa orang-orang, deng lei ni surat for tu jemaat yang biasa ja bakumpul for baibada pa bapak pe ruma. Kita minta pa Tuhan Allah tu torang pe Bapa deng lei pa Tuhan Yesus Kristus supaya kase tunjung tu bae pa ngoni deng lei beking tu ngoni pe hidop jadi tenang. Waktu kita basombayang, kita slalu inga pa bapak kong kita bilang makase pa Tuhan Allah yang kita semba. Soalnya kita so dengar kalu bapak butul-butul percaya pa Tuhan Yesus deng bapak lei sayang pa samua tu Tuhan pe orang-orang. Kita basombayang supaya ngoni yang so percaya bole mo ada hubungan dekat, kong torang samua pe hubungan itu bole jadi kuat sampe torang samua bole lebe mangarti samua hal yang bae tu Tuhan so kase pa torang lantaran torang ja iko pa Kristus. Bapak Filemon, bapak itu kita pe sudara yang percaya, bapak pe sayang for Tuhan pe orang-orang itu bagus skali, bapak so beking dorang pe hati jadi kuat. Tu bapak da beking itu beking kita jadi snang deng kita pe hati lei jadi kuat. Bapak Filemon, Kristus da kase kuasa pa kita, so itu kita bole mo suru pa bapak for beking apa tu bapak musti beking, mar kita lei tau kalu bapak sayang pa Tuhan pe orang-orang, so itu kita lebe suka for bamohon pa bapak daripada mo basuru pa bapak. Kita ini Paulus, kita so tua, kong kita lei da dapa se maso di bui lantaran kita ja se tau tentang Kristus Yesus pa orang-orang. Kita bamohon pa bapak tentang Onesimus, tu bapak pe budak. Waktu samantara di bui, kita da se tau tentang Yesus pa dia kong dia jadi percaya pa Yesus. So itu no kita so anggap dia itu sama deng kita pe anak sandiri, kong kita jadi sama deng dia pe papa. Dulu tu bapak pe budak Onesimus itu da lari dari pa bapak, waktu itu dia so nyanda ada guna for bapak. Mar skarang dia so ada guna skali, bukang cuma for bapak mar for kita lei. Kita sayang skali pa dia, mar biar lei bagitu, kita suru pa dia supaya babale pa bapak. Sebenarnya kalu mo iko kita pe mau, kita suka mo tahang pa Onesimus samantara kita ada di bui, supaya dia bole ganti pa bapak for bantu pa kita di sini. Kita ada di bui lantaran kita ja se tau tu Kabar Bae tentang Kristus Yesus pa orang-orang. Mar kalu bapak nyanda stuju, kita nyanda mo suru dia tinggal for bantu pa kita di sini, so itu kita lebe suka kalu bapak sandiri yang suru pa dia, bukang lantaran kita da paksa pa bapak for suru pa dia bagitu. Kita pikir mungkin tu alasan sampe bapak deng dia da se baku pisa for samantara waktu, itu supaya dia bole jadi percaya pa Tuhan Yesus, kong bapak bole trima ulang pa dia for sama-sama kong deng bapak. Jadi bapak mo trima pa dia skarang ini bukang cuma sbagai bapak pe budak, mar lebe dari itu, bapak trima pa dia sbagai bapak pe sudara yang sama-sama percaya pa Tuhan Yesus. Kita ini so sayang pa dia, pasti lei bapak mo sayang pa dia lebe dari tu kita pe sayang pa dia. Bapak pasti mo sayang pa dia lantaran dia itu bapak pe budak, deng dia itu lei bapak pe sudara yang sama-sama percaya pa Tuhan Yesus. Jadi kalu bapak anggap kita ini bapak pe tamang yang sama-sama ja beking tu karja yang Yesus da suru, kita minta pa bapak supaya kalu Onesimus pulang pa bapak, bapak trima jo ulang pa dia sama deng bapak da trima pa kita. Kalu misalnya dia so beking sala apa-apa pa bapak ato da bautang pa bapak, biar jo itu samua nanti kita yang tanggong. Kita ini Paulus, kong skarang kita tulis ini deng kita pe tangan sandiri bagini, “Kita mo bayar tu Onesimus pe utang pa bapak,” itu jadi jaminan for bapak. Kita stou nyanda perlu mo se inga pa bapak kalu kita yang da bantu pa bapak jadi percaya pa Tuhan Yesus, itu sama deng bapak itu ada utang pa kita. So itu kita minta pa bapak tu kita pe sudara yang percaya pa Tuhan supaya bapak bole trima akang jo pa Onesimus. Kita deng bapak sama-sama percaya pa Kristus, kong kalu bapak trima pa dia, itu mo beking kita pe hati jadi snang. Kita tulis ni surat pa bapak kong kita memang yakin kalu bapak mo beking tu kita da minta, malatare kita tau kalu bapak mo beking itu lebe dari yang kita da minta. Kong kita minta tolong lei supaya sadia akang kamar for kita pa bapak pe ruma. Soalnya kita baharap deng yakin kalu Tuhan Allah mo jawab tu ngoni pe sombayang supaya kita bole mo kaluar dari bui kong mo pigi ulang pa ngoni. Epafras da kirim salam for bapak. Dia itu kita pe tamang yang sama-sama da dapa tahang di bui lantaran dia ja beking tu Kristus Yesus da suru. Trus ada lei tu kita pe tamang-tamang laeng yang nyanda da sama-sama deng kita di bui, dorang da kirim salam for ngoni. Dorang itu Markus, Aristarkhus, Demas deng Lukas. Dorang itu kita pe tamang yang sama-sama ja beking tu karja yang Yesus Kristus da suru. Kita minta supaya Tuhan Yesus Kristus kase tunjung Dia pe bae pa ngoni. Dulu, Tuhan Allah ulang-ulang kali babicara pa torang tu orang Israel pe nene moyang pake macam-macam cara rupa ini: Dia da babicara se tau tu Dia pe pesan pa dorang lewat tu nabi-nabi trus tu nabi-nabi itu kase tau tu pesan itu pa orang-orang, mar skarang di hari-hari yang so dekat deng hari kiamat, Dia babicara pa torang lewat tu Dia pe Anak. Tu Dia pe anak itu Dia so tetapkan mo jadi ahli waris for samua yang ada, kong lewat tu Dia pe anak Dia beking tu bumi deng samua tu bumi pe isi. Kong dari Anak Allah itu, torang bole dapa lia tu kuasa dari Tuhan Allah yang luar biasa. Dia itu pe sifat sama persis deng Tuhan Allah pe sifat. Dia tu da jaga samua yang ada lewat Dia pe kata-kata yang punung deng kuasa. Waktu so se bersi manusia dari dosa-dosa, Dia nae ka sorga, trus Dia dudu di tampa terhormat di sabla kanan dari pa Tuhan Allah Yang Mahabasar. Jadi Tuhan Allah pe Anak itu jao lebe penting dari samua tu malaekat, bagitu lei deng Dia pe Nama yang Tuhan Allah da kase pa Dia, itu so jao lebe istimewa dari tu dorang pe nama. Soalnya nyanda perna Tuhan Allah babilang pa malaekat-malaekat rupa ini, “Ngana itu Kita pe Anak. Ni hari, Kita se tunjung kalu Kita ini Ngana pe Papa.” Kong Dia lei nyanda perna babilang pa dorang, “Kita ini mo jadi Dia pe Papa, kong Dia itu mo jadi Kita pe Anak.” Deng lei, waktu Tuhan Allah utus pa Dia pe Anak yang sulung ka dunia, Dia bilang bagini, “Samua tu Kita pe malaekat-malaekat musti semba pa Dia.” Kong waktu Tuhan Allah bicara tentang tu Dia pe malaekat-malaekat, Dia bilang bagini, “Kita beking tu malaekat-malaekat sama deng angin kras, deng lei dorang itu Kita beking jadi Kita pe playan-playan yang sama deng api.” Mar tentang tu Anak Allah, Tuhan Allah da bilang bagini pa Dia, “Ngana itu Tuhan Allah yang baprenta sbagai Raja sampe slama-lamanya. Ngana baprenta deng adil pa Ngana pe krajaan. Ngana suka kalu orang ja beking tu butul, kong Ngana binci kalu orang ja beking tu jaha. So itu Kita tu Tuhan Allah, tu Ngana pe Tuhan Allah, Kita taru minya pa Ngana pe kapala for se hormat deng beking Ngana pe hati snang lebe dari tu Ngana pe tamang-tamang.” Tuhan Allah lei bilang bagini tentang tu Dia pe Anak, “Ngana itu Tuhan, kong waktu tu bumi ini blum ada, Ngana yang da beking tu dasar bumi, Ngana yang da beking tu langit deng Ngana pe tangan sandiri. Tu samua itu mo ancor, sama deng baju yang so rusak tu so nyanda lei mo pake, mar Ngana sandiri tetap mo ada trus sampe slama-lamanya. Samua itu Ngana mo se ancor, sama deng da gulung tu baju yang so nyanda mo pake lei, kong samua itu Ngana mo roba, sama deng tu baju yang so rusak tu mo ganti deng yang baru. Mar Ngana sandiri nyanda mo bruba, Ngana tetap mo ada trus sampe slama-lamanya.” Trus nyanda perna Tuhan Allah babicara pa malaekat sama deng Dia perna babicara pa Dia pe Anak rupa ini, “Dudu jo di tampa terhormat di sabla kanan pa Kita, sampe Ngana pe musu-musu Kita taru di bawa Ngana pe kaki.” Jadi tu malaekat-malaekat itu sebenarnya apa dang? Dorang itu sebenarnya tu roh-roh yang ja beking tu Tuhan da suru pa dorang. Tuhan da utus pa dorang for pi layani tu orang-orang yang nanti mo dapa slamat dari tu hukuman dosa. Jadi, torang musti lebe pegang kuat tu ajaran yang torang so dengar tentang Yesus, jang sampe torang taiko deng yang laeng kong so jadi nyanda percaya lei. Soalnya tu ajaran yang ada di kitab Taurat yang malaekat-malaekat da kase pa torang orang Israel pe nene moyang, itu samua butul. Trus tiap orang yang nyanda iko ato nyanda beking tu ajaran itu, tu orang itu mo dapa hukuman yang pantas iko apa tu dia da beking. Bagitu lei deng torang, torang mo dapa hukuman kalu torang nyanda farduli deng tu Kabar Bae yang penting skali itu, tu Kabar Bae yang bole se slamat pa manusia dari tu hukuman dosa. Tuhan Yesus yang pertama tu da kase tau tu ajaran yang bole se slamat pa manusia itu, trus tu orang-orang yang da dengar langsung tu ajaran itu dari pa Dia, dorang itu yang da se tau tu ajaran itu pa torang. Kong lei supaya orang bole yakin kalu tu ajaran yang dorang da se tau itu butul, Tuhan Allah kase kuasa supaya dorang bole beking tu tanda-tanda, hal-hal luar biasa, deng macam-macam mujisat, deng lei Dia kase tu karunia-karunia dari Roh Kudus iko tu Dia pe mau. Sudara-sudara, bukang tu malaekat-malaekat yang Tuhan Allah kase kuasa for mo baprenta di dunia yang nanti mo ada, tu dunia yang torang da bicara skarang ini. Mar di Kitab Suci ada satu orang yang bilang bagini, “Oh Tuhan Allah, apa so tu manusia sampe Tuhan inga pa dia? Apa so tu manusia sampe Tuhan tarukira akang pa dia? Tuhan beking manusia pe posisi lebe renda sadiki dari tu malaekat-malaekat, mar itu cuma nyanda lama, itu cuma waktu dia masi ada di dunia. Tuhan beking pa dia jadi luar biasa, deng dapa hormat sama deng raja. Tuhan se kala samua tu dia pe musu-musu, sama deng Tuhan taru samua tu dia pe musu-musu di bawa pa dia pe kaki.” Jadi dari situ jelas kalu Tuhan Allah kase pa manusia for berkuasa pa samua yang ada. Nyanda ada yang dia nyanda kuasai, samua dia kuasai. Cuma skarang ini, torang blum lia kalu dia so berkuasa pa samua yang ada. Mar yang torang so tau tentang Yesus, Tuhan Allah da beking Yesus pe posisi lebe renda sadiki dari tu malaekat-malaekat, mar itu cuma nyanda lama, itu cuma waktu Dia masi ada di dunia. Kong skarang ini, Tuhan Allah so beking Dia jadi luar biasa deng beking Dia dapa hormat sama deng Raja lantaran Dia so mendrita sampe mati. Dia da rasa samua itu lantaran Tuhan Allah da se tunjung tu Dia pe sayang pa torang samua deng cara Yesus rasa samua itu kong mati for se slamat pa torang samua. Tuhan Allah yang da beking samua, kong samua yang Dia da beking for Dia. Dia beking banya orang jadi iko pa Dia kong dorang mo dapa puji deng hormat sama-sama deng Dia. Kong memang butul Dia suka supaya Yesus jadi sempurna, kong for dapa itu Yesus musti mendrita deng dapa siksa dulu sampe mati. Yesus itu no tu da buka jalang for manusia yang percaya supaya bole mo dapa slamat. Yesus yang beking manusia jadi kudus. Dia deng torang manusia yang Dia da beking jadi kudus, Dia deng torang pe Bapa sama. So itu no Dia nyanda malo mo bilang kalu torang ini Dia pe sudara-sudara. Dia babilang pa Tuhan Allah, “Bapa, Kita mo kase tau tentang Bapa pa Kita pe sudara-sudara. Kita mo manyanyi puji pa Bapa waktu Kita bakumpul sama-sama deng jemaat.” Kong Yesus bilang lei, “Kita cuma taru Kita pe percaya pa Bapa.” Trus Dia bilang lei, “Bapa, tarukira jo, ini no Kita deng tu anak-anak yang Tuhan Allah da kase pa Kita.” Tu anak-anak yang Yesus da bilang itu, dorang itu manusia yang dari dara deng daging, so itu Yesus lei jadi manusia sama deng dorang. Deng Dia jadi manusia rupa itu, Dia lei mo mati sama deng manusia yang laeng. Kong deng Dia mati, Dia bole se kala pa setang pe bos yang ada kuasa deng tu hal-hal kematian. Waktu Yesus mati, Dia se bebas pa torang manusia dari tu torang pe rasa tako mati yang da kuasai pa torang. Soalnya slama manusia hidop, manusia tako mo mati, itu sama deng manusia jadi budak dari tu tong pe rasa tako itu. Soalnya pasti Dia datang for tolong tu Abraham pe keturunan, bukang for tolong tu malaekat-malaekat. Jadi so lantaran Dia mo tolong pa manusia, Dia lei musti jadi sama di samua hal rupa manusia tu ja bilang Dia pe sudara-sudara. Deng bagitu, Dia bole jadi Imam Basar tu prantara antara manusia deng Tuhan Allah, Dia jadi imam basar yang se tunjung Dia pe rasa kasiang pa manusia deng Dia itu setia ja beking tu Tuhan Allah da suru, kong lewat Dia, tu manusia pe dosa bole mo dapa ampung. Jadi so lantaran Dia sandiri so perna rasa tu siksa waktu da dapa goda, so itu Dia lei mampu mo tolong tu orang-orang yang da dapa goda supaya dorang nyanda tagoda beking dosa. Sudara-sudara tu Tuhan pe orang-orang, ngoni itu Tuhan da pangge for hidop deng Dia di sorga. Ngoni pikir jo bae-bae tentang Yesus, Dia itu Tuhan Allah pe Utusan deng Dia itu lei Imam Basar tu jadi prantara hubungan antara manusia deng Tuhan Allah yang torang so akui. Dia itu Tuhan Allah da pili, kong Dia setia pa Tuhan Allah. Dia pe setia itu sama deng Musa yang setia ja balayani pa Tuhan Allah pe ruma, tu Tuhan Allah pe ruma itu no tu Tuhan Allah pe orang-orang. Mar biar lei bagitu, Yesus itu pantas dapa puji deng hormat lebe basar dari Musa. Itu sama deng tu ahli bangunan yang beking ruma, dia itu mo dapa puji deng hormat lebe dari tu ruma yang dia da beking. Soalnya tiap ruma yang beking itu satu ahli bangunan, mar samua yang ada, yang beking itu Tuhan Allah. Musa itu memang setia pa Tuhan Allah pe ruma sbagai orang karja. Apa tu Musa da beking, itu jadi satu kesaksian tentang tu butul yang Tuhan Allah mo kase tau nanti. Mar Kristus itu setia sbagai Anak Allah yang ada tanggong jawab pa Tuhan Allah pe ruma, so itu Dia lebe dari Musa. Kong torang ini no tu Tuhan Allah pe ruma, itu lei kalu torang tetap pegang trus tu tong pe percaya pa Dia deng lei baharap deng yakin kalu torang mo dapa tu Tuhan Allah mo kase pa torang, tu torang bole mo babangga akang. Jadi dengar jo apa tu Roh Kudus da bilang, bagini tu Dia da bilang, “Ni hari, kalu ngoni dengar tu Tuhan Allah pe suara, ngoni jang se kras tu ngoni pe hati, sama rupa tu ngoni pe nene moyang dulu da beking, waktu dorang malawang pa Tuhan. Waktu itu dorang ada di padang gurun, dorang da coba-coba pa Tuhan deng cara malawang Tuhan pe prenta. Di padang gurun itu, ngoni pe nene moyang dulu da lia samua mujisat yang Kita da beking pa dorang slama ampa pulu taong, mar dorang da coba-coba pa Kita. So itu no kiapa sampe Kita mara pa dorang itu, kong Kita bilang, ‘Dorang itu nimau iko pa Kita, deng dorang nimau beking tu Kita da suru.’ So itu, waktu Kita mara, Kita basumpa, ‘Dorang nyanda mo maso pa Kita pe tampa istirahat for sama-sama deng Kita di situ.’ ” Jadi sudara-sudara, ngoni hati-hati jo, jang sampe ada dari pa ngoni yang de pe hati jaha rupa itu kong nyanda percaya sampe so nimau lei iko pa Tuhan Allah yang Hidop. Mar tiap hari ngoni baku se kuat hati jo slama ngoni masi bole bilang “ni hari”, supaya nyanda ada dari antara pa ngoni tu mo jadi kras hati sampe tatipu for beking dosa. Soalnya torang samua so jadi Kristus pe tamang karja, asal katu torang tetap percaya pa Dia dari pertama torang percaya sampe akhir jaman. Ini tu da tulis di Kitab Suci, “Ni hari, kalu ngoni dengar tu Tuhan Allah pe suara, ngoni jang se kras tu ngoni pe hati, sama rupa tu ngoni pe nene moyang dulu yang da malawang pa Tuhan Allah.” Sapa tu orang-orang yang da dengar tu Tuhan Allah pe suara mar malawang pa Dia? Dorang samua itu no tu orang-orang Israel yang Musa da pimpin kaluar dari tana Mesir. Kong sapa tu orang-orang yang Tuhan Allah mara slama ampa pulu taong? Dorang itu no tu orang-orang Israel yang berdosa da malawang pa Tuhan Allah kong so lantaran itu Dia hukum pa dorang mati di padang gurun. Kong sapa tu orang-orang yang Tuhan Allah da sumpa akang kalu dorang itu nimbole mo maso ka tampa for istirahat sama-sama deng Dia di situ? Dorang itu no tu orang-orang Israel yang nyanda da dengar-dengaran pa Dia. Jadi torang bole tau kalu dorang itu nimbole maso di tampa itu lantaran dorang nyanda percaya pa Dia. Tuhan Allah da bajanji kalu Dia pe orang-orang bole mo maso ka tampa istirahat sama-sama deng Dia, kong tu janji itu masi tetap ada. So lantaran itu torang musti hati-hati, jang sampe ada dari pa torang biar cuma satu yang nyanda mo maso di situ. Soalnya torang ini lei so dengar tu Kabar Bae sama deng tu torang pe nene moyang lei da dengar. Mar tu Kabar Bae yang torang pe nene moyang da dengar itu nyanda ada de pe guna for dorang, lantaran dorang nyanda percaya sama-sama deng tu orang laeng yang percaya waktu itu. Soalnya cuma torang yang percaya tu bole mo maso ka tampa istirahat for baistirahat sama-sama deng Tuhan, kong tentang tu orang yang nyanda percaya, Tuhan Allah da bilang ini, “Waktu Kita mara, Kita basumpa, ‘Dorang nimbole mo maso ka tampa istirahat for sama-sama deng Kita.’ ” Tuhan Allah da bilang bagitu, mar sebenarnya Dia so se sadia tu tampa istirahat itu dari lei dulu waktu pertama Dia da beking ni dunia. Di Kitab Suci, ada tulis tu Tuhan Allah perna da bilang tentang hari istirahat tu hari katuju. Bagini tu da tulis, “Tuhan Allah beking samua Dia pe karja, abis itu Dia istirahat di hari katuju.” Trus ada lei tu da tulis di Kitab Suci, “Dorang nimbole mo maso ka tampa istirahat for istirahat sama-sama deng Kita.” Jadi memang so jelas kalu ada orang-orang yang mo maso ka tampa istirahat sama-sama deng Tuhan Allah, mar tu torang pe nene moyang yang lebe dulu da dengar tu Kabar Bae itu, dorang nyanda maso di situ lantaran dorang nyanda dengar-dengaran pa Tuhan. So lantaran itu Dia so tentukan satu hari lei supaya manusia bole mo istirahat sama-sama deng Dia. Tu hari yang Dia da tentukan, itu torang bole bilang “Ni hari”. Soalnya bebrapa ratus taong abis nabi Musa, raja Daud tulis tu Tuhan pe kata-kata ini, “Ni hari, kalu ngoni dengar Tuhan Allah pe suara, ngoni jang se kras tu ngoni pe hati.” Dulu, kalu misalnya Yosua berhasil bawa tu bangsa Israel maso ka tampa for istirahat sama-sama deng Tuhan, tantu waktu jaman Raja Daud Tuhan Allah nyanda mo babilang kalu Dia mo kase tu hari laeng for torang mo istirahat sama-sama deng Dia. Jadi for Tuhan Allah pe orang-orang, torang itu masi ada kesempatan for baistirahat sama-sama deng Tuhan, itu sama deng waktu Tuhan Allah da istirahat di hari Sabat, tu hari katuju. Soalnya sapa jo yang so istirahat sama-sama deng Tuhan Allah, dia itu lei so istirahat dari samua tu de pe karja sama deng Tuhan Allah da istirahat dari samua tu Dia pe karja di hari katuju. So itu mari jo torang brusaha maso ka tampa baistirahat itu, supaya nyanda ada dari pa torang yang se tinggal tu torang pe percaya, sama deng tu torang pe nene moyang dulu yang nyanda beking tu Tuhan pe mau. Soalnya tu Tuhan Allah pe firman itu hidop deng ada kuasa. Tu Tuhan pe firman itu lebe tajang dari tu peda yang tajang dua sabla. Tuhan pe firman itu ada kuasa sampe bole priksa ka dalam torang pe pikiran deng torang pe maksut tu ada pa torang pe hati, itu sama deng da se pisa tu torang pe jiwa deng torang pe roh, deng torang pe sendi-sendi deng sumsum. Nyanda ada biar cuma satu tu Tuhan Allah da beking yang tasambunyi di muka pa Dia. Samua yang ada, sama deng talanjang deng lei tabuka di muka pa Dia. Pa Dia no tu torang musti tanggong jawab akang tu torang da beking. Torang skarang ini so ada Imam Basar yang Agung. Dia itu no Yesus tu Anak Allah. Dia yang so maso ka sorga di muka pa Tuhan Allah. So lantaran samua itu, torang yang so percaya, mari jo torang pegang trus tu torang pe percaya itu. Soalnya Yesus tu torang pe Imam Basar itu, Dia mangarti kalu torang yang ada kelemahan bole mo tagoda beking dosa. Dia itu so rasa da dapa goda di samua hal, sama deng torang da dapa goda, cuma katu Dia nyanda beking dosa. So itu sudara-sudara, mari jo deng hati yang brani torang badekat pa Tuhan tu da dudu di atas tahta, Dia yang da se tunjung tu Dia pe sayang pa torang. Deng torang badekat pa Tuhan, torang mo rasa tu Dia pe rasa kasiang pa torang deng tu Dia pe bae for tolong pa torang pas di waktu yang torang perlu. Tiap orang yang da dapa pili dari antara manusia for jadi imam basar, dia itu prantara antara manusia deng Tuhan Allah. Dia ja srahkan pa Tuhan Allah tu orang-orang pe persembahan deng korban persembahan supaya Tuhan kase ampung akang tu dorang pe dosa. Tu imam basar cuma manusia jadi dia banya kelemahan, so itu dia bole layani bae-bae tu orang-orang yang nintau apa-apa deng tu orang-orang yang sesat. Kong lantaran tu imam basar lei banya kelemahan, jadi selain dia kase korban persembahan pa Tuhan for orang laeng pe dosa, dia lei musti kase korban persembahan pa Tuhan for de pe diri sandiri supaya dapa ampung. Kong nyanda ada tu bole angka de pe diri sandiri for jadi imam basar. Mar orang bole jadi imam basar cuma kalu Tuhan Allah da pangge pa dia, itu sama deng tu da jadi dulu pa Harun waktu Tuhan Allah pangge pa dia. Bagitu lei no deng Kristus, Dia nyanda angka tu Dia pe diri sandiri jadi Imam Basar, mar Tuhan Allah tu da angka pa Dia, Tuhan Allah da bilang pa Dia bagini, “Ngana itu Kita pe Anak, ni hari Kita ini jadi Ngana pe Papa.” Kong di bagean laeng di Kitab Suci, Tuhan Allah da bilang bagini, “Ngana itu Imam for slama-lamanya, sama deng dulu tu Melkisedek da jadi imam.” Waktu Yesus hidop sbagai manusia di dunia ini, Dia basombayang deng bamohon pa Tuhan Allah. Kong waktu da basombayang itu, Dia babicara deng suara kuat deng bamanangis pa Tuhan Allah yang ada kuasa for se lapas pa Dia dari kematian. Tuhan Allah dengar tu Yesus pe sombayang itu lantaran Yesus ja iko Tuhan Allah pe mau. Yesus itu Anak Allah, mar biar lei bagitu, Dia mendrita kong dari situ Dia blajar dengar-dengaran pa Tuhan Allah. Deng Yesus beking bagitu Tuhan Allah so beking Yesus itu jadi sempurna, Yesus yang bole se slamat pa torang dari tu hukuman dosa for slama-lamanya. Dia se slamat pa torang samua tu orang-orang yang dengar-dengaran pa Dia. Dia itu yang Tuhan Allah da angka jadi Imam Basar sama deng dulu tu Melkisedek da jadi imam. Sudara-sudara, ada banya hal lei tentang Yesus deng Melkisedek yang torang musti bilang pa ngoni, cuma pe susa skali for mo kase tau itu pa ngoni, lantaran ngoni beking tu ngoni pe diri plang mo mangarti itu. Sebenarnya kalu mo lia dari waktu, ngoni itu so lama percaya pa Yesus, so de pe waktu for ngoni se ajar pa orang laeng tentang tu firman itu. Mar skarang ini ngoni masi perlu lei mo dapa se ajar akang ulang tentang tu dasar dari tu Tuhan Allah pe firman itu. Ngoni itu masi tetap sama rupa tu bayi yang cuma bole minum susu, ngoni itu masi blum mampu for makang tu makanan yang kras. Soalnya sapa yang nyanda mampu for mo se beda mana tu butul deng mana tu sala, dia itu bole mo se sama deng tu bayi yang memang cuma bole minum susu. Mar sapa yang slalu ja latih tu de pe diri for kase beda mana tu butul deng mana tu sala, dia itu bole mo se sama deng orang yang so dewasa tu bole mo makang makanan yang kras. So itu, mari jo torang se tinggal tu ajaran-ajaran yang dasar for tu orang yang baru percaya pa Kristus, kong lanjut deng tu ajaran yang lebe dalam lei supaya torang pe percaya pa Kristus bole jadi dewasa. Torang jang cuma ja ulang-ulang tu ajaran dasar rupa tu ajaran tentang bertobat dari tu kalakuan yang memang nyanda ada de pe guna, ajaran dasar bagimana percaya pa Tuhan Allah, ajaran tentang baptisan, ajaran tentang taru tangan di atas pa orang, ajaran tentang orang yang so mati nanti mo hidop ulang deng ajaran tentang tu orang yang mo dapa tu hukuman kekal. Jadi kalu Tuhan Allah kase isin pa torang, torang mo lanjut deng tu ajaran-ajaran yang lebe dalam. Soalnya tu orang-orang yang so nimau lei percaya pa Kristus, nyanda mungkin lei dorang itu mo dapa pimpin for bertobat dari tu kalakuan yang memang nyanda ada de pe guna, lantaran kwa dulu dorang itu so perna hidop di trang kong so rasa tu Tuhan pe berkat-berkat pa dorang pe hidop, deng dorang so trima tu bagean dari Roh Kudus. Dorang so perna tau kalu Tuhan Allah pe firman itu bagus, deng dorang lei so rasa tu Tuhan pe kuasa, tu kuasa yang nanti mo ada di dunia yang baru. Kong biar dorang so rasa tu samua itu, kalu dorang se lapas tu dorang pe percaya pa Yesus, dorang so nyanda mungkin lei mo dapa pimpin for bertobat. Itu so kurang sama jo deng dorang da se salib for kadua kali tu Anak Allah deng hina pa Dia di muka umum. Torang bole mo se sama deng tana, kalu tu tana slalu ja ujang akang, tu tana mo batumbu akang tanaman deng ada lei de pe hasil, kong itu de pe guna basar skali for tu orang yang da karja di tana itu yang mo ambe de pe hasil dari situ. Tu tana itu dapa berkat dari pa Tuhan Allah. Mar kalu tu tana cuma da batumbu akang rumpu baduri deng batumbu akang kusu-kusu, tu tana itu nyanda ada de pe guna. Tu tana itu so mo dapa kutuk dari Tuhan, kong de pe laste mo dapa bakar. Sudara-sudara yang kita sayang, biar lei torang bicara bagitu pa ngoni, torang yakin kalu ngoni nyanda sama deng tu tana yang da dapa kutuk itu, mar torang tau kalu ngoni dapa tu hal-hal yang lebe bae dari itu, tu hal-hal for tu orang-orang yang mo dapa slamat dari hukuman dosa. Soalnya Tuhan Allah itu adil. Dia nyanda perna lupa deng tu bae yang ngoni da beking deng tu ngoni pe sayang pa Dia yang ngoni da se tunjung deng cara tolong pa Dia pe orang-orang, kong ngoni tetap ja beking samua itu sampe ni hari. Kong torang suka kalu ngoni masing-masing tetap brusaha se tunjung tu ngoni pe smangat deng cara itu sampe hari kiamat, supaya ngoni trima tu ngoni da baharap deng yakin pa Tuhan Allah. Deng ngoni smangat rupa itu, ngoni nyanda jadi malas mar ngoni mo hidop rupa tu orang-orang yang so trima tu janji lantaran dorang percaya deng da tunggu-tunggu deng sabar for mo dapa itu. Sudara-sudara, dulu Tuhan Allah da bajanji pa Abraham. Waktu itu, Tuhan Allah da basumpa demi De pe Nama sandiri, lantaran nyanda ada yang lebe hebat dari Dia. Tuhan Allah da bajanji pa Abraham bagini, “Kita pasti mo kase akang berkat pa ngana deng Kita mo beking ngana pe keturunan jadi pe banya skali.” Kong Abraham da batunggu-tunggu deng sabar tu Tuhan Allah pe janji itu mo jadi, kong deng bagitu dia lei da dapa tu Tuhan pe janji itu. Soalnya manusia pe biasa, kalu dia basumpa, dia pasti basumpa demi nama yang lebe penting dari dia. Dia pe sumpa itu beking kuat tu dia pe kata-kata, supaya nyanda ada yang bole mo banta tu dia da bilang. Bagitu lei waktu Tuhan Allah bilang tu Dia pe janji pa Abraham deng pa Abraham pe keturunan, Dia suka beking lebe kuat tu dorang pe hati supaya dorang tau kalu Dia pe janji nyanda perna mo bruba. So lantaran itu, Dia se kuat tu Dia pe janji itu deng cara basumpa. Ada dua hal yang nyanda perna mo bruba: pertama tu Tuhan Allah pe janji, deng yang kadua tu Tuhan Allah pe sumpa. Soalnya Tuhan Allah nyanda perna badusta. Jadi lewat Tuhan Allah pe janji deng sumpa itu, torang pe hati jadi kuat. Deng bagitu, torang yang da pigi pa Dia for cari slamat, torang bole pegang kuat tu torang pe harapan for mo dapa tu Dia pe janji. Tu torang pe harapan itu bole mo se sama deng jangkar yang da tatanang di dasar laut, kong torang pe harapan itu beking torang pe hati jadi tenang. So lantaran torang kuat baharap rupa itu, torang bole ada hubungan langsung deng Tuhan, kong itu so kurang sama jo deng torang so bole maso di Ruang Mahasuci yang da pele deng tu kaeng pampele basar. Yesus so lebe dulu da maso di situ, Dia so buka jalang for torang bole maso ka situ. Yesus itu so jadi Imam Basar for slama-lamanya, sama deng dulu tu Melkisedek da jadi imam. Tu Melkisedek, dulu dia itu raja Salem, dia lei imam dari Tuhan Allah Yang Mahatinggi, imam itu prantara hubungan manusia deng Tuhan Allah. Waktu Abraham pulang dari prang da se kala tu raja-raja, Melkisedek yang datang sambut pa Abraham kong minta akang berkat dari Tuhan Allah for Abraham. Waktu itu, Abraham kase pa Melkisedek spulu persen dari samua tu dia da rampas waktu prang. Tu nama Melkisedek, de pe arti ‘raja tu ja beking yang butul’. Kong dia lei orang ja pangge ‘raja Salem’, tu de pe arti ‘raja damai’. Tu Melkisedek itu, nyanda ada yang tau sapa tu de pe papa deng mama, deng nyanda ada yang tau tu de pe nene moyang. Nyanda ada lei yang tau tempo apa dia da lahir deng tempo apa dia da mati. Jadi dia itu sama deng tu Anak Allah, dia tetap jadi imam for slama-lamanya. Ngoni tarukira jo bae-bae, tu Melkisedek itu orang yang penting, sampe tu torang pe nene moyang Abraham da kase pa dia spulu persen dari samua yang dia da rampas waktu prang. Kalu iko tu atoran yang ada di kitab Taurat, tu orang-orang dari keturunan Lewi yang so jadi imam-imam, dorang itu dapa tugas for kumpul tu spulu persen pendapatan dari tu dorang pe sudara-sudara tu orang-orang Yahudi, biar lei dorang deng tu sudara-sudara itu sama-sama Abraham pe keturunan. Mar Melkisedek itu bukang dari keturunan Lewi, cuma biar lei bagitu Abraham tetap da kase pa dia tu spulu persen dari tu Abraham pe hasil yang da rampas waktu baprang. Kong lei Melkisedek da minta akang berkat dari Tuhan for Abraham, padahal sebenarnya Abraham itu orang yang Tuhan so kase akang janji. Torang tau pasti kalu orang yang baminta berkat dari Tuhan for kase pa orang laeng, dia itu lebe penting dari tu orang yang dia da minta akang berkat dari pa Tuhan. Tu imam-imam dari Lewi pe keturunan, dorang itu trima spulu persen for dorang pe hidop, mar dorang itu cuma manusia biasa yang nanti mo mati. Tu Melkisedek, dia lei trima spulu persen dari Abraham, cuma nyanda tulis di Kitab Suci kalu dia da mati, jadi ada kesaksian kalu dia da hidop trus. Dulu cuma tu keturunan Lewi yang ja trima spulu persen for dorang pe hidop. Mar waktu Abraham tu torang pe nene moyang da kase spulu persen pa Melkisedek, itu torang bole bilang kalu tu keturunan Lewi so sama jo deng perna da kase spulu persen pa Melkisedek lewat Abraham. Soalnya biar lei tu Lewi blum lahir waktu jaman Melkisedek, dia masi jadi satu bagean deng de pe nene moyang tu Abraham. Jadi waktu Abraham baku dapa deng Melkisedek kong kase tu spulu persen, itu sama jo deng Lewi deng lei dia pe keturunan tu imam-imam so sama-sama deng Abraham. Dulu Tuhan kase tu Dia pe atoran-atoran di kitab Taurat pa orang-orang Yahudi, kong Dia pili tu Lewi pe keturunan for jadi imam-imam tu ja kase korban persembahan. Tu imam-imam itu bole urus samua iko tu atoran-atoran, mar tu dorang da beking itu nyanda beking tu orang-orang Yahudi itu jadi sempurna di muka pa Tuhan. So lantaran itu no kong kiapa sampe musti muncul imam yang laeng. Tu imam yang muncul itu nyanda sama rupa imam Harun tu Lewi pe keturunan, mar tu imam yang muncul itu sama rupa tu Melkisedek. Soalnya kalu imam dari Lewi pe keturunan da ganti deng imam yang laeng, tu atoran-atoran di kitab Taurat tantu lei mo dapa ganti. Tu Imam yang skarang torang samantara da bilang-bilang itu, Dia itu bukang dari suku Lewi, Dia dari suku laeng, kong nyanda ada dari Dia pe suku itu yang perna da karja di tampa ja kase korban persembahan pa Tuhan. Soalnya samua orang tau kalu torang pe Tuhan dari keturunan suku Yehuda, kong Musa nyanda perna bilang kalu Yehuda pe keturunan bole dapa pili jadi imam. Kong tentang ada imam yang bukang dari keturunan Lewi, ini lebe jelas lei lantaran ada satu Imam laeng tu da muncul yang sama rupa tu Melkisedek. Tu Imam yang da muncul itu, so Dia no tu Yesus. Dari tu atoran-atoran yang ada di kitab Taurat, torang bole tau kalu tu imam-imam itu musti dari Lewi pe keturunan. Yesus da jadi Imam bukang lantaran Lewi pe keturunan, mar Dia jadi Imam lantaran pa Dia ada kuasa yang beking Dia hidop for slama-lamanya. Soalnya di Kitab Suci da tulis tentang Dia bagini, “Ngana itu Imam for slama-lamanya, sama deng dulu tu Melkisedek da jadi imam.” Tuhan bilang bagitu lantaran tu atoran-atoran di kitab Taurat dulu tentang tu imam-imam so nyanda pake lei, lantaran tu atoran itu so nyanda ada lei kuasa deng so nyanda ada lei de pe guna. Soalnya tu atoran-atoran di kitab Taurat, itu sama skali nyanda beking sesuatu jadi sempurna di muka pa Tuhan Allah. Mar skarang torang so ada harapan yang lebe bae, torang bole baharap deng yakin pa Yesus supaya torang bole badekat pa Tuhan Allah. Dulu waktu Tuhan Allah angka pa tu Lewi pe keturunan for jadi imam, Dia nyanda angka pa dorang deng sumpa. Mar waktu Tuhan Allah angka pa Yesus jadi Imam, Dia angka pa Yesus deng sumpa. Waktu Tuhan Allah angka pa Yesus jadi Imam, Dia basumpa bagini, “Kita ini Tuhan Allah! Kita basumpa kong Kita nyanda perna mo roba apa tu Kita mo bilang ini, ‘Ngana itu Imam for slama-lamanya.’ ” Jadi deng Tuhan Allah pe sumpa itu, torang bole tau kalu Yesus jadi jaminan dari perjanjian yang baru tu jao lebe bagus dari tu perjanjian yang pertama. Dulu tu imam-imam itu pe banya lantaran kalu dari pa dorang ada yang mati, musti ada laeng yang ganti pa imam yang so mati itu. Mar Yesus, Dia itu slama-lamanya mo pegang tu Dia pe jabatan sbagai Imam, lantaran Dia itu hidop for slama-lamanya. So lantaran itu, Dia lei mampu butul-butul se slamat tu orang-orang dari hukuman dosa. Dia se slamat pa tu orang-orang yang badekat pa Tuhan Allah lewat Dia. Soalnya, Dia itu hidop for slama-lamanya supaya Dia bole slalu ja basombayang akang torang pa Tuhan Allah. Soalnya Yesus itu, tu Imam Basar yang torang perlu. Dia itu kudus, Dia nyanda beking sala sama skali, Dia itu nyanda perna beking dosa. Tuhan Allah se pisa pa Dia dari tu orang-orang berdosa, deng Tuhan Allah da angka pa Dia ka tingkat yang lebe tinggi dari tu tingkat-tingkat di sorga. Dia itu nyanda sama deng tu imam-imam basar yang laeng. Dorang tiap hari musti kase korban persembahan for hapus dorang pe dosa-dosa sandiri, kong baru abis itu dorang kase korban persembahan for hapus dong pe orang-orang pe dosa-dosa. Mar Yesus, Dia kase korban persembahan pa Tuhan Allah for hapus samua manusia pe dosa, kong Dia pe korban persembahan itu cuma satu kali Dia da kase, mar Dia pe korban persembahan itu for slama-lamanya. Soalnya kalu iko tu atoran-atoran di kitab Taurat, tu orang-orang yang da dapa angka jadi imam basar, dorang itu cuma manusia biasa yang ada kelemahan. Mar abis Tuhan Allah kase tu atoran-atoran di kitab Taurat, Dia beking perjanjian yang baru yang Dia da kase deng sumpa. Pa Dia pe perjanjian yang baru itu, Dia da angka tu Dia pe Anak sandiri for jadi Imam Basar yang sempurna for slama-lamanya. Sudara-sudara, de pe inti dari samua tu kita da bilang itu bagini: torang ada Imam Basar yang luar biasa. Dia da dudu di tampa yang paling terhormat, di sabla kanan tahta dari Tuhan Allah Yang Mahabasar di sorga. Tu torang pe Imam itu, Dia beking tu Dia pe karja sbagai Imam Basar yang da balayani di tampa yang kudus di sorga, tu Tuhan Allah pe tampa tinggal yang sebenarnya, bukang tenda ibada di bumi yang manusia da beking. Tiap imam basar yang da dapa pili, dia pe tugas kase orang pe persembahan deng lei kase korban persembahan pa Tuhan Allah. So itu, tu torang pe Imam Basar Yesus, Dia lei musti ada sesuatu for kase pa Tuhan Allah. Jadi kalu misalnya Dia tetap ada di dunia ini, Dia itu nyanda mo jadi Imam, lantaran di dunia ini so ada imam-imam yang ja kase persembahan iko tu atoran-atoran di kitab Taurat. Tu imam-imam itu ja kase persembahan pa Tuhan di tenda ibada, kong apa tu dorang ja beking di situ, de pe model sama deng satu gambaran dari apa yang ada di sorga. Soalnya waktu nabi Musa mo beking tu tenda ibada itu, Tuhan Allah da bilang pa nabi Musa bagini, “Musa, inga jo bae-bae! Ngana musti beking itu sama rupa tu conto yang Kita da kase tunjung pa ngana di atas gunung.” Mar Yesus tu torang pe Imam Basar, Dia pe karja sbagai Imam Basar itu so jao lebe bagus dari tu imam-imam pe karja di perjanjian yang pertama. Soalnya Yesus itu jadi prantara hubungan antara Tuhan Allah deng manusia di perjanjian yang baru, kong tu perjanjian itu so jao lebe bagus lantaran Tuhan Allah so janji torang mo dapa hal-hal yang lebe bae dari tu perjanjian yang pertama. Soalnya kalu misalnya bakase korban persembahan dari tu perjanjian yang pertama itu mampu mo beking torang pe hubungan deng Tuhan Allah jadi bagus ulang, pasti katu so nyanda perlu lei Yesus kase Dia pe diri for tu perjanjian yang baru. Mar dulu Tuhan Allah lia kalu dorang so beking sala lantaran dorang nyanda iko tu atoran-atoran dari tu perjanjian yang pertama, so itu Tuhan Allah bilang pa dorang bagini, “Tarukira jo bae-bae tu Kita mo bilang ini! Nanti mo ada de pe waktu, Kita mo beking perjanjian yang baru deng tu orang-orang dari bangsa Israel, deng tu orang-orang dari bangsa Yehuda. Tu perjanjian yang baru itu nyanda mo sama deng tu perjanjian yang Kita da beking deng dorang pe nene moyang dulu. Kita da pimpin pa dorang, itu sama deng Kita da pegang tu dorang pe tangan for se kaluar dari tana Mesir. Soalnya dorang itu nyanda ja beking tu atoran yang Kita da kase waktu Kita beking tu perjanjian deng dorang itu, so itu no Kita so nyanda lei mo tarukira akang pa dorang. Mar skarang, Kita mo beking satu perjanjian yang baru deng orang-orang dari bangsa Israel di hari-hari yang nanti mo datang ini. Kita mo taru tu Kita pe atoran-atoran pa dorang pe pikiran, deng Kita mo tulis itu pa dorang pe hati. Kita mo jadi dorang pe Tuhan Allah, deng dorang mo jadi Kita pe orang-orang. Kong dorang lei nanti so nyanda perlu mo se ajar pa orang-orang tu sama-sama satu bangsa deng dorang, deng nyanda perlu mo se ajar lei pa dorang pe sudara bagini, ‘Ngoni musti kanal pa Tuhan Allah’, lantaran dorang samua mo kanal pa Kita, basar kacili, penting ato nyanda penting. Soalnya Kita mo se tunjung tu Kita pe rasa kasiang pa dorang deng cara se ampung tu dorang pe dosa, Kita so nyanda lei mo inga-inga tu dorang pe dosa.” Jadi sudara-sudara, waktu Tuhan bilang kalu Dia mo beking satu perjanjian yang baru, itu beking tu perjanjian yang pertama itu so nyanda mo tapake lei. Kong tu perjanjian yang pertama yang so nyanda tapake itu, itu no yang so tua deng so nyanda lama mo ilang. Dulu memang di perjanjian yang pertama antara Tuhan Allah deng tu orang-orang Israel, ada atoran-atoran for baibada deng ada tenda ibada yang kudus tu dorang da beking. Dorang beking tu tenda ibada itu ada dua bagean, bagean muka tu ja bilang Ruang Suci. Di situ ada taru akang tu tampa pelita deng meja yang da taru akang roti for srahkan pa Tuhan Allah. Kong di Tenda itu ada satu kaeng pampele basar yang da gantong for pele tu bagean muka deng bagean blakang. Tu bagean blakang itu no tu ruangan yang ja bilang Ruang Mahasuci. Di Ruang Mahasuci itu ada satu tampa yang de pe model rupa meja tu da beking dari mas for ja bakar akang kemenyan, deng lei ada tu tabut perjanjian yang de pe bagean dalam deng luar da lapis akang deng mas. Di tabut perjanjian itu ada isi akang guci dari mas yang da isi deng manna, deng di tabut itu da isi tu Harun pe tongkat yang perna da batunas, deng lei dua lempeng batu tulis yang da tulis akang tu spulu prenta dari pa Tuhan Allah. Di atas tu tabut itu ada dua patong yang de pe model rupa malaekat tu ja bilang kerub, tu dua patong itu lambang kalu Tuhan Allah yang luar biasa ada di situ. Tu sayap dari dua kerub itu da tabuka lebar kong tutu tu tabut pe penutup itu, itu no tu tampa for Tuhan Allah se ampung tu orang-orang pe dosa. Mar skarang blum de pe waktu kita babicara tentang samua yang ada dalam tenda. Dorang ator bagitu tu barang-barang di tenda ibada, trus tu imam-imam ja maso di bagean muka dari tu tenda ibada for beking dorang pe karja. Mar di bagean blakang, cuma tu imam basar yang bole maso ka situ, itu lei tu imam basar cuma bole maso ka situ satu taong satu kali. Kong dia bole maso di situ cuma kalu dia bawa binatang pe dara for kase persembahan pa Tuhan for se hapus tu dia pe dosa sandiri deng lei for se hapus tu orang-orang laeng pe dosa yang nyanda sengaja da beking. Kong lewat tu atoran-atoran yang dulu itu, tu Roh Kudus kase tunjung kalu slama tu bagean muka masi tetap ada, pasti manusia nimbole langsung mo maso ka bagean blakang tu Ruang Mahasuci for badekat pa Tuhan, itu sama jo deng tu Ruang Mahasuci masi da tatutu. Jadi samua tu dorang pe korban persembahan itu jadi gambaran for torang skarang ini, kalu torang pe hati nyanda mo bersi dari dosa cuma deng kase persembahan deng tu korban-korban persembahan itu. Soalnya kalu iko tu atoran-atoran dari tu perjanjian yang pertama, itu cuma atoran tentang apa tu dorang mo makang deng minum, deng lei tu atoran se bersi tu dong pe diri. Samua tu atoran itu de pe hubungan cuma deng manusia pe diri, kong itu lei berlaku cuma samantara sampe waktu tu perjanjian yang baru datang. Kristus so datang jadi Imam Basar, Dia so bawa tu hal yang bae for torang. Dia so maso pa Tuhan Allah pe tampa tinggal di sorga, yang lebe luar biasa deng lebe sempurna, yang bukang manusia da beking, deng bukang dari ni dunia ini. Kristus da maso satu kali for slama-lamanya ka tampa yang kudus itu. Dia da maso di situ nyanda da bawa kambing jantan pe dara ato anak sapi pe dara sama deng tu biasa imam basar ja bawa for kase korban persembahan, mar Kristus da maso di situ da bawa tu Dia pe dara sandiri. Kong deng Dia pe dara itu, Dia se bebas pa torang dari torang pe dosa-dosa for slama-lamanya. Soalnya kalu iko tu atoran agama, kalu orang beking dosa kong mo beking bersi de pe diri dari dosa supaya dia bole mo semba ulang pa Tuhan, tu orang itu musti se pancar akang deng tu kambing jantan pe dara ato tu sapi jantan pe dara ato tu abu dari sapi pe anak yang da bakar, supaya tu orang itu jadi bersi dari de pe dosa. Jadi kalu tu dara deng tu abu itu bole mo kase bersi orang-orang dari dong pe dosa, no apa lei dang tu Kristus pe dara, pasti lebe dari itu. Kristus so kase Dia pe diri sandiri pa Tuhan Allah jadi korban persembahan yang sempurna, kong tu Roh Kudus yang ada trus sampe slama-lamanya yang da pimpin pa Kristus kase Dia pe diri. Dia pe dara yang da tacura itu se bersi tu torang pe hati dari tu hal-hal yang torang da beking tu nyanda ada de pe guna, supaya torang bole semba pa Tuhan Allah Yang Hidop. Jadi so lantaran samua yang Kristus da beking itu, Dia jadi Prantara for tu perjanjian yang baru antara Tuhan Allah deng manusia. Deng Kristus beking bagitu samua orang yang Tuhan Allah da pangge for iko pa Dia, dorang samua bole mo dapa tu warisan yang Tuhan Allah da janji mo kase, tu warisan itu no tu hidop kekal. Soalnya Kristus mati for tubus tu manusia dari dosa-dosa yang dorang da beking waktu masi da iko tu perjanjian yang pertama. Kalu misalnya ada surat for mo kase warisan pa orang tertentu, tu orang yang mo kase warisan itu musti ada bukti kalu dia so mati lebe dulu baru tu surat warisan itu berlaku. Soalnya slama tu orang yang da kase tu warisan itu masi hidop, tu surat itu blum berlaku. Tu surat itu nanti berlaku kalu yang mo bakase tu warisan itu so mati. Bagitu lei no deng tu perjanjian yang pertama, musti ada dara yang tacura dari korban binatang yang mati for beking sah tu perjanjian itu. Soalnya dulu Musa da kase tau samua tu atoran-atoran di kitab Taurat pa bangsa Israel. Abis itu dia ambe tu anak sapi pe dara deng kambing jantan pe dara trus dia campur tu dara itu deng aer, kong dia lei taru tu kayu hisop deng domba pe buluh yang warna mera tua di dara itu, trus dia kase pancar tu dara itu di kitab-kitab yang da tulis akang tu Tuhan Allah pe atoran-atoran, deng lei dia se pancar itu pa samua orang Israel. Samantara Musa beking itu, dia babilang, “Ni dara ini beking sah tu perjanjian antara Tuhan Allah deng ngoni, kong Tuhan suru ngoni musti iko tu perjanjian itu.” Kong deng cara yang sama, Musa lei kase pancar tu dara ka tenda ibada deng lei se pancar tu dara ka alat-alat yang ja pake for baibada di situ. Memang kalu iko tu atoran agama Yahudi, amper samua barang bole mo beking jadi suci kalu pake dara, kong kalu manusia pe dosa-dosa mo dapa ampung, musti ada dara lei yang da tacura. Jadi tu tenda ibada deng lei samua alat yang dorang ja pake di situ, itu no satu gambaran dari apa yang ada di sorga, kong musti pake dara dari korban persembahan for beking suci tu samua itu. Mar for beking suci apa yang ada di sorga, itu musti pake dara dari korban persembahan yang jao lebe bagus dari korban persembahan binatang. Soalnya Kristus memang da maso di Ruang Mahasuci yang sebenarnya tu ada di sorga, bukang da maso di Ruang Mahasuci yang ada di dunia, yang di tenda ibada tu manusia da beking. Tu Ruang Mahasuci yang ada di tenda ibada, itu cuma gambaran dari tu Ruang Mahasuci yang ada di sorga. Kong skarang ini Kristus ada di sorga di muka pa Tuhan Allah for mewakili torang di muka pa Tuhan Allah. Kristus nyanda kase ulang-ulang Dia pe Diri for jadi korban persembahan, sama deng tu imam basar yang musti ulang-ulang kase korban persembahan. Tiap taong, tu imam basar ja maso ka Ruang Mahasuci for bawa dara tu bukang de pe dara sandiri mar dara binatang for kase korban persembahan. Soalnya kalu Dia ulang-ulang se korban tu Dia pe diri, tantu katu dari pertama ni dunia da beking, Dia itu so ulang-ulang mendrita sampe mati. Mar yang sebenarnya, di waktu-waktu yang so dekat deng akhir jaman ini, Kristus datang ka dunia cuma satu kali for tubus tu manusia pe dosa-dosa deng cara kase Dia pe diri sandiri mati jadi korban persembahan. Kong sama deng tu Tuhan Allah so tetapkan kalu manusia mati cuma satu kali, trus abis itu mo dapa adili, bagitu lei deng Kristus cuma mati satu kali for jadi korban persembahan for se hapus manusia pe dosa-dosa. Kong Dia mo datang ulang yang kadua kali, Dia bukang datang for mo hapus lei tu manusia pe dosa-dosa, mar Dia datang for se slamat pa orang-orang dari hukuman dosa, tu orang-orang yang da tunggu-tunggu pa Dia. Tu atoran-atoran di kitab Taurat, itu cuma gambaran dari tu hal-hal bae yang nanti torang mo dapa lewat Yesus, bukang yang sebenarnya. So itu, tu atoran-atoran di Kitab Taurat itu nyanda beking tu orang-orang yang basemba pa Tuhan Allah jadi sempurna di muka pa Dia, biar lei dorang tiap taong kase korban persembahan. Soalnya kalu misalnya deng kase korban persembahan pa Tuhan kong orang bole jadi bersi di muka pa Tuhan, itu de pe arti tu orang-orang yang datang basemba pa Tuhan itu so nyanda perlu lei mo kase korban persembahan ulang-ulang, lantaran dorang so nyanda bapikir kalu dorang masi berdosa. Mar deng dorang kase tu korban persembahan tiap taong, itu justru se inga pa dorang kalu dorang itu orang berdosa. Soalnya memang nyanda mungkin tu dara dari sapi jantan deng dara dari tu kambing jantan bole mo se hapus tu manusia pe dosa-dosa. So lantaran tu korban persembahan itu nyanda cukup for se hapus dosa, itu no kong kiapa waktu Kristus datang ka dunia, Dia babilang pa Tuhan Allah bagini, “Tuhan, Tuhan nimau tu korban deng persembahan, mar Tuhan so se sadia badan for Kita. Tuhan nyanda snang deng tu korban bakaran deng tu korban-korban for se hapus dosa. Trus Kita bilang, ‘Oh Tuhan Allah! Lia jo, Kita so datang for beking tu Tuhan Allah pe mau, itu sama deng yang da tatulis dari dulu tentang Kita di gulungan Kitab.’ ” Tu pertama yang Kristus da bilang di atas bagini, “Tuhan Allah, Tuhan nimau deng lei nyanda snang deng tu korban-korban persembahan deng persembahan-persembahan laeng, tu korban bakaran deng tu korban-korban for se hapus dosa.” Padahal tu persembahan-persembahan yang dorang da kase itu, itu iko tu atoran-atoran di kitab Taurat. Kong Kristus lei da bilang, “Tuhan Allah! Lia jo, Kita datang for beking tu Tuhan Allah pe mau.” Deng bagitu, Dia so nyanda pake lei tu atoran-atoran dari perjanjian yang pertama, Dia pake tu perjanjian yang baru. So lantaran Tuhan Allah pe mau itu no kong torang jadi kudus lewat Yesus Kristus yang so kase Dia pe diri jadi korban persembahan satu kali for slama-lamanya. Tiap hari, tu orang Yahudi pe imam-imam badiri for beking tu dorang pe karja, dorang ulang-ulang ja kase korban persembahan pa Tuhan Allah. Mar tu korban persembahan itu sama skali nyanda beking manusia pe dosa dapa ampung. Mar Kristus, Dia cuma satu kali srahkan tu Dia pe diri jadi korban persembahan for se hapus tu manusia pe dosa, kong itu for slama-lamanya. Abis Dia jadi korban persembahan, Dia dudu di tampa yang terhormat, di sabla kanan pa Tuhan Allah. Kong skarang Kristus batunggu tu waktu for Tuhan Allah taru Kristus pe musu-musu di bawa pa Kristus pe kaki. Soalnya deng Dia pe korban persembahan yang satu kali itu, Dia so beking jadi sempurna for slama-lamanya tu orang-orang yang Dia da beking jadi kudus. Kong Roh Kudus kase kesaksian tentang itu pa torang, “Tuhan Allah bilang bagini, ‘Di hari-hari yang nanti mo datang, Kita mo beking perjanjian yang baru deng dorang. Kita mo taru tu Kita pe atoran-atoran pa dorang pe hati, Kita mo tulis itu pa dorang pe pikiran.’ ” Kong Tuhan Allah bilang lei, “Kita so nyanda mo inga-inga lei tu dorang pe dosa-dosa, deng tu jaha yang dorang ja beking.” Jadi kalu Tuhan Allah so se ampung tu torang pe dosa-dosa deng tu jaha yang torang ja beking, itu de pe arti so nyanda perlu lei mo kase korban persembahan for se hapus dosa. Sudara-sudara, Yesus pe dara so tacura for se hapus tu torang pe dosa-dosa, so itu torang so bole deng brani mangada pa Tuhan Allah, itu sama deng torang bole deng brani mo maso pa Tuhan Allah pe Ruang Mahasuci. Waktu Yesus srahkan Dia pe diri for mati, Dia buka jalang yang baru supaya torang dapa tu hidop kekal kong bole mangada langsung pa Tuhan Allah, itu bole mo se sama deng Dia da rabe tu kaeng pampele basar yang dulu da pele tu Ruang Mahasuci. Yesus itu torang pe Imam Basar tu Prantara hubungan antara Tuhan Allah deng manusia, Dia yang bapimpin pa torang tu Tuhan Allah pe ruma. So itu, mari jo torang badekat pa Tuhan Allah. Torang badekat pa Dia deng hati yang sunggu-sunggu deng lei torang pe percaya butul-butul pa Dia. Dia so se hapus tu jaha yang ada pa torang pe hati, itu sama deng torang pe hati so dapa pancar deng dara for beking jadi suci, kong sama lei deng torang pe badan so dapa cuci deng aer for beking bersi. Mari jo torang tetap batahang pa torang pe percaya pa Yesus yang torang so akui itu, so Dia no tu torang bole mo baharap akang. Soalnya Tuhan Allah itu setia, Dia pasti beking tu Dia so janji pa torang. Mari jo torang baku tarukira deng baku kase smangat for basayang pa orang-orang deng bole beking tu hal-hal yang bae. Ada tu bebrapa orang yang brenti pi bakumpul sama-sama for baibada, torang jang sama deng dorang itu. Torang musti tetap ja bakumpul sama-sama for baku se kuat tu torang pe percaya, lebe-lebe lei lantaran torang tau kalu tu waktu for Tuhan mo datang ulang so lebe dekat. Soalnya kalu torang so trima tu brita yang butul dari Tuhan, kong abis itu torang masi tetap sengaja ja babeking dosa, nanti so nyanda ada lei korban persembahan yang mo kase for hapus tu torang pe dosa. Kalu torang pe kalakuan sama deng itu, torang kurang mo tunggu-tunggu Tuhan Allah pe penghakiman yang pe dapa tako, deng tu api pe basar yang bamanyala-manyala yang mo se angus tu orang-orang yang malawang pa Dia. Dulu sapa jo yang tolak tu atoran-atoran di kitab Taurat yang Musa da tulis, asal ada dua ato tiga orang yang basaksi tentang itu, tu orang itu mo dapa hukuman mati, nyanda ada ampung for dia. Kalu tu orang yang tolak tu atoran-atoran itu dapa hukuman brat, no ngoni pikir jo, pasti katu lebe brat lei tu hukuman yang mo kase pa orang yang beking ini: yang pandang enteng pa Yesus tu Anak Allah, itu sama deng dia injang-injang tu Anak Allah, deng lei yang anggap nyanda berharga tu Yesus pe dara yang da beking sah tu perjanjian yang baru antara Tuhan Allah deng manusia, tu dara yang beking torang jadi kudus di muka pa Tuhan Allah, kong lei yang hina pa Tuhan Allah pe Roh yang ja se tunjung tu Dia pe sayang pa torang. Soalnya torang so kanal pa Tuhan Allah yang da babilang, “Kita ini yang mo babalas tu jaha yang orang da beking, deng Kita ini yang mo bahukum.” Kong Dia bilang lei, “Tuhan yang mo adili tu Dia pe orang-orang.” Pe dapa tako skali kalu sampe torang dapa hukum dari Tuhan Allah Yang Hidop. Ngoni musti inga tu waktu ngoni baru jadi percaya, waktu itu ngoni baru trima tu trang, kong ngoni banya mendrita lantaran ngoni pe percaya, mar biar lei ngoni mendrita, ngoni tetap batahang percaya. Ada dari pa ngoni yang dapa hina deng dapa siksa di muka umum, kong ada yang dari pa ngoni tu da babantu tu tamang-tamang yang da dapa siksa sama deng tu ngoni lei da dapa. Ngoni rasa kasiang kong bantu tu orang-orang yang da dapa maso bui lantaran iko pa Yesus Kristus. Kong waktu orang rampas tu ngoni pe harta, ngoni trima itu deng snang hati lantaran ngoni tau kalu ngoni nanti mo dapa harta yang lebe bagus dari Tuhan, tu harta yang mo batahang for slama-lamanya. Jadi sudara-sudara, ngoni jang se lapas tu ngoni pe percaya yang kuat itu. Soalnya kalu ngoni tetap kuat percaya, ngoni mo dapa upah yang basar dari pa Tuhan. So itu ngoni musti tetap batahang percaya biar dapa siksa, supaya kalu ngoni so beking tu Tuhan Allah pe mau, ngoni bole mo trima apa tu Tuhan Allah so janji mo kase. Soalnya di Kitab Suci da tulis tu Tuhan Allah da bilang bagini, “So nyanda lama lei, tu Dia yang mo datang itu so mo datang, Dia so nyanda mo tunda-tunda lei mo datang. Mar tu Kita pe orang-orang yang ja beking tu butul, dorang hidop cuma bagantong pa dorang pe percaya pa Kita. Cuma kalu ada dari pa dorang yang so nimau lei percaya, Kita so nyanda snang deng dorang itu.” Mar torang ini sudara-sudara, torang ini bukang tu orang-orang yang nimau percaya deng tu mo binasa itu, mar torang ini tu orang-orang yang percaya deng yang dapa slamat. Sudara-sudara, skarang ini torang mo bicara tentang iman. Iman itu bagini: apa yang torang harap deng yakin mo dapa dari pa Tuhan, torang tau kalu torang mo dapa itu, biar lei torang blum lia yang torang mo dapa itu, mar torang yakin kalu torang mo dapa itu. Soalnya dulu lantaran torang pe nene moyang pe iman Tuhan Allah snang pa dorang. Kong lantaran torang pe iman, torang bole mangarti kalu ni langit deng bumi ini da beking cuma deng Tuhan Allah pe kata-kata. So itu no apa yang torang bole lia tu Dia da beking itu, samua itu Dia da beking dari apa yang nyanda dapa lia. So lantaran Habel pe iman, dia kase korban persembahan yang lebe bagus pa Tuhan Allah daripada tu dia pe kaka Kain pe korban persembahan. Kong lantaran tu Habel pe iman itu, Tuhan bilang kalu Habel itu orang yang butul deng lei Tuhan trima tu Habel pe korban persembahan. Jadi biar lei tu Habel so mati, torang bole blajar dari tu dia pe iman, itu sama jo deng dia masi tetap da babicara pa torang sampe skarang. Kong lantaran tu Henokh pe iman, Tuhan Allah angka pa dia ka sorga supaya dia nyanda rasa tu kematian. Nyanda ada orang yang da dapa lia pa dia lei lantaran Tuhan so angka pa dia. Kong seblum Henokh dapa angka, Tuhan bilang kalu Henokh itu beking snang Dia pe hati. Jadi nyanda mungkin orang mo beking snang Tuhan Allah pe hati kalu tu orang itu nyanda ada iman. Soalnya sapa yang suka mo badekat pa Tuhan Allah, dia musti percaya kalu Tuhan Allah itu ada, deng lei percaya kalu Tuhan Allah mo kase tu hal-hal bae pa orang-orang yang brusaha cari pa Dia. Kong lei so lantaran Nuh pe iman, Tuhan Allah kase tau pa dia kalu ada sesuatu tu mo jadi nanti yang dia blum dapa lia. Trus Nuh blum lia apa tu mo jadi itu, mar dia dengar-dengaran pa Tuhan, so itu dia beking satu kapal yang basar skali for mo se slamat pa dia deng dia pe kluarga. Kong waktu Nuh beking tu Tuhan da prenta, itu sama deng dia se tunjung pa tu orang-orang kalu dorang itu pantas for dapa hukum dari Tuhan. Trus lantaran Nuh pe iman itu, kong Tuhan Allah bilang kalu Nuh itu orang yang butul di muka pa Dia. Trus tu Abraham, so lantaran dia pe iman, dia iko akang tu Tuhan Allah pe prenta for se tinggal tu dia pe tampa tinggal kong pigi ka satu tampa yang nanti mo jadi dia punya. Dia iko akang Tuhan pe prenta, biar lei waktu itu dia nintau mo pigi ka mana. So lantaran tu Abraham pe iman itu, dia hidop sbagai orang asing di tana yang Tuhan da janji mo kase pa dia. Tuhan Allah da janji lei pa Abraham pe anak Ishak deng pa Abraham pe cucu Yakub kalu dorang mo dapa warisan dari tu janji yang sama dari Tuhan Allah. Dia tinggal di tana yang Tuhan da janji sama-sama deng Ishak deng lei Yakub, kong dorang tinggal di situ di dalam tenda-tenda. Abraham bole tahang hidop bagitu lantaran dia da tunggu-tunggu mo tinggal di kota yang Tuhan Allah sandiri da rancang deng da beking, tu kota yang de pe fondasi kuat. Trus lantaran Abraham pe iman, dia da dapa anak deng cucu biar lei dia deng Sara so tua skali, lebe-lebe lei Sara sandiri mandul. Dorang dua dapa anak lantaran Abraham percaya kalu Tuhan setia, Dia pasti beking tu Dia pe janji mo kase keturunan pa dorang. Jadi biar lei waktu Abraham so tua skali sama deng dia so mo mati, mar dari pa dia itu muncul banya skali keturunan. Tu dia pe keturunan itu de pe banya sama deng bintang di langit deng sama lei deng paser di laut tu nyanda dapa rekeng. Samua dorang itu tetap deng dorang pe iman sampe dorang mati, kong waktu dorang masi hidop dorang itu blum trima apa tu Tuhan da janji pa dorang. Mar itu bole mo bilang kalu dorang itu da lia dari jao tu Tuhan da janji pa dorang itu da jadi, kong dorang sambut itu, biar masi lama mo trima. Dorang batunggu tu Tuhan da janji pa dorang itu, kong dorang bilang kalu dorang hidop di dunia ini sama deng tu orang asing yang tinggal cuma nyanda lama. Tu orang-orang yang bilang kalu dorang itu orang asing yang tinggal cuma nyanda lama, itu jelas kalu dorang rindu mo cari tu tampa tinggal yang tetap for dorang. Kong tu tampa yang dorang da rindu akang itu, itu bukang dorang pe tampa tinggal dulu yang dorang da se tinggal akang. Soalnya kalu tu tampa tinggal itu yang dorang rindu akang, dorang bole mo babale ulang ka situ. Mar tu tampa tinggal yang dorang da rindu akang, itu tampa yang lebe bagus, itu no tu sorga. So itu Tuhan Allah nyanda malo waktu dorang bilang kalu Dia itu dorang pe Tuhan Allah, lantaran Dia so kase siap akang satu kota for dorang. So lantaran Abraham pe iman, waktu Tuhan Allah tes pa dia, Abraham rela kase tu dia pe anak satu-satunya tu Ishak jadi korban persembahan, biar lei tu anak itu yang Tuhan da janji akang mo kase akang banya keturunan. Pa Abraham itu no tu Tuhan Allah da janji akang bagini, “Dari ngana pe anak Ishak itu, ngana mo dapa banya keturunan.” Abraham yakin kalu Tuhan Allah ada kuasa for kase hidop ulang pa Ishak dari kematian. Mar Tuhan Allah nyanda da kase jo dia bunung pa Ishak, itu sama jo deng dia da trima ulang tu Ishak dari kematian. Trus tu Ishak, so lantaran dia pe iman, dia da minta akang berkat for tu Yakub deng Esau yang nanti dorang mo dapa. Trus tu Yakub, so lantaran dia pe iman, waktu dia so mo mati, dia minta akang berkat for Yusuf pe dua anak, waktu itu dia pake tongkat for badiri supaya dia bole semba pa Tuhan. Trus tu Yusuf, so lantaran dia pe iman, waktu dia so mo mati, dia se tau kalu nanti tu orang-orang Israel mo kaluar dari Mesir, deng dia bapesan pa dorang supaya nanti waktu dorang kaluar dari Mesir, dorang bawa lei tu dia pe tulang-tulang. Trus tu Musa pe orang tua, so lantaran dorang pe iman, dorang nyanda tako langgar tu raja pe prenta for suru bunung tu orang Israel pe anak laki-laki yang baru lahir. Jadi waktu Musa baru lahir, dorang se sambunyi tu Musa slama tiga bulan lantaran dorang pikir kalu dong pe anak itu istimewa. Trus tu Musa, so lantaran dia pe iman, serta dia so basar, dia so nimau kalu orang mo bilang dia itu raja Mesir pe cucu, padahal tu raja Mesir pe anak parampuang da angka anak pa Musa. Mar dia lebe pili for hidop dapa siksa sama-sama deng Tuhan Allah pe orang-orang, daripada dia mo hidop snang-snang deng dosa yang cuma nyanda lama de pe waktu. Dia pikir lebe bae orang hina pa dia lantaran Kristus tu Raja yang se slamat pa manusia, daripada dia mo dapa tu kekayaan di tana Mesir. Soalnya dia baharap tu upah yang nanti Tuhan mo kase pa dia. Kong so lantaran tu Musa pe iman itu, dia se tinggal tu tana Mesir, dia nyanda tako tu raja Mesir mo mara pa dia. Kong dia sabar deng maju trus pa de pe tujuan, lantaran dia sama deng so lia pa Tuhan yang nyanda dapa lia itu. Trus so lantaran tu dia pe iman itu, dia beking tu hari raya Paskah for orang Israel. Dia suru tu orang-orang dari bangsa Israel for se pancar dara pa dong pe pintu ruma, supaya waktu tu malaekat maut datang for bunung tu orang Mesir pe anak-anak sulung, tu malaekat maut cuma lewat akang tu orang-orang Israel pe ruma kong dorang pe anak-anak sulung nyanda dapa bunung. Kong tu orang-orang Israel dulu, so lantaran dorang pe iman, dorang balewat di Laut Mera sama deng dorang cuma da balewat di tana yang kring. Mar waktu tu orang-orang Mesir da coba balewat di Laut Mera, dorang tengglam di situ. Trus so lantaran tu orang-orang Israel dulu pe iman lei, waktu dorang bajalang bakliling akang tu Yerikho slama tuju hari, tu kota itu pe pagar beton rubu. Kong lei tu Rahab, dia itu parampuang nakal, trus so lantaran dia pe iman, dia nyanda dapa bunung sama-sama deng tu orang-orang yang nimau iko pa Tuhan tu ada pa dia pe kota. Soalnya waktu tu orang-orang Israel pe mata-mata datang pa Rahab pe kota itu, dia itu yang da trima deng bae-bae pa dorang pa dia pe ruma. Ada banya lei tu kita musti se tau pa ngoni, mar kita nyanda ada waktu lei for itu. Kita nyanda ada lei waktu for mo se cirita tentang Gideon, Barak, Simson, Yefta, Daud, Samuel deng tu nabi-nabi laeng. So lantaran dorang samua pe iman, ada dari pa dorang itu yang bole se kala tu krajaan-krajaan, ada lei yang bapimpin deng adil, ada yang bole trima apa tu Tuhan da janji pa dorang, deng ada lei yang tutu tu singa-singa pe mulu. Kong ada yang slamat dari api yang basar, ada yang lolos dari dapa bunung deng peda, ada yang lemah mar Tuhan beking jadi kuat, ada lei yang jadi kuat waktu baprang kong se kala tu dorang pe musu-musu yang dari bangsa-bangsa asing. Trus ada lei tu parampuang-parampuang yang lantaran dorang pe iman, kong dorang trima ulang tu dorang pe kluarga yang so mati lantaran Tuhan da se hidop ulang tu dong pe kluarga itu. Mar ada lei tu orang-orang laeng yang rela tu dorang pe diri dapa siksa, dorang nimau mo se bebas kalu musti manyangkal tu dong pe iman. Soalnya dorang percaya kalu dorang mati, dorang mo hidop ulang kong dapa tu hidop yang lebe bae lei. Kong ada lei orang yang lantaran dorang pe iman, dorang dapa hina deng ada lei dapa cambok, malatare ada yang da dapa ika deng rante trus da se maso ka bui. Kong ada lei yang dapa lempar deng batu, ada yang dapa gergaji sampe tabla jadi dua, trus yang laeng dapa bunung deng peda. Kong ada lei yang hidop bapinda-pinda, dorang pe baju cuma yang da beking dari domba pe kuli deng dari kambing pe kuli. Dorang hidop susa, mendrita deng lei dapa siksa. Dorang hidop bapinda-pinda di padang gurun deng di gunung-gunung, dorang tinggal di goa-goa deng di sela-sela gunung. Ni dunia ini nyanda pantas for tu orang-orang yang dorang pe iman rupa itu. Samua dorang itu beking snang Tuhan Allah pe hati lantaran dorang pe iman, padahal dorang blum trima apa yang Tuhan da janji pa dorang. Soalnya Tuhan Allah so se sadia akang sesuatu yang lebe bae for torang ini. Tuhan Allah mau supaya nanti di satu waktu, torang sama-sama deng tu orang-orang yang tetap deng dong pe iman itu, torang samua mo dapa apa yang Tuhan so se sadia akang itu, supaya torang samua bole jadi sempurna di muka pa Tuhan. Sudara-sudara, tu orang-orang dulu yang hidop deng iman jadi saksi for torang supaya torang pe iman bole jadi kuat, so itu biar dorang so mati, dorang bole mo se sama deng da badiri bakliling akang pa torang. Jadi brusaha jo for buang samua beban deng se lapas jo tu dosa-dosa yang masi jadi penghalang for torang, kong brusaha trus batahang deng torang pe iman, itu sama deng torang da brusaha trus batahang waktu iko lomba yang torang musti iko akang. Mari jo torang cuma lia pa Yesus, Dia yang da buka akang jalang for torang bole ada iman, Dia yang da beking tu torang pe iman itu jadi sempurna. Dia itu batahang waktu dapa siksa di kayu salib sampe Dia mati, Dia nyanda farduli waktu dapa hina di kayu salib lantaran Dia tau kalu abis itu nanti Dia mo snang skali. Kong skarang Dia so dudu di tampa terhormat di sabla kanan pa Tuhan Allah di sorga. Co ngoni pikir jo bae-bae tentang tu waktu Yesus sandiri da batahang tanggong tu siksa waktu mangada tu orang-orang yang berdosa, Dia tanggong samua itu supaya ngoni pe iman mo tetap kuat deng ngoni nyanda mo putus asa. Ngoni perna malawang tu godaan for beking dosa, mar waktu ngoni malawang itu, ngoni blum sampe dapa siksa sampe musti mati tacura dara. Apa ngoni so lupa tu Tuhan pe nasehat? Dia babicara sama deng da babicara pa Dia pe anak-anak, “Kita pe anak-anak, ngoni jang pandang enteng Tuhan pe ajaran! Ngoni jang putus asa kalu Dia togor. Soalnya Tuhan togor tu orang-orang yang Dia sayang, deng Dia kase hukuman for se ajar tu orang-orang yang Dia so anggap Dia pe anak-anak.” Tu siksa yang ngoni da dapa itu sama deng Tuhan Allah da togor pa ngoni, Dia beking ngoni ini sama deng Dia pe anak-anak. Soalnya apa ada anak yang nyanda perna dapa togor dari de pe papa? Mar kalu misalnya ngoni nyanda dapa togor rupa tu samua Tuhan pe anak-anak biasa ja dapa, itu de pe arti ngoni itu bukang butul-butul Tuhan pe anak. Torang ada papa di dunia kong tu torang pe papa itu ja togor pa torang, kong torang hormat pa tu tong pe papa itu. No kalu bagitu, torang lei musti lebe dengar-dengaran pa torang pe Bapa di sorga waktu Dia togor pa torang, supaya torang bole dapa tu hidop kekal. Tu torang pe papa di dunia, dorang ja togor pa torang cuma di waktu yang nyanda lama. Tu dorang pe tegoran itu iko apa tu dorang anggap butul. Mar Bapa di sorga, waktu Dia togor pa torang, itu supaya torang bole jadi lebe bagus deng lei supaya torang bole jadi kudus sama deng Dia itu kudus. Memang tiap kali torang dapa togor, torang pe hati bukang jadi snang mar torang pe hati jadi sedi. Mar abis torang dapa togor, de pe hasil dari da dapa togor itu: torang jadi orang yang ja beking tu butul deng lei torang hidop deng hati tenang. So itu se kuat jo tu ngoni pe iman, itu sama deng ngoni se kuat tu ngoni pe tangan deng lutut yang lemah. Kong ngoni hidop lurus jo iko pa Tuhan, kong orang laeng yang kurang percaya pa Tuhan bole mo iko tu ngoni pe cara hidop yang lurus itu trus dorang pe iman bole jadi kuat, itu sama deng ngoni da bajalang di jalang yang lurus supaya tu orang yang de pe kaki kento yang mo iko pa ngoni nyanda mo tasala mar mo jadi bae. Ngoni brusaha jo for hidop baku-baku bae deng samua orang deng brusaha lei for hidop deng hati yang bersi di muka pa Tuhan. Kalu orang nyanda hidop deng hati yang bersi di muka pa Tuhan, tu orang itu nanti nyanda mo lia pa Tuhan. Hati-hati jo ngoni, jang sampe ada dari pa ngoni yang brenti percaya sampe nyanda rasa lei tu Tuhan Allah pe bae, supaya nyanda ada orang yang kase pengaru jaha yang beking tu orang percaya jadi kacau kong pengaruhi lebe banya orang. Tu orang yang kase pengaru jaha itu bole mo se sama deng tu tanaman baracun yang beking rusak tu tanaman laeng. Jangan ada dari pa ngoni yang hidop ja beking tu hal-hal cabul ato nyanda hargai tu dia pe hak sbagai anak yang tua yang Tuhan da kase pa dia sama deng Esau yang da tukar deng satu piring makanan tu dia pe hak itu. Ngoni so tau waktu dia mo trima tu berkat sbagai anak yang tua, dia pe papa nyanda mo kase itu pa dia. Soalnya dia so nyanda dapa kesempatan lei for mo bertobat dari tu sala yang dia da beking, biar lei dia cari jalang for beking butul itu deng mamanangis. Sudara-sudara, dulu Tuhan babicara deng bangsa Israel di gunung Sinai, tu gunung yang bole mo sontong. Di situ dapa lia api yang bamanyala-manyala, tatutu deng tu glap, deng ada lei angin kancang da batiop. Mar ngoni so nyanda sama deng bangsa Israel yang dulu musti pigi ka gunung Sinai. Dorang dengar bunyi dari trompet yang pe kras, deng Tuhan pe suara yang pe kuat da babicara pa dorang. Waktu dorang dengar tu suara itu, dorang jadi tako kong dorang bamohon supaya tu suara itu jang lei babicara pa dorang. Soalnya dorang nyanda tahang da dengar tu prenta yang suara itu da se tau bagini, “Samua yang da sontong ni gunung ini, biar lei itu cuma binatang, musti dapa lempar deng batu sampe mati.” Tu orang-orang Israel pe tako skali waktu da mangada itu, sampe Musa babilang, “Kita tako skali sampe totofore.” Mar ngoni sudara-sudara, ngoni so datang ka Bukit Sion tu kota dari Tuhan Allah yang hidop, tu Yerusalem yang ada di sorga deng ngoni datang pa tu ribuan malaekat yang da bakumpul deng basnang-snang. Ngoni itu datang pa tu kumpulan dari tu orang-orang yang pertama da jadi Tuhan pe anak-anak, dorang itu pe nama-nama yang so tatulis di sorga. Ngoni lei datang pa Tuhan Allah, tu Hakim yang mo adili pa samua orang. Kong ngoni lei datang pa tu orang-orang yang so mati dari dulu, tu orang-orang yang waktu dorang hidop ja beking tu butul di muka pa Tuhan kong Tuhan so beking jadi sempurna. Ngoni datang lei pa Yesus, tu Prantara dari tu perjanjian yang baru antara Tuhan Allah deng manusia. Yesus mati, kong Dia pe dara yang da tacura itu lebe bae dari tu Habel pe dara yang da tacura dulu, lantaran tu Habel pe dara se tunjung supaya orang dapa hukum, mar Yesus pe dara se tunjung supaya orang dapa ampung dari dosa. Ngoni dengar bae-bae pa Tuhan Allah yang da babicara pa ngoni, jang ngoni tolak pa Dia. Soalnya dulu tu orang-orang Israel nyanda farduli tu Tuhan pe kata-kata yang Musa da se tau pa dorang di dunia ini, kong dorang itu da dapa hukuman. Apa lei nanti deng torang, torang pasti nyanda mo lolos dari hukuman kalu torang nimau mo badengar tu Tuhan pe kata-kata yang langsung dari sorga. Dulu di jaman Musa, waktu Tuhan Allah babicara dari gunung Sinai, Dia pe suara pe kuat skali sampe beking tu bumi tagoyang. Mar skarang, ada tu janji yang Dia da bilang, “Nanti satu kali lei Kita mo se goyang bukang cuma ni bumi, mar deng tu langit lei.” Tu “satu kali lei,” itu de pe arti samua yang Tuhan Allah da beking di bumi ini mo dapa se goyang deng mo ancor, trus tu laeng yang nyanda dapa se goyang yang mo tatinggal. Jadi sudara-sudara, torang bilang makase pa Tuhan Allah lantaran torang ini so jadi orang-orang dari Tuhan Allah yang Berkuasa sbagai Raja di krajaan yang nyanda perna mo tagoyang. Mari jo torang semba pa Dia iko tu cara yang beking snang pa Dia, torang semba pa Dia deng rasa tako deng hormat pa Dia. Soalnya Tuhan Allah yang torang ja semba, Dia itu sama deng api yang se angus samua. Sudara-sudara, ngoni tetap jo baku-baku sayang sbagai orang-orang yang percaya pa Tuhan. Ngoni trima jo pa ngoni pe ruma tu orang-orang yang ngoni blum kanal. Soalnya deng beking bagitu, ada bebrapa orang yang nyanda sangka-sangka da trima malaekat-malaekat pa dong pe ruma. Ngoni inga jo tu orang-orang yang ada di bui, sama deng ngoni lei ada di bui sama-sama deng dorang. Ngoni inga lei tu orang yang dapa siksa, sama deng ngoni lei da rasa tu siksa itu. Samua orang musti hormat tu perkawinan. Tu laki bini itu musti setia satu deng laeng, nimbole ada hubungan seks deng orang laeng. Soalnya tu orang-orang yang baseks bebas ato yang da bersina, nanti dorang itu mo dapa hukuman dari Tuhan Allah. Ngoni lei jang jadi orang yang gila doi, mar lebe bae ngoni puas deng apa yang ada pa ngoni. Soalnya Tuhan Allah da bilang bagini, “Kita nyanda perna mo se biar pa ngana, deng Kita nyanda perna mo se tinggal pa ngana.” So lantaran tu Tuhan da bilang itu, torang bole yakin kong babilang, “Tuhan itu kita pe Penolong. Kita nyanda mo tako apa-apa, apa yang manusia bole mo beking pa kita?” Inga jo tu ngoni pe pemimpin-pemimpin yang so se tau tu Tuhan Allah pe firman pa ngoni. Tarukira jo bagimana dorang pe cara hidop sampe dorang pe akhir hidop, kong ngoni iko jo tu conto dari dorang pe iman. Yesus Kristus tetap sama, dari dulu, skarang deng sampe slama-lamanya. Ngoni jang iko tu macam-macam ajaran yang nyanda butul tu bole mo beking ngoni jadi sesat. Lebe bae beking kuat tu ngoni pe hati lewat tu bae yang Tuhan da se tunjung, jang ngoni iko tu atoran-atoran tentang makanan yang bole mo makang deng nimbole mo makang, lantaran tu atoran itu nyanda ada de pe guna for tu orang yang iko itu. For torang, ada Yesus yang jadi korban persembahan for se hapus torang pe dosa-dosa, Dia jadi sama deng torang pe persembahan yang da se korban di tampa korban persembahan di tenda ibada, mar tu imam-imam yang ja layani di tenda ibada nyanda mo dapa untung apa-apa dari tu korban persembahan itu. Soalnya tu binatang-binatang yang dapa potong for korban persembahan, tu dong pe dara tu imam basar da bawa maso ka Ruang Mahasuci sbagai korban for se hapus dosa. Kong tu binatang-binatang pe bangkai da bakar di luar dari tu dorang pe tampa tinggal. Dorang bakar tu binatang pe bangkai di luar dari dong pe tampa tinggal, bagitu lei no deng Yesus, Dia da mendrita sampe mati di luar dari tu kota Yerusalem for beking kudus tu Dia pe orang-orang deng Dia pe dara. So lantaran itu, mari jo torang pigi pa Yesus di luar dari tampa tinggal, biar orang mo hina pa torang sama deng Yesus da dapa hina. Soalnya di dunia ini, torang nyanda ada tampa tinggal yang tetap, mar torang baharap skali tu satu kota yang nanti torang mo tinggal akang. So itu, mari jo lewat Yesus torang puji pa Tuhan Allah, itu sama deng torang kase korban persembahan for Dia. Torang puji-puji Dia pe nama, torang mangaku kalu Dia itu torang pe Tuhan. Ngoni nimbole lupa ja beking tu bae deng tolong pa orang. Soalnya kalu ngoni beking bagitu, itu sama jo deng ngoni pe korban persembahan yang beking snang pa Tuhan Allah. Ngoni musti dengar-dengaran pa ngoni pe pemimpin-pemimpin deng musti iko apa tu dorang da prenta. Soalnya dorang yang dapa tugas for jaga tu ngoni pe percaya pa Tuhan, kong dorang sandiri nanti mo tanggong jawab tu dong pe karja sbagai pemimpin pa Tuhan. Ngoni musti dengar-dengaran pa dorang supaya dorang bole bakarja deng hati snang. Mar kalu ngoni nyanda dengar-dengaran pa dorang, dorang pe hati mo jadi susa, kong itu nyanda mo ada untung for ngoni. Torang minta pa ngoni supaya ngoni basombayang akang trus for torang. Soalnya torang yakin kalu torang pe hati butul-butul bersi, torang suka beking apa yang butul di samua hal. Kita minta kusus pa ngoni supaya ngoni basombayang akang for kita, minta pa Tuhan supaya buka akang jalang for kita supaya capat pi babale ulang pa ngoni. Tuhan Allah so kase hidop ulang pa Yesus dari tu kematian. Yesus itu torang pe Tuhan, Dia jadi Gembala yang Agung pa torang tu Dia pe domba-domba. Dia pe dara yang da tacura itu yang beking kuat tu perjanjian antara Tuhan Allah deng manusia for slama-lamanya. Kita minta pa Tuhan Allah yang bole beking manusia hidop deng hati tenang, supaya Dia bantu pa ngoni bole beking samua hal yang bae supaya ngoni bole beking tu Dia pe mau. Kita minta lei supaya lewat Yesus Kristus, Tuhan Allah bole bakarja pa torang pe hati supaya torang bole mo beking apa tu Dia suka. Puji deng hormat jo pa Dia sampe slama-lamanya. Amin. Sudara-sudara, kita minta deng sangat pa ngoni supaya ngoni trima deng bae tu kita pe nasehat-nasehat, biar lei kita pe surat ini cuma pende. Kita suka ngoni tau ini: Timotius, tu torang pe sudara yang percaya so bebas dari bui. Kong kalu dia so datang kamari pa kita, torang dua mo sama-sama pigi pa ngoni. Ngoni bilang akang tu torang pe salam pa samua tu ngoni pe pemimpin jemaat deng pa samua tu Tuhan pe orang-orang. Kong tu sudara-sudara yang percaya tu dari Italia da kirim salam lei for ngoni. Kita minta pa Tuhan supaya Dia kase tunjung tu Dia pe bae pa ngoni samua. Salam dari kita, Yakobus. Kita ini ja beking tu Tuhan Allah deng Tuhan Yesus Kristus da suru pa kita. Ni surat for ngoni sudara-sudara dari dua blas suku Israel yang so percaya pa Yesus Kristus, tu da pi merantau ka sluru dunia. Kita pe sudara-sudara yang percaya, kalu ngoni dapa macam-macam cobaan, ngoni musti trima samua itu deng snang hati. Soalnya ngoni so tau kalu ngoni percaya pa Tuhan kong ngoni dapa macam-macam cobaan, tu cobaan-cobaan itu mo beking ngoni jadi lebe kuat batahang percaya. Ngoni musti trus batahang percaya rupa itu, supaya ngoni jadi butul-butul percaya, deng ngoni pe percaya mo jadi sempurna. Trus ngoni nyanda mo kurang apa-apa di samua hal. Kalu ada dari pa ngoni kurang tau mana tu bae yang dia musti beking, lebe bae dia minta dari pa Tuhan Allah. Kalu dia minta pa Tuhan Allah, Tuhan Allah mo kase tu dia da minta. Soalnya Tuhan Allah ja kase apa tu samua orang da minta deng talebe-lebe, deng lei nyanda ja pake syarat. Mar waktu orang baminta pa Tuhan, dia musti yakin pa Tuhan, dia nimbole ragu-ragu. Soalnya orang yang ragu-ragu, dia itu sama deng omba di laut yang kasana-kamari lantaran angin ja tiop. Tu orang yang rupa itu, jang bapikir kalu dia mo dapa apa-apa dari pa Tuhan. Soalnya dia itu orang yang badua hati, dia pe pikiran nyanda tetap pa Tuhan. Tu orang bagitu, de pe hidop nyanda mo tenang. Tu sudara yang percaya yang miskin, dia itu musti rasa bangga kalu Tuhan angka pa dia jadi orang yang penting. Kong tu orang kaya yang percaya lei, dia musti rasa bangga kalu Tuhan beking dia jadi orang biasa yang nyanda jadi apa-apa. Soalnya dia itu ini hari ada mar de pe eso dia so nyanda ada, sama deng tu rumpu yang babunga yang capat layu. Soalnya kalu matahari muncul kong de pe sinar yang panas kana di bunga, tu bunga itu jadi layu sampe de pe klopak ciri kong ilang de pe bagus. Bagitu lei deng tu orang kaya, waktu dia samantara sibuk deng de pe karja for cari doi lebe banya, dia pe hidop mo abis. Tu orang yang dapa cobaan kong batahang deng tetap percaya pa Tuhan, dia itu yang paling snang. Soalnya kalu dia tetap batahang sampe dia berhasil lewat samua tu cobaan, dia mo dapa hadia tu hidop kekal yang Tuhan Allah so janji mo kase pa orang-orang yang sayang pa Dia. Kalu ada orang yang dapa cobaan kong tagoda beking tu jaha, dia itu nimbole babilang bagini, “Tuhan Allah yang da coba pa kita!” Soalnya Tuhan Allah nyanda perna tagoda for beking tu jaha, kong Dia lei nyanda perna kase cobaan pa orang. Mar kalu orang tagoda for beking tu jaha, itu lantaran dia da iko akang tu de pe keinginan sandiri yang jaha, sama deng dia da lia tu umpan kong dia ambe lantaran dia tertarik. Kong kalu tu orang iko akang tu keinginan itu, itu de pe arti dia so beking dosa. Trus kalu tu dosa so kuasai pa dia, dia pe hidop so tapisa deng Tuhan for slama-lamanya. Sudara-sudara yang kita sayang, ngoni jang tatipu, bukang Tuhan tu da goda pa ngoni for beking tu jaha. Soalnya samua yang bae deng sempurna tu torang da dapa, itu datang dari Tuhan di sorga. Dia itu torang pe Bapa yang da beking tu benda-benda yang ja kase trang di langit. Tu benda-benda itu ja bruba-bruba, laengkali basinar deng laengkali nyanda, mar Tuhan nyanda bagitu, Dia nyanda perna bruba, Dia slalu bae. Tuhan beking torang jadi Dia pe anak-anak lewat Dia pe ajaran yang butul, itu Dia pe mau supaya torang jadi hasil yang paling utama dari samua tu Dia da beking. Sudara-sudara yang kita sayang, ngoni musti inga tu hal-hal ini: tiap orang lebe bae badengar jo lebe dulu waktu ada orang yang samantara bicara, dia jang capat babicara, deng lei dia jang capat mara. Soalnya kalu orang mara, dia nyanda mo beking tu butul yang Tuhan Allah suka dia mo beking. Jadi ngoni musti brenti beking samua yang besae deng tu jaha yang pe banya itu. Ngoni musti trima tu Tuhan pe firman deng hati yang nyanda sombong. Tu firman yang Tuhan da se tanang pa ngoni pe hati itu ada kuasa for mo se slamat pa ngoni. Ngoni jang cuma ja dengar tu Tuhan pe firman mar ngoni musti ja beking itu. Soalnya kalu ngoni nyanda beking tu firman, itu de pe arti ngoni tipu tu ngoni pe diri sandiri. Tu orang yang cuma dengar tu firman mar nyanda ja beking, dia itu sama deng orang yang da tarukira bae-bae de pe muka yang sebenarnya di muka kaca. Dia lia dia pe muka di kaca, mar abis itu dia pigi kong dia iko lupa bagimana de pe muka itu pe model. Mar kalu orang cari tau deng tarukira bae-bae kong beking tu firman bukang cuma dengar kong lupa, pasti Tuhan mo beking dia jadi orang yang paling snang. Tu Tuhan pe firman, itu ajaran yang sempurna, tu ajaran yang bole mo bantu se lapas orang dari dosa. Kalu orang pikir dia iko pa Tuhan, mar dia nyanda ja jaga de pe mulu, dia itu tipu de pe diri sandiri, itu de pe arti nyanda ada de pe guna dia iko pa Tuhan. Mar orang butul-butul iko pa Tuhan Allah deng de pe kalakuan bae di muka pa Tuhan Allah tu torang pe Bapa, kalu dia itu bagini: pi tolong tu anak-anak yang so nyanda ada orang tua deng tu janda-janda yang mendrita, deng lei jaga diri supaya nyanda tapengaru deng tu cara hidop yang jaha tu ada di dunia ini. Kita pe sudara-sudara, torang so percaya pa Yesus Kristus, tu torang pe Tuhan yang luar biasa. So itu torang nimbole se beda-beda orang. De pe conto, ada orang kaya maso pa ngoni pe tampa bakumpul for baibada. Dia da pake cincin mas deng baju yang bagus deng mahal. Kong maso lei tu orang miskin ka situ. Tu orang miskin itu da pake baju besae. Kong pa tu orang yang da pake baju bagus deng mahal itu ngoni sambut deng hormat, trus bilang pa dia, “Mari bapak, dudu jo di tampa yang bagus ini!” Mar pa tu orang miskin itu ngoni bilang, “Badiri jo di sana!” ato “Dudu jo di lante di dekat kita pe tampa kaki!” Deng beking bagitu, ngoni so se beda-beda orang kong so jadi hakim deng maksut yang jaha. Sudara-sudara yang kita sayang, dengar akang tu kita mo bilang ini: Tuhan so pili tu orang-orang yang dunia ja anggap miskin supaya dorang percaya kuat pa Dia. Dorang itu yang nanti mo jadi orang-orang dari Tuhan Allah yang Berkuasa sbagai Raja, itu sama deng tu Dia da janji pa samua orang yang sayang pa Dia. Mar ngoni da hina tu orang-orang miskin. Padahal tu orang-orang kaya yang justru ja tindas pa ngoni kong bawa pa ngoni ka pengadilan for urus pa ngoni di situ. Dorang itu lei yang ja hojat tu Nama yang luar biasa. Kong lewat Nama itu, ngoni jadi Tuhan punya. Kalu ngoni beking tu atoran yang paling penting tu da tulis di Kitab Suci, ngoni so beking tu bae. Tu atoran itu pe bunyi bagini, “Sayang jo pa orang laeng sama deng ngoni sayang pa ngoni pe diri sandiri.” Mar kalu ngoni ja se beda-beda orang, ngoni so beking dosa. Deng bagitu ngoni so langgar tu atoran-atoran di Kitab Suci. Soalnya sapa jo yang beking samua Tuhan Allah pe atoran-atoran mar kalu dia langgar satu jo dari tu atoran itu, dia so langgar samua atoran. Soalnya Tuhan Allah perna bilang, “Jang bersina,” deng Dia lei bilang, “Jang babunung.” Jadi biar ngoni nyanda bersina mar ngoni da babunung orang, itu sama jo deng ngoni da langgar samua tu Tuhan Allah pe atoran. So itu torang musti hati-hati kalu babicara deng beking sesuatu, lantaran torang tau kalu nanti Tuhan mo adili pa samua orang pake tu hukum yang bole bantu se lapas manusia dari dosa. Soalnya nanti waktu Tuhan mo adili pa manusia, Dia nyanda mo rasa kasiang pa orang-orang yang nyanda ada rasa kasiang pa orang laeng. Mar pa orang-orang yang so se tunjung tu dong pe rasa kasiang pa orang laeng, Tuhan nyanda mo hukum pa dorang. Kita pe sudara-sudara yang percaya, kalu satu orang bilang dia percaya pa Tuhan, mar dia nyanda ja beking tu bae, itu sama deng de pe percaya pa Tuhan nyanda ada de pe guna kong dia nyanda mo slamat. De pe conto bagini: ada ngoni pe sudara laki-laki ato parampuang nyanda ada baju deng nyanda cukup makanan for mo makang hari-hari. Kong ngoni cuma da bilang pa dia, “Pigi jo deng bae-bae. Torang harap ngana da pake baju supaya nyanda rasa dingin deng lei cukup makanan supaya bole mo kanyang.” Tu ngoni da bilang itu nyanda ada de pe guna lantaran ngoni nyanda bantu apa tu dia pe perlu. Bagitu lei deng torang pe percaya pa Tuhan. Kalu torang percaya mar nyanda ja beking tu bae, tu torang pe percaya itu nyanda ada de pe guna. Mar ada orang stou yang mo bilang, “Ngana percaya pa Yesus, mar kita ja beking tu bae pa orang laeng.” Pa tu orang yang bilang bagitu, kita mo bilang, “Ngoni nyanda dapa se bukti pa kita kalu orang butul-butul percaya pa Tuhan kalu dia nyanda ja beking tu bae pa orang laeng. Mar kita mo se tunjung tu kita pe percaya pa Tuhan deng cara ja beking tu bae pa orang laeng.” Ngoni percaya kalu cuma ada satu Tuhan Allah. Itu bagus! Mar tu setang-setang lei percaya tu hal itu kong dorang tako sampe totofore. Hei ngoni orang-orang yang nintau apa-apa! Kalu orang percaya pa Tuhan mar nyanda ja beking tu bae pa orang laeng, dia pe percaya itu nyanda ada de pe guna. De pe conto tu torang pe nene moyang Abraham. Dulu Tuhan Allah suru pa Abraham taru de pe anak Ishak di tampa ja kase korban persembahan for mo jadi korban persembahan pa Tuhan. Abraham beking tu Tuhan da suru itu, kong Tuhan bilang kalu Abraham itu orang yang butul. Jadi ngoni tau kalu Abraham da beking dua hal ini: dia percaya pa Tuhan deng lei dia ja beking tu Tuhan da suru pa dia, deng bagitu Abraham pe percaya pa Tuhan jadi sempurna lantaran dia beking tu Tuhan da suru. Jadi deng Abraham beking bagitu, apa tu da tulis dulu di Kitab Suci itu so jadi gnap. Bagini tu da tatulis, “Abraham percaya pa Tuhan Allah kong Tuhan beking Abraham jadi orang yang butul di muka pa Dia.” So itu no ja bilang kalu tu Abraham itu Tuhan Allah pe tamang. Jadi torang bole tau kalu Tuhan Allah beking torang jadi orang yang butul di muka pa Dia bukang cuma lantaran torang bilang percaya pa Dia, mar lantaran torang percaya deng lei ja beking tu bae pa orang laeng. Ada lei tu conto laeng bagini: dulu ada satu parampuang tu de pe nama Rahab. Dia itu parampuang nakal. Waktu itu, dia trima kong se sambunyi tu orang Israel pe mata-mata pa de pe ruma kong tolong pa dorang kaluar lewat jalang laeng supaya slamat. Deng Rahab beking bagitu, Tuhan beking dia jadi orang yang butul di muka pa Tuhan. Jadi orang yang bilang kalu dia percaya pa Tuhan, mar dia nyanda ja beking tu bae pa orang laeng, tu de pe percaya itu nyanda ada de pe guna. Dia itu sama deng orang yang so mati, ada badan mar so nyanda ada jiwa. Kita pe sudara-sudara yang percaya, dari pa ngoni ini jang banya tu coba mo jadi guru for se ajar tentang Tuhan. Soalnya ngoni tau kalu torang tu ja se ajar tentang Tuhan, torang ini mo dapa adili sampe di hal-hal yang paling kacili, lebe dari orang yang bukang guru. Torang samua ja beking sala dalam banya hal. Tu orang yang mampu kontrol de pe mulu sampe nyanda sala bicara, dia itu orang yang sempurna, tu bole kuasai dia pe diri sandiri. De pe conto tu kuda: kalu torang pake tali kekang pa kuda pe mulu kong torang hela tu tali, tu kuda pasti mo iko torang pe mau. Deng bagitu torang bole kontrol tu kuda itu. De pe conto laeng lei tu kapal basar. Biar lei tu kapal itu pe basar kong angin kuat ja tiop sampe tu kapal bagra, mar tu kamudi yang pe kacili bole mo kontrol tu kapal itu iko tu nahkoda pe mau. Bagitu lei deng torang pe lida. Torang pe lida itu cuma bagean yang kacili dari torang pe badan, mar tu lida bole mo bicara sombong tentang hal-hal yang basar. Bagitu lei deng api, biar dia cuma kacili mar dia bole jadi basar sampe bakar abis tu utang yang pe basar. Kong tu lida lei sama deng tu api. Pa torang pe badan ini, tu lida itu satu bagean yang bole beking torang pe badan ini jadi jaha. Tu lida bole beking rusak tu torang pe hidop enteru. Tu lida jadi jaha bagitu lantaran sama deng setang pe bos da taru akang api dari neraka. Manusia mampu se jinak macam-macam binatang, kong so ada yang se jinak binatang rupa ini: binatang liar, burung-burung, binatang yang bamaraya deng lei tu binatang yang hidop di laut. Mar nyanda ada satu orang yang mampu mo kontrol de pe lida. Tu lida itu jaha deng nyanda dapa mo kontrol, kong punung deng racun yang bole mo beking mati. Deng torang pe lida, torang ja puji pa Tuhan tu torang pe Bapa, deng lei torang ja pake tong pe lida for bakutuk pa manusia yang Tuhan Allah da beking iko Dia pe model. Torang ini cuma ada satu mulu mar tu kata-kata yang kaluar ada dua macam, tu kata-kata for puji pa Tuhan deng tu kata-kata for bakutuk pa orang. Sudara-sudara, mustinya torang nyanda bagitu. De pe conto tu mata aer, pasti nyanda ada aer tawar deng aer bagaram yang da kaluar dari satu mata aer. Sudara-sudara, bagitu lei deng tu conto laeng ini: nyanda mungkin tu pohong ara kong mo babua Zaitun. Kong tu batang anggor pasti lei nyanda mungkin mo babua ara. Bagitu lei tu mata aer yang de pe aer bagaram pasti nyanda mungkin mo kase kaluar aer tawar. Kalu di antara pa ngoni ada orang yang bijaksana deng pande, dia musti se tunjung itu lewat de pe cara hidop yang ja beking tu bae deng lewat de pe hati yang nyanda sombong. Mar kalu pa ngoni pe hati ada rasa mangiri deng cuma pikir diri sandiri, ngoni jang basombong babilang kalu ngoni itu bijaksana, deng ngoni jang se putar bale tu ajaran yang butul. Kalu ngoni pe bijaksana cuma rupa itu, itu bukang bijaksana yang dari pa Tuhan mar dari dunia ini, dari nafsu manusia deng dari setang-setang. Soalnya kalu ada rasa mangiri deng cuma pikir diri sandiri, di situ pasti mo ada kekacauan deng lei samua hal yang jaha. Mar tu orang yang de pe bijaksana dari pa Tuhan, dia itu bagini: pertama dia hidop deng hati yang bersi, dia suka baku bae, bae-bae pa orang, dengar-dengaran, punung deng rasa kasiang, deng ja beking tu hal-hal bae. Dia lei nyanda ja bapro pa sapa-sapa deng nyanda munafik. Kalu orang yang suka hidop baku bae bantu pa orang laeng sampe lei tu orang laeng itu hidop baku-baku bae, dia itu ja beking tu butul di muka pa Tuhan. Itu sama deng tu orang itu ada tanang bibit yang bagus kong dapa hasil yang bagus. Ngoni baku ambe deng bakalae satu deng laeng lantaran tu nafsu-nafsu yang besae tu ada pa ngoni pe diri. Tu nafsu-nafsu besae itu baku malawang pa ngoni pe diri for mo kuasai pa ngoni supaya ngoni beking tu jaha. Ngoni suka sesuatu mar nyanda dapa, kong ngoni babunung orang. Ngoni mangiri lantaran ngoni suka sesuatu, mar ngoni nyanda dapa itu. Kong ngoni baku ambe kong bakalae. Ngoni nyanda dapa apa-apa lantaran ngoni nyanda ja basombayang. Ato tare ngoni da basombayang mar ngoni nyanda dapa apa-apa lantaran ngoni pe tujuan da minta pa Tuhan itu sala, ngoni cuma minta for se snang tu ngoni pe diri sandiri. Hei ngoni, orang-orang yang nyanda setia! Ngoni pasti tau kalu ngoni ja iko tu dunia pe mau, itu de pe arti ngoni so baku musu deng Tuhan Allah. Sapa jo yang mo iko dunia pe mau, dia beking de pe diri jadi Tuhan Allah pe musu. Jang ngoni kira nyanda ada alasan tu da tulis di Kitab Suci bagini, “Roh yang Tuhan da taru pa torang pe hati, tu Roh itu cemburu kalu torang nyanda setia pa Tuhan.” Mar lebe basar tu Tuhan Allah pe bae yang Dia da se tunjung pa torang. So itu ada bilang di Kitab Suci bagini, “Tuhan Allah malawang tu orang-orang sombong, mar Dia se tunjung tu Dia pe bae pa orang-orang yang nyanda sombong.” So itu srahkan jo ngoni pe diri pa Tuhan Allah kong iko pa Dia. Ngoni lawang jo tu setang pe bos kong dia mo lari dari pa ngoni. Brusaha jo for hidop dekat deng Tuhan Allah kong Dia lei mo badekat pa ngoni. Hei ngoni orang-orang yang berdosa, kase bersi jo ngoni pe tangan dari ja beking tu jaha! Kong ngoni tu orang-orang yang badua hati, ngoni musti hidop deng hati yang bersi di muka pa Tuhan. Brenti jo tatawa deng snang lantaran ngoni pe dosa, mustinya ngoni ganti itu deng cara manyasal kong manangis lantaran sedi skali da beking tu dosa. Ngoni musti hidop deng hati yang nyanda sombong di muka pa Tuhan, kong deng bagitu Dia mo angka pa ngoni. Sudara-sudara, ngoni jang baku se besae nama. Sapa yang se besae de pe sudara pe nama ato batudu kalu tu sudara itu sala, itu sama deng dia se besae ato se sala tu Tuhan Allah pe atoran-atoran. Kalu ngoni beking bagitu, ngoni bukang orang yang ja iko tu Tuhan pe atoran-atoran, mar ngoni beking ngoni pe diri jadi hakim for se sala tu atoran-atoran itu. Cuma ada satu yang da kase tu atoran-atoran pa manusia, itu Tuhan sandiri, kong cuma Dia lei yang bole jadi hakim pa torang. Dia itu no yang ada kuasa for se slamat deng se binasa pa manusia. Mar ngoni, ngoni ini sapa so sampe bole mo hakimi pa orang laeng? Kong ngoni yang babilang, “Ni hari ato eso torang mo pigi ka satu kota. Di sana torang mo tinggal satu taong kong mo mancari for dapa doi.” Padahal, ngoni nintau apa tu mo jadi eso. Apa so ngoni pe hidop ini? Ngoni pe hidop sama deng uap yang cuma nyanda lama ada kong ilang. Mustinya ngoni babilang rupa ini, “Kalu ini Tuhan pe mau, torang bole hidop kong mo beking ini ato itu.” Mar ngoni tare bicara sombong for angka ngoni pe diri sandiri. Padahal tu bicara rupa itu dosa. Jadi kalu ada orang yang tau bagimana musti beking tu bae, mar dia nyanda beking, dia itu so berdosa. Hei orang-orang kaya, lebe bae skarang ngoni manangis kong bataria lantaran ngoni mo mendrita skali. Ngoni pe kekayaan so busu kong ngoni pe baju rayap so makang. Ngoni pe mas deng perak so bakarat. Tu karat itu jadi bukti kalu ngoni cuma da kumpul-kumpul tu harta. Nanti tu karat itu mo makang tu ngoni pe badan sama deng api yang bakar ngoni pe badan. Ngoni itu yang so kumpul-kumpul tu harta yang banya di hari-hari yang so dekat kiamat ini. Tarukira jo bae-bae, tu orang-orang karja yang so bapanen akang tu ngoni pe hasil kobong da mengelu lantaran ngoni nyanda ja bayar akang gaji. Kong tu dorang pe keluhan itu Tuhan Allah Yang Mahakuasa so dengar. Ngoni so hidop mewa deng bafoya-foya di dunia. Ngoni so beking puas tu ngoni pe diri sandiri, mar Tuhan mo hukum pa ngoni. Itu sama deng tu binatang yang da makang-makang sampe gode, tu siap for mo potong. Ngoni so hukum tu orang-orang yang ja beking tu butul di muka pa Tuhan, malatare ngoni bunung pa dorang, kong dorang nyanda mampu malawang pa ngoni. So itu sudara-sudara, ngoni musti basabar sampe Tuhan datang ulang. Co tarukira bae-bae, tu petani pe sabar da batunggu tu ujang mo turung waktu oras batanang deng oras tu tanaman babua. Dia sabar batunggu dapa hasil yang berharga dari tu de pe tana. Bagitu lei deng ngoni, ngoni musti basabar deng se kuat tu ngoni pe hati, lantaran so dekat tu waktu for Tuhan mo datang ulang. Sudara-sudara, ngoni jang bamengelu deng baku tudu, supaya ngoni nyanda dapa hukum. Co tarukira bae-bae, tu Hakim so dekat, Dia so badiri di muka pintu. Sudara-sudara, inga jo tu nabi-nabi dulu, dorang itu yang da kase tau tu Tuhan pe pesan pa orang-orang. Kong waktu itu, dorang dapa macam-macam susa, mar biar lei bagitu dorang tetap sabar. Jadi ngoni iko jo tu conto dari dorang pe sabar itu. Tarukira jo bae-bae, orang-orang yang batahang iko pa Tuhan biar lei da mangada tu siksa, dorang tu paling snang. Pasti ngoni so dengar tentang Ayub dulu. Dia dapa macam-macam siksa mar dia batahang da mangada tu samua itu, kong de pe laste Tuhan kase akang berkat pa dia. Tuhan beking bagitu lantaran Tuhan pangsayang skali deng Dia ja se tunjung Dia pe rasa kasiang pa orang. Kita pe sudara-sudara yang percaya, tu paling penting, ngoni jang basumpa demi langit, demi bumi ato demi apa jo yang ada. Kalu ngoni mo bilang “iyo,” lebe bae ngoni cuma bilang “iyo.” Kong kalu ngoni mo bilang “nyanda,” lebe bae ngoni cuma bilang “nyanda.” Kalu ngoni bilang bagitu, ngoni nyanda mo dapa hukum dari Tuhan. Kalu ada di antara pa ngoni yang mendrita, lebe bae dia basombayang. Kalu ada orang yang snang, lebe bae dia manyanyi puji pa Tuhan. Kalu ada di antara pa ngoni yang saki, lebe bae dia pangge tu penatua-penatua jemaat, supaya dorang basombayang akang deng goso minya pa dia pake Tuhan pe Nama lantaran ada kuasa. Kalu dorang basombayang deng percaya, tu orang saki itu mo bae. Tuhan mo beking tu orang itu butul-butul bae. Kong kalu dia da beking dosa, Tuhan mo se ampung tu de pe dosa. So itu lebe bae ngoni baku mangaku dosa jo deng baku sombayang supaya ngoni jadi bae. Tu sombayang dari orang yang ja beking tu butul di muka pa Tuhan, de pe sombayang pe kuasa pe basar skali kong mo ada de pe hasil. Co pikir tu nabi Elia! Dia itu manusia biasa sama deng torang. Dia sunggu-sunggu da basombayang minta nyanda turung ujang, kong memang nyanda ujang di bumi slama tiga stenga taong. Kong abis itu dia basombayang ulang minta ujang, trus dari langit turung ujang sampe tu tanaman se kaluar de pe hasil. Kita pe sudara-sudara yang percaya, kalu ada di antara pa ngoni yang dulu percaya pa Tuhan mar so nyanda iko lei tu ajaran yang butul, trus ada orang yang bantu pa dia supaya babale ulang di ajaran yang butul, ngoni musti tau kalu tu orang yang bantu de pe tamang supaya se tinggal tu jalang sesat itu kong babale ulang percaya tu ajaran yang butul, dia so bantu tu orang berdosa itu dapa ampung kong tu orang itu pe jiwa mo slamat dari hukuman tapisa deng Tuhan for slama-lamanya. Ni surat dari kita, Petrus, kita ini Kristus Yesus pe rasul tu Dia pe utusan. Surat ini for ngoni tu orang-orang yang Tuhan Allah da pili for percaya pa Dia. Ngoni ini pendatang tu da tinggal di tenga-tenga orang-orang Pontus, Galatia, Kapadokia, Asia deng Bitinia. Tuhan Allah tu torang pe Bapa da pili pa ngoni dari dulu iko Dia pe rencana. Tuhan Allah pe Roh da beking ngoni jadi kudus supaya ngoni mampu beking tu Yesus Kristus pe mau deng lei supaya ngoni bersi dari dosa lewat Yesus Kristus pe dara. Kita minta Tuhan Allah se tunjung Dia pe bae pa ngoni deng beking ngoni hidop deng hati tenang, kong samua itu kita minta supaya Dia beking deng talebe-lebe. Puji jo pa Tuhan Allah, Dia itu torang pe Tuhan Yesus Kristus pe Bapa. Dia pe rasa kasiang pa torang pe basar, so itu torang bole dapa hidop baru kong torang bole hidop deng punung harapan. Torang bole dapa tu hidop baru itu lantaran Yesus Kristus yang da mati mar so hidop ulang. Torang hidop deng punung harapan kalu torang pasti mo dapa warisan, tu warisan itu berkat-berkat dari pa Tuhan Allah yang da simpang for torang di sorga. Tu berkat-berkat itu nyanda mo rusak, nyanda mo kotor deng nyanda mo bruba. Tuhan Allah da jaga pa ngoni pake Dia pe kuasa lantaran ngoni pe percaya pa Dia. Dia jaga pa ngoni sampe ngoni mo dapa slamat dari hukuman dosa kong dapa hidop kekal. Tu slamat yang ngoni mo dapa itu Dia so se sadia for ngoni di hari kiamat. Tuhan da beking samua itu, so itu ngoni musti snang biar lei skarang ini for samantara waktu ngoni sedi lantaran dapa macam-macam siksa. Ngoni dapa tu siksa itu for se bukti kalu ngoni itu butul-butul percaya pa Tuhan. Ngoni pe percaya itu lebe berharga dari tu mas yang bole mo rusak. Kalu mo dapa mas murni, tu mas itu musti bakar dulu, bagitu lei deng ngoni pe percaya pa Tuhan musti dapa uji dulu deng macam-macam siksa. Kalu ngoni batahang percaya rupa itu, nanti waktu Yesus Kristus datang ulang, ngoni mo dapa puji deng hormat, deng Dia mo se tunjung tu ngoni pe luar biasa. Biar ngoni blum perna lia pa Yesus Kristus, ngoni sayang pa Dia. Kong biar lei skarang ini ngoni nyanda lia pa Dia, ngoni percaya pa Dia. Ngoni snang luar biasa, sampe ngoni so nyanda dapa bilang deng kata-kata tu ngoni pe rasa snang itu, lantaran ngoni so sampe pa ngoni pe tujuan percaya pa Yesus. Tu ngoni pe tujuan itu tu mo dapa slamat dari hukuman dosa. Dulu tu nabi-nabi da kase tau tentang Tuhan pe sayang yang nanti Dia mo kase tunjung pa ngoni supaya ngoni slamat dari tu hukuman dosa kong dapa hidop kekal. Kong waktu itu, tu nabi-nabi da cari tau deng cari mangarti bae-bae tentang tu Tuhan pe sayang itu. Kristus pe Roh yang ada pa tu nabi-nabi itu da kase tau tu siksa yang Kristus mo dapa nanti, deng lei tentang Dia pe luar biasa abis Dia dapa tu siksa itu. Jadi, tu nabi-nabi itu lei cari tau bagimana deng tempo apa itu mo jadi. Kristus pe Roh so kase tau itu pa tu nabi-nabi dulu kalu tu pesan yang dorang ja kase tau itu bukang for dorang pe diri sandiri mar for ngoni skarang ini. Tu dorang da kase tau itu, itu no tu Kabar Bae tentang Yesus Kristus. Kong skarang ini ada orang-orang tu Roh Kudus yang dari sorga da kuasai, kong dorang so kase tau tu Kabar Bae itu pa ngoni. Tu Kabar Bae itu, itu no tu hal-hal yang malaekat-malaekat suka mo cari tau. Sudara-sudara, lantaran ngoni so bole tau tu Kabar Bae itu, so itu ngoni musti siap for beking tu hal yang bae, ngoni musti kuasai diri supaya nyanda beking tu jaha, deng lei ngoni hidop punung deng harapan kalu Tuhan mo se tunjung Dia pe bae pa ngoni waktu Yesus Kristus datang ulang. Ngoni ini Tuhan pe anak-anak yang dengar-dengaran, kong ngoni jang iko akang tu nafsu yang besae yang kuasai pa ngoni dulu waktu ngoni blum percaya pa Tuhan. Mar ngoni musti kudus di samua ngoni pe hidop sama deng Tuhan Allah yang da pangge pa ngoni lei kudus. Soalnya di Kitab Suci da tulis bagini, “Ngoni musti hidop kudus, lantaran Kita ini kudus.” Ngoni pangge Tuhan Allah itu ‘Bapa’ waktu ngoni basombayang. Dia itu yang baadili iko apa tu orang da beking deng nyanda bapili-pili orang waktu Dia baadili. Jadi kalu ngoni pangge pa Dia ‘Bapa’, ngoni lei musti hidop deng rasa tako pa Dia slama ngoni masi manumpang di dunia ini. Ngoni musti hidop bagitu lantaran ngoni tau kalu ngoni so dapa tubus, ngoni so bebas dari tu cara hidop yang lama tu nyanda ada de pe guna. Tu cara hidop itu yang ngoni da iko dari ngoni pe nene moyang. Ngoni da dapa tubus bukang deng barang yang bole mo rusak rupa tu mas ato perak, mar ngoni dapa tubus deng Kristus pe dara yang berharga skali. Kristus itu sama deng domba pe anak yang nyanda ada cacat ato nyanda kurang apa-apa for kase korban persembahan. Kristus yang Tuhan Allah so pili seblum dunia ini ada. Kong di hari-hari yang so dekat deng kiamat ini, Kristus so datang ka dunia supaya ngoni samua bole mo slamat dari hukuman dosa. Jadi lantaran tu Kristus da beking itu, ngoni bole percaya pa Tuhan Allah. Tuhan Allah itu yang da kase hidop ulang pa Kristus waktu Dia mati, deng yang da beking Kristus dapa puji deng hormat. Deng bagitu, ngoni bole percaya deng baharap pa Tuhan Allah. Ngoni so beking kudus tu ngoni pe hidop deng cara ja iko tu ajaran yang butul, so itu ngoni bole basayang yang butul-butul pa ngoni pe sudara yang percaya. Jadi kita minta ngoni lebe baku sayang deng segnap hati. Soalnya ngoni ini so dapa hidop baru. Ngoni nyanda dapa tu hidop baru itu dari manusia yang memang mo mati, mar ngoni dapa tu hidop baru itu dari Tuhan Allah yang mo ada for slama-lamanya. Ngoni dapa hidop baru lantaran ngoni percaya deng tu Tuhan Allah pe firman. Tu firman itu mo tetap ada trus kong beking orang bole hidop deng Tuhan Allah for slama-lamanya. Soalnya di Kitab Suci da tulis bagini, “Manusia pe hidop deng de pe hebat nyanda mo batahang lama. Manusia sama deng tu rumpu yang babunga bagus, mar nyanda lama tu bunga ciri trus tu rumpu jadi kring, mar tu Tuhan pe firman tetap ada for slama-lamanya.” Tu firman itu no, tu Kabar Bae yang orang-orang so kase tau pa ngoni samua. Jadi, ngoni jang beking lei samua tu hal jaha, jang batipu, jang munafik, jang mangiri deng lei jang se besae orang laeng pe nama. Ngoni musti suka skali ajaran rohani yang butul tu Tuhan pe firman, itu sama deng tu bayi yang baru lahir suka skali minum susu yang murni. Kalu ngoni suka skali tu firman bagitu, ngoni pe percaya pa Tuhan mo lebe tatamba kuat sampe slamat kong dapa hidop kekal. Ngoni musti suka skali tu Tuhan pe firman lantaran ngoni so rasa tu Tuhan pe bae. Datang jo pa Yesus. Yesus da se sama deng batu yang hidop lantaran Dia yang beking manusia bole hidop. Dia itu sama deng batu yang orang so buang lantaran pikir nyanda berharga, mar di muka pa Tuhan Allah, Dia itu berharga skali deng Tuhan Allah tu da pili pa Dia. Kong ngoni ini lei so dapa hidop baru lantaran Yesus. Jadi, ngoni itu sama deng batu yang hidop, so itu kase jo tu ngoni pe diri pa Tuhan supaya Dia pake jadi Dia pe Roh pe tampa tinggal. Kong ngoni lei so jadi sama deng tu imam-imam yang ja kase korban persembahan pa Tuhan. Ngoni jadi imam-imam yang de pe hati bersi di muka pa Tuhan, kong ngoni kase tu persembahan yang Tuhan suka trima, trus Tuhan Allah mo trima tu ngoni pe persembahan itu lantaran apa yang Yesus Kristus da beking for torang samua. Soalnya di Kitab Suci da tulis bagini, “Tarukira jo bae-bae, Kita so pili satu batu yang berharga. Tu batu itu Kita so taru jadi batu fondasi yang paling penting di Yerusalem, tu ja bilang lei Sion. Kong sapa yang percaya pa Dia, nyanda mo kecewa.” Yesus Kristus itu berharga for orang-orang yang percaya pa Dia. Mar for tu orang-orang yang nyanda percaya pa Dia, ada tulis bagini di Kitab Suci tentang dorang, “Batu yang tukang-tukang bangunan da buang, batu itu so jadi batu fondasi yang paling penting.” Kong lei ada tu da tulis bagini, “Ada batu yang beking orang mo tasontong akang kong taplaka.” Jadi bagini: tu orang-orang yang nyanda percaya, dorang nyanda ja iko tu Tuhan pe firman, dorang itu sama deng orang-orang yang da tasontong di batu kong taplaka, dorang itu memang Tuhan so tentukan bagitu. Mar ngoni ini tu orang-orang yang Tuhan Allah so pili, ngoni so sama deng imam-imam yang ja layani pa Tuhan Allah tu torang pe Raja, ngoni tu bangsa yang hidop deng hati yang bersi di muka pa Tuhan, kong ngoni ini lei Tuhan punya. Ngoni jadi samua itu supaya ngoni bole kase tau pa orang-orang tu hal-hal luar biasa yang Tuhan so beking. So Dia no tu da pangge pa ngoni kaluar dari glap kong maso pa Dia pe trang yang ajaib. Dulu ngoni itu bukang Tuhan Allah punya, mar skarang so jadi Dia punya. Kong dulu lei ngoni blum trima tu Tuhan Allah pe rasa kasiang, mar skarang ngoni so trima tu Dia pe rasa kasiang itu. Sudara-sudara yang kita sayang, ngoni ini orang-orang pendatang deng orang-orang yang cuma samantara da tinggal di dunia ini. Kita se nasehat pa ngoni supaya ngoni bajao dari tu nafsu yang besae tu da baprang malawang tu ngoni pe keinginan hati yang suka beking tu butul. Ngoni musti hidop deng kalakuan yang bagus di muka pa tu orang-orang yang nyanda kanal pa Tuhan Allah supaya kalu dorang fitna ngoni itu ja beking tu jaha, dorang cuma mo dapa lia tu ngoni pe kalakuan yang bagus. Trus kalu dorang lia ngoni pe kalakuan yang bagitu, tu orang-orang yang nyanda kanal pa Tuhan Allah itu mo puji deng hormat pa Dia waktu Yesus Kristus datang ulang. Ngoni da iko pa Tuhan, so itu ngoni musti dengar-dengaran pa samua orang yang da pegang kuasa di pemerenta. Ngoni musti dengar-dengaran pa tu raja yang pegang kuasa paling tinggi, sampe pa orang-orang yang raja da suru pegang kuasa di bawa pa dia. Tu orang-orang itu yang dapa tugas mo hukum pa orang yang da beking jaha, deng lei puji pa orang yang da beking tu bae. Soalnya Tuhan Allah pe mau ngoni beking tu bae, supaya tu orang yang nintau apa-apa tentang tu Tuhan pe mau brenti ja bicara yang nyanda butul tentang ngoni. Ngoni ini orang bebas, ngoni hidop jo deng bebas kong jang pake tu ngoni pe hidop bebas for ja beking tu jaha. Mar lebe bae tare ngoni hidop jo jadi orang yang ja beking tu Tuhan Allah da suru. Ngoni musti hormat pa samua orang deng sayang jo tu ngoni pe sudara-sudara yang percaya. Ngoni lei musti tako pa Tuhan Allah deng hormat jo tu ngoni pe raja. Hei ngoni tu orang-orang karja, ngoni musti dengar-dengaran deng punung rasa hormat pa ngoni pe tuang. Ngoni musti beking itu pa ngoni pe tuang biar ngoni pe tuang yang pangbae, ato pa ngoni pe tuang yang pangjaha. Soalnya kalu dari pa ngoni ada yang mendrita biar nyanda beking sala apa-apa, kong kalu ngoni sabar mendrita lantaran ngoni da inga Tuhan pe mau, Tuhan Allah mo se tunjung De pe bae pa ngoni. Soalnya, kalu ngoni mendrita da dapa pukul lantaran beking dosa trus ngoni tetap sabar, apa ngoni mo dapa puji? Pasti nyanda to? Mar kalu ngoni da beking tu bae kong ngoni mendrita dapa pukul trus ngoni tetap sabar, itu pasti Tuhan Allah mo se tunjung tu Dia pe bae pa ngoni. Soalnya Tuhan Allah pangge pa ngoni for beking tu bae biar lei mendrita, lantaran Yesus lei so mendrita for ngoni. Yesus so kase conto for ngoni supaya ngoni iko tu Dia ja beking. Di Kitab Suci da tulis bagini tentang Dia, “Dia nyanda perna beking dosa, kong nyanda perna bicara dusta.” Waktu orang hina pa Dia, Dia nyanda balas hina pa tu orang itu. Waktu Dia dapa siksa, Dia nyanda bale baancam for mo babalas, mar Dia cuma da srahkan Dia pe diri pa Tuhan Allah yang baadili deng adil. Dia lei so tanggong tu torang pe dosa pa Dia pe badan sandiri waktu Dia mati di kayu salib. Deng bagitu torang bole bebas dari kuasa dosa, deng lei torang bole hidop ja beking tu butul di muka pa Tuhan Allah. Tu luka-luka yang Dia da dapa waktu itu, itu no yang beking torang jadi bae. Soalnya ngoni dulu sama deng domba yang so tailang akang jalang, mar skarang ngoni so babale pa Tuhan tu Gembala yang ja jaga pa ngoni pe jiwa. Ngoni tu bini-bini, ngoni musti dengar-dengaran pa ngoni pe laki. Deng bagitu, kalu ngoni pe laki ada yang nyanda ja iko Tuhan pe firman, biar ngoni nyanda kase tau tu firman pa dorang, dorang mo lia tu ngoni pe cara hidop yang bae, trus dorang itu mo jadi iko tu Tuhan pe firman lei. Dorang mo iko tu Tuhan pe firman waktu dorang lia tu ngoni pe cara hidop yang bersi di muka pa Tuhan, deng lei waktu dorang lia tu ngoni pe rasa hormat pa Tuhan deng pa orang. Kalu ngoni mo dapa lia cantik, jang cuma dapa lia cantik di luar tu sama deng ini: bagaya deng cara beking tu rambu bamodel-model, pake perhiasan mas deng baju yang talalu mahal. Mar kalu suka butul-butul cantik, musti yang dari dalam hati sama deng ini: tu hati yang nyanda sombong deng hati yang tenang. Itu no tu parampuang pe cantik yang nyanda mo ilang kong lei itu yang bagus skali di muka pa Tuhan Allah. Soalnya tu parampuang-parampuang jaman dulu yang hidop deng hati bersi da beking cantik dorang pe diri deng cara bagitu lei. Dorang itu parampuang-parampuang yang butul-butul da baharap deng yakin pa Tuhan Allah deng yang dengar-dengaran pa dong pe laki. De pe conto Sara. Dia ja beking samua tu Abraham ja suru pa dia kong dia ja bilang kalu de pe laki itu tuang. Kong ngoni tu parampuang-parampuang, ngoni bole mo bilang kalu ngoni ini Sara pe keturunan kalu ngoni ja beking tu bae sama rupa dia da beking deng nyanda tako kalu ada yang baancam pa ngoni. Bagitu lei ngoni tu laki-laki, ngoni musti hidop bae-bae deng ngoni pe bini, dorang itu nyanda sama kuat deng ngoni. Ngoni musti hormat tu ngoni pe bini yang sama-sama trima tu warisan hidop kekal yang Tuhan mo kase lantaran Dia sayang. Kalu ngoni hidop bagitu deng ngoni pe bini, Tuhan mo tetap dengar ngoni pe sombayang. De pe laste, kita minta pa ngoni supaya ngoni samua hidop satu hati. Kalu ada satu orang yang rasa susa, ngoni coba rasa sama deng tu dia da rasa itu. Ngoni lei musti basayang pa ngoni pe sudara yang percaya, se tunjung rasa kasiang pa samua orang, deng lei se tunjung hati yang nyanda sombong. Kong lei ngoni jang balas tu jaha deng jaha. Kalu ada orang bicara jaha tentang ngoni, ngoni jang balas bicara jaha tentang dorang. Malatare minta jo pa Tuhan supaya kase akang berkat pa dorang, lantaran Tuhan da pangge pa ngoni for kase berkat pa orang laeng, kong deng bagitu ngoni lei mo dapa berkat. Ngoni musti hidop bagitu lantaran di Kitab Suci da tulis bagini, “Sapa yang suka mo hidop snang deng suka mo lia de pe hari-hari bae, dia itu musti jaga de pe lida supaya nyanda bicara tu jaha, deng jaga de pe bibir supaya nyanda badusta. Dia musti bajao dari tu cara hidop yang jaha, kong beking tu bae. Dia lei musti brusaha sunggu-sunggu for mo hidop baku-baku bae deng orang laeng. Soalnya Tuhan pe mata ja tarukira pa orang-orang yang ja beking tu butul, deng Dia pe talinga ja badengar tu dorang pe sombayang-sombayang yang minta tolong. Mar Dia malawang pa tu orang-orang yang ja beking tu jaha.” Kalu ngoni brusaha ja beking tu bae, sapa yang mo beking hal-hal jaha pa ngoni? Nyanda ada to? Mar biar lei ngoni ja beking tu butul kong ngoni dapa siksa, ngoni itu mo jadi yang paling snang. Ngoni nyanda perlu tako deng kuatir pa tu orang-orang yang mo siksa pa ngoni. Mar ngoni hormat jo pa Kristus, Dia itu Tuhan yang baprenta pa ngoni pe hati. Kong kalu ada orang batanya kiapa ngoni baharap deng yakin pa Kristus, ngoni musti slalu siap for mo bajawab pa dorang. Kong waktu ngoni bajawab, ngoni musti bajawab deng nyanda kasar deng se tunjung tu hormat, deng ngoni pe hati musti bersi di muka samua orang. Kalu ngoni pe cara bajawab rupa itu, tu orang-orang yang bicara besae tentang ngoni yang percaya pa Kristus, dorang mo malo sandiri lantaran ngoni ja beking tu bae. Lebe bae ngoni mendrita lantaran ja beking tu bae kalu itu Tuhan Allah pe mau, daripada ngoni mendrita lantaran ja beking tu jaha. Soalnya Kristus so mati satu kali for se hapus torang pe dosa. Dia itu yang ja beking tu butul so mati for torang tu orang-orang yang nyanda ja beking tu butul, supaya Dia bole bawa pa torang datang pa Tuhan Allah. Dia da dapa bunung waktu Dia jadi manusia, mar tu Roh Kudus da kase hidop ulang pa Dia. Kong tu Roh Kudus itu da kuasai pa Kristus trus bawa pa Dia pi kase tau tu Tuhan Allah pe pesan pa roh-roh yang ada di satu tampa yang sama deng bui. Tu roh-roh itu roh dari orang yang dulu nyanda badengar pa Tuhan Allah waktu jaman Nuh. Waktu itu Nuh da beking kapal basar, samantara itu Tuhan deng sabar da tunggu pa manusia mo roba dorang pe kalakuan yang besae, mar dorang nyanda bruba. Kong waktu banjer basar datang, cuma ada dlapan orang tu da maso di kapal basar kong dapa slamat. Tu banjer basar waktu itu bole mo se sama deng baptisan skarang. Tu baptisan jadi tanda kalu Tuhan Allah so se slamat pa ngoni lewat Yesus Kristus pe hidop ulang. Tu baptisan itu bukang for se bersi ngoni pe badan dari tu kotor, mar for mo minta pa Tuhan Allah supaya ngoni pe hati jadi bersi. Skarang Yesus Kristus so nae ka sorga kong dudu di tampa yang paling terhormat tu di sabla kanan pa Tuhan Allah. Kong samua malaekat, samua yang berkuasa deng samua kekuatan ada di bawa pa Dia pe kekuasaan. Yesus Kristus so mendrita pa Dia pe badan, so itu ngoni lei musti se siap ngoni pe diri for mo trima tu pendritaan sama deng Dia. Soalnya sapa yang so mendrita pa de pe badan, dia itu so nyanda mo beking dosa lei. Jadi slama ngoni masi hidop di dunia, ngoni pake jo tu waktu itu for beking tu hal-hal yang iko Tuhan Allah pe mau, jang ngoni iko akang tu manusia pe nafsu besae. Soalnya dulu, ngoni so banya pake tu waktu for beking tu hal-hal yang orang-orang nyanda kanal pa Tuhan Allah suka ja beking. Waktu itu, ngoni da hidop rupa ini: iko tu keinginan-keinginan yang cabul, nafsu yang besae, ja bamabo, ja beking pesta mabo-mabo sampe ngoni beking tu hal-hal yang iko tu ngoni pe nafsu yang besae, deng ngoni ja semba tu opo-opo yang mustinya nimbole ngoni beking. Mar skarang ini orang-orang yang nyanda percaya pa Tuhan jadi heran, lantaran ngoni so nyanda iko lei sama-sama deng dorang for beking tu hal-hal jaha rupa itu sampe so nyanda ada batas, so itu dorang se besae tu ngoni pe nama. Mar nanti, dorang itu musti tanggong jawab pa Tuhan Allah tentang samua tu dorang da beking. Tuhan Allah so siap mo adili samua orang yang hidop deng yang mati. So itu no tu Kabar Bae da kase tau lei pa tu orang-orang yang so mati. Biar dorang itu dapa hukuman mati sama deng samua orang musti mati lantaran da beking dosa, dorang pe roh mo hidop di sorga iko Tuhan Allah pe mau. Tu hari kiamat so dekat. So itu, ngoni musti bapikir tenang deng kuasai diri supaya ngoni bole basombayang. Kong yang paling penting ngoni musti butul-butul baku sayang. Soalnya kalu torang baku sayang, torang so nyanda mo inga lei orang laeng pe sala yang banya pa torang. Ngoni lei trima jo orang laeng pa ngoni pe ruma deng nyanda bamengelu. Tiap orang dari pa ngoni so trima karunia dari Tuhan Allah, kong pake jo tu karunia itu for layani orang laeng, pake bae-bae itu lantaran Tuhan Allah tu da se tunjung tu Dia pe bae pa ngoni sampe Dia kase tu karunia-karunia itu. De pe conto bagini: kalu ada orang dapa karunia for kase tau tu Tuhan Allah pe firman pa orang-orang, apa tu orang itu ja kase tau musti iko tu Tuhan Allah pe firman. Kong kalu ada orang yang dapa karunia for bantu orang, dia pake jo tu karunia itu deng kekuatan yang Tuhan da kase pa dia. Jadi pake jo tu ngoni pe karunia dengan itu, supaya di samua hal Tuhan Allah mo dapa puji deng hormat lewat Yesus Kristus. Tuhan Allah itu memang luar biasa deng Dia pe kuasa ada sampe slama-lamanya. Amin. Sudara-sudara yang kita sayang, ngoni da dapa siksa yang brat skali yang mo uji ngoni pe iman supaya kuat. Mar jang ngoni heran kalu ngoni dapa siksa yang brat itu, jang ngoni pikir kalu cuma ngoni yang dapa siksa rupa itu. Lebe bae tare ngoni snang jo lantaran ngoni da rasa tu siksa sama deng tu siksa yang Yesus perna da rasa. Deng bagitu, ngoni mo snang deng sukacita waktu Yesus datang ulang kong torang dapa lia Dia pe luar biasa. Kong kalu ada orang hina pa ngoni lantaran ngoni da iko pa Kristus, ngoni itu paling snang lantaran tu Roh yang luar biasa tu Tuhan Allah pe Roh ada pa ngoni. Mar jang sampe ada dari pa ngoni yang dapa siksa lantaran dia da babunung, bapancuri, suka maso campur deng orang laeng pe urusan, ato lantaran da beking tu jaha yang laeng. Mar kalu ngoni dapa siksa lantaran ngoni ini orang Kristen, ngoni nyanda usa malo. Lebe bae ngoni puji deng hormat pa Tuhan Allah lantaran ngoni ini orang-orang yang so percaya pa Kristus. Soalnya skarang so de pe waktu for Tuhan Allah mo adili samua orang, kong Dia mo adili lebe dulu pa tu Dia pe orang-orang sandiri. Kong kalu Dia mo adili lebe dulu pa torang tu Dia pe orang-orang, bagimana lei deng tu hukuman nanti waktu Dia adili tu orang-orang yang nimau mo percaya deng tu Kabar Bae dari pa Dia? Di Kitab Suci da tulis bagini, “Tu orang-orang yang ja beking tu butul di muka pa Tuhan, dorang itu amper-amper nyanda mo slamat dari hukuman dosa. No kalu bagitu, bagimana dang deng tu orang-orang yang hidop jao dari Tuhan Allah deng tu orang-orang yang ja beking dosa? Dorang itu pasti lebe soe!” So itu, kalu ada orang yang dapa siksa lantaran itu Tuhan Allah pe mau, dia itu musti srahkan de pe diri pa Tuhan deng lei ja beking tu bae. Tuhan itu yang so beking samua kong Dia itu setia. Kita ini pemimpin jemaat, kong kita mo kase nasehat pa ngoni tu pemimpin-pemimpin jemaat, tu kita pe tamang-tamang karja. Kita ini da lia deng kita pe mata kapala sandiri waktu Kristus da dapa siksa dulu. Kong nanti waktu Kristus datang ulang, Dia mo se tunjung tu Dia pe luar biasa pa samua orang, trus kita ini tamaso dari tu orang-orang yang mo rasa tu Dia pe luar biasa itu. Jadi skarang, kita mo se nasehat pa ngoni bagini: ngoni jaga jo tu orang-orang yang percaya pa Kristus yang ngoni da pimpin, sama deng tu gembala da jaga de pe domba. Ngoni jaga jo pa dorang deng snang hati iko tu Tuhan Allah pe mau, bukang lantaran ngoni da dapa paksa ato bukang lantaran ngoni mo cari untung, mar ngoni jaga pa dorang lantaran ngoni memang butul-butul mo tolong pa dorang. Ngoni jang main prenta pa dorang yang Tuhan da kase percaya akang for ngoni pimpin, mar lebe bae ngoni jadi conto yang bae for dorang. Nanti waktu Kristus tu Gembala Agung itu so datang ulang, ngoni tu pemimpin jemaat mo dapa upah yang luar biasa, sama deng orang yang da dapa mahkota yang luar biasa, tu mahkota nyanda perna mo rusak. Bagitu lei kita se nasehat pa ngoni tu orang-orang muda, ngoni musti dengar-dengaran pa orang yang lebe tua. Ngoni samua musti hidop deng hati yang nyanda sombong satu deng laeng lantaran Tuhan Allah da bilang bagini di Kitab Suci, “Tuhan Allah malawang tu orang yang sombong, mar Dia kase tunjung Dia pe bae pa tu orang yang hidop nyanda sombong.” So itu, ngoni musti hidop nyanda sombong di muka pa Tuhan Allah yang berkuasa, supaya pas de pe waktu Tuhan mo angka pa ngoni for dapa hormat. Srahkan jo pa Tuhan samua hal yang beking ngoni kuatir, lantaran Dia itu farduli pa ngoni. Ngoni musti hati-hati kong bajaga-jaga! Setang pe bos tu ngoni pe musu itu da cari-cari orang for dia mo se ancor, itu sama deng tu singa yang da mangaung cari-cari mangsa for dia mo tlang. Ngoni musti malawang pa tu setang pe bos itu deng cara pegang kuat tu ngoni pe percaya. Soalnya ngoni lei tau kalu tu ngoni pe sudara yang percaya di dunia ini da rasa tu siksa yang sama deng tu ngoni da rasa. Mar tu siksa yang ngoni da rasa itu cuma samantara, kong abis itu, Tuhan Allah mo beking bae tu ngoni pe keadaan, mo beking kuat ngoni pe hati, mo beking ngoni mampu mo percaya, deng mo beking ngoni slalu tetap percaya pa Dia. So Dia itu tu Tuhan Allah yang ja se tunjung samua tu bae. Dia yang so pangge pa ngoni for jadi percaya pa Kristus, kong ngoni mo rasa tu Dia pe luar biasa for slama-lamanya. Dia itu yang berkuasa sampe slama-lamanya. Amin. Kita da tulis surat yang pende ini pa ngoni, kong Silas tu da bantu pa kita. Silas ini kita pe sudara yang percaya tu bole mo percaya akang. Ni surat kita tulis for kase smangat supaya ngoni tetap yakin tu butul tentang Tuhan Allah pe bae yang Dia se tunjung pa ngoni, kong ngoni musti tetap yakin pa Tuhan Allah pe bae itu. Kong jemaat di Babel da kirim salam for ngoni. Tuhan so pili pa dorang for iko pa Dia sama deng Dia so pili pa ngoni. Kong lei tu Markus yang kita so anggap kita pe anak, dia da kirim salam for ngoni. Ngoni musti baku kase salam sayang satu deng laeng. Kita minta pa Tuhan supaya torang samua yang percaya pa Kristus bole hidop deng hati tenang. Ni surat dari kita, Simon Petrus. Kita ini orang yang ja beking tu Yesus Kristus da suru, deng kita ini Kristus Yesus pe rasul tu Dia pe utusan. Surat ini for ngoni tu orang-orang yang sama-sama deng torang tu so percaya pa Yesus Kristus. Yesus Kristus, Dia itu Tuhan Allah deng Dia lei tu Juruslamat yang se slamat pa torang dari hukuman dosa. Dia yang beking ngoni jadi percaya sama deng torang lantaran Dia itu ja beking tu adil. Kita minta supaya Tuhan se tunjung tu Dia pe bae deng beking ngoni hidop deng hati tenang, kong samua itu Dia kase pa ngoni deng talebe-lebe. Ngoni mo trima samua itu lantaran ngoni kanal pa Tuhan Allah deng pa Tuhan Yesus. Tuhan pake Dia pe kuasa for kase pa torang samua hal yang torang perlu supaya torang bole hidop iko Dia pe mau. Tuhan da kase samua itu lantaran torang so kanal pa Dia. Tuhan yang da pangge pa torang for iko pa Dia lantaran Dia itu pangbae deng luar biasa. Kong lantaran Dia pe pangbae deng luar biasa itu, Dia kase pa torang samua janji yang bagus skali deng berharga. Tu janji-janji itu Tuhan kase supaya torang bebas dari tu nafsu yang besae tu beking rusak pa manusia, kong torang pe sifat bole mo jadi sama deng Tuhan pe sifat. So lantaran samua yang Tuhan da beking itu, torang yang so percaya jang cuma percaya, mar torang musti brusaha sunggu-sunggu hidop deng kalakuan yang pe bagus skali. Kong kalu torang so hidop deng kalakuan yang pe bagus skali, torang lei musti tau mana tu bae deng mana tu jaha. Kong kalu torang so tau mana tu bae deng mana tu jaha, torang lei musti kuasai torang pe diri. Trus kalu torang so kuasai torang pe diri, torang lei musti batahang percaya pa Tuhan biar dapa siksa. Kong kalu torang so batahang percaya pa Tuhan, torang lei musti hidop ja iko Tuhan Allah pe mau. Trus kalu torang so hidop ja iko Tuhan Allah pe mau, torang lei musti sayang pa torang pe sudara-sudara yang percaya. Kong kalu torang so sayang pa torang pe sudara-sudara yang percaya, torang lei musti sayang pa samua orang. Soalnya kalu ngoni hidop ja beking tu samua hal itu deng tamba trus ja beking itu, samua itu mo bantu pa ngoni yang so kanal pa Yesus Kristus tu torang pe Tuhan supaya ngoni bole berhasil hidop beking tu Dia pe mau. Mar tu orang-orang yang nyanda ja beking tu samua hal-hal itu, dorang pe cara bapikir pende, dorang itu sama jo deng orang buta. Dorang lupa kalu Tuhan so se ampung dong pe dosa-dosa yang dorang da beking dulu. Jadi kita pe sudara-sudara yang percaya, ngoni musti brusaha butul-butul beking tu samua yang kita da bilang itu. Deng ngoni beking itu, ngoni se tunjung kalu ngoni memang butul-butul Tuhan da pili deng da pangge for iko pa Dia. Soalnya deng ngoni hidop bagitu, ngoni nyanda mo se tinggal tu ngoni pe percaya, sama deng ngoni nyanda perna mo tasontong di batu kong jatung. Kalu ngoni beking samua hal itu, Tuhan Allah mo trima pa ngoni deng snang hati waktu ngoni maso pa Yesus Kristus pe krajaan, kong tu krajaan itu mo ada for slama-lamanya. Yesus Kristus itu torang pe Tuhan deng torang pe Juruslamat. So itu kita mo se inga trus pa ngoni tentang tu samua hal itu yang ngoni musti beking, biar ngoni so tau tu samua hal itu deng lei biar ngoni so iko tu ajaran yang butul yang ngoni so trima itu. Kong slama kita masi hidop, kita rasa itu kita pe kewajiban for se inga-inga trus pa ngoni tentang tu samua hal itu. Soalnya kita tau kalu so nyanda lama lei kita mo mati, lantaran Yesus Kristus tu torang pe Tuhan so kase tau itu pa kita. So itu kita mo brusaha for se inga pa ngoni, supaya nanti kalu kita so mati, ngoni bole mo inga trus tu samua hal itu. Torang so kase tau pa ngoni tentang Yesus Kristus pe kuasa deng tentang Dia lei mo datang ulang ka dunia. Kong tu torang da kase tau itu bukang da iko tu cirita-cirita dongeng yang orang-orang pande da beking, mar torang tu da lia deng tong pe mata kapala sandiri pa Yesus Kristus yang luar biasa itu. Tu suara yang torang da dengar itu beking torang lebe percaya apa tu nabi-nabi dulu da bilang tentang Kristus. Kong tu dorang da bilang itu bole mo se tunjung tu jalang yang butul, sama deng lampu yang bacahaya di tampa glap. So itu, lebe bae ngoni tarukira jo tu nabi-nabi da bilang itu sampe tu hari Kristus datang ulang, kong ngoni bole kanal pa Dia pa ngoni pe hati. Kristus mo datang ulang itu sama deng bintang timur yang muncul amper siang kong tu hari so mo trang. Ini yang penting tu ngoni musti tau: Di Kitab Suci, tu nabi-nabi dulu da tulis apa tu Tuhan da suru dorang kase tau pa orang-orang, dorang tulis itu nyanda iko dong pe pikiran sandiri. Soalnya tu pesan yang Tuhan da se tau pa tu nabi-nabi itu, itu nyanda iko manusia pe mau, mar tu Roh Kudus da kuasai pa nabi-nabi trus dorang da se tau tu Tuhan Allah pe pesan for orang-orang. Dulu di tenga-tenga pa Tuhan Allah pe orang-orang tu bangsa Israel ada nabi-nabi palsu, bagitu lei skarang mo muncul di tenga-tenga pa ngoni yang percaya pa Yesus tu guru-guru palsu. Tu guru-guru palsu itu mo kase ajar deng sambunyi-sambunyi tu ajaran-ajaran sesat yang beking rusak tu orang pe percaya. Kong bukang cuma itu lei, dorang mo manyangkal pa Tuhan kalu Tuhan itu bukang dorang pe Tuhan yang so se bebas pa dorang dari dosa-dosa. Samua tu guru-guru palsu da beking itu, cuma mo beking tare dong pe diri sandiri capat mo binasa. Kong banya orang mo iko tu guru-guru palsu pe kalakuan yang iko tu dong pe nafsu yang besae. So lantaran dorang itu, banya orang mo cirita besae tentang tu ajaran yang butul. Tu guru-guru palsu itu gila doi, jadi dorang mo se cirita tu cirita yang dorang da beking for tipu pa ngoni supaya dorang bole mo dapa untung dari pa ngoni. Mar tu hukuman for dorang yang ja beking bagitu so lama Tuhan sadia, dorang pasti mo binasa. Co ngoni pikir, dulu waktu malaekat-malaekat da beking dosa, Tuhan Allah hukum pa dorang, biar lei dorang itu malaekat. Tuhan buang pa dorang ka neraka kong ika deng rante di tampa yang glap di situ. Di tampa itu dorang dapa tahang sampe di hari waktu Tuhan mo adili pa samua. Bagitu lei deng tu orang-orang yang hidop jao dari pa Tuhan Allah waktu jaman Nuh dulu. Waktu itu, Tuhan Allah nyanda se biar dorang lapas dari hukuman mar Dia tetap hukum pa dorang deng aer bah. Kong cuma Nuh deng tu tuju orang de pe kluarga yang Tuhan da kase slamat dari tu aer bah lantaran Nuh itu orang yang ja kase tau pa orang-orang supaya dorang ja beking tu butul di muka pa Tuhan. Kong bagitu lei Tuhan hukum pa orang-orang yang hidop jao dari pa Dia tu ada di Sodom deng Gomora. Tuhan hukum deng cara bakar se abis tu Sodom deng Gomora sampe samua yang da di situ. Kong itu jadi pringatan apa tu mo jadi pa tu orang-orang yang hidop jao dari pa Tuhan di masa-masa brikut. Mar Tuhan da se slamat pa Lot, tu orang yang ja beking tu butul di muka pa Tuhan. Lot itu trus-trus mendrita lantaran tu orang-orang di sekitar pa dia pe cara hidop yang besae tu cuma iko dong pe nafsu. Soalnya, Lot tu orang yang ja beking tu butul itu da tinggal di tenga-tenga pa dorang tu orang-orang yang hidop iko dorang pe nafsu. Tiap hari dia da lia deng da dengar tu dorang pe kalakuan jaha sampe dia jadi mendrita skali lantaran dia itu orang yang ja beking tu butul. Jadi dari tu conto-conto itu, torang lia kalu Tuhan tau se slamat pa orang-orang yang ja beking tu butul kalu dorang dapa cobaan. Dia lei tau bagimana mo hukum tu orang-orang yang nyanda ja beking tu butul sampe tu hari Dia mo baadili pa samua orang, lebe-lebe lei pa tu orang-orang yang cuma hidop iko dong pe nafsu yang besae deng yang pandang enteng Tuhan Allah pe kuasa. Tu guru-guru palsu itu pe brani deng sombong sampe dorang nyanda tako-tako bahojat samua yang hidop mulia di sorga. Hele tu malaekat-malaekat sandiri, biar lei dorang lebe kuat deng lebe berkuasa dari tu guru-guru palsu itu, dorang nyanda brani bahojat tentang samua yang hidop mulia di sorga itu waktu dorang batuntut di muka pa Tuhan Allah. Mar tu guru-guru palsu itu, dorang bicara jaha tentang tu hal-hal yang dorang sandiri nyanda mangarti, sama deng tu binatang yang nyanda ada akal tu da se lahir cuma for mo dapa tangka trus dapa bunung. Tuhan mo hukum se binasa pa dorang, sama deng tu binatang liar yang manusia da bunung. Kong dorang mo dapa hukuman siksa skali lantaran tu kejahatan yang dorang perna da beking. Biar lei masi siang, dorang suka skali hidop snang-snang. Trus kalu ngoni beking acara makang-makang, dorang itu suka ja batipu orang kong di antara pa ngoni yang percaya, dorang itu sama deng kotoran deng noda. Kalu dorang lia pa parampuang, dorang suka mo bersina deng tu parampuang itu. Dorang nyanda perna puas ja beking dosa. Dorang ja goda tu orang-orang yang dong pe percaya pa Tuhan blum talalu kuat supaya jadi sesat. Dorang itu so tabiasa hidop sraka. Tuhan mo kutuk pa dorang. Dorang so se tinggal tu jalang yang butul kong iko tu jalang yang sesat. Dorang so iko tu nabi Bileam pe kalakuan. Tu Bileam itu Beor pe anak. Dia suka skali ja trima doi dari de pe kalakuan yang jaha itu. Mar lantaran tu de pe kalakuan jaha itu, dia dapa togor deng kras. Tu de pe keledai yang nintau babicara Tuhan beking babicara sama deng manusia, sampe dia nyanda jadi beking tu de pe rencana jaha itu, yang cuma nabi yang gila tu brani beking rencana itu. Tu guru-guru palsu itu nyanda ada de pe guna, dorang sama deng mata aer yang kring ato sama deng awan glap yang angin cuma da bawa sampe nyanda turung ujang. For dorang itu Tuhan so sadia akang tampa yang glap skali for mo hukum pa dorang. Soalnya dorang babicara sombong, dorang ja babilang tu kata-kata yang nyanda ada de pe guna, deng dorang pake tu keinginan cabul for tarek tu orang-orang yang baru percaya pa Tuhan supaya tu orang-orang itu babale ulang di jalang sesat. Dorang janji pa tu orang-orang yang baru percaya kalu tu orang-orang yang baru percaya itu bole mo jadi orang-orang yang bebas for nyanda ja beking lei tu atoran-atoran kong bole mo beking apa tu dorang suka mo beking. Padahal tu guru-guru palsu itu, dorang sandiri sama jo deng budak-budak lantaran dorang ja iko akang tu dong pe keinginan-keinginan yang beking rusak pa manusia, tu keinginan-keinginan itu kuasai pa dorang. Soalnya apa jo yang kuasai pa torang, torang so jadi budak dari tu da bakuasai pa torang itu. Kong kalu orang-orang so kanal pa torang pe Tuhan deng Juruslamat Yesus Kristus, dorang lei so lapas dari tu keinginan-keinginan dunia yang jaha. Mar kalu dorang bale ulang for iko akang tu keinginan-keinginan dunia itu, dorang pe keadaan nanti mo lebe soe dari tu pertama. So itu lebe bae kalu dorang itu nyanda perna tau tu cara hidop yang butul di muka pa Tuhan daripada dorang tau mar abis itu dorang bale pa dong pe cara hidop dulu kong nyanda iko lei tu prenta yang kudus yang so se tau pa dorang. For dorang itu, memang butul tu pribahasa yang da bilang bagini: “Anjing babale ulang pa de pe munta” deng “boke yang so se mandi babale ulang di pece-pece.” Sudara-sudara yang kita sayang, ini kita pe surat kadua yang kita da tulis for ngoni. Di dua surat itu, kita brusaha se inga pa ngoni supaya ngoni smangat bapikir tu hal-hal yang ngoni so tau, supaya ngoni bole inga tu kata-kata yang nabi-nabi kudus da bilang dulu, deng lei supaya ngoni inga tu prenta dari torang pe Tuhan deng Juruslamat yang rasul-rasul tu Dia pe utusan-utusan da kase tau pa ngoni. Tu paling penting yang ngoni musti tau bagini: di hari-hari seblum Tuhan mo datang ulang, mo muncul tu orang-orang yang pangbahina tu mo hina pa ngoni, dorang itu orang-orang yang hidop iko dorang pe nafsu yang besae. Dorang mo bilang bagini, “Tu Kristus bajanji kalu Dia mo datang ulang, mar skarang mana jo Dia? Soalnya dari dulu, dari jo tu waktu torang pe nene moyang mati sampe ni hari nyanda ada yang bruba, samua masi sama dari waktu ni dunia da beking sampe skarang.” Dorang bilang bagitu lantaran dorang sengaja nimau mo tau kalu dulu Tuhan Allah cuma bicara kong tu langit iko jadi, deng lei Dia cuma bicara, kong ni bumi jadi dari aer kong se pisa dari tu aer itu. Kong deng tu aer itu no dulu Tuhan se ancor ni bumi deng banjer basar. Trus Tuhan cuma bicara lei kong tu langit deng bumi yang ada skarang tetap dapa jaga, kong nanti waktu Tuhan mo adili samua orang, Tuhan lei mo se binasa tu orang-orang yang hidop jao dari pa Dia deng mo se abis ni dunia deng langit pake api. Mar sudara-sudara yang kita sayang, ada satu hal yang ngoni musti tarukira: di muka pa Tuhan Allah, satu hari sama deng sribu taong, deng sribu taong sama deng satu hari. Jadi bagini: ada orang yang anggap kalu Tuhan talalu lama mo beking Dia pe janji kalu tu Kristus mo datang ulang, mar Tuhan nyanda bagitu. Tuhan itu sabar deng ngoni, Dia suka samua orang ada waktu for mo bertobat, lantaran Dia nimau ada yang mo binasa biar lei cuma satu orang. Mar tempo apa Tuhan mo datang ulang nyanda ada yang tau, Dia mo datang kage-kage sama deng papancuri. Kong di hari itu tu langit mo abis, trus waktu itu jo mo ada bunyi pe kuat skali kong tu benda-benda di langit mo tabakar trus abis, kong bumi deng samua yang ada di bumi mo abis. Jadi kalu samua itu nanti mo abis deng cara bagitu, kira-kira torang mo hidop bagimana skarang? Tantu katu torang musti hidop deng hati bersi deng lei ja beking Tuhan Allah pe mau, waktu torang da samantara batunggu deng beking capat tu hari yang Tuhan Allah so tentukan. Di hari itu, tu langit mo ancor tabakar deng api, kong samua benda-benda di langit mo malele lantaran tu api pe panas. Mar Tuhan Allah so janji pa torang kalu Dia mo kase langit deng bumi yang baru, kong torang da tunggu-tunggu tu Dia pe janji itu. Di situ cuma ada orang-orang yang ja beking tu butul di muka pa Dia. So itu sudara-sudara yang kita sayang, samantara torang batunggu samua itu mo jadi, torang musti brusaha lei hidop tre deng hidop bae supaya nyanda ada orang bole se sala apa-apa, deng lei musti slalu ada hubungan bae deng Tuhan. Ngoni anggap jo kalu Tuhan pe sabar itu jadi kesempatan for ngoni bole percaya kong dapa slamat dari tu hukuman dosa. Itu samua sama deng Paulus da tulis lei for ngoni iko tu hikmat yang Tuhan da kase pa dia. Dia itu torang pe sudara yang percaya tu torang sayang. Paulus tulis tu hal-hal itu pa de pe samua surat. Memang ada bebrapa hal pa de pe surat-surat itu yang susa mo mangarti de pe maksut. Kong ada orang yang nyanda mangarti deng nyanda kuat dong pe percaya pa Tuhan da se putar bale tu Paulus pe maksut itu. Dorang se putar bale bukang cuma itu mar Tuhan pe firman yang laeng lei dorang se putar bale. Dorang itu mo binasa. Jadi sudara-sudara yang kita sayang, ngoni so tau samua tu guru-guru palsu da beking. So itu, ngoni musti hati-hati deng tu guru-guru palsu yang ja malawang tu butul itu, supaya ngoni nyanda iko akang tu dong pe ajaran yang sesat sampe ngoni nyanda percaya lei tu ajaran yang butul. Mar lebe bae tiap hari ngoni lebe rasa tu Tuhan pe bae, deng lei ngoni tiap hari lebe cari kanal butul pa torang pe Tuhan deng Juruslamat tu Yesus Kristus. Kong for Dia tu puji deng hormat dari skarang sampe slama-lamanya. Amin. Ni surat tentang firman yang bole beking orang hidop slama-lamanya deng Tuhan. Tu firman ini memang so ada dari dulu seblum Tuhan Allah da ciptakan ni dunia. Torang so dengar deng so lia pa Dia deng tong pe mata kapala sandiri, torang lei so pegang pa Dia deng tong pe tangan sandiri. Firman yang hidop itu ada sama-sama deng Bapa di sorga. Dia so datang kong torang so lia pa Dia. Kong torang mo basaksi deng kase tau pa ngoni bagimana ngoni bole mo dapa hidop kekal deng Dia. Skarang torang kase tau pa ngoni apa tu torang so lia deng so dengar dari pa Dia supaya ngoni bole ada hubungan dekat deng torang. Torang samua ini lei ada hubungan dekat deng Bapa, deng Dia pe Anak tu Yesus Kristus. Samua ini torang tulis supaya torang pe hati lebe snang. Ini tu brita yang torang so dengar dari pa Dia, kong torang se tau pa ngoni bagini: Tuhan Allah itu trang kong pa Dia itu sama skali nyanda ada tu glap. Kalu torang bilang torang so ada hubungan dekat deng Dia mar torang pe hidop masi di glap, torang so badusta kong torang nyanda ja beking tu butul. Mar kalu torang hidop di trang, sama deng Tuhan lei ada di trang, torang pasti mo ada hubungan dekat satu deng laeng, kong tu dara dari Yesus tu Anak Allah se bersi pa torang dari samua dosa. Kalu torang bilang torang nyanda ada dosa, torang so tipu tong pe diri sandiri kong tu butul nyanda ada pa torang. Kalu torang mangaku dosa pa Tuhan, Dia itu setia deng Dia pe janji deng Dia lei adil, so itu Dia mo kase ampung torang pe dosa-dosa deng mo se bersi pa torang dari samua tu jaha yang torang da beking. Kalu torang bilang torang nyanda perna beking dosa, itu sama jo deng torang bilang Dia itu pangbadusta kong lei Dia pe firman nyanda ada pa torang. Hei ngoni yang kita so anggap kita pe anak-anak, kita da tulis tentang tu hal-hal ini pa ngoni supaya ngoni jang beking dosa. Mar kalu ada orang yang beking dosa, ada tu mo bela pa dia di muka pa Bapa. Tu mo babela pa dia itu tu Yesus Kristus, Dia itu yang adil. Dia mati jadi korban supaya samua torang pe dosa dapa ampung. Mar bukang cuma torang pe dosa, samua orang di dunia ini lei pe dosa. Ini de pe bukti kalu torang kanal pa Tuhan, kalu torang ja beking Dia pe prenta-prenta. Sapa tu da bilang, “Kita kanal pa Tuhan” mar dia nyanda beking Tuhan pe prenta-prenta, dia itu pangbadusta kong tu ajaran yang butul nyanda ada pa dia. Mar orang yang ja beking tu Tuhan pe prenta, pa dia itu ada Tuhan Allah pe sayang yang beking dia bole basayang iko Tuhan pe mau. Deng bagitu torang tau kalu torang hidop satu deng Tuhan. Sapa jo yang bilang kalu dia hidop satu deng Tuhan, dia pe cara hidop lei musti sama deng Kristus pe cara hidop. Sudara-sudara yang kita sayang, tu kita da tulis ini bukang prenta baru for ngoni mar prenta lama yang ngoni so dengar dulu waktu ngoni baru percaya. Tu prenta lama itu, itu no tu firman yang ngoni so perna dengar. Mar tu prenta yang kita da tulis skarang ini, itu prenta baru lei for ngoni. Tu prenta baru itu butul, kong Yesus ja beking tu prenta itu deng ngoni lei ja beking itu. Soalnya tu glap so mulai ilang, kong tu trang yang butul so bacahaya. Sapa jo tu babilang kalu dia hidop di trang mar dia binci pa de pe sudara yang percaya, itu de pe arti dia masi hidop di glap sampe skarang. Sapa yang sayang pa de pe sudara yang percaya, dia tetap ada di dalam trang kong nyanda ada tu bole beking dia berdosa kong jadi sesat. Mar sapa yang binci pa de pe sudara yang percaya, dia itu hidop di glap kong dia nintau mo pigi ka mana, lantaran tu glap sama deng so beking buta pa dia. Hei ngoni yang kita so anggap kita pe anak-anak, kita tulis ni surat for ngoni lantaran ngoni pe dosa so dapa ampung lewat Yesus Kristus. Bapak-bapak, kita da tulis for ngoni lantaran ngoni so kanal pa Dia yang so ada dari dulu seblum dunia ini ada. Kita lei tulis for ngoni pemuda-pemuda lantaran ngoni so se kala setang pe bos. Anak-anak, kita da tulis for ngoni lantaran ngoni kanal pa Tuhan Allah tu torang pe Bapa. Bapak-bapak, kita tulis pa ngoni lantaran ngoni so kanal pa Dia yang so ada dari dulu seblum dunia ini ada. Kita lei tulis pa ngoni pemuda-pemuda lantaran ngoni pe iman kuat. Tu Tuhan Allah pe firman da hidop pa ngoni pe diri, deng ngoni so se kala tu setang pe bos. Ngoni nimbole sayang ni dunia yang jaha ini deng samua de pe isi. Kalu ngoni sayang ni dunia, ngoni nyanda sayang pa Tuhan Allah tu torang pe Bapa. Soalnya samua yang jaha yang ada di dunia ini, itu bukang dari Bapa mar itu dari dunia ini. Samua yang jaha itu bagini: nafsu yang besae, keinginan mata yang besae, deng ja se sombong de pe hidop. Ni dunia deng samua tu keinginan yang jaha samantara ilang, mar orang yang ja beking Tuhan Allah pe mau, dia mo hidop deng Tuhan slama-lamanya. Kita pe anak-anak dalam Tuhan, ini waktu so dekat mo kiamat. Ngoni so perna dengar kalu tu antiKristus mo datang. Skarang memang so banya tu da muncul, itu de pe tanda kalu tu kiamat so dekat. Memang dorang itu muncul dari antara pa torang, mar dorang itu bukang torang pe orang. Soalnya kalu dorang memang torang pe orang, tantu dorang tetap sama-sama deng torang. Mar deng dorang kaluar dari pa torang, itu jadi tanda kalu dorang itu bukang torang pe orang. Mar Yesus Kristus Yang Kudus so kase tu Roh Kudus for kuasai pa ngoni, so itu ngoni tau tu ajaran yang butul. Kita tulis ini pa ngoni bukang lantaran ngoni nintau tu ajaran yang butul, malatare lantaran ngoni tau tu ajaran itu deng ngoni lei tau kalu nyanda ada dusta di ajaran yang butul itu. Sapa tu pangbadusta? Tantu katu tu orang yang manyangkal kalu Yesus itu Kristus, tu Raja yang se slamat pa manusia. Tu orang yang manyangkal itu no tu antiKristus, dia itu yang manyangkal pa Bapa deng lei pa Anak. Soalnya sapa yang manyangkal pa Anak, dia nyanda hidop satu deng Bapa. Mar sapa yang mangaku percaya pa Anak, tantu lei dia so ada hubungan dekat deng Bapa. Jadi apa tu ngoni so dengar dari dulu waktu ngoni jadi percaya, itu musti ngoni simpang bae-bae pa ngoni pe hati. Deng bagitu ngoni mo tetap hidop satu deng Anak deng lei Bapa. Kong ini tu janji yang Dia sandiri so janji pa torang, kalu torang ini mo dapa hidop kekal. Tu samua yang kita da tulis pa ngoni ini tentang tu orang-orang yang da brusaha mo beking sesat pa ngoni. Kong tentang ngoni sandiri, Tuhan so kase tu Roh Kudus di atas pa ngoni for kuasai pa ngoni. Tu Roh itu masi tetap ada pa ngoni, jadi so nyanda perlu lei orang laeng mo ajar pa ngoni. Soalnya tu Roh Kudus tu da kuasai pa ngoni so ajar pa ngoni tentang samua hal, kong apa tu Dia da se ajar itu butul, bukang dusta. Jadi ngoni so trima tu ajaran itu dari Dia, so itu ngoni musti tetap hidop satu deng Tuhan. Hei ngoni yang kita so anggap kita pe anak-anak, ngoni musti tetap hidop satu deng Yesus Kristus supaya kalu Dia datang ulang, torang nyanda tako deng nyanda malo mo mangada pa Dia. Kalu ngoni tau Dia itu butul, ngoni lei musti tau kalu tiap orang yang ja beking tu butul di muka pa Tuhan, tu orang itu so jadi Tuhan pe anak-anak. Co ngoni pikir, pe basar skali Bapa pe sayang pa torang, sampe Dia bilang torang ini Dia pe anak-anak, kong memang torang ini Dia pe anak-anak. So itu, orang-orang yang ja iko dunia yang jaha nyanda kanal pa torang lantaran dorang yang dari dunia ini nyanda kanal pa Bapa. Sudara-sudara yang kita sayang, skarang torang ini Tuhan Allah pe anak-anak, mar torang blum tau persis bagimana torang pe hidop nanti. Yang torang tau, kalu nanti Kristus so datang ulang, torang mo jadi sama deng Dia, lantaran torang mo lia pa Dia deng Dia pe keadaan yang sebenarnya. Orang yang da baharap bagitu pa Kristus, tu orang itu musti jaga tu de pe hidop supaya suci sama deng Dia itu suci. Orang yang ja beking dosa, dia itu lei malawang Tuhan pe prenta. Soalnya kalu orang nyanda beking Tuhan pe prenta, itu no tu dosa. Ngoni tau kalu Dia datang for mo se hapus tu manusia pe dosa-dosa, kong pa Dia itu nyanda ada dosa. Tiap orang yang hidop satu deng Tuhan, dia itu nyanda trus-trus ja beking dosa. Soalnya kalu ada orang yang trus-trus ja beking dosa, dia nyanda perna lia deng nyanda perna kanal pa Yesus. Hei ngoni yang kita so anggap kita pe anak-anak, jang sampe orang laeng beking sesat pa ngoni. Sapa yang ja beking tu butul di muka pa Tuhan Allah, dia itu orang yang butul sama deng Kristus itu butul. Mar sapa yang trus-trus ja beking dosa, dia itu setang pe bos da kuasai, lantaran tu setang pe bos dari dulu ja beking dosa. Kong Yesus tu Anak Allah datang for se ancor samua tu setang pe bos ja beking. Orang yang so jadi Tuhan Allah pe anak, dia itu nyanda trus-trus ja beking dosa lantaran Tuhan Allah da hidop pa de pe diri, sama deng Tuhan da tanang bibit pa orang itu pe hati kong da batumbu. Dia so nyanda trus-trus ja beking dosa, lantaran Tuhan Allah so beking dia jadi Tuhan pe anak. Torang bole dapa tau mana tu Tuhan Allah pe anak-anak deng mana tu setang pe bos pe anak-anak. Tu orang yang nyanda ja beking tu butul di muka pa Tuhan Allah deng nyanda sayang pa de pe sudara yang percaya, dia itu bukang Tuhan Allah pe anak. Ini tu brita yang ngoni so dengar dari dulu waktu ngoni baru percaya: ngoni musti baku-baku sayang. Ngoni jang sama deng Kain yang da bunung de pe ade sandiri. Dia itu setang pe bos da kuasai, sampe dia bunung de pe ade. Jadi kiapa so Kain da bunung de pe ade? Kain da bunung dia pe ade lantaran Kain da beking tu hal-hal yang jaha di mata Tuhan, mar de pe ade da beking tu butul. Sudara-sudara, ngoni jang heran kalu tu orang yang ja iko tu dunia pe mau ini binci pa ngoni. Dulu torang pe hidop tapisa deng Tuhan, itu sama deng torang pe rohani so mati. Mar skarang torang tau kalu torang so dapa tu hidop kekal lantaran torang sayang pa tong pe sudara yang percaya. Mar sapa yang nyanda ja basayang, dia pe hidop tetap tapisa dari Tuhan sampe slama-lamanya, sama deng de pe rohani tetap mati. Sapa yang binci pa de pe sudara yang percaya, dia itu sama deng pangbabunung orang. Kong ngoni tau kalu nyanda ada tu pangbabunung orang yang mo dapa hidop kekal. Torang tau tu sayang yang butul dari Kristus pe sayang. Bagini tu Dia pe sayang: Dia so kase De pe diri sampe mati for samua orang. So itu torang lei musti siap for mo kase tong pe diri sampe mati for tong pe sudara-sudara yang percaya. Kalu ada orang yang de pe harta talebe, kong dia lia de pe sudara yang percaya pe hidop susa mar dia nyanda tolong, itu de pe arti Tuhan Allah pe sayang nyanda ada pa dia. Hei ngoni yang kita so anggap kita pe anak-anak, kalu torang basayang, jang cuma di mulu ato cuma bilang sayang mar torang nyanda beking apa-apa. Mari jo torang butul-butul basayang pa orang deng cara tolong pa dia. Kalu torang basayang deng cara bagitu, torang bole tau kalu torang ini da iko tu butul, deng lei torang pe hati jadi tenang di muka pa Tuhan Allah, biar lei torang pe hati batudu kalu torang berdosa, Tuhan Allah itu lebe basar dari torang pe hati yang batudu, deng Dia tau samua yang ada. Sudara-sudara yang kita sayang, kalu torang pe hati nyanda batudu pa torang, torang lei nyanda mo tako di muka pa Tuhan Allah. Kong apa jo yang torang da minta pa Dia, torang mo dapa. Soalnya torang ja beking Dia pe prenta-prenta, deng ja beking tu hal-hal yang beking snang Dia pe hati. Kong ini tu Tuhan Allah pe prenta: torang musti percaya pa Yesus Kristus tu Dia pe Anak, deng lei torang musti baku sayang sama deng tu Kristus da prenta pa torang. Jadi sapa yang iko Tuhan pe prenta-prenta, dia itu hidop satu deng Tuhan kong Tuhan lei hidop satu deng dia. Kong torang bole tau kalu Tuhan hidop satu deng torang, lantaran Tuhan so kase Dia pe Roh pa torang. Sudara-sudara yang kita sayang, ngoni jang percaya pa samua orang yang babilang kalu Tuhan Allah pe Roh ada pa dorang. Mar lebe bae ngoni priksa dulu pa dorang supaya tau kalu tu roh yang ada pa dorang itu butul-butul dari Tuhan Allah ato nyanda. Kita bilang bagitu lantaran banya nabi palsu so muncul kong pigi kamana-mana di dunia ini. Bagini de pe cara supaya torang bole tau kalu Tuhan Allah pe Roh ada pa orang ato nyanda: orang yang mangaku kalu Yesus Kristus so datang ka dunia ini jadi manusia, tu orang itu ada Tuhan Allah pe Roh. Mar tu orang yang nyanda mangaku sama deng itu tentang Yesus, pa dia itu nyanda ada Tuhan Allah pe Roh. Tu roh yang ada pa orang itu roh antiKristus. Ngoni so dengar kalu tu roh itu mo datang kong skarang dia so ada di dunia ini. Hei ngoni yang kita so anggap kita pe anak-anak, ngoni itu dari Tuhan Allah. Ngoni so se kala tu nabi-nabi palsu, lantaran tu Roh yang ada pa ngoni de pe kuasa lebe basar dari tu roh yang ada di dunia ini. Tu nabi-nabi palsu itu dari dunia ini, so itu dorang cuma babicara tentang hal-hal duniawi. Kong tu orang-orang di dunia yang nyanda kanal pa Tuhan badengar pa tu nabi-nabi palsu itu. Torang ini dari Tuhan Allah. So itu orang yang kanal pa Tuhan Allah, dia itu badengar pa torang. Mar orang yang nyanda badengar pa torang, dia itu nyanda kanal pa Tuhan Allah. Bagitu no sampe torang bole se beda antara tu Tuhan Allah pe Roh yang ja se ajar tu butul deng tu roh yang ja se ajar tu sesat. Sudara-sudara yang kita sayang, mari jo torang baku-baku sayang. Soalnya tu sayang itu dari Tuhan Allah, kong sapa jo yang ja basayang, dia itu so kanal Tuhan Allah kong so jadi Dia pe anak. Mar sapa yang nyanda basayang, dia nyanda kanal pa Tuhan Allah lantaran Tuhan Allah itu ja basayang. Tuhan Allah so kase tunjung kalu Dia sayang pa torang deng cara bagini: Dia utus De pe Anak satu-satunya ka dunia ini, supaya lewat tu Anak itu torang bole hidop deng Tuhan sampe slama-lamanya. Bagini tu sayang: bukang kalu torang so sayang pa Tuhan Allah, mar Tuhan Allah yang so sayang pa torang. Dia so utus Dia pe Anak jadi korban supaya lewat De pe anak itu torang pe dosa-dosa bole mo dapa ampung. Sudara-sudara yang kita sayang, kalu Tuhan Allah sayang pa torang sama deng itu, torang lei musti baku-baku sayang. Nyanda ada satu orang yang perna lia pa Tuhan Allah. Mar kalu torang baku-baku sayang, de pe arti Tuhan hidop satu deng torang kong Dia pe sayang beking torang butul-butul basayang iko Dia pe mau. Tuhan Allah so kase Dia pe Roh pa torang, deng bagitu torang bole tau kalu torang tetap hidop satu deng Tuhan Allah kong Tuhan hidop satu deng torang. Trus torang sandiri so lia kong basaksi kalu Bapa so utus Dia pe Anak for se slamat ni dunia ini. Sapa yang mangaku kalu Yesus itu Anak Allah, Tuhan Allah tetap hidop satu deng dia, kong tu orang itu hidop satu deng Tuhan Allah. Torang so tau deng percaya tentang Tuhan Allah pe sayang pa torang. Tuhan Allah ja basayang. Sapa yang ja basayang, tu orang itu tetap hidop satu deng Tuhan Allah, kong Tuhan Allah lei hidop satu deng dia. Tuhan pe sayang itu ada pa torang. Tu Dia pe sayang itu yang beking torang bole basayang iko De pe mau supaya nanti kalu Tuhan mo adili samua orang, torang nyanda mo tako lantaran torang pe hidop di dunia ini sama deng Tuhan Yesus pe hidop. Kalu torang basayang, torang nyanda ada rasa tako. Soalnya Tuhan Allah beking torang bole basayang iko Dia pe mau, itu no yang beking ilang tu rasa tako. Kalu orang rasa tako Tuhan mo hukum pa dia, itu de pe arti dia blum ada Tuhan Allah pe sayang yang bole beking dia basayang iko Tuhan pe mau. Torang basayang, lantaran Tuhan Allah so lebe dulu sayang pa torang. Kalu ada orang bilang, “Kita sayang pa Tuhan Allah,” mar dia binci pa de pe sudara yang percaya, dia itu pangbadusta. Soalnya sapa tu nyanda sayang pa de pe sudara yang percaya yang dia dapa lia, nyanda mungkin dia sayang pa Tuhan Allah yang nyanda dapa lia. Ini tu prenta yang torang trima dari Tuhan Allah: sapa yang sayang pa Tuhan Allah, dia lei musti sayang pa de pe sudara yang percaya. Tiap orang yang percaya kalu Yesus itu Kristus tu Raja yang mo se slamat pa manusia, dia itu jadi Tuhan Allah pe anak. Samua orang yang sayang pa Tuhan Allah tu Bapa, dorang itu lei sayang pa orang yang so jadi Tuhan Allah pe anak. Trus kalu torang sayang pa Tuhan Allah deng beking Dia pe prenta-prenta, itu jadi bukti kalu torang lei sayang pa De pe anak-anak. Soalnya kalu torang sayang pa Tuhan Allah, torang mo beking Dia pe prenta-prenta, kong Dia pe prenta-prenta itu nyanda brat mo beking. Soalnya torang yang so jadi Tuhan Allah pe anak-anak mampu se kala tu dunia yang jaha ini. Torang mampu se kala tu dunia yang jaha lantaran torang percaya pa Tuhan. Sapa dang yang bole se kala tu dunia yang jaha ini? Tantu katu tu orang yang percaya kalu Yesus itu Anak Allah. Yesus Kristus datang ka dunia deng aer deng lei dara. Jadi Dia datang bukang cuma deng aer mar deng dara lei. Kong Roh Allah yang basaksi kalu samua itu butul, lantaran tu Roh ja bilang tu butul. Kong ada tiga yang jadi saksi kalu Yesus itu Anak Allah [di sorga: Bapa, firman deng Roh Kudus, kong tiga itu satu. Kong ada tiga lei yang jadi saksi di bumi]: Roh, aer deng dara, kong samua itu kase kesaksian yang sama. Torang trima tu manusia pe kesaksian, mar tu Tuhan Allah pe kesaksian lebe kuat dari tu manusia pe kesaksian. Tuhan Allah pe kesaksian itu tentang Dia pe Anak. Sapa yang percaya pa Anak Allah, dia itu so trima tu kesaksian pa de pe hati. Mar sapa yang nyanda percaya pa Tuhan Allah, itu sama deng dia so beking Tuhan Allah itu pangbadusta lantaran dia nyanda percaya tu Tuhan Allah pe kesaksian tentang Dia pe Anak. Tu kesaksian itu pe isi bagini: Tuhan Allah so kase pa torang tu hidop kekal, kong tu hidop kekal itu torang dapa lewat percaya pa Dia pe Anak. Sapa yang da trima pa Anak Allah, dia itu so dapa tu hidop kekal. Mar sapa yang nyanda trima pa Anak Allah, dia itu nyanda dapa tu hidop kekal itu. Kita da tulis samua itu for ngoni yang percaya pa Anak Allah, supaya ngoni tau kalu ngoni so dapa tu hidop kekal. Kong torang brani baminta pa Dia lantaran kalu torang basombayang minta sesuatu iko Dia pe mau, torang yakin kalu Dia pasti dengar deng iko akang tu torang da minta itu. Kong kalu torang tau Dia so dengar tu torang da minta, torang lei yakin kalu torang so dapa samua tu torang da minta pa Dia itu. Kalu satu orang lia dia pe sudara yang percaya beking dosa, mar tu dosa itu nyanda beking tu sudara itu dapa hukuman tapisa deng Tuhan for slama-lamanya, tu orang yang da lia itu musti basombayang supaya Tuhan Allah beking bagus ulang tu sudara itu pe hubungan deng Tuhan. Mar ada dosa yang beking orang tapisa deng Tuhan Allah. Kalu ada orang yang beking dosa itu, kita nyanda bilang kalu ngoni perlu basombayang akang pa dia. Samua tu jaha itu dosa, mar ada dosa yang nyanda beking orang dapa hukuman tapisa deng Tuhan for slama-lamanya. Torang tau kalu samua orang yang so jadi Tuhan Allah pe anak-anak, dorang nyanda trus-trus beking dosa. Soalnya tu Anak Allah da jaga pa dorang, deng setang pe bos nyanda mampu mo beking apa-apa pa dorang. Torang tau kalu torang ini dari Tuhan Allah, kong tu sluru dunia ini setang pe bos da kuasai. Torang lei tau kalu tu Anak Allah so datang kong so beking torang mangarti supaya torang kanal Tuhan Allah Yang Butul. Torang hidop satu deng Tuhan Allah Yang Butul itu, lantaran torang hidop satu deng Dia pe Anak Yesus Kristus. So Dia itu tu Tuhan Allah Yang Butul deng Dia yang beking orang bole hidop kekal. Hei ngoni yang kita so anggap kita pe anak-anak, ngoni hati-hati, jang sampe ngoni basemba tu opo-opo. Ni surat dari kita tu pemimpin jemaat. Surat ini for ibu yang Tuhan da pili, deng lei for ibu pe anak-anak yang butul-butul kita sayang. Mar bukang cuma kita yang sayang pa ngoni, samua orang yang iko tu ajaran yang butul lei sayang pa ngoni. Torang sayang pa ngoni lantaran tu ajaran yang butul itu ada pa torang pe hati, kong tu ajaran itu ada trus pa torang sampe slama-lamanya. Kita minta supaya Tuhan Allah tu torang pe Bapa deng Yesus Kristus tu Bapa pe Anak se tunjung tu bae deng tu rasa kasiang pa torang samua, deng lei beking torang hidop deng hati tenang. Samua itu for torang yang ja iko tu ajaran yang butul deng yang ja baku sayang. Kita snang skali lantaran dapa tau kalu ada dari ibu pe anak-anak yang hidop iko tu ajaran yang butul, sama deng tu Bapa da prenta pa torang. Kong skarang kita minta pa ibu supaya torang samua baku-baku sayang. Tu kita da minta ini bukang prenta baru, mar prenta yang so ada pa torang dari pertama waktu torang baru percaya. Kong dari pertama, ngoni so dengar tu Tuhan pe prenta kalu torang musti hidop baku-baku sayang. Kong kalu torang hidop baku-baku sayang, itu de pe arti torang so beking tu Dia pe prenta-prenta. So ada banya orang pigi ka sluru dunia for beking sesat pa tu orang-orang yang percaya pa Yesus Kristus. Dorang yang beking sesat itu nyanda percaya kalu Yesus Kristus da datang ka dunia sbagai manusia. Dorang itu no tu ja beking sesat deng lei tu antiKristus. So itu ngoni musti jaga bae-bae tu ngoni pe percaya pa Yesus Kristus supaya nyanda ilang. Deng bagitu torang pe karja dulu pa ngoni nyanda sia-sia, kong nanti ngoni mo trima samua tu ngoni pe upah. Tiap orang yang so nyanda iko tu Kristus pe ajaran kong iko tu ajaran laeng, dia itu nyanda ada hubungan deng Tuhan Allah. Mar tu orang yang iko tu Kristus pe ajaran, dia itu ada hubungan deng Bapa deng lei Anak. Jadi kalu ada orang datang kong kase tau pa ngoni tu ajaran yang nyanda sama deng Kristus pe ajaran, ngoni jang trima dia pa ngoni pe ruma deng jang ngoni kase salam pa dia. Soalnya sapa yang trima kong kase salam pa tu orang itu, dia itu so iko beking jaha sama deng tu orang itu da beking. Masi banya tu kita mo tulis for kase tau pa ngoni, mar lebe bae jang lewat surat. Kita harap mo pigi baku dapa deng ngoni kong mo babicara langsung pa ngoni, supaya torang pe hati butul-butul snang. Tu ibu pe sudara parampuang yang Tuhan da pili lei, dia pe anak-anak da kirim salam for ibu. Ni surat dari kita, tu pemimpin jemaat. Surat ini for bapak Gayus yang butul-butul kita sayang. Bapak yang kita sayang, kita basombayang supaya bapak sehat-sehat deng berhasil di samua hal, trus bapak pe jiwa lei da bae-bae. Kita snang skali waktu ada bebrapa sudara yang percaya datang kong kase tau pa kita kalu bapak da tetap hidop ja iko tu ajaran yang butul, kong memang bapak ja beking tu ajaran itu. For kita, nyanda ada tu bole mo beking kita pe hati lebe snang daripada dengar kalu kita pe anak-anak dalam Tuhan da hidop iko tu ajaran yang butul. Bapak Gayus yang kita sayang, bapak setia ja bantu dalam samua hal tu sudara-sudara yang percaya, biar lei bapak blum kanal pa dorang. Tu sudara-sudara itu so datang kamari kong kase tau di jemaat tentang bapak pe sayang pa dorang. Bagus skali kalu bapak bantu trus pa dorang deng cara yang beking snang pa Tuhan Allah waktu dorang se trus tu dong pe perjalanan. Soalnya waktu dorang pi kase tau tentang Yesus Kristus ka bangsa laeng yang nyanda percaya, dorang nyanda dapa apa-apa dari tu orang-orang nyanda percaya itu. Jadi torang musti bantu pa orang-orang sama deng dorang itu, supaya torang samua jadi tamang karja for sama-sama se ajar tu ajaran yang butul. Kita so tulis surat sadiki for jemaat, mar Diotrefes tu suka jadi bos di jemaat nimau mo dengar pa kita. So itu kalu kita datang, kita mo kase tau pa ngoni samua tu dia da beking. Dia da cirita jaha yang nyanda butul tentang torang. Mar samua itu blum cukup for dia. Soalnya waktu tu sudara-sudara yang percaya datang, dia nimau trima pa dorang. Malatare dia larang pa orang-orang for mo trima tu sudara-sudara itu, kong dia nyanda kase tu orang-orang yang da trima tu sudara-sudara itu bagabung di jemaat. Bapak Gayus yang kita sayang, bapak jang tiru tu conto yang jaha mar tiru jo tu conto yang bae. Sapa yang ja beking tu bae, dia itu dari Tuhan Allah. Mar sapa ja beking tu jaha, dia blum perna kanal pa Tuhan Allah. Tentang Demetrius, samua orang bilang kalu dia itu orang yang ja beking tu butul. Kong tu butul yang dia ja beking itu jadi bukti kalu memang dia ja iko tu ajaran yang butul. Torang lei bilang kalu tu Demetrius ja beking itu butul, kong bapak tau kalu tu torang ja bilang itu butul. Banya lei tu kita mo bilang pa bapak, mar kita nimau mo tulis lewat surat. Kita harap nyanda lama lei kita mo pigi baku dapa ulang deng bapak, kong torang bole babicara langsung. Kita minta supaya Tuhan beking bapak hidop deng hati tenang. Kong bapak pe tamang-tamang di sini lei da kirim salam. Tolong lei kirim akang kita pe salam for tamang-tamang di sana satu-satu. Ni surat dari kita, Yudas. Kita ini ja beking tu Yesus Kristus da suru, kong kita ini lei Yakobus pe sudara. Ni surat for ngoni tu orang-orang yang Tuhan Allah tu torang pe Bapa da pangge deng yang Dia sayang, Dia lei jaga pa ngoni for jadi Yesus Kristus pe orang-orang. Kita minta pa Tuhan supaya Dia se tunjung Dia pe rasa kasiang pa ngoni, beking ngoni bole hidop deng hati tenang, deng lei sayang pa ngoni, kong biar samua itu Dia kase deng talebe-lebe for ngoni. Sudara-sudara yang kita sayang, sebenarnya kita pe tujuan pertama kita suka skali mo tulis surat for ngoni tentang torang pe keslamatan yang torang sama-sama so dapa. Mar skarang pa kita pe hati ada rasa yang kuat for tulis ni surat deng se nasehat pa ngoni supaya ngoni tetap pertahankan tu ngoni pe iman. Tu iman itu Tuhan Allah so kase pa ngoni tu Dia pe orang-orang, tu iman yang Dia kase satu kali for slama-lamanya. Soalnya ada orang-orang yang so maso deng babasambunyi di tenga-tenga pa ngoni. Dorang itu orang-orang yang hidop jao dari pa Tuhan Allah. Dorang se putar bale tu brita tentang Tuhan Allah pe bae pa torang, dorang bilang kata torang bole beking dosa iko torang pe nafsu yang besae. Dorang itu lei manyangkal kalu Yesus Kristus itu satu-satunya Penguasa deng dorang bilang Dia bukang torang pe Tuhan. Tu orang-orang bagitu so dari dulu da tulis di Kitab Suci kalu dorang itu memang mo dapa hukuman. Biar ngoni so tau tu hal ini, kita mo se inga pa ngoni bagini: dulu, Tuhan da kase slamat pa bangsa Israel dari tana Mesir, mar Dia lei se binasa dari antara pa dorang tu orang-orang yang nyanda percaya pa Dia. Bagitu lei deng tu malaekat-malaekat yang da langgar tu dorang pe batas-batas kekuasaan sampe se tinggal tu dorang pe tampa tinggal sandiri. Dorang itu Tuhan da tahang di dunia glap pake rante tu nyanda talapas sampe slama-lamanya. Tuhan da tahang pa dorang sampe di hari waktu Dia mo bahakimi. Bagitu lei tu Sodom deng Gomora deng tu kota-kota yang ada di dekat situ. Tu orang-orang di situ ja baseks bebas deng ja baseks yang nyanda wajar. So itu dorang dapa hukuman di api yang nyanda mo mati for slama-lamanya, itu jadi conto pringatan for samua orang. Bagitu lei deng tu orang-orang yang da se ajar tu ajaran sesat. Dorang itu pangmimpi kong dorang anggap tu dong pe mimpi itu butul sampe dorang beking hal-hal caparuni, pandang enteng tu Tuhan pe kuasa, deng lei bahojat samua yang luar biasa tu ada di sorga. Hele Mikhael tu pemimpin malaekat di sorga, dia nyanda brani batudu deng bahojat pa setang pe bos macam itu. Jadi waktu Mikhael da baku ambe deng setang pe bos tentang Musa pe mayat, Mikhael tare cuma da bilang bagini, “Biar jo nanti Tuhan Allah togor pa ngana!” Mar tu orang-orang yang da se ajar tu ajaran sesat, dorang bahojat samua yang dorang nintau. Dorang ja beking tu hal-hal yang cuma iko tu dong pe mau sandiri, itu sama deng binatang yang beking sesuatu cuma iko dong pe naluri lantaran nyanda ada akal. Deng dorang beking bagitu, dorang beking dorang pe diri binasa. Cilaka jo dorang itu! Soalnya dorang da beking tu jaha sama deng Kain da beking tu jaha. Dorang lei da beking dosa sama deng Bileam da beking dosa lantaran suka mo dapa doi imbalan. Dorang da malawang pa Tuhan sama lei deng Korah da malawang pa Tuhan, jadi dorang mo binasa lei sama deng Korah da binasa. Dorang yang da se ajar tu ajaran sesat, so dorang itu yang beking rusak tu ngoni pe acara makang-makang for mo inga Tuhan Allah pe sayang, dorang sama deng jadi noda di acara itu. Dorang nyanda malo-malo bamakang deng rakus di acara itu, kong dorang cuma pikir dong pe diri sandiri. Dorang sama deng awan yang nyanda bawa ujang. Dorang lei sama deng pohong-pohong yang nyanda babua waktu oras babua, so itu tacabu sampe pa de pe akar-akar, sampe mati sama skali. Dorang itu se lia dorang pe kalakuan besae yang beking dorang jadi malo, sama deng buih dari omba laut yang ganas. Dorang itu lei sama deng bintang-bintang tu pinda kasana-kamari, kong for dorang itu so tasadia tampa yang paling glap for slama-lamanya. Ada tu Adam pe keturunan katuju tu de pe nama Henokh. Henokh da dapa pesan dari Tuhan Allah tentang apa tu mo jadi nanti pa tu orang-orang skarang yang da se ajar tu ajaran sesat. Kong dia bilang tu pesan bagini, “Tarukira jo bae-bae, Tuhan mo datang deng Dia pe ribuan malaekat yang kudus. Dia datang for mo adili samua orang, deng lei Dia mo hukum samua orang yang hidop jao dari pa Tuhan Allah. Dia mo hukum pa dorang yang hidop jao dari pa Tuhan Allah lantaran samua dorang pe kalakuan yang jaha, deng lantaran dong pe kata-kata kasar tentang Tuhan.” Dorang itu ja babafeto, ja bamengelu, dorang cuma hidop iko dorang pe nafsu yang besae. Dorang bilang tu kata-kata for angka dong pe diri sandiri, dorang cari muka pa orang supaya bole dapa untung. Sudara-sudara yang kita sayang, ngoni inga jo apa yang rasul-rasul tu Tuhan Yesus Kristus pe utusan-utusan so perna da bilang tu mo jadi nanti. Dorang da bilang pa ngoni bagini, “Kalu nanti waktu so mo kiamat, mo muncul tu orang-orang yang pangbahina, dorang yang ja iko tu dong pe nafsu yang besae.” Dorang itu no tu ja beking orang-orang percaya baku ambe sampe jadi tapisa-pisa. Dorang hidop iko tu dunia pe mau, kong nyanda ada Roh Kudus pa dorang itu. Mar ngoni tu kita pe sudara-sudara yang kita sayang, ngoni musti brusaha se kuat tu ngoni pe percaya, ngoni pe percaya pa Dia itu kudus. Basombayang jo pake kuasa dari Roh Kudus. Tuhan Allah sayang pa ngoni, kong ngoni musti tetap hidop basandar pa Dia pe sayang itu. Ngoni basandar pa Dia pe sayang waktu ngoni samantara batunggu tu Tuhan Yesus Kristus se tunjung tu Dia pe rasa kasiang pa ngoni, kong itu no yang mo bawa pa ngoni mo dapa tu hidop kekal. Ngoni lei musti se tunjung tu rasa kasiang pa orang-orang yang masi ragu-ragu percaya. Ngoni lei musti tolong tu orang-orang yang so sesat supaya dorang bole slamat, itu sama deng ngoni da hela pa dorang kaluar dari api. Kong pa orang laeng lei ngoni musti kase tunjung tu rasa kasiang, mar ngoni musti hati-hati supaya nyanda taiko beking dosa sama deng dorang, sama deng ngoni binci tu dong pe baju yang so kotor. Tuhan yang mampu jaga pa ngoni supaya ngoni nyanda jatung kong jadi nyanda percaya lei pa Dia. Dia mo bawa pa ngoni di muka pa Dia yang luar biasa, kong di muka pa Dia nyanda ada yang mo se sala pa ngoni, ngoni mo snang skali. So itu, puji jo pa Tuhan Allah, Dia itu cuma satu. Dia yang kase slamat pa torang lewat Yesus Kristus tu torang pe Tuhan. Dia itu luar biasa, Dia Mahabasar, Dia ada kuasa for baator deng baprenta. Dia itu tetap bagitu dari tu dunia blum ada, skarang deng sampe slama-lamanya. Amin. Kita ini Yohanes, tu orang yang ja beking tu Tuhan da suru. Tu surat ini pe isi tentang apa yang Tuhan Allah da se tunjung pa Yesus Kristus, trus Yesus Kristus se tunjung pa orang-orang yang ja beking tu Dia da suru supaya dorang bole tau apa tu so nyanda lama lei mo jadi. Kong Yesus suru tu Dia pe malaekat se tunjung tu samua itu pa kita. Kita ini saksi dari tu samua yang kita da lia: kita se tau pa ngoni tentang tu Tuhan Allah pe firman deng lei tentang samua hal yang Yesus Kristus so se tunjung pa kita. Orang yang da se baca tu kita da tulis tentang apa tu mo jadi nanti, deng tu orang-orang yang da badengar kong beking tu da tatulis itu, dorang itu yang paling snang, lantaran samua itu so nyanda lama lei mo jadi. Ni surat dari Yohanes, for ngoni sudara-sudara di tuju jemaat yang ada di daera Asia. Kita minta pa Tuhan deng pa tu tuju roh yang di muka pa Tuhan pe tahta supaya kase tunjung tu bae pa ngoni deng beking ngoni hidop deng hati tenang. Tuhan itu yang so ada dari dulu, yang ada lei skarang deng tu mo datang ulang. Kong kita minta lei supaya Yesus Kristus kase tunjung tu Dia pe bae pa ngoni deng beking ngoni hidop deng hati tenang. Dia itu tu Saksi yang setia. Dia yang pertama tu da hidop ulang dari antara orang mati, kong Dia itu yang berkuasa pa samua raja di bumi ini. Dia sayang pa torang. Dia pe dara yang tacura waktu Dia mati se bebas torang dari dosa-dosa. Dia beking torang jadi Dia pe rakyat pa De pe krajaan, deng Dia beking lei torang jadi imam-imam yang ja layani Tuhan Allah tu Dia pe Bapa. For Dia tu puji deng hormat, deng Dia yang berkuasa sampe slama-lamanya. Amin. Tarukira jo bae-bae, nanti Dia mo datang di atas awan-awan, kong samua orang di dunia mo lia pa Dia sampe tu orang-orang yang dulu da cucu pa Dia deng tombak mo lia lei pa Dia. Samua suku bangsa di bumi mo manangis akang pa Dia. Itu samua mo jadi bagitu. Amin. Tuhan Allah bilang bagini, “Kita ini, Alfa deng Omega, tu de pe arti yang pertama deng yang akhir. Kita so ada dari waktu samua blum ada, Kita ada skarang kong Kita lei mo datang ulang. Kita ini Yang Mahakuasa.” Kita Yohanes, tu ngoni pe sudara deng tamang karja yang sama-sama da dapa siksa lantaran ja iko pa Yesus. Torang sama-sama ja iko pa Tuhan yang berkuasa sbagai raja, torang batahang percaya pa Tuhan biar lei dapa siksa kong torang da batunggu Yesus mo datang ulang. Kong kita ini da dapa buang ka pulau Patmos lantaran kita da kase tau tu Tuhan Allah pe firman deng da kase tau apa tu Yesus da bilang. Satu hari pas tu hari sombayang, Tuhan pe Roh da kuasai pa kita. Kong waktu itu kita dapa dengar suara yang pe kuat skali dari blakang pa kita. Tu suara itu pe babunyi sama deng trompet pe bunyi. Tu suara itu babilang pa kita, “Tulis jo samua yang ngana mo lia ini di satu kitab, kong ngana kirim tu kitab itu pa tuju jemaat ini: jemaat di Efesus, Smirna, Pergamus, Tiatira, Sardis, Filadelfia deng di Laodikia.” Pe dengar tu suara itu, kita batengo ka blakang for mo lia sapa tu da babicara pa kita. Serta kita batengo, kita dapa lia ada tuju tiang tu tampa ja taru akang pelita tu da beking dari mas. Kong di tenga-tenga tu tampa taru pelita itu da badiri satu orang. Tu orang itu dapa lia sama deng Anak Manusia. Dia da pake juba yang de pe panjang sampe pa de pe kaki, kong Dia pe dada da lingkar akang deng ban dari mas. Dia pe kapala deng Dia pe rambu pe warna puti sama deng domba pe bulu deng salju pe warna. Kong Dia pe mata manyala sama deng api pe manyala. Dia pe kaki mangkilat sama deng tembaga yang da bakar di api. Dia pe suara babunyi kuat sama deng banjer basar pe bunyi. Kong pa Dia pe tangan kanan da pegang tuju bintang, deng dari De pe mulu kaluar satu peda. Tu peda itu de pe dua sabla tajang. Dia pe muka basinar sama deng matahari pe sinar waktu siang. Kong waktu kita lia pa Dia, kita rubu ka tana di muka pa Dia pe kaki, kita kurang sama jo deng tu orang mati. Mar Dia taru Dia pe tangan kanan di atas pa kita trus babilang, “Yohanes, ngana jang tako! Kita ini tu so ada dari pertama deng lei yang tetap mo ada sampe akhir jaman. Kita ini yang da hidop! Kita so perna mati, mar lia skarang Kita so hidop ulang, kong Kita mo hidop sampe slama-lamanya. Kita ada kunci maut, itu de pe arti Kita ada kuasa for se hidop ulang tu orang yang so mati, deng Kita ada lei kunci krajaan maut, itu de pe arti Kita ada kuasa di tampa orang mati. So itu ngana musti tulis samua tu ngana da lia, tu hal-hal yang da jadi skarang deng lei tu hal-hal yang nanti mo jadi. Tu ngana da lia tadi itu de pe arti masi rahasia. Kong Kita mo se bilang tu rahasia itu pe arti bagini: tu tuju bintang yang Kita da pegang deng Kita pe tangan kanan, de pe arti tu Tuhan pe tuju malaekat yang jaga tu tuju jemaat. Kong tu tuju tiang tu tampa ja taru akang pelita yang da beking dari mas, de pe arti tu tuju jemaat.” Abis itu, tu Anak Manusia bilang pa kita, “Yohanes, tulis jo tu Kita mo bilang ini pa tu malaekat yang da jaga tu jemaat di Efesus. Ngana tulis bagini: Ni pesan dari Kita tu Anak Manusia yang da pegang tuju bintang di tangan kanan deng bajalang di antara tu tuju tiang tampa ja taru akang pelita yang da beking dari mas. Kita tau tu ngoni ja beking. Ngoni so karja kras beking tu Tuhan pe karja, deng lei ngoni tetap batahang percaya ja mangada tu siksa. Ngoni nyanda suka pa orang jaha. Ngoni lei so priksa bae-bae tu orang-orang yang bilang dong pe diri itu rasul tu Yesus pe utusan, mar sebenarnya dorang nyanda bagitu, ngoni da dapa memang dorang pangbadusta. Kita lei tau kalu ngoni tetap batahang percaya biar lei dapa siksa deng ngoni lei mendrita lantaran percaya pa Kita, kong ngoni nyanda perna menyera. Mar biar lei bagitu, Kita mo kritik pa ngoni: ngoni so nyanda basayang lei sama deng waktu ngoni baru percaya pa Kita. So itu ngoni inga jo kalu skarang ngoni so laeng skali dari ngoni yang pertama. Jadi bertobat jo deng beking ulang apa yang ngoni beking dari pertama. Kalu ngoni nyanda bertobat, Kita mo datang pa ngoni kong mo hukum pa ngoni, itu sama deng Kita mo ambe tu ngoni pe tiang tu tampa ja taru akang pelita dari pa de pe tampa. Mar ada yang bagus pa ngoni, ngoni binci tu Nikolaus pe orang-orang ja beking, kong Kita lei binci tu dorang ja beking itu. Sapa ada talinga, lebe bae dia badengar jo apa tu Tuhan pe Roh da kase tau pa jemaat-jemaat, ‘Sapa yang menang dari tu kuasa jaha, Kita mo kase makang pa dia dari tu pohong kehidupan yang ada pa Tuhan Allah pe taman firdaus.’ ” Anak Manusia bilang lei, “Yohanes, tulis akang lei for malaekat yang da jaga tu jemaat di Smirna. Ngana tulis bagini: Ini kata-kata dari Kita tu Yang Pertama deng Yang Akhir. Kita ini so perna mati mar so hidop ulang. Kita tau ngoni pe hidop siksa deng lei miskin, mar sebenarnya ngoni itu kaya di mata Tuhan. Kita tau lei tu orang-orang Yahudi da fitna pa ngoni beking tu hal-hal besae. Tu orang-orang Yahudi itu mangaku kalu dorang Tuhan Allah pe orang yang Dia da pili, padahal dorang itu yang ja basemba pa setang pe bos. Ngoni jang tako deng tu siksa yang ngoni musti mo rasa. Tarukira jo bae-bae, nanti bebrapa orang dari pa ngoni lantaran dorang pe percaya pa Kita mo dapa cobaan dari setang pe bos. Tu cobaan itu bagini, ngoni mo dapa maso ka bui kong dapa siksa di sana slama spulu hari. Mar biar lei ngoni dapa siksa sampe mo mati, ngoni musti tetap percaya pa Kita. Kalu ngoni tetap percaya, Kita mo kase pa ngoni tu hidop kekal, itu sama deng ngoni dapa mahkota tu tanda ngoni so menang. Sapa ada talinga, lebe bae dia badengar jo apa tu Tuhan Allah pe Roh da kase tau pa jemaat-jemaat, ‘Sapa yang menang dari tu kuasa jaha, dia itu pasti nyanda mo trima tu hukuman di neraka, tu ja bilang mati kadua kali.’ ” Anak Manusia bilang lei, “Yohanes, tulis akang lei for malaekat yang da jaga tu jemaat di Pergamus. Ngana tulis bagini: Ini kata-kata dari Kita yang da pegang tu peda tajang dua sabla. Kita tau ngoni da tinggal di Pergamus, tu tampa setang pe bos berkuasa. Mar biar lei bagitu, ngoni percaya trus pa Kita, ngoni nyanda manyangkal tu ngoni pe percaya pa Kita, biar lei waktu lalu ngoni da lia orang-orang da bunung pa Antipas tu Kita pe saksi yang setia. Dorang da bunung pa dia di Pergamus, tu tampa setang pe bos berkuasa. Mar biar lei bagitu, Kita mo kritik pa ngoni dalam bebrapa hal: ada bebrapa orang dari antara pa ngoni ja iko Bileam pe ajaran. Bileam itu yang se ajar pa Balak for goda tu orang Israel for beking dosa. Lebe kusus Bileam se ajar pa dorang for makang tu makanan yang so kase for opo-opo, deng lei ja baseks bebas. Bagitu lei ada dari antara pa ngoni yang ja iko tu ajaran dari Nikolaus pe orang-orang. Jadi bertobat jo. Kalu ngoni nyanda bertobat, Kita mo iko datang pa ngoni kong Kita mo baprang deng tu orang-orang itu pake peda yang kaluar dari pa Kita pe mulu. Sapa ada talinga, lebe bae badengar jo apa tu Tuhan pe Roh da kase tau pa jemaat-jemaat, ‘Sapa yang menang dari tu kuasa jaha, dia itu Kita mo kase akang manna yang da se sambunyi, deng Kita mo kase lei pa dia batu puti. Di atas tu batu itu da tulis akang tu da menang itu pe nama baru. Tu nama baru itu cuma tu yang mo trima tu batu puti itu yang tau, orang laeng nintau tu nama.’ ” Anak Manusia bilang lei, “Yohanes, tulis akang lei for malaekat yang da jaga tu jemaat di Tiatira. Ngana tulis bagini: Ini kata-kata dari Kita tu Anak Allah. Kita pe mata bamanyala-manyala sama deng api, deng Kita pe kaki mangkilat sama deng tembaga yang da bakar di api. Kita tau samua tu ngoni so beking. Ngoni samua baku sayang, deng lei ngoni tetap percaya pa Kita. Kita tau bagimana ngoni ja layani orang deng ngoni tetap batahang percaya biar dapa siksa. Kita tau apa tu ngoni da beking skarang so lebe banya dari waktu ngoni baru percaya pa Kita. Mar biar lei bagitu, Kita mo kritik pa ngoni: Ngoni da se biar satu parampuang da mangajar pa Kita pe orang-orang yang ja beking tu Kita da suru. Dia mangajar kong pengaruhi pa dorang supaya dorang sambarang ja baseks deng makang tu makanan yang da kase persembahan for opo-opo. Tu parampuang itu de pe nama Izebel. Dia bilang de pe diri itu nabi tu orang yang ja kase tau Tuhan pe pesan pa orang-orang padahal nyanda. Kita so kase waktu for tu parampuang itu bertobat, mar dia nimau bertobat dari sambarang ja baseks itu. Ngoni tarukira jo bae-bae, Kita mo kase lempar tu parampuang itu ka koi, tu tampa for orang yang saki brat. Kong Kita mo beking mendrita skali tu orang-orang yang da baseks bebas deng dia. Mar kalu tu orang-orang itu bertobat, dorang nyanda mo mendrita. Kita mo bunung tu parampuang itu pe anak-anak, tu orang-orang yang ja iko de pe ajaran. Deng bagitu samua jemaat mo tau kalu Kita ini yang tau apa tu manusia pe pikiran deng isi hati. Kita mo balas tiap orang iko apa tu masing-masing orang da beking. Mar for ngoni tu orang-orang laeng di Tiatira yang nyanda iko tu ajaran dari Izebel, ngoni itu lei nyanda blajar tu hal-hal tentang setang pe bos, pa ngoni Kita bilang kalu kita nyanda mo tamba tugas laeng lei pa ngoni. Mar tu ngoni musti pegang trus tu iman yang so ada pa ngoni sampe Kita datang ulang. Sapa jo yang menang dari tu kuasa jaha deng ja beking tu Kita da suru sampe akhir jaman, pa dia itu Kita mo kase akang kuasa for baprenta pa suku-suku bangsa. Kong dia mo baprenta deng kras pa dorang, itu sama deng dia baprenta pake tongkat besi. Dia mo kase ancor pa dorang sama deng barang dari tana liat yang da kase ancor. Tu kuasa yang dia trima, itu sama deng tu kuasa yang Kita da trima dari Kita pe Bapa. Kong Kita mo kase lei pa dia tu bintang timur. Sapa ada talinga, lebe bae dia badengar jo apa tu Tuhan pe Roh da kase tau pa jemaat-jemaat.” Kong tu Anak Manusia babilang lei, “Yohanes, ngana tulis lei for malaekat tu da jaga jemaat di Sardis. Ngana tulis jo bagini: Ini kata-kata dari Kita yang punya tuju Roh dari Tuhan Allah deng yang da pegang tu tuju bintang itu. Kita tau samua tu ngoni so beking. Ngoni dapa lia hidop for Kita padahal ngoni sebenarnya nyanda bagitu, itu sama deng ngoni dapa lia hidop mar sebenarnya so mati. Jadi ngoni sadar jo deng tu ngoni da beking, ngoni se kuat jo tu ngoni pe percaya yang so mo mati itu. Soalnya Kita tau tu ngoni ja beking itu nyanda butul di muka pa Kita pe Tuhan Allah. So itu ngoni inga-inga jo trus tu ajaran yang ngoni so dengar deng trima itu. Ngoni musti iko tu ajaran itu kong bertobat jo. Kalu ngoni nyanda bajaga-jaga sama deng itu, Kita mo datang pa ngoni. Kita mo datang kage-kage sama deng papancuri, ngoni nyanda perna tau tempo apa Kita mo datang for mo adili pa ngoni. Mar ada jo bebrapa orang di Sardis yang dorang pe hidop lurus, dorang itu sama deng orang yang jaga tu dong pe baju supaya nyanda kotor. Dorang itu nanti mo bajalang sama-sama deng Kita pake baju puti, lantaran dorang memang pantas for itu. Orang yang menang dari kuasa jaha, dia mo pake baju puti sama deng itu. Kita nyanda mo coret tu orang itu pe nama dari buku kehidupan, tu buku yang da tulis akang nama-nama dari orang-orang yang mo trima tu hidop kekal. Waktu Kita badiri di muka pa Kita pe Bapa deng Dia pe malaekat-malaekat, Kita mo bilang kalu Kita kanal pa tu orang itu. Sapa ada talinga, lebe bae dia badengar jo apa tu Tuhan pe Roh da kase tau pa jemaat-jemaat.” Trus tu Anak Manusia babilang lei, “Yohanes, ngana tulis lei for malaekat tu da jaga jemaat di Filadelfia. Ngana tulis jo bagini: Ini kata-kata dari Kita Yang Kudus, Yang Butul, deng lei yang da pegang kunci dari raja Daud. Kita yang bole buka tu pintu, kong nyanda ada yang bole mo tutu tu pintu. Trus Kita lei yang bole mo tutu tu pintu, kong nyanda ada yang bole mo buka tu pintu. Kita tau apa tu ngoni ja beking. Kita tau kalu ngoni pe pengaru cuma sadiki. Mar biar lei bagitu, ngoni so iko tu Kita pe firman deng lei ngoni nyanda perna manyangkal kalu ngoni kanal pa Kita. Jadi tarukira jo bae-bae, Kita so buka pintu di muka pa ngoni, kong nyanda ada yang bole mo tutu tu pintu. Ngoni tarukira jo bae-bae, tu orang-orang yang ja iko pa setang pe bos, dorang itu mangaku kalu dorang Tuhan Allah pe orang yang Dia da pili, padahal sebenarnya nyanda, dorang itu cuma da badusta. Ngoni tarukira jo bae-bae, Kita mo suru dorang itu datang berlutut di muka ngoni pe kaki, kong dorang mo tau kalu Kita sayang pa ngoni. Ngoni tetap da batahang percaya pa Kita biar dapa siksa, kong deng bagitu ngoni da beking tu Kita pe prenta. So lantaran itu, nanti komang Kita mo jaga pa ngoni supaya ngoni nyanda rasa tu siksa yang hebat tu mo jadi di sluru dunia ini waktu Tuhan adili samua orang. Tuhan kase tu siksa itu for mo tes samua orang di dunia ini kalu sapa dari antara pa dorang yang memang butul-butul percaya pa Dia. Kita so nyanda lama lei mo datang! Ngoni pegang jo trus tu ngoni pe iman supaya nyanda ada orang yang bole mo rampas tu ngoni pe hadia mahkota, tu tanda ngoni so menang. Sapa yang menang dari tu kuasa jaha, dia itu Kita mo beking jadi tiang yang ada pa Tuhan Allah pe Ruang Mahasuci, itu sama deng dia mo tinggal slama-lamanya di situ pa Tuhan Allah pe Ruang Mahasuci. Kita mo tulis tu Kita pe Tuhan Allah pe nama pa tu orang itu pe diri. Kong Kita lei mo tulis pa dia tu nama kota dari Kita pe Tuhan Allah, tu Yerusalem baru. Tu kota itu Tuhan Allah mo se turung dari sorga. Trus Kita mo tulis lei pa dia tu Kita pe nama baru. Sapa ada talinga, lebe bae dia badengar jo apa tu Tuhan Allah pe Roh da kase tau pa jemaat-jemaat.” Kong Anak Manusia babilang lei, “Yohanes, ngana tulis akang lei for malaekat tu da jaga jemaat di Laodikia. Ngana tulis jo bagini: Ini kata-kata dari Kita, yang ja bilang Amin tu de pe arti Yang Butul. Kita ini Saksi yang setia deng yang butul. Kita ini tu sumber dari samua tu Tuhan Allah da beking. Kita tau apa tu ngoni ja beking. Ngoni nyanda butul-butul da iko pa Kita, ngoni itu sama jo deng aer lao-lao, ngoni bukang panas ato bukang lei dingin, lebe bae tare ngoni panas ato dingin. Mar lantaran ngoni ini nyanda panas deng lei nyanda dingin mar sama deng aer lao-lao, so itu Kita mo se munta pa ngoni, itu de pe arti Kita mo tolak pa ngoni. Soalnya ngoni bilang bagini, ‘Torang ini orang kaya deng so berhasil, torang nyanda kurang apa-apa,’ padahal ngoni nintau kalu ngoni itu sebenarnya orang yang susa deng pe dapa sayang skali, ngoni itu orang miskin, ngoni buta deng lei talanjang. So itu, Kita se nasehat pa ngoni supaya ngoni bli jo dari pa Kita mas yang so beking murni, deng bagitu ngoni bole butul-butul jadi kaya. Ngoni lei musti bli baju puti supaya ngoni nyanda malo lantaran orang ja lia ngoni batalanjang, kong ngoni lei musti bli obat mata for mo kase obat tu ngoni pe mata supaya ngoni bole balia. Kalu tu orang-orang yang Kita sayang beking sala, dorang itu Kita mo togor deng kase hukuman supaya dorang bertobat jo kong sunggu-sunggu iko pa Tuhan. Tarukira jo bae-bae, Kita so badiri di muka pintu kong da batoki tu pintu. Kalu ada orang dengar Kita pe suara kong dia buka akang tu pintu, Kita mo maso deng makang sama-sama deng dia, kong dia lei makang sama-sama deng Kita. Orang yang menang dari tu kuasa jaha, Kita mo kase dudu dia sama-sama deng Kita pa Kita pe tahta, itu so sama deng Kita so menang dari tu kuasa jaha kong Kita dudu sama-sama deng Kita pe Bapa pa Dia pe tahta. Sapa ada talinga, lebe bae dia badengar jo apa tu Tuhan Allah pe Roh da kase tau pa jemaat-jemaat.” Abis itu, kita tu Yohanes lia satu pintu di sorga da tabuka. Kong kita dengar suara yang perna da babilang pa kita, tu suara itu pe kuat sama deng tu bunyi trompet. Trus tu suara itu babilang lei pa kita, “Yohanes, nae jo kamari! Kita mo se tunjung pa ngana tu hal-hal yang musti mo jadi abis ini.” Waktu itu jo, Tuhan pe Roh kuasai pa kita. Trus kita lia satu tahta di sorga, kong ada satu Orang yang da dudu di tahta itu. Dia yang da dudu di tahta itu bacahaya sama deng tu cahaya dari permata yaspis deng sardis, kong ada lei pelangi yang da balingkar di tahta itu. Tu pelangi itu pe cahaya dapa lia sama deng permata zamrud pe cahaya. Kong ada lei dua pulu ampa tahta laeng yang da bakliling di tahta itu, kong di atas tu dua pulu ampa tahta itu ada dudu dua pulu ampa tua-tua. Dorang da pake baju puti kong pa dorang pe kapala ada mahkota dari mas. Ada lei kilat kaluar dari tu satu tahta yang ada di tenga, kong dapa dengar bunyi guntur baku-baku sambung. Di muka tu satu tahta itu ada tuju obor yang da bamanyala, itu no tu Tuhan Allah pe tuju Roh. Deng di muka tu tahta itu dapa lia ada sesuatu yang sama deng lautan kaca tu de pe bening sama deng kristal. Kong di tenga tahta deng di sekliling tu tahta itu, ada ampa mahluk tu sama deng binatang. Tu ampa mahluk itu pe bagean muka deng blakang punung deng mata. Tu mahluk yang pertama sama deng singa, tu kadua sama deng sapi jantan muda, tu katiga pe muka sama deng manusia, kong yang kaampa sama deng burung rajawali yang da terbang. Tu ampa mahluk itu masing-masing ada anam sayap, kong pa de pe bagean dalam sampe luar punung deng mata. Siang deng malam tu mahluk-mahluk itu nyanda perna brenti bapuji-puji pa Tuhan. Dorang bilang, “Kudus, kudus, kudus jo Tuhan Allah, Tuhan Yang Mahakuasa. Tuhan yang dari dulu ada, yang skarang ada, deng yang mo datang lei.” Tu ampa mahluk itu manyanyi lagu puji-pujian deng hormat pa Dia yang da dudu di tahta, kong dorang lei ja bilang makase pa Dia. Dia itu yang hidop slama-lamanya. Kong tiap kali dorang beking bagitu, tu dua pulu ampa tua-tua itu berlutut di muka pa Dia yang da dudu di tahta itu trus dorang semba pa Dia yang hidop slama-lamanya. Kong waktu itu, dorang buka tu dong pe mahkota trus dorang taru di muka tu tahta itu deng babilang, “Ya Tuhan tu torang pe Tuhan Allah. Cuma Tuhan yang luar biasa, Tuhan yang pantas dapa hormat, deng lei Tuhan yang punya kuasa! Soalnya Tuhan so beking samua, kong itu samua ada lantaran Tuhan suka itu mo ada, so itu no Tuhan beking itu samua.” Kong kita lia pa Dia yang dudu di tahta itu pe tangan kanan ada satu gulungan kitab. Di bagean dalam deng luar dari tu gulungan kitab itu ada tulisan, kong tu gulungan kitab itu da segel deng tuju metrai. Kong kita lia lei satu malaekat yang kuat batanya deng suara kuat, “Sapa yang pantas mo buka tu tuju metrai, trus buka tu gulungan kitab itu?” Mar nyanda ada satu orang yang pantas for buka tu gulungan kitab ato mo lia apa yang ada di dalam tu gulungan kitab itu, bae itu yang ada di sorga, di bumi ato di bawa bumi tu tampa for orang mati. So itu kita sedi skali kong manangis, lantaran nyanda ada satu orang yang pantas mo buka tu gulungan kitab itu ato mo lia tu kitab itu pe dalam. Trus ada satu dari tu dua pulu ampa tua-tua yang babilang pa kita, “Ngana nyanda usa manangis. Tarukira jo bae-bae, ada tu raja Daud pe keturunan tu ja bilang Singa dari suku Yehuda, Dia itu so menang dari tu kuasa jaha. So itu Dia yang bole mo buka tu tuju metrai itu deng lei tu gulungan kitab itu.” Abis itu, kita lia satu Anak Domba da badiri di tenga-tenga tu tahta itu kong tu ampa mahluk deng samua tua-tua da bakliling akang pa Dia. Tu Anak Domba itu dapa lia sama deng so perna dapa bunung. Pa Dia itu ada tuju tanduk deng tuju mata. Tu tuju mata itu, itu no tu tuju Roh dari Tuhan Allah yang so dapa utus ka sluru bumi. Kong tu Anak Domba pi ambe tu kitab itu dari tangan kanan pa Dia yang dudu di atas tahta itu. Waktu tu Anak Domba ambe tu gulungan kitab itu, tu ampa mahluk deng tu dua pulu ampa tua-tua berlutut di muka pa Dia. Dorang itu masing-masing da pegang satu kecapi deng cawan dari mas. Tu cawan itu pe isi punung deng kemenyan, itu no tu sombayang dari Tuhan pe orang-orang. Kong dorang manyanyi satu lagu baru, dorang bilang, “Tu Anak Domba ini yang pantas trima tu gulungan kitab itu, deng buka tu de pe metrai-metrai. Soalnya Anak Domba ini so perna dapa bunung, Dia pe dara da pake for tubus tu orang-orang, kong deng bagitu dorang itu jadi Tuhan Allah pe kepunyaan. Dorang itu dari tiap fam, suku bangsa, bahasa deng dari tiap bangsa. Anak Domba ini so beking dorang jadi satu krajaan, jadi imam-imam yang ja beking tu karja yang Tuhan Allah da suru, kong dorang mo baprenta sbagai raja di dunia.” Abis itu kita dengar suara dari malaekat yang pe banya skali, kita lia dorang itu ada ribuan sampe jutaan. Dorang ada di sekliling tu tahta, tu ampa mahluk deng tu tua-tua itu. Dorang da manyanyi deng suara kuat, “Ni Anak Domba yang so perna dapa bunung, Dia yang pantas for trima tu kuasa, tu kekayaan, tu hikmat, tu kekuatan, tu hormat, tu pujian, deng Dia lei luar biasa.” Abis itu, kita dengar samua mahluk yang ada di sorga, di bumi, di bawa bumi tu tampa for orang mati, deng lei di dalam laut da babilang, “Torang puji deng hormat pa Dia yang dudu di atas tahta deng pa tu Anak Domba. Dia deng tu Anak Domba itu luar biasa deng pegang kuasa sampe slama-lamanya.” Kong tu ampa mahluk itu sama-sama babilang, “Amin!” Trus tu tua-tua berlutut kong basemba. Trus kita tu Yohanes lia pa Anak Domba. Dia da buka tu metrai yang pertama dari tu tuju metrai yang ada di gulungan kitab itu. Kong kita dengar mahluk yang pertama dari tu ampa mahluk itu babicara deng suara kuat sama deng guntur pe bunyi, dia bilang, “Mari jo!” Kong kita lia ada satu ekor kuda puti. Di atas tu kuda itu ada satu orang yang da dudu pegang pana, kong pa dia itu da kase akang mahkota, trus dia pigi sbagai pemenang for mo menang dari tu de pe musu-musu. Abis itu, tu Anak Domba itu buka metrai yang kadua, trus kita dengar mahluk yang kadua babilang, “Mari jo!” Kong maju satu ekor kuda yang laeng. Tu kuda itu pe warna mera sama deng api pe warna. Trus tu orang yang da nae di atas tu kuda itu da dapa satu peda basar. Dia dapa lei kuasa for ambe tu damai dari bumi, sampe tu orang-orang baku bunung. Kong tu Anak Domba itu buka metrai yang katiga. Waktu itu, kita dengar mahluk yang katiga babilang, “Mari jo!” Trus kita lia ada satu ekor kuda itang. Di atas tu kuda itu ada satu orang yang da dudu kong dia da pegang satu timbangan. Trus kita dengar sesuatu sama deng suara dari tenga-tenga pa tu ampa mahluk itu yang babilang, “Satu liter gandum yang bagus, de pe harga satu doi perak, kong tiga liter gandum yang nyanda bagus, de pe harga lei satu doi perak, trus jang beking rusak tu pohong zaitun yang ja se hasil minya deng pohong anggor yang ja se hasil bua anggor.” Kong tu Anak Domba buka metrai yang kaampa. Waktu itu, kita dengar mahluk yang kaampa babilang, “Mari jo!” Trus kita lia ada satu ekor kuda yang de pe warna puti pucat, kong ada satu orang yang da nae pa tu kuda itu. Tu orang itu pe nama ‘Maut’. Kong ada lei sesuatu tu ja bilang ‘krajaan maut’ da iko-iko di blakang pa tu orang itu. Dorang dapa kuasa for bunung sprampa manusia di bumi pake peda, pake kelaparan, pake panyaki yang bajangke deng lei pake binatang buas. Kong tu Anak Domba itu buka tu metrai yang kalima. Waktu itu, kita lia ada orang-orang pe jiwa di bawa tu tampa ja kase korban persembahan pa Tuhan. Itu no tu jiwa-jiwa dari orang-orang yang da dapa bunung lantaran ja kase tau tu Tuhan Allah pe firman, deng lei ja kase tau tu kesaksian tentang Yesus yang ada pa dorang pa orang-orang. Tu jiwa-jiwa itu babilang deng suara kuat, “Ya Tuhan yang Mahakuasa, yang kudus, deng yang butul! Brapa lama lei baru Tuhan mo hakimi kong kase hukuman pa orang-orang di bumi yang da babunung pa torang?” Abis itu, tu samua jiwa itu masing-masing da trima juba puti, kong ada yang bilang pa dorang supaya istirahat lei sadiki sampe tu jumla orang yang mo mati dapa bunung so gnap. Soalnya masi ada lei dorang pe tamang-tamang playan deng dorang pe sudara-sudara yang percaya yang nanti mo mati dapa bunung sama deng dorang. Trus tu Anak Domba buka tu metrai yang kaanam. Waktu itu kita lia ada tana goyang pe kuat skali, tu matahari jadi itang sama deng tu baju warna itang, kong bulan jadi mera sama deng dara pe warna. Tu bintang-bintang di langit ciri ka bumi, sama deng tu bua ara yang masi manta ciri dari de pe pohong waktu angin ribut da batiop. Kong langit tagulung sama deng gulungan kitab yang da gulung, kong tu gunung-gunung deng pulau-pulau taangka dari pa de pe tampa. Waktu itu, samua orang brusaha basambunyi di goa-goa ato di antara batu-batu karang di gunung, mulai dari tu raja-raja di bumi, pejabat-pejabat, perwira-perwira, orang-orang kaya, orang-orang yang ada kuasa, samua budak deng lei tu orang-orang bebas. Dorang bilang pa gunung-gunung deng batu-batu itu, “Tutu jo pa torang deng se sambunyi akang pa torang dari pa Dia yang dudu di tahta itu deng lei dari tu hukuman brat yang Anak Domba mo kase.” Soalnya so sampe tu hari waktu Tuhan Allah deng Anak Domba mo hakimi samua orang, kong nyanda ada satu orang yang tahang mo mangada tu hukuman brat itu. Abis itu, kita tu Yohanes lia ada ampa malaekat badiri di ampa penjuru bumi. Dorang da tahang angin di ampa penjuru bumi supaya tu angin nyanda batiop di darat, laut, ato di pohong-pohong. Tu ampa malaekat itu so dapa kuasa for mo se rusak tu darat deng laut. Kong kita lia lei ada malaekat laeng muncul dari sabla timur, tu tampa matahari ja kaluar akang. Tu malaekat itu da bawa cap dari Tuhan Allah yang hidop. Trus tu malaekat itu babilang deng suara kuat pa tu ampa malaekat, dia bilang bagini, “Ngoni jang dulu beking rusak tu darat ato laut ato pohong-pohong! Soalnya Tuhan so suru pa torang se cap tu testa dari tu orang-orang tu ja beking tu torang pe Tuhan Allah da suru, supaya dorang nyanda dapa cilaka. Nanti kalu torang so klar cap pa dorang, baru ngoni bole beking itu.” Abis itu kita dengar kalu tu orang-orang yang dapa cap di testa, de pe jumla ada sratus ampa pulu ampa ribu orang. Dorang itu dari samua dua blas suku Israel. Ini no dorang: Dari suku Yehuda, Ruben deng Gad, masing-masing suku itu ada dua blas ribu orang yang da dapa cap. Dari suku Asyer, Naftali deng Manasye, masing-masing suku itu ada dua blas ribu orang lei yang da dapa cap. Dari suku Simeon, Lewi deng Isakhar, masing-masing suku itu ada dua blas ribu orang yang da dapa cap. Dari suku Zebulon, Yusuf, deng Benyamin, masing-masing suku itu lei ada dua blas ribu orang yang da dapa cap. Abis itu, kita lia ada klompo orang pe banya skali sampe nyanda dapa rekeng de pe jumla. Dorang itu dari samua fam, suku bangsa, bahasa deng bangsa. Dorang samua badiri di muka tahta deng di muka pa Anak Domba itu. Dorang da pake juba puti deng masing-masing da pegang daong palem. Kong deng suara kuat dorang bilang, “Tu da se slamat pa torang, itu Tuhan Allah yang dudu di atas tahta, deng lei tu Anak Domba.” Waktu itu samua malaekat badiri bakliling di tahta itu deng tu tua-tua deng tu ampa mahluk. Dorang berlutut sampe dorang pe muka kana di tana di muka tu tahta itu, kong semba pa Tuhan Allah. Kong dorang babilang, “Amin! Mari jo torang puji pa Tuhan Allah. Dia itu luar biasa deng bijaksana. Torang lei bilang makase deng kase hormat pa Dia. Dia itu berkuasa, deng Dia tu torang pe Tuhan Allah itu kuat sampe slama-lamanya! Amin.” Kong satu dari tu tua-tua itu batanya pa kita, “Tu orang-orang yang da pake juba puti itu, dorang itu sapa? Kong dari mana dorang?” Kita manyao, “Bapak, bapak yang tau tu dorang itu.” Kong dia bilang pa kita, “Dorang itu no tu orang-orang yang so lewat tu siksa yang hebat skali. Dorang pake tu Anak Domba pe dara for se hapus dong pe dosa-dosa, itu sama deng dorang so cuci tu dong pe juba jadi puti. So itu, dorang ada di muka pa Tuhan Allah pe tahta kong layani pa Dia siang deng malam pa Dia pe Ruang Mahasuci. Kong Dia yang dudu di atas tahta itu mo ada di tenga-tenga pa dorang for jaga pa dorang, itu sama deng Dia da se badiri akang tenda di atas pa dorang. Dorang so nyanda mo mendrita lantaran lapar deng rasa aus lei. Kong tu panas matahari ato tu udara yang panas nyanda mo beking siksa pa dorang. Soalnya tu Anak Domba yang ada di tenga-tenga tahta itu mo jadi dorang pe Gembala for jaga pa dorang. Dia mo bawa pa dorang pi minum di mata aer yang kase tu hidop, kong Tuhan Allah mo hapus samua dorang pe aer mata.” Kong tu Anak Domba buka tu metrai yang katuju. Waktu itu, nyanda dapa dengar suara apa-apa di sorga slama kira-kira stenga jam. Trus kita lia tuju malaekat yang da badiri di muka pa Tuhan Allah, kong dorang da trima tuju trompet. Kong datang satu malaekat laeng, dia badiri di dekat tampa ja kase korban persembahan. Dia da bawa satu baskom kacili dari mas, kong dia da trima banya kemenyan for mo taru di baskom itu sama-sama deng tu sombayang dari Tuhan pe orang-orang. Dia taru tu kemenyan deng sombayang-sombayang itu for jadi korban persembahan di tampa persembahan yang da beking dari mas, kong dia bakar di situ di muka tu tahta itu. Kong tu asap dari kemenyan deng tu sombayang-sombayang dari Tuhan pe orang-orang itu, nae sama-sama dari pa tu malaekat itu pe tangan sampe pa Tuhan Allah. Abis itu tu malaekat ambe tu baskom kong isi deng api tu dari tampa ja kase korban persembahan, trus dia lempar tu baskom itu ka bumi. Kong dapa dengar bunyi guntur deng kilat baku-baku sambung, deng ada lei tana goyang. Waktu itu tu tuju malaekat yang masing-masing da pegang trompet, dorang siap-siap for mo tiop trompet. Tu malaekat yang pertama tiop tu de pe trompet, kong jadi ujang es deng api yang da bacampur dara, kong tu samua itu da se lempar ka bumi. Trus sepertiga dari bumi angus tabakar, sepertiga dari pohong-pohong angus tabakar, deng lei samua rumpu ijo angus lei tabakar. Tu malaekat kadua tiop de pe trompet, trus ada sesuatu tu sama deng gunung pe basar yang da manyala-manyala lantaran tabakar tu da se lempar ka laut. Trus sepertiga dari laut bruba jadi dara, deng sepertiga dari samua binatang yang da hidop di laut mati, bagitu lei deng sepertiga dari samua kapal yang da blayar di laut ancor. Tu malaekat yang katiga tiop de pe trompet, kong dari langit ciri satu bintang basar. Tu bintang itu da bamanyala-manyala sama deng obor pe manyala, kong tu bintang itu ciri ka sepertiga kuala-kuala deng lei ciri ka sepertiga dari samua mata aer. Tu bintang yang da ciri itu pe nama Apsintus, tu de pe arti pait. Waktu tu bintang itu da ciri di aer, tu sepertiga dari aer-aer itu bruba jadi pait, kong banya orang mati lantaran da minum tu aer itu. Tu malaekat kaampa tiop de pe trompet, kong sepertiga dari matahari dapa hantam sampe tu sepertiga itu so nyanda basinar, so itu sepertiga siang jadi nyanda trang. Tu sepertiga dari bulan lei da dapa hantam sampe tu sepertiga itu jadi glap. Bagitu lei deng tu sepertiga bintang-bintang da dapa hantam sampe tu sepertiga itu jadi glap, so itu sepertiga malam jadi glap skali. Kong kita lia ada satu ekor burung rajawali da terbang tinggi di langit. Trus kita dengar tu burung babilang deng suara kuat, “Cilaka, cilaka, cilaka jo tu orang-orang di bumi! Soalnya masi ada tiga malaekat lei yang mo tiop dong pe trompet.” Abis itu malaekat yang kalima tiop de pe trompet, kong kita lia satu bintang ciri dari langit ka bumi. Trus ada yang kase pa tu bintang itu kunci for buka tu tampa maso ka jurang maut, tu tampa yang ja tahang akang setang-setang. Kong dia buka tu tampa maso ka jurang maut itu, trus dari tu jurang itu kaluar asap pe tabal sama deng tu asap yang da kaluar dari tungku yang pe basar skali. Kong tu matahari deng langit jadi glap tatutu deng tu asap itu. Kong dari tu asap itu kaluar belalang yang turung ka bumi. Tu belalang itu da dapa kemampuan for basengat pa orang-orang, kong de pe saki sama deng tu saki waktu kalajengking da sengat. Tu belalang itu da dapa prenta supaya dorang jang beking rusak tu rumpu-rumpu, tanaman-tanaman ato tu pohong-pohong di bumi, mar dorang cuma bole pi srang tu orang-orang yang nyanda ada cap di testa, tu cap yang dari Tuhan Allah. Tuhan Allah kase isin pa tu belalang for srang pa orang-orang itu sampe dorang jadi siksa skali slama lima bulan, mar belalang nimbole bunung tu orang-orang itu. Kong tu siksa yang orang-orang itu da rasa waktu belalang itu da sengat, de pe siksa sama deng kalajengking da sengat. Kong slama lima bulan itu, tu orang-orang mo brusaha supaya dorang bole mo mati, mar dorang nyanda mo mati-mati. Dorang suka skali mo mati mar tu maut cuma bajao dari pa dorang. Tu belalang itu pe model sama deng kuda yang da se siap for baprang. Pa dorang pe kapala ada sesuatu yang sama deng mahkota dari mas, kong dorang pe muka sama deng manusia pe muka. Trus dorang pe rambu sama deng parampuang pe rambu, kong dorang pe gigi sama deng singa pe gigi. Dorang pe dada da pele deng sesuatu tu sama deng tentara pe baju besi. Kong dorang pe sayap pe babunyi waktu terbang sama deng bunyi dari tentara pe kreta-kreta kuda pe banya yang samantara da baserbu di tampa prang. Trus dorang pe ekor sama deng kalajengking pe ekor yang ada de pe bisa. Kong pa dorang pe ekor itu ada kuasa for beking siksa orang-orang slama lima bulan. Trus dorang pe raja yang bertugas jaga tu jurang maut. Tu raja itu pe nama dalam bahasa Ibrani ja bilang Abadon, tu dalam bahasa Yunani ja bilang Apolion tu de pe arti pangbarusak. Tu malapetaka pertama itu so lewat, mar masi ada dua malapetaka lei. Kong tu malaekat yang kaanam tiop tu de pe trompet, trus kita dengar suara yang kaluar dari ampa huk tu model tanduk yang ada di tampa korban persembahan. Tu tampa korban itu da beking dari mas kong ada di muka pa Tuhan Allah. Tu suara itu babilang pa tu malaekat kaanam yang da pegang tu trompet itu, “Pi kase lapas jo tu ampa malaekat yang da taika di dekat kuala basar Efrat itu!” Trus tu malaekat itu pi se lapas tu ampa malaekat, supaya tu ampa malaekat itu mo bunung sepertiga manusia. Dorang ampa itu memang so ditentukan for mo se lapas di jam, hari, bulan deng taong itu. Kong ada pe banya tentara-tentara berkuda, kita dengar dorang pe jumla ada dua ratus juta tentara. Kong pa kita pe penglihatan, kita lia tu tentara-tentara deng dong pe kuda-kuda. Tu tentara-tentara itu da pake baju besi for pele dong pe dada. Tu baju-baju itu ada tiga warna: ada tu warna mera sama deng api, ada tu biru tua sama deng batu permata deng ada tu kuning sama deng belerang. Kong tu kuda-kuda pe kapala pe model sama deng singa pe kapala, trus dari tu kuda-kuda pe mulu kaluar api, asap deng belerang. Tu api, asap deng belerang yang da kaluar dari tu kuda itu pe mulu, itu no tu tiga malapetaka. Kong tu tiga malapetaka itu da se mati sepertiga dari manusia di bumi. Soalnya tu kuda-kuda itu ada kuasa for mo siksa pa manusia, tu dong pe kuasa itu ada pa dong pe mulu deng ekor. Tu dorang pe ekor-ekor itu ada sesuatu sama deng ular pe kapala yang ada kuasa for siksa pa manusia. Mar tu manusia yang nyanda mati deng tu malapetaka-malapetaka itu, dorang tetap nimau bertobat dari beking-beking tu jaha. Dorang nyanda brenti ja semba tu setang-setang deng patong opo-opo yang da beking dari mas, perak, tembaga, batu deng kayu, padahal tu samua opo-opo itu nimbole balia, badengar ato bajalang. Dorang lei nimau mo bertobat dari babunung orang, pake ilmu itang, ja baseks bebas deng bapancuri. Kong kita lia ada satu malaekat laeng yang kuat turung dari sorga. Dia pe badan tabungkus deng awan, kong pelangi ada balingkar pa de pe kapala. Dia pe muka bacahaya sama deng matahari, kong de pe kaki dapa lia sama deng tiang dari api. Kong pa dia pe tangan ada satu gulungan kitab kacili yang da tabuka. Dia pe kaki kanan da bainjang di laut kong de pe kaki kiri da bainjang di darat. Kong dia bataria deng suara kuat sama deng singa yang da mengaum. Abis dia bataria, tu tuju guntur babicara deng suara kuat. Serta tu tuju guntur klar babicara, kita mo tulis apa tu guntur da bilang, cuma kita dapa dengar ada suara dari sorga yang babilang, “Ngana jang tulis itu! Ngana musti se rahasia apa tu tuju guntur itu da bilang.” Abis itu, tu malaekat yang kita da lia da badiri tu de pe kaki satu di laut deng de pe kaki laeng di darat itu, dia angka de pe tangan kanan ka langit, trus dia basumpa demi Dia yang hidop slama-lamanya, Dia yang so beking langit deng samua tu ada di situ, bumi deng de pe isi, deng lei laut deng de pe isi. Dia basumpa, “Tuhan so nyanda mo tunda for beking tu Dia pe rencana.” Nanti waktu tu malaekat katuju tiop tu de pe trompet, waktu itu no Tuhan Allah mo se gnap tu Dia pe rencana yang rahasia. Tu rencana rahasia itu yang Dia so kase tau dari dulu pa Dia pe nabi-nabi tu ja kase tau Dia pe pesan pa orang-orang. Abis itu, kita dengar tu suara yang sama deng tadi dari sorga babilang pa kita, “Pigi jo kong ambe tu gulungan kitab yang da tabuka di tangan pa malaekat yang da badiri di atas laut deng darat itu.” So itu kita pigi pa tu malaekat itu, trus kita minta pa dia supaya kase tu gulungan kitab kacili itu pa kita. Kong dia babilang pa kita, “Ambe jo, kong makang jo ini! Tu gulungan kitab ini mo beking ngana pe puru rasa pait, mar pa ngana pe mulu mo rasa manis sama deng madu pe manis.” Kong kita ambe tu gulungan kitab kacili itu dari pa malaekat itu pe tangan, trus kita makang. Pa kita pe mulu, tu gulungan itu dapa rasa manis sama deng madu, mar serta kita tlang tu gulungan itu, pa kita pe puru dapa rasa jadi pait. Abis itu, ada suara yang prenta pa kita, “Ngana musti kase tau ulang pa orang-orang apa tu mo jadi nanti. Ngana kase tau itu pa orang-orang, pa suku-suku bangsa, pa orang-orang yang pake macam-macam bahasa, deng lei pa raja-raja.” Abis itu, ada yang kase pa kita satu batang kayu yang de pe model sama deng tu alat yang ja pake for baukur. Kong Tuhan Allah prenta pa kita bagini, “Yohanes, bangong jo kong pi ukur tu Kita pe Ruang Mahasuci deng tu tampa korban persembahan, kong rekeng lei brapa tu orang yang ja semba pa Kita. Mar ngana jang ukur tu kintal yang di luar dari tu Ruang Mahasuci itu, lantaran tu tampa itu so kase for bangsa-bangsa yang nyanda kanal pa Kita. Kong slama ampa pulu dua bulan, dorang mo kuasai tu Yerusalem tu kota yang suci itu. Kita lei mo kase kuasa pa Kita pe dua saksi, kong dorang dua itu mo kase tau tu Kita pe pesan pa orang-orang slama sribu dua ratus anam pulu hari, kong slama itu dorang mo pake baju berkabung lantaran sedi deng tu kota itu.” Tu dua saksi itu sama deng tu dua pohong zaitun deng tu dua tiang tampa ja taru akang pelita yang ada di muka pa Tuhan Allah yang pegang kuasa di sluru dunia. Kalu ada orang yang mo beking tu jaha pa dorang dua itu, dari pa dorang pe mulu mo kaluar api yang mo se angus tu dong pe musu-musu itu. Deng cara bagitu no tu orang yang mo beking jaha pa dorang dua itu mo mati. Waktu dorang kase tau tu Tuhan pe pesan pa orang-orang, Tuhan kase kuasa pa dorang. Dorang dapa kuasa for beking tu ujang nyanda turung dari langit, itu sama deng dorang dapa kuasa for tutu tu langit. Dorang dapa kuasa for beking samua aer bruba jadi dara, deng lei dapa kuasa for beking samua malapetaka di bumi. Kong tiap kali dorang suka tu malapetaka mo jadi, itu pasti jadi. Kalu dorang dua so klar kase tau tu Tuhan pe pesan, ada binatang buas kaluar dari jurang maut tu tampa ja tahang akang setang-setang. Kong tu binatang buas itu srang deng se kala pa dorang kong bunung pa dorang. Kong tu dua saksi itu pe mayat mo tabiar-biar di jalang raya di kota basar itu. Tu kota basar itu no tu tampa dorang pe Tuhan da se salib akang. Tu orang-orang di kota itu pe kalakuan jaha, jadi orang ja bilang lei kota itu kota Sodom deng Mesir. Orang-orang dari samua fam, suku bangsa, bahasa deng bangsa mo lia-lia tu dorang dua pe mayat itu slama tiga hari stenga. Kong orang-orang itu nyanda mo kase isin kubur tu dorang dua pe mayat. Samua orang tu ada di dunia mo snang lantaran tu dua saksi itu so mati. Dorang samua mo beking pesta kong lei baku kase kado, lantaran tu dua saksi itu so beking samua orang di bumi dapa banya siksa. Mar serta so lewat tiga hari stenga, Tuhan Allah kase akang nafas hidop pa tu dua saksi itu sampe dorang dua badiri. Kong samua orang yang da lia dorang dua itu so hidop ulang jadi tako skali. Tu dua orang saksi itu dapa dengar suara yang pe kuat skali dari sorga babilang pa dorang, “Nae jo kamari!” Kong dorang dua nae ka sorga, samantara itu awan tutu pa dorang. Waktu itu, dorang pe musu-musu da lia tu samua itu. Waktu itu jo ada tana goyang pe kuat skali kong sepersepulu dari kota itu ancor. Ada tuju ribu orang mati lantaran tu tana goyang itu, kong tu orang-orang laeng yang da slamat jadi tako skali, trus dorang puji deng hormat pa Tuhan Allah yang ada di sorga. Deng bagitu tu malapetaka kadua so lewat. Mar co ngoni lia, tu malapetaka yang katiga so nyanda lama lei so mo datang. Tu malaekat yang katuju tiop de pe trompet, kong kita dengar suara-suara yang pe kuat skali dari sorga babilang, “Skarang yang berkuasa di dunia ini, cuma tu torang pe Tuhan deng Kristus tu Raja yang mo se slamat pa manusia. Dia itu mo baprenta sbagai Raja sampe slama-lamanya.” Kong tu dua pulu ampa tua-tua yang da dudu pa dorang pe tahta di muka pa Tuhan Allah, dorang berlutut sampe dong pe muka kana di tana di muka pa Tuhan Allah, kong dorang semba pa Tuhan Allah. Dorang bilang, “Torang bilang makase pa Tuhan Allah Yang Mahakuasa! Dia itu Tuhan yang dari dulu ada sampe skarang. Torang bilang makase lantaran Tuhan so pake tu Tuhan pe kuasa yang basar, kong so mulai baprenta sbagai Raja. Samua suku bangsa yang nyanda percaya so mara, mar tu waktu for Tuhan se tunjung Dia pe mara pa tu suku-suku itu so sampe, kong lei so de pe waktu for Tuhan mo adili orang-orang yang so mati. Trus so de pe waktu lei for Tuhan mo kase akang upah: pa tu orang-orang yang ja beking tu Dia da suru, pa nabi-nabi tu ja kase tau Tuhan pe pesan pa orang-orang, pa orang-orang yang dong pe hati bersi di muka pa Tuhan, deng lei pa orang-orang yang hormat pa Dia, biar itu orang yang nyanda penting ato orang yang penting. Kong waktu itu lei, Dia mo se binasa sapa jo yang da se binasa tu bumi.” Abis itu, kita dapa lia di sorga tu Tuhan Allah pe Ruang Mahasuci tabuka, kong kita lia tu Dia pe tabut perjanjian ada di Ruang Mahasuci itu. Trus ada kilat yang bapancar deng bunyi guntur yang pe kras, ada lei tana goyang deng ujang es yang kras skali. Abis itu, kage-kage kita lia tanda yang luar biasa di langit. Di langit dapa lia ada satu parampuang yang de pe badan da tabungkus deng matahari. Dia pe kaki ada di atas bulan, trus pa dia pe kapala ada mahkota yang da beking dari dua blas bintang. Dia da hamil kong so sampe de pe waktu for mo melahirkan, so itu dia da bataria lantaran saki mo melahirkan. Trus dapa lia lei tanda yang laeng di langit. Dapa lia ada satu naga mera yang basar. Tu naga itu pe kapala ada tuju deng de pe tanduk ada spulu, kong di atas pa de pe tuju kapala itu, masing-masing ada mahkota. Kong deng dia pe ekor, dia hela sepertiga dari bintang di langit, trus dia lego tu bintang-bintang itu ka bumi. Tu naga itu badiri di muka tu parampuang yang mo melahirkan itu, supaya dia bole mo tlang tu Anak waktu tu parampuang itu melahirkan. Tu parampuang melahirkan satu Anak laki-laki. Mar ada yang datang kong rampas tu Anak itu, trus bawa tu Anak pa Tuhan Allah deng pa Tuhan pe tahta. Tu Anak itu yang nanti mo baprenta pa samua suku bangsa di bumi pake tongkat besi. Kong tu parampuang itu lari ka padang gurun, di satu tampa yang Tuhan Allah so se sadia akang for dia. Di situ ada yang mo urus pa dia slama sribu dua ratus anam pulu hari. Abis itu jadi prang di sorga. Mikhael deng de pe anak bua tu malaekat-malaekat laeng da baprang malawang tu naga deng lei tu malaekat-malaekat yang so jadi tu naga pe anak bua. Mar tu naga deng de pe anak bua itu kala baprang, sampe dorang samua so nimbole lei tinggal di sorga, dorang musti kaluar dari situ. Naga yang basar itu no tu ular tua, tu ja bilang setang pe bos ato setang tu ja beking sesat pa orang-orang di sluru dunia. Dia itu da dapa lempar ka bumi sama-sama deng de pe anak bua. Kong kita dengar suara yang kuat di sorga babilang, “Skarang ini so sampe de pe waktu for torang pe Tuhan Allah mo se slamat tu Dia pe orang-orang. Dia mo se tunjung De pe kuasa, Dia mo baprenta sbagai Raja. Deng skarang lei so sampe tu waktu for Kristus tu Raja yang mo se slamat pa manusia dari dulu mo se tunjung tu Dia pe kuasa di dunia. Soalnya tu setang pe bos so dapa lempar kaluar dari sorga. Dia itu yang siang malam ja batudu tu sudara-sudara yang percaya di muka pa Tuhan. Kong tu sudara-sudara yang percaya so se kala pa setang pe bos. Dorang da se kala pa dia deng tu Anak Domba itu pe dara, deng dorang se kala lei pa dia pake tu dong pe kesaksian tentang Yesus. Kong dorang so nyanda farduli deng dong pe nyawa sandiri, sampe dorang siap mati. So itu, snang jo ngoni yang tinggal di sorga, mar ngoni yang tinggal di darat deng di laut mo rasa tu siksa. Soalnya deng mara skali setang pe bos so turung pa ngoni, lantaran dia tau kalu dia pe waktu so mo abis.” Kong waktu tu naga itu sadar kalu dia so dapa lempar ka bumi, dia pi cari tu parampuang yang da se lahir tu Anak laki-laki itu. Mar ada yang kase akang dua sayap burung rajawali yang basar pa tu parampuang itu, supaya dia bole terbang pa dia pe tampa di padang gurun, tu tampa yang dia mo dapa urus akang slama tiga stenga taong, deng lei tu tampa itu jao dari tu naga pe tampa. Kong tu naga itu kase kaluar aer dari pa de pe mulu. Tu aer yang da bakaluar itu pe banya sama deng satu kuala bapigi pa tu parampuang itu for mo se anyor pa dia. Mar bumi da tolong pa tu parampuang itu. Tu bumi da buka de pe tana sama deng mulu yang da tabuka, kong tu bumi tlang tu aer yang da kaluar dari tu naga pe mulu itu. Abis itu, tu naga jadi mara skali pa tu parampuang itu. So itu dia pi baprang deng tu parampuang itu pe keturunan yang laeng. Dorang itu no tu orang-orang yang iko tu Tuhan Allah pe prenta deng lei yang ja kase tau tu dorang pe kesaksian tentang Yesus. Kong tu naga itu badiri di pante. Kong kita lia ada satu binatang buas kaluar dari dalam laut. Tu binatang pe kapala ada tuju kong de pe tanduk ada spulu. Di atas pa de pe tanduk-tanduk itu ada spulu mahkota, kong pa dia pe kapala-kapala da tatulis nama yang bahojat pa Tuhan. Binatang yang kita da lia itu, de pe badan pe model sama deng macan tutul. Dia pe kaki sama deng beruang pe kaki, kong de pe mulu sama deng singa pe mulu. Kong tu naga kase tu de pe kekuatan, tu de pe tahta deng tu de pe kuasa yang basar pa tu binatang itu. Kong kita lia satu dari tu binatang itu pe kapala ada bekas luka. Tu luka itu bole mo beking mati pa dia, mar tu luka itu so bae. Samua orang yang ada di bumi heran da lia tu binatang itu, kong dorang iko pa binatang itu. Trus dorang semba pa tu naga lantaran dia da kase kuasa pa tu binatang itu. Dorang lei da semba pa tu binatang deng bilang, “Nyanda ada yang mo sama kuat rupa tu binatang itu pe kuat. Nyanda ada yang mampu mo malawang se kala tu binatang itu.” Tuhan Allah se biar tu binatang itu for basombong tentang tu binatang pe kuasa deng lei for bahojat pa Tuhan Allah, tu binatang lei dapa kuasa for baprenta slama ampa pulu dua bulan. Tu binatang mulai bahojat tentang Tuhan Allah, dia bahojat tu Tuhan Allah pe nama, deng dia bahojat tu Tuhan Allah pe tampa tinggal di sorga deng lei samua yang tinggal di sana. Tuhan Allah lei kase isin pa dia for baprang malawang Tuhan pe orang-orang, kong dia se kala pa dorang. Dia lei dapa kuasa for baprenta samua orang dari samua fam, suku bangsa, bahasa deng bangsa. Samua orang yang tinggal di bumi mo semba pa tu binatang itu. Dorang itu no tu orang-orang yang dong pe nama nyanda da tulis di dalam buku kehidupan, dari jo ni dunia da beking. Tu buku itu Anak Domba punya, tu Anak Domba yang so dapa bunung. Sapa yang ada talinga, lebe bae dia badengar jo bae-bae tu brita ini, “Sapa yang memang so ditentukan for mo dapa tahang di bui, dia pasti dapa tangka. Sapa yang memang so ditentukan mo dapa bunung pake peda, dia pasti dapa bunung deng peda.” So itu, tu Tuhan pe orang-orang musti tetap percaya pa Dia deng batahang percaya biar lei dapa siksa. Abis itu kita lia lei satu binatang buas laeng kaluar dari dalam bumi. Tu binatang itu ada dua tanduk sama deng tu tanduk dari domba pe anak, kong dia pe suara sama deng naga pe suara. Kong di muka pa tu binatang yang pertama itu, dia pake samua tu binatang pertama itu pe kuasa. Dia beking samua orang di bumi basemba pa tu binatang yang pertama itu. Tu binatang yang pertama itu ada luka brat, mar so bae. Tu binatang yang kadua itu beking tanda-tanda yang pe hebat skali, malatare dia sampe da kase turung api dari langit ka bumi di muka pa manusia. Kong deng tu tanda-tanda itu yang dia da beking di muka pa binatang yang pertama itu, dia bole tipu tu orang-orang di bumi for iko pa dia. Dia suru pa dorang beking satu patong rupa tu binatang yang pertama, tu binatang yang so dapa potong deng peda mar tetap da hidop. Kong tu binatang yang kadua itu dapa kuasa for beking tu patong rupa tu binatang yang pertama itu bole babicara deng babunung tu orang-orang yang nyanda semba pa dia. Binatang yang kadua lei suru tiap orang dapa cap pa dorang pe tangan kanan ato testa. Tu orang-orang itu, tu orang yang nyanda penting deng yang penting, tu orang miskin deng kaya, deng lei tu orang yang jadi budak deng yang bebas. Kong nyanda ada satu orang yang bole bajual ato babli apa-apa kalu dia nyanda ada tu cap itu. Tu cap itu ada tatulis tu binatang pertama pe nama ato nomor dari de pe nama. Jadi tu paling penting di sini, orang musti ada hikmat. Sapa yang bijaksana, dia musti cari tau bae-bae tu nomor dari binatang itu lantaran itu nomor dari satu orang pe nama, kong tu nomor itu 666. Abis itu, kita lia Anak Domba da badiri di bukit Sion kong ada sratus ampa pulu ampa ribu orang da sama-sama deng Dia. Pa tu orang-orang itu pe testa ada tatulis tu Anak Domba pe nama deng Dia pe Bapa pe nama. Kong kita dengar ada suara dari sorga. Tu suara itu pe kuat sama deng tu aer terjun basar, deng tu suara itu pe kras sama deng guntur. Tu suara yang kita da dengar itu sama deng suara musik dari orang-orang yang da bermain kecapi. Kong di muka tahta deng di muka ampa mahluk deng tu tua-tua itu, tu sratus ampa pulu ampa ribu orang itu da manyanyi satu lagu baru. Nyanda ada satu orang lei yang bole mo blajar tu lagu itu kacuali tu sratus ampa pulu ampa ribu orang itu. Dorang itu no tu orang-orang yang Tuhan Allah so se slamat dari dunia ini. Dorang itu hidop deng hati yang bersi, itu sama deng laki-laki yang nyanda perna tidor deng parampuang. Dorang itu yang ja iko pa Anak Domba ka mana jo Dia pigi. Dorang dapa tubus dari antara manusia sbagai persembahan yang paling pertama for Tuhan Allah deng Anak Domba. Kong dorang itu nyanda perna badusta, kong nyanda ada yang kase sala pa dorang. Abis itu, kita lia satu malaekat laeng da terbang di langit. Dia itu da bawa Kabar Bae yang kekal, kong dia mo kase tau tu Kabar Bae itu pa orang-orang yang tinggal di bumi, orang dari samua fam, suku bangsa, bahasa deng bangsa. Tu malaekat itu babicara deng suara kuat, “Ngoni musti tako pa Tuhan Allah, ngoni musti puji deng hormat pa Dia. Soalnya tu waktu for Dia mo adili samua orang so sampe. Semba jo pa Dia yang da beking langit, bumi, laut deng samua mata aer.” Abis itu, datang satu malaekat laeng, tu malaekat yang kadua. Kong tu malaekat kadua itu babilang, “So ancor, so ancor tu kota basar Babel itu! Tu orang-orang di kota Babel itu so pengaruhi samua suku bangsa di bumi supaya ja iko tu de pe keinginan yang cabul, itu sama jo deng dorang so kase minum anggor pa samua suku bangsa sampe mabo kong beking yang nyanda pantas mo beking.” Abis itu, datang lei tu malaekat laeng, malaekat yang katiga. Tu malaekat katiga itu babilang deng suara kuat, “Sapa jo yang semba pa tu binatang buas deng tu binatang itu pe patong, deng sapa jo yang trima tu cap dari tu binatang itu pa dia pe testa ato tangan, Tuhan Allah mo mara skali pa orang-orang itu. Dia mo hukum deng kejam pa dorang, itu sama deng dorang da minum tu anggor asang yang da saleng di glas tu nyanda da campur akang apa-apa. Kong dorang mo dapa siksa pake api deng belerang di muka pa tu malaekat-malaekat yang kudus deng di muka pa Anak Domba. Asap dari tu api yang beking siksa pa dorang itu mo ada trus sampe slama-lamanya. Dorang itu yang ja semba tu binatang buas itu deng de pe patong, deng lei sapa-sapa yang da trima cap dari tu binatang itu pe nama, dorang samua itu mo dapa siksa trus siang deng malam.” Jadi itu samua pe maksut: tu Tuhan pe orang-orang musti tetap batahang percaya biar lei dapa siksa, dorang itu yang tetap ja iko tu Tuhan pe prenta deng percaya trus pa Yesus. Kong kita dengar suara dari sorga yang babilang, “Yohanes, tulis jo ini: mulai skarang, kalu tu orang-orang percaya pa Tuhan mati, dorang itu yang paling snang!” Kong Tuhan pe Roh babilang, “Butul, dorang mo snang! Dorang itu ja layani pa Tuhan biar rasa siksa skali kong skarang dorang bole istirahat dari samua tu dorang da beking itu, lantaran laporan tentang samua yang dorang da beking di bumi mo ada sama-sama deng dorang di sorga.” Abis itu kita lia ada satu awan puti, kong di atas awan itu da dudu satu orang. Dia yang sama deng Anak Manusia. Pa Dia pe kapala ada mahkota yang da beking dari mas, deng Dia da pegang satu sabit tajang. Trus ada malaekat laeng kaluar dari Tuhan Allah pe Ruang Mahasuci. Tu malaekat itu babilang deng suara kuat pa Dia yang da dudu di atas awan itu, “Kase ayun jo tu ngana pe sabit itu for mo bapotong, lantaran tu waktu for bapanen so sampe, tu hasil-hasil tanaman di bumi so siap mo panen.” Kong Dia yang da dudu di atas awan itu kase ayun tu De pe sabit ka atas bumi for bapanen, trus ambe tu hasil-hasil di bumi. Abis itu, di sorga ada satu malaekat laeng kaluar lei dari Tuhan Allah pe Ruang Mahasuci. Dia da pegang lei satu sabit yang tajang. Trus ada satu malaekat laeng lei datang dari tu tampa korban persembahan. Dia itu yang dapa kuasa for jaga tu api di situ. Kong dia babicara deng suara kuat pa tu malaekat yang da pegang sabit tajang itu, dia bilang, “Kase ayun jo tu ngana pe sabit yang tajang itu for panen tu bua-bua di pohong anggor yang ada di bumi, lantaran tu bua-bua anggor itu so masa.” Abis itu, tu malaekat kase ayun tu de pe sabit ka atas bumi, trus dia kumpul tu bua-bua anggor. Dia kase lempar tu bua-bua itu ka tampa ja peras akang anggor, tu tampa itu tu tampa murka dari Tuhan Allah bahukum akang orang. Tu tampa peras anggor itu ada di luar kota. Kong tu bua-bua anggor itu ja peras deng cara ja injang-injang, bagitu lei deng tu orang-orang yang nyanda iko pa Tuhan, dorang itu mo dapa hukum deng brat skali sampe kaluar tu dong pe dara. Tu dara yang da bakaluar pe banya skali sama deng aer di kuala ja mengalir, kong tu dara yang bakaluar itu pe panjang tiga ratus kilometer, trus de pe dolong amper dua meter, itu sama deng mo ukur dari tana sampe pa kuda pe mulu. Kong kita lia ada satu tanda laeng yang basar deng ajaib di sorga. Tu tanda itu no tu tuju malaekat yang ada kuasa for mo beking tuju malapetaka terakhir. Kong kalu tu tuju malapetaka itu so jadi, tu Tuhan Allah pe murka pa manusia di dunia so abis. Abis itu, kita lia ada sesuatu tu sama deng laut yang bening skali rupa tu kaca yang da campur deng api, kong ada orang-orang yang da badiri di pinggir tu sesuatu yang sama deng laut itu. Dorang itu yang so se kala tu binatang buas deng tu binatang buas itu pe patong, deng lei nyanda trima tu nomor dari binatang buas itu pe nama. Dorang da pegang tu Tuhan Allah pe kecapi. Dorang da manyanyi tu Musa pe lagu, Musa ini tu orang yang ja beking tu Tuhan Allah da suru. Tu lagu itu lei Anak Domba pe lagu. Tu lagu pe bunyi bagini, “Oh Tuhan Allah Yang Mahakuasa, Tuhan yang beking hal-hal yang basar deng ajaib. Oh Tuhan, Raja dari samua suku bangsa, samua hal tu Tuhan da beking itu butul deng adil. Samua orang pasti tako pa Tuhan, deng puji deng hormat tu Tuhan pe Nama. Soalnya cuma Tuhan yang kudus. Samua suku bangsa mo datang kong berlutut for semba pa Tuhan, lantaran orang-orang so lia kalu tu hal-hal yang Tuhan da beking itu butul.” Abis itu kita lia da tabuka tu Ruang Mahasuci, tu Tuhan Allah pe tampa tinggal di sorga. Kong tu tuju malaekat yang da bawa tu tuju malapetaka itu kaluar dari tu Ruang Mahasuci. Dorang da pake baju puti bersi deng bamangkilat, kong pa dorang pe dada masing-masing ada se lingkar akang deng salempang dari mas. Trus satu dari ampa mahluk yang ada di sabla pa Tuhan Allah pe tahta kase tuju cawan dari mas pa tu tuju malaekat itu. Tu tuju cawan itu punung deng Tuhan Allah pe murka. Tuhan Allah itu no yang hidop sampe slama-lamanya. Kong tu Ruang Mahasuci jadi punung deng asap lantaran Tuhan Allah pe luar biasa deng Dia pe kuasa. Nyanda ada satu orang tu bole maso ka Ruang Mahasuci seblum tu tuju malaekat klar beking tu tuju malapetaka itu. Abis itu, kita dengar suara yang kuat dari dalam Ruang Mahasuci babilang pa tu tuju malaekat itu, “Pigi jo kong kase cura tu isi dari tuju cawan murka Allah ka bumi!” Pe dengar itu, tu malaekat yang pertama pigi kong kase cura tu cawan pe isi ka bumi, trus timbul bisul-bisul pa samua orang yang pake cap dari tu binatang deng yang da semba tu binatang pe patong. Tu bisul-bisul yang da timbul itu pe jijik skali deng beking saki skali. Abis itu, tu malaekat yang kadua kase cura tu cawan pe isi ka laut, kong tu aer laut jadi dara sama deng tu orang yang so mati pe dara, trus samua yang hidop di laut mati. Kong malaekat yang katiga se cura tu cawan pe isi ka kuala-kuala deng mata-mata aer, kong samua aer jadi dara. Abis itu kita dengar malaekat yang berkuasa pa tu aer-aer itu babilang, “Tuhan, Tuhan Yang Kudus. Tuhan yang so ada dari dulu, deng ada lei skarang. Tuhan Yang Adil lantaran Tuhan pe hukuman itu adil. Orang-orang jaha so beking tu Tuhan pe orang-orang deng nabi-nabi pe dara tacura deng cara bunung pa dorang, so itu Tuhan beking samua aer jadi dara kong tu orang-orang jaha itu cuma bole minum tu aer yang so jadi dara itu. Itu no tu hukuman dari Tuhan yang pantas for dorang mo dapa.” Kong kita dengar suara dari tampa ja kase korban persembahan babilang, “Ya Tuhan, Tuhan Allah Yang Mahakuasa. Tu hukuman yang Tuhan da kase itu samua adil deng butul!” Abis itu, malaekat kaampa kase cura tu cawan pe isi ka matahari, trus tu matahari jadi panas skali sama deng api sampe bole mo bakar pa manusia. Sinar matahari yang pe panas skali itu beking sampe tu manusia pe kuli angus kong dorang mendrita. So itu, dorang bahojat tu Tuhan Allah pe nama lantaran cuma Dia yang ada kuasa for beking tu malapetaka-malapetaka itu. Kong dorang tetap nimau mo bertobat, dorang nimau mo puji deng hormat pa Dia. Abis itu malaekat kalima kase cura tu cawan pe isi pa tu binatang buas itu pe tahta. Kage-kage jadi glap kong tu glap itu tutu pa tu orang-orang yang ja semba tu binatang itu kong dorang mendrita skali, sampe dorang gigi tu dong pe lida lantaran dorang siksa skali. Kong dorang lei hojat pa Tuhan Allah di sorga lantaran dorang pe bisul-bisul deng dong pe rasa saki itu, mar dorang tetap nimau bertobat dari dorang pe kalakuan yang malawang pa Tuhan. Abis itu, malaekat kaanam se cura tu cawan pe isi ka kuala yang basar tu de pe nama Efrat, kong tu aer di kuala itu jadi kring. Deng bagitu nanti tu raja-raja yang datang dari sabla timur bole bajalang lewat tu kuala yang so kring itu. Kong kita lia ada tiga roh jaha tu de pe model sama deng kodo. Tu tiga roh jaha itu, satu da kaluar dari naga pe mulu, tu satu da kaluar dari tu binatang buas pe mulu, kong tu satu lei da kaluar dari tu nabi palsu pe mulu. Itu no tu tiga roh jaha yang da beking tanda-tanda ajaib. Dorang pigi cari pa raja-raja di sluru dunia kong kumpul pa dorang for mo baprang malawang Tuhan Allah. Kong tu prang itu mo jadi di hari basar, tu hari waktu Tuhan Allah Yang Mahakuasa mo se kala De pe musu. Tuhan bilang, “Tarukira jo bae-bae, nyanda ada yang tau tempo apa Kita mo datang, Kita mo datang sama deng papancuri. Tu orang yang paling snang, dia itu yang slalu bajaga-jaga deng dia hidop ja beking tu bae, dia itu sama deng orang yang ja tarukira de pe baju, supaya dia nyanda malo lantaran orang lia dia da bajalang deng talanjang.” Kong tu tiga roh jaha itu se kumpul pa raja-raja di satu tampa, tu tampa itu dalam bahasa Ibrani ja bilang Harmagedon. Abis itu, tu malaekat yang katuju kase cura tu cawan pe isi ka udara, kong dapa dengar suara dari tahta di dalam Ruang Mahasuci da babilang, “Ini samua so klar.” Trus ada kilat bapancar, deng guntur babunyi baku-baku sambung. Kong ada lei tana goyang pe kuat skali tu blum perna jadi di bumi dari waktu manusia ada. Pe hebat skali tu tana goyang itu, sampe tu kota Babel yang top itu tabla jadi tiga. Kong tu kota-kota laeng dari orang-orang yang nyanda kanal pa Tuhan Allah lei jadi ancor samua. Kong Tuhan Allah nyanda lupa deng tu Babel yang top itu, Tuhan Allah mo kase pa Babel itu cawan yang punung deng Tuhan Allah pe anggor, tu anggor itu lambang dari tu Tuhan Allah pe murka. Kong samua pulau ilang deng tu gunung-gunung so nyanda ada lei. Ada ujang es yang basar skali ciri dari langit kana pa orang-orang, tu satu es pe brat kira-kira lima pulu kilogram. Kong tu orang-orang itu lei bahojat pa Tuhan Allah lantaran tu ujang es yang pe hebat itu. Abis itu datang tu satu dari tuju malaekat yang da bawa tu tuju cawan itu, kong babilang pa kita, “Mari jo kamari, kita mo kase tunjung pa ngana bagimana mo hukum pa tu parampuang nakal yang paling top itu. So dia itu no tu Babel yang top lantaran de pe orang-orang pe kalakuan yang jaha skali. Tu kota itu pe tampa ada di dekat banya aer. Tu raja-raja di bumi so beking tu hal-hal cabul deng dia. Kong tu orang-orang di bumi lei so tapengaru beking tu hal-hal yang jaha rupa itu, itu sama deng dorang so minum tu dia pe anggor sampe mabo.” Abis itu, Tuhan pe Roh kuasai pa kita kong tu malaekat bawa pa kita ka padang gurun. Di situ kita lia ada satu parampuang dudu di atas satu binatang buas yang warna mera tua, kong pa tu binatang itu pe badan punung deng kata-kata yang bahojat pa Tuhan Allah. Tu binatang itu ada tuju kapala deng spulu tanduk. Tu parampuang itu da pake baju warna pars deng mera tua. Dia da pake perhiasan mas, permata deng mutiara. Pa dia pe tangan ada cawan dari mas yang punung deng hal-hal yang jaha skali deng hal-hal yang najis dari tu de pe kalakuan yang cabul. Kong pa de pe testa da tatulis satu nama yang de pe arti masi rahasia. Tu tulisan itu pe isi bagini, “Kita tu Babel yang paling top! Kita ini tu samua parampuang nakal pe mama, kong samua tu hal-hal jaha di bumi, de pe asal dari pa kita.” Kong kita lia tu parampuang itu mabo lantaran da minum dara dari tu Tuhan pe orang-orang, deng lei da minum tu dara dari Yesus pe saksi-saksi. Waktu kita lia itu, kita jadi heran skali. Trus tu malaekat bilang pa kita, “Kiapa so ngana heran? Kita mo bilang pa ngana tu rahasia tentang tu parampuang deng tentang tu binatang yang da pikul pa dia, tu binatang yang ada tuju kapala deng spulu tanduk itu. Tu binatang buas yang ngana da lia tadi, dulu dia itu so perna da hidop, mar dia so nyanda ada lei, kong nanti dia mo muncul dari jurang maut, tu tampa ja tahang akang setang-setang, trus dia mo binasa. Kong tu orang-orang yang tinggal di bumi mo heran waktu lia tu binatang itu, lantaran tu binatang itu perna da hidop, trus dia so nyanda ada lei, mar nanti dia mo muncul ulang, kong abis itu dia mo binasa. Tu orang-orang yang da heran itu, dorang itu no yang dong pe nama nyanda da tulis di buku kehidupan. Tu buku kehidupan itu da tulis akang nama-nama dari orang-orang yang mo dapa hidop kekal, kong tu nama-nama itu da tulis di situ seblum ni dunia ini da beking. So itu torang musti pake hikmat supaya bole mangarti hal ini: tu tuju kapala dari tu binatang buas, itu tu tuju gunung tampa tu parampuang itu da dudu akang. Tu tuju kapala itu lei tu tuju raja. Lima dari tu raja-raja itu so mati, trus tu satu masi baprenta kong yang satu lei blum datang. Nanti kalu dia datang, dia mo baprenta mar cuma nyanda lama. Tu binatang buas yang so perna ada itu kong so nyanda ada lei, dia itu no satu dari tu tuju raja. Dia mo datang ulang kong jadi raja kadlapan, mar so nyanda lama lei dia mo binasa. Tu spulu tanduk yang ngana da lia itu, itu no tu spulu raja. Dorang itu blum mulai baprenta, mar dorang mo dapa kuasa baprenta sbagai raja slama satu jam sama-sama deng tu binatang buas itu. Dorang samua spakat for mo kase tu dong pe kekuatan deng kuasa pa tu binatang buas itu. Dorang mo baprang malawang Anak Domba, mar tu Anak Domba deng tu orang-orang yang da sama-sama deng Dia mo kase kala pa dorang. Soalnya tu Anak Domba itu Tuhan dari samua tuhan, Dia lei Raja dari samua raja. Kong tu orang-orang yang da sama-sama deng Dia, dorang itu yang Tuhan so pangge for iko pa Dia, yang Tuhan so pili, deng yang setia trus pa Dia.” Trus tu malaekat itu bilang lei pa kita, “Samua aer yang ngana so lia, tu tampa parampuang nakal itu da dudu akang, itu no tu samua orang deng kumpulan manusia, samua suku bangsa deng bahasa. Tu spulu raja yang ngana so lia deng lei tu binatang buas itu mo binci pa tu parampuang nakal itu. Dorang mo rampas samua tu parampuang pe kepunyaan kong kase batalanjang pa dia, trus makang de pe daging, kong bakar pa dia deng api. Soalnya Tuhan Allah so bakarja pa dorang pe hati supaya dorang beking apa tu Tuhan pe mau, so itu dorang spakat for mo kase tu dong pe kuasa for baprenta pa tu binatang buas itu, sampe samua tu Tuhan da bilang itu jadi. Tu parampuang yang ngana da lia itu, dia itu no tu Babel yang top tu da baprenta pa samua raja di bumi.” Abis itu kita lia ada satu malaekat laeng turung dari sorga. Dia ada kuasa yang basar, kong dia itu luar biasa sampe ada cahaya yang kaluar dari pa dia beking ni bumi jadi trang. Dia babilang deng suara kuat, “So ancor, so ancor tu Babel, tu kota yang paling top. Tu kota itu so jadi tampa tinggal dari tu setang-setang deng roh-roh yang jaha. Tu kota itu lei so jadi tampa basambunyi dari burung-burung najis deng lei binatang-binatang yang orang-orang binci. Tu kota itu so ancor lantaran dia so pengaruhi samua suku bangsa beking tu dia pe keinginan yang cabul, itu sama deng Babel so kase pa dorang minum anggor sampe dorang taiko-iko deng dia. Tu raja-raja di dunia so bersina deng dia. Tu orang-orang yang bajual so jadi kaya lantaran tu orang-orang Babel pe nafsu for babli barang-barang mahal basar skali.” Abis itu kita dengar suara laeng dari sorga babilang, “Hei Kita pe orang-orang, kase tinggal jo tu kota itu. Deng bagitu ngoni nyanda taiko-iko deng tu orang-orang di kota itu pe dosa-dosa, supaya tu malapetaka yang kota itu mo dapa nyanda mo kana pa ngoni. Soalnya orang-orang di kota itu pe dosa-dosa so tasusung-susung sampe ka langit, deng Tuhan Allah da inga samua dorang pe jaha. Jadi tu jaha yang orang-orang di kota itu perna da beking, itu samua musti se balas pa tu orang-orang jaha itu, kong itu musti se balas pa dorang dua kali lipa lebe jaha dari tu dorang da beking. Dorang itu musti se minum tu anggor yang dari pa dorang pe cawan sandiri, kong tu anggor itu musti dua kali lebe kras dari yang dorang perna da kase pa orang-orang. Dorang musti se rasa tu siksa yang luar biasa deng lei se rasa tu sedi skali. Kong tu siksa deng tu sedi yang dorang da rasa, itu musti sama banya deng tu dong pe hidop yang cuma puji deng hormat tu dong pe diri sandiri deng tu hidop mewa yang dorang so rasa. Soalnya dulu dorang nyanda brenti puji tu dong pe diri sandiri pa dong pe dalam hati, ‘Kita ini ratu yang ada kuasa for baprenta! Kita bukang janda, kong kita nyanda perna mo rasa tu sedi lantaran da mati akang.’ So lantaran dorang puji dong pe diri rupa itu, dorang mo dapa malapetaka-malapetaka for hukum pa dorang. Nanti cuma dalam satu hari, dorang mo dapa saki brat, mo kelaparan, mo sedi lantaran da mati akang, kong api mo bakar pa dorang. Soalnya Tuhan Allah yang da tentukan tu hukuman for dorang, Tuhan itu Tuhan Allah yang kuat.” Kong tu raja-raja di bumi yang so beking tu hal-hal yang cabul deng hidop mewa deng tu orang-orang di kota itu, dorang itu nanti mo manangis akang tu kota itu waktu dorang lia asap dari tu api yang da bakar tu kota. Dorang mo badiri jao dari tu kota itu, lantaran dorang tako kalu dorang mo rasa tu siksa yang sama deng tu kota itu da rasa, kong dorang mo babilang, “Cilaka, cilaka tu kota Babel, tu kota yang paling top, tu kota yang kuat. Soalnya cuma dalam satu jam, tu kota itu so mo dapa de pe hukuman.” Kong tu orang-orang yang bajual di bumi manangis deng berkabung lantaran tu kota itu. Soalnya so nyanda ada orang lei yang bli dorang pe barang-barang. So nyanda ada yang bli dong pe barang tu da beking dari mas, perak, permata deng mutiara. So nyanda ada lei yang bli dong pe baju yang da beking dari kaeng bagus yang mahal rupa tu: kaeng lenan, kaeng pars, kaeng sutra deng lei kaeng mera tua. Nyanda ada lei yang mo babli tu dorang pe barang-barang yang da beking dari kayu yang bobou sadap, dari kayu yang mahal, dari gading, tembaga, besi deng dari batu pualam. So nyanda ada lei yang mo bli dorang pe kayu manis, tu bahan-bahan for beking minya wangi, balsem, mur, kemenyan, anggor, minya zaitun, topong deng gandum. So nyanda ada lei yang mo bli dong pe sapi, domba, kuda deng kreta, deng lei orang for beking jadi budak. Tu orang-orang yang ja bajual itu mo babilang pa tu kota itu, “Babel, samua barang yang mahal tu beking snang tu ngana pe hati so nyanda ada lei. Samua yang mewa tu beking ngana pe hidop sadap, deng samua ngana pe harta so ilang. Ngana so nyanda perna mo dapa lei tu samua itu.” Tu orang-orang yang bajual barang-barang dari kota itu so jadi kaya. Mar nanti dorang mo badiri jao-jao dari tu kota itu lantaran dorang tako mo takana tu kota pe siksa. Dorang mo manangis deng berkabung, kong babilang, “Cilaka, cilaka jo tu kota Babel yang paling top. Dulu tu orang-orang di situ bapake baju yang da beking dari macam-macam kaeng: kaeng lenan, kaeng warna pars yang mahal deng kaeng warna mera tua. Dulu dorang lei ja pake perhiasan dari mas, permata deng mutiara. Mar cuma deng satu jam samua de pe kekayaan yang pe banya itu iko abis.” Kong tu samua nahkoda, orang-orang kapal, tu panumpang deng samua orang yang dong pe tampa mancari di laut da badiri jao-jao. Dorang lia tu asap dari api yang da bakar tu Babel itu, kong dorang babilang deng suara kuat, “Nyanda perna ada kota yang sama de pe top rupa tu kota itu!” Dorang kase ambor abu pa dorang pe kapala, tanda dorang sedi skali. Dorang manangis kong babilang deng suara kuat, “Cilaka, cilaka tu kota Babel yang top itu. Orang-orang yang ada kapal da bawa barang for se jual deng for se bli tu orang-orang Babel pe barang yang mahal, sampe dorang itu jadi kaya. Mar cuma dalam satu jam, tu kota Babel itu so ancor.” Trus ada lei yang babilang, “Hei ngoni tu ada di sorga, snang-snang jo ngoni, lantaran tu kota itu Tuhan so hukum! Snang-snang jo ngoni tu Tuhan pe orang-orang, ngoni tu rasul-rasul tu Tuhan pe utusan-utusan, deng lei ngoni tu nabi-nabi tu orang-orang yang ja kase tau Tuhan pe pesan! Soalnya Tuhan Allah so kase hukuman pa tu kota itu lantaran samua tu jaha yang orang-orang di kota itu perna da beking pa ngoni.” Abis itu ada tu satu malaekat yang kuat, kong dia angka satu batu basar skali tu de pe basar sama deng batu gilingan di tampa ja giling akang gandum. Dia angka tu batu trus lego ka laut deng babilang, “Bagini no de pe cara Tuhan Allah mo se lego ka bawa deng kuat tu kota Babel, sampe tu kota itu so nyanda mo dapa lei. Kong di kota itu so nyanda perna lei mo dapa dengar suara musik dari orang-orang yang main kecapi, suling deng trompet, trus so nyanda mo dapa dengar suara orang bamanyanyi. So nyanda ada lei mo dapa tu orang yang ahli di kota itu, kong so nyanda mo dapa dengar lei bunyi dari batu yang ja bagiling gandum di kota itu. Kong tu lampu so nyanda mo bacahaya lei di kota itu, deng dari situ so nyanda dapa dengar lei suara tu pengantin laki-laki deng tu pengantin parampuang. Soalnya dulu tu orang-orang yang ja bajual di kota itu, dorang yang paling top di bumi, kong orang-orang di kota itu pake ilmu sihir for beking sesat orang-orang dari samua suku bangsa di dunia. Tu kota itu dapa hukum bagitu lantaran tu orang-orang di situ so babunung tu nabi-nabi, tu Tuhan pe orang-orang yang laeng deng lei samua orang di bumi yang mati dorang da bunung.” Abis itu, kita dengar rupa ada suara yang pe kuat dari orang banya skali yang da bakumpul di sorga, dorang babilang, “Haleluya, puji jo pa Tuhan! Dia itu torang pe Tuhan Allah, Dia yang kase slamat, Dia itu Tuhan yang luar biasa, deng Dia yang berkuasa! Soalnya Dia ja baadili orang deng cara yang butul deng adil. Dia so kase hukuman pa tu Babel yang top lantaran de pe orang-orang pe kalakuan yang besae. Tu kota itu bole mo se sama deng tu parampuang nakal, yang da beking rusak ni dunia deng de pe kalakuan cabul. Kong Tuhan lei balas tu parampuang itu, lantaran dia yang da bunung tu orang-orang yang ja beking tu Tuhan da suru.” Kong for kadua kali dorang babilang, “Haleluya, puji jo pa Tuhan! Asap dari api yang da bakar tu kota itu nae trus sampe slama-lamanya!” Kong tu dua pulu ampa tua-tua deng ampa mahluk itu berlutut kong semba pa Tuhan Allah yang dudu di atas tahta, dorang babilang, “Haleluya, puji jo pa Tuhan Allah! Amin.” Kong kita dengar suara dari tu tahta itu babilang, “Puji jo tu torang pe Tuhan Allah, hei ngoni samua orang yang ja beking tu Dia da suru, ngoni yang tako pa Dia, ngoni tu orang yang nyanda penting deng tu orang yang penting.” Abis itu, kita dengar rupa ada suara yang pe kuat dari orang banya skali yang da bakumpul. Suara itu pe kuat sama deng bunyi aer terjun yang basar deng lei sama deng guntur pe bunyi pe kuat. Tu suara itu babilang, “Haleluya, puji jo pa Tuhan Allah! Soalnya Tuhan, tu torang pe Allah Yang Mahakuasa, so Dia yang berkuasa.” “Mari jo torang samua bersukacita deng snang skali, kong puji deng hormat pa Dia. Soalnya so sampe tu waktu for tu Anak Domba mo kaweng, kong tu Anak Domba pe pengantin parampuang lei so siap. Tuhan Allah kase isin pa tu pengantin parampuang itu mo pake kaeng lenan yang bagus deng yang puti bamangkilat.” (Tu kaeng alus yang bagus, itu no tu perbuatan-perbuatan yang butul dari tu Tuhan pe orang-orang.) Kong tu malaekat babilang pa kita, “Tulis jo bagini, ‘Tu orang-orang yang dapa undang pa Anak Domba pe pesta kaweng, dorang itu yang paling snang.’ ” Trus tu malaekat babilang lei pa kita, “Tu kita da bilang ini tu Tuhan Allah pe kata-kata, tu Dia pe kata-kata itu butul.” Kong kita berlutut di muka pa malaekat itu pe kaki for semba pa dia, mar dia bilang pa kita, “Ngana jang semba pa kita! Semba jo pa Tuhan Allah! Soalnya kita ini sama deng ngana, torang dua cuma ja beking tu Tuhan da suru, trus torang lei sama deng tu sudara-sudara yang laeng yang ja beking tu Tuhan da suru. Torang samua ini yang ja kase tau kesaksian tentang Yesus. Soalnya sapa jo yang kase tau tu kesaksian itu, dia itu butul-butul ja kase tau Tuhan Allah pe pesan.” Abis itu kita lia sorga tabuka, di situ ada satu kuda puti, trus di atas tu kuda itu ada yang da dudu, Dia pe nama ‘Yang Setia’ deng ‘Yang Butul’. Dia itu adil waktu bahakimi deng baprang. Dia pe mata babamanyala sama deng api, deng di atas pa De pe kapala ada banya mahkota. Pa Dia ada tatulis satu nama, kong tu nama itu nyanda ada yang tau, cuma Dia sandiri yang tau. Dia da pake juba tu da se colo di dara, kong Dia pe nama ja bilang ‘Firman Allah’. Samua tentara di sorga iko pa Dia. Dorang da nae kuda puti deng da pake baju puti yang da beking dari kaeng alus yang bagus tu ja bilang lenan. Dari pa Dia pe mulu kaluar satu peda tajang, kong deng Dia pe peda itu, Dia mo se kala tu suku-suku bangsa. Dia mo baprenta pa dorang pake kekuatan yang basar sama deng da pake tongkat besi. Dia mo se tunjung tu Tuhan Allah Yang Mahakuasa pe murka yang hebat pa Tuhan Allah pe musu-musu, itu sama deng orang injang-injang tu bua anggor for mo peras tu anggor. Pa Dia pe juba deng pa Dia pe pala-pala ada tatulis satu nama, ‘Raja dari samua raja, deng Tuhan dari samua tuhan.’ Kong kita lia satu malaekat badiri di atas matahari. Tu malaekat itu babilang deng suara kuat pa samua burung yang terbang tinggi di langit, “Mari jo kamari kong bakumpul for iko tu Tuhan Allah pe pesta makang yang basar! Deng bagitu ngoni bole makang samua orang pe daging, tu daging dari: raja-raja, kapala-kapala perwira, tentara-tentara, orang-orang yang ja nae kuda deng dorang pe kuda-kuda. Ngoni bole makang daging dari samua orang: dari orang yang jadi budak deng orang bebas, dari orang yang nyanda penting deng orang yang penting.” Kong kita lia tu binatang buas, tu raja-raja di dunia sama-sama deng dong pe tentara so bakumpul. Dorang mo baprang malawang Dia yang da dudu di atas tu kuda puti itu deng Dia pe tentara-tentara. Kong Dia deng Dia pe tentara-tentara tangka tu binatang buas itu sama-sama deng tu nabi palsu. Tu nabi palsu itu yang so perna da beking tanda-tanda ajaib pake tu binatang pe kuasa. Deng dia beking tu tanda-tanda ajaib itu, dia beking sesat tu orang-orang yang so trima tu binatang pe tanda deng lei pa orang-orang yang so semba tu binatang pe patong. Kong skarang, tu binatang deng tu nabi palsu itu dapa buang hidop-hidop ka dalam lautan api belerang yang basar tu da babamanyala. Kong Dia yang da dudu di atas tu kuda puti itu bunung lei tu binatang pe tentara laeng pake peda yang da kaluar dari pa Dia pe mulu. Abis itu, samua burung datang trus makang dorang pe daging sampe kanyang. Kong kita lia satu malaekat turung dari sorga. Tu malaekat itu da pegang kunci jurang maut deng rante yang basar. Dia tangka tu naga, tu ular tua itu, tu ja bilang setang pe bos ato tu ja se sesat orang. Dia ika tu naga itu for sribu taong, trus dia kase lempar tu naga itu ka dalam jurang maut tu tampa ja tahang akang setang-setang. Abis itu dia kunci tu jurang maut itu kong segel pa de pe atas, supaya tu naga so nyanda lei mo se sesat pa suku-suku bangsa slama sribu taong. Kong serta so abis tu sribu taong, tu malaekat musti mo se lapas ulang pa tu naga mar de pe waktu cuma nyanda lama. Trus kita lia ada tahta-tahta. Kong ada orang-orang yang da dudu di atas tu tahta-tahta, dorang itu no tu da dapa kuasa for mo adili pa orang. Kita lia lei ada orang-orang pe jiwa, tu jiwa-jiwa dari orang-orang yang dulu da dapa potong akang kapala lantaran ja kase tau tu kesaksian tentang Yesus deng lei Tuhan Allah pe firman. Dorang itu no yang nyanda ja semba tu binatang buas deng tu binatang itu pe patong, dorang lei nyanda perna trima cap dari tu binatang pa dorang pe testa ato tangan. Tuhan se hidop ulang pa dorang, kong dorang baprenta sbagai raja sama-sama deng Kristus slama sribu taong. Dorang itu no tu pertama yang Tuhan Allah da se hidop ulang dari antara tu orang-orang yang so mati. Selain dari dorang itu, nyanda ada yang Tuhan se hidop ulang. Nanti kalu tu sribu taong so klar, baru Tuhan mo se hidop ulang tu orang-orang laeng yang so mati. Dorang tu pertama yang Tuhan da se hidop ulang, dorang itu yang paling snang deng dorang itu orang kudus. Dorang nyanda mo rasa tu kematian kadua. Mar dorang mo jadi imam-imam yang ja layani pa Tuhan Allah deng Kristus, kong dorang lei mo baprenta sbagai raja sama-sama deng Kristus slama sribu taong. Serta tu waktu sribu taong itu so klar, malaekat kase bebas tu setang pe bos itu dari de pe bui di jurang maut. Kong tu setang pe bos itu mo pi beking sesat tu suku-suku bangsa yang ada di sluru dunia, tu suku-suku bangsa itu ja bilang deng nama Gog deng Magog. Setang pe bos mo kumpul tu orang-orang yang dia da pengaruhi itu for pi baprang. Kong dorang pe jumla itu, de pe banya sama deng paser di laut. Dorang pigi ka sluru daratan di bumi kong kepung tu kota yang Tuhan sayang, tu tampa tinggal dari tu Tuhan pe orang-orang. Mar ada api dari langit turung kong bakar se angus pa dorang. Kong tu setang pe bos yang ja beking sesat pa orang-orang dapa lempar ka lautan api belerang. Tu binatang buas deng nabi palsu so ada lei di lautan api itu, kong dorang samua dapa siksa di situ siang deng malam sampe slama-lamanya. Kong kita lia satu tahta puti yang basar deng Dia yang da dudu di atas tahta itu. Trus di muka pa Dia itu, tu langit deng bumi ilang sampe so nyanda dapa lei tu dong pe tampa. Kong kita lia orang-orang yang so mati, orang yang penting deng orang yang nyanda penting da badiri di muka tu tahta. Waktu itu tu buku-buku da tabuka, tu buku yang da tulis akang samua tu manusia perna da beking. Kong ada lei satu buku laeng yang da tabuka, tu buku kehidupan yang da tulis akang tu nama-nama dari orang yang mo trima tu hidop kekal. Trus tu orang-orang mati itu mo dapa adili iko apa tu dorang da beking yang da tatulis di buku-buku itu. Tu laut srahkan tu orang yang da mati di situ. Tu maut deng lei tu krajaan maut tu tampa orang mati srahkan lei tu orang-orang mati yang ada di tampa itu. Kong tu orang-orang mati itu masing-masing da dapa adili iko tu dorang da beking. Abis itu, tu maut deng tu krajaan maut da dapa lempar ka lautan api. Tu lautan itu no tampa hukuman tu kematian yang kadua. Tiap orang yang de pe nama nyanda ada tatulis di buku kehidupan itu, dia dapa lempar ka dalam lautan api itu. Kong kita tu Yohanes lia ada langit deng bumi yang baru lantaran tu langit deng bumi yang pertama so nyanda ada, deng laut lei so nyanda ada. Kita lia lei kota yang kudus, tu Yerusalem baru, turung dari sorga dari pa Tuhan Allah. Tu kota itu da rias sama deng tu pengantin parampuang da se barias for de pe pengantin laki-laki. Kong kita dengar suara pe kuat skali dari tu tahta itu da babilang, “Tarukira jo bae-bae, Tuhan Allah pe tampa tinggal so ada di tenga-tenga pa manusia. Dia mo tinggal sama-sama deng manusia kong dorang mo jadi Dia pe orang-orang. Dia sandiri yang mo sama-sama trus deng dorang, Dia mo jadi dorang pe Tuhan Allah. Dia mo seka samua aer mata dari dong pe mata. So nyanda ada lei yang mo mati, nyanda ada lei yang mo rasa sedi ato mo manangis, kong so nyanda ada lei yang mo saki. Soalnya samua yang lama itu so nyanda ada lei.” Dia yang dudu di atas tahta itu babilang, “Tarukira jo bae-bae, Kita beking samua hal jadi baru!” Kong Dia bilang pa kita, “Tulis jo itu samua! Soalnya samua tu kata-kata itu bole mo percaya deng samua itu butul.” Dia bilang lei pa kita, “Itu samua so jadi. Kita ini tu Alfa deng Omega, tu de pe arti Kita Yang Pertama deng Yang Terakhir. Sapa jo yang aus, Kita mo kase minum aer deng cuma-cuma pa dia, tu aer yang kase hidop kekal. Sapa yang menang dari tu kuasa jaha, dia itu mo dapa samua berkat yang Kita da bilang ini. Kong Kita mo jadi dia pe Tuhan Allah, trus dia mo jadi Kita pe anak. Mar ada orang-orang yang mo dapa hukum: tu orang yang panako, orang yang nyanda percaya, orang yang ja beking tu hal-hal yang caparuni, orang yang ja babunung orang, orang yang baseks bebas, orang yang ja pake pokos-pokos, orang yang ja basemba opo-opo, deng samua orang yang pangbadusta, dorang samua itu mo dapa lempar ka lautan api belerang yang babamanyala. Ini no tu kematian yang kadua.” Abis itu, datang satu dari tuju malaekat yang da pegang tuju cawan tu de pe isi punung deng tuju malapetaka terakhir. Tu malaekat itu babilang pa kita, “Mari jo kamari! Kita mo se tunjung pa ngana tu Anak Domba pe pengantin parampuang.” Trus Tuhan Allah pe Roh kuasai pa kita kong bawa ka gunung yang pe basar skali. Di sana tu malaekat kase tunjung tu Tuhan Allah pe kota kudus tu Yerusalem, kong tu kota itu samantara turung dari sorga dari pa Tuhan Allah. Tuhan Allah pe luar biasa yang se sinar tu kota itu. Tu sinar dari tu kota itu sama deng tu permata paling berharga pe sinar, sama deng tu permata yaspis pe sinar, kong de pe bening sama deng kristal pe bening. Tu kota itu da kliling akang deng dinding beton. Kong de pe dinding beton pe basar deng tinggi. Dia pe pintu gerbang ada dua blas, kong di masing-masing pintu gerbang itu ada satu malaekat yang bajaga. Di tiap pintu itu ada tatulis satu suku pe nama, tu satu suku dari tu dua blas suku Israel. Dari tu dua blas pintu itu, ada tiga pintu di sabla timur, tiga pintu di sabla utara, tiga pintu di sabla slatan, deng tiga pintu lei di sabla barat. Tu dinding beton yang da bakliling tu kota itu da se badiri di atas dua blas batu fondasi yang basar. Kong di tiap batu itu, masing-masing da tatulis satu nama dari tu Anak Domba pe dua blas rasul tu Dia pe utusan. Tu malaekat yang da babicara pa kita, dia ada satu tongkat yang da beking dari mas tu ja pake for baukur. Dia pake tu tongkat itu for mo ukur tu kota, tu kota pe pintu-pintu gerbang deng tu dinding beton yang da bakliling tu kota itu. Tu kota itu pe model segi ampa, kong de pe ukuran panjang deng lebar sama. Tu malaekat ukur tu kota pake tu tongkat mas itu. Tu kota pe panjang 12.000 stadia ato kira-kira 2.400 kilometer, bagitu lei deng tu kota itu pe panjang, lebar deng tinggi, masing-masing 12.000 stadia ato kira-kira 2.400 kilometer. Abis itu, dia lei ukur tu kota itu pe dinding beton pe tabal. Tu dinding itu pe tabal kira-kira 144 hasta ato kira-kira 66 meter. Tu ukuran tu malaekat da pake itu sama deng tu ukuran yang manusia biasa ja pake. Tu dinding beton itu da beking dari batu permata yaspis. Kong tu kota itu da beking dari mas murni, kong bening sama deng kaca. Tu dinding batu dari tu kota itu pe fondasi da beking dari sgala macam batu permata. Tu fondasi pertama da beking dari batu yaspis, fondasi kadua dari batu nilam, fondasi katiga dari batu mirah, fondasi kaampa dari batu zamrud, fondasi yang kalima da beking dari batu unam, fondasi kaanam dari batu sardis, fondasi katuju dari batu ratna cempaka, fondasi kadlapan dari batu beril, fondasi kasambilan dari batu krisolit, fondasi kaspulu dari batu krisopras, fondasi kaseblas dari batu lazuardi, trus tu fondasi kadua blas dari batu kecubung. Tu kota itu pe dua blas pintu gerbang da beking dari dua blas mutiara, tiap pintu da beking dari satu mutiara. Kong tu kota itu pe jalang-jalang da beking dari mas murni, yang bening sama deng kaca yang murni. Kita nyanda lia ada Ruang Mahasuci di dalam kota itu. Soalnya tu Ruang Mahasuci itu no tu Tuhan Allah, tu Tuhan Yang Mahakuasa deng lei tu Anak Domba itu. Tu kota itu nyanda perlu matahari deng bulan pe sinar for mo kase trang, lantaran Tuhan Allah pe luar biasa yang se sinar tu kota itu sampe tu kota itu jadi trang, kong tu kota pe lampu tu Anak Domba. Samua suku bangsa di bumi mo bajalang di trang itu, deng raja-raja di bumi lei mo bawa dong pe kekayaan ka dalam kota itu. Tu kota itu pe pintu-pintu gerbang nyanda perna mo tutu spanjang hari, lantaran di sana so nyanda mo ada lei malam. Kong suku-suku bangsa mo bawa samua dong pe kekayaan deng dong pe hormat ka kota itu. Mar tu hal-hal yang najis, ato tu orang yang ja beking hal-hal yang caparuni ato tu pangbatipu nyanda mo maso ka dalam kota itu. Tu orang yang bole maso ka situ, cuma tu orang yang dong pe nama da tulis di dalam buku kehidupan tu buku yang da tulis akang tu nama-nama yang mo dapa hidop kekal. Tu buku itu Anak Domba punya. Abis itu, tu malaekat kase tunjung akang pa kita tu kuala yang de pe aer kase hidop kekal. Tu aer itu pe bening skali sama deng tu kristal pe bening. Kong tu aer itu da mengalir kaluar dari Tuhan Allah deng Anak Domba itu pe tahta, trus mengalir di tenga-tenga jalang di kota itu. Di sabla-sabla dari tu kuala itu ada pohong kehidupan tu ja babua dua blas kali dalam satu taong, tiap bulan tu pohong babua satu kali. Tu pohong itu pe daong ja pake for se bae akang tu suku-suku bangsa. Kong so nyanda ada lei yang mo dapa kutuk di situ. Trus tu Tuhan Allah deng Anak Domba pe tahta mo ada di situ, kong orang-orang yang ja beking tu Tuhan da suru mo semba pa Dia. Trus dorang mo lia Tuhan pe muka, kong Tuhan pe nama mo tatulis pa dorang pe testa. Di kota itu lei so nyanda ada malam. Samua tu ada di situ so nyanda perlu cahaya dari lampu ato dari matahari lantaran Tuhan Allah sandiri tu mo jadi cahaya for mo se trang pa dorang. Dorang mo baprenta sbagai raja sampe slama-lamanya. Abis itu, tu malaekat babilang pa kita, “Samua tu kita da kase tau ini butul deng bole mo percaya akang. Tuhan Allah, Dia yang da kase tau tu Dia pe pesan pa nabi-nabi dulu lewat tu Dia pe Roh yang ada pa dorang. Kong Dia lei yang da utus tu Dia pe malaekat for kase tunjung pa orang-orang yang ja beking tu Dia da suru, supaya dorang tau apa tu musti jadi nanti.” Abis itu Yesus babilang, “Tarukira jo bae-bae, so nyanda lama lei Kita so mo datang. Kong orang yang da iko tu Tuhan pe pesan yang ada di kitab ini, dia itu yang paling snang.” Kong kita, Yohanes, kita no tu da dengar deng da lia tu samua hal itu. Kong serta kita so abis dengar deng lia samua itu, kita berlutut di muka pa malaekat pe kaki, tu malaekat yang da kase tunjung tu samua itu pa kita. Kita berlutut for semba pa dia. Mar dia bilang pa kita, “Nimbole! Ngana jang semba pa kita! Soalnya kita ini cuma ja beking tu Tuhan da suru. Kita ini sama deng ngana, sama lei deng tu ngana pe sudara-sudara yang percaya yang laeng, sama lei deng tu nabi-nabi, kong sama lei deng tu orang-orang yang ja iko samua tu ada tulis di kitab ini. Torang samua cuma ja beking tu Dia da suru. Yang ngana musti semba itu Tuhan Allah!” Kong tu malaekat bilang lei pa kita, “Tu kitab ini jang ngana segel, supaya apa tu da tulis di kitab ini tentang tu mo jadi nanti nyanda tasambunyi, lantaran so dekat de pe waktu tu samua itu mo jadi. Sapa ja beking tu jaha, biar jo dia ja beking trus tu jaha, sapa ja beking tu hal-hal caparuni, biar jo dia tetap ja beking tu hal-hal caparuni. Mar sapa ja beking tu butul, biar jo dia ja beking trus tu hal-hal yang butul, sapa yang hati bersi di muka pa Tuhan Allah, biar jo dia tetap hidop deng hati yang bersi!” Abis itu Yesus bilang, “Tarukira jo bae-bae, so nyanda lama lei Kita so mo datang kong mo kase akang upah ato kase akang hukuman pa orang-orang, iko apa tu dorang da beking. Kita ini Alfa deng Omega, yang Pertama deng yang Akhir, Kita yang ada dari waktu samua blum ada, kong mo ada trus sampe slama-lamanya.” Tu orang-orang yang cuci dong pe juba sampe bersi, dorang itu yang paling snang. Dorang mo ada hak maso ka dalam tu kota itu lewat pintu-pintu gerbang, deng dorang lei ada hak for makang tu bua dari pohong yang kase tu hidop kekal. Mar ada orang-orang yang nimbole mo maso di kota itu. Dorang itu orang-orang yang rupa ini: orang yang ja bilang anjing lantaran nyanda iko Tuhan pe mau, orang yang ja pake pokos-pokos, orang yang baseks bebas, orang yang ja babunung orang, orang yang ja basemba opo-opo, deng tu orang yang suka tu dusta kong ja badusta. Yesus bilang, “Kita ini Yesus. Kita so utus tu Kita pe malaekat for kase tau samua isi kitab ini pa ngoni, kong ngoni kase tau lei tu samua isi kitab ini pa jemaat-jemaat. Kita ini tu tunas dari Raja Daud, tu Raja Daud pe keturunan. Kita ini tu bintang yang basinar dari timur, tu bintang yang basinar trang skali.” Kong Roh Allah deng pengantin parampuang itu babilang pa Yesus, “Mari jo!” Kong sapa jo yang da dengar itu, lebe bae dia babilang lei, “Mari jo!” Trus sapa yang aus, lebe bae dia datang. Kong sapa yang suka mo minum, lebe bae dia datang ambe deng cuma-cuma tu aer yang bole kase hidop kekal. Kita kase inga pa tiap orang yang dengar tu Tuhan pe pesan di kitab ini bagini, “Kalu ada orang yang tamba akang apa-apa di kitab ini, Tuhan Allah lei nanti mo kase tamba akang pa dia tu malapetaka-malapetaka yang ada di kitab ini. Bagitu lei, kalu ada orang yang kase ilang akang apa-apa dari tu Tuhan pe pesan tentang tu mo jadi nanti yang da tulis di kitab ini, Tuhan Allah lei mo ambe tu orang itu pe bagean dari pohong yang kase hidop kekal, deng lei Dia mo ambe tu orang itu pe bagean di kota kudus, itu sama deng tu da tulis di kitab ini.” Dia yang so kase tau pa kita tentang samua hal itu babilang, “Butul, so nyanda lama lei Kita so mo datang!” So itu kita babilang, “Amin. Datang jo Tuhan Yesus!” Kita minta supaya Tuhan Yesus kase tunjung tu Dia pe bae pa ngoni samua! Amin.